རྗེ་བཙུན་འཇམ་དཔལ་དབྱངས་ཀྱི་བསྟོད་པ་ཏམྦུ་རའི་རྒྱུད་མང་།
རྗེ་བཙུན་འཇམ་དཔལ་དབྱངས་ཀྱི་བསྟོད་པ་ཏམྦུ་རའི་རྒྱུད་མང་ཞེས་པ་བཞུགས་སོ། །
ན་མ་ཨཱརྱ་མཉྫུ་ཤྲི་ཡེ། མཁའ་ཁྱབ་དོན་དམ་ཆོས་སྐུ་ལྷ་ཡི་ལམ། །བཅུ་དྲུག་བདེ་ཆེན་མཚན་བཟང་དབང་པོའི་གཞུ། །གཉིས་མེད་གཉིས་སུ་འཆར་བའི་སྒྱུ་དྲའི་གར། །སྟོན་མཛད་འཇམ་མགོན་ཟུར་ཕུད་ལྔ་པར་འདུད། །ཆུ་སྐྱེས་འདབ་བརྒྱ་རྒོད་པའི་ཟེའུ་འབྲུའི་རྩེར། །རབ་གསལ་ཟླ་བའི་དཀྱིལ་འཁོར་ཉ་རྒྱས་སྟེང་། །གུར་ཀུམ་རྡུལ་མང་བརྩེགས་པའི་ལྷུན་པོ་ནི། །ཉི་མ་བྱེ་བའི་འོད་ཀྱིས་འཁྱུད་པ་བཞིན། །བཅུ་དྲུག་ལང་ཚོ་དར་བའི་འཇོ་སྒེག་ཅན། །རྒྱལ་སྲས་གཞོན་ནུར་སྟོན་འདི་རིང་པོ་ནས། །རྣམ་འདྲེན་ཀུན་གྱི་ཡབ་ཅེས་རྒན་པོའི་མཚན། །འཆང་བའི་གཏམ་འདི་ཟོལ་གྱིས་སྒྲིབ་པ་བཞིན། །འཚམས་སྤྲིན་གདངས་ཀྱི་རི་བོ་པད་རག་གི །མདངས་དབྱིབས་གཟུགས་སྐུའི་བཀོད་པ་བྱེ་བའི་ཚོགས། །མཐའ་མ་འཁོར་བའི་རྒྱ་མཚོ་མ་བསྐམས་བར། །གྲངས་མེད་འགྲོ་བའི་དོན་དུ་བསྟན་ལས་ཅི། །མིག་གི་བདུད་རྩིར་སྤྱོད་པའི་མཛེས་སྡུག་སྐུ། །ཕུན་ཚོགས་མཚན་དཔེའི་རི་མོ་བཀྲ་བ་གང་། །མཐོང་ཐོས་དྲན་དང་རེག་པས་རྣམ་གྲོལ་བ། །འདི་ཀོ་སྐལ་བཟང་གདུལ་བྱའི་བསོད་ནམས་དཔྱིད། །དེ་དོན་(༢ན)
རྟོགས་པའི་བློ་གྲོས་ཆེས་ཕྲ་རྣམས། །སྣ་ཚོགས་རིན་ཆེན་ཕྲེང་བའི་དོ་ཤལ་དང་། །པཤྩ་ལི་ཀའི་དར་གྱི་ཤམ་ཐབས་ལ། །བསྔགས་བརྗོད་དར་དིར་སྒྲོག་པ་ངལ་བའི་གནས། །སྲིད་ཞིའི་རྒུད་པ་མིག་སྨན་ལྟར་གནག་པ། །མཐར་བྱེད་ནཱ་དའི་སྒྲ་དབྱངས་རྟ་ལྗང་ཅན། །རྒོལ་ངན་སྨྲ་བའི་ཀུ་མུད་ཟུམ་པ་དང་། །དཔྱོད་ལྡན་བློ་གྲོས་པད་དཀར་འཛུམ་གྱིས་བསུ། །དམ་པའི་ཆོས་ཀྱི་རྒྱུད་མང་འཁྲོལ་བའི་གླུ། །སྐལ་བཟང་རྣ་བར་འཇེབས་པ་ཚངས་པའི་གསུང་། །ཆེས་ཆེར་རྨོངས་པའི་འགྲོ་ལ་བྲག་ཅའི་སྒྲ། །མི་བཟད་བདུད་སྡེའི་སྙིང་ལ་ཚེར་མ་བཞིན། །ཆུ་ཀླུང་གཅིག་ལ་སྣག་ཁྲག་བདུད་རྩི་སོགས། །སྣ་ཚོགས་དུ་མར་སྣང་ཞིང་དོན་བྱེད་པ། །ཀུན་རྫོབ་འཁྲུལ་བའི་ཆོས་ཀུན་དོན་དམ་དབྱིངས། །མ་རྙེད་དབུ་མའི་ལམ་བཟང་སྟོན་པ་བཞིན། །སྐད་ཅིག་ཙམ་ལ་རྒྱ་ཆེན་ཤེས་བྱའི་མཐའ། །འཇལ་ནུས་ཟབ་ཡངས་ཐུགས་ཀྱི་རྒྱ་མཚོ་ཆེར། །གྲངས་མེད་ཆོས་ཀྱི་རི་བོང་འཛིན་པའི་གཟུགས། །མི་འཆར་ལྐོག་ཏུ་གྱུར་དེ་ད་ག་རེ། །ཕུལ་བྱུང་ཐུགས་རྗེའི་ལངྒའི་བདག་པོའི་གཟུགས། །བློ་ལྡན་སྙིང་གི་རིན་ཆེན་རྩིག་(༢བ)
ངོས་ལ། །ཤར་ཚེ་ལྔ་རིག་ཧ་ནུ་མནྠ་གང་། །དགའ་བའི་ཟློས་གར་སྒྱུར་ལ་ཅི་ཡང་བྲེལ། །ཆོས་བརྒྱད་འབོད་གྲོགས་འཕྲུལ་གྱིས་ཉེར་དྲངས་པའི། །དམ་པའི་ཆོས་ཀྱི་སི་ཏཱ་དོར་བྱས་ནས། །འདིར་སྣང་རི་དྭགས་སྙེག་ལ་མགོན་ཁྱོད་ཀྱིས། །མི་ཕན་བྱང་བསྟན་ཕུག་པར་ཉི་ཟེར་བཞིན། །གཏན་གྱི་སྐྱབས་སུ་གསོལ་ན་སྨོས་ཅི་འཚལ། །ཅུང་ཟད་དྲན་པས་ཕན་བདེའི་ལེགས་ཚོགས་རྣམས། །སྩོལ་མཛད་འདོད་པའི་རེ་སྐོང་དབང་གི་རྒྱལ། །སྔོན་མེད་ཡིད་བཞིན་ནོར་བུ་གཞན་ན་སུ། །འགྲོ་བའི་དབང་པོར་འཚམ་པའི་འཕྲིན་ལས་ཀྱི། །ཕ་མཐའ་ཀུན་གསལ་བུ་མོའི་འགྲམ་པ་ལ། །འཇལ་བྱེད་འཛད་པ་མེད་པའི་ཞགས་པ་ཡིས། །སྲིད་དང་ཞི་བའི་དངོས་ཀུན་གཅིག་ཏུ་བཅིངས། །ཕྲ་ཞིབ་རྣམ་པར་དཔྱོད་པའི་མཁྱེན་པའི་སྤྱན། །དཀྱུས་རིང་ཟུར་གྱིས་འཕངས་པའི་ཉག་ཕྲན་གྱིས། །མཐའ་མེད་ཁེངས་ལྡན་ཤེས་བྱ་ལུས་ཕྲ་མ། །ཀུན་ཡིད་དགའ་བའི་འཛུམ་དང་བཅས་ཏེ་བསུ། །བརྩེ་ཆེན་དཔྱིད་ཀྱི་དཔལ་མོའི་མངལ་ཡངས་ནས། །ལྷག་བསམ་ཆུ་མིག་གསར་པའི་ལང་ལོང་ཅན། །རླབས་ཆེན་སྤྱོད་པ་མཆོག་གི་ཆར་རྒྱུན་གྱིས། །ཕན་དང་བདེ་བའི་མྱུ་གུ་གཡུར་དུ་ཟ། །དབང་ཕྱུག་མིག་ལས་སྤར་བའི་མེ་དཔུང་གིས། །ཉག་ཕྲན་བདག་པོ་བཅོམ་པ་ངེས་པར་རྫུན། །བདེན་ན་ཁྱོད་ཀྱི་ནུས་མཐུའི་ཐོག་མདའ་ཡིས། །ནག་པོའི་ཕྱོགས་རྣམས་ཅིག་ཅར་བཅོམ་མིན་ནམ། །ཁྱོད་དང་མ་ལ་ཡར་སྐྱེས་ལྗོན་པ་གཉིས། །མི་ཤེས་ཚ་གདུང་འཇོམས་ལ་མཚུངས་ན་ཡང་། །མགོན་ཁྱོད་ཉེས་པའི་སྐྱོན་བྲལ་ངག་གི་ལྷ། །ཙན་དན་ཤིང་དེ་གདུག་(༣ན)
པའི་སྦྲུལ་གྱིས་འཁྲིལ། །ཨེ་མ་ངོ་མཚར་མཁའ་ལ་ཉི་ཟླ་ཟུང་། །ཆོས་བཟང་ལྷ་ཡི་མདུན་སར་མིག་སྟོང་ཅན། །གྲངས་མེད་རྐང་འཐུང་ཁྲོད་ན་ཡོངས་འདུའི་ལྗོན། །རྒྱལ་སྲས་འཕགས་ཚོགས་དབུས་ན་འཇམ་དབྱངས་ཁྱོད། །མཆོག་དམན་ཀུན་ལ་ཉེ་དང་རིང་མེད་པར། །གསོལ་བ་བཏབ་པ་ཙམ་གྱིས་འདོད་པའི་དོན། །ལྷུན་གྲུབ་རེ་བ་མ་ལུས་སྐོང་བྱེད་པའི། །ཡིད་བཞིན་ནོར་བུ་ཀླུ་དབང་གཙུག་ན་མཛེས། །རྣམ་པར་འབྱེད་པའི་ཤེས་རབ་རལ་གྲི་ཡིས། །མི་ཤེས་རྨོངས་པའི་དྲྭ་བ་བཅད་པ་དང་། །ལྷན་ཅིག་འཁོར་བ་སྡུག་བསྔལ་ཀུན་གྱི་རྒྱ། །དྲལ་ཏེ་འགྲོ་རྣམས་བདེ་བ་ཆེན་པོར་འཁྲིད། །གང་གི་གསང་གསུམ་བྱིན་རླབས་བདུད་རྩིའི་རྒྱུན། །སྐྱེ་དགུའི་ཡིད་ཀྱི་ཡོལ་གོར་འཁྱིལ་བ་ན། །ཤེས་ལྡན་དད་པའི་བསྟོད་བསྔགས་ཟིལ་མངར་ཆུ། །མགོན་ཁྱོད་ཐུགས་ཀྱི་པདྨའི་ཟེའུ་འབྲུར་འབབ། །མཐའ་བྲལ་རླབས་ཆེན་མཛད་པ་མཆོག་གི་ནོར། །ཕྱུར་བུར་སྤུངས་པ་གཅིག་ཏུ་ཤོང་བའི་སྣོད། །སྤྲུལ་ལ་འཇིག་རྟེན་མེས་པོ་ངལ་གྱུར་ན། །སྲིད་གསུམ་འདི་ཡང་ད་གདོད་ཆུང་ངུར་ཁུམས། །ཆོས་ཕུང་རྒྱ་མཚོར་ཤར་བའི་པུ་ཏི་ཀ །ཕྲག་གོང་ཨུཏྤལ་འདབ་སྟེང་མངོན་ཆགས་པ། །བལྟ་ཕྱིར་ལྷུན་པོས་ཉི་ཟླའི་སྒྲོན་མེ་ཟུང་། །བཏེག་ནས་ངལ་མེད་ལྟ་བར་ཆས་པ་བཞིན། །ཐབས་ཤེས་ཟུང་འཇུག་རྒྱུད་ལས་དྲངས་པའི་མདས། །གཏི་མུག་སྙིང་ག་ཕུག་པའི་ཁྲག་གི་རྒྱུན། །འགྲོ་ལ་རྗེས་ཆགས་དམར་བའི་འོད་གཟི་ལ། །ཐུན་མཚམས་མདངས་སུ་བྱེད་པོས་བཏགས་སམ་སྙམ། །རྒོད་མ་ཁ་ལ་འགྲན་བཟོད་ཞབས་སེན་(༣བ)
གྱིས། །འཇམ་མཉེན་ཆུ་སྐྱེས་འདབ་མ་སྲེག་གོ་ཞེས། །རི་བོང་འཛིན་དེ་ཚ་བའི་གདུང་སེལ་སླད། །མཁའ་ལས་བབས་ནས་སྟན་དུ་འོང་པ་བཞིན། །ཆོས་ཀུན་མཁྱེན་ཡང་སློབ་པ་འཕགས་པའི་ཚུལ། །དྲང་པོའི་སྐུ་ཡང་འཁྱོག་པོའི་འགྱིང་བག་ཅན། །ཞི་ཞིང་དུལ་ཡང་བདུད་སྡེའི་ཚོགས་ལ་ཁྲོ། །ཀུན་ལ་བརྩེ་ཡང་སྐལ་ལྡན་རྗེས་སུ་འཛིན། །མགོན་ཁྱོད་ཐུགས་རྗེའི་ཟེགས་མ་མ་འདྲིས་པའི། །ལུས་ཅན་རྣམས་ལ་འཇུག་པ་རྫུན་གཏམ་སྟེ། །ཙནྡྲ་གོ་མི་མཁས་པའི་མཐར་སོན་ཡང་། །ད་དུང་སྐྱེ་དགུ་ཕལ་ཆེར་རྣམ་པར་རྨོངས། །འགྲོ་ཀུན་འཛུམ་གྱིས་བསུ་བའི་ཞལ་ཁྱིམ་ལ། །གུར་གུམ་གསར་པའི་མདངས་ལ་དམར་འོད་ཅན། །འཁོར་བའི་ཕ་རོལ་འཚོལ་བའི་སྤྱན་གྱི་དཀྱུས། །སྲིད་དང་ཞི་བའི་མཐའ་ལས་རྣམ་པར་བརྒལ། །ཡིད་འོང་གདུབ་སིལ་འཁྲོལ་བའི་སྙན་པོའི་སྒྲ། །རྣ་བའི་བདུད་རྩིར་བྱེད་པའི་འོད་དཀར་ཅན། །ཡིད་བཞིན་འོ་མའི་རྒྱ་མཚོ་འཁྱིལ་བའི་དབུས། །རྩེད་འཇོར་རོལ་བའི་འདབ་ཆགས་ངང་པ་སུ། །རྒྱལ་བ་ལས་ཀྱིས་མཁྱེན་པའི་ཕུང་པོ་དང་། ཁྱོད་ཀྱི་རྣམ་པར་ཡངས་པའི་བློ་གྲོས་གཉིས། །འཇིག་རྟེན་མེས་པོས་སྲང་ལ་བཏེག་པ་ན། །ལྕི་དང་ཡང་བའི་གོ་སྐབས་མེད་འདི་མཚར། །དཔལ་ལྡན་སྟོབས་བཅུའི་རྩལ་འཆང་འདྲེན་པ་ཀུན། །ཀུན་དགའི་ལེགས་བཤད་སྤེལ་ཕྱིར་རྒྱལ་བའི་སྲས། །སྲས་བཅས་རྣམས་ཀྱི་གཙུག་ན་མཐོ་བའི་ལྷ། །ལྷ་མཆོག་འཇམ་དཔལ་དབྱངས་ཞེས་གྲགས་པ་འབར། །ངག་གི་དབང་པོ་དབང་ཕྱུག་བརྒྱད་ལྡན་པ། །ཐམས་ཅད་མཁྱེན་དེ་མཁྱེན་བརྩེ་ནུས་པའི་དཔྱིད། །སྒྲིབ་(༤ན)
གཉིས་ལས་བྲལ་ལས་ཅན་འགྲོ་བའི་མགོན། །མཆོག་གི་དངོས་གྲུབ་དངོས་སུ་སྩོལ་ལ་མཁས། །འཚམས་སྤྲིན་མདངས་འཛིན་འཛིན་མ་ཡོངས་ཀྱི་རྒྱན། །རྒྱན་ཕྲེང་གིས་མཛེས་མཛེས་སྡུག་གཞོན་ནུའི་གཟུགས། །གཟུགས་སྐུ་ངོ་མཚར་མཚར་སྡུག་འཛིན་པའི་མགོན། །མགོན་པོ་འཇམ་དབྱངས་དབྱངས་བདུན་ལེགས་བཤད་འཁྲོལ། །དུང་དུང་ཡིད་ཀྱིས་རྟག་ཏུ་ལྷར་བསྟེན་ན། །བརྟན་བརྟན་སྙིང་གི་པད་མཚོར་ལེགས་བཞུགས་ནས། །འགྲིག་འགྲིག་གསུང་གི་སྣང་བ་ལེགས་སྩོལ་ཞིང་། །ཡང་ཡང་ཐུགས་རྗེའི་ཕྱག་གིས་དབུགས་དབྱུང་མཛད། །ལྡེམ་ལྡེམ་པདྨ་འདབ་མ་རྒྱས་པའི་དབུས། །དཀར་དཀར་ཆུ་ཤེལ་དབང་པོའི་དཀྱིལ་འཁོར་སྟེང་། །མཛེས་མཛེས་གཅིག་ཏུ་བསྡུས་པའི་མཚན་དཔེའི་སྐུ། །གསལ་གསལ་ཀུན་རྟོག་པིར་གྱིས་ཅི་ཡང་འབྲི། །ཕ་མཐའ་མི་མངོན་ཚང་ཚིང་རྣམ་པར་འཁྲིགས། ཁ་དོག་རབ་དཀར་ཁ་བའི་རེག་བྱས་གདུངས། །ཚ་གྲང་མི་སྙོམ་ཐ་ག་པ་ཡི་ཡུལ། །ཋ་ག་ར་ལ་ཐོབ་བྱར་འཛིན་པ་རྣམས། །མི་ཤེས་རྨོངས་པའི་མུན་པས་ཉེར་བསྒྲིབས་པས། །མི་ཟད་སྡུག་བསྔལ་རྒྱ་མཚོའི་རྒྱུ་སྒྲུབ་པར། །མེ་ཏོག་བཅུད་ལ་བུང་བ་ལྟར་འཁོར་བའི། །མ་ལུས་འགྲོ་བ་དྲོངས་ཤིག་འཇམ་དཔལ་དབྱངས། །ཀ་མ་ལ་ལྟར་འཇམ་མཉེན་གཟུགས་ཀྱི་སྐུའི། ཁ་དོག་རྣམ་པར་བཀྲ་བའི་བཀོད་པ་དང་། །ག་བུར་ངད་ལྡང་གདུང་སེལ་ཐུགས་རྗེའི་ཕྱག །ང་རྒྱལ་ཅན་གྱི་འགྲོ་བའི་གཙུག་ན་ཁྱོངས། །ཅ་ཅོ་ལེགས་པར་བཤད་པའི་དབྱངས་སྙན་པོ། །ཆ་ཤས་རེས་ཀྱང་ཡིད་དང་རྣ་བ་ལ། །ཇ་དཀར་བཏུང་བས་རིག་པའི་མདངས་གསལ་ལྟར། །ཉ་(༤བ)
རྒྱས་ཟླ་ལྟར་བློ་གྲོས་འཕེལ་བར་མཛོད། །ཏ་ལའི་གླེགས་བམ་རྒྱ་གར་མཁས་པའི་གཞུང་། །ཐ་ན་ཆུང་ངུའི་དཀའ་གནད་ཙམ་ལ་ཡང་། །ད་ལྟ་ཐོགས་མེད་སྨྲ་བའི་སྤོབས་པ་མཆོག །ནཱ་གཱ་རྫུ་ནའི་རྣམ་དཔྱོད་ལྟར་མཚུངས་མཛོད། །པ་སངས་ལྟར་དཀར་མཁས་པའི་བྱ་བ་ཀུན། །ཕ་རོལ་རྒོལ་བ་ཟིལ་གྱིས་གནོན་ནུས་པ། །བ་གླང་དབུས་ན་ཁྱུ་མཆོག་ཇི་བཞིན་དུ། །མ་ལུས་ཤེས་ལྡན་རྣམས་ཀྱི་མགོན་དུ་མཛོད། །ཙ་ན་ཡིན་ཀྱང་དངོས་སུ་ཞལ་བསྟན་ནས། །ཚ་ཟེར་སྤྲིན་དང་པདྨ་ཇི་བཞིན་དུ། །ཛ་ཡའི་གསུང་རབ་ཀུན་ལ་ལྟ་བའི་མིག །ཝ་ལེར་གསལ་བའི་ཤེས་རབ་རྒྱས་པར་མཛོད། །ཞ་ཡིག་ལྟར་འཁྱིལ་འཁོར་བའི་རྒྱ་མཚོའི་ནང་། །ཟ་བྱེད་ཉོན་མོངས་ཆུ་སྲིན་གདུག་པས་གཙེས། །འ་འུར་མི་བཟད་སྡུག་བསྔལ་ལྡན་པ་རྣམས། །ཡ་མཚན་དག་པའི་ཞིང་དུ་ཁྱོད་ཀྱིས་དྲོངས། །ར་བ་མེད་པའི་ཕུག་པའི་བླུན་སྒོམ་དང་། །ལ་ལུང་འཁྱམ་པའི་ཏོག་གེ་ཁ་བཤད་མཁན། །ཤ་ཁྲག་སྡིག་ལ་རོལ་པའི་ཀླ་ཀློའི་སྡེ། །ས་ཡི་རྡུལ་ལྟར་ཁྱབ་རྣམས་རྗེས་སུ་ཟུངས། །ཧ་ཅང་དུས་ངན་སྙིགས་མའི་མཐར་ཐུག་འདིར། །ཨ་དོན་སྐྱེ་མེད་རྟོགས་པ་ཉིན་སྐར་ཙམ། །ཧ་ལའི་དུག་འདྲའི་གནས་ངན་ལེན་གྱི་རྒྱུ། །ཨ་མྲའི་འབྲས་ལྟར་མྱོང་རྣམས་རྗེས་བརྩེར་མཛོད། །དེ་ལྟར་དུས་གསུམ་རྒྱལ་བ་ཀུན་གྱི་ཡབ། །རྒྱས་སྲས་གཞོན་ནུའི་ཚུལ་འཛིན་ངག་གི་ལྷ། །དྲན་པས་རྣམ་འདྲེན་རིན་ཆེན་གླིང་མཆོག་ཏུ། །འཁྲིད་པའི་དེད་དཔོན་བརྟན་པའི་འཁོར་ལོ་དགོངས། །མི་འཕྲོག་དད་པའི་ཤིང་རྟས་རབ་དྲངས་པའི། །ཤུགས་དྲག་སྨོན་ལམ་དཀྱིལ་འཁོར་རྟ་ལྗང་ཅན། །སྙན་(༥ན)
འགྱུར་ཚིག་གི་མཁའ་ལ་ཉེར་འཕགས་ན། །ཐུགས་རྗེའི་པད་དཀར་འདབ་མ་འཛུམ་ལས་ཅི། །བདག་སོགས་མཁའ་མཉམ་སེམས་ཅན་མ་ལུས་པ། །ཉོན་མོངས་དུག་གསུམ་དྲག་པོའི་གདོན་གྱིས་གཙེས། །གནས་ངན་ལེན་པའི་རྒྱུ་ཡི་ཁུར་ཆེན་བླངས། །བླང་དང་དོར་བྱར་ལྟ་བའི་བློ་མིག་ལྡོངས། །མངོན་མཐོ་ངེས་ལེགས་ལམ་ལས་རྒྱབ་ཀྱིས་ཕྱོགས། །མི་བཟད་ངན་སོང་གཡང་སར་གོམ་པ་འཕྱན། །དགེ་བའི་ལས་ཀྱི་འཁར་བའི་རྟེན་དང་བྲལ། །ཉམ་ཐག་སྙིང་རྗེའི་གནས་སུ་གྱུར་རྣམས་ལ། །མགོན་པོ་ཁྱོད་ཀྱིས་རྗེས་སུ་མི་འཛིན་ན། །གཏན་གྱི་སྐྱབས་གནས་དམ་པ་སུ་ལ་རེ། །བདག་གཞན་བརྗེ་བའི་བྱང་ཆུབ་སེམས་ལྡན་པའི། །སྙན་པོའི་གཏམ་ཡང་མིང་གི་ལྷག་མར་ཟད། །ཆེས་ཆེར་སྙིགས་མ་ལྔ་ཡི་ཉེར་སྦགས་པས། །ཧ་ཅང་གདུལ་བ་དཀའ་ཞེས་བཏང་སྙོམས་སུ། །འཇོག་ན་བགྲོད་པར་དཀའ་བའི་ཆུ་བོ་ལ། །མི་ཕན་གྲུ་དང་ཟམ་པས་ཅི་ཞིག་བྱེད། །འགྲོ་བའི་ཁམས་དང་བསམ་པ་བག་ལ་ཉལ། །ཇི་བཞིན་རྟོགས་ནས་རྗེས་སུ་འཛིན་པ་ལ། །རྨད་བྱུང་མཁྱེན་པའི་ཡོན་ཏན་མཐའ་ཡས་པ། །རྒྱལ་སྲས་དམ་པ་ཁྱོད་ལ་ལྷག་པར་མངའ། །འགྲོ་བ་ཀུན་ལ་རང་གི་བུ་གཅིག་ལྟར། །རྣམ་པར་བརྩེ་བས་ཅུང་ཟད་ཙམ་དུ་ཡང་། །ཡལ་བར་མི་འདོར་སྙིང་རྗེ་ཆེན་པོ་ནི། །རྗེ་བཙུན་ཁྱོད་ཀྱི་རྒྱུད་ལ་རྟག་ཏུ་ལྡན། །གཞན་ལ་ཕན་ན་དམྱལ་བའི་མེ་དོང་དུ། །འཇུག་པ་མཚོ་དང་རྫིང་བུར་ངང་པ་ལྟར། །དགའ་ཞིང་སྤྲོ་བའི་ནུས་ལྡན་ལྷག་པའི་སེམས། །འཕགས་ཆེན་དམ་པའི་ཡུལ་ལས་གཞན་དུ་ཅི། །སྐྱེ་དགུའི་མགོན་སྐྱབས་དཔུང་དང་གཉེན་གྱུར་པའི། །(༥བ)
ཡོན་ཏན་ཀུན་ཚང་དམ་པ་ཁྱེད་རྣམས་ཀྱིས། །འགྲོ་རྣམས་ཡལ་བར་འདོར་ན་སྐྱབས་གནས་མཆོག །གསུང་རབ་མང་པོར་བཤད་པ་རྫུན་དུ་བས། །དེ་ཕྱིར་ཐུགས་རྗེ་ཆེན་པོའི་ཞགས་པ་ཡིས། །ལུས་ཅན་མཐའ་དག་མི་གནས་མྱང་འདས་མཆོག །རང་གཞན་དོན་གཉིས་གྲུབ་པའི་གཏན་བདེའི་གཞིར། ཁྲིད་ཅིག་སྨྲ་བའི་དབང་ཕྱུག་འཇམ་དཔལ་དབྱངས། །ལུགས་གཉིས་ཨུཏྤལ་འཁྲིགས་པའི་རྫིང་བུ་ལ། །རྨོངས་པའི་གླང་ཆེན་རྒྱུ་བའི་གོམ་སྟབས་ཀྱིས། །ཕན་བདེའི་ཡལ་འདབ་འདམ་ལྟར་བརྫི་བ་ལ། །དྲན་འཛིན་ལྕགས་ཀྱུས་ཐུལ་ཞིག་འཇམ་དཔལ་དབྱངས། །མེ་ཏོག་མདའ་ཡིས་དགེ་བའི་སེམས་ཀྱི་སྙིང་། །མངོན་པར་ཕུག་པའི་རི་དྭགས་ཤ་ར་བྷ། །ཕུལ་བྱུང་བྱིན་རླབས་དཔྱད་ཀྱིས་རབ་ཕྲལ་ནས། །ལོག་སྤྱོད་ཟུག་རྔུ་ཆོམས་ཤིག་འཇམ་དཔལ་དབྱངས། །སྒྲ་ཚད་བཟོ་གསོ་ནང་དོན་རིག་པ་དང་། །སྙན་ངག་མངོན་བརྗོད་སྡེབ་སྦྱོར་ཟློས་གར་གཞུང་། །སྐར་རྩིས་བཅུ་ཕྲག་རིག་པའི་གནས་རྣམས་ཀུན། །འཆད་པའི་རྣམ་དཔྱོད་སྩོལ་ཅིག་འཇམ་དཔལ་དབྱངས། །མཐའ་ཀླས་གཙུག་ལག་མངོན་པར་འཁྱིལ་བའི་ཆུ། །ལོག་རྟོག་ཉེས་བཤད་རྙོག་མའི་ལང་ལོང་ཅན། །རིགས་ལམ་ནོར་བུ་ཀེ་ཏ་ཀས་དྲུངས་པའི། །རྩོད་པའི་རྣམ་དཔྱོད་སྩོལ་ཅིག་འཇམ་དཔལ་དབྱངས། །ཕྱི་ནང་གསང་བའི་གཞུང་ལུགས་མ་ལུས་པ། །ཉུང་དུ་སྤེལ་དང་རྒྱ་ཆེན་སྙིང་པོར་བསྡུ། །མ་ཚང་ཁ་འགེངས་གབ་དཀྲུགས་སྡེབ་པ་སོགས། །རྩོམ་པའི་རྣམ་དཔྱོད་སྩོལ་ཅིག་འཇམ་དཔལ་དབྱངས། །བློ་གྲོས་དྲི་མ་མེད་པའི་ཨཱ་དཪྴར། །ཅུང་ཟད་ཙམ་ལ་གསུང་རབ་བྱེད་པའི་གཟུགས། །ཐོགས་(༦ན)
མེད་འཆར་བའི་འཛིན་དང་མི་བརྗེད་པའི། །གཟུངས་ཀྱི་དངོས་གྲུབ་སྩོལ་ཅིག་འཇམ་དཔལ་དབྱངས། །ཕྱོགས་དེས་མི་ངོམས་ལེགས་པར་བཤད་པའི་ཚིག །ལུས་ཕྲའི་འགྲམ་པའི་ཆང་གི་ཐིགས་པས་ཀྱང་། །ཡོན་ཏན་བ་ཀུ་ལ་ཡི་ཁ་འབྱེད་པའི། །ཐོས་པའི་དངོས་གྲུབ་སྩོལ་ཅིག་འཇམ་དཔལ་དབྱངས། །ཚིག་ཙམ་མ་ཡིན་དེ་དོན་དཀའ་བའི་གནད། །ཀུན་ལ་ཞིབ་མོར་བརྟགས་ཤིང་ཉེར་དཔྱད་པས། །ཡང་དག་དོན་གྱི་ངེས་པ་གཏིང་རྙེེད་པའི། །བསམ་པའི་དངོས་གྲུབ་སྩོལ་ཅིག་འཇམ་དཔལ་དབྱངས། །སྡེ་སྣོད་གསུམ་དང་རྡོ་རྗེའི་རྣལ་འབྱོར་སོགས། །ཟབ་མོའི་ལམ་རྣམས་རྒྱུད་ལྡན་བླ་མ་ཡི། །མན་ངག་ཇི་བཞིན་ཉམས་སུ་རབ་ལེན་པའི། །སྒོམ་པའི་དངོས་གྲུབ་སྩོོལ་ཅིག་འཇལ་དབྱངས། །ཕན་བདེའི་འབྱུང་གནས་རྒྱལ་བའི་བསྟན་པ་མཆོག །དབྱར་གྱི་ལྗོན་པའི་ལོ་འདབ་ལྟར་རྒྱས་ཤིང་། །སེམསཅན་མཐའ་དག་སྐྱིད་པའི་གྲིབ་གསིལ་ལ། །ཡུན་རིང་འཚོ་ཞིང་སྐྱོང་ཅིག་འཇམ་དཔལ་དབྱངས། །གསོལ་འདེབས་བཀྲ་ཤིས་གཡས་སུ་འཁྱིལ་བའི་དུང་། །དུས་གསུམ་དགེ་བའི་སྒྲ་དབྱངས་སྙན་པོ་ཅན།།འགྲོ་བའི་ཡིད་ཀྱི་གདུང་སེལ་བདུད་རྩིའི་བཅུད། །རྒྱལ་ཀུན་མཆོད་པའི་རོལ་མོས་མཉེས་གྱུར་ཅིག །ཅེས་འཕགས་པ་འཇམ་དཔལ་དབྱངས་ལ་བསྟོད་པ་སྨོན་ལམ་དང་བཅས་པའི་ཚིགས་སུ་བཅད་པ་ཏམྦུ་རའི་རྒྱུད་མང་ཞེས་པ་འདི་ནི་འགའ་ཞིང་ཆོས་རྗེ་རྒྱ་ཡགས་རབ་འབྱམས་པ་གྲགས་པ་རྒྱལ་མཚན་དང་། ཟུང་ཆུ་རབ་འབྱམས་པ་འཕྲིན་ལས་སོགས་ཀྱིས་བསྐུལ་པའི་ངོར། སློབ་དཔོན་དཎྜིའི་
གཞུང་ལུགས་ལ་སྦྱངས་ནས་ཅུང་ཟད་ཤེས་པ་ལ་བསྟེན་སྙན་ངག་མཁན་པོར་རློོམ་པ། ཟ་ཧོར་གྱི་རིགས་ལས་ཨ་ཝ་དྷཱུ་ཏཱི་པའི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ། མིང་གཞན་འཇམ་ངབྱངས་དགའ་བའི་བཤེས་གཉེན་ནམ། ཚངས་སྲས་བཞད་པའི་རྡོ་རྗེར་འབོད་པའི་ལྡུམ་བུ་པས། རྣམ་རྒྱལ་ཞེས་པ་ཆུ་མོ་སྦྲུལ་གྱི་ལོ་དབོ་ཟླ་བའི་དཀར་ཕྱོགས་གྱི་རྒྱལ་བ་གསུམ་པའི་ཚེས་ཀྱི་ཉིན། རྒྱ་ནག་གི་སའི་ཆ་རི་བོ་རྩེ་ལྔ་དང་ལེ་དབར་བདུན་རྒྱས་ཆོད་པའི་ཕོ་བྲང་པེ་ཅིང་གི་ཉེ་འདབས་སུ་ཇ་སྦྱོར་གསུམ་གྱི་ཡུན་ལ་གྲུབ་པར་སྦྱར་བའི་ཡི་གེ་པ་ནི་སྨོན་འགྲོ་པཎ་ཆེན་ནོ། །