བསྟན་པའི་རྩ་བ་རབ་བྱུང་དང་ཁྱིམ་པ་ལ་ཕན་གདགས་པའི་ཆོ་ག་མཐའ་དཔྱོད་དང་བཅས་པ་འཁྲུལ་སྤོང་རྣམ་རྒྱལ་གསེར་མདོག
མཆོད་བརྗོད་དང་རྩོམ་པར་དམ་བཅའ་བ།
བསྟན་པའི་རྩ་བ་རབ་བྱུང་དང་ཁྱིམ་པ་ལ་ཕན་གདགས་པའི་ཆོ་ག་མཐའ་དཔྱོད་དང་བཅས་པ་འཁྲུལ་སྤོང་རྣམ་རྒྱལ་གསེར་མདོག་ཅེས་བྱ་བ་བཞུགས་སོ། །
ངོ་མཚར་དག་ཞིང་གཞན་གྱིས་བཟུང་མཐར་ཆེས་ཆེར་གདུལ་དཀའི་འགྲོ་ལ་རྗེས་ཆགས་སྙིང་སྟོབས་མཆོག་གིས་བྱང་ཆུབ་ཆེན་པོར་ཐུགས་བསྐྱེད་དེ། །(༢ན)
སྐྱེ་འཕགས་ཕལ་གྱི་ཁོང་དུ་ཆུད་མིན་བྱ་དཀའ་རླབས་ཆེན་སྤྱོད་པ་དྭངས་མཚོར་འཁོར་ལོའི་ཡན་ལག་ཅན་བཞིན་དགའ་མགུར་འཇུག་མཛད་པས། །(༢བ)
རྫོགས་སངས་རྒྱས་དཔང་ས་ལྷས་བྱས་ཚེ་ཡིད་སྲུབས་གདོང་དམད་ཟས་གཙང་སྲས་ཁྱོད་མཚན་དཔེའི་སྣང་བརྙན་སླར་ཡང་བདག་སོགས་འགྲོ་ཀུན་ལ། །(༣ན)
དངོས་མཐོང་སྐལ་བཟང་མཆིས་ན་སྟོན་ཞེས་དུང་བའི་སྐད་གསང་ཕྱོགས་བཅུར་འབོད་པར་གླང་པོའི་སྣ་ཞགས་ལྟ་བུའི་ཕྱག་དེ་གཙུག་ཏུ་ཁྱོངས། །(༣བ)
ཆུ་འཛིན་ལང་ལོང་འཁྲིགས་ལས་དབྱར་རྔ་དལ་བུར་སྒྲོག་ཚེ་མདོང་མཐའ་སྒྲོ་གཤོག་ཟླུམ་པོར་བསྒྱུར་ནས་གར་བྱེད་ན། །ཚངས་པའི་དབྱངས་ཀྱིས་འགྲོ་མང་རྣ་བ་བདུད་རྩིར་སྤྱོད་པ་དངོས་པོའི་གཤིས་དེར་མཚར་འཛིན་བྱིས་བློ་ལྟར་ཕྲ་མོད། །འོན་ཏེ་བདུད་སྙིང་བསྲེགས་པའི་བུད་ཤིང་འདི་ཀོས་ཀུན་ལ་རྗེས་བརྩེ་བདེན་གཏམ་བསེར་བུར་བསྐུར་ཞེས་འཁྱོགས་འཕྱང་བར། །སེམས་ཅན་བསམ་པའི་ཁྱད་པར་མཐའ་ཀླས་སྣ་ཚོགས་འཇུག་སྒོ་དབྱེ་བའི་གསུང་གིས་བདག་བློའི་ཐེ་ཚོམ་དྲ་བ་ཆོད། །ཉེ་རིང་མེད་པར་ལུས་ཅན་ཡོངས་ཀྱི་སྙིང་ལ་ཉེར་སིམ་ཐུགས་རྗེའི་དྲི་བསུང་དངར་པོའི་ངད། །མི་ཕྱེད་དད་པའི་རླུང་གིས་དྲངས་ཚེ་སྲིད་ཞིའི་ཚ་གདུང་རབ་བཅིལ་སྨན་གྱི་མཆོག །སྔོན་མེད་ཙནྡན་རྐང་འཐུང་གཅིག་པུ་ཇི་ལྟ་ཇི་སྙེད་མངོན་སུམ་གཟིགས་པའི་ཡེ་ཤེས་ཆེ། །གསེར་འགྱུར་རྩི་ཡིས་སྐྱེ་རྒུའི་ཡིད་ཀྱི་ལྕགས་ཁམས་བསྒྱུར་ནས་རྒྱུད་ལྔའི་འགྲོ་འདྲེན་ནུས་བྱིན་རློབས། །སྔོན་དང་ད་ལྟའི་ཆོ་གའི་སྒོ་ནས་ངུར་སྨྲིག་གོས་ཀྱིས་ཀུན་གསལ་མདོག །མཚམས་སྤྲིན་གཞོན་ནུའི་མདངས་སུ་སྤེལ་མཛད་སྐྱེ་འཕགས་དགེ་འདུན་མུ་ཐི་ལའི། །ཆད་མེད་འཕྲེང་མཛེས་སྐྱེ་རྒུའི་བསོད་ནམས་ཐོད་དུ་བཅིངས་པར་དགའ་བའི་གར། །བལྟ་བར་ལྷ་རྣམས་ཡང་ཡང་རྒྱུ་བས་གོ་ལའི་སྒང་གཤོངས་བྱུང་ངམ་སྙམ། །གསོལ་བཞིའི་ཆོ་གས་སྤོང་བདུན་ཚུལ་ཁྲིམས་ཡིད་བཞིན་ནོར། །ཉེས་ཚོགས་དྲི་བཀྲུས་བསྟན་པའི་རྒྱལ་མཚན་རྩེར་བཀོད་པས། །མངོན་མཐོ་ངེས་ལེགས་འདོད་དགུའི་ཆར་འབེབས་སྒྲ་གཅན་འཛིན། །ཟུང་སོགས་རིམ་བྱོན་བཀའ་དྲིན་ཕུང་པོ་(༤ན)
གང་གིས་གཞལ། །གངས་ལྗོངས་མོང་རྟུལ་སྨག་རུམ་སོ་ཐར་ཉིས། །ཕན་བདེའི་འོད་དཀར་སྣང་ཁྱབ་སྡོམ་བརྩོན་ཆེ། །ཤཱནྟ་རཀྵི་ཏ་ཡི་སྙན་གྲགས་རྔ། །ཚངས་རིས་ཡུལ་སའི་བར་དུ་བརྡུངས་མིན་ནམ། །དེ་ལྟ་ནའང་ཕྱོགས་འདིའི་འགྲོའི། །ལས་ནག་སྨིན་པའི་དུག་རླངས་ཀྱིས། །འདུལ་གཞུང་སྲོག་རྩ་ཆད་ཉེ་བ། །གསོ་བའི་བདུད་རྩི་མདོ་རྨད་བྱུང་། །ཚུལ་དེར་རང་གར་སྤྱོད་པ་གཟུ་ལུམ་གྱིས། །རྣམ་དག་བསྟན་ལ་བགྲང་བྱར་འོས་མི་འོས། །མིག་མངས་རྡེའུའི་རྩེ་འཇོར་གངས་ལྗོངས་ཀྱི། །མང་དག་མགོ་འཁོར་ཚེ་འདིའི་ཉི་རིང་འཕུལ། །ཤཱཀ་སེང་འཕྲིན་ལས་སེམས་ཅན་ཁམས་ལ་འཇུག་པའི་རྒྱུན་པོ་ཆེ། །མི་འཆད་ཤཱ་རིའི་བུའི་མཆེད་ཀསྨི་ར་པའི་བསོད་སྙོམས་པ། །པཎ་ཆེན་ཤཱཀྱ་ཤྲཱིའི་སྡོམ་རྒྱུན་ཉལ་འགྲོས་མངོན་གྱུར་ཉོན་མོངས་ཞུགས། །དབལ་བཅིལ་བག་ཡོད་ལྷུང་ལྷུང་སྒྲ་སྙན་འཕགས་བོད་ཀུན་ཁྱབ་མཚར། །རླངས་སྤྱོད་ན་བུན་ར་རི་དང་བྲལ་བརྟན་མཁས་གཉིས་ལྡན་གངས་ཅན་ལས། །ཉེས་མེད་ཕུན་ཚོགས་སྡོམ་གསུམ་གངྒཱ་བོད་ཡུལ་བསྟན་པའི་ཆུ་གཏེར་ཆེར། །འབེབས་མཁས་རྡོར་བྱང་ས་ལོ་རྗེས་འབྲངས་བློ་གསལ་སྐལ་ལྡན་ཤིང་རྟ་ཆེའི། །རྣམ་པར་ཐར་ལ་གཟུར་གནས་མཐའ་དག་དད་དུང་བ་སྤུ་གྱེན་དུ་ལངས། །སྟོད་སྨད་ཁ་ཆེར་བཅས་པའི་འདུལ་ཁྲིམས་ནོར་འཛིན་བུ་མོའི་མངལ་དུ་སྦྲུམས་པ་ཡི། །ལྕིད་ཀྱིས་གནས་བརྟན་རྔུལ་ཆུ་སྟར་བརྒྱུས་ཡལ་བོར་ཕྲ་ཞིབ་བསླབ་བྱའི་གནད་རྣམས་ཀུན། །གཏན་ལ་ཕབ་སྟེ་ཛཱ་ཏིའི་མེ་ཏོག་བཀྲ་ནས་ཤར་ཕྱོགས་རྒྱལ་པོའི་ཁབ་ཀྱི་བར། །མཚམས་སྤྲིན་གོས་(༤བ)
ཀྱིས་ཁྱབ་མཛད་བློ་བཟང་གྲགས་པ་ཉི་མའི་གཉེན་དེ་སླར་བྱོན་ཏམ། །ཤིང་རྟའི་སྲོལ་འཛིན་རྒྱལ་བའི་རྒྱལ་ཚབ་དར་མ་རིན་ཅེན་སོགས། །རྣམ་དཔྱོད་རྫིངས་ཀྱིས་སྡེ་སྣོད་ཆུ་གཏེར་ཕ་མཐའ་རབ་བརྒལ་བའི། །མཁས་བཙུན་དེད་དཔོན་གསེར་སྦྱངས་ཐོད་བཅིངས་བརྟག་ཐབས་དཔྱད་ཡངས་པས། །བཞེད་སྲོལ་འཁྲུལ་མེད་ནོར་བུའི་ཚོང་ཟོང་འདྲེན་རྣམས་ཕྱག་གི་ཡུལ། །འདུལ་མངོན་དཀའ་བའི་གནས་ཀུན་ཡོངས་འགྲོལ་རྒྱུད་མང་གླུ། །ཡང་ཡང་རྣ་བར་རབ་འཁྲོལ་ལེགས་བཤད་གཏམ་སྙན་པོས། །ཡིད་དབང་ཀུན་དགར་སྤྱོད་མཛད་འཇམ་དབྱངས་མི་ཡི་གཟུགས། །དཀོན་ཅོག་ཆོས་འཕེལ་བཀའ་དྲིན་དྲན་ཚེ་ལག་པད་ཟུམ། །གཟོད་མ་ཉིད་ནས་སྒོ་གསུམ་བག་ཡོད་ལྕགས་ཀྱུས་སྣར་བཏབ་ཆུ་ལྷའི་བུས། །འཆལ་བའི་དུག་གི་དྲི་མ་ཀུན་སྦྱངས་ཚུལ་གནས་ཡན་ལག་བརྒྱད་ལྡན་དུ། །བསྒྱུར་པས་ཕྲ་རྒྱས་ནད་བརྒྱ་དྲུང་འབྱིན་སྦྱོར་འཛིན་འབོགས་ལ་ཉེར་མཁས་པ། །རིན་ཅེན་བསོད་ནམས་མཆོག་ཏུ་གྲུབ་ཁྱོད་གངས་ཅན་ལྗོངས་འདིར་ཉེ་བར་འཁོར། །གང་གི་ཞབས་སེན་འོད་དམར་རྡུལ་ཚོགས་གཙུག་ལྷུང་བའི། །མོད་ལ་སྲིད་འབྱོར་ཨེ་རཎྜ་ཡི་སྙིང་པོ་བཞིན། །ངེས་པར་འབྱུང་བས་བསྟན་ལ་རབ་ཞུགས་ཡོངས་རྫོགས་དྲིན། །བྱང་ཆུབ་མཆོག་གི་བར་དུ་གཞལ་དཀའ་ཡིད་དབང་འཁྱོགས། །རྣམ་དག་ཆོ་གའི་ས་བོན་མེས་ཚིག་པའི། །ལང་ལོང་སྙེ་མའི་ཕུང་པོ་གཟུགས་བརྙན་ཙམ། །ཚིགས་གསུམ་ནོས་ཀྱང་བསྲུང་སྡོམ་རགས་པ་ཡི། །ལྟུང་བའི་ཁུར་དེ་ཡང་སྲིད་ཕྱི་མར་ལྕི། །མཁས་སྙན་གྲགས་འདོད་མ་ཡིན་པར། །དོན་ཀུན་གྲུབ་བསྟན་བསྐལ་བའི་(༥ན)
བར། །གནས་སྨོན་ལས་ཆོག་འཁྲུལ་སྤོང་གི །རྣམ་རྒྱལ་གསེར་གྱི་མདོག་ཅན་སྤེལ། །ཞེས་མཁས་དབང་དཎྜིའི་གཙུག་ལག་གི་རྗེས་སུ་འབྲངས་ཏེ་ཉམས་དང་འགྱུར་བ་སྟོང་གི་སྒོ་ནས་བརྗོད་པ་རྣམ་པར་དག་པའི་ཚིགས་སུ་བཅད་པ་སྤོབས་པའི་མགྲིན་པ་མཐོན་པོར་བཏེག་པ་སྔོན་དུ་འགྲོ་བས་སྐབས་སུ་གླེང་བར་བྱ་བ་ནི། འོ་སྐོལ་གྱི་རྣམ་འདྲེན་ཟས་གཙང་གི་སྲས་པོ་དོན་ཀུན་གྲུབ་པ་ནི་དྲིན་ལན་བསབས་པའི་མདོ་ལས། སྟོན་པ་འདི་སྔོན་བསྐལ་པ་དཔག་ཏུ་མེད་པའི་སྔོན་རོལ་ནས་ཤེས་རབ་དང་སྙིང་རྗེའི་སྟོབས་ཀྱིས་དགེ་བའི་རྩ་བ་རྒྱ་ཆེན་པོ་བསགས་པ་ཡིན་ཀྱང་བར་སྐབས་སུ་ལས་ཀྱི་དབང་གིས་དམྱལ་བའི་ཤིང་རྟ་འདྲེན་པའི་གྱད་ཅིག་ཏུ་གྱུར་པའི་ཚེ། རང་གི་སྡུག་བསྔལ་ལ་དཔགས་ཏེ་གྲོགས་ལ་ཚད་མེད་པའི་སྙིང་རྗེ་སྐྱེས་ནས་གཤིན་རྗེའི་སྐྱེས་བུ་ཨ་ཝ་གླང་མགོ་དང་སྡིག་པ་སྦྲུལ་མགོ་ལ། འདིའི་ཁུར་ཀྱང་བདག་གིས་འཁུར་བར་ཅི་གནང་ཞེས་ཞུས་པས། དེ་དག་ཁྲོས་ཏེ་སེམས་ཅན་རང་རང་གི་ལས་ཀྱི་བགོ་སྐལ་ལ་སྤྱོད་པ་ལ་ཁྱོད་ཀྱིས་ཅི་བྱར་ཡོད་ཅེས་ཟེར་ནས་ལྕགས་ཀྱི་ཐོ་ལུམ་མགོ་ལ་བསྣུན་པས་ཚེའི་དུས་བྱས་ལྷའི་ནང་དུ་སྐྱེས་ཏེ་ལོ་མང་པོར་བདེ་བ་ཉམས་སུ་མྱོང་བར་བྱས། སྙིང་རྗེ་འཕེལ་བའི་བདག་རྐྱེན་དགེ་བའི་བཤེས་གཉེན་ལ་རག་ལས་པས་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ་ཤཱཀྱ་ཐུབ་པ་ཆེན་པོ་ལ། གདུགས། མཆིལ་ལྷམ་ཟུང་། རྫའི་བུམ་པ་བྱི་དོར་བྱས་པ་གསུམ་ཕུལ། མགྲོན་བུ་ལྔ་མེ་ཏོག་གི་ཚུལ་དུ་གཏོར་ནས། དེ་བཞིན་གཤེགས་པ་ཁྱེད་སྐུ་ཅི་འདྲ་སོགས་ཀྱིས་ཐུགས་བསྐྱེད། ཚོགས་ནི་མཛོད་(༥བ)
ལས། རྣམ་གཟིགས་མར་མེ་རིན་ཅེན་གཙུག །གྲངས་མེད་གསུམ་གྱི་ཐ་མར་བྱུང་། །དང་པོ་ཤཱཀྱ་ཐུབ་པ་ཡིན། ཞེས་རྒྱལ་པོ་རྣམ་པར་རྒྱལ་བའི་ཕོ་བྲང་རྣམ་པར་རྒྱལ་བའི་རྒྱལ་མཚན་ཅན་དུ་རྒྱལ་པོའི་སྲས་གཞོན་ནུ་བརྩོན་འགྲུས་སྤྱོད་དུ་འཁྲུངས་པའི་ཚེ། །དེ་བཞིན་གཤེགས་པ་ཕུང་པོ་ཆེན་པོ་སོགས་སངས་རྒྱས་སློབ་མར་བཅས་པ་ལ་བསྙེན་བཀུར་ནས་སྨོན་ལམ་བཏབ་པ་ནས་རིན་ཅེན་གཙུག་ཏོར་ཅན་གྱི་བར་བདུན་ཁྲི་ལྔ་སྟོང་ལ་གྲངས་མེད་དང་པོའི་ཚོགས་བསགས། དེ་རྗེས་ཚོང་དཔོན་ཤེས་རབ་བཟང་པོར་གྱུར་པའི་ཚེ། རྒྱལ་པོ་མཛེས་པར་སྣང་བའི་ཕོ་བྲང་འཛམ་བུའི་གསེར་དུ་སངས་རྒྱས་དཀོན་མཆོག་ཡན་ལག་བྱོན་པ་ནས་མར་མེ་མཛད་ཀྱི་བར་བདུན་ཁྲི་དྲུག་སྟོང་ལ་གྲངས་མེད་གཉིས་པའི་ཚོགས་བསགས། སྟོན་པ་འདི་གཞོན་ནུ་ཆོས་ཀྱི་སྤྲིན་དུ་གྱུར་པའི་ཚེ་རྒྱལ་པོ་དགྲ་ཐུབ་ཀྱི་ཕོ་བྲང་གྲོང་ཁྱེར་པདྨོ་ཅན་དུ་སངས་རྒྱས་མར་མེ་མཛད་ནས་རྣམ་གཟིགས་ལ་ཐུག་གི་བར་བདུན་ཁྲི་བདུན་སྟོང་ལ་གྲངས་མེད་གསུམ་པའི་ཚོགས་བསགས་པའི་མཐར་སངས་རྒྱས་དབང་པོའི་ཏོག་ཏུ་སངས་རྒྱས། དེས་བྲམ་ཟེའི་ཁྱེའུ་བླ་མར་སྤྲུལ་ནས་སངས་རྒྱས་འོད་སྲུངས་ལ་བསྙེན་བཀུར་ཞིང་དགའ་ལྡན་དུ་དམ་པ་ཏོག་དཀར་པོར་གྱུར་ནས་ཆོས་བསྟན། བརྒྱད་སྟོང་འགྲེལ་ཆེན་སོགས་སུ་གྲངས་མེད་སུམ་ཅུ་རྩ་གསུམ་གྱི་རྣམ་གཞག་བཤད་ཅིང་། གྲངས་མེད་དང་པོར་ས་དང་པོ་མན། །གཉིས་པར་རིང་དུ་སོང་བ་མན། གསུམ་པར་དག་པ་ས་གསུམ་ཞེས་གྲགས་ཀྱང་ཐེག་དམན་གྱི་སྐབས་སུ་གྲངས་མེད་གསུམ་ག་ཚོགས་ལམ་(༦ན)
གྱི་གནས་སྐབས་སུ་རྫོགས་པར་འདོད། འཛམ་བུའི་གླིང་འདིར་མཛད་པ་བཅུ་གཉིས་ཀྱི་ཚུལ་བསྟན་པའི་ནང་ཚན། ལུང་གཞི་ལས། བྱང་ཆུབ་སེམས་དཔའ་ལོ་ཉི་ཤུ་རྩ་དགུ་བཞེས་ནས་ལོ་དྲུག་དཀའ་བ་སྤྱོད་པར་འགྱུར་ཏེ། དེ་ནས་བདུད་རྩི་རྟོགས་པར་མཐོང་ངོ་། །ཞེས་དབུས་འགྱུར་འཆང་རྡོ་རྗེའི་གདན་གྱི་སྤོར། །ཟོར་བའི་གདན་ལ་སྐྱིལ་མོ་ཀྲུང་གཅིག་གིས་ཆུ་སྲིན་རྒྱལ་མཚན་ཅན་གྱི་གཡུལ་ལས་རྣམ་པར་རྒྱལ་ཏེ། མངོན་པར་རྫོགས་པར་སངས་རྒྱས་ནས་ཆུ་སྟོད་ཟླ་བའི་ཚེས་བཞིར་ཡུལ་ཝ་རཱ་ཎཱ་སིར་སངས་རྒྱས་སྟོང་གི་ཁྲི་ཡོད་པར་བཞི་པའི་སྟེང་དུ་བཞུགས་ནས་ལྔ་སྡེ་ལ་སོགས་མཐའ་ཡས་པའི་གདུལ་བྱར་ཆོས་ཀྱི་འཁོར་ལོ་བསྐོར་བའི་ནང་ནས་སློབ་དཔོན་ཆོས་ཀྱི་ཚོང་དཔོན་གྱིས། ཇི་ལྟར་འདི་ནི་ཤིང་རྩ་གཙོ་བོ་སྟེ། །རྣམ་པར་འཕེལ་དང་ཀུན་འཛིན་གཉིས་ཀྱི་གཞི། །དེ་བཞིན་དམ་ཆོས་ཚོགས་རྣམས་ཀུན་གྱི་ཡང་། །རྒྱུ་དང་རྩ་བ་འདུལ་བ་ཡིན་པར་གསུངས། ཞེས་དང་། རྒྱལ་བ་སྟོན་པ་དེ་ཡི་དམ་ཆོས་དག །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་གྱུར་ཕྱག་བྱས་སངས་རྒྱས་ཁྱོད་གཅིག་བཞིན། །ཞེས་མངོན་པ་དང་མདོ་སྡེའི་སྡེ་སྣོད་ཀྱིས་བསྟན་པའི་གོ་ཆོད་ཀྱང་སྟོན་པའི་གོ་མི་ཆོད། འདུལ་བའི་སྡེ་སྣོད་ཀྱིས་གཉིས་ཀའི་གོ་ཆོད་པའི་ཕྱིར་ལེགས་པར་གསུངས་པ་དམ་པའི་ཆོས་ལུང་སྡེ་བཞི་བཀའ་སྩལ་བའི་བརྗོད་དོན་འདུལ་བའི་རྣམ་བཤད་སྤྱིར་བསྟན་པ།
འདུལ་བའི་རྣམ་བཤད་སྤྱིར་བསྟན་པ།
སྟག་ཚང་ལོ་ཙཱ་བ་ཤེས་རབ་རིན་ཅེན་གྱི་འདུལ་ཊཱིཀ་འདུལ་བའི་སྙིང་པོ་རབ་ཏུ་གསལ་བའི་གཞི་སྨད་ཀྱི་རྣམ་བཤད་ལས། དབྱེ་(༦བ)
བ། བསྡུ་བ། མཚན་ཉིད། གོ་རིམ། གྲངས་ངེས། སྒྲ་དོན་དང་དྲུག་གོ །དང་པོ་ནི། ལུང་ལས། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ལྤགས་དང་། །སྨན་དང་གོས་དང་སྲ་བརྐྱང་དང་། །ཀོ་ཤམྦི་དང་ལས་ཀྱི་གཞི། །དམར་སེར་ཅན་དང་གང་ཟག་དང་། །སྤོ་དང་གསོ་སྦྱོང་བཞག་པ་དང་། །གནས་མལ་དང་ནི་རྩོད་པ་དང་། །དགེ་འདུན་དབྱེན་རྣམས་བསྡུས་པ་ཡིན། ཞེས་པ་ལྟར་བཅུ་བདུན་ནོ། །བསྡུ་ན། རབ་བྱུང་གི་གཞིའི་སུམ་ཆ་དང་། ལས་དང་གནས་མལ་གྱི་ཆོས་མ་ཐོབ་པ་ཐོབ་པར་བྱེད་པ་དང་། །ཕྱིར་འཆོས་ཀྱི་གཞི་བདུན་དང་། །ལས་ཀྱི་ཆོས་ཉམས་ན་ཕྱིར་འཆོས་པ་དང་། ལྷག་མ་རྣམས་ཀྱིས་ཐོབ་པ་མི་ཉམས་པར་བསྲུང་བ་སྟེ་གསུམ་དུའང་འདུ་ལ། བསླབ་པ་ཡོངས་སུ་སྦྱོང་བའི་དང་། བདེ་བར་གནས་པའི་རྐྱེན་གྱི་དང་། ཐམས་ཅད་འགྲུབ་པའི་དང་། ཕྱིར་བཅོས་པའི་དང་། ཐམས་ཅད་ཀྱི་རྟེན་བྱེད་པའི་གཞི་སྟེ་ལྔར་བསྡུའོ། །གསུམ་པ་ནི། འཇུག་ལྡོག་གཉིས་ཀྱི་ནང་ནས་དང་པོ་གཙོ་བོར་གྱུར་པའི་ཚུལ་ཁྲིམས་ནི་བརྗོད་བྱའི་དང་། དེ་སྟོན་བྱེད་ནི་རྗོད་བྱེད་ཀྱི་གཞིའི་མཚན་ཉིད་དོ། །བཞི་པ་ནི། མ་ཐོབ་པ་ཐོབ་པར་བྱེད་པ་དང་། ཐོབ་པ་མི་ཉམས་པར་བསྲུང་བ་དང་། ཉམས་ན་ཕྱིར་འཆོས་པ་རྣམས་རབ་བྱུང་གི་གཞི་དང་། བར་སྐབས་ན་ཤས་ཆེ་བའི་གཞི་བརྒྱད་དང་། །ཐ་མར་ཤས་ཆེ་བའི་བདུན་རྣམས་ཀྱིས་སྟོན་པས་ཕལ་ཆེར་རྒྱུ་འབྲས་ཀྱི་གོ་རིམ་མོ། །གཉིས་པ་ལ་མི་ཉམས་པར་བསྲུང་བ་ལ། གསོ་སྦྱོང་དང་པོར་བསྟན་པ་ནི་སྤྱིར་བསྲུང་ཐབས་ལྔའི་གང་ཟག་གཞན་ལ་བརྟེན་པ་དང་། རང་གི་བསམ་པའི་(༧ན)
སྟོབས་བསྐྱེད་པ་དང་མི་མཐུན་ཕྱོགས་ངོ་ཤེས་པས་བསྲུང་བ་གསུམ། རབ་བྱུང་བཞི་དང་རྣམ་འབྱེད་ཀྱིས་བསྟན་ཟིན་པས། ད་ནི་བསླབ་པ་ཡོངས་སུ་སྦྱོང་བའི་དང་། བདེ་བར་གནས་པའི་རྐྱེན་བསྟེན་པའི་སྒོ་ནས་བསྲུང་བ་གཉིས་ཡིན་ལ། དེ་གཉིས་ཀྱི་ནང་ནས་དང་པོ་གཙོ་བོ་ཡིན་ཅིང་། དེ་ལ་ཡང་རང་སྟོབས་ཀྱིས་བསླབ་པ་སྦྱོང་བ་གཙོ་བོ་ཡིན་པའི་ཕྱིར་རོ། །དེའི་འོག་ཏུ་གཞན་སྟོབས་ཀྱིས་སྦྱོང་བ་དབྱར་དང་དགག་དབྱེས་བྱེད་ལ། དེ་ཡང་ལུང་ལས་དགག་དབྱེ་སྔོན་ལ་གསུངས་ཀྱང་བསྟན་བཅོས་ལས་དབྱར་དགག་དབྱེའི་རྒྱུ་ཡིན་པ་ལ་དགོངས་ནས་དབྱར་དང་པོར་བཤད་དོ། །རྐྱེན་གཉིས་པ་ལ་ཡང་ལུང་ལས་སྨན་དང་པོར་གསུངས་ཀྱང་དེ་བདེར་གནས་རྐྱེན་གྱི་གཙོ་བོ་ཡིན་པས་འདིར་འོག་ཏུ་བསྟན་ལ། གོས་གཞི་གསུམ་ལ་ཡང་ལུང་ལས་ཀོ་ལྤགས་དང་པོར་བསྟན་ཀྱང་། སྲ་བརྐྱང་ནི་རྒྱུ་དགག་དབྱེ་དང་འབྲེལ་ཞིང་གོས་འབྱུང་བའི་རྒྱུ་ཡིན་པས་དང་། དེ་ལས་གོས་དངོས་འབྱུང་བས་དང་། དེའི་དམིགས་བསལ་ཡིན་པས་འདིར་རིམ་པ་བཞིན་ནོ། །ལས་ཀྱི་གཞི་ནི་མ་ཐོབ་པ་ཐོབ་པར་བྱེད་པ་སོགས་གསུམ་ག་ལ་དགོས་པས་ཀུན་གྱི་དབུས་སུའོ། །ཕྱིར་བཅོས་ལ་ལྟུང་བ་ཕྱིར་བཅོས་གཙོ་བོ་དང་། རྩོད་པ་ཕྱིར་བཅོས་ཆ་ལག་ཡིན་པས་ལྟུང་བ་ཕྱིར་བཅོས་ཀྱི་གཞི་བཞི་དང་པོར་དང་རྩོད་པ་ཕྱིར་བཅོས་ཀྱི་གཞི་གསུམ་འོག་ཏུ་བསྟན་ནོ། །དང་པོ་ལ་ཡང་རང་སྟོབས་དང་གཞན་སྟོབས་ཀྱི་ཕྱིར་འཆོས་པ་གཉིས་མཆོག་དམན་ཡོད་པས། དང་པོ་ལ་གསུམ། དང་པོ་དང་གཉིས་པ་ཡོངས་སུ་སྦྱང་བའི་གཞི་འོག་ཏུ་བསྟན། (༧བ)
དང་པོ་གསུམ་ཡང་ལུས་ལྟ་བུ་ཡིན་པས་དང་། དེ་ལ་འཆབ་པ་དང་མི་ལྡན་པ་དགོས་ཤིང་འཆབ་པ་གང་ལ་འབྱུང་བ་ཤེས་པའི་ཐབས་ཡིན་པས་དང་། འཆབ་ཉེས་དེ་འདག་བྱེད་ཡིན་པས་རིམ་པ་ལྟར་རོ། །རྩོད་པ་ཕྱིར་བཅོས་ལ་བྱ་བའི་རང་བཞིན་དང་། དགེ་སྦྱོང་གི་ཚུལ་དང་། ལྟུང་བའི་རང་བཞིན་རྣམས་རྩོད་པ་གསུམ་ཡིན་ལ། དེ་ཡང་ལུང་ལས། ལས་བྱེ་བའི་གཞི་མཇུག་ཏུ་བཤད་ཀྱང་། འདིར་ལྟུང་བ་ཕྱིར་བཅོས་ཀྱི་གླེང་དྲན་བྱས་པ་ན་ལས་དང་སྤྱོད་པ་ཐ་དད་དུ་འགྱུར་བས་དེ་བསྡུམ་པ་ལ་དང་། དེ་ལ་བརྟེན་ནས་ལྟ་བ་ཐ་དད་དུ་འགྱུར་བས་དེ་བསྡུམ་པ་ལ་དང་། དེ་ལ་བརྟེན་ནས་ཁ་ན་མ་ཐོ་བ་དང་བཅས་པར་གྱུར་ན་དེ་བསྡུམ་པ་ལ་ལས་བྱ་བའི་གཞི་ལ་སོགས་པ་གསུམ་རིམ་པ་ལྟར་རིགས་པས་གོ་རིམ་དེ་ལྟར་བཤད་དོ། །གནས་མལ་གྱི་གཞི་ནི་ལུང་ལས་རྩོད་པའི་གོང་དུ་གསུངས་ཀྱང་ཐམས་ཅད་ཀྱི་རྟེན་ལྟ་བུ་ཡིན་པས་འདིར་མཇུག་ཏུ་བཤད་དོ། །གྲངས་ངེས་པ་ནི། གང་ཟག་གཅིག་གིས་མངོན་མཐོ་དང་ངེས་ལེགས་ཀྱི་བདེ་བ་ཐོབ་པར་བྱེད་པ་ལ་དང་པོར་བསྟན་པ་ལ་མ་ཞུགས་པ་འཇུག་ཞུགས་ནས་བསླབ་པ་བསྲུང་ཉམས་ན་ཕྱིར་འཆོས་པ་རྣམས་དགོས་པས་གཞི་བཅུ་བདུན་ལས་ཉུངས་ན་མི་འདུས་ཤིང་། དེ་ཙམ་གྱིས་དགོས་པ་དེ་ཕུན་སུམ་ཚོགས་པར་འགྱུར་བས་མང་མི་དགོས་པ་ཡིན་ནོ། །སྒྲ་དོན་ནི། ལྷག་པ་ཚུལ་ཁྲིམས་ཀྱི་བསླབ་པ་ཕུན་སུམ་ཚོགས་པ་ཉིད་དུ་སྒྲུབ་པའི་རྟེན་ནམ་གཞིར་གྱུར་པས་གཞི་ཞེས་བྱའོ། །ཞེས་གསུངས་པའི་དོན་གྱི་གནས་ལ་འཁྲུགས་སྡེབས་དང་གོ་རིམ་ལེགས་པར་(༨ན)
གསུངས། འདི་ཉིད་སྙིང་པོར་བཟུང་སྟེ་བཤད་པ་ལ། སྡོམ་པ་མ་ཐོབ་པ་ཐོབ་པར་བྱེད་པ། ཐོབ་པ་མི་ཉམས་པ་བསྲུང་བར་བྱེད་པ། ཉམས་ལེན་ཕྱིར་བཅོས་པའི་ཐབས་དང་གསུམ་དུ་བསྡུས་པའི་སྡོམ་པ་ཐོབ་པར་བྱེད་པའི་ཐབས་ལ། ཇི་ལྟར་བྱུང་ཚུལ། དེ་དག་གི་དོགས་གནས་ལ་མཐའ་དཔྱད་པ། ཆོ་གའི་ལག་ལེན་དངོས། ཞར་བྱུང་ཁྱིམ་པ་ལ་ཕན་གདགས་པའི་ཆོ་ག་དང་བཞི།དང་པོ་ནི། ལུང་མ་མོ་ལས། བསྙེན་པར་རྫོགས་པར་འོས་པ་རྣམ་པ་བཅུའོ། །དེ་བཞིན་གཤེགས་པ་རང་བྱུང་དང་། རང་སངས་རྒྱས་སློབ་དཔོན་མེད་པར་བསྙེན་པར་རྫོགས་པ་དང་། ལྔ་པོ་རྣམས་ཡེ་ཤེས་ཁོང་དུ་ཆུད་པས་དང་། ཚེ་དང་ལྡན་པ་འོད་སྲུངས་ཆེན་པོ་སྟོན་པར་ཁས་བླངས་པས་དང་། ཚེ་དང་ལྡན་པ་འཆར་ལྡན་དྲིས་ནས་ལུང་བསྟན་པས་དང་། དགེ་སློང་ཚུར་ཤོག་ཅེས་གསུངས་པས་དང་། སྐྱབས་སུ་འགྲོ་བའི་ཚིག་གསུམ་གྱིས་དང་། ཡུལ་མཐའ་འཁོབ་ཏུ་འདུལ་བ་འཛིན་པ་དང་ལྔའི་དགེ་འདུན་ལས་དང་། ཡུལ་དབུས་སུ་བཅུ་འདུས་པའམ་དེ་བས་ལྷག་པ་ལས་དང་། བླ་མའི་ཆོས་ཁས་བླངས་པས་དང་། ཕོ་ཉས་དང་། དགེ་འདུན་སྡེ་གཉིས་ལས་བསྙེན་པར་རྫོགས་པའོ། །ཞེས་པའི་ཡུལ་དབུས་དང་མཐའ་འཁོབ་ཏུ་དགེ་འདུན་གྲངས་བསྟན་པ་གཉིས་དང་། མཆོད་སྦྱིན་མས། ཞར་བྱུང་དུ་བསྟན་པ་ཕོ་ཉ་དང་། དགེ་འདུན་སྡེ་གཉིས་མ་གཏོགས་པའི་གཞན་རྣམས་ནི་སྲིད་པ་ཐ་མ་པའི་གང་ཟག་རྣམས་ལ་ཆོ་ག་དང་དགེ་འདུན་ལ་མ་བལྟོས་པར་བསྙེན་པར་རྫོགས་པས་སྒྲ་ཡངས་པའི་(༨བ)
དབང་དུ་བྱས་ན་སྔོན་ཆོག་ཏུ་བགྲང་དུ་རུང་མོད། སྔོན་ཆོག་དང་། དར་ཆོག་གཉིས་སུ་ཟླས་ཕྱེ་བའི་སྔོན་ཆོག་ནི་མིན་ནོ། །དེའི་རྒྱུ་མཚན་སྟག་ཚང་ལོ་ཙཱ་བའི་འདུལ་ཊཱིཀ་ཏུ་སངས་རྒྱས་རང་བྱུང་དང་། རང་རྒྱལ་མཁན་སློབ་མེད་པར་དང་། ལྔ་སྡེ་ངེས་པ་ལ་འཇུག་པས་དང་། བཟང་སྡེའི་ཚོགས་སྐྱབས་གསུམ་ཁས་ལེན་གྱིས་དང་། ཤཱ་རིའི་བུ་སོགས་ཚུར་ཤོག་གིས་དང་། འོད་སྲུངས་སྟོན་པར་ཁས་ལེན་གྱིས་དང་། ལེགས་སྦྱིན་ནམ། སུ་དཱ་ཡ་ནི་དྲི་བས་མཉེས་པས་དང་། མཆོད་སྦྱིན་མ་འཕྲིན་གྱིས་དང་། སྐྱེ་རྒུའི་བདག་མོ་སོགས་ལྕི་བའི་ཆོས་ཁས་བླངས་པས་དང་། །ཡུལ་དབུས་སུ་བཅུ་དང་། མཐའ་འཁོབ་ཏུ་ལྔའི་ཚོགས་ཀྱིས་བསྙེན་པར་རྫོགས་ཞེས་ལུང་རྩ་འགྲེལ། མཛོད་འགྲེལ། མེ་ཏོག་འཕྲེང་རྒྱུད་རྣམས་སུ་གསུངས་པ་རྣམས་ལ་སྔ་མ་ཕལ་ཆེར་སྔོན་ཆོག་བཅུའི་ཐ་སྙད་བྱས་ནས་དེ་དག་ལ་རང་བྱུང་མ་གཏོགས་དབྱེ་བསྡུ་སོགས་ཀྱི་བཤད་པ་མཛད་པ་ནི་མི་རིགས་ཏེ། དང་པོ་གཉིས་ལ་གཞན་གྱི་རིག་བྱེད་ཙམ་ཡང་མེད་ལ། བརྒྱད་པ་ད་ལྟར་གྱི་ཆོ་ག་ཡིན་པར་གླེང་གཞིས་ངེས་ཤིང་། གཞན་དགུ་པ་ཡན་ཆོད་རྣམས་ལའང་རང་དོན་གྱི་སྔགས་ལན་གསུམ་བརྗོད་པ་ཡང་ཇི་བཞིན་མེད་ལ། བཅུ་པ་ལའང་སྔོན་དང་ད་ལྟར་གྱི་ཆ་གཉིས་ཀ་ཡོད་པའི་ཕྱིར་དང་། དེ་རྣམས་བཤད་པའི་ལུང་དེ་རྣམས་ལས་ཀྱང་བྱེ་བྲག་སྨྲ་བའི་བསྙེན་པར་རྫོགས་པའི་ཚུལ་བཅུ་ཞེས་གསུངས་ཀྱི། སྔོན་ཆོག་གི་ཐ་སྙད་མ་བྱུང་བའི་ཕྱིར་རོ། །ཞེས་གསུངས་པ་ནི་ལེགས་བཤད་ཆེན་པོར་སྣང་ཞིང་། མཆོད་སྦྱིན་མ་འཕྲིན་གྱིས་བསྙེན་པར་རྫོགས་པ་དང་ལྔ་སྡེ་བཟང་པོ་ཡེ་ཤེས་ཁོང་ཆུད་ཀྱི་སྐོར་(༩ན)
ལ་ཀུན་མཁྱེན་ཀླུ་སྒྲུབ་རྒྱ་མཚོའི་འདུལ་བའི་དཀའ་གནས་ལ་དཔྱད་པ་ལུང་རིགས་ནོར་བུའི་ཐེམ་སྐས་ལས་མཆོད་སྦྱིན་མ་ལྟ་བུ་འཕྲིན་ཆོག་ལས་རྫོགས་པའི་ཚེ། སྔར་དགེ་འདུན་གྱིས་གསོལ་བཞིའི་ཆོ་ག་མཛད་པའི་བརྗོད་པ་ཐ་མའི་ཆ་གསུམ་པ་ལ་བསྙེན་རྫོགས་ཀྱི་སྡོམ་པ་མ་ཐོབ་པར། དེ་ཉིད་ཀྱི་འཕྲིན་ཨུཏྤ་ལའི་མདོག་ཅན་གྱིས་མཆོད་སྦྱིན་མའི་རྣ་བར་བཏང་བ་ལས་བསྙེན་པར་རྫོགས་པ་ཡིན་ནོ། །ཞེས་ཁས་བླང་སྙམ་མོ། །དེ་ལའང་དཔྱོད་ལྡན་དག་ན་རེ། འོ་ན་འཕྲིན་ཆོག་ལས་བསྙེན་པར་རྫོགས་མ་ཐག་པའི་མཆོད་སྦྱིན་མ་ཆོས་ཅན། ཁྱོད་དགེ་འདུན་ལས་བསྙེན་པར་རྫོགས་མ་ཐག་པའི་གང་ཟག་ཡིན་པར་ཐལ། ཁྱོད་གསོལ་བཞིའི་ཆོ་ག་ལས་བསྙེན་པར་རྫོགས་པའི་གང་ཟག་ཡིན་པའི་ཕྱིར། འདོད་ན། མ་ཡིན་པར་ཐལ། ཁྱོད་དགེ་འདུན་དང་གང་ཟག་གཉིས་ཀྱི་ཟླས་ཕྱེ་བའི་གང་ཟག་ཙམ་ལས་བསྙེན་པར་རྫོགས་པའི་གང་ཟག་ཡིན་པའི་ཕྱིར་ཏེ། ཁྱོད་ཨུཏྤ་ལའི་མདོག་ཅན་ལས་བསྙེན་པར་རྫོགས་པའི་གང་ཟག་ཡིན་པའི་ཕྱིར་ཏེ། ཁྱོད་དེ་འདྲའི་འཕྲིན་ཆོག་ལས་བསྙེན་པར་རྫོགས་པའི་གང་ཟག་ཡིན་པའི་ཕྱིར་ཟེར་ན། གོང་དེར་མ་ཁྱབ་སྟེ། བསྙེན་པར་རྫོགས་མ་ཐག་པའི་མཆོད་སྦྱིན་མ་དེ་རྒྱུད་ནས་དགེ་འདུན་ལ་རྫོགས་པ་ཡིན་ཀྱང་། དངོས་སུ་ཨུཏྤ་ལའི་མདོག་ཅན་ལས་རྫོགས་པ་ཡིན་ཞེས་ཁས་བླང་ངོ་། །དེ་ལ་ཁོ་ན་རེ། མཆོད་སྦྱིན་མ་འཕྲིན་གྱིས་བསྙེན་པར་རྫོགས་པའི་ཆོ་ག་ཆོས་ཅན། ཁྱོད་སྔོན་ཆོག་ཡིན་པར་ཐལ། ཁྱོད་རབ་དབྱེ་ལས། དེ་བས་དགེ་སློང་བྱེད་པ་ལ། །རང་བྱུང་གི་ནི་བསྙེན་རྫོགས་དང་། །ཡེ་ཤེས་ཁོང་དུ་ཆུད་པ་(༩བ)
དང་། །དེ་བཞིན་སྟོན་པར་ཁས་བླང་དང་། །འཕྲིན་གྱིས་བསྙེན་པར་རྫོགས་པ་དང་། །ཚུར་ཤོག་ལ་སོགས་བསྙེན་རྫོགས་བླང་། །འཁྲུལ་པ་ཡིན་པ་མཉམ་པོ་ལ། །འདི་རྣམས་སྔོན་གྱི་ཆོ་གར་བཤད། ཅེས་པའི་ཚིག་ཟུར་གྱིས། འདི་རྣམས་སྔོན་གྱི་ཆོ་གར་བཤད། །ཅེས་པའི་སྐབས་ནས་དངོས་བསྟན་གྱི་ཆོ་ག་ཡིན་པའི་ཕྱིར་ཏེ། ཁྱོད་འཕྲིན་གྱིས་བསྙེན་པར་རྫོགས་པ་དང་ཞེས་པའི་སྐབས་ནས་དངོས་བསྟན་གྱི་ཆོ་ག་ཡིན་པའི་ཕྱིར་ཏེ། །ཆོས་ཅན་ཡིན་པའི་ཕྱིར་ཟེར་ན། གོང་དེར་མ་ཁྱབ། གཞུང་དེས་ནི་འཕྲིན་ཆོག་དེ་སྔོན་ཆོག་དང་དར་ཆོག་གཉིས་ཀྱི་ཟླས་ཕྱེ་བའི་སྔོན་ཆོག་ཏུ་བསྟན་པ་མིན་གྱི་སྔོན་གྱི་གང་ཟག་སྐལ་ལྡན་འགའ་ཞིག་ལ་བསྙེན་པར་རྫོགས་པའི་ཆོ་ག་ཙམ་ཡིན་ཞེས་བསྟན་པ་ཡིན་པའི་ཕྱིར་དང་། དེ་བཞིན་དུ་རང་བྱུང་སོགས་ཀྱང་སྔོན་གྱི་སྐལ་བཟང་འགའ་ཞིག་བསྙེན་པར་རྫོགས་པའི་ཐབས་ལ་སྔོན་ཆོག་ཅེས་སྒྲ་ཡངས་པའི་དབང་གིས་བཤད་པ་ཡིན་པས་སྔོན་ཆོག་ཅེས་པའི་མིང་ཙམ་གྱིས་འཁྲུལ་ནས་མགོ་རྨོངས་པར་མ་བྱེད་ཅིག །ཡང་ལྔ་སྡེ་བཟང་པོ་ཡེ་ཤེས་ཁོང་ཆུད་ཀྱི་བསྙེན་རྫོགས་འདི་ལ། མཁས་པ་ཁ་ཅིག་འདི་མཐོང་ལམ་མ་ཐོབ་པའི་གོང་དུ་བསྙེན་པར་རྫོགས་ནས་རྫོགས་རྗེས་མཐོང་ལམ་ཐོབ་ཅེས་འཆད་པ་ནི་རྒྱ་ཆེ་རོལ་བ་སོགས་ཐེག་ཆེན་སྐབས་སུ་དེ་ལྟར་འཆད་པའི་ལུགས་ཡོད་ཀྱང་ཐུན་མོང་འདུལ་བ་འདིར་དེ་ལྟར་ཁས་བླང་དུ་མི་རུང་སྟེ་རྒྱུ་མཚན། དེ་ལྟར་བསྙེན་པར་རྫོགས་མ་ཐག་པའི་ལྔ་སྡེའི་ནང་ཚན་ཀུན་ཤེས་ཀཽཎྜིནྱ་ཆོས་ཅན། ཁྱོད་རང་རྒྱུད་ལ་མཐོང་ལམ་སྐྱེས་པའི་སྔ་རོལ་དུ་བསྙེན་པར་རྫོགས་པའི་གང་ཟག་མིན་པར་ཐལ། ཁྱོད་རང་(༡༠ན)
རྒྱུད་ལ་མཐོང་ལམ་སྐྱེས་མ་ཐག་ཏུ་བསྙེན་པར་རྫོགས་པའི་གང་ཟག་ཡིན་པའི་ཕྱིར་ཏེ། ཁྱོད་རང་ཉིད་ལ་སྟོན་པས་བདེན་བཞིའི་ཆོས་འཁོར་བསྐོར་མ་ཐག་ཏུ་བསྙེན་པར་རྫོགས་པའི་གང་ཟག་གང་ཞིག །ཁྱོད་ལ་སྟོན་པས་བདེན་བཞིའི་ཆོས་འཁོར་བསྐོར་བ་དང་ཁྱོད་ཀྱི་རྒྱུད་ལ་མཐོང་ལམ་སྐྱེས་པ་དུས་མཉམ་པའི་ཕྱིར། མ་གྲུབ་ན། དེ་དེར་ཐལ། འདུལ་བ་ལུང་ལས། གང་གི་ཚེ་བཅོམ་ལྡན་འདས་དགེ་སློང་ལྔ་པོ་དག་གི་རྒྱུད་ལ་ཆོས་ཀྱི་འཁོར་ལོ་བསྐོར་ཏེ། དེ་དག་བསྙེན་པར་རྫོགས་པ་དགེ་སློང་གི་དངོས་པོར་གྱུར་པ་དེའི་ཚེ་དེ་དག་དེ་བཞིན་གཤེགས་པ་ལ་ཤིན་ཏུ་མཚན་ནས་བརྗོད་པ་དང་ཞེས་དེ་ལ་བདེན་བཞིའི་ཆོས་འཁོར་བསྐོར་བས་དེ་བསྙེན་པར་རྫོགས་པར་བསྟན། ཀུན་ཤེས་ཀཽཎྜི་ནྱའི་རྒྱུད་ལ་མཐོང་ལམ་སྐྱེས་པ་ན་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་ཏེ་ཞེས་པའི་རྒྱུད་ལ་མཐོང་ལམ་སྐྱེས་ནས་སྟོན་པས་འཇིག་རྟེན་འདིར་ཆོས་འཁོར་བསྐོར་བའི་ཐ་སྙད་འཐོབ། དེ་ཡན་ཆད་དུ་དེ་དག་ལ་ཆོས་བསྟན་ཀྱང་ཆོས་འཁོར་བསྐོར་བའི་ཐ་སྙད་མི་འཇོག་པ་འདི་མཁས་པ་དག་གི་སྤྱི་ལུགས་ཡིན་པའི་ཕྱིར་དང་། འགྲེལ་པ་དག་ལས་ཀྱང་ལྔ་པོ་རྣམས་ཡེ་ཤེས་ཁོང་དུ་ཆུད་པས་དང་ཞེས་ལྔ་སྡེ་རང་རྒྱུད་ལ་མཐོང་ལམ་སྐྱེས་ཚེ་བསྙེན་པར་རྫོགས་པས་ན་ཡེ་ཤེས་ཁོང་ཆུད་ཀྱི་བསྙེན་རྫོགས་དང་། ངེས་ཞུགས་ཀྱི་བསྙེན་རྫོགས་ཞེས་བཤད་འདུག་པའི་ཕྱིར་རོ། །འོ་ན་ལྔ་སྡེས་མཐོང་ལམ་མ་ཐོབ་གོང་དུ་ལྔ་པོ་དེ་དག་ལ་དགེ་སློང་དག་ཅེས་དགེ་སློང་དུ་བཤད་པ་མིན་ནམ་སྙམ་ན་དེ་ནི་དགེ་སློང་ལྔའི་ནང་ནས་སློང་བའི་དགེ་སློང་(༡༠བ)
ཙམ་ལ་དངོས་བཏགས་མ་ཕྱེ་བའི་མིང་བཏགས་ཙམ་ཡིན་པས་དགེ་སློང་མཚན་ཉིད་པར་འཁྲུལ་བར་མི་བྱའོ། །ཞེས་གསུངས་པ་ནི་རྣམ་དཔྱོད་དང་ལྡན་པའི་གཏམ་མོ། །སྔ་ཕྱིར་དུ་འདུལ་འཛིན་མང་པོ་སྔོན་ཆོག་བཅུ་ཞེས་ན་ཡམས་སུ་གསུང་བར་འདྲེན་ཚུལ། བྱ་འདུལ་དང་བུ་སོགས་སངས་རྒྱས་དང་རང་རྒྱལ་སོ་སོ་དང་། དབུས་དང་མཐའ་འཁོབ་ཏུ་གསོལ་བཞིའི་ཆོ་ག་ཞེས་གཅིག་ཏུ་འདྲེན། འགའ་ཞིག་དེ་ལས་གོ་ལྡོག་པའི་རྣམ་གཞག་ཡོད་པར་མཚོ་སྣ་པས་སྤྱིར་བསྙེན་པར་རྫོགས་ཚུལ་ལ་བཅུར་ཡོད་ཀྱང་། སྔོན་ཆོག་ཁོ་ན་ལ་བཅུར་མ་ངེས་ཤིང་དེ་འདྲའི་ལུང་གསལ་པོ་མེད་པ་དང་། ལྷག་པར་སྔ་མའི་ལུགས་ཀྱི་འདྲེན་པ་དང་རང་རྒྱལ་རྫོགས་ཚུལ་ཐ་དད་དུ་བྱས་པ་མི་འཐད་ཅིང་། མཆོད་སྦྱིན་མ་འཕྲིན་གྱིས་རྫོགས་ཚུལ་ལ། སྔོན་དུ་རབ་བྱུང་དང་། དེ་ནས་ལོ་གཉིས་སོང་ནས་བསྙེན་པར་རྫོགས་ཚུལ་སོགས་ཕྲན་ཚེགས་ཀྱི་ལུང་གསལ་པོ་ཡོད་པས་སྔོན་ཆོག་ཏུ་འདྲེན་མི་རིགས་པས་སྔོན་ཆོག་བརྒྱད་ཁོ་ནར་ངེས་གསུང་མཁས་པ་ཕལ་ཆེར་སྔོན་ཆོག་ལ་དེ་ལྟར་རྣམ་གྲངས་དུ་མ་ཡོད་པ་ལས། འདིར་གསོལ་བཞིའི་སྔོན་ཆོག་སྨོས་དགོས་པའི་རྒྱུ་མཚན་ཆོ་ག་འདི་དར་ཆོག་དང་རིགས་འདྲ་ཙམ་ཡིན་པས་དེ་ལྟར་རུང་ངམ་སྙམ་པའི་དོགས་པ་བསལ་བའི་ཆེད་ཡིན་པས། སྔོན་ཆོག་གཞན་རྣམས་ད་ལྟ་བྱ་རུང་ངམ་སྙམ་པའི་དོགས་པ་མི་འབྱུང་བའི་རྒྱུ་མཚན་གྱིས་ཡིན་གསུང་བ་ནི་ཁུངས་བཙུན་པར་མངོན། དེའི་རྗེས་སུ་ཡུལ་ཐག་རིང་པོ་ནས་སྟོན་པའི་སྤྱན་སྔར་འོངས་པ་དག །གཅན་གཟན་དང་འབྱུང་བའི་གནོད་པས་ཚེའི་དུས་བྱས་པ་སོགས་(༡༡ན)
ལ་བརྟེན་དགེ་འདུན་རྣམས་འདུས་ཏེ་གསོལ་བ་དང་བཞིའི་ལས་ཙམ་གྱིས་ཅིག་ཅར་རབ་ཏུ་བྱུང་བ་དང་བསྙེན་པར་རྫོགས་པར་གནང་བ་ཡིན་ལ། ཚུལ་ཇི་ལྟར་ན་སྐྱེ་བ་རྒྱུའི་ཁྱད་པར་སྔོན་ཆོག་གི་སྒོ་ནས་བསྙེན་རྫོགས་ཀྱི་སྡོམ་པ་སྐྱེ་བ་ལ་མཚམས་ནང་དེ་ན་ཡོད་པའི་དགེ་འདུན་ཐམས་ཅད་འདུས་པ་རབ་ཏུ་བྱུང་བའི་རྟགས་ཆ་ལུགས་དང་ལྡན་པ་རྒན་རིམ་ལ་ཕྱག་འཚལ་བ་སོགས་གུས་པའི་སྤྱོད་ལམ་དང་ལྡན་པ། བསྙེན་པར་རྫོགས་པར་གསོལ་བ་ལན་གསུམ་དུ་བཏབ་པ་ཞིག་དགོས་པ། མདོ་རྩ་ལས། དགེ་འདུན་ཐམས་ཅད་འདུས་པ་ན་ཆ་ལུགས་འདི་བཞིན་བྱས་རྒན་རིམ་ལ་ཕྱག་འཚལ་ཏེ་ཐལ་མོ་སྦྱར་ཙོག་ཙོག་པུར་འདུག་ཅིང་གསོལ་བ་བཏབ་པར་གྱུར་པ་གསུམ་དང་ཞེས་བྱུང་། མཚོ་སྣ་པ་ཀུན་མཁྱེན་བུ། ཐམས་ཅད་མཁྱེན་པ་དགེ་འདུན་གྲུབ། པཎ་ཆེན་བློ་གྲོས་ལེགས་བཟང་། མཁས་གྲུབ་བདེ་ལེགས་ཉི་མ། པཎ་ཆེན་བསོད་ནམས་གྲགས་པ་སོགས་མང་དག་མཐུན་པར་སྔོན་ཆོག་ལ་དགེ་འདུན་ཐམས་ཅད་འདུས་པའམ་མ་འདུས་ཀྱང་འདུན་པ་དང་ཡོངས་དག་འབུལ། སྔོན་ཆོག་ལ་རབ་བྱུང་གི་གོས་རྣམས་ཚང་བ་དང་། དར་ཆོག་ལ་མཁན་པོས་གནང་། སྔོན་ཆོག་ལ་ཕྱག་མང་པོ་མི་དགོས། དར་ཆོག་ལ་དགེ་བའི་བཤེས་གཉེན་ཆེན་པོ་མཚོ་སྣ་པ་ཤེས་རབ་བཟང་པོས་མཛད་པའི་འདུལ་བའི་རྣམ་བཤད་ཉི་མའི་འོད་ཟེར་ལས། སངས་རྒྱས་དགེ་འདུན་མཁན་པོར་གསོལ། །གོས་ཀྱི་གཉིས་དང་ལྷུང་བཟེད་དང་། །གསང་ཏེ་སྟོན་དང་འཇུག་ཡོད་དང་། །སངས་རྒྱས་དགེ་འདུན་ལས་བྱེད་ལའོ། །(༡༡བ)
ཞེས་ཕྱག་ཚན་བཅུ་གཅིག་བཤད། སྔོན་ཆོག་ལ་ཐལ་མོ་སྦྱར་སྟན་མེད་པར་ཙོག་པུར་ཡུད་ཙམ་འདུག་པས་ཆོག །དར་ཆོག་ལ་ཐལ་མོ་སྦྱར། རྩྭ་ཕ་གུའི་སྟེང་དུ་སྟན་མེད་པར་འདིང་བ་གཟར་བ་ལ་ཡུན་རིང་པོར་འདུག་དགོས། སྔོན་ཆོག་ལ་བདག་རབ་བྱུང་བསྙེན་རྫོགས་མཛད་དུ་གསོལ་སོགས་བསྒྲུབ་བྱ་རང་ཉིད་ཀྱི་ལན་གསུམ་དུ་གསོལ་བ་བཏབ་པས་ཆོག །དར་ཆོག་ལ་མཁན་པོས་ངོ་ཆེན་བྱས། ལས་སློབ་ཀྱིས་བརྡ་སྦྱར་ནས་གསོལ་བ་འདེབས་དགོས། སྔོན་ཆོག་ལ་མཐུན་རྐྱེན་ཚང་བ་དང་འགལ་རྐྱེན་བར་ཆད་དང་བྲལ་མ་བྲལ་སོགས་དྲི་བ་བརྗོད་མི་དགོས་ལ། དར་ཆོག་ལ་དེ་ལྟར་བརྗོད་དགོས། སྔོན་ཆོག་ལ་རབ་བྱུང་བསྙེན་རྫོགས་ཅིག་ཅར་དང་། དར་ཆོག་ལ་རིམ་ཅན་དུ་སྐྱེ་བ་སོགས་ཡོད་པར་བཞེད། ཆོ་གའི་མཚན་གཞི་ནི་སྔོན་ཆོག་ལ་གསོལ་བཞིའི་ཆོ་ག་དང་ལྡན་པ་ཞིག་དགོས་སོ་ཞེས་པ་ལ་གོང་གི་འཕྲོས་ལས་གསོལ་བ་དང་བཞིའི་ལས་ཀྱིས་ཞེས་པ་བྱུང་། ཇི་ལྟར་སྐྱེ་བའི་ཚུལ་ནི་སྔོན་ཆོག་ལ་སྡོམ་པ་སྐྱེ་བ་བར་མ་རབ་བྱུང་གི་ཚུལ་ཁྲིམས་དང་བསྙེན་རྫོགས་ཀྱི་སྡོམ་པ་ཅིག་ཅར་དུ་སྒྲུབ་དགོས་སོ་ཞེས་འཆད་པ་ནི། ཅིག་ཅར་རབ་ཏུ་བྱུང་བ་དང་བསྙེན་པར་རྫོགས་པ་ཉེ་བར་བསྒྲུབས་པར་གྱུར་པ་ཞེས་བྱུང་། ཆོ་ག་གཞན་དུ་བསྟན་པ་ནི་བར་མ་རབ་བྱུང་གི་ཚུལ་ཁྲིམས་དང་བསྙེན་རྫོགས་ཅིག་ཅར་དུ་བསྒྲུབ་པའི་གསོལ་བཞིའི་ཆོ་ག་འདི་ད་ལྟར་གྱི་ཆོ་ག་ལས་གཞན་པའི་སྔོན་ཆོག་མཚན་ཉིད་པ་ཡིན་ནོ། །ཞེས་འཆད་པ་ནི། ལྟ་བུ་ནི་སྔོན་གྱི་ཆོ་གའོ། ཞེས་དང་། རྒྱ་ཆེར་འགྲེལ་དུ། ལྟ་བུ་ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ། སྔོན་གྱི་ཆོ་(༡༢ན)
གའི་རྣམ་པ་ནི་དེ་ལྟ་བུར་རིག་པར་བྱའི་རྣམ་པ་གཞན་མ་ཡིན་ནོ་ཞེས་བྱ་བའི་ཐ་ཚིག་གོ །ཞེས་གསུངས། ཉེས་མེད་ཕུན་ཚོགས་ཀྱི་དབང་དུ་བྱས་ན་མཚམས་ནང་དེར་གནས་པའི་དགེ་འདུན་ཐམས་ཅད་འདུ་བར་བཤད་ཀྱང་། དམིགས་ཀྱིས་བསལ་བ་ནི། དགྲ་བཅོམ་པ་ས་ག་ལྷས་མཛད་པའི་འདུལ་བ་ཚིག་ལེའུར་བྱས་པ་མེ་ཏོག་ཕྲེང་རྒྱུད་ལས། དབུས་དང་མཐའ་འཁོབ་པ་དག་ལ། །བསྙེན་རྫོགས་ཡང་དག་བསྟན་པ་ནི། །བཅུ་དང་ལྔ་ཡི་ཚོགས་ཀྱིས་སམ། །དེ་བས་ལྷག་པས་ཀྱང་ནི་རུང་། ཞེས་བཤད་དོ། །འདི་ལ་སྔོན་ཆོག་དངོས་གཞི་ངོས་འཛིན་དགོས་པ་ཐམས་ཅད་མཁྱེན་པ་བུ་དང་། ལུང་རིགས་གཏེར་མཛོད་དུ་སྔོན་ཆོག་གཞན་རྣམས་བཏགས་པ་བ་དང་། གསོལ་བཞིའི་ལས་ཀྱི་ཅིག་ཅར་བསྒྲུབ་པ་ལ་མཚན་ཉིད་པར་ངོས་བཟུང་། འདུལ་ཊཱིཀ་རིན་ཅེན་ཕྲེང་བ། པཎ་ཆེན་བསོད་ནམས་གྲགས་པ་དང་། ཆོས་རྗེ་བདེ་ལེགས་ཉི་མ་གཉིས་ཀྱི་སྤྱི་དོན་སོགས་མཁས་པ་མང་པོའི་བཞེད་པ་མཐུན་པར་སྔོན་ཆོག་དངོས་གསོལ་བཞིའི་ཆོ་གས་རབ་བྱུང་དང་བསྙེན་རྫོགས་ཅིག་ཅར་དུ་བསྒྲུབ་པ། དེ་ལྟར་གྱི་ཆོ་གའི་སྔོན་རོལ་དུ་གནང་བའི་གསོལ་བཞིའི་ལས་ཆོག་སྔོན་ཆོག་གི་མཚན་ཉིད་ཅེས་གསུངས་ཤིང་། འཇམ་དབྱངས་བླ་མ་དཀོན་ཅོག་ཆོས་འཕེལ་ཀྱང་དེ་ཁོ་ན་ལྟར་བཞེད། དུས་སྟོན་པ་སངས་རྒྱས་ནས་ལོ་ལྔའི་བར་དུ་བྱུང་བ་སྔོན་ཆོག་དང་། དེ་ནས་དར་ཆོག་བྱུང་བར་བཞེད་ཅིང་། ཁྱད་པར་ཊཱིཀ་ཆེན་རིན་ཅེན་ཕྲེང་བར། དུས་སྟོན་པ་སངས་རྒྱས་ནས་ལོ་དྲུག་ནས་(༡༢བ)
བྱུང་སྟེ། དེའི་ཚེ་ཡབ་སྲས་མཇལ་བའི་འཕྲིན་པ་འཆར་ཀས་བྱས་དེའི་ཚེ་ཤཱ་རིའི་བུས་འཆར་ཀ་ད་ལྟར་ཀྱི་ཆོ་གས་རབ་བྱུང་བསྙེན་རྫོགས་བྱས་པར་གསུངས་པའི་ཕྱིར་རོ་ཞེས་གསུངས། དེ་ཡང་གོང་དུ་སྨོས་པའི་བསྙེན་པར་རྫོགས་ཚུལ་རྣམས་ལ་ཡུལ་གཞན་ལ་མ་བརྟེན་པ་རང་རྒྱལ་སྲིད་པ་ཐ་མ་པ་དང་བྱང་སེམས་སྲིད་པ་ཐ་མ་པས་ཟད་མི་སྐྱེ་ཤེས་པའི་བྱང་ཆུབ་མངོན་དུ་མཛད་པའི་ཚེ་བསྙེན་རྫོགས་ཀྱི་སྡོམ་པ་རང་གི་ངང་གིས་སྔོན་དུ་གྱུར་པ་ལ་ཆོ་གའི་ཐ་སྙད་ཟུར་ཙམ་ཡང་མེད། ཡུལ་གཞན་སྟོན་པ་སངས་རྒྱས་ལ་བརྟེན་པ་ནི་ལྔ་སྡེ་བཟང་པོ་ལ་དགེ་སློང་དག་འདི་ནི་སྡུག་བསྔལ་འཕགས་པའི་བདེན་པའི་ཞེས་སོགས་གསུངས་པ་ཙམ་གྱི་མཐོང་ལམ་སྐྱེས་པའི་ཚེ་བསྙེན་རྫོགས་ཀྱི་སྡོམ་པ་སྐྱེས་པ་ལྟ་བུ་གྲགས་པ་སོགས་ལ་ཚུར་ཤོག་ཚངས་པར་མཚུངས་པར་སྤྱོད་ཅིག་གསུངས་པའི་མོད་ལ་བྱི་བྱད་དང་། གོས་དང་སྤྱོད་ལམ་ཐམས་ཅད་བསྙེན་པར་རྫོགས་ནས་ལོ་བརྒྱ་ལོན་པ་ལྟ་བུ། འོད་སྲུངས་ཆེན་པོས་ཁྱོད་ནི་ཁོ་བོའི་སྟོན་པའོ། །ཁོ་བོ་ནི་ཁྱོད་ཀྱི་ཉན་ཐོས་སོ་ཞེས་སྟོན་པར་ཁས་བླངས་པ་ལྟ་བུ། བཟང་སྡེའི་ཚོགས་དྲུག་ཅུས་དཀོན་ཅོག་གསུམ་ལ་སྐྱབས་སུ་འགྲོ་བ་ཁས་བླངས་པ་ལྟ་བུ། སྐྱེ་རྒུའི་བདག་མོ་སོགས་ཀྱིས་ལྕི་བའི་ཆོས་བརྒྱད་ཁས་བླངས་པ་ལྟ་བུ། ཁྱིམ་བདག་ལེགས་བྱིན་ལ་གཅིག་ཏུ་དགེ་བ་ནི་གང་། ཐར་པའོ། །དེ་ལ་མཁོ་བ་ནི་གང་། དད་པའོ་ཞེས་པའི་དྲི་བ་ལ་མཉེས་པ་ལྟ་བུ། ཆོ་གའི་རིག་བྱེད་ལ་བརྟེན་པ་སྔོན་གྱི་ཆོ་ག་སྔར་བཤད་པ་ལྟར་སྨིན་པ་གསུམ་ཤས་ཆེ། སྒྲིབ་པ་གསུམ་ཤས་ཆུང་བའི་བསྒྲུབ་བྱ་གསོལ་བཞིའི་ལས་ཀྱིས་ཅིག་ཅར་བསྒྲུབས་པ་(༡༣ན)
ལྟ་བུ་སྟེ། རྒྱ་ཆེར་འགྲེལ་ལས། སེམས་ཅན་རྒྱུད་རྣམ་པར་དག་པ་ཤ་སྟག་བྱུང་བས་འདུལ་བྱའི་རིམ་པ་ལ་མི་བལྟོས་ཤིང་མཁན་པོ་དང་སློབ་དཔོན་ལ་སོགས་པ་ལ་མ་བལྟོས་པར་ཡང་ཚེགས་ཆུང་ངུ་ཁོ་ནས་བཅོམ་ལྡན་འདས་ཀྱི་བཀའ་རྫོགས་པར་བྱེད་པར་བྱེད་པ་དང་། དེ་དག་བསོད་ནམས་བྱས་པ་ཡིན་པས་ནད་མེད་པ་དང་། ཇི་སྟེ་དེ་དག་ལ་ནད་ཅིག་བྱུང་དུ་ཟིན་ཀྱང་དེ་དག་གི་ནད་གཡོག་ལ་སོགས་པ་རྙེད་པར་འགྱུར་རོ་ཞེས་གསུངས། སྟོན་པ་སངས་རྒྱས་ནས་ལོ་དྲུག་ཕན་ཆད་ན་གདུལ་བྱ་རྣམས་སྲིད་པ་ཐ་མ་པ་མ་ཡིན་པ་དབང་པོ་རྟུལ་ཞིང་ལས་འཕྲོ་ཞན་པས་རང་སྟོབས་ཀྱིས་བླང་དོར་གྱི་གནད་ཚུལ་བཞིན་དུ་མ་ཤེས་པས་སྤྱོད་ལམ་རྒོད་བག་ཅན་དུ་གྱུར་ཅིང་། ནད་དང་ཉེར་འཚེ་ལ་སོགས་པ་འབྱུང་བ་མང་ཞིང་མཐུན་རྐྱེན་སྨན་དང་ཡོ་བྱད་རྙེད་དཀའ་བས་ལ་ལ་བྲོ་འཚལ་བ་ལ་གྲོགས་མེད་པར་ཚེའི་དུས་བྱས་པར་བརྟེན་མཁན་སློབ་དང་བཅས་ཏེ་ད་ལྟར་གྱི་ཆོ་གའི་སྒོ་ནས་རབ་ཏུ་བྱུང་བ་དང་བསྙེན་པར་རྫོགས་པ་གནང་བ་ཡིན་ཏེ། དེ་ཉིད་ལས་ད་ལྟར་ནི་དེ་ལྟ་བུའི་རྒྱུད་རྣམ་པར་དག་པ་མེད་པས། དེས་ན་ད་ལྟར་གྱི་ཆོ་ག་རྣམ་པར་བཞག་གོ །ཞེས་སོ། །སློབ་དཔོན་ཡོན་ཏན་འོད་ཀྱིས་བསྟན་བཅོས་འདིར་སྔོན་ཆོག་བཀོད་པར་དགོས་པ་མེད་དེ། ད་ལྟར་གྱི་སྐབས་སུ་སྔོན་ཆོག་བྱར་མི་རུང་བའི་ཕྱིར་སྙམ་ན་སྐྱོན་མེད་དེ། སྔོན་གྱི་རྒྱུད་ཡོངས་སུ་སྨིན་པའི་གདུལ་བྱ་ཚེགས་ཆུང་ངུའི་སྒོ་ནས་བསྙེན་པར་རྫོགས་པའི་ཐབས་སྔོན་གྱི་ཆོ་ག་ཁྱད་པར་ཅན་ཡོད་པར་ཤེས་ནས་མ་འོངས་པ་ན་དེ་དག་རང་རྒྱུད་ལ་ཡང་འབྱུང་བའི་ཕྱིར་དུ་སྤྲོ་(༡༣བ)
བས་འཇུག་པ་དང་། སྔོན་ཆོག་དང་ད་ལྟར་གྱི་ཆོ་གའི་རྣམ་བཞག་སོ་སོར་ཤེས་པའི་ཕྱིར་དུ་ཡང་འདིར་སྔོན་ཆོག་གི་རྣམ་གཞག་གསུངས་སོ། །དེ་ཡང་ཤེས་རབ་ཅན་གྱི་མཆོག་འཕགས་པ་ཤཱ་རིའི་བུ་ལས་ཤཱཀྱའི་རིགས་ཀྱི་སྲས་སྒྲ་གཅན་འཛིན་གྱིས་བསྙེན་པར་རྫོགས། དེ་ལ་འདམ་བུ་བྱིན་ནམ། རྒྱུན་གྱི་དབང་པོའི་མཁན་པོ་བྲམ་ཟེ་སྒྲ་གཅན་འཛིན་གྱིས་བསྙེན་རྫོགས་ཀྱི་དངོས་པོ་ནོས། དེ་ལ་སངས་རྒྱས་གཉིས་པ་ཀླུ་སྒྲུབ་ཞབས་ཀྱིས་དགེ་སློང་གི་དངོས་པོར་བསྒྲུབ་པར་མཛད། རྗེ་རང་བྱུང་པས་སྲས་སྒྲ་གཅན་འཛིན་གྱི་རྗེས་སུ་མཐར་ཕྱིན་དཔལ་གྱི་གྲགས་པ་དགོས་ཞེས་དོགས་སློང་མཛད་ནའང་། མཁས་པ་གཞན་རྣམས་ལ་མ་གྲགས་པས་སོམ་ཉི་མི་འཚལ།
གངས་ཅན་ལྗོངས་སུ་འདུལ་བའི་བསྟན་པ་ཇི་ལྟར་དར་ཚུལ།
ནཱ་གཱ་རྫུ་ནས། མ་དྲོས་པའི་མཚོ་ལས་ཆུ་བོ་བཞི་ལྟར་ཕྱོགས་ཀུན་ཏུ་ཁྱབ་པ། ཀུན་མཁྱེན་ཀླུ་སྒྲུབ་རྒྱ་མཚོས། སྒྲ་གཅན་འཛིན་བཟང་སྤྲིན་གྱི་བཅུད་། །འཐུང་མཁས་ཀླུ་སྒྲུབ་མ་དྲོས་མཚོ། །བྷོ་ཊའི་ལྗོངས་འདིར་བསྙེན་རྫོགས་ཀྱི། །ཆུ་ཀླུང་མཐའ་དག་འདི་ལས་བབ། ཅེས་གསུངས། ཁྱད་པར་གངས་ཅན་གྱི་ལྗོངས་འདིའི་སྡོམ་རྒྱུན་སྔ་ཕྱི་མཐའ་དག་ཤིང་རྟ་ཆེན་པོ་འདི་ཉིད་ལས་བརྒྱུད་པའི་བོད་ཡུལ་འདིར་བསྟན་པ་དབུ་བརྙེས་དར་རྒྱས་སུ་བྱུང་བའི་ཕྱི་མའི་ཚེ་ལྷ་བཙད་པོ་ཁྲི་སྲོང་ལྡེའུ་བཙན་གྱིས་ཟ་ཧོར་གྱི་རྒྱལ་རིགས་ལས་སྡོམ་བརྩོན་དམ་པ་ཞི་བ་འཚོ་སྤྱན་དྲངས། ཐམས་ཅད་ཡོད་པར་སྨྲ་བའི་གནས་བརྟན་བཅུ་གཉིས་དང་བཅས་མེ་མོ་ལུག་གི་ལོ་ལ་སད་མི་མི་བདུན་བྱུང་བ་རྦ་བཞེད་ལས། བཙན་པོའི་ཞལ་ནས་སློབ་དཔོན་ངའི་བོད་ལ་དགེ་སློང་མེད་པས་ངའི་ཞང་བློན་(༡༤ན)
དག་ལ་དགེ་སློང་བཏུབ་བམ་ཞེས་ཞུས་པའི་ལན་དུ། བཏུབ་བམ་སད་པར་བྱ་གསུངས་ནས་སྐད་ལབས་པ་ཚོ་ལས་ཐོག་མར་བོད་ལ་དད་པ་ཆེ་བའི་རྦ་ཁྲི་གཟིགས་དགེ་སློང་བྱས་མ་ཐག་ཏུ་མཚན་རྦ་དཔལ་དབྱངས་སུ་བཏགས། ལྔའི་མངོན་པར་ཤེས་པ་དང་ལྡན་པས་བཙན་པོ་དགྱེས་ཏེ། དེའི་ཞབས་སྤྱི་བོར་བླངས་ནས་ཁྱོད་བོད་ཀྱི་རིན་པོ་ཆེ་ཡིན་ནོ་ཞེས་བཀའ་སྩལ་ནས་མཚན་ཡང་རྦ་རཏྣ་ཞེས་བཏགས་ཏེ། བོད་ཀྱི་རབ་ཏུ་བྱུང་བ་ལ་སྔ་བ་དེ་ཡིན་ནོ། །བཙན་པོ་ན་རེ། སློབ་དཔོན་གྱིས་ངའི་ཞང་བློན་དད་པ་ཅན་ད་རུང་རབ་ཏུ་ཕྱུང་ཞིག་ཅེས་ཞུས་པས། སད་ཅིག་གསུངས་ནས་རྦ་གསལ་སྣང་དང་། །རྦ་ཁྲི་བཞེར་གྱི་བུ་སད་ཤི་ཏི་དང་། པ་གོར་ཧེ་འདོད་ཀྱི་བུ་བཻ་རོ་ཙ་ན་དང་། ངན་ལམ་རྒྱལ་བ་མཆོག་དབྱངས་དང་། རྨ་ཨ་ཙ་ར་རིན་ཅེན་མཆོག་དང་། ལ་གསུམ་རྒྱལ་བའི་བྱང་ཆུབ་དང་དྲུག་དགེ་སློང་བྱས་ཏེ། མིང་ཡང་ཡེ་ཤེས་དབང་པོ་དང་། སྐྱ་བོའི་དུས་ན་རྦ་གསལ་སྣང་ཟེར། སེམས་བསྐྱེད་ཞུས་ནས་རབ་ཏུ་བྱུང་བའི་མིང་། སློབ་དཔོན་བོ་དྷི་ས་ཏྭར་བཏགས། རྦ་དཔལ་དབྱངས་ལ་རྒྱ་ནག་སྐད་སང་ཤི་ཏ་ཟེར། ལ་ལ་རྦ་ཁྲི་བཞེར་གྱི་བུ་སང་ཤི་ཏ་ཟེར། དེ་ལ་སོགས་པར་བཏགས་ནས་སད་མི་མི་དྲུག་རབ་ཏུ་བྱུང་ངོ་། །ཞེས་པ་ལྟར་བསྟན་པ་སྔ་དར་ལ་དགེ་འདུན་གྱི་སྡེ་རྒྱ་ཆེར་འཕེལ་ནས་འགྲོ་བ་ཀུན་གྱི་བསོད་ནམས་ཀྱི་ཞིང་མཆོག་བླ་ན་མེད་པ་སྟེ། ཀླུ་སྒྲུབ་རྗེས། དྷཱིཿཡིག་འོད་ཕྲེང་ཐིག་པ་ལས་སྨིན་ཆོས་རྒྱལ་ཁྲི་སྲོང་ལྡེ་བཙན་དེས། །ཐུབ་པའི་བསྟན་ལ་ལྷག་བསམ་བརྟན་པོས་ཞི་འཚོ་རྒྱལ་བཤེས་ཚུལ་(༡༤བ)
ཁྲིམས་སྦྱིན། །མཁན་སློབ་ཚོགས་ལས་བོད་ཀྱི་བློ་གསལ་སད་མི་བདུན་ཞེས་བསྙེན་པར་རྫོགས། །གངས་རིའི་ལྗོངས་འདིར་རབ་བྱུང་འདུལ་བའི་བསྟན་པ་རྨ་མེད་དེ་ནས་བྱུང་། ཞེས་གསུངས། རྒྱལ་པོ་དར་མས་བསྟན་པ་བསྣུབས་པའི་གཏམ་གསན་པས། ཆུ་བོ་རིའི་སྒོམ་གྲྭ་ནས་སྟོད་ལུང་དམར་ཤཱཀྱ་མུ་ནེ་དང་། བོ་དོང་པ་གཡོ་དགེ་འབྱུང་དང་། བཞད་ཀྱི་གཙང་རབ་གསལ་དང་གསུམ་གྱིས་འདུལ་མངོན་གྱི་དཔེ་ཆ་དྲེའུ་གཅིག་གི་རྒྱབ་ཁལ་དང་བཅས་གསང་ཐབས་ཀྱིས་མངའ་རིས་སུ་བྲོས། དེར་ཡང་བཞུགས་མ་ནུས་པར་བྱང་ལམ་བརྒྱུད་ནས་མདོ་སྨད་རྨ་ལུང་དུ་རྡོ་རྗེའི་བྲག་ར་ཨན་ཆུང་གནམ་རྫོང་དན་ཏིག་ཤེལ་གྱི་ཡང་དགོན་དུ་བསྒོམ་གྱིན་བཞུགས་པ། དེའི་ཚེ་འགྲོ་སྟག་སྣང་ཁྲི་ཞེས་པའི་རྒྱལ་པོའི་བློན་པོ་ཞིག་གིས་ལོ་སུམ་ཅུ་རྩ་ལྔ་པ་ལ་སྨོན་ལམ་རྣམ་པར་དག་པས་མཚམས་སྦྱར་ནས་བཙོང་ཁ་བདེ་ཁམས་སུ་ཆུ་བྱིར་བོན་པོའི་བུ་ཤེས་རབ་ཅན་ཞིག་ཏུ་འཁྲུངས་པས་མུ་ཟུ་གསལ་འབར་དུ་བཏགས། ནར་སོན་ནས་ནོན་འཇམ་དཔལ། ཁང་རིན་ཅེན་རྡོ་རྗེ། སྐྱི་རྒྱལ་བའི་གཙུག་ཏོར། ནམ་དགའ་ལྡན་བྱང་ཆུབ་སོགས་བླ་མ་བསྟེན་ནས་མདོ་སྔགས་ཀྱི་ཆོས་དུ་མ་ནོས། འཁོར་བའི་སྡུག་བསྔལ་བསལ་ནས་ཐར་པ་ཡི། །བདུད་རྩིས་འགྲོ་བའི་སྡུག་བསྔལ་ཞི་བྱེད་པའི། །བསྟན་པ་ཕྱོགས་བཅུར་རྒྱས་པར་བྱ་བའི་ཕྱིར། །དང་པོར་བདག་གིས་རབ་ཏུ་བྱུང་བར་བྱ། །ཞེས་གསུངས་ནས། གཙང་གི་མཁན་པོ་དང་གཡོས་སློབ་དཔོན་མཛད་ནས་རབ་ཏུ་བྱུང་བའི་མཚན་དགེ་བ་རབ་གསལ་དུ་བཏགས། དེ་ནས་རིང་ཞིག་ལོན་པ་ན་གོང་(༡༥ན)
གི་མཁན་སློབ་གཉིས་དམར་གྱིས་གསང་སྟོན་རྒྱའི་ཧྭ་ཤང་ཀེ་དབང་དང་འབག་གིས་ཁ་སྐོང་མཛད་ནས་བསྙེན་པར་རྫོགས་ཤིང་ཕྱིས་ཐུགས་རབ་ཤིན་ཏུ་ཆེ་བས་དགོངས་པ་རབ་གསལ་དུ་གྲགས། མི་ཉག་གྷའི་ཡུལ་དུ་གོ་རོང་སེང་གེ་གྲགས་ལ་འདུལ་བ་གསན། ཀྭ་འོད་མཆོག་གྲགས་ཞེས་ལྷོ་བལ་ནས་ཆོས་མང་པོར་སྦྱངས་པ་ཞིག་ཁམས་སུ་བྱོན་པར་འབུམ་ཊཱིཀ་སོགས་ཞུས། རི་དནྟིག་ཏུ་བཞུགས་པའི་ཚེ་སྤ་གོར་ཡེ་ཤེས་གཡུང་དྲུང་དང་བར་གནས་བརྟན་གྲགས་གཉིས་རབ་ཏུ་བྱུང་བས་སྤ་བར་གཉིས། ཇ་ཅོག་གཉིས། བཞད་སྲགས་གཉིས། འལ་གནུབས་གཉིས། ཟོང་མཚུར་གཉིས་སོགས་འདུལ་འཛིན་མང་དུ་བྱོན། དེ་དག་གི་སྐབས་ཡུམ་བརྟན་དང་། འོད་སྲུངས་ནས་རྒྱལ་རབས་གསུམ་གྱི་བར་ལ་བོད་དབུས་གཙང་ན་སྡོམ་པ་འབོགས་ལེན་ལྟ་ཞོག་རབ་བྱུང་གི་གཟུགས་བརྙན་ཚང་བ་ཡང་མེད། ཉན་བཤད་ལྟ་ཞོག་ནད་པའི་རིམ་གྲོ་ལ་ཀློག་འདོན་རེ་ཙམ་བྱེད་པ་ན་དམར་པོ་འདི་རྣམས་ནག་པོ་འདི་རྣམས་ཀྱིས་འཆད་པ་འདྲ་ཞེས་པ་ལས་མེད་པ་ལོ་བདུན་ཅུ་བྱུང་ངོ་། །དེ་རྗེས་སྨད་ན་བསྟན་པ་ཅུང་ཟད་ཚུགས་པའི་སྐད་ཆ་དབུས་གཙང་དུ་སླེབས། མངའ་བདག་ཚལ་ནས་ཡབ་སྲས་སོགས་ལ་སངས་རྒྱས་ཀྱི་འཕྲིན་ལས་ཅུང་ཟད་ཞུགས་ནས། ཀླུ་མེས་ཚུལ་ཁྲིམས་ཤེས་རབ། འབྲིང་ཡེ་ཤེས་སྟོན། རྦ་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་ཏེ་དབུས་པ་ལྔ་མདོ་སྨད་དུ་བརྫངས། དེའི་སྐད་གཙང་གི་བཙན་པོ་རྣམས་ཀྱིས་ཀྱང་གསན་ཏེ། ལོ་སྟོན་རྡོ་རྗེ་དབང་ཕྱུག །ཆང་བཙུན་ཡེ་ཤེས་(༡༥བ)
སེང་གེ །མངའ་རིས་འོད་བརྒྱད་སྤུན་གཉིས། བོ་དོང་པ་ཨུ་པ་དེ་ཀར་རྣམས་ཀྱང་བརྫངས། གཙང་གཡོ་དམར་གསུམ་བགྲེས་པས་མཁན་པོ་མི་འཁྱོངས་གསུངས་ནས་སློབ་དཔོན་དང་བླ་ཆེན་དགོངས་པ་རབ་གསལ་གྱིས་མཁན་པོ་མཛད་དེ་རབ་བྱུང་བསྙེན་རྫོགས་གནང་། འདུལ་བ་བསླབས་ཏེ་ཡར་ཕེབས་ནས་དབུས་གཙང་གི་མི་བཅུ་བཙན་པོ་རྣམས་ཀྱི་བླ་མཆོད་དུ་གྱུར། ཀླུ་མེས་ལ་གནས་གཞི་འཛིན་པའི་སློབ་མ་ཀ་བ་བཞི་གདུང་དྲུག་སོགས་གྲགས་པའི་ཀ་བ་བཞི་ནི། གྲུ་མེར་ཚུལ་བྱུང་། ཞང་སྣ་ནམ་རྡོར་དབང་། རྔོག་བྱང་འབྱུང་། གླན་ཡེ་ཤེས་རབ་བོ། །དེ་བཞིས་རིམ་བཞིན་གསོལ་ནག་ཐང་ཆེན། སྟོད་ལུང་ར་ཙག །ཡེར་པ་བ་རང་། རྒྱ་གསེར་སྒང་སོགས་བརྩིགས་ནས་མང་དུ་མཆེད་པས་རང་སྡེ། ཞང་སྐོར། རྔོག་ཚོ་གླན་སྐོར་དུ་གྲགས་སོ། །འབྲིང་གིས་ངན་ལམ་སྤྱི་མོ་བརྩིགས་པ་ནས་མཆེད་པ་འབྲིང་ཚོ་ཟེར་ཏེ། གསང་ཕུ་སྙེ་ཐང་སོགས་ཀྱང་དེ་བཞིན་ནོ། །རྦས་ལུང་གྱུར་ལྷ་ཁང་བརྩིགས་ནས་མཆེད་པ་ལ་རྦ་ཚོ་ཟེར་ཏེ། རག་ཤིས་ཀ་ཚལ་བཟུང་བ་ནས་མཆེད་པ་ལ་རག་ཚོའོ། །གཙང་དུ་ལོ་སྟོན་གྱིས་ཞ་ལུ་རྒྱན་གོང་བརྩིགས་པ་ནས་མཆེད་པ་ལ་ལོ་ཚོ། ཚོང་བཙུན་གྱིས་རྩིས་ཀྱི་ཡང་དབེན་བཟུང་བ་ནས་མཆེད་པ་ལ་ཚོང་ཚོ་སྟེ་དེ་གཉིས་ཤིན་ཏུ་མང་། གཙང་པ་གཞན་གསུམ་དང་སུམ་པ་ལས་མཆེད་མ་ཐུབ་པས་དབུས་གཙང་གི་མི་དྲུག་ཏུའང་བྱེད་དོ། །འ་ཞ་ཡེ་ཤེས་གཡུང་དྲུང་གིས་བླ་ཆེན་གྱི་མཁན་བུ་ཏྲེ་བོ་མཆོག་བླ་ལ་བཀའ་དྲིན་ཞུས་པས་ངས་ཆབ་གཏོར་བཏང་ལ་འོང་གིས་གསུང་བའི་བར་དེར་(༡༦ན)
མཁན་པོ་གྲོངས་པས་དེ་ག་སྡོམ་པར་ངོས་བཟུང་ནས་དེའི་རྒྱུན་སྤེལ་བ་ལ་དགེ་ཚུལ་ཆུ་གཏོར་མར་གྲགས། འབྲེ་གཞོན་ཚུལ་གྱིས་བླ་ཆེན་པོའི་མཁན་བུ་ཡ་ཟི་བོན་སྟོན་ལ་སྡོམ་པ་ཞུས་པས། དེར་བས་ཟེར་བའི་ངང་ལས་འདས་པས་སྡོམ་པ་ཐོབ་པར་བརྩིས་པས་སྡོམ་པ་དེར་བས་མར་གྲགས། འ་འབྲེ་གཉིས་ནས་གཙང་གི་ཕྱོགས་སུ་གནས་གཞི་དང་སྡེ་རྒྱ་ཆེར་འཕེལ་ཚུལ་ཀུན་མཁྱེན་བུའི་ཆོས་འབྱུང་དང་སྟག་ཚང་ལོ་ཙཱ་བའི་སྡོམ་གསུམ་འགྲེལ་པར་འབྱུང་ཞིང་། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གི་རྣམ་ཐར་དུ་འ་ཞའི་སྡོམ་རྒྱུན་དེར་བས་མ་ཡིན་ཚུལ་བྱུང་བ་སྔོན་གྱི་ཡིག་ཚང་སོ་སོར་བརྟེན་པས་ཁུངས་ཆེའམ་སྙམ་ཀྱང་དཔྱད་དོ། །དེ་དག་གི་ནང་ནས་གཙོ་ཆེར་ཀླུ་མེས་ནས་གྱེས་པ་ནི། དངོས་སློབ་ཀ་ཆུ་བ་གཟུས་རྡོ་རྗེ་རྒྱལ་མཚན་ལ་འདུལ་བའི་བཀའ་བབས། དེ་ལ་བུ་བཞི་སྟེ། གླན་ཚུལ་བྱང་། ཀ་ཆུ་བ་ཚུལ་འབྱུང་། སྣེ་པོ་གྲགས་རྒྱལ། འཛིམ་པ་ཤེར་འོད་དོ། །ཕྱི་མ་གསུམ་ལ་རིམ་བཞིན། ཉང་མཚམ་པ་རིན་ཅེན་བླ་མ། སོག་ཚུལ་ཁྲིམས་བླ་མ། ཀོ་ཁྱིམ་པ་ཡེ་ཤེས་བླ་མའོ། །དེ་གསུམ་དང་འཛིམ་པ་ལས་གཞན་གསུམ་ལ་རྒྱ་འདུལ་བ་འཛིན་པ་དབང་ཕྱུག་ཚུལ་ཁྲིམས་ཀྱི་གསན་ནས་དམ་ཆོས་འདུལ་བའི་བསྟན་པ་ཕྱོགས་བཅུར་རྒྱས་པར་མཛད་དེ། སྔ་ཚར་ཕྱི་ཚར་བར་ཚར་གྱི་སློབ་མ་བྱུང་། །སྔ་ཚར་ལ་དབུས་ཀྱི་ཀ་བ་རྨ་ཚོ་བྱང་རྡོར་དང་ནག་པོ་དར་ཚུལ། གཙང་གི་ཀ་བ་མཐའ་བཞི་བརྩོན་འགྲུས་འབར་དང་འདར་འདུལ་འཛིན། བར་ཚར་གྱི་གསོ་ཚུལ་འཕགས། ཕྱི་ཚར་ས་སྐྱའི་བྲག་དམར་(༡༦བ)
རྡོ་རྗེ་ཕུར་བུ་སྟེ། རྨ་ཚོ་ནས་བྱ་འདུལ་སོགས་དང་། འདར་འདུལ་ནས་ཤ་མི་སོགས་དང་། ཀྱི་པོ་རྣམས་ལ་བྱ་ཀྱི་ཤ་གསུམ་ལ་འདུལ་བ་འཆད་ཅེས་གྲགས་སོ། །བསྟན་པ་ཕྱི་དར་གྱི་ལོ་ཆེན་རིན་བཟང་སོགས་སྔ་རབས་པའི་སྡོམ་བརྩོན་ཕལ་ཆེར་དང་། བཀའ་གདམས་ཀྱི་བཤེས་གཉེན་རྣམས་བླ་ཆེན་གྱི་སྡོམ་རྒྱུན་འདི་ལ་བརྟེན་ནས་སྡོམ་བརྩོན་མཛད་པས་རྣམ་པར་མ་དག་གོ་ཞེས་སྐུར་པ་བཏབ་ན་ཆོས་སྤོང་གི་སྒྲིབ་པ་ཆེན་པོ་གསོག་ལ། བླ་ཆེན་པོས་བསྙེན་རྫོགས་མཛད་པའི་ཚེ་ཁ་སྐོང་བའི་དགེ་འདུན་ལ་རྒྱ་བན་དེ་བྱུང་བ་སོམ་ཉིར་བྱུང་བ་དང་། ཆབ་གཏོར་མ་དང་དེར་བས་མའི་རྒྱུན་ཡང་མང་གཤིས་ཉེས་མེད་ཕུན་ཚོགས་ལ་ཡང་ཤེས་ལྡན་རྣམས་དཔྱད་པ་མཛད་པར་སྣང་། ལྷ་བླ་མ་ཡེ་ཤེས་འོད་ཀྱི་དུས། རྒྱ་གར་ཤར་ཕྱོགས་ཀྱི་པཎྜི་ཏ་ངྷརྨཱ་པཱ་ལ་སྤྱན་དྲངས། འདུལ་བའི་བཤད་པ་དང་ལག་ལེན་མཛད་པའི་སློབ་མའི་གཙོ་བོ་སཱ་ངྷུ་པཱ་ལ། གུ་ཎ་པཱ་ལ། པྲཛྙཱ་པ་ལ་སྟེ། པཱ་ལ་གསུམ་ལ་སོགས་པའི་སློབ་མ་མང་དུ་བྱུང་སྟེ། དེ་རྣམས་ལས་བརྒྱུད་པ་ལ་སྟོད་འདུལ་པར་གྲགས་ཤིང་། ཀུན་མཁྱེན་ཀླུ་སྒྲུབ་རྒྱ་མཚོས། ཀླུ་སྒྲུབ་ཞལ་གྱི་པདྨ་ལས་འཁྱུད་རྒྱ་གར་ཤར་ཕྱོགས་མཁས་པའི་གཙོ། །དྷཱརྨ་པཱ་ལ་དེ་སློབ་མཁན་བུ་ཚུལ་ཁྲིམས་དྲི་ལྡན་པཱ་ལ་གསུམ། །ཞང་ཞུང་འདུལ་འཛིན་རྒྱལ་བ་ཤེས་རབ་པྲ་ཛྙ་པཱ་ལའི་མཁན་བུ་སྟེ། །སྟོད་ལུགས་འདུལ་བ་བརྒྱུད་པ་གཉིས་ལྡན་གཞན་ལས་ལྷག་ཅེས་རང་གིས་བསྟོད། །དེ་ཡང་སྒྲུབ་པ་ཉམས་ལེན་དང་། །བཤད་པའི་རྒྱུད་དང་གཉིས་ཡིན་ཟེར། །ཕྱག་ལེན་བཤད་པ་རང་བཟོ་ཞེས། །གཞན་ལ་བརྣག་དཀའི་ཚིག་མདའ་(༡༧ན)
འཕེན་ཞེས་གསུང་། ཁ་ཆེའི་བསོད་སྙོམས་པ་ཆེན་པོ་ཤཱཀྱ་ཤྲཱི་ཁྲོ་ཕུ་ལོ་ཙཱ་བ་བྱམས་པ་དཔལ་གྱིས་བོད་ཡུལ་དུ་སྤྱན་དྲངས། ཆུ་ཤུལ་སྲོག་མ་དགོན་པར་ཉིན་གཅིག་ལ་མི་བཅུ་གཅིག་བསྙེན་པར་རྫོགས་པའི་ནང་ནས་གྲོ་ཤུལ་བ་ཁེར་གད་བྱང་ཆུབ་དཔལ་དང་། གཙང་པ་རྡོ་རྗེ་དཔལ་གཉིས་མཁན་པོའི་གཙོ་བོར་གྱུར། པཎ་ཆེན་ལ་སྟོད་ནས་ཕེབས་པའི་ཚེ་གཙང་སོ་བ་བསོད་ནམས་མཛེས་བྱ་བས་ཁོ་བོ་དགེ་སློང་གི་བསླབ་པ་བླངས་ནས་ལྟུང་བས་སྐད་ཅིག་ཀྱང་མ་གོས་པའི་དགེ་བ་དེ་རྫོགས་བྱང་དུ་བསྔོ་བ་ཞུ་ཞུས་པས་ཤིན་ཏུ་མཉེས་ནས་ཐུགས་ཀར་ཐལ་མོ་སྦྱར་ཏེ་བསྔོ་རྒྱུ་ཤིན་ཏུ་བཟང་། ངའི་མཆོད་གནས་བྱེད་གསུངས་ནས་ཞམ་རིང་དུ་འཁྲིད་པ་དེ་བྱང་རྡོར་གཉིས་ཀྱི་གྲོགས་སུ་བཏང་ནས་ཟུལ་ཕུའི་ན་བཟའ་འཕྲེང་གསོལ་ལ་འདུལ་བ་སློབ་པར་བཏང་། པཎ་ཆེན་རྒྱ་གར་དུ་ཐེག་སྐབས་བྱང་རྡོར་གཉིས་ཀྱིས་ཕྱགས་ཕྱིར་འགྲོ་བར་ཞུས་པས་ཚད་པ་མི་ཐུབ་གསུངས་ནས་མ་གནང་བར་གཙང་སོ་བ་ལ་བརྟེན་ནས་འདུལ་བ་སྤེལ། དགེ་འདུན་བཞི་སྡེ་དང་མ་བྲལ་བ་གྱིས་གསུངས། རྡོ་རྗེ་དཔལ་བས་སྙེ་མོ་ཚག་མིག་ཚོགས་པ་བཙུགས། སློབ་མ་གཞུ་བ་དཔལ་དཀོན་ཅོག་རྒྱལ་མཚན་གྱིས་བྱེ་རྫིང་ཚོགས་བཙུགས། བྱང་ཆུབ་དཔལ་གྱིས་ཚོགས་དགེ་འདུན་སྒང་བཙུགས། དེའི་སློབ་མ་དབུ་མཛད་བསོད་ནམས་སྟོབས་ཀྱིས་ཆོས་ལུང་ཚོགས་པ་བཙུགས་པས་ཚོགས་སྡེ་བཞིར་གྲགས། ཉང་སྟོད་རྒྱན་གོང་གི་གཙུག་ལག་ཁང་དུ་འཇམ་མགོན་ས་སྐྱ་པཎྜི་ཏས་ཁ་ཆེ་པཎ་ཆེན་ལ་བསྙེན་པར་རྫོགས་པས་བྱང་རྡོར་གཉིས་དང་ས་ལོ་ནས་འཕེལ་བར་པཎ་ཆེན་(༡༧བ)
བརྒྱུད་པར་གྲགས་པས། ཀླུ་སྒྲུབ་རྗེས། འཛམ་གླིང་ཡོངས་ལ་སྙན་གྲགས་མཁན། ཁ་ཆེའི་མཁན་པོ་ཤཱཀྱ་ཤྲཱི། ཁྲོ་ལོ་དད་པའི་ལྕགས་ཀྱུ་ཡིས། །བསྟན་འགྲོའི་དཔལ་དུ་སྤྱན་དྲངས་ཚེ། །མཁན་བུའི་གཙུག་རྒྱན་ལྔ་རིག་དབང་། །ཞི་དུལ་གཙང་མཁས་ས་ལོ་ཙཱ། །རྡོར་བྱང་ལ་སོགས་བསམ་མི་ཁྱབ། །དེང་སང་འདི་ན་བསྟན་པའི་གཞི་མ་བསྙེན་རྫོགས་སྡོམ་པ་ཆུ་བོའི་རྒྱུན། །ས་ལེ་རྡོར་བྱང་ཞལ་ལས་འཐུང་ཡིན་སྟོད་སྨད་ལ་སོགས་ཆུའི་གད་མོ། །འཐུངས་པས་མི་ངོམས་རེག་ན་འཇིག་ཅེས་འདུལ་འཛིན་འགའ་ཞིག་ཐུགས་མི་ཚིམ། །སྡོམ་པའི་རྒྱུན་དང་སྡོམ་པའི་རྒྱུ་ཚོགས་གཟུ་ལུམ་མ་བྱེད་བརྟགས་པས་འཆོང་། ཞེས་གསུངས། ཆོས་ཀྱི་རྒྱལ་པོ་འཕགས་པ་རིན་པོ་ཆེ། བླ་མ་དམ་པ་བསོད་ནམས་རྒྱལ་མཚན། ཀུན་མཁྱེན་བུ། རྒྱལ་སྲས་ཐོགས་མེད་པ། རྡོ་རྗེ་འཆང་ཀུན་དགའ་བཟང་པོ་སོགས་ཕྱིས་ཀྱི་མཁས་གྲུབ་ཕལ་ཆེར་པཎ་ཆེན་བརྒྱུད་ལས་སྡོམ་པ་བཞེས་པ་མང་ཞིང་། པཎ་ཆེན་བྱམས་པ་གླིང་པས་གསང་སྔགས་མཁར་དུ་རྒྱལ་ཚབ་ཐམས་ཅད་མཁྱེན་པས་མཁན་པོ་དང་། འདུལ་འཛིན་གྲགས་པ་རྒྱལ་མཚན་གྱིས་ལས་སློབ་མཛད་ནས་བསྙེན་པར་རྫོགས། དེའི་མཁན་བུ་ཀུན་མཁྱེན་རྡོ་རྗེ་གདན་པ་ཡིན་པས་སྡོམ་རྒྱུན་འདི་རྣམ་པར་དག་ཀྱང་རྒྱལ་ཚབ་རྗེ་སྟོད་འདུལ་བའི་བརྒྱུད་པར་སོང་གཤིས། པཎ་ཆེན་བརྒྱུད་འཕེལ་ལ་རེའི་ཐུགས་ཞེན་གྱིས་བསྙེན་རྫོགས་ཀྱི་མཁན་པོ་མ་མཛད་སྐད་དོ། །ཐམས་ཅད་མཁྱེན་པ་ཡེ་བཟང་རྩེ་བའི་ཞལ་སྔ་ནས་ཀྱིས་བདག་ཉིད་ཆེན་པོ་བློ་བཟང་གྲགས་པའི་དཔལ་གྱིས་མཛད་པའི་སྐབས་(༡༨ན)
གཉལ་གྱི་མོ་ལའི་རྩར་ཞག་ས་མཛད་པས། ཁྱོད་སངས་རྒྱས་འཇིག་རྟེན་དུ་བྱོན་པ་དང་འདྲ་བ་ཞིག་འོང་བར་ཤེས་པར་གྱིས་ཤིག །ཅེས་པའི་ལུང་བསྟན་པ་བརྙེས། ཡི་དམ་གྱིས་ཀྱང་འདུལ་བའི་བསླབ་པ་ལ་བརྟེན་ནས་གཞན་ལ་ཕན་པ་ཆེན་པོར་འགྱུར་བར་ལུང་བསྟན་པས་ཐོག་མར་དཔོན་སློབ་རྣམས་ཀྱི་བླ་གོས་དྲས་ཤིང་དྲུབས་པ་དང་ལྷུང་བཟེད་དང་གདིང་བ་ལ་སོགས་པའི་ཡོ་བྱད་རྣམས་བསྣམས་ནས་གཞན་དག་གིས་མཐོང་ན་རབ་ཏུ་བྱུང་བའི་ཚུལ་འདི་ལྟ་བུ་ཞིག་ཁོ་ནའོ། །ཞེས་ཡིད་ཆེས་པར་འགྱུར་བར་མཛད་ནས་ཕྱིས་ནི་ལོ་རེའམ་ཟླ་རེ་ཙམ་ཆོས་ཉན་པར་རྩོལ་བའི་སློབ་མ་དག་ཀྱང་འདུལ་བའི་ཀུན་ཏུ་སྤྱོད་པ་ལ་བཀོད་པས་མངོན་སུམ་དུ་གྱུར་བ་ལྟ་ཞོག །རྒྱང་རིང་པོ་ནས་ཐོས་པ་དག་ཀྱང་སྤུ་ལོང་གཡོ་བས་ཕྱོགས་ཐམས་ཅད་དུ་སྙན་པས་ཁྱབ་སྟེ་འགྲན་ཟླ་མེད་པར་གྱུར་ཞེས་དང་། རྗེ་བཙུན་དེའི་བཀའ་དྲིན་ལས་ཞལ་མ་མཐོང་ཞིང་ས་ཕྱོགས་རིང་ན་གནས་པའི་རབ་ཏུ་བྱུང་བ་དག་ཀྱང་དྲས་དྲུབས་མ་དང་གདིང་ལྷུང་ལ་སོགས་པའི་ཡོ་བྱད་བསྲེལ་བ་དང་ཕྱི་རོལ་ཡང་སྡུད་མ་སྤངས་ཏེ་ཟླ་གམ་གྱོན་པ་དང་ཞྭའི་མདོག་ཀྱང་གསེར་མདོག་ཏུ་བྱེད་པ་འདི་ཡིན་ནོ། །འདི་དག་ནི་ཐུན་མོང་དུ་སྣང་བའི་ཆེ་བ་ཙམ་ཞིག་བརྗོད་པ་སྟེ་གསང་བའི་བདག་པོ་ཕྱག་ན་རྡོ་རྗེས་མཁན་ཆེན་ལས་ཀྱི་རྡོ་རྗེ་ལ་བཀའ་སྩལ་པའི་ཡི་གེ་ལས། ང་ལག་ན་རྡོ་རྗེས་ཀྱང་མ་ཏི་བྷ་དྲ་ཀཱིརྟི་ཤྲཱིའི་ཡོན་ཏན་གྱི་མཐའ་རྟོགས་པར་མི་ནུས་སོ་གསུང་། ཚད་མ་ལས་ནི་འདིའི་ཕྱི་མ་ལ་དགའ་ལྡན་དུ་བྱང་ཆུབ་སེམས་དཔལ་འཇམ་དཔལ་སྙིང་པོར་གྱུར་རོ་ཞེས་བྱ་བ་དང་། (༡༨བ)
མ་འོངས་པ་ན་དེ་བཞིན་གཤེགས་པ་སེང་གེའི་ང་རོར་འགྱུར་རོ་ཞེས་བྱ་བ་དག་ལ་ཡིད་འཁྱོག་པ་མེད་ཅིང་ཤིན་ཏུ་མཐོ་བའི་ས་ལ་བཞུགས་པ་ཞིག་འདིར་སེམས་ཅན་གྱི་དོན་དུ་བྱོན་ནོ་ཞེས་རྒྱ་ཆེར་བསྔགས་པའི་ཡུལ་གངས་རིའི་ལྗོངས་འདིའི་བསྟན་པའི་ཉི་མ་གཅིག་པུ་བ་བློ་བཟང་གྲགས་པའི་དཔལ་གྱིས་ཀྱང་ཡར་ཀླུངས་རྣམ་རྒྱལ་དུ་ཚག་མིག་མཁན་ཆེན་ཚུལ་ཁྲིམས་རིན་ཆེན་ལས་བསྙེན་པར་རྫོགས་པར་མཛད་དོ། །པཎ་ཆེན་བརྒྱུད་པར་རྣམ་གྲངས་མང་ན་ཡང་དཔལ་མགོན་འཕགས་པ་ཀླུ་སྒྲུབ་ནས། ཡོན་ཏན་བཤེས་གཉེན། རིན་ཅེན་བཤེས་གཉེན། ཆོས་ཀྱི་བཟང་པོ། གུ་ཎ་པ་ཏི། ཆོས་ཀྱི་ཕྲེང་བ། འབྱུང་གནས་སྦས་པ། ཁ་ཆེ་པཎ་ཆེན་ཤཱཀྱ་ཤྲི། འཇམ་དབྱངས་ས་སྐྱ་པཎ་ཆེན། ཁང་སྟོན་འོད་ཟེར་རྒྱལ་མཚན། མཉམ་མེད་གྲགས་པ་རྒྱལ་མཚན། སྔགས་འཆང་གཟུངས་ཀྱི་དཔལ་བ། བོ་དོང་དགེ་ལེགས་བཟང་པོ། སྔགས་འཆང་ཨཱ་ནནྟ་པ། སྒྱེ་ཆུ་བ་བྱམས་པ་ཆོས་རིན་ཅེན། སྒྱེ་ཆུ་བ་བརྩོན་འགྲུས་རྒྱ་མཚོ། སྒྱེ་ཆུ་བ་ཆོས་རྒྱལ་དཔལ་འབྱོར། སྒྱེ་ཆུ་བ་ནམ་མཁའ་རྒྱལ་མཚན། སྒྱེ་ཆུ་བ་ནམ་མཁའ་དབང་ཕྱུག །རྗེ་སངས་རྒྱས་འོད་ཟེར། ཐམས་ཅད་མཁྱེན་པ་ཀླུ་སྒྲུབ་རྒྱ་མཚོ། འཇམ་དབྱངས་དགའ་བའི་བཤེས་གཉེན། འདིར་སྐྱིད་གཤོངས་རྗེ་དཔོན་མང་ཐོས་གྲགས་པ་རྣམ་རྒྱལ། ལྷ་ཁང་མཁན་ཆེན་བྱམས་པ་བསོད་ནམས་བཀྲ་ཤིས། དོན་གྱི་སླད་དུ་མཚན་ནས་སྨོས་ཏེ་ཡོངས་རྫོགས་བསྟན་པའི་མངའ་བདག་མཁན་རིན་པོ་ཆེ་གནས་བརྟན་ཉེ་བར་འཁོར་གཉིས་པ་རིན་ཅེན་བསོད་ནམས་(༡༩ན)
མཆོག་གྲུབ་བསྟན་པའི་རྒྱལ་མཚན་དཔལ་བཟང་པོས་སླར་ཡང་ཕྱོགས་ཀུན་ཏུ་དར་རྒྱས་སུ་མཛད་དོ། །གཉིས་པ་དེ་དག་གི་དོགས་གནས་ལ་མཐའ་དཔྱད་པ་ནི། བུ་སྟོན་ཐམས་ཅད་མཁྱེན་པས་མཛད་པའི་དུས་བསྒོའི་མཇུག་ཏུ། ཀྱེ་མ་གངས་ཅན་ཁྲོད་འདི་ན། །མཁན་སློབ་ཁྱིམ་པས་བྱེད་པ་དང་། །སྡོམ་པ་གཏོར་མས་ལེན་པ་དང་། །དུས་བསྒོ་ཧོར་ཟླས་བྱེད་པ་མང་། །མདོ་དང་ཀརྨ་ཤ་ཏམ་དུ། །ལོ་ཟླ་ཚེས་གྲངས་བཤད་པ་མེད། །ཟླ་བ་བདུན་པའམ་བརྒྱད་པ་ནས། །ལོ་འགོ་འཛིན་པའང་མདོ་དང་འགལ། །མང་དུ་སྨྲས་ན་དགྲ་སོགས་སྡང་། །མ་སྨྲས་ལག་ལེན་འཆོལ་པར་སྤྱོད། །འདི་འདྲའི་དུས་ལ་བབ་པ་ན། །བདག་ལྟ་བུ་ལ་ཅི་བྱ་ཡོད། ཅེས་དང་། སྒྲ་ཚད་པ་རིན་ཅེན་རྣམ་རྒྱལ་གྱི་ཞུ་ཡིག་ཐུགས་རྗེ་བསྐུལ་བ་ལས། ཁྱིམ་པ་རྣམས་ཀྱིས་མཁན་སློབ་བྱེད་ཅིང་ཧོར་འདྲས་ཁ་བསྐོང་སྡོམ་པ་གཏོར་མས་ལེན་པར་བྱེད་ཅིང་བསྒྲུབ་བྱ་ཐག་རྒྱས་འཇལ་བར་བྱེད། སྲོག་གཅོད་རྫུན་སྨྲ་མ་བྱིན་ལེན་སོགས་ཕམ་པས་དཀྲིས་ཀྱང་མཁན་སློབ་བྱེད་ཅིང་སྡོམ་བརྩོན་གཞན་ལ་རྣམ་པ་སྣ་ཚོགས་ཀྱིས་སྐུར་བ་འདེབས། རྩ་བཞི་སྡོམ་ཀྱང་ལྷག་མ་ལ་སོགས་བག་ཡངས་སྤྱོད་ཅིང་བླང་དང་དོར་བར་བྱ་བ་མི་ཤེས་དགེ་སློང་ཡིན་ཞེས་བདག་ལ་བསྟོད། ཅེས་སོགས་གསུངས་པ་ལྟར། བསྟན་པའི་འཕེལ་འགྲིབ་ཀྱི་དབང་གིས་ལག་ལེན་འཆོལ་བར་སྤྱོད་པ་སྣ་ཚོགས་ཤིག་འབྱུང་བའི་མཁན་པོ་ཁྱིམ་པས་བྱེད་པ་ནི། རྭ་ལོ་ཆེན་པོར། སྐྱོ་འདུལ་འཛིན་ན་རེ། ཁྱེད་རབ་ཏུ་བྱུང་བའི་མཁན་པོ་མཛད་པ་ལ་མཁན་པོར་འོས་པའི་(༡༩ན)
ཡོན་ཏན་མ་ཚང་སྟེ། མཁན་པོ་བྱ་བ་བསྙེན་པར་རྫོགས་ནས་ལོ་བཅུ་ལོན་པའི་དགེ་སློང་འདུལ་བའི་སྡེ་སྣོད་ཤེས་པ་དགོས་པ་ལ། ཁྱེད་ནུབ་ཀྱི་རིགས་སུ་ཤ་ཆང་ལ་ལོངས་སྤྱོད། སྐབས་སུ་མི་ལ་མཐུ་གཏད་བཏང་ནས་གསོད། ལྐོག་ཏུ་བུད་མེད་བསྟེན་པས་གཞན་གྱི་མཁན་པོ་བྱས་ན་བསྟན་པ་ལ་གནོད་ཟེར་ཞིང་། གཞན་ཡང་མང་པོའི་གསེབ་ཏུ་ཆོས་གཏམ་ལ་བསྙད་བཏགས་ནས་ངན་སྨྲས་མང་དུ་བྱས་པ་ན། དེར་རྭ་ཆེན་ཐུགས་ཅུང་ཟད་ཁྲོས་པའི་རྣམ་པས་འདི་སྐད་གསུངས་ཏེ། ཤ་ཆང་བཟའ་བ་ཚོགས་ཀྱི་འཁོར་ལོ་ཡིན། །དམ་ཉམས་གསོད་པ་སྔགས་ཀྱི་དམ་ཚིག་ཡིན། །བུད་མེད་བསྟེན་པ་ལས་ཀྱི་ཕྱག་རྒྱ་ཡིན། །ང་ཡིས་དེ་ལྟར་ཤེས་པའི་གནས་སྐབས་ན། །འདུལ་འཛིན་དགེ་སློང་དག་དང་འགལ་བ་མེད། །དེ་བས་དམ་ཉམས་ལོག་ལྟ་ཅན་ཁྱོད་ཀྱང་། །ཞག་བདུན་ཐོ་རངས་གཤེགས་སུ་གསོལ་བར་བྱ། གསུངས་པས། མཁན་པོ་དེ་ཞག་བདུན་ན་ལུས་ངག་ཡིད་གསུམ་རེངས་ནས་འདས་པས་རྭ་ཆེན་རིག་པ་འཛིན་པ་ཆེན་པོ་ལ་ལས་རྒྱ་བསྟེན་པ་སོགས་གྲོགས་སུ་འགྱུར་ནའང་། དེ་རྒྱུ་མཚན་དུ་བྱས་ནས་མཁན་པོ་མཛད་མི་རིགས་པར་མངོན་ཏེ། ཤྲཱི་ནཱ་ལནྡའི་མཁན་པོ་གནས་བརྟན་ཆེན་པོ་དཔལ་ལྡན་ཆོས་སྐྱོང་ལྟ་བུའང་བརྟུལ་ཞུགས་ཀྱི་སྤྱོད་པ་མཛད་ནས་བིརླ་བར་གྲགས་པའི་ཚེ་མཁན་པོ་མ་མཛད་ཅིང་། དེས་མཚོན་ནཱ་རོ་ཏ་པ་སོགས་གྲུབ་ཆེན་མང་པོའང་སྐུ་ཚེའི་སྟོད་སྨད་ཀྱི་མཛད་འཕྲིན་མི་གཅིག་པ་སོ་སོར་ཡོད་ཅིང་། སློབ་དཔོན་ཆེན་པོ་པདྨ་འབྱུང་གནས་གདུལ་བྱའི་རང་སྣང་དུ་ཡོན་ཏན་(༢༠ན)
གསུམ་གྱིས་སངས་རྒྱས་གཞན་ལས་ཁྱད་ཞུགས་པ་དུས་གསུམ་རྒྱལ་བའི་སྤྱི་གཟུགས་དེས་ཀྱང་བོད་དུ་གསང་སྔགས་ཀྱི་རྡོ་རྗེ་སློབ་དཔོན་ལས་རབ་བྱུང་གི་མཁན་སློབ་མ་མཛད། དེར་མ་ཟད་འོ་སྐོལ་གྱི་སྟོན་པས་ཀྱང་རྡོ་རྗེ་འཆང་གི་སྐུའི་རྣམ་པས་གཞན་ལ་ཉན་ཐོས་ལུགས་ཀྱི་སོ་ཐར་གྱི་སྡོམ་པ་ཕོག་པ་མེད་པས། ཚད་ཐུབ་ཀྱི་དཔང་པོ་རྣམས་ལ་འཐད་མི་འཐད་ཀྱི་རྣམ་དབྱེ་ཡོད་མོད། བོ་དོང་པཎ་ཆེན་འཇིགས་བྲལ་གྱིས་ཤེལ་དཀར་རྡོར་འཛོམ་གསང་ཡུམ་དུ་བསྟེན་པའང་རྭ་ལོའི་རྣམ་ཐར་དང་མཚུངས་པར་མངོན་ཞིང་། དུས་ཕྱིས་རྟག་བརྟན་སྤྲུལ་སྐུ་ཀུན་དགའ་སྙིང་པོ་དང་། ཟལ་མོ་བྲག་སྐུ་སྐྱེ་སྔ་རྟིང་འཇམ་མགོན་སྐུ་སྐྱེ་སོགས་ཀྱིས་མི་ཚངས་པར་སྤྱོད་པ་ལ་འཛེམ་བག་མེད་བཞིན་དུ་མཁན་པོའི་བྱ་བ་མཛད་ཅིང་། གསེར་མདོག་ཅན་པའི་དགེ་བཤེས་སུ་རློམ་པ་འདྲ་ཡང་མིག་ཅན་གཡང་མཆོངས་ཀྱི་རྣམ་པས་དེ་དག་ལས་སྡོམ་པ་ལེན་པར་གྲགས་ཤིང་། ཀར་འབྲུག་རྣམས་ནི་ཅི་མཛད་ལེགས་པར་མཐོང་བའི་མོས་གུས་ལ་བརྟེན་ནས་བླ་མའི་བྱིན་རླབས་སེམས་ལ་ཞུགས་དྲགས་པས་གླེང་གཞི་བྱ་བའི་ཡུལ་མ་ཡིན་པར་སེམས། སྡོམ་པ་གཏོར་མས་ལེན་པར་འགའ་ཞིག་སྔགས་རྙིང་མའི་མདོ་དབང་གི་ཉན་ཐོས་སྐབས་ལ་ཟུར་ཟ་བར་འཆད་ཀྱང་། མདོ་དབང་དུ་མ་ཟད་སྔ་འགྱུར་བཀའ་གཏེར་མང་པོར་ཐེག་པ་རིམ་པ་དགུའི་དབང་རིམ་བཞིན་བསྐུར་བའི་སྔ་མ་སྔ་མ་ཕྱི་མ་ཕྱི་མའི་གཞི་རྟེན་དུ་དགོངས་པའི་ཉན་ཐོས་དང་འབྲེལ་བའི་དབང་གི་བརྡ་ཆད་ཙམ་དུ་སོ་ཐར་ཕྱོགས་མཚུངས་ཙམ་ལས་ཆོ་ག་མཚན་ཉིད་པའི་སྒོ་ནས་སྡོམ་པ་འབོགས་པ་(༢༠བ)
མིན་ཞིང་། བསྐུར་ཡུལ་ཀྱང་རབ་བྱུང་དང་ཁྱིམ་པ་ལ་ངེས་པ་མེད་པས་སྔགས་གསར་མའི་སྐབས་སུ་ཡང་སྡོམ་པ་དང་མི་ལྡན་པའི་ཁྱིམ་པ་ལ་དབང་བསྐུར་བའི་སྔོན་དང་དེའི་གཞི་རྟེན་དུ་གྱུར་པའི་མི་དགེ་བཅུ་སྤོང་གི་ཁྲིམས་ཤིག་དགོས་པ་དང་ཕྱོགས་མཚུངས་པས། དེ་ཉན་ཐོས་ཀྱི་སོ་ཐར་མཚན་ཉིད་པའི་དབང་དུ་བྱས་ན་དབང་གི་སྣོད་དུ་རུང་བ་ལ་གླིང་གསུམ་གྱི་སྐྱེས་པ་བུད་མེད་ཟ་མ་དང་མཚན་ཉིད་པ་མ་ཡིན་པ་ཞིག་དགོས་པར་འགྱུར་བས་ཤེས་བྱ་མཐའ་བཀག་པའི་གོ་ཡུལ་ཤིན་ཏུ་དོག་ལ། ཁོ་ན་རེ། དེ་ལྟར་ཡིན་དུ་ཆུག་ཀྱང་། མདོ་དབང་ལ་གསོལ་བཞིའི་རྣམ་གཞག་ཀྱང་ཕྱོགས་འདྲ་ཙམ་འདུག་པས་མི་འཐད་དོ་ཞེ་ན། སྡོམ་གསུམ་ལས། །ཐེག་པ་ཆེན་པོ་ལས་བྱུང་བའི། །སོ་སོར་ཐར་པ་བཤད་ཀྱིས་ཉོན། །བྱང་ཆུབ་སེམས་དཔའ་ཉིད་ལ་ཡང་། །སོ་སོར་ཐར་པ་འབོགས་པ་ཡི། །ཆོ་ག་འགའ་ཞིག་ཡོད་མོད་ཀྱི། །དེ་ཡི་ཆོ་ག་ཕལ་ཆེར་ནུབ། །ཅེས་ཐེག་ཆེན་ལུགས་ཀྱི་སོ་ཐར་གྱི་འབོགས་ཆོག་གི་ལག་ལེན་ཕལ་ཆེར་ནུབ་པར་གསུངས་ཤིང་དཀོན་ཅོག་བརྩེགས་པའི་དྲག་ཤུལ་ཅན་གྱིས་ཞུས་པར། བྱམས་འཇམ་དབྱངས་ལོངས་སྐུའི་ཆ་བྱད་ཅན་གྱིས་ཁྱིམ་བདག་དགུ་སྟོང་དང་བདུན་སྟོང་གཟུགས་མ་བསྒྱུར་བར་བསྙེན་པར་རྫོགས་པར་མཛད་པ། སྡོམ་གསུམ་ལས། རྒྱལ་སྲས་བྱམས་པ་འཇམ་དབྱངས་སོགས། །བདག་ཉིད་ཆེན་པོ་འགའ་ཞིག་གིས། །མཁན་པོ་མཛད་ནས་འགྲོ་མང་ལ། །བསྙེན་པར་རྫོགས་པར་མཛད་དོ་ཞེས། །ཚིག་འབྲུ་ཙམ་ཞིག་གསུངས་མོད་ཀྱི། །འོན་ཀྱང་དེ་ཡི་ཆོ་ག་ནི། །མདོ་ལས་གསུངས་པ་ངས་མ་མཐོང་། །ཞེས་བསྟན་པ་ཕྱི་(༢༡ན)
དར་ལ་བཤད་སྲོལ་འདི་དག་མཁས་པ་རྣམས་ཀྱིས་མ་གཟིགས་ཀྱང་སྔ་འགྱུར་གྱི་སྐབས་རྫུ་འཕྲུལ་ཐོགས་མེད་མངའ་བའི་པཎ་གྲུབ་རྣམས་ཀྱིས་མཁའ་སྤྱོད་ཨོ་རྒྱན་གྱི་ཡུལ་སོགས་སོ་སྐྱེས་བགྲོད་པར་མི་ནུས་པའི་ཞིང་ཁམས་སུ་བཞུགས་པ་གཟིགས་པར་བརྟེན་ལོ་པཎ་རྣམས་ཀྱིས་མདོ་དབང་གི་སྐབས་ཐེག་པ་ཆེན་པོ་དང་འབྲེལ་བའི་ཕྱག་ལེན་རྒྱས་པ་མ་མཛད་པའི་ངེས་པ་མེད་ཅིང་། སློབ་དཔོན་དང་སློབ་མའང་རབ་བྱུང་དང་ཁྱིམ་པ་གོས་དཀར་ཅན་ལ་མཐའ་མ་བཀག་པས་བཤད་མ་ཐག་པའི་ལུགས་སྲོལ་དེ་དག་གི་རྗེས་སུ་ཞུགས་པར་མངོན་པས། སའི་སྙིང་པོ་འཁོར་ལོ་བཅུ་པའི་མདོ་ལས། རིགས་ཀྱི་བུ་གཞན་ཡང་དགེ་སློང་རྣམ་པ་བཞི་ཡོད་དེ། བཞི་གང་ཞེ་ན། དོན་དམ་པའི་དགེ་སློང་དང་། ཀུན་རྫོབ་ཀྱི་དགེ་སློང་དང་། ལུག་ལྐུགས་པ་ལྟ་བུའི་དགེ་སློང་དང་། ཁྲེལ་བ་དང་ངོ་ཚ་མེད་པའི་དགེ་སློང་ངོ་། །དེ་ལ་ཇི་ལྟར་ན་དོན་དམ་པའི་དགེ་སློང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་འདས་སམ། བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་སློང་ཡོན་ཏན་ཆེན་པོ་དང་ལྡན་པ་ཆོས་ཐམས་ཅད་ལ་དབང་དུ་གྱུར་བའམ། རང་སངས་རྒྱས་ཀྱི་བྱང་ཆུབ་བམ། དགྲ་བཅོམ་པའམ། ཕྱིར་མི་འོང་བའམ། ལན་གཅིག་ཕྱིར་འོངས་པའམ། རྒྱུན་དུ་ཞུགས་པ་སྟེ། གང་ཟག་རྣམ་པ་བདུན་པོ་འདི་དག་གི་དོན་དམ་པའི་དགེ་སློང་དུ་བསྡུ་བ་དང་། སྐྱེ་བོ་གང་ཁྱིམ་ན་གནས་ཤིང་སྐྲ་དང་ཁ་སྤུ་ཡང་མ་བྲེགས། ཆོས་གོས་ཀྱང་མི་གོན། རབ་ཏུ་བྱུང་བས་སོ་སོ་ཐར་པའི་ཚུལ་ཁྲིམས་ཐམས་ཅད་ཀྱང་མ་ནོས། གསོལ་བ་དང་། ཞུ་བའི་ལས་དང་། གསོ་སྦྱིན་དང་། ཚུལ་གྱི་ལས་(༢༡བ)
ཐམས་ཅད་ཀྱི་ནང་དུ་མི་ཆུད་མོད་ཀྱི། འཕགས་པའི་ཆོས་དང་ལྡན་ལ་འཕགས་པའི་འབྲས་བུ་ཐོབ་པས་ན་དེ་ཡང་དོན་དམ་པའི་དགེ་སློང་དུ་བསྡུས་ཏེ། དེ་དག་ནི་དོན་དམ་པའི་དགེ་སློང་ཞེས་བྱའོ། །ཞེས་གསུངས་པས་ཤེས་ནུས་ཤིང་། དེང་སང་གི་མདོ་དབང་འཆད་ཉན་བྱེད་པ་རྣམས་བྱམས་འཇམ་དབྱངས་སོགས་གང་ཟག་ཁྱད་པར་ཅན་རྣམས་དང་འདྲ་བ་མ་ཡིན་ཀྱང་། དེ་དག་ལ་མིག་ཡར་ལྟའི་ཚུལ་གྱིས་རྗེས་སུ་འཇུག་པ་སྟེ། དེང་སང་གི་རབ་ཏུ་བྱུང་བར་ཁས་འཆེ་བ་རྣམས་ཀྱང་འོད་སྲུངས་ཆེན་པོ་དང་ཤཱ་རིའི་བུ་སོགས་ཀྱི་ངང་ཚུལ་ལ་འཇུག་པར་མོས་པ་ལྟ་བུའོ། །གོང་དུ་བཤད་པ་དེ་ཇི་ལྟར་ཡིན་སྙམ་ན་ཕྱོགས་འདི་ལ་ཞལ་འདྲིས་ཆུང་བའི་དྭགས་ཤངས་ཞི་གཅོད་སོགས་སུ་མ་ཟད། ས་དགེའི་ལུགས་འཛིན་གྱི་བླ་མ་དང་འབུལ་སྡུད་པ་ཐོས་པ་ཆུང་ཞིང་སྙིང་ཁམ་ཆེ་བ་འགའ་ཞིག་གིས་ཁམས་སོག་མོན་ཀོང་སོགས་ཀྱི་དབང་རྟུལ་འདྲ་ལ། ཆོས་གོས་གསུམ་དང་ལྷུང་བཟེད་གདིང་བ་གཏད་རྗེས་སོ་སོའི་ཆོས་སྐྱོང་གང་ཡིན་གྱི་གཏོར་མ་མགོ་ཐོག་ཏུ་བཞག་ནས་བཀའ་བསྒོས་པའི་རྗེས་སུ་ཁྱོད་ཆོས་སྐྱོང་ཆེ་གེ་མོ་འདིའི་སྒོ་ནས་བསྙེན་པར་རྫོགས་སོ་ཞེས་བརྡ་སྤྲད་པའི་གཏམ་རྣ་བར་ཐོས་སུ་མ་ཟད་ཕྱིས་ཀྱང་ཐོར་བུ་བྱུང་བ་མིག་མཐོང་ལག་ཟིན་གྱི་ངག་རྒྱུན་སྣང་བས་སྔ་དུས་ཀྱང་བསྟན་པ་ལ་དབང་ཟ་བ་འདྲ་བྱུང་བར་བུ་སྟོན་ཡབ་སྲས་ཐུགས་མ་རངས་བའི་ཟུར་མདའ་འཕེན་པར་ཐལ་མོ་སྦྱོར་བ་ལས་ཞུ་ལན་འབུལ་ཅི་འཚལ། ཀརྨ་པ་མི་བསྐྱོད་རྡོ་རྗེའི་ཉི་མའི་དཀྱིལ་འཁོར་དུ་ཐག་རྒྱ་མ་རུང་བའི་གསལ་ག་དངོས་བསྟན་ལ་མེད་འདུག་པ་དེ་ལ་(༢༢ན)
བརྟེན་ནས་གཞན་དག་གིས་རྩོད་པ་བྱུང་གི་དོགས་ནས་འཛམ་གླིང་རྒྱན་གཅིག་གི་སྦུབས་བཟང་མཛད་པ་འདྲ། ཀམ་ཚང་པ་རྣམས་སྔོན་གྱི་འདུལ་བ་འཛིན་པ་རྡོ་རྗེ་གཞོན་ནུའི་ཕྱག་ལེན་ཡིན་ཟེར་ནས་བསྙེན་པར་རྫོགས་འདོད་ཀྱི་བསྒྲུབ་བྱ་བཅུའམ་ཉི་ཤུའམ་སུམ་ཅུ་ལ་སོགས་པ་ཇི་ཙམ་ཚོགས་པ་ལ་མཁན་པོའི་བྱ་བ་དུས་ཅིག་ཅར་དུ་མཛད་ནས། ལས་དངོས་གཞི་ལ་བསྒྲུབ་བྱ་དུ་ཡོད་སྲད་བུས་བསྐོར་བའི་མཚམས་ཐ་དད་དུ་བཅད་ནས་བཞག །མཚམས་དེ་ཐམས་ཅད་ཐག་པ་ལྟ་བུས་ནོན་པར་བྱས་པའི་སྣེ་རིང་དུ་བརྐྱངས་བའི་ཁ་ན་ཕར་གདན་བཤམས་ལ་དེར་ལས་གྲལ་གྱི་དགེ་འདུན་གྲངས་ཚང་བཞུགས་ནས་ལས་ཀྱི་ཆོ་ག་བརྡ་སྤྲོད་པར་བྱེད་ཅིང་། དེའི་ཚེ་ན་བསྒྲུབ་བྱ་དུ་ཡོད་པ་ལ་ལས་ཀྱི་ཆོ་ག་གཅིག་ལས་བསྙེན་རྫོགས་ཀྱི་སྡོམ་པ་ཅིག་ཅར་དུ་སྐྱེ་བར་འདོད་པར་པཎ་ཆེན་ཤཱཀྱ་མཆོག་ལྡན་གྱིས། འདི་རུང་བ་ཙམ་ཡིན་ཞེས་གསུངས། ཁོང་པ་འདུལ་འཛིན་ཆེན་པོར་འདུག་པས་མ་དགོངས་པ་ག་ལ་ཡིན་ཀྱང་རིན་སྤུངས་དོན་ཡོད་རྡོ་རྗེ་སོགས་ཀྱི་ཐུགས་ལ་མི་འཐད་པ་བྱུང་གི་དོགས་པའི་བསྟན་པ་དང་ཆེན་པོའི་ངོ་འཛིན་ཚོང་རྒྱབ་པར་མཆིས། པཎ་ཆེན་དང་ཀརྨ་པ་ཆོས་གྲགས་རྒྱ་མཚོ་དུས་མཚུངས་པས་ཕྱག་ལེན་འདི་ཀར་ལུགས་ལ་རྣམ་རྟོག་ཆོས་སྐུའི་ཀློང་ནས་དུས་རེ་སྔ་ཞིག་ཤར་བར་མངོན། སྨན་ཐང་པ་དཀོན་ཅོག་ལྷུན་གྲུབ་ཀྱི་དྲིས་ལན་ཞྭ་དམར་བ་དྲུག་པས་མཛད་པར་སྡོམ་པ་ཐག་རྒྱ་མར་གྲགས་པ་འདི་ལ་སྔོན་གྱི་དགེ་བའི་བཤེས་གཉེན་དམ་པ་རྣམས་ཀྱིས་རྩོད་པའི་ཡུལ་དུ་མཛད་པ་མིན་ཀྱང་། ཕྱིས་མི་མཁས་པ་མཁས་(༢༢བ)
པའི་གྲགས་པ་འདོད་པ་རྣམས་ཀྱིས། ཇི་སྐད་དུ། སྟོང་གི་འཁོར་ལོས་སྒྱུར་རྒྱལ་ལ། །སློང་པོ་རྣམས་ཀྱི་དབྱུག་པས་འགྲན། ཞེས་པ་ལྟར་གཞི་མེད་པའི་སྐུར་བ་དང་། རྒྱུ་མེད་པའི་རྩོད་པ་སྨྲ་བ་དག་ཡོད་མོད། དེ་ལ་འཐད་པ་འདི་ལྟ་བུ་དག་ཡོད་དེ། བཅོམ་ལྡན་འདས་ཀྱི་ལུང་ལས། ཡིད་འོང་ཨུཏྤ་ལི། དགེ་སློང་གང་དག་དགྲ་བཅོམ་པའི་ཕྱིར་རམ། འབྲས་བུའི་ཕྱིར་དགེ་སློང་དེ་དག་གིས་ཁྱིམ་པ་བརྒྱན་པ་ལྟ་བུའམ་བར་དུ་རབ་ཏུ་བྱུང་བ་རྣམས་བསྙེན་པར་རྫོགས་པར་བྱ་སྟེ། དེ་ཡུལ་ནཱ་ལི་ཏ་ལྟ་བུར་མི་གནོད་བཞིན་རྒྱལ་པོའི་འཁོར་མཐའ་དག་རབ་ཏུ་བསྙེན་པར་རྫོགས་པར་བྱེད་ན། ར་བའི་བར་རམ། རེ་ཁཱའམ། མཐའི་ལོ་མའམ། རས་བྱེད་ཀྱི་སྐུད་པའམ། སྲོ་མ་ནཱི་ལ་སོགས་པ་དག་གིས་བར་བྱས་པ་ལ་བློ་མཐུན་པ་གྲངས་ཅན་དག་གནས་པ་ལ་སྡོམ་པ་སྟེར་བར་བྱེད་དམ། འབོགས་པར་བྱེད་དམ། སྦྱིན་པར་བྱེད་དམ། གསལ་བར་བྱེད་ན་དེ་ནི་རུང་བ་སྟེ། གཞི་རྣམ་པར་དག་པའོ། །ཞེས་དང་། ཡང་ལུང་ལས། བཟང་པོ་དང་། པདྨ་གྲགས་དང་། དགེ་བྱེད་དང་། དེ་ནི་དཀྱིལ་འཁོར་གཅིག་ཏུ་བྱའོ། །དེས་ན་ནཱ་མི་ལཱི་ཞེས་པས་འདི་སྐད་གསོལ་ཏོ། །གལ་ཏེ་བཟང་པོ་དང་། པདྨ་གྲགས་དང་། དགེ་བྱེད་དང་། དབང་པོ་དང་། བྱུང་བ་དང་། གནག་སྐྱེས་དག་བཅོམ་ལྡན་འདས་ལ་གཅིག་གིས་བསྙེན་པར་རྫོགས་པར་བགྱིད་ན། སྐབས་འགར་རམ། འདི་ཉིད་ཁོ་ནར་ཡིན། བཀའ་སྩལ་པ། རྟགས་ཙམ་དང་མཚན་མ་ཙམ་གྱིས་གང་ལ་བར་ཆོད་པར་བགྱི། ཞེས་པ་འདི་ངའི་ཉན་ཐོས་རྣམས་ཀྱིས་ལན་ཅིག་མ་ཡིན་གཉིས་(༢༣ན)
མ་ཡིན། དུས་རེ་བ་མ་ཡིན་ཏེ་རྣམ་པ་ཀུན་དུ་རུང་བས་སྤྱད་པའོ། །ཞེས་དང་། མ་ག་དྷ་དང་། ཨཱ་སི་པཪྤ་ཏའི་གནས་སུ་རྒྱལ་པོ་གྲགས་ཆེན་བུ་ལྔ་བརྒྱ་འཁོར་ཁྲི་ཕྲག་བདུན། བློན་པོ་བརྒྱ་ཉེར་ལྔ་ཉུག་རུམ་པ་སྟོང་གི་ཚོགས་དང་བཅས་པ་བཅོམ་ལྡན་འདས་ལ་བསྙེན་པར་རྫོགས་པར་གསོལ་བའི་ཚེ། དགེ་སློང་བསྟན་སྐྱོང་ལ་བཀའ་སྩལ་བ། ཨུ་པ་ལ་མོ་ཏ་ལྟར་མང་དུ་ཡོད་ཀྱང་གྲངས་ཀྱང་བྱས་པའོ། །འདི་ལྟ་སྟེ་དཔེར་ན། ཨུ་པ་ལ་མོ་ཏ་ནི་ཁ་དོག་སྣ་ཚོགས་པ། འདི་ལྟ་སྟེ། དམར་པོ་དང་། དཀར་པོ་དང་། སེར་པོ་དང་། ནག་པོ་དང་། ཁྲ་བོ་དང་། སྐྱ་བོ་དང་། ཟས་པ་དང་། ནཱ་ཚོ་དང་། སྔོན་པོ་དང་། རམས་དང་། ལྗང་གུ་དང་། ལྗང་གུ་མང་པོ་དག་ཡོད་དེ། དེ་གཉིས་རེ་ལ་ཡང་ནམ་མཁའི་མདོག་གིས་བར་ཆོད་པས་མ་འདྲེས་པར་སྣང་ངོ་། །དེ་བཞིན་དུ་དགེ་སློང་འདོད་པ་ཡོད་པ། དགེ་སློང་བྱེད་པ་ཡོད་པ། དགེ་སློང་གཉན་པ་ཡོད་པ་དུ་མ་ལས་ཀྱང་གྲངས་རེར་རེ་ཁཱ་ཡོད་དམ། ཚིགས་པ་ཡོད་དམ། རྟགས་ཀྱི་དཀྱིལ་འཁོར་མང་པོ་ཡོད་ན་འདི་རུང་བ་སྟེ། དེའི་ཕྱིར་རྒྱལ་པོ་འདི་རབ་ཏུ་དབྱུང་སྟེ། སང་ནང་པར་སྔ་བར་བྱི་དོར་བྱོས་ཤིག །དེར་འདི་གསུམ་དག་གི་གྲངས་ལྡན་གྱི་རེ་ཁཱ་ས་དམར་པོ་དག་གིས་བཀོད་པར་གྱིས་ཤིག །གལ་ཏེ་རལ་པ་ཅན་དང་ནཱ་ལི་ན་ལ་སོགས་པ་དག་གིས་ཀྱང་ངོ་། །སྨིན་པར་བྱ་བའི་ཕྱིར། དཀྱིལ་འཁོར་དེར་བཀོད་པ་ལ་ལས་ཀྱི་དངོས་པོ་སྦྱིན། དགེ་སློང་དག་ལོངས་ཤིག །ཅེས་སྨྲོས་ཤིག་ཅེས་སོགས་དང་། གཞན་ཡང་སྤོང་བ་དང་བཅས་པ་དང་། ལྟུང་བ་དང་བཅས་པར་མི་(༢༣བ)
འགྱུར་རོ། །དེ་ལ་དགེ་སློང་གིས་ཚད་མ་ཅན་གྱི་སེམས་བཟུང་ལ་བསླབ་པ་ཐུབ་པ་ལ་གྲངས་མང་དུ་བྱའོ། །ཞེས་སོགས་དང་། གང་འདི་འདི་ལྟར་ངེས་པར་དག་པར་བྱེད་པའི་ཕྱིར་རེ་རེ་བཞིན་དཀྱིལ་འཁོར་བྱས་ན་སྐྱོན་མེད་དོ། །ཞེས་པ་རྣམས་ཀྱིས་བསྟན་པ་ཡིན། གཞན་ཡང་བདེ་བར་གཤེགས་པའི་བཀའ་ལས་མང་དུ་འབྱུང་བ་དང་། སློབ་དཔོན་ཀླུ་སྒྲུབ་ཀྱི་བསླབ་པ་བརྟག་པ་དང་། བསྟན་པ་རྨད་དུ་བྱུང་བའི་ཚོགས་སོགས་ལས་གསུངས། ཟླ་བ་གྲགས་པས་ཀྱང་བཤད། བུ་སྟོན་དང་བཅོམ་རལ་སོགས་ཀྱི་དགོངས་གཞི་ལྟར་མཛད་ཀྱང་ཞེ་འདོད་འདི་ཁོ་ན་ལྟར་མཛད་པ་ཡིན། ཞེས་གསུང་པའི་ཐོག་མའི་ལུང་འདི་འདུལ་བ་ལུང་དང་ཀརྨ་ཤ་ཏམ་དུ། མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་སེང་ལྡེང་གི་ཕུར་པ་གདབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་གཏོད་པ་ལ་སོགས་པའི་མཚན་མ་བརྟན་པོ་གཟུག་པར་བྱའོ། །དེའི་འོག་ཏུ་ཞེས་པ་དང་ཕྱོགས་འདྲ་ཙམ་ལས་ཞུས་དག་མ་འཕེར་ཞིང་། ཚིག་གཅིག་པ་ལུང་ལས་མ་རྙེད་མོད། ལུང་ཁུངས་རྣམ་དག་ཏུ་བྱས་ཀྱང་བསྙེན་རྫོགས་དང་གསོ་སྦྱོང་སོགས་ཀྱི་དུས་དཀྱིལ་འཁོར་པའི་ལས་ཀྱི་ཁུངས་མ་གཏོགས་བསྙེན་རྫོགས་དུས་གཅིག་ཏུ་སྒྲུབ་པའི་ཁུངས་སུ་མི་འགྲོ། གལ་ཏེ་འགྲོ་བའི་དབང་དུ་བྱས་ན། ལུང་ལས། གང་ཟག་ལྔ་བསྙེན་པར་མ་རྫོགས་པ་ཞེས་བྱ་སྟེ། བདག་གི་མིང་མ་བརྗོད་པ་དང་། མཁན་པོའི་མིང་མ་བརྗོད་པ་དང་། གསོལ་བ་ཆད་པ་དང་། བརྗོད་པ་ཆད་པ་དང་། བསྙེན་པར་རྫོགས་པར་མི་ཤེས་པའོ། །(༢༤ན)
ཞེས་གསུངས་པས། ལས་མཁན་གྱི་བསྒྲུབ་བྱའི་མིང་དང་། མཁན་པོའི་མིང་དང་། དགེ་འདུན་གྱི་མིང་རྣམས་མ་བརྗོད་པའམ། གསོལ་བ་དང་བརྗོད་པ་གང་རུང་ཆད་ནས་མི་སྐྱེ་བར་བཤད་པས་བསྒྲུབ་བྱ་བརྒྱར་ལོངས་པ་ཙམ་གྱི་མིང་ཅིག་ཅར་དུ་ལས་སློབ་ཀྱི་བློ་ནས་མི་ཐོན་པ་མངོན་སུམ་དུ་གྲུབ་ཅིང་གོང་གི་མཚམས་གཅོད་ལུགས་དེ་རྩིག་པས་མ་བསྐོར་བའི་ཐང་སྟོངས་ལྟ་བུར་དཀྱིལ་འཁོར་པའི་ལས་ལ་དགོངས་པ་ཁྱེད་རྣམས་ཁང་པའི་ནང་དུ་མཛད་པ་དཀྱིལ་འཁོར་གཅིག་གི་ནང་དུ་དཀྱིལ་འཁོར་ཐ་དད་པ་དུ་མ་མི་རུང་བས་སོ། །རྗེས་འབྲངས་ཀྱི་དཔྱོད་ལྡན་འདྲ་དང་མོལ་བའི་ཚེ་རྒྱལ་བ་ཡབ་སྲས་ཀྱིས་སྐུ་གལ་ཆེ་བའི་རིགས་ལ་གཅིག་གམ་གསུམ་ཚུན་ཆད་བསྒྲུབ་པ་གནང་། གཞན་འཕྲིན་ལས་ཆེ་དྲགས་པས་དམངས་ལ་སྐབས་སུ་གང་བབས་མཛད་ཟེར་བས། སངས་རྒྱས་ཀྱིས་སོ་ཐར་གྱི་སྡོམ་པ་འཁོར་ལོས་སྒྱུར་བའི་རྒྱལ་པོ་སོགས་ལ་རྒྱས་པ་དང་། མུ་ཏོ་བ་སོགས་ལ་ཉུང་ངུར་བྱ་ཞེས་པའི་ཆོ་གའི་ཚིག་ལ་རྒྱས་བསྡུས་མ་གསུངས་པས་བོན་ནམ་ཁོམ་གྱི་སྐར་མ་ལས་མ་འདས་ཤིང་། འཕྲིན་ལས་ཆེ་ཆེ་མོའི་རིགས་ཀྱིས་ལོང་མེད་པ་དང་འདིའི་ཚབ་འདིས་ཡོང་འདིའི་དོད་འདིས་བྱེད་ཟེར་ནས་དེ་བཞིན་གཤེགས་པ་ལ་དགྲ་ཤ་ལེན་པ་མང་བར་སྣང་། ཞྭ་དམར་བ་དྲུག་པས་ལུང་འདྲེན་མཛད་པ་དེ་རྣམས་ལུང་དུ་ཡོད་མེད་བརྟག་ཕྱིར་སྨན་ཐང་ནས་ཀྱིས་བཀྲ་ཤིས་ལྷུན་པོའི་དགེ་བཤེས་ཡིག་རྩལ་ཅན་བཅུ་བཞི་ལ་འདུལ་ལུང་པོ་ཏི་རེ་གཏད་དེ་ཞིབ་མོར་འཚོལ་བཅུག་པས་ཡེ་མ་རྙེད་གཤིས་སྨན་ཐང་པ། (༢༤བ)
ཞྭ་དམར་དཀོན་ཅོག་ཡན་ལག་ལ་བསྙེན་རྫོགས་བསྒྲུབས་པའི་དད་ཞེན་ཅན་གྱི་ལུགས་ལ་དཔོན་སློབ་ཐམས་ཅད་མཁྱེན་པ་ནི་གནང་རྒྱུ་མང་ཞེས་སྐུར་བ་གདབ་སྐད། སླར་ལུང་སྡེ་བཞི་ནས་བཙལ་ཀྱང་མ་བརྙེད་པས་རྒྱ་ནག་མདོ་རྩོམ་པའི་ཕྱག་ལེན་དེ་སླེབས་པ་འདྲའོ། །སྟག་ཚང་ལོ་ཙཱ་བའི་འདུལ་ཊཱིཀ་ཏུ། མཚམས་གཉིས་ཀྱི་བར་དུ་བསྡད་ནས་གཅིག་ཏུ་སོགས་དང་། མཚམས་བཞིའི་བར་དུ་ཤིང་ལེབ་ལྟ་བུའི་སྟེང་དུ་ཐམས་ཅད་སོགས་ཏེ། དེས་ཁ་སྐོང་ཡང་རུང་བ་ལས་བྱས་ནའང་དུས་རེ་ལ་འགྲུབ་ཅེས་པ་སྟེ། སྔོན་དཔལ་ཆེན་རྡོར་གཞོན་གྱིས་འབྲི་གུང་དུ་མཛད་པ་ཕྱིས་ཕྱག་ལེན་ཉམས་ནས་ཐག་རྒྱ་མར་གྲགས་སོ། །དེ་བཞིན་དུ་གནས་དུ་མར་དབྱར་གནས་པར་ཁས་བླང་སོགས་མདོ་གསུམ་ནི་རྟོགས་སླ་སྟེ། དེ་དག་གིས་ནི་ལས་ཀྱི་ཁ་སྐོང་བྱེད་པ་ལ་མཚམས་གཞན་མ་ཡིན་པ་དགོས་པར་བསྟན་ནོ། །ཞེས་ཚིག་ཉུང་ཞིང་དོན་ཆེས་གསལ་ལ་རྡོ་རྗེ་གཞོན་ནུ་ཟེར་བའང་འབྲི་གུང་ཕྱོགས་ནས་བྱུང་བ་ཞིག་ཡིན་ཡང་སྐྱོབ་པ་དང་མི་གཅིག་པས་བླུན་པོ་སྙིང་ཁམས་ཅན་གྱི་བསྙགས་ས་དེ་མིན་པ་འདུག་གོ །གསུམ་དུ་གཅོད་དགོས་པ་ནི། དགྲ་བཅོམ་པ་ས་ག་ལྷས། དགེ་སློང་རྣམས་ཀྱི་ལས་གཅིག་གིས། །བཞི་ནི་བསྙེན་པར་རྫོགས་མི་བྱ། །ཚོགས་དག་ལ་ནི་ཚོགས་ཉིད་ཀྱིས། །ལས་ནི་གང་དུའང་ཅུང་ཟད་མེད། ཅེས་དང་། མདོ་རྩ་ལས། དུ་མ་མཁན་པོ་གཅིག་པས་གསུམ་མན་ཆད་ཚིགས་གཅིག་གིས་བསྙེན་པར་རྫོགས་པར་བྱར་རུང་ངོ་། །ཞེས་པར་རང་འགྲེལ་ལས། དུ་མ་ཞེས་བྱ་བ་ནི་གཉིས་ལ་སོགས་པའོ། །མཁན་པོ་གཅིག་པ་འདི་(༢༥ན)
ལ་ཡོད་པས་ན་མཁན་པོ་གཅིག་པ་སྟེ་དེ་ལའོ། །ཚིགས་གཅིག་གིས་ཞེས་བྱ་བ་ནི་གསོལ་བ་གཅིག་གིས་སོ། །དུ་མ་ཇི་ཙམ་གྱིས་ཤེས་ཤེ་ན། འདིར་གསུམ་མན་ཆད་ཅེས་སྨོས་ཏེ། གསུམ་མན་ཆད་རིགས་པ་ཡིན་གྱིས། གཞན་ནི་མ་ཡིན་ཞེས་བྱ་བའི་དོན་ཏོ། །ཞེས་གསུངས་པས་མཁན་པོ་གཅིག་གིས་བསྒྲུབ་བྱ་གསུམ་ལས་མང་བ་དུས་གཅིག་ལ་བསྙེན་པར་རྫོགས་མི་རུང་བ་དངོས་སུ་གསལ་ཞིང་། ཉེ་བར་འཁོར་གྱིས་ཞུས་པ་ལས། བཙུན་པ་དུས་གཅིག་དང་སྐད་ཅིག་ཉིད་ལ་ལས་བྱེད་པ་པོ་གཅིག་གིས་ལས་གཉིས་བགྱི་བ་དང་བགྱིས་པར་བརྗོད་པ་དང་། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་བ་མཆིས་སམ། ཉེ་བར་འཁོར་ཡོད་དེ། ལས་བྱེད་པ་པོའི་དགེ་སློང་སྟོབས་དང་ལྡན་པར་གྱུར་ན་མཁན་པོ་རྣམས་དང་། བསྙེན་པར་རྫོགས་པར་འདོད་པ་རྣམས་ཀྱི་མིང་ཡོངས་སུ་བརྗོད་ནུས་ཤིང་གསོལ་པ་ཉམས་པར་མི་འགྱུར་ལ་ལས་ཀྱང་བྱེད་ནའོ་ཞེས་པའི་དོན་མཁན་པོ་དེས་བསྒྲུབ་བྱ་གཅིག་བསྙེན་པར་རྫོགས་པར་མ་ཟད་བསྒྲུབ་བྱ་གཉིས་སམ་གསུམ་གྱི་མིང་དུས་གཅིག་ལ་འདོན་པར་ནུས་ན་དུ་མ་བསྙེན་པར་རྫོགས་ཆོག་པའི་ཁུངས་ཏེ་བཞིར་ལོངས་པ་མི་ཆོག་པའི་རྒྱུ་མཚན། ལུང་ཕྲན་ཚེགས་ལས། ཚེ་དང་ལྡན་པ་ཉེ་བར་འཁོར་གྱིས་དགེ་ཚུལ་གཉིས་པོ་བྲན་ཅན་དང་། སྐྱོང་བ་སྟེ། དེ་དག་ཕན་ཚུན་གཏམ་འདྲེས་པ། ཕེབས་པར་སྨྲ་བ་སྨོས་མགྲིན། འགྲོགས་ཤེས་ཡིན་ནོ། །དེ་གཉིས་ལས་གཅིག་གིས་ཁྱོད་བསྙེན་པར་རྫོགས་ཤིག་དང་ངས་མཁན་པོ་དང་ཁྱོད་ཀྱི་རིམ་གྲོ་བྱའོ་ཞེས་སྨྲས་པ་(༢༥བ)
དང་། ཅིག་ཤོས་ཀྱིས་ཀྱང་དེ་ཁོ་ན་བཞིན་དུ་སྨྲས་ཏེ། དེ་དག་ཕན་ཚུན་སྟབས་བྱེད་པས་གཉིས་ཀ་བསྙེན་པར་མ་རྫོགས་པར་གྱུར་ཏོ། །དེ་ནས་ཚེ་དང་ལྡན་པ་ཉེ་བར་འཁོར་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས། ཚེ་དང་ལྡན་པ་ཉེ་བར་འཁོར་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་མཁན་པོ་གཅིག་དང་། སློབ་དཔོན་གཅིག་དང་། གསོལ་བའི་ལས་གཅིག་གིས་གཉིས་བསྙེན་པར་རྫོགས་སུ་རུང་ལགས་སམ། ཉེ་བར་འཁོར་རུང་ངོ་། །དེ་གཉིས་གང་རྒན་པ་ལགས། གང་ཡང་མ་ཡིན་ནོ། །བཙུན་པ་མཁན་པོ་གཅིག་དང་། སློབ་དཔོན་གཅིག་དང་། གསོལ་བའི་ལས་གཅིག་གིས་བཞི་བསྙེན་པར་རྫོགས་སུ་རུང་ལགས་སམ། ཉེ་བར་འཁོར་རུང་ངོ་། །དེ་དག་ལས་གང་རྒན་པ་ལགས། གང་ཡང་མ་ཡིན་ནོ། །བཙུན་པ་མཁན་པོ་གཅིག་དང་། སློབ་དཔོན་གཅིག་དང་། གསོལ་བའི་ལས་གཅིག་གིས་བཞི་བསྙེན་པར་རྫོགས་རུང་ལགས་སམ། ཉེ་བར་འཁོར་མི་རུང་ངོ་། །དེ་ཅིའི་ཕྱིར་ཞེ་ན། ཉེ་བར་འཁོར་ཚོགས་ཀྱིས་ཚོགས་ཀྱི་ལས་དག་མི་བྱ་བས་དགེ་འདུན་གྱིས་དགེ་འདུན་བསྙེན་པར་རྫོགས་པར་འགལ་ཏེ། དགེ་འདུན་གྱིས་དགེ་འདུན་བསྙེན་པར་རྫོགས་པར་བྱེད་ན་འགལ་ཚབས་ཅན་དུ་འགྱུར་རོ། །ཞེས་གསུངས་པས་ཤེས་ནུས། བུ་སྟོན་རིན་པོ་ཆེས་མཛད་པའི་འདུལ་བའི་ལག་ལེན་གྱི་ཆོ་ག་དྲི་མ་མེད་པའི་འཕྲེང་བ་ལས། ཁྱེད་རང་གསུམ་མན་ཆད་དུ་གནས་ཤིང་། སྔར་དགེ་ཚུལ་མ་(༢༦ན)
ཐོབ་པར་ད་ཕྱིས་ནས་རབ་ཏུ་བྱུང་བ་བྱས་མ་ཐག་མ་ཉམས་པ་ཡིན་པས་ཞེས་གསུངས་པས། དགེ་ཚུལ་གྱི་སྐབས་སུའང་ཚོགས་སུ་མ་ཚང་བ་དགོས་པར་བཞེད། སྟག་ཚང་ལོ་ཙཱ་བའི་འདུལ་ཊཱིཀ་ལས། བསྒྲུབ་བྱ་དུ་མ་མཁན་པོ་གཅིག་པ་གྲངས་གསུམ་མན་ཆོད་ཆོ་གའི་ཚིག་གཅིག་གིས་རབ་བྱུང་དང་བསྙེན་པར་རྫོགས་པར་བྱར་རུང་སྟེ་དགག་བྱ་མེད་ཅིང་དགོས་པ་གཟིགས་ནས་དེ་བཅས་པའོ། །ཤུགས་ལ་རྒྱུད་མཐུན་པའི་རྐྱེན་དུ་རྒྱུད་བཞི་མན་ཆད་ཀྱི་ཚོགས་སུ་མ་ཚང་བ་དགོས་ཏེ། དེ་ལྟར་བྱས་ན་ལས་མི་ཆགས་པས་སྡོམ་པ་མི་སྐྱེ་བས་སོ། །སྐྱེད་ཚལ་མཁན་པོ་འཇམ་དབྱངས་ཀུན་དགའ་ཆོས་བཟང་གིས་མཛད་པའི་འདུལ་བའི་སྤྱི་དོན་ལུང་རིགས་གཏེར་མཛོད་ལས། བསྒྲུབ་བྱ་ལ་དགེ་བསྙེན། བར་མ་རབ་བྱུང་། དགེ་ཚུལ་བསྙེན་རྫོགས་ཀྱི་སྡོམ་པ་འབོགས་པ་ལ་གསུམ་མན་ཆད་དུ་གནས་པ་དགོས་ཀྱི། དེ་ལས་ལྷག་པ་ལ་ལྷན་ཅིག་ཏུ་སྡོམ་པ་ཕོག་ཀྱང་མི་སྐྱེ་སྟེ། ཚོགས་ཀྱིས་ཚོགས་ལས་ལས་དག་མི་འཆགས་སོ། །ཞེས་མཁས་པ་ཐམས་ཅད་ཞལ་མཐུན་པས། བཅོམ་ལྡན་རལ་གྲི་དང་བུ་སྟོན་སོགས་ལ་རྫུན་ཁུངས་མི་སྐྱེལ་བ་ཞུ། འདིས་མཚོན་ཏེ་བསྙེན་རྫོགས་ལོ་གྲངས་དང་ཟླ་གྲངས་སུ་བཅད་ནས་བསྒྲུབ་པ་དང་། ཤ་སྤོང་བ་འདུལ་བའི་བཅས་པར་གོ་བའི་བསྙེན་རྫོགས་བསྒྲུབས་ནས་ལོ་གཅིག་དང་གཉིས་ཀྱི་བར་སོགས་སྡོར་དཀར་བྱས་ཟེར་བའི་བླུན་པོ་ངོ་མཚར་བསྐྱེད་པའི་གཏམ་ལ་དགའ་བར་མ་བྱེད་ཅིག །མི་བསྐྱོད་རྡོ་རྗེའི་ཉི་དཀྱིལ་དུ་དྲངས་པའི་ཞུ་བའི་ལུང་ནི། བཙུན་པ་ལས་བགྱིས་པ་ཕྱོགས་གཅིག་ཏུ་མཆིས་ལ། གནས་བཞིར་གང་ཟག་བཞི་(༢༦བ)
བསྙེན་པར་རྫོགས་པར་བགྱིད་དུ་གནང་ངམ། གནང་སྟེ་འདི་ལྟར་ལས་བྱེད་པའི་དགེ་སློང་གནས་བཞི་ཆར་གྱི་མཚམས་སུ་ཤིང་ངམ་འཁར་བའམ་རེ་ལྡེ་རྣམས་ཀྱིས་མནན་ཏེ་རེ་རེ་ནས་སམ། གཉིས་གཉིས་ནས་སམ་གསུམ་གསུམ་ནས་བསྙེན་པར་རྫོགས་པར་བྱ་སྟེ་བཞིར་མ་ཚང་ནའོ། །ཞེས་པའི་ཚིག་དེ་དངོས་བསྟན་གྱི་དབང་དུ་བྱས་ཀྱང་། ལུང་ཞུ་བའི་འགྲེལ་པར། བྲམ་ཟེ་རྒྱལ་པོ་རྒྱལ་བཤེས་ཞེས་བྱ་བ་བསྟན་པ་ལ་སྡང་བ་ཞིག་བྱུང་བར་གྱུར་ནས་དེས་བསྟན་པ་ལ་གནོད་པ་མང་པོ་བྱས་པར་གྱུར་ཏེ་མཆོད་རྟེན་དག་ཀྱང་བཤིག །དགེ་འདུན་གྱི་ཀུན་དགའ་ར་བ་དག་ཀྱང་བསྲེགས། དགེ་སློང་རྣམས་ཀྱང་བསད། སངས་རྒྱས་ཀྱི་བཀའི་གླེགས་བམ་རྣམས་ཀྱང་ཕུང་པོར་བཅེར་ནས་བསྲེགས་སོ། །དེ་ནས་རིམ་གྱིས་དགེ་སློང་རྣམས་ཀྱིས་ཡུལ་དང་གནས་སྡེ་སྣོད་གསུམ་གྱི་གླེགས་བམ་ཐམས་ཅད་བསྡུས་ནས་བཅོམ་བརླག་ཏུ་ཡང་དག་པར་བསྡུ་བ་བྱས་ཏེ་གཞུང་བླ་མའི་གླེགས་བམ་ནི་མ་རྙེད་དོ་ཞེས་བསྟན་པའི་འཕེལ་འགྲིབ་ཀྱི་དབང་གིས་དག་མི་དག་དང་། རྩ་བའི་སྡེ་པ་བཞི་ལ་ལུང་མི་འདྲ་བ་བཞི་ཡོད་པ་སོགས་ནས་ཚད་མར་གྱུར་པའི་ཕྱག་ལེན་དང་མི་མཐུན་པའི་ལུང་ཁུངས་ཙམ་ལ་ཡིད་བརྟན་ཡང་དཀའ། ལུང་འདི་གའི་བརྗོད་དོན་ལ་དཔགས་ན་བླ་གབ་མེད་པའི་ས་ཡུལ་དོག་པ་ཞིག་ཏུ་དགེ་འདུན་གྲངས་ཚང་བ་སྡེ་ཚན་བཞིས་སོ་སོར་དཀྱིལ་འཁོར་པའི་ལས་བྱས་ནས་ཐག་ཉེས་པས་མཐོང་ཐོས་བྱུང་བར་ཕན་ཚུན་འདུན་པ་ཕུལ་ནས་བྱར་རུང་བའི་དམིགས་བསལ་གྱི་ཁུངས་མིན་པའི་ངེས་པ་མི་འདུག་ཅིང་། འཕགས་ཡུལ་གྱི་ཀླུ་སྒྲུབ་ཞབས་(༢༧ན)
སོགས་ཡོངས་གྲགས་ཀྱི་འདུལ་འཛིན་རྣམས་དང་། བོད་ཀྱི་འདུལ་བསྟན་སྔ་ཕྱི་བར་གསུམ་དུ་བྱུང་བའི་དཔང་གྱུར་རྣམས་ལ་མ་གྲགས་པའི་ལུང་ཁུངས་འཁྱར་བ་དང་རེ་གཉིས་ཀྱི་འདོད་མོས་བྱས་པ་སྤྱིར་བཏང་ལ་འཁྱེར་མི་རུང་བ་བྲམ་ཟེའི་ཁྱེའུ་ཀརྨ་ལ་མི་ཚངས་སྤྱོད་གནང་བ་ལྟ་བུས་ཀྱང་ཤེས་ནུས། གོང་གི་ལུང་དེ་ལ། མཚོ་སྣ་པ་ཆེན་པོས། བཅུ་གཉིས་ལས་བྱེད་པའི་ཚིག་གཅིག་གིས་རྫོགས་པར་བྱེད་པའི་ཚེ་ཡང་ཕྱོགས་བཞིར་འབོགས་པ་པོའི་དགེ་འདུན་སྡེ་བཞི་བཀོད་དགོས་པར་གསུང་བ་ཞིབ་ཏུ་དཔྱད་ན། བླ་གབ་མེད་པ་ཞིག་ཏུ་ཕྱོགས་བཞིར་རེ་ཁཱས་བཅད་པར་བསྒྲུབ་བྱ་གཅིག་ནས་གསུམ་གྱི་བར་གང་ཡང་རུང་བ་བྱས་པ་ཁྱོན་བསྡོམས་མང་མཐའ་བཅུ་གཉིས་བྱུང་། དེ་དག་ལ་མཁན་སློབ་གཉིས་བཞི་ག་ལ་གཅིག་གིས་གོ་བཅད། སོ་སོར་ཁ་སྐོང་གི་དགེ་འདུན་བཞི་རེ་ཚང་བ་ཕྱེད་པའི་ལུགས་དམིགས་བསལ་ཀྱི་ཁུངས་ཙམ་བྱུང་ཡང་། བོད་དུ་བྱར་མི་རུང་བ་གཉགས་དབོན་གྱིས་ལུང་ལས་དེ་ལྟར་གསུངས་ཀྱང་དེའི་ཆོ་ག་ཞིབ་མོ་འདིར་མི་འབྱུང་བའི་ཕྱིར་སྔོན་བྱུང་གི་འདུལ་འཛིན་ཆེན་པོ་རྣམས་དེ་ལྟར་ལ་ཕྱག་ལེན་མཛད་པའི་སྲོལ་མ་བྱུང་བ་ཡིན་ནོ། །དེས་ན་བྱེད་ཚུལ་གྱི་ཆོ་ག་རྒྱས་པར་མ་བསྟན་པའི་བྱེད་རུང་གི་སྒྲ་ཙམ་གྱིས་བྱེད་པའི་གོ་རིམ་བྱ་བ་ཡང་མི་ཤེས་པའི་ཕྱིར། དེ་ལྟ་བུའི་འབོགས་ཆོག་ད་ལྟ་བྱེད་མི་རུང་ཞེས་པའང་བསྟན་པ་སྤྱི་སྐད་དང་མཐུན་ཞིང་། བཤད་མ་ཐག་པའི་ལུགས་དེ་མཚོ་སྣ་བས་ཚིག་འབྲུ་བསྣོན་རྒྱུ་ཞིག་གཙོ་བོར་མཛད་པ་འདྲ་ཡང་རྣམ་དག་ཏུ་བྱས་ཀྱང་ཐག་རྒྱ་མའི་(༢༧བ)
རྒྱབ་ཆོས་སུ་འགྲོ་ན་ཀར་ལུགས་ཀྱི་ཕྱག་ལེན་དེར་བསྒྲུབ་བྱ་ཇི་ཙམ་ཤོང་བ་ལས་གྲངས་མེད་ཅིང་། བརྒྱ་ཐམ་པར་མཚོན་ན་བསྒྲུབ་གྲ་སུམ་ཚན་དུ་བཅད་པར་སུམ་ཅུ་སོ་གསུམ་དང་ཉག་མ་གཅིག་བྱུང་བ་རེ་ཁཱས་བཅད་པར་དེར་གྲངས་དང་མཉམ་པའི་ཁ་སྐོང་གི་དགེ་འདུན་བཞི་སྡེ་ངེས་པར་དགོས་རྒྱུ་ལ་དེང་སང་དངོས་སུ་མི་མཛད་པས་གྲུབ། སྙིང་པོར་བསྒྲིལ་ན་གོང་དུ་བརྗོད་པ་མཐའ་དག་གི་དོན་ཡངས་ཅན་མཁན་པོ་པཎ་ཆེན་ངག་དབང་ཆོས་གྲགས་ཀྱིས་མཛད་པའི་གྲུབ་མཐའི་བཤན་འབྱེད་མཐའ་དཔྱོད་དང་བཅས་པའི་འགྲེལ་པའི་གཏམ་སྐྱེལ་དཔྱོད་ལྡན་མཁས་པའི་ལུས་རྒྱན་རིན་ཅེན་མཛེས་པའི་ཕྲ་ཚོམ་བཀོད་པ་ལས། འདི་སྐོར་གྱི་དོགས་གཅོད་རྣམས་ཚིག་དོན་གཉིས་ཀ་བཟང་བས་འཕྲི་སྣོན་མེད་པར་བཀོད་པ་ནི། དེ་ལ་འདུ་ཁང་ལྟ་བུའི་གནས་ཡངས་པ་གཅིག་ཏུ་བསྒྲུབ་བྱ་བཅུ་ལ་སོགས་པའམ་བརྒྱ་ཕྲག་ཏུ་ལོངས་པ་དུས་གཅིག་ལ་བསྙེན་པར་རྫོགས་པ་དེ་མཚམས་ནང་གཅིག་ཏུ་ཡིན་ནམ་ཐ་དད་དུ་ཡིན། དང་པོ་ལྟར་ན་སྐུད་པའམ་ཐག་པས་བཅད་ནས་མཚམས་ཐ་དད་དུ་གནས་པར་འདོད་པ་དང་འགལ། ཐ་དད་དུ་ཡིན་ན་གཙུག་ལག་ཁང་གཅིག་གི་ནང་དུ་མཚམས་ཐ་དད་པ་དུ་མ་མ་བཤད་དེ། གཙུག་ལག་ཁང་དེའི་རྩིག་ནང་ཚུན་མཚམས་ནང་གཅིག་ཏུ་བཤད་པའི་ཕྱིར་ཏེ། དེ་སྐད་དུ། ལས་ལ་རྩིག་པ་མཚམས་ཡིན་ནོ། །ཞེས་གསུངས་པའི་ཕྱིར་རོ། །དབྱར་གནས་ཀྱི་གཞིའི་ཐད་ཀྱི་མདོ་རྩར། ཐམས་ཅད་གནོན་པ་ལ་གནས་ན་ནོན་པ་ཉིད་དོ། །ཞེས་གསུངས་པ་ནི་དབྱར་གནས་ཁས་ལེན་དགོས་པའི་ཚེ་དམིགས་(༢༨ན)
བསལ་གསུངས་པ་ཡིན་གྱིས། དེ་ལས་གཞན་ལ་སྦྱར་བར་མི་བྱ་སྟེ་ཕན་ཚུན་གཅིག་གི་དམིགས་བསལ་གཅིག་ལ་སྦྱར་ན་ཐམས་ཅད་འཆོལ་པར་འགྱུར་བའི་ཕྱིར་རོ་སྙམ་དུ་སེམས། ཁྱད་པར་མདོ་རྩར། དུ་མ་མཁན་པོ་གཅིག་པ་གསུམ་མན་ཆད་ཚིགས་གཅིག་གིས་བསྙེན་པར་རྫོགས་པར་བྱ་རུང་ངོ་ཞེས་དང་། དེའི་རྒྱ་ཆེར་འགྲེལ་ལས། གསུམ་མན་ཆད་ཅེས་བྱ་བ་སྨྲས་ཏེ། གསུམ་མན་ཆད་ཚིགས་གཅིག་གིས་བསྙེན་པར་རྫོགས་པར་བྱར་རུང་གིས། དེ་ལས་ལྷག་པ་མི་རུང་ངོ་ཞེས་བྱ་བའི་ཐ་ཚིག་གོ །ཞེས་གསུངས་པས་བསྙེན་པར་རྫོགས་འདོད་ཀྱི་བསྒྲུབ་བྱ་གསུམ་ཚན་དུ་མ་མཁན་པོ་གཅིག་ཡིན་པ་ཡང་ཚོགས་པ་དེ་རྣམས་ལ་གསོལ་བཞིའི་ལས་ཀྱི་ཆོ་ག་གཅིག་གིས་དུས་གཅིག་ལ་བསྙེན་པར་རྫོགས་པར་བྱར་མི་རུང་བ་དངོས་སུ་བསྟན་ལ། ཁྱོད་ཅག་གི་སངས་རྒྱས་ཀྱིས་གསུངས་པའི་འདུལ་བའི་ཆོ་ག་ལ་འདི་ལ་མགོ་སྐོར་གྱི་ཚུལ་བཞིན་དུ་ནང་གཅིག་ཏུ་བསྒྲུབ་བྱ་གསུམ་ཚན་པ་དུ་མ་ལ་སྐུད་པའམ་ཐག་པས་བསྐོར་ཙམ་གྱི་བརྫུན་རིབ་བྱས་ནས་གྲལ་དེར་གནས་ཀྱི་ལས་སློབ་ཀྱི་གསོལ་བཞིའི་ཆོ་ག་གཅིག་གི་གསུམ་ཚན་པ་དུ་མ་ལ་དུས་གཅིག་ལ་བསྙེན་རྫོགས་འབོགས་པ་འདི་འདུལ་བའི་གཞུང་དང་དངོས་སུ་འགལ་བ་བསྙོན་མེད་དུ་གསལ། དེས་ན་བསྙེན་པར་རྫོགས་འདོད་ཀྱི་བསྒྲུབ་བྱ་བརྒྱ་ལ་སོགས་པ་ཇི་ཙམ་ཡོད་ཀྱང་བརྫུན་གྱི་ཐག་རྒྱ་དེ་འདྲ་བྱེད་པ་ལས་རིམ་པ་བཞིན་གསུམ་ཚན་རེས་སུ་ཚོ་བཅད་ནས་བྱས་ན་སྡོམ་པ་སྐྱེ་བས་རང་གཞན་ལ་ཕན་པར་འགྱུར་བ་འདི་མཛད་རིགས་སོ་ཞེས་(༢༨བ)
ནན་གྱིས་གསོལ་འདེབས་ཐལ་མོ་སྦྱར་ན་གསན་དགོངས་ཇི་ལྟར་མཛད། བསྒྲུབ་བྱ་དུ་ཡོད་དེ་ལ་ཐག་རྒྱ་མར་མིང་བཏགས་ནས་དུས་གཅིག་རང་ལ་ཆོ་ག་བྱེད་དགོས་པའི་གཏུགས་དྲག་དེ་འདྲ་ག་ནས་བྱུང་། གནད་ཀྱི་དོན་ནི་དུ་མ་མཁན་པོ་གཅིག་པ་གསུམ་མན་ཆད་ཚིགས་གཅིག་གི་ཞེས་གསུངས་པ་ལ་གོ་ནུས་ཀྱི་ཁྱད་པར་སོ་སོར་འཆད་དགོས་ཏེ། དེ་ཡང་དུ་མ་ཞེས་པ་ནི་གནས་སྐབས་གང་ཡིན་པ་དེའི་དུས་སུ་བསྙེན་པར་རྫོགས་འདོད་ཀྱི་བསྒྲུབ་བྱ་གསུམ་ཚན་པ་གཅིག་གིས་མི་ཆོག་པར་ཉུང་མཐའ་བསྒྲུབ་བྱ་བཞིའམ་ལྔ་ནས་མང་མཐའ་བརྒྱ་ལ་སོགས་པའི་བར་ལ་བྱ་དགོས་ཏེ་དུ་མ་ཞེས་སྤྱིར་བཏང་ནས་དེ་དག་གི་ནང་ན་མཁན་པོ་གཅིག་པ་དང་མི་གཅིག་པ་འགའ་ཡོང་སྲིད་པས་དེའི་ཞིབ་ཆ་དཔྱོད་པ་ལ་མཁན་པོ་གཅིག་ཅེས་པའི་ཚིག་འདི་སྨོས་དགོས་བྱུང་བ་ཡིན། དེ་ཡང་དིང་སང་བྱེད་པའི་ཆོ་གའི་དཀྱུས་ཐོག་འདི་ལ་བསྙེན་རྫོགས་ཀྱི་སྦྱོར་བའི་ཆོ་ག་ནས་བཟུང་དུས་བསྒོའི་བར་སྡེབས་གཅིག་ལ་སྔར་གྱི་མཁན་པོ་དངོས་སུ་བྱོན་ཡོད་པའམ་མེད་ཀྱང་རུང་དགེ་སློང་ལྔ་ཚང་བ་ཡན་ཆད་ཀྱི་དགེ་འདུན་ལས་བསྙེན་པར་རྫོགས་པ་ཡོད་ཅིང་། དེའི་ཚེ་ན་བསྒྲུབ་བྱ་གསུམ་ཚན་གཅིག་ལས་ལྷག་པ་དུ་མ་ཚོགས་པ་དེ་ལ་མཁན་པོ་མི་གཅིག་པ་རྣམས་ལ་ཐ་དད་དུ་བྱ་དགོས་ཏེ། མཁན་(༢༩ན)
པོ་མི་གཅིག་ན་བསྒྲུབ་བྱས་བསྙེན་པར་རྫོགས་པར་གསོལ་བ་འདེབས་པ་དང་། བར་ཆད་དྲི་བའི་སྔོན་གྱི་གསོལ་བ་འབའ་ཞིག་པའི་ལས་དང་། གསོལ་བཞིའི་ལས་ཀྱི་ཆོ་ག་རྣམས་བརྗོད་མི་བདེ་བའི་ཕྱིར་ཏེ། མཁན་པོ་གཅིག་གི་མཚན་ནས་སྨོས་པས་མི་ཆོག་པར་བསྒྲུབ་བྱ་རང་རང་གི་མཁན་པོ་ཐ་དད་པ་དུ་མའི་མཚན་ནས་ཡང་བརྗོད་དགོས་པར་འགྱུར་ལ། དེ་འདྲ་ནི་བརྗོད་ཐུབ་མི་ཐུབ་གང་ཡིན་ཀྱང་སངས་རྒྱས་ཀྱིས་མ་གསུངས་པས་མི་འཐད། དེའི་ཕྱིར་ན་མཁན་པོ་གཅིག་པ་ཞེས་པའི་གཞུང་འདི་གསུངས་པ་ཡིན། གལ་ཏེ་མཁན་པོ་གཅིག་པའི་བསྒྲུབ་བྱ་གསུམ་ལས་ལྷག་པ་དུ་མ་ལ་བསྙེན་རྫོགས་དུས་གཅིག་ལ་བྱར་རུང་ངམ་ཞེ་ན། དེ་མི་རུང་ཞེས་པ་ལ། གསུམ་མན་ཆད་ཚིགས་གཅིག་གི་ཞེས་པ་འདི་བྱུང་། དེ་ཡང་མཁན་པོ་གཅིག་ཀྱང་བསྙེན་རྫོགས་དངོས་གཞིའི་ཚེ་བསྒྲུབ་བྱ་གསུམ་མན་ཆད་དུ་གནས་པ་ལ་གསོལ་བཞིའི་ལས་ཀྱི་ཆོ་ག་གཅིག་གིས་དུས་གཅིག་བསྙེན་པར་རྫོགས་བྱར་རུང་གི །དེ་ལས་ལྷག་པ་ལ་མི་རུང་ངོ་ཞེས་བཀས་བཅད་ཀྱི་ཁྲིམས་འདི་སངས་རྒྱས་རང་དང་། སངས་རྒྱས་གཉིས་པ་ཡོན་ཏན་འོད་དང་། ཆོས་ཀྱི་བཤེས་གཉེན་སོགས་ཀྱིས་གསལ་བར་གསུངས་པ་འདི་ལ་བརྩི་དོན་ཡོད་པ་ཞིག་གི་ཆ་ཆོད་རས་བོར་མི་གནང་བ་དགོངས་འཚལ་ལགས། རང་བཟོའི་ཆོ་གས་རང་དང་བསྟན་ལ་གནོད། །དེ་བས་གསུམ་ཚན་དུ་མར་ཐག་རྒྱ་ནི། །ཀུན་དང་མི་མཐུན་འབད་ཀྱང་ངལ་བ་ཙམ། །རིམ་བཞིན་གསུམ་ཚན་རེ་རེར་འབོགས་ཆོག་གིས། །སྡོམ་པ་སྐྱེ་ངེས་ངལ་བ་(༢༩བ)
དོན་ལྡན་ཞིང་། །འདུལ་བའི་གཞུང་དང་མཐུན་པས་རྣམ་དཔྱོད་ཀྱི། །སྤྱན་རས་ཡངས་པའི་མཁས་ཀུན་དགའ་བསྐྱེད་ཅིང་། །བརྒྱུད་འཛིན་ཀུན་ཀྱང་སྡོམ་རྒྱུན་རྒྱན་གྱིས་མཛེས། །ཐག་པས་བཅད་ཀྱང་སུམ་ཚན་དུ་མར་ནི། །དུས་གཅིག་བསྙེན་རྫོགས་ཆོ་ག་ཁྱེད་བྱེད་ན། །སྟོན་པས་ཚོགས་ཀྱིས་ཚོགས་ལ་ལས་མི་བྱ། །གསུངས་ལ་ཆེད་དུ་སྙིང་ནང་འདི་ཅི་ཞིག །བསྒྲུབ་ཚོ་སོ་སོའི་ཐག་སྣེ་སྒྲུབ་བྱེད་ཀྱི། །གདན་འོག་བཅུག་པས་དེ་དང་མཚམས་གཅིག་ན། བསྒྲུབ་ཚོ་ཀུན་ཀྱང་མཚམས་ནང་གཅིག་འགྱུར་ཏེ། །དེ་ཀུན་སྒྲུབ་བྱེད་ཚོགས་དང་མཚམས་གཅིག་ཕྱིར། །ཀུན་ལ་མེད་པའི་ཁྱད་ཆོས་ཐག་རྒྱ་མ། །འཕགས་པའི་ཡུལ་དུ་མ་བྱུང་གངས་ཅན་དུའང་། །མཚན་ལྡན་ཀུན་གྱིས་མ་མཛད་བཤོལ་ན་ལེགས། །དེ་སྐད་རྒྱང་ནས་སྙན་འབུལ་འདི་གསན་རིགས། རིགས་པའི་གནད་ནི་འདི་ཡིན་ཏེ། ཐག་པས་བསྐོར་པའི་བསྒྲུབ་ཚོ་དང་པོ་དང་། གཉིས་པ་ལ་སོགས་པ་སྐབས་དེར་ཇི་ཙམ་ཡོད་པ་དེ་ཀུན་མཚམས་ནང་གཅིག་ཏུ་གནས་པར་གསལ་ཏེ། དེ་ཀུན་སྐབས་དེའི་སྒྲུབ་བྱེད་དགེ་འདུན་གྱི་ཚོགས་དང་མཚམས་ནང་གཅིག་ཏུ་གནས་པའི་ཕྱིར། ཁྱབ་པ་མངོན་སུམ་ཚད་མའི་རིགས་པས་འགྲུབ། དཔེར་ན། བུམ་པའི་ཆུ་ཀུན་གོ་ས་གཅིག་ཏུ་གནས་པར་ཐལ། དེ་ཀུན་བུམ་པའི་ནང་དུ་གོ་ས་གཅིག་ཏུ་གནས་པའི་ཕྱིར་ཞེས་པ་ལྟ་བུ་ལ་སོགས་པའི་རིགས་ལ་ཁྱབ་པ་མེད་ཟེར་ན། མངོན་སུམ་དུ་སྙན་བརྡུང་བར་སོང་བས་མཁས་པའི་མདུན་སར་དེ་ལས་ངོ་ཚ་བ་ཅི་ཡོད། གོང་དུ་འདོད་ན། དེ་ཀུན་མཚམས་ནང་མི་(༣༠ན)
གཅིག་པར་ཁས་བླངས་པ་དང་འགལ་ཞིང་། ཐག་པའམ་སྐུད་པས་བསྐོར་བ་དགོས་མེད་དུ་སོང་། རྟགས་མ་གྲུབ་ན། ཐག་སྣེ་ཀུན་བསྒྲུབ་བྱའི་གདན་འོག་ཏུ་བཅུག་པ་དགོས་མེད་དུ་སོང་། འདི་རིགས་ཀྱི་ཆོ་ག་བྱ་དཀའ་ལ་སྒྲུབ་བྱེད་མེད་པ་དགོས་པ་བསྐྱེད་མི་ནུས་པ་འདི་འདྲས་ཅི་བྱེད་སོམས་མཛོད། ཅེས་གསུངས་པའི་གནམ་ལྕགས་ཀྱི་ཐོག་ལྟར་འཕངས་པ་འདི་ལ་རྗེས་སུ་ཡི་རང་ངོ་། །ས་སྐྱ་པའི་ཡིག་ཆ་མང་པོར་སྭསྟི་སིདྡྷཾ་ཞེས་པ་བདེ་ལེགས་གྲུབ་པའི་སཾ་སྐྲྀ་ཏའི་སྐད་ཡིན་པ་མ་གོ་བར་ས་ས་དེ་ས་སྐྱ་པའི་ཆེ་བ་ལྟ་བུར་གོ་ནས་ངེད་རང་འབྲི་གུང་པ་ཚོ་ཡང་འབྲིསྟི་འབྲིདྡྷཾ་བྱེད་ཟེར་བའི་ལོ་རྒྱུས་ལྟར་ཕྱོགས་དེར་རྣམ་པར་མ་དག་པའི་སྒྲོས་མང་ཡང་ལ་ལ་ཐག་རྒྱ་མ་ནི་རྗེ་འབྲི་གུང་པས་མཛད་ཟེར་བ། སྡོམ་གསུམ་དུ། བླུན་པོ་སྙིང་ཕོད་ཅན་གྱིས་ཀྱང་། །འདུལ་བའི་ཆོ་ག་བརྒལ་མ་ནུས། ཞེས་གསུངས་པས། འབྲི་སྟག་སྒམ་འབྲུག་རྣམས་ཀྱིས་ཀར་ལུགས་ཀྱི་བློ་གཤེད་དེ་འདྲ་མ་ནུས་པར་སྣང་མོད། འབྲུག་པ་སྤྲུལ་སྐུ་པདྨ་དཀར་པོས་དགུང་ལོ་བཅུ་བདུན་གྱི་སྟེང་བསྙེན་པར་རྫོགས་པ་དང་སྟག་ལུང་ཞབས་དྲུང་རྣམ་རྒྱལ་བཀྲ་ཤིས་ཀྱིས་བདག་ཆེན་ངག་གི་དབང་པོ་ལ་མཁན་པོ་དང་རྗེ་གྲོལ་མཆོག་ལ་ལས་སློབ་ཞུས་པའི་ལས་སློབ་ཀྱི་སྡོམ་རྒྱུན་ཡང་འདྲེན་གྱི་ཡོད་འདུག་པ་གོང་གི་བཞུགས་གྲལ་ལ་ཚུད་ན་མ་ཚུད་ན་ཡོད་པ་འདྲ། མཁས་པ་ལ་ལའི་བསྟན་བཅོས་སུ་དགེ་བསྙེན་དང་དགེ་ཚུལ་གྱི་སྡོམ་པ་སུམ་ཚན་དུ་མ་བཅད་ཀྱང་སྐྱེ་ལ་ཉེས་བྱས་འབྱུང་བར་འཆད་པ་དགེ་བསྙེན་ལ་(༣༠བ)
དེ་ལྟར་ཡིན་དུ་ཆུག་ཀྱང་། དགེ་ཚུལ་ལ་ནི་འཆད་པའི་དོགས་པ་ཙམ་ཡང་མེད་ཅིང་ལ་ལ་ཚོགས་ཀྱི་ཚོགས་ལ་ལས་མི་བྱ་བ་ལ་བློ་རྩེ་བསྟད་ནས་དགེ་ཚུལ་ལ་ཁ་སྐོང་གི་དགེ་འདུན་མེད་ཀྱང་ཆོག་པས་སོ་ཟེར་མོད་ཚོགས་དང་ལས་གཉིས་པོ་དགེ་འདུན་དུ་ལོངས་པ་དང་གསོལ་བ་དང་བཞིའི་ལས་སམ་འབའ་ཞིག་པའི་ལས་ཡིན་པས་གསུམ་དུ་གཅོད་དགོས་པར་མ་ཟད་དེའི་བརྟེན་བཞིར་གྱུར་པའི་ཚིགས་སྔ་མ་གཉིས་ལའང་གསུམ་ཚན་དུ་གཅོད་དགོས་པ་དོན་གྱིས་ཐོབ་པས་ཆོས་ཀྱི་རྒྱལ་པོ་འཕགས་པ་དང་ཀུན་མཁྱེན་བུ་སོགས་ཚད་ཐུབ་རྣམས་ཀྱིས་ལས་ཆོག་ཏུའང་རྒྱ་གར་གྱི་མཁས་པ་ཡོན་ཏན་འོད་ཀྱི་རྗེས་སུ་འབྲངས་པས་དེ་དག་ལ་འབྲུ་ལོག་པར་བརྒྱབ་ནས་རང་ཉིད་སྤྱོད་ཡུལ་ཡངས་པ་སྒྲུབ་ཐབས་ནི་རྣམ་དག་བསྟན་པའི་བགྲང་བྱར་མིན་ནོ། །གསོལ་བཞིའི་ལས་དངོས་གཞི་གསུམ་ཚན་དུ་བཅད་ཕྱིན། དེ་ཕྱིན་ཆད་བསྒྲུབ་བྱ་མང་ཉུང་ཇི་ཙམ་ཚོགས་པར་ཅིག་ཅར་དུ་བྱེད་པའང་དགེ་ཚུལ་སོགས་ལ་མཁས་པ་རྣམས་མི་བཞེད་ན་ལྟ་ཅི་སྨོས། རབ་བྱུང་གི་ཚེ་བསྒྲུབ་བྱ་རྣམས་དབང་གྲལ་ལྟར་བཀོད་ནས་བླ་གོས་སོགས་ཚིག་དང་བསྟུན་ནས་ལག་པར་རེག་ཙམ་གྱི་འགྲོ་གང་ཆེ་ཁྲོམ་དབང་ལ་ཚེ་རྫས་སྟེར་བ་ལྟ་བུའང་མི་རིགས་པ་སྒྲུབ་གྲ་རེ་ལ་གོས་གཏོད་པའི་ཚིག་ཚང་བ་རེ་བརྗོད་ནས་གཏོད་དགོས། བསྙེན་རྫོགས་ཀྱི་སྐབས་ཁ་སྐོང་གི་དགེ་འདུན་རྣམས་ཀྱིས་ཀྱང་གོས་བྱིན་གྱིས་བརླབས་ནས་གཏོད་པའང་གཟུ་ལུམས་ཏེ། འདུལ་བའི་ལག་ལེན་གྱི་ཆོ་ག་དྲི་མ་མེད་པའི་འཕྲེང་བ་ལས། ཡོ་བྱད་མངོན་དུ་གྱུར་པ་ལ། གོས་ཀྱི་རྟགས་(༣༡ན)
ཆོས་གོས་གསུམ་དྲས་ཤིང་དྲུབས་པའམ། རྒྱུ་རུང་བ་ལ་མཁན་པོ་རང་གིས་བྱིན་གྱིས་བརླབས་ཏེ་གནང་བ། འདི་ལ་ཆུ་ཚགས་རུང་བ་ཚད་ལྡན་མཁན་པོའི་ཚིག་གིས་གནང་བ། སྣོད་སྤྱད་ཀྱི་རྟགས་ལྷུང་བཟེད་རུང་བ་ཚད་ལྡན་དགེ་འདུན་ལ་བསྟན། དགེ་འདུན་གྱིས་གནང་། མཁན་པོ་རང་གི་བྱིན་གྱིས་བརླབས་ཏེ་གནང་བ་དགོས་ཞེས་གསུངས་པས་རྟོགས་ནུས། གསང་སྟོན་བསྐོ་བ་དང་བར་ཆད་འདྲི་བའི་ལས་ཀྱང་གཅིག་གི་མིང་ནས་སྨོས་ཏེ་སོགས་ཁོངས་ནས་བཞིར་ལོངས་པ་ཡན་ཆད་ལ་སྡེབས་སུ་བྱས་པས་ལས་མི་ཆགས་ཤིང་། དེའི་སྐྱོན་གྱིས་བསྐོ་ཡུལ་དེ་ཡང་གསང་སྟོན་པར་མི་འགྱུར་བ་སོགས་ཀྱི་ཉེས་པ་དུ་མ་འབྱུང་། དེང་སང་རྣམ་པར་དག་པའི་ཕྱག་ལེན་སྣར་ཐང་པ་ནས་བླ་ཆེན་བརྒྱུད་འཛིན་ཚོར་དར་བ་དང་། སྤོས་ཁང་ཚོགས་པའི་ཕྱག་ལེན་པཎ་ཆེན་རྒྱུན་འཛིན་ཚོར་དར་བ་གཉིས་ལས། སྔ་མ་ལ་བསྒྲུབ་བྱ་ཉི་ཤུ་སྐོར་སོགས་མང་ཉུང་ཙམ་ཡོད་མཚམས་ཁང་དེར་འཚོགས་པར་མཁན་པོས་རབ་བྱུང་གི་བར་ཆད་དྲིས་ཤིང་། དགེ་བསྙེན་དུ་བསྒྲུབ་པ་ཉེས་བྱས་ཙམ་ལས་མི་རུང་བ་མ་ཡིན་ཀྱང་ཉེས་མེད་ཕུན་ཚོགས་ལ་གནོད་པས་རྩིང་སྤྱོད་དུ་སོང་། བར་མའི་མཁན་པོར་གསོལ་གདབ་ཀྱི་བཤད་པ་རྣམས་སྤྱི་ཐོག་ཏུ་བཏང་ནས་དཔེར་ན་སྒྲུབ་གྲ་ལྔ་ཡོད་ན་གསུམ་གསུམ་དུ་གསོལ་བ་གདབ་པས་མཚོན་ཏེ་གསོལ་བཞིའི་ལས་ཀྱི་བར་ཐམས་ཅད་རིམ་པ་བཞིན་དུ་མཛད་པ་བརྡ་སྤྲོད་པ་རྣམས་གཅིག་གིས་ཆོག་པས་ཟོར་ཡང་བར་བཞེད་རུང་། བཤད་པ་རྒྱས་བསྡུས་ལོང་སྐབས་དང་བསྟུན་ཆོག་པས་ངེས་པ་མེད། (༣༡བ)
བསྒྲུབ་བྱ་བཀའ་བློ་མི་བདེ་བའི་རིགས་རྣམས་ཚུར་ཤོག་ཕར་སོང་ལ་ཡང་དུས་ཐོག་ཏུ་མི་འགྲིག་པའི་འགོར་གཞི་དང་། བསྒྲུབ་བྱའི་གོ་རིམ་ཀྱང་མ་འཁྲུགས་པར་ཡོང་བའི་ངེས་པ་མེད། གསང་སྟོན་བསྐོ་བའི་ལས་བརྗོད་པའི་སྐབས་སུམ་ཚན་དུ་གཅོད་པའི་ཚེ་མི་མངས་ཀྱི་མིང་ཐམས་ཅད་ནི་བློར་མི་ཟིན། དྲི་བའི་ཚེ་སྐད་བརྡ་ཇི་བཞིན་མི་གཅིག་པའི་རིགས་ཀྱིས་ལན་ཀྱང་དུས་སུ་མི་འཇལ་བས་ཉག་ཉོག་གི་ངང་ལ་ཟད་པ་ཞིག་འོང་། དུས་བསྒོ་མཐར་གཅིག་ལས་མི་མཛད་པ་སྔ་དྲོ་སྡོམ་པ་ཐོབ་པའི་བསྒྲུབ་བྱ་གཅིག་དང་ཕྱི་དྲོ་ཐོབ་པ་ཞིག་ལ་བསླབ་པ་རྒན་གཞོན་མེད་པའི་རྩིང་སྐྱོན་དུ་འདུག །མཐར་གདམས་ངག་བསླབ་པ་བརྗོད་པ་འཕྲལ་དུ་མ་གྲུབ་ན་སང་ཉིན་བརྗོད་སྲོལ་ཡང་། མདོ་ལས། བསྙེན་པར་རྫོགས་མ་ཐག་པ་ལ་མི་བརྗོད་པར་མི་བྱའོ། །ཞེས་དེ་མ་ཐག་བརྗོད་དགོས་པར་བཤད་པས་འགྲུབ་ཅིང་། འཇམ་དབྱངས་བླ་མ་དཀོན་ཅོག་ཆོས་འཕེལ་གྱིས་མཁན་པོ་གནང་བའི་སྐབས་ཁ་སྐོང་ལ་ཕྱིན་པའི་ཚེ། ཕྱག་ལེན་རྒྱས་དྲགས་པའི་མུན་རུབ་ནས་མར་མེའི་མདངས་ལ་གདམས་ངག་བརྗོད་པ་ལྗགས་ཀློག་གནང་བ་མཐོང་ཞིང་། ཨཻ་ཝཾ་ཆོས་ལྡན་དུ་ཡང་དེ་ལྟར་ཡོད་འདུག་གཤིས་མཚན་མོ་ཡི་གེ་ལ་བརྟེན་པར་ཐུགས་སུན་པའི་ངོར་ཆེན་དཀོན་ཅོག་ལྷུན་གྲུབ་སོགས་ཀྱིས་ཐུགས་བློར་བཟུང་ནས་གསུངས་པར་གྲགས། སྤོས་ཁང་པ་སོགས་ཕྱག་ལེན་ཕྱི་མར་རབ་བྱུང་གི་བར་ཆད་དྲི་བ་ནས་བསྙེན་རྫོགས་ཀྱི་དུས་བསྒོའི་བར་སྒྲུབ་གྲ་གཅིག་ཁོ་ནར་མཛད་ནས་ཚད་ཟིན་དང་བསྟུན་ནས་ཕྱི་མ་རྣམས་སྒྲུབ་པ་དངོས་གཙང་བས་རྫོགས་བྱེད་(༣༢ན)
དང་གནག་ལྷས་སོགས་ཀྱི་རིང་ལུགས་ལ་མ་ཞུགས་པ་མཐའ་དག་ཤཱཀྱ་སེང་གེའི་བསྟན་པ་ལ་དགོངས་ནས་མཛད་པ་ཅི་གནང་ཞེས་ཐལ་མོ་སྦྱར་ནས་ཞུ་བ་འབུལ་ལོ། །སོ་ཐར་གྱི་སྡོམ་པ་འབོགས་པ་ལ་སྐྱེ་བའི་རྟེན་ནི་རྒྱལ་བ་ཙོང་ཁ་པ་ཆེན་པོས་འདུལ་བ་རྒྱ་མཚོའི་སྙིང་པོར། དེ་ལྟར་སོ་ཐར་རིགས་བརྒྱད་པོ། །སྒྲ་མི་སྙན་པ་མ་གཏོགས་པའི། །གླིང་གསུམ་སྐྱེས་པ་བུད་མེད་ཀྱི། །རྟེན་ལ་སྐྱེ་ཡི་ཟ་མ་དང་། །མ་ནིང་མཚན་གཉིས་སོགས་ལ་མིན། །ཅེས་གསུངས་པས་རྟེན་དེ་ལ་ཚིགས་སྔ་མ་དགེ་ཚུལ་དུ་བསྒྲུབ་པའི་སྔོན་འགྲོར་རབ་ཏུ་བྱུང་བར་རུང་མི་རུང་བརྟག་པའི་ཕྱིར་བར་ཆད་འདྲི་བ་ལ། མདོ་རྩ། རྒྱ་ཆེར་འགྲེལ། ལས་བརྒྱ་དང་བཅས་པར་གོ་རིམ་ཐོར་བུར་གསུངས་པ། ལུང་རིགས་གཏེར་མཛོད་དུ་འཁྲུགས་སྡེབས་མཛད་པའི་དགོངས་དོན་སྙིང་པོར་བསྒྲིལ་བ་ལ། །སྤྱིར་སྡོམ་པ་སྐྱེ་བའི་བར་ཆད། སྐྱེ་བ་གནས་པའི། གནས་པ་ཁྱད་པར་ཅན་དུ་གྱུར་པའི། རྟེན་མཛེས་པའི་བར་ཆད་དང་བཞི་ལས། དང་པོ་མི་མ་ཡིན་པའི་འགྲོ་བ་པ་ལྟ་བུ་རྣམ་སྨིན་གྱི་བར་ཆད་འགྲོ་བ་ཉམས་པ། བྱང་གི་སྒྲ་མི་སྙན་པ་ལྟ་བུ་རྣམ་སྨིན་ཀྱི་བར་ཆད་གནས་རིགས་ཉམས་པ། མ་ནིང་རིགས་ལྔ་ལྟ་བུ་རྣམ་སྨིན་གྱི་བར་ཆད་མཚན་ཉམས་པ། མུ་སྟེགས་ཅན་ཞུགས་པ། རྐུ་ཐབས་སུ་གནས་པ། བསམས་བཞིན་དུ་མཚམས་མེད་དང་ཉེ་བའི་མཚམས་མེད་བྱས་པ། ཕམ་པ་འཆབ་བཅས་ཀྱིས་རྒྱུད་གོས་པ་རྣམས་ལས་ཀྱི་བར་ཆད། རྒྱུད་དུག་གསུམ་ཤས་ཤིན་ཏུ་ཆེ་བས་དགེ་བ་ལ་སྦྱོར་མི་བཟོད་པ་ལྟ་བུ་ཉོན་(༣༢བ)
མོངས་པའི་སྒྲིབ་པ་ཤས་ཆེ་བའི་བར་ཆད། ཁྱིམ་པ་དང་མུ་སྟེགས་ཅན་གྱི་རྒྱལ་མཚན་འདོར་བར་མི་བྱེད་པ་སོགས་རྟགས་གཞན་དུ་གྱུར་པའི་བར་ཆད། འདི་དག་ནི་སྡོམ་པ་སྐྱེ་བའི་བར་ཆད་ཅན་ཡིན་པས་སྡོམ་སྐྱེའི་སྐལ་བ་མེད་པར་བཞེད། གཉིས་པ། རྒྱལ་པོས་བཀྲབས་པ་བློན་པོའི་མཆོག་གམ་རུ་དཔོན་ལྟ་བུ། བྲན་ལ་སོགས་པ་གཞན་གྱི་དབང་དུ་གྱུར་པས། བུ་ལོན་ཆགས་པ་སོགས་ནི་གནས་པའི་བར་དུ་གཅོད་པ་སྟེ། དེ་དག་སྡོམ་པ་སྐྱེས་སུ་ཟིན་ཀྱང་བར་ཆད་དེ་དག་གི་དབང་གིས་ཡུན་རིང་དུ་མི་གནས་པར་དབབ་དགོས་པ་སོགས་ཀྱི་རྒྱུ་བྱེད་པའི་ཕྱིར། གསུམ་པ་ནི། ནད་ཀྱིས་གཟིར་པ་སོགས་གནས་པ་ཁྱད་པར་དུ་འགྱུར་བའི་བར་ཆད་དོ། །སྡོམ་པ་སྐྱེས་སུ་ཟིན་ཀྱང་ནད་ཀྱི་དབང་གིས་བསླབ་པ་སོགས་ལ་སྦྱོར་མི་བཟོད་པས་ཡོན་ཏན་གོང་ནས་གོང་དུ་ཁྱད་པར་དུ་འགྱུར་བའི་གེགས་བྱེད་པའི་ཕྱིར། བཞི་པ་ལ། གདོལ་པ་དང་གཡུང་པོ་སོགས་ཀྱི་རིགས་ལ་སྐྱོན་ཆགས་པའི་བར་ཆད། སྐྲ་སེར་དང་ལག་རྡུམ་སོགས་ལུས་ལ་སྐྱོན་ཆགས་པའི་བར་ཆད་དེ་འདི་དག་ནི་རྟེན་མཛེས་པའི་བར་ཆད་ཡིན་པས་སྡོམ་པ་སྐྱེས་སུ་ཟིན་ཀྱང་རྐྱེན་དེ་ལྟ་བུ་ཁྱིམ་པ་དག་བསྟན་པ་ལ་མ་དད་པའི་རྒྱུ་བྱེད་པའི་ཕྱིར། འོན་ཀྱང་ཕྱི་མ་གཉིས་བསྟན་པ་ལ་ཕན་པ་སོགས་དགོས་པ་ཁྱད་པར་ཅན་ཡོད་ན་རབ་ཏུ་འབྱིན་པར་ཉེས་པ་མེད་དེ། མེ་ཏོག་འཕྲེང་རྒྱུད་ལས། དེ་དག་དགེ་རྒྱུན་མེད་མིན་ཞིང་། །ཐར་པའང་མི་འདོད་མ་ཡིན་མོད། །གཅིག་ཏུ་བསྟན་ལ་སྐྱེ་བོ་ཡི། །ཐོས་ན་སྐྱོན་དུ་བལྟ་ཕྱིར་བཀག །བསམ་དང་རྗེས་གྱི་བསམ་ཤེས་ཤིང་། །མངོན་ཤེས་ཏིང་(༣༣ན)
འཛིན་ཐོབ་པ་ནི། །མཐུ་ཡིས་འཇིག་རྟེན་ཚིམ་བྱེད་ཕྱིར། །རབ་ཏུ་འབྱིན་པ་ཉེས་པ་མེད། །ཅེས་གསུངས། འོན་ཀྱང་འདི་དང་བསྙེན་རྫོགས་ཀྱི་བར་ཆད་སྐོར་ལ་སྟག་ཚང་ལོ་ཆེན་གྱི་འདུལ་ཊཱིཀ་ཏུ་མེ་ལོང་གི་བྱད་བཞིན་ལྟར་ལེགས་པར་བཀྲོལ་བ་དབྲི་བསྣན་མེད་པ་འདི་ལྟ་སྟེ། སྡོམ་པ་སྐྱེ་བའི་དང་། གནས་པའི་དང་། ཁྱད་པར་དུ་འགྱུར་བའི་བར་ཆད་དང་། སྐྱེ་བའི་བར་ཆད་གཞན་བཤད་པ་དང་། མཛེས་པའི་བར་ཆད་བཤད་པའོ། །དང་པོ་ལ་བསམ་རྟེན་ལ་དང་། ལུས་རྟེན་ལ་སྐྱོན་ཆགས་པའི་བར་ཆད་དོ། །དང་པོ་ལ། དོར་བྱའི་བར་ཆད་མདོར་བསྟན། ཞར་ལ་ཚིག་གི་ཚེགས་སྐྱུང་། མགུ་བར་གྱུར་པ་རྒྱས་པར་བཤད་པའོ། །དང་པོ་ནི། རབ་ཏུ་སོགས་ནས། ངག་གིས་ཀྱང་དྲི་བར་བྱ་སྟེ། མུ་སྟེགས་ཅན་དེ་འདིར་བསྟན་གྱི་བར་ཆད་ཅན་ཡིན་པའི་ཕྱིར། དེས་ན་ཆོས་འདི་ལས་ཕྱི་རོལ་ཏུ་གྱུར་པའི་མུ་སྟེགས་ཅན་ཆོས་ཅན། ཁྱོད་རབ་ཏུ་སོགས་ནས་མི་བྱ་སྟེ། ཁྱོད་ལ་སྡོམ་པ་མི་སྐྱེ་བའི་ཕྱིར་ཏེ། སངས་རྒྱས་ལ་ཞེ་འགྲས་པའི་སེམས་དང་ལྡན་པའི་ཕྱིར་རོ། །རྒྱུ་མཚན་འདི་དང་ལྡན་པ་མུ་སྟེགས་ཅན་དངོས་མ་ཡིན་པ་གཞན་འདིས་མཚོན་ནོ། །དེས་ན་སྔོན་གྱི་འདུལ་འཛིན་རྣམས་ཀྱིས་བར་ཆད་འདི་དག་ལ་མཚན་ཉིད་དང་། དབྱེ་བ་དང་། དགག་བྱ་དང་། མཚོན་དོན་ཏེ་བཞི་བཞིས་བཤད་པ་རྣམས་ཀྱིས་དང་པོ་གསུམ་རིམ་པ་ལྟར་ཆོས་ཅན་དང་། སྒྲུབ་ཆོས་དང་། རྟགས་སུ་བྱས་པ་སྟེ་ཕྱི་མ་རྣམས་ལའང་དེ་བཞིན་ནོ། །འོ་ན་མུ་སྟེགས་ཅན་དུ་གྲགས་པ་མཐའ་དག་མི་རུང་ངམ་ཞེ་ན། མ་(༣༣བ)
ཡིན་ཏེ། ཉེ་དུ་ལ་གདུངས་ཤིང་རིགས་མི་བསླུ་བའི་ཤཱཀྱ་དང་། ལས་དང་བརྩོན་འགྲུས་ཆོས་སུ་སྨྲ་ཞིང་ཆོས་འདི་ལ་དད་པ་མ་སྤངས་པ་མེ་པ་རལ་པ་ཅན་མ་གཏོགས་པའི་ཕྱིར་རོ། །དེར་ཡང་མ་ཟད་དེ། སྔོན་མུ་སྟེགས་ཅན་ཡིན་ཡང་ཆོས་འདི་ལ་སེམས་མགུ་བར་འགྱུར་ན་རུང་བས། དེར་ཡང་མ་གྱུར་པས་མུ་སྟེགས་མཚན་ཉིད་པ་རྣམས་མི་རུང་ཞེས་པའོ། །གཉིས་པ་ནི། འདིར་འོག་མ་རྣམས་སུ་ཚིག་ཚོགས་སྐྱུང་བའི་ཕྱིར་དུ་བཀོལ་བ་ཞེས་པའི་ཐ་སྙད་མཛད་དོ། །མིང་དེ་ནི་ཆོས་ཅན། ཁྱོད་འཇུག་པའི་གཞི་ཡོད་དེ། མདོ་སྔ་མའི་མུ་སྟེགས་ཅན་དང་། ཕྱི་མའི་ཤཱཀྱ་ལ་སོགས་པའི་འཇུག་གི་མུ་སྟེགས་ཅན་ཞེས་པ་ཡན་ཆོད་ཟུར་དུ་བཀོལ་ཞིང་ཕུད་པའི་མདོ་ཚིག་རྣམས་ཁྱོད་འཇུག་པའི་གཞི་ཡིན་པའི་ཕྱིར་རོ། །དེ་ལྟར་ན་མདོ་ཚིག་དེ་རྣམས་འོག་གི་བར་ཆད་རེ་རེ་ལ་སྦྱར་དགོས་པས་འཁྲིས་བཀོལ་ཞེས་བྱ་ཞིང་། ཕུད་པ་དེ་རྣམས་ལ་བོར་བཀོལ་ཞེས་བྱ་སྟེ། འོག་གི་བཀོལ་བ་བྲན་ནོ་ཞེས་པ་ལྟ་བུ་ལ། བཀོལ་བ་ཞེས་པ་འཁྲིས་ཞེས་པ་བཀོལ་ཡིན་ལ། བྲན་ཞེས་པ་འདིར་བོར་བའི་མུ་སྟེགས་ཅན་ཞེས་པའི་དོད་དུ་ཤེས་པར་བྱའོ། །གསུམ་པ་ལ་མགུ་བར་གྱུར་པའི་ཚད། མགུ་བར་གྱུར་པའི་ཐབས། དེ་ལ་ཇི་ལྟར་བསྐྱེད་ཚུལ་ལོ། །དང་པོ་ནི། ཡོན་ཏན་དང་སྐྱོན་ཇི་ལྟར་གནས་པ་བཞིན་དུ་བརྗོད་པའི་སྒོ་ནས་དཀོན་ཅོག་རྣམས་སོགས་ནས་བརྗོད་པ་མ། སྔོན་གྱི་ཞེན་པའི་སྒོ་ནས་སེམས་མི་གཡོ་སོགས་ནས་ཉིད་ཡིན་པས་དེ་རབ་བྱུང་བྱའོ། །གཉིས་པ་ནི། མགུ་བ་དེའི་དོན་དུ་ད་ལྟ་མགུ་བ་དེ་དང་མི་ལྡན་པའི་མུ་སྟེགས་དེ་དགེ་བསྙེན་(༣༤ན)
ཉིད་དུ་བྱས་པའི་ལས་ཀྱི་མཐའ་དེ་ལ། དགེ་འདུན་གྱིས་གསོལ་བཞིའི་ལས་ཀྱིས་ཟླ་བ་བཞིའི་བར་དུ་རབ་བྱུང་གི་ཁྲོད་དུ་གནས་སུ་གཞུག་པར་བྱ་སྟེ། དེའི་བར་དུ་མགུ་བ་སྐྱེ་བར་འགྱུར་སྲིད་པའི་ཕྱིར་རོ། །གསུམ་པ་ནི། དེའི་སོགས་ཏེ། ལས་སུ་བསྐོ་བའི་བྱེད་པ་པོ་ནི་དེ་ཉིད་ཡིན་ནོ། །གཉིས་པ་ལ། དངོས་དང་། ཞར་བྱུང་ངོ་། །དང་པོ་ནི། འདི་ལོན་ནམ་ཞེས་སྒྲུབ་པའི་རྣམ་ལྡན་དུ་དྲིས་པས་ན་བཀོལ་པ་མ་སྦྱར་བར། རབ་ཏུ་སོགས་ནས་མི་བྱ་སྟེ། ཁྱོད་ལ་སྡོམ་པ་མི་སྐྱེ་བའི་ཕྱིར་ཏེ། དེ་ལུས་ཀྱི་ན་ཚོད་མ་སྨིན་པས་བསྟན་པའི་ཁུར་འཁྱེར་མི་ནུས་པའི་ཕྱིར་རོ། །རྒྱུ་མཚན་དེ་དང་མཐུན་པ་གཞན་ཡང་མཚོན་ནོ། །བར་ཆད་དྲི་བའི་རྒྱུ་མཚན་ཡང་སྔར་བཞིན་སྦྱར་རོ། །གཉིས་པ་ནི། དགེ་སློང་བཞིན་དུ་དགེ་ཚུལ་གཅིག་ལས་ལྷག་པ་གནས་གཅིག་ཏུ་སོགས་ཏེ། དགེ་ཚུལ་ནི་རྒྱུད་ཉེ་བར་མ་ཞི་བ་ཤས་ཆེ་བའི་ཕྱིར་ཏེ། བསྟན་པ་ལ་ཞུགས་ཀྱང་ཡོངས་སུ་མ་རྫོགས་པས་སོ། །དེས་ན་སོ་སོར་རབ་ཏུ་འབྱུང་བར་མི་འདོད་ན་ལྷན་ཅིག་རབ་ཏུ་བྱུང་ནས་ལོ་ལོན་ན་རྒན་པ་སོགས་སོ། །ལོ་མ་ལོན་ན་གཞན་ལ་གནས་པའི་སོགས་སོ། །གཏད་པ་དེས་དགེ་ཚུལ་དེ་སོགས་སོ། །ལོ་ལོན་ནས་བསྙེན་པར་སོགས་སོ། །གཏད་པ་དེས་མི་སྟེར་ན་དབང་དང་ཤེད་ལ་སོགས་པའི་མཐུས་དགུག་པར་བྱ་སྟེ། རང་གིས་བདག་གིར་བཟུང་བའི་སློབ་མ་རང་ཉིད་ཀྱིས་ཆོས་ལ་སྦྱར་དགོས་པས་སོ། །གཉིས་པ་ལ་བྲན་རྗེ་དཔོན་གྱི་དང་། བུ་ལོན་ཅན་བདག་པོའི་དང་། བུ་ཚ་བདག་པོའི་དབང་དུ་གྱུར་པ་གསུམ་མོ། །དང་པོ་ནི། བཀོལ་པ་རབ་ཏུ་བྱུང་(༣༤བ)
བའི་ཕྱིར་ཉེ་བར་འོངས་པ་ལ་བྲན་མ་ཡིན་ནམ་ཞེས་དྲི་བར་སོགས་ནས། བདག་གིས་ཀྱང་དྲི་དགོས་ཏེ། དེར་བར་ཆད་ཅན་ཡིན་པས་སོ། །རྗེ་དཔོན་གྱི་དབང་དུ་གྱུར་པའི་བྲན་ཆོས་ཅན། དེ་གཉིས་བྱར་མི་རུང་སྟེ། སྡོམ་པ་སྐྱེ་ཡང་ཉེས་བྱས་མཁན་སློབ་སོགས་ལ་འབྱུང་བའི་ཕྱིར་ཏེ། སྡོམ་པ་རྒྱུན་མི་གནས་པའི་དགག་བྱས་གཞན་གྱིས་སྨོད་པ་སོགས་འབྱུང་བས་སོ། །གཉིས་པ་ནི། ལོ་བཅོ་ལྔ་ལོན་པ་ཡིན་ནམ། ཞེས་པ་ལྟ་བུའི་ཡིན་ནམ་གྱི་ཚིག་བོར་ཞིང་བཏང་ལ། དེའི་གནས་སུ་ཁྱོད་ལ་ལ་ལའི་སོགས་ནས་མེད་དམ་ཞེས་བཅུག་ནས་དྲི་བར་བྱ་སྟེ། བུ་ལོན་ཅན་དེ་ཡང་བར་ཆད་ཅན་ཡིན་པས་སོ། །བདག་པོའི་དབང་དུ་གྱུར་པའི་བུ་ལོན་ཅན་ཆོས་ཅན། ཆོས་རྟགས་སྔ་མ་བཞིན་ནོ། །དེ་གཉིས་ལའང་དགག་བྱ་དེ་ལྡན་གཞན་ཡང་མཚོན་ཏེ་འོག་མ་རྣམས་ལའང་དེ་བཞིན་ནོ། །གསུམ་པ་ནི། རབ་ཏུ་སོགས་ནས་ཞག་བདུན་རབ་བྱུང་མི་བྱེད་པར་རང་དགར་བཞག་ནས་བསྲེལ་བར་བྱའོ། །ཐག་ཉེ་བར་མ་ཟད་དེ་ཡུལ་ཐག་རིང་བ་ཡིན་ན་ཡང་སོགས་ཏེ། གཞུང་འདིས་ཐག་རིང་ན་བསྲེལ་མི་དགོས་པར་བསྟན་ནོ། །ཞེས་གཞི་འགྲེལ་མཁན་པོ་དགེ་ལེགས་བཤེས་གཉེན་གྱིས་བཤད་པ་ནི་ལེགས་པར་བཤད་པའོ། །ཇི་ལྟར་བསྐྱང་བ་ནི། རབ་ཏུ་སོགས་སོ། །གསུམ་པ་ནི། རབ་ཏུ་བྱུང་བའི་ཕྱིར་དུ་ཉེ་བར་སོགས་ཏེ་རྒྱུ་མཚན་སྔར་བཞིན། བསྙེན་པར་རྫོགས་པར་བྱེད་པ་དག་གི་མཛེ་དང་འབྲས་དང་ཞེས་སོགས་ཁྱད་པར་ཞིབ་ཏུ་དྲི་དགོས་ཏེ། སྡོམ་པ་མཆོག་ལ་ལུས་ཀྱང་མཆོག་དགོས་པས་སོ། །ལུས་ནད་ཀྱིས་གཟིར་བའི་ནད་པ་ཆོས་ཅན། (༣༥ན)
ཆོས་རྟགས་སྔར་བཞིན་ལ། རྟགས་བསྒྲུབ་དགེ་བ་ལ་སྦྱོར་མི་བཟོད་པས་སོ། །བཞི་པ་ལ་དབང་དུ་བྱ་བའི་མདོ་དང་། དེའི་མཚན་གཞི་རྒྱས་པར་བཤད་པའོ། །དང་པོ་ནི། བཀོལ་བའི་མིང་དོན་རྒྱུ་ལས་བཟློག་པའི་ཆད་པ་ཞེས་པའི་གོང་ཡན་ཆད་ལ་སྦྱར་རོ། སྤྲུལ་པ་ནས་དེའི་བར་འདི་རྣམས་ལ་སྡོམ་པ་སྐྱེ་བའི་ཆོས་ཉིད་མེད་པར་ཡང་འདྲ་སྟེ། སྐྱེ་བའི་བར་ཆད་ཅན་དུ་མཚུངས་པས་སོ། །མ་སྐྱེས་ཀྱང་རབ་བྱུང་སོགས་བྱས་པ་དེ་ལྟ་བུའི་རྟགས་ཅན་ནི་ཆོས་ཅན། བསྙིལ་ཞིང་བསྐྲད་པར་བྱ་བ་ཡིན་ཏེ། རྟགས་ཅན་སྡོམ་མེད་ཡིན་པས་སོ། །གཉིས་པ་ལ་རྣམ་སྨིན་གྱི་དང་། ལས་ཀྱི་སྒྲིབ་པས་སྐྱེ་བའི་བར་ཆད་གཉིས་སོ། །དང་པོ་ལ་འགྲོ་བ་ཉམས་པ་ནི་མི་མ་ཡིན་མིར་སྤྲུལ་པ་ཆོས་ཅན། ཆོས་རྟགས་མུ་སྟེགས་ཅན་དང་འདྲ་བ་ལས་རྟགས་བསྒྲུབ་རྣམ་སྨིན་གྱི་སྒྲིབ་པས་སྡོམ་པ་སྐྱེ་བའི་རྟེན་དུ་མི་རུང་བའི་ཕྱིར་རོ། །ལུས་ཉམས་པ་ནི་མ་ནིང་སྟེ། དེ་ལའང་དེ་བཞིན་ནོ། །མ་ནིང་དེ་རྣམ་པ་ལྔ་ཡོད་དོ། སྐྱེས་ཙམ་ནས་ཕོ་མོ་གཉིས་ཀའི་མཚན་ཡོད་པ་དང་། ཟླ་བའི་སྟོད་སྨད་ལ་ཕོ་མོའི་འདོད་ཆགས་སོ་སོར་སྐྱེ་བ་ཟླ་བ་ཕྱེད་པ་དང་། ཕོ་མོ་གང་རུང་གིས་རང་ལ་མ་འཁྱུད་བར་དུ་ཆགས་པ་མི་སྐྱེ་བའི་འཁྱུད་ནས་ལྡང་བ་དང་། དེ་གཉིས་ཆགས་པའི་སྦྱོར་བ་བྱེད་པ་མ་མཐོང་བར་དུ་མི་སྐྱེ་བ་ཕྲག་དོག་ཅན་དང་། མཚན་མ་མཚོན་གྱིས་བཅད་པ་སོགས་ཀྱིས་ཉམས་པའོ། །འདི་རྣམས་ལས་ཐ་མ་ནི་ཕོ་མོའི་ཆགས་སོགས་ཀྱི་ཉེས་པ་བསྟེན་ན་སོགས་སོ། །གཉིས་པ་ནི། རྐུ་ཐབས་སོགས་ཏེ། དེའི་(༣༥བ)
མཚན་ཉིད་ནི། རང་ཉིད་བསྙེན་པར་རྫོགས་པའི་སྡོམ་པ་ལེན་ཆོག་མ་བྱས་པ་ཉིད་དམ་བྱས་ཀྱང་ལས་མ་ཆགས་པ་ཉིད་དུ་ཤེས་པའི་རབ་བྱུང་། ཡུལ་དགེ་འདུན་མཚན་ཉིད་ཚང་བ་དང་གནས་ལྷན་ཅིག་མཚམས་ནང་གཅིག་ཏུ་དུས་ལན་ཅིག་གཉིས་ཡན་ཆོད་དུ་དངོས་པོ་འདུལ་བའི་ལས་བརྒྱ་རྩ་གང་རུང་སེམས་བསྟད་ནས་ཉམས་སུ་མྱོང་བར་བྱས་པ་ནི་རྐུ་ཐབས་སུ་གནས་པ་ཡིན་ལ། དེ་ཆོས་ཅན། ཆོས་རྟགས་འདྲ། རྒྱུ་མཚན་བསྟན་པའི་གསང་བ་ཟབ་མོ་ལ་ལོངས་སྤྱོད་དུ་མི་དབང་བཞིན་དུ་སྤྱད་པའི་ལས་སྒྲིབ་ཀྱིས་སྡོམ་པའི་རྟེན་དུ་མི་རུང་བས་སོ། །མུ་སྟེགས་ཅན་ཞུགས་པ་ཡང་ཆོས་རྟགས་འདྲ། རྟགས་བསྒྲུབ་ལས་ལོག་དྲུག་གང་རུང་བྱས་པའི་ལས་སྒྲིབ་ཀྱིས་སོགས་སོ། །དེའི་མཚན་ཉིད་ནི། ལས་ལོག་དྲུག་ནི། ཆོས་འདི་པའི་རབ་ཏུ་བྱུང་བ་འདི་ཡང་དག་པར་བླངས་པ། མུ་སྟེགས་ཀྱི་ལྟ་བ་དེ་དང་ལྡན་པ། སངས་རྒྱས་ཀྱི་ཆོས་གོས་འདི་བོར་ཏེ་མུ་སྟེགས་ཀྱི་རྒྱལ་མཚན་དེས་མུ་སྟེགས་ཀྱི་འདུག་གནས་དེར་བསྡད་ནས་སྐྱ་རེངས་ཤར་བ་སྟེ་ལྔ་དང་། མུ་སྟེགས་ཅན་ཡིན་ཅིང་ལྔ་པོ་དེ་མ་བྱས་ཀྱང་རྐུ་ཐབས་སུ་གནས་པའི་ལས་རྣམས་བྱས་པ་ཡང་དེ་དང་འདྲ་བར་སྡོམ་པ་མི་སྐྱེ་ཞིང་། དེ་ཡང་མུ་སྟེགས་ཅན་ཞུགས་པར་འགྱུར་བའི་སྒོ་ཡིན་ནོ། །མ་བསད་པ་ནས་ཁྲག་ཕྱུང་བའི་བར་མཚམས་མེད་ལྔ་སྟེ། དེ་རྣམས་གང་རུང་བྱས་པ་ཆོས་ཅན། སྒྲུབ་བྱེད་ལས་སྒྲིབ་ཁྱད་པར་ཅན་གྱིས་རྒྱུད་ཉམས་པའི་སྒོ་ནས་སྡོམ་པའི་རྟེན་དུ་མི་རུང་བས་སོ། །འོག་ནས་འཆད་པའི་མཚན་ཉིད་ཅན་གྱི་དགེ་སློང་མ་སུན་ཕྱུང་བ་དང་ཕམ་པར་འགྱུར་བ་ཐུན་མོང་བ་བཞི་ལས་(༣༦ན)
གང་ཡང་རུང་བ་བྱུང་བ་རྣམས་མ་ཡིན་ནམ་ཞེས་དྲི་དགོས་པའི་རྒྱུ་མཚན་དང་། རབ་བྱུང་སོགས་མི་རུང་བའི་རྒྱུ་མཚན་རྟགས་བསྒྲུབ་ཀྱང་མཚམས་མེད་དང་འདྲའོ། །ལྔ་པ་ལ། སྤྱོད་པ་ལ་དང་། ལུས་ལ་སྐྱོན་ཆགས་པས་མཛེས་པའི་བར་ཆད་དོ། །དང་པོ་ནི། རྒྱུ་འཐབ་ཀྲོལ་སོགས་ལས་བཟློག་པའི་ཆད་པ་བསྡིགས་པ་ནན་ཏུར་སོགས་བྱས་ན་དེ་དག་ཁས་མ་བླངས་པར་བསླབ་པ་བབས་ཤིང་རྒྱུ་འཐབ་ཀྲོལ་སོགས་ནི་གཏོང་བ་ལ་ཆད་པ་ནན་ཏུར་ཁས་མི་ལེན་པའི་དགེ་ཚུལ་ལམ། ཁྱིམ་པ་ཆོས་ཅན། རབ་ཏུ་སོགས་ཏེ། སྐྱེ་ཡང་ཉེས་བྱས་འབྱུང་བའི་ཕྱིར་ཏེ། བྱ་བ་ངན་པ་ཆེན་པོ་ནི་འཕྲོ་གཅོད་ལ་གཞན་གྱི་དམིགས་རྐྱེན་སོགས་སུ་མཛེས་པའི་ཆད་པ་ཁས་མི་ལེན་པའི་ཕྱིར་རོ། །འོག་ཞུ་བའི་སྐབས་ནས་མི་སྐྱེ་བར་བཤད་པ་དང་འདིར་སྐྱེ་ལ་ཉེས་བྱས་སུ་གསུངས་པའི་ཁྱད་པར་ལ། སྔོན་གྱི་ཆེན་པོ་ཁ་ཅིག །ཆད་པ་གཅོད་མཁན་མ་ཡིན་པའི་དགེ་འདུན་གཞན་གྱི་སར་མི་སྐྱེ་ཞིང་དེ་དག་གི་སར་སྐྱེ་བ་ལ་དགོངས་ཏེ། དེ་གཉིས་ལ་བཟོད་གསོལ་མི་འཆགས་པ་དང་འཆགས་པས་སོ། །ཞེས་གསུངས་པ་ནི་མི་རིགས་ཏེ། བཟོད་གསོལ་འཆགས་པ་སྡོམ་པའི་སྐྱེ་རྒྱུར་གང་དུའང་མ་བཤད་པས་སོ། །ཕྱི་རབས་པ་དག་ངག་ཏུ་ཁས་མི་ལེན་པ་འདྲ་ཡང་། རྒྱུ་ལས་བཟློག་པར་ཞེ་བས་ཀྱང་ཁས་མི་ལེན་པ་དང་། ཞེ་བས་ཁས་ལེན་པ་ཁྱད་པར་ཡིན་ནོ། །ཞེས་ཟེར་བའང་ཤེས་བྱེད་ཀྱི་ཁུངས་ཅུང་ཟད་ཀྱང་མ་དམིགས་པས་རང་བློས་སྦྱར་བ་ཁོ་ནར་ཟད་དོ། །དེས་ན་གཞུང་འདི་ཉིད་ཀྱི་སྡོད་ལུགས་དང་། ཁྱད་པར་རྒྱ་དཔེ་ལས་(༣༦བ)
ཆད་པ་ཁས་མི་ལེན་པ་བསྙེན་པར་རྫོགས་པར་མི་བྱ་ཞེས་སོགས་སུ་ཡོད་གསུང་བ་དང་། གོང་དུ་བཀོལ་བ་ཆད་པ་ཡན་ཆད་དོ། །ཞེས་པའི་གཞུང་དང་འདིའི་འགྲེལ་པས་ཀྱང་འདིར་སྐྱེ་བར་ནི་བཤད་ལ་འོག་ཏུ་མི་སྐྱེ་བའི་རྒྱུ་མཚན་བྱ་བ་ངན་པ་འཕྲོ་མི་གཅོད་པས་ཡན་ལག་ངེས་པའི་སྒོ་ནས་ངེས་པ་ལྔ་བྲལ་མ་ཚང་བ་ཉིད་དུ་རིགས་པས་འདིར་དེ་དང་འབྱེད་དགོས་པའི་ཕྱིར་བཤད་པ་དང་པོ་ཉིད་རིགས་སོ། །འོ་ན་རྒྱ་ཆེ་འགྲེལ་སོགས་སུ་འདི་ཡང་རྒྱུ་མི་གཏོང་བ་ལྟ་བུར་གསུངས་པ་ཅི་ཞེ་ན། རྩ་བས་བསྟན་པའི་ཆད་པ་ཁས་མི་ལེན་པ་ཙམ་ཡང་རབ་བྱུང་སོགས་མི་རུང་ན་རྒྱུ་མི་གཏོང་བ་ལྟ་ཅི་སྨོས་ཞེས་པའི་དོན་དུ་གསལ་ལོ། །དེ་ལྟ་མ་ཡིན་ན། འགྲེལ་པ་མཁན་པོ་ཉིད་ཚིག་སྔ་ཕྱི་འགལ་བ་ཁོ་ནར་འགྱུར་རོ། །དེའི་ཕྱིར་གང་དག་འདིར་ནན་ཏུར་བཞི་དང་། འོག་མ་གནས་དབྱུང་བདུན་གྱི་དབང་དུ་བྱས་སོ། །ཞེས་པའང་འགྲེལ་པ་རྣམས་དང་འགལ་ཞིང་ཤེས་བྱེད་ཀྱང་མེད་དོ། །གོང་གི་ཆོས་ཅན་དུ་བཟུང་བའི་གང་ཟག་དེས་བཟོད་གསོལ་གྱི་ཆོ་ག་ཟུར་དུ་མི་དགོས་ཏེ། དེ་བསྙེན་སོགས་ནས་ཡིན་པའི་ཕྱིར་རོ། །གལ་ཏེ་བསྙེན་པར་རྫོགས་ཟིན་ནས་རྒྱུ་གཏོང་བར་ཁས་མི་ལེན་པ་ནི་ལས་འཆགས་པའི་དགེ་འདུན་ཚོགས་པ་ཡོད་ན་སླར་ཡང་ཆད་པས་བཅད་པར་བྱའོ། །གལ་ཏེ་འཐབ་ཀྲོལ་སོགས་བྱེད་པའི་ལྟུང་བ་ཡོད་བཞིན་དུ་དེ་མ་མཐོང་ངོ་ཞེས་རྫུན་ཟེར་བ་ཆོས་ཅན། ལྟུང་བྱེད་དོ་ཞེས་བརྗོད་པར་རིགས་ཏེ། ངན་སོང་དུ་ལྟུང་བའི་བྱེད་ལས་དང་ལྡན་པའི་གཞིས་བསྡུས་ཀྱི་ཉེས་པ་ཡིན་པས་སོ། །མདོ་འདི་གཉིས་གླེང་གཞི་ནས་བསྡུས་པའོ། །གཉིས་པ་ནི། མཁྲིག་མ་དང་ལོང་(༣༧ན)
བུ་ནས་ཆད་པའི་ལག་རྡུམ་དང་རྐང་རྡུམ་སོར་མོ་སྦྲུལ་མགོ་ལྟ་བུར་གཅིག་ཏུ་འགྱུར་པའི་ལག་སོར་སོགས་དང་། ཁ་ལ་མཆུ་མེད་པ་དང་། ལུས་ལ་སྣག་ཚའི་རི་མོ་སོགས་ཀྱི་རྨ་མཚན་ཅན་དང་། བདུན་ཅུ་ཡན་དང་། བདུན་ལོན་ཀྱང་བྱ་རོག་སྐྲོད་མི་ནུས་པའི་རྒན་ཕྱེ་སོགས་དང་། རྐང་པ་འཐེང་པོ་དང་། བརླའི་ཕྱོགས་རླུང་གིས་ཉམས་པའི་སྨད་འཁྱལ་དང་། མིག་ཡ་གཅིག་ཞར་བ་དང་། མཁྲིག་མའི་མགོ་ནས་སོར་མོའི་རྣམ་པ་དོད་ཙམ་ཡོད་པ་ལག་སོར་ཟླུམ་པོ་དང་། བྲང་དང་སྒལ་ཚིགས་ཞོམ་པ་སྒུར་པོ་དང་ལུས་དང་ཡན་ལག་ལྷུ་མ་ཚང་བ་མིའུ་ཐུང་དང་། སྐེ་ལ་ལྦ་བ་ཡོད་པ་དང་། སྨྲ་མི་ཤེས་པ་ལྐུགས་པ་དང་། རྣ་བས་མི་ཐོས་པ་འོན་པ་དང་། སུག་བཞི་ཀ་ལ་བརྟེན་ཏེ་འཕྱེ་ཞིང་འགྲོ་བ་དང་། རྐང་པ་ལ་ནད་རྐང་བམ་ཡོད་པ་དང་། ཟོས་མ་ཐག་ཏུ་ཐུར་དུ་འབྱུང་བ་ཡ་ཟ་མ་ལུག་དང་། རྒས་མ་རན་པར་རྒས་པ་སྟ་གམ་དང་། ཚུལ་དེ་འདྲ་བ་མི་མཛེས་པའི་མི་རྣམས་ནི་ཆོས་ཅན། དྲང་སྲོང་ཆེན་པོ་སངས་རྒྱས་ཀྱིས་ཁྱོད་འདྲ་བའི་བར་ཆད་ཅན་རབ་ཏུ་འབྱུང་བ་སོགས་མི་རུང་ངོ་ཞེས་དགག་པ་མཛད་པའི་རྒྱུ་མཚན་ཡོད་དེ། ལུས་མཛེས་པ་རབ་ཏུ་བྱུང་བ་དང་། མཚམས་མེད་སོགས་ཀྱི་བར་ཆད་ཀྱིས་ཡོངས་སུ་སོགས་ནས་རབ་མཁྱེན་ཏེ། དྲང་པོ་གསུང་བ་བདེན་པའི་གསུང་དབྱངས་ཀྱི་མཚན་དང་ལྡན་པས་བཀའ་སྩལ་བའི་ཕྱིར་རོ། །བར་ཆད་ཀྱི་སྐོར་རྣམས་རབ་བྱུང་སོགས་ཀྱི་སྒོ་ནས་བསྡུ་བར་བྱ་བའི་སྐབས་ཡིན་པ་རྣམས་རྫོགས་ཏེ། དེ་ཡན་ཆད་གཞིའི་སྐབས་ནས་བྱུང་བའི་རབ་ཏུ་བྱུང་བའི་གཞི་རྫོགས་སོ། །(༣༧བ)
གཉིས་པ་ལ་ཐུན་མོང་བ་ཕ་ཆོག་གི་དང་། ཐུན་མོང་མ་ཡིན་པ་མ་ཆོག་གི་སྤྲོས་པའོ། །དང་པོ་ལ་ཐོབ་བྱེད་ཆོ་གའི་དང་། སྲུང་བྱེད་ཚུལ་ཁྲིམས་ཀྱི་སྤྲོས་པའོ། །དང་པོ་ལ་འགལ་རྐྱེན་སྤང་བ་དང་། མཐུན་རྐྱེན་སྒྲུབ་པ་གཉིས་ལས། དང་པོ་ལ་མ་བྱུང་བ་དགག་པ་དང་། བྱུང་བ་འཁོར་དུ་མི་བཞག་པ་གཉིས་ལས། དང་པོ་ལ་གཞིའི་བུ་ཚས་མཚོན་པའི་དོན་ནི། རབ་ཏུ་འབྱུང་བའི་ཕྱིར་ཞེས་སོགས་མཁྲིས་བཀོལ་དུ་གྲགས་པའི་མདོ་ཚིག་དང་སྦྱར་བྱའི་བོར་བཀོལ་ནི། རྒྱལ་པོས་མང་པོའི་ཁྲོད་ནས་ཡིད་བརྟན་པའི་གནས་སུ་བཀྲབས་པ་ཡིན་ལ། དེ་ཡང་རྒྱལ་པོས་མ་གནང་བ་དང་དེའི་ཚིག་འདར་མི་རུང་བའི་ཡུལ་སོགས་སོ། །བུ་ལོན་ཅན་གྱི་མཚོན་དོན་ནི། སྔར་བཞིན་དུ་བཀོལ་པ་ཕྱོགས་དེ་ན་ཆོམ་རྐུན་པར་གྲགས་པའོ། །བྲན་གྱི་མཚོན་དོན་ནི། ཀོ་ལྤགས་བཟོ་བའི་ལྷམ་མཁན་དང་། རིགས་ངན་པའི་གཡུང་པོ་དང་། ཀླ་ཀློར་སྐྱེས་པ་གདོལ་པ་དང་། དེ་ལྟ་བུ་གང་ལས་ཟན་བཟའ་བར་མི་བྱ་བ་རྣམས་རབ་ཏུ་སོགས་ཏེ། རྒྱུ་མཚན་སྔ་མ་བཞིན་ནོ། །ལག་རྡུམ་སོགས་ཀྱི་མཚོན་དོན་ལ་མདོར་བསྟན་ནི། གཞིའི་སྐབས་སུ་བཤད་པའི་ལག་རྡུམ་ཞེས་པ་ལ་སོགས་ཞེས་སོགས་ནས་ཡིན་ཏེ། ལུས་སོགས་ལ་སྐྱོན་ཆགས་པ་གཞན་ཡང་དེས་བསྟན་པའི་ཕྱིར་རོ། །རྒྱས་བཤད་ལ། སྐྲ་དང་། མགོ་དང་། མིག་དང་། རྣ་བ་དང་། སྣ་དང་། ཀོས་ཀོ་དང་། སོ་དང་། ལུས་གཞན་ལ་སྐྱོན་ཆགས་པ་རྣམས་སོ། །དང་པོ་ནི། སྐྲ་ཡུང་བའི་མདོག་ལྟར་སེར་བ་དང་། སེང་གེའི་སྐྲ་ལྟར་སེར་སྐྱ་དང་། རམས་ཀྱིས་བསྒྱུར་བ་ལྟར་ལྗང་གུ་ཁ་དང་། མི་རྣམས་(༣༨ན)
སྐྱེས་ཙམ་ནས་སྐྲ་དཀར་བ་དང་། གླང་ཆེན་གྱི་སྐྲ་དང་འདྲ་བ་ཐེར་ཚོམས་སུ་ཡོད་པ་དང་། སྐྲ་མེད་ཟངས་ལྟར་དམར་བའོ། །གཉིས་པ་ནི། སུལ་གཉིས་གསུམ་ཡོད་པའི་མགོ་འབར་འབུར་ཅན་དང་། ཚད་ལས་ཆེ་བའི་ཀླད་པོ་ཆེ་དང་། ལུས་ཧ་ཅང་སྦོམ་ནས་སྦྱོར་མི་བཟོད་པ་དང་། ལུས་འབྲས་ཀྱི་སྲུས་གླེབས་པ་འདྲ་བ་དང་། མགོ་བོ་བོང་བུ་དང་། ཕག་གི་མགོ་ལྟ་བུ་དང་། མགོ་བོ་གཉིས་ཡོད་པ་དང་། མཚོགས་མ་མེད་པ་ལྟར་མགོ་ཆུང་དང་། གསུམ་པ་ནི། ཙནྡན་ལྟར་མིག་དམར་བ་དང་། དབང་རྟེན་གྱི་ཤའི་གོང་བུའི་མིག་ཧ་ཅང་ཆེ་བ་དང་། ཚད་ལས་མིག་ཆུང་བ་དང་། མིག་ཧ་ཅང་མདོག་སེར་བ་དང་། མིག་ཤེལ་ལྟར་འཚེར་བ་དང་། མིག་ཆུ་བུར་ལྟ་བུར་ཕྱིར་གློ་བ་དང་། མིག་ཡ་གཅིག་ལས་མེད་པ་དང་། གཏན་མེད་པ་རྣམས་སོ། །བཞི་པ། ལྔ་པ། དྲུག་པ། བདུན་པ་རྣམས་ནི་དེ་དག་སྲོག་ཆགས་དྲུག་གི་དང་འདྲ་བ་དང་། རེ་རེ་ལས་མེད་པ་དང་། གཏན་མེད་པ་ཡིན་ལ། ཀོས་སྙུང་ཡང་ཀོས་ཀོ་ཕྱོགས་གཅིག་ལས་མེད་པ་ལ་བཤད་དོ། །སོ་གཅིག་པ་ནི། བར་ཆད་མེད་པར་འཁོར་བའམ། གཅིག་པུ་ཀོ་རེ་བའོ། །བརྒྱད་པ་ནི། མགུལ་པ་རིངས་ཆེས་ནས་ཚད་ལས་ལྷག་པ་དང་། མགོ་ཐལ་གོང་ལ་འབྱར་བ་མཇིང་ནུབ་དང་། མགོ་མདུན་དུ་དགུ་ཆེས་ཏེ་ཕྲག་པ་དང་མིག་ཐད་མཉམ་དུ་ཡོད་པ་དང་། ལུས་ཆེས་ཆེར་སྒུར་བ་དང་། ལུས་ཧ་ཅང་རིང་ཐུང་དང་། ཤ་སྐམ་པོ་རང་དང་། མ་འོས་པར་ངལ་སྐྱེན་པ་དང་། ཤ་མདོག་དཀར་སེར་དམར་ནག་གི་ཁ་དོག་རྣམ་པ་བཞི་(༣༨བ)
གང་རུང་དུ་གསལ་ཆེས་པ་དང་། རྐང་པ་འཕྱལ་ཞིང་འགྲོ་བ་གྱོལ་པོ་དང་། རྐང་པ་གཅིག་སྟེང་དུ་གཅིག་འདོར་ལུས་ཉམས་པའོ། །དེ་ལྟར་སྨོས་པ་དང་མ་སྨོས་ཀྱང་དེ་ལྟ་བུ་དེ་དག་སྐྱོན་ཅན་རབ་བྱུང་སོགས་དགག་པ་དེ་ཡང་བསྒྲིམས་ནས་རབ་ཏུ་བཟུང་བར་བྱ་སྟེ། སྡོམ་པ་སྐྱེ་ཡང་ཉེས་བྱས་འབྱུང་བའི་ཕྱིར་ཏེ། སྐྱེ་ཡང་བསྟན་པ་མི་མཛེས་པས་གཞན་གྱི་ཕྱར་ཁ་འབྱུང་བས་སོ། །གཉིས་པ་ནི། བྲན་དང་གདོལ་པ་སོགས་རིགས་དང་མདོག་དབྱིབས་ཀྱི་སྒོ་ནས་ལུས་ལ་སྐྱོན་ཆགས་པ་དེ་རྣམས་རབ་ཏུ་བྱུང་ཟིན་པ་ཡང་འཁོར་དུ་ཉེ་བར་བཞག་པར་མི་བྱ་སྟེ། འཁོར་མི་མཛེས་པ་གནས་སྦྱིན་པར་མ་ཟད་ཕྱི་བཞིན་འབྲང་བའི་འཁོར་དུ་ཡང་བཀག་པས་སོ། །ཞེས་དང་། གསུམ་པ་ཞུ་བའི་སྐབས་བྱུང་ལ་གཉིས། སྡོམ་པ་སྐྱེ་མི་སྐྱེའི་སྤྲོས་པ་དང་། བར་ཆད་ཀྱི་སྤྲོས་པ་གཞན་བཤད་པའོ། །དང་པོ་ལ་བཞི། རྒྱུད་ཀྱི་དང་། ཡུལ་གྱི་དང་། ཆོ་གའི་དང་། རྟགས་ཀྱི་ཁྱད་པར་གྱིས་མི་སྐྱེ་བའོ། །དང་པོ་ནི། ལྷ་ལ་སོགས་པ་མི་མ་ཡིན་པའི་འགྲོ་བ་པ་དང་། བྱང་གི་སྒྲ་མི་སྙན་པའི་མི་གཉིས་ནི་ཆོས་ཅན། སོ་ཐར་གྱི་སྡོམ་པ་སྐྱེས་བའི་བར་ཆད་ཡིན་ཏེ་དེ་སྐྱེ་བའི་ཞིང་ཉིད་མ་ཡིན་པའི་ཕྱིར་ཏེ། སྡིག་པ་སྤོང་བ་དང་དགེ་བ་ལ་འཇུག་པའི་བསམ་པ་ཤུགས་ཆུང་བ་ཡིན་པའི་ཕྱིར། མཚན་ལན་གསུམ་དུ་གྱུར་པ་ཡང་ཆོས་ཅན། དེ་སྐྱེ་བའི་ཞིང་མ་ཡིན་ཏེ། མ་ནིང་གི་རིགས་ཡིན་པའི་ཕྱིར། དང་པོ་གཉིས་ལ་ནི་མི་ཉམས་སོ་ཞེས་པ་གསུམ་གྱུར་ན་སྐྱེས་ཟིན་ཉམས་པར་ཡང་བསྟན་ནོ། །སྡོམ་པ་ལེན་པའི་ཚེ་ཉིད་ན་མཚན་འགྱུར་ན་ཡང་སྐྱེ་སྟེ། དགེ་(༣༩ན)
སློང་མའི་སྡོམ་པ་ནི་སྐྱེས་པ་ལས་ལེན་དགོས་པའི་ཤེས་བྱེད་དང་བཅས་ནས་སྐྱེ་བར་གསུངས་པས་སོ། །གཉིས་པ་ནི། སྔར་མཁན་པོ་ཉིད་དུ་གནས་པ་ལ་སྡོམ་པ་ཡོད་ཀྱི། དེ་མེད་ན་མེད་ཅེས་མཁན་པོ་མེད་ན་སྡོམ་པ་མི་སྐྱེ་བར་དང་། འདིར་སྐྱེ་བར་བཤད་པའི་དོན་ལ། ཁ་ཅིག །སྔ་མ་དགེ་སློང་དང་འདི་དགེ་ཚུལ་གྱི་སྡོམ་པའི་དབང་དུ་བྱས་ཞེས་དང་། ཁ་ཅིག །དེ་ལས་ལོག་སྟེ་སྨྲ་བ་གཉིས་ལ་ནི་རྒྱུ་མཚན་མེད་ལ། སྲོག་དེ་དགེ་སློང་མ་ཡིན་པར་ཤེས་ན་མི་སྐྱེ་ཞེས་སོགས་བཤད་པས་བསམ་ངོ་ལ་མེད་ན་མི་སྐྱེ་བ་གཞིའི་དོན་དང་། བསམ་ངོ་ལ་ཡོད་ན་དོན་ལ་མེད་ཀྱང་སྐྱེ་བ་འདིའི་དོན་ཡིན་ཞེས་ཟེར་ལ། རྒྱ་ན་རེ། སྐབས་འདིའི་ལུང་དང་བསྟན་བཅོས་སུ་མི་སྐྱེ་བར་བཤད་པ་རྣམས་ཀྱང་མཁན་པོ་དང་ལྡན་པའི་སྡོམ་པ་ལ་དགོངས་པར་ཊཱིཀྐས་བཤད་པས། སྡོམ་པ་ལ་མཁན་པོ་དང་ལྡན་པའི་དང་། མི་ལྡན་པའི་སྡོམ་པ་གཉིས་སུ་བྱས་པའི་སྔ་མ་མཁན་པོ་མེད་ན་མི་སྐྱེ་བ་དང་། ཕྱི་མ་མཁན་པོ་མེད་ཀྱང་སྐྱེ་བ་ལུང་སྔ་ཕྱིའི་དོན་ཡིན་ལ། མཁན་པོ་དེ་སྡོམ་པའི་མེད་ན་མི་འབྱུང་བའི་རྒྱུ་མ་ཡིན་པས་མཁན་པོ་དང་མི་ལྡན་པའི་སྡོམ་པ་གྲུབ་ཀྱང་གྲུབ་བོ། །ཞེས་ཟེར་ཞིང་ཤ་མི་སོགས་ཀྱང་དེ་བཞིན་དུ་སྨྲའོ། །བྱ་འདུལ་སོགས་ནི། དེ་དགེ་སློང་མ་ཡིན་པར་ཤེས་པ་དང་། རྐུ་ཐབས་སུ་གནས་པ་དང་། སྔོན་ལྟུང་བ་བྱུང་བར་ཤེས་པ་དང་། ཕྱིར་སྤོང་བ་དང་། དེའི་མིང་མ་བརྗོད་ན་མི་སྐྱེ་བར་ཞུ་བ་ནས་དང་། མཁན་པོ་ཚུལ་ཁྲིམས་འཆལ་བ་ལ་སོགས་པའི་སྟོབས་ཀྱིས་སྡོམ་པ་མ་སྐྱེས་པར་འགྲེལ་(༣༩བ)
ཆེན་གྱི་སྐབས་གཞན་དུ་བཤད་པའི་ཕྱིར་དང་། དེ་མེད་ན་ངོ་ཚ་ཁྲེལ་ཡོད་སྐྱེ་བའི་རྟེན་མེད་པའི་ཕྱིར་དང་། ལས་མཁན་ཚུལ་ཁྲིམས་འཆལ་ན་སྡོམ་པ་མི་སྐྱེ་བར་བཤད་པ་དང་རྒྱུ་མཚན་མཚུངས་པའི་ཕྱིར་ན་མཁན་པོ་གཏན་མེད་པར་སྡོམ་པ་སྐྱེ་མི་སྲིད་པ་དང་། སྡོམ་ལྡན་ཡིན་ན་མཚན་ཉིད་མ་ཚང་ཡང་སྐྱེ་བ་ལུང་སྔ་ཕྱིའི་དོན་དུ་བཞེད་དེ། དེ་རྣམས་ཀྱི་སྒྲུབ་བྱེད་སོ་སོར་རྒྱས་པར་ནི་རང་རང་གི་ཊཱིཀྐ་རྣམས་སུ་བལྟའོ། ཁོ་བོ་ནི་འདི་ལྟར་སེམས་ཏེ། གཞིའི་རྣམ་གཞག་ནི་སྔོན་དང་ད་ལྟར་གྱི་ཆོ་ག་སོ་སོར་ཕྱེ་བའི་ད་ལྟར་གྱི་སྐབས་ཡིན་ལ། ཞུ་བའི་སྐབས་འདིར་ནི་མ་ཕྱེ་བར་སྡོམ་པའི་སྐྱེ་ཚུལ་སྤྱི་ལ་ཉེ་བར་འཁོར་ཀྱིས་དོགས་གཅོད་ཞུས་པ་ཡིན་པས། གཞིར་ནི་ད་ལྟར་གྱི་ཆོ་ག་ལ་མཁན་པོ་དགོས་པར་ནན་གྱིས་བསྒྲུབས་ལ། འདིར་ནི། སྤྱིར་དེ་ཡོད་མེད་ལ་སྐྱེ་མི་སྐྱེ་གཉིས་ཀར་ཡོད་པར་གཏན་ལ་ཕབ་བོ། །དེ་ལྟར་ན་ད་ལྟར་ནི་དགོས་པའི་སྒྲུབ་བྱེད་བྱ་འདུལ་གྱིས་བཀོད་པའི་སྟེང་དུ། གཞིའི་འགྲེལ་ཆེན་དུ། ད་ལྟར་གྱི་སྡོམ་པ་སྤྱིར་གང་ཟག་གཞན་ལ་རག་ལས་ཤིང་། ཁྱད་པར་མཁན་པོ་དང་འབྲེལ་བར་བཤད་པ་དང་། སྐབས་འདིའི་འགྲེལ་ཆེན་དུ། ཡང་དག་པར་ལེན་པར་བྱེད་པ་གང་ལ་མཁན་པོ་མེད་པ་དེ་ནི་མཁན་པོ་མེད་པའོ། །ཞེས་པའི་ཚིག་ཟུར་ཀྱིས་སྡོམ་པ་ལེན་པའི་ཆོ་ག་ལ་མཁན་པོ་ཡོད་མེད་གཉིས་ཡོད་པར་བསྟན་པ་ཡང་ཆོ་གའི་རིགས་གཉིས་ལ་དགོངས་པར་གསལ་བ་དང་། སྐབས་འདིར་ལྡན་པའི་དང་མི་ལྡན་པའི་ཞེས་པའང་དེ་ལ་དགོངས་པ་དང་། མ་མོ་ལས་ཀྱང་མཁན་པོ་མེད་(༤༠ན)
པ་སོགས་ཀྱི་གང་ཟག་བཅུ་བསྙེན་པར་རྫོགས་པར་གསུངས་པའི་ཕྱིར་དང་། མཁན་པོ་ནི་ད་ལྟར་གྱི་ཆོ་གའི་མཐུན་རྐྱེན་གྱི་གཙོ་བོ་ཡིན་པས་རྒྱལ་བས་ནན་གྱིས་བཅས་པའི་ཕྱིར་རོ། །དེ་ལྟར་ཤེས་ན་འགལ་བའི་ཚོགས་མཐའ་དག་ལས་བདེ་བླག་ཏུ་གྲོལ་ལོ། །འོན་ཀྱང་མཁན་པོ་བསྙེན་པར་མ་རྫོགས་པ་ཡིན་ཀྱང་དེ་དང་ལྡན་པའི་སྡོམ་པ་སྐྱེ་བར་གསུངས་པ་ནི་ས་གཞན་ན་གནས་པ་ལྟ་བུའི་མཚན་ཉིད་དང་མི་ལྡན་པ་ལ་དགོངས་སོ། །དེ་ལྟར་ན་མཁན་པོ་མེད་པ་ཉིད་ལ་ཡང་སྡོམ་པ་སྐྱེ་བ་ཡོད་དེ་སྡོམ་པའི་སྐྱེ་རྒྱུ་མ་ཡིན་པའི་ཕྱིར། དཔེར་ན། དེ་དང་ལྡན་པའི་སྡོམ་པ་མཁན་པོ་ལས་སྐྱེ་བ་ལྟར་རོ། །མཁན་པོ་དེ་དང་ལྡན་པ་ད་ལྟར་གྱི་རབ་བྱུང་སྡོམ་པ་ཆོས་ཅན། ཁྱོད་མཁན་པོ་མཚན་ཉིད་དང་ལྡན་པ་ཁོ་ན་ལ་རག་མ་ལས་ཏེ། དེ་བསྙེན་པར་མ་རྫོགས་པའི་མིང་ཅན་ཉིད་ཡིན་ན་ཡང་ཁྱོད་སྐྱེ་སྲིད་པའི་ཕྱིར། དེ་ཆོས་ཅན། ཁྱོད་བསྒྲུབ་བྱས་མཁན་པོ་དགེ་སློང་མ་ཡིན་པར་ཤེས་པ་དང་དེ་མི་འདོད་ནས་ཕྱིར་སྤོང་བ་ལ་མི་སྐྱེ་སྟེ། དེ་ལྟར་བྱས་ན་ཁྱོད་ཀྱི་ཡུལ་གྱི་སྒོ་ནས་སྐྱེ་རྒྱུའི་གཙོ་བོར་མ་ཚང་བར་འགྱུར་བའི་ཕྱིར་རོ། །གསུམ་པ་ནི། ཆོས་ཅན། བསྒྲུབ་བྱ་དང་མཁན་པོ་དེ་གཉིས་ཀྱི་མིང་མ་བརྗོད་ན་ཡང་ཁྱོད་མི་སྐྱེ་སྟེ། དེ་ལྟར་ན་ཆོ་གའི་སྒོ་ནས་སྐྱེ་རྒྱུ་མ་ཚང་བར་འགྱུར་བའི་ཕྱིར། །ད་ལྟར་ཆོ་གའི་དགེ་འདུན་དེའི་སྐྱེ་གནས་ཀྱི་སྡོམ་པ་བསྙེན་རྫོགས་དང་དགེ་སློབ་མ་ཆོས་ཅན། དགེ་འདུན་གྱི་མིང་མ་བརྗོད་ན་ཁྱོད་མི་སྐྱེ་སྟེ། རྟགས་སྔ་མ་ཉིད་དོ། །བཞི་པ་ནི། ཁྱིམ་པའི་རྒྱལ་མཚན་དང་མུ་སྟེགས་ཅན་གྱི་རྒྱལ་མཚན་ཏེ། དེ་གཉིས་མཚོན་ནུས་པའི་རྟགས་སྲེད་པས་(༤༠ན)
འཆང་བ་དང་། འཁོར་གསུམ་གོས་ཀྱིས་མ་གཡོགས་པའི་སྒྲེན་མོ་དང་། བསམ་པ་རང་བཞིན་དུ་མི་གནས་པའི་འཁྲུགས་པ་དང་། འགྲོགས་ན་སྐྱེས་པ་འཆི་བའི་མཚན་དུག་མ་རྣམས་ལ་ཡང་རབ་བྱུང་གི་སྡོམ་པ་མི་སྐྱེ་སྟེ། རྟགས་ཁྱད་པར་ཅན་ཉམས་པ་སོགས་ཀྱི་སྒོ་ནས་སྐྱེ་རྒྱུ་མ་ཚང་བའི་ཕྱིར། རྒྱུ་ལས་བཟློག་པའི་ཆད་པ་ཁས་མི་ལེན་པ་གནས་ནས་ཕྱུང་བ་སྡིག་བསམ་མ་ལོག་པ་ལ་ཡང་མི་སྐྱེ་སྟེ། བསམ་པ་ཉམས་པས་སོ། །དགེ་ཚུལ་སོགས་ཀྱི་ཚིགས་སྔ་མ་མེད་པ་དང་། མཁན་པོར་ཚིག་མ་གསོལ་བ་དང་། བར་ཆད་མ་དྲིས་པར་ཡང་དང་བར་ཆད་དེ་མེད་བཞིན་པར་ཡོད་ཅེས་ཁས་ལེན་པ་ལ་སྦྱིན་པ་རྣམས་ལ་སྐྱེ་ལ་ཉེས་བྱས་ཙམ་དུ་ཟད་དེ། ཆོ་ག་ཁྱད་པར་ཅན་མ་ཉམས་པས་སོ། །གཉིས་པ་ལ། བར་ཆད་ཀྱི་མཚོན་དོན་དང་། མཚན་ཉིད་དོ། །དང་པོ་ལ་བཞི་ལས་ལག་རྡུམ་གྱི་དང་། ནད་པའི་དང་། རྐུན་པོའི་དང་། བུ་ཚའི་མཚོན་དོན་ནོ། །དང་པོ་ནི། སྐྱེས་པ་འདྲ་བའི་སོགས་ཏེ། ཚུལ་བྱད་འདྲ་བ་ནི་གླིང་གཞན་གསུམ་ན་སྐྱེས་པ་ཡང་བྱར་རུང་ངོ་། །ལག་པ་དང་དཔུང་པ་སྤྲིང་ཡིག་རྒྱས་བཏབ་པ་བཞིན་དུ་ལེབ་མོར་འཇས་པ་དང་། ཕོ་མཚན་ལྟ་བུའི་མགོ་སྙུང་དང་། སྨྱོན་ཐབས་མཁན་གྱི་སྐྲ་བཞིན་དུ་སྒྲ་སྒྲེ་དང་། མདུན་དུ་སྒུར་པོ་དང་། རྒྱབ་ཏུ་སྒྱེ་བོ་དང་། གཉིས་ཀར་སྒྱེ་སྒུར་གྱུར་པ་དང་། སོར་མོའི་སྒྲ་དྲུག་པ་སོགས་ལ་སྦྱར་བ་དང་། མིག་གི་སྒྲ་རྫི་མ་སོགས་ནས་འབྲུམ་ཅན་གྱི་བར་ལ་སྦྱར་ཏེ་གྲ་ཟུར་ཕྱིན་ཅི་ལོག་དང་། སྣ་གོང་ཆད་ནས་བར་འཛིངས་པ་དང་། དྲ་བ་བཞིན་དུ་བཞིན་འཕྱང་བ་གློ་བ་(༤༡ན)
དང་། རྫི་མ་མེད་པའི་ཤ་དམར་པོ་གླེ་བོ་དང་། མིག་ནང་དུ་མཛེར་པ་ལ་སོགས་ཅན་དང་། རྣ་བའི་སྒྲ་སེར་བ་སོགས་བཞི་ལ་སྦྱར་བ་དང་། ཁྱི་རྡོའི་སྒྲ་གཡའ་བ་སོགས་ལ་སྦྱར་བ་དང་རྐང་ལག་གི་སྒྲ་གཅིག་པ་སོགས་གཉིས་ལ་དང་། མགོའི་སྒྲ་གླང་ཆེན་ནས་སྦྲུལ་གྱི་བར་ལ་དང་། མགུལ་གྱི་སྒྲ་ཤིང་ཏ་ལའི་གཉེར་མ་ལྟ་བུ་སོགས་གཉིས་ལ་སྦྱར་བ་སོགས་ལས་མི་ན་བ་རྣམས་ལག་རྡུམ་སོགས་ཀྱིས་འཕངས་སོ། །གཉིས་པ་ནི། དེ་དག་གི་ནང་ན་མི་ན་བ་ལས་གཞན་ན་བ་དག་ནི་ནད་པས་འཕངས་སོ། །གསུམ་པ་ནི། ཕྲན་ཚེགས་སུ་བཤད་པའི་རྐུན་མས་ནི་ཕུང་ཀྲོལ་བ་ཁྲིམས་འཇིག་པར་བྱེད་པ་རྣམས་འཕངས་སོ། །བཞི་པ་ནི། རྒྱལ་པོ་སོགས་སོ། །བསྐྱེད་པའི་ཕ་མ་མ་ཡིན་ཡང་ཡོངས་སུ་འཛིན་པ་སོགས་ཏེ། ཡོངས་སུ་འཛིན་བྱེད་མི་མ་ཡིན་པའི་སོགས་ནི་ཕ་མ་དང་འདྲ་བ་མ་ཡིན་ནོ། །གཉིས་པ་ལ་མཚམས་མེད་ཀྱི་དང་། དགེ་སློང་མ་སུན་ཕྱུང་བའི་དང་། སྔོན་རབ་ཏུ་བྱུང་བའི་དང་། ཕམ་པ་བྱུང་བའི་དང་། རྒྱུད་ལ་བརྟེན་པའི་བར་ཆད་ཀྱི་མཚན་ཉིད་དང་། དང་པོ་ནི། མི་མ་ཡིན་པའི་ཕ་མ་དེ་གཉིས་ལས་མཚམས་མེད་པར་མི་འགྱུར་ཏེ། མཚམས་མེད་དུ་འགྱུར་བའི་ཕ་མ་དེ་ནི་བསྐྱེད་པར་བྱེད་པའི་མིའི་འགྲོ་བ་པ་གཉིས་ལས་བཞག་པས་སོ། །ཕ་བསད་པའི་མཚམས་མེད་འབྱུང་བ་ལ་སྐྱེས་པ་བསད་པས་མ་ཁྱབ་སྟེ། ཕ་མ་མཚན་གྱུར་པ་གཉིས་བསད་པ་ལས་ཀྱང་མཚམས་མེད་དུ་འགྱུར་བས་སོ། །རྒྱས་པར་མཛོད་དུ། མཚམས་མེད་གླིང་གསུམ་དག་ན་ཡོད། །(༤༡བ)
ཟ་མ་སོགས་ལ་མི་འདོད་དོ། །ཕན་དང་ངོ་ཚ་ཆུང་བའི་ཕྱིར། །ཞེས་དང་། མཚན་ནི་གཞན་དུ་གྱུར་ཀྱང་འགྱུར། །གང་གི་ཟླ་མཚན་ལས་བྱུང་མ། །ཞེས་སོགས་ལྟར་རོ། །གཉིས་པ་ནི། དགེ་སློང་མ་ཕམ་པར་འགྱུར་བ་སྤྱི་སྒོས་མ་བྱུང་བ་ཉིད་ལ་བྱ་བ་མི་ཚངས་པར་སྤྱོད་པ་ཉམས་སུ་མྱོང་བ་ནི་ཆོས་ཅན། དགེ་སློང་མ་སུན་ཕྱུང་བ་ཡིན་ཏེ། དེའི་འཇོག་བྱེད་ཡིན་པས་སོ། །ཕན་ཚུན་ཞེས་པ་ནི། སུན་འབྱིན་བྱེད་དགེ་སློང་ཡིན་ན་དེ་ཡང་ངེས་ཕྱུང་བར་འགྱུར་ཞེས་པའོ། །དགེ་སློང་མ་ནི་མི་ཚངས་སྤྱོད་ཀྱི་སྔོན་དུ་ཕམ་པ་མ་བྱུང་བ་ཞིག་དགོས་སོ། །གསུམ་པ་ནི། བུད་མེད་བསླབ་པ་ཕུལ་ནས་མཚན་གྱུར་ཏེ་སྐྱེས་པ་ཉིད་དུ་གྱུར་པ་ནི་ཆོས་ཅན། སྔོན་རབ་ཏུ་བྱུང་བ་མ་ཡིན་ཏེ། མཚན་དེ་ལ་རབ་བྱུང་གཞན་སྔོན་དུ་མ་སོང་བའི་སྒོ་ནས་རབ་བྱུང་བསྙེན་རྫོགས་བྱར་རུང་བའི་ཕྱིར་རོ། །བཞི་པ་ནི། བུད་མེད་ཕམ་པར་འགྱུར་བ་ཐུན་མོང་མ་ཡིན་པ་བཞི་ལྷག་པར་སྤྱད་པ་ཅན་མཚན་གྱུར་པ་ཡང་ཆོས་ཅན། ཕམ་པ་བྱུང་བའི་བར་ཆད་ཅན་མ་ཡིན་ཏེ། རབ་བྱུང་སོགས་བྱར་རུང་བའི་ཕྱིར། བུད་མེད་བསྙེན་པར་རྫོགས་པར་བྱ་བའི་ཆོ་ག་ཆོས་ཅན། དགེ་སློང་གློ་བུར་དུ་ལྷགས་པ་རྣམས་ཀྱིས་ཁྱོད་མི་འགྲུབ་སྟེ། དགེ་སློང་གཉུག་མར་གནས་པ་རྣམས་ཁྱོད་ཀྱི་ཡུལ་མཐུན་པའི་རྐྱེན་གྱི་ཡན་ལག་ཏུ་དགོས་པ་ཡིན་པའི་ཕྱིར་རོ། །ལྔ་པ་ནི། སྡོམ་པ་རྫོགས་པར་ཐོབ་ཐོབ་ཀྱི་བར་དུ་ལུས་སེམས་མ་ཉམས་པ་གལ་ཆེ་བས། སྡོམ་པ་སྐྱེ་བའི་རྒྱུད་རྒྱུའི་ཚེ་ཉིད་ནི་སྡོམ་པ་ཕུལ་ལམ་མ་ནིང་སོགས་སུ་ཉམས་ནའང་དེ་མི་སྐྱེ་བའི་ཕྱིར། (༤༢ན)
དེའི་དངོས་རྒྱུ་ནུས་པ་ཐོགས་མེད་ཀྱི་ཚེ་ཕུལ་ཉམས་མི་སྲིད་དེ། གང་གིས་ཀྱང་གེགས་བྱ་བར་མི་ནུས་པའི་ཕྱིར། འདིས་ནི་བསམ་པ་དང་རྒྱུད་མཐུན་པའི་རྐྱེན་དངོས་སུ་བསྟན་ཡང་དེའི་ཟློག་ཟླ་སྐྱེ་བའི་བར་ནི་བརྗོད་བྱའི་གཙོ་བོར་བཟུང་ངོ་། །རབ་བྱུང་གི་གཞི་དང་འབྲེལ་བ་ཞུ་བ་རྫོགས་སོ། །ཞེས་གསུངས། དེ་ཡང་ཚིགས་གསུམ་རིམ་གྱིས་ནོས་པའི་དབང་དུ་བྱས་པ་ལས། དགེ་བསྙེན་ཙམ་ལ་བར་ཆད་མི་འདྲི་བར་འདུལ་འཛིན་ཐམས་ཅད་མཐུན་ནའང་། ཁྱོད་ལོ་བཅོ་ལྔ་མ་ལོན་པ་མ་ཡིན་ནམ་སོགས་དམིགས་བསལ་འགའ་ཞིག་མ་གཏོགས། བར་ཆད་རགས་རིམ་དགེ་བསྙེན་ལ་ཡང་དོན་གྱི་ཐོབ་པར་འདྲི་མི་དགོས་པའི་རྒྱུ་མཚན་ལ་ས་དགེའི་འདུལ་འཛིན་མཁས་པའི་ཁུར་འཛིན་རྣམས་ལྗགས་ཀྱི་དབང་པོ་རྐྱོང་བ་ཞུ། འདུལ་བ་རྒྱ་མཚོའི་སྙིང་པོར། བསྙེན་གནས་དགེ་བསྙེན་ཕ་མ་དང་། །དགེ་ཚུལ་ཕ་མ་དགེ་སློབ་མ། །དགེ་སློང་མ་དང་དགེ་སློང་སྟེ། །སོ་སོར་ཐར་པ་རིགས་བརྒྱད་དོ། ཁྱིམ་པའི་སྡོམ་པ་དང་པོ་གསུམ། །རབ་བྱུང་སྡོམ་པ་ཐ་མ་ལྔ། །ཞེས་དང་། སྣ་གཅིག་སྣ་འགའ་ཕལ་ཆེར་སྤྱོད། །ཡོངས་རྫོགས་སྤྱོད་དང་ཚངས་སྤྱོད་དང་། །སྐྱབས་འགྲོའི་དགེ་བསྙེན་རྣམ་པ་དྲུག །རྩ་བ་བཞི་ལས་གཅིག་གཉིས་གསུམ། །འདོད་ལོག་མི་ཚངས་སྤྱོད་སྤོང་དང་། །སྐྱབས་འགྲོ་ཙམ་གྱི་དགེ་བསྙེན་དུ། ཁས་ལེན་རྣམས་དང་གོ་རིམ་བཞིན། །ཞེས་སོ་ཐར་རིགས་བརྒྱད། བྱེ་བྲག་དགེ་བསྙེན་ལ་ཡང་སྒྲས་བརྗོད་རིགས་ཀྱི་སྒོ་ནས་དབྱེ་ན་ནང་གསེས་དྲུག་ཏུ་བྱུང་བའི་སྐབས་(༤༢ན)
འདིར་བྱ་བ་ནི་ཡོངས་རྫོགས་དགེ་བསྙེན་ཡིན་ལ། །དེ་ཡང་དར་ཆོག་ལ་ཡུན་རིང་པོར་ཙོག་ཙོག་པུར་འདུག་དགོས་གཤིས་སྟེགས་མེད་ན་ངལ་དུབ་ཀྱིས་མནར་ཏེ་ངེས་འབྱུང་གི་བསམ་པ་དང་། སྡོམ་པའི་ཐོབ་མཚམས་སོགས་ལ་རིག་པ་གཅིག་ཏུ་བསྒྲིམ་མི་ནུས་པའི་སྐྱོན་འབྱུང་བས་ཐོག་མ་ནས་ཕ་གུའི་སྟེགས་བྱས་པ་འཐད་པར་སེམས། ཙོག་ཙོག་པུར་ཐལ་མོ་སྦྱར་དགོས་པ། རྣམ་འབྱེད་འགྲེལ་པ་ལས། ཐལ་མོ་དབུག་དབུག་པོར་སྦྱར་ཏེ་ཞེས་དང་། གཞི་འགྲེལ་ལས། ཐལ་མོ་འཇབ་འཇབ་པོར་སྦྱར་ཏེ་ཞེས་གསུངས་པར། མཚོ་སྣ་པས། ཐལ་མོ་ཅུང་ཟད་ཁོང་སྟོད་དུ་གྱུར་པའི་འཇབ་འཇབ་པོ་ཞེས་དང་། ཐལ་མོ་ཁོང་སྟོད་དུ་སྦྱར་བ་ནི་ཆོས་འདི་པའི་ལུགས་དང་། ཐལ་མོ་ཅར་ལེབ་ཏུ་སྦྱར་བ་ནི་མུ་སྟེགས་པའི་ལུགས་ཡིན་ནོ་ཞེས་པུ་ཎྱ་ཤྲཱི་གསུང་ངོ་། །ཞེས་དྲངས་འདུག་པས་བསྒྲུབ་བྱ་ལས་ཉམས་སུ་མྱོང་བ་པོས་ཐལ་མོ་སྦྱར་ཚུལ་འདི་བཞིན་དང་། ལས་བྱེད་པ་པོ་རྣམས་ཀྱིས་ལུས་དང་སེམས་བཏུད་དོ། །ཐལ་མོ་བསྣོལ་ཏེ་བཅང་ངོ་། །ཞེས་གསུངས་པས། ཐལ་མོ་བསྣོལ་ཏེ་བཅང་བ་འཐད་པར་མངོན། །ཐོག་མ་ནས་ཁྱིམ་པའི་ཆ་ལུགས་སུ་ཡོད་ན་དེས་ཁྱབ། བཙུན་པའི་གཟུགས་བརྙན་ཅན་དང་། དགེ་ཚུལ་སློང་བསྐྱར་ནས་བསྒྲུབ་པ་སོགས་ལ་གོས་དཀར་པོ་ཅན་ཞེས་པའི་ཚིག་གི་ནུས་པས་ཤམ་ཐབས་སོགས་ཕུད་ནས་སྟེང་གཡོགས་དཀར་པོ་ཞིག་གྱོན། དེ་ཡང་སྡོམ་གསུམ་གནས་འགྱུར་པའི་ལུགས་ལྟར་ན། སྡོམ་པ་སྔ་མ་བཏང་ནས་གསར་དུ་སྐྱེ་བར་འདོད་ཚེ་འབུལ་ཆོག་(༤༣ན)
བྱེད། མ་ཕུལ་ན་ཕྱི་མ་བླངས་པ་སྔ་མའི་གོང་འཕེལ་དུ་འཆད་པ་སྐྱེད་ཚལ་མཁན་པོ་སོགས་ལུགས་འཛིན་འགའ་ཞིག་སྨྲ་བ་ཤེས་པར་འདོད་པའི་ཕྱོགས་ལ་དོན་ལ་གནས་ཤིང་། གོང་དཀར་རྡོ་རྗེ་གདན་གྱི་ཆོས་འཆད་གསང་སྔགས་ལ་མཁས་པ་ཆོས་རྗེ་ཚུལ་ཁྲིམས་བཀྲ་ཤིས་སོགས་འབུལ་ཆོག་མ་བྱས་པར་བླངས་ཀྱང་གསར་དུ་སྐྱེ་རྒྱུ་མེད་པར་འཆད་ཀྱང་གཟུགས་ཅན་དུ་འདོད་པར་ལུང་རིགས་གཉིས་ཀའི་གནོད་པ་འཕོག་སྟེ། འབུལ་ཆོག་ངེས་པར་དགོས་པ་ནི། དགེ་སློང་ལ་རབ་ཏུ་གཅེས་པའི་མདོར། །གང་ཞིག་བསླབ་ལ་མི་གནས་པས། །བདེ་གཤེགས་རྒྱལ་མཚན་འཛིན་པ་ལས། །བསླབ་ལ་མི་གནས་སྐད་ཅིག་ལ། །གཟུགས་བོར་ཁྱིམ་པར་གནས་པ་བཟང་། །ཞེས་དང་། སྡོམ་གསུམ་རབ་དབྱེར། དད་ཟས་ཟ་བའི་ཉེས་མཐོང་ནས། །དགེ་སློང་ལྔ་བརྒྱས་བསླབ་པ་ཕུལ། །དེ་ལ་སྟོན་པས་ལེགས་སོ་གནང་། ཞེས་སོགས་དང་། དུལ་བ་ལྷས། སྡོམ་པ་སྔར་བསྲུངས་པ་ལ་ཕན་ཡོན་འབྱུང་བ། ད་ལྟ་ལྟུང་བ་མི་འབྱུང་བ། ཕྱིས་སྡོམ་པ་སྐྱེ་བའི་ཕན་ཡོན་ཡོད་པར་གསུངས་པ་ལྟར་རྐྱེན་ཁྱད་པར་ཅན་བྱུང་ན་འབུལ་ཆོག་ཤེས་པའི་ཆེད་ཡིན་པས་དེའི་ཆོ་ག་ནི། རྣམ་འབྱེད་ལས། བསླབ་པ་ཉམས་པར་བྱས་པ་ནི། དགེ་སྦྱོང་གི་ཚུལ་གཏོང་འདོད་པ་ན། དགེ་སློང་གི་དྲུང་དུ་སོང་སྟེ་ཚངས་པར་སྤྱོད་པ་སྤྱད་དཀའོ། །རབ་ཏུ་དབེན་པར་བྱ་དཀའོ། །ཕ་མ་དང་ཕུ་ནུ་དང་བུ་སྲིང་དྲན་ནོ། །བདག་ཁྱིམ་བཟང་པོ་དག་ཏུ་གཏོད་ཅིག་ཅེས་བྱ་བ་ལ་སོགས་པ་དགེ་སྦྱོང་གི་ཚུལ་གཏོང་འདོད་(༤༣བ)
པའི་ཚིག་བརྗོད་པར་བྱེད་པའོ། །ཞེས་གསུངས་ཀྱང་མདོ་རྩ་བར། རང་བཞིན་ཉམས་པར་བྱས་པ་ཉིད་ནི་ཕུལ་བ་ཉིད་མ་ཡིན་ནོ། །དེ་ལམ་ཡིན་ནོ། །ལྐུགས་པ་ལ་མ་ཡིན་ནོ། །མི་མ་ཡིན་པའི་འགྲོ་བ་པ་ལ་མ་ཡིན་ནོ། །མ་གོ་པ་ཉིད་ལ་མ་ཡིན་ནོ། །ཞེས་དང་། ས་ག་ལྷས། སྡོམ་གཏོང་རང་བཞིན་གནས་པ་ཡིན། །བརྡ་འཕྲོད་མི་ཡི་དྲུང་དག་ཏུ། །བདག་གིས་གང་བསྲུང་བསླབ་པ་ནི། །གཏོང་ངོ་ཞེས་སོགས་ཚིག་རྣམས་དབུལ། །ཞེས་གསུངས་པ་ལྟར། འབུལ་ཡུལ་སྨྱོན་པ་ལ་སོགས་པ་རང་བཞིན་ཉམས་པ་མ་ཡིན་པ། ལྐུགས་པ་མ་ཡིན་པ། ལྷ་ཀླུ་ལ་སོགས་པ་མི་མ་ཡིན་པའི་འགྲོ་བ་པ་མ་ཡིན་པ། གླེན་པ་དང་འོན་པ་སོགས་མི་གོ་བ་ཉིད་མ་ཡིན་པ་སྨྲ་ཤེས་དོན་གོ་བསམ་པ་རང་བཞིན་དུ་གནས་པ། མ་ནིང་མཚན་གཉིས་མ་ཡིན་པ་སྟེ། ཐ་སྙད་ལྔ་ལྡན། ལུས་ཐ་མལ་དུ་གནས་པ། རང་ལས་རྒྱུད་ཐ་དད་པ་ཡིན་ཕྱིན་དགེ་སློང་ལྟ་བུའི་དམིགས་བསལ་མི་དགོས་པར་བཞེད་པ་མཐུན། འབུལ་ཚུལ་གཞུང་ལས་ཇི་ལྟར་འབྱུང་བ་ལྟར་ཁྱིམ་པ་སོགས་སུ་ཁས་ལེན་པ། དགོས་པ་སླར་གསོ་རུང་། སྔར་བསྲུངས་པར་ཕན་ཡོན་འབྱུང་། འཇིག་རྟེན་གྱི་ཁ་ན་མ་ཐོ་བ་སྤང་བ་སོགས་ཡིན། མདོ་རྩར། བདག་ཁྱིམ་པའམ་དགེ་ཚུལ་ལམ། ཞེས་གསུངས་པའི་རང་འགྲེལ་དུ། བདག་ཁྱིམ་པའམ་ཞེས་བྱ་ནི་ཁྱིམ་པ་ཉིད་དུ་དམ་བཅས་པ་རབ་ཏུ་བྱུང་བའི་སྡོམ་པ་ཡོད་པའི་དངོས་པོ་མེད་དེ་ཞེས་བྱ་བ་ནི་ཁྱིམ་པ་ཉིད་སོ་སོར་ཤེས་པ་ལ་བསླབ་པ་འབུལ་བ་ཉིད་གོ་བར་བྱེད་པའོ། །དགེ་ཚུལ་ཞེས་བྱ་བ་ནི་བསྙེན་(༤༤ན)
པར་རྫོགས་པ་ཉིད་དགེ་ཚུལ་ལ་བརྟེན་པ་ཞེས་བྱ་བ་ཡོད་པ་མ་ཡིན་ཏེ། ཞེས་བྱ་བ་དགེ་ཚུལ་ལ་བརྟེན་པ་ཉིད་ཤེས་པ་ལ་བསྙེན་པར་རྫོགས་པ་འབུལ་བ་ལའོ། །ཞེས་དང་། བསྙེན་པར་རྫོགས་པ་ཐམས་ཅད་ལས་འདི་ཐ་དད་པ་གནས་པ་ཞེས་བྱ་བ་འདི་དགེ་ཚུལ་ཉིད་དུ་དམ་བཅའ་བཅས་པ་བཞིན་དུའོ། །ཞེས་དང་། ཊཱིཀ་ཆུང་ཡོན་ཏན་མར། ཁྱིམ་གནས་སུ་བདག་གཟུང་ཞིག་གམ་བདག་ཁྱིམ་པར་གཟུང་ཞིག་ཅེས་བྱ་བས་ཁྱིམ་པ་ལ་ཁྲིམས་མེད་པ་ཡིན་པས་ཁྲིམས་ཕུལ་བར་འགྱུར་རོ། །དགེ་ཚུལ་ལམ་བདག་དགེ་ཚུལ་དུ་གཟུང་ཞིག་བྱས་པས་དགེ་ཚུལ་མ་ཁྲིམས་ཉིས་བརྒྱ་ལྔ་བཅུ་མེད་པས་ཁྲིམས་ཆེན་པོ་ནི་ཕུལ་བར་འགྱུར་ཞེས་གསུངས་ཤིང་། བོད་ཀྱི་འགྲེལ་མཛད་བུ་སྟོན་སོགས་དང་དགོངས་པ་མཐུན་པར་རིན་ཆེན་འཕྲེང་བར། བདག་ཁྱིམ་པར་གཟུང་དུ་གསོལ། ཞེས་པས་ནི་བསླབ་པའི་ས་བཏང་བས་བསླབ་པ་བཏང་བ་ཡིན་ནོ། །དགེ་ཚུལ་དུ་གཟུང་དུ་གསོལ་ཞེས་པས་དགེ་སློང་གི་སྡོམ་པ་གཏོང་ཞིང་དགེ་བསྙེན་དང་དགེ་ཚུལ་གྱི་སྡོམ་པ་གཏོང་བར་ནི་མ་ངེས་སོ། །ཞེས་གསུངས་པ་སོགས་ཀྱི་རིགས་པས་དགེ་བསྙེན་དུ་ཁས་བླངས་ན་དགེ་སློང་ལྟ་ཅི་དགེ་ཚུལ་ཡང་གཏོང་བར་འགྱུར་ཞིང་། ཁྱིམ་པར་ཁས་བླངས་པས་ཁྲིམས་མཐའ་དག་གཏོང་བར་འགྱུར་བ་དེ་བཞིན་དུ། ལེགས་བཤད་གསེར་ཐུར་དུའང་དགེ་སློང་གིས་དགེ་ཚུལ་དང་དགེ་བསྙེན་དུ་ཁས་བླངས་པ་བསླབ་པ་འབུལ་ཆོག་ཏུ་བཤད་དོ། །དེར་མ་ཟད་སྨྱུང་གནས་སོགས་ཐེག་པ་ཆེན་པོའི་(༤༤ན)
གསོ་སྦྱོང་ཡང་ཁྱིམ་པས་ལེན་དགོས་ཀྱི། རབ་བྱུང་ལ་མི་དགོས་པ་དང་གལ་ཏེ་བླངས་ན་སོ་ཐར་གྱི་སྡོམ་པ་གཏོང་བའི་ཉེས་དམིགས་ཡོད་ཚུལ་གསུང་བར། ལྕགས་ཐང་ཆོས་རྗེས་གསེར་མདོག་ཅན་པར་སྐྱོན་བརྗོད་མཛད་པ་ཐེག་པ་ཆེ་ཆུང་གི་ཁྱད་པར་ཤེས་ནས་བླངས་ན་སྐྱོན་མེད་པས་དགག་པ་རྣམ་དག་མ་སོང་ཞིང་རྣམ་དབྱེ་མེད་ན་སང་ཉི་མ་མ་ཤར་བར་ཞེས་པའི་ནུས་པའི་ཁས་བླང་གི་བཟློག་ཆས་སོ་ཐར་གཏོང་ཉེན་ཤིན་ཏུ་ཆེ། མདོར་ན་བཅས་ལྡན་དགེ་སློང་ཞིག་གིས་དགག་དགོས། ཁྱད་པར་ཅན་གྱི་ཕྱིར་སླར་ཚིགས་གསུམ་རིམ་ནོད་དུ་བླངས་ཚེ་ཕྱི་མ་དབང་བཙན་པར་བྱེད་ན་དགེ་བསྙེན་གྱི་སྡོམ་པ་སྔ་མ་གཏོང་བྱེད་དམིགས་བསལ་མ་བྱུང་ཡང་དགེ་བསྙེན་དུ་ཡང་དག་པར་ཁས་བླངས་པ་ཙམ་གྱིས་སྡོམ་པ་གོང་མ་གཉིས་གཏོང་བར་འགྱུར་ཏེ། གོང་དུ་དྲངས་པའི་ལུང་དང་རིག་པས་ལེགས་པར་གྲུབ་ཅིང་གཞན་ཡང་ལུང་ཤིན་ཏུ་གསལ་པ་ལུང་སིལ་བུ་ལས་བསྙེན་པར་རྫོགས་ཟིན་ཀྱང་ཁྱིམ་པར་ཁས་བླངས་ན། དེ་ཡང་བསྙེན་པར་མ་རྫོགས་པ་ཞེས་བྱ་ན། བསྙེན་པར་རྫོགས་པར་བྱེད་པའི་ཚེ་ན་ལྟ་སྨོས་ཀྱང་ཅི་དགོས་ཞེས་དང་། མཚོ་སྣ་པས། དེ་ནི་དགེ་སློང་བདག་ཉིད་ཁྱིམ་པ་ཡིན་ནོ་སྙམ་དུ་འདུ་ཤེས་འཁྲུལ་ན་ཞེས་བསྟན་པ་མ་ཡིན་གྱི། དགེ་སློང་བདག་ཉིད་ཁྱིམ་པར་ཁས་བླངས་ན་ཞེས་སོགས་རྒྱས་པར་གསུངས་སོ། །རང་ཕྱོགས་དགེ་ལུགས་དང་ཞ་ལུ་པ་སོགས་སྡོམ་པ་སྔ་མ་སྔ་མ་ཕྱི་མ་ཕྱི་མའི་གཏོང་རྒྱུར་བཤད་པས་འབུལ་ཆོག་མ་བྱས་ཀྱང་དོན་ལ་ཚང་ངོ་། །གོང་དུ་སྨོས་པའི་(༤༥ན)
ཤེས་བྱེད་ཙམ་དུ་མ་ཟད་རིགས་པས་ཀྱང་འགྲུབ་སྟེ། ཚིགས་གསུམ་རིམ་གྱིས་ནོས་པའི་དགེ་སློང་དེ་ཆོས་ཅན། ཁྱོད་ཀྱིས་དགེ་བསྙེན་དུ་ཁས་བླངས་པ་ན་ཁྱོད་ཁྱིམ་པར་འགྱུར་བར་ཐལ། ཁྱོད་ཀྱིས་དགེ་བསྙེན་དུ་ཁས་བླངས་པ་ནི་གང་ཞིག །དགེ་བསྙེན་དེ་ཁྱིམ་པ་ཡིན་པའི་ཕྱིར། རྟགས་དང་པོ་དངོས། ཕྱི་མ་མ་གྲུབ་ན། དགེ་བསྙེན་ཆོས་ཅན། ཁྱོད་ཁྱིམ་པ་ཡིན་པར་ཐལ། ཁྱིམ་པ་དང་རབ་བྱུང་གང་རུང་གང་ཞིག །རབ་བྱུང་མ་ཡིན་པའི་ཕྱིར། དང་པོ་མ་གྲུབ་ན། ཁྱིམ་པ་དང་རབ་བྱུང་གང་ཡང་མ་ཡིན་པའི་དགེ་བསྙེན་དེ་ཆོས་ཅན། ཁྱོད་ཀྱི་རྒྱུད་ཀྱི་སྡོམ་པ་དེ་སོ་ཐར་རིགས་བརྒྱད་གང་རུང་དུ་མི་གཏོགས་པར་ཐལ། ཁྱོད་རབ་བྱུང་དང་ཁྱིམ་པ་གང་དུ་ཡང་མི་གཏོགས་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་རྒྱུད་ཀྱི་སྡོམ་པ་དེ་སོ་ཐར་རིགས་བརྒྱད་པོ་གང་རུང་དུ་གཏོགས་པར་ཐལ། ཁྱོད་ཀྱི་རྒྱུད་ཀྱི་སྡོམ་པ་དེ་ཁྱིམ་པའི་ཕྱོགས་ཀྱི་སྡོམ་པ་གསུམ་པོ་གང་རུང་དུ་གཏོགས་པའི་ཕྱིར། དེ་ཡིན་པར་ཐལ། ཁྱོད་དགེ་བསྙེན་གྱི་སྡོམ་པ་ཡིན་པའི་ཕྱིར། གཞན་ཡང་དགེ་བསྙེན་ཆོས་ཅན། ཁྱོད་དུ་ཁས་བླངས་པ་ན་ཁྱིམ་པར་འགྱུར་བར་ཐལ། ཁྱོད་ཀྱིས་སྡོམ་པ་འབོགས་པའི་རྗེས་ཟློས་གསུམ་པའི་དུས། སྐྱབས་བརྗོད་བདག་བརྗོད་གཉིས་རྫོགས་པ་དང་། དགེ་བསྙེན་དུ་འགྱུར་བ་དུས་མཉམ་ཡིན་པའི་ཕྱིར་རོ། །གཞན་ཡང་བྱེ་བྲག་པ་དགེ་བསྙེན་དུ་ཁས་བླངས་པས། དེའི་སྤྱི་ཁྱིམ་པར་ཁས་བླངས་པར་འགྱུར་བར་ཐལ། རམས་ཀྱི་མདོག་ཅན་ཡིན་པར་ཁས་བླངས་པས་ཁ་(༤༥བ)
དོག་སྔོན་པོ་ཡིན་པར་ཁས་བླངས་པར་འགྲོ་བའི་ཕྱིར། གཞན་ཡང་མདོ་རྩ་བར་ཁྱིམ་པ་ཉིད་དུ་དམ་བཅས་པས་རབ་ཏུ་བྱུང་བའི་དངོས་པོ་མེད་དེ་ཞེས་བཤད་པ་མི་འཐད་པར་ཐལ། དགེ་སློང་གིས་དགེ་བསྙེན་དུ་དམ་བཅས་པས་དགེ་སློང་གི་སྡོམ་པ་གཏོང་བར་མི་འགྱུར་བའི་ཕྱིར། དེ་ལ་སོགས་ཏེ་རིགས་པའི་གནོད་བྱེད་མཐའ་ཡས་སོ། །འདུལ་བ་རང་སྐད་ལ་དེ་ལྟར་ཡིན་དུ་ཆུག་ཀྱང་སྡོམ་གསུམ་གནས་འགྱུར་ལ་མི་འཐད་སྙམ་པའི་ལོག་རྟོག་ནི་ག་ལ་སྲིད་དེ། གནས་འགྱུར་ལ་སོ་ཐར་གྱི་སྡོམ་པའང་ཤེས་པའི་སྟེང་དུ་འཇོག་དགོས་པས་སྔགས་བྱང་སེམས་ལྟར་ལན་བརྒྱ་སྟོང་དུ་བླངས་ཀྱང་གོང་འཕེལ་དང་། ལས་ཆོག་ཏུ་སྡོམ་པ་རྙིང་པས་རྒྱུད་མ་འགགས་པ་ཡོད་སྙམ་ཚེ་ཉན་ཐོས་ལྟར་ན་སྔར་བཤད་པ་ལྟར་ཚིགས་གསུམ་ལྡན་པ་ཞིག་གིས་ཚིགས་སྔ་མ་དགེ་བསྙེན་བླངས་པས་ཕྱི་མ་གཏོང་ཞིང་། གནས་འགྱུར་ལྟར་ན་དེ་འདྲར་མ་བལྟོས་པའི་རྒྱུ་མཚན་པཎ་ཆེན་ངག་དབང་ཆོས་གྲགས་སོགས་མཁས་པ་དུ་མས་མཁྱེན་འདུག་པ་དེར་གཟིགས་འཚལ། སྡོམ་པ་འབོགས་ཚུལ་གྱི་ཁྱད་པར་ཀུན་མཁྱེན་ཀླུ་སྒྲུབ་རྒྱ་མཚོའི་སྡོམ་གསུམ་རབ་དབྱེའི་དཀའ་འགྲེལ་གནད་ཀྱི་སྙིང་པོ་གསལ་བྱེད་ལས། དེས་ན་འདུལ་བ་ལས་ནི་ཁ་ཆེ་བའི་འདོད་པ་ལྟར་བཤད་ན། མདོ་སྡེ་ལས་ཉི་འོག་པ་དང་མདོ་སྡེ་པའི་འདོད་པ་ལྟར་བཤད་དེ། འདུལ་བ་ལུང་ལས་དགེ་བསྙེན་གྱི་སྡོམ་པ་འབོགས་ཆོག་ཁ་ཆེ་བ་ལྟར་བཤད། མིང་ཆེན་གྱི་མདོ་ལས། ཉི་འོག་པ་དང་མདོ་སྡེ་པ་ལྟར་བཤད་པའི་ཕྱིར། གནད་(༤༦ན)
དེ་ཉིད་ཀྱིས་འདུལ་བ་དང་མདོ་སྡེ་ལ་བརྟེན་པའི་གྲུབ་མཐའ་སོ་སོ་ལ་དགེ་བསྙེན་གྱི་སྡོམ་པ་འབོགས་ཆོག་དང་། བླང་བའི་ཡུལ་དང་། ལེན་པའི་རྟེན་གྱི་གང་ཟག །སྡོམ་པའི་ངོ་བོ་རྣམས་ལ་འཇོག་ཚུལ་མི་འདྲ་བ་རེ་རེ་ཡོད་པ་ནི་ཁོ་བོའི་རྣམ་དཔྱོད་ཀྱི་དཔལ་ལས་གྲུབ་པ་ཡིན་ཏེ། ལུང་དང་རྟེན་གྱི་མི་འདྲ་བའི་ཁྱད་པར་ནི། གཞུང་དེ་ཉིད་ལས། བསྙེན་གནས་ལ་དངོས་སུ་བཤད་པའི་ཤུགས་ལས་ཤེས་ལ། འབོགས་པའི་ཆོ་ག་མི་འདྲ་བ་ནི་རྣམ་དཔྱོད་དང་ལྡན་ན་མངོན་སུམ་གྱིས་གྲུབ་པ་ཡིན་ཏེ། སྐྱབས་འགྲོ་རྩོམ་བྱེད་དུ་བྱས་ནས་བདག་དགེ་བསྙེན་དུ་གཟུང་དུ་གསོལ་ཞེས་པ་ལན་གསུམ་བརྗོད་པ་སྡོམ་པ་འབོགས་ཆོག་ཏུ་ཁ་ཆེ་བས་ཁས་ལེན། སྐྱབས་འགྲོ་རྩོམ་བྱེད་དུ་བྱས་ནས་བསླབ་བྱ་གཅིག་གཉིས་སོགས་གང་ལེན་པ་དེ་ལན་གསུམ་བརྗོད་པ་སྡོམ་པ་འབོགས་ཆོག་ཏུ་མིང་ཆེན་མདོ་ལས་བཤད་པ་ལྟར། ཉི་འོག་པ་སོགས་ཁས་ལེན་པའི་ཕྱིར་རོ། །དེས་ན་ཁ་ཅིག་མདོ་སྡེ་པའི་ལུགས་ལ། བདག་སྐྱབས་གསུམ་འཛིན་པའི་དགེ་བསྙེན་དུ་གཟུང་དུ་གསོལ་དང་། སྣ་གཅིག་སྤྱོད་པ་དང་། ཡོངས་རྫོགས་དགེ་བསྙེན་དུ་གཟུང་དུ་གསོལ། །ལན་གསུམ་གསུམ་བྱེད་པ་སྡོམ་པ་འབོགས་ཆོག་ཏུ་འདོད་པ་ནི་གྲུབ་མཐའི་རྣམ་དབྱེ་མ་ཕྱེད་པ་སྟེ། ཉི་འོག་པ་དང་མདོ་སྡེ་པའི་གྲུབ་མཐའི་གནད་མ་རྟོགས་པར་ཁ་ཆེ་བའི་སྡོམ་པ་འབོགས་པའི་ཆོ་གའི་རིགས་འགྲེ་ཉི་འོག་པ་དང་མདོ་སྡེ་པ་ལ་སྦྱར་འདུག་པའི་ཕྱིར། དེ་ལྟར་ཆོ་ག་མི་འདྲ་(༤༦བ)
བ་གཉིས་བྱུང་བའི་ལུང་གི་གནད་ནི་འདུལ་བ་དང་མདོ་སྡེ་ལས་བཤད་ཚུལ་མི་འདྲ་བ་གཉིས་བྱུང་བའི་གནད་ཀྱིས་ཡིན་ལ། རིགས་པའི་གནད་ནི་དགེ་བསྙེན་སྡོམ་པ་དང་མི་ལྡན་པའི་དགེ་བསྙེན་མི་འདོད་ཅིང་སོར་སྡོམ་ལ་རྩ་བཞི་ངེས་པར་སྤོང་དགོས་པའི་གནད་ཀྱིས་ཆོ་ག་མི་འདྲ་བ་གཅིག་དང་། དགེ་བསྙེན་གྱི་སྡོམ་པ་དང་མི་ལྡན་པར་སྐྱབས་འགྲོ་ཙམ་གྱིས་དགེ་བསྙེན་དུ་གྱུར་པ་ཞིག་ཡོད་པར་འདོད་པ་དང་། སོར་སྡོམ་ལ་རྩ་བ་བཞི་ངེས་པར་སྤོང་མི་དགོས་ཀྱི་རྩ་བ་གཅིག་གཉིས་སོགས་ཅི་རིགས་པར་སྤངས་པས་ཆོག་པའི་གནད་ཀྱི་ཆོ་ག་མི་འདྲ་བ་ཞིག་བྱུང་བ་ཡིན་ནོ། །ཞེས་སྐལ་ལྡན་ཡོངས་ཀྱི་སྙིང་ལ་བཅང་བར་བྱ་སྟེ། སྔོན་མ་བྱུང་བ་ལེགས་བཤད་ཀྱི་གནད་དམ་པ་ཡིན་པའི་ཕྱིར་རོ། །ཞེས་གསུང་བ་རྣམས་ལ་གནད་འགག་ཆེ་བ་འདུག་པས་ཕལ་ཆེར་སྤྱོད་པའི་དགེ་བསྙེན་སོགས་རྩ་བཞི་མ་ཚང་བ་འདི་ཁ་ཆེ་བ་མ་གཏོགས་ཐམས་ཅད་འདོད་པ་ནི་མིན་ཞིང་། གཞི་ཐམས་ཅད་ཡོད་སྨྲའི་གཞུང་དུ་མི་གསལ་བ་འདུལ་བ་འཛིན་པ་རྣམས་ཀྱི་རིགས་འགྲེ་སྦྱར་བ་ཡིན། སྡོམ་པ་སྐྱེ་བའི་རྒྱུའི་གཙོ་བོ་འདུལ་བ་རྒྱ་མཚོའི་སྙིང་པོ་ལས། ངེས་འབྱུང་བསམ་པས་རྒྱུ་བྱས་ནས། །གཞན་གནོད་གཞི་དང་བཅས་པ་ལས། །ལྡོག་པ་དེ་ཡང་ལུས་ངག་ལས། །གཟུགས་ཅན་ཡིན་ཞེས་འདོད་པ་དང་། །སྤོང་བའི་སེམས་པ་རྒྱུན་ཆགས་པ། །ས་བོན་དང་བཅས་ཡིན་ནོ་ཞེས། །འདོད་པའི་ཚུལ་ནི་རྣམ་པ་གཉིས། །རང་གི་སྡེ་པ་གོང་འོག་སྨྲ། །ཞེས་སྡོམ་པའི་རྒྱུའི་གཙོ་བོ་ངེས་འབྱུང་གི་བསམ་པ་དང་། སྡོམ་པ་སྐྱེ་བའི་(༤༦ན)
སྐབས་སུ་བརྡ་འཕྲོད་པ་ཤིན་ཏུ་གལ་ཆེ་བ་ལས་ཆོག་ཚོར་སྐད་གཟེངས་མཐོ་བ་དང་། སེ་གོལ་གྱི་བརྡ་སྤྲོད་ཅེས་པ་ལྟར་མཛད་པ་དབང་རྣོན་གྱི་རིགས་ལ་ངོ་འཕྲོད་ཀྱང་ཕལ་མོ་ཆེས་སྔར་གྱི་བཤད་པ་བརྗེད་ནས་གཡམས་ལ་རྒྱུགས་མང་བས་མཁས་པའི་དབང་པོ་དཀོན་ཅོག་ཆོས་འཕེལ་ཞལ་ནས་ཀྱང་སྡོམ་པ་ཐོབ་བོ་ཞེས་གསུང་བ་ནི། ཤིན་ཏུ་ངོ་འཕྲོད་པས་དགྲ་ཉེན་ཆེ་སར་བོང་སྐད་མ་རྒྱག་པར་དེ་དོན་བཞིན་མཛད་འཚལ། ངེས་འབྱུང་གི་བསམ་པ་དེ་ཡང་རྒྱལ་བ་ཙོང་ཁ་པ་ཆེན་པོས་ཚ་ཁོ་དབོན་པོར་གདམས་པར། དེ་ལྟར་བསྒོམས་པས་འཁོར་བའི་ཕུན་ཚོགས་ལ། །ཡིད་སྨོན་སྐད་ཅིག་ཙམ་ཡང་མི་སྐྱེ་ཞིང་། །ཉིན་མཚན་ཀུན་ཏུ་ཐར་པ་དོན་གཉེར་བློ། །བྱུང་ན་དེའི་ཚེ་ངེས་འབྱུང་སྐྱེས་པ་ལགས། །ཞེས་གསུངས་པ་དེ་ངེས་འབྱུང་གི་བསམ་པ་དངོས་བསྟན་ཡིན་ལ། སྡོམ་པ་སྐྱེ་བའི་རྒྱུ་ཙམ་ལ་ལས་མཁན་གྱིས་བརྡ་སྤྲད་པའི་ཚེ་བཅོས་མའི་ངེས་འབྱུང་ལྷང་བ་ཞིག་སྐྱེས་པས་གོ་ཆོད་ཀྱིས། མཚན་ཉིད་པ་སྐྱེ་དགོས་ན་དེང་སང་སྡོམ་ལྡན་ཤིན་ཏུ་ཉུང་བར་འགྱུར་ལ། ལ་ལ་ངེས་འབྱུང་གི་བསམ་པ་མཚན་ཉིད་པ་རྒྱུད་ལ་སྐྱེས་པ་དང་ལམ་དུ་ཞུགས་པ་དུས་མཉམ་པར་སྨྲ་བ་ནི་གཞུང་ལུགས་ལ་མ་འདྲིས་པའི་བཞད་གད་ཀྱི་གནས་སོ། །བསམ་པའི་ཁྱད་པར་འགའ་ཞིག་རྫོགས་བྱང་དུ་སེམས་བསྐྱེད་པ་ཐེག་དམན་གྱི་སྐབས་མི་འཐད་དམ་ཟེར་བ་ནི་མ་གོ་བ་སྟེ། སྟག་ཚང་ལོ་ཙཱ་བའི་སྡོམ་གསུམ་འགྲེལ་པ་ལས། འོ་ན་འདུལ་བའི་སྐབས་སུ་རྫོགས་བྱང་གི་སེམས་བསྐྱེད་ཀྱི་སྡོམ་པ་བླང་དུ་མི་རུང་བར་འགྱུར་ཏེ། (༤༧བ)
དེ་ནི་ཐེག་ཆེན་གྱི་བསམ་པ་ཡིན་པའི་ཕྱིར་རོ་ཞེ་ན། འདི་ནི་འདུལ་བའི་སྡེ་སྣོད་རྣམས་ཐེག་པ་ཐུན་མོང་བའི་གསུང་རབ་ཏུ་མི་གོ་ཞིང་འདུལ་བ་པ་ཡིན་ན་ཉན་ཐོས་པ་དང་ཐེག་ཆེན་པ་མིན་པས་ཁྱབ་པར་བཟུང་ནས་གནས་ལ་མི་དད་པར་བྱེད་པ་རྣམས་ཀྱི་ལོག་རྟོག་ཆེན་པོ་ཡིན་ཏེ། འདུལ་བ་ལས། རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་དང་། བྱང་ཆུབ་གསུམ་ཆར་དུ་སེམས་བསྐྱེད་པ་དང་འབྲས་བུ་ཐོབ་པའི་རྣམ་གཞག་མང་དུ་བྱུང་ལ། འདུལ་མངོན་གྱི་གདུལ་བྱའི་གཙོ་བོ་ཉན་ཐོས་སྡེ་གཉིས་ཀྱང་ཐེག་ཆེན་བདག་མེད་གཉིས་རང་སྟོང་གསུམ་རྡུལ་ཕྲན་དུ་སྡུད་པ་སོགས་ཀྱི་རྨད་དུ་བྱུང་བའི་སྤྱོད་པའི་གསུང་རབ་བློར་མི་ཤོང་བས་ཐེག་ཆེན་ཁས་མི་ལེན་ཞེས་བྱའི། རྫོགས་པའི་སངས་རྒྱས་དང་དེའི་སེམས་བསྐྱེད་ཕྱིན་དྲུག་བསྡུ་བཞི་སོགས་ནི་ཤིན་ཏུའང་འདོད་ཅིང་ཐེག་ཆེན་ལ་ཅུང་ཟད་སྐྱོན་དུ་བལྟ་བའི་བྱང་སེམས་ཆེན་པོ་དང་རིགས་འཛིན་ཆེན་པོ་དག་གིས་ཀྱང་འདུལ་བ་ལ་གཅེས་སྤྲས་སུ་མཛད་དེ། བྱང་སེམས་ཀྱི་ཚུལ་ཁྲིམས་ལེའུར་བྱང་སེམས་ཀྱི་ལྟུང་བ་མང་པོ་འདུལ་བའི་ནང་ཁྲིམས་བསྲུངས་ན་ཉེས་པ་མེད་དོ་ཞེས་ཡང་ཡང་གསུང་ཞིང་། བླ་མེད་ཀྱི་རྒྱུད་སྡེ་གོང་མའི་གོང་མ་ཀུན་ཏུ། ཉན་ཐོས་སྤྱོད་པ་སྐྱོང་བར་བྱེད་ཅེས་དང་། ཕྱི་རུ་ཉན་ཐོས་སྤྱོད་པ་སྐྱོང་། །ནང་དུ་གསང་བ་འདུས་པར་དགའ། །ཞེས་སོགས་ཡང་ཡང་གསུངས་པའི་ཕྱིར། ཞེས་གསུངས་པ་འདི་ནུས་པ་ཤིན་ཏུ་ཆེ་བ་འདུག་གོ ། འདུལ་བ་རྒྱ་མཚོའི་སྙིང་པོར། གསོད་རྐུ་སྨྲ་དང་ལོག་པར་གཡེམ། །མྱོས་འགྱུར་(༤༨ན)
འཐུང་བ་ལྔ་སྤོང་བ། །དགེ་བསྙེན་གྱི་ནི་སྡོམ་པའོ། །ཞེས་སྤང་བྱ་ལྔར་གསུངས་པའི་ཕྱི་མ་ཆང་དང་མི་ཤ་མ་གཏོགས་ནད་པ་བཅས་པ་མཐའ་དག་གིས་བསྐྱང་བར་གསུངས་པའི་སྐོར་ནི་དོགས་གནས་ཆེ་བ། མདོ་རྩ་ལས། མཁུར་བར་བསྲེལ་བ་དང་ལུས་བཀུད་པ་ནི་སྦྱོར་དང་འདྲའོ། །ནད་པ་ལ་ནི་ལྟུང་བ་མེད་དོ། །ཞེས་གསུངས་པ་གོང་གི་མྱོས་པར་འགྱུར་བ་འཐུང་ནའོ། །དེ་སྐོལ་ན་ནི་དེ་ཉིད་ལས་ཉམས་པ་ཡིན་ནོ། །སྦང་མ་དང་ཚིགས་མ་ཟ་བ་ལ་ནི་དེའི་འཇུག་པ་ཡོད་དོ། །ཕབ་ཀྱི་ཆང་བུ་ནི་ཕྱེད་ཉིད་དོ། །རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་མྱོས་པར་འགྱུར་བ་རྣམས་ཀྱང་ངོ་། །མྱོས་པར་འགྱུར་བའི་དྲི་དང་རོ་བྲོ་བའི་ཐུག་པ་མྱོས་པར་མི་བྱེད་པ་རྣམས་ཀྱང་ངོ་། །མདོག་ཙམ་མྱོས་པར་འགྱུར་བ་དང་འདྲ་བ་ལ་ནི་ཉེས་པ་མེད་དོ། །ཞེས་པ་ཀུན་ལ་ཐ་མའི་གསལ་བྱེད་དུ་མཛད་འདྲ་ཡང་། མདོ་རྩའི་སྨན་གྱི་གཞི་ལས། ནད་པས་ཆང་ནི་རྩྭ་མཆོག་གིས་ཀྱང་བཏུང་བར་མི་བྱའོ། །དགེ་བསྙེན་ཡན་ཆད་ཐམས་ཅད་ཀྱིས་མི་བླུད་དོ། །རང་བཞིན་གྱིས་ཁ་ན་མ་ཐོ་བ་དང་བཅས་པ་ལས་གཞན་པ་ཐམས་ཅད་ལ་གསོ་བའི་དོན་ཉིད་མ་གཏོགས་སོ། །ཞེས་བྱ་བའི་ལྷག་མའོ། །ཞེས་གསུངས་པས། སྤྱིར་བཅས་པ་མཐའ་དག་ནད་པ་ལ་གནང་ཀྱང་མིའི་ཤ་དང་ཆང་གི་བཏུང་བ་དགག་པ་རྗེས་བཅས་ཀྱི་སྒོ་ནས་བཀག་པ་ཡིན་ཏེ། ལུང་ལས། བཅས་པ་མཐའ་དག་གིས་ནད་པ་བསྐྱང་བར་བྱའོ། །ཞེས་སྤྱིར་བཏང་ནས་ཆང་མ་གཏོགས་སོ་ཞེས་དང་། ང་ལ་སྟོན་པ་ཟེར་བ་ཁྱེད་ཅག་གིས་(༤༨བ)
ཆང་ནི་རྩྭ་མཆོག་གིས་ཀྱང་བཏུང་བར་མི་བྱའོ། །ཞེས་གསུངས་ཤིང་། དེས་ན་ས་ག་ལྷས། སྨན་པའི་ངག་གིས་བཏུང་བར་ནི། །སྲོག་ལ་བབ་ཀྱང་མ་གནང་སྟེ། ཁ་ཡི་ནད་ལ་མཁུར་ཕུགས་སུ། །བསྲེལ་བ་ཙམ་ལ་ཉེས་པ་མེད། ཅེས་བཤད་པས། ཆང་དངོས་ནི་ནམ་ཡང་བཏུང་དུ་མ་གནང་ཞིང་། ཁའི་ནད་ལ་གོང་གི་ལུང་ལྟར་མཁུར་བར་བསྲེལ་ཏེ་མགུལ་དུ་མ་མིད་པར་ཕྱིར་འབོ་བ་དང་། ཡང་ན། མདོ་རྩ་ལས། ནད་པས་ནི་ཞུན་མར་དང་། འབྲུ་མར་ཆང་དང་འདྲེས་པ་བཏུང་བར་བྱ་བ་ཉིད་དོ། །ཆང་མ་ཡིན་པ་ཉིད་ན་ཉེས་པ་མེད་པ་ཉིད་དོ། །དེ་ནི་སྐོལ་བ་ལས་འགྲུབ་བོ། །ཞེས་སོགས་གསུངས་པས་རྫས་གཞན་དང་བསྲེས་ནས་ཆང་མ་ཡིན་པར་གྱུར་པ་མདོག་དང་དྲི་རོ་ནུས་པ་མཐའ་དག་ཆང་མི་འདྲ་བ་ཞིག་དགོས་ཏེ། འགྲེལ་ཆུང་ཡོན་ཏན་འོད་མར། དགེ་སློང་ནད་པ་ལ་ཕན་པར་བྱ་བའི་ཕྱིར་མར་རམ། ཡུངས་མར་གྱི་ནང་དུ་ཆང་ཉུང་ཟད་ཅིག་བླུག་སྟེ་འཐུངས་ཀྱང་ཉེས་པ་མེད་དེ། ཉེས་པ་མེད་ན་ནི་ཆང་མ་ཡིན་པ་ནའོ། །ལྷག་མ་ལྟར་མར་དང་བསྲེས་པའི་ཆང་ཡང་ཁ་དོག་ཀྱང་ཆང་མི་འདྲ། རོ་དང་བསུང་ཡང་ཆང་མི་འདྲ་ན་བཏུང་དུ་རུང་ངོ་། །སྐོལ་བས་འབྱོར་རོ། །ཆང་ཟངས་གང་ཙམ་སྐོལ་ནས་ཕྱེད་ཙམ་དུ་བསྡུ་བས་བསུང་མི་བྲོ། རོ་དང་ཁ་དོག་ཀྱང་ཆང་མི་འདྲ་ན་འཐུང་དུ་རུང་། འདི་སར་བཅུག་པ་ལ་ནས་བརྔོས་པས་བླུག་སྟེ་ཚར་གྱུར་ནའོ། །ཆང་བུམ་གང་ཙམ་ས་འོག་ཏུ་བཅུག་ལ་ཡོས་ཚིག་པར་བརྔོས་ཏེ། ཆང་གི་ནང་དུ་བླུག་སྟེ་སྦྱིབས་ཏེ་བཞག་ན་ཚར་གྱུར་ཏེ། ཁ་དོག་ཀྱང་(༤༩ན)
ཆང་མི་འདྲ་རོ་ཡང་ཆང་མི་བྲོ་ན་ཉེས་མེད། རྒུན་ཆང་སྐོལ་ན་ར་རོ་བར་མི་འགྱུར། རྒུན་ཆང་སྐོལ་ཏེ་འཐུངས་པས་རའང་མི་རོ་ལ། བསུང་ཆང་མི་བྲོ་ན་འཐུངས་ནའང་ཉེས་མེད། ཅེས་གསུངས་པས། སྟག་ཚང་པའི་འདུལ་ཊཱིཀ་ཏུ། ནད་པས་ཆང་ནི་མགུལ་དུ་མིད་པའི་ཚད་དུ་ལོངས་པ་ལྟ་ཅི་སྨོས། རྩྭའི་མཆོག་སྟེ་རྩེ་མོས་བླངས་པས་ཀྱང་མི་བཏུང་སྟེ། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་བསྲུང་ཕྱིར་རོ། །ཞེས་པ་ལྟར་ཆང་མ་བསྲུངས་ན་ཁ་ན་མ་ཐོ་བ་གཞན་མཐའ་དག་འབྱུང་བའི་ཕྱིར་རོ། །མཆོག་དང་རྩེ་མོ་གཉིས་ཀྱི་སྐད་དོད་ཨ་གྲ་ཞེས་པར་གཅིག་པས་རྩེ་མོའི་དོན་ཡིན་གྱི། མཆོག་མ་ཞེས་སོགས་ཀྱི་བློ་བཟོ་མི་བྱའོ། །རབ་བྱུང་དུ་མ་ཟད་དགེ་བསྙེན་ཡན་ཆོད་སོགས་ཏེ། ཆང་འཐུང་ངུ་འབོད་གནས་སུ་སྐྱེ། །ལྡུད་མཁན་དེ་ཡི་འཁོར་དུ་སྐྱེ། །ཞེས་མདོ་ལས་འབྱུང་ཞེས་ལུང་རིགས་ཀྱི་སྒྲུབ་བྱེད་མཛད་ཅིང་། དེ་ཉིད་ལས། མིའི་ཤ་ནི་ཐ་ཆད་པས་སྨན་དང་སྨན་མིན་པ་ཐམས་ཅད་དུ་མི་རུང་ཞེས་པ་ནད་ཚབས་ཆུང་བ་ལ་དགོངས་ཏེ། ཆང་ལས་གཞན་པའི་བཅས་རྐྱང་ཡིན་པས་སོ། །ཞེས་གསུངས། དེ་ལྟར་ཆང་གིས་མྱོས་པར་འགྱུར་བ་ལ་བརྟེན་ནས་བག་མེད་པའི་གཞི་ཆེན་པོ་བྱེད་པར་དགོངས་པ་ལྟར་ན་དུས་དེར་མ་དར་བས་གསལ་ཁ་མ་བྱུང་བ་མ་གཏོགས་ཐ་མ་ཁར་གྲགས་པའི་སྔོ་འདི་ལོ་བརྒྱ་ལྷག་ཙམ་ནས་རྒྱ་གར་དང་རྒྱ་ནག་ཏུ་བྱུང་ཞིང་། དེ་ཡང་བུད་མེད་ཅིག་གིས་སྨོན་ལམ་ལོག་པར་བཏབ་པའི་ཁྲག་ས་ལ་ལྷུང་བ་ལས་སྐྱེས་ཤིང་། བྱེད་རྐྱེན་(༤༩བ)
གྱིས་འབྱུང་པོ་སྙིང་ལ་ཞུགས་ནས་དུ་བ་རྡུབ་དགོས་པའི་གང་ལ་ཡང་ཕན་པ་ཆུང་ཞིང་ནད་སོགས་མང་དུ་བསྐྱེད་པས་དགག་བྱ་ཆེ་བ་ཁྱད་པར་བག་མེད་གནས་སུ་སྦྱོར་བ་ལ་ཆང་དང་འདྲའོ། །
མ་བྱིན་ལེན་གྱི་རིན་ཐང་གི་ཚད་བཤད་པ།
དེང་སང་མ་བྱིན་ལེན་གྱི་རིན་ཐང་གི་ཚད་ལ། མཚོ་ཊཱིཀ་ལས། ཀཪྵ་པ་ཎ་མཚན་ཉིད་པ་དང་བཏགས་པ་བ་གཉིས་ལས། དང་པོ་ནི། དངུལ་ལས་བྱས་པ་དོང་ཙེའི་རྣམ་པ་འདྲ་བའི་རི་མོའི་ཁྱད་པར་དང་དབྱིབས་སུ་བྱས་པ་སྟེ། ཞུ་འགྲེལ་ལས། ཀཪྵ་པ་ཎ་ཟོང་གི་ཁྱད་པར་ཏེ། དངུལ་ལས་བྱས་པ་གཟུགས་བཏོད་པ་བཙོང་དུ་རུང་བ་ཡིན་ནོ། །ཞེས་བཤད་ཅིང་། ལུང་ཞུ་བ་ཆེ་ཤོས་ལས། ཀཪྵ་པ་ཎ་ནི་ཇི་ལྟ་བུ་རྒྱན་ཐམས་ཅད་ཀྱིས་བརྒྱན་པ་པོ་ཞེས་གསུངས་སོ། །དེ་ཡང་སྔོན་རྒྱལ་པོ་རྨ་བྱ་བ་ཞེས་བྱ་བའི་ཁྲིམས་ལུགས་ལས་བྱུང་བ་སྟེ། ལུང་ཞུ་བ་ཆུང་ཤོས་ལས། ཀཪྵ་པ་ཎ་ཇི་ལྟ་བུ་ལགས། རྒྱལ་པོ་རྨ་བྱ་བས་བྱས་པའོ་ཞེས་གསུངས་ཤིང་། དེའི་འགྲེལ་པ་ལས། རྒྱལ་པོའི་མིང་རྨ་བྱ་བས་ཏེ། རྒྱལ་པོ་དེས་དང་པོར་ཀཪྵ་པ་ཎ་སྤྱོད་དུ་བཅུག་པ་སྟེ། དཔལ་ལེགས་བལྟམས་ཀྱིས་བྱས་པའི་དོང་ཙེ་ལྟ་བུའོ་ཞེས་བཤད་དོ། །ཀཪྵ་པ་ཎ་དེའང་དངུལ་ཞོ་ཕྱེད་ཙམ་ལ་བཟོ་བྱས་པ་སྟེ། དེ་ཉིད་ཀྱི་ཕྱིར་ན་འགྲེལ་ཆུང་ལས། སངས་རྒྱས་བཞུགས་པའི་ཚེ་ནའང་དངུལ་ཞོ་གཅིག་གི་བརྒྱད་ཆ་གཅིག་གིས་ཕམ་ཞེས་བཤད་དོ། །གཉིས་པ་ཀཪྵ་པ་ཎ་བཏགས་པ་བ་ནི་དེ་དང་རིན་མཉམ་པའི་འགྲོན་བུ་ལ་སོགས་པའི་དངོས་པོ་རྣམས་ཡིན་ནོ། །དེ་ཡང་འགྲོན་བུ་ཀཪྵ་པ་ཎ་གཅིག །རས་ཀཪྵ་པ་ཎ་གཅིག་(༥༠ན)
བུ་རམ་ཀཪྵ་པ་ཎ་ཞེས་བརྗོད་དེ། དཔེར་ན་སྣམ་བུ་སོ་བ་གཅིག །བུ་རམ་བྲེ་གང་ཞེས་པ་ལྟ་བུའོ། །ཞེས་སོགས་སྔ་ཕྱིའི་འདུལ་འཛིན་རྣམས་ཀྱིས་བཤད་ཚུལ་མང་ཞིང་། ངེས་པར་ཐམས་ཅད་མཁྱེན་པ་ཞ་ལུ་ལོ་ཙཱ་བ་རིན་ཅེན་ཆོས་སྐྱོང་བཟང་པོའི་ཞལ་སྔ་ནས། མདོ་རྩར། མ་བྱིན་ལེན་གྱི་རིན་ཐང་གི་སྐབས་སུ་ཀ་ཀ་ནི་བཞི་ལ་མ་ཤ་ཀ་གཅིག་གོ །ལྔ་ཉིད་རིན་ཐང་གི་ཁྱད་པར་རོ། །གང་དུ་དེའི་ཚིགས་ཉི་ཤུ་ཡིན་པ་དེ་ལ་བརྟེན་ནས་སོ། །ཞེས་གསུངས་པའི་ཀ་ཀ་ནི་ཞེས་པ་ནི་གུཉྩ་ཞེས་བྱ་བ་དམར་རུ་མགོ་ནག་གི་མིང་ཡིན། བཞི་ལ་མ་ཤ་ཀ་ཞེས་བྱ་བ་གསེར་སེ་བ་དོ་ཡིན། ལྔ་ཉིད་རིན་ཐང་གི་ཁྱད་པར་ཞེས་བྱ་བ་གསེར་སེ་བ་བཅུ་ཀཪྵ་པ་ཎའི་བཞི་ཆ་ཡིན། འཆི་མེད་མཛོད་ལས། གུཉྩ་ལྔ་སོགས་མ་ཤ་ཀ །དེ་དག་བཅུ་དྲུག་ཞོ་གཉིས་ཏེ། །ཞེས་འབྱུང་བའང་འདི་དང་དོན་གཅིག །དེས་ན་ཀཪྵ་པ་ཎ་ཞེས་བྱ་བ་འགྲོན་བུ་སྟོང་དྲུག་བརྒྱའི་རིན་ཐང་གི་ཚད་དེ་གསེར་ཞོ་དོ་ཡིན། དེའི་བཞི་ཆ་གསེར་ཞོ་ཕྱེད་ནི་འགྲོན་བུ་བཞི་བརྒྱའི་རིན་ཐང་གི་ཚད་ཡིན། ཀ་ཀ་ནིའམ། བུཎྜི་ཀའམ། གུཉྩ་ཞེས་བྱ་བ་དེ་ནི་དམར་རུ་མགོ་ནག་ཡིན། དེ་ནི་འགྲོན་བུ་ཉི་ཤུའི་རིན་ཐང་གི་ཚད་ཡིན། མ་ཤ་ཀ་ནི་འགྲོན་བུ་བརྒྱད་ཅུའི་རིན་ཐང་གི་ཚད་ཡིན། དེས་ན་འགྲོན་བུ་བཞི་བརྒྱའི་རིན་ཐང་གི་ཚད་གསེར་སེ་བ་བཅུ་བརྐུས་ན་རིན་ཐང་ཚང་བས་ཕམ་པར་འགྱུར་རོ། །སྔོན་གྱི་འདུལ་འཛིན་མང་པོས་ཀ་ཀ་ནི་དམར་རུ་མགོ་ནག་ཡིན་པ་མ་མཁྱེན་པར་ངོས་མ་ཟིན་པའི་གཏམ་མང་པོ་ཡི་གེར་བཀོད་བྱུང་(༥༠བ)
བ་སྣང་ངོ་། །རིགས་ལྡན་ཆོས་ཀྱི་རྒྱལ་པོ་ངག་དབང་རྣམ་རྒྱལ་གྱིས་དབུས་གཙང་གི་དགེ་བའི་བཤེས་གཉེན་ཕལ་ཆེ་བ་སྟག་ལོ་ཧོར་ཟླ་གཉིས་པའི་ནང་དུ་ཆུ་ཤུལ་ལྷུན་པོ་རྩེར་བསྡུས་ཏེ་འབེལ་བའི་གཏམ་མང་པོ་དང་། ཁྱད་པར་འདུལ་བ་དང་མངོན་པའི་སྐབས་སུ་དཔྱད་པ་མང་པོ་དགོས་བྱུང་བ་ལ། གསེར་དང་གསོལ་ཇའི་གནང་སྦྱིན་ཕོ་ཉ་བ་དང་བཅས་པ་ཕེབས་པ་ལ་བརྟེན་ཞ་ལུ་ལོ་ཙཱ་བ་ཤྲི་དྷརྨ་པཱ་ལ་བྷ་དྲས་ཕྱོགས་གཅིག་ཏུ་སྦྱར་བའོ་ཞེས་བྱུང་། དེང་སང་དགེ་བསྙེན་ལ་དུས་བསྒོ་དཀྱུས་སུ་མ་བྱུང་ཀྱང་བུ་སྟོན་རིན་པོ་ཆེའི་འདུལ་ཊཱིཀ་ཏུ། དགེ་བསྙེན་དུ་སྒྲུབ་པའི་ཆོ་གའི་སྐབས་འདིར་དེ་མ་ཐག་རབ་བྱུང་བྱེད་པའི་དབང་དུ་བྱས་ནས་གྲིབ་ཚོད་སོགས་མ་བརྗོད་པ་ཡིན་གྱི་དགེ་བསྙེན་ཉིད་དུ་སྡོད་ན་རིག་པར་བྱེད་དགོས་ཏེ། དགེ་བསྙེན་ལའང་བསླབ་པའི་གྲལ་བྱེད་པའི་ཕྱིར་རོ། །དགེ་ཚུལ་ལའང་དེ་མ་ཐག་བསྙེན་རྫོགས་བྱེད་ན་མི་དགོས་མོད་ཀྱི། དགེ་ཚུལ་དུ་སྡོད་པ་ལ་བརྗོད་དགོས་ཏེ། ལས་བརྒྱ་རྩ་གཅིག་ཏུ་སློབ་དཔོན་མ་ཡིན་པའི་དགེ་སློང་གཞན་ཡང་རུང་བ་ཞིག་གིས་གྲིབ་ཚོད་གཞལ་བར་བྱ་ཞིང་། སྐྱེས་བུ་དང་། རྩ་བ་དང་། ཉིན་མཚན་གྱི་ཆ་དང་དུས་ཚོད་ཀྱང་རིག་པར་བྱའོ། །ཞེས་བཤད་པས་སོ་གསུང་། ལས་ཆོག་ཉིད་དུ་གསལ་ཁ་མ་བྱུང་ཀྱང་བུ་སྟོན་གྱིས་མཛད་པའི་ལས་བརྒྱའི་ཊཱིཀྐ་ཆོ་གའི་གསལ་བྱེད་དུ། འདིར་དེ་མ་ཐག་རབ་བྱུང་བྱེད་པའི་དབང་དུ་བྱས་ནས་གྲིབ་ཚོད་རིག་པར་བྱ་བ་མ་གསུངས་ཀྱི་དགེ་བསྙེན་དུ་སྡོད་ན་བྱ་དགོས་སོ་གསུང་སྟེ་འདུལ་བའི་(༥༡ན)
བཀའ་དང་བསྟན་བཅོས་རྣམས་ལ་མི་སྣང་ནའང་དོན་ལ་ཐོབ་པ་འདྲའོ། །ཞེས་གསུངས་པ་ལུང་དང་མདོ་རྩ་འགྲེལ་བཅས་སུ་དངོས་བསྟན་ལ་མེད་པར་དགོངས་སམ། གཞུང་ལུགས་འབུམ་ཕྲག་བརྒྱ་པ་དངོས་གྲུབ་དཔལ་འབར་གྱི་ལས་ཆོག་ཏུ། དགེ་བསྙེན་ཙམ་དུ་བསྒྲུབ་ན་འདིར་བསླབ་པ་དང་དུས་བསྒོ་བརྗོད། ཚིགས་ཕྱི་མ་སྦྲགས་ནས་སྒྲུབ་ན་འདིར་བརྗོད་མི་དགོས་ཏེ། ཚིགས་ཕྱི་མ་ཕྱི་མའི་ཁོངས་སུ་སྔ་མ་སྔ་མའི་བསླབ་བྱ་དང་། དུས་བསྒོ་འདུ་བའི་ཕྱིར་རོ། །ཞེས་འབྱུང་བས་དེང་སང་ཞ་ལུ་དང་ངོར་སོགས་ན་ཚིགས་གསུམ་རིམ་གྱིས་འབོགས་པའི་ཚེ་དགེ་བསྙེན་གྱི་བསླབ་བརྗོད་དང་། དགེ་ཚུལ་ལ་དུས་བསྒོ་བསླབ་བརྗོད་གཉིས་ཀ་མཛད་པའང་ཚིག་ཚོགས་ཆེ་བ་ལས་དགོས་པ་ལྷག་པོ་མ་མཐོང་ངོ་། །ཚིགས་གསུམ་རིམ་གྱིས་ནོས་པ་འདི་ལ་སྡོམ་པའི་ངོ་བོ། དབྱེ་བ། ཁྱད་ཆོས་ཀྱི་རྣམ་གཞག་རགས་པ་ཙམ་མ་ཆགས་པར་སྡོམ་པ་འབོགས་པའང་རི་མོར་བྲིས་པའི་མར་མེ་ལྟ་བུར་སྣང་བས། མཚོ་སྣ་པའི་འདུལ་ཊཱིཀ་ལས་རང་ལུགས་སུ་ཉན་ཐོས་བྱེ་བྲག་སྨྲ་བ་ནི་སྡོམ་པའི་ངོ་བོ་གཟུགས་ཡིན་པར་འདོད་དེ། མཛོད་ལས། གཟུགས་ནི་དབང་པོ་ལྔ་དང་དོན། །ལྔ་དང་རྣམ་རིག་བྱེད་མིན་ཉིད། ཅེས་དང་། རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། ཞེས་སོ། །དེའང་སྡོམ་པ་རྣམ་པ་རིག་བྱེད་མ་ཡིན་པའི་གཟུགས་བསྟན་དུ་མེད་ཅིང་ཐོགས་པ་མེད་པ་སྟེ། སྡོམ་ལྡན་གྱི་ལུས་ཀྱི་རྡུལ་(༥༡བ)
ཕྲ་རབས་རྣམས་ཀྱི་བར་ན་ནགས་ལ་མེ་ལྕེ་ཞུགས་པ་ལྟར་སྡོམ་པ་དེ་ཡོད་པར་འདོད་དེ། མཛོད་འགྲེལ་ལས། ལུས་ཀྱི་རྡུལ་རྣམས་ལ་གསེབ་ཡོད་པའི་ཕྱིར། ཞེས་བཤད་ཅིང་། བུ་སྟོན་རིན་པོ་ཆེའི་འདུལ་ཊཱིཀ་ལས། སོ་སོ་ཐར་པའི་སྡོམ་པའི་མཚན་ཉིད་ཆོས་འདི་པ་དག་གི་འདོད་པ་ན་སྤྱོད་པའི་ཚུལ་ཁྲིམས་སོ། །ཞེས་དང་། མཛོད་འགྲེལ་དུ་ཡང་དག་པར་བླངས་པའི་ཚུལ་ཁྲིམས་ནི་རྣམ་པ་རིག་བྱེད་ལ་རག་ལུས་པའི་ཕྱིར་ལས་ཀྱི་ལམ་གཟུགས་ཅན་བདུན་གདོན་མི་ཟ་བར་རྣམ་པ་རིག་བྱེད་དང་། རྣམ་པ་རིག་བྱེད་མ་ཡིན་པ་དང་རྣམ་པ་གཉིས་ཀ་ཡིན་ནོ། །ཞེས་བཤད་པས། རྣམ་པ་རིག་བྱེད་ཡིན་མིན་གཉིས་ཀ་སྡོམ་པ་ཡིན་ཞིང་། སྡོམ་པ་ཡང་དག་པར་བླངས་པའི་རྣམ་པ་རིག་བྱེད་དང་རྣམ་པ་རིག་བྱེད་མ་ཡིན་པ་དང་པོ་དག་གི་སྡིག་པ་ལས་དང་པོར་ཐར་བའི་ཕྱིར་སོ་སོར་ཐར་པའང་ཡིན་ལ། ལུས་དང་ངག་སྡོམ་པའི་སྡོམ་པའང་ཡིན་ནོ། །ལས་ཀྱི་ལམ་དངོས་ཡིན་ནོ། །སྐད་ཅིག་གཉིས་པ་ཕན་ཆད་ནི་སོ་སོ་ཐར་པ་ལས་སྐྱེས་པའི་སྡོམ་པ་ཡིན་པས་ན་སོ་སོ་ཐར་པའི་སྡོམ་པ་ཡིན་གྱི་སོ་སོ་ཐར་པ་ནི་མ་ཡིན་ཏེ། སྐད་ཅིག་དང་པོ་ཁོ་ནས་སྡིག་པ་ལས་ཐར་བར་བྱས་ཟིན་པའི་ཕྱིར་རོ། །དེས་ན་ལས་ཀྱི་འཇུག་ཡིན་གྱི་ལས་དངོས་མ་ཡིན་ནོ། །ཞེས་དང་། འདུལ་ཊཱིཀ་རིན་ཅེན་འཕྲེང་བར། འོ་ན་སློབ་དཔོན་ཡོན་ཏན་འོད་ཀྱི་ལུགས་ལ་སྡོམ་པའི་ངོ་བོ་གང་ཞེ་ན། ཁ་ཅིག་ན་རེ། མཛོད་ལས། འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །ཞེས་གསུངས་པ་ལྟར་རྣམ་པ་རིག་(༥༢ན)
བྱེད་དང་། རྣམ་པ་རིག་བྱེད་མ་ཡིན་པའི་གཟུགས་ཡིན་ལ། མདོ་སྡེ་པ་ནི་སྤོང་བའི་སེམས་པ་ས་བོན་དང་བཅས་པར་འདོད་དོ་ཟེར། །སློབ་དཔོན་ཡོན་ཏན་འོད་ས་གསུམ་པ་ལ་གནས་པའི་བྱང་སེམས་སུ་འདོད་པ་ལྟར་ན་བྱེ་བྲག་སྨྲ་བའི་ཐུན་མོང་མ་ཡིན་པའི་ལུགས་རང་ལུགས་སུ་མི་བཞེད་པས། སྤོང་བའི་སེམས་པ་ས་བོན་དང་བཅས་པར་བཞེད་དོ་སྙམ་སྟེ་གོང་འོག་ཀུན་ཏུ་དཔྱད་པར་བྱའོ། །ཞེས་དང་། པཎ་ཆེན་གསེར་མདོག་ཅན་པས་གསེར་ཐུར་དུ་དགག་བཞག་སྤང་གསུམ་རྒྱ་ཆེར་མཛད་པའི་བཞེད་དོན་དུ་བྱེ་སྨྲའི་ལུགས་ལ་སོ་སོར་ཐར་པའི་སྡོམ་པ་ལ་རིག་བྱེད་མ་ཡིན་པའི་གཟུགས་ཀྱིས་ཁྱབ་པ་ཡིན་ཏེ། ཇི་སྐད་དུ། རྣམ་རིག་མིན་ནམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །ཞེས་སོགས་དང་། སྡོམ་པ་སོ་སོར་ཐར་ཞེས་བྱ། །དེ་བཞིན་ཟག་མེད་བསམ་གཏན་སྐྱེས། །ཞེས་སོགས་ཀྱི་ལུང་འདྲེན་དང་། མདོར་ན་ལས་ལམ་དངོས་གཞིའི་བསྐྱེད་བྱེད་རིག་བྱེད་ནི་སྦྱོར་བ་ཡིན་པས་དངོས་གཞིར་མི་རུང་། དངོས་གཞི་དང་དུས་གཅིག་པའི་རིག་བྱེད་ནི་ལས་ལམ་གྱི་འཇུག་ཏུ་གྱུར་པའི་རིག་བྱེད་དུ་འཇོག་དགོས་པ་ཡིན་ཏེ། ཤི་ཟིན་པའི་རོ་ལ་བསྣུན་ཟིན་པ་ལས་ལམ་དངོས་གཞིར་མི་རུང་བ་བཞིན་ནོ། །ཞེས་དང་། བྱེ་སྨྲའི་ལུགས་ལ་སོ་ཐར་གྱི་སྡོམ་པ་རང་གི་ངོ་བོ་རིག་བྱེད་མ་ཡིན་པའི་གཟུགས་དང་། ཉེ་བར་ལེན་པའི་རྒྱུ་འབྱུང་བ་བཞི་དང་། ལྷན་ཅིག་བྱེད་པའི་རྐྱེན་ལུས་ཀྱི་རིག་བྱེད་ལས་སྐྱེས་པའི་སྤོང་བ་བདུན་པོ་གང་རུང་དུ་འདོད་དོ། །པཎ་ཆེན་བསོད་(༥༢བ)
ནམས་གྲགས་པའི་འདུལ་བའི་སྤྱི་དོན་དུ། མདོ་སྡེ་པས་སོ་ཐར་སྡོམ་པ་སྤོང་སེམས་མངོན་གྱུར་ལ་འདོད། སེམས་ཙམ་པས་དེའང་དེ་དག་གི་ས་བོན་གང་རུང་ལ་འདོད་པ་ཡོད་ཀྱང་བྱེ་བྲག་སྨྲ་བ་རང་ལུགས་ལ་དེ་མི་འདོད་དེ་གཟུགས་ཅན་དུ་ཁས་ལེན་པའི་ཕྱིར་ཞེས་དང་། རང་ལུགས་སོ་ཐར་སྡོམ་པ་རྣམ་པ་རིག་བྱེད་མ་ཡིན་པའི་གཟུགས་སུ་བྱས་པར། སྔར་བཤད་པའི་ལུང་རིགས་རྣམས་དང་། སྡོམ་གསུམ་རྣམ་གཞག་མང་པོ་ཞིག་གྲུབ་པའི་ཕྱིར་རོ། །ཞེས་དང་། ཆོས་རྗེ་བདེ་ལེགས་ཉི་མས། ངོ་བོ་ངོས་འཛིན་པ་ལ། བྱེ་སྨྲའི་ལུགས་ལ་སོ་ཐར་གྱི་སྡོམ་པ་དེ་སྣང་བ་གཟུགས་ཀྱི་གཞི་ཡིན། དེས་ན་སོ་ཐར་གྱི་སྡོམ་པ་ཡིན་ན་གཟུགས་ཅན་ཡིན་པའི་ཁྱབ་པ་ཁས་ལེན་པའི་ཕྱིར། མདོ་སྡེ་པ་ཡན་ཆད་ལ་སྤོང་བའི་སེམས་པ་དེའི་ས་བོན་གང་རུང་གི་སྟེང་ནས་སོ་ཐར་གྱི་སྡོམ་པ་འཇོག་པ་ཡིན་ཏེ། འདུལ་བ་རྒྱ་མཚོའི་སྙིང་པོར། ངེས་འབྱུང་བསམ་པས་ཞེས་སོགས་གསུངས། པཎ་ཆེན་བློ་གྲོས་ལེགས་བཟང་གིས་མཛད་པའི་སྤྱི་དོན་རིན་ཅེན་འཕྲེང་བ་གསལ་བར་བྱེད་པའི་སྒྲོན་མ་ལས། སོ་ཐར་གྱི་སྡོམ་པ་དེ་གཟུགས་ཅན་ཡིན་ཞིང་། སོ་ཐར་གྱི་སྡོམ་པ་སྐད་ཅིག་དང་པོ་དེ་ལ་ཁོ་རང་དུ་གྱུར་པའི་རྣམ་པ་རིག་བྱེད་ཀྱི་གཟུགས་དང་། རྣམ་པ་རིག་བྱེད་མ་ཡིན་པའི་གཟུགས་གཉིས་ཡོད་དེ། མཛོད་ལས། དང་པོའི་རྣམ་རིག་རྣམ་རིག་མིན་ཞེས་གསུངས་པའི་ཕྱིར་དང་། སོ་ཐར་གྱི་སྡོམ་པ་དེ་དགེ་བར་ལུང་དུ་བསྟན་ཅིང་། ཐོགས་མེད་ཀྱི་གཟུགས་ཡིན་པའི་ཕྱིར། མཛོད་འགྲེལ་དུ་མདོ་དྲངས་པར། ལུང་བསྟན་(༥༣ན)
ཐོགས་པ་མེད་པའི་གཟུགས། ཞེས་གསུངས་པའི་ཕྱིར། ཞེས་གསུངས། མཁས་པ་ཕལ་ཆེར་བཞེད་ཚུལ་ཕྱོགས་འདྲ་ཙམ་མཐུན་ཞིང་། སྟག་ཚང་ལོ་ཙཱ་བས་འདུལ་ཊཱིཀ་ཏུ། འདུལ་འཛིན་ཕལ་མོ་ཆེས་མ་ཐོན་པའི་ལེགས་བཤད་ངོ་མཚར་བ་འདི་ལྟ་སྟེ། སྡོམ་པའི་ངོ་བོ་ལ་སྔོན་གྱི་མཁས་པ་ཀུན་ཞལ་མཐུན་པར་གཟུགས་ཅན་དུ་འདོད་པ་ནི་བྱེ་བྲག་སྨྲ་བ་ཁོ་ན་ཡིན་ལ། མདོ་སེམས་ཡན་ཆོད་སེམས་པ་ས་བོན་དང་བཅས་པར་འདོད་དོ། །ཞེས་གསུང་ངོ་། །དེ་ནི་མི་རིགས་ཏེ། དེ་ལྟར་ན་རྣམ་རིག་པས་སྡོམ་པས་སྡོམ་པ་འདུ་བྱེད་དང་རྣམ་ཤེས་ཕུང་པོས་བསྡུས་པར་འདོད་དགོས་པར་འགྱུར་ན། ཡང་དག་པར་བླངས་པ་ལས་བྱུང་བའི་གཟུགས་ཤེས་གཟུགས་ཕུང་དུ་བསྡུས་པར་མངོན་པ་ཀུན་ལས་བཏུས་སུ་གསལ་བར་གསུངས་པས་སོ། །སེམས་ཙམ་པ་རིག་བྱེད་མ་ཡིན་པའི་གཟུགས་མི་འདོད་པའང་མ་ཡིན་ཏེ། དབྱིག་གཉེན་གྱིས། ཕུང་པོ་ལྔ་ཡི་རབ་བྱེད་དུ། རྣམ་པར་རིག་བྱེད་མ་ཡིན་པའི་གཟུགས་གང་ཞེ་ན། རིག་བྱེད་དང་ཏིང་ངེ་འཛིན་ལས་བྱུང་བ་བསྟན་དུ་མེད་ལ་ཐོགས་པ་མེད་པའི་གཟུགས་སོ་ཞེས་བཤད་པས་སོ། །དེར་མ་ཟད། དབུ་མ་ཕུང་པོ་ལྔ་པ་ལས་ཀྱང་དེ་བཞིན་དུ་བཤད་པས་དབུ་མ་པའང་སྡོམ་པ་གཟུགས་ཅན་དུ་འདོད་དོ། །འོན་ཀྱང་ཐེག་པ་གོང་མའི་གཞུང་མང་པོར་སྤོང་བའི་སེམས་པ་ལ་བཤད་པས་མདོ་སེམས་ཡན་ཆད་སྡོམ་པའི་གཙོ་བོ་སེམས་པ་ལ་འཇོག་གོ །དེ་ཡང་སྒོ་གསུམ་གྱི་ནང་ནས་ཡིད་ཀྱི་ལས་གཙོ་ཆེ་བའི་དབང་གིས་ཡིན་(༥༣བ)
གྱི། ལུས་ངག་གི་སྡོམ་པ་མི་འདོད་ན་ལུས་ངག་གི་དགེ་སྡིག་གི་ལས་ལམ་བདུན་པོ་མེད་པར་འགྱུར་ཞིང་། དེ་ལྟ་ན་ལས་ཀྱི་རྣམ་གཞག་བཤད་པ་རྣམས་དང་། དགེ་སྡིག་གཟུགས་ཅན་དུ་བཤད་པ་དུ་མ་དང་འགལ་ལོ། ཁྱད་པར་སོ་ཐར་གྱི་སྡོམ་པ་སེམས་པ་ལ་གཙོ་བོར་འཇོག་ན། ཡིད་ཀྱི་མི་དགེ་བ་གསུམ་པོ་འདིའི་སྤང་བྱར་ཐལ་བ་དང་། ཚེ་འདིར་བྱང་ཆུབ་ཀྱི་བར་དུ་བླངས་ན་སྐྱེ་བར་ཐལ་བ་ཟློག་ཏུ་མེད་དོ། །དེས་ན་མཛོད་དུ། འཆལ་ཚུལ་དང་དེའི་གཉེན་པོ་ཚུལ་ཁྲིམས་གཉིས་ཀ་གཟུགས་སུ་བཤད་པ་ལ་མདོ་སྡེ་པས་དགག་པ་མ་བྱས་ཤིང་། བྱེ་སྨྲས་བཏགས་པའི་རིག་བྱེད་མ་ཡིན་པ་འགོག་པའི་སྐབས་སུ་ཡང་བྱེད་པ་པོའི་ལུས་བསམ་ལས་དོན་གཞན་པའི་རིག་བྱེད་མིན་པ་གཙོ་བོར་བཀག་པས་ན་རིག་བྱེད་མ་ཡིན་པའི་གཟུགས་ཙམ་ཞིག་མདོ་སེམས་ཀྱང་ཁས་ལེན་པར་ངེས་སོ། །དེས་ན་འདིར་རྒྱ་ཆེ་འགྲེལ་མཁན་པོ་ནི་བྱེ་བྲག་སྨྲ་བ་དངོས་ཡིན་ལ། ཡོན་ཤཱཀ་གཉིས་དངོས་སུ་མི་གསལ་ཡང་། སོ་ཐར་ལུས་ངག་ལ་འཇོག་པས་ལྟུང་བ་ལ་ལུས་ངག་གིས་ཁྱབ་པས་ཡིད་ཀྱི་ཉེས་པ་ལྟུང་བར་མི་འདོད་པའི་ཕྱིར། ཡིད་ཀྱི་ཚུལ་ཁྲིམས་སྡོམ་པར་མི་བཞེད་པས་ན་སྡོམ་པ་གཟུགས་ཅན་དུ་འདོད་དོ། །དེ་ཡང་སྡོམ་པ་སྐད་ཅིག་དང་པོ་ལས་ལམ་དངོས་གཞི་དང་གཉིས་པ་མན་ཆད་ལས་ལམ་གྱི་མཇུག་ཡིན་ཞིང་། སྔ་མ་ལ་རིག་བྱེད་ཡིན་མ་ཡིན་གཉིས་ཀ་ཡོད་ལ། འཁོར་བ་ལས་དང་པོར་ཐར་བས་སོ་ཐར་གྱི་སྒྲ་བཤད་ཀྱང་ཚང་། ཕྱི་མ་ལ་རིག་བྱེད་མ་ཡིན་པ་ནི་སེམས་མེད་ཀྱི་ཚེ་ཡང་ཡོད་(༥༤ན)
ཅིང་། རིག་བྱེད་ལུས་ངག་ཏུ་ཐོན་པའི་ཚེ་ན་ཡོད་དོ། །དེས་ན་སྡོམ་པའི་ངོ་བོ་ནི། རིག་བྱེད་དང་བཅས་པའམ་མངོན་གྱུར་མེད་པ་ཡང་རུང་སྟེ། གཙོ་བོར་རིག་བྱེད་མ་ཡིན་པའི་གཟུགས་སོ། །དེ་ནི་གནས་སྐབས་ཀྱི་ཁྱད་པར་ན་གཡེངས་སེམས་བཅས་སམ། གཡེངས་ཤིང་སེམས་མེད་པའི་རྣམ་པ་ཀུན་ཏུ་འབྱུང་བ། ངོ་བོའི་ཁྱད་པར་འདི་ལུང་མ་བསྟན་བསྐྱེད་ནུས་ཀྱི་རིག་བྱེད་མི་སྲིད་པས་ན། རྣམ་རིག་མིན་ལུང་བསྟན་མིན་མེད། །ཅེས་པ་ལྟར་དགེ་མི་དགེ་གང་རུང་དུ་ངེས་ཤིང་རྒྱུན་རྗེས་སུ་འབྲེལ་བ་རྒྱུའི་ཁྱད་པར་འབྱུང་བ་ཆེན་པོ་བཞི་ལས་བྱུང་བ་སྟེ། དེ་ཡང་བསམ་གཏན་ཟག་མེད་གཉིས་ནི་འབྱུང་བ་བཞི་ཚན་རེ་རེ་དང་། སོ་སོ་ཐར་པ་ནི་བཞི་ཚན་བདུན་ལས་དགེ་སློང་གི་དང་། བཞི་ལས་སྡོམ་པ་གཞན་རྣམས་སྐྱེ་བའོ། །ཞེས་དབྲི་བསྣན་མེད་པར་བཀོད་པ་ཡིན་ལ། ལུང་རིགས་གཏེར་མཛོད་ཀྱི་དགོངས་བཞེད་ཅུང་ཟད་བསྡུས་ཏེ་བཀོད་པར། ཐོབ་བྱ་སོ་ཐར་གྱི་རང་བཞིན་ལ། ངོ་བོ། དབྱེ་བ། ཁྱད་ཆོས་གསུམ་གྱི་དང་པོ་ངོ་བོ་ལ་གྲུབ་མཐའ་འདོད་ཚུལ། མཚོན་པར་བྱེད་པའི་མཚན་ཉིད། མིང་གི་རྣམ་གྲངས། མཚོན་བྱ་སྒྲ་དོན་བཞིར་ཡོད་པའི། དང་པོ་གྲུབ་མཐའི་འདོད་ཚུལ་ལ་བྱེ་སྨྲའི་ལུགས། མདོ་སྡེ་པའི་ལུགས། སེམས་ཙམ་པ་ཡན་ཆད་ཀྱི་ལུགས་གསུམ་ལས། དང་པོ་ལ་སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས་ལས། དང་པོ་ནི། སྤྱིར་གཟུགས་ཅན་དུ་འདོད་ཅིང་། དེ་ལའང་རིག་བྱེད་ཀྱི་གཟུགས་དང་རིག་བྱེད་མ་ཡིན་པའི་གཟུགས་གཉིས་ཀ་ཡོད་པར་(༥༤ན)
འདོད་དེ། མཛོད་འགྲེལ་ལས། ཡང་དག་པར་བླངས་པའི་ཚུལ་ཁྲིམས་ནི་རྣམ་པར་རིག་བྱེད་ལ་རག་ལུས་པའི་ཕྱིར། ལས་ཀྱི་ལམ་གཟུགས་ཅན་བདུན་ནི་གདོན་མི་ཟ་བར་རྣམ་པར་རིག་བྱེད་དང་རིག་བྱེད་མ་ཡིན་པ་རྣམ་པ་གཉིས་ཀ་ཡོད་དེ། ཞེས་གསུངས་པའི་ཕྱིར། དེ་ཡང་སོ་ཐར་གྱི་སྡོམ་པ་ཐོབ་ནས་མ་བཏང་བ་དེ་སྲིད་དུ་རྣམ་པར་རིག་བྱེད་མ་ཡིན་པའི་གཟུགས་ཀྱི་ངོ་བོར་གྱུར་པའི་སྡོམ་པ་རྒྱུན་ཆགས་སུ་ལྡན་ཏེ། མཛོད་ལས། སོ་སོ་ཐར་གནས་ཇི་སྲིད་དུ། །མ་བཏང་བར་དག་ད་ལྟར་གྱི། །རྣམ་རིག་མིན་ལྡན་སྐད་ཅིག་མ། །དང་པོ་ཕྱིན་ཆད་འདས་པ་དང་། ཞེས་གསུངས་པའི་ཕྱིར། ད་ལྟར་གྱི་ཆོ་ག་ལ་བརྟེན་ནས་ཐོབ་པའི་སོ་ཐར་གྱི་སྡོམ་པ་སྐད་ཅིག་དང་པོ་ལ་ལུས་ངག་གི་རིག་བྱེད་གཉིས་ཀ་ཡོད་དེ། མཁན་སློབ་ཀྱིས་ཆོ་ག་བརྡ་སྤྲད་པ་ལས་ཇི་སྲིད་འཚོའི་བར་དུ་སྡོམ་པ་བསྲུང་བར་ཁས་ལེན་པའི་ངག་དང་ལུས་ཀྱི་རིག་བྱེད་གཉིས་ཀ་ཡོད་པའི་ཕྱིར། མཛོད་ལས། དང་པོའི་རྣམ་རིག་རྣམ་རིག་མིན། །སོ་སོ་ཐར་དང་བྱ་བའི་ལམ། ཞེས་དང་། དེའི་རང་འགྲེལ་དུ་སྡོམ་པ་ཡང་དག་པར་བླངས་པ་རྣམ་པ་རིག་བྱེད་དང་རྣམ་པར་རིག་བྱེད་མ་ཡིན་པ་དང་པོ་དག་ནི་སོ་སོར་ཐར་པ་ཞེས་བྱ་སྟེ། ཞེས་གསུངས་པའི་ཕྱིར། དེས་ན་སོ་ཐར་གྱི་སྡོམ་པ་སྐད་ཅིག་དང་པོའི་ངོ་བོར་གྱུར་པའི་ངག་གི་རིག་བྱེད་ཡོད་ཀྱང་གཉིས་པ་ཕན་བྱེད་ཀྱི་ངོ་བོར་གྱུར་པའི་ངག་གི་རིག་བྱེད་ཡོད་པའི་ངེས་པ་མེད་དེ། སྒྲ་ལ་རྒྱུན་མེད་པའི་ཕྱིར། ལུས་ཀྱི་རིག་བྱེད་ལ་མི་མཚུངས་ཏེ། ལུས་ཀྱི་རིག་བྱེད་ཀྱི་ངོ་བོར་གྱུར་པའི་སོ་ཐར་གྱི་སྡོམ་པ་སྔ་མ་ལས་ཕྱི་མ་(༥༥ན)
འབྱུང་བའི་རྒྱུན་ཡོད་པའི་ཕྱིར།
སོ་ཐར་སྡོམ་པའི་ངོ་བོ་དང་དབྱེ་བ་བཤད་པ།
གཉིས་པ་བྱེ་བྲག་ཏུ་བཤད་པར་རྣམ་པ་རིག་བྱེད་ཀྱི་གཟུགས། རྣམ་རིག་མ་ཡིན་པའི་གཟུགས། དང་པོ་ལ་ལུས་ངག་གཉིས། ཕྱི་མ་ལ་སྡོམ་པ། སྡོམ་མིན་བར་མ་གསུམ། དང་པོར་ཡང་སོ་ཐར། བསམ་གཏན། ཟག་མེད་རྣམས་སུ་ཡོད། གཉིས་པ་མདོ་སྡེ་པ་ནི། ལུས་ངག་མི་བདེ་བ་ལས་སྡོམ་པར་བྱེད་པའི་རྒྱུད་ཡོངས་སུ་འགྱུར་བའི་ཁྱད་པར་ལ་འདོད། གསུམ་པ་སེམས་ཙམ་པ་ནི་གཞན་ལ་གནོད་པ་གཞི་བཅས་སྤོང་བའི་སེམས་པ་ཁྱད་པར་ཅན་དང་དེའི་བག་ཆགས་གཏོང་རྒྱུས་མ་བཅོམ་པ་དང་བཅས་པ་ཅི་རིགས་པ་ལ་འདོད། དེ་ཡང་སེམས་པ་ཁོ་ན་མ་ཡིན་ཏེ། འགོག་པ་ལ་མཉམ་པར་བཞག་པའི་དགེ་སློང་ལ་སྡོམ་པ་ཡོད་ཀྱང་སེམས་པའི་ངོ་བོར་གྱུར་པའི་སྡོམ་པ་མེད་པའི་ཕྱིར། བག་ཆགས་རྐྱང་པ་ལ་མ་ཡིན་ཏེ་གཏོང་རྒྱུ་བྱུང་བའི་གནས་སྐབས་སུའང་སྡོམ་པའི་བག་ཆགས་ཡོད་པའི་ཕྱིར། དེ་ལྟར་ཡང་ལས་གྲུབ་པར། གལ་ཏེ་སེམས་པ་ཁོ་ན་ལུས་ཀྱི་ལས་སུ་འགྱུར་ན། སེམས་གཡེངས་པ་དང་། སེམས་མེད་པ་དག་ལ་སེམས་པ་དེ་མེད་ན་སྡོམ་པ་དང་སྡོམ་པ་མིན་པ་གཉིས་ཇི་ལྟར་ཡོད་ཅེ་ན། སྡོམ་པའི་ཁྱད་པར་གྱི་བག་ཆགས་མ་བཅོམ་པའི་ཕྱིར་སྡོམ་པ་དང་སྡོམ་པ་མ་ཡིན་པ་གཉིས་ཀ་ཡོད་དེ་ཞེས་སོ། །དབུ་མ་པ་ལྟར་ན་སྤོང་སེམས་མཚུངས་ལྡན་དང་བཅས་པ་ལ་འདོད་དེ། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་གསུངས་པའི་ཕྱིར། གསུངས། གཉིས་པ་མཚོན་བྱ་མཚན་(༥༥ན)
ཉིད་ལ། བྱེ་སྨྲ་ལྟར་ན་འདོད་པའི་སས་བསྡུས་པའི་ངེས་འབྱུང་གི་བསམ་པས་ཟིན་པའི་སྡོམ་པའི་ཚུལ་ཁྲིམས། འདིར་བསམ་གཏན་ཟག་མེད་སོ་ཐར་གྱི་སྡོམ་པ་གསུམ་འགལ་བར་འདོད་དེ། འདོད་པའི་སས་བསྡུས་སོ་ཐར། གཟུགས་ཀྱི་སས་བསྡུས་བསམ་གཏན། ཁམས་གསུམ་གང་རུང་གི་སས་མ་བསྡུས་པ་ཟག་མེད་དུ་འདོད། ཐེག་པ་ཆེན་པོ་ལྟར་ན། སོ་ཐར་གྱི་སྡོམ་པ་འགྲུབ་པར་བྱེད་པའི་རྒྱུ་ཕུན་ཚོགས་ལ་བརྟེན་ནས་ཐོབ་པའི་སྡོམ་པའི་ཚུལ་ཁྲིམས། དེ་ཡང་སོ་ཐར་བསམ་གཏན་ཟག་མེད་གསུམ་འགལ་བ་མ་ཡིན་ཏེ། ཐེགཆེན་འཕགས་པའི་རྒྱུད་ཀྱི་བསམ་གཏན་གྱི་དངོས་གཞིར་གྱུར་པའི་སྡོམ་པ་དེ་གཞན་ལ་གནོད་པ་གཞི་བཅས་སྤོང་བའི་ཆ་ནས་སོ་ཐར། བསམ་གཏན་པའི་དངོས་གཞིས་བཙལ་བའི་ཆ་ནས་བསམ་གཏན། འཕགས་ལམ་གྱི་ངོ་བོ་ཡིན་པའི་ཆ་ནས་ཟག་མེད་ཀྱི་སྡོམ་པ་ཡིན་པའི་ཕྱིར་གསུངས། གསུམ་པ་མིང་གི་རྣམ་གྲངས། ཚུལ་ཁྲིམས་དང་ནི་ལེགས་སྤྱད་དང་། །ལས་དང་སྡོམ་པ་ཞེས་བྱའོ། །བཞི་པ་སྒྲ་དོན་ལ་སྤྱིའི་སྒྲ་དོན་དང་། བྱེ་བྲག་གི་སྒྲ་དོན་གཉིས་ཀྱི་དང་པོ་ནི། སྡིག་པ་མི་དགེ་བའི་ཆོས་ལས་རབ་ཏུ་ཐར་བ་དང་། སོ་སོ་ཐར་པ་དང་། དང་པོར་ཐར་བས་ན་སོ་སོ་ཐར་པ་ཞེས་བྱའོ། །སོ་སོ་ཐར་པའི་སྐད་དོད་དུ། པྲ་ཏི་མོཀྵ་ཞེས་པ་འབྱུང་ལ། པྲ་ཏི་ནི་སོ་སོ་བ་དང་། དང་པོ་ལ་འཇུག །མོཀྵ་ནི་ཐར་པ་ལ་འཇུག་པའི་ཕྱིར། དེས་ན་སོ་སོ་ཐར་པའི་སྡོམ་པ་སྐད་ཅིག་དང་པོ་ནི་སོ་སོ་ཐར་པ་དང་སྡོམ་པ་གཉིས་ཀ་ཡིན་ལ། སྐད་ཅིག་མ་གཉིས་པ་ཕན་ཆད་(༥༦ན)
སོ་སོ་ཐར་པའི་སྡོམ་པ་ཡིན་གྱི་སོ་སོ་ཐར་པ་མ་ཡིན་ཏེ། སྡིག་པ་མི་དགེ་བའི་ཆོས་ལས་དང་པོར་ཐར་པ་མ་ཡིན་པའི་ཕྱིར། དེ་སྐད་དུ་ཡང་། དང་པོའི་རྣམ་རིག་རྣམ་རིག་མིན། །ཞེས་པའི་རང་འགྲེལ་དུ། སྡོམ་པ་ཡང་དག་པར་བླངས་པའི་རྣམ་པ་རིག་བྱེད་དང་རྣམ་པ་རིག་བྱེད་མ་ཡིན་པ་དང་པོ་དག་ནི་སོ་སོ་ཐར་པ་ཞེས་བྱ་སྟེ། དེས་སྡིག་པ་ལས་སོ་སོར་ཐར་པའི་ཕྱིར། སྐད་ཅིག་མ་གཉིས་པ་ལ་སོགས་པ་ནི་སོ་སོ་ཐར་པའི་སྡོམ་པ་ཁོ་ན་ཡིན་གྱི། སོ་སོ་ཐར་པ་ནི་མ་ཡིན་ནོ། །ཞེས་གསུངས་པའི་ཕྱིར། གཉིས་པ་ནི། ཉོན་མོངས་པའི་ཚ་གདུང་ལས་བསིལ་བར་བྱེད་པས་ན་ཚུལ་ཁྲིམས་ཞེས་བྱ། སྐྱེས་བུ་དམ་པས་བསྔགས་པར་འོས་པས་ན་ལེགས་སྤྱད་ཅེས་བྱ། ལུས་ངག་གི་བྱ་བའི་རང་བཞིན་ཡིན་པས་ན་ལས་ཞེས་བྱ། རྒྱུད་མི་དགེ་བ་ལས་སྡོམ་པར་བྱེད་པས་ན་སྡོམ་པ་ཞེས་བྱའོ། །རྩ་བའི་ས་བཅད་གཉིས་པ་དབྱེ་བ་ལ། དབྱེ་བ་སྤྱིར་བསྟན་པ། རྫས་རིགས་བསྡུ་བ། སོ་སོའི་རང་བཞིན་བཤད་པ་གསུམ་གྱི་དང་པོ་ལ། དགེ་སློང་དགེ་ཚུལ་དགེ་བསྙེན་རྣམས་ཕ་མ་དགེ་སློབ་བསྙེན་གནས་བཅས་བརྒྱད། གཉིས་པ་ལ་ལ་བསྡུ་བ་དངོས། ལྡན་ཚུལ་གཉིས་ཀྱི་དང་པོ་བསྡུ་བ་དངོས་ནི། དེ་ལྟར་བརྒྱད་པོ་བསྡུ་ན། དགེ་སློང་ཕ་མ་རྫས་རིགས་གཅིག །དགེ་ཚུལ་ཕ་མ་དགེ་སློབ་མ་དང་བཅས་པ་རྫས་རིགས་གཅིག །དགེ་བསྙེན་ཕ་མ་རྫས་རིགས་གཅིག །བསྙེན་གནས་ལ་གཅིག་སྟེ་རྫས་རིགས་བཞིར་འདུས། གཉིས་པ་ལྡན་ཚུལ་ལ། ཐེག་ཆེན་པ་ལྟར་ཤེས་པར་འདོད་པའི་ལྡན་ཚུལ་དང་། ཐེག་(༥༦བ)
དམན་པ་ལྟར་གཟུགས་ཅན་དུ་འདོད་པའི་ལྡན་ཚུལ་གཉིས་ཀྱི་དང་པོ་ནི། ཐེག་པ་ཆེན་པོ་ལྟར་ན་དགེ་བསྙེན་དགེ་ཚུལ་དགེ་སློང་རིམ་ཅན་དུ་ནོད་པའི་དགེ་སློང་གི་རྒྱུད་ལ་སྡོམ་གསུམ་ངོ་བོ་ཐ་དད་ཅིག་ཅར་དུ་ལྡན་པ་ཡང་མ་ཡིན་ཏེ། སྡོམ་པ་གསུམ་པ་དེ་དག་ཤེས་པ་གང་ཞིག །གཙོ་སེམས་གཅིག་གི་འཁོར་དུ་སྡོམ་པའི་ངོ་བོར་གྱུར་པའི་སྤོང་སེམས་རྫས་གཞན་པ་གསུམ་ཅིག་ཅར་དུ་འབྱུང་བ་མི་སྲིད་པའི་ཕྱིར། དེའི་རྒྱུད་ལ་སྡོམ་གསུམ་ངོ་བོ་གཅིག་ཏུ་ཡོད་པ་ཡང་མ་ཡིན་ཏེ། བསྙེན་པར་རྫོགས་མ་རྫོགས་ཀྱི་སྡོམ་པའི་གཞི་མཐུན་ཡོད་པར་ཐལ་བའི་སྐྱོན་གནས་པའི་ཕྱིར། དེས་ན་ཚིགས་གསུམ་རིམ་བཞིན་ནོད་པའི་ཚེ་འོག་མ་འོག་མ་རྫས་གོང་འཕེལ་གྱི་ཚུལ་གྱིས་གོང་མ་གོང་མར་གནས་འགྱུར་བ་ཡིན་ཏེ། ལམ་ལྔ་རིམ་གྱིས་བགྲོད་པའི་ཚེ་ལམ་འོག་མ་འོག་མ་རྫས་གོང་འཕེལ་གྱི་ཚུལ་གྱིས་གོང་མར་གནས་འགྱུར་བ་བཞིན་ནོ། །སྡོམ་པ་ཤེས་པར་འདོད་པ་དང་། ཚིགས་གསུམ་རིམ་གྱིས་ནོད་པའི་གང་ཟག་གི་རྒྱུད་ལ་སྡོམ་གསུམ་ངོ་བོ་ཐ་དད་ཅིག་ཅར་དུ་ཡོད་པར་འདོད་པ་ནི་རིག་པའི་འཇུག་པ་མ་ཤར་བ་ཡིན་ཏེ། གཙོ་སེམས་གཅིག་གི་འཁོར་དུ་སྤོང་སེམས་རྫས་གཞན་དུ་མ་ཅིག་ཅར་དུ་ཡོད་པར་ཐལ་བའི་སྐྱོན་གནས་པའི་ཕྱིར། གཉིས་པ་ནི། ཚིགས་གསུམ་རིམ་གྱིས་ནོད་པའི་ཚེ་སྡོམ་པ་འོག་མ་གོང་མར་གནས་འགྱུར་བ་མ་ཡིན་ཏེ། ཐོབ་པར་བྱ་བའི་ཆོ་ག་ཐ་དད་ལས་ཐོབ་དགོས་པའི་གཟུགས་ཅན་ངོ་བོ་ཐ་དད་ཡིན་པའི་ཕྱིར། གོང་མ་ཐོབ་པའི་ཚེ་འོག་མ་གཏོང་བ་མ་ཡིན་ཏེ། གོང་མ་འོག་མའི་གཏོང་རྒྱུ་མ་ཡིན་པའི་ཕྱིར། (༥༧ན)
དེས་ན་ཚིགས་གསུམ་རིམ་གྱིས་ནོད་པའི་དགེ་སློང་གི་རྒྱུད་ལ་སྡོམ་པ་གསུམ་ངོ་བོ་ཐ་དད་པའི་ཚུལ་གྱིས་ཅིག་ཅར་དུ་ལྡན་པ་ལ་རིགས་པ་དང་འགལ་བ་མེད་དེ། སྡོམ་པ་གསུམ་པོ་དེ་ཐོབ་བྱེད་ཀྱི་རྒྱུས་ཐོབ། གཏོང་བྱེད་ཀྱི་རྒྱུས་མ་བཏང་བའི་གཟུགས་ཅན་ངོ་བོ་ཐ་དད་ཡིན་པའི་ཕྱིར། དེ་ཡང་དགེ་སློང་གི་སྡོམ་པ་དེ་ལུས་ངག་གི་སྤང་བྱ་བདུན་སྤོང་པའི་སྤོང་བ་གཟུགས་ཅན་བདུན་ལྡན་ཏེ་དགེ་སློང་གིས་ལུས་ངག་གི་སྤང་བྱ་མཐའ་དག་སྤོང་བར་ཁས་བླངས་ཤིང་། སྡོམ་པ་ཇི་ལྟར་ཁས་བླངས་པ་བཞིན་དུ་ཐོབ་དགོས་པའི་ཕྱིར། མཛོད་ལས། སྡོམ་པ་ཇི་ལྟར་ཁས་བླངས་བཞིན། །འཐོབ་ཀྱི་རྒྱུད་ལས་མ་ཡིན་ནོ། །ཞེས་དང་། འོད་ལྡན་ལས། སོ་སོ་ཐར་པའི་སྡོམ་པ་ནི། སྤོང་བ་བདུན་གྱི་བདག་ཉིད་ཅན་ཡིན་ཏེ། ལུས་ཀྱི་རྣམ་པ་གསུམ་དང་ངག་གི་བཞི། །ཞེས་བྱ་བར་ངེས་པའི་ཕྱིར་རོ། །དགེ་བསྙེན་དང་དགེ་ཚུལ་གྱི་སྡོམ་པ་སྤོང་བ་བཞི་ལྡན་ཡིན་ཏེ། ཕྲ་མ་ཚིག་རྩུབ་ངག་འཁྱལ་སྤོང་བར་ཁས་མ་བླངས་པའི་ཕྱིར། དེ་ལྟར་ཡང་། སོ་སོ་ཐར་ཅེས་བྱ་རྣམ་བརྒྱད། །རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །ཐ་དད་དེ་དག་འགལ་བ་མེད། །ཅེས་པའི་དོན་ལེགས་པར་བཤད་པ་ཡིན་ནོ། །གསུམ་པ་སོ་སོའི་རང་བཞིན་ལ། རང་དགེ་བསྙེན་གྱི་སྡོམ་པ་འགྲུབ་བྱེད་ཀྱི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་ཅིང་། དགེ་བསྙེན་གྱི་སྡོམ་པའི་མི་མཐུན་ཕྱོགས་སུ་གྱུར་པའི་སྤང་བྱ་ཇི་སྲིད་འཚོའི་བར་དུ་སྤོང་བར་ཁས་བླངས་པའི་ངེས་འབྱུང་གི་ཚུལ་ཁྲིམས། རང་བསྙེན་(༥༧བ)
གནས་ཀྱི་སྡོམ་པ་འགྲུབ་པར་བྱེད་པའི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་ཅིང་། བསྙེན་གནས་ཀྱི་སྡོམ་པའི་མི་མཐུན་ཕྱོགས་སུ་གྱུར་པའི་སྤང་བྱ་བརྒྱད་ཉིན་ཞག་ཕྲུགས་གཅིག་གི་བར་དུ་སྤོང་བར་ཁས་བླངས་པའི་ངེས་འབྱུང་གི་ཚུལ་ཁྲིམས། རང་དགེ་ཚུལ་གྱི་སྡོམ་པར་འགྲུབ་པར་བྱེད་པའི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་ཅིང་། དགེ་ཚུལ་གྱི་སྡོམ་པའི་མི་མཐུན་ཕྱོགས་སུ་གྱུར་པའི་སྤང་བྱ་བཅུ་ཇི་སྲིད་འཚོའི་བར་དུ་སྤོང་བར་ཁས་བླངས་པའི་ངེས་འབྱུང་གི་ཚུལ་ཁྲིམས། རང་དགེ་སློབ་མའི་སྡོམ་པར་འགྲུབ་པར་བྱེད་པའི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་ཅིང་། རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་གིས་བསྡུས་པའི་སྤང་བྱ་རྣམས་ལོ་གཉིས་ཀྱི་བར་དུ་སྤོང་བར་ཁས་བླངས་པའི་ངེས་འབྱུང་གི་ཚུལ་ཁྲིམས། རང་དགེ་སློང་གི་སྡོམ་པར་འགྲུབ་པར་བྱེད་པའི་རྒྱུ་ཕུན་སུམ་ཚོགས་པ་ལ་བརྟེན་ནས་ཐོབ་ཅིང་། ལུས་ཀྱི་སྤང་བྱ་མཐའ་དག་ཇི་སྲིད་འཚོའི་བར་དུ་སྤོང་བར་ཁས་བླངས་པའི་རིགས་སུ་གནས་པའི་ངེས་འབྱུང་གི་ཚུལ་ཁྲིམས། དབྱེ་ན་ཕ་མ་གཉིས་མིང་གི་རྣམ་གྲངས་དགེ་སློང་གི་སྡོམ་པ་དང་བསྙེན་རྫོགས་ཀྱི་སྡོམ་པ། སྒྲ་བཤད་ནི། སྤངས་རྟོགས་མཐར་ཐུག་པའི་མྱང་འདས་ལ་མྱུར་དུ་སྦྱོར་བར་བྱེད་པས་ན་བསྙེན་རྫོགས་ཞེས་བྱ་སྟེ། རྫོགས་པ་ནི་སྤངས་རྟོགས་མཐར་ཐུག་པའི་མྱང་འདས་ཡིན་ལ། བསྙེན་པ་ནི་དེ་དག་མྱུར་དུ་སྒྲུབ་པ་ལ་འཇུག་པའི་ཕྱིར། རྒྱ་ཆེར་འགྲེལ་ལས། རྫོགས་པ་ཞེས་བྱ་བ་ནི་གནོད་པ་ཐམས་ཅད་དང་བྲལ་བའི་དངོས་པོ་ལ་བྱ་སྟེ། མྱ་ངན་ལས་འདས་པ་ཡང་(༥༨ན)
དེ་ལྟ་བུའི་རང་བཞིན་ནོ། །བསྙེན་པ་ཞེས་བྱ་བའི་སྒྲ་ནི་ཉེ་བའི་ཚིག་ཡིན་ཏེ། དེའི་ཕྱིར་བསམ་པ་ཐམས་ཅད་ཀྱིས་མྱ་ངན་ལས་འདས་པ་དང་ཉེ་བར་གྱུར་པ་ནི་བསྙེན་པར་རྫོགས་པ་ཡིན་ནོ། །ཞེས་དང་། གཞི་ཊཱིཀ་ཏུ། རྫོགས་པ་ཞེས་བྱ་བ་ནི་དོན་ཐམས་ཅད་ཡང་དག་པར་འགྲུབ་པ་སྟེ། མྱ་ངན་ལས་འདས་པ་ཞེས་བྱ་བའི་ཐ་ཚིག་གོ །དེ་སྐད་དུ་ཡང་། དྲི་མ་ཐམས་ཅད་བཅོམ་བྱས་ཤིང་། །མྱ་ངན་འདས་པ་རྫོགས་པ་ཐོབ། །སྡུག་བསྔལ་ཐ་མར་བྱེད་པ་དང་། །ཐམས་ཅད་རྫོགས་པར་གྱུར་པ་ཡིན། །ཞེས་གསུངས་པ་ལྟར་རོ། །
སོ་ཐར་སྡོམ་པའི་ཁྱད་ཆོས་བཤད་པ།
རྩ་བའི་ས་བཅད་གསུམ་པ་ཁྱད་ཆོས་ལ། ལྡན་ཚུལ། ཐོབ་ཚུལ། གཏོང་ཚུལ། བསླབ་བྱ། ཕན་ཡོན་དང་ལྔ་ལས། དང་པོ་ནི། སྤྱིར་མི་མ་ཡིན་པ་དང་སྒྲ་མི་སྙན་པ་དང་ཟ་མ་དང་མ་ནིང་མ་ཡིན་པར་ལྡན། བྱེ་བྲག་དགེ་ཚུལ་སློང་དགེ་བསྙེན་ཕ་མ་བསྙེན་གནས་པ་བརྒྱད་ལ་ལྡན། ཐོབ་ཚུལ་ལ་རྒྱུ་གང་ལས་ཐོབ་ན་སྤྱིར་ཆོ་ག་ལ་བརྟེན་ནས་ཐོབ་པ་དང་། ཆོ་ག་ལ་བལྟོས་མེད་དུ་རང་གིས་ངང་གིས་ཐོབ་པ་གཉིས་ཀ་ཡང་ཡོད། བྱེ་བྲག་ཏུ་ཚིགས་སྔ་མ་དགེ་ཚུལ་དང་ཕྱི་མའི་བསྙེན་རྫོགས་སུ་བསྒྲུབ་པ་སོགས། གཞི་གང་ལས་ཐོབ་ན། ལས་ལམ་གྱི་སྦྱོར་དངོས་རྗེས་གསུམ་ཐམས་ཅད་ལས་ཐོབ། གཞི་སེམས་ཅན་ཡིན་མིན་གཉིས་ཀ་བཅས་པ་དང་རང་བཞིན་གྱི་ཁ་ན་མ་ཐོ་བ་གཉིས་ཀ་ལས་ཐོབ། ད་ལྟར་བའི་ཕུང་ཁམས་སྐྱེ་མཆེད་ལས་ཐོབ། ཡང་ན་སེམས་ཅན་ཐམས་ཅད་ལས་ཐོབ་པ་ཞེས་བྱ་སྟེ། སེམས་ཅན་ཐམས་ཅད་ལ་གནོད་འཚེའི་བསམ་པ་ལོག་(༥༨བ)
དགོས་པའི་ཕྱིར། གཏོང་ཚུལ་ལ། སྤྱིར་བཏང་དང་། རྩ་ལྟུང་སྡོམ་པའི་གཏོང་རྒྱུ་ཡིན་མིན་དཔྱད་པ་གཉིས། དང་པོ་ནི། བསླབ་པ་ཕུལ་བས་གཏོང་སྟེ། སྡོམ་པའི་མི་མཐུན་ཕྱོགས་ཁས་བླངས་པའི་ཕྱིར། ཤི་འཕོས་པས་གཏོང་སྟེ། ཁས་བླངས་པ་དུས་ལས་འདས་པའི་ཕྱིར། མཚན་གཉིས་ཅིག་ཅར་དུ་བྱུང་བ་དང་མཚན་ལན་གསུམ་དུ་གྱུར་པས་གཏོང་སྟེ། སྡོམ་པའི་རྟེན་ཉམས་པའི་ཕྱིར། དགེ་བའི་རྩ་བ་ཆད་པས་གཏོང་ཏེ། སྡོམ་པའི་རྟེན་གཞི་མེད་པའི་ཕྱིར། བསྙེན་གནས་ཀྱི་སྡོམ་པ་མཚན་མོའི་མཐའི་སྐད་ཅིག་མ་འདས་པས་གཏོང་སྟེ། ཁས་བླངས་པ་དུས་ལས་འདས་པའི་ཕྱིར། མདོ་སྡེ་པ་ན་རེ། རྩ་ལྟུང་འཆབ་བཅས་བྱུང་བས་ཀྱང་གཏོང་སྟེ། རྒྱུད་ངོ་ཚ་མེད་པ་དང་། ཁྲེལ་མེད་པ་ཤས་ཆེན་པོས་གང་བར་བྱས་པའི་ཕྱིར། གོས་དམར་བའི་སྡེ་པ་ན་རེ། ལུང་གི་དམ་ཆོས་ནུབ་པས་ཀྱང་གཏོང་སྟེ། དེའི་ཚེ་བསླབ་པའི་འཚམས་རྣམ་པར་བཞག་པ་མེད་པའི་ཕྱིར། ཐོགས་མེད་སྐུ་མཆེད་ནི། དེས་སྡོམ་པ་སྔར་ཡོད་མི་གཏོང་སྟེ། ལུང་གི་དམ་ཆོས་མེད་ཀྱང་རྟོགས་པའི་དམ་ཆོས་མ་ནུབ་པའི་ཕྱིར། འོན་ཀྱང་དེའི་ཚེ་སྡོམ་པ་སྔར་མེད་གསར་དུ་མི་སྐྱེ་སྟེ། སྡོམ་པ་འབོགས་པའི་ཆོ་གའི་རྣམ་གཞག་མེད་པའི་ཕྱིར། ཅེས་གསུངས། ཁ་ཆེ་བྱེ་བྲག་ཏུ་སྨྲ་བ་ན་རེ། རྩ་ལྟུང་འཆབ་བཅས་བྱུང་བའི་དགེ་སློང་དེ་ཚུལ་ཁྲིམས་དང་ལྡན་པ་དང་དེ་ཚུལ་ཁྲིམས་འཆལ་བ་གཉིས་ཀ་ཡིན་ཏེ། སྡོམ་པའི་རྫས་རང་རྒྱུད་ལ་ཚང་བར་ཡོད་པ་དང་། སེམས་རྒྱུད་ལ་རྩ་ལྟུང་འཆབ་བཅས་ཀྱིས་གོས་པར་(༥༩ན)
བྱས་པའི་ཕྱིར། དཔེར་ན་མི་འགའ་ཞིག་ལ་ནོར་ཡང་ཡོད། བུ་ལོན་ཡང་ཡོད་པ་བཞིན་ནོ། །དེ་ལྟར་ཡང་མཛོད་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །སོ་སོ་ཐར་པའི་འདུལ་བ་གཏོང་། ཁ་ཅིག་ལྟུང་བར་འགྱུར་ལས་སྨྲ། །གཞན་དག་དམ་ཆོས་ནུབ་པ་ལས། ཁ་ཆེ་རྣམས་ནི་བྱུང་བ་ལ། །བུ་ལོན་ནོར་བཞིན་གཉིས་སུ་འདོད། །ཅེས་གསུངས་པའི་ཕྱིར། གཞན་ཡང་བསྒྲུབ་བྱ་ལོ་ཉི་ཤུ་མ་ལོན་པ་ལོན་པར་འདུ་ཤེས་པས་བསྙེན་པར་རྫོགས། ཕྱིས་ཉི་ཤུ་མ་ལོན་པར་ངོ་ཤེས་པའི་ཚེ་མངལ་ཤོལ་གྱི་ཟླ་བས་ཁ་བསྐང་བས་ཉི་ཤུ་ཚང་ན་མི་གཏོང་ཡང་མ་ཚང་ན་གཏོང་། །
རྩ་ལྟུང་སྡོམ་པའི་གཏོང་རྒྱུ་ཡིན་མིན་ལ་དཔྱད་པ།
གཉིས་པ་རྩ་ལྟུང་སྡོམ་པའི་གཏོང་རྒྱུ་ཡིན་མིན་དཔྱད་པ་ལ། སེམས་ཙམ་པ་ཡན་ཆད་ཀྱི་ལུགས། མདོ་སྡེ་བའི་ལུགས། བྱེ་སྨྲའི་ལུགས་དང་གསུམ་གྱི་དང་པོ་ནི། དགེ་སློང་གིས་གཞི་བསམ་སྦྱོར་བ་མཐར་ཐུག་གིས་ཡན་ལག་ཚང་བའི་སྒོ་ནས་རྩ་བའི་ལྟུང་བ་སྤྱད་ན་ཕམ་པར་འགྱུར་ཞིང་། དེ་ལ་འཆབ་བཅས་འཆབ་མེད་གཉིས་པོ་གང་བྱུང་ཡང་སྣོད་ཆུས་བཤལ་བ་བཞིན་དུ་སྡོམ་པ་རྩ་བ་ནས་གཏོང་བར་འདོད་དེ། དེ་ཡང་ཕམ་པ་འཆབ་མེད་བྱུང་ན་ཕྱིས་བླང་དུ་རུང་སྟེ། རྩ་བའི་ལྟུང་བ་བྱུང་ཡང་རྒྱུད་ངོ་ཚ་མེད་པ་དང་ཁྲེལ་མེད་པ་ཤས་ཆེན་པོས་གང་བར་མ་བྱས་པའི་ཕྱིར། འཆབ་བཅས་བྱུང་ན་སྡོམ་པ་ཕྱིས་བླང་དུ་མི་རུང་སྟེ། རྒྱུད་ངོ་ཚ་མེད་པ་དང་ཁྲེལ་མེད་པ་ཤས་ཆེན་པོས་གང་བར་བྱས་པའི་ཕྱིར་དང་། ལུང་ལས། དེས་དེ་བྱས་མ་ཐག་ཏུ་དགེ་(༥༩བ)
སློང་དུ་མི་རུང་སོགས་ཀྱི་ལུང་འདྲེན། གཉིས་པ་མདོ་སྡེ་བའི་ལུགས་ལ། རྩ་བའི་ལྟུང་བ་ལ་འཆབ་བཅས་འཆབ་མེད་གཉིས་སུ་ཡོད་ཅིང་། དགེ་སློང་ལ་འཆབ་མེད་བྱུང་བའི་ཚེ་སྡོམ་པ་ཡང་མི་སྟོང་ལ་ཕམ་པ་ཡང་མ་བྱུང་སྟེ། ཕམ་པ་ལ་ངེས་པར་འཆབ་སེམས་ཡན་ལག་ཏུ་དགོས་པའི་ཕྱིར། ལུང་ལས་གལ་ཏེ་སེམས་ནི་གཅིག་གིས་ཀྱང་། །འཆབ་པ་མེད་པར་འཆགས་བྱེད་ན། །ཐ་མ་བྱུང་བར་གྱུར་ན་ཡང་། །དེ་ནི་ཕམ་པར་མི་འགྱུར་རོ། ཞེས་སོ། །དེས་ན་དགེ་སློང་ལ་རྩ་བའི་ལྟུང་བ་བྱུང་བའི་རྗེས་སུ་སྡོམ་པ་སྦྱིན་མི་རིགས་ཏེ། འཆབ་བཅས་བྱུང་ན་སྦྱིན་ཀྱང་མི་སྐྱེ། འཆབ་མེད་བྱུང་ན་སྦྱིན་མི་དགོས་པའི་ཕྱིར། འོ་ན། བསླབ་བྱིན་དགེ་སློང་མེད་པར་ཐལ། ཕམ་པ་བྱུང་བའི་དགེ་སློང་མེད་པའི་ཕྱིར་སྙམ་ན། རྩ་ལྟུང་འཆབ་མེད་བྱུང་བའི་དགེ་སློང་ལ་གསོལ་གཞིའི་ཆོ་གས་སྡོམ་པ་སྦྱིན་མི་དགོས་ཀྱང་། ཆད་པ་ལས་ཀྱི་བསླབ་པ་སྦྱིན་ནས་དགེ་བའི་ཕྱོགས་ལ་བརྩོན་པ་ལྷུར་ལེན་དང་། དགེ་འདུན་གྱི་བྱ་བ་གང་དགོས་མཐའ་དག་གཙོ་བོར་བསྒྲུབ་པར་བྱེད་པ་ལ་འདོད་དོ། །གསུམ་པ་བྱེ་སྨྲའི་ལུགས་ལ། །སྤྱིར་བསྟན་པ་དང་། དོགས་དཔྱོད་གཉིས་ཀྱི་དང་པོ་ནི། དགེ་སློང་གིས་གཞི་བསམ་སྦྱོར་བ་མཐར་ཐུག་གི་ཡན་ལག་ཚང་བའི་སྒོ་ནས་རྩ་བའི་ལྟུང་བ་སྤྱད་ན་ཕམ་པར་འགྱུར་ཞིང་། དེ་འཆབ་བཅས་འཆབ་མེད་གཉིས་གང་བྱུང་ཡང་སྡོམ་པ་མི་གཏོང་སྟེ་དགེ་སློང་གི་སྡོམ་པའི་རྫས་ཚང་བར་ཡོད་པའི་ཕྱིར། དེ་ཡང་ཕམ་པ་འཆབ་མེད་ཀྱིས་སྡོམ་པ་རྣམ་དག་ལས་ཉམས་པར་བྱེད་ཀྱི་དགོས་པ་བསྒྲུབ་ནུས་པ་ལས་ཉམས་པར་མི་བྱེད་དེ། དེ་བྱུང་བའི་དགེ་སློང་(༦༠ན)
ལ་གནས་སྐབས་སུ་གྲོགས་ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་ཏུ་གནས་ནས་ཆོས་དང་ཟང་ཟིང་ལོངས་སྤྱོད་པ་དང་། མཐར་ཐུག་ནི་དགོས་པ་ཚེ་འདིར་དགེ་བའི་བྱ་བ་ལ་བརྩོན་པ་བྱས་པ་ལ་བརྟེན་ནས་བྱང་ཆུབ་ཐོབ་ནུས་པའི་སྐལ་བ་ཡོད་པའི་ཕྱིར། རྩ་ལྟུང་འཆབ་བཅས་ཀྱིས་དགོས་པ་བསྒྲུབ་ནུས་པ་ལས་ཀྱང་ཉམས་ཏེ། དེ་ལ་གནས་སྐབས་མཐར་ཐུག་གི་དགོས་པ་དེ་གཉིས་བསྒྲུབ་ནུས་པའི་སྐལ་བ་མེད་པའི་ཕྱིར། ཞེས་རྒྱ་ཆེར་འགྲེལ་ལས། དགེ་སློང་ཕམ་པར་གྱུར་པ་ལ་ནི་སྡོམ་པ་ཡོད་དུ་ཟིན་ཀྱང་དེ་ལྟ་མོད་ཀྱི་དགོས་པ་མེད་པ་ཉིད་དུ་འགྱུར་ཏེ། ཚངས་པར་སྤྱོད་པ་རྣམས་དང་། ལྷན་ཅིག་གནས་པ་དང་ལོངས་སྤྱོད་པ་མེད་པའི་ཕྱིར་རོ། །སྡོམ་པ་ཡང་དག་པར་བླངས་པ་ནི་རྣམ་པར་གྲོལ་བ་ཐོབ་པའི་ཆེད་ཡིན་ལ། དེས་རྣམ་པར་གྲོལ་བ་ཐག་རིང་དུ་བྱས་པའི་ཕྱིར། དེས་ན་དེའི་སྡོམ་པ་ནི་མེད་པ་དང་འདྲའོ། །ཞེས་གསུངས། གཉིས་པ་དོགས་དཔྱོད་ལ། འདུལ་འཛིན་སྔ་རབས་པ་ཁ་ཅིག་སོ་ཐར་གྱི་སྡོམ་པ་ཀུན་གཏོང་ཡིན་ཏེ། དགེ་སློང་གིས་སྲོག་གཅོད་ཀྱི་ཕམ་པ་འཆབ་བཅས་སྤྱད་ཚེ་སྡོམ་པ་དགོས་པ་བསྒྲུབ་ནུས་ཐམས་ཅད་གཏོང་བའི་ཕྱིར་ཟེར། འདུལ་འཛིན་ཁ་ཅིག །སོ་ཐར་གྱི་སྡོམ་པ་གཏོང་ཚུལ་སོ་ཤོར་ཡིན་ཏེ། སྲོག་གཅོད་ཀྱི་ཕམ་པ་འཆབ་བཅས་ཙམ་བྱུང་བའི་དགེ་སློང་དེས་སྲོག་གཅོད་སྤོང་པའི་སྡོམ་པ་རྣམ་དག་དང་དགོས་པ་བསྒྲུབ་ནུས་ལས་ཉམས་ཀྱང་། མ་བྱིན་ལེན། མི་ཚངས་སྤྱོད། རྫུན་སྨྲ་སྤོང་བའི་སྡོམ་པ་ལས་མ་ཉམས་པའི་ཕྱིར་ཏེ། སྤང་(༦༠བ)
བྱ་ལྟུང་བ་བཞི་པོ་ཡང་རྫས་ཐ་དད་གཉེན་པོ་སྡོམ་པ་བཞི་པོ་ཡང་རྫས་སོ་སོ་བ་ཡིན་པའི་ཕྱིར་དང་། མཛོད་འགྲེལ་ལས། ཕྱོགས་གཅིག་བླངས་པས་ནི་ཐམས་ཅད་བླངས་པར་མི་འགྱུར་ལ། ཕྱོགས་གཅིག་བཏང་བས་ཐམས་ཅད་བཏང་བར་ཡང་མི་འགྱུར་རོ། །ཞེས་གསུངས་པའི་ཕྱིར་དང་། སྔ་མའི་བཞེད་པ་ལྟར་ན། ཕམ་པ་འཆབ་བཅས་བཞི་ག་བྱུང་བའི་དགེ་སློང་གཞི་མ་གྲུབ་པར་ཐལ་བ་སོགས་ཀྱི་སྐྱོན་བརྗོད་པར་མཛད། མཁས་པ་དམར་སྟོན་སོགས་སྤྱིར་སྡོམ་པའི་གཏོང་རྒྱུ་ལ་བལྟོས་ནས་ཀུན་གཏོང་ཡིན་ཏེ། བསླབ་པ་ཕུལ་བ་སོགས་ཀྱིས་ཐམས་ཅད་གཏོང་བའི་ཕྱིར། ཕམ་པ་སྡོམ་པའི་སོ་ཤོར་དང་ཀུན་གཏོང་གང་གི་སྒོ་ནས་ཀྱང་སྡོམ་པའི་གཏོང་རྒྱུ་མ་ཡིན་ཏེ། ཕམ་པ་བྱུང་བའི་དགེ་སློང་ལ་སྡོམ་པའི་རྫས་ཚང་བར་ཡོད་པའི་ཕྱིར། ཉམས་ཚུལ་ལ་བལྟོས་ན་ཀུན་གཏོང་ཡིན་ཏེ། སྲོག་གཅོད་ཀྱི་ཕམ་པ་འཆབ་བཅས་ཙམ་བྱུང་བའི་ཚེ། སྡོམ་པ་མཐའ་དག་དགོས་པ་བསྒྲུབ་ནུས་ལས་ཉམས་པའི་ཕྱིར་ཞེས་སོགས་དགག་བཞག་རྒྱ་ཆེར་མཛད་མོད། ལུང་རིགས་གཏེར་མཛོད་མཛད་པ་པོ་ཉིད་ཀྱི་བཞེད་པ་ནི་སྔ་མ་སྤྱིར་བསྟན་ལྟར་ཡིན་ལ། བཞི་པ་བསླབ་བྱ་ལ་སྤྱིའི་བསླབ་བྱ་དང་། སོ་སོའི་བསླབ་བྱ་གཉིས། དང་པོ་ནི། དགག་པའི་བསླབ་བྱ་ལྟུང་བ་སྡེ་ལྔ། བསྒྲུབ་པའི་བསླབ་བྱ་གསོ་སྦྱོང་དབྱར་གནས་ལ་སོགས་པ་ཡིན།
ཁྱིམ་པའི་ཕྱོགས་སུ་གཏོགས་པའི་སོ་ཐར་སྡོམ་པའི་བསླབ་བྱ་སོགས་བཤད་པ།
གཉིས་པ་སོ་སོར་བཤད་པ་ལ། ཁྱིམ་པའི་ཕྱོགས་སུ་གཏོགས་པའི་སོ་ཐར་སྡོམ་པའི་བསླབ་བྱ་དང་། རབ་བྱུང་གི་ཕྱོགས་སུ་གཏོགས་པའི་དེ་གཉིས། དང་པོ་ལ། དགེ་བསྙེན་དང་། བསྙེན་(༦༡ན)
གནས་ཀྱི་བསླབ་བྱ་གཉིས། དང་པོ་ལ། བྱེ་བྲག་ཏུ་སྨྲ་བའི་དང་། ཐེག་པ་ཆེན་པོའི་ལུགས་གཉིས། དང་པོ་ནི། དགེ་བསྙེན་གྱི་བསླབ་བྱ་བསྡུ་ན། སྐྱབས་གསུམ་འཛིན་པའི་དང་། ཡོངས་རྫོགས་ཀྱི་དགེ་བསྙེན་གྱི་བསླབ་བྱ་གཉིས་སུ་འདུས། དང་པོ་ནི། སྒྲུབ་པའི་སྒོ་ནས་དཀོན་ཅོག་གསུམ་ལ་ཡིད་ཆེས་ཀྱི་དད་པ་ལྡན་པས་སྐྱབས་སུ་འགྲོ་བ་དང་། དགག་པའི་སྒོ་ནས་ཕྱི་རོལ་པའི་ལྷ་དབང་ཕྱུག་སོགས་ལ་སྐྱབས་སུ་མི་འགྲོ། གྲོགས་མུ་སྟེགས་ཅན་དང་མི་འགྲོགས། སེམས་ཅན་ལ་གནོད་འཚེ་སྤོང་བར་བྱེད་པའོ། །གཉིས་པ་ནི། རྩ་བ་བཞི་དང་ཆང་དང་ལྔ་སྤོང་བར་བྱེད། དེ་ཡང་ལོག་གཡེམ་སྤོང་བ་ཡན་ལག་ཡིན་གྱི། མི་ཚངས་སྤྱོད་སྤོང་པ་མ་ཡིན་ཏེ། དགེ་བསྙེན་ནི་གཙོ་བོར་ཁྱིམ་པའི་ཕྱོགས་སུ་གཏོགས་པ་ཡིན་ལ། ཁྱིམ་པས་ལོག་གཡེམ་སྤོང་སླ་བ་ཡིན་གྱི་མི་ཚངས་སྤྱོད་སྤོང་དཀའ་བ་དང་། ལོག་གཡེམ་འཇིག་རྟེན་ན་སྨད་པའི་གནས་སུ་གྱུར་པ་ཡིན་པ་དང་། འཕགས་པའི་གང་ཟག་གིས་དགེ་བསྙེན་གྱི་བསླབ་བྱ་དང་འགལ་བའི་བྱ་བ་མི་བྱེད་ཅིང་། འཕགས་པས་ལོག་གཡེམ་མི་བྱེད་པ་ཡིན་གྱི། ཚངས་སྤྱོད་ལ་གནས་པའི་ངེས་པ་མེད་པའི་ཕྱིར། མཛོད་ལས། ལོག་གཡེམ་ཤིན་ཏུ་སྨད་ཕྱིར་དང་། །སླ་ཕྱིར་མི་བྱེད་ཐོབ་ཕྱིར་རོ། །ཞེས་གསུངས་པའི་ཕྱིར། འོ་ན་ངག་གི་མི་དགེ་བ་བཞིའི་ནང་ནས། རྫུན་སྤོང་བ་ཡན་ལག་ཏུ་འཇོག་ལྷག་མ་མི་འཇོག་པའི་རྒྱུ་མཚན་ཅི་ཡིན་ཞེ་ན། དེའི་རྒྱུ་མཚན་ཡོད་དེ། བསླབ་པ་གཞན་ལས་འདས་ཀྱང་མ་འདས་སོ་ཞེས་རྫུན་སྨྲ་བ་སྤོང་(༦༡བ)
བའི་ཆེད་ཡིན་པའི་ཕྱིར། མཛོད་ལས། བསླབ་པ་ཐམས་ཅད་འདས་གྱུར་ན། །བརྫུན་དུ་ཐལ་བར་འགྱུར་བའི་ཕྱིར། ཞེས་སོ། །བསླབ་པ་ལྷག་མ་རྣམས་རྫོགས་པར་བྱེད་པའི་ཡན་ལག་ཏུ་མྱོས་འགྱུར་སྤོང་དགོས་པ་ཡིན་ཏེ། མྱོས་འགྱུར་བཏུངས་བ་ན་དྲན་པ་ཉམས་ནས་སེམས་བག་མེད་པར་འགྱུར་ཏེ་ཉེས་པ་གཞན་ལ་སྦྱོར་བར་བྱེད་པའི་ཕྱིར། མཛོད་ལས། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་བསྲུང་ཕྱིར་རོ། །ཞེས་སོ། །གཉིས་པ་ཐེག་པ་ཆེན་པོའི་ལུགས་ལ། ཚངས་སྤྱོད་ལ་ཉེར་གནས་དང་། གོ་མིའི་དགེ་བསྙེན་གྱི་བསླབ་བྱ་གཉིས། དང་པོ་ནི། ཁྱིམ་པའི་རྟགས་ཆ་ལུགས་དང་ལྡན་པའི་སྒོ་ནས་མི་ཚངས་སྤྱོད་གཞི་དང་བཅས་པ་སྤོང་བ་ལྟ་བུའོ། །གཉིས་པ་ནི། ཁྱིམ་པའི་རྟགས་ཆ་ལུགས་དང་ལྡན་པའི་སྒོ་ནས་བསྙེན་གནས་ཡན་ལག་བརྒྱད་པའི་བསླབ་བྱ་ལ་ཇི་སྲིད་འཚོའི་བར་དུ་སློབ་པ་ལྟ་བུའོ། །དེ་ལྟར་ཡང་ཆོ་འཕྲུལ་བསྟན་པའི་མདོ་ལས། རབ་བྱུང་ཡོན་ཏན་དུ་མ་ལྡན་པ་ཞེས། །དེ་བཞིན་གཤེགས་པ་རྣམས་ཀྱིས་གསུང་གྱུར་མོད། །དེ་ལྟར་ལགས་ཀྱང་སྙིང་རྗེར་གྱུར་པས་ན། །འགྲོ་ལ་ཕན་ཕྱིར་བདག་གིས་རྒྱལ་སྲིད་བསྒྲུབས། །ཇི་སྲིད་འཚོའི་བར་བདག་ནི་ཚངས་སྤྱོད་ཅིང་། །གསོ་སྦྱོང་ཡན་ལག་བརྒྱད་པའང་བླང་བར་བགྱི། ཞེས་གསུངས། དེ་ཡང་ཚིག་རྐང་དང་པོ་ལྔས་ཚངས་སྤྱོད་ལ་ཉེར་གནས་ཀྱི་དགེ་བསྙེན་དང་། དང་པོ་བཞི་དང་། དྲུག་པས་གོ་མིའི་དགེ་བསྙེན་བསྟན་པ་ཡིན་ནོ། །གཉིས་པ་བསྙེན་གནས་ཀྱི་བསླབ་བྱ་ནི། རྩ་བ་བཞི་ཆང་དང་ཕྱི་དྲོའི་ཁ་ཟས་གར་སོགས་འཕྲེང་སོགས་(༦༢ན)
མལ་ཆེ་མཐོ་དང་བརྒྱད་སྤོང་པ་ལ་དགོས་ཏེ། བཤེས་སྤྲིང་ལས། འཚེ་དང་ཆོམ་རྐུན་འཁྲིག་པ་རྫུན་དང་ནི། །ཆང་དང་དུས་མིན་ཟས་ལ་ཆགས་པ་དང་། །མལ་སྟན་མཐོ་ལ་དགའ་དང་གླུ་དག་དང་། །གར་དང་འཕྲེང་བའི་ཁྱད་པར་རྣམས་སྤོངས་ཤིང་། །ཞེས་པ་ལྟར་རོ། །དེ་དག་ཀྱང་བསྡུ་ན། ཚུལ་ཁྲིམས་ཀྱི། བག་ཡོད་ཀྱི། བརྟུལ་ཞུགས་ཀྱི་ཡན་ལག་དང་གསུམ་དུ་འདུས། རྩ་བ་བཞི་སྤོང་བ་ནི་དང་པོ་ཡིན་ཏེ། རང་བཞིན་གྱི་ཁ་ན་མ་ཐོ་བ་སྤོང་བྱེད་ཡིན་པའི་ཕྱིར། ཆང་སྤོང་བ་ནི་གཉིས་པ་ཡིན་ཏེ། ཆང་བཏུངས་བ་ན་དྲན་པ་ཉམས་ནས་སེམས་བག་མེད་ལ་སྦྱོར་བའི་ཕྱིར། ཕྱི་དྲོའི་ཁ་ཟས་སོགས་གསུམ་སྤོང་པ་གསུམ་པ་ཡིན་ཏེ། ཕྱི་དྲོའི་ཁ་ཟས་སོགས་བསྟེན་ན་སེམས་རྒྱུད་ལ་དྲེགས་པ་སྐྱེས་ནས་ཚུལ་ཁྲིམས་འཆལ་བ་ལ་སྦྱོར་བའི་ཕྱིར། མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །གཞི་གཅིག་དེ་བཞིན་གསུམ་རིམ་བཞིན། །དེ་ཡིས་དྲན་ཉམས་དྲེགས་པར་འགྱུར། །ཞེས་པ་ལྟར་རོ། །གཉིས་པ་རབ་བྱུང་གི་ཕྱོགས་སུ་གཏོགས་པའི་སོ་ཐར་གྱི་བསླབ་བྱ་ལ། དགེ་ཚུལ། དགེ་སློང་གི་བསླབ་བྱ་དང་གཉིས། དང་པོ་ནི། རྩ་བ་བཞི་ཆང་ཕྱི་དྲོའི་ཁ་ཟས་གར་སོགས་འཕྲེང་སོགས་མལ་ཆེ་མཐོ་གསེར་དངུལ་ལེན་པ་སྤོང་བའི་བསླབ་བྱ་ལ་སློབ་དགོས། གར་སོགས་ནི་ཆགས་སེམས་ཀྱིས་ཀུན་ནས་བསླང་སྟེ། གར་དང་གླུ་དང་རོལ་མོའི་སྒྲ་བྱེད་པའོ། །འཕྲེང་སོགས་ནི་ཆགས་སེམས་ཀྱིས་ཀུན་ནས་བསླང་སྟེ་ལུས་ལ་འཕྲེང་བ་དང་རྒྱན་(༦༢བ)
དང་སྤོས་བྱུག་པ་ལ་སོགས་པའོ། །མལ་ཆེ་བ་ནི་གསེར་དངུལ་གྱི་ཁྲི། མཐོ་བ་ནི་ཁྲུ་གང་ལས་ལྷག་པའི་ཁྲིའོ། །དེ་ལ་བསྙེན་གནས་ཀྱི་སྐབས་སུ་གར་སོགས་འཕྲེང་སོགས་གཅིག་ཏུ་འདྲེན་པའི་རྒྱུ་མཚན་ཡོད་དེ། བསྙེན་གནས་ནི་ཁྱིམ་པའི་ཕྱོགས་སུ་གཏོགས་པ་ཡིན་ལ། ཁྱིམ་པ་ལ་བསླབ་བྱ་གྲངས་མངས་ན་སློབ་པར་མི་ནུས་སྙམ་པའི་བསམ་ངོའི་ལོག་རྟོག་བཟློག་པའི་ཆེད་ཡིན་པའི་ཕྱིར། དགེ་ཚུལ་གྱི་སྐབས་སུ་སོ་སོར་འདྲེན་པའི་རྒྱུ་མཚན་ཡོད་དེ། རབ་ཏུ་བྱུང་བ་ལ་གླུ་གར་ལ་སོགས་པའི་ཕྱར་གཡེང་ནི་ཚུལ་དང་མི་མཐུན་པ་ཡིན་པས་ངེས་པར་དགག་དགོས་པར་ཤེས་པའི་ཆེད་ཡིན་པའི་ཕྱིར། བསྙེན་གནས་ཀྱི་སྐབས་སུ་གསེར་དངུལ་སྤོང་བ་ཡན་ལག་ཏུ་མི་འཇོག །འདིར་ཡན་ལག་ཏུ་འཇོག་པའི་རྒྱུ་མཚན་ཡོད་དེ། གསེར་དངུལ་ལེན་པ་གསོག་འཇོག་གི་རྩ་བ་ཡིན་ལ། ཁྱིམ་པ་ལ་གསོག་འཇོག་ཚུལ་དང་མི་མཐུན་པ་མིན་ཞིང་རབ་ཏུ་བྱུང་བ་ལ་གསོག་འཇོག་ཚུལ་དང་མི་མཐུན་པ་ཡིན་པའི་ཕྱིར། དེ་ལྟར་ཡང་། སུམ་བརྒྱ་པ་ལས། གང་ཞིག་སྲོག་གཅོད་གཞན་གྱི་ནོར་འཕྲོག་དང་། །མི་ཚངས་སྤྱོད་རྫུན་བཅོས་པའི་ཆང་ལ་སོགས། །གར་སོགས་འཕྲེང་སོགས་མལ་ཆེན་མཐོ་བ་དང་། །ཕྱི་དྲོའི་ཁ་ཟས་གསེར་དངུལ་སྤོང་བ་སྟེ། །ཞེས་པ་ལྟར་རོ། །
ཞར་ལ་བར་མ་རབ་བྱུང་གི་བསླབ་བྱ་བཤད་པ།
ཞར་ལ་བར་མ་རབ་བྱུང་གི་བསླབ་བྱ་ནི། དཀོན་ཅོག་གསུམ་ལ་སྐྱབས་སུ་འགྲོ་བ། མཁན་སློབ་ལ་གུས་པར་བྱེད་པ། ཁྱིམ་པའི་རྟགས་སྤོང་བ། རབ་ཏུ་བྱུང་བའི་རྟགས་ཡང་དག་པར་ལེན་པ་བཞི་ལ་གཙོ་བོར་སློབ་དགོས་ཏེ། བར་མ་(༦༣ན)
རབ་བྱུང་གི་སྐབས་སུ་བཞི་པོ་འདི་ལ་སློབ་པར་ཁས་བླངས་པའི་ཕྱིར། གཉིས་པ་དགེ་སློང་ཕའི་བསླབ་བྱ་ལ། ཕམ་པ་བཞི་ལྷག་མ་བཅུ་གསུམ་མ་ངེས་པ་གཉིས་སྤང་ལྟུང་སུམ་ཅུ་ལྟུང་བྱེད་འབའ་ཞིག་པ་དགུ་བཅུ་སོ་སོར་བཤགས་པ་བྱ་བ་བཞི་ཉེས་བྱས་བརྒྱ་དང་བཅུ་གཉིས་ཏེ་ཁྲིམས་ཉིས་བརྒྱ་དང་ལྔ་བཅུ་རྩ་གསུམ་ལ་སློབ་བོ། །ལྔ་པ་ཕན་ཡོན་ལ། སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས། དང་པོ་ནི། གོང་དུ་བརྗོད་བྱ་དོན་གྱི་འདུལ་བའི་ཕན་ཡོན་བཤད་པ་རྣམས་སོ། །གཉིས་པ་ནི་འདུལ་བ་ལུང་ལས། ཕན་ཡོན་བཅུ་གསུངས་ཤིང་། དེ་དག་གི་སྡོམས་ནི། འགྱོད་མེད་གཉིས་དང་སྙན་བདེ་བསྲུང་། །འཇིགས་མེད་ཕན་གཉིས་འགྲུབ་གཉིས་བཅུ། །ཞེས་པ་ལྟར་ངེས་འབྱུང་གི་ཚུལ་ཁྲིམས་རྣམ་དག་དང་ལྡན་པ་ལ་ཕན་ཡོན་བཅུ་འབྱུང་སྟེ། འགྱོད་པ་མེད་པར་མཆོག་ཏུ་དགའ་བ་སྔོན་དུ་འགྲོ་བའི་ཆོས་ཐོབ་པ། འགྱོད་པ་མེད་པར་འཆི་བའི་དུས་བྱེད་པ། སྙན་པའི་གྲགས་པས་ཕྱོགས་བཅུ་ཀུན་ཁྱབ་པ། བདེ་བར་གཉིད་ལོག་ཅིང་བདེ་བར་སད་པར་འགྱུར་བ། གཉིད་ལོག་པ་ན་དཀར་ཕྱོགས་ལ་དགའ་བའི་ལྷ་རྣམས་ཀྱིས་བསྲུང་བར་འགྱུར་བ། གནོད་བྱེད་ཀྱི་དགྲ་བོ་དང་གནོད་སྦྱིན་ལ་སོགས་པ་ལ་ཡ་ང་བ་དང་བག་ཚ་བའི་འཇིགས་པ་མེད་པ། དགྲ་བོ་ལ་སོགས་པས་ཀྱང་ཟས་གོས་ཀྱི་ཕན་འདོགས་པར་བྱེད་པ། གནོད་སྦྱིན་ལ་སོགས་པ་མི་མ་ཡིན་པ་རྣམས་ཀྱིས་ཀྱང་མཐུན་རྐྱེན་སྒྲུབ་ཅིང་ཕན་འདོགས་པར་བྱེད་པ། ཆོས་གོས་ལྷུང་བཟེད་ལ་སོགས་པ་འཚོ་བའི་ཡོ་བྱད་ཚེགས་ཆུང་(༦༣བ)
ངུས་འགྲུབ་པ། གནས་སྐབས་དང་མཐར་ཐུག་གི་སྨོན་ལམ་འགྲུབ་པ་དང་བཅུ། ཞེས་གསུངས་པའི་དོན་གལ་ཆེ་བའི་རགས་རིམ་རྣམས་བཀོད་པ་ཡིན་ནོ། །གོང་གི་སྡོམ་པ་གཏོང་རྒྱུ་དང་ཕྱོགས་མཐུན་པ་འདུལ་བ་རྒྱ་མཚོའི་སྙིང་པོ་ལས། སྡོམ་པ་གཏོང་བའི་རྒྱུ་ལ་གཉིས། །བསླབ་པ་ཕུལ་དང་ཤི་འཕོས་དང་། །མཚན་གཉིས་བྱུང་དང་ལན་གསུམ་འགྱུར། །དགེ་རྩ་ཆད་རྣམས་ཐུན་མོང་ངོ་། །ཉི་ཤུ་མ་ལོན་དེར་ཤེས་དང་། །བསྟན་ཕྱིར་ཁས་བླངས་ཉིན་ཞག་འདས། །རིམ་བཞིན་དགེ་སློང་དགེ་སློབ་མ། །བསྙེན་གནས་རྣམས་ཀྱི་ཐུན་མོང་མིན། །རྩ་བའི་ལྟུང་བ་བྱུང་བ་དང་། །དམ་པའི་ཆོས་ནི་ནུབ་པ་ལས། །སྡོམ་པ་གཏོང་ཞེས་འདོད་པའང་ཡོད། ཁ་ཆེ་བྱེ་བྲག་སྨྲ་བ་རྣམས། །སྡོམ་ལྡན་རྩ་ལྟུང་བྱུང་བ་ལ། །བུ་ལོན་ནོར་ཅན་བཞིན་དུ་འདོད། །ཅེས་གསུང་། དེ་ཡང་སོ་ཐར་གྱི་ཚིགས་གསུམ་པོ་འདི་གང་ཟག་གཅིག་གི་རྒྱུད་ལ་ལྡན་ཚུལ་དང་སོ་ཐར་སྡོམ་ལྡན་གྱིས། བྱང་སེམས་དང་སྔགས་ཀྱི་སྡོམ་པ་བླངས་ན་གང་ཟག་གཅིག་གི་རྒྱུད་ལ་ལྡན་ཚུལ་བཞེད་པའི་རྣམ་གྲངས་ཐ་དད་པ་མང་ཡང་། རྗེ་བཙུན་ས་སྐྱ་པ་ཡབ་སྲས་གནས་འགྱུར་ངོ་བོ་གཅིག་ཏུ་བཞེད་ཅིང་། དེ་ལ་ཡང་མཁས་པ་ཆེན་པོ་རྣམས་དགོངས་པ་འགྲེལ་ཚུལ་མི་འདྲ་ཙམ་ཡོད་པའི་ཀུན་མཁྱེན་གོ་རམས་པ་རྗེས་འབྲང་འགས་སྐྱེས་བུ་དཔའ་རྩལ་ཅན་ཞིག་གིས་གོ་མཚོན་ཐོགས་པ་ལྟར། དགེ་སློང་གི་སྡོམ་ལྡན་དེས་བྱང་སེམས་དང་སྔགས་སྡོམ་བླངས་ན་རྫས་གོང་འཕེལ་དུ་འགྲོ་ཚུལ་དང་སྡོམ་པ་གོང་མ་གཉིས་ཀྱིས་ཟིན་པའི་དགེ་སློང་གི་སྡོམ་ལྡན་དེ་ལ་ཕམ་པ་(༦༤ན)
འཆབ་བཅས་བྱུང་བ་གསོ་མི་རུང་བ་མ་ཡིན་ཏེ། དེ་ལྟར་དབང་བཞི་གཞན་ལས་ནོས་པའམ་རང་གིས་བདག་འཇུག་བླངས་པའི་ཚེ་དབང་གསུམ་པའི་དུས་ཡེ་བརྒྱ་ལ་བརྟེན་ནས་ཀྱང་དབབ་ལྡོག་གི་བདེ་བ་ཉམས་སུ་མྱོང་བས་ཀྱང་སྡོམ་པ་འཇིག་པ་སོགས་ཀྱི་སྒྲུབ་བྱེད་མང་དུ་མཛད་པས་མཚོན། གོང་མའི་གསུང་རབ་ལ་གཅེས་པར་འཛིན་པ་ཕལ་ཆེར་དགོངས་པ་མཐུན། པཎ་ཆེན་ཤཱཀྱ་མཆོག་ལྡན་གྱི་བཞེད་པ་རྗེ་བཙུན་རིན་པོ་ཆེས་གནས་འགྱུར་དུ་བཤད། ཆོས་ཀྱི་རྗེ་ས་སྐྱ་པཎྜི་ཏས་ངོ་བོ་གཅིག་ཏུ་བཤད་པ་བསྡོམས་པས་གནས་འགྱུར་ངོ་བོ་གཅིག་ཏུ་གྲུབ་པ་ཡིན། དེ་ཡང་རྗེ་བཙུན་གྱིས་གནས་འགྱུར་བཞེད་ཀྱང་དེ་གསུམ་གྱི་གཞི་མཐུན་མི་བཞེད་ཚུལ་གཏན་ཚིགས། ལུང་། དཔེ་གསུམ་གྱིས་བསྒྲུབ་པར་མཛད། དེ་ཡང་གནས་འགྱུར་ཚུལ་ནི། སྤོང་སེམས་སྔ་མ་རྣམས་ཕྱི་མ་དང་དགེ་བའི་ཆོས་སྡུད། སེམས་ཅན་དོན་བྱེད་རྣམས་སྔགས་ཀྱི་ཐེག་པར་འཐོབ་པ་དེར་གནས་འགྱུར་བ་ཡིན། ངོ་བོ་གཅིག་ཚུལ་ནི། སྡོམ་པ་སུམ་ལྡན་གྱི་རྒྱུད་ཀྱི་གཞན་གནོད་སྤོང་བའི་སེམས་པ་དེ་སོ་ཐར་གྱི་ངོ་བོ། གཞན་སེམས་ཅན་ཐམས་ཅད་ལ་ཕན་པ་བསྒྲུབ་པ་བྱང་སེམས་ཀྱི་ངོ་བོ། གསང་སྔགས་ཀྱི་དམ་ཚིག་མཐའ་དག་ལ་བསླབ་པ་སྔགས་སྡོམ་གྱི་ངོ་བོ། དེ་གསུམ་པོ་དངོས་པོ་གཅིག་པ་ཡིན་པས་སོ། །ཞེས་བཞེད། འཇམ་དབྱངས་ཆོས་རྗེ་སུམ་ལྡན་གྱི་རྒྱུད་ཀྱི་སོ་ཐར་སྡོམ་པ་ཤི་འཕོས་པའི་ཚེ་ལྡོག་ཆ་ཙམ་གཏོང་ཡང་རྫས་ཀྱི་ངོ་བོ་མི་གཏོང་བར་བཤད། དཀའ་འགྲེལ་གནད་ཀྱི་སྙིང་པོ་(༦༤བ)
གསལ་བྱེད་ལས། ཆོ་ག་ཉན་ཐོས་ལུགས་བཞིན་བྱས་པའི་ཐེག་ཆེན་དགེ་སློང་གི་སྡོམ་པ་ཆོས་ཅན། ཁྱོད་ཤི་འཕོས་ཀྱང་མི་གཏོང་བར་ཐལ། ཁྱོད་བྱང་ཆུབ་སེམས་དཔའི་སྡོམ་པ་ཡིན་པ་གང་ཞིག །བྱང་ཆུབ་སེམས་དཔའི་སྡོམ་པ་ནི། །སེམས་ལས་སྐྱེ་ཕྱིར་གཟུགས་ཅན་མིན། །དེས་ན་ཇི་སྲིད་སེམས་མ་ཉམས། །དེ་ཡི་བར་དུ་སྡོམ་པ་ཡོད། །ཅེས་གོང་དུ་བཤད་ཟིན་པའི་ཕྱིར་སྙམ་ན། དེ་ལྟ་བུའི་དགེ་སློང་ལ་སོགས་པའི་སྡོམ་པ་ཆོས་ཅན། ཁྱོད་ཐེག་ཆེན་སོ་སོ་ཐར་པའི་སྡོམ་པ་ཡིན་ཀྱང་། ཁྱོད་ཀྱི་ལྡོག་པ་དེ་མིང་གི་ཐ་སྙད་ཤི་བའི་ཚེ་ན་གཏོང་སྟེ་ཁྱོད་ཇི་སྲིད་འཚོའི་མཐའ་ཅན་དུ་བླངས་པའི་སྡོམ་པ་ཡིན་པའི་ཕྱིར། དེ་ཆོས་ཅན། ཁྱོད་ཀྱི་ཀུན་སློང་བྱང་ཆུབ་སེམས་དཔའི་སྡོམ་པ་ཤི་ཡང་འབྱུང་སྟེ། བྱང་ཆུབ་སྙིང་པོའི་མཐའ་ཅན་ཡིན་པའི་ཕྱིར། ཁྱོད་ཀྱི་འབྲས་བུ་ཡང་ཤི་འཕོས་པས་མི་གཏོང་སྟེ། རང་འབྲས་མངོན་མཐོ་དང་ངེས་ལེགས་བྱང་ཆུབ་བར་དུ་འབྱུང་བའི་ཕྱིར། ཞེས་གསུང་བ་ནི་གནད་ཟབ་པ་ཞིག་འདུག །མཁན་ཆེན་ངག་དབང་ཆོས་གྲགས་ཀྱི་འདུལ་བའི་ཊཱིཀྐར། དེང་སང་བསླབ་པ་ཉམས་པ་གསོ་བ་ལ་མཁན་སློབ་ཀྱི་སྤྱན་སྔར་སྡོམ་པ་འབོགས་ཆོག་ཞུ་བ་ནི་ཐེག་པ་ཆེན་པོའི་རྒྱས་བཀབ་བ་ཡིན་ཏེ། བསླབ་པ་སྔ་མ་དེ་ཞུ་བའི་དུས་སུ་ཐེག་ཆེན་གྱི་བསམ་པ་གསལ་བཏབ་སྟེ། ཆོ་ག་ཉན་ཐོས་ཀྱི་ལུགས་བཞིན་བྱས་པ་ལས་སྡོམ་པ་ཕོག་པ་དེ་བདག་ཉིད་ཆེན་པོ་ས་པཎ་གྱིས། དེས་ན་ད་ལྟའི་ཆོ་ག་ནི། །ཞེས་སོགས་གསུངས་པ་ལྟར་ཐེག་ཆེན་སོ་ཐར་སྡོམ་པའི་ངོ་བོར་སྐྱེ་ལ་ཐེག་ཆེན་གྱི་སྡོམ་པ་དེ་ནི་ཉན་ཐོས་པའི་ལུགས་དང་མི་འདྲ་(༦༥ན)
བར་ཐེག་པ་ཆེན་པོའི་ལུགས་འདིར་ཤེས་པ་ཡིན་གྱི། གཟུགས་ཅན་མ་ཡིན་པས་སླར་ཡང་སྡོམ་པ་བླངས་པས་སྐྱེ་བ་ནི་བདག་ཉིད་ཆེན་པོ་ས་པཎ་ནས་བཟུང་ས་སྐྱ་པའི་འདུལ་འཛིན་མཐའ་དག་ཕྱག་ལེན་ལ་མཛད་པ་ཡིན་ནོ། །དོན་འདི་དང་མཐུན་པར་ས་བཟང་མ་ཏི་པཎ་ཆེན་གྱི་འདུལ་བའི་ལས་ཆོག་ལས། དེ་ལྟར་སྦྱོར་བ་དང་། དངོས་གཞི་གཉིས་ཀྱིས་ཁྱེད་ཀྱི་རྒྱུད་ལ་བསྙེན་པར་རྫོགས་པའི་སྡོམ་པ་ཁྱད་པར་ཅན་སྤང་བྱའི་རྒྱུན་སྡོམ་པར་བྱེད་པ་ཆུ་ལོན་ལྟ་བུ། རྣམ་པར་རིག་བྱེད་དང་རིག་བྱེད་མ་ཡིན་པའི་གཟུགས་སམ་སེམས་པ་དགེ་བ་ཁྱད་པར་ཅན་ས་བོན་དང་བཅས་པ་དེ་ཐོབ་ཅིང་མངོན་དུ་གྱུར་བ་ཡིན་པས་དགའ་བ་སྒོམས་ཤིག །ཅེས་གསུངས་པ་ཡིན་ཏེ། གཟུགས་སམ་ཞེས་པ་འདུལ་བ་རང་རྐང་གི་ལུགས་དང་། སེམས་དཔའ་དགེ་བ་ཁྱད་པར་ཅན་ཐོབ་པ་ཞེས་པ་གསུངས་པ་ནི་ཐེག་ཆེན་ལུགས་ཀྱི་དབང་དུ་བྱས་པ་ཡིན་ནོ། །འདུལ་བ་རང་རྐང་ལ་སྡོམ་པ་གཟུགས་ཅན་དུ་འདོད་པས་སྡོམ་པ་ལན་ཅིག་བླངས་པ་སྟེ་རྩ་ལྟུང་བྱུང་བས་ཀྱང་མི་གཏོང་བ་ཡོད་ཅིང་། དེའི་སྡོམ་རོ་རྙིང་པ་དེས་སླར་སྡོམ་པ་རྣམ་དག་བླངས་ཀྱང་སྐྱེ་བའི་གེགས་བྱེད་པས་ཕྱག་ལེན་གུ་དོག་ལ། གལ་ཏེ་མཁན་སློབ་ཀྱི་ཆོ་ག་ལས་སླར་སྡོམ་པ་ལེན་གོང་དུ་བསླབ་པ་འབུལ་ཆོག་བྱས་ན་སྡོམ་པ་རྙིང་པས་རྒྱུད་མ་བཀག་པས་ལེན་དུ་རུང་བ་ཙམ་ཡིན་ཏེ། །ཐེག་ཆེན་གྱི་བསམ་པས་ཟིན་པ་ལ་སྡོམ་པ་རྙིང་པས་རྒྱུད་བཀག་མ་བཀག་སོགས་ཀྱི་རྣམ་གཞག་བརྩི་མི་དགོས་པས་གུ་ཡངས་ཤིང་གདུལ་བྱ་ལ་ཕན་ཆེ་བ་ནི་ཐེག་པ་(༦༣ན)
ཆེ་ཆུང་གི་ཁྱད་པར་ཡིན་ནོ། །གནད་འདི་ནི་ཁོ་བོའི་མཁན་པོ་ཐམས་ཅད་མཁྱེན་པ་དོན་གྱི་སླད་དུ་མཚན་ནས་སྨོས་ཏེ་འཇམ་དབྱངས་དབང་ཕྱུག་དཔལ་བཟང་གི་གསུང་རྒྱུན་ལས་བྱུང་བ་འདིར་བྲིས་པའོ། །ཞེས་དང་། རིགས་འཛིན་སྡོམ་པའི་སྐབས་སུ་དབང་བཞི་བླངས་པ་དེ་ཡི་རྟེན་གྱི་གང་ཟག་སློབ་མ་དེ་སྡོམ་པ་སུམ་ལྡན་དུ་གྱུར་པ་ཡིན་ཏེ། སྔར་སྡོམ་པ་འོག་མ་གཉིས་སྔོན་དུ་སོང་ན་དབང་བསྐུར་གྱི་ཚེ་སྔགས་སྡོམ་དུ་གནས་འགྱུར་ནས་སྔགས་སྡོམ་གྱི་ངོ་བོར་གྱུར་པའི་སྡོམ་གསུམ་ངོ་བོ་གཅིག་ཏུ་ལྡན་པ་དང་། སྔར་སྔོན་དུ་མ་སོང་ན་དབང་གི་སྟ་གོན་གྱི་སྐབས་སུ་རྒྱུན་བཤགས་ཀྱི་རྗེས་ཟློས་ལན་གསུམ་བྱས་པའི་ཚེ་ཐུན་མོང་མ་ཡིན་པའི་སྐྱབས་འགྲོའི་ལྡོག་པ་ནས་བསྟན་པའི་སོ་ཐར་གྱི་སྡོམ་པ་དང་། སྨོན་འཇུག་གི་སེམས་བསྐྱེད་ཀྱི་ལྡོག་པ་ནས་བྱང་སེམས་ཀྱི་སྡོམ་པ་དང་། གནས་གསུམ་བྱིན་རླབས་ནས་བཟུང་སྟེ་དབང་བཞི་པའི་བར་རྣམས་སུ་སྔགས་ཀྱི་ལྡོག་པ་ནས་བསྟན་པའི་སྔགས་སྡོམ་ཐོབ་པར་འགྱུར་བའི་ཕྱིར། དེ་སྐད་དུ་རྗེ་བཙུན་རིན་པོ་ཆེའི་རྩ་ལྟུང་འཁྲུལ་སྤོང་ལས། འོ་ན་སྔར་སོ་སོ་ཐར་པའི་སྡོམ་པ་དགེ་སློང་གི་བར་ཐོབ་པ་ཞིག་གིས་ཕྱིས་བྱང་ཆུབ་ཏུ་སེམས་བསྐྱེད་ནས་སླར་ཡང་དབང་ནོས་པར་གྱུར་ན་འདི་ལ་སྡོམ་པ་ཇི་ལྟར་ལྡན་ཞེ་ན། དགེ་སློང་གིས་སེམས་བསྐྱེད་པའི་ཚེ་ན་སོ་སོ་ཐར་པ་ཐམས་ཅད་བྱང་ཆུབ་སེམས་དཔའི་སྡོམ་པར་འགྱུར་ལ། དཀྱིལ་འཁོར་དུ་ཞུགས་པའི་ཚེ་ན་སྡོམ་པ་ཐམས་ཅད་ཀྱང་རིག་པ་འཛིན་པའི་སྡོམ་པ་ཞེས་པ་ཡིན་ནོ། །ཞེས་དང་། སོ་ཐར་(༦༦ན)
དང་བྱང་སྡོམ་གཉིས་ནི་གུད་དུ་བླངས་ཀྱང་རུང་མ་བླངས་ཀྱང་རུང་དབང་གི་སྔོན་དུ་སྟ་གོན་ཀྱི་སྐབས་སུ་འབྱུང་བ་ཡིན་ནོ། །ཞེས་དང་། གནད་དེ་དག་ཐུགས་ལ་བཞག་ནས་ཁ་སྐོང་ལས། སྡོམ་གསུམ་ལྡན་པས་འབྲས་བུ་མཆོག །འགྲུབ་ཅིང་སྡོམ་གསུམ་དེ་ཉིད་ཀྱང་། །རང་རང་ཆོ་གས་རིམ་བཞིན་དུ། །བླངས་སམ་དབང་བསྐུར་ཆོ་ག་ལས། །གསུམ་ཆར་ཐོབ་པ་ཉིད་ཀྱང་རུང་། །སུམ་ལྡན་ཚེ་ན་ངོ་བོ་གཅིག །ཅེས་གསུངས་པའི་བཞེད་དོན་སྡོམ་གསུམ་རིམ་ཅན་དུ་བླངས་པའི་སུམ་ལྡན་རྒྱུད་ཀྱི་སོ་ཐར་སྡོམ་པ་ཤི་འཕོས་པས་གཏོང་ཡང་དེའི་ངོ་བོའི་སྡོམ་པ་ཙམ་པོ་བ་ཞིག་བྱང་སྡོམ་དུ་གནས་འགྱུར་བས་ཤི་འཕོས་པས་མི་གཏོང་ཞིང་ཇི་སྲིད་འཚོའི་བར་དུ་བླངས་པའི་ལྡོག་ཆ་དེ་གཏོང་བ་སོགས་རྒྱུ་མཚན། རྗེ་བཙུན་གོང་མའི་བཞེད་ཚུལ་དང་། ཀུན་མཁྱེན་བཙོང་ཁ་པ་ཆེན་པོས་ཚུལ་ཁྲིམས་ལེའུའི་རྣམ་བཤད་དུ། རྩ་ལྟུང་ལས་གཞན་ཕྱིར་བཅོས་སུ་རུང་བ་ནི་ཉན་ཐོས་ལ་ཡང་ཡོད་པའི་ཕྱིར་བྱང་སེམས་ཀྱི་ཁྱད་ཆོས་མིན་ནོ། །གལ་ཏེ་དེ་ནི་མི་རིགས་ཏེ་རྩ་ལྟུང་ཡིན་ན་ཚུལ་ཁྲིམས་ཀྱི་ཕུང་པོ་ཡོངས་སུ་མ་གཏུགས་པ་ཁོ་ན་ཡིན་ནོ། །ཞེས་གསུངས་པ་དང་འགལ་བའི་ཕྱིར་ཏེ། ཚུལ་ཁྲིམས་ཡོངས་སུ་གཏུགས་པའི་དོན་ནི་ཉམས་པ་ཡིན་པའི་ཕྱིར་རོ་ཞེ་ན་སྐྱོན་མེད་དེ། བསླབ་བཏུས་སུ་དྲངས་པའི་འགྱུར་ལས་ཚུལ་ཁྲིམས་ཀྱི་ཕུང་པོ་མཐའ་མེད་དོ། །ཞེས་འབྱུང་བ་འདི་བདེ་སྟེ། དེའི་དོན་ནི་བྱང་སེམས་ཀྱི་རྒྱུད་ཀྱི་ཚུལ་ཁྲིམས་དེ་རྩ་ལྟུང་བྱུང་བས་ཕྱིར་བླང་དུ་མེད་ན་དེའི་(༦༦བ)
མཐའ་དེ་ཙམ་དུ་ཟད་པས་མཐའ་ཡོད་ན་ཡང་བླང་དུ་ཡོད་པས་མཐའ་མེད་ཅེས་པ་ཡིན་པའི་ཕྱིར་རོ། །ཞེས་དང་། འོ་ན་སྨོན་སེམས་དང་མ་བྲལ་ན་བཅོས་སུ་ཡོད་པ་དང་བྲལ་ན་བཅོས་སུ་མེད་པའི་ཁྱད་པར་འོང་བ་ཅི་ཞེ་ན། སོ་ཐར་གྱི་སྡོམ་ལྡན་གང་ཡང་རུང་བ་ལ་རྩ་ལྟུང་བྱུང་བ་ཕྱིར་བླང་དུ་ཡོད་ན་ཁྱད་པར་དེ་དོན་མེད་ཀྱང་དེ་ནི་མ་ཡིན་ཏེ། འདི་ལྟར་བྱང་སེམས་སོ་ཐར་གྱི་སྡོམ་ལྡན་དེ་ལ་སོ་ཐར་གྱི་རྩ་ལྟུང་བྱུང་ན་རྩ་ལྟུང་བྱུང་བའི་འོག་དེ་མ་ཐག་ཡན་ཆོད་དུ་སྔར་བསྐྱེད་པའི་སེམས་བསྐྱེད་དང་མ་བྲལ་ན་ཕྱིར་བླང་དུ་ཡོད་ལ། གལ་ཏེ་བྱང་སེམས་ཡིན་ཡང་རྩ་ལྟུང་གི་སྦྱོར་དངོས་མཇུག་དེ་མ་ཐག་ཡན་ཆོད་དུ་སེམས་བསྐྱེད་བཏང་ནས་མི་ལྡན་པར་བྲལ་ཕྱིར་བསྐྲད་དུ་མི་རུང་སྟེ་དེ་རུང་ན་ཐེག་པ་དམན་པའི་རྟེན་ལ་ཡང་ཧ་ཅང་ཐལ་བར་འགྱུར་རོ། །ཞེས་གསུངས་པ་རྗེ་བཙུན་གོང་མའི་གསུང་རབ་དང་དགོངས་པ་མཐུན་པ་བྱུང་ནའང་བསླབ་བཏུས་སུ། དེ་བས་ན་རང་གི་མཐུ་དང་འཚམ་པར་དགེ་བའི་རྩ་བ་གཅིག་ཙམ་ཡང་ཡང་དག་པར་བླངས་ཏེ་བསྲུང་བར་བྱ། ཞེས་སྨོན་སེམས་བསྐྱེད་ནས་རིང་པོ་མ་ལོན་པ་དེས་བསླབ་བྱ་མཐའ་དག་ལ་སློབ་མི་ནུས་པས་ཐོག་མར་དགེ་བའི་རྩ་བ་གཅིག་ཙམ་འཛིན་པ་སོགས་རང་བློ་དང་བསྟུན་ནས་རིམ་གྱིས་སློབ་སྦྱངས་ཏེ་མཐར་སྤྱོད་པ་མཐའ་དག་ལ་སློབ་ནུས་པར་གསུངས་ལ། བྱང་ཆུབ་ལམ་རིམ་ཆེ་ཆུང་དུ་སེམས་བསྐྱེད་ཆོ་གས་འཛིན་པ་དང་། དེ་ལ་མ་བལྟོས་པར་སེམས་བསྐྱེད་པ་ཡོད་པའི་རྒྱུ་མཚན་ལམ་དུ་མ་ཞུགས་པའི་གང་ཟག་གིས་འཇུག་སྡོམ་བླངས་ཏེ། དེའི་རྗེས་སུ་སྨོན་(༦༧ན)
པ་བྱང་ཆུབ་མཆོག་ཏུ་སེམས་བསྐྱེད་ནས་ཚོགས་ལམ་ཆུང་ངུ་ཐོབ། ཚོགས་ལམ་འབྲིང་དུ་སླེབས་པ་དང་སྨོན་སེམས་དེ་འཇུག་སེམས་སུ་གནས་འགྱུར་བའི་ཚུལ་གྱིས་འཇུག་སེམས་སྐྱེས་པ་ཡོད། ཡང་འཇུག་སྡོམ་ལེན་མ་མྱོང་བ་ཞིག་གིས་སྨོན་སེམས་བསྐྱེད་ནས་ཚོགས་ལམ་ལ་བཞུགས། ཚོགས་ལམ་འབྲིང་དུ་སླེབས་པ་དང་འཇུག་པའི་སེམས་བསྐྱེད། འབྲིང་གིས་ཐ་མར་འཇུག་སྡོམ་བླངས་པའང་འོང་བས་མཐའ་གཅིག་ཏུ་གོ་རིམ་ཀྱི་ངེས་པ་མེད་པར་བཤད་ལ། སྨོན་སེམས་ཆོ་གས་བསྐྱེད་པ་ཙམ་གྱིས་སྡོམ་པ་ཐོབ་པར་མི་འགྱུར་ཞིང་། དེ་ལྟར་བསྐྱེད་པ་ཙམ་ལ་ཕན་ཡོན་ཆེ་ཞིང་ཉེས་པ་ཆུང་བས། དཔལ་མཉམ་མེད་དཱི་པཾ་ཀཱ་རས། མང་ཡུལ་སྐྱིད་གྲོང་དང་། བསམ་ཡས་སོགས་བོད་ཀྱི་མི་ཚོགས་ཆེ་བའི་ཁྲོམ་ལ་སེམས་བསྐྱེད་པ་ལམ་ཡིག་སོགས་ཆོས་འབྱུང་ཚོར་གསལ། དིང་སང་སྨོན་འཇུག་གི་སེམས་བསྐྱེད་ཆོ་གས་བཟུང་མ་བཟུང་ལ་མ་བལྟོས་པར་དབང་བསྐུར་གྱི་སྔོན་དུ་གུར་ལས་བྱུང་བའི་རྒྱུན་བཤགས་ལན་གསུམ་བརྗོད་པས་སྨོན་འཇུག་གི་སྡོམ་པ་ཐོབ་པ་ཡིན་ལ། དེས་ན་སྤྱོད་འཇུག་ལས། འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་ཡུལ་ཞིག་ཏུ་འགྲོ་བར་འདོད་པ་དང་འགྲོ་བ་ལ་བརྩོན་པ་གཉིས་དཔེར་བཟུང་སྟེ་སྨོན་སེམས་དང་འཇུག་སེམས་ཀྱི་བྱེ་བྲག་གསུངས་པའི་དབང་དུ་བྱས་ནས་སྨོན་སེམས་ལ་ལེགས་པར་སྦྱང་བའི་མྱོང་བ་སྣ་ཟིན་རྒྱུད་ལ་སྐྱེས་པ་(༦༧བ)
ན་བྱང་སྡོམ་གྱི་བསླབ་བྱ་རྣམས་ཉན་ཏེ་ཕྱིན་དྲུག་སོགས་ལ་བསླབ་པའི་ཕན་ཡོན་མ་བསླབས་པའི་ཉེས་དམིགས་རྩ་ལྟུང་དང་ཉེས་བྱས་སོགས་ལེགས་པར་ཤེས་ནས་བླང་དོར། དེ་ལ་སྤྲོ་བ་ཤུགས་དྲག་པོ་བཅོས་མ་མ་ཡིན་པ་སྐྱེས་པ་དང་། ཤིང་རྟ་ཆེན་པོ་གཉིས་ཀྱི་ལུགས་སྲོལ་གཅིག་ཏུ་འདྲེས་པའི་རྒྱལ་སྲས་ཀྱི་སྡོམ་པ་ཆོ་གའི་སྒོ་ནས་འབོགས་དགོས་པ་ཤིང་རྟ་ཆེན་པོ་གཉིས་ཀྱི་རྗེས་སུ་འབྲངས་པའི་རྒྱ་བོད་ཀྱི་མཁས་གྲུབ་རྣམས་མགྲིན་པ་གཅིག་ཏུ་བཏེག་ནས་གསུང་བ་བྱང་ཆུབ་ལམ་རིམ་ཆེན་མོ་ལས་བཀའ་སྩལ་བ་ལྟར། ལམ་དུ་མ་ཞུགས་པ་རྣམས་ཀྱིས་འཇུག་སྡོམ་ལ་རིངས་པ་དགག་བྱ་ཆེ། ལམ་རིམ་བསྡུས་དོན་དུ། སེམས་བསྐྱེད་ཐེག་མཆོག་ལམ་གྱི་གཞུང་ཤིང་སྟེ། །རླབས་ཆེན་སྤྱོད་པ་རྣམས་ཀྱི་གཞི་དང་རྟེན། །ཚོགས་གཉིས་ཀུན་ལ་གསེར་འགྱུར་རྩི་ལྟ་བུ། །རབ་འབྱམས་དགེ་ཚོགས་སྡུད་པའི་བསོད་ནམས་གཏེར། ཞེས་དང་། རྗེ་བླ་མའི་བཀའ་པོད་ཕལ་ཆེར་གྱི་དགོངས་དོན་འཁྲུལ་མེད་དུ་འགྲེལ་བར་རང་བསྟན་འདིའི་ཤིང་རྟ་ཆེན་པོ་པ་རྒྱལ་ཚབ་ཐམས་ཅད་མཁྱེན་པས། ཐེག་པ་ཆེན་པོ་པ་རྣམས་ནི་སེམས་འདི་ཡོད་མེད་ཀྱི་རྗེས་སུ་འགྲོ་ལྡོག་བྱེད་ལ་ཞེས་གསུངས་པ་དང་། ཀུན་མཁྱེན་གོ་བོ་སོགས་རྗེ་བཙུན་གོང་མའི་རྗེས་འབྲངས་ཕལ་ཆེར་རྒྱུན་བཤགས་ལྟ་བུའི་སྒོ་ནས་སྡོམ་པ་བཟུང་སྟེ་ཐེག་པ་ཆེན་པོར་སེམས་བསྐྱེད་པ་དང་ཚོགས་ལམ་དུ་ཞུགས་པ་དུས་མཚུངས་པར་བཞེད་པ་རྣམས་དགོངས་གཞི་གཅིག་པས། ཐེག་ཆེན་པ་ཞེས་པའི་མིང་ཙམ་བླ་ཡང་དངོས་པོའི་གནས་ཚོད་ལ་གནད་(༦༨ན)
འགག་དེ་ལྟར་ཡོད་ཅིང་། དེ་ལྟ་བུའི་བྱང་སེམས་ཀྱི་རྟེན་གཞིར་བྱས་པའི་རིགས་འཛིན་གྱི་སྡོམ་གསུམ་དུ། ཆོ་ག་ཅུང་ཟད་ཉམས་པ་ལ། །ཆོ་ག་ཆགས་པར་མི་འགྱུར་ན། །ཆོ་ག་ཕལ་ཆེར་ཉམས་པ་ལ། །ཆོ་ག་ཆགས་པར་འགྱུར་རེ་ཀན། ཞེས་པ་ལྟར། མཚན་ཉིད་དང་ལྡན་པའི་དཀྱིལ་འཁོར་གྱི་ཆོ་ག་ལ་བརྟེན་ནས་ཐོབ་དགོས་པས་བཤད་མ་ཐག་པའི་མཚན་ཉིད་དེ་ལྡན་གྱི་རིགས་ལ་ས་བཟང་པཎ་ཆེན་གྱིས་སེམས་པ་དགེ་བ་ཁྱད་པར་ཅན་ས་བོན་དང་བཅས་པ་ཞེས་པའི་དོན་བཞིན་ཐེག་པ་གོང་མ་གཉིས་ཀྱི་རྩིས་ཟིན་པའི་སྡོམ་པ་གནས་འགྱུར་བ་རིག་འཛིན་དང་བྱང་སེམས་ཀྱི་སྡོམ་པ་མཚན་ཉིད་པ་རྒྱུད་ལ་སྐྱེས་པའི་རིགས་ལ་སྡོམ་པ་འོག་མ་གོང་མ་གཉིས་སུ་གནས་འགྱུར་བའི་རིག་འཛིན་གྱི་སྡོམ་པས་འོག་མ་ཟིལ་གྱིས་མནན་ཏེ། དེ་ལྟ་བུའི་དགེ་སློང་ལ་ཕམ་པ་འཆབ་བཅས་བྱུང་ཀྱང་གསོ་བ་སོགས་ཉན་ཐོས་དང་མི་མཐུན་པའི་རྣམ་གཞག་བྱུང་བ་ནི་རྟོགས་པའི་ཡོན་ཏན་གཙོ་ཆེ་བའི་ནུས་པ་སྟེ། དཔེའི་འོད་གསལ་འདྲེན་པའི་དུས་ལ་བབས་པ་དེ་རྟེན་དགེ་སློང་ཡིན་ཀྱང་ལས་རྒྱ་བསྟེན་པས་ཚངས་སྤྱོད་ལ་མི་གནོད་པ་དང་། ཇི་ལྟར་གྲོང་ཁྱེར་སེར་སྐྱའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་ཀྱི་ཉོན་མོངས་ལུད། །དེ་ནི་བྱང་ཆུབ་སེམས་རྣམས་སྐྱེ་ལ་ཕན། །ཞེས་སོ་ཐར་གྱི་སྡོམ་པ་དང་ལྡན་མི་ལྡན་ལ་མ་བལྟོས་པའི་སྐྱོན་ཡོན་ཏན་དུ་འགྱུར་བའི་གནད་འགག་དེ་བཞིན་བཤད་པས། (༦༨བ)
རྗེ་བཙུན་གོང་མ་རྡོ་རྗེ་འཆང་དང་ཞལ་གཉིས་པ་རྣམས་ཀྱིས་བཞེད་པ་འདི་དོན་ཐོག་ཏུ་གནས་པར་སེམས་མོད་འོན་ཀྱང་སྡོམ་གསུམ་དུ། དེས་ན་ཉན་ཐོས་ཐེག་པ་ནི། །ནུབ་ཀྱང་གཟུགས་བརྙན་ཙམ་ཞིག་སྣང་། །རྡོ་རྗེ་ཐེག་པའི་བསྟན་པ་ལ། །གཟུགས་བརྙན་ཙམ་ཡང་མི་སྣང་ངོ་། །ཞེས་པ་ལྟར་དེང་སང་བྱང་སེམས་དང་སྔགས་ཀྱི་སྡོམ་པ་མོས་པ་ལམ་བྱེད་ཙམ་གྱིས་བཟུང་བའི་ལམ་མ་ཞུགས་ཀྱི་སོ་སྐྱེ་ཐེག་ཆེན་པར་ཁས་འཆེ་བ་མང་བའི་དུས་འདིར་ལམ་དུ་ངེས་པར་ཞུགས་པའི་ཐེག་ཆེན་པ་དག་གི་ངང་ཚུལ་ལྷུར་བླངས་ཚེ་སྟག་གིས་མཆོངས་སར་ཝའི་དཔེ་ལྟར་དགག་བྱ་ཆེ་ཞིང་དགོས་པ་ཆུང་བས། ཐེག་པ་གོང་འོག་གི་ལུགས་མ་འདྲེས་པར་བསྟར་བ་ཁེ་ཆེ་ཞིང་ཉེས་དམིགས་ཆུང་བ་འདྲ་སྟེ། ཀུན་མཁྱེན་གོ་བོས་སྡོམ་གསུམ་སྤྱི་དོན་ལས། གཉིས་པ་བསླབ་བྱ་ཕན་ཚུན་ནང་འགལ་ན་ཇི་ལྟར་བསྒྲུབ་པའི་ཚུལ་ནི་སྡོམ་པ་གསུམ་རིམ་ཅན་དུ་བླངས་པའི་དགེ་སློང་རྡོ་རྗེ་འཛིན་པ་ཞིག་གི་སྐབས་འགའ་ཞིག་ཏུ་སྡོམ་པ་གོང་འོག་ལ་བལྟོས་པའི་བསླབ་བྱ་རྣམས་ཕན་ཚུན་འགལ་བར་གྱུར་ན་གང་གི་དབང་དུ་བྱས་ནས་སྤྱད་སྙམ་ན། ས་པཎ་གྱི་བཀའ་གདམས་དོ་ཀོར་པའི་དྲིས་ལན་ལས། སྡོམ་གསུམ་ལྡན་པའི་གང་ཟག་གིས། །སྤང་བྱ་ཕན་ཚུན་ནང་འགལ་ཚེ། །དགག་བྱ་དང་ནི་དགོས་པ་གཉིས། །གཙོ་བོ་གང་ཆེའི་དབང་དུ་ཐོང་། །ཞེས་གསུངས་ལ། འཕགས་པའི་དྲིས་ལན་འགའ་ཞིག་ལས། སྡོམ་པ་གོང་མ་གོང་མའི་དབང་དུ་བྱས་ནས་སྤྱད་པར་གསུངས་པ་ཡང་ཡོད་དོ། །དོན་ནི་འདི་ཡིན་ཏེ། གོང་འོག་རྩ་བར་མཉམ་(༦༩ན)
པའི་ཡན་ལག་ཏུ་མཉམ་པ་ལྟ་བུ་བསླབ་བྱ་མཉམ་པ་དང་། འོག་མའི་ཡན་ལག་དང་གོང་མའི་རྩ་བ་འགལ་བའི་ཚེ་རྣམ་པ་ཐམས་ཅད་དུ་གོང་མའི་དབང་དུ་བྱས་ནས་བསྲུང་དགོས་ཏེ། དེའི་རྒྱུད་ཀྱི་སྡོམ་པ་འོག་མ་ཐམས་ཅད་གནས་གྱུར་ནས་གོང་མའི་ངོ་བོར་ཡོད་པའི་ཕྱིར་དང་། དེའི་བསྲུང་བྱའི་གཙོ་བོ་ནི་གོང་མ་ཡིན་པའི་ཕྱིར་རོ། །འདི་ལ་དགོངས་ནས་འཕགས་པས་གོང་མའི་དབང་དུ་བྱས་ནས་སྤྱད་པར་གསུངས་སོ། །འོན་ཀྱང་ལས་དང་པོ་བའི་ཚེ་སེམས་ཅན་གྱི་དོན་དུ་འགྱུར་བའི་དགག་དགོས་ཁྱད་པར་ཅན་མེད་པར་གོང་མའི་ཡན་ལག་འགའ་ཞིག་དང་། འོག་མའི་རྩ་བ་ལྟ་བུ་འགལ་བའི་ཚེ་འོག་མའི་དབང་དུ་བྱས་ནས་བསྲུང་དགོས་པ་ཡང་ཡོད་དེ། །སྤྱོད་འཇུག་ལས། ཆུང་ངུའི་ཕྱིར་ནི་ཆེ་མི་གཏང་། །གཙོ་ཆེར་གཞན་གྱི་དོན་བསམ་མོ། །ཞེས་པ་དང་། འདི་ལྟར་སྨིན་པའི་དུས་དག་ཏུ། །ཚུལ་ཁྲིམས་བཏང་སྙོམས་བྱ་བར་གསུངས། །ཞེས་བཤད་པ་ལྟར་རོ། །འདི་ལ་དགོངས་ནས་ས་པཎ་གྱིས་དགག་བྱ་དང་དགོས་པ་གང་ཆེ་བའི་དབང་དུ་བཏང་བར་གསུངས་སོ། །ཞེས་དང་། ཡང་དེ་ཉིད་ལས། རྟེན་གྱི་གང་ཟག་སྡོམ་གསུམ་རིམ་ཅན་དུ་བླངས་པའི་དགེ་སློང་རྡོ་རྗེ་འཛིན་པ་དེས་ཇི་སྲིད། བསླབ་དང་དབང་ལས་རྣལ་འབྱོར་གྲོལ། །ཞེས་གསུངས་པ་ལྟ་བུའི་རྟོགས་པ་མ་ཐོབ་ཀྱི་བར་དུ་རང་རྒྱུད་ཀྱི་སྡོམ་པ་གསུམ་གྱི་བསླབ་བྱ་རྣམས་ལ་སེམས་ཅན་གྱི་དོན་དུ་འགྱུར་བ་སོགས་ཀྱི་དགོས་པ་ཁྱད་པར་ཅན་མེད་པའི་ཚེ་སོ་སོའི་གཞུང་ལས་འབྱུང་བ་བཞིན་བསླབ་(༦༩བ)
དགོས་ཏེ། གསང་བ་འདུས་པའི་བཤད་རྒྱུད་ལས། ཕྱི་རུ་ཉན་ཐོས་སྤྱོད་པ་བསྲུང་། །ནང་དུ་འདུས་པའི་དོན་ལ་དགའ། །ཞེས་པ་དང་། རྡོ་རྗེ་གུར་ལས། ཉན་ཐོས་སྤྱོད་པ་བསྲུང་བ་པོ། ཞེས་པ་དང་། ལྟུང་བ་འཆད་པའི་སྐབས་སུ་ཡང་། སྡོམ་པ་གཉིས་ཀྱི་བཅས་པ་ལ། །དགོས་པ་མེད་པར་འདའ་བ་དང་། །ཞེས་སོགས་དགོས་མེད་དུ་བཅས་པ་ལས་འདས་པ་ཡན་ལག་གི་ལྟུང་བར་བཤད་པའི་ཕྱིར་དང་། །སྤྱོད་འཇུག་ལས། འཇིག་རྟེན་མ་དད་གྱུར་པ་རྣམས། །མཐོང་དང་དྲིས་ཏེ་སྤང་བར་བྱ། །ཞེས་པ་དང་། རྐང་པ་བརྐྱང་སྟེ་མི་འདུག་ཅིང་། །ཞེས་སོགས་ཀྱི་བསླབ་བྱ་མང་དུ་གསུངས་པའི་ཕྱིར་དང་། གཞུང་འདིར་ཡང་། འདི་ལ་སྡིག་ཏོ་མི་དགེའི་ཕྱོགས། །ཕལ་ཆེར་ཉན་ཐོས་ལུགས་བཞིན་བསྲུང་། །ཞེས་སོགས་མང་དུ་གསུངས་པའི་ཕྱིར་རོ། །ཞེས་བཤད། རྒྱ་ཆེར་འགྲེལ་ལས། ཕམ་པར་གྱུར་པ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཞེས་བྱ་བ་ཡང་རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་ཁྱོད་ཕམ་པར་གྱུར་པ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཞེས་དྲི་བར་བྱ་ཞིང་། ཞེས་བྱ་བ་ལ་སོགས་པ་དག་བརྗོད་པར་བྱའོ། །གང་ཡང་རུང་བ་ཞིག་ཅེས་སྨོས་པ་ནི། གཅིག་གིས་ཀྱང་སྐྱེ་བའི་ཆོས་ཉིད་མེད་པ་ཡིན་ཞེས་བྱ་བར་སྟོན་ཏོ། །ཞེས་དང་། བུ་སྟོན་རྗེའི་ལས་བརྒྱའི་ཊཱིཀྐར་ཡང་། ཕམ་པར་གྱུར་པའི་ལྟུང་བ་བཞི་པོ་དག་ལས་ལྟུང་བ་གང་ཡང་རུང་བ་བྱུང་བ་ཞེས་སྨོས་པས་ལྟུང་བ་གཅིག་གིས་ཀྱང་སྐྱེ་བའི་ཆོས་ཉིད་མེད་པར་འདྲ་བར་བསྟན་པའི་དོན་(༧༠ན)
དུའོ། །དེའང་ཕམ་པ་འཆབ་བཅས་ཀྱི་དབང་དུ་བྱས་ཤིང་འཆབ་སེམས་མེད་ན་སྐྱེར་རུང་སྟེ། ཞུ་བར། བཙུན་པ། བསླབ་པ་སྩལ་ནས་བསླབ་པ་ཕུལ་ཏེ་ཁྱིམ་པའི་དངོས་པོར་མཆིས་པ་ལས་དེ་སླར་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་ཏེ་དགེ་སློང་གི་དངོས་པོར་འཆལ་བ་དང་། དེ་དགེ་སློང་གི་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི་བསྙེན་པར་རྫོགས་ཞེས་བྱ་སྟེ། བསྙེན་པར་རྫོགས་པར་བྱེད་པ་ནི་འདས་པ་དང་བཅས་པའོ། །བཞི་ཞེས་སྨོས་པས་དགེ་སློང་མའི་ཐུན་མོང་མ་ཡིན་པའི་ཕས་ཕམ་བྱུང་ན་མཚན་འགྱུར་ནས་སྐྱེས་པར་སོང་ན་སྡོམ་པ་སྐྱེ་བར་རུང་བ་སྟེ་སེལ་བར་བྱེད་དེ། མདོར། ཕམ་པར་གྱུར་པ་ཐུན་མོང་མ་ཡིན་པ་ལྷག་པར་སྤྱད་པ་ཅན་ཡང་ངོ་། །ཞེས་པས་སོ། །འོ་ན་འདི་ལྟར་སྔར་གྱི་གནས་པར་མི་བྱ་བ་ལ་ཁྱད་པར་མེད་པས་ཟློས་སོ་ཞེ་ན། སྐྱོན་མེད་དེ། སྔར་ཕམ་པས་ཉམས་པ་ལ་མི་སྐྱེ་བ་སྤྱིར་བསྟན། འདིར་ཕམ་པ་ཐུན་མོང་བ་བཞི་ལ་དམིགས་ཀྱིས་བསལ་ནས་བསྟན་པའམ་ཡང་ན་དགེ་ཚུལ་ལ་མི་ཚངས་སྤྱོད་སོགས་ཕམ་པ་དང་འདྲ་བའི་ཉེས་བྱས་ཡིན་གྱི་ཕམ་པ་དངོས་མ་ཡིན་ཀྱང་གནས་པར་མི་བྱ་བ་ཡིན་པས་སྡོམ་པ་སྐྱེ་བའི་སྐལ་བ་མེད་པར་བསྟན་པའི་ཕྱིར། འགྲེལ་ཆུང་ཡོན་ཏན་འོད་མ་ལས། ཕས་ཕམ་པ་བཞི་ལ་གང་ཡང་རུང་བའི་ལྟུང་བ་བྱུང་བའོ། །རབ་ཏུ་བྱུང་བར་འོངས་པ་ལ་ཕས་ཕམ་པ་མ་ཡིན་ནོ། །ཞེས་དྲིས་ལ་ཕམ་པ་ནི་སྔོན་དགེ་སློང་བྱས་ལ་དེའི་ཚེ་མི་ཚངས་(༧༠བན)
སྤྱོད་པ་དང་། རྐུ་བ་དང་། གསོད་པ་དང་། བརྫུན་དུ་སྨྲ་བ་བཞི་གང་ཡང་རུང་བ་བྱས་པའོ། །སཱུ་ཏྲར་འདི་ཡན་ཆད་ལྟ་བུ་ཞིག་ཡོད་ན་ཁྲིམས་ཡོངས་མི་འཆགས་ཁྲིམས་རྫོགས་ཟིན་པ་ལ་བྱུང་ན་ཡང་ཁྲིམས་མེད་པར་སོང་ངོ་། །མཚན་མ་ས་ལས་བཟློག་པར་ཁས་བླངས་པའི་སྨད་པ་རབ་ཏུ་བྱུང་བ་དང་བསྙེན་པར་རྫོགས་པར་མི་བྱའོ། །ཞེས་དང་། ལུང་རིགས་གཏེར་མཛོད་དུ། དགེ་ཚུལ་གྱི་སྡོམ་པ་ལན་ཅིག་བླངས་ཀྱང་རྩ་ལྟུང་འཆབ་བཅས་ཀྱི་སྒོ་ནས་ཉམས་པའི་གང་ཟག་ལ་སྡོམ་པ་ཕོག་ཀྱང་མི་ཆགས་ཏེ། རྒྱུད་ངོ་ཚ་མེད་པ་དང་ཁྲེལ་མེད་པ་ཤས་ཆེན་པོས་གང་བར་བྱས་པའི་ཕྱིར། སུམ་བརྒྱ་པར། མི་གསོད་པ་སོགས་རྣམ་བཞི་ཡིས། །དགེ་ཚུལ་ལས་ནི་ཉམས་གྱུར་ན། །དགེ་སློང་བཞིན་དུ་དགེ་ཚུལ་ལའང་། །ཕྱིས་ནས་སྡོམ་སྐྱེའི་སྐལ་བ་མེད། །ཅེས་གོང་གི་ལུང་དེ་སུམ་བརྒྱ་པར་ཡོད་མེད་སོམ་ཉིར་སྣང་ཞིང་། སྟག་ཚང་ལོ་ཙཱ་བས་འོད་ལྡན་དུ་བྱེ་བྲག་བཤད་མཛོད་ཀྱི་ལུང་དྲངས་པ་ལས་ཞེས་འདུག་ཀྱང་འོད་ལྡན་དུ་ལུང་ཁུངས་སྨོས་པ་མི་འདུག །འདུལ་ཊཱིཀ་རིན་ཅེན་འཕྲེང་བར་ཕམ་པར་གྱུར་པ་བཞི་ལས་གང་ཡང་རུང་བ་འཆབ་བཅས་ཤིག་བྱུང་བ་མ་ཡིན་ནམ། ཞེས་འདྲིའོ། །གང་ཡང་རུང་བ་ཞེས་པས་གང་རུང་གཅིག་གིས་ཀྱང་སྡོམ་པ་མི་སྐྱེ་བར་བསྟན་པ་ཡིན་ནོ། །ཞེས་དང་། མཁས་གྲུབ་རིན་པོ་ཆེ། ཕམ་པ་འཆབ་གཅས་ཀྱིས་ཉམས་པ་ནི་ཤིང་ཏཱ་ལའི་མགོ་བཅད་པ་ལྟར་ཆོས་འདུལ་བ་འདི་ལ་སྐྱེར་མི་རུང་བའི་ཆོས་ཅན་དུ་གསུངས་པས་ལྟུང་བ་ལས་ལྡང་བའི་ཐབས་ཀྱིས་ཕྱིར་བཅོས་པའི་ཆོ་ག་བྱར་མེད་ལ། ཕམ་པ་(༧༡ན)
འཆབ་སེམས་མ་སྐྱེས་པས་ཉམས་པ་ཡིན་ན་བསླབ་པ་སྦྱིན་པའི་སྒོ་ནས་སླར་གསོ་བ་བྱར་ཡོད་ཀྱང་། ཇི་སྲིད་དགྲ་བཅོམ་པར་མ་གྱུར་གྱི་བར་དུ་རང་བཞིན་དུ་གནས་པ་མི་འཐོབ་ཀྱིས་གཞན་ན་གནས་པ་ཡིན་པས་ལས་ཀྱི་ཁ་སྐོང་སོགས་སུ་མི་རུང་བའི་ཆ་ནས་དགེ་ཚུལ་དང་འདྲ་བ་ཡིན་ནོ། །ཞེས་གསུངས། སྟག་ཚང་ལོ་ཙཱ་བས། སྤྱིར་ཕམ་པ་འཆབ་བཅས་ཀྱིས་སྡོམ་པ་གཏོང་མི་གཏོང་ལ་མདོ་སྡེ་པ། བྱེ་སྨྲ། འདུལ་འཛིན་སྔ་རབས་པ་གསུམ་གྱི་འདོད་པ་སོ་སོར་བཀོད་ནས་རང་ལུགས་སུ་ལུགས་དེ་གསུམ་ལས་གང་འདོད་ཅེ་ན། འདུལ་བ་གཞིར་བྱས་ལ་ཡོན་ཤཱཀ་གི་རྗེས་སུ་འབྲང་ཞིང་། ཁ་ཅིག །ཡོན་ཤཱཀ་གཉིས་ཀ་བྱེ་བྲག་ཏུ་སྨྲ་བ་ཡིན་ནོ་ཟེར་མོད་ཀྱི། བྱེ་སྨྲ་ཚུལ་ཁྲིམས་འཆལ་བ་དགེ་སློང་མ་ལ་འདོམས་པ་ལྟུང་བྱེད་དངོས་སུ་ཁས་ལེན་ཅིང་། ཡོན་ཏན་འོད་ཉམས་པ་ལ་ཉེས་བྱས་སུ་ཁས་ལེན་པའི་ཕྱིར་དང་། ཤཱཀྱ་འོད་ཀྱིས་སྔ་རབས་པའི་འདོད་པ་མཇུག་ཏུ་བཀོད་ནས་དགག་པ་མ་བྱས་པའི་ཕྱིར་དང་། ཀཱ་རི་ཀ་ལྔ་བཅུ་པ་ཤཱཀྱ་འོད་ཀྱིས་མཛད་པར་འདོད་པ་མང་ཞིང་། དེ་ལྟར་ན། དེ་ཡང་སྡོམ་པ་ཞིག་པར་འགྱུར། །ཞེས་སོགས་དང་། སུམ་བརྒྱ་པ་ལས། མི་ཤི་རྨི་ལམ་མ་གཏོགས་དེ་བརླག་འགྱུར། །ཞེས་དང་། ཆགས་པས་རེག་པའི་བདེ་རྣམས་མྱོང་དེ་ཉམས། །ཞེས་སོགས་བཤད་ལ། བརླག་པ་དང་ཉམས་པ་སྡོམ་པ་མ་ཞིག་པ་ལ་མི་འབྱུང་བས་སོ། །ཆོས་ཀྱི་བཤེས་གཉེན་ནི་བྱེ་བྲག་སྨྲ་བ་དང་མཐུན་མོད་ཀྱི། ནང་འགལ་ཅུང་ཟད་བྱུང་གི་དོགས་(༧༡བ)
སོ། །དེས་ན་ཕམ་པ་འཆབ་བཅས་བྱུང་ན་སྡོམ་པ་གསོར་མི་རུང་དུ་གཏོང་ལ། འཆབ་མེད་བྱུང་ན་གསོར་རུང་གི་ཚུལ་གྱིས་གཏོང་ཞིང་། དེ་ལ་བསླབ་པ་བྱིན་ཆགས་སྤྱད་པས་དགྲ་བཅོམ་ཐོབ་པས་སོར་ཆུད་པར་འགྱུར་བ་ཡིན་ནོ། །ཞེས་གསུངས་ཤིང་། ཕམ་པ་འཆབ་མེད་ཀྱི་མཚན་ཉིད་ཀྱང་། ལུང་མ་མོ་ལས། ཕམ་པ་བྱུང་བ་བསླབ་པ་སྦྱིན་པ་གང་ཞེ་ན། གལ་ཏེ་མི་ཚངས་པར་སྤྱོད་པ་བྱས་ནས་ཐ་ན་སེ་གོལ་གཏོགས་པ་ཙམ་ཡང་འཆབ་པའི་སེམས་མ་སྐྱེས་པ་ཡིན་ཏེ། དེ་ལ་དགེ་སློང་དགའ་བྱེད་དང་འདྲ་བར་བསླབ་པ་བྱིན་ཅིག །ཕམ་པ་བྱུང་བ་བསླབ་པ་བྱིན་པས་ཀྱང་བསླབ་པ་ལ་བསླབ་པར་བྱའོ། །ཞེས་གསུངས་པས། དེ་ལྟ་བུའི་ཕམ་པ་འཆབ་མེད་འབྱུང་བ་དཀོན་པས་བསླབ་སྦྱིན་དགེ་སློང་འབྱུང་དཀའ་བ་འདྲ་ཞིང་། སྤྱིར་འཆབ་པ་ཞེས་བྱ་བའི་དོན་ནི་གསང་བའམ་སྦེད་པ་ཁོ་ནར་བཞེད་པ་མང་ཡང་འདུལ་ཊཱིཀ་རྣམས་ཀྱི་དགོངས་དོན་ལ་བརྟགས་ན་ལས་དེ་སྤྱད་པའི་རྗེས་ལ་ཅུང་ཟད་ཀྱང་འགྱོད་པར་མ་གྱུར་ཅིང་སྤྲོ་བ་ཉམས་སུ་མྱོང་བས་གཞན་ལ་མཐོལ་བཤགས་ཀྱི་ཆེད་དུ་གླེང་བར་མི་བྱེད་པར་ཉེས་པར་ཡིད་མི་ཆེས་པ་ཞིག་ཡིན་ནམ་སྙམ་སྟེ། དཔེར་ན་སྲོག་གཅོད་ལྟ་བུའི་ཕམ་པས་གོས་པ་མ་སྦས་ཀྱང་ཕམ་པ་འཆབ་བཅས་སུ་འགྱུར་བ་མང་ཞིང་མི་ཆོས་བླ་མའི་ཕམ་པ་ལྟ་བུར་གསང་ཏེ་སྦས་པ་ཡན་ལག་ཏུ་མི་འགྲོ་བར་ངོ་བོ་ལྟ་བུར་འགྱུར་བ་ཡང་སྲིད་དེ། དགེ་སློང་དགའ་བྱེད་ཀྱི་གླེང་གཞིས་ཀྱང་གོ་ནུས་ལ། རྒྱ་ཆེར་འགྲེལ་ལས། གང་དག་ངས་བཤད་པ་ལ་ཡིད་མི་ཆེས་པ་དེ་དག་ནི་(༧༢ན)
འཆབ་པར་སེམས་སོ། །ཞེས་དང་། ཡིད་ཆེས་པ་དེ་དག་ནི་འཆབ་པར་མི་སེམས་སོ། །ཞེས་གསུངས་པས་ཀྱང་རྟོགས་པར་ནུས་པས། ཕམ་པ་འཆབ་བཅས་ལ་སྡོམ་པ་གསོ་མི་རུང་བ་དང་། འཆབ་མེད་ལ་བསླབ་སྦྱིན་སོགས་འདུལ་བའི་ཆོས་སྐད་མང་པོ་འཇིག་པས་དེ་ལྟར་ན་ལས་དང་པོ་པ་རྣམས་ཚིགས་གསུམ་རིམ་གྱིས་ནོས་པའི་ཚིགས་ཀྱིས་བསྒྲུབ་པ་ལས། མི་དགེ་བཅུ་སྤོང་གི་ཚུལ་ཁྲིམས་ཙམ་ལ་བརྟེན་ནས་གོང་མ་ལ་ཞུགས་ན་སྒྲོག་ཐག་བདེ་ཞིང་། རྗེས་འབྲས་ལ་ཁྱད་པར་མ་བྱུང་བས་རྟགས་ལྷུར་བླངས་མ་བླངས་ལ་མ་བལྟོས་པར་དོགས་ཤིང་ཉན་ཐོས་ཀྱི་སོ་ཐར་དེ་བྱང་སྡོམ་དུ་གནས་འགྱུར་བའི་གང་ཟག་དེ་ཤི་འཕོས་ནས་ཀྱང་བྱང་སྡོམ་དང་ལྷན་ཅིག་ཏུ་ཡང་སྲིད་ཕྱི་མར་ཡང་འབྱུང་བའི་དོགས་གནས་འོ་མ་མར་དུ་གྱུར་ཟིན་པ་སླར་འོ་མར་ལྡོག་པ་དང་ལྕགས་གསེར་དུ་བསྒྱུར་བ་སླར་ལྕགས་སུ་མི་རུང་བ་མངོན་སུམ་དུ་གྲུབ་པ་བཞིན་ཆུ་དང་འོ་མ་འདྲེས་པ་དབྱེ་མི་ཤེས་པ་ལྟར་འཆི་ཁའི་བར་དུ་བྱང་སེམས་སུ་འགྱུར་བའི་སྡོམ་པ་དེ་ཚེ་འཕོས་པ་དང་བྱང་སྡོམ་མདའ་འཕངས་པའི་རྗེས་སུ་སོ་ཐར་གཞུ་ལུས་པ་ལྟ་བུ་རིགས་པས་བསྒྲུབ་དཀའ་བས་འབྲངས་ཚེ། ལྷ་དང་བྱིས་པའི་དགེ་སློང་ནི། །འདུལ་བའི་སྡེ་སྣོད་དག་ལས་བཀག །ཅེས་པའི་གསུང་ལའང་རས་སུ་འཕོག་ཅིང་ངོ་བོ་དང་ལྡོག་ཆའི་སྤུ་རིས་ཀྱང་བློ་གྲོས་དམན་སྐྱོན་ཡིན་ནམ་དཔྱད་དཀའ་མོད། རྗེ་བཙུན་གོང་མའི་རྗེས་འབྲང་གི་མཁས་པ་ཆོས་ཀྱི་སྤྱན་ལྡན་མཐའ་དག་དགོངས་པའི་འགྲེལ་ལུགས་ཕྱོགས་མཐུན་(༧༢བ)
པས་ལམ་མ་ཞུགས་ཀྱི་དགེ་སློང་བྱང་སེམས་དང་རིགས་འཛིན་དུ་ཁས་འཆེ་བ་ཙམ་ལ་གནས་འགྱུར་མི་འགྱུར་བདག་འདྲའི་བློ་མིག་ཆུང་ངུས་འཐད་མི་འཐད་ཀྱི་ཁ་མཚོན་ག་ལ་ཆོད། སོ་ཐར་བྱང་སེམས་རིགས་འཛིན་གྱི་སྡོམ་པ་གསུམ་ག་རྒྱུད་ལྡན་རྣམས་ཀྱིས་གསོ་སྦྱོང་སྐབས་སྔགས་བྱང་སེམས་ཀྱི་ཕྱིར་བཅོས་མཛད་པ་ལེགས་མོད། དབང་བསྐུར་མ་ཐོབ་པའི་རྟོག་གེ་པ་དག་གིས་དེ་ལྟར་བྱེད་པ་ནི་ཁྱིམ་པས་དགེ་སློང་གི་གསོ་སྦྱོང་བྱ་བ་ལྟར་དོན་མ་ཡིན་ནོ། །གོང་གི་གྲུབ་མཐའ་མཐའ་གཅིག་ཏུ་བཟུང་ཚེ། སྟག་ཚང་ལོ་ཙཱ་བས་མཛད་པའི་སྡོམ་གསུམ་འགྲེལ་པ་ཐུབ་བསྟན་ཀུན་གསལ་ལས། དེ་ཡང་འདིར་སོ་སོ་ཐར་པ་ལུགས་གཉིས་ཀྱི། །ཐེག་ཆེན་སོ་ཐར་ངོས་འཛིན་མཛད་པ་ན། དེས་ན་ད་ལྟའི་ཆོ་ག་ནི། །བསམ་པ་སེམས་བསྐྱེད་ཀྱིས་ཟིན་པའི། །ཆོ་ག་ཉན་ཐོས་ལུགས་བཞིན་གྱིས། །སོ་སོ་ཐར་པ་རིགས་བརྒྱད་པོ། །བྱང་སེམས་སོ་སོ་ཐར་པར་འགྱུར། ཞེས་སོ་ཐར་གྱི་སྡོམ་པའི་མཚན་ཉིད་པ་ཐེག་ཆེན་སེམས་བསྐྱེད་ཀྱིས་ཟིན་པ་འདི་ཉིད་ཐེག་ཆེན་སོ་ཐར་རམ་བྱང་སེམས་སོ་ཐར་དུ་མཛད་པ་ནི། དཀོན་བརྩེགས་ཀྱི་ཉེ་བ་འཁོར་གྱིས་ཞུས་པ་ལས། བྱང་ཆུབ་སེམས་དཔའི་སོ་སོ་ཐར་པ་ནི་བྱང་ཆུབ་ཀྱི་བར་དུ་རྗེས་སུ་འཇུག་པ་དང་། སྡོམ་པ་འདི་ལ་འདོད་ཆགས་ལས་བྱུང་བའི་ལྟུང་བ་ལ་ལྟུང་བར་ང་མི་སྨྲའོ། །ཞེས་སོགས་རྒྱུ་མཚན་དུ་མས་སྡོམ་པ་གསུམ་གྱི་ནང་ནས་བྱང་སེམས་སྡོམ་པར་གསུངས་པ་དང་མི་མཐུན་ལ། བྱང་སེམས་ཀྱི་རྒྱུད་ལ་ཡོད་པའི་སྡོམ་པ་(༧༣ན)
ཡིན་པས་བྱང་སེམས་སྡོམ་པར་འཇོག་ན་ནི་དགེ་སློང་གི་རྒྱུད་ལ་ཡོད་པའི་དགེ་བསྙེན་དང་དགེ་ཚུལ་གྱི་སྡོམ་པ་ཡང་དགེ་སློང་གི་སྡོམ་པར་ཐལ་བ་དང་། ཚོགས་ལམ་པའི་རྒྱུད་ལ་ཡོད་པའི་ལམ་ཡིན་ན་ཚོགས་ལམ་ཡིན་པས་ཁྱབ་པར་འགྱུར་ཞིང་། དེ་ལྟ་ན་དམན་ལམ་སྔོན་སོང་གི་འཕགས་ལམ་ཚོགས་ལམ་དུ་འགྱུར་བ་སོགས་མང་། ལེན་ཆོག་ཉན་ཐོས་ལུགས་བཞིན་བྱས་རྟིང་། སྡོམ་པའི་ངོ་བོ་དང་གཏོང་ཚུལ་སོགས་ཀྱང་ཉན་ཐོས་ལུགས་ལས་མ་འདས་ལ། དེ་ལྟར་ན་གོང་དུ་བྱང་སེམས་ཀྱི་སྡོམ་པ་སེམས་ལས་སྐྱེ་བས་གཟུགས་ཅན་མིན་པ་དང་། ཚེ་འཕོས་པས་མི་གཏོང་བར་གསུངས་པས། གཞུང་ཡང་སྔ་ཕྱི་འགལ་བ་ལྟ་བུ་ཤིན་ཏུ་བཤད་པར་དཀའོ། །གཞན་ཡང་གཞུང་འདི་རིགས་ལ་བརྟེན་ནས་སྡེ་སྣོད་སོ་སོའི་སྡོམ་པ་སོ་སོ་རྣམས་ཀྱི་གང་ཟག་དང་། ལེན་ཆོག་དང་། བཅས་འགལ་སོགས་ལ་མི་མཁས་པ་དག་གིས་སོ་ཐར་ཐེག་ཆེན་སེམས་བསྐྱེད་ཀྱིས་ཟིན་ན་བྱང་སེམས་སྡོམ་པར་འགྱུར་ལ། དེ་སྔགས་ཀྱི་བསམ་སྦྱོར་གྱིས་ཟིན་ན་སྔགས་སྡོམ་དུ་འགྱུར་བས་སྡོམ་གསུམ་མི་འགལ་བ་དང་འགལ་ཡང་ངོ་བོ་གཅིག་པར་འདོད་པའི་ལོག་རྟོག་རྣམས་འབྱུང་། ཞེས་དང་། གཞུང་འདི་ཉིད་དུ། དེས་ན་སོ་སོ་ཐར་པ་ཡི། །སྡོམ་པ་ཤི་ཡང་ཡོད་དོ་ཞེས། །སྨྲ་བའི་སྐྱེས་བུ་དེ་ལ་ནི། །སྡེ་སྣོད་རྣམ་དབྱེ་མེད་པར་ཟད། །ཅེས་གསུངས་པ་ཉིད་ཀྱིས་ལེགས་པར་གནོད་དེ། སྡོམ་གསུམ་ནང་ཚན་གྱི་སོ་ཐར་སྡོམ་པ་ནི་སྡེ་སྣོད་གསུམ། རིག་འཛིན་སྡེ་(༧༣བ)
སྣོད་དང་བཅས་པའི་ནང་ནས་འདུལ་བའི་སྡེ་སྣོད་ཁོ་ནའི་བསྟན་དོན་ཡིན་གྱིས། གཞན་ན་ལེན་ཆོག་དང་གཏོང་རྒྱུ་སོགས་ཅུང་ཟད་ཀྱང་མི་གསལ་བའི་ཕྱིར་རོ། །འོ་ན་ཁྱོད་རང་ཇི་ལྟར་འཆད་ཅེ་ན། འདི་ནི་བྱང་སེམས་སམ་ཐེག་ཆེན་གྱི་མིང་ཅན་སོ་ཐར་དངོས་ཡིན་ལ། དཀོན་བརྩེགས་ཀྱིས་ནི་དེ་ལས་ལྡོག་ཅིང་། དིང་སང་སོ་ཐར་ཐེག་ཆེན་ལུགས་ཤིག་བྱེད་ན་འདི་ལས་མ་འདས་ཏེ། སོ་ཐར་དངོས་ཀྱང་ཡིན་ཐེག་ཆེན་པས་ལེན་པ་ཡང་ཡིན་པ་འདི་ལས་མེད་དོ། །ཞེས་དང་། གཞན་ཡང་དེ་ཉིད་ལས། དེ་ཡང་སྤྱིར་འདུལ་བ་དང་མངོན་པའི་གཞུང་ལུགས་རྣམས་སུ་སྡོམ་པ་དང་། སྡོམ་པ་མིན་པ་དང་། བར་མ་སྟེ་གསུམ་དུ་བཤད་ལ། དེ་གསུམ་ནི་རིམ་པ་བཞིན་སྤང་བྱ་སྤོང་བའི་དང་། སྤང་བྱ་ལ་སྤྱོད་པའི་སེམས་པ་རྒྱུན་བརྟེན་པ་དང་། གཉིས་ཀའི་སེམས་པ་རྒྱུན་མི་བརྟན་པས་ཀུན་ནས་བསླང་བ་ངོ་བོ་ལུས་ངག་ཏུ་ཐོན་པའི་རིག་བྱེད་དང་དེས་བཞག་པའི་རིག་བྱེད་མ་ཡིན་པས་བསྡུས་པའི་གཟུགས་ཅན་ནོ། །དེས་ན་སྡེ་སྣོད་ཆེན་པོ་གཉིས་ནས་སྡོམ་པ་སེམས་པའི་སྟེང་དུ་བཞག་པ་གཏན་མེད་དེ། སྡེ་སྣོད་དེ་གཉིས་སུ་བྱང་སེམས་དང་གསང་སྔགས་ཀྱི་སྡོམ་པའི་རྣམ་གཞག་ཟུར་ཙམ་ཡང་མེད་པའི་ཕྱིར་རོ། །དེ་གསུམ་གྱི་ཐ་མ་གཉིས་ནི་མུ་སྟེགས་དང་ཡང་ཐུན་མོང་བ་ཡིན་ལ། གཅེར་བུ་པ་ལ་སྡོམ་པ་ལྔ་དང་བརྟུལ་ཞུགས་བཅུ་གསུམ་ལ་སོགས་པའི་མིང་ཡོད་ཀྱང་བར་མ་དགེ་བ་ཙམ་ཡིན་གྱི་སྡོམ་པ་ནི་མ་ཡིན་ཏེ། འཁོར་བ་ལས་གཏན་ཐར་པའི་ཐར་པ་མཚན་ཉིད་པ་(༧༤ན)
མེད་ལ། དེ་མེད་པས་དེ་ལ་སྐྱབས་སུ་འགྲོ་བ་མེད་ཅིང་། དེ་མེད་པས་སྡོམ་པའི་རྩ་བ་དང་རྟེན་མེད་པའི་ཕྱིར་ཏེ། དཔལ་ལྡན་ཟླ་བས། དེ་ནི་སྡོམ་བརྒྱད་རྩ་བ་ཡིན། །ཞེས་གསུངས་པའི་ཕྱིར་རོ། །དེས་ན་སྡོམ་པ་ནི་ནང་པ་སངས་རྒྱས་པ་ཁོ་ནའི་ཁྱད་ཆོས་དང་མཐའ་གཅིག་ཏུ་དགེ་བ་ཡིན་ལ། སྡོམ་མིན་མི་དགེ་བ་ཁོ་ན་དང་། བར་མ་ལ་ནི་དགེ་སྡིག་གཉིས་ཀ་ཡོད་ཀྱི་ལུང་མ་བསྟན་མེད་དེ། རྣམ་རིག་མིན་ལུང་བསྟན་མིན་མེད། །ཅེས་རིག་མིན་ལ་ལུང་མ་བསྟན་མི་སྲིད་པའི་ཕྱིར་རོ། །སྡོམ་པ་ནི་འདུལ་མངོན་གྱི་སྡེ་སྣོད་དུ། སོ་ཐར་དང་། བསམ་གཏན་དང་། ཟག་མེད་ཀྱི་སྡོམ་པ་སྟེ་གསུམ་དུ་གསུངས་ཤིང་། ཀུན་སློང་དང་ངོ་བོ་སྔར་བཤད་པ་བཞིན་དང་སྤང་བྱའི་གཙོ་བོ་ལུས་ངག་གིས་མི་དགེ་བ་བདུན་སྤོང་བའི་རྫས་གཟུགས་ཅན་བདུན་དང་། ཕྱི་མ་གཉིས་ལ་རེ་རེ། སྔ་མ་ལུས་དང་ཕྱི་མ་གཉིས་སེམས་ཀྱི་རྗེས་སུ་འབྲང་བས་ཤི་འཕོས་པས་གཏོང་བ་དང་མི་གཏོང་བའི་ཁྱད་པར་སོགས་ཁྱད་ཆོས་ཕྲ་མོ་མང་པོ་གསུངས་ཤིང་། གསུམ་ཀའང་སེམས་དང་ཡུལ་དང་དུས་དང་ཚད་དང་སྤང་བྱའི་ཡན་ལག་སྟེ་ངེས་པ་ལྔ་བྲལ་དགོས་པར་སྤྱིར་བཏང་དུ་འདྲ་བ་དང་། དམིགས་བསལ་སོ་ཐར་གྱི་དགེ་ཚུལ་མན་ཆད་ངག་གི་རྫུན་ལས་གཞན་གསུམ་ལྟུང་བ་འབྱུང་བའི་སྤང་བྱར་མི་བྱེད་པས་ཡན་ལག་ངེས་པ་དང་མ་བྲལ་ཡང་སྡོམ་པ་སྐྱེ་བའོ། །འདི་དག་གཟུགས་ཅན་དུ་བཤད་པ་འདི་བྱེ་བྲག་སྨྲ་བའི་རྟོག་བཏགས་ཡིན་གྱིས་མདོ་སྡེ་པས་དེ་ལེགས་པར་འགོག་པའི་ཕྱིར་ཐེག་(༧༤ན)
ཆེན་པ་རྣམས་ནི། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སྤྱོད་འཇུག་དང་། རྩ་བ་སེམས་པ་ལ་བརྟེན་དང་། །ཞེས་མདོ་སྡེ་རྒྱན་གྱི་སྦྱིན་པའི་ངོ་བོ་རྒྱུ་འབྲས་སོགས་ཀྱི་ནང་ནས་རྒྱུའི་སྐབས་སུ་བཤད་པ་སོགས་མང་བས་གཟུགས་ཅན་དུ་མི་བཞེད་དོ། །ཞེས་བོད་གངས་ཅན་པ་རྣམས་མགྲིན་གཅིག་ཏུ་སྒྲོག་གོ །འཐད་པ་ནི་མ་ཡིན་ཏེ། རྒྱན་དང་སྤྱོད་འཇུག་སོགས་ནས་ནི་བྱང་སེམས་ཀྱི་སྡོམ་པ་དང་ཚུལ་ཁྲིམས་ལ་དགོངས་ལ། སོ་ཐར་གྱི་དབང་དུ་བྱས་ན་མདོ་སྡེ་པས་ཀྱང་བྱེ་སྨྲའམ་རིག་མིན་སྒྲུབ་པའི་ལུང་རིགས་ལ་མ་ངེས་པ་བསྟན་ཅིང་། མ་བྱས་པའི་ལས་ལམ་སོགས་ནི་སེམས་རྒྱུད་འགྱུར་བའི་ཁྱད་པར་ལའང་གཞག་ཏུ་རུང་ཞེས་བསྟན་པ་ཡིན་གྱི་སྡོམ་པ་གཟུགས་ཅན་དུ་མི་འདོད་པ་ནི་མ་ཡིན་ཏེ། ཡིན་ན་འོག་ཏུ། འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །སངས་རྒྱས་ཀྱི་ནི་བཅས་པ་ཡང་། །ཞེས་སྡོམ་ལྟུང་གཉིས་ཀ་གཟུགས་ཅན་དུ་གསལ་བར་རྩ་བས་བཤད་པ་ལ་འགྲེལ་པར་དགག་པ་དངོས་དང་སྔར་གྱི་དགག་པ་ལ་ཁ་འཕང་ཙམ་ཞིག་བྱེད་རིགས་པ་ལས་མ་བྱས་པའི་ཕྱིར་རོ། །ཐེག་ཆེན་སེམས་ཙམ་གྱི་གཞུང་གི་གཙོ་བོ་ནི་མངོན་པ་ཀུན་བཏུས་དང་ཕུང་པོ་ལྔའི་རབ་བྱེད་ཡིན་ལ། སྔ་མར་སོ་ཐར་སྡོམ་པ་ལས་ཡང་དག་པར་བླངས་པ་ལས་བྱུང་བ་ཞེས་བཏགས་ནས་གཟུགས་ཕུང་གི་ནང་དུ་བསྡུས་ཤིང་། ཕྱི་མས་རིག་བྱེད་མིན་པའི་མཚན་ཉིད་གསལ་བར་བཤད་པའི་ཕྱིར་དང་། མདོ་སྡེ་རྒྱན་དུ་ཡང་། སེམས་པ་ཕར་ཕྱིན་གྱི་ངོ་(༧༥ན)
བོར་མ་བཤད་ཀྱི་རྒྱུར་བཤད་པའི་ཕྱིར་དང་། དབུ་མའི་གཞུང་ཟླ་གྲགས་ཀྱིས་མཛད་པའི་ཕུང་པོ་ལྔ་པར་ཡང་རིག་བྱེད་མིན་པའི་གཟུགས་གསལ་བར་བཤད་པས་དཔལ་མགོན་ཀླུ་སྒྲུབ་ཀྱིས་དགེ་སློང་སྡོམ་པ་དེ་ཡང་གཟུགས་ཅན་ལུས་ཀྱི་རྗེས་སུ་བྱེད་པ་སྐུ་ཚེ་བརྗེས་པའི་ཚེ་གཏོང་བར་བཞེད་པའི་ཕྱིར་རོ། །
རྣམ་པར་རིག་བྱེད་མ་ཡིན་པའི་གཟུགས་ཀྱི་ཁྱད་པར་བཤད་པ།
འོ་ན་རིག་བྱེད་མིན་པའི་གཟུགས་དེ་གཟུགས་ཀྱི་ཁྱད་པར་ཇི་ལྟ་བུ་ཞིག་ཡིན་ཞེ་ན། གཟུགས་ལ་གསུམ་སྟེ། གཟུགས་རགས་པ་མིག་གི་སྤྱོད་ཡུལ་དུ་འགྱུར་བ་གཟུགས་ཀྱི་སྐྱེ་མཆེད་ལྟ་བུ་བསྟན་ཡོད་ཐོགས་བཅས། འབྲིང་པོ་སྒྲ་དྲི་རོ་རེག་དབང་པོ་གཟུགས་ཅན་ལྔ་ལྟ་བུ་བསྟན་མེད་ཐོགས་བཅས། ཕྲ་བ་རིག་བྱེད་མིན་པའི་གཟུགས་ལྟ་བུ་བསྟན་མེད་ཐོགས་མེད་གསུམ་སྟེ། དེ་ལྟ་བུའི་རྣམ་དབྱེ་ཤེས་པ་ལ་ཆོས་མངོན་པའི་སྡེ་སྣོད་ལེགས་པར་ཤེས་དགོས་མོད་ཀྱི། བོད་ཀྱི་རྟོག་གེ་པ་རྣམས་ཀྱི་གཙུག་གི་ནོར་བུ་ཕྱ་པ་ཆོས་ཀྱི་སེང་གེས་ཀྱང་དངོས་པོ་ལ་བེམ་རིག་གང་རུང་གིས་ཁྱབ་པ་སོགས་ཀྱིས་གྲུབ་མཐའ་མང་དུ་བཞག་པ་ནི་དོན་འདི་ལ་སླ་བཅོས་ཧམ་ཤུར་མཛད་པའི་སྐྱོན་ཡིན་ནོ། །དེས་ན་འདུལ་བ་དང་མངོན་པ་མི་ཤེས་པས་སོ་ཐར་སྡོམ་པའི་བཤད་པ་བྱེད་པ་ནི་དམུས་ལོང་གིས་ཁ་དོག་དཀར་དམར་གྱི་བཤད་པ་བྱེད་པ་ལས་ཀྱང་མཚང་ཆེའོ། །དེར་མ་ཟད་གཞུང་ལུགས་འདི་དག་ལ་ལེགས་པར་སྦྱངས་པའི་ཆེན་པོ་དག་ལ་ཡང་འཁྲུལ་པ་ཅུང་ཟད་མཐོང་སྟེ། བུ་སྟོན་ཆོས་ཀྱི་རྒྱལ་པོས་མདོ་རྩའི་ཊཱིཀ་ཆེན་དུ། སོ་ཐར་སྡོམ་པའི་མཚན་ཉིད་ཆོས་འདི་པ་དག་གི་འདོད་(༧༥བ)
པ་ན་སྤྱད་པའི་ཚུལ་ཁྲིམས་ཞེས་བཞག་པ་ཡང་། ཆོས་འདི་པའི་ལེགས་སྨོན་དང་འཇིགས་སྐྱོབ་ཀྱི་ཚུལ་ཁྲིམས་སོ་ཐར་གྱི་སྡོམ་པར་ཐལ་ལ། འདོད་མི་ནུས་ཏེ། དེ་གཉིས་ངེས་འབྱུང་གི་བསམ་པ་ཉམས་པས་སོ་ཐར་སྡོམ་པར་མི་འགྱུར་ཞེས་ཉིད་ཀྱི་ལས་ཆོག་ཏུ་བྲིས་ཤིང་ལུང་རིགས་དུ་མས་ཀྱང་འགྲུབ་པའི་ཕྱིར་རོ། །དེས་ན་ཚུལ་ཁྲིམས་ཙམ་ལ་འཇིགས་སྐྱོབ་ལེགས་སྨོན་ངེས་འབྱུང་ཚུལ་ཁྲིམས་ཏེ་གསུམ་དུ་དབྱེར་རུང་ཀྱང་སྡོམ་པ་ལ་མི་རུང་སྟེ། དང་པོ་གཉིས་ཚུལ་ཁྲིམས་དང་ལེགས་སྤྱད་ཙམ་གྱི་སྡོམ་པ་མིན་པའི་ཕྱིར་རོ། །གཞན་ཡང་དེ་ཉིད་ལས། དེ་ལྟར་ན་སྡོམ་གསུམ་ཙམ་ལ་ནི་ངོ་བོ་གཅིག་པའི་དོགས་པ་འོང་དོན་མེད་དེ། གང་ནས་འབྱུང་བའི་ལུང་ཁུངས་འགལ། དེ་བཞིན་དུ་གང་ལས་ལེན་པའི་ཡུལ། གང་གིས་ལེན་པའི་གང་ཟག །ཇི་ལྟར་ལེན་པའི་ཆོ་ག །གང་གིས་གཏོང་བའི་རྩ་ལྟུང་། ནམ་གྱི་ཚེ་གཏོང་བའི་དུས་རྣམས་འགལ་བའི་ཕྱིར་རོ། །ཅི་ཏེ་ཁྱོད་ཀྱིས་བཤད་པའི་སོ་ཐར་ནི་ཉན་ཐོས་དང་ཐུན་མོང་ཡིན་ལ། དེ་དང་སྡོམ་པ་གོང་མ་གཉིས་འགལ་བར་རྗེ་བཙུན་ཆེན་པོའི་རྩ་ལྟུང་འཁྲུལ་སྤོང་དུ་ཡང་བཤད་པས་བདེན་དུ་ཆུག་ཀྱང་སོ་ཐར་ཙམ་པོ་ཞེས་དང་མི་འགལ་ཞིང་། སྡོམ་པ་གོང་མ་གཉིས་ནི་ཤིན་ཏུ་ཡང་མི་འགལ་བར་འཁྲུལ་སྤོང་དུ་བཤད་དོ་ཞེ་ན་བཤད་མོད། འདུལ་བ་ནས་མ་བཤད་པའི་སོ་ཐར་དེ་གང་ཡིན། ལུང་གང་ནས་བཤད། དེ་ནི་གཞན་ལ་གནོད་པ་གཞི་བཅས་སྤོང་བའི་ཚུལ་ཁྲིམས་ཙམ་ཡིན་ལ། ཉེ་བར་འཁོར་གྱིས་ཞུས་པའི་དཀོན་བརྩེགས་ལས་བྱང་ཆུབ་སེམས་(༧༦ན)
དཔའི་སོ་སོ་ཐར་པ་ཞེས་གསུངས་སོ་ཞེ་ན། འོ་ན་མུ་སྟེགས་གཅེར་བུ་པའི་རྒྱུད་ལ་ཡང་སོ་སོ་ཐར་པའི་སྡོམ་པ་ཡོད་པར་འགྱུར་ཏེ། དེ་ལ་གཞན་གྱི་ལུས་སྲོག་ལ་གཏན་མི་འཚེ་བའི་བརྟུལ་ཞུགས་ཡོད་ལ། བོད་ཀྱི་བོན་པོར་གྲགས་པ་ལ་ཡང་དེ་བཞིན་ནོ། །དེ་བཞིན་དུ་ལྷའི་དགེ་སློང་དང་བྱིས་པའི་དགེ་སློང་སྲིད་པར་ཐལ་འགྱུར་ནན་གྱིས་གཞུང་འདིར་གསུངས་པ་ཐམས་ཅད་འགོག་པའི་སྡོམ་གསུམ་རབ་དབྱེའི་བསྟན་འཛིན་རེ་མཚར། ཉེ་བར་འཁོར་གྱིས་ཞུས་པའི་མདོ་ལས་གསུངས་པའི་བྱང་སེམས་སོ་ཐར་གྱི་བྱང་སེམས་ཀྱི་སྡོམ་པ་ཡིན་ཏེ། འདོད་ཆགས་ལ་ལྟུང་བ་ཆུང་བ་དང་སླར་ཡང་བཅོས་སུ་ཡོད་པར་གསུངས་པ་སོགས་སྡོམ་གསུམ་ནང་ཚན་གྱི་སོ་ཐར་ལ་མེད་ཅིང་བྱང་སེམས་ལ་ཡོད་པའི་ཁྱད་པར་གྱི་ཆོས་དང་ལྡན་པར་གསུངས་པའི་ཕྱིར་རོ། །འདིས་ནི་སོ་ཐར་གྱི་སྒྲ་བཤད་དང་བྱེད་ལས་རགས་པ་ཚང་བ་ཙམ་ལ་དེའི་མིང་གིས་བཏགས་པ་ཙམ་མོ། །དེ་ལྟ་ན་ནི་གཞུང་ཤེར་ཕྱིན་དང་གཞན་དོན་རྗེས་དཔག་དང་མི་འབྱོར་ལྡན་ལ་ལྷ་དང་བླུན་པོ་ལ་བ་ལང་དུ་བཏགས་པ་སོགས་ཀྱང་དེ་དང་དེར་འགྱུར་བར་ཧ་ཅང་ཐལ་ལོ། །ཅིས་ཏེ་རྒྱུད་ཐ་དད་ཀྱི་སྡོམ་གསུམ་ངོ་བོ་ཐ་དད་ཀྱང་གང་ཟག་གཅིག་རྒྱུད་ཀྱི་རྣམས་ངོ་བོ་གཅིག་སྟེ། འཁྲུལ་སྤོང་དུ། འོ་ན་སྔར་སོ་ཐར་གྱི་སྡོམ་པ་དགེ་སློང་གི་བར་ཐོབ་པ་ཞིག་གིས་ཕྱིས་བྱང་ཆུབ་ཏུ་སེམས་བསྐྱེད་ནས་སླར་ཡང་དབང་ནོས་པར་གྱུར་ན་འདི་ལ་སྡོམ་པ་ཇི་ལྟར་ལྡན་ཞེ་ན། དགེ་སློང་གིས་བྱང་ཆུབ་ཏུ་སེམས་བསྐྱེད་པའི་ཚེ་སོ་སོ་ཐར་པ་ཐམས་(༧༦བ)
ཅད་བྱང་ཆུབ་སེམས་དཔའི་སྡོམ་པར་འགྱུར་ལ། དཀྱིལ་འཁོར་དུ་ཞུགས་པའི་ཚེ་ན་སྡོམ་པ་ཐམས་ཅད་ཀྱང་རིག་པ་འཛིན་པའི་སྡོམ་པ་ཞེས་བྱ་བ་ཡིན་ནོ། །དེ་སྐད་དུ་རྒྱུད་འབུམ་པའི་ལུང་དེ་ཁོ་ན་ཉིད་ཀྱི་ཡེ་ཤེས་གྲུབ་པ་ཞེས་བྱ་བ་ལས་འབྱུང་བ། རྡོ་ཡི་རིགས་ཀྱི་བྱེ་བྲག་ནི། །བཞུ་བས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཐམས་ཅད་གསེར་དུ་སྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ནས། །རྡོ་རྗེ་འཛིན་པ་ཞེས་བྱའོ། །ཞེས་གསུངས་སོ། དཔེའི་རྡོ་ནི་ཕལ་པ། ལྕགས་ཉན་ཐོས། ཟངས་རང་རྒྱལ། དངུལ་བྱང་སེམས། གསེར་ནི་རྡོ་རྗེ་ཐེག་པའི་བསླབ་པ་ཡིན་པར་མངོན་ནོ། །ཞེས་གསུངས་པའི་ཕྱིར་རོ་ཞེ་ན། གསུང་དེ་གསལ་མོད་ཀྱི་དགོངས་པ་མ་བླངས་པར་སྒྲ་དྲང་ཐད་དུ་ཁས་བླངས་ན་རིགས་ལམ་དུ་མི་ཚུད་དེ། དཔེའི་ལྕགས་སོགས་གསེར་འགྱུར་གྱི་རྩིས་གསེར་དུ་བསྒྱུར་ཟིན་པའི་གོང་བུ་གསེར་ཁོ་ན་ཡིན་ནམ་མ་ཡིན་ན་ཐམས་ཅད་གསེར་དུ་སྒྱུར་བར་བྱེད། ཅེས་པའི་ཚིག་ཉམས་ཤིང་དོན་ལ་སྡོམ་པ་ཐམས་ཅད་རིགས་འཛིན་སྡོམ་པ་ཡིན་ཞེས་གསལ་བར་དམ་བཅས་པའི་དཔེར་མི་རུང་། ཡིན་ན་དེ་ལ་ལྕགས་ཟངས་སོགས་མེད་པ་བཞིན་དུ་དོན་ལའང་སྔགས་སྡོམ་ཐོབ་པའི་ཚེ་གཞན་གཉིས་མེད་པར་འགྱུར་ཞིང་དེ་ལྟར་ན་སྡོམ་པ་གསུམ་ལྡན་ཇི་ལྟར་ཡིན། སྡོམ་པ་གསུམ་ལྡན་མ་ཡིན་ན། འོ་ན་ཁྱེད་ཀྱི་སོ་སོ་ཐར་པ་སྔོན་དུ་སོང་བའི་སྡོམ་པ་གསུམ་ཀ་ཡིན་ན་ཞེས་པའི་ལན་དུ་ཇི་(༧༧ན)
ལྟར་འགྲོ། གཞན་ཡང་དེ་འདྲའི་སྔགས་སྡོམ་ཅན་དེས་མི་ཚངས་སྤྱོད་དང་རྙེད་བཀུར་ལ་ལྷག་པར་ཆགས་པས་བདག་བསྟོད་གཞན་སྨོད་བྱས་པས་སོ་ཐར་དང་བྱང་སེམས་ཀྱི་རྩ་ལྟུང་མི་འབྱུང་བར་འགྱུར་ཏེ་སྡོམ་པ་དེ་གཉིས་མེད་པའི་ཕྱིར་དང་། གཞི་དེ་དག་སྔགས་སྡོམ་གྱི་རྩ་ལྟུང་དུ་ཡང་མི་རུང་བའི་ཕྱིར་རོ། །ཅིས་ཏེ་སྔགས་སྡོམ་དེ་སྡོམ་པ་གཞན་གཉིས་ཀྱང་ཡིན་ནོ་ཞེ་ན། དགེ་སློང་བྱང་ཆུབ་ཏུ་སེམས་བསྐྱེད་པས་སོ་ཐར་བྱང་སེམས་ཀྱི་སྡོམ་པར་འགྱུར་ཞེས་སོགས་དང་དངོས་སུ་འགལ་ཏེ་མ་གྱུར་པའི་ཕྱིར་རོ། །གཞན་ཡང་དེ་འདྲའི་སྔགས་སྡོམ་དེ་ཆོས་ཅན། མི་ཚངས་སྤྱོད་བྱས་པས་གཏོང་བར་འགྱུར་ཏེ་སོ་ཐར་སྡོམ་པ་ཡིན་པའི་ཕྱིར། བྱང་སེམས་ཀྱི་རྩ་ལྟུང་གིས་གཏོང་བར་འགྱུར་ཏེ་བྱང་སེམས་ཀྱི་སྡོམ་པ་ཡིན་པའི་ཕྱིར། ཁྱོད་རྩ་ལྟུང་གིས་བཏང་ན་དེ་གཉིས་བཏང་བར་འགྱུར་ཏེ། ཁྱོད་སྡོམ་པ་དེ་གཉིས་ཡིན་པའི་ཕྱིར། གནས་འགྱུར་དུ་འདོད་པའང་མི་འཐད་པར་འགྱུར་ཏེ། མ་གྱུར་པར་རང་སོར་གནས་པའི་ཕྱིར་རོ། །འདིའི་སོ་ཐར་ནི་ཉན་ཐོས་དང་ཐུན་མོང་བའི་སོ་ཐར་མིན་ནོ་ཞེ་ན། ཉན་ཐོས་དང་ཐུན་མོང་བ་ཞེས་པའི་ཚིག་ལ་ནུས་པ་མེད་པར་འགྱུར་ཏེ། ཉན་ཐོས་དང་ཐུན་མོང་བའི་སོ་ཐར་མི་སྲིད་པའི་ཕྱིར་ཏེ། བྱང་སེམས་ཀྱི་སྡོམ་པ་ཐོབ་ནས་དེ་ལྡོག་པའི་སྒོ་ནས་བྱང་སེམས་ཀྱི་རྒྱུད་ལ་དེ་འབྱུང་མི་སྲིད་པའི་ཕྱིར་རོ། །དེ་ལྟར་ན་རྗེ་བཙུན་ཆེན་པོའི་གསུང་འདི་དག་ནི་ཁ་བ་ཅན་ན་བསྟན་པའི་རྩ་བ་སོ་སོ་ཐར་པ་ལ་ཤིན་ཏུ་མི་མོས་པས་རབ་ཏུ་འབྱིན་མི་ནུས་པར་མ་ཟད། དགེ་བསྙེན་(༧༧བ)
གྱི་སྡོམ་པ་ཙམ་ཡང་མི་འཛིན་པར་རྡོ་རྗེ་འཛིན་པ་ཆེན་པོར་རློམ་པ་མང་དུ་བྱུང་ཞིང་། འབྱུང་བ་རྣམས་སྤྲོ་བསྲིང་ཞིང་ཞུམ་པ་བསལ་བར་བྱ་བའི་ཕྱིར་དུ་སྡོམ་པ་གསུམ་ལྡན་ཡིན་ནོ་ཞེས་དགོངས་ཏེ་གསུངས་པའི་དྲང་དོན་ཡིན་ནོ་ཞེས་བརྗོད་པར་བྱའོ། །ཡང་གཞུང་འདིའི་རྣམ་བཤད་རྒྱས་པའི་ཐོག་མ་བྱེད་པ་པོ་དག་གིས། སྡོམ་གསུམ་ངོ་བོ་གཅིག་པའི་སྒྲུབ་བྱེད་དང་ཐ་དད་ལ་གནོད་བྱེད་འགོད་པར་འདོད་ནས་སྡོམ་གསུམ་གྱི་ངོ་བོ་བེམ་པོ་ཡིན་ནམ་རིག་པ་ཡིན། དང་པོ་མི་རིགས་ཏེ། མཁས་མཆོག་དབྱིག་གཉེན་གྱིས་བཀག་པའི་ཕྱིར་རོ། །གཉིས་པ་ལྟར་ན་སེམས་བྱུང་ངམ་སེམས་པ་ཡིན་པས་གཙོ་བོ་རྣམ་ཤེས་ཀྱི་འཁོར་དུ་འབྱུང་དགོས་ལ། དེ་ཡང་དབང་ཤེས་ལྔའི་འཁོར་དུ་མི་འབྱུང་སྟེ་དབང་ཤེས་དགེ་བ་མེད་པའི་ཕྱིར། ཀུན་གཞི་ཉོན་ཡིད་ནི་ལུང་མ་བསྟན་ཡིན་པས་མི་འབྱུང་བའི་ཕྱིར་ཡིད་ཀྱི་རྣམ་ཤེས་ལས་མ་འདས་ལ། རྣམ་ཤེས་གཅིག་གི་འཁོར་དུ་སེམས་པ་གསུམ་བྱུང་ན་རྫས་མཚུངས་ཉམས་པར་འགྱུར། གལ་ཏེ་ས་བོན་ལ་འཇོག་ནའང་དེ་བེམ་རིག་གང་རུང་ལས་མ་འདས་པས་སྔར་གྱི་ཉེས་པ་ལས་མ་གྲོལ་ལོ་ཞེས་བཀག་ན་རྗེ་བཙུན་ཆེན་པོའི་དངོས་བསྟན་ཇི་བཞིན་ཁས་བླངས་པ་དང་། ཕྱིས་ཀྱི་མཁས་པར་གྲགས་པ་དག་ཀྱང་སེམས་པ་ངོ་བོ་དང་འཛིན་སྟངས་མི་འདྲ་བ་གསུམ་དང་གང་ཟག་གཅིག་རྒྱུད་ལ་ཅིག་ཅར་འབྱུང་མི་སྲིད་པས་སྡོམ་གསུམ་ནི་ངོ་བོ་གཅིག་པ་ལས་མ་འདས་སོ་ཞེས་འཁོར་མང་པོའི་དབུས་ན་གད་བརྒྱངས་དང་བཅས་ཏེ་སྒྲོག་གོ་ཞེས་བསྒྲག་གོ །(༧༨ན)
འདི་དག་ཀྱང་མི་འཐད་དེ། མཁས་མཆོག་དབྱིག་གཉེན་གྱིས་བཀག་པ་མ་གྲུབ་སྟེ། འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་ཁྲིམས་རྣམ་གཉིས་སོ། །ཞེས་གཟུགས་ཅན་དུ་གསལ་བར་གསུངས་པའི་ཕྱིར་རོ། །དབང་ཤེས་ལ་དགེ་བ་མི་སྲིད་ཅེས་སྨྲས་པ་ནི། ཆོས་མངོན་པ་གཏན་མི་ཤེས་པའམ་ཅུང་ཟད་ཤེས་ཀྱང་བརྗེད་པར་གསལ་ཏེ། །ཐོགས་དང་བཅས་པ་གཟུགས་ཅན་བཅུ། །ལུང་མ་བསྟན་བརྒྱད་དེ་དག་ཉིད། །གཟུགས་སྒྲ་མ་གཏོགས་གཞན་རྣམས་གསུམ། །ཞེས་དབང་པོ་གཟུགས་ཅན་ལྔ་དང་ཕྱིའི་གཟུགས་སྒྲ་བོར་བའི་གཟུགས་ཅན་གྱི་ཁམས་གསུམ་སྟེ་བརྒྱད་པོ་མཐའ་གཅིག་ཏུ་ལུང་མ་བསྟན་ཡིན་གྱི་གཞན་ཁམས་བཅུ་ཀ་ལ་དགེ་སྡིག་ལུང་མ་བསྟན་གསུམ་ཀ་ཡོད་དོ། །ཞེས་དབྱིག་གཉེན་གྱིས་གསལ་བར་གསུངས་པ་བཞིན་ཐོགས་མེད་ཀྱིས་ཀྱང་ལེགས་པར་གསུངས་པའི་ཕྱིར་རོ། །ས་བོན་བེམ་རིག་གང་རུང་དུ་འདོད་པ་ཡང་ཆོས་མངོན་པ་ལས་ཕུང་པོ་ལྔ་གསུངས་པའི་གཟུགས་ཕུང་བེམ་པོ་དང་། ཚོར་འདུ་རྣམ་ཤེས་གསུམ་རིག་པ་དང་། འདུ་བྱེད་ཕུང་པོའི་ཕྱོགས་གཅིག་སེམས་བྱུང་རྣམ་རིག་པ་ཡིན་ཀྱང་ཕྱོགས་གཅིག་ལྡན་མིན་འདུ་བྱེད་མངོན་པ་གོང་མ་ལས་ཉི་ཤུ་རྩ་གསུམ་དང་འོག་མར་བཅུ་བཞི་སོགས་བཤད་པ་རྣམས་གཟུགས་སེམས་གང་ཡང་མིན་པའི་འདུས་བྱས་སུ་གསུངས་པ་རྣམས་རྒྱུས་མེད་པ་དང་། ཚད་རྐྱང་པ་རང་ལ་གྲགས་པའི་དངོས་པོ་བཙན་པོ་དེ་བེམ་རིག་གང་ཡིན་ཡང་དཔྱད་པ་ཅུང་ཟད་ཀྱང་མ་བྱས་པར་བསྡུས་རྙིང་རྣམས་སུ་དངོས་(༧༨བ)
པོ་ལ་བེམས་པོ་དང་རིག་པ་གཉིས་ཞེས་པ་ཙམ་སེམས་ལ་ཡོད་པའི་ཆོས་སྐད་དོ། །གཞན་ཡང་སྔ་ཕྱི་ཐམས་ཅད་ཀྱིས་སྡོམ་པ་ལ་སེམས་མངོན་གྱུར་གྱིས་ཁྱབ་པར་བཟུང་བས་ནོངས་ཏེ། དེ་ལྟ་ན་གཉིད་འཐུག་པོའི་ཚེ་སྡོམ་མེད་དུ་འགྱུར་ཞིང་དེ་ལྟ་ན་གཉིད་ཀྱིས་བསྐྱེད་པའི་ལྟུང་བ་མི་སྲིད་པ་དང་། གཉིད་སད་པའི་ཚེ་སྡོམ་པ་གསར་དུ་སྐྱེ་ན་སྡོམ་པ་བསྐྱེད་ཆོག་རྒྱལ་བས་མ་གསུངས་པ་དུ་མ་ཁས་ལེན་དགོས་པར་འགྱུར་བས་འདུལ་བ་མངོན་པ་མ་ཚོར་བར་སྡོམ་པའི་བཤད་པ་བག་ཡངས་སུ་བྱེད་པ་ལ་ཉན་མཁན་དང་རྗེས་འབྲངས་མང་དུ་འབྱུང་བ་ནི་རྒྱལ་བའི་བསྟན་པ་བསྡུས་པར་གསལ་ལོ། །དེ་ན་སེམས་པ་རིགས་མི་མཐུན་ཅིག་ཅར་དུ་འབྱུང་དགོས་པའི་ལུང་རིགས་གཉིས་ཀ་མེད་ཅིང་ངེས་པར་ཤེས་པ་རྣམས་ཀྱི་བཅུག་ཡིན་ཀྱང་མ་བྱས་ལ། གཉིད་འཐུག་སོགས་ཀྱི་ཚེ་ཡང་སོ་ཐར་གྱི་ནི་རིག་བྱེད་མ་ཡིན་པ་བརྟན་པར་ཡོད་ཅིང་གཞན་གཉིས་ཀྱི་ཡང་སྤང་བྱ་གཟུགས་ཅན་སྤོང་བ་རྣམས་དེ་དང་འདྲ་ལ། ཡིད་ཀྱིས་སྤོང་བ་ནི། སེམས་པ་དང་དེས་བཞག་པའི་ས་བོན་དང་ཐོབ་པ་དབང་དང་རྒྱུན་ཆགས་སོགས་ཡོད་པས་གཏོང་རྒྱུའི་རྩ་ལྟུང་སོགས་མ་བྱུང་ན་ཚེ་ཇི་སྲིད་འཚོའི་བར་དུ། སྡོམ་པ་གསུམ་ལྡན་ཉེས་ལྟུང་དྲི་མ་མེད། །དགེ་སྦྱོང་མཆོག་གྱུར་རྒྱལ་སྲས་རྡོ་རྗེ་འཛིན། །ཞེས་པ་རྟོགས་པའི་བསྟན་པ་མཐའ་དག་གི་སྙིང་པོ་སོ་སོ་སྐྱེ་བོའི་དུས་ནས་རྫོགས་པར་འཛིན་དུ་ཡོད་པས་ཤིན་ཏུ་སྤྲོ་བ་འཕེལ་ཞིང་། དེས་དྲངས་པའི་དོན་གཉེར་དང་བླང་དོར་ལ་འབད་པ་དྲག་པོ་བསྐྱེད་པར་བྱའོ་གསུངས་པ་འདི་རྣམས་ཚིག་དོན་གཉིས་ཀ་ནུས་པ་ཆེ་བར་(༧༩ན)
སྣང་བས་སྒྲ་ཟུར་མ་ཉམས་པར་བྲིས་སོ། །དེར་མ་ཟད་སྡོམ་པ་གནས་འགྱུར་མི་འགྱུར་གྱི་སྐོར་ལ་མཁས་པ་གཞན་དག་གི་གསུང་འཕྲོས་ཀྱང་མང་བས། མངོན་པ་མཛོད་ལས། །ཐ་དད་དེ་དག་འགལ་བ་མེད། །ཅེས་གསུངས་པའི་དགོངས་དོན་ལྟར། ས་བཟང་མ་ཏི་པཎ་ཆེན་གྱིས། དེ་ལ་སྡོམ་པ་གསུམ་པོ་དེ་དག་ནི་གང་ཟག་གཅིག་གི་རྒྱུད་ལ་ཡོད་པའི་ཚེ་ནའང་ཐ་དད་ཁོ་ནར་ཡོད་དེ། གཞན་དུ་ན་དགེ་སློང་གི་སྡོམ་པ་བཏང་བས་གསུམ་ཅར་གཏོང་བར་འགྱུར་བ་ལས། དགེ་སློང་བཏང་ནས་དགེ་ཚུལ་དང་དེའང་བཏང་ནས་དགེ་བསྙེན་དུ་འགྱུར་བར་གསུངས་པའི་ཕྱིར་རོ། །འོན་ཀྱང་དེ་དག་འགལ་བ་མེད་པས་བསྟན་པ་ལ་རིམ་གྱིས་ཞུགས་པའི་དགེ་སློང་གི་རྒྱུད་ལ་དེ་གསུམ་གྱི་རིག་བྱེད་མ་ཡིན་པ་རྣམས་ནི་སོ་སོར་ཡོད་ཅེས་སོ། །དེ་ལྟ་ན་དགེ་བསྙེན་དང་དགེ་ཚུལ་ཡང་ཡིན་པར་འགྱུར་ཞེ་ན། ཡིད་སྨོན་གྱི་དགེ་སློང་ཞེས་བརྗོད་པ་ནི་ཡོན་ཏན་གཙོ་བོའི་སྒོ་ནས་བརྗོད་པ་ཡིན་ལ། དེས་ན་དགེ་སློང་ཞེས་བརྗོད་ཅིང་དེར་འཛིན་པའི་བསམ་པས་ཀུན་ནས་སློང་བའི་ཕྱིར་རིག་བྱེད་ནི་དགེ་སློང་གི་ཁོ་ན་ཡོད་པར་འཆད་དོ། །ཞེས་དང་། བུ་སྟོན་རིན་པོ་ཆེའི་འདུལ་ཊཱིཀ་ཏུ། འོ་ན་གང་ཟག་གིས་སྡོམ་པ་རིམ་ཅན་དུ་བླངས་པ་ན། སྤོང་བའི་འཕེལ་བ་དང་ལྡན་པ་དགེ་བསྙེན་གྱི་ལྔའི་སྟེང་དུ་དགེ་ཚུལ་གྱི་ལྷག་པོ་ལྔ་བསྣན་པས་བཅུར་སོང་བ་ལྟ་བུ་ཡིན། འོ་ན་ཐམས་ཅད་ཐ་དད་ཅེ་ན། དོང་ཙེ་བརྩེགས་པ་ལྟར་རྫས་ཐ་དད་མ་འདྲེས་པར་ཡོད་དེ། སྲོག་གཅོད་སྤོངས་བ་གསུམ་ནས་ཆང་སྤོང་བ་གསུམ་(༧༩བ)
གྱི་བར་མཚན་ཉིད་ཐ་དད་པ་སྐྱེ་སྟེ། ལྷག་མ་གར་སོགས་སྤོང་བའང་དེ་དང་འདྲའོ། །འོ་ན་ཁྱད་པར་ཅི་ཡོད་ཅེ་ན། གཞིའི་ཁྱད་པར་ལས་ཁྱད་ཡོད་དེ། བསླབ་པའི་གཞི་ཆེས་མང་པོ་དག་ལེན་པར་འདོད་པ་སྟེ་དེ་ལྟར་རྒྱགས་པ་དང་བག་མེད་པའི་གནས་ཆེན་པོ་མང་པོ་ལས་ལོག་པ་དང་། སྲོག་གཅོད་པ་ལ་སོགས་པའི་གཞི་དུས་མ་ཡིན་པའི་ཁ་ཟས་ལ་སོགས་པ་ལས་ལོག་པར་འགྱུར་བ་དང་། སྤོང་བའི་གཞི་རྣམས་ལ་ཡང་འཇུག་པར་འགྱུར་བས་ཁྱད་ཡོད་དོ། །དེ་ལྟ་མ་ཡིན་པ་རྫས་གཅིག་ན་དགེ་སློང་གི་སྡོམ་པ་བཏང་བས་གསུམ་ཅར་བཏང་བར་ཐལ་ལོ། །དེས་ན་དེ་དག་རྒྱུད་གཅིག་ལ་ལྷན་ཅིག་གནས་པ་ཡིན་གྱིས། སྡོམ་པ་ཕྱི་མ་བླངས་པས་སྔ་མ་གཏོང་བ་མ་ཡིན་ནོ། །ཞེས་དང་། མངོན་པའི་འགྲེལ་པ་མངོན་པའི་རྒྱན་ཞེས་པ་ལས་ཀྱང་། དགེ་བསྙེན་ལ་སོགས་པའི་སྡོམ་པ་དེ་དག་ཐ་དད་པ་ཡིན་གྱི་སྔ་མ་སྔ་མ་གནས་འགྱུར་བ་ཕྱི་མ་ཕྱི་མའམ་གཅིག་ཏུ་ཡོད་པ་ནི་མ་ཡིན་ཏེ། ཞེས་སོགས་དང་། འོ་ན་དགེ་སློང་དེ་ཉིད་དགེ་ཚུལ་དང་དགེ་བསྙེན་དུའང་འགྱུར་རོ་ཞེ་ན། དེ་ལྟ་ནི་མིན་མོད་ཀྱི། དགེ་སློང་ཞེས་བརྗོད་པ་ནི་གཙོ་ཆེ་བའི་ཕྱིར་ཏེ། དགྲ་བཅོམ་པ་དགེ་སློང་ཡིན་ཡང་དགྲ་བཅོམ་པ་ཞེས་བརྗོད་པའི་ཕྱིར་རོ། །ཞེས་གསུངས་པས། རྫས་ཐ་དད་དུ་གནས་པ་ལ་ཐེག་དམན་བཞེད་པ་མི་མཐུན་པ་མ་བྱུང་ཞིང་ཞེས་དང་། མཁས་གྲུབ་རིན་པོ་ཆེའི་སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར་ལས། ཁ་ཅིག་སྡོམ་པ་གོང་མ་གོང་མ་ཐོབ་པ་ན་དེའི་རྒྱུད་སྔར་ཡོད་ཀྱི་སྡོམ་པ་འོག་མ་འོག་(༨༠ན)
མ་ཡང་གོང་མ་གོང་མར་གནས་འགྱུར་འགྲོ་སྟེ། དཔེར་ན་དགེ་སློང་གིས་བྱང་སེམས་ཀྱི་སྡོམ་པ་མ་བླངས་གོང་དེའི་རྒྱུད་ཀྱི་དགེ་སློང་གི་སྡོམ་པ་དེ་སོ་སོ་ཐར་པའི་སྡོམ་པར་ཡོད་པ་ལ་བྱང་སེམས་ཀྱི་སྡོམ་པ་ཐོབ་པ་ན་དེ་སོ་སོ་ཐར་པའི་སྡོམ་པ་ལས་གནས་འགྱུར་ནས་བྱང་སེམས་ཀྱི་སྡོམ་པར་གནས་འགྱུར་བ་ལྟ་བུའོ། །བྱང་སེམས་ཀྱི་སྡོམ་ལྡན་གྱིས་སྔགས་སྡོམ་ཐོབ་པ་ན་གནས་འགྱུར་བའི་ཚུལ་ཡང་དེ་བཞིན་ནོ་ཞེས་ཟེར་རོ། །ཆེས་མི་རིགས་ཏེ་དེ་ལྟར་ན་དགེ་སློང་བྱང་ཆུབ་སེམས་དཔའ་སྔགས་སྡོམ་ཐོབ་པའི་ཚེ་དེའི་རྒྱུད་ཀྱི་སྔར་ཡོདཀྱི་སྡོམ་པ་གཉིས་པོ་གནས་འགྱུར་ནས་སྔགས་སྡོམ་འབའ་ཞིག་ལ་སོང་བའི་ཕྱིར་སྡོམ་པ་གསུམ་ལྡན་མི་སྲིད་པར་འགྱུར་བ་དང་གོང་མ་ཐོབ་པའི་དབང་གིས་འོག་མ་གཏོང་ན་གོང་མ་འོག་མའི་གཏོང་རྒྱུར་ཁས་ལེན་པ་ལས་ཐ་ཆད་པ་ཅི་ཞིག་ཡོད། འདི་ལ་གནོད་བྱེད་གོང་དུ་ཡང་བརྗོད་ཟིན་ཏོ། །གོང་མ་ཐོབ་པས་འོག་མ་གནས་འགྱུར་ཀྱང་མི་གཏོང་ན་དགེ་སློང་གིས་བྱང་སེམས་ཀྱི་སྡོམ་པ་ཐོབ་པའི་རྒྱུད་ཀྱི་དགེ་སློང་གི་སྡོམ་པ་དེ་ཚེ་འཕོས་པས་ཀྱང་མི་གཏོང་དགོས་པས་ལྷ་དང་དུད་འགྲོའི་དགེ་སློང་སོགས་ཡོད་པར་འགྱུར་བ་དང་། དགེ་སློང་གིས་སྔགས་སྡོམ་ཐོབ་པའི་ཚེ་དེའི་རྒྱུད་ཀྱི་དགེ་སློང་གི་སྡོམ་པ་དེ་སོ་ཐར་གྱི་སྡོམ་པ་མ་ཡིན་པར་སྔགས་སྡོམ་འབའ་ཞིག་ཡིན་པས། བུད་མེད་ལ་སྨོད་ན་དགེ་སློང་གི་སྡོམ་པའི་གཏོང་རྒྱུར་འགྲོ་བ་ཡང་འདོད་དགོས་པའི་ཕྱིར་རོ། །སྡོམ་གསུམ་འོད་འཕྲེང་ལས། གོང་མ་གོང་མ་ཐོབ་པ་ན་སྔ་མ་སྔ་མ་ཟིལ་གྱིས་(༨༠བ)
མནན་ནས་ཀུན་གཞི་ལ་བག་ལ་ཉལ་གྱི་ཚུལ་དུ་གནས་ཀྱི་མངོན་འགྱུར་དུ་མི་གནས་ཏེ། དཔེར་ན་མཁའ་ལ་སྐར་ཟླ་ཉི་གསུམ་རིམ་ཅན་གྱིས་ཤར་བའི་ཚེ། ཕྱི་མ་ཕྱི་མའི་འོད་ཀྱིས་སྔ་མ་སྔ་མའི་འོད་ཡོད་ཀྱང་ཟིལ་གྱིས་མནན་ནས་མི་མངོན་པ་དང་འདྲའོ་ཞེས་བཤད་དོ། །དེའང་ཆེས་འཐད་པ་མ་ཡིན་ཏེ། དགེ་སློང་གི་སྡོམ་པ་མངོན་གྱུར་མེད་ཀྱང་ཀུན་གཞི་ལ་སྡོམ་པ་དེའི་བག་ལ་ཉལ་ཡོད་པ་ཙམ་གྱིས་དགེ་སློང་གི་གོ་ཆོད་ན། སེམས་ཅན་ཐམས་ཅད་དགེ་སློང་དུ་ཐལ། ཤེས་རྒྱུད་ལ་དགེ་སློང་གི་སྡོམ་པའི་བག་ཆགས་ཡོད་པའི་ཕྱིར། ཞེས་བརྗོད་ན། ལན་ཅི་ཡོད་སོམས་ཤིག །གོ་མི་ཆོད་ན་དགེ་སློང་རྡོ་རྗེ་འཛིན་པ་མི་སྲིད་པར་ཐལ་བ་བཟློག་ཏུ་ཅི་ཞིག་ཡོད། དཔེ་དོན་ཡང་གཏན་མི་མཚུངས་ཏེ། ཉི་མ་འཆར་བ་ལ་སྔོན་དུ་ཟླ་བ་འཆར་ག་ལ་དགོས། སྔགས་སྡོམ་ཐོབ་པ་ལ་དེའི་སྔོན་དུ་ངེས་པར་བྱང་སེམས་ཀྱི་སྡོམ་པ་ཐོབ་དགོས་པའི་ཕྱིར་དང་། ཉི་མའི་འོད་ཟེར་ཡོད་པའི་ཚེ་ཉི་མའི་འོད་ལས་ལོགས་པའི་ཟླ་བ་དང་སྐར་མའི་འོད་སྒོས་སུ་བསྒྲིབ་པའི་མུན་པ་ཐུན་མོང་མ་ཡིན་པ་རྡུལ་ཙམ་ཡང་མི་སྲིད་ལ། གང་ཟག་གཅིག་གི་རྒྱུད་ལ་སྡོམ་པ་གོང་མ་ཡོད་པའི་ཚེ་ཡང་གོང་མའི་བཅས་པ་ལས་ལོགས་པའི་འོག་མའི་བཅས་པ་དང་འགལ་བའི་ཐུན་མོང་མ་ཡིན་པའི་ལྟུང་བ་དུ་མ་ཞིག་སྲིད་པའི་ཕྱིར་རོ། །ཡང་ཁ་ཅིག །གང་ཟག་གཅིག་གི་རྒྱུད་ཀྱི་སྡོམ་གསུམ་ངོ་བོ་གཅིག་ཅིང་ལྡོག་པ་ཐ་དད་ལ། གོང་མ་གོང་མ་ཁྱབ་བྱེད་དང་འོག་མ་འོག་མ་ཁྱབ་བྱ་ཡིན་ནོ་ཞེས་ཟེར་རོ། །དེ་ལྟར་ན་ཁྱབ་བྱེད་བཀག་ན་ཁྱབ་བྱ་ཁེགས་དགོས་(༨༡ན)
པའི་ཕྱིར། སྡོམ་པ་གསུམ་ལྡན་གྱི་གང་ཟག་ལ་སྡོམ་པ་གོང་མའི་གཏོང་རྒྱུ་ཡིན་ན་འོག་མའི་གཏོང་རྒྱུ་ཡིན་པར་ཁྱབ་པར་ཐལ་བའི་ཕྱིར་དང་། ཁྱབ་བྱ་ཡོད་ན་ཁྱབ་བྱེད་ཡོད་དགོས་པས་སྡོམ་པ་གསུམ་ལྡན་གྱི་གང་ཟག་དེས་ཇི་སྲིད་སོ་ཐར་གྱི་སྡོམ་པ་ཡོད་ཀྱི་རིང་ལ་སྡོམ་པ་གོང་མ་གཉིས་ཀྱང་ཡོད་པས་ཁྱབ་པར་འགྱུར་བའི་ཕྱིར་ཤིན་ཏུ་མི་འཐད་དོ། །འཐད་པའི་ཕྱོགས་ནི་འདི་ཡིན་ནོ། །སྡོམ་པ་གསུམ་ལྡན་གྱི་གང་ཟག་གཅིག་གི་རྒྱུད་ཀྱི་སྡོམ་གསུམ་རང་རང་གི་ཐོག་མའི་རྒྱུ་ཚོགས། ཚོགས་པ་རིགས་མི་མཐུན་གྱི་ཆོ་ག་རིགས་ཐ་དད་ལས་སྐྱེས་པའི་ཐོབ་ཚུལ་སོ་སོར་ངེས་ཤིང་། དེའི་དབང་གིས་མཐར་གཏོང་བའི་རྒྱུ་ཡང་སོ་སོར་ངེས་པ་ཡིན་ལ། འོན་ཀྱང་གནས་སྐབས་སུ་སྡོམ་པ་འོག་མ་བསྲུང་བ་ཡང་གོང་མའི་ཀུན་སློང་ཁྱད་པར་ཅན་གྱིས་ཟིན་པའི་རྐྱེན་གྱིས་གནས་སྐབས་ཀྱི་རྐྱེན་དེ་དང་མ་བྲལ་གྱི་རིང་ལ་འོག་མ་ཡང་གོང་མའི་ཡན་ལག་ཏུ་འགྱུར་བ་ཡིན་གྱི། གྲུབ་སྡེ་དབྱེར་མེད་དང་རིགས་རྒྱུན་ཕན་ཚུན་གཅིག་བཀག་ན་ཅིག་ཤོས་ཁེགས་པའི་ཡན་ལག་ཏུ་འགྱུར་བ་མ་ཡིན་ཏེ། དཔེར་ན་སྣོད་དངས་ཤིང་དྲི་མ་མེད་པར་ཆུ་ཤིན་ཏུ་དངས་པའི་ནང་དུ་རིན་པོ་ཆེ་མར་གད་ལ་སོགས་པ་བཅུག་ན་དེ་སྲིད་དུ་ཆུའི་མདོག་ཀྱང་རིན་པོ་ཆེའི་ཁ་དོག་གི་ཡན་ལག་འགྱུར་མོད་ཀྱི། ཆུ་དང་རིན་པོ་ཆེ་དེ་དག་ཕན་ཚུན་གཅིག་བཀག་ཀྱང་ཅིག་ཤོས་མི་ཁེགས་པ་བཞིན་ནོ། །དེས་ན་བྱང་ས་ལས། སོ་སོ་ཐར་པའི་སྡོམ་པ་ནི་བྱང་ཆུབ་སེམས་དཔའི་སྡོམ་པའི་ཡན་ལག་ཏུ་འགྱུར་བ་ཡིན་ཏེ་ཕྱོགས་གཅིག་ཉིད་དུ་རིག་(༨༡བ)
པར་བྱའོ། །ཞེས་གསུངས་པ་དང་། ཚུལ་ཁྲིམས་ལེའུའི་རྣམ་བཤད་ཀྱི་དོན་ཡང་དེ་ལྟར་ཤེས་པར་བྱའོ། །ཞེས་སྔ་མ་རྣམས་ལ་དགག་བཞག་དང་བཅས་རྒྱ་ཆེར་གསུངས། དེ་ཡང་བུ་སྟོན་རིན་པོ་ཆེའི་བཞེད་པར་ཚིགས་གསུམ་རིམ་གྱིས་ནོས་པའི་སྡོམ་པ་གང་ཟག་གཅིག་གི་ལུས་ལ་རྒྱན་སོ་སོར་བཏགས་པ་དང་འདྲ་ཚུལ། སྟག་ཚང་ལོ་ཙཱ་བ་དང་པཎ་ཆེན་བསོད་ནམས་གྲགས་པ་སོགས་མཁས་པ་མང་པོ་དོང་ཙེ་བརྩེགས་པ་ལྟར་ཡོད་པ་དང་། བི་བྷུ་ཏི་ཙནྡྲས་ནམ་མཁའ་ལ་ཉི་ཟླ་སྐར་གསུམ་དུས་གཅིག་ཏུ་ཤར་ཚེ་གཞན་གཉིས་མེད་པ་མིན་ཀྱང་ཉི་མའི་འོད་ཀྱི་ཟིལ་གྱིས་མནན་ནས་བག་ལ་ཞ་བ་བཞིན་དུ་སྔགས་སྡོམ་གྱིས་བྱང་སེམས་སོ་ཐར་ཟིལ་གྱིས་གནོན་པར་བཤད་པའི་ཤུགས་ལ་སོ་ཐར་ལ་ཡང་དེ་ལྟར་བཞེད་པས། ཚིགས་གསུམ་གང་ཟག་གཅིག་གི་རྒྱུད་ལ་སོ་སོར་ཡོད་ཀྱང་བསྙེན་རྫོགས་ཀྱི་སྡོམ་པ་གཙོ་ཆེ་བས་དེས་གཞན་གཉིས་དངོས་སུ་མི་མངོན་པར་འཆད་པ་འདུལ་བ་རང་སྐད་སྨྲ་བ་ཕལ་ཆེར་བཞེད་མོད། འོན་ཀྱང་གང་ཟག་གཅིག་གི་རྣ་བ་གཡས་གཡོན་ལ་རྒྱན་རེ་བཏགས་པའི་གཡས་ཀྱི་རྒྱན་བོར་ཡང་གཡོན་གྱི་རྒྱན་འབོར་བའི་ངེས་པ་མེད་པ་བཞིན། ཚིགས་གསུམ་རིམ་གྱིས་ནོས་པའི་དགེ་སློང་ལ་སྲོག་གཅོད་ཀྱི་ཕམ་པ་འཆབ་བཅས་བྱུང་ནས་སྡོམ་པ་ཉམས་ཀྱང་རྒྱན་སོ་སོར་བཏགས་པ་བཞིན། དགེ་ཚུལ་གྱི་ངོས་སྐལ་གྱི་སྲོག་གཅོད་དང་དགེ་བསྙེན་གྱི་ངོས་སྐལ་གྱི་སྲོག་གཅོད་ཀྱི་ལྟུང་བ་མི་འབྱུང་བའི་སྤུ་རིས་དབྱེ་དཀའ། དེ་བཞིན་དུ་དོང་ཙེ་བརྩེགས་མའི་གཅིག་བོར་བས་གཞན་གཉིས་མི་(༨༢ན)
འབོར་ཞིང་། ཤར་རྩེ་པའི་སྤྱི་དོན་སོགས་སུ་ཉི་ཟླ་སྐར་གསུམ་གྱི་གཅིག་སྤྲིན་གྱིས་བསྒྲིབས་པར་གཞན་གཉིས་བསྒྲིབ་པའི་ངེས་པ་མེད་པ་ལྟ་བུའི་རིག་པ་བཅུག་ཚེ་དམ་བཅའ་བའང་དཀའ་བའི་གནས་སུ་མཆིས། སྡོམ་གསུམ་གནས་འགྱུར་ཚེ་འོག་མ་རྣམས་གོང་མ་དང་གཅིག་ཏུ་སོང་བས་འོག་མ་གཉིས་ཀྱི་སྡོམ་པ་མེད་པར་འགྱུར་ཞེས་དགག་པའང་སྣོད་གཅིག་ཏུ་ཆུ་ཆང་འོ་མ་གསུམ་རིམ་གྱིས་གསེས་ཚེ་ཆང་གི་དྲི་དང་འོ་མའི་མདོག་སོགས་མངོན་ཆེ་ཡང་དེ་ལ་ཆུ་མེད་པར་བསྒྲུབ་མི་ནུས་པས་ཚིག་འཁྲི་ཙམ་ལས་དོན་ཐོག་ཏུ་ཁེལ་བར་མི་སེམས། ཐུབ་བསྟན་རིན་པོ་ཆེའི་བྱི་དོར་གྱི་མཐའ་གཅོད་རྣམས་ཕ་རོལ་གྱི་ཁས་བླངས་ལ་ནུས་པ་ཆེ་བ་ཞིག་སྣང་ཡང་། དཔེའི་སྐབས་སུ་ཉི་མ་འཆར་བའི་སྔོན་དུ་ཟླ་བ་འཆར་མི་དགོས་ཤིང་། ཉི་མའི་འོད་ཟེར་ཡོད་པའི་ཚེ་ཉི་མའི་འོད་ལས་ལོགས་སུ་གྱུར་པའི་ཟླ་སྐར་གྱི་འོད་བསྒྲིབ་པའི་མུན་པ་ལོགས་སུ་མི་འབྱུང་བ། འདྲ་བའི་ཕྱོགས་ནི་དངོས་མ་ཡིན། །མི་འདྲ་བ་ལ་དཔེ་མ་གྲུབ། །ཅེས་གྲགས་པས། ཕྱོགས་ཙམ་འདྲ་བ་ལས་ཐམས་ཅད་འདྲ་བ་ཞིག་ག་ལ་དགོས། རྒྱུ་མཚན་སྙན་ངག་མེ་ལོང་དུ། ཁྱོད་ཀྱི་གདོང་ནི་པདྨ་བཞིན། །མིག་དག་ཨུཏྤལ་སྔོན་པོ་བཞིན། །ཞེས་པ་ཆོས་གཅིག་རྟོགས་བྱེད་པ། །དེ་ནི་དངོས་པོའི་དཔེ་ཉིད་དོ། །ཞེས་དཀར་བ་དང་འཇམ་པའི་ཆ་ནས་པདྨ་དང་། མིག་ནག་ཅིང་མཛེས་པས་ཨུཏྤལ་དཔེར་བཟུང་གི །དེ་ལྟར་ན་གདོང་ནི་ཤ་ཁྲག་པགས་རུས་ལས་གྲུབ་ཅིང་། པདྨ་ནི་དེ་ལྟ་མ་ཡིན་པས་དཔེར་མི་འོས་ཞེས་སྨྲ་དགོས་པར་འགྱུར་ཞིང་། སངས་(༨༢བ)
རྒྱས་ཀྱི་སྐུ་ལ་བསྟོད་པའི་སྐབས་སུ་དཔེ་ལ་བསྟོད་པ་ལས། ཁྱོད་སྐུ་མཚན་གྱིས་སྤྲས་གྱུར་པ། །མཛེས་གྱུར་མིག་གི་བདུད་རྩི་ནི། །སྤྲིན་མེད་སྟོན་གྱི་ནམ་མཁའ་ལ། །སྐར་མའི་ཚོགས་ཀྱིས་སྤྲས་པ་འདྲ། །ཞེས་པ་ནམ་མཁའ་སྔོ་སངས་ལ་སྐར་མ་ཤར་བ་དང་། ཐུབ་པའི་སྐུ་གསེར་མདོག་ལ་མཚན་དཔེས་སྤྲས་པ་གཉིས་མི་མཚུངས་ཞེས་མདོ་རྒྱུད་བསྟན་བཅོས་ཀྱི་དཔེ་དོན་ཐམས་ཅད་རོལ་བརྒྱ་ཤལ་གཅིག་གི་རིགས་པ་འདི་འདྲ་དཔལ་ལྡན་ཆོས་གྲགས་ཀྱི་ཐུགས་ལ་ཡང་མ་ཤར་རོ། །དེས་ན་སྡོམ་གསུམ་རབ་དབྱེ་ལས། །ཐེག་པ་གསུམ་གྱི་ལག་ལེན་ཡང་། །རང་རང་གཞུང་ལུགས་བཞིན་བྱེད་ན། །སངས་རྒྱས་བསྟན་ཡིན་མི་བྱེད་ན། །བསྟན་པའི་གཟུགས་བརྙན་ཡིན་ཞེས་བྱ། །ཞེས་ཐེག་པ་གསུམ་སོ་སོའི་ལུགས་བཞིན་ལག་ལེན་མ་འཆོལ་བར་བྱ་དགོས་པར་བཤད་པས། སྡོམ་གསུམ་གནས་འགྱུར་ཀྱང་སྤྱིར་བཏང་དམིགས་བསལ་ལས་ཐམས་ཅད་ལ་ཁྱབ་པར་བཞེད་པའི་ངེས་པ་མི་འདུག་ཅིང་། མཁས་པ་རྣམས་ཀྱི་གྲུབ་མཐའི་འཇོག་མཚམས་ལ་བློ་དམན་རྣམས་ཀྱི་མཐའ་གཅིག་ཏུ་ངེས་བཟུང་དཀའ་ནའང་གཉའ་ནང་བྲག་ཕུག་གི་རྒྱུས་མི་ལ་རས་པའི་དཔེ་བཞིན་ཉན་ཐོས་ལུགས་བཞིན་སོ་ཐར་བླངས་པའི་གདུལ་བྱ་སོ་སྐྱེ་ལས་དང་པོ་པ་རྣམས་ཀྱི་སྐལ་བ་དང་འཚམ་པ་ནི། ལུགས་སྲོལ་འདི་ལ་ཁ་ཆེའི་བསོད་སྙོམས་པ་ཆེན་པོ་བརྒྱུད་པར་བཅས་པ་མཁས་པས། པཎ་ཆེན་ཤཱཀྱ་ཤྲཱི་དང་བི་བྷཱུ་ཏི་ཙནྡྲས་སྡོམ་གསུམ་རྫས་ཐ་དད་དུ་བཞེད་ཅིང་། བི་བྷཱུ་ཏི་ཙནྡྲས། མཁྱེན་བརྩེ་དུང་ཕྱུར་དང་ལྡན་ཞིང་། །པཎ་ཆེན་བློ་ཡི་རྒྱ་མཚོ་ལ། །(༨༣ན)
སྡོམ་གསུམ་ནོར་བུའི་འཕྲེང་བ་བླངས། །ཞེས་པཎ་ཆེན་གྱི་དགོངས་པ་ལྟར་སྡོམ་གསུམ་རྫས་ཐ་དད་དུ་སྟོན་པའི་སྡོམ་གསུམ་འོད་འཕྲེང་མཛད་ཅིང་། དེར། དེས་ན་རིགས་འཛིན་གཅིག་པུ་ལ། །སུམ་ལྡན་སྦྱོར་བ་འཐད་མ་ཡིན། །གལ་ཏེ་འཐད་ན་འོག་མ་གཉིས། །ཆོ་ག་མི་དགོས་སྐྱེ་འགྱུར་རོ། །སྡོམ་གསུམ་ཆོ་ག་ཐུན་མོང་དུ། །ཐུབ་པ་ཆེན་པོས་གསུངས་པ་མེད། །རིག་འཛིན་སྡོམ་པ་ཁོ་ན་བས། །སུམ་ལྡན་བསྔགས་པའི་དགོས་པ་ནི། །འབྲས་བུའི་སྒོ་ནས་མ་ཡིན་ཏེ། །ཡིན་ན་ཀུན་མཁྱེན་མཆོག་དམན་འགྱུར། །ཞེས་སོགས་གསུངས་སོ། །གཉགས་དབོན་བསོད་ནམས་བཟང་པོས་བཤད་མ་ཐག་པའི་རྗེས་སུ་འབྲངས་ཏེ། སོ་སྐྱེ་གཅིག་གི་རྒྱུད་ཀྱི་སྡོམ་གསུམ་རྫས་ཐ་དད་ཡིན་ཏེ། དེའི་སྡོམ་གསུམ་ཕྱི་མ་ཕྱི་མ་སྐྱེ་བ་ལ་སྔ་མ་སྔ་མ་སྐྱེས་ཟིན་རྟེན་དུ་དགོས་པས་སྐྱེ་བའི་དུས་ཐ་དད། སོ་ཐར་ཇི་སྲིད་འཚོའི་བར་ཡིན་ལ། ཕྱི་མ་གཉིས་སངས་རྒྱས་མ་ཐོབ་ཀྱི་བར་དུ་ཡིན་པས་གནས་པའི་དུས་ཐ་དད། སོ་ཐར་ཚེ་འཕོས་པས་གཏོང་ལ། གཞན་གཉིས་དེས་མི་གཏོང་བ་སོགས་གཏོང་རྒྱུ་ཐ་དད་པའི་ཕྱིར་རོ། །སངས་རྒྱས་ཀྱི་དཀོར་ཀུན་ནས་དཀྲིས་པ་ཆེན་པོས་ཕྲོགས་ན་བྱང་སེམས་ཀྱི་སྡོམ་པ་འཇིག་ཅིང་མྱ་ངན་ལས་འདས་པའི་ལྷ་ཉིད་དོ་ཞེས་པས། དེས་སོ་ཐར་འཇིག་པར་མི་འགྱུར་བ་དང་། ཀུན་ནས་འཁྲུགས་པས་བུད་མེད་ལ་སྨད་ན་གསང་སྔགས་ཀྱི་སྡོམ་པ་འཇིག་ཅིང་། དེས་སོ་ཐར་ལ་ཕམ་པར་འགྱུར་བ་མི་སྲིད་པའི་ཕྱིར་དང་། དམ་ཚིག་ལས་ནི་ཇི་བཞིན་རྙེད། དེ་སྤོང་བ་ནི་བཅུ་གསུམ་པ། ཞེས་(༨༣བ)
ཚོགས་ཀྱི་འཁོར་ལོ་མ་ད་ན་སོགས་དམ་ཚིག་གི་རྫས་ཞེ་ནས་སྤོང་ན་རྩ་ལྟུང་བཅུ་གསུམ་པར་འགྱུར་ལ། སོ་ཐར་གྱི་དེ་སྤང་བྱ་ཡིན་པའི་ཕྱིར་གལ་ཏེ་གསུམ་ལྡན་དེའི་སྔགས་ཀྱི་སྡོམ་པ་བཏང་བས་དེའི་སོ་ཐར་ཡང་བཏང་བར་འགྱུར་ན་རྩ་ལྟུང་བཅུ་གསུམ་པ་དང་བཅུ་བཞི་པས་སོ་ཐར་ཡང་གཏོང་པར་ཐལ་ལོ། །འདོད་ན། ཆང་སྤངས་པ་དང་བུད་མེད་ལ་སྨད་པས་སོ་ཐར་སྡོམ་པ་གཏོང་བ་ནི་ཤིན་ཏུ་ངོ་མཚར་བར་འགྱུར་རོ། །ཕྲ་རགས་ཞེས་གསུང་བ་ནི། འོད་འཕྲེང་ལས། དང་པོ་དེ་ནི་ཀུན་གཞི་ལས། །བག་ལ་ཉལ་བའི་ཚུལ་དུ་གནས། །རིག་འཛིན་སྡོམ་པ་ཐོབ་པ་ནས། །འོག་མ་གཉིས་ལ་བག་ལ་ཉལ། །དཔེར་ན་མཁའ་ལ་སྐར་མ་ཤར། །ཅུང་ཟད་སྣང་བར་བྱས་འགྱུར་མོད། །ཟླ་བའི་དཀྱིལ་འཁོར་ཤར་བའི་ཚེ། །སྐར་མ་འོད་ཉམས་འཇིག་རྟེན་སྣང་། །རྟ་བདུན་ཚ་ཟེར་བྱུང་བ་ན། །ཟླ་བའི་འོད་ཉམས་འཇིག་རྟེན་གསལ། ཞེས་སྔ་མ་སྔ་མ་ཕྲ་ཞིང་ཕྱི་མ་རགས་པར་གསུངས་པ་ལྟར་རོ། །འདི་ལ་ཀུན་མཁྱེན་གོ་རམས་པའི་སྡོམ་གསུམ་སྤྱི་དོན་ལས། བི་བྷཱུ་ཏི་ཙནྡྲའི་གསུང་བཀྲོལ་ནས་དེ་ལ་དགག་པ་བཏང་བར། ཉི་ཟླ་སྐར་གསུམ་གྱི་དཔེ་དང་སྦྱར་བ་ཡང་མི་འཐད་དེ། རང་གི་རྟོག་པས་སྦྱར་བ་ཙམ་ཡིན་གྱི་ལུགས་རྣམ་པར་དག་པ་གང་ནས་ཀྱང་མ་བཤད་པའི་ཕྱིར་སྔགས་སྡོམ་ལ་གནས་པའི་གང་ཟག་གིས་གཞན་དོན་དུ་སྡོམ་པ་འོག་མ་ལེན་པ་དོན་ལ་གནས་ཀྱང་ཁྱེད་ལ་འགལ་ཏེ། སོ་ཐར་ལེན་པའི་བསམ་པའི་ཡན་ལག་ཏུ་རང་དོན་ཡིད་བྱེད་དགོས་པར་ཁས་བླངས་པའི་ཕྱིར་རོ། །གོང་མ་གནས་ཀྱི་བར་དུ་འོག་(༨༤ན)
མའི་ལྟུང་བ་འབྱུང་ཡང་རྣམ་སྨིན་གྱིས་མི་གོས་པར་འདོད་པ་ལ་ཡང་བརྗོད་པར་བྱ་སྟེ། སྔགས་སྡོམ་ལ་གནས་པའི་གང་ཟག་ལ་བྱང་སེམས་ཀྱི་སྡོམ་པ་ལ་བལྟོས་པའི་རྩ་ལྟུང་བྱུང་ན་བྱང་སེམས་ཀྱི་སྡོམ་པ་ཉམས་ལ། དེ་ཉམས་ན་འགྲོ་བ་ཀུན་བསླུས་པས་གནོད་པ་ཤིན་ཏུ་མང་བ་དང་། །རྒྱལ་དང་དེ་སྲས་ཐམས་ཅད་དང་། །འགྲོ་བ་ཀུན་གྱིས་ཤིན་ཏུ་ཁྲེལ། །ཕམ་པའི་ལྕི་ཡང་བྱེ་བྲག་གིས། །བསྐལ་པའི་གྲངས་བཞིན་དམྱལ་བར་གནས། །ཞེས་ཁས་བླངས་པ་དང་ཅིའི་ཕྱིར་མི་འགལ། གལ་ཏེ་ཉེས་དམིགས་དེ་དག་ནི་སྡོམ་པ་རེ་རེ་དང་ལྡན་པ་ཉམས་པའི་དབང་དུ་བྱས་ཀྱིས་གོང་མ་དང་ལྡན་པའི་དབང་དུ་བྱས་པ་མ་ཡིན་ནོ་སྙམ་ན་དེ་ཤིན་ཏུ་མི་འཐད་དེ། གོང་མ་དང་ལྡན་པའི་ཚེ་ཡང་སྡོམ་པ་གསུམ་ཆར་གྱི་གཏོང་ཐོབ་གནས་པའི་ཚུལ་ཐམས་ཅད་རང་རང་གི་ཆོ་ག་བཞིན་གནས་པར་ཁས་བླངས་པ་དང་འགལ་བའི་ཕྱིར་རོ། །གོང་མའི་ལྟུང་བ་བྱུང་ན་འོག་མ་གནས་ཀྱང་སྐྱོབ་མི་ནུས་པ་ལ་ཡང་དཔྱད་པར་བྱ་སྟེ། བྱང་སེམས་ལས་དང་པོ་པ་འགའ་ཞིག་བྱང་སེམས་ཀྱི་སྡོམ་པ་བཏང་ནས་སོ་ཐར་ལ་གནས་ཏེ་ཉན་ཐོས་ཀྱི་བྱང་ཆུབ་ཐོབ་པ་མེད་པར་ཐལ། གོང་མའི་ལྟུང་བ་བྱུང་ན་འོག་མས་སྐྱོབ་མི་ནུས་པའི་ཕྱིར། འདོད་ན། བྱང་སེམས་རིགས་མ་ངེས་པ་རྣམས་ལ་ཐེག་དམན་དུ་འཇུག་པ་མེད་པར་འགྱུར་རོ། །གཞན་ཡང་དཔེ་དང་བསྒྲིགས་པ་ལྟར་ན་སྔགས་སྡོམ་ལ་བལྟོས་པའི་རྩ་ལྟུང་བྱུང་བའི་བྱང་སེམས་ཀྱི་སྡོམ་པས་སྐྱོབ་མི་ནུས་པ་ལྟར་སྔགས་སྡོམ་མ་བླངས་པའི་(༨༤བ)
བྱང་སེམས་ཀྱི་སྡོམ་པས་ཀྱང་སྐྱོབ་མི་ནུས་པར་ཐལ། ཉི་མ་ནུབ་ན་ཟླ་སྐར་གནས་ཀྱང་མུན་པའི་བག་ཡིན་པ་ལྟར་ཉི་མ་མ་ཤར་ན་ཟླ་སྐར་གནས་ཀྱང་མུན་པའི་བག་ཡིན་པའི་ཕྱིར། ཁྱབ་པ་ཁས་བླངས་སོ། །འདོད་ན། བྱང་སེམས་སྡོམ་པའི་ཕ་རོལ་ཕྱིན། །གནས་སྐབས་བདེ་མང་མཐར་ཐུག་ནི། །རིང་མོ་ཞིག་ནས་རྫོགས་སངས་རྒྱས། །ཞེས་བཤད་པ་དང་དངོས་སུ་འགལ་ལོ། །ཞེས་པ་བི་བྷཱུ་ཏིར་དགག་པ་བཏང་བ་ར་སྤུའི་འུར་རྡོ་ར་མགོའི་དཔེ་བཞིན་སྡོམ་པ་གོང་མས་འོག་མ་ཟིལ་གྱིས་མནན་ཏེ་ཕམ་པ་འཆབ་བཅས་གསོ་རུང་བ་སོགས་ཀྱི་གྲུབ་མཐའ་རྣམས་ཤུགས་ཀྱིས་བགགས་ཤིང་། ཉི་ཟླ་སྐར་གསུམ་གྱི་སྐྱོན་བརྗོད་མཁས་གྲུབ་ཐམས་ཅད་མཁྱེན་པའི་གསུང་དང་མཐུན་ཞིང་། དཔེར་ན་གོས་ཁ་དོག་ཤིན་ཏུ་བཀྲ་བ་ཞིག་མུན་པར་བཞག་ན་དེའི་སྟོབས་ཀྱིས་མི་གསལ་ཡང་དེ་སྣང་བ་ལ་འཆར་ན་འོད་གང་ཡོད་གསལ་བར་འབྱུང་ལ། གོས་དེ་སྣུམ་ལྟ་བུས་འཚོས་ན་སྣང་མུན་གང་གི་སར་ཡང་བཀྲག་འདོན་རྒྱུ་མེད་ཅིང་། དེ་བཞིན་དུ་གནམ་སྟོང་ལ་ཟླ་བའི་འོད་མི་གསལ་ཡང་ཡར་ངོའི་ཚེ་ཟླ་བའི་བཀྲག་མདངས་མི་ཉམས་པར་འབྱུང་བས་ཟིལ་མནན་པ་དང་ཉམས་པར་བྱས་པ་གཉིས་མི་གཅིག་པས། ས་དགེའི་བསྟན་འཛིན་གྱི་གཙོ་བོ་ཐམས་ཅད་མཁྱེན་པ་གཉིས་ཀྱིས་རྒྱུག་པ་འཕྲེད་འཇོག་གི་གསུང་འགྲོས་མི་མཛད་པ་ཞུ། ས་སྐྱ་པའི་རྗེས་འབྲངས་ཕལ་ཆེར་སྡོམ་གསུམ་གནས་འགྱུར་བར་བརྟེན་ཤེས་པ་ལ་བློ་རྩེ་བསྟད་ནས་ཚིགས་གསུམ་རྒྱུད་ལ་ལྡན་པ་ཞིག་གིས་བསྐྱར་ན་མི་གཏོང་བས་ན་ཁ་(༨༥ན)
གསོའི་ཚུལ་དུ་སོང་ནས་སྡོམ་རྒྱུན་སྔ་ཕྱི་འདྲེས་འགྲོ་བར་འཆད་པ་ཐེག་ཆེན་སོ་ཐར་གཙོ་བོར་སྟོན་ན་དེ་ལས་མ་འདས་མོད། ཉན་ཐོས་ལུགས་ཀྱི་སོ་ཐར་སྒྲ་ཇི་བཞིན་པར་ཁས་བླངས་ཚེ། འདུལ་འཛིན་སྔ་མ་མང་པོ་དང་དགེ་ཞལ་སྟག་ཚང་པ་སོགས་དགོངས་པ་མཐུན་པའི་ལུགས། ཕྱི་མ་ལྟར་རྗེས་འབྲངས་ཀྱི་མཁས་པ་རྣམས་སུ་མ་ཟད་ཚད་ཐུབ་ཕལ་ཆེར་དགོངས་པ་མཐུན་པས་སྡོམ་པ་རྙིང་པས་རྒྱུད་བཀག་པའི་ནང་ནས་དེ་ག་གཅིག་ཐོག་ཏུ་གཅིག་བརྩེགས་མི་རུང་བ་སྔ་མ་ཕུལ་བ་སོགས་མ་བྱས་ན་ཕྱི་མ་མི་ཆགས་པ་ཀུན་མཁྱེན་བུ་སྟོན་རྗེའི་ལས་ཆོག་ཏུ། བསྙེན་རྫོགས་ཀྱི་སྡོམ་པ་ཐོབ་བཞིན་པ་མ་ཡིན་པ་ཞིག་དགོས་ཏེ། ཐོབ་བཞིན་པ་ལ་ཆོ་ག་བྱས་ཀྱང་མི་འཆགས་ཏེ། ཉིད་ཀྱི་རྣམ་བཤད་ལས། བླངས་པ་ལ་སླར་སླང་བ་མེད་པའི་ཕྱིར་རོ་ཞེས་དང་། ལས་བརྒྱའི་ཊཱིཀྐར། དེ་ཡང་ལས་སྔ་མ་བྱས་ཟིན་ཆགས་པའི་སྟེང་དུ་ཕྱི་མ་མི་འཆགས་པ་ཐམས་ཅད་ལ་འདྲ་སྟེ། བཙུན་པ་བསྡིགས་པའི་ལས་བགྱིས་པ་ལ་བསྡིགས་པའི་ལས་བགྱིས་པ་ཞེས་བགྱིའམ། ཨུ་པ་ལི་མ་ཡིན་ནོ་ཞེས་པ་ནས། དེ་བཞིན་དུ་ལས་ཐམས་ཅད་ཀྱང་འཁོར་ལོའི་རྒྱུད་བཞིན་དུ་བྱའོ། །ཞེས་བྱུང་བས། དཔེར་ན་ཚིགས་གསུམ་རིམ་གྱིས་ནོས་པའི་དགེ་སློང་ཞིག་སླར་དགེ་སློང་བསྐྱར་ནས་ལེན་ཚེ། དགེ་བསྙེན་ནས་རིམ་གྱིས་བསྒྲུབས་ན་སྔ་མ་སྔ་མ་ཕྱི་མ་ཕྱི་མའི་གཏོང་རྒྱུ་ཡིན་པས། སྔར་བླངས་པའི་དགེ་སློང་གི་སྡོམ་པ་གཏོང་ཡང་གསར་དུ་བླངས་པ་དེ་སྐྱེ་ཞིང་(༨༥བ)
དགེ་སློང་ཁོ་ན་བསྐྱར་ན་ཆུས་སྣོད་ཁེངས་བཞིན་དུ་གསར་པ་ལྡུགས་མི་ཐུབ་པ་བཞིན་དུ་སླར་བླངས་པའི་སྡོམ་པ་མི་སྐྱེ་བ་མངོན་སུམ་གྱི་གསལ་ཡང་། བྱང་སེམས་དང་སྔགས་སྡོམ་ལྟར་གང་ཟག་གཅིག་གི་རྒྱུད་ལ་བླ་ཆེན་དང་པཎ་ཆེན་གཉིས་ཀའི་སྡོམ་རྒྱུན་ཡོད་པ་སྐད་དུ་ངོམ་པའང་། གནས་འགྱུར་འགོག་པའི་རྗེས་འབྲངས་ནས། །སོ་ཐར་སྡོམ་པ་རྣམ་རིག་དང་། །རྣམ་རིག་མིན་པའི་གཟུགས་ཅན་དུ། །འདོད་བཞིན་བརྒྱུད་པ་གཉིས་བསྲེ་བ། །ལུང་དང་འགལ་བ་སྨོས་ཅི་དགོས། །རང་ལུགས་དང་ཡང་འགལ་བ་ཡིན། །ཞེས་སྡོམ་གསུམ་རབ་དབྱེ་གསར་པ་ཞིག་འབྱོན་པར་སྣང་ངོ་། །དེ་ཡང་སྡོམ་པ་སྔ་མ་གཉིས་མ་ཐོབ་ཀྱང་ཕྱི་མ་སྐྱེ་བས་བསྙེན་རྫོགས་ཉིད་དུ་བསྒྲུབས་ན་ཚེགས་ཆུང་ངོ་སྙམ་ན་མི་རིགས་ཏེ། མདོ་རྩར། དགེ་བསྙེན་ཉིད་དང་ཞེས་སོགས་ཀྱི་རང་འགྲེལ་དུ། དགེ་བསྙེན་ཉིད་ལ་སོགས་པ་འདི་རྣམས་ཀྱིས་སྔ་མ་སྔ་མ་ནི་སྔ་མ་བསྙེན་པར་མ་རྫོགས་པ་ལ་དེའི་བདག་ཉིད་དུ་ཉེ་བར་སོང་བས་ཁས་མ་བླངས་པ་ལ་གང་ཞིག་ཕྱི་མ་ཕྱི་མ་དེ་ནི་བྱ་བ་མ་ཡིན་ཏེ། འདི་ནི་རྣམ་པར་བཞག་པ་བསྟན་པའོ། །བར་ཆད་དྲིས་ནས་རབ་ཏུ་བྱུང་བ་བཟུང་བ་ལ་བལྟོས་པ་དང་པོ་དགེ་བསྙེན་ཉིད་འཛིན་དུ་བཞུག་གོ །དེ་ནས་དགེ་ཚུལ་དང་། དེ་ནས་དགེ་སློང་ཉིད་འབྱུང་བ་ཡིན་ནོ། །ཞེས་བྱ་བ་འདི་ཤེས་པར་བྱ་བའི་དོན་དུ་སྟེ། འདིའི་དོན་ནི་མ་ཡིན་ཏེ། སྔ་མ་མ་བཟུང་བ་ལ་ཕྱི་མ་སྐྱེ་བར་འབྱུང་བ་མ་ཡིན་ནོ་ཞེས་བྱ་བའོ། །དགེ་སློང་གི་སྡོམ་པའི་སྔོན་དུ་སྡོམ་པ་གཞན་སྐྱེ་བ་ལ་ཡང་ཁུངས་ཀྱི་ཚིག་གཙོ་བོ་(༨༦ན)
ཡོད་པ་ཉིད་དེ། དགེ་ཚུལ་གྱི་སྡོམ་པ་ལ་ནི་དགེ་བསྙེན་གྱི་སྡོམ་པ་མེད་པར་སྐྱེ་བ་འབྱུང་བ་ཡིན་ནོ། །དགེ་སློང་གི་སྡོམ་པ་ནི་ཁུངས་ཀྱི་ཚིག་ཡོད་པ་མ་ཡིན་ནོ། །སྐྱབས་སུ་འགྲོ་བ་སྔོན་དུ་འགྲོ་བས་སྡོམ་པ་བླང་ངོ་ཞེས་བསྟན་པའི་ཕྱིར་སྐྱབས་སུ་འགྲོ་བ་ཁས་བླངས་པའི་ཚིག་རྩོམ་པ་དང་། དགེ་བསྙེན་ཉིད་དང་དགེ་ཚུལ་ཉིད་དུ་ཁས་བླངས་པའི་ཚིག་བྱའོ། །ཞེས་གསུངས། ཆོས་ཀྱི་བཤེས་གཉེན་གྱིས་མཛད་པའི་རྒྱ་ཆེར་འགྲེལ་ལས། དགེ་བསྙེན་ཉིད་དང་དགེ་ཚུལ་ཉིད་དང་དགེ་སློང་ཉིད་དག་གིས་ཚིགས་སྔ་མ་སྔ་མ་གང་དང་གང་ཡིན་པ་དེར་རྫོགས་པར་མ་བསྙེན་པ་ཞེས་བྱ་བ་ཡང་དག་པར་ཐོབ་པའི་གང་ཟག་ལ་ཚིགས་ཕྱི་མ་ཕྱི་མ་མི་བྱའོ་ཞེས་སྟོན་ཏོ། །འདི་སྐད་བསྟན་ཏེ། ཇི་སྲིད་དུ་དགེ་བསྙེན་གྱི་སྡོམ་པ་སྦྱིན་པར་མི་བྱེད་པ་དེ་སྲིད་དུ་དགེ་ཚུལ་གྱི་སྡོམ་པ་སྦྱིན་པར་མི་བྱ་ལ། དེ་བཞིན་དུ་ཇི་སྲིད་དུ་དགེ་ཚུལ་གྱི་སྡོམ་པ་སྦྱིན་པར་མི་བྱེད་པ་དེ་སྲིད་དུ་རྫོགས་པར་བསྙེན་པར་མི་བྱའོ་ཞེས་བསྟན་ཏོ། །དེ་ནི་རྣམ་པར་བཞག་པ་བསྟན་པ་ཡིན་གྱི་འབྱུང་བའི་རྒྱུ་བསྟན་པ་ནི་མ་ཡིན་ཏེ། འདི་ལྟར་དགེ་བསྙེན་གྱི་སྡོམ་པ་མེད་པར་ཡང་དགེ་ཚུལ་གྱི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་ལ། དེ་བཞིན་དུ་དགེ་ཚུལ་གྱི་སྡོམ་པ་མེད་པར་ཡང་དགེ་སློང་གི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་པའི་ཕྱིར་རོ། །དེ་ལྟར་ན་གོ་རིམ་འདིས་ནི་སྡོམ་པ་ཐམས་ཅད་ཀྱི་ཡང་དག་པར་བླང་བ་བསྟན་པ་ཡིན་ཏེ། འདི་ལྟར་བཙུན་པ་ཁྱིམ་པ་རབ་ཏུ་མ་བྱུང་བ་ཞིག་རྫོགས་པར་བསྙེན་པར་བགྱིད་(༨༦བ)
ན། རྫོགས་པར་བསྙེན་ཞེས་བགྱིའམ། རྫོགས་པར་མ་བསྙེན་ཞེས་བགྱི། ཉེ་བར་འཁོར་རྫོགས་པར་བསྙེན་ཞེས་བྱའོ། །ཞེས་གསུངས་པའི་ཕྱིར་རོ། །དེ་ལ་འདིར་གལ་ཏེ་དགེ་བསྙེན་དང་དགེ་ཚུལ་གྱི་སྡོམ་པ་མ་སྐྱེས་པ་ལ་དགེ་སློང་གི་སྡོམ་པ་མི་འབྱུང་བར་འགྱུར་ན་གཙུག་ལག་དེ་དོན་མེད་པར་འགྱུར་རོ། །དགེ་བསྙེན་གྱི་སྡོམ་པ་མེད་པར་ཡང་དགེ་ཚུལ་གྱི་སྡོམ་པ་སྐྱེ་བའི་ཁུངས་ཀྱང་དེ་ཉིད་ཡིན་ཏེ། དེ་ལྟ་བས་ན་མདོ་འདི་ནི་རྣམ་པར་བཞག་པ་བསྟན་པ་ཙམ་ཡིན་ནོ། །མདོ་རྩར། ཚིགས་སྔ་མ་མེད་པ་ཉིད་ལ་ནི་ཉེས་བྱས་ཙམ་དུ་ཟད་དོ། །ཞེས་པའི་རྒྱ་ཆེར་འགྲེལ་དུ། གང་ལ་དགེ་བསྙེན་ཉིད་ལ་སོགས་པའི་ཚིགས་སྔ་མ་མེད་པར་དེ་ནི་ཚིགས་སྔ་མ་མེད་པ་སྟེ། དེའི་དངོས་པོ་དེ་ཉིད་དོ། །དེ་མེད་པ་དེ་ལ་ནི་དགེ་ཚུལ་ཉིད་ལ་སོགས་པའི་ཚིགས་གཞན་དག་ཁས་ལེན་དུ་བཅུག་ན་ཡང་ལས་བྱེད་པ་དག་ལ་ཉེས་བྱས་ཙམ་དུ་ཟད་ཀྱི་དེ་ལ་ནི་སྡོམ་པ་སྐྱེའོ། །འདི་སྐད་བསྟན་ཏེ། དགེ་བསྙེན་ཉིད་མེད་པར་དགེ་ཚུལ་ཉིད་ཁས་ལེན་པ་དང་། དགེ་ཚུལ་ཉིད་མེད་པར་དགེ་སློང་ཉིད་ཁས་ལེན་པར་བྱེད་ན་ཉེས་བྱས་ཙམ་དུ་འགྱུར་གྱི་སྡོམ་པ་མི་སྐྱེ་བར་ནི་མི་འགྱུར་རོ། །ཞེས་དང་། བུ་སྟོན་རིན་པོ་ཆེའི་འདུལ་ཊཱིཀ་ཏུ། འོན་ཀྱང་ཉེས་པ་མེད་པར་འཇུག་པའི་རྣམ་གཞག་བསྟན་པ་ཡིན་གྱིས། མེད་ན་མི་འབྱུང་གི་རྒྱུ་བསྟན་པ་ནི་མ་ཡིན་ནོ། །གླེང་གཞི་ལས། རབ་ཏུ་མ་བྱུང་བསྙེན་རྫོགས་དང་། །ཞེས་སོགས་ཀྱི་ལུང་འདྲེན་པར་མཛད། མཚོ་སྣ་པ་ཆེན་པོའི་ཊཱིཀྐར། ཚིགས་སྔ་མ་མེད་ཀྱང་རྒྱུ་གཞན་ཚང་ན་(༨༧ན)
ཚིགས་ཕྱི་མའི་སྡོམ་པ་སྐྱེ་སྟེ། ཚིགས་སྔ་མ་མེད་པ་ལ་ནི་ཉེས་བྱས་ཙམ་དུ་ཟད་དོ། །ཞེས་གསུངས་པ་དང་། ཊཱིཀྐ་ལས་ཀྱང་ཉེས་བྱས་ཙམ་དུ་ཟད་ཀྱི་དེ་ལ་ནི་སྡོམ་པ་སྐྱེའོ་ཞེས་པ་དང་། གོ་རིམ་དེ་ནི་རྣམ་པར་བཞག་པ་བསྟན་པ་ཡིན་གྱི་འབྱུང་བའི་རྒྱུ་བསྟན་པ་ནི་མ་ཡིན་ཏེ། ཞེས་ཀྱང་ཊཱིཀྐ་ལས་བཤད་པས་ཤེས་སོ། །ཞེས་དང་འདུལ་ཊིཀ་རིན་ཅེན་འཕྲེང་བར་། སྔ་མ་སྔ་མ་བསྙེན་པར་མ་རྫོགས་པ་སྟེ་མ་ཐོབ་པར་ཕྱི་མ་ཕྱི་མ་མི་བྱ་སྟེ་བསྟན་པ་ལ་རིམ་གྱིས་མ་བསླབས་པའི་ཉེས་པར་འགྱུར་བའི་ཕྱིར། སྔ་མ་མེད་པར་ཕྱི་མ་གཏན་ནས་མི་སྐྱེ་བ་ནི་མ་ཡིན་ཏེ། ཚིགས་སྔ་མ་མེད་པ་ནི་ཉེས་བྱས་ཙམ་དུ་ཟད་དོ་ཞེས་གསུངས། ལུང་རིགས་གཏེར་མཛོད་དུ། དགེ་བསྙེན་དང་དགེ་ཚུལ་སྔོན་དུ་མ་སོང་བར་དགེ་སློང་གི་སྡོམ་པ་མི་སྐྱེ་བ་མ་ཡིན་གྱི་བྱེད་པ་པོ་མཁན་སློབ་དགེ་འདུན་དང་བཅས་པ་ལ་སྟོན་པའི་བཅས་པ་དང་འགལ་བའི་ཉེས་པ་འབྱུང་། བསྒྲུབ་བྱའི་རྒྱུད་ལ་སྡོམ་པ་སྐྱེ་བར་བཤད་པའི་ཕྱིར་ཏེ། ཚིགས་སྔ་མ་མེད་པ་ཉིད་ལ་ནི་ཉེས་བྱས་ཙམ་དུ་ཟད་དོ། །ཞེས་གསུངས་པའི་ཕྱིར། སྟག་ཚང་ལོ་ཙཱའི་ཊཱིཀྐར། སྔ་མ་སྔ་མ་མེད་པར་ཕྱི་མ་ཕྱི་མ་ཉེས་མེད་མི་སྐྱེ་སྟེ། བསྟན་པ་ལ་རིམ་གྱིས་སློབ་ཏུ་གཞུག་པའི་ཕྱིར་དུ་སྔ་མ་བསྙེན་པར་མ་རྫོགས་ཤིང་མ་ཐོབ་པ་ལ་ཕྱི་མ་སྦྱིན་པར་མི་བྱའོ། །ཞེས་བཅས་པ་མཛད་པའི་ཕྱིར་རོ། །སྐྱེ་ལ་ཉེས་བྱས་སུ་འོག་ནས་སྟོན་པས། འདི་ན་བསྟན་པའི་རྣམ་གཞག་ཏུ་ཆོས་ཀྱི་བཤེས་གཉེན་གསུང་ངོ་། །ཞེས་སོགས་གསུངས་པས། རྒྱ་བོད་ཀྱི་མཁས་གྲུབ་ཕལ་ཆེར་བཞེད་(༨༧བ)
པ་མཐུན་པར་འདུག་པས། དེ་ལྟར་ན་དགེ་བསྙེན་དགེ་ཚུལ་དགེ་སློང་རྣམས་རིམ་བཞིན་ནོད་པ་སྟེ་ཚིགས་སྔ་མ་སྔོན་དུ་མ་སོང་བར་དགེ་སློང་ལྟ་བུ་བསྒྲུབས་ན་བསྒྲུབ་བྱའི་རྒྱུད་ལ་སྡོམ་པ་སྐྱེ་ཡང་སྡོམ་པ་འབོགས་པ་པོ་ལ་ཉེས་བྱས་འབྱུང་བས་སྐྱེ་ལ་ཉེས་བྱས་དང་། ཚིགས་གསུམ་རིམ་གྱིས་ནོད་ན་ཉེས་མེད་ཕུན་ཚོགས་ཀྱི་སྡོམ་པ་འབྱུང་བའི་དབང་དུ་བྱས་ནས་གསུངས་པ་ཡིན་ནོ། །དེ་ཡང་འདུལ་བ་རྒྱ་མཚོའི་སྙིང་པོར། རྩ་བ་བཞི་དང་ཡན་ལག་དྲུག །བཅུ་སྤོང་དགེ་ཚུལ་སྡོམ་པའོ། །གར་སོགས་འཕྲེང་སོགས་རྣམ་གཉིས་དང་། །གསེར་དངུལ་ལེན་དང་རྣམ་པ་གསུམ། །ཕྱེ་བས་ཡན་ལག་དྲུག་ཏུ་འགྱུར། །མཁན་པོར་གསོལ་བ་གདབ་པ་དང་། །ཁྱིམ་པའི་རྟགས་ནི་སྤོང་བ་དང་། །རབ་བྱུང་རྟགས་ནི་ལེན་པ་ལས། །ཉམས་པ་རྣམ་གསུམ་བསྣན་པ་ཡིས། །སྤང་བྱ་བཅུ་གསུམ་དག་ཏུ་འགྱུར། །དགེ་ཚུལ་སྡོམ་པ་ཐོབ་རྗེས་སུ། །རྩ་བའི་ཆོས་དྲུག་རྗེས་མཐུན་གྱི། །ཆོས་དྲུག་སྤོང་བའི་སྡོམ་པ་ནི། །དགེ་སློབ་མ་ཡི་སྡོམ་པ་ཡིན། །གཅིག་པུ་ལམ་དུ་འགྲོ་མི་བྱ། །ཆུ་བོའི་ཕ་རོལ་བརྐྱལ་མི་བྱ། །སྐྱེས་པ་ལ་ནི་རེག་མི་བྱ། །སྐྱེས་པ་དང་ནི་འདུག་མི་བྱ། །སྨྱན་དུ་གྱུར་པ་མི་བྱ་ཞིང་། ཁ་ན་མ་ཐོ་འཆབ་མི་བྱ། །དེ་དག་རྩ་བའི་ཆོས་དྲུག་སྤོང་། །གསེར་ལ་བཟུང་བར་མི་བྱ་ཞིང་། །འདོམས་ཀྱི་སྤུ་ནི་བྲེག་མི་བྱ། །བྱིན་ལེན་མ་བྱས་བཟའ་མི་བྱ། །གསོག་འཇོག་བྱས་པ་བཟའ་མི་བྱ། །རྩྭ་སྔོན་མི་གཙང་འདོར་མི་བྱ། །ས་ནི་བརྐོ་བར་མི་བྱ་བ། །རྗེས་མཐུན་ཆོས་ནི་རྣམ་དྲུག་སྤོང་། །ཞེས་གསུངས་པའི་དགེ་ཚུལ་བརྟུལ་ཞུགས་མྱུར་དུ་བླང་བའི་ཕྱིར་(༨༨ན)
རབ་བྱུང་བསྒྲུབ་པ་སྔོན་དུ་སོང་ནས་དངོས་གཞི་དགེ་ཚུལ་དུ་སྒྲུབ་པའི་སྤང་བྱའི་དོན་གྱི་སྡོམས་བསྟན་པ་ཡིན་ཞིང་། བླངས་འདས་སྐོར་ཅུང་ཟད་རྒྱས་པར་སྤྲོ་ན་སྟག་ཚང་ལོ་ཙཱ་བའི་འདུལ་ཊཱི་ཀ་ཏུ། འདིར་བླངས་འདས་བཤད་པ་ལ། དབྱེ་བ། བསྡུ་བ། གྲངས་ངེས། གོ་རིམ། ངོ་བོ་རྣམས་སོ། །མཚན་ཉིད་ནི་ངོ་བོར་འདུས་ལ། འདས་ན་ཅིར་འགྱུར་ནི་གཞུང་གིས་བཤད་ཟིན་ཏོ། །དང་པོ་ལ་དངོས་དང་། རྩོད་པ་སྤོང་བའོ། །དང་པོ་ལ་ལྟུང་བའི་རྐང་གྲངས་ཀྱི་དབྱེ་བ་དང་། ཁྲིམས་ཉིས་བརྒྱ་ང་གསུམ་དང་སྦྱར་བའི་དབྱེ་བའོ། །དང་པོ་ནི། སྲོག་གཅོད་བཞི་དང་མ་བྱིན་ལེན། །མི་ཚངས་སྤྱོད་དང་བརྫུན་དུ་སྨྲ། །གཞི་མེད་བག་ཙམ་དགེ་འདུན་དབྱེན། །དེ་རྗེས་ཕྱོགས་དང་ཁྱིམ་སུན་འབྱིན། །ཤེས་བཞིན་ཤེས་ངོར་འཕྱ་བ་དང་། །ཟས་ཅུང་ལྷག་མས་སྐུར་འདེབས་དང་། །བསླབ་སྤོང་ད་གདོད་འབྲས་ཆེན་འགེབས། །འབྲུ་ཆང་བཅོས་ཆང་གར་སོགས་གསུམ། །འཕྲེང་སོགས་གསུམ་དང་ཆེ་མཐོ་གཉིས། །དུས་མིན་ཟས་དང་གསེར་དངུལ་གཉིས། །སྡོམ་ལས་ཉམས་པ་སུམ་ཅུ་གསུམ། །བར་མ་ཉམས་པ་རྣམ་གསུམ་སྟེ། །བླངས་འདས་སུམ་ཅུ་རྩ་དྲུག་གོ །དེ་ལ་སྲོག་གཅོད་བཞི་ནི། ཕམ་འདྲ་དང་། སྲོག་ཆགས་དང་བཅས་པའི་ཆུ་ལ་འདེབས་སྤྱོད་གཉིས། དུད་འགྲོ་གསོད་པ་རྣམས་སོ། །གར་སོགས་ནི་གླུ་དང་རོལ་མོ། འཕྲེང་སོགས་ན་ིསྤོས་ཉུག་པ་དང་རྒྱན་དང་ཁ་དོག་འཆང་བའོ། །བར་མ་གསུམ་ནི། མཁན་པོར་གསོལ་བ། ཁྱིམ་པའི་རྟགས་སྤོང་བ། རབ་བྱུང་གི་རྟགས་ཡང་དག་པར་ལེན་པར་ཁས་(༨༨བ)
བླངས་པ་གསུམ་ལས་ཉམས་པའོ། །གཉིས་པ་ནི་། སྲོག་གཅོད་བཞི། མ་བྱིན་ལེན། མི་ཚངས་སྤྱོད། རྫུན་བཅུ་བཞི། ཆང་། ཕྱི་དྲོའི་ཁ་ཟས་ཏེ་ཉེར་གཉིས། གར་སོགས་འཕྲེང་སོགས་ཆེ་མཐོ་གསེར་དངུལ་ཉམས་པ་གཉིས་རྣམས་ཀྱིས། རིན་པོ་ཆེ་ལ་རེག་པ་དང་ལོངས་པ་གཞིར་གཏོགས། ཁ་མ་བསྒྱུར་བའི་གོས་གྱོན་པ་གསུམ་སྟེ་རྣམ་འབྱེད་དང་སྦྱར་ན་ལྟུང་བ་ཉེར་ལྔ་འདུས་སོ། །གཉིས་པ་ནི། འོད་ལྡན་རྩ་འགྲེལ་དུ། ཕྱོགས་མཐུན་གྱི་མཚན་གཞིར་འཆིར་དང་གཡའ་སྒོག་ལ་སོགས་ནགས་མེས་གཏོང་། ཞེས་ནགས་ལ་མེས་གཏོང་བ་བསྡམ་བྱར་བཤད་པས་འདེབས་སྤྱོད་དང་མཚུངས་སོ་ཞེ་ན། མི་མཚུངས་ཏེ། གནོད་པ་ལས་བལྟོས་མེད་ཙམ་དང་། སྲོག་ལ་བལྟོས་མེད་ཀྱི་ཆ་ནས་གསོད་སེམས་ཡོད་མེད་ཀྱི་ཁྱད་པར་ཡོད་པའི་ཕྱིར་དང་། འཁྲུལ་མེད་སྲོག་ཆགས་བསད་བསམ་པས། །རིགས་གཞན་བསད་པ་ལ་ནི་ཉེས་བྱས་འགྱུར། །ཞེས་དང་། གང་ཞིག་སྲོག་ཆགས་བཅས་ཆུ་ལ་སོགས་སྤྱོད། །ཡང་ན་ཆུ་ཚན་ལ་སོགས་ལྡུགས་བྱེད་ལ། །ལྟར་ཡོད་སྐྱེ་བོ་ཤི་ན་དེ་ལ་ནི། །སྲོག་ཆགས་རེ་རེའི་ལྟུང་བ་ལྕི་བ་འབྱུང་། །ཞེས་དང་། ཡིད་ཀྱི་བསྡམ་བྱ་ལ་ལྟུང་བའི་མིང་མི་འདོགས་པར་གསལ་བར་བཤད་པས་སོ། །ཡང་སྔར་དྲངས་པའི་འདུལ་བར་དབྱེན་འདི་ཞེས་སོགས་དང་། འགྲེལ་ཆེན་དུ། རྫུན་དུ་སྨྲ་བའི་ཕྱོགས་དང་མཐུན་པ་ནི་དབྱེན་བྱེད་པ་དང་། དེའི་རྗེས་སུ་ཕྱོགས་པ་དང་། སྐུར་བ་འདེབས་པ་དང་། ཞེས་དང་། རྣམ་འབྱེད་འགྲེལ་པ་ལས་ཀྱང་། རྫུན་ནི་བསླུས་འདེབས་པ་ཡིན་ལ། སྐུར་(༨༩ན)
འདེབས་ནི་ཉམས་པར་འདུན་པ་ཡིན་ཞེས་སོགས་ཀྱི་གཞི་མེད་བག་ཙམ་སོགས་གཞི་ཕྱོགས་མཐུན་དུ་བསྟན་ནོ་ཞེ་ན། མ་ཡིན་ཏེ། འོད་ལྡན་ལས། ད་ནི་བཤད་པར་བྱ་ཡི། རྫུན་དུ་སྨྲ་བ་ཉོན་ཅིག་དང་བཤད་པར་བྱའོ། །གཞི་མེད་པར་དངོས་པོར་སྨྲ་བར་བྱེད་ན་བརྫུན་དུ་འགྱུར་རོ། །ཞེས་སོགས་དང་། གཞི་མེད་སོགས་རྫུན་གྱི་དབྱེ་བ་དེ་དང་དེ་དག་སྟོན་པའི་ལུང་བསྟན་བཅོས་ཀུན་ལས་རྫུན་གྱི་ལྟུང་བ་ཉིད་དུ་གསུངས་ལ། རྫུན་དུ་སྨྲ་བ་སྤོང་བར་དངོས་སུ་ཁས་བླངས་ནས་དེ་ལས་འདས་པ་བླངས་འདས་སུ་མི་འདོད་པ་ནི་མི་མཁས་པའི་གྲུབ་མཐའ་ཡིན་པའི་ཕྱིར་རོ། །འོ་ན་འབྲས་ཆན་འགེབས་པ་ལ་རྫུན་མ་ཚང་ངོ་ཞེ་ན། སུམ་བརྒྱ་པར། རྫུན་ཞེས་བྱ་བའི་ཚུལ་ནི་ཚིག་ཡིན་པས། ངག་གིས་གོ་བྱེད་འོན་ཏེ་ལུས་ཀྱིས་ཀྱང་། །གོ་བྱེད་ཉེས་བྱས་ཉིད་དེ་འོན་ཀྱང་ཆུང་། །ཞེས་བཤགས་བྱ་ཉེས་བྱས་ཀྱི་རྫུན་ཆུང་ངུར་བཤད་པས་ཚང་ངོ་། ཁ་ཅིག །ཤཱཀྱ་འོད་ཀྱི་བཞེད་པས། ཉམས་པ་གསུམ་ཕྱོགས་མཐུན་ཡིན་ཏེ། །ཁྱིམ་པའི་རྟགས་ནི་སྤོང་བར་སྨྲས་པས་ན། །དེ་ཉམས་ཕྱོགས་མཐུན་ཡོངས་སུ་སྤང་བྱ་སྟེ། ཁྱིམ་པ་འདྲ་བར་ཤམ་ཐབས་མི་བགོ་ཞིང་། ཁ་དོག་གཅིག་པའང་ཁ་ཚར་ཅན་དཀར་མིན་ཞེས་སོ། །ཁྱིམ་པའི་རྟགས་རྫོགས་པ་གོས་དཀར་པོ་གྱོན་པ་སོགས་དང་། གཅེར་བུ། སྐྲ་འབལ་ལག་པར་ཟས་ཟ་བ་སོགས་ཀྱང་ཕྱོགས་མཐུན་དུ་བཞེད་པས་སོ། །ཞེས་ཟེར་མོད། འདིར་སྤྱོད་པར་སྨྲས་པས་ན། ཞེས་དང་། གོང་དུ། (༨༩བ)
བླངས་པའི་ཕྱོགས་མཐུན་རྣམས་ལ་ཡིད་ཀྱིར་འགྱུར། །ཞེས་པའི་འགྲེལ་པར་བསླབ་གཞི་བཅུ་དང་བར་མ་གསུམ་ག་ཡང་དག་པར་བླངས་པའི་མཚན་གཞིར་བཤད་པས་དེ་ལས་འདས་པ་བཤགས་བྱར་བཞེད་པར་གསལ་ལོ། །དེས་ན་གོས་དཀར་པོ་གྱོན་པ་སོགས་ཀྱི་རྟགས་རྫོགས་པར་མི་འགྱུར་གྱི། འཇིག་རྟེན་ན་ཁྱིམ་པ་དང་མུ་སྟེགས་ཀྱི་རྟགས་རྫོགས་པར་ཇི་ཙམ་གྱིས་འཇོག་པའི་ཡུལ་དུས་དང་བསྟུན་པ་རྫོགས་པ་བླངས་འདས་སུ་འདོད་པར་རིག་པར་བྱའོ། །རྒྱ་འགྲེལ་ལས་ནི། བུད་མེད་དང་ལྷན་ཅིག་ཉལ་བ་དང་། དཀོན་ཅོག་གསུམ་ལ་མ་གུས་པ་དང་། གསོ་སྦྱོང་དགག་དབྱེ་མི་བྱེད་པ་རྣམས་གནས་པ་དང་། མ་གུས་པ་དང་། མི་སྦྱོང་བའི་གཞི་ལས་བྱུང་བའི་ཕྱོགས་མཐུན་གྱི་མཐུན་ཡུལ་བླངས་འདས་སུ་བཤད་ཅིང་། ཁང་པ་ཁང་ཆེན་ལ་ཡང་བཤགས་བྱ་དང་བསྡམ་བྱ་འགྱུར་བ་གཉིས་ཀ་ཡོད་པར་བཤད་དོ། །བོད་སྔ་མ་ཁ་ཅིག །སྲོག་གཅོད་ལ་མི་མ་ཡིན་གསོད་པའང་བགྲང་སྟེ། དེ་ལྟ་ན་ནི་བླངས་འདས་ཀྱི་གྲངས་སྔར་བཤད་པ་ལས་མང་བར་འགྱུར་ནའང་། བོད་ཀྱི་མཁས་པ་ཕལ་ཆེར་སྔར་བཤད་པ་རྣམས་བཞེད་དོ། །བསྡུ་བ་ནི། མཁན་པོ་ལས་ཐོབ་པ་བར་མ་དང་སློབ་དཔོན་ལས་ཐོབ་པ་སྡོམ་པ་གཉིས་ལས་འདས་པའོ། །སྡོམ་པའང་། གང་ཞིག་སྲོག་གཅོད་གཞན་གྱི་ནོར་འཕྲོག་དང་། །མི་ཚངས་སྤྱོད་རྫུན་གཅེས་པའི་ཆང་ལ་སོགས། །གར་སོགས་འཕྲེང་སོགས་མལ་ཆེན་མཐོ་བ་དང་། །ཕྱི་དྲོའི་ཁ་ཟས་གསེར་དངུལ་སྤོང་བ་སྟེ། །ཞེས་པ་བཅུར་འདུས་(༩༠ན)
ལ་བླངས་འདས་མང་ཡང་བཅུར་བསྡུ་བའི་རྒྱུ་ནི་མུ་སྟེགས་རྒྱ་གར་གྱི་བུ་ལ་བསླབ་པ་གསུམ་ལས་མེད་དོ། །ཞེས་བསྟན་པ་བཞིན་དུ་མངས་ན་སྐྲག་ནས་མི་འཇུག་པ་སྤང་བའི་ཆེད་ཡིན་ལ། བསྡུ་ཚུལ་ནི། སྲོག་གཅོད་བཞི་སྲོག་ལ་གནོད་པར་གཅིག་པ་དང་། རྫུན་བཅུ་བཞི་འདུ་ཤེས་བསྒྱུར་བ་དང་། ཆང་བག་མེད་དུ་དང་། གར་སོགས་རྒོད་བག་དུ་དང་། འཕྲེང་སོགས་བྱི་བྱད་དུ་དང་། མལ་འདོད་ཞེན་དུ་དང་། གསེར་དངུལ་དོན་མེད་ཀྱི་ལོངས་སྤྱོད་དུ་གཅིག་པས་དེར་བསྡུས་ཏེ་རྟོགས་པར་སླའོ། །ཤིན་ཏུ་བསྡུ་ན། མཛོད་དུ། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །གཞི་གཅིག་དེ་བཞིན་གསུམ་རིམ་བཞིན། །ཞེས་བསྙེན་གནས་ལ་བཤད་པ་དེ་ཉིད་དེ་བཞིན་ལྔ་རིམ་བཞིན་ཞེས་དགེ་ཚུལ་ཕ་མ་དང་། བཅུ་གཅིག་རིམ་བཞིན་ཞེས་དགེ་སློབ་མ་ལ་སྦྱོར། བསྙེན་པར་མ་རྫོགས་པའི་རྟེན་ལ་ཚེ་འདིར་དགྲ་བཅོམ་ཐོབ་པ་དཀོན་པས་སྐྱེ་བ་བརྒྱུད་དགོས་ལ། དེ་ལ་ཕྱི་མ་ལྷ་མིར་སྐྱེ་བ་དགོས་ཤིང་། དེ་ལ་ཚུལ་ཁྲིམས་དག་པ་དགོས་པས་རྩ་བཞི་ཚུལ་ཁྲིམས་ཀྱི་ཡན་ལག་ཡིན་ལ། དེ་བག་མེད་ན་མི་འགྲུབ་པས། ཆང་སྤོང་བ་བག་ཡོད་དང་། དེ་གཉིས་ཚང་ཡང་མྱང་འདས་ཀྱི་བསམ་པ་རྒྱུན་དུ་བསྟེན་པ་མེད་ན་ངེས་འབྱུང་ཚུལ་ཁྲིམས་སུ་མི་འགྱུར་ཞིང་། དེ་ཡང་འཁོར་བའི་ཆོས་རྒོད་བག་དང་དྲེགས་པ་ལ་སྐྱོ་བ་མེད་པར་མི་འགྱུར་བས་ན་གར་སོགས་སྤྱོད་པ་ནི་བརྟུལ་ཞུགས་ཀྱི་ཡན་ལག་གོ །གྲངས་ངེས་ནི་བཅུའམ་བཅུ་དྲུག་པོ་འདི་ཙམ་ཁོ་ནས་(༩༠བ)
བསྙེན་པར་མ་རྫོགས་ཤིང་། རབ་ཏུ་བྱུང་བའི་དོན་ཐམས་ཅད་འགྲུབ་པས་འདི་བས་མང་མི་དགོས་ཤིང་ཉུངས་ན་མི་འདུས་པ་སྟེ། སྤངས་བྱའི་གཙོ་བོ་བཅུར་འདུས་པས་དེ་ལས་བཟློག་པའི་སྒོ་ནས་བཞག་སྟེ། གཞན་གྱི་སྲོག་ལ་གནོད་པ་དང་། ལོངས་སྤྱོད་ལ་གནོད་པ་དང་། །རང་འཁྲིག་པའི་འདོད་ཆགས་དང་། འདུ་ཤེས་བསྒྱུར་བ་དང་། བག་མེད་པ་དང་། རྒོད་བག་དང་། བྱི་བྱད་དང་། འདོད་ཞེན་ཆེ་བ་དང་། ཉེས་སྤྱོད་འཕེལ་བའི་ཟས་དང་། ཡོ་བྱད་དོན་མེད་རྣམས་ལས་བཟློག་པས་སོ། །གོ་རིམ་ནི། རྩ་བ་དང་ཡན་ལག་གཙོ་འཁོར་གྱི་དང་། རྩ་བཞི་མི་དགེ་བ་བཅུའི་དང་། ཆང་དང་ཡན་ལག་ལྷག་མ་ཉེས་པ་ཆེ་ཆུང་གི་དང་། གར་སོགས་ལྔ་འཇིག་རྟེན་མཐུན་འཇུག་གི་གོ་རིམ་ཡིན་ཏེ། འཇིག་རྟེན་ན་རྒྱལ་པོ་སོགས་སྤྱན་འདྲེན་པ་ན། དང་པོར་གླུ་གར་གྱི་བསུ། དེ་ནས་འཕྲེང་བ་དང་རྒྱན་འདོགས། དེ་ནས་ཁྲི་བཟང་པོ་ལ་འཇོག །དེ་ནས་ཟས་བསྟབས། དེ་ནས་གསེར་དངུལ་སོགས་འབུལ་བ་བཞིན་ནོ། །ངོ་བོ་ནི་བར་མ་གསུམ་བར་མ་དགེ་བ་དང་། སྡོམ་པ་སྤོང་བཞི་འཁོར་དང་བཅས་པའི་ཚུལ་ཁྲིམས་ཏེ་དེ་གཉིས་ལས་འདས་པའི་ལུས་ངག་གི་ཉེས་སྤྱོད་ཡིན་ལ། གཉིས་ཀའང་རིག་བྱེད་མ་ཡིན་པས་བསྡུས་པའོ། །འོ་ན་བླངས་འདས་ཐམས་ཅད་བཤགས་བྱའི་ཉེས་བྱས་ཡིན་ནམ་མ་ཡིན། ཡིན་ན་རྩ་ལྟུང་ཡང་བཤགས་པས་འདག་པར་འགྱུར་ཞིང་། འདོད་ན། འོད་ལྡན་དུ་བྱེ་བྲག་བཤད་མཚོའི་ལུང་དྲངས་པ་ལས། མི་གསོད་ལ་སོགས་བཞི་རྣམས་ཀྱིས། །(༩༡ན)
དགེ་ཚུལ་ལས་ནི་ཉམས་འགྱུར་ཞིང་། །དགེ་སློང་བཞིན་དུ་དགེ་ཚུལ་ཡང་། །ཕྱིས་ནས་སྡོམ་སྐྱེའི་སྐལ་བ་མེད། །ཅེས་གསོར་མི་རུང་དུ་བཤད་པ་དང་འགལ་ལ། མ་ཡིན་ན། རྒྱ་ཆེར་འགྲེལ་དུ། སྤྱིར་བླངས་པ་མདོར་གཏོགས་ཀུན་དང་ཁྱད་པར་མི་ཚངས་སྤྱོད་བཤགས་བྱ་ཉེས་བྱས་སུ་བཤད་པ་དང་འགལ་ལོ་ཞེ་ན། འདི་ལ་སྔོན་གྱི་མཁས་པ་དག་བརྒལ་བརྟག་མང་དུ་མཛད་མོད་ཀྱི་ཉེས་བྱས་གཞིར་བཞག་ལ་བཤགས་བྱ་དང་བསྡམ་བྱ་གཉིས་སུ་འདུས་པའི་ནང་ནས་རྩ་ལྟུང་ཡང་བཤགས་བྱ་ལས་མ་འདས་ཏེ། ཉེས་བྱས་གང་གི་བསྡམ་བྱ་མ་ཡིན་པས་སོ། །བཤགས་བྱ་ཉེས་བྱས་ཡིན་ན་བཤགས་པས་འདག་པར་ཐལ་བ་ལ་ཁྱབ་པ་མེད་ཅིང་། རྒྱ་འགྲེལ་གྱི་དགོངས་པ་ཡང་བཤགས་པས་འདག་པར་བཞེད་པ་མ་ཡིན་ཏེ། བསྟེན་པའི་དོན་དུ་ཁས་བླངས་ཀྱི་ཐད་དུ་ཕམ་འདྲའི་ཉེས་བྱས་སུ་གསུངས་པས་སོ། །དེས་ན་ཆད་ལས་ཆེན་པོས་བཤགས་བྱ་ཡིན་ནོ་ཞེས་ཟེར་བའང་འཆབ་མེད་ལ་མ་ཁྱབ་པས་མི་འཐད་དོ། །དེ་ལྟར་ན་དགེ་སློང་དང་འདྲ་བར་འཆབ་བཅས་བྱུང་ན་གསོར་མི་རུང་དང་། འཆབ་མེད་བསླབ་པ་བྱིན་ནས་གསོ་བར་བྱ་བ་ཉིད་དོ། །འོ་ན་ཉེས་བྱས་ལ་བཤགས་བྱས་ཁྱབ་བམ་སྙམ་ན། མ་ཁྱབ་སྟེ། བླངས་འདས་དེའི་ཕྱོགས་དང་མཐུན་པ་ལ་ནི་ཡིད་ཀྱིས་བསྡམ་བྱ་ཉེས་བྱས་སུ་འགྱུར་བས་སོ། །འདི་ལ་ཕྱོགས་མཐུན་ངོས་བཟུང་བ་དང་། དེའི་དབྱེ་བསྡུའོ། །དང་པོ་ལ། ཕྱོགས་མཐུན་གྱི་མཚན་གཞི་གང་ཞེ་ན། བཤད་མ་ཐག་པའི་བླངས་འདས་དང་། (༩༡བ)
ཉེས་པ་མེད་པ་རྣམས་བོར་བའི་ལྷག་མ་དགེ་སློང་ཕ་མ་ལ་ལྟུང་བར་གསུངས་པ་མཐའ་དག་ཡིན་ནོ། །འོ་ན་ཉེས་མེད་དུ་ཡོད་ཅེ་ན། རྒྱ་ཆེར་འགྲེལ་ལས། འཆང་དང་འབྲལ་དང་མ་རིག་དང་། །སྤངས་པ་ཟ་དང་ས་བོན་འཇིག །མི་གཙང་འདོར་དང་ཤིང་འཛེག་དང་། །བླངས་པ་མདོར་གཏོགས་སློབ་མའི་མིན། །དགེ་ཚུལ་གཉིས་ཀྱི་རིན་ཅེན་རེག །གསོག་འཇོག་བྱས་པ་ཟ་བ་དང་། །བྱིན་ལེན་མ་བྱས་ས་བརྐོ་དང་། །སྐྱེ་བ་འཇིག་དང་བཅས་པ་མིན། །དབྱར་གནས་གཅིག་ཏུ་གནས་པ་དང་། །གསོ་སྦྱོང་དགག་དབྱེར་བཅས་པ་དང་། །དེ་ལ་སོགས་པ་དེ་ཡི་ནི། །བླངས་པའི་ཕྱོགས་དང་མཐུན་པ་ཡིན། །ཞེས་པའི་བཤད་པ་མཛད་པ་ན། དགེ་སློབ་མ་ལ་འཆང་བ་སོགས་བདུན་དང་། དགེ་ཚུལ་ཕ་མ་ལ་དེ་དག་གི་སྟེང་དུ་རིན་པོ་ཆེ་ལ་རེག་པ་སོགས་ལྔ་ཉེས་མེད་དུ་གསུངས་ཀྱང་། འཆང་བའི་གྲངས་ལ་ལྷུང་བཟེད་འཆང་བ་ཡང་བསྡུས་ནས་བགྲངས་པ་ཕྱེ་བས་བཅུ་གསུམ་དུ་འགྱུར་ནའང་། ས་བོན་དང་སྐྱེ་བ་འཇིག་པ་གཉིས་དགེ་སློབ་མ་ལ་གནང་མ་གནང་གི་སྒོ་ནས་ཕྱེ་བ་ཡིན་གྱི། ཉིས་བརྒྱ་ལྔ་བཅུ་བའི་གྲངས་ལ་གཅིག་ཏུ་བརྩི་བས་ཉེས་མེད་བཅུ་གཉིས་དངོས་སུ་གསུངས་སོ། །དོན་དེ་ཉིད་འོད་ལྡན་དུ་བྱེ་བྲག་བཤད་མཚོ་དྲངས་པར། འཆང་བ་དང་ནི་འབྲལ་བ་དང་། །དེ་བཞིན་ས་ནི་བརྐོ་བ་དང་། །རིན་ཅེན་རེག་དང་མེ་ལ་རེག །གཏད་ནས་ཟ་བར་བྱེད་པ་དང་། །ལྗོན་ཤིང་འཛེག་དང་ཤིང་གཅོད་དང་། །བྱིན་ལེན་མ་བྱས་ཟ་བ་དང་། །རྩྭ་སྔོན་མི་གཙང་འདོར་བ་དང་། །དེ་བཞིན་གསོག་(༩༢ན)
འཇོག་ཟ་བ་དང་། །ས་བོན་འཇོམས་དང་བསླབ་པའི་གཞི། །བཅུ་པོ་རྣམས་ནི་མ་གཏོགས་པ། །སོ་སོ་ཐར་པར་བསྟན་པ་དག །བླངས་པའི་ཕྱོགས་མཐུན་ཤེས་པར་བྱ། །ཞེས་པས་བཤད་ལ། དེ་ཉིད་འོད་ལྡན་གྱིས་བཀྲལ་བ་ན་ཡང་འཆང་བ་གཉིས་སོ་སོར་བགྲངས་ནས་བཅུ་གསུམ་དུ་གསུངས་པ་ལ་ཡང་ས་བོན་སྐྱེ་འཇིག་གཅིག་ཏུ་བསྡུས་པས་བཅུ་གཉིས་སོ། །དེ་ལྟར་ཉེས་མེད་དངོས་སུ་བཤད་པ་ནི་དེ་རྣམས་ཡིན་ལ། དོན་གྱིས་ཐོབ་པ་འབྲལ་བ་སྤྱིར་གནང་བས་བྱེ་བྲག་དགོན་པ་པའི་འབྲལ་བ་ལའང་ཉེས་པ་མེད་པར་འགྲུབ་ཅིང་། རྒྱུ་བྱིན་ལེན་མེད་པས་གསོག་འཇོག་གི་སྤང་ལྟུང་ཡང་མེད། ལས་ལ་འདུར་མི་རུང་ཞིང་འདུས་ན་རྐུ་ཐབས་སུ་གནས་པར་འགྱུར་བས་ལས་ཀྱི་ནང་ནས་མི་སྨྲ་བར་འགྲོ་བ་དང་། ལས་ལ་འདུན་པ་ཕྱིར་བསྒྱུར་བའི་ལྟུང་བ་ཡང་མེད། སྤྱིར་གོས་བྱིན་གྱིས་མ་བརླབས་པར་འཆང་དུ་གནང་བས་ཟླ་འཇོག་ཀྱང་མེད། དགེ་ཚུལ་མ་ལ་ཆོས་གོས་དང་ལྷུང་བཟེད་བྱིན་གྱིས་མ་བརླབས་པར་འཆང་བ་དང་དེ་ཉིད་ཟླ་བ་ཕྱེད་ཕྱེད་ན་བྱིན་གྱིས་མི་རློབ་པའི་ཉེས་པ་ཡང་མེད། བསྙེན་པར་མ་རྫོགས་པ་ནང་ཕན་ཚུན་ནུབ་ལྷག་པར་ཉལ་དུ་གནང་བས་དེའི་ཕྱེད་ལ་ལྟུང་བ་མེད་དོ། །དེ་ལྟར་ན་དགེ་སློབ་མ་ལ་འཆང་བ་གཉིས། འབྲལ་བ་གཉིས། འཇོག་པ། མེ་རེག །སྤངས་ཟ། ས་བོན་འཇིག་པ། རྩྭ་སྔོན་ལ་མི་གཙང་འདོར་བ། ཤིང་ལ་འཛེག་པ། འདུན་པ་ཕྱིར་བསྒྱུར། ལས་ནང་ནས་མི་སྨྲ་བར་འགྲོ་བ། དགེ་སློབ་མ་ནང་ཕན་ཚུན་ནུབ་ལྷག་པ་སྟེ། ས་བོན་འཇིག་པ་ལོགས་སུ་བགྲངས་ན་ཕྱེད་དང་བཅུ་གསུམ། (༩༢བ)
དགེ་ཚུལ་ཕ་མ་ལ་དེ་དག་གི་སྟེང་དུ་གཞན་གྱི་རིན་པོ་ཆེ་ལ་རེག་པ། གསོག་འཇོག་བྱེད་པ་དང་། ཟ་བ། བྱིན་ལེན་མ་བྱས་པར་ཟ་བ། ས་རྐོ་བ། སྐྱེ་བ་འཇིག་པ་གཅིག་ཏུ་བགྲངས་ན་དྲུག་སྟེ་བསྡོམས་པས་ཕྱེད་དང་བཅུ་དགུ །ཉིས་བརྒྱ་ང་གསུམ་གྱི་གྲངས་ལ་ས་བོན་དང་སྐྱེ་བ་འཇིག་པ་གཅིག་ཏུ་བགྲངས་པ་ལྟར་ན་ཕྱེད་དང་བཅོ་བརྒྱད་ཉེས་མེད་དུ་གནང་ཞིང་། གནང་བའི་རྒྱུ་མཚན། དགེ་སློང་ཕ་མའི་གཡོག་བྱེད་དགོས་ཤིང་ཚུལ་དང་མི་མཐུན་པ་ཤས་ཆུང་བ་སོགས་ཀྱི་ཆ་ནས་འགོག་པའི་དགག་བྱ་ལས་གནང་བའི་དགོས་པ་ཆེ་བས་ཡིན་གྱི། དགེ་ཚུལ་ལོངས་སྤྱོད་ལ་ཞེན་པ་ཆུང་བ་དང་། ཟས་འཇུ་སླ་བ་སོགས་ཀྱིས་ཡིན་ནོ་ཞེས་སྨྲ་བ་ནི་མུན་སྤྲུལ་ལོ། །འོ་ན་ཞུ་བ་ཆེ་བ་ནས་འཆང་འབྲལ་མེ་རེག་སོགས་དུ་མ་ལ་ཉེས་བྱས་སུ་བཤད་པ་ཅི་ཞེ་ན། ལུང་གི་ཡི་གེ་མ་དག་པར་གསལ་ཏེ། ལུང་ཞུ་བ་ཉུང་བ་དང་། བྱེ་བྲག་བཤད་མཚོ་དང་། ཐོ་དཀར་གྱི་མཁས་པ་སོགས་ཀྱིས་ཉེས་མེད་དུ་བཤད་པས་སོ། །འོ་ན་བླངས་འདས་དང་ཉེས་མེད་ལས་གཞན་མཐའ་དག་ཕྱོགས་མཐུན་ཡིན་ན་གཞི་བསྡུས་རྣམས་ཀྱང་དེར་ཐལ་ལ། འདོད་ན། སོ་སོ་ཐར་པར་བསྟན་པ་དག །ཅེས་དང་། བླངས་པ་མདོར་གཏོགས་ཞེས་བཤད་པ་དང་འགལ་ཞེ་ན། མི་འགལ་ཏེ། གཞི་བསྡུས་ཀྱི་ཉེས་པ་སོ་ཐར་དུ་བསྟན་པའི་ཕྱིར་ཏེ། རྩོད་པ་ཞི་བྱེད་དངོས་སུ་བསྟན་ལ། གཞི་གཞན་རྣམས་ཤུགས་ལ་བསྟན་པས་སོ། །དེ་ལྟ་མིན་ན་གཞི་བཅུ་བདུན་པོ་རྣམས་སོ་ཐར་གྱི་དོན་འགྲེལ་མིན་པར་ཐལ་བ་བཟློག་ཏུ་མེད་དོ། །དེ་རྣམས་ཕྱོགས་མཐུན་དུ་འཇོག་(༩༣ན)
པའི་རྒྱུ་མཚན་ནི། དངོས་སུ་བླངས་པ་རྣམས་དང་དགག་བྱ་དགོས་པ་མཐུན། སྦྱོར་བ་རྗེས་སྒྲུབ་མཐུན། རྒྱུད་པ་རྒྱུད་འགྲོ་མཐུན་པ་སྟེ། མཐུན་པ་གསུམ་གྱིས་མཐུན་ཞིང་། བསྙེན་པར་མ་རྫོགས་པ་ལ་གནང་བའི་ལྟུང་བ་རྣམ་གཞག་གིས་མ་བསྐྱེད། གཞི་གཞན་དུ་མ་བཅས་ཤིང་བཤགས་བྱར་མི་འགྱུར་བས་སོ། །དེས་ན་བླངས་འདས་དང་མཐུན་པ་གསུམ་གྱིས་མཐུན་ཞིང་། བསྡམ་བྱར་བཅས་པའི་ཉེས་བྱས་ནི་སྤངས་བྱ་ཕྱོགས་མཐུན་གྱི་མཚན་ཉིད་ཡིན་ལ། རབ་ཏུ་བྱུང་ཞིང་བསྙེན་པར་མ་རྫོགས་པས་དངོས་སུ་བླངས་པའི་ཚུལ་ཁྲིམས་དང་། མཐུན་པ་གསུམ་གྱིས་མཐུན་ཞིང་བར་མས་བསྡུས་པའི་ཚུལ་ཁྲིམས་ནི་གཉེན་པོ་ཕྱོགས་མཐུན་གྱི་མཚན་ཉིད་ཡིན་གྱི། འདི་སྡོམ་པས་བསྡུས་ན་སྤང་བྱ་ལྟུང་བར་ཐལ་བ་དང་། སྤོང་བ་བདུན་པར་ཐལ་བ་སུས་ཀྱང་མི་བཟློག་གོ །དབྱེ་བ་ནི་རྣམ་འབྱེད་ཀྱིས་བསྡུས་པའི་ལྟུང་བ་རྣམ་གཞག་ལ་བླངས་འདས་སུ་འགྲོ་བ་ཉེར་ལྔ། ཉེས་མེད་ཕྱེད་དང་བཅོ་བརྒྱད་རྣམས་མ་གཏོགས་པ་ཉིས་བརྒྱ་དང་ཕྱེད་དང་བཅུ་མ་རྣམས་ལའང་དེས་འགྲེ་བ་རྣམས་དང་། ལྟུང་བ་རེ་རེ་ཡང་སྦྱོར་བ་དང་སྦྱོར་བའི་སྦྱོར་བ། གཞིས་བསྡུས་ཀྱི་བཤགས་བྱ་ཉེས་བྱས་བསྙེན་པར་རྫོགས་པ་ལ་གང་བཤད་པ་ཐམས་ཅད་ཕྱོགས་མཐུན་དངོས་ཡིན་ལ། སེམས་བསྐྱེད་བསྡམ་བྱ་ཐམས་ཅད་ནི་དགེ་སློང་ཕ་མ་ལའང་བསྡམ་བྱ་ཡིན་པས་འདིར་བསྡམ་བྱ་ཕྲ་མོའོ། །བསྡུ་བ་ནི་བྱེ་བྲག་བཤད་མཚོ་དང་། དྷརྨ་མི་ཏྲས་གཞི་བཅུར་བསྡུས་ཏེ། འགྲེལ་ཆེན་ལས། (༩༣བ)
རྟགས་དང་སློབ་དང་སྣོད་དང་ནི། །ལོངས་སྤྱོད་ཕྱར་གཡེང་འདོད་པ་དང་། །གནོད་པ་དང་ནི་གནས་པ་དང་། །མ་གུས་མི་སྦྱོང་བཞི་ལས་བྱུང་། །ཞེས་སོ། །དེ་ཡང་རྒྱ་ཆེར་འགྲེལ་གྱིས་ནི་བླངས་འདས་དང་ཕྱོགས་མཐུན་གཉིས་ཀ་ལ་མཐུན་ཡུལ་དང་། མཐུན་ཆོས་ཀྱི་ཚུལ་དུ་གཞི་བཅུ་སྦྱར་ལ། འོད་ལྡན་གྱིས་ཕལ་ཆེར་མ་ཕྱེ་བར་སྦྱར་རོ། །དེ་ཡང་རྟགས་ཀྱི་གཞི་ལས་བྱུང་བ་ནི། ཁྱིམ་པ་དང་མུ་སྟེགས་ཀྱི་རྟགས་རྫོགས་པར་འཆང་བ་བླངས་འདས་དང་། ལྷུང་བཟེད་ཀྱང་མུ་སྟེགས་སོགས་དང་འདྲ་བའི་མི་རུང་བ་འཆང་བ་བླངས་འདས་དང་། གོས་སོགས་རྒྱུ་མི་རུང་བ་དང་ཚད་དང་མི་ལྡན་པ་འཆང་བ་བྱི་དོར་མ་གནང་བ་བྱེད་པ་ལྟ་བུ་ཕྱོགས་མཐུན་ནོ། །དེ་བཞིན་དུ་སློང་བའི་གཞི་ཡང་། གསེར་དངུལ་སློང་བ་དང་། གོས་སློང་བ་རིམ་པ་བཞིན་ནོ། །སྣོད་སྤྱད་ཀྱི་ཡང་རིན་པོ་ཆེ་དང་བ་སོ་སོགས་ཀྱིས་ཁབ་རལ་བྱེད་པའོ། །ལོངས་སྤྱོད་ཀྱི། ཕྱི་དྲོའི་ཁ་ཟས་དང་སྒོག་སྐྱ་ཟ་བ་སོགས་སོ། །ཕྱར་གཡེང་གི་ཡང་། མལ་ཆེ་མཐོ་དང་གླུ་གར་སོགས་དང་། ཁྲུས་དང་ཆུ་ལ་རྩེ་བ་སོགས་སོ། །འདོད་པའི་ཡང་། མི་ཚངས་སྤྱོད་དང་འབྱིན་པ་སོགས་སོ། །གནོད་པའི་ཡང་། དབྱེན་སོགས་དང་། ཚིག་རྩུབ་ཕྲ་མ་སོགས་སོ། །གནས་པའི་ལ། འགྲེལ་ཆེན། བུད་མེད་དང་ཉལ་བ་བླངས་འདས་དང་། བསྙིལ་བ་དང་། ཁྱིམ་པ་མུ་སྟེགས་སོགས་དང་ཉལ་བ་ཕྱོགས་མཐུན་དུ་བྱེད་ལ། འོད་ལྡན། སྔ་མ་མི་ཚངས་སྤྱོད་དང་། ཕྱི་མ་སྡོམ་(༩༤ན)
པ་མཐའ་དག་ཉམས་པའི་ཕྱོགས་མཐུན་ཉིད་དུ་འདོད་དོ། །མ་གུས་པའི་ལ། འགྲེལ་ཆེན། དཀོན་ཅོག་གསུམ་ལ་མ་གུས་པ་བླངས་འདས་དང་། མཁན་སློབ་སོགས་ལ་མ་གུས་པ་ཕྱོགས་མཐུན་དུ་འཆད་ཅིང་། འོད་ལྡན། གནས་ལ་མ་གུས་པ་སྡོམ་པ་མཐའ་དག་ཉམས་པ་དང་། མཁན་པོ་ལ་མ་གུས་པ་མཁན་པོར་གསོལ་བ་བཏབ་པའི་ཕྱོགས་མཐུན་དང་། གང་ཟག་གཞན་ལ་མ་གུས་པ་ནི་མཁན་པོ་ལ་མ་གུས་པའི་ཕྱོགས་མཐུན་ནོ། །མི་སྦྱོང་བ་ལའང་། འགྲེལ་ཆེན། གསོ་སྦྱོང་། དགག་དབྱེ་སོགས་མི་བྱེད་པའི་སྒོ་ནས་བསླབ་པ་འདྲལ་བ་བླངས་འདས་གསོ་སྦྱོང་སོགས་ལ་གཡེལ་བ་ཕྱོགས་མཐུན་དུ་བཞེད་ལ། འོད་ལྡན་ནི། གསོ་སྦྱོང་དང་དགག་དབྱེ་མི་བྱེད་པ་ཉིད་ཕྱོགས་མཐུན་དུ་བཞེད་ལ། དགེ་ཚུལ་ལ་ཡང་དགག་དབྱེ་བྱ་བར་དངོས་སུ་གསུངས་པ་ཉིད་ཀྱིས་གསོ་སྦྱོང་ཡོད་པ་འགྲེལ་པ་གཉིས་ཀས་བཤད་ལ། ཕྱོགས་མཐུན་རྣམས་ལ་བསྡམ་བྱར་འགྱུར་བའི་རྒྱུ་མཚན། འོད་ལྡན་ལས། ཡན་ལག་བཅུ་པ་འདིས་ཞེས་བསླབ་པའི་ཚད་བཞག་ནས་བཅུ་པོ་ཁོ་ན་ལ་འདས་ན་ལྟུང་བར་གསུངས་ཀྱི། གཞན་ལ་མ་གསུངས་ཤིང་སྐྱོན་མེད་པ་ཡང་མ་ཡིན། བླངས་པ་དང་ཤན་འདྲ་བ་ཡིན་པའི་ཕྱིར་དང་། ཡིད་ཀྱིས་བསྡམ་པར་བྱ་བ་ཞེས་སྤྱིར་བསྟན་པའི་ཕྱིར། ཞེས་པའི་སྒྲུབ་བྱེད་དང་། ཡན་ལག་མ་ཚང་བའི་ན་སྨད་དུ་མི་འཐད་དམ་སྙམ་ན། ན་སྨད་ནི་བླངས་འདས་ལྟ་བུ་ལྟུང་བར་འགྱུར་བའི་ཡུལ་ལ། (༩༤བ)
ཡིན་གྱི། ཕྱོགས་མཐུན་བསྡམ་བྱ་ནི་ལྟུང་བ་མ་ཡིན་པས་ན་སྨད་མི་འཇོག་པ་དང་། ཕྱོགས་མཐུན་གྱི་ནང་ན་ཡང་སྡིག་པ་ཆེན་པོར་འགྱུར་བ་ཡོད་པས་ལྟུང་བ་ཆེན་པོར་ཅིའི་ཕྱིར་མི་འགྱུར་སྙམ་ན། ལྟུང་བ་ཆེ་ཆུང་ནི་བཅས་པ་ཙམ་གྱི་རྗེས་སུ་འབྲང་གི །སྡིག་པའི་རྗེས་སུ་མི་འབྲང་ལ། སྡིག་པ་ཆེ་ཆུང་ནི་ཡུལ་དང་བསམ་པའི་རྗེས་སུ་འབྲང་བར་བཤད་དོ། །མདོ་རྩ་བ་འདི་ནི་བསྙེན་པར་རྫོགས་པའི་སྤང་བླང་གཙོ་བོར་སྟོན་པས་དགེ་ཚུལ་གྱི་སྤང་བླང་མི་རྒྱས་པས་ན་གཞུང་འདི་གཉིས་ལ་བཤད་པ་ཞིབ་ཏུ་བྱས་པ་ལས་རྟོགས་དགོས་པའི་ཕྱིར་རྒྱས་པར་བྲིས་མོད་ཀྱི། འོན་ཀྱང་སུམ་བརྒྱ་པ་རྩ་འགྲེལ་སོགས་ལ་ད་དུང་བསླབ་པར་བྱའོ། །སྡོམ་པ་སྐྱེས་ལ་མ་ཉམས་ན་སྡེ་ལྔ་རྫོགས་པར་བསྐྱེད་དམ་སྙམ་ན། དེས་མ་ཁྱབ་སྟེ། བསྙེན་པར་མ་རྫོགས་ཤིང་། རབ་ཏུ་བྱུང་བ་དགེ་ཚུལ་ཕ་མ་དང་། དགེ་སློབ་མ་སྐྱེས་ལ་མ་ཉམས་པས་བླངས་པ་ལས་འདས་པ་ལ་ཡང་ཉེས་བྱས་ཀྱི་ལྟུང་བ་ལས་མི་འབྱུང་བའི་ཕྱིར། བསྙེན་པར་མ་རྫོགས་པའི་རབ་བྱུང་ཐམས་ཅད་ཀྱི་ལྟུང་བ་ལ་ཉེས་བྱས་ཁོ་ནའི་མིང་གིས་སྟོན་པའི་རྒྱུ་མཚན་ནི། དགྲ་བཅོམ་པ་ཉེར་སྦས་དང་། ཟླ་བའི་ནོར་བུ་གཉིས་ཀྱིས་བསྙེན་པར་རྫོགས་མ་རྫོགས་གཉིས་ཀྱི་བྱེ་བྲག་བསྟན་པའི་ཕྱིར་དང་། ཚུལ་ཁྲིམས་ཀྱི་མཐའ་མར་གྱུར་བའི་ཕྱིར་རོ། །ཞེས་གསུངས་སོ། །ཀརྨ་ཤ་ཏམ་དུ། དང་པོར་བྱ་དང་ཞེས་པའི་ཁོངས་སུ་བསྒྲུབ་བྱ་ལོ་ཉི་ཤུ་ལོན་དགོས་ལ། རྒྱ་ཆེར་འགྲེལ་དུ། ལོ་ཉི་ཤུ་མ་ལོན་(༩༥ན)
ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་གལ་ཏེ་མ་ལོན་ན་གཞན་ལ་རེ་ཞིག་གནས་པའི་ཕྱིར་གཏད་པར་བྱའོ། །ཞེས་སོགས་ལས་རབ་བྱུང་གི་གཞི་ནས་གསལ་བར་གསུངས་ཀྱང་། ས་ག་ལྷས། གང་འདི་ཉི་ཤུ་མ་རྫོགས་པའི། །ལོ་ཡིས་དགེ་སློང་བྱས་ན་ནི། །ཟླ་བཤོལ་མངལ་གྱི་ཟླ་རྣམས་ཀྱིས། །མཁས་པ་ཡིས་ནི་དགང་བར་བྱ། །གལ་ཏེ་དེ་ལྟ་ན་ཡང་འདིས། །ལོ་ནི་ཉི་ཤུ་མ་ཚང་ན། དགེ་ཚུལ་ཉིད་དུ་གནས་འགྱུར་ཏེ། །དེ་ནི་བསྙེན་པར་རྫོགས་མིན་ཉིད། །ལོ་ནི་གཅིག་གམ་གཉིས་དག་ན། །གལ་ཏེ་དྲན་པ་རྙེད་གྱུར་ན། །འདི་ཡི་ལོ་ནི་ཚང་བ་ཡིས། །བསྙེན་པར་རྫོགས་པ་ཉིད་ཡིན་ནོ། །ཞེས་གསུངས་པ་ལ། བུ་སྟོན་གྱི་ལས་བརྒྱའི་ཊཱིཀྐར། འོ་ན་ལོ་ཉི་ཤུ་མ་ལོན་པ་ལ་ལོན་པར་འདུ་ཤེས་པ་དེ་ལས་མི་ཆགས་པར་འགྱུར་ཏེ་དོན་ཤེས་མཐུན་པ་མེད་པའི་ཕྱིར་རོ་སྙམ་ན། མ་ལོན་པ་ལ་ལོན་པར་འདུ་ཤེས་པ་ནི་བསྒྲུབ་བྱའི་འདུ་ཤེས་ཡིན། དགེ་འདུན་གྱི་བསྒྲུབ་བྱས་ལོན་པར་འདུ་ཤེས་པ་ལ་དེ་ལྟར་ཤེས་སམ་ཡིད་གཉིས་ཟ་ན་སྡོམ་པ་སྐྱེ་བར་འདུ་ཤེས་པ་ཡིན། དོན་ལ་སྡོམ་པ་སྐྱེ་བའི་བར་ཆད་མེད་པ་ལ་དེ་ལྟར་འདུ་ཤེས་སམ། ཐེ་ཚོམ་ཟ་ན་དོན་ཤེས་མཐུན་པ་ཡིན་ནོ། །གནམ་རྩིབས་སྟེང་མར། གཞིའི་ཡན་ལག་གང་བསྙེན་པར་རྫོགས་པར་བྱེད་པའི་ཡུལ་ནི་བསྙེན་པར་མ་རྫོགས་ཤིང་རྫོགས་པར་འདོད་པ། སྡོམ་པ་སྐྱེ་བའི་བར་ཆད་གཞན་དང་མི་ལྡན་ཞིང་མངལ་བཤོལ་དང་(༩༥བ)
བཅས་ཏེ་ལོ་ཉི་ཤུ་མ་ལོན་པའོ། །ཞེས་སོགས་ཀྱི་མཇུག་ཏུ་ཉི་ཤུ་མ་ལོན་པར་འདུ་ཤེས་ན་སྡོམ་པ་སྐྱེ་ལ། དེས་མངལ་བཤོལ་དང་བཅས་ཏེ་ཉི་ཤུ་མ་ལོན་པའི་སྔ་རོལ་དུ་མ་ལོན་པར་བསྙེན་རྫོགས་བྱས་པར་ཤེས་ན་སྡོམ་པ་གཏོང་ངོ་ཞེས་དང་། སྟག་ཚང་ལོ་ཙཱ་བས། འོན་ཀྱང་དེས་ཕྱིས་མ་ལོན་པར་ཤེས་ན་ནི་གལ་ཏེ་བློ་དེ་སྐྱེས་པའི་ཚེ་ན་ཉི་ཤུ་མ་ལོན་ན་སྔར་སྐྱེས་པ་དེ་ཞིག །དེའི་ཚེ་ལོན་ན་མི་འཇིག་སྟེ། འདི་ཡང་འདུ་ཤེས་ཀྱི་ཤུགས་ཀྱིས་སོ། །དྲན་ནས་བརྩི་བ་ན་མངལ་བཤོལ་སོགས་དང་བཅས་ཏེ་ཁ་བསྐང་བས་ཆོག་ལ། དང་པོ་ལེན་པའི་ཚེ་མངལ་བཤོལ་གྱི་ཁ་འགེངས་པ་དག་ལ་ནི་བསྒྲུབ་བྱ་ལ་སྡོམ་པ་སྐྱེས་ཀྱང་མཁན་པོ་ལྟུང་བྱེད་དུ་འགྱུར་བར་རྣམ་འབྱེད་ལས་བཤད་དོ། །ཞེས་དང་། ལུང་རིགས་གཏེར་མཛོད་དུ། བསྒྲུབ་བྱ་བསྙེན་པར་རྫོགས་པར་བྱེད་པ་ལ། དངོས་པོ་ལེན་པའི་ཚེ་མངལ་བཤོལ་གྱི་ཁ་འགེངས་པ་དག་ལ་ནི་བསྒྲུབ་བྱ་ལ་སྡོམ་པ་སྐྱེས་ཀྱང་མཁན་པོ་ལྟུང་བྱེད་དུ་འགྱུར་བར་རྣམ་འབྱེད་ལས་བཤད་དོ། །ཞེས་དང་། ལུང་རིགས་གཏེར་མཛོད་དུ། བསྒྲུབ་བྱ་བསྙེན་པར་རྫོགས་པར་བྱེད་པ་ལ། དངོས་པོ་ལ་ལོ་ཉི་ཤུ་ལོན་པའམ་བསམ་ངོར་ལོ་ཉི་ཤུ་ལོན་ནམ་སྙམ་པའི་ཐེ་ཚོམ་ཡན་ཆད་ཀྱི་སྒོ་ནས་འདུ་ཤེས་པ་ཞིག་དགོས་ལ། དེ་ལས་གཞན་དུ་བསྙེན་རྫོགས་ཀྱི་སྡོམ་པ་མི་འཆགས་པའི་ཕྱིར་རོ། །དེ་ཡང་བསྒྲུབ་བྱ་འགའ་ཞིག་གིས་དང་པོར་ལོ་ཉི་ཤུ་མ་ལོན་པ་ལ་ལོན་པར་འདུ་ཤེས་པའི་སྒོ་ནས་བསྙེན་རྫོགས་ཀྱི་སྡོམ་པ་བླངས། ཕྱིས་ཉི་ཤུ་མ་ལོན་པར་ངོ་ཤེས་པའི་ཚེ་མངལ་གྱི་ཟླ་བ་དང་བཤོལ་གྱི་ཟླ་བས་ཁ་བསྐང་བའི་སྟོབས་ཀྱིས་ལོ་ཉི་ཤུ་ཚང་ན་བསྙེན་རྫོགས་ཀྱི་སྡོམ་པ་མི་གཏོང་ལ། དེ་ལྟར་ཁ་བསྐང་ཡང་ལོ་ཉི་ཤུ་མ་ཚང་ན་བསྙེན་རྫོགས་ཀྱི་སྡོམ་པ་གཏོང་། ཞེས་(༩༦བ)
གསུངས། མཁས་གྲུབ་རྗེས། མངལ་བཤོལ་གཉིས་ཀ་དང་བཅས་པའི་ལོ་ཉི་ཤུ་མ་ལོན་པ་ཡང་བསྙེན་རྫོགས་ཀྱི་སྡོམ་པ་སྐྱེ་བའི་བར་ཆད་དུ་གསུངས་པ་ལ། དངོས་པོ་ལ་མ་ལོན་ཀྱང་བསྒྲུབ་བྱ་ཁོ་རང་གིས་ལོན་པར་འདུ་ཤེས་ན་ནི་སྡོམ་པ་སྐྱེ་ལ། སྡོམ་པ་སྐྱེས་ཟིན་པའི་རྗེས་སུ་མ་ལོན་པར་བསྙེན་རྫོགས་བྱས་པ་ཉིད་དུ་ངེས་ན། ངེས་པ་དེ་སྐྱེས་པའི་ཚེ་ན་ཡང་ད་དུང་ལོ་ཉི་ཤུ་མ་ལོན་ན་སྔར་སྡོམ་པ་སྐྱེས་པ་དེ་འཇིག་ཅིང་། སྔར་བསྙེན་རྫོགས་བྱེད་པའི་ཚེ་མ་ལོན་པ་ལ་ལོན་པར་འཁྲུལ་ནས་བྱས་པ། དུས་ཕྱིས་ལོ་ཉི་ཤུ་ལོན་པའི་རྗེས་སུ་སྔར་མ་ལོན་པ་ལ་བསྙེན་རྫོགས་བྱས་པར་ངེས་ཀྱང་སྡོམ་པ་སྔར་སྐྱེས་པ་མི་འཇིག་གོ །ཚུལ་འདི་ནི་ལོ་བདུན་མ་ལོན་པར་རབ་བྱུང་བྱས་པ་ལ་ཡང་ཤེས་པར་བྱའོ། །ཞེས་དང་། རྒྱ་ཆེར་འགྲེལ་ལས། ཤེས་ན་ནི་དེ་ཞིག་གོ་ཞེས་བྱ་བ་ནི། ལོ་ཉི་ཤུ་མ་ལོན་པར་བསྙེན་པར་རྫོགས་པ་ལོ་ཉི་ཤུ་མ་ལོན་པར་ཤེས་ན་སྔར་སྡོམ་པ་ཆགས་པ་དེ་ཞིག་གོ །ཅི་ཆོ་ག་དེ་ཆོ་ག་གཅིག་ཏུ་ཟད་དམ་ཞེ་ན། དེའི་ཕྱིར་གལ་ཏེ་སྐྱེས་པ་ན་མ་ལོན་པའིའོ། །ཞེས་བྱ་བ་སྨྲས་ཏེ། བསྙེན་པར་རྫོགས་པའི་འོག་ཏུ་བདག་ཉིད་ལོ་ཉི་ཤུ་མ་ལོན་ནོ་སྙམ་པ་ནི་གནས་སྐབས་དེའི་ཚེ་གལ་ཏེ་དགེ་སློང་དེ་ལོ་ཉི་ཤུ་མ་ལོན་པར་གྱུར་ན་དེའི་ཚེ་དེའི་སྡོམ་པ་སྔར་འཆགས་པ་དེ་ཞིག་གོ །གལ་ཏེ་བདག་ཉིད་ལོ་ཉི་ཤུ་མ་ལོན་པར་བསྙེན་པར་རྫོགས་སོ་སྙམ་པའི་འདུ་ཤེས་སྐྱེས་པའི་གནས་སྐབས་དེའི་ཚེ་ན་དེས་ལོ་ཉི་ཤུ་ལོན་པར་གྱུར་ན་ནི་(༩༦བ)
དེའི་སྡོམ་པ་སྔ་མ་འཆགས་པ་དེ་མི་འཇིག་གོ །བསམ་པ་ཙམ་གྱི་དབང་གིས་ཀྱང་སྡོམ་པ་གཏོང་བར་སྣང་སྟེ། དཔེར་ན་དགེ་བའི་རྩ་བ་ཆད་པའི་ཕྱིར་རོ། །ཞེས་བྱ་བ་ལྟ་བུའོ། །ཅི་བསྙེན་པར་རྫོགས་པའི་གནས་སྐབས་ན་བདག་ཉིད་ལོ་ཉི་ཤུ་མ་ལོན་པར་བསྙེན་པར་རྫོགས་པར་ཤེས་པའི་ཚེ་དེའི་གནས་སྐབས་ཕན་ཆད་ལོ་ཉི་ཤུ་ལོན་ནམ་མ་ལོན་བརྩི་བ་སྟེ། དང་པོ་མངལ་གྱི་གནས་བསམ་པ་ནས་བརྩམས་ཏེ། དེ་ཚུན་ཆད་བརྩི་བར་བྱའམ་འོན་ཏེ་མངལ་དུ་ཞུགས་པ་ཚུན་ཆད་ནས་བརྩི་བར་བྱ་ཞེ་ན། དེའི་ཕྱིར་མངལ་ན་གནས་པ་དང་བཤོལ་གྱི་ཟླ་བ་དང་ཡང་བཅས་ཏེའོ། །ཞེས་བྱ་བ་སྨྲས་ཏེ། མངལ་ན་གནས་པའི་ཟླ་བ་དག་དང་བཤོལ་གྱི་ཟླ་བ་ལྷག་མ་དག་དང་ཡང་བཅས་ཏེ། དེའི་ལོ་ཉི་ཤུ་ཉིད་བརྩི་བར་བྱའོ། །བསྙེན་པར་རྫོགས་པར་འདོད་པའི་གནས་སྐབས་སུ་ནི་བརྩི་བར་མི་བྱ་སྟེ། གལ་ཏེ་རྩི་བར་བྱེད་ན་བསྙེན་པར་རྫོགས་པ་ནི་འཆགས་པ་ལ་བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ། །ཞེས་བྱུང་། བཅུ་བདུན་དང་པོར་ལུས་རྫོགས་བསྟན་ལ་ཞུགས། །གཉིས་པ་རྒྱ་གར་བགྲོད་ནས་མཁས་པ་བསྟེན། །གསུམ་པ་བོད་ཡུལ་ཆོས་འཁོར་བཞི་པ་བསྐོར། །ཞེས་ལོ་ཆེན་བློ་ལྡན་ཤེས་རབ་ཀྱི་ཆེ་བརྗོད་འདི་ལ་བཅུ་བདུན་དང་པོར་བསྟན་ལ་ཞུགས་པ་དགེ་ཚུལ་ཙམ་མིན་པའི་ངེས་པ་མི་འདུག་ཅིང་། གལ་ཏེ་དགེ་སློང་ཡིན་ན་བསྟན་པ་ཕྱི་དར་ནས་ཡུན་ཧ་ཅང་མི་རིང་བས་དཔྱད་པ་མ་ཞུགས་པར་མངོན། འབྲུག་(༩༦ན)
སྦྲུལ་གྱིས་བཅུ་བདུན་པར་མཁྱེན་བཞིན་དུ་བསྒྲུབས་པ། སྡོམ་པ་གཏན་མེད་དུ་སོང་བས་སྔོན་ཆད་ཕྱོགས་དེར་རྟོགས་ལྡན་གྱི་བརྟུལ་ཞུགས་འཛིན་པ་མང་ཞིང་། ཚངས་སྤྱོད་དོན་གཉེར་དག་ཀྱང་ཇོ་གདན་པ་དང་ས་སྐྱ་པ་ཕྱོགས་ལ་གཏུག་པར་ཟད་མོད། རྗེ་པད་དཀར་གྱིས་ལས་ཆོག་གསར་དུ་བརྩམས་ཏེ་རང་ཚུགས་འཛིན་ཡང་རྩ་བ་ཆད་པའི་ལྗོན་ཤིང་གི་འཕྲེང་བ་ཞིག་སྣང་ངོ་། །ལས་བརྒྱའི་འགྲེལ་པ་ཆོ་གའི་གསལ་བྱེད་ལས། འདིར་ཕ་གུ་སྣང་སྟེ། ཕ་གུ་ཞེས་བྱ་བ་ནི་བོང་བ་ཡིན་པར་ཤེས་པར་བྱའོ། །འདིར་བདག་གི་བླ་མ་ལོ་ཙཱ་བ་ཆེན་པོའི་ཞལ་ནས། རྒྱ་གར་དང་བལ་པོ་གཉིས་ཀའི་ཕྱག་ལེན་ལ། ཕ་གུ་སོ་བཏང་བ་རི་མོ་བྲིས་པ་ལ་བྱེད་གསུང་ངོ་། །འགྲེལ་པ་ཤེས་རབ་བྱེད་པས་ཀྱང་། སོ་ཕག་བཏིང་བ་ཞེས་བཤད་དོ། །སྐད་དོད་ལས་སོ་ཕག་གི་སྐད་དོད་ཡོད་དོ། །དེའི་སྟེང་དུ་རྩྭ་བཏིང་བ་ཆོས་གོས་མ་རུངས་པར་འགྱུར་བ་ཡོངས་སུ་སྤང་བའི་ཕྱིར་རོ། །ཞེས་འདུལ་བ་འཛིན་པ་དག་གི་མན་ངག་ལས་ཁོང་དུ་ཆུད་པར་བྱའོ། །དེ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པུར་འདུག་ཏུ་བཅུག་ནས་ཞེས་གསུངས་པ། གཞི་འགྲེལ་ལས། ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ཏེ་ཙོག་ཙོག་པུར་འདུག་ཏུ་བཅུག་སྟེ། ཞེས་བྱ་བ་ལ་ཕ་གུའི་སྟེང་དུ་རྟིང་པ་གཉིས་ཀྱིས་མནན་ནས་ཙོག་ཙོག་པུར་འདུག་ཏུ་གཞུག་པ་ཡུན་རིང་ཙོག་ཙོག་པུར་འདུག་པ་སྡུག་བསྔལ་བ་དེའི་ཕྱིར་འདི་རྗེས་སུ་གནང་སྟེ། རྫོགས་པར་བསྙེན་པར་བྱེད་(༩༧བ)
པ་ན་ཆོས་གོས་དང་ལྷུང་བཟེད་བྱིན་གྱིས་བརླབ་པ་དང་། གསང་སྟེ་སྟོན་པ་མ་གཏོགས་པར་མཁན་པོར་གསོལ་བ་དང་། རྫོགས་པར་བསྙེན་པར་གསོལ་བ་དང་། ལས་ཀྱི་སློབ་དཔོན་གྱིས་བར་ཆད་དྲི་བ་མཉན་པ་དང་། དེའི་ལན་འདེབས་པ་དང་། རྫོགས་པར་བསྙེན་པར་བྱ་བ་ལ་སོགས་པའི་སྐབས་ཐམས་ཅད་དུ་རྫོགས་པར་བསྙེན་པར་བྱ་བའི་གང་ཟག་དེ་ཕ་གུའི་སྟེང་དུ་རྐང་པ་གཉིས་ཀྱིས་འདུག་ཏུ་གཞུག་པར་བྱའོ། །འདིར་ཕ་གུ་ཞེས་བྱ་བ་ནི་བོང་བ་ཡིན་པར་ཤེས་པར་བྱའོ། །རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པུར་འདུག་ཏུ་གཞུག་པ་ནི་ཆོས་གོས་མ་རུང་བར་འགྱུར་བ་ཡོངས་སུ་སྤང་བའི་ཕྱིར་རོ། །ཞེས་འདུལ་བ་འཛིན་པ་དག་གི་མན་ངག་ལས་ཁོང་དུ་ཆུད་པར་བྱའོ། །ཞེས་གསུངས། རང་འགྲེལ་ལས། གསང་སྟེ་སྟོན་པ་མ་གཏོགས་པ་བསྙེན་པར་རྫོགས་པའི་ལས་བྱེད་པ་རྣམས་ལས་ཀྱི་སློབ་དཔོན་གྱིས་བར་ཆད་དྲི་བ་ཉན་པ་དང་། དེའི་ལན་འདེབས་པ་དང་། བསྙེན་པར་རྫོགས་པར་བྱ་བ་ལ་སོགས་པའི་སྐབས་ཐམས་ཅད་དུ། བསྙེན་པར་རྫོགས་པར་བྱེད་པའི་གང་ཟག་དེར་ཕ་གུའི་སྟེང་དུ་རྟིང་པ་གཉིས་ཀྱིས་འདུག་ཏུ་གཞུག་གོ །ཆོས་གོས་དང་ལྷུང་བཟེད་བྱིན་གྱིས་བརླབ་པ་ནི། སྔར་བྱས་ཟིན་པས་དེ་ལ་ནི་ཆོ་ག་འདི་ཐལ་བར་མི་འགྱུར་ཏེ། རྫས་བྱིན་གྱིས་བརླབ་པ་ལ་སོགས་པས་གནོད་པའོ། །འདིར་ཕ་གུ་ཞེས་བྱ་བ་ནི་དྲང་སྲོང་གི་རྗེས་སུ་འབྲངས་ནས་སྨོས་(༩༨ན)
པའོ། །དེ་ལྟར་འདི་ནི་དྲང་སྲོང་གི་ལུགས་ལས་འབྱུང་བ་སྟེ་བོང་བའི་རིགས་ཀྱི་དབང་དུ་བྱས་དེའོ། །དུམ་བུ་ཡང་འདིར་རྗེས་བསྙེག་པའོ། །ཞེས་དང་། འགྲེལ་པ་ཤེས་རབ་བྱེད་པར། རྟིང་པ་གཉིས་གཤིབས་པའི་འོག་ཏུ་ཕ་གུ་ཞོག་ཅིག་པའོ། །ཞེས་འབྱུང་ཞིང་། ཞ་ལུ་དང་ཨེ་ཝཾ་ཆོས་ལྡན་དུ་ཕ་གུ་དང་རྩྭ་གདན་ཚད་ལྡན་བཟོས་པ་ཞ་ལུའི་དེ་མཁན་སློབ་ཁ་ཤས་ཀྱི་གོང་ནས་གར་སོང་མ་བྱུང་བར་གྲགས། དིང་སང་དབུས་གཙང་ཕལ་ཆེར་དུ་ལྕི་བ་དང་འཇག་མའི་རྒྱ་གྲམ་ཙམ་གྱིས་མཚོན་དོན་བྱེད་པ་དབང་རྫས་དངོས་བསྟན་མི་འབྱོར་བའི་རིགས་ལ་རི་མོར་བྲིས་པ་སོགས་བྱེད་པས་གཞོགས་དྲུད་པ་འདྲ་ཡང་འདུལ་བ་ཚིག་ལ་རྩག་པས་མི་འཐད་ཅིང་། རུང་ན་ཆོས་གོས་གསུམ་དང་ལྷུང་བཟེད་ཀྱང་རི་མོར་བྲིས་ཆོག་པས་ཐུག་མེད་དུ་འགྱུར་རོ། །དར་ཆོག་ལ་མཁན་པོ་དགོས་མི་དགོས་ཀྱི་དོགས་གཞིར་དགྲ་བཅོམ་པ་ས་ག་ལྷས། མཁན་པོ་གཏན་མེད་ཉིད་དང་ནི། །མཁན་པོ་ཁྱིམ་པའི་རྟགས་སོགས་ཉིད། །གང་ཡང་སྐལ་ལྡན་རྐུན་པོ་དང་། །ཡན་ལག་བཅད་སོགས་ཁོང་ཆུད་དང་། །དེ་ཡང་བསྙེན་པར་རྫོགས་འགྱུར་མོད། །དགེ་སློང་འགལ་ཚབས་ཅན་དུ་འགྱུར། །ཞེས་གསུངས་པ་དང་། རྒྱ་ཆེར་འགྲེལ་དུ། དེ་དང་ལྡན་པའི་ལྟར་མཁན་པོ་མེད་པ་ཉིད་ལ་ཡང་ངོ་། །ཞེས་བྱ་བ་ལ་དགེ་ཚུལ་ལ་སོགས་པའི་སྡོམ་པ་གང་ལ་མཁན་པོ་དེ་ཡོད་པ་དེ་ནི་དེ་དང་ལྡན་པ་སྟེ། མཁན་པོ་དེ་དང་ལྡན་པ་དེའི་སྡོམ་པ་(༩༨བ)
སྐྱེ་བ་ཁོ་ན་ལྟར་མཁན་པོ་མེད་པ་ཉིད་ལ་ཡང་སྡོམ་པ་སྐྱེ་བ་ཡིན་ཏེ། ཡང་དག་པར་ལེན་པར་བྱེད་པ་གང་ལ་མཁན་པོ་མེད་པ་དེ་ནི་མཁན་པོ་མེད་པའོ། །དེའི་དངོས་པོ་ནི་དེ་ཉིད་དེ་ལ་ཡང་སྡོམ་པ་སྐྱེའོ། །འདི་སྐད་བསྟན་ཏེ་མཁན་པོ་མེད་ན་ཡང་སྡོམ་པ་སྐྱེ་བ་ཉིད་དོ། །ཞེས་བྱ་བའི་ཐ་ཚིག་གོ །དེ་བསྙེན་པར་མ་རྫོགས་པ་ཉིད་ན་ཡང་ངོ་། །ཞེས་བྱ་བ་ནི། མཁན་པོ་དེ་བསྙེན་པར་མ་རྫོགས་པ་ཉིད་ཡིན་ན་ཡང་མཁན་པོ་དང་ལྡན་པའི་སྡོམ་པ་སྐྱེ་བ་ཉིད་དུ་འགྱུར་རོ། །དེ་དགེ་སློང་ཉིད་དུ་མ་ཡིན་པར་ཤེས་ན་མི་སྐྱེའོ། །ཞེས་བྱ་བ་ནི། ཡང་དག་པར་ལེན་པར་བྱེད་པས་མཁན་པོ་དེ་བསྙེན་པར་མ་རྫོགས་པ་ཉིད་ཡིན་ན་ཉམས་པ་ཉིད་ཡིན་པས། དགེ་སློང་ཉིད་མ་ཡིན་པར་ཤེས་ན་ནི་མཁན་པོ་དང་ལྡན་པའི་སྡོམ་པ་མི་སྐྱེ་བ་ཁོ་ནའོ། །འདིར་གཞུང་གི་བསྙེན་པར་རྫོགས་པར་འཚལ་བ་མཁན་པོ་རྐུ་ཐབས་སུ་གནས་པས་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱིའམ་བསྙེན་པར་མ་རྫོགས་ཞེས་བགྱི། བཀའ་སྩལ་པ། གལ་ཏེ་བདག་གི་མཁན་པོ་རྐུ་ཐབས་སུ་གནས་པ་ཡིན་ནོ། །ཞེས་ཤེས་པ་ནི་བསྙེན་པར་མ་རྫོགས་ཞེས་བྱའོ། །གལ་ཏེ་མི་ཤེས་ན་ནི་བསྙེན་པར་རྫོགས་ཞེས་བྱའོ། །སྔོན་ལྟུང་བ་བྱུང་བས་ཀྱང་དེ་བཞིན་ནོ་ཞེས་གསུངས་པ་ལ་སོགས་པ་ཡིན་ནོ། །དེ་བཞིན་དུ་འདུལ་བའི་ལས་བརྒྱའི་འགྲེལ་པ་བུ་སྟོན་རྗེས་མཛད་པར་ཡང་། འོ་ན་ལས་བྱེད་པ་ཚུལ་ཁྲིམས་འཆལ་བས་བྱས་ན་ལས་མི་འཆགས་པར་འགྱུར་རོ་ཞེ་ན་ལས་བྱེད་པ་ཚུལ་ཁྲིམས་འཆལ་བ་ལས་བསྒྲུབ་བྱས་(༩༩ན)
མཐོང་ཐོས་དོགས་གསུམ་གྱི་སྒོ་ནས་ཤེས་ན་ལས་མི་འཆགས་སོ། །དངོས་དོན་ལ་ཚུལ་ཁྲིམས་འཆལ་པ་ཡིན་ཡང་། བསྒྲུབ་བྱའི་ངོས་ནས་མཐོང་ཐོས་དོགས་གསུམ་གྱི་སྐྱོན་མེད་ན་དག་པ་ཡིན་ལ། དེ་ལ་དེ་ལྟར་ཤེས་ན་དོན་དང་འདུ་ཤེས་མཐུན་པས་འདུ་ཤེས་མ་འཁྲུལ་བར་བཞག་སྟེ་ལས་ཐམས་ཅད་སྤྱད་པ། ཐ་སྙད་པའི་འདུ་ཤེས་ཀྱིས་འཇུག་པའི་ཕྱིར་རོ། །དེ་ལྟ་མ་ཡིན་ན་བསྒྲུབ་མི་ནུས་པའི་སྐྱོན་དུ་འགྱུར་ཏེ། ལྷའི་མིག་དང་རྣ་བ་སོགས་མངོན་ཤེས་ཀྱིས་སྤྱོད་པ་ནི་བཀག་ལ་དེ་ལས་གཞན་གྱིས་དག་མ་དག་མི་ཤེས་པའི་ཕྱིར་རོ། །འོད་ལྡན་ནས་ཚུལ་ཁྲིམས་འཆལ་པ་དེ་ཡང་ཇི་ལྟར་ཤེས་པར་བྱ་ཞེ་ན། མཐོང་བ་དང་། ཐོས་པ་དང་། དོགས་པ་རྣམས་ཀྱིས་སོ། །ཞེས་བཤད་དོ། །མཁས་གྲུབ་ཐམས་ཅད་མཁྱེན་པས། དགེ་ཚུལ་དང་དགེ་སློང་གཉིས་ཀའང་མཁན་པོ་མེད་ཀྱང་སྐྱེ་བ་ཡིན་ཏེ། མདོ་རྩ་ལས། དེ་དང་ལྡན་པའི་ལྟར་མཁན་པོ་མེད་པ་ཉིད་ལ་ཡང་ངོ་། །སོགས་དང་། རྒྱ་ཆེར་འགྲེལ་དུ། འདི་སྐད་བསྟན་ཏེ་མཁན་པོ་མེད་ན་ཡང་སྡོམ་པ་སྐྱེ་བ་ཉིད་དོ་ཞེས་པའི་ཐ་ཚིག་གོ །ཞེས་གསུངས་པའི་ཕྱིར་རོ། །འོན་ཀྱང་བསྒྲུབ་བྱ་ལ་སྡོམ་པ་སྐྱེ་ཡང་སློབ་དཔོན་དང་དགེ་འདུན་རྣམས་ལ་ཉེས་པ་འབྱུང་བ་ཡིན་ནོ། །མཁན་པོ་སྡོམ་པ་དང་མི་ལྡན་ཡང་བསྒྲུབ་བྱ་དེས་མཁན་པོ་སྡོམ་ལྡན་དུ་ཡིད་ཆེས་ན་ཡང་སྡོམ་པ་སྐྱེ་བ་ཡིན་ཏེ། མདོ་རྩ་ལས། དེ་བསྙེན་པར་མ་རྫོགས་པ་ཉིད་ཡིན་ན་ཡང་ངོ་། །ཞེས་གསུངས་པས་སོ། །གཞན་ཡང་དོན་འདི་ནི་ལུང་གི་གླེང་གཞི་ལས་གསལ་བར་ཤེས་ཏེ། མཉན་ཡོད་དུ་ཁྱིམ་བདག་གི་(༩༩བ)
བུ་ཞིག་གིས་གཞན་ཀྱི་བུ་མོར་ལོག་པར་གཡེམ་དུ་འགྲོ་བ་མས་བསྲུངས་པས་བསམས་བཞིན་དུ་རལ་གྲིས་མའི་སྐེ་བཅད་ནས་དེས་ཕྱིས་རྒྱལ་བྱེད་ཀྱི་ཚལ་དུ་སོང་བ་ན། གང་གིས་སྡིག་པའི་ལས་བྱས་པ། །དགེ་བ་ཡིས་ནི་འགོག་བྱེད་དེ། །ཉི་མ་སྤྲིན་ནས་ཕྱུང་བ་ལྟར། །འཇིག་རྟེན་འདི་ན་དེ་སྣང་འགྱུར། །ཟེར་བ་ཐོས་པས། ཐབས་འདི་ལ་བརྟེན་ནས་སྡིག་པའི་ལས་ཀྱང་འགོག་པར་ནུས་སོ་སྙམ་སྟེ། དགེ་སློང་ཞིག་ལ་བདག་རབ་ཏུ་བྱུང་དུ་གསོལ། དེས་ཀྱང་རབ་ཏུ་ཕྱུང་ཞིང་བསྙེན་པར་རྫོགས་པར་བསྒྲུབས་ནས་དེ་ནས་དེ་ཉིད་ཀྱིས་བརྩོན་འགྲུས་བརྩམས་ཏེ་གསུང་རབ་ཀློག་པར་བརྩམས་པས། སྡེ་སྣོད་གསུམ་ལ་མཁས་པར་གྱུར་ཏོ། །དགེ་སློང་དག་གིས་སྨྲས་པ། ཁྱོད་བརྩོན་འགྲུས་འདིས་ཅི་ཞིག་དོན་དུ་གཉེར། སྡིག་པ་ཟད་པའོ། །སྡིག་པ་ཅི་ཞིག་བྱས། མ་བསད་དོ། །མ་མའམ། མ་ཡིན་ཏེ། བསྐྱེད་པའི་མའོ། །དོན་དེ་ཉིད་སྟོན་པ་ལ་གསོལ་བས། མ་བསད་པ་ནི་སྡོམ་པ་མི་སྐྱེ་བའི་ཆོས་ཅན་ཡིན་པས་བསྙིལ་བར་བྱའོ། །ཞེས་བཀའ་སྩལ་ནས། བསྙིལ་ཞིང་གནས་ནས་ཕྱུང་ངོ་། །དེས་ཀྱང་བདག་འབད་པ་ནི་མི་ནུས་ཀྱི་སྙམ་ནས། རང་གིས་རྒྱུས་མི་ཤེས་པའི་མཐའ་འཁོབ་ཅིག་ཏུ་སོང་སྟེ། དེར་ཁྱིམ་བདག་དད་པར་བྱས་ནས་གཙུག་ལག་ཁང་ཞིག་བརྩིགས་ཏེ། དེར་དེ་ལ་བརྟེན་ནས་རབ་ཏུ་བྱུང་ཞིང་བསྙེན་པར་རྫོགས་པའི་དགེ་འདུན་ཚོགས་ཤིན་ཏུ་ཆེ་བར་ལོངས་ཏེ། འགའ་ཞིག་གི་དགྲ་བཅོམ་པ་ཡང་ཐོབ་བོ། །དེ་ནས་དུས་ནམ་ཞིག་ན་ནད་ཀྱིས་ཐེབས་པར་གྱུར་ཏེ། དེའི་ཆེད་དུ་དགེ་འདུན་གྱིས་བསྲོ་ཁང་བྱས་པས། བསྲོ་ཁང་གི་མེ་ལ་འདུག་བཞིན་དུ་ཤི་སྟེ་མནར་མེད་པའི་དམྱལ་བར་སྐྱེས་སོ། །དེར་དེས་སྨྲས་(༡༠༠ན)
པ། བསྲོ་ཁང་ཚའོ། །སྐལ་ཆད་ཁྱོད་ཀྱི་བསྲོ་ཁང་འདི་ཡིན་ནམ་ཞེས་དམྱལ་སྲུང་གིས་མགོ་ལ་བསྣུན་པས་དམྱལ་བ་ནས་འཕོས་ཏེ་རྒྱལ་ཆེན་བཞིའི་ལྷར་སྐྱེས་ཏེ། དེ་མ་ཐག་སྟོན་པའི་དྲུང་དུ་མཆོད་པའི་སླད་དུ་འོངས་པས་ཆོས་བསྟན་ཅིང་རྒྱུན་དུ་ཞུགས་པ་ཐོབ་པར་གསུངས་སོ། །མཚམས་མེད་བྱས་པས་དམྱལ་བར་ཡུད་ཙམ་ཞིག་སྐྱེས་ཀྱང་དམྱལ་བའི་སྡུག་བསྔལ་མ་མྱོང་ཞིང་། དེ་མ་ཐག་ལྷར་སྐྱེས་ཏེ་འཕགས་པ་ཐོབ་པར་གསུངས་པ་ནི་མཐའ་འཁོབ་ཏུ་དགེ་འདུན་གྱི་སྡེ་བཙུགས་ཤིང་བསྟན་པ་དར་བ་བྱས་པའི་འབྲས་བུར་གསུངས་པས། སྡོམ་པ་མེད་པ་ཡིན་ཡང་ཚུལ་ཁྲིམས་དང་ལྡན་པར་སློབ་མ་དག་གིས་ཡིད་ཆེས་པའི་དབང་གིས་དགེ་སློང་དུ་མ་དེ་ལ་བརྟེན་ནས་བྱུང་བར་ཆེས་གསལ་བར་ངེས་ལ། སྡོམ་པ་དང་མི་ལྡན་ཡང་ལྡན་པ་དང་འདྲ་བའི་ཀུན་སྤྱོད་ཀྱིས་ཁྱིམ་པ་དད་པར་བྱས་ཏེ། དེ་ཡང་ཚུལ་འཆོས་པས་རང་གི་རྙེད་བཀུར་བསྒྲུབ་པའི་ཆེད་མ་ཡིན་པར་དགེ་འདུན་གྱི་སྡེ་བཙུགས་བསྟན་པ་ལ་ཕན་པར་བྱས་ན་མཚམས་མེད་པ་བྱས་པ་ཡང་ཟིལ་གྱིས་གནོན་པའི་བསོད་ནམས་རླབས་པོ་ཆེ་འཐོབ་པར་ཡང་འདི་ཉིད་དང་ཕ་བསད་པའི་གླེང་གཞི་སོགས་ལས་གསལ་བར་ངེས་ཤིང་། བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱིས་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་འཕྲེང་མཐོང་ལྡན་བདེ་བྱེད་བཞིན། ཞེས་གསུངས་པས་བདེ་བྱེད་ཀྱང་མ་བསད་པ་འདི་ཉིད་ཡིན་པར་འགྲེལ་པས་བཤད་དོ། །དེ་ལྟར་ན་མཁན་པོ་མེད་པ་དང་། ཡོད་ཀྱང་ཁྲིམས་(༡༠༠བ)
དང་མི་ལྡན་པ་ལ་ལྡན་པར་ཡིད་ཆེས་ན་སྡོམ་པ་སྐྱེ་བར་གྲུབ་བོ་ཟེར་ཡང་། སྟག་ཚང་ལོ་ཙཱ་བས། སྔར་མཁན་པོ་ཉིད་དུ་གནས་པ་ལ་སྡོམ་པ་ཡོད་ཀྱི། དེ་མེད་ན་མེད་ཅེས་མཁན་པོ་མེད་ན་སྡོམ་པ་མི་སྐྱེ་བ་དང་། འདིར་སྐྱེ་བར་བཤད་པའི་དོན་ལ། ཁ་ཅིག །སྔ་མ་དགེ་སློང་དང་འདི་དགེ་ཚུལ་གྱི་སྡོམ་པའི་དབང་དུ་བྱས་ཞེས་དང་། ཁ་ཅིག །དེ་ལས་བཟློག་སྟེ་སྨྲ་བ་གཉིས་ལ་ནི་རྒྱུ་མཚན་མེད་ལ། སོག་དེ་དག་དགེ་སློང་མ་ཡིན་པར་ཤེས་ན་མི་སྐྱེ་ཞེས་སོགས་བཤད་པས་བསམ་ངོ་ལ་མེད་ན་མི་སྐྱེ་བ་གཞིའི་དོན་དང་། བསམ་ངོ་ལ་ཡོད་ན་དོན་ལ་མེད་ཀྱང་སྐྱེ་བ་འདིའི་དོན་ཡིན་ཞེས་ཟེར་ལ། རྒྱ་ན་རེ། སྐབས་འདིར་ལུང་དང་བསྟན་བཅོས་སུ་མི་སྐྱེ་བར་བཤད་པ་རྣམས་ཀྱང་མཁན་པོ་དང་ལྡན་པའི་སྡོམ་པ་ལ་དགོངས་པར་ཊཱིཀྐས་བཤད་པས། སྡོམ་པ་ལ་མཁན་པོ་དང་ལྡན་པའི་དང་། མི་ལྡན་པའི་སྡོམ་པ་གཉིས་སུ་བྱས་པའི་སྔ་མ་མཁན་པོ་མེད་ན་མི་སྐྱེ་བ་དང་། ཕྱི་མ་མཁན་པོ་མེད་ཀྱང་སྐྱེ་བ་ལུང་སྔ་ཕྱིའི་དོན་ཡིན་ལ། མཁན་པོ་དེ་སྡོམ་པ་མེད་ན་མི་འབྱུང་བའི་རྒྱུ་མ་ཡིན་པས་མཁན་པོ་དང་མི་ལྡན་པའི་སྡོམ་པ་གྲུབ་ཀྱང་གྲུབ་བོ་ཞེས་ཟེར་ཞིང་ཤ་མི་སོགས་ཀྱང་དེ་བཞིན་དུ་སྨྲའོ། །བྱ་འདུལ་སོགས་ནི་དེ་དགེ་སློང་མ་ཡིན་པར་ཤེས་པ་དང་། རྐུ་ཐབས་སུ་གནས་པ་དང་། སྔོན་ལྟུང་བ་བྱུང་བར་ཤེས་པ་དང་། ཕྱིར་སྤོང་བ་དང་། དེའི་མིང་མ་བརྗོད་ན་མི་སྐྱེ་བར་ཞུ་བ་ནས་དང་། མཁན་པོ་ཚུལ་ཁྲིམས་འཆལ་པ་ལ་སོགས་པའི་སྟོབས་ཀྱིས་སྡོམ་པ་མ་སྐྱེས་པར་འགྲེལ་ཆེན་གྱི་སྐབས་གཞན་དུ་བཤད་པའི་ཕྱིར་དང་། དེ་མེད་ན་ངོ་ཚ་ཁྲེལ་ཡོད་སྐྱེ་བའི་རྟེན་མེད་པའི་ཕྱིར་དང་། ལས་མཁན་ཚུལ་(༡༠༡ན)
ཁྲིམས་འཆལ་ན་སྡོམ་པ་མི་སྐྱེ་བར་བཤད་པ་དང་རྒྱུ་མཚན་མཚུངས་པའི་ཕྱིར་ན་མཁན་པོ་གཏན་མེད་པར་སྡོམ་པ་སྐྱེ་མི་སྲིད་པ་དང་། སྡོམ་ལྡན་ཡིན་ན་མཚན་ཉིད་མ་ཚང་ཡང་སྐྱེ་བ་ལུང་སྔ་ཕྱིའི་དོན་དུ་བཞེད་དེ། དེ་རྣམས་ཀྱི་སྒྲུབ་བྱེད་སོ་སོར་རྒྱས་པར་ནི་རང་རང་གི་ཊཱིཀྐ་རྣམས་སུ་བལྟའོ། །ཁོ་བོ་ནི་འདི་ལྟར་སེམས་ཏེ། གཞིའི་རྣམ་གཞག་ནི་སྔོན་དང་ད་ལྟར་གྱི་ཆོ་ག་སོ་སོར་ཕྱེ་བས་ད་ལྟར་གྱི་སྐབས་ཡིན་ལ། ཞུ་བའི་སྐབས་འདིར་ནི་མ་ཕྱེ་བར་སྡོམ་པའི་སྐྱེ་ཚུལ་སྤྱི་ལ་ཉེ་བ་འཁོར་གྱིས་དོགས་གཅོད་ཞུས་པ་ཡིན་པས། གཞིར་ནི་ད་ལྟར་གྱི་ཆོ་ག་ལ་མཁན་པོ་དགོས་པར་ནན་གྱིས་བསྒྲུབས་ལ། འདིར་ནི་སྤྱིར་དེ་ཡོད་མེད་ལ་སྐྱེ་མི་སྐྱེ་གཉིས་ཀ་ཡོད་པར་གཏན་ལ་ཕབ་བོ། །དེ་ལྟར་ན་ད་ལྟར་ནི་དགོས་པའི་སྒྲུབ་བྱེད་བྱ་འདུལ་གྱིས་བཀོད་པའི་སྟེང་དུ་གཞིའི་འགྲེལ་ཆེན་དུ་ད་ལྟར་གྱི་སྡོམ་པ་སྤྱིར་གང་ཟག་གཞན་ལ་རག་ལས་ཤིང་། ཁྱད་པར་མཁན་པོ་དང་འབྲེལ་བར་བཤད་པ་དང་། སྐབས་འདིའི་འགྲེལ་ཆེན་དུ། ཡང་དག་པར་ལེན་པར་བྱེད་པ་གང་ལ་མཁན་པོ་མེད་པ་དེ་ནི་མཁན་པོ་མེད་པའོ། །ཞེས་པའི་ཚིག་ཟུར་གྱིས་སྡོམ་པ་ལེན་པའི་ཆོ་ག་ལ་མཁན་པོ་ཡོད་མེད་གཉིས་ཡོད་པར་བསྟན་པ་ཡང་ཆོ་གའི་རིགས་གཉིས་ལ་དགོངས་པར་གསལ་བ་དང་། སྐབས་འདིར་ལྡན་པའི་དང་མི་ལྡན་པའི་ཞེས་པའང་དེ་ལ་དགོངས་པ་དང་། མ་མོ་ལས་ཀྱང་མཁན་པོ་མེད་པ་སོགས་ཀྱི་གང་ཟག་བཅུ་བསྙེན་པར་མ་རྫོགས་པར་གསུངས་པའི་ཕྱིར་དང་། མཁན་པོ་ནི་ད་ལྟར་གྱི་ཆོ་གའི་མཐུན་རྐྱེན་གྱི་གཙོ་བོ་ཡིན་པས་རྒྱལ་བས་ནན་གྱིས་བཅས་པའི་ཕྱིར་རོ། །དེ་ལྟར་ཤེས་(༡༠༡བ)
ན་འགལ་བའི་ཚོགས་མཐའ་དག་ལས་བདེ་བླག་ཏུ་གྲོལ་ལོ། །འོན་ཀྱང་མཁན་པོ་བསྙེན་པར་མ་རྫོགས་པ་ཡིན་ཀྱང་དེ་དང་ལྡན་པའི་སྡོམ་པ་སྐྱེ་བར་གསུངས་པ་ནི་ས་གཞན་ན་གནས་པ་ལྟ་བུའི་མཚན་ཉིད་དང་མི་ལྡན་པ་ལ་དགོངས་སོ། །དེ་ལྟར་ན་མཁན་པོ་མེད་པ་ཉིད་ལ་ཡང་སྡོམ་པ་སྐྱེ་བ་ཡོད་དེ། དེ་སྡོམ་པའི་སྐྱེ་རྒྱུ་མ་ཡིན་པའི་ཕྱིར། དཔེར་ན་དེ་དང་ལྡན་པའི་སྡོམ་པ་མཁན་པོ་ལས་སྐྱེ་བ་ལྟར་རོ། །མཁན་པོ་དེ་དང་ལྡན་པ་ད་ལྟར་གྱི་རབ་བྱུང་སྡོམ་པ་ཆོས་ཅན། ཁྱོད་མཁན་པོ་མཚན་ཉིད་དང་ལྡན་པ་ཁོ་ན་ལ་རག་མ་ལས་ཏེ། དེ་བསྙེན་པར་མ་རྫོགས་པའི་མིང་ཅན་ཉིད་ཡིན་ན་ཡང་ཁྱོད་སྐྱེ་སྲིད་པའི་ཕྱིར། དེ་ཆོས་ཅན། ཁྱོད་བསྒྲུབ་བྱས་མཁན་པོ་དགེ་སློང་མ་ཡིན་པར་ཤེས་པ་དང་། དེ་མི་འདོད་ནས་ཕྱིར་སྤོང་བ་ལ་ནི་སྐྱེ་སྟེ། དེ་ལྟར་བྱས་ན་ཁྱོད་ཀྱི་ཡུལ་གྱི་སྒོ་ནས་སྐྱེ་རྒྱུའི་གཙོ་བོ་མ་ཚང་བར་འགྱུར་བའི་ཕྱིར་རོ། །ཞེས་དགག་སྒྲུབ་དང་བཅས་མཁན་པོ་གཏན་མེད་ལ་མི་སྐྱེ་ཞིང་མཁན་པོ་དགེ་སློང་མ་ཡིན་པ་སོགས་ལ་དེར་མ་ཤེས་ན་སྐྱེ་བའི་སྒྲུབ་བྱེད་ལོ་ཆེན་གྱི་གསུང་དེ་ཤིན་ཏུ་ནུས་པ་ཆེ་བ་ཞིག་གནང་ངོ་། །མཁན་ཆེན་ངག་དབང་ཆོས་གྲགས་ཀྱི་འདུལ་བའི་འགྲེལ་པར། རྗེ་བཙུན་རེ་མདའ་པ་ཆེན་པོས་འདུལ་བ་ལ་ཊཱིཀྐ་མཛད། དེར་ཡང་ད་ལྟར་གྱི་ལས་ཀྱི་ཆོ་ག་སྤྱིར་བཏང་ལ་མཁན་པོ་དགོས་ཀྱང་། དམིགས་བསལ་ལ་ལས་གྲལ་དེར་མཁན་པོ་གཏན་ནས་མེད་པའམ། མཁན་པོ་སོགས་ལས་གྲལ་བ་དེ་དང་དེ་དགེ་སློང་མ་ཡིན་ན་ཡང་བསྒྲུབ་བྱའི་འདུ་ཤེས་ཀྱི་དབང་གིས་སྡོམ་པ་སྐྱེ་བ་ཡོད་པར་བཞེད། དེ་ལ་དྭོགས་(༡༠༢ན)
པ་འདི་འབྱུང་སྟེ། མཁན་པོ་དགེ་སློང་མ་ཡིན་ཡང་འདུ་ཤེས་ཀྱི་དབང་གིས་བསྒྲུབ་བྱ་ལ་སྡོམ་པ་སྐྱེས་པ་དེའི་སྡོམ་རྒྱུན་གང་ལ་འདེད། མཁན་པོའི་ཚུལ་འཆང་བ་དེ་ལ་ནི་སྡོམ་རྒྱུན་མི་བཞུགས་པ་དེ་ཡིན། འདི་ལ་མདོ་རྩའི་ཚིག་ཟིན་སྒྲ་ཇི་བཞིན་པའ་ིརྗེས་སུ་འབྲང་བ་དག་ལན་ཇི་ལྟར་གསུངས། རྗེ་བཙུན་རེ་མདའ་བ། འདུལ་འཛིན་སྔ་མ་དག་གི་ཕྱག་ལེན་ལ་ལས་སློབ་འོས་པ་གཞན་མ་འབྱོར་ན་སླར་ལས་སློབ་ཀྱང་མཁན་པོ་ཉིད་ཀྱིས་བྱས་ཏེ་བསྙེན་པར་རྫོགས་པའི་ཕྱག་ལེན་རིམ་ཅན་དུ་བྱུང་བ་འདི་མི་འཐད་དེ། མཁན་སློབ་གཅིག་གིས་བྱེད་པ་ལུང་ལས་མི་གསལ་ལ། དེ་བས་མཁན་པོ་གཏན་མེད་པར་ཆོ་ག་བྱས་ན་ལེགས་ཏེ། དེ་ཉིད་འདུལ་བའི་གཞུང་ན་གསལ་བའི་ཕྱིར། དེ་བས་ན་འདུལ་འཛིན་རྣམས་ལ་མཁན་སློབ་གཅིག་གིས་བྱེད་པ་འདི་མི་མཛད་པར་ཞུ་ཞེས་ཐལ་མོ་སྦྱར་ནས་གསོལ་བ་འདེབས་སོ་གསུང་བ་ཡོད་འདུག །ཐམས་ཅད་མཁྱེན་པ་ཀླུ་སྒྲུབ་རྒྱ་མཚོའི་གསུང་ལས། འདུལ་བའི་ཆོ་ག་ལ་སྔོན་ཆོག་དང་། དར་ཆོག་གཉིས་ལས། སྔོན་ཆོག་ལ་མཁན་སློབ་ཀྱི་རྣམ་གཞག་མེད་ཅིང་དིང་སང་བྱར་ཡང་མི་རུང་། ད་ལྟར་གྱི་ཆོ་ག་ལ་གསོལ་བཞིའི་ལས་བརྗོད་པའི་ཚེ་བསྒྲུབ་བྱའི་མིང་དང་མཁན་པོའི་མིང་བརྗོད་པ་ཆད་ན་སྡོམ་པ་མི་སྐྱེ་བ་ཉིད་དུ་གསུངས་པས་མཁན་པོ་གཏན་མེད་ཀྱི་ད་ལྟར་གྱི་བསྙེན་རྫོགས་སྟོན་པས་གསུངས་པ་མེད་པས་དེ་འདྲ་མི་མཛད་པ་ཞུ་ཞེས་སླར་རྗེ་རེ་མདའ་པ་ཉིད་ལ་ཐལ་མོ་སྦྱར་ནས་གསོལ་བ་འདེབས་སོ་ཞེས་གསུངས་པ་ཡིན་ཏེ། མཁྱེན་པའི་གཏེར་ཆེན་ཀླུ་སྒྲུབ་རྗེས་མཛད་པའི་དཔལ་གྱི་འཁྲི་ཤིང་གི་འདུལ་བའི་སྐབས་ལས། མཁན་སློབ་གཅིག་(༡༠༢བ)
པ་འདུལ་བའི་གཞུང་མི་གསལ། །དེ་བས་མཁན་པོ་མེད་པར་བསྒྲུབ་པ་འདི། །འདུལ་བར་གསལ་ཕྱིར་འདི་ཉིད་རིགས་སོ་ཞེས། །རེ་མདའ་པ་སོགས་ཐལ་སྦྱར་གསོལ་བ་འདེབས། །གསོལ་བཞིའི་ལས་ཀྱིས་བསྙེན་པར་རྫོགས་པ་ལ། །སྔོན་དང་ད་ལྟར་བྱུང་བ་གཉིས་སུ་ངེས། །དར་ཆོག་བསྙེན་རྫོགས་མིང་གསུམ་ཆད་མི་སྐྱེ། །སྔོན་གྱི་ཆོ་ག་དིང་སང་བྱར་མི་རུང་། །མཁན་པོ་མེད་པར་ད་ལྟར་ཆོ་ག་ཡིས། །བསྙེན་རྫོགས་སྒྲུབ་པའི་ཆོ་ག་ཟུར་པ་ཞིག །སྟོན་པས་མ་གསུངས་ཁྱོད་ཀྱིས་བརྩམ་མ་རིགས། །སླར་ཡང་ཁྱེད་ལ་ཐལ་སྦྱར་གསོལ་བ་འདེབས། །ཞེས་ལུང་རིགས་ཀྱི་དཔྱད་པ་འདི་དག་རྗེས་སུ་ཡི་རང་བའི་གནས་སུ་མཆིས། ནོར་བུའི་ཐེམ་སྐས་སུ། རྣམ་དཔྱོད་དང་ལྡན་པའི་སྒྲ་པ་ཤེས་རིན་པའི་གསུང་ལས། ལུང་གཞི་སོགས་ལས་མཁན་པོ་མེད་ན་བསྙེན་རྫོགས་སྡོམ་པ་མི་སྐྱེ་བར་བཤད་པ་ནི། ད་ལྟར་ཆོ་གའི་དབང་དུ་བྱས་ལ། ཞུ་བ་ལས་མཁན་པོ་མེད་ཀྱང་སྐྱེ་བར་བཤད་པ་ནི། སྔོན་དང་ད་ལྟར་སོ་སོར་མ་ཕྱེ་བའི་དབང་དུ་བྱས་ཞེས་ཐུགས་ཡུས་དག་པར་མཛད་པ་ནི་མི་རིགས་ཏེ། ཞུ་བ་ལས་མཁན་པོ་མེད་ཀྱང་བསྙེན་རྫོགས་སྡོམ་པ་སྐྱེ་མི་སྐྱེའི་དོགས་དཔྱོད་འདི་ད་ཆོག་ཁོ་ནའི་དབང་དུ་བྱས་ནས་དོགས་པ་དཔྱད་པ་ཡིན་པའི་ཕྱིར་ཏེ། ཞུ་བ་ལས་བཙུན་པ་མཁན་པོ་མེད་པར་བསྙེན་པར་རྫོགས་ན་རྫོགས་ཞེས་བགྱིའམ། མ་རྫོགས་ཞེས་བགྱི། ཨུ་པ་ལི་རྫོགས་པ་ཞེས་བྱ་སྟེ། རྫོགས་པར་བྱེད་པ་དག་ལ་འདས་པ་དང་བཅས་པར་རོ། །ཞེས་བཤད་པའི་ཕྱིར་རོ། །དེ་ཡང་སྙིང་པོ་དྲིལ་ན་སྔོན་ཆོག་ལ་བརྟེན་པའི་བསྙེན་རྫོགས་སྡོམ་པ་ཡིན་ན་སྐྱེ་ལ་ཉེས་བྱས་ཀྱི་སྡོམ་པ་ཡིན་དགོས་པར་ཐལ། དེ་ཡིན་ན་མཁན་པོ་(༡༠༣ན)
མེད་པར་བསྙེན་པར་རྫོགས་པའི་སྡོམ་པ་ཡིན་དགོས་པ་གང་ཞིག །ཞུ་བའི་ལུང་དེས་མཁན་པོ་མེད་པར་བསྙེན་རྫོགས་སྡོམ་པ་སྐྱེ་ཡང་སྐྱེ་ལ་ཉེས་བྱས་ཀྱི་དབང་དུ་བྱས་པར་བཤད་པ་དེ་སྔོན་དང་ད་ལྟར་སོ་སོར་མ་ཕྱེ་བར་སྔོན་ཆོག་ལ་དགོངས་ནས་བཤད་པ་ཡིན་པའི་ཕྱིར་རོ། །རྟགས་ཁས། འདོད་ན་ཧ་ཅང་ཐལ་ལོ། །དེས་ན་རང་ལུགས་མཉན་ཡོད་བླ་མ་དམ་པའི་དགོངས་དོན་གྱི་ཟེ་འབྲུ། དར་ཆོག་ལ་བརྟེན་ནས་ཉེས་མེད་ཕུན་ཚོགས་ཀྱི་བསྙེན་རྫོགས་ལ་མཁན་པོ་ཅིས་ཀྱང་དགོས། །སྐྱེ་ལ་ཉེས་བྱས་ཙམ་ལ་མེད་ཀྱང་ཆོག །ཅེས་པ་འདི་ཁོ་ན་ཡིན་ནོ། །དེ་ལ་ཁོ་ན་རེ། དར་ཆོག་ལ་བརྟེན་ནས་བསྙེན་རྫོགས་བསྒྲུབ་པའི་གསོལ་བཞིའི་ཆོ་གའི་ཟུར་དུ་མཁན་པོའི་མིང་ངེས་སྨོས་དགོས་པ་དེ་མི་འཐད་པར་ཐལ། དེ་ལྟར་བསྒྲུབ་པ་ལ་མཁན་པོ་ངེས་པར་མི་དགོས་པའི་ཕྱིར། འདོད་ན། གང་ཟག་གསུམ་ནི་བསྙེན་པར་མ་རྫོགས་པ་ཞེས་བྱ་སྟེ། བདག་གི་མིང་མི་བརྗོད་པ་དང་། མཁན་པོའི་མིང་མི་བརྗོད་པ་དང་། བསྙེན་པར་རྫོགས་པའི་དུས་མི་ཤེས་པའོ། །ཞེས་དང་། མདོ་རྩ་བར། དེ་དགེ་སློང་མ་ཡིན་པར་ཤེས་ན་མི་སྐྱེའོ། །དེའི་མིང་མ་བརྗོད་ན་མི་སྐྱེའོ། །ཞེས་བཤད་པ་མི་འཐད་པར་ཐལ། འདོད་པའི་ཕྱིར། ཟེར་ན་མ་ཁྱབ་བོ། །འོ་ན་ལུང་དེའི་དོན་ཅི་སྙམ་ན་ད་ཆོག་ལ་བརྟེན་ནས་བསྙེན་རྫོགས་བསྒྲུབ་པ་ལ་མཁན་པོ་ཡོད་བཞིན་དུ། བསྒྲུབ་བྱ་མིང་འདི་ཞེས་བགྱི་བ་དོན་གྱི་སླད་དུ་མཚན་ནས་སྨོས་ཏེ། མཁན་པོ་མིང་འདི་ཞེས་བྱ་བ་ལས། ཞེས་སོགས་མ་བརྗོད་ན། བསྙེན་རྫོགས་སྡོམ་པ་མི་ཆགས་ཞེས་བྱ་བའི་དོན་ནོ། །འོ་ན་མཁན་པོ་མེད་པའི་ཚེ་གསོལ་བཞིའི་ཆོ་ག་ཇི་ལྟར་བྱ་སྙམ་(༡༠༣བ)
ན། གཞན་ད་ལྟར་ཆོ་གའི་གསོལ་བཞིའི་ཆོ་ག་ཇི་ལྟ་བ་ལས་མཁན་པོའི་མིང་བོར་ཏེ། བསྒྲུབ་བྱ་མིང་འདི་ཞེས་བགྱི་བ་ལ། དགེ་འདུན་ལས་བསྙེན་པར་རྫོགས་པར་འཚལ་ཏེ། ཞེས་སྔོན་ཆོག་བཞིན་བརྗོད་པ་ལས་མ་འདས་པས། འདི་ལ་ཐེ་ཚོམ་ཟ་བར་མི་བྱའོ་ཞེས་གསུང་བ་དཔལ་གྱི་འཁྲི་ཤིང་དང་རང་ཚིག་ནང་འགལ་བྱུང་ཞིང་མཁན་པོ་མེད་པའི་དུས་མིང་མ་བརྗོད་པར་སྐྱོན་མི་ཡོང་ན་ཡོད་པའི་དུས་མིང་ཆད་པ་ལ་ཡང་སྐྱོན་ཡོང་དོན་ག་ལ་ཡོད། སྔོན་ཆོག་ལྟར་དར་ཆོག་ལ་བྱར་རུང་ན་དེང་སང་ཀྱང་སྔོན་ཆོག་གི་སྒོ་ནས་བསྙེན་རྫོགས་བྱར་རུང་བའི་ཐལ་སྐྱོན་དུ་འགྱུར། བསྒྲུབ་བྱས་མཁན་པོ་ཡོད་མེད་ཀྱི་དཔྱད་པ་མ་ཞུགས་པར་རྣམ་དག་ཡིན་སྙམ་པའི་འདུ་ཤེས་མ་འཁྲུལ་བ་ཙམ་གྱིས་སྡོམ་པ་སྐྱེ་བར་མཐའ་མ་བཀག་པ་བྱས་ན་ཆབ་གཏོར་མ་སོགས་ཀྱི་རྒྱུན་ཡང་རྣམ་དག་ཏུ་འགྱུར། ཚིགས་སྔ་མ་གཉིས་མ་སོང་བར་ཁྱིམ་པ་ཞིག་གིས་མཁན་པོ་མེད་པར་ཚིགས་ཕྱི་མ་བསྒྲུབ་ན་ཆོས་གོས་རྣམ་གསུམ་གཏོད་པ་པོ་མེད་པས་གོས་དཀར་ཅན་གྱི་དགེ་སློང་འང་གཏན་ཚིགས་ཀྱིས་མི་འགྲུབ་ཅིང་། མཁན་པོ་མེད་པ་ལ་ཡང་ངོ་། ཞེས་པའི་ཚིག་ལ་ས་དགེའི་མཁས་པ་ཕལ་ཆེར་འདོད་ལན་མཛད་ཀྱང་དོན་ཐོག་ཏུ་ཁེལ་བར་མི་སེམས་པས་ལོ་ཆེན་ལ་ཐུགས་ཡུས་གསུང་ནའང་དུས་སྔ་ཕྱི་ཁྱད་ཞུགས་པ་མ་གཏོགས་ཚུར་གསུང་དགོས་པར་སྣང་ངོ་། །མཁན་པོ་དེ་ཡང་བརྟན་མཁས་ཀྱི་ཡོན་ཏན་གཉིས་དང་ལྡན་དགོས་པའི་རྒྱུ་མཚན་ཉ་སྡེ་ལྗོངས་སུ་དབྱར་གནས་པའི་སྐབས་བསྙེན་པར་རྫོགས་ནས་ལོ་གཅིག་ལས་མ་ལོན་པར་མཁན་པོ་བྱས་པ་ལ་བཅས་པ། ལོ་གཅིག་ལོན་པས་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་(༡༠༤ན)
སྦྱིན་པར་མི་བྱ། དགེ་ཚུལ་ཉེ་བར་བཞག་པར་མི་བྱ། བདག་གིས་ཀྱང་མི་གནས་པ་འདུག་པར་མི་བྱ་སོགས། ལོ་དགུའི་བར་དུ་སྦྱར་ཏེ་གསུངས་ནས། ལོ་བཅུ་ལོན་པས་དེ་དག་བྱ་བར་གསུངས་ཡང་ལོ་བཅུ་ལོན་པ་བྱིས་པ་རྨོངས་པ་མི་གསལ་བ་མི་མཁས་པས་རབ་ཏུ་འབྱིན་པར་བྱེད་པ་ན་བདག་ཉིད་མ་དུལ་བ་སོགས་ཀྱིས་གཞན་དུལ་བར་བྱེད་པ་སོགས་ཀྱི་གནས་མེད་པར་གསུངས་པས་དེའི་ཕྱིར་རྒྱས་པར་མ་འཐོན་ན་ལོ་དྲུག་ཅུ་ཙམ་ལོན་ཀྱང་བྱིས་པ་ཡིན་པས་དེ་དག་མི་བྱ་བར་བཅས་པས། ཡང་ལྗོངས་རྒྱུ་བའི་ཚེ་དགེ་སློང་གནས་བརྟན་རྒན་པོ་རྣམས་འགྲོ་བར་མི་ནུས་ཤིང་། གསར་བུ་རྣམས་མཁན་སློབ་མི་འགྲོ་བས་འགྲོ་མ་ནུས་པས་སྟོན་པར་འཁོར་ཉུང་བའི་རྒྱུ་གསོལ་བ་ན་ལོ་ལྔ་ལོན་ཅིང་ལྷན་ཅིག་སྦྱར་བ་ཐ་མ་དང་ལྡན་པས་གནས་མ་བཅས་པར་ལྗོངས་རྒྱུ་བར་གསུངས་ཤིང་། མདོ་རྩར། བསྙེན་པར་རྫོགས་ནས་ལོ་བཅུ་མ་ལོན་པར་མཁན་པོ་ཉིད་དང་གནས་ཉིད་དང་མི་གནས་པར་འདུག་པར་མི་བྱའོ། །འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ། །ཞེས་དང་། ལོ་ལྔ་ལོན་ཞིང་ལྷན་ཅིག་སྦྱར་བ་ཐ་མ་དང་ལྡན་ན་གནས་མ་བཅས་པར་ལྗོངས་རྒྱུར་འགྲོ་བར་བྱའོ། །ཞེས་པའི་དགོངས་དོན་ལོ་བཅུ་ལོན་ཅིང་འདུལ་བར་མཁས་ན་གནས་བརྟན་བྱ་བར་དབང་ལ། དེ་ཡང་ལོ་བཅུ་བར་མ་ཆད་ལོན་པ་ཞེས་གནམ་ཙེ་ལྡེང་མ་སོགས་སུ་གསུངས་པའི་ནུས་པས་བསྒྲུབ་བྱ་ཡང་མཁན་པོ་དང་ལྷན་ཅིག་ལོ་བཅུ་གནས་དགོས་པར་ཤེས་ནུས་ཤིང་། འཇམ་དབྱངས་ས་པཎ་གྱིས་ཆག་ལོའི་དྲི་ལན་དུ་ཡང་། བདག་གི་བླ་མ་ཁ་ཆེའི་བསོད་སྙོམས་པ་ཆེན་པོ་དགེ་སློང་གི་མཁན་པོ་ཞུ་བ་ཀུན་ལ། འདུལ་(༡༠༤བ)
བ་ཉན་ཅིང་ངའི་དྲུང་དུ་ལོ་བཅུ་སྡོད་ནུས་ན་བྱ་གསུང་ནས་མ་གནང་། ཞེས་ཀྱང་གསུང་། དེ་ལྟར་ན་འདུལ་བ་མཁས་པ་ཤུགས་ཀྱིས་འབྱུང་བ་ལ་དགོངས་པས་ལོ་བཅུ་ལོན་པ་ལས་འདུལ་བ་ཤེས་པ་གཙོ་ཆེ་ཞིང་། དེའི་ཕྱིར་བླ་ཆེན་དགོངས་པ་རབ་གསལ་ལ་མཁན་པོ་གཙང་གིས་དམིགས་བསལ་ཡིན་པས་བཏུབ་ཅེས་ལོ་ལྔ་ལས་མ་ལོན་པར་མཁན་པོ་གྱིས་ཤིག་པར་གསུངས་སམ་སྙམ། མཁན་ཆེན་ངག་དབང་ཆོས་གྲགས་ཀྱི་འདུལ་འགྲེལ་དུ་མདོ་རྩ་ལས། བསྙེན་པར་རྫོགས་ནས་ལོ་བཅུ་མ་ལོན་པར་མཁན་པོ་ཉིད་དང་། གནས་ཉིད་དང་། མི་གནས་པར་འདུག་པར་མི་བྱ། འོག་ནས་འབྱུང་བ་དག་ནས་ལྷན་ཅིག་སྦྱར་བ་གང་དང་ཡང་མི་ལྡན་བླ་མ་ཡིན་ནོ་ཞེས་པས་བསྟན། སྔོན་གྱི་དུས་སུ་བླ་ཆེན་དགོངས་པ་རབ་གསལ་གྱིས་བསྙེན་པར་རྫོགས་ནས་ལོ་ལྔ་ལོན་པའི་སྐབས་སུ་དབུས་གཙང་གི་མཁས་པ་མི་བཅུས་བླ་ཆེན་ལ་མཁན་པོ་ཞུས་ཏེ་བསྙེན་རྫོགས་བླངས་པའི་གཏམ་རྒྱུད་ཁུངས་མ་ཡོངས་སུ་གྲགས་པ་འདི་དང་། དྲངས་མ་ཐག་པའི་མདོ་རྩའི་ལུང་གཉིས་འགལ་བ་ལྟར་སྣང་བའི་དོགས་པ་ཅུང་ཟད་འབྱུང་། མཁྱེན་པའི་སྤྱན་ལྡན་མཁས་པའི་དབང་པོས་གསུངས་ཙ་ན། བླ་ཆེན་གྱིས་བསྙེན་པར་རྫོགས་ནས་ལོ་ལྔ་སོང་ནས་གཞན་གྱི་མཁན་པོ་མཛད་དེ། མདོ་རྩར། ལོ་ལྔ་ལོན་ཞིང་ལྷན་ཅིག་སྦྱོར་བ་ཐ་མ་དང་ལྡན་ན་གནས་མ་བཅས་པར་ལྗོངས་རྒྱུར་འགྲོ་བར་བྱའོ། །ཞེས་གསུངས་པ་འདིས་བསྟན་པ་འདྲ་སྟེ། དགེ་སློང་རང་ཉིད་གནས་བླ་མ་ཞིག་ལ་མ་བརྟེན་པར་འགྲོ་འདུག་རང་དབང་ཅན་དུ་མི་བྱ་བ་དང་། གཞན་གྱི་གནས་བླ་མ་དང་མཁན་པོ་བྱེད་པ་ལ་བསྙེན་པར་རྫོགས་ནས་ལོ་བཅུ་ལོན་དགོས་པར་གསུངས་(༡༠༥ན)
པ་དེ་ལུགས་སྔ་མ་དེའི་དོན་ཡིན་པ་དེ་ནི་སྤྱིར་བཏང་དང་། ལོ་ལྔ་ལོན་ནས་མཁན་པོ་སོགས་གསུམ་བྱེད་པ་ལུང་ཕྱི་མ་དེས་སླར་དམིགས་བསལ་བསྟན་པ་ཡིན་གསུངས། མཁས་པའི་ཡན་ལག་ལ་ཉི་ཤུ་རྩ་གཅིག་ཏུ་ཡོད་པའི་རེ་རེ་ལ་ལྔ་ལྔ་ལས། དང་པོ་ནི་ལོ་བཅུ་ལོན་པ། ནད་གཡོག །འགྱོད་པ་བསལ་བ། སྡིག་ལྟ་སྤང་པ། བསམ་པ་ཤེས་པ་དང་ལྔ། གཉིས་པ་ནི། སྡེ་སྣོད་གསུམ་འཛིན་པ། མང་ཐོས་ཚུལ་ལྡན་དང་ལྔ། གསུམ་པ་ནི། སྡེ་སྣོད་གསུམ་མཁས་པ་མང་ཐོས་ཚུལ་ལྡན་དང་ལྔ། བཞི་པ་ནི། སྡེ་སྣོད་གསུམ་རིག །མང་ཐོས་ཚུལ་ལྡན་དང་ལྔ། ལྔ་པ་ནི། སྡེ་སྣོད་གསུམ་གསལ་བ། མང་ཐོས་ཚུལ་ལྡན་དང་ལྔ། དྲུག་པ་ནི། སྡེ་སྣོད་གསུམ་འཛིན་འཇུག་ནུས་པ། མང་ཐོས་ཚུལ་ལྡན་དང་ལྔ། བདུན་པ་ནི། བསླབ་པ་གསུམ་ལ་བསླབ་པ། མང་ཐོས་ཚུལ་ལྡན་དང་ལྔ། བརྒྱད་པ་ནི། བསླབ་པ་གསུམ་ལ་བསླབ་འཇུག་ནུས་པ། མང་ཐོས་ཚུལ་ལྡན་དང་ལྔ། དགུ་པ་ནི། ལྷག་པའི་སྤྱོད་པ། འདུལ་བ་སོ་སོར་ཐར་པར་བསླབ་པ། མང་ཐོས་ཚུལ་ལྡན་དང་ལྔ། བཅུ་པ་ནི། ལྷག་པའི་སྤྱོད་པ། འདུལ་བ་སོ་སོར་ཐར་པར་བསླབ་འཇུག་ནུས་པ། མང་ཐོས་ཚུལ་ལྡན་དང་ལྔ། བཅུ་གཅིག་པ་ནི། དད་པ། ཚུལ་ཁྲིམས། ཐོས་པ། གཏོང་བ། ཤེས་རབ་ཕུན་ཚོགས་དང་ལྔ། བཅུ་གཉིས་པ་ནི། ཚུལ་ཁྲིམས་ཏིང་ངེ་འཛིན། ཤེས་རབ། རྣམ་པར་གྲོལ་བ། རྣམ་པར་གྲོལ་བ་མཐོང་བ་ཕུན་ཚོགས་དང་ལྔ། བཅུ་གསུམ་པ་ནི། མང་ཐོས་ཚུལ་ལྡན། བརྩོན་འགྲུས། ཤེས་རབ། དྲན་པ་དང་ལྔ། བཅུ་བཞི་པ་ནི། མང་ཐོས་ཚུལ་ལྡན། བརྩོན་འགྲུས། ཤེས་རབ། ནང་དུ་ཡང་དག་འཇོག་པ་དང་ལྔ། བཅོ་ལྔ་པ་ནི། མང་ཐོས་(༡༠༥བ)
ཚུལ་ལྡན། བརྩོན་འགྲུས། ཤེས་རབ། མཉམ་པར་འཇོག་པ་དང་ལྔ། བཅུ་དྲུག་པ་ནི། སློབ་པའི་ཚུལ་ཁྲིམས། ཏིང་ངེ་འཛིན། ཤེས་རབ། རྣམ་པར་གྲོལ་བ་ཤེས་པ། རྣམ་པར་གྲོལ་བ་མཐོང་བ་དང་ལྔ།བཅུ་བདུན་པ་ནི། མི་སློབ་པའི་ཚུལ་ཁྲིམས། ཏིང་ངེ་འཛིན། ཤེས་རབ། རྣམ་པར་གྲོལ་བ་ཤེས་པ། རྣམ་པར་གྲོལ་བ་མཐོང་བ་དང་ལྔ། བཅོ་བརྒྱད་པ་ནི། འབྱུང་བ། བཅས་པ། རྗེས་སུ་བཅས་པ། བཀག་པ། གནང་བ་མངོན་པར་ཤེས་པ་དང་ལྔ། བཅུ་དགུ་པ་ནི། བར་དུ་གཅོད་པ་དང་བར་དུ་གཅོད་པ་མ་ཡིན་པར་མངོན་པར་ཤེས་པ། སྨྲ་བ་དང་རྗེས་སུ་སྟོན་པ། གནས་འཆར་འཇུག་ནུས་པ་དང་ལྔ། ཉི་ཤུ་པ་ནི། བར་དུ་གཅོད་པ་དང་བར་དུ་གཅོད་པ་མ་ཡིན་པ་མངོན་པར་ཤེས་པ། སྨྲ་བ། རྗེས་སུ་སྟོན་པ། གནས་འཆར་འཇུག་པ་དང་ལྔ། ཉི་ཤུ་རྩ་གཅིག་པ་ནི། ལྟུང་བ། ལྟུང་བ་མ་ཡིན་པ། ཡང་བ། ལྕི་བ་མངོན་པར་ཤེས་པ། སོ་སོར་ཐར་པ་རྒྱས་པར་ཐོན་པ་དང་ལྔ་རྣམས་ཡིན། པཎ་ཆེན་དངོས་གྲུབ་དཔལ་འབར་གྱི་ལས་ཆོག་ཏུ་སཾ་སྐྲྀ་ཏའི་སྐད་དུ་ཨུ་པ་ཞེས་པ་བྱུང་། དེ་ཉེ་བ་ལ་འཇུག །དེ་ལ་དྷ་ར་སནྡྷ་བེ་ཀཱ་ར་ན་ཞེས་པའི་རྐྱེན་གསུམ་བྱིན་ཞེས་གསུང་བ། ཨུ་པ་ཉེར་བསྒྱུར་དང་དྷཱ་ར་སོགས་བྱིངས་མིང་དུ་གྲུབ་ཟིན་པ་ལ་རྐྱེན་གྱི་ཐ་སྙད་མི་ཡོང་བས་འདི་དང་དབྱིབས་འདྲ་བ་ཉི་ཐང་དྲུང་ཆེན་དངོས་གྲུབ་པས་བྱིངས་བསྒྲུབ་བྱས་ཟིན་པའི་མིང་དུ་གྲུབ་པ་རྐྱེན་ཡིན་ཁུལ་ཀྱི་ཁམས་ཀྱི་སྐད་དོད་དྷཱ་ཏུ་ལ་དྷཱ་རའི་རྐྱེན་དང་སྦྱར་ཞེས་གོང་གི་མཆེད་ཟླ་ཡོད་པ་ས་དགེའི་སྡེ་སྣོད་ལ་རིང་དུ་སྦྱངས་ནས་བསྙེམས་པའི་སྤོ་ག་གས་པ་རྣམས་ཀྱང་། ཞ་ལུ་ལོ་ཆེན་གྱིས། མཁས་ཞེས་བྱ་བ་(༡༠༦ན)
མང་ན་ཡང་། སྒྲ་ཚད་ཀྱི་འཕྲང་ལ་བཅུག་ན་ཤེས། ཞེས་གསུངས་པ་ལྟར། ལེགས་སྦྱར་གྱི་ཚུལ་ལ་མ་སྦྱངས་པར་ཚིག་དོན་གཉིས་ཀའི་ཆ་ལ་སྒྲོ་འདོགས་ཆོད་དཀའ་བས་ནང་རྟེན་རྣམས་ཕྱི་རོལ་དུ་མཇལ་ཁ་མི་གནང་བ་ཞུ་ཞེས་ཕྱོགས་བཅུར་ཐལ་མོ་སྦྱོར་རོ། །གོང་དུ་བཤད་པའི་སཾ་སྐྲྀ་ཏའི་སྐད་གསུམ་པོའི་བསྒྲུབ་ལུགས་ནི་ཉེ་བསྒྱུར་ཨུ་པ་སྔོན་མའི་ཌུ་དྷྲྀཉ་འཛིན་པ་ལའོ་ཞེས་པའི་བྱིངས་ལ། དཎྜ་དང་སུ་ཏྲ་དག་མ་ཡིན་པའི་མཚོན་ཆ་ལའང་དྷྲྀཉ་ལའོ་ཞེས་པའི་བྱིངས་མིང་དུ་བསྒྲུབ་པའི་རྐྱེན་ཨ་ཙ་བྱིན། ཙ་ཁྱད་དོན། བྱིངས་ཀྱི་རྗེས་འབྲེལ་ཌུ་ཡིས། ཌུ་རྗེས་སུ་འབྲེལ་བ་ལས་དེའི་ཚར་པ་ལ་ཏྲི་མ་ཀྲའོ། །ཞེས་པའི་དོན་དང་ཉ་ཡིག་ཨིན་དང་ཉ་དང་ཡ་ཛ་སོགས་ལས་གཉིས་ཀའི་ཞེས་པའི་དོན་རིམ་པ་ལས་མ་འདས་པར་ཕྲལ་བར་བྱའོ། །ཞེས་པ་ས་དྷའི་སྲོག་གི་རྀ་ཕྲལ། ནཱ་མིན་མཐའི་བྱིངས་དང་བི་ཀ་ར་ཎ་དག་གི་ཡོན་ཏན་ནོས་རྀ་ཨར། གསལ་བྱེད་དབྱངས་མེད་པ་ཕ་རོལ་གྱི་ཡི་གེའི་སྟེང་དུ་དྲང་ངོ་ཞེས་པས་དྷ་དང་ར་སོ་སོར་དྲངས་པས། ཨུ་པ་དྷ་ར་ཞེས་གྲུབ་པ་ལ་མིང་དེ་ཚིག་ཏུ་བསྒྲུབ་པའི་ཆེད་དུ་རྣམ་དབྱེ་དང་པོའི་གཅིག་ཚིག་སི་བྱིན་མི་ཟད་པ་ལས་རྣམ་དབྱེ་རྣམས་ཀྱི་འོས་དེ་ཕྱིས་པའོ། །ཡང་ཨུ་པ་སྔོན་མའི་སནྡྷ་སྙན་ཚིག་རབ་ཏུ་སྦྱོར་བ་ལའོ། །ཞེས་པའི་བྱིངས་ལ། ཉེ་བསྒྱུར་ལ་དཱ་སོགས་ལ་ཀིའོ། །ཞེས་པས་མིང་དུ་བསྒྲུབ་པའི་རྐྱེན་ཀི་སྦྱར། ཀུ་ཡོན་ཏན་འགོག་པའི་དོན། བྱིངས་མཐའི་ཨཱ། ཨཱ་ཏ་རྗེས་སུ་འབྲེལ་པ་ལས་སོའི་ཁྱད་དོན་རིམ་པར་དྲངས་སི་ཕྱིས་པས། ཨུ་པ་སནྡྷི་ཞེས་གྲུབ། ཡང་བི་སྔོན་མའི་ཌུ་ཀྲྀཉ་བྱེད་པ་ལའོ་ཞེས་པའི་བྱིངས་ལ་རྗེས་འབྲེལ་གཉིས་ཕྱིས། ཁྲོ་བ་དང་རྒྱན་དང་གཡོ་བ་དང་སྒྲའི་དོན་རྣམས་ལ་(༡༠༦བ)
ཡུ་ཎ་འོས་མིང་སྒྲུབ་ཀྱི་རྐྱེན་ཡུ་སྦྱར། གྲུབ་པ་ཉ་ཎ་རྗེས་སུ་འབྲེལ་བ་ལ་ཨིཙ་བཞིན་ནོའི་བྱིངས་ཀྱི་རྀ་འཕེལ་བ་ཨཱར་དུ་བསྒྱུར། ཡུ་བུ་ཛྷ་སོགས་ཀྱི་མདོས་ཡུ་ཨ་ན། ར་སྔོན་མའི་རྒྱུ་མཚན་ལས་ན་ཎ། སོ་སོར་དྲངས་ནས་སི་ཕྱིས་པས་བི་ཀཱ་ར་ཎ་ཞེས་གྲུབ་པའི་སྔོན་དུ་ཨུ་པ་བཞག་པས་གྲུབ་བོ། །ཡང་བར་མ་རབ་བྱུང་གི་དངོས་གཞིའི་བཤད་པའི་སྐབས། ཉེ་བསྒྱུར་པྲ་སྔོན་མའི་པྲྀ་ཛཱི་འདོར་བ་ལའོ་ཞེས་པའི་བྱིངས་ལ། ལས་ལ་ཀྟ་འོས་བྱིངས་མིང་དུ་བསྒྲུབ་པའི་རྐྱེན་ཀྟ་སྦྱར། བྱིངས་ཀྱི་ཨཱི་དཱིང་ཤྲི་ཨཱིཏ་རྗེས་སུ་འབྲེལ་བའི་དོན། རྐྱེན་གྱི་ཀ །ཀ་ལ་ཡ་ཎ་བཞིན་འང་སྟེ་ཡ་ལ་བརྗོད་པ་བོར་པ་འོའི་ཁྱད་དོན། བྱིངས་ཐམས་ཅད་པ་མ་ཡིན་པ་གསལ་བྱེད་དང་པོ་ཡ་ཡིག་དང་པོ་མ་ཡིན་པའི་དང་པོར་ཨིཊ་ཨཱ་ག་མ་འོས་བར་རྐྱན་ཨིཊ་བྱིན། ཊ་གནས་དོན་ཨིཊ་དང་བཅས་པའི་ནི་ཥཱ་འོས། ཨུ་པ་དྷའི་རྀ་ཨ་རེ། གསལ་བྱེད་དབྱངས་མེད་པ་ཕ་རོལ་གྱི་ཡི་གེར་དྲང་ངོས་སོ་སོར་དྲངས། མིང་དེ་ཚིག་ཏུ་བསྒྲུབ་པའི་ཆེད་དུ་རྣམ་དབྱེ་དང་པོའི་གཅིག་ཚིག་སི་བྱིན། མི་ཟད་པ་ལས་རྣམ་དབྱེ་རྣམས་ཀྱི་འོས་དེ་ཕྱིས་པས་པྲ་བརྫི་ཏ་གྲུབ་པ་རབ་ཏུ་སྤངས་པའི་དོན་ཏེ། རབ་ཏུ་བྱུང་བ་ལ་དོན་འགྱུར་གྱིས་ཐོབ། བདེ་བར་གནས་པའི་རྐྱེན་བསྟེན་པའི་ནང་ཚན་གོས་མཐའ་གཉིས་སུ་མ་ལྷུངས་པ་སོགས་འཚོ་བའི་ཡོ་བྱད་བཅུ་གསུམ་གྱི་སྐོར་ལ་ལུང་རིགས་གཏེར་མཛོད་ལས། བག་ཡངས་དང་འདྲ་བ་སྲ་བརྐྱང་གི །འཚོ་བའི་ཡོ་བྱད་དང་འབྲེལ་བ་གོས་ཀྱི། དམིགས་བསལ་དང་འབྲེལ་བ་ཀོ་ལྤགས་ཀྱི་གཞིའོ། །དང་པོ་ནི། མཁོ་ཆུང་བས་བཏང་སྙོམས་སུ་བཞག་སྟེ། གཉིས་པ་གོས་གཞི་ལ། གོས་ཇི་ལྟར་བསྒྲུབ་པའི་ཚུལ་དང་། (༡༠༧ན)
དེ་ལས་གྲུབ་པའི་གོས་ཀྱི་རྣམ་པར་བཞག་པའོ། །དང་པོ་ནི། ལོག་པའི་འཚོ་བ་ཆར་གཏོགས་དང་བཅས་པ་སྤངས་ཏེ་ཡང་དག་པའི་འཚོ་བ་ལ་བརྟེན་པའི་ཚུལ་གྱིས་བསྒྲུབ་པར་བྱའོ། །ལོག་པའི་འཚོ་བ་ལྔ་སྟེ། ཚུལ་འཆོས་ཀྱི་སྒོ་ནས་རྙེད་པ་བསྒྲུབ་པ། ཁ་གསག །གཞོགས་སློང་། ཐོབ་ཀྱིས་འཇལ་བའི་སྒོ་ནས་རྙེད་པ་བསྒྲུབ་པ། རྙེད་པས་བརྙེད་པ་འདོད་པའོ། །དང་པོ་ནི། རིན་ཆེན་འཕྲེང་བར། ཚུལ་འཆོས་རྙེད་དང་བཀུར་སྟིའི་ཕྱིར། །དབང་པོ་སྡོམ་པར་བྱེད་པས་ཏེ། །ཞེས་སོ། །གཉིས་པ་ནི་ཁ་གསག་རྙེད་དང་བཀུར་སྟིའི་ཕྱིར། །ཚིག་འཇམ་སྙན་པར་སྨྲ་བའོ། །ཞེས་སོ། །གཉིས་པ་ལ། གོས་ཀྱི་རྒྱུ་རུང་མི་རུང་གི་བྱེ་བྲག་བརྟག་པ། རུང་བ་ལ་གོས་བཟོ་བའི་ཚུལ། གོས་ཀྱི་དབྱེ་བ། དབྱེ་བ་སོ་སོའི་རྣམ་བཞག །གོས་ལ་ལོངས་སྤྱོད་པའི་ཚུལ་ལོ། །དང་པོ་ལ་མི་རུང་བ་ནི། ཁ་ཚར་དང་ཕུན་ཚར་མ་བཅད་པ་དང་དཔག་བསམ་གྱི་ཤིང་ལས་བྱུང་བ་དང་། རྔ་མོའི་བལ་ལས་བྱས་པ་དང་ཁ་དོག་ཁྲའོ། །དབྱིབས་ཁྱིམ་པ་དང་མུ་སྟེགས་ཅན་གྱི་གོས་ལྟ་བུའོ། །རུང་བ་བདུན་ཏེ། བལ་ལས་བྱས་པ། རྩྭ་ཤན་ལས་བྱས་པ། ཉི་འོག་པའི་གོས་རས་གོས་རྩྭ་ཟར་མ་ལས་བྱས་པ་རྩྭ་ཀོ་ཏམ་པ་ལས་བྱས་པ་རྩྭ་དུ་གུ་ལས་བྱས་པ་སྟེ། ས་ག་ལྷས། བག་གོས་ཤ་ན་ཉི་འོག་དང་། །རས་གོས་ཤ་ན་ཉི་འོག་དང་། །རས་གོས་དང་ནི་ཟར་མ་དང་། །(༡༠༧བ)
ཀོ་ཏམ་པ་དང་དུ་གུ་ལ། །ཆོས་གོས་རྒྱུ་ནི་རྣམ་པ་བདུན། ཞེས་སོ། །བལ་དང་རས་སོགས་ལས་བྱས་པ་ཡང་སྤུ་ཤིན་ཏུ་ཆེ་བ་ཆོས་གོས་རྣམ་གསུམ་དུ་བྱར་མི་རུང་སྟེ། གཞུང་དུ། སྤུ་ཅན་ཆོས་གོས་གསུམ་ཉིད་དུ་བྱིན་གྱིས་བརླབ་པར་མི་བྱའོ། །ཞེས་དང་། ས་ག་ལྷས། སྤུ་ཅན་རྣམ་པར་སྤངས་ནས་ནི། །བརྟུལ་ཞུགས་ཅན་གྱི་ནང་ཤུན་བྱ། ཞེས་སོ། །གཉིས་པ་ལ་། བཀྲུ་བ། ཁ་བསྒྱུར་བ། དྲས་ཤིང་དྲུབས་པའོ། །དང་པོ་ནི། ས་ག་ལྷས། དག་པར་བྱ་ཕྱིར་ཤམ་ཐབས་ནི། །བཙོ་བླག་མཁན་ལ་འཁྲུར་མི་གཞུག །བརྩེ་ལྡན་རང་ངམ་གཞན་གྱིས་ཀྱང་། །སྣོད་ཀྱི་ནང་དུ་དལ་བུས་བཀྲུ། །ཞེས་པ་ལྟར་རོ། །གཉིས་པ་ནི། མི་རུང་བའི་ཚོན་ཆེན་བརྒྱད་སྤངས་ཏེ་རུང་བའི་ཚོན་ཁ་གསུམ་གྱིས་བསྒྱུར་དགོས་ཏེ། ས་ག་ལྷས། སྔོན་པོ་བཅག་དང་ངུར་སྨྲིག་རྩི། །འདི་དག་རུང་བའི་ཚོན་གསུམ་སྟེ། །ཚོན་ཆེན་དག་གིས་ཆོས་གོས་ནི། ཁ་བསྒྱུར་བྱེད་པ་བཀག་པ་ཡིན། །ཞེས་གསུངས་པའི་ཕྱིར། ཚོན་ཆེན་བརྒྱད་ནི། ས་ག་ལྷས། རྒྱ་སྐྱེགས་ལེ་བརྒན་རྩི་དང་བཙོད། །སྨ་ཤིང་རྩི་དང་མཐིང་ཤིང་མཚལ། །སིནྡྷུ་ར་དང་གུར་གུམ་སྟེ། །འདི་དག་ཚོན་ཆེན་བརྒྱད་དུ་འདོད། །ཅེས་པ་ལྟར་རོ། །གསུམ་པ་ལ། གོས་གང་ལ་བྱ་བ་དང་ཇི་ལྟར་བྱ་བའི་ཚུལ་ལོ། །དང་པོ་ནི། སྣམ་སྦྱར་ལ་ངེས་པར་དྲས་དྲུབས་དགོས་ལ། བླ་གོས། མཐང་གོས། དགེ་སློང་མའི་ཤིང་ང་དཔུང་ཆད་དང་རྔུལ་གཟན་ལ། རབ་དྲས་དྲུབས། འབྲིང་ལྷན་ཐབས། ཐ་མ་ཐང་ཐང་པོར་བྱ་བ་ཡིན་ནོ། །གདིང་བ་ལ་གླེགས་བུ་ཕྱེད་དང་གཉིས་པ་བྱེད་ཅིང་། གོས་གཞན་རྣམས་ལ་སྣམ་ཕྲན་དང་གླེགས་བུའི་བཤད་པ་མེད་དོ། །ས་ག་ལྷས། གདིང་བ་ལ་དྲ་མི་དགོས། །རྟག་ཏུ་འབྲལ་བ་ཡང་ནི་མེད། །(༡༠༨ན)
སྣམ་སྦྱར་ངེས་པར་དྲས་ཏེ་བཅང་། །གཞན་དག་མ་ངེས་གང་གི་ཕྱིར། །འདོད་ཆུང་རང་གི་ཆོས་གོས་ཀྱི། །ལས་ཀྱིས་སྐྱོ་བ་བསྐྱེད་ཕྱིར་རོ། །ཞེས་དང་། འདིར་ཡང་སྣམ་སྦྱར་མ་ཡིན་པ་དག་ལ་དྲས་ཏེ་བྱིན་གྱིས་བརླབ་པའི་ངེས་པ་མེད་དོ། །ཞེས་དང་། དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ། །མཐང་གོས་དང་བླ་གོས་དང་སྣམ་སྦྱར་ལའོ། །དགེ་སློང་མས་ནི་ཤིང་ང་དཔུང་ཆད་དང་རྔུལ་གཟན་སྣམ་པ་གང་ཡང་རུང་བའོ། །ཞེས་སོ། །གཉིས་པ་ལ། བླ་གོས་དང་། སྣམ་སྦྱར་ལ་དྲས་དྲུབས་བྱ་ཚུལ་ལོ། །དང་པོ་ནི། བླ་གོས་ཀྱི་རྒྱུ་ལ་མཐའ་སྐོར་མ་གཏོགས་པ་ལྷག་མ་རྣམས་ལ་གླེགས་བུ་ཚད་མ་བཅུ་བཞི། ཕྱེད་པ་བདུན་ཏེ་དུམ་བུ་ཉེར་གཅིག་ཏུ་དྲའོ། །དྲུབ་པའི་ཚེ་གླེགས་བུ་ཕྱེད་དང་གསུམ་གསུམ་བྱ་སྤུ་ནོན་གྱི་ཚུལ་དུ་སྦྱར་ནས་དྲུབ་བོ། །དེ་ལྟ་བུའི་སྣམ་ཕྲན་བདུན་ཡོད་པ་ལ། གཅིག་དབུས་སུ་བཞག །གཡས་སུ་གསུམ། གཡོན་དུ་གསུམ། གླེགས་བུ་ཆེ་ཆུང་རིམ་པ་འཆོལ་བར་བྱ་སྤུ་ནོན་གྱི་ཚུལ་གྱིས་བཞག་ནས་མཐར་ལྕགས་རིས་བསྐོར་ཏེ་དྲུབ་པར་བྱེད་པའོ། །གཉིས་པ་ནི། རབ་ཀྱི་རབ་སྣམ་ཕྲན་ཉེར་ལྔ་མ་བྱེད་ན་སྣམ་སྦྱར་གྱི་རྒྱུ་ལ་མཐའ་སྐོར་མ་གཏོགས་པ་ལྷག་མ་རྣམས་གླེགས་བུ་ཚད་མ་བརྒྱ་ཐམ་པ། ཕྱེད་པ་ཉེར་ལྔ་སྟེ་དུམ་བུ་བརྒྱ་དང་ཉེར་ལྔར་དྲའོ། །དྲུབ་པའི་ཚེ་གླེགས་བུ་ཕྱེད་དང་ལྔ་ལྔ་བྱ་སྤུ་ནོན་གྱི་ཚུལ་དུ་མཐུད་ནས་དྲུབས་པས་གླེགས་བུ་ཕྱེད་དང་ལྔ་ལྔ་དང་ལྡན་པའི་སྣམ་ཕྲན་ཉེར་ལྔ་འབྱུང་ངོ་། །དེ་ནས་སྣམ་ཕྲན་གཅིག་དབུས་སུ་བཞག །གཡས་སུ་བཅུ་གཉིས། གཡོན་དུ་བཅུ་གཉིས། གླེགས་བུ་རྣམས་རིམ་པ་འཆོལ་བར་བྱ་སྤུ་ནོན་གྱི་ཚུལ་གྱིས་བཞག་པ་ལ་མཐའ་(༡༠༨ན)
ལྕགས་རིས་བསྐོར་བའི་ཚུལ་གྱིས་སྦྱར་ནས་དྲུབ་བོ། །དེ་བཞིན་དུ་སྣམ་སྦྱར་ལྷག་མ་རྣམས་ལ་ཡང་ཤེས་པར་བྱའོ། །དེ་ལྟར་ཡང་མཚོན་གྱིས་མ་དྲས་པའི་གོས་སྤྱད་པར་མི་བྱའོ། །དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ། །སྣམ་ཕྲན་སྣྲེལ་ཞི་ཉིད་དང་ལྷག་མ་མཉམ་པ་ཉིད་དང་དབུས་ནས་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་བལྟ་བ་ཉིད་དང་མཐའ་བསྐོར་བ་ཉིད་དག་གིས་སོ་ཞེས་པ་ལྟར་རོ། །གསུམ་པ་ལ་དྲུག་སྟེ། འཚོ་བའི་ཡོ་བྱད། མཁོ་བའི་ཡོ་བྱད། ལྷག་པའི་ཡོ་བྱད། འཚོ་བའི་ཡོ་བྱད་ཕྲན་ཚེགས། མཁོ་བའི་ཡོ་བྱད་ཕྲན་ཚེགས། ལྷག་པའི་ཡོ་བྱད་ཕྲན་ཚེགས་སོ། །བཞི་པ་ལ་དྲུག་ལས། དང་པོ་ལ། ངོ་བོ། དབྱེ་བ། སོ་སོའི་རང་བཞིན་ནོ། །དང་པོ་ནི། དགེ་སློང་ལ་ལུས་འཚོ་བའི་ཆེད་དུ་རང་དོན་གྱི་བསམ་པས་འཆང་བར་གནང་བའི་རུང་བ་ཚད་ལྡན་གྱིས་གོས་སོ། །གཉིས་པ་ལ། བཅུ་གསུམ་སྟེ། གཞུང་དུ་སྣམ་སྦྱར་དང་བླ་གོས་དང་ཤམ་ཐབས་དང་ཤམ་ཐབས་ཀྱི་གཟན་དང་། རྡུལ་གཟན་དང་། རྡུལ་གཟན་གྱི་གཟན་དང་། གདོང་ཕྱིས་དང་། རྣག་གཟན་དང་། གཡན་པ་དགབ་པ་དང་། སྐྲ་གཟེད་དང་། གདིང་བ་དང་། དབྱར་གྱི་གོས་རས་ཆེན་བཅང་བར་བྱའོ། །ཞེས་དང་། ས་ག་ལྷས། ཆོས་གོས་དྲས་པ་གསུམ་དང་ནི། །རྡུལ་གཟན་ཤམ་ཐབས་གཉིས་གཉིས་དང་། །གཡན་པ་དགབ་དང་གདིང་བ་དང་། །རས་ཆེན་དང་ནི་སྐྲ་གཟེད་དང་། །གདོང་དང་ལག་པ་ཕྱི་བ་སྟེ། །འདི་དག་བཅུ་གསུམ་དབྱེ་བར་འདོད། །ཅེས་སོ། །ལག་པ་ཕྱི་བ་ནི། རྣམ་གཟན་གྱི་མིང་གི་རྣམ་གྲངས་སོ། །གསུམ་པ་ལ། བཅུ་གསུམ་ཡོད་པའི་དང་པོ། སྣམ་སྦྱར་ལ། ངོ་བོ། དབྱེ་བ། ཁྱད་ཆོས། བྱིན་གྱིས་(༡༠༩ན)
བརླབ་ཚུལ་ལོ། །དང་པོ་ནི། སྣམ་ཕྲན་དགུ་ཡན་ཆོད་དུ་ངེས་པར་དྲས་དྲུབས་བྱས་ཏེ་བྱིན་གྱིས་བརླབས་ནས་བཅང་དགོས་པའི་འཚོ་བའི་ཡོ་བྱད་བཅུ་གསུམ་གྱི་ནང་ནས་གཙོ་བོར་གྱུར་བའི་རུང་བ་ཚད་ལྡན་གྱི་གོས་སོ། །དབྱེ་ན་ཐ་སྐོར་གསུམ། འབྲིང་སྐོར་གསུམ། རབ་སྐོར་གསུམ་མོ། དང་པོ་ལ། ཐ་མའི་ཐ་མ་སོགས་གསུམ་སྟེ། སྣམ་ཕྲན་དགུ་མ། བཅུ་གཅིག །བཅུ་གསུམ་གྱི་བདག་ཉིད་ཅན་ནོ། །གཉིས་པ་ལ་འབྲིང་གི་ཐ་མ་སོགས་གསུམ་སྟེ། སྣམ་ཕྲན་བཅོ་ལྔ། བཅུ་བདུན། བཅུ་དགུའི་བདག་ཉིད་ཅན་ནོ། །གསུམ་པ་ལ། རབ་ཀྱི་ཐ་མ་སོགས་གསུམ་སྟེ། སྣམ་ཕྲན་ཉེར་གཅིག །ཉེར་གསུམ། ཉེར་ལྔའི་བདག་ཉིད་ཅན་ནོ། །སྣམ་ཕྲན་ཉེར་ལྔ་ལས་ལྷག་པ་བྱར་མི་རུང་སྟེ། ཚེམ་བུའི་རང་བཞིན་ཅན་དུ་འགྱུར་བའི་ཕྱིར། དེ་ལྟར་ཡང་། སྣམ་སྦྱར་གྱི་སྣམ་ཕྲན་དག་གི་དགུ་ཡན་ཆད། ཉི་ཤུ་རྩ་ལྔ་མན་ཆད་དེ་ཟུང་མ་གཏོགས་སོ་དེ་ཡན་ཆད་ནི་ཚེམ་བུའོ། །ཞེས་དང་། ས་གའི་ལྷས། སྣམ་སྦྱར་རྣམས་ཀྱི་ཚལ་བུ་ནི། །སྣྲེལ་ཞི་བྱའོ་དགུ་སོགས་དགུ །སྣམ་ཕྲན་ཉི་ཤུ་རྩ་ལྔའི་བར། །དེ་དག་དབྱེ་བས་ངེས་པར་བསྟན། །ཞེས་སོ། །གསུམ་པ་ལ། ཚལ་བུའི་ཚད། གླེགས་བུའི་གྲངས། རྒྱ་ཁྱོན་གྱི་ཚད། ཇི་ལྟར་ལོངས་སྤྱོད་ཚུལ་ལོ། །དང་པོ་ནི། གླེགས་བུས་གླེགས་བུ་ཕྱེད་པ་བྱ་སྤུ་ནོན་གྱི་ཚུལ་གྱིས་མནན་པའི་འཕྲོ་དང་། སྣམ་ཕྲན་གྱིས་སྣམ་ཕྲན་གཡས་གཡོན་དུ་བྱ་སྤུ་ནོན་གྱིས་མནན་པའི་འཕྲོ་ནི་ཚལ་བུ་ཡིན་ལ། དེའི་ཚད་ནི། རབ་ལ་སོར་བཞི། ཐ་མ་ལ་སོར་གཉིས། འབྲིང་ལ་དེའི་བར་ཏེ། ས་ག་ལྷས། དང་པོ་ཐ་མ་དག་དང་དབུས། །ཚལ་བུའི་སྒོ་ནི་གསུམ་དུ་འདོད། །དེ་ལ་སོར་ནི་བཞི་དང་གཉིས། །དེའི་བར་ལ་རིམ་(༡༠༩བ)
པ་བཞིན། །ཞེས་སོ། །གཞུང་ལས། གླེགས་བུ་དང་གླེགས་བུ་ཕྱེད་དག་མཉམ་པར་བྱའོ། །གཞལ་བའི་ཕྱིར་དེའི་ཚད་ཀྱི་ཆགས་ཤིང་བཅང་བར་བྱའོ། །ཚལ་བུ་དག་ཀྱང་ངོ་། །དེའི་ཚད་ཀྱི་ཆགས་ཤིང་བཅང་བར་བྱའོ། །དེའི་ཆེ་ཚད་ནི་སོར་བཞིའོ། །བྱ་རོག་གི་མཐོ་གང་ཡང་ངོ་། །ཆུང་ཚད་ནི་སོར་གཉིས་སམ། ཕྱེད་དང་གསུམ་མམ། མཐེབ་སོར་གཅིག་གོ །ས་ལ་ཆོས་གོས་འདིང་བར་མི་བྱའོ། །གཉིས་པ་ནི། ཐ་མ་སྐོར་གསུམ་གྱི་སྣམ་ཕྲན་ནི། གླེགས་བུ་ཕྱེད་དང་གསུམ་པ། འབྲིང་གི་གླེགས་བུ་ཕྱེད་བཞི་པ། རབ་ཀྱི་གླེགས་བུ་ཕྱེད་དང་ལྔ་པ་ཡིན་ཏེ། གཞུང་དུ། དང་པོ་གསུམ་ལ་ནི། དེ་དག་ནི་གླེགས་བུ་ཕྱེད་དང་གསུམ་པ་ཉིད་དོ། །གཉིས་པ་ལ་ནི་གླེགས་བུ་ཕྱེད་དང་བཞི་པ་ཉིད་དོ། །གསུམ་པ་ལ་ནི་གླེགས་བུ་ཕྱེད་དང་ལྔ་པ་ཉིད་དོ། །ཞེས་དང་། ས་ག་ལྷས། གླེགས་བུ་ཕྱེད་དང་གསུམ་པ་གསུམ། །གསུམ་ནི་གླེགས་བུ་ཕྱེད་དང་བཞི། །ཐ་མ་གསུམ་གྱི་གླེགས་བུ་ནི། །ཕྱེད་དང་ལྔ་པར་གསུངས་པ་ཡིན། །ཞེས་སོ། །གསུམ་པ་ནི། རབ་སྐོར་གསུམ་ལ་དཔངས་སུ་ཁྲུ་གསུམ། སྲིད་དུ་ཁྲུ་ལྔ། ཐ་མ་གསུམ་ལ་ཁྲུ་ཕྱེད་ཕྱེད་ཕྲི་བའོ། །འབྲིང་ལ་དེའི་བར་ཏེ། དེ་ལྟར་ཡང་བྱིན་གྱིས་བརླབ་ཏུ་རུང་བ་ཆེན་པོ་དག་ནི། རང་གི་ཁྲུ་གསུམ་དང་ལྔ་དག་གོ །ཆུང་ངུ་དག་ནི་གཉིས་ཀ་ལས་ཁྲུ་ཕྱེད་ཕྱེད་ཕྲི་བའོ། །འབྲིང་རྣམས་ཀྱི་ཚད་ནི་བར་མའོ། །ཞེས་དང་། སྡེ་ཚན་གསུམ་པ་དེ་དག་གིས། །སྣམ་སྦྱར་ཞེས་བྱར་གསུངས་པས་ཏེ། །དེ་དག་ཚད་ནི་ངེས་བསྟན་པ། །དང་པོ་ཁྲུ་ནི་ལྔ་དང་གསུམ། །ཐ་མ་ཕྱེད་དང་གསུམ་དང་ལྔ། །དེ་གཉིས་བར་ནི་བར་མ་ཡིན། །ཞེས་སོ། །བཞི་པ་ནི། གྲོང་དུ་བསོད་སྙོམས་ལ་རྒྱུ་བ་(༡༡༠ན)
དང་། དཀོན་ཅོག་ལ་ཕྱག་བྱ་བ་དང་། དགེ་འདུན་ལས་ལ་འཚོགས་པ་དང་། ཆོས་བཤད་ཉན་གྱི་དུས་སུ་གྱོན་པར་བྱ་བ་ཡིན་ཞིང་། ཆུད་ཟ་བ་སྤང་བའི་ཕྱིར་དུ་ལུས་ཀྱི་ཤ་རྗེན་པ་ལ་མི་རེག་ཅིང་མཆན་ཁུང་དྲོད་ཀྱིས་སྣམ་སྦྱར་ཆུད་མི་ཟ་བར་བྱ་བའི་ཕྱིར་དུ་ཞེང་དུ་མཐོ་གང་དང་སྲིད་དུ་ཁྲུ་ཕྱེད་དང་དོ་ཡོད་པའི་ལྷན་པས་སྐྱབས་ཏེ་ལོངས་སྤྱོད་དགོས་ཏེ། གཞུང་དུ། བསོད་སྙོམས་ལ་རྒྱུ་བ་དང་། ཆོས་སྟོན་དང་མཆོད་རྟེན་ལ་ཕྱག་བྱ་བ་དང་། ཞེས་བྱ་བ་དང་། དགེ་འདུན་ཚོགས་པ་དང་གདམས་ངག་དང་། ཆོས་ཉན་པ་ཉམས་སུ་མྱོང་བ་ལས་གཞན་པའི་བྱ་བ་ལ་སྣམ་སྦྱར་བགོ་བར་མི་བྱའོ། །དེ་ལ་འདུག་པ་ཉལ་བར་མི་བྱའོ། །འགའ་ཡང་སྐུར་བ་ལ་སྦྱར་བར་མི་བྱའོ། །ལུས་ལ་རེག་པར་བགོ་བར་མི་བྱའོ། །མཆན་ཁུང་གཡས་པའི་དྲོད་ཀྱིས་དེ་མ་རུང་བར་འགྱུར་རོ། །དེ་ལྟར་མི་འགྱུར་བར་བྱ་བའི་ཕྱིར། ཕྱོགས་དེར་དེ་ལ་གོས་གླན་པར་བྱའོ། ཁྲུ་ཕྱེད་དང་དོ་དང་མཐོ་གང་ངོ་། །ཞེས་དང་། ས་ག་ལྷས། སྣམ་སྦྱར་དགེ་འདུན་འདུས་པ་དང་། །ཟས་དང་མཆོད་རྟེན་ཕྱག་བྱ་དང་། །གྲོང་སོགས་འཇུག་ལ་བགོ་བྱ་ཡིས། །གཞན་དག་ཏུ་ནི་བཀག་པ་ཡིན། །རྡུལ་གྱི་འཇིགས་པས་སྣམ་སྦྱར་ལ། །རྡུལ་གཟན་སྦྱར་ནས་བཅང་བྱ་སྟེ། །ཞེང་དུ་མཐོ་གང་སྲིད་དུ་ཁྲུ། །ཕྱེད་དང་དོ་ལས་ལྷག་མི་བྱ། །ཞེས་སོ། །
བྱིན་རླབས་བཤད་པ།
བཞི་པ་བྱིན་རླབས་ལ། དངོས་དང་ཞར་བྱུང་རྒྱུའི་བྱིན་རླབས་གཉིས། དང་པོ་ནི། བྱིན་རླབས་བྱ་བའི་ཡུལ་དེ་ཉིད། བསླབ་པ་རྒན་ན་ཕྱག་བྱ། མིན་ན་མི་དགོས། གཉིས་ཀ་འགྲེངས་ཏེ་འདུད་པ་དང་བཅས་པས་སྣམ་སྦྱར་གྱི་ཕྱི་ནང་མ་ལོག་པར་བཞི་བལྟབ་བྱས་པའི་སྣེ་མོ་གཅིག་ཡུལ་གྱི་ཕྲག་པ་གཡོན་པར་བཀལ། སྣེ་མོ་གཅིག་གཉིས་ཀའི་(༡༡༠བ)
ལག་པ་གཡོན་པའི་སྟེང་དུ་བཞག་པ་གཡས་པས་མནན་ཏེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལེགས་པ་རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ཞེས་གསུམ་བརྗོད་དེ། དེ་ནས་ཐབས་ལེགས་བྱའོ། །དེ་བཞིན་དུ་འཚོ་བའི་ཡོ་བྱད་ལྷག་མ་རྣམས་ཀྱང་རང་རང་གི་མིང་ནས་སྨོས་ཏེ། བྱིན་གྱིས་བརླབ་དགོས་པ་ཡིན་ཏེ། གཞུང་དུ། ཆོས་གོས་གནང་བ་དེ་ཉིད་དུ་བྱིན་གྱིས་བརླབས་ཏེ་བཅང་བར་བྱའོ། །ཞེས་གསུངས་པའི་ཕྱིར། གཉིས་པ་ནི། སྣམ་སྦྱར་གྱི་རྒྱུར་རུང་བའི་གོས་ཁྲུ་གང་ཡན་ལ། སྔར་བཞིན་བྱས་ཏེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་འདི་སྣམ་སྦྱར་དུ་བྱིན་གྱིས་བརླབ་བོ། །འཚལ་ན་སྣམ་ཕྲན་དགུ་པ་ལ་སོགས་པར་བགྱིས་ཏེ། གླེགས་བུ་ཕྱེད་དང་གསུམ་པ་སོགས་པ་བགྱིའོ། །བར་ཆད་མ་བྱུང་ན་བཀྲུའོ། །བརྐྱང་ངོ་། །དྲའོ། །བསྡེབ་བོ། །གཟུངས་གདབ་བོ། །དྲུབ་བོ། ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ་ཆོས་གོས་འདི་ནི་རུང་བ་སྤྱད་པར་འོས་པའོ། །ཞེས་པ་གསུམ་བརྗོད་དེ། ཐབས་ལེགས་བྱེད་པའོ། །དེ་བཞིན་དུ་བླ་གོས་ཀྱི་རྒྱུ་ལ་ཡང་སྣམ་ཕྲན་དགུ་པའི་ཚབ་ཏུ་སྣམ་ཕྲན་བདུན་པ་དང་། སྣམ་སྦྱར་གྱི་ཚབ་ཏུ་བླ་གོས་བཅུག་ཏེ་ཤེས་པར་བྱའོ། །གཉིས་པ་བླ་གོས་ནི། གླེགས་བུ་ཕྱེད་དང་གསུམ་གསུམ་གྱི་བདག་ཉིད་ཅན་གྱི་སྣམ་ཕྲན་བདུན་པ་ཡིན་ལ། རབ་འབྲིང་། ཐ་གསུམ་གྱི་ཚད་སྣམ་སྦྱར་བཞིན་ནོ། །མཐང་གོས་ནི་དཔངས་སུ་ཁྲུ་དོ། སྲིད་དུ་ཁྲུ་ལྔ་འམ་བཞི། ཐ་མ་ལྟེ་བ་མན་ཆད་པུས་མོ་ཡན་ཆད་དེ་འཁོར་གསུམ་ཁེབས་པའི་ཚད་ཀྱང་རུང་ལ། ཁྲུའི་དོན་ནི་རང་གི་ལུས་ཀྱི་གཙུག་ནས་རྐང་མཐིལ་གྱི་བར་ལ་(༡༡༡ན)
དུམ་བུ་བདུན་དུ་བྱས་པའི་ཆ་གཉིས་སོ། །ལུས་ཤིན་ཏུ་སྦོམ་པས་མཐང་གོས་ཀྱི་མ་འདུས་ན་རལ་ཁ་དཔུང་ཆད་ཀྱིས་བསྣོན་པ་བྱེད་དགོས་པར་བཤད་དེ། གཞུང་དུ། མཐང་གོས་ནི་དོ་དང་ལྔ་ཡང་ཡིན་དོ་དང་བཞི་ཡང་ཡིན་ནོ། །འཁོར་གསུམ་ཁེབས་པ་ཉིད་ཡན་ཆད་ཀྱང་ངོ་། ཁྲུའི་དོན་ནི་ལུས་ཀྱི་ཆ་བདུན་ལས་གཉིས་སོ། །མི་ཡོགས་ན་རལ་ཁ་དཔུང་ཆད་བྱའོ། །ཞེས་སོ། །ཤམ་ཐབས་ནི་ཉིན་མོ་མཐང་གོས་ཀྱི་འོག་ཏུ་གྱོན་པར་བྱ་བ། ཤམ་ཐབས་ཀྱི་གཟན་ནི་མཚན་མོ་མཐང་གོས་ཀྱི་འོག་ཏུ་གྱོན་པར་བྱ་བ་ཡིན་ཞིང་། ཚད་མཐང་གོས་བཞིན་ནོ། །རྔུལ་གཟན་དང་དེའི་གཟན་ནི་ཉིན་མོ་དང་མཚན་མོ་བླ་གོས་ཀྱི་འོག་ཏུ་གྱོན་པར་བྱ་བ་ཚད་བླ་གོས་བཞིན་ནོ། །གདོང་ཕྱིས་ནི། ཁོ་ར་ཁོར་ཡུག་ཏུ་ཁྲུ་གང་གི་ཚད་དང་ལྡན་པའོ། །སྣག་གཟན་ནི་དགེ་སློང་རྣག་ནད་ཅན་གྱིས་ཤ་ལ་སྦྱར་ཏེ་བགོ་བར་བྱའོ། །ཚད་ཇི་ཙམ་དགོས་པའོ། །གཡན་པ་དགབ་པ་ནི་གཡན་པའི་ནད་ཅན་གྱི་ཤ་ལ་སྦྱར་ནས་གྱོན་པར་བྱ་བ་ཡིན་ཞིང་། ཚད་སྲིད་དུ་ཁྲུ་དྲུག་དང་། དཔངས་སུ་ཁྲུ་གསུམ་མོ། །སྐྲ་བཟེད་ནི་སྐྲ་བྲེགས་པའི་ཚེ་ཆོས་གོས་བསྲུང་བའི་དོན་དུ་སྟོད་དུ་གྱོན་པར་བྱ་བ་སྟེ། ས་ག་ལྷས། བསྲུང་བའི་དོན་དུ་སྐྲ་བཟེད་ནི། །ཞེང་དུ་ཁྲུ་ནི་ཕྱེད་དང་གཉིས། །སྲིད་དུ་ཁྲུ་ནི་གསུམ་ཡིན་ཏེ། །ལྷག་མ་བརྟག་པར་མི་བྱའོ། །ཞེས་པ་ལྟར་རོ། །གདིང་བ་ནི། གནས་མལ་བསྐྱབ་པའི་ཕྱིར་དུ་གནང་བའི་གོས་ཡིན་ཞིང་། ཚད་སྲིད་དུ་ཁྲུ་གསུམ་ཞེང་དུ་ཁྲུ་དོ་སོར་དྲུག་གོ །དབྱར་གྱི་རས་ཆེན་ནི། དབྱར་ཆར་ཆུ་བསྐྱབ་པའི་ཕྱིར་དུ་གྱོན་པར་བྱ་བ་ཡིན་ཞིང་། ཚད་སྲིད་དུ་ཁྲུ་དགུ་ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །དེ་ཐམས་ཅད་ཀྱང་རུང་བའི་ཚོན་(༡༡༡བ)
གྱིས་ཁ་བསྒྱུར་བའོ། །གཉིས་པ་མཁོ་བའི་ཡོ་བྱད་ནི་དགེ་སློང་ལ་ཕྲལ་དུ་ཉེ་བར་མཁོ་བ་གདན་དང་གདིང་གཡོགས་དང་གཏུར་བུ་ལ་སོགས་པ་ཡིན་ལ། དེ་ཡང་ཁྱད་ཆོས་བཞི་ལྡན་ཏེ། ཁྲུ་གང་ཡན་ཆད་ཀྱི་ཚད་དུ་ལོངས་ཤིང་། ཆེ་ཚད་ངེས་པ་མེད་པ་རང་གཞན་ཐུན་མོང་བས་བསམ་པས་བཅང་བ། ཁ་དོག་དང་དབྱིབས་ངེས་པ་མེད་པ། རང་གཞན་ཐུན་མོང་བའི་མིང་གིས་བྱིན་གྱིས་བརླབ་པར་བྱའོ། །བྱིན་གྱིས་བརླབ་པའི་ཚུལ་ནི། ཡུལ་ཡོད་ན་བཙུན་པ་དགོངས་སུ་གསོལ། ཡུལ་མེད་ན་མདུན་དུ་ཤཱ་རིའི་བུ་ལ་སོགས་པའི་ཉན་ཐོས་ཡོད་པར་དམིགས་ཏེ། ལྷ་དགོངས་སུ་གསོལ། གོས་འདི་དག་བདག་དང་ཚངས་པར་མཚུངས་པར་སྤྱོད་པ་རྣམས་ལ་མཁོ་བའི་ཡོ་བྱད་ཀྱི་གོས་སུ་བྱིན་གྱིས་བརླབ་བོ། །ཞེས་པ་གསུམ་བརྗོད་དེ། ཐབས་ལེགས་བྱེད་པའོ། །གསུམ་པ་ལྷག་པའི་ཡོ་བྱད་ནི་རབ་བྱུང་ལ་མེད་དུ་མི་རུང་བ་མ་ཡིན་ཀྱང་། དགོས་པའི་དབང་གིས་བཅང་བར་བྱ་བའི་གོས་ཡིན་ལ། དེ་ཡང་ཁྱད་ཆོས་བཞི་ལྡན་ཏེ། ཚད་སྔར་བཞིན། ཁ་དོག་དང་དབྱིབས་ངེས་པ་མེད་པ། གཞན་ཁོ་ནའི་ཕྱིར་དུ་བཅང་བར་བྱ་བ། གཞན་ཁོ་ནའི་མིང་གིས་བྱིན་གྱིས་བརླབ་པར་བྱ་བའོ། །བྱིན་གྱིས་བརླབ་ཚུལ་ནི། སྣམ་སྦྱར་ལྷག་པོ་དང་རས་ཡུག་ལ་སོགས་པ་ཐོགས་ཏེ། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བའི་གོས་ལྷག་པ་རུང་བ་མ་བགྱིས་པ། རུང་བ་བགྱིད་པར་འོས་པ་འདི་མཁན་པོ་ལ་རུང་བར་བགྱིའོ། །མཁན་པོ་ལ་ཡིད་གཏད་དེ་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ། །ཞེས་གསུམ་བརྗོད་ཅིང་། ཐབས་ལེགས་བྱེད་དོ། །དེ་ཡང་སྣམ་སྦྱར་གྲངས་མང་པོ་ཡོད་པ་ཡིན་ན་གཅིག་འཚོ་བའི་(༡༡༢ན)
ཡོ་བྱད། གཞན་རྣམས་མཁོ་བ་དང་ལྷག་པའི་ཡོ་བྱད་ཅི་རིགས་པར་བྱིན་གྱིས་བརླབ་བོ། །དེས་ན་དགེ་སློང་གིས་རང་གིས་བདག་ཏུ་བཟུང་བའི་ཁྲུ་གང་ཡན་ཆད་དུ་ལོངས་པའི་གོས་ཐམས་ཅད་ཡོ་བྱད་གསུམ་པོ་གང་རུང་དུ་བྱིན་གྱིས་བརླབ་དགོས་ཏེ། གཞན་དུ་སྤང་ལྟུང་བསྐྱེད་པར་འགྱུར་བའི་ཕྱིར། བཞི་པ་ནི། ཞྭ་དང་ལྷམ་དང་སྐ་རགས་དང་ལྷུང་བཟེད་ཀྱི་སྣོད་ལ་སོགས་པའོ། །ལྔ་པ་ནི། མཁོ་བའི་ཡོ་བྱད་ཀྱི་རྒྱུར་བསྔོས་ཤིང་། ཁྲུ་གང་གི་ཚད་དུ་མ་ལོངས་པའོ། །དྲུག་པ་ནི། ལྷག་པའི་ཡོ་བྱད་ཀྱི་རྒྱུར་བསྔོས་ཤིང་ཁྲུ་གང་གི་ཚད་དུ་མ་ལོངས་པའོ། །ལྔ་པ་ལ། གང་ཟག་གང་གིས་བསམ་པ་ཇི་ལྟ་བུས་དགོས་པ་གང་གི་ཕྱིར་ལོངས་སྤྱོད་པའོ། །དང་པོ་ནི། མི་སློབ་པའི་གང་ཟག་གིས་གཞན་གྱི་ཡོ་བྱད་རང་དབང་བའི་ཚུལ་དུ་ལོངས་སྤྱད་དུ་རུང་སྟེ། ཡོན་ཡོངས་སུ་སྦྱོང་བ་ཆེན་པོ་ཡིན་པའི་ཕྱིར། སློབ་པ་འཕགས་པའི་གང་ཟག་ནི་རང་ལ་བྱིན་པ་རྣམས་ཇི་ལྟ་བ་བཞིན་དུ་ལོངས་སྤྱོད་ནུས་ཏེ། ཡོན་སྦྱོང་ནུས་པའི་ཕྱིར། འཕགས་པ་མིན་ཡང་ཚུལ་ཁྲིམས་རྣམ་པར་དག་ཅིང་ཐོས་བསམ་དང་སྒྲུབ་པ་ལ་བརྩོན་པའི་གང་ཟག་གིས་གཞན་གྱི་ལོངས་སྤྱོད་སངས་རྒྱས་ཀྱིས་གནང་བའི་ཚུལ་གྱིས་ལོངས་སྤྱད་དུ་རུང་སྟེ། དེ་ལྟར་སྟོན་པས་གནང་བའི་ཕྱིར། ཚུལ་ཁྲིམས་རྣམ་པར་དག་ཀྱང་ཐོས་བསམ་མི་བྱེད་པའི་ལེ་ལོ་ཅན་ལ་ནི་བླང་བ་བུ་ལོན་ཅན་དུ་འགྱུར་ཏེ། སྐྱེ་བ་ཕྱི་མར་བརྒྱ་འགྱུར་དང་སྟོང་འགྱུར་ལ་སོགས་པ་འཇལ་དགོས་པར་སྐྱེ་བའི་ཕྱིར། ཚུལ་ཁྲིམས་འཆལ་བའི་གང་ཟག་གིས་གཞན་གྱི་དད་རྫས་ལོངས་སྤྱོད་པ་བཀག་པ་ཡིན་ཏེ། དེས་དགེ་འདུན་གྱི་དད་ཟས་ཁམ་གཅིག་ཙམ་དང་། བཏུང་བ་ཧུབ་གཅིག་ཙམ་དང་། དགེ་འདུན་གྱི་གཙུག་ལག་ཁང་དང་། (༡༡༢བ)
གནས་མལ་ལ་ལོངས་སྤྱོད་ན་ཕྱི་མ་ངན་སོང་དུ་སྐྱེས་ནས་ལྕགས་ཀྱི་ཐོ་ལུམ་མེ་འབར་བ་ཟ་བ་དང་། ཁྲོ་ཆུ་ཁོལ་མ་འཐུང་བ་དང་། ལྕགས་བསྲེགས་ཀྱིས་གཞི་ལ་གོམ་པ་འདོར་བ་ལ་སོགས་པའི་སྡུག་བསྔལ་མྱོང་བར་གསུངས་པའི་ཕྱིར། དེ་ལྟར་ཡང་མྱ་ངན་ལས་འདའ་བའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང་། ཟས་རོ་བརྒྱ་པ་དང་། ཁང་པ་བརྩེགས་པ་ལྔ་བརྒྱ་པ་ཡང་འོས་སོ། །དགེ་འདུན་གྱི་རྫས་ཀྱང་ངོ་། །མི་སློབ་པ་མན་ཆད་ཀྱིའོ། །སོ་སོའི་སྐྱེ་བོ་ལ་ཡང་ངོ་། །ཚུལ་ཁྲིམས་འཆལ་པ་ལ་ནི་མ་ཡིན་ནོ། །ལེ་ལོ་ཅན་ལ་ནི་བླངས་པ་དང་ཉེ་བར་སྤྱད་པ་བུ་ལོན་དུ་འགྱུར་རོ། །ཞེས་དང་། ས་ག་ལྷས། མི་སློབ་པ་ནི་བདག་པོར་སྤྱོད། །སློབ་པ་བྱིན་པ་སྤྱོད་པ་སྟེ། །བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། ལྷག་མ་ལེ་ལོས་བཅོམ་པ་ཡིས། བདག་ཉིད་རྣམས་ནི་བུ་ལོན་སྤྱོད། ཁྲིམས་འཆལ་རྣམས་ནི་ནམ་དུ་ཡང་། །གཙུག་ལག་ཁང་སོགས་ཉེར་སྤྱོད་བཀག །ཅེས་གསུངས་སོ། །གཉིས་པ་ནི། རང་གི་ལུས་ལ་རྨ་དང་ངོ་ཚ་བའི་འདུ་ཤེས། ཆོས་གོས་ལ་རྨ་དཀྲིས་དང་ངོ་ཚ་དགབ་བའི་འདུ་ཤེས། གང་དུ་གནང་བ་དེ་ཉིད་དུ་བྱིན་གྱིས་བརླབ་པ་དྲན་པ་དང་། དགེ་སྦྱོང་གི་ཆོས་བཞི་མཚོན་བྱེད་ཡིན་ནོ་སྙམ་དུ་བསམས་ནས་ལོངས་སྤྱོད་པའོ། །གཞན་ཡང་འཕྲལ་གྱི་བྱ་བ་བྱེད་པའི་གནས་སྐབས་སུ་འདུ་ཤེས་ལྔ་ལྡན་དུ་ལོངས་སྤྱོད་པ་ཡང་གསུངས་ཏེ། འདུལ་བ་བསྡུ་བ་ལས། དགེ་སློང་འདུལ་བའི་བསླབ་པ་ལ། །གནས་པ་རྣམ་པ་ལྔ་འདོད་དེ། །གྲོང་དུ་འཇུག་པར་བྱེད་པ་ན། །བཙོན་ར་ཡིན་ནི་འདུ་ཤེས་དང་། །གཙུག་ལག་ཁང་དུ་འཇུག་པ་ན། །རྟག་པར་དགེ་སྦྱོང་འདུ་ཤེས་དང་། །ཟས་ལ་རྟག་(༡༡༣ན)
པར་ནད་ཀྱི་ནི། །གཉེན་པོ་ཉིད་ཀྱི་འདུ་ཤེས་དང་། །ཉལ་ན་དགོན་པའི་རི་དྭགས་ལྟར། །ཐུག་ཕྲད་གཉིད་ཀྱི་འདུ་ཤེས་དང་། །འཇིག་རྟེན་མཐུན་འཇུག་བྱ་བ་ལ། །འོན་ལོང་ལྐུགས་པའི་འདུ་ཤེས་སོ། །དེ་ལྟར་གནས་པའི་དགེ་སློང་ནི། །བརྒྱ་ལ་འོས་པའི་ལོངས་སྤྱོད་ལ། །གནས་ཀྱང་འདོད་པ་བསོད་ཉམས་ཀྱི། །རྗེས་སུ་འཇུག་པར་མི་འགྱུར་རོ། །ཞེས་པ་ལྟར་རོ། །གསུམ་པ་ནི། ཁྱིམ་པ་དང་མུ་སྟེགས་ཅན་ལས་རྟགས་ཀྱི་སྒོ་ནས་ཁྱད་པར་འཕགས་ཏེ། རང་ཉིད་སངས་རྒྱས་ཀྱི་རྗེས་སུ་འཇུག་པ་དང་། དགེ་སྦྱོང་གི་དྲན་པ་གསོ་བའི་ཆེད་དུའོ། །ཞེས་གསུངས་པ་རྣམས་ཆད་ལྷག་མེད་པར་བཀོད་པ་ཡིན་ཅིང་། གཞན་ཡང་། མདོ་རྩ་ལས། སྣམ་ཕྲན་སྣེལ་ཞི་ཉིད་དང་ལྷག་མ་མཉམ་པ་ཉིད་དང་། དབུས་ནས་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་དང་མཐའ་བསྐོར་བ་ཉིད་དག་གིས་སོ། །ཞེས་པར་རང་འགྲེལ་ལས། གདིང་བ་དྲུབ་པར་བྱེད་པའི་དུམ་བུ་རྣམས་ལ་ཕྱེད་དང་གསུམ་གྱི་དཀྱིལ་འཁོར་ཉིད་ཅེས་བྱ་བ་ལ་སོགས་པའི་ཆོ་ག་གསུངས་སོ། །དེའི་ཕྱིར་དེ་སྲིད་དུ་དྲུབ་པར་བྱེད་པའི་དུམ་བུའི་དབང་དུ་བྱས་ནས་མདོ་འདི་བྱས་སོ། །གླེགས་བུ་འཕྲོ་བཟུང་བའི་དབུས་ནས་སྣམ་ཕྲན་རྣམས་ལ་ལྷག་མ་གང་ཡིན་པ་དེ་ནི་འདིར་ལྷག་མ་ཉིད་དུ་གསུངས་སོ། །ཕྱོགས་ཕྱོགས་སུ་ཟློས་བུར་བྱ་སྟེ་དབུས་ཀྱི་སྣམ་ཕྲན་གཞན་རྣམས་མངོན་པར་ཁྱབ་པར་བསྒྲུབ་པའི་དོན་དུ་སྣམ་ཕྲན་སྣྲེལ་ཞི་ཉིད་དོ། །ལྷག་མ་མཉམ་པ་ཉིད་དང་དབུས་ནས་གཞན་གླེགས་བུ་འཕྲོ་ཕྱོགས་སུ་ལྟ་བ་ཉིད་དོ། །གླེགས་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་ནི་རྒྱུད་གཞན་གྱི་ཁོངས་སུ་གཏོགས་པའི་གླེགས་བུའི་འཕྲོ་དེའི་དངོས་(༡༡༣བ)
པོ་དང་། མཐའ་སྐོར་ཉིད་དག་གིས་སྦྱིན་པ་རྗེས་སུ་སོང་བ་ཉིད་དེ། དེ་ལྟར་རྣམ་པ་བཞི་པོ་འདི་རྣམས་ཀྱི་ཞེས་བྱ་བ་ནི་འདིའི་དོན་ཏོ། །ཆོས་ཀྱི་བཤེས་གཉེན་གྱིས་མཛད་པའི་རྒྱ་ཆེར་འགྲེལ་ལས། དེ་ལ་སྣམ་ཕྲན་སྣྲེལ་ཞི་ཉིད་ཅེས་བྱ་བ་ལ་འདིར་སྣམ་ཕྲན་ཞེས་བྱ་བའི་སྒྲ་ནི་སྲིད་དུ་བཏང་བའི་ཚལ་བུ་ལ་བྱའོ། །སྣྲེལ་ཞི་ཞེས་བྱ་བ་ནི་སྲིད་དུ་བཏང་བའི་སྣམ་ཕྲན་དེ་དག་གི་ཚལ་བུ་རྣམས་ཀྱི་སྣ་དྲང་ཐད་དུ་མ་བབས་པར་མཐོ་དམན་མི་མཉམ་པ་ཉིད་ཀྱིས་འགྲུབ་ཐབས་སུ་ཉིད་དུ་འདུག་པའོ། །དེའི་དངོས་པོ་ནི་དེ་ཉིད་དོ། །ལྷག་མ་མཉམ་པ་ཉིད་ཅེས་བྱ་བ་ལ་ལྷག་མ་ཞེས་བྱ་བ་ནི་དབུས་ཀྱི་སྣམ་ཕྲན་ལ་མ་གཏོགས་པའི་སྣམ་ཕྲན་དག་ཚལ་བུས་ནོན་པ་གང་ཡིན་པ་དེའི་ལྷག་མའི་ཕྱོགས་ནི་འདིར་ལྷག་མ་ཉིད་དོ། །རྗོད་བྱེད་ལྷག་མ་དེ་དང་དབུས་ཀྱི་སྣམ་ཕྲན་དུ་མཉམ་པར་བྱའོ། །དེའི་དངོས་པོ་ནི་དེ་ཉིད་དོ། །དབུས་ནས་གཞན་དུ་ཚལ་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་ལ། དབུས་ཞེས་བྱ་བ་ནི་ཞེང་དུ་ཐལ་རང་དུ་བཏང་བའི་སྣམ་ཕྲན་དབུས་མ་གཉིས་ཀྱི་བར་གྱི་གླེགས་བུའོ། །དེ་ནས་གཞན་དུ་གླེགས་བུའི་འཕྲོ་ཞེས་བྱ་བ་ནི། དུས་དེ་ནས་གཡས་གཡོན་གཞན་དུ་སྣམ་ཕྲན་ཞེང་དུ་ཐལ་དྲང་དུ་བཏང་བ་དག་གི་གླེགས་བུའི་འཕྲོའོ། །ཕྱོགས་ཕྱོགས་སུ་ལྟ་བ་ཞེས་བྱ་བ་ནི། གཡས་གཡོན་གྱི་གླེགས་བུའི་ཐམས་ཅད་ལ་ཁྱབ་པར་བྱ་བའི་ཕྱིར་ཕྱོགས་ཕྱོགས་སུ་ཞེས་ཟློས་བུར་བྱ་སྟེ། གཡས་ཕྱོགས་ཀྱི་ཚལ་བུ་རྣམས་ཀྱི་འཕྲོ་ཡང་གཡས་ཕྱོགས་སུ་ཕྱི་བརྒྱུད་དུ་བལྟ་ལ། གཡོན་ཕྱོགས་ཀྱི་ཚལ་བུ་རྣམས་ཀྱི་འཕྲོ་ཡང་གཡོན་ཕྱོགས་སུ་ཕྱི་བརྒྱུད་དུ་བལྟ་བའོ། །དེའི་དངོས་པོ་ནི་དེ་ཉིད་དོ། །དེ་ལྟར་སྣམ་ཕྲན་སྣྲེལ་ཞི་ཉིད་དང་ལྷག་མ་མཉམ་པ་ཉིད་དང་། དབུས་ནས་གཞན་དུ་ཚལ་བུའི་འཕྲོ་(༡༡༤ན)
ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་དེ་གསུམ་གྱིས་ནི་སྲིད་དུ་བཏང་བའི་གླེགས་བུ་དག་དྲུབས་པ་བསྟན་ཏོ། །མཐའ་སྐོར་བ་ཉིད་ཅེས་བྱ་བ་ནི་ཆུ་ཞེང་གི་མཐའ་འཁོར་བར་ཀུན་དགའ་བོའི་མཐའ་སྐོར་གྱིས་བསྐོར་བའོ། །དེའི་དངོས་པོ་ནི་དེ་ཉིད་དོ། །དེ་ལྟར་རྣམ་པ་བཞི་པོ་དེ་དག་བསྡུས་པ་དྲུབས་པའི་ཆོས་གོས་གང་ཡིན་པ་དེ་བྱིན་གྱིས་བརླབ་པར་བྱའོ། །འདི་སྐད་བསྟན་ཏེ། ཇི་ལྟར་སྲིད་དུ་བཏང་བའི་ཚལ་བུ་རྣམས་ཀྱི་སྣ་མཐོ་དམན་དུ་འདུག་པས་སྣམ་ཕྲན་སྣྲེལ་ཞི་ཉིད་དུ་འགྱུར་བ་དེ་ལྟར་ཆོས་གོས་དེ་དྲུབས་པར་བྱའོ། །སྣམ་བུ་གཅིག་ལ་ཚལ་བུས་ནོན་པའི་ལྷག་མ་མནོན་པ་ཇི་ཙམ་དུ་ཡོད་པ་དེ་ཙམ་དུ་དེ་ལས་གཞན་པའི་གླེགས་བུ་ལྷག་མ་དག་ཀྱང་དེ་དང་མཉམ་པར་བྱའོ། །དབུས་ཀྱི་སྣམ་བུ་ལས་བལྟོས་ནས་གཡས་གཡོན་གྱི་ཕྱོགས་གཉིས་སུ་གླེགས་བུའི་འཕྲོ་ཕྱོགས་ཕྱོགས་སུ་བལྟ་བར་བྱའོ། །ངོས་བཞི་ཀུན་ནས་ཁོར་བར་ཀུན་དགའ་བོའི་མཐའ་སྐོར་གྱིས་འཕྲོ་ཐམས་ཅད་བསྐོར་བར་བྱའོ། །ཞེས་དང་། འགྲེལ་ཆུང་ཡོན་ཏན་འོད་མ་ལས། དུམ་བུར་བྲེས་པ་ལྷག་མ་དང་མཉམ་པ་སྟེ། དབུས་མ་ལས། གཞན་པ་དེ་དང་དེར་གཏོགས་པའི་འདབ་མའི་ངོས་མཐའ་སྐོར་ཡང་ངོ་། །ཆོས་གོས་དྲས་ཤིང་བཙེམ་པའི་ཐབས་ནི་འདི་ལྟར་བྱ་སྟེ། མདོར་ན་ཆོས་གོས་ཉིད་ལ་ལྟོས་ན་བརྡ་ཕྲད་པར་འགྱུར་རོ། །ནང་དུ་གནས་པ་དང་བླ་གབ་དང་སྦྱར་ལ་ཡང་ངོ་། །ཆོས་གོས་སྣམ་བུ་ལྔ་པ་དང་བདུན་པ་གཉིས་ནི་མཚོན་གྱིས་མ་བཅད་ན་ཡང་རུང་། ཆོས་གོས་ཆེན་པོ་ནི་མ་བཅད་ན་མི་རུང་སྟེ་སྔགས་མི་ཆགས་སོ། །གཉིས་ནི་སྔགས་ནི་ཆགས་ཏེ་ཉེས་བྱས་སོ། །ཞེས་དང་། ལེབ་ལེབ་པོའི་ཆེད་དུ་མཉམ་པར་བྱ། ཆོས་(༡༡༤ན)
གོས་ཀྱི་ཚལ་བུ་རིང་ཐུང་དུ་འདུག་པ་རིང་པོ་དེའི་ཚད་དུ་ཐུང་ངུ་བྱའོ། །བཅལ་བའི་ཕྱིར་ཆག་ཤིང་བཅང་། ཀ་ཤ་དྲུབ་པའི་ཚུལ་དུ་བཅལ་བའི་ཕྱིར་ཆག་ཤིང་བཅངས་ཀྱང་ཉེས་མེད་འདབ་མའི་ངོས་ཀྱང་ངོ་། །ཚལ་བུ་བསྣོལ་མ་ཚུར་འགྲོ་བ་དང་ཞེང་དུ་འགྲོ་བ་དང་ཐ་མ་སྐོར་བ་ཞེང་ཚད་ཆེ་ཆུང་མ་ཁྱེར་བར་མཉམ་པར་བྱ། དེ་ཙམ་དུ་ཆག་ཤིང་བཅང་ཚལ་བུའི་ཞེང་ཚད་ཀྱི་ཆག་ཤིང་ཡང་བཅང་། འདིའི་མཐའ་ནི་རབ་ཏུ་ཆེན་པོར་བཞིའོ། །ཚལ་བུའི་སྣ་སྣོལ་དུ་འགྲོ་བ་དང་། མཐའ་སྐོར་བའི་ཞེང་ཚད་ནི་སོར་བཞིར་བྱའོ། །ཚལ་བུའི་ཞེང་ཚད་བྱ་རོག་གི་རྐང་པའི་ཚད་དུ་བྱས་ཀྱང་རུང་། ཆུང་ངུ་ཕྱེད་དང་གསུམ་པའམ་མཐེ་བོང་ངོས་སོ། །ཚལ་བུ་ཆུང་ངུ་ཕྱེད་དང་གསུམ་དང་མཚོན་གང་དུ་བྱས་ཀྱང་ཉེས་མེད་དེ་ཞེང་ཚད་ཕྲན་ཚེགས་ཀྱི་འགྲེལ་པ་ཚུལ་ཁྲིམས་སྐྱང་གིས་མཛད་པར་ཚལ་བུའི་སྣས་ནོན་པར་མ་གྱུར་པའི་ཕྱོགས་ནི་གླེགས་བུ་ཡིན་ཏེ་གླེགས་བུ་གླེགས་བུ་དང་། གླེགས་བུ་ཕྱེད་པ་གླེགས་བུ་ཕྱེད་པ་དང་མཉམ་པོར་བྱའོ། །མཐེ་བོང་དང་ཉེ་བར་གྱུར་པ་མཛུབ་མོ་གང་ཡིན་པ་དེའི་དབུས་མའི་ཚིགས་གང་ཡིན་པ་དེའི་ཚིགས་ཀྱང་ལོགས་གང་ཡིན་པ་དེའི་སྟེང་དུ་མཐེ་བོའི་ཚིགས་བཞག་པར་གྱུར་པ་ལ་མཐོར་གྲུབ་པ་གང་ཡིན་པ་དེ་ལ་འདིར་བྱ་རོག་གི་མཐོ་ཉིད་དུ་བརྗོད་པ་ཡིན་ལ། བྱ་རོག་གི་རྐང་པ་དང་འདྲ་བའི་སྒོ་ནས་འདི་ལ་ཡང་སོར་བཞི་ཁོ་ནའི་ཚད་དུ་རྣམ་པ་གཞན་གྱི་སྒོ་ནས་བསྒྲུབས་པ་ཡིན་ནོ། །སློབ་དཔོན་ཤེས་རབ་བྱེད་པས་མཛད་པའི་མདོ་རྩའི་འགྲེལ་པར། མཚོན་གྱིས་མ་དྲས་པའི་གོས་མི་བགོ །ཞེས་པ་ལ་སོགས་པ་ཡིན་ཏེ། ཁ་ཚར་མ་བཅང་མཚོན་གྱིས་མ་དྲས་ན། ཁྱིམ་པའི་གོས་སུ་འགྱུར་བས་ན་དགག་པའི་ཕྱིར་རོ། །དྲས་ཤིང་དྲུབས་པའི་གོས་ལ་(༡༡༥ན)
བྱིན་གྱིས་བརླབ། ཅེས་པ་འདི་ལྟ་བུའི་ཆོས་གོས་གསུམ་ལ་བྱིན་གྱིས་རློབས་ཤིག་པའོ། །ཇི་ལྟ་བུ་དྲུབས་ཤེ་ན། ཚལ་བུ་དབུས་ནས་ལྷག་མ་དང་མཉམ་པ་འདབ་ངོས་སྤེལ་ཏེ་གཞན་གྱི་འོག་ཏུ་བསྲུལ་ཅིང་མཐའ་སྐོར་བའོ། །ཞེས་པ་ཡིན་ཏེ། ཚལ་བུ་དབུས་ནས་ཁ་སོ་སོར་གྱེས་ལ་ཚལ་བུ་ལྷག་མ་རྣམས་དང་ཞེང་ཚད་མཉམ་ཞིང་ཚལ་བུ་ཕྱེད་དུ་བགོ་བའི་ཐོག་མ་རྩེ་སྤྲོད་དུ་མི་བྱ་བར་སྤེལ་ཏེ། ཚལ་བུ་གཞན་གྱི་འོག་ཏུ་བསྲུལ་བ་དང་། ཐ་མ་ཡང་ཁོར་ཡུག་ཏུ་ཚལ་བུའི་ཚད་ཀྱིས་བསྐོར་བའོ། །འདུལ་བ་གཞི་བམ་པོ་རེ་གཉིས་པར། གོས་ཀྱི་གཞིའི་སྐབས་སུ་འཚོ་བྱེད་གཞོན་ནུས་གསོས་ཀྱི་རས་ཡུག་པོ་ཆེ་ཕུལ་བ་ལ་སྟོན་པའི་ཆོས་གོས་གསུམ། ཀུན་དགའ་བོའི་བླ་གོས་དང་མཐང་གོས། སྒྲ་གཅན་འཛིན་གྱི་རལ་ཆུང་དཔུང་གཅད་རྣམས་དྲས་ཤིང་དྲུབས། དེའི་ཚེ་གཟུགས་ཅན་སྙིང་པོས་སྟོན་པའི་ཉན་ཐོས་སུ་འཁྲུལ་ནས་འཚོ་བ་པར་ཕྱག་བཙལ་བར་གཞན་རྣམས་ཀྱིས་འཕྱས་པར་བརྟེན་སྟོན་པ་ལ་ཆོས་གོས་རྣམས་མཚན་མ་གདབ་དགོས་པར་གསོལ་བ་ལ་འཕྲོས་ནས། ཇི་སྐད་དུ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱི་ལུས་འཕགས་ཀྱི་རི་མཐོང་ངམ། བཙུན་པ་མ་མཐོང་ལགས་སོ། །དེ་བཞིན་གཤེགས་པའི་ན་བཟའ་ཆོས་གོས་ཀྱི་མཐའ་ནས་ཟུངས་ཤིག །དེས་བཟུང་བ་དང་བཅོམ་ལྡན་འདས་ཀྱིས་རྒྱལ་པོའི་ཁབ་ན་མི་སྣང་བར་མཛད་པས་དེ་ཉིད་ནས་རྫུ་འཕྲུལ་གྱིས་སྟེང་གི་ནམ་མཁའ་ལ་གཤེགས་ནས་ལུས་འཕགས་ཀྱི་རི་བོ་ལ་བཞུགས་སོ། །དེའི་ཚེ་མ་ག་དྷའི་མི་རྣམས་ཀྱི་ཞིང་མཉམ་ཞིང་ཉེ་འཁོར་མཉམ་པ་རྣང་གི་ཁྱད་པར་སྣ་ཚོགས་དག་རྣང་རྒལ་གྱི་འབྲེལ་(༡༡༥བ)
ཞིང་མཛེས་པ་དག་གཟིགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཞིང་མཉམ་ཞིང་ཉེ་འཁོར་མཉམ་ལ་རྣང་གི་ཁྱད་པར་སྣ་ཚོགས་པ་དག་རྣང་རྒལ་གྱིས་འབྲེལ་པར་མཛེས་པ་དེ་དག་མཐོང་ངམ། བཙུན་པ་མཐོང་ལགས་སོ། །ཀུན་དགའ་བོ་དེ་ལྟ་བས་ན་དགེ་སློང་རྣམས་ཀྱིས་འདི་ལྟ་བུར་ཆོས་གོས་དག་དྲས་ཏེ་དྲུབ་པར་བྱའོ། །གནས་བརྟན་ཀུན་དགའ་བོས་དགེ་སློང་རྣམས་ལ་སྨྲས་པ། ཁྱེད་ཀྱི་འདི་ལྟ་བུར་ཆོས་གོས་རྣམས་དྲོས་ལ་དྲུབས་ཤིག །དགེ་སློང་རྣམས་ཀྱིས་ཆོས་གོས་དག་དྲས་ཏེ་དྲུབ་པར་བརྩམས་པ་ན། སྣམ་བུ་རྣམས་ཁ་ཕྱོགས་གཅིག་ཏུ་བསྟན་པ། མི་མཛེས་ནས་ཚེ་དང་ལྡན་པ་ཀུན་དགའ་བོས་བསམས་པ། བཅོམ་ལྡན་འདས་ཀྱིས་བཀའ་སྩལ་མོད་ཀྱི། འདི་ཁོ་ནས་རྐྱེན་བྱས་ནས་གནང་བར་འགྱུར་བའི་གནས་དེ་ཡོད་དོ་སྙམ་ནས་དེས་སྣམ་བུ་རྣམས་ཁ་ཕྱོགས་གཉིས་ཀར་བསྟན་ན་འོན་ཀྱང་མཐའ་སྐོར་མེད་པས་མཛེས་པར་མ་གྱུར་ནས་མཐའ་སྐོར་བྱས་སོ། །དེ་ནས་བྱས་ཤིང་ཟིན་པ་དང་། བཅོམ་ལྡན་འདས་ལ་ཕུལ་ལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ལེགས་སོ་ལེགས་སོ། །ངས་གང་གི་ཕྱིར་བཀའ་སྩལ་པ་དེ་ཁྱེད་ཀྱིས་ཤེས་ཏེ། དེ་ལྟ་བས་ན་དགེ་སློང་རྣམས་ཀྱིས་འདི་ལྟ་བུར་ཆོས་གོས་རྣམས་དྲས་ལ་དྲུབ་བར་བྱའོ། །ཞེས་སོགས་གསུངས་ཤིང་སྣམ་སྦྱར་གྱི་ཚལ་བུའི་དོགས་གནས་ཞིག་ལ། ལུང་རིགས་གཏེར་མཛོད་དུ། གླེགས་བུ་ཕྱེད་པ་བྱ་སྤུ་ནོན་གྱི་ཚུལ་དུ་མནན་པའི་འཕྲོ་དང་། སྣམ་ཕྲན་གྱིས་སྣམ་ཕྲན་གཡས་གཡོན་དུ་བྱ་སྤུ་ནོན་གྱི་ཚུལ་གྱིས་མནན་པའི་འཕྲོ་ནི་ཚལ་བུ་ཡིན་ལ། ཞེས་གསུངས། འདི་ལས་གསལ་བ་ལུང་སྡེ་བཞི་དང་འདུལ་བའི་དགོངས་འགྲེལ་བསྟན་འགྱུར་དུ་བཞུགས་པ་རྣམས་(༡༡༦ན)
ལ་མ་མཐོང་ལ། དེ་དང་ཕྱོགས་འདྲ་ཙམ་མཐའ་གཅོད་གསལ་བྱེད་སྒྲོན་མེ་ལས། དེས་ན་ཕྱེད་དང་ལྔ་པ་ཞིག་དབུས་སུ་བྱས་ནས་དེའི་གཡས་གཡོན་དུ་སྣམ་ཕྲན་བཅུ་གཉིས་བཅུ་གཉིས་བྱ་སྤུ་གཞོལ་དུ་སྦྱར་བས་སྣམ་ཕྲན་ཁ་ཕྱོགས་ཕྱོགས་སུ་བལྟ་བ་ཞིག་འབྱུང་ངོ་། །གང་མའི་ཚལ་བུ་འཕྲོ་ལྷག་པ་ཙམ་ཕྱི་མའི་སྣེ་མོར་སླེབ་པར་སྦྱར་བས། ཚལ་བུའི་ཁ་ཕྱོགས་ཕྱོགས་སུ་བལྟ་བ་འབྱུང་སྟེ། མདོ་རྩ་བ་ལས། དབུས་ན་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་བལྟ་བ་ཉིད་དང་། ཞེས་པ་དང་། དེའི་རྒྱ་ཆེར་འགྲེལ་བ། ཕྱོགས་ཕྱོགས་སུ་ཞེས་གློ་འབུར་བྱས་ཏེ། གཡས་ཕྱོགས་ཀྱི་གླེགས་བུ་རྣམས་ཀྱི་འཕྲོ་ཡང་གཡས་ཕྱོགས་སུ་ཕྱི་བརྒྱུད་དུ་བལྟ་ལ། གཡོན་ཕྱོགས་ཀྱི་གླེགས་བུ་རྣམས་ཀྱི་འཕྲོ་ཡང་གཡོན་ཕྱོགས་སུ་ཕྱི་བརྒྱུད་དུ་བལྟའོ། །ཞེས་གསུངས་པའི་ཕྱིར། ཞེས་བཤད་པས། སྤྱིར་ལུང་དང་རྒྱ་གཞུང་འགྲེལ་བཅས། བོད་ཊཱིཀ་སྔ་མ་རྣམས་སུ་འདི་ལས་གསལ་བ་མི་འབྱུང་བ་ལུགས་གཉིས་སུ་མ་སོང་བས་དགོས་པ་མེད་པའི་སྟབས་ཀྱིས་རྟོགས་སླར་མཛད་པ་འདྲ། མཁན་ཆེན་ངག་དབང་ཆོས་གྲགས་ཀྱི་འདུལ་ཊཱིཀ་ལས། གོས་ཀྱི་གཞིའི་སྐབས་སུ་དྲས་ཤིང་དྲུབས་པ་ནི་གླེགས་བུ་དྲས་ཤིང་དྲུབས་པ་ཡིན་ནོ། །ཚུལ་ཇི་ལྟར་དུ་དྲུབས་པ་ཡིན་ཞེ་ན། ཇི་སྐད་དུ། སྣམ་ཕྲན་སྣྲེལ་ཞི་ཉིད་དང་། ལྷག་མ་མཉམ་པ་ཉིད་དང་། དབུས་ནས་གཞན་དུ་གླེགས་བུའི་འཕྲོ་ཕྱོགས་ཕྱོགས་སུ་བལྟ་བ་ཉིད་དང་། མཐའ་སྐར་བ་དག་གིས་སོ། །མཐང་གོས་དང་། བླ་གོས་དང་། སྣམ་སྦྱར་ལའོ་ཞེས་གསུངས་པས་དྲུབ་པ་བསྟན་ནོ། །དེའི་དོན་ཡང་སྣམ་སྦྱར་ལ་སྣམ་ཕྲན་དང་གླེགས་བུའི་གྲངས་ཀྱི་སྒོ་ནས་ཕྱེ་ན་ཆུང་ངུ་སྐོར་གསུམ། འབྲིང་སྐོར་གསུམ། ཆེན་པོ་(༡༡༦བ)
སྐོར་གསུམ་སྟེ་དགུ་ཡོད་པ་ལས། དང་པོ་གསུམ་ནི། སྣམ་ཕྲན་དགུ་པ་དང་། བཅུ་གཅིག་པ་དང་། བཅུ་གསུམ་པ་རྣམས་ཡིན། འདི་གསུམ་ག་ལ་གླེགས་བུ་ཕྱེད་དང་གསུམ་པར་བྱེད་པ་ཡིན་ནོ། །འབྲིང་གསུམ་ནི། སྣམ་ཕྲན་བཅོ་ལྔ་པ། བཅུ་བདུན་པ། བཅུ་དགུ་པ་རྣམས་ཡིན་ཏེ། འདི་གསུམ་ག་ལ་གླེགས་བུ་ཕྱེད་དང་བཞི་པར་བྱེད་དོ། །ཆེན་པོ་གསུམ་ནི། སྣམ་ཕྲན་ཉེར་གཅིག་པ། ཉེར་གསུམ་པ། ཉེར་ལྔ་པ་རྣམས་ཡིན་ཏེ། འདི་གསུམ་ག་ལ་གླེགས་བུ་ཕྱེད་དང་ལྔ་བར་བྱེད་དོ། །བླ་གོས་ལ་མཐའ་གཅིག་ཏུ་སྣམ་ཕྲན་བདུན་མ། གླེགས་བུ་ཕྱེད་དང་གསུམ་པ། མཐང་གོས་ལ་སྣམ་ཕྲན་ལྔ་པ། གླེགས་བུ་ཕྱེད་དང་གཉིས་པར་བྱེད་དོ། །འདུལ་འཛིན་གྲགས་རྒྱལ་གྱི་བསླབ་བྱ་ཆེན་མོར། སྣམ་ཕྲན་དང་གླེགས་བུ་མེད་པའི་བླ་གོས་མེ་ལོང་མ་ལྟ་བུ་བཞེད་ཀྱང་། དེ་ནི་རབ་བྱུང་མ་ཡིན་པའི་སྔགས་པར་ཁས་འཆེ་བ་འགའ་ཞིག་གིས་ཆོས་གོས་སུ་མིང་འདོགས་པ་ཡིན་པས་ལུགས་འདི་ཇི་ལྟར་འཐད་བརྟག་པར་བྱའོ་ཞེས་གསུངས། ལྷུང་བཟེད་ཀྱི་དོགས་གཅོད་ལ། དགེ་ལེགས་བཤེས་གཉེན་གྱི་གཞི་འགྲེལ་ལས། ལྷུང་བཟེད་ཀྱི་ཚད་ཀྱི་སྐབས་མཐེ་བོའི་ལྟོ་གང་ཞེས་བྱ་བ་ནི་མཐེ་བོའི་སོར་གཅིག་སྟེ། མཐེ་བོའི་ཚིགས་དང་པོའི་ཕྱོགས་གཅིག་ནས་བརྩམས་ཏེ། ཚིགས་དེ་ཉིད་ཀྱི་ཕྱོགས་གཅིག་གི་བར་དུ་ལྟོ་རལ་ནས་གཞལ་བ་ནི་མཐེ་བོའི་ལྟོ་གང་ཞེས་བྱ་སྟེ། དེ་ནི་མཐེ་བོའི་སོར་གཅིག་ཡིན་ནོ། །ཞེས་དང་། རྣམ་འབྱེད་ཀྱི་འགྲེལ་པ་དུལ་བའི་ལྷས་མཛད་པར། ཁའི་ཆའི་མཐའ་ཁོ་ན་ནས་ཞེས་བྱ་བ་ནི་ལྷུང་བཟེད་ཀྱི་ཁའི་ཆའི་མཐའ་ཁོ་ན་ནས་ནང་རོལ་གྱི་ཞབས་ལོགས་སུའོ། །མཐེ་བོའི་ལྟོ་གང་གིས་མི་རེག་པ་ཞེས་བྱ་བ་ལ་མཐེ་བོའི་ལྟོ་གང་ཞེས་བྱ་བ་ལ་མཐེ་བོའི་ལྟོ་གང་ཞེས་བྱ་(༡༡༧ན)
བ་ནི་མཐེ་བོའི་ཚིགས་དང་པོའི་ཕྱོགས་གཅིག་ནས་བརྩམས་ཏེ་ཚིགས་དེ་ཉིད་ཀྱི་ཕྱོགས་གཅིག་གི་བར་ནི་མཐེ་བོའི་ལྟོ་སྟེ། མཐེ་བོའི་ཞེང་ཚད་ཀྱི་སོར་གཅིག་གི་ཚད་ཀྱིས་ཁའི་ཆའི་མཐའ་ཁོ་ན་ནས་ཟས་ལ་མི་རེག་མི་ཐུག་ཅེས་བྱ་བའི་ཐ་ཚིག་གོ །འདུལ་ཊཱིཀ་རིན་ཅེན་འཕྲེང་བར་ཡང་འདི་དང་མཐུན་ཀྱང་འགའ་ཞིག་སོར་དོ་དང་མཐུན་ཆེད་དུ་མཐེ་བོའི་རྩེ་ནས་ཚིགས་དང་པོ་ཡན་ལ་ངོས་འཛིན་པ་འཁྲུལ། འཚོ་བའི་ཡོ་བྱད་བཅུ་གསུམ་ཞིབ་ཏུ་ཕྱེ་ན། འཚོ་བའི་ཡོ་བྱད་བཅུ་གསུམ་གྱི་ཚད། འཚོ་བའི་ཡོ་བྱད་གོས་བཅུ་གསུམ་ལ། སྣམ་སྦྱར། བླ་གོས། རྔུལ་གཟན། རྔུལ་གཟན་གྱི་གཟན་རྣམས་ཚད་མཚུངས་ཤིང་། ཆེ་ཚད་སྲིད་དུ་ཁྲུ་གསུམ་དང་། ཞེང་དུ་ཁྲུ་ལྔ། ཆུང་ཚད་སྲིད་དུ་ཁྲུ་ཕྱེད་གསུམ་དང་། ཞེང་དུ་ཁྲུ་ཕྱེད་ལྔ། བར་དེ་དག་གང་རུང་འབྲིང་ཚད། མཐང་གོས། ཤམ་ཐབས། ཤམ་ཐབས་ཀྱི་གཟན་རྣམས་ཚད་འདྲ་བར་ཆེ་ཚད་སྲིད་དུ་དོ་དང་ཞེང་ལྔ། ཆུང་བ་ཞེང་དུ་བཞི། བར་དེ་དག་འབྲིང་། གདོང་ཕྱིས་ཁྲུ་གང་གྲུ་བཞི་། རྣག་གཟན་ཇི་ཙམ་འོས་པ། གཡན་པ་དགབ་པ་སྲིད་དུ་ཁྲུ་དྲུག་དང་དཔངས་སུ་ཁྲུ་གསུམ། སྐྲ་བཟེད་སྲིད་དུ་ཁྲུ་གསུམ། ཞེང་དུ་ཁྲུ་ཕྱེད་དོ། གདིང་བ་སྲིད་དུ་ཁྲུ་གསུམ། ཞེང་དུ་ཁྲུ་དོ་སོར་དྲུག །འཆར་ཀ་ལྟ་བུ་ལུས་ཤིན་ཏུ་རིང་བར་དེས་མ་ཆོག་ན་སྲིད་དུ་ཁྲུ་ཕྱེད་དོ་བསྐྱེད་པ། དབྱར་གྱི་གོས་རས་ཆེན་སྲིད་དུ་ཁྲུ་དགུ །ཞེང་དུ་ཁྲུ་གསུམ་སོར་བཅོ་བརྒྱད་དུ་བཤད་ལ། གདིང་བའི་ཚད་སོ་ཐར། རྣམ་འབྱེད། སོ་ཐར་རྒྱ་འགྲེལ་རྣམས་དང་། མདོ་རྩ་རྒྱ་འགྲེལ་བཞི། ཚིག་ལེ་ས་ག་ལྷས་མཛད་པ་རྣམས་ཚང་འདི་ག་དང་མཐུན་ཀྱང་གྲུ་བཞིར་བྱེད་པའི་ཁུངས་མ་བརྙེད། གདིང་(༡༡༧བ)
བ་གཡན་དགབ་རས་ཆེན་མ་གཏོགས་གོས་གཞན་རྣམས་གཞལ་བའི་ཚད་རྡུལ་ཁྲུ་དང་ལག་ཁྲུས་གོ་མི་ཆོད་དེ། ལུས་ཁྲུས་གཞལ་དགོས་ལ། དེ་ཡང་ཇི་ལྟ་བུ་ཞེ་ན། ཁྲུའི་དོན་ནི་ལུས་ཀྱི་ཆ་བདུན་ལས་གཉིས་སོ་ཞེས་གསུངས་པས་སོ། །དེ་དག་གི་ཁ་དོག་འདུལ་བ་ལུང་། མདོ་རྩ་རྒྱ་འགྲེལ་བཞི། དགེ་ཚུལ་གྱི་སུམ་བརྒྱ་པ་རྩ་འགྲེལ་སོགས་མཐུན་པར། ས་ག་ལྷས། རྒྱ་སྐྱེགས་ལེ་བརྒན་རྩི་དང་བཙོད། །རྨ་ཤིང་རྩི་དང་མཐིང་ཤུན་མཚལ། །སིནྡྷུ་ར་དང་གུར་གུམ་སྟེ། །དེ་དག་ཚོན་ཆེན་བརྒྱད་དུ་བཤད། །ཚོན་ཆེན་བརྒྱད་ཀྱིས་ཆོས་གོས་ཀྱི། ཁ་བསྒྱུར་བྱེད་པ་བཀག་པ་ཡིན། །སྔོན་པོ་བཙག་དང་ངུར་སྨྲིག་སྟེ། །དེ་དག་རུང་བའི་ཚོན་གསུམ་མོ། །ཞེས་སྔོན་པོ་དེ་རམས་དང་བཙག །ངུར་སྨྲིག་སྟེ་ཚོས་སྙིགས་མ། གསུམགྱི་གོས་རྣམས་ཀྱིས་གོས་ཀྱི་ཁ་བསྒྱུར་བྱེད་པར་གསུངས་ལ། །ཚོན་ཆེན་བརྒྱད་ཀྱི་ཁ་བསྒྱུར་བྱེད་པ་བཀག་འདུག་ཀྱང་། དེང་སང་བཙོད་ཀྱིས་ཁ་བསྒྱུར་བ་ནི། དཔེར་ན། བལ་ནག་གི་སྤང་བའི་སྐབས་ཡུལ་འགའ་ཞིག་ཏུ་བལ་ནག་པོ་ལས་དཀར་པོ་གོང་ཆེ་ན་དེ་གཉིས་གོས་བསྒྱུར་བར་གསུངས་པ་ལྟར། བོད་དུ་སྔོན་གྱི་འདུལ་བ་འཛིན་པ་རྣམས་ཀྱིས། རྒྱ་གར་དུ་རམས་རྙེད་པར་བླ་ཡང་། བོད་དུ་རྙེད་དཀའ་བ་དང་། བཙོད་འདི་བོད་དུ་བསྒྲུབ་སླ་བའི་དབང་དུ་མཛད་དེ་སྔོན་པོ་དང་བཙོད་གཉིས་གོ་བརྗེ་བར་མཛད་པ་ཡིན་ནམ་སྙམ། འཇལ་བྱེད་ཀྱི་ཁྲུ་ཡང་འདུལ་བ་ལས། རྡུལ་ཁྲུ་དང་། ལུས་ཁྲུ་དང་། ལག་ཁྲུ་གསུམ་བཤད་པའི་དང་པོ་ནི། མདོ་རྩ་ལས། རྡུལ་ཕྲ་རབ་དང་རྡུལ་ཕྲ་མོ་དང་། ཆུ་དང་། ལྕགས་དང་། རི་བོང་དང་། ལུག་དང་། གླང་དང་། ཉི་ཟེར་གྱི་རྡུལ་དང་། སྲོ་མ་དང་། ཤིག་དང་། ནས་དང་། སོར་རྣམས་ནི་སྔ་མ་དྲུག་ལས་ཕྱི་མའོ། སོར་བཞི་དྲུག་ལ་ཁྲུ་གང་ངོ་། །ཁྲུ་(༡༡༨ན)
ཕྱེད་དང་བཞི་ལ་ནི་མིའི་སྲིད་དོ། ཁྲུ་བཞི་ལ་གཞུའོ། །དེ་ལྔ་བརྒྱ་ལ་རྒྱང་གྲགས་སོ། དགོན་པའི་དང་པོ་ནི་དེའི་མཐའ་འོ། །ཞེས་གསུངས། གཉིས་པ་ནི། མདོ་རྩ་ལས། ཁྲུའི་དོན་ནི་ལུས་ཀྱི་ཆ་བདུན་ལ་གཉིས་སོ། །ཞེས་དང་། གསུམ་པ་ནི། ཊཱིཀྐ་ལས། ཁྲུ་ནི་གྲུ་མོ་ནས་གུང་མོའི་རྩེའི་བར་རོ། །ཞེས་གསུངས་ལ། དེ་རྣམས་ཀྱིས་ཇི་ལྟར་གཞལ་ཚུལ་སོགས་ནི། མཚོ་སྣ་པས། རྡུལ་ཁྲུ་ལུས་ཁྲུ་ལག་ཁྲུ་སྟེ། ཁྲུ་གསུམ་རྣམ་དབྱེ་ཤེས་པར་བྱ། །རྡུལ་ཁྲུས་གཞལ་བར་བྱ་བ་ནི། ཁང་པའི་ཚད་དང་ཁྲི་རྐང་ཚད། །གདིང་བ་གཡན་དགབ་རས་ཆེན་ནོ། །དེ་དག་ལས་གཞན་ཆོས་གོས་རྣམས། །ལུས་ཁྲུའམ་ལག་ཁྲུས་གཞལ་བ་སྟེ། །ལུས་རིང་ཧ་ཅང་ལག་ཐུང་དང་། །དེ་ལས་ལྡོག་པའི་ཆོས་གོས་རྣམས། །རང་གི་ལུས་ཁྲུ་ཁོ་ནས་གཞལ། །ལུས་ཚད་ལག་ཚད་འཚམ་པ་ཡིས། །ལག་ཁྲུས་ཀྱང་ནི་གཞལ་དུ་རུང་། །ཞེས་གཟུང་བར་གསུངས་སོ། །རལ་ཁ་དཔུང་ཆད་ནི་ཚད་ལ་ངེས་བཟུང་ཆེ་བ་མེད་ཀྱང་ཐང་ཤམ་གྱི་ཕྱེད་ལས་ཆེ་བ་མི་རུང་བ་འདྲ་ཞིང་། དེ་ཡང་མཚོ་ཊཱིཀ་ལས། རལ་ཁ་དཔུང་ཆད་ནི་རྒྱ་ཁྱོན་ཇི་ཙམ་ཡོད་པ་ལོགས་སུ་བྱིན་གྱིས་བརླབས་ཏེ་སྒྲོ་གུའམ་ཟུངས་ཀྱིས་འཐུད་པའོ། །ཞེས་གསུངས་སོ། །ཀོ་ལྤགས་ནི་བཏང་སྙོམས་སུ་བཞལ་ཅིང་འདི་སྐོར་ལ་སྟག་ཚང་ལོ་ཙཱ་བའི་འདུལ་ཊཱིཀ་ཏུ་ངོ་མཚར་བའི་གཏམ་སྣང་བ་འདི་ལྟ་སྟེ། གཉིས་པ་གོས་གཞི་དངོས་ལ་ཡང་དགོས་བསྡུས་ཚིག་གསུམ་ལས། དགོས་པ་ནི། གོས་ཀྱི་རྒྱུའི་རྙེད་པ་ལ་མཁས་པས་ལོག་འཚོ་མི་འབྱུང་ཞིང་གོས་དྲ་བ་དང་། དྲུབ་པ་དང་། ཁ་བསྒྱུར་བ་དང་། བྱིན་གྱིས་རློབ་པ་སོགས་ལ་མཁས་པས། གོས་མཐའ་གཉིས་སུ་མ་ལྷུང་བར་འགྱུར་བས་སོ། །བསྡུས་(༡༡༨ན)
དོན་ལ། གླེང་གཞི་དང་། གོས་རྒྱུ་རྙེད་པའི་རྣམ་གཞག་དང་། དེ་ལས་བྱུང་བའི་གོས་ཀྱི་རང་བཞིན་དང་། གོས་དེ་གང་ཟག་གིས་ལོངས་སྤྱད་པའོ། །དང་པོ་ནི། རྒྱལ་པོ་གཟུགས་ཅན་སྙིང་པོས་དེད་དཔོན་ཞིག་གི་ཆུང་མ་ལ་ལོག་པར་ཞུགས་པ་བུ་གཅིག་བྱུང་པ་ལ་འཚོ་བྱེད་གཞོན་ནུ་གསོས་སུ་བཏགས་ཤིང་རྒྱུན་ཤེས་ལ་སྨན་མཁས་པར་བསླབས་ནས། ཕ་དང་། མ་ཡར་མོ་དང་། སྤུན་ཟླ་མ་སྐྱེས་དགྲ་རྣམས་ཀྱི་ཕོལ་མིག་བཅོས་པས། སྨན་པའི་རྒྱལ་པོར་ལན་གསུམ་དབང་བསྐུར་བས་ང་རྒྱལ་སྐྱེས་པ་རི་བོ་གངས་ཅན་དུ་བཅོམ་ལྡན་འདས་ཀྱིས་ཞི་བར་མཛད་པས་བདེན་པ་མཐོང་ཞིང་། ལུས་འཕགས་ཀྱི་རྒྱལ་པོའི་ལུས་གསོས་པས། པ་ཎ་བརྒྱ་སྟོང་རི་བའི་རས་ཡུག་ཡོན་དུ་ཐོབ་པ་སངས་རྒྱས་ལ་ཕུལ་བས། ཀུན་དགའ་བོས། སྟོན་པའི་ཆོས་གོས་གསུམ་དང་། རང་གི་མཐང་གོས་གཅིག །སྒྲ་གཅན་འཛིན་གྱི་རལ་ཁ་དཔུང་ཆད་རྣམས་བྱས་ཤིང་། གཞན་ཡང་དགེ་སློང་དུ་མས་དབྱར་གྱི་རྒྱུ་ལས་བྱུང་བའི་གོས་དུ་མ་ལ་ཇི་ལྟར་དྲུབ་པ་མ་ཤེས་པ་ན་གོས་ཀྱི་གཞི་གསུངས་སོ། །གཉིས་པ་ལ་རྙེད་པ་བགོ་བའི་ཆོ་ག་དང་། དེ་ལ་དབང་མི་དབང་གི་གང་ཟག་བཤད་པའོ། །དང་པོ་ལ་བདུན་ཏེ། དགེ་འདུན་ནི་དེར་གཏོགས་ཤིང་མི་མཐུན་པ་མེད་པའོ། །བྱེད་པ་པོ་ནི་བསྐོས་པའམ་མདུང་དོར་བའོ། །དངོས་པོ་ནི། དུས་གློ་བུར་གྱིའམ། གོས་ཀྱི་རྙེད་པར་འོས་པའི་ཤི་བའི་ཡོ་བྱད་དོ། །ཚད་ལ། ཟས་ནི་སུ་ལ་སའི་སོགས་དང་། གོས་ནི་མར་མེའི་སོགས་སོ། །ཆོ་ག་ལ་སྦྱོར་བ་ནི་བཤེག་ཏུ་མི་རུང་བ་རྣམས་བསྐྱེད་པའི་ཚུལ་གྱིས་བསྒྱུར་ཞིང་གཞན་དེ་ཉིད་དུ་སྟ་གོན་བྱའོ། །དངོས་གཞི་ནི་ཚོགས་པ་ལ་བརྗོད་པ་ལ་སོགས་པ་ལྔའོ། །དགོས་པ་(༡༡༩ན)
ནི་སྙོམས་ཤིང་སོ་སོར་ལོངས་སྤྱད་པའི་ཆེད་དོ། །བླང་བའི་བསླབ་བྱནི། འདུས་པས་རང་རང་གི་སྐལ་བ་དང་བསྐོས་པས་གཞན་དུ་སོང་བའི་ནོད་པའོ། །བློན་པོ་སོགས་ཀྱི་ཆེད་མ་གཏོགས་མ་བཅོལ་བར་མི་ནོད། ཁས་བླངས་ནས་མ་ནོས་ན་གསབ། གཞན་དོན་དུ་མ་ནོས་པ་དེ་འགོད་པ་པོ་ལ་བརྡ་སྤྲད་པའོ། །གཉིས་པ་ལ་དུས་དང་། གློ་བུར་བའི་དང་། ཤི་བའི་ཡོ་བྱད་ཀྱི་རྙེད་པ་གང་དབང་ངོ་། །དང་པོ་ལ་གཉིས་ལས། སེམས་ཅན་ལས་བྱུང་བ་ལ་ལྔ་སྟེ། གནས་ཀྱིས་དང་། དུས་ཀྱིས་དང་། ཁྲིམས་ཀྱིས་དང་། མཚམས་ཀྱིས་དང་། སྦྱིན་བདག་གིས་བསྒྲུབས་པའོ། །སེམས་ཅན་མ་ཡིན་པ་ལས་བྱུང་བ་ལ། མཆོད་རྟེན་དང་། དམ་ཆོས་དང་། གཞི་གཞན་ལས་བྱུང་བའོ། །དང་པོ་ལ། སངས་རྒྱས་དང་བསེ་རུའི་ལ་ཕུལ་ན་དེ་ཉིད་ཀྱི་ཆེད་དུ་བཞག་ཚོགས་སྤྱོད་དང་ཉན་ཐོས་ཀྱི་ལ་ཕུལ་བ་ཚངས་པར་སྤྱོད་པས་བགོ །དོན་དམ་པའི་ཆོས་ལ་ཕུལ་བ་མཆོད་རྟེན་དང་འདྲ། ལུང་གི་ཆོས་ལ་ཕུལ་བ་ཆོས་སྨྲ་བས་དཔྱད། གཞི་གཞན་གྱི་ལྗོན་ཤིང་ལ་ཕུལ་བའི་རྙེད་པ་ནི་དེ་ཉིད་བརྒྱན་པའི་ཕྱིར་དུ་བཞག་པ་སོགས་སོ། །གཉིས་པ་ལ། སྡོམ་ལྡན་གྱི་དང་། རྟགས་ཅན་གྱི་གཉིས་ལས། དང་པོ་ལ་དྲུག་ལས། གང་ཟག་ནི་རབ་བྱུང་གི་སྡོམ་པ་དང་ལྡན། མཚན་དང་ལྟ་བ་མཐུན། གནས་ནས་མ་ཕྱུང་། བྱེ་བ་ན་གཞན་ཕྱོགས་སུ་མ་སོང་བ་སྟེ། ཆོས་ལྔ་ལྡན་ནོ། །དང་པོ་དགེ་འདུན་དབང་བ་རྣམས་ལ་གཏོགས་པའོ། །མཚམས་ནི་ནོར་རམ། ནོར་འདྲ་བ་གང་ན་འདུག་པར་གཏོགས་པའོ། །དུས་ནི་གསོལ་བ་འམ་དང་པོ་ཐ་མས་བྱིན་གྱིས་བརླབས་པའོ། །ཆོ་ག་ནི་མཚམས་དེར་ཤི་ན་རོ་དབྱུང་བ་སོགས་བྱས་ཏེ་བྱིན་གྱིས་བརླབས་པ་(༡༡༩བ)
དང་། གཞན་དུ་ཤི་ན་བྱིན་གྱིས་བརླབས་པ་ཙམ་བྱ་བའོ། །ཚད་ནི་དགེ་ཚུལ་ཕ་མ་སུམ་གཉིས་དང་། བསྙེན་པར་རྫོགས་ཁ་མ་དང་། དགེ་སློབ་མ། དགེ་སློང་ཕ་མ་རྣམས་མཉམ་པའོ། །རྟགས་ཅན་གྱི་ལ་རྒྱལ་པོ་དང་དཀོན་ཅོག་ཏུ་བགོ་བ་དང་། དཀོན་ཅོག་གསུམ་ནང་ཇི་ལྟར་བགོ་བ་དང་། དགེ་འདུན་ཉིད་ཀྱི་སྐལ་བ་ཇི་ལྟར་སྤྱད་པ་རྣམས་སོ། །གསུམ་པ་ལ་གོས་ཇི་ལྟར་བསྒྲུབ་པ་དང་། བསྒྲུབས་པའི་གོས་ཀྱི་རྣམ་གཞག་གོ །དང་པོ་ལ་དྲ་བ་དང་། དྲུབ་པ་དང་། བཀྲུ་བ་དང་། ཁ་བསྒྱུར་བ་རྣམས་སོ། །གཉིས་པ་ལ་བདུན་ཏེ། དབྱེ་བ་དང་། མཚན་ཉིད་དང་། བྱིན་གྱིས་བརླབ་པའི་ཆོ་ག་དང་། དེའི་དགོས་པ་དང་། བཅང་བའི་ཐབས་དང་། ལོངས་སྤྱད་པའི་ཆོ་ག་དང་། ཞར་ལ་བྱིན་བརླབས་འཇིག་པའི་རྒྱུའོ། །དང་པོ་ལ་བཞི་སྟེ། འཚོ་བའི་དང་། མཁོ་བའི་དང་། ལྷག་པའི་ཡོ་བྱད་དང་། ཡོ་བྱད་ཕྲན་ཚེགས་རྣམས་སོ། །དེའི་དང་པོ་ལ་བཅུ་གསུམ་དུ་དབྱེ་ཞིང་། གཞན་རྣམས་ལ་དབྱེ་གྲངས་མེད་དོ། །མཚན་ཉིད་ལ་དང་པོའི་ནི་རུང་བ་དང་། ཚད་དང་ལྡན་པ་དང་། རེ་རེ་བར་ངེས་པ་དང་། རང་མིང་གིས་བྱིན་གྱིས་བརླབ་བྱ་ཡིན་པ་སྟེ་མཚན་ཉིད་བཞི་ལྡན་ནོ། ཁ་ཅིག །རང་དོན་དུ་འཆང་དུ་གནང་བ་བསྣན་ཞེས་ཟེར་མོད་ཀྱི། དེ་ནི་རུང་བ་དང་རང་མིང་ཉིད་ཀྱིས་ཞེས་པས་ཆོད་དོ། །གཉིས་པའི་མཚན་ཉིད་ནི། ཁྲུ་གང་ཡན་ཆད་དུ་ལོངས་ཤིང་ཟོང་གོས་སུ་ངེས་མ་ངེས་ཀྱི་བློ་འབྱུང་བ། ཁ་བསྒྱུར་མ་བསྒྱུར་གང་རུང་གཞན་གཉིས་ཀའི་མིང་གིས་བྱིན་གྱིས་བརླབ་བྱ་ཡིན་པའོ། །གསུམ་པའི་མཚན་ཉིད་ནི། ཕལ་ཆེར་རུང་བ་ཚད་ལྡན་གཞན་ཁོ་ནའི་མིང་གིས་བྱིན་གྱིས་བརླབས་པའམ། ཡིད་བརྟན་པ་གང་རུང་གིས་བཅང་བར་(༡༢༠ན)
བྱའོ། །ཡོ་བྱད་འདི་ཁྱད་པར་བཤེས་གཉེན་གྱིས། ཤིག་སྲོ་མང་བ་དང་། ཞལ་ཏ་པ་ལས་མང་བ་དང་། དྲི་མ་མང་བ་སོགས་བཅུ་ལ་གནང་བར་བཤད་དོ། །བཞི་པ་ནི་ཚད་དུ་མ་ཆོག་པའི་དང་། འཁོར་དུ་གཏོགས་པའི་ཕྲན་ཚེགས་གཉིས་ཏེ། དང་པོ་ནི། རུང་བ་ཁྲུ་གང་གི་ཚད་དུ་མ་ལོངས་པ་སྟེ་སོ་སོའི་བློ་བསྐྱེད་པ་ཙམ་ལས་གཞན་པའི་བྱིན་རླབས་མེད་པའོ། །གཉིས་པ་ནི། སྔས་དང་སྟན་དང་སྐ་རགས་ཞྭ། །སྦྲང་སྐྱབས་སོགས་དང་ཆུ་ཚགས་དང་། །གཏུར་བུ་རྐང་འབོབ་ལྷུང་བཟེད་སྣོད། །དེ་ཡི་ཁ་གཡོགས་ལ་སོགས་སོ། །དེ་དག་ནི་ཡོ་བྱད་ཀྱི་གོས་སམ་སྟན་དུ་བྱིན་གྱིས་བརླབ་བྱའོ། །གསུམ་པ་ལ། འཚོ་བའི་ཡོ་བྱད་ནི། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བས་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ལན་གསུམ་བརྗོད། ཐབས་ལེགས་བྱའོ། །དེ་བཞིན་དུ་མིང་བརྗེའོ། །གཉིས་པའི་ནི། གོས་འདི་བདག་དང་ཚངས་པ་མཚུངས་པར་སྤྱོད་པ་རྣམས་ཀྱི་མཁོ་བའི་ཡོ་བྱད་དུ་བྱིན་གྱིས་བརླབ་བོ། །གསུམ་པ་ནི། རུང་བ་ཡིན་ན། བདག་མིང་འདི་ཞེས་བགྱིས་པའི་གོས་ལྷག་པ་རྣམ་པར་མ་བརྟགས་པ་བརྟག་པར་འོས་པ་འདི་མཁན་པོའི་ལེགས་པར་རྣམ་པར་བརྟག་པར་བགྱིའོ། །མཁན་པོ་ལ་ཡིད་བརྟན་ཏེ་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ། །མི་རུང་བ་ཡིན་ན། སྦྱིན་བདག་ལ་ཡིད་བརྟན་ཏེ་བཅང་བར་བྱའོ། །བཞི་པའི་ནི། གོས་འདི་ཡོ་བྱད་ཀྱི་གོས་སམ་སྟན་དུ་ཞེས་སོ། །བཞི་པ་ནི། ལྟུང་བ་མི་འབྱུང་བ་དང་། དགེ་སྦྱོང་གི་དྲན་པ་གསོ་བ་དང་། གོས་ལ་མངོན་ཞེན་སྤོང་བ་དང་། གོས་མི་རུང་བ་མི་འཆང་བ་དང་། (༡༢༠བ)
གཞན་མ་དད་པ་སྤོང་བའི་དགོས་པ་ཡོད་དོ། །ལྔ་པ་ནི། གང་དང་གང་དུ་བྱིན་གྱི་བརླབས་པ་དེ་མི་བརྗེད་པའི་ཚུལ་གྱིས་བརླབས་པ་དེ་མི་བརྗེད་པའི་ཚུལ་གྱིས་རང་གི་ཉིད་ལ་སོགས་པའི་ཞེན་པ་དང་བྲལ་ཏེ་བཅང་བའོ། །དྲུག་པ་ལ་དྲུག་སྟེ། ཆུད་ཟ་བ་དང་། མ་གུས་པ་དང་། མི་རུང་བ་དང་། རྟགས་གཞན་དུ་གྱུར་པ་སྤང་བ་དང་། བདེ་བར་གནས་པའི་རྐྱེན་དུ་བསྒྲུབ་པ་དང་། ཞར་བྱུང་ལམ་དུ་འཇུག་ཚུལ་ལ་མཁས་པས་ལོངས་སྤྱོད་པའོ། །བདུན་པ་ནི། རྟེན་ཉམས་ཆུང་དང་བརྗེད་དང་བསྔོས། །བརླག་དང་སྤང་ལྟུང་བྱུང་བ་དང་། །བར་པ་གཉིས་ལ་རང་གཞན་སྐྱེས། །ཡིད་བརྟན་ཡུལ་ནི་ཤི་བར་ངེས། །དེ་རྣམས་བྱིན་རླབས་འཇིག་རྒྱུའོ། །སྤྱིའི་བཞི་པ་ནི། སྤྱིར་བསྟན་མྱ་ངན་ལས་འདས་པའི་བསམ་པས་རབ་ཏུ་བྱུང་ཞིང་ཚུལ་ཁྲིམས་དང་ལྡན་ལ། བརྩོན་འགྲུས་བརྩམས་པ་དང་དམིགས་བསལ་དེ་དག་མེད་ཀྱང་གོས་ཀྱིས་བསྟངས་པར་བྱ་བས་སྤྱད་པར་འོས་སོ། །ཚིག་དོན་ལ་གཉིས་ལས། གཞིའི་སྐབས་ལ། གོས་དངོས་ཀྱི་དང་། གོས་རྒྱུ་རྙེད་པའི་རྣམ་གཞག་གོ །དང་པོ་ལ། དྲུབ་པ་དང་། བརྐྱང་བ་དང་། མི་རུང་བ་སྤང་བའོ། །དང་པོ་ནི། ཁ་ཚར་མ་བཅད་པ་ལྟ་བུས་ཚོན་གྱིས་སོགས་ཏེ་ཁྱིམ་པའི་གོས་ཡིན་པའི་ཕྱིར་རོ། །འཆད་འགྱུར་བཞིས་ཁྱད་པར་དུ་བྱས་པའི་དྲས་ཤིང་སོགས། བཞི་པོ་ནི། སྲིད་དུ་བཏང་བའི་གླེགས་བུ་སྣམ་ཕྲན་ཡིན་པས་དེ་ཐལ་མར་མ་བཏང་བའི་སྣྲེལ་ཞི་དང་། ཚལ་བུས་མ་ཁྱབ་པའི་ལྷག་མ་རྣམས་ཆེ་མཉམ་ཆུང་མཉམ་དུ་མཉམ་པ་དང་། ཞེང་དུ་བཏང་བའི་གླེགས་བུའི་འཕྲོ་རྣམས་དབུས་ནས་ཕྱོགས་སུ་ལྟ་བ་དང་། ཚལ་བུ་དང་མཉམ་པའི་ལྕགས་རིས་མཐའ་བསྐོར་བ་རྣམས་ལ་ཉིད་ཅེས་པ་དངོས་པོའི་རྐྱེན་ཏེ་དེའི་དངོས་པོ་(༡༢༡ན)
ཉིད་དོ། །དྲས་དྲུབས་དེ་ཡང་མཐང་གོས་ནི་སྨད་ཀྱི་ནང་དུ་བགོ་བས་ནང་གོས་ཞེས་པ་སྟེ་ཨནྟར་ཞེས་པ་ནང་ལ་འཇུག་པ་ལས། མཐང་ཞེས་པ་ནང་གི་བརྡ་རྙིང་ཡིན་པ་དང་། བླ་ནི་སྟེང་ལ་འཇུག་པས་སྟོད་ཀྱི་གོས་དང་། སྣམ་ཕྲན་དྲས་ཏེ་སྦྱར་བས་ན་སྣམ་སྦྱར་རྣམས་ཏེ། དེ་ཡང་ཕྲེང་རྒྱུད་དུ། སྣམ་སྦྱར་ངེས་པར་དྲས་ཏེ་བཅང་། །གཞན་དག་མ་ངེས་གང་གི་ཕྱིར། །འདོད་ཆུང་རང་གི་ཆོས་གོས་ཀྱི། །ལས་ཀྱི་སྐྱོ་བར་འགྱུར་ཕྱིར་རོ། །ཞེས་གསུངས་ཤིང་འདིར་རྣམ་པ་གང་ཡང་སོགས་སོ། །གཞན་ནི་གོ་བར་ཟད་དོ། །གཉིས་པ་ནི། གནས་མལ་སོགས་ཏེ། མལ་སྟན་ལྟ་ཞོག་ཐ་མལ་པར་འདུག་པའི་སྟན་ཡན་ཆད་ལ་དགེ་འདུན་དེ་མ་ཡིན་པའི་གདིང་བ་མེད་པར་སོགས། གསུམ་པ་ནི་སྲིན་བལ་སོགས་ཏེ། དཔག་བསམ་གྱི་ཤིང་ལས་བྱུང་བ་ལྟ་བུ་རྣམས་སུ་མ་བྱས་སོགས། སྐྲ་ལས་བྱས་པའི་ལ་བ་དང་། ཐལ་བས་བྱུགས་པའི་གཅེར་བུ་པ་དང་། བྱ་འུག་པའི་སྒྲོ་ལས་བྱས་པ་རྣམས་ལ་ཡང་དག་པར་ལེན་པ་སྦྱར་རོ། །འདིའི་སྦོམ་པོ་རྣམས་ཡོན་ཏན་སྒྲའི་སྦོམ་པོ་ཡིན་པ་ལ་སྒྲུབ་བྱེད་མེད་དོ་ཞེས་བྱ་འདུལ་གསུང་མོད། སྒྲུབ་བྱེད་གོང་དུ་བརྗོད་ཟིན་ཏོ། །དོར་མ་ལ་སོགས་པའི་ཡན་ལག་གི་སྦུབས་དང་། གོས་ཐམས་ཅད་སྔོ་བ་ནི། སྟོད་གཡོགས་སྨད་གཡོགས་སྔོ་བ་ཀུན་བཀག་ལ། འོད་ལྡན་དུ་ཐམས་ཅད་སེར་བ་དང་དམར་བའང་མི་རུང་བར་འདོད་མོད། སློབ་དཔོན་འདི་ནི་མི་བཞེད་པས་སྔོ་ཞེས་ཟུར་དུ་ཐོན་པ་མཛད་དོ། །གཉིས་པ་ལ། རྙེད་པ་བགོ་བའི་དང་། རྙེད་པ་གང་དབང་གི་རྣམ་གཞག་གོ །དང་པོ་ལ། ཚད་ནི། ཤིང་པུ་ལ་སའི་འདབ་མ་ནི་(༡༢༡བ)
འགྲེལ་ཆུང་མཁན་པོས་ཟར་མའི་འདབ་མ་ལ་བཤད་དོ། །ཆོ་ག་ལ་སྦྱོར་བ་ནི། ལ་བ་དང་སོགས། དངོས་གཞི་ནི་རྙེད་པ་བགོ་བ་ལ་ལྔ་བྱའོ། །ལྔ་ནི་དེང་སོགས་སོ། །ལྔ་པོའི་ཐ་མ་ཡན་ཆད་བྱེད་པ་ཉིད་ན་གློ་བུར་དུ་འོངས་པ་ནི་དབྱར་གནས་ལྟ་བུ་ལ་ཕུལ་བ་སོགས་ངེས་པའི་རྙེད་པ་མ་ཡིན་པ་དགེ་འདུན་ལ་སྤྱིར་སྤགས་ཏེ་ཕུལ་བའི་རྙེད་པ་ནི་དབང་བ་ཉིད་ཡིན་ནོ་སོགས་ལྔ་གའི་མཇུག་ཏུ་སོགས་དབྱར་གནས་པ་ལྟ་བུ་རྙེད་པ་ཐོབ་པའི་བྱ་བ་དེར་སོགས་བསབ་པའི་ཚད་ནི་པ་ཎ་སྟེ་མ་ཤ་ལྔ་ལ་སོགས་པའོ། །གང་ཟག་གི་རྣམ་གཞག་ལ་དུས་དང་། གློ་བུར་བའི་དང་། ཤི་བའི་ཡོ་བྱད་ཀྱི་རྙེད་པ་གང་དབང་གཉིས་སོ། །དང་པོ་ལ་དྲུག་ལས། གནས་ཀྱིས་བསྒྲུབས་པ་ནི། གནས་ཀྱི་རྙེད་པ་དབང་བའི་དགེ་སློང་གཅིག་ཉིད་ཀྱིས་རས་ཡུག་ཆེན་བརྒྱ་ལ་སོགས་པ་ཤིན་ཏུ་སོགས། དེའི་དོགས་གཅོད་ནི་བྱེ་བ་སོགས། དུས་ཀྱིས་བསྒྲུབས་པ་ནི། དབྱར་གནས་དེའི་དུས་སོགས། དོགས་གཅོད་བབས་པ་སོགས། སྦྱིན་བདག་གིས་བསྒྲུབས་པ་ནི། རྙེད་པ་ནི་སྦྱིན་བདག་དེ་རང་གིས་ཇི་ལྟར་སོགས་ཏེ། དུས་ཚིགས་དང་གནས་དང་གང་ཟག་སོགས་ཁོ་རང་གིས་གང་ལ་ཕུལ་བ་དེའོ། །ཁྲིམས་ཀྱིས་བསྒྲུབས་པ་ནི། རྙེད་པ་ཐོབ་པའི་དགེ་འདུན་རྣམས་ཀྱིས་ཀྱང་ཁྲིམས་སུ་ཇི་ལྟར་བཅད་པ་བཞིན་ནོ། །དེའི་དོགས་གཅོད་ནི། ཁྱིམ་བདག་ལྟ་བུ་ཞིག་གིས་དགེ་འདུན་ཐམས་ཅད་ཀྱི་ཆ་ཚང་བར་ཕུལ་ན་ཡང་དགེ་འདུན་རང་གིས་ཁྲིམས་སུ་གང་བྱས་དེ་རྣམས་དབང་ཞེས་པའོ། །དེས་ན་ཟས་ཙམ་ཡང་ཕྱོགས་དེས་རྗེས་སུ་མ་གནང་བར་གཞན་གྱིས་ལེན་དུ་མི་རུང་བར་བཤད་དོ། །མཚམས་ཀྱིས་བསྒྲུབ་པ་ནི། དགེ་འདུན་ཙམ་ལ་ཕུལ་ཞིང་དགེ་འདུན་(༡༢༢ན)
འདི་དག་ཅེས་ཡོངས་སུ་མ་བཅད་ན་ལས་ཀྱི་མཚམས་པོ་ཆེ་སོགས་ཡོངས་སུ་བཅད་ནས་བགོ་བར་བྱའོ། །འདི་ལ་མཚམས་ནང་དེ་ན་གཅིག་ལ་སོགས་པ་དགེ་འདུན་དུ་མ་ལོངས་པ་ནི། དགེ་འདུན་དེ་ཉིད་ཡིན་པས་རྙེད་པ་དེ་དབང་ངོ་། །ལུང་གི་ཆོས་ཀྱི་རྙེད་པ་ནི་སོགས་དང་། ཆོས་སྨྲ་བའི་ཚད་ནི། གཙུག་ལག་གི་སོགས་ཏེ། འདུལ་བ་བྱེ་བྲག་ཏུ་བཤད་པ་སོགས་ལས་མྱ་ངན་ལས་འདས་པ་ལ་ཕུལ་བ་ནི་མཆོད་རྟེན་གྱི་དང་འདྲ་བར་བཞག་གོ །ཞེས་གསུངས་པས་རྟོགས་པའི་ཆོས་ལ་ཕུལ་བ་མི་དབང་ངོ་། །ཤི་བའི་ཡོ་བྱད་ལ་རབ་བྱུང་ཤི་བའི་དང་། རྟགས་ཅན་ཤི་བའི་ཡོ་བྱད་ལ་ཇི་ལྟར་དབང་བ་གཉིས་ལས། དང་པོ་ལས། གང་ཟག་དང་། དུས་དང་། མཚམས་དང་། ཆོ་ག་དང་། དངོས་པོའི་སྒོ་ནས་རྣམ་པར་བཞག་པ་སྟེ་ལྔ་ལས། དང་པོ་ནི། མཚན་མི་མཐུན་པ་སོགས་ཏེ། གནས་ནས་ཕྱུང་བ་ནི་མ་ཕྱུང་བ་མེད་ན་ཡང་གནས་ནས་མ་ཕྱུང་བ་གཞན་ཤི་བའི་ཡོ་བྱད་དེ་མི་དབང་སྟེ་དགེ་འདུན་དུ་མི་གཏོགས་པས་སོ། །འོན་ཀྱང་རྒྱུ་ལས་སེམས་མ་ལོག་ན་དེ་ལྟར་ཡིན་གྱི། ལོག་ན་དབང་སྟེ་དགེ་འདུན་དུ་མི་གཏོགས་པའི་རྒྱུ་དེ་བཏང་བའི་ཕྱིར་རོ། །གནས་ནས་ཕྱུང་བ་ཤི་བའི་ཡོ་བྱད་དེ་གནས་ནས་མ་ཕྱུང་བ་རྣམས་དབང་བ་ཅི་ཞེ་ན། སྤྱིར་གནས་ནས་ཕྱུང་བ་དེ་ནི་དགེ་འདུན་ལས་ཐ་དད་པ་ཉིད་ཡིན་ཡང་གནས་ནས་ཕྱུང་བ་དེའི་ཤི་བའི་ཡོ་བྱད་དེ་ནོད་པར་བྱ་བ་ཉིད་ལ་ཐ་དད་མ་ཡིན་པའི་ཕྱིར་རོ། །ཆོས་དང་ཆོས་མིན་གྱི་ཕྱོགས་ཐ་དད་པ་ཤི་བའི་ཡོ་བྱད་ལ་ནི་ཕྱོགས་གཉིས་ཕྱོགས་ཐ་དད་པ་ཡིན་པས་ཕན་ཚུན་མི་དབང་ངོ་། །སྤྱིར་ནི་སྐབས་འདིར་རབ་ཏུ་བྱུང་སོགས་ཏེ། རིམ་པ་(༡༢༢བ)
བཞིན་ཁྱིམ་པ་དང་མུ་སྟེགས་སུ་གྱུར་པའི་ཉེ་དུ་ལྟ་བུ་མི་དབང་བ་ཉིད་ཡིན་ནོ། །གཉིས་པ་ནི། གསོལ་བ་འབའ་ཞིག་པའི་ལས་ཀྱིས་བྱིན་གྱིས་བརླབ་པའམ། དང་པོ་གནས་བརྟན་ནམ་ཐ་མ་གསར་བུ་ལ་རྫས་དེ་ལས་འགའ་ཞིག་སྦྱིན་པ་ནི། དང་པོ་ཐ་མའི་ལས་དེ་ཞེས་བྱ་བ་ཡིན་པས་དེ་གཉིས་གང་རུང་གིས་བྱིན་གྱིས་བརླབས་ཟིན་ནས་ཕྱིས་འོངས་པ་རྣམས་མི་དབང་ལ་དེ་ཡན་ཆད་དུ་འོངས་པ་རྣམས་དབང་ཞིང་དགེ་འདུན་གྱི་ཆེད་དུ་སོང་ན་ཕྱིས་འོངས་པ་ཡང་དབང་བར་འགྲེལ་ཆུང་ནས་བཤད་དོ། །འདི་ནི་དང་པོ་དང་ཐ་མའི་གང་ཟག་གཉིས་ལ་བྱིན་པས་སམ། ཡས་བགྲངས་མས་བགྲངས་ཀྱི་ཐ་མ་གཉིས་ལ་དང་པོར་སྦྱིན་པས་ཀྱང་དེ་ཞེས་བྱའོ། །གསུམ་པ་ནི། གཤིན་པོ་དང་གཤིན་རྫས་གཉིས་ཀྱི་ནང་ནས་གཤིན་རྫས་གཙོ་ཆེ་སྟེ། མཚམས་གང་ན་བྱིན་གྱིས་བརླབ་པར་བྱ་བའི་སྤྱོད་འདུག་པ་སོགས་གཉིས་ཀྱི་ཕྱིར་མཚམས་ཀྱི་བར་དུ་ཡོད་པ་ལ་ནི། སུམ་བརྒྱ་པར། གཙུག་ལག་ཁང་གི་མཚམས་ཀྱི་བར་ཤི་ན། །གང་དུ་མགོ་བོ་བཞག་པ་དབང་བ་ཡིན། །ཞེས་ཀྱང་བཤད་དོ། ཤི་རྫས་དང་། ནོར་བཅོལ་བ་གཉིས་ཀྱི་ཕྱི་མ་གཙོ་ཆེ་སྟེ། མཚམས་གང་ན་ནོར་དང་འདྲ་བ་སོགས་མདོ་གཉིས་ཀྱི་ཕྱིར་ནོར་དང་འདྲ་བ་ནི། སུམ་བརྒྱ་པར། གང་ལ་དེ་ཡི་རྫས་ནི་གཏམས་གྱུར་པ། །མི་དེ་ནོར་དང་འདྲ་བར་བྱ་ཞེས་བཤད། །ཅེས་སོ། ཞར་བྱུང་གྲོགས་མཆེད་ལྟ་བུ་ཕན་ཚུན་སྤྱད་དངོས་བསྐུར་བ་ན་བསྐུར་བར་བྱ་བས་མ་སྤངས་པ་ནི་བསྐུར་བྱ་དེ་ཉིད་ཀྱི་ཡིན་ལ། དེས་སྤངས་ན་བསྐུར་བར་བྱེད་པ་ཉིད་ཀྱིས་ཡིན་ལ་དེས་སྤངས་ན་ཡང་དེ་ཉིད་ཀྱི་ཡིན་ནོ། །བཞི་པ་ནི། མཚམས་ཀྱི་ཕྱི་རོལ་དུ་(༡༢༣ན)
ཡང་སོགས་ཏེ། འབའ་ཞིག །མི་མཐུན་པའོ། །འདི་ནི་འདུ་ཤེས་འཁྲུལ་པས་མི་ཆགས་པ་ཡིན་ལ། རོ་དབྱུང་བ་དང་རིམ་གྲོ་སོགས་ཏེ། འདི་ནི་ཆོ་ག་ཁྱད་པར་ཅན་ཉམས་པས་མི་ཆགས་པས་སོ། །ལྔ་པ་ལ་བཞི་ལས། ཁྱིམ་གྱི་ནང་ན་ཡོད་པ་ནི་ཁྱིམ་བདག་གིས་གང་ལ་བྱིན་པ་དབང་བ་ནི་ལྷུང་བཟེད་སོགས་ཏེ། སྦྱིན་བདག་དེས་སྦྱིན་པའི་སྒོ་ནས་ངེས་པར་མི་བྱེད་ན་དེས་འཕོངས་ཤིང་ཁས་བླངས་པའི་རྩོལ་བ་དང་ལྡན་པ་དེ་དབང་ཞིང་། དེ་ཡང་དུ་མ་ཅིག་ཅར་སློང་ན་སྤྱིར་དང་མཐར་གྱིས་ན་དང་པོ་དང་སློང་བ་མེད་པ་ཉིད་སོགས་ན་དང་དང་པོར་ཁྱིམ་དེར་སོང་སོགས། བུ་ལོན་གྱི་ཡོ་བྱད་བུ་ལོན་པ་དབང་བ་ནི་བུ་ལོན་སོགས་ཏེ་འདི་ནི་བཀའ་གཉན་པས་དགེ་འདུན་གྱི་བགོ་ཚར་ནའང་བསྡུས་ནས་གཞལ་ལོ། །གཤིན་པོ་དེ་དང་བུ་ལོན་པ་དེ་ལྷན་ཅིག་འཇལ་ལེན་རྣམ་པར་བཞག་པ་ན་ཚོང་པ་ལས་རས་ཡུག་ཆེན་ཉོས་ཏེ་བུ་ལོན་པ་ལ་གཞལ། བར་ཆད་འདུག་ན་སྦྱིན་པར་བྱ་བ་ཉིད་རིན་དེ་སྤྲད་པས་ཆོག་གི་ཆད་པའི་རས་ཡུག་ཆེན་དེ་ཉིད་སྤྲོད་དགོས་པ་མ་ཡིན་པ་དང་། ཐག་པ་ལ་རྒྱུ་སྤུན་གཏད་འདུག་ན་བླང་བར་བྱ་བ་རས་ཡུག་ཉིད་བླངས་པས་ཆོག་གི །རྒྱུ་སྤུན་དེ་ཉིད་བླང་དགོས་པ་མ་ཡིན་པའོ། །བུ་ལོན་པ་བཀའ་གཉན་ཡང་དེས་གྲོགས་ཚངས་སོགས་ལས་གསར་པ་བྱེད་པ་པོ་ལག་གི་བླ་ལ་སོགས་པས་དཀོན་ཅོག་སོགས་ཏེ། འདེད་མཁན་དངོས་སུ་མེད་པས་གཞལ་མི་དགོས་སམ་སྙམ་པའི་དོགས་གཅོད་དོ། །ཡོ་བྱད་དྲུག་ནད་གཡོག་དབང་བ་ནི་ནད་གཡོག་སོགས་ཏེ། དྲུག་ནི་ཆོས་གོས་གསུམ་དང་སྟན་དང་ལྷུང་བཟེད་དང་ཆུ་ཚགས་སོ། །འོན་ཀྱང་ཁྱིམ་པ་ལྟ་(༡༢༣བ)
བུ་དྲུག་པོ་དེ་སྤྱིར་མི་དབང་བ་ལ་མི་སྦྱིན་ཞིང་། དབང་ན་གཞན་དུ་གནས་པར་སོགས་ཀྱང་ངོ་། །མདོར་ན་རབ་བྱུང་ཤི་བའི་ཡོ་བྱད་དབང་བའི་དགེ་འདུན་དུ་གཏོགས་པ་ལ་ཆོས་བཞི་ཚང་དགོས་ཏེ། རབ་ཏུ་བྱུང་བའི་སྡོམ་པ་རྣམ་པར་དག་པ་དང་ལྡན། མཚན་མཐུན། གནས་ནས་མ་ཕྱུང་། གཞན་ཕྱོགས་སུ་མ་སོང་བའོ། །དེའི་སྟེང་དུ་ནད་གཡོག་གི་ཡོ་བྱད་དབང་བ་ལ་ཆོས་གཉིས་བསྣན་ཏེ། ནད་གཡོག་དངོས་སུ་བྱེད་བཞིན་པའམ་དེའི་ཆེད་དུ་གཞན་དུ་སོང་བའོ། །ཤི་བའི་ཡོ་བྱད་བགོ་བ་ལ་དབྱར་རྙེད་གོས་རྙེད་བཞིན་དུ་མཐོ་དམན་མི་བྱེད་དེ། བསྙེན་པར་རྫོགས་པ་ཡང་ཐམས་ཅད་མཉམ་པོར་དབང་བས་སོ། །ནད་པས་མ་ཤི་གོང་དུ་བྱིན་ན་དེ་དབང་བ་ནི། ནད་པས་སོགས་ཏེ་བལྟོས་མེད་དུ་བྱིན་ཟིན་པས་སོ། །ཤི་ཟིན་པ་ཉིད་ཀྱི་དུས་ན་བལྟོས་པ་དང་བཅས་ཏེ་སྦྱིན་བྱའི་རྫས་ཉིད་བསྒྲུབ་པའི་ཚུལ་དུ་བྱིན་པའི་ནོར་བདག་མི་དབང་སྟེ། སུམ་བརྒྱ་པར། ཁོ་བོ་འདས་ནས་སྦྱིན་ཞེས་བྱིན་པ་ནི། །དེ་ཤི་ན་ཡང་སྤྱིན་པར་མི་བྱ་སྟེ། །སྡོམ་བརྩོན་བུ་ལ་སོགས་པ་བལྟོས་བྲལ་ཕྱིར། །བལྟོས་དང་བཅས་པའི་སྦྱིན་པ་བྱིན་པ་མིན། ཞེས་སོ། །གཉིས་པ་རྟགས་ཅན་གྱི་ལ། བཞི་ལས་བུ་ལ་སོགས་ལ་བྱིན་པ་དེ་དབང་བ་ནི་ཁྱིམ་ན་སོགས། རྒྱལ་པོ་དང་དཀོན་ཅོག་ཏུ་བགོ་བ་སོགས་ནི། གླང་པོ་སོགས། དཀོན་ཅོག་གསུམ་ནང་དུ་བགོ་བ་ནི། དབྱིག་དང་གསེར་དང་གཞན་བརྡུངས་སུ་བྱས་སོགས། མུ་ཏིག་རྣམས། གལ་ཏེ་རིན་པོ་ཆེ་གཞན་སོགས་ཏེ་སངས་རྒྱས་ཉིད་ཀྱི་ཐོབ་པ་གཅིག་བྱེད་པའོ། །མཚལ་མ། མཐིང་སོགས་ཚོན་རྩི་ཆེན་པོའོ། །མུ་ཏིག་དེ་དག་ནི་བཏགས་ཏེ་སོགས་དང་། མུ་ཏིག་དེ་མ་ཡིན་པ་སོགས། གླང་(༡༢༤ན)
ཆེན་སོགས་ཀྱི་ཐེག་པའོ། །རྒྱལ་མཚན་གྱི་སྲོག་ཤིང་དེར་རུང་སོགས་དེ་འདྲ་ལས་གཞན་དག་དང་སོགས། དགེ་འདུན་གྱི་བཞག་པ་སོགས་གསུམ་དུ་བྱ་བ་ནི་དགེ་འདུན་གྱི་སྔར་སྨོས་ལས་གཞན་ནི་སོགས། མྱུར་དུ་མི་འགྲུབ་པའི་དམ་རྒྱ་ནི། བུ་ལོན་འཕྲལ་དུ་མི་ཁུགས་པའི་ཡི་གེའོ། །གཞན་གསུམ་ནི་མུ་སྟེགས་ཀྱི་བསྟན་བཅོས་དང་། མྱུར་དུ་ཁུགས་པའི་དང་། གོས་འཚེད་པའི་མཚོན་ནོ། །གཞན་རྣམས་ནི་རྟོགས་སླའོ། །གཉིས་པ་ཕྲན་ཚེགས་ལ་སོགས་པའི་སྐབས་བྱུང་ལ། ཕྲན་ཚེགས་དངོས་དང་། ཕྲན་ཚེགས་དང་བཅས་པ་གཞན་ནས་འབྱུང་བའོ། །དང་པོ་ལ་དྲུག་སྟེ། གོས་སྒྲུབ་པའི་དང་། ལོངས་སྤྱོད་པའི་དང་། ཞར་བྱུང་ལམ་དུ་འགྲོ་བའི་དང་། བཅོས་ལེགས་བྱ་བའི་དང་དུར་ཁྲོད་པ་བསྟེན་པའི་དང་། བདེ་བར་གནས་པའི་རྐྱེན་གྱི་སྤྲོས་པའོ། །དང་པོ་ལ་དྲ་བ་དང་། དྲུབ་པ་དང་། བཀྲུ་བ་དང་། ཁ་བསྒྱུར་བ་བཞི་ལས། དང་པོ་ལ་ཚད་ནི། གླེགས་བུ་སོགས། གཞི་ནི་ས་ལ་སོགས། དྲ་སྤྱད་ནི་དྲེའུ་སོགས། གཉིས་པ་ལ་གནས་ནི་ལྕི་བའི་སོགས། འཚེམ་སྤྱད་ནི། བྱ་གག་གི་ཤོག་ཤིང་དང་། སྨྱུག་མའི་ཚལ་བུས་དེ་བཙེམ་པར་བྱའོ། །དེར་མ་ཟད་ཁབ་ཀྱིས་ཀྱང་སོགས། ཚུལ་ནི་མི་འཇིལ་སོགས་སོ། །གསུམ་པ་ལ། ཚུལ་ནི་བཙོ་སོགས། སྣོད་ནི་གཞོང་སོགས། བཀྲུ་བྱ་ལ་དོགས་བཅོད་ནི་ཕྱག་དར་སོགས་སོ། །བཞི་པ་ལ་སྦྱོར་བ་ཚོན་སྦྱར་བ་ནི། ཚོན་བཟང་པོ་སོགས་དངོས་གཞི། གོས་གཞུག་པ་ནི་སྔར་དང་པོ་སོགས། མཇུག་སྐམ་པ་ནི་གཟར་ཐག་སོགས། བསྒྱུར་དཀའ་བ་བྱེ་བྲག་ཏུ་བཤད་པ་(༡༢༤བ)
ནི། ཚོན་གསར་པ་རྣམས་ནི་གོས་གསར་པ་ལ་སོགས། བསྒྱུར་བའི་གནས་ནི། བང་རིམ་སོགས། མཇུག་གི་བྱི་དོར་ནི། ཚོན་གྱི་ལས་བྱས་ཟིན་ནས་སོགས། ལོངས་སྤྱོད་པ་ལ་མི་རུང་བ་དགག་པ་ནི། བཅགས་པ་སོགས། རུང་བ་བསྒྲུབ་པ་ལ་ཁ་དོག་དང་དབྱིབས་དང་གཞི་དང་བྱ་བ་དང་གནས་དང་སྣོད་རྣམས་རུང་བ་བསྒྲུབ་པའོ། །དང་པོ་ནི་འདི་ལ་སོགས། གཉིས་པ་ནི། ཤམ་ཐབས་སོགས་ཏེ། ཤུར་བུ་སོགས་བཞི་ནི། ད་ལྟར་གྲགས་པའི་སྐེར་ཆུང་དང་། ལྷས་མ་གྲུ་བཞི་དག་སྐ་རགས་སྤུངས་བཏགས་མ་དང་། ད་ལྟར་གྲགས་པའི་སྒོམ་ཐག་ལྟ་བུའོ། །ཚོམ་བུ་སོགས་བཞི་ནི། གསེར་སྐུད་ཀྱི་ཤར་བུ་གསུམ་མམ་བཞིའི་ཚོམ་བུ་ལ་མདོ་མདོར་ནོར་བུས་སྤྲས་པ་དང་། གསེར་ལས་བྱས་པའི་ཚར་ཚར་གྲོག་སྒལ་གྱི་བར་རིལ་བུ་ཅན་གསེར་སྐུད་ཀྱིས་བསྒྱུས་པ། ཐོག་མར་དྲིལ་བུ་གཡེར་ཁ་བཏགས་པའི་འོག་པག་དང་། གསེར་ལས་བྱས་པ་ཟླ་གམ་དང་གྲུ་གསུམ་གྱིས་བརྒྱན་པའི་འོག་པག་དང་། གསེར་ལས་བྱས་པའི་ལུ་གུ་རྒྱུད་རྣམས་སོ། །གསུམ་པ་ནི། བཞི་སོགས་ཏེ་རྐང་པ་བཀྲུ་བ་སོགས་མི་གཙང་བའི་བྱི་དོར་རོ། །བཞི་པ་ནི། བརྟུལ་བ་སོགས་ཏེ་བླ་གོས་དེར་དང་སྣམ་སྦྱར་དེ་ལ་སོགས་རྣག་གཟན་དེའི་ཁ་བསྒྱུར་བ་དེ་ནི་བཙག་གིས་གཟུགས་སོ། །འཛག་པ་དེའི་སྐམ་པ་དང་ཤ་བཀྲར་མི་འགྱུར་བ་ད་ལ་ནི་སོགས་ལྔ་པ་ནི། ཆོས་གོས་དག་སོགས། དྲུག་པ་ནི། གཏུར་བུ་སོགས། གསུམ་པ་ལ། སྦྱོར་བ་རང་གནས་སུ་དང་། དངོས་གཞི་ལམ་དུ་དང་། འཇུག་གཞན་གནས་སུ་ཇི་ལྟར་བྱ་བའོ། །དང་པོ་ནི། སང་སོགས་གཉིས་པ་ལ་ངག་གི་དང་། ལུས་ཀྱི་(༡༢༥ན)
སྤྱོད་ལམ་གཉིས་ཀྱི་དང་པོ་ནི། ལམ་དུ་སོགས། གཉིས་པ་ནི། ལམ་དུ་སོགས། གསུམ་པ་ལ། འགྲོན་པོའི་དང་གཞི་པོའི་བསླབ་བྱའོ། །དང་པོ་ནི། རྒན་རིམ་སོགས། གཉིས་པ་ནི། རྐུས་ཤེས་སོགས། གང་ལ་དབུལ་བར་བྱ་བ་གཏོང་མཁན་གྱིས་ལྷུང་ནས་བརླག་ན་དེས་གཞལ་ཞིང་དེས་མ་བླངས་པར་བཏང་ན་ཡང་ངོ་། །བསུ་བའི་རྒྱས་བཤད་ལྷུང་བཟེད་དང་སོགས། འགྲོན་པོ་དེས་ཀྱང་དགེ་འདུན་གྱི་གནས་བརྟན་གྱི་སོགས། གནས་བརྟན་དེས་འགྲོན་པོ་དེ་སོགས། བཞི་པ་ནི། ཆོས་གོས་ཀྱི་མཐའ་ཟེགས་སོགས། ལྔ་པ་ནི། བདག་དུར་ཁྲོད་པའོ་སོགས། དུར་ཁྲོད་པས་སྦྱིན་བདག་གིས་བདག་གིར་སོགས། དྲུག་པ་ལ་གསུམ་གྱི་སྦྲང་གཡོབ་བཅང་བ་ནི། སྦྲང་གཡབ་སོགས་དང་པོ་ནི། ལོག་པའི་འཚོ་བ་ཆར་གཏོགས་དང་བཅས་པ་སྤངས་ཏེ་ཡང་དག་པའི་འཚོ་བ་ལ་བརྟེན་པའི་ཚུལ་གྱིས་བསྒྲུབ་པར་བྱའོ། །ལོག་པའི་འཚོ་བ་ལ་ལྔ་སྟེ། ཚུལ་འཆོས་ཀྱི་སྒོ་ནས་རྙེད་པ་བསྒྲུབ་པ། ཁ་གསག །གཞོགས་སློང་། ཐོབ་ཀྱིས་འཇལ་བའི་སྒོ་ནས་རྙེད་པ་བསྒྲུབ་པ། རྙེད་པས་བརྙེད་པ་འདོད་པའོ། །དང་པོ་ནི། རིན་ཅེན་འཕྲེང་བར། ཚུལ་འཆོས་རྙེད་དང་བཀུར་སྟིའི་ཕྱིར། །དབང་པོ་སྡོམ་པར་བྱེད་པས་ཏེ། ཞེས་སོ། །གཉིས་པ་ནི། ཁ་གསག་རྙེད་དང་བཀུར་སྟིའི་ཕྱིར། །ཚིག་འཇམ་སྙན་པར་སྨྲ་བའོ། །ཞེས་སོ། །གསུམ་པ་ནི། གཞོགས་སློང་སེང་ནི་ཐོབ་བྱའི་ཕྱིར། །གཞན་གྱི་རྫས་ལ་བསྔགས་བྱེད་པའོ། །བཞི་པ་ནི། ཐོབ་ཀྱིས་འཇལ་བ་རྙེད་པའི་ཕྱིར། །མངོན་སུམ་གཞན་ལ་སྨོད་བྱེད་པའོ། །ཞེས་སོ། །ལྔ་པ་ནི། རྙེད་པས་བརྙེད་པ་རྣམས་འདོད་པས། །སྔར་ཐོབ་པ་ལ་བསྔགས་བྱེད་པའོ། །ཞེས་ཏེ། རྔ་ཡབ་ཀྱི་གཟུགས་ཅན་ནོ། །སྦྲང་སྐྱབས་བཅང་བ་ནི། སྦྲང་སོགས་ཏེ། ཕྱ་ཐེར་ཆུང་ངུའི་དབྱིབས་ཅན་ནོ། །བསིལ་ཡབ་བཅང་བ་ནི། ཚ་བར་ནི་སོགས་ཏེ། ཡུ་བ་ལ་གོང་དུ་བཀག་ཟིན་པས། བསིལ་ཡབ་ཀྱི་ལུས་ཁྲ་ཁྲ་སོགས། གཉིས་པ་ལ་གསུམ་སྟེ། གོས་ཀྱི་རྒྱུད་དང་རང་བཞིན་དང་། སྐབས་བྱུང་གཞན་བཤད་པའོ། དང་པོ་ལ་བཞི་ལས། གཞི་གང་ལས་བྱུང་བ་གང་དུ་བཅད་པ་ནི། བུ་དང་སོགས། རིན་དེེ་ཇི་ཙམ་དུ་སོགས། ལན་ཅིག་ཕུལ་བ་དེ་སྦྱིན་བདག་གི་དད་པ་སྤེལ་བའི་ཕྱིར་དུ་ཡང་དང་སོགས། རྩིག་པ་ལ་ཕུལ་བ་ཡིན་ན་སོགས། ས་ལ་ཕུལ་བ་ཡིན་ན་ཞེས་རྫིང་བུའི་ཡང་ངོ་ཞེས་པའི་བར་རེ་རེ་ལ་རྫིང་བུའི་ས་ལ་ཕུལ་ན་ཞེས་སོགས་སྦྱར་རོ། །གཞུང་ཁ་ཅིག་ལས་རྫིང་བུའི་ས་ལ་ཕུལ་བ་དེ་ནི་སོགས་། སྤྱིར་དཀོན་ཅོག་གི་སོགས། ཤིང་རྟའི་འཕང་ལོའོ། སྣོད་སྤྱད་འབྲུ་བ་སོགས། སངས་(༡༢༥བ)
རྒྱས་རྗེ་བཙུན་ལ་སོགས་པ་མཆོད་པ་འདི་ལ་གནས་གཅིག་གི་ནང་དུ་དགེ་སློང་མ་དེ་དག་གི་སོགས་སྣོད་སྤྱད་འགེངས་པ་དེ་གསོལ་གཉིས་ཀྱིས་བསྐོ། གནས་བརྟན་གྱིས་རིན་བཏབ་པ་དེ་ལས་བསྐྱེད་ཅིང་མཐོ་བའི་ཐབས་ཀྱིས་བཙོང་བའོ། །རིན་བཏབ་པ་དེས་ནི་གནས་བརྟན་དེ་ལས་ཉོ་བ་དང་འཇལ་བ་མི་འབབ་བོ། །བུད་མེད་ཉོ་བས་ནི་རིན་དེ་ལྟར་བསྐྱེད་པར་མི་བྱའོ། །གང་ཟག་གང་གིས་ལོངས་སྤྱད་པ་ནི། མྱ་ངན་ལས་སོགས་ཏེ། གོས་སོགས་གསུམ་ནི་ཀཪྵ་པ་ཎ་འབུམ་རི་བ་དང་། རོའི་རྣམ་པ་བརྒྱ་ཡོད་བའི་ཟས་དང་། ཁང་བརྩེགས་མི་ལྔ་བརྒྱ་ཤོང་བའམ། ནེ་ཙོའི་སྣ་ལྟ་བུ་ལྔ་བརྒྱ་ཡོད་པའོ། །ལྷ་དང་བཅས་པའི་འཇིག་རྟེན་གྱི་སྦྱིན་བདག་གི་རྫས་སུ་མ་ཟད་དགེ་འདུན་གྱི་རྫས་ཀྱང་སྟེ། དེ་ཡང་དགེ་འདུན་མི་སློབ་པ་སོགས་ཀྱི་ཡང་དབང་ངོ་། །དེ་དག་ནི་ལེན་པ་བཞི་ལས་བདག་པོས་ལེན་པ་ཡིན་ལ། དབང་ཕྱུག་གིས་ལེན་པ་ནི་སངས་རྒྱས་བཅོམ་ལྡན་འདས་སོ། །མ་བྱིན་པར་ལེན་པ་ནི་ཚུལ་ཁྲིམས་འཆལ་བ་ཞེས་ཏེ། ལྕགས་གོང་མེ་ལྕེ་འབར་བ་དག །ཟོས་པར་འགྱུར་བ་མཆོག་ཡིན་གྱི། །ཚུལ་འཆལ་ཡང་དག་མི་སྡོམ་པས། ཡུལ་འཁོར་བསོད་སྙོམས་སྤྱོད་པ་མིན། །ཞེས་དང་། ཁྱད་པར་དགེ་འདུན་གྱི་རྫས་ལ་སྤྱད་པ་དང་། གཙུག་ལག་ཁང་དུ་གོམ་པ་གཅིག་བོར་བའི་རྣམ་སྨིན་བསམ་གྱིས་མི་ཁྱབ་པར་བཤད་དོ། །ཚུལ་ཁྲི་མས་དང་ལྡན་ཡང་བརྩོན་འགྲུས་མེད་པའི་ལེ་ལོ་ཅན་ལ་ནི་སོགས་ཏེ། དེ་ནི་བུ་ལོན་གྱིས་ལེན་པར་བཤད་དོ། །དགེ་འདུན་གྱི་བཞག་པ་ལ་སོགས་པའི་སྤྲོས་པ་ནི། དགེ་འདུན་གྱི་མཚམས་ཀྱི་སོགས་ཏེ། ཁོ་རང་གི་དེར་མ་ཟད་དགེ་འདུན་གྱི་རྙེད་པ་ཡང་འོས་སོ། །སྔར་(༡༢༦ན)
བཤད་པའི་བགོ་རྫས་གཞན་དག་ཅེས་པའི་ལྕགས་སོགས་ཚོན་རྩི་ནི་གུར་གུམ་སོགས་ཚོན་ཆེན་པོ་ལྔ་ལས་གཞན་པའོ། །ཚོན་ཆེན་སྒོལ་བ་ནི་སོགས། དེ་དག་གཏའ་མར་གཞག་པར་སོགས། །ཚོན་ཆེན་གྱིས་བསྒྱུར་བ་དེ་གང་ཟག་གི་གོས་སུ་བྱིན་གྱིས་སོགས་ཕ་མ་ལ་ཟས་དང་གོས་ཀྱིས་བསྟངས་པ་སྟེ། ཕན་གདགས་པར་བྱའོ། །ཞེས་པའི་བརྡ་རྙིང་ཡིན་གྱི། སྦྱིན་པ་བཏང་བར་བྱའོ་ཞེས་པའི་དོན་མ་ཡིན་ནོ། །སྟོངས་དང་གྲོགས། སྟོབས་གདབ་པར་བྱའོ་ཞེས་སོགས་དང་གཅིག་གོ །གཉིས་པ་ལ་བརྟེན་པ་དང་། བཅང་བ་དང་། སྤྱད་པའོ། །དང་པོ་ལ་རྟགས་ཉམས་པ་སྤང་བ་ནི། བྱེ་བྲག་སོགས་ཏེ། སྡེ་པ་སོ་སོ་ལ་མཚན་མ་སོ་སོར་བཤད་པ་སོགས་འདིར་འཆད་མོད་ཀྱི། རྩ་འགྲེལ་གྱི་དགོངས་པ་ནི་སྟོན་པ་སྐུ་མཆེད་ལྟ་བུ་འདྲ་འདྲ་རྣམས་མི་ནོར་བའི་ཆེད་དུའོ། །འབྲལ་སྤང་དུ་བཤད་པའི་རྐྱེན་དེ་ལྟ་བུ་དེ་དག་མེད་པར་སྣམ་སྦྱར་མ་དྲས་པ་དེས་སོགས། དྲས་ཤིང་དྲུབས་པ་ཆོས་གོས་ཉིད་དུ་ཞེས་པའི་ཆོས་གོས་ནི་འདིར་འགྲེལ་ཆེན་གྱི་སྣམ་སྦྱར་ལ་དགོངས་པར་ལུང་རིགས་དུ་མས་བསྒྲུབས་སོ། །མུ་སྟེགས་འཁོད་ན་སོགས། གོས་ལྷག་མི་རུང་བ་ཇི་ལྟར་བསྟེན་པ་ནི། སྤུ་ཅན་སོགས་ཏེ། རྐྱེན་དགོས་མེད་ནའོ། །སྤུ་ཅན་དེ་ལ་མི་བཅའ་བ་མ་ཡིན་པའི་བགོ་བའི་སོགས། སེང་བ་དག་ནི། རྐྱེན་དགོས་ཡོད་ན་ལོངས་སྤྱད་དུ་ཡང་རུང་མོད་ཀྱི། མེད་ན་བཅང་བའི་དོན་ཙམ་དུ་བདག་གིར་བྱའོ། །དྲི་མ་དང་ཤིག་ལ་སོགས་པའི་གནོད་པ་མེད་ན་ལྭ་བ་སྤུ་ཅན་དེ་སོགས། །པར་སིག་གི་ཡུལ་ནས་བྱུང་བའི་ལྭ་བ་དང་། སྤུ་ཤིན་ཏུ་རིང་བའི་བེའུ་ཕྲུག་དང་། ཚོན་བཀྲ་བའི་པར་ཏང་ཁྲ་བོ་རྣམས་ནི་རིམ་པ་བཞིན་(༡༢༦བ)
ཧ་ཅང་རིན་ཆེ་བ་དང་། མེ་ཏོག་ལྟ་བུའི་རི་མོ་ཡོད་པ་དང་ཧ་ཅང་བཀྲ་བས་བཀག་གོ ། འཆགས་སར་པར་ཏང་ཁྲའོ་ཡིན་ན་གདིང་བ་སོགས། པར་ཏང་དེ་རྙིངས་ནས་བཅོས་པར་སོགས། སྤུ་ཅན་དང་སྤུ་དམའ་བ་སོགས་ལས་གཞན་པའི་པར་སིག་གི་ལྭ་བ་སོགས་ནི་སྦྱིན་བདག་དེ་དབང་བའི་བསམ་པས་དེ་ལ་ཡིད་གཏད་དེ་བཅང་བར་བྱའོ། །གཉིས་པ་ནི། སྣམ་སྦྱར་སོགས་ཏེ། ཡོ་བྱད་བཅུ་གསུམ་མོ། །ཕྲེང་རྒྱུད་དུ་དབྱེ་གྲངས་ཅུང་ཟད་མི་འདྲ་བ་ཙམ་དུ་བཤད་དོ། །སྔགས་བྱིན་གྱིས་བརླབས་པའི་སྔགས་བཤད་པ་རྣམས་ནི་འདིའི་འགྲེལ་ཆེན་ན་གསལ་ལོ། །ཆོས་གོས་གནང་བ་བཅུ་གསུམ་པོ་རྣམས་རང་མིང་དེ་ཉིད་དུ་སོགས། མཁོ་བའི་ཡོ་བྱད་ཀྱི་གོས་ཀྱང་བྱིན་གྱིས་བརླབས་ཏེ་བཅང་ལ་དེ་ནི་སོགས། དེ་གཉིས་ལས་གཞན་ལྷག་པའི་ཡོ་བྱད་དུ་མ་ཡང་ཡིད་བརྟན་གྱིས་རུང་བར་སོགས། དེའི་སྤྲོས་པ་ནི། སེམས་སོགས། གསུམ་པ་ནི། གོས་ག་བུར་ལ་སོགས་པའི་དྲི་དག་གིས་སོགས། སྣུམ་གྱིས་གོས་ན་ཐལ་ཆུ་ལྟ་བུས་རྩུབ་པར་སོགས། ཞར་བྱུང་གི་བསླབ་བྱ་ནི། ངེད་གྲོགས་མཆེད་ལྷན་ཅིག་པ་ཉིད་ཁོ་ན་ལ་གཏོད་ཅིག །ཅེས་མ་བགོ་ན་གཅིག་དང་། བྲལ་བའི་རྒྱུ་མཚན་གྱི་ཕྱིར་འདོམས་པ་ལ་བྱིན་པ་ནི་བཅོལ་མ་གཏོང་པ་ཡང་དག་པའི་སོགས། འཆོལ་ཞིང་འདོམས་པར་བྱེད་པ་དང་བཅས་པའི་འདོམས་བྱེད་མ་ཡིན་པ་ལ་མི་སྦྱིན་ཏེ། བདག་པོ་མ་ཡིན་པ་ལའང་བྱིན་པར་འགྱུར་བས་སོ། །སྨྱོན་པ་སོགས་ལས་དགེ་སློང་གིས་བླང་བར་མི་བྱ་སྟེ་བརྐུས་ཁག་འབྱུང་བས་སོ། །ཕས་བུ་རེ་ཞིག་བསྐྲད་པ་ལ་སོགས། ཡང་རྙེད་ན་བླང་བ་ནི་ཁྲོ་བ། མི་བརྟན་པའི་ཆེད་དོ། །གསུམ་པ་ལ། གོས་(༡༢༧ན)
རྙེད་ཀྱི་སྤྲོས་པ། དེའི་ཞར་བྱུང་། ནད་པའི་ཀུན་སྤྱོད། སྐབས་སྔ་མ་མཐར་དབྱུང་བའོ། །དང་པོ་ནི། མཆོད་རྟེན་སོགས། བསེ་རུ་མ་གཏོགས་པའི་ཉན་རང་དགེ་འདུན་དུ་གཏོགས་པས་བགོར་རུང་བས་དེ་བཞིན་གཤེགས་པའི་མཆོད་རྟེན་པ་དང་། ས་ཞིང་དང་། ལྷ་འབངས་ལ་སོགས་པ་རྙེད་པའི་འབྱུང་ཁུངས་དང་། གྲོ་ནས་ལ་སོགས་པ་ཟས་ཀྱི་དོན་དང་། གནས་ཁང་དང་ཁང་ཁྱིམ་སོགས་བསྐོ་བས་ཉེ་བར་འཚོ་བ་དང་། སྨན་ལ་སོགས་པའི་ནད་པའི་རུང་བ་སྟེ་ལྔ་པོ་འདི་ནི་བགོ་བར་མི་བྱ་སྟེ། སྔ་མ་དཀོན་ཅོག་མི་གཅིག་པ་དང་། གཞན་བཞི་ནི་འདུ་བའི་སྒོ་ལ་གནོད་པས་སོ། ཟས་ཀྱི་དོན་ཡིན་ཀྱང་ལ་ཕུག་ལྟ་བུའི་རྩ་བ་དང་། ཤིང་ཏོག་ལྟ་བུའི་འབྲས་བུ་དང་། བུ་རམ་ཤིང་ནི་བགོད་རུང་ལ་བདག་གིར་བྱ་བའི་ཕྱིར་མ་ཡིན་པ་ཞལ་ཏ་དང་། བྱི་དོར་ལ་སོགས་པའི་དོན་དུ་ནི་ལྔ་པོ་ཡང་རུང་བའི་སྐབས་ཡོད་དོ། །དབྱར་གྱི་རྙེད་པ་ལ་ནི་དབྱར་གནས་དུས་ཀྱི་མཚམས་དང་། དགག་དབྱེའི་རྗེས་སུ་བྱེད་པའི་མཚམས་གཉིས་ལས། དབྱར་གྱི་མཚམས་དེའི་དབང་གིས་འཇུག་ལྡོག་བྱ་སྟེ། དེ་ནི་གནས་ཀྱིས་བསྒྲུབས་པའི་རྙེད་པ་ཡིན་པའི་ཕྱིར་རོ། །དབྱར་རྙེད་ཐོབ་པ་ལ་དབྱར་མ་རལ་བ་མི་དགོས་ཏེ། དབྱར་རལ་སོགས། འོན་ཀྱང་དགེ་འདུན་དུ་གཏོགས་པ་དགོས་ཏེ་གནས་ནས་སོགས། དབྱར་མཚམས་དུ་མ་ཁྲི་ལ་སོགས་པའི་རྫས་ཀྱིས་སོགས་ཏེ། ཀུན་ལས་བསྡུས་ནས་སོ། །དུ་མར་གནས་པ་དེ་ལས་གཞན་པ་མཚམས་གཅིག་ཏུ་སོགས་རྙེད་པའི་ཐོབ་ཚུལ་གྱི་ཚད་ནི། དགེ་ཚུལ་དང་སོགས་ཏེ། ཤཱཀྱ་འོད་ཀྱིས། དགེ་ཚུལ་སུམ་ཆ་གཅིག་གཅིག་དབང་བ་ཡིན། (༡༢༧བ)
བསྙེན་པར་རྫོགས་པར་འདོད་པ་ཆ་གཉིས་ཏེ། །ཞེས་བཤད་དོ། །དགེ་སློང་ཕ་མའི་ཐུན་མོང་དུ་ཕུལ་བ་ནི། དགེ་འདུན་ལས་ཕྱེད་ཕྱེད་དུ་མི་བགོ་ཡི། །གང་ཟག་གི་གྲངས་ལས་བགོ་བར་བྱའོ། །དང་པོར་དགེ་སློང་ལ་དམིགས་ཤིང་ཟས་ཀྱི་དུས་སུ་དགེ་སློང་མ་རྣམས་མེད་ཀྱང་དེའི་རྙེད་པའི་དུས་སུ་སླེབ་ན་དེ་རྣམས་ཀྱང་དབང་ཞེས་པ་ནི་ཟས་ཀྱི་སོགས། གཉིས་པ་ནི། སྟན་དང་སོགས་ཏེ་ཟས་དང་འབྲེལ་བས་ཞར་བྱུང་ངོ་། ས་མ་པྲཱཔྟ་ནི་མཉམ་པ་དང་བི་ས་པ་པྲཱཔྟ་ནི་མི་མཉམ་པ་སྟེ་དུག་མེད་དང་དུག་བཅས་ཀྱི་དོན་དུ་བཤད་པས་ན། མ་ལ་སྲོག་མེད་པའི་སམ་པྲཱཔྟ་ཞེས་པ་ནི་ཡི་གེ་ནོར་བའོ། །གསུམ་པ་ནི། དགེ་སློང་ཆོས་གོས་སོགས་བཟང་ངན་འབྲིང་གིས་དང་སྟོད་གཡོགས་དང་སྨད་གཡོགས་མ་ཡིན་པའི་རྫས་ལྷག་མས་མི་བྱའོ། །བཞི་པ་ནི། ཤམ་ཐབས་སྐ་རགས་ཀྱི་མ་བཅིངས་སོགས་གོས་ཀྱི་གཞི་རྣམ་པར་བཤད་པ་རྫོགས་སོ། །ཞེས་པ་བློ་གསལ་དགའ་བ་བསྐྱེད་པའི་ཕྱིར་དུ་བཀོད་པའོ། །
བདེ་བར་གནས་པའི་རྐྱེན་ཟས་བཞི་བཤད་པ།
བདེ་བར་གནས་པའི་རྐྱེན་ཟས་མཐའ་གཉིས་སུ་མ་ལྷུངས་པར་བསྟེན་ཚུལ་ནི། སྨན་གྱི་གཞི་ལ་ཀུན་མཁྱེན་ཀླུ་སྒྲུབ་རྗེའི་ལེགས་བཤད་ཉི་མའི་འོད་ཟེར་གྱི་སྨན་གཞིའི་ཟུར་བཀོལ་རིན་ཅེན་ཕྲེང་བ་ལས་བཤད་པའི་རང་ལུགས་སྙིང་པོ་ཅུང་ཟད་བསྡུས་ན། སྨན་གྱི་ངོ་བོ་ནི་སྤྱིར་དྲི་རོ་རེག་བྱ་གསུམ་གང་རུང་གིས་བསྡུས་པའི་ཁམ་ཟས། དེ་དང་ཟས་བཞིའི་ཟླས་ཕྱི་བའི་ཁམ་ཟས་དོན་གཅིག་སྟེ། མཛོད་ལས། ཁམ་གྱི་ཟས་ནི་འདོད་པ་ཡི། །སྐྱེ་མཆེད་གསུམ་གྱི་བདག་ཉིད་དོ། །གཟུགས་ཀྱི་སྐྱེ་མཆེད་མ་ཡིན་དེས། །རང་དབང་གྲོལ་ལ་མི་ཕན་ཕྱིར། །ཞེས་གསུངས། འདིར་བསྟན་སྨན་གྱི་ངོ་བོ་ཁམ་ཟས་གང་ཞིག །བཅས་ལྡན་དགེ་སློང་ལ་རུང་བའི་རིགས་སུ་གནས་པ་དེ། དབྱེ་(༡༢༨ན)
ན་དུས་རུང་སོགས་བཞི། དང་པོ་དུས་རུང་སྨན་གྱི་ངོ་བོ། སྨན་བཞི་གང་རུང་གང་ཞིག །རབ་ཏུ་བྱུང་བས་སྔ་དྲོ་ཁོ་ན་ལོངས་སྤྱོད་དུ་རུང་བའི་རིགས། དབྱེ་ན་བཟའ་བ་དང་བཅའ་བ། དང་པོ་ལ་ཚིག་ལེར། སྣ་ཚོགས་འབྲས་ཆན་ཟན་དང་ཤ ། ཕྱེད་དང་འཁུར་བ་བཟའ་བ་ལྔ། ཞེས་དང་། སུམ་བརྒྱ་པར། ནས་ཆན་སྣུམ་འཁུར་འབྲས་ཆན་ཉ་དང་ཤ ། འདི་དག་སྲོག་གནས་བྱ་ཕྱིར་བཟའ་བར་བྱ། ཞེས་དང་། འགྲེལ་ཆེན་སོགས་སུ། འབྲས་ཆན། ཟན་དྲོན། ཤ་དང་། སྣུམ་འཁུར། ལྡེ་གུ་དང་ལྔ་ལ་བཤད་ཅིང་། དེ་དག་ཏུ་མ་འདུས་པ་ཕྱེ་མར། འོ་འཛར། ཞོ་དང་། དར་བ། ཐུག་པ་ལ་སོགས་པ་རྣམས་ཀྱང་དུས་རུང་ཡིན་ལ། འདིར་ལྡེ་གུ་དང་སྐྱོ་མ་གཅིག་ཅིང་། སྐྱོ་མ་ཐུག་པ་ཟན་དྲོན་གསུམ་གྱི་ཁྱད་རིམ་པར། བཟར་བུ་གྱེན་དུ་བསྒྲེང་མི་ནུས་པ། ནུས་པ། སོར་མོ་ལྔའི་རྗེས་དོད་པ་རྣམས་ཡིན་པ་དང་། བུ་རམ་བསྒར་མ་ནི་ཅིས་ཀྱང་ཞག་བདུན་པ་ཡིན་པས། རབ་བྱུང་དག་གིས་ཀྱང་དགོངས་དུས་སྤྲོ་ཞིང་ལོངས་སྤྱོད་པས་ཆོག་པ་ཡིན་ནོ། །བཅའ་བ་ལྔ་ནི་ཚིག་ལེར་རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། ཞེས་པ་ལྟར་ཡིན་ལ། དེ་ཡང་རྩ་བ་ནི། ཐུ་ལུ་ལ་ཕུག །གྲོ་མ་སོགས། སྡོང་བུ་ནི། བུ་རམ་ཤིང་སོགས། མེ་ཏོག་ནི། ཨུཏྤལ་པདྨ་སོགས། འབྲས་བུ་ནི། རྒུན་འབྲུ། ཁམ་སྟར་སོགས་ལོ་མ་ནི། ཐུ་ལུ་དང་། ལ་ཕུག་སོགས་ཀྱི་ལོ་མ། སྒྲ་བཤད་ནི། རབ་བྱུང་དག་གིས་སྔ་དྲོ་ལོངས་སྤྱད་དུ་རུང་ཞིང་ཕྱི་དྲོའི་ཆར་མི་རུང་བས་ན་དུས་རུང་། བྱེད་ལས་ནི། བཀྲེས་པའི་ནད་སེལ། གཉིས་པ་ཐུན་ཚོད་དུ་རུང་བའི་སྨན་གྱི་ངོ་བོ་ནི། སྨན་བཞི་གང་(༡༢༨བ)
རུང་གང་ཞིག །ཐུན་ཚོད་ཀྱི་མཐའ་ཅན་དུ་བྱིན་གྱིས་བརླབ་ཏུ་རུང་བའི་རིགས་གནས་ཀྱི་བཏུང་བ། དབྱེ་ན་སྨན་བཞི་སོ་སོའི་རྒྱུ་ལས་བྱུང་བ། ཚགས་ཀྱིས་བཙགས་པའི་རྩམ་ཐང་དང་རུས་ཐང་ཤིན་ཏུ་སླ་བ་བཞིན་གྱི་གཟུགས་བརྙན་སྣང་བ་ལྟ་བུ་དུས་རུས་གི་རྒྱུ་ལས་བྱུང་བ། དར་སིང་ཆུར་ཁུ་ལྟ་བུ་ཆུ་དང་འདྲེས་པའི་དྭངས་མ་ཚགས་ཀྱིས་བཙགས་པ་ཐུན་ཚོད་ཀྱི་རྒྱུ་ལས་བྱུང་བ། སྦྲང་བུར་གྱི་དྭངས་མ་ཤིན་ཏུ་སླ་བ་ལྟ་བུ་ཞག་བདུན་པའི་རྒྱུ་ལས་བྱུང་བ། ཨ་བར་སྐྱུར་གསུམ་སོགས་ཀྱི་ཁུ་བ་ཤིན་ཏུ་སླ་བ་ལྟ་བུ་འཚོ་བཅང་གི་རྒྱུ་ལས་བྱུང་བ། སྒྲ་བཤད་ནི། ཐུན་ཚོད་ཀྱི་མཐའ་ཅན་དུ་བྱིན་གྱིས་བརླབས་ནས་ལོངས་སྤྱོད་རུང་བས་སོ། །བྱེད་ལས་ནི་སྐོམ་པའི་ནད་སེལ། གསུམ་པ་ཞག་བདུན་པའི་སྨན་གྱི་ངོ་བོ་ནི་སྨན་བཞི་གང་རུང་གང་ཞིག །ཞག་བདུན་གྱི་མཐའ་ཅན་དུ་བྱིན་གྱིས་བརླབ་རུང་བའི་རིགས། དབྱེ་བའམ་མཚན་གཞི་འབྲུ་མར། ཞུན་མར། བུ་རམ། སྦྲང་རྩི། མར་གསར། ཧྭགས་སོགས། སྒྲ་བཤད་ནི་ཞག་བདུན་དུ་བྱིན་གྱིས་བརླབ་རུང་བས་སོ། །བྱེད་ལས་ནི། གཙོ་བོ་རླུང་ནད་སེལ་བ་སོགས། བཞི་པ་འཚོ་བཅང་གི་སྨན་གྱི་ངོ་བོ་ནི། སྨན་བཞི་གང་རུང་གང་ཞིག །ཇི་སྲིད་འཚོའི་བར་དུ་བྱིན་གྱིས་བརླབ་རུང་བའི་རིགས་གནས། དབྱེ་ན་འཇིག་རྟེན་ན་སྨན་དུ་གྲགས་པའི་རྩ་བ། སྡོང་བུ། ལོ་མ། མེ་ཏོག །འབྲས་བུ་ལྔ། དང་པོ་ནི། གླ་སྒང་། ཤུ་དག །བོང་དཀར་ལྟ་བུ། གཉིས་པ་ཙན་དན། ཤུག་པ། སླེ་ཏྲེས་ལྟ་བུ། གསུམ་པ། བ་ཤ་ཁ། ནིམ་པའི་ལོ་མ་ལྟ་བུ། བཞི་པ་ནིམ་པ། བ་ཤ་ཁ། ཀླུ་ཤིང་གི་མེ་ཏོག་ལྟ་བུ། ལྔ་པ། ཨ་བར་སྐྱུར་(༡༢༩ན)
གསུམ་ནི་ལེ་ཤམ་ལྟ་བུ་ཡིན། སྒྲ་བཤད་ནི། ཇི་སྲིད་མ་ཤིའི་བར་དུ་བྱིན་གྱིས་བརླབ་རུང་བ། བྱེད་ལས་གཙོ་བོར་འདུས་པའི་ནད་སེལ་བར་བྱེད། སྨན་བཞི་པོ་དེ་དག་ཀྱང་དུས་རུང་ལ་བྱིན་བརླབས་མེད་ཅིང་བྱིན་ལེན་བྱས་ནས་སྔ་དྲོའི་དུས་ལོངས་སྤྱོད། ཕྱི་མ་གསུམ་ནི་དུས་དང་། དུས་མིན་ཐམས་ཅད་དུ་ལོངས་སྤྱོད་དུ་རུང་བ་ཡིན་མོད། བྱིན་གྱིས་མ་བརླབས་ན། སྔ་དྲོ་བྱིན་ལེན་བྱས་པ་གུང་དང་། ཕྱི་དྲོ་བྱིན་ལེན་བྱས་པ་ཐུན་ཚོད་ཀྱི་མཐའ་ལས་འདས་ན་གསོག་འཇོག་ཏུ་འགྱུར། ཐུན་ཚོད་དུ་རུང་བ་བྱིན་གྱིས་བརླབས་ན་བརླབ་དུས་སྔ་དྲོ་ཡིན་པས་དེ་ནས་ཐུན་ཚོད་ཀྱི་མཐའ་ཚུན་ལོངས་སྤྱད་ཆོག །དེ་ལས་འདས་ན་གསོག་འཇོག་དང་སྤང་ལྟུང་གཉིས་ཀ་འབྱུང་། ཞག་བདུན་པ་བྱིན་གྱིས་བརླབས་ན་བརླབས་པའི་སྔ་དྲོ་ནས་ཞག་བདུན་གྱི་བར་ལོངས་སྤྱད་ཆོག་དེ་ལས་འདས་ན་གསོག་འཇོག་དང་སྤངས་ལྟུང་གཉིས་ཅར་འབྱུང་། འཚོ་བཅང་བྱིན་གྱིས་བརླབས་ནས་ཇི་སྲིད་མ་ཤིའི་བར་ལོངས་སྤྱད་དུ་རུང་བས་འདི་ལ་གསོག་འཇོག་དང་སྤང་ལྟུང་གཉིས་ཀ་མི་བསྐྱེད། ཁ་ཅིག །འཚོ་བཅང་ནད་ལས་གྲོལ་ནས་བཅངས་ན་སྤང་ལྟུང་བསྐྱེད་ཅེས་དང་། ཁ་ཅིག་ཇི་སྲིད་འཚོའི་བར་དུ་བྱིན་གྱིས་བརླབ་གསུང་བ་ལུང་གིས་ཟིན་ཟོ་མེད་འདྲ། དེས་ན་བཅས་ལྡན་དགེ་སློང་གིས་གནང་བའི་དུས་ཀྱི་དམིགས་བསལ་མེད་པར་མཐའ་དེ་དག་ལས་འདས་པར་འཆང་ན་གསོག་འཇོག་དང་། དེ་ཟོས་ན་གསོག་འཇོག་ཅན་ཟོས་པའི་ལྟུང་བྱེད་འཕོག་པས་དེ་ལས་མ་འདས་པར་ལོངས་སྤྱོད་པའམ། ཡང་ན་གཞན་ལ་སྦྱིན་པའམ། ཡང་ན་བྱིན་ལེན་དང་བྱིན་བརླབས་བཤིག་པར་བྱ་སྟེ་གསོག་འཇོག་བསྲུང་བའི་ཐབས་བླ་ན་མ་མཆིས་པའོ། །ཞེས་དང་། སྨན་གྱི་ཁྱད་ཆོས་ལ་ཟས་(༡༢༩བ)
ལ་བརྟེན་པའི་སྨན་གྱི་ལྟུང་བ་བསྲུང་ཚུལ་དང་། ཟས་དེ་བསྟན་ཚུལ་ལོ། །དང་པོ་ལ། ཐུན་མོང་བ་རུང་ཆུའི་རྣམ་གཞག །ཐུན་མོང་མ་ཡིན་པ་བསྲུང་ཚུལ་སོ་སོ་གཉིས། དང་པོ་ལ་དྲུག་གི་གང་ལ་འཐོར་བའི་གཞི་སྨན་ཕྱི་མ་གསུམ་རུང་པ་ཚད་ལྡན་ཏེ། སློབ་དཔོན་སྦྲང་མའི་རྐང་པ་ཅན་གྱི་སོ་ཐར་ཊཱིཀར། མི་རུང་བ་དང་དུས་རུང་དང་། ཁོལ་བའི་གནས་སྐབས་རྣམས་ལ་ནི། །རུང་ཆུ་འཐོར་བར་མི་བཞེད་དོ། །ཞེས་བཤད། གང་འཐོར་ན་ཟན་དང་མ་འདྲེས་པའི་ཆུ་གཙང་མ་སྐོལ་གྲངས་མིན་པའི་རང་བཞིན་གྱིས་གྲང་བ། གང་གིས་འཐོར་ན་བསྙེན་པར་མ་རྫོགས་པ། འོན་ཀྱང་རྫོགས་པས་གོ་ནི་ཆོད། ཚུལ་ཇི་ལྟར་འཐོར་ན་ཀུ་ཤ་ལ་སོགས་པས་ཆུ་འཐོར་བའི་ཐ་སྙད་བྱས་པ་ཙམ། དུས་ནམ་གྱི་ཚེ་འཐོར་ན་སྨན་བྱིན་རླབས་བྱེད་ན་སྔ་དྲོ་དང་། དེ་མིན་ཉི་མ་ཕྱེད་ཡོལ་ནས་སྐྱ་རེངས་མ་ཤར་བར་དུ། དགོས་པ་ནི། དངོས་ཀྱིས་སྨན་ཕྱི་མ་གསུམ་ལ་རུང་ཆུ་མ་བཏབ་པར་ལོངས་སྤྱད་ན་བསྙེན་པར་རྫོགས་པ་ལ་བཤགས་བྱ་དང་། མ་རྫོགས་པ་ལ་བསྡམ་བྱའི་ཉེས་བྱས་འབྱུང་བས་དེ་ཁེགས་པ་རྒྱུད་ཀྱི་དགོས་པ་ཕྱི་དྲོ་དང་མཚན་མོ་ལོངས་སྤྱད་དུ་རུང་མི་རུང་གི་བཅས་པའི་མཚམས་ཟིན་པའི་ཆེད་ཡིན། ངེས་ཚིག་ནི་དུས་མིན་དུ་ལོངས་སྤྱོད་རུང་བ་རུང་བར་ངེས་པས་སོ། །བྱིན་གྱིས་བརླབ་པ་ནི། ཡུལ་དགེ་སློང་ཞིག་གི་དྲུང་དུ། རང་ལས་བསླབ་པ་རྒན་ན་ཕྱག་བྱས། སྨན་བྱིན་རླབས་ཀྱི་ཆོ་ག་ལ་ཐུགས་གཏད་པ་ཞུ། ཡུལ་དེས་ཆོས་བཞིན་འདུལ་བ་བཞིན་མཛད་པར་ཞུ་ཞེས་བརྗོད། དེ་ནས་མཁན་པོ་འམ། སློབ་དཔོན་ནམ། བཙུན་པ་དགོངས་སུ་གསོལ་(༡༣༠ན)
བདག་མིང་འདི་ཞེས་བྱ་བའི་ཐུན་ཚོད་དུ་རུང་བའམ། ཞག་བདུན་པའམ། འཚོ་བཅང་གི་སྨན་འདི་བདག་དང་ཚངས་པ་མཚུངས་པར་སྤྱོད་པ་རྣམས་ཀྱིས་ཐུན་ཚོད་དུ་རུང་བའམ། ཞག་བདུན་པའམ། ཇི་སྲིད་འཚོ་བཅང་དུ་རུང་བར་བྱིན་གྱིས་བརླབ་བོ། །ལན་གསུམ་དང་ཐབས་ལེགས་བྱ། ཞུ་མཁན་དེས་སྨན་བྱིན་རླབས་ཀྱི་ཆོ་ག་ལ་ཐུགས་གཏད་པ་བཀའ་དྲིན་ཆེ། ཡུལ་དེས་ཆོས་བཞིན་འདུལ་བ་བཞིན་མཛད་པ་ངོ་མཚར་ཆེ། ཞེས་བརྗོད། སྤྱོད་ལམ་ཡུལ་དེའི་མདུན་དུ་ཙོག་པུར་འདུག་སྟེ། སྨན་དེ་གཉིས་ཆར་གྱི་ལག་པ་གཡོན་པའི་མཐིལ་དུ་བཞག །གཡས་པས་སྟེང་ནས་བཀབ་སྟེ་བྱ་བ་ཡིན། དེ་ལྟར་བྱིན་གྱིས་བརླབས་པའི་དགོས་པ་ནི་གསོག་འཇོག་ཏུ་སོང་བའི་ཉེས་པ་ཁེགས་པ་དང་། དགེ་སློང་ནད་པས་བྱིན་ལེན་བྱ་མི་དགོས་པར་ཚེགས་ཆུང་ངུས་བདེ་བ་ལ་རེག་པར་གནས་པ་དང་བཅས་པའི་མཚམས་ཟིན་པའི་ཆེད་ཡིན་ནོ། །ཞེས་དང་། གཉིས་པ་སྨན་ལ་བརྟེན་ནས་ལྟུང་བ་བསྲུང་ཚུལ་ལ། གསོག་འཇོག་གི་སྤང་ལྟུང་བསྲུང་ཚུལ། བྱིན་ལེན་མ་བྱས་པར་ཟ་བའི་ལྟུང་བྱེད་བསྲུང་ཚུལ། དུས་མིན་དུ་ཟ་བའི་ལྟུང་བྱེད་བསྲུང་ཚུལ། སྤངས་པ་ཟ་བའི་ལྟུང་བྱེད་བསྲུང་ཚུལ། གསོག་འཇོག་བྱས་པ་ཟ་བའི་ལྟུང་བྱེད་བསྲུང་ཚུལ་ལོ། །དང་པོ་ནི། བཅས་ལྡན་དགེ་སློང་གིས་གཞི་སྨན་རྣམ་བཞི་གང་རུང་རུང་བ་ཚད་དང་ལྡན་པ། ངོ་བོ་ཡོངས་སུ་རྫོགས་པ། རང་ཉིད་དབང་ཞིང་གནས་སྐབས་དབང་བྱར་ཡོད་པ། རང་ངམ་རང་དང་འདྲ་བས་བྱིན་ལེན་བྱས་ལ། བྱིན་ལེན་མ་ཞིག་པ། ལྷའི་བདུད་རྩི་མིན་པའོ། །འདིར་རུང་བ་ཞེས་པ་ནི། རང་གི་ལག་ཉར་སོང་བ་ནི་མི་རུང་བའི་ཟས་ཡིན་ལ། དེ་ལྟ་(༡༣༠བ)
བུ་ལ་སོགས་པ་མིན་པ། ཚད་དང་ལྡན་པ་ནི་མགུལ་དུ་མིད་རིན་ཆོག་པ། ངོ་བོ་རྫོགས་པ་ནི་ཚ་ཆུ། འགྱུར་བྱེད་ཀྱི་ཆུ། རྙོག་ཆུ་སོགས་ནི་ཟས་ཀྱི་ཆེད་ཡིན་པས་མ་རྫོགས་པའོ། །རང་དང་འདྲ་བ་ཞེས་པ་ལྔ་སྟེ་ཆོ་གའི་སྒོ་ནས་འདུལ་བའི་ལག་ལེན་ཚུལ་བཞིན་བྱེད་པ་རྣམས་འདྲ། དེ་བྱེད་པ་དང་མི་བྱེད་པ་མི་འདྲ། དེ་བཞིན་དུ་སྡོམ་པའི་སྒོ་ནས་བསྙེན་པར་རྫོགས་པ་ནང་ཕན་ཚུན་འདྲ། རྫོགས་པ་དང་མ་རྫོགས་པ་ལྟ་བུ་མི་འདྲ། ལྟ་བ་དང་མཚན་མཐུན་པ་རྣམས་འདྲ། མཐུན་པ་དང་མི་མཐུན་པ་རྣམས་མི་འདྲ། མཆོག་དང་མཆོག་མིན་གྱི་སྒོ་ནས་ཕམ་པས་མ་གོས་པ་ཕན་ཚུན་འདྲ། གོས་པ་དང་མ་གོས་པ་མི་འདྲ་བ་ལས་འདི་ལྟ་བུའི་འདྲ་བའི་ལྔ་ཚར་ཚང་ན་འདྲ་བའི་ཐ་སྙད་འཐོབ་ལ། མི་འདྲ་བ་ལ་གང་རུང་གཅིག་མི་འདྲ་བས་ཆོག་ཅེས་འདུལ་འཛིན་སྔ་མ་དག་བཞེད་ཀྱང་འདྲ་བ་ལའང་ལྔ་ཚར་ཚང་དགོས་པའི་ངེས་པ་མེད་པས་དེ་ལྟ་བུ། ལྷའི་བདུད་རྩི་གནང་བ་ཡིན་ཞིང་དེ་དང་འདྲ་བའི་དཀོན་ཟས་འགའ་ཞིག་ལའང་མཚུངས་སམ་སྙམ་ན། སྨན་ཕྱི་མ་གསུམ་ལ་ནི་བྱིན་གྱིས་བརླབས་པའམ་མ་བརླབས་ཀྱང་རྗེས་སུ་འབྲེལ་བ་དགོས་ཏེ། དེ་གསུམ་བྱིན་གྱིས་མ་བརླབས་པར་བྱིན་ལེན་བྱས་ནས་རང་དུས་ལས་འདས་ཏེ་གསོག་འཇོག་ཏུ་སོང་བ་ལ་ནི་ཉེས་བྱས་ཙམ་ཞིག་འབྱུང་གི་སྤང་ལྟུང་མི་འབྱུང་བའི་ཕྱིར་དང་། སྨན་བཞི་བྱིན་ལེན་མ་བྱས་པར་འཆང་བ་ལ་ཉེས་པ་མ་བཅས་པ་འདྲ་ནའང་བྱིན་ལེན་མ་བྱས་པར་ཟ་བ་ལ་ལྟུང་བྱེད་འབྱུང་བའི་ཕྱིར་རོ། །གནད་འདི་ཡང་དྲན་དགོས་སོ། །བདག་ཉིད་ནི། དགེ་སློང་ཕ་མ་དང་དགེ་སློང་མ་གསུམ་གང་རུང་ཡིན་པ་སྟེ། དགེ་སློབ་མ་ལ་གསོག་(༡༣༡ན)
འཇོག་གི་སྤང་ལྟུང་མ་བཅས་ཀྱང་ལྟུང་བ་བཅས་འདུག་པའི་ཕྱིར་རོ། །བསམ་པ་ལ་འདུ་ཤེས་མ་འཁྲུལ་ཞིང་ཟ་བའི་ཆེད་དུ་རང་དུས་འདས་ནས་ཀྱང་། འཆང་འདོད་ཀྱི་བསམ་པ་རྒྱུན་མ་ཆད་པ། སྦྱོར་བ་དེ་ལྟར་འཇོག་པར་རྩོམ་པ། མཐར་ཐུག་རང་རང་གི་དུས་ལས་འདས་པ་ན། གསོག་འཇོག་གི་སྤང་ལྟུང་དངོས་གཞི་གྲུབ། ཅེས་དང་། དེས་ན་འཚོ་བཅང་གི་སྨན་བྱིན་གྱིས་བརླབས་པ་དེས་སྤང་ལྟུང་མི་བསྐྱེད་དེ། མ་ཤིའི་བར་དུ་རང་དུས་ལས་འདས་པ་མིན་ལ། ཤི་ནས་རྟེན་བོར་བས་སྤང་ལྟུང་མི་བསྐྱེད་པའི་ཕྱིར་རོ། །འོ་ན་སྨན་ཕྱི་མ་གཉིས་བྱིན་གྱིས་མ་བརླབས་པས་སྤང་ལྟུང་གཏན་ནས་མི་བསྐྱེད་དམ་སྙམ་ན་མ་ཡིན་ཏེ། ཚེས་གཅིག་ལ་བུ་རམ་གྱི་སྨན་གཅིག་རྙེད་ནས་བྱིན་གྱིས་བརླབས། དེའི་ཉིན་ནམ་ཚེས་གཉིས་ནས་བདུན་གྱི་བར་ལ་བུ་རམ་གྱི་སྨན་གཞན་བརྙེད་པ་བྱིན་གྱིས་མ་བརླབས་ཀྱང་ཞག་བརྒྱད་པའི་སྐྱ་རེངས་ཤར་བའི་ཚེ་དེ་ཐམས་ཅད་ཀྱི་སྤང་ལྟུང་བསྐྱེད་པའི་ཕྱིར་ཏེ། བྱིན་གྱིས་བརླབས་པས་རང་སྟོབས་དང་། མ་བརླབས་པ་རྣམས་ལ་ཤན་དང་འདྲེས་པའི་སྐྱོན་གྱིས་ཤན་སྟོབས་ཀྱི་སྤང་ལྟུང་བསྐྱེད་པའི་ཕྱིར་རོ། །དེ་ནི་ཤན་འདྲེས་པའི་སྐྱོན་ནོ། །དེས་ན་སྨན་ལ་ཤན་བརྡེག་བྱེད་བྱིན་གྱིས་བརླབས་པ་ཞིག་དགོས་པའི་གནད་རྟོགས་ན་དཀའ་བའི་གནད་ལས་རང་གྲོལ་ཏེ། རང་སྟོབས་ཀྱི་གསོག་འཇོག་གི་སྤང་ལྟུང་བསྐྱེད་པ་ལ། སྨན་བྱིན་གྱིས་བརླབས་པ་ཞིག་དགོས་པའི་གནད་ཀྱིས་ཡིན་པའི་ཕྱིར་རོ། །འོ་ན་ཐུན་ཚོད་ཀྱི་མཐའ་ཇི་ལྟར་སྙམ་ན་བཞེད་པ་མི་འདྲ་བ་མང་ཡང་འབུམ་ཕྲག་གསུམ་པའི་དགོངས་པ་(༡༣༡བ)
སྲོད་ཐུན་ཚུན་ལ་མཛད་པ་ལུང་གིས་གྲུབ་སྟེ། སྨན་གཞིར། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བཏུང་བ་བརྒྱད་པོ་འདི་དག་ནི། དུས་སུ་བྱིན་གྱིས་བརླབས། དུས་སུ་མཉེས། དུས་སུ་བཙགས། དུས་སུ་བྱིན་གྱིས་བརླབས་ནས་དུས་སུ་ལོངས་སྤྱད་པར་བྱ་ཞིང་། དུས་མ་ཡིན་པར་ཡང་ལོངས་སྤྱད་པར་བྱ་སྟེ། ནམ་གྱི་ཐུན་དང་པོ་ཐལ་ནས་ནི་ལོངས་སྤྱད་པར་མི་བྱའོ། །ཞེས་བཤད་པའི་ཕྱིར་རོ། །འོ་ན་ནད་པ་ལ་མཚན་མོའི་ཐུན་ཕྱི་མ་གཉིས་ལ་སྐོམ་པའི་ནད་བྱུང་ན་ཇི་ལྟར་བྱ་སྙམ་ན། དེའི་ཚེ་སྲོད་ཐུན་འདས་ནས་ཀྱང་བྱིན་རླབས་བྱས་ཏེ་ལོངས་སྤྱད་པས་རུང་ཞེས་རོང་སྟོན་ཆེན་པོས་ཚིག་ལེའི་ཊི་ཀར་བཤད་པ་ལྟར་ལེགས་སོ། །གཉིས་པ་བྱིན་ལེན་མ་བྱས་པར་ཟ་བའི་ལྟུང་བྱེད་བསྲུང་ཚུལ་ལ། ལྟུང་བའི་རྣམ་གཞག་དང་། བྱིན་ལེན་གྱི་རྣམ་གཞག་གཉིས། དང་པོ་ནི་རྟོགས་སླ། འོན་ཀྱང་གནང་བའི་དུས་ལམ་བརྒྱགས་ལྟ་བུ། གནས་སྒྲ་མི་སྙན། ཟན་གཅོད་ཀྱི་ཆོ་ག་བྱས་པ། ན་བ། མུ་གེའི་དུས་རྣམས་སུ་བྱིན་ལེན་མི་དགོས་ཏེ་དེ་ལྟར་བྱས་ཆོག་པ་གནང་བའི་ཕྱིར་རོ། །འོ་ན་ཟན་གཅོད་ཀྱི་ཆོ་ག་ཇི་ལྟ་བུ་སྙམ་ན། ཚིག་ལེ་ལས། ལམ་དུ་སོང་ཚེ་ལམ་བརྒྱགས་དག །ཁུར་ཁྱེར་སུ་ཡང་མེད་པ་ན། བརྗེ་བ་ཡི་ནི་འདུ་ཤེས་ཀྱིས། །རང་ཉིད་ཀྱིས་ནི་ཁུར་བར་བྱ། །བརྗེ་བ་གཞན་དག་མེད་པ་ན། །ཉི་མ་དང་པོ་ཟན་བཅད་བྱས། །གཉིས་པ་ལ་ནི་སྤར་གང་ཙམ། །བཟའ་ཡི་དེ་ལས་ལྷག་པ་མིན། །ཉི་མ་གསུམ་པར་སྤར་བ་གཉིས། །དེ་ལས་ཕར་ནི་ཅི་བདེར་བྱ། །ཞེས་གསལ་བར་བཤད་པ་བཞིན་བྱིན་ལེན་སྟོབ་མཁན་གཏན་མ་རྙེད་པའི་ཚེ་ཉི་མ་གཅིག་ཟན་(༡༣༢ན)
བཅད་པར་བྱའོ། །དེ་ནས་ཉི་མ་དང་པོ་ལ་སྤར་བ་གང་བཟའ་འོ། །ཉི་མ་གཉིས་པ་ལ་ནི་སྤར་བ་དོ་བཟའ་འོ། །གསུམ་ཕན་ཆད་ཇི་ཙམ་གྱིས་ཆོག་པ་བཟའ་ལ་བྱིན་ལེན་བྱེད་མི་དགོས་པ་ཡིན་ནོ། །འདི་ལྟ་བུའི་ཟན་གཅོད་ཀྱི་ཆོ་ག་ནི། དགེ་སློང་མཚམས་དམ་པོར་ཐུགས་དམ་ལ་ཞུགས་པ་འདུལ་བ་ལ་གཅེས་སྤྲས་བྱེད་པ་དག་ལ་ཉེ་བར་མཁོ་ཞིང་། ཆོ་ག་འདི་བྱས་ནས། ཤིན་ཏུ་བཀྲེས་པའི་ཚེ། ཤིང་ཏོག་རུང་བ་མ་ཡིན་པ་དང་། དུས་མིན་ཟ་བ་སོགས་ཀྱང་གནང་བ་ཡིན་ཏེ། རྒྱ་ཆེར་འགྲེལ་ལས། དགེ་སློང་ཟན་བཅད་བྱས་པས། རྒུན་འབྲུ་ལ་སོགས་པའི་ཤིང་ཏོག་རུང་བ་མ་བྱས་པ་དང་། བྱིན་ལེན་མ་བྱས་པ་དང་། ལག་ཉ་བླངས་པ་དག་ཀྱང་དུས་མ་ཡིན་པར་ཡང་བཟའ་བར་བྱ་བ་ཉིད་ཡིན་ནོ། །ཞེས་བཤད་པས་སོ། །གཉིས་པ་བྱིན་ལེན་གྱི་རྣམ་གཞག་ལ་གསུམ་གྱི་བྱིན་ལེན་དངོས་ནི། གཞི་ཆུ་དང་སོ་ཤིང་མ་གཏོགས་པའི་སྨན་རྣམས་བཞི་རུང་བ་ཚད་ལྡན། དེ་ཡང་ཁ་བཤལ་བའི་ཆུ་ལ་བྱིན་ལེན་མི་དགོས་ཀྱི། སྐོམ་པས་བཏུང་བར་བྱ་བ་ཡིན་ན་བྱིན་ལེན་དགོས། མི་རུང་བ་ནི་ངོ་བོའི་སྒོ་ནས་བཙོང་སྒོག །ཤ་རྗེན་པ། རྟ་ཤ །བོང་ཤ །གླང་པོ་ཆེའི་ཤ་སོགས། ཆོ་གའི་སྒོ་ནས་མི་རུང་བ། ལག་ཉ་ཅན། མཚམས་བཙོས་ཞག་ལོན། རྗེན་བཙོས། གསོག་འཇོག་ཏུ་སོང་བའི་ཟས་སོགས། སྟོབས་པ་པོ་སྤྱིར་བསྙེན་པར་མ་རྫོགས་པ། བྱིན་ལེན་སྟོབ་པར་འོས་པ། ཞེ་ཐག་པ་ནས་སྟོབ་འདོད་པ། ཟས་དེ་གྱེན་དུ་འདེགས་ནུས་པ། ནོད་པ་པོའི་གློ་གཡས་གཡོན་རྒྱབ་དང་། དེ་ལས་མཐོ་བར་བསྡད་པ་མ་ཡིན་པ། ལག་པ་གཉིས་གྱེན་དུ་བཀན་པ་དང་བཅས་པ། དམིགས་(༡༣༢བ)
བསལ་བསླབ་བྱིན་དགེ་སློང་གིས་དགེ་སློང་རྣམ་དག་ལ་བྱིན་ལེན་ཆགས། དགེ་སློང་རྣམ་དག་ཀྱང་ཕ་མ་ཕན་ཚུན་གཅིག་གིས་གཅིག་ལ་བྱིན་ལེན་ཆགས། དགེ་སློང་ཕ་ནང་ཁུལ་དུའང་བསླབ་པ་གཡེལ་བས་མི་གཡེལ་བ་ལ་ཆགས། ལྟ་བ་ཐ་དད་པས་ཆགས། མཆོག་མིན་པས་མཆོག་ལ་ཆགས་པ་སོགས། བྱིན་ལན་ནོད་པ་པོ་ནི། དགེ་སློང་ཕ་མ་དགེ་སློང་མ་དང་གསུམ་གང་རུང་ཡིན་པ། ལངས་པ་མིན་པར་ས་ལ་འདུག་བཞིན་པ། ལག་པ་གཉིས་གྱེན་དུ་བཀན་ནས་ལེན་པ། དེ་གཉིས་ཀྱི་བར་དུ་རགས་པ་མཚམས་གཞན་གྱིས་བར་མ་ཆོད་པར་མཚམས་གཅིག་གི་ནང་དུ་ཆུད་པའོ། །བྱིན་ལེན་སྟོབ་པ་པོ་བསྡད་པས་ཀྱང་ཆགས་མོད། མ་གུས་པ་སྤང་བའི་ཕྱིར་ལངས་དགོས་ཞེས་གདམས་སོ། །བསམ་པ་འདུ་ཤེས་མ་འཁྲུལ་ཞིང་། རང་ངམ་རང་དང་འདྲ་བ་ཟ་བའི་ཕྱིར་དུ་སྟོབ་འདོད་དང་ལེན་འདོད་ཀྱི་བསམ་པ་རྒྱུན་མ་ཆད་པ་སྦྱོར་བ་ལག་པ་གཉིས་གྱེན་དུ་བཀན་པས་སྟོབ་པའོ། །ལེན་པར་བརྩམས་པ། མཐར་ཐུག་ལེན་པ་པོའི་ལག་པའམ་ལག་པ་དང་འབྲེལ་བའི་སྣོད་དུ་འཐོབ་པ། རགས་པ་མཚམས་གཞན་ནི། རྡོ་བ། དབྱུག་པ། རྩིག་པ། བར་མཚམས་ཀྱི་བུ་ག་ནམ་མཁའ། སྲོག་ཆགས། གོས་ལ་སོགས་པ་ཞེང་དང་དཔངས་སོར་བཞི་ཡན་དང་དཀྱུས་ཁྲུ་གང་ཡན་གྱི་བར་ཆོད་པ། ཁ་ཅིག་ཅུང་ཟད་རྒྱུག་པའི་ཆུ་དང་མེ་དོན་བྱེད་ནུས་པའང་འདོད། འོ་ན་ཅོག་ཙེ་སོགས་ཀྱི་སྟེང་དུ་ཞེ་ན། བྱིན་ལེན་ནོད་པའི་གཞི་ཡིན་ན་ཆགས་ཏེ་ཁྲི་དང་ཁྲིའུ་སོགས་ཀྱི་སྟེང་དུ་ཆགས་པར་བཤད་པའི་ཕྱིར། དམིགས་བསལ་ལག་པ་གཉིས་ཀས་མི་བདེ་ན་གཅིག་གིས་དང་། ཐག་ཉེ་བ་ནས་མི་བདེ་ན་རིང་པ་ནས་སྟབས་ཀྱང་(༡༣༣ན)
ཆོག་པ། སྤེའུ་དང་གླང་པོ་ཆེ་ཅང་ཤེས་ལྟ་བུས་མཐོ་ས་ནས་སྟབས་ཀྱང་ཆོག་པ། ཚིག་ལེ་ལས། བྱིན་ལེན་བྱའོ་མི་བདེ་ན། །རྒྱང་རིང་ནས་ཀྱང་རུང་བ་ཉིད། །ཅེས་དང་། འདི་ལ་ཅང་ཤེས་གླང་པོ་རྟ། །སྤྲེའུ་ཡིས་ཀྱང་རུང་བ་ཉིད། །ཅེས་བཤད་པའི་ཕྱིར་རོ། །ཡང་དགེ་འདུན་ལ་ཟན་སྟོབ་པའི་ལག་བདེ་བ་དགེ་སློང་གིས་བྱས་ཆོག་པའི་དམིགས་བསལ་ཡང་ཡོད་དེ། དགེ་སློང་དེ་ལ་ཟས་རྣམས་བསྙེན་པར་མ་རྫོགས་པ་ཞིག་གིས་བྱིན་ལེན་བྱས་ནས། དགེ་སློང་དེས་དགེ་འདུན་ལ་ཟས་རྣམས་འབྲིམ་པར་བཤད་པའི་ཕྱིར་ཏེ་། རྩ་བར། དགེ་སློང་བྱིན་ལེན་བྱས་པས་བྲིམ་པ་ཉིད་ནི་རུང་བ་ཉིད་ཡིན་ནོ། །ཞེས་བཤད་པས་སོ། །ལྷག་མ་དེ་དག་སྤངས་ཟིན་པ་རང་གི་གནས་མལ་དུ་དགེ་སློང་རང་གི་བཟའ་བར་བྱེད་ན་ནི་ལྷག་བོར་གྱི་ཆོ་ག་དགོས་པར་སྣང་སྟེ། དེ་མ་བྱས་ན་སྤངས་པ་ཟ་བའི་ལྟུང་བྱེད་དམ། ཉེས་བྱས་གང་རུང་གིས་རེག་པར་འགྱུར་བས་སོ། །གཉིས་པ་བྱིན་ལེན་འཇིག་པའི་རྒྱུ་ནི། ལུང་བར་སྡོམས་ལས། འཕྲོགས་དང་འདྲིལ་དང་རེག་པ་དང་། །བསྔོས་དང་དགེ་སློང་མིན་གྱུར་དང་། །དངོས་པོ་འགྱུར་དང་སྐྱེ་བ་འགྱུར། །དོར་བས་ཀྱང་ནི་བྱིན་ལེན་འཇིག །ཅེས་བརྒྱད་དང་ལུང་གཞན་ལས། སྤང་ལྟུང་ཕྱིར་བཅོས་ཀྱི་ཚེ་ཟས་དེ་སྤངས་པ་དང་། མེ་ཆུ་ལ་སོགས་པས་ཟས་དེ་བརླག་པས་ཀྱང་འཇིག་པར་བཤད་དེ་བསྡོམས་པས་འཇིག་རྒྱུ་བཅུ་ཡོད་དོ། །གསུམ་པ་བྱིན་ལེན་གྱི་དབྱེ་བ་ནི། ལུང་ལས། བྱིན་ལེན་ནི་ལྔ་སྟེ། ལུས་ཀྱིས་ལུས་ལ་བྱ་བ། ལུས་དང་འབྲེལ་བས་ལུས་ལ་བྱ་བ། ལུས་ཀྱི་ལུས་དང་འབྲེལ་(༡༣༣ན)
བར་བྱ་བ། ལུས་དང་འབྲེལ་བས་ལུས་དང་འབྲེལ་བར་བྱ་བ། བཞག་པའི་བྱིན་ལེན་ནོ་ཞེས་ལྔ་བཤད་པའི་དང་པོ་ནི་སྟོབ་པ་པོའི་ལག་པས་ནོད་པ་པོའི་ལག་པར་བྱས་པ་ལྟ་བུ། གཉིས་པ་སྟོབ་པ་པོའི་ལྟུང་བཟེད་ལ་སོགས་པའི་སྣོད་ཀྱི་ནང་ནས་ནོད་པ་པོའི་ལག་པར། གསུམ་པ་ནི་སྟོབ་པ་པོའི་ལག་པས་ནོད་པ་པོའི་ལག་པས་བཟུང་བའི་ལྷུང་བཟེད་དང་ཅོག་ཙེ་ལྟ་བུར། བཞི་པ་ནི་སྟོབ་པ་པོའི་ལག་པས་བཟུང་བའི་སྣོད་ཀྱི་ནང་ནས་ནོད་པ་པོའི་ལག་པས་བཟུང་བའི་སྣོད་ཀྱི་ནང་དུ། ལྔ་པ་ནི་རིགས་ངན་བཤན་པ་ལྟ་བུས་བཟའ་བཅའ་སོགས་དྲངས་ན་དཀྱིལ་འཁོར་རམ་རྒྱུག་རིས་སོགས་བཞག་པའི་གཞི་སྟན་དེར་ཞོག་ཅིག་ཅེས་སྨྲས་ཏེ། དེ་ནས་རང་གི་བླངས་ཏེ་ཟོས་པ་ལྟ་བུ་ལ་བྱེད་དོ། །ཡང་ཟན་གཅོད་ཀྱི་ཆོ་ག་མ་བྱས་ཀྱང་སྦྱིན་བདག་གི་བསམ་པ་དག་པས་བཏང་བའི་བཟའ་བཅའ་རྣམས། བྱིན་ལེན་མ་བྱས་པར་དུས་མིན་དུ་སྒྲ་མི་སྙན་པའི་དུས་དྲན་བྱས་པའི་སྒོ་ནས་བཟར་རུང་བ་ཡིན་ཏེ། ཚིག་ལེ་ལས། དགེ་སློང་རྣམས་ལ་སྦྱིན་བདག་གི །གལ་ཏེ་བཟའ་བཅའ་བོར་ན་ནི། །སྒྲ་མི་སྙན་པའི་དབང་བྱས་ཏེ། །དུས་ཡོལ་ནས་ཀྱང་བཟའ་བར་བྱ། །ཞེས་དང་། མདོ་རྩར། དེ་སྦྱིན་བདག་གིས་བསམ་པ་དག་པས་བཏང་བ་ཡིན་ན་རང་གིས་བླངས་ཏེ་བཟའ་བར་བྱའོ། །ཞེས་དང་། འགྲེལ་ཆེན་ལས། བྱིན་ལེན་མ་སྟབས་པར་ཟ་བ་ཐམས་ཅད་ལ་སྒྲ་མི་སྙན་པའི་དུས་སུ་བྱིན་གྱིས་བརླབ་པར་བྱའོ། །ཞེས་ཐམས་ཅད་དུ་ཤེས་པར་བྱའོ། །ཞེས་དང་། དགེ་སློང་ཟན་མེད་པ་ཤིན་ཏུ་བཀྲེན་པ་ཉིད་ན་བྱིན་ལེན་མ་སྟབས་པ་དང་། རུང་བ་མ་བྱས་པ་དང་། དུས་མ་ཡིན་པར་ཟ་བ་ལ་སོགས་པ་རུང་བར་བྱ་བ་དག་ལ་རྩོམ་པའི་(༡༣༤ན)
མདུན་རོལ་དུ་རྩོམ་འདོད་པའི་ཚེ་ན། དགེ་སློང་དེས་བྱང་སྒྲ་མི་སྙན་ན་གྲགས་པའི་ཡིད་ལ་བྱེད་པ་བྱ་སྟེ། ཞེས་དང་། བྱིན་ལེན་བྱས་པའི་ཟས་གཞན་མེད་དམ། བྱིན་ལེན་སྟོབ་པའི་མི་ལ་སོགས་པ་མེད་ན། ཞེས་དང་། གང་ཡང་རུང་བ་ཞིག་ཡོད་ན་ནི་ཉེས་པ་ཁོ་ནར་འགྱུར་རོ། །ཞེས་སོགས་བཤད་པས་སོ། །གསུམ་པ་དུས་མིན་ཟ་བའི་ལྟུང་བྱེད་བསྲུང་ཚུལ་ལ། ལྟུང་བའི་གཞི་ནི་དུས་རུང་གི་སྨན་རུང་བ་ཚད་ལྡན། མིད་པ་གཉིས་པའི་སྒྲེག་པ་བཞི་པ་ཚུན་ཆད་མ་ཡིན་པ་དུས་རང་གླིང་གི་ཉི་མ་ཕྱེད་ཡོལ་ནས། སྐྱ་རེངས་མ་ཤར་གྱི་བར་མུ་གེ་དང་མུ་གེ་དང་འདྲ་བའི་དུས་མ་ཡིན་པ། བདག་ཉིད་དེས་ཕན་པའི་ནད་ཅན་མ་ཡིན་པ། བསམ་པ་འདུ་ཤེས་གཙོ་བོར་གྱུར་ཅིང་ཀུན་སློང་ཟ་འདོད་ཀྱི་བསམ་པ་རྒྱུན་མ་ཆད་པ། སྦྱར་བ་ཟ་བར་རྩོམ་ཞིང་མཐར་ཐུག་མགུལ་དུ་མིད་པ་ན་གྲུབ་ཅིང་། དེ་ཡང་ཁམ་མིད་ཐེངས་རེས་ལ་ལྕགས་ཀྱི་གོང་བུ་རེ་ཟ་བའི་ཉེས་པ་དང་བཅས་པ་སྟེ། སུམ་བརྒྱ་པར། རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་བར་འདི་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་ཀྱི་གོང་བུའི་ཟས་རྣམས་ཟ། །ཞེས་བཤད། འདི་ལ་འདུ་ཤེས་གཙོ་ཆེ་བའི་གནད་ཀྱིས་འདུ་ཤེས་མུ་དྲུག་འབྱུང་བ་ཡིན་ཏེ། དུས་མ་ཡིན་པ་མ་ཡིན་པར་འདུ་ཤེས་པ་དང་། དེ་ལ་ཡིད་གཉིས་ཟ་བས་ཟོས་ན་དངོས་གཞིའི་མུ་གཉིས། དུས་ཡིན་པ་ལ་མ་ཡིན་པར་འདུ་ཤེས་པ་དང་། དེ་ལ་ཡིད་གཉིས་ཟ་བས་ཟོས་ན་ཉེས་བྱས་ཀྱི་མུ་གཉིས། དུས་ལ་དུས་སུ་འདུ་ཤེས་པ་དང་། དུས་མ་ཡིན་པར་དུས་སུ་(༡༣༤བ)
འདུ་ཤེས་པས་ཟོས་ན་ཉེས་མེད་ཀྱི་མུ་གཉིས་འབྱུང་བ་ཡིན། རང་གླིང་ཞེས་པ་སྐྱེས་པ་དང་། གནས་པའི་གླིང་དུ་བཞེད་པ་མི་མཐུན་པ་མང་ཡང་ཞུ་བ་ལས་སྐྱེས་པའི་གླིང་གཙོ་ཆེ་བར་བཤད་པ་སྤྱིར་བཏང་དང་། གཏམ་གཞི་ལས་གནས་པའི་གླིང་གཙོ་ཆེ་བར་བཤད་པ་དམིགས་བསལ་ཡིན་པས་ཕྱི་མ་དབང་བཙན་པར་བཞེད། ཉེས་མེད་ནི་སྨན་ཕྱི་མ་གསུམ་ཕྱི་དྲོ་ཟོས་པ་ལྟ་བུ་དང་། བསླབ་བྱ་ནི་ཕལ་ཆེར་གོང་དུ་སོང་ཟིན་ལ། འདུལ་ལུང་ལས། དགེ་སློང་རྣམས་མཆོད་རྟེན་གྱི་ལས་བྱེད་ཚེ་གུང་ཚིགས་ཡོལ་བ་ན་ལས་དེ་ལྟ་བུའི་ཕྱི་དྲོ་གནང་བའང་ཡོད་དོ། །བཞི་པ་སྤངས་པས་ཟ་བའི་ལྟུང་བྱེད་བསྲུང་ཚུལ་ལ། ལྟུང་བའི་རྣམ་གཞག་ནི། བཅས་ལྡན་དགེ་སློང་ནད་པ་མིན་པས། མུ་གེ་དང་མུ་གེ་དང་འདྲ་བའི་དུས་མིན་པ་སྤངས་པའི་ཉིན་མཚན་གཅིག་པོ་དེ་ཉིད་ཡིན་པ། ཟས་སྐྱོ་མ་དང་ཐུག་པའམ་དེ་དང་འདྲ་བ་གཞན་དང་དཀོན་ཟས། ལྷག་བོར་གྱི་ཆོ་ག་བྱས་པ་མིན་པའི་དུས་རུང་གི་སྨན་རུང་བ་ཚད་ལྡན། སྟན་ཐོག་གཅིག་ཏུ་ཆོག་པར་ཟོས་ནས། ངག་གི་སྒོ་ནས་ཚིག་ལྷག་མ་མེད་པ་ལྔ། གསོལ་ཅིག །སོང་ཞིག །འཚལ་ལགས་སོ། །ཆོག་གོ །མི་ཟུའོ། །ཞེས་སྨྲས་ཤིང་སྟན་ལས་ལངས་ནས་དེ་ཉིད་སླར་བསམ་པ་འདུ་ཤེས་མ་འཁྲུལ་ཞིང་། ཀུན་སློང་ཟ་འདོད་རྒྱུན་མ་ཆད་པའོ། །སྦྱོར་བ་ཟ་བར་རྩོམ་པ་མཐར་ཐུག་མགུལ་དུ་མིད་ཚེ་སྤངས་ཟའི་ལྟུང་བྱེད་འབྱུང་བས་དེ་བསྲུང་ཞིང་། རེ་ཞིག་གསོལ་ཅིག་ཅེས་སོགས་སྦྱར་ན། ཚིག་ལྷག་མ་མེད་པར་མ་སོང་བས་ངག་གི་སྒོ་ནས་སྤངས་པར་མ་སོང་ཞིང་། ལུས་ངག་གཉིས་ཅར་གྱིས་སྤངས་པ་མ་ཚང་ན། (༡༣༥ན)
སྤངས་པ་ཡོངས་རྫོགས་སུ་མ་སོང་བས་ལྷག་བོར་མ་བྱས་པར་ཟོས་ཀྱང་སྤང་ཟའི་ལྟུང་བྱེད་མི་འབྱུང་བར་སེམས་སོ། །དེ་ཡང་བཟའ་བ་ལྔ་གང་རུང་ཞིག་སྤངས་ན་བཟའ་བཅའ་ཐམས་ཅད་སྤངས་པར་འགྱུར་ཏེ་གཙོ་བོ་ཡིན་པའི་ཕྱིར་རོ། །བཅའ་བ་ལྔ་གང་རུང་ཞིག་སྤངས་ན་བཅའ་བ་ཐམས་ཅད་སྤངས་བར་སོང་གི་བཟའ་བ་གང་ཡང་སྤངས་པར་མ་སོང་སྟེ། གཙོ་བོ་མ་ཡིན་པའི་ཕྱིར། ལྷག་པོར་གྱི་ཆོ་ག་ནི་གཞི་དངོས་པོ་གོང་དང་འདྲ། བསམ་པ་ལྷག་པར་བྱེད་འདོད་པས། སྦྱོར་བ་དང་པོར་བྱིན་ལེན་བྱས། ཡུལ་དེ་རྒན་ན་ཕྱག་བྱ་ཙོག་པུར་འདུག་སྟེ་གཉིས་ཀའི་ལག་པ་གཡོན་གྱི་མཐིལ་དུ་བཞག །གཡས་པས་སྟེང་ནས་བབ་སྟེ་ཆོ་གའི་སྔོན་རྗེས་སྨན་བྱིན་བརླབ་པ་བཞིན་ལ་ལྷག་བོར་གྱི་ཆོ་ག་ཞེས་བསྒྱུར། དངོས་གཞི་བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བས་འཚལ་མ་འཚལ་ལགས་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱིས་པ་ལས་བཟའ་བ་དང་བཅའ་བ་རྙེད་ཅིང་འཚལ་བར་འཚལ་ན་ལྷག་བོར་བགྱིས་ཏེ་བདག་ལ་སྩལ་དུ་གསོལ། ཐབས་ལེགས་སོགས་བརྗོད། ཡུལ་དེས་ཁམ་གཉིས་གསུམ་ཟོས་ནས་ཁྱོད་ཀྱིར་འགྱུར་གྱི་བཞུད་ཅིག་ཅེས་བརྗོད། ལུས་ངག་གཉིས་ཅར་གྱིས་མ་སྤངས་པའམ་ཡིད་ཀྱིས་མི་ཟ་བར་དམ་བཅས་པ་ཙམ་ལ་ལྷག་བོར་བྱས་ཀྱང་ཆོག་ལ་མ་བྱས་ཀྱང་འགལ་བ་མེད་དམ་བསམ་ཞིང་། ལྷག་བོར་བྱ་བའི་ཡུལ་དེ་དགེ་སློང་ཟས་ཟ་བའི་མུ་དང་བཅས་ཤིང་། སྟན་དེ་ལས་མ་ལངས་པ་སྤངས་པ་ཡོངས་རྫོགས་སུ་མ་སོང་བ་ཞིག་ངེས་པར་དགོས་ཏེ། མདོ་(༡༣༥བ)
རྩ་བར། གནས་མ་བཏང་བས་བྱ་བ་ཉིད་དོ། །ཞེས་དང་། ཚིག་ལེ་ལས། འདུག་ས་མ་ནོར་དགེ་སློང་གིས། །གང་ཟོས་དེ་ནི་ལྷག་བོར་ཡིན། །ཞེས་གསུངས་པས་སོ། །བརྩམས་ལྡང་ནི། དགེ་སློང་ནད་པ་མིན་པས་ཆོག་པར་ཟོས་མ་ཟིན་པ། དགག་བྱ་ཟིལ་གནོན་དུ་འགྲོ་བའི་དགག་དགོས་གཞན་མེད་པ། སྨན་རྣམ་བཞི་གང་རུང་ཟ་བའི་འཕྲོ་བ་ལྡང་འདོད་ཀྱི་བསམ་པ་རྒྱུན་མ་ཆད་ཅིང་འདུ་ཤེས་མ་འཁྲུལ་བས། སྦྱོར་བ་ལྡང་བར་རྩོམ་པ། མཐར་ཐུག་ལངས་པ་ན་འབྱུང་བས་དེ་བསྲུང་དགོས་ལ། ཁ་ཅིག་བྱིན་ལེན་བྱས་ནས་ཟོས་མ་ཟིན་བར་ལ་ལངས་ན་བརྩམས་ལྡང་འབྱུང་ཞེས་སོགས་མི་འཐད་དེ། སྦྱིན་བདག་གི་སྒོར་བྱིན་ལེན་བྱས་ནས་རང་ཁྱིམ་དུ་ཟ་བ་དང་། ཟས་གྲལ་དུ་བྱིན་ལེན་བྱས་ནས་གནས་གཞན་དུ་ཟ་བ་སོགས་ལ་ཉེས་པ་མེད་པའི་ཕྱིར་རོ། །ལྔ་པ་གསོག་འཇོག་བྱས་པ་ཟ་བའི་ལྟུང་བྱེད་བསྲུང་ཚུལ་ལ། བཅས་ལྡན་དགེ་སློང་གིས་གནང་བ་མ་ཡིན་པར་སྨན་རྣམ་བཞི་གང་རུང་རུང་བ་ཚད་ལྡན་རང་ངམ་རང་འདྲ་བས་གསོག་འཇོག་བྱས་ལ་མ་ཞིག་པ་ངོ་བོའི་སྒོ་ནས་རུང་ཞིང་ཆོ་གའི་སྒོ་ནས་མི་རུང་བ། དུས་སུ་མུ་གེ་དང་མུ་གེ་དང་འདྲ་བའི་དུས་མ་ཡིན་པ། བསམ་པ་འདུ་ཤེས་མ་འཁྲུལ་ཞིང་ཀུན་སློང་གསོག་འཇོག་བྱས་པ་ཟ་བར་འདོད་པ་རྒྱུན་མ་ཆད་པ། སྦྱོར་བ་ཟ་བར་རྩོམ་པ། མཐར་ཐུག་མགུལ་དུ་མིད་པའི་ཚེ་དངོས་གཞི་གྲུབ་ལ། གསོག་འཇོག་ཏུ་ནམ་སོང་ན། མདོ་རྩ་བར། སྔ་དྲོའི་ཟས་བྱིན་ལེན་བྱས་པ་ཕྱི་དྲོའི་ཟས་སུ་དང་། དེ་ཐུན་ཚོད་ལས་འདས་པ་ལྟ་བུ་ནི་གསོག་འཇོག་བྱས་པ་ཡིན་ནོ། །ཞེས་དང་། ཚིག་ལེར། སྔ་ཕྱི་གཉིས་སུ་སྤྱོད་པ་ཡི། །(༡༣༦ན)
དེ་ནི་རྣམ་པ་གཉིས་སུ་གསུངས། །ཞེས་པ་ལྟར། དུས་རུང་ནི། སྔ་དྲོ་ཟ་ཆེད་ཀྱི་བྱིན་ལེན་བྱས་པ་དེ་མ་ཞིག་པར་གུང་ཚིགས་ལས་འདས་པར་བཅང་ན་གསོག་འཇོག་ཏུ་འགྱུར་ལ། སྨན་ཕྱི་མ་གསུམ་བྱིན་གྱིས་མ་བརླབས་ན། སྔ་དྲོ་བྱིན་ལེན་བྱས་པ་མ་ཞིག་བར་གུང་ཚིགས་ཡོལ་བའི་ཚེ་དང་། ཕྱི་དྲོ་བྱིན་ལེན་བྱས་པ་ཐུན་ཚོད་ཀྱི་མཐར་གསོག་འཇོག་ཏུ་འགྱུར། བྱིན་གྱིས་བརླབས་ཚེ་ཐུན་ཚོད་དུ་རུང་བ་སྤྱིར་བཏང་ཐུན་ཚོད་ཀྱི་མཐའ་དང་། དམིགས་བསལ་ཞག་བདུན་པའི་རྒྱུ་ལས་བྱུང་བའི་ཐུན་ཚོད་དུ་རུང་བའི་སྨན་ཐུན་ཚོད་ལས་འདས་ཙམ་གྱི་གསོག་འཇོག་ཏུ་མི་འགྱུར། ཞག་བདུན་པ་ནི་ཞག་བརྒྱད་པའི་སྐྱ་རེངས་ཤར་ཚེ་གསོག་འཇོག་ཏུ་འགྱུར། འཚོ་བཅང་ནི་བྱིན་གྱིས་བརླབས་པར་གསོག་འཇོག་མི་འབྱུང་སྟེ། རྒྱ་ཆེར་འགྲེལ་ལས། འཚོ་བའི་བར་དུ་བཅང་བར་བྱིན་གྱིས་བརླབས་པ་རྣམས་ལ་ནི་ཆོ་ག་འདི་མེད་དོ། །དེ་དག་ལ་དུས་ཡོངས་སུ་ཆད་པ་མེད་པ་དང་། དུས་ཐམས་ཅད་དུ་བཟའ་བར་བྱ་བ་ཡིན་ནོ། །འཚོ་བའི་བར་དུ་བཅང་བ་བྱིན་གྱིས་མ་བརླབས་པ་རྣམས་ནི། དུས་ཀྱི་ཕྱིར་བསྡུས་པ་ཡིན་ནོ། །ཞེས་གསལ་བར་བཤད་པའི་ཕྱིར་རོ། །དེའི་ཆར་གཏོགས་བཞིའི་ལག་ཉ་ནི། བཅས་ལྡན་དགེ་སློང་ནད་པ་མིན་པས། གནས་སྒྲ་མི་སྙན་མ་གཏོགས་པར་རང་གི་ལུས་སམ་ལུས་དང་འབྲེལ་བའི་དབྱུག་པ་སོགས་ཀྱི་དུས་མུ་གེ་དང་མུ་གེ་དང་འདྲ་བའི་དུས། དོན་ཁྱད་པར་ཅན་སྒྲུབ་པ། རང་དབང་མེད་པ་སོགས་གནང་བའི་དུས་མིན་པར། དངོས་པོ་སྨན་རྣམ་བཞི་ངོ་བོ་རྫོགས་པ་རུང་བ་ཚད་ལྡན། ཟས་དངོས་སམ་ནས་ཀྱི་འབྲུ། དེའི་བང་བ། (༡༣༢༦)
རྩམ་རྐྱལ་སོགས་དེ་དང་ཉེ་བའི་སྟ་གོན་དུ་གནས་པ། རང་ངམ་རང་དང་འདྲ་བ་དབང་ཞིང་གནས་སྐབས་དབང་བྱར་ཡོད་པ། བྱིན་ལེན་སྟོབ་པར་འོས་པ་དང་མ་འབྲེལ་བ་རང་ངམ་རང་དང་འདྲ་བས་བྱིན་ལེན་ཆགས་ལ་མ་ཞིག་པ་མ་ཡིན་པ། ཆུད་ཟ་བའི་རྐྱེན་མེད་པ། གཞི་བརྟན་པོ་དང་མ་འབྲེལ་བར་དགོས་པ་ཟ་ཆེད་མ་ཡིན་པར། བསམ་པ་འདུ་ཤེས་མ་འཁྲུལ་ཞིང་ཀུན་སློང་རེག་འདོད་རྒྱུན་མ་ཆད་པ། སྦྱོར་བ་དེ་ལྟར་རྩོམ་པ་མཐར་ཐུག་རང་གི་ལུས་དངོས་སམ་ལུས་དང་འབྲེལ་བས་རིག་ན་ལག་ཉར་སོང་བས་དེ་དགེ་སློང་ལ་མི་རུང་བའི་ཟས་ཡིན་པས་ཟོས་ན་ཉེས་བྱས་འབྱུང་བ་ཡིན་ནོ། །འདི་ལ་འདུལ་འཛིན་ཕལ་ཆེར་རེག་པ་ཙམ་གྱིས་ལག་ཉར་སོང་བར་བཞེད་ཀྱང་། མཁས་གྲུབ་དཔལ་ལྡན་སངས་རྒྱས་དང་། མཁས་མཆོག་ཤཱཀྱ་མཆོག་ལྡན། ལག་ཉ་ལ་ཟ་ཆེད་མིན་པར་རེག་པ་ཞིག་དགོས་ཏེ། དེ་མིན་བྱིན་ལེན་མ་བྱས་པར་ཟ་བའི་ལྟུང་བྱེད་མེད་པར་ཐལ་བའི་ཕྱིར་གསུང་བ་བདེན་ཏེ། ལག་ཉར་སོང་བ་དེ་ནི་མི་རུང་བའི་ཟས་ཡིན་པས། དེ་ཟོས་པ་ལ་བྱིན་ལེན་མ་བྱས་པའི་ལྟུང་བྱེད་དངོས་གཞི་མི་སྐྱེད་ལ། ཟ་བྱེད་དུ་ཟས་ལ་རེག་པ་དེ་ནི་བྱིན་ལེན་མ་བྱས་པར་ཟ་བའི་སྦྱོར་བ་ཡིན་ཏེ། ལག་ཉ་མ་ཡིན་པའི་ཕྱིར་རོ། །གཉིས་པ་མཚམས་བཙོས་ནི། གནས་རང་ངམ་རང་དང་འདྲ་བ་དབང་བའི་མཚམས་ནང་ཉེ་འཁོར་དང་བཅས་པ་རུང་ཁང་མ་བཅད་པ། ཟས་སྨན་རྣམ་བཞི་རུང་བ་ཚད་ལྡན། རང་ངམ་རང་དང་འདྲ་བ་དབང་བ་ཆུད་འཛའ་བའི་རྐྱེན་མེད་པ་རྗེན་པ་དང་མ་བྲལ་བ། ཟས་དངོས་སམ། དེའི་ཉེ་(༡༣༧ན)
བའི་སྟ་གོན་དུ་གནས་པ། བདག་ཉིད་གནས་པའི་དུས་ཅན་མིན་པ། བསམ་པ་འདུ་ཤེས་མ་འཁྲུལ་ཞིང་། ཀུན་སློང་མེའམ་རླངས་པ་སོགས་ལ་རེག་འདོད་རྒྱུན་མ་ཆད་པ། སྦྱོར་བ་རང་ངམ་བསྐོས་པས་རེག་པར་རྩོམ་པ་མཐར་ཐུག་རེག་པ་ན་གྲུབ། རྗེན་པ་དང་མ་བྲལ་བའི་མཚན་ཉིད་ནི། ཤ་སྐམ་པོ་དང་འབྲས་སོགས་མི་སྙི་པ་སུམ་ཆ་བངས་པ་དང་། ཤ་རློན་པ་ལྟ་བུ་སྙི་བ་རྣམས་ཁ་དོག་འགྱུར་བ། ཐུག་པ་འོ་མ་སོགས་ཁུ་བ་རྣམས་ལན་གསུམ་འཁོལ་ན་རྗེན་པ་དང་བྲལ། དེའི་སྔ་རོལ་ནི་རྗེན་པ་དང་མ་བྲལ་བའོ། །གསུམ་པ་ཞག་ལོན་ལ་གནས་སྨན་གཞན་གོང་བཞིན་ལ། རྗེན་པ་དང་བྲལ་མ་བྲལ་ཁྱད་མེད། ཀུན་སློང་མཚམས་ནང་དེར་ཞག་ལོན་པར་འདོད་པ་རྒྱུན་མ་ཆད་པ། སྦྱོར་བ་རང་ངམ་བསྐོས་པས་མཐར་ཐུག་མཚམས་ནང་དེར་སྐྱ་རེངས་ཤར་བའོ། །བཞི་པ་རྗེན་བཙོས་ལ་གཞི་བསམ་སྦྱོར་བ་མཐར་ཐུག་དངོས་གཞི་སོགས་མཚམས་བཙོས་དང་འདྲ་། འོན་ཀྱང་གནས་གང་དུ་སླེབ་ཀྱང་གྲུབ། རྗེན་བཙོས་འདི་དང་དགེ་སློང་གིས་བཙོས་པ་གཉིས་གཅིག་ཡིན་ལ། དེ་ལྟར་ལག་ཉ་མཚམས་བཙོས་ཞག་ལོན། རྗེན་བཙོས་རྣམས་དགེ་སློང་གིས་བཟའ་བར་མི་བྱ་སྟེ། དེ་དག་ངོ་བོའི་སྒོ་རུང་མི་རུང་ལ་མ་བལྟོས་པར་ཆོ་གའི་སྒོ་ནས་མི་རུང་བར་སོང་བས་ཉེས་བྱས་བསྐྱེད་དོ། དྲུག་པ་དེ་ལས་གཞན་པ་གཞན་ཡང་བསྲུང་ཚུལ་ལ། བཅས་ལྡན་དགེ་སློང་གིས་གནང་བའི་དུས་དང་མུ་གེའི་དུས་མ་གཏོགས་པར་ཉིན་གཅིག་ལ་རང་དང་ནོར་ཁ་མི་གཅིག་ཅིང་། སྦྱིན་པ་པོ་ཁྱིམ་པ་ཐ་སྙད་ལྔ་ལྡན་ནོར་ཁ་མི་གཅིག་པ་ཐ་དད་གཉིས་(༡༣༧བ)
ལས་ལན་གཉིས་སུ་བཟའ་བ་ལྔ་གང་རུང་མགྲོན་གྱི་ཚད་དུ་ལོངས་པ། ཀུན་སློང་ཟས་སྔ་མ་དེ་ཟོས་ནས་ཕྱི་མ་དེའི་ཟས་ཟ་འདོད་རྒྱུན་མ་ཆད་ཅིང་། འདུ་ཤེས་མ་འཁྲུལ་བ། སྦྱོར་བ་ཟས་ཕྱི་མ་དེ་ཟ་བར་རྩོམ་པ། མཐར་ཐུག་མགུལ་དུ་མིད་པ་ན་ཡང་ཡང་ཟ་བའི་ལྟུང་བྱེད་འབྱུང་བས་དེ་བསྲུང་དགོས་ལ། སེལ་བ་ནི། ནད་པ་དང་། ལམ་དུ་འགྲོ་བ་དང་། ལས་བྱེད་པ་དང་། སྦྱིན་བདག་ཕྱི་མ་དེ་ལ་ཆོས་གོས་ཀྱི་རྙེད་པ་འབུལ་རྒྱུ་ཡོད་ན་ལྟུང་བྱེད་མི་འབྱུང་སྟེ། ཚིག་ལེར། ནད་དང་ཆོས་གོས་ལས་དང་ལམ། །དུས་མ་གཏོགས་པར་སྡོམ་བརྩོན་ནི། །ཟས་ནི་གཞན་དུ་འདོད་པ་ཡིས། །ཡང་ཡང་ཟ་ན་ལྟུང་བྱེད་ཡིན། །ཞེས་དང་། ནད་པ་སོགས་ཀྱི་ཚད་ཀྱང་དེ་ཉིད་ལས། ལན་ཅིག་ཟོས་པས་མི་འཚོ་བ། །དེ་ནི་ནད་པ་ཞེས་བྱའོ། །དཔག་ཚད་ཕྱེད་དུ་སོར་ནས་ནི། །སྡོམ་བརྩོན་སླར་ཡང་ལོག་པ་ན། །དེ་ནི་ལམ་དུ་ཤེས་བྱ་སྟེ། །ཡང་ཡང་ཟ་ལ་ཉེས་པ་མེད། །གཙུག་ལག་ཁང་ངམ་མཆོད་རྟེན་ལ། །ཐ་ན་རེ་ལྡེ་ཙམ་ཡང་རུང་། །བྱུག་གམ་ཀུན་ནས་སྙོམས་བྱེད་ན། །ལས་བྱེད་དུས་སུ་བརྗོད་པ་ཡིན། །ཡུལ་བཞིར་ཁྲུ་གང་ཙམ་གྱིས་ཀྱང་། །ཆོས་གོས་ཀྱི་ནི་དུས་སུ་འདོད། །ཀུན་ཏུ་གོས་ནི་མི་རྙེད་ཕྱིར། །ཀུན་མཁྱེན་ཐུགས་རྗེ་ཅན་གྱིས་གནང་། །ཉེ་དུ་འབྲེལ་པ་ཁོ་ན་ལ། །ལན་བརྒྱར་བཟའ་བ་ཟོས་ཀྱང་ནི། །ལྟུང་བའི་དྲི་མ་ཡོད་མ་ཡིན། །ཞེས་གསུང་པ་རིན་ཅེན་འཕྲེང་བ་སོགས་འདུལ་འཛིན་སྔ་མའི་ཡིག་ཆ་རྣམས་སུ་རྒྱས་བཤད་དང་ཚིག་བརླིང་བ་སོགས་ཀྱིས་རྟོགས་དཀའ་བ་འདིར་གོ་གསལ་སྙིང་པོར་འདྲིལ་བ་(༡༣༨ན)
ནས་ཁོལ་དུ་ཕྱུང་བ་དཔྱོད་ལྡན་སྙིང་གི་ཐིག་ལེར་འཛིན་པའི་གནས་སོ། །
གསོ་སྦྱོང་གི་གཞི་བཤད་པ།
འདུལ་བ་མདོ་རྩ་ལས། གསོ་སྦྱོང་གི་གནས་ལ་བློ་མཐུན་པར་བྱའོ། །ཞེས་གསུངས། སྐབས་འདིར་དམིགས་ཀྱི་བསལ་བ་བསྙེན་རྫོགས་ཀྱི་གནས་ལ་བློ་མཐུན་ཡིན་ཀྱང་། གསོ་སྦྱོང་། དབྱར་གནས། དགེ་འདུན་གྱི་ལས་ཕལ་མོ་ཆེར་བློ་མཐུན་པ་དགོས་ཏེ། གནས་ལ་བློ་མཐུན་བྱས་པས་དགེ་འདུན་རྣམས་ཐུགས་མཐུན་པར་འགྱུར་བ་དང་། བྱེ་བྲག་ཏུ་ལས་ཀྱི་བྱ་བ་ཀླག་ཅོར་དུ་མི་འགྱུར་བའི་དགོས་པ་ཁྱད་པར་ཅན་ཡོད་ཅིང་། དེ་ལའང་གནས་ཀྱི་མཚན་ཉིད་སྤྱིར་བསྟན་པ་དང་། བྱེ་བྲག་ཏུ་བཤད་པ་གཉིས། དང་པོ་ནི། གནས་ཐམས་ཅད་གྲུབ་པའམ་བྱས་པའམ་ཟིན་པ་ལའོ། །ཕྱི་རོལ་ཉེ་འཁོར་འདོམ་གང་དང་ལྡན་པ་ལའོ། །དགེ་འདུན་འདོད་ནའོ། །ལས་གཞན་གྱི་གནས་ཀྱང་དེ་ཉིད་ཡིན་ནོ། །ཞེས་གསུངས་པས་བསྐལ་པ་ཆགས་པའི་ཚེ་གྲུབ་པའམ། དེའི་འོག་ཏུ་གཏིབ་ཆད་པ་ལས་གྲུབ་པ་རིའི་བྱ་སྐྱིབས་ལ་སོགས་པ་ནི་གྲུབ་པ་ཞེས་བྱ། སྐྱེས་བུས་མངོན་པར་བསྒྲུབ་པ་སྟེ་བྱས་པ་དང་། བསྒྲུབས་ཚར་བ་སྟེ་ཟིན་པ་ཞེས་བྱ། དེ་ཡང་ཉེ་འཁོར་འདོམ་གང་དང་བཅས་པ་དེར་མི་འདོད་བཞིན་དུ་མ་ཡིན་པ་བློ་མཐུན་པ་དགོས་ལ། དེ་ནི་གསོ་སྦྱོང་ཁོ་ནར་མ་ཟད་ལས་གཞན་གྱི་གནས་ཀྱང་ཡིན་ནོ། །ཞེས་ཤེས་པར་བྱ་བའི་ཕྱིར་ཡིན། གཉིས་པ་ལ་མཚམས་བུ་ཆེ་བཅད་ཚུལ། མཚམས་བུ་ཆུང་བཅད་ཚུལ། རང་བཞིན་གྱིས་གྲུབ་པའི་མཚམས། དེ་དག་གི་དགོས་པ་བསྟན་པ་དང་བཞི། དང་པོ་ནི། མཚམས་ཀྱི་ཚད། གཅོད་པའི་ཚུལ། དེའི་(༡༣༨བ)
ཆོ་ག་གསུམ་གྱི། དང་པོ་ནི། མཚམས་བཅད་པར་བྱའོ། །དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དོ། །ཞེས་གསུངས་པ། རྒྱ་ཆེར་འགྲེལ་དུ། ཕྱོགས་བཞིར་དཔག་ཚད་ཕྱེད་གསུམ་གྱི་མཐའ་ཚུན་ཆད་དོ་ཞེས་བྱ་བའི་ཐ་ཚིག་གོ །ཞེས་དང་། དབུས་ནས་དཔག་ཚད་ཕྱེད་དང་གསུམ་གྱི་མཐའ་ལས་ལྷག་པར་མཚམས་བཅད་པ་མི་ཆགས་སོ། །ཞེས་གསུངས་པ་གནས་དེའི་དབུས་ནས་གཞལ་བ་ཡིན་པས་ཤར་ནས་ནུབ་ཀྱི་མཐའི་བར་དཔག་ཚད་ལྔ་ཙམ་མོ། །གཉིས་པ་གཅོད་པའི་ཚུལ་ལ། ཕྱོགས་ཕྱོགས་སུ་ཕ་བོང་དང་། རྩིག་པ་དང་། ཀ་བ་དང་། ཤིང་ལྗོན་པ་དང་། ར་བ་དང་། བྱ་སྐྱིབས་དང་། ལམ་པོ་ཆེ་དང་། ཁྲོན་པ་ལ་སོགས་པ་དེ་ཤེས་པའི་དགེ་སློང་རྣམས་ཀྱིས་བརྟགས་ནས་དགེ་འདུན་གྱི་མདུན་དུ་མཚན་མ་བརྟན་པོ་བརྗོད་དེ་ལས་བྱའོ། །ཞེས་པས། དགེ་སློང་དེ་ན་གནས་པའམ་གཉུག་མར་གནས་པས་དགེ་འདུན་གྱི་སྤྱན་སྔར་མཚན་མ་དེ་དག་བརྗོད་དེ་ལས་བྱ་བ་ཡིན་ལ། དེ་ཡང་ལུང་དང་ཀརྨ་ཤ་ཏམ་ལས། དང་པོར་དགེ་སློང་གནས་པ་དང་གཉུག་མར་གནས་པ་རྣམས་ཀྱིས་དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུ་མཚམས་ཆེན་པོ་ཕྱོགས་བཞིར་མཚན་མ་བརྟན་པོ། ཕ་བོང་དང་རྩིག་པའམ་ཀ་བའམ་ཤིང་ལྗོན་པའམ་བྱ་སྐྱིབས་སམ་ལམ་པོ་ཆེའམ་ཁྲོན་པ་ལ་སོགས་པའི་མཚན་མ་བརྟན་པོ་གཟུགས་པར་བྱའོ་། །དེའི་འོག་ཏུ་གནས་མལ་བཤམས་པ་བྱས་ནས་གཎྜི་བརྡུངས་ཏེ། དྲིས་པའི་ཚིག་གིས་དགེ་སློང་མ་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གནས་པ་དང་གཉུག་(༡༣༩ན)
མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་བཙུགས་པ་དག་བརྗོད་པར་བྱའོ། །དེའི་འོག་ཏུ་དགེ་སློང་ལས་བྱེད་པ་གཅིག་གིས་གསོལ་བ་བྱས་ཏེ་ལས་བྱའོ། །ཞེས་གསུངས།གསུམ་པ་ཆོ་ག་ནི། དེ་ཉིད་ལས། འདི་ལྟར་བྱ་སྟེ། འདུག་ལ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། འདི་ལྟ་སྟེ། གནས་འདི་ན་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་ཆེན་པོའི་ཕྱོགས་བཞིའི་མཚན་མ་བརྟན་པོ་བརྗོད་པ་ཤར་ཕྱོགས་སུ་ནི། ཕ་བོང་གི་མཚན་མའམ། རྩིག་པའི་མཚན་མ་བརྟན་པོ་ལགས། ལྷོ་ཕྱོགས་སུ་ནི། ཀ་བའི་མཚན་མའམ། ཤིང་ལྗོན་པའི་མཚན་མ་བརྟན་པོ་ལགས། ནུབ་ཕྱོགས་སུ་ནི། ར་བའི་མཚན་མའམ། བྱ་སྐྱིབས་ཀྱི་མཚན་མ་བརྟན་པོ་ལགས། བྱང་ཕྱོགས་སུ་ནི། ལམ་པོ་ཆེའི་མཚན་མའམ། ཁྲོན་པའི་མཚན་མ་བརྟན་པོ་ལགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱི་གནང་བར་མཛོད་ཅིག་དང་། དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པ་འདི་ལྟ་སྟེ་གནས་བསྡུ་བ་དང་། དགེ་སློང་རྣམས་བདེ་བ་ལ་རེག་པར་གནས་པར་བགྱི་བའི་སླད་དུ་དགེ་འདུན་གྱི་གྲོང་དང་གྲོང་གི་ཉེ་འཁོར་མ་གཏོགས་པར་དགོན་པ་ལ་ཐུག་པ་དང་གནས་མལ་ལ་ཐུག་གི་བར་དུ་(༡༣༩བ)
མཚམས་ཆེན་པོ་གཅོད། འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་ནས། མཚན་མ་བརྟན་པོ་ལགས་ཏེ། དེའི་སླད་དུ་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པ་འདི་ལྟ་སྟེ་ནས། མཚམས་ཆེན་པོ་གཅོད་ན་ཚེ་དང་ལྡན་པ་གང་དག་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་སོགས་ནས་མཚམས་ཆེན་པོ་བཅད་པར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱི་བཟོད་ཅིང་གནང་ན་དགེ་འདུན་གྱིས་མཚན་མ་འདི་རྣམས་ཀྱི་ནང་དུ་གསོ་སྦྱོང་གཅིག་པའི་གནས་ཀྱི་སྡོམ་པ་འདི་ལྟ་སྟེ་ནས། མཚམས་བཅད་ལགས་ཏེ་འདི་ལྟར་ཧ་ཅང་མི་གསུང་བས་དེ་དེ་བཞིན་དུ་འཛིན་ཏོ། །ཞེས་གསུངས་ལ། འདིར་མཚན་མ་ནི་དཔེར་བརྗོད་པ་ཙམ་དུ་གསུངས་ཀྱི་ཕྱོགས་བཞིར་མཚན་མ་དེ་དག་ལས་གང་རུང་རེ་ཡོད་པས་ཆོག་ལ་ཆོ་གའི་སྐབས་སུའང་མཚན་མ་གང་ཡོད་ཀྱི་མིང་ནས་སྨོས་ཏེ་བརྗོད་པ་མ་གཏོགས། ཤར་ཕྱོགས་སུ་ནི་ཕ་བོང་གི་མཚན་མའམ་རྩིག་པའི་མཚན་མ་ཞེས་སོགས་གཉིས་བརྗོད་མི་དགོས་པར་མངོན། །གཉིས་པ་མཚམས་བུ་ཆུང་བཅད་པ་ལ་ཚད། གཅོད་ཚུལ། ཆོ་ག །དོགས་གཅོད་བཞི་ལས། དང་པོ་ནི། ཐམས་ཅད་ཀྱི་ཆེད་དུ་དཀྱིལ་འཁོར་པ་བློ་མཐུན་བྱའོ། །ཞེས་དང་། རྒྱ་ཆེར་འགྲེལ་ལས། སྔར་མཚམས་ཆེན་པོ་བཅད་ཟིན་ནས་དེའི་འོག་ཏུ་ལས་ཐམས་ཅད་ཀྱི་ཆེད་དུ་ཞེས་བྱ་བ་གསོ་སྦྱོང་འབའ་ཞིག་གི་ཆེད་དུ་མ་ཟད་ཀྱི་འདུལ་བ་དང་ལྡན་པའི་ལས་ཐམས་ཅད་ཀྱི་ཆེད་དུ་མཚམས་ཆུང་ངུ་བཅད་ཅིང་དཀྱིལ་འཁོར་པར་(༡༤༠ན)
བློ་མཐུན་པར་བྱའོ། །ཞེས་གསུངས་པ་ལས་གསལ་བར་མ་བཤད་ཀྱང་། མཚོ་སྣ་པ་དཀྱིལ་འཁོར་པའི་ཚད་གདིང་བ་བཞི་བཅུ་དང་བསྒྲུབ་བྱ་གཤོང་བ་སྟེ། ལུང་ལས། དཀྱིལ་འཁོར་གང་དུ་གྲངས་བཞི་བཅུ་བསྒོ་བ་གཤོང་བའོ། །ཞེས་གསུངས། བུ་ཊཱིཀ་ཏུ་ཆེ་ཚད་དཔག་ཚད་གཉིས་སམ་རྒྱང་གྲགས་ནས་ཆུང་ཚད་གདིང་བ་བཞི་བཅུ་གཤོང་བར་བཤད། ཊཱིཀ་ཆེན་རིན་ཅེན་ཕྲེང་བ་དང་། པཎ་ཆེན་བློ་གྲོས་ལེགས་བཟང་པ། ཆོས་རྗེ་བདེ་ལེགས་ཉི་མ་རྣམས་ཆེ་ཚད་རྒྱང་གྲངས་ནས་ཆུང་ཚད་འདིང་བ་བཞི་བཅུ་གཤོང་བ་ཙམ་དུ་བཞེད་པ་མཐུན། གཉིས་པ་གཅོད་ཚུལ་ནི་ལུང་དང་ཀརྨ་ཤ་ཏམ་ལས། དེའི་འོག་ཏུ་མཚམས་བུ་ཆུང་བཅད་ཅིང་དཀྱིལ་འཁོར་པར་བློ་མཐུན་པར་བྱ་བ་ནི་འདི་ལྟར་བྱ་སྟེ། ཇི་དང་པོར་དགེ་སློང་གནས་པ་དང་། གཉུག་མར་གནས་པ་རྣམས་ཀྱིས་མཚམས་བུ་ཆུང་གི་ཕྱོགས་བཞིའི་མཚན་མ་བརྟན་པོ་སེང་ལྡེང་གི་ཕུར་པ་གདབ་པའམ། སྲད་བུ་བྲེས་པའམ། རྡོ་བཞག་པའམ། སྲོལ་གཏོད་པ་ལ་སོགས་པའི་མཚན་མ་བརྟན་པོ་གཟུག་པར་བྱའོ། །དེའི་འོག་ཏུ་ཞེས་སོགས་གསུངས། གསུམ་པ་ཆོ་ག་དངོས་ནི། གསོལ་བ་དང་གཉིས་ཀྱི་ལས་གོང་དང་འདྲ་བ་ལ། ཤར་ཕྱོགས་སུ་ནི་སེང་ལྡེང་གི་ཕུར་པ་བཏབ་པ་ལགས། ལྷོ་ཕྱོགས་སུ་ནི་སྲད་བུ་བྲེས་པ་ལགས། ནུབ་ཕྱོགས་སུ་ནི་རྡོ་བཞག་པ་ལགས། བྱང་ཕྱོགས་སུ་ནི་སྲོལ་བཏོད་པ་བརྟན་པོ་ལགས་ན། ཞེས་སོགས་ལྟ་བུར་ཕྱོགས་སོ་སོར་མཚན་མ་གང་བཞག་པ་བཞིན་དུ་བརྗོད་པ་ཁྱད་པར་དུ་བྱས་པ་བྱ། བཞི་པ་དོགས་གཅོད་ནི། འོན་ཀྱང་འདི་ལ་དཀྱིལ་འཁོར་པ་(༡༤༠བ)
དང་། མཚམས་བུ་ཆུང་གཅིག་པར་བཞེད་པ་དང་། མི་གཅིག་པར་བཞེད་པའི་ལུགས་གཉིས་བྱུང་ལ། མཚོ་སྣ་པ་ཆེན་པོ་ནི། སྤྱིར་དཀྱིལ་འཁོར་པ་དང་མཚམས་བུ་ཆུང་མི་གཅིག་སྟེ། དཀྱིལ་འཁོར་པ་ཡིན་ན་མཚམས་བུ་ཆུང་ཡིན་པས་ཁྱབ་ཀྱང་། མཚམས་བུ་ཆུང་ཡིན་ན་དཀྱིལ་འཁོར་པ་ཡིན་པས་མ་ཁྱབ་སྟེ། གདིང་བ་བཞི་བཅུ་བསྒྲུབ་བྱ་དང་བཅས་པ་ཤོང་བའི་ཚད་དེ་ལས་ཆེ་ལ། མཚམས་ཆེན་ལས་ཆུང་བའི་མཚམས་བཅད་པ་དེ་དེ་འདྲ་ཡིན་པའི་ཕྱིར་གསུངས། གཞན་ཡང་། མཚོ་མཆན་དུ། འདིའི་འགྲེལ་ཆུང་ལས་མཚམས་བུ་ཆུང་མིག་རས་ཀྱིས་བཅད་ལ་གསོལ་བ་དང་བརྗོད་པ་མི་དགོས་ཏེ་དེའི་ནང་དུ་གསོ་སྦྱོང་བྱར་རུང་ངོ་ཞེས་བཤད་པ་འདི་ནི། འདུལ་བ་སྟོད་ལུགས་པ་རྣམས་མི་འགུ་ཡང་འདུལ་འཛིན་བརྒྱུད་པའི་མན་ངག་སྟེ། དེང་སང་གི་དགེ་སློང་རྣམས་འཁྲུལ་བཅས་ཤས་ཆེ་བས་དེ་དག་གི་མ་འདུས་པའི་མི་མཐུན་པ་བསྐྱེད་ཀྱང་། དགེ་སློང་མ་འདུས་པར་ལས་བྱེད་པ་འདི་མི་རིགས་སྙམ་དུ་ཐེ་ཚོམ་སེལ་བའི་དགོས་པ་ཡོད་དོ། །ཞེས་ཀྱང་གསུངས། སྐབས་འདིར་མཚམས་བུ་ཆུང་དེ་ཡང་མཚམས་ཆེན་མ་བཀྲོལ་བར་མི་ཆགས་ཏེ། སྔ་མ་བག་ཡངས་སུ་མ་བྱས་པར་བཅད་པ་གཞན་མི་ཆགས་སོ། །ཞེས་གསུངས་སོ། །འོ་ན་ལྷན་ཅིག་ཏུ་འཆགས་སམ་ཞེ་ན། འཆགས་ཏེ་ཚིག་གཅིག་གིས་མཚམས་གཉིས་བཅད་པ་དང་འགྲོལ་དུ་རུང་ངོ་། །ཞེས་པའི་རྒྱ་ཆེར་འགྲེལ་ལས། དཀྱིལ་འཁོར་པ་གཅིག་ཏུ་ལས་བྱེད་པ་གཅིག་གི་གསོལ་བ་དང་ལས་བརྗོད་པའི་ཚིག་གཅིག་གིས་མཚམས་གཉིས་ཅིག་ཅར་དུ་དགྲོལ་དུ་རུང་བའོ། །འདིར་གཞུང་གིས་(༡༤༡ན)
མཚམས་གཉིས་ཀར་དགེ་འདུན་བཀོད་ནས་ལས་བྱེད་པའི་དགེ་སློང་གིས་མཚམས་གཉིས་ཀར་ཤིང་ངམ་དབྱུག་པའམ་རེ་ལྡེས་མནན་ནས་གསོལ་བ་བྱས་ཏེ་ལས་བྱའོ། །ཞེས་སོགས་གསུངས་སོ། །གསུམ་པ་རང་བཞིན་གྱིས་གྲུབ་པའི་མཚམས་ནི། མཚམས་བཅད་པའི་གནས་སུ་ནི། ལས་ལ་རྩིག་པ་མཚམས་ཡིན་ནོ། །ཝ་ཁ་ནས་ཆུ་འཛག་པ་གང་དུ་འབབ་པ་ཡང་ངོ་། །གྲོང་ལ་ནི་ཉེ་འཁོར་གྱི་མཐའ་ཚུན་ཆད་དོ། །དགོན་པ་ལ་ནི་ཕྱོགས་ཕྱོགས་སུ་རྒྱང་གྲགས་ཀྱི་མཐའ་ཚུན་ཆད་དོ། །ཞེས་དང་། རྒྱ་ཆེར་འགྲེལ་ལས། མཚམས་མ་བཅད་པའི་གནས་གང་ཡིན་པ་དེར་ནི་ལས་བྱ་བའི་ཡུལ་ལ་གཙུག་ལག་ཁང་གི་རྩིག་པ་ཉིད་མཚམས་ཡིན་པའོ། །ཞེས་དང་། འདིར་ལས་ལ་ཞེས་སྨོས་པ་ནི་ལས་ཀྱི་གཞིར་སྤྱིར་བསྟན་པ་གསོལ་བ་དང་། གསོལ་བ་དང་གཉིས་དང་གསོལ་བ་དང་བཞིའི་ལས་བརྒྱ་རྩ་གཅིག་པོ་དག་ཉེ་བར་བཟུང་བར་མ་ཟད་ཀྱི་འདུལ་བ་དང་ལྡན་པའི་ལས་ཐམས་ཅད་བསྡུས་པར་རིག་པར་བྱའོ། །དེ་ལྟར་གྱུར་ན་དབྱར་གནས་པ་འདྲལ་བ་ལའང་རྣམ་པ་འདི་ཉིད་ཡིན་ཏེ་འདི་ལྟར་དབྱར་གནས་པར་ཁས་བླངས་པའི་མཚམས་གང་ཡིན་པ་དེ་ཉིད་ཀྱང་འདི་ཡིན་ལ་མཚམས་འདིར་རྙེད་པ་བགོ་བ་དང་། ཤི་བའི་ཡོ་བྱད་བྱིན་གྱིས་བརླབ་པའང་འདུས་པ་ཡིན་ནོ། །དེ་ལྟར་ཡང་ཚེ་དང་ལྡན་པ་ཉེ་དགའ་གཙུག་ལག་ཁང་ནས་ཐག་རིང་པོ་ན་འདུག་པས་ཁོ་བོ་མཚམས་སུ་གཏོགས་པས་རྙེད་པ་དབང་ངོ་། །ཞེས་སྨྲས་པ་ཡིན་ནོ། །ཞེས་དང་། ཁང་སྟེང་གི་ཆུ་ཁུང་དུ་ཝ་ཁ་བཙུགས་པའི་ནང་ནས་ཆུ་(༡༤༡ན)
འཛག་པའི་སྣས་གང་དུ་སླེབས་པ་ཚུན་ཆད་ཀྱང་མཚམས་ཀྱི་ཁོང་དུ་གཏོགས་པ་ཡིན་ནོ། །ཡང་དེ་ཞེས་བྱ་བའི་སྒྲས་ནི་གཅིག་གམ་གཉིས་སུ་བརྟག་པ་ཡིན་གྱི་འདིའང་མཚམས་གཅིག་ཡིན་ནོ། །ཞེས་བྱ་བར་བསྟན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། མདོ་སྔ་མས་ནི་མཚམས་མ་བཅད་པའི་གནས་རྩིག་པས་བསྐོར་བ་ལ་ནི་གཙུག་ལག་གི་རྩིག་པ་ཉིད་ལས་ལ་མཚམས་ཡིན་པར་བསྟན་ཏོ། །མདོ་འདིས་ནི་མཚམས་མ་བཅད་པའི་གནས་རྩིག་པས་མ་བསྐོར་བ་ལ་ནི་ཝ་ཁ་ནས་ཆུ་འཛག་པའི་སྣས་གང་དུ་བབ་པ་ཚུན་ཆད་ལས་ལ་མཚམས་ཡིན་པར་བསྟན་ཏོ། །ཞེས་དང་། གྲོང་ལ་ནི་སྔར་འབྲལ་བའི་སྐབས་སུ་གྲོང་གི་ཉེ་འཁོར་བསྟན་པ་དེའི་མཐའ་ཚུན་ཆད་མཚམས་ཡིན་པའོ། །ཞེས་གསུངས་པས། དེ་ཡང་འབྲལ་སྤང་གི་སྐབས་སུ་རྩིག་པས་བསྐོར་བའི་གྲོང་ལ་ནི་ཇི་ཙམ་དུ་བ་ལང་དྲུག་དང་ལྡན་པའི་ཤིང་རྟ་སྨྱིག་མ་ཅན་གྱི་འམ་བྱ་གག་སྤར་ནས་འདུག་པའི་ལམ་གྱིས་ཁྱབ་པའོ། །རིབ་མས་བསྐོར་བ་ལ་ནི་ར་ལུག་གི་རྡུལ་གྱི་འམ་མི་རང་བཞིན་གྱི་ངོ་ཚ་དང་ལྡན་པའི་བཤང་བའི་ལམ་གྱིས་སོ། །འོབས་ཀྱིས་བསྐོར་བ་ལ་ནི་སྐས་གདང་བུ་བཅུ་གཉིས་པའི་འམ་ཕྱག་དར་བོར་བའི་བོང་བ་རགས་པའི་ལམ་གྱིས་སོ། །ཞེས་སོ། །དེ་ལའང་མཚོ་ཊཱིཀ་ཏུ་རྩིག་པས་བསྐོར་བ་ལ་སོགས་པ་གསུམ་གྱི་ཉེ་འཁོར་གསུམ་གྱི་འདོམ་དགུ་དང་དྲུག་དང་གསུམ་གོ་རིམ་བཞིན་ནོ། །དེ་ལྟར་ཉེ་འཁོར་བའི་ཆེ་འབྲིང་གསུམ་འོང་བ་ནི་ལོངས་སྤྱོད་ཆེ་འབྲིང་ཆུང་གསུམ་ཡོད་པའི་དབང་དུ་བྱས་ཏེ། གོ་རིམ་བཞིན་དུ་ཤིང་རྟ་དང་ར་ལུག་དང་ཕྱག་དར་གྱིས་མཚོན་(༡༤༢ན)
བྱུང་བས་ཤེས་སོ། །ཞེས་དང་། དེའི་མཆན་བུར། བ་ལང་དྲུག་གིས་དྲང་དགོས་པའི་ཤིང་རྟའི་ལམ་གྱི་ཞེང་ཚད་ནི་འདོམ་དགུ་སྟེ། དེ་ཡང་བ་ལང་དྲུག་ལ་གཉའ་ཤིང་གཏད་དེ་གྲལ་བྱས་པ་ན་བ་ལང་དྲུག་གི་བར་ལ་འདོམ་གང་དང་། བ་ལང་རེའི་ངོས་ན་འདོམ་ཕྱེད་ཕྱེད་དེ་འདོམ་གང་དང་བཅས་པས་འདོམ་དགུའོ་ཞེས་གསུངས། ཤིང་རྟ་སྨྱིག་མ་ཅན་གྱི་ལམ་གྱིས་ཇི་ཙམ་དུ་ཁྱབ་པའོ། །ཞེས་སྦྱོར་ཞེས་དང་། གྲོང་གཅིག་པ་རྩིག་པ་རིབ་མ་འོབས་དང་གསུམ་གས་བསྐོར་བ་ལ་ནི་ཉེ་འཁོར་རིང་ཤོས་ཀྱི་ཁོང་དུ་ཐུང་ཤོས་གཉིས་བསྡུས་ཏེ་སྤོ་བ་སྤྱོད་པའི་གནད་ཀྱིས་སྦྱར་རོ། །ཊཱི་ཀ་ལས། རྩིག་པས་བསྐོར་བའི་གྲོང་གི་ཉེ་འཁོར་དང་པོ་ཤོས་ནི་རིས་སུ་བཅད་པའི་ཉེ་འཁོར་ཡིན་ནོ། །རིབ་མས་བསྐོར་བའི་གྲོང་གི་ཉེ་འཁོར་རྣམས་གཉིས་དང་འོབས་ཀྱིས་བསྐོར་བའི་གྲོང་གི་འོག་མ་ཤོས་ནི་བསྒྲུབ་པའི་ཉེ་འཁོར་ཡིན་ཏེ། ཞེས་པ་ནི་བསམ་པས་རིས་སུ་བཅད་པ་དང་། བྱ་བ་བསྒྲུབ་པ་ལ་བལྟོས་པ་སྟེ་འདི་ཐམས་ཅད་ཉེ་འཁོར་དུ་བརྩིའོ། །ཞེས་རྒྱ་ཆེར་གསུངས་སོ། །རྩིག་པའི་མཚམས་མེད་པའི་གཡེ་ཐང་ཁ་ལྟ་བུའམ་གྲོང་མེད་པའི་དགོས་པ་སོགས་ཀྱི་མཚམས་ནི། རང་འགྲེལ་ལས། དགོན་པ་ལ་ནི་དབུས་ཀྱི་ཕྱོགས་ཕྱོགས་སུ་རྒྱང་གྲགས་གཅིག་གི་མཐའ་ཚུན་ཆད་མཚམས་ཡིན་ཏེ། དེས་ན་ཕྱོགས་གཉིས་བསྡོམས་ན་སྤྱིར་རྒྱང་གྲགས་གཉིས་ཀྱི་མཚམས་ཡིན་ནོ། །ཞེས་པ་ལྟར་རོ། །བཞི་པ་དགོས་པ་ནི། སྤྱིར་ལས་ལ་དགེ་སློང་ཐམས་ཅད་འདུ་དགོས་ཤིང་བྱེ་བྲག་ཏུ་གསོ་སྦྱོང་དང་དགག་དབྱེའི་ལས་ལ་ཐམས་ཅད་འདུས་པས་ཀུན་དག་པར་འགྱུར་བ་དང་། ཆོས་(༡༤༢བ)
གོས་དང་འབྲལ་བ་ཚེགས་ཆུང་ངུས་སྤོང་བ་དང་། དབྱར་འདྲལ་བའི་ཉེས་པ་སྤང་སླ་བ་དང་། གནས་གཞན་དུ་དབྱར་གནས་པར་ཁས་བླངས་པས་ཀྱང་སྲ་བརྐྱང་གི་ཕན་ཡོན་ཐོབ་པ་རྣམས་མཚམས་ཆུང་བཅད་པས་དགེ་འདུན་འདུ་བ་ཁྱབ་ཆེས་པ་སྤོང་ཞིང་། དགེ་སློང་རྣམས་ཀྱི་དགེ་བ་གཞན་ཉམས་པར་འགྱུར་བ་སྤང་བའི་དགོས་པ་ཡོད་ལ། གཙོ་བོའི་དགོས་པ་མི་འདུ་བ་དགག་དགོས་པ་ནི། མི་མཐུན་པ་དག་མི་བྱའོ། །ཞེས་གསུངས་པས་སྤྱིར་ལས་ལ་མཐུན་པ་བསྒྲུབ་པ་དང་། མི་མཐུན་པ་ཕྱིར་བཟློག་གཉིས་ཀྱི་དང་པོ་ཡིན་ལ། དེའི་ཆེད་དུ་མཚམས་དེར་གཏོགས་པ་ཐམས་ཅད་ཀྱིས་དངོས་སུ་འདུ་དགོས་ཀྱང་རྐྱེན་ན་བ་དང་དབང་མེད་པ་དང་སྲོག་དང་ཚངས་པར་སྤྱོད་པའི་བར་ཆད་ཀྱི་འཇིགས་པ་ལས་གཞན་པས་འབུལ་བ་ལ་ནི་ཉེས་བྱས་སོ། །ཞེས་གསུངས་པས་དེ་ལྟ་བུ་ཞིག་གིས་འདུ་མ་ནུས་ན་འདུན་པ་དང་ཡོངས་དག་འབུལ་དགོས་ཏེ། འདུན་པ་ཕུལ་བས་དགེ་འདུན་གྱི་ལས་འཆགས་པ་དང་། ཡོངས་དག་ཕུལ་བས་འབུལ་བ་པོ་ཉིད་དག་པར་འགྱུར་བའི་དགོས་པ་ཡོད་པའི་ཕྱིར། དེ་ཡང་མདོ་རྩ་ལས། འདུན་པ་ཕུལ་བས་ལས་དེ་དང་མཐུན་པ་གྲུབ་བོ། །ཞེས་གསུངས། འོན་ཀྱང་མཚམས་གཅོད་པའི་ལས་དངོས་ལ་འདུན་པ་འབུལ་དུ་མི་རུང་སྟེ། རྒྱ་ཆེར་འགྲེལ་ལས། མཚམས་བཅད་པ་ནི་མི་འགྲུབ་བོ། །ཞེས་བྱ་བ་ནི་མཚམས་བཅད་པའི་ལས་ལ་ནི་གང་ཟག་གང་འདུན་པ་འབུལ་བར་བྱེད་པའི་གང་ཟག་དེ་དང་མཐུན་པ་མི་འགྲུབ་བོ། །འདིར་གཞུང་ནི་ཉེ་བར་འཁོར་ལས་ཐམས་ཅད་ནི་འདུག་ས་དང་བཅས་པ་ཡིན་ཏེ། (༡༤༣ན)
མཚམས་བཅད་པ་ནི་མ་གཏོགས་སོ། །ཞེས་གསུངས། རྒྱུ་མཚན་ནི། མཚོ་སྣ་པས། བཅས་པའི་དབང་གིས་ཏེ། དེ་ལྟར་འཆའ་བ་ནི་མཚམས་བཅད་པ་འདིས་ཐག་འདི་ཙམ་ནས་འདུ་དགོས་ཀྱིས་མཚམས་འཛིན་པ་ཡིན་ལ། ལས་དེ་ལ་དངོས་སུ་ལུས་ན་ས་མཚམས་འདི་ཙམ་ནས་འདུ་དགོས་མི་དགོས་ཀྱི་ཚད་དེ་དངོས་སུ་ཤེས་པར་འགྱུར་གྱི་འདུན་པ་ཕུལ་ཏེ་དངོས་སུ་མ་འདུས་ན་ཚད་དེ་དངོས་སུ་ཤེས་པར་མི་འགྱུར་བའི་ཕྱིར་རོ། །ཞེས་གསུངས། བུ་སྟོན་རིན་པོ་ཆེའི་ཊཱིཀྐར་ཡང་། མཚམས་བཅད་པ་འདུན་པ་ཕུལ་བས་མཐུན་པ་མི་འགྲུབ་སྟེ། མཚམས་དེར་གཏོགས་ཀྱི་དགེ་འདུན་གྱིས་མཚན་མ་བརྟན་པོ་ཤེས་དགོས་པས། དེ་ལ་འདུན་པ་ཕུལ་བས་མི་འགྲུབ་པའི་ཕྱིར་གསུང་། འདུལ་འཛིན་སྔ་མ་འགའ་ཞིག་མཚམས་པོ་ཆེ་ལ་འདུན་པ་འབུལ་མི་རུང་ལ། དཀྱིལ་འཁོར་པ་ལ་འདུན་པ་ཕུལ་བས་ཆོག་གསུང་། འདུན་པ་འབུལ་བ་པོའི་མཚན་ཉིད་ནི། མཚམས་ཀྱི་ནང་ན་གནས་པ། ལས་ཀྱི་ཁ་སྐོང་བར་འོས་པ། ལུས་སམ་འདུན་པ་མ་བླངས་པ། གང་ལ་མི་མཐུན་པའི་ལས་བྱེད་པ་མ་ཡིན་པ། སྨྱོས་པའི་གནང་བ་མ་ཐོབ་པ། ངེས་པར་ཤེས་པའི་འཁྲིགས་པ་ཡིན་པ། དངོས་སུ་གྲངས་ཀྱི་ཁ་སྐོང་བྱེད་མ་ཡིན་པ། དངོས་སུ་མི་འདུ་བའི་རྐྱེན་དང་ལྡན་པའི་ཆོས་བརྒྱད་ལྡན་དེ་ལྟ་བུ་ཡིན་ཏེ། དེའི་མཚམས་ཀྱི་ཁོངས་སུ་གཏོགས་པ་ཁ་སྐོང་བར་འོས་པ་ལུས་སམ་དེ་ལ་འདུན་པས་མ་འདུས་པར་རྗེས་སུ་མ་ཞུགས་པ་ཉིད་དང་། ཞེས་གསུངས། སྨྱོས་པའི་གནང་བ་ཐོབ་པས་འདུན་པ་འབུལ་བའི་དགོས་པ་ནི། མདོ་(༡༤༣བ)
རྩ་ལས། སྨྱོས་པའི་གནང་བ་ཐོབ་པས་ནི་མི་མཐུན་པ་ཉིད་དུ་མི་འགྱུར་རོ། །ཞེས་གསུངས། འཕྲིགས་པ་ནི། རྒྱ་ཆེར་འགྲེལ་ལས། འཕྲིགས་པས་མི་མཐུན་པ་ཉིད་དུ་འགྱུར་རོ། །ཞེས་བྱ་བ་ནི། མཚམས་ཀྱི་ནང་ན་དགེ་སློང་དངོས་སུ་འཁོད་པར་ཤེས་པ་རྣམས་ཀྱིས་འདུན་པ་ལ་སོགས་པ་མ་བླངས་པས་དགེ་འདུན་གྱི་ལས་མི་མཐུན་པ་ཉིད་ཀྱི་ཉེས་པར་འགྱུར་བ་འབའ་ཞིག་ཏུ་མ་ཟད་ཀྱི་འདི་ལྟར་མཚམས་ཀྱི་ནང་དགེ་སློང་གློ་བུར་བ་འགའ་ཞིག་འོང་བ་མཐོང་ངམ་ཐོས་སམ། འཁར་གསིལ་གྱི་སྒྲ་གྲག་གམ། གཏུར་བུ་ལ་སོགས་པ་མཐོང་བའི་མཚན་མ་འམ། སྒོ་ནས་དགེ་སློང་ཞིག་དེར་ཡོད་པར་ཕྲིགས་ནས་དེའི་འདུན་པ་ལ་སོགས་པ་མ་བླངས་ན་ཡང་དགེ་འདུན་གྱི་ལས་མི་མཐུན་པ་ཉིད་ཀྱི་ཉེས་པར་འགྱུར་རོ་ཞེས་བྱ་བའི་ཐ་ཚིག་གོ །ཐ་དད་པ་ཉིད་དུ་འདོད་པས་མངོན་པར་བརྟགས་ཏེ་ལས་བྱེད་ན་ཉེས་པ་སྦོམ་པོའོ་ཞེས་བྱ་བ་ནི་ངེས་པའམ་ཕྲིགས་པ་མ་ལྷགས་པ་རྣམས་དང་། ཐ་དད་པ་ཉིད་དུ་འདོད་པས་མ་འོངས་ཀྱང་བླའོ་སྙམ་དུ་མངོན་པར་བརྟགས་ཏེ་ལོགས་ཤིག་ཏུ་ལས་བྱེད་པ་ནི་དགེ་འདུན་གྱི་དབྱེན་གྱི་རང་བཞིན་ཅན་ཡིན་པར་ཡིད་ལ་སྣང་སྟེ། དེ་བས་ན་གང་དག་མ་ལྷགས་པ་དེ་དག་མེད་ཀྱང་རུང་གི །ཐག་རིང་པོ་ན་འཁོད་ཅིག་སྙམ་ནས་དེ་དག་གི་འདུན་པ་ལ་སོགས་པ་མི་ལེན་པར་ལས་བྱེད་པས་དེ་དག་ལ་དགེ་འདུན་གྱི་དབྱེན་ལ་བརྟུལ་བའི་སྐབས་སུ་གཏོགས་པའི་ཉེས་པ་སྦོམ་པོར་འགྱུར་རོ། །འདིར་ལས་ཞེས་སྨོས་པ་ནི་འདུལ་བར་གཏོགས་པ་མཐུན་པ་དང་འབྲེལ་བའི་ལས་སུ་བྱ་བ་ཐ་ན་རབ་ཏུ་བྱུང་བ་ལ་བལྟོས་པ་ཞུ་བའི་མཐར་ཐུག་པ་ཡན་ཆད་ཀུན་བསྡུའོ། །རྟོག་(༡༤༤ན)
པ་ཉིད་ནི་ཐེ་ཚོམ་ཟ་བའོ་ངེས་པར་བྱེད་པ་ལ་ནི་ཉེས་པར་བྱེད་པ་འབྱུང་བ་མ་ཡིན་ནོ། །ཞེས་གསུང་པ་ནི། རྟག་པ་ཉིད་འདི་ཅི་རུང་ངམ་འོན་ཏེ་མི་རུང་ངམ་སྙམ་དུ་རྣམ་པ་དེ་ལྟར་ཐེ་ཚོམ་དུ་གྱུར་ནས་ཐེ་ཚོམ་ཟ་ཞིང་ཡིད་གཉིས་བྱེད་པ་དང་ངེས་པ་མེད་པར་འདི་གདོན་མི་ཟ་བར་རུང་ངོ་ཞེས་ངེས་པར་བྱེད་པ་གང་ཡིན་པ་དེ་གཉིས་ལ་ནི་ཉེས་པའི་བྱེད་པ་མི་འབྱུང་བ་མ་ཡིན་ཏེ། གཉིས་ཀ་ལའང་མཚན་ཉིད་ཇི་ལྟར་ཐོབ་པ་ཁ་ན་མ་ཐོ་བ་ཁོ་ནར་འགྱུར་རོ། །དེ་ལྟར་ཡང་འདིར་གཞུང་ནི་ཅི་གང་དག་མ་ལྷགས་པ་དེ་དག་མེད་པར་བདག་ཅག་གི་གསོལ་བ་བྱས་ཏེ་གསོ་སྦྱོང་བྱ་བ་དང་། སོ་སོ་ཐར་པའི་མདོ་འདོན་པ་འདོན་དུ་རུང་ངམ་འོན་ཏེ་མི་རུང་། དེ་དག་མེད་པར་བདག་ཅག་གིས་དགག་དབྱེ་བྱར་རུང་ངམ། འོན་ཏེ་མི་རུང་སྙམ་དུ་རྟོག་པ་ཉིད་ན་ཐེ་ཚོམ་ཟ་བ་གང་ཡིན་པ་དང་། དེ་དག་མེད་པར་བདག་ཅག་གིས་གདོན་པ་དང་དགག་དབྱེའི་བར་དག་བྱར་རུང་ངོ་ཞེས་ངེས་པར་བྱེད་པ་གང་ཡིན་པ་དེ་དག་ནི་ཉེས་པའི་བྱེད་པ་མི་འབྱུང་བ་མ་ཡིན་ཏེ། འདི་ལྟར་ཐེ་ཚོམ་ཟ་བཞིན་དུ་བྱེད་པ་དང་ངེས་པ་མེད་པར་ངེས་པར་བྱེད་པ་ལ་ནི་དགེ་འདུན་མི་མཐུན་པའི་ཉེས་པ་ཁོ་ནར་འགྱུར་རོ། །ཞེས་གསུངས་པ་ཡིན་ནོ། །དེ་ལྟ་བས་ན་འདིར་ལས་ཐམས་ཅད་ཀྱི་དབང་དུ་བྱས་པ་ཡིན་པས་སྤྱི་མདོར་བྱས་སོ། །བསམ་པ་ཐག་པ་ནས་ཡོངས་སུ་བཙལ་ཞིང་གོ་བ་ལོག་མང་དུ་བྱས་ན་དག་པའི་བྱེད་པ་ཡིན་ནོ་ཞེས་བྱ་བ་ནི། བསམ་པ་ཐག་པ་ནས་རྒྱུ་མེད་པར་དགེ་སློང་མ་ལྷགས་པ་རྣམས་ཡོངས་སུ་བཙལ་ཞིང་། གོ་བ་ལོག་མ་བྱས་ན་དེ་དག་མཚམས་ཀྱི་ནང་ན་འཁོད་དུ་ཟིན་ཀྱང་དེ་དགེ་སློང་དེ་(༡༤༤བ)
དག་ལ་དག་ཅིང་ལྟུང་བ་མེད་པ་དང་མཐུན་པ་ཉིད་དུ་འགྱུར་བའི་བྱེད་པ་ཡིན་ནོ། །ཞེས་བྱ་བའི་ཐ་ཚིག་གོ །བཙལ་བ་དང་བོད་པ་དང་མཐོན་པོར་འདུག་སྟེ་ཕྱོགས་སུ་བལྟ་བ་དག་གིས་ནི་དེ་ཡིན་ནོ། །ཞེས་བྱ་བ་ནི་རྣམ་པ་དེ་གསུམ་གྱིས་རིམ་གྱིས་ནི་ཡོངས་སུ་བཙལ་བ་ཉིད་ཡིན་ཏེ། དེ་དག་གིས་མ་རྙེད་ན་མ་ལྷགས་པ་དག་མཚམས་ཀྱི་ནང་ན་འཁོད་ཅིང་དེ་དག་གི་འདུན་པ་ལ་སོགས་པ་མ་བླངས་སུ་ཟིན་ཀྱང་མི་མཐུན་པར་མི་འགྱུར་རོ། །དེ་ལ་བཙལ་བ་ཞེས་བྱ་བ་ནི་དེ་དང་དེ་དག་ཏུ་མྱུལ་བའོ། །བོད་པ་ཞེས་བྱ་བ་ནི་སྐད་ཀྱིས་བོད་པའོ། །མཐོན་པོར་འདུག་སྟེ་ཕྱོགས་སུ་བལྟ་བ་ཞེས་བྱ་བ་ནི་ས་ཕྱོགས་མཐོན་པོར་འགྲེངས་ཏེ་མིག་རྒྱང་གིས་ཕྱོགས་ཕྱོགས་སུ་བལྟ་བར་བྱའོ། །དེ་གསུམ་ཡང་གོ་རིམ་བཞིན་དུ་བྱས་ཏེ་ཏེ་པོར་ཇེ་བཙལ་བར་བྱའོ། །བཙལ་བས་མ་རྙེད་ན་བོད་པར་བྱའོ། །དེས་ཀྱང་མ་རྙེད་ན་ཕྱོགས་ཆེས་མཐོན་པོར་འགྲེངས་ཏེ་ཕྱོགས་བཞིར་བལྟ་བར་བྱའོ། །འདིར་གཞུང་ཞུ་བ་ལས་བཙུན་པ་བཅོམ་ལྡན་འདས་ཀྱིས་དགེ་སློང་གྲོང་མཐའ་པ་མ་ལགས་པ་དགོན་པ་ན་གནས་པ་དེ་དག་ཐམས་ཅད་གསོ་སྦྱོང་གནས་གཅིག་ཏུ་འདུ་བར་བྱའོ། །ཞེས་བཀའ་སྩལ་ན། གལ་ཏེ་དེ་དག་མི་གདའ་ན་བཙལ་བར་མི་བགྱི་ཞིང་། གལ་ཏེ་དེ་དག་མ་རྙེད་ན་བོད་པར་བགྱིའོ། །གལ་ཏེ་དེ་དག་གི་མ་ཐོས་ན་གསོ་སྦྱོང་བགྱིས་ཞེས་བགྱིའམ། ཉེ་བར་འཁོར་བྱས་ཞེས་བྱའོ། །ཞེས་གསུངས་པ་དང་། འོག་མ་ཤོས་ཀྱི་གཞུང་ནི་ཕྱོགས་བཞིར་བལྟ་སྟེ། གསོ་སྦྱོང་བྱའོ་ཞེས་གསུངས་པ་ཡིན་ནོ། །ཞེས་རྒྱ་ཆེར་བཤད་པ་དང་མཐུན་པར། རང་འགྲེལ། ཊཱིཀ་ཆུང་ཡོན་ཏན་འོད་མ། འགྲེལ་བཤད་ཤེས་རབ་བྱེད་པ་རྣམས་ལས་ཀྱང་(༡༤༥ན)
བཤད་ཅིང་། གོ་བ་ལོག་ནི་འགྲེལ་ཆུང་ལས་ལེ་ལོ་བྱས་ཏེ་འོལ་སྤྱི་ཙམ་དུ་བཙལ་བའི་མིང་དུ་བཤད་ལ། འདིའི་རྩ་བའི་གླེང་གཞི་ནི་དགེ་སློང་ཀ་བི་ན་ལ་བཅས་སོ། །འདིར་གསོ་སྦྱོང་གི་སྐབས་སུ་བློ་མཐུན་འཚམས་ཆེན་དཀྱིལ་འཁོར་པ་རྣམས་བཅད་པ་དེར་ལས་གཞན་མཐའ་དག་བགྱིར་རུང་སྟེ། ཀརྨ་ཤ་ཏམ་དུ། དགེ་འདུན་གྱིས་གང་དུ་གསོ་སྦྱོང་གི་གནས་སུ་བློ་མཐུན་བྱས་པ་དེར་དགེ་སློང་རྣམས་ཀྱིས་འདུག་ལ་གསོ་སྦྱོང་དང་། དགག་དབྱེ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་དག་བྱའོ། །ཞེས་དང་། དེ་བཞིན་དུ་དགེ་འདུན་གྱིས་གང་དུ་མཚམས་པོ་ཆེ་བཅད་པ་དེར་དགེ་སློང་རྣམས་ཀྱིས་འདུག་ལ་གསོ་སྦྱོང་སོགས་དང་། དགེ་འདུན་གྱིས་གང་དུ་མཚམས་བུ་ཆུང་བཅད་ཅིང་དཀྱིལ་འཁོར་བར་བློ་མཐུན་བྱས་པ་དེར་དགེ་སློང་རྣམས་ཀྱིས་འདུག་ལ་གསོ་སྦྱོང་སོགས་སྦྱར་ཏེ་གསུངས་པ་དང་། རྒྱ་ཆེར་འགྲེལ་ལས་ཀྱང་གསོ་སྦྱོང་གི་གནས་ཞེས་སྨོས་པས་དགག་དབྱེ་ལ་སོགས་པའི་ལས་གཞན་ནི་དེར་མི་བྱའོ་སྙམ་དུ་དོགས་པ་བསལ་བའི་ཕྱིར་ལས་གཞན་གྱི་གནས་ཀྱང་དེ་ཡིན་ནོ། །ཞེས་བྱ་བ་སྨྲས་ཏེ། དགག་དབྱེ་ལ་སོགས་པའིའོ། །གསོ་སྦྱོང་གི་གཞི་ལས་དེ་བཅས་པའི་ཕྱིར་དེ་སྐད་ཅེས་བྱའོ། །དེ་དག་གི་གྲུབ་འབྲས། ལས་མཚམས་བཅད་པ་མ་ཡིན་པར་རྩིག་མཚམས་ཡིན་ན་གཙུག་ལག་ཁང་གི་ཕྱི་སྐྱའི་རྩིག་པ་ནུབ་ཉེ་འཁོར་འདོམ་གང་དང་བཅས་པ་མཚམས་ནང་དུ་བྱེད། ནང་དེའི་ཁང་པ་ཕན་ཚུན་ཐ་དད་པ་དང་། འོག་ཁང་སྟེང་ཁང་རིམ་པ་ཡོད་པ་སོགས་ལ་མཚམས་ནང་དུ་གཏོགས་(༡༤༥བ)
མི་གཏོགས་པའི་དངོས་བསྟན་རྒྱ་འགྲེལ་རྣམས་སུ་མ་བྱུང་བས། བོད་ཊཱིཀ་ཚོར་ཡང་མི་གསལ་ཀྱང་། འདུན་པ་ལེན་པ་པོས་ཇི་ལྟར་བྱ་བ་བཤད་སྐབས། མདོ་རྩ་ལས། དེ་བླངས་ནས་རྒྱུག་པར་མི་བྱའོ། །མགྱོགས་པར་མི་བྱའོ། །མཆོང་བར་མི་བྱའོ། །ཕྱི་རོལ་ལ་མཆོད་པར་མི་བྱའོ། །བང་རིམ་ལ་མི་བྱའོ། །ནམ་མཁའ་ལ་འདུག་པར་མི་བྱའོ། །ཕྱི་རོལ་དུ་མི་བྱའོ། །སྐས་ཀྱི་རིམ་པ་གཞན་བཞག་ནས་གཞན་དུ་གོམ་པ་འདོར་བར་མི་བྱའོ། །ཐེམ་སྐས་ཀྱི་ཐེམ་པར་མི་བྱའོ། །ཆུ་ལྐོག་མ་ནུབ་ཙམ་ལ་འབོག་པར་མི་བྱའོ། །གཉིད་ལོག་པ་དང་སྙོམས་པར་འཇུག་པར་མི་བྱའོ། །ཞེས་གསུངས་པས་ནང་དེའི་སྟེང་འོག་ཕན་ཚུན་ཐ་དད་ན་གནས་པ་སོ་སོས་འདུན་པ་འབུལ་དགོས་པ་གསལ་བས་མཚམས་ནང་དུ་ངེས་པ་རྟོགས་ནུས་ཤིང་། ཡང་དཀྱིལ་འཁོར་པའི་ལས་མཚམས་ཐ་དད་དུ་བྱས་ན་ཚོམས་ལྟ་བུ་ཞིག་གི་ནང་དུའང་ལས་ཐ་དད་པ་དུ་མ་འཆགས་པ་ཡང་། རྒྱ་ཆེར་འགྲེལ་ལས། ཚོགས་ཐ་དད་པ། འདུན་པ་ལ་སོགས་པས་མཐུན་པར་བྱས་ཏེ། ལས་བྱེད་པ་ལ་མི་རུང་བ་མེད་དོ་ཞེས་བྱ་བ་ནི། ཚོགས། ཐ་དད་པ་དགེ་འདུན་མཚམས་གཅིག་གི་ནང་དང་མཚམས་སོ་སོར་གནས་པས་འདུན་པ་དང་ཡོངས་སུ་དག་པ་དགག་དབྱེ་ལ་སོགས་པ་ཕན་ཚུན་དབུལ་བས་མཐུན་པར་བྱས་ཏེ་ལས་ཐ་དད་པ་མང་པོ་སོ་སོ་ན་བྱེད་པ་ལ་མི་རིགས་པ་མེད་པར་ཤེས་པར་བྱའོ། །འདིར་གཞུང་ནི། ཞུ་བ་ལས་བཙུན་པ་དགེ་སློང་ཕྱོགས་གཅིག་ན་མཆིས་པས་གནས་བཞི་པོ་དག་ཏུ་སོ་སོར་ཐར་པའི་མདོ་བཏོན་ལ་གསོ་སྦྱོང་ཡང་བགྱིས་པར་འགྱུར་ཞིང་(༡༤༦ན)
འགལ་ཚབས་ཅན་དུ་མི་འགྱུར་བ་མཆིས་སམ། ཉེ་བ་འཁོར་ཡོད་དེ། འདི་ལྟར་སོ་སོར་ཐར་པའི་མདོ་འདོན་པའི་དགེ་སློང་གིས་གནས་བཞི་པོ་དག་ཅིག་ཅར་དུ་ཤིང་ངམ་དབྱུག་པའམ་རེ་ལྡེས་མནན་ཏེ་སོ་སོར་ཐར་པའི་མདོ་འདོན་པ་ནའོ། །ཞེས་བྱ་བ་ལ་སོགས་པ་གསུངས་པ་ཡིན་ནོ། །བརྗོད་པར་བྱ་བ་རྩོམ་པ་འདྲ་བ་རྣམས་ཅིག་ཅར་བརྗོད་པ་ལ་འང་མེད་དོ་ཞེས་བྱ་བ་ནི་མི་རུང་བ་ཞེས་སྦྱར་ཏེ། བརྗོད་པར་བྱ་བ་རྩོམ་པ་དང་འདྲ་བ་འདི་ལྟ་སྟེ། འདུན་པ་དང་ཡོངས་སུ་དག་པ་བརྗོད་པ་དང་། དགག་དབྱེ་རིག་པར་བྱ་བ་དང་འཁར་བ་དང་དྲ་བའི་གནང་བ་གསོལ་བ་ལ་སོགས་པ་ལྟ་བུའི་དོན་རྣམས་ཅིག་ཅར་དུས་གཅིག་ཏུ་བརྗོད་པ་ལའང་མི་རུང་བ་མེད་པར་ཤེས་པར་བྱ་སྟེ། ཐབས་གཅིག་གིས་བསྒྲུབས་པར་བྱ་བ་ཉིད་དོ་ཞེས་བྱ་བའི་ཐ་ཚིག་གོ །ཞེས་གསུངས་སོ། །དེས་ཕན་ཚུན་དུ་མི་གནོད་པ་ཙམ་དུ་མ་ཟད་བསྒྲུབ་བྱ་མ་ཡིན་པའི་ཁྱིམ་པ་སོགས་ཐོས་སུ་མི་རུང་བས་ཐོས་ཀྱང་ལས་ལ་མི་གནོད་དེ། རྒྱ་ཆེར་འགྲེལ་ལས། ཐོས་པར་བྱ་བ་མ་ཡིན་པས་ཐོས་པས་ནི་མི་འཆགས་པར་མི་འགྱུར་ཞེས་བྱ་བ་ནི་ཐོས་པ་བྱ་བ་ཡིན་པ་བསྙེན་པར་རྫོགས་པ་ལ་སོགས་པས་ཐོས་པས་ནི་ལས་ནི་འཆགས་པར་མི་འགྱུར་ཏེ། འཆགས་པར་འགྱུར་བ་ཁོ་ནའོ། །ལས་བྱེད་པ་ལ་སོགས་པ་ལ་ལྟུང་བ་ཙམ་དུ་ནི་འགྱུར་རོ། །དེ་ལྟར་ཡང་ཀུན་དགའ་བོ་ཁྱོད་ཀྱི་རྒྱལ་པོ་གསོ་སྦྱོང་གི་ཕྱིར་སོ་སོར་ཐར་པ་འདོན་པ་ཉན་དུ་མ་བཅུག་པ་ཉེས་སོ་ཞེས་གསུངས་པ་ཡིན་ནོ།།འདུལ་བ་ཚིག་ལེར། མཚམས་ནི་ཐ་མ་མནན་ནས་སམ། །ལ་ལར་ཡང་ནི་དཀྱིལ་(༡༤༦བ)
འཁོར་པ། །དེ་བཞིན་ལས་ནི་ཐམས་ཅད་ལ། །མཚམས་ནི་བཅད་པར་རུང་བ་ཡིན། །ཞེས་དང་། ལས་ཀྱི་ཕྱིར་ནི་དཀྱིལ་འཁོར་པ། །བྱའོ་མཐའ་མཚམས་དགྲོལ་ནས་ཀྱང་། །མཚམས་གཅིག་ཏུ་ནི་མ་འདྲེས་པས། །ཚོགས་ཀྱི་ལས་ནི་བྱ་བར་བརྗོད། །ཅེས་དང་། མཚམས་བཅིང་རབ་ཏུ་རྣམ་མང་ལས། །མདོར་བསྡུས་ཚུལ་ནི་རྣམ་པ་བཞི། །འདིར་ཡང་མདོར་བསྡུས་དབང་བྱས་ནས། །ཕྱོགས་ཙམ་བསྟན་པས་བརྗོད་པར་བྱ། །དཔག་ཚད་ཕྱེད་དང་གསུམ་པའི་མཚམས། །ཆེན་པོ་དེ་ནི་ཕྱོགས་བཞི་རུ། །ལྗོན་ཤིང་ཆུ་བོ་བྲག་རི་དང་། །ལམ་ཆེན་སོགས་ཀྱིས་མཚོན་དེ་བཅད། །ཅེས་དང་། སྔར་གྱི་ཆེན་པོ་མི་མཁོ་ན། །ཆུང་ངུ་ཡང་ནི་བྱ་བ་སྟེ། །གསོལ་དང་བཞི་ཡི་ལས་ཀྱིས་ནི། །ཆེན་པོ་ཉེ་བར་བཀྲོལ་ནས་ནི། །ཆུང་ངུ་བཅིངས་ནས་སྔ་མ་བཞིན། །མཚན་མ་བརྟན་པོ་རྣམས་ཀྱིས་སོ། །དཀྱིལ་འཁོར་པ་ཞེས་གྲགས་པ་དེ། །ཚོགས་ཀྱི་ལས་ནི་བསྒྲུབ་པར་བྱ། །ཞེས་མཐུན་པར་གསུངས་པས། མདོར་ན་ལས་མཚམས་རྩིག་མཚམས་གང་རུང་གི་ནང་དུ་འདུས་པའི་དགེ་སློང་ཐམས་ཅད་ལས་གང་བགྱིད་ཀྱང་འདུ་བའམ། མ་ནུས་ཀྱང་འདུན་པ་མ་ཕུལ་ན་ལས་མི་འཆགས། འདུན་པ་ཕུལ་ཕྱིན་མཚམས་ནང་རང་གི་ཐག་ཉེ་འགྱང་ཅི་འདྲར་གནས་ཀྱང་ལས་ལ་མི་གནོད་ཅིང་། ཡོངས་དག་ཕུལ་བས་མ་འདུས་པ་རྣམས་ལ་ཉེས་པ་མི་འབྱུང་བ་ཡིན་ནོ། །ཞེས་བཤད་ལ། སྟག་ཚང་ལོ་ཙཱ་བའི་འདུལ་ཊཱིཀ་ཏུ། གནས་ཀྱི་སྤྲོས་པ་ལ། ལས་དང་ཆུ་དང་། ནམ་མཁའ་དང་། (༡༤༧ན)
དགོན་པའི་མཚམས་གཞན་གྱི་སྤྲོས་པའོ། །དང་པོ་ནི། སྔ་མ་བག་ཡངས་སོགས་ཀྱི་ཕྱིར་ན་མ་བརྟགས་སོགས། དེའི་རྒྱུ་མཚན་ཡང་མཚམས་བཅད་པ་མི་ཆགས་པ་ལ་སྔར་བཅད་པ་ཉིད་དུ་ཤེས་པ་ཡན་ལག་ཏུ་མི་དགོས་པའི་ཕྱིར་ཏེ། བཅད་ཟིན་མ་ཞིག་པ་ཡིན་ན་མི་ཆགས་པས་སོ། །དེ་ནི་གཅོད་པའི་གཞི་དག་པ་དགོས་པར་བསྟན་ལ། བཅད་ཟིན་ལེགས་པར་བསྲུང་ཡང་དགོས་ཏེ། མཚམས་དང་ལྡན་པའི་དགེ་སློང་ཕ་མ་དེ་སྐྱ་རེངས་ཤར་ཤར་དེར་མེད་པ་ཉིད་ཀྱི་ས་མཚམས་བག་ཡངས་སུ་འགྱུར་རོ། །འདིར་མཚམས་འཇིག་པའི་རྒྱུའི་སྡོམ་ནི། མཚམས་ལ་རེ་བ་མེད་པ་དང་། །མཚན་མ་བརྟན་པོ་ཞེས་པ་དང་། །དེ་བཞིན་མཚམས་གཞན་བྱུང་བ་དང་། །ལས་ཀྱིས་གཤིག་དང་མཚམས་ནང་དེའི། །དགེ་སློང་མེད་པར་གྱུར་པས་སོ། །མེད་པ་འདི་ཡང་རྣམ་ལྔ་སྟེ། །དགེ་འདུན་ཀུན་གྱིས་དོར་བ་དང་། །ཀུན་ཀྱང་མཚན་གྱུར་ཞིང་མིན་གྱུར། །སྨྱོ་བར་གྱུར་དང་ཤི་བས་སོ། །ཞིང་མིན་པ་ནི་མཚན་གཉིས་ཅིག་ཅར་བྱུང་བ་ལ་བྱ་བར་སྔ་མ་རྣམས་བཞེད་དོ། །དེས་ན་ཀྱང་ནི་ལས་ཀྱིས་བཤིག་པ་སོགས་སྔ་མ་རྣམས་ལ་བྱའོ། །འོག་ནས་འཆད་པའི་རུང་བའི་ཁང་པ་ཡང་བག་ཡངས་སུ་འགྱུར་བའི་རྒྱུ་ནི་མཚམས་དང་འདྲ་བས་རུང་ཁང་གསུམ་པ་ལས་གཞན་རྣམས་བསྲུང་མཁན་མེད་ཀྱང་མི་འཇིག་པར་འདོད་པ་ནི་སྤྱིར་བཏང་འདི་ལ་དམིགས་བསལ་གྱི་ཚིག་མ་བྱུང་བས་མི་རིགས་སོ། །སྔར་བཅད་ཟིན་པའི་མཚམས་སུ་མཚམས་གཞན་གྱིས་ཕྱོགས་འདྲེས་པར་བསྐོར་དུ་མི་རུང་སྟེ་དེ་འདྲའི་ལས་བྱས་ཀྱང་མི་འཆགས་པས་སོ། །དམིགས་བསལ་(༡༤༧བ)
དཀྱིལ་འཁོར་པ་ལ་སོགས་པ་གསུམ་གྱི་ཚད་དུ་ཕྱི་ནས་མཚམས་ཀྱིས་བསྐོར་དུ་མི་རུང་ཡང་དེ་གསུམ་ལ་ཕྱི་རོལ་དུ་མཚམས་གཅིག་གིས་བསྐོར་དུ་རུང་ངོ་། །མཚམས་རེ་རེ་ལ་མཚན་མ་རེ་རེ་མི་དགོས་ཏེ། ཤིང་སོགས་སོ། །མཚམས་འདི་ལ་མིའ་ཐ་སྙད་སོགས་ཏེ། མི་མ་ཡིན་ལྟ་བུ་ནི་བརྟན་པར་གནས་ཀྱང་མཚན་མར་མི་རུང་བའི་ཕྱིར་ཏེ། ཐ་སྙད་ལས་འདས་པས་སོ། །རྫུ་འཕྲུལ་སོགས་ནི་ཐ་སྙད་དུ་རུང་བ་དེ་ལྟར་སོགས། གཉིས་པ་ནི་མཚམས་ཀྱི་ནང་དུ་ཆུ་ལྐོག་མ་ནུབ་ཙམ་གྱིས་ཆོད་པ་ནི་མཚམས་སོགས། ཁ་ཅིག་ཆུ་རྒྱུག་ཕེར་ཙམ་གྱིས་ཆོག་པར་འདོད་པ་ནི་སྦྱིན་ལེན་གྱི་ཆུ་མཚམས་གཞན་དང་འཁྲུལ་བར་ཟད་དེ། གོང་དུ་ལྐོག་མ་ནུབ་ཙམ་དུ་འབོག་ན་མཚམས་གཞན་དང་འདྲ་བར་བཤད་པའི་ཕྱིར་དང་། རྒྱུག་ཕེར་ཙམ་གྱིས་ཆོག་ན་སྒྲུབ་མི་ནུས་པས་སོ། །ཞག་བདུན་ཕན་ཆད་དུ་སྦྱོར་བ་བཏང་ན་ནི་ཕྱིར་བྱས་ཀྱང་མཚམས་རྗེས་སུ་མི་འཇུག་པའོ། །གསུམ་པ་ནི་ནམ་མཁའི་ཁམས་ནི་སོགས། བཞི་པ་ནི། དབུས་ནས་སོགས་རི་མཐོན་པོ་ལ་སོགས་པའི་སྒོ་ནས་འོག་དང་སོགས། མཚམས་བཅད་པ་ཞིག་ན་མི་འབྲལ་བའི་གནང་བ་ཞིག་ལ་དེ་ཞིག་པས་ནི་སོགས། གསུམ་པ་ནི་མཆོད་རྟེན་སོགས། འདུན་པ་གང་ཟག་ཁོ་ན་ལ་འབུལ་བར་མ་ངེས་ཏེ། དགེ་འདུན་སོགས། དགེ་འདུན་དེ་ལས་གང་ཟག་གང་ཡང་རུང་སོགས། །བཞི་པ་ནི། དགེ་སྐོས་ཀྱིས་སོགས་འདུས་མ་འདུས་ཤེས་པའི་ཕྱིར་རོ། །སྤྱིར་བཏང་ལེགས་པར་སོགས། འདོན་པ་པོའི་དམིགས་བསལ་ནི། མི་ནུས་སོགས། གནས་ཀྱི་དམིགས་བསལ་ནི་འཇིགས་སོགས། སྤྱོད་(༡༤༨ན)
ལམ་ལས་ནི་འདུག་པ་ཉིད་ཀྱིས་སོ། །ཞེས་པའི་དམིགས་བསལ་ནི། འགྲོན་པོ་སོགས། ཡུལ་གྱི་དམིགས་བསལ་ནི་དད་པ་སོགས། འདོན་པར་བྱ་བ་སོགས་བཞི་དེ་ཁོ་ན་བཞིན་ཉེ་བར་མ་བཟུང་བ་ནི་ཕྲན་ཚེགས་སོགས་དང་། ཐོས་བསྒྲགས་ཙམ་ཡང་མི་སྒྲུབ་པ་དང་། ཉ་ཤི་མ་ཡིན་པ་དང་། བསྙེན་པར་མ་རྫོགས་པ་སོགས་སོ། །གོང་དུ་འགའ་ཡང་མ་སོང་བ་ཉིད་ཡིན་ན་ཞེས་པའི་སོང་བའི་ཚད་ནི་ཐོས་པའི་སོགས་སོ། །ཞེས་གསུངས། སྔོན་གྱི་འདུལ་འཛིན་ཁུངས་མ་འགའ་ཞིག་ནི་གཙུག་ལག་ཁང་ལྟ་བུའི་གནས་གང་ཡང་རུང་བར་བསྙེན་རྫོགས་ཀྱི་ལས་བྱེད་པའི་ཚེ་ཁང་པ་དེར་ཁ་སྐོང་དུ་ཚོགས་པ་རྣམས་མ་གཏོགས་པའི་དགེ་སློང་མི་འཇོག་ཅིང་། རྩིག་པའི་ཕྱི་རོལ་གྱི་འདོམ་གང་ཚུན་ལའང་བསྲུང་མཁན་འཇོག་པ་ལྟ་སྣང་ལ་ཕྱག་ལེན་གཙང་བ་འདྲ་ཞིག་འདུག་ཀྱང་། དཔེར་ན་ཤྲཱི་ནཱ་ལནྡ་ལྟ་བུའི་གཙུག་ལག་ཁང་དུ་ལས་བྱེད་པའི་ཚེ་ལྕགས་རིའི་ནང་གི་དགེ་སློང་མཐའ་དག་འཚོག་པའང་འདུན་པ་འབུལ་དགོས་ཤིང་། དེ་འདྲ་བོད་དུ་འདུལ་བ་ཡུལ་ཆོས་ཀྱི་སྟབས་ནས་མི་འགྲིག་ལ། དཀྱིལ་འཁོར་པའི་ལས་ལ་གཙུག་ལག་ཁང་གི་རྩིག་པས་ཆོད་པར་གསུངས་པ་བཞིན་ཁང་པ་རེ་མིག་མང་དུ་ཡོད་པའི་རེ་ཁཱ་གཅིག་ཚུན་ལ་གནས་ཀྱི་བློ་མཐུན་བྱས་པས་ཀྱང་འགྲུབ་བོ། །སྤྱིར་ཁ་སྐོང་བའི་དགེ་འདུན་གྱི་གྲངས་ལ། དགྲ་བཅོམ་པ་ས་ག་ལྷས། གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་ན་ནི། །བསྙེན་རྫོགས་མ་རྨད་གྱུར་པ་སྟེ། ལྷ་ཡིས་ཀྱང་ནི་ཕྱག་བྱར་འོས། །དགེ་འདུན་ཚང་དང་མཚམས་ཕྱིར་མིན། །(༡༤༨བ)
ལས་མཁན་ཚུལ་ཁྲིམས་ལྡན་པ་དང་། །ལས་དག་པ་དང་བར་ཆད་མེད། །བསྙེན་པར་རྫོགས་པའི་རྒྱུ་ཡིན་ནོ། །ཞེས་དང་། དབུས་དང་མཐའ་འཁོབ་པ་དག་ལ། །བསྙེན་རྫོགས་ཡང་དག་བསྟན་པ་ནི། །བཅུ་དང་ལྔ་ཡི་ཚོགས་ཀྱིས་སམ། །དེ་བས་ལྷག་པས་ཀྱང་ནི་རུང་། །ཞེས་གསུངས། རྒྱ་ཆེར་འགྲེལ་ལས། མཐའ་འཁོབ་དག་ཏུ་ནི་མེད་ན་འདུལ་བ་འཛིན་པ་དང་ལྔ་ལ་སོགས་པའོ། །དགེ་སློང་ཡུལ་མཐའ་འཁོབ་ཏུ་བསྙེན་པར་རྫོགས་པར་བྱ་བའི་ལས་ལ་ནི་དགེ་སློང་བཅུ་ལ་སོགས་པ་མེད་ན་འདུལ་བ་འཛིན་པ་ཞེས་བྱ་བ་ལས་བྱེད་པ་ཉིད་དུ་གཏོགས་པར་ལྔ་ལ་སོགས་པ་དགེ་འདུན་ཉིད་ཡིན་ནོ། །ཡོད་ན་ནི་བཞིའི་ཆོ་ག་ཁོ་ན་ལ་བརྟེན་པར་བྱའོ། །དེས་ན་དགེ་སློང་མ་དགེ་འདུན་ལྷག་མའི་ལྟུང་བ་བྱུང་བའི་མགུ་བ་དང་དབྱུང་བའི་ལས་ལ་ནི་མཚམས་གཉིས་ཀ་ན་དགེ་སློང་དང་དགེ་སློང་མ་གཉིས་ཀའི་དགེ་འདུན་ཐམས་ཅད་ཚོགས་པ་དགེ་འདུན་ཉིད་ཡིན་ནོ། །དགེ་སློང་མ་ཡུལ་དབུས་སུ་བསྙེན་པར་རྫོགས་པར་བྱ་བའི་ལས་ལ་ནི་དགེ་སློང་བཅུ་ལ་སོགས་པ་དང་དགེ་སློང་མ་བཅུ་གཉིས་ལ་སོགས་པ་དགེ་འདུན་ཉིད་ཡིན་ནོ། །དགེ་སློང་མ་ཡུལ་མཐའ་འཁོབ་ཏུ་བསྙེན་པར་རྫོགས་པར་བྱ་བའི་ལས་ལ་ནི་མེད་ན་དགེ་སློང་འདུལ་བ་འཛིན་པ་ཉིད་གཏོགས་པར་ལྔ་ལ་སོགས་པ་དང་། དགེ་སློང་མ་འདུལ་བ་འཛིན་པ་ཉིད་གཏོགས་པར་དྲུག་ལ་སོགས་པའི་གཉིས་ཀའི་དགེ་འདུན་ཡིན་ནོ། །ཡོད་ན་ནི་གཞིའི་ཆོ་ག་ཁོ་ན་ལ་བརྟེན་པར་བྱའོ། །དགེ་སློབ་མའི་སྡོམ་པ་སྦྱིན་པ་ལ་ནི་དབུས་དང་མཐའ་འཁོབ་ཏུ་དགེ་སློང་མའི་གྲངས་བསྙེན་པར་རྫོགས་པར་བྱ་བའི་ལས་དང་(༡༤༩ན)
འདྲ་བར་ཤེས་པར་བྱའོ། །ལྷག་མ་ནི་བཞི་ལ་སོགས་པའོ་ཞེས་བྱ་བ་ནི། དབྱུང་དང་བསྙེན་པར་རྫོགས་པར་བྱ་བའི་ལས་མ་གཏོགས་པ་དེ་དག་གི་ལྷག་མའི་ལས་ནི་དགེ་སློང་བཞི་ལ་སོགས་དགེ་འདུན་ཉིད་ཡིན། དགག་དབྱེ་ལ་ནི་དགག་དབྱེ་བྱེད་པར་གཏོགས་པར་ལྔ་ལ་སོགས་པ་དགེ་འདུན་ཉིད་ཡིན་ཞེས་དང་། བུ་སྟོན་ཐམས་ཅད་མཁྱེན་པས་ལས་བརྒྱའི་ཊཱིཀྐར། ཕྱོགས་བཞིའི་མཚམས་ཀྱི་མཚན་མ་སྔར་སྨོས་པ་དེ་ཕན་ཆད་ནི་ཡུལ་མཐའ་འཁོབ་སྟེ། དེར་བསྙེན་རྫོགས་བྱ་བའི་ལས་ལ། དགེ་སློང་བཅུ་ལ་སོགས་པ་གཞན་མེད་ན་འདུལ་བ་འཛིན་པ་སྟེ་ལས་བྱེད་པ་ཉིད་གཏོགས་པ་དང་བཅས་པའི་ལྔ་ལ་སོགས་པའི་ཚོགས་ལ་ཡང་རུང་སྟེ་མེད་ན་ཞེས་སྨོས་པས། ཡོད་ན་ནི་གཞིའི་ཆོ་ག་ཁོ་ན་ལ་བརྟེན་པར་བྱའོ། ཁ་ཅིག་བཞིས་ཀྱང་བསྙེན་པར་རྫོགས་པར་འགྱུར་ཏེ། ཁ་སྐོང་བར་འོས་པ་བཞིར་ཚང་ན། དགེ་འདུན་དུ་ལོངས་པས་ལས་ཐམས་ཅད་ལ་དབང་བའི་ཕྱིར་དང་། ཞུ་བ་ལས། མཐའ་འཁོབ་ཏུ་ལྔས་བསྙེན་པར་རྫོགས་པར་བྱའོ། །ཞེས་གསུང་ན། ལྔའམ་ལྔ་ལས་ལྷག་པར་མཆིས་བཞིན་དུ་བཞིས་བསྙེན་པར་རྫོགས་ན་རྫོགས་ཞེས་བགྱིའམ་མ་རྫོགས་པ་ཞེས་བགྱི། རྫོགས་པ་ཞེས་བྱ་ལ་འདས་པ་དང་བཅས་པར་རོ། །ཞེས་དང་། ས་ག་ལྷས་གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་ན་ནི། །བསྙེན་རྫོགས་མ་སྨད་འགྱུར་བ་སྟེ། །ལྷ་ཡིས་ཀྱང་ནི་ཕྱག་བྱར་འོས། །ཞེས་བཤད་པའི་ཕྱིར་རོ། །ཞེ་ན། དེ་ནི་མི་འཐད་དེ། ཞུ་བའི་དེ་ནི་ཡི་གེ་ཉམས་པ་ཡིན་ཏེ།(༡༤༩བ)
རྒྱ་ཆེར་འགྲེལ་མཁན་པོས་ལུང་དྲངས་པར། ལྔ་ལས་ལྷག་པར་མཆིས་བཞིན་དུ་ལྔས་བསྙེན་པར་རྫོགས་པར་བགྱིས་ན་རྫོགས་ཞེས་བགྱིའམ། མ་རྫོགས་ཞེས་བགྱི། བཀའ་སྩལ་པ། རྫོགས་ཞེས་བྱ་ལ་འདས་པ་དང་བཅས་པར་རོ། །ཞེས་དྲངས་པའི་ཕྱིར་དང་། ཡུལ་དབུས་སུ་ཉི་ཤུ་འམ་ཉི་ཤུ་ལས་ལྷག་པར་མཆིས་བཞིན་དུ་བཅུས་བསྙེན་པར་རྫོགས་ཞེས་བགྱིའམ། མ་རྫོགས་ཞེས་བགྱི། བཀའ་སྩལ་པ། རྫོགས་ཞེས་བྱ་ལ་འདས་པ་དང་བཅས་པར་རོ། །ཞེས་གསུངས་པའི་ཟླ་སྟོབས་ཀྱིས་འགྲུབ་པའི་ཕྱིར་རོ། །ས་ག་ལྷས། བཞིའི་སྟེང་དུ་ལས་མཁན་བསྣན་པ་ལ་དགོངས་སོ། །བཞིར་ཚང་བས་དགེ་འདུན་དུ་ལོངས་པས་ལས་ཐམས་ཅད་འགྲུབ་ན། ལས་སོ་སོ་ལ་དགེ་འདུན་གྲངས་ཐ་དད་གསུངས་པ་དོན་མེད་པར་འགྱུར་རོ། །བཞི་ལས་མེད་ན་གསང་སྟོན་བསྐོ་བ་ལ་སོགས་པའི་ལས་མི་འགྲུབ་པའི་ཕྱིར་རོ། །ཞེས་དང་། སྟག་ཚང་ལོ་ཙཱ་བའི་འདུལ་ཊཱིཀ་ལས། མཐའ་འཁོབ་དག་ཏུ་ཡེ་བསག་ཏུ་མེད་ན་འདུལ་བ་འཛིན་པ་ལས་མཁན་དང་བཅས་པའི་དགེ་སློང་ལྔ་ལ་སོགས་པ་དགོས་ཏེ། བཞི་ཁ་སྐོང་གཅིག་གསང་སྟོན་དུ་བསྐོ་དགོས་པས་སོ། །ལས་མཁན་དང་བཅས་པའི་བཞི་ལས་མ་རྙེད་ནའང་འཆགས་ཏེ། གསང་སྟོན་གྱི་བྱ་བ་འཁོར་བཅས་མེད་པར་ཡང་འཆགས་པར་རབ་བྱུང་གཞི་ནས་བཤད་ཅིང་། དེ་ཡང་སྒྲུབ་ཏུ་ཡོད་ན་འཆགས་ལ་ཉེས་བྱས་དང་། མེད་ན་ཉེས་མེད་དུ་འཆགས་ཏེ། གྲོ་བཞིན་སྐྱེས་ལ་ཉེས་མེད་དུ་གནང་ཞིང་། ཞེས་དང་། ཕྲེང་རྒྱུད་ལས། གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་ན་ནི། །(༡༥༠ན)
བསྙེན་རྫོགས་མ་སྨད་གྱུར་པ་སྟེ། །ལྷ་ཡིས་ཀྱང་ནི་ཕྱག་བྱར་འོས། །ཞེས་སོགས་བཤད་པས་སོ། །འོན་ཀྱང་བསག་ཏུ་ཡོད་ན་ནི་སྤྱིར་བཏང་གཞི་བཞག་ནི་ཆོ་ག་ལ་བསྟེན་པར་བྱའོ། །ཞེས་གོང་འོག་ཏུ་ལན་དུ་མར་གསུངས་པས་མཐའ་འཁོབ་ཏུ་ཡང་བཅུ་ཚོགས་བསགས་པ་ལ་འབད་པར་བྱའོ། །ཞེས་གསུངས། ལུང་རིགས་གཏེར་མཛོད་དུ། སྐྱེ་ལ་ཉེས་བྱས་ཀྱི་དབང་དུ་བྱས་ནས་དགེ་སློང་བཞི་ལ་བརྟེན་ནས་ཀྱང་བསྙེན་རྫོགས་ཀྱི་སྡོམ་པ་སྐྱེར་རུང་སྟེ། བསྒྲུབ་བྱ་བར་ཆད་དང་མི་ལྡན་པའི་སྐལ་ལྡན་ལ་མཁན་པོ་གཏན་མེད་པ་དང་གསང་སྟོན་གྱི་ལྐོག་ཏུ་བར་ཆད་མ་དྲིས་པར་གསོལ་བཞིའི་ཆོ་ག་བརྡ་སྤྲད་པ་ལས་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པའི་ཕྱིར། འདི་ལ་དགོངས་ནས་ལུང་ཞུ་བ་དང་། ཚིག་ལེའི་ལུང་སྔ་མ་གཉིས་འདྲེན་པར་མཛད། མཁས་གྲུབ་རྗེས། དེས་ན་ཕྱིས་ཀྱི་བོད་ཁ་ཅིག །མེ་ཏོག་ཕྲེང་རྒྱུད་ལ་བརྟེན་ནས་དགེ་སློང་བཞི་ཁོ་ནས་བསྙེན་པར་རྫོགས་པར་བྱེད་པ་ནི་བསྟན་པ་ལ་གནོད་པའི་ཆོ་ག་ཡིན་ཏེ། དགེ་སློང་བཞི་ལས་མེད་ན་གཅིག་གསང་སྟོན་དུ་བསྐོ་དགོས་ཤིང་། གསུམ་གྱིས་གསང་སྟོན་བསྐོ་བའི་ལས་བྱས་ཀྱང་དགེ་འདུན་དུ་མ་ལོངས་པས་ལས་མི་འཆགས་པའི་ཕྱིར་རོ། །འཕྲེང་རྒྱུད་ལས་བཞི་ཞེས་འབྱུང་བ་ནི་ལས་བྱེད་པ་མ་གཏོགས་པའི་ཁ་སྐོང་བཞིའི་དབང་དུ་བྱས་པ་ཡིན་པར་གདོན་མི་ཟའོ། །ཞེས་དང་། རིན་ཅེན་མཛེས་པའི་ཕྲ་ཚོམ་ལས། བསྒྲུབ་བྱེད་དགེ་འདུན་གྱི་གྲངས་ཀྱི་ཚད་ལ་ཡུལ་དབུས་སུ་བསྒྲུབ་བྱ་སྐྱེས་པ་བསྙེན་པར་རྫོགས་པ་ལ་ཉུང་མཐའ་ལའང་དགེ་སློང་བཅུ་ཚོགས་དགོས། མཐའ་འཁོབ་ཏུ་ཉུང་མཐའ་(༡༥༠བ)
དགེ་སློང་ལྔ་ཚོགས་དགོས་པ་ནི་མདོ་རྩའི་ལས་གཞི་ལས་བསྙེན་པར་རྫོགས་པ་ལ་ནི་བཅུ་ལ་སོགས་པའོ། །མཐའ་འཁོབ་དག་ཏུ་མེད་ན་འདུལ་བ་འཛིན་པ་དང་ལྔ་ལ་སོགས་པའོ། །ཞེས་གསུངས་པས་བསྟན། དེ་ལ་པཎ་ཆེན་རིན་པོ་ཆེས། གསང་སྟོན་བསྐོ་བའི་ལས་བྱེད་པའི་སྐབས་སུ་ནི་དགེ་སློང་ལྔས་མི་ཆོག་པར་དྲུག་ངེས་པར་དགོས་ཏེ། བསྐོ་བའི་ལས་དེ་བྱེད་པའི་ཚེ་ལས་སློབ་ཀྱི་དགེ་འདུན་བཙུན་པ་རྣམས་གསན་དུ་གསོལ། ཞེས་བརྗོད་དགོས་པས་དེ་སྐད་བརྗོད་ཡུལ་གྱི་དགེ་འདུན་ནི་བསྐོ་མཁན་གྱི་ལས་སློབ་དང་བསྐོ་ཡུལ་གཉིས་མི་ཐེ་བའི་དགེ་སློང་གཞན་བཞི་ཡན་ཆད་ལ་འཇོག་པའི་ཕྱིར་གསུངས་པ་ནི་ཐུགས་མད་པར་སྣང་། དེ་ལྟར་ན་དངོས་གཞིའི་ཆོ་ག་བརྗོད་པའི་ཚེ་ལྔ་ཚོགས་ཙམ་གྱི་ཆོག་པ་མདོ་རྩའི་དགོངས་པར་བྱེད་དགོས་པ་འདྲ། འདུལ་བ་འཛིན་པ་དང་ལྔ་ལ་སོགས་པའི་དང་། སྒྲ་འདི་འབྱེད་ཚིག་ཡིན་ན་འདུལ་བ་འཛིན་པ་ལས་སློབ་དང་། དེའི་སྟེང་དུ་གཞན་ལྔ་ལ་སོགས་པ་དགོས་པ་བསྟན་པར་སྣང་། ལས་སློབ་དང་བཅས་པས་ལྔ་ལ་སོགས་པའི་དོན་དུ་འཆད་ན་འབྲེལ་ཞིང་སྡུད་པའི་ཚིག་ཕྲད་དུ་སོང་། རྒྱ་ཆེར་འགྲེལ་ལས་ཕྱི་མ་འདི་བཤད། འདུལ་བ་འཛིན་པ་དམར་སྟོན་གྱི་སློབ་མ་དམར་སྟོན་རྒྱ་མཚོ་རིན་ཅེན་བྱུང་། དེས་མདོ་རྩ་ལ་འབྲུ་ཞིབ་མོ་མ་ཡིན་པའི་དཀའ་འགྲེལ་ལྟ་བུ་ཞིག་མཛད་པ་དམར་ཊཱིཀ་ཏུ་གྲགས། དེ་ལ་ཀུན་མཁྱེན་སངས་རྒྱས་འཕེལ་གྱི་འདུལ་ཆོས་གསན། འདིས་འདུལ་བའི་སྤྱི་དོན་མདོར་བསྡུས་པ་ཞིག་མཛད། འདི་ལ་སློབ་མ་བསམ་གྱིས་མི་ཁྱབ་པ་བྱུང་། སྐྱེད་ཚལ་བའི་ལུང་རིགས་གཏེར་མཛོད་ལས། སྐྱེ་ལ་ཉེས་བྱས་(༡༥༡ན)
ལ་བཞི་ཚོགས་ཀྱི་བསྙེན་རྫོགས་ཀྱང་བཞེད། དེའི་ཤེས་བྱེད་དུ་ལུང་ཞུ་བར་ལྔ་འམ་ལྔ་ལས་ལྷག་པ་མཆིས་བཞིན་དུ་བཞིས་བསྙེན་པར་རྫོགས་ན་རྫོགས་ཞེས་བགྱིའམ་མ་རྫོགས་ཞེས་བགྱི། ཉེ་བར་འཁོར་རྫོགས་ཞེས་བྱ་སྟེ། རྫོགས་པར་བྱེད་པ་དག་ལ་འགལ་ཚབས་ཅན་དུ་འགྱུར་རོ། །ཞེས་དང་། འདུལ་བ་ཚིག་ལེ་ལས། གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་ན་ནི། །ཞེས་སོགས་གསུངས་པ་འདྲེན་པ་མཛད། དོན་ལ་ནི་དགེ་སློང་བཞི་ཙམ་ཚོགས་པས་བསྙེན་རྫོགས་འབོགས་པ་དེ་འདྲ་མི་ཡོང་བ་འདྲ་སྟེ། དེ་འདྲ་ལས་ནི་སྡོམ་པ་མི་སྐྱེ། རྒྱུ་མཚན་ལས་སློབ་ཀྱི་དགེ་འདུན་བཙུན་པ་རྣམས་གསན་དུ་གསོལ། ཞེས་བརྗོད་པའི་ཚེ་གསན་ཡུལ་ལ་ལས་སློབ་རང་མི་ཐེ་བའི་དགེ་སློང་བཞི་དགོས་རྒྱུ་ལ་གསུམ་ལས་མ་བྱུང་བས། གསན་ཡུལ་དགེ་འདུན་དུ་མ་ལོངས་པ་བསྙོན་མེད་དུ་གསལ། ལུང་དྲངས་པ་དེ་ནི་ཡི་གེ་མ་དག་པར་བུ་སྟོན་ཐམས་ཅད་མཁྱེན་པ་བཞེད་པས་དེས་ཞུས་དག་གྲུབ། གལ་ཏེ་བཞི་ནི་ལས་བརྗོད་མཁས། །ཞེས་པའི་དོན་ནི། དགེ་སློང་གཞན་བཞིའི་སྟེང་དུ་ལས་སློབ་བསྣན་པ་ལ་དགོངས་པར་ཀུན་མཁྱེན་རོང་སྟོན་ཆེན་པོ་བཞེད། འདི་རིགས་པས་ཀྱང་འགྲུབ་སྟེ། ལས་གྲལ་གཅིག་ཏུ་དགེ་སློང་གསོལ་བཞིའི་ལས་བརྗོད་མཁན་གཅིག་ལས་བཞི་མི་འབྱུང་བའི་ཕྱིར། ལས་ཀྱི་ཁ་སྐོང་དུ་འོས་པའི་ཁྱད་ཆོས་བཅུ་གསུམ་འཆད་པ་ན། ལུང་རིགས་གཏེར་མཛོད་ལས། འགྲེང་ཡུལ་འདུན་སོགས་ཕུལ་བ་མིན། །ཞེས་སོགས་ཀྱི་སྡོམ་ཚིགས་དྲངས་ནས་ཁྱད་ཆོས་གཉིས་ཡུལ་མ་ཡིན་པ་(༡༥༡བ)
འཆད་པ་ན་གང་ལ་ལས་བྱ་བའི་ཡུལ་གྱི་བསྒྲུབ་བྱ་མ་ཡིན་པ་ཞེས་བཤད་པ་ནི་ཇི་ལྟར་འཐད་བརྟག་པར་བྱ་སྟེ། ལས་བྱ་ཡུལ་གྱི་བསྒྲུབ་བྱ་དེ་སྒྲུབ་བྱེད་དགེ་སློང་གི་ནང་ཚན་དུ་འོས་མི་འོས་ཀྱི་དོགས་པ་ཙམ་ཡང་གཏན་ནས་འབྱུང་མི་རིགས་པའི་ཕྱིར། དེ་ལྟར་ནི་ལས་བྱ་བའི་ཕྱོགས་དེར་གནས་པའི་དགེ་སློང་ཡིན་པ་ལ་ཉེས་པ་འགའ་ཞིག་ལ་བརྟེན་དགེ་འདུན་གྱི་བསྐྲད་པ་ལ་སོགས་པའི་ནན་ཏུར་གྱི་ལས་གང་ལ་བྱ་བའི་ཡུལ་དེ་དགེ་འདུན་གྱི་ལས་བྱེད་པ་ལ་ཚོགས་པའི་ནང་དུ་འཇུག་པར་མི་འོས་པའི་དོན་དུ་འཆད་པ་ཡིན་ཏེ། མདོ་རྩ་ཉིད་ཀྱི་གཞི་སྨད་ཀྱི་ལས་གཞི་ལས། གང་ལ་བྱ་བ་ཡང་མ་ཡིན་ནོ། །ཞེས་དང་། དེའི་རྒྱ་ཆེར་འགྲེལ་ལས། བསྐྲད་པ་ལ་སོགས་པའི་ལས་གང་ལ་བྱ་ཡུལ་གྱི་དགེ་སློང་རྣམས་ལས་ཀྱི་ཁ་སྐོང་དུ་མི་འོས་པ་ལ་གསུངས་འདུག་པའི་ཕྱིར། ཞེས་ཤེས་བྱེད་མང་དུ་དྲངས་འདུག་ནའང་མེ་ཏོག་ཕྲེང་རྒྱུད་ཀྱི་ལུང་ལ་ལས་བྱེད་མ་གཏོགས་པའི་བཞི་ཞེས་འཆད་པ་དག་འཁྱོག་པོར་འདྲེན་པར་མངོན་ཞིང་། མཁན་པོ་མེད་པར་སྡོམ་པ་སྐྱེ་བའང་སྔ་རབས་པ་རྣམས་ཀྱིས་ཚིག་གི་ཡམས་ཀྱི་ཤན་ཤོར་བ་འདྲ། མདོ་རྩར། སྐལ་བ་དང་ལྡན་པའི་རང་བཞིན་ཅན་ལ་བར་ཆད་མ་དྲིས་པར་ཡང་ངོ་། །ཞེས་པ་མཁན་པོ་མེད་པ་ལ་ཡང་ངོ་ཞེས་པའི་ལུང་དང་མི་འདྲ་སྟེ། གོང་མ་ལ་ལུང་རིགས་གཉིས་ཀས་སྒྲུབ་ཏུ་ཡོད་པ་ལུང་བཤད་མ་ཐག་པ་ལྟར་དང་བར་ཆད་ཀྱི་ཆོས་རྣམས་དང་མི་ལྡན་པའི་བསྒྲུབ་བྱ་མང་དུ་འོང་བ་མངོན་སུམ་གྱི་ཚད་མས་གྲུབ་ལ། དེ་འདྲའི་བསྒྲུབ་བྱ་ལ་བར་ཆད་འདྲི་མི་དགོས་པས་གསང་སྟོན་བསྐོ་བ་དང་ལས་སློབ་ཀྱི་དྲི་བའི་སྔོན་གྱི་གསོལ་བའི་ལས་གཉིས་ཀ་བརྗོད་མི་དགོས་ཤིང་། འོག་ཏུ་(༡༥༢ན)
གསོལ་བཞིའི་ལས་ཀྱི་སྐབས་ལས་སློབ་ཐེ་བའི་དགེ་འདུན་བཞི་ཡོད་པས་ཁྱབ་པའི་རྒྱུ་མཚན་སྡོམ་པ་དགེ་འདུན་ལ་བསྟེན་ནས་སྐྱེ་ཞིང་། དགེ་འདུན་ནི་བཞིར་ལོངས་པས་གྲངས་ཚང་། གསང་སྟོན་བསྐོ་བའི་ཚེ་བསྐོ་མཁན་དང་། བསྐོ་ཡུལ་གྱི་དགེ་འདུན་གཉིས་ཀ་མི་ཐེ་བར་བྱས་པའི་གསུམ་ལས་མ་བྱུང་བར་སྨྲ་བ་ནི་གཏན་ནས་མི་རིགས་ཏེ་གང་ལ་བྱ་བ་མ་ཡིན་པ་ཞེས་པ་གསང་སྟོན་བསྐོ་ཡུལ་ལམ་བསྒྲུབ་བྱ་སོགས་ལ་བྱ་བ་མ་གཏོགས་ལས་མཁན་ལ་དོགས་པ་ནི་གནག་རྫི་རྒན་པོ་ལ་ཡང་མི་འཆར་བས་པཎ་ཆེན་གསེར་མདོག་ཅན་པའི་གསུང་ལྟར་ན། ད་ལྟའི་འདུལ་འཛིན་ཕལ་ཆེར་གྱི་ཕྱག་ལེན་མ་དག་པར་སོང་བས་ཁྱེད་ཀྱི་བསྟན་པ་སྤྱི་ལ་སྐུར་པ་འདི་འདྲ་བཏབ་ཕྱིན། རྒྱལ་བ་བཙོང་ཁ་པར་དམོད་པ་མཛད་པ་གཙང་ཆུ་དང་ཡུར་ཆུའི་དཔེར་སོང་། ངོར་ཨེ་ཝཾ་ཆོས་ལྡན་དུ་གྲོགས་ལྡན་པ་ཐེ་བའི་དྲུག་མཛད་པ་ཁ་སྐོང་མང་བའི་ཕན་ཡོན་ལས་མཁས་པའི་རྣམ་དཔྱོད་དུ་མི་སེམས་ཏེ་གྲོགས་ལྡན་པ་གཙུག་ཕུད་འབྲེག་མཁན་གྱིས་བྱས་ཀྱང་ཁྱབ་བོ། །དོན་འདི་སྐོར་ལ། ནོར་བུའི་ཐེམ་སྐས་ལས། ཡང་མཁས་པ་ཁ་ཅིག །བསྙེན་པར་རྫོགས་ཚུལ་བཅུའི་ནང་ཚན། ཡུལ་དབུས་སུ་བཅུ་ཚོགས་དང་། མཐའ་འཁོབ་ཏུ་ལྔ་ཚོགས་ཀྱི་ཆོ་ག་གཉིས་སྔོན་ཆོག་མཚན་ཉིད་པར་འཆད་པ་མི་འཐད་དེ། མཐའ་འཁོབ་ཏུ་ལྔ་ཚོགས་ཀྱི་ཆོ་ག་ཆོས་ཅན། ཁྱོད་དགེ་འདུན་ཐམས་ཅད་འདུས་པ་ན་ཆ་ལུགས་འདི་བཞིན་དུ་བྱས། ཞེས་སོགས་ཀྱི་སྐབས་ནས་དངོས་བསྟན་གྱི་སྔོན་ཆོག་ཡིན་པར་ཐལ། ཁྱོད་སྔོན་ཆོག་ཡིན་པའི་ཕྱིར་རོ། །འདོད་མི་ནུས་ཏེ། ཆོས་ཅན་ཡིན་པའི་ཕྱིར་རོ། །དེས་ན་མཐའ་འཁོབ་ཏུ་ལྔ་ཚོགས་(༡༥༢བ)
ཀྱི་ཆོ་ག་ནི། གསོལ་བཞིའི་སྔོན་ཆོག་མ་ཡིན་ཏེ། ད་ཆོག་བཅས་པའི་རྗེས་འཕྱི་མོ་ནས། ཡུལ་མཐའ་འཁོབ་རྡོ་ཅན་ཞེས་བྱ་བར། དགེ་སློང་བཅུ་ཚོགས་རྙེད་དཀའ་ནས་བཅས་པ་ཡིན་པའི་ཕྱིར་ཏེ། འདུལ་ལུང་ལས། རྡོ་ཅན་ཞེས་བྱ་བའི་ཡུལ་གྱི་ཐ་མ་ན་དགེ་སློང་གི་ཚོགས་ཉུང་ཉུང་སྟེ། གྲངས་བཅུར་སྐལ་བ་དཀའ་ནས། བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་ངས་རྗེས་སུ་གནང་སྟེ། མཐའ་འཁོབ་རྣམས་སུ་འདུལ་བ་འཛིན་པ་དང་ལྔའི་ཚོགས་གྱིས་བསྙེན་པར་རྫོགས་པ་དང་། རྟག་ཏུ་ཁྲུས་བྱ་བ་དང་། འཆིལ་ལྷམ་རིམ་གཅིག་པ་བཅང་པར་བྱ་སྟེ། ཞེས་སོགས་བཤད་པས་བཅུ་ཚོགས་ལྔ་ཚོགས་གཉིས་ནི། ད་ཆོག་གི་ནང་ཚན་འཕྱི་མོ་ནས་བཅས་པ་ཡིན་པས། སྔོན་ཆོག་ཏུ་དོགས་པའི་འཁྲུལ་གཞི་ཙམ་ཡང་མེད་དོ། །དེས་ན་རང་ལུགས་ནི། སྔོན་ཆོག་མ་ཡིན་ན་གསོལ་བཞིའི་ཅིག་ཅར་རབ་བྱུང་བསྙེན་རྫོགས་སུ་བསྒྲུབ་པའི་ཆོ་ག་འདི་མ་ཡིན་དགོས་ཏེ། དགེ་འདུན་ཐམས་ཅད་འདུས་པ་ན། ཞེས་སོགས་ཀྱི་གཞུང་འདི། སྔོན་ཆོག་མཚན་ཉིད་སྟོན་བྱེད་ཀྱི་གཞུང་ཡིན་པའི་ཕྱིར་ཏེ། རྒྱ་ཆེར་འགྲེལ་ལས། ལྟ་བུ་ནི་སྔོན་གྱི་ཆོ་གའི་ཞེས་བྱ་བ་ལ་ལྟ་བུ་ནི། ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ། སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི། རྣམ་པ་གཞན་མ་ཡིན་ནོ། །ཞེས་བྱ་བའི་ཐ་ཚིག་གོ །ཞེས་བཤད་པའི་ཕྱིར་རོ། །གཞུང་དེའི་དོན་ཅི་སྙམ་ན་སྔོན་ཆོག་གི་རྣམ་པ་སྟེ། རང་བཞིན་ནམ་ཁྱད་ཆོས་ནི། ཅིག་ཅར་བར་མ་རབ་བྱུང་བསྙེན་རྫོགས་སྒྲུབ་པ་སོགས་ཁྱད་ཆོས་སུམ་ལྡན་དེ་ལྟ་བུ་ནི་ཚང་ན་སྔོན་ཆོག་མཚན་ཉིད་པ་ཡིན་གྱིས། མ་ཚང་ན་མིན་ཞེས་པའི་དོན་ཏེ། གཞན་མ་ཡིན་གཞན་ལྡན་རྣམ་དཔྱོད་ཀྱི་ཚིག་(༡༥༣ན)
གི་ནུས་པ་བསྟན་འདུག་པའི་ཕྱིར་རོ། །ཞེས་དང་། ཡང་དེ་ཉིད་ལས། དགེ་འདུན་མངོན་གྱུར་གྲངས་ཚང་སྐབས་སུ་མཐའ་འཁོབ་ཏུ་བསྒྲུབ་བྱ་བསྙེན་རྫོགས་ལ་དགེ་སློང་ལྔ་ངེས་པར་དགོས་པ་དང་། བཞིས་ཀྱང་ཆོག་ཅེས་པའི་ལུགས་ཕྱི་མ་འདི་དམིགས་བསལ་ལ་གཅེས་པ་ཡིན་ནོ། །དེ་ཡང་ཇི་ལྟར་སྙམ་ན། མཐའ་འཁོབ་ཏུ་བསྒྲུབ་བྱ་བསྙེན་པར་རྫོགས་པ་ལ་དགེ་སློང་བཞི་ཙམ་འདུས་པ་ལས་བསྒྲུབ་བྱ་ལ་གསོལ་བཞིའི་ལས་ཆགས་པ་གཅིག་ཡོད་པར་ཐལ། ཞུ་བ་ལས། བཙུན་པ་མཐའ་འཁོབ་ཏུ་ལྔས་བསྙེན་པར་རྫོགས་པར་བྱའོ། །ཞེས་གསུངས་ན། ལྔའམ་ལྔ་ལས་ལྷག་པར་མཆིས་བཞིན་དུ་བཞིས་བསྙེན་པར་རྫོགས་ན་རྫོགས་ཞེས་བགྱིའམ་མ་རྫོགས་ཞེས་བགྱི། ཨུ་པ་ལི་རྫོགས་པ་ཞེས་བྱ་སྟེ་རྫོགས་པར་བྱེད་པ་དག་ལ་འདས་པ་དང་བཅས་པར་རོ། །ཞེས་བཤད་པའི་ཕྱིར། དེ་ལ་ཁོ་ན་རེ། ཞུ་བའི་ལུང་དེ་ལུང་མ་དག་པ་ཡིན་ཏེ། འོ་ན་ཡུལ་དབུས་སུ་དགེ་སློང་བཅུའམ་བཅུ་ལས་ལྷག་པར་མཆིས་བཞིན་དུ་དགུས་བསྙེན་པར་རྫོགས་ན་རྫོགས་ཞེས་བགྱིའམ་མ་རྫོགས་ཞེས་བགྱི། ཨུ་པ་ལི་རྫོགས་པ་ཞེས་བྱ་སྟེ། ཞེས་སོགས་ཀྱི་འདུལ་ཚིག་གཅིག་འབྱུང་རིགས་པར་ཐལ། ལུང་སྔ་མ་དེ་འདུལ་ལུང་རྣམ་དག་ཡིན་པའི་ཕྱིར། འདོད་མི་ནུས་ཏེ་ཞུ་བ་ལས། ཡུལ་དབུས་སུ་དགེ་སློང་ཉི་ཤུའམ་ཉི་ཤུ་ལས་ལྷག་པར་མཆིས་བཞིན་དུ་བཅུས་བསྙེན་པར་རྫོགས་ན་རྫོགས་ཞེས་བགྱིའམ་མ་རྫོགས་ཞེས་བགྱི། ཨུ་པ་ལི་རྫོགས་ཞེས་བྱ་སྟེ། རྫོགས་པར་བྱེད་པ་དག་ལ་འདས་པ་དང་བཅས་པར་རོ་ཞེས་འབྱུང་གིས། ལུང་ཚིག་སྔ་མ་དེ་ལྟ་བུ་ཅི་ཡང་མི་འབྱུང་བའི་ཕྱིར་རོ། །དེས་ན་རྒྱ་ཆེར་འགྲེལ་དུ་ལུང་དྲངས་པ་ཡང་། (༡༥༣བ)
མཐའ་འཁོབ་ཏུ་ལྔ་ལས་ལྷག་པར་མཆིས་བཞིན་དུ་ལྔས་བསྙེན་པར་རྫོགས་ཞེས་བགྱིའམ་མ་རྫོགས་ཞེས་བགྱི། རྫོགས་པ་ཞེས་བྱ་སྟེ། རྫོགས་པར་བྱེད་པ་དག་ལ་འདས་པ་དང་བཅས་པར་རོ་ཞེས་པ་འདི་དག་པ་ཡིན་གྱིས། སྔ་མ་ནི་མ་དག་སྟེ། ལས་སོ་སོའི་ཁ་སྐོང་གི་གྲངས་ལ་དུ་དགོས་ངེས་པ་ཅན་བཤད་པའི་གྲངས་དེ་མ་ཚང་ན་ལས་དེ་མི་ཆགས་ཞེས་སྟོན་པ་ནི་དགེ་འདུན་དུ་མ་གྱུར་པས་མི་བྱའོ། །ཞེས་པས་བསྟན་ན་ལས་གང་ལ་དགེ་སློང་དུ་དགོས་སྙམ་པ་ལ། བསྙེན་པར་རྫོགས་པ་ལ་ནི་བཅུ་ལ་སོགས་པའོ། །མཐའ་འཁོབ་ཏུ་གཞན་མེད་ན་འདུལ་བ་འཛིན་པ་དང་ལྔ་ལ་སོགས་པའོ། །ཞེས་བསྒྲུབ་བྱ་བསྙེན་པར་རྫོགས་པ་ལ་ཡུལ་དབུས་སུ་དགེ་སློང་བཅུ་དང་། མཐའ་འཁོབ་ཏུ་ལྔ་ཉུང་མཐར་བྱས་ནས་བཤད་ཀྱིས། དེ་ལས་ཉུང་བ་ལ་བསྙེན་རྫོགས་ཀྱི་ལས་འཆགས་པ་མ་བཤད་འདུག་པའི་ཕྱིར་ཟེར་ན། འདི་རྣམ་དཔྱོད་དང་ལྡན་པའི་དོགས་པའི་གནད་ཅིས་ཀྱང་ཡིན་མོད། འདི་ལ་སྤྱིར་བཏང་བ་དང་། དམིགས་ཀྱི་བསལ་བའི་གནད་གཅེས་པའི་སྙིང་གཏམ་ཡིན་ཏེ། མཐའ་འཁོབ་ཏུ་དགེ་སློང་རྙེད་དཀའ་བ་ནས་ལྔ་ཚོགས་ཉུང་མཐར་བྱས་པ་ནི་སྤྱིར་བཏང་ཡིན་ལ། དམིགས་བསལ་ལ་དགེ་སློང་བཞི་ལ་བརྟེན་ནས་ཀྱང་བསྙེན་རྫོགས་ཀྱི་ལས་ཆགས་པ་ཡིན་ཏེ། ཞུ་བའི་ལུང་གོང་དུ་དྲངས་པ་དེ་དག་པའི་ཤེས་བྱེད། འདུལ་བ་མེ་ཏོག་ཕྲེང་རྒྱུད་ལས་ཀྱང་། གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་ན་ནི། །བསྙེན་རྫོགས་མ་སྨད་གྱུར་པ་སྟེ། །ལྷ་ཡིས་ཀྱང་ནི་ཕྱག་བྱར་འོས། །ཞེས་ཁ་སྐོང་དགེ་སློང་བཞི་པོ་དེའི་ནང་ན་ལས་(༡༥༤ན)
བརྗོད་མཁན་ལས་སློབ་ཀྱི་འོས་ཡོད་ན་བཞི་པོ་དེ་ཙམ་གྱི་བསྙེན་རྫོགས་ཀྱི་ལས་བྱར་རུང་ཞེས་བཤད་འདུག་པའི་ཕྱིར་རོ། །འདི་ལ་ཁ་ཅིག །གཞུང་འདིའི་དགོངས་པ་ཁ་སྐོང་བཞིའི་སྟེང་དུ་ལས་བརྗོད་མཁན་བསྣན་པའི་ལྔས་བསྙེན་རྫོགས་བྱར་རུང་ཞེས་པའི་དོན་ཡིན་གྱི། དགེ་སློང་བཞིས་ཆོག་པ་བསྟན་པའི་བདུད་རྩི་མ་ཡིན་ནོ། །ཞེས་འཆད་པ་ཡང་རྣམ་དཔྱོད་ཅན་མ་ཡིན་ཏེ། མཐའ་འཁོབ་ཏུ་ལྔས་བསྙེན་རྫོགས་རུང་བ་ནི། ཚིག་ལེ་དེར་དེའི་གོང་ཉིད་དུ། མཐའ་འཁོབ་ཏུ་ལྔ་ལ་སོགས་པ་བཞེད་པ་ཡིན། ཞེས་བཤད་ཟིན་པས་སླར་ཡང་བཞིའི་སྟེང་དུ་ལས་མཁན་དང་ལྔས་བསྙེན་རྫོགས་རུང་ཞེས་བཤད་པ་ལ་རྣམ་བཅད་མེད་པའི་ཕྱིར་དང་། རྣམ་བཅད་ལྷག་པོ་ཡོད་དུ་ཆུག་ནའང་། གལ་ཏེ་བཞི་དང་ལས་བརྗོད་མཁས། །ཞེས་ཟླས་དབྱེའི་ཚིག་བྱུང་ན། དེ་ལྟར་འགྱུར་བ་བདེན་ནའང་། གལ་ཏེ་བཞི་ནི་ལས་བརྗོད་མཁས། །ཞེས་དགར་ཚིག་སྨོས་པའི་གནད་ཀྱིས་དེ་ལྟ་བུའི་འབྲུ་གནོན་མཛད་པ་མཁས་པའི་བཞད་གད་ཡིན་པའི་ཕྱིར་རོ། །དེས་ན་གནད་ཀྱི་སྙིང་པོ་གསང་སྟོན་བཀོད་པ་སོགས། བསྒྲུབ་བྱ་དགེ་སློང་ལ་སྒྲུབ་བྱེད་བསྐོ་བའི་ལས་ཡོད་པར་དགེ་སློང་ལྔ་ངེས་པར་དགོས་ཏེ། བསྐོ་བའི་ཡུལ་དགེ་སློང་གཅིག་དང་། བཀོད་མཁན་དགེ་སློང་བཞི་ངེས་པར་དགོས་པའི་ཕྱིར། གསང་སྟོན་བསྐོ་བ་སོགས་བསྐོ་བའི་ལས་མི་དགོས་ན་དགེ་སློང་བཞིས་ཆོག་སྟེ། དགེ་སློང་བཞིའི་ཚོགས་པས་འདུལ་བར་གཏོགས་པའི་ལས་ཕལ་ཆེར་འགྲུབ་པ་བསྟན་པ་བསྟན་པའི་སྙིང་པོ་ཡིན་པའི་ཕྱིར་རོ། །དེ་ལ་ཡུལ་དབུས་སུ་དགེ་སློང་དགུ་མན་ཆད་ཚོགས་པས་ཀྱང་(༡༥༤བ)
བསྙེན་རྫོགས་ཀྱི་ལས་བསྒྲུབ་ཏུ་རུང་བར་ཐལ། ཞེས་འཕེན་པ་ནི་རིགས་པ་བཟང་པོར་སྣང་བས་ཡུལ་དབུས་སུ་དགེ་སློང་རྙེད་སླ་བའི་དབང་གིས་དགེ་སློང་བཅུ་ལས་ཉུང་བའི་དམིགས་བསལ་གྱི་ལུང་ཁོ་བོས་མ་མཐོང་མོད་ཀྱིས། དུས་ཀྱི་དབང་གི་རྙེད་དཀའ་འབྱུང་ན་བཞིས་ཀྱང་བསྙེན་རྫོགས་འཆགས་པ་ཞིག་ཡུལ་དབུས་སུ་ཡང་སྲིད་དགོས་སོ། །ཞེས་ཁོ་བོས་འཆད་དོ། །བཅུ་ཚོགས་དང་ལྔ་ཚོགས་ཀྱི་ཁྱད་པར་དགེ་སློང་དཀོན་མོད་ཀྱིས། དགག་དགོས་ལས་རྣམ་པར་ཕྱེ་བ་ཙམ་ཡིན་གྱིས། གཞན་སྒྲུབ་བྱེད་ཟུར་པ་མེད་པའི་ཕྱིར་དང་། དཀའ་ཞིང་ཉེ་བར་འཚེ་བའི་ཚེ་བསླབ་པའི་གཞི་བག་ཡངས་སུ་བྱའོ། །ཞེས་བཤད་པའི་ཚིག་གི་ནུས་པ་ལས། རྒྱལ་བ་ཉིད་ཀྱི་དགོངས་པའི་བདུད་རྩིར་ཡང་གདོན་མི་ཟ་བའི་ཕྱིར་རོ། །འོན་ཀྱང་མཁས་པ་ཁ་ཅིག །ཡུལ་མཐའ་འཁོབ་ཏུ་གསང་སྟོན་སློབ་དཔོན་འོས་སུ་གྱུར་པ་མེད་ན། དེ་མེད་པར་བསྙེན་པར་རྫོགས་པ་ལ་ཉེས་མེད་ཕུན་ཚོགས་ཀྱི་སྡོམ་པ་ཡང་འཆགས། དེའི་འོས་ཡོད་བཞིན་དེ་མེད་པར་རྫོགས་པ་ལ་སྐྱེ་ལ་ཉེས་བྱས་ཡིན་ཞེས་འཆད་པ་ནི་བློ་གསལ་དག་གིས་དཔྱད་པར་བྱའོ། །འདི་ལ་དགོས་པ་དཔྱད་ན་དཔྱད་ལྡན་དག་ན་རེ། དགེ་སློང་བཞི་ཁོ་ན་ལས་བསྙེན་པར་རྫོགས་མ་ཐག་པའི་བསྙེན་རྫོགས་ཀྱི་སྡོམ་པ་ཆོས་ཅན། ཁྱོད་སྒྲུབ་བྱེད་ཀྱི་དགེ་སློང་བཞི་པོ་དེ། མདོ་རྩ་བར། འདིར་ཆོ་ག་ནི་དགེ་འདུན་ཚང་བ་དང་། ལས་བརྗོད་པ་དང་། ལས་བྱེད་པ་ཉིད་དོ། །ཞེས་པའི་ཚིག་ཟུར་གྱི་དགེ་འདུན་ཚང་བ་དང་། ཞེས་པའི་སྐབས་ནས་དངོས་བསྟན་གྱི་དགེ་སློང་ཡིན་པར་ཐལ། ཁྱོད་ད་ལྟར་ཆོ་ག་ལས་བསྙེན་པར་རྫོགས་པའི་སྡོམ་པ་ཡིན་པའི་(༡༥༥ན)
ཕྱིར། འདོད་ན། དེ་ཆོས་ཅན། ཁྱོད་སྒྲུབ་བྱེད་ཀྱི་དགེ་སློང་བཞི་པོ་དེ་དབྱུང་བ་ལ་ནི་ཉི་ཤུ་ལ་སོགས་པ་དགེ་འདུན་ཉིད་དོ། །བསྙེན་པར་རྫོགས་པ་ལ་ནི་བཅུ་ལ་སོགས་པའོ། །མཐའ་འཁོབ་དག་ཏུ་ནི་མེད་ན་འདུལ་བ་འཛིན་པ་དང་ལྔ་ལ་སོགས་པའོ། །ཞེས་པའི་སྐབས་ནས་དངོས་བསྟན་གྱི་དགེ་སློང་ཡིན་པར་ཐལ། འདོད་པ་གང་ཞིག །ཁྱོད་སྒྲུབ་བྱེད་ཀྱི་དགེ་སློང་བཞི་པོ་དེ་ལྷག་མ་ལ་ནི་བཞི་ལ་སོགས་པའོ། །ཞེས་པའི་སྐབས་ནས་དངོས་བསྟན་གྱི་དགེ་སློང་མིན་པའི་ཕྱིར། འདོད་ན་ཆོས་ཅན། ཁྱོད་སྒྲུབ་བྱེད་ཀྱི་དགེ་སློང་བཞི་པོ་དེ་དབྱུང་བ་ལ་ནི་ཉི་ཤུ་ལ་སོགས་པ་དགེ་འདུན་ཉིད་ཤེས་པའི་སྐབས་ནས་དངོས་བསྟན་གྱི་དགེ་སློང་ཡིན་པར་ཐལ། འདོད་པ་གང་ཞིག །ཁྱོད་སྒྲུབ་བྱེད་ཀྱི་དགེ་སློང་བཞི་པོ་དེ་བསྙེན་པར་རྫོགས་པ་ལ་ནི་བཅུ་ལ་སོགས་པའོ། །ཞེས་པའི་དངོས་བསྟན་གྱི་དགེ་སློང་ཡང་མ་ཡིན། མཐའ་འཁོབ་དག་ཏུ་ནི་གཞན་མེད་པ་ན་འདུལ་བ་འཛིན་པ་དང་ལྔ་ལ་སོགས་པའོ། །ཞེས་པའི་དངོས་བསྟན་གྱི་དགེ་སློང་མ་ཡིན་པའི་ཕྱིར་རོ། །འདོད་ན་ཁྱོད་སྒྲུབ་བྱེད་ཀྱི་ལས་དེ་དབྱུང་བའི་ལས་ཡིན་པར་ཐལ་ལོ། །འདོད་མི་ནུས་ཏེ། ཁྱོད་སྒྲུབ་བྱེད་ཀྱི་ལས་དེ་བསྙེན་རྫོགས་ཀྱི་ལས་ཡིན་པའི་ཕྱིར་རོ། །གཉིས་པ་མ་གྲུབ་ན། ཁྱོད་སྒྲུབ་བྱེད་ཀྱི་དགེ་སློང་བཞི་པོ་དེ། རྒྱ་ཆེར་འགྲེལ་ལས། དབྱུང་བ་དང་བསྙེན་(༡༥༥བ)
པར་རྫོགས་པའི་བྱ་བའི་ལས་མ་གཏོགས་པ་དེ་དག་གིས་ལྷག་མའི་ལས་ལ་ནི། དགེ་སློང་བཞི་ལ་སོགས་པའི་དགེ་འདུན་ཉིད་དོ། །ཞེས་པའི་སྐབས་ནས་དངོས་བསྟན་གྱི་དགེ་སློང་ཡིན་པར་ཐལ། མ་གྲུབ་པ་དེའི་ཕྱིར། འདོད་ན། དེ་ཆོས་ཅན། ཁྱོད་སྒྲུབ་བྱེད་ཀྱི་ལས་དེ་གཞུང་དེའི་ཚིག་ཟུར་གྱི་ལྷག་མའི་ལས་ལ་ནི་ཞེས་པའི་དངོས་བསྟན་གྱི་ལས་ཡིན་པར་ཐལ། འདོད་ན། ཁྱོད་སྒྲུབ་བྱེད་ཀྱི་ལས་དེ་བསྙེན་པར་རྫོགས་པའི་ལས་མིན་པར་ཐལ་ལོ། །ཟེར་ན་རྩ་བ་ལ་མ་ཁྱབ་སྟེ། གཞུང་སྔ་མ་དེ་དག་གི་སྤྱིར་བཏང་ལམ་མེ་བའི་རྣམ་གཞག་ཡིན་ལ། དགེ་སློང་བཞི་ཁོ་ནས་བསྙེན་པར་རྫོགས་པ་བསྒྲུབ་པ་འདི་དམིགས་བསལ་ཕྲ་མོའི་རྣམ་གཞག་ཡིན་པས། གཞུང་སྔ་མ་དེ་དག་གང་གི་ཡང་སྐབས་ནས་དངོས་བསྟན་མ་ཡིན་པའི་ཕྱིར་རོ། །ཞེས་གསུང་བ་ནི་ཀུན་མཁྱེན་ཀླུ་སྒྲུབ་རྗེའི་ལེགས་བཤད་ཆེན་མོར་མངོན་ནོ། །འདུལ་བ་རྒྱ་མཚོའི་སྙིང་པོ་ལས། ཕམ་བརྒྱད་ལྷག་མ་ཉི་ཤུ་དང་། །སྤང་བའི་ལྟུང་བྱེད་སུམ་ཅུ་གསུམ། །ལྟུང་བྱེད་འབའ་ཞིག་བརྒྱ་བརྒྱད་ཅུ། །སོ་སོར་བཤགས་པ་བཅུ་གཅིག་དང་། །ཉེས་བྱས་བརྒྱ་དང་བཅུ་གཉིས་ཏེ། །སུམ་བརྒྱ་དྲུག་ཅུ་རྩ་བཞི་རྣམས། །སྤོང་བར་བྱེད་པ་དགེ་སློང་མ། །ཕམ་པ་བཞི་དང་ལྷག་མ་ནི། །བཅུ་གསུམ་སྤང་ལྟུང་སུམ་ཅུ་དང་། །ལྟུང་བྱེད་འབའ་ཞིག་དགུ་བཅུ་དང་། །སོར་བཤགས་བཞི་དང་ཉེས་བྱས་ནི། །བརྒྱ་རྩ་བཅུ་གཉིས་བསྡོམས་པ་ཡིས། །ཉིས་བརྒྱ་ལྔ་བཅུ་རྩ་གསུམ་རྣམས། །སྤོང་བར་བྱེད་པ་དགེ་སློང་ངོ་། །ཞེས་པའི་དགེ་སློང་མའི་སྐོར་བོད་དུ་མ་དར་བས་ཆོ་ག་སོགས་ཀྱི་རྣམ་གཞག་ལས་ཆོག་ཚོར་མ་གསུངས་པ་དགོངས་གཞི་(༡༥༦ན)
ཆེ་སྟེ། རིན་ཆེན་མཛེས་པའི་ཕྲ་ཚོམ་དུ། ཀུན་མཁྱེན་རིན་པོ་ཆེའི་བཞེད་པས། གངས་རིའི་ལྗོངས་འདིར་བུད་མེད་བསྙེན་རྫོགས་བྱར་མི་རུང་གསུངས། དེའི་རྒྱུ་མཚན་མདོ་རྩར། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་ཐོབ་པར་བསྙེན་པར་རྫོགས་པར་མི་འགྱུར་རོ། །གསང་སྟེ་སྟོན་པའི་འོག་ཏུ་དགེ་འདུན་གྱི་དེ་སྦྱིན་པར་བྱའོ། ཞེས་དང་། དེའི་རྒྱ་ཆེར་འགྲེལ་ལས། སྐབས་ཡིན་པའི་ཕྱིར། དགེ་སློང་མའི་དགེ་འདུན་གྱི་ཞེས་སྨོས་སོ། །ཞེས་གསུངས་པས་ན་བུད་མེད་བསྙེན་པར་རྫོགས་པ་ལ་གསང་སྟོན་གྱི་བར་ཆད་དྲིས་པའི་འོག་ཏུ་དགེ་སློང་མའི་དགེ་འདུན་གྱི་ཚངས་སྤྱོད་ལ་ཉེར་གནས་ཀྱི་སྡོམ་པ་ངེས་པར་སྟེར་དགོས། འདི་ལ་མ་སྦྱིན་ཀྱང་ཆོག་པའི་དམིགས་བསལ་གཞན་གསུངས་པ་མེད། དགེ་སློང་མའི་དགེ་འདུན་དུ་ལོངས་པ་ནི་བོད་དུ་སྔ་ཕྱི་བར་གསུམ་དུ་མ་བྱུང་། དགེ་སློང་ཕའི་དགེ་འདུན་ཁོ་ནས་བུད་མེད་ལ་བསྙེན་རྫོགས་ཕོག་པ་འདི། དགེ་ལྡན་པའི་ཆོས་རྗེ་འདུལ་བ་པ་ཞེས་པ་ཞིག་གིས་བྱས་པར་གྲགས། དེ་དག་ལ་རིག་པའི་འུར་རྡོ་འཕངས་པས་དེ་དག་གིས་མ་བྱས་སོ་ཟེར་ཞིང་། ནམ་མཁའ་བསོད་ནམས་ཀྱི་མཁན་པོ་དང་། ཤངས་ཀྱི་ཕུའི་བླ་མ་ཞིག་གིས་ལས་སློབ་བྱས་ནས། ཆུ་དབར་རང་བྱོན་གྱི་དབོན་མོ་བསྙེན་རྫོགས་བྱས་པ་ལ་ཕོག་སོང་བར་སྣང་ངོ་། །ཞེས་གསུང་བར་མཛད། པཎ་ཆེན་རིན་པོ་ཆེས་དབུས་ཕྱོགས་སུ་བུད་མེད་བསྙེན་རྫོགས་གནང་འདུག་པ་རྒྱ་མ་དགེ་སློང་མར་གྲགས་པ་བཙུན་པའི་ཚད་ཐུབ་པ་བྱུང་ཟེར། ཀུན་མཁྱེན་གྱི་གསུང་ལྟར་ན་པཎ་ཆེན་ལ་ཡང་རིག་(༡༥༦ན)
པའི་འུར་རྡོ་འཕོག་པ་འདྲ། གང་ལྟར་མཁས་པའི་ལུགས་སྲོལ་དེ་དག་ལ་འཐད་མི་འཐད་ཀྱི་རྣམ་དབྱེ་ཅི་འདྲ་གསུང་གིན་ཡོད། ཀུན་མཁྱེན་གྱི་གསུང་དེ་ལ་དཔལ་གྱི་འཁྲི་ཤིང་ལས། ཕ་མའི་ཆོ་ག་ཕན་ཚུན་བསྣོར་བ་ལས། །ཕ་མའི་བསྙེན་རྫོགས་ཕན་ཚུན་ཆགས་པའི་ཕྱིར། །གནོད་བྱེད་རིག་པའི་རུ་མཚོན་བཏུལ་ལོ་ཞེས། །རྒོལ་ན་མགྲིན་པ་འདེགས་ནུས་སུ་ཡོད་སྨྲོས། །ཞེས་རྗེ་འབངས་རྣམས་ལ་མཁས་རྨོངས་ཀྱི་ཉམས་སད་པའི་གནད་དུ་བསྐུལ་བའི་གསུང་ཡང་འབྱོན་པར་མཛད་འདུག་ཕ་མའི་ཆོ་ག་ཕན་ཚུན་བསྣོར་བ་སྟེ་ཕ་ཆོག་ལ་བརྟེན་ནས་བུད་མེད་བསྙེན་པར་རྫོགས་པ་དང་། མ་ཆོག་ལ་བརྟེན་ནས་སྐྱེས་པ་བསྙེན་པར་རྫོགས་པ་མདོ་རྩའི་ལས་གཞི་ཉིད་དང་། དེའི་རྒྱ་ཆེར་འགྲེལ་ལས་གསུངས་པ་ཀུན་མཁྱེན་ཉིད་ཀྱིས་མ་དགོངས་པར་དཔྱད་པ་དེ་དག་གསུངས་པ་ག་ནས་ཡིན། རྗེས་འབྲངས་དག་གིས་ཀྱང་དེ་འདྲ་གོ་བ་གཞིར་བཞག །ཁ་སྐོང་ལས་དོགས་གཅོད་དེ་དག་གནང་བའི་དབུ་ཉིད་ནས། དངོས་གཞི་གསོལ་བཞིའི་ལས་ཀྱི་ཚེ། །ཚོགས་གཉིས་ཕན་ཚུན་བསྣོར་བ་དང་། །ལས་ཚིག་ཕན་ཚུན་བསྣོར་བས་ཀྱང་། །ཆགས་པར་ལས་གཞི་ཉིད་ལས་གསུངས། །འོན་ཀྱང་ད་ལྟར་ཆོ་ག་ཡིས། །བུད་མེད་བསྙེན་པར་རྫོགས་པ་ལ། །ཞེས་སོགས་གསུངས་ཡོད། ཚངས་སྤྱོད་ལ་ཉེར་གནས་སྔོན་དུ་འགྲོ་དགོས་པར་གསུངས་པ་དེ་ལ་གནོད་བྱེད་རིག་པའི་རུ་མཚོན་བརྟུལ་ཚུལ་ཕ་མའི་ཆོ་ག་ཕན་ཚུན་བསྣོར་བ་ལས་སྡོམ་པ་སྐྱེ་བའི་ཕྱིར། མིང་ཙམ་གྱི་སྒྲུབ་བྱེད་ནུས་པ་ཅན་ཞིག་དཔལ་གྱི་འཁྲི་ཤིང་ལས་གསུངས་པའི་རིགས་པ་(༡༥༧ན)
འདྲ། ཀུན་མཁྱེན་རང་གི་གསུངས་པ་དེ་ག་རྟགས་སུ་བཀོད་ནས་གནོད་བྱེད་རིག་པའི་རུ་མཚོན་བརྟུལ་ལོ། །ཞེས་གསུངས་པ་ཤིན་ཏུ་མད་ཅིང་། པཎ་ཆེན་གསེར་མདོག་ཅན་པས་དགེ་སློང་མ་བསྒྲུབས་པར་ཁོང་འདུལ་བའི་བདག་པོ་ཡིན་པས་གསུང་རྒྱུ་ལོས་ཡོད་ཅེས་མཁན་ངག་དབང་ཆོས་གྲགས་ཀྱིས་མཆན་བུ་མཛད་འདུག་པ་ས་སྐྱ་པའི་ཐུགས་ཞེན་ཡིན་ཤས་ཆེ་ཡང་གསེར་མདོག་ཅན་པའི་ཕྱག་ལེན་དེ་འདྲ་ཆོས་ལ་དབང་ཟ་བར་ཟད་ཀྱི། ལབ་རྒྱུ་ཕ་བསད་ཀྱི་བུ་བཞིན་ལྗགས་རློན་པར་ཡོད་པ་རྒྱུ་མཚན་དུ་བྱེད་པ་ལ་མཐའ་མ་བཀག་གོ །དགེ་འདུན་ལ་གསོལ་བ་གདབ་པའི་སྐབས་བུ་སྟོན་རིན་པོ་ཆེའི་ལས་ཆོག་ཏུ་བསྙེན་པར་རྫོགས་པར་མཛད་དུ་གསོལ་སོགས་ཀྱི་སྐབས་སྐད་ཤན་སྦྱར་མཛད་པ་ཞིབ་ཏུ་བཀྲོལ་ཚེ། དོན་གྱི་ཆ་ལ་ཕན་པར་འགྱུར་བས་ཉེ་བསྒྱུར་པྲ་སྔོན་མའི་པྲ་ཛ་འགྲོ་བ་ལའོ་ཞེས་པའི་བྱིངས་ལ། ནིཥྛའོ་ཞེས་པའི་མིང་དུ་བསྒྲུབས་པའི་རྐྱེན་ཀྟ། ཀ་བྱིངས་ལ་ཡོན་ཏན་འགོག་པའི་དོན། བྱིངས་མཐའི་ཨ་བརྗོད་དོན། བྱིངས་ཐམས་ཅད་པ་མ་ཡིན་པ་གསལ་བྱེད་དང་པོ་ཡ་ཡིག་དང་པོ་མ་ཡིན་པའི་དང་པོར་ཨིཊ་ཨཱ་ག་མའོ་ཞེས་པས་བར་རྐྱེན་ཨིཊ་བྱིན། ཊ་གནས་དོན། སོ་སོར་དྲངས། མི་ཟད་པ་ལས་སི་ཕྱིས་པས། པྲ་བྲ་ཛི་ཏ་ཞེས་གྲུབ། ཡང་ཉེ་བསྒྱུར་སཾ་སྔོན་མའི། པ་ཏྀལ་ལཾ་ལ་ཡང་སྟེ། འགྲོ་བ་ལའོ་ཞེས་པའི་བྱིངས་ལ། དཎྜ་དང་སཱུ་ཏྲ་སོགས་ཀྱི་མདོས་བྱིངས་མིང་དུ་བྱེད་པའི་རྐྱེན་ཨཙ་སྦྱར་ཙ་རྗེས་འབྲེལ། བྱིངས་ཀྱི་ལཾ་ཡིག་པུ་ཥ་སོགས་དྱུ་ཏ་སོགས་ལཾ་ཡིག་རྗེས་སུ་འབྲེལ་བ་ཨརྟི་(༡༥༧བ)
སརྟི། ཤསྟི། རྣམས་ལས་པ་རསྨཻ་ལའོ་ཞེས་པའི་ཁྱད་དོན། སོ་སོར་དྲངས། སི་ཕྱིས་ཨུ་པ་ཐོག་མར་བཞག་པས། ཨུ་པ་སམྦ་ཏ་ཞེས་གྲུབ། ཡང་ཉེ་བསྒྱུར་ཨུཏ་སྔོན་མའི་ལུང་པི་གཅོད་པ་ལའོ་ཞེས་པའི་བྱིངས་ལ། ནུས་པ་དང་སྨོན་པ་དག་ལ་འདོ་ཞེས་པ། བྱིངས་ཚིག་ཏུ་བསྒྲུབ་པའི་རྣམ་དབྱེ་པཉྩ་མིའི་སྐྱེས་བུ་དང་པོའི་མང་ཚིག་ཏུ་སྦྱར། བྱེད་པ་པོ་ལ་ཨན་ཏེ་བི་ཀ་ར་ཎའོ་ཞེས་པས་ཨན་བྱིན། ན་རྗེས་འབྲེལ། བྱིངས་མཐའི་ཨི་ཡིག །ཨི་དིཏ་ཀྱི་ནུམ་འོ། ཞེས་པའི་ཁྱད་དོན་ཡིན་པས་ཨི་ཕྱིས། ནུམ་བྱིན། མ་གནས་དོན། ཨུ་བརྗོད་དོན། སྡེ་པ་ལས་སྡེ་པ་དེའི་ལྔ་པ་རྣམས་སུ་འོས་ན་མ། ཉེ་བསྒྱུར་ཨུཏ་ཀྱི་ཏྲ། ཏའི་ལ་འོས་ལར་བསྒྱུར། སོ་སོར་དྲངས་པས། ཨུལླུམྤ་ཏུ་ཞེས་གྲུབ་བོ། །དེ་ཡང་ལས་ཆོག་མང་པོར་སྐབས་འདིར་གསོལ་བ་ཐེབས་ན་ལས་དངོས་གཞིའི་སྐབས་གཉིད་ཀྱིས་ར་རོ་བའམ། འགོག་པ་ལ་སྙོམས་པར་ཞུགས་ཀྱང་སྡོམ་པ་སྐྱེ་གསུང་བ། ལུང་ཞུ་བ་ལས། བཙུན་པ་གཉིད་ལོག་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པཱ་ལི་དེ་སྟེ་ལུས་དང་ཚིག་གིས་དམིགས་ལ་གསོལ་བ་དང་། ལས་བྱེད་པའི་ཚེ་གཉིད་ཀྱིས་ལོག་ཀྱང་བསྙེན་པར་རྫོགས་པ་ཞེས་བྱའོ། །ཇི་ལྟར་གཉིད་ཀྱིས་ལོག་པ་དེ་བཞིན་དུ་ར་རོ་བ་དང་སྙོམས་པར་ཞུགས་པ་རྣམས་ལ་ཡང་བརྗོད་པར་བྱའོ། །ཞེས་པའི་ལུང་ལ་ཐུགས་རྩེ་གཏད་པར་མངོན་ཞིང་། དེ་ལྟར་ན་མཁས་གྲུབ་རིན་པོ་ཆེས། ཚུལ་འཆལ་གྲལ་ན་གནས་པའི་དགེ་འདུན་དང་། །སྔགས་ཚིག་(༡༥༨ན)
ནོར་འཁྲུལ་ཀླག་དང་བརྡ་མ་འཕྲོད། །ངེས་པ་ལྔ་བྲལ་མེད་པའི་བསྒྲུབ་བྱ་ལ། །བསྙེན་རྫོགས་བྱེད་པ་དགེ་སློང་གཟུགས་བརྙན་ཡིན། །ཞེས་གསུངས་པས་མཚོན་མཁས་པ་ཕལ་ཆེར་གྱི་བཞེད་པར་ཐོབ་བློ་སྐྱེ་བའི་བརྡ་འཕྲོད་པ་ཞིག་དགོས་པས། དེ་དང་རྒྱབ་འགལ་དུ་སོང་བ་ལྟར་ན་ལུང་གི་དོན་ལ་སྤྱིར་བཏང་དམིགས་བསལ་གྱི་དགོངས་བསལ་གྱི་དགོངས་པ་འགྲེལ་རྒྱུ་ཡོད་ན་མ་གཏོགས་བཀའ་ཆད་མ་ལ་རས་གཅོད་མི་རུང་ཞིང་། དེ་དོན་ལྟར་ཁས་བླངས་ན་ཕྱི་རབས་ཀྱི་ཡིག་ཆ་གསུང་རྒྱུན་ཕྱག་ལེན་རྣམས་ལ་ཆུ་བུན་གྱི་ཚོས་ལས་འོས་མེད་པས་ཁ་ཚོན་གཅོད་དཀའ་ཞིང་། ཐོག་མར་སྡོམ་པ་ལེན་འདོད་ཡོད་པའི་མུར་གསོལ་བཞིའི་སྐབས་གཉིད་དུ་སོང་བ་རྗེས་སུ་སྡོམ་པ་ཐོབ་བློ་སྐྱེས་པས་གོ་ཆོད་པ་ལྟ་བུའི་འབྲུ་བསྣོན་ལས་འགྲེལ་རྒྱུ་གཞན་མེད་ཚེ་སྡོམ་པ་ཐོབ་དུས་ཡིད་གཞན་དུ་ཡེངས་ནས་ངོ་མ་འཕྲོད་ཀྱང་ཐོག་མར་འདུན་པ་དང་རྗེས་སུ་ཐོབ་བློ་ཡོད་པས་སྐྱོན་མེད་དུ་ཐལ་ཞིང་གང་ལྟར་མཁས་པ་རྣམས་ཀྱིས་རང་ཚིག་སྔ་ཕྱི་མི་འགལ་བའི་ལྗགས་རིང་པོར་བརྐྱངས་ནས་རྩོད་པ་སྤོངས་ཤིག་ཅེས་མགྲིན་པ་བཏེག་ནས་སྙན་དུ་གསོལ་ལོ། །གསོལ་བཞིའི་ལས་འདི་ཚིག་ཕྱེད་ཀྱང་མ་འཁྲུལ་བར་དགོས་པར་བཤད་པས་དགོས་པ་ཆད་པ་དང་། དོན་མེད་ཀྱི་ལྷག་པོར་བསྣན་པ་སོགས་ལ་ཞིབ་མོར་དཔྱོད་དགོས་པ་གལ་ཆེ་བའི་རྒྱུ་མཚན་ཞ་ལུ་རི་ཕུག་གི་གཙུག་ལག་ཁང་ནས་བསྟན་པ་རིན་པོ་ཆེ་ལ་བརྟུལ་ཞུགས་དྲི་མ་མེད་པའི་ཁུར་འཛིན་ཅིང་། ལུང་དང་མངོན་པར་རྟོགས་པའི་ཡོན་ཏན་དང་ལྡན་པ་གནས་བརྟན་ཡང་དག་པ་ཡོངས་(༡༥༩ན)
ཀྱི་དགེ་བའི་བཤེས་གཉེན་རྒྱ་མ་པ་ཡོན་ཏན་འོད་ཀྱི་ཕྱག་ཏུ་ཕུལ་བ། ཁྱོད་ཀྱི་འདུལ་བའི་ལས་ཆོག་གི་སྐབས་ནས་དྲི་བ་འགའ་ཟུང་མཛད་འདུག་པའི་དྲི་བ་དང་པོ། བསྙེན་རྫོགས་ཀྱི་ལས་གཞིའི་བརྗོད་པའི་སྐབས་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པར་བཟོད་པ་དེ་དག་ནི་ཅང་མ་གསུང་ཞིག་ཅེས་པ་འདི་ལ། འགོ་ན་དགེ་འདུན་གྱིས་ཟེར་བའང་མི་འདུག །མཇུག་ན་དགེ་འདུན་ལས་བྱ་བའང་མི་འདུག་པས། འདིར་གོང་འོག་གང་རུང་ཞིག་ཏུ་དགེ་འདུན་ཞིག་དགོས་སྙམ་ཞིང་། གལ་ཏེ་མེད་ན་གསོལ་བ་དང་མཇུག་བསྡུ་དང་། བརྗོད་པ་རང་གིའང་ཚིག་འདིའི་སྔ་མ་རྣམས་ལ་དགེ་འདུན་སྨོས་པ་རྣམས་ཀྱི་འགག་སྡོམས་ཤོར་ནས་འགྲོ་བར་ཡོད་ཅིང་། གལ་ཆེ་ས་ཏོག་པ་དེར་དགེ་འདུན་དོན་མེད་ལ་བཏང་ནས་མཁན་པོ་རྐྱང་པས་བསྙེན་པར་རྫོགས་པར་མཛད་ཅེས་པའི་དོན་དུ་འགྲོ་བར་འདུག་མི་འདུག་མཁྱེན་པ་ཅན་རྣམས་ཀྱི་ཐུགས་གཟུ་བོར་གནས་པའི་རྣམ་དཔྱོད་རྒྱ་ཆེན་པོས་གཟིགས་པར་ཞུ། བདག་གི་གོ་ཚོད་དམ་ཐེ་ཚོམ་སྐྱེས་ཚུལ་ལ། འདིར་དགེ་འདུན་མང་ཤོས་དང་ཉུང་ཤོས་གཉིས་ཟེར་བའི་རྩོད་པ་འདི་སྔོན་དུས་སྔ་མོ་ཞིག་ནས་བྱུང་ཡོད་པར་འདུག་ཅིང་། མཁས་པ་མང་པོ་གླེང་གླེངས་པའི་དུས་ནའང་མཁན་ཆེན་ཐར་ལོའི་གསུང་གིས། གལ་ཏེ་དགེ་འདུན་མང་ཤོས་འདི་དག་པ་ཡིན་སྲིད་ན་ཉུང་ཤོས་ལ་ཆད་པའི་སྐྱོན་ཆེན་པོ་འོང་ཞིང་ལས་མི་ཆགས་ལ། གལ་ཏེ་མང་ཤོས་ལྷག་ཏུ་བཅུག་ནའང་བརྗོད་པ་ལྷག་པ་དག་གིས་ནི་(༡༥༩ན)
མ་བྱས་པ་ཉིད་མ་ཡིན་ནོ། །ཞེས་གསུངས་པས་ལས་མི་འཆགས་པའི་དགག་བྱ་མེད་པས་མང་ཤོས་བྱས་ན་ཧེ་ལྡོམ་ཆུང་ཞིང་། ལག་ལེན་བཟང་གསུང་བ་ལགས་པར་གདའ་བ་ཤིན་ཏུ་མད་པའི་གསུང་ཡིན་སྙམ་པ་བྱུང་ཞིང་། དོན་ལའང་ལུང་རིགས་ཀྱིས་ལེགས་པར་བརྟགས་ཤིང་དཔྱད་ན་ཆོས་བདག་བཟང་ངན་ལྟ་བུར་སོང་ནས་དུས་ཕྱིས་ཀྱི་འདུལ་འཛིན་ཕལ་ཆེར་གྱིས་དགེ་འདུན་ཉུང་ཤོས་དག་པར་ཁ་ཚོན་བཅད་འདུག་ནའང་། མང་ཤོས་རང་དང་པོའི་ཡིན་ལུགས་དེ་ཡིན་བྱས་ནའང་ལུང་རིགས་ཀྱིས་བསྒྲུབ་ནུས་ཤིང་འཐད་པར་ཡོད། དགེ་འདུན་གྱིས་ཞེས་དང་། དགེ་འདུན་ལས་ཞེས་པ་འདི་རྣམས་ལ་འབྲུ་མནན་ཅིང་གོང་འོག་གི་གུང་ལེགས་པར་བསྒྲིགས་ན་འགལ་འདུས་སྐྱོན་ཅན་གཅིག་ཀྱང་མེད་ཅིང་། ཉུང་ཤོས་ལ་བརྟགས་ན་མ་འབྲེལ་བའི་སྐྱོན་ཆེན་པོ་ཡོད་བསམ། འོན་ཀྱང་ཉུང་ཤོས་པ་རྣམས་ཀྱི་ཐུགས་ཀྱི་གཏད་སོ་དང་སྒོ་བསྟུན་པའི་དབང་དུ་བྱས་ནའང་། མང་ཤོས་པའི་གསོལ་བའི་མཇུག་ཏུ་དགེ་འདུན་ལས་ཞེས་པ་དང་། མཇུག་སྡུད་དུ་དགེ་འདུན་ལས་ཟེར་བ་ཞིག་དང་། བརྗོད་པ་ལ་དགེ་འདུན་ལས་བསྙེན་པར་རྫོགས་པར་མཛད་ན་ཞེས་པའི་གསུམ་པོའི་དགེ་འདུན་ལས་ཞེས་པ་འདི་རྣམས་ལྷག་ཏུ་བཅུག་ནས་ཕུད་པ་ལ་སྐྱོན་མེད་མོད། བརྗོད་པའི་སྐབས་ཀྱི་འོག་མའི་དགེ་འདུན་ལས་ཞེས་པ་འདི་མེད་ཁ་མེད་ཡིན་སྙམ་པ་དང་། ཉུང་ཤོས་ལ་གཅིག་པོ་ཆད་པ་དེ་ཡང་འགའ་ཞིག་གིས་དགེ་འདུན་མང་ཤོས་ལ་ཞུས་དག་བྱས་དུས་མཇུག་སྡུད་ལ་གཅིག །གསོལ་(༡༥༩བ)
བ་ལ་གཅིག །བརྗོད་པ་ལ་གཅིག་སྟེ་གསུམ་ལྷག་པའི་སྐྱོན་དེ་ཚོར་ནས་བསུབས་པའི་ཞོར་ལ་འདིའི་སྐྱོན་ཡོན་ཞིབ་པ་དེ་མ་ཚོར་བར་བསུབས་པ་ཞིག་ད་བར་དུ་མཁས་པ་རྣམས་ཀྱིས་ཐུག་རྟོག་མ་ཞུགས་པ་ལ་བརྟེན་ནས་མ་བརྟགས་པའི་བཏང་སྙོམས་ལ་ལུས་པ་ཡིན། གལ་ཏེ་རྟོག་དཔྱོད་ཞུགས་ན་ཆེ་ཆུང་རི་དང་མཉམ་པ་འདི་མ་མཐོང་དགོས་པའི་ཚོད་དུ་འདུག་བསམ་པ་བྱུང་ཟེར་བ་ལ། ལས་དངོས་གཞིའི་བརྗོད་པའི་སྐབས་ན་ཚེ་དང་ལྡན་པ་གང་དག་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །ཅེས་པ་འདི་ལ་གལ་ཆེ་ས་ཏོག་པ་དེར་དགེ་འདུན་དོན་མེད་ལ་བཏང་ནས་མཁན་པོ་རྐྱང་པས་བསྙེན་པར་རྫོགས་པར་མཛད་ཅེས་པའི་དོན་དུ་མི་འགྲོ་སྟེ། གོང་དུ་དགེ་འདུན་ལས་བསྙེན་པར་རྫོགས་པར་འཚལ་ནས་གསོལ་ཏེ་མཆི་སྟེ་གསོལ་ན་ཞེས་པ་གལ་ཆེ་ས་ཡིན་ཅིང་ལས་ཀྱི་ངོ་བོ་བརྗོད་པ་མཆི་སྟེ། བྱ་བ་བརྗོད་པ་གསོལ་ན། ཞེས་པ་འདི་དག་གལ་ཆེ་ས་ཡིན་ཏེ། གསོལ་ན་ཞེས་པའི་ཚིག་འགག་པ་དང་། བསྒྲུབ་བྱའི་རྒྱུད་ལ་སྡོམ་པ་སྐྱེ་བ་དུས་མཉམ་པའི་ཕྱིར། བྱེད་པ་བརྗོད་པ་དེའི་སླད་དུ་ཞེས་པའི་དུས་སུ་བསྒྲུབ་བྱའི་རྒྱུད་ལ་སྡོམ་པ་སྐྱེས་ཚར་བས་ཚེ་དང་ལྡན་པ་གང་དག་ཅེས་པ་མར་ཆད་གལ་ཆེ་ས་ཏོག་པ་ཡང་མ་ཡིན། གལ་ཆེ་སར་དགེ་འདུན་ལན་གསུམ་ཡོད་པས་དགེ་འདུན་དོན་མེད་ལ་བཏང་བར་ཡང་མི་འགྱུར། དགེ་འདུན་ལས་བསྙེན་པར་རྫོགས་པར་མཛད་ན་ཞེས་པ་ཡོད་པས་(༡༦༠ན)
མཁན་པོ་རྐྱང་པས་བསྙེན་པར་རྫོགས་པའི་དོན་དུ་ཡང་མི་འགྱུར། ཡང་དགེ་འདུན་ཉུང་ཤོས་པ་ལ་ལུང་རིགས་ཀྱི་སྒྲུབ་བྱེད་དགོས་ཤིང་། གལ་ཏེ་ལུང་རིགས་ཀྱི་སྒྲུབ་བྱེད་མེད་བཞིན་དུ་སྔ་རབས་པས་བྱས་པ་བཙན་དུ་འཇུག་ན་མཁས་པའི་གསུང་དུ་ཨེ་འགྲོ་ཟེར་བ་ལ། དགེ་འདུན་ཉུང་ཤོས་ཡིན་པའི་ལུང་ཡོད་དེ། ལུང་དང་། ཀརྨྨ་ཤ་ཏམ་ལས། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་གསུངས་ཤིག །འདི་ནི་ལས་བརྗོད་པ་དང་པོ་སྟེ། དེ་བཞིན་དུ་ལན་གཉིས་གསུམ་དུ་བཟླས། དགེ་འདུན་གྱི་བཟོད་ཅིང་གནང་ནས། དགེ་འདུན་གྱི་མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །དེ་ནི་བསྙེན་པར་རྫོགས་པ་ཉེ་བར་སྒྲུབ་པའི་ཆོ་ག་དང་ལས་སོ། །ཞེས་འདིའི་རྒྱ་དཔེ་དང་བོད་དཔེ་གཉིས་ཀ་ལས་དགེ་འདུན་ཉུང་ཤོས་བཤད། དེ་བཞིན་དུ་རྒྱ་ཆེར་འགྲེལ་ལས། གསུམ་པ་ནི་བྱེད་པ་བརྗོད་པ་སྟེ། དཔེར་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱི་མིང་འདི་ཞེས་བགྱི་བ། མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་དོ། །ཞེས་གསུངས་(༡༦༠བ)
པ་ལྟ་བུའོ། །དེ་ལ་དོན་གྱི་སྐབས་གཉིས་བྱས་པ་ཉིད་ན་ལས་ཕལ་ཆེར་བྱས་པ་ཉིད་དུ་ཤེས་པར་བྱའོ། །ཞེས་དགེ་འདུན་ཉུང་ཤོས་བཤད་དོ། །དགེ་འདུན་བཞི་ལྷག་པར་འདོན་པ་མ་དག་པའི་རྒྱུ་མཚན། འདུལ་བ་ལུང་དང་། ལས་བརྒྱ་རྩ་གཅིག་གི་གཞུང་དང་། མདོ་དང་། རྒྱ་ཆེར་འགྲེལ་དང་། འདི་ཉིད་ཀྱི་རྣམ་བཤད་དང་། ཤེས་རབ་བྱེད་པས་བྱས་པའི་འགྲེལ་པ་ལ་སོགས་རྣམས་སུ་མ་བྱུང་བའི་ཕྱིར་དང་། ལས་བརྒྱ་རྩ་གཅིག་གི་རྒྱ་དཔེ་བོད་དཔེ་གང་ན་ཡང་མེད་པའི་ཕྱིར། དེ་ལྟ་མིན་པར་དགེ་འདུན་མང་ཤོས་པ་དག་ན། དེའི་ལུང་རྩོད་མེད་དགོས་ཤིང་། ལུང་གི་རྒྱུ་མཚན་མེད་བཞིན་དུ། མཁན་ཆེན་ཐར་ལོ་ལ་སོགས་སྔ་རབས་པའི་གསུང་བཙན་དུ་འཇུག་ཟེར་བ་དེ་བས་ཀྱང་མཁས་པའི་གསུང་དུ་ཨེ་འགྲོ། མཁན་ཆེན་ཐར་ལོས་ཀྱང་ལུང་རིགས་ཀྱི་སྒྲུབ་བྱེད་གཟིགས་ནས་དགེ་འདུན་མང་ཤོས་བཞེད་པ་མ་ཡིན། ཆུ་མིག་ཏུ་འཚོག་འདུ་ཞིག་བྱུང་དུས་དགེ་འདུན་མང་ཉུང་གང་དག་གི་གླེང་མོ་བྱུང་བ་ལ་གཞན་ཞིག་ནས་འོངས་པའི་འདུལ་འཛིན་དུ་རློམ་པའི་ཤོབ་པོ་ཞིག་གིས། ཞུ་བ་མང་ཤོས་ནས་དགེ་འདུན་མང་ཤོས་བཤད་ཟེར་བ་ལ། ཁོ་འདུལ་འཛིན་ཡིན་པར་འདུག་པས་བདེན་ཡོང་གསུངས་ནས་ཚད་མར་བཟུང་འདུག་སྟེ། རང་གིས་ངེས་པར་བྱས་པའམ་མཁས་པ་གཞན་གྱིས་བརྟག་དཔྱད་བྱས་པ་ལ་ཡིད་མི་ཆེས་པར། བླུན་པོ་ཟེར་ཚད་ལ་བདེན་པར་བཟུང་ན་རྣམ་པར་འཁྱམས། དེའི་རྒྱུ་མཚན་ཡང་དབུ་ཞབས་སུ། དགེ་འདུན་མང་ཉུང་གི་བཤད་པ་གཅིག་ཀྱང་མེད། དགེ་འདུན་མང་ཤོས་པ་ཡང་སྔོན་མ་བ་(༡༦༡ན)
ཕྱར་རྩེ་མོས་དྲན་པ་ཡིན་ཞེས་གྲགས་ཀྱི། དེ་མ་གཏོགས་དབུས་གཙང་གི་འདུལ་བའི་གྲ་ས་བཟང་པོ་རྣམས་སུ་དགེ་འདུན་མང་ཤོས་མ་གྲགས་པས། བསྟན་པ་དཀྲུག་པའི་ལོག་ལྟའི་རྗེས་སུ་མ་འབྲང་ཞིག །ཡང་ཁྱེད་ཀྱི་ཡི་གེ་ནས་ལེགས་པོར་སོང་ན་མཁས་པ་རྣམས་ཀྱིས་དཔྱད་པའི་ལུང་རིགས་ཀྱིས་མ་གྲུབ་ན་དཔེ་ཆས་དཔང་པོ་ཐུབ་པ་དཀའ་ཞིང་། དགེ་འདུན་ཉུང་ཤོས་འདི་ཡང་སྔར་གྱི་དཔེ་ཆ་མ་དག་པ་ཞིག་ལ་ཚད་མར་བཟུང་བས་ཉེས་བསམ་སྙམ་པ་བྱུང་ལ་དེ་ལྟའང་ཕལ་ཆེར་རྒྱ་དཔེ་འགའ་ཞིག་ན་གང་འདུག་དེ་ལ་ཚད་མར་བྱེད་པ་མང་པོ་འདུག་ནའང་། ལུང་རིགས་དང་མཐུན་པ་ཞིག་དཔེ་ཆ་དེ་ན་སྣང་ན་ཚད་མ་ཡིན་གྱི་ཞེན་པས་འཇུག་པ་དང་དབང་ཕྱུག་གི་སྤྱོད་པ་མིན་པར་ལུང་རིགས་དང་མི་མཐུན་པ་ཞིག་འདུག་ན་དཔེ་ཆ་ལ་ཕར་ཞུ་དག་བྱ་རྒྱུ་ཡིན་བསམ། རྒྱ་གར་བ་རྣམས་ལ་དག་སྣང་ཆེ་བར་འགྲོ་མོད་ནའང་རྒྱ་དཔེ་འདྲི་མཁན་ཐམས་ཅད་འཕགས་པ་མིན་མཆི་བས་སོ་སྐྱེ་འདྲ་ཡིན་ན་ནོར་པ་ཡང་མཆི། ད་ལྟར་གྱི་རིགས་པ་བསྒྲེས་པས་ཤེས་བསམ་པ་བྱུང་ཟེར་བ་འདུག་པ་ལ། སྤྱིར་ལུང་རིགས་ཀྱིས་མ་གྲུབ་ན་དཔེ་ཆས་དཔང་པོ་ཐུབ་དཀའ་བ་བདེན་ནའང་། འདུལ་བ་ལ་སངས་རྒྱས་ཀྱི་བཅས་པའི་དབང་གིས་བཞག་དགོས་ཀྱི་ཐ་སྙད་ཀྱི་རིགས་པས་དཔྱད་དུ་མི་བཏུབ། གལ་ཏེ་རིགས་པས་གྲུབ་དགོས་ན། སོ་སྐྱེའི་དགེ་འདུན་གྱིས་ཁ་སྐོང་བཏུབ་ལ། རྫོགས་པའི་སངས་རྒྱས་ཀྱིས་ཁ་སྐོང་མི་བཏུབ་པ་ཅི་ཡིན། ལུས་ལས་སྐྱེས་པའི་མགོའི་སྐྲ་བྲེག་ཏུ་བཏུབ་ལ། འདོམས་ཀྱི་སྦུ་བྲེག་ཏུ་མི་བཏུབ་པ་ཅི་ཡིན། (༡༦༡བ)
རྩྭ་སྐྱེ་འཕྲོ་བཅད་ན་ལྟུང་བ་འབྱུང་བ་ལ། སྐྲ་སྐྱེ་འཕྲོ་བཅད་ན་ལྟུང་བ་མི་འོང་བ་ཅི་ཡིན། རེག་པ་ལ་དགེ་སློང་མ་ལ་ཕམ་པར་འགྱུར་ལ། དགེ་སློང་ལ་ལྷག་མར་འགྱུར་བ་ཅི་ཡིན། དེ་སོགས་ཀྱི་ཐ་སྙད་པའི་རིགས་པས་མི་འགྲུབ་པ་ཤིན་ཏུ་མང་། དགེ་འདུན་ཉུང་ཤོས་ཀྱི་དཔེ་ཆ་མ་དག་པ་ཡིན་ཟེར་བ་ཡང་། དཔེ་མ་དག་པ་རེ་རེ་ཙམ་སྲིད་མོད། ལུང་དང་ལས་བརྒྱ་རྩ་གཅིག །མདོ། འགྲེལ་པ་རྣམས་མ་དག་ཟེར་བ་ནི་གཞན་རྣམས་ཅི་ཟེར་ལྟ་བའི་མཐའ་གཅོད་ཡིན་མཆི། ཁྱེད་སྡེ་སྣོད་ཀྱི་དོན་དགོངས་པས་དེ་འདྲ་ཞེ་བས་མི་འདོད། གལ་ཏེ་ཞེ་བས་སྨྲ་བ་ཡིན་ན་བསྟན་པ་སྐྱོན་མེད་ལ་སྐྱོན་གྱི་དྲི་མ་ཚོལ་བ་བདུད་ཀྱིས་ཁ་ཕྱེ་བ་ཡིན་པར་སེམས་སོ། །རྒྱ་དཔེ་འདྲི་མཁན་འཕགས་པ་མིན་པས་རྒྱ་དཔེ་ལ་ནོར་བ་འོང་སྲིད་ཟེར་བ་ཡང་དེ་དང་མཚུངས་ཤིང་། ཁྱེད་དགེ་འདུན་མང་ཤོས་འདོད་པ་ལའང་རྒྱ་དཔེ་བོད་དཔེས་དཔང་པོ་མི་ཐུབ་ན། གཞན་རིགས་པ་ཅི་ཡང་མེད་དེ། ལུང་ཞལ་གསལ་ནི་མེད། རིགས་པས་ནི་མི་རུང་། རུང་མཐུན་རྩི་རྒྱུ་ནི་མེད་པའི་ཕྱིར། དེ་ལྟ་མིན་པར་མཁན་པོ་མིང་འདི་ཞེས་བགྱི་བས། བསྙེན་པར་རྫོགས་པར་མཛད་དོ། །ཞེས་པ་འདི་ལ་ཅིས་ཀྱང་དགེ་འདུན་ལས་བསྙེན་པར་རྫོགས་པར་མཛད་དོ། །ཞེས་པ་དགོས་ན་མཁན་པོར་གསོལ་བ་གདབ་པའི་སྐབས་སུ། བཙུན་པ་མཁན་པོས་དགེ་འདུན་ལས་བསྙེན་པར་རྫོགས་པར་མཛད་དོ། །ཞེས་པ་དང་། སློབ་དཔོན་མཁན་པོས་དགེ་འདུན་ལས་བསྙེན་པར་རྫོགས་པར་མཛད་དོ། །ཞེས་པ་དང་། མཁན་པོ་མཁན་པོས་དགེ་འདུན་ལས་བསྙེན་པར་རྫོགས་པར་(༡༦༢ན)
མཛད་དོ། །ཞེས་པ་དགོས་པར་འགྱུར། འདོད་ན་ལུང་དང་། ཀརྨྨ་ཤ་ཏམ་ལས། མཁན་པོ་ལ་ཕྱག་འཚལ་དུ་བཅུག་ནས། མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པུར་འདུག་ཏུ་བཅུག་ནས། གལ་ཏེ་མཁན་པོ་ཡིན་ན་མཁན་པོ་ཞེས་བརྗོད་པར་བྱ། སློབ་དཔོན་ཡིན་ན་སློབ་དཔོན་ཞེས་བརྗོད་པར་བྱ། བཙུན་པ་ཡིན་ན་བཙུན་པ་ཞེས་ཅི་རིགས་པར་བརྗོད་པར་བྱའོ། །ཞེས་བསྟན་ནས། དེས་འདི་སྐད་ཅེས་བརྗོད་པར་བྱ་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བྱ་བ་བཙུན་པ་ལ་མཁན་པོར་གསོལ་གྱིས། བཙུན་པ་བདག་གི་མཁན་པོ་མཛད་དུ་གསོལ། བཙུན་པ་མཁན་པོས་བསྙེན་པར་རྫོགས་པར་བགྱིའོ། །དེ་བཞིན་དུ་ལན་གཉིས་ལན་གསུམ་དུ་བཟླས་ཚིག་གསུམ་པ་ལ་མཁན་པོ་ཞེས་བརྗོད་པར་བྱའོ། །མཁན་པོས་ཐབས་ཡིན་ནོ་ཞེས་བརྗོད་པར་བྱའོ། །སློབ་མས་ལེགས་སོ་ཞེས་བརྗོད་པར་བྱའོ། །དེ་ནི་མཁན་པོར་གསོལ་བའོ། །ཞེས་སློབ་དཔོན་མཁན་པོས་བསྙེན་པར་རྫོགས་པར་མཛད་དོ། །མཁན་པོ་མཁན་པོས་བསྙེན་པར་རྫོགས་པར་མཛད་དོ། །ཞེས་འབྱུང་བས་གསལ། དེ་བཞིན་དུ་གསང་སྟོན་བསྐོ་བའི་སྐབས་སུ་དགེ་སློང་མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་དགེ་འདུན་གྱི་མིང་འདི་ཞེས་བགྱི་བ་ལ་གསང་སྟེ་སྟོན་ཏོ་ཞེས་དང་། ནང་དུ་བར་ཆད་དྲི་བའི་སྐབས་སུ། བདག་གི་དགེ་འདུན་གྱི་ནང་དུ་མཁན་པོ་མིང་འདི་ཞེས་བགྱི་བས། དགེ་འདུན་གྱི་མིང་འདི་ཞེས་བགྱི་བ་ལ་བར་ཆད་གྱི་ཆོས་རྣམས་(༡༦༢བ)
དྲི་བར་བྱའོ། །ཞེས་སོགས་དགོས་པར་མཚུངས་པ་ལས་མ་བྱུང་བས་གསལ། ཡང་ན་མཁན་པོར་གསོལ་འདེབས་སོགས་ཀྱི་ཚིག་འདིའང་རྒྱ་དཔེ་བོད་དཔེ་གཉིས་ཀ་ཡི་གེ་མ་དག་ཟེར་དགོས་ཏེ་ཧ་ཅང་ཐལ། དེས་ན་བཀའ་སྡུད་པའི་དགྲ་བཅོམ་པ་རྣམས་ཀྱིས་དགྲ་བཅོམ་མི་བརྗེད་པའི་གཟུངས་ཐོབ་པའི་དགེ་འདུན་གྱི་དབུས་སུ། ངེད་ཀྱི་འདུལ་བ་དེ་ཡིན་ཁྱེད་ཀྱི་འདུལ་བ་དེ་ཡིན་ནམ་ཞེས་ཞུས་དག་མཛད་ནས་གླེགས་བམ་དུ་བྲིས། དགྲ་བཅོམ་པ་རྣམས་ཀྱིས་མཉམ་པར་བཞག་ནས་གཟིགས་པས་ཆད་ལྷག་ནོར་བའི་སྐྱོན་མེད་པར་མཁྱེན་ནས། ངེད་ཀྱི་འདུལ་བ་དེ་ཡིན་ན་ཁྱེད་ཀྱི་འདུལ་བ་དེ་ཡིན་ནམ་ཞེས་དྲིས། འཕགས་པ་ཡོན་ཏན་འོད་ཀྱིས་དེ་བཞིན་དུ་བསྡུས། འགྲེལ་བྱེད་མཁན་པོ་ཚད་མར་གྱུར་པ་རྣམས་ཀྱིས་དེ་བཞིན་དུ་བཀྲལ། སྔོན་གྱི་ལོ་པཎ་བཀའ་སྡུད་པ་པོ་རྣམས་ཀྱིས་བསྒྱུར་བ་ལ་ཚད་མར་བྱ་དགོས་ཀྱི། རང་གི་མགོ་ཕུར་གྱི་བསམ་མནོས་འདུལ་བའི་ལས་ཀྱི་ཆོ་ག་བསྒྲིགས་ན་བསླབ་པ་འཆའ་བ་ལ་དབང་བར་ཐལ་བའི་སྐྱོན་ཡོད་དོ། །ཡང་ཁྱེད་ཀྱི་དྲི་བའི་ཚིག་ལ། ཚེ་དང་ལྡན་པ་གང་དག་ཅེས་པ་འདི་རང་ལ་ཡང་སྤྱིར་ནི་རང་བས་རྒན་པ་ལ་གནས་བརྟན། མཉམ་པ་ལ་བཙུན་པ། གཞོན་ན་ཚེ་དང་ལྡན་པ་ཟེར་བའི་ཆོས་སྐད་ཅིག་འདུག་པས་འདི་དམིགས་གསལ་ཡིན་ནམ། ཡང་ན་ཚེ་དང་ལྡན་པ་འདི་རྒན་གཞོན་གྱི་སྤྱི་མིང་ཡིན་ཟེར་བ་ལ། ཚེ་དང་ལྡན་པ་ཞེས་པའི་ཉེ་བའི་ཚིག་འདི། རྒན་གཞོན་ཐམས་ཅད་ཀྱི་སྤྱི་མིང་ཡིན་ཏེ། མདོ་རྩའི་འགྲེལ་པ་ཤེས་རབ་བྱེད་པས་མཛད་པ་ལས། རྒན་(༡༦༣ན)
རབས་ལའང་གནས་བརྟན་ནམ་ཚེ་དང་ལྡན་པ་ཞེས་ཉེ་བའི་ཚིག་མེད་པར་མ་འབོད་ཅིག་པ་དང་། བཅོམ་ལྡན་འདས་ལ་ནི་ཉེ་བའི་ཚིག་འདི་རུ་གནས་བརྟན་ནམ་ཚེ་དང་ལྡན་པ་ཞེས་བྱ་བར་མི་རུང་བར་སྟོན་པའོ། །ཞེས་གསུངས་ཤིང་། རྒྱ་ཆེར་འགྲེལ་དུ། དགེ་འདུན་བཙུན་པ་རྣམས་དགོངས་སུ་གསོལ་ཞེས་སོགས་ཀྱི་སྐབས་སུ། སོགས་པ་ཞེས་སྨོས་པའི་སྒྲས་ནི་དགེ་འདུན་བཙུན་པ་རྣམས་གསན་དུ་གསོལ། དགེ་འདུན་བཙུན་པ་རྣམས་དགོངས་སུ་གསོལ། བཙུན་པ་དགོངས་སུ་གསོལ། ཚེ་དང་ལྡན་པ་གསན་དུ་གསོལ། ཚེ་དང་ལྡན་པ་དག་སེམས་བསྡུས་ཤིག །ཅེས་བྱ་བའི་སྔགས་དག་བསྡུ་བར་རིག་པར་བྱའོ། །ཞེས་རྣམ་གྲངས་སུ་གསུངས་ཤིང་། ཡང་རྒྱ་ཆེར་འགྲེལ་དུ་དེ་བཞིན་གཤེགས་པ་མ་གཏོགས་པ་རྒན་པ་ལ་ཡང་ཚེ་དང་ལྡན་པ་ཞེས་པའི་ཉེ་བའི་ཚིག་གིས་བརྗོད་པར་གསུངས་ཏེ། དེ་བཞིན་གཤེགས་པ་ལ་ཚེ་དང་ལྡན་པ་དང་མིང་དང་རུས་བརྗོད་པས་ཀུན་ཏུ་སྤྱད་པར་མི་བྱའོ། །ཞེས་བྱ་བ་ནི། དེ་བཞིན་གཤེགས་པ་ལ་ཚེ་དང་ལྡན་པ་ཞེས་བརྗོད་པ་དང་། མིང་ནས་བརྗོད་པ་དང་། རུས་ནས་བརྗོད་པས་འབོད་པར་མི་བྱའོ། །ཉེ་བའི་ཚིག་དང་བྲལ་བར་དེའི་མཚན་ནམ་དུའང་སྨོས་པར་མི་བྱའོ། །ཞེས་བྱ་བ་ནི་ཉེ་བའི་ཚིག་དང་བཅས་པར་མཚན་ནམ་གདུང་སྨོས་པར་བྱའོ། །འདིར་གཞུང་ནི་འདི་ལྟར་ཉེ་བའི་ཚིག་དང་བཅས་པར་སྟོན་པའི་མཚན་སྨོས་པར་བྱ་སྟེ། བཅོམ་ལྡན་འདས་ཤཱཀྱ་ཐུབ་པ་ཞེས་བརྗོད་པར་བྱའོ། །ཞེས་བྱ་བ་ལ་སོགས་པ་གསུངས་པ་ཡིན་ནོ། །རྒན་(༡༦༣བ)
པའི་མི་བྱའོ། །ཞེས་བྱ་བ་ནི་ཉེ་བའི་ཚིག་དང་བྲལ་བར་མིང་དང་རུས་སྨོས་པར་རོ། །འདི་ལ་གནས་བརྟན་དང་ཚེ་དང་ལྡན་པ་ནི་ཉེ་བའི་ཚིག་ཉིད་ཀྱི་ཚུལ་དང་མཐུན་པ་ཡིན་ནོ་ཞེས་བྱ་བ་ནི་རྒན་པ་འདི་ལའོ། །སྔ་མ་ལ་ནི་མ་ཡིན་ནོ། །ཞེས་བྱ་བ་ནི་དེ་བཞིན་གཤེགས་པ་ལ་སྟེ། སྟོན་པ་ལ་གནས་བརྟན་ནམ། ཚེ་དང་ལྡན་པ་ཞེས་ཉེ་བའི་ཚིག་ཉིད་ཀྱི་ཚུལ་དང་མཐུན་པ་མ་ཡིན་ནོ། །ཞེས་བྱ་བའི་ཐ་ཚིག་གོ་ཞེས་གསུངས་ཤིང་། དེ་ལྟ་མིན་པར་རྒན་པ་ལ་ཚེ་དང་ལྡན་པ་ཞེས་བརྗོད་དུ་མི་རུང་ན། མདོ་ནས། ཀཽ་ཤི་ཀས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཞེས་སོགས་དང་། ཚེ་དང་ལྡན་པ་ཀུན་ཤེས་ཀཽཎྜི་ནྱ། ཚེ་དང་ལྡན་པ་རྟ་ཐུལ། ཚེ་དང་ལྡན་པ་འོད་སྲུངས། ཚེ་དང་ལྡན་པ་ཤཱ་རིའི་བུ་ཞེས་སོགས་གསུངས་པ་མི་རུང་བར་འགྱུར་རོ། །ཡང་ཁྱེད་ཀྱི་དྲི་བ་ན་མཁན་པོ་དེ་ལས་སློབ་དེའི་ཡང་མཁན་པོ་ཡིན་ན་མཁན་པོ་ཞེས་སྨོས་དགོས་པ་རྣམས་སུ་མཁན་པོ་ཚིག་གཉིས་རང་གི་དབང་དུ་བྱས་པ་དང་། བསྒྲུབ་བྱའི་དབང་དུ་བྱས་པ་ཞིག་དགོས་སམ་མི་དགོས། ཁོ་བོས་གོ་ཚོད་ལྟར་ན་གཅིག་གིས་ཆོག་ཅིང་། གཅིག་པོ་དེ་དོན་གྱི་སླད་དུ་མཚན་ནས་སྨོས་ཏེ་ཞེས་པའི་གོང་དུ་ངེས་པར་སྨོས་དགོས། དེའི་གོང་དུ་མཁན་པོ་ཞེས་སྨོས་ན། མཁན་པོའི་དངོས་མིང་དང་མཚན་ནས་སྨོས་ཏེ་ཟེར་བ་དེ་གཉིས་ཀྱི་བར་དུ་མཁན་པོ་ཟེར་བ་དེས་ཆོད་པའི་སྐྱོན་ཡོད་ཅིང་། དེ་གཉིས་ཀྱི་བར་དུ་ཚིག་གཞན་གྱིས་བར་མ་ཆད་པ་དགོས་པར་རྒྱ་ཆེར་འགྲེལ་ཉིད་ན་ལྷང་ངེ་ཚེར་རེར་ཡོད་ཟེར་བ་འདུག་པ་ལ། མཁན་པོ་དེ་ལས་(༡༦༤ན)
སློབ་དེའི་མཁན་པོ་ཞེས་སྨོས་དགོས་པ་རྣམས་སུ་མཁན་པོའི་ཚིག་རང་དང་བསྒྲུབ་བྱའི་དབང་དུ་བྱས་པ་གཉིས་སྨོས་དགོས་ཏེ། དཔེར་ན་སློབ་དཔོན་ཡིན་ན་མཁན་པོ་སློབ་དཔོན་ཞེས་སྨོས་དགོས་པ་བཞིན་མཁན་པོ་ཞེས་པའི་ཚིག་ཀྱང་དོན་གྱི་སླད་དུ་མཚན་ནས་སྨོས་ཏེ་ཞེས་པའི་ཚིག་གི་འོག་ཏུ་བརྗོད་དགོས་ཏེ། མཁན་པོ་བསོད་ནམས་གྲགས་ཞེས་པ་མཁན་པོའི་དངོས་མིང་ཡིན་གྱི། བསོད་ནམས་གྲགས་ཞེས་པ་རྐྱང་པ་དངོས་མིང་མ་ཡིན། དེས་ན་དོན་གྱི་སླད་དུ་མཚན་ནས་སྨོས་ཏེ་ཞེས་པ་དང་། དངོས་མིང་གི་བར་དུ་མཁན་པོས་ཆོད་པའི་སྐྱོན་མེད་དེ། རྒྱ་ཆེར་འགྲེལ་ལས། དེའི་ཕྱིར་དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བ་དང་བཅས་པར་མ་སྨོས་པར་མཁན་པོའི་མིང་མི་བཟུང་ངོ་། །ཞེས་བྱ་བ་སྨྲས་ཏེ། མཁན་པོའི་མིང་བཟུང་བ་ན་དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བའི་ཚིག་དེ་དང་བཅས་པར་མ་སྨྲས་པར་མཁན་པོ་ཞེས་བྱ་བའི་སྒྲ་ཉེ་བར་བརྗོད་པ་ཉི་ཚེས་མཁན་པོའི་མིང་མི་བཟུང་ངོ་། །འདི་སྐད་བསྟན་ཏེ། དོན་གྱི་སླད་དུ་ཞེས་བྱ་བའི་དགོས་པའི་དབང་དུ་མཁན་པོའི་མཚན་ནས་ཞེས་བྱ་བ་མཁན་པོའི་མིང་ནས་སྨོས་ཏེ་ཞེས་བྱ་བ་བརྗོད་དེ། ཚིག་དེ་དང་བཅས་པ་ཞེས་པའི་ཚིག་དེའི་མཇུག་ཐོགས་སུ་མཁན་པོའི་སྒྲ་ཉེ་བར་བརྗོད་པས་མཁན་པོའི་མིང་ཉེ་བར་བརྗོད་པ་དེ་བཟུང་བར་བྱའོ། །དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བའི་ཚིག་མ་སྨྲས་པར་མཁན་པོ་ཞེས་བྱ་བའི་སྒྲ་ཙམ་ཉེ་བར་བརྗོད་པས་མཁན་པོའི་མིང་མི་བཟུང་ངོ་། །བཅས་པར་ཞེས་བྱ་བ་སྨོས་པ་ནི་བར་དུ་ཆད་པ་སྤང་བའི་དོན་ཏེ། (༡༦༤བ)
ཚིག་སྔ་མ་དང་འབྲེལ་བར་མཁན་པོའི་མིང་བཟུང་བར་བྱའི། བར་དུ་ཆད་པ་ནི་མ་ཡིན་ནོ། །ཞེས་བྱ་བའི་ཐ་ཚིག་གོ །ཞེས་གསུངས་པས་རང་གི་མཁན་པོ་ཡིན་ན་མཁན་པོ་བསོད་ནམས་ཞེས་བརྗོད་དུ་མི་རུང་། དོན་གྱི་སླད་དུ་མཚན་ནས་སྨོས་ཏེ་མཁན་པོ་བསོད་ནམས་གྲགས་ཞེས་བརྗོད་དགོས། དེས་ན་འདི་སྐད་བརྗོད་པར་བྱ་སྟེ། ཚེ་དང་ལྡན་པ་གང་དག་ཚེ་དང་ལྡན་པ་མིང་འདི་ཞེས་བགྱི་བ་འདི། མཁན་པོ་དོན་གྱི་སླད་དུ་མཚན་ནས་སྨོས་ཏེ་མཁན་པོ་བསོད་ནམས་གྲགས་ཞེས་བགྱི་བས་བསྙེན་པར་རྫོགས་པར་མཛད་པར་བཟོད་པ་དེ་དག་ནི་ཅང་མ་གསུང་ཞིག །ཅེས་རྒྱས་པར་གསུངས་པ་འདི་རྣམས་ས་དགེའི་མཁས་པ་རྣམས་ལ་ཡང་གྲགས་ཆེ་བར་མི་འདུག་པས་བློ་གསལ་རྣམས་ལ་བསྐྱེད་ཐོན་པའི་ཕྱིར་དུ་གསུང་ཇི་ལྟ་བ་བཞིན་བཀོད་པ་ཡིན་ནོ། །
འདུལ་བའི་དུས་ཚིགས་བཤད་པ།
བསླབ་པ་བླངས་པའི་རྗེས་སུ་རྙེད་བཀུར་དང་རྙེད་བཀུར་མ་ཡིན་པའི་གནས་ཤེས་དགོས་པས། དུས་ཚིགས་ཀྱི་རྣམ་གཞག་སྟག་ཚང་ལོ་ཙཱ་བའི་འདུལ་ཊཱིཀ་ཏུ་མདོར་བསྟན་ནི། གསོ་སྦྱོང་བྱའོ་དུས་ནམ་གྱི་ཚེ་ན་ཟླ་བ་ཕྱེད་ཕྱེད་ན་བྱ་སྟེ། དེ་ལས་འགྱངས་ན་ལྟུང་བ་བརྗེད་ཅིང་བག་མེད་དུ་འགྱུར་ལ། མ་གྱུར་ན་ཀློག་པ་དང་བསམ་གཏན་གྱི་བར་ཆད་དུ་འགྱུར་བས་སོ། །དེ་ཡང་ཚེས་བཅོ་ལྔ་ལ་བྱ་སྟེ། མཚན་མ་བསལ་བ་དང་། སྤྲོ་བ་མཐུན་པ་དང་། དུས་བྱིན་གྱིས་བརླབས་པ་རྣམས་བཅོ་ལྔ་ལ་ཚང་གི །གཞན་ལ་མ་ཚང་བས་སོ། །འོ་ན་བཅུ་བཞི་པ་མི་བྱེད་དམ་སྙམ་ན་བཅོ་ལྔ་པ་སྨོས་པས་བཅུ་བཞི་པ་ཡང་བསྡུས་ཏེ། འཇིག་རྟེན་གྱི་ཐ་སྙད་དང་སྒོ་བསྟུན་ནས་ཉི་མ་(༡༦༥ན)
བཅུ་བཞི་པ་ཡིན་པས། གསོ་སྦྱོང་བཅུ་བཞི་པ་ཞེས་གསུང་བར་ཟད་ཀྱི། གསོ་སྦྱོང་བཅུ་བཞི་པ་ཞེས་བྱ་བའི་ཉི་མ་དེ་ཉིད་ཚེས་བཅོ་ལྔ་པ་ཡིན་པའི་ཕྱིར་རོ། །ཞེས་འགྲེལ་ཆེན་དུ་གསུངས་སོ། །དེས་ན་ཉ་ཤི་དང་བསྟུན་པའི་གསོ་སྦྱོང་ཡིན་ན་ཚེས་བཅོ་ལྔ་ལ་བྱེད་པས་ཁྱབ་པ་ཡིན་པས་འདི་མདོ་ཚིག་སོར་བཞག་པས་ཆོག་པ་ཡིན་ནོ། །འདི་ལ་རིགས་པ་ཅི་ཡོད་ཅེ་ན། ཞག་ལ། ཁྱིམ་ཞག་དང་། ཉིན་ཞག་དང་། ཚེས་ཞག་ཅེས་པ་གསུམ་ཡིན་ལ། དེ་ཡང་ལོ་གཅིག་ལ་སུམ་བརྒྱ་དྲུག་ཅུར་ཕྱེ་བའི་ཆ་གཅིག་དང་། ནམ་ལངས་ནས་ནམ་ལངས་ཀྱི་བར་དང་། ཟླ་བའི་འཕེལ་འགྲིབ་ཀྱི་ཆ་རེ་རེ་ལ་རིམ་པ་ལྟར་བཞག་གོ །དེ་ལྟར་ན་ཉིན་ཞག་ནི་འཇིག་རྟེན་ཀུན་གྱིས་རྟོགས་པར་ནུས་ལ། ཁྱིམ་ཞག་ནི་དེ་ལས་ཅུང་ཟད་ཡུན་རིང་ཞིང་ཚེས་ཞག་ནི་ཅུང་ཡུན་ཐུང་བ་ཡིན་ནོ། །དེ་ལྟར་ན་ལོ་གཅིག་ལ་ཁྱིམ་ཞག་སུམ་བརྒྱ་དྲུག་ཅུ། ཉིན་ཞག་སུམ་བརྒྱ་རེ་ལྔ་ལྷག་པ་དང་། ཚེས་ཞག་སུམ་བརྒྱ་དོན་གཅིག་ལྷག་ཙམ་ཡོད་པས་ཞག་མི་ཐུབ་འདོན་དགོས་པ་ཡང་ཉིན་ཞག་དང་ཚེས་ཞག་ཆ་མ་མཉམ་པའི་དབང་གིས་ཡིན་ཏེ། ཚེས་ཞག་དྲུག་ཅུ་ཐམ་པ་ལ་ཉིན་ཞག་ང་དགུ་ལས་མེད་པས་སོ། །འོན་ཀྱང་ཉིན་ཞག་ང་དགུ་པ་དེ་ཉིད་ཚེས་ཞག་དྲུག་ཅུ་པ་ཡིན་པས་ཚེས་མ་ཆད། ཉིན་ཞག་ཆད་པར་ཤེས་པར་བྱའོ། །མི་མཁས་པ་གང་དག་ཉིན་ཞག་ཀྱང་མ་ཆད་པ་ཡིན་ཟེར་ནས་ཉེར་དགུ་ལ་གསོ་སྦྱོང་བྱས་པའི་སང་ཉིན་གནམ་གང་དུ་བརྩི་བ་དེ་དག་ནི་འཁྲུལ་པར་ཟད་དོ། །འོ་ན་འགྲེལ་ཆེན་ལས། ཉི་མ་འདི་ལ་ཉི་མ་མ་(༡༦༥བ)
ཆད་པ་ཡིན་པས་ཞེས་བཤད་པ་གང་ཞེ་ན། དེ་ནི་འགྱུར་གྱི་སྐྱོན་དུ་ཟད་དེ། དེ་ལྟ་མ་ཡིན་ན་ཡིག་ཕྲེང་གཅིག་གི་གོང་ན་ཉི་མ་གཅིག་ཆད་པས་སྤྱིར་ཞག་བཅུ་བཞི་ཡོད་པའི་ཕྱིར། ཞེས་བཤད་པ་དང་འགལ་ལོ། །ཚེས་བཅོ་ལྔ་ལ་མཚན་མ་གསལ་ཏེ། ཟླ་བ་ཉ་བའི་མཐར་ཐུག་དང་ཟད་པའི་མཐར་ཐུག་ཡིན་པའི་ཕྱིར་རོ། །སྤྲོ་བ་མཐུན་ཏེ། དགེ་བ་རྒྱས་པ་དང་སྡིག་པ་ཟད་པ་མཚོན་པས་སོ། །དུས་བྱིན་གྱིས་བརླབས་ཏེ། མདོ་ལས། ཚེས་བརྒྱད་དང་། བཅུ་བཞི་དང་། བཅོ་ལྔ་རྣམས་ལ་རིམ་པ་བཞིན་རྒྱལ་ཆེན་བཞིའི་གཡོག་དང་བུ་དང་རང་ཉིད་འོང་བར་གསུངས་པས་དུས་བཟང་གསུམ་ལས། ཐ་མ་བཟང་བར་གྲུབ་པའོ། །རྣམ་པ་གང་གིས་གསོ་སྦྱོང་བྱ་ཞེ་ན། སངས་རྒྱས་རང་རང་གི་བསྟན་པ་དེའི་སོ་སོ་ཐར་པའི་མདོ་འདོན་པའི་ངག་གི་ལས་ཁྱད་པར་ཅན་གྱིས་བྱའི། དགེ་བའི་བཤེས་གཉེན་བསྟེན་པ་དང་མདོ་སྡེ་ལྟ་བ་སོགས་ཀྱི་སེམས་དྲང་པོར་སྒྲུབ་པ་དང་། ལྟུང་བ་སྤོང་བ་ལྟ་བུའི་འགལ་བ་བཟློག་པ་ཙམ་གྱིས་མི་འགྲུབ་བོ། །འོན་ཀྱང་དམིགས་བསལ་ལ་སོ་ཐར་མ་བཏོན་ན་གསོ་སྦྱོང་མི་འགྲུབ་པས་མ་ཁྱབ་སྟེ། དགག་དབྱེ་སོགས་རྒྱུ་མཚན་སྤྱི་དོན་བཞིན་ནོ། །དུས་ནི། དགེ་འདུན་གྱི་གནས་བརྟན་གྱིས་སོགས་ཏེ་འདི་དག་ཀྱང་བསྒྲུབ་པའི་བསླབ་བྱའོ། །ཞར་བྱུང་ནི། ཉིན་ཞག་གཅིག་གི་སོགས་ཏེ་གླེང་གཞི་དགེ་སློང་དག་གི་བསོད་སྙོམས་ལ་རྒྱུས་པ་ན། ཁྱིམ་པ་དག་གིས་ཟླ་བ་དང་ཚེས་གྲངས་དྲིས་ཏེ་ཞག་ཆད་པ་མི་འདོར་རམ། ཞེས་པ་ལ་བརྟེན་ནས་སོ། །རིགས་པ་ནི། སྔར་བཤད་པ་ལྟར་ཚེས་(༡༦༦ན)
ཞག་དང་ཉིན་ཞག་མི་མཉམ་པའི་དབང་གིས་ཡིན་གྱི། སྔོན་གྱི་འདུལ་འཛིན་གང་དག་འཕུལ་བྱེད་ཀྱི་རླུང་ཟླ་བ་མགྱོགས་ལ་ཉི་མ་བུལ་བས་ཡིན་ནོ་གསུང་བ་ནི། གནམ་གང་ལ་ཉི་ཟླ་སྡོངས་ནས་ཕྱིན་པས་ཚེས་གཉིས་གསུམ་ན་ཟླ་བ་ཤུལ་ན་ལུས་པ་བླུན་པོའི་མངོན་སུམ་གྱིས་ཀྱང་གྲུབ་པས་གསལ་ལ། ས་ཟླ་དང་གནམ་ཟླ་མ་སྙོམས་པས་ཡིན་ནོ། །ཞེས་ཟེར་བ་དང་། སྐད་ཅིག་མའི་ནུར་རམ་ཤུགས་ཀྱིས་ཡིན་ནོ་ཞེས་རྨ་ཚོ་གསུང་བ་གཉིས་ནི་དོན་མཁས་པས་ཀྱང་མི་གོ་བའི་རྫུབ་ཀྱི་རི་མོར་ཟད་ལ། ཉི་ཟླ་ལྷོ་བགྲོད་བྱང་བགྲོད་ལ་མགྱོགས་བུལ་བྱུང་བས་ཡིན་ནོ། །ཞེས་བྱ་གསུང་བའང་རྒྱུ་མཚན་ལ་ཅུང་ཟད་ཉེ་མོད་ཀྱི། གཟའ་སྐར་གྱི་བགྲོད་པ་དང་། རྐང་པའི་མྱུར་བུལ་མ་དགོངས་པས་གསལ་བར་མ་ནུས་པར་ཟད་དོ། །དེས་ན་ཟླ་བ་འཕུལ་བའི་རླུང་ནི་གཟའ་སྐར་ཐམས་ཅད་ཀྱི་ནང་ན་བུལ་བས་ཞག་རེ་ལ་སྐར་ཁོངས་རེ་རེ་ཕྱིར་ལུས་ནས་ཉིན་ཞག་ཉེར་བརྒྱད་པའི་ཟླ་བ་དེ་ཉེར་དགུའི་སྔ་དྲོ་མཐོང་བར་མངོན་སུམ་གྱིས་གྲུབ་པས། དེ་ཉེར་བརྒྱད་ཀྱི་ཟླ་བར་བྱས་རྟིང་གནམ་གང་ལ་ཉི་མ་དང་སྡོངས་པའི་ཟླ་བ་དེ་ཉེར་དགུའི་ཟླ་བ་ཡིན་པར་བྱེད་དགོས་ན་དེ་ལྟར་བྱེད་མཁན་སུ་ཡང་མེད་པས་བར་དེ་ནས་ཟླ་བའི་འཕེལ་འགྲིབ་ཀྱི་ཆ་གཅིག་ཅུང་མེད་ཙམ་ཉིན་ཞག་ཉེར་དགུའི་བར་ལ་ཅ་བཀྲམ་དུ་སོང་ཡོད་པའི་རྒྱུ་མཚན་གྱིས། ཞག་མི་ཐུབ་ཡེ་མ་བཏོན་པར་སྨྱུག་ཐུར་མ་ནོར་བར་སྤོས་ན་ལོ་གཅིག་འཁོར་བའི་ཚེ། ཟླ་བ་ཉ་བའི་ཉི་མ་ལ་ཚེས་བརྒྱད་དགུའི་མིང་འདོགས་དགོས་པར་(༡༦༦བ)
མངོན་སུམ་གྱིས་འགྲུབ་བོ། །འོ་ན་ཉིན་ཞག་གཅིག་པོ་དེ་ནམ་གྱི་ཚེ་འདོར་ཞེ་ན། དུས་ཚིགས་སོགས་ཏེ་འདི་ལ་སྤྱིར་དུས་ཚིགས་ཀྱི་སྤྲོས་པ་བཤད་པ་དང་། དེ་སྐབས་ཀྱི་ལག་ལེན་དང་སྦྱར་བའོ། །དང་པོ་ལ་གསུམ་ཡན་ལག་ཅན་ལོ་ཡི་རྣམ་གཞག །ཡན་ལག་ཟླ་བའི་དབྱེ་བ། དེ་ལ་དུས་ཚིགས་སུ་བཅད་པའོ། །དང་པོ་ནི། ཆོས་མངོན་པ་ནས་འབྱུང་བ་ལྟར་ན་གཟུགས་མིང་དུས་མཐའ་རྡུལ་ཡིག་དང་། སྐད་ཅིག་ཅེས་པའི་ཚུལ་གྱིས་གཟུགས་ཀྱི་ཆུང་མཐའ་རྡུལ་ཕྲ་རབ། མིང་གི་ཆུང་མཐའ་ཡི་གེ །དུས་ཀྱི་ཆུང་མཐའ་སྐད་ཅིག་མ་ཡིན་ལ། དེའི་ཡུན་ཚད་ལུང་གི་མངོན་པ་ནས་སྐྱེས་བུ་དར་མས་སེ་གོལ་གཅིག་གཏོག་པའི་བར་ལ་སྐད་ཅིག་མ་བརྒྱ་དྲུག་ཅུ་འགག་པར་གསུངས་ལ། རིགས་པའི་མངོན་པ་ནས་རྡུལ་ཕྲ་རབ་གཅིག་བླ་འོག་འདྲེས་པའི་བར་ལ་སྐད་ཅིག་མ་གཅིག་ཏུ་བཤད་དོ། །དེ་འདྲའི་སྐད་ཅིག་མ་བརྒྱ་ཉི་ཤུ་ལ། དེ་ཡིས་སྐད་ཅིག་དེ་དག་ཀྱང་། །དྲུག་ཅུ་ལ་ནི་ཐང་གཅིག་གོ །ཡུད་ཙམ་ཉིན་ཞག་ཟླ་གསུམ་ནི། །གོང་ནས་གོང་དུ་སུམ་ཅུས་བསྒྱུར། །ཞག་མི་ཐུབ་དང་བཅས་པ་ཡི། །ཟླ་བ་བཅུ་གཉིས་ལ་ལོ་གཅིག །ཅེས་བཤད་ལ། ལུང་གཞན་ནས་འབྱུང་བ་ལྟར་སྐྱེས་བུ་དར་མ་ནད་མེད་པའི་དབུགས་འབྱུང་རྔུབ་ཁུག་པ་རེ་རེ་ལ་གཅིག་ཏུ་བརྩིས་པའི་དབུགས་དྲུག་ལ་ཆུ་སྲང་། དེ་དྲུག་ཅུ་ལ་ཆུ་ཚོད། དེ་དྲུག་ཅུ་ལ་ཉིན་ཞག །དེ་སུམ་བརྒྱ་དྲུག་ཅུ་ཟེར་ཡང་ཞིབ་བརྩིས་སུམ་བརྒྱ་རེ་ལྔ་ལྷག་ཙམ་ལོ་གཅིག་ཏུ་བྱེད་ལ། དེ་ཡང་རྒྱ་གར་ན་འདུལ་མངོན་གཞིར་བྱས་ནས་ལོ་ལ་རང་མིང་མེད་དེ། རྒྱལ་པོ་འདི་ཞེས་བྱ་བས་རྒྱལ་སྲིད་བསྐྱངས་(༡༦༧ན)
ནས་ལོ་གྲངས་འདི་ཙམ་ལོན་པའི་ལོ་ཞེས་སོགས་ལས་མི་འབྱུང་བའི་ཕྱིར་རོ། །བདེ་མཆོག་སྟོད་འགྲེལ་སོགས་དང་བསྟུན་ནས་རབ་བྱུང་རྣམ་བྱུང་དཀར་པོ་དང་། ཞེས་སོགས་ལོ་དྲུག་ཅུའི་མིང་འབྱུང་ངོ་། །རྒྱ་ནག་པ་བྱི་བ་སོགས་ལ་བཅུ་གཉིས་ལ་ལོ་སྐོར་དུ་བྱེད་ཅིང་། དེ་འབྱུང་བ་མེ་ས་ལྕགས་ཆུ་ཤིང་རྣམས་ལ་ཕོ་མོ་གཉིས་གཉིས་དང་སྦྱར་བས་དྲུག་ཅུ་ལོན་པ་ན་རྫོགས་པར་འདོད་དོ། །གཉིས་པ་ལ་དངོས་དང་། ལོ་འགོ་འཛིན་ཚུལ་གཉིས་དང་པོ་ནི། ལོ་གཅིག་ལ་ཟླ་བ་བཅུ་གཉིས་སུ་འབྱེད་པར་ཀུན་མཐུན་ཞིང་། དེ་ཡང་དབྱར་དགུན་སྟོན་དཔྱིད་བཞི་ལ་ར་བ་འབྲིང་པོ་མཐའ་ཆུང་གསུམ་གསུམ་དུ་འབྱེད་པར་ཀུན་མཐུན། དེ་ཡང་དུས་འཁོར་བ་དང་། རྒྱ་ནག །ཧོར། བོད་རྣམས་ཡར་ངོ་སྔོན་འགྲོ་བྱེད་ལ། རྒྱ་གར་གྱི་འདུལ་མངོན་པ་རྣམས་མར་ངོ་སྔོན་འགྲོ་ཡིན་ཏེ། ཟླ་བ་ཉ་ཚེ་ཟླ་རངས་འགྱུར། །ཞེས་སོགས་དང་། མེ་ཏོག་ཕྲེང་རྒྱུད་ལས། གྲོ་ཞུན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན། །དེ་བཞིན་ཁྲུམས་སྟོད་ཟླ་བ་ཡི། །ཚེས་གཅིག་ཅེས་ནི་ཕྱི་མར་གྲགས། །ཞེས་ཚེས་གཅིག་ལ་དབྱར་ཁས་ལེན་པར་བཤད་ལ། ཡར་ངོའི་ཚེས་གཅིག་ལ་ཁས་ལེན་པ་མི་སྲིད་པའི་ཕྱིར་དང་། དགེ་ཚུལ་གྱི་ལོ་དྲི་བ་ནས་ཀྱང་དེ་བཞིན་དུ་གསུངས་པའི་ཕྱིར་རོ། །འོ་ན་མདོ་རྩ་དང་མཛོད་རྩ་འགྲེལ་ལས། ཡར་ངོ་སྔོན་འགྲོར་བཤད་པ་ཇི་ལྟར་ཡིན་ཅེ་ན། རྒྱ་དཔེ་ལ་མར་ངོ་སྔོན་འགྲོ་རང་དུ་ཡོད་ཀྱང་བོད་ན་ཡང་སྔོན་འགྲོ་བའི་ཀུན་ལ་གྲགས་པས་དེ་དང་མཐུན་པར་དོན་འགྱུར་མཛད་པ་ཡིན་ནོ། །ཟླ་(༡༦༧བ)
བའི་མིང་ནི། གང་གིས་ཉ་བའི་སྐར་མ་དེའི་སྒོ་ནས་འདོགས་ལ། དེ་ཡང་བོད་ན། དཔྱིད་གསུམ་རྒྱལ་རྟ་ཁྲ་ལ་ཉ། །དབྱར་གསུམ་ས་རྩེ་མ་རུ་བྲེ། །སྟོན་གསུམ་སྦོ་སྒྲོགས་ཁྲུམས་ལ་ཉ། །དགུན་གསུམ་དབྱུག་སྨིན་མགོ་ལ་ཉ། །མཐའ་ཆུང་གསུམ་པོ་རང་ས་འཛིན། །ཞེས་ཟེར་ལ། དུས་འཁོར་བ། དཔྱིད་འབྲིང་ནག་པ་ལུག་གི་ཁྱིམ། །དཔྱིད་མཐའ་ས་ག་གླང་གི་ཁྱིམ། །དབྱར་མཐའ་ས་ག་གླང་གི་ཁྱིམ། །དབྱར་ར་སྟོན་ཟླ་འཁྲིག་པའི་ཁྱིམ། །དབྱར་འབྲིང་ཆུ་སྟོད་ཀ་རྐའི་ཁྱིམ། །དབྱར་མཐའ་གྲོ་བཞིན་སེང་གེའི་ཁྱིམ། །སྟོན་ར་ཁྲུམས་སྟོད་བུ་མོའི་ཁྱིམ། །སྟོན་འབྲིང་ཐ་སྐར་སྲང་གི་ཁྱིམ། །སྟོན་མཐའ་སྨིན་དྲུག་སྡིག་པའི་ཁྱིམ། །དགུན་ར་མགོ་ཟླ་གཞུ་ཡི་ཁྱིམ། །དགུན་འབྲིང་རྒྱལ་ཟླ་ཆུ་སྲིན་ཁྱིམ། །དགུན་མཐའ་མཆུ་ནི་བུམ་པའི་ཁྱིམ། །དཔྱིད་ར་དབོ་ཟླ་ཉ་ཡི་ཁྱིམ། །ཞེས་འཆད་དོ། །གཉིས་པ་ནི། ལོའི་འགོ་ཟླ་བ་གང་ནས་འཛིན་ཞེ་ན། དུས་འཁོར་བ་ནི་ནག་པའི་ཚེས་གཅིག་ནས་རགས་བརྩིས་ཀྱི་ལོ་གསར་བར་འདོད་དེ། ཉི་མ་ལུག་ཁྱིམ་དུ་ཞུགས་པ་ན་ཉི་མས་རྒྱུ་སྐར་གྱི་དང་པོ་ཐ་སྐར་གྱི་སྟེང་དུ་སླེབ་ཡོང་བས་སོ། །དེ་ཡང་ཞིབ་ཏུ་བརྩི་ན་དུས་སྦྱར་བརྩིས་ནས་ཉི་མ་ལུག་ཁྱིམ་དུ་ནམ་ཞུགས་པའི་སྐད་ཅིག་དེ་ནས་འཛིན་ནོ། །རྒྱ་ནག་པ་ནི། ཟླ་བ་བཅུ་གཉིས་ལོ་སྐོར་བཅུ་གཉིས་དང་སྦྱོར་ན། མགོ་ཟླ་བྱི་བ། རྒྱལ་ཟླ་གླང་། མཆུ་ཟླ་སྟག་ཅེས་སོགས་སྦྱོར་ན་ཡང་ལོ་འགོ་དཔྱིད་ར་ནས་འཛིན་པས་ལོ་གསར་རྒྱལ་དུ་གྲགས་སོ། །ཧོར་ནི། ཆོ་འཕྲུལ་ཆེན་པོའི་རྟ་ཟླ་ནས་ལོ་འགོ་འཛིན་པས་དེ་ལ་ཧོར་ཟླ་དང་པོར་བྱེད་ཅིང་། དེང་སང་བོད་ན་ཡང་ཧོར་ཟླ་འདི་གྲགས་ཆེ་བས་འདི་གཞིར་བྱས་ནས་བཤད་པར་(༡༦༨ན)
བྱའོ། །དེ་དག་ནི་ཟླ་བའི་ཡར་ངོ་སྔོན་འགྲོར་བྱེད་པའི་ལོ་འགོ་འཛིན་ཚུལ་ཡིན་ལ། འདུལ་མངོན་གཞིར་བྱས་ཀྱི་རྒྱ་གར་བ་རྣམས་ནི། སངས་རྒྱས་པ་རྣམས་ཀྱི་དུས་ཀྱི་དང་པོ་ནི་དགུན་ཏེ། ཞེས་བཤད་པས་མར་ངོ་སྔོན་འགྲོའི་དགུན་ཟླ་ར་བ་མགོ་ཟླའི་ཚེས་གཅིག་ནས་འཛིན་ལ། དེ་དུས་ནམ་གྱི་ཚེ་འབྱུང་ན། ཧོར་ཟླ་བཅུ་པ་སྨིན་དྲུག་ཟླ་བའི་ཚེས་བཅུ་དྲུག་ཡིན་ཏེ། མདོ་ཉི་མའི་སྙིང་པོ་ལས། བདག་གིས་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བ། །འདི་ནི་རབ་ཏུ་རྫོགས་པ་ཡིན། །ཞེས་སྨིན་དྲུག་གིས་ཉ་བའི་ཉིན་ཞག་དེས་སྟོན་ཟླ་ཐ་ཆུང་རྫོགས་པར་བཤད་ཅིང་། མདོ་རྩ་རྩ་འགྲེལ་འདིར་དབྱར་འབྲིང་གི་ཉའི་ཕྱི་དེ་ཉིན་པར་དབྱར་སྔ་མ་ཁས་ལེན་པར་གསུངས་ལ། དགུན་སྟོད་དགུན་སྨད་དཔྱིད་སོས་ཀ་རྣམས་ལ་ཟླ་བ་གཉིས་གཉིས་རྫོགས་ནས་དབྱར་སྔ་མ་ཁས་ལེན་དགོས་ཤིང་། དེ་ཡང་ཟླ་བའི་རང་མིང་གི་དབང་དུ་བྱས་ན། གྲོ་ཞུན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན། །ཞེས་པ་ལྟར་ཆུ་སྟོད་ཀྱི་ཉ་བའི་ཕྱི་དེ་ཉིན་པར་ལེན་པ་ལས་གཞན་དུ་བསྒྱུར་ཐབས་མེད་ལ། དེ་དག་ཀྱང་ལོ་འགོ་འཛིན་ཚུལ་འདི་ལ་འཐད་ཀྱིས་གཞན་ལ་མི་འགྲིག་པའི་ཕྱིར་རོ། །འོ་ན་ཁྱོད་ཀྱིས་བཤད་པའི་ལོ་འགོ་འདི་ནས་དགུན་ཟླ་གཉིས་ལས་མ་འགྱངས་པར་དགུན་ཉི་ལྡོག་པ་མངོན་སུམ་གྱིས་གྲུབ་ན། མཛོད་ལས། དགུན་རྣམས་ཀྱི་ནི་བཞི་པ་ལ། །ཐུང་དུ་འགྱུར་རོ་ཉིན་མོ་བཟློག །ཅེས་དགུན་ཟླ་བཞི་པ་ལ་ཉི་མ་ལྡོག་པར་བཤད་པ་དང་འགལ་ལོ་ཞེ་ན། ཁ་ཅིག་འདི་གཙོ་བོར་(༡༦༨བ)
བྱས་ནས་ལོ་འགོ་ཧོར་ཟླ་བརྒྱད་པའམ་དགུ་པ་ནས་འཛིན་ལ། ཁ་ཅིག་འདུལ་མངོན་མི་མཐུན་པས་འདུལ་བའི་རྣམ་གཞག་ལ་མངོན་པས་མི་གནོད་དོ་ཞེས་ཟེར་མོད། དེ་ནི་ཡར་ངོ་སྔོན་འགྲོའི་དགུན་ཟླ་བཞི་པ་དབོའི་ཟླ་བ་ཧོར་ཟླ་གཉིས་པའི་སྨད་ལ་ཉིན་མཚན་མཉམ་བཞག་གཅིག་འབྱུང་ལ། དེའི་ཕྱི་ཉིན་ནས་མཚན་མོ་ལས་ཉིན་མོ་རིང་དུ་འགྲོ་ལ། དེ་ནས་ཟླ་བ་གསུམ་ལྷག་ཙམ་ལོན་པ་དཔྱིད་ཀྱི་བཞི་པ་ཆུ་སྟོད་ཀྱི་ཟླ་འགོ་ལ་དབྱར་ཉི་ལྡོག་ཅིང་། དེ་ནས་ཟླ་བ་གསུམ་ལོན་པ་དབྱར་གྱི་གཉིས་པ་ཁྲུམས་ཀྱི་ཟླ་སྨད་ལ་སྟོན་ཉིན་མཚན་མཉམ་པའི་ཕྱིས་ཉིན་ནས་རིང་ཐུང་དུ་འགྲོ་བས་འདི་དང་མཐུན་པར་བཤད་ན་ལེགས་སོ། །གསུམ་པ་ནི། ལོ་ཟླ་དེ་དག་ལ་དུས་ཚིགས་དུར་དབྱེ་ཞེ་ན། ལོ་གཅིག་ལ་དུས་ཚིགས་གསུམ་དང་བཞི་དང་ལྔ་དང་དྲུག་ཏུ་དབྱེ་བ་རྣམས་གསུངས་ཏེ། དགོས་པ་རིམ་པ་བཞིན་ཟླ་བ་བཞི་བཞི་ལོངས་སྤྱད་ན་ཕྱག་དར་ཁྲོད་དུ་བྱེད་པས་དེའི་གོས་ངོས་བཟུང་བའི་ཕྱིར་དང་། རབ་འབྲིང་པོ་ཐ་ཆུང་གསུམ་གསུམ་རྟོགས་པའི་ཆེད་དང་། དབྱར་སྔ་མ་མ་གྲུབ་ན། ཕྱི་མ་ཁས་ལེན་དགོས་ལ་དེ་དབྱར་ཐུང་ངུའི་ཉིན་ཞག་གཅིག་པོ་ལ་མ་གྲུབ་ན། ལོ་གཅིག་གི་དབྱར་གནས་སྟོངས་པས་དབྱར་ཐུང་ངུ་ཤི་བ་དང་འདྲ་བ་ངོས་བཟུང་བའི་ཕྱིར་དང་། འདིར་བསྟན་གསོ་སྦྱོང་ཞག་མི་ཐུབ་ངོས་བཟུང་བའི་ཆེད་དུའོ། །རྣམས་ཀྱི་མིང་འདོགས་ལ། དང་པོ་ནི། དགུན་དཔྱིད་དབྱར་རྣམས་ལ་ཟླ་བ་བཞི་བཞིའོ། །གཉིས་པ་དབྱར་དགུན་སྟོན་དཔྱིད་དོ། །གསུམ་པ་ནི། དུས་གོའི་སྐབས་སུ་བཤད་པ་བཞིན་ནོ། །བཞི་པ་ནི། དགུན་སྟོད། དགུན་སྨད། དཔྱིད་(༡༦༩ན)
སོ་ཀ །དབྱར་སྟོན་གྱི་དུས་རྣམས་ལ་ཟླ་བ་གཉིས་གཉིས་སུ་བྱའོ། །དུས་ཚིགས་བཞི་པོའི་དང་པོ་གཉིས་ནི་ཡར་ངོ་སྔོན་འགྲོ་གཙོ་ཚེ་ལ། ལྔ་དང་དྲུག་ཏུ་བྱས་པ་གཉིས་ནི་མར་ངོ་སྔོན་འགྲོར་མ་བྱས་ན་འགྲིག་པའི་ཐབས་མེད་དོ། །གཉིས་པ་ནི་དཔེར་ན། ཧོར་ཟླ་བཅུ་པའི་ཟླ་སྨད་ལ་བཅོ་ལྔ་པ་དང་། བཅུ་གཅིག་པའི་ཟླ་སྨད་ལ་བཅུ་བཞི་པ་བྱ་ཞིང་། དེ་བཞིན་དུ་སྤེལ་ནས་བྱ་སྟེ། འདིའི་བཅོ་ལྔ་པའི་དུས་སུ་དགུན་སྟོད་ཀྱི་དུས་ཀྱི་ཟླ་བ་གཉིས་གང་ཡིན་པ་དེ་ལས་སང་གི་སྐྱ་རེངས་ཤར་བས་ཟླ་བ་ཕྱེད་ནི་འདས་སོ། །ལྷག་མ་ཕྱེད་དང་གཉིས་ནི་སླད་དུ་ལུས་སོ། །ཞེས་སོགས་སྦྱར་བར་བྱའོ། །ངག་དོན། དུས་ཚིགས་དྲུག་པོ་རྣམས་ཀྱི་ཟླ་བ་ཕྱེད་ལུས་པ་ན་ཉིན་ཞག་གཅིག་གིས་མི་ཆོག་པའི་ཞག་མི་ཐུབ་བཏོན་པ་ཆོས་ཅན། དགོས་པ་ཡོད་དེ། ཚེས་ཞག་དང་ཉིན་ཞག་ཆ་མི་སྙོམས་པ་དོར་ནས་ཉ་སྒོ་དང་ཚེས་སྒོ་འགྲིག་པའི་དགོས་པ་ཡོད་པའི་ཕྱིར། དེ་ལྟར་སྨྱུག་ཐུར་གྱིས་བརྩིས་པའི་ཞག་མི་ཐུབ་དྲུག་པོ་བསྣན་པའི་ཟླ་བ་བཅུ་གཉིས་ལ་ཉིན་ཞག་སུམ་བརྒྱ་དང་དྲུག་ཅུས་ཀྱང་ལོ་གཅིག་ཅུང་མི་རྫོགས་པས་དེའི་སྟེང་དུ་ཉིན་ཞག་ལྔ་ལྷག་ཙམ་བསྣན་པའི་ཀུན་ལ་གྲགས་པའི་ཚེས་ཟླ་བཅུ་གཉིས་པོ་དེ་རྫོགས་ནས་ཉིན་ཞག་བཅུ་གཅིག་པོ་དེ་བསགས་པ་ན་ཟླ་ཤོལ་འབྱུང་བས་ཟླ་བ་ཞེས་སོགས་གསུངས་ཏེ། དང་པོར་ལོ་དྲུག་དྲུག་ན་དོར་ཅིག་ཅེས་གསུངས་པས་དུས་མི་འགྲིག་ཅིང་བློན་པོ་མཁས་པ་དག་འཕྱ་ནས་རྒྱལ་པོའི་རྗེས་སུ་འབྲང་བར་བཅས་པས་བརྩིས་མཁན་མཁས་པ་དང་བཅས་པའི་རྒྱལ་པོས་ནམ་དོར་བ་ན་འདོར་(༡༦༩བ)
དགོས་ཀྱི། དུས་ཀྱི་གྲང་དྲོ་ལྟ་བུ་མཚན་མ་ལྟར་སྣང་འགའ་རེ་རྒྱུ་མཚན་དུ་བྱས་ནས་རང་བཟོ་བྱེད་པ་ནི་བཅས་པ་དང་འགལ་བར་ཤེས་པར་བྱའོ། །ཟླ་ཤོལ་འབྱུང་བའི་རྒྱུ་མཚན་ནི། བཤད་མ་ཐག་པ་ལྟར་ཚེས་ཟླས་ཁྱིམ་ཟླ་མ་ནོན་པས་ཚེས་ཟླ་བཅུ་གཉིས་ལ་ཁྱིམ་ཟླ་བཅུ་གཉིས་མི་ཡོང་བའི་ཆ་བསགས་པས་ཡིན་ལ། དེ་ཡང་ཞིབ་པར་བརྩིས་ན་ཚེས་ཟླ་སུམ་ཅུ་པོ་ཕྱེད་དང་གསུམ་གསུམ་ན་ཚེས་ཟླ་ལྷག་པོ་རེ་རེ་འབྱུང་བར་ཟླ་ཤོལ་གྱི་རྒྱུ་མཚན་བརྩིས་ཀྱིས་གསལ་བས་དེ་དང་བསྟུན་ནས་འདོར་དགོས་ཀྱི། གང་དག་མདོ་སྡེའི་ལུགས་སུ་བྱས་ནས་ལོ་གསུམ་གསུམ་ན་ཟླ་ཤོལ་རེ་རེ་འབྱུང་ལ། དེ་ཡང་རྟ་བྱ་བྱི་བ་ཡོས་ལ་ཤོལ། །སྟོན་དགུན་དཔྱིད་དབྱར་འབྲིང་པོ་གཉིས། །ཞེས་གསུང་པ་ནི་རྒྱལ་པོ་མཁས་པ་དང་མཐུན་པ་མ་ཡིན། དེར་མ་ཟད་རགས་བརྩིས་ལའང་ལོ་རེ་ལ་ཉིན་ཞག་བཅུ་གཅིག་ལྷག་ཙམ་རེ་ལྷག་པོར་ཡོད་པས་ལོ་གསུམ་ན་ཟླ་གཅིག་དང་ཞག་བཞི་ཙམ་འབྱུང་བས་སོ། །དེ་ལྟར་ཟླ་ཤོལ་གྱི་ཞག་རྣམས་ནི་ལོ་རྣམས་ཀྱི་ཁོངས་སུ་ཐིམ་ནས་ཟུར་དུ་ལུས་པ་ཅུང་ཟད་ཀྱང་མེད་པས་གང་དག་ཟླ་ཤོལ་བསགས་ནས་ལོ་ཤོལ་འདོན་པར་འདོད་པ་དེ་དག་ནི་གཟུ་ལུམས་ཀྱི་རང་བཟོ་གླེན་པའི་རིགས་འགྲེ་ཡིན་ནོ། །རྒྱུ་སྐར་ནི་སོགས་དང་། གོང་འོག་རྣམས་སུ་ཕྱོགས་དང་ཉིན་ཞག་སོགས་རྣམས་ལ་མཁས་པར་བྱ་བར་གསུངས་པ། བློ་ནུས་ཡོད་བཞིན་དུ་སྐར་མ་བརྩི་བ་རྣམ་རྟོག་རགས་པ་ཡིན་པར་འདོད་པ་དེ་དག་ནི་རྟེན་འབྲེལ་དང་བཅས་པ་གཉིས་ཀ་ཁྱད་དུ་སོད་པར་དོགས་སོ། །རྒྱུ་མཚན་ཡང་དེ་ལྟར་ཤེས་པ་འདི་ལ་དགོས་པ་ནི་འཇིག་རྟེན་པའི་ཐ་སྙད་ལ་མཁས་པ་དང་ཚེ་འདས་པ་(༡༧༠ན)
སེམས་ལ་བཞག་པ་དང་གསོ་སྦྱོང་གི་ཉི་མ་ཤེས་པའི་ཆེད་ཡིན་ནོ། །ཞེས་འགྲེལ་ཆེན་ལས་གསུངས་པས་སོ། །སྤྲོས་པས་ཆོག་གོ །ཞེས་དང་། ནོར་བུའི་ཐེམ་སྐས་ཀྱི་རང་ལུགས་སྙིང་པོར་བསྡུས་པ་ལ། ལོ་འགོ་འཛིན་ཚུལ་འཇིག་རྟེན་ལུགས་ཀྱི་སྟོན་ཟླ་མཐའ་ཆུང་མར་ངོའི་ཚེས་བཅུ་དྲུག་ནས་ལོ་འགོ་འཛིན་པ་ཕལ་ཆེར་མཐུན་ལ། སྟོན་ཟླ་མཐའ་ཆུང་གི་ངོས་འཛིན་ཟླ་བ་བརྒྱད་པ་དང་དགུ་པ་དང་བཅུ་པ་གསུམ་ལ་ཁ་མི་འཆམ་པར་སྣང་བ་ལས། རང་ལུགས་རིལ་ཚེས་ཧོར་ཟླ་བཅུ་པའི་ཚེས་བཅུ་དྲུག་གམ། འཇིག་རྟེན་ལུགས་ཀྱི་སྨིན་དྲུག་ཟླ་བའི་ཚེས་བཅུ་དྲུག་ནས་མགོ་ཟླའི་ཚེས་བཅོ་ལྔའི་བར་འདི་མགོ་ཟླ་དང་དགུན་ཟླ་དང་པོ་ཡིན་ཞིང་ལོ་འགོ་དང་དུས་འགོ་ཡང་ཡིན་ཞེས་དང་། ལོ་གཅིག་ལ་ཞག་མི་ཐུབ་དྲུག་འབྱུང་བའི་ངོས་འཛིན་སྙིང་པོར་སྒྲིལ་ན། རང་རེའི་པཎ་ཆེན་ཐམས་ཅད་མཁྱེན་པ་དང་། ཀུན་མཁྱེན་ཆོས་ཀྱི་རྒྱལ་པོ་གཉིས་བཤད་པའི་སྲོལ་ཐ་དད་པ་གཉིས་འཛིན་པར་སྣང་སྟེ། ལུགས་སྔ་མ་འཐད་པ་ཡིན་ཏེ་ཇི་ལྟར་སྙམ་ན་འཇིག་རྟེན་གྱི་མགོ་ཟླའི་ཉེར་དགུའི་ཉིན། རྒྱལ་ཟླའི་མར་ངོའི་གསོ་སྦྱོང་བཅུ་(༡༧༠ན)
བཞི་པ་འབྱུང་བ་སྟེ་འཐད་པར་ཐལ། དེའི་ཉིན་རྒྱལ་ཟླའི་མར་ངོའི་ཚེས་ཞག་བཅོ་ལྔ་པར་སླེབ་པའི་ཕྱིར་ཏེ། རྒྱལ་ཟླའི་མར་ངོའི་ཉིན་ཞག་བཅུ་བཞི་པའི་ཉིན་རྒྱལ་ཟླའི་མར་ངོའི་ཚེས་ཞག་བཅོ་ལྔ་པར་སླེབ་པ་གང་ཞིག །འཇིག་རྟེན་ལུགས་ཀྱི་མགོ་ཟླའི་ཉེར་དགུའི་ཞག་དེ་རྒྱལ་ཟླའི་མར་ངོའི་ཉིན་ཞག་བཅུ་བཞི་པ་ཡིན་པའི་ཕྱིར་རོ། །དང་པོ་དེར་ཐལ། སྨིན་དྲུག་ཟླ་བའི་མར་ངོའི་གསོ་སྦྱོང་བཅུ་བཞི་པ་བྱས་པའི་ཕྱི་དེ། དེ་ཉིན་བར་ནས་རྒྱལ་ཟླའི་མར་ངོའི་ཉིན་ཞག་བཅུ་ཞིག་པའི་བར་ལ་ཉིན་ཞག་ང་དགུ་ལོན་པ་གང་ཞིག །ཉིན་ཞག་ང་དགུ་ལ་ཚེས་ཞག་དྲུག་ཅུ་འབྱུང་བའི་ཕྱིར། དང་པོ་དེར་ཐལ། དེ་ནས་དེའི་བར་ལ་སྨིན་དྲུག་ཟླ་བའི་མར་ངོའི་ཚེས་བཅོ་ལྔ། མགོ་ཟླ་ཧྲིལ་པོ་རྒྱལ་ཟླའི་མར་ངོའི་ཉིན་ཞག་བཅུ་བཞི་པ་རྣམས་བསྡོམས་པས་ཉིན་ཞག་ང་དགུ་ལྷག་ཆད་མེད་པར་ཚང་བའི་ཕྱིར། རྟགས་བསལ་ཁྱབ་པ་གསུམ་ཆར་ལ་བསྙོན་པར་མི་ནུས་སོ། །ཞེས་དང་། འདི་ལ་འབུམ་ཕྲག་གསུམ་པས་ཞག་མི་ཐུབ་འབྱུང་བའི་གནམ་གང་དྲུག་པོ་དེ་འདོར་ཞེས་པའི་བཀའི་སྙིང་པོ་ལ་ངེས་པ་རྙེད་ན། དཀའ་བའི་གནས་རང་གྲོལ་ཡིན་པའི་ཕྱིར་ཏེ། ཞག་མི་ཐུབ་མི་འབྱུང་བའི་ཟླ་བ་རྣམས་ལ་འཇིག་རྟེན་ལུགས་ཀྱི་གནམ་གང་དེ་ལ་བསྟན་བཅོས་ལུགས་ཀྱི་མར་ངོའི་ཚེ་ཉིན་ཞག་བཅོ་ལྔ་པར་བྱས་ཆོག་ཀྱང་། ཞག་མི་ཐུབ་འབྱུང་བའི་ཟླ་བ་དྲུག་པོ་ལ་མང་པོའི་ཉིན་ཞག་དྲུག་ཆད་ནས་མེད་པས་འཇིག་རྟེན་ལུགས་ཀྱི་གནམ་གང་དྲུག་པོ་དེ་ཡང་ཆད་བར་སོང་བ་ལ། ཞག་མི་ཐུབ་དོར་བ་ཞེས་ཐ་སྙད་བཏགས་པ་ཡིན་ལ། དེས་ན་འཇིག་རྟེན་ལུགས་ཀྱི་མགོ་ཟླ་བའི་གནམ་གང་དུ་བྱེད་(༡༧༡ན)
པའི་ཞག་དེ་ནི་བསྟན་བཅོས་ལུགས་འདིར་རྒྱལ་ཟླའི་ཡར་ངོའི་ཚེས་གཅིག་ཏུ་སླེབ་པ་ཡིན་ནོ། །དེས་ན་ཞིབ་ཆ་འདི་སྐད་སྨྲ་དགོས། རྒྱལ་ཟླའི་མར་ངོའི་ཉིན་ཞག་བཅོ་ལྔ་པ་ནི་ཆད་ནས་མེད་ལ།འཇིག་རྟེན་ལུགས་ཀྱི་མགོ་ཟླའི་གནམ་གང་གི་ཞག་དེ་ཡོད་དུ་ཆུག་ཀྱང་དེ་ནི་རྒྱལ་ཟླའི་ཡར་ངོའི་ཚེས་གཅིག་ཏུ་སླེབ་པ་ཡིན་ནོ། །ཞེས་དཔྱོད་ལྡན་སྙིང་གི་བདུད་རྩིར་བཟུང་དགོས་སོ། །ཞེས་དང་། དེས་ན་འདུལ་བ་རང་སྐད་ལ་ལོ་གཅིག་ལ་ཚེས་ཞག་སུམ་བརྒྱ་དྲུག་ཅུ་འམ་ཉིན་ཞག་སུམ་བརྒྱ་ང་བཞི་འབྱུང་གི་དེ་ལས་ལྷག་པ་མི་འབྱུང་སྟེ་ཤོལ་མེད་ཀྱི་ལོ་གཅིག་ལ་ཟླ་བ་བཅུ་གཉིས་ལས་མི་འབྱུང་ལ། ཟླ་བ་བཅུ་གཉིས་པོ་དེ་ལ་ཉིན་ཞག་སུམ་ཅུ་ཚང་བའི་ཟླ་བ་དྲུག་དང་ཉིན་ཞག་ཉེར་དགུ་ལས་མེད་པའི་ཟླ་བ་དྲུག་འབྱུང་གི་དེ་ལས་སྤྲོས་པ་ཅི་ཡང་འབྱུང་རྒྱུ་མེད་པའི་ཕྱིར་རོ། །དེས་ན་དཔལ་འབུམ་ཕྲག་གསུམ་པས། འདུལ་བ་རང་ལུགས་ལ། ཞག་མི་ཐུབ་དང་བཅས་པ་ཡི། །ཟླ་བ་བཅུ་གཉིས་ལ་ལོ་གཅིག།ཅེས་པ་འདི་ཚད་མར་བཟུང་ནས་ཁྱིམ་ལོ་དང་ཁྱིམ་ཞག་སོགས་འདིར་བཏང་སྙོམས་སུ་མཛད་པ་འདི་སྐབས་སུ་བབས་ཀྱི། གཞན་དག་འདུལ་བ་འདི་ལ་དུས་འཁོར་གྱི་རྒྱས་བཀབ་སྟེ་ཞག་གསུམ་རྣམ་དབྱེ་ཚད་མར་བྱས་ཏེ། ལོ་གཅིག་ལ་ཁྱིམ་ཞག་སུམ་བརྒྱ་དྲུག་ཅུ། ཉིན་ཞག་སུམ་བརྒྱ་དྲུག་ཅུ་རེ་ལྔ། ཚེས་ཞག་སུམ་བརྒྱ་བདུན་ཅུ་རྩ་གཅིག་རྗེས་འབྲང་དང་བཅས་ཡོད་ཅེས་བཤད་སྣང་བ་འདི་དཔྱོད་ལྡན་དག་གིས་དཔྱོད་པར་རིགས་ཏེ། ཞེས་དགག་སྒྲུབ་རྒྱ་ཆེར་མཛད་པ་དང་། དགོངས་(༡༧༡ན)
དོན་དེ་ཉིད་ལས། གནད་འདི་ལྟར་ཡིན་ཏེ་ཞག་མི་ཐུབ་ཀྱི་ཞག་དྲུག་པོ་དེ། ཟླ་བ་རང་རང་དྲུག་པོ་དེར་ལྷག་ནས་བཞག་པའམ། ཟླ་བ་བཅུ་རྫོགས་རྗེས་ལྷག་པོར་ཞག་དྲུག་བསགས་ནས་འཇོག་པ་གང་ཡང་མ་ཡིན་གྱི། སྤྱིར་ཚེས་ཞག་དང་ཉིན་ཞག་གི་བར་ན་ཆུ་ཚོད་རེའམ། ཡུད་ཙམ་ཕྱེད་རེ་ཡོད་པའི་ཆུ་ཚོད་དམ་ཡུད་ཙམ་ཕྱེད་པོ་དེ་དག་བསྡོམས་ནས་ལོ་རེ་ལ་ཞག་དྲུག་རེར་འགྱུར་བ་དེ་ལོ་ལྔ་ནས་ཟླ་བར་ལོངས་པས་གཉིས་པོའི་ཞག་ཁྱད་ལ་འདི་ཙམ་འབྱུང་བ་དེ་ཤེས་པར་བྱ་བའི་ཕྱིར། འདུལ་བ་ནས་ལོ་ལྔ་ནས་ཟླ་ལྷག་རེ་འདོན་པ་ཡིན་པའི་ཕྱིར་རོ། །དེ་ལྟར་མིན་པ་ལྷག་པོར་ཞག་དྲུག་གནས་ཚོད་ལ་ལྷག་རྒྱུ་ཡིན་ན། ལོ་སྔ་མའི་ཟླ་བ་བཅུ་གཉིས་རྫོགས་ནས་ལོ་ཕྱི་མ་འཆར་བའི་བར་མ་ལ་ཞག་དྲུག་པོ་དེས་ཆོད་དགོས་པས་མཁས་པས་བདེ་བའི་དགའ་སྟོན་དུ་འགྱུར་བ་མ་ལགས་སོ། །དེ་ལའང་འདི་སྙམ་དུ་འདུལ་བ་རང་ལུགས་ལའང་ལོ་གཅིག་ལ་ཁྱིམ་ཞག་སུམ་བརྒྱ་དང་དྲུག་ཅུ་འབྱུང་རིགས་པར་ཐལ། གནམ་ཞག་ཅེས་པ་ཚེས་ཞག་དང་། ས་ཞག་ཅེས་པ་ཁྱིམ་ཞག་གི །ཐ་སྙད་ཁས་ལེན་རིགས་པའི་ཕྱིར་ཚེས་ཞག་དང་ཁྱིམ་ཞག་གི་བར་ཁྱད་ལ་ཞག་བཅུ་གཅིག་འབྱུང་བའི་དབང་གིས་ལོ་གསུམ་ནས་ཟླ་ཤོལ་འདོན་པ་དེ་འཐད་པའི་ཕྱིར་སྙམ་ན། འཁྲུལ་གཞི་དེར་སྣང་མོད། དེའི་གནད་ནི་འདུལ་བ་རང་ལུགས་ལ་ཁྱིམ་ཞག་ཁས་བླངས་ནས་ཟླ་བ་རེ་ལ་ཁྱིམ་ཞག་སུམ་ཅུ་རེ་ཚང་བ་རང་ལུགས་ལ་ཁས་ལེན་ནོ་ཞེས་བབ་བཅོལ་སྨྲ་བ་མ་ཡིན་གྱིས། རྒྱལ་པོའི་བརྩིས་པ་དག་དེ་སྐད་གླེང་བ་(༡༧༢ན)
བཞིན་རྒྱལ་པོ་དེ་ཉིད་ཚད་མར་བྱེད་པས་ཟླ་ཤོལ་འདོར་བ་སོགས་རྒྱལ་པོའི་རྗེས་སུ་འབྲང་བ་ཙམ་ཡིན་པའི་ཕྱིར་རོ། །དེས་ན་གོང་དུ་དཔྱད་པ་བྱས་པའི་དོན་འཇིག་རྟེན་ལུགས་ཀྱི་མགོ་ཟླ་བའི་གནམ་གང་དེ་ཆད་ཅེས་སམ། དེ་ཉིད་རྒྱལ་ཟླའི་ཡར་ངོའི་ཚེས་གཅིག་ཏུ་སླེབ་ཅེས་པའི་དོན་འཇིག་རྟེན་ལུགས་ཀྱི་མགོ་ཟླའི་གནམ་གང་ཞེས་པའོ། །རྒྱལ་ཟླའི་མར་ངོའི་ཉིན་ཞག་བཅོ་ལྔ་པའི་ཐ་སྙད་ཆད་ནས་འཇོག་ཏུ་མེད་ཀྱང་། དེ་གཉིས་ཀྱི་དོན་མ་ཚང་བར་རྒྱལ་ཟླའི་ཡར་ངོའི་ཚེས་གཅིག་དེ་ལ། དེ་གཉིས་ཀྱི་དོན་ཚང་ཞེས་པའི་དོན་ཡིན་གྱི་འཇིག་རྟེན་ལུགས་ཀྱི་མགོ་ཟླའི་གནམ་གང་དེ་རྒྱལ་ཟླའི་ཡར་ངོའི་ཚེས་གཅིག་ཏུ་བཟུང་ནས་སླར་ཡང་བསྟན་བཅོས་ལུགས་ཀྱི་རྒྱལ་ཟླའི་ཚེས་གཅིག་རྗེས་སུ་འབྱུང་དུ་མེད་པའི་གནད་རྟོགས་ན་དཀའ་བའི་གནད་ཐམས་ཅད་རང་གྲོལ་ཡིན་པས་གོང་དུ་ལན་རིམ་པས་འབུལ་ལོ་ཞེས་སྙན་གསན་ཕབ་ཚར་བ་དེ་ཡིན་པས་སྣོད་མིན་ལ་གསང་བ་སྒྲོག་པར་མ་བྱེད་ཅིག །ཅེས་གསུངས་པ་ནི་རྣམ་དཔྱོད་དང་ལྡན་པའི་གསུང་དུ་མཐོང་ཞིང་སྟག་ཚང་ལོ་ཙཱ་བས་དུས་འཁོར་གྱི་རྒྱས་བཀབ་ཅེས་ཞག་གསུམ་གྱི་རྣམ་དབྱེ་ཞིབ་མོར་གསུངས་པ་ལ་ཟུར་ཟ་བ་ནི་ས་དགེའི་རྟོག་གེ་པ་རྒན་པོ་འདུལ་མངོན་གྱི་རྣམ་གཞག་རགས་པ་ཙམ་ལས་ཁོང་དུ་མ་ཆུད་པའི་རིགས་ལ་ཁ་དང་སོའི་དཔེ་བཞིན་འཚམ་པར་དགོངས་ནས་ཉིད་ཀྱིས་སྟག་ཚང་པར་ལན་མཛད་པར་དོགས་ཀྱང་དོན་གྱི་ཀླན་ཀ་འཇུག་པ་ནི་མ་ཡིན་ནོ། དེ་ལྟར་ཐོབ་པའི་སྡོམ་པ་དེ་ཡང་ལུང་རྣམ་འབྱེད་ལས། གང་ཞིག་སྟོན་པ་ཐུགས་རྗེའི་བསྟན་པ་(༡༧༢བ)
ལ། །ཡལ་བར་སེམས་ཤིང་ཅུང་ཟད་འདའ་བྱེད་པ། །དེ་ནི་དེ་བས་སྡུག་བསྔལ་གཞན་དབང་ཐོབ། །སྨྱིག་ཚལ་བྲེགས་པས་ཨ་མྲའི་ཚལ་ཉམས་བཞིན། །འདི་ན་ལ་ལ་རྒྱལ་པོའི་ཚིག་ཆེན་ཡང་། །ལན་འགའ་འདས་ན་ཆད་པ་ཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདའ་བྱེད་པ། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་སྡོམ་པ་བླངས་ཀྱང་ཚུལ་བཞིན་མ་བསྲུངས་ན་ཉེས་དམིགས་ཤིན་ཏུ་ཆེ་ཞིང་། སོ་སོའི་ངོས་སྐལ་གྱི་སྤང་བྱ་ཕྲ་རགས་སྲོག་ལ་བསྡོས་ཀྱང་འབད་པ་ཆེན་པོས་སྙིང་པོ་ལེན་དགོས་པས་མི་ཤེས་པ་ལྟུང་བ་འབྱུང་བའི་སྒོ་ཡིན་པའི་ཕྱིར། ཐོས་པ་མི་ཉམས་པ་བསྲུང་བའི་སླད་དུ་ལྟུང་བ་སྡེ་ལྔའི་སྐོར་དང་། ཉམས་ན་ཕྱིར་བཅོས་ཀྱི་རྣམ་གཞག་ཀུན་གལ་ཆེ་ཡང་འདིར་ཡི་གེ་མངས་ཀྱི་དོགས་པས་མ་སྤྲོས་ཤིང་། ལུང་དང་མདོ་འགྲེལ་སོགས་རྒྱ་གར་མཁས་པའི་གཞུང་དང་། ལྗོངས་འདིར་འདུལ་འཛིན་སྔ་ཕྱིར་བྱོན་པའི་བསྟན་བཅོས་རྣམས་ལ་བློ་གྲོས་ཀྱི་འཇུག་པ་ཤར་ན་མཆོག་ཏུ་གྱུར་མོད། དེ་ཙམ་མ་ནུས་ཀྱང་ཐམས་ཅད་མཁྱེན་པ་དགེ་འདུན་གྲུབ་ཀྱིས་མཛད་པའི་འདུལ་ཊཱིཀ་རིན་ཅེན་ཕྲེང་བ། སྟག་ཚང་ལོ་ཙཱ་བས་མཛད་པའི་འདུལ་བ་མདོའི་རྣམ་པར་བཤད་པ་འདུལ་བའི་སྙིང་པོ་རབ་ཏུ་གསལ་བ། ལུང་རིགས་གཏེར་མཛོད། མང་ཐོས་ཀླུ་སྒྲུབ་རྒྱ་མཚོས་མཛད་པའི་ཟབ་དོན་འདུལ་བའི་དཀའ་གནས་ལ་དཔྱད་པ་ལུང་རིགས་ནོར་བུའི་ཐེམ་སྐས་དང་། འདུལ་བའི་གནད་ལ་དོགས་པ་དཔྱད་པ་ལེགས་བཤད་མཁས་པའི་གཏམ་བྱ་གསང་བ་སྒོ་འབྱེད་སོགས་ཊཱིཀ་(༡༧༣ན)
འགྲེལ་སྤྱི་དོན་གྱི་རིགས་དང་། གླེང་འབུམ་ཆེན་མོ། གནམ་ཙེ་ལྡེང་དུ་མཁས་མཆོག་རེ་མདའ་པ་གཞོན་ནུ་བློ་གྲོས། སྐད་གཉིས་སྨྲ་བ་སྐྱབས་མཆོག་དཔལ་བཟང་། ཐམས་ཅད་མཁྱེན་ངེས་བློ་བཟང་གྲགས་པ་སྟེ་མཁས་པ་རྣམ་གསུམ་གྱིས་འདུལ་བའི་བསླབ་བྱ་ཕྲ་རགས་ཐམས་ཅད་གཏན་ལ་ཕབ་པའི་ཚེ། རྒྱལ་བའི་རྒྱལ་ཚབ་དར་མ་རིན་ཅེན་གྱིས་ཟིན་བྲིས་སུ་མཛད་པ། འདུལ་བ་འཛིན་པ་གྲགས་པ་རྒྱལ་མཚན་དང་། ཐམས་ཅད་མཁྱེན་པ་དགེ་འདུན་རྒྱ་མཚོས་མཛད་པའི་བསླབ་བྱས་མཚོན་བླ་མ་སྔ་ཕྱིས་མཛད་པའི་བསླབ་བྱ་ཆེ་ཆུང་ཚོར་ཞིབ་མོར་དཔྱད་ནས་སློབ་དགོས་ལ། མ་བསླབས་པའི་ཉེས་དམིགས་སྟག་ཚང་ལོ་ཙཱ་བའི་འདུལ་ཊཱིཀ་ལས། སྡིག་ལྟུང་མི་འགལ་ཏེ་རང་བཞིན་གྱི་ལྟུང་བ་ནི་དེ་གཉིས་ཀ་ཡིན་ལ། བཅས་ལྟུང་ལ་སྡིག་པ་ཡིན་མིན་གཉིས་ཀ་ཡོད་པའི་ཕྱིར་ཏེ། མཛོད་དུ། འཆལ་བའི་ཚུལ་ཁྲིམས་མི་དགེའི་གཟུགས། །ཞེས་དང་། སངས་རྒྱས་ཀྱི་ནི་བཅས་པ་ཡང་། །ཞེས་བཅས་རང་གི་ལྟུང་བ་གཉིས་ཀ་མི་དགེ་བ་གཟུགས་ཅན་དུ་གསུངས་ཤིང་། འགྲེལ་ཆེན་དང་། བམ་ལྔ་དང་། ལྔ་བཅུ་པ་རྩ་འགྲེལ་སོགས་སུ་ཕམ་པ་དང་མཚམས་མེད་ཀྱི་སྡིག་པ་སོགས་གཞི་རེ་རེའི་སྟེང་དུ་བཞག་ལ་ལོ་དྲིར་སྡེ་ལྔས་རིམ་པ་བཞིན་དུ་ཚ་བ་ནས་ཡང་སོས་ཀྱི་བར་དུ་མས་རིམ་སྐྱེ་བར་འགྱུར་ཞེས་གསུངས་ཤིང་། ཉེས་པ་བཤགས་པའི་ཐབས་ནི་དེ་ཉིད་ལས། གཉིས་པ་ལ་མཐོལ་བས་དང་། བཤགས་པས་དང་། བསྡམས་པས་དང་། བྱིན་གྱིས་བརླབས་པས་ཕྱིར་(༡༧༣བ)
བཅོས་པའོ། །དང་པོ་ལ་ལྔ་སྟེ། ཡུལ་དང་། གང་ཟག་དང་། བསམ་པ་དང་། ཆོ་ག་དང་། དགོས་པའོ། །དང་པོ་ལ། མཐོལ་བྱ་བསྒོ་གྱུར་དང་། སོར་བཤགས་དང་། དེ་ལས་གཞན་པའི་མཐོལ་ཡུལ་རྣམས་རིམ་པ་བཞིན་དགེ་སློང་ཆོས་དགུ་ལྡན་གཞིར་བྱས་མཚམས་ནང་དེར་གཏོགས་ཚད་དང་། གནས་ཁང་དེར་གཏོགས་ཚད་དང་གཅིག་ཡན་ཆད་དོ། །དགུ་ནི། རྫོགས་སྡོམ་རྣམ་དག་དང་ལྡན། མཚན་མཐུན། ལྟ་བ་མཐུན། ཐ་སྙད་གསུམ་དང་ལྡན། ལུས་དང་ས་རང་བཞིན་དུ་གནས་པ་དང་། བྱེ་བ་ན་ཕྱོགས་གཞན་དུ་མ་སོང་མཚམས་ནང་ན་གནས་རང་ལ་རྒྱུད་གཞན་པ་རྣམས་སོ། །གང་ཟག་ནི་དགེ་སློང་གི་སྡོམ་པ་གསོ་བ་ལ་ཞུགས་པ་ཡན་ཆད་ལྡན། ལུས་བསམ་གཉིས་རང་བཞིན་དུ་གནས། གནས་ནས་མ་ཕྱུང་། ལྟུང་བ་ལེགས་པར་དྲན་པར་ནུས་སྔར་བྱས་དང་མ་འབྲེལ་བའོ། །བསམ་པ་ནི། སྤྱིར་མྱང་འདས། སྒོས་སྔར་བྱས་ལ་འགྱོད་ཅིང་ཕྱིན་ཆད་སྡོམ། བསམ་པ་ཐག་པ་ནས་མཐོལ་བར་འདོད་པའོ། །ཆོ་ག་ལ་མ་བཅབས་པའི་དང་། བཅབས་པའི་མཐོལ་བའོ། །དང་པོ་ལ་དམིགས་བསལ་ཐ་ན་མིང་གོ་བར་བྱ་བ་ཙམ་གྱིས་འགྲུབ་ལ། སྤྱིར་བཏང་ནི་འཆབ་ཉེས་མེད་ཀྱང་བཤགས་ཡུལ་མ་ཚང་ན་ཆོས་འདི་པ་གང་རུང་ཞིག་ཡན་ཆད་ལ་མཐོལ་བར་བཤད་དེ། སྔགས་ནི། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ལྟུང་བྱེད་ཀྱི་སྡེ་ཚན་ལས་ས་བརྐོ་བའི་ལྟུང་བྱེད་ཅིག་བྱུང་སྟེ། བདག་མིང་འདི་ཞེས་བགྱི་བའི་ལྟུང་བ་དེ་ཚེ་དང་ལྡན་པའི་མདུན་དུ་མཐོལ་ལོ། །མི་འཆབ་(༡༧༤ན)
བོ། །མཐོལ་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་ན་མི་འགྱུར་རོ། །ཐབས་ལེགས་བྱ། འདི་ལ་འཆགས་སོ་ཞེས་སོགས་མི་སྦྱར་རོ། །འདིས་ནི་འཆབ་ཉེས་ཁེགས་སོ། །ཞེས་སོགས་སྦྱར་རོ། །སོར་བཤགས་ཡིན་ན་བདག་ལ་དམད་པའི་གནས་མི་རིགས་པ་དགེ་སློང་མ་ལ་ཟས་ལེན་པའི་སོ་སོར་བཤགས་པ་བྱུང་གི །ཆོས་དེ་སོ་སོར་འཆགས་སོ་ཞེས་ལན་གཅིག་གོ །བཅབས་པའི་མཐོལ་བ་ནི་འཆབ་རྒྱུའི་ལྟུང་བ་དང་། བཅབས་པའི་ཞག་གཉིས་ཀ་གཅིག་གཉིས་ཡིན་ན་རང་མིང་། གསུམ་ཡན་ཆད་གྲངས་ཀྱིས་ཆོད་ན་ཚད་ཤིན་ཏུ་མང་པོ་གྲངས་ཞེས་སྦྱར་བར་བྱ་སྟེ། དཔེར་ན། དགོངས་སུ་གསོལ་བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་བཞིས་བསྡུས་ཀྱི་ཉེས་བྱས་ཀྱི་སྡེ་ཚན་ལས། ས་བརྐོ་བའི་ལྟུང་བྱེད་ལྟ་བུ་གཅིག་གཉིས་སམ། ཤིན་ཏུ་མང་པོའམ་དཔག་ཏུ་མེད་པ་བྱུང་བ་དགུང་ཞག་གཅིག་གཉིས་སམ། ཤིན་ཏུ་མང་པོའམ་དཔག་ཏུ་མེད་པ་བཅབས་པའི་ཉེས་པ་གཅིག་གཉིས་སམ། ཤིན་ཏུ་མང་པོ་འམ་དཔག་ཏུ་མེད་པ་བྱུང་སྟེ། བདག་མིང་འདི་ཞེས་བྱ་བའི་ཉེས་པ་དེ་དང་། དེ་ཚེ་དང་ལྡན་པའི་སྤྱན་སྔར་མཐོལ་ལོ། །མི་འཆབ་བོ། །འཆགས་སོ། །མཐོལ་ཞིང་བཤགས་ན་སོགས་འདྲའོ། །དེ་ཡང་ཡུལ་རྒན་ན་ཕྱག་བྱས་ནས་བཙུན་པ་ཞེས་དང་། གཞོན་ན་ཕྱག་མི་བྱ་བར་ཚེ་དང་ལྡན་པ་དང་། གཉིས་ཀ་ལ་གནས་བརྟན་ཞེས་བརྗོད་དོ། །དགོས་པ་ནི་འཆབ་པ་མི་འབྱུང་བ་དང་། བཅབས་ཉེས་འདག་པ་དང་། ལྟུང་(༡༧༤བ)
བ་དང་། དངོས་གཞིའི་བཤགས་པ་འཆགས་པའོ། །གཉིས་པ་བཤགས་པས་ཕྱིར་བཅོས་པ་ལའང་ཡུལ་སོགས་ལྔ་ལས་ཡུལ་ལ། ཕམ་ལྷག་གི་དངོས་གཞིའི་བཅོས་ཐབས་འོག་ཏུ་སྟོན་པས་ན། ཕམ་པའི་སྦོམ་པོ་ལྕི་བ་དང་། ཡང་བ་གཉིས་ལྷག་པའི་སྦོམ་པོ་དང་། དེ་ལས་གཞན་པའི་ལྟུང་བ་སྡེ་ཚན་པ་བཞི་ལ་རིམ་པ་བཞིན་དགེ་སློང་ཆོས་དགུ་ལྡན་མཚམས་ཀྱི་ཕྱི་ནང་མ་བཅད་པ་དྲུག་དང་། ནང་དུ་མ་བཅད་པ་བཞི་དང་། ལྔ་དང་། གཅིག་རྣམས་རིམ་པ་བཞིན་ཏེ། དགུ་ནི་སྔ་མ་ཇི་བཞིན་ནོ། །གང་ཟག་ཀྱང་སྔ་མ་ཇི་བཞིན་ལ་འདི་ལ་དགེ་སློང་ཡན་ལག་ཏུ་མི་དགོས་ཏེ། རབ་བྱུང་ལ་འཆབ་པ་མི་འབྱུང་བས་མཐོལ་བ་མི་དགོས་ཀྱང་བཤགས་པ་དགོས་པས་སོ། །དེས་ན་བསྙེན་པར་མ་རྫོགས་སྡོམ་པ་གསོ་བ་ལ་ཞུགས་པ་ཡན་ཆད་དོ། །བསམ་པ་ཡང་འདྲ་བ་ལས་ཁྱད་པར་བཤགས་པར་འདོད་པས་སོ། །ཆོ་ག་སྔ་རབས་པ་རྣམས་མཐོལ་བཤགས་རིམ་གྱིས་པ་དང་ཅིག་ཅར་བ་ཞེས་པའི་དབྱེ་བ་བྱེད་མོད་ཀྱིས། འཆབ་ཉེས་ཡོད་མེད་དུ་འདུག་ལ་འཆབ་ཉེས་མེད་པ་ལ་མཐོལ་བའི་དོན་མེད་པས་ཅིག་ཅར་བའི་ཐ་སྙད་དོན་དང་མི་མཐུན་ནོ། །དེས་ན་འཆབ་ཉེས་ཡོད་ན་མཐོལ་བའི་ཆོ་ག་སྔ་མ་བཞིན་དང་། ཡུལ་ཡོད་ལ་ཕྱིར་མ་བཅོས་པའི་ཉེས་པ་ཡོད་ན་ཡང་སྟེ་དང་ལྷན་ཅིག་བཤགས་པ་སྔོན་དུ་བཏང་ནས་དེ་རྗེས་དངོས་བཞི་བཤགས་པར་བྱ་ལ། འཆབ་ཉེས་སོགས་མེད་ན་དངོས་གཞི་ཉིད་བཤགས་པར་བྱ་ཞིང་སྔགས་ནི་སྔར་བཤད་པའི་རིགས་པ་སྦྱར་བས་ཤེས་པར་ནུས་སོ། །དགོས་(༡༧༥ན)
པ་ནི་མཚན་ཉིད་འདི་ལྟ་བུ་ཚང་ན་རང་རྒྱུད་ཀྱི་ལྟུང་བའི་མིང་དོན་འདག་པ་དང་། ལག་ལེན་གྱི་མིག་ལྟོས་བསྐྱེད་ནས་བསྟན་པ་ལ་ཕན་ཞིང་ཚུལ་ཁྲིམས་རྣམ་པར་དག་པའི་ཕན་ཡོན་མཐའ་དག་འབྱུང་ངོ་། །བསྡམ་པས་ཕྱིར་བཅོས་པ་ནི་ལུས་ངག་ཏུ་མ་ཐོན་པར་གཞན་འཆི་བར་འདོད་པ་ལྟ་བུའི་ཉེས་བྱས་ནི་སྔ་མ་ལ་འགྱོད་པ་དང་ཕྱིས་མི་བྱའོ་སྙམ་དུ་རང་གི་ཡིད་ལ་བསྡམ་པ་ཉིད་ཀྱིས་བདག་གོ །བྱིན་གྱིས་བརླབས་པས་ཕྱིར་བཅོས་པ་ནི་གསོ་སྦྱོང་གི་གཞིར་བཤད་པ་བཞིན་ནོ། །ཕྱིར་མ་བཅོས་པའི་ཉེས་དམིགས་ནི་མིག་ལྟོས་ངན་པས་བསྟན་པ་ལ་གནོད་ཅིང་རྣམ་སྨིན་ངན་སོང་དུ་ལྟུང་བས་རྒྱུད་དེ་ལ་གནོད་པའོ། །ཕན་ཡོན་ནི་དེ་ལས་བཟློག་པའོ། །ཚིག་གི་དོན་ལ་ཕྱིར་བཅོས་ཀྱི་རྒྱུ་ནན་ཏུར་བཤད་པ་དང་། ཕྱིར་བཅོས་དངོས་བཤད་པ་དང་གཉིས་ལས། དང་པོ་ལ། ནན་ཏུར་སྤྱིར་བསྟན་པ་དང་། སོ་སོར་བཤད་པའོ། །དང་པོ་ལ་གང་ལ་བྱ་བའི་གཞི་ངེས་པར་བྱ་བ་དང་། དེ་ལྟར་བྱས་པ་ལ་བཟོད་པ་བླང་བའོ། །དང་པོ་ལ། སྤྱིར་བཏང་ནི། འདུལ་བར་གཏོགས་པའི་ནན་ཏུར་གྱི་ལས་ཆོས་ཅན། གཞི་གང་རུང་རུང་ལ་ཁྱོད་བྱས་ཀྱང་མི་འཆགས་ཏེ། ཁྱོད་འཆགས་པའི་གཞི་ལ་སྤྱིར་བཏང་དུ་རྒྱུ་རྐྱེན་གྱི་ཁྱད་པར་སུམ་ལྡན་ཞིག་དགོས་པའི་ཕྱིར་རོ། །དེ་ཡང་རྒྱུའི་ཁྱད་པར་འཐབ་ཀྲོལ་སོགས་ཀྱི་གཞི་ལ་ཞུགས་ཤིང་མ་བཏང་བའི་སྒོ་ནས་མ་ཞི་བར་དེར་གནས་ཕལ་ཆེར་གྱིས་ཤེས་ཤིང་། རྐྱེན་གྱི་ཁྱད་པར་གླེང་བ་པོ་དགེ་འདུན་གྱིས་གླེང་དྲན་སོགས་ཀྱི་སྒོ་ནས་གང་དང་གང་གི་གཞི་ཡིན་པ་དེ་སོ་སོར་ཤེས་པར་བྱས་ནས་མངོན་སུམ་དུ་ཞལ་ལྕེེ་བཅད་པ་དང་། གླེང་བྱ་དེས་དགེ་འདུན་གྱི་མངོན་(༡༧༥བ)
དུ་རྒྱུ་མི་གཏོང་ངོ་ཞེས་མངོན་སུམ་དུ་འཇོག་པ་རྣམས་ལ་ནན་ཏུར་གྱི་ལས་བྱ་དགོས་པའོ། །འོ་ན་གླེང་བ་པོ་དགེ་འདུན་ཡིན་ན་དགེ་འདུན་ཐམས་ཅད་ཀྱིས་ཅིག་ཅར་གླེང་ངམ་ཞེ་ན། དེ་ནི་མི་མཛེས་པས་བསྐོས་པའི་གླེང་བ་པོ་གཅིག་གིས་གླེང་ལ་དེ་ཡང་རང་དང་བླངས་ཀྱིས་མ་བྱུང་ན་སོགས་སོ། །དེ་ལྟར་ན་རྒྱུ་ལ་མ་ཞུགས་པའམ་བཏང་བ་དང་། དགེ་འདུན་གྱིས་གཏན་ལ་མ་ཕེབས་ན་ཀུན་མི་ཆགས་ལ། མངོན་སུམ་དུ་མི་འཇོག་ན་ཕལ་ཆེར་མི་འཆགས་སོ། །དམིགས་བསལ་ནི་མངོན་སུམ་དུ་འཇོག་པ་མ་ཚང་ནའང་ནན་ཏུར་འཇོག་པ་ཆགས་པ་ཡོད་དེ། དགེ་འདུན་གྱི་ནང་དུ་ལུས་འདུ་བ་མི་སྟེར་ཞིང་ཡན་ལག་གཞན་ཚང་ན་རྒྱུ་དེ་ལ་ཞུགས་ཤིང་མ་བཏང་བར་ཀུན་ལ་གྲགས་པ་ཙམ་གྱིས་བྱེད་པས་སོ། །གཞན་ཡང་རྒྱུ་དེ་ཡོད་པར་ཁས་ལེན་བཞིན་དུ་མངོན་སུམ་དུ་འཇོག་པ་ནན་ཏུར་ཀུན་གྱི་ཡན་ལག་ཏུ་མི་དགོས་ཏེ། མ་མཐོང་བ་གནས་ནས་དབྱུངས་པ་ལ་ནི་ལྟུང་བ་ཁས་ལེན་པ་འཆགས་པའི་ཡན་ལག་མ་ཡིན་པའི་ཕྱིར་ཏེ། ཁས་ལེན་ནི་ནན་ཏུར་དེའི་རྒྱུ་ཡོད་པ་ཉིད་རྣམ་པར་བཤིག་པས་མི་འཆགས་པའི་ཕྱིར་རོ། །དེ་བཞིན་དུ་ལྟུང་བ་གླེངས་པའི་སྐབས་མི་འབྱེད་པ་ལའང་བརྗོད་བཅས་ཕུར་བཅས་བྱེད་པ་ནའང་གྲགས་པའང་མངོན་སུམ་ཉིད་ཀྱིས་བྱ་བར་རིགས་ཀྱི་ཁས་ལེན་པ་ཡན་ལག་མ་ཡིན་ཏེ། ཁས་ལེན་པ་ཡན་ལག་ཏུ་རྒྱུ་མཚན་གཉིས་ཀྱིས་མི་རིགས་པའི་ཕྱིར་ཏེ་སྐབས་མི་འབྱེད་པའི་བསྒྲུབ་བྱ་དེ་ལ་རང་ངོས་ནས་ཁས་བླང་ངོ་སྙམ་པའི་བློ་མེད་པའི་ཕྱིར་དང་། དེ་ལ་གཞན་གྱིས་གླེང་བ་ཉིད་ཀྱང་མི་རིགས་པའི་ཕྱིར་རོ། གླེང་བ་པོ་རང་མ་ལངས་ན་གསོལ་གཉིས་ཀྱིས་བསྐོ་བས་བླང་བར་བྱའོ། །དེ་ལྟར་ནན་ཏན་གྱིས་གླེང་བ་པོ་བསྐོ་(༡༧༦ན)
བ་སོགས་བྱེད་དགོས་པ་ནི། གྲོགས་ཚངས་པ་མཚུངས་པར་སྤྱོད་པ་སྡུག་བསྔལ་གྱི་རྒྱུ་ལ་གནས་པ་ནི་བརྩེ་བས་རྗེས་སུ་བཟུང་དགོས་པས་སོ། །གཉིས་པ་ནི། དགེ་འདུན་ལ་བཤེ་ཁྲོ་སྤྱོ་བ་ཉིད་དུ་མི་འཛིན་པ་དང་། དགེ་འདུན་གྱི་རྙེད་པ་དང་གནས་མེད་པར་བྱ་བར་སེམས་པ་ཉིད་མི་འཛིན་པ་དང་། བླའི་གྲ་སོགས་གསུམ་རྟེན་ཉིད་དུ་མི་འཛིན་པ་དང་། དགེ་འདུན་རྟེན་མིན་པ་ཉིད་དུ་མི་འཛིན་ཏེ། མི་འཛིན་པ་བཞི་ལས། དང་པོ་འཁོན་འཛིན་སྤོང་བ། གཉིས་པ་བསམ་པ་ཕྱིན་ཅི་ལོག་སྤོང་བ། འོག་མ་གཉིས་རྟེན་ཕྱིན་ཅི་ལོག་སྤོང་བའོ། །ཁྱིམ་པ་དང་མུ་སྟེགས་ཅན་གྱི་རྒྱལ་མཚན་འཆང་བར་མི་བྱེད་པ་དང་། མུ་སྟེགས་ཅན་ལ་བརྟེན་པར་མི་བྱེད་པ་དང་། ཆོ་ག་མ་ཡིན་པ་སྤྱོད་པར་མི་བྱེད་པ་དང་། དགེ་སློང་གི་བསླབ་པ་ལ་མི་སློབ་པར་མི་བྱེད་པ་བཞི་ལས། དང་པོ་གཉིས་རྟགས་ཕྱིན་ཅི་ལོག་སྤོང་བ། ཕྱི་མ་གཉིས་བསླབ་པ་ཕྱིན་ཅི་ལོག་སྤོང་བའོ། །སྐྲ་གྱེན་དུ་འགྲེང་ཕྲེད་ལ་འཕྱར་སྤུ་འཁུམས་ཤིང་སྙོལ་བར་བྱེད་པ་ནི་ང་རྒྱལ་དང་རྒྱགས་པ་སྤོང་བའོ། །དམན་པའི་གནས་ནས་རང་བཞིན་དུ་གནས་པར་འབྱུང་བར་བསྐྱོད་པ་དང་། དགེ་འདུན་དང་མཚུངས་པའི་གུས་པའི་སྤྱོད་ལམ་ཉེ་བར་སྟོན་པ་གཉིས་ནི་དགེ་འདུན་མི་འདོད་པ་སྤོང་པའོ། །འཐབ་ཀྲོལ་སོགས་འཕྲོ་གཅོད་པས་རྒྱུ་ལས་བཟློག་པ་དང་། ཞེ་ཐག་པ་ནས་བཟོད་པ་གསོལ་བ་ནི་དམན་པའི་གནས་ལ་དང་དུ་ལེན་པ་སྤོང་བ་སྟེ་བརྒྱད་ལྡན་པ་བཟོད་པ་བླང་བར་བྱའོ། །བཟོད་པ་བླང་བ་ལ་གསོལ་བ་ཡན་ལག་(༡༧༦བ)
ཏུ་དགོས་པ་བཞིན་དུ་ཁང་པ་ཁང་ཆེན་བསྟན་པ་ལྟ་བུའི་ལས་སྦྱིན་པ་དང་། ལྷག་མ་དབྱུང་བ་དང་། བསྙེན་པར་རྫོགས་པར་བྱ་བ་དང་། ཁྱིམ་གྱི་བསླབ་པའི་སྡོམ་པ་གཞིག་པ་དང་། ལྷུང་བཟེད་ཁས་དབུབ་པ་བསྲང་བ་ལ་ཡང་གསོལ་བ་ལན་གསུམ་དུ་མི་འདེབས་པ་ལ་མི་སྦྱིན་ཞེས་པའོ། །གཉིས་པ་སོ་སོར་བཤད་པ་ལ་སྤྱི་དོན་བཞི་སྟེ། འབྲེལ་བསྒྲུབ་པ་དང་། གང་ཟག་གང་ལ་བྱ་བ་དང་། དེ་ལ་བཅས་པའི་ནན་ཏུར་གྱི་རང་བཞིན་དང་། ནན་ཏུར་བྱས་ནས་ཇི་ལྟར་བསྒྲུབ་པའོ། །དང་པོ་ནི་སངས་རྒྱས་ནས་ལོ་བཅུ་གཉིས་ཀྱི་བར་དུ་ནི་ཆོས་གོས་ཟླུམ་པོར་བགོ་བ་སོགས་ཀྱི་བསྒྲུབ་པའི་བསླབ་པ་འབའ་ཞིག་མ་གཏོགས་དགག་པའི་བསླབ་པ་འཆའ་མི་དགོས་ཏེ། གང་ཟག་རྒྱུད་སྨིན་ཅིང་ཚོགས་བསགས་པ་ངོ་ཚ་དང་ལྡན་པ་ཤ་སྟག་ཡིན་པའི་ཕྱིར་རོ། །དེ་རྗེས་བཟང་སྦྱིན་སོགས་ཀྱིས་བསྟན་པ་ལ་རྨ་གཏད། གང་ཟག་རྒྱུད་འདྲེས་མར་གྱུར་པས་ལྟུང་བ་སྡེ་ལྔ་སོགས་ཀྱི་དགག་བཅས་མཛད་ཅིང་མ་བསྲུངས་པ་དང་བསྲུངས་ན་ཡང་སོས་སོགས་ཚ་དམྱལ་དྲུག་ཏུ་དང་། འདོད་ལྷ་དྲུག་ཏུ་སྐྱེ་བའི་ཉེས་དམིགས་དང་ཕན་ཡོན་རྒྱས་པར་གསུངས་སོ། །དེ་རྗེས་ཕན་ཡོན་དང་། ཉེས་དམིགས་ཀྱིས་སྤྲོ་བ་དང་སྐྱོ་བ་གཉིས་ཀ་མ་སྐྱེས་པའི་གང་ཟག་འགའ་ཞིག་ལ་ནན་ཏུར་དང་། ས་གཞན་གྱི་ཆད་ལས་དང་། ཚུལ་འཆལ་བསྐྲད་པ་སོགས་གསུངས་སོ། །གཉིས་པ་ནི། དམར་སེར་ཅན་གྱི་གཞི་ལས། དམར་སེར་ཅན་ལ་བསྡིགས་པ་དང་། །ལེགས་ལྡན་ལ་ནི་སྨད་པ་དང་། །འགྲོ་མགྱོགས་ནབ་སོ་བསྐྲད་པ་སྟེ། །ཆུ་སྟོད་ལ་ནི་ཕྱིར་འགྱེད་དང་། །འདུན་པ་ལ་ནི་མ་མཐོང་དང་། །(༡༧༧ན)
དེ་བཞིན་སླར་ནི་མི་འཆོས་པ། འཆི་ལྟས་སྡིག་པའི་ལྟ་བ་ཅན། །ཞེས་པ་རྣམས་སོ། །གསུམ་པ་ནི། ནན་ཏུར་ཐམས་ཅད་གཞི་རྩ་ཅན་ཡིན་ཏེ། རང་རང་གི་གཞི་གང་ཡིན་ལ་བྱེད་དགོས་ཀྱིས་གཞན་ལ་གཞན་དུ་བྱས་ན་མི་འཆགས་ཏེ། གཞན་དུ་ན་མི་འཆགས་སོ་ཞེས་བཤད་པའི་ཕྱིར་ཏེ། དཔེར་ན་གླེང་དྲན་སྔོན་དུ་བཏང་བའི་ཚེ་འཐབ་ཀྲོལ་བྱེད་པར་མཐུན་ནང་དུ་གྲུབ་ཀྱང་བསྒྲུབ་བྱས་གླེང་བའི་སྐབས་མི་འབྱེད་པ་དང་། ཕྱེ་ཡང་གཉེན་ནོར་མི་བྱེད་པ་ལྟ་བུ་ལ་གྲགས་པས་མངོན་སུམ་གྱིས་བསྡིགས་པ་ནན་ཏུར་ཉིད་བྱའི། བརྗོད་བཅས་ཕུར་བཅས་སོགས་མི་བྱེད་པའི་ཕྱིར་རོ། །འོ་ན་བརྗོད་བཅས་ཕུར་བཅས་གང་ལ་བྱ་ཞེ་ན། བྱ་བ་ངན་པ་འཕྲོ་གཅོད་དུ་གཞུག་པའི་ཕྱེད་དུ་གླེངས་བ་ལྟ་བུ་མ་ཡིན་པ་ལྟུང་བ་ཕྱིར་བཅོས་སུ་གཞུག་པའི་ཕྱིར་དུ་གླེངས་བ་ན་སྐབས་མི་འབྱེད་ན་བརྗོད་བཅས་དང་ཕྱེ་ཡང་བསྙེན་པར་མི་བྱེད་ན་ཕུར་བཅས་བྱའོ། །ནན་ཏུར་རང་རང་གི་གཞི་ལ་ནན་ཏུར་སོ་སོར་བྱས་ཀྱང་མ་ཐུལ་ན་འཐབ་ཀྲོལ་ལ་འབད་པས་མ་ལོག་པ་ལ་གནས་དབྱུང་བྱ་བར་གསུངས་པའི་རིགས་པས་ནན་ཏུར་ཀུན་གྱི་མཐར་གནས་དབྱུང་ནན་ཏུར་འཐོབ་བོ། །བཞི་པ་ནི། རབ་བྱུང་བསྙེན་རྫོགས་བྱེད་དུ་མི་གཞུག་པ་སོགས་ཆད་པའི་ལས་བྱ་བ་དང་། བཟོད་པར་འོས་ན་དེ་སླད། ལས་དང་འཁོར་ལོ་བྱེ་བ་དང་རྩོད་པར་གྱུར་ན་སྡུམ་བྱེད། འོག་ནས་འཆད་པ་བཞིན་བསྡུམས་པ་རྣམས་ནན་ཏུར་གྱི་མཐའ་ལ་བྱ་བར་རིགས་ཀྱི་མགོ་མེད་ལ་མགོ་དང་ཤམ་བུ་མེད་པ་ལ་ཤམ་བུ་འདོགས་པ་སོགས་ནི་རང་བཟོའི་(༡༧༧བ)
སྤྲོས་པར་ཟད་པས་མི་བྱའོ། །གཞུང་དོན་ནི། ལས་ཀྱིས་ཞེས་པ་གསོལ་བཞིའི་ལས་ཏེ། སྐབས་འདིའི་ནན་ཏུར་བདུན་ཀ་ལ་སྦྱར་ལ། དགེ་སློང་དམར་སེར་ཅན་ལྟ་བུ་དགེ་འདུན་གྱི་ནང་དུ་འཐབ་ཀྲོལ་དང་རྩོད་པ་སྐྱེད་པར་བྱེད་པ་ལ་བསྡིགས་པ་ནན་ཏུར་བྱ་ཞིང་། དགེ་ལྡན་ནམ་ལེགས་ལྡན་ལྟ་བུ་དགེ་འདུན་ལྷག་མའི་ལྟུང་བ་ཕྱིར་མི་འཆོས་པར་རྒྱུན་དུ་སྟེ་བཞི་བཏུད་དུ་བྱེད་པ་ལ་སྨད་པ་ནན་ཏུར་དང་། འགྲོ་མགྱོགས་དང་། ནབ་སོ་ལྟ་བུ་ཁྱིམ་པ་སུན་འབྱིན་པ་ལ་བསྐྲད་པ་ནན་ཏུར་བྱ་སྟེ་ནན་ཏུར་དེའི་ཕྱིར་དུ་ལུས་མངོན་སུམ་དུ་འདུ་བ་མི་སྦྱིན་པ་དང་སྐབས་མི་འབྱེད་པ་དག་ལ་ནན་ཏུར་དེ་གྲགས་པ་ཙམ་གྱིས་བྱ་ཞིང་། འདུ་ལ་སྐབས་འབྱེད་ཀྱང་དེ་མ་མཐོང་ངོ་ཞེས་ཟེར་ནས་ཁས་མི་ལེན་ཡང་དེ་ཉིད་བྱའོ། །དགེ་སློང་དམ་པའམ་ཆུ་སྟོད་ལྟ་བུ་ཁྱིམ་པ་ལ་བརྙས་ཐབས་བྱེད་པ་ལ་ནི་ཕྱིར་འགྱེད་པ་ནན་ཏུར་བྱ་ཞིང་། འདི་ལ་བཟོད་པ་གསོལ་བའི་ལས་ཀྱི་གནས་སུ་ཁྱིམ་པ་དེ་སོགས་ཏེ། དེ་རྣམས་ནི་ནན་ཏུར་བཞི་ཞེས་གྲགས་ཤིན་ཏུ་ཆེ་བ་རྣམས་སོ། །འདུན་པ་ལྟ་བུ་ལྟུང་བ་གྲགས་པ་སོགས་གསུམ་པོ་དགེ་འདུན་གྱིས་ཤེས་པ་དང་། ལྟུང་བ་དེ་མ་མཐོང་ངོ་ཞེས་སོགས་གཉིས་ལ་ཕྱིར་མི་འཆོས་པ་དང་མ་མཐོང་བ་གནས་དབྱུང་དང་། དགེ་སློང་བོང་རྫི་འཆི་ལྟས་ཅན་ལྟ་བུ་སྡིག་པ་ཅན་གྱི་ལྟ་བ་མི་གཏོང་བ་ན་ནི་སྡིག་ལྟ་མི་གཏོང་བ་གནས་ནས་དབྱུང་བར་བྱའོ། །ནན་ཏུར་གྱི་ལས་དངོས་དེ་རྣམས་རྫོགས་པའི་མཇུག་ཆོག་ནི་འདི་ཉིད་དུ་སོགས་སོ། །གཉིས་པ་ཕྱིར་བཅོས་དངོས་ལ་གསུམ་ལས། མཐོལ་བས་ཕྱིར་བཅོས་པ་ལ་རང་བཞིན་སྤྱིར་བཏང་བ་ནི། ལྟུང་བ་བཅབས་པར་མི་(༡༧༨ན)
བྱ་བར་མཐོལ་བའི་སྔགས་སྤྱི་དོན་དུ་བརྗོད་པས་མཐོལ་བར་བྱའོ། །དམིགས་བསལ་ནི། ཐ་ན་མིང་སོགས་སོ། །དེ་ཡང་ཉེས་བྱས་ནི་བདག་ལ་ལྟུང་བའམ་ཁ་ན་ཐོ་བ་བྱུང་ངོ་ཞེས་སོགས་ཐ་སྙད་གང་ཡང་རུང་བས་སོ། །ཡུལ་ནི་ཚུལ་ཁྲིམས་རང་བཞིན་དུ་གནས་པ་སོགས་ནས་མཚན་མཐུན་པའི་བར་བཞི་ལྡན་དགོས་ལ། བཞི་ལྡན་དེ་ཉིད་ལ་བསྙེན་པར་རྫོགས་པ་འདི་དང་འོག་མ་བསྙེན་པར་མ་རྫོགས་པས་མཐོལ་དགོས་ཀྱི། དགེ་ཚུལ་སོགས་ལ་སྤྱིར་བཏང་མཐོལ་ཡུལ་མི་རུང་སྟེ་རབ་ཏུ་སོགས་ཀྱི་ཕྱིར་རོ། །དམིགས་བསལ་དུ་ཆོས་འདི་པའི་སྡེ་ལྔ་དང་ཁྱིམ་པ་དེ་བཞིན་གཤེགས་པའི་ཆོས་ཀྱི་ལྟ་བ་ཅན་ཡན་ཆད་ལ་གོ་བ་དེ་བྱས་ན་མཐོལ་བ་བྱས་པ་ཡིན་ལ་སྒྲུབ་ནུས་བཞིན་དུ་ན་ཉེས་བྱས་སུ་བཤད་དོ། །འདིའི་ཡུལ་ནི་ནམ་མཁའ་ལ་གནས་པ་ལ་གོ་བར་བྱས་ཀྱང་འགྲུབ་པས་མཚམས་སོགས་སོ། །བསྒོ་སོགས་མདོ་གཉིས་ཀྱི་དོན་སྤྱི་དོན་དུ་བཤད་ཟིན་ལ་སོར་བཤགས་ཀྱི་སྔགས་ནི་ཚེ་དང་ལྡན་པ་བདག་ལ་སོགས་སོ། །དེ་ནི་ལན་ཅིག་གིས་འགྲུབ་པས་སྔགས་དང་སོགས། བསྡམས་པས་ཕྱིར་བཅོས་པ་ནི་ལུས་ངག་ཏུ་མ་ཐོན་པའི་ཡིད་ཀྱི་ཉེས་བྱས་དེ་ལས་སོགས་བཤགས་པས་ཕྱིར་བཅོས་པ་ལ་ལྟུང་བ་གཞན་གྱི་ཕྱིར་བཅོས་དང་། ཕམ་ལྷག་གི་ཕྱིར་བཅོས་སོ། །དང་པོ་ལ། ཆད་ལས་ལ་མི་བལྟོས་པ་ལ་ཆོ་ག་ནི་ཡིད་ལས་གཞན་པ་ལུས་ངག་ཏུ་ཐོན་པའི་ལྟུང་བ་ལས་ནི་སྡོམ་སེམས་དེ་དང་བཅས་པའི་ངག་ཏུ་བཤགས་པར་བྱའོ། །ཡུལ་ནི་ཕམ་ལྷག་ལས་གཞན་པའི་ལྟུང་བ་ལ་བཤགས་ཡུལ་མང་པོ་མི་དགོས་པས་གྲངས་(༡༧༨བ)
གཅིག་ཏུ་ལྟ་བ་དང་འགྲེལ་པས་མཚན་ཐ་མི་དད་པ་དང་། རྙེད་ན་ལྟུང་བྱེད་སོགས་ཀྱི་སྡེ་ཚན་ལས་མེད་ན་ལྟུང་བ་ལས་ཁ་ན་མ་ཐོ་བ་མི་མཐུན་པ་ལ་བཤགས་ཡུལ་བྱའོ། །ཆད་ལས་ལ་བལྟོས་པ་ནི་སྤངས་པའི་ལྟུང་བྱེད་ལས་ནི་སྤང་ལྟུང་ཕོག་པའི་རྫས་དེ་སྤངས་པ་སོགས། གཉིས་པ་ལ་སྦོམ་པོའི་དང་། ལྷག་མ་དངོས་གཞིའི་ཕྱིར་བཅོས་སོ། །དང་པོ་ནི། ལྷག་མ་དང་སོགས་མདོ་བཞི་སྟེ་དོན་སྤྱི་དོན་དུ་བཤད་ཟིན་ཏོ། དེ་དག་ནི་ཡུལ་གྱི་གྲངས་ཡིན་ལ། བསམ་པ་ནི་འགྱོད་སེམས་དང་སྡོམ་སེམས་ཡོད་ན་ཆོ་ག་ལ་མི་བལྟོས་པ་ཡང་སྲིད་དེ། ཚེའི་མཐར་འཆི་ཁའི་ཚེ་ཕྱིར་བཅོས་དེ་ལ་བསམ་པ་ཐག་པ་ནས་བཙལ་བ་སྟེ། རྩོལ་བ་བྱས་པ་ཡུལ་མེད་པ་སོགས་ཀྱིས་རྐྱེན་སོགས་ཏེ་ལྟུང་བ་ལས་ལྡང་བར་གསུངས་ལ་དངོས་གཞི་སྨྱོས་པས་བྱས་པ་དེ་ཕྱིར་སངས་པ་ན་བདག་གིས་དེ་བྱས་སོ་ཞེས་འདུ་ཤེས་པ་ན་ཉེས་བྱེད་དེ་ཉེས་བྱས་དང་འདྲ་བས་གཅིག་ལ་བཤགས་དགོས་སོ། །སྤྱིར་བཏང་དུ་ནི་བཤགས་ཚུལ་གང་རུང་རུང་གིས་རྣམ་སྨིན་འདག་སྲིད་ཀྱང་ལྟུང་བའི་ཐ་སྙད་མི་འདག་སྟེ། ལྟུང་བའི་ཐ་སྙད་ལས་ལྡང་བ་ལ་ལྷག་སྦོམ་སོགས་ཀྱིས་མིང་དང་ཀུན་སློང་འདིས་བླང་ཞེས་སོགས་ཀྱི་རིགས་དང་ལྡན་པར་བརྗོད་དགོས་པས་སོ། །དེ་ནས་སྟོབས་བཞི་ཚང་བའི་བཤགས་སྡོམས་ཀྱིས་རྣམ་སྨིན་འདག་ལ། མིང་རིགས་བརྗོད་པས་ཐ་སྙད་འདོག་པས་ན་གཉིས་ཀ་ལ་འབད་པར་བྱའོ། །ལྷག་མ་དངོས་གཞིའི་ཕྱིར་བཅོས་ལ་ཆོ་གའི་ཁྱད་པར་དང་། དེ་ལས་ལྡང་ཐབས་བཤད་པའོ། །དང་པོ་ནི་དགེ་འདུན་ལྷག་མ་བཅོས་པ་ནི་ཆོ་གའི་(༡༧༩ན)
ཚིག་ཁྱད་པར་བ་ཡོད་དེ། བཤགས་པ་བྱེད་པའི་ཚེ་བཅབས་ཉེས་ཡོད་ན་དུས་འདི་སྲིད་ཅིག་བཅབས་པ་ཉིད་དང་བཅས་ཏེ་བརྗོད་དགོས་ལ། མེད་ན་མ་བཅབས་པའི་ལྷག་མ་ཞེས་པའི་ཚིག་བཅས་ཏེ་བརྗོད་དགོས་པས་སོ། །དེས་ན་ཁ་ཅིག་མ་བཅབས་ན་བརྗོད་མི་དགོས་ཞེས་ཀྱང་ཟེར་རོ། །འོན་ཀྱང་འགྲེལ་ཆེན་དུ་མ་བཅབས་པ་ཉིད་དང་། བརྗོད་པར་བྱའོ་ཞེས་བཤད་པས་མི་རིགས་སོ། །གཉིས་པ་ལ་དབྱུང་བའི་སྔོན་འགྲོ་སྤོ་མགུ་དང་། དབྱུང་བ་དངོས་སོ། །དང་པོ་དངོས་སོ། །དང་པོ་ལ། སྤྱི་དོན་དང་གཞུང་དོན་ནོ། དང་པོ་ལ། སྤོ་བ་དང་། མགུ་བའོ། །དང་པོ་ལ་སྦྱིན་པ་དང་སྤྱད་པའོ། །དང་པོ་ལ་བདུན་ལས། དགེ་འདུན་ནི་མཚན་ཉིད་སུམ་ལྡན་གྱིས་སོ། །ཡུལ་ནི་མཐོལ་བ་དང་འདྲ་བ་ལས་མཐོལ་བ་སྔོན་དུ་མ་སོང་བ་ཞེས་པའི་གནས་སུ་དམན་པའི་གང་ཟག་ཡིན་པ་དང་། ཚོགས་སུ་མ་ཚང་བ་དང་འཆབ་ཉེས་དང་ལྡན་པའོ། །བསམ་པ་ནི་དགེ་འདུན་གྱིས་དེ་ལ་ཕན་སེམས་ཀྱིས་བསམ་པ་ཐག་པ་ནས་སྦྱིན་འདོད་དང་། ཡུལ་གྱིས་མྱང་འདས་ཀྱི་བསམ་པས་ནོད་པར་འདོད་པའོ། །དུས་ཇི་སྲིད་བཅབས་པ་དེ་སྲིད་དུའོ། །ཆོ་ག་ལ་སྦྱོར་བ་གསོལ་བ་གདབ་པ་དང་། དངོས་གཞི་སྤོ་བ་དང་། གཞི་སྤོ་དང་། ཡང་གཞི་སྤོ་གསུམ་སྦྱིན་པའོ། །དགོས་པ་ནི་དངོས་སུ་སྤྱད་པ་འཆགས་ཤིང་རྒྱུད་ནས་འཆབ་འདག་པའོ། །སྒྲ་བཤད་པ་ནི་རང་བཞིན་དུ་གནས་པ་དག་པའི་ས་ནས་མ་དག་པའི་གཞན་དུ་སྤོ་བས་སྤོ་བའོ། །སྤྱད་པ་ནི་འོག་ནས་སྟོན་ནོ། །མགུ་བ་ཡང་གཉིས་ཏེ། སྦྱིན་པ་ལ་དགེ་འདུན་(༡༧༩བ)
དང་བསམ་པ་སྔར་བཞིན་ལས། ཡུལ་ནི་འདྲ་བ་ལ་ཁྱད་པར་འཆབ་པ་དང་མི་ལྡན་པ་ཞེས་སྦྱར་རོ། །དུས་ནི་དགེ་སློང་མས་ཟླ་བ་ཕྱེད་དང་དགེ་སློང་གིས་ཞག་དྲུག་གོ །ཆོ་ག་ལ་སྦྱོར་བ་གསོལ་བ་གདབ་པ་དང་། དངོས་གཞི་མགུ་བ་སྦྱིན་པ་བཅུ་གཉིས་ཏེ། མ་བཅབས་ན་མགུ་བ་དང་། གཞི་མགུ་དང་། ཡང་གཞི་ནས་མགུ་བ་གསུམ་སྦྱིན་པ་དང་བཅབས་ན་སྤོ་སོགས་གསུམ་བྱས་པ་ལ་མགུ་བ་སྦྱིན་པ་གསུམ་དང་། གཞི་མགུ་སྦྱིན་པ་གསུམ་དང་། ཡང་བཞི་མགུ་སྦྱིན་པ་གསུམ་སྦྱིན་པའོ། དགོས་པ་ནི་སྤྱད་པ་དང་དབྱུང་བ་འཆགས་པའོ། །སྒྲ་བཤད་པ་ནི་དགེ་འདུན་ཐུགས་མགུ་བར་བྱེད་པའོ། །སྤྱད་པ་ནི་ས་གཞན་ན་གནས་པའི་སྐབས་སུ་སྟོན་ནོ། །གཞུང་དོན་ནི་ལྷག་མ་དེ་ལས་སོགས་ཏེ་དབྱུང་བ་དེ་གང་ལ་སྦྱིན་ཞེ་ན། དགེ་འདུན་ལས་ཞེས་སོ། །དགེ་སློང་མས་ནི་ལྷག་མར་མ་ཟད་ལྕི་བའི་སོགས་མགུ་བ་དེ་བཅབས་པའི་ཉེས་པ་མེད་ན་འཆགས་ཀྱི་ཡོད་ན་མི་འཆགས་སོ། །སྤོ་བ་སྦྱིན་ཞིང་སྤྱོད་པས་བཅབས་ཉེས་དེ་མེད་པར་འགྱུར་རོ། །སྤོ་བ་སྤྱོད་པའི་དུས་ནི་དགེ་འདུན་ལས་ཇི་སྲིད་བཅབས་པའི་དུས་དེ་སྲིད་མནོས་ཏེ་སྤྱད་པར་བྱའོ། །གཞི་སྤོ། གཞི་མགུ་ནི། སྤོ་མགུ་དེ་གཉིས་བྱེད་པ་ཉིད་ཀྱི་ཚེ་ན་དགེ་འདུན་ལྷག་མ་རིགས་འདྲ་དེ་བྱུང་ན་སྔར་མནོས་ཏེ་བྱས་པ་དེ་གཉིས་ཞིག་པས་དེའི་ཕྱིར་གཞི་ནས་བརྩམས་པ་ཉིད་སྦྱིན་ནོ། །སྤོ་མགུ་བྱེད་པ་དེ་ཡང་སྤྱད་ནས་ཞག་གཅིག་ཡན་ཆད་ལོན་པ་དགོས་ཀྱིས་བརྩམས་ནས་ཞག་མ་ལོན་པ་ན་ལྟུང་བ་རིགས་འདྲ་བྱུང་བ་ནི་སྔར་མནོས་ཏེ་བྱས་པ་དེ་གཉིས་ཞིག་པ་མ་ཡིན་ཏེ། མ་(༡༨༠ན)
ཞིག་པར་མཐར་ཐུག་པར་བྱ་བ་དང་འདྲ་བ་ཡིན་པའི་ཕྱིར་རོ། །གཞུང་འདིའི་དོན་འདི་ལྟར་ཡིན་ཏེ། འདིའི་འགྲེལ་པར་ཡོངས་སུ་མི་གཏོང་ངོ་ཞེས་བྱ་བའི་ཐ་ཚིག་གོ །ཞེས་བཤད་ལ་བརྩམས་པ་མཐར་ཐུག་པ་དང་འདྲ་བར་བྱ་དགོས་པ་དེའི་ཕྱིར་སྤོ་མགུ་སྦྱིན་པ་དེ་རྐྱེན་གྱིས་དབང་གི་ལས་ལ་ཆགས་ཤིང་སྐབས་དེར་ལྟུང་བ་རིགས་འདྲ་བྱུང་ན་དེའི་ཚེ་ལྟུང་བ་དང་པོའི་སྤོ་མགུ་ཡང་ཐ་དད་པར་བླང་བར་བྱ་བ་ཡིན་གྱི། འདི་ལ་ནི་གཞི་སྤོ་སོགས་ཀྱི་མིང་དོན་མེད་དེ་སྔ་མ་མ་ཆགས་པའི་ཕྱིར་རོ། །འོན་ཀྱང་ལྟུང་བ་བར་མ་དེ་ཡང་ཡལ་བར་མི་དོར་བར་ཕྱིར་བཅོས་པར་བྱ་བ་ཡིན་ལ། དེ་ཡང་སྦྱིན་པ་ནི་ཚིག་གཅིག་གིས་སྦྱིན་ལ། །བསྟེན་པ་ནི། ལྟུང་བ་གཉིས་པ་དེའི་དོན་དུ་སླར་ཡང་བསྟེན་པར་བྱ་བ་ཡིན་ནོ། །དེ་ཡང་ལྟུང་བ་བར་མ་དེ་ཇི་སྲིད་བཅབས་པའི་དུས་ལྷག་པ་ཡང་སྔ་མ་དེར་གཞུག་པར་བྱ་བ་ཡིན་ནོ། །བརྩམས་པ་མཐར་ཐུག་གི་སྐབས་སུ་བྱ་འདུལ་ཀྱིས་སྔ་མ་ཞིག་པར་གསུངས་པ་ནི་མཁས་པ་ལ་འཁྲུལ་བ་བྱུང་བ་ཡིན་ནོ། །སྤོ་མགུ་དེ་གཉིས་གསོལ་བཞིའི་ལས་ཀྱིས་སྦྱིན་པར་བྱ་སླ་དེར་མ་ཟད་ལྷག་མའི་ལྟུང་བ་ལས་རང་བཞིན་དུ་གནས་པའི་སར་དབྱུང་བ་ཡང་གསོལ་བཞིའི་ལས་ཀྱིས་སྦྱིན་ནོ། །དབྱུང་བའི་གསོལ་བཞིའི་ལས་ནི་གསོལ་བརྗོད་བར་མ་ཆད་དུ་བྱ་བ་མ་ཡིན་ཏེ། །བར་དེར་བསྡིགས་པའི་སྔགས་ཀྱང་བརྗོད་དགོས་ལ། དེ་ཡང་གསོལ་བ་དང་ལས་བརྗོད་པ་དང་པོའི་བར་དུ་བྱ་ཞིང་བསྒྲུབ་བྱ་འགྱོད་ཅིང་བག་ཁུམས་ནས་ལུས་སེམས་ཞིག་ནས་རྩྭ་བཀྲམ་པ་ལྟ་བུར་འགྱེལ་བ་ལའོ། །(༡༨༠བ)
སྔགས་ནི་ཁྱོད་ཀྱིས་ལེགས་པར་མ་བྱས། སངས་རྒྱས་ཀྱི་གསུང་དང་འགལ་བར་བྱས། ལྟུང་བ་འབྱིན་པ་དང་ཕྱིར་མི་འཆོས་པ་གཉིས་ནི། སྟོན་པའི་ཆོས་འཁོར་རྗེས་སུ་མི་བསྐོར་བ་སོགས་ཀྱི་རྣམ་བྱང་མི་སྐྱེད་ལ་ཟག་པ་འཕེལ་བར་བྱེད་པའོ་ཞེས་སོགས་སོ། བསྡིགས་པའི་སྔགས་ལས་བཟློག་པའི་ཚིག་གིས་གཟེངས་བསྟོད་པ་ཡང་བྱ་ལ། སྐབས་ནི་བརྗོད་པ་གསུམ་པ་བྱས་མ་ཐག་མཇུག་སྡུད་ཀྱི་གོང་དུའོ། །འདིར་དབྱུང་བའི་སྤྱི་དོན་ལ་ཡང་བདུན་ལས། དགེ་འདུན་ནི་སྐྱེས་པ་དང་བུད་མེད་ཀྱི་བྱེ་བྲག་གིས་ཉི་ཤུ་དང་བཞི་བཅུར་ཚང་པ་མཚན་ཉིད་སུམ་ལྡན་ནོ། །གང་ཟག་ནི་སྔར་བཞིན་ལ་འཆབ་པ་དང་མི་ལྡན་པ་ཞེས་པའི་གནས་སུ་སྤོ་མགུ་ཆད་ལས་སྔོན་དུ་སོང་བའོ། །བསམ་པ་སྔར་བཞིན་ལས་ཁྱད་པར་དུ་དབྱུང་བར་འདོད་པའོ། དུས་ནི་མགུ་པ་སྤྱད་ཟིན་ནས་དབྱུང་བ་ལ་ཐོགས་པའི་ཚེའོ། །ཆོ་ག་ལ་སྦྱོར་བ་གསོལ་བ་གདབ་པ་དང་། དངོས་གཞི་བསྡིག་པ་དང་བཅས་པའི་དབྱུང་བ་བཅུ་གཉིས་ཏེ། མགུ་སོགས་རྐྱང་པ་གསུམ་སྤྱད་པ་ལ་དབྱུང་བ་གསུམ་དང་། སྤོ་སོགས་གསུམ་དང་བཅས་པའི་མགུ་བ་སྤྱད་པ་གསུམ་དང་། གཞི་མགུ་སྤྱད་པ་གསུམ་དང་ཡང་གཞི་མགུ་སྤྱད་པ་གསུམ་རྣམས་ལ་དབྱུང་བའོ། །མཇུག་གཟེངས་བསྟོད་ཅིང་ཡི་རང་བའོ། །དགོས་པ་རང་བཞིན་དུ་གནས་པ་ཐོབ་པའོ། །སྒྲ་བཤད་ལྷག་མའི་ས་ནས་རང་བཞིན་དུ་གནས་པའི་སར་དབྱུང་བས་སོ། །ཕྱིར་བཅོས་པ་གཞིའི་སྐབས་རྫོགས་སོ་ཞེས་གསུངས་ཤིང་། སོ་སོར་ཐར་པའི་མདོ་ལས་(༡༨༡ན)
ཀྱང་། གང་གི་ཕྱིར་ནི་མདོ་སྟོན་དང་། །གང་ཕྱིར་གསོ་སྦྱོང་བྱས་གྱུར་པ། །ཚུལ་ཁྲིམས་དེ་ནི་བསྲུང་བྱ་སྟེ། །གཡག་རྔའི་རྩེ་མོ་ཇི་བཞིན་ནོ། །ཞེས་པའི་གཡག་རྔའི་རྩེ་མོའི་དོན་ཚུལ་ཁྲིམས་དེ་ཡང་ཇི་ལྟར་བསྲུང་བར་བྱ་ཞེ་ན། ཇི་ལྟར་གངས་ཀྱི་གཡག་ཅེས་བྱ་བ་དེ་རྔ་མའི་ཉག་མ་གཅིག་ཤིང་དེ་ལ་ཐོགས་ན་དེ་བསྲུང་བའི་ཕྱིར་མ་ཤི་བར་དུ་སྡོད་པ་དེ་བཞིན་དུ་ཉེས་བྱས་ཕྲ་མོ་ཡན་ཆད་ལ་ཡང་སྲོག་ལུས་ལ་མི་ལྟ་བར་བསྲུང་བར་བྱ་ཞེས་བྱ་བའི་དོན་ནོ། །ཞེས་གསུངས་། མཁས་མཆོག་རྟ་དབྱངས་ཀྱིས་མཛད་པར་གྲགས་པའི་སོ་ཐར་གྱི་འགྲེལ་པར། ཇི་ལྟར་བསིལ་རུམ་གངས་ཁྲོད་ན་གནས་པའི་གཡག་རྔ་མ་བག་ཡོད་པས་བསྲུང་བ་རྔ་མ་ཝ་མཇུག་ལྟར་མི་རྐྱོང་བར་རྩེ་མོ་ལྡང་དུ་གཟར་ཏེ་འགྲོ་བ་དེ་བཞིན་དུ། ཚུལ་ཁྲིམས་འདི་ཡང་བག་ཡོད་པར་བསྲུང་བར་གྱིས་ཤིག་ཅེས་བྱ་བའི་ཐ་ཚིག་གོ །ཞེས་བྱུང་ཞིང་། བསླབ་པ་ལ་ནན་ཏན་དུ་བྱས་བའི་ཕན་ཡོན་ནི་གནས་སྐབས་སུ་མངོན་པར་མཐོ་བའི་ཡང་སྲིད་རྒྱུན་མར་ཐོབ་ཅིང་མཐར་ཐུག་སྒྲིབ་གཉིས་ཀྱི་གཡུལ་ལས་རྒྱལ་ཏེ་ཉན་ཐོས་རང་རྒྱལ་སངས་རྒྱས་ཀྱི་བྱང་ཆུབ་གསུམ་པོ་གང་རུང་ཐོབ་ནས་ཕྱིར་མི་ལྡོག་པའི་གཏན་གྱི་མདུན་མ་ལྷུན་གྱིས་གྲུབ་པར་གྱུར་ཏེ། སུམ་བརྒྱ་པར། ངེས་པར་འབྱུང་བའི་ཚུལ་ཁྲིམས་སྡུག་བསྔལ་སྤོང་། །འཇིག་ཚོགས་ལྟ་བ་གདོན་གྱི་རྩ་བ་འཇོམས། །དཔལ་འབྱོར་ས་དང་མེ་ཏོག་མདའ་ཅན་འཇོམས། །སངས་རྒྱས་ལ་ནི་མགོས་གཏུགས་བཤད་པར་བྱ། །ཞེས་དང་། ཉོན་མོངས་དགྲ་གཡུལ་རྒྱལ་བྱེད་ཚུལ་ཁྲིམས་(༡༨༡བ)
ཏེ། དགེ་ཚུལ་བརྟུལ་ཞུགས་ཆུ་ལོན་བརྩིགས་པ་དང་། །འཆི་བའི་མཆེ་བ་འབྱིན་པར་བྱེད་པའི་ཐབས། །རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་དང་། འདུལ་བ་རྒྱ་མཚོའི་སྙིང་པོར། །སྡོམ་པ་དེ་དག་བསྲུངས་པ་ལས། །གནས་སྐབས་འབྲས་བུ་ལྷ་མི་དང་། །མཐར་ཐུག་འབྲས་བུ་བྱང་ཆུབ་གསུམ། །ཐོབ་པར་འགྱུར་ཞེས་གསུངས་པའི་ཕྱིར། །བརྩོན་ལྡན་རྣམས་ཀྱིས་སོ་སོ་ཐར། །རྟག་ཏུ་གུས་པས་འབད་དེ་བསྲུང་། །ཞེས་བཀའ་སྩལ་བ་སོགས་ཀྱིས་མཚོན་པའི་ལུང་རིགས་ཀྱིས་རྟོགས་པས་སྤྲོ་དགའ་རྒྱ་ཆེར་བྱའོ། །
དགེ་ཚུལ་སློང་གི་སྡོམ་པ་འབོགས་ཆོག་བྱ་ཚུལ།
གསུམ་པ་ཆོ་གའི་ལག་ལེན་དངོས་ལ་འདི་ལ་ཐོག་མར་གནས་ཁང་བྱི་དོར་བྱ། སྟོན་པའི་སྐུ་དངོས་སུ་བཞུགས་དགོས་ཤིང་། །ཆོ་ག་གཙོ་བོར་དགེ་འདུན་རྣམས་ཀྱི་ཐུགས་ལ་ཡོད་པས་ཚང་ཡང་དེ་ལྟར་ཡོད་དོ་ཞེས་པའི་མཚོན་བྱེད་ལ་ལས་ཀྱི་ཆོ་གའི་གླེགས་བམ་དང་བཅས་པའི་རྟེན་ཁྱད་པར་ཅན་རྣམས་བཞུགས་སུ་གསོལ། ཉེར་སྤྱོད་ལྔ་ལ་སོགས་པའི་མཆོད་པ་རྒྱ་ཆེན་པོ་བཤམས། འོག་ཏུ་རབ་བྱུང་བསྙེན་རྫོགས་ལ་དགོས་པའི་ཡོ་བྱད་རྣམས་སྟ་གོན་བྱའོ། །ལས་གྲལ་བ་རྣམས་ལ་སྔ་ཆབ་དང་མེ་ཏོག་ཕུལ། ཞྭ་དང་འཕྲེང་བ་ལ་སོགས་པ་གཞག་པར་བྱའོ། ཁྱེད་རྣམས་བསྟན་པ་རིན་པོ་ཆེའི་སྒོར་འཇུག་པ་དངོས་གཞིའི་ཆོ་ག་ལ། ཚིགས་སྔ་མ་དགེ་ཚུལ་དུ་བསྒྲུབ་པའི་ཆོ་ག་དང་། ཕྱི་མ་བསྙེན་རྫོགས་སུ་བསྒྲུབ་པའི་ཆོ་ག་གཉིས། དང་པོ་ལ་སྡོམ་ནི། ཀརྨ་ཤ་ཏམ་ལས། སྔོན་དང་དགེ་བསྙེན་བསླབ་པ་དང་། ཞུ་(༡༨༢ན)
དང་མཁན་པོ་དང་པོ་དང་། །རབ་བྱུང་དགེ་ཚུལ་གྲིབ་ཚོད་དང་། །བསླབ་པ་བརྗོད་པ་ཐ་མ་ཡིན། །ཞེས་སོ། །དེ་ཡང་སྔོན་དང་ཞེས་པས་སྔོན་ཆོག་བསྟན། ལྷག་མ་རྣམས་ཀྱི་དོན་འཆད་པ་ལ། སྦྱོར་བ། དངོས་གཞི། རྗེས་གསུམ་གྱི་དང་པོ་ལ། རབ་ཏུ་བྱུང་བ་རུང་མི་རུང་བརྟག་པའི་ཕྱིར་བར་ཆད་དྲི་བ། བསྟན་པ་ལ་རིམ་གྱིས་སློབ་ཏུ་བཞུག་པའི་ཕྱིར་དགེ་བསྙེན་དུ་བསྒྲུབ་པ། དགེ་ཚུལ་གྱི་བརྟུལ་ཞུགས་མྱུར་དུ་བླང་བའི་ཕྱིར་རབ་བྱུང་དུ་བསྒྲུབ་པ་དང་གསུམ་གྱི་དང་པོ་ནི། མཁན་པོ་ཉིད་དུ་ཕྱོགས་པའི་དགེ་སློང་འགའ་ཞིག་གི་གན་དུ་རབ་ཏུ་བྱུང་བར་འདོད་པ་འོངས་ནས། མདུན་དུ་ཙོག་ཙོག་པུར་འདུག་ཏུ་བཅུག་ལ། ཁྱོད་རབ་ཏུ་བྱུང་བ་བྱེད་པ་ལ་བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཅན་རབ་ཏུ་བྱུང་ན་རྒྱུད་དེ་ལ་སྡོམ་པ་མི་སྐྱེ་བའམ། སྐྱེས་ཀྱང་མི་གནས་པ་ལ་སོགས་པའི་སྒོ་ནས་རྒྱུད་དེ་ལ་ཕན་མི་ཐོགས་ཤིང་། ངེད་ལ་ཡང་ཉེས་པ་ཡོང་བས་བར་ཆད་དྲི་དགོས་ཏེ། མདོ་རྩ་བར། དང་པོའི་མཁན་པོ་ཉིད་ཀྱིས་བར་ཆད་དྲིས་ནས་ཡོངས་སུ་དག་པ་ལ་སྐབས་དབྱེའོ། །ཞེས་གསུངས་པས། ངེད་ཀྱི་དྲི་བ་འདི་རྣམས་ལ་སེམས་མ་ཡེངས་པར་ལན་ཐོབ་ཅིག །ཁྱོད་མུ་སྟེགས་ཅན་མ་ཡིན་ནམ། ལོ་བཅོ་ལྔ་མ་ལོན་པ་མ་ཡིན་ནམ། ལོ་བཅོ་ལྔ་ལོན་པ་བྱ་རོག་སྐྲོད་མི་ནུས་པ་མ་ཡིན་ནམ། བྱ་རོག་སྐྲོད་ནུས་པ་ལོ་བདུན་མ་ལོན་པ་མ་ཡིན་ནམ། བྲན་ལ་སོགས་པ་མ་ཡིན་ནམ། བུ་ལོན་ཆགས་པ་མ་ཡིན་ནམ། ཕ་མས་(༡༨༢བ)
མ་གནང་བ་མ་ཡིན་ནམ། ཕ་མས་མ་གནང་བ་ཡུལ་ཐག་མི་རིང་བ་མ་ཡིན་ནམ། ནད་པ་མ་ཡིན་ནམ། དགེ་སློང་མ་སུན་ཕྱུང་བ་མ་ཡིན་ནམ། རྐུ་ཐབས་སུ་གནས་པ་མ་ཡིན་ནམ། ཐ་དད་དུ་གནས་པ་མ་ཡིན་ནམ། གནས་པར་མི་བྱ་བ་མ་ཡིན་ནམ། ཟ་མ་མ་ཡིན་ནམ། མ་ནིང་མ་ཡིན་ནམ། སྤྲུལ་པ་མ་ཡིན་ནམ། དུད་འགྲོ་མ་ཡིན་ནམ། མུ་སྟེགས་ཅན་ཞུགས་པ་མ་ཡིན་ནམ། མ་བསད་པ་མ་ཡིན་ནམ། ཕ་བསད་པ་མ་ཡིན་ནམ། དགྲ་བཅོམ་པ་བསད་པ་མ་ཡིན་ནམ། དགེ་འདུན་གྱི་དབྱེན་བྱས་པ་མ་ཡིན་ནམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ། ཕམ་པར་འགྱུར་བའི་ལྟུང་བ་བཞི་པོ་དག་ལས་ལྟུང་བ་གང་ཡང་རུང་བ་བྱུང་བ་མ་ཡིན་ནམ། རྒྱུ་ལས་བཟློག་པའི་ཆད་པ་ཁས་མི་ལེན་པ་གནས་ནས་ཕྱུང་བ་མ་ཡིན་ནམ། ལག་རྡུམ་ལ་སོགས་པ་མ་ཡིན་ནམ། སྐྲ་སེར་ལ་སོགས་པ་མ་ཡིན་ནམ། སེན་མོ་གཅིག་པ་ལ་སོགས་པ་མ་ཡིན་ནམ། རྒྱལ་པོས་བཀྲབས་པ་ལ་སོགས་པ་མ་ཡིན་ནམ། རྒྱལ་པོས་མ་གནང་བ་མ་ཡིན་ནམ། རྒྱལ་པོས་མ་གནང་བ་ཡུལ་ཐག་མི་རིང་བ་མ་ཡིན་ནམ། ཆོམ་རྐུན་པར་གྲགས་པ་མ་ཡིན་ནམ། ཕུང་ཀྲོལ་བ་མ་ཡིན་ནམ། ལྷམ་མཁན་མ་ཡིན་ནམ། གདོལ་པ་མ་ཡིན་ནམ། གཡུང་པོ་མ་ཡིན་ནམ། མི་མ་ཡིན་པའི་འགྲོ་བ་པ་མ་ཡིན་ནམ། བྱང་གི་སྒྲ་མི་སྙན་པ་མ་ཡིན་ནམ། མཚན་ལན་གསུམ་དུ་གྱུར་པ་མ་(༡༨༣ན)
ཡིན་ནམ། སྐྱེས་པ་འདྲ་བའི་བུད་མེད་མ་ཡིན་ནམ། སྡིག་སྡིག་ལྟ་བུའི་མཚན་ཉིད་ཅན་མ་ཡིན་ནམ། གླིིང་གཞན་ནས་སྐྱེས་པ་ཚུལ་བྱད་མི་འདྲ་བ་མ་ཡིན་ནམ། ཞེས་དྲིས་པས། མ་ཡིན་ལགས་ཟེར་ན། འོ་ན་ཁོ་བོས་ཁྱོད་རབ་ཏུ་དབྱུང་བར་བྱའོ། །ཞེས་སྐབས་ཕྱེའོ། །གཉིས་པ་ནི། བསྒྲུབ་བྱ་དེ་དང་པོར་སྟོན་པ་ལ་ཕྱག་འཚལ་དུ་བཅུག །དེ་ནས་རང་ལ་ཕྱག་འཚལ་དུ་བཅུག་ནས། མདུན་དུ་ཙོག་ཙོག་པུར་འདུག་ཏུ་བཅུག་ཅིང་། ཐལ་མོ་སྙིང་གར་སྦྱར་དུ་བཅུག་ནས། ཁྱོད་རབ་ཏུ་འབྱུང་བར་བྱེད་པ་ལ་བསྟན་པ་ལ་རིམ་གྱིས་བསླབ་དགོས་ཏེ། མདོ་རྩར། དགེ་བསྙེན་ཉིད་དང་། དགེ་ཚུལ་ཉིད་དང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ་ཞེས་གསུངས་པས། དགེ་བསྙེན་གྱི་སྡོམ་པ་བླང་དགོས། དེ་ལ་སྐྱབས་སུ་འགྲོ་བ་རྩོམ་བྱེད་དུ་བྱས་ནས་ཁས་ལེན་ལན་གསུམ་བྱས་པ་ལས་སྐྱེ་བ་ཡིན་པས། བསམ་པ་འདི་བཞིན་དུ་གྱིས། ཁམས་གསུམ་འཁོར་བ་འདི་གང་དུ་སྐྱེས་ཀྱང་སྡུག་བསྔལ་གྱི་གནས། སུ་དང་འགྲོགས་ཀྱང་སྡུག་བསྔལ་གྱི་གྲོགས། ཅི་ལ་ལོངས་སྤྱོད་ཀྱང་སྡུག་བསྔལ་གྱི་ལོངས་སྤྱོད་ལས་མི་འདུག་པས། འཁོར་བའི་སྡུག་བསྔལ་ལས་ཐར་བ་ལ་སྐྱབས་འཚོལ་དགོས། དེ་ཡང་འཇིག་རྟེན་པའི་ལྷ་ལ་སོགས་པས་འཁོར་བའི་སྡུག་བསྔལ་ལས་སྐྱོབ་མི་ནུས་ཏེ། རང་ཡང་འཁོར་བའི་བཙོན་རར་བཅིངས་པ་ཡི། འཇིག་རྟེན་ལྷ་ཡིས་སུ་ཞིག་སྐྱོབ་པར་ནུས། །(༡༨༣བ)
ཞེས་གསུངས་པ་ཡིན། དེས་ན་དཀོན་མཆོག་གསུམ་གྱིས་འཁོར་བའི་སྡུག་བསྔལ་ལས་སྐྱོབ་ནུས་པས། སངས་རྒྱས་ལ་སྐྱབས་སུ་སོང་ནས་ལམ་སྟོན་པ་པོ་ཞུ། ཆོས་ལ་སྐྱབས་སུ་སོང་ནས་སྐྱབས་དངོས་ཞུ། དགེ་འདུན་ལ་སྐྱབས་སུ་སོང་ནས་ལམ་བསྒྲུབ་པའི་གྲོགས་ཞུ་སྙམ་པའི་སྒོ་ནས། སེམས་ཅན་ཐམས་ཅད་ཀྱི་དོན་དུ་མི་གནས་པའི་མྱ་ངན་ལས་འདས་པ་རྫོགས་པའི་སངས་རྒྱས་བསྒྲུབ་པར་བྱ། དེའི་ཆེད་དུ་དུས་འདི་ནས་མ་ཤིའི་བར་དུ་ཡོངས་རྫོགས་ཀྱི་དགེ་བསྙེན་གྱི་སྡོམ་པ་བླངས་ལ་བསྲུང་། བདག་བསླབ་གཞི་ལྔ་འཛིན་པའི་དགེ་བསྙེན་དུ་བཟུང་དུ་གསོལ་སྙམ་པ་གྱིས་ལ་ལད་མོ་གྱིས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་གཟུང་དུ་གསོལ། ལྷག་པོར་མ་གཏོགས་པའི་རང་གི་དོན་གྱི་སྔགས་བརྗོད་པ་ཡང་ངོ་། །ཞེས་ལན་གསུམ་བཟླས་དགོས་པར་གསུངས་པས་གཉིས་པའི་ཡང་རྗེས་ཟློས་གྱིས་ཞེས་བརྗོད།གཉིས་པ་སོང་བའི་རྗེས་སུ་ཆོ་གའི་ཚིག་འདི་ལ་དུམ་བུ་གསུམ་ཡོད་པས། དགེ་འདུན་ལ་སྐྱབས་སུ་མཆིའོ་ཡན་ཆད་སྐྱབས་བརྗོད་པ། བདག་ཇི་སྲིད་འཚོའི་བར་དུ་དགེ་བསྙེན་དུ་ཞེས་པ་བདག་བརྗོད་པ། བཙུན་པས་གཟུང་དུ་གསོལ་ཞེས་པ་གཞན་བརྗོད་པ་ཡིན་(༡༨༤ན)
པས། །བདག་བརྗོད་རྫོགས་པ་དགེ་བསྙེན་དུ་ཞེས་པའི་ཚིག་རྫོགས་པ་དང་། ཁྱེད་ཀྱི་རྒྱུད་ལ་དགེ་བསྙེན་གྱི་སྡོམ་པ་སྐྱེ། ངེད་ཁྱེད་ཀྱི་སློབ་དཔོན་དུ་གྱུར་པ་ཡིན་པས། དགེ་བསྙེན་དུ་ཞེས་པའི་སྐབས་སུ་ངེད་ཀྱིས་སྐད་གཟེངས་མཐོ་བ་དང་། སེ་གོལ་གྱི་བརྡ་སྤྲོད་པས་བདག་གི་རྒྱུད་ལ་དགེ་བསྙེན་གྱི་སྡོམ་པ་ཐོབ་པའི་དུས་འདི་ཡིན་སྙམ་པའི་ཐོབ་བློ་སྐྱེས་པ་ཤིན་ཏུ་གལ་ཆེ་བས། དེ་དུས་སྡོམ་པ་ཐོབ་པར་ཤེས་པ་དང་། སློབ་དཔོན་དུ་གྱུར་ནས་སློབ་དཔོན་གྱིས་གཟུང་དུ་གསོལ་ཞེས་བརྗོད་དགོས་པས། དེ་ཡིད་ལ་ཞོག་ལ་གསུམ་པའི་རྗེས་ཟློས་གྱིས་ཞེས་བརྗོད། དེའང་སེ་གོལ་གཏོགས་པ་དང་ལྷན་དུ་སྡོམ་པ་ཐོབ་བོ་ཞེས་སློབ་དཔོན་གྱི་ཞལ་ནས་ཀྱང་བརྡ་སྤྲོད། །གསུམ་པ་ཟིན་པ་དང་སློབ་དཔོན་གྱིས་དེ་དགེ་བསྙེན་དུ་བསྒྲུབ་པའི་ཐབས་ཡིན་ནོ། ཁྱོད་རང་ལེགས་སོ་གྱིས་ཞེས་བརྗོད། སློབ་མས་ལེགས་སོ་ཞེས་བརྗོད། དེས་ཁྱོད་ཀྱི་དགེ་བསྙེན་གྱི་སྡོམ་པ་ཐོབ་པ་ཡིན། ཐོབ་ཀྱང་མ་བསྲུངས་ན་ཕན་ཡོན་ཆེན་པོ་མི་འབྱུང་། ཉེས་དམིགས་ཆེན་པོ་འབྱུང་བས་བསྲུང་དགོས། བསྲུང་ལུགས་དགྲ་བཅོམ་པ་རྣམས་ཀྱིས་སྲོག་གཅོད་པ་སོགས་ལྔ་ཡིད་ཀྱིས་སྤངས་ཏེ། ལུས་ངག་གིས་སླར་ལོག་པ་དེ་བཞིན་དུ་བདག་གིས་ཀྱང་བསླབ་སྙམ་པ་གྱིས་ལ། ལད་མོ་གྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་(༡༨༤བ)
ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་། མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ། །ཡན་ལག་ལྔ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །སློབ་དཔོན་གྱིས་ཐབས་ཡིན་ནོ། ཁྱོད་རང་ལེགས་སོ་ཞེས་བརྗོད། དགེ་བསྙེན་གྱིས་ལེགས་སོ་ཞེས་བརྗོད་དོ། །འདི་རྒྱ་དཔེར་ལན་གསུམ་བཟླས་པར་གསུངས་ཀྱང་། ལུང་དང་། ཀརྨ་ཤ་ཏམ་དང་། དེ་དག་གི་འགྲེལ་པ་ལས་ལན་གསུམ་བཟླས་བྱ་བའི་དམིགས་བསལ་མ་བྱུང་བས་ཕྱག་ལེན་ལན་རེེ་མཛད་དོ། །དེས་དགེ་བསྙེན་གྱི་སྡོམ་པ་ལེགས་པར་ཐོབ་པས་དེའི་སྐྱབས་འགྲོའི་བསླབ་བྱས་སངས་(༡༨༥ན)
རྒྱས་ལ་སྐྱབས་སུ་སོང་བས་ལྷ་གཞན་ལ་ཕྱག་མཆོད་མི་བྱ། ཆོས་ལ་སྐྱབས་སུ་སོང་བས་སེམས་ཅན་ལ་གནོད་འཚེ་སྤོང་། དགེ་འདུན་ལ་སྐྱབས་སུ་སོང་བས་གྲོགས་མུ་སྟེགས་ཅན་དང་མི་འགྲོགས་པ་དང་། ཐུན་མོང་དུ་སྐྱེས་བུ་དམ་པ་ལ་བརྟེན་པ། དམ་པའི་ཆོས་ཉན་པ། ཚུལ་བཞིན་ཡིད་ལ་བྱ་བ། ཆོས་ཀྱི་རྗེས་སུ་འབྲང་བའི་ཆོས་བསྒྲུབ་པ་སྟེ་བཞི་དང་། དབང་པོ་མི་རྒོད་པ་དང་། སྡོམ་པ་ཅི་ནུས་སུ་ལེན་པ་དང་། སེམས་ཅན་ལ་སྙིང་བརྩེ་བ་དང་། དཀོན་མཆོག་མཆོད་པ་ལ་བརྩོན་པ་ལ་བསླབ། དགེ་བསྙེན་གྱི་སྡོམ་པའི་ཡན་ལག་མི་གསོད་པ་སོགས་བཞི་བྱུང་ན་སྡོམ་པ་གཏོང་བས་བསྐྱར་ནས་ལེན། མི་མ་ཡིན་པ་གསོད་པ་སོགས་ལྔ་བྱུང་ན་སྡོམ་ལྡན་གཅིག་ལ་བཤགས། ཕྲ་མ་སོགས་མི་དགེ་བ་དྲུག་པོ་ཕྱོགས་མཐུན་ཡིན་པས་ཡིད་ཀྱིས་བསྡམས་ནས་ལེགས་པར་སྲུངས་ཤིག །ཅེས་བརྗོད་དོ། །ཤིན་ཏུ་བསྡུ་ན་ཁྱོད་དགེ་བསྙེན་དུ་བསྒྲུབ་པ་ལ་བསམ་པ་འདི་བཞིན་གྱིས། ཁམས་གསུམ་འཁོར་བ་འདི་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མི་འདུག་པས། འཁོར་བའི་སྡུག་བསྔལ་ལས་གཏན་དུ་ཐར་བའི་སྐྱབས་གནས་དམ་པ། རྫོགས་པའི་སངས་རྒྱས་ཀྱི་གོ་འཕང་དམ་པ་སེམས་ཅན་ཐམས་ཅད་ཀྱི་དོན་དུ་ཐོབ་པ་ཞིག་བྱེད་དགོས། དེའི་ཆེད་དུ་བསླབ་གཞི་ལྔ་འཛིན་པའི་དགེ་བསྙེན་གྱི་སྡོམ་པ་བླངས་ལ། དུས་ད་ནས་མ་ཤིའི་བར་དུ་བསྲུང་སྙམ་པའི་བསམ་པ་ཁྱད་པར་ཅན་དུངས་པ་ཞིག་བསྐྱེད་ལ། འདིའི་རྗེས་ཟློས་མཛོད། བཙུན་པ་དགོངས་སུ་གསོལ་ནས། ལེགས་སོའི་བར་བརྗོད། (༡༨༥བ)
དགེ་བསྙེན་ཙམ་དུ་བསྒྲུབ་ན་འདིར་བསླབ་པ་དང་དུས་བསྒོ་བརྗོད། ཚིགས་ཕྱི་མ་བསྒྲགས་ནས་སྒྲུབ་ན་འདིར་བརྗོད་མི་དགོས་ཏེ། ཚིགས་ཕྱི་མ་ཕྱི་མའི་ཁོངས་སུ་སྔ་མ་སྔ་མའི་བསླབ་བྱ་དང་། དུས་བསྒོ་འདུ་བའི་ཕྱིར་རོ། དེ་དག་གིས་ནི་དགེ་བསྙེན་བསླབ་པ་དང་ཞེས་པའི་དོན་བསྟན་ཏོ། །གསུམ་པ་ལ། སྦྱོར་བ་དང་། དངོས་གཞིའི་ཆོ་ག་གཉིས། དང་པོ་ལ། དེ་ཚོ་ཁྲེལ་ཡོད་ཀྱི་བསམ་པ་བསྐྱེད་པའི་ཕྱིར་དགེ་འདུན་ལ་རབ་བྱུང་ཞུ་བ། རབ་བྱུང་གི་མེད་ན་མི་འབྱུང་བའི་རྒྱུ་བསྒྲུབ་པའི་ཕྱིར་མཁན་པོར་གསོལ་བ་གདབ་པ། ཆོས་འདི་པའི་ཆ་ལུགས་སུ་བསྒྱུར་བའི་ཕྱིར་དང་པོར་བྱ་བ་དང་གསུམ། དང་པོ་ནི། ཐོག་མར་མཁན་པོའི་གཡས་གཡོན་དུ་བསྒྲུབ་བྱའི་གདིང་བ་ནང་སྦྱར་བའི་བཞི་བལྟབ་བྱས་པ་དེ་ཉིས་བལྟབ་ཏུ་བྱས་པའི་ཁར་མཐང་གོས་བརྒྱད་བལྟབ་བྱས་པ་ཉིས་བལྟབ་བྱས། དེའི་སྟེང་དུ་བླ་གོས་བརྒྱད་བལྟབ་བྱས་པ་ཉིས་བལྟབ་བྱས་ཏེ་བཅག་མཚམས་མཁན་པོ་ཕྱོགས་སུ་བསྟན་ནས་བཞག །ལྷུང་བཟེད་སྟོང་པ་མིན་པ་འབྲུ་དཀར་གྱི་རིགས་ཅུང་ཟད་བླུག་པ་ཆུ་ཚགས་དང་བཅས་པ་བཤམས། མཁན་པོས་ལས་གྲལ་དེ་ན་གནས་པའི་རབ་ཏུ་བྱུང་བའི་ཆོ་ག་ལ་མཁས་པའི་དགེ་སློང་ཞིག་ལ། དགེ་སློང་དགེ་བའི་བཤེས་གཉེན་ཆེ་གེ་མོས། ཚེ་དང་ལྡན་པ་འདི་དགེ་འདུན་ལ་རབ་ཏུ་བྱུང་བ་ཞུ་བའི་གྲོགས་ལྡན་མཛོད་ཅིག་ཅེས་བསྐོ། དགེ་སློང་དེས་ཅི་ཚེ་དང་ལྡན་པ་འདི་བར་ཆད་ཀྱི་ཆོས་རྣམས་ཡོངས་སུ་དག་གམ་ཞེས་དྲི། མཁན་པོས། ཡོངས་སུ་དག་གོ་ཞེས་(༡༨༦ན)
ཁོ་ན་ཉིད་མཆི་ཡིན་གདའོ། །ཞེས་ལན་གདབ། དེ་ནས་དགེ་སློང་དེས་བསྒྲུབ་བྱ་དེ། དགེ་སློང་རྣམས་ལ་རྒན་རིམ་བཞིན་ཕྱག་གསུམ་གསུམ་འཚལ་དུ་གཞུག །ལོང་སྐབས་ཡོད་ན་གོང་བཞིན་དང་རྩོལ་བས་བསྒྲུབ་ཚེ་དགེ་འདུན་སྤྱིར་ཕྱག་གསུམ་བཙལ་བས་ཆོག་པ་ཐར་རྩེའི་ལས་ཆོག་སོགས་སུ་བྱུང་བས་མི་འགལ། དགེ་སློང་རེ་རེ་བཞིན་སྨོན་ལམ་འདེབས། ཚེ་དང་ལྡན་པ་འདིའི་རྒྱུད་ལ་རབ་ཏུ་བྱུང་བ་དགེ་ཚུལ་གྱི་སྡོམ་པ་མྱུར་དུ་ཐོབ་པར་གྱུར་ཅིག་ཅེས་བརྗོད་ཅིང་ནས་གཏོར་རོ། །འདི་ལྟར་བྱས་ན་ཕུན་སུམ་ཚོགས་པའི་ཡན་ལག་ཡིན་ཞིང་བུ་སྟོན་རིན་པོ་ཆེའི་ལས་ཆོག་སོགས་སུ་མི་གསལ་བས་མ་བྱས་ཀྱང་མི་འགལ། དེ་ནས་བསྒྲུབ་བྱ་ཙོག་ཙོག་བུར་འདུག་ཐལ་མོ་སྦྱོར་དུ་བཅུག་ནས་གོས་དཀར་ཅན་ཡིན་ན་དེས་ཚང་མིན་ན་རས་དཀར་ཞིག་གཡོགས་ཏེ། རང་རྒན་པའི་མཐའ་ལོགས་སུ་འགྲེངས་ཏེ་འདུད་པ་དང་བཅས་པས། ལས་ཆོག་ལ་ལར་ཕྱག་གསུམ་འཚལ་བར་བཤད་ཀྱང་ད་ལྟ་ལག་ལེན་ལ་ཐང་བཤད་ལན་གསུམ་རེ་བྱེད། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། ཁྱིམ་པ་གོས་དཀར་པོ་ཅན་སྐྲ་དང་ཁ་སྤུ་མ་བྲེགས་པ་ལས། ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བར་འཚལ་ཏེ། ཚེ་དང་ལྡན་པ་མིང་འདི་ཞེས་བགྱི་བ་འདི་རབ་ཏུ་འབྱུང་བར་འཚལ་ཞིང་། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་སྟེ། དེ་ཡང་(༡༨༦བ)
བར་ཆད་གྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་སྟེ་རབ་ཏུ་བྱུང་ངམ། དགེ་སློང་ཐམས་ཅད་ཀྱིས། གལ་ཏེ་ཡོངས་སུ་དག་ནའོ་ཞེས་བརྗོོད། མི་བརྗོད་ན་དེ་ལ་ཉེས་བྱས་སོ། །འདིར་ཞུ་བའི་དགེ་སློང་གིས་མིང་འདི་ཞེས་སྨོས་དགོས་ཏེ། རང་གི་མཁན་པོ་ཡིན་ན་དོན་གྱི་སླད་དུ་མཚན་ནས་སྨོས་ཏེ། མཁན་པོ་མིང་འདི་ཞེས་བགྱི་བ་ཞེས་བརྗོད། སློབ་དཔོན་ཡིན་ན་སློབ་དཔོན་མིང་འདི་ཞེས་བརྗོད། མཁན་པོ་དང་སློབ་དཔོན་མིན་པའི་ཆེས་རྒན་པའི་དགེ་སློང་ཡིན་ན་གནས་བརྟན་ཞེས་པའམ། ཡོངས་ཀྱི་དགེ་བའི་བཤེས་གཉེན་ཞེས་ཉེ་ཚིག་གིས་བརྗོད། བསྒྲུབ་བྱ་དེ་ཡང་གཉིས་ཡོད་ན་སྔར་འདི་ཞེས་པ་འདི་དག །དེ་ཡང་ཞེས་པ་དེ་དག་ཀྱང་། ཅི་དེ་ཞེས་པ། ཅི་དེ་དག་གསུམ་ཡོད་ན་འདི་རྣམས་དེ་རྣམས་ཀྱང་ཅི་དེ་རྣམས་ཞེས་དང་། ཁོ་ན་ཉིད་མཆི་ན་ཞེས་པ། ཁོང་དག་ཉིད་མཆི་ན། ཁོང་རྣམས་ཉིད་མཆི་ན་ཞེས་པ་རྣམ་དབྱེ་དང་། ཚིག་ཕྲད་བསྒྱུར་བ་ནི་གོང་འོག་ཐམས་ཅད་དུ་ཤེས་པར་བྱའོ། །འདི་དགེ་སློང་གཅིག་ཁོ་ནས་རབ་བྱུང་བསྒྲུབ་ན་ཞུ་མི་དགོས་ཏེ། ཞུས་པའི་དགོས་པ་མི་མཐུན་པ་སྤངས་ནས་མཐུན་པ་བསྒྲུབ་པའི་ཆེད་ཡིན་ལ། རང་ཉིད་ལ་མཐུན་མི་མཐུན་གྱི་བྱེད་པ་འགལ་བའི་ཕྱིར། དགེ་སློང་གཉིས་དང་གསུམ་ལ་ཞུ་ན། དགེ་འདུན་དུ་མ་ལོངས་པས་དགེ་སློང་བཙུན་པ་དག་གམ་རྣམས་སྙན་གསན་དུ་གསོལ། ཞེས་ཞུ་ཚིག་བསྒྱུར་བ། ཚིག་ཕྲད་བསྒྱུར་བའི་རུང་མཐུན་ལས་ཤེས་སོ། །གཉིས་པ་ནི། མཁན་པོ་ལ་ཕྱག་འཚལ་དུ་བཅུག །མདུན་དུ་ཙོག་ཙོག་པུར་ཐལ་མོ་སྦྱོར་དུ་བཅུག་ནས། ཁྱོད་རབ་ཏུ་བྱུང་བར་འདོད་པ་དེ། མདོ་རྩ་བར། རབ་ཏུ་འབྱུང་བ་དང་བསྙེན་པར་རྫོགས་པ་དེའི་ཕྱིར། དགེ་སློང་འགའ་ཞིག་མཁན་(༡༨༧ན)
པོ་ཉིད་དུ་གནས་པ་ལའོ། ཞེས་མཁན་པོ་ཉིད་དུ་གནས་པ་ལ་རབ་བྱུང་བསྙེན་རྫོགས་ཡོད་ཀྱི། མི་གནས་པ་ལ་མེད། དེའི་རྒྱུ་མཚན་སྔོན་གྱི་སྲིད་པ་ཐ་མ་པའི་གང་ཟག་སྨིན་པ་གསུམ་ཤས་ཆེ། སྒྲིབ་པ་གསུམ་ཤས་ཆུང་བས་ནད་དང་ཉེར་འཚེ་ལ་སོགས་པ་འབྱུང་བ་དཀོན། བྱུང་ཡང་སྨན་དང་ནད་གཡོག་ལ་སོགས་པ་རྙེད་སླ་བས། འཁྲིད་ཅིང་སྐྱོང་བར་བྱེད་པའི་མཁན་སློབ་ལ་བལྟོས་མི་དགོས་པས། ཚུར་ཤོག་ལ་སོགས་པའི་སྔོན་ཆོག་གིས་བསྙེན་པར་རྫོགས་པ་གསུངས། དུས་ཕྱིས་སྲིད་པ་ཐ་མ་པ་མ་ཡིན་པ་མཁན་སློབ་མེད་པར་རབ་ཏུ་བྱུང་བས། ལེགས་པར་མ་སྦྱངས་ཤིང་སྤྱོད་ལམ་རྒོད་བག་ཅན་དུ་གྱུར་པས། ཁྱིམ་པ་རྣམས་དང་། མུ་སྟེགས་ཅན་རྣམས་ཀྱིས་འཕྱ་བར་གྱུར་ཅིང་། དགེ་སློང་འགའ་ཞིག་ནད་གཡོག་མེད་པར་ཤི་བར་གྱུར་ནས། དེ་སྟོན་པའི་སྙན་དུ་གསོལ་བས། ངའི་ཉན་ཐོས་རྣམས་གཅིག་གིས་གཅིག་བསྡུ་བར་བྱ་བའི་ཕྱིར་དང་། ནད་པ་རྣམས་ལ་རིམ་གྲོར་བྱ་བའི་ཕྱིར། མཁན་པོ་དང་སློབ་དཔོན་དག་གིས་རབ་ཏུ་བྱུང་བ་དང་། བསྙེན་པར་རྫོགས་པར་གནང་ངོ་། །ཞེས་ད་ལྟར་གྱི་ཆོ་ག་བཅས་ལ་གནང་ངོ་ཟེར་ཀྱང་། ཅི་དགར་གནང་བའི་བསླབ་བྱ་མིན་གྱི་ངེས་པར་བསྒྲུབ་དགོས་པས་སྒྲུབ་པའི་བསླབ་བྱ་ཡིན་པས་མཁན་པོ་དགོས། མཁན་པོའི་ཁྱད་ཆོས་མདོར་བསྙེན་པར་རྫོགས་ནས་ལོ་བཅུ་མ་ལོན་པར་མཁན་པོ་ཉིད་དང་། གནས་ཉིད་དང་། མི་གནས་པར་འདུག་པར་མི་བྱའོ། །ཞེས་གསུངས་པས། བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་ཞིག་དགོས། ཡང་མདོ་ལས། འོག་ནས་འབྱུང་བ་དག་ལས་(༡༨༧བ)
ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ། །ཞེས་གསུངས་པས། ལྔ་ཕྲུགས་སུ་སྦྱར་བ་ཉི་ཤུ་རྩ་གཅིག་པོ་གང་རུང་དང་ལྡན་པ་ཞིག་དགོས། ཡང་མདོར། ས་གཞན་ན་གནས་པ་ཉི་ཤུ་རྩ་ལྔས་རབ་བྱུང་བསྙེན་རྫོགས་ཀྱི་མཁན་པོ་བྱར་མི་རུང་བར་བཤད་པས། ས་རང་བཞིན་དུ་གནས་པ། བྱེ་བ་ན་ཆོས་མིན་ཕྱོགས་སུ་སོང་པ་མིན་པ། སྨྱོན་པ་སོགས་མིན་པ། འགྲོ་བ་གཞན་དུ་གནས་པ་མིན་པ། མཚན་གྱུར་པ་མིན་པ་ཞིག་དགོས་པར་གསུངས། དེ་ལྟར་ཆོས་བདུན་ལྡན་ལ་གསོལ་བ་མ་བཏབ་ན་མཁན་པོར་མི་འགྱུར་བས། གསོལ་བ་བཏབ་ནས་ཁས་བླངས་པ་དང་ལྡན་པ་ཞིག་དགོས་པས་གསོལ་བ་འདེབས་དགོས། དེ་ལ་མཁན་པོའི་སྒྲ་དོན་ལེགས་སྦྱར་གྱི་སྐད་དུ། དྷ་ར། སནྡྷི། བིཀཱི་ར་ཎ་སོ་སོའི་སྔོན་དུ་ཉེ་བསྒྱུར་ཨུ་བ་བཞག་པས་ཨུ་པ་དྷ་ར་ཞེས་པ་ཕ་དང་བུའི་འདུ་ཤེས་ཀྱི་ཉི་ཚེ་བས་དམན་པའི་གནས་སུ་ལྷུང་བ་ལས་ཉེ་བར་འཛིན་པའི་དོན་ཨུ་བ་སནྡྷི་ཞེས་པ་དངོས་སུ་བསླབ་པ་རིན་པོ་ཆེ་ལ་ཉེ་བར་སྦྱོར། རྒྱུད་ནས་མི་གནས་པའི་མྱང་འདས་ལ་ཉེ་བར་སྦྱོར་བའི་དོན། ཨུ་པ་བི་ཀཱ་ར་ཎ་ཞེས་པ་དགག་སྒྲུབ་གནང་གསུམ་གྱི་བསླབ་པའི་གནས་ཉེ་བར་ལུང་འབོགས་པའི་དོན་ཡིན། མདོར་ན་ཟག་བཅས་འཁོར་བའི་ཆོས་ཐམས་ཅད་ལས་ངེས་པར་འབྱུང་བའི་རབ་བྱུང་དུ་སྒྲུབ་མཁན་མཛད་དུ་གསོལ་སྙམ་པ་གྱིས་ལ་ལད་མོ་མཛོད་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱིས། སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་བདག་རབ་ཏུ་དབྱུང་བར་བགྱིའོ་(༡༨༨ན)
སྔར་བཞིན་ལན་གསུམ་བཟླས་ལ། གསུམ་པའི་སྐབས་སུ་མཁན་པོར་གསོལ་བ་ཁས་བླངས་པ་ན་དེར་གྱུར་རོ། །ཞེས་གསོལ་བ་ཁས་བླངས་ན་མཁན་པོར་འགྱུར་བར་བཤད། འདིར་ཐ་མ་ལ་མཁན་པོའི་དོན་ཏོ། །ཞེས་པས་བརྗོད་པ་གསུམ་པའི་གསོལ་གྱི་ཡན་ཆད་ཆ་དང་པོ། མཛད་དུ་གསོལ་མན་ཆད་ཆ་གཉིས་པ་དེའི་མཇུག་ཏུ་མཁན་པོར་འགྱུར་ཞིང་། དེ་ནས་སློབ་དཔོན་ཞེས་མི་བརྗོད་པར་མཁན་པོ་ཞེས་བརྗོད་དགོས་པས། གསུམ་པའི་རྗེས་ཟློས་གྱིས་བྱས་ལ་གསུམ་པ་བྱ། མཇུག་ཏུ་ཐབས་ཡིན་ནོ། །ལེགས་སོ་བྱའོ། །མཁན་པོར་གསོལ་བ་བཏབ་པའི་བསླབ་བྱས་ཕ་བུའི་ཚུལ་གྱིས་མཁན་པོ་ལ་སྟོན་པའི་འདུ་ཤེས་བསྐྱེད་ནས་གུས་པར་བྱ་བ་ཡོན་དབུལ་བ། བསྙེན་བཀུར་བྱེད་པ། བྱ་བ་ཐམས་ཅད་དེ་ལ་ཞུས་ནས་བཀའ་བཞིན་བསྒྲུབ་པར་བྱ་སྟེ། དེ་ལས་འདས་ན་གསོལ་བ་བཏབ་པ་ལས་ཉམས་པའི་ཉེས་པར་འགྱུར་རོ། །ཤིན་ཏུ་བསྡུ་ན། ཁྱོད་རབ་ཏུ་བྱུང་བ་སྒྲུབ་པ་ལ་མཁན་པོ་ཞིག་དགོས་མཁན་པོ་ཡང་ཅི་རུང་རུང་གིས་མི་ཆོག་བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ། བཙུན་པ་བརྟན་པའི་ཡོན་ཏན་ལྔ་ཕྲུགས་སུ་སྦྱར་བ་ཉི་ཤུ་རྩ་གཅིག་གང་རུང་དང་ལྡན་པ་མཁས་ཤིང་ཕན་ཐོགས་ཀྱི་ཡོན་ཏན་ཏེ། བརྟན་མཁས་ཀྱི་ཡོན་ཏན་གཉིས་ལྡན་ཞིག་དགོས་པ་ཁོ་བོས་འགྲུབ་རུང་དུ་ཡོད་པས། སྔར་གྱི་དགེ་བསྙེན་བསྒྲུབ་པའི་སློབ་དཔོན་དེ་ལ་རབ་བྱུང་སྒྲུབ་པའི་མཁན་པོ་ཞུ་སྙམ་པ་གྱིས་ལ་ལད་མོ་མཛོད། སློབ་དཔོན་དགོངས་སུ་གསོལ་ནས་ལེགས་སོའི་བར་བྱའོ། གསུམ་པ་ནི། སྐྲ་དང་ཁ་སྤུ་འབྲེག་པའི་དགེ་སློང་ལ་དགེ་སློང་འདི་ཞེས་བྱ་བས་ཚེ་དང་ལྡན་(༡༨༨བ)
པ་འདིའི་གཙུག་ཕུད་འབྲེག་པ་ལ་སོགས་པའི་གྲོགས་ལྡན་མཛོད་ཅིག་ཅེས་བསྐོ། བསྐོས་པའི་དགེ་སློང་དེས་ཀྱང་མདུན་ནས་འདྲི་ཞིང་རྒྱབ་ནས་འབྲེག་ཅེས་པ་ལྟར། མཐེ་བོས་མཐེ་ཆུང་བཀུག་ལ་མནན། སོར་མོ་རྣམས་བརྐྱང་བ་ལག་པ་གཡོན་པའི་སྟེང་དུ་གཡས་པ་བཞག་པ་བསྒྲུབ་བྱའི་མགོ་བོར་བཞག་སྟེ། ཞེས་བྱུང་ཡང་ཐར་རྩེ་པའི་དེར་གཡོན་པས་བུམ་པ་དང་སྐྲ་གྲི་འཛིན་ཅིང་གཡས་པས་མཆོག་སྦྱིན་གྱི་ཕྱག་རྒྱ་བསྒྲུབ་བྱའི་སྤྱི་བོར་གཏུགས་ཏེ་ཞེས་བྱུང་བའི་ཕྱི་མ་འདི་ཉིད་འཇུག་པ་བདེ། ཅི་ཚེ་དང་ལྡན་པ་འདི་ཞེས་བྱ་བ་གཙུག་ཕུད་འབྲེག་པ་ལ་སྤྲོ་འམ། ཞེས་མདུན་ནས་དྲི་ཞིང་། བསྒྲུབ་བྱས་སྤྲོ་ལགས་ཞེས་ལན་བཏབ་པའི་རྗེས་སུ། རྒྱབ་ནས་བྲེགས་ནས་མཁན་པོ་ལ་ཕུལ། མཁན་པོས་དཀར་ཕྱོགས་ལ་མངོན་པར་དགའ་བའི་ལྷ་རྣམས་དགྱེས་པ་ཆེན་པོ་མཛད་དུ་གསོལ། ཞེས་དཀོན་མཆོག་ཕྱོགས་ལ་གཏོར་རོ། །དེ་ནས་གྲང་དུས་ཡིན་ན་ཆུ་དྲོན་མོ། དྲོ་དུས་ཡིན་ན་ཆུ་གྲང་མོས་ཁྲུས་བྱེད་དུ་གཞུག །འགྲུབ་ན་ལུས་རིལ་པོ་བཀྲུ། རྒས་པའམ། ན་བའམ། ཆུ་མ་འབྱོར་ན་ཡན་ལག་ལྔ་ཁྲུས་བྱས་ལ། མཁན་པོའི་ཞབས་གཉིས་ལ་གཏུགས་པའི་ཕྱག་གསུམ་བྱས་ཏེ། འཚལ་ལུགས་གདན་གྱི་རྩ་བར་མགོ་བོ་གཏུགས་པའི་ཡར་ལངས་པའི་ཞོར་ལ་མཁན་པོའི་ཞབས་ལ་རེག་པ་དེ་འདྲ་ལན་གསུམ་བྱས་ནས། མདུན་དུ་ཙོག་པུར་འདུག་པའི་ཕྲག་པ་གཡོན་པ་ལ་གདིང་བ། མཐང་གོས། བླ་གོས་གསུམ་ནང་ལ་བརྒྱད་བལྟབ་ཏུ་བཀལ་ནས། ཆོས་གོས་ཀྱི་སྣེ་མོ་བསྒྲུབ་བྱའི་ལག་པ་གཡོན་པའི་ཁར་བཞག །གཉིས་ཀའི་ལག་པ་གཡས་པས་སྟེང་ནས་བཀབ་ལ། འདི་སྟོད་དུ་རྒྱུན་དུ་གྱོན་པའི་ཆོས་(༡༨༩ན)
གོས་བླ་གོས་ཞེས་བྱ་བ། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་གྱུར་པ་དགེ་སྦྱོང་གི་དྲན་པ་གསོ། སྦྲང་བུ་དང་། ཤ་སྦྲང་དང་། རླུང་དང་ཉི་མ་ལ་སོགས་པའི་ཚ་གྲང་གི་རེག་པ་ལས་སྐྱོབ་པའི་གོས་སུ་གནང་བ་ཡིན་པས་དུས་རྒྱུན་དུ་སྟོད་གཡོགས་འདི་ལྟ་བུ་རེ་འཆང་སྙམ་པ་གྱིས་བྱས་ལ། ཕྲག་པ་གཡས་ལ་བཞག །མཐང་གོས་ལའང་སྔར་བཞིན་བྱས་ལ། འདི་སྨད་ཀྱི་ནང་དུ་གྱོན་པར་བྱེད་པའི་མཐང་གོས་ཞེས་བྱ་བ་སྨད་གཅར་བ་དང་། ངོ་ཚ་བའི་གནས་ལས་སྐྱོབ། སྦྲང་བུ་ལ་སོགས་པའི་རེག་པ་བསྲུང་། ཁྱིམ་པ་དང་མུ་སྟེགས་ཅན་ལས་རྟགས་ཁྱད་པར་དུ་འགྱུར། དགེ་སྦྱོང་གི་དྲན་པ་གསོ་བའི་གོས་སུ་གནང་བ་ཡིན་པས། དུས་རྒྱུན་དུ་སྨད་གཡོགས་འདི་ལྟ་བུ་རེ་འཆང་སྙམ་པ་གྱིས། རྒྱ་གར་ན་རུང་བའི་ཚོན་གསུམ་ལ་ཁ་དོག་ངན་པར་བྱེད་པས། རྒྱགས་པ་དང་དྲེགས་པ་འཇོམས་པའི་དོན་ཡིན་ཞིང་། སྟོན་པས་ཀྱང་སྟོད་གཡོག་སྨད་གཡོགས་འདི་ལྟ་བུ་བསྣམས་ནས་འདིའི་ལམ་ལ་བསླབས་ཤིང་སངས་རྒྱས་ནས། རྗེས་འཇུག་རྣམས་ལའང་གོས་འདི་ལྟ་བུ་གནང་བ་ཡིན་པས། སྟོད་གཡོགས་སྨད་གཡོགས་འདི་ལྟ་བུ་གྱོན་ལ། སེམས་དུལ་བ་དང་ཞི་བར་བྱེད་དགོས་པ་ཡིན་བྱས་ལ། གཡས་སུ་སྤོ།ལྷུང་བཟེད་ཀྱི་ནང་དུ་ནས་འབྲུ་ལ་སོགས་པའི་དངོས་པོ་བླུགས་ལ། མཁན་སློབ་གཉིས་ཀའི་ལག་པ་གཡོན་པ་འོག་ཏུ་བྱས། གཡས་པས་སྟེང་ནས་བཟུང་ལ། འདི་ལྷུང་བཟེད་ཅེས་བྱ་བ་ཁྱིམ་པའི་ཁ་ཕོར། མུ་སྟེགས་ཀྱི་སློང་ཕོར། རབ་བྱུང་དམན་པ་གཞན་ལས་སྣོད་སྤྱད་ཀྱི་རྟགས་ཁྱད་པར་(༡༨༩བ)
ཅན་དུ་གྱུར་པ་ཡིན། འདི་ཟས་ཀྱིས་འགེངས་པ་བཞིན་དུ། རང་གི་ཤེས་རྒྱུད་ཡོན་ཏན་གྱིས་འགེངས། འདིའི་ནང་ནས་ཟས་ལ་ལོངས་སྤྱོད་པ་བཞིན་དུ་ཆོས་ལ་ལོངས་སྤྱོད། མཐའ་གཉིས་སྤངས་པའི་བསོད་སྙོམས་སྤྱོད་པའི་སྣོད་དུ་སྟོན་པས་གནང་བ་ཡིན་པས། དུས་རྒྱུན་དུ་སྣོད་སྤྱད་འདི་ལྟ་བུ་འཆང་སྙམ་པ་གྱིས། འདིང་བ་ལ་འཆང་ལུགས་སྔར་བཞིན་བྱས་ལ། འདི་གདིང་བ་བྱ་བ་ཁྱིམ་པའི་དཀར་པོ། གང་ཟག་གི་ཁྲ་བོ་ཕལ་ཆེར་མ་ཉམས་པ་དང་། དགེ་འདུན་གྱི་རྩྭའི་གདན་མ་གཏོགས་པ་གནས་མལ་ལ་ལོངས་སྤྱོད་པའི་དུས་སུ། འདིས་བསྐྱབས་ནས་ལོངས་སྤྱོད་དགོས་པ་ཡིན། ཆུ་ཚགས་གཏད་ལ་འདི་ཆུ་ཚགས་བྱ་བ་སངས་རྒྱས་ཀྱི་བསྟན་པ་སྙིང་རྗེས་རབ་ཏུ་ཕྱེ་བ་ཡིན་ཞིང་། སོ་སོ་ཐར་པའི་སྡོམ་པ་གཞན་ལ་གནོད་པ་གཞི་དང་བཅས་པ་ལས་ལྡོག་པ་ཡིན་པས། སེམས་ཅན་ཐམས་ཅད་ལ་གནོད་པ་སྤང་དགོས། ཁྱད་པར་དུ་ཆུ་འདི་འབྲེལ་ཆེ་འབྱུང་ཉེ། ནང་དང་ནུབ་ཏུ་ཆུ་ལ་ལོངས་སྤྱད་དགོས་པས་ཆུ་ཚགས་འདི་འདྲ་རེ་འཆང་ཞིང་། དེས་མཚོན་ནས་ཡོ་བྱད་གང་ལ་ཡང་སྲོག་ཆགས་ལ་མ་གནོད་པ་བྱེད་དགོས་སོ། །ཞེས་བརྗོད་ལ་སྦྱིན་ནོ། གྲོགས་ལྡན་གྱིས་མཐང་གོས་ཉིས་བལྟབ་བྱས་པ་དེ་བསྒྲུབ་བྱའི་རྒྱབ་ལ་བསྐོན། དེའི་སྟེང་དུ་བླ་གོས་བརྐྱང་པ་བསྐོན་ཏེ། དེ་ནས་མཁན་པོས་གཡས་གཡོན་གྱི་སྣེ་མོ་མདུན་དུ་ལྷན་ཅིག་བྱས་ཐལ་མོ་སྦྱོར་དུ་བཅུག་སྟེ། དེ་ནས་མཁན་པོས་བསྒྲུབ་བྱའི་མགོར་མེ་ཏོག་བཞག་ལ། དགེ་འདུན་རྣམས་ཀྱིས་སྨོན་ལམ་གནང་བ་ཞུ་བྱས་ལ། དགེ་འདུན་རྣམས་ཀྱིས་མེ་ཏོག་འཐོར་བ་དང་བཅས་ཏེ། ཐར་པའི་རྒྱལ་མཚན་བརྟན་པར་གྱུར་ཅིག །ཚངས་(༡༩༠ན)
པར་སྤྱོད་པ་ཚེའི་མཐར་ཕྱིན་པར་གྱུར་ཅིག །ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པར་གྱུར་ཅིག །སྐྱེ་བ་དང་ཚེ་རབས་ཐམས་ཅད་དུ་རབ་ཏུ་བྱུང་བ་དགེ་ཚུལ་གྱི་སྡོམ་པ་རྣམ་པར་དག་པ་དང་ལྡན་པར་གྱུར་ཅིག །ཅེས་བརྗོད་ལ་བསྐོན། སྨད་གཡོགས་སྐྱོན་དྲུག་དང་བྲལ་ཞིང་། ཡོན་ཏན་ཟླུམ་པོར་བགོ་བ། སྟོད་གཡོགས་སྐྱོན་གཉིས་དང་བྲལ་ཞིང་ཡོན་ཏན་ཟླུམ་པོར་བགོ་བ་ལ་སློབ། ཞར་ལ་མཚན་མ་ཚོར་བར་བརྟག གཞན་ལ་འཆོལ་ན་ཆེ་གེ་མོས་འདིའི་གོས་ཚགས་ལེགས་པར་སློབ་པ་དང་། བདག་གི་བྱ་བ་ཡང་སྒྲུབས་མཛོད་ཅིག་ཅེས་བསྒོ། དེས་ཀྱང་སྔར་ལྟར་གྱོན་ལུགས་ལེགས་པར་སློབ་ཅིང་། ཞར་ལ་མཚན་གཉིས་པ་ལ་སོགས་པ་ཡིན་མ་ཡིན་བརྟགས་ལ། མིན་ན་བར་ཆད་དང་མི་ལྡན་པ་གདའ་ལགས་ཞེས་བརྡ་སྤྲོད། དེ་རྣམས་ཀྱི་ཚེ་དགེ་སློང་གཞན་ཞིག་གིས་བསྒྲུབ་བྱའི་གདིང་བ་ཉིས་བལྟབ་བྱས་པའི་གླེགས་བུ་ཕྱེད་པ་མདུན་ཕྱོགས་ལ་འོང་བ་བྱས་ཏེ་བཏིང་བའི་སྟེང་བསྒྲུབ་བྱ་འགྲེངས་ནས་བཞག་གོ །གཉིས་པ་ན་སྒྲུབ་བྱ་དེ་སྟོན་པའི་སྐུ་འདི་ལ་ཤཱཀྱ་སེང་གེ་དངོས་ཡིན་སྙམ་པ་གྱིས་ལ་ཕྱག་གསུམ་དང་། མཁན་པོ་ལ་ཕྱག་གསུམ་འཚལ་དུ་བཅུག །མདུན་དུ་ཙོག་ཙོག་པུར་ཐལ་མོ་སྙིང་གར་སྦྱར་ནས་འདུག་ཏུ་བཅུག་ལ། ཁྱེད་རབ་ཏུ་འབྱུང་བའི་བསམ་པ་སྐྱེས་པ་དེ་ལེགས། དེའི་རྒྱུ་མཚན། དགའ་བོ་རབ་ཏུ་བྱུང་བའི་མདོ་ལས། ཁྱིམ་པ་རྣམས་ནི་མེའི་འོབས་ན་གནས་པ་ལྟ་བུ། རབ་ཏུ་བྱུང་བ་རྣམས་ནི་བསིལ་བའི་ཁང་པ་ན་གནས་པ་ལྟ་བུའོ། །ཞེས་པ་ལ་སོགས་པ་གསུངས་ཤིང་། ཆོ་འཕྲུལ་བསྟན་པའི་མདོ་ལས། འདོད་པ་དག་(༡༩༠བ)
ནི་རབ་ཏུ་བསྟེན་བྱེད་ཅིང་། །བུ་དང་ཆུང་མ་དག་ལ་སྲེད་བསྐྱེད་ནས། སྣང་བར་བྱ་བའི་ཁྱིམ་ལ་བརྟེན་པ་དེ། །བླ་མེད་བྱང་ཆུབ་དམ་པ་གཞར་མི་ཐོབ། །གང་དག་འདོད་པ་ལྕི་སྐམ་མེ་བཞིན་སྤོངས། །བུ་དང་ཆུང་མ་དག་ལ་སྲེད་སྤངས་ནས། ཁྱིམ་གྱིས་སྐྲག་སྟེ་ཁྱིམ་ནས་མངོན་བྱུང་བ། །དེ་དག་བྱང་ཆུབ་མཆོག་འདི་རྙེད་མི་དཀའ། །གང་དག་ཁྱིམ་ན་གནས་པར་བྱེད་བཞིན་དུ། །བྱང་ཆུབ་དམ་པ་མཆོག་འདི་ཐོབ་པ་ཡི། །སངས་རྒྱས་གང་ཡང་སྔོན་ཆད་མ་བྱུང་སྟེ། །མ་འོངས་པ་ནའང་མི་འབྱུང་གནས་པ་མེད། །རྒྱལ་སྲིད་མཆིལ་མའི་ཐལ་བ་བཞིན་སྤངས་ནས། །དབེན་པར་དོང་སྟེ་དགོན་པར་གནས་བྱེད་པ། །ཉོན་མོངས་སྤངས་ཏེ་བདུད་ནི་བཅོམས་ནས་སུ། །བྱང་ཆུབ་རྡུལ་མེད་འདུས་མ་བྱས་འཚང་རྒྱ། །ཞེས་གསུངས། དེ་ཡང་རབ་བྱུང་དམན་པ་མུ་སྟེགས་ཀྱིས་རབ་ཏུ་བྱུང་བ་མ་ཡིན་པ། ཆོ་གའི་ཟུར་དུ་ཤཱཀྱ་སེང་གེ་ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་རྗེས་སུ་བདག་རབ་ཏུ་འབྱུང་སྟེ། ཞེས་འབྱུང་བས། འོ་སྐོལ་གྱི་སྟོན་པས་འཁོར་ལོ་སྒྱུར་བའི་རྒྱལ་སྲིད་འབྱོར་པ་དང་ཁབ་སྤངས་ནས། ཉིད་ཀྱི་དབུ་སྐྲ་ཉིད་ཀྱིས་བཅད་རིན་ཐང་མེད་པའི་གོས་དང་། ངུར་སྨྲིག་གི་གོས་བརྗེས་ནས་གསོལ་ཏེ། རབ་ཏུ་བྱུང་བ་བཞིན་དུ་རབ་ཏུ་འབྱུང་བ་ཡིན། རབ་ཏུ་བྱུང་བའི་དོན་ནི། སཾ་སྐྲྀ་ཏའི་སྐད་ལ། པྲ་བརྫིི་ཏ་ཞེས་རབ་ཏུ་སྤངས་པའི་དོན་ཡིན། དེ་ཟག་བཅས་འཁོར་བའི་དངོས་པོ་ཐམས་ཅད་ལས་རྒྱབ་ཀྱིས་ཕྱོགས་ཤིང་སྤངས་པ་ཡིན་པས། དེ་ལ་བརྗེ་བ་གསུམ་དགོས། རྟགས་ཆ་ལུགས་བརྗེ་བ་ཁྱིམ་པའི་རྟགས་ཆ་ལུགས་སྤངས། རབ་ཏུ་བྱུང་བའི་རྟགས་ཆ་(༡༩༡ན)
ལུགས་སུ་བསྒྲུབས་པས་ཚངས། བསམ་པ་བརྗེ་བ་ནི་འཇིག་རྟེན་པ་རྣམས་ཀྱི་འདོད་པ་བསྟེན་པའི་བསམ་པ་ལ་ཉེས་དམིགས་ལྔ་ཡོད་པས། དེ་སྤངས་ནས་འཁོར་བའི་ཉེས་དམིགས་ཤེས་ནས་འཁོར་བ་ལ་ཡིད་འབྱུང་། མྱང་འདས་ཀྱི་ཕན་ཡོན་མཐོང་ནས་མྱང་འདས་ཐོབ་པར་འདོད་པའི་དད་པ་དགོས། དེ་ནས་འཁོར་བ་ལ་ཡིད་འབྱུང་བ་དང་ལྡན་པའི་སྒོ་ནས། འཁོར་བའི་དུཿཁ་ལས་ཐར་བར་བྱེད་པའི་སྐྱབས། དཀོན་ཅོག་གསུམ་ལ་སྟོན་པ་དང་སྐྱབས་དངོས་དང་། ཟླ་གྲོགས་ཞུས་ནས། མྱ་ངན་ལས་འདས་པ་བསྒྲུབ་སྙམ་པ་དགོས་ཤིང་། འདི་ཐེག་པ་ཐུན་མོང་བ་ཡིན་པས། མྱང་འདས་གསུམ་པོ་གང་རུང་དུ་སེམས་བསྐྱེད་ཀྱང་། ངེས་འབྱུང་གི་བསམ་པའི་གོ་ཆོད་མོད། འོན་ཀྱང་ད་རེས་འདིར་བསམ་པ་རབ་བསྐྱེད་དེ། སེམས་ཅན་ཐམས་ཅད་ཀྱི་དོན་དུ་མི་གནས་པའི་མྱང་འདས་སངས་རྒྱས་ཀྱི་གོ་འཕང་ཐོབ་པར་བྱའོ། །དེའི་ཕྱིར་དུཿཁ་ཐམས་ཅད་ཀྱི་གནས་སུ་གྱུར་པའི་ཁྱིམ་གྱི་གནས་ཡོངས་སུ་སྤངས་ཏེ། ཁྱིམ་པའི་རྟགས་ཆ་ལུགས་རྣམས་སྤངས། རབ་ཏུ་བྱུང་བའི་རྟགས་ཆ་ལུགས་ཡང་དག་པར་བླངས་ནས། ཇི་སྲིད་མ་ཤིའི་བར་དུ་བསྲུང་སྙམ་པ་གྱིས། དེ་རྣམས་སྤོས་པའི་བརྗེད་ཐོ་རུ་མིང་སྤོ་བ་ཡིན་པས། སྡེ་པའི་མིང་གི་མཐའ་ཅན། དཔལ་དང་། འོད་ཟེར་དང་། གྲགས་པ་དང་། བཟང་པོའི་མཐའ་ཅན་ནམ་མཁན་པོའི་མིང་གི་མཐའ་ཅན་དུ་སྤོས་ལ། མིང་དེ་ནས་སྨོས་ལ་འདིའི་རྗེས་ཟློས་ཀྱིས་བྱས་ལ། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་(༡༩༡བ)
དུ་རྐང་གཉིས་རྣམས་ཀྱི་མཆོག སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱ་སེང་གེ །ཤཱཀྱའི་རྒྱལ་པོ། གཙོ་བོ་དེ་རབ་ཏུ་བྱུང་བའི་རྗེས་སུ་བདག་རབ་ཏུ་འབྱུང་སྟེ། ཁྱིམ་པའི་རྟགས་སྤོང་ངོ་། །རབ་ཏུ་བྱུང་བའི་རྟགས་ཡང་དག་པར་ལེན་ཏོ། །ལན་གསུམ་བཟླས། དེ་རབ་བྱུང་དུ་བསྒྲུབ་པའི་ཐབས་ཡིན་ནོ། ཁྱོད་རང་ལེགས་སོ་གྱིས་བྱ། བསྒྲུབ་བྱས་ལེགས་སོ་བྱའོ། །དེ་ལྟར་རབ་ཏུ་བྱུང་ནས་ཁྱིམ་པའི་རྟགས་སྤོང་བར་སྨྲས་པས། དེ་ཉམས་པའི་ཕྱོགས་མཐུན་དཀར་པོ་དང་། ཁ་ཚར་ཅན་དང་། ཐམས་ཅད་ཁ་དོག་གཅིག་པ་དང་། ཚོན་ཆེན་དང་། སྐྲ་དང་ཁ་སྤུ་རིང་པོར་འཇོག་པ་དང་། འབྲེག་པའི་ཕྱོགས་མ་ཡིན་པ་བྲེག་པ་དང་། ཁུར་འཁུར་བ་ལ་སོགས་ཁྱིམ་པའི་སྤྱོད་ལམ་རྣམས་སྤོང་བ་དང་། རབ་ཏུ་བྱུང་བའི་རྟགས་ལེན་པར་ཁས་བླངས་པ་དེ་ཉམས་པའི་ཕྱོགས་མཐུན་མུ་སྟེགས་ཅན་གྱི་རྟགས། སྤྱོད་ལམ། བརྟུལ་ཞུགས་དང་། བཀའ་ཐུབ་རྣམས་སྤངས་ནས། རབ་ཏུ་བྱུང་བའི་གཙང་སྦྲ་དང་། ཆ་བྱད་དང་། བརྟུལ་ཞུགས་ལ་གནས་པར་བྱའོ། །ཤིན་ཏུ་བསྡུ་ན། མཁན་པོས་ཆོས་གོས། ལྷུང་བཟེད་སོགས་བྱིན་པ་བསྐོན་པའི་རྗེས་སུ། འོ་ན་ཁྱོད་རབ་ཏུ་བྱུང་བར་འདོད་པ་ཤིན་ཏུ་ལེགས་པ་ཡིན། ལེགས་པའི་རྒྱུ་མཚན། མདོ་ལས། ཁྱིམ་པ་དང་རབ་ཏུ་བྱུང་བ་གཉིས་ལ་ཁྱད་པར་ཤིན་ཏུ་ཆེ་བར་གསུངས་ཏེ། དུས་གསུམ་(༡༩༢ན)
གྱི་སངས་རྒྱས་ཐམས་ཅད་རབ་ཏུ་བྱུང་བའི་རྟེན་ཁོ་ནས་སངས་རྒྱས་པ་ཡིན་གྱི། ཁྱིམ་པའི་རྟེན་ལ་སངས་རྒྱས་པ་སུ་ཡང་མེད། ཁྱད་པར་ཁམས་གསུམ་གྱི་སེམས་ཅན་ཐམས་ཅད་ཀྱིས་དུས་བསྐལ་པའི་བར་དུ། རང་གི་བུ་དང་ཆུང་མ་སོགས་སྦྱིན་པར་བཏང་བའི་བསོད་ནམས་ལས། རབ་ཏུ་བྱུང་བར་འདོད་པའི་བསམ་པ་དག་པས་དགོན་པར་གོམ་པ་གཅིག་བོར་བ་བསོད་ནམས་ཆེ་བ་སོགས་མཐའ་ཡས་པ་གསུངས། དེ་ལྟ་བུའི་རབ་བྱུང་བསྒྲུབ་པ་ལ། བརྗེ་བ་གསུམ་དགོས་པས་རྟགས་ཆ་ལུགས་བརྗེ་བ་ལེགས་པར་གྲུབ་པ་ཡིན། བསམ་པ་བརྗེ་བ་ཁྱིམ་པའི་ཉེས་དམིགས་དང་། རབ་ཏུ་བྱུང་བའི་ཕན་ཡོན་དྲན་པར་བྱས་ནས། ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རབ་ཏུ་བྱུང་བའི་ཚུལ་ཁྲིམས་རྣམ་པར་དག་པ་བླངས་ཏེ། ཇི་སྲིད་མ་ཤིའི་བར་དུ་བསྲུང་སྙམ་པའི་བསམ་པ་ཁྱད་པར་ཅན་དུང་པ་ཞིག་བསྐྱེད་མཛོད། དེ་དག་མི་བརྗེད་པའི་བརྡར་མིང་སྤོ་བ་ཡིན་པས། ཁྱོད་རང་མིང་འདི་ཞེས་བྱ་བ་གྱིས་ལ། མིང་དེ་ནས་སྨོས་ཏེ་འདིའི་རྗེས་ཟློས་མཛོད། མཁན་པོ་དགོངས་སུ་གསོལ་ནས། ལེགས་སོའི་བར་བྱ། འདིའི་བསླབ་བྱ་ལ་ཁྱིམ་པའི་རྟགས་སྤངས་ཏེ། རབ་ཏུ་བྱུང་བའི་རྟགས་ཆ་ལུགས་དང་ལྡན་པ་མཁན་པོ་ལ་གུས་པ་སོགས་བྱེད་དགོས་སོ། །ཞེས་བརྗོད་པར་བྱའོ། །དེ་དག་གིས་ནི་ཞུ་དང་མཁན་པོ་དང་པོ་དང་། རབ་བྱུང་ཞེས་པའི་དོན་ལེགས་པར་བཤད་ཟིན་ཏོ། །
དགེ་ཚུལ་དུ་བསྒྲུབ་པའི་དངོས་གཞིའི་ཆོ་ག་སོགས་བཤད་པ།
ད་ནི་གཉིས་པ་དགེ་ཚུལ་དུ་བསྒྲུབ་པའི་དངོས་གཞིའི་ཆོ་ག་བརྗོད་ན། ཁྱད་ཆོས་བཅུ་གཅིག་དང་ལྡན་པའི། །འདུལ་འཛིན་སློབ་དཔོན་མཁས་པ་ཡིས། །དགེ་ཚུལ་དོན་གཉེར་བསྒྲུབ་བྱ་ལ། །སྡོམ་པ་སྐྱེ་དང་གནས་པ་དང་། །གནས་པ་ཁྱད་པར་འགྱུར་བ་དང་། །རྟེན་ཉིད་མཛེས་པར་བྱེད་པ་ཡི། །འགལ་རྐྱེན་བར་ཆད་བཞི་བྲལ་དང་། །ཡུལ་རྒྱུད་རྟགས་དང་བསམ་པ་དང་། །ཆོ་ག་མཐུན་པའི་རྐྱེན་ལྔ་པོ། །ཚིག་དོན་གསལ་བར་བརྡ་སྤྲད་དེ། །དགེ་ཚུལ་ཉིད་དུ་ཉེ་བར་བསྒྲུབ། །དེ་ལྟར་བཤད་པའི་རྒྱུ་ཚོགས་ལས། །འགལ་རྐྱེན་བར་ཆད་བཞི་བྲལ་དང་། །མཐུན་རྐྱེན་དང་པོ་གསུམ་པོ་ཡི། །བཤད་པ་བཏང་སྙོམས་གྱུར་ཀྱང་སླའི། །ངེས་འབྱུང་སྡོམ་པ་སྐྱེ་བ་ལ། །མེད་དུ་མི་རུང་གཅེས་པའི་ཆོས། །རྒྱུ་ཡི་ཀུན་སློང་ཐོབ་འདོད་དང་། །དུས་ཀྱི་ཀུན་སློང་ཐོབ་ཤེས་དང་། །འགལ་རྐྱེན་བར་ཆད་བཞི་བྲལ་དང་། །མཐུན་རྐྱེན་ཕུན་ཚོགས་སུམ་ལྡན་དང་། །ངེས་འབྱུང་བསམ་པའི་གསལ་འདེབས་ཏེ། ཁྱད་ཆོས་ལྔ་དང་ལྡན་པ་ཡི། །བསམ་པ་མཐུན་པའི་རྐྱེན་ཉིད་དང་། །སྡོམ་པ་འབོགས་བྱེད་ཆོ་གའི་ཚིག །འཁྲུལ་མེད་ཆོ་ག་མཐུན་པའི་རྐྱེན། །ཕུན་ཚོགས་བསྟན་པ་འཕེལ་རྐྱེན་དང་། །བསྒྲུབ་བྱ་ཉིད་ལ་ཕན་སེམས་ཀྱི། །སྙིང་རྗེ་དྲག་པོས་ཀུན་བླངས་ཏེ། །བསྒྲུབ་བྱའི་བློ་ཡུལ་འཆར་བདེ་བ། །བཏང་སྙོམས་མ་ཤོར་གཅེས་སྤྲས་སུ། །ནན་ཏན་མཛད་པ་གནད་ཀྱི་དོན། །ཚུལ་འདིས་ཐོག་མཐའ་རྣམས་ཀྱི་ཡང་། །སྡོམ་པའི་སྐྱེ་ཚུལ་མཚོན་པར་བྱ། །དགེ་ཚུལ་ཉིད་དུ་སྒྲུབ་པ་ཡི། །དངོས་གཞིའི་ཆོ་གའི་ཁོག་ཕུབས་སོ། །དེ་ཡང་ཅུང་ཟད་བཤད་ན། །མཁན་པོས་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་(༡༩༣ན)
དགེ་སློང་ཆོས་བཅུ་གཅིག་དང་ལྡན་ཞིང་། དགེ་ཚུལ་དུ་སྒྲུབ་པའི་ཆོ་ག་ལ་མཁས་པ་ཞིག་ལ། མང་དུ་ཐོས་པའི་འདུལ་བ་འཛིན་པ་ཆེན་པོ་དགེ་སློང་ཆེ་གེ་མོ་ཞེས་བྱ་བས། ཚེ་དང་ལྡན་པ་འདི་ཉིད་ལ་དགེ་ཚུལ་གྱི་སྡོམ་པ་རྣམ་པར་དག་པ་ཞིག་བཀས་གནང་བར་ཞུ། ཞེས་བརྗོད་ལ་གཏད། དེས་ཀྱང་ཅི་ཚེ་དང་ལྡན་པ་འདིའི་བར་ཆད་ཀྱི་ཆོས་རྣམས་ཡོངས་སུ་དག་གམ། ཞེས་དྲི། མཁན་པོས་ཡོངས་སུ་དག་གོ་ཞེས་ཁོ་ན་ཉིད་མཆི་ཡིན་གདའོ་ཞེས་ལན་བཏབ། དེ་ནས་སློབ་དཔོན་གྱིས་བསྒྲུབ་བྱ་དེ་སྟོན་པའི་སྐུ་དང་། སློབ་དཔོན་རང་ལ་ཕྱག་གསུམ་གསུམ་འཚལ་དུ་བཅུག །མདུན་དུ་ཙོག་ཙོག་པུར་འདུག་སྟེ་ཐལ་མོ་སྙིང་གར་སྦྱོར་དུ་བཅུག་ནས། ཁྱོད་དགེ་ཚུལ་གྱི་སྡོམ་པ་ལེན་པ་ལ། དགག་པའི་ཚུལ་གྱི་འགལ་རྐྱེན་བར་ཆད་བཞི་སྤངས་པ། སྒྲུབ་པའི་ཚུལ་གྱིས་མཐུན་རྐྱེན་ལྔ་ཚང་བ་ཞིག་དགོས་པ་ལ། འགལ་རྐྱེན་སྡོམ་པ་སྐྱེ་བ་དང་། གནས་པ་དང་། ཁྱད་པར་དུ་འགྱུར་བ་དང་། མཛེས་པ་ལ་བར་དུ་གཅོད་པ་སྟེ་བཞི་མེད་པ་དགོས་ཏེ། མཁན་པོ་བས་བར་ཆད་དྲིས། ཁྱོད་རང་གིས་ལན་བཏབ་པས་དག་པར་རྟོགས་པས་གྲུབ་པ་ཡིན། མཐུན་རྐྱེན་ལ་ཡུལ་དང་། རྒྱུད་དང་། རྟགས་དང་། བསམ་པ་དང་། ཆོ་ག་མཐུན་པའི་རྐྱེན་དང་ལྔ་ལས། དང་པོ་ཡུལ་མཐུན་པའི་རྐྱེན་ནི། སྐྱབས་འགྲོའི་ཡུལ་དུ་གྱུར་པའི་དཀོན་ཅོག་གསུམ་འགོག་ལམ་གྱི་སྟེང་ནས་འཇོག་པས། དེ་ལ་ཡིད་ཆེས་ཀྱི་དད་པ་དང་ལྡན་པ་ཞིག་དགོས། ཀུན་རྫོབ་བརྡར་མཚོན་པའི་དཀོན་ཅོག་གསུམ། སངས་རྒྱས་སྟོན་པའི་སྐུ་གཟུགས་རབ་ཏུ་བྱུང་བའི་ཆ་ལུགས་ཅན་(༡༩༣བ)
དངོས་སུ་བཞུགས་པ་ཞིག་དགོས་པ་ཚང་། ཆོས་ལུང་གི་ཆོས་ལས་ཀྱི་ཆོ་ག་འདི་ན་བཞུགས་པ་འདི་ཉིད་ཀྱིས་ཚང་། དམ་པའི་ཆོས་མ་ནུབ་པ་ཞིག་དགོས་ན་དེའང་ཚང་། དགེ་ཚུལ་གྱི་སྡོམ་པ་གང་ཟག་ལས་སྐྱེ་བས། དགེ་འདུན་མེད་ཀ་མེད་མིན་ནའང་། ཞུ་བའི་དུས་སུ་དགེ་འདུན་ལོངས་པས་དགེ་འདུན་ཡང་ཚང་། མཁན་པོ་ཆོས་བདུན་ལྡན་ལ་མཁན་པོར་གསོལ་བ་བཏབ་པས་ཁས་བླངས་པ་ཞིག་དགོས་ན། མཁན་པོ་བ་ཡོན་ཏན་ཕུན་སུམ་ཚོགས་པ་དང་ལྡན་པར་བཞུགས་ཤིང་། དེ་ལ་ཁྱོད་རང་གིས་གསོལ་བ་བཏབ་པས། ཞལ་གྱིས་བཞེས་པ་ངོས་གྲུབ་པ་ཡིན། སློབ་དཔོན་ཆོས་བཅུ་གཅིག་དང་ལྡན་པ་ལ། མཁན་པོའི་ཚིག་གིས་བསྐོས་པ་ཞིག་དགོས་ཏེ། ཁྱོད་ལ་དགེ་ཚུལ་གྱི་སྡོམ་པ་བསྐྱེད་པའི་ཆོ་གའི་བརྡ་སྤྲོད་པ་དེ་བདག་གིས་འགྲུབ་རུང་དུ་ཡོད་པས་ཡུལ་དུ་གང་དགོས་ཚང་། གཉིས་པ་རྒྱུད་མཐུན་པའི་རྐྱེན་ལ། རྒྱུད་ཚོགས་སུ་མ་ཚང་བ། སྡོམ་པ་རྙིང་པས་རྒྱུད་མ་བཀག་པ། ཉེས་མེད་ཕུན་ཚོགས་ཀྱི་སྡོམ་པ་སྐྱེ་བ་ལ་ཚིགས་སྔ་མ་སྔོན་དུ་སོང་ཞིང་ཆགས་པ་ཞིག་དགོས་ཏེ། ཁྱོད་རང་གསུམ་མན་ཆད་དུ་གནས་པ་དང་། རྩ་ལྟུང་འཆབ་བཅས་བྱུང་བ་མ་ཡིན་པ་དང་། ད་ཅི་ནས་རབ་བྱུང་། དགེ་བསྙེན་སོགས་བྱས་མ་ཐག་པ་ཡིན་པས་ཐམས་ཅད་ཚང་། གསུམ་པ། རྟགས་མཐུན་པའི་རྐྱེན་ལུས་ཀྱི་བྱི་བྱད་ཀྱི་རྟགས་སྐྲ་དང་ཁ་སྤུ་བྲེགས་ཤིང་། བྲེག་ཏུ་མ་གནང་བའི་ཕྱོགས་མ་བྲེགས་པ། ཁྲུས་བྱས་པ། གོས་ཀྱི་རྟགས་བླ་གོས་མཐང་གོས་རུང་བ་ཚད་དང་ལྡན་པ་མཁན་པོས་གནང་ཞིང་བསྐོན་པ། གདིང་བ། ཆུ་ཚགས་རུང་བ་ཚད་ལྡན་མཁན་པོས་(༡༩༤ན)
གནང་བ། སྣོད་སྤྱད་ཀྱི་རྟགས་ལྷུང་བཟེད་རུང་བ་ཚད་ལྡན་མཁན་པོས་གནང་བ། མདོར་ན་རབ་ཏུ་བྱུང་བའི་རྟགས་ཆ་ལུགས་དང་ལྡན། ཁྱིམ་པ་དང་མུ་སྟེགས་ཀྱི་རྟགས་ཆ་ལུགས་དང་མི་ལྡན་པ་ཞིག་དགོས་ཏེ། ཁྱིམ་པ་དང་མུ་སྟེགས་ཀྱི་རྒྱལ་མཚན་ཅན་ལ་ཡང་མི་སྐྱེའོ། །ཞེས་གསུངས་པས། བརྙན་པོ་ཚུན་ཆོད་ཀྱིས་ཐམས་ཅད་ཚང་བར་ཡོད་པ་ཡིན། བཞི་པ་བསམ་པ་མཐུན་པའི་རྐྱེན་ལ། རྒྱུའི་ཀུན་སློང་ཐོབ་པ་འདོད། དུས་ཀྱི་ཀུན་སློང་ཐོབ་ཤེས། འགལ་རྐྱེན་ངེས་པ་ལྔ་བྲལ། མཐུན་རྐྱེན་ཕུན་ཚོགས་སུམ་ལྡན། དེ་ཐམས་ཅད་ངེས་འབྱུང་གིས་བསམ་པས་ཟིན་པ་ཞིག་དགོས། རྒྱུའི་ཀུན་སློང་ཐོབ་འདོད་ནི་སྐོམ་པ་ཆུ་འདོད་པ་ལྟར། དགེ་ཚུལ་གྱི་སྡོམ་པ་ཞེ་ཐག་པ་ནས་རང་ལ་ལེན་འདོད་ཡོད་པ་ཞིག་སྟེ། ཁྱོད་རང་གིས་ཆེད་དུ་གཉེར་ནས་བསྒྲུབས་པས་ཚང་། དུས་ཀྱི་ཀུན་སློང་ཐོབ་ཤེས་ནི། དགེ་ཚུལ་གྱི་སྡོམ་པ་ཐོབ་པ་ལ་ཐོབ་པར་ཤེས་པའི་བསམ་པ་སྐྱེ་རུང་ཞིག་དགོས་ཏེ། དེ་ཡང་ཁྱོད་ལ་སྐྱེ་རུང་དུ་ཡོད་པས་ཚང་བ་ཡིན། འགལ་རྐྱེན་ངེས་པ་ལྔ་བྲལ་ནི། ངེས་པ་ལྔ་ནི་སེམས་ཅན་དང་། ཡུལ་དུས་གནས་སྐབས་ཡན་ལག་གོ །ཞེས་པ་ལྟར། སེམས་ཅན་ངེས་པ་ནི་སེམས་ཅན་འགའ་ཞིག་ལ་གནོད་འཚེ་སྤོང་ནུས་འགའ་ཞིག་ལ་སྤོང་མི་ནུས་སྙམ་པ་ནི། སེམས་ཅན་ངེས་པ་ཡིན་ལ། དེ་ལྟ་བུའི་བསམ་པ་དང་བྲལ་ནས། སེམས་ཅན་ཐམས་ཅད་ལ་གནོད་འཚེ་སྤོང་ནུས་སྙམ་པ་ཞིག་དགོས། ཡུལ་ངེས་པ་ནི་ཡུལ་འགའ་ཞིག་ཏུ་དགེ་ཚུལ་གྱི་སྤང་བྱ་རྣམས་སྤོང་ནུས། ཡུལ་ཐམས་ཅད་དུ་མི་ནུས་སྙམ་པ་ནི་ཡུལ་ངེས་པ་ཡིན་ལ། དེ་དང་(༡༩༤བ)
བྲལ་ནས་ཡུལ་ཐམས་ཅད་དུ་དགེ་ཚུལ་གྱི་སྤང་བྱ་རྣམས་སྤོང་འདོད་ཡོད་པ་ཞིག་དགོས། དུས་ངེས་པ་ནི། ལོ་གཅིག་དང་ཟླ་བ་གཅིག་ལ་སོགས་པར་དགེ་ཚུལ་གྱི་བསླབ་བྱ་ལ་སློབ་ནུས། ཇི་སྲིད་འཚོའི་བར་སློབ་མི་ནུས་སྙམ་པ་ནི་དུས་ངེས་པ་ཡིན་ལ། དེ་དང་བྲལ་ནས། དུས་དེ་ནས་ཇི་སྲིད་མ་ཤིའི་བར་དུ་དགེ་ཚུལ་གྱི་བསླབ་བྱ་མཐའ་དག་ལ་སློབ་སྙམ་པ་ཞིག་དགོས། གནས་སྐབས་ངེས་པ་ནི་འཐབ་མོ་ལ་སོགས་པའི་གནས་སྐབས་སུ་སྤང་བྱ་སྤོང་མི་ནུས། དེ་ལས་གཞན་དུ་སྤོང་ནུས་སྙམ་པ་ནི། གནས་སྐབས་ངེས་པ་ཡིན་ལ། དེ་དང་བྲལ་ནས་གནས་སྐབས་ཐམས་ཅད་དུ་སྤོང་འདོད་ཡོད་པ་ཞིག་དགོས། དགེ་ཚུལ་གྱི་སྡོམ་པ་ལ་ཡན་ལག་ངེས་པ་ཚང་མི་དགོས་ཏེ། མཛོད་ལས། སྡོམ་པ་སེམས་ཅན་ཐམས་ཅད་ལ། །ཡན་ལག་རྒྱུ་ལ་དབྱེ་བ་ཡོད། ཅེས་གསུངས་པ་ཡིན། འོན་ཀྱང་དགེ་ཚུལ་གྱི་སྤང་བྱ་བཅུའི་ནང་ནས། འདི་བསྲུང་འདི་མི་བསྲུང་སྙམ་པའི་ངེས་པ་དང་བྲལ་བ་ཞིག་དགོས་པས་ངེས་པ་ལྔ་བྲལ་ཡང་ཆ་འདྲ་ཞིག་ཚང་དགོས། མཐུན་རྐྱེན་ཕུན་ཚོགས་སུམ་ལྡན་ནི། གང་ལ་སྡོམ་པ་བླང་བའི་ཡུལ། མཁན་སློབ་དགེ་འདུན་དང་བཅས་པ་དང་། བྱེད་པ་ལས་ཀྱི་ཆོ་ག་ལ་སྡོམ་པ་བསྐྱེད་པའི་ནུས་པ་ཡོད་ཅིང་། རང་ཉིད་ཀྱིས་ཀྱང་བསླབ་བྱ་ལ་སློབ་ནུས་སོ་སྙམ་པའི་བསམ་པ་དང་ལྡན་པ་ཞིག་དགོས། ལྔ་པ་ངེས་འབྱུང་གི་བསམ་པ་ནི། དེ་ཐམས་ཅད་མྱང་འདས་ཀྱི་བསམ་པ་བརྟན་པོས་ཟིན་པ་ཞིག་དགོས་ཏེ། འཚོ་བ་མ་ཕྱེད་པའམ། རྒྱལ་པོའི་ཆད་པས་འཇིགས་ནས་རབ་བྱུང་ལེན་པ་འཇིགས་སྐྱོབས་ཀྱི་ཚུལ་(༡༩༥ན)
ཁྲིམས་དང་། ཕྱི་མར་ལྷ་མིའི་དཔལ་འདོད་ནས་རབ་བྱུང་ལེན་པ་ལེགས་སྨོན་གྱི་ཚུལ་ཁྲིམས་སུ་འགྱུར་གྱི། དེ་གཉིས་ངེས་འབྱུང་གི་བསམ་པས་མ་ཟིན་པས་སོ་ཐར་གྱི་སྡོམ་པར་མི་འགྱུར། དེ་ནས་སོ་ཐར་གྱི་སྡོམ་པར་འགྱུར་བ་ལ་མྱང་འདས་ཀྱི་བསམ་པ་བརྟན་པོས་ཟིན་པ་ཞིག་དགོས། མྱང་འདས་ཀྱི་བསམ་པའི་དོན་འཁོར་བའི་སྡུག་བསྔལ་ལ་ཡིད་འབྱུང་ནས་མྱང་འདས་དོན་གཉེར་གྱི་བསམ་པ་དྲག་པོ་ལ་ཟེར་བ་ཡིན། དེ་ཡང་འཁོར་བའི་སྡུག་བསྔལ་ལ་བསམས་པ་ན། དམྱལ་བ་ཚ་གྲང་གི་སྡུག་བསྔལ་དྲག་ལ་རྒྱུན་རིང་བ་སྲན་གྱིས་མི་བཟོད་པ་ཡོད། ཡི་དྭགས་ལ་བཀྲེས་སྐོམ་གྱི་སྡུག་བསྔལ་ཤིན་ཏུ་ཡ་ང་བ་ཡོད། དུད་འགྲོ་ལ་གཅིག་ལ་གཅིག་ཟ་བ་དང་། གསོད་པ་དང་། བཀོལ་སྤྱོད་ཀྱི་སྡུག་བསྔལ་སོགས་བརྗོད་ཀྱི་མི་ལང་བ་ཡོད། མི་རྣམས་ལ་འདོད་པ་བཙལ་གྱིས་མ་རྙེད་པ། མི་འདོད་པ་ཐོག་ཏུ་བབས་པ། དགྲ་སྡང་བ་དང་ཕྲད་པ། གཉེན་བྱམས་པ་དང་བྲལ་བ། ཡོད་པ་རྣམས་གསོག་བསྲུང་གི་སྡུག་བསྔལ། མེད་པ་རྣམས་འཚོལ་འགྲོའི་སྡུག་བསྔལ་ལ་སོགས་པ་རང་རེས་ཉམས་སུ་མྱོང་བས་གྲུབ་པ་འདི་ཡིན། ལྷ་མ་ཡིན་རྣམས་ལ་རང་བཞིན་གྱིས་ལྷའི་དཔལ་ལ་ཕྲག་དོག་པས་རྟག་ཏུ་འཐབ་རྩོད་དང་། ལུས་བཅད་ཅིང་བྲལ་བའི་སྡུག་བསྔལ་བསམ་གྱིས་མི་ཁྱབ་པ་ཡོད། ལྷ་རྣམས་ལ་ཡང་བྱ་ནམ་མཁའ་ལ་འཕུར་བ་ཅིས་ཀྱང་ས་ལ་འབབ་པ་བཞིན་དུ་སླར་འོག་ཏུ་ལྟུང་ནས་སྡུག་བསྔལ་སྣ་ཚོགས་མྱོང་བར་འགྱུར་ཞིང་། ཁྱད་པར་འཆི་ལྟས་ལྔ་དང་ཉེ་བའི་འཆི་ལྟས་ལྔ་བྱུང་བའི་ཚེ་ངན་འགྲོར་སྐྱེ་བར་ཤེས་(༡༩༥བ)
པ་ན། དམྱལ་བའི་སྡུག་བསྔལ་ལས་ཆེས་ཆེར་ཆེ་བའི་སྡུག་བསྔལ་ཡོད་དེ། ལྷ་རྣམས་འཆི་བར་གྱུར་པའི་ཚེ། །སྡུག་བསྔལ་འབྱུང་བ་ཇི་སྙེད་པ། །མནར་མེད་སེམས་ཅན་དམྱལ་བ་ཡིས། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་ཐུན་མོང་དུ་འགྲོ་བ་དེ་ཐམས་ཅད་སྐྱེ་རྒ་ན་འཆིའི་སྡུག་བསྔལ་ལས་མ་ཐར་བས་སྡུག་བསྔལ་གྱི་རང་བཞིན་ཅན། སྡུག་བསྔལ་བའི་ཆོས་ཅན་ཡིན་ཏེ། མདོ་དྲན་པ་ཉེར་གཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུངས་པས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་གསུངས་ཤིང་། །རྒྱུད་བླ་མ་ལས། མི་གཙང་བ་ལ་དྲི་ཞིམ་མེད་ལྟར་འགྲོ་ལྔ་དག་ན་བདེ་བ་མེད། ཅེས་གསུངས་པས། དེ་ལྟར་འཁོར་བ་མཐའ་དག་སྡུག་བསྔལ་གྱི་རང་བཞིན་ཅན་དུ་རིག་པར་བྱའོ། །དེས་ན་འཁོར་བའི་སྡུག་བསྔལ་ལས་གཏན་དུ་ཐར་བའི་མྱང་འདས་ལ་དོན་གཉེར་གྱི་བསམ་པ་དྲག་པོ་བསྐྱེད་དགོས། མྱང་འདས་ལ་ཆུང་ངུ་ཉན་ཐོས། འབྲིང་རང་རྒྱལ། མཆོག་སངས་རྒྱས་ཀྱི་མྱང་འདས་གསུམ་ཡོད་པ་ལས་འདི་ཐེག་པ་ཐུན་མོང་བ་ཡིན་པས་རང་གི་བློ་དང་འཚམ་པར་གསུམ་པོ་གང་བླངས་ཀྱང་གོ་ཆོད་མོད། འོན་ཀྱང་ཉན་ཐོས་དང་རང་རྒྱལ་གྱི་མྱང་འདས་གཉིས། འཁོར་བའི་སྡུག་བསྔལ་ལས་ལེགས་པར་གྲོལ་བར་ཡིན་ཀྱང་། རང་དོན་གྱི་སྤང་རྟོགས་ཡོངས་སུ་མ་རྫོགས། གཞན་དོན་གྱི་འཕྲིན་ལས་རྒྱ་ཆེན་པོ་མི་འབྱུང་། མཐར་(༡༩༦ན)
སངས་རྒྱས་ཐོབ་པ་ལ་བར་དུ་གཅོད་པས་ཤིང་ཚིག་པའི་མགལ་དུམ་བཞིན། སངས་རྒྱས་ཀྱི་རྒྱུ་མི་རུང་བའི་སྐྱོན་དང་བཅས་པ་ཡིན། རྒྱུ་མཚན་དེས་ན་རྫོགས་པའི་སངས་རྒྱས་ཐོབ་འདོད་པ་ཞིག་དགོས། དེ་ཡང་རང་གཅིག་པུའི་དོན་དུ་མ་ཡིན་གྱི། སེམས་ཅན་ཐམས་ཅད་ཀྱི་དོན་དུ་ཐོབ་པར་འདོད་པ་ཞིག་དགོས་ཏེ། ནམ་མཁའ་ལ་མཐའ་མེད་པ་བཞིན་དུ་སེམས་ཅན་ལ་མཐའ་མེད། མཐའ་མེད་པའི་སེམས་ཅན་དེ་ཐམས་ཅད་ཀྱིས་རང་གི་ཕ་མ་མ་བྱས་པ་གཅིག་ཀྱང་མེད་ཅིང་། སེམས་ཅན་རེ་རེས་ཀྱང་ཕ་མ་ལན་གྲངས་དུ་མ་བྱས་ཕན་ཚད་མེད་པ་བཏགས་པའི་དྲིན་ཅན་ཤ་སྟག་ཡིན་པ་ལ། དེ་ཐམས་ཅད་འདོད་ནི་བདེ་བ་འདོད། སྡུག་བསྔལ་མི་འདོད་ཀྱང་ཐབས་མི་མཁས་པས་སྡུག་བསྔལ་རྒྱུ་འབྲས་ལ་ལོངས་སྤྱོད་དེ་ངན་སོང་གསུམ་ནི་སྡུག་བསྔལ་གྱི་སྡུག་བསྔལ་དངོས་ལ་ལོངས་སྤྱོད། ལ་ལ་ནི་སྡུག་བསྔལ་གྱི་རྒྱུ་མི་དགེ་བ་ཁམ་པོ་ཆེ་ལ་ལོངས་སྤྱོད། མ་རིག་པའི་ལིང་ཏོག་གིས་ནི་མིག་ལྡོངས། ཐར་པའི་ལམ་གྱི་བརྟེན་བའི་འཁར་བ་དང་ནི་བྲལ། དགེ་བའི་བཤེས་གཉེན་གྱི་དམིགས་བུས་ནི་མ་ཟིན། མཐོ་རིས་ཀྱི་ལམ་ནས་བརྡེག་འཆོས་ཤིང་། ངན་སོང་གསུམ་གྱི་གཡང་ཁར་འགྲིམ་པ་འདི་རྣམས་ཤིན་ཏུ་སྙིང་རྗེ་བར་འདུག །སྙིང་རྗེ་བྱས་ནས་བཞག་པས་མི་ཕན། དེ་རྣམས་སྡུག་བསྔལ་ལས་སྐྱབས། བདེ་བ་ལ་འགོད་དགོས་ཏེ་དེའི་ནུས་པ་བདག་ལ་མེད། དེ་མ་ཟད་ཚངས་པ་དང་བརྒྱ་བྱིན་སོགས་འཇིག་རྟེན་པའི་མཐུ་བོ་ཆེ་རྣམས་ལའང་མེད། འོ་ན་སུ་ལ་ཡོད་ན་རྫོགས་པའི་སངས་རྒྱས་ཁོ་ན་ལ་ཡོད་དེ། རྫོགས་(༡༩༦བ)
པའི་སངས་རྒྱས་ཀྱིས་སེམས་ཅན་རྣམས་ཀྱི་ཁམས་དང་བསམ་པ་དང་བག་ལ་ཉལ་མངོན་སུམ་དུ་མཁྱེན་པའི་སྒོ་ནས་སྐུ་ལས་འོད་ཟེར་སྣ་རེ་སྤྲོས་པས་ཀྱང་སེམས་ཅན་ཚད་མེད་པ་མྱང་འདས་ལ་འགོད་ནུས། གསུང་གིས་ཆོས་ཐུན་རེ་བཤད་པས་ཀྱང་སེམས་ཅན་ཚད་མེད་པ་མྱང་འདས་ལ་འགོད་ནུས། ཐུགས་ཏིང་ངེ་འཛིན་སྣ་རེ་ལ་བཞག་པས་ཀྱང་སེམས་ཅན་ཚད་མེད་པ་མྱང་འདས་ལ་འགོད་ནུས། མདོར་ན་དངོས་དང་བརྒྱུད་པའི་སྒོ་ནས། མཐོང་ཐོས་དྲན་རེག་ཐམས་ཅད་མྱང་འདས་ལ་འགོད་པའི་ནུས་པ་སངས་རྒྱས་ཁོ་ན་ལ་འདུག་པས། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་དགོས་སོ། །སངས་རྒྱས་དེ་ཡང་རྒྱུ་མེད་རྐྱེན་མེད་དུ་མི་འབྱུང་གིས། རྒྱུ་ཚོགས་གཉིས་རྒྱ་ཆེན་པོ་བསགས་ཏེ་ཟག་མེད་ཀྱི་ཤེས་རབ་ཀྱིས་སྒྲིབ་གཉིས་བག་ཆགས་དང་བཅས་པ་སྤངས་ནས་ཐོབ་དགོས་པ་ཡིན། ཤེས་རབ་དེ་མཉམ་པར་བཞག་པའི་ཏིང་ངེ་འཛིན་ལས་འབྱུང་བ་ཡིན། ཏིང་ངེ་འཛིན་དེ་ཚུལ་ཁྲིམས་རྣམ་པར་དག་པ་ལས་འབྱུང་བ་ཡིན་ཏེ། སྨན་གྱི་གཞི་ལས། དགེ་སློང་དག་ཚུལ་ཁྲིམས་གོམས་པར་བྱས་ན་ཏིང་ངེ་འཛིན་ཡུན་རིང་དུ་གནས་པར་འགྱུར་རོ། །ཏིང་ངེ་འཛིན་གོམས་པར་བྱས་ན་ཤེས་རབ་ཡུན་རིང་དུ་གནས་པར་འགྱུར་རོ། །ཤེས་རབ་གོམས་པར་བྱས་ན་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་ལས་སེམས་ཡང་དག་པ་ཁོ་ནར་རྣམ་པར་གྲོལ་བར་འགྱུར་རོ། །ཞེས་བཤད། དེ་ན་སངས་རྒྱས་ཀྱི་རྒྱུའི་གཙོ་བོ་ཚུལ་ཁྲིམས་ཡིན། ཚུལ་ཁྲིམས་ཀྱི་གཙོ་བོ་དགེ་ཚུལ་སོགས་ཀྱི་སྡོམ་པ་ཡིན་པས། དེ་བླངས་ལ་(༡༩༧ན)
བསྲུང་སྙམ་པའི་བསམ་པ་ཁྱད་པར་ཅན་དུངས་པ་བསྐྱེད་མཛོད། ངེས་འབྱུང་གསལ་འདེབས་ཤིན་ཏུ་བསྡུ་ན། མདོ་དྲན་པ་ཉེར་གཞག་ལས། སེམས་ཅན་དམྱལ་བ་དམྱལ་མེས་ཉམས། །ཞེས་སོགས་གསུངས་པ་ལྟར་ཁམས་གསུམ་འཁོར་བ་གང་དུ་གནས་ཀྱང་སྡུག་བསྔལ་གྱི་གནས། སུ་དང་འགྲོགས་ཀྱང་སྡུག་བསྔལ་གྱི་གྲོགས། ཅི་ལ་ལོངས་སྤྱོད་ཀྱང་སྡུག་བསྔལ་གྱི་ལོངས་སྤྱོད་ལས་མི་འདུག་པས། འཁོར་བའི་སྡུག་བསྔལ་མཐའ་དག་ལས་ཐར་བའི་སྐྱབས་དམ་པ་རྫོགས་པའི་སངས་རྒྱས་ཀྱི་གོ་འཕང་སེམས་ཅན་ཐམས་ཅད་ཀྱི་དོན་དུ་ཐོབ་པར་བྱ་དགོས་སྙམ་པའི་བསམ་པ་ཁྱད་པར་ཅན་དུངས་པ་ཞིག་བསྐྱེད་མཛོད། ཅེས་བརྗོད། ལྔ་པ་ཆོ་ག་མཐུན་པའི་རྐྱེན་ལ་སྦྱོར་བ་སྔར་སོང་དངོས་གཞི་དང་། མཇུག་ད་ལྟ་ཉིད་དུ་བསྒྲུབ་པས་རྒྱུ་རྐྱེན་ཐམས་ཅད་ཚང་ཞིང་དགེ་ཚུལ་གྱི་སྡོམ་པ་སྐྱེ་བ་ཡིན་པས་སྔར་བཤད་པ་བཞིན་སྐྱབས་སུ་འགྲོ་བའི་དོན་དྲན་པར་བྱས་ཏེ། དུས་འདི་ནས་མ་ཤིའི་བར་དུ་དགེ་ཚུལ་གྱི་བསླབ་གཞི་བཅུ་པོ། ཡུལ་དུས་གནས་སྐབས་ཐམས་ཅད་དུ་མ་ཚང་བ་མེད་པར་བསྲུང་སྙམ་པས། སྤང་བྱ་བཅུ་སྤོང་བའི་དགེ་ཚུལ་དུ་བཟུང་དུ་གསོལ་སྙམ་པའི་སྒོ་ནས་འདིའི་རྗེས་ཟློས་གྱིས་བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱིས་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་(༡༩༧བ)
དུ་བཙུན་པས་བཟུང་དུ་གསོལ། འདི་རང་དོན་དུ་བརྗོད་པའི་སྔགས་ཡིན་པས་གཉིས་པའི་ཡང་རྗེས་ཟློག་གྱིས་ཞེས་བརྗོད། གསུམ་པའི་སྐབས་སུ་གསུམ་པ་འདི་ལ་སྐྱབས་བརྗོད་བདག་བརྗོད་གོང་དུ་སོང་། གཞན་བརྗོད་པའི་ཐོག་མར་དགེ་ཚུལ་གྱི་སྡོམ་པ་སྐྱེ་བ་ཡིན་ཏེ། མདོར། དཔེར་ན། གཞན་བརྗོད་པའི་དུས་ན་དགེ་ཚུལ་ཉིད་བཞིན་ནོ། །ཞེས་གསུངས་པས་དགེ་ཚུལ་དུ་ཞེས་པའི་ཚིག་རྫོགས་པ་དང་ཁྱོད་ལ་སྡོམ་པ་སྐྱེ། ངེད་ཁྱོད་ཀྱི་སློབ་དཔོན་དུ་གྱུར་པ་ཡིན་ཞིང་། དགེ་ཚུལ་དུ་ཞེས་པའི་སྐབས་སུ་ངེད་ཀྱི་སྐད་གཟེངས་མཐོ་བ་དང་། སེ་གོལ་གྱིས་བརྡ་སྦྱོར་བས། དེ་དུས་བདག་གི་རྒྱུད་ལ་དགེ་ཚུལ་གྱི་སྡོམ་པ་སྐྱེས་པའི་དུས་འདི་ཁོ་ན་ཡིན་སྙམ་པའི་ཐོབ་བློ་སྐྱེས་པ་ཤིན་ཏུ་གལ་ཆེ་བ་དང་། སློབ་དཔོན་དུ་གྱུར་ནས་བཙུན་པ་ཞེས་མི་བརྗོད་པར་སློབ་དཔོན་ཞེས་བརྗོད་དགོས་པ་ཡིན་པས་མ་ཡེངས་པར་ཡིད་ལ་ཞོག་ལ། གསུམ་པའི་ཡང་རྗེས་ཟློས་གྱིས་ཞེས་བརྗོད། མཇུག་ཏུ་དེ་དགེ་ཚུལ་དུ་བསྒྲུབ་པའི་ཐབས་ཡིན་ནོ། ཁྱོད་རང་ལེགས་སོ་གྱིས་བྱ། སློབ་མས་ལེགས་སོ་ཞེས་བརྗོད་དོ། །དེས་དངོས་གཞིའི་ཆོ་ག་གྲུབ། མཇུག་གི་ཆོ་ག་ལ་གཉིས་ཡོད་པའི་དང་པོ་ཐོབ་དུས་གོ་བ་དེ། མང་དུ་ཐོས་པའི་འདུལ་བ་འཛིན་པ་ཆེན་པོ་དགེ་སློང་ཆེ་གེ་མོ་མཛོད་ཅིག་ཅེས་བསྒོ། དེས་ཀྱང་ལས་ལ་ངན་དང་ཕོ་ཚོད་མི་བྱ་བར་ཉིན་མཚན་གྱི་ཆ་ལེགས་པར་བརྟགས། ཉི་མ་རྫོགས་པའི་སར་ཕྱིན་ཏེ་ཐུར་མ་སོར་བཞི་པས་གྲིབ་ཚོད་གཞལ། ཐུར་མ་དེའི་གྲིབ་མ་སོར་བཞི་ལ། སྐྱེས་བུ་གཅིག་དང་། སོར་གསུམ་མན་ཆད་ལ་རྐང་པའི་ཐ་སྙད་བྱས། དུས་ཚོད་ལ་སོགས་པ་ཐམས་ཅད་བློ་ལ་བྱང་ཞིང་(༡༩༨ན)
ངེས་པོ་བྱས་ནས་ཁྱོད་དགེ་ཚུལ་དུ་བསྒྲུབ་པ་ལ་ཆོ་ག་སྦྱོར་དངོས་རྗེས་གསུམ་ཡོད་པའི་སྦྱོར་བ་དང་དངོས་གཞི་གཉིས་ཀྱིས་ཁྱོད་ཀྱི་རྒྱུད་ལ་དགེ་ཚུལ་གྱི་སྡོམ་པ་ལེགས་པར་ཐོབ་པ་ཡིན། མཇུག་གི་ཆོ་ག་ལ་གཉིས་ཡོད་པའི་དང་པོ་བསྙེན་བཀུར་གྱི་གནས་དང་། གནས་མ་ཡིན་དང་ཤེས་པའི་ཕྱིར་ཐོབ་པའི་དུས་གོ་བ་ལ། བསྙེན་བཀུར་གྱི་གནས་དང་གནས་མ་ཡིན་པ་དང་། བསྙེན་བཀུར་རང་གི་ངོ་བོ། གང་ལ་བརྟེན་ནས་གོ་ཞིང་རིག་པར་བྱ་བ། རིག་པར་བྱ་བའི་ཕན་ཡོན་དང་ལྔ། དང་པོ་བསྙེན་བཀུར་གྱི་གནས་ནི། དགེ་སློབ་མཚན་མཐུན་ལ་སྡོམ་པ་མཆོག་དམན་གྱི་ཁྱད་པར་ཡོད་པའི་ཕྱིར་དགེ་སློང་ཐམས་ཅད་བསྙེན་བཀུར་གྱི་གནས་ཡིན། དགེ་ཚུལ་མཉམ་པོ་ལ་རང་ལས་གྲིབ་མ་སོར་གཅིག་གི་དུས་ཀྱིས་རྒན་པ་རྣམས་བསྙེན་བཀུར་གྱི་གནས་ཡིན། གཉིས་པ་བསྙེན་བཀུར་གྱི་གནས་མ་ཡིན་པ་ནི། སྡོམ་པ་མཆོག་ཡིན་ཀྱང་རྟེན་དམན་པ་ཡིན་པའི་ཕྱིར། དགེ་སློང་མ་དང་། དགེ་སློབ་མ་དང་། དགེ་ཚུལ་མ་རྒན་གཞོན་ཐམས་ཅད་དང་། མཚན་མཐུན་པའི་དགེ་ཚུལ་རང་ལས་བསླབ་པ་གཞོན་པ་རྣམས་དང་། དགེ་བསྙེན་དང་ཁྱིམ་པ་ལ་སོགས་པ་བསྙེན་བཀུར་གྱི་གནས་མ་ཡིན། གསུམ་པ་བསྙེན་བཀུར་རང་གི་ངོ་བོ་གྲལ་གོང་དུ་གཏོང་། རྙེད་པ་དང་པོར་འབུལ། ཕྱག་འཚལ་བ་སྔོན་དུ་ལྡང་བ་བྱེད་པ་སོགས་གུས་པའི་ལས་རྣམས་ཡིན། བཞི་པ་ལ། ལུང་དང་ཀརྨ་ཤ་ཏམ་ནས་གསུམ་ལས་མ་གསུངས་ཀྱང་། དགེ་ཚུལ་གྱི་ལོ་དྲི་བ་ནས་ལོ་སྨོས་པར་གསུངས་ཤིང་། གཞི་འགྲེལ་ལས། ཟླ་བ་དང་། ངོ་དང་། ཚེས་གྲངས་ཀྱང་སྨོས་པར་གསུངས་པ་དང་བསྟུན་ན། ད་ལོའི་ལོ་འདི་ཆེ་གེའི་(༡༩༨བ)
ལོ་ཡིན། དེ་ལ་དུས་ཚོད་དགུན་དང་། དཔྱིད་དང་། དབྱར་དང་། དབྱར་ཐུང་ངུ་དང་། དབྱར་འབྲིང་པོའི་དུས་དང་ལྔ་ལས་དགུན་གྱི་དུས་ཡིན། དེ་ལ་དགུན་ཟླ་བཞི་ཡོད་པ་ལས་དགུན་ཟླ་ཆེ་གེ་ཡིན། དེ་ཐམས་ཅད་ལ་མར་ངོ་སྔོན་དུ་འགྲོ་བའི་མར་ངོ་ཡར་ངོ་གཉིས་ལས་ཆེ་གེ་ཡིན། དེ་ལ་ཚེས་བཅོ་ལྔ་ཡོད་པ་ལས་ཚེས་ཆེ་གེ་ཡིན། དེ་ཡང་ཉིན་མོའི་ཆ་ཤས་བཅུ་བཞི་དང་། མཚན་མོའི་ཆ་ཤས་བརྒྱད་དེ་ཉིན་མཚན་གྱི་ཆ་ཉི་ཤུ་རྩ་གཉིས་ཡོད་དེ། ཀརྨ་ཤ་ཏམ་ལས། སྔ་དྲོ་དང་གུང་དང་ཕྱི་དྲོ་དང་། མཚན་མོ་ཐུན་དང་པོ་དང་ཐུན་དང་པོའི་ཕྱེད་དང་གུང་ཐུན་དང་གུང་ཐུན་གྱི་ཕྱེད་དང་ཐུན་ཐ་མ་དང་ཐུན་ཐ་མའི་ཕྱེད་དང་། སྐྱ་རེངས་མ་ཤར་བ་དང་། སྐྱ་རེངས་ཤར་བ་དང་། ཉི་མ་མ་ཤར་བ་དང་། ཉི་མ་ཤར་བ་དང་། ཉི་མ་བརྒྱད་ཆ་ཤར་བ་དང་། བཞི་ཆ་ཤར་བ་དང་། གུང་ཚིགས་མ་ཡོལ་བ་དང་། ཉི་མ་བཞི་ཆ་ལུས་པ་དང་། བརྒྱད་ཆ་ལུས་པ་དང་། ཉི་མ་མ་ནུབ་པ་དང་། ཉི་མ་ནུབ་པ་དང་། རྒྱུ་སྐར་རྣམས་མ་ཤར་བ་དང་། རྒྱུ་སྐར་རྣམས་ཤར་བ་སྟེ། ཞེས་གསུངས་པ་ལྟར་ཉིན་མོའི་ཆ་ཆེ་གེའི་དུས། གྲིབ་ཚོད་སྐྱེས་བུ་འདི་དང་། རྐང་པ་འདིའི་དུས་བཀྲ་ཤིས་པའི་གནས་གཙུག་ལག་ཁང་ཆེ་གེ་མོར། མཁན་པོ་བསྟན་པ་རིན་པོ་ཆེའི་མངའ་བདག་ཆེ་གེ་མོས་ཐོག་དྲངས། མཁན་སློབ་འདུས་པ་རྒྱ་མཚོའི་དབུས་སུ་ཁྱེད་ཀྱིས་དགེ་ཚུལ་གྱི་སྡོམ་པ་ཐོབ་པ་ཡིན་པས་དེ་ལྟར་ཡིད་ལ་བཞག་ནས། བསྙེན་བཀུར་གྱི་གནས་རྣམས་གྲལ་གོང་དུ་ཞོག །རྙེད་པ་དང་པོར་ཕུལ། ཕྱག་དང་སྔོན་དུ་ལྡང་བ་ལ་སོགས་པ་གུས་པའི་ལས་གྱིས། ལས་སུ་བསྐོ་བ་བྱུང་ན་སྔོན་ལ་རང་རེས་བྱེད་པ་ཡིན། བསྙེན་བཀུར་གྱི་གནས་མ་(༡༩༩ན)
ཡིན་པ་རྣམས་ཀྱི་གྲལ་འགོར་སྡོད། བསྙེན་བཀུར་དང་པོར་འགྲིམ་པ་བྱུང་ན་དང་དུ་ལོང་། དགེ་སློང་མ་དང་དགེ་སློབ་མའི་ཕྱག་མ་ལེན། དེ་མ་ཡིན་པ་རྣམས་ཀྱི་ཕྱག་དང་བསྙེན་བཀུར་སྟོབ་པ་དང་དུ་ལོང་། དགེ་ཚུལ་བསླབ་པ་མཉམ་པ་བྱུང་ན་གཅིག་གིས་གཅིག་ལ་ཕྱག་བྱ་མི་དགོས། གྲལ་མགྱོགས་གྲལ་བྱས་པས་ཆོག་སྟེ། མདོ་རྩ་བར། དུས་མཉམ་པ་རྣམས་ནི། གཅིག་གིས་གཅིག་ལ་ཕྱག་མི་བྱའོ། །སྔར་འོངས་པ་ཉིད་དང་པོ་ཡིན་ནོ། །ཞེས་གསུངས། ལྔ་པ་ཕན་ཡོན་ནི་དངོས་སུ་སྡོམ་པ་ཐོབ་པའི་དུས་ཤེས་པ་དང་། དེ་ལ་བརྟེན་ནས་བསྙེན་བཀུར་གྱི་གནས་ལ་བསྙེན་བཀུར་བྱས། གནས་མ་ཡིན་པའི་བསྙེན་བཀུར་སྟོབ་པ་དང་དུ་བླངས་པས་སངས་རྒྱས་ཀྱི་བཅས་པ་དང་མཐུན། འཇིག་རྟེན་པའི་ཆོས་དགེ་བ་ལ་གནས་པས་དགེ་ལེགས་ཐམས་ཅད་ཀྱི་རྒྱུར་འགྱུར་བ་གླེང་བཞིར་ཤེས་སོ། །དེ་དག་ཐམས་ཅད་མི་གནས་པའི་མྱང་འདས་ཀྱི་བསམ་པས་ཟིན་པར་བྱས་ན་སངས་རྒྱས་ཐོབ་པའི་ཕན་ཡོན་ཡོད་པས། དེ་རྣམས་ཐུགས་ལ་བཞག་ནས་ཕྱག་ལེན་ལ་ཐེབས་པར་མཛོད། དེ་མཇུག་ཆོག་དང་པོ་ལགས། གཉིས་པ་དགེ་བའི་བཤེས་གཉེན་པས་གསུང་བར་འགྱུར་བས་དེར་སྙན་གཏོད་བྱའོ། །ཤིན་ཏུ་བསྡུ་ན། ཁྱོད་དགེ་ཚུལ་དུ་བསྒྲུབ་པ་ལ་ཆོ་ག་སྦྱོར་དངོས་རྗེས་གསུམ་ཡོད་པས། རྗེས་ཀྱི་ཆོ་ག་ལ་གཉིས་ལས་དང་པོ་བསྙེན་བཀུར་གྱི་གནས་དང་གནས་མ་ཡིན་པ་ཤེས་པའི་ཕྱིར་དུ་དུས་གོ་བ་ལ། ཁྱོད་ཀྱི་རྒྱུད་ལ་དགེ་ཚུལ་གྱི་སྡོམ་པ་ཐོབ་པའི་དུས། ལོའི་དབང་དུ་བྱས་ན་ལོ་སྐོར་བཅུ་གཉིས་ཡོད་པ་ལས་ལོ་འདི་ཆེ་གེ་ཡིན། དེ་ལ་དུས་ཚིགས་ལྔ་ལས། དགུན་(༡༩༩བ)
དུས་ཡིན། དེ་ལ་ཟླ་བ་བཞི་ཡོད་པ་ལས་དགུན་ཟླ་ཆེ་གེ་ཡིན། དེ་ལ་ཡར་ངོ་དང་མར་ངོ་གཉིས་ཡོད་པ་ལས་ཡར་ངོ་ཡིན། དེ་ལ་ཚེས་བཅོ་ལྔ་ཡོད་པ་ལས་ཆེ་གེ་ཡིན། དེ་ལ་ཉིན་མཚན་གྱི་ཆ་གཉིས་ལས་ཉིན་མོ་ཡིན། དེ་ལ་ཆ་ཤས་བཅུ་བཞི་ཡོད་པའི་ཆེ་གེའི་དུས་ཡིན། གྲིབ་ཚོད་སྐྱེས་བུ་ཆེ་གེ་དང་། རྐང་པ་ཆེ་གེའི་དུས་སུ། གཙུག་ལག་ཁང་ཆེ་གེ་མོ་རུ། མཁན་པོ་ཆེ་གེ་ལས། ཁྱོད་ཀྱི་དགེ་ཚུལ་གྱི་སྡོམ་པ་ཐོབ་པ་ཡིན་པས་དེ་རྣམས་ཡིད་ལ་བཞག་ནས་བསྙེན་བཀུར་གྱི་གནས་གྱི་གནས་དགེ་སློང་རྣམས་དང་། རང་ལས་རྒན་པའི་དགེ་ཚུལ་རྣམས་གྲལ་གོང་དུ་ཞོག །རྙེད་པ་དང་པོར་ཕུལ། ཕྱག་དང་སྔོན་དུ་ལྡང་བ་སོགས་གུས་པའི་ལས་གྱིས། དེ་ལྟར་བྱས་པས་གཞན་རྒྱུད་ཀྱི་བསླབ་པ་ལ་གུས་པར་བྱས་པའི་ཕན་ཡོན་ཡོད། དགེ་སློང་མ་དང་དགེ་སློབ་མའི་ཕྱག་མ་ལེན། རང་ལས་བསླབ་པ་གཞོན་པའི་དགེ་ཚུལ་དང་། དགེ་ཚུལ་མ་རྒན་གཞོན་ཐམས་ཅད་དང་། དགེ་བསྙེན་ཕ་མ་སོགས་ཀྱི་ཕྱག་དང་བསྙེན་བཀུར་དང་དུ་ལོང་། དེ་ལྟར་བྱས་པས་རང་རྒྱུད་ཀྱི་བསླབ་པ་ལ་གུས་པར་བྱས་པའི་ཕན་ཡོན་ཡོད། དུས་མཉམ་པ་བྱུང་ན་གཅིག་གིས་གཅིག་ལ་ཕྱག་བྱ་མི་དགོས། གྲལ་མགྱོགས་གྲལ་བྱས་པས་ཆོག །དེ་ལྟར་བྱས་པས་དངོས་སུ་སྡོམ་པ་ཐོབ་པའི་དུས་ཤེས། སྟོན་པའི་བཅས་པ་དང་མཐུན་ཞིང་། ངེས་འབྱུང་གི་བསམ་པས་ཟིན་པས་སངས་རྒྱས་ཐོབ་པའི་ཕན་ཡོན་ཡོད་པས་དེ་རྣམས་ཐུགས་ལ་བཞག་ནས་ཕྱག་ལེན་ལ་ཐེབས་པ་མཛོད། དེ་མཇུག་ཆོག་དང་པོ་ལགས། གཉིས་པ་དགེ་བའི་བཤེས་གཉེན་པས་གསུང་བར་འགྱུར་བས་དེ་ལ་སྙན་གཏོད་མཛོད། ཅེས་བརྗོད། དེ་ནས་(༢༠༠ན)
སློབ་དཔོན་གྱིས། དགེ་བའི་བཤེས་གཉེན་པས་གསུངས་པ་དེ་རྣམས་ཀྱང་སེམས་ལ་བཞག་ནས་ལག་ལེན་ལ་ཐེབས་པར་བྱེད་དགོས་པ་ཡིན། ད་མཇུག་ཆོག་གཉིས་པ་ཐོབ་པ་མི་ཉམས་ཤིང་འཕེལ་བར་བྱ་བའི་ཕྱིར་བསླབ་པ་བརྗོད་པ་ནི། སྡོམ་པ་ཐོབ་པ་ཙམ་གྱིས་མི་ཆོག་བསྲུང་དགོས། མ་བསྲུངས་ན་སྡུག་བསྔལ་ཆེན་པོ་འབྱུང་སྟེ། དགེ་སློང་ལ་རབ་ཏུ་གཅེས་པའི་མདོ་ལས། ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་སྡུག་བསྔལ་ཡིན། །ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་བ་སྡུག་བསྔལ་ཡིན། །ཞེས་གསུངས་པས། ལེགས་པར་བསྲུང་དགོས་ཤིང་བསྲུང་ལུགས་ནི། དགྲ་བཅོམ་པ་རྣམས་ཀྱིས་སྤང་བྱ་བཅུ་པོ་ཡིད་ཀྱིས་སྤངས་ཤིང་ལུས་ངག་གིས་དེ་ལས་སླར་ལོག་པ་བཞིན་དུ། བདག་གིས་ཀྱང་དུས་འདི་ནས་མ་ཤིའི་བར་དུ་སྤང་བྱ་བཅུ་པོ་འཁོར་དང་བཅས་པ་ཡིད་ཀྱིས་སྤངས་ནས། ལུས་ངག་གིས་སླར་ལྡོག་སྙམ་པ་གྱིས་ལ་འདིའི་རྗེས་ཟློས་གྱིས། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས། ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་འཚོའི་བར་དུ། སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ། ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་(༢༠༠བ)
པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཟས་དང་། གསེར་དངུལ་ལེན་པ་སྤངས་ཏེ། གསེར་དངུལ་ལེན་པ་ལས་སླར་ལྡོག་པར་བགྱིའོ། །ཡན་ལག་བཅུ་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ་བྱའོ། །དེ་ལྟར་དངོས་སུ་བླངས་པའི་བསླབ་པ་བཅུ་ལས་རྩ་བ་བཞི་ལས་འདས་ན་ཕམ་པ་དང་འདྲ་བའི་ཉེས་བྱས། ཡན་ལག་དྲུག་ལས་འདས་ན་བཤགས་བྱའི་ཉེས་བྱས། སྡོམ་པ་བླངས་པའི་ཕྱོགས་མཐུན་ལས་འདས་ན་བསྡམ་བྱའི་ཉེས་བྱས། འཆང་བ་ལ་སོགས་པ་ཉེས་མེད་དུ་གནང་བ་རྣམས་ལ་ཉེས་པ་མེད་པར་ཤེས་པར་གྱིས་ལ་ལེགས་པར་(༢༠༡ན)
སྲུངས་ཤིག །ཅེས་བརྗོད་དོ། །དེ་ལྟར་དགེ་ཚུལ་དུ་གྱུར་ནས་ཁྱིམ་པ་ཡིན་ན་འཕགས་པ་ཚུན་ཆད་ཀྱིས་ཕྱག་བྱ་བའི་གནས་སུ་གྱུར་བ་ཡིན་ཏེ། ས་ག་ལྷས། དེ་ལྟར་དགེ་ཚུལ་བྱས་མ་ཐག །འདི་ལ་ཁྱིམ་པ་ཐམས་ཅད་ཀྱིས། ཕྱག་འཚལ་སྨོན་པར་འགྱུར་བ་སྟེ། །གང་ཕྱིར་ཁྱིམ་གྱི་འཆིང་གྲོལ་ཕྱིར། ཚུལ་ངན་རབ་རིབ་མུན་བསལ་ཏེ། །ངུར་སྨྲིག་གོས་མཆོག་འཛིན་པ་ཡིས། །ཉི་མ་ཤར་ལྟར་ལྷང་ང་ནི། །ཕུལ་ཕྱིན་དེ་ནི་ཤིན་ཏུ་མཛེས། །ཞེས་གསུངས་པས། དགའ་སྤྲོ་རྒྱ་ཆེན་པོ་གྱིས། དེ་ཐམས་ཅད་མཁན་པོའི་སྐུ་དྲིན་ལས་བྱུང་བ་ཡིན་པས་མཁན་པོ་ལ་ཕྱག་གསུམ་ཚོལ་ལ་སྐུ་དྲིན་ཆེ་ལགས་ཞེས་བརྗོད། དེས་ཀྱང་སྐུ་དྲིན་ཆེ་ལགས་ཞེས་བརྗོད། གཞན་རྣམས་ཀྱིས་མེ་ཏོག་འཐོར་བ་དང་བཅས་ཏེ། གོང་གིས་སྨོན་ལམ་བཞི་གདབ་པོ། །དེ་དག་གིས་ནི། དགེ་ཚུལ་གྲིབ་ཚོད་དང་། བསླབ་པ་བརྗོད་པ་ཐ་མ་ཡིན། ཞེས་པའི་དོན་ལེགས་པར་བཤད་ཟིན་ཏོ། །ཚིགས་སྔ་མ་དགེ་ཚུལ་དུ་སྒྲུབ་པའི་ཆོ་གའོ། །
ཚིགས་ཕྱི་མ་བསྙེན་རྫོགས་སུ་བསྒྲུབ་པའི་ཆོ་ག་བཤད་པ།
གཉིས་པ་ཚིགས་ཕྱི་མ་བསྙེན་རྫོགས་སུ་བསྒྲུབ་པའི་ཆོ་ག་ལ། སྡོམ་ནི། དང་པོར་བྱ་དང་མཁན་པོ་དང་། །ཆོས་གོས་གཉིས་དང་ལྷུང་བཟེད་གཉིས། །གསོལ་བའི་ལས་དང་བློ་མཐུན་དང་། །སྤྲོ་བྱ་གསོལ་བ་གསང་སྟོན་དང་། །ཞུ་དང་གསོལ་དང་གསོལ་བ་དང་། །དྲི་དང་ལས་དང་གྲིབ་ཚོད་དང་། །ཉིན་མཚན་དུས་ཚོད་གནས་རྣམས་དང་། །ལྟུང་དང་དགེ་སྦྱོང་མཆོག་འདོད་དང་། །ཚུལ་ཁྲིམས་མཉམ་དང་ཚུལ་འབྲེལ་དང་། །དུལ་དང་དགོས་དང་མ་བརྗོད་དང་། །གུས་པ་དང་ནི་བསྒྲུབ་བྱ་(༢༠༡བ)
བ། །མུ་སྟེགས་གནས་པ་བྱིན་པ་ཡི། །སྡེ་ཚན་ཡང་དག་བསྡུ་བ་ཡིན། །ཞེས་སོ། །དེ་དག་གི་དོན་བསྙེན་རྫོགས་སུ་བསྒྲུབ་པའི་ཆོ་ག་ལ། སྦྱོར་དངོས་རྗེས་གསུམ་ལས། དང་པོ་སྦྱོར་བའི་ཆོ་ག་ལ་དོན་ཚན་བརྒྱད་ཡོད་པའི། དང་པོར་བྱ་དང་ཞེས་པའི་དོན། ཡོ་བྱད་ཚགས་སུ་གཞུག་ཅིང་། དཀོན་ཅོག་གསུམ་དང་སློབ་དཔོན་མངོན་དུ་འགྱུར་བར་བྱ་བའི་ཕྱིར་དུ་དང་པོར་བྱ་བ་ནི། བསྒྲུབ་བྱ་དེ་ལོ་ཉི་ཤུ་ལོན་ནས་བསྙེན་རྫོགས་འདོད་ན། དེའི་ཆོས་གོས་གསུམ་དང་ལྷུང་བཟེད་དེ། རང་ལ་མེད་ཅིང་མཁན་པོ་ལ་ཡོད་ན་སྦྱིན་ཞིང་། མེད་ན་གཡར་པོ་ལ་སོགས་ཚུན་ཆད་ཀྱིས་བཙལ་ལ་ཡོ་བྱད་ཚགས་སུ་གཞུག །མཁན་པོས་ལས་སློབ་དང་། གསང་སྟོན་དང་། ཁ་སྐོང་བར་འོས་པའི་དགེ་སློང་རྣམས་ལ་ཚིག་གིས་གསོལ་བ་གདབ །དེ་རྣམས་ཐམས་ཅད་ཀྱིས་ཀྱང་རང་གི་རྒྱུད་སོ་སོར་བརྟགས་ནས། ལས་གྲལ་ལ་མ་འདུས་པའི་གོང་དུ་ལྟུང་བ་རྣམས་མཐོལ་བ་དང་། བཤགས་པ་དང་། བསྡམས་པ་དང་། བྱིན་གྱིས་བརླབ་པར་བྱ་བས་ཕྱིར་བཅོས་ཏེ། རང་རྒྱུད་དག་པར་བྱས་ལ་འདུ་བར་བྱའོ། །མཁན་པོའམ་དེས་བསྐོས་པས་གནས་མལ་བཤམས། རྒན་པའི་མཐའ་ལོགས་སུ་སྟོན་པའི་སྐུ་གཟུགས་བཞུགས་སུ་གསོལ་བ་དང་། དེའི་སྤྱན་སྔར་མཆོད་པ་ཅི་འབྱོར་བ་བཤམས་ཟིན་ཅིང་། བསྒྲུབ་བྱའི་ཆོས་གོས་གསུམ་རྒྱུ་དང་ཁ་དོག་དང་། ཆེ་ཆུང་གི་སྒོ་ནས་དངོས་ཀྱི་བྱིན་རླབས་འཆགས་མི་འཆགས་ལེགས་པར་བརྟགས་ལ། འོག་ཏུ་གདིང་བ་ནང་དུ་བཞི་བལྟབ་བྱས་སྟེང་མཐང་གོས་བརྒྱད་བལྟབ་བྱས་པ། དེ་སྟེང་བླ་གོས་བརྒྱད་བལྟབ་བྱས་པ། (༢༠༢ན)
དེ་སྟེང་སྣམ་སྦྱར་བརྒྱད་བལྟབ་བྱས་པ་རྣམས་བརྐྱང་སྟེ་མགོ་མཇུག་དང་ཕྱི་ནང་མ་ལོག་པར་བྱས་ནས་མགོ་བོ་མཁན་པོར་བསྟན་པ་བཞག ལྷུང་བཟེད་དང་། གདིང་བ་ཆུ་ཚགས་ཀྱང་དེའི་ལོགས་སུ་བཞག །མཁན་པོའི་མདུན་དུ་མེ་ཏོག་དང་། བསྒྲུབ་བྱའི་སྟན་དུ་རྩྭ་ཕ་གུ་དང་བཅས་པ་སྟ་གོན་བྱའོ། །དགེ་སློང་ཐམས་ཅད་འདུས་པ་དང་། བསྒྲུབ་བྱ་དེ་རྒན་པའི་མཐའ་ལོགས་སུ་བཞག །མཁན་པོས་ཐམས་ཅད་ཀྱི་ཕྱག་ཏུ་མེ་ཏོག་ཕུལ་ནས། །ཕྱག་བྱ་བ་ལན་གསུམ་སྔོན་དུ་འགྲོ་བས་འགྲེངས་ཏེ་འདུད་པ་དང་བཅས་ནས། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི་དགེ་འདུན་ལས་བསྙེན་པར་རྫོགས་པར་འཚལ་ནས་དགེ་འདུན་ལ་བསྙེན་པར་རྫོགས་པར་གསོལ་ན། དགེ་སློང་མང་དུ་ཐོས་པའི་འདུལ་བ་འཛིན་པ་ཆེན་པོ་ཆེ་གེ་མོས་ལས་ཀྱི་སློབ་དཔོན་བཀས་གནང་བ་ཞུ། དགེ་སློང་མང་དུ་ཐོས་པའི་འདུལ་བ་འཛིན་པ་ཆེན་པོ་ཆེ་གེ་མོས་གསང་སྟེ་སྟོན་པའི་སློབ་དཔོན་བཀས་གནང་བ་ཞུ། ཆེ་གེ་མོས་དབུ་མཛད་རྣམས་ཀྱིས་ལས་ཀྱི་ཁ་སྐོང་མཛད་ནས་ཚེ་དང་ལྡན་པ་འདི་ལ་བསྙེན་པར་རྫོགས་པའི་སྡོམ་པ་རྣམ་པར་དག་པ་ཞིག་བཀས་གནང་བ་ཞུ། དངོས་དེ་ལྟར་གཡར་ངོ་འཕྱར་ཞིང་མཆིས་ལགས། ཞེས་གསོལ་བ་བཏབ་ནས། མཁན་པོ་དང་བསྒྲུབ་བྱས་སྟོན་པ་དགེ་འདུན་དང་བཅས་པ་ལ་མེ་ཏོག་གཏོར་རོ། །དེ་ནས་བསྒྲུབ་བྱ་ལ་སྟོན་པའི་སྐུ་གཟུགས་འདི་ལ་སྟོན་པ་དངོས་ཀྱི་འདུ་ཤེས་ཞོག་ལ་ཕྱག་གསུམ་གྱིས། བདག་ཉིད་དགེ་སློང་གི་དགེ་འདུན་གྱི་ནང་དུ་འཇུག་པའི་བསམ་པ་དྲག་པོས་དགེ་སློང་རེ་རེ་ལ་ཕྱག་གསུམ་གསུམ་གྱིས་(༢༠༢བ)
ཞེས་བརྗོད། ཕྱག་པུས་མོའི་ལྷ་ང་གཉིས། ལག་མཐིལ་གཉིས། མགོ་བོ་སྟེ་ཡན་ལག་ལྔ་ས་ལ་རེག་པའི་ཕྱག་གམ། དགེ་སློང་རྣམས་ཀྱི་སྒྱིད་པ་ལ་འཁྱུད་ཅིང་མགོ་བོས་རྐང་བ་ལ་གཏུགས་པའི་ཕྱག་བྱ་སྟེ། ཕྱག་གཞན་གྱིས་གོ་མི་ཆོད་དོ། ཕྱག་འཚལ་བའི་ཚེ་དགེ་སློང་རེ་རེས་ཚེ་དང་ལྡན་པ་འདིའི་རྒྱུད་ལ་བསྙེན་པར་རྫོགས་པ་དགེ་སློང་གི་སྡོམ་པ་མྱུར་དུ་ཐོབ་པར་གྱུར་ཅིག་ཅེས་སྨོན་ལམ་བཏབ་ཅིང་མེ་ཏོག་གཏོར་རོ། །གཉིས་པ་མཁན་པོ་དང་ཞེས་པའི་དོན། མཁན་པོ་མངོན་དུ་འགྱུར་བར་བྱ་བའི་ཕྱིར་མཁན་པོར་གསོལ་བ་བཏབ་པ་ནི། བསྒྲུབ་བྱ་དེ་རྩྭའི་སྟེང་ནས་མཁན་པོ་ལ་ཕྱག་གསུམ་འཚལ་དུ་བཅུག་སྟེ། མཁན་པོའི་མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས་ཙོག་ཙོག་པུར་ཐལ་མོ་སྙིང་གར་སྦྱོར་དུ་བཅུག་ནས། ཁྱོད་བསྙེན་པར་རྫོགས་པའི་དགེ་སློང་གི་དངོས་པོ་དོན་དུ་གཉེར་བ་དེ་ཤིན་ཏུ་ལེགས། ལེགས་པའི་རྒྱུ་མཚན། དགེ་སློང་ལ་རབ་ཏུ་གཅེས་པའི་མདོ་ལས། དགེ་སློང་ཞེས་བྱ་ཆོས་ཀྱི་རྒྱལ་མཚན་ཏེ། །དགེ་སློང་ཞེས་བྱ་རྡོ་རྗེའི་སྲོག་ཤིང་ཡིན། །དགེ་སློང་ཞེས་བྱ་དུཿཁ་སྤོང་བ་ཡིན། དགེ་སློང་ཞེས་བྱ་རྒྱལ་བའི་སྲས་པོ་ཡིན། །དགེ་སློང་ཞེས་བྱ་ཉོན་མོངས་སྲོག་བཅོད་དེ། །དགེ་སློང་ཞེས་བྱ་ཐར་པའི་ལམ་འགྲོ་ཡིན། །དགེ་སློང་རང་གི་ངོ་བོ་བསྡམས་པ་སྟེ། །ཞེས་གསུངས།
སྔོན་ཆོག་དང་ད་ཆོག་གི་ཁྱད་པར་བཤད་པ།
དེ་ལྟ་བུའི་བསྙེན་རྫོགས་སུ་སྒྲུབ་པར་བྱེད་པ་ལ། སྔོན་གྱི་ཆོ་ག་དང་ད་ལྟར་གྱི་ཆོ་ག་གཉིས་སུ་གསུངས་པ་ལས། དང་པོ་ནི། ཤཱ་རིའི་བུ་ལ་སོགས་པ་སྔོན་གྱི་རྒྱུད་ཡོངས་སུ་སྨིན་པའི་གང་ཟག་རྣམས་ལ། དགེ་སློང་དག་ཚུར་ཤོག་ལ་(༢༠༣ན)
ཚངས་པར་སྤྱད་པ་སྤྱོད་ཅིག་ཅེས་གསུངས་པའི་མོད་ལ། སྐྲ་དང་ཁ་སྤུ་རང་གི་ངང་གིས་བྱི། ལུས་ལ་ཆོས་གོས་སྣམ་སྦྱར་གྱོན། ལག་ཏུ་ལྷུང་བཟེད་དང་བྱ་མ་བུམ་ཐོགས། བསྙེན་པར་རྫོགས་ནས་ལོ་བརྒྱ་ལོན་པ་ལྟ་བུའི་སྤྱོད་ལམ་ཅན་དུ་གྱུར་པ་ལ། བར་སྣང་གི་ལྷ་རྣམས་ངོ་མཚར་བའི་གནས་སུ་གྱུར་ཏེ། བཅོམ་ལྡན་འདས་ཀྱིས་ཚུར་ཤོག་བཀའ་སྩལ་པས། སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞི་གནས་འགྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །ཞེས་ཆེད་དུ་བརྗོད་པར་བྱེད་དོ། །དེའི་ཚེ་བཅོམ་ལྡན་འདས་ཀྱིས་དགེ་སློང་དག་ཚུར་ཤོག་ཅེས་གསུངས་པ་ཙམ་གྱིས་རབ་བྱུང་བསྙེན་རྫོགས་ཐོབ་པ་ཡོད་དོ། །ཞེས་པའི་སྙན་པ་ལ་བརྟེན་ནས་རབ་བྱུང་བ་བསྙེན་རྫོགས་དོན་དུ་གཉེར་བ་རྣམས་ཡུལ་ཐག་རིང་པོ་ནས་འོངས་པས། འགའ་ཞིག་ནི་ཆུ་དང་གཡང་ས་ལ་སོགས་པ་འབྱུང་བའི་བར་ཆད། འགའ་ཞིག་ནི་སྟག་དང་སེང་གེ་ལ་སོགས་པ་གཅན་གཟན་གྱི་གནོད་པའི་དབང་གིས་བཅོམ་ལྡན་འདས་ཀྱི་དྲུང་དུ་མ་ཕྱིན་པར་ཚེའི་དུས་བྱས། དེ་སྟོན་པའི་སྙན་དུ་གསོལ་བས། ཀྱེ་མ་ངའི་ཉན་ཐོས་རྣམས་ཐག་རིང་པོ་ནས་འོངས་པ་ཤིན་ཏུ་ངལ་བར་གྱུར་ཏོ་སྙམ་དུ་དགོངས་ནས། དེ་ཕྱིན་ས་དེར་གནས་པའི་དགེ་འདུན་རྣམས་ཀྱིས་རབ་ཏུ་བྱུང་བ་དང་བསྙེན་པར་རྫོགས་པར་བྱ་བར་གནང་ངོ་། །ཞེས་གསོལ་བཞིའི་ལས་ཀྱིས་ཅིག་ཅར་རབ་ཏུ་བྱུང་བ་དང་བསྙེན་པར་རྫོགས་པ་གནང་ནས། དེར་དགེ་སློང་རྣམས་ཀྱིས་བསྒྲུབ་བྱ་ལ་རབ་བྱུང་བསྙེན་རྫོགས་བྱས་པ། དེ་དག་ལ་མཁན་སློབ་མེད་པས་ལེགས་པར་མ་སྦྱངས་ཤིང་། (༢༠༣བ)
སྤྱོད་ལམ་རྒོད་བག་ཅན་དུ་གྱུར་པ་ལ་ཁྱིམ་པ་མ་དད་ཅིང་མུ་སྟེགས་ཅན་རྣམས་འཕྱ་བར་གྱུར་ལ། དགེ་སློང་འགའ་ཞིག་ནད་གཡོག་མེད་པར་ཤི་བར་གྱུར་པའི་སྐབས་དེ་སྟོན་པའི་སྙན་དུ་གསོལ་པས། སྔར་དགེ་ཚུལ་གྱི་སྐབས་བཤད་པ་ལྟར། ངའི་ཉན་ཐོས་རྣམས་གཅིག་གིས་གཅིག་བསྡུ་བར་བྱ་བའི་ཕྱིར་དང་། ཞེས་པ་ནས། དགག་སྒྲུབ་གནང་གསུམ་གྱི་བསླབ་པའི་གནས་རྣམས་ཉེ་བར་ལུང་འབོགས་པའི་དོན་གྱིས་ན་མཁན་པོ་སྟེ། དོན་ཐམས་ཅད་ཡང་དག་པར་གྲུབ་པའི་དཔལ་མྱ་ངན་ལས་འདའ་བ་ལ་ཁད་ཉེ་བའི་དགེ་སློང་གི་དངོས་པོ་སྒྲུབ་པར་མཛད་དུ་གསོལ་ཞེས་ཞུ་བ་འབུལ་བ་ཡིན་པས། བཙུན་པའམ་སློབ་དཔོན་ནམ། སྔར་རབ་བྱུང་གི་མཁན་པོ་ཡིན་ཀྱང་། ཆོ་ག་ཐ་དད་ཡིན་པས་སྔར་གྱི་རབ་བྱུང་གི་མཁན་པོ་འདི་ལ། ད་བསྙེན་རྫོགས་ཀྱི་མཁན་པོ་ཞུ་སྙམ་པ་གྱིས་ལ་འདིའི་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བ་མཁན་པོར་གསོལ་གྱིས། མཁན་པོ་བདག་གི་མཁན་པོ་མཛད་དུ་གསོལ། མཁན་པོ་མཁན་པོས་བདག་བསྙེན་པར་རྫོགས་པར་བགྱིའོ། །ལན་གཉིས་བཟླས་པའི་རྗེས་སུ་གསུམ་པ་འདི་ལ་ཆོ་ག་དུམ་བུ་གསུམ་ཡོད་པའི། དུམ་བུ་གཉིས་རྫོགས་པ་མཛད་དུ་གསོལ། ཞེས་པའི་མཐར་གསོལ་བ་བཏབ་པ་ཁས་བླངས་པ་དེ་དུས། ངེད་ཁྱེད་ཀྱི་བསྙེན་རྫོགས་ཀྱི་མཁན་པོར་གྱུར་པ་ཡིན་ནོ། །བཙུན་པའམ་སློབ་དཔོན་ཡིན་ན་མཁན་པོར་གྱུར་ནས་བཙུན་པ་ཞེས་མི་བརྗོད་པར། མཁན་པོ་ཞེས་བརྗོད་དགོས་པས། དེ་ལྟར་ཡིད་ལ་ཞོག་ལ་གསུམ་པའི་ཡང་རྗེས་ཟློས་གྱིས་ཞེས་བརྗོད། མཇུག་ཏུ་ཐབས་(༢༠༤ན)
ཡིན་ནོ། །ལེགས་སོ་ཞེས་བརྗོད། ཤིན་ཏུ་བསྡུ་ན། ཁྱེད་བསྙེན་པར་རྫོགས་པ་བྱེད་པ་ལ་མཁན་པོ་ཞིག་དགོས། མཁན་པོ་ལ་ཅི་རུང་རུང་གི་མི་ཆོག་གིས། བསྙེན་པར་རྫོགས་ནས་ལོ་བཅུ་བར་མ་ཆད་དུ་ལོན་པ་བཙུན་པ་བརྟན་པའི་ཡོན་ཏན་ལྔ་ཕྲུགས་སུ་སྦྱར་བ་ཉི་ཤུ་རྩ་གཅིག་གང་རུང་དང་ལྡན་པ། མཁས་ཤིང་ཕན་ཐོགས་ཀྱི་ཡོན་ཏན་ཏེ། བརྟན་མཁས་ཀྱི་ཡོན་ཏན་གཉིས་དང་ལྡན་པའི་དགེ་སློང་ལ་མཁན་པོར་ལན་གསུམ་གྱི་བར་དུ་གསོལ་བ་འདེབས་དགོས། དེ་ངེད་ཀྱིས་འགྲུབ་རུང་དུ་ཡོད་པས། བདག་མྱ་ངན་ལས་འདས་པ་ལ་ཁད་ཉེ་བའི་དགེ་སློང་གི་དངོས་པོ་སྒྲུབ་པར་བྱེད་མཁན་མཛད་དུ་གསོལ་སྙམ་པ་གྱིས་ལ་འདིའི་རྗེས་ཟློས་ཀྱིས། བཙུན་པའམ་མཁན་པོ་དགོངས་སུ་གསོལ་ནས། ཐབས་ལེགས་ཀྱི་བར་བྱའོ། །གསུམ་པ་ཆོས་གོས་གཉིས་དང་ལྷུང་བཟེད་གཉིས། ཞེས་པའི་དོན་ཡོ་བྱད་མངོན་དུ་འགྱུར་བར་བྱ་བའི་ཕྱིར་ཆོས་གོས་དང་ལྷུང་བཟེད་བྱིན་གྱིས་བརླབས་ནས་སྦྱིན་པ་ནི། ཕྱག་གསུམ་འཚོལ་ལ་ངེད་ཀྱི་མདུན་དུ་ཤོག་ཅིག་ཅེས་བསྒོ། གྲོགས་བྱེད་པས་ཆོས་གོས་གསུམ་པོ་སོ་སོར་བལྟབ་པ་ཕྲག་པ་གཡོན་པ་ལ་བཀལ་ནས། འདི་ལ་དངོས་དང་འདི་ལ་རྒྱུའི་བྱིན་རླབས་འཆགས་པར་གདའ། བྱས་ལ་བརྡ་སྤྲད། མཁན་པོས་ཀྱང་དེ་ལ་མང་དུ་ཐོས་པའི་དགེ་སློང་འདི་ཞེས་བྱ་བས་ཚེ་དང་ལྡན་པ་འདིའི་ལྷུང་བཟེད་དགེ་འདུན་ལ་སྟོན་པའི་གྲོགས་ལྡན་མཛོད་ཅིག་ཅེས་བསྒོ། དེ་ནས་མཁན་པོ་དང་བསྒྲུབ་བྱ་གཉིས་ཀ་འགྲེངས་ཏེ་གཉིས་ཀའི་ལག་པས་སྣམ་སྦྱར་བཟུང་ནས། འདི་སྣམ་ཕྲན་དང་གླེགས་བུ་དུ་མ་སྦྱར་བས་ན་སྣམ་སྦྱར་ཞེས་བྱ་བ། ཁྱིམ་པ་དང་མུ་སྟེགས་(༢༠༤བ)
ཅན་དང་རབ་ཏུ་བྱུང་བ་བསྙེན་པར་མ་རྫོགས་པ་མན་ཆད་ལས་རྟགས་ཀྱི་སྒོ་ནས་ཁྱད་པར་དུ་འགྱུར་བ་ཡིན་པས། འདི་དགེ་སློང་གི་འཚོ་བའི་ཡོ་བྱད་སྣམ་སྦྱར་དུ་བྱིན་གྱིས་བརླབ་སྙམ་པ་གྱིས་ལ་འདིའི་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་བགྱིས་ལགས་པ། རུང་བ་སྦྱང་བར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ལན་གསུམ་བཟླས་ལ། དེ་སྣམ་སྦྱར་དུ་བྱིན་གྱིས་བརླབ་པའི་ཐབས་ཡིན་ནོ། ཁྱེད་རང་ལེགས་སོ་གྱིས་བྱས་ལ། ཕྲག་པ་གཡས་ངོས་སུ་སྒོས་ལ་བཞག །བླ་གོས་དང་མཐང་གོས་ཀྱི་བཤད་པ་ལ་སྤྲོ་ན་དགེ་ཚུལ་གྱི་སྐབས་སུ་བཤད་པ་ཇི་ལྟ་བ་བཞིན་བྱས་ལ། འདི་དགེ་སློང་གི་ཡོ་བྱད་བླ་གོས་དང་མཐང་གོས་སུ་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་གྱིས་བྱས་པ་མངགས་ལ། སྣམ་སྦྱར་གྱི་གནས་སུ་བླ་གོས་དང་མཐང་གོས་ཞེས་འཇུག་གཞན་འདྲ། ཐབས་ལེགས་སྣམ་སྦྱར་ལྟར་བྱེད། གྲོགས་ལྡན་པས་དེ་བླངས་ཏེ་བལྟབ་པ་བཤིག །དེ་བཞིན་དུ་སྣམ་སྦྱར་ཕྱིར་འོང་བ་བྱས་བླ་གོས་ནང་དུ་བྱས་ནས་སྦྲགས་ཏེ་བཞག །མཐང་གོས་ཉིས་བལྟབ་བྱས་པ་བསྒྲུབ་བྱ་ལ་བསྐོན། དེ་སྟེང་དུ་བླ་གོས་སྣམ་སྦྱར་སྦྲགས་པ་བསྐོན་པའི་ཕྲག་པ་གཡོན་པར་བཀལ། གཡས་ཀྱི་སྣེ་མོ་གཡོན་གྱི་ཕྲག་པའི་སྟེང་དུ་བཞག་གཡས་ཀྱི་དཔུང་བ་ཕྱིར་ཕྱུང་སྟེ་མཁན་པོས་ཀྱང་བསྐོན་ཞིང་ཐལ་མོ་སྙིང་གར་སྦྱར་བཅུག་པའི་མགོ་བོར་མེ་ཏོག་བཞག་ནས། སྨོན་ལམ་བཞི་བོ་ཐམས་ཅད་ཀྱིས་གདབ་པོ། །སྣམ་སྦྱར་བསྐོན་མ་ཐག་ཏུ་མྱུར་དུ་བསྙེན་པར་རྫོགས་པའི་ཆེད་དུ་རྩ་འམ། གདིང་བའི་སྟེང་ན་འདུག་པས་དགེ་འདུན་ལ་ཕྱག་གསུམ་བྱའོ། །(༢༠༥ན)
གལ་ཏེ་གོས་དྲས་ཤིང་དྲུབས་པ་མེད་པ་འམ། དངོས་ཀྱི་བྱིན་རླབས་འཆགས་པ་མེད་ན་ཆོས་གོས་གསུམ་གྱི་རྒྱུ་རུང་བ་སོ་སོར་བལྟབས་ཏེ་སློབ་མའི་ཕྲག་པ་གཡོན་པ་ལ་བཀལ། གཉིས་ཀས་སྣམ་སྦྱར་གྱི་རྒྱུ་བཟུང་ལ་བཤད་པ་གཞན་འདྲ་བ་ལ་འདི་སྣམ་སྦྱར་གྱི་རྒྱུར་བྱིན་གྱིས་བརླབ་སྙམ་པ་གྱིས་ལ་རྗེས་ཟློས་ཀྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ཆོས་གོས་འདི་སྣམ་སྦྱར་དུ་བྱིན་གྱིས་བརླབ་བོ། །འཚལ་ལ་བར་ཆད་མ་བྱུང་ན་སྣམ་ཕྲན་དགུ་པ་ལ་སོགས་པར་བགྱི་སྟེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བཀྲུའོ། །བརྐྱང་ངོ་། །དྲའོ། །བསྡེབ་བོ། །གཟུངས་གདབ་པོ། །དྲུབ་པོ། ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་ཏེ་ཆོས་གོས་འདི་ནི་རུང་བ་སྤྱད་པར་འོས་པའོ། །ལན་གསུམ་བཟླས་ལ་ཐབས་ལེགས་བྱའོ། །བླ་གོས་ལ་གཞན་འདྲ་བ་ལ་སྣམ་ཕྲན་བདུན་པར་བགྱི་སྟེ། གླེགས་བུ་ཕྱེད་དང་གསུམ་བར་བགྱིའོ། །མཐང་གོས་ལ་སྣམ་ཕྲན་ལྔ་པར་བགྱི་སྟེ་གླེགས་བུ་ཕྱེད་དང་གཉིས་པར་བགྱིའོ། །ཞེས་བརྗོད་གཞན་སྔར་གྱིས་འགྲེའོ། །ལྷུང་བཟེད་སྟོན་པའི་དགེ་སློང་གིས་ལྷུང་བཟེད་ཀྱི་ནང་དུ་མེ་ཏོག་གམ་སྨན་ཅུང་ཟད་བཅུག་ལ། ལྷུང་བཟེད་ལག་པ་གཡོན་པར་བཞག་གཡས་པས་ཁ་བཀབ། རྒན་པའི་མཐའ་ནས་བརྩམས་ཏེ་དགེ་སློང་རེ་རེའི་མདུན་དུ་འགྲེངས་ཏེ་འདུད་པ་དང་བཅས་པས་རྒན་གཞོན་གྱི་བྱེ་བྲག་གིས་བཙུན་པའམ་ཚེ་དང་ལྡན་པ་དགོངས་སུ་གསོལ། ཚེ་དང་ལྡན་པ་མིང་འདི་ཞེས་བགྱི་བའི་ལྷུང་བཟེད་འདི་མི་ཆུང་ངམ་མི་ཆེ་འམ། མི་སྐྱ་འམ་ཞེས་འདྲི། རེ་རེ་ནས་ལྷུང་བཟེད་བཟང་ངོ་། །(༢༠༥བ)
ཞེས་བརྗོད། གལ་ཏེ་དེ་ལྟར་མི་བརྗོད་ན་ཉེས་བྱས་སོ། །སྟོན་མཁན་དེ་ལ་དགེ་སློང་གཞན་ཞིག་གིས་སྟོན་ལུགས་སྔར་བཞིན་བྱ། མཁན་པོས་ལེགས་པར་བརྟགས་ནས་འགྲིམ་དུ་བཅུག་པ་ཡིན་ན་མཁན་པོ་ལ་བསྟན་མི་དགོས། དེ་ལྟ་མ་ཡིན་ན་དགོས་གསུང་ངོ་། །དེ་ནས་ལྷུང་བཟེད་དེ་མཁན་སློབ་གཉིས་ཀ་འགྲེང་བའི་ལག་པ་གཡོན་པར་བཞག །གཡས་པས་སྟེང་ནས་བཀབ་ལ་བཤད་པ་ལ་སྤྲོ་ན་དགེ་ཚུལ་གྱི་སྐབས་ལྟར་བྱས་ནས། འདི་དགེ་སློང་གི་འཚོ་བའི་ཡོ་བྱད་ལྷུང་བཟེད་དུ་བྱིན་གྱིས་བརླབ་སྙམ་པ་གྱིས་ལ་འདིའི་རྗེས་ཟློས་གྱིས། མཁན་པོ་དགོངས་སུ་གསོལ། བདག་མིང་འདི་ཞེས་བགྱི་བའི་ལྷུང་བཟེད་ཟས་ལ་སྤྱད་པར་འོས་པ་དྲང་སྲོང་གི་སྣོད་འདི་བསླང་བའི་སྣོད་དུ་བྱིན་གྱིས་བརླབ་བོ་ལན་གསུམ་བཟླས་ཐབས་ལེགས་བྱའོ། །དེ་ནས་གདིང་བ་དང་ཆུ་ཚགས་སྟེར་ལུགས་དགེ་ཚུལ་གྱི་སྐབས་ཇི་ལྟ་བ་བཞིན་བྱ། དེས་ཁྱེད་བསྙེན་པར་རྫོགས་པར་བྱེད་པའི་ཡོ་བྱད་མངོན་དུ་གྱུར་པར་བྱས་པ་ཡིན་ནོ། །རེ་ཞིག་དགེ་སློང་འདིའི་ཕྱི་ལ་སོང་ཞིག་ཅེས་བརྗོད། གྲོགས་བྱེད་པའི་དགེ་སློང་དེས་ཀྱང་བསྒྲུབ་བྱ་དེའི་ལུས་ཚགས་ལེགས་པར་བྱས། ལས་མི་ཐོས་པའི་ས་ཡིན་ན་དང་། ཐོས་ཚེ་རྣ་བ་བཀག་ལས་གྲལ་ནས་མཐོང་སར་གདིང་བ་བཏིང་བའི་སྟེང་དུ་ཁ་ཚུར་བསྟན་ནས་འགྲེངས་ཏེ་འདུད་པ་དང་བཅས་པའི་ཚུལ་དུ་བཞག་ལ། རང་ཉིད་ལས་གྲལ་དུ་འཁོད་པར་བྱའོ། །བཞི་པ་གསོལ་བའི་ལས་དང་ཞེས་པ་ནི། ཕྱག་ལེན་ལ་ཕུང་པོ་གསུམ་པའི་མདོ་འདོན་པའི་སྒོ་ནས་ལས་གྲལ་གྱི་དགེ་སློང་རྣམས་ཀྱིས་ལྟུང་བ་ལ་བཤགས་བསྡམས་ཚུལ་བཞིན་དུ་བྱས་ཏེ་བསྡམས་བྱ་ཉེས་བྱས་ཡན་ཆད་ཀྱིས་མ་གོས་(༢༠༦ན)
པར་བྱེད་དགོས་པ་ད་ལྟ་ཕྱག་ལེན་ལ་དགེ་འདུན་རྣམས་འདུས་མ་ཐག་པར་མཛད་པ་བདེ། ལས་བྱེད་པས་གསང་སྟོན་བསྐོ་བའི་ཐོག་མར་ལས་ཐམས་ཅད་ཀྱི་སྔོན་དུ་འགྲོ་བ་གཉིས་གདའ་བ་ལ། ལྟུང་བ་ཐུན་མོང་བ་བྱིན་གྱིས་བརླབ་པ་འདི་ལས་གྲལ་མ་འདུས་པའི་གོང་དུ་བྱ་བར་གསུངས་ཀྱང་དེར་བྱ་བ་མ་གྲུབ་པས་འདིར་བགྱི། ཡུལ་དུས་ཀྱི་སྟབས་ཀྱིས་བཤགས་པར་མ་ནུས་པའི་ལྟུང་བ་ཐུན་མོང་བ་ཐམས་ཅད་ལས་ལ་མི་སྒྲིབ་པར་བགྱི་བའི་སླད་དུ། གསོལ་བའི་ལས་ཀྱིས་བྱིན་གྱིས་བརླབ་པར་བགྱི་བས། དགེ་འདུན་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། དེང་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ལགས་ལ་བདག་ཅག་དགེ་འདུན་ཐམས་ཅད་ནི་ལྟུང་བ་དང་བཅས་པར་གྱུར་ན་གང་གི་མདུན་དུ་བདག་ཅག་ལྟུང་བ་དེ་ཆོས་བཞིན་དུ་སླར་བགྱི་བ། བདག་ཅག་ལས་དགེ་སློང་གནས་གཞན་དུ་མཆིས་ལ་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་སླར་བགྱིད་པར་སྤྲོ་བ་སུ་ཡང་མ་མཆིས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དེང་ལྟུང་བ་དེ་བྱིན་གྱིས་བརླབས་ཏེ་བསྙེན་པར་རྫོགས་པའི་འཕྲིན་ལས་མཛད་ལ། སླད་ཀྱིས་དགེ་སློང་གི་མདུན་དུ་ལྟུང་བ་དེ་ཆོས་བཞིན་དུ་སླར་མཛད་དོ། །འདི་ནི་གསོལ་བའོ། །ལྔ་པ་བློ་མཐུན་དང་ཞེས་པའི་དོན། དགེ་འདུན་ཐུགས་མཐུན་པའི་ཕྱིར་གནས་ལ་བློ་མཐུན་བགྱི་བ་ནི། ལས་མཛད་པའི་གནས་འདི་ཉེ་འཁོར་དང་བཅས་པ་ཚུན་ཆད། བསྙེན་རྫོགས་ཀྱི་འཕྲིན་ལས་ཀྱི་གནས་སུ་ཐུགས་བསྟུན་པ་གསོལ་བའི་(༢༠༦བ)
ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པའམ། བགྱིས་པ་འམ། ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བཞེད་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་གནས་ཐམས་ཅད་གྲུབ་པ་འམ། བགྱིས་པ་འམ། ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱིའོ། །འདི་ནི་གསོལ་བའོ། །གསོལ་བ་ཐལ། བརྗོད་པ་མཇུག་བསྡུད་དང་བཅས་པ་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། གནས་ཐམས་ཅད་གྲུབ་པ་འམ། བགྱིས་པ་འམ། ལགས་པ་ནང་མཚམས་དང་། །ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བཞེད་དོ། །དེའི་སླད་དུ་དགེ་འདུན་གྱིས་གནས་ཐམས་ཅད་གྲུབ་པ་འམ། བགྱིས་པ་འམ། ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱིས་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱི་ན། ཚེ་དང་ལྡན་པ་གང་དག་གནས་ཐམས་ཅད་གྲུབ་པའམ། བགྱིས་པ་འམ། ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱིས་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱི་བར་བཟོད་པ་དེ་དག་ནི་ཅང་མ་གསུང་ཞིག །གང་(༢༠༧ན)
དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱི་གནས་ཐམས་ཅད་གྲུབ་པ་འམ། བགྱིས་པ་འམ། ལགས་པ་ནང་མཚམས་དང་། ཕྱི་རོལ་ཉེ་འཁོར་འདོམ་གང་དང་བཅས་པ་འདི་དགེ་འདུན་གྱི་བསྙེན་པར་རྫོགས་པའི་འཕྲིན་ལས་ཀྱི་གནས་སུ་བློ་མཐུན་པར་བགྱིས་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གྲུབ་པ་ཞེས་པ་བསྐལ་པ་ཆགས་པའི་ཚེ་རང་གྲུབ་པ་འམ། དེའི་འོག་ཏུ་གཏིབ་ཆད་པ་ལ་སོགས་པ་རང་གྲུབ་པ་སྟེ། སྐྱེས་བུའི་རྩོལ་བ་ལ་མ་བལྟོས་པའོ། །བགྱིས་པ་ཞེས་པ་སྐྱེས་བུའི་བྱེད་པས་མངོན་པར་བསྒྲུབས་པའོ། །ལགས་པ་ནི་ཟིན་པ་སྟེ་བྱ་བ་བྱེད་པའི་གནས་ལ་སོགས་པ་རུང་བའོ། །ཆོ་གའི་སྐབས་སུ་གང་རུང་ལས་གསུམ་ཁ་བརྗོད་མི་དགོས་སོ། ཆོ་ག་དེ་དཀྱུས་གཅིག་ལ་བསྙེན་རྫོགས་དུ་མ་ཞག་གཅིག་ལ་སྦྲེལ་ནས་བྱེད་ན། ལྟུང་མཐུན་བྱིན་གྱིས་བརླབ་པ་དང་། གནས་ལ་བློ་མཐུན་གཉིས་ཆོ་ག་ཕྱི་མ་རྣམས་ལ་བྱེད་མི་དགོས་སོ། །དྲུག་པ་སྤྲོ་བྱ་གསོལ་བ་གསང་སྟོན་དང་། ཞུ་དང་ཞེས་པའི་དོན། དེ་ནས་ལས་བྱེད་པས་མཁན་པོ་མིང་འདི་ཞེས་བགྱི་བས། ཚེ་དང་ལྡན་པ་མིང་འདི་ཞེས་བྱ་བའི་གསང་སྟེ་སྟོན་པར་གསོལ་བ་བཏབ་པ་དེ་གང་ཡིན་ཞེས་དྲི། དེས་བདག་དགེ་སློང་མིང་འདི་ཞེས་བྱ་བ་ལགས་ཞེས་ལན་གདབ། །མིང་འདི་ཞེས་བྱ་བ་ཁྱེད་མཁན་པོ་མིང་འདི་ཞེས་བྱ་བས་ཚེ་དང་ལྡན་པ་མིང་འདི་ཞེས་བགྱི་བ་ལ་གསང་སྟེ་སྟོན་པར་སྤྲོ་འམ། དེས་ཀྱང་སྤྲོ་ལགས་ཞེས་ལན་གདབ། ལས་བརྒྱ་རྩ་གཅིག་ལས། བསྙེན་པར་རྫོགས་པའི་རྟེན་ལ་བྱ་བའི་ལས་རིགས་བརྒྱད་ལས། འདིར་(༢༠༧བ)
གསང་སྟེ་སྟོན་པས་ལྐོག་ཏུ་བར་ཆད་དྲི་བའི་ཕྱིར། གསང་སྟེ་སྟོན་པ་བསྐོ་བ་ལ་ཐུགས་བསྟུན་པ་གསོལ་བའི་ལས་ལ་ཐུགས་གཏད་པ་ཞུ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས། མིང་འདི་ཞེས་བགྱི་བ་ལ་གསང་སྟེ་སྟོན་པར་སྤྲོ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་སློང་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བ་མིང་འདི་ཞེས་བགྱི་བ་ལ་གསང་སྟེ་སྟོན་ཏོ། །འདི་ནི་གསོལ་བའོ། །དེ་ནས་གསང་སྟོན་དེས་བསྒྲུབ་བྱའི་གན་དུ་ཕྱིན་ལ་རང་ལ་ཕྱག་གསུམ་འཚལ་དུ་བཅུག །མདུན་དུ་ཙོག་ཙོག་པུར་འདུག་ཏུ་བཅུག་སྟེ། ཐལ་མོ་སྙིང་གར་སྦྱོར་དུ་བཅུག་ལ། ཁྱོད་བསྙེན་པར་རྫོགས་པར་བྱེད་པ་ལ་མངོན་དུ་གྱུར་པ་བཅུ་ཚང་དགོས་ཤིང་། དེའི་ནང་ནས་ཡོངས་སུ་དག་པ་མངོན་དུ་གྱུར་པ་ཞེས་བྱ་བ། བར་ཆད་ཀྱི་ཆོས་དང་མི་ལྡན་པ་ཞིག་དགོས། བར་ཆད་ཡོད་མེད་ངས་དྲིས་པས་ཤེས་པས་ཁྱོད་ལ་དྲི་བར་བྱ། ཁྱོད་ཀྱིས་ཀྱང་ཆོ་ག་ལས། འདི་ནི་ཁྱོད་ཀྱི་བདེན་པའི་དུས་འདི་ནི་འབྱུང་བའི་དུས་ཏེ། ཞེས་པའི་དོན་བདེན་པར་སྨྲ་བའི་དུས་དང་། འབྱུང་བ་སྟེ་ཡང་དག་པའི་མཐའ་སྨྲ་བའི་དུས་ཡིན་པས་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས་འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་དྲི་ཡིས། ཁྱོད་མ་འཛེམས་པར་བྱོས་ལ་ཡིན་པ་ལ་ཡིན་ཞེས་སྨྲོས། མ་ཡིན་པ་ལ་མ་ཡིན་ཞེས་ལན་ཐོབ་ཅིང་། ཁྱོད་སྐྱེས་པ་ཡིན་ནམ། དེས་ཡིན་ལགས་ཞེས་སོགས། (༢༠༨ན)
དྲི་བ་དང་མཐུན་པའི་ལན་གདབ་བོ། །སྐྱེས་པའི་དབང་པོ་དང་ལྡན་ནམ། ལོ་ཉི་ཤུ་ལོན་ནམ། ཁྱོད་ཀྱི་ཆོས་གོས་གསུམ་དང་ལྷུང་བཟེད་ཚང་ངམ། ཁྱོད་ཕ་མ་གསོན་པས་མ་གནང་བ་མ་ཡིན་ནམ། ཁྱོད་བྲན་མ་ཡིན་ནམ། བརྐུས་པ་མ་ཡིན་ནམ། རྙེད་བཙོན་མ་ཡིན་ནམ། རྩོད་པ་ཅན་མ་ཡིན་ནམ། བཙོངས་པ་མ་ཡིན་ནམ། རྒྱལ་པོས་བཀྲབས་པ་མ་ཡིན་ནམ། རྒྱལ་པོ་ལ་བསྡིགས་པ་མ་ཡིན་ནམ། རྒྱལ་པོ་ལ་གནོད་པའི་ལས་བྱེད་པ་མ་ཡིན་ནམ། རྒྱལ་པོ་ལ་གནོད་པའི་ལས་བྱས་སམ་བྱེད་དུ་བཅུག་པ་མ་ཡིན་ནམ། ཆོམ་རྐུན་པར་གྲགས་པ་མ་ཡིན་ནམ། ཟ་མ་མ་ཡིན་ནམ། མ་ནིང་མ་ཡིན་ནམ། དགེ་སློང་མ་སུན་ཕྱུང་བ་མ་ཡིན་ནམ། རྐུ་ཐབས་སུ་གནས་པ་མ་ཡིན་ནམ། ཐ་དད་དུ་གནས་པ་མ་ཡིན་ནམ། གནས་པར་མི་བྱ་བ་མ་ཡིན་ནམ། མུ་སྟེགས་ཅན་མ་ཡིན་ནམ། །མུ་སྟེགས་ཅན་ཞུགས་པ་མ་ཡིན་ནམ། ཕ་བསད་པ་མ་ཡིན་ནམ། །མ་བསད་པ་མ་ཡིན་ནམ། དགྲ་བཅོམ་པ་བསད་པ་མ་ཡིན་ནམ། དགེ་འདུན་གྱི་དབྱེན་བྱས་པ་མ་ཡིན་ནམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ། སྤྲུལ་པ་མ་ཡིན་ནམ། དུད་འགྲོ་མ་ཡིན་ནམ། ཞེས་དྲིས་ལ། བསྒྲུབ་བྱས་མ་ཡིན་ལགས་ཞེས་བརྗོད་པར་བྱའོ། ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་བསྙེན་པར་རྫོགས་ནས་འཇལ་མི་ནུས་པ་ཅུང་ཟད་ཀྱང་ཆགས་པ་མེད་དམ། ཁྱོད་སྔོན་རབ་ཏུ་བྱུང་བ་མ་ཡིན་ནམ། ཁྱོད་ཕམ་པར་གྱུར་པ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ། ཇི་ལྟར་ཁྱོད་ད་ལྟ་རབ་ཏུ་བྱུང་བ་ཡིན་ནམ། ཁྱོད་ཀྱིས་ཚངས་པར་(༢༠༨བ)
སྤྱོད་པ་ལེགས་པར་སྤྱད་དམ། ཞེས་དྲི། དེས་ལེགས་པར་སྤྱད་ལགས་ཞེས་བརྗོད། ཁྱོད་ཀྱི་མིང་ཅི། དེས་བདག་གི་མིང་འདི་ཞེས་བགྱི། ཁྱོད་ཀྱི་མཁན་པོའི་མིང་ཅི། དོན་གྱི་སླད་དུ་མཚན་ནས་སྨོས་ཏེ་བདག་གི་མཁན་པོའི་མིང་འདི་ཞེས་བགྱི། ཞེས་བརྗོད་དོ། །ཚེ་དང་ལྡན་པ་ཁྱོད་ཉོན་ཅིག །མི་རྣམས་ཀྱི་ལུས་ལ་ལུས་ཀྱི་ནད་རྣམ་པ་འདི་ལྟ་བུ་དག་འབྱུང་བ་འདི་ལྟ་སྟེ། མཛེ་དང་། འབྲས་དང་། ཕོལ་མིག་དང་། འབྲུམ་ཕྲན་དང་། ཤ་བཀྲ་དང་། ཁྱི་སྔོ་དང་། གཡའ་བ་དང་། གློག་པ་དང་། རྐང་ཤུ་དང་། སྐེམ་ནད་དང་། རྐེམ་པ་དང་། བརྗེད་བྱེད་དང་། བཀྲེས་རྔབ་དང་། །སྐྱ་རྦབ་དང་། རྐང་བམ་དང་། མཚན་པར་རྡོལ་བ་དང་། རིམས་དང་། རིམས་དྲག་པ་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། འདུས་པ་དང་། །རིམས་ཉིན་རེ་བ་དང་། རྟག་པའི་རིམས་དང་། །རིམས་ལྡང་དུབ་པ་དང་། ཤུ་བ་དང་། གསུད་པ་དང་། སྐྱིགས་བུ་དང་། ལུད་པ་དང་། དབུགས་མི་བདེ་བ་དང་། ལྷོག་པ་དང་། ཡན་ལག་ཏུ་ཟུག་པ་དང་། སྐྲན་དང་། ཁྲག་ནད་དང་། མཁྲིས་ནད་དང་། གཞང་འབྲུམ་དང་། སྐྱུག་བྲོ་བ་དང་། ཆུ་འགགས་པ་དང་། ངལ་བ་དང་། ལུས་ཚ་བ་དང་། རྩིབ་ལོགས་ཚ་བ་དང་། རུས་པ་ལ་ཟུག་པ་སྟེ་ལུས་ཀྱི་ནད་འདི་ལྟ་བུ་འདི་དག་ལས་གང་ཡང་རུང་བ་དང་། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ། དེས་མེད་ལགས་ཞེས་བརྗོད་དོ། །ཚེ་དང་ལྡན་པ་ཁྱོད་ཉོན་ཅིག །ཁྱོད་ལ་ད་ལྟ་ངས་དྲིས་པ་དེ་ཉིད་དགེ་འདུན་གྱི་དབུས་སུ་ཡང་། ཚངས་པ་མཚུངས་པར་སྤྱོད་པ་མཁས་པ་རྣམས་ཁྱོད་ལ་(༢༠༩ན)
འདྲི་ཡིས། དེར་ཡང་ཁྱོད་ཀྱིས་མ་འཛེམ་པར་བྱོས་ལ། ཡིན་པ་ལ་ཡིན་ཞེས་སྨྲོས། མ་ཡིན་པ་ལ་མ་ཡིན་ཞེས་ལན་ཐོབ་ཅིག །ཁྱོད་མ་བོས་ཀྱི་བར་དུ་མ་འོང་པར་སྡོད་ཅིག །དེ་ལྟར་ན་ཁྱོད་བར་ཆད་ཀྱིས་དག་འདུག་ཅིང་། ངས་དགེ་འདུན་ལ་ཞུས་ལ་ཡོང་གི་ཞེས་བརྗོད་ལ། དེས་དགེ་འདུན་གྱི་ནང་དུ་འོངས་ཏེ་རྒན་པའི་མཐའ་ལོགས་སུ་འགྲེངས་ཏེ་འདུད་པ་དང་བཅས་པས། དགེ་འདུན་བཙུན་པ་རྣམས་གསན་དུ་གསོལ། བདག་གི་མཁན་པོ་མིང་འདི་ཞེས་བགྱི་བས། ཚེ་དང་ལྡན་པ་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན། དེ་ཡང་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན། ཅི་མཆི་ཞིག་གམ་ཐམས་ཅད་ཀྱིས་གལ་ཏེ་ཡོངས་སུ་དག་ནའོ། །ཞེས་བརྗོད། མ་བརྗོད་ན་ཉེས་བྱས་སོ། །དེ་ནས་བསྒྲུབ་བྱ་ལ་དགེ་འདུན་གྱི་ནང་གི་ཤོག་ཅིག་ཅེས་བརྗོད་ལ། གདིང་བའི་སྟེང་ནས་དགེ་འདུན་སྤྱི་ལ་དམིགས་པའི་ཕྱག་གསུམ་འཚལ་དུ་བཅུག་ལ། རང་ཉིད་གྲལ་དུ་འཁོད་དོ། །བདུན་པ་གསོལ་བ་དང་ཞེས་པའི་དོན་གསོལ་བ་མངོན་དུ་འགྱུར་བར་བྱ་བའི་ཕྱིར་གསོལ་བ་གདབ་པ་ནི། བསྒྲུབ་བྱ་དེ་དང་པོར་སྟོན་པ་ལ་ཕྱག་གསུམ་འཚལ་དུ་བཅུག །དེ་ནས་དགེ་འདུན་ལ་ཕྱག་གསུམ་འཚལ་དུ་གཞུག །དེ་ནས་ལས་སློབ་པས་དེ་ལ་ཕྱག་གསུམ་ཚོལ་ལ། ངེད་ཀྱི་མདུན་དུ་ཕ་གུའི་སྟེང་དུ་རྩྭ་བཏིང་བ་ལ་རྟིང་པ་གཉིས་ཀྱིས་མནན་ནས། ཙོག་ཙོག་པུར་ཐལ་མོ་སྙིང་གར་སྦྱོར་ལ་འདུག་ཅིག་ཅེས་བསྒོ། ཁྱོད་བསྙེན་པར་རྫོགས་པའི་སྡོམ་པ་དོན་དུ་གཉེར་བ་དེ། དགེ་འདུན་(༢༠༩བ)
གྱི་ལས་ཀྱིས་སྒྲུབ་དགོས་ཤིང་། ལས་བརྒྱ་རྩ་གཅིག་ཡོད་པ་ལས་སློབ་དཔོན་དུལ་བ་ལྷས། དགོས་ཆེད་ཀྱི་སྒོ་ནས་ལས་རིགས་བཅུ་གསུམ་དུ་བསྡུ་བ་མཛད་ཀྱང་། སློབ་དཔོན་ཐོགས་མེད་ཀྱི་གཞི་སེམས་ཅན་ལ་བྱ་བ་དང་། སེམས་ཅན་མ་ཡིན་པ་ལ་བྱ་བ་གཉིས་སུ་བསྡུས་ཤིང་། དེ་ལ་འདིར་སེམས་ཅན་ལ་བྱ་བ་ཡིན། དེ་ལ་ཁྱིམ་པ་དང་རབ་ཏུ་བྱུང་བའི་རྟེན་ལ་བྱ་བ་གཉིས་ལས། འདིར་ཐ་མ་ཡིན། དེ་ལ་བསྙེན་པར་རྫོགས་པ་དང་། །མ་རྫོགས་པའི་རྟེན་ལ་བྱ་བ་གཉིས་ལས་ཐ་མ་ཡིན། དེ་ལ་སྦྱིན་པའི་ལས་དང་། མི་མཐུན་པའི་ལས་གཉིས་ལས་འདི་སྦྱིན་པའི་ལས། དེའི་ནང་ནས་ཀྱང་བསྙེན་པར་རྫོགས་པའི་སྡོམ་པ་སྦྱིན་པའི་ལས་ཡིན་པས། སྦྱིན་པའི་ལས་མཚན་ཉིད་པ་ཐམས་ཅད་ལ་གསོལ་བ་ལན་གསུམ་དུ་གདབ་པ་སྔོན་དུ་འགྲོ་བས་གསོལ་བ་འདེབས་དགོས། གསོལ་བ་གང་ལ་འདེབས་ན། གང་ལས་སྡོམ་པ་ཐོབ་པར་འགྱུར་བའི་དགེ་འདུན་གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་སྟེ་མཚན་ཉིད་གསུམ་ལྡན་ལ་གསོལ་བ་འདེབས་དེ་ཡང་ཆོ་གའི་ཚིག་ཟུར་ནས་བདག་བསྙེན་པར་རྫོགས་པར་མཛད་དུ་གསོལ། ཞེས་བྱ་བ་འབྱུང་། བསྙེན་པར་རྫོགས་པ་ནི་སཾསྐྲྀ་ཏའི་སྐད་དུ་ཨུ་པ་སམྤཏ་ཞེས་འབྱུང་། དེ་ཡང་ཨུ་པ་ནི་ཉེ་བ། སམྤ་ཏ་རྫོགས་པ་སྟེ་སྐྱོན་ཐམས་ཅད་དང་བྲལ་ཞིང་། ཡོན་ཏན་ཐམས་ཅད་རྫོགས་པ་མྱ་ངན་ལས་འདས་པ་ཐོབ་པ་ལ་ཁད་ཉེ་བའི་དགེ་སློང་གི་དངོས་པོ་བསྒྱུབ་ཏུ་གསོལ་ཞེས་བྱ་བའི་དོན་ཡིན། དྲང་དུ་གསོལ་བྱ་བ་ནི་བ་སྙེན་རྫོགས་ཀྱི་སྡོམ་པ་དང་མི་ལྡན་པའི་ཆ་ནས་ལྡན་པའི་སར་ཕྱག་(༢༡༠ན)
བརྐྱང་བའི་ཚུལ་གྱིས་དྲང་དུ་གསོལ་ཞེས་བྱ་བ་ཡིན། རྗེས་སུ་གཟུང་དུ་གསོལ་བ་ནི་སྔོན་མེད་པའི་སྡོམ་པ་སྦྱིན་པའི་སྒོ་ནས་རྗེས་སུ་གཟུང་དུ་གསོལ་ཞེས་བྱ་བ་ཡིན། རྗེས་སུ་བསྟན་དུ་གསོལ་ནི་འཁོར་བའི་སྡུག་བསྔལ་ལས་བསྒྲལ་བའི་ཕྱིར་ཐར་པའི་ལམ་སྟན་དུ་གསོལ་བྱ་བ་ཡིན་། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཞེས་པ་ནི། དགེ་འདུན་ནི་སྡུག་བསྔལ་གྱི་འདམ་དུ་བྱིང་བ་རྣམས་ཡོངས་སུ་སྐྱོབ་པར་མཛད་པས་ན་ཐུགས་བརྩེ་བ་ཅན་ནོ། །ཐུགས་བརྩེ་བའི་སླད་དུ་ཞེས་པ་ཐུགས་བརྩེ་བ་སྔོན་དུ་བཏང་ནས་ཡིན་གྱི་ལན་དུ་ཕན་འདོགས་པའི་བློས་ནི་མ་ཡིན་ནོ། །ཐུགས་བརྩེ་བར་མཛད་དུ་གསོལ་ནི་ཐུགས་བརྩེ་བས་ཀུན་ནས་བསླངས་ཏེ། ཅི་ནས་ཀྱང་བསྙེན་པར་རྫོགས་པར་མཛད་དུ་གསོལ་བྱ་བ་ཡིན་པས་དོན་དེ་རྣམས་དྲན་པའི་སྒོ་ནས། དགེ་འདུན་མཐའ་དག་གིས་གསན་པའི་རྗེས་ཟློས་ཚིག་ཟུར་ཆག་པ་དང་ནོར་བ་མ་ཡིན་པ་བྱེད་ཚིག་སོ་སོ་ནས་མ་འཆོལ་བར། སྐད་ཆེ་ལ་བརྗོད་པ་དག་པ་གྱིས་ལ། ཁོ་བོའི་ངག་རྫོགས་པའི་རྗེས་སུ་རྗེས་ཟློས་ཚེག་ཟུར་ལམ་པ་གྱིས་ཤིག །དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ཏེ། བདག་མིང་འདི་ཞེས་བགྱི་བ། དོན་གྱི་སླད་དུ་མཚན་ནས་སྨོས་ཏེ་མཁན་པོ་མིང་འདི་ཞེས་བགྱི་བས། དགེ་འདུན་ལ་བསྙེན་པར་རྫོགས་པར་གསོལ་ན། དགེ་འདུན་བཙུན་པ་རྣམས་ཀྱིས་བདག་བསྙེན་པར་རྫོགས་པར་མཛད་དུ་གསོལ། དགེ་(༢༡༠བ)
འདུན་བཙུན་པ་རྣམས་ཀྱིས་དྲང་དུ་གསོལ། དགེ་འདུན་བཙུན་པ་རྣམས་ཀྱིས་བདག་རྗེས་སུ་གཟུང་དུ་གསོལ། དགེ་འདུན་བཙུན་པ་རྣམས་ཀྱིས་བདག་ལ་རྗེས་སུ་བསྟན་དུ་གསོལ། །ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ། འདི་རང་དོན་དུ་བརྗོད་པའི་སྔགས་ཡིན་པས་ལན་གསུམ་བརྗོད་དགོས་པའི་ཕྱིར། གཉིས་པའི་ཡང་རྗེས་ཟློས་མཛོད། ཡང་གསུམ་པའི་ཡང་རྗེས་ཟློས་མཛོད། དེ་ལྟར་ལན་གསུམ་དུ་གསོལ་བ་བཏབ་པས། དགེ་འདུན་གྱིས་ཀྱང་ཅང་མི་གསུང་བའི་སྒོ་ནས་གནང་བ་བྱིན་པ་ཡིན། དེས་བསྙེན་པར་རྫོགས་པར་འདོད་པ་དང་། གསོལ་བ་མངོན་དུ་གྱུར་པ་བྱས་པ་ཡིན། ཤིན་ཏུ་བསྡུ་ན། ཁྱོད་བསྙེན་པར་རྫོགས་པར་བྱེད་པ་ལ་དགེ་འདུན་ལ་ལན་གསུམ་གྱི་བར་དུ་གསོལ་བ་འདེབས་དགོས་པས། ངེད་ཀྱི་རྗེས་ཟློས་གྱིས། དགེ་འདུན་བཙུན་པ་རྣམས་གསན་དུ་གསོལ་ནས། ཐུགས་བརྩེ་བར་མཛད་དུ་གསོལ་གྱི་བར་ལན་གསུམ་བརྗོད་དོ། །བརྒྱད་པ་གསོལ་བ་དང་། དྲི་དང་ཞེས་པའི་དོན། ཡོངས་སུ་དག་པ་དགེ་འདུན་ཐུགས་ཡིད་ཆེས་པ་ལ་སོགས་པའི་དོན་དུ་ནང་དུ་བར་ཆད་དྲི་བར་བྱ་བའི་ཕྱིར་སྔོན་འགྲོ་གསོལ་བའི་ལས་བགྱིད། ཁྱེད་རང་རྗེས་ཟློས་བགྱི་མི་འཚལ། དགེ་འདུན་སྤྱོད་ལམ་བསྟུན་ནས་གསོལ་བའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ཏེ། མིང་འདི་ཞེས་བགྱི་བ་འདི་མཁན་པོ་མིང་འདི་(༢༡༡ན)
ཞེས་བགྱི་བས། དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། བདག་གིས་དགེ་འདུན་གྱི་ནང་དུ་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་དྲི་བར་བྱའོ། །འདི་ནི་གསོལ་བའོ། །དེ་ནས་བསྒྲུབ་བྱ་ལ་ངེད་ལ་ཕྱག་གསུམ་ཕུལ་ལ། སྔར་བཞིན་ཕ་གུའི་སྟེང་དུ་འདུག་ཅིག་ཅེས་བསྒོ་ལ། ཁྱོད་བསྙེན་པར་རྫོགས་པར་བྱེད་པ་ལ་རྒྱུད་བར་ཆད་ཀྱི་ཆོས་དང་མི་ལྡན་པས་ཡོངས་སུ་དག་པ་ཞིག་དགོས། བར་ཆད་ཅན་བསྙེན་པར་རྫོགས་ན་སྡོམ་པ་མི་སྐྱེ་བ་འམ། སྐྱེས་ཀྱང་རྒྱུན་མི་གནས་པ་ལ་སོགས་པའི་ཉེས་པ་ཡོད་པས། ཁྱོད་ལའང་ཕན་མི་ཐོགས། བསྙེན་པར་རྫོགས་པར་བྱེད་མཁན་ལ་ཡང་ཉེས་པ་འབྱུང་བ་ཡིན། བར་ཆད་མེད་ན་ཁྱོད་རང་ལ་ཡང་སྡོམ་པ་སྐྱེ་བས་དོན་ཆེན་པོ་འགྲུབ། ངེད་ཀྱིས་ཀྱང་ཆོས་ལྡན་གྱི་འཕྲིན་ལས་བྱས་པས་སྟོན་པ་ལ་བྱ་བ་བྱས་པར་བཤད་ཅིང་བསྟན་པ་ལ་ཕན་པ་ཡིན། བར་ཆད་གསང་སྟོན་གྱིས་དྲིས་པས་ཆོག་མོད་སྙམ་ན། བར་ཆད་འགའ་ཞིག་གློ་བུར་དུ་འབྱུང་བ་ཡང་སྲིད། སྔར་མ་དྲན་པ་དྲན་པའང་སྲིད་པ་ལ་སོགས་དགོས་བྱེད་འགའ་ཞིག་ཀྱང་ཡོད་མོད། གཙོ་ཆེར་དགེ་འདུན་ཐུགས་ཡིད་ཆེས་པའི་དོན་དུ་ནང་དུ་འདྲི་བ་ཡིན་པས་ལན་དྲང་པོར་ཐོབ་ཅིག །ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས། འདི་ནི་འབྱུང་བའི་དུས་ཏེ། ཁོ་བོས་ཁྱོད་ལ་ཅུང་ཟད་དྲི་ཡིས་ཁྱོད་མ་འཛེམ་པར་བྱོས་ལ་ཡིན་པ་ལ་ཡིན་ཞེས་(༢༡༡བ)
སྨོས་ཞེས་པ་ནས། འདི་ལྟ་བུ་གཞན་དག་ཀྱང་ཁྱོད་ཀྱི་ལུས་ལ་མེད་དམ་ཞེས་པའི་བར་སྔར་གསང་སྟོན་གྱི་དྲིས་པ་ལྟར་དྲིའོ། །དེ་ཡན་ཆད་ཀྱིས་སྦྱོར་བའི་ཆོ་ག་སོང་། གཉིས་པ་ལས་དང་ཞེས་པའི་དོན། དངོས་གཞིའི་ཆོ་ག་ནི། སངས་རྒྱས་ཆོས་དང་དགེ་འདུན་དང་། །མཁན་སློབ་བསྙེན་པར་རྫོགས་འདོད་དང་། །རྫོགས་པའི་ཡོ་བྱད་ཡོངས་དག་དང་། །གསོལ་པ་ལས་རྣམས་མངོན་གྱུར་ཏེ། །མངོན་གྱུར་བཅུ་ཡི་སྒོ་ནས་ནི། བསྙེན་རྫོགས་ཉིད་དུ་ཉེ་བར་བསྒྲུབ། །དེ་ལྟར་བཤད་པའི་རྒྱུ་ཚོགས་ལས། །མངོན་གྱུར་ལྷག་མ་བརྒྱད་པོ་ཡི། །བཤད་པ་བཏང་སྙོམས་གྱུར་ཀྱང་བླ། །མཁན་སློབ་དགེ་འདུན་བཅས་པ་རྣམས། །ཐུགས་དགོངས་གསུམ་པོ་གསལ་གདབ་ཅིང་། །ལས་ཀྱི་སློབ་དཔོན་མཁས་པ་ཡིས། །བསྙེན་རྫོགས་སྡོམ་པ་བསྐྱེད་པ་ལ། །མེད་དུ་མི་རུང་གཅེས་པའི་ཆོས། །བསྙེན་པར་རྫོགས་འདོད་བསམ་པའི་རྟེན། །ཁྱད་ཆོས་ལྔ་དང་ལྡན་པ་དང་། །གསོལ་བཞིའི་ཆོ་ག་གོ་བདེའི་ངག །འཁྲུལ་མེད་བློ་ལས་ཐོན་ནུས་པའི། །མངོན་གྱུར་གཉིས་ལ་ནན་ཏན་གྱིས། །བསྙེན་རྫོགས་བསྒྲུབ་པ་གནད་དུ་ཆེ། །བསྟན་རྩའི་དགེ་སློང་སྒྲུབ་བྱེད་ཀྱི། །དངོས་གཞིའི་ཆོ་གའི་ཁོག་ཕུབས་སོ། །དེ་ཡང་ཅུང་ཟད་བཤད་ན། ལས་འཆགས་པའི་རྒྱུ་རྐྱེན་ཕུན་སུམ་ཚོགས་པ་ཚང་ན། ལས་མཚན་ཉིད་དང་ལྡན་པར་བྱས་པས། སྡོམ་པ་ཐོབ་པར་འགྱུར་བས། གདམས་ངག་གི་བཤད་པ་མེད་ཀྱང་ཆོག་སྟེ། །བཤད་པ་མ་གཙོ། རྒྱུ་རྐྱེན་ཚང་བ་གཙོ་བ་ཡིན། འོན་ཀྱང་ངེས་འབྱུང་གི་བསམ་པ་གསལ་གདབ་ཅིང་ཐོབ་ཤེས་ཀྱི་ཡིད་ཆེས་པའི་ངེས་ཤེས་བསྐྱེད་པའི་ཕྱིར་གདམས་(༢༡༢ན)
ངག་གི་བཤད་པས་ཅུང་ཟད་བརྡ་སྤྲད་ན། གྲུབ་པའི་མཐའ་ལས། རྒྱུ་དྲུག་རྐྱེན་བཞིའི་ནང་ནས་རྒྱུ་རྐྱེན་ལྔ་ལས་སྐྱེ་བོ་ཞེས་བརྡ་སྤྲད་ཀྱང་རུང་། འགལ་རྐྱེན་བཞི་སྤངས་མཐུན་རྐྱེན་ལྔ་ཚང་བ་ལས་སྐྱེ་བོ་ཞེས་བརྡ་སྤྲད་ཀྱང་རུང་མོད་ཀྱི་འདིར་གཅིག་ལས་འཕྲོས་པའི་བཅུ་པའི་སྐབས་ལས། མངོན་དུ་གྱུར་ནས་བསྙེན་པར་རྫོགས་པར་འགྱུར་བ་བཅུ་སྟེ། སྟོན་པ་མངོན་སུམ་དུ་གྱུར་ནས་བསྙེན་པར་རྫོགས་པར་འགྱུར་བ་དང་། སངས་རྒྱས་མངོན་སུམ་དུ་གྱུར་པ་དང་། ཆོས་མངོན་སུམ་དུ་གྱུར་པ་དང་། མཁན་པོ་མངོན་སུམ་དུ་གྱུར་པ་དང་། སློབ་དཔོན་མངོན་སུམ་དུ་གྱུར་པ་དང་། བསྙེན་པར་རྫོགས་འདོད་མངོན་སུམ་དུ་གྱུར་པ་དང་། བསྙེན་པར་རྫོགས་པར་འདོད་པའི་ཡོ་བྱད་མངོན་སུམ་དུ་གྱུར་པ་དང་། ཡོངས་སུ་དག་པ་མངོན་སུམ་དུ་གྱུར་པ་དང་། གསོལ་བ་མངོན་སུམ་དུ་གྱུར་པ་དང་། ལས་མངོན་སུམ་དུ་གྱུར་པ་རྣམས་སོ། །ཞེས་གསུངས། དེ་ལྟར་བཅུ་ལས། སྟོན་པ་མངོན་སུམ་དུ་གྱུར་པ་ནི་དགེ་འདུན་ལ་འདུལ་འཛིན་སྔ་མ་རྣམས་འཆད་ཅིང་། འདི་ལ་དགེ་འདུན་གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བ་གསུམ་དགོས། དང་པོ་ནི། ཡུལ་དབུས་སུ་བསྙེན་པར་རྫོགས་པ་ལ་དགེ་སློང་བཅུ་ཡན་ཆད། མཐའ་འཁོབ་ཏུ་ལྔ་ཡན་ཆད་དགོས་ཏེ། ལུང་དུ། བསྙེན་པར་རྫོགས་པ་ལ་ནི་བཅུ་ལ་སོགས་པའོ། །མཐའ་འཁོབ་དག་ཏུ་མེད་ན་འདུལ་བ་འཛིན་པ་དང་ལྔ་ལ་སོགས་པའོ། །ཞེས་གསུངས་པའི་ཕྱིར། གཉིས་པ་ལ། སྡོམ་ཚིག་དང་དེའི་དོན་བཤད་པ་གཉིས། (༢༡༢བ)
དང་པོ་ནི། འགྲེང་ཡུལ་འདུན་སོགས་ཕུལ་བ་མིན། །མ་རྫོགས་ཉམས་དང་མཚམས་མེད་མིན། །སྡིག་ས་ཐ་དད་འཁྲུལ་བཅས་མིན། །མཚམས་མཚན་དཀོན་ཅོག་གཞན་མེད་པའོ། །གཉིས་པ་ལ། གཞིའི་སྐབས་ནས་འབྱུང་བ་བཅུ། ཞུ་བའི་སྐབས་ནས་འབྱུང་བ་གསུམ་མོ། །དང་པོ་ནི། ལས་གྲལ་དེར་མི་འདུག་པར་འགྲེང་བ་མ་ཡིན་པ། གང་ལ་ལས་བྱ་བའི་ཡུལ་བསྒྲུབ་བྱ་དེ་ཉིད་མ་ཡིན་པ། འདུན་པ་དང་ཡོངས་སུ་དག་པ་ཕུལ་བ་མ་ཡིན་པ། བསྙེན་པར་མ་རྫོགས་པ་མ་ཡིན་པ། རྫོགས་ཀྱང་ཕམ་པ་འཆབ་བཅས་ཀྱིས་གོས་པ་མ་ཡིན་པ། མཚམས་མེད་དང་ཉེ་བའི་མཚམས་མེད་བྱས་པ་མ་ཡིན་པ། སྟོན་པའི་བསླབ་པ་ལ་ཡིད་མི་ཆེས་པའི་སྡིག་ལྟ་ཅན་མ་ཡིན་པ། སྤོ་མགུ་སྤྱོད་པ་ལ་སོགས་པ་དམན་པའི་ས་ན་གནས་པ་མ་ཡིན་པ་ཆོས་ཕྱོགས་ལས་ལྟ་བ་ཐ་དད་པའི་ཆོས་མ་ཡིན་ཕྱོགས་པ་མ་ཡིན་པ། བསྡམ་བྱ་ཉེས་བྱས་ཡན་ཆད་ཀྱིས་གོས་པའི་འཁྲུལ་བཅས་མ་ཡིན་པའོ། །འོ་ན་སོ་སོ་སྐྱེ་བོའི་དགེ་སློང་ལས་ཀྱི་ཁ་སྐོང་དུ་རུང་བ་རྙེད་དཀའ་བར་འགྱུར་ཏེ། བསྡམ་བྱ་ཉེས་བྱས་ཡན་ཆད་ཀྱིས་གོས་པའི་འཁྲུལ་བཅས་མ་ཡིན་པ་དགོས་ཤིང་འཁྲུལ་བཅས་ལས་ཀྱི་ཁ་སྐོང་དུ་མི་རུང་བའི་ཕྱིར་སྙམ་ན་སྐྱོན་མེད་དེ་ལས་གྲལ་ལ་འདུས་པའི་དུས་སུ་ལྟུང་བ་ཐུན་མོང་བྱིན་གྱིས་རློབ་པ་གསོལ་བ་འབའ་ཞིག་པའི་ལས་བྱེད་ལ། དེ་བྱས་པས་དགེ་འདུན་ལྷག་མ་མན་ཆད་ཀྱི་ལྟུང་བས་ལས་ཆགས་པ་ལ་སྒྲིབ་པའི་ཉེས་པ་འདག་པའི་ཕྱིར་ཏེ། འཁྲུལ་པ་དང་བཅས་པ་ཡང་ངོ་། །བསྡམ་པར་བྱ་བས་ཀྱང་ཡིན་གྱི། བཤགས་པར་བྱ་བ་འབའ་ཞིག་གིས་ཡིན་པར་མ་ཟད་དོ། །བྱིན(༢༡༣ན)
གྱིས་བརླབས་པས་དག་པ་ཉིད་དུ་འགྱུར་རོ། །ཞེས་གསུངས་པའི་ཕྱིར་རོ། །གཉིས་པ་ལ། མཚམས་གཞན་མ་ཡིན་པ། མཚན་གཞན་མ་ཡིན་པ། དཀོན་ཅོག་གཞན་མ་ཡིན་པའོ། །དང་པོ་ནི། སྤྱིར་མཚམས་ལ་རགས་པ་མཚམས་གཞན་དང་། ནམ་མཁའ་མཚམས་གཞན་གཉིས། དང་པོ་ནི། རྩིག་པ་དང་། མེ་དང་། །ཆུ་ལ་སོགས་པས་བར་ཆོད་པ་ལྟ་བུའོ། གཉིས་པ་ནི། རྫུ་འཕྲུལ་གྱིས་ནམ་མཁའ་ལ་འདུག་པ་ལྟ་བུའོ། །དེས་ན་བསྒྲུབ་བྱ་བསྙེན་པར་རྫོགས་པར་བྱེད་པ་ལ། དགེ་སློང་རྣམས་མཚམས་ནང་གཅིག་ཏུ་ལྷན་གཅིག་ཏུ་གནས་པའོ། །གཉིས་པ་ནི། སྐྱེས་པ་བསྙེན་པར་རྫོགས་པ་ལ་དགེ་སློང་ཕའི་དགེ་འདུན་དགོས་པ་ཡིན་གྱི། དགེ་སློང་མའི་དགེ་འདུན་གྱིས་བསྙེན་པར་རྫོགས་པར་བྱར་མི་རུང་བ་ལྟ་བུའོ། །བུད་མེད་བསྙེན་པར་རྫོགས་པ་ལ་ངེས་པར་མཚན་མཐུན་དགོས་པ་མ་ཡིན་ཏེ། དེ་གཉིས་ཀའི་དགེ་འདུན་ལས་བསྙེན་པར་རྫོགས་པར་བྱེད་དགོས་པའི་ཕྱིར་རོ། །གསུམ་པ་ནི། ལས་བྱེད་པའི་དགེ་སློང་ལ་སངས་རྒྱས་མ་ཡིན་པ་ཞིག་དགོས་ཏེ། ལས་ཀྱི་གཞིར་། རྒྱལ་བ་ནི་མི་མཐུན་པ་བྱེད་པ་ཉིད་མ་ཡིན་ནོ། ཁ་སྐོང་བར་བྱེད་པ་ཉིད་མ་ཡིན་ནོ། །དེས་བྱས་པ་ལས་མ་ཡིན་པས་མི་འཆགས་སོ། །ཞེས་གསུངས། གསུམ་པ་ལ་མ་འདུས་པའི་མི་མཐུན་པ་དང་། འདུས་པ་ཕྱིར་ལོག་གི་མི་མཐུན་པ་གཉིས། དང་པོ་ནི། ལས་གྲལ་དེར་འདུ་བར་འོས་པའི་དགེ་སློང་འགའ་ཞིག་མ་འདུས་པ་ནི་མ་འདུས་པའི་མི་མཐུན་པ་ཡིན་ལ། དེ་དང་བྲལ་ནས་དེར་འདུ་བར་འོས་པའི་དགེ་སློང་ཐམས་ཅད་ལས་གྲལ་དེར་འདུས་པའོ། །གཉིས་(༢༡༣བ)
པ་ནི་ལས་གྲལ་དེར་གནས་པའི་དགེ་སློང་གིས་ཆོས་ལྡན་གྱི་ལས་འདི་བྱར་མི་རུང་ངོ་ཞེས་ལྡོག་པར་བྱེད་པ་ནི། འདུས་པ་ཕྱིར་ལྡོག་གི་མི་མཐུན་པ་ཡིན་ལ། དེ་དང་བྲལ་ནས་དེར་གནས་པའི་དགེ་སློང་རྣམས་ཀྱིས་ཅང་མི་གསུང་བའི་ཚུལ་གྱིས་ལས་ལ་གནང་བ་སྟེར་བར་བཞུགས་པའོ། །གཉིས་པ་སངས་རྒྱས་མངོན་གྱུར་ལ། སྐྱབས་འགྲོའི་ཡུལ་དུ་གྱུར་པའི་སངས་རྒྱས་དཀོན་ཅོག་དང་། ཀུན་རྫོབ་བརྡར་མཚོན་པའི་སངས་རྒྱས་ཀྱི་སྐུ་གཟུགས་གཉིས། དང་པོ་ནི་གདུལ་བྱ་གཞན་ངོར་རང་གང་ལ་ལྡན་པའི་རྟེན་གྱི་གང་ཟག་སངས་རྒྱས་སུ་མཚོན་པར་བྱེད་པའི་ཐེག་ཆེན་མི་སློབ་པའི་ལམ་གྱི་བདེན་པ་ལ་འཇོག་སྟེ། མཛོད་ལས། གང་ཞིག་གསུམ་ལ་སྐྱབས་འགྲོ་སྟེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་གསུངས་ཤིང་། དེ་ལྟ་བུའི་སངས་རྒྱས་དཀོན་ཅོག་ལ་ཡིད་ཆེས་པའི་དད་པ་དང་ལྡན་པའོ། །གཉིས་པ་ནི་རབ་ཏུ་བྱུང་བའི་ཆ་ལུགས་ཅན་གྱི་སངས་རྒྱས་ཀྱི་སྐུ་གཟུགས་དངོས་སུ་བཞུགས་པའོ། །གསུམ་པ་ལ་སྐྱབས་འགྲོའི་ཡུལ་དུ་གྱུར་པ་དང་། ཀུན་རྫོབ་བརྡར་མཚོན་པའི་ཆོས་གཉིས། དང་པོ་ནི་འགོག་བདེན་གྱིས་བསྡུས་པའི་མྱང་འདས་ཡིན་ལ། དེ་ཉིད་ལ་ཡིད་ཆེས་ཀྱི་དད་པ་དང་ལྡན་པའོ། །གཉིས་པ་ལ་ལུང་དང་རྟོགས་པའི་ཆོས་གཉིས། དང་པོ་ནི་ལུང་སྡེ་བཞི་འམ། དེའི་དགོངས་འགྲེལ་གྱི་བསྟན་བཅོས་དངོས་སུ་བཞུགས་པའོ། །གཉིས་པ་ནི། ལས་གྲལ་དེ་ན་གནས་པའི་དགེ་འདུན་རྣམས་ཀྱི་བསླབ་པ་རིན་པོ་ཆེ་རྣམ་པ་གསུམ་ལྟ་བུའོ། །བཞི་པ་ལ་བརྟན་མཁས་ཀྱི་ཡོན་ཏན་གཉིས་(༢༡༤ན)
དང་ལྡན་པའི་མཁན་པོར་འོས་པའི་དགེ་སློང་ལ་མཁན་པོར་གསོལ་བ་བཏབ་ཅིང་། ཁས་བླངས་པ་དང་ལྡན་པའོ། །ལྔ་པ་ལ་ལས་ཀྱི་སློབ་དཔོན་དང་། གསང་སྟེ་སྟོན་པའི་སློབ་དཔོན་གཉིས། དང་པོ་ནི་ཁ་སྐོང་གི་ཆོས་དང་ལྡན་ཞིང་། དགེ་འདུན་གྱི་དབུས་སུ་གསོལ་བཞིའི་ཆོ་ག་བརྡ་སྤྲོད་པ་ལ་མཁས་པ་ཞིག་ལ། མཁན་པོས་ཚིག་ཙམ་གྱི་སྒོ་ནས་ལས་སློབ་ཏུ་བསྐོས་པའི་དགེ་སློང་དངོས་སུ་བཞུགས་པའོ། །གཉིས་པ་ནི་ཁ་སྐོང་གི་ཆོས་དང་ལྡན་ཞིང་། འགྲོ་མིན་བཞི་དང་བྲལ་བ། ལྐོག་ཏུ་བར་ཆད་དྲི་བ་ལ་མཁས་པ་དགེ་འདུན་གྱིས་གསོལ་བ་འབའ་ཞིག་པའི་ལས་ཀྱིས་གསང་སྟོན་དུ་བསྐོས་པའི་དགེ་སློང་དངོས་སུ་བཞུགས་པའོ། །དྲུག་པ་ལ་ལུས་ཀྱི་རྟེན་དང་། བསམ་པའི་རྟེན་གཉིས། དང་པོ་ནི་སྡོམ་པ་སྐྱེ་བའི་བར་ཆད་དང་མི་ལྡན་ཞིང་། རྒྱུད་ཚོགས་སུ་མ་ཚང་བ། སྡོམ་པ་རྙིང་པས་རྒྱུད་མ་བཀག་པ། ཚིག་སྔ་མ་དགེ་ཚུལ་མན་ཆད་སྔོན་དུ་སོང་ཞིང་ཆགས་པའོ། །གཉིས་པ་ལ་རྒྱུའི་ཀུན་སློང་ཐོབ་འདོད། དུས་ཀྱི་ཀུན་སློང་ཐོབ་ཤེས། འགལ་རྐྱེན་ངེས་པ་ལྔ་བྲལ་གྱི་བསམ་པ་མཐུན་རྐྱེན་ཕུན་ཚོགས་གསུམ་ལྡན་གྱི་བསམ་པ། དེ་ཐམས་ཅད་ངེས་འབྱུང་གི་བསམ་པས་ཟིན་དགོས་པའོ། །འདི་དག་གི་རྣམ་གཞག་ནི་གོང་དུ་བཤད་པ་ལས་ཤེས་པར་བྱའོ། །བདུན་པ་ཡོ་བྱད་མངོན་དུ་གྱུར་པ་ལ། ལུས་ཀྱི་བྱི་བྱད་ཀྱི་རྟགས། གོས་ཀྱི་རྟགས། སྣོད་སྤྱད་ཀྱི་རྟགས་དང་གསུམ། དང་པོ་ནི། བྲེག་པར་འོས་པའི་སྐྲ་དང་ཁ་སྤུ་བྲེགས་ཤིང་ཁྲུས་བྱས་པས་ཁྱད་པར་དུ་བྱས་པའོ། །གཉིས་པ་ནི། ཁྱིམ་པ་དང་མུ་སྟེགས་ཅན་ལས་གོས་ཀྱི་རྟགས་ཀྱི་ཁྱད་པར་དུ་འཕགས(༢༡༤བ)
ཤིང་། དགེ་སྦྱོང་གི་དྲན་པ་གསོ་བ་དང་། སེམས་ཆགས་བྲལ་དུ་བསྒྱུར་བ་མཚོན་བྱེད་དུ་ཆོས་གོས་རྣམ་གསུམ་མཁན་པོས་བྱིན་གྱིས་བརླབས་ནས་གནང་བ་དེ་ཉིད་གཅེས་སྤྲས་སུ་འཆང་དགོས་ཏེ། སྣམ་སྦྱར་པགས་པ་དང་འདྲ་བར་རོ། །ཆོས་གོས་ལྷག་མ་ཡང་ངོ་། །ཞེས་བྱ་བ་ནི་ཆོས་ཀྱི་བཤེས་གཉེན་གྱི་རྒྱ་ཆེར་འགྲེལ་ལས། །ཇི་ལྟར་པགས་པ་རླུང་དང་ཉི་མ་དང་ཆར་ལ་སོགས་པ་དག་ལས་བསྐྱབ་བར་བྱ་བ་ལྟར་དགེ་སློང་གི་སྣམ་སྦྱར་ཡང་དེ་བཞིན་དུ་བསླབ་པར་བྱའོ། །ཞེས་གསུངས་། དགེ་འདུན་གྱི་གནས་མལ་དང་། སྦྱིན་བདག་གི་གདན་གསར་པ་བསྐྱབ་བའི་ཕྱིར་དུ་གླེགས་པུ་ཕྱེད་དང་གཉིས་པའི་བདག་ཉིད་ཅན་གྱི་གདིང་བ་མཁན་པོས་གནང་བ་ལྟར་དུ་བཅང་དགོས། གདིང་བ་བཅང་བར་བྱའོ། །དེ་ནི་འཐུག་ན་ཆིག་རྐྱང་རུང་ངོ་། །སེངས་པ་ནི་ཉིས་རིམ་མོ། ཁྲ་ཁྲ་བོ་མི་རུང་ངོ་། །དེ་ལ་གླེགས་བུའི་འཕྲོ་བྱའོ། །འོག་རོལ་གྱི་སུམ་ཆའི་དང་པོར་རོ། །གླེགས་བུ་གཅིག་པ་བྱིན་གྱིས་བརླབ་པར་མི་བྱའོ། །ཞེས་གསུངས། གསུམ་པ་ནི། ཁྱིམ་པ་དང་མུ་སྟེགས་ཅན་ལས་སྣོད་སྤྱད་ཀྱི་རྟགས་ཀྱི་གནས་ཁྱད་པར་དུ་འཕགས་ཤིང་། །དགེ་སྦྱོང་གི་དྲན་པ་གསོ་བ་དང་། །ལྷུང་བཟེད་ཀྱི་ནང་ནས་ཟས་ལ་ལོངས་སྤྱོད་པ་བཞིན་དུ། རང་གི་སེམས་རྒྱུད་ཆོས་ལ་ལོངས་སྤྱོད་པ་མཚོན་བྱེད་དུ་ལྷུང་བཟེད་མཁན་པོས་བྱིན་གྱིས་བརླབས་ནས་བྱིན་པ་ལྟར་གཅེས་སྤྲས་ཀྱི་སྒོ་ནས་འཆང་དགོས་ཏེ། །ལྷུང་བཟེད་མེད་པར་རབ་ཏུ་བྱུང་བ་དང་བསྙེན་པར་རྫོགས་པར་མི་བྱའོ། །ཆུང་ངུ་དང་། ཆེན་པོ་དང་། སྐྱ་བས་ཀྱང་མི་བྱའོ་ཞེས་དང་། ལྷུང་བཟེད་མིག་བཞིན་དུ་བསྐྱང་བར་བྱའོ། ཞེས་(༢༡༥ན)
གསུང་། སྲོག་ཆགས་ལ་གནོད་འཚེ་སྤང་བའི་ཕྱིར་དུ་ཆུ་ཚགས་མཁན་པོས་གནང་བ་ལྟར་འཆང་དགོས་ཏེ། སངས་རྒྱས་ཀྱི་བསྟན་པ་སྙིང་རྗེས་ཁྱད་པར་དུ་བྱས་པའི་ཕྱིར། བརྒྱད་པ་ཡོངས་སུ་དག་པ་ལ་མངོན་དུ་གྱུར་པ་ནི། བར་ཆད་མེད་པ་ཞིག་དགོས་ཏེ། གསང་སྟེ་སྟོན་པས་ལྐོག་ཏུ་དྲིས། ངེད་ཀྱིས་དགེ་འདུན་གྱི་དབུས་སུ་དྲིས་པས་བར་ཆད་མེད་པར་རྟོགས་པས་ཚང་བ་ཡིན། དགུ་པ་གསོལ་བ་མངོན་དུ་གྱུར་པ་ནི། དགེ་འདུན་ལ་བསྙེན་པར་རྫོགས་པའི་ཕྱིར་གསོལ་བ་ལན་གསུམ་དུ་འདེབས་པ་ལ་རང་གི་མིང་དང་། མཁན་པོའི་མིང་དང་། དགེ་འདུན་ཞེས་པ་བརྗོད་པ་མ་ཆད་པས་གསོལ་བ་གདབ་དགོས་ཏེ་དེ་གསུམ་བརྗོད་པ་ཆད་ན་མི་སྐྱེ་སྟེ། མདོར་དེ་གཉིས་ཀྱི་མིང་མ་སྨོས་ན་མི་སྐྱེའོ། །དགེ་འདུན་གྱི་ན་ཡང་དེའི་སྐྱེ་གནས་ཀྱིས་མི་སྐྱེའོ། །ཞེས་གསུངས། དེ་ཡང་ཆོ་ག་ལྷག་ཆད་མེད་པར་ལན་གསུམ་དུ་གསོལ་བ་བཏབ་པས་ཚང་བ་ཡིན། བཅུ་པ་ལས་མངོན་དུ་གྱུར་པ་ལ། ལས་མཁན་གྱིས་བསྒྲུབ་བྱའི་མིང་དང་། མཁན་པོའི་མིང་དང་། དགེ་འདུན་གྱི་མིང་རྣམས་མ་བརྗོད་པའམ། གསོལ་བ་དང་བརྗོད་པ་གང་རུང་ཆད་ན་མི་སྐྱེ་སྟེ། ལུང་ལས་གང་ཟག་ལྔ་བསྙེན་པར་མ་རྫོགས་པ་ཞེས་བྱ་སྟེ། བདག་གི་མིང་མ་བརྗོད་པ་དང་། མཁན་པོའི་མིང་མ་བརྗོད་པ་དང་། གསོལ་བ་ཆད་པ་དང་། བརྗོད་པ་ཆད་པ་དང་། བསྙེན་པར་རྫོགས་པར་མི་ཤེས་པའོ། །ཞེས་གསུངས། མདོར་ན་གསོལ་བ་དང་། བཞིའི་ལས་ཚིག་ཕྱེད་ཀྱང་མ་འཁྲུལ་བ། ཚང་ལ་མ་ནོར་བ་མ་འཁྲུགས་པ། བློ་ལས་ཐོན་ནུས་པ་ཞིག་དགོས་པ་ད་ལྟ་ཉིད་དུ་(༢༡༥བ)
མངོན་དུ་འགྱུར་བས་སྡོམ་པ་སྐྱེ་བའི་རྒྱུ་ཚོགས་ཐམས་ཅད་ཚང་བ་ཡིན་ནོ། །ཤིན་ཏུ་བསྡུ་ན། ཁྱོད་བསྙེན་རྫོགས་བྱེད་པ་ལ་མངོན་གྱུར་བཅུའི་སྒོ་ནས་བསྒྲུབ་དགོས་ཤིང་། མངོན་གྱུར་གཞན་ཐམས་ཅད་ཕུན་སུམ་ཚོགས་པའི་ཚུལ་གྱིས་ཚང་། བསྙེན་རྫོགས་ཀྱི་སྡོམ་པ་བསྐྱེད་པ་ལ་བསྙེན་པར་རྫོགས་པར་འདོད་པ་མངོན་དུ་གྱུར་པ་བསམ་པའི་རྟེན། རྒྱུའི་ཀུན་སློང་ཐོབ་འདོད། དུས་ཀྱི་ཀུན་སློང་ཐོབ་ཤེས། འགལ་རྐྱེན་ངེས་པ་ལྔ་བྲལ། མཐུན་རྐྱེན་ཕུན་ཚོགས་སུམ་ལྡན། དེ་ཐམས་ཅད་ངེས་འབྱུང་གི་བསམ་པས་ཟིན་དགོས་སོ། །ཞེས་སྔར་དགེ་ཚུལ་གྱི་སྐབས་བཞིན་བརྡ་སྤྲད། ད་ཧྲིལ་གྱིས་དྲིལ་ན་མཁན་སློབ་དགེ་འདུན་དང་བཅས་པ་ལ་སེམས་དང་བའི་སྒོ་ནས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་དོན་དུ་བསྙེན་རྫོགས་ཀྱི་སྡོམ་པ་བླངས་ལ་མ་ཤིའི་བར་དུ་བསྲུང་སྙམ་པ་གྱིས། རྗེས་ཟློས་བགྱི་མི་འཚལ། དགེ་འདུན་རྣམས་སྤྱོད་ལམ་བསྟུན། ཐུགས་དགོངས་གསུམ་པོ་གསལ་བཏབ་ནས་གསོལ་བའི་ལས་ལ་ཐུགས་གཏད་པར་ཞུ་ཞིང་། ལྷག་ཆད་བྱུང་ན་གསོ་བར་ཞུ། དགེ་འདུན་བཙུན་པ་རྣམས་གསན་དུ་གསོལ། ཚེ་དང་ལྡན་པ་མིང་འདི་ཞེས་བགྱི་བ་འདི། མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་(༢༡༦ན)
ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། ཚེ་དང་ལྡན་པ་མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས། དགེ་འདུན་ལས་བསྙེན་པར་རྫོགས་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་ཚེ་དང་ལྡན་པ་མིང་འདི་ཞེས་བགྱི་བ། མཁན་པོ་མིང་འདི་ཞེས་བགྱི་བས་བསྙེན་པས་རྫོགས་པར་མཛད་དོ། །འདི་ནི་གསོལ་བའོ། །གསོལ་བ་ཐལ། བརྗོད་པའི་ལས་ལ་ཐུགས་གཏད་པར་ཞུ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས་དགེ་འདུན་ལས་བསྙེན་པར་རྫོགས་པར་འཚལ་ནས། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས། དགེ་འདུན་ལས་བསྙེན་པར་རྫོགས་པར་གསོལ་ཏེ། སྐྱེས་པ་ཡང་ལགས། སྐྱེས་པའི་དབང་པོ་དང་ཡང་ལྡན། ལོ་ཉི་ཤུ་ཡང་ལོན། འདིའི་ཆོས་གོས་གསུམ་དང་ལྷུང་བཟེད་ཀྱང་ཚང་། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གོ་ཞེས་ཁོ་ན་ཉིད་མཆི་སྟེ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བས། དགེ་འདུན་ལས་བསྙེན་པར་རྫོགས་པར་གསོལ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ། མཁན་པོ་མིང་འདི་ཞེས་བྱ་བས་བསྙེན་པར་རྫོགས་པར་མཛད་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་མཁན་པོ་མིང་འདི་ཞེས་བགྱི་བས་བསྙེན་པར་རྫོགས་པར་མཛད་པར་བཟོད་པ་དེ་དག་ནི་ཅང་མ་གསུང་ཞིག །གང་དག་མི་བཟོད་པ་དེ་དག་ནི་(༢༡༦བ)
གསུངས་ཤིག །བརྗོད་པ་དང་པོ་ཐལ། གཉིས་པ་ལ་ཐུགས་གཏད་པར་ཞུ་བྱས་ལ་གཉིས་པ་བྱ། གསུམ་པའི་སྐབས་སུ་ལས་ཆགས་པ་ཡིན་ཏེ། མདོར། བརྗོད་པ་ཐ་མ་གང་ཡིན་པའི་ཆ་གསུམ་པ་ལ་གྲུབ་པ་ཉིད་དོ། །ཞེས་གསུངས་པས་མཆི་སྟེ་ཡན་ཆད་ངོ་བོ་བརྗོད་པ། དེ་ནས་གསོལ་ནའི་བར་བྱ་བ་བརྗོད་པ། དེའི་སླད་དུ་མན་ཆད་བྱེད་པ་བརྗོད་པ་ཡིན་པས། ངོ་བོ་བརྗོད་པ་དང་བྱ་བ་བརྗོད་པ་གཉིས་རྫོགས་པ་གསོལ་ན་ཞེས་པ་འགག་པ་དང་སྙམ་དུ་ཁྱོད་ལ་བསྙེན་རྫོགས་ཀྱི་སྡོམ་པ་སྐྱེ། ངེད་ཁྱོད་ཀྱི་སློབ་དཔོན་དུ་གྱུར་པ་ཡིན་པས། གསོལ་ན་ཞེས་པའི་སྐབས་སུ། ངེད་ཀྱི་སྐད་གཟེངས་མཐོ་བ་དང་། སེ་གོལ་གྱི་བརྡ་སྦྱར་བས། དེའི་དུས་ངའི་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེ་བའི་དུས་འདི་ཡིན་སྙམ་པའི་ཐོབ་བློ་སྐྱེས་པ་ཤིན་ཏུ་གལ་ཆེ་ཞིང་། དེའི་སླད་དུ་ཞེས་པའི་ཚིག་བྱུང་བ་དང་སྡོམ་པ་སྐྱེས་ཚར། དགེ་སློང་དུ་གྱུར་སྙམ་དུ་མ་ཡེངས་པར་སོམས་ཤིག །དགེ་འདུན་རྣམས་བརྗོད་པ་གསུམ་པ་ལ་ཐུགས་གཏད་པར་ཞུ་བྱས་ལ་གསུམ་པ་བྱ། ལས་ཀྱི་མཇུག་སྡུད་ལ་ཐུགས་གཏད་པར་ཞུ། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་མིང་འདི་ཞེས་བགྱི་བ་མཁན་པོ་མིང་འདི་ཞེས་བྱ་བས་བསྙེན་པར་རྫོགས་པར་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །གལ་ཏེ་ཆོ་ག་ནོར་བའམ་དགེ་སློང་སོང་བ་ལ་སོགས་པས་ལས་འཁྲུགས་ནས་བསྐྱར་དགོས་ན། གསོལ་བ་སྐྱོར་ན། བཙུན་པ་དག་ཡང་གསོལ་བ་བགྱིའོ། །བྱས་ལ་བསྐྱར། བརྗོད་པ་སྐྱོར་ན་བཙུན་པ་དག་ཡང་རྗེས་སུ་བསྒྲག་གོ་བྱས་ལ་བསྐྱར། གཉིས་ཀ་སྐྱོར་ན་བཙུན་(༢༡༧ན)
པ་དག་ཡང་གསོལ་བ་བགྱི་ཞིང་རྗེས་སུ་ཡང་བསྒྲག་གོ་བྱས་ལ་བསྐྱར་རོ། །དེ་ལྟར་གསོལ་བཞིའི་ལས་ཀྱིས་ཁྱོད་ཀྱི་རྒྱུད་ལ་བསྙེན་རྫོགས་ཀྱི་སྡོམ་པ་འཆལ་ཚུལ་གྱི་རྒྱུན་སྡོམ་ཞིང་འགོག་པར་བྱེད་པའི་ཆུ་ལོན་ལྟ་བུ་ཐོབ། དགེ་སློང་དུ་གྱུར་བས་དགའ་བ་སྒོམས་ཤིག །དེས་དངོས་གཞི་གྲུབ། གསུམ་པ་མཇུག་གི་ཆོ་ག་ལ་གཉིས་ཡོད་པའི། དང་པོ་ཆེ་གེ་མོས་མཛོད། ཅེས་བརྗོད། དེ་ནས་བསྐོས་པའི་དེ་སློང་དེས་གྲིབ་ཚོད་འཇལ་ལུགས་དང་། ཆོ་ག་གཞན་ཐམས་ཅད་དགེ་ཚུལ་དང་འདྲ་བ་ལ། བསྙེན་བཀུར་གྱི་གནས་ཡིན་མིན་གྱི་སྐབས་སུ་བསྙེན་བཀུར་གྱི་གནས་ནི་རང་ལས་གྲིབ་མ་སོར་གཅིག་གི་དུས་ཀྱིས་རྒན་པའི་དགེ་སློང་རྣམས་བསྙེན་བཀུར་གྱི་གནས་ཡིན། གནས་མ་ཡིན་པ་ནི་རང་ལས་གཞོན་པའི་དགེ་སློང་རྣམས་དང་། ས་གཞན་ན་གནས་པའི་དགེ་སློང་རྣམས་དང་། རྟེན་དམན་པ་དགེ་སློང་མ་རྣམས་དང་། དགེ་སློབ་མ་དང་། དགེ་ཚུལ་ཕ་མ། དགེ་བསྙེན་ཕ་མ་ལ་སོགས་པ་བསྙེན་བཀུར་གྱི་གནས་མ་ཡིན། བསྙེན་བཀུར་རང་གི་ངོ་བོ་བསྙེན་བཀུར་གྱི་གནས་རྣམས་ལ་བསྙེན་བཀུར་བྱེད་ལུགས་དང་། གནས་མ་ཡིན་པ་རྣམས་ཀྱི་བསྙེན་བཀུར་དང་དུ་ལེན་ལུགས་དགེ་ཚུལ་ལྟར་སློབ། དགེ་སློང་རང་དང་། བསླབ་པ་མཉམ་པ་བྱུང་ན། གཅིག་གིས་གཅིག་ལ་ཕྱག་བྱ་མི་དགོས། གྲལ་མགྱོགས་གྲལ་བྱས་པས་ཆོག་པ་ཡིན་ཏེ། མདོ་རྩ་བར། དུས་མཉམ་པ་རྣམས་ནི་ཞེས་ལུང་འདྲེན། འདུལ་བ་མེ་ཏོག་ཕྲེང་རྒྱུད་ལས། གཉིས་སམ་གསུམ་པོ་དག་ཀྱང་རུང་། །དུས་གཅིག་ལ་ནི་བསྙེན་རྫོགས་ན། །ན་ཚོད་བྱེ་བྲག་ཡོད་གྱུར་ཀྱང་། །(༢༡༧བ)
རྒན་པོ་མེད་ཅིང་གསར་བུ་མེད། །ཕན་ཚུན་ཕྱག་ཀྱང་ཡོད་མིན་ཏེ། །རྙེད་པ་གྲལ་རིམ་བཞིན་དུའོ། །ཞེས་སོ། །ལྔ་པ་ཕན་ཡོན་ནི་ཞེས་པ་ནས། མཇུག་ཆོག་གཉིས་པ་དགེ་བའི་བཤེས་གཉེན་པས་གསུང་བར་འགྱུར་བས། དེར་སྙན་གཏོད་མཛོད་ཅེས་བརྗོད་དོ། །དེ་ནས་ལས་བྱེད་པས། དགེ་བའི་བཤེས་གཉེན་པས་གསུངས་པ་དེ་རྣམས་ཀྱང་ཤེས་པར་བྱས་ནས་ཕྱག་ལེན་ལ་གདབ་འཚལ། མཇུག་ཆོག་གཉིས་པ་ཐོབ་པའི་སྡོམ་པ་མི་ཉམས་ཤིང་འཕེལ་བར་བྱ་བའི་ཕྱིར་གདམས་ངག་བཅུ་གཅིག་བརྗོད་པ་ལ་དགེ་སློང་གི་བསླབ་བྱ་མདོར་བསྡུས་ཏེ་བརྗོད་པ་དང་། དེ་ལ་བསླབ་ཚུལ་གྱི་གདམས་ངག་བརྗོད་པ་གཉིས་ཀྱི་དང་པོ་ལ། བསླབ་བྱའི་གཙོ་བོ་རྣམས་དངོས་སུ་བརྗོད་པ་དང་། དངོས་སུ་མ་བརྗོད་པ་བླངས་པ་རྣམས་ཤེས་པའི་ཐབས་བརྗོད་པ་དང་གཉིས་ཀྱི་དང་པོ་ལ། བརྟེན་བྱ་འཚོ་བ་དང་། བསྲུང་བྱ་ཚུལ་ཁྲིམས་དང་། ཉམས་ལེན་སྤྱོད་པ་དང་། རྟོགས་པ་ལྟ་བ་རྣམ་དག་ལ་གདམས་པ་དང་བཞིའི་དང་པོ་ལ་སྤྱིར་གདམས། བྱེ་བྲག་ཏུ་ཕྱེ་སྟེ་གདམས་པ་དང་གཉིས་ཀྱི་དང་པོ་ནི། བསྙེན་པར་རྫོགས་མ་ཐག་པ་དེས་གང་ལ་བརྟེན་ནས་འཚོ་བའི་གནས་རྣམས་མ་ཤེས་ན་ལྟུང་བར་འགྱུར་བས། མདོར། བསྙེན་པར་རྫོགས་མ་ཐག་པ་ལ་མི་བརྗོད་པར་མི་བྱའོ། །ཞེས་གསུངས་པས། གནས་བརྗོད་དགོས་ལ། དེའང་དགེ་སློང་གི་དངོས་པོ་ཐོབ་ནས་ཉམས་པ་བཞི་སྤང་དགོས་པས། འཚོ་བ་ཉམས་པ་སྤང་བའི་ཕྱིར་ཚངས་པར་སྤྱོད་པ་རྣམས་ཀྱིས་བརྟེན་པར་བྱ་བ་ཡིན་པའི་ཕྱིར་གནས་ཏེ་རང་གཞན་དུ་གནས་པས་གོས་དང་ཟས་དང་། གནས་མལ་(༢༡༨ན)
ཏེ་གསུམ། ནད་པས་དེའི་སྟེང་དུ་སྨན་དང་བཞི་བསྟེན་པས། སེམས་ལས་སུ་རུང་བར་འགྱུར་ལ། དེའང་མཐའ་གཉིས་སུ་མ་ལྷུང་བ་ཞིག་དགོས་སོ་ཞེས་སྤྱིར་འདོམས་པ་འདིར་གདའ། ཚེ་དང་ལྡན་པ་མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་གནས་སུ་གསུངས་ཏེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །གཉིས་པ་ལ་བཞིའི་དང་པོ་གོས་མཐའ་གཉིས་སུ་མ་ལྷུང་བ་ལ་བསླབ་པ་ནི། སྤྱིར་འདུལ་བ་ལུང་ལས། དགེ་སློང་དག་རབ་ཏུ་བྱུང་བས་ནི་མཐའ་འདི་གཉིས་ལ་བརྟེན་པར་མི་བྱ། བསྙེན་པར་མི་བྱ། བསྙེན་བཀུར་མི་བྱ་སྟེ། གཉིས་གང་ཞེ་ན། འདོད་པ་རྣམས་ལ་འདོད་པའི་བསོད་ཉམས་ཀྱིས་རྗེས་སུ་བརྩོན་པ་དམན་པ་ངན་པ། ཐ་ཆད། མ་རབས་གང་ཡིན་པ་དང་། བདག་ཉིད་དུབ་པ་ལ་རྗེས་སུ་བརྩོན་པ། སྡུག་བསྔལ་བ། འཕགས་པ་མ་ཡིན་པ། གནོད་པ་དང་ལྡན་པ་གང་ཡིན་པའོ། །ཁྱེད་ཀྱིས་མཐའ་འདི་གཉིས་ལ་མི་བརྟེན་པར་དབུ་མའི་ལམ་མིག་བྱེད་པ་ཡེ་ཤེས་བྱེད་པ། ཉེ་བར་ཞི་བར་འགྱུར་བ། མངོན་པར་ཤེས་པ་དང་། རྫོགས་པར་བྱང་ཆུབ་པ་དང་། མྱ་ངན་ལས་འདས་པར་འགྱུར་བ་ཡོད་དེ། ཞེས་གསུངས་པས། ངན་པ་དང་ཉུང་ངུ་ཆུང་ངུས་ཆོག་མི་ཤེས་པར་བཟང་པོ་དང་། མང་(༢༡༨བ)
པོ་ལ་སྲེད་པས་བཀག་པ་ལས་འདས་ཏེ། བཟང་པོ་ལ་སྤྱོད་པ་འདོད་པ་བསོད་ཉམས་ཀྱི་མཐའ་དང་། རྩོལ་མེད་དུ་རྙེད་ཅིང་གནང་ཡང་བག་འཁུམས་ནས་སྤྱོད་མི་ནུས་པ་རང་གི་ལུས་སེམས་གདུང་བར་བྱེད་པ་ངལ་ཞིང་དུབ་པའི་མཐའ་གཉིས་སྤངས་ནས་དབུ་མའི་ལམ་བརྟེན་དགོས་པས། དང་པོ་གོས་བཟང་པོ་ལ་སྲེད་པས་ཚེགས་དང་འབད་རྩོལ་གྱིས་བསྒྲུབ་ཅིང་ཞེན་པས་ལོངས་སྤྱོད་པ་འདོད་པ་བསོད་ཉམས་ཀྱི་མཐའ་སྤོང་བ་འདིར་གདའ། བཞི་གང་ཞེ་ན། གོས་ཀྱི་ནང་ན་ཕྱག་དར་ཁྲོད་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་ཕྱག་དར་ཁྲོད་གོས་ཀྱིས་འཚོ་བར་སྤྲོའམ། དེས་སྤྲོ་ཞེས་བརྗོད་པར་བྱའོ། །མདོ་རྩར། མྱ་ངན་ལས་འདས་པའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང་། ཟས་རོ་མཆོག་བརྒྱ་པ་དང་། ཁང་པ་བརྩེགས་པ་ལྔ་བརྒྱ་པ་ཡང་འོས་སོ་ཞེས་རང་ངེས་འབྱུང་གི་ཚུལ་ཁྲིམས་རྣམ་དག་དང་ལྡན། དགེ་བའི་ཕྱོགས་ལ་བརྩོན་པ་ལྷུར་བྱེད་པ་ཡིན་ན། སྒྲུབ་པའི་ཚེ་ན་ཚེགས་དང་འབད་རྩོལ་གྱིས་བསྒྲུབ་མི་དགོས་ལོངས་སྤྱོད་པའི་ཚེ་ན་ཆགས་ཞེན་དང་མངོན་ཞེན་དྲག་པོ་མི་སྐྱེ་ན་གོས་ཀཱཪྵ་པ་ཎ་འབུམ་རི་བ་ཡང་ལོངས་སྤྱད་པས་ཆོག་གོ་ཞེས་འདོམས་པ། གཉིས་པ་ངལ་ཞིང་དུབ་པའི་མཐའ་སྤོང་བ་འདིར་གདའ་ལྷག་པར་རྙེད་ན་དར་རམ། རས་ཡུག་ཆེན་ནམ། བེའུ་རས་སམ། དར་ལའམ། མོན་དར་(༢༡༩ན)
རམ། བེའུ་རས་ཡུག་ཆེན་ནམ། བེའུ་རས་དམར་པོ་འམ། བེའུ་ཕྲུག་གམ། ལ་དམར་རམ། ཡུལ་ཀཱ་ཤི་ཀའི་རས་ཕྲན་ནམ། ཁ་དོག་རན་པའམ། ཁ་དོག་ངན་པའམ། བལ་གོས་སམ། ཤ་ནའི་རས་སམ། ཟར་མའི་རས་སམ། རས་གོས་སམ། དུ་ཀུ་ལའི་རས་སམ། ཀོ་ཏམ་པའི་རས་སམ། ཉི་འོག་གི་གོས་སམ། གཞན་ཡང་གོས་རུང་བ་གང་། དགེ་འདུན་ནམ། གང་ཟག་ལས་རྙེད་ན་དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའམ། འཆའ་ལགས་ཞེས་བརྗོད་པར་བྱའོ། །གཉིས་པ་ཟས་མཐའ་གཉིས་སུ་མ་ལྷུང་བ་ལ་གཉིས་ཡོད་པའི་དང་པོ། འདོད་ཞེན་གྱིས་མི་རུང་བའི་ཟས་བཟང་པོ་ཚེགས་ཀྱིས་བསྒྲུབ་ཅིང་སྤྱོད་པ་སྤངས་ནས། སྦྱིན་བདག་ལ་བླངས་པའི་བསོད་སྙོམས་ཀྱིས་འཚོ་དགོས་སོ་ཞེས་འདོད་པ་བསོད་ཉམས་ཀྱི་མཐའ་སྤོང་བ་འདིར་གདའ། མིང་འདི་ཞེས་བྱ་བ་ཁྱོད་ཉོན་ཅིག །ཟས་ཀྱི་ནང་ན་བསོད་སྙོམས་ནི་རུང་བ་རྙེད་ཀྱང་སླ་བ་སྟེ་དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་བསོད་སྙོམས་ཀྱི་ཟས་ཀྱིས་འཚོ་བར་སྤྲོའམ། དེས་སྤྲོ་ལགས་ཞེས་བརྗོད་དོ། །གཉིས་པར་ཆོས་ལྡན་གྱིས་རྩོལ་མེད་དུ་རྙེད་པ་ལ་ཆགས་ཞེན་མེད་པའི་སྒོ་ནས་ཟས་བཟང་པོ་ལ་ཡང་ལོངས་སྤྱད་པར་བྱའོ། །ཞེས་ངལ་ཞིང་དུབ་པའི་མཐའ་སྤོང་བ་འདིར་གདའ། ལྷག་པར་རྙེད་ན་འབྲས་ཆན་ནམ། སྐྱོ་མའམ། ཐུག་(༢༡༩བ)
པ་འམ། ལྔ་སྟོན་ནམ། བརྒྱད་སྟོན་ནམ། བཅུ་བཞི་སྟོན་ནམ། ཉ་སྟོན་ནམ། རྟག་རས་འཁོར་རམ། མགྲོན་དུ་བོས་པའམ། འཕྲལ་ལ་བོས་པའམ། སྤགས་པའམ། གཞན་ཡང་ཟས་རུང་བ་གང་། དགེ་འདུན་ནམ། གང་ཟག་ལས་རྙེད་ན་དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའམ། དེས་འཆའ་ལགས་ཞེས་བརྗོད་པར་བྱའོ། །གསུམ་པ་གནས་མལ་མཐའ་གཉིས་སུ་མ་ལྷུང་བ་ལ་གདམས་པ་ལ་གཉིས་ལས། དང་པོ་འདོད་ཞེན་གྱིས་མི་རུང་བའི་ཁྱིམ་དང་། གནས་མལ་བཟང་པོ་ཚེགས་ཀྱིས་བསྒྲུབ་ཅིང་ལོངས་སྤྱོད་པ་སྤངས་ཏེ། ཤིང་དྲུང་གི་གནས་མལ་གྱིས་ཀྱང་འཚོ་བར་བྱ་དགོས་ཞེས་སྟོན་པ་འདོད་པ་བསོད་ཉམས་ཀྱི་མཐའ་སྤོང་བ་འདིར་གདའ། མིང་འདི་ཞེས་བྱ་བ་ཁྱོད་ཉོན་ཅིག །གནས་མལ་གྱི་ནང་ན་ཤིང་དྲུང་ནི་རུང་བ་རྙེད་ཀྱང་སླ་བ་སྟེ། །དེ་ལ་གནས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། །བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་ཤིང་དྲུང་གི་གནས་མལ་གྱིས་འཚོ་བར་སྤྲོའམ། དེས་སྤྲོ་ལགས་ཞེས་བརྗོད་དོ། །གཉིས་པ་རང་ཆོས་གཉིས་ལྡན་གྱིས་རྩོལ་མེད་དུ་རྙེད་ན། ཁང་མིག་ལྔ་བརྒྱ་པ་ཡང་ཞེན་མེད་དུ་ལོངས་སྤྱད་པས་ཆོག་གོ་ཞེས་སྟོན་པ་ངལ་ཞིང་དུབ་པའི་མཐའ་སྤོང་བ་འདིར་གདའ། ལྷག་པར་རྙེད་ན་ཁང་པ་འམ། སྔ་ཁང་ངམ། ཁང་པ་བརྩེགས་པའམ། བསིལ་ཁང་ངམ། སབ་མོས་བསྐོར་བའམ། བ་གམ་མམ། ཁང་བཟང་ངམ། སྒོ་ཁང་གི་སྟེང་གི་བསིལ་(༢༢༠ན)
ཁང་ངམ། ཁང་སྟེང་གི་ཡོལ་ཁང་ངམ། ཡོལ་ཁང་ངམ། སྤང་ལེབ་ཁང་ངམ། ས་ཕུག་གམ། བྲག་ཕུག་གམ། རི་ཕུག་གམ། རྩྭའི་སྤྱིལ་བུ་འམ། ལོ་མའི་སྤྱིལ་བུ་འམ། འཆག་སར་བྱས་པའམ། འཆག་སར་མ་བྱས་པ་འམ། བྱ་སྐྱིབས་སུ་བྱས་པའམ། བྱ་སྐྱིབས་སུ་མ་བྱས་པའམ། གཞན་ཡང་གནས་མལ་རུང་བ་གང་དགེ་འདུན་ནམ་གང་ཟག་ལས་རྙེད་ན་དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །ཇི་ལྟར་ཁྱོད་གནས་འདི་ལྟ་བུ་ལ་དམ་འཆའམ། དེས་འཆའ་ལགས་ཞེས་བརྗོད་པར་བྱའོ། །བཞི་པ་སྨན་མཐའ་གཉིས་སུ་མ་ལྷུང་བ་ལ་གདམས་པ་ལ་གཉིས་ཡོད་པའི་དང་པོ་འདོད་ཞེན་གྱི་སྨན་མི་རུང་བ་དང་། བཟང་པོ་ཚེགས་ཀྱིས་བསྒྲུབ་ཅིང་ལོངས་སྤྱོད་པ་སྤངས་ནས་གཞན་གྱིས་སྨན་བཀོལ་ཏེ་ཁུ་བ་བཀུས་ཤིང་བཏོན་ནས་རྩིགས་མ་བོར་བའི་སྨན་གྱིས་ཀྱང་འཚོ་དགོས་སོ་ཞེས་སྟོན་པ་འདོད་པ་བསོད་ཉམས་ཀྱི་མཐའ་སྤོང་བ་འདིར་གདའ། མིང་འདི་ཞེས་བྱ་བ་ཁྱོད་ཉོན་ཅིག །སྨན་གྱི་ནང་ན་བཀུས་སྟེ་བོར་བ་ནི་རུང་བ་རྙེད་ཀྱང་སླ་བ་སྟེ། དེ་ལ་གནས་ན་དགེ་སློང་ལེགས་པར་གསུང་པའི་ཆོས་འདུལ་བ་ལ་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོར་འགྱུར་རོ། །མིང་འདི་ཞེས་བྱ་བ་ཁྱོད་ཇི་སྲིད་འཚོའི་བར་དུ་བཀུས་ཏེ་བོར་བའི་སྨན་གྱིས་འཚོ་བར་སྤྲོ་འམ། དེས་སྤྲོ་ལགས་ཞེས་བརྗོད་དོ། །གཉིས་པ་རང་ཆོས་གཉིས་ལྡན་གྱིས་རྩོལ་མེད་དུ་རྙེད་ན་སྨན་བཟང་པོའང་ཞེན་མེད་དུ་ལོངས་སྤྱད་པས་ཆོག་གོ་ཞེས་སྟོན་པ་ངལ་ཞིང་དུབ་པའི་མཐའ་སྤོང་བ་འ་དིར་གདའ། ལྷག་པར་རྙེད་ན་ཞུན་མར་རམ། (༢༢༠བ)
འབྲུ་མར་རམ། སྦྲང་རྩིའམ། བུ་རམ་གྱི་དབུ་བའམ། དུས་སུ་རུང་བའམ། ཐུན་ཚོད་དུ་རུང་བའམ། ཞག་བདུན་པའམ། འཚོ་བའི་བར་དུ་བཅག་པའམ། རྩ་བའི་སྨན་ནམ། སྡོང་བུའི་སྨན་ནམ། ལོ་མའི་སྨན་ནམ། མེ་ཏོག་གི་སྨན་ནམ། འབྲས་བུའི་སྨན་ནམ། གཞན་ཡང་སྨན་རུང་བ་གང་དགེ་འདུན་ནམ་གང་ཟག་ལས་རྙེད་ན་དེ་ཡང་ཁྱོད་ཀྱིས་ལོང་ལ་ཚོད་ཟིན་པར་གྱིས་ཤིག །དེ་ལྟར་ཁྱོད་གནས་དེ་ལྟ་བུ་ལ་དམ་འཆའམ། དེས་འཆའ་ལགས་ཞེས་བརྗོད་པར་བྱའོ། །དེ་ལྟར་མཐའ་གཉིས་སྤངས་པའི་ཚུལ་གྱིས་གནས་བཞི་ལ་བརྟེན་ན་འཚོ་བ་མ་ཉམས་པ་ཡིན་ཏེ། ལུང་དུ་དེའི་འཚོ་བ་ཡོངས་སུ་དག་པ་ཡིན་ན་དེ་ལྟ་བུ་ནི་འཚོ་བ་ཉམས་པ་མ་ཡིན་པའོ་ཞེས་སོ། །གཉིས་པ་ནི། དེའི་སྟེང་དུ་ཚུལ་ཁྲིམས་མ་ཉམས་པ་ཞིག་དགོས། ལུང་དུ་ཚུལ་ཁྲིམས་ཉམས་པ་ཇི་ལྟ་བུ་ཞེ་ན། ཕས་ཕམ་པ་བཞི་ལས་གང་ཡང་རུང་བའི་ལྟུང་བ་བྱུང་བར་གྱུར་ལ། ཞེས་གསུངས་པས། ཕས་ཕམ་བཞི་སྤང་དགོས་པས། དེ་ལ་སྤྱི་དང་བྱེ་བྲག་ལ་གདམས་པ་གཉིས་ཀྱི་དང་པོ། དགེ་སློང་གི་དངོས་པོ་འཇིག་པར་བྱེད་པ་རྩ་བའི་ལྟུང་བར་འགྱུར་བའི་ཆོས་བཞི་ཆར་གཏོགས་པ་དང་བཅས་པ་སྤང་དགོས་སོ། །ཞེས་སྤྱིར་འདོམས་པ་འདིར་གདའ། མིང་འདི་ཞེས་བྱ་བ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་དེ་ལྟར་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་ལྟུང་བར་འགྱུར་བའི་ཆོས་སུ་གསུངས་ཏེ། དགེ་སློང་གིས་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་(༢༢༡ན)
འགྱུར། དགེ་སྦྱོང་དུ་མི་རུང་། །ཤཱཀྱའི་སྲས་ཀྱིར་མི་རུང་། དགེ་སྦྱོང་གི་དངོས་པོ་ལས་ཉམས་པར་འགྱུར་ཏེ་དེའི་དགེ་སློང་གི་ཚུལ་ཞིག་པར་འགྱུར་ཞིང་། །ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ། འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །གཉིས་པ་བྱེ་བྲག་ལ་གདམས་པ་ལ་བཞི་ལས། རྩ་ལྟུང་བཞི་པོ་ཀུན་སློང་དུག་གསུམ་གང་རུང་གིས་སྦྱོར་བར་ཁྱད་པར་མེད་མཐར་ཕྱིན་ཅིང་རྫོགས་པར་བྱེད་པ་ནི་མི་ཚངས་སྤྱོད་དང་མ་བྱིན་ལེན་འདོད་ཆགས་ཀྱིས། སྲོག་གཅོད་ཞེ་སྡང་གིས། རྫུན་དུག་གསུམ་གང་རུང་གི་རྫོགས་པར་བྱེད་དེ། མཛོད་དུ། གསོད་དང་གནོད་སེམས་ཚིག་རྩུབ་པོ། །ཞེ་སྡང་གིས་ནི་མཐར་ཕྱིན་བྱེད། །ལོག་གཡེམ་བརྣབ་སེམས་མ་བྱིན་ལེན། །ཆགས་པ་ཡིས་ནི་རྫོགས་པར་བྱེད། །ལོག་པར་ལྟ་བ་གཏི་མུག་གིས། །ལྷག་མ་གསུམ་གྱིས་རྫོགས་པར་འདོད། ཅེས་བཤད་པས། དང་པོ་ནང་སེམས་ཅན་ལ་ཆགས་པས་མཐར་ཕྱིན་པར་བྱེད་པ་མི་ཚངས་སྤྱོད་སྤང་བར་གདམས་པ་ནི། མི་ཚངས་སྤྱོད་བྱས་ན་སྡོམ་པ་ལྷག་མ་མེད་པར་སྤྱོད་ཅིང་། དགེ་སློང་གི་དངོས་པོ་ལས་ཉམས་པར་བྱེད་པས་སྤང་དགོས་དེའི་ཆར་གཏོགས་ཆགས་སེམས་ཀྱིས་བུད་མེད་ལ་བལྟ་བ་ཚུན་ཆད་སྤང་དགོས་སོ་ཞེས་འདོམས་པ་འདིར་གདའ། བཞི་གང་ཞེ་ན། འདོད་པ་དང་འདོད་པ་ལ་ཞེན་པ་དང་། འདོད་པ་ལ་འཆུམས་པ་དང་། འདོད་པ་ལ་ལྷག་པར་ཞེན་པ་ནི།(༢༢༡བ)
བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །འདོད་པ་སྤངས་པ་ནི་བསྔགས་ཏེ་བོར་བ་དང་། བསལ་བ་དང་། ཟད་པ་དང་། འདོད་ཆགས་དང་བྲལ་བ་དང་། འགོག་པ་དང་། ཉེ་བར་ཞི་བ་དང་། ནུབ་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཆགས་པའི་སེམས་ཀྱིས་བུད་མེད་ཀྱི་ཡུལ་ལ་མིག་གཏད་དེ། མིག་གིས་བལྟ་བར་ཡང་མི་བྱ་ན། གཉིས་ཀྱིས་གཉིས་སྤྲད་དེ། མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་གྱུར་པས། བསླབ་པ་མ་ཕུལ། བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཐ་ན་དུད་འགྲོའི་སྐྱེ་གནས་སུ་སྐྱེས་པ་དང་། ལྷན་ཅིག་ཀྱང་རུང་སྟེ་དགེ་སློང་དེ་ཡང་ཕམ་པར་གྱུར་པ་ཡིན་གྱིས། གནས་པར་མི་བྱའོ་ཞེས་བྱ་བ་འདི་བཀའ་སྩལ་ཏོ། །དགེ་སློང་གིས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ་དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་ལ་ལྟུང་བ་ཕམ་པར་གྱུར་པ་སྟེ་དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་(༢༢༢ན)
དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། །བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་པ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས་ཞེས་བརྗོད་དོ། །གཉིས་པ་ཕྱི་རོལ་ཡོ་བྱད་ལ་ཆགས་པས་མཐར་ཕྱིན་པར་བྱེད་པ་མ་བྱིན་ལེན་སྤོང་བར་གདམས་པ་ནི། མ་ཤ་ཀ་ལྔས་མཚོན་པ་ཀཱཪྵ་པ་ཎ་བཞི་ཆ་བརྐུས་ན་ཕམ་པར་འགྱུར་ཏེ། དེའི་ཆར་གཏོགས་ཏིལ་གྱི་ཕུབ་མ་ཙམ་ཡང་མི་རྐུ་སྟེ། མདོར་ན་རྐུ་བའི་སྦྱོར་དངོས་མཇུག་གསུམ་ཐམས་ཅད་སྤང་དགོས་སོ་ཞེས་པ་འདིར་གདའ། ཚེ་དང་ལྡན་པ་ཁྱོད་ཉོན་ཅིག །མ་བྱིན་པར་ལེན་པ་ནི། བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །མ་བྱིན་པར་ལེན་པ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་རྐུ་སེམས་ཀྱིས་གཞན་ཀྱི་ཏིལ་གྱི་ཕུབ་མ་ཡང་མ་བྱིན་པར་མི་བླང་ན་མ་ཤ་ལྔའམ། མ་ཤ་ཀ་ལྔ་ལས་ལྷག་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ། བཅོམ་ལྡན་འདས་དེ་བཞིན་གཤེགསཔ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས་ཡང་དགེ་སློང་གང་གཞན་དག་གི་གྲོང་ན་འདུག་པའམ། དགོན་པ་ན་འདུག་པ་མ་བྱིན་པ་རྐུ་བའི་གྲངས་སུ་གཏོགས་པ་བླངས་ན་ཇི་ཙམ་མ་བྱིན་པར་བླངས་པས་དེ་རྒྱལ་པོའི་བློན་པོ་ཆེན་པོས་བཟུང་ནས་དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ། །བླུན་པའོ། །རྐུ་བའོ་ཞེས་ཟེར་ཞིང་། བསོད་དམ། འཆིང་(༢༢༢བ)
ངམ་སྤྱུགས་ཀྱང་རུང་སྟེ། དགེ་སློང་དེ་ལྟར་མ་བྱིན་པར་ལེན་ན་དགེ་སློང་དེ་ཡང་ཕམ་པར་གྱུར་པ་ཡིན་གྱིས། གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གི་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱད་དམ། དེས་མི་སྤྱོད་ལགས་ཞེས་བརྗོད་དོ། །གསུམ་པ་དུག་གསུམ་གང་རུང་གིས་སྦྱར་ནས་ཞེ་སྡང་གིས་མཐར་ཕྱིན་པར་བྱེད་པ་སྲོག་གཅོད་སྤོང་བར་གདམས་པ་ལ། དབང་པོ་དྲུག་འདུས་ཀྱི་མིའམ། དབང་པོ་གསུམ་འདུས་ཀྱི་མིར་ཆགས་པ་བསད་ན་ཕམ་པར་འགྱུར་བས་སྤང་དགོས་ཤིང་། དེའི་ཆར་གཏོགས་གྲོག་སྦུར་གསོད་པ་སྲོག་གཅོད་ཀྱི་སྦྱོར་དངོས་མཇུག་གསུམ་ཐམས་ཅད་སྤོངས་ཤིག་ཅེས་འདོམས་པ་འདིར་གདའ། ཚེ་དང་ལྡན་པ་ཁྱོད་ཉོན་ཅིག །སྲོག་གཅོད་པ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །སྲོག་གཅོད་པ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །དེང་ཕྱིན་(༢༢༣ན)
ཆད་ཚེ་དང་ལྡན་པ་ཁྱོད་ཀྱིས་བསམས་བཞིན་དུ་སྲོག་ཆགས་གྲོག་སྦུར་ཡང་བསད་པར་མི་བྱ་ན། མིའམ་མིར་ཆགས་པ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་མིའམ་མིར་ཆགས་པ་ལ་བསམ་བཞིན་དུ་རང་གི་ལག་དར་ཏེ་སྲོག་གཅད་དམ། དེ་ལ་མཚོན་བྱིན་ནམ། དེ་ལ་མཚོན་ཐོགས་པ་གཉེར་རམ་དེ་འཆིར་བཅུགས་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་སྡིག་པ་མི་གཙང་བ་ངན་པ་འདིས་ཅི་ཞིག་བྱ། ཀྱེ་མི་ཁྱོད་གསོན་པ་བས་ཤི་སླའོ་ཞེས་ཟེར་ཞིང་སེམས་ཀྱི་འདོད་པ་དང་། སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་དེ། དེ་ཡང་རྩོམ་པ་དེས་དུས་བྱས་ན་དགེ་སློང་དེ་ཡང་ཕམ་པར་གྱུར་པ་ཡིན་གྱིས། གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། དགེ་སློང་གིས་གནས་དེ་ལྟ་བུ་བྱས་ན། བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་ཏེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་པ་ཕམ་པར་འགྱུར་བ་སྟེ། དེའི་དགེ་སྦྱོང་གི་ཚུལ་ཕྱིར་བླང་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་བ་མ་ཡིན་པ་(༢༢༣བ)
དང་། སྤྱད་པ་མ་ཡིན་པ་སྤང་བ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་ལ་མི་སྤྱོད་དམ། དེས་མི་སྤྱོད་ལགས་ཞེས་བརྗོད་དོ། །བཞི་པ་དུག་གསུམ་གང་རུང་གིས་སྦྱོར་ཞིང་གང་རུང་གིས་མཐར་ཕྱིན་པར་བྱེད་པ། རྫུན་སྨྲ་བ་སྤང་བར་གདམས་པ་ལ་མི་ཆོས་བླ་མའི་རྫུན་སྨྲས་ན་ཕམ་པར་འགྱུར་བས་སྤང་དགོས་ལ། དེར་མ་ཟད་ཀུ་རེ་བཞད་གད་ཀྱི་ཕྱིར་ཤེས་བཞིན་གྱི་རྫུན་ཕྲ་མོ་ཡང་བྱར་མི་རུང་སྟེ་རྫུན་གྱི་སྦྱོར་དངོས་རྗེས་གསུམ་ཐམས་ཅད་སྤང་དགོས་སོ་ཞེས་པ་འདིར་གདའ། ཚེ་དང་ལྡན་པ་ཁྱོད་ཉོན་ཅིག །རྫུན་དུ་སྨྲ་བ་ནི་བཅོམ་ལྡན་འདས་ཀྱིས་རྣམ་གྲངས་དུ་མས་སྨད་དོ། །རྫུན་དུ་སྨྲ་བ་སྤངས་པ་ནི་བསྟོད་དོ། །བཀུར་རོ། །བསྔགས་སོ། །སྙན་པར་བརྗོད་དོ། །ཚེ་དང་ལྡན་པ་ཁྱོད་དེང་ཕྱིན་ཆད་ཐ་ན་བཞད་གད་བྱ་བར་བསམས་ཏེ་ཤེས་བཞིན་དུ། རྫུན་དུ་སྨྲ་བར་ཡང་མི་བྱ་ན། བསམས་བཞིན་དུ་མིའི་ཆོས་བླ་མ་སྨྲ་བ་ལྟ་སྨོས་ཀྱང་ཅི་དགོས། ཚེ་དང་ལྡན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། ཡང་དགེ་སློང་གང་མངོན་པར་མི་ཤེས་ཤིང་། ཡོངས་སུ་མི་ཤེས་ལ་། མིའི་ཆོས་བླ་མ་མཐའ་དང་། འཕགས་པ་དང་། བྱེ་བྲག་ཐོབ་པ་དང་། ཤེས་པ་དང་། མཐོང་བ་དང་། རེག་པར་སྤྱོད་པ་མེད་ལ། མེད་བཞིན་དུ། འདི་ཤེས་སོ། །འདི་མཐོང་ངོ་ཞེས་ཁས་འཆེས་པ་ལས། དེ་ལྟུང་བ་བྱུང་བ་རྣམ་པར་དག་པར་འདོད་ནས། དུས་གཞན་ཞིག་ན་དྲིས་ཀྱང་རུང་། མ་དྲིས་ཀྱང་རུང་། འདི་སྐད་ཅེས་ཚེ་དང་ལྡན་པ་དག །བདག་གིས་ནི་མི་ཤེས་པར་ཤེས་སོ། །ཞེས་སྨྲས། མ་མཐོང་(༢༢༤ན)
བར་མཐོང་ངོ་ཞེས་སྨྲས་ཏེ། གསོག་གསོབ་རྫུན་དུ་སྨྲས་སོ་ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ། དགེ་སློང་དེ་ཡང་ཕམ་པར་གྱུར་པ་ཡིན་གྱི། གནས་པར་མི་བྱའོ། །ཞེས་བྱ་བ་འདི་བཀའ་སྩལ་ཏེ། ཅི་ཞིག་ཤེས་ཤེ་ན། སྡུག་བསྔལ་ཤེས་སོ། །ཀུན་འབྱུང་བ་དང་། འགོག་པ་དང་། ལམ་ཤེས་སོ། །ཅི་ཞིག་མཐོང་ཞེས་ན་ལྷ་རྣམས་མཐོང་ངོ་། །ཀླུ་རྣམས་དང་གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་མཐོང་ངོ་། །ལྷ་རྣམས་ཀྱིས་བདག་མཐོང་ངོ་། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་མཐོང་ངོ་། །ལྷ་རྣམས་ཀྱི་སྒྲ་ཐོས་སོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་། ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱི་སྒྲ་ཐོས་སོ། །ལྷ་རྣམས་ཀྱིས་ཀྱང་བདག་གི་སྒྲ་ཐོས་སོ། །ཀླུ་རྣམས་དང་། གནོད་སྦྱིན་རྣམས་དང་། ནམ་མཁའི་ལྡིང་རྣམས་དང་དྲི་ཟ་རྣམས་དང་། མིའམ་ཅི་རྣམས་དང་ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་ཤ་ཟ་རྣམས་དང་། གྲུལ་བུམ་རྣམས་དང་། (༢༢༤བ)
སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱིས་ཀྱང་བདག་གི་སྒྲ་ཐོས་སོ། །ལྷ་རྣམས་བལྟ་བའི་ཕྱིར་འགྲོའོ། །ཀླུ་རྣམས་དང་གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་དྲི་ཟ་རྣམས་དང་། མིའམ་ཅི་རྣམས་དང་། ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་ཤ་ཟ་རྣམས་དང་། གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་བལྟ་བའི་ཕྱིར་འགྲོའོ། །ལྷ་རྣམས་བདག་བལྟ་བའི་ཕྱིར་འོང་ངོ་། །ཀླུ་རྣམས་དང་གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། མིའམ་ཅི་རྣམས་དང་ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་ཤ་ཟ་རྣམས་དང་གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་ཀྱང་བདག་བལྟ་བའི་ཕྱིར་འོང་ངོ་། །ལྷ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད་། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ཀླུ་རྣམས་དང་གནོད་སྦྱིན་རྣམས་དང་། ནམ་མཁའི་ལྡིང་རྣམས་དང་དྲི་ཟ་རྣམས་དང་མིའམ་ཅི་རྣམས་དང་ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་ཤ་ཟ་རྣམས་དང་། གྲུལ་བུམ་རྣམས་དང་སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །ལྷ་རྣམས་བདག་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུའང་ལྷན་ཅིག་གནས་པར་བྱེད་དོ། །ཀླུ་རྣམས་དང་གནོད་སྦྱིན་རྣམས་དང་། ནམ་མཁའ་ལྡིང་རྣམས་དང་། དྲི་ཟ་རྣམས་དང་། (༢༢༥ན)
མིའམ་ཅི་རྣམས་དང་ལྟོ་འཕྱེ་ཆེན་པོ་རྣམས་དང་། ཡི་དྭགས་རྣམས་དང་ཤ་ཟ་རྣམས་དང་གྲུལ་བུམ་རྣམས་དང་། སྲུལ་པོ་རྣམས་དང་། ལུས་སྲུལ་པོ་རྣམས་དང་། རྡུལ་ཁྲོད་ཀྱི་ཤ་ཟ་རྣམས་དང་ལྷན་ཅིག་གཏམ་འདྲེ་བར་བྱེད། ཕེབས་པར་སྨྲ་བར་བྱེད། སོ་སོར་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ། །མ་ཐོབ་བཞིན་དུ་བདག་གིས་མི་རྟག་པའི་འདུ་ཤེས་དང་མི་རྟག་པ་ལ་སྡུག་བསྔལ་བའི་འདུ་ཤེས་དང་། སྡུག་བསྔལ་བ་ལ་བདག་མེད་པའི་འདུ་ཤེས་དང་། ཟས་ལ་མི་མཐུན་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ཉེས་དམིགས་ཀྱི་འདུ་ཤེས་དང་། སྤོང་བའི་འདུ་ཤེས་དང་། འདོད་ཆགས་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཆི་བའི་འདུ་ཤེས་དང་། མི་སྡུག་པའི་འདུ་ཤེས་དང་རྣམ་པར་བསྔོས་པའི་འདུ་ཤེས་དང་། རྣམ་པར་བསྣགས་པའི་འདུ་ཤེས་དང་། རྣམ་པར་བམ་པའི་འདུ་ཤེས་དང་། རྣམ་པར་འབུས་བཞིགས་པའི་འདུ་ཤེས་དང་། རྣམ་པར་ཟོས་པའི་འདུ་ཤེས་དང་། རྣམ་པར་དམར་བའི་འདུ་ཤེས་དང་། རྣམ་པར་མཐོང་བའི་འདུ་ཤེས་དང་། རུས་གོང་གི་འདུ་ཤེས་དང་། སྟོང་པ་ཉིད་དུ་སོ་སོ་རྟོགས་པའི་འདུ་ཤེས་ཐོབ་བོ། མ་ཐོབ་བཞིན་དུ་བདག་གིས་བསམ་གཏན་དང་པོ་དང་། གཉིས་པ་དང་། གསུམ་པ་དང་། བཞི་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དང་། རྒྱུན་དུ་བཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་(༢༢༥བ)
མི་འོང་བའི་འབྲས་བུ་དང་། དགྲ་བཅོམ་པ་ཉིད་ཀྱི་འབྲས་བུ་དང་། རྫུ་འཕྲུལ་གྱི་ཡུལ་དང་། ལྷའི་རྣ་བ་དང་། སེེམས་ཀྱི་རྣམ་གྲངས་དང་། སྔོན་གྱི་གནས་དང་། འཆི་འཕོ་བ་དང་། སྐྱེ་བ་དང་། ཟག་པ་ཟད་པ་ཐོབ་བོ། །བདག་ནི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དང་། གཉིས་ཀའི་ཆ་ལས་རྣམ་པར་གྲོལ་བ་ཡིན་ནོ། །ཞེས་བྱ་བ་སྟེ། དགེ་སློང་གིས་གནས་འདི་ལྟ་བུ་བྱས་ན་བྱས་མ་ཐག་ཏུ་དགེ་སློང་དུ་མི་རུང་བར་འགྱུར། དགེ་སྦྱོང་དུ་མི་རུང་། ཤཱ་ཀྱའི་སྲས་ཀྱིར་མི་རུང་། དགེ་སློང་གི་དངོས་པོ་ལས་ཉམས་པར་འགྱུར་སྟེ། དེའི་དགེ་སྦྱོང་གི་ཚུལ་ཞིག་པར་འགྱུར་ཞིང་། ཉམས་པ་བཅོམ་པ་ལྟུང་བ་ཕམ་པར་གྱུར་པ་སྟེ། དེའི་དགེ་སྦྱོང་གི་ཚུལ་ཕྱིར་བླངས་དུ་མེད་པར་འགྱུར་རོ། །འདི་ལྟ་སྟེ། དཔེར་ན་ཤིང་ཏཱ་ལའི་མགོ་བོ་བཅད་ན་སྔོན་པོར་འགྱུར་དུ་མི་རུང་ལ་འཕེལ་ཞིང་རྒྱས་པ་དང་ཡངས་པར་འགྱུར་དུ་མི་རུང་བ་བཞིན་ནོ། །དེང་ཕྱིན་ཆད་ཁྱོད་སྤྱད་པ་མ་ཡིན་པ་དང་། བྱ་བ་མ་ཡིན་པ་དང་། སྤྱད་པ་མ་ཡིན་པ་སྤངས་པ་དེ་ལ་དྲན་པ་དང་བག་ཡོད་པས་སེམས་ཤིན་ཏུ་བསྲུང་བར་བརྩོན་པར་གྱིས་ཤིག །ཇི་ལྟར་གནས་འདི་ལྟ་བུ་མི་སྤྱོད་དམ། དེས་མི་སྤྱོད་ལགས་ཞེས་བརྗོད་དོ། །དེ་ལྟར་བཞིས་ཕམ་པ་བཞི་ཆར་གཏོགས་དང་བཅས་པ་བསྲུངས་པས། ཚུལ་ཁྲིམས་མ་ཉམས་པར་འགྱུར་ཏེ། ལུང་དུ་ཕས་ཕམ་པ་བཞི་རྣམས་ཀྱི་གང་ཡང་རུང་བའི་ལྟུང་བ་མ་བྱུང་བ་གང་ཡིན་པ་དེ་ལྟ་བུ་ནི། ཚུལ་ཁྲིམས་ཉམས་པ་མ་ཡིན་ནོ། །ཞེས་སོ། །དེའི་སྟེང་དུ་ཡང་སྤྱོད་པ་མ་ཉམས་པ་ཞིག་དགོས་ལ། ལུང་དུ། སྤྱོད་པ་ཉམས་པ་ཇི་ལྟ་བུ་ཞེ་ན། བསླབ་པའི་རྗེས་སུ་མཐུན་ཞིང་འཚམས་པའི་ཚིག་གི་ལམ་དག་གིས་སྨད་ན་ཡང་དག་པར་མི་སྒྲུབ་པའོ་ཞེས་གསུངས་པས་(༢༢༦ན)
དེའི་གཉེན་པོར། གསུམ་པ་ཉམས་ལེན་སྤྱོད་པ་རྣམ་དག་ལ་གདམས་པ་ལ། ལྔ་ཡོད་པའི་དང་པོ་ལ། དགེ་སྦྱོང་ལ་མེད་དུ་མི་རུང་བའི་དགེ་སྦྱོང་དུ་བྱེད་པའི་ཆོས་ལ་གདམས་པ་ནི། དགེ་སྦྱོང་ནི་དུལ་བ་དང་། ཞི་བ་ཡིན་ལ། དེའི་རང་བཞིན་དུ་བྱེད་པ་བཟོད་པ་ཡིན་ཏེ། རབ་ཏུ་བྱུང་བ་གཞན་ལ་གནོད་པ་དང་། གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་དེ་དང་བྲལ་ན་དགེ་སྦྱོང་མ་ཡིན་པར་གསུངས་པའི་ཕྱིར། གཞན་ལ་ཕར་མི་གནོད་པར་མ་ཟད། ཚུར་གནོད་པ་བྱུང་ཀྱང་ལན་མི་བྱེད་པར་བཟོད་པ་བསྒོམ་དགོས་སོ་ཞེས་འདོམས་པ་འདིར་གདའ། ཚེ་དང་ལྡན་པ་ཁྱོད་ཉོན་ཅིག །བཞི་པོ་འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པ་དེས། དེ་ལྟར་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་དགེ་སྦྱོང་དུ་བྱེད་པའི་ཆོས་སུ་གསུངས་ཏེ་བཞི་གང་ཞེ་ན། ཚེ་དང་ལྡན་པ་ཁྱོད་ཀྱིས་དེང་ཕྱིན་ཆད་གཤེ་ཡང་སླར་མི་གཤེ་བར་བྱ་བ་དང་། ཁྲོས་ཀྱང་སླར་མི་ཁྲོ་བར་བྱ་བ་དང་། བརྡེགས་ཀྱང་སླར་མི་བརྡེག་པར་བྱ་བ་དང་། མཚང་བྲུས་ཀྱང་སླར་མཚང་མི་འབྲུ་བར་བྱ་བའོ། །ཇི་ལྟར་གནས་འདི་ལྟ་བུ་ལ་སྤྱོད་དམ། དེས་སྤྱོད་ལགས་ཞེས་བརྗོད་པར་བྱའོ། །གཉིས་པ་སྤང་བླང་ལ་ནན་ཏན་དུ་བྱེད་པའི་རྒྱུ་མཆོག་ཏུ་འདོད་པའི་དོན་གྲུབ་པར་གདམས་པ་ལ་ཁྱེད་ཀྱི་བསམ་པ་ལ། གནས་བཞི་ལ་བརྟན་པ་དང་། ལྟུང་བར་འགྱུར་བ་བཞི་སྤོང་བ་དང་། དགེ་སྦྱོང་དུ་བྱེད་པའི་ཆོས་བཞི་ཉམས་སུ་ལེན་པ་ནི། ཤིན་ཏུ་དཀའ་བས་བདག་གིས་མི་ནུས་ཤིང་། བདག་བདེ་བ་དོན་དུ་གཉེར་བས་འདོད་པའི་དོན་མ་གྲུབ་སྙམ་ན་དཀའ་བ་དེ་དག་ལ་སློབ་དགོས་ཀྱང་། (༢༢༦བ)
གཞན་གྱིས་ནན་གྱིས་ཁུར་དུ་བཀུར་བ་མ་ཡིན་གྱི། ཁྱེད་རང་སྔ་མོ་ནས་མཆོག་ཏུ་འདོད་ཅིང་། དོན་དུ་གཉེར་བའི་དོན། རྒྱུ་ཕུན་སུམ་ཚོགས་པ་ཡང་དག་པ་ཉིད་ཀྱིས་རང་གི་ངོ་བོ་རྫོགས་ཤིང་རྒྱས་པར་ཐོབ་པ་ཡིན་པས། ད་གཉེན་པོ་བསྐྱེད་པ་བསྲུང་དགོས་ཞེས་འདོམས་པ་འདིར་གདའ། ཚེ་དང་ལྡན་པ་ཁྱོད་ཉོན་ཅིག །ཁྱོད་སྔོན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་། བསྙེན་པར་རྫོགས་པ་དགེ་སློང་གི་དངོས་པོ་ཐོབ་ཀྱང་ཅི་མ་རུང་སྙམ་དུ་སྨོན་པ་གང་ཡིན་པ་དེ། ད་ཁྱོད་མཁན་པོར་འོས་པ་དང་། སློབ་དཔོན་དུ་འོས་པ་གཉིས་དང་། དགེ་འདུན་མཐུན་པ་དང་། གསོལ་བ་དང་བཞིའི་ལས་མི་གཡོ་བ་བཞག་པར་མི་འོས་པས་རབ་ཏུ་བྱུང་ཞིང་བསྙེན་པར་རྫོགས་སོ། །གསུམ་པ་གནས་བརྟན་རྣམས་དང་ཚུལ་ཁྲིམས་མཉམ་པར་གྱུར་པ་ལ་ངེས་པར་སྦྱར་བ་ནི། ཁྱེད་ཀྱི་བསམ་པ་ལ་དེ་ལྟ་ན་ཡང་གནས་བརྟན་བགྲེས་པོ་རྣམས་དང་ཚུལ་ཁྲིམས་མི་མཉམ་པས་འདོད་པ་མ་གྲུབ་ཅིང་། དེ་རྣམས་ཀྱི་སློབ་པ་བཞིན་བསླབ་མི་ནུས་སོ་སྙམ་ན་དེ་ལྟ་མ་ཡིན་ཏེ། དེ་རྣམས་དང་རང་བཞིན་དང་བཅས་པ་སྤོང་བ་དང་། ཆོས་ཀྱི་ལོངས་སྤྱོད་གསུམ་གྱིས་ཚུལ་ཁྲིམས་མཉམ་པོར་ཐོབ་པས། དེ་རྣམས་ཇི་ལྟར་སློབ་པ་བཞིན་བསླབ་དགོས་སོ་ཞེས་འདོམས་པ་འདིར་གདའ། ཚེ་དང་ལྡན་པ་ཁྱོད་ཉོན་ཅིག །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ། དེ་རིང་བསྙེན་པར་རྫོགས་པས་ཀྱང་བསླབ་པོ། དེ་རིང་བསྙེན་པར་རྫོགས་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ། བསྙེན་པར་རྫོགས་ནས་ལོ་བརྒྱ་ལོན་པས་ཀྱང་བསླབ་པོ། དེ་ལྟར་ན་ཚུལ་ཁྲིམས་ཉིད་(༢༢༧ན)
ཀྱིས་མཉམ་པ་དང་། བསླབ་པ་ཉིད་ཀྱིས་མཉམ་པ་དང་། སོ་སོར་ཐར་པའི་མདོ་འདོན་པ་ཉིད་ཀྱིས་མཉམ་པས་ཁྱོད་ཀྱིས་དེང་ཕྱིན་ཆད་བསྒྲུབ་པར་བྱའི། མི་བསྒྲུབ་པར་མི་བྱའོ། །བཞི་པ་ཡོངས་འཛིན་ལ་གུས་པ་འཇིག་རྟེན་པའི་ཚུལ་དང་འབྲེལ་བའི་གཟུགས་བརྙན་ལ་ངེས་པར་སྦྱར་བ་ནི། གནས་བརྟན་རྒན་པོ་རྣམས་དང་མཉམ་པ་གསུམ་གྱིས་མཉམ་པས་སུ་ལའང་རག་མ་ལས་པས་གུས་པ་དང་བསྙེན་བཀུར་བྱ་མི་དགོས་སམ་སྙམ་ན། འཇིག་རྟེན་ན་བུ་བཟང་པོས་ཕ་ལ་གུས་པས་ཞབས་ཏོག་བྱེད་ཅིང་བསྒོ་བ་ཉན། ཕ་བཟང་པོས་བུ་ལེགས་པར་སྐྱོང་བ་བཞིན་དུ། མཁན་པོས་ཀྱང་ཁྱོད་ཆོས་དང་ཟང་ཟིང་གི་སྒོ་ནས་ཕན་གདགས་ཤིང་། ན་ན་ནད་གཡོག་གིས་ཀྱང་རྗེས་སུ་བཟུང་དགོས། ཁྱོད་ཀྱིས་ཀྱང་མཁན་པོ་ལ་གུས་པའི་སྒོ་ནས་བསྙེན་བཀུར་བྱ་ཞིང་། གནས་པའི་ཚུལ་ཁྲིམས་མཐའ་དག་ལ་གནས་དགོས་སོ་ཞེས་འདོམས་པ་འདིར་གདའ། དེང་ཕྱིན་ཆད་ཁྱོད་ཀྱིས་མཁན་པོ་ལ་ཕའི་འདུ་ཤེས་ཉེ་བར་གཞག་པར་བྱའོ། །མཁན་པོས་ཀྱང་ཁྱོད་ལ་བུའི་འདུ་ཤེས་ཉེ་བར་གཞག་པར་བྱའོ། །ཁྱོད་ཀྱི་དེང་ཕྱིན་ཆད་མཁན་པོ་ལ་ཇི་སྲིད་འཚོའི་བར་དུ་བསྙེན་བཀུར་བྱའོ། །མཁན་པོས་ཀྱང་ཁྱོད་ཤིའམ་སོས་ཀྱི་བར་དུ་ནད་གཡོག་བྱའོ། །ལྔ་པ་གྲོགས་ལ་གུས་པ་དུལ་བར་གནས་པ་ལ་ངེས་པར་སྦྱར་བ་ནི། དེ་ལྟ་ན་ཡང་མཁན་པོ་ལས་གཞན་པའི་དགེ་སློང་རྣམས་དང་མཉམ་པ་གསུམ་གྱིས་མཉམ་པས་གུས་པར་བྱ་མི་དགོས་ཀྱིས་མཉམ་འགྲོགས་ཀྱིས་ཆོག་གམ་སྙམ་ན། དེ་ལྟ་མ་ཡིན་ཏེ། ལུང་ཕྲན་ཚེགས་ལས། ཀུན་དགའ་བོ་ཁྱོད་འདི་ལྟ་སྟེ། དགེ་བའི་བཤེས་གཉེན་ལ་བརྟེན་པ་དང་། དགེ་བ་དང་ལྷན་ཅིག་གནས་པ་དང་། དགེ་བ་ལ་བརྟེན་ནས་སྡིག་(༢༢༧བ)
པའི་གྲོགས་པོ་དང་མི་བརྟེན། སྡིག་པ་དང་ལྷན་ཅིག་མི་གནས། སྡིག་པ་ལ་མ་བརྟེན་ན་འདི་ནི་ཚངས་པར་སྤྱོད་པའི་ཕྱེད་ཡིན་ནོ། །ཞེས་དེ་སྐད་མ་ཟེར་ཞིག །དེ་ཅིའི་ཕྱིར་ཞེ་ན། ཀུན་དགའ་བོ། དེ་ནི་ཚངས་པར་སྤྱོད་པ་ཀུན་ཏུ་མཐར་ཕྱིན་པ། མ་འདྲེས་པ་ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡིན་ནོ། །ཞེས་སོ། །གྲོགས་ནི་ཡོན་ཏན་ཐམས་ཅད་ཀྱི་འབྱུང་གནས་ཡིན་པའི་ཕྱིར་གུས་པར་བྱེད་དགོས་སོ་ཞེས་འདོམས་པ་འདིར་གདའ། དེང་ཕྱིན་ཆད་ཁྱོད་ཀྱིས་ཚངས་པ་མཚུངས་པར་སྤྱོད་པ་རྣམས་དང་། གནས་བརྟན་རྣམས་དང་། བར་མ་རྣམས་དང་། གསར་བུ་རྣམས་ལ་གུས་པ་དང་བཅས་པ་དང་། ཞེ་ས་དང་བཅས་པ་དང་། འཇིགས་པ་དང་བཅས་པའི་དབང་དུ་འགྱུར་བར་གནས་པར་བྱའོ། །དེ་ལྟར་ལྔ་པོ་དེས་གདམས་པ་བཞིན་བསྒྲུབས་ན་སྤྱོད་པ་མ་ཉམས་ཤིང་རྣམ་པར་དག་པར་འགྱུར་ཏེ། ལུང་དུ་བསླབ་པའི་རྗེས་སུ་མཐུན་ཞིང་འཚམ་པའི་ཚིག་གིས་ལམ་དག་གིས་སྨྲས་ན་ཡང་དག་པར་བསྒྲུབ་པ་དེ་ལྟ་བུ་ནི་སྤྱོད་པ་ཉམས་པ་མ་ཡིན་ནོ་ཞེས་དང་། མ་མོ་ལས་ཇི་ལྟར་ན་སྤྱོད་པ་མ་ཉམས་པ་ཡིན་ཞེ་ན། མི་སྤྱད་པ་མི་སྤྱོད་ཅིང་། དགེ་སློང་གི་བསླབ་པ་ལ་ཡང་སློབ་པ་ཡིན་ཏེ། དེ་ལྟ་བུ་ནི་སྤྱོད་པ་མ་ཉམས་པ་ཞེས་བྱའོ། ཞེས་སོ། །བཞི་པ་ལྟ་བ་དག་པའི་ཕྱིར་སྤོང་པ་དང་ཀློག་པ་གཉིས་ཀྱི་དགོས་པ་རྗེས་སུ་བསྒྲུབ་པ་ལ་ངེས་པར་སྦྱར་བ་ནི་དེ་ལྟར་མཆོག་དུ་འདོད་པའི་དོན་གྲུབ་པས་གནས་བརྟན་རྣམས་དང་མཉམ་པར་གྱུར་པས། བླ་མ་དང་གྲོགས་ལ་གུས་པར་བྱས་ནས་སོས་དལ་དུ་བསྡད་པས་ཆོག་གམ་སྙམ་ན་མི་ཆོག་སྟེ། དོན་གྲུབ་པ་རྒྱུ་མཚན་དུ་བྱས་ནས་ཐོས་བསམ་སྒོམ་གསུམ་ལ་(༢༢༨ན)
འབད་དེ་ལུང་སྡེ་སྣོད་གསུམ་ལ་མཁས་པ་དང་། མངོན་རྟོགས་བསླབ་པ་གསུམ་གྱི་རྒྱུད་ཕྱུག་པར་བྱེད་དགོས་སོ་ཞེས་པ་འདིར་གདའ། དེང་ཕྱིན་ཆད་ཁྱོད་ཀྱི་ལུང་ནོད་པར་བྱ། བཀླག་པར་བྱ། ཁ་ཏོན་དུ་བྱའོ། །ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར། ཁྱོད་ཀྱིས་བརྩོན་པ་མི་དོར་བར་བྱའོ། །དེ་ལྟར་བསླབ་པས་ཐོས་བསམ་སྒོམ་གསུམ་གྱིས་ཡང་དག་པའི་ལྟ་བ་སྐྱེས་པས་ལྟ་བ་མ་ཉམས་པར་འགྱུར་ཏེ། ལུང་དུ། ལྟ་བའི་རྣམ་པ་དྲུག་ཅུ་རྩ་གཉིས་ལས་གང་ཡང་རུང་བའི་ལྟ་བ་ལ་མངོན་པར་མ་ཞེན་པ་དེ་ལྟ་བུ་ནི་ལྟ་བ་ཉམས་པ་མ་ཡིན་ནོ། །ཞེས་སོ། །དེ་རྣམས་བསླབ་བྱའི་གཙོ་བོ་གལ་ཆེ་ཆེ་རྣམས་བརྗོད་པ་ཡིན། གཉིས་པ་མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་སྒྲུབ་པར་འགྱུར་བ་ཉིད་ཀྱང་བརྗོད་པར་བྱ་བ་ནི། སྔར་བཤད་པའི་སྤང་བླང་དེ་ཙམ་ལ་ནན་ཏན་དུ་བྱས་པས་ཆོག་གམ་སྙམ་ན་མི་ཆོག་འདིར་བསླབ་བྱའི་གཙོ་བོ་ཙམ་ཞིག་བརྗོད་པ་ཡིན། དགེ་འདུན་ལྷག་མ་ལ་སོགས་དངོས་སུ་མ་བརྗོད་པ་རྣམས་ཀྱང་། ཐབས་འདི་དག་གིས་ཤེས་པར་བྱས་ལ་བསླབ་དགོས་སོ་ཞེས་འདོམས་པ་འདིར་གདའ། འདི་དག་ནི་ཁོ་བོས་ཁྱོད་ལ་བསླབ་པའི་གཞི་ཆེ་ལོང་ཆེ་ལོང་ཙམ་ཞིག་བརྗོད་པར་ཟད་དེ། གཞན་དག་ནི་ཟླ་བ་ཕྱེད་ཕྱེད་ཅིང་སོ་སོ་ཐར་པའི་མདོ་འདོན་པ། འདོན་པའི་ཚེ་ཐོས་པར་འགྱུར་རོ། །(༢༢༨བ)
གཞན་དག་ཀྱང་སློབ་དཔོན་དང་། མཁན་པོ་དང་། མཁན་པོ་གཅིག་པ་དང་། སློབ་དཔོན་གཅིག་པ་དང་། གཏམ་འདྲེས་པ་དང་། ཕེབས་པར་སྨྲ་བ་དང་། སྨོན་འདྲིན་དང་། འགྲོགས་ཤེས་རྣམས་ཀྱང་རྒྱ་ཆེར་སྟོན་པར་འགྱུར་རོ། །གཉིས་པ་བསླབ་པ་དེ་རྣམས་ལ་སློབ་ཚུལ་ལ་ཁྱད་དུ་གསོད་པའི་གཉེན་པོར་གུས་པ་ལ་སྦྱར། བསྒྲུབ་པར་བྱ་བའི་ཐབས་བརྗོད་པ་བག་ཡོད་ལ་སྦྱར་བ་གཉིས་ཀྱི་དང་པོ་ནི། དེ་ལྟར་བསླབ་བྱ་ཐམས་ཅད་ཤེས་པར་བྱ་ལ། ཤིན་ཏུ་རྙེད་དཀའ་བའི་དལ་འབྱོར་ཐོབ། མཇལ་དཀའ་བའི་སངས་རྒྱས་ཀྱི་བསྟན་པ་དང་མཇལ་ནས། བསྟན་པའི་སྙིང་པོ་བསྙེན་པར་རྫོགས་པ་ཐོབ་པས་ཅི་ནས་ཀྱང་དལ་འབྱོར་ཆུད་མ་ཟོས་པར་བསླབ་གཞི་རྣམས་ལ་ཇི་ལྟར་གསུངས་པ་བཞིན་དུ་མ་ཤི་བར་དུ་མགོ་དང་གོས་ལ་མེ་འབར་བ་ལྟར་ཡོངས་སུ་བསྐྱངས་ཤིང་། གུས་པས་རྗེས་སུ་བསྒྲུབ་པ་ལྷུར་ལོང་ཞིག་ཅེས་འདོམས་པ་འདིར་གདའ། ཤེས་རབ་མཆོག་གི་བསྟན་པ་ལ། ཁྱོད་ནི་བསྙེན་པར་རྫོགས་པར་འགྱུར། །དལ་དང་འབྱོར་བ་རྙེད་དཀའ་བས། །འདི་དག་ཇི་ལྟ་བཞིན་དུ་སྒྲུབས། །མཛེས་པ་རབ་ཏུ་བྱུང་བ་དང་། །ཡོངས་སུ་དག་པ་བསྙེན་རྫོགས་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །གཉིས་པ་ནི་གུས་པས་བསླབ་དགོས་ལ། དེའི་ཐབས་གང་ཡིན་སྙམ་ན། བསྒྲུབ་བྱ་བསྙེན་རྫོགས་སྒྲུབ་བྱེད་ཀྱི་ཐབས་བག་ཡོད་ལ་སྦྱོར་བ་འདིར་གདའ། ཚེ་དང་ལྡན་པ་ཁྱོད་བསྙེན་པར་རྫོགས་ཟིན་གྱིས་བག་ཡོད་པར་སྒྲུབས་ཤིག །འདི་ཚིག་ཉུང་ཡང་དོན་རྒྱ་ཆེ་བ་སྟེ། ཆོས་མངོན་པར་། བག་ཡོད་པ་གང་ཞེ་ན། (༢༢༩ན)
མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། བརྩོན་འགྲུས་དང་བཅས་པ་ལ་གནས་ནས་དགེ་བའི་ཆོས་རྣམས་བསྒོམ་ཞིང་། ཟག་པ་དང་བཅས་པའི་ཆོས་རྣམས་ལ་སེམས་བསྲུང་བ་སྟེ་ཞེས་བཤད་པས། སྤང་གཉེན་ལ་བླང་དོར་ཕྱིན་ཅི་མ་ལོག་པ་བྱེད་པའི་གཟོབ་པ་ལྷུར་ལེན་པ་ནི་བག་ཡོད་པ་སྟེ། དེས་སྒྲུབས་ཤིག །སོ་སོ་ཐར་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང་། གཞན་ཡང་གང་དག་དེ་ལྟ་བུ་དང་མཐུན་པ། དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་ཐོབ་བོ་ཞེས་གསུངས་པའི་ཕྱིར་རོ། །དེ་ལྟར་སྦྱོར་དངོས་མཇུག་གསུམ་གྱིས་ཁྱོད་བསྙེན་པར་རྫོགས་པར་བསྒྲུབ་པའི་ཆོ་ག་ལེགས་པར་གྲུབ་པ་ཡིན། དེའང་གཙོ་བོར་མཁན་པོ་པའི་བདག་རྐྱེན་ལས་བྱུང་བ་ཡིན་ཏེ། རང་གིས་མཛད་དགོས་རྣམས་རང་གིས་མཛད། གཞན་ལ་བསྒོ་དགོས་རྣམས་བསྐོས་ནས་མཛད་པས་དྲིན་ཆེ་བ་ཡིན་པས་ཕྱག་གསུམ་ཚོལ་ལ་བཀའ་དྲིན་ཆེ་ཞེས་བརྗོད། འདིའི་དངོས་བསྟན་གྱི་བསྡུ་ཚུལ་རྣམས་གཞུང་ལུགས་བརྒྱ་པ་དངོས་གྲུབ་དཔལ་འབར་གྱི་ཡིག་ཆར་གསལ་བ་འཚམ་པར་གོ་བས་ཅུང་ཟད་ལས་དབྲི་བསྣན་མ་དགོས་ཤིང་ལོང་ཡོད་རྒྱས་པར་སྤྲོ་ན་ཐམས་ཅད་མཁྱེན་པ་བུས་མཛད་པའི་ལས་ཆོག་ཆེན་མོའི་ཀུན་ཚང་རྒྱས་པ་ཉིད་ལས་ལྷག་པར་མ་མཆིས། བསྒྲུབ་བྱ་མང་ཞིང་ཡུལ་དུས་ཀྱི་རྩོལ་བས་བསྒྲུབ་དགོས་ཚེ་ཆོ་ག་དང་ཕྱག་ལེན་རྣམས་དཀྱུས་བཞིན་ལས་བཅོས་བསླད་བྱར་མེད་ཅིང་བཤད་པ་ལ་ངེས་པ་མེད་པས་ངེས་པར་དགོས་པའི་བརྡ་སྤྲོད་རྒྱུ་རྣམས་ངོ་འཕྲོད་(༢༢༩བ)
ཕྱིན་དོན་གྱི་སྙིང་པོར་ཧྲིལ་གྱིས་དྲིལ་ཆོག་པ་བློ་ལྡན་རྣམས་ཀྱི་མཐོང་རྒྱུད་དང་བློ་གྲོས་ཀྱི་དཔྱད་པས་ཆོག་ལ་རྣམ་དཔྱོད་ཀྱི་སྤྱན་རིང་པོར་མི་རྐྱོང་ཞིང་སྨྲ་བའི་ལྗགས་རྐན་ཕུགས་སུ་སྒྲིལ་བ་རྣམས་ལ་སྣག་ཤོག་གི་གྲོན་དུ་ཟད་པས་དཔེ་བརྗོད་མང་དུ་མ་བྲིས་སོ། །
ཞར་བྱུང་ཁྱིམ་པ་ལ་ཕན་གདགས་པའི་བསྙེན་གནས་ཀྱི་ཆོ་ག་བཤད་པ།
བཞི་པ་ཞར་བྱུང་ཁྱིམ་པ་ལ་ཕན་གདགས་པའི་ཆོ་ག་ལ་ཇི་སྲིད་འཚོའི་བར་དུ་བསྲུང་བ་དགེ་བསྙེན་གྱི་སྡོམ་པ། ཉིན་ཞག་གཅིག་གི་བར་བསྲུང་བ་ཡན་ལག་བརྒྱད་པའི་སྡོམ་པ་དང་གཉིས། དང་པོ་ལ་ནང་གསེས་ཀྱི་མང་དུ་ཡོད་པའི་གཙོ་བོ་ཁ་ཆེ་བ་དང་ཐུན་མོང་བའི་ཡོངས་རྫོགས་དགེ་བསྙེན་ནི། ཚིགས་སྔ་མའི་སྐབས་སུ་ཁྱེད་རྣམས་རབ་ཏུ་བྱུང་བར་བྱེད་པ་ལ་དགེ་བསྙེན་གྱི་སྡོམ་པ་བླང་དགོས་ཞེས་པའི་ཚིག་ཕྲད་དོར་ནས། ཁྱེད་རྣམས་རྙེད་པར་དཀའ་བའི་དལ་འབྱོར་གྱི་མི་ལུས་ཐོབ། མཇལ་བར་དཀའ་བའི་སངས་རྒྱས་ཀྱི་བསྟན་པ་དང་མཇལ་བའི་དུས་འདིར་སྙིང་པོ་ཞིག་ལེན་དགོས། དེ་ལ་ཚུལ་མང་དུ་ཡོད་ཀྱང་བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། ཡོན་ཏན་ཀུན་གྱི་གཞི་རྟེན་ལགས་པར་གསུངས། ཞེས་རྒྱུ་བ་བཅུད་ཀྱི་སེམས་ཅན་དང་། མི་རྒྱུ་བ་སྣོད་ཀྱི་འཇིག་རྟེན་ཐམས་ཅད་ཀྱི་གཞི་རྟེན་ས་ཆེན་པོ་ཡིན་པ་ལྟར་ཚུལ་ཁྲིམས་འདི་ཡང་ཡོན་ཏན་ཀུན་གྱི་གཞི་མ་ཡིན་པས་དེ་ལ་རབ་ཏུ་བྱུང་བ་དང་། ཁྱིམ་པའི་ཕྱོགས་ཀྱི་སྡོམ་པ་གཉིས་ལས་ཁྱིམ་པ་ལ་གསུམ་དུ་ཡོད་པའི་བྱེ་བྲག་ཡོངས་རྫོགས་དགེ་བསྙེན་གྱི་སྡོམ་པ་བླང་དགོས་ཞེས་པ་ནས་བཟུང་སྟེ་ཕྱོགས་མཐུན་ཡིན་པས་ཡིད་ཀྱིས་བསྡམས་(༢༣༠ན)
ནས་ལེགས་པར་སྲུངས་ཤིག་གི་བར་དཀྱུས་ལྟར་ལས། བསླབ་པ་བརྗོད་པའི་སྔ་རོལ་དུ་དུས་གོ་བརྗོད་པ་རྒྱས་བསྡུས་ཇི་ལྟར་རིགས་པ་ཞིག་བྱ། དགེ་བསྙེན་ལ་གསུམ་དུ་གཅོད་དགོས་པས་བསྒྲུབ་བྱ་མང་པོ་ཡོད་ན་དེ་ཙམ་འཚམ་ཞིང་། རྒྱས་པར་སྤྲོ་ན་འོག་ནས་འབྱུང་བའི་བསྙེན་གནས་ཀྱི་སྐབས་ཀྱི་སྒོས་ཆོས་རྣམས་དོར་བའི་བཤད་པ་རྣམས་བཏང་བས་ཆོག་གོ །ཆོ་གའི་སྐབས་ཀླུ་སྒྲུབ་རྗེས་མཛད་པའི་སྙིང་པོ་རབ་གསལ་ལས། ཁ་ཆེ་དང་ཐུན་མོང་བའི་ཡོངས་རྫོགས་དགེ་བསྙེན་གྱི་སྡོམ་པ་འབོགས་པའི་ཚེ་བདག་དགེ་བསྙེན་དུ་གཟུང་དུ་གསོལ་ཞེས་བརྗོད་པས་ཆོག་ལ། ཉི་འོག་པ་ཡན་ཆད་ལྟར་ན་བདག་སྤང་བྱ་ལྔ་སྤོང་བའི་དགེ་བསྙེན་དུ་གཟུང་དུ་གསོལ་ཞེས་བརྗོད་དགོས་པ་ནི། གྲུབ་མཐའི་གནད་དམ་པར་ཤེས་དགོས་ཏེ། ཁ་ཆེ་བ་དགེ་བསྙེན་ཡིན་ཚད་རྩ་བཞི་སྤོང་བས་ཁྱབ་པ་ཁས་ལེན། ཉི་འོག་པ་དགེ་བསྙེན་གྱི་སྡོམ་པ་དང་ལྡན་མི་ལྡན་གཉིས་སུ་ཕྱེ། ལྡན་པ་ཙམ་ལའང་རྩ་བ་གཅིག་ཙམ་སྤོང་བ། གཉིས་ཙམ་སྤོང་བ། བཞི་ཆར་སྤོང་བའི་སྡོམ་པ་ཁས་ལེན་པའི་གནད་ཀྱིས་སོ་ཞེས་བྱུང་། ཚངས་སྤྱོད་དགེ་བསྙེན་ལ་བདག་ཇི་སྲིད་འཚོའི་བར་དུ་ཚངས་པར་སྤྱོད་པའི་དགེ་བསྙེན་དུ་གཟུང་དུ་གསོལ་ཞེས་པ་དང་། འདོད་པས་ལོག་པར་གཡེམ་པ་མི་ཚངས་སྤྱོད་དུ་བསྒྱུར་རོ། །ཕལ་ཆེར་སྤྱོད་པ་ནི། རྩ་བ་བཞི་ཙམ་བསྲུང་བའི་ཕལ་ཆེར་སྤྱོད་པའི་དགེ་བསྙེན་དུ་གཟུང་དུ་གསོལ། བསླབ་པ་བརྗོད་(༢༣༠བ)
དུས། ལོག་གཡེམ་བསྒྱུར་མི་དགོས། འདི་དཔེར་བརྗོད་ཙམ་སྟེ་རྩ་བཞི་གང་རུང་ཞིག་དོར་ནས་ཆང་བསྲུངས་པས་ཀྱང་ཆོག །སྣ་འགའ་བསྲུང་བ་ནི། གང་བསྲུང་རྒྱུ་འདོད་པ་གཙོ་ཡང་དཔེར་ན་སྲོག་གཅོད་དང་མ་སྦྱིན་ལེན་གཉིས་སྤོང་བའི་དགེ་བསྙེན་དུ་གཟུང་དུ་གསོལ་ཞེས་བརྗོད་ཅིང་། བསླབ་པ་བརྗོད་པའི་སྐབས་ཡན་ལག་ཕྱི་མའི་སྐབས་སུ་མ་སྦྱིན་པར་ལེན་པ་ཞེས་ཁ་བསྒྱུར། སྣ་གཅིག་བསྲུང་བ་ནི་གང་བསྲུང་རྒྱུ་དེ་གར་འགྱུར་རོ། །དེ་ཡང་བརྒྱད་སྟོང་འགྲེལ་ཆེན་དུ། དགེ་བསྙེན་ནི་སྐྱབས་གསུམ་ཡོངས་སུ་འཛིན་པ་དང་། བསླབ་པའི་གཞི་ལྔ་ཡོངས་འཛིན་པའོ། །དགེ་བསྙེན་མ་ཡང་དེ་བཞིན་ཡིན་པའི་ཕྱིར་རྣམ་པ་གཉིས་ཏེ། སྐྱབས་གསུམ་འཛིན་པའི་དགེ་བསྙེན་དུ་སློབ་དཔོན་གྱིས་གཟུང་དུ་གསོལ་ཞེས་བྱ་བ་དང་། དཀོན་ཅོག་གསུམ་ལ་སྐྱབས་སུ་སོང་ནས་བསླབ་པའི་གཞི་ལྔ་ཡོངས་སུ་འཛིན་པའི་དགེ་བསྙེན་དུ་སློབ་དཔོན་གྱིས་གཟུང་དུ་གསོལ་ཞེས་འདུལ་བ་ལས་གཉིས་སུ་སྨོས་པའི་ཕྱིར་ཞེས་བཤད་དེ། སྡེ་པ་གཞན་གྱི་འདུལ་བ་ལ་ཡོད་པར་སྣང་གི །གཞི་ཐམས་ཅད་ཡོད་སྨྲའི་འདུལ་བ་ལ་དེ་ལྟ་བུ་མི་སྣང་ཞིང་། སྣ་གཅིག་སྤྱོད་པ་སོགས་ཀྱི་དགེ་སྙེན་གྱི་ཆོ་ག་གསུངས་པའང་མི་སྣང་རུང་། ཉི་འོག་པའི་ལུགས་ལྟར། བླ་མ་གོང་མ་རྣམས་རིགས་པ་བསྒྲེས་ནས། སྔར་ཡོངས་རྫོགས་ཀྱི་ཆོ་ག་དེ་ཉིད་འདོན་པ་ཁ་སྤོས་སུ་མཛད་པ་བཞིན་དུ་བརྗོད་པར་སྣང་བ་འདུལ་འཛིན་ཕལ་ཆེར་ལ་གྲགས་ཤིང་མཛད་ཀྱང་ཉི་འོག་པ་དང་མདོ་(༢༣༡ན)
སྡེ་པའི་འདོད་ཚུལ་གྱི་གནད་མ་ཤེས་པའི་སྐྱོན་ཡོད་པར་དོགས་པས་དཔྱད་དགོས། འོན་ཀྱང་ཕྱག་ལེན་འདི་གྲགས་ཆེ་ཞིང་ཐོག་མར་སྤང་བྱ་ལྔ་སྤོང་བར་ཁས་བླངས་ནས་རྗེས་སུ་ཡོངས་རྫོགས་བསྲུང་མ་ནུས་ན་སྣ་གཅིག་སྣ་འགའ་སོགས་བློ་དང་འཚམ་པ་ཞིག་བསྲུང་བའི་དོན་དུ་འཆད་པའང་ཡོད། གོ་མི་ཞེས་པ་བཙུན་པའི་སྐད་དོད་ཡིན་པ་ལ་འཁྲུལ་ནས་རབ་བྱུང་གི་གཟུགས་བརྙན་གྱི་ཡོངས་རྫོགས་དགེ་བསྙེན་ལ་འཆད་པ་ཡོད་ནའང་། ཁྱིམ་པ་ཇི་སྲིད་འཚོ་བར་དུ་ཡན་ལག་བརྒྱད་སྤོང་བར་ཁས་བླངས་པ་ལ་ངོས་འཛིན་པ་ཁུངས་དག་པ་འདྲ་སྟེ་སློབ་དཔོན་ཆེན་པོ་ཙནྡྲ་གོ་མི་བཞིན་ནོ། །སྐྱབས་འགྲོ་ལ། ཐེག་པ་ཆེན་པོའི་ལུགས་ལ་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་ཞིང་། བདག་ཇི་སྲིད་འཚོའི་བར་དུ་སྐྱབས་གསུམ་འཛིན་པར་བཙུན་པས་བཟུང་དུ་གསོལ་ཞེས་དགེ་བསྙེན་དུ་མི་གཏོགས་པའི་སྐྱབས་སྡོམ་མཚན་ཉིད་པ་བཞེད་ཀྱང་ཐེག་པ་འོག་མ་ལ་དགེ་བསྙེན་གྱི་སྡོམ་པ་སྦྱིན་པ་ལ་ཉི་འོག་པ་རྣམས་སྐྱབས་འགྲོ་ཉིད་ཀྱིས་དགེ་བསྙེན་དུ་འགྱུར་ཟེར་བ་ལ། ཁ་ཆེ་བྱེ་བྲག་ཏུ་སྨྲ་བ་རྣམས་དགེ་བསྙེན་གྱི་སྡོམ་པ་མ་བླངས་པའི་དགེ་བསྙེན་དུ་མི་འགྱུར་ཏེ། དགེ་སློང་གི་སྡོམ་པ་མ་བླངས་པར་དགེ་སློང་དུ་མི་འགྱུར་བ་བཞིན་ནོ། །ཞེས་ཟེར་བ་ལ། མདོ་སྡེ་པ་རྣམས་དེ་གཉིས་མི་མཚུངས་ཏེ། དགེ་བསྙེན་ནི་དགེ་བསྙེན་གྱི་སྡོམ་པ་མེད་ཀྱང་དགེ་བསྙེན་དུ་འགྱུར་ཏེ། སྐྱབས་གསུམ་འཛིན་པའི་དགེ་བསྙེན་ཡིན་ནོ་ཞེས་མདོ་སྡེ་པ་སྐྱབས་གསུམ་འཛིན་པ་དགེ་བསྙེན་དུ་འདོད། བྱེ་བྲག་སྨྲ་བ་སྐྱབས་གསུམ་འཛིན་པ་དགེ་བསྙེན་དུ་མི་འདོད་དོ། །དེ་ལ་མདོ་སྡེ་པ་ལྟར་དགེ་བསྙེན་སྦྱར་(༢༣༡བ)
ན་སྐྱབས་འགྲོ་ཙམ་གྱི་དགེ་བསྙེན་དུ་ཞེས་པ་དང་མཐུན་པར་སྤང་བྱ་ལྔ་པོའི་དམིགས་བསལ་མེད་པའི་སྐྱབས་གསུམ་འཛིན་པའི་དགེ་བསྙེན་དུ་འགྲོ་བས་ལེན་ལུགས་ཀྱང་ཐེག་ཆེན་པ་དང་མ་འདྲེས་པར་འོག་ནས་འབྱུང་བ་ལྟར་ལེན་དགོས་ཤིང་། འདི་ལ་སྐྱབས་འགྲོའི་བསླབ་བྱ་ལས་གཞན་མ་བྱུང་བས་གཞན་རྣམས་ལས་སླ་བ་འདྲ་ཞིག་སྣང་ཡང་། ཆོས་ལ་སྐྱབས་སུ་སོང་བས་སེམས་ཅན་ལ་གནོད་འཚེ་སྤོང་བ་སྲོག་གཅོད། ཚིག་རྩུབ་སོགས་ཀྱིས་ཀྱང་ཕ་རོལ་གྱི་ལུས་སེམས་ལ་གནོད། རྐུ་འཕྲོག་སོགས་ཀྱིས་ལོངས་སྤྱོད་ལ་གནོད། གཞན་གྱི་མཆིས་བྲང་ལ་སྤྱད་པས་བདག་པོ་དང་གཞན་གྱི་སྡོམ་པ་སོགས་ལ་གནོད། ཕན་ཚུན་མཐུན་པར་མི་མཐུན་པའི་ཕྲ་མ་བྱས་པས་རྒྱུན་རྣལ་དུ་ཕེབས་པ་ལ་གནོད། དེ་དག་ཀུན་གྱི་རྩ་བ་མྱོས་འགྱུར་གྱིས་བྱེད་པས་རྩ་བཞི་ཆང་དང་ལྔ་པོ་སྐྱབས་འགྲོའི་ཁོངས་སུ་འགྲོ་བར་མ་ཟད་རབ་བྱུང་གི་བཏུང་བ་གཞན་དག་ནས་ཀྱང་རགས་རིམ་ཙམ་ཚང་བས་དེ་ལྟར་ན་སྐྱབས་འགྲོ་ནི་རྒྱ་ཤིན་ཏུ་ཆེ་བས་སྣ་གཅིག་སྤྱོད་པའི་དགེ་བསྙེན་དེ་དོན་དུ་ཡོངས་རྫོགས་དགེ་བསྙེན་དང་ཁྱད་པར་མེད་པ་འདྲ་ཞིག་བྱུང་བར་དོགས་མོད་འོན་ཀྱང་ཆོས་མངོན་པར་བག་ཡོད་པ་གང་ཞེ་ན། མ་ཆགས་པ་དང་། ཞེ་སྡང་མེད་པ། གཏི་མུག་མེད་པ་དང་། བརྩོན་འགྲུས་དང་བཅས་པ་ལ་གནས་ནས་དགེ་བའི་ཆོས་རྣམས་བསྒོམ་ཞིང་། ཟག་པ་དང་བཅས་པའི་ཆོས་རྣམས་ལ་སེམས་བསྲུང་བ་སྟེ་ཞེས་པའི་དོན་ལྟར་ན་སོ་སྐྱེའི་རྒྱུད་ཀྱི་སོ་ཐར་རིགས་བརྒྱད་ཀྱི་སྤང་བྱ་ལས་རྒྱ་ཆེ་བ་ཞིག་བྱུང་ཡང་གོང་འོག་གཉིས་ཀར་མཁས་པ་རྣམས་ཀྱི་དོགས་སེལ་རྣམ་དཔྱོད་ཀྱི་མགྲིན་པ་(༢༣༢ན)
འདེགས་དགོས་སོ། །ལེན་པའི་ཆོ་ག་ལ་ཡང་བྱེ་བྲག་སྨྲ་བས་སྐྱབས་འགྲོའི་རྗེས་སུ་། བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་བཟུང་དུ་གསོལ། ཞེས་བརྗོད་པས་དགེ་བསྙེན་གྱི་སྡོམ་པ་ཐོབ་པ་ཡིན། བསླབ་པ་བརྗོད་པ་ཁས་བླངས་པའི་ཚུལ་གྱིས་བྱ་བ་ནི། བསླབ་བྱ་ཤེས་པའི་ཕྱིར་བརྗོད་པ་ཡིན་ཏེ། གསོལ་བཞིའི་ལས་ཀྱིས་དགེ་སློང་དུ་གྱུར་ནས། མཇུག་ཏུ་གདམས་ངག་བརྗོད་པ་དང་འདྲ་ཞེས་འཆད། སྐྱབས་འགྲོའི་སྡོམ་པ་ལེན་པ་ནི་ཤིན་ཏུ་ཕན་ཡོན་ཆེ་སྟེ། མདོ་སྡེ་རྒྱལ་མཚན་དམ་པ་ལས། འཇིགས་པས་སྐྲག་པའི་མི་རྣམས་ནི། །ཕལ་ཆེན་རི་དང་ནགས་ཚལ་དང་། །ལྗོན་ཤིང་དག་ལ་སྐྱབས་འགྲོ་སྟེ། །སྐྱབས་དེ་གཙོ་བོ་མ་ཡིན་ཏེ། །སྐྱབས་དེ་དག་ལ་བརྟེན་ནས་ནི། །འཇིགས་པ་ཀུན་ལས་ཐར་མི་འགྱུར། །གང་ཞིག་སངས་རྒྱས་ཆོས་དང་ནི། །དགེ་འདུན་དག་ལ་སྐྱབས་འགྲོ་བ། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འགགས་པ་དང་། །བདེ་གཞི་མྱ་ངན་འདས་བྱས་ནས། །སྡུག་བསྔལ་ཀུན་ལས་གྲོལ་བར་འགྱུར། །ཞེས་འཇིག་རྟེན་གྱི་ལྷ་དང་རི་ར་བ་ཁང་ཁྱིམ་ལྗོན་ཤིང་སོགས་ཀྱིས་གནས་སྐབས་ཀྱི་སྐྱབས་ཡོང་ཡང་གཏན་གྱི་སྐྱབས་གནས་སུ་མི་འོས་པས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་སྒྲོལ་བའི་སྐྱབས་ནི་དཀོན་ཅོག་གསུམ་སྟེ། དེ་ལ་ཡང་ངོས་འཛིན་མི་འདྲ་བ་བྱེ་བྲག་ཏུ་སྨྲ་བས། སངས་རྒྱས་དང་དགེ་འདུན་དུ་བྱེད་པའི་ཆོས་ལམ་བདེན་ཡིན་གྱི་གཟུགས་སྐུ་མིན་ཟེར་ཡང་། མདོ་སྡེ་པའི་ལུགས་ཀྱིས། སངས་རྒྱས་སུ་བྱེད་པའི་ཆོས། སངས་རྒྱས་མི་(༢༣༢བ)
སློབ་པའི་ལམ་བདེན་ཆོས་སྐུ་དང་གཟུགས་སྐུ་གཉིས་ཀྱི་བདག་ཉིད་དང་། དགེ་འདུན་དུ་བྱེད་པའི་ཆོས་སློབ་མི་སློབ་ཀྱི་ལམ་བདེན་གཟུགས་སྐུ་དང་བཅས་པ་དང་ཆོས་མྱ་ངན་ལས་འདས་པ་སོ་སོར་བརྟགས་འགོག་རྣམས་ཡིན་ཞིང་། སྐྱབས་སུ་འགྲོ་བའི་རྒྱུ་མཚན་སངས་རྒྱས་ནི་རང་ཉིད་སྒྲིབ་གཉིས་བག་ཆགས་དང་བཅས་པ་སྤངས་པས་ཤིན་ཏུ་དུལ་བའི་བདག་ཉིད་དང་། རྣམ་པ་ཐམས་ཅད་དུ་གདུལ་བྱ་འདུལ་བའི་ཐབས་ལ་མཁས་པ་དང་། གདུལ་བྱ་འཇིགས་པ་དང་སྡུག་བསྔལ་ལས་སྐྱོབ་པའི་ཐུགས་རྗེ་ཆེ་བ་དང་། ཟང་ཟིང་གི་མཆོད་པ་ཐམས་ཅད་ཀྱིས་མཉེས་པར་བྱ་བ་མ་ཡིན་གྱི། སྒྲུབ་པའི་མཆོད་པས་མཉེས་པར་བྱ་བ་ཡིན་པ་སྟེ་རྒྱུ་བཞིས་སངས་རྒྱས་སྐྱབས་སུ་འོས་ལ། དེ་ལྟ་བུས་བསྟན་པའི་ཆོས་གང་ཡིན་པ་དང་། དེའི་ཉན་ཐོས་ཀྱི་དགེ་འདུན་གང་ཡིན་པ་དེ་ཡང་དེ་ལྟ་བུ་ཁོ་ནས་སྐྱབས་སུ་འོས་པ་ཡིན། དེ་ལྟ་བུའི་ཡོན་ཏན་ཤེས་ནས་ཇི་ལྟར་འགྲོ་ན་སངས་རྒྱས་ཀྱི་ཡོན་ཏན་ལ་བརྟེན་ནས་དང་བའི་དད་པ་དང་། དེའི་རྒྱུར་ལས་འབྲས་ལ་ཡིད་ཆེས་པའི་དད་པ་སྔོན་དུ་བཏང་ནས་ཕྱི་རོལ་པའི་སྟོན་པ་དང་། དེས་བསྟན་པའི་ཆོས་དང་དེ་སྒྲུབ་པའི་གང་ཟག་ལ་གཏན་གྱི་སྐྱབས་སུ་འོས་པའི་ཡོན་ཏན་མེད་པས་ཁྱད་པར་ཤེས་དགོས་པས་དེ་དག་གི་བྱེ་བྲག་ལ་ཡང་སངས་རྒྱས་ནི་རང་མངོན་པར་བྱང་ཆུབ་པའི་མཚན་ཉིད། ཆོས་དཀོན་ཅོག་ནི་མངོན་པར་རྫོགས་པར་བྱང་ཆུབ་པའི་འབྲས་བུའི་མཚན་ཉིད། དགེ་འདུན་དཀོན་ཅོག་ནི་གཞན་གྱི་མན་ངག་གིས་ཡང་དག་པར་བསྒྲུབ་པའི་མཚན་ཉིད་དོ། །སངས་རྒྱས་ནི་ལུང་ལེགས་པར་འབོགས་པའི་(༢༣༣ན)
འཕྲིན་ལས། ཆོས་ནི་ཉོན་མོངས་པ་དང་སྡུག་བསྔལ་སྤོང་བའི་དམིགས་པའི་འཕྲིན་ལས། དགེ་འདུན་ནི་སྤྲོ་བ་མངོན་པར་འཕེལ་བར་བྱེད་པའི་འཕྲིན་ལས་ཅན། སངས་རྒྱས་ནི་བསྙེན་བཀུར་ལ་གུས་པ། ཆོས་ནི་མངོན་དུ་བྱ་བ་ལ་གུས་པ། དགེ་འདུན་ནི་ཆོས་མཐུན་པ་པོའི་དངོས་པོས་ལྷན་ཅིག་འགྲོགས་ལ་གུས་པས་ཞེན་པར་བྱ། སངས་རྒྱས་ལ་ནི་མཆོད་པ་དང་། རིམ་གྲོ་ཉེ་བར་སྒྲུབ་པའི་སྒྲུབ་པ། ཆོས་ལ་ནི་རྣལ་འབྱོར་གྱི་སྦྱོར་བ་གོམས་པར་བྱ་བའི་སྒྲུབ་པ། དགེ་འདུན་ལ་ཆོས་དང་ཟང་ཟིང་གི་ལོངས་སྤྱོད་ཐུན་མོང་གི་སྒྲུབ་པ། སངས་རྒྱས་ལ་འདི་ལྟར་སངས་རྒྱས་བཅོམ་ལྡན་འདས་དེ་ནི་སོགས། ཆོས་ལ་ཐོག་མར་དགེ་བ་སོགས། དགེ་འདུན་ལ་ལེགས་པར་ཞུགས་པ་སོགས་སོ་སོར་དྲན་པའོ། །སངས་རྒྱས་ལ་ནི་སེམས་ཅན་གཅིག་གི་དབང་དུ་བྱས་པའི་བསོད་ནམས་མཆོག་འཕེལ་བར་འགྱུར་ཏེ། རྐང་གཉིས་ཐམས་ཅད་ཀྱི་ནང་ནས་མཆོག་གཅིག་པུ་ཡིན་ཆོས་ལ་ནི་ཆོས་ཀྱི་དབང་དུ་བྱས་པའི་བསོད་ནམས་མཆོག་འཕེལ་བ། དགེ་འདུན་ལ་ནི་སེམས་ཅན་མང་པོའི་དབང་དུ་བྱས་པའི་བསོད་ནམས་མཆོག་འཕེལ་བར་འགྱུར་བ་དེས་བསམ་པ་ཕུན་སུམ་ཚོགས་པར་བྱས་ནས་ཁས་ལེན་ཚུལ་ནི། རྒྱལ་པོ་དང་ཤ་ཟ་ཆོམ་རྐུན་གྱི་འཇིགས་པ་ལས་སྐྱབས་འཚོལ་བ་ནི་འཇིགས་སྐྱོབས་ཀྱི་ཚུལ་ཁྲིམས། ཕྱི་མ་བདེ་འགྲོ་ཐོབ་པའི་ཕྱིར་དུ་སྐྱབས་འཚོལ་བ་ལེགས་སྨོན་གྱི་སྐྱབས་འགྲོ་ཡིན་པས་དེ་སྙིང་ཐག་པ་ནས་སྐྱབས་སུ་འགྲོ་བའི་ངེས་པ་མེད། རང་ཉིད་གཅིག་པུ་ཞི་བ་དོན་དུ་གཉེར་བའི་སྐྱབས་འགྲོ་སྐྱེས་བུ་འབྲིང་གི་སྐྱབས་འགྲོ། སེམས་ཅན་(༢༣༣བ)
ཐམས་ཅད་ཀྱི་ཆེད་དུ་སངས་རྒྱས་དོན་དུ་གཉེར་ནས་སྐྱབས་སུ་འགྲོ་བ་སྐྱེས་བུ་ཆེན་པོའི་སྐྱབས་འགྲོ་ཡིན་པས་ཕྱི་མ་གཉིས་གཙོ་ཆེ་བའི་དབང་དུ་བྱས་ཏེ་སྡུག་བསྔལ་གསུམ་གྱིས་མནར་བའི་སེམས་ཅན་དེ་རྣམས་སྡུག་བསྔལ་དེ་ལས་སྐྱོབ་པའི་ཕྱིར་སངས་རྒྱས་ལ་དེའི་ཐབས་སྟོན་པའི་སྟོན་པ་ཞུ། ཆོས་མི་གནས་པའི་མྱང་འདས་དེ་མངོན་དུ་བྱས་ལ་སྐྱབས་དངོས་ཞུ། འཕགས་པའི་དགེ་འདུན་ལ་དེ་སྒྲུབ་པའི་གྲོགས་ཞུ། དེ་ཕྱིན་ཆད་ཕྱི་རོལ་པའི་ལྷ་ཁྱབ་འཇུག །དབང་ཕྱུག་སོགས་སྟོན་པར་འཛིན་པ་དང་། དེའི་ཆོས་སྒྲུབ་པ་དང་། དེ་སྒྲུབ་པའི་གང་ཟག་རྣམས་གྲོགས་སུ་འཛིན་པ་སྤངས་ལ་སྐྱབས་སུ་འགྲོ་སྙམ་པ་གྱིས་ལ། འདིའི་རྗེས་ཟློས་བགྱི། ཆོ་ག་དངོས་གཞི་གོང་དང་འདྲ་བ་ལ། བདག་ཇི་སྲིད་འཚོའི་བར་དུ་སྐྱབས་གསུམ་འཛིན་པར་བཟུང་དུ་གསོལ་ཞེས་འདོན་པ་བསྒྱུར། བསླབ་བྱ་ལ་གཉིས་སུ་ཡོད་པའི་སོ་སོའི་བསླབ་བྱ་ནི། སྐྱབས་འགྲོ་བདུན་ཅུ་པ་ལས། གང་ཞིག་གསུམ་ལ་སྐྱབས་འགྲོ་བའི། །དགེ་བསྙེན་ཉིད་དུ་དམ་བཅས་པས། སྐྱབས་ནི་གསུམ་པོ་བསྲུང་བར་བྱ། །མུ་སྟེགས་ཀུན་ལ་གུས་པ་ཡིས། །མཆོད་དང་ཕྱག་འཚལ་མི་བྱའོ། །ཞེས་དང་། མདོ་རྩར། ལྷ་གཞན་ལ་ཕྱག་མི་བྱའོ། །མཆོད་པ་མི་བྱའོ། །བཀུར་སྟི་མི་བྱའོ། །གནས་སུ་ཕྱིན་ན་མངོན་སུམ་དུ་འགྲེང་སྟེ་སེ་གོལ་གྱི་སྒྲས་གོ་བར་བྱས་ནས་གཙུག་ལག་གི་ཚིགས་སུ་བཅད་པ་གདོན་པས་དེ་ལ་ཕན་གདགས་པར་བྱའོ། །ཞེས་གསུངས་པ་ལྟར་ཕྱི་རོལ་པའི་ལྷ་དང་འཇིག་རྟེན་པའི་ལྷ་ལ་ཕྱག་མཆོད་མི་བྱ་ཞིང་། ལྷ་རྟེན་གྱི་རྩར་ཕྱིན་ན་སེ་གོལ་གྱི་སྒྲ་སྔོན་དུ་འགྲོ་བས། ཆོས་རྣམས་ཐམས་ཅད་རྒྱུ་(༢༣༤ན)
ལས་བྱུང་། ཞེས་པ་ལྟ་བུ་ཞལ་ནས་གསུངས་པའི་ཚིགས་བཅད་འདོན་ཞིང་ཕན་གདགས། སྐུ་གཟུགས་དང་མཆོད་རྟེན་དངོས་བསྟན་ལྟ་ཅི། བྱིས་པས་རྩེད་མོའི་ཕྱིར་གཟུགས་བརྙན་གྱི་རྣམ་པ་བྱས་པ་ལ་ཡང་སངས་རྒྱས་རྗེས་སུ་དྲན་ནས་གུས་པར་བྱ་ཞིང་། འགོམ་ཡུགས་སོགས་མི་གུས་པའི་རྣམ་འགྱུར་སྤང་། དགེ་བ་གང་བྱས་སངས་རྒྱས་དང་མི་འབྲལ་བར་བསྔོ། ཆོས་ཀྱི་བསླབ་བྱ་ལ་སེམས་ཅན་ལ་གནོད་འཚེ་སྤོངས་། ཐེག་པ་ཆེ་ཆུང་སོགས་རིས་སུ་བཅད་དེ་ཆོས་ལ་བརྟེན་པའི་སྒྲིབ་པ་མི་གསོག །སངས་རྒྱས་ཀྱི་གསུང་ཁྱད་དུ་སོད་པ་དང་། གླེགས་བམ་མེར་བསྲེག་པ་སོགས་ཆོས་ལ་མི་གུས་པའི་རྣམ་འགྱུར་སྤངས། ཆོས་ཉན་བཤད་བྱེད་པའི་གང་ཟག་ལ་གུས་པ་དང་ཕན་གདགས་པ་ལས་མི་གུས་པ་དང་གནོད་པ་མི་བྱ་ཞིང་ཆོས་བཤད་པའི་དགེ་བ་མྱང་འདས་སུ་བསྔོ། དགེ་འདུན་གྱི་བསླབ་བྱ་ལ་གྲོགས་མུ་སྟེགས་ཅན་དང་མི་འགྲོགས། དགེ་འདུན་བཞིར་ལོངས་པའམ་རྒྱུན་བཞུགས་སོགས་དགེ་འདུན་གཅིག་ལའང་གུས་པ་ལྷུར་ལེན་པ་ལས་བརྙས་པ་སྤང་ཞིང་། མཐའ་ན་ལྷན་པ་སེར་པོ་གཅིག་ཙམ་ལའང་སངས་རྒྱས་ཀྱི་ན་བཟར་མོས་ནས་འགོམ་ཡུགས་མི་བྱ། དེར་མ་ཟད་ཚུལ་ཁྲིམས་འཆལ་པའི་དགེ་སློང་ལ་ཡང་མི་བརྙས་པར་གུས་པར་བྱ་སྟེ། སྔོན་གླང་པོ་ཆེའི་རྒྱལ་པོས། རྔོོན་པ་ངུར་སྨྲིག་གི་གོས་གྱོན་པ་ལ། །ཆོས་གོས་ཚོན་ཆེན་གྱོན་པ་འདི་དག་ནི། །འཁོར་བའི་རྒྱ་མཚོ་ལས་ནི་སྒྲོལ་མཛད་པའོ། །ཞེས་གུས་པ་བསྐྱེད་པའི་ཚུལ་སོགས་ལ་བརྟེན་ནས་དགེ་འདུན་རྗེས་སུ་དྲན་པར་བྱ། ཐུན་མོང་བའི་བསླབ་བྱ་ལ། སྡུད་པ་ལས། །སློབ་(༢༣༤ན)
མ་གུས་ལྡན་བླ་མ་བཟང་པོ་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བ་དེ་སྐད་གསུང་། ཞེས་སྐྱེས་བུ་དམ་པ་ཡུན་དུ་བསྟེན་པ་ལ་བརྟེན་ནས་དེ་ལས་བྱུང་བའི་ཡོན་ཏན་ཐམས་ཅད་དམ་ཆ་ཤས་ནས་རང་ལ་འགོས་པར་འགྱུར། ཐེག་པ་ཆེ་ཆུང་གི་ཆོས་རྣམས་ཉན་པས་ཐོས་པའི་ཤེས་རབ་ཀྱིས་སྤང་གཉེན་གྱི་བླང་དོར་ལེགས་པར་ཤེས་པར་འགྱུར། ཐོས་པ་དེ་ཚུལ་བཞིན་ཡིད་ལ་བྱས་པ་ལ་བརྟེན་ནས་བསམ་བྱུང་གི་ཤེས་རབ་དང་། དེའི་དོན་ཡང་ནས་ཡང་དུ་གོམས་པར་བྱས་པ་ལ་བརྟེན་ནས་སྒོམ་བྱུང་གི་ཤེས་རབ་འཕེལ། ཆོས་མྱ་ངན་ལས་འདས་པའི་རྗེས་སུ་མཐུན་པ་སྟེ་ཕན་པའི་ཆོས་དེ་ལམ་དེ་སྒྲུབ་པ་བདེན་བཞི་བསྒོམ་པ་ཡིན། དྲན་ཤེས་བཞིན་གྱི་དབང་པོའི་སྒོ་བསྡམས་ནས་བྱ་བ་མ་ཡིན་པ་ལས་ལྡོག་ནས་དགེ་བ་ལ་སྦྱོར་ཞིང་། མ་ནུས་ནའང་མི་དགེ་བའི་ཕྱོགས་སུ་མ་ལྷུངས་པ་བྱེད། སྡོམ་པ་གསུམ་པོ་རྒྱུད་ཚོད་དང་བསྟུན་ནས་ལེན་པའམ་མ་ནུས་ནའང་ཉིན་ལན་གསུམ་མཚན་ལན་གསུམ་དུ་བསླབ། སངས་རྒྱས་བྱང་སེམས་ཐམས་ཅད་སེམས་ཅན་ལ་བུ་གཅིག་པ་ལྟར་བརྩེ་བས་སྲས་བཅས་རྒྱལ་བ་མཉེས་པའི་ཕྱིར་དུ་སེམས་ཅན་ལ་གནོད་འཚེ་སྤོང་། ཉིན་མཚན་དུས་དྲུག་གམ་མ་འགྲུབ་ན་ཉིན་མཚན་རེ་རེར་འབྱོར་ན་མཆོད་པ་རྒྱས་པ་དང་། མ་འགྲུབ་ན་ཆུ་གཙང་ཙམ་གྱི་མཐའ་བརྟེན་ཏེ་དངོས་བཤམས་ཡིད་སྤྲུལ་གྱིས་མཆོད། ལེགས་ཉེས་ཅི་བྱུང་ཡང་སྐྱབས་གཞན་མི་འཚོལ་(༢༣༥ན)
བར་དཀོན་ཅོག་ལ་གསོལ་བ་གདབ་ཅིང་། སྲོག་ལ་བབས་ཀྱང་སྐྱབས་མི་སྤང་བ་སོགས་སྒྲུབ་པའི་མཆོད་པས་མཆོད་། གལ་ཏེ་བསླབ་བྱའི་གཙོ་བོ་ཉམས་པ། ལོག་ལྟ་སྐྱེས་པ། ཐར་པ་མི་འདོད་པ། གང་ཟག་གཞན་ལ་དཀོན་ཅོག་གསུམ་འབུལ་བའི་བརྡ་སྤྲད་པ། ལྷ་གཞན་ལ་བརྟེན་པར་བཟུང་དུ་གསོལ། མུ་སྟེགས་ཅན་དུ་བཟུང་དུ་གསོལ། ཞེས་བསམ་པ་ཐག་པས་བརྗོད་པ། ཤི་འཕོས་པ་རྣམས་ཀྱིས་སྡོམ་པ་གཏོང་ལ། ཚེ་འཕོས་པ་ལ་མ་གཏོགས་པའི་རྒྱུ་གཞན་གྱིས་བཏང་བ་སླར་བསྐྱར་དུ་རུང་ངོ་། །ཕན་ཡོན་ནི་ཕག་མོའི་རྟོགས་བརྗོད་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ངན་འགྲོར་མི་འགྲོ་སྟེ། །ལྷ་ཡི་ལུས་ནི་སྤངས་ནས་ཀྱང་། །མི་ཡི་ལུས་སུ་སྐྱེ་བར་འགྱུར། །ཆོས་དང་དགེ་འདུན་ལའང་སྦྱར་བས་ཚེ་འདི་དང་ཕྱི་མར་མི་དང་མི་མ་ཡིན་པའི་འཚེ་བ་ལས་བསྲུང་། ངན་འགྲོའི་འཇིགས་པ་ལས་ཐར། ལས་ཉོན་ལས་དགྲོལ་བས་འཁོར་བའི་སྡུག་བསྔལ་གྱིས་གོས་པར་མི་འགྱུར། ཤེས་བྱའི་སྒྲིབ་པ་ལས་གྲོལ་བས་ཞི་བདེའི་ལམ་དུ་མི་གོལ་བར་མི་གནས་པའི་མྱ་ངན་ལས་འདས་པ་ཐོབ་པ་སོགས་ཉེས་པ་ཐམས་ཅད་ལས་བསྲུང་བ་ཆེན་པོར་འགྱུར། སྐྱབས་སུ་མ་སོང་བར་ཐེག་པ་གསུམ་གྱི་ཆོས་ལ་ཐོས་བསམ་སྒོམ་གསུམ་བྱས་ཀྱང་རྐུ་ཐབས་སུ་གནས་པས་འགྲུབ་པར་མི་འགྱུར། མདོར་ན་ལེགས་ཚོགས་ཐམས་ཅད་ཀྱི་གཞི་ཡིན་པས་མདོ་སྡེ་རྒྱན་ལས། འཇིག་རྟེན་ཇི་སྲིད་སེམས་ཅན་གྱི། །གནོད་དང་ཕུན་སུམ་ཚོགས་པ་ཀུན། །བཟློག་ཅིང་འབྱོར་པར་བྱ་བའི་ཕྱིར། །སངས་རྒྱས་སྐྱབས་ཆེན་ཉིད་དུ་འདོད།(༢༣༥བ)
ཅེས་སོགས་ཕན་ཡོན་ཤིན་ཏུ་ཆེ་བར་གསུངས་པས་དགའ་བ་བསྒོམས་ལ་ཐལ་མོ་སྙིང་གར་སྦྱོར་ལ་བཀའ་དྲིན་ཆེ་ལགས་ཞེས་བརྗོད་དུ་འཇུག་གོ །
ཉིན་ཞག་གཅིག་ཏུ་བསྲུང་བའི་བསྙེན་གནས་ཡན་ལག་བརྒྱད་པའི་སྡོམ་པ་སོགས་བཤད་པ།
གཉིས་པ་ཉིན་ཞག་གཅིག་ཏུ་བསྲུང་བ་ཡན་ལག་བརྒྱད་པའི་སྡོམ་པ་ལ། དོན་རྣམ་པར་བཤད་པ་དང་ཆོ་ག་དངོས་གཉིས་ཀྱི་དང་པོ་ནི། པཎ་ཆེན་ངག་དབང་ཆོས་གྲགས་ཀྱི་སྡོམ་གསུམ་འགྲེལ་པ་ལེགས་པར་བཤད་པ་ཟླ་འོད་ནོར་བུ་ལས། །སོ་ཐར་ལེན་པའི་ཚུལ་ལ་ལུགས་གཉིས་བཤད། །ཉན་ཐོས་ལུགས་ལ་རིགས་བདུན་ཇི་སྲིད་འཚོ། །འབྲི་གུང་པ་དག་ཉན་ཐོས་ལུགས་ལ་ཡང་། །བྱང་ཆུབ་བར་དུ་ལེན་ཞེས་རྣམ་དབྱེ་འཆོལ། །སྡོམ་པའི་ངོ་བོ་ཁྱད་མེད་འགྱུར་སོགས་དང་། །བསླབ་ཕུལ་སོགས་ཀྱང་སྡོམ་པ་གཏོང་བའི་རྒྱུ། །མིན་པར་ཐལ་བའི་གནོད་བྱེད་རིག་པའི་ཐོག །བྱུང་ཚེ་སེམས་བསྐྱེད་ཀྱིས་ནི་ཟིན་པ་དང་། །མ་ཟིན་རྣམ་དབྱེ་ཕྱེ་ནས་ལེན་སྨྲ་མོད། །འོ་ན་སེམས་བསྐྱེད་ཀྱིས་ཟིན་རྩོད་གཞི་རུ། །བཟུང་བས་གནོད་བྱེད་སྔར་བཞིན་ཅིས་མི་མཚུངས་། །ཤི་འཕོས་ལྷ་དང་བྱིས་པའི་དུས་ཉིད་ནས། །དགེ་སློང་འགྱུར་ན་འདུལ་བའི་གཞུང་ལས་བཀག །བསྙེན་གནས་གཙོ་ཆེར་ཉིན་ཞག་གཅིག་པའི་མཐའ། །ཉན་ཐོས་སྡེ་གཉིས་བླང་ཡུལ་ལེན་པའི་རྟེན། །ཐ་དད་ཆེ་བ་རྣམ་དཔྱོད་ལྡན་པའི་གཏམ། །ཐེག་ཆེན་དོན་ཞགས་རྟོག་པ་ནས་གསུངས་ཡིན། །བསྙེན་གནས་ནང་པར་འབུལ་དང་འཆོལ་ཞེས་པ། །ཆོས་པ་རྒྱུས་མེད་མུན་སྒོམ་ཙམ་དུ་ཟད། །བསྙེན་གནས་བསྲུང་ཚེ་ལྷ་སྒོམ་འདོད་པ་ཡང་། །བསྙེན་གནས་ཉན་ཐོས་གཞུང་ལུགས་གཙོ་ཆེ་དང་། །ལྷ་སྒོམ་གསང་སྔགས་ཁྱད་ཆོས་མ་ཤེས་གཏམ། །(༢༣༦ན)
འོན་ཀྱང་སྔགས་ནས་གསུངས་པའི་བསྙེན་གནས་སྡོམ། །བསྲུང་ན་བྱ་རྒྱུད་ལུགས་བཞིན་མདུན་བསྐྱེད་ཀྱིས། །ཡི་དམ་སྒོམ་པ་ཕན་ཡོན་ཆེ་བར་ཐོབ། །ཐེག་ཆེན་ལུགས་ལ་ཐུན་མོང་མིན་པ་ཡི། །ཆོ་ག་མང་བྱུང་དིང་སང་དགོས་ནུས་ཆུང་། །དེས་ན་བསམ་པ་ཐེག་ཆེན་ཉེར་བཟུང་ནས། །ཆོ་ག་ཉན་ཐོས་ལུགས་བྱེད་གནད་ཀྱི་དོན། །ཅེས་སྡོམ་ཚིག་གསལ་བར་མཛད་པ་བཞིན། ཉན་ཐོས་ཀྱི་ལུགས་ལ་སོ་སོ་ཐར་པ་རིགས་བདུན་པོ་དེ་ཇི་སྲིད་འཚོའི་བར་དུ་ལེན་པ་དང་། བསྙེན་གནས་དེ་སང་ཉི་མ་མ་ཤར་གྱི་བར་དུ་ལེན་ཞིང་ཡུལ་ཀྱང་མཛོད་འགྲེལ་ལས། སོ་སོ་ཐར་པའི་སྡོམ་པ་དེ་ཡང་དགེ་འདུན་ནམ་གང་ཟག་ལས་ཏེ། དགེ་སློང་དང་། དགེ་སློང་མ་དང་། དགེ་སློབ་མའི་སྡོམ་པ་རྣམས་ནི་དགེ་འདུན་ལས་སོ། །གཞན་དག་ནི་གང་ཟག་ལས་སོ། །ཞེས་གསུངས་པའི་དགེ་འདུན་ནི་བཞིར་ལོངས་པ་དང་གང་ཟག་ནི་དགེ་སློང་ཕ་མ་གང་རུང་ལ་བྱེད་དགོས་པས་ཐམས་ཅད་མཁྱེན་པ་བུ་སྟོན་རིན་པོ་ཆེའི་ལས་ཆོག་ཏུ། འདུལ་བའི་བསྙེན་གནས་དགེ་སློང་ལས་ལེན་པའི་ངེས་པ་མི་སྣང་སྟེ། ལུང་ལས་ཁྱིམ་བདག་མགོན་མེད་ཟས་སྦྱིན་གྱིས་གཞན་ལ་བསྙེན་གནས་འབོགས་པར་བཤད་པའི་ཕྱིར། ཞེས་གསུངས།ཡང་མཛོད་འགྲེལ་ལས། གཞན་ལས་མནོས་པ་ནི་ལེགས་པར་སྤྱད་པ་ཙམ་དུ་འགྱུར་གྱིས། བསྙེན་གནས་ཀྱི་སྡོམ་པ་ནི་བར་མ་ཡིན་ནོ་ཞེས་དང་། སྟག་ཚང་ལོ་ཙཱ་བས་ཀྱང་འདི་དང་མཐུན་པར་གསུངས་ཤིང་། ལུང་གོང་མའི་དོན། གཞན་དག་ཅེས་པའི་དོན། གང་ལ་ངོས་འཛིན་ན་དགེ་ཚུལ་ཕ་མ། དགེ་བསྙེན་(༢༣༦བ)
ཕ་མ། བསྙེན་གནས་སྡོམ་པ་ལྔ་པོ་དེ་ལས་དར་ཆོག་ལ་གཞན་ངོས་འཛིན་རྒྱུ་མེད་དོ། །དེ་ཡང་ལེགས་སྤྱད་ཙམ་ལ་ངེས་པ་མེད་པ། མཛོད་འགྲེལ་ལས། དེ་ལྟར་བྱས་ན་བཤན་པ་དང་། །བྱི་བྱེད་པ་དག་གིས་ཉིན་མོ་དང་མཚན་མོའི་བསྙེན་གནས་ཀྱང་འབྲས་བུ་ཡོད་པར་རུང་ངོ་། །ཞེས་གསུངས་ཤིང་། ལེགས་སྨོན་ཙམ་ལ་སངས་རྒྱས་པའི་ཆོ་ག་ཁོ་ན་ལ་བརྟེན་པའི་ངེས་པ་མེད་པ་ཀླུ་སྒྲུབ་རྗེའི་གསལ་བའི་སྒྲོན་མེ་ལས། བསྙེན་གནས་ཀྱི་སྡོམ་པ་ཙམ་ཞིག་ཕྱི་རོལ་པ་རྣམས་ལ་ཡང་ཡོད་པ། སངས་རྒྱས་འཇིག་རྟེན་དུ་མ་བྱོན་གོང་དུ་ཡང་ཡོད་པས། ངེས་འབྱུང་གི་བསམ་པ་མེད་ཀྱང་། ལེགས་སྨོན་ཙམ་གྱི་བསྙེན་གནས་ཀྱི་སྡོམ་པ་སྐྱེ་བའི་གནད་ཀྱིས། གསོ་སྦྱོང་འདོད་སྤྱོད་ལྷ་ལུས་ཡིད་འོང་བ། །སྐྱེས་པ་བུད་མེད་དག་ལ་སྩལ་བར་བགྱི། ཞེས་གསུངས་པ་ཡིན། འདིའི་རིགས་བསྒྲེས་ནས། སྦྱིན་སྡོམ་ཕྱི་མ་བདུན་ལའང་། འཇིགས་སྐྱོབས་ཙམ་དང་ལེགས་སྨོན་ཙམ་དང་། ངེས་འབྱུང་གི་སྡོམ་པ་གསུམ་དུ་འབྱེད་པ་ནི་མི་རིགས་ཏེ། དེ་དག་ངེས་འབྱུང་གི་བསམ་པས་ཀུན་ནས་སླངས་ཏེ། ཆོ་ག་ནང་པ་སངས་རྒྱས་པའི་ལུགས་ཁོ་ན་ལ་བརྟེན་ནས་སྐྱེ་དགོས་པའི་སྡོམ་པ་ཡིན་པའི་ཕྱིར་རོ། །དགེ་བསྙེན་གྱི་སྡོམ་པ་སོགས་ལེན་པ་སྐྱབས་འགྲོ་རྩོམ་བྱེད་དུ་བྱེད་པ་ཡང་གནད་དེ་ཁོ་ནས་ཡིན་ཏེ། རྒྱ་ཆེར་འགྲེལ་ལས། ངེས་འབྱུང་གི་བསམ་པ་བརྟན་པོ་མེད་པར་སུས་ཀྱང་སྐྱབས་སུ་འགྲོ་བ་བསྒྲུབ་པར་མི་བྱེད་ཅེས་བཤད་པས་སོ། །འོན་ཀྱང་གསུང་རིགས་འགའ་ཞིག་ལས། སྡོམ་པ་དེ་བརྒྱད་ལ་འཇིགས་སྐྱོབས་ལེགས་སྨོན། ངེས་འབྱུང་གསུམ་དུ་ཕྱེ་བ་ལྟ་བུར་སྣང་བ་(༢༣༧ན)
ནི། རིང་བའི་རྒྱུ་དུས་ཀྱི་ཀུན་སློང་ཙམ་ལ་དགོངས་པ་སྟེ། ཉེ་བའི་རྒྱུ་དུས་ཀྱི་ཀུན་སློང་ངེས་འབྱུང་གི་བསམ་པས་མ་ཟིན་ན་སྡོམ་པ་དེ་དག་མི་འཆགས་པའི་ཕྱིར་རོ། །དེས་ན་བརྙེན་གནས་ཀྱི་སྡོམ་པ་མ་གཏོགས་རིགས་ཕྱི་མ་བདུན་ལ་སོ་ཐར་གྱི་སྡོམ་པའམ་ངེས་འབྱུང་གི་སྡོམ་པ་ཡིན་པས་ཁྱབ་ཅེས་བྱའོ། །སྡོམ་པ་སྐྱེ་བའི་རྟེན་ཡང་མཛོད་ལས། ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ་། །སྡོམ་མིན་སྡོམ་པའང་དེ་བཞིན་ལ། ཞེས་ཟ་མ་མ་ནིང་། སྒྲ་མི་སྙན་པ་མ་གཏོགས་པའི་གླིང་གསུམ་གྱི་སྐྱེས་པ་བུད་མེད་ལ་སྐྱེ་བ་ཉན་ཐོས་བྱེ་སྨྲ་བའི་ལུགས་ཡིན་པ་འདུལ་མངོན་གཞིར་བཞག་ན་འདི་གཙོ་ཆེ། མདོ་སྡེ་པ་རྣམས་དུད་འགྲོ་སོགས། །འགྲོ་བ་གཞན་ལའང་སྐྱེ་བར་བཤད། བླང་བའི་ཡུལ་ཡང་དགེ་བསྙེན་སོགས། གང་ཡང་རུང་ལས་བླང་བར་གསུངས། ཀླུ་གཞོན་ནུ་ཙམ་པ་ཞེས་བྱ་བས་དུས་བཟང་ལ་ཡན་ལག་བརྒྱད་པའི་བསྙེན་གནས་བསྲུངས་པ་དང་། རྒྱ་མཚོ་ཆེན་པོའི་ཀླུ་ཆེན་པོ་རྣམས་དུས་བཟང་ལ་རྒྱ་མཚོ་ནས་བྱུང་སྟེ། གསོ་སྦྱོང་ལེན་པ་ལ་སོགས་གསུངས་པས་བསྙེན་གནས་གྱི་སྡོམ་པ་དུད་འགྲོ་དང་ཡི་དྭགས་ཀྱི་འགྲོ་བ་ལ་སོགས་དང་། ཟ་མ་དང་མ་ནིང་ལ་ཡང་སྐྱེ་བར་འདོད་ཅིང་། དྲང་སྲོང་གནས་མཆོག་གིས་ཞུས་པར། ཁྱིམ་པ་དང་རབ་ཏུ་བྱུང་བ་གང་ཡང་རུང་བ་ཆོག་ཤེས་པ་ཞིག་ལ་ལེན་པར་གསུངས་ཏེ། ལུང་ལས། ཁྱིམ་བདག་མགོན་མེད་ཟས་སྦྱིན་གྱིས་མང་པོ་ལ་བསྙེན་གནས་ཕོག་པར་གསུངས་པས་དགེ་སློང་ཁོ་ན་ལས་ལེན་པར་མ་ངེས་པར་བཤད་པ་ནི། མཛོད་འགྲེལ་ལས། དེ་ལ་གཞན་དུ་(༢༣༧བ)
ནོས་པས་ནི་ལེགས་པར་སྤྱད་པ་ཙམ་དུ་འགྱུར་གྱིས། བསྙེན་གནས་གྱི་སྡོམ་པ་ནི་མ་ཡིན་ནོ། །ཞེས་གསུངས་ཤིང་། དེ་བཞིན་དུ་གསལ་སྒྲོན་ལས་བྱེ་བྲག་སྨྲ་བ་རྣམས་བཅོམ་ལྡན་འདས་གྱི་སོ་ཐར་སྡོམ་པ་ཉིན་ཞག་གི་མཐའ་ཅན་དང་། ཇི་སྲིད་འཚོའི་མཐའ་ཅན་གཉིས་ལས་མ་བཤད་པས་ཉིན་ཞག་ལྔ་སོགས་ཀྱི་བསྙེན་གནས་སྡོམ་པ་མི་འཐད་ཅེས་བཞེད་དོ། །མཛོད་འགྲེལ་ལས། ཕྱིན་ཆད་སྡོམ་པ་སྐྱེ་བ་ལ་ཡང་རིགས་པ་དང་འགལ་བ་ནི་མེད་པའི་ཕྱིར་རོ། །ཕྱིན་ཆད་པོ་འདི་སུ་ལ་ཡང་མ་བསྟན་པས་བྱེ་བྲག་ཏུ་སྨྲ་བ་རྣམས་ནི་མི་བཞེད་དོ་ཞེས་བཤད་དོ། །དེས་ན་རང་ལུགས་ཉན་ཐོས་ཐུན་མོང་བའི་བསྙེན་གནས་སྡོམ་པ་ནི། བྱེ་སྨྲ་ལྟར་ཉིན་ཞག་གཅིག་གི་མཐའ་ཅན་དུ་ཁས་ལེན་པ་འདི་རིགས་པ་ཡིན་ནོ། །ཞེས་གསུང་པ་ནི་འཐད་པར་མངོན། མདོ་སྡེ་པའི་ལུགས་དེ་ཉིན་ཞག་ཕྱེད་པའི་བསྙེན་གནས་ལྟ་བུ་སྟེ། དེ་ནི་བར་མའི་དགེ་བ་ཙམ་ལས་བསྙེན་གནས་དངོས་མིན་ནོ། །དེང་སང་ཁྱིམ་པ་རྣམས་ཀྱིས་ལེན་པའི་ཡོངས་གྲགས་ཀྱི་བསྙེན་གནས་ནི་འདི་ཁོ་ན་ཡིན་ལ། ཐེག་པ་ཆེན་པོའི་བསྙེན་གནས་ནི། སོ་ཐར་དང་མི་འདྲ་བར་རང་ཉིད་ཀྱིས་རྟེན་གྱི་དྲུང་དུ་ལེན་ཞིང་། སང་ནང་པར་ཞེས་ཉིན་ཞག་གཅིག་ཏུ་ཁས་ལེན་པར་མཚུངས་ཀྱང་། ལེན་ཡུལ་གང་ཟག་དང་། རྟེན་སངས་རྒྱས་ཀྱི་སྐུ་གཟུགས་དང་བཅུ་གཅིག་ཞལ་ལྟ་བུའི་སྐུ་དང་ཕྱོགས་བཅུའི་བླ་མ་རྒྱལ་བ་སྲས་བཅས་མཁའ་ཁྱབ་ཏུ་བཞུགས་པ་དང་སྤྱན་དྲངས་པ་སོགས་རྟེན་གྱི་ཁྱད་པར། ལེན་ཚིག་ཇི་ལྟར་སྔོན་གྱི་དེ་བཞིན་གཤེགས་པ་སོགས་དང་། བཙུན་པ་དགོངས་སུ་གསོལ་སོགས་(༢༣༨ན)
བརྗོད་བྱ་མི་འདྲ་བ། བསམ་པ་ཆོ་ག་འདིས་བླངས་པས་གསོ་སྦྱོང་གི་སྡོམ་པ་སང་ཉི་མ་མ་ཤར་གྱི་བར་དང་སྔོན་དུ་གང་ཟག་གམ་དགེ་འདུན་ལས་བླངས་པའི་དགེ་སློང་དགེ་ཚུལ་གྱི་སྡོམ་པ་ཇི་སྲིད་འཚོའི་བར་དུ་བསྲུང་སྙམ་པའི་ཁྱད་པར་དབྱེ་ཐུབ་པ་ཐེག་ཆེན་གྱི་སྡོམ་པ་ཤེས་པའི་སྟེང་ནས་འཇོག་པས་ཉན་ཐོས་གཟུགས་ཅན་གྱི་སྡོམ་པ་དགག་གཏོང་གཉིས་བྱུང་དོགས་མི་དགོས། སྤང་བྱ་ཡན་ལག་བརྒྱད་དུ་མཚུངས་ཀྱང་སོ་ཐར་ལ་ཉན་ཐོས་རྣམ་གསུམ་དག་པའི་ཤ་སྤང་མི་དགོས་ཤིང་། སྟག་ཚང་ལོ་ཙཱ་བའི་འདུལ་ཊཱིཀ་ཏུ། ཤ་གཞན་རང་ལ་བསྔོས་ནས་བསད་པར་མཐོང་ཐོས་དོགས་གསུམ་གང་རུང་གིས་ཤེས་ན་སོགས་ཏེ། བཤན་པའི་ཚོང་འདུས་ནས་དགེ་བསྙེན་དད་པ་ཅན་གྱིས་བླངས་ནས་ཟ་བར་གནང་ངོ་། །སུམ་བརྒྱ་པར། ཡ་རབས་རྣམས་ཀྱིས་ཉ་དང་ཤ་གནང་གང་། །གནོད་དང་བརྩེ་མེད་རོ་སོགས་ལ་ཆགས་དང་། །ཡོངས་སུ་བཙལ་བའི་སེམས་དག་སྤངས་ནས་ནི། །ལྷུང་བཟེད་འོངས་པ་དེ་ལ་བརྟག་སྟེ་བཟའ། ཞེས་སོ། །སྟག་གི་གོད་མ་ནི་བཙོག་པས་བཀག་གོ །ཞེས་ཟེར་མོད། ཁྭ་རྣམས་ཀྱིས་ནི་ལྷག་མར་བྱས་པའི་ཤ །གང་ཡིན་དེ་མཆུའི་ཐན་སྐོར་བོར་ཏེ་ཟ། ཞེས་དང་། འདིར་ཡང་དེ་བཞིན་དུ་བཤད་ན་ཅེ་སྤྱང་དང་ཁྭ་ལས་སྟག་བཙོག་པའི་རྒྱུ་མཚན་མེད་པས། སྟག་ནི་ཤིན་ཏུ་ཆགས་ཤིང་བལྟོས་པ་དང་བཅས་པས་བཀག་གོ །ངོ་བོའི་སྒོ་ནས་མི་རུང་བ་ནི་གླང་པོ་ཆེ་སོགས་ཏེ་ཀླུ་ནི་སྦྲུལ་ལོ། །རྨིག་གཅིག་པ་ནི་རྐང་ལག་གི་རྨིག་པ་ཁ་ཧྲག་མེད་པ་བོང་བུ་སོགས་བྱ་ཤིང་རྟ་མོ་སོགས། སྐྱིན་གོར་སྲམ་དུ་གྲགས་པའོ། །དྲེའུ་སྲིན་ནི་ས་ལས་(༢༣༨བ)
སྐྱེས་པའི་འབུ་རིང་པོའོ། །བཅད་པ་ལས་བྱུང་བ་ནི་དེ་ལྟར་བཀག་པ་ལས་བྱུང་བ་ཞེས་པ་ཡིན་པ། ཞར་བྱུང་འོ་མ་ལ་དོགས་པ་དཔྱད་པ་ནི། གླང་པོ་སོགས་ཏེ། ཤ་བསྔོས་པར་ཤེས་ན་ཞེས་པ་ནས་བཟུང་སྟེ་ནད་པ་མ་ཡིན་པའི་དབང་དུ་བྱས་ནས་རྩ་འགྲེལ་གྱིས་བསྟན་ཏེ། ནད་པ་ལ་ནི་མིའི་ཤ་བཀག་པའི་ཤུགས་ལས་གཞན་རྣམས་གནང་བར་གྲུབ་པས་སོ། །དེས་ན་གང་དག་འདུལ་བ་ནས་ཤ་མ་གནང་ངོ་ཞེས་ཟེར་བ་དག་གིས་ནི་འདུལ་བ་མི་ཤེས་པའི་རྨོངས་པ་དང་། རང་ཉིད་ཤ་མི་ཟ་བའི་ང་རྒྱལ་དང་། གཞན་ལ་ཞེ་སྡང་བའི་ཉོན་མོངས་ཀྱིས་ཀུན་ནས་བསླང་བའི་ཅ་ཅོ་བསྒྲགས་པས་ལྷས་བྱིན་གྱི་བསླབ་པའི་གཞི་ལ་གནས་པར་བསྟན་ཏོ། །འོན་ཀྱང་སྙིང་རྗེས་ཀུན་ནས་བསླངས་ཏེ་གཞན་རྗེས་སུ་འཛིན་པར་འདོད་པའི་དྲང་དོན་ཡིན་ན་ཤིན་ཏུ་ངོ་མཚར་ཞེས་བྱུང་བས་ཐེག་ཆེན་གྱི་གསོ་སྦྱོང་བླངས་ཚེ་ངེས་པར་ཤ་དང་སྒོག་བཙོང་སོགས་སྤོང་དགོས་པ་ལང་གཤེགས་ལས། དྲི་ང་འཕགས་པ་མིན་པས་བསྙེན། །མི་བསྙེན་པར་ཡང་བྱེད་པ་སྟེ། །ཤ་ནི་གཅན་གཟན་རྣམས་ཀྱི་ཟས། །བཟར་མི་རུང་བར་ཐུབ་ཆེན་གསུངས། །ཟོས་ན་ཉེས་པ་གང་ཡོད་དང་། །མ་ཟོས་པ་ཡི་ཡོན་ཏན་དག །ཤ་ཟ་དེ་ལ་གང་ཡིན་པ། །བློ་གྲོས་ཆེན་པོས་ཤེས་པར་གྱིས། །འཁྲུལ་པ་དང་ནི་གཉེན་བཤེས་དང་། །ཁུ་ཆུ་ཁྲག་ལས་བྱུང་བའི་ཕྱིར། །འབྱུང་པོ་རྣམས་ནི་དངང་འགྱུར་བས། །རྣལ་འབྱོར་ཅན་གྱིས་ཤ་མི་བཟའ། །ཤ་རྣམས་དང་ནི་སྒོག་བཙོང་དག །ཆང་དག་རྣམ་པ་སྣ་ཚོགས་དང་། །ཀེའུ་དང་སྒོག་སྐྱ་དེ་བཞིན་ཏེ། །རྣལ་འབྱོར་ཅན་གྱིས་རྟག་ཏུ་སྤང་། ཞེས་དང་། ཡང་དེ་ཉིད་ལས། ཁེ་ཡི་ཕྱིར་(༢༣༩ན)
ནི་སེམས་ཅན་གསོད། །ཤ་ཡི་ཕྱིར་ནི་ནོར་སྦྱིན་བྱེད། །གཉིས་ཀ་སྡིག་པའི་ལས་ཅན་པས། །ཤི་ནས་འོ་དོད་འབོད་པར་ལྟུང་། །བཅོལ་འཚོལ་འདུ་ཤེས་དེ་མེད་ན། །རྣམ་གསུམ་དག་པའི་ཤ་ཡང་མེད། །རྒྱུ་མེད་ལས་ནི་ཡོད་མིན་པས། །དེ་ཡི་ཕྱིར་ན་བཟའ་མི་བྱ། །རྣལ་འབྱོར་པ་ནི་དེ་དག་གིས། །དེས་ན་ཐམས་ཅད་སྤང་བར་བྱ། ཕྱོགས་བཅུ་སངས་རྒྱས་བཅོམ་ལྡན་འདས། །ཐམས་ཅད་རབ་ཏུ་སྨོད་པར་འགྱུར། །གཅིག་ལ་གཅིག་ནི་ཟ་བར་བྱེད། །ཤི་ནས་གཅན་གཟན་རིགས་སུ་ལྟུང་། དྲི་མི་ཞིམ་པ་སྨད་པ་དང་། །གླེན་པ་དག་ཏུ་སྐྱེ་བར་འགྱུར། །ཕལ་ཆེར་གདོལ་པའི་རིགས་སུ་སྐྱེ། །རྔོན་པ་དམེ་ཤ་ཅན་རིགས་དང་། །ཡང་ན་ཕྲ་མེན་རིགས་སུ་སྐྱེ། །ཤ་ཟའི་རིགས་སུ་སྐྱེ་བར་འགྱུར། །སྲིན་པོ་བྱི་ལ་ལ་སོགས་པའི། །མངལ་ཀུན་ཏུ་ནི་སྐྱེ་བར་འགྱུར། །གླང་པོ་འཆིང་དང་སྤྲིན་ཆེན་དང་། །སོར་མོ་འཕྲེང་བའི་མདོ་དག་དང་། །ལང་ཀར་གཤེགས་པའི་མདོ་འདི་ལས། །ངས་ནི་ཤ་ནི་རབ་ཏུ་བཀག །ཅེས་གསུངས་པས་ཤེས་ནུས་སོ། །འདི་སྐོར་ལ་མང་ཐོས་ཀླུ་སྒྲུབ་རྒྱ་མཚོའི་སྡོམ་གསུམ་འགྲེལ་པ་ལས། དེ་ལྟར་དགེ་བསྙེན་གྱི་སྡོམ་པ་ལ་ཆོ་ག་མི་འདྲ་བའི་གནད་གཉིས་ཡོད་པ་དེ་ལྟ་ན་སྐབས་སུ་བབ་པ་བསྙེན་གནས་ཀྱི་ཆོ་ག་ཇི་ལྟར་བྱེད་སྙམ་ན་དགེ་བསྙེན་དང་འདྲ་བར་བསྙེན་གནས་ལ་ཡང་གྲུབ་མཐའི་དབང་གི་ཆོ་ག་མི་འདྲ་བ་གཉིས་འབྱུང་སྟེ། སྐྱབས་འགྲོ་རྩོམ་བྱེད་དུ་བྱས་ནས་བསླབ་བྱ་བརྒྱད་ཁས་ལེན་གསུམ་བྱེད་པ་མདོ་སྡེའི་ལུགས་དང་། སྐྱབས་འགྲོ་བརྩོམ་བྱེད་དུ་བྱས། བདག་བསྙེན་གནས་པར་བཟུང་དུ་གསོལ་ལན་གསུམ་བྱེད་པ་ཁ་ཆེ་བྱེ་སྨྲ་བའི་ལུགས་(༢༣༩བ)
གཉིས་ཡོད་པའི་ཕྱིར། གཉིས་པ་ནི་འདུལ་ལུང་སོགས་ལས་མ་བཤད་ཀྱང་མཛོད་རང་འགྲེལ་ལས་ཤུགས་ལས་བཤད་པའི་ལུགས་དང་། དང་པོ་ནི། གནས་འཇོག་ནས་བཤད་པའི་ལུགས་དང་། བྱང་ས་དང་སྡོམ་བརྒྱད་འགྲེལ་པ་སོགས་ལས་བཤད་པའི་ལུགས་དང་། གོང་དུ་བཤད་པ་ལྟར་གྱི་རིགས་པས་གྲུབ་པའི་ཕྱིར་རོ། །གཉིས་པ་མདོ་སྡེ་པའི་ལུགས་ནི། མདོ་སྡེ་པ་རྣམས་ཆོས་ཅན། ཁྱོད་ཀྱི་ལུགས་ལ་བསྙེན་གནས་སྡོམ་པའི་རྟེན་དང་། བླང་ཡུལ་སོགས་ཁ་ཆེ་བྱེ་སྨྲ་དང་མི་འདྲ་སྟེ། དུད་འགྲོ་སོགས་འགྲོ་བ་གཞན་ལའང་བསྙེན་གནས་ཀྱི་སྡོམ་པ་སྐྱེ་བར་མདོ་མཛངས་བླུན་སོགས་ལས་བཤད་པ་ལྟར་འདོད་ཅིང་། བླང་པའི་ཡུལ་ཡང་དགེ་བསྙེན་སོགས་སྔོམ་ལྡན་གང་ཡང་རུང་བ་ལས་བླང་བར་གནས་འཇོག་གི་མདོ་སོགས་ལས་བཤད་པ་ལྟར་འདོད་པའི་ཕྱིར་རོ། །འདི་ལ་པཎ་ཤཱཀ་པས། དུད་འགྲོ་སོ་སོར་ཐར་པ་ཡི། །སྡོམ་པའི་རྟེན་དུ་ཁས་ལེན་པའི། །ཉན་ཐོས་སྡེ་པ་ཡོད་དམ་ཅི། །ཞེས་དྲིས་ནས། དེའི་རང་ལན་དུ། གྲུབ་མཐའ་སྨྲ་བ་བཞི་ལས་ཕྱེ་བའི་མདོ་སྡེ་བས། དུད་འགྲོ་སོར་སྡོམ་གྱི་རྟེན་དུ་ཁས་མི་ལེན་ཏེ། དེས་སོ་ཐར་གྱི་རྣམ་གཞག་འདུལ་བ་དང་མི་འགལ་བར་ཁས་ལེན་པ་གང་ཞིག །འདུལ་བ་ལས་དུད་འགྲོ་སོར་སྡོམ་གྱི་རྟེན་ཡིན་པ་བཀག་པའི་ཕྱིར། དེས་ན་ཐེག་པ་ཆེ་ཆུང་གི་མདོ་སྒྲ་ཇི་བཞིན་དུ་ཁས་ལེན་པ་དག་ལ་ཐར་པ་ཡིན་ཏེ། མདོ་སྡེ་མཛངས་བླུན་ལས། ཀླུས་བསྙེན་གནས་བསྲུང་བར་བཤད་པའི་ཕྱིར་དང་། ཁྱིམ་བདག་མགོན་མེད་ཟས་སྦྱིན་གྱིས། གཞན་ལ་བསྙེན་གནས་ཕོག་པར་བཤད་པའི་ཕྱིར་དང་། དེ་དག་ནི་བར་མ་དགེ་བ་ཙམ་ཡིན་གྱིས། སྡོམ་པར་བཞེད་(༢༤༠ན)
པའི་ཚད་ལྡན་སུ་ཡང་མེད་དོ། །དེ་ལྟར་ན། འདུལ་བར་བསྙེན་གནས་དགེ་སློང་ལས། །ལེན་ཅིང་མི་ཡི་རྟེན་དུ་བཤད། །མདོ་སྡེ་ལས་ནི་དུད་འགྲོ་སོགས། །འགྲོ་བ་གཞན་ལའང་སྐྱེ་བར་བཤད། ཅེས་བཏོན་ན་གནད་དང་འཁྲུལ་པ་མེད་དོ་ཞེས་འཆད་པར་བྱེད་དོ། །དེ་ཡང་གྲུབ་མཐའ་གོང་འོག་གི་གནད་རྣམས་མ་དགོངས་པའི་སྐྱོན་ཡིན་ཏེ། བསྟན་བཅོས་བྱེ་བྲག་ཏུ་བཤད་པ་ལ་གཙོ་བོར་བྱེད་པ་ལ་བྱེ་བྲག་ཏུ་སྨྲ་བ་དང་། ཐེག་ཆུང་གི་མདོ་གཙོ་བོར་བྱེད་པ་ལ་མདོ་སྡེ་པ་ཞེས་འཇོག་པ་ཡིན་པས། མདོ་སྡེ་པས་མདོ་ལས་བསྙེན་གནས་སྡོམ་པ་བླང་བའི་ཡུལ་དང་། རྟེན་བཤད་པ་དེ་ཚད་མ་བྱེད་ཅེས་པའི་གྲུབ་མཐའི་གནད་ཡིན་པའི་ཕྱིར་དང་། གཞན་དུ་ན། ཐེག་པ་ཆེ་ཆུང་གི་མདོ་སྒྲ་ཇི་བཞིན་དུ་ཁས་ལེན་པ་སྟེ། གྲུབ་མཐའ་སྨྲ་བ་སུ་ཡིན་དྲིས་ན་ལན་རྣལ་མ་མེད་པའི་ཕྱིར་དང་། ཁྱད་པར་ཁྱེད་རང་གིས་མདོ་སྡེ་པས་ཉིན་ཞག་ལྔའི་མཐའ་ཅན་གྱི་བསྙེན་གནས་སྡོམ་པ་ཁས་ལེན་པར་འོག་ཏུ་བཤད་པ་དེ་མི་འཐད་པར་ཐལ། མདོ་སྡེ་པས་བསྙེན་གནས་སྡོམ་པའི་རྣམ་གཞག་འདུལ་བ་དང་མི་འགལ་བར་ཁས་ལེན་པ་གང་ཞིག །འདུལ་བ་ལས་དེ་འདྲ་མ་བཤད་པའི་ཕྱིར། འཁོར་གསུམ་ཨེ་དྲན། འདུལ་བ་ལ་བསྙེན་གནས་དགེ་སློང་ལས། ཞེས་སོགས་གཞུང་འཆོལ་མི་དགོས། འདུལ་བ་དང་མདོ་ལས་དེ་ལྟར་བཤད་པ་དེ། བྱེ་མདོ་གཉིས་ཀྱི་སོ་སོར་ཁས་ལེན་པ་གྲུབ་མཐའི་གནད་ཡིན་པའི་ཕྱིར་རོ། །ཞེས་པ་འདི་ལུང་རིགས་ཤིན་ཏུ་ཕྲ་བར་སྣང་ངོ་། །འོ་ན། འབྲི་གུང་དགོངས་གཅིག་པ་དང་། བཀའ་གདམས་པ་ལ་ལ་བསྙེན་གནས་ད་ནང་བླངས་པ་སང་ཞོགས་འབུལ་ཆོག་(༢༤༠བ)
བྱེད་དགོས་ཟེར་པ་ནི་སང་ཉི་མ་མ་ཤར་གྱི་བར་དུ་ཞེས་ཚིག་གིས་བཅས་དེ་ཁས་བླངས་པས་དུས་མཚམས་རྫོགས་པའི་མཐར་སྡོམ་པ་རང་ཤུགས་ཀྱིས་གཏོང་བ་མ་གོ་བ་སྟེ། དེ་ལྟར་ན་དགེ་སློང་གིས་འཆི་བའི་དུས་སུ་སྡོམ་པ་འབུལ་ཆོག་དགོས་པའི་སྐྱོན་དུ་འགྱུར་རོ། །བྱེ་སྨྲ་བ་ལ་དེ་ལྟར་ཡིན་མོད་ཀྱང་། མདོ་སྡེ་པ་ལ་ལུགས་གཞན་ཡོད་དམ་སྙམ་ན། མདོ་སྡེ་པའི་ལུགས་བཞིན་དུ་སྔོན་ལན་གཅིག་ཟླ་བ་བྱུང་ངོ་ཅོག་གི་ཚེས་བརྒྱད་ལ་བདག་བསྙེན་གནས་པར་བཟུང་དུ་གསོལ་ཞེས་ཁས་བླངས་ནས། ཕྱིས་སྐྱ་རེངས་ཤར་ནས་ཡུན་འགའ་སོང་ཞིང་ཟན་ཟོས་པའི་རྗེས་སོགས་ཇི་ལྟར་འདོད་པའི་ཚེ། བསྙེན་གནས་ལེན་ན་ཡང་ནང་པར་གཞན་ལ་འབུལ་མི་དགོས་ཏེ། ནང་པར་སྐྱ་རེངས་ཤར་བ་ཕན་ཆད་སྡོམ་པ་དེ་བསྲུང་བསམ་པ་མེད་པའི་ཕྱིར་ན་ནང་པར་སྡོམ་པ་གཏོང་བར་ངེས་སོ། །ཀླུ་སྒྲུབ་རྗེའི་སྡོམ་གསུམ་འགྲེལ་པར། བསྙེན་གནས་བསྲུངས་པའི་ལུགས་འདི་ལ་བསྙེན་གནས་ཆོས་ཅན། ཁྱོད་སང་ནང་པར་འབུལ་ཆོག་མི་དགོས་ཏེ། ཁྱོད་མཚན་མོ་འདས་ནས་སྐྱ་རེངས་ཤར་བའི་ཚེ་རང་ཤུགས་ཀྱིས་གཏོང་བའི་ཕྱིར། དེ་ལ་ཁོ་ན་རེ་མ་གྲུབ་སྟེ། ཇི་སྲིད་འཚོའི་བར་དུ་དུས་བཟང་གསུམ་ལ་སོགས་པའི་བསྙེན་གནས་སྟབས་ཅིག་ཏུ་བླངས་ནས་བསྲུང་བ་ཡོད་པའི་ཕྱིར་ཞེ་ན། ཁྱོད་ཀྱི་འཁྲུལ་གཞི་ཐམས་ཅད་དེ་ལྟ་བུས་བྱས་པར་སྣང་མོད། ཇོ་བོ་རྗེའི་ཕྱག་བཞེས་སུ་མདོ་སྡེ་བའི་ལུགས་སུ་གྲགས་པ་བཞིན་ཐོག་མར་བསྙེན་གནས་སློབ་དཔོན་ལས་སྟབས་ཅིག་ཏུ་བླངས་ནས། ཕྱིས་རང་ཇི་ལྟར་ནམ་འདོད་པའི་ཚེ་ལེན་པ་སྟེ་བསྲུང་ན་ཡང་། དེ་ལྟར་སྟབས་ཅིག་ཏུ་བླངས་ནས་བསྲུང་བའི་སྡོམ་པ་ཆོས་ཅན། ཁྱོད་སང་གི་སྐྱ་(༢༤༡ན)
རེངས་ཤར་ནས་གཏོང་སྟེ། ཁྱོད་བསྲུང་བའི་གང་ཟག་དེ་ལ་ཁྱོད་སང་ནང་པར་ཕན་དུས་རྟག་ཏུ་བསྲུང་བའི་བསམ་པ་མེད་པའི་ཕྱིར་ཏེ། གང་ཟག་དེས་ཁྱོད་ནམ་འདོད་པའི་ཉིན་ཞག་རེ་རེ་ཁོ་ནར་བླངས་པ་ཙམ་ཡིན་པའི་ཕྱིར། དེས་ན་ཉིན་ཞག་གཅིག་པའི་བསྙེན་གནས་སྟབས་ཅིག་ཏུ་བླངས་པའི་ལུགས་འདི་ལ་ཡང་ཆོས་ཅན། བསྲུང་ཟིན་པའི་རྗེས་སུ་འབུལ་མི་དགོས་ཏེ། ཉི་མ་ཕྱི་མའི་སྐྱ་རེངས་ཤར་པས་གཏོང་བ་དེའི་ཕྱིར་རོ། །གཞུང་འདི་ལ་པཎ་ཤཱཀ་པས་མདོ་སྡེ་པའི་ལུགས་བཞིན་དུ། ཇི་ལྟར་འདོད་ཚེ་ལེན་ཞེས་པ། དུས་གཅིག་སྟབས་སུ་ལེན་ནམ་ཅི། །ཟན་ཟོས་ནས་ཀྱང་ནོད་ཅེས་པ། འདིའི་དོན་དུ་ཁས་ལེན་ན། །དེ་འདྲ་བྱེ་བྲག་སྨྲ་བ་ཡི། །དམིགས་བསལ་ཡིན་གྱི་མདོ་སྡེ་པའི། །གཞུང་ལུགས་ཡིན་པར་འགལ་བ་མེད། །བསྙེན་གནས་སྟབས་ཅིག་ལེན་པ་དེ། །མདོ་སྡེའི་གཞུང་ལུགས་གང་ལས་བྱུང་། །ཞེས་པའི་དྲི་བ་མཛད་དོ། །འདི་ལ་དྲི་བའི་སྒོ་ནས་དགོས་པ་བཀོད་པ། དྲི་ལན་གྱི་སྒོ་ནས་གཏན་ལ་ཕབ་པ་གཉིས། དང་པོ་ནི། རྣམ་བཤད་མཛད་པ་སྔ་མ་རྣམས་ཀྱིས་ཐོག་མར་སློབ་དཔོན་ལ་ཟླ་བ་བྱུང་ངོ་ཅོག་གི་དུས་བཟང་གསུམ་གྱི་བསྙེན་གནས་སྟབས་ཅིག་ཏུ་བླངས་ནས་ཕྱིས་ནམ་འདོད་པའི་ཚེ་བསྲུངས་པས་ཆོག་པ་འདི། མདོ་སྡེ་པའི་ལུགས་བཞིན་དུ་ཞེས་པའི་སྐབས་ཀྱི་མདོ་སྡེ་པའི་ལུགས་ཡིན་ཞིང་། དེའི་རྒྱབ་བརྟེན་ནི། མཛོད་འགྲེལ་ལས། གང་གི་ཚེས་བརྒྱད་ལ་རྟག་ཏུ་བསྙེན་པར་བྱའོ། །ཞེས་སྔོན་ཡང་དག་པར་བླངས་པ་བྱས་པ་དེས་ནི་ཟས་ཟོས་ནས་ཀྱང་ནོད་པར་བྱའོ་ཞེས་འདྲེན་པར་མཛད་ཅིང་།(༢༤༡བ)
འདི་ཉིད་ཇོ་བོ་རྗེའི་ཕྱག་བཞེས་དང་། རང་རེ་དཔལ་ལྡན་ས་སྐྱ་བའི་གོང་མ་རྣམས་ཀྱིས་ཀྱང་ཕྱག་བཞེས་ཡིན་ནོ། །ཞེས་མཐའ་དཔྱོད་རྒྱས་པར་གསུང་།དེ་ཡངབྱེ་མདོ་གཉིས་ཀྱི་སྡོམ་པ་ལེན་པའི་ཁྱད་པར་ནི། ལུང་རིག་གཏེར་མཛོད་ལས། བྱེ་བྲག་ཏུ་སྨྲ་བའི། མདོ་སྡེ་པའི། ཐེག་པ་ཆེན་པོའི་ལུགས་དང་གསུམ། དང་པོ་ལ། དང་པོར་ལེན་པའི་ཆོ་ག་དང་། ཕྱིས་ཁས་ལེན་པའི་ཆོ་ག་གཉིས། དང་པོ་ནི། སློབ་དཔོན་གྱི་དྲུང་དུ་སྔར་བཤད་པ་ལྟར་གྱི་ཀུན་སྤྱོད་དང་ལྡན་པས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སང་ཉི་མ་མ་ཤར་གྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་བསྙེན་གནས་ཡན་ལག་བརྒྱད་པར་བཙུན་པས་གཟུང་དུ་གསོལ། ཞེས་པའི་ཆོ་གའི་ཚིག་ལན་གསུམ་དུ་བརྗོད་པའི་རྗེས་སུ་རྩ་བ་བཞི། ཆང་། ཕྱི་དྲོའི་ཁ་ཟས། མལ་ཆེ་མཐོ། གར་སོགས་ཕྲེང་སོགས་སྤོང་བའི་བསླབ་པའི་གནས་བརྒྱད་ལ་བསླབ་ཚུལ་བརྗོད། གཉིས་པ་ནི། གཞན་རྣམས་སྔར་དང་འདྲ་བ་ལ། ཟླ་བ་བྱུང་ངོ་ཅོག་གི་ཚེས་བརྒྱད་དང་བཅོ་ལྔ་གནམ་གང་ལ་བསྙེན་གནས་ཡན་ལག་བརྒྱད་པར་བཙུན་པས་གཟུང་དུ་གསོལ་ཞེས་པ་ལྟ་བུའོ། །འདི་ལྟར་བླངས་པའི་དགོས་པ་ནི། མ་འོངས་པ་ན་ཚེས་བརྒྱད་ལ་སོགས་པ་དུས་ཁྱད་པར་ཅན་གྱི་དུས་སུ་ཟས་ལ་ལོངས་སྤྱད་པས་རྗེས་སུ་ཡང་སློབ་དཔོན་གྱི་དྲུང་དུ་(༢༤༢ན)
བསྙེན་གནས་ཀྱི་སྡོམ་པ་བླངས་པས་སྐྱེ་བའི་ཆེད་ཡིན་ཏེ། མཛོད་རང་འགྲེལ་དུ། གང་གི་ཚེས་བརྒྱད་ལ་བསྙེན་གནས་ལ་གནས་པར་བྱའོ་ཞེས་སྔོན་ཡང་དག་པར་ཁས་བླངས་པ་དེས་ནི། ཟན་ཟོས་ཀྱང་ནོད་པར་བྱའོ། །གཞན་ལས་ནོད་པར་བྱ་བའི་བདག་ཉིད་ལས་ནི་མ་ཡིན་ནོ། ཞེས་གསུངས་པའི་ཕྱིར་རོ། །གཉིས་པ་ལ། དང་པོར་ལེན་པའི་དང་། ཕྱིས་ལེན་པའི་ཆོ་ག་གཉིས། དང་པོ་ནི། བཙུན་པ་དགོངས་སུ་གསོལ་། ཞེས་པ་ནས་དགེ་འདུན་ལ་སྐྱབས་སུ་མཆིའོ། །བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་ཟླ་བ་བྱུང་ངོ་ཅོག་གི་ཚེས་བརྒྱད་དང་བཅོ་ལྔ་དང་། གནམ་གང་ལ་བསྙེན་གནས་ཡན་ལག་བརྒྱད་པར་བཙུན་པས་གཟུང་དུ་གསོལ། ཞེས་བརྗོད་པ་ལྟ་བུ། གཉིས་པ་ནི། སྔར་ཚེས་བརྒྱད་སོགས་ལ་བསྙེན་གནས་ཀྱི་སྡོམ་པ་བསྲུང་བར་ཁས་བླངས་པའི་གང་ཟག་དེས། ཕྱིས་རྟེན་གྱི་དྲུང་དུ་ཡང་བསྙེན་གནས་ཀྱི་སྡོམ་པ་རང་ཉིད་ཀྱིས་བླངས་པས་སྐྱེ་བ་ཡིན་ཏེ། མདོ་སྡེ་པ་ཡི་ལུགས་བཞིན་དུ། །ཇི་ལྟར་འདོད་ཚེ་ལེན་ན་ཡང་། །ཞེས་གསུངས་པའི་ཕྱིར།གསུམ་པ་ཐེག་ཆེན་གྱི་ལུགས་ནི་ལུགས་འདི་ལ་མཁོ་ཆུང་བས་དཀྱུས་ལྟར་མ་བྲིས་ལ། མདོ་སྡེ་པའི་ལུགས་འདི་ནི་གང་ལས་བཤད་སྙམ་ན། ནང་པར་གཞན་ལས་ནོད་པར་བྱ། ཞེས་པའི་མཛོད་འགྲེལ་ལས། ནང་པར་ནི་རེ་ཞིག་ཉི་མ་མ་ཤར་བའི་ཚེ་སྟེ། ཉིན་ཞག་གི་སྡོམ་པ་ཡིན་པའི་ཕྱིར་ཞེས་སྤྱིར་བཏང་དང་། གང་གིས་ཚེས་བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ། །ཞེས་སྔོན་ཡང་དག་པར་ཁས་བླངས་པ་དེས་ནི་ཟན་ཟོས་ནས་ཀྱང་(༢༤༢བ)
ནོད་པར་བྱའོ། །ཞེས་དམིགས་གསལ་གཉིས་གསུངས་པའི་དམིགས་བསལ་འདི་མདོ་སྡེ་པའི་ལུགས་བཞིན་དུ་ཇི་ལྟར་འདོད་པའི་ཚེ་བསྙེན་གནས་ལེན་ཞེས་པ་དེ་ཡིན་པར་འཆད།ལུང་རིགས་གཏེར་མཛོད་དུ། ཐོག་མར་སློབ་དཔོན་ལས་ལན་ཅིག་བླངས་ནས་སླར་བརྗོད་དེ་ཟན་ཟོས་པའི་རྗེས་སུའང་སློབ་དཔོན་ལ་བླངས་ཆོག་པ་བྱེ་སྨྲ་རང་ལུགས་སུ་གསུངས་པར་མཁན་ཆེན་ངག་དབང་ཆོས་གྲགས་ཀྱི་སྡོམ་གསུམ་འགྲེལ་པར། དེས་ན་ནང་པར་ནི་རེ་ཞིག་ཅེས་སོགས་འགྲེལ་བ་སྔ་མ་དེ་བྱེ་སྨྲའི་ལུགས་དང་། གང་གིས་ཚེས་བརྒྱད་ལ་ཞེས་སོགས་འགྲེལ་པ་ཕྱི་མ་ལས་འཕྲོས་པའམ། དམིགས་བསལ་གྱི་ཚུལ་དུ་བྱུང་བ་སྟེ་མདོ་སྡེ་པའི་ལུགས་ཡིན་ཏེ། འགྲེལ་བ་སྔ་མའི་ཐད་ཀྱི་འགྲེལ་བཤད་རྒྱལ་སྲས་མ་ལས་སྡོམ་པ་ནི་སློང་བར་བྱེད་པ་ཡང་དག་པར་ལེན་པར་ངེས་པའི་སེམས་པ་ཡིན་པའི་ཕྱིར། ཉི་མ་འཆར་བའི་ཚེ་ཁོ་ན་སྐྱེ། ཟན་ཟོས་ནས་ནོད་པ་ནི་གསལ་བའི་ཕྱིར་རོ། །ཞེས་ཉི་མ་སྟེ་སྐྱ་རེངས་ཤར་བའི་ཚེ་ལེན་པ་ཁོ་ན་བྱེ་བྲག་ཏུ་སྨྲ་བའི་ལུགས་བསྟན་པའི་ཕྱིར་དང་། གང་གིས་ཚེས་བརྒྱད་ལ་ཞེས་སོགས་བྱེ་སྨྲ་རང་ལུགས་ཀྱི་དམིགས་བསལ་ཡིན་ན་འགྲེལ་བཤད་ཀྱང་དེ་དང་མཐུན་པ་ཞིག་དགོས་པ་ལས། ཉི་མ་འཆར་བའི་ཚེ་ཁོ་ན་སྐྱེའོ་ཞེས་པའི་ངེས་བཟུང་གི་ཚིག་གིས་མི་མཐུན་པ་དངོས་སུ་བསལ་བས་འགྲེལ་བཤད་དེ་འདོར་རིགས་པར་འགྱུར་བའི་སྐྱོན་ཡོད་དོ། །ཞེས་གསུངས་པ་གཉིས་འགལ་བ་ཕྱི་མ་ལྟར་ན་བྱེ་སྨྲ་ལུགས་ལ་ཟླ་བ་བྱུང་ངོ་ཅོག་གི་ཚིག་བསྣོན་པ་དགོས་མེད་དུ་སོང་ཞིང་། གསལ་བའི་སྒྲོན་མེ་ལས། དམིགས་བསལ་གྱི་ཆོ་ག་ནི། དང་པོ་སློབ་དཔོན་གྱི་དྲུང་དུ་བླངས་ནས། ཕྱིས་འབོགས་(༢༤༣ན)
པ་པོ་མེད་ཀྱང་རང་ཉིད་ཀྱིས་རྟེན་གྱི་དྲུང་དུ་བླངས་པས་སྐྱེ་བ་ཡིན་ཏེ། དེའི་ཚུལ་ནི། རྟེན་དང་མཆོད་པ་བཤམས། དེའི་མདུན་དུ་རང་ཉིད་ཙོག་ཙོག་པུར་འདུག་སྟེ། མདུན་གྱི་རྟེན་དེ་ཉིད་ཀྱི་འབོགས་པར་བསམ། སློབ་དཔོན་གྱི་ཚབ་ཏུ་ལྷ་དགོངས་སུ་གསོལ། ཞེས་བཅུག་སྟེ་ཆོ་ག་གཞན་སྔར་དང་འདྲ་བར་བྱས་པས་སྡོམ་པ་སྐྱེ་བ་ཡིན་ནོ། །ཡང་མཛོད་འགྲེལ་ལས། གང་གིས་ཚེས་བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ་ཞེས། སྔོན་ཡང་དག་པར་ཁས་བླངས་པ་དེས་ནི། ཟན་ཟོས་ནས་ཀྱང་ནོད་པར་བྱའོ་ཞེས་པ་འདི་མཁས་པ་འགའ་ཞིག་མདོ་སྡེ་པའི་ལུགས་ཁོ་ན་ལ་སྦྱོར་བ་སྣང་ཡང་། མདོ་སྡེ་པའི་ལུགས་དང་ཆ་འདྲ་བ་མ་གཏོགས་བྱེ་སྨྲ་བས་ཀྱང་ཁས་ལེན་པར་སྣང་སྟེ། དེའི་དམིགས་གསལ་གྱི་ཆོ་ག་ཡིན་པའི་ཕྱིར་ཞེས་གསུངས། དེས་མཛད་པའི་སྡོམ་གསུམ་གྱི་འགྲེལ་པའི་གསེར་མདོག་ཅན་པའི་ལན་དུ་སྔ་རབས་པའི་བསྙེན་གནས་སྟབས་གཅིག་ལེན་པའི་ཆོ་ག་ལུང་གི་ཁུངས་མེད་གསུང་བ་བརྟག་པར་བྱ་སྟེ། མཛོད་འགྲེལ་ལས། གང་གིས་ཚེས་བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ། །ཞེས་སྔོན་ཡང་དག་པར་ཁས་བླངས་པ་དེས་ནི། ཞེས་པ་དེས། ཟླ་བ་བྱུང་ངོ་ཅོག་གི་ཚེས་བརྒྱད་ཀྱི་བསྙེན་གནས་ཀྱི་སྡོམ་པ་ཆོ་ག་ལས་དུས་གཅིག་ཏུ་བླངས་པ་ཞིག་ཡོད་པར་དངོས་སུ་བསྟན་པ་གང་ཞིག །དེས་བསྟན་ན་དུས་བཟང་གཞན་རྣམས་ལའང་མཚུངས་པའི་ཕྱིར། རྟགས་དང་པོ་གྲུབ་སྟེ། དེ་ལྟར་བླངས་པའི་གང་ཟག་དེས། ཟླ་བ་ཕྱི་མའི་ཚེས་བརྒྱད་ཀྱི་ཉི་མ་ཤར་མ་ཐག་རང་རྒྱུད་ལ་བསྙེན་གནས་ཀྱི་སྡོམ་པ་སྐྱེས་ཀྱང་(༢༤༣བ)
དེའི་ཉིན་བསྙེན་གནས་བསྲུང་བའི་བསམ་པ་བརྗེད་དེ་ཟན་ཟོས་ན་ཡང་སླར་སྔར་བླངས་པའི་སྡོམ་པ་དྲན་པས་གསལ་འདེབས་པ་ཙམ་གྱི་ཕྱིར་དུ་བསྙེན་གནས་གཞན་ལ་ནོད་ཀྱང་ཆོག་ཅེས་པ་ནི། ཟན་ཟོས་ནས་ཀྱང་ནོད་པར་བྱའོ། །ཞེས་པས་བསྟན་པ་ཡིན་པའི་ཕྱིར་ཏེ། དེའི་འགྲེལ་བཤད་རྒྱལ་སྲས་མ་ལས། སྡོམ་པ་ནི་བླང་དོར་བྱེད་པ་ཡང་དག་པར་ལེན་པར་ངེས་པའི་སེམས་དཔའ་ཡིན་པའི་ཕྱིར། ཉི་མ་ཤར་བའི་ཚེ་ཁོ་ན་སྐྱེའོ། །ཟན་ཟོས་ནས་ནོད་པ་ནི་གསལ་བར་བྱ་བའི་ཕྱིར་རོ། །ཞེས་གསལ་བར་བཤད་འདུག་པའི་ཕྱིར་རོ། །དེ་ལ་མཁས་པ་པཎ་ཤཱཀ་པ་ན་རེ། མཛོད་འགྲེལ་དེའི་དོན། ཚེས་བརྒྱད་ལ་རྟག་ཏུ་བསྙེན་གནས་ལ་གནས་པ་དམ་བཅས་པ་ཙམ་ལ་དགོངས་ཀྱི། ཆོ་གས་བླངས་པ་མ་ཡིན་ནོ། །ཞེས་ཁོ་བོས་བཤད་ཟིན་པ་མ་ཡིན་ནམ་ཞེ་ན་དེ་ལྟར་བཤད་པ་དེས། འགྲེལ་བཤད་འདི་ལ་ཐུགས་བསམ་མ་བཅུག་པའི་སྐྱོན་ཡིན་ཏེ། ཚེས་བརྒྱད་ཀྱི་ཉི་མ་འཆར་བའི་ཚེ་བསྙེན་གནས་ཀྱི་སྡོམ་པ་སྐྱེས་ཀྱང་། ཉི་མ་ཤར་ཟིན་ཚ་བ་ཟོས་རྗེས་བསྙེན་གནས་ལེན་པ་ཞིག་འགྲེལ་བཤད་འདིས་བསྟན་པ་ལས་ཉི་མ་འཆར་བའི་ཚེ་སྐྱེས་པས་བསྙེན་གནས་སྡོམ་པ་དེ་སྔར་དུས་གཅིག་བླངས་པའི་ཆོ་ག་གཅིག་ལས་མ་སྐྱེས་ན། སྔར་གྱི་དམ་བཅའ་དེ་ལས་སྐྱེས་པའམ། ཕྱིས་ཀྱི་ཆོ་ག་དེ་ལས་སྐྱེས་པ་གང་རུང་དུ་ཁས་བླང་དགོས་པས། མཁས་པའི་བཞད་གད་ཆེན་པོ་ཡིན་པའི་ཕྱིར་རོ། །ཡང་གཞན་ལ་བརྗོད་པའི་རིགས་པའི་གནོད་བྱེད་དེ་ཡང་མི་འཇུག་སྟེ། ཚེས་གཅིག་གི་ཉིན་དུས་བཟང་གསུམ་གྱི་བསྙེན་གནས་སྟབས་ཅིག་ཏུ་བླངས་པའི་ཚེ། ཚེས་གཅིག་གི་ཉིན་བསྙེན་གནས་(༢༤༤ན)
ཀྱི་སྡོམ་པ་མི་སྐྱེ་སྟེ། དེ་ཉིད་དེ་བསྲུང་བར་ཁས་མ་བླངས་པའི་ཕྱིར་རོ། །འོན་ཀྱང་དེའི་ཉིན་ཆོ་ག་དེ་བླངས་པ་ལ་དགོས་པ་ཡོད་དེ། ཕྱིས་ཚེས་བརྒྱད་སོགས་དུས་བཟང་སོ་སོ་ལ་བསྙེན་གནས་ཀྱི་སྡོམ་པ་སྐྱེ་བའི་ཆེད་ཡིན་པའི་ཕྱིར། ཕྱིས་ཀྱི་སྡོམ་པ་དེ་ཆོས་ཉིད་ཀྱི་ཐོབ་པ་ཡང་མིན་ཏེ། སྔར་ཚེས་གཅིག་གི་ཆོ་ག་དེ་ལ་བལྟོས་པའི་ཕྱིར་རོ། །གཞན་ཡང་རྣམ་གསལ་གྱི་དཔེ་བརྗོད་པར་བྱ་སྟེ། མཆོད་སྦྱིན་མ་འཕྲིན་གྱི་བསྙེན་རྫོགས་བྱེད་པའི་ཚེ། དགེ་འདུན་སྡེ་གཉིས་ཀྱི་ཨུ་པ་ལའི་མདོག་ཅན་གྱི་གམ་དུ་གསོལ་བཞིའི་ཆོ་ག་བྱས་པའི་ཚེ། མཆོད་སྦྱིན་མའི་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེས་སམ་མ་སྐྱེས། སྐྱེས་ན་བསྒྲུབ་བྱ་མེད་པའི་སྡོམ་པ་སྐྱེ་བ་བཞད་གད་ཡིན་ཞིང་། མ་སྐྱེས་ན་ཆོ་ག་དེ་བྱས་པ་ལ་དགོས་པ་མེད་པར་ཐལ། དེ་བྱས་པའི་ཚེ་སྡོམ་པ་སྐྱེ་རྒྱུ་མ་བྱུང་བའི་ཕྱིར། འཁོར་གསུམ་ཨེ་དྲན། གཉིས་པ་མཛོད་འགྲེལ་གྱི་དོན་མིན་ཞེས་པའི་སྐབས་སུ། མཛོད་འགྲེལ་དེས། ཕྱོགས་སྔའི་འདོད་པ་ལ་གནོད་བྱེད་དུ་སོང་བ་ཡིན་གསུང་བ་ལའང་བརྟག་སྟེ། ཕྱོགས་སྔ་མས། སྔར་དུས་གཅིག་ལེན་པའི་ཆོ་ག་བྱས་ནས་ཕྱིས་ཚེས་བརྒྱད་སོགས་ལ་གཏན་ནས་བླང་དུ་མི་འདོད་པར་ཁས་བླངས་ན། ཁྱེད་བདེན་ཡང་ཕྱིས་བླངས་པའི་ཡུལ་རྙེད་ན་བླངས་ཀྱང་སྐྱོན་མེད་ལ། མ་བླངས་ཀྱང་བསྲུངས་པས་ཆོག་ཅེས་ཁས་བླངས་པས་གནོད་བྱེད་མེད་པའི་ཕྱིར་རོ། །ཞེས་པའི་ལུང་རིགས་འདི་ཤིན་ཏུ་འཕྲོད་ཅིང་རྣོ་བར་སྣང་ངོ་། །བཤད་ཚུལ་གསུམ་པོ་མི་མཐུན་ཙམ་བྱུང་བ་ལུང་རིགས་གཏེར་མཛོད་ཀྱི་དེ་ག་གཞུང་ཐོག་ཏུ་ཕེབས་པ་འདྲའོ། །བྱེ་མདོ་གཉིས་ཀྱི་བསྙེན་(༢༤༤བ)
གནས་ལ་ཉིན་ཞག་གཅིག་པར་གྲགས་ཀྱང་ཞིབ་ཏུ་བྱས་ན། བྱེ་བྲག་ཏུ་སྨྲ་བར་ད་ནང་སྐྱ་རེངས་ཤར་ནས་སང་སྐྱ་རེངས་མ་ཤར་གྱི་བར་ཉིན་ཞག་ཕྲུགས་གཅིག་ཚང་ལ་མདོ་སྡེ་པས་ཟན་ཟོས་ནས་བླངས་ན་ཉིན་ཞག་ཚང་བ་མི་ཡོང་བའི་ཁྱད་པར་ཡོད་ཅིང་། སྡོམ་གསུམ་ལས། ལ་ལ་བསྙེན་གནས་བསྲུངས་པ་ཡི། ནང་པར་བསྙེན་གནས་འབུལ་དགོས་ཟེར། །བསྙེན་གནས་མཚན་མོ་འདས་པ་ན། །གཏོང་ཕྱིར་འདི་ལ་འབུལ་མི་དགོས། །མདོ་སྡེ་པ་ཡི་ལུགས་བཞིན་དུ། །ཇི་ལྟར་འདོད་ཚེ་ལེན་ན་ཡང་། །ནང་པར་ཕན་ཆད་བསྲུང་བ་ཡི། །བསམ་པ་མེད་ཕྱིར་སྡོམ་པ་གཏོང་། །དེ་ཡི་ཕྱིར་ན་འབུལ་མི་དགོས། །ཞེས་གསུངས་པས་ཀྱང་བསྒྲུབ་ནུས། དེ་ཉིད་ལས། ལ་ལ་བསྙེན་གནས་འཆོལ་བ་ཐོས། །འདི་འདྲ་གང་ནའང་བཤད་པ་མེད། ཅེས་གསུང་དགོས་པའི་དོན་ལ་དགའ་གདོང་འགྲེལ་ཆེན་དུ། འདུ་ཤེས་ཞན་ཅིང་ཆོས་ལ་དབང་ཟ་བ་འགའ་ཞིག །རང་བསྙེན་གནས་བསྲུང་བར་མི་ཁོམ་ན་ཚབ་ལ་གང་ཟག་ལ་འཆོལ་བའི་ལུགས་བྱེད་དེ། དེ་འདྲ་བཀའ་བསྟན་བཅོས་གང་ནས་ཀྱང་མ་གསུངས་པས་མི་བྱའོ་ཞེས་གསུང་པ་འདི་དང་། པཎ་ཆེན་དོན་ཡོད་དཔལ་བས་འདོད་ཡོན་ལ་སྲེད་པ་ཆེ་བ་ལ་ལ་ན་རེ། ཆང་འཐུང་བ་ལྟ་བུའི་ཚེ་ན་བསྙེན་གནས་འཆོལ་པ་ཡིན་ནོ་ཞེས་ཟེར་བ་ཐོས་སོ། །ཞེས་གསུང་བ་སྔ་མ་དང་ཚིག་མཐུན་པར་སེམས་ཤིང་། ཀུན་མཁྱེན་གོ་རམས་པའི་སྡོམ་གསུམ་ཊཱིཀྐ་གསུང་རབ་དགོངས་གསལ་ལས། ཆོས་རྒྱུས་ཆུང་བ་ལ་ལ་ན་རེ། བསྙེན་གནས་བསྲུངས་ནས་སླར་ནས་བསྲུང་འདོད་ན། ནང་པར་གཞན་ལ་འཆོལ་དགོས་ཏེ། གཞན་དུ་ན་(༢༤༥ན)
སླར་ལེན་དུ་མེད་པའི་ཕྱིར་རོ། །ཞེས་པ་དང་། མཁན་ཆེན་ངག་དབང་ཆོས་གྲགས་ཀྱི་སྡོམ་ཊཱིཀ་གི་དགོངས་པ་གཉིས་མཐུན་པར་སྣང་བ་སྔ་མ་གཉིས་ལྟར་ན་བསྙེན་གནས་ཀྱི་སྡོམ་ལྡན་དེས་ཆང་འཐུང་རིང་གཞན་ལ་འཆོལ་ལོ་ཞེས་དང་། ཕྱི་མ་གཉིས་ལྟར་ན་ཚེས་དགུ་ལྟ་བུའི་ནང་པར་སྡོམ་པ་དེ་གཞན་ལ་བཅོལ་ནས་ཟླ་བ་རྟིང་མའི་དུས་ཚུར་ལེན་པ་ལྟ་བུའི་ཞེ་འདོད་བསྐྱར་བ་དོན་དུ་ལུགས་ངན་དེ་འདྲ་མི་འཐད་པར་གསུང་བ་མཐུན།བཀའ་གདམས་བྱ་ཡུལ་བ་སོགས་འགའ་ཞིག་གིས་ཚེས་བཅོ་ལྔ་ལ་བསྙེན་གནས་འབོགས་ན་ལྷ་ཤཱཀྱ་ཐུབ་པ་དང་། ཚེས་བརྒྱད་ལ་འབོགས་ན་སྨན་བླ་དང་། གནམ་སྟོང་ལ་འབོགས་ན་སྣང་བ་མཐའ་ཡས་ཀྱི་སྒོམ་བཟླས་རྣམས་ཐ་དད་དུ་མ་བྱས་ན་དུས་དེ་དང་དེ་ལ་བསྙེན་གནས་བསྲུང་དུ་མི་འདོད་ཟེར་བའང་སོ་ཐར་གྱི་སྐབས་ཤིན་ཏུ་མི་རིགས་ཏེ་ལྷ་སྒོམ་པ་དང་སྔགས་བཟླ་བ་གསང་སྔགས་ཀྱི་ལུགས་ཡིན་པས་འདིར་མི་འཇུག་ཅིང་། གལ་ཏེ་མེད་ཀ་མེད་ཡིན་ན་དགེ་ཚུལ་སློང་སོགས་ཀྱི་ཀྱང་ལྷ་སྒོམ་སྔགས་བཟླས་མ་བྱས་ན་སྡོམ་པ་ཉམས་པར་འགྱུར་ཞིང་། དེས་ན་གསང་སྔགས་ལྟ་ཅི་སྨོས། ཕ་རོལ་ཏུ་ཕྱིན་པ་ཙམ་ཡང་བློར་མི་ཆུད་པའི་དགེ་སློང་དག་རྣམ་དག་མ་ཡིན་པར་སྨྲ་དགོས་པར་ཐལ་ཞིང་། དེ་འདྲ་ཡོད་པའི་ཁུངས་ཆག་ལོ་ཆོས་རྗེ་དཔལ་གྱིས་རྒྱ་གར་དུ་བྱོན་པའི་ལམ་ཡིག་ལས། རྡོ་རྗེ་གདན་དུ་དགེ་འདུན་གྱི་གཙུག་ལག་ཁང་ཞེས་བྱ་བར་བརྒྱད་སྟོང་པའི་རྒྱ་དཔེ་ཞིག་ཁུར་ནས་བྱོན་པས་དཀོན་གཉེར་ཉན་ཐོས་ན་རེ་ཆོས་ཅི་ཡིན་ཟེར། ཆོས་རྗེས་པྲཛྙ་པཱ་ར་མི་ཏ་ཧོ་ཞེས་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་གསུངས་པས། ཁོང་ན་རེ་(༢༤༥བ)
ཁྱོད་དགེ་སློང་ལེགས་པ་ཞིག་འདུག་པ་ལ་ཐེག་པ་ཆེན་པོའི་ཆོས་རྒྱབ་ལ་ཁུར་བ་དེ་མ་ལེགས། དེ་བོར་ཞིག་ཆུ་ལ་སྐྱུར་ཞིག་ཟེར་ནས་སྣ་འགེབས་སུ་བྱུང་། ཐེག་པ་ཆེན་པོ་སངས་རྒྱས་ཀྱིས་མ་གསུངས། ཀླུ་སྒྲུབ་ཟེར་བའི་དབང་པོ་རྣོ་རུ་རེ་བ་ཞིག་གིས་བཅོས་པ་ཡིན་ཟེར། ཞེས་གསལ་བར་བྱུང་བས་ཤེས་སོ། །ཡང་ལུང་སྨན་གྱི་གཞི་ལས། དགེ་སློང་ས་རིའི་དུག་ཞི་བའི་ཕྱིར་དུ་རྨ་བྱ་ཆེན་མོའི་རིགས་སྔགས་གསུངས་པ་དང་། ཡང་ཡངས་པ་ཅན་དུ་ཡམས་ནད་ཞི་བའི་དོན་དུ་ཡངས་པ་ཅན་གྱི་གྲོང་ཁྱེར་དུ་འཇུག་པའི་གཟུངས་གསུངས་པ་དང་། གནས་མལ་གྱི་གཞི་ཕྲན་ཚེགས་ལས་གསང་སྔགས་ཕན་པར་བྱེད་པ་བཟུང་བར་བྱའོ། །སྦྱར་བར་བྱའོ། །ཞེས་གསུངས་པ་དང་འགལ་ལོ་སྙམ་ན། དེ་ནི་ནད་ལ་སོགས་པ་ཞི་བའི་ཐབས་སུ་སྔགས་ཀྱི་ཡིག་འབྲུ་ཙམ་བཟླ་བར་གསུངས་ཀྱི། ཡི་དམ་གྱི་ལྷ་བསྒོམ་པ་དེའི་སྔགས་བཟླས་པ་སོགས་མ་གསུངས་ཤིང་། སྤྱིར་ཡང་ལྷ་དང་དྲང་སྲོང་སོགས་ཀྱིས་བྱས་པའི་རིག་སྔགས་ནུས་པ་ཅན་ཡང་འོང་བས་སྔགས་བཟླ་རྒྱུ་ཐམས་ཅད་གསང་སྔགས་ཀྱི་ཁོངས་སུ་ག་ལ་གཏོགས། བྱ་ཡུལ་བའི་ལུགས་དེ་འདྲ་གསང་སྔགས་རྙིང་མའི་སྐབས་དུས་ཆེན་བཅུ་ལ་གསོ་སྦྱོང་བླངས་ཏེ་ལྷ་སྒོམ་པའི་རྣམ་གཞག་འདྲ་མཐོང་ནས་གཞོགས་དྲུད་དེ་བྱས་འདྲ་བ། པཎ་ཆེན་ན་བཟའ་པའི་ཁ་འབར་མ་ལྟར་ཁུངས་དང་རྒྱུ་མཚན་མ་ཆེས་པར་མཐོང་ཚད་བསྲེ་བ་དེ་འདྲ་རང་ཉིད་སྟོན་པའི་མེ་ལོང་ངོ་། །དེ་ཡང་ཐེག་ཆེན་སོ་ཐར་ནི་གཏན་ལ་དབབ་པ་བསྡུ་བ་ལས། དགེ་སློང་ཕ་མའི་སྡོམ་པ་མ་གཏོགས་པའི་སོ་ཐར་གཞན་རྟེན་གྱི་དྲུང་དུ་རང་ཉིད་ཀྱིས་ལེན་པར(༢༤༦ན)
གསུངས་པ་དང་། ཆོ་འཕྲུལ་བསྟན་པའི་མདོར། སྔོན་བསྐལ་པ་མངོན་པར་དགའ་བ་ལ། འཇིག་རྟེན་གྱི་ཁམས་བདེ་བ་ཞེས་བྱ་བར་རྒྱལ་བ་རི་རབ་ལྟ་བུ་ལ་འཁོར་ལོས་སྒྱུར་རྒྱལ་དགེ་བའི་བཀོད་པས་རྗེས་སུ་མཐུན་པའི་བཟོད་པ་ཐོབ་ནས་རབ་ཏུ་བྱུང་ཞིང་སྲས་སྙིང་རྗེས་ཆེར་སེམས་རྒྱལ་སར་བསྐོས་པས་དེ་ཉིད་ཀྱང་། རབ་བྱུང་ཡོན་ཏན་དུ་མ་བསྔགས་པ་ཞེས། །དེ་བཞིན་གཤེགས་པ་རྣམས་ཀྱིས་གསུངས་མོད་ཀྱི། །དེ་ལྟར་ལེགས་ཀྱང་སྙིང་རྗེར་གྱུར་པ་ན། །འགྲོ་ལ་ཕན་ཕྱིར་རྒྱལ་སྲིད་བདག་གིས་བསྒྲུབས། །ཇི་སྲིད་འཚོའི་བར་བདག་ནི་ཚངས་སྤྱོད་ཅིང་། གསོ་སྦྱོང་ཡན་ལག་བརྒྱད་པ་བླང་བར་བྱ། ཞེས་གསོ་སྦྱོང་ཡན་ལག་བརྒྱད་ཇི་སྲིད་འཚོའི་བར་དུ་བླང་བར་གསུངས་པ་དང་། འཕགས་པ་དོན་ཡོན་ཞགས་པའི་རྟོག་པ་ལས། གསོ་སྦྱོང་གི་སྡོམ་པ་རྟེན་གྱི་དྲུང་དུ་རང་ཉིད་ཀྱིས་ལེན་པར་གསུངས་པ་ལ་སོགས་པ་རྣམས་ཀྱི་ལག་ལེན་ཉན་ཐོས་ཀྱི་ལུགས་ལ་བྱས་ན་ཞྭ་དཔེ་ལྷམ་ཁེབས་སུ་འགྱུར་ཞིང་ལག་ལེན་ཕལ་ཆེར་ཀྱང་དེང་སང་ནུབ་ལ། མ་ནུབ་པ་དོན་ཞགས་རྟོག་པ་ནས་གསུངས་པའི་ཐེག་ཆེན་གྱི་བསྙེན་གནས་སུ་གྲགས་པ་ཉིན་ཞག་གཅིག་པའི་མཐའ་ཅན་དང་། སྐྱབས་འགྲོའི་སྡོམ་པ་བྱང་ཆུབ་སྙིང་པོའི་བར་ལེན་པ་སྤྱོད་འཇུག་ནས་གསུངས་པ་སོགས་ཐེག་ཆེན་སོ་ཐར་གྱི་ལག་ལེན་འགའ་ཞིག་མ་ནུབ་པར་ཡོད་ལ། མདོ་ནས་ཚིག་གིས་ཟིན་ཙམ་ནི་དཀོན་ཅོག་བརྩེགས་པའི་ཁྱིམ་བདག་དྲག་ཤུལ་ཅན་གྱིས་ཞུས་པར། རྒྱལ་སྲས་བྱམས་པས་མཁན་པོ་མཛད་ནས། ཁྱིམ་བདག་དགུ་སྟོང་དང་། རྒྱལ་སྲས་འཇམ་དབྱངས་ཀྱིས་མཁན་པོ་མཛད་ནས་(༢༤༦བ)
ཁྱིམ་བདག་བདུན་སྟོང་རབ་ཏུ་བྱུང་ཞིང་བསྙེན་པར་རྫོགས་པར་མཛད་དོ། །ཞེས་གསུངས་པ་མཁན་པོ་བྱམས་པ་ལ་སོགས་པ་དབུ་སྐྲ་རིང་ཞིང་རྒྱན་དང་བཅས་པ་རྣམས་ཀྱིས་བསྒྲུབ་བྱ་ཁྱིམ་པའི་ཆ་ལུགས་ཅན་བསྙེན་པར་རྫོགས་ཚུལ་འདི་འདྲ་ནི་སྔོན་གྱི་ཆོ་ག་འཕགས་པ་རྣམས་ཀྱི་སྤྱོད་ཡུལ་ཁོ་ན་ཡིན་ནོ། །སྨྱུང་གནས་སོགས་ཀྱི་སྐབས་དོན་ཞགས་ནས་བཤད་པའི་གསོ་སྦྱོང་བླང་བ་འདི་ལ་ཐེག་ཆེན་ལུགས་ཀྱི་བསྙེན་གནས་སུ་གྲགས་ཀྱང་སྔར་བཤད་པ་ལྟར་ཉན་ཐོས་ལུགས་ཀྱི་བསྙེན་གནས་དང་མི་འདྲ་བའི་ཁྱད་པར་ཡོད་པ་དེ་དག་ཆོས་རྒྱུས་ཆུང་བ་རྣམས་ཀྱིས་དབྱེ་བ་མི་ཕྱེད་པར། སྨྱུང་གནས་ཀྱི་སྐབས་ཀྱང་ཉིན་སྔ་མ་སོ་ཐར་རིགས་བརྒྱད་ཀྱི་ནང་ཚན་གྱི་བསྙེན་གནས་ལེན་པ་སོགས་རྣམ་དབྱེ་མེད་པའི་ལག་ལེན་སྣ་ཚོགས་དར་ནས་བསྟན་པ་དྲི་བཅས་སུ་བྱེད་དོ། །དོན་ཞགས་ནས་བཤད་པའི་བསྙེན་གནས་དེ་བསྙེན་གནས་ཡིན་ཀྱང་སོ་ཐར་གྱི་བསྙེན་གནས་མ་ཡིན་པས་མཚོན་དབྱེ་ཚུལ་གྱི་སྤུ་རིས་མང་དུ་ཡོད་པས་གསལ་བའི་སྒྲོན་མེར་རབ་དབྱེ་ལས། བྱང་ཆུབ་སེམས་དཔའ་ཉིད་ལ་ཡང་། །སོ་སོ་ཐར་པ་འབོགས་པ་ཡི། །ཆོ་ག་འགའ་ཞིག་ཡོད་མོད་ཀྱི། །དེ་ཡི་ཆོ་ག་ཕལ་ཆེར་ནུབ། །གསོ་སྦྱོང་རང་གིས་བླང་བ་ཡི། །ཆོ་གའི་ལག་ལེན་འགའ་ཞིག་ཡོད། ཅེས་གསུངས་པ་ལྟར། ཐེག་ཆེན་ཐུན་མོང་མ་ཡིན་པ་ལའང་རིགས་བརྒྱད་ལ་སོགས་པའི་ཆོ་ག་སྔར་བྱུང་མོད། དགེ་བསྙེན་ཕ་མ་སོགས་རིགས་ཕྱི་མ་བདུན་འབོགས་པའི་ཆོ་གའི་ལག་ལེན་དིང་སང་ནུབ་ནས་མེད་ཅིང་། རིགས་བརྒྱད་ཀྱི་ནང་ཚན་བསྙེན་གནས་ཀྱི་སྡོམ་པ་འབོགས་པའི་ཆོ་ག །དིང་སང་ལག་ལེན་མ་(༢༤༧ན)
ནུབ་པར་ཡོད་ཅེས་གསུང་གི །སོ་ཐར་རིགས་བརྒྱད་ཀྱི་སྡོམ་པ་ལ། ཉན་ཐོས་དང་། ཐུན་མོང་བའི་ཆོ་ག་བླངས་པ་ཞིག་དགོས། ཞེས་པ་དང་། དོན་ཞགས་རྒྱུད་ནས་གསུངས་པའི་བསྙེན་གནས་ཀྱི་སྡོམ་པས་བསྙེན་གནས་ཀྱི་སྡོམ་པའི་གོ་མི་ཆོད་ཅེས་པ་དེ་འདྲ་གཏན་ནས་མ་གསུངས་པའི་ཕྱིར་རོ། །དབྱེ་བ་ཡང་། སྡེ་སྣོད་ཀྱི་སྒོ་ནས་འདུལ་བ། མངོན་པ། མདོ་སྡེ། རྒྱུད་སྡེ་ནས་བཤད་པའི་བསྙེན་གནས་ཀྱི་སྡོམ་པ་བཞི། གྲུབ་མཐའི་སྒོ་ནས། བྱེ་སྨྲའི་ལུགས་མདོ་སྡེ་པའི་ལུགས། གྲུབ་མཐའ་སྨྲ་བ་གོང་མའི་ལུགས། རིག་པ་འཛིན་པའི་ལུགས་དང་བཞི། མདོ་སྡེ་ནས་བཤད་ཚུལ། ཀུན་ཏུ་རྒྱུ་སེན་རིང་གིས་ཞུས་པའི་མདོ་ནས་བཤད་པའི་ཚུལ་དང་། དྲིན་ལན་བསབ་པའི་མདོ་ནས་བཤད་པའི་ཚུལ་གཉིས་ཡོད།ཆོ་གའི་སྒོ་ནས་དབྱེ་ན། བྱེ་སྨྲ་ལུགས་ཀྱི་ཆོ་གས་བླང་བ། མདོ་སྡེ་ལུགས་ཀྱི་ཆོ་གས་བླང་བ། ཉན་ཐོས་ཐུན་མོང་བའི་ཆོ་གས་བླང་བ། ཐེག་ཆེན་ཐུན་མོང་མ་ཡིན་པའི་ལུགས་ཀྱི་ཆོ་གས་བླང་པ་དང་བཞི། ཞེས་རྒྱས་པར་དབྱེ་བ་རྣམ་དཔྱོད་དང་ལྡན་པས་གསུང་ངོ་། །བསྙེན་གནས་ཀྱི་སྡོམ་པ་ལེན་ཡུལ་ལ། པཎ་ཆེན་བསོད་ནམས་གྲགས་པའི་འདུལ་བའི་སྤྱི་དོན་དུ་དགེ་བསྙེན་གྱིས་བདག་བསྙེན་གནས་པར་གཟུང་དུ་གསོལ་ཞེས་འབུལ་ཆོག་ཏུ་འགྲོ་སྟེ། ཞེས་དང་། གནད་འདི་མ་གོ་བར་དགེ་ཚུལ་དང་། དགེ་བསྙེན་གྱིས་བསྙེན་གནས་ལེན་འོས་པར་འདོད་པའི་གྲུབ་མཐའ་ངན་པ་འདི་བྱུང་ངོ་ཞེས་དང་། དགེ་བསྙེན་གྱིས་བསྙེན་གནས་པར་ཡན་ལག་རྣམས་བསྲུངས་པ་ཙམ་གྱིས་གསོ་སྦྱོང་ལ་གནས་པར་འགྱུར་རོ། །རྒྱུ་(༢༤༧བ)
མཚན་དེའི་ཕྱིར། ཁྱིམ་པའི་གསོ་སྦྱོང་དང་བསྙེན་གནས་ཀྱི་སྡོམ་པ་མུ་གསུམ་སྟེ། སྔ་མ་ཡིན་ལ་ཕྱི་མ་མིན་པ་ནི། ཡོངས་རྫོགས་དགེ་བསྙེན་གྱིས་ཉིན་ཞག་གི་གསོ་སྦྱོང་རང་གིས་ཁས་བླངས་པ་ལྟ་བུ་དང་། ཕྱི་མ་ཡིན་ལ་སྔ་མ་མིན་པ་ནི་དགེ་བསྙེན་གྱི་སྡོམ་པ་དང་མི་ལྡན་པས་བླངས་པའི་བསྙེན་གནས་ཀྱི་སྡོམ་པ་ལྟ་བུ་དང་། གཉིས་ཀ་མིན་པ་ནི་ཉིན་ཞག་ཕྱེད་པའི་བསྙེན་གནས་ལྟ་བུ་དང་། སོ་ཐར་གྱི་སྡོམ་པ་དང་མི་ལྡན་པས་ཕོག་པའི་བསྙེན་གནས་ལྟ་བུ་དང་། ཉིན་ཞག་གཅིག་ཏུ་སྲོག་གཅོད་རྐྱང་པ་སྤོང་བའི་བསྙེན་གནས་ལྟ་བུ་ཡིན་པའི་ཕྱིར། ཞེས་དང་། པཎ་ཆེན་ཤཱཀ་མཆོག་གིས་ཡོངས་རྫོགས་དང་ཚངས་པར་སྤྱོད་པའི་དགེ་བསྙེན་གྱི་སྡོམ་པ་ལ་གནས་པས་གནས་འཇོག་གི་མདོ་དང་། དགེ་བསྙེན་གྱི་སྡོམ་བརྒྱད་དང་། དོན་ཡོད་ཞགས་པའི་ཆོ་ག་ལས་ཇི་ལྟར་གསུངས་པ་བཞིན་དུ་བསྙེན་གནས་ཡན་ལག་བརྒྱད་པ་ཚང་མར་ནོད་དུ་རུང་བ་མ་ཡིན་ཏེ། རྩ་བ་བཞི་ཇི་སྲིད་འཚོའི་བར་དུ་བསྲུང་བའི་སྡོམ་པ་ལ་གནས་བཞིན་དུ། རྩ་བ་བཞི་ཉིན་ཞག་གཅིག་ཏུ་བསྲུང་བར་ཁས་བླངས་པ་ལ་དགོས་པ་མེད་པར་མ་ཟད། དེ་ལྟར་ལེན་པ་དེ་སྡོམ་པ་སྔ་མའི་གཏོང་རྒྱུར་སོང་བའི་ཉེས་དམིགས་ཡོད་པའི་ཕྱིར། ཞེས་འབྱུང་ལ། ཀླུ་སྒྲུབ་རྗེའི་སྡོམ་གསུམ་འགྲེལ་པར། ཁྱེད་རང་གིས་ཁྱིམ་པའི་གསོ་སྦྱོང་དང་བསྙེན་གནས་ཀྱི་སྡོམ་པ་ལ་མུ་བཞི་བཤད་ཅིང་། བསྙེན་གནས་ཀྱི་སྡོམ་པ་ཡིན་ལ་གསོ་སྦྱོང་མ་ཡིན་པ་ནི་དགེ་བསྙེན་གྱི་སྡོམ་པ་དང་མི་ལྡན་པས་བླངས་པའི་བསྙེན་གནས་ཀྱི་སྡོམ་པ་ལྟ་བུ་གསོ་སྦྱོང་ཡིན་ལ། བསྙེན་གནས་ཀྱི་སྡོམ་པ་མ་ཡིན་པ་ནི་ཡོངས་རྫོགས་(༢༤༨ན)
དགེ་བསྙེན་གྱི་ཉིན་ཞག་གཅིག་པའི་གསོ་སྦྱོང་གཞན་ལ་མ་བལྟོས་པར་རང་གིས་བླངས་པ་ལྟ་བུ། གཉིས་ཀ་ཡིན་པ་ནི་ཡོངས་རྫོགས་དགེ་བསྙེན་གྱིས་ཉིན་ཞག་གཅིག་པའི་གསོ་སྦྱོང་བླངས་པ་ལྟ་བུ།གཉིས་ཀ་མིན་པ་ནི་ཉིན་ཞག་ཕྱེད་པའི་བསྙེན་གནས་ལྟ་བུའོ། །ཞེས་བཤད་པ་དེ་ཐུགས་ལ་ཨེ་གསལ། དེ་ཐུགས་ལ་གསལ་ན་ཉིན་ཞག་གཅིག་པའི་བསྙེན་གནས་ཀྱི་སྡོམ་པ་བླངས་མ་ཐག་པའི་ཡོངས་རྫོགས་དགེ་བསྙེན་ཆོས་ཅན། ཁྱོད་ཀྱི་རྩ་བཞི་ཇི་སྲིད་འཚོའི་བར་དུ་སྤོང་བའི་སྡོམ་པ་དེ་བཏང་བར་ཐལ། ཁྱོད་དེ་ལྟ་བུའི་སྡོམ་པ་ཡོད་བཞིན་དུ་རྩ་བ་བཞི་ཉིན་ཞག་གཅིག་གི་མཐའ་ཅན་དུ་སྤོང་བའི་སྡོམ་པ་ཁས་བླངས་མ་ཐག་པ་ཡིན་པ་གང་ཞིག །དེ་དེའི་གཏོང་རྒྱུ་ཡིན་པའི་ཕྱིར། འཁོར་གསུམ་ཨེ་དྲན། དེ་ལ་མཁས་པ་ན་རེ། ཡོངས་རྫོགས་དགེ་བསྙེན་དེས་བསྙེན་གནས་པར་ཁས་བླངས་ནས་ཡན་ལག་ལྷག་མ་བསྲུངས་པ་ཙམ་གྱིས་གསོ་སྦྱོང་ལ་གནས་པར་འགྱུར་རོ། །ཞེས་ཁས་བླངས་ཀྱིས། བསྙེན་གནས་ཡན་ལག་བརྒྱད་ཚང་བར་ནོད་པར་ཁས་མ་བླངས་པས་སྐྱོན་མེད་ཅེ་ན། ཤིན་ཏུ་ཡང་མི་རིགས་ཏེ། མཛོད་འགྲེལ་ལས། ཡན་ལག་བརྒྱད་ཚང་བར་ནོད་བར་བྱའི། མ་ཚང་བར་ནི་མ་ཡིན་ནོ། །ཞེས་བཤད་པས། ཡན་ལག་བརྒྱད་ཚང་བར་མ་ནོད་པའི་བསྙེན་གནས་སྡོམ་པ། མཁས་པ་དགྱེས་པའི་དགའ་སྟོན་མ་ཡིན་པའི་ཕྱིར་དང་། དགེ་ཚུལ་གྱིས་བསྙེན་གནས་པར་ཁས་བླངས་ན་དགེ་ཚུལ་སྡོམ་པའི་གཏོང་རྒྱུར་འགྱུར་ན། ཡོངས་རྫོགས་དགེ་བསྙེན་གྱིས་བསྙེན་གནས་པར་ཁས་བླངས་ན་དགེ་བསྙེན་(༢༤༨བ)
སྡོམ་པའི་གཏོང་རྒྱུར་མཚུངས་པའི་ཕྱིར་རོ། །ཞེས་དང་། གསལ་བའི་སྒྲོན་མེར། མཁས་པ་ཤཱཀྱ་མཆོག་ལྡན་སོགས་འགའ་ཞིག་དགེ་ཚུལ་ཕ་མ་ཡན་ཆད་ཀྱི་རབ་ཏུ་བྱུང་བས་འདི་བླང་དུ་མི་རུང་སྟེ། རྩ་བཞི་ཇི་སྲིད་འཚོའི་མཐའ་ཅན་དུ་བསྲུང་བའི་སྡོམ་པ་ཡོད་བཞིན་དུ་རྩ་བཞི་ཉིན་ཞག་གཅིག་གི་མཐའ་ཅན་དུ་ཁས་བླངས་ན། སྡོམ་པ་སྔ་མ་དེའི་གཏོང་རྒྱུར་ཐལ་བའི་སྐྱོན་ཡོད་གསུང་བ་ནི་རིགས་པ་ཚིག་ལ་ཤོར་བ་སྟེ། དེ་ལྟར་ན་ཡོངས་རྫོགས་དགེ་བསྙེན་གྱིས་ཀྱང་དེ་བླང་དུ་མི་རུང་བར་འགྱུར་ཏེ། རྒྱུ་མཚན་ཁྱེད་རང་གིས་བཀོད་པ་དེའི་ཕྱིར་རོ། །དེས་ན་ཁྱིམ་པ། དགེ་བསྙེན། དགེ་ཚུལ། དགེ་སློང་སོགས་གང་གིས་ཀྱང་བླངས་ཆོག་སྟེ། སྨན་བླའི་མདོ་ཆོག་སོགས་ལས་དེ་ལྟར་བཤད་པས་སོ། །ཞེས་པའང་བྱུང་པས། པཎ་ཆེན་རྣམ་གཉིས་ཀྱི་དགེ་བསྙེན་དང་བསྙེན་གནས་ལ་མུ་གསུམ་དང་བཞིར་དབྱེ་བ་ནི་ན་ཡམས་ཙམ་ལས་རང་ཚིག་དང་མི་འགལ་བའི་ཚིག་དོན་དཔྱད་པའི་མཛུབ་བཙུགས་མི་སྣང་ཞིང་། ཀུན་མཁྱེན་ཀླུ་སྒྲུབ་རྗེའི་གསུང་འདི་སྐོར་ནུས་པ་ཆེ་བར་མ་ཟད་དགེ་བསྙེན་གྱི་སྤང་བྱ་ལྔ་པོ་ཉིན་ཞག་གཅིག་པའི་མཐའ་ཅན་དུ་ཁས་མ་བླངས་ཤིང་། གླུ་གར་སོགས་ཁས་བླངས་པའི་དབྱེ་ཚུལ་ཤིན་ཏུ་དཀའ་ལ། ཉན་ཐོས་ཀྱི་བསྙེན་གནས། དགེ་ཚུལ་སློང་གིས་བླངས་པ་ཚད་ཐུབ་གྱི་རིགས་ལ་བྱུང་ཚོད་མི་འདུག་པས་པཎ་ཆེན་བསོད་གྲགས་པའི་གསུང་དེ་ཡང་པཎ་ཤཱཀ་པ་ལྟར་དོན་ཞགས་སོགས་ནས་བཤད་པའི་བསྙེན་གནས་ལ་དགོངས་པ་འདྲ། སྡོམ་པ་དང་མི་ལྡན་པའི་ཁྱིམ་པས་བསྙེན་གནས་བླངས་པ་བསྙེན་གནས་ཡིན་ལ་གསོ་སྦྱོང་མིན་པ་མི་འཐད་རྒྱུ་མེད་ཀྱང་ཡོངས་རྫོགས་དགེ་(༢༤༩ན)
བསྙེན་གྱིས་གསོ་སྦྱོང་བླངས་པ་དེ་གང་ཟག་གམ་རྟེན་གྱི་དྲུང་དུ་བླངས་ན་ཆོ་ག་གཅིག་པས་བསྙེན་གནས་མ་ཡིན་པའི་མུར་འགྲོ་དོན་མེད་པས་ཆོ་ག་མེད་པར་ཡན་ལག་བརྒྱད་སྤོང་སྙམ་ཙམ་གྱིས་ནི་གོ་ཆོད་ན་ཉིས་བརྒྱ་ལྔ་བཅུ་རྩ་གསུམ་སྤོང་སྙམ་པ་ཙམ་གྱིས་དེ་དགེ་སློང་དུ་ཐལ་བའི་སྐྱོན་ཡོད་ཅིང་། སྡོམ་པ་གཟུགས་ཅན་དུ་འདོད་པའི་ལུགས་ཀྱི་ཡོངས་རྫོགས་དགེ་བསྙེན་གྱིས་ཉན་ཐོས་ལུགས་ཀྱི་གསོ་སྦྱོང་བླངས་ན་གཉིས་ཀ་གཟུགས་ཅན་ཡིན་པས།པཎ་ཆེན་གཉིས་ཀ་ཞབས་འདྲེད་ལྷན་ཅིག་ཏུ་ཤོར།ཐེག་ཆེན་ལུགས་ལ་བསྙེགས་ན་དགེ་བསྙེན་གྱི་སྡོམ་པ་གཟུགས་ཅན་ཐེག་ཆེན་གྱི་བསྙེན་གནས་ཤེས་པར་འདོད་པས། ཤེས་པའི་སྡོམ་པ་བླངས་ནས་ཉིན་ཞག་གཅིག་སྤོང་བར་ཁས་བླངས་པས་གཟུགས་ཅན་གྱི་སྡོམ་པ་མ་ཤི་བར་དུ་ཁས་བླངས་པ་ལ་དང་ལུང་པ་མི་གཅིག་པས་གཏོང་དོན་ཡང་མི་འདུག་ཅིང་། ཞེ་འདོད་དེ་འདྲས་དོན་ཞགས་སོགས་གསུང་རབ་གཞན་གྱི་བཤད་ཁུངས་ལ་ཆུ་བུན་གྱི་ཚོས་རྒྱ་ལས་མ་འདས་པས་མི་གསུང་བར་གསོལ་བ་འདེབས་ཤིང་། བསྙེན་གནས་མ་ཡིན་ལ་ཁྱིམ་པའི་གསོ་སྦྱོང་ཡིན་པའི་ཆོ་ག་ཐེག་པ་གོང་མ་རྣམས་དང་གཏན་ནས་མ་འདྲེས་པའི་ཉན་ཐོས་རང་སྐད་ཅིག་འཆད་རྒྱུ་ཡོད་ན་དགོངས་ཇ་བུ་རམ་དང་བཅས་ཉན་པར་སྤྲོ་བ་ལགས། བྱང་སེམས་དང་སྔགས་སྡོམ་ཐོབ་པས་ཡོངས་རྫོགས་དགེ་བསྙེན་གྱི་སྡོམ་པ་དེ་གནས་འགྱུར་དུ་འདོད་པའི་ལུགས་ལྟར་ན་ཉན་ཐོས་ཀྱི་བསྙེན་གནས་བླངས་པས་ཁས་བླངས་ཀྱི་ལྡོག་ཆས་དགེ་བསྙེན་གཏོང་ངམ་ཁ་གསོར་འགྲོ་ལ་དཔྱད་རྒྱུ་ཞིག་སྣང་ངོ་། །མི་བསྐྱོད་རྡོ་རྗེའི་ཉི་མ་ཆེན་པོར་བསྙེན་(༢༤༩བ)
གནས་དགེ་བསྙེན་གྱི་གསོ་སྦྱོང་ཡིན་གསུང་བ་ཐེག་པ་ཆེ་ཆུང་གི་དབྱེ་བ་དོད་ནས་གསུངས་མ་གསུངས་ལ་ཐེ་ཚོམ་འདུག་ཅིང་། དགས་རྒྱུད་པའི་རིགས་ཀྱིས་ལུང་རིགས་འཕྲོད་པའི་དམ་བཅའ་མེད་པར་ན་ཡམས་ཀྱིས་གཞན་ཟེར་ཚིག་རྗེས་འབྲང་བར་མཐའ་མ་བཀག །ཀུན་མཁྱེན་བུའི་ལས་ཆོག་ཏུ་འདི་དགེ་བསྙེན་རྣམས་ཀྱི་དགེ་བའི་རྩ་བ་གསོ་ཞིང་སྡིག་པ་སྦྱོང་བས་དགེ་བསྙེན་གྱི་ཚེས་བརྒྱད་སོགས་ལ་རྟག་ཏུ་བསྲུང་དགོས་ཤིང་དགེ་བསྙེན་གྱི་གསོ་སྦྱོང་ཡིན་པས་གསོ་སྦྱོང་ཞེས་གསུངས། འོ་ན་དགེ་བསྙེན་མིན་པས་དེ་མི་བྱེད་དམ་ཞེ་ན། མཛོད་དུ། གཞན་ལའང་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་པས་དགེ་བསྙེན་མ་ཡིན་པ་གཞན་གྱིས་ཀྱང་དཀོན་ཅོག་གསུམ་ལ་སྐྱབས་སུ་སོང་ནས་བསྙེན་གནས་ཀྱི་སྡོམ་པ་འདོད་ན་སྐྱེ། སྐྱབས་སུ་མ་སོང་ན་མི་སྐྱེའོ། །ཞེས་དང་། སློབ་དཔོན་བྱང་ཆུབ་བཟང་པོའི་དགེ་བསྙེན་གྱི་སྡོམ་པའི་བཤད་པའི་གཞུང་ལས་ཀྱང་། དགེ་བསྙེན་གྱི་སྡོམ་པ་དང་སྒྲེལ་ནས་གསུངས་ཏེ། ཇི་སྐད་དུ། དེ་ལྟ་བུ་འདི་ནི་ཡན་ལག་ལྔ་ཡོངས་སུ་རྫོགས་པའི་དགེ་བསྙེན་གྱི་སྡོམ་པར་འགྱུར་རོ། །ཉིན་དང་མཚན་དུ་བསྙེན་གནས་ཀྱི་སྡོམ་པ་བརྒྱད་བླང་བར་འདོད་ན་ཉི་མ་འཆར་བའི་སྔོན་དུ་དེ་བླང་བར་བྱའོ། །ཞེས་དང་། དེས་མཚོན་འདུལ་འཛིན་ལ་ལ་བསྙེན་གནས་དེ་ཁྱིམ་པའི་གསོ་སྦྱོང་ཡིན་པས་དགེ་བསྙེན་གྱི་བླངས་ཆོག་པར་བཞེད་པ་སྔ་རབས་ཀྱི་བཤད་ཚོད་མཐའ་དག་ལ་ཆ་མ་འཚལ་མོད། ཆོས་རྗེ་བུ་སྟོན་རྩོད་དུས་ཀྱི་ཐམས་ཅད་མཁྱེན་པ་ཡོངས་གྲགས་ཡིན་པས་ཉན་ཐོས་རང་སྐད་ལ་དེ་(༢༥༠ན)
ལྟར་བླང་རུང་བའི་ཁུངས་ཤིག་ཡོད་དམ་སྙམ་པས། ཁོ་བོའི་མིག་དཀྱུས་ཐུང་ངུས་མ་བརྙེད་ཀྱང་དཔྱོད་ལྡན་རྣམས་ཀྱིས་སྤྱན་གྱི་ཟུར་མདའ་རྒྱང་རིང་དུ་འཕེན་པར་ཞུ། སོ་ཐར་རིགས་བདུན་གང་ཐོབ་ཀྱང་ཐེག་ཆེན་གྱི་བསྙེན་གནས་ལེན་པར་ཚུལ་ཁྲིམས་ཕུང་པོའི་མདོར། །རིགས་བརྒྱད་སྔོན་དུ་སོང་བ་ཡིས། །ཉིན་བཞིན་དུ་ནི་གསོ་སྦྱོང་བླང་། །འདི་ནི་ཚུལ་ཁྲིམས་རྣམ་དག་འགྱུར། ཞེས་དང་། དོན་ཡོད་ཞགས་པ་ལས། བཅོམ་ལྡན་འདས་གང་ཡང་རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ཕའམ། དགེ་སློང་མའམ། དགེ་བསྙེན་ཕའམ། དགེ་བསྙེན་མའམ། དེ་ལས་གཞན་པའི་སེམས་ཅན་སུ་ཡང་རུང་བས། དོན་ཡོད་ཞགས་པའི་སྙིང་པོའི་ཆེད་དུ་ཡར་ངོའི་ཚེས་བརྒྱད་ལ་སྨྱུང་བར་བགྱིས་ཏེ། གཞན་མི་སྨྲ་བར་དོན་ཡོད་ཞགས་པའི་སྙིང་པོ་ལན་བདུན་བཟླས་བརྗོད་བགྱིད་ན། བཅོམ་ལྡན་འདས་དེས་ཚེ་འདི་ཉིད་ལ་ཕན་ཡོན་ཉི་ཤུ་རྩ་གཅིག་འཐོབ་བར་འགྱུར་ཏེ། ཞེས་དང་། རྗེ་བཙུན་རྩེ་མོའི་གཟུངས་ཆོག་ལས། དེ་ལྟར་མཆོད་པའང་གཏོར་མའི་རྗེས་ལ། འཕགས་པའི་རྗེས་སུ་བཟླས་པ་བྱེད་པར་བསམ་ཞིང་རང་གི་གསོ་སྦྱོང་གི་ཚིག་ལན་གསུམ་བརྗོད་ལ་བདག་སྡོམ་པ་དང་ལྡན་པར་བྱའོ། །འདི་ནི་རབ་ཏུ་བྱུང་བའི་ཕྱོགས་ལའང་བྱ་དགོས་ཏེ། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། ཞེས་བྱ་བ་ལ་སོགས་པ་ཐེག་པ་ཆེན་པོའི་ལུགས་ཡིན་པའི་ཕྱིར་རོ། །ཞེས་དང་། སྨན་བླའི་མདོ་ཆོག་ལས། འཇམ་དཔལ་གཞན་ཡང་འཁོར་གྱི་དགེ་སློང་དང་དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་དང་། གཞན་ཡང་དད་པའི་རིགས་ཀྱི་(༢༥༠བ)
བུའམ་རིགས་ཀྱི་བུ་མོ་གང་དག་ཡན་ལག་བརྒྱད་དང་ལྡན་པའི་བསྙེན་གནས་ལ་ཉེ་བར་གནས་ཏེ། ལོ་གཅིག་གམ་ཟླ་བ་གསུམ་དུ་བསླབ་པའི་གཞི་རྣམས་འཛིན། ཞེས་སོགས་གསུངས་པས་ཀྱང་ཤེས་ནུས་སོ། །གཉིས་པ་ཆོ་ག་དངོས་ལ་སྦྱོར་དངོས་རྗེས་གསུམ། དང་པོ་སྦྱོར་བ་ལ། གནས་ཁང་བྱི་དོར་བྱས། མེ་ཏོག་ཕྲེང་རྒྱུད་ལས། དགའ་སྟོན་དུས་ཚེ་སྐུ་གཟུགས་ནི། །རྒན་པོའི་གོང་དུ་རྟག་ཏུ་བཞུགས། །སངས་རྒྱས་ཆོས་དང་དགེ་འདུན་དང་། །འཇིག་རྟེན་གསུམ་སྣང་ཁྱབ་བདག་ཡིན། །ཞེས་སློབ་དཔོན་གྱི་མཐའ་ལོགས་སུ་བཅོམ་ལྡན་འདས་ཤཱཀྱ་སེང་གེའི་སྐུ་གཟུགས་ཀྱི་སྤྱན་སྔར་མཆོད་པ་ཅི་འབྱོར་བ་བཤམས། མཛོད་ལས། དམའ་བར་འདུག་སྨྲ་བཟླས་པ་ཡིས། །མི་བརྒྱན་ནམ་ནི་ནང་པར་རུ། །བསྙེན་གནས་ཡན་ལག་ཚང་བར་ནི། །ནང་པར་གཞན་ལས་ནོད་པར་བྱ། ཞེས་བསྒྲུབ་བྱ་གྲངས་སུ་མ་བཅད་པ་ཇི་ཙམ་ཚོགས་པ་དག་ཁྲུས་བྱས་གོས་རྒྱན་གསར་མཆོད་མི་བྱ་ཞིང་། སྐྱ་རེངས་མཐའ་མ་ཤར་བའི་ལག་རིས་མཐོང་དུས་འཚོགས་ཏེ་ཕྱག་ལན་གསུམ་བཙལ། སྟན་མེད་པའམ་དམའ་བར་ལུས་ཀྱི་སྤྱོད་ལམ་པུས་མོ་གཡས་པའི་ལྷ་ང་ས་ལ་བཙུགས་ཤིང་། ནད་པ་ཡིན་ན་སྤྱོད་ལམ་གང་བདེ་བྱས་ཐལ་མོ་སྦྱར་ནས་འདུག་པར་བྱའོ། །གཉིས་པ་དངོས་གཞི་ནི། མདོ་ལས། མིར་གྱུར་པ་ཡང་རྙེད་པར་དཀའ། དལ་བ་འབྱོར་པ་ཕུན་སུམ་ཚོགས་པ་ཡང་རྙེད་པར་དཀའ། ཞེས་གསུངས་པ་ལྟར་སྤྱིར་མིའི་ལུས་དང་། དེའི་ནང་ནས་ཀྱང་མི་ཁོམ་པའི་གནས་བརྒྱད་སྤང་ཞིང་། དལ་བ་བརྒྱད་དང་འབྱོར་བ་བཅུ་ཚང་བའི་མིའི་(༢༥༡ན)
ལུས་རྣམ་པར་དག་པ་འདི། བཤེས་སྤྲིང་ལས། རྒྱ་མཚོ་གཅིག་ན་གཉའ་ཤིང་བུག་པ་དང་། རུས་སྦལ་ཕྲད་པ་བས་ཀྱང་དུད་འགྲོ་ལས། མི་ཉིད་ཆེས་ཐོབ་དཀའ་བས་མི་དབང་གིས། དམ་ཆོས་སྤྱོད་པས་དེ་འདྲས་འཆིས་པར་མཛོད། །ཅེས་རྒྱ་མཚོ་ཆེན་པོ་ན་གསེར་གྱི་གཉའ་ཤིང་བུག་པ་གཅིག་པ་དང་། རུས་སྦལ་ལོང་བ་ཞིག་ཡོད་པ་ལོ་བརྒྱ་ཙམ་ན་ཆུའི་རླབས་ཀྱིས་གཉའ་ཤིང་དེ་ཆུའི་ཁར་གཡེང་བ་དང་། རུས་སྦལ་དེ་ཡང་སྟེང་དུ་འོང་བ་གཉིས་འཕྲད་དེ་ཕུག་པར་མགྲིན་པ་ཆུད་པ་དཔེར་བཟུང་ནས་མི་ཁོམ་པའི་གནས་རྣམས་སུ་ལུས་གྲངས་མེད་པ་བླངས་པའི་མཐར། དལ་འབྱོར་གྱི་མི་ལུས་ལན་རེ་ཙམ་བརྙེད་པ་འདི་ཆུད་མ་ཟོས་པར་གཏན་གྱི་བདེ་འབྲས་བསྒྲུབས་ནས་སྙིང་པོ་ཞིག་ལེན་དགོས་ཏེ། ཞི་བ་ལྷས། མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། གྲུ་འདི་ཕྱིས་ནས་རྙེད་དཀའ་བས། རྨོངས་པ་དུས་སུ་གཉིད་མ་ལོག །ཅེས་འཁོར་བ་གཏིང་མཐའ་མེད་པ་སྡུག་བསྔལ་གྱི་རྒྱ་མཚོ་ཆེན་པོ་ལས་སྒྲོལ་བར་བྱེད་པའི་ཐབས་རྫིངས་ལྟ་བུ་ནི་མི་ལུས་ཏེ། དེ་ལ་བརྟེན་ནས་ཐར་པ་རིན་པོ་ཆེའི་གླིང་དུ་བགྲོད་པར་བྱེད་པ་ཡིན་ལ། དལ་འབྱོར་གྱི་མི་ལུས་ཐོབ་པ་ཙམ་གྱིས་ཆོག་གམ་སྙམ་ན། བཤེས་སྤྲིང་ལས། ཚེ་འདི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་བུར་བས་ཀྱང་མི་རྟག་ན། །དབུགས་འབྱུང་དབུགས་རྔུབ་གཉིད་ཀྱི་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་རླུང་གིས་བསྐྱོད་པའི་ཆུའི་ལྦུ་བ་ནི་སྐད་ཅིག་ལ་འཇིག་པ་ལྟར་ཚེ་ལ་སྣོན་པ་ཉུང་ཞིང་འགྲིབ་བྱེད་བར་མ་ཆད་དུ་ཡོད་པ། (༢༥༢ན)
ཁང་ཁྱིམ་གྲུ་རྫིངས། ཟས་སོགས་གསོན་རྐྱེན་རྣམས་ཀྱང་འགྱེལ་བ། རྡིབ་པ། མི་འཕྲོད་པ་སྟེ་འཆི་རྐྱེན་དུ་སོང་བས་མཚོན། དབུགས་འབྱུང་རྔུབ་དང་གཉིད་ལོག་པའི་བར་དུ་མི་འཆི་བར་སད་རྒྱུ་ཡོད་པ་ངོ་མཚར་ཆེ་བར་གསུངས་ཤིང་། རྒྱལ་བ་བཙོང་ཁ་པ་ཆེན་པོས་མཛད་པའི་ཚངས་ཅོད་མ་ལས། རྙེད་དཀའ་དོན་ཆེའི་དལ་འབྱོར་ཐོབ་པ་ཡང་། །སྟོབས་ཀྱིས་མི་བཟློག་འབྲོས་པར་མི་ནུས་པའི། །སྟོབས་ལྡན་འཆི་བདག་ཕོ་ཉ་བཀྱེ་བ་དང་། ན་དང་རྒ་བས་ཟིན་པར་མཐོང་ན་ཡང་། །ནམ་འཆི་ངེས་མེད་འཆི་བའི་དུས་ཀྱི་ཚེ། །ཐམས་ཅད་དོར་ནས་འགྲོ་བ་ཤེས་བཞིན་དུ། །ལོ་ཟླ་ཞག་རྣམས་དོན་མེད་འདའ་བྱེད་པའི། །རབ་རྨོངས་བདག་ལ་བརྩེ་བའི་དུས་ལ་བབ། །ཅེས་གསུངས་པ་ལྟར་ཡིན་ཞིང་། སྤྱོད་འཇུག་ལས། དེ་རིང་ཁོ་ན་མི་འཆི་ཞེས། །བདེ་བར་འདུག་པ་རིགས་མ་ཡིན། ཞེས་ད་ལྟ་གཞོན་པའི་དུས་ཚེ་འདིའི་མདུན་བཤོམས་བྱས་ནས་ནམ་ཕུགས་ཕྱི་མའི་བདེ་བ་སྒྲུབ་སྙམ་ན་དེ་འདྲ་ཕར་བཞག །དོ་ནུབ་ལྟ་བུ་གཟའ་གདོང་ཐུག་པ་འམ། གཡང་དུ་ལྷུང་བ་ལྟ་བུ་གློ་བུར་བའི་རྐྱེན་ཞིག་གིས་ཚེའི་དུས་བྱས་ནས་སང་གི་གནས་སྐབས་སུ་བར་དོའམ། ད་ལྟའི་ལུས་འདི་དང་དབྱིབས་མི་འདྲ་བ་ཞིག་ཏུ་མི་སྐྱེ་བའི་ངེས་པ་མེད་པས་ཕྱི་བཤོལ་གྱི་དབང་དུ་མ་སོང་བར་དལ་བ་དོན་ལྡན་དུ་བསྒྲུབ་དགོས་ཏེ། མགོན་པོ་ཀླུ་སྒྲུབ་ཀྱིས། མགོ་འམ་གོས་ལ་གློ་བུར་མེ་ཤོར་ན། །དེ་ལ་བཟློག་ཕྱིར་བགྱི་བ་བཏང་ནས་ཀྱང་། །ཡང་སྲིད་མེད་པར་བགྱི་སླད་འབད་འཚལ་ཏེ། །དེ་བས་ཆེས་མཆོག་དགོས་པ་གཞན་མ་མཆིས། །ཞེས་ཚེ་འདིར་གཅེས་སྤྲས་སུ་བྱ་ཡུལ་ནི་ལུས་ཡིན་ལ། དེ་ལ་གནོད་པའི་མེ་མགོ་(༢༥༢ན)
དང་གོས་སོགས་ལ་འབར་ན་དེ་ཞི་བར་བྱེད་པའི་ཐབས་ལ་སྤྱིར་རིགས་མེད། བྱེ་བྲག་ཏུ་ཆོས་བསྒྲུབ་པའི་བགེགས་སུ་འགྲོ་བ་ཞིག་འདུག་ན་ལྡོག་བྱེད་དེ་ཡང་བཤོལ་ཏེ་བརྩོན་པ་ཆེན་པོས་བསྒྲུབ་དགོས་པར་གསུངས་ཤིང་། བསྒྲུབ་བྱ་དམ་པའི་ཆོས་དེ་ཡང་དཔལ་ལྡན་ཟླ་བ་གྲགས་པས། སྦྱིན་སོགས་ཆོས་གསུམ་དེ་དག་ཕལ་མོ་ཆེ། །བདེ་བར་གཤེགས་པས་ཁྱིམ་པ་རྣམས་ལ་བསྔགས། །བསོད་ནམས་ཞེས་བྱའི་ཚོགས་ཀྱང་དེ་ཉིད་དེ། །སངས་རྒྱས་གཟུགས་ཀྱི་བདག་ཉིད་སྐུ་ཡི་རྒྱུ། །ཞེས་ཕ་རོལ་ཏུ་ཕྱིན་པ་དྲུག་གི་ནང་ནས་སྦྱིན་པ་ཚུལ་ཁྲིམས་བཟོད་པ་གསུམ་ཡིན་ཞིང་། དེའི་ནང་ནས་ཀྱང་ཚུལ་ཁྲིམས་ནི། སོ་སོ་སྐྱེ་བོ་རྣམས་དང་གསུང་སྐྱེས་དང་། །རང་བྱང་ཆུབ་ལ་བདག་ཉིད་ངེས་རྣམས་དང་། །རྒྱལ་སྲས་རྣམས་ཀྱི་ངེས་པར་ལེགས་པ་དང་། །མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་མངོན་མཐོ་དང་ངེས་ལེགས་ཀྱི་རྒྱུའི་གཙོ་བོ་ཚུལ་ཁྲིམས་བསྲུང་བ་ལ་རག་ལུས་ཤིང་། དེ་ཉིད་ལས། སྦྱིན་པས་ལོངས་སྤྱོད་དག་ནི་འགྲོ་ངན་ནའང་། །སྐྱེ་བོ་ཚུལ་ཁྲིམས་རྐང་པ་ཉམས་ལས་འབྱུང་། །ཞེས་ཚེ་རབས་སྔ་མ་རྣམས་སུ་རྒྱ་ཆེར་བཏང་བས་མཚོན། བཟོད་པ་བསྒོམ་པ་སོགས་ཕར་ཕྱིན་གཞན་གྱི་ཚོགས་ཇི་ཙམ་བསགས་པའི་འབྲས་བུ་ལྷ་མིའི་རྟེན་ལ་ལོངས་སྤྱོད་པའང་ཚུལ་ཁྲིམས་ཀྱི་རྗེས་སུ་འགྲོ་ཞིང་། ཚུལ་ཁྲིམས་མ་བསྲུངས་བ་དང་། ཉམས་ན་འབྲས་བུ་དུད་འགྲོ་སོགས་འགྲོ་བ་གཞན་གྱི་རྟེན་ལ་ལོངས་སྤྱོད་དགོས་པས་བསླབ་ཁྲིམས་ལ་གནས་པར་རག་ལུས་ལ། དེ་ལའང་འདུལ་བ་རྒྱ་མཚོའི་སྙིང་པོ་ལས། ཁྱིམ་པའི་སྡོམ་པ་དང་པོ་གསུམ། །ཞེས་པའི་(༢༥༢བ)
ནང་ཚན་ཇི་སྲིད་འཚོ་བར་དུ་བསྲུང་བ་དགེ་བསྙེན་ཕ་མའི་ཁྲིམས། ཉིན་ཞག་གཅིག་གི་བར་དུ་བསྲུང་བ་ཡན་ལག་བརྒྱད་པའི་ཁྲིམས་དང་གསུམ་ལས། བསྙེན་གནས་ཀྱི་སྡོམ་པ་ནི་བྱ་སླ་ཞིང་ཕན་ཡོན་ཤིན་ཏུ་ཆེ་བ། གནས་འཇོག་གི་མདོ་ལས། གདྒཱ་ལ་སོགས་པའི་ཆུ་ཀླུང་ཆེན་པོ་ལྔ་དང་། རྒྱ་མཚོ་ཆེན་པོའི་ཆུ་བུམ་པའི་གྲངས་ཀྱིས་བཟུང་བར་ནུས་ཀྱི། བསྙེན་གནས་ཀྱི་ཕན་ཡོན་གྱི་ཚད་བཟུང་བར་མི་ནུས་ཤིང་། འཛམ་བུའི་གླིང་གང་བའི་དགྲ་བཅོམ་པ་ལ་རིན་པོ་ཆེ་ལ་སོགས་པའི་ཡོ་བྱད་ཐམས་ཅད་སྦྱིན་པའི་བསོད་ནམས་ཀྱིས་བསྙེན་གནས་ཀྱི་བསོད་ནམས་ཀྱི་བརྒྱའི་ཆར་ཡང་མི་འགྲོ། སྟོང་གི་ཆར་ཡང་མི་འགྲོ། ཞེས་ཁྲིམས་ལན་ཅིག་བླངས་ནས་བསྲུངས་པའི་བསོད་ནམས་ཀྱི་ཚད་གཞལ་མི་ནུས་པར་མ་ཟད། འབྲས་བུ་གནས་སྐབས་སུ་ལྷ་མིའི་རྟེན་བཟང་པོ་རྒྱུད་མར་འབྱུང་ཞིང་འོ་སྐོལ་གྱི་སྟོན་པའི་བསྟན་པ་ལ་བསྙེན་གནས་ཀྱི་ཁྲིམས་བསྲུངས་པ་ལ་བརྟེན་ནས་བསྐལ་བཟང་གི་སངས་རྒྱས་ལྔ་པ་མ་ཕམ་མགོན་པོས་འཛམ་བུའི་གླིང་དུ་ཆོས་ཀྱི་འཁོར་ལོ་བསྐོར་བའི་འདུས་པ་དང་པོར་སྐྱེས་ནས་གྲོལ་བ་ཐོབ་བར་གསུངས་པ། བྱམས་པ་ལུང་བསྟན་པའི་མདོ་ལས། བཅུ་བཞི་དང་ནི་བཅོ་ལྔ་དང་། །དེ་བཞིན་ཟླ་གཅིག་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་བ་ལ། །ཡན་ལག་བརྒྱད་ལེགས་མཉམ་གཞག་ཅིང་། །བསྙེན་གནས་གསོ་སྦྱོང་བྱས་ནས་ནི། །ང་ཡི་བསྟན་ལ་ལྷགས་སོ་ཞེས། །དོན་འདི་རབ་ཏུ་གསུང་བར་འབྱུང་། ཞེས་བྱུང་ལ། དེ་བས་ཀྱང་ཆེས་ལྷག་པ་བླ་ན་མེད་པ་རྫོགས་པའི་བྱང་ཆུབ་ཐོབ་པར་འགྱུར་བའི་རྒྱུ་མཚན་བརྒྱ་བྱིན་གྱིས། །ཟླ་བ་ཡར་གྱི་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་བ་ལ། །བསྙེན་གནས་ཡན་ལག་བརྒྱད་བསྲུངས་ན། (༢༥༣ན)
དེ་ནི་ང་དང་ང་འདྲར་འགྱུར། །ཞེས་སྨྲས་པས། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་ཁྱོད་དེ་སྐད་མ་ཟེར་ཅིག །ཟླ་བ་ཡར་གྱི་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་བ་ལ། །བསྙེན་གནས་ཡན་ལག་བརྒྱད་བསྲུངས་ན། །དེ་ནི་ང་དང་ང་འདྲར་འགྱུར། །ཞེས་གསུངས་ཤིང་། གནས་སྐབས་སུ་ཡང་སྡོམ་པ་དང་མི་ལྡན་པ་དག་གིས་རྒྱ་མཚོ་ཙམ་གྱི་མར་ཁུ་ལ་རི་རབ་དང་མཉམ་པའི་སྡོང་བུ་བཙུགས་ཏེ་མར་མེ་སྤར་ཏེ་ཕྱོགས་བཅུའི་སངས་རྒྱས་མཆོད་པ་བས་སྡོམ་ལྡན་ཞིག་གིས་མར་མེ་ཆུང་ངུ་སྦར་ཏེ་མཆོད་པ་བསོད་ནམས་ཆེ་བས་མཚོན་ཏེ་རྣམ་དཀར་གྱི་ལས་བྱས་སོ་ཅོག་གི་འབྲས་བུ་འཕེལ་ཆེ་བ་སོགས་རྒྱུ་མཚན་སྒོ་དུ་མས་ཚུལ་འདི་ལ་འབད་པར་རིགས་ཤིང་། ཕན་ཡོན་དེ་ལྡན་གྱི་སྡོམ་པ་ལེན་པར་བྱེད་པ་ལ། མདོ་རྩ་བར། མྱ་ངན་ལས་འདས་པའི་བསམ་པ་བརྟན་པོ་མེད་པར་སོ་སོ་ཐར་པའི་སྡོམ་པ་མི་སྐྱེའོ། །ཞེས་སྡོམ་པ་སྐྱེ་བའི་རྒྱུའི་གཙོ་བོ་ངེས་འབྱུང་གི་བསམ་པ་ཡིན། དེ་གང་གི་སྒོ་ནས་བརྡ་སྤྲོད་པ། མདོ་སྡེ་དྲན་པ་ཉེར་བཞག་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་དག་འཚོ་བ་ཐུང་བས་ཉམས། །ལྷ་དག་བག་མེད་པ་ཡིས་ཉམས། །འཁོར་བ་ཁབ་ཀྱི་རྩེ་ཙམ་ལ། །བདེ་བ་ནམ་ཡང་ཡོད་མ་ཡིན། །ཞེས་དང་། ལུང་གཞིར། གང་ན་མི་གནས་ལྷ་རྣམས་མི་བཟང་ངོ་། །གང་ན་ཞི་མེད་སྲིད་པ་མི་བཟང་སྟེ། །འཚོ་བ་ཐུངས་པའི་མི་རྣམས་མི་བཟང་ངོ་། །མྱ་ངན་འདས་པ་མཆོག་ཅེས་སངས་རྒྱས་གསུངས། །ཞེས་ཁམས་གསུམ་གྱི་འཁོར་(༢༥༣བ)
བ་ནི་སྡུག་བསྔལ་གྱི་རང་བཞིན་ཏེ་ངན་སོང་གསུམ་གྱི་ནང་ནས་ཚ་དམྱལ་བརྒྱད། གྲང་དམྱལ་བརྒྱད། ཉི་ཚེ་ཉེ་འཁོར་གྱི་དམྱལ་བ་སོགས་བཟོད་དཀའ་ཤིན་ཏུ་མང་བས། བཤེས་སྤྲིང་ལས། སེམས་ཅན་ཉེས་པར་སྤྱོད་པ་སྤྱོད་རྣམས་ལ། །ཡང་སོས་ཐིག་ནག་རབ་ཏུ་ཚ་བ་དང་། །བསྡུས་འཇོམས་ངུ་འབོད་མནར་མེད་ལ་སོགས་པའི། །དམྱལ་བ་རྣམས་སུ་རྟག་ཏུ་སྡུག་བསྔལ་འགྱུར། ཞེས་དང་། ཚངས་ཅོད་མར། རབ་འབར་ལྕགས་ཀྱིས་ས་གཞིར་མེ་ལྕེས་བསྲེག་ཅིང་ལུས་ལ་མཚོན་ཆས་ཆར་པ་འབབ། །གཤིན་རྗེའི་སྐྱེས་བུས་གསལ་ཞིང་ལ་བསྐྱོན་ཟངས་ཞུན་ལྡུད་ཅིང་ཕུར་བུས་ལྕེ་ལ་འདེབས། །གངས་རིས་བསྐོར་བའི་འཁྱགས་པའི་སྦུབས་ཆུད་བུ་ཡུག་འཚུབས་པའི་རླུང་གིས་བཏབ་པ་ཡིས། །ལ་ལ་ཆུ་བུར་བརྒྱ་བྱུང་ལ་ལར་རྡོལ་ཞིང་ལུས་ནི་ཚལ་པ་དུམ་བུར་གས། །ཞེས་ཚ་གྲང་གི་སྡུག་བསྔལ་ཤིན་ཏུ་བཟོད་པར་དཀའ་ཞིང་མྱོང་བྱའི་སྡུག་བསྔལ་དེ་ཡང་། བཤེས་སྤྲིང་ལས། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལ། །འོལ་ཡང་མི་འགྲོ་ཆར་ཡང་མི་ཕོད་དོ། །ཞེས་མི་ཞིག་གི་ལུས་ལ་མདུང་ཐུང་སུམ་བརྒྱ་དུས་གཅིག་ལ་བཏབ་པའི་སྡུག་བསྔལ་གྱིས་དམྱལ་བའི་སྡུག་བསྔལ་གྱི་ཆར་ཡང་མི་ཕོད་ལ། སྡུག་བསྔལ་དེ་ནི་ཡུད་ཙམ་ལ་ཚེའི་དུས་བྱེད་པས་ཡུན་རིང་མྱོང་མི་དགོས་ཤིང་། དམྱལ་བའི་སྡུག་བསྔལ་ནི་ཆེ་ཡང་ཡུན་རིང་པོའི་བར་དུ་མྱོང་དགོས་པ་ཡང་སོས་ལྟ་བུར་མི་ལོ་ཁྲག་ཁྲིག་ཆེན་པོ་གཅིག་དང་། ཁྲག་ཁྲིག་དྲུག་དང་། ཐེར་འབུམ་ཆེན་པོ་གཉིས་ཡོད་པས་མཚོན་ཏེ། ཚ་དམྱལ་རྣམས་ལ་རིམ་(༢༥༤ན)
གྱིས་ལོག་པོར་འཕེལ་ཞིང་། གྲང་དམྱལ་ཡང་མཛོད་ལས། ཏིལ་རྗང་ནང་ནས་ལོ་བརྒྱ་ཞིང་། །ཏིལ་གཅིག་ཕྱུང་བས་ཟད་གྱུར་པ། །ཆུ་བུར་ཅན་གྱི་ཚེ་ཡིན་ཏེ། །གཞན་གྱི་ཚེ་ནི་ཉི་ཤུས་བསྒྱུར། ཞེས་ཚེ་ཚད་ལ་བསམས་ན་སྙིང་འགས་པར་འགྱུར་ཞིང་། ཞི་བ་ལྷས། ལྕགས་བསྲེགས་ས་གཞི་སུ་ཡིས་བྱས། །མེ་ཚོགས་འདི་དག་གང་ལས་བྱུང་། །དེས་ན་དེ་དག་ཐམས་ཅད་ནི། །སྡིག་སེམས་ཡིན་པ་ཐུབ་པས་གསུངས། །ཞེས་དམྱལ་བའི་སྡུག་བསྔལ་ཐམས་ཅད་སྔོན་བསགས་ཀྱི་སྡིག་པའི་ལས་ཀྱི་འཁྲུལ་སྣང་དུ་གསུངས་པས། བཤེས་སྤྲིང་ལས། དེ་ལྟར་སྡུག་བསྔལ་ཤིན་ཏུ་མི་བཟད་ལོ། །བྱེ་བ་ཕྲག་བརྒྱར་ཉམས་སུ་མྱོང་ཡང་ནི། །ཇི་སྲིད་མི་དགེ་དེ་ཟད་མ་གྱུར་པ། །དེ་སྲིད་སྲོག་དང་བྲལ་བར་མི་འགྱུར་རོ། །ཞེས་སྔོན་བསགས་ཀྱི་སྡིག་པའི་ལས་དེ་མ་ཟད་ཀྱི་བར་དུ་སྡུག་བསྔལ་མྱོང་དགོས་པར་གསུངས་པས། སྣང་ཚུལ་དེ་དག་ལ་དཔགས་ན། དེ་ཉིད་ལས། སྡིག་ཅན་དབུགས་འབྱུང་འགག་པ་ཙམ་ཞིག་གི །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་གནམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླགས་དང་གཟུགས་སུ་བགྱིས་རྣམས་ཀྱང་། །འཇིགས་པ་བསྐྱེད་པར་གྱུར་ན་མི་བཟད་པའི། །རྣམ་སྨིན་ཉམས་སུ་མྱོང་ན་སྨོས་ཅི་འཚལ། །ཞེས་གསུངས། དེ་ལས་ཡི་དྭགས་ཀྱི་སྡུག་བསྔལ་ཆུང་ཡང་། ཡང་དེ་ཉིད་ལས། ཡི་དྭགས་དག་ནའང་འདོད་པས་ཕོངས་པ་ཡིས། །བསྐྱེད་པའི་སྡུག་བསྔལ་རྒྱུན་ཆགས་མི་འཆོས་པ། །བཀྲེས་སྐོམ་གྲང་དྲོ་ངལ་དང་འཇིགས་པ་ཡིས། །བསྐྱེད་པ་ཤིན་ཏུ་མི་བཟད་(༢༥༤བ)
བསྟེན་འཚལ་ལོ། །ཞེས་དང་། ཚངས་ཅོད་མར། གདོང་ནི་སྐྲས་ཁེབས་ཁ་ནི་སྐམས་ཤིང་ཆུ་ཀླུང་མཐོང་སྟེ་བཏུང་ཕྱིར་བརྒྱུགས་པ་ན། །རལ་གྲི་མདུང་རྣམས་ཐོགས་པའི་སྐྱེས་བུས་འགེགས་ཤིང་ཆུ་ཡང་རྣག་ཁྲག་ཉིད་དུ་མཐོང་། ཁ་ནི་ཁབ་ཀྱི་མིག་ཙམ་ལྦ་བས་མགྲིན་འགགས་ཟས་སྐོམ་རྙེད་ཀྱང་སྤྱོད་མི་ནུས། །ཟོས་ཤིང་འཐུངས་རྣམས་འབར་ནས་ཚིག་ཅིང་བཤང་གཅིས་འཚོ་ལ་རང་ཤ་བཅད་དེ་ཟ། །ཞེས་ཕྱི་ནང་གི་སྒྲིབ་པ་ཅན་བཀྲེས་སྐོམ་ལ་བརྟེན་པའི་སྡུག་བསྔལ་ཤིན་ཏུ་ཆེ་ཞིང་ལས་ཀྱི་འཁྲུལ་སྣང་གིས་མངོན་སུམ་གྱིས་གྲུབ་པ་རྣམས་ཀྱངགོ་ལྡོག་པས། བཤེས་སྤྲིང་ལས། ཡི་དྭགས་རྣམས་ལ་སོས་ཀའི་དུས་སུ་ནི། །ཟླ་བ་ཚ་ལ་དགུན་ནི་ཉི་མ་གྲང་། །ལྗོན་ཤིང་འབྲས་བུ་མེད་འགྱུར་འདི་དག་གིས། །བལྟས་པ་ཙམ་གྱིས་ཀླུང་ཡང་སྐམ་པར་འགྱུར། ཞེས་གསུངས་ཤིང་། སྡུག་བསྔལ་ཡུན་རིང་དུ་མྱོང་དགོས་པའང་། མཛོད་ལས། ཡི་དྭགས་རྣམས། ཟླ་བ་ཉིན་ཞག་གི་ལྔ་བརྒྱ། ཞེས་གསུངས་ཤིང་། བཤེས་སྤྲིང་ལས། བར་བཅད་མེད་པར་སྡུག་བསྔལ་བསྟེན་གྱུར་པ། །ཉེས་པར་སྤྱོད་པའི་ལས་ཀྱི་ཞགས་པ་ནི། །སྲ་བས་བཅིངས་པའི་ལུས་ཅན་ཁ་ཅིག་ལོ། །ལྔ་སྟོང་དག་དང་ཁྲིར་ཡང་འཆི་མི་འགྱུར། །ཞེས་གསུངས།དེ་ལས་ཅུང་ཟད་ཆུང་བའི་དུད་འགྲོ་ཡང་། དེ་ཉིད་ལས། དུད་འགྲོའི་སྐྱེ་གནས་ན་ཡང་གསོད་པ་དང་། །བཅིང་དང་བརྡེག་སོགས་སྡུག་བསྔལ་སྣ་ཚོགས་པ། །ཞི་འགྱུར་དགེ་བ་སྤངས་པ་རྣམས་ལ་ནི། །གཅིག་ལ་གཅིག་ཟ་ཤིན་ཏུ་མི་བཟད་པ། ཁ་ཅིག་མུ་ཏིག་བལ་དང་རུས་པ་དང་། །ཤ་དང་པགས་པའི་ཆེད་དུ་གསོད་པར་འགྱུར། །དབང་མེད་གཞན་དག་(༢༥༥ན)
རྡོག་པ་ལག་པ་དང་། ལྕག་དང་ལྕགས་ཀྱུས་བཏབ་པས་བཏབ་སྟེ་བཀོལ། །ཞེས་དང་། ཚངས་ཅོད་མར། རྨོངས་པའི་མུན་ཆེན་འཐིབས་པས་ལམ་དང་ལམ་མིན་འབྱེད་ལ་བློ་ཡི་ནུས་པ་བྲལ། །གཅིག་ལ་གཅིག་གསོད་ལྷ་མིའི་གཞན་དབང་གྱུར་པས་བརྡེག་དང་བཀོལ་བའི་སྡུག་བསྔལ་འབབ། །ཅེས་དུད་འགྲོ་ལ་བྱིངས་ན་གནས་པ་དང་། ཁ་འཐོར་བ་རྣམས་བསྲན་པར་དཀའ་བའི་སྡུག་བསྔལ་ཤིན་ཏུ་མང་ཞིང་ཚེ་ཚད་ཀྱང་། མཛོད་ལས། དུད་འགྲོ་རྣམས། མཆོག་རིང་བསྐལ་པའོ། ཞེས་རིང་ཚད་དང་། ཐུང་བར་ངེས་པ་མེད་པར་ཉིན་རེ་ཙམ་ལའང་སྐྱེ་འཆི་བྱེད་པ་ཡོད། དེ་ལྟར་ངན་སོང་གསུམ་ནི་སྡུག་བསྔལ་གྱི་སྡུག་བསྔལ་ཤིན་ཏུ་བཟོད་དཀའ་བ་དེ་ལས་བཞལ་ཚེ་བདེ་འགྲོ་རྣམས་མིང་དང་དོན་མཐུན་པའི་བདེ་བ་ལ་སྤྱོད་པ་ཡིན་ནའང་མི་རྣམས་ལ། ཚངས་ཅོད་མ་ལས། མི་ཡི་གནས་ནའང་ལོངས་སྤྱོད་དབང་ཕྱུག་གིས། །མངོན་པར་མཐོ་ན་ཉམས་ཀྱི་དོགས་པ་དང་། །མཐོ་རིས་ཡོན་ཏན་འབྱོར་བས་ཕོངས་པ་ན། །འདོད་བདེ་འཚོལ་བར་འགྱུར་བས་ཤ་ཐང་ངོ་། །བདེ་བར་འདོད་ནས་དེ་ཡི་ཐབས་བསྒྲུབས་པས། །བདེ་བ་ཐོབ་པ་དེ་ལས་ཆེས་ལྷག་པའི། །ལུས་ཀྱི་སྡུག་བསྔལ་སེམས་ཀྱི་ཡིད་མི་བདེ། །རྣམ་པ་དུ་མས་ཀུན་ནས་མནར་བར་འགྱུར། །ཞེས་མི་རྣམས་ལ་ཡང་དགྲ་སྡང་བ་དང་འཕྲད་ཀྱིས་དོགས་པ། གཉེན་སྡུག་པ་དང་བྲལ་གྱིས་དོགས་པ། ཡོད་པ་གསོག་བསྲུང་། མེད་པ་འཚོལ་འགྲོ། ཁས་དྲག་པོ་དམའ་པོར་སོང་བ། ཕྱུག་པོ་དབུལ་པོར་གྱུར་པ། གཙོ་བོ་དམངས་སུ་འབབ་པ་སོགས་སྡུག་བསྔལ་མཐའ་ཡས་ཤིང་། དེ་(༢༥༥བ)
དག་རྣམས། མཛོད་ལས། འདི་ན་མ་ངེས་ཐ་མ་ནི། །ལོ་བཅུ་དང་པོ་དཔག་ཏུ་མེད། ཅེས་གསུངས།ལྷ་མ་ཡིན་ནི། བཤེས་སྤྲིང་ལས། ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་དང་། ཚངས་ཅོད་མར། ལྷ་རྣམས་དཔལ་ལ་འཁྲུག་པའི་ཕྲག་དོག་མེ་ཆེན་འབར་བས་ཡིད་བདེའི་གོ་སྐབས་བཅོམ། །འཐབ་རྩོད་ལས་བྱུང་ལུས་བཅད་དྲལ་ཞིང་གཡོ་སྒྱུས་བསླད་པས་བདེན་མཐོང་སྐལ་མེད། །ཅེས་ལམ་རྒྱུད་ལྔའི་སྐབས་ལྷ་མིན་རྣམས་དུད་འགྲོ་དང་ལྷར་འདྲེན་པའི་ལུགས་གཉིས་ཡོད་ནའང་། མི་ཤིན་ཏུ་མི་སྲུན་པ་ལ་མི་མ་ཡིན་ཟེར་བ་ལྟར་ལྷའི་ནང་ཚན་ནས་བདེན་པ་མཐོང་བའི་སྐལ་བ་མེད་པ་སོགས་སྒོ་དུ་མ་ནས་ལྷ་མ་ཡིན་དུ་བཏགས་ཤིང་། ཕྲག་དོག་གི་དབང་གིས་འཐབ་རྩོད་ལ་བརྟེན་ནས་ལུས་བཅད་དྲལ་གཏུབས་སོགས་བརྗོད་ཀྱིས་མི་ལང་ཞིང་། འདོད་པའི་ལྷ་རྣམས་ཀྱང་བཤེས་སྤྲིང་ལས། །ལུས་ཀྱི་ཁ་དོག་མི་སྡུག་གྱུར་པ་དང་། །སྟན་ལ་མི་དགའ་མེ་ཏོག་འཕྲེང་རྙིངས་དང་། །གོས་ལ་དྲི་མ་འཆགས་དང་ལུས་ལ་ནི། །སྔོན་ཆད་མེད་པའི་རྡུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བགྱིད་སྔ་ལྟས་ལྔ། །ལྷ་ཡུལ་གནས་པའི་ལྷ་རྣམས་ལ་འབྱུང་སྟེ། །ས་སྟེང་མི་རྣམས་འཆི་བར་འགྱུར་བ་དག །སྦྲོན་པར་བྱེད་པའི་འཆི་ལྟས་རྣམས་དང་འདྲ། ཞེས་དང་། ཚངས་ཅོད་མར། ལུས་མཛེས་རིན་ཅེན་རྒྱན་གྱིས་རབ་བརྒྱན་ནས། ཁང་བཟང་དགའ་བའི་ཚལ་དུ་གནས་བཅས་ཤིང་། །ཡུན་རིང་འདོད་པའི་བདེ་ལ་ལོངས་སྤྱོད་པ། །མཐོ་རིས་དཔལ་ལ་རོལ་(༢༥༦ན)
པའི་ལྷ་རྣམས་ཀྱང་། །མི་འདོད་འཆི་བའི་ལྟས་ཀྱིས་ཟིན་པ་ན། ཡིད་འཕྲོག་སྙིང་ལ་བཅགས་པར་གྱུར་པ་ཡི། །ལྷ་ཡི་མཛེས་མ་ཡིད་འོང་སྐྱེད་མོས་ཚལ། །བདུད་རྩི་ཁ་ཟས་གོས་བཟང་མཛེས་པའི་རྒྱན། །ལྷ་བུ་གཞོན་ནུ་རྣམས་དང་མྱུར་དུ་བདག །མི་འདོད་བཞིན་དུ་འབྲལ་བར་མཐོང་བའི་ཚེ། །གནས་དེར་སྐྱེས་པའི་ལུས་ཀྱི་བདེ་བ་ལས། །ཆེས་ཆེར་ལྷག་པའི་ཡིད་ཀྱི་སྡུག་བསྔལ་གྱིས། །བསྐྱེད་པའི་མྱ་ངན་མེ་ལྕེ་འབར་བས་བསྲེག །ཚེ་རབས་མང་པོར་ལེགས་པར་སྤྱད་པའི་ལས། །འབད་པས་བསྒྲུབས་པའི་འབྲས་བུ་སྤྱད་པས་ཟད། །བག་མེད་དབང་གིས་ངན་འགྲོའི་རྒྱུ་བསྒྲུབས་པས། །སླར་ཡང་ངན་སོང་གནས་སུ་ལྟུང་བར་འགྱུར། །ཞེས་འདོད་ལྷ་རྣམས་ལྷའི་བདེ་བ་ཕུན་སུམ་ཚོགས་པ་ལ་ལོངས་སྤྱོད་ཀྱང་། འཆི་ལྟས་ལྔ་དང་ཉེ་བའི་འཆི་ལྟས་ལྔ་ཤར་བའི་ཚེ་ངན་སོང་གི་གནས་གཞན་དག་ཏུ་སྐྱེ་ཚེ་མ་སྐྱེས་གོང་ནས་སྡུག་བསྔལ་ཉམས་སུ་མྱོང་ཟིན་པ་ལྟ་བུའི་ཚོར་བ་དྲག་པོས་མནར་བར་འགྱུར་བས། མདོ་ལས། ལྷ་རྣམས་འཆི་བར་གྱུར་པའི་ཚེ། །སྡུག་བསྔལ་འབྱུང་བ་ཇི་སྙེད་པ། །མནར་མེད་སེམས་ཅན་དམྱལ་བ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པ་ལྟར་བདེ་འགྲོ་བ་རྣམས་ཀྱང་ཟག་བཅས་ཀྱི་བདེ་བ་འགྱུར་བའི་སྡུག་བསྔལ་ཁོ་ན་ལས་མ་འདས། གཟུགས་གཟུགས་མེད་ཀྱི་ལྷ་རྣམས་ལ་སྡུག་བསྔལ་མངོན་འགྱུར་བ་དེ་ལྟ་བུ་མེད་ཀྱང་། ཚངས་ཅོད་མ་ལས། འདོད་ལ་འདུན་པའི་རྣམ་རྟོག་གནོད་སེམས་མེད། གཉིད་དང་ཡིད་ལ་གདུངས་པའི་སྤྱོད་པ་སྤང་། ལུས་དང་སེམས་ལ་གནོད་པའི་སྡུག་བསྔལ་བྲལ། ཏིང་འཛིན་སྟོབས་ཀྱིས་ཡུན་རིང་བདེར་གནས་(༢༥༦བ)
པ། །གཟུགས་དང་གཟུགས་མེད་ལྷ་ཡི་གནས་ཐོབ་ཀྱང་། །འདུ་བྱེད་སྡུག་བསྔལ་འཆིང་ལས་མ་གྲོལ་བས། །སྔོན་གྱི་ཏིང་འཛིན་འཕེན་པ་ཟད་པ་ན། །ཕྱིར་ཡང་འོག་ཏུ་ལྷུང་ནས་རྒྱུད་མར་འཁོར། །ཅེས་བསམ་གཏན་དང་གཟུགས་མེད་པའི་ཏིང་ངེ་འཛིན་གྱི་བདེ་བ་ཁོ་ནར་འབྱམས་ཀླས་ཀྱང་སྔོན་གྱི་འཕེན་པ་ཟད་པ་ན། ཟོ་ཆུན་གྱི་འཁྱུད་མོ་ལྟར་གནས་འོག་མར་འཁོར་ཞིང་སྡུག་བསྔལ་ཉམས་སུ་མྱོང་སྟེ། མདོར་ན་ལྷ་མིའི་དབང་ཕྱུག་རྣམས་དང་ཉི་ཟླ་ལ་སོགས་པའང་འགྱུར་བའི་རང་བཞིན་ཤ་སྟག་ཡིན་པའི་ཕྱིར།བཤེས་སྤྲིང་ལས། བརྒྱ་བྱིན་འཇིག་རྟེན་མཆོད་འོས་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང་། །འཁོར་ལོས་སྒྱུར་བ་ཉིད་དུ་གྱུར་ནས་ནི། །འཁོར་བ་དག་ཏུ་ཡང་བྲན་ཉིད་དུ་འགྱུར། །ཞེས་དང་། ལྷ་ཡུལ་འདོད་བདེ་ཤིན་ཏུ་ཆེན་པོ་དང་། །ཚངས་ཉིད་ཆགས་བྲལ་བདེ་བ་ཐོབ་ནས་སླར། །མནར་མེད་མེ་ཡི་བུད་ཤིང་གྱུར་པ་ཡིས། །སྡུག་བསྔལ་རྒྱུན་མི་འཆད་པ་བསྟེན་འཚལ་ལོ། །ཉི་མ་ཟླ་བ་ཉིད་ཐོབ་རང་ལུས་ཀྱི། །འོད་ཀྱིས་འཇིག་རྟེན་མཐའ་དག་སྣང་བྱས་ཏེ། །སླར་ཡང་མུན་ནག་སྨག་ཏུ་ཕྱིན་གྱུར་ནས། །རང་གི་ལག་པ་བརྐྱང་བའང་མི་མཐོང་འགྱུར། །ཞེས་གསུངས་ཤིང་དོན་ཧྲིལ་གྱིས་བསྒྲིལ་ན་ཁམས་གསུམ་འཁོར་བ་འདི་སྐྱེ་རྒ་ན་འཆིའི་སྡུག་བསྔལ། ཟད་མི་ཤེས་པ། གཏིང་མི་དཔོགས་པ། གནོད་པ་དང་འཇིགས་པ་ཡ་ང་བའི་གནས་དེ་ལས་ཕ་རོལ་ཏུ་བརྒལ་དཀའ་བས་རྒྱ་མཚོ་དང་ཆོས་མཚུངས་པ་སྟེ། སྡུག་བསྔལ་གྱི་རང་བཞིན་ཅན། སྡུག་བསྔལ་གྱི་ཁོང་འཚངས་ཅན་ཡིན་པས་འཁོར་བ་ནས་ཅིས་ཀྱང་ཐར་(༢༥༧ན)
བར་བྱེད་སྙམ་པའི་ངེས་འབྱུང་གི་བསམ་པ་ཐེབས་པ་གལ་ཆེ། དེ་ལྟར་བསམ་པ་བསྐྱེད་ནས་སྡོམ་པ་སྐྱབས་འགྲོ་རྩོམ་བྱེད་དུ་བྱས་ནས་ཁས་ལེན་དགོས་པས་སྐྱབས་སུ་འགྲོ་བའི་ཡུལ་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱིས། རང་ཡང་འཁོར་བའི་བཙོན་རར་བཅིངས་པ་ཡི། །འཇིག་རྟེན་ལྷ་ཡིས་སུ་ཞིག་སྐྱོབ་པར་ནུས། །ཞེས་ཚངས་པ་དབང་ཕྱུག་ཁྱབ་འཇུག་སོགས་གཙོ་བོ་གསུམ་གྱིས་ཐོག་དྲངས་འཇིག་རྟེན་པའི་ལྷ་རྣམས་རང་ཉིད་འཁོར་བ་ལས་མ་གྲོལ་བས་གཏན་གྱི་སྐྱབས་སུ་མི་རུང་ལ། གཏན་གྱི་སྐྱབས་སུ་འོས་པ་ནི། མཛོད་ལས། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་ཡུལ་དཀོན་ཅོག་གསུམ་ལ་སྐྱབས་སུ་འགྲོ་དགོས་པས། ཆོ་ག་ཐད་སོ་ལ་བསམ་པ་ཡར་ལྡན་དུ་བྱས་ནས་འཁོར་བའི་སྡུག་བསྔལ་གྱིས་མནར་བའི་སེམས་ཅན་རྣམས་སྲིད་པའི་ཉེས་བརྒྱ་ལས་སྐྱོབ་པར་བྱེད་པའི་སྐྱབས། སངས་རྒྱས་ལ་སྐྱབས་སྟོན་པ་པོ། ཆོས་མི་གནས་པའི་མྱ་ངན་ལས་འདས་པ་འགོག་པའི་བདེན་པ་ལ་སྐྱབས་དངོས། དགེ་འདུན་ལ་སྐྱབས་སྟོན་པའི་ཟླ་གྲོགས་ཞུ། བདག་དུས་འདི་ནས་བཟུང་སྟེ། སང་ཉི་མ་མ་ཤར་གྱི་བར་དུ་བསྙེན་གནས་ཀྱི་སྡོམ་པ་ལེན། སྤང་བྱ་ཡན་ལག་བརྒྱད་སྤོང་བའི་བསྙེན་གནས་པར་གཟུང་དུ་གསོལ་སྙམ་པ་གྱིས་ལ་འདིའི་རྗེས་ཟློས་གྱིས། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་(༢༥༧བ)
སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་བསྙེན་གནས་ཡན་ལག་བརྒྱད་པར་བཙུན་པས་གཟུང་དུ་གསོལ། ལན་གསུམ་བཟླ་བ་དང་སྡོམ་པ་སྐྱེ་བའི་བརྡ་སྤྲོད་པ་སོགས་དགེ་བསྙེན་ཀྱི་སྐབས་ལྟར་བྱ། འདི་ནི་བྱེ་བྲག་སྨྲ་བ་རང་ལུགས་ཀྱི་སྡོམ་པ་ལེན་ཚུལ་དངོས་བསྟན་ཡིན་ཞིང་། ལན་ཅིག་སྡོམ་པ་བླངས་ནས་རྗེས་མ་ལ་བརྗེད་དེ་ཟས་ཟོས་ཟིན་ནས་དགེ་སློང་ཞིག་གི་དྲུང་དུ་སྡོམ་པ་བླངས་ན་སྐྱེ་བའི་ཆེད་དུ་དུས་འདི་ནས་བཟུང་སྟེ་ཟླ་བ་བྱུང་ངོ་ཅོག་གི་ཚེས་བརྒྱད་དང་། བཅོ་ལྔ་དང་། གནམ་གང་ལ་བསྙེན་གནས་ཡན་ལག་བརྒྱད་པར་ཞེས་ཆོ་ག་བསྒྱུར་ནས་ལེན། དེང་སང་སྡོམ་པ་ལན་ཅིག་འདི་ལྟར་ཕབ་ནས་རྟིང་མ་རྣམས་ལ་རང་ཉིད་ཀྱིས་སྟོན་པའི་སྐུ་གཟུགས་ཀྱི་དྲུང་དུ་ལེན་པ་མདོ་སྡེ་པའི་ལུགས་ཡིན་ཞིང་། དུས་རྟག་ཏུ་སྡོམ་པ་ལེན་ཡུལ་གྱི་གང་ཟག་རྙེད་དཀའ་ཞིང་དེ་ལྟར་བླངས་པ་ལ་ཕན་ཡོན་ཆེན་པོ་འབྱུང་བས་གུ་ཡངས་པའི་དབང་དུ་བྱས་ནས་འདུལ་འཛིན་རྣམས་ཕྱག་ལེན་དུ་མཛད་དོ། །
མཇུག་གི་ཆོ་ག་བཤད་པ།
གསུམ་པ་འཇུག་གི་ཆོ་ག་ནི། དེ་ལྟར་སྡོམ་པ་ཐོབ་པ་ཙམ་གྱིས་ཀྱང་མི་ཆོག་པར་བསྲུང་དགོས་ཏེ། དགེ་སློང་ལ་རབ་ཏུ་གཅེས་པའི་མདོ་ལས། ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་དུཿ ཁ་ཡིན། །ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་བ་དུཿ ཁ་ཡིན། །ཞེས་དང་། དགེ་སློང་དག་སྲོག་དང་བྲལ་ཞིང་ཤི་བ་ནི་བླ་ཡི། ཚུལ་ཁྲིམས་ཉམས་ཤིང་(༢༥༨ན)
ཞིག་པ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། སྲོག་དང་བྲལ་ཞིང་ཤི་བ་ནི་ཚེ་འདི་ཉིད་ཀྱི་སྐྱེ་བ་ཟད་པར་འགྱུར་གྱི། ཚུལ་ཁྲིམས་ཉམས་ཤིང་ཞིག་པས་ནི་སྐྱེ་བ་འབུམ་ཕྲག་བརྒྱའི་བར་དུ་རིགས་དང་བྲལ་ཞིང་བདེ་བ་སྤངས་ཏེ་རྣམ་པར་ལྟུང་བ་ཆེན་པོ་ཉམས་སུ་མྱོང་བར་འགྱུར་རོ། །ཞེས་གསུངས་པ་ལྟར། ཚུལ་ཁྲིམས་ཉམས་པ་ལ་བརྟེན་ནས་མངོན་མཐོ་དང་ངེས་ལེགས་ལ་རྒྱབ་ཀྱིས་ཕྱོགས་ཏེ་རྩ་བའི་ལྟུང་བ་བྱུང་ན་དམྱལ་བ་དང་། ཡན་ལག་གི་ལྟུང་བས་ཡི་དྭགས་དང་དུད་འགྲོར་སྐྱེ་བ་སོགས་བརྣག་པར་དཀའ་བའི་སྡུག་བསྔལ་སྐྱེ་བ་འབུམ་ཕྲག་ཏུ་མྱོང་བར་གསུངས་ཤིང་། ཚུལ་བཞིན་བསྲུངས་ན་ལྷ་དང་མིའི་སྲིད་པ་རྒྱུན་མར་འཛིན་ཞིང་དེའི་རྟེན་ལ་ལེགས་པར་སྤྱད་པའི་མཐུས། མགོན་པོ་ཀླུ་སྒུབ་ཀྱིས། མི་ཡི་ཆོས་ལུགས་ལེགས་སྤྱད་པས། །ལྷ་ཡུལ་བགྲོད་པར་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་རིང་པོར་མི་ཐོགས་པར་ཐར་པ་མྱ་ངན་ལས་འདས་པ་ཐོབ་པར་འགྱུར་ལ། དེ་ལྟར་ཚུལ་བཞིན་དུ་བསྲུང་བར་རིགས་པའི་དབང་ཕྱུག་གིས། ཐབས་བྱུང་དེ་རྒྱུ་ལྐོག་གྱུར་པ། །དེ་འཆད་པ་ནི་དཀའ་བ་ཡིན། ཞེས་ལག་ཏུ་བསྟར་རྒྱུ་དེ་རང་ལ་ལྐོག་ཏུ་གྱུར་ན་བླང་དོར་བྱ་མི་ནུས་པས། ཇི་ལྟར་ངོས་འཛིན་ན་ཚུལ་ཁྲིམས་ཀྱི་ཡན་ལག །བག་ཡོད་པའི་ཡན་ལག །བརྟུལ་ཞུགས་ཀྱི་ཡན་ལག་དང་གསུམ་དུ་འདུས། དང་པོ་ནི་སྲོག་གཅོད། མ་བྱིན་ལེན། མི་ཚངས་སྤྱོད། བརྫུན་དེ་བཞི་སྤོང་བའི་བསླབ་བྱ་ལས། གཙོ་བོར་ཞེ་སྡང་གིས་བསྐྱེད་(༢༥༨བ)
པ། སྲོག་གཅོད་པ་ནི་རང་ལས་རྒྱུད་ཐ་དད་པའི་མིའམ་མིར་ཆགས་པ་རང་ཉིད་ཀྱིས་དུག་དང་རིག་སྔགས་དང་། མཚོན་གྱིས་བསད་པའམ། གཞན་གསོད་དུ་བཅུག་ན་སྡོམ་པ་འདི་རྩ་བ་ནས་འཇིག་པས་རྩ་ལྟུང་ཡིན་ཞིང་། དེའི་ཆར་གཏོགས་པ་སྲོག་ཆགས་གྲོག་སྦུར་ཡན་ཆོད། སྲོག་དང་ཕྲལ་ན། མི་དགེ་བ་བཅུའི་ནང་ཚན་གྱི་སྲོག་གཅོད་ཀྱི་ལས་ལམ་དངོས་གཞི་རྫོགས་པས་དེ་བྱས་ན། སྡོམ་པ་དེའི་བསླབ་བྱ་དང་འགལ་བའི་ཡན་ལག་གི་ཉེས་པ་ཙམ་ཡིན་པས་སྲོག་གཅོད་ཀྱི་མི་དགེ་བ་མཐའ་དག་བསྲུང་། ཡོ་བྱད་ལ་ཆགས་པས་བསྐྱེད་པ། མ་བྱིན་པར་ལེན་པ་ནི་གཞན་གྱི་བདག་ཏུ་བཟུང་བའི་གསེར་སེ་བ་བཅུ་འམ་དེའི་དོད་ཐུག་གི་དངོས་པོ་རྐུ་འཕྲོག་ཐབས་ཀྱིས་ཕྲལ་བ་སོགས་བྱས་ན་རྩ་ལྟུང་དུ་འགྱུར་ཞིང་། དེའི་ཆར་གཏོགས་པ་ཁབ་སྐུད་ཙམ་ཡང་བརྐུས་ནས་ཐོབ་བློ་སྐྱེས་ན། མི་དགེ་བ་བཅུའི་ནང་གི་མ་བྱིན་ལེན་བསླབ་བྱ་དང་འགལ་བའི་ཡན་ལག་གི་ཉེས་པ་ཡིན་པས་སྤང་། སེམས་ཅན་ལ་ཆགས་པས་བསྐྱེད་པ་མི་ཚངས་པར་སྤྱོད་པ་ནི་རང་གི་མཆིས་བྲང་སོགས་ཀྱི་རྨའི་སྒོ་གསུམ་གང་རུང་དུ་བཅུག་རེག་ཉམས་སུ་མྱོང་བ་དང་། རང་གི་ཁྱིམ་ཐབ་ཏུ་བླངས་པ་མིན་པ་ལ་བགྲོད་པ་ནི་བགྲོད་བྱ་མ་ཡིན་པ་ལ་བགྲོད་པ་དེ་ཡིན་ཀྱང་། སྦྲུམ་མ་དང་ན་བ་དང་སྣེང་བ་དང་བཅས་པར་བགྲོད་པ་ལྟ་བུ་དུས་མ་ཡིན་པར་བགྲོད་པ། དཀོན་ཅོག་གི་རྟེན་སོགས་ཀྱི་དྲུང་དུ་བགྲོད་པ་ནི་གནས་མ་ཡིན་པར་བགྲོད་པ། ཁ་དང་བཤང་ལམ་སོགས་སུ་བགྲོད་པ་ཡན་ལག་མ་ཡིན་པར་བགྲོད་པ་སྟེ། ལོག་གཡེམ་(༢༥༩ན)
བཞི་པོ་དེ་ནི་མི་དགེ་བ་བཅུའི་ནང་ཚན་གྱི་སྡོམ་པ་གཏོང་བའི་རྩ་ལྟུང་ཡིན་པས། ངེས་པར་བསྲུང་ཞིང་ཐ་ན་ཆགས་སེམས་ཀྱིས་ལྟ་རེག་ཀྱང་སྤང་། གཙོ་བོར་གཏི་མུག་གིས་བསྐྱེད་པ་འདུ་ཤེས་བསྒྱུར་ཏེ། རྫུན་དུ་སྨྲ་བ་ནི་མིའི་ཆོས། བླ་མ་ཞེས་པ་ལྷ་ཀླུ་གནོད་སྦྱིན་སོགས་མ་མཐོང་བཞིན་དུ་མཐོང་བ་དང་། གཏམ་འདྲེས་པར་སྨྲ་བ་དང་། བསམ་གཏན་གྱི་མཉམ་གཞག་ལ་བརྟེན་པའི་མངོན་ཤེས་རྫུ་འཕྲུལ་མེད་ཀྱང་ཡོད་དོ་ཞེས་སྨྲ་བ། རྒྱུན་ཞུགས། ལན་ཅིག་ཕྱིར་འོང་། ཕྱིར་མི་འོང་བ། དགྲ་བཅོམ་པའི་འབྲས་བུས་མཚོན་ཏེ་ཡོན་ཏན་ཁྱད་པར་ཅན་མ་ཐོབ་བཞིན་དུ་ཐོབ་པར་སྨྲས་པས་གཞན་གྱི་དོན་གོ་བ་ན་རྩ་ལྟུང་དུ་འགྱུར་ཞིང་། དེའི་ཆར་གཏོགས་པ་གཞན་བསླུ་བའི་རྫུན་ཚིག་ཆེ་ཕྲ་གང་སྨྲས་ཀྱང་མི་དགེ་བ་བཅུའི་ནང་ཚན་གྱི་རྫུན་དུ་འབྱུང་བས་སྤང་དགོས། གཉིས་པ་བག་ཡོད་ཀྱི་ཡན་ལག་ནི། མྱོས་འགྱུར་ཆང་སྤོང་བ་སྟེ། དེ་ལ་འདུལ་བ་སུམ་བརྒྱ་པ་ལྟར་ན། སྦྱར་བའི་ཆང་དང་། བཅོས་པའི་ཆང་གཉིས། དང་པོ་ནི། ཚན་བཏགས་མནན་པར་བྱས་པ་སྦྱར་བའི་ཆང་། ཞེས་པ་ལྟར། ནས་དང་འབྲས་སོགས་བཙོས་ཕབས་བཏབ་བསྙལ་བ་ལས་བྱུང་བའི་ཆང་ནི་སྦྱར་བའི་ཆང་ཞེས་བྱ། གཉིས་པ་ནི། འབྲས་བུ་ལ་སོགས་ཁུ་བར་བཅོས་པ་ནི། བཅོས་ཆང་རྒུན་ཆང་བུ་རམ་ཆང་འདྲར་བསྟན། ཅེས་པ་ལྟར། རྒུན་ཆང་བུར་ཆང་ལ་སོགས་པ་སེམས་མྱོས་པར་བྱེད་པ་ནི་བཅོས་པའི་ཆང་ཞེས་བྱའོ། །ཡང་མཛོད་འགྲེལ་ལས། འབྲུའི་ཆང་ནི་ཟས་ལས་སྦྱར་བའི་བཏུང་བའོ། །སྦྱར་བའི་ཆང་ནི་རྫས་ལས་སྦྱར་བའི་(༢༥༩བ)
བཏུང་བའོ་ཞེས་འབྲུའི་ཆང་ནས་དང་འབྲས་སོགས་ཀྱི་ཆང་བུ་རམ་ཤིང་གི་ཆང་སོགས་ལ་བཤད་པ་མི་མཐུན་པ་གཉིས་འབྱུང་བ་བཤད་ཚུལ་ཐ་དད་པས་འདུལ་བར་རང་བཞིན་དང་བཅས་པའི་ཁ་ན་མ་ཐོ་བ་སོ་སོར་བྱས་ཏེ་རྩྭའི་རྩེ་མོ་ཙམ་ཡང་འཐུང་མི་རུང་བར་གསུངས་ལ། མངོན་པར་རང་གི་གཉེན་པོས་སེམས་དབང་དུ་འདུ་ན་སེམས་མ་མྱོས་ཀྱི་བར་དུ་བཏུངས་ཀྱང་འགལ་བ་མེད་པར་བཤད་པ་གཉིས་ཕྱོགས་འདི་ལ་ལུགས་སྔ་མ་གཉིས་གཙོ་ཆེ་ཞིང་དེས་མཚོན་དུ་བ་རྔུབ་པ་སོགས་བག་མེད་པའི་སྤྱོད་ལམ་མཐའ་དག་སྤོང་དགོས། གསུམ་པ་བརྟུལ་ཞུགས་ཀྱི་ཡན་ལག་ནི་གར་སོགས་ཕྲེང་སོགས་ཀྱི་ཡན་ལག །མལ་ཆེ་མཐོའི་ཡན་ལག །ཕྱི་དྲོའི་ཁ་ཟས་སྤོང་བའི་ཡན་ལག་དང་གསུམ་གྱི་དང་པོ་ཉོན་མོངས་པས་ཀུན་ནས་བསླངས་ཏེ་གླུ་ལེན་གར་བརྩེ་བ་རྒྱུན་གྱི་འདོགས་གྱོན་བྱེད་བཞིན་པ་མིན་པའི་རྒྱན་གོས་གསར་པ་དང་མཛེས་ཆེད་དུ་དྲི་བཟང་ལུས་ལ་བྱུག་མེ་ཏོག་དང་རིན་པོ་ཆེའི་ཕྲེང་བ་སོགས་སྒེག་ཆོས་རྣམས་བསྲུང་། གཉིས་པ་ནི་གསེར་དངུལ་སོགས་རིན་པོ་ཆེའི་ཁྲི་ཆེན་པོ་དང་ཁྲུ་གང་ཡན་ཆད་ཀྱི་ཁྲི་མཐོན་པོས་ཆགས་སེམས་ཀྱིས་འདུག་ཉལ་སྤོང་། གསུམ་པ་ནི། ཟན་དྲོན། འབྲས་ཆན། ཤ །ཉ་ཤ །སྣུམ་འཁུར་ཏེ། བཟའ་བ་ལྔ་ཆར་གཏོགས་སྐྱོ་མ། ལྡེ་གུ། ཐུག་པ་སོགས་དང་། ལ་ཕུག་དང་ཉུང་མ་ལྟ་བུ་རྩ་བ། བུ་རམ་ཤིང་ལྟ་བུ་སྡོང་པོ། ལ་ཕུག་ཡུངས་ཀར་གྱི་ལོ་མ་ལྟ་བུ་འདབ་མ། པདྨ་ཨུཏྤལ་སོགས་མེ་ཏོག །རྒུན་འབྲུམ་ཁམ་སྟར་སོགས་འབྲས་བུ་སྟེ། བཤད་མ་ཐག་པ་རྣམས་ཕྱི་དྲོའི་ཁ་ཟས་ཡིན་པས་སྤང་དགོས་ཏེ་ཇི་སྐད་(༢༦༠ན)
དུ། རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་བར་འདི་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་གི་གོང་བུའི་ཟས་རྣམས་ཟ། །ཞེས་འབྱུང་བས་གླིང་ནི་གནས་པ་དང་སྐྱེས་པ་གཉིས་ལས། གནས་པ་གཙོ་ཆེ་སྟེ་དཔེར་ན་ནུབ་གླིང་ལྟ་བུར་ཕྱིན་ཚེ་དེའི་ཉི་མའི་ཕྱེད་ཡོལ་ན་ཟ་མི་རུང་བས་ཤེས་ནུས་ཤིང་། དུས་ཡོལ་ནས་ཀྱང་ཟ་རུང་བ་འབྲུ་མར་དང་ཞུན་མར་དང་སྦྲང་བུར་བསྒར་བ་ཀ་ར་ལྟ་བུས་ནི་ཞག་བདུན་པའི་སྨན་ཡིན་པས་བསྟེན་རུང་། ཞེས་དང་ཡན་ལག་བརྒྱད་པོ་འདི་སྤངས་པའི་ཕན་ཡོན་ཀུན་ཏུ་རྒྱུ་སེན་རིང་གིས་ཞུས་པའི་མདོ་ལས། སྲོག་གཅོད་སྤངས་པས་རྡོ་རྗེའི་ལུས་དང་ལྡན་པར་འགྱུར། མ་བྱིན་ལེན་སྤངས་པས་སེན་མོ་རིང་ཞིང་དྲ་བས་འབྲེལ། འདོད་ལོག་སྤངས་པས་དབང་པོ་ཚང་ཞིང་ལུས་རྒྱས། རྫུན་དུ་སྨྲ་བ་སྤངས་པས་ལྕེས་གདོང་པ་ཁེབས་པ། ཆང་སྤངས་པས་སེང་གེའི་སྟབས་ཀྱིས་གཤེགས་པ། དུས་མ་ཡིན་པའི་ཟས་སྤངས་པས་ཚེམས་བཞི་བཅུ་མ་ཉམས་ཤིང་དཀར་བ། ཕྲེང་སོགས་སྤངས་པས་ལུས་ལ་ཚུལ་ཁྲིམས་ཀྱི་སྤོས་ཀྱིས་བྱུགས། གར་སོགས་སྤངས་པས་ལུས་མཚན་ཐམས་ཅད་ཀྱིས་བརྒྱན་པར་འགྱུར། ཁྲི་སྟན་ཆེ་མཐོ་སྤངས་པས་སྟན་གསུམ་ལ་སྦྱོར་བར་འགྱུར། དཀོན་ཅོག་གསུམ་དང་མཁན་སློབ་ལ་ཡན་ལག་ལྔ་ས་ལ་གཏུགས་ཏེ་ཕྱག་བྱས་པས་དབུའི་གཙུག་ཏོར་དང་ལྡན་པར་བཤད་པས། དེ་ལྟར་དགྲ་བཅོམ་པ་རྣམས་ཀྱིས་སྤང་(༢༦༠བ)
བྱ་བརྒྱད་པོ་འདི་ཡིད་ཀྱི་སྒོ་ནས་སྤངས། ལུས་ངག་གིས་སླར་ལོག་པ་བཞིན་དུ་བདག་གིས་ཀྱང་སང་ཉི་མ་མ་ཤར་གྱི་བར་དུ་བསྙེན་གནས་ཀྱི་སྤང་བྱ་བརྒྱད་ཆར་གཏོགས་དང་བཅས་པ་ཡིད་ཀྱིས་སྤངས་ཏེ། ལུས་ངག་གིས་སླར་ལྡོག་སྙམ་པའི་སྒོ་ནས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས། །དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་། མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་སྤངས་ཏེ་དུས་མ་ཡིན་པའི་ཁ་ཟས་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་(༢༦༡ན)
ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་སྤངས་ཏེ་དུས་མ་ཡིན་པའི་ཟས་ལས་སླར་ལྡོག་པར་བགྱིའོ། །ཡན་ལག་བརྒྱད་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ་ཞེས་བརྗོད། ཕྱག་གསུམ་འཚལ་དུ་བཅུག་ལ་རང་གནས་སུ་བཏང་ངོ་། །རིང་ནས་ཚོགས་གཉིས་སྤྲིན་གྱི་ཟེགས་རྡུལ་ཉེར་བརྩེགས་ཆོས་གཟུགས་གངས་ཅན་ས་འཛིན་ལས། །མ་སྨད་ཐུགས་རྗེའི་ཆུ་ཀླུང་རྣམ་བཞི་ཆད་མེད་འགྲོ་བློའི་དད་མཚོར་ལེགས་བབས་པས། །ཡིད་སྲུབས་སྡེར་བཅས་སྙིང་དབུས་རབ་འབར་བྱིན་ཟའི་རྩེ་མོ་ལྷ་ཡི་ལམ་བསྙེག་ཀྱང་། །མྱང་འདས་བསིལ་བའི་བདེ་བར་སྦྱར་ཚེ་ཁྱོད་ཞབས་རིས་བྲལ་གཙུག་བསྟེན་ཤཱཀྱའི་རྒྱལ། གང་གིས་ལྗགས་ཡངས་མ་ལ་ཡ་ནས་ཚུལ་གནས་བསླབ་པའི་ཙན་དན་ངད། །འཕགས་བོད་ཀུན་ཏུ་འདྲེན་མཁས་དྲི་བཞོན་འདུལ་འཛིན་རིམ་པར་བྱོན་རྣམས་ཀྱིས། །སྐལ་བཟང་འགྲོ་མཁར་འཕྲིན་ལས་ཉིན་འབྱེད་ཁྲིམས་ཀྱི་ལག་ལེན་འོད་ཟེར་གྱིས། བསྟན་པའི་པད་ཚལ་རྣམ་པར་བཞད་ལས་རྒྱལ་རྣམས་དགྱེས་མཆོད་སྦྲང་རྩི་དངར། །སཱ་ལའི་ལྗོངས་འདིར་སྔ་ཕྱི་བར་དར་སོ་ཐར་ཆོ་ག་ཡི། །ཕྱག་(༢༦༡བ)
བཞེས་འཁྲུལ་མེད་བདུད་རྩི་དཔང་གྱུར་མཁས་མང་ཐུགས་མཚོ་ནས། །ཉེར་འཐོན་ཐར་འདོད་ལྷ་ཡི་བཅུད་ལེན་བརླང་སྤྱོད་སྒྲ་གཅན་ཚོགས། གཏན་བདེའི་མགྲིན་པ་ཆད་ཀྱང་མཐོ་རིས་སྲོག་གི་ཟུངས་སུ་གྱུར། ཁྱད་པར་ཁ་ཆེའི་པཎ་ཆེན་བསོད་སྙོམས་པའི། །བཞེད་སྲོལ་ཆུ་ཀླུང་ལོག་རྟོག་རྙོག་མའི་དྲིས། །སྦགས་རྣམས་རྣམ་དག་ཆོ་ག་ཀེ་ཏ་ཀས། །བགྲུངས་ཚེ་མྱང་འདས་བཞིན་རས་ཅི་ཡང་གསལ། །བློས་བྱས་ར་གན་ཉེས་བཤད་གསེར་ཆུ་ཡིས། །ཉེར་སྦགས་རྨོངས་པའི་ཚོང་འདུས་གཞི་མདོ་རུ། །བཀྲམ་ནས་ཕན་བདེའི་ནོར་འཕྲོག་ཆོམ་རྐུན་དིང་། །དབྱར་གྱི་སྲིན་བུའི་གྲངས་འཁུར་མཆི་མ་བཀུ། །བདག་བདེ་ན་བུན་ཡོངས་བྲལ་ལྷག་བསམ་གངས། །དཀར་མིན་རང་འདོད་རྫ་རི་བསྙིལ་བའི་ཁྲོད། །སྡིག་འབྲས་རྔ་མ་གྱེན་སློང་འབྲོང་གཡག་རྭ། །གནས་ངན་ལེན་སྒོ་འབིགས་ལ་གདེངས་པ་བཞིན། །ལྔ་ཕྲག་དྲུག་པར་ཐུབ་བསྟན་སླེབས་པའི་གཏམ། །སྙན་གྱི་བུ་རམ་དངར་ཡང་སོ་ཐར་སྡོམ། །འབོགས་བྱེད་ཆོ་ག་བམ་མྱག་རུལ་བའི་དྲིས། །དད་དུང་སེམས་ཀྱི་སྣ་སྒོར་འཁུན་དེས་ནོངས། །བདེན་ཚིག་དབྱར་རྔ་འཁྱོག་པོའི་སྤྲིན་རུམ་ནས། །བསྒྲག་ཚེ་གཞན་སེམས་བསྲུང་ནུས་རྨ་བྱའི་མངལ། །འཛིན་ཡང་སྡིག་ལྟའི་ངན་སྤྱོད་སྐྱིན་ཐང་གིས། །འདུལ་བསྟན་ལོ་ཏོག་རྩད་ནས་ཕྱུང་གིས་དོགས། །ཕ་མེས་ཕོར་གཙང་མས་བཅག་རྫ་རུའི་སྣོད། །བཟང་འཛིན་བློ་ཡི་དྲི་མ་དབྱངས་ཅན་ཆུས། །བཀྲུས་པས་ལུང་དོན་རིགས་ལམ་ནས་(༢༦༢ན)
འདྲེན་པར། །རྗེས་སུ་འབྲང་པ་གཟུར་གནས་རངས་པའི་ཡུལ། །ཀུན་མཁྱེན་བུས་ཀྱང་ཐམས་ཅད་མགུ་བའི་ཐབས། ཤེས་པའི་བློ་གྲོས་ཕྲ་ཞེས་ཐུགས་འབྱུང་ན། །རྨོངས་བདག་མི་སྨྲའི་བརྟུལ་ཞུགས་མ་བཟུང་བས། །ཙུ་ཏའི་ཡུལ་གྱི་རྐང་གཉིས་བསྒྲུབ་པ་བཞིན། །རྣམ་དག་ཁྲིམས་འཛིན་མཁས་ཆེ་གླང་པོའི་སྣར། །བག་ཡོད་ལྕགས་ཀྱུས་རབ་བཏབ་གོམ་འགྲོས་ཀྱིས། །ངེས་ལེགས་ལམ་བགྲོད་མྱང་འདས་ཤཱ་ལིའི་ཚལ། །ཡངས་པོར་སྤྱོད་པའི་ས་མཁན་གཅིག་ཏུ་རྨད། །ཟང་ཟིང་འཁོར་དང་སྙན་གྲགས་ཆེད་མིན་པར། །ཐུབ་དབང་རིང་ལུགས་བྱི་དོར་བྱར་སེམས་བློ། །རྡུལ་བྲལ་སྟོན་གྱི་བཅོ་ལྔའི་ཟླ་བའི་ངོས། །རི་དྭགས་གཟུགས་ཤར་མིག་གསུམ་པས་མི་ཁེབས། །བསོད་ནམས་བྱས་པའི་ས་བོན་ལྷག་བསམ་ཆུས། །སྐྱེད་དུ་བསྲིངས་པ་རྣམ་མཁྱེན་ཡོངས་འདུའི་ལྗོན། །བདེ་སྐྱིད་རོ་བདར་སྤྱོད་ལ་ལུས་ཅན་ཀུན། །ལེགས་བྲིས་ཚོགས་བཤུལ་རྐང་རྗེས་གསལ་ནུས་ཤོག །བསྐལ་བཟང་འདྲེན་པ་བཞི་པའི་ལུང་རྟོགས་བསྟན། །འཛམ་གླིང་སྐྱེ་རྒུའི་ལེགས་བྱས་མཆོད་སྡོང་ཆེར། །ནམ་མཁའི་མཐའ་འཚོལ་མིག་གི་མངོན་པར་ཤེས། །སྔ་ནས་མ་བརྙེད་བར་དུ་གཡོ་མེད་ཤོག །དྲས་དྲུབས་གོས་སོགས་ཕྲ་མོའི་བཅས་པས་ཀྱང་། །ཤཱཀ་ཐུབ་ཚེམས་དཀར་འཕྲེང་མཛེས་སྟོན་བྱེད་པ། །བློ་བཟང་གྲགས་པའི་རིང་ལུགས་ཡིད་བཞིན་ནོར། །སྲིད་ཞིའི་རྒྱལ་མཚན་ཏོག་ཏུ་འབར་བར་ཤོག །རྒྱུད་དུལ་ནང་རྟགས་ཕྱིར་ཤར་ངུར་སྨྲིག་གིས། །ངེས་པར་ཀླུབས་པས་རྣམ་དག་(༢༦༢བ)
ཆོ་ག་ཡི། བསླབ་གཞིར་འགྲོ་མང་བཀོད་པ་ཀུན་བཟོད་མའི། །དཔལ་མོའི་མངལ་ཁུར་བརྗིད་དང་ལྡན་པར་ཤོག །ཆོས་ལ་དབང་ཟ་མགྲིན་བཟང་གཟིག་ཤུན་ཅན། །མ་ཡིན་ཐུབ་གསུང་སྙིང་གི་གཅེས་ནོར་དུ། །འཆང་བའི་བསྟན་འཛིན་དབྱར་མཚོ་ལྟར་འཕེལ་ཞིང་། །གཡུང་དྲུང་སྲོག་གི་ཀ་བ་ཚུགས་པར་ཤོག །ཁྲིམས་གཉིས་གསེར་ཤིང་མཆོག་དམན་གཉའ་བ་རུ། །རབ་ལྕི་གནམ་བསྐོས་མི་བདག་སྐུ་ཚེ་དང་། །ཆབ་སྲིད་དགའ་བ་བརྒྱ་བའི་དཔལ་ལྡན་པ། །ཕོ་བྲང་ཆེན་པོའི་འདུན་སར་དར་དྲག་ཤོག །འཇིག་རྟེན་གསུམ་གྱི་རྒུད་མུན་ཉེར་སངས་མཐར། །ཕན་བདེའི་ཉི་མ་བོད་ཡུལ་དགུང་སྔོན་ནས། །ཤར་བའི་དགེ་ལེགས་སྣང་བ་འོད་པོ་ཆེ། །སུམ་རྩེན་ཡོངས་དབང་དཔལ་ལ་འགྲན་ནུས་ཤོག །གྲགས་སྐམ་སྨིག་མའི་ཚལ་དུ་སྐྱེས་ཙམ་མ་ཡིན་པར། རྣམ་དཔྱོད་མེས་སྨིན་གཞོན་ནུའི་ལུས་ཅན་རྒན་པོའི་བློ། །མཁས་མང་འཆི་མེད་འདུན་སར་བགྲོད་ལ་སྤོབས་མཐོ་བས། །སྲིད་ཞིའི་ལེགས་པའི་ཆ་ཀུན་དིང་བསགས་དངོམ་པར་ཤོག །ཐུབ་གཞུང་ཐིག་ལེ་མཆོག་མར་རྗེས་ཆགས་སྡེ་བཞིའི་ཞལ་སྒོའི་རིགས་བྱེད་ལས། །རྒྱལ་བསྟན་འཇིག་རྟེན་གསུམ་དུ་སྣང་སྤྲུལ་ཕན་བདེའི་འོད་ཀྱིས་མུ་བཞིའི་ལྷ། །རགས་པའི་གཟུགས་སུ་མངོན་སུམ་མཐོང་ལ་མྱ་ངན་མེད་དང་མེས་དབོན་གྱི། །རྣམ་ཐར་དཀོན་ཅོག་མཐུས་སྦྱོན་སྙན་གྲགས་སྲིད་པའི་ཁོངས་ལས་བརྒལ་བར་ཤོག །ཅེས་འོ་སྐོལ་གྱི་སྟོན་པ་ཤཱཀྱ་སེང་གེའི་བསྟན་པ་རིན་པོ་ཆེའི་རྩ་བར་གྱུར་པ་དམ་པའི་ཆོས་འདུལ་བའི་སྡོམ་པ་རབ་ཏུ་བྱུང་བ་དང་ཁྱིམ་པ་རྣམས་ཀྱིས་ཐོབ་པར་བྱེད་པའི་ཆ་ོག་འཁྲུལ་སྤོང་རྣམ་རྒྱལ་གསེར་(༢༦༣ན)
མདོག་ཅེས་བྱ་བ་འདི་ནི་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་གདན་ས་ཞེ་གསུམ་པ་ཡོངས་རྫོགས་བསྟན་པའི་མངའ་བདག་ཆོས་ཀྱི་རྗེ་བློ་བཟང་བསྟན་འཛིན་གྱིས་བཀའ་བསྩལ་ཞིང་། བ་སོ་ཆོས་ཀྱི་རྒྱལ་མཚན་གྱི་སྤྲུལ་པའི་སྐུ་ངག་དབང་དཀོན་ཅོག་ཉི་མ། རྒྱལ་བའི་སྲས་པོ་ཤེས་རབ་འཕེལ་བའི་སྤྲུལ་སྐུ་བློ་བཟང་བསྟན་འཛིན། གནས་རྙིང་ཆོས་རྗེ་ཀུན་དགའ་བདེ་ལེགས་ཀྱི་རྣམ་སྤྲུལ་ངག་དབང་ཀུན་དགའ་བདེ་ལེགས། ཤར་པ་ཆོས་རྗེ་དགེ་འདུན་གྲགས་པ། བྱང་པ་ཆོས་རྗེ་བློ་གྲོས་རྒྱ་མཚོ། རྒྱལ་ལེགས་བཤད་གླིང་དང་ཁྱབ་བདག་བླ་མ་ཕ་བོང་ཁ་པའི་གདན་ས་པ་ངག་དབང་བསྟན་འཛིན། ཁལ་ཁ་ཛ་ཡ་པཎྜི་ཏ་ཁུ་ཐུག་ཐུ། སྐྱིད་ཤོད་ཆོས་རྗེའི་སྐུ་སྐྱེ་ངག་དབང་བསྟན་འཛིན་འཕྲིན་ལས། སྣར་ཐང་མཁན་པོ་ཀོང་པོ་ངག་དབང་བཀྲ་ཤིས་སོགས་དོན་གཉེར་ཅན་མང་པོས་འབད་པ་ཆེན་པོས་བསྐུལ་བ་དང་། སྡོམ་གསུམ་ལས། བླུན་པོ་སྦྱངས་པ་ཆུང་བ་རྣམས། །འདི་འདྲ་སྤྱོད་པ་བདེན་མོད་ཀྱི། །མཁས་པ་སྦྱངས་པར་རློམ་པ་ཡང་། །རི་བོང་འཆལ་བཞིན་འདི་ལ་སྤྱོད། །འདི་འདྲའི་རིགས་ཅན་འཕེལ་གྱུར་ན། །སངས་རྒྱས་བསྟན་ལ་གནོད་མི་གནོད། །མཁས་པ་རྣམས་ཀྱིས་དཔྱོད་ལ་སྨྲོས། །གལ་ཏེ་འདི་འདྲའི་ཆོས་ལོག་གིས། །སངས་རྒྱས་བསྟན་ལ་མི་གནོད་ན། །མུ་སྟེགས་སོགས་ཀྱི་ཆོས་ལོག་ཀྱང་། །སངས་རྒྱས་བསྟན་ལ་ཅི་སྟེ་གནོད། །ཅེས་དབང་རྟུལ་དད་པའི་རྗེས་སུ་འབྲངས་པས་བསྟན་པ་ལ་མི་ཕན་པར་མ་ཟད་བསྟན་པ་དྲི་བཅས་སུ་བྱེད་ལ། དབང་རྣོན་ཆོས་(༢༦༣བ)
ཀྱི་རྗེས་སུ་འབྲངས་ཏེ། བསྲེགས་བཅད་བརྡར་བའི་གསེར་བཞིན་ལེགས་པར་དཔྱད་ནས་ཡིད་གཏན་དུ་བྱེད་དགོས་པའི་ཕྱིར། དེ་ཉིད་ལས། བདག་ནི་སངས་རྒྱས་བསྟན་པ་ལ། །མི་ཕྱེད་པ་ཡི་དད་པ་ཡོད། །འོན་ཀྱང་སངས་རྒྱས་བསྟན་པ་ལ། །འཁྲུལ་པར་སྤྱོད་ལ་བདག་མ་དད། ཅེས་གསུངས་པ་ལྟར། བསྟན་པ་རིན་པོ་ཆེ་དྲི་མ་དང་བྲལ་བ་ཞིག་བྱུང་ན་ཅི་མ་རུང་སྙམ་པའི་ལྷག་བསམ་གྱི་ཀུན་ནས་བླངས་ཏེ་ཆོ་ག་གཅིག་པུར་མ་བལྟོས་པར་རིགས་བྲལ་མཁས་པ་མང་པོའི་གསུང་རབ་ལ་དཔྱད་དེ་བློ་གསལ་རྣམས་གོ་བ་བསྐྱེད་པའི་ཆེད་དུ་མཐའ་གཅོད་དང་བཅས་ཏེ་འཇམ་དབྱངས་གཞོན་ནུ་ངུར་སྨྲིག་གར་གྱི་རྣམ་པར་རོལ་བ་རྗེ་བཙུན་དཀོན་ཅོག་ཆོས་འཕེལ་གྱི་བཀའ་དྲིན་ལ་བརྟེན་ནས་གཞུང་ལུགས་འདི་ལ་ཐོས་བསམ་ཅུང་ཟད་བགྱིས་ཤིང་། འཕགས་པའི་གནས་བརྟན་ཉེ་བར་འཁོར་གཉིས་པ་མཁན་ཆེན་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོར་བསྟན་པ་རིན་པོ་ཆེར་ཡོངས་སུ་ཞུགས་ལ་བཀའ་དྲིན་ནོས་པ་ཤཱཀྱའི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེའམ་མིང་གཞན་ཚངས་སྲས་བཞད་པའི་རྡོ་རྗེར་འབོད་པས་འོ་སྐོལ་གྱི་སྟོན་པ་ཟས་གཙང་གི་སྲས་གཙང་གི་སྲས་པོ། དྲག་པོ་ཞེས་པ་ལྕགས་སྤྲེལ་ལ་སྐུ་བལྟམས་ནས་ལོ་ཉིས་སྟོང་དྲུག་བརྒྱ་སོ་དགུར་སླེབས་པ་སྟོད་འགྲེལ་བའི་ལུགས་ལ་ཨརྠསིདྦྷུ་ཞེས་པ་ཕྱོགས་འདིར་དབང་ཐང་དང་བསྟུན་པ་གྱི་ཡི་ཞེས་པ་ས་མོ་ལུག་གི་ལོ། དམ་པའི་ཆོས་འདུལ་བའི་དབང་དུ་བྱས་ན་སྦལ་ཏི་དགྲ་བཅོམ་པ་དང་། འདུལ་འཛིན་(༢༦༤ན)
སྐྱོར་མོ་ལུང་པ་རྣམས་རྟེན་འབྲེལ་མདོ་འགྲེལ་གྱི་རྗེས་སུ་འབྲངས་ནས་ཧོར་ཟླ་བརྒྱད་པའི་ཚེས་བཅུ་དྲུག་ལ་ལོ་འགོ །ཁ་ཆེ་པཎྜིཏ་ཆེན་པོ་ཤཱཀྱ་ཤྲཱི་བྷ་དྲ་རྗེས་འབྲངས་ཇོ་བོ་སྟན་གཅིག་པ་རྣམས་མདོ་ཉི་སྙིང་གི་རྗེས་སུ་འབྲངས་ནས་ཧོར་ཟླ་དགུ་པའི་ཚེས་བཅུ་དྲུག་ལ་ལོ་འགོ །རྗེ་བཙུན་ས་སྐྱ་པ་དང་། མཉམ་མེད་རི་བོ་དགའ་ལྡན་པ་སོགས་འདུལ་འཛིན་ཕྱི་མ་མང་པོ་ཞིག་མངོན་པ་མཛོད་ཀྱི་རྗེས་སུ་འབྲངས་ནས་ཧོར་ཟླ་བཅུ་པའི་ཚེས་བཅུ་དྲུག་ལ་ལོ་འགོར་མཛད་པའི་ལུགས་གསུམ་ལས་ཕྱི་མ་ཉིད་གྲགས་ཆེ་བས། འདུལ་མངོན་པ་ལུགས་ཀྱི་ལོ་འགོ་ཐོག་མར་ཚེས་ཤིང་དུས་གསུམ་རྒྱལ་བ་ཀུན་དངོས་བློ་བཟང་གྲགས་པ་ཟུང་འཇུག་གི་གོ་འཕངས་མངོན་དུ་མཛད་པའི་དུས་དྲན་གྱི་ཚེ་གངས་ཅན་གྱི་ལྟེ་བ་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་དཔལ་གྲོང་སྔགས་རམ་པ་ངག་དབང་དགེ་ལེགས་ཀྱིས་བགྱིས་པ་སོ་སོ་ཐར་པ་རིགས་བརྒྱད་ཀྱི་རིང་ལུགས་དྲི་མ་མེད་པ་སྲིད་མཐའི་བར་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་མངྒ་ལཾ།། །།