ཇ་མཆོད་ཀྱི་རིམ་པ་བཅུད་མཆོག་ནམ་མཁའ་མཛོད་ཀྱི་དགའ་སྟོན།
༄༅། །ཇ་མཆོད་ཀྱི་རིམ་པ་བཅུད་མཆོག་ནམ་མཁའ་མཛོད་ཀྱི་དགའ་སྟོན་ཞེས་བྱ་བ་བཞུགས་སོ། །
པད་རྩ་ལྟ་བུར་དཀར་བའི་ཡོལ་གོའི་ནང་། ཁ་དོག་དམར་སེར་ལེགས་འཁྱིལ་རྒྱ་ཇ་ཡི། །ཕུན་ཚོགས་རོ་བརྒྱ་བདའ་བ་བཏུང་བའི་མཆོག །འཛད་མེད་ནམ་མཁའ་མཛོད་དུ་བྱིན་བརླབས་ཏེ། །གདེངས་ཅན་ཀླུ་དབང་འཛིན་པ་ལག་མང་དང་། །བཙུན་མོ་སྲས་དང་བཀའ་ཉན་བློན་པོར་བཅས། །ཕོ་ཉ་མངག་གཞུག་འཁོར་ཚོགས་རྒྱ་མཚོ་ལ། །མཆོད་པར་འབུལ་ལོ་དངོས་གྲུབ་མ་ལུས་སྩོལ། །འཇིག་རྟེན་ཁམས་སུ་ཆར་འབབ་ལོ་ཏོག་དང་། །རྩི་བཅུད་རབ་རྒྱས་དཔལ་འབྱོར་ལོངས་སྤྱོད་འཕེལ། །བསྟན་དང་བསྟན་འཛིན་དགོན་གནས་སྡེ་བཅས་སྐྱོངས། །འདོད་པའི་རེ་བ་ཡིད་བཞིན་སྐོང་བར་མཛོད། །ཇ་མཆོད་འདིའང་གདེངས་ཅན་དབང་པོས་བསྐུལ་བ་ལྟར་ཟ་ཧོར་གྱི་བནྡེས་བཀོད་པའོ། །དོན་ཀུན་གྲུབ་པ་དགྲ་བཅོམ་ཤཱཀྱའི་ཏོག །རིགས་གསུམ་རྣམ་སྤྲུལ་ཆོས་རྒྱལ་མེས་དབོན་ཚོགས། །བསྟན་པའི་མངའ་བདག་རྗེ་བཙུན་བཙོང་ཁ་པ། །རྩ་བརྒྱུད་བླ་མ་རྣམས་ལ་མཆོད་པ་འབུལ། །འཇམ་དཔལ་དཔའ་བོ་དུས་ཀྱི་དགྲར་བཞེངས་ནས། །གནམ་ས་ལྟར་བགྲད་ཞལ་གདངས་གཤིན་རྗེ་གཤེད། །བར་ཆད་ཀུན་སེལ་དཔལ་ཆེན་ཧེ་རུ་ཀཿ ཡི་དམ་དཀྱིལ་འཁོར་འཁོར་ལོར་མཆོད་(༢ན)
པ་འབུལ། །རྡོ་རྗེ་དབྱིངས་ཕྱུག་དབྱངས་ཅན་ངག་གི་ལྷ། །སྲིད་གསུམ་མངའ་སྒྱུར་འདོད་ཁམས་དབང་ཕྱུག་མ། །དུང་སྐྱོང་རྒྱལ་མོ་བསྟན་མ་བཅུ་གཉིས་སོགས། །བཀའ་སྡོད་འཁོར་ཚོགས་བཅས་ལ་མཆོད་པ་འབུལ། །བྱིན་རླབས་ཆར་འབེབས་མྱུར་མཛད་ཡེ་ཤེས་མགོན། །རྣམ་བཞིའི་འཕྲིན་ལས་སྒྲུབ་མཛད་ངལ་བསོས་པོ། །སྐྱེ་འགྲོའི་སྲོག་འཕྲོག་ལས་གཤིན་འཆི་བདག་ནག །བསྟན་སྲུང་དམ་ཅན་རྒྱ་མཚོར་མཆོད་པ་འབུལ། །བདེ་གཤེགས་ཡོངས་ཀྱི་མཐུ་སྟོབས་བཞུ་བླུགས་པ། །རྡོ་རྗེ་སྲིན་པོ་གུར་ཞལ་པུ་ཏྲ་དང་། །བེག་ཙེ་རྒྱལ་པོ་སྐུ་ལྔ་ཙེའུ་དམར། །དྲེགས་པ་སྡེ་བརྒྱད་ཚོགས་ལ་མཆོད་པ་འབུལ། །བོད་ཀྱི་ལྷ་ཆེན་རྗེ་ཡི་མགུར་ལྷ་དང་། །འབངས་ཀྱི་སྲོག་ལྷ་ཐུགས་དཀར་གཟའ་ཆོས་ལྷ། །ས་བདག་རྒྱལ་བློན་འགོ་བའི་ལྷ་ལྔ་སོགས། །ཡུལ་ལྷ་གཞི་བདག་རྣམས་ལ་མཆོད་པ་འབུལ། །ནད་གདོན་དབུལ་ཕོངས་བར་གཅོད་ཀུན་ཞི་ཞིང་། །མ་རུངས་དགྲ་སྡེ་དཔུང་བཅས་ཚར་བཅད་དེ། །དཔའ་བོའི་ལག་རྟགས་ཕྱོགས་ལས་རྣམ་རྒྱལ་བའི། །རུ་མཚོན་སྲིད་པའི་རྩེ་མོར་བསྒྲེང་པར་མཛོད། །ཅེས་ས་སྐྱོང་བློ་བཟང་མཐུ་(༢བ)
སྟོབས་ཀྱིས་དབུས་གཙང་ཚོ་ཆེན་རྣམས་ལ་འོས་པའི་ཇ་མཆོད་ཅིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ཕུན་ཚོགས་དབང་པོའོ། །པད་རག་མདངས་འཕྲོག་ག་བུར་ངད་པ་འཐུལ། །ཕུན་ཚོགས་རོ་བདའ་རྐང་འཐུང་ཕུར་མའི་བཅུད། །འཛད་མེད་ནམ་མཁའ་མཛོད་དུ་རབ་སྤེལ་བ། །སྐྱབས་གནས་དཀོན་ཅོག་གསུམ་ལ་མཆོད་པ་འབུལ། །བསྟན་པའི་བདག་པོ་ཐུབ་དབང་ཟས་གཙང་སྲས། །ཉེ་བར་འཁོར་དང་རྒྱལ་སྲས་སྒྲ་གཅན་འཛིན། །ཞི་བ་འཚོ་སོགས་འཕགས་བོད་གནས་བརྟན་ཏེ། །ཕན་བདེའི་རྩ་ལག་རྣམས་ལ་མཆོད་པ་འབུལ། ཁ་ཆེའི་པཎ་ཆེན་ཤཱཀྱ་ཤྲིའི་ཞབས། །ལྔ་རིག་ཀུན་གཟིགས་ས་སྐྱ་ལོ་ཙཱ་བ། །ཆོས་ཀྱི་རྒྱལ་པོ་བློ་བཟང་གྲགས་པའི་དཔལ། །གངས་ཅན་མུན་སེལ་ཚོགས་ལ་མཆོད་པ་འབུལ། །རྒྱུད་སྡེ་རྣམ་བཞིའི་ཡི་དམ་དཀྱིལ་འཁོར་ལྷ། །ཐུབ་བསྟན་སྐྱེད་མཛད་ལེགས་ལྡན་ནག་པོ་ཆེ། །དཀར་ཕྱོགས་སྐྱོང་བའི་གཙང་རིས་མགོན་པོ་སོགས། ས་དགེ་སོ་སོར་ཚོགས་སྐབས་ཚིག་འདི་གཉིས་གང་རུང་དོར་ནས། ལྔ་བརྒྱའི་གཙུག་རྒྱན་དཔལ་ལྡན་ཨ་ཏི་ཤ །ཞེས་ཁ་ཆེ་པཎ་ཆེན་གྱི་གོང་དུ་འཇུག །བསོད་ནམས་ཞིང་གྱུར་ཡོངས་ལ་མཆོད་པ་འབུལ། །ལུས་ཅན་སྤྱི་དང་ཇ་འདི་བསྒྲུབ་པའི་ཆེད། །དཀའ་སྤྱད་མི་དང་དུད་འགྲོར་བཅས་པ་ཀུན། །ནུབ་ཕྱོགས་བདེ་ལྡན་ཞིང་དུ་པདྨ་ལ། །སྐྱེས་ནས་ཐེག་ཆེན་ཆོས་ལ་ལོངས་སྤྱོད་ཤོག །ཅེས་ཇ་མཆོད་འདི་ནི་ཀ་སྨི་ར་པའི་མ་ཧཱ་པཎྞི་ཏའི་སྲོལ་འཛིན་ཚག་མིག་ཚོགས་པ་སྤྱི་སོས་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་བཀྲ་ཤིས་རབ་བརྟན་པ་ཕུན་ཚོགས་དབང་པོའོ། །རོ་བརྒྱ་བདའ་བ་ལྗོན་ཤིང་ཕུར་མའི་བཅུད། །ཕྱེ་མར་ལན་ཚྭས་རོ་བསྒྱུར་བཏུང་བའི་མཆོག །དུས་གསུམ་རྒྱལ་སྲས་སློབ་མར་བཅས་ཀུན་དང་། །ཡང་སྒོས་ཉི་མའི་གཉེན་ལ་མཆོད་པ་འབུལ། །གྲུབ་པའི་འཁོར་ལོས་སྒྱུར་བ་བི་རཱུ་པ། །འཇིག་རྟེན་མིག་གཅིག་ལོ་ཆེན་འབྲོག་མིའི་ཞབས། །འཇམ་དབྱངས་བདུན་སོགས་དཔལ་ལྡན་ས་སྐྱ་པ། །ཡབ་སྲས་བརྒྱུད་པར་བཅས་ལ་མཆོད་པ་འབུལ། །གནས་ལྔ་རིགས་པའི་གཙུག་རྒྱན་ཨ་ཏི་ཤ །འབྲོམ་སྟོན་རྗེ་སོགས་རྒྱ་ཆེན་སྤྱོད་བརྒྱུད་དང་། །ཟབ་མོ་ལྟ་བརྒྱུད་ཉམས་ལེན་བྱིན་རླབས་ཀྱི། །བརྒྱུད་པའི་བླ་མ་རྣམས་ལ་མཆོད་ལ་འབུལ། ཁྱད་པར་རྒྱལ་བ་གཉིས་པ་བཙོང་(༣ན)
ཁ་པ། །རྒྱལ་ཚབ་རྗེ་དང་ཤེས་རབ་སེང་གེའི་ཞབས། །དགེ་འདུན་མཁས་གྲུབ་བསོད་ནམས་རྒྱ་མཚོའི་ཞིང་། །དགའ་ལྡན་བསྟན་འཛིན་ཚོགས་ལ་མཆོད་པ་འབུལ། །ལྷ་རིགས་རླངས་ཀྱི་གདུང་ལས་གསང་བའི་བདག །མི་ཡི་སྲིད་བཟུང་དྲུང་ཆེན་ཏཱའི་སི་ཏུ། །བྱང་ཆུབ་རྒྱལ་མཚན་གྱིས་མཚོན་ཕག་གྲུ་པའི། །གདན་རབས་བཀའ་རྒྱུད་རྣམས་ལ་མཆོད་པ་འབུལ། །རྡོ་རྗེ་གུར་གྱི་མགོན་པོ་ཕྱག་བཞི་དྲུག །འདོད་ཁམས་དབང་ཕྱུག་ལྷ་ཆེན་སྟོབས་འཕྲོག་ནག །རྣམ་མང་ཐོས་སྲས་ལ་སོགས་ཐུབ་པའི་བསྟན། །སྲུང་མཛད་དམ་ཅན་རྒྱ་མཚོར་མཆོད་པ་འབུལ། །བསོད་ནམས་བྱས་པའི་འབྲས་བུ་ནམ་མཁའི་མཐའ། །དེ་སྲིད་བར་དུ་ནམ་ཡང་མི་འཛད་པ། །གྲོ་བཞིན་སྐྱེས་ཀྱི་རྣམ་པར་ཐར་པ་བཞིན། །འཛིན་ཕྱིར་དགེ་ཚོགས་བྱང་ཆུབ་ཆེན་པོར་བསྔོ། །ཞེས་ཆོས་གྲྭ་ཆེན་པོ་དཔལ་གྱི་རྩེས་དང་གི་ལས་ཆེན་པ་གསུམ་དང་གཉེར་པ་གཉིས་སོགས་ཀྱིས་བསྐུལ་བ་ལྟར་ཆོས་སྡེ་འདི་ཉིད་སྡེ་སྲིད་ཕག་མོ་གྲུ་པས་ཕྱག་དར་ནས་བཏབ་ཅིང་དེང་སང་(༣བ)
ས་དགེ་ཉིས་ཚོགས་ཀྱི་ར་མ་ལུག་གི་རིགས་འདི་འདྲ་ལ་ཇ་མཆོད་ཀྱང་རྨ་བྱའི་སྒྲོ་གདོངས་ལྟ་བུ་ཞིག་དགོས་པར་མངོན་ནས་གོ་བདེ་འབོལ་རྩོམ་གྱི་ཚུལ་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རབ་དྭངས་མན་ཤེལ་ཞུན་མའི་ཡོལ་གོའི་ནང་། །པད་རཱག་མདངས་འཕྲོག་ཤོང་དཀར་རྩེ་མོའི་བཅུད། །མྱངས་པས་རིག་པ་གསལ་ཞིང་ལྕེ་བདེ་བ། །ཕུན་ཚོགས་རོ་བརྒྱའི་རྩེར་སོན་བཏུང་བ་འདི། །རྣམ་འདྲེན་མཆེད་བདུན་མདོ་སྡེ་ཤློ་ཀ །བརྒྱད་བརྒྱའི་གྲངས་ལྡན་རི་མོ་གཡས་འཁྱིལ་བའི། །མགུར་ནས་ཚངས་པའི་དབྱངས་སྙན་གདུལ་བྱའི་རྣར། །སྒྲོགས་མཛད་ཉི་མའི་གཉེན་ལ་མཆོད་པ་འབུལ། །ཁྱོད་གསུང་ཟབ་དང་རྒྱ་ཆེའི་འཛིན་མ་ལས། །ཉམས་ལེན་སྙིང་པོའི་ཆོ་ག་ས་ལེ་སྦྲམ། །བློ་གསལ་རྒྱན་དུ་སྤུད་མཛད་ཞི་འཚོ་སོགས། །དངོས་བརྒྱུད་བླ་མ་རྣམས་ལ་མཆོད་པ་འབུལ། །ཇི་ལྟར་ཞལ་གྱིས་འཆེས་པའི་སྨོན་ལམ་རྣམས། །ཉེར་གྲུབ་ཐུགས་རྗེའི་གློག་ཞགས་སྙིགས་དུས་མུན། །གཞིལ་ལ་ཆེས་མྱུར་བཻཌཱུར་འོད་ཀྱི་རྒྱལ། །བཅོམ་ལྡན་སྨན་གྱི་བླ་མར་མཆོད་པ་འབུལ། །དམ་བཅའ་མི་འགྱུར་རྡོ་ཡི་རི་མོ་ལ། །མཁྱེན་བརྩེ་ནུས་མཚུངས་མངོན་མཁྱེན་ཆོས་བསྒྲགས་དང་། །མྱ་ངན་མེད་དཔལ་གསེར་བཟང་རིན་ཅེན་ཟླ། །མཚན་ལེགས་མཆེད་དྲུག་བཅས་ལ་མཆོད་པ་འབུལ། །ཐུབ་གསུང་ཆུ་གཏེར་ལས་ཐོན་བདེན་ཚིག་གིས། །སྲིད་ཞིའི་གདུང་སེལ་གླེགས་བམ་ཟིལ་མངར་གྱིས། །ལུས་ཅན་མངོན་པར་མཐོ་དང་ཐར་པའི་སྲོག །ཟུངས་གྱུར་དམ་པའི་ཆོས་ལ་མཆོད་པ་འབུལ། །སེམས་པ་བཅུ་དྲུག་ཕྱོགས་སྐྱོང་ཉི་ཟླ་ཟུང་། །གནོད་སྦྱིན་སྡེ་(༤ན)
དཔོན་རྒྱལ་ཆེན་རྣམ་བཞི་སོགས། །སྨོན་ལམ་མཆོག་འདི་ཞུ་གསོལ་འཛིན་ཅིང་སྤེལ། །སྲུང་མཛད་དགེ་འདུན་རྣམས་ལ་མཆོད་པ་འབུལ། །འཇིག་རྟེན་གསུམ་གྱི་གསེར་ལྡན་ལུས་ཕྲའི་ལྟོར། །སངས་རྒྱས་སྲས་བཅས་ཐུགས་རྗེའི་མཁའ་ཀློང་ལས། །བྱིན་རླབས་ཆར་ཀྱིས་རིང་པོར་བསྐྱེད་བསྲིངས་པ། །ཕན་བདེའི་སྙེ་མ་གཡུར་དུ་ཟ་བར་ཤོག །ཁྲི་སྲོང་ལྡེ་བཙན་ཆེད་བཏབ་སྨོན་ལམ་བཞིན། །ཐུབ་པའི་བསྟན་རྒྱས་དེ་འཛིན་སྐྱེས་བུ་དང་། །ས་སྤྱོད་ཚོགས་རྣམས་སྒྲིབ་དག་སྐུ་ཚེ་འཕེལ། །དབུ་རྨོག་ལེགས་བཙན་ཆོས་སྲིད་དར་བར་ཤོག །རྐང་འཐུང་ཕུར་མ་ཙི་ནའི་ཡུལ་གྲུ་ནས། །འདྲེན་པར་ངལ་བའི་ཁུར་ལྕི་མི་ཁལ་ཚོགས། །སྔར་བསགས་སྡིག་སྒྲིབ་བྱང་ནས་རྒྱལ་བ་བདུན། །ལེགས་བཞུགས་དག་པའི་ཞིང་དུ་སྐྱེ་བར་ཤོག །རིག་ཅན་བློན་པོའི་འབྱུང་བའི་རི་བོའི་དབྱིབས། །གཉིས་འཐུང་འགྱིང་འདྲའི་ས་བཀྲ་ཤིས་པའི་ངོས། །འདི་ཕྱིའི་བདེ་སྐྱིད་རབ་འཕེལ་ས་ཆེན་པོས། །འཇིག་རྟེན་འདེགས་ནུས་དེ་སྲིད་རྒྱས་པར་ཤོག །རྒྱ་ཇའི་ཕུད་མཆོད་སྤྱད་པའི་འབྲས་བུ་ལས། ཆོས་སྡེ་གཞན་ཚོར་ཞལ་འདོན་དུ་མང་ཇ་མཛད་ན། །ས་ལའི་སྨན་ལྗོངས་བསོད་ནམས་གཤིན་པའི་སར། །མདོ་ཆོག་སྨོན་ལམ་ཆེ་བཏབ་སོ་ནམ་ལ། །ཉེར་བརྩོན་ཚངས་པར་སྤྱོད་པའི་ཆོས་སྡེ་འདི། །འཛམ་གླིང་མུན་སེལ་སྒྲོན་མེར་རྟག་འབར་ཤོག །ཅེས་འབྱིན་འཇུག་བྱེད། །བྱམས་མགོན་མཆོག་གི་སྤྲུལ་སྐུ་འཚང་རྒྱ་ཚེ། །འདུས་པ་དང་པོར་སྐྱེས་ནས་དམ་ཆོས་ཀྱི། །བདུད་རྩིས་ལེགས་ངོམས་སྨིན་ཅིང་གྲོལ་བར་ཤོག །མཁའ་ལ་གཟའ་སྐར་འཕྲོད་དང་དུས་སྦྱོར་དགེ། །ནོར་འཛིན་ཁྱོན་ལ་ཁྲི་གདུགས་ཉི་འོད་དྲོ། །བར་སྣང་ཕྱོགས་མཚམས་དགེ་མཚན་ལྟས་ཀྱིས་ཁྱབ། །བཀྲ་ཤིས་ཟླ་རྒྱས་ལྟར་འཕེལ་རྨད་དུ་བྱུང་། །ཞེས་(༤བ)
བདེ་གཤེགས་བདུན་གྱི་སྨོན་ལམ་ཆོ་ག་དང་འབྲེེལ་བའི་ཇ་མཆོད་ཅིག་ཆོས་སྡེ་རི་བོ་བདེ་ཆེན་དུ་འཛུགས་རྩིས་ཀྱིས་གནས་བརྟན་འཇམ་དབྱངས་གྲགས་པས་བསྐུལ་བ་ལ་བརྟེན་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །རིན་ཆེན་ཡོལ་གོར་རྐང་འཐུང་ཕུར་མའི་བཅུད། །འཆར་ཀའི་ཐུན་མཚམས་མདངས་འཛིན་བཏུང་བའི་རྩེ། །ཤཱཀྱ་སེང་གེ་དེས་གསུངས་དམ་པའི་ཆོས། །ཐེག་གསུམ་དགེ་འདུན་བཅས་ལ་མཆོད་པ་འབུལ། །གྲུབ་ཐོབ་བརྒྱད་ཅུ་རྒྱན་དྲུག་མཆོག་གཉིས་དང་། །ཆོས་རྒྱལ་མེས་དབོན་མཁན་སློབ་ལོ་པཎ་ཚོགས། །ཁྱད་པར་ཇོ་འབྲོམ་ཁུ་རྔོག་ཤཱཀྱ་ཤྲཱི། །གངས་ཅན་བསྟན་པའི་སྒྲོན་མེར་མཆོད་པ་འབུལ། །འཁོན་རིགས་འཇམ་དཔལ་རྡོ་རྗེ་ས་སྐྱ་པ། །རབ་འབྱམས་ཤེས་བྱ་ཀུན་གཟིགས་བུ་སྟོན་རྗེ། །རྒྱལ་བ་ཀུན་དངོས་བློ་བཟང་གྲགས་པའི་དཔལ། །བཀའ་དྲིན་མཚུངས་མེད་རྣམས་ལ་མཆོད་པ་འབུལ། །རྒྱལ་བསྟན་གྱེན་དུ་འདེགས་ལ་མ་ཕམ་མགོན། །སྙིང་སྟོབས་རབ་བརྟན་ཀུན་བཟང་མཆོད་པའི་སྤྲིན། །སྤྲོ་མཛད་འཕགས་ཆེན་དམ་པ་ས་སྤྱོད་ཚུལ། །འཛིན་ལ་ཡི་རང་དད་པས་མཆོད་པ་འབུལ། །བགྲང་ཡས་རྒྱུད་སྡེ་རྣམ་བཞིའི་དཀྱིལ་འཁོར་ལྷ། །ལེགས་ལྡན་ལྕམ་དྲལ་དཔལ་མགོན་བདུན་ཅུ་སོགས། །རྣམ་བཞིའི་འཁོར་ཚོགས་སྐྱོང་ལ་མཐུ་རྩལ་ཅན། །ཕྱི་ནང་བསྟན་སྲུང་རྒྱ་མཚོར་མཆོད་པ་འབུལ། །རོ་བདེའི་བཏུང་བར་ཉེར་ཞེན་འདོད་སྲེད་དང་། །ལོག་འཚོས་མ་གོས་དཀོན་མཆོག་མཆོད་པའི་རྫས། །འཁོར་གསུམ་རྣམ་དག་ནམ་མཁའ་མཛོད་ཀྱི་སྒོ། །རབ་འབྱེད་སྐལ་བཟང་བྱང་ཆེན་བར་ཐོབ་ཤོག །རྣམ་འདྲེན་སྲས་དང་སློབ་མར་བཅས་པ་རྣམས། །ཙནྡས་བྱུག་དང་(༥ན)
མཚོན་ཆ་གཟས་པ་ལ། །མཉམ་ཡང་དགྱེས་པར་བཞེས་ནས་ལེགས་བྱས་ཀྱི། །ཕུང་པོ་མ་ཟད་སྟེར་ལ་སྤྲོ་དགའ་བརྟས། །ཞེས་མྱང་སྟོད་དཔལ་འཁོར་བདེ་བ་ཆེན་པོའི་ཚོགས་ཆེན་ཀྱི་ཞལ་འདོན་དུ་འོས་པའི་ཇ་མཆོད་ཅིག་དགོས་ཞེས་མཁན་ཆེན་ངག་དབང་འཕྲིན་ལས་ཀྱི་གསུང་གིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །ངོ་བོ་འདུས་མ་བྱས་པ་རིག་པའི་རྩལ། །ཀ་དག་ཀུན་བཟང་གནས་ལུགས་རང་གྲོལ་བ། །གར་དབང་ཆོས་སྐུར་འཁྲུལ་དགའི་ལྷ་བཞིན་དུ། །གཞན་མིན་རང་ངོ་ཤེས་པས་མཆོད་པ་འབུལ། །རང་གཞན་དབྱིངས་ལ་ཡེ་ཤེས་ལྔ་ལྡན་གདངས། །མ་འདྲེས་ཤེལ་ཚོན་ལྟ་བུར་གསལ་བའི་འཇའ། །ཞི་ཁྲོ་སྒྱུ་འཕྲུལ་ལོངས་སྐུར་ནམ་མཁའ་མཛོད། །འབྱམས་ཀླས་སྒོ་འཕར་ཕྱེ་བའི་མཆོད་པ་འབུལ། །ཐུགས་རྗེ་སིནྡྷུའི་དྭངས་མཚོར་འདབ་བརྒྱའི་རྩེར། །དུས་གསུམ་རྒྱལ་བའི་ཡེ་ཤེས་རྡོ་རྗེ་སེམས། །པད་འབྱུང་ཡབ་ཡུམ་སྤྲུལ་སྐུར་ཕྱི་དང་ནང་། །གསང་བ་དེ་བཞིན་ཉིད་ཀྱི་མཆོད་པ་འབུལ། །དུག་ལྔ་ཡེ་དག་ཕུང་ལྔ་གནས་གྱུར་ལ། །ལྔ་ལྡན་འཁོར་ལོར་ཐོད་ཕྲེང་རིགས་ལྔའི་འཕྲུལ། །ཞི་རྒྱས་དབང་དྲག་ཐམས་ཅད་ལས་གྲུབ་པར། །གཉིས་མེད་གཉིས་སྣང་སྤྲུལ་བསྒྱུར་མཆོད་པ་འབུལ། །ཐབས་མཆོག་ཝཾ་ཡིག་པད་འབྱུང་ཀུན་གསལ་མདངས། །ཞེས་པ་ཨེ་དབྱིངས་འཚོ་རྒྱལ་ཡིད་འཛིན་མར། །མཁའ་ལ་མཁའ་སྦྱོར་ལྟ་བུའི་སྒྱུ་འཕྲུལ་ཅན། །དགའ་བཞིའི་བདེ་སྟོང་རྒྱས་ལ་མཆོད་པ་འབུལ། །སྒོ་གསུམ་བག་ཡོད་རི་ཥིས་ཉེས་ལྟུང་ཆུའི། །དུག་རྣམས་ཚུལ་ཁྲིམས་ཡན་ལག་བརྒྱད་ལྡན་དུ། །ཡོངས་(༥བ)
བསྒྱུར་སྡོམ་བརྩོན་པདྨ་སཾ་བྷ་ཝ། །ལས་འབྲས་ཕྲ་ཞིབ་འབྱེད་པར་མཆོད་པ་འབུལ། །ད་ལྟ་ཇི་སྙེད་ཆོས་ཀུན་དྭངས་མའི་མཚོར། །ཟླ་གཟུགས་ལྟ་བུར་དྲི་མེད་སྤྱན་རས་ཀྱི། །མངོན་སུམ་གཟིགས་པ་བློ་ལྡན་མཆོག་སྲེད་ཞབས། །ཐམས་ཅད་མཁྱེན་པར་ངེས་ལ་མཆོད་པ་འབུལ། །ནང་དུ་དུག་གསུམ་རྒྱ་བྲལ་རྫོགས་སངས་རྒྱས། །གཞན་ནས་མ་འཚོལ་འཁོར་འདས་ཐམས་ཅད་ལ། །སྣང་བ་འབྱམས་ཀླས་པདྨ་རྒྱལ་པོ་ཆེས། ཁམས་གསུམ་དབང་དུ་སྡུད་ལ་མཆོད་པ་འབུལ། །སེམས་ཅན་རྣམས་ཀྱི་མ་རིག་སྟུག་པོའི་མུན། །ཅིག་ཅར་སངས་བྱེད་སྣང་བའི་གཏེར་ཆེན་པོ། །བརྒྱ་ཕྲག་ཉི་མའི་འོད་ཟེར་ཆེར་འབར་བ། །གྲངས་མེད་འགྲོ་བ་འདུལ་ལ་མཆོད་པ་འབུལ། །མཚན་དཔེའི་དཔལ་གྱིས་མངོན་པར་མཐོ་བའི་ཞལ། །མཐོང་ཐོས་དྲན་དང་རེག་པས་རྣམ་གྲོལ་བ། །འཇིགས་མེད་ཤཱཀྱ་སེང་གེའི་ང་རོ་ཡི། །བདུད་ཚོགས་འཇོམས་པར་མཛད་ལ་མཆོད་པ་འབུལ། །གཏུམ་ཆེན་དཔའ་བོ་རྡོ་རྗེ་རྩེ་བརྒྱའི་མཚོན། །གདེངས་པས་ལོག་འདྲེན་ལྷ་མིན་མེ་ཡི་མངལ། །ལྟུང་བྱེད་སེང་གེ་སྒྲ་སྒྲོག་མིག་སྟོང་ཅན། །ལྟ་ངན་མུ་སྟེགས་འདུལ་ལ་མཆོད་ལ་འབུལ། །འཆོལ་བའི་ཁྲོ་རྒྱལ་མཐོང་བའི་མོད་ཉིད་ལ། །འཁོར་འདས་ལྷ་འདྲེ་ལག་ཆ་སྟབས་གཅིག་ཏུ། །འཆོར་ནུས་ཡིད་སྲུབས་ཀླད་འགེམས་གྲོ་བོ་ལོད། །དྲེགས་པ་ཚར་གཅོད་མཛད་ལ་མཆོད་པ་འབུལ། །རྩ་གསུམ་འདུས་པའི་ངོ་བོར་ལེགས་མཆོད་པས། །གནས་སྐབས་སྲིད་ཞིའི་ཡོན་ཏན་གོང་འཕེལ་ཞིང་། །སྐྱེ་བར་ཐོད་འཕྲེང་རྩལ་གྱིས་རྗེས་བཟུང་ནས། །རིང་མིན་ཆོས་ཉིད་ཟད་སར་འཁྱོལ་བར་ཤོག །ཅེས་ཆོས་ལོངས་སྤྲུལ་གསུམ། ཐོད་ཕྲེང་རིགས་ལྔ། མཚན་བརྒྱད་དང་(༦ན)
སྦྱར་བའི་ཇ་མཆོད་ཅིག་རྩོམས་ཞེས་ལྷ་བཅས་སྐྱེ་དགུའི་འདྲེན་མཆོག་དཔལ་ས་སྐྱ་པ་གདན་ས་འོག་ནས་བདག་ཆེན་རིན་པོ་ཆེ་བསོད་ནམས་བསྟན་འཛིན་དབང་པོ་བྱམས་པ་ཆོས་ཀྱི་རྒྱལ་མཚན་དཔལ་བཟང་པོས་བཀའ་སྩལ་བ་དང་དུ་བླངས་ཏེ་གཡོ་རུ་ལྷོ་རྒྱུད་དུ་སྐྱེས་པའི་ཟ་ཧོར་གྱི་སྔགས་སྨྱོན་ཆེ་མཆོག་འདུས་པ་རྩལ་གྱིས་ལྕགས་སྤྲེལ་ས་ག་ཟླ་བའི་ཚེས་བཅུ་ལ་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །འཁོར་འདས་རྒྱལ་པོས་དུས་གསུམ་སངས་རྒྱས་རྣམས། །མཚོ་སྐྱེས་སྤྲུལ་སྐུ་པདྨ་འབྱུང་གནས་དང་། །དབྱེར་མེད་འཇམ་དཔལ་རྡོ་རྗེ་བཙོང་ཁ་པ། །བློ་བཟང་གྲགས་པའི་དཔལ་ལ་མཆོད་པ་འབུལ། །དགེ་འདུན་ཀུན་འདུས་བསོད་ནམས་བྱེ་བའི་ཞིང་། །ཡོན་ཏན་འབྱུང་གནས་ངག་དབང་བློ་ཡི་གཏེར། །སྐལ་བཟང་རྒྱ་མཚོའི་མགོན་དང་དབང་ཆེན་ལྷ། །མཁའ་འགྲོ་དམ་ཅན་ཚོགས་ལ་མཆོད་པ་འབུལ། །ཁྱད་པར་སྣང་སྲིད་དྲེགས་པའི་སྡེ་དཔོན་ཆེ། །སྤྲུལ་པའི་ཆོས་རྒྱལ་སྐུ་ལྔ་གསང་བའི་ཡུམ། །བློན་པོ་ལས་མཁན་བཀའ་སྡོད་ཚོགས་རྣམས་ལ། །མཆོད་པ་འབུལ་ལོ་འཕྲིན་ལས་ལྷུན་གྲུབ་མཛོད། །ཅེས་གནས་ཆུང་པེ་ཀར་ལྕོག་ཏུ་ཇ་མཆོད་འདི་འདྲ་ཞིག་བྱུང་ན་ལེགས་འདྲ་ཞེས་དབུ་མཛད་བློ་བཟང་ཡོན་ཏན་དང་། མཆོད་དཔོན་ངག་དབང་ཤེས་རབ་གཉིས་ཀྱིས་མཚམས་སྦྱར་བས་རྐྱེན་བྱས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་མཐར་རྒྱས་པ་བློ་བཟང་དབང་པོའོ། །