རབ་བྱུང་བཅུ་གཅིག་པའི་ཆུ་བྱི་ལོར་མཛད་པའི་སྐུ་གསུང་ཐུགས་རྟེན་དང་རིན་པོ་ཆེའི་མཆོད་རྫས་སོགས་གསར་བཞེངས་ཀྱི་དཀར་ཆག་དང་སྨོན་ལམ་སོགས།
སྐུ་གསུང་ཐུགས་རྟེན་གསར་བཞེངས་རིན་པོ་ཆེའི་མཆོད་རྫས་ཁང་བཟང་གི་དཀར་ཆག་དང་ཐམ་ཕུད་དེབ་ཁྲིམས་ཡིག་འགོ་རྒྱངས་སྡེ་བཞིའི་སྒོ་འཕར་ཕྱེ་བའི་སྐལ་བཟང་གི་གླེགས་བམ་གཉིས་པ་བཞུགས་སོ།།
(སྡེབ་སྦྱོར་མཉམ་པའི་པྲིཏྟ་ལས་མེ་ཏོག་འཕྲེང་ཅན།)
སཾཁྱནསྟིཏྲིཀལྤེདྭིསཾགཱཎྱཕལྱཱདྷརཀྵཏྲཔཱཀྱཱདྭཧོརྣརྟྲཀཿ །
གྲངས་མེད་བསྐལ་གསུམ་བསགས་པའི་ཚོགས་གཉིས་འབྲས། །འོག་མིན་ཞིང་གཙོར་སྨིན་ལས་དུ་མའི་གར། །(༢ན)
ཨེཀཔཪྻངྐམཱཤྭཀྱབྲྀཀྵེཙཔྲྀཥྤཱཤྲཡོབཱརནིརྨཱམཡོཔདྷྱཡཿ
སྐྱིལ་ཀྲུང་གཅིག་གིས་མྱ་ངན་མེད་ལྗོན་ལ། །རྒྱབ་བརྟེན་མཆོག་གི་སྤྲུལ་པའི་སྒྱུ་མ་མཁན། །ལྷ་རྣམས་བསྔགས་པའི་མེ་ཏོག་འཐོར་བའི་ཡུལ། །(༢བ)
བསྐལ་བཟང་འདི་ལ་ཆད་མེད་སྟོང་ཕྲག་འཕྲེང་། །རིམ་བྱོན་བདེ་གཤེགས་བཞི་པ་དོན་ཀུན་གྲུབ། །རྒྱལ་གཞན་ལས་ལྷག་སྙིང་སྟོབས་ཁྱད་ཞུགས་དཔའ། །མཐའ་ཀླས་ཉི་མ་གཟི་བརྗིད་ལས་འཕགས་སྐུ། །མཚན་དཔེ་རབ་བཀྲ་མཐོང་བས་རྣམ་གྲོལ་བ། །དྲན་པས་སྲིད་ཞིའི་གདུང་སེལ་མཛའ་ན་མོ། །ཡིད་དབང་བསྟན་པ་འཕྲོག་པ་ཀུནྡའི་དཔྱིད། །མཁྱེན་པའི་གཞལ་བྱར་བྲོས་པའི་ལྐོག་གྱུར་ཆོས། །ནམ་མཁའི་ཕ་མཐའ་བཙལ་ཀྱང་མ་རྙེད་པར། །སླར་ཡང་ཐུགས་ཀྱི་མན་ཤེལ་དྲི་བྲལ་ངོས། །བྱེད་པོས་པིར་གྱིས་བྲིས་པ་ཚོན་རིས་བཞིན། །སྐྱོན་གྱི་རྙོག་མའི་རྡུལ་ཆ་ཕྲ་མོས་ཀྱང་། །མ་གོས་ཡོན་ཏན་དངས་བསིལ་ལྷུང་ལྷུང་སྒྲ། །རྫོགས་པ་ཁྱོད་ཉིད་གཅིག་པུའི་ངང་ཚུལ་ཙམ། །མ་ཡིན་བདེ་བར་གཤེགས་ཀུན་སྤྱི་ལུགས་སྲོལ། །འགྲོ་ཁམས་སྒྲིབ་གཉིས་ནད་ཀྱིས་མནར་དེ་སྲིད། །འཕྲིན་ལས་རྩི་སྨན་ལྗོན་པ་འཇུག་པའི་མཐའ། །ཟད་མིན་དེ་ཕྱིར་ཚངས་པ་ཐལ་སྦྱར་ནས། །ཆོས་འཁོར་བསྐོར་བར་གསོལ་ལ་རྟག་ཏུ་འབྲེལ། །སྐུ་དང་ཐུགས་ཡོན་འཕྲིན་ལས་མ་ལ་ཡའི། །བསེར་བུས་འགྲོ་ཀུན་ཉེས་བརྒྱ་ཚ་བའི་གདུང་། །བཅིལ་ཡང་དཔལ་གྱི་མགུལ་ནས་ཚངས་པའི་གསུང་། །འདི་ཀོ་མཛད་པ་རྣམས་ཀྱི་ཡང་རྩེར་སོན། །ལྷ་ཀླུ་གནོད་སྦྱིན་དྲི་ཟ་གྲུལ་བུམ་སོགས། །མཐའ་ཀླས་ཡིད་ཅན་སྐད་དང་དབང་པོ་རུ། །གསུང་གཅིག་གདངས་ལས་སོ་སོ་ལེགས་འབྱུང་བ། །སྟོང་ཕྲག་རྫིང་བུར་ཤར་བའི་ཟླ་གཟུགས་བཞིན། །དབུས་འགྱུར་ཤར་ལྷོ་ནུབ་ཀྱི་ལྗོངས་ཆེན་པོར། །དར་བའི་གསུང་རབ་ཟད་མེད་བང་མཛོད་ལས། །ལོ་པཎ་བརྩོན་པའི་ཤིང་རྟས་བོད་ཡུལ་འདིར། །མཁའ་ཚེས་གླེགས་བམ་རིན་ཅེན་ཕུང་པོར་དྲངས། །རྒྱལ་བསྟན་ཉི་ལྟར་(༣ན)
གསལ་བཞེད་ལྷག་བསམ་གྱིས། །མཆོད་གནས་སྡེ་གཉིས་དབུ་ཡི་ཐོད་ཁུར་ནས། །བཤད་སྒྲུབ་སྲོག་གི་ཟུངས་སུ་སྔོན་བྱུང་གི །རྒྱལ་བློན་རིམ་པར་བྱོན་ལས་སུ་ཞིག་གསུང་། །ཡིད་སྲུབས་ཕྱོགས་ཀྱི་དམོད་པས་ལུང་རྟོགས་ཟླ། །ཆ་ཤས་འཕེལ་འགྲིབ་དངོས་པོའི་གཤིས་ཡིན་ཀྱང་། །ཕྱི་དར་བསྟན་པའི་ཉི་དཀྱིལ་རྟག་གང་བ། །འགྲོ་འདིའི་བསོད་ནམས་དཔྱིད་དུ་རྒྱས་པ་བཞིན། །དགེ་སྡིག་སྲང་ལ་བཏེག་པས་ལས་དཀར་གྱི། །ཕུང་པོ་ལྕིད་དུ་ཆེ་འདོད་བླང་དོར་ལ། །ལྟ་བའི་མིག་ཡངས་ནང་སོ་དགོས་དགོས་ཀྱིས། །བརྩོན་པས་བརྒྱ་ཕྲག་གླེགས་བམ་དེང་འདིར་བསྒྲུབས། །རྒྱུ་སྦྱོར་བྲིས་མཁན་ཞུས་ཆེན་ལས་བྱེད་ཀུན། འདིར་འབད་བསམ་སྦྱོར་ཛམྦུ་ལྗོན་པའི་འབྲས། །ལེགས་བྱས་རྒྱ་མཚོར་ལྷུང་ལས་སྲིད་དང་ཞིའི། །གསེར་གྱི་སྙེ་མ་ཡོངས་སུ་སྨིན་པར་ཤོག །བདེ་བར་གཤེགས་པས་གང་མཁྱེན་ཆོས་རྣམས་ལ། །མངོན་སུམ་འཁྲུལ་མེད་གཞལ་ནུས་བཙོང་ཁ་པའི། །བསྟན་པའི་བ་དན་ཕྱོགས་བཅུར་རབ་ཚུགས་ཤིང་། །དེ་འཛིན་སྐྱེས་བུ་འདུས་ཚོགས་དར་བར་ཤོག །ཐོས་བསམ་སྒོམ་པ་འབྲེལ་བའི་གྲུ་བོ་ཆེས། །འགྲོ་མང་ནོར་བུའི་གླིང་དུ་འདྲེན་བཟོད་པ། །ཟ་ཧོར་རིགས་ལས་འཇམ་དབྱངས་དགའ་བའི་བཤེས། །སྲོག་གི་འཚོ་བ་དོན་དང་ལྡན་གྱུར་ཅིག །གོམ་པའི་རི་མོ་རྒྱལ་ཕྲན་བྱེ་བའི་མགོར། །འགོད་པའི་བློ་དང་བཟང་པོའི་ལས་འཕྲོའི་མཐུ། །སྟོབས་ལྡན་ས་སྤྱོད་ཚེ་དང་དབང་ཐང་གིས། །དུས་ཀྱི་བྱེད་པོའི་ངང་ཚུལ་འཛིན་པར་ཤོག །སྲིན་པོ་བྱིན་ཤ་འདར་པའི་དཔའ་རྟུལ་གྱིས། །དགྲ་དཔུང་སྲིད་སྡེ་ལྐོག་མར་སྙིང་འབྲོས་མཁན། །བསྟན་འཛིན་ད་ལའི་རྒྱལ་པོས་གནམ་དང་སའི། །དབང་ཕྱུག་དམ་པའི་ངང་ཚུལ་འཛིན་པར་ཤོག །ལྷ་ལྡན་གཙུག་ལག་བྱ་འདབས་ཀྱིས་བསྐྱངས་པ། །སྡེ་(༣བ)
འདིར་འཛམ་གླིང་ཡོངས་ཀྱི་བདོག་པའི་དཔྱ། །ཀུན་ཚང་ཚོང་འདུས་དར་བ་རྣམ་ཐོས་བུའི། །གན་མཛོད་མངོན་སུམ་འཕོས་པའི་རྗེས་འགྲོར་ཤོག །འབྱོར་པ་ནོར་བུས་འགྲངས་རྒྱས་ལྟར་གྱུར་ཀྱང་། །རྒྱགས་པའི་ཁེངས་བྲལ་ཁང་ཁྱིམ་ཤག་སྐོར་ལྡན། །མགོན་མེད་ཟས་སྦྱིན་ལ་འཁུའི་མི་བརྒྱུད་དང་། །མངའ་ཐང་བླ་ནས་བླར་ཡང་འཕེལ་བར་ཤོག །དཀོན་ཅོག་ཐུགས་རྗེའི་གཟི་བྱིན་ནོར་བུའི་སྒྲོན། །ཆེས་ཆེར་འཇིག་རྟེན་ཡོངས་ཀྱི་ཕན་དང་བདེའི། །སྣང་བ་ཆད་པ་མེད་སྒྱུར་འདིས་མཚོན་པའི། །དུས་གསུམ་བསགས་པའི་དགེ་ཚོགས་མཐའ་དག་བསྔོ། །ཞེས་འགྲངས་རྒྱས་ཤག་པ་ནང་སོ་དགོས་དགོས་ཀྱི་ལྷག་བསམ་གྱིས་ཡིད་དྲངས་ཏེ་རྒྱལ་བའི་བཀའ་འགྱུར་རོ་ཅོག་གླེགས་བམ་དུ་བཞེངས་པའི་ཚེ་དཀར་ཆག་སྨོན་ལམ་དང་བཅས་པ་ཞིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོས་བགྱིས་པ་ཛ་ཡནྟུ།(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)
རཱགབིནྡུརྦྷབཱསྠིཏྱཤཾསུཁྱརཱསཱདཡགཱརྠིཔྲཱརྠབུདྷཻཪྶབྷཾ། །ནམབཻཤཱཥཙཱཪྻོཛཡཱནྱརྟིངྉྤཉྩམཱིཏཱིཔྲཏྉྤ྄ཛྱནཱིཤཱཀྱཀཿ
ཆགས་རྡུལ་སྲིད་ལ་མི་གནས་ཞི་བདེའི་རོ། །ཞེན་མེད་འགྲོ་དོན་ལ་གཞོལ་སངས་རྒྱས་སྤྱིའི། །ལུགས་ལས་ཁྱད་འཕགས་རྒྱལ་གཞན་གྱིས་དོར་བའི། །ལྔ་བདོའི་སྐྱེ་རྒུའི་འདྲེན་པ་ཤཱཀྱའི་ཏོག །འཛུམ་ཞལ་པདྨའི་འདབ་རྒྱ་ཡོངས་གྲོལ་ལས། །ལེགས་གསུང་སྦྲང་རྩིའི་(༤ན)
ཁུ་བ་འཛག་པའི་རྒྱུན། །རིགས་ཅན་གསུམ་གྱི་བུང་བ་ངོམས་བྱས་དེང་། །བར་མེད་ལས་ལྷན་མཐའ་དག་གཅིག་ཏུ་ཚིམ། །རྒྱུ་དེས་མཐོ་རིས་དགའ་ཚལ་ལྟ་ཞོག་གི །ཐར་པའི་ཡུལ་ས་ཀུན་ཀྱང་ཕན་པའི་གླུ། །དར་དིར་སྒྲོགས་ལ་བྲེལ་བས་གཏམས་པ་འདི། །མགོན་ཁྱོད་དྲིན་ལས་གཞན་དུ་གང་གིས་བྱས། །ལོག་པའི་སློབ་དཔོན་གྱིས་འདྲིད་མུ་སྟེགས་བྱེད། །ལྷ་གཅིག་ཕྱོགས་ལས་ཕྱིར་གྱུར་སྐལ་ངན་ཅན། །བྱང་བསྟན་ཕུག་པར་ཉི་འོད་མི་འཆར་བའི། །རང་བཞིན་དེ་ལ་སུ་ཡིས་བཅོས་སུ་ཡོད། །ཅི་ཡང་ཡིད་མི་བྱེད་པའི་རྙོག་པ་ཡིས། །ཐུབ་བསྟན་ཆུ་ཀླུང་སྦགས་པ་ཀ་མ་ལས། །དྲུངས་ཀྱང་ཕྱག་རྒྱའི་ཁྲུས་གང་དེར་སྨོན་པ། །ལྗོངས་འདིར་སྐྱེ་རྒུའི་ལས་ངན་ལྡོག་པ་དཀའ། །འོན་ཏེ་སྡེ་སྣོད་གསུམ་དང་རྒྱུད་སྡེ་བཞིའི། །རླབས་འཕྲེང་ཡོལ་བ་མེད་པའི་རྒྱ་མཚོའི་འཇིང་། །ས་ལམ་གདེངས་ཀ་གཡོ་བའི་གཙུག་ཏོར་རྩེར། །སྐུ་བཞི་ནོར་བུའི་ཅོད་པན་འོད་འབར་སྤྲོ། །དེ་ཚུལ་འགྲུབ་བྱེད་རྒྱུ་རྐྱེན་ལ་རག་པས། །སྒྲིབ་གཉིས་ནད་གསོའི་སྨན་པ་ཉི་མའི་གཉེན། །དཔལ་གྱི་གུར་ལས་གསུངས་པ་དམ་པའི་ཆོས། །ཐོས་བསམ་སྒོམ་ལ་མཁས་རྣམས་གཅིག་ཏུ་གཞོལ། །བོད་སྐྱོང་རྒྱལ་པོའི་བཀས་བཅད་ལྔ་ཕྱིར་འགྱུར། །ཕྱི་དར་འཇིག་རྟེན་མིག་གཅིག་མཐའ་ཀླས་པའི། །གསར་ཞུས་སྔར་བྱུང་བཅོས་སོགས་རྒྱལ་བའི་བཀའ། །བརྒྱ་ཕྲག་གླེགས་བམ་བསོད་ནམས་བརྒྱ་མཚོའི་ཞིང་། །འདྲི་ཀློག་འཆད་ཉན་སྲི་ཞུར་བྱེད་པ་ཀུན། །སྔོན་གོམས་སྐྱེ་བོའི་སྤྱི་གཙུག་ཤ་རྨེན་ལས། །བརྡོལ་བའི་འཁོར་འདས་ཕུན་ཚོགས་ང་ལ་ནུའི། །དབང་ཐང་གསེར་གྱི་འཁོར་ལོ་མཁའ་ལ་འཕགས། །འདི་དང་གཏན་གྱི་མདུན་མ་མ་ལུས་པ། །འགྲུབ་ལ་གོར་མ་ཆགས་པ་བློ་གྲོས་ཀྱི། །མིག་གིས་མངོན་སུམ་མཐོང་བཞིན་(༤བ)
ཡལ་འདོར་བ། །དེ་འདྲ་གཞན་འཕྲུལ་བདག་པོས་བརླམས་པར་ཟད། །སྐྱེ་རྒ་ན་འཆིའི་ཆུ་སྲིན་འབྱུང་གནས་ལས། །སྒྲོལ་ནུས་དལ་འབྱོར་གྲུ་བོ་ཆེ་ཡི་མཐུས། །སྤངས་རྟོགས་རིན་ཅེན་འདྲེན་འདོད་དཔྱོད་ལྡན་རྣམས། །དགེ་ཚོགས་དེད་དཔོན་ངང་ཚུལ་ལ་བརྟེན་རིགས། །དེ་ཡང་དཀར་ནག་གི་ལས་ཀྱི་འབྲས་བུ་འཆོལ་བར་མི་འབྱུང་བ་འོ་སྐོལ་གྱི་སྟོན་པས་ལན་གཅིག་མ་ཡིན་པར་བཀའ་སྩལ་ཞིང་དེ་ལ་ཡིད་བརྟན་དུ་བྱས་པ་མི་བསླུ་བ། ལུང་ཕྲན་ཚེགས་ལས། ཟླ་བ་སྐར་མའི་ཚོགས་བཅས་ས་ལ་ལྷུང་ཡང་སྲིད། །ས་འདི་རི་དང་ནགས་བཅས་མཁའ་ལ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་བསྐམས་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་པ་མིན། ཞེས་སངས་རྒྱས་ཀྱིས་མི་བདེན་པ་གསུང་བ་ནི་ནམ་ཡང་མེད་ཅིང་དགེ་བའི་ཚོགས་རྣམས་ཀྱི་ནང་ནས་ཀྱང་དཀོན་ཅོག་གསུམ་དངོས་དང་དེའི་རྟེན་ལ་རི་མོར་བྱ་བ་ནི་མཆོག་ཏུ་བསྔགས་པས། ལུང་གཞི་ལས། །མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་ལ་ནིགོམ་འདོར་ན། །ཛམྦུ་ཆུ་བོའི་གསེར་གྱི་སྲང་ཚད་ནི། །སྟོང་ཁྲག་བརྒྱ་ཡང་དེ་དང་མཉམ་པ་མིན། །ཞེས་དང་བདག་སྔོན་སྤོས་འཚོང་གྱུར་བ་ལས། །རྣམ་པར་གཟིགས་ཀྱི་གསུང་རབ་ཀྱི། །དགེ་སློང་དགེ་འདུན་སྤྱན་དྲངས་ནས། ཁྱེད་ཅག་ཇི་སྙེད་བཞེད་པ་ཡི། །བསྙུན་སྨན་བདག་གིས་དབུལ་བགྱིས་ཏེ། །ཤུན་པ་རྩ་བ་འབྲས་བུའི་སྨན། །དགེ་འདུན་བདག་གིས་ཚིམ་པར་གྱིས། །དགེ་འདུན་དབྱར་གྱི་སྤྱན་དྲངས་ནས། །བདག་ལ་དགེ་སློང་གཅིག་ཅིག་གིས། །ཨ་རུ་ར་གཅིག་མ་གཏོགས་བར། །དེ་ན་འགའ་ཡང་སློང་བ་མེད། །བསྐལ་པ་དགུ་ཅུ་རྩ་གཅིག་ཏུ། །བདག་ནི་ལོག་པར་ལྷུང་མ་གྱུར། །སྨན་སྦྱིན་པ་ཡི་རྣམ་སྨིན་ནི། །མཐུ་ཆེན་འདི་(༥ན)
ནི་བལྟ་བར་གྱིས། །དགེ་བ་ཆུང་ངུ་བྱས་པས་ནི། །བདེ་བ་མང་པོ་ཉམས་སུ་མྱོང་། །ཨ་རུ་ར་ནི་གཅིག་བྱིན་པས། །ཡུན་རིང་མཐོ་རིས་རྣམས་སུ་དགའ། །ཞེས་སངས་རྒྱས་ཀྱི་མཆོད་རྟེན་ལ་གུས་པར་བྱས་པ་དང་དགེ་འདུན་ལ་བསོད་སྙོམས་དང་སྨན་ཕུལ་བ་སོགས་ཀྱིས་མཚོན་པའི་བསོད་ནམས་ཀྱི་འབྲས་བུ་བླ་ན་མེད་ནའང་དེའི་ནང་ནས་ཀྱང་གསུང་རབ་ཉིད་མཆོག་ཏུ་གྱུར་པས། བརྒྱད་སྟོང་པ་ལས། དེ་བཞིན་གཤེགས་པའི་བྱིན་གྱིས་བརླབས་ཀྱིས་གླེགས་བམ་ཆེན་པོ་ལ་ཡི་གེ་གསལ་ཞིང་རབ་ཏུ་གསལ་བ་ལེགས་པར་བྲིས་ཏེ་མེ་ཏོག་དང་བདུག་པ་དང་དྲི་དང་འཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་དྲིལ་བུ་དང་བ་དན་དང་ཁོ་ར་ཁོར་ཡུག་ཏུ་མར་མེའི་འཕྲེང་བ་དང་མཆོད་པ་རྣམ་པ་མང་པོས་བཀུར་སྟིར་བྱ་བླ་མར་བྱ། རྗེད་པར་བྱ་མཆོད་པར་བྱ་རི་མོར་བྱ་བསྙེན་བཀུར་བྱ་སྟེ་ཀུན་དགའ་བོ་འདི་ནི་ངའི་རྗེས་སུ་བསྟན་པའོ། །དེ་ཅིའི་ཕྱིར་ཞེ་ན་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་གྱུར་རོ། །ཞེས་འབྱུང་བ་ཤེར་ཕྱོགས་སུ་མ་ཟད་ཐུབ་པའི་གསུང་རབ་མཐའ་དག་ལ་ཕྱོགས་མཚུངས་ཤིང་། །རྒྱུད་རྣམས་ནི་ཕན་ཡོན་ལྷག་པར་ཆེ་བས། རྡོ་རྗེ་རྩེ་མོ་ལས། བཟླས་པའི་གསང་བ་ངེས་སྦས་པ། །གསང་བ་འདི་ནི་རྣམ་པ་དྲུག །རིག་འཛིན་རྣམས་ཀྱི་སྙིང་པོ་དང་། །རྣལ་འབྱོར་རྒྱུད་ནི་བསྡུས་པ་དང་། དོན་ཡོད་ཤིན་ཏུ་རྨད་བྱུང་བ། །གསང་བ་ལས་ཀྱང་མཆོག་གསང་བཤད། །བཟླས་བརྗོད་ཙམ་གྱི་སྦྱོར་བ་ཡིས། །ལྟ་བའི་རི་བོ་འཇོམས་པར་འགྱུར། །ཞེས་བཟླས་བརྗོད་ཙམ་གྱི་ཕན་ཡོན་འདི་ལྟར་གསུངས་ཤིང་། སྤྱི་རྒྱུད་དུ། །དཀྱིལ་འཁོར་(༥བ)
འདི་འདྲ་མཐོང་མ་ཐག །དེ་དག་ཐད་པར་འགྱུར་ཡིན་ན། །ཞེས་དཀྱིལ་འཁོར་མཐོང་བ་ཙམ་གྱིས་ཀྱང་སྡིག་པའི་ཚོགས་རྣམས་བྱང་བར་གསུངས་པའི་ཤུགས་བསྟན་ལ། རྒྱུད་སྡེ་བཞིའི་གླེགས་བམ་འདྲི་ཞིང་ཀློག་པ་དང་རི་མོར་བྱེད་པ་སོགས་ཕན་ཡོན་མཐའ་ཀླས་པས་འཇམ་དཔལ་དབྱངས་ཀྱི་རྣམ་པར་སྤྲུལ་པ་ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་ལོ་པཎ་རྣམས་ཀྱིས་མདོ་འདུལ་ཤེར་ཕྱོགས་མང་དུ་བསྒྱུར་ཅིང་། རིགས་ཀྱི་དབོན་གསང་བའི་བདག་པོ་མངའ་བདག་ཁྲི་རལ་པ་ཅན་གྱིས་སྐད་གསར་བཅད་ཀྱིས་གཏན་ལ་འབེབས་སུ་བཅུག །གསང་སྔགས་རྙིང་མའི་རྒྱུད་རྣམས་ནི་བཀའ་ཤིན་ཏུ་གཉན་པས་གསང་ཆོས་ལྟ་བུར་སྦས་པའི་ཚུལ་དུ་གྱུར་ནས་བསྟན་པ་ཉིན་མོ་ལྟར་གསལ་བ་དུས་ཀྱི་འཕེལ་འགྲིབ་སྣ་ཚོགས་བྱུང་ནའང་དཔལ་མར་མེ་མཛད་དང་བསོད་སྙོམས་པ་ཆེན་པོ་ཤཱཀྱ་ཤྲཱི་སོགས་ལོ་པཎ་མཁས་གྲུབ་མང་པོས་བསྟན་པའི་མེ་རོ་ཆེས་ཆེར་བསོས་ཤིང་ཁྱད་པར་བཀའ་འགྱུར་རོ་ཅོག་ལ་དབུས་པ་བློ་གསལ་དང་བཅོམ་ལྡན་རལ་གྲི། ཐམས་ཅད་མཁྱེན་པ་བུ་སྟོན་རིན་པོ་ཆེ། ཚལ་པ་སི་ཏུ་དགེ་བའི་བློ་གྲོས་རྣམས་ཀྱིས་དཀར་ཆག་བསྒྲིགས་ཤིང་དག་ཐེར་མཛད་ནས་འཕེལ་རྒྱས་སུ་གྱུར་ཅིང་ཁྱད་པར་བསྟན་པའི་རྒྱུན་ལ་དགོངས་ནས་བཤེས་གཉེན་གྲོ་ལུང་པ་ཆེན་པོ་དང་། ཆོས་ཀྱི་རྒྱལ་པོ་འཕགས་པ་རིན་པོ་ཆེས་མདོ་མངས་ཀྱི་ལུང་རྒྱུན་འབད་པ་ཆེན་པོས་བཙལ་བ་ནི། བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཉན་པར་བྱ་གཟུང་བར་བྱ་བཅང་བར་བྱ་བཀླག་པར་བྱ་ཀུན་ཆུབ་པར་བྱ། རབ་ཏུ་གདོན་པར་བྱ། བསྟན་པར་བྱ་ཉེ་བར་བསྟན་པར་བྱ་ལུང་དབོག་པར་བྱ་ཁ་ཏོན་བྱ་བྲི་བར་བྱ། ཞེས་གསུངས་པའི་དགོངས་པ་བླ་ན་མ་མཆིས་པ་(༦ན)
ཡིན་ཅིང་། བར་སྐབས་སུ་རིམ་གྱིས་ཆ་ཕྲ་བར་གྱུར་པ་བུ་སྟོན་ཐམས་ཅད་མཁྱེན་པ་ཀུན་དགའ་རྣམ་རྒྱལ་དཔལ་བཟང་པོས་ཤིང་རྟའི་སྲོལ་སླར་ཡང་བཏོད་ཅིང་དེང་སང་གི་དུས་ཆོས་པར་རློམ་པ་ཕལ་ཆེར་ཁྱིམ་གྱི་བདག་པོའི་བསམ་སྦྱོར་ལྷུར་བླངས་ཏེ་གལ་ཆུང་ཆོས་ལ་བྱེད་པའི་དུས་ངན་འདིར། རིགས་དང་དཀྱིལ་འཁོར་ཀུན་གྱི་ཁྱབ་བདག་གནས་གསར་པ་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོས་བསྟན་པ་རིན་པོ་ཆེའི་སྲོག་འཐུད་པའི་རྣམ་པར་ཐར་པ་ལ་གཟུར་གནས་སྐྱེ་རྒུ་རྣམས་ལག་པའི་སོར་མོ་སྙིང་གར་ཟུམ་པའི་གནས་སུ་སྣང་ཞིང་སླར་ཡང་ཐུབ་བའི་བསྟན་པ་ལ་བྱ་བ་ཡང་དག་པར་མཛད་པ་ངེས་པ་དོན་གྱི་བསྟན་འཛིན་མང་ཞིང་འགྲོ་བའི་བསོད་ནམས་ཀྱི་མཐུས་རྟགས་ཙམ་འཛིན་པའི་བར་དུ་འབྱོན་པར་སེམས་སོ། །སྐབས་དོན་པ་རི་ངྷ་ར་ཞེས་པ་ཡོངས་འཛིན་དུ་འབོད་པ་ཆུ་ཕོ་བྱི་བའི་ལོ་ས་སྐྱོང་བློ་བཟང་མཐུ་སྟོབས་ཀྱིས་ཁུར་བཞེས་ནས་དོ་དམ་ཉུག་པ་དོན་གྲུབ་རྡོ་རྗེ་དང་འབྲི་ལུང་དབང་རྒྱལ་གཉིས་ཀྱིས་བྱས་དཔོན་ཡིག་པ་ཨོ་ཆོས་ལུང་དཀར་མོ་ནས་མཁས་བསྡུས་ཀྱིས་ཧོར་རྒྱལ་པོའི་དུས་བོད་ཁྲི་སྐོར་བཅུ་གསུམ་དུ་ཕྱེ་བའི་ཡ་གྱལ་ལྷོ་ཁྲི་སྐོར་གྱི་རྫོང་གི་ལྟེ་བ་ཤལ་དཀར་དུ་རྒྱལ་བའི་བཀའ་འགྱུར་རོ་ཅོག་རྒྱལ་རྩེ་ཐེམ་སྤངས་མ་སོར་བཞག་ལ་རྙིང་མ་རྒྱུད་འབུམ་གཙོ་བསྡུས་གསུམ་བསྣན་ཏེ་བཞེངས་པ་ཡིན་ནོ། །རྒྱ་ཧོར་བོད་ཡུལ་ཚངས་པའི་ལྟེ་བ་རུ། །ཞྭ་སེར་བསྟན་སྲིད་གསེར་སྒོང་ཡོངས་སྤུངས་པ། །བསོད་ནམས་བྱས་པའི་དྲོད་ཀྱིས་ཆེར་སྨིན་འབྲས། །ཐུབ་པའི་བསྟན་ལ་ནམ་ཡང་འཛད་མེད་ཤོག །འདིའི་ཆེད་བྱེད་པོར་གཏོགས་པའི་མཆོག་དམན་འགྲོས། །ཉེར་མཚོན་རྒྱུད་ལྔའི་སྐྱེ་རྒུ་མ་(༦བ)
ལུས་པ། །གནས་སྐབས་སུམ་རྩེན་དཔལ་ལ་སྤྱོད་བཞིན་དུ། །རིང་མིན་བྱང་ཆུབ་མཆོག་དེ་རྙེད་པར་ཤོབ། །ཤིས་བརྗོད་མེ་ཏོག་དཀར་མཛེས་མཆོད་པའི་སྤྲིན། །རྒྱལ་གསུང་སྲི་ཞུར་དབུལ་བའི་འཆི་མེད་རྣམས། །ལྷ་ལམ་ངོས་སུ་དགའ་བའི་གར་སྒྱུར་ཅིང་། །རབ་རྙན་གླུ་དབྱངས་རྟག་ཏུ་ལེན་གྱུར་ཅིག །ཅེས་བཀའ་འགྱུར་གསར་བཞེངས་ཀྱི་དཀར་ཆག་སྨོན་ལམ་དང་བཅས་པ་འདི་ནི་ཟ་ཧོར་གྱི་བནྡེ་སྡོམ་བརྩོན་སྡེ་སྣོད་གསུམ་པས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོས་བགྱིས་པ་ཤྲཱི་ཨསམཔཪྤཏནནྡབཧཤྴཱསནོདཡབྷཝནྟུ། ཆུ་བྱི་ཕོ་བྲང་ཆེན་པོ་པོ་ཏ་ལའི་མཆོད་ཁང་དམར་པོའི་ལི་མ་ལྷ་ཁང་དུ་བཞུགས་པའི་བྲིས་ཐང་སྣ་ཚོགས་སྣོད་སྒམ་ཆོས་བཅས་དེབ་ཐེར་དུ་བཀོད་པའི་འགོ་བརྗོད་ངོ་མཚར་སྒྱུ་འཕྲུལ་གར་མཁན། རྣམ་འདྲེན་སྲས་དང་སློབ་མའི་སྣང་བརྙན་གྱི། །སྤྲུལ་བསྒྱུར་ཆུ་ཟླ་ཇི་བཞིན་གདུལ་བྱའི་ངོར། །ཤར་བའི་ཕ་མཐའ་མེས་པོས་མ་རྙེད་ནས། །ཟག་བཅས་གཉིད་ལ་བསྐལ་པའི་བར་དུ་གཡུར། །འོན་ཏེ་ཚུར་མཐོང་འགྲོ་བློར་ཉེར་འཚམ་པའི། །སྣ་ཚོགས་བཀོད་པ་ཀཱ་ཤི་གཙང་མའི་ངོས། །གཙུག་ལག་གཉིས་པ་ཤེས་པའི་སོར་མོའི་གར། །ལེགས་བསྒྱུར་སྒྱུ་མའི་རྣམ་འཕྲུལ་གཟིགས་མོར་མཚར། །གྲངས་སྙེད་རྟོགས་པར་སླ་བའི་ངོས་འཛིན་གྱི། །དཀར་ཆག་ཨ་འདུས་ཀ་འཕྲེང་ཡི་གེའི་གཟུགས། །དེབ་ཐེར་འཁྲུལ་པ་མེད་པའི་ཨཱ་དཪྴར། །གསལ་འདིས་མི་བསྐྱུད་མཐོང་བས་དོན་ཀུན་གྲུབ། །ཅེས་ཤིས་པར་བརྗོད་ནས། །ཆུ་བྱི་ས་སྐྱོང་བློ་བཟང་མཐུ་སྟོབས་ཀྱིས་ར་ས་འཕྲུལ་སྣང་གི་མཎྜལ་ར་བའི་ལྕགས་ཁྲ་གསར་བརྗེས་ཀྱི་ནུབ་ཕྱོགས་སུ་ར་མ་ལུག་གི་ཚགས་སོགས་རྒྱས་པར་སྤེལ་བའི་ཁ་ཡིག་མཆོད་སྤྲིན་འཛད་མེད་འཁྱིལ་བའི་ཕྱག་རྒྱ། ཛམྦུའི་ལྗོན་པས་མཚན་(༧ན)
པའི་གླིང་གི་རྒྱན། །ལྷ་བཅས་སྐྱེ་རྒུའི་བསོད་ནམས་རྒྱ་མཚོའི་ཡུལ། །མཐོང་ཐོས་དྲན་པའི་ངེས་ལེགས་སར་སྦྱོར་བ། །ཤཱཀྱའི་ཏོག་གྱུར་རྣམ་འདྲེན་ཉི་མའི་གཉེན། །མགོན་དེའི་བརྟེན་པ་ཞིང་ཁམས་ཞིང་གི་གཙོ། །སྲོང་བཙན་ཡེ་ཤེས་སྒྱུ་འཕྲུལ་དྲ་བའི་གར། །ལྷ་ལྡན་སྤྲུལ་པའི་གཙུག་ལག་ཁང་ཆེན་པོ། །ས་ལ་གནས་པའི་འོག་མིན་སྟུག་པོ་བཀོད། །རྒྱ་གར་རྒྱ་ནག་ཧོར་དང་བལ་ཡུལ་ལི། །ཡ་ཚེ་བོད་ཀྱི་ཆེ་རྒུས་ཐོག་དྲངས་པའི། །མཆོག་དམན་བར་པའི་འགྲོ་བས་ཡོངས་སྤེལ་བ། །མཆོད་སྤྲིན་འཛད་པ་མེད་པ་ནམ་མཁའ་མཛོད། །གང་དེར་མི་བསྲུན་ཆོམ་པོས་མ་བྱིན་ལེན། །སྲུང་བྱེད་ལྕགས་ཀྱི་དྲ་བའི་འཁོར་ཡུག་གི །ནུབ་ངོས་དངུལ་ཚགས་རུ་བཞི་ར་མ་ལུག །རྨད་བྱུང་བཀོད་པས་རི་མོར་ཚར་དངར་བ། །ས་སྐྱོང་བློ་བཟང་མཐུ་སྟོབས་ཀྱིས་སྤེལ་བའི། །དོ་དམ་བར་ཏ་ཆོས་མཛད་ཨ་ཏར་སོགས། །ཚགས་པ་རིན་ཅེན་གྱིས་གཙོས་བཟོ་བོའི་རིགས། །དགོས་བྱེད་སྤྲོད་མཁན་བྱང་གླིང་རྒྱལ་པོས་བགྱིས། །དགེ་ཚོགས་མ་དྲོས་ལས་འོངས་གངྒཱའི་ཀླུང་། །བྱང་ཆུབ་མཆོག་གི་རྒྱ་མཚོར་རྟག་བབས་ནས། །འབྲས་བུ་རྒྱུད་ལྔའི་ཡིད་ཅན་མ་ལུས་པ། །འདྲེན་པའི་དེད་དཔོན་ཆེན་པོར་འགྱུར་བར་ཤོག །སེམས་ལྡན་ཀུན་གྱི་སྙིང་ལ་དཀོན་ཅོག་གི །མ་སྨད་ཐུགས་རྗེ་ཞུགས་པའི་གཟི་བྱིན་འོད། །འབར་བའི་བཀྲ་ཤིས་སྣང་བའི་དགའ་སྟོན་གྱིས། །ཡངས་པའི་ནོར་འཛིན་མ་ལུས་གསལ་བར་ཤོག །ཆོས་ཉིད་ཟད་སར་འཁྱོལ་བའི་རགས་པའི་ལུས། །འཇའ་ཚོན་འོད་སྐུར་གྲོལ་མཐུས་འཁོར་འདས་ལ། དབང་སྒྱུར་བརྟུལ་ཞུགས་མཐར་ཕྱིན་རིག་སྔགས་འཆང་། །པདྨ་ཐོད་འཕྲེང་འགྲོ་ཀུན་རྗེས་སུ་བཟུང་། །ཐབས་ཤེས་མཁའ་(༧བ)
ལ་མཁའ་སྦྱོར་ཟུང་འཇུག་པས། །ངྷུ་ཏཱིར་རླུང་སེམས་བཅིངས་ལས་འཁོར་ལོའི་མདུད། །རྣམ་གྲོལ་བདེ་སྟོང་བྱིངས་ཞུགས་པདྨ་ལས། །ལེགས་པར་འབྱུང་བའི་གནས་གཅིག་ཁྱོད་ཁོ་ན། །ཕྱག་དར་ཁྲོད་པའི་ངུར་སྨྲིག་གོས་འཆང་ཞིང་། །ཡོན་ཏན་ཀུན་རྫོགས་པདྨ་སམ་བྷ་ཝ། །ལྔ་རིག་མཁྱེན་ཡངས་སྤྱན་གྱིས་མ་གཞལ་བའི། །ཇི་ལྟ་ཇི་སྙེད་གནས་ཚུལ་ད་ག་རེ། །གཅིག་ཏུ་གསལ་བའི་བློ་གྲོས་ཉི་འོད་ཀྱིས། །རྨོངས་ཆེན་སྨག་རུམ་ཕ་མཐར་བྱས་པའི་བཤུལ། །ཤེས་བྱའི་གཟུགས་ཀུན་མཐོང་བའི་སྐལ་པ་དང་། །ལྡན་ཁྱོད་མཆོག་གི་ཉེ་ལམ་ལ་སྲེད་བཙོན། །སྐྱེ་མེད་པདྨའི་ཟེའུ་འབྲུར་སྐྱེ་བའི་ཚུལ། །ཆགས་མེད་རྒྱལ་སྲས་རྒྱུད་ལྔར་ཆགས་པ་ཡིས། །ཞེན་མེད་ཁམས་གསུམ་སྡུད་པོར་ཞེན་པ་ཅན། །ངེས་མེད་འགྲོ་ཀུན་མངའ་འབངས་རིས་ལྟར་སྐྱོང་། །བརྒྱ་ཕྲག་ཉི་མའི་དཔལ་ལ་འགྲན་པའི་འོད། །ཐུགས་རྗེའི་ཟེར་འཕྲེང་སྤྲོ་བ་རྨད་པོ་ཆེ། །གདུལ་བྱར་སྣང་བ་བརྩེ་བའི་མཆོག་སྦྱིན་མཁན། །རྣལ་འབྱོར་སྤྱོད་པས་ས་ལམ་རྟོགས་པ་རྫོགས། །དཀར་མིན་རང་སེམས་འཁྲུལ་བའི་སྒྱུ་མའི་གྲོང་། །ཡིད་སྲུབས་བ་གླང་སྨྱོན་པའི་སྲོག་པ་རྩེར། །ཤཱཀྱའི་མཚན་དཔེ་སེང་གེའི་མཆེ་བ་ཡིས། །ཉེར་གཅོད་ཐུབ་ཆེན་གཞན་ན་དམིགས་སུ་མེད། །ལྟ་ངན་མུ་སྟེགས་སྡེ་བཅས་རི་དགས་ཚོགས། །ལྐོག་མར་དོན་སྙིང་འཐོན་པའི་སྔོན་འགྲོའི་སྒོར། །རྣ་བར་འཇིགས་པ་མེད་པ་སེང་གེའི་སྒྲ། །སྒྲོགས་པའི་རྡོ་རྗེའི་ཁྲོ་བོ་གར་གྱིས་རོལ། །འཆོལ་པའི་ཁྲོ་བོ་གཏུམ་ཆེན་སྟང་སྟབས་ཀྱིས། །ཕུར་པའི་དབྱུག་རྩེར་དགྲ་བགེགས་ཕྱེར་བཏགས་པས། །སྡེ་བརྒྱད་ཀུན་གྱི་ལག་ཆ་སྟབས་གཅིག་ཏུ། །འཆོར་བྱེད་རྡོ་རྗེ་སྲིན་པོ་གྲོ་བོ་ལོད། །མགོན་ཁྱོད་མཛད་(༨ན)
པས་མཁའ་ཁྱབ་དེ་སྙེད་ཚད། །རྣམ་མཁྱེན་ལས་གཞན་གཞལ་ནུས་སྲིད་མིན་ཀྱང་། །འཛམ་བུའི་གླིང་ན་མཚོ་སྐྱེས་རྣམ་རོལ་གར། །ཆེ་ལོང་ཞིང་བཀོད་ངོ་མཚར་འབྱམས་སུ་ཀླས། དགེ་ཚོགས་རྀ་ཥིའི་འོད་ཀྱིས་གང་ཁྱབ་ཆུ། །སྲིད་ཞིའི་ཟུག་རྔུའི་དུག་བྲལ་ཕན་དང་བདེའི། །ཡན་ལག་བརྒྱད་དུ་བསྒྱུར་བ་སྐྱེ་རྒུའི་བདག །མཐོ་རིས་སྨན་པ་ཆེན་པོ་དེང་འགྲུབ་ཤོག །ཅེས་པ་འདི་ཡང་སྣེའུ་སྡོང་རྩེའི་བདག་མོ་བསོད་ནམས་དབང་འདུས་རྒྱལ་མོས་དཔལ་ཨོཾ་ཌཱི་ཡཱ་ནའི་སློབ་དཔོན་ཆེན་པོ་མཚན་བརྒྱད་གྲ་ཚར་སིནྡྷུ་རྒྱ་མཚོའི་ཞིང་བཀོད་དང་བཅས་བཞེངས་པའི་རྒྱབ་ཡིག་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོའོ། །