མཇུག་གི་ཆོ་ག་བཤད་པ།
གསུམ་པ་འཇུག་གི་ཆོ་ག་ནི། དེ་ལྟར་སྡོམ་པ་ཐོབ་པ་ཙམ་གྱིས་ཀྱང་མི་ཆོག་པར་བསྲུང་དགོས་ཏེ། དགེ་སློང་ལ་རབ་ཏུ་གཅེས་པའི་མདོ་ལས། ལ་ལའི་ཚུལ་ཁྲིམས་བདེ་བ་སྟེ། །ལ་ལའི་ཚུལ་ཁྲིམས་དུཿ ཁ་ཡིན། །ཚུལ་ཁྲིམས་ལྡན་པ་བདེ་བ་སྟེ། །ཚུལ་ཁྲིམས་འཆལ་བ་དུཿ ཁ་ཡིན། །ཞེས་དང་། དགེ་སློང་དག་སྲོག་དང་བྲལ་ཞིང་ཤི་བ་ནི་བླ་ཡི། ཚུལ་ཁྲིམས་ཉམས་ཤིང་(༢༥༨ན)
ཞིག་པ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། སྲོག་དང་བྲལ་ཞིང་ཤི་བ་ནི་ཚེ་འདི་ཉིད་ཀྱི་སྐྱེ་བ་ཟད་པར་འགྱུར་གྱི། ཚུལ་ཁྲིམས་ཉམས་ཤིང་ཞིག་པས་ནི་སྐྱེ་བ་འབུམ་ཕྲག་བརྒྱའི་བར་དུ་རིགས་དང་བྲལ་ཞིང་བདེ་བ་སྤངས་ཏེ་རྣམ་པར་ལྟུང་བ་ཆེན་པོ་ཉམས་སུ་མྱོང་བར་འགྱུར་རོ། །ཞེས་གསུངས་པ་ལྟར། ཚུལ་ཁྲིམས་ཉམས་པ་ལ་བརྟེན་ནས་མངོན་མཐོ་དང་ངེས་ལེགས་ལ་རྒྱབ་ཀྱིས་ཕྱོགས་ཏེ་རྩ་བའི་ལྟུང་བ་བྱུང་ན་དམྱལ་བ་དང་། ཡན་ལག་གི་ལྟུང་བས་ཡི་དྭགས་དང་དུད་འགྲོར་སྐྱེ་བ་སོགས་བརྣག་པར་དཀའ་བའི་སྡུག་བསྔལ་སྐྱེ་བ་འབུམ་ཕྲག་ཏུ་མྱོང་བར་གསུངས་ཤིང་། ཚུལ་བཞིན་བསྲུངས་ན་ལྷ་དང་མིའི་སྲིད་པ་རྒྱུན་མར་འཛིན་ཞིང་དེའི་རྟེན་ལ་ལེགས་པར་སྤྱད་པའི་མཐུས། མགོན་པོ་ཀླུ་སྒུབ་ཀྱིས། མི་ཡི་ཆོས་ལུགས་ལེགས་སྤྱད་པས། །ལྷ་ཡུལ་བགྲོད་པར་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་རིང་པོར་མི་ཐོགས་པར་ཐར་པ་མྱ་ངན་ལས་འདས་པ་ཐོབ་པར་འགྱུར་ལ། དེ་ལྟར་ཚུལ་བཞིན་དུ་བསྲུང་བར་རིགས་པའི་དབང་ཕྱུག་གིས། ཐབས་བྱུང་དེ་རྒྱུ་ལྐོག་གྱུར་པ། །དེ་འཆད་པ་ནི་དཀའ་བ་ཡིན། ཞེས་ལག་ཏུ་བསྟར་རྒྱུ་དེ་རང་ལ་ལྐོག་ཏུ་གྱུར་ན་བླང་དོར་བྱ་མི་ནུས་པས། ཇི་ལྟར་ངོས་འཛིན་ན་ཚུལ་ཁྲིམས་ཀྱི་ཡན་ལག །བག་ཡོད་པའི་ཡན་ལག །བརྟུལ་ཞུགས་ཀྱི་ཡན་ལག་དང་གསུམ་དུ་འདུས། དང་པོ་ནི་སྲོག་གཅོད། མ་བྱིན་ལེན། མི་ཚངས་སྤྱོད། བརྫུན་དེ་བཞི་སྤོང་བའི་བསླབ་བྱ་ལས། གཙོ་བོར་ཞེ་སྡང་གིས་བསྐྱེད་(༢༥༨བ)
པ། སྲོག་གཅོད་པ་ནི་རང་ལས་རྒྱུད་ཐ་དད་པའི་མིའམ་མིར་ཆགས་པ་རང་ཉིད་ཀྱིས་དུག་དང་རིག་སྔགས་དང་། མཚོན་གྱིས་བསད་པའམ། གཞན་གསོད་དུ་བཅུག་ན་སྡོམ་པ་འདི་རྩ་བ་ནས་འཇིག་པས་རྩ་ལྟུང་ཡིན་ཞིང་། དེའི་ཆར་གཏོགས་པ་སྲོག་ཆགས་གྲོག་སྦུར་ཡན་ཆོད། སྲོག་དང་ཕྲལ་ན། མི་དགེ་བ་བཅུའི་ནང་ཚན་གྱི་སྲོག་གཅོད་ཀྱི་ལས་ལམ་དངོས་གཞི་རྫོགས་པས་དེ་བྱས་ན། སྡོམ་པ་དེའི་བསླབ་བྱ་དང་འགལ་བའི་ཡན་ལག་གི་ཉེས་པ་ཙམ་ཡིན་པས་སྲོག་གཅོད་ཀྱི་མི་དགེ་བ་མཐའ་དག་བསྲུང་། ཡོ་བྱད་ལ་ཆགས་པས་བསྐྱེད་པ། མ་བྱིན་པར་ལེན་པ་ནི་གཞན་གྱི་བདག་ཏུ་བཟུང་བའི་གསེར་སེ་བ་བཅུ་འམ་དེའི་དོད་ཐུག་གི་དངོས་པོ་རྐུ་འཕྲོག་ཐབས་ཀྱིས་ཕྲལ་བ་སོགས་བྱས་ན་རྩ་ལྟུང་དུ་འགྱུར་ཞིང་། དེའི་ཆར་གཏོགས་པ་ཁབ་སྐུད་ཙམ་ཡང་བརྐུས་ནས་ཐོབ་བློ་སྐྱེས་ན། མི་དགེ་བ་བཅུའི་ནང་གི་མ་བྱིན་ལེན་བསླབ་བྱ་དང་འགལ་བའི་ཡན་ལག་གི་ཉེས་པ་ཡིན་པས་སྤང་། སེམས་ཅན་ལ་ཆགས་པས་བསྐྱེད་པ་མི་ཚངས་པར་སྤྱོད་པ་ནི་རང་གི་མཆིས་བྲང་སོགས་ཀྱི་རྨའི་སྒོ་གསུམ་གང་རུང་དུ་བཅུག་རེག་ཉམས་སུ་མྱོང་བ་དང་། རང་གི་ཁྱིམ་ཐབ་ཏུ་བླངས་པ་མིན་པ་ལ་བགྲོད་པ་ནི་བགྲོད་བྱ་མ་ཡིན་པ་ལ་བགྲོད་པ་དེ་ཡིན་ཀྱང་། སྦྲུམ་མ་དང་ན་བ་དང་སྣེང་བ་དང་བཅས་པར་བགྲོད་པ་ལྟ་བུ་དུས་མ་ཡིན་པར་བགྲོད་པ། དཀོན་ཅོག་གི་རྟེན་སོགས་ཀྱི་དྲུང་དུ་བགྲོད་པ་ནི་གནས་མ་ཡིན་པར་བགྲོད་པ། ཁ་དང་བཤང་ལམ་སོགས་སུ་བགྲོད་པ་ཡན་ལག་མ་ཡིན་པར་བགྲོད་པ་སྟེ། ལོག་གཡེམ་(༢༥༩ན)
བཞི་པོ་དེ་ནི་མི་དགེ་བ་བཅུའི་ནང་ཚན་གྱི་སྡོམ་པ་གཏོང་བའི་རྩ་ལྟུང་ཡིན་པས། ངེས་པར་བསྲུང་ཞིང་ཐ་ན་ཆགས་སེམས་ཀྱིས་ལྟ་རེག་ཀྱང་སྤང་། གཙོ་བོར་གཏི་མུག་གིས་བསྐྱེད་པ་འདུ་ཤེས་བསྒྱུར་ཏེ། རྫུན་དུ་སྨྲ་བ་ནི་མིའི་ཆོས། བླ་མ་ཞེས་པ་ལྷ་ཀླུ་གནོད་སྦྱིན་སོགས་མ་མཐོང་བཞིན་དུ་མཐོང་བ་དང་། གཏམ་འདྲེས་པར་སྨྲ་བ་དང་། བསམ་གཏན་གྱི་མཉམ་གཞག་ལ་བརྟེན་པའི་མངོན་ཤེས་རྫུ་འཕྲུལ་མེད་ཀྱང་ཡོད་དོ་ཞེས་སྨྲ་བ། རྒྱུན་ཞུགས། ལན་ཅིག་ཕྱིར་འོང་། ཕྱིར་མི་འོང་བ། དགྲ་བཅོམ་པའི་འབྲས་བུས་མཚོན་ཏེ་ཡོན་ཏན་ཁྱད་པར་ཅན་མ་ཐོབ་བཞིན་དུ་ཐོབ་པར་སྨྲས་པས་གཞན་གྱི་དོན་གོ་བ་ན་རྩ་ལྟུང་དུ་འགྱུར་ཞིང་། དེའི་ཆར་གཏོགས་པ་གཞན་བསླུ་བའི་རྫུན་ཚིག་ཆེ་ཕྲ་གང་སྨྲས་ཀྱང་མི་དགེ་བ་བཅུའི་ནང་ཚན་གྱི་རྫུན་དུ་འབྱུང་བས་སྤང་དགོས། གཉིས་པ་བག་ཡོད་ཀྱི་ཡན་ལག་ནི། མྱོས་འགྱུར་ཆང་སྤོང་བ་སྟེ། དེ་ལ་འདུལ་བ་སུམ་བརྒྱ་པ་ལྟར་ན། སྦྱར་བའི་ཆང་དང་། བཅོས་པའི་ཆང་གཉིས། དང་པོ་ནི། ཚན་བཏགས་མནན་པར་བྱས་པ་སྦྱར་བའི་ཆང་། ཞེས་པ་ལྟར། ནས་དང་འབྲས་སོགས་བཙོས་ཕབས་བཏབ་བསྙལ་བ་ལས་བྱུང་བའི་ཆང་ནི་སྦྱར་བའི་ཆང་ཞེས་བྱ། གཉིས་པ་ནི། འབྲས་བུ་ལ་སོགས་ཁུ་བར་བཅོས་པ་ནི། བཅོས་ཆང་རྒུན་ཆང་བུ་རམ་ཆང་འདྲར་བསྟན། ཅེས་པ་ལྟར། རྒུན་ཆང་བུར་ཆང་ལ་སོགས་པ་སེམས་མྱོས་པར་བྱེད་པ་ནི་བཅོས་པའི་ཆང་ཞེས་བྱའོ། །ཡང་མཛོད་འགྲེལ་ལས། འབྲུའི་ཆང་ནི་ཟས་ལས་སྦྱར་བའི་བཏུང་བའོ། །སྦྱར་བའི་ཆང་ནི་རྫས་ལས་སྦྱར་བའི་(༢༥༩བ)
བཏུང་བའོ་ཞེས་འབྲུའི་ཆང་ནས་དང་འབྲས་སོགས་ཀྱི་ཆང་བུ་རམ་ཤིང་གི་ཆང་སོགས་ལ་བཤད་པ་མི་མཐུན་པ་གཉིས་འབྱུང་བ་བཤད་ཚུལ་ཐ་དད་པས་འདུལ་བར་རང་བཞིན་དང་བཅས་པའི་ཁ་ན་མ་ཐོ་བ་སོ་སོར་བྱས་ཏེ་རྩྭའི་རྩེ་མོ་ཙམ་ཡང་འཐུང་མི་རུང་བར་གསུངས་ལ། མངོན་པར་རང་གི་གཉེན་པོས་སེམས་དབང་དུ་འདུ་ན་སེམས་མ་མྱོས་ཀྱི་བར་དུ་བཏུངས་ཀྱང་འགལ་བ་མེད་པར་བཤད་པ་གཉིས་ཕྱོགས་འདི་ལ་ལུགས་སྔ་མ་གཉིས་གཙོ་ཆེ་ཞིང་དེས་མཚོན་དུ་བ་རྔུབ་པ་སོགས་བག་མེད་པའི་སྤྱོད་ལམ་མཐའ་དག་སྤོང་དགོས། གསུམ་པ་བརྟུལ་ཞུགས་ཀྱི་ཡན་ལག་ནི་གར་སོགས་ཕྲེང་སོགས་ཀྱི་ཡན་ལག །མལ་ཆེ་མཐོའི་ཡན་ལག །ཕྱི་དྲོའི་ཁ་ཟས་སྤོང་བའི་ཡན་ལག་དང་གསུམ་གྱི་དང་པོ་ཉོན་མོངས་པས་ཀུན་ནས་བསླངས་ཏེ་གླུ་ལེན་གར་བརྩེ་བ་རྒྱུན་གྱི་འདོགས་གྱོན་བྱེད་བཞིན་པ་མིན་པའི་རྒྱན་གོས་གསར་པ་དང་མཛེས་ཆེད་དུ་དྲི་བཟང་ལུས་ལ་བྱུག་མེ་ཏོག་དང་རིན་པོ་ཆེའི་ཕྲེང་བ་སོགས་སྒེག་ཆོས་རྣམས་བསྲུང་། གཉིས་པ་ནི་གསེར་དངུལ་སོགས་རིན་པོ་ཆེའི་ཁྲི་ཆེན་པོ་དང་ཁྲུ་གང་ཡན་ཆད་ཀྱི་ཁྲི་མཐོན་པོས་ཆགས་སེམས་ཀྱིས་འདུག་ཉལ་སྤོང་། གསུམ་པ་ནི། ཟན་དྲོན། འབྲས་ཆན། ཤ །ཉ་ཤ །སྣུམ་འཁུར་ཏེ། བཟའ་བ་ལྔ་ཆར་གཏོགས་སྐྱོ་མ། ལྡེ་གུ། ཐུག་པ་སོགས་དང་། ལ་ཕུག་དང་ཉུང་མ་ལྟ་བུ་རྩ་བ། བུ་རམ་ཤིང་ལྟ་བུ་སྡོང་པོ། ལ་ཕུག་ཡུངས་ཀར་གྱི་ལོ་མ་ལྟ་བུ་འདབ་མ། པདྨ་ཨུཏྤལ་སོགས་མེ་ཏོག །རྒུན་འབྲུམ་ཁམ་སྟར་སོགས་འབྲས་བུ་སྟེ། བཤད་མ་ཐག་པ་རྣམས་ཕྱི་དྲོའི་ཁ་ཟས་ཡིན་པས་སྤང་དགོས་ཏེ་ཇི་སྐད་(༢༦༠ན)
དུ། རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་བར་འདི་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་གི་གོང་བུའི་ཟས་རྣམས་ཟ། །ཞེས་འབྱུང་བས་གླིང་ནི་གནས་པ་དང་སྐྱེས་པ་གཉིས་ལས། གནས་པ་གཙོ་ཆེ་སྟེ་དཔེར་ན་ནུབ་གླིང་ལྟ་བུར་ཕྱིན་ཚེ་དེའི་ཉི་མའི་ཕྱེད་ཡོལ་ན་ཟ་མི་རུང་བས་ཤེས་ནུས་ཤིང་། དུས་ཡོལ་ནས་ཀྱང་ཟ་རུང་བ་འབྲུ་མར་དང་ཞུན་མར་དང་སྦྲང་བུར་བསྒར་བ་ཀ་ར་ལྟ་བུས་ནི་ཞག་བདུན་པའི་སྨན་ཡིན་པས་བསྟེན་རུང་། ཞེས་དང་ཡན་ལག་བརྒྱད་པོ་འདི་སྤངས་པའི་ཕན་ཡོན་ཀུན་ཏུ་རྒྱུ་སེན་རིང་གིས་ཞུས་པའི་མདོ་ལས། སྲོག་གཅོད་སྤངས་པས་རྡོ་རྗེའི་ལུས་དང་ལྡན་པར་འགྱུར། མ་བྱིན་ལེན་སྤངས་པས་སེན་མོ་རིང་ཞིང་དྲ་བས་འབྲེལ། འདོད་ལོག་སྤངས་པས་དབང་པོ་ཚང་ཞིང་ལུས་རྒྱས། རྫུན་དུ་སྨྲ་བ་སྤངས་པས་ལྕེས་གདོང་པ་ཁེབས་པ། ཆང་སྤངས་པས་སེང་གེའི་སྟབས་ཀྱིས་གཤེགས་པ། དུས་མ་ཡིན་པའི་ཟས་སྤངས་པས་ཚེམས་བཞི་བཅུ་མ་ཉམས་ཤིང་དཀར་བ། ཕྲེང་སོགས་སྤངས་པས་ལུས་ལ་ཚུལ་ཁྲིམས་ཀྱི་སྤོས་ཀྱིས་བྱུགས། གར་སོགས་སྤངས་པས་ལུས་མཚན་ཐམས་ཅད་ཀྱིས་བརྒྱན་པར་འགྱུར། ཁྲི་སྟན་ཆེ་མཐོ་སྤངས་པས་སྟན་གསུམ་ལ་སྦྱོར་བར་འགྱུར། དཀོན་ཅོག་གསུམ་དང་མཁན་སློབ་ལ་ཡན་ལག་ལྔ་ས་ལ་གཏུགས་ཏེ་ཕྱག་བྱས་པས་དབུའི་གཙུག་ཏོར་དང་ལྡན་པར་བཤད་པས། དེ་ལྟར་དགྲ་བཅོམ་པ་རྣམས་ཀྱིས་སྤང་(༢༦༠བ)
བྱ་བརྒྱད་པོ་འདི་ཡིད་ཀྱི་སྒོ་ནས་སྤངས། ལུས་ངག་གིས་སླར་ལོག་པ་བཞིན་དུ་བདག་གིས་ཀྱང་སང་ཉི་མ་མ་ཤར་གྱི་བར་དུ་བསྙེན་གནས་ཀྱི་སྤང་བྱ་བརྒྱད་ཆར་གཏོགས་དང་བཅས་པ་ཡིད་ཀྱིས་སྤངས་ཏེ། ལུས་ངག་གིས་སླར་ལྡོག་སྙམ་པའི་སྒོ་ནས་འདིའི་རྗེས་ཟློས་མཛོད། སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས། །དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཏེ། སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །གཞན་ཡང་ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་ཆང་དང་། བཅོས་པའི་ཆང་། མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་ཁ་དོག་འཆང་བ་དང་། ཁྲི་སྟན་མཐོན་པོ་དང་། ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་སྤངས་ཏེ་དུས་མ་ཡིན་པའི་ཁ་ཟས་ལས་སླར་ལོག་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། རྫུན་དུ་སྨྲ་བ་དང་། འབྲུའི་(༢༦༡ན)
ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་དང་། གླུ་གར་དང་། རོལ་མོའི་སྒྲ་དང་། ཕྲེང་བ་དང་། སྤོས་ཉུག་པ་དང་། རྒྱན་དང་། ཁ་དོག་འཆང་བ་དང་། ཁྲི་སྟན་མཐོན་པོ་དང་ཁྲི་སྟན་ཆེན་པོ་དང་། དུས་མ་ཡིན་པའི་ཁ་ཟས་སྤངས་ཏེ་དུས་མ་ཡིན་པའི་ཟས་ལས་སླར་ལྡོག་པར་བགྱིའོ། །ཡན་ལག་བརྒྱད་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །ཐབས་ཡིན་ནོ། །ལེགས་སོ་ཞེས་བརྗོད། ཕྱག་གསུམ་འཚལ་དུ་བཅུག་ལ་རང་གནས་སུ་བཏང་ངོ་། །རིང་ནས་ཚོགས་གཉིས་སྤྲིན་གྱི་ཟེགས་རྡུལ་ཉེར་བརྩེགས་ཆོས་གཟུགས་གངས་ཅན་ས་འཛིན་ལས། །མ་སྨད་ཐུགས་རྗེའི་ཆུ་ཀླུང་རྣམ་བཞི་ཆད་མེད་འགྲོ་བློའི་དད་མཚོར་ལེགས་བབས་པས། །ཡིད་སྲུབས་སྡེར་བཅས་སྙིང་དབུས་རབ་འབར་བྱིན་ཟའི་རྩེ་མོ་ལྷ་ཡི་ལམ་བསྙེག་ཀྱང་། །མྱང་འདས་བསིལ་བའི་བདེ་བར་སྦྱར་ཚེ་ཁྱོད་ཞབས་རིས་བྲལ་གཙུག་བསྟེན་ཤཱཀྱའི་རྒྱལ། གང་གིས་ལྗགས་ཡངས་མ་ལ་ཡ་ནས་ཚུལ་གནས་བསླབ་པའི་ཙན་དན་ངད། །འཕགས་བོད་ཀུན་ཏུ་འདྲེན་མཁས་དྲི་བཞོན་འདུལ་འཛིན་རིམ་པར་བྱོན་རྣམས་ཀྱིས། །སྐལ་བཟང་འགྲོ་མཁར་འཕྲིན་ལས་ཉིན་འབྱེད་ཁྲིམས་ཀྱི་ལག་ལེན་འོད་ཟེར་གྱིས། བསྟན་པའི་པད་ཚལ་རྣམ་པར་བཞད་ལས་རྒྱལ་རྣམས་དགྱེས་མཆོད་སྦྲང་རྩི་དངར། །སཱ་ལའི་ལྗོངས་འདིར་སྔ་ཕྱི་བར་དར་སོ་ཐར་ཆོ་ག་ཡི། །ཕྱག་(༢༦༡བ)
བཞེས་འཁྲུལ་མེད་བདུད་རྩི་དཔང་གྱུར་མཁས་མང་ཐུགས་མཚོ་ནས། །ཉེར་འཐོན་ཐར་འདོད་ལྷ་ཡི་བཅུད་ལེན་བརླང་སྤྱོད་སྒྲ་གཅན་ཚོགས། གཏན་བདེའི་མགྲིན་པ་ཆད་ཀྱང་མཐོ་རིས་སྲོག་གི་ཟུངས་སུ་གྱུར། ཁྱད་པར་ཁ་ཆེའི་པཎ་ཆེན་བསོད་སྙོམས་པའི། །བཞེད་སྲོལ་ཆུ་ཀླུང་ལོག་རྟོག་རྙོག་མའི་དྲིས། །སྦགས་རྣམས་རྣམ་དག་ཆོ་ག་ཀེ་ཏ་ཀས། །བགྲུངས་ཚེ་མྱང་འདས་བཞིན་རས་ཅི་ཡང་གསལ། །བློས་བྱས་ར་གན་ཉེས་བཤད་གསེར་ཆུ་ཡིས། །ཉེར་སྦགས་རྨོངས་པའི་ཚོང་འདུས་གཞི་མདོ་རུ། །བཀྲམ་ནས་ཕན་བདེའི་ནོར་འཕྲོག་ཆོམ་རྐུན་དིང་། །དབྱར་གྱི་སྲིན་བུའི་གྲངས་འཁུར་མཆི་མ་བཀུ། །བདག་བདེ་ན་བུན་ཡོངས་བྲལ་ལྷག་བསམ་གངས། །དཀར་མིན་རང་འདོད་རྫ་རི་བསྙིལ་བའི་ཁྲོད། །སྡིག་འབྲས་རྔ་མ་གྱེན་སློང་འབྲོང་གཡག་རྭ། །གནས་ངན་ལེན་སྒོ་འབིགས་ལ་གདེངས་པ་བཞིན། །ལྔ་ཕྲག་དྲུག་པར་ཐུབ་བསྟན་སླེབས་པའི་གཏམ། །སྙན་གྱི་བུ་རམ་དངར་ཡང་སོ་ཐར་སྡོམ། །འབོགས་བྱེད་ཆོ་ག་བམ་མྱག་རུལ་བའི་དྲིས། །དད་དུང་སེམས་ཀྱི་སྣ་སྒོར་འཁུན་དེས་ནོངས། །བདེན་ཚིག་དབྱར་རྔ་འཁྱོག་པོའི་སྤྲིན་རུམ་ནས། །བསྒྲག་ཚེ་གཞན་སེམས་བསྲུང་ནུས་རྨ་བྱའི་མངལ། །འཛིན་ཡང་སྡིག་ལྟའི་ངན་སྤྱོད་སྐྱིན་ཐང་གིས། །འདུལ་བསྟན་ལོ་ཏོག་རྩད་ནས་ཕྱུང་གིས་དོགས། །ཕ་མེས་ཕོར་གཙང་མས་བཅག་རྫ་རུའི་སྣོད། །བཟང་འཛིན་བློ་ཡི་དྲི་མ་དབྱངས་ཅན་ཆུས། །བཀྲུས་པས་ལུང་དོན་རིགས་ལམ་ནས་(༢༦༢ན)
འདྲེན་པར། །རྗེས་སུ་འབྲང་པ་གཟུར་གནས་རངས་པའི་ཡུལ། །ཀུན་མཁྱེན་བུས་ཀྱང་ཐམས་ཅད་མགུ་བའི་ཐབས། ཤེས་པའི་བློ་གྲོས་ཕྲ་ཞེས་ཐུགས་འབྱུང་ན། །རྨོངས་བདག་མི་སྨྲའི་བརྟུལ་ཞུགས་མ་བཟུང་བས། །ཙུ་ཏའི་ཡུལ་གྱི་རྐང་གཉིས་བསྒྲུབ་པ་བཞིན། །རྣམ་དག་ཁྲིམས་འཛིན་མཁས་ཆེ་གླང་པོའི་སྣར། །བག་ཡོད་ལྕགས་ཀྱུས་རབ་བཏབ་གོམ་འགྲོས་ཀྱིས། །ངེས་ལེགས་ལམ་བགྲོད་མྱང་འདས་ཤཱ་ལིའི་ཚལ། །ཡངས་པོར་སྤྱོད་པའི་ས་མཁན་གཅིག་ཏུ་རྨད། །ཟང་ཟིང་འཁོར་དང་སྙན་གྲགས་ཆེད་མིན་པར། །ཐུབ་དབང་རིང་ལུགས་བྱི་དོར་བྱར་སེམས་བློ། །རྡུལ་བྲལ་སྟོན་གྱི་བཅོ་ལྔའི་ཟླ་བའི་ངོས། །རི་དྭགས་གཟུགས་ཤར་མིག་གསུམ་པས་མི་ཁེབས། །བསོད་ནམས་བྱས་པའི་ས་བོན་ལྷག་བསམ་ཆུས། །སྐྱེད་དུ་བསྲིངས་པ་རྣམ་མཁྱེན་ཡོངས་འདུའི་ལྗོན། །བདེ་སྐྱིད་རོ་བདར་སྤྱོད་ལ་ལུས་ཅན་ཀུན། །ལེགས་བྲིས་ཚོགས་བཤུལ་རྐང་རྗེས་གསལ་ནུས་ཤོག །བསྐལ་བཟང་འདྲེན་པ་བཞི་པའི་ལུང་རྟོགས་བསྟན། །འཛམ་གླིང་སྐྱེ་རྒུའི་ལེགས་བྱས་མཆོད་སྡོང་ཆེར། །ནམ་མཁའི་མཐའ་འཚོལ་མིག་གི་མངོན་པར་ཤེས། །སྔ་ནས་མ་བརྙེད་བར་དུ་གཡོ་མེད་ཤོག །དྲས་དྲུབས་གོས་སོགས་ཕྲ་མོའི་བཅས་པས་ཀྱང་། །ཤཱཀ་ཐུབ་ཚེམས་དཀར་འཕྲེང་མཛེས་སྟོན་བྱེད་པ། །བློ་བཟང་གྲགས་པའི་རིང་ལུགས་ཡིད་བཞིན་ནོར། །སྲིད་ཞིའི་རྒྱལ་མཚན་ཏོག་ཏུ་འབར་བར་ཤོག །རྒྱུད་དུལ་ནང་རྟགས་ཕྱིར་ཤར་ངུར་སྨྲིག་གིས། །ངེས་པར་ཀླུབས་པས་རྣམ་དག་(༢༦༢བ)
ཆོ་ག་ཡི། བསླབ་གཞིར་འགྲོ་མང་བཀོད་པ་ཀུན་བཟོད་མའི། །དཔལ་མོའི་མངལ་ཁུར་བརྗིད་དང་ལྡན་པར་ཤོག །ཆོས་ལ་དབང་ཟ་མགྲིན་བཟང་གཟིག་ཤུན་ཅན། །མ་ཡིན་ཐུབ་གསུང་སྙིང་གི་གཅེས་ནོར་དུ། །འཆང་བའི་བསྟན་འཛིན་དབྱར་མཚོ་ལྟར་འཕེལ་ཞིང་། །གཡུང་དྲུང་སྲོག་གི་ཀ་བ་ཚུགས་པར་ཤོག །ཁྲིམས་གཉིས་གསེར་ཤིང་མཆོག་དམན་གཉའ་བ་རུ། །རབ་ལྕི་གནམ་བསྐོས་མི་བདག་སྐུ་ཚེ་དང་། །ཆབ་སྲིད་དགའ་བ་བརྒྱ་བའི་དཔལ་ལྡན་པ། །ཕོ་བྲང་ཆེན་པོའི་འདུན་སར་དར་དྲག་ཤོག །འཇིག་རྟེན་གསུམ་གྱི་རྒུད་མུན་ཉེར་སངས་མཐར། །ཕན་བདེའི་ཉི་མ་བོད་ཡུལ་དགུང་སྔོན་ནས། །ཤར་བའི་དགེ་ལེགས་སྣང་བ་འོད་པོ་ཆེ། །སུམ་རྩེན་ཡོངས་དབང་དཔལ་ལ་འགྲན་ནུས་ཤོག །གྲགས་སྐམ་སྨིག་མའི་ཚལ་དུ་སྐྱེས་ཙམ་མ་ཡིན་པར། རྣམ་དཔྱོད་མེས་སྨིན་གཞོན་ནུའི་ལུས་ཅན་རྒན་པོའི་བློ། །མཁས་མང་འཆི་མེད་འདུན་སར་བགྲོད་ལ་སྤོབས་མཐོ་བས། །སྲིད་ཞིའི་ལེགས་པའི་ཆ་ཀུན་དིང་བསགས་དངོམ་པར་ཤོག །ཐུབ་གཞུང་ཐིག་ལེ་མཆོག་མར་རྗེས་ཆགས་སྡེ་བཞིའི་ཞལ་སྒོའི་རིགས་བྱེད་ལས། །རྒྱལ་བསྟན་འཇིག་རྟེན་གསུམ་དུ་སྣང་སྤྲུལ་ཕན་བདེའི་འོད་ཀྱིས་མུ་བཞིའི་ལྷ། །རགས་པའི་གཟུགས་སུ་མངོན་སུམ་མཐོང་ལ་མྱ་ངན་མེད་དང་མེས་དབོན་གྱི། །རྣམ་ཐར་དཀོན་ཅོག་མཐུས་སྦྱོན་སྙན་གྲགས་སྲིད་པའི་ཁོངས་ལས་བརྒལ་བར་ཤོག །ཅེས་འོ་སྐོལ་གྱི་སྟོན་པ་ཤཱཀྱ་སེང་གེའི་བསྟན་པ་རིན་པོ་ཆེའི་རྩ་བར་གྱུར་པ་དམ་པའི་ཆོས་འདུལ་བའི་སྡོམ་པ་རབ་ཏུ་བྱུང་བ་དང་ཁྱིམ་པ་རྣམས་ཀྱིས་ཐོབ་པར་བྱེད་པའི་ཆ་ོག་འཁྲུལ་སྤོང་རྣམ་རྒྱལ་གསེར་(༢༦༣ན)
མདོག་ཅེས་བྱ་བ་འདི་ནི་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་གདན་ས་ཞེ་གསུམ་པ་ཡོངས་རྫོགས་བསྟན་པའི་མངའ་བདག་ཆོས་ཀྱི་རྗེ་བློ་བཟང་བསྟན་འཛིན་གྱིས་བཀའ་བསྩལ་ཞིང་། བ་སོ་ཆོས་ཀྱི་རྒྱལ་མཚན་གྱི་སྤྲུལ་པའི་སྐུ་ངག་དབང་དཀོན་ཅོག་ཉི་མ། རྒྱལ་བའི་སྲས་པོ་ཤེས་རབ་འཕེལ་བའི་སྤྲུལ་སྐུ་བློ་བཟང་བསྟན་འཛིན། གནས་རྙིང་ཆོས་རྗེ་ཀུན་དགའ་བདེ་ལེགས་ཀྱི་རྣམ་སྤྲུལ་ངག་དབང་ཀུན་དགའ་བདེ་ལེགས། ཤར་པ་ཆོས་རྗེ་དགེ་འདུན་གྲགས་པ། བྱང་པ་ཆོས་རྗེ་བློ་གྲོས་རྒྱ་མཚོ། རྒྱལ་ལེགས་བཤད་གླིང་དང་ཁྱབ་བདག་བླ་མ་ཕ་བོང་ཁ་པའི་གདན་ས་པ་ངག་དབང་བསྟན་འཛིན། ཁལ་ཁ་ཛ་ཡ་པཎྜི་ཏ་ཁུ་ཐུག་ཐུ། སྐྱིད་ཤོད་ཆོས་རྗེའི་སྐུ་སྐྱེ་ངག་དབང་བསྟན་འཛིན་འཕྲིན་ལས། སྣར་ཐང་མཁན་པོ་ཀོང་པོ་ངག་དབང་བཀྲ་ཤིས་སོགས་དོན་གཉེར་ཅན་མང་པོས་འབད་པ་ཆེན་པོས་བསྐུལ་བ་དང་། སྡོམ་གསུམ་ལས། བླུན་པོ་སྦྱངས་པ་ཆུང་བ་རྣམས། །འདི་འདྲ་སྤྱོད་པ་བདེན་མོད་ཀྱི། །མཁས་པ་སྦྱངས་པར་རློམ་པ་ཡང་། །རི་བོང་འཆལ་བཞིན་འདི་ལ་སྤྱོད། །འདི་འདྲའི་རིགས་ཅན་འཕེལ་གྱུར་ན། །སངས་རྒྱས་བསྟན་ལ་གནོད་མི་གནོད། །མཁས་པ་རྣམས་ཀྱིས་དཔྱོད་ལ་སྨྲོས། །གལ་ཏེ་འདི་འདྲའི་ཆོས་ལོག་གིས། །སངས་རྒྱས་བསྟན་ལ་མི་གནོད་ན། །མུ་སྟེགས་སོགས་ཀྱི་ཆོས་ལོག་ཀྱང་། །སངས་རྒྱས་བསྟན་ལ་ཅི་སྟེ་གནོད། །ཅེས་དབང་རྟུལ་དད་པའི་རྗེས་སུ་འབྲངས་པས་བསྟན་པ་ལ་མི་ཕན་པར་མ་ཟད་བསྟན་པ་དྲི་བཅས་སུ་བྱེད་ལ། དབང་རྣོན་ཆོས་(༢༦༣བ)
ཀྱི་རྗེས་སུ་འབྲངས་ཏེ། བསྲེགས་བཅད་བརྡར་བའི་གསེར་བཞིན་ལེགས་པར་དཔྱད་ནས་ཡིད་གཏན་དུ་བྱེད་དགོས་པའི་ཕྱིར། དེ་ཉིད་ལས། བདག་ནི་སངས་རྒྱས་བསྟན་པ་ལ། །མི་ཕྱེད་པ་ཡི་དད་པ་ཡོད། །འོན་ཀྱང་སངས་རྒྱས་བསྟན་པ་ལ། །འཁྲུལ་པར་སྤྱོད་ལ་བདག་མ་དད། ཅེས་གསུངས་པ་ལྟར། བསྟན་པ་རིན་པོ་ཆེ་དྲི་མ་དང་བྲལ་བ་ཞིག་བྱུང་ན་ཅི་མ་རུང་སྙམ་པའི་ལྷག་བསམ་གྱི་ཀུན་ནས་བླངས་ཏེ་ཆོ་ག་གཅིག་པུར་མ་བལྟོས་པར་རིགས་བྲལ་མཁས་པ་མང་པོའི་གསུང་རབ་ལ་དཔྱད་དེ་བློ་གསལ་རྣམས་གོ་བ་བསྐྱེད་པའི་ཆེད་དུ་མཐའ་གཅོད་དང་བཅས་ཏེ་འཇམ་དབྱངས་གཞོན་ནུ་ངུར་སྨྲིག་གར་གྱི་རྣམ་པར་རོལ་བ་རྗེ་བཙུན་དཀོན་ཅོག་ཆོས་འཕེལ་གྱི་བཀའ་དྲིན་ལ་བརྟེན་ནས་གཞུང་ལུགས་འདི་ལ་ཐོས་བསམ་ཅུང་ཟད་བགྱིས་ཤིང་། འཕགས་པའི་གནས་བརྟན་ཉེ་བར་འཁོར་གཉིས་པ་མཁན་ཆེན་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོར་བསྟན་པ་རིན་པོ་ཆེར་ཡོངས་སུ་ཞུགས་ལ་བཀའ་དྲིན་ནོས་པ་ཤཱཀྱའི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེའམ་མིང་གཞན་ཚངས་སྲས་བཞད་པའི་རྡོ་རྗེར་འབོད་པས་འོ་སྐོལ་གྱི་སྟོན་པ་ཟས་གཙང་གི་སྲས་གཙང་གི་སྲས་པོ། དྲག་པོ་ཞེས་པ་ལྕགས་སྤྲེལ་ལ་སྐུ་བལྟམས་ནས་ལོ་ཉིས་སྟོང་དྲུག་བརྒྱ་སོ་དགུར་སླེབས་པ་སྟོད་འགྲེལ་བའི་ལུགས་ལ་ཨརྠསིདྦྷུ་ཞེས་པ་ཕྱོགས་འདིར་དབང་ཐང་དང་བསྟུན་པ་གྱི་ཡི་ཞེས་པ་ས་མོ་ལུག་གི་ལོ། དམ་པའི་ཆོས་འདུལ་བའི་དབང་དུ་བྱས་ན་སྦལ་ཏི་དགྲ་བཅོམ་པ་དང་། འདུལ་འཛིན་(༢༦༤ན)
སྐྱོར་མོ་ལུང་པ་རྣམས་རྟེན་འབྲེལ་མདོ་འགྲེལ་གྱི་རྗེས་སུ་འབྲངས་ནས་ཧོར་ཟླ་བརྒྱད་པའི་ཚེས་བཅུ་དྲུག་ལ་ལོ་འགོ །ཁ་ཆེ་པཎྜིཏ་ཆེན་པོ་ཤཱཀྱ་ཤྲཱི་བྷ་དྲ་རྗེས་འབྲངས་ཇོ་བོ་སྟན་གཅིག་པ་རྣམས་མདོ་ཉི་སྙིང་གི་རྗེས་སུ་འབྲངས་ནས་ཧོར་ཟླ་དགུ་པའི་ཚེས་བཅུ་དྲུག་ལ་ལོ་འགོ །རྗེ་བཙུན་ས་སྐྱ་པ་དང་། མཉམ་མེད་རི་བོ་དགའ་ལྡན་པ་སོགས་འདུལ་འཛིན་ཕྱི་མ་མང་པོ་ཞིག་མངོན་པ་མཛོད་ཀྱི་རྗེས་སུ་འབྲངས་ནས་ཧོར་ཟླ་བཅུ་པའི་ཚེས་བཅུ་དྲུག་ལ་ལོ་འགོར་མཛད་པའི་ལུགས་གསུམ་ལས་ཕྱི་མ་ཉིད་གྲགས་ཆེ་བས། འདུལ་མངོན་པ་ལུགས་ཀྱི་ལོ་འགོ་ཐོག་མར་ཚེས་ཤིང་དུས་གསུམ་རྒྱལ་བ་ཀུན་དངོས་བློ་བཟང་གྲགས་པ་ཟུང་འཇུག་གི་གོ་འཕངས་མངོན་དུ་མཛད་པའི་དུས་དྲན་གྱི་ཚེ་གངས་ཅན་གྱི་ལྟེ་བ་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་དཔལ་གྲོང་སྔགས་རམ་པ་ངག་དབང་དགེ་ལེགས་ཀྱིས་བགྱིས་པ་སོ་སོ་ཐར་པ་རིགས་བརྒྱད་ཀྱི་རིང་ལུགས་དྲི་མ་མེད་པ་སྲིད་མཐའི་བར་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་མངྒ་ལཾ།། །།