རབ་བྱུང་བཅུ་གཅིག་པའི་མེ་སྦྲུལ་ལོར་དེབ་ཐེར་དུ་བཀོད་པའི་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་ལུགས་གཉིས་དང་འབྲེལ་བའི་དངོས་སྤྱད་ཀྱི་དེབ་ཐེར་དཔག་བསམ་འདོད་འཇོ་དང་། ཚེའི་རིག་བྱེད་མཐའ་དག་གི་སྙིང་པོ་བསྡུས་པའི་གླེགས་བམ་གྱི་ཆེ་བརྗོད་སྨོན་ལམ་གྱི་རིམ་པ་སོགས།
རབ་བྱུང་བཅུ་གཅིག་པའི་མེ་སྦྲུལ་ལོར་དེབ་ཐེར་དུ་བཀོད་པའི་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་ལུགས་གཉིས་དང་འབྲེལ་བའི་དངོས་སྤྱད་ཀྱི་དེབ་ཐེར་དཔག་བསམ་འདོད་འཇོ་དང་། ཚེའི་རིག་བྱེད་མཐའ་དག་གི་སྙིང་པོ་བསྡུས་པའི་གླེགས་བམ་གྱི་ཆེ་བརྗོད་སྨོན་ལམ་གྱི་རིམ་པ་སོགས། རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་ལུགས་གཉིས་དང་འབྲེལ་བའི་དངོས་སྤྱད་ཀྱི་དེབ་ཐེར་དཔག་བསམ་འདོད་འཇོ། (སྡེབ་སྦྱོར་མཉམ་པའི་པྲིཏྟ་ལས་རྒྱུན་ཆགས་གསུམ་པ་རྒྱ་མཚོ།) སཁིདཡབཔནདྷྭིནཎྱཥླཎཱུརྡྲེཎཔཱགྡྷརྨརཱུཔདྲུམོདོགྲཀཱམཱཤཔཱརཱཔྟབུདྡྷཤྲིཡོཧིགལཀཙསུཥཥྛིགཱིཏཱདྡིནིཏྱེནགཱཿཧཱིཏྲིཡནིཡུགཱདྱནྟཀཱནྟཤྴུབྷེསདྱདྷརྨཻརསཿ། ཤིས་པ་བརྗོད་པའི་སྒོ་དང་པོ། བྱམས་བརྩེའི་ས་བོན་ཚོགས་གཉིས་དྲོད་གཤེར་གྱིས་སྨིན་ཆོས་གཟུགས་ཡོངས་འདུ་ས་བརྟོལ་དར་དྲག་འདོད་པའི་རེ་བ་ཀུན་སྐོང་རྫོགས་སངས་རྒྱས། །དཔལ་གྱི་མགུར་ནས་དྲུག་ཅུའི་གླུ་ལས་བདེན་པ་གཉིས་ཀྱིས་འགྲོ་རྣམས་ཐེག་གསུམ་ལ་སྦྱོར་ཐོག་མཐའ་བར་དགེ་དམ་པའི་ཆོས་ཀྱི་རོ། །(༡༤༨བ)
སམབིཏལིཧབྷཱུམིཔབྠཱབྷིབུངྔྷེནསཱཀཔྲམུགྫཱཡཙཤྲཱུབཀས་ཝུརུཥྱཔྲསཾགྷེཥཔཱུབུངྷནལབྷསདཻཀཤཱརཏྲིབཱརཻྈྐརུརསཱུཪྻསཽཧིཏྱབྷཱནུཛྭལཱཀཱལལཀྵྨཱཏནནྟཏྶབཿ། ཚུལ་བཞིན་ལེགས་མྱངས་ས་དང་ལམ་གྱི་མངོན་པར་རྟོགས་པས་སྨིན་ཅིང་རབ་གྲོལ་རྒྱལ་བའི་སྲས་པོ་ཉན་རང་སྐྱེ་འཕགས་དགེ་བདུན་ཏེ། །བྱང་ཆུབ་བར་དུ་གཏན་གྱི་སྐྱབས་གཅིག་མཆོག་གསུམ་ཐུགས་རྗེ་རྟ་བདུན་པ་ཡིས་ཕན་བདེའི་འོད་འབར་དུས་ཀུན་ཕུན་ཚོགས་དགའ་སྟོན་སྩོལ། །ཤིས་པ་བརྗོད་པའི་སྒོ་གཉིས་པ། གདུལ་དཀའི་འགྲོ་མང་སྟོབས་ལྡན་ས་སྲུངས་ཉོན་མོངས་ཆུས་མྱོས་ལོག་ལམ་ཉེར་འཕྱན་དགེ་བཅུའི་པད་ཚལ་བརྫི་བའི་སྣར། །བདེ་གཤེགས་ཡོངས་ཀྱི་དབང་གི་འཕྲིན་ལས་ཨུཏྤལ་ལྕགས་ཀྱུའི་གཟུགས་ཅན་བཏབ་པས་བག་ཡོད་ར་བར་ལེགས་འཇུག་པ། །རྐེད་ཕྲ་ནུ་འབུར་ཆུ་འཛིན་མངོན་མཐོ་དཀྱུས་རིང་སྤྱན་གྱི་ཟུར་མདའ་འགོས་ཚེ་བརྟན་གཡོའི་དངོས་ཀུན་སྙིང་འབིགས་མ། །རྒྱལ་རྣམས་ཡུམ་གཅིག་(༡༤༩ན)
རིགས་བྱེད་ལྷ་ཁྱོད་ཞབས་རྡུལ་གཙུག་བསྟེན་འདོད་པའི་རེ་འབྲས་ཆར་དུ་བསྙིལ་པའི་ཤིས་པ་སྩོལ། །ཤིས་པ་བརྗོད་པའི་སྒོ་གསུམ་པ། མཆོད་སྦྱིན་བརྒྱ་པའི་ཡན་ལག་བཞི་དཔུང་བདེ་བར་ངལ་གསོའི་མི་འཇིགས་སྟེར་བའི་བྱམས་ལྡན་ཡང་། །བཟོད་དཀའ་ལུས་ངན་འཕྲུལ་གྱིས་བཅུད་བྲལ་དོན་སྙིང་ལྐོག་མར་འབྱིན་ལ་གཏུམ་དྲག་བརྩེ་མེད་ཅན། །བརྒྱ་ཕྲག་ཉི་གོས་ཀྱིས་ཀླུབས་གསེར་སྦྱངས་ལྷུན་པོ་ཟིལ་གནོན་རྣམ་མང་ཐོས་སྲས་ཕྱག་སོར་གྱིས། །བཙིར་བའི་ནེའུ་ལེའི་མགྲིན་པ་ལས་སྐྱུགས་མི་ཟད་ནོར་བུའི་གྲུ་ཆར་འབེབས་པའི་དགེ་ལེགས་སྩོལ། །མཁའ་ཁྱབ་མཁའ་ཡི་རྡོ་རྗེ་སྟོང་ཆེན་ཤེས་རབ་རང་སྣང་བཙུན་མོའི་ཨེ་དབྱིངས་རྣམ་དག་གཞལ་ཡས་ཆེར། །འཕོ་མེད་བདེ་བའི་བཅུ་དྲུག་ཆ་གང་ཀུནྡའི་ལང་ཚོ་དར་བབས་ཐབས་མཆོག་ཝཾ་ཡིག་ལྷ་ཡི་ཚོགས། །ཕྱག་འཚལ་བའི་སྒོ་དང་པོ། རང་ལས་གཞན་མིན་འཁོར་ལ་ངེས་གསང་ནཱ་དའི་དབྱངས་སུ་ལེན་པ་ཁྱབ་བདག་རྡོ་རྗེ་སེམས་དཔའ་ཆེ། །ཐུན་མོང་གདུལ་བྱར་འཚམས་སྤྲིན་གོས་ཅན་ཤཱཀྱ་སེང་ཞབས་འཁོར་ལོས་རབ་བཀྲ་གཙུག་ཏུ་བཀོད་ཕྱག་འཚལ། །ཕྱག་འཚལ་བའི་སྒོ་གཉིས་པ། འོད་མཚན་སྟོང་འབར་མཛོད་སྤུའི་ཟེར་ལས་རྒྱ་གར་པཎ་གྲུབ་འཛམ་གླིང་ཆེ་བའི་རིག་སྔགས་འཆང་། །འཇའ་ལུས་འཕོ་བ་ཆེན་པོའི་སྐུ་བརྙེས་རིགས་བརྒྱའི་བདག་པོ་དཔལ་ལྡན་ཀུན་བཟང་ཧེ་རུ་ཀཿ །དུས་གསུམ་རྒྱལ་བ་ཡོངས་ཀྱི་སྤྱི་གཟུགས་མཚོ་ལས་སྐྱེས་པའི་རྡོ་རྗེ་ཞེས་གྲགས་ཐོད་འཕྲེང་རྩལ། །ཞབས་སེན་མེ་ཏོག་བྱང་ཆེན་དེ་སྲིད་ཅོད་པན་ལ་འཆིང་ཡིད་སྲུབས་སྡེ་ལས་རྒྱལ་བྱིན་རློབས། །(༡༤༩བ)
ཕྱག་འཚལ་བའི་སྒོ་གསུམ་པ། རིང་བསགས་བོད་འབངས་ལེགས་བྱས་ཕུང་པོ་ནོར་འཛིན་ལུས་ཕྲའི་མངལ་ཁུར་ཆུ་གཏེར་ཆེ། །རིགས་གསུམ་སྒྱུ་འཕྲུལ་གངས་ཅན་ལྷ་གཅིག་མེས་དབོན་ཐུགས་བསྐྱེད་རི་བོ་བསྒྲིལ་བ་ལས། །འཕགས་བོད་ལོ་པཎ་རིམ་པར་བྱོན་སོགས་བགྲངས་ཡས་མཁས་གྲུབ་བུམ་བཟང་བདུད་རྩིའི་གཏེར། །ཉེས་བརྒྱའི་ཟུག་རྔུ་དྲུང་འབྱིན་བསྟན་འགྲོའི་སྲོག་ཟུངས་གྱུར་ཏོ་ཅོག་ཀུན་ཕྱག་གི་གནས། །ཕྱག་འཚལ་བའི་སྒོ་བཞི་པ། ཕུལ་བྱུང་མཁྱེན་ཡངས་མེས་པོའི་ཐོད་ལས་སྐྱེས་བུ་གསུམ་གྱི་མཐོ་རིས་ཆབ། །བློ་གྲོས་ལྟོར་འཁྱིལ་དཔྱད་གསུམ་དག་པའི་གཟེགས་མ་ཕྱིར་སྐྱུགས་གངྒཱའི་རྒྱུན། །རྒྱལ་བསྟན་ལོག་རྟོག་དྲི་ཚོགས་འཁྲུད་ལ་དྷཱི༔ཡིག་བཞུན་མ་མི་ཡི་གཟུགས། །ཤེས་བྱར་སྲིད་ཀུན་གཟིགས་པའི་དབང་ཕྱུག་རྣམ་འདྲེན་བཙོང་ཁ་པ་ལ་འདུད། །ཕྱག་འཚལ་བའི་སྒོ་ལྔ་པ། ཆུ་ནང་ཟླ་ལྟར་རང་བཞིན་མེད་ཀྱང་མྱ་ངམ་ཐང་འཁྱམས་འགྲོ། །མ་འདྲིས་ཡོངས་ལ་ཐུབ་རྣམས་རྗེས་ཆགས་གཟུགས་སྣང་སྙིང་རྗེའི་ལྷ། །ཕྱག་ན་པད་དཀར་ལུས་ཅན་བསོད་ནམས་ཞིང་དུ་ངུར་སྨྲིག་གར། །བསྒྱུར་བའི་འཕྲིན་ལས་རྒྱ་མཚོའི་ཕ་མཐར་ཁྱབ་དེས་བདག་རྗེས་བཟུང་། །དངོས་པོ་ངེས་བསྟན་གྱི་སྒོ་དང་པོ། རྣམ་པར་གྲོལ་རྩེ་རྒྱལ་བའི་ས་བོན་ཆེད། །གཞན་ཕན་བདེ་འབྱུང་ལེགས་ལམ་བཤད་སྒྲུབ་ཀྱི། །རིགས་འཛིན་འདུས་གླིང་སྤྱད་བྱར་འོས་པའི་ཅ། །རྨུགས་འཛིན་དབང་པོའི་མཛོད་ལ་གཅིག་ཏུ་འགྲན། །དངོས་པོ་ངེས་བསྟན་གྱི་སྒོ་གཉིས་པ། སྙིང་མེད་ཨེརཎྜར་མཚུངས་ཟང་ཟིང་ནོར། །ཞི་ཁྲོ་རབ་འབྱམས་དམ་ཅན་སྲུང་མ་རྣམས། །མཆོད་པའི་རྫས་བསྒྱུར་བསོད་ནམས་ཉེར་(༡༥༠ན)
བྱས་གཟུགས། །སྣོད་དུ་འཇིག་རྟེན་ཁམས་ཀུན་བྱེད་པོས་བསྐྲུན། །དངོས་པོ་ངེས་བསྟན་གྱི་སྒོ་གསུམ་པ། བརྟུལ་ཞུགས་སྤྱོད་པའི་ཡན་ལག་གར་འཆམས་ཀྱི། །ཆས་གཞུག་རྒྱན་གོས་སྣ་ཚོགས་རོལ་མོ་སོགས། །རྒྱུད་འགྲེལ་མཁས་པའི་ཕྱག་བཞེས་རྗེས་འབྲངས་ལས། །སྣང་ཤས་ཟ་ཟི་མཁན་པོའི་མཆེད་ཟླ་མིན། །འདི་ཕྱིའི་བདེ་སྐྱིད་ཀཏྤུར་ཡི་ངད། །གཏོང་ཕོད་མ་ལ་ཡ་རླུང་གིས་དྲངས་དྲི། །དོན་མིན་གདུང་གཞིལ་བསྒྲུབས་འབྲས་བྱང་ཆུབ་བར། །མི་འཛད་རང་གཞན་སྒྲིབ་ལས་གྲོལ་བའི་རྒྱ། །དཀོན་ཅོག་རྙེད་པ་ལོག་འཚོར་ཉེར་སྦྱོར་ཟས། །ཟངས་བཞུན་ཁོལ་མར་འཐུངས་པའི་ས་བོན་གྱིས། །འགྲོ་མང་མནར་ནུས་མེ་ཏོག་མདའ་ཅན་གྱི། །ཆོ་ག་རྫོགས་ལས་ཕྱིར་བཟློག་འཕྲུལ་གྱི་སྒྱོགས། །བག་ཚ་སྡུམ་དུམ་སྲེག་བྱེད་འདོད་ཆེན་མེས། །སྙིང་གི་ཡོལ་གོར་རྐུ་སེམས་ཁོལ་བའི་ཆབ། །བཅིལ་ནུས་བརྗོད་པ་རྣམ་དག་དེབ་ཐེར་ངོས། །མིང་ཚིག་ཡི་གེའི་དྭངས་བསིལ་ཆུ་ཀླུང་སྦྲེང་། །ཐབས་མཁས་གཞན་སྣང་འདྲིད་ནུས་འདོད་པའི་ལྷ། །དངོས་དོན་འཁྲུལ་བྲལ་མགྲིན་བློན་མིག་གི་མེས། །བསྲེགས་ཚེ་ཁྱབ་མཇུག་གིས་ཀྱང་འཁྱོག་པོའི་འགྲོས། །མ་ནུས་ས་ཆེན་འདེགས་པའི་བརྫུ་ལ་བརྟེན། །ངོ་སྲུང་མཛེས་ཚིག་གཙོ་བོར་མ་བཏོན་པ། །གསོང་པོར་སྨྲས་པ་དགུ་ཚིགས་གནམ་གྱི་ཐིག །བསྐལ་པར་རྫོགས་མིན་རིང་པོའི་སྐ་རགས་ཀྱི། །རི་མོ་མིག་གསུམ་པས་ཀྱང་དབྱི་ནུས་སུ། །ལོང་ལོང་ཁོལ་བའི་སྙིང་གི་ཁྲག་དྲོན་གྱིས། །མ་ཚིམ་སྲིད་གསུམ་ཟ་ལ་རྔམས་པའི་ཞལ། །རབ་གདངས་བེག་ཙེ་ལྕམ་དྲལ་དམར་ཟླུམ་སྤྱན། །(༡༥༠བ)
གཟིགས་ནས་མེལ་ཚེ་མཛད་ལ་མ་གཡེལ་ཀྱེ། །ཆེས་ཕྲའི་ཀ་ཅར་ཕྱིར་བསྙིགས་ཡུད་ཙམ་ལ། །ཉིན་ལམ་བཅོ་བརྒྱད་བྱ་རྒོད་འཕུར་བའི་བཤུལ། །མྱུལ་བའི་བཀའ་སྲུང་ལི་བྱིན་ཧ་ར་ཆེ། །ཡུམ་བློན་ཀིངྒ་རར་བཅས་མཐུ་དཔུང་བསྐྱེད། །བསྟན་འགྲོའི་རྩ་ལག་རིག་གྲོལ་གཉིས་ལྡན་སྡེ། །འདུ་རྫས་རྣམ་དཀར་ལས་རྒྱུན་སྤེལ་བའི་མཁར། །ལྷ་སྲིན་ལྕགས་རི་དུས་མཐའི་མེ་ལྟ་བུས། །གཤིན་རྗེའི་འདུན་ས་སྙིང་ལས་ཆུང་ངུར་མཛོད། །འཇམ་མཉེན་ཤོག་བུའི་ཁོ་ར་ཁོར་ཡུག་ནང་། །ཨ་འདུས་ཀ་འཕྲེང་ལྡན་པ་ཡི་གེའི་གཟུགས། །བརྡ་དང་བཀོད་པའི་ཁྱད་པར་རྣམ་བཀྲ་བ། །འཆི་མེད་བདག་པོའི་སྐྱེད་མོས་ཚལ་རྗེས་འགྲོ། །ཛཱ་ཏིའི་འཁྲི་ཤིང་ཀླུང་ནས་ཆུ་གཏེར་རླབས། །མཁའ་ལ་སྙེག་འདྲའི་བར་གྱི་ནོར་འཛིན་ལྟོར། །ཕུན་ཚོགས་འབྱོར་པའི་ཕུད་ཀུན་གཅིག་བསྡུས་པ། །དེབ་ཐེར་དཔག་བསམ་འདོད་པ་འཇོ་འདི་སྤེལ། །དེའང་བདག་ཉིད་ཆེན་པོ་འཇམ་མགོན་ས་སྐྱ་པཎྜི་ཏས། མཆོད་བསྟོད་འདུད་པའི་བདག་ཉིད་ཅན། །ཤིས་པ་བརྗོད་སོགས་མི་འགལ་ཏེ། །ཐམས་ཅད་དུ་ཡང་སྟོན་པ་ཡི། །ཆེ་བ་འབའ་ཞིག་བརྗོད་ཕྱིར་རོ། །ཞེས་མཆོད་བསྟོད་ཤིས་བརྗོད་སོགས་ཚིག་གི་སྦྱོར་སྡེ་དང་མིང་འདོགས་ཀྱི་ཁྱད་པར་ལས་དོན་དུ་བསྔགས་ཡུལ་གང་ཡིན་པ་དེའི་ཆེ་བ་ཁོ་ན་བརྗོད་པར་གསུངས་པ། སློབ་དཔོན་དཎྜིའི་ཞབས་ཀྱིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ །ཞེས་པའི་དགོངས་དོན་དང་མཚུངས་པ་ཡིན་པས་འཕགས་བོད་ཀྱི་མཁས་གྲུབ་རྣམས་ཀྱི་རྗེས་སུ་(༡༥༡ན)
ཞུགས་ཏེ་སྙན་ངག་གི་ཚིགས་སུ་བཅད་པས་སྔུན་བསུས་ནས་དངོས་དོན་གླེང་བར་བྱ་བ་ནི་སྙིང་རྗེ་པདྨ་དཀར་པོ་ལས་གསུངས་པ་ལྟར། འོ་ན་བསྐལ་པ་འདི་ལ་བཟང་པོ་ཞེས་བརྗོད་པ་ཅི་ཞེ་ན། འཇིག་རྟེན་འདི་ཆུས་འཇིག་པའི་ཚེ་མཚོ་ནས་གསེར་གྱི་པདྨ་སྟོང་བྱུང་བར་གྱུར་ཏེ། དེ་ལ་ལྷ་རྣམས་ཀྱིས་བརྟགས་པས་སངས་རྒྱས་སྟོང་འབྱུང་བའི་ལྟས་སུ་ཤེས་ཏེ། ཀྱེ་མ་བསྐལ་པ་འདི་ནི་བཟང་པོའོ་ཞེས་བརྗོད་པས་བསྐལ་པ་བཟང་པོ་ཞེས་གྲགས་པར་འགྱུར་རོ། །ཞེས་གྲགས་ཅན་གྱི་བསྐལ་པ་འདི་ལ་སངས་རྒྱས་སྟོང་བྱོན་པའི་ནང་ནས་འོ་སྐོལ་གྱི་འདྲེན་པ་ཟས་གཙང་སྲས་པོ་འོག་མིན་གནས་སུ་མངོན་པར་རྫོགས་པར་སངས་རྒྱས་ཟིན་ཀྱང་། བདེ་མཆོག་མཁའ་འགྲོ་རྒྱ་མཚོ་ལས། འཛམ་བུའི་གླིང་ནི་ཆུང་ངུ་འདིར། །བདག་ནི་ཤཱཀྱའི་རིགས་རྗེས་འགྲོ། །ཞེས་དཔལ་དུས་ཀྱི་འཁོར་ལོ་དང་མཐུན་པར་འཛམ་གླིང་ཆེ་ཆུང་གཉིས་ལས་ཆུང་བ་ལྷོ་ཕྱོགས་ཀྱི་འཛམ་གླིང་འདིར་རིགས་ཕུན་སུམ་ཚོགས་པ་ཤཱཀྱའི་བརྒྱུད་དུ་བལྟམས་ནས་ཤིན་ཏུ་ངོ་མཚར་བའི་གནས་བཅུའི་ལྟེ་བ་མངྒ་དྷ་རྡོ་རྗེ་གདན་དུ་མཆོག་གི་སྤྲུལ་པའི་སྐུར་འཚང་རྒྱ་བའི་ཚུལ་བསྟན་པའི་འཕྲིན་ལས་ཀྱི་སྒོ་འཕར་ཡངས་པོར་ཕྱེ་ནས་ལུང་རྟོགས་ཀྱི་བསྟན་པ་ཕྱོགས་བཅུར་རྒྱས་པའི་ནང་ཚན་འཇམ་དཔལ་རྩ་བའི་རྒྱུད་ལས། ང་ཡི་དུས་ནས་ལོ་བརྒྱ་ན། ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་མཚོ་བྲི་བའི་ཤུལ་དུ་རིམ་གྱིས་མིའི་འགྲོ་བ་ཆགས་པའི་ལྷ་གཅིག་ཆོས་ཀྱི་རྒྱལ་པོ་རྣམས་དང་སྔ་ཕྱིར་བྱོན་པའི་མཁས་གྲུབ་ལོ་པཎ་ཚོགས་ཀྱི་བཀའ་དྲིན་ལས་བཤད་སྒྲུབ་ཀྱི་བསྟན་པ་དར་བ་ནི། ཁྲུས་ཁང་(༡༥༡བ)
ལོ་ཙཱ་བ་བསོད་ནམས་རྒྱ་མཚོའི་སྡེས། ལར་དུས་གསུམ་རྒྱལ་བའི་ཐུགས་རྗེ་དང་། །རྒྱལ་སྲས་པད་དཀར་ཞབས་དྲིན་ལས། །བོད་ཀྱི་ཡུལ་ཁམས་འདི་ཉིད་ཀྱང་། །འཕགས་ཡུལ་དང་སྐལ་བ་མཉམ་པ་སྙམ། །ཞེས་གསུངས་པ་དོན་ལ་གནས་ཤིང་བསྟན་པའི་རྩ་བ་ནི་འདུལ་བའི་སྡེ་ལ་རག་ལུས་པའི་དགེ་འདུན་དེ་ལ་ཡང་ཉན་ཐོས་ཀྱི་དགེ་འདུན་དང་། ཐེག་ཆེན་གྱི་དགེ་འདུན་གཉིས་སུ་བྱུང་བའི་སྔ་མ་གཙོ་ཆེ་བའི་དབང་དུ་བཏང་སྟེ། སྡོམ་གསུམ་ལས། །ཉན་ཐོས་རྣམས་ཀྱི་བླ་མ་ནི། །བཟང་ཡང་གང་ཟག་ཁོ་ནར་བས། །ཞེས་དགེ་སློང་གྲངས་བཞིར་མ་ལོངས་པ་ལ་གང་ཟག་དང་ལོངས་པ་ནི། མཛོད་རང་འགྲེལ་ལས། སོ་སོ་ཐར་པའི་སྡོམ་པ་དེ་ཡང་དགེ་འདུན་ནམ། གང་ཟག་ལས་ཏེ། དགེ་སློང་དང་། དགེ་སློང་མ་དང་། དགེ་སློབ་མའི་སྡོམ་པ་ནི་དགེ་འདུན་ལས་སོ། །གཞན་རྣམས་གང་ཟག་ལས་སོ། །ཞེས་དམ་པའི་ཆོས་འདུལ་བ་དང་འབྲེལ་བའི་དགེ་འདུན་དུ་བྱེད་དགོས་པ་བསྟན་པ་གནས་མ་གནས་ཀྱང་སོ་ཐར་གྱི་སྡོམ་པ་ཡོད་མེད་ལ་རག་ལུས་པར་གསུངས་པས་གཙོ་ཆེ་ནའང་སྡོམ་གསུམ་ལས། ཕ་རོལ་ཕྱིན་པའི་བླ་མ་ནི། །བཟང་ཡང་དགེ་འདུན་དཀོན་ཅོག་ཡིན། །ཞེས་སྦྱོར་མཐོང་སྒོམ་གསུམ་ལ་གནས་པ་ཡིན་པར་གསུངས་པ་དེ་ལྟ་བུའི་གང་ཟག་ཀྱང་མཐའ་མ་བཀག་པས་ཐེག་པ་ཆེ་ཆུང་གི་འདུས་ཚོགས་རྣམས་ལུང་རྟོགས་ཀྱི་ཡོན་ཏན་ཕུན་སུམ་ཚོགས་པས་ཕྱུག་ཅིང་ལྷ་མིའི་བསོད་ནམས་ཀྱི་ཞིང་དམ་པར་གྱུར་པའི་ཕྱིར་རྣམ་པར་རྒྱལ་བའི་ཕན་བདེ་ལེགས་བཤད་གླིང་འདི་ཉིད་དུའང་རྒྱ་ཧོར་བོད་དང་བོད་ཆེན་པོ་སོགས་སྐྱེ་རྒུ་མཐའ་ཀླས་པས་འདི་ཕྱིའི་བདེ་འབྲས་ཀྱི་ཆེད་དུ་སྲི་(༡༥༢ན)
ཞུར་བསྐྲུན་པའི་བདོག་པ་གཞི་ལམ་བྱེས་ཚང་མར་དགོས་པ་ལུགས་གཉིས་དང་འབྲེལ་བའི་དཔྱ་ད་དངོས་རྣམས་དོན་མ་ཡིན་པར་ཆུད་འཛའ་བར་གྱུར་ན་མདོ་ཉི་མའི་སྙིང་པོ་ལས། ལྷུན་པོ་དང་ནི་འདྲ་བའི་མི། །བླང་བ་བྱས་ཏེ་ཟོས་པ་བླའི། ཁྱིམ་པར་གྱུར་པས་དགེ་འདུན་གྱི། །ལོངས་སྤྱད་པར་ནི་མི་བྱའོ། །ཞེས་དང་། མེ་ལྕེ་འབར་མ་ལྟ་བུ་ཡི། །ལྕགས་ཀྱི་ཐུ་ལུམ་བླངས་པ་བླའི། །རབ་ཏུ་བྱུང་དང་ཁྱིམ་པ་ཡིས། །དབྱིག་ནི་བླང་བར་མི་བྱའོ། །ཞེས་དགེ་འདུན་གྱི་རྫས་ལ་འབགས་པའི་ཉེས་དམིགས་ཆེས་མང་དུ་གསུངས་པས་ལོག་འཚོ་དང་ཆོམ་རྐུན་གྱི་འཇིག་པ་ལས་སྐྱོབ་པའི་ཆེད་དུ་སྐུ་གསུང་ཐུགས་རྟེན། སྒྲུབ་མཆོད། ཆོ་ག །བསྐང་བ། མདོས་གཏོར། གར་འཆམས་སོགས་ལ་ཉེ་བར་མཁོ་བའི་ཡོ་བྱད། མཆོད་རྫས། སྤྱན་གཟིགས། གཞན་ཡང་ལུགས་གཉིས་ཀྱི་སྐབས་ཐོབ་དང་འབྲེལ་བའི་དངོས་པོའི་རིམ་པ་བརྗེད་བྱང་དུ་བྱ་བར། མཁའ་འགྲོ་རྒྱ་མཚོ་ལས། །རྣལ་འབྱོར་དག་པའི་སེམས་འཆང་བ། །དེ་ལ་གདུག་པའི་གཟའ་སྐར་དང་། །བགེགས་དང་ལོག་འདྲེན་ཐམས་ཅད་ཀྱིས། །གནོད་པར་མི་ནུས་རྟོག་མེད་ཕྱིར། །ཞེས་དེ་ཁོ་ན་ཉིད་རྟོགས་པའི་རྣལ་འབྱོར་ལ་ཚེས་གྲངས་གཟའ་སྐར་སོགས་རྩི་མི་དགོས་ཀྱང་ཀུན་རྫོབ་ཀྱི་ཆོས་ལ། རྡོ་རྗེའི་ཚིག་ཏུ། ཇི་ལྟར་ས་བོན་དེ་བཞིན་ཤིང་། །ཤིང་ཇི་ལྟ་བ་དེ་བཞིན་འབྲས། །འཇིག་རྟེན་ཀུན་ལ་དེ་མཐོང་བས། །འདི་ནི་རྟེན་ཅིང་འབྲེལ་འབྱུང་ངོ་། །ཞེས་པ་ལྟར་གཟའ་སྐར་སོགས་རྟེན་འབྲེལ་འགྲིག་པ་ལ་བལྟོས་དགོས་པ། འགྲེལ་ཆེན་དྲི་མེད་འོད་ལས། གཟའ་ཚེས་རྒྱུ་སྐར་སྦྱོར་བ་དང་བྱེད་པ་ཉིད་(༡༥༢བ)
དང་དུས་སྦྱོར་དང་། །གདུག་པའི་གཟའ་སྟེ་འདི་རྣམས་ནི། །བསོད་ནམས་བྱེད་པ་རྣམས་ལ་དགེ །ཞེས་གསུངས་པ་བཞིན་འཕགས་པའི་སྐད་དུ་སིངྒ་ལ་ཞེས་པ་ཕྱོགས་འདིར་དམར་སེར་ཅན་དུ་བསྒྱུར་ཅིང་རྒྱ་ནག་གཙུག་ལག་གི་གཞུང་ལས་ཏིང་ཟི་སྟེ་མེ་སྦྲུལ་གྱི་ལོ་ཆུ་སྟོད་ཟླ་བའི་གནམ་གང་ལྷའི་བླ་མ་རྒྱལ་སར་བྱོན་བའི་དུས་དགེ་བར་དེབ་ཐེར་དཔག་བསམ་འདོད་འཇོ་འདྲི་བའི་དབུ་བཙུགས་ཏེ་བཀོད་པ་ལ། སྤྲེལ་ཟླའི་ཚེས་བཅུ་ཆེན་མོར་ཉེ་བར་མཁོ་བའི་དེབ་ཐེར་འདྲེན་བྱེད་བདུད་རྩིའི་དཔལ་སྟེར། (སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།) ཀཱརལེགོཛྭལཻཤྴསྟྲཏིཀྵྞ་ཏྱཏཱགྲཱསུར་གྲཱཧགཱཎཾནནིཏྱཔཐི། །ནྱཱསཀྲྀཏྶིནྷཱཧསྶཱརཤཱཏཾསགོརྡྷེཥུནོམཱརས་དྡྷི་རྨཧཱདྷིཥྛ་པཏྲ། མི་བཟད་རྡོ་རྗེ་འབར་བའི་མཚོན་རྣོན་པོ། །གདེངས་རྩེར་ལྷ་མིན་གདོན་ཚོགས་མི་རྟག་ལམ། །འགོད་མཛད་སིནྡུའི་རྒྱ་མཚོར་འདབ་བརྒྱའི་སྟེང་། །གར་བསྒྱུར་འཆི་མེད་གྲུབ་པས་བྱིན་ཆེན་ཕོབ། །(༡༥༣ན)
ལག་ན་པདྨའི་སྒྱུ་འཕྲུལ་ཁམས་གསུམ་ལ། །དབང་ཕྱུག་དཀར་མོར་རྗེས་ཆགས་དམར་འོད་མདངས། །སྲིད་ཞིའི་ཡིད་རྩ་གཡོ་བྱེད་འདོད་པའི་མེའི། །རྩེ་མོ་ཚངས་པའི་ཡུལ་ས་ལས་བརྒལ་སྒར། །མ་དང་མཁའ་འགྲོ་འདུ་བའི་ཚོགས་དཔོན་དུ། །རྒྱལ་ཀུན་རིགས་བདག་རྔ་ཡབ་གླིང་པའི་ཞབས། །ལེགས་འབྱིན་གར་འཆམས་ངོ་མཚར་བཀོད་པའི་དེབ། །འདྲེན་བྱེད་བདུད་རྩིའི་དཔལ་སྟེར་དེང་འདིར་འགོད། །ཅེས་བཀྲ་ཤིས་ཀྱི་ཚིགས་བཅད་བརྗོད་པ་སྔོན་དུ་འགྲོ་བས། ཇི་སྐད་དུ། རིན་ཆེན་མཚོ་གླིང་པདྨའི་སྡོང་པོ་ལས༔ རང་བྱུང་སྤྲུལ་པའི་སྐུ་རུ་བརྡ་ཡིས་འོངས༔ གང་ཞིག་ལས་ཅན་སྐྱེས་བུ་དད་པ་ཅན༔ བདག་ལ་གདུང་བའི་སེམས་ཀྱིས་གསོལ་འདེབས་ན༔ རྒྱུ་འབྲས་རྟེན་འབྲེལ་སྨོན་ལམ་ཁྱད་པར་གྱིས་༔ སངས་རྒྱས་གཞན་པས་བདག་ཉིད་ཐུགས་རྗེ་མྱུར༔ ཞེས་སྙིགས་མ་ལྔ་བདོ་བའི་སེམས་ཅན་ཐམས་ཅད་མངོན་མཐོ་དང་ངེས་ལེགས་ཀྱི་སར་བཀྲི་བའི་ཐུགས་བསྐྱེད་མངའ་ནའང་ཁྱད་པར་བོད་དང་བོད་ཆེན་པོའི་འགྲོ་བ་རྣམས་རྗེས་སུ་འཛིན་པར་ཐུགས་རྗེའི་མཐུ་ལྷག་པར་མྱུར་བ་ཞལ་གྱིས་འཆེས་ཤིང་དེར་མ་ཟད། རྒྱལ་པོའི་མངའ་བསྐྱེད་ནོར་བུའི་བང་མཛོད་ལས། ང་ཡི་(༡༥༣བ)
གསུང་གི་གདུལ་བྱ་ཡིས༔ བོད་ལ་བདེ་སྐྱེད་འབྱུང་འདོད་ན༔ ཡར་ངོ་ཚེས་བཅུ་ནམ་ཤར་ཚེ༔ ཨྱོན་པདྨའི་སྤྲུལ་པ་འབྱུང༔ ཞེས་དང་། ཆོས་རྒྱལ་རཏྣ་གླིང་པའི་གཏེར་བྱོན་ཆོས་བཅུའི་བསྐུལ་བྱང་ལས། ང་ཉིད་སྲིན་ཡུལ་འགྲོ་བའི་ཚེ༔ བོད་ཀྱི་རྒྱལ་བློན་སྔགས་སློབ་ལ༔ བྱུང་ཅོག་ཟླ་བའི་ཚེས་བཅུ་ལ༔ ང་ཉིད་འབྱོན་པའི་དབུ་སྙུང་བཞེས༔ པདྨ་འབྱུང་གནས་གཞན་མི་བསླུ༔ ཐེ་ཚོམ་སྤོངས་ཤིག་རྗེས་འཇུག་རྣམས༔ ཞེས་ལྷག་པར་ཡར་ངོའི་ཚེས་བཅུར་དངོས་སུ་འབྱོན་པར་ཞལ་གྱིས་འཆེས་པའི་ནང་ཚན་སྤྲེལ་ཟླའི་ཚེས་བཅུ་ཆེན་མོ་མངའ་བདག་གསུང་གི་སྤྲུལ་པ་གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་ཟབ་གཏེར་ལས་བྱང་ལེའུ་བརྒྱད་པ་དང་འབྲེལ་བའི་གར་འཆམས་ཕོ་བྲང་འཛམ་གླིང་རྒྱན་གཅིག་སྣེའུ་སྡོང་རྩེར་ཟི་ན་རིན་པོ་ཆེ་ཀུན་བཟང་རྩེ་བ་བསོད་ནམས་རྒྱལ་མཚན་ཡབ་སྲས་ཀྱི་ཕྱག་བཞེས་སུ་བསྟར་བའི་རྗེས་སུ་འབྲངས་པའི་ཞལ་བརྙན། ཕོད་ཀ །གར་གོས། པྲོག་ཞུ། རྟེན་ཁེབས། རྒྱན་དྲུག །ཕྱག་མཚན། གིང་རྔ། འཕན་གདུགས་སོགས་སྤྱན་གཟིགས་ཀྱི་རིམ་པའི་དེབ་འདྲེན་བྱེད་བདུད་རྩིའི་དཔལ་སྟེར་བཀོད་པ་ལ། རྩ་དེབ་དཔག་བསམ་འདོད་འཇོར་མ་འཐུས་པ་བེད་སྤྱད་འཕེལ་འགྲིབ་སྣ་ཚོགས་གཉེར་པར་རྩིས་སྤྲད་(༡༥༤ན)
པའི་དེབ་དངས་མཚོའི་ཟླ་གཟུགས། (སྡེབ་སྦྱོར་མཉམ་པའི་པྲི་རྟྟ་ལས་མེ་ཏོག་འཕྲེང་ཅན།) ཀོཊིསཱུཪྻཱ་བྷཱིབྷཱུཡེནབསྟྲསྱམཎྜལྱཧཱིཔཱཤམཏྲསྠཙཱལཱབྷབཿ། །ཀམྦཀཱརམཧཱདེབཀཱམསྱརཱཛྙོབྷབཻཪྴསུགཱཎཤསནྡཤཏུ། །འབུམ་ཕྲག་ཉི་མ་ཟིལ་གནོན་ཞལ་གྱི་ཁྱིམ། །མཐོང་བའི་མོད་ལ་བརྟན་གཡོའི་དངོས་པོ་ཀུན། །འདར་མཛད་ལྷ་ཆེན་ཊཀྐི་རཱ་ཛ་ཡིས། །སྲིིད་ཞིའི་ལེགས་ཚོགས་མ་ལུས་དབང་དུ་སྡུས། །རྒྱ་བལ་བོད་ཧོར་ཙི་ནའི་རྒྱལ་ཁམས་སོགས། །སྐད་རིགས་ཆ་བྱད་སྤྱོད་ཚུལ་མཐའ་ཀླས་པ། །བགྲང་ཡས་ཡུལ་གྲུའི་སྤྱད་དངོས་འདི་ཙམ་ཞེས། །གཅིག་ཏུ་འཛིན་པ་བྱིས་པའི་བློ་གྲོས་བཞིན། །དེ་ཕྱིར་རིན་ཅེན་ཕྱི་ནང་གོས་རས་ཇས། །ཉེར་མཚོན་ཚོང་འདུས་དུ་མར་བསྒྱུར་བ་དང་། །ལོངས་སུ་སྤྱད་པས་འཕེལ་འགྲིབ་སྣ་ཚོགས་དེབ། །རབ་འཆར་དྭངས་མཚོའི་ཟླ་གཟུགས་འདི་ནའོ། །ཞེས་ཚིགས་སུ་བཅད་པ་སྔོན་དུ་བཏང་སྟེ་གཉེར་པར་རྩིས་སྤྲོད་རྒྱུའི་གསེར་དངུལ་རིན་པོ་ཆེའི་རིགས། གོས་དར་ཇ་རས། ཐབ་གདན་ཆས། གོ་མཚོན། (༡༥༤བ)
འབྲུ་ཆ། རྟ་དྲེལ། རུ་ཁག་གི་མཚོན་བདོག་པ་སྣ་ཚོགས་མཐའ་དག་གཅིག་ཏུ་བརྟན་མི་ཆགས་པར་འཕེལ་འགྲིབ་ཀྱི་དེབ་དྭངས་མཚོའི་ཟླ་གཟུགས་བཀོད་པ་ལ། གཞིས་བྱེས་གཉིས་ཀར་འཕྲལ་དགོས་ཀྱི་རིགས་རྩ་དེབ་དཔག་བསམ་འདོད་འཇོ་ལས་ཟུར་དུ་ཕྱུང་སྟེ་དཀོན་གཉེར་རྣམས་ལ་སྤྲད་པའི་དེབ་མུ་ཏིག་འཕྲེང་བ། (སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།) བིདྱབཱལེམལཡྻཱཏྶུགདྒནྡྷདཱརིདྲཏཔྶེཏྠདྷེཪྪཱཡཀཱཤཱིཏཏཱ། །གཱམཤྴཱམཀྲྀདྲཱཀྟཛམྦྷལྱཱཧཱིཙཏྲིདྷཱཏཽསཀ་ལྱཔཏཱིཤེཀུརུ། མཐུ་སྟོབས་མ་ལ་ཡ་ལས་ལེགས་འོངས་དྲིས། །དབུལ་འཕོངས་གདུང་སེལ་འབྱོར་པའི་གྲིབ་བསིལ་བར། །འགྲོ་རྣམས་ངལ་གསོར་བྱེད་པ་ཛམ་ལ་དམར། ཁམས་གསུམ་མཐའ་དག་རང་གིར་དབང་དུ་མཛོད། །བསྙེན་སྒྲུབ་དམིགས་པའི་རྟེན་གྱི་བྲིས་འབུར་སྐུ། །མངོན་སྤྱོད་ལས་ལ་སྦྱོར་བ་དྲག་པོའི་ཆས། །རྩ་གསུམ་ཐུགས་དམ་སྐོང་ནུས་མཆོད་པའི་རྫས། །འཕྲལ་དུ་སྤྱད་བྱར་འོས་རྣམས་ཟུར་ཕྱུང་བ། །སྤེལ་ལེགས་མུ་ཏིག་འཕྲེང་མཛེས་ལྟར་བརྒྱུས་དེབ། །མཁའ་འགྲོ་ལྔ་ཚོགས་དགྱེས་བསྐྱེད་ཏམ་བུ་ར། །བརྗོད་པ་རྣམ་(༡༥༥ན)
དག་ཚིག་སྦྱོར་སྦར་མོའི་རྩེས། །བསྐུལ་བའི་སྒྲ་དབྱངས་རྣ་བའི་རྒྱན་དུ་དངར། །ཞེས་ཕུན་སུམ་ཚོགས་པའི་ཤིས་པ་བརྗོད་དེ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་བྱེས་སུ་འདེགས་དུས་འབྲས་སྤངས་སོགས་ཉེ་བར་མཁོ་ཞིང་གཞིས་སུའང་འཕྲལ་དུ་སྤྱོད་པའི་སྐུ་གསུང་ཐུགས་རྟེན་རྒྱུན་གཏོར། དུས་གཏོར་གློ་བུར་དུ་དགོས་པའི་མཆོད་ཆས་སོགས་མ་དེབ་ཆེན་མོ་དཔག་བསམ་འདོད་འཇོ་ནས་ཟུར་དུ་ཕྱུང་སྟེ་དཀོན་གཉེར་སྦྲེལ་པོར་རྩིས་སྤྲོད་ཀྱི་དེབ་མུ་ཏིག་འཕྲེང་བ་བཀོད་པ་ལ། བྱེས་བཞུགས་ཀྱི་ཉེར་སྤྱད་རྩ་དེབ་དཔག་བསམ་འདོད་འཇོ་ནས་ཟུར་དུ་ཕྱུང་བ་གཉེར་ཚང་སྦྲེལ་པོར་སྤྲད་པ་དང་གསར་བྱུང་རྩིས་ཐོག་ཏུ་འཁྱེར་རྒྱུའི་དེབ་རི་བོང་འཛིན་པའི་དཀྱིལ་འཁོར། (སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།) སཱམཏེཛཻཏྒལཱདུནྡུབྷོཤཔྟཀོཏྒརྫབཱངྒཀཔེཏྲཤྭབྷེཧྲྀདྲུཔཿ། །མཱནཏཔྶེབཀཤྲཱིམཏོཛམྦྷལོཔེཤྲབེརྦྷཎྜརཽཔཱཏྲཀཡཙྪཏུ། །སྙན་བརྗིད་འགྲིན་རྔ་སྒྲོག་པ་གཡུ་འབྲུག་སྟེང་། །གངྒཱའི་ཡབ་གཅིག་མཛེས་པ་འཕྲོག་པའི་གཟུགས། །ཡིད་ཀྱི་གདུང་སེལ་དཔལ་ལྡན་ཛམ་བྷ་ལས། །རྣམ་ཐོས་བུ་ཡི་གན་མཛོད་དེང་འདིར་སྩོལ། །སྲས་བཅས་རྒྱལ་བ་ཞི་ཁྲོའི་བྲིས་ཐང་སྐུ། །དར་ཟབ་ལྡ་ལྡི་སྤེལ་ལེགས་(༡༥༥བ)
དབང་པོའི་གཞུ། །ཕྲ་མང་དུང་དཀར་སྦུབ་སིལ་སྤོས་ཕོར་དང་། །རྟེན་ཁེབས་གོ་མཚོན་བཟའ་བཏུང་གཡོས་འདྲེན་སྣོད། །འཕེལ་འགྲིབ་རྩིས་སུ་གདབ་འོས་བྱེས་ཆས་རིགས། །འཕྲལ་བདེ་མཛོད་གཉེར་སྣ་ཚོགས་ཀ་ཅའི་དེབ། །མ་འདྲེས་ཆ་གང་རི་བོང་འཛིན་པ་ཡི། །དཀྱིལ་འཁོར་གཉིས་སྐྱེས་དགའ་སྟོན་དེང་འདིར་ཤར། །ཞེས་ཚིགས་སུ་བཅད་པས་བསྔུན་བདར་ཏེ་རྩ་དེབ་ཆེན་མོ་དཔག་བསམ་འདོད་འཇོ་ནས་ཟུར་དུ་ཕྱུང་བ་གཙོ་བོར་བཏོན་ཏེ་གྲྭ་ཚང་བྱེས་སུ་བཏེགས་བཞུགས་ཀྱི་འཕྲལ་དགོས་དང་སྙན་དར་སོགས་སྤྱི་འབུལ་གྱི་རིམ་པ་གསར་བྱུང་རྩིས་ཁོག་ནས་བཏོན་པའི་གཞིས་སུ་བསྐུར་འོས་དང་འཕྲལ་བདེར་བེད་སྤྱོད་པའི་འཕེལ་འགྲིབ་སྣ་ཚོགས་གཉེར་ཚབ་སྦྲེལ་པོར་རྩིས་སྤྲོད་ཀྱི་དེབ་རི་བོང་འཛིན་པའི་དཀྱིལ་འཁོར་བཀོད་པ་ལ། རྩ་དེབ་ཆེན་མོ་དཔག་བསམ་འདོད་འཇོའི་ཞུ་ཡིག་ལག་འཛིན་དེབ་ཐེར་དབང་གི་རྒྱལ་པོ། (སྡེབ་སྦྱོར་མཉམ་པའི་པྲྀཏྟ་ལས་ཟླུམ་པོ།) ཛྙོབཡདྭིབིཥྞུཀརྭིགཱཎཀོརྨམལནོནིརོདྷབྷོདྷིསཱརམཱཏཔཱངྒཏཻརྩཏུརྠཀཱཡཔཱཡསཱཏྲིལོཀགནྡྷསྣཱནནཀྵཎབྷྲམཱནྟཧདྦྷབཱཊུཌིཥུནིཏྱཔ་ནྡདཱིགསརྦབིཥྞུབུདྡྷཔཱདཤེཁཡགྲབནྡྷཀོམཡཱནུདྟཱར། །(༡༥༦ན)
ཐབས་ཤེས་ཟུང་འཇུག་ཚོགས་གཉིས་རླབས་འཕྲེང་ཡོལ་མེད་བྱང་ཆུབ་སྙིང་པོའི་མཚོ། །མ་དྲོས་ལས་འོངས་སྐུ་བཞིའི་ཆུ་བོས་འཇིག་རྟེན་གསུམ་གྱི་དྲི་མ་རྣམས། །འཁྲུད་པར་མི་དལ་འཁོར་མཐའ་དེ་སྲིད་ཆད་མེད་རྟག་འབབ་འཕྲིན་ལས་རྒྱུན། །འགྲོ་ཀུན་ལ་འཇུག་ཉི་མའི་གཉེན་ཞབས་གཙུག་ཏོར་རྩེར་འཆིང་བདག་རྗེས་བཟུང་། །ཆེན་པོ་ཧོར་སོགས་འཛམ་གླིང་མ་ལུས་པར། །བཏུད་བྱ་བསོད་ནམས་གཞིར་གྱུར་འཕྲིན་ལས་ཀྱིས། །རྒྱ་མཚོའི་གོས་མཐའ་བཅིངས་མཐོང་བརྒྱ་བྱིན་ཀྱང་། །ཞབས་པད་འདུད་ལ་བྲེལ་ཁྱོད་བསྔགས་པའི་ཡུལ། །དཔལ་མགྲིན་སྲས་པོ་མི་བསྲུན་གཉིས་འཐུང་ཞལ། །འཇིག་རྟེན་དབང་ཕྱུག་ཐུགས་རྗེ་འཕྲུལ་པོ་ཆེས། །ཡེ་ཤེས་སྣང་བ་འབྱམས་ཀླས་ཚོགས་ཀྱི་བདག །བི་ནུ་རཱ་ཛས་མཁོ་རྒུའི་འབྱོར་པ་སྩོལ། །གདུལ་དཀའ་ཉི་མའི་དངོས་གྲུབ་དམར་ཆུང་སྙིང་། །ཟ་བའི་གཏུམ་དྲག་སྲིད་གསུམ་འདར་ནུས་ཀྱང་། ཁྲོ་ཆགས་པད་རག་མདངས་ལྡན་རྣམ་ཐོས་སྲས། །གནོད་སྦྱིན་བང་མཛོད་སྒོ་འཕར་དེང་འདིར་ཕྱེ། །ལྷ་མིའི་ལོངས་སྤྱོད་ཡོད་དོ་ཅོག་གི་གཏེར། །ཕྱུར་བུར་སྤུངས་པ་མིང་དོན་འཁྲུལ་མེད་དུ། །བརྡ་སྤྲོད་ཡིག་གཟུགས་དཀར་འཇམ་ཤོག་བུའི་ངོས། །ཡོངས་ཤར་དེབ་ཐེར་དབང་རྒྱལ་དེང་འདིར་དགོད། །ཅེས་པའི་ཤིས་པ་བརྗོད་པ་སྔོན་དུ་བཏང་ནས་རྩ་དེབ་ཆེན་མོ་དཔག་བསམ་འདོ་འཇོའི་བུ་ཡིག་གཉེར་པས་ལག་འཛིན་དུ་བྱེད་རྒྱུའི་དེབ་ཐེར་དབང་གི་རྒྱལ་པོ་བཀོད་པ་ལ།(སྡེབ་སྦྱོར་མཉམ་པའི་པྲྀཏྟ་ལས་ཟླུམ་པོ།) (༡༥༦བ)
ལམྦྷཏསྶུཀཪྻཀདྭིགཱཎསཱདྷྱནོབིདུརུསྥཊཱིཀཤུཀླངཱཪྴཀསྱབཀྟཏཱསུབིཏྶཱརཱུཔནོཏལདྡི། །ཤབྷམཱཔྟཏིཥྛཀཱཔིཛམཱུདཱིལགཾམུཁེནིམིཏྟབཻམབྱདེཤྱཔཉྩམོདདཱིབཙཀྲབནྡྷུཨཱཪྠསིངྡྷཏེནཤུབྷྱཡཙྪ། །རིང་ནས་ལེགས་བྱས་ཚོགས་ཀྱིས་བསྒྲུབས་པའི་རྡུལ་བྲལ་ཤེལ་དཀར་མེ་ལོང་ངོས། །ཡེ་ཤེས་རང་གཟུགས་འགོག་མེད་ཡོངས་ཤར་འོག་མིན་ཞིང་གཙོར་འཁོར་བའི་མཐའ། །རྫོགས་མིན་བཞུགས་ཀྱང་འཛམ་གླིང་འགྲོ་ངོར་མཚན་དཔེའི་སྣང་བརྙན་མངོན་སུམ་དུ། །བསྟན་ཏེ་ལྔ་བདོའི་གླིང་དང་དཔུང་གཉེན་དོན་ཀུན་གྲུབ་དེས་དགེ་ལེགས་སྩོལ། །གཡས་འཁྱིལ་མཛོད་སྤུ་ནས་འཕྲོས་འོད་ཀྱི་ཟེར། །ཡོངས་ཁྱབ་འཇིག་རྟེན་སྣང་བའི་དགའ་སྟོན་གྱིས། །དུས་ཀྱི་མུན་པ་མཐར་བྱེད་ཚེ་མཐའ་ཡས། །འཆི་མེད་བུམ་བཟང་གཙུག་ཏུ་བཀོད་བྱིན་རློབས། །ཨུཏྤལ་རྒྱུད་ལས་དྲངས་པའི་འཇམ་མཉེན་མདས། །འཁོར་འདས་ཡིད་མྱོས་གཙུག་ཏོར་འདུད་པའི་རྩེར། །རྐང་སེན་ཟླ་བ་ཚེས་པའི་མཆོག་སྦྱིན་མཁན། །(༡༥༧ན)
རིགས་བྱེད་ལྷ་མོས་འཇིག་རྟེན་གསུམ་དབང་སྡུས། །གངྒའི་ཀླུང་རྡུལ་སྙེད་ཀྱི་བགྲང་དཀའི་ཞིང་། །འགྲོ་འདུལ་སྤྲུལ་པ་ནམ་མཁའི་མཐའ་བསྙེག་དིང་། །འབོད་གྲོགས་མགོན་གཅིག་ཚུལ་དངོམ་སྒྱུ་ཐབས་ཅན། །པདྨ་ཐོད་འཕྲེང་ཞབས་པད་སྤྱི་བོས་ལེན། །ཐུབ་བསྟན་ཨུཏྤལ་བཞད་རྩེར་ལེགས་བཤད་ཀྱི། །རྣམ་དཔྱོད་རལ་གྲི་འོད་འཕྲོས་དཔུང་མཛེས་བརྒྱན། །སྐྱེ་རྒུའི་མིག་ངོར་སྒྱུར་མཛད་བཙོང་ཁ་པ། །འཇམ་དཔལ་རྡོ་རྗེར་ངེས་རྙེད་མགོས་ཕྱག་འཚལ། །ཐོག་མཐའ་བར་དགེ་ཆེད་འདུན་བརྩོན་པའི་འབྲས། །ལྷུན་གྲུབ་བསོད་ནམས་ཚོགས་ཆེན་ཡོན་ཏན་གྱི། །ཕུང་པོས་ནོར་འཛིན་རྔུལ་བའི་ཆུ་གཏེར་བཞི། །བྱང་ཆུབ་རྒྱ་མཚོར་བབས་དེར་འདུད་པར་སྤྲོ། །དང་པོའི་མགོན་པོ་གདུལ་བྱའི་བསོད་ནམས་ཞིང་། །འཚམས་སྤྲིན་གོས་ཀླུབས་རྣམ་ཀུན་མཆོག་ལྡན་པ། །ཨེ་ཝཾ་ཟུང་འཇུག་དགྱེས་མཛད་རྡོ་རྗེའི་སྐུར། །བཞེངས་ལ་དངོས་པོ་ཡོངས་ཀྱིས་སྐྱབས་སུ་སོང་། །འཁོར་འདས་ཆོས་ཀྱི་གནས་ལུགས་རླབས་ཀྱི་འཕྲེང་། །ཀ་དག་ཆུ་གཏེར་དབྱིངས་སུ་རོ་གཅིག་པས། །རང་རིག་ཀུན་བཟང་དོན་གྱི་བླ་མ་རུ། །ངོ་འཕྲོད་རྣམ་པར་གྲོལ་མཛད་རིགས་ཀྱི་བདག །ཐེག་ཆེན་སྐྱེ་འཕགས་སློབ་མར་བཅས་པ་ཡི། །སྐུ་གསུང་ཐུགས་རྟེན་སྤེལ་པའི་ལེགས་བྱས་ཚོགས། །འདྲེན་བྱེད་ཡུལ་གྱི་དངོས་མཐོང་གཟུགས་ཅན་དུ། །གྱུར་ན་ནམ་མཁའི་མཐའ་འཇལ་ངལ་བ་བཏང་། །སྐྱེ་མང་སྡིག་མུན་བརྩེགས་པའི་ཕུང་པོའི་ནང་། །དགེ་བའི་སྒྲོན་མེ་ཆུང་ངུ་བཏེགས་པའི་མོད། །སྒྲིབ་བྱེད་མངོན་སུམ་ལྟ་ཞོག་བག་ལ་ཞ། །གར་སོང་འཕགས་(༡༥༧བ)
པའི་སྤྱན་གྱིས་གཟིགས་ནུས་ཅི། །ཉེས་བརྒྱའི་གཉེན་པོ་མཐོ་རིས་ཆུ་གོས་རྩེར། །བློ་བརྩོན་ཏོག་གིས་རབ་མཛེས་མ་དག་དྲི། །བཀྲུས་པར་གནས་ངན་སྦྱིན་སྐྱེས་དོགས་བྲལ་ཞིང་། །ངེས་ལེགས་མིག་མི་འཛུམ་གྱི་དགའ་སྟོན་དཔྱིད། །བསོད་ནམས་བྱས་ཚོགས་གདང་བུ་སྦྲེལ་པའི་སྐས། །མ་རྨད་ཐར་པའི་བ་གམ་སྒོར་བཙུགས་པར། །འཛེགས་ནས་དགྱེས་དགུར་སྤྱོད་པ་གཏན་གྱི་འདུན། །སྒྲུབ་པའི་ཟློས་གར་དེ་ལ་སུ་ཞིག་བཤུང་། །དཀར་ནག་ཡོངས་བཏབ་ས་བོན་མ་འདྲེས་པར། །ལེགས་སྨིན་ཚུལ་ལ་དཔྱོད་པའི་མིག་ཡངས་པོས། །ཉེར་འབད་དགེ་ཚོགས་ཛམྦུའི་ལྗོན་ཤིང་འབྲས། །བྱང་ཆུབ་མཆོག་མཚོར་གསེར་དུ་བསྒྱུར་དེ་སྤྲོ། །བློ་གསལ་དཔལ་ལྡན་སྐལ་པ་བཟང་པོའི་མཐུ། །སྟོབས་ཀྱི་ཁོ་ལག་ཡངས་པོར་ལྷག་བསམ་གྱིས། །རང་གཞན་དོན་ཆེད་རྣམ་སྨིན་ཆེས་དཀར་ཟས། །འཚང་རྒྱའི་བར་དུ་མྱོང་ཚོར་རོ་བཅུད་མངར། །རིང་བསྲེལ་བཞི་ཡིས་ཕྱུར་བུར་སྤུངས་པའི་རྟེན། །ཐུབ་གསུང་འགྱུར་རོ་ཅོག་གི་པུ་སྟ་ཀཿ ། དཀོན་ཅོག་རིན་ཅེན་སྤེལ་ལེགས་གནྡོ་ལའི། །དཀར་ཆག་མུ་ཏིག་འཁྲི་ཤིང་འདོད་པ་འཇོ། །དེའང་མཁས་འཇུག་ལས། །བསྟན་བཅོས་རྩོམ་པའི་དམ་པ་ཡིས། །སྟོན་པ་ལ་ནི་མཆོད་བརྗོད་བྱ། །བསྟན་པ་སྤེལ་ཕྱིར་དག་པའི་ཚིག །འདི་ལ་འཐད་པ་བཟང་པོ་མཐོང་། །ཞེས་གསུངས་པ་ལྟར་སྔོན་རབས་དམ་པའི་རྣམ་པར་ཐར་པའི་རྗེས་སུ་འབྲངས་ཏེ་ཕུན་སུམ་ཚོགས་པའི་མཆོད་བསྟོད་འདུད་ཚིག་སྔོན་དུ་བཏང་ནས་སྐབས་སུ་གླེང་བར་བྱ་བ་ནི། རྒྱལ་བ་བཙོང་ཁ་པ་ཆེན་པོས། རེས་འགའ་རྒྱལ་(༡༥༨ན)
ལ་དམིགས་པའི་དད་པ་དང་། །སྐབས་འགར་ཤིང་རྟ་ཆེན་པོའི་སྐུ་དྲིན་དྲན། །གཞན་ཚེ་མཁས་པའི་བཤེས་ལ་གུས་པ་དང་། །ཉམ་ཆུང་འགྲོ་ལ་སྙིང་ནས་བརྩེ་བ་དང་། །བསྟན་པ་རིན་ཅེན་རིང་དུ་གནས་འདོད་པ། །འདི་དག་ཕན་ཚུན་འགྲན་ཅིང་འཕེལ་བར་འགྱུར། །ཞེས་ཐུབ་པ་སངས་རྒྱས་བཅོམ་ལྡན་འདས་རྣམས་ཀྱི་བྱ་དཀའ་བ་བརྒྱ་ཕྲག་དུ་མའི་སྤྱོད་པ་རླབས་ཆེན་པོས་གྲངས་མེད་པའི་བསྐལ་པ་མང་པོ་སེམས་ཅན་རྣམས་ཀྱི་དོན་དུ་ཚོགས་བསགས་ཤིང་བྱང་ཆུབ་མཆོག་གི་བདུད་རྩི་བརྙེས་ནས་ཐབས་ལ་མཁས་པའི་མཛད་པ་དུ་མས་ཡིད་ཅན་རྣམས་འདྲེན་པར་མཛད་པ་ལ་རྒྱུ་མཚན་ཤེས་ནས་དད་པ། བསྐལ་པ་འདིའི་རྣམ་འདྲེན་བཞི་པ་ཤཱཀྱ་སེང་གེས་འཁོར་ལོ་རིམ་པ་གསུམ་སོགས་མདོ་རྒྱུད་ཀྱི་ཆོས་ཚུལ་མཐའ་ཀླས་པ་གསུངས་ནའང་རྗེས་འབྲངས་རྣམས་ཀྱིས་མ་རྟོགས་པ་དང་ལོག་རྟོག་གིས་འདམ་དུ་ཆུད་པར་འཁྲུལ་མེད་ཀྱི་ཤིང་རྟའི་སྲོལ་ལེགས་པར་ཕྱེ་བ་ཀླུ་སྒྲུབ་དང་ཐོགས་མེད་གཉིས་ཀྱི་སྐུ་དྲིན་རྗེས་སུ་དྲན་པའམ། ཤིང་རྟ་ཆེན་པོའི་སྲོལ་བཟུང་ནས་གྲུབ་མཐའ་རྣམ་བཞིའི་ཆོས་ཚུལ་རྒྱས་པར་མཛད་པའི་པཎ་གྲུབ་དང་ལྗོངས་འདིར་སྐད་གཉིས་སྨྲ་བའི་འཇིག་རྟེན་གྱི་མིག་གཅིག་པུ་སོགས་ཀློག་པ་ཐོས་བསམ་དང་སྤོང་བ་བསམ་གཏན་ལ་གཅིག་ཏུ་བཞོལ་བའི་བཤེས་གཉེན་རྣམས་ལ་དད་པ་ཆེན་པོས་གུས་པ། བདེ་བར་འདོད་ཀྱང་མ་རིག་པའི་དབང་གིས་སྡུག་བསྔལ་གྱི་རྒྱུ་ལ་ལོངས་སྤྱོད་པའི་ཉམ་ཐག་གི་སྐྱེས་བུའི་ཚོགས་ཕ་མར་ཤེས་ནས་སྙིང་བརྩེ་བ། འཕགས་པ་སྡུད་པ་ལས། འཛམ་(༡༥༨བ)
བུའི་གླིང་འདིར་ཆུ་ཀླུང་ཇི་སྙེད་ཅིག་འབབ་ཅིང་། །མེ་ཏོག་འབྲས་ལྡན་སྨན་དང་ནགས་ཚལ་སྐྱེད་བྱེད་པ། །མ་དྲོས་གནས་པའི་ཀླུ་དབང་ཀླུ་བདག་རྟེན་གནས་ཏེ། །དེ་ནི་ཀླུ་ཡི་བདག་པོ་དེ་ཡི་མཐུ་དཔལ་ཡིན། །རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །འཆད་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་སྐྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་པའི་དོན་བཞིན་གོང་དུ་སྨོས་པ་རྣམས་ཀྱི་འབྱུང་གནས། བསྟན་འགྲོའི་དགེ་ལེགས་ཐམས་ཅད་ཀྱི་རྩ་བ་ཐུབ་པའི་བསྟན་པ་རིན་པོ་ཆེ་ཡུན་རིང་དུ་གནས་ན་ཅི་མ་རུང་སྙམ་པ་རྣམས་ཐུགས་རྒྱུད་ལ་ཕན་ཚུན་འགྲན་པ་བཞིན་དུ་འགྱུར་ཚུལ་གསུངས་པའི་ལུང་རྟོགས་ཀྱི་བསྟན་པ་ནི་ཕན་པ་དང་བདེ་བ་འབྱུང་བའི་སྒོ་དམ་པ་ཡིན་པ་དེའང་། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་ཡུལ་ཡོངས་སུ་སྤྱོད་པར། ཡུལ་དབུས་ནས་ལྷོ་ཕྱོགས་སུ་དར་བར་འགྱུར་རོ། །ལྷོ་ཕྱོགས་ནས་བྱང་ཕྱོགས་སུ་དར་བར་འགྱུར་རོ། །བྱང་ཕྱོགས་ནས་བྱང་ཕྱོགས་སུ་དར་བར་འགྱུར་རོ། །ཞེས་གསུངས་པའི་བྱང་ཕྱོགས་ཞེས་པའི་བྱང་ཕྱོགས་ནི་ཐུགས་རྗེ་ཆེན་པོ་དང་སྒྲོལ་མའི་སྤྲུལ་པ་སྤྲེའུ་དང་བྲག་སྲིན་མོ་འདུས་པ་ལས་འགྲོ་བ་འཕེལ་ཏེ་རུས་ཆེན་བཞིའམ་དྲུག་ཏུ་མཆེད་པར་ཐུགས་རྗེ་ཆེན་པོའི་བཀའ་འབུམ་སོགས་ནས་བྱུང་ཞིང་། ཁྱད་པར་འཕགས་བསྟོད་ཀྱི་འགྲེལ་པའི་ཁུངས་བུ་སྟོན་ཆོས་འབྱུང་དུ་དྲངས་པར། སྐྱ་སེང་བུ་ལྔ་དང་དགྲ་ངན་དཔུང་ཚོགས་ཡན་ལག་བཅུ་གཉིས་འཐབ་པའི་ཚེ་རྒྱལ་པོ་རཱུ་པ་ཏི་(༡༥༩ན)
ཞེས་དམག་སྟོང་ཕྲག་གཅིག་དང་བཅས་བུད་མེད་ཀྱི་ཆས་སུ་ཞུགས་ཏེ་རི་གངས་ཅན་གྱི་དབུས་སུ་བྲོས་པ་ལས་མཆེད་པ་དང་། བདེ་མཆོག་རྡོ་རྗེ་མཁའ་འགྲོའི་རྒྱུད་ལས། །བོད་ཡུལ་དུ་ནི་ལྷན་སྐྱེས་ཏེ། །ཞི་ཞིང་གསལ་བའི་གཟུགས་ཅན་ལ། །ཆུ་སྲིན་རྒྱལ་མཚན་ལག་ན་ཐོགས། །བྲག་གི་ཁྱིམ་ལ་བརྟེན་ཏེ་གནས། །རང་བྱུང་གི་ནི་སྐྱེ་གནས་ཅན། །ཞེས་ཡུལ་ཉི་ཤུ་རྩ་བཞིའི་ཡ་གྱལ་དུ་བགྲངས་པ་སོགས་བཤད་ཚུལ་སྣ་ཚོགས་ཀྱང་དོན་དུ་བོད་ཡིན་པ་མཐུན་ལ། ལྷ་གཅིག་ཇོ་བོ་ཨ་ཏི་ཤ་རྡོ་རྗེ་གདན་གྱི་ནུབ་ཕྱོགས་ན་འོད་དཔག་མེད་ཀྱི་ལྷ་ཁང་ཞིག་ཡོད་པའི་ནང་དུ་བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པའི་ཐུགས་དམ་ལ་བཞུགས་པས་ཇོ་བོ་སྤྱན་རས་གཟིགས་ཀྱི་ཞལ་མངོན་སུམ་དུ་བསྟན་པའི་ཞལ་ནས། །སྐྱེས་བུ་དམ་པ་ལེགས་སོ་ལེགས་སོ་དུས་གསུམ་གྱི་སངས་རྒྱས་ཐམས་ཅད་ཀྱི་གསང་བའི་མཛོད་གང་ཡིན་པ་དེ་ཁྱོད་ཀྱིས་ཤེས་སམ་འདི་ནས་བྱང་ཕྱོགས་ན་ངའི་ཞིང་ཁམས་ཡོད། ཁྱོད་ཀྱི་ཡི་དམ་ཇོ་མོ་སྒྲོལ་མ་ཡང་དེ་ན་སེམས་ཅན་གྱི་དོན་མཛད་ཅིང་བཞུགས། ཁྱོད་ཀྱི་གདུལ་བྱ་མང་པོ་ཡང་དེ་ན་ཡོད་པས་བྱང་ཕྱོགས་བོད་དུ་སོང་ཞེས་བོད་འདི་ཐུགས་རྗེ་ཆེན་པོ་རང་གི་ཞིང་ཁམས་མཆོག་ཏུ་ལུང་བསྟན་ཅིང་སྒྲོལ་མས་ཀྱང་། ས་གཞི་དང་སྐྱེ་འགྲོའི་རྒྱུད་བྱིན་གྱིས་བརླབ་པར་ཐ་མལ་གྱི་ཚུལ་བཟུང་ནས་རྒྱུན་བརྟན་པར་བཞུགས་པའི་ཕྱིར་འཕགས་པ་སྤྱན་རས་གཟིགས་ཀྱི་འཕྲིན་ལས་ཀྱི་འཇུག་པ་རྒྱུན་མི་ཆད་པའི་དབང་གིས་རྗེ་གཉའ་ཁྲི་བཙན་པོ་ནས་བཟུང་རྒྱལ་རབས་ཉེར་(༡༥༩བ)
བདུན་གྱི་བར་དངོས་སུ་དམ་པའི་ཆོས་ཀྱི་མིང་ཙམ་མི་གྲགས་ཀྱང་ཐབས་ཀྱི་སྒོ་ནས་ལེགས་པའི་ལམ་ལ་བཀྲིས་ཤིང་ཆབ་སྲིད་སྒྲུང་ལྡེའུ་བོན་གསུམ་གྱིས་བསྐྱངས། ལྷ་ཐོ་ཐོ་རི་སྙན་ཤལ་གྱི་དུས་དམ་པ་ཆོས་ཀྱི་དབུ་བརྙེངས། དེ་ནས་རྒྱལ་རབས་ལྔ་པ་ཆོས་རྒྱལ་སྲོང་བཙན་སྒམ་པོའི་དུས་སྲོལ་བཏོད། དེ་ནས་རྒྱལ་རབས་བཞི་སོང་ནས་རྗེ་ཁྲི་སྲོང་ལྡེའུ་བཙན་གྱི་དུས་དམ་པའི་ཆོས་རྒྱས་པར་མཛད། དབོན་ཁྲི་ལྡེ་གཙུག་བརྟན་གྱིས་སྐད་གསར་བཅད་ཀྱི་གཏན་ལ་འབེབས་པ་སོགས་བསྟན་པ་སྔ་དར་དང་བར་སྐབས་སུ་འཕེལ་འགྲིབ་བྱུང་བ་འདུལ་བའི་བསྟན་པ་མདོ་སྨད་ཕྱོགས་ནས་མེ་རོ་གསོས་ཤིང་སྨྲྀ་ཏི་ཛྙ་ན་ཤྲཱི་དང་ཇོ་བོ་ཆེན་པོ་ཨ་ཏི་ཤ་སོགས་པཎ་གྲུབ་དུ་མ་དང་། སྤྲུལ་པའི་སྐྱེས་མཆོག་རིན་ཅེན་བཟང་པོ་དང་སྒྲ་སྒྱུར་ཆེན་པོ་ཤཱཀྱ་ཡེ་ཤེས་སོགས་སྐད་གཉིས་སྨྲ་བ་རྣམས་དང་། དེ་དག་གི་རྗེས་སུ་ཞུགས་པའི་མཁས་བཙུན་གྲུབ་པའི་དབང་ཕྱུག་ནམ་མཁའི་སྐར་ཚོགས་ལྟ་བུས་གནམ་གྱིས་ས་བཀབ་པ་བཞིན་གྱུར་ཏེ་ཐུབ་པའི་རིང་ལུགས་དྲི་མ་མེད་པ་དེང་སང་གི་བར་དུ་ཆད་པ་མེད་པར་བཞུགས་པ་ནི་ལུས་ཅན་ཀུན་གྱི་བསོད་ནམས་ཀྱི་ཞིང་དམ་པ་ཡིན་ལ། དེ་ཡང་སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐང་འགའ་བྱུང་། །དེ་ལྟར་དགེ་བ་ཉམ་ཆུང་ཉིད་ལ་བརྟག །སྡིག་པ་སྟོབས་ཆེན་ཤིན་ཏུ་མི་བཟད་པ། །ཞེས་སངས་རྒྱས་ཀྱི་བསྟན་པ་ནི་སྒྲོན་བསྐལ་དུ་གློག་འཁྱུག་པ་ཙམ་དང་སངས་རྒྱས་(༡༦༠ན)
མི་འབྱོན་པའི་མུན་བསྐལ་མཐའ་ཀླས་པར་བསྟན་པ་དང་མི་འཇལ་ཞིང་དགེ་བཅུའི་ལས་ལམ་ཚུལ་བཞིན་ལག་ཏུ་བསྟར་རྒྱུ་ཡོད་པ་ནི་ཆེས་སྐལ་པ་བཟང་ལ། །དེ་བསྒྲུབ་པའང་རང་ཉིད་གཅིག་པུའི་ཆེད་དུ་བྱ་བ་དམན་པར་གོལ་བས་བློ་དང་ལྡན་པ་རྣམས་ཀྱིས་བླང་བྱ་མ་ཡིན་ཅིང་དེ་ལས་ལྡོག་སྟེ་གཞན་དོན་སྤྱོད་པ་ནི། སློབ་སྤྲིངས་ལས། བདེར་གཤེགས་ལམ་བསྟན་འགྲོ་བ་འདྲེན་པར་ཆས་གྱུར་ཅིང་། །སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པ། །ལམ་དེ་ལྷ་དང་ཀླུ་ཡིས་རྙེད་མིན་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཞེས་བདེ་བར་བཤེགས་པའི་ཐེག་པ་ཆེན་པོའི་ལམ་ལ་བརྟེན་ནས་འགྲོ་བ་ཐར་པར་འདྲེན་པར་བྱེད་པའི་ཁུར་ཁྱེར་བར་ནུས་པའི་རྟེན་གྱི་གཙོ་བོའང་དལ་འབྱོར་ཚང་བ་འདི་ཉིད་ཡིན་ཅིང་། དེ་ཉིད་ལས། །ཤིན་ཏུ་རྙེད་བླའི་རྩ་ཁམ་འགའ་ལྟ་ཕྱུགས་ཀྱང་རང་ཉིད་ཟ། །ཤིན་ཏུ་སྐོམ་པས་གདུངས་པའང་ཆུ་ཞིག་རྙེད་ན་དགའ་མགུར་འཐུང་། །འདི་ན་སྐྱེས་བུ་གཞན་དོན་བྱེད་པར་བརྩོན་པ་གང་ཡིན་པ། །དེ་འདིའི་བརྗིད་བག་ཡིན་ཏེ་དེ་བདེ་སྐྱེས་བུའི་རྩལ་དེ་འཕགས། །ཉི་མ་རླབས་ཆེན་རྟ་ཞོན་རྒྱུ་བ་སྣང་བྱེད་གང་ཡིན་དང་། ཁུར་ལ་མི་རྩག་ས་ཡིས་འཇིག་རྟེན་འདེགས་པ་གང་ཡིན་དེ། །རང་དོན་འགའ་མེད་ཆེན་པོ་རྣམས་ཀྱི་རང་བཞིན་དེ་འདྲ་སྟེ། །དེ་དག་འཇིག་རྟེན་ཕན་དང་བདེ་བའི་རོ་ལ་གཅིག་ཏུ་གཞོལ། །ཞེས་རང་གི་ཟས་སྐོམ་འཚོལ་བ་སོགས་ཕན་ཐབས་ལྷུར་ལེན་པ་དུད་འགྲོ་ལའང་འབྱུང་བ་ལྟ་བུ་མ་ཡིན་པར་འདི་སྣང་གིས་ཕ་(༡༦༠བ)
མས་ཐོག་དྲངས་མཁའ་མཉམ་གྱི་སྐྱེ་རྒུ་རྣམས་ཀྱི་དོན་དུ་བསྒྲུབ་པ་ཉི་མས་མུན་པ་བསལ་བ་དང་ས་ཆེན་པོས་འཇིག་རྟེན་འདེགས་པ་དང་ཆོས་མཚུངས་པས་གཞན་དོན་བསྒྲུབས་པའི་ཞར་ལ་རང་དོན་ཤུགས་ལ་འབྱུང་བ། བྱང་ཆུབ་ལམ་རིམ་ལས། དེའི་ཕྱིར་རང་གཞན་གྱི་ལེགས་པ་ཐམས་ཅད་ཀྱི་འབྱུང་གནས་རྒུད་པ་ཐམས་ཅད་སེལ་བའི་སྨན། མཁས་པའི་སྐྱེ་བོ་ཀུན་གྱིས་བགྲོད་པའི་ལམ་ཆེན་པོ་མཐོང་ཐོས་དྲན་རེག་གིས་ཀྱང་འགྲོ་བ་ཀུན་གྱི་གསོས་སུ་གྱུར་པ། གཞན་དོན་དུ་ཞུགས་པས་རང་དོན་མ་ཚང་བ་མེད་པར་ཞར་ལ་འགྲུབ་པའི་ཐབས་མཁས་ཆེན་པོ་དང་ལྡན་པའི་ཐེག་ཆེན་ལ་འཇུག་ཏུ་ཡོད་པ་ནི་ཀྱེ་མའོ་བདག་གིས་རྙེད་པ་ལེགས་པར་རྙེད་དོ་སྙམ་དུ་བསམས་ལ་སྐྱེས་བུའི་རྩལ་ཅི་ཡོད་ཀྱིས་ཐེག་པ་མཆོག་འདིར་འཇུག་པར་བྱའོ། །ཞེས་འཕགས་ཆེན་དམ་པ་རྣམས་ཀྱི་རྣམ་པར་ཐར་པའི་རྗེས་སུ་ཞུགས་ཏེ་འབད་པས་བཞེངས་པའི་ཡུལ་ཡང་། སྔོན་གྱི་ཡིག་ཚང་ལས། དབུས་ཕྱོགས་ཙམ་དུད་འཁྱེར་ལུགས་ནི། །འབྲི་གུང་བོད་འབྲོག་གཉིས་པོ་ལ། །སུམ་སྟོང་དྲུག་བརྒྱ་སུམ་ཅུ་ཡོད། །ཚལ་པ་སུམ་སྟོང་བདུན་བརྒྱ་ཡིན། །ཕག་མོ་གྲུ་པ་ཉིས་སྟོང་དང་། །བཞི་བརྒྱ་སུམ་ཅུ་རྩ་བརྒྱད་དོ། །ཞེས་པའི་ཁུངས་ཀྱང་། དེ་ཕྱིར་ས་སྐྱའི་དཔོན་ཆེན་ནི། །ཟམ་གྲུ་གུང་མིང་དབན་ཧུ་ཡི། །མིང་ཐོབ་ཤཱཀྱ་བཟང་པོ་དེའི། །དེབ་ཐེར་ཤོག་དྲིལ་ཅན་བཞིར་ཡིན། །ཁྲི་སྐོར་དེ་བས་དབུས་གཙང་གི །འཇའ་མོ་འཛིན་ལུགས་དེ་ལྟར་ཡིན། །ཞེས་དབུས་གཙང་ཁྲི་སྐོར་བཅུ་གསུམ་ལེ་ལག་དང་བཅས་སོ་སོར་དབྱེ་བའི་ཆར་གཏོགས་ཤིང་གནམ་གྱིས་བསྐོས་(༡༦༡ན)
པའི་དྲུང་ཆེན་རིན་པོ་ཆེ་ཏཱའི་སི་ཏུས་གཞིས་ཆེན་བཅུ་གསུམ་བཏབ་པའི་ནང་ཚན་ཟངས་རི་ལྷུན་གྲུབ་རབ་བརྟན་དུ་ས་སྐྱོང་བློ་བཟང་མཐུ་སྟོབས་ཀྱིས་འཕགས་པའི་ཡུལ་དུ་ཨ་ན་ལ་ཞེས་པ་ཕྱོགས་འདིར་མེར་འབོད་ཅིང་རྒྱ་ནག་གི་ཡུལ་ཁམས་སུ་སིང་ཞིང་ཞེས་པ་ལྗོངས་འདིར་མེ་ཕོ་འབྲུག་གི་ལོར་སྐུ་གསུང་ཐུགས་རྟེན་བཞེངས་པ་དང་དམར་སེར་ཅན་ཞེས་པ་མེ་སྦྲུལ་རྟེན་བཞེངས་རྣམས་ཀྱི་དཀར་ཆག་བཀོད་པ་ལ་རྫོང་གསར་ཚོམས་ཆེན་གྱི་བྱང་རྒྱུད་ངོས་ཀྱི་ཆའི་དབུས་སུ་བདག་ཅག་གི་སྟོན་པས་ལན་ཅིག་མ་ཡིན་པར་ཆེས་ཆེར་བསྔགས་ཤིང་། མཐའ་ཡས་པའི་བསྐལ་པའི་སྔོན་རོལ་ནས་སྡུག་བསྔལ་གསུམ་གྱིས་མནར་བའི་ལུས་ཅན་རྣམས་ས་དང་ལམ་ལ་ཞུགས་པར་མ་བལྟོས་པར་རྣམ་པར་དག་པའི་སྨོན་ལམ་གྱིས་མཚམས་སྦྱར་བའི་མཐུས་སྲིད་པ་འཛིན་པར་ནུས་པའི་དག་པའི་གནས་མངོན་པར་འདུ་མཛད་པ་ནུབ་ཕྱོགས་བདེ་ལྡན་ཞིང་གི་བཀོད་པ་དང་སྙིགས་མའི་འགྲོ་འདྲེན་ཐུགས་བསྐྱེད་ཀྱི་དམ་བཅའ་ཕུལ་དུ་བྱུང་བ་མགོན་པོ་འོད་དཔག་མེད་སྲས་ཀྱི་ཐུ་བོ་སྙིང་རྗེའི་གཏེར་ཆེན་སྤྱན་རས་གཟིགས་དང་བདུད་དཔུང་ཟིལ་གྱིས་གནོན་པ་མཐུ་ཆེན་ཐོབ་སོགས་མིག་གི་བདུད་རྩིར་གྱུར་པའི་སྟེང་གི་ཆའི་དབུས་སུ། འཇམ་དཔལ་རྡོ་རྗེ་ངུར་སྨིག་འཛིན་པའི་ཟློས་གར་རྒྱལ་བ་གཉིས་པ་ཤར་བཙོང་ཁ་པ་བློ་བཟང་གྲགས་པ། དེའི་མདུན་སྨད་ཀྱི་ཆར་ངེད་རང་གི་འདྲ་འབག །གཡས་སུ་སྣང་བ་མཐའ་ཡས་ཡེ་ཤེས་སྒྱུ་མའི་ཟློས་གར། ལྔ་བརྒྱའི་གཙུག་རྒྱན་མར་མེ་མཛད། གཡོན་དུ་སྐྱེ་བ་ཉི་ཤུ་རྩ་ལྔར་(༡༦༡བ)
འཇམ་དཔལ་དབྱངས་མིའི་སྲིད་པ་གཟུང་ཞིང་སྐུ་ཚེ་ཕྱི་མ་མངོན་དགའི་ཞིང་དུ་བདེ་གཤེགས་དྲི་མ་མེད་པར་མངོན་སངས་རྒྱས་པ་ས་པཎྜི་ཏ་ཀུན་དགའ་རྒྱལ་མཚན། དེ་ནས་རིམ་གྱིས་ཅུང་ཟད་དམའ་བར་ཇོ་བོ་ཆེན་པོར་སྒྲོལ་མས་སློབ་མའི་མཆོག་ཏུ་ལུང་བསྟན་པ་བཀའ་གདམས་ཀྱི་ཆུ་འགོ་འབྲོམ་སྟོན་པ་རྒྱལ་བའི་འབྱུང་གནས། འཇམ་པའི་དབྱངས་ཀྱི་རྣམ་སྤྲུལ་དགེ་བའི་བཤེས་གཉེན་གསང་ཕུ་བ་ལེགས་པའི་ཤེས་རབ། ཐམས་ཅད་མཁྱེན་པ་དགེ་འདུན་གྲུབ་པ། དབྱངས་ཅན་བཞད་པ་དགེ་འདུན་རྒྱ་མཚོ། མཁྱེན་བརྩེ་ནུས་ལྡན་བསོད་ནམས་རྒྱ་མཚོ། བདེ་ཆེན་ཆོས་ཀྱི་རྒྱལ་པོ་ཡོན་ཏན་རྒྱ་མཚོ། བདེ་བ་ཅན་གྱི་ཞིང་གི་བཀོད་པའི་གཡས་གཡོན་གྱི་གླིང་གི་ཆར། ཡངས་པ་ཅན་གྱི་རོལ་མོའི་སྒྲ་ཅན་གྱི་ཤིང་ལྗོན་པའི་དྲུང་ན་ཡང་དག་པར་རྫོགས་པའི་སངས་རྒྱས་ཤཱཀྱའི་རྒྱལ་པོས་ཐོག་མཐའ་བར་དུ་དགེ་བའི་ཆོས་གསུངས་པའི་ཚེ་འཕགས་པ་འཇམ་དཔལ་གྱིས་ལྔ་བརྒྱའི་ཐ་མ་ལ་གང་ཐོས་པ་ཙམ་གྱིས་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པར་འགྱུར་པ་དང་བསམ་པ་ཐམས་ཅད་ཡིད་བཞིན་དུ་འགྲུབ་པའི་ཡོན་ཏན་དང་ལྡན་པའི་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་ཁྱད་པར་རྒྱས་པ་ཞུ་བར་མཛད་པའི་དགོས་པ་བསྟན་པའི་མཐར་གྱུར་པ་ན། གསུང་རབ་སྤྱི་དང་གཟུངས་སྔགས་མཐུ་ཆུང་བར་འགྲོ་བ་བཤད་ཀྱང་། མདོ་འདི་ཉིད་ཆེས་ཆེར་བདོ་བའི་འགྲོ་ལ་ཆེད་དུ་བསྔགས་པས་ནུས་པ་ཆེར་འགྲོ་བ་སྨོན་ལམ་གྱི་ཁྱད་པར་ཡིན་ཞིང་སངས་རྒྱས་རྣམས་རིས་སུ་མ་ཆད་པའི་སེམས་ཅན་ལ་རྗེས་སུ་ཆགས་(༡༦༢ན)
པར་མཚུངས་ཀྱང་། ཞུ་ལན་ནོར་བུའི་འཕྲེང་བར། སྤྲུལ་པའི་ཆོས་རྒྱལ་དཔལ་ལྡན་མར་མེ་མཛད་བཟང་པོ་མ་དག་པའི་གདུལ་བྱ་ལ་དུས་དྲུག་ཏུ་གཟིགས་ཤིང་བཞུགས་པའི་ཚེ་སྙིགས་མའི་མགོན་པོ་རྒྱལ་བ་བདུན་དང་རང་གི་སྟོན་པ་ཤཱཀྱ་ཐུབ་པ། ཞེས་སོགས་གསུངས་པ་ལྟར་སྙིགས་མའི་དུས་འདིར་རྣམ་འདྲེན་གཞན་ལས་མཐུ་དཔུང་ལྷག་པར་ཆེ་ཞིང་བདེ་གཤེགས་བདུན་གྱི་མཆོད་པའི་ཕན་ཡོན་ཀྱང་། སེར་སྣ། ཚུལ་འཆལ། ང་རྒྱལ། ཕྲག་དོག །ཕྲ་མ་ལས་སྦྱོར་ངན་པ་བྱས་པའི་རྣམ་སྨིན་མྱོང་བ་དག་མཚན་ཐོས་པ་དང་དྲན་པས་སྡུག་བསྔལ་ལས་གྲོལ་བ། ལས་ཀྱི་སྒྲིབ་པ་དག་ཅིང་བདུད་སྡིག་ཅན་གྱིས་མི་བརྫི་བ་བུ་ནོར་ཚེ་དང་དབང་ཕྱུག་ཕུན་སུམ་ཚོགས་ཤིང་འཁོར་ལོས་སྒྱུར་རྒྱལ་དུ་སྐྱེ་བ་སོགས་ཕན་ཡོན་མཐའ་ཀླས་པའི་མདོའི་ཆོ་ག་ལས་བྱུང་བའི་ཞིང་བཀོད་གཙོ་འཁོར་གྱི་ལྷ་ཚོགས་ང་གསུམ། སྟེང་གི་ཆར་བརྒྱུད་པའི་བླ་མ་རིན་པོ་ཆེའི་འཕྲེང་བ་ལྟར་ཚར་དུ་དངར་བ། ནུབ་ཕྱོགས་ནས་རིམ་པ་བཞིན་ཡང་དག་པར་རྫོགས་པའི་སངས་རྒྱས་ཀྱིས་ཡུལ་ཡངས་པ་ཅན་དུ་སྐུ་ཚེ་བྱིན་གྱིས་བརླབས་པའི་རྣམ་རྒྱལ་མཆོད་རྟེན་སྐུ་རྒྱུ་རིན་ཅེན་གཉིས་པ་དངུལ་དཀར་དང་། ཁྲི་སོགས་གསེར་ཟངས་ལས་གྲུབ་པ་བུམ་ནང་དུ་སྐུ་དང་། སེང་ཁྲི་རྒྱལ་ཆེན་བཞི་འཕྲུལ་མ་རིན་པོ་ཆེའི་རྒྱན་སོགས་བཟོ་བཀོད་ཕུན་སུམ་ཚོགས་པ། ཡུམ་ཆེན་མོ་ཤེར་ཕྱིན་མ། མཉམ་མེད་ཇོ་བོ་རྗེ་ཨ་ཏི་ཤ །རྒྱལ་བ་གཉིས་པ་བློ་བཟང་གྲགས་པ། འདི་གའི་འདྲ་འབག །ཐུགས་རྗེ་ཆེན་པོ་སེམས་ཉིད་ངལ་གསོ། གངས་ཅན་ལྷ་གཅིག་ཆོས་ཀྱི་རྒྱལ་པོ་(༡༦༢བ)
སྲོང་བཙན་སྒམ་པོ། འཇམ་དཔལ་རྡོ་རྗེ་ཚངས་པ་ལྷའི་མེ་ཏོག །འཕགས་མཆོག་སྙིང་རྗེའི་གཏེར་ཆེན་འབྲོམ་སྟོན་རྒྱལ་བའི་འབྱུང་གནས། གནས་ལྔ་རིག་པའི་པཎ་ཆེན་དགེ་འདུན་གྲུབ་པ། ཐམས་ཅད་མཁྱེན་ཅིང་གཟིགས་པ་དགེ་འདུན་རྒྱ་མཚོ། ཧོར་བོད་སྐྱེ་རྒུའི་རྣམ་འདྲེན་བསོད་ནམས་རྒྱ་མཚོ། ཡོན་ཏན་རྒྱ་མཚོའི་འབྱུང་གནས་བདེ་ཆེན་ཆོས་རྒྱལ། དེ་འཕྲོས་དང་ནུབ་རྒྱུད་ཀྱི་སྟོད་ཆར་འདི་གའི་འདྲ་འབག་པར་དུ་བཏབ་པ་བཅུས་ལྷག་སུམ་སྟོང་དང་སྨད་ཆར་སྒྲོལ་དཀར་གྱི་སྐུ་མང་བ། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ། མདོ་སྡེ་གསེར་འོད་དམ་པ། པདྨ་བཀའི་ཐང་ཡིག །བཀའ་ཐང་སྡེ་ལྔ། མཉམ་མེད་ཇོ་བོ་ཡབ་སྲས་ཀྱི་གསང་ཆོས་བཀའ་གདམས་གླེགས་བམ་རིན་པོ་ཆེ་ཆ་ལག་དང་བཅས་པ། བདུད་རྩིའི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་བཞི། དེའི་ཆ་ལག་བཅོ་བརྒྱད། ངེད་རང་གིས་བརྩམས་ཆོས་པར་དུ་འཁོད་པ་རྣམས། ཤར་ཕྱོགས་སུ་སྙིགས་དུས་ཀྱི་རྒྱལ་བ་གཉིས་པ་བུ་སྟོན་རིན་ཅེན་གྲུབ་ཀྱིས་མཛད་པའི་དཀར་ཆག་སོར་གནས་ལ་མཚལ་པ་བཀའ་འགྱུར་གྱི་རྙིང་རྒྱུད་པོ་ཏི་གསུམ་བསྣན་པའི་རྒྱལ་བའི་བཀའ་འགྱུར་རོ་ཅོག་སྐྱ་པོད་གསར་བཞེངས་ལ་ཆེ་བརྗོད་དཀར་ཆག་སྨོན་ལམ་དང་བཅས་པ་ལོགས་སུ་གསལ། མཆོད་རྫས་ས་རྒྱན་གནམ་རྒྱན་འཕན་མེ་དམ། མཆོད་སྐོང་། ཏིང་སོགས་མཆོད་པའི་བྱེ་བྲག་མཐའ་ཀླས་པ། གཞན་ཡང་ཨྱོན་ཕུག་ཏུ་དཔལ་ཨོ་ཌི་ཡ་ནའི་སློབ་དཔོན་ཆེན་པོ་ཟ་ཧོར་མའི་ཆོས་སྐུ་ཡུམ་ཆེན་མོའི་རྣམ་པར་སྤྲུལ་པ་མ་གཅིག་ལབ་ཀྱི་སྒྲོན་(༡༦༣ན)
མའི་གནས་ཁང་དམར་མཆོད་ཁང་དུ་དཔལ་མར་མེ་མཛད། རྒྱལ་བ་བཙོང་ཁ་པ། འདི་གའི་འདྲ་འབག །རྫོང་གི་ཀླུ་སྡིངས་སུ་སློབ་དཔོན་ཆེན་པོའི་སྐུ་རྒྱ་གར་ལུགས། གཟིམས་ཁང་འོག་ཨ་ལགས་དགོས་དགོས་ཀྱི་ཕྱི་རྟེན་དུ་ཨྱོན་ཆེན་པོ་གཙོ་འཁོར་གསུམ། སྤྲུལ་པའི་གུ་རུ་མཚན་བརྒྱད། ཐམས་ཅད་མཁྱེན་པ་དགེ་འདུན་གྲུབ་ཀྱི་རྣམ་པར་སྤྲུལ་པ་དང་འབྲེལ་བའི་འཁྲུངས་རབས་གྲ་ཚར་ཞལ་ཐང་བཅུ་བདུན་ལ་ཚང་བའི་ལྷ་མགྲོན་སོགས་ཕྱུག་པ་རྣམས། དམར་སེར་ཅན་ཞེས་པ་མེ་སྦྲུལ་གྱི་ལོ་རོང་ལྷ་རྒྱལ་མཚན་གྱིས་ངེད་རང་རིང་འཚོའི་རྟེན་འབྱུང་ལ་དམིགས་ནས་མི་ཚད་ཙམ་བཞེངས་ཏེ་ཟངས་རི་ཁང་དམར་དུ་བཞུགས་ན་ལེགས་པའི་ལུང་བསྟན་ལྟར་ཨྱོན་ཡབ་ཡུམ་གསུམ། གུ་རུ་མཚན་བརྒྱད་དང་བཅས་པ། དེ་སྟེང་སྐྱིད་གྲོང་ཐོད་པ་འབར། ཕ་ཐོས་སྨྱོན་བསམ་གྲུབ། མ་གཅིག་ལབ་ཀྱི་སྒྲོན་མ། ཕྱག་ན་རྡོ་རྗེ་རྣམས། གཞན་ཡང་ཐུབ་དབང་། གནས་བརྟན་བཅུ་དྲུག །དགེ་བསྙེན་དྷརྨ། རྒྱལ་ཆེན་བཞི། ཧ་ཤང་གུ་རུ་མཚན་བརྒྱད་ཆུང་གྲ་གཅིག །ཇོ་བོ་ཆེན་པོ་ཨ་ཏི་ཤ་གསུམ། རྒྱལ་བ་བཙོང་ཁ་པ་གསུམ། འདི་གའི་འདྲ་འབག་ཆེ་ཆུང་དྲུག །བྲིས་སྐུ་ཆོ་འཕྲུལ་མཆོད་པའི་ཞལ་ཐང་བཅོ་ལྔ་རྣམས་ལས། འབུར་སྐུ་དང་མཆོད་རྟེན་གྱི་གཟུངས་བཞུགས་ལ། རིང་བསྲེལ་རྣམ་པ་བཞི་ལས། སྐུ་གདུང་གི་རིང་བསྲེལ། སྐུ་བལ་གྱི་རིང་བསྲེལ། ཆོས་སྐུའི་རིང་བསྲེལ་རྣམས་ལས། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོའི་རིང་བསྲེལ་རྩེ་ལྷ་སྒང་གི་ནང་རྟེན་དང་ཆོས་དབང་གི་གཏེར་(༡༦༣བ)
བྱོན་སོགས་ལས་བྱོན་པ། གདུང་དང་སྐུ་བལ་སོ་སོར་ཕྱེ་བ་ལས། གང་ཟག་དེ་གའི་བྱིན་རླབས་རྣམས་ཕྱོགས་གཅིག་ཏུ་བསྡོམས་པ་བརྗོད་བདེ་བས། བསྟན་སྤྱིའི་སྐོར་ལ་རྡོ་རྗེ་གདན་གྱི་བྱང་ཆུབ་ལྗོན་ཤིང་། རང་སངས་རྒྱས་ཀྱི་གདུང་རྡོའི་ཁམས་སུ་བྱིན་གྱིས་བརླབས་པ། དགྲ་བཅོམ་པ་ཉི་མ་གུང་པའི་སྣམ་སྦྱར། དཔལ་ལྡན་ས་ར་ཧའི་རེག་འཇམ་སྦྲུལ་གྱི་པགས་པའི་སྒོམ་ཐག །པཎ་ཆེན་ནཱ་རོ་ཏ་པའི་རུས་རྒྱན། མངའ་བདག་མཻ་ཏྲི་པའི་རྡོ་རྒྱུས་སྒོམ་ཐག །དགེ་སློང་མ་དཔལ་མོས་བསྒྲུབས་པའི་ཐུགས་རྗེ་ཆེན་པོའི་བུམ་ཆུ་རིལ་བུ། །འཇིག་རྟེན་མཁའ་འགྲོས་རྒྱ་གར་ཕྱག་ན་ལ་གནང་བའི་རྡོ་རྒྱུས་སྒོམ་ཐག །བལ་པོའི་རྒྱལ་པོ་འོད་ཟེར་གོ་ཆའི་བ་སོའི་དབུ་རྒྱན། ཆོས་རྒྱལ་སྲོང་བཙན་སྒམ་པོའི་ཞབས་ཕྱགས། རྒྱ་མོ་བཟའ་ཨོང་ཇོའི་ཕྱག་བཟོའི་སངས་རྒྱས་བཏགས་སྐུ། །འཇིག་རྟེན་གྱི་མིག་གཅིག་པུ་ལོ་ཆེན་རིན་བཟང་གི་དབུ་སྐྲ། ལྷོ་བྲག་མར་པ་ཆོས་ཀྱི་བློ་གྲོས་ཀྱི་གསོལ་ཞལ་ལ་རྗེ་མི་ལས་ཀྱང་བཞེས་པའི་ཐུན་མོང་གི་བཞེས་ཅན། རྗེ་བཙུན་མི་ལའི་སྒོམ་ཐག །མཁས་གྲུབ་ཁྱུང་པོ་དང་རྨོག་བཅོག་པ་རིན་ཅེན་བརྩོན་འགྲུས་ཀྱི་གདུང་ཐལ། བསྟན་པའི་རྩ་ལག་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱིའི་སྐུ་ཆོས། དབུ་ཞྭ། ལྷུང་བཟེད་ཀྱི་ཤུབས། གསིལ་བྱེད་ཀྱི་བར་ཤིང་བྱང་ཆུབ་ལྗོན་པ་ལས་གྲུབ་པ། རྩོད་དུས་ཀྱི་ཐམས་ཅད་མཁྱེན་པ་བུ་སྟོན་རིན་པོ་ཆེའི་ཞབས་ཕྱགས། སེམས་དཔའ་ཆེན་པོ་ཐོགས་མེད་བཟང་པོ་དཔལ་བའི་ན་བཟའ། གནུབས་ཆོས་ལུང་ཚོགས་པའི་རྟེན་འདམ། གཉགས་དབོན་བསོད་ནམས་(༡༦༤ན)
བཟང་པོའི་དབུ་སྐྲ། མཁན་ཆེན་རྒྱལ་བ་ཕྱག་ནའི་དམ་རྫས། འཇམ་དབྱངས་དཀོན་ཅོག་བཟང་པོའི་དབུ་ལོ། ཡབ་རྗེ་རྡོ་རྗེ་འཆང་ཀུན་དགའ་རྒྱལ་མཚན་གྱི་སྒོམ་ཐག །ཙ་རི་དང་ཆོས་འཁོར་རྒྱལ་གྱི་བླ་མཚོའི་རིལ་བུ་རྣམས། བཀའ་གདམས་རིན་པོ་ཆེ་དང་མཉམ་མེད་ཞྭ་སེར་ཅོད་པན་འཆང་བའི་བྱིན་རྟེན་ལ། ལྔ་བརྒྱ་པ་རྣམས་ཀྱི་གཙུག་གི་ནོར་བུ་ཇོ་བོ་རྗེ་ཨ་ཏི་ཤའི་བླ་གོས། དབུ་ཞྭ། གདུང་ནག །རྒྱ་དཔེ། བཤེས་གཉེས་ཆེན་པོ་པོ་ཏོ་བ་རིན་ཅེན་གསལ་གྱི་བླ་གོས། སྤྱན་སྔ་རིན་པོ་ཆེ་ཚུལ་ཁྲིམས་འབར་གྱི་དབུ་སྐྲ། མཆིམས་ནམ་མཁའ་གྲགས་ཀྱི་བེར་ཟླམ། མཁན་ཆེན་ལས་ཀྱི་རྡོ་རྗེའི་ཕྱག་མཛུབ། སྙིགས་དུས་ཀྱི་རྒྱལ་བ་གཉིས་པ་ཤར་བཙོང་ཁ་པ་བློ་བཟང་གྲགས་པའི་དབུ་ལོ། བླ་གོས། དབུ་ཞྭ། རྡུལ་གཟན། དགའ་ལྡན་ཁྲི་པ་འཇམ་དབྱངས་གཙང་པ་བདུན་བརྒྱུད་ཀྱི་དབུ་སྐྲ་ཕྱག་སེན་རྣམས་ཕྱོགས་གཅིག་ཏུ་བསྡོམས་པའི་རིལ་བུ། རྒྱལ་ཚབ་ཐམས་ཅད་མཁྱེན་པ་དར་མ་རིན་ཅེན་གྱི་དབུ་སྐྲ། རྟོགས་ལྡན་འཇམ་དཔལ་རྒྱ་མཚོའི་ཞབས་ངར། བ་སོ་ཆོས་རྒྱལ་མཚན་གྱི་དབུ་སྐྲ། ཐམས་ཅད་མཁྱེན་པ་དགེ་འདུན་གྲུབ་པའི་དབུ་པཎ། པཎ་ཆེན་བྱམས་པ་གླིང་པ་བསོད་ནམས་རྣམ་པར་རྒྱལ་བའི་ན་བཟའ། འཇམ་དབྱངས་སྨོན་ལམ་ལེགས་དཔལ་བློ་གྲོས་ཀྱི་ཤངས་ཕྱིས། འདར་སྟོན་བློ་བཟང་གྲགས་པའི་གདུང་རུས། དུས་ཞབས་ཆེན་པོ་མཁས་གྲུབ་ནོར་བཟང་རྒྱ་མཚོའི་དབུ་ལོ། བཞུགས་གདིང་། ཐམས་ཅད་མཁྱེན་པ་དགེ་འདུན་རྒྱ་མཚོའི་སྐུ་རགས། པཎ་(༦༤བ)
ཆེན་བསོད་ནམས་གྲགས་པ་རྣམ་དཔྱོད་མཆོག་གི་སྡེའི་དབུ་ལོ། ཐམས་ཅད་མཁྱེན་པ་བསོད་ནམས་རྒྱ་མཚོའི་དབུ་སྐྲ། ཞྭ་ཐུལ། པུར་རས། སྟན་དམར། ཆབ་མདོ་རྗེ་དྲུང་རིན་པོ་ཆེ་བསྟན་པ་རྒྱ་མཚོའི་ན་བཟའ། ཐམས་ཅད་མཁྱེན་པ་ཡོན་ཏན་རྒྱ་མཚོའི་དབུ་ལོ། གསང་ཆབ། ཕྱག་འཕྲེང་། པུར་རས། རྡོ་རྗེ་འཆང་ཕ་བོང་ཁ་པ་དཔལ་འབྱོར་ལྷུན་གྲུབ་ཀྱི་དབུ་སྐྲ། དབུ་ཀླད། གདུང་རུས། ངེད་རང་ནས་ཆུ་བྱི་བཀའ་བརྒྱད་གསང་བ་ཡོངས་རྫོགས་ཀྱི་སྒྲུབ་ཆེན་གྱིས་ཐོག་དྲངས་གྲ་ཚང་ལ་དབང་མང་དུ་ཕུལ་བ་དང་གཞན་ཡང་སྔ་ཕྱིར་དབང་བསྐུར་ཚེ་ཆོག་སོགས་བགྱིས་པའི་བུམ་ཆུ་དང་ཚེ་ཆང་རིལ་བུ། སྒྲུབ་གཏོར། ཟུར་ཀུན་མཁྱེན་ཆེན་པོར་ཚེ་བདག་གི་དབང་ཞུས་སྐབས་ཀྱི་དཔུང་སྐུད་དང་བཅས་པ། དྭགས་པོ་གྲྭ་ཚང་ནས་མ་ཎི་དུང་ཕྱུར་བསྒྲུབས་པའི་རིལ་བུ། དགའ་ལྡན་གསང་སྔགས་གླིང་པས་བྱང་གཏེར་ཐུགས་རྗེ་ཆེན་པོའི་སྒོ་ནས་བསྒྲུབས་པའི་མྱོང་གྲོལ་རིལ་བུ་རྣམས། རྗེ་བཙུན་ས་སྐྱ་པ་རྗེས་འབྲངས་དང་བཅས་པའི་བྱིན་རྟེན་སྐོར་ལ་གྲུབ་པའི་འཁོར་ལོས་སྒྱུར་བ་དཔལ་ལྡན་བིཪྺ་པའི་རུས་རྒྱན། དེའི་བདུད་རྩི་རིལ་བུ། ཟུང་འཇུག་སྐུ་བརྙེས་ཞང་སྟོན་ཆོས་འབར་གྱི་ན་བཟའ། བླ་མ་གནམ་ཁའུ་པ་དར་མ་རྒྱལ་མཚན་ཚ་བ་བཞེས་སྐབས་མགོན་པོ་ཞལ་བཞི་དངོས་སུ་གཟིགས་པས་ཕྱག་ནས་ཤོར་བའི་བཞེས་ཅན། འཁོན་དཀོན་ཅོག་རྒྱལ་པོའི་ན་བཟའ། དེ་དང་རྗེ་ས་སྐྱ་པ་ཐུན་མོང་གི་རེ་ཕྲུག་གི་ན་བཟའ། རྗེ་བཙུན་བརྩེ་བ་ཆེན་པོའི་གར་གོས། རུས་རྒྱན། སློབ་དཔོན་རིན་པོ་ཆེ་བསོད་ནམས་རྩེ་མོའི་གར་གོས། རྗེ་བཙུན་(༡༦༥ན)
རིན་པོ་ཆེ་གྲགས་པ་རྒྱལ་མཚན་གྱི་ཕྱག་འཕྲེང་མེ་འབར་མ། གར་གོས། བེར་ཟླམ། ཁ་ཊྭཱཾ་གའི་འཕན་རྩེ། འཇམ་དབྱངས་ས་སྐྱ་པཎ་ཆེན་གྱི་ན་བཟའ། ཆོས་ཀྱི་རྒྱལ་པོ་འཕགས་པ་རིན་པོ་ཆེའི་ན་བཟའ། རྡོ་རྒྱུས་པང་ཁེབས། བླ་མ་དམ་པ་བསོད་ནམས་རྒྱལ་མཚན་གྱི་བླ་གོས་དང་ཙར་མོ། སྔགས་འཆང་གཟུངས་ཀྱི་དཔལ་བའི་སྐུ་བེར། ཐེག་ཆེན་ཆོས་ཀྱི་རྒྱལ་པོའི་པུར་རས། ད་ལམ་བསྒྲུབས་པ་འདི་མྱངས་ན་སྐྱེ་བ་གསུམ་ན་མཁའ་སྤྱོད་གྲུབ་པར་མཁའ་འགྲོས་ལུང་བསྟན་ཐེངས་གསུམ་བྱུང་བ་ལྟར་བདག་ཆེན་རྡོ་རྗེ་འཆང་བློ་གྲོས་རྒྱལ་མཚན་གྱིས་བསྒྲུབས་པའི་བདུད་རྩི་རིལ་བུ། རྗེ་བཙུན་རྡོ་རིང་པ་ཆེན་པོ་ཀུན་བཟང་ཆོས་ཀྱི་ཉི་མས་བསྒྲུབས་པའི་ཚེ་ཟན། ས་ལེ་ཐམས་ཅད་མཁྱེན་པ་འཇམ་དཔལ་རྡོ་རྗེའི་ན་བཟའ། རྡོ་རྗེ་འཆང་ཚར་པ་ཆོས་རྗེའི་དབུ་ལོ། གདུང་རུས། སྐུ་རག །ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གི་གདུང་རུས། དེས་བྱང་གཏེར་ཐུགས་རྗེ་ཆེན་པོའི་སྒོ་ནས་བསྒྲུབས་པའི་སྐྱེ་བདུན་རིལ་བུ། ན་བཟའ། དེས་བསྒྲུབས་པའི་སྐྱེ་བདུན་རིལ་བུ། རིན་པོ་ཆེ་བོད་མཁར་པ་མཻ་ཏྲི་དོན་གྲུབ་རྒྱལ་མཚན་གྱི་དབུ་སྐྲ། མཁན་རིན་པོ་ཆེ་གཞོན་ནུ་བློ་གྲོས་ཀྱིས་བསྒྲུབས་པའི་རྟག་གཏོར། ཚར་ཆེན་དང་འཇམ་དབྱངས་མཁྱེན་བརྩེ་ཡབ་སྲས་ཀྱིས་བསྒྲུབས་པའི་བདུད་རྩི་རིལ་བུ། ཀུན་མཁྱེན་ཀླུ་སྒྲུབ་རྒྱ་མཚོ་དང་སྔགས་འཆང་དགོན་གསར་བ་བསོད་ནམས་ཆོས་འཕེལ་གྱི་གདུང་རུས། རྡོ་རྗེ་འཆང་དབང་ཕྱུག་རབ་བརྟན་གྱི་གདུང་རུས། ན་བཟའ། བདག་ཆེན་འཇམ་དབྱངས་བསོད་ནམས་དབང་པོའི་(༡༦༥བ)
དབུ་ལོ། རྩེ་གདོང་ཁྲི་ཆེན་ཀུན་དགའ་བསོད་ནམས་ལྷུན་གྲུབ་བཀྲ་ཤིས་གྲགས་པ་རྒྱལ་མཚན་གྱི་བླ་གོས། ས་སྐྱ་ཁྲི་ཆེན་ཨ་མི་ངག་དབང་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོའི་ས་ཞུ། སྐུ་ཤམ། དེས་བསྒྲུབས་པའི་བདུད་རྩི་རིལ་བུ། རིགས་ཀུན་ཁྱབ་བདག་མགོན་པོ་བསོད་ནམས་མཆོག་ལྡན་གྱི་གདུང་རུས། བསྒྲུབ་པ་གནང་བའི་ཚེ་ཟན། འཁོན་རིགས་གོང་མ་སོགས་དང་སྔགས་གསར་མ་མང་པོའི་དམ་རྫས་ཕྱོགས་གཅིག་ཏུ་བསྡུས་པའི་རྟ་བརྒྱ་མཛོ་བརྒྱ་རི་བའི་རིལ་བུ་རིན་སྤུངས་པའི་ནང་རྟེན་གྲས་རྣམས། གསང་སྔགས་རྙིང་མའི་བྱིན་རྟེན་སྐོར་ལ། སློབ་དཔོན་ཆེན་པོའི་ན་བཟས་མཚོན་ཐོག་མར་འདྲི་འོས་ནའང་། གཏེར་ཁ་སོ་སོ་ནས་བྱུང་བའི་ན་བཟའ་ཤོག་སེར་སོགས་མང་བའི་གཏེར་སྟོན་གྱི་རྗེས་སུ་འབྲངས་པ་བརྗོད་བདེ་བར་མཐོང་སྟེ་བཀོད་པ་ལ། མཉམ་མེད་ཇོ་བོ་ཆེན་པོ་ཨ་ཏི་ཤས་བསྣམས་ཕེབས་པའི་ཟ་ཧོར་རྒྱལ་པོ་གཙུག་ལག་འཛིན་གྱི་གདུང་རུས། བཻ་རོ་ཙ་ནའི་རྒྱ་དཔེ། བསམ་ཡས་པར་ཁང་གི་རྒྱ་དཔེ། གཏེར་ཁ་གང་ཡིན་མ་ངེས་པའི་ཤོག་སེར་ཁུངས་བཙུན། ཨྱོན་ཆེན་པོའི་དབུ་སྐྲ །ཉང་ཏ་ཐཱ་ག་ཏའི་གདུང་རུས། མངའ་བདག་སྐུའི་སྤྲུལ་པ་ཉང་རལ་པ་ཅན་གྱི་གཏེར་བྱོན་བདེ་འདུས་ཤོག་སེར། མངའ་བདག་གསུང་གི་སྤྲུལ་པ་གུ་རུ་ཆོས་ཀྱི་དབང་ཕྱུག་གི་སྐུ་ཤ །གཏེར་བྱོན་གྱི་ཁྲུས་ལུང་མ་ཎི་མའི་ཁྲུས་དར། ཤོག་སེར། དེས་བསྒྲུབས་པའི་ཆོས་སྨན། སྲས་པདྨ་དབང་ཆེན་གྱི་སྐུ་ཤ །བླ་མ་བྱ་ནག་ཆེན་པོ་རིན་ཅེན་འོད་ཀྱིས་དྲང་སྲོང་བསྒྲུབས་པའི་སྐྲ། མཐུ་ཆེན་(༡༦༦ན)
གངས་པ་ཤཱཀ་འབུམ་གྱིས་སྒྲུབ་པ་མཛད་པའི་ཕྱག་ཕྲེང་། སླར་རྒྱལ་བ་གཡུང་སྟོན་པས་ཀྱང་མཛད་པ་དང་རིང་བསྲེལ། རོག་སྙེ་མདོ་ཐམས་ཅད་མཁྱེན་པའི་དབུ་སྐྲ་དང་ཞབས་ཕྱགས། ཡབ་རྗེ་ཨྱོན་གླིང་པའི་གཏེར་བྱོན་ཁྲོས་ནག་ཤོག་སེར། དེའི་ཤོག་སེར་སློབ་དཔོན་གྱི་ཕྱག་རྗེས་མ། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་པའི་ཕྱག་འཕྲེང་། སྤྲུལ་སྐུ་སངས་རྒྱས་གླིང་པའི་གཏེར་བྱོན་ཨྱོན་ཡབ་ཡུམ་གྱི་བྱང་སེམས་དཀར་དམར། གཏེར་སྟོན་རིན་ཅེན་གླིང་པའི་སྐུ་ཤ །གཏེར་སྟོན་དྲི་མེད་ལྷུན་པོའི་དབུ་ཞྭ་དེའི་གཏེར་བྱོན། མཁན་པོ་བོ་དྷི་ས་ཏྭ། སློབ་དཔོན་ཆེན་པོ་པདྨ་ཐོད་འཕྲེང་། ཆོས་རྒྱལ་ཁྲི་སྲོང་ལྡེ་བཙན། མཁའ་གྲོ་ཡེ་ཤེས་འཚོ་རྒྱལ་གསུམ་གྱི་ཤངས་མཚལ་སྐུ་རྒྱུར་བསྲེས་པའི་འབུམ་དམར། རིགས་འཛིན་རྒོད་ཀྱི་ལྡེམ་ཕྲུའི་གཏེར་མའི་རྣམ་སྣང་རྡོ་རྗེ་བདུད་འཇོམས་ཀྱི་དབུ་རལ། ཆོས་རྒྱལ་རཏྣ་གླིང་པའི་གདུང་རུས། སྐུ་རག །གཏེར་བྱོན་སློབ་དཔོན་ཆེན་པོའི་ཟབ་བེར་གཏེར་སྟོན་ཀུན་སྐྱོང་གླིང་པའི་གདུང་རུས། གྲུབ་ཐོབ་ཐང་སྟོང་རྒྱལ་པོས་བསྒྲུབས་པའི་ཚེ་རིལ། སླེ་བེམ། གཏེར་སྟོན་པདྨ་གླིང་པའི་སྐུ་ཤ་རིལ་བུ། གཏེར་བྱོན་གྱི་ཤོག་སེར། སློབ་དཔོན་ཆེན་པོའི་ཟབ་བེར། དེས་བསྒྲུབས་པའི་སྐྱེ་བདུན་རིལ་བུ། སེ་སྟོན་མགོན་པོ་བཟང་པོའི་དབུ་ཀླད། །སེ་སྟོན་རིན་ཅེན་རྒྱལ་མཚན་གྱི་དབུ་རལ། སྐུ་ཤམ། མངའ་རིས་པཎ་ཆེན་རིན་པོ་ཆེའི་གདུང་རུས། རིགས་འཛིན་ཆེན་པོ་ལེགས་ལྡན་རྡོ་རྗེའི་དབུ་སྐྲ། གདུང་རུས། ན་བཟའ། སྐྱེ་བདུན། དམ་རྫས་ཀྱི་ཕབས་(༡༦༦བ)
འབྲི་གུང་པ་ཆོས་རྒྱལ་རིན་ཅེན་ཕུན་ཚོགས་ཀྱི་སྐུ་ཤ་རིལ་བུ། ཕྱག་འཕྲེང་། མཉམ་མེད་ནུབ་དགོན་པ་བྱམས་པ་ཆོས་ཀྱི་རྒྱལ་མཚན་གྱི་གདུང་རུས། སྐུ་ཕོད། འཕྲེང་པོ་གཏེར་སྟོན་ཤེས་རབ་འོད་ཟེར་གྱི་དམ་རྫས་རིལ་བུ། འབྲི་གུང་ཞབས་དྲུང་ཆོས་རྒྱལ་ཕུན་ཚོགས་ཀྱིས་བདེ་འདུས་སྒོ་ནས་བསྒྲུབས་པའི་ཆོས་སྨན། ཆོས་རྒྱལ་བཀྲ་ཤིས་སྟོབས་རྒྱལ་གྱི་དབུ་རལ། བསམ་ཡས་ཨཱརྱ་པ་གླིང་ནས་གདན་དྲངས་པའི་མྱོང་གྲོལ་པདྨ་རཱ་ག །བཀའ་བརྒྱད་གསང་བ་ཡོངས་རྫོགས་ཀྱི་སྒོ་ནས་བསྒྲུབས་པའི་བུམ་ཆུ་རིལ་བུ། ཆོས་སྨན། སྣང་གསལ་བ་རིགས་འཛིན་ཀུན་དགའ་ཚེ་མཆོག་གི་དབུ་ཞྭ། བཀྲ་བཟང་པ་སེ་སྟོན་པདྨ་དབང་ཆེན་གྱི་དབུ་རལ། བྱང་པ་རིགས་འཛིན་ངག་གི་དབང་པོའི་དབུ་སྐྲ། ན་བཟའ། ཞབས་ཕྱགས། འབྲི་གུང་པ་རིགས་འཛིན་ཆེན་པོ་ཆོས་ཀྱི་གྲགས་པའི་དབུ་སྐྲ། བདེར་འདུས་ཀྱི་སྒོ་ནས་བསྒྲུབས་པའི་ཆོས་སྨན། འཕྱོང་རྒྱས་ཞབས་དྲུང་ཧོར་ངག་དབང་བསོད་ནམས་གྲགས་པའི་གདུང་རུས། རླུང་ཆེན་གཞོན་ནུ་དོན་གྲུབ་ཀྱི་ན་བཟའ། ཡོལ་མོ་སྤྲུལ་པའི་སྐུ་བསྟན་འཛིན་ནོར་བུའི་དབུ་རལ། གདུང་རུས། གསུང་སྤྲུལ་ཚུལ་ཁྲིམས་རྡོ་རྗེས་བསྒྲུབས་པའི་སྐྱེ་བདུན་དང་ཆོས་སྨན། ཀོང་པོ་རྫོགས་ཆེན་པ་ལྷ་བཙུན་ནམ་མཁའ་འཇིགས་མེད་ཀྱིས་བསྒྲུབས་པའི་འགྲོ་དོན་ལས་སྦྱོར་ལྔ་པ། ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱི་དབུ་སྐྲ། ཆབ་སེར་རིལ་བུ། གདུང་རུས། ཕྱག་འཕྲེང་ཐག་པ། དེས་བསྒྲུབས་པའི་འགྲོ་དོན་ལས་སྦྱོར་ལྔ་པ་དང་། ཚེས་བཅོ་ལྔར་ཕྱག་གིས་དྲིལ་བ་འཕེལ་བའི་(༡༦༧ན)
དམ་རྫས་ཁྱད་མཚར། ཁྱབ་བདག་ཁྲ་ཚང་པ་བློ་མཆོག་རྡོ་རྗེའི་དབུ་སྐྲ། དེས་བསྒྲུབས་པའི་གསང་རྫོགས་ཀྱི་ཆོས་སྨན་དང་། ཚེ་དཔག་མེད་བདུད་རྩི་འཁྱིལ་པའི་ཚེ་རིལ། དར་རྒྱས་ཆོས་སྡིངས་པ་རིགས་འཛིན་འཕྲིན་ལས་ལྷུན་གྲུབ་ཀྱིས་ཤེལ་བྲག་ཏུ་བསྒྲུབས་པའི་ཆོས་སྨན། ཆོས་རྒྱལ་གཏེར་བདག་གླིང་པའི་གཏེར་བྱོན་ཨ་ཐམ་མ། ཨྱོན་ཆེན་པོའི་སྐུ་རག །གཏེར་སྟོན་རང་ཉིད་ཀྱི་དབུ་སྐྲ། རིགས་འཛིན་ཐུགས་ཏིག་གི་སྒོ་ནས་བསྒྲུབས་པའི་ཚེ་རིལ། བདུད་རྩི་ཆོས་སྨན། རྡོ་རྗེ་བྲག་རིགས་འཛིན་སྤྲུལ་པའི་སྐུས་གསང་རྫོགས་སྒོ་ནས་བསྒྲུབས་པའི་ཆོས་སྨན། ཚེ་དཔག་མེད་བདུད་རྩི་འཁྱིལ་བ་དང་། སྐུ་གསུམ་རིགས་འདུས་ཀྱི་ཚེ་རིལ། ཐུགས་རྗེ་ཆེན་པོ་འགྲོ་བ་ཀུན་སྒྲོལ་ལ་བརྟེན་པའི་སྐྱེ་བདུན་རིལ་བུ། དཔལ་རི་སྤྲུལ་སྐུ་ངག་དབང་པདྨ་འཕྲིན་ལས་ཀྱི་འཆི་མེད་སྐུ་གསུམ་འདུས་པ་དང་། རིགས་འཛིན་སྲོག་སྒྲུབ་ཀྱི་སྒོ་ནས་བསྒྲུབས་པའི་རིལ་བུ་རྣམས། དྭགས་པོ་བཀའ་བརྒྱུད་ཀྱི་བྱིན་རྟེན་སྐོར་ལ། ཏེ་ལོ་ནཱ་རོ་སོགས་རྒྱ་བོད་ཀྱི་པཎ་གྲུབ་དུ་མའི་སྟེང་དུ་བཀའ་བརྒྱུད་ཀྱི་བླ་མ་རྣམས་བསྣན་པའི་བཀའ་བརྒྱུད་སྤྱིའི་རྟེན་འདུས་རིན་སྤུངས་པའི་ནང་རྟེན་ནས་བརྒྱུད་པ། སྒམ་པོ་ཟླ་འོད་གཞོན་ནུའི་ཞབས་ཕྱགས། དཔལ་ཕག་མོ་གྲུ་པའི་དབུ་སྐྲ། བེར་ཟླམ། སྒོམ་ཞྭ། ཞང་འགྲོ་བའི་མགོན་པོ་གཡུ་བྲག་པའི་ན་བཟའ། འབབ་རོང་པ་དར་མ་ཆོས་ཀྱི་དབང་ཕྱུག་གི་ཆིབས་ཡག །སྟག་ལུང་ཐང་པའི་ན་བཟའ། རྒྱལ་བ་ཐོག་སྡུགས་པ་ཆེན་པོའི་ཐོག་གཏུམ་པའི་ན་བཟའ། རྒོད་ཚང་པ་མགོན་པོ་རྡོ་རྗེའི་དབུ་སྐྲ། གྲུབ་ཆེན་(༡༦༧བ)
ཀརྨ་པ་ཤིའི་དབུ་ལོ། ཀུན་མཁྱེན་རང་བྱུང་རྡོ་རྗེའི་གདུང་རུས། སྤྱན་ལྔ་ལྷ་གཟིགས་རས་པའི་གདུང་། ཞྭ་དམར་བ་བཞི་པ་སྤྱན་སྔ་ཆོས་ཀྱི་གྲགས་པའི་ཤངས་མཚལ་ཏེ་གོང་གསལ་སོ་སོའི་ཆ་ཤས་རེ་རྟེན་རྣམས་ལ་ཚང་བར་བཞུགས་ཤིང་ཁྱད་པར་ངེད་རང་གིས་ཡུན་རིང་དུ་ལོངས་སྤྱོད་པའི་སྣམ་སྦྱར་ཚང་མ་འདྲ་འབག་ནང་དུ་བཅུག །ཆོས་སྐུའི་རིང་བསྲེལ་ལ་སྔགས་གསར་རྙིང་མང་པོའི་བླ་མ་བརྒྱུད་པའི་མཚན་གཟུངས། རིག་པ་ཆེན་མོ། གསང་སྔགས་གསར་རྙིང་གི་རྒྱུད་སྡེ་ནས་བྱུང་བའི་ཕ་རྒྱུད་མ་རྒྱུད་གཉིས་སུ་མེད་པ་སྟེ་བླ་མེད་ཀྱི་སྐོར། སྲོག་ཤིང་བརྟེན་པ། རྣལ་འབྱོར་རྒྱུད། གཟུངས་ཆེན་སྡེ་ལྔ་གཙོ་བོར་བཏོན་པའི་བྱ་སྤྱོད། མདོ་གཟུངས། ཆོས་སྐྱོང་། ནོར་ལྷ། བརྟན་བཞུགས། ཤིས་བརྗོད་རྣམས་པར་འདེབས་པ་ནས་འབུལ་བའི་བར་འཁྲུལ་པ་མེད་པའི་ཕྱག་ལེན་གྱིས་ཕྱུར་བུར་གཏམས་པ། འཕགས་བལ་རྒྱ་ནག་བོད་ཡུལ་སོགས་ཀྱི་གནས་ཆེན་གྱི་ས་སྣ་རྡོ་སྣ་མང་དུ་སྤུངས་པ། གཙོ་བོ་རྣམས་ལ་གནོད་སྦྱིན་འཁོར་ལོ་དཔའ་བོ་གཅིག་གྲུབ་ཀྱི་དགོངས་དོན་སོར་བཞག་ཚུལ་བཞིན་བསྒྲུབས་པར་ཟས་ནོར་ལོངས་སྤྱོད་ཀྱི་ཕུང་པོ་འབྱོར་བའི་རྟེན་འབྲེལ་དུ་སྤེལ་ཏེ་རྟེན་བཞེངས་སྔ་མ་རྣམས་ལ་དགེ་སློང་འཇམ་དབྱངས་གྲགས་པས་རྡོ་རྗེ་སློབ་དཔོན་བྱས་གྲ་པ་བཅུ་སྐོར་གྱིས་དཔལ་ཆེན་རྡོ་རྗེ་ཕུར་པའི་དཀྱིལ་འཁོར་ཞལ་ཕྱེ་སྟེ་བཅུ་གཉིས་ལ་སྟ་གོན་དང་བཅུ་གསུམ་ལ་དངོས་གཞིའི་སྒོ་ནས་རབ་ཏུ་གནས་པ་ལེགས་པར་བསྒྲུབས། དེ་ཡང་། ལུང་གཞི་ལས། །མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་(༡༦༨ན)
ལ་ནི་གོམ་འདོར་ན། །ཛམཱུ་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་དང་། གང་ཞིག་རབ་དང་སེམས་ཀྱིས་སངས་རྒྱས་ཀྱི། །མཆོད་རྟེན་ལ་ནི་འཇིམ་གོང་འཇོག་བྱེད་ན། །ཛམཱུ་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་བདེ་བར་གཤེགས་པའི་སྐུ་གཟུགས་ལ་སོགས་པ་རྟེན་གྱི་ཞིག་གསོས་དང་དེ་དག་གི་ཆེད་གོམ་པ་འདོར་བ་ཙམ་གྱི་བསོད་ནམས་གྱི་ཚད་ཀྱང་མཐའ་ཀླས་ན་གསར་དུ་བསྐྲུན་པའི་ཕན་ཡོན་གྱི་ཚད་གཟུང་བར་དཀའ་ལ། དེ་བཞིན་དུ། འཕགས་པ་བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་མཉན་པར་བྱ་གཟུང་བར་བྱ་བཅང་བར་བྱ་བཀླག་པར་བྱ་ཀུན་ཆུབ་པར་བྱ་རབ་ཏུ་གདོན་པར་བྱ་བསྟན་པར་བྱ་ཉེ་བར་བསྟན་པར་བྱ་ལུང་འབོགས་པར་བྱ་ཁ་གཏོན་དུ་བྱ་བྲི་བར་བྱ། དེ་བཞིན་གཤེགས་པའི་བྱིན་གྱི་བརླབས་ཀྱིས་གླེགས་བམ་ཆེན་པོ་ལ་ཡི་གེ་གསལ་ཞིང་རབ་ཏུ་གསལ་བ་ལེགས་པར་བྲིས་ཏེ་མེ་ཏོག་དང་བདུག་པ་དང་དྲི་དང་འཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་དྲིལ་བུ་དང་བ་དན་དང་ཁོ་ར་ཁོར་ཡུག་དུ་མར་མེའི་འཕྲེང་བ་དང་མཆོད་པ་རྣམ་པ་མང་པོས་བཀུར་སྟིར་བྱ་བླ་མར་བྱ་བརྗེད་པར་བྱ་མཆོད་པར་བྱ་རི་མོར་བྱ་བསྙེན་བཀུར་བྱ་སྟེ། ཀུན་དགའ་བོ་འདི་ནི་ངའི་རྗེས་སུ་བསྟན་པར་བྱའོ། དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ། །ཞེས་དང་། ཏིང་འཛིན་རྒྱལ་པོ་ལས། མདོ་(༡༦༨བ)
སྡེ་འདི་ལ་སུ་དགའ་བ། །དེ་དག་ཆོས་རྣམས་ཐམས་ཅད་ལ། །ཐེ་ཚོམ་དང་ནི་ནེམ་ནུར་མེད། །དེ་དག་མྱ་ངན་འདས་དང་ཉེ། །བྱ་རྒོད་ཕུང་པོར་དེ་བཞིན་གཤེགས། །དཔའ་བོ་ཆེན་པོ་དེ་ཡིས་མཐོང་། །ཐམས་ཅད་སངས་རྒྱས་ལུང་བསྟན་ཏེ། །རྒྱལ་བ་བྱམས་པ་མཐོང་བར་འགྱུར། །སངས་རྒྱས་བྱམས་པ་མཐོང་ནས་ནི། །བཟོད་པ་བཟང་པོ་འཐོབ་པར་འགྱུར། །ཞེས་བདེ་བར་གཤེགས་པའི་གསུང་རབ་ལ་འདྲི་ཀློག་སྲི་ཞུར་བགྱིས་པའི་ཕན་ཡོན་གཟུགས་སུ་གྲུབ་ན་ནམ་མཁའི་མཐོངས་སུའང་ཤོང་བར་དཀའ་ཞིང་། འཕགས་པ་སྤྱན་རས་གཟིགས་ཀྱི་མདོ་ལས། བློ་གྲོས་རྣམ་པར་དག་པ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་གིས་དེ་བཞིན་གཤེགས་པའི་མཆོད་རྟེན་མཐོང་ནས་དད་པ་བསྐྱེད་དེ། པུས་མོ་གཉིས་ཀའི་ལྷ་ང་ས་ལ་བཙུགས་ནས་ཕྱག་འཚལ་ཞིང་ཕྱག་བྱེད་དེ། དེ་བཞིན་གཤེགས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པ་ཅི་འདྲ་བར་བདག་གི་ལུས་ཀྱང་དེ་འདྲ་བར་གྱུར་ཅིག་ཅེས་མོས་པ་བསྐྱེད་ན། བློ་གྲོས་རྣམ་པར་དག་པ། བསོད་ནམས་ཀྱི་ཕུང་པོ་དེའི་མཐའ་བརྗོད་པར་མི་ནུས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་གནས་པའི་ཕྱིར་རོ། །བསོད་ནམས་ཀྱི་ཕུང་པོ་དེ་ནི་རྒྱལ་པོ་ཉིད་དམ། བརྒྱ་བྱིན་ཉིད་དམ། ཚངས་པ་ཉིད་དམ། རང་སངས་རྒྱས་ཉིད་དམ། ཡང་དག་པར་རྫོགས་པའི་སངས་རྒྱས་ཀྱི་ཐེག་པ་བླ་ན་མེད་པས་ཀྱང་ཟད་པར་བྱ་བར་མི་ནུས་སོ། །ཞེས་དེ་བཞིན་(༡༦༩ན)
གཤེགས་པའི་རིང་བསྲེལ་གྱི་སྙིང་པོ་ཅན་དུ་གྱུར་པའི་མཆོད་རྟེན་བཞེང་བ་དང་བཀུར་སྟིར་བགྱིས་པས་གནས་སྐབས་དང་མཐར་ཐུག་གི་འཁོར་འདས་ཀྱི་ཡོན་ཏན་ཕུང་པོ་ནི་གང་གིས་ཀྱང་མཚུངས་ཟླར་མི་རུང་བ་སོགས་རྒྱ་ཆེར་བསྔགས་པའི་ཚུལ་ལ་བློ་དང་ལྡན་པ་རྣམས་ཀྱིས་སྒོ་གསུམ་གྱི་འབད་པ་ཆེན་པོས་ནན་ཏན་བསྒྲུབ་པ་ནི་ཕན་པ་དང་བདེ་བའི་འབྱུང་གནས་བླ་ན་མེད་པའོ། ཨ་ཧོ་འགྲོ་ཆེད་བསྐལ་མང་བྱ་དཀའ་སྤྱོད། །བརྩོན་པས་བྱང་ཆུབ་མཆོག་གི་བདུད་རྩིའི་བཅུད། །ཐུགས་གསང་ཟ་མ་ཏོག་འཁྱིལ་རྒྱལ་དྲིན་མཐའ། །འཕྲོག་བྱེད་མཁའ་ལྡིང་ཞོན་མྱུལ་མ་རྙེད་ངལ། །ཐུབ་རྣམས་གང་མཛད་སྐྱེ་རྒུར་རྩི་སྨན་གྱི། །ལྗོན་ཤིང་ཕང་ཕུང་འདབ་མའི་གྲིབ་བསིལ་ལ། །མཐའ་དག་འཇིག་རྟེན་ངལ་གསོས་དབང་པོ་ལྔར། །སིམ་པའི་ཚོར་མྱོང་སྔོན་བསགས་ལེགས་བྱས་མཐུ། །དཀོན་ཅོག་ཞིང་སར་སྲི་ཞུ་ས་བོན་ཆ། །ཕྲ་ཡང་བསྔོ་སྨོན་གཤེར་གྱིས་སྐྱེད་བསྲིངས་སྡོང་། །ཡལ་ག་ཐར་པའི་ལམ་སྙེག་དཔག་བསམ་འབྲས། །གཉིས་པ་ལྷ་དང་ཐུན་མོང་སྤྱད་བྱ་མིན། །བཟང་པོའི་བག་ཆགས་སྤྲིན་ལ་རྣམ་དཔྱོད་མིག །ཉེར་བལྟ་ལེགས་བྱས་འཁྱིལ་བ་དབྱར་རྔའི་སྒྲས། །བླང་དོར་མངལ་ཁུར་མདུན་མ་གྲུ་བཞིའི་སར། །བདེ་སྐྱིད་སྒྲོ་གཤོག་ཟླུམ་པོར་ཟློས་གར་སྒྱུར། །ཐེག་གསུམ་སྐྱེ་འཕགས་ཀུན་གྱིས་ཆེར་བསགས་ཚོགས། །སོ་ནམ་(༡༦༩བ)
རྟག་འགྲུས་ཞིང་ལ་ཆ་མཉམ་པར། །བཀྲམ་པའི་རྣམ་དཀར་དགེ་ཚོགས་སྙེ་མ་ལས། །བརྒྱགས་ཕྱེ་བྱང་ཆེན་དེ་སྲིད་མི་འཛད་ཤོག །དུས་མིན་མཚུན་དུ་འཁྲིད་པ་འཆི་བདག་གདོན། །དམར་བའི་མིག་རས་བཙའ་བཞིན་རིང་པོའི་ཚེ། །ཕ་མཐར་ཕྱིན་པའི་བྱེད་པོ་གར་དབང་ལྷའི། །བུམ་བཟང་བདུད་རྩི་སྲོག་གི་ཟུངས་གྱུར་ཤོག །ནག་པོའི་ལས་དང་དེས་བསྐྱེད་ཟུག་རྔུའི་ནད། །རྩུབ་ཚེར་འབྱུང་བའི་སྨན་པ་བཻ་ཌཱུཪྻའི། །འོད་ལྡན་རྣམ་འདྲེན་ཐུགས་རྗེས་འདུ་བ་རྣམས། །མ་འཁྲུགས་སྙོམས་པའི་ཚོར་བ་རྟག་མྱོང་ཤོག །ཡང་སྲིད་མང་པོར་གཏོང་བའི་བུ་ལོན་ཚོགས། །ཆུད་མི་འཛའ་བ་དབང་ཐང་ནེའུ་ལེའི་མགྲིན། །ཉེར་སྐྱུགས་འབྱོར་བའི་ཕུང་པོ་མཐོར་བརྩེགས་པ། །ངལ་གསོས་བུ་ཡི་གན་མཛོད་སྤུན་ཟླར་ཤོག །དར་དྲག་བཙན་པོའི་ལས་ཤུགས་རྐང་པའི་རྡུལ། །གཙུག་ཏུ་འགོད་ལ་འཇིག་རྟེན་ཆེ་རྒུ་ཡིས། །རྒྱགས་པའི་བསྙེམས་བཏང་པུས་མོའི་ལྷ་ང་སར། །བཙུགས་ནས་ལག་པད་སྙིང་གར་ཟུམ་པར་ཤོག །སྐྱེ་བར་སྐྱབས་མགོན་བཤེས་གཟུགས་ཡིད་སྨོན་མཚར། །འཆར་གེགས་དུག་བཅིལ་འདོད་དོན་སྨན་གྱི་རོར། །རབ་བསྒྱུར་བདེན་པའི་ཚིག་གི་ཆུ་ལྷའི་བུའི། །དཀྱིལ་འཁོར་མཆོག་གསུམ་མཐུ་ཡིས་གསལ་བར་ཤོག །ཆོས་དཀར་ཕུང་པོ་འདི་ཀོ་བསྒྲུབས་པའི་ཆེད། །གོམ་གཅིག་བོར་བས་མཐའ་བརྟེན་ལས་བྱེད་དང་། །(༡༧༠ན)
བདོག་པ་གཏོང་རྣམས་དེང་ནས་ཡང་སྲིད་ཀུན། །བདེ་སྐྱིད་དཔལ་འབར་རྣམ་མཁྱེན་མྱུར་ཐོབ་ཤོག །གཏིང་མཐའ་མི་དཔོགས་འཁོར་བའི་ཀློང་དུ་ཟོ་ཆུན་འཁྱུད་མོ་ལྟར་འཕྱན་པའི། །ཡང་སྲིད་བརྒྱུད་མར་བཏུངས་པའི་ནུ་ཞོ་རྒྱ་མཚོའི་ཚད་བརྒལ་བྱིན་པའི་མ། །དངོས་དང་དེས་སྐྱེད་སྡུག་བསྔལ་བསྒྲུབ་བརྩོན་ཡིད་ཅན་ཚོགས་རྣམས་གཏན་གྱི་བདེ། །མི་གནས་མྱ་ངན་འདས་པའི་རྒྱུ་རུ་བསགས་པའི་དགེ་ཚོགས་མ་ལུས་བསྔོ། །མིག་གི་བདུད་རྩིར་མཐོང་བའི་མོད་ལ་རྣམ་པར་གྲོལ་བའི་ས་ལ་ཡོངས་སྦྱོར་རྫོགས་སངས་རྒྱ྄ས། །སྒྲ་འཛིན་དབང་པོར་ཐོས་པ་ཙམ་གྱིས་སྲིད་ཞིའི་ཉེས་བརྒྱ་མཐའ་དག་གཞིལ་མཛད་དམ་པའི་ཆོས། །དད་དང་གཏོང་བས་རི་མོར་བགྱིས་ན་རླབས་ཆེན་ཚོགས་གཉིས་དབྱར་ལྟར་མཚོ་སྤེལ་དགེ་འདུན་གྱིས། །འཇིག་རྟེན་གསུམ་དུ་བཀྲ་ཤིས་དགའ་སྟོན་ཆར་གྱི་རྒྱུན་བབས་ཕན་བདེའི་མྱུ་གུ་དར་བར་ཤོག །ཅེས་ས་སྐྱོང་བློ་བཟང་མཐུ་སྟོབས་ཀྱིས་སྐུ་གསུང་ཐུགས་རྟེན་སྔ་ཕྱིར་བཞེངས་པའི་དཀར་ཆག་ལེགས་བྱས་འདོད་འཇོ་འདི་ནི་རྒྱུ་སྦྱོར་བ་པོ་ཉིད་ཀྱིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེ་འཇམ་དབྱངས་དགའ་བའི་བཤེས་གཉེན་གྱིས་དམར་སེར་ཅན་ཞེས་པ་མེ་སྦྲུལ་ཆུ་སྟོད་ཟླ་བའི་ཤེས་རབ་ཀྱི་ཆའི་གནམ་གང་གི་རྒྱལ་ཕུར་འཛོམ་པའི་འགྲུབ་སྦྱོར་གྱི་ཉིན་ཕོ་བྲང་དམར་པོ་རིར་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པས་བགྱིས་པ་སརྦདཱཀྵྨབྷཝནྟུ། (༡༧༠བ)
(སྡེབ་སྦྱོར་མཉམ་པའི་པྲྀཏྟ་ལས་ཟླུམ་པོ།) ཨཱདིཏཱཧིམིཏྲདཱཡགརྒྷཙིཏྟྭཀོཪྠིཏསྱམཻགྷནཻལཀཙྩཀཥྚཥཌྒཙཱརབྷཪྵདྷརྨརཱུཔསཉྫརོདརུདྲ། ཨཱགམ་བྷྲམཱདྡཏར་དྲ་ཏཱརམཀྵརཻཪྶམཱཡགཾཡདཱཏིཀལྤཔཉྩམོདཀཱལཀཱརུཥསྱཙཀྲཤཱཀྱརཱཛ། །གཟོད་མ་ཉིད་ནས་བྱམས་བརྩེའི་སྙིང་པོ་ཐུགས་བསྐྱེད་སྤྲིན་སྔོན་འཁྲིགས་པ་ལས། །བྱ་དཀའི་ཕྱིན་དྲུག་སྤྱོད་པའི་ཆར་གྱིས་ཆོས་གཟུགས་སྙེ་མ་དར་དྲག་པས། །འགྲོ་ཀུན་འཁོར་འཁྱམས་ཕོངས་ལས་སྒྲོལ་བའི་མི་གཡོའི་དམ་བཅའ་གང་དུ་སོང་། །དེ་ཕྱིར་ཆེར་སྙིགས་ལྔ་བདོའི་དུས་འདིར་ཐུགས་རྗེའི་དཔུང་བསྐྱེད་ཟས་གཙང་སྲས། །དགྲ་གཉེན་བར་མ་ཀུན་ལ་ཆ་སྙོམས་པར། །ལྷག་བསམ་ག་བུར་རྡུལ་དཀར་བཀྲམ་པའི་ངད། །སྡུག་བསྔལ་ཚ་གདུང་བཅིལ་དེ་ཁྱོད་ཁོ་ནའི། ཁྱད་པར་མ་ཡིན་རྣམ་འདྲེན་ཡོངས་ཀྱི་སྲོལ། །འོན་ཏེ་གཅིག་ཏུ་གདུལ་དཀའ་ལྕགས་ཀྱི་ཁམས། །སྙིང་སྟོབས་རྩི་ཡིས་ངེས་ལེགས་གསེར་སྦྱངས་སུ། །བསྒྱུར་ལ་པད་དཀར་ལྟ་བུར་ལྷ་རྣམས་ཀྱིས། །བསྔགས་པའི་བདེན་གཏམ་འདི་ལ་གང་གིས་བསྙོན། །ཆུ་(༡༧༡ན)
ཡི་ལྗིད་ལྡན་སྤྲིན་དབུས་དབྱར་རྔའི་སྒྲས། །མདོངས་མཐའ་སྒྲོ་གཤོག་ཟླུམ་པོར་གར་བྱེད་ན། །བསྐལ་བཟང་འདྲེན་པ་བཞི་པའི་རྣམ་ཐར་ལ། །མི་དད་བློ་དེ་ལྷ་མིན་གདོན་གྱིས་བཏབ། །ཟླ་བཞིན་དཀྱུས་རིང་མིག་གི་ཟུར་མདའ་ཅན། །འཇམ་མཉེན་ནུ་འབུར་གངས་རིའི་དཔལ་འཛིན་པ། །རྐེད་ཕྲ་སོར་མོའི་གདུབ་སིལ་འཁྲོལ་བའི་སྒྲས། །འོད་ལྡན་ཡིད་ཀྱི་བརྟན་པ་འཕྲོག་ལས་ཅི། །རིང་ནས་སྦོམ་པོར་སྐྱེད་བསྲིངས་སྡོང་པོ་ལ། །ཡལ་ག་ཕང་ཕུང་གཡོ་བའི་ལོ་འདབ་དབུས། །རོ་བདའི་འབྲས་བུ་སྨིན་པའི་དཔག་བསམ་ལྗོན། །སྤྱོད་པའི་མིག་མི་འཛུམ་ལ་ལྷག་པར་སྨོན། །སྔོ་འཇམ་དགེ་བའི་རྩྭ་ཡི་ཆུན་པོའི་སྟེང་། །སྐྱིལ་ཀྲུང་གཅིག་གིས་མངོན་པར་བྱང་ཆུབ་སྟེ། །རྩོད་ལྡན་འགྲོ་འདྲེན་ཚུལ་ལ་ཆུ་སྐྱེས་རྣམས། །དགའ་བའི་འཛུམ་གྱིས་ཕྱོགས་དེར་དགོད་པ་བཞིན། །བརྒྱ་པའི་བགྲང་བྱར་འཁོར་ལོ་རྣམ་གསུམ་གྱི། །འཇིགས་བྲལ་སེང་གེའི་ང་རོའི་སྒྲ་བསྒྲགས་ཚེ། །ལུས་མེད་ཅེ་སྤྱང་དུས་མིན་སྐད་འབྱིན་པའི། སྙིང་དེ་ལྐོག་མར་བྲོས་ཀྱང་དུམ་བུར་གས། །རྩིབས་བརྒྱད་རབ་ཏུ་བཀྲ་བ་ཞབས་ཀྱི་མཐིལ། །གཙུག་ཏུ་བཀོད་པའི་རི་མོ་བྱང་ཆུབ་བར། །མངོན་སུམ་གསལ་འདི་དབྱི་བར་དྲག་པོ་ཡིས། །བསྐལ་བརྒྱར་དཀའ་ཐུབ་བླངས་ཀྱང་ཅུང་ཟད་ངལ། །པུས་མོའི་ལྷ་ང་སར་བཙུགས་ལག་པ་ཟུང་། །སྙིང་གར་སྦྱར་ཏེ་མགོ་བོས་ཕྱག་འཚལ་ན། །སྲིད་ཞིའི་ཕུན་ཚོགས་དཔལ་གྱིས་འཇིག་རྟེན་གསུམ། ཁྱབ་པའི་དགེ་ལེགས་དེང་འདིར་སྩལ་དུ་གསོལ། །ཞེས་ཤིས་པ་བརྗོད་པའི་ཚིག་གིས་སྔུན་བསུས་ནས།(༡༧༡བ)
འོ་སྐོལ་གྱི་སྟོན་པ་གྲངས་མེད་པའི་བསྐལ་པ་དུ་མ་ནས་སྒྲིབ་གསུམ་གྱི་འཆིང་རྒྱ་ལས་རྣམ་པར་གྲོལ་ཏེ་མ་ལུས་པར་སྤངས་པ། །ཆོས་གཟུགས་ཀྱི་སྐུ་གཉིས་སྔོན་དུ་གྱུར་ནས་ཡོན་ཏན་མཐའ་དག་ལ་བྱང་ཆུབ་པར་མཛད་པའི་མཉམ་མེད་བུ་རམ་ཤིང་པས་འོག་མིན་སྟུག་པོ་བཀོད་པའི་ཞིང་དུ་བླ་ན་མེད་པའི་ཡེ་ཤེས་བརྙེས་ནས། ངེས་པ་ལྔ་ལྡན་གྱི་གཟུགས་སྐུ་མཐར་ཐུག་པ་ལ་གཡོ་བ་མེད་ནའང་། རྒྱུད་བླ་མར། ཆོས་ཀྱི་སྐུ་ལས་མ་གཡོས་ཀྱང་། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་ནས་ནི་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པས་ཐུན་མོང་བའི་སེམས་ཅན་རྣམས་ཀྱི་ཆེད་དུ་དགའ་ལྡན་གྱི་གནས་སུ་ལྷའི་བུ་དམ་པ་ཏོག་དཀར་པོར་བསྟན་པས་རང་གི་ཅོད་པན་མི་ཕམ་མགོན་པོའི་དབུ་ལ་བཅིངས་ཏེ། མཁའ་འགྲོ་རྒྱ་མཚོའི་རྒྱུད་ལས། འཛམ་བུ་གླིང་ནི་ཆེན་པོ་ཡི། །དུམ་བུ་བཅུ་གཉིས་ཀྱི་ནི་དབུས། །ཞེས་དང་། འཛམ་བུ་གླིང་ནི་ཆུང་ངུ་འདིར། །བདག་ནི་ཤཱཀྱའི་རིགས་རྗེས་འགྲོ །ཞེས་པ་ལྟར་རྒྱལ་པོ་ཟས་གཙང་མའི་རིགས་སུ་སྲིད་པ་བཟུང་སྟེ་མ་ག་དྷ་རྡོ་རྗེ་གདན་གྱི་སྤོར་མཆོག་གི་སྤྲུལ་པའི་སྐུའི་རྣམ་པར་(༡༧༢ན)
རོལ་པས་འདུས་པ་རྣམ་པ་གསུམ་ལ་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ཞིང་། གདུལ་བྱ་དབང་པོ་ཡང་རབ་ཏུ་གྱུར་པ་རྣམས་ལ་ངེས་གསང་རྡོ་རྗེ་ཐེག་པའི་སྨིན་གྲོལ་གྱི་གདམས་པ་རྒྱ་ཆེར་སྩལ་བ་སོགས་སྡེ་སྣོད་གསུམ་དང་རྒྱུད་སྡེ་བཞིའི་གསུང་རབ་མཐའ་དག །ཇི་སྐད་དུ། གང་ཞིག་དོན་ལྡན་ཆོས་དང་ཉེར་འབྲེལ་ཞིང་། ཁམས་གསུམ་ཀུན་ནས་ཉོན་མོངས་སྤོང་བྱེད་ལ། །ཞི་བའི་ཕན་ཡོན་སྟོན་པར་མཛད་པ་གང་། །དེ་དག་དྲང་སྲོང་གསུང་ཡིན་ལྡོག་པ་གཞན། །ཞེས་དངོས་དང་བརྒྱུད་པའི་སྒོ་ནས་གདུལ་བྱའི་རྒྱུད་ཀྱི་ཉོན་མོངས་པ་སེལ་བ་དང་ཞི་བ་མྱ་ངན་ལས་འདས་པའི་གོ་འཕང་ཐོབ་པའི་ཐབས་ཀྱི་གཙོ་བོ་དང་ཡན་ལག་གི་ཚུལ་དུ་གསུངས་པ་ཤ་སྟག་ཡིན་ལ། དེ་ཡང་འདུལ་མངོན་དུ་གླིང་གསུམ་གྱི་སྐྱེས་པ་དང་བུད་མེད་རྣམས་ལ་སོ་སོར་ཐར་པའི་སྡོམ་པ་སྐྱེ་བར་བཤད་པས་དམ་པའི་ཆོས་ཀྱི་སྣོད་ཡིན་ཀྱང་གཙོ་བོར། རྣམ་བཞག་རིམ་པ་ལས། ཤར་གྱི་ལུས་འཕགས་དང་། ནུབ་ཀྱི་བ་ལང་སྤྱོད་དང་། བྱང་གི་སྒྲ་མི་སྙན་གྱི་མི་རྣམས་ལ་ལོངས་སྤྱོད་ཆེན་པོ་དང་ལྡན་ཏེ། དེ་ལྟ་མོད་ཀྱི་བླུན་ཅིང་རྨོངས་པས་མི་སྤྱོད་ཅིང་མི་འབྱེད་དོ། །འཛམ་བུ་གླིང་པ་འདི་ནི་ལས་ཀྱི་ས་པ་ཡིན་ཏེ། སོགས་ནས། འོན་ཀྱང་འགོ་སྨོས་པས་གོ་བ་དང་། དབང་པོ་རྣོ་ཞིང་བསྒྲིན་པ་སྟེ། དེས་ན་བྱང་ཆུབ་སེམས་དཔའ་རྣམས་འཛམ་བུ་གླིང་གི་སྐྱེ་བོའི་གནས་ཀྱི་དབུས་སུ་འཁྲུངས་ཤིང་ཆོས་སྟོན་པར་འགྱུར་རོ། །ཞེས་རྒྱལ་བའི་བསྟན་པ་ལ་ཐོས་བསམ་སྒོམ་གསུམ་གཙོ་བོ་དར་བ་ནི་འཛམ་བུ་གླིང་ཡིན་ལ། འཛམ་གླིང་ཡང་། དཔལ་(༡༧༢བ)
ལྡན་རྒྱུད་ཀྱི་འཇིག་རྟེན་ཁམས་ལེར། གླིང་ནས་ཟླ་བ་འོད་དཀར་ཅན་དང་རབ་མཆོག་ཀུ་ཤ་དང་ནི་མིའམ་ཅི་དང་ཁྲུང་ཁྲུང་དང་། །དྲག་པོ་ཡང་ནི་ལོངས་སྤྱོད་ས་སྟེང་བདུན་པར་འཛམ་བུའི་མི་རྣམས་གནས་པ་དག་ནི་ལས་ཀྱི་ས། །ཞེས་རི་རབ་ཀྱི་རའི་འོག་གི་གླིང་དྲུག་ལོངས་སྤྱོད་ཀྱི་ས་དང་། བདུན་པ་ས་དུམ་བུ་བཅུ་གཉིས་ལ་ལས་ཀྱི་ས་པ་འཛམ་གླིང་ཆེན་པོར་གསུངས་པ་དང་ཕྱོགས་མཐུན་པར། བདེ་མཆོག་མཁའ་འགྲོ་རྒྱ་མཚོ་སོགས་ལས་བཤད་ནའང་། མངོན་པ་གོང་འོག་གིས་མཚོན་པའི་གསུང་རབ་མང་པོར་ལྷོ་ཕྱོགས་ཀྱི་གླིང་འདི་ལ་འཛམ་བུ་གླིང་དུ་བཤད་པའི་ཐུབ་པའི་བསྟན་པ་དར་རྒྱས་སུ་གྱུར་པའི་གླིང་ཡང་འདི་ཉིད་དུ་ངོས་འཛིན་ཅིང་། གླིང་དེ་ལ། དུས་འཁོར་དུ། འཕགས་ཡུལ་བོད་ལི་རྒྱ་ནག་དང་། །ཀེ་ལ་ཤ་དང་གངས་ཅན་ཆེ། །ཞེས་ཡུལ་ཆེན་པོ་དྲུག་ཏུ་བཤད་པའི་ནང་ཚན། འདུལ་བ་ལུང་ལས། མཉན་ཡོད་གནས་བཅས་ཙམ་པ་ཀ །ཝ་ར་ཎཱ་སི་ཡངས་པ་ཅན། །རྒྱལ་པོའི་ཁབ་དང་དྲུག་པོ་སྟེ། །འདི་དག་གྲོང་ཁྱེར་ཆེན་པོར་གྲགས། །ཞེས་གྲོང་ཁྱེར་ཆེན་པོ་དྲུག་གིས་མཚོན་པའི་འཕགས་ཡུལ་ནི། ཤར་དུ་ལི་ཁ་རའི་ཤིང་ཚང་ཚིང་ཅན། ལྷོར་ཆུ་ཀླུང་འདམ་བུ་ཅན། ནུབ་ཏུ་བྲམ་ཟེའི་གྲོང་ཀ་བ་དང་ཉེ་བའི་ཀ་བ། བྱང་དུ་ཨུ་ཤི་རིའི་རིའི་ས་མཚམས་དང་འཁོར་རྣམ་པ་བཞིའི་སྡོམ་རྒྱུན་སོགས། ས་ཚིགས་དང་ཆོས་ཚིགས་གཉིས་ཀའི་སྒོ་ནས་ཡུལ་དབུས་སུ་གྲགས་པར་བཀའ་བསྡུ་རིམ་པ་གསུམ་དང་། ཤིང་རྟ་ཆེན་པོ་གཉིས་སོགས་པཎ་གྲུབ་མཐའ་ཀླས་པས་བཀའ་རྣམས་འཆད་ཉན་གྱིས་གཏན་ལ་ཕབ་ཅིང་། དེའི་དགོངས་འགྲེལ་གྱི་(༡༧༣ན)
བསྟན་བཅོས་མང་དུ་མཛད་ནས་བསྟན་པ་རིན་པོ་ཆེ་ཉིན་མོ་ལྟར་གྱུར་པ་ལས་རི་ཁ་བ་ཅན་གྱི་ཁྲོད་དུ་ཇི་ལྟར་དར་བའི་ཚུལ་ནི། འཇམ་དཔལ་རྩ་རྒྱུད་ལས། ང་ཡི་དུས་ནས་ལོ་བརྒྱ་ན། ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་བོད་ཡུལ་འདི་མཚོས་གང་བ་རིམ་གྱིས་བྲི་ནས་ནགས་དང་མིའི་འགྲོ་བ་འབྱུང་བར་བཤད་ཅིང་། དེ་ཡང་ཐུགས་རྗེ་ཆེན་པོའི་བཀའ་འབུམ་སོགས་སུ་སྤྱན་རས་གཟིགས་དང་སྒྲོལ་མས་བྱིན་གྱིས་བརླབས་པའི་སྤྲེའུ་དང་བྲག་སྲིན་མོ་འདུས་པ་ལས་གདོང་དམར་ཤ་ཟན་གྱི་ཕྲུག་གུ་དྲུག་བྱུང་བ་ནས་རིམ་གྱིས་འཕེལ་བ་རུས་ཆེན་བཞིའམ་མིའུ་གདུང་དྲུག་བྱུང་ཚུལ་དང་། ལོ་རྒྱུས་ལ་ལར་རྒྱལ་པོ་རཱུ་པ་ཏི་དཔུང་བཅས་གཡུལ་འཕམ་སྟེ་བུད་མེད་ཀྱི་ཆས་སུ་ཞུགས་ནས་རི་ཁ་བ་ཅན་གྱི་ཁྲོད་དུ་འོངས་པ་ལས་མིའི་འགྲོ་བ་འཕེལ་བར་བཤད། མཁས་པའི་དབང་པོ་སྟག་ཚང་པ་སོགས་ནི་རྒྱ་གར་གྱིས་མཚོན་པའི་ཡུལ་ཁམས་གཞན་ལྟར་བོད་ཡུལ་དུའང་ཐོག་མ་ནས་ལྷན་ཅིག་པར་བཅུད་ཆགས་པར་བཞེད་པ་སོགས་རྣམ་གྲངས་མཐའ་ཡས་ཀྱང་། དོན་དུ་པུར་རྒྱལ་གྱི་རྒྱལ་ཁམས་འདིའི་འབངས་ཀྱི་རྗེ་བོ་རྒྱལ་ཕྲན་སིལ་མ་བཅུ་དྲུག་སོགས་མང་དག་བྱུང་བའི་མཐར་ཕྱག་ན་པདྨའི་སྤྲུལ་པ་གཉའ་ཁྲི་བཙན་པོ་མང་པོས་བཀུར་ཏེ་རྒྱལ་པོར་མངའ་གསོལ་བ་ནས་བཟུང་རྒྱལ་རབས་ཉེར་བདུན་གྱི་བར་དུ་རྒྱལ་སྲིད་སྒྲུང་དང་བོན་གྱིས་བསྐྱངས་ཤིང་། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་ཡུལ་ཡོངས་སུ་སྤྱོད་པར། ཡུལ་དབུས་ནས་ལྷོ་ཕྱོགས་སུ་དར་བར་འགྱུར་རོ། ལྷོ་ཕྱོགས་ནས་བྱང་ཕྱོགས་སུ་དར་བར་འགྱུར་རོ། །(༡༧༣བ)
བྱང་ཕྱོགས་ནས་བྱང་ཕྱོགས་སུ་དར་བར་འགྱུར་རོ། །ཞེས་དམ་པའི་ཆོས་རྒྱ་གར་ནས་རིམ་གྱིས་བྱང་ཕྱོགས་ཁ་བ་ཅན་དུ་དར་བར་ལུང་བསྟན་པ་ལྟར་ལྷ་ཐོ་ཐོ་རི་སྙན་ཤལ་གྱི་དུས་དམ་པ་ཆོས་ཀྱི་དབུ་བརྙེངས། དེ་ནས་རྒྱལ་རབས་ལྔ་པ་རྗེ་སྲོང་བཙན་སྒམ་པོའི་དུས་དམ་ཆོས་ཀྱི་སྲོལ་བཏོད། དེ་ནས་གདུང་རབས་ལྔ་པ་ལྷ་སྲས་ཁྲི་སྲོང་ལྡེའུ་བཙན་གྱིས་མཁན་སློབ་གཉིས་དང་། མཁས་པའི་དབང་པོ་ཀ་མཱ་ལ་ཤཱི་ལ་སོགས་པཎ་གྲུབ་དུ་མ་སྤྱན་དྲངས་ཤིང་། ལོ་པཎ་ལ་བསྙེན་བཀུར་ནས་འདུལ་ལུང་ཤེར་ཕྱོགས་མདོ་སྡེ་སྣ་ཚོགས་ཀྱི་སྐོར་མང་དག་བསྒྱུར་ཞིང་ཐེག་པ་ཆེན་པོ་གསང་སྔགས་ནི་བཀའ་གཉན་པས་ལྐོག་ཆོས་སུ་མཛད་པར་གྲགས། དེ་ནས་དབོན་ཁྲི་ལྡེ་གཙུག་བརྟན་གྱིས་མེས་ཀྱི་དུས་བསྒྱུར་བའི་ཆོས་རྣམས་སྐད་གསར་བཅད་ཀྱི་གཏན་ལ་འབེབས་པའི་བདག་རྐྱེན་མཛད། བསྟན་པ་ཕྱི་དར་ལ་ཡང་སྨྲྀ་ཏི་ཛྙ་ན་ཤྲཱི། ཇོ་བོ་ཆེན་པོ་མར་མེ་མཛད། པཎ་ཆེན་གྷ་ཡ་དྷ་ར། ཀསྨི་ར་པའི་སྡོམ་བརྩོན་བསོད་སྙོམས་པ་ཆེན་པོ་སོགས་པཎ་གྲུབ་དུ་མ་དང་། ལོ་ཆེན་རིན་ཅེན་བཟང་པོ། འཇིག་རྟེན་གྱི་མིག་གཅིག་པུ་འབྲོག་མི་ཤཱཀྱ་ཡེ་ཤེས་ཀྱིས་མཚོན་པའི་སྐད་གཉིས་སྨྲ་བ་རྒྱུ་སྐར་གྱི་འཕྲེང་བ་ལྟར་སྤེལ་ལེགས་སུ་བྱོན་པ་རྣམས་ཀྱིས་མདོ་རྒྱུད་ཀྱི་བཀའ་དང་དགོངས་འགྲེལ་ཞུས་ཆེན་དང་བསྒྱུར་བཅོས་ཀྱིས་བསྟན་པ་རིན་པོ་ཆེར་བྱི་དོར་མཛད་པས། ཁྲུས་ཁང་ལོ་ཙྭ་བའི་གསུང་ལས། ལར་དུས་གསུམ་རྒྱལ་བའི་ཐུགས་རྗེ་དང་། །རྒྱལ་སྲས་པད་དཀར་ཞབས་དྲིན་ལས། །བོད་ཀྱི་ཡུལ་ཁམས་འདི་ཉིད་ཀྱང་། །འཕགས་(༡༧༤ན)
ཡུལ་དང་སྐལ་བ་མཉམ་པ་སྙམ། །ཞེས་མཐའ་འཁོབ་ཀྱི་རྒྱལ་ཁམས་འདི་ཉིད་དུ་སྔོན་རྒྱ་གར་དུ་བསྟན་པ་དར་བ་དང་མཚུངས་པའི་བཀའ་དྲིན་ནི་འཛམ་གླིང་གསེར་གྱིས་བཀང་ཀྱང་གཞལ་བར་ག་ལ་ནུས། བོད་འདིར་འགྱུར་རོ་ཅོག་གི་ཐུབ་པའི་གསུང་རབ་ཀྱི་ཚོགས་རྒྱལ་བློན་བྱང་ཆུབ་སེམས་དཔའ་རྣམས་ནས་ཉེ་བར་བཟུང་དམ་པའི་ཆོས་ལ་རྒྱུ་མཚན་ཤེས་ནས་དད་པ་ཐོབ་པའི་རབ་ཏུ་བྱུང་བ་དང་ཁྱིམ་གྱི་བདག་པོ་འབྱོར་ལྡན་རྣམས་ཀྱིས་སྒྱུ་མའི་ནོར་ལ་སྙིང་པོ་ལེན་པའི་ཆེད་དུ་ཡི་གེར་འབྲི་བ་དང་ཀློག་པ་སོགས་རྒྱ་ཆེར་དར་བ་ཡང་། ཤེས་རབ་ཁྲི་པ་ལས། རབ་འབྱོར་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་དེ། རིགས་ཀྱི་བུའམ་རིགས་ཀྱི་བུ་མོ་དེ་ཚེས་བརྒྱད་དང་། ཚེས་བཅུ་བཞི་དང་། བཅོ་ལྔ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཁ་ཏོན་དུ་བྱེད་པ་དང་། འཆད་པར་བྱེད་པ་ན་བསོད་ནམས་ཀྱི་ཕུང་པོ་དཔག་ཏུ་མེད། གྲངས་མེད། ཚད་མེད། བསམ་གྱིས་མི་ཁྱབ། གཞལ་དུ་མེད་པ་མང་པོ་དག་བསྐྱེད་པར་འགྱུར་ཞིང་དེ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཁ་ཏོན་དུ་བྱེད་པ་དང་། འཆད་པར་བྱེད་ན་ལྷའི་འཁོར་མདུན་དུ་གནས་པར་འགྱུར་རོ། །ཞེས་དང་། བརྒྱད་སྟོང་པ་ལས། ཀཽ་ཤི་ཀ་དེ་ལྟ་བས་ན། དེ་ལྟར་རིགས་ཀྱི་བུའམ་རིགས་ཀྱི་བུ་མོ་གང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་མངོན་པར་དད་དེ་རྟོགས་ཤིང་མོས་ལ་སེམས་དང་བས་བྱང་ཆུབ་དུ་སེམས་བསྐྱེད་ནས་ལྷག་པའི་བསམ་པས་ཉན་པ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་བར་བྱེད་པ་དང་། རབ་ཏུ་འདོན་པ་དང་། སྟོན་པ་དང་། ཉེ་བར་སྟོན་(༡༧༤བ)
པ་དང་། ལུང་ནོད་པ་དང་། ཁ་ཏོན་དུ་བྱེད་པ་དང་། གཞན་དག་ལ་ཡང་རྒྱ་ཆེར་ཡང་དག་པར་སྟོན་པ་དང་། ཞེས་པ་ལྟར་ལུང་ནོད་པ་གཙོ་བོར་གསུངས་ནའང་། མདོ་མངས་ཀྱི་ལུང་རྒྱུན་ཆེས་དཀོན་པ་ཆོས་ཀྱི་རྒྱལ་པོ་འཕགས་པ་རིན་པོ་ཆེ་དང་དགེ་བའི་བཤེས་གཉེན་གྲོ་ལུང་པ་ཆེན་པོ་སོགས་བསྟན་པ་རིན་པོ་ཆེ་གཅེས་པར་འཛིན་པའི་དམ་པ་དུ་མས་བརྩོན་པ་ཆེན་པོའི་མཐུ་ལས་དཀར་ཆའི་ཟླ་བ་ལྟར་འཕེལ་ཞིང་། དེར་མ་ཟད་འདུལ་ལུང་ཤེར་ཕྱོགས་རྒྱུ་དང་བཅས་པའང་བག་སྟོན་གཞོན་ཚུལ་དང་། བཀའ་འགྱུར་བ་ཤཱཀྱ་རྒྱལ་མཚན། གོང་དཀར་རྡོ་རྗེ་གདན་པ་ཀུན་མཁྱེན་ཀུན་དགའ་རྣམ་རྒྱལ་སོགས་བསྟན་འཛིན་དུ་མས་སྲོལ་ལེགས་པར་བཟུང་ཡང་། དུས་ཀྱི་བསྐལ་པས་འཇིག་རྟེན་གྱི་འདུ་བཀོད་དང་། བརྒྱ་བཤིག་སྟོང་འགུགས་ཀྱིས་མཚོན་པའི་རང་དོན་ལྷུར་ལེན་ལ་བསྟན་འགྲོའི་དོན་དུ་སྒྲོ་འདོགས་པའི་ཆུ་ཤིང་ལྟ་བུའི་སྐྱེ་བོས་ནོར་འཛིན་དཔལ་མོའི་ལྟོ་བ་ཡོངས་སུ་གཏམས་ཏེ་གལ་ཆུང་ཆོས་ལ་བྱས་པས་སྔོན་དུས་དམ་པ་རྣམས་ཀྱིས་དཀའ་བ་བརྒྱ་ཕྲག་སྤྱད་པའི་མཛད་པ་རྣམས་ཀྱང་བྱ་ལམ་རྗེས་མེད་དུ་འགྲོ་བར་ཉེ་བའི་ཚེ། དུས་གསུམ་རྒྱལ་བའི་སྤྱི་གཟུགས་རིགས་དང་དཀྱིལ་འཁོར་ཀུན་གྱི་ཁྱབ་བདག་གནས་གསར་མགོན་པོ་བསོད་ནམས་མཆོག་ལྡན་བསྟན་པའི་རྒྱལ་མཚན་དཔལ་བཟང་པོའི་འཕྲིན་ལས་ཀྱི་ཆ་ཤས་ལས་དབུས་གཙང་རུ་བཞིའི་རྒྱལ་ཁམས་ཀུན་ཏུ་འཆད་ཉན་གྱིས་ཁྱབ་པར་གཟུར་གནས་རྣམས་དད་པའི་དབྱར་མཚོ་ཆེས་ཆེར་འཕེལ་བར་སྣང་མོད། གངས་རི་སྔོན་པོར་མཐོང་བའི་ལོག་ཤེས་ཅན་དག་སྔོན་བསགས་ལས་ཉོན་གྱི་བག་ཆགས་(༡༧༥ན)
སྟུག་པོའི་མཐུ་བརྟས་པ་ལ་མཐའ་མ་བཀག་པས། ལེགས་བཤད་རིན་པོ་ཆེ་ལས། ལས་ཀྱི་ཤུགས་ཀྱིས་བདས་པ་ན། །བློ་ཅན་ལོག་པའི་ལམ་ངན་འགྲོ །མུ་སྟེགས་བྱེད་ཀྱི་སྟོན་པ་མཆོག །དབང་ཕྱུག་སྨྱོན་པའི་བརྟུལ་ཞུགས་འཛིན། །ཞེས་པའི་དོན་དང་མཚུངས་པར་མངོན། སྐབས་དོན། ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ལས། དེ་བཞིན་གཤེགས་པའི་བྱིན་གྱིས་བརླབས་ཀྱིས་གླེགས་བམ་ཆེན་པོ་ལ་ཡི་གེ་གསལ་ཞིང་རབ་ཏུ་གསལ་བ་ལེགས་པར་བྲིས་ཏེ། མེ་ཏོག་དང་། བདུག་པ་དང་། དྲི་དང་། འཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ། གདུགས་དང་། རྒྱལ་མཚན་དང་། དྲིལ་བུ་དང་། བ་དན་དང་། ཁོ་ར་ཁོར་ཡུག་ཏུ་མར་མེའི་འཕྲེང་བ་དང་། མཆོད་པ་རྣམ་པ་མང་པོས་བཀུར་སྟིར་བྱ། བླ་མར་བྱ། བརྗེད་པར་བྱ། མཆོད་པར་བྱ། རི་མོར་བྱ། བསྙེན་བཀུར་བར་བྱ་སྟེ། ཀུན་དགའ་བོ་འདི་ནི་ངའི་རྗེས་སུ་བསྟན་པའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་འདི་ལས་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ། །ཞེས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་ཡི་གེར་བྲིས་ཏེ་མཆོད་པ་བྱས་པར་བསོད་ནམས་གཞལ་དུ་མེད་པ་འབྱུང་བས་མཚོན་ཏེ་རྒྱལ་བའི་གསུང་རབ་མཐའ་དག་ལ་རི་མོར་བྱས་པའི་འབྲས་བུ་ཤེས་པར་ནུས་ཤིང་། སངས་རྒྱས་རྣམས་ཀྱི་གསང་བ་གསུམ་གྱི་མཛད་པའི་ནང་ནས། ཐམས་ཅད་མཁྱེན་པ་བཙོང་ཁ་པ་ཆེན་པོས། མཛད་པ་ཀུན་ལས་གསུང་གི་ནི། །མཛད་པ་མཆོག་ཡིན་དེ་ཡང་ནི། །(༡༧༥བ)
འདི་ཉིད་ཡིན་ཕྱིར་མཁས་པ་ཡིས། །འདི་ལས་སངས་རྒྱས་རྗེས་དྲན་བྱོས། །ཞེས་གསུང་གི་མཛད་པ་གཙོ་བོར་བཤད་པའང་། ཚོམས་ལས། ཐུབ་རྣམས་སྡིག་པ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་འགྱུར། །ཞེས་སེམས་ཅན་གྱི་རྒྱུད་ལ་བགོས་པའི་ལས་ཉོན་རྣམས་དྲི་མ་ཆུས་བཀྲུ་བ་དང་། ཚེར་མ་ཆ་དཔྱད་ཀྱིས་དབྱུང་བ་ལྟ་བུ་མ་ཡིན་པར་མ་ཟད་ཐུགས་རྒྱུད་ཀྱི་སྤངས་པ་དང་རྟོགས་པའི་ཡོན་ཏན་རྣམས་དངོས་པོའི་གཏོང་ལེན་བཞིན་གཞན་རྒྱུད་ལ་སྤོ་ནུས་པ་མིན་ཡང་བདེན་པ་གཉིས་ཀྱི་རྣམ་བཞག་བཀའ་སྩལ་པ་ལ་བརྟེན་ནས་གྲོལ་པར་འགྱུར་བས་ན། དཔལ་ལྡན་ཟླ་བས། ཐ་སྙད་བདེན་པ་ཐབས་སུ་གྱུར་པ་དང་། །དོ་དམ་བདེན་པ་ཐབས་བྱུང་གྱུར་པ་ཡི། །དེ་གཉིས་རྣམ་དབྱེ་གང་གིས་མི་ཤེས་པ། །དེ་ནི་རྣམ་རྟོག་ལོག་པའི་ལམ་ངན་ཞུགས། །ཞེས་པའི་ཤུགས་ལ། དེ་གཉིས་རྣམ་དབྱེ་གང་གིས་ལེགས་ཤེས་པ། །དེ་ནི་ཕྱིན་ཅི་མ་ལོག་ལམ་བཟང་ཞུགས། །ཞེས་འབྱུང་བ་ལྟར་བདེན་པ་གཉིས་ཀྱི་ཁྱད་པར་ཚུལ་བཞིན་དུ་ཤེས་པ་ལ་བརྟེན་ནས་འཁོར་བ་ལས་གྲོལ་བས་ཐུབ་པས་གདུལ་བྱ་དབང་རྟུལ་གྱི་རིགས་ལ་བཀའ་དང་པོ་བདེན་པ་བཞིའི་ཆོས་འཁོར་དང་། དེ་ཁོ་ན་ཉིད་དང་ཕྱིན་དྲུག་གི་སྤྱོད་པ་སྔོན་གོམས་ཀྱི་བག་ཆགས་སད་པའི་རིགས་ལ་བར་པ་མཚན་ཉིད་མེད་པའི་ཆོས་འཁོར་བསྟན་ནས། དེ་གཉིས་སྒྲས་ཟིན་ལ་འགལ་བ་དེ་སྤོང་གི་ལན་འཁོར་ལོ་(༡༧༦ན)
ཐ་མའི་དུས་བཀའ་སྩལ་བས་རྟེན་ཅིང་འབྲེལ་བར་འབྱུང་བའི་ཚུལ་འདི་མ་རྟོགས་ན་ཐར་པ་ཐོབ་པར་མི་ནུས་པས། འཇུག་པ་ལས། སློབ་དཔོན་ཀླུ་སྒྲུབ་ཞབས་ཀྱི་ལམ་ལས་ནི། །ཕྱི་རོལ་གྱུར་ལ་ཞི་བའི་ཐབས་མེད་དོ། །དེ་ཉིད་ཀུན་རྫོབ་དོན་དམ་བདེན་ལས་ཉམས། །དེ་ལས་ཉམས་པས་ཐར་པ་ཐོབ་ཡོད་མིན། །ཞེས་གཞུང་ཕྱི་མོའི་དབུ་མ་པ་འཕགས་པ་ཡབ་སྲས་ཀྱི་བཞེད་པའི་དངོས་བསྟན་སྟོང་ཉིད་ཀྱི་རིམ་པ་རྟོགས་པ་གལ་ཆེ་ནའང་། དེ་ཙམ་གྱིས་རྣམ་པ་ཐམས་ཅད་མཁྱེན་པ་ཐོབ་པར་མི་ནུས་པས་བསམ་པ་བྱང་ཆུབ་ཏུ་སེམས་བསྐྱེད། རྒྱལ་བའི་སྲས་ཀྱི་སྤྱོད་པ་སྟོན་པ་སྦས་དོན་མངོན་རྟོགས་ཀྱི་རིམ་པ་ལ་བསླབ་པའི་ཐབས་ཤེས་ཟུང་དུ་འབྲེལ་དགོས་པའི་ཕྱིར། མ་ཕམ་པས། ཐེག་མཆོག་ལ་མོས་ས་བོན་ཤེས་རབ་ནི། །སངས་རྒྱས་ཆོས་བསྐྱེད་མ་དང་བསམ་གཏན་གྱི། །བདེ་བའི་མངལ་གནས་སྙིང་རྗེའི་མ་མ་ཅན། །གང་ཡིན་དེ་དག་ཐུབ་པའི་རྗེས་སྐྱེས་སྲས། །ཞེས་བྱུང་བ་ལྟར་སྡེ་སྣོད་གསུམ་གྱི་བརྗོད་བྱའི་སྙིང་པོ་འདི་ཉིད་ཡིན་ནའང་། དྲང་ངེས་ཀྱི་བཀའ་ཐམས་ཅད་ཀྱི་ནང་ནས་ལ་ལ་བྱང་ཆུབ་ཐོབ་པའི་རྒྱུའི་གཙོ་བོ་དང་། འགའ་ཞིག་དེའི་ཡན་ལག་སྟེ་མཐའ་དག་མི་འགལ་བར་སངས་རྒྱས་ཐོབ་པའི་ཐབས་ཀྱི་གདམས་པར་ཤར་དགོས་པས། ཇི་སྐད་དུ། །བསྟན་པ་ཐམས་ཅད་འགལ་མེད་རྟོགས་པ་དང་། །གསུང་རབ་མ་ལུས་གདམས་པར་ཤར་བ་དང་། །རྒྱལ་བའི་དགོངས་པ་བདེ་བླག་རྙེད་པ་དང་། །ཉེས་སྤྱོད་ཆེན་པོའི་གཡང་ས་ལས་ཀྱང་བསྲུང་། །ཞེས་གསུངས་པ་ལྟར་རྒྱལ་བའི་བཀའ་འགྱུར་(༡༧༦བ)
རོ་ཅོག་ལ་འབྲི་ཀློག་ཁ་ཏོན་མཆོད་པར་བྱས་པ་ནི་སངས་རྒྱས་བཅོམ་ལྡན་འདས་ལ་བྱ་བ་བྱས་པར་འགྱུར་ཞིང་། སངས་རྒྱས་ནི། རིགས་པའི་དབང་ཕྱུག་གིས། ཙནྡན་སྟེའུར་མཚུངས་པ་ལ། །ཆགས་བྲལ་ཞེས་སུ་བརྗོད་པ་ཡིན། །ཞེས་གཡས་ནས་ཙནྡན་གྱིས་བྱུགས་པ་དང་། གཡོན་ནས་སྟེའུ་འཕྱར་ཏེ་བརྡེག་པར་བརྩམས་པ་གཉིས་ལ་ཆགས་སྡང་གི་རྟོག་པ་མི་མངའ་བས་འདིས་ང་ལ་བྱ་བ་བྱས་སོ་དགོངས་པའི་ཆགས་པ་མེད་ཀྱང་ཐུགས་རྗེ་ཆེན་པོའི་འཇུག་པ་དུས་ལས་མི་ཡོལ་བ་ཆོས་ཉིད་དེ། ཡིད་བཞིན་གྱི་ནོར་བུ་བེམས་པོ་ལ་ལེགས་ཉེས་ཀྱི་རྟོག་དཔྱོད་མེད་ཀྱང་གསོལ་བ་བཏབ་པས་རེ་འབྲས་གྲུབ་པའི་ཕྱིར་ན། སངས་རྒྱས་རྨ་ག་ཆད་ལས། ཇི་ལྟར་ནོར་བུ་རིན་ཅེན་བསམ་པ་ཀུན་བསྟེན་པ། །གང་རྣམས་ཅི་འདོད་དེ་ལ་དེ་དག་ཐམས་ཅད་འབྱིན། །དེ་ནི་བསོད་ནམས་གང་གིས་བྱས་པ་དེས་མཐོང་སྟེ། །རིན་ཅེན་དམ་པ་དེ་ལ་རྣམ་རྟོག་གང་ཡང་མེད། །དེ་བཞིན་སངས་རྒྱས་བདེ་གཤེགས་སྐུ་མཆོག་བསམ་པ་ཀུན་སྐོང་བ། །མཐོང་ནས་སྨོན་ལམ་སུ་འདེབས་དེ་དག་བསམ་པ་འགྲུབ། །སྙིང་རིང་དམའ་བའི་སེམས་ལྡན་འགྲོ་བས་ཐུབ་མི་མཐོང་། །བདེ་གཤེགས་རྣམ་རྟོག་མི་མངའ་སེར་སྣ་མི་མངའ་འོ། །ཞེས་གསུངས་པ་ལྟར་ཡུལ་ཁྱད་པར་ཅན་ལ་བརྟེན་ནས་ཚོགས་བསགས་པའི་ཕན་ཡོན་ནི། །ཐུབ་པས་བདུད་བཅོམས་ནས་མངོན་པར་སངས་རྒྱས་མ་ཐག་ཏུ། །བསོད་ནམས་རྣམ་སྨིན་བདེ་དེ་སྡུག་བསྔལ་ཐམས་ཅད་སེལ། །བསོད་ནམས་(༡༧༧ན)
ལྡན་པའི་མི་ཡི་བསམ་པ་རྣམས་ཀྱང་འགྲུབ། །བདུད་བཅོམས་ནས་ནི་བྱང་ཆུབ་བར་དུ་རེག་པར་འགྱུར། །མྱ་ངན་ལས་འདས་ཞི་བ་བསིལ་བའི་དངོས་པོ་ཐོབ། །ཅེས་དང་། རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་ལས། །རབ་རྩུབ་མྱ་ངམ་དུ་གསལ་འཁོར་བའི་ལམ་ནི་ཤིན་ཏུ་གདུང་བ་འདིར། །རྟག་པར་རྗེས་སུ་གདུང་ལྡན་སྡིག་པ་སྡིག་པ་བོར་ཞིག་སྐྱེ་བོ་དག །རྟག་ཏུ་བསོད་ནམས་མཛོད་ཅིག་བསོད་ནམས་བརྟེན་པ་རྣམ་དག་གི །བསོད་ནམས་བདུད་རྩིས་བྲན་པའི་བསོད་ནམས་གྲིབ་བསིལ་ཤིང་གི་ས་གཞི་བསིལ། །ཞེས་གསུངས་རབ་དགོངས་འགྲེལ་དང་བཅས་པ་ལས་འབྱུང་བར་དགོངས་ཏེ། འཇམ་དབྱངས་ས་སྐྱ་ལོ་ཙཱ་བས། སྔོན་ཀྱང་འདི་བཞིན་བྱས་རྣམས་བདེ། །ད་ལྟ་ན་ཡང་བདེ་བར་མཐོང་། །གཏན་ཚིགས་བཟང་པོ་འདི་ཡིས་ནི། །མ་འོངས་དུས་སུའང་ཕུན་ཚོགས་འགྱུར། །ཞེས་པ་ལྟར་ས་སྐྱོང་བློ་བཟང་སྦྱིན་པས་ཁུར་བཞེས་ནས་ཁམས་སྟོད་ཤོ་པ་མདོ་ལྷུན་གྲུབ་མི་འགྱུར་རབ་བརྟན་དུ་ཐུབ་གསུང་གླེགས་བམ་བརྒྱ་ཕྲག་ཏུ་བརྒལ་བ་བཞེངས་པའི་དོ་དམ་འཇུན་པ་ཆ་དཀར་བ་གཉིས་ཀྱིས་བྱས་པའི་ལེགས་བྱས་ཀྱི་འབྲས་བུ་ནམ་ཡང་བསླུ་བ་མེད་པ་ནི། མདོ་ལས། འདོད་དགུ་འབྱུང་བའི་དཔག་བསམ་ལྗོན་པ་དེ། །བསོད་ནམས་ཡིན་པས་ལྷ་ཡི་ཡུལ་དུ་སྨིན། ཞེས་སོགས་རྒྱ་ཆེར་གསུངས་པ་བཞིན་ནོ། །ལེགས་ལྡན་དཔྱིད་ཀྱི་བུ་མོ་བཞིན་དངོམ་ཚེ། །དབྱར་སྐྱེས་གཞོན་ནུའི་བརྟན་པ་འཕྲོག་པ་(༡༧༧བ)
ལྟར། །རྒྱུ་འབྲས་མི་བསླུར་ངེས་པ་ཚུལ་གསུམ་པོ། །ཚང་བའི་གཏན་ཚིགས་འདི་ཀོ་གང་གིས་འགོག །ཀུན་ལ་ཆགས་སྡང་བྲལ་བ་བཏང་སྙོམས་གཞིར། བྱམས་བརྩེའི་བརླན་གྱིས་སེམས་བསྐྱེད་ཨུཏྤ་ལ། །འཇམ་མཉེན་བདུད་སྙིང་རྩུབ་དེས་རིས་མེད་ཀྱི། །མགོན་དུ་ཞལ་འཆེའི་དམ་བཅའ་གང་དུ་ཐལ། །གློ་བུར་ཟུག་རྔུ་སྐྱེད་བྱེད་རོ་ནུས་སྨན། །ཞུ་རྗེས་ནད་བརྒྱ་བཀྲུ་བའི་ཆོ་ག་བཞིན། །གཅིག་ཏུ་ཆུ་སྲིན་རྒྱལ་མཚན་སྡེར་བཅས་ལ། །རྗེས་ཆགས་བྱང་ཆེན་ལ་སྦྱོར་འཕྲུལ་པོ་ཆེ། །འདིར་སྣང་ཞིང་སར་མི་མངོན་ས་བོན་ཚོགས། །བསྔོ་སྨོན་གཤེར་དྲོད་ཀྱིས་བསྐྱེས་མྱུ་གུའི་རྩེར། །བདེ་སྐྱིད་འབྲས་བུ་དུད་ལ་སྐྱེ་བ་ཀུན། །སྤྱོད་པའི་སྐལ་པ་བཟང་པོར་འགྱུར་བར་ཤོག །ཡངས་པའི་འཇིག་རྟེན་ཉ་ཕྱིས་ཁོག་པ་རུ། །ཞྭ་སེར་ཆོས་སྲིད་ཕྱུར་སྤུངས་མུ་ཐི་ལཿ། །ལུས་ཅན་ཡོངས་ཀྱི་སྲིད་མཚོར་རྒྱན་འཕྲེང་དུ། །བསྐལ་པའི་དར་གྱི་སྲད་བུར་རྟག་བརྒྱུ་ཤོག །ཁྲིམས་གཉིས་གསེར་གྱི་གཉའ་ཤིང་མངའ་འབངས་ཀྱི། །ཕྲག་པར་རབ་ལྕི་ནོར་འཛིན་སྐྱོང་བའི་རྗེ། སྐུ་ཚེ་དབང་ཐང་དར་དྲག་གྲིབ་བསིལ་དུ། །འགྲོ་རྣམས་བདེ་བའི་ངལ་གསོར་ལོངས་སྤྱོད་ཤོག །ཐུབ་གསུང་འདི་བསྐྲུན་བྱེད་པོར་རྟགས་ཀུན་གྱིས། །ཉེར་མཚོན་ནམ་མཁའི་སྐ་རགས་རིང་པོས་ཀྱང་། །འཆིང་བར་ནུས་མིན་མར་གྱུར་ཡིན་ནོ་ཅོག །བྱང་ཆེན་ཐོབ་རྒྱུར་དགེ་བའི་ཚིགས་རྣམས་བསྔོ། །ཞེས་སྨོན་ལམ་ཆེ་བརྗོད་དང་བཅས་པ་འདི་ནི་ས་སྐྱོང་བློ་བཟང་སྦྱིན་པའི་གསུང་གིས་བསྐུལ་བ་ལ་བརྟེན་ནས་ཟ་ཧོར་གྱི་བནྡེ་ཚངས་སྲས་བཞད་པའི་རྡོ་རྗེས་དམར་སེར་ཅན་གྱི་ལོ་གླུ་དབྱངས་ཀྱི་ཟླ་བའི་དབྱངས་ཨོ་འཆར་བའི་ཚེས་ལ་རྒྱལ་ཁབ་དམར་པོ་རིར་སྦྱར་བའི་ཡི་གེ་པ་ནི་འཕྱོང་རྒྱས་བསམ་མཐོང་ངག་རིག་ཕུན་ཚོགས་དབང་པོས་བགྱིས་པ་ཛཡནྟུ། །
(ལྡེབ་སྦྱོར་མཉམ་པའི་བྲྀཏྟ་ལས་མེ་ཏོག་གཡོ་བའི་འཁྲི་ཤིང་།) ཀཱརུཎྱཻཤྩནྡྲིརུཔགབསརཾཀཱཤསཱརཔྲསེནྱཾཡདྭཱབྷྱཽདྨཱཧཱདིབནཡཡདཾཁཱནྟཏྲྀཏྟདྨརོདྷཿདཧྱལུརྦིཤྭིབྷགབནུཏརཾཡདྡཀརྨཱངྴཀཱཙཱགྲཾབརྡྷཱཡུནྱཾཏྲིཔརཏིགཡཱལོཀནནྡོཏྶཡཙྪ། །ཐུགས་རྗེའི་ཟླ་གཟུགས་འགྲོ་རྒྱུད་དང་མཚོར་པྲ་ཕབ་ཇི་བཞིན་མངོན་སུམ་དུ། །འཆར་ལ་བརྩེ་ཆེན་དཀྱུས་རིང་སྤྱན་ཟུར་མཁའ་མཐའ་བརྒལ་དེས་ཡོལ་མེད་པས། །ལུས་ཅན་སྣ་ཚོགས་མོས་ངོར་རྗེས་འཇུག་གང་འདུལ་འཕྲིན་ལས་དཀྱིལ་འཁོར་ཆ། །འཕེལ་འགྲིབ་དང་བྲལ་མཆོག་གསུམ་གཟི་ཡིས་འཇིག་རྟེན་ཀུན་སྣང་དགའ་སྟོན་སྩོལ། །སྒྲིབ་གསུམ་ཟུག་རྔུའི་འཆིང་རྒྱ་བཀྲོལ་བའི་ཞར། །བཞི་བརྒྱ་རྩ་བཞིའི་གདུང་སེལ་སྨན་གྱི་བླར། །སྲིད་ཞི་ཡོངས་ཀྱི་སྐྱབས་སོང་བཏུད་པའི་གཙུག །ཞབས་རྡུལ་འཁོར་ལོའི་རི་མོ་གཅིག་ཏུ་གསལ། །ལས་ཉོན་གྱིས་བསྐྱེད་མི་མཉམ་འདུ་འཁྲུག་ནད། །གཞིལ་ལ་ཚངས་པ་མགྲིན་སྔོན་འཁོར་ལོའི་ལག །ལྷ་དང་ཕྱི་ནང་དྲང་སྲོང་ཚེའི་རིག་བྱེད། །འཛིན་རྣམས་བཀྲ་(༡༧༨བ)
ཤིས་མེ་ཏོག་ཆར་དུ་སྙིལ། །ཉི་བུའི་མཆེ་ཕྲག་ཕྱོགས་པའི་ཕྱུགས་སྲོག་ཀྱང་། །ལྡོག་པར་རིག་ན་དལ་རྟེན་རིང་འཚོ་བ། །བརྩོན་པའི་བསོད་ནམས་གྲུ་རྫིངས་ལ་བརྟེན་ནས། །ཐར་པའི་རིན་ཅེན་གླིང་དུ་བགྲོད་མིན་སུ། །མ་བྱས་མི་འཕྲད་གང་བསགས་ཆུད་མི་འཛད། །ཚད་མའི་བཀའ་དང་དཔང་གྱུར་གཞུང་ལུགས་བཞིན། །རྣམ་སྨིན་ཆེས་དཀར་འབྲས་བུའི་རོ་མྱོང་བའི། །བདེན་གཏམ་རླུང་བསྐུར་མ་ཡིན་སུ་ཞིག་བསྙོན། །ཆུང་ངུའི་བློ་གྲོས་རྨིག་པའི་ཁུང་བུ་རུ། །ཕྲ་མོའི་ཡོན་ཏན་ཉལ་འགྲོས་ཁེངས་མིན་པ། །མཁྱེན་དཔྱོད་རབ་རྒྱས་ཟླ་བའི་མ་མའི་འཇིང་། །གཙུག་ལག་བྱེ་བའི་ཆུ་གཉེར་མི་དོག་ཡངས། །ལྟོ་འགྲོར་མ་གི་ཏ་བཞིན་ཕྱོགས་ལྷུང་སྙིང་། །མ་རུངས་འབྱུང་པོའི་གདོན་གྱིས་མ་བཏབ་པའི། །གཟུར་གནས་བློ་ཡི་ལེགས་བཤད་བང་མཛོད་ཀྱི། །ཡིད་བཞིན་གཏམ་གྱིས་ཕྱུར་བུར་སྤུངས་འདི་ལོང་། དེ་ཡང་འཇིག་རྟེན་གྱི་མིག་གཅིག་པུ་མཁས་པའི་དབང་པོ་དཔང་ལོ་ཙཱ་བས། རྒྱལ་བའི་སྲས་ཀྱི་ཤེས་བྱ་ཐམས་ཅད་ལ། །བསླབ་པར་གསུངས་ཕྱིར་ཇི་སྙེད་མཁྱེན་པ་ཡི། །ཡེ་ཤེས་རྒྱུ་རུ་འགྱུར་བས་ཤེས་ལྡན་རྣམས། །བྱང་ཆུབ་དོན་གཉེར་བསམ་པས་འདིར་བླང་རིགས། ཞེས་དང་། ཁྲུས་ཁང་ལོ་ཙཱ་བ་བསོད་ནམས་རྒྱ་མཚོའི་སྡེས། དེ་ཕྱིར་ཀུན་མཁྱེན་ལམ་དོན་གཉེར་བ་ཡིས། །ཕྱོགས་ལྷུང་མེད་པའི་ཡིད་ཀྱིས་ཐོས་པ་བཙལ། །ཞེས་ཐུབ་པ་སངས་རྒྱས་བཅོམ་ལྡན་འདས་ཀྱིས་རྒྱལ་བའི་སྲས་པོ་རྣམས་ཀྱིས་མི་བསླབ་པའི་གནས་ནི་གང་ཡང་མེད་ཅིང་དགོས་པའང་རང་གཞན་གྱི་དོན་གཉིས་སྒྲུབ་པ་ལ་བླ་ན་མེད་པའི་བྱང་ཆུབ་མངོན་དུ་བྱེད་(༡༧༩ན)
དགོས་ཤིང་ཆོས་ཐམས་ཅད་ཐོས་བསམ་གྱིས་གཏན་ལ་ཕབ་པ་ནི་ལ་ལ་རྒྱུའི་གཙོ་བོ་དང་། འགའ་ཞིག་ཡན་ལག་ཏུ་འགྱུར་བའི་ཕྱིར་བློ་གྲོས་དང་ལྡན་པ་རྣམས་ཀྱིས་དང་དུ་བླང་བྱ་ཡིན་ལ། དེའང་ཤེས་བྱ་ཇི་ལྟ་ཇི་སྙེད་ཀྱི་གནས་མཐའ་དག་གཟིགས་པ་ནི་འཕགས་ཆེན་དམ་པ་རྣམས་ཀྱི་སྤྱོད་ཡུལ་ཡིན་ལ། རང་ཅག་ཚུར་མཐོང་གི་སྐྱེ་བོ་རྣམས་ཀྱིས་ཇི་ཙམ་རྟོགས་པ་རིག་པའི་གནས་ཆེན་བཅོ་བརྒྱད་སོགས་ངོས་འཛིན་གྱི་ཁྱད་པར་རྒྱ་ཆེ་ཆུང་རྣམ་གྲངས་མཐའ་ཡས་ཀྱང་སྙིང་པོར་དྲིལ་ན་མ་ཕམ་པས་མདོ་སྡེ་རྒྱན་དུ་གསུངས་པ་དང་མཐུན་པར། འཇམ་མགོན་ས་སྐྱ་པཎྜི་ཏས། གངས་རིའི་ཁྲོད་ཀྱི་བློ་གསལ་ཀུན་འདུས་ཀྱང་། །རིག་པའི་གནས་ལྔ་ཀུན་ལ་བློས་མི་ལྕོགས། །མཁའ་ལ་རྒྱུ་སྐར་བྱེ་བའི་འོད་འཁྲིགས་ཀྱང་། །ཚ་ཟེར་བྱེད་པོའི་འཕྲིན་ལས་འགྲུབ་པར་དཀའ། །འོན་ཀྱང་ལས་ཀྱི་འཕྲོ་འདུ་མི་བཟད་པས། །སྙིགས་མའི་དུས་འདིར་གངས་རིའི་ཁྲོད་དུ་སྐྱེས། །འོན་ཀྱང་སྔོན་གྱི་བག་ཆགས་མཐུ་སད་པས། །ཤེས་བྱ་ཕལ་ཆེར་འབད་པ་ཆུང་ངུས་ཤེས། །ཞེས་དང་། ས་བཟང་མ་ཏི་པཎ་ཆེན་གྱིས། ཀུན་མཁྱེན་ཐོབ་པར་འདོད་རྣམས་ཀྱིས། །རིག་པའི་གནས་ལྔ་ཤེས་བྱ་སྟེ། །ཞེས་གསུངས་པའི་གནས་ལྔ་པོ་ནི། རིན་སྤུངས་ས་སྤྱོད་དབང་པོ་ངག་དབང་འཇིག་རྟེན་དབང་ཕྱུག་གྲགས་པའི་རྡོ་རྗེས་མཛད་པའི་ས་པཎ་གྱི་རྣམ་ཐར་སརྒ་བཅུ་གཉིས་མར། སྒྲ་དང་ཚད་མའི་རིག་པ་གཏུམ་པོས་ལྟ་ངན་མ་ལུས་ཤེས་བྱའི་དབྱིངས་སུ་བསད། །བཟོ་དང་གསོ་བ་རྗེས་སུ་འཛིན་པའི་ཕན་པ་མངོན་སུམ་(༡༧༩བ)
ཉིད་དུ་ཡང་དག་རྒྱུ། །ཆོས་ཀྱི་དྲ་བ་སྡོམ་པའི་ནང་གི་དེ་ཉིད་སྨྲ་བ་ཀུན་གྱི་རྒྱལ་པོ་ཆེ། །ལྔ་རིག་མཁས་དང་གྲུབ་པའི་འཁོར་ལོ་དུས་གསུམ་སྒྱུར་བ་རྣམས་ལ་དང་བས་བསྟོད། །ཅེས་ལོག་སྨྲ་ཚར་གཅོད་པ་སྒྲ་དང་ཚད་མ། གཞན་རྗེས་སུ་འཛིན་པ་བཟོ་དང་གསོ་བ། རང་ཉིད་ཀུན་ཤེས་པར་བྱ་བ་ནང་རིག་པ་སྟེ། རིག་གནས་ལྔར་བཤད་པའི་ནང་ཚན་གསོ་བ་རིག་པ་ནི། མཁས་མཆོག་དཔའ་བོས། ཚེ་ནི་རིང་བར་འདོད་པ་ཡིས། །ཆོས་དང་ནོར་དང་བདེ་བ་སྒྲུབ། །ཚེ་ཡི་རིག་བྱེད་ལུང་བཤད་པ། །རབ་ཏུ་གུས་པར་བྱ་བར་གྱིས། ཞེས་དང་། རིག་གནས་ཀུན་ཤེས་ལས། འགྲོ་ཀུན་ལུས་ནད་སྣ་ཚོགས་ཀྱིས་གཟིར་ཕྱིར། །གསོ་དཔྱད་དོན་དུ་མི་གཉེར་སྲིད་མཐའ་ཙམ། །དེ་ཕྱིར་རིག་གནས་གཉིས་པ་འདི་ཉིད་ནི། །དོན་གཉེར་རྗེས་སུ་འཛིན་པའི་མཆོག་ཏུ་གྲུབ། །ཅེས་ཐོག་མ་མེད་པ་ནས་ཉོན་མོངས་པ་དུག་ལྔས་གཟིར་ཅིང་ནག་པོའི་ལས་ཆེས་ཆེར་བརྩེགས་པའི་འབྲས་བུ་འདུ་བ་རྣམ་བཞི་འཁྲུགས་པའི་ནད་བཞི་བརྒྱ་རྩ་བཞི་ལ་མཇུག་དོན་ཡོངས་གཏད་ལས། ནད་ལ་བཞི་བརྒྱ་རྩ་བཞིར་གྲགས་པ་ལ། །བརྒྱ་དང་རྩ་གཅིག་ལྟར་སྣང་འཕྲལ་གྱི་ནད། །མ་བཅོས་རང་གར་བཞག་པས་འཚོ་བ་ཡོད། །འོན་ཀྱང་བཅོས་ན་མྱུར་དུ་བདེ་བ་སྟེར། །དཔེར་ན་འགྱེལ་བུབ་ལག་ནས་འཐེན་པ་འདྲ། །དང་པོ་སྔོན་ཚུལ་ཆེ་བར་བྱུང་གྱུར་ཀྱང་། །མ་བཅོས་རང་གར་ལམ་ནས་བཟློག་པ་ཡོད། །དཔེར་ན་མཁའ་ལ་སྤྲིན་འཐིབས་ཆར་འབབ་པ། །གློ་བུར་སངས་ནས་ཐན་པར་འགྱུར་བ་འདྲ། །བརྒྱ་དང་རྩ་གཅིག་ཀུན་བརྟགས་གདོན་ཡིན་(༡༨༠ན)
པས། །དེ་མ་བཅོས་པར་སྨན་དཔྱད་ལེན་མི་འདོད། །གདོན་བཅོས་སྨན་མེད་གྱུར་ཀྱང་འཚོ་བ་ཡོད། །དཔེར་ན་དཔུང་པ་གཡར་བའི་བཙོན་བུ་འདྲ། །བརྒྱ་དང་རྩ་གཅིག་ཡོངས་གྲུབ་ཚེ་ཡི་ནད། །མ་བཅོས་འཆི་ལ་བཅོས་ན་འཚོ་བ་ཡོད། །དེ་ཡང་དང་པོ་བར་དང་ཐ་མ་གསུམ། །ཚ་བའི་སྔོན་ཚུལ་ལམ་ནས་མི་ཟློག་པ། །གཉེན་པོ་གྲོགས་ཀྱིས་ལེན་དུ་མི་སྟེར་ཕྱིར། །སྟོབས་ཆུང་གྲོགས་མེད་གསར་དུས་མི་ཟློག་མེད། །བར་དུ་ནད་རྒྱས་གཉེན་པོས་ཆོམས་པ་དཀའ། །དཔེར་ན་ཤྭ་ཡི་གདོང་དུ་རགས་བརྩིགས་པ། །ཞར་ལ་ཁྱེར་ཡང་ཞར་ལ་མནན་པ་ཡིས། །ཆུ་ཤུགས་ཟད་ནས་རགས་ཀྱིས་ཐུབ་པར་སྣང་། །དེ་བཞིན་ནད་རྒྱས་གཉེན་པོ་འཐབས་པ་ཡིས། །མི་ཆོམས་འདྲ་ཡང་བསྟུད་ན་ནུས་པ་ཐོབ། །གྲང་རྒྱས་ལྕི་བ་གཉེན་པོས་ཆོམས་དཀའ་སྟེ། །གོ་མཚོན་བཅས་པའི་ཚོང་པ་དཔུང་བཅས་འདྲ། །བརྒྱ་དང་རྩ་གཅིག་གཞན་དབང་སྔོན་གྱི་ལས། །བཅོས་ཀྱང་མི་ཐུབ་འཆི་བའི་ནད་ཡིན་པས། །དེ་ཡང་བསྡུ་ན་སྲོག་བཅོད་ནད་དགུར་འདུས། །ཚ་བ་ལ་ལ་བཟླས་དང་མ་བཟླས་གཉིས། །དཔེར་ན་མེ་ལོང་ཐབ་ཏུ་བཅུག་པ་འདྲ། །མ་ཞུ་ཆུས་སླེབ་ཞུ་ནས་དེས་མི་ཟློག །གྲང་བ་གཏིང་ནས་འཁར་དང་མི་འཁར་གཉིས། །དཔེར་ན་ལྡུམ་བུ་དང་ནི་སྡོང་རྒན་འདྲ། །དང་པོ་ཚོས་བླ་གཉིས་པ་ཚོས་མི་འགྱུར། །རླུང་ནད་སྲོག་རྟེན་ཆད་དང་མ་ཆད་གཉིས། །དཔེར་ན་སྐོན་པ་ནང་གི་བྱ་དང་འདྲ། །མ་ཤོར་ཟིན་ལ་ཤོར་ན་ཟིན་ཐབས་མེད། །ཟུངས་ཟད་ནད་ལ་དེ་སྲོག་གནས་པ་སྟེ། །ནད་བཅོམ་གྱུར་ན་སྲོག་ཀྱང་འཇིག་པའི་ཕྱིར། །དཔེར་ན་རྨང་གིས་མ་ཐུབ་རྩིག་(༡༨༠བ)
པ་འདྲ། །རྣམ་པར་འཚེ་བ་གདོན་གྱིས་བླ་ཁྱེར་བ། །འཚོ་བ་འདྲ་ཡང་ངེས་པར་འཆི་བ་སྟེ། །དཔེར་ན་རྒྱུ་མ་ཕུག་པའི་མི་དང་འདྲ། །འཚོ་བའི་ཚེ་ལས་བསོད་ནམས་གསུམ་ཟད་པ། །ནད་གྲོལ་རྩ་ཤོར་འབྱུང་བ་འགག་པའི་ཕྱིར། །དཔེར་ན་ནམ་གཞུག་ཆད་པའི་ཆར་པ་འདྲ། །གཤེད་དུ་བབས་པ་ཚ་གྲང་གཉིས་འདོམས་པས། །གཅིག་བཅོས་གཅིག་སྐྱེ་གཉེན་པོ་ཀུན་མི་ལེན། །དཔེར་ན་ཐག་ཆོད་མི་ལ་གྲོས་འདེབས་འདྲ། །སྦྱོར་བ་མཚུངས་པ་རྒྱུ་རྐྱེན་གཉིས་པོ་ལོག །གང་བཅོས་གྲོགས་ཀྱི་ཐོག་ཏུ་བབ་པ་སྟེ། །དུག་ཟིན་མི་ལ་བཙན་དུག་བླུད་པ་འདྲ། །གནད་དུ་བབས་པ་སྲོག་གནས་བཅོམ་པ་སྟེ། །སྲོག་རྩ་ཆད་པ་བཅོས་ཐབས་ཅི་ལ་རྙེད། །གྲོས་ཁ་བཙན་པོ་དགྲ་ལ་ཤོར་བ་འདྲ། །དྲང་སྲོང་ཆེན་པོ་ཐེ་ཚོམ་སྐྱེ་མི་རུང་། །གསོ་བྱས་མ་བྱས་མཉམ་པོར་བྱ་མི་རིགས། །འཚོ་འཆི་ཀུན་ལ་སྨན་ཡོད་མ་ཡིན་ཏེ། །ཀུན་ཏུ་སྨན་མེད་ཅེས་སྨྲ་དེ་མ་ཡིན། །མེ་སྟེང་ཆུ་སླུག་མི་གསོད་ག་ལ་སྲིད། །དེ་ཡང་སྨན་ན་སོད་པ་ཤིན་ཏུ་དཀའ། །རྩམ་པས་ལྟོགས་པ་མི་སེལ་ག་ལ་སྲིད། །ཆུ་ཡིས་སྐོམ་པ་མི་སེལ་ག་ལ་སྲིད། །གག་ལྷོག་གསོ་བ་མེད་པར་སུ་བདེར་འགྱུར། །ཆུ་འགགས་སྨན་དཔྱད་མེད་པར་ཅི་ལ་ཐོན། །གཉེན་པོ་མེད་པར་དུག་ཟ་སུ་ཡིས་ནུས། །མཆོག་སོགས་ནུས་པ་ལུང་ལས་གྲགས་བཞིན་སེལ། །དེ་ཕྱིར་གསོ་བ་ཐེ་ཚོམ་བཅས་མི་བྱ། །ཞེས་མ་བཅོས་ཀྱང་འཚོ་བ། གདོན་བཅོས་པས་འཚོ་བ། བཅོས་ན་འཚོ་ལ་མ་བཅོས་ན་མི་འཚོ་བ། །བཅོས་ཀྱང་མི་འཚོ་བ་སྟེ་མུ་བཞིར་གསུངས་པའི་སྨན་དཔྱད་སོགས་(༡༨༡ན)
ཀྱིས་འཆི་བདག་གཤིན་རྗེའི་ཞགས་པ་ལས་གྲོལ་བར་བྱེད་པའི་ཚུལ་འདིས་སྐྱེ་རྒུ་ཀུན་ལ་མི་འཇིགས་པ་སྦྱིན་པ་རླབས་པོ་ཆེས་གཞན་ཕན་གྱི་ཐབས་རྒྱལ་བའི་སྲས་ཀྱི་སྤྱོད་པའི་ཡན་ལག་ཏུ་ངེས་པར་འགྱུར་བ་ཤེས་ལྡན་རྣམས་ཀྱིས་གཅིག་ཏུ་གཞོལ་བའི་གནས་ཡིན་ལ། དེའང་ལྷ་ལས་དར་བ་ནི། ཇི་སྐད་དུ། སྙན་ཚིག་མཆོད་སྦྱིན་སྲིད་སྲུངས་དང་། །ངེས་བརྗོད་རིག་བྱེད་བཞི་ཞེས་བྱ། །བསླབ་དང་བརྡ་སྤྲོད་སྡེབ་སྦྱོར་དང་། །དེ་བཞིན་སྐར་རྩིས་ཐོས་པ་དང་། །རྟོག་པ་དང་ནི་ཡན་ལག་གོ །དྲན་པ་དང་ནི་ཆོས་དང་བཅས། །ཞེས་འབྱུང་བ་ལྟར་ཡན་ལག་དྲུག །ཉེ་བའི་ཡན་ལག་གཉིས་དང་བཅས་པ་ཀུན་ཀྱང་མེས་པོའི་ཞལ་བཞི་ལས་བྱུང་བའི་རྒྱུ་མཚན། གང་ཕྱིར་ཚངས་པ་ཡི་ནི་ཞལ། །དབུས་མ་ནས་ནི་ཚེའི་རིག་བྱེད། །སྙན་ཚིག་ངེས་བརྗོད་མཆོད་སྦྱིན་རྣམས། །ཞལ་གཞན་ནས་ནི་གསུང་བ་མཛད། །ཅེས་པས་ཤེས་ནུས་ཤིང་རིག་བྱེད་དེའང་སུས་ཀྱང་མ་བྱས་པས་རྟག་པ། བྱ་རྩོལ་གྱིས་མ་བསླད་པར་རང་བྱུང་། ཐམས་ཅད་བརྗོད་དུ་རུང་བས་ཚད་མ་ཡིན་པ་ཞིག་ཏུ་ངོས་འཛིན་ལ། ཀུན་ཤེས་ལས། སྒྲ་གཅན་འཁོར་ལོས་ཚངས་པའི་དཔྲལ་བ་སྣང་། །དེ་ཡི་རྐྱེན་གྱིས་ཚེ་ཡི་རིག་བྱེད་དྲན། །སྐྱེ་རྒུའི་བདག་ལ་བཤད་ཅིང་དེ་ཡིས་ཀྱང་། །ཐ་སྐར་བུ་གཉིས་བརྒྱ་བྱིན་ལ་སོགས་པ། །ཞེས་པའི་དོན་ལྟར། སློབ་དཔོན་ཤེས་རབ་གོ་ཆས་མཛད་པའི་ལྷ་ལས་ཕུལ་བྱུང་གི་འགྲེལ་པར། དེ་ཡང་འདི་སྐད་ཐོས་ཏེ་ཚངས་པས་བསྐོས་པའི་ཕྱོགས་གཅིག་ན་ལྷ་གནས། ཕྱོགས་གཅིག་ན་ནི་ལྷ་མ་ཡིན་རྣམས་འདུག་(༡༨༡བ)
ནས། རི་བོ་མནྡ་རའི་སྟེང་ནས་ནི་ཁྱབ་འཇུག་གིས་བཟུང་། ཀླུའི་རྒྱལ་པོ་ནོར་རྒྱས་ཀྱིས་སྲུབ་ཐག་བྱས། འོག་ནས་ནི་རུས་སྦལ་གྱི་རྒྱབ་ཀྱིས་བརྟེན་ཏེ་འོ་མ་ཅན་གྱི་རྒྱ་མཚོ་ཆེན་པོ་བསྲུབས་པར་འགྱུར་ཏོ། །དེ་ནས་ཤིན་ཏུ་འཇིགས་སུ་རུང་བའི་དུག་གི་སྐྱེས་བུ་ནག་པོ་བརྩེགས་པ་ཞེས་བྱ་བ་ཞིག་བྱུང་བར་འགྱུར་པ་དང་། དེ་ཁྱབ་འཇུག་གིས་མིད་པར་གྱུར་བ་ན་དྲན་པ་གཏོར་ཏེ་ས་ལ་འགྱེལ་ནས་ཅང་མི་སྨྲ་བར་གནས་པ་དང་། ལྷ་ཆེན་པོས་དེ་ལས་དྲངས་ཏེ་མགྲིན་པར་བཞག་པར་གྱུར་ཏོ། །དེས་དེའི་མགྲིན་པ་སྔོན་པོར་གྱུར་ཏོ། །དེ་ནས་ཟླ་བ་ཚེས་པ་བྱུང་ན་ལྷ་ཆེན་པོས་བླངས་ཏེ་མགོ་ལ་བཞག་གོ །དེ་ནས་དཔལ་མོ་ཞེས་བྱ་བ་བྱུང་སྟེ། དེས་རང་ཉིད་ཀྱིས་ཁྱབ་འཇུག་བླངས་ནས་འདུས་སོ། །དེའི་འོག་ཏུ་རྟ་མགྲིན་རིང་དང་། ཤིང་ཡོངས་འདུ་ས་བརྟོལ་ལ་སོགས་པ་བྱུང་སྟེ། དེ་དག་ནི་བརྒྱ་བྱིན་ལ་སོགས་པ་ལྷ་གཞན་རྣམས་ཀྱིས་ཅི་རིགས་པར་ཁྱེར་རོ། །དེ་ནས་བུད་མེད་ཤིན་ཏུ་ཡིད་དུ་འོང་བ་ཞིག་བྱུང་བ་དང་དེ་ལ་ཁྱེད་སུ་ཡིན་ཞེས་དྲིས་པ་ན་ང་ནི་ཆང་ཞེས་བྱ་སྟེ་འཐུངས་ན་མྱོས་པ་དང་། བརྒྱལ་བ་དང་དྲེགས་པ་ལ་སོགས་པའི་རྣམ་པར་འགྱུར་བ་འབྱུང་བར་འགྱུར་རོ། །ཞེས་སྨྲས་པ་དང་། ལྷ་མ་ཡིན་རྣམས་འཇིགས་ནས་མ་འཐུངས་པ་ན་ལྷ་མ་ཡིན་ཞེས་བྱ་བར་འགྱུར། ལྷ་རྣམས་ཀྱི་འཐུངས་པས་ནི་ལྷ་ཞེས་བྱ་བར་གྱུར་ཏེ། དེ་ནས་དེའི་འོག་ཏུ་བདུད་རྩི་བྱུང་བ་ན་སྣོད་ཆེན་པོ་བརྒྱད་གང་བ་ལྷ་མ་ཡིན་རྣམས་ཀྱིས་ཁྱེར་བར་གྱུར་པ་ལས་ལྷ་རྣམས་ཤིན་ཏུ་ཡིད་མུག་ནས་ཁྱབ་འཇུག་གིས་ཤིན་ཏུ་ཡིད་(༡༨༢ན)
དུ་འོང་ཞིང་གཟུགས་བཟང་བའི་བུད་མེད་ཀྱི་གཟུགས་སུ་བསྒྱུར་ཏེ་སོང་ཞིང་བརྒྱ་བྱིན་གྱིས་ཀྱང་མི་སྣང་བའི་གཟུགས་ཀྱི་ནམ་མཁའ་ལ་འདུག་གོ །དེའི་ཚེ་ལྷ་མ་ཡིན་རྣམས་ཀྱིས་འདི་ནི་ཁོ་བོ་ཅག་གི་བུད་མེད་ཡིན་ནོ་སྙམ་ནས་བདུད་རྩིའི་སྲུང་མར་བཞག་སྟེ་རང་ཉིད་རྣམས་ཁྲུས་ལ་སོང་ངོ་། །དེའང་ཆོས་ཀྱི་བསྟན་བཅོས་ལས། མ་བཀྲུས་དྲི་མ་སྦྱོང་གྱུར་བས། ཁྲུས་མ་བྱས་པར་ཟས་མི་ཟ། །ཞེས་སྨོས་པའི་དོན་གྱིས་དེ་དག་ཁྲུས་ལ་སོང་ངོ་། །སྐབས་དེར་ཁྱབ་འཇུག་དང་བརྒྱ་བྱིན་གྱིས་བདུད་རྩི་བརྐུས་ནས་བརྒྱ་བྱིན་གྱི་ཁང་པར་ཁྱེར་རོ། །དེ་རྣམས་ཁྲུས་བྱས་ནས་སླར་ལོག་པ་དང་། བདུད་རྩི་མ་མཐོང་ནས་དེ་འཚོལ་བ་ལ་བརྩོན་པ་ན་ལྷ་རྣམས་ཀྱིས་ཁྱེར་རོ། ཞེས་ཐོས་ནས་ལྷ་རྣམས་སྟེང་དུ་འགྲོ་བ་ན་བདེན་ནོ་སྙམ་མོ། །དེའི་ཚེ་ལྷ་རྣམས་བདུད་རྩི་ལ་ལོངས་སྤྱོད་པའི་ཕྱིར་འདུས་པ་ན་སྒྲ་གཅན་ཟིན་ལྷའི་ཆ་ལུགས་སུ་བསྒྱུར་ཏེ་དེར་ཞུགས་པས། བདུད་རྩིའི་སྐལ་བ་ཐོབ་པ་དང་དེ་ཉི་མས་མཐོང་སྟེ་ཁྱབ་འཇུག་ལ་སྦྲན་ནས་འདི་ནི་སྒྲ་གཅན་ཟིན་ནོ་ཞེས་སྨྲས་པ་དང་། དེའི་འཁོར་ལོས་མགོ་བཅད་པར་གྱུར་ལ། འོན་ཀྱང་བདུད་རྩི་ལ་ལོངས་སྤྱད་ཅིང་ལྷགས་པའི་མགོ་བོ་ནི་དེང་སང་ནའང་གསལ་ལ། ལུས་ལྷག་མ་ནི་ཤི་བར་གྱུར་ཏོ། །དེ་ནས་སྒྲ་གཅན་ཟིན་དང་ཉི་མ་ཞེ་འགྲས་པར་གྱུར་པས་གང་གིས་ཉི་མའི་དཀྱིལ་འཁོར་འགེབས་ཤིང་སྒྲིབ་པར་བྱེད་པ་ཡིན་ནོ། །ཞེས་གཏམ་དུ་གྲགས་སོ། །ཞེས་པ་ལྟར་བསྐལ་བ་རྫོགས་ལྡན་གྱི་མཇུག་ཏུ་ཁམས་ཀྱི་ཟས་རག་པ་ཟས་པ་ལ་བརྟེན་ནས་མ་ཞུ་བ་སོགས་ནད་བྱུང་བའི་དུས་དེར་གནས་རི་(༡༨༢བ)
རབ་ཀྱི་རྩེ་མོར་འཆི་མེད་གྱི་བདུད་རྩི་ལྷ་མ་ཡིན་སྒྲ་གཅན་ཟིན་གྱིས་རྐུ་ཐབས་ཀྱིས་བཏུངས་པར་ཁྱབ་འཇུག་གི་ལག་ན་ཞོ་འཐུང་གི་རུས་པ་ལས་བི་ཤྭ་ཀརྨས་བཟོས་པའི་ཉི་མ་བདར་བའི་འཁོར་ལོ་ཡོང་བ་དེ་འཕངས་པས་སྒྲ་གཅན་གྱི་མགྲིན་པ་བཅད་ཀྱང་བདུད་རྩིའི་མཐུས་མ་ཤི་བར་ཕྱིར་འཕངས་པས་ཚངས་པའི་དཔྲལ་བའམ་མཁུར་ཚོས་ལ་རྨ་བྱུང་བའི་ཟུག་རྔུ་དྲག་པོ་མི་བཟོད་པས་རིང་ཞིག་བརྒྱལ་བ་བསོས། དྲན་པ་རྙེད་ནས་ཕན་ཐབས་བསམ་པས་སྔོན་སངས་རྒྱས་ཤིག་ལ་སྨན་གྱི་རྒྱུད་ཐོས་པས་རྐྱེན་བྱས། རྨ་ནང་ནས་ཚེའི་རིག་བྱེད་ཀྱི་ཐོག་མ་ཨོཾ་ཨ་ཐ་ཞེས་བྱ་བ་ཐོན་པ་ལ་བརྟེན་ནས་ཚེའི་རིག་བྱེད་སོགས་རིག་བྱེད་བཞི་ཡན་ལག་དང་བཅས་པ་བྱུང་བ། ཟླ་ཟེར་ལས། ཡི་གེ་ཨོཾ་དང་ཨ་ཐའི་སྒྲ། །གཉིས་པོ་འདི་དག་སྔོན་ཚངས་པའི། །མཁུར་ཚོས་བརྟོལ་ནས་བྱུང་བ་སྟེ། །དེས་ན་འདི་དག་བཀྲ་ཤིས་ཡིན། །ཞེས་བཤད་ཅིང་། བཀླག་པའི་ཚེ་ཡང་ངེས་བརྗོད་ཀྱི་རིག་བྱེད་ཀྱི་ཨོཾ། སྙན་ངག་གི་ཨུ། སྲིད་སྲུང་གི་ཨེ། མཆོད་སྦྱིན་གྱི་ཨཱ་སྟེ། དེ་བཞི་པོའི་ཚད་དུ་འདོན་དགོས་པར་བཞེད། ཨ་བསྲུང་བ་ལ་སྟེ་སྐྱོད་པ་ལའོ་ཞེས་པའི་བྱིངས་བཞག །བའི་སྲོག་གི་ཨ་བརྗོད་དོན། མ་ནི་ནུ་འོས་མ་ནི་ནུ་བྱིན། ཨིན་རྗེས་འབྲེལ། ཨ་བ་ཏིའི་མཐའ་དབྱིའོས། མའི་སྲོག་དང་ན་དབྱི་ཚ་བ་དག་གི་ལྔ་པ་ལ་ཤ་ཨཱུ་ཊ྄་འོས། བྲ། ཨཱུ་ཊ྄་རུ། ཤི་བི་ཨི་བི་མ་བི་ཛྭ་རི་ཏྭ་ར་རྣམས་ཀྱི་དངོས་ཨུ་པངྷཱའི་ཨའང་ཨཱུཊ། ཨ་ཡིག་ལས་ཨཱུཊའི་འཕེལ་བ་འོས། ཊ་གཉིས་ཕྱིས། ཨཱུ་མཚུངས་འདྲ། ནཱ་མི་མཐའི་བྱིངས་དང་སོགས་ཀྱི་ཡོན་ཏན། མ་ད་རོར་བྱས་པས་ཨོཾ་(༡༨༣ན)
འགྲུབ་པས་སྲུང་བའི་དོན་ལ་འཇུག །རྡོ་རྗེ་རྩེ་མོ་ལས། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་གཏེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་པ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་བཀྲ་ཤིས་པ་སོགས་དོན་མང་པོ་ལ་འཇུག་པར་གསུངས། ཐར་པ་ལོ་ཙཱ་བས་བསྒྱུར་བའི་ཉི་མའི་མདོར། ལྷའི་བུ་ཉི་མས་བཅོམ་ལྡན་འདས་རྗེས་སུ་དྲན་པ་ཡིད་ལ་བྱས་ཏེ། དེའི་དུས་སུ་ཚིགས་སུ་བཅད་པ་འདི་གསོལ་ཏོ། །སངས་རྒྱས་དཔའ་བོ་དེ་ལ་འདུད། །ཐམས་ཅད་མྱུར་དུ་སྒྲོལ་བར་གྱིས། །བདག་འདིའི་ཁ་རུ་བཅུག་པས་ན། །བདག་ནི་ཁྱེད་ལ་སྐྱབས་སུ་མཆི། །དེ་ནས་བཅོམ་ལྡན་འདས་ཀྱིས་ལྷའི་བུ་ཉི་མའི་ཆེད་དུ་ལྷ་མ་ཡིན་གྱི་དབང་པོ་སྒྲ་གཅན་འཛིན་ལ་ཚིགས་སུ་བཅད་པ་བཀའ་སྩལ་པ། སངས་རྒྱས་འཇིག་རྟེན་ལ་བརྩེ་བ། །དགྲ་བཅོམ་དེ་བཞིན་གཤེགས་པ་ལ། །ཉི་མ་སྐྱབས་སུ་སོང་བས་ན། །སྒྲ་གཅན་འཛིན་གྱིས་ཉི་མ་ཐོང་། །གང་ཞིག་མུན་པ་སྣང་བས་གསལ་བར་བྱེད། །རྣམ་སྣང་དྲག་པོའི་གཟི་བརྗིད་དཀྱིལ་འཁོར་ཅན། །ནམ་མཁའི་ཉི་མ་སྒྲ་གཅན་སྒྲིབ་མ་བྱེད། །ཉི་མ་འདི་ནི་སྒྲ་གཅན་གྱིས་ཐོང་ཞིག །ཅེས་དང་། ཟླ་བའི་མདོར་ཡང་ཞུ་བ་ཞུ་ལན་འདི་དང་དབྱིབས་འདྲ་བ་ཡོད་པ་སྒྲ་གཅན་གྱིས་བདུད་རྩི་བརྐུས་པ་ཟླ་བས་བྱ་བཏང་བའི་འཁོན་འཛིན་གྱིས་བཅོ་ལྔའི་དུས་ཟིན་པའི་འཇིགས་སྐྱོབ་དེ་བཞིན་གཤེགས་པར་ཞུས་པར་བཤད་ཅིང་། གནམ་སྟོང་དུ་ཉི་མ་སྒྲིབ་པའམ་གཙོ་བོར་ཟླ་བར་ཡིན་རུང་ལྷན་ཅིག་ཏུ་གནས་པའི་(༡༨༣བ)
དབང་ལས་ཡིན་པ་ལོ་རྒྱུས་ལ་ལར་བྱུང་བ་ཐུན་མོང་བའི་གདུལ་བྱའི་སྣང་ངོར་ཙམ་སྟེ་དོན་ཉི་ཟླ་ཁམས་ཀྱི་དྭངས་མའི་རྣམ་པར་སྒྲ་གཅན་བར་སྲིད་ཀྱི་ཚུལ་དུ་སྦྱོར་ཞིང་། གོ་ལའི་རྒྱུ་ལམ་དུ་ཆུ་ཤེལ་དང་མེ་ཤེལ་གྱི་དཀྱིལ་འཁོར་ཤིན་ཏུ་དྭངས་པའི་སྟེང་དུ་གདོང་མཇུག་ནོར་བུ་བཻ་ཌཱུཪྻའི་མདངས་ཅན་སྟེང་ནས་ཕོག་པའི་གྲིབ་མ་ལས་གནོད་པ་བྱས་པའི་ཐ་སྙད་མེད་ཅིང་དྷཱུ་ཏཱི་སྒྲ་གཅན་དང་རོ་རྐྱང་ཉི་ཟླ་བྱས་ནས་ཕྱི་ནང་གཞན་གསུམ་གྱི་སྦྱོར་ཚུལ་དང་པོའི་སངས་རྒྱས་གསུངས། དེར་མ་ཟད་སྨན་པ་ལ་སྔ་བ་ཚངས་པ། སྨན་ལ་སྔ་བ་ཆུ་སྐོལ། ནད་པ་ལ་སྔ་བ་ཤེད་བུ། ནད་ལ་སྔ་བ་མ་འཇུ་བ་བྱུང་ཞེས་གྲགས། མེས་པོས་སྐྱེ་རྒུའི་བདག་པོ་ཞེས་པ་ཚངས་པ་གཉིས་པ་ཞིག་ལ་བསྟན། དེས་ཐ་སྐར་གྱི་བུ་གཉིས་ཞེས་པ་སྔོན་གྱི་རྒྱལ་པོ་སྐྱ་སེང་གི་བུ་ལྔར་གྲགས་པའི་འཐབ་བརྟན་ཆོས་ཀྱི་བུ། འཇིགས་སྡེ་རླུང་གི་བུ། སྲིད་སྒྲུབ་དབང་པོའི་བུ། རིས་མེད་ལྷར་བཅས་གཉིས་ཏེ་ལྔའི་ནང་ནས་ཐ་མ་གཉིས་ཐ་སྐར་གྱི་བུ་ཡིན་པ་ལ་བཤད། དེ་གཉིས་ཀྱིས་ལྷའི་དབང་པོ་བརྒྱ་བྱིན་ལ་བསྟན་པ་ལས་རྒྱ་ཆེར་འཕེལ་ལོ། །ལྷ་ཡུལ་དུ་མ་ཟད་འགྲོ་བ་མི་ལ་དར་རྒྱས་སུ་གྱུར་པ་བསྐལ་པ་བཟང་པོ་འདི་ལ་མཚོན་ན་སངས་རྒྱས་འཁོར་བ་འཇིག་གི་བསྟན་པ་ལ་སངས་རྒྱས་ཀྱི་བཀའ་སྩལ་པ་དང་གཞན་དག་གིས་བཤད་པ་སོགས་མེད་པའི་མཐའ་མ་བཀག་ཀྱང་དིང་སང་འདིའོ་ཞེས་གསལ་བར་བརྗོད་པའི་སྐབས་མ་འཚལ་ཞིང་། ཀུན་ཤེས་ལས། ཐུབ་པའི་དབང་པོས་རྒྱ་གར་ལྷོ་ཕྱོགས་སུ། །ཚངས་པས་ཞུས་ངོར་ཚེ་ཡི་རིག་བྱེད་ཀྱི། །སྨན་རྒྱུད་འབུམ་ཕྲག་གསུངས་པ་མཁས་ལ་གྲགས། །(༡༨༤ན)
གཞན་ཡང་རྒྱུད་སྡེ་བཞི་དང་དུས་འཁོར་ལོ། །སྨན་གཞིའི་ལུང་དང་གསེར་འོད་སོགས་སུའང་གསུངས། །ཞེས་པ་ལྟར། འོ་སྐོལ་གྱི་སྟོན་པ་ཤཱཀྱ་སེང་གེས་འཁོར་ལོ་དང་པོའི་དུས་སུ་དགེ་སློང་ནད་པས་ནི་སྨན་པ་ལ་དྲིས་ཏེ་བྱའོ། །ཞེས་པ་ལྟ་བུའི་འཕྲོས་ལ་བརྟེན་ནས་འདུལ་བ་ལུང་གི་དུམ་བུ་གསུམ་པར་སྨན་དང་མས་བཏང་བའི་དཔྱད་ལ་སོགས་པ་ཉུང་ངུ་ཙམ་ཞིག་བཤད་ཅིང་གཙོ་བོར་སྨོས་པ་ནི། བཅོམ་ལྡན་འདས་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ་དགེ་སློང་རྣམས་སྟོན་ཀའི་བྲོ་ནད་ཀྱི་སྐྱ་བོ་སེང་སེང་པོར་གྱུར་པའི་ཚེ་སྨན་སོ་སོར་བསྟེན་པར་གསུངས་ཀྱང་དུས་སུ་མ་གཏོགས་དེ་ལས་ཡོལ་བར་མི་བསྟེན་པས་སྐྱ་བོར་གྱུར་པ་ལ། ཀུན་དགའ་བོ་དེ་ལྟ་བས་ན་རྗེས་སུ་གནང་སྟེ། དགེ་སློང་རྣམས་ཀྱི་སྨན་རྣམ་པ་བཞི་པོ་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། ཇི་སྲིད་འཚོའི་བར་དུ་བཅང་བ་སོ་སོར་བསྟེན་པར་བྱའོ། །དེ་ལ་དུས་སུ་བཏུང་བ་ནི་ལྡེ་གུ་དང་། འབྲས་ཆན་དང་ཟན་དྲོན་དང་། ཤ་དང་། སྣུམ་ཁུར་རོ། ཐུན་ཚོད་དུ་རུང་བ་ནི་བཏུང་བ་རྣམ་པ་བརྒྱད་པོ་ཤིང་ཏོག་ཙོ་ཙའི་བཏུང་བ་དང་། ཆུ་ཤིང་གི་འབྲས་བུའི་བཏུང་བ་དང་། རྒྱ་ཤུག་གི་བཏུང་བ་དང་། ཨ་ཤྭ་ཏཱའི་བཏུང་བ་དང་། ཨུ་དུམ་ཝཱ་རའི་བཏུང་བ་དང་། ས་རུ་ཤ་ཀའི་བཏུང་བ་དང་། རྒུན་འབྲུའི་བཏུང་བ་དང་། འབྲ་གོའི་བཏུང་བའོ། །ཞག་བདུན་པ་ནི་མར་དཀར་དང་། ཏིལ་མར་དང་། བུ་རམ་གྱི་དབུ་བ་དང་། སྦྲང་རྩི་དང་། ཤ་ཁ་རའོ། །འཚོ་བའི་བར་དུ་བཅང་བ་ནི་རྩ་བའི་(༡༨༤བ)
སྨན་དང་། སྡོང་པོའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲུའི་སྨན་དང་། ཐང་ཆུའི་སྨན་ལྔ་དང་། ཐལ་བ་ལྔ་དང་། ལན་ཚ་ལྔ་དང་། བསྐ་བ་ལྔའོ། །ཞེས་བྱ་བ་ལ་སོགས་པ་བྱིན་གྱིས་བརླབ་ཚུལ་དང་བཅས་ཏེ་བཀའ་སྩལ། འཁོར་ལོ་བར་པའི་དུས་སུ་ལྷ་ཆེན་པོ་ཚངས་པ་ལ་གཅེར་མཐོང་རིག་པའི་རྒྱུད་ཆེན་པོ་ལེའུ་སུམ་སྟོང་ལྔ་བརྒྱ་པའམ་གསོ་དཔྱད་འབུམ་པར་གྲགས་པ་གསུངས་ཤིང་། ལ་ལར་ཀུན་དགའ་བོ་དང་བེ་ཏའི་ཡུལ་དུ་ཤཱ་རིའི་བུ་ལ་སྩལ་ཟེར་བ་སྣང་། འཁོར་ལོ་ཐ་མའི་དུས་སུ་ཚོང་དཔོན་གྱི་བུ་ཆུ་འབེབས་ལ་མདོ་སྡེ་གསེར་འོད་དམ་པ་བཀའ་སྩལ་པ་ལ། རྒྱས་འབྲིང་བསྡུས་གསུམ་འགྱུར་པའི་འབྲིང་པོར། ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། །ཞེས་སོགས་ཤློ་ཀ་དགུ་དང་། རྒྱ་ནག་འགྱུར་དུ་དེ་བཞིན་གཤེགས་པ་ཁྱེའུ་ཆུ་འབེབས་སུ་འཁྲུངས་པའི་ཚེ་རང་གི་ཡབ་ལས་བྱུང་བ་རྣམས་བསྐྱར་བའི་ཚུལ་གྱི་གསུངས་པ་དང་། མདོ་སྡེ་མྱང་འདས་སུ་གྲོང་ཁྱེར་ཞིག་ན་རྒྱལ་པོ་དང་སྨན་པ་གཉིས་ཀ་ཤེས་རབ་འཆལ་བ་འོ་མ་ཁོ་ན་སྨན་དུ་བཟུང་བས་སྐྱེ་བོ་མང་པོའི་སྲོག་འཕྲོག་པ་ན་ཡུལ་གཞན་ནས་སྨན་པ་ཚེའི་རིག་བྱེད་ཡན་ལག་ལ་མཁས་པ་ཞིག་གིས་ཐབས་ཀྱི་སྒོ་ནས་སྨན་པ་དེ་བསྐྲད་པ་དཔེར་མཛད་ནས་ཆོས་བསྟན། དེས་མཚོན་ནས། རྡོ་རྗེ་མཁའ་འགྲོ་ལས། འདས་པའི་དུས་སུ་སྔོན་བྱུང་བའི། །བདེ་ཆེན་བསྐལ་པ་དང་པོ་རུ། །རྡོ་རྗེ་སེམས་དཔའ་བདག་དང་དེར། །ལྷག་པ་ཡི་ནི་ལྷ་གཅིག་ཞུ། །གྲུབ་པ་ལྷ་མིན་མི་མ་ཡིན། །ལྷ་ཚོགས་ཀྱིས་ཀྱང་མཐོང་ནས་སྐྲག །སངས་རྒྱས་(༡༨༥ན)
ཐམས་ཅད་འདུས་པ་ཡི། །བདག་ནི་མྱུར་དུ་བསྐུལ་བར་བྱེད། །བྱང་ཆུབ་སེམས་གྱུར་ལྷ་ཆེན་པོ། །བདུད་རྣམས་ཀུན་ནས་ཟིལ་མནན་བྱས། །ཐམས་ཅད་དེ་ཡིས་རྨོངས་པར་བྱེད། །དངུལ་ཆུ་ཞེས་ནི་བཤད་པ་ཡིན། །ཞེས་དངུལ་ཆུ་སོགས་བཅུད་ལེན་གྱི་སྦྱོར་བ་དང་། གཞན་ཡང་གསོག་ལྡང་ཞི་གསུམ་རགས་པ་ཙམ་གསུངས། དམ་པ་དང་པོའི་སངས་རྒྱས་ཀྱི་བསྡུས་པའི་རྒྱུད་དུ། ལུས་འདི་ལ་ནི་ཁམས་ཀྱི་ཚོགས་རྣམས་མཐའ་དག་རོ་དྲུག་ཟོས་ཤིང་འཐུངས་པ་ལས། །ཞེས་སོགས་ལུས་ཆགས་ཚུལ་དང་། རླུང་འཇོམས་ལན་ཚ་སྐྱུར་བ་དག་ཏུ་རབ་ཏུ་འགྱུར་ཏེ་མངར་དང་བསྐ་བ་དང་ནི་མཁྲིས་པའི་དགྲ །བད་ཀན་འཇོམས་པས་ཁ་བ་ཀུན་དང་དེ་བཞིན་ཚ་བ་དག་ཀྱང་སྨན་རྣམས་སམ་ནི་ཁུ་བའམ། །བད་ཀན་འཇོམས་པ་ར་ཡི་འོ་མ་ཚ་བ་གསུམ་བཅས་དག་ནི་མ་ཧེའི་འོ་མ་མཁྲིས་པའི་དགྲ། །རླུང་འཇོམས་དག་ཀྱང་ལྔ་མོའི་འོ་མ་རྣམ་གསུམ་ནད་འཕྲོག་པ་ཡི་འོ་མ་དང་ནི་དེ་བཞིན་མར། །ཛཱ་ཏི་བསྐོལ་བའི་ཆུ་ནི་བྲོ་བས་ཁ་ནད་ཞི་བར་བྱེད་དེ་སོ་ཡི་ཟུག་རྔུ་ཉིད་ཀྱང་ངོ་། །ཏིལ་མར་དངོས་པོའི་ཆུས་བསྐོལ་ཚ་བ་གསུམ་དང་ལན་ཚ་དག་གིས་རྣ་བ་ཡི་ནི་ནད་དག་འཇོམས། །མར་དང་འོ་མ་བསྐོལ་བར་གྱུར་པ་ཀླུ་དང་དམར་པོ་དག་གིས་རྟག་ཏུ་སྣ་ཡི་ནད་དག་འཇོམས། །ཀ་རྐོ་ཊི་དང་ལངྒ་ལི་དང་ཨིནྡྲ་བོང་བུའི་ཆུར་བཅས་བྱུགས་པས་འབྲས་ཀྱི་འཕྲེང་བ་འཕྲོག །ཅེས་སོགས་ཕྱི་ནང་གི་སྨན་བསྟེན་ཚུལ་སྣ་ཚོགས་ཡུམ་དཀར་མོར་བརྟེན་ནས་རྡོ་རྗེའི་ཚེར་མ་གཞིལ་སྲུང་། འཆི་ལྟས། རིན་ཅེན་སྦྱོར་བ། (༡༨༥བ)
བླ་གནས་ཀྱི་འཕོ་ཚུལ་སོགས་ཀྱང་འདོད་པའི་བསྟན་བཅོས། རོ་བརྗོད་པའི་གཞུང་། སྲིད་སྲུང་སོགས་རིག་བྱེད་རྣམས་དང་སྒོ་བསྟུན་ནས་གསུངས་པས་ཤེས་ནུས་ཤིང་། ཀུན་ཤེས་ལས། ལྷ་ཡི་དྲང་སྲོང་རྣམས་ལ་བརྒྱུད་ནས་ནི། །ཞེས་ཕྱི་ནང་གི་སྟོན་པ་གཞན་དག་གིས་བཤད་པ་བརྒྱ་བྱིན་ལ་སྐྱ་སེང་གི་བུ་ལྟར་ཕ་ལྷའི་དྲང་སྲོང་རྒྱུན་ཤེས་སོགས་བུ་བདུན། མ་མའི་བུད་མེད་ལ་བརྟེན་ནས་རྒྱུན་ཤེས་ཀྱི་བུ་སོགས་ཀྱིས་རྒྱུད་ལ་འཇུག་པའི་འགྲེལ་པ་རྒྱ་ཆེ་བ་རེ་བརྩམས། དེ་དག་གི་སློབ་མ་དྲང་སྲོང་ལུག་ནག་སོགས་དང་ཤ་ལེ་ཧོ་ཏྲ་རྣམས་ཀྱིས་ཀྱང་གསོ་བ་རིག་པའི་གཞུང་ཇི་སྙེད་ཅིག་མཛད་པ་རྡོ་འཇོག་གི་སྨན་པ་རྒྱུན་ཤེས་ཀྱི་བུའི་བར་དུ་བྱུང་བར་གྲགས། སྨན་གྱི་གྲོང་ཁྱེར་ལྟ་ན་སྡུག་ཏུ་དོན་ཀུན་གྲུབ་པས་སྟོན་པ་སྨན་གྱི་བླའི་རྣམ་པར་བསྟན་ཏེ་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་རྒྱུད་བཀའ་སྩལ་པའི་མཇུག་དོན་ཡོངས་གཏད་དུ། བདེ་གཤེགས་རྣམས་ཀྱིས་སྤྲུལ་པས་འགྲོ་དོན་དུ། །རྒྱ་གར་ཡུལ་དུ་སྨན་གྱི་སྦྱོར་བ་གསུངས། །རྒྱ་ནག་ཡུལ་དུ་མེ་བཙའ་རྩ་སྦྱོངས་གསུངས། །དོལ་པོའི་ཡུལ་དུ་གཏར་ཁ་གཙོ་བོར་བསྟན། །བོད་ཀྱི་ཡུལ་དུ་རྩ་ཆུའི་བརྟག་པ་བསྟན། །ལྷ་ཡི་འཁོར་ལ་གསོ་དཔྱད་འབུམ་པ་གསུངས། །དྲང་སྲོང་འཁོར་ལ་ཙ་ར་ཀ་སྡེ་བརྒྱད། །མུ་སྟེགས་འཁོར་ལ་དབང་ཕྱུག་ནག་པོའི་རྒྱུད། །ནང་པའི་འཁོར་ལ་རིགས་གསུམ་མགོན་པོའི་སྐོར། །གསོ་དཔྱད་རྒྱུད་འདིར་ཐམས་ཅད་འདུས་པར་བསྟན། །འདིར་མ་འདུས་པའི་གསོ་དཔྱད་གཞན་མེད་དེ། །འཕགས་པའི་ཐུགས་རྗེ་ཕྱོགས་རིས་མེད་མོད་ཀྱང་། །(༡༨༦ན)
གང་ཟག་མོས་པའི་མཐོང་སྣང་སོ་སོར་ཤར། །དཔེར་ན་མཁའ་ལ་ཟླ་བ་གཅིག་ཤར་ན། །ཆུ་ཡི་སྐྱོགས་རེར་ཟླ་བ་རེ་རེ་བཞིན། །གཅིག་ཏུ་གསུངས་ཀྱང་སོ་སོས་དུ་མར་གོ །ཞེས་གོང་དུ་སྨོས་པའི་ཕྱི་ནང་དྲང་སྲོང་གི་ཚེའི་རིག་བྱེད་ཀྱི་གཞུང་གི་རྩ་བ་ཀུན་སྟོན་པ་ཉིད་ཀྱི་གང་ལ་གང་འདུལ་གྱི་སྐུར་སྤྲུལ་ནས་ཕལ་ཆེར་བསྟན་པས་སངས་རྒྱས་རྣམས་ཀྱི་གསང་བ་བསམ་གྱིས་མི་ཁྱབ་པའི་ཚད་རང་ཅག་སོ་སྐྱེ་རྣམས་ཀྱིས་གཞལ་བར་མི་ནུས་ཤིང་བརྗོད་པའི་གནས་མ་ཡིན་ལ། དེའང་ཀུན་ཤེས་ལས། སྟོན་པ་བཞུགས་དུས་རྒྱལ་པོ་པདྨ་ཡི། །སྙིང་པོ་ཞེས་བྱའི་ཡུལ་ལྗོངས་རྡོ་འཇོག་ཏུ། །མི་ཡི་དྲང་སྲོང་རྒྱུན་ཤེས་བུ་ལས་ནི། །གཟུགས་ཅན་སྙིང་པོའི་ཟུར་བུ་ཐ་ཆུང་པོ། །འཚོ་བྱེད་གཞོན་ནུས་གསོས་ཞེས་ཆེར་གྲགས་པ། །སྨན་པའི་རྒྱལ་པོར་ལན་མང་དབང་བསྐུར་ཞིང་། །ཐུབ་པ་སྙུན་གསོའི་སྨན་པའི་རྒྱལ་པོ་བྱུང་། །དེ་ལས་བརྒྱུད་པ་གསལ་བ་མ་མཐོང་ཡང་། །ཞེས་པ་ལྟར་རྒྱལ་པོ་གཟུགས་ཅན་སྙིང་པོ་དང་ཚོང་དཔོན་གྱི་ཆུང་མ་འདུས་པ་ལས་བྱུང་བའི་བུ་རང་གི་ཕུ་བོ་གཞོན་ནུ་འཇིགས་མེད་ཀྱིས་གསོས་པས་གཞོན་ནུས་གསོས་ཞེས་བྱ་བ་ལང་ཚོ་ལ་བབ་པར་ཉེ་བ་ན་གོས་དཀར་ཅན་མང་དུ་མཐོང་བ་ལས་སུ་ཡིན་དྲིས་པས། ཡབ་ན་རེ་འདི་རྣམས་ནད་ཀྱི་གདུང་བ་སེལ་བའི་སྨན་པ་ཞེས་བྱ་བ་ཤ་སྟག་ཡིན་ནོ་ཞེས་ཟེར་བ་ཐོས་པས་སྔོན་གྱི་བག་ཆགས་ཉིད་ཀྱིས་བདག་ཀྱང་འདི་རྣམས་ཀྱིས་རྗེས་སུ་བསླབ་པར་བགྱིའོ། །ཞེས་ཞུས་པས་གནང་སྟེ་སྨན་བསླབ་པར་བརྩམས་སོ། །དེའི་ཚེ་རྒྱུན་ཤེས་(༡༨༦བ)
ཀྱི་བུའི་རྗེས་སུ་སློབ་པར་འདོད་ནས་རྡོ་འཇོག་གི་རྒྱལ་པོ་པདྨའི་སྙིང་པོ་ལ་ཡབ་ཀྱི་ཡི་གེ་དང་བཅས་ཏེ་ཕྱིན། དེར་སློབ་དཔོན་གྱིས་ཉུང་ཤས་ཙམ་ལས་མ་བསྟན་ཀྱང་ཁྱད་པར་དང་བཅས་ཏེ་ལོབས། དུས་གཞན་ཞིག་ན་སློབ་དཔོན་གྱིས་འཚོ་བྱེད་ཁྲིད་ནས་ནད་པ་ཞིག་ལ་སྨན་བསླབས་ནས་ལོག་པ་ལ་འཚོ་བྱེད་ཀྱི་བསམ་པས་སྨན་དེ་མི་འཕྲོད་པར་མཐོང་ནས་སླར་ནད་པའི་རྩར་སོང་སྟེ་སློབ་དཔོན་ན་རེ་སྨན་སྔ་མ་དེ་མ་ཟ་བར་ཕྱི་མ་འདི་དང་འདི་ལྟ་བུ་ཟོ་ཞིག་ཅེས་གསུངས་སོ། །ཞེས་ཐབས་མཁས་ཀྱིས་བཟློག་གོ །ཇི་ཙམ་ན་སློབ་དཔོན་གྱིས་དྲིས་པས་གསོས་ཟེར། ད་དུང་སྨན་འདི་ཉིད་ཐོང་ཞིག་བྱས་པས་སྔ་ཕྱི་གང་ཡིན་ཟེར། ཁོ་བོས་གཉིས་ནི་མ་བསྟན་བྱས་པས། སྔ་མ་ནི་དངོས་སུ་དང་། ཕྱི་མ་ནི་འཚོ་བྱེད་ལས་སོ་ཟེར་བས། སློབ་དཔོན་གྱིས་བསམས་པ། བདག་གིས་ཉེས་ཏེ་འཚོ་བྱེད་ནི་མཁས་པའོ་སྙམ་ནས་འཚོ་བྱེད་ལ་དགའ་བ་སྐྱེས་ཏེ་ཤས་ཆེར་འཚོ་བྱེད་ཉིད་འཁྲིད་པར་བྱེད་དོ། །སློབ་མ་གཞན་རྣམས་ན་རེ་མཁན་པོ་ནི་འཚོ་བྱེད་ཁོ་ན་ལ་སྤྲོ་བས་སྟོན་གྱི་བདག་ཅག་རྣམས་ནི་མ་ཡིན་ནོ། །ཞེས་ཟེར་རོ། དེ་ལ་མཁན་པོས་འཚོ་བྱེད་ནི་ཤེས་རབ་ཆེ་བ་ཡིན་ཏེ། ངས་གང་བསྟན་པ་དེ་ལས་རྣམ་པར་འབྱེད་ནུས་ཀྱི་ཁྱོད་རྣམས་ཀྱིས་མ་ཡིན་ནོ། །དེ་ལྟར་མཁན་པོས་གང་ལས་མཁྱེན་འོ་ན་མངོན་སུམ་དུ་བྱའོ། །ཞེས་སྨྲས་ནས། ཁྱེད་ཅག་རྣམས་ལྷན་ཅིག་ཏུ་ཚོང་འདུས་སུ་སོང་ལ་སྨན་འདི་དང་འདི་འདྲ་བའི་རིན་ཐང་ཁྱོད་དང་ཁྱོད་ལྟ་བུ་རེ་རེས་དྲིས་ལ་ཤོག་ཅིག་ཅེས་བསྒོས་ནས་བཏང་སྟེ་སླར་འཁོར་ནས་དྲིས་པས་གཞན་རྣམས་ཀྱི་གང་སྨོས་པའི་སྨན་སྣ་རེའི་རིན་ཐང་མ་གཏོགས་(༡༨༧ན)
མ་ཤེས། འཚོ་བྱེད་ཀྱིས་སྨན་སྣ་ཐམས་ཅད་ཀྱི་རིན་ཐང་འཆད་རྒྱུ་བྱུང་ངོ་། །ཡང་སོང་ལ་ཐང་ཤིང་གི་རི་ནས་སྨན་མ་ཡིན་པ་ལོང་ཞིག་བྱས་ནས་འཁོར་བའི་ཚེ། གཞན་རྣམས་ཀྱིས་སྨན་མ་ཡིན་པ་མང་པོ་ཁྱེར་བྱུང་ལ། འཚོ་བྱེད་ཀྱིས་སྨན་མ་ཡིན་པ་མ་རྙེད་ནས་དེས་འོན་ཀྱང་འདམ་བུ་མདའ་རྒྱུའི་རྩ་བ་དང་རྡོའི་དུམ་བུ་ཞིག་ཁྱེར་ནས་སོང་བའི་ལམ་དུ་ཕྱུགས་རྫི་མོས་ཞོའི་བུམ་པ་དང་ཕྲུམ་ཚུད་ཁྱེར་ནས་མཁན་པོའི་དྲུང་དུ་འགྲོ་བ་ལས་མིག་ཤིན་ཏུ་ན་བ་མཐོང་ནས་དེས་དེ་ལ་མདུན་དེ་ཉིད་ན་ཡོད་པའི་སྨན་ཞིག་བསྟན་པ་ལས་བསོས་ནས་དགའ་སྟེ་ཞོ་བུམ་ཁྱོད་སྣོམས་ཤིག །དེས་ཕྲུམ་ཚུད་བླངས་ཏེ་ཞོའི་བུམ་པ་དེ་ཉིད་ལ་གཏད་ནས་ཕྱིན་པ་ལས་བལ་གླང་གི་རྗེས་ཤིག་འདུག་པ་གྲོགས་རྣམས་བརྟག་པའི་ཆེད་དུ་དྲིས་པ། འདི་གང་གི་རྗེས་ཡིན། གཞན་རྣམས་ན་རེ་གླང་པོ་ཆེའི་རྗེས་སོ། །དེ་ནི་མ་ཡིན་ཏེ། འདི་ནི་བལ་གླང་མོའི་རྗེས་སོ། །དེ་ཡང་མིག་གཡས་པ་ཞར་བ། དེ་རིང་ཁོ་ནར་གླང་པོའི་ཕྲུག་གུ་སྐྱེ་བ། དེ་ལ་ཞོན་པའམ་བུད་མེད་ཡིན་པ། མིག་གཡས་ཞར་བ། དེ་རིང་ཉིད་དུ་བུ་ཕོ་བཙའ་བར་གྱུར་བ་ཞིག་གོ །ཞེས་སྨྲས་ནས་སློབ་དཔོན་གྱི་དྲུང་དུ་སླེབ་པ་ན་བྲམ་ཟེའི་ཁྱེའུ་རྣམས་ཀྱིས་སྨན་མ་ཡིན་པར་བསྟན་པ་དང་། མཁན་པོས་འདི་ཐམས་ཅད་ཀྱང་སྨན་ཡིན་ཏེ། འདི་ལ་མིང་འདི་ཞེས་བྱ་བ་དང་ནད་འདི་དང་འདི་ལ་ཕན་ནོ་ཞེས་རེ་རེ་ནས་སྨྲས་སོ། །འཚོ་བྱེད་ཀྱིས་ཐམས་ཅད་སྨན་ལགས་ཏེ་སྨན་མ་ཡིན་པ་ཅི་ཡང་མ་མཆིས་སོ། །འོན་ཀྱང་འདི་གསུམ་ཁུར་རོ། །འདིས་ཅི་བྱ། དེ་ན་རེ། སྡིག་པས་ཟིན་(༡༨༧བ)
པ་ལ་མདའ་རྒྱུའི་རྩ་བའི་དུད་པས་བདུགས་ནས་ཕྲུམ་ཚུད་བསླན་པས་ཕན་ཞིང་རྡོའི་དུམ་བུ་ནི་སྟོན་ཀ་ཞོའི་བུམ་པ་ཆགས་པར་འགྱུར་རོ། །ཞེས་སྨྲས་པ་ལས་མཁན་པོ་འཛུམ་བྱུང་བ་ན་གཞན་རྣམས་ཀྱི་བསམ་པ་མཁན་པོ་འཚོ་བྱེད་ལ་མ་མཉེས་སོ་སྙམ་ནས་སྨྲས་པ། མཁན་པོ་འདི་གཅིག་པུར་བས་དགོངས་སམ། ལམ་དུ་གླང་པོ་ཆེའི་རྗེས་ལ་རིགས་པ་མ་ཡིན་པ་འདི་ལྟར་སྨྲས་སོ། །ཞེས་ལོ་རྒྱུས་བསྐྱར་བས། འཚོ་བྱེད་བདེན་ནམ་བདེན་ལགས་སོ། །དེ་ཇི་ལྟར་ཤེས། དེས་མཁན་པོ་བདག་རྒྱལ་པོའི་རིགས་ལས་ཆེན་པོར་གྱུར་པ་ལགས་ཅི་སྟེ་མི་ཤེས། གླང་པོ་ཆེའི་རྗེས་ནི་ཟླུམ་མོ། བལ་གླང་མོའི་རྗེས་ནི་མཆུར་རིང་ངོ། མིག་གཡས་ཞར་བ་ནི་གཡོན་ཕྱོགས་སུ་རྩ་ཟོས་པ་ལས་ཤེས་སོ། །སྦྲུམ་མ་ནི་ལག་པ་བས་རྐང་རྗེས་གཏིང་རིང་བ་ལས། དེ་རིང་ཁོ་ནར་སྐྱེ་བ་ནི་གཅིན་བིའུ་སྣབས་ཅན་ལས། ཕྲུག་གུ་ཕོར་སྐྱེ་བ་ནི་རྐང་པ་གཡས་པའི་རྗེས་གཏིང་རིང་བ་ལས། དེ་ལ་བུད་མེད་ཞོན་པ་ནི་བབས་ནས་ཆུ་བཏང་བའི་རྗེས། དེའི་ཡང་མིག་གཡས་པ་ཞར་བ་ནི་གཡོན་ཕྱོགས་སུ་མེ་ཏོག་འཐུས་པ་ལས། དེ་སྦྲུམ་མ་ནི་རྟིང་པའི་རྗེས་ལྷག་པར་དོད་པ་ལས། དེ་རིང་ཁོ་ནར་བཙའ་བ་ནི་གཅིན་ལྗིན་ལྗིན་ཅན་ལས་ཤེས་ཏེ། ཐུགས་མཆེས་ན་དེ་ཉིད་དུ་དྲི་བར་མཛོད་ཅིག །ཅེས་སྨྲས་པ་ལྟར་དྲིས་པས་ཇི་ལྟ་བར་མཐོང་ནས་མཁན་པོས་གཞན་རྣམས་ལ་སྨྲས་པ་ཐོས་སམ། འཚོ་བྱེད་ནི་འདི་འདྲ་བའི་ཤེས་རབ་ཅན་ཡིན་ནོ། །ཞེས་སྨྲས་ཏེ་ཐོད་པ་དབྱེ་བའི་དཔྱད་མ་གཏོགས་ཐམས་ཅད་བསླབས་(༡༨༨ན)
སོ། །ཇི་ཙམ་ན་མི་ཞིག་ཀླད་ནད་ཀྱིས་ཐེབས་ནས་མཁན་པོ་ལ་ཞུས་པས། དེ་རིང་དོང་དང་ལྕི་བ་སྟ་གོན་གྱིས་ཤིག་པར་བྱའོ། །དེ་ཐོས་ནས་འཚོ་བྱེད་ཀྱིས་ནད་པའི་ཁང་པར་གབ་ནས་གནས་པའི་ཚེ། མཁན་པོས་ཐོད་པ་ཕྱེ་ནས་སྲིན་བུ་ལེན་པར་བརྩམས་པའི་ཚེ། འཚོ་བྱེད་ཐོན་ནས་ཐབས་བསྟན་པས་མགུ་སྟེ། ཁོ་བོ་ནི་འདིས་འཚོ་བ་ཡིན་ན་ཁྱེད་གཞན་དུ་སོང་ཞིག་སྨྲས་པས། ཕྱག་བྱས་ཏེ་རྒྱལ་པོ་པདྨའི་སྙིང་པོའི་གན་དུ་ཕྱིན་ནས་འགྲོ་བར་བརྩམས་པ་ན་ཁོ་བོ་དང་མི་མཐུན་པ་མཐའ་ཁོབ་སྐྱ་སེང་ཐུལ་ལ་སོང་ཞིག །དེས་ཁས་བླངས་ནས་ཡན་ལག་བཞིའི་དཔུང་གིས་ཕབ་གཏེའུ་བཟུང་། དཔྱའ་ཕུལ་བས་བྱ་དགའ་ཆེན་པོ་གནང་བ་ཐམས་ཅད་མཁན་པོ་ལ་ཕུལ་ནས་རིམ་གྱིས་གྲོང་ཁྱེར་བཟང་བྱེད་དུ་ཕྱིན་ནོ། །དེར་དབྱར་གནས་ནས་འབྱུང་པོ་ཐམས་ཅད་ཀྱི་སྐད་ཤེས་པའི་བསྟན་བཅོས་བསླབས་ནས་ཆས་པ་ན། ཤིང་ཁུར་བའི་མི་རུས་པ་དང་པགས་པའི་ལྷག་མ་ཅན་ཀུན་ནས་འཛག་པ་ཞིག་མཐོང་ནས་རྒྱུ་མཚན་དྲིས་པས། ཤིང་ཁུར་འདིས་བྱུང་སྟེ་གཞན་ཁོ་བོ་མི་ཤེས་ཟེར་བ་ལ། ཤིང་བརྟག་པའི་རིག་པས་འབྱུང་པོ་ཐམས་ཅད་དང་བར་བྱེད་པའི་ནོར་བུ་འདུག་པར་མཐོང་ནས། ཁུར་པོ་ཚོངས་ཤིག་རིན་ཇི་ཙམ། ཀཪྵ་པ་ཎི་ལྔ་བརྒྱའོ། །དེས་དེ་སྤྲད་ནས་ནོར་བུ་དེ་བླངས་སོ། །དེའི་ཡོན་ཏན་ནི་ཁྱིམ་ན་རྫས་ཅི་ཡོད་མར་མེ་བཏེག་པ་བཞིན་ནད་པའི་མདུན་དུ་བཞག་པ་ཙམ་གྱིས་ནད་ཇི་ལྟ་བ་ཤེས་པ་ཞིག་པས། རིམ་གྱིས་ཡུལ་ཨུ་དུམ་ཝཱ་རར་ཕྱིན་པས་བྲེ་མགོ་ལ་བསྣུན་པ་ཞིག་མཐོང་ནས་དྲིས་(༡༨༨བ)
པས་ཀླད་པ་གཡའ་ཟེར། དེར་ནོར་བུ་ལ་བརྟེན་ནས་བརྟགས་པས་ཀླད་པ་ལ་སྲིན་བུ་མཐོང་ནས་སྔར་གྱི་དཔྱད་བྱས་པས་སོས་ཏེ་ཀཪྵ་པ་ཎ་ལྔ་བརྒྱ་ཐོབ་པའང་མཁན་པོ་ལ་བསྐུར་རོ། །དེ་ནས་ཡུལ་རོ་ཧེ་ཏ་ཀར་ཕྱིན་པས་ཁྱིམ་བདག་ཞིག་ལ་སྐྱེད་ཚལ་ངོ་མཚར་ཅན་ཞིག་ཡོད་པ་ལ་ལྷག་པར་ཆགས་ནས་ཤི་བ་དེ་ཉིད་དུ་མི་མ་ཡིན་དུ་སྐྱེས་པས་དེར་གནས་པ་མང་དུ་བསད་པ་ལས་ཚལ་དེ་སྤངས་སོ། །ཇི་ཙམ་ན་དམུ་ཆུས་ན་ནས་སྨན་པས་སྤངས་པ་ཞིག་ཚལ་དེར་འཆི་བར་ཕྱིན་པ་དང་། འཚོ་བྱེད་ཀྱང་ནུབ་མོ་དེ་ཉིད་དུ་བསྡད་པ་ལས། དེའི་ཚེ་མི་མ་ཡིན་དེས་ནད་པ་དེ་བསྡིགས་པ་ན་ནད་བདག་དེ་བྱུང་སྟེ་འདི་བདག་གིས་སྔར་ནས་བཟུང་ན་ཁྱོད་ཀྱིས་ཅི་ལ་སྡིག །ཁྱོད་ལ་ར་སྤུའི་དུ་བས་ནི་མ་བདུགས། དེ་བདུགས་ན་ཁྱོད་དཔག་ཚད་བཅུ་གཉིས་སུ་འབྲོས་དགོས་པར་མི་འགྱུར་རམ་ཟེར་བས། དེས་ཁྱོད་ལའང་ལ་ཕུག་གི་ས་བོན་མར་ཕྱུངས་པའི་དར་བ་དང་སྦྱར་ཏེ་འགའ་ཡང་མ་སྦྱིན། དེས་ནི་ཁྱོད་དུམ་བུ་དུམ་བུར་འཛག་པར་མི་འགྱུར་རམ། ཞེས་གླེང་བ་ཐམས་ཅད་འཚོ་བྱེད་ཀྱིས་རྟོགས་ནས་ནང་པར་ཁྱིམ་བདག་གི་བུ་དང་ནད་པ་གཉིས་ཀ་ལ་ཐབས་དེ་སོ་སོར་བྱས་པས་ཇི་ལྟ་བ་བཞིན་བྱུང་ནས་ཀཪྵ་པ་ཎ་ལྔ་བརྒྱ་ལྔ་བརྒྱ་བྱུང་བའང་མཁན་པོ་ལ་བསྐུར་རོ། །དེ་ནས་ཡུལ་བཅོམ་བརླག་ཏུ་ཕྱིན་ནས་ཤིང་དྲུང་ཞིག་ན་ངལ་གསོ་བ་ལས། གྱད་གཅིག་གིས་གཅིག་བརྡབས་ནས་ནང་ཁྲོལ་འཁྲུགས་ཏེ་ཤིའོ། །ཞེས་ཕྱིར་ཁུར་བྱུང་བ་ན། ཤིང་དེའི་རྩེ་ན་བྱ་རྒོད་མོ་ཕྲུག་གུ་དང་བཅས་པ་དག་ན་རེ། ཤ་དགོས། ག་ལ་ཡོད། གྱད་ཀྱི་རོའོ། །འདི་འཚོ་བྱེད་ཀྱིས་འཚོའོ། །(༡༨༩ན)
ཇི་ལྟར་ཕྱེ་མས་རེག་ནའོ། །ཞེས་ཟེར་བ་རྟོགས་ནས་ནོར་བུས་བལྟས་ཏེ་གཅིའུས་ཕྱི་མ་ནང་ཁྲོལ་ལ་རེག་པས་སོས་ཏེ་ཀཪྵ་པ་ཎ་ལྔ་བརྒྱ་རྙེད་པའམ་མཁན་པོ་ལ་བསྐུར་རོ། །ཡང་དེ་ཉིད་དུ་ཁྱིམ་བདག་གཅིག་ཆུང་མ་ཤིན་ཏུ་མཛེས་པ་ལ་ཆགས་བཞིན་དུ་ཤི་བ་མངལ་གྱི་སྲིན་བུར་སྐྱེས་ནས་སྐྱེས་པ་སུས་སྤྱད་ཀྱང་འཆི་བར་བྱེད་དོ། །དེ་ན་སུས་ཀྱང་རེག་པར་མ་ནུས་པ་ལ་འཚོ་བྱེད་ལ་བསྟན་པས། སྒྲེན་མོར་ཕྱུངས་ནས་མོ་མཚན་གྱི་སྒོར་ཤའི་དུམ་བུ་བཞག་པ་ལས་སྲིན་བུ་ཤ་ལ་ཆགས་ནས་འོངས་པ་དོར་བས་སོས་སོ། །དེས་ཀྱང་ཀཪྵ་པ་ཎ་ལྔ་བརྒྱ་བྱུང་བ་དེ་ཡང་མཁན་པོ་ལ་བསྐུར་རོ། །དེ་ནས་རིམ་གྱིས་ཆུ་བོ་ཡ་མུན་ནར་ཕྱིན་པ་དང་། མི་རོའི་རྟིང་པ་ལ་ཉས་འཐེན་པས་མིག་འབྱེད་འཛུམ་བྱེད་པ་མཐོང་ནས་རྩ་ཕྲ་ཐམས་ཅད་བརྟགས་ཏེ་རིམ་པས་ཡངས་པ་ཅན་དུ་ཕྱིན་ནོ། །དེར་གྱད་གཅིག་གིས་གཅིག་གི་གདོང་ལ་ཐལ་མོ་བསྣུན་པས་མིག་དོན་པ་ལ་རྟིང་པའི་རྩ་ནས་དྲངས་པས་ཚུད་དོ། །དེས་ཀཪྵ་པ་ཎ་ལྔ་བརྒྱ་བྱུང་བ་ཐུ་བོ་འཇིགས་མེད་ཀྱི་མ་ཨ་མྲ་སྐྱོང་མ་ལ་བྱིན་ནོ། །ཡང་དེར་མི་ཞིག་གི་རྣ་བར་སྲིན་བུ་ཞུགས་ནས་ཕྲུག་གུ་བདུན་བརྒྱ་ཙམ་གནས་པས་ཉེན་པ་ལ་བསམས་པ། སྔར་ནི་མཁན་པོས་བསྟན་པ་ལྟར་བྱས། ད་ནི་རང་གིས་བསམས་ལ་བྱའོ་སྙམ་ནས་ལོ་མའི་སྤྱིལ་པོར་རས་སྔོན་པོས་གཡོགས། དེའི་འོག་ཏུ་རྔ་བཞག་ནས་ས་ཡང་དྲོ་བར་བྱས་ཏེ་མི་དེ་ས་ལ་བཀལ། ས་རྣམས་ཆུས་ཆག་ཆག་བཏབ་སྟེ་རྔ་བརྡུངས་པས་སྲིན་བུ་རྣམས་ཀྱི་དབྱར་ཞུའོ་སྙམ་ནས་ཕྱིར་ཐོན་པ་ལ་རྣའི་(༡༨༩བ)
རྩར་ཤའི་དུམ་བུ་བཞག་པས་དེ་ནང་དུ་སོང་ནས་ཐམས་ཅད་བོས་ཏེ་ཟ་བའི་ཚེ་དོར་བས་སོས་ཤིང་ཀཪྵ་པ་ཎ་ལྔ་བརྒྱ་རྙེད་པའང་ཨ་མ་སྐྱོང་མ་ལ་བྱིན་ནོ། །དེ་ནས་རིམ་པས་རྒྱལ་པོའི་ཁབ་ཏུ་ཕྱིན་པ་ན་མ་སྐྱེས་དགྲས་སུས་ཀྱང་མ་ཕྲད་པར་སྒོ་གཞན་ནས་ཞུགས། དུས་གཞན་ཞིག་ན་སྐྱེ་བོ་མང་པོས་བསྐོར་ནས་སེམས་གཡེངས་ཤིང་སོང་བའི་ཚེ། བྲམ་ཟེ་མིག་ན་བ་ཞིག་གིས་སྨན་ཞུས་པ་ལ་ཞེ་སུན་ནས་ཐལ་བ་ཐོབ་བྱས་པ་ལྟར་བཏབ་པས་དེ་སོས་སོ། །ཕྱིས་དེ་དང་མི་གཞན་ཞིག་ཕྲད་པ་ལས་གར་འགྲོ་དྲིས་པས་འཚོ་བྱེད་ལ་སྨན་ཞུར་འགྲོ་ཟེར། དེས་འདིའི་སྨན་ནི་ཐལ་བའོ་ཞེས་སྔར་བཞིན་བཏབ་པས་ལོང་། དེ་ཙམ་ན་ཡབ་རྒྱལ་པོའི་སྤྱི་བོར་ཕོལ་མིག་བྱུང་བ་ལ་སྨན་པ་རྣམས་བསགས་ནས་དཔྱད་གྱིས་ཤིག་པར་བསྒོས་པས། ལྷ་ལགས་སྨན་པའི་རྒྱལ་པོ་འཚོ་བྱེད་ཡོད་བཞིན་དུ་བདག་ཅག་རྣམས་ཀྱིས་རྔོ་མི་ཐོགས་པར་ཞུས་པས། འཚོ་བྱེད་བཀུག་ནས་དཔྱད་བྱོས་ཤིག །དམ་ཞིག་བཅའ་ན་བྱའོ། །བདག་ཉིད་ཀྱིས་ཁྲུས་བགྱིད་ནའོ། །དེ་བཞིན་གྱིས་ཤིག་བྱས་དེས་སྐྱུ་རུ་ར་བཀུར་ཅིང་སྨན་རྫས་བཏབ་ནས་དེ་དང་བསྲེས་པའི་ཆུ་བུམ་པ་ལྔ་བརྒྱ་བླུག་ནས་སྨིན་པའི་ཚེ་སྤུ་གྲིས་རེག་པ་ཙམ་གྱིས་མ་ཚོར་བར་བརྟོལ། དེ་ནས་འཚོ་བའི་རྫས་བཏབ་ཅིང་དེ་དང་བསྲེས་པའི་ཆུ་བུམ་པ་ལྔ་བརྒྱ་བླུག་པས་སོས་ཏེ་སྐྲ་ཡང་མཉམ་པར་གྱུར་ཏོ། ཁྲུས་དེ་བྱས་མ་ཐག་དཔྱད་གྱིས་ཤིག །རེ་ཞིག་བཤོས་གསོལ་ཞིག །དེ་ནས་དཔྱད་ཀྱང་གྱིས་ཤིག །ལྷ་བགྱིས་ཟིན་ལགས་སོ། །དེ་ཡིད་མ་ཆེས་ནས་ལག་པས་སྙུལ་བས་མ་ཤེས། མེ་ལོང་(༡༩༠ན)
ལ་བལྟས་པས་ཀྱང་མ་མཐོང་། བཙུན་མོ་ལ་དྲིས་པས་ཀྱང་མ་ཤེས་ནས་ངོ་མཚར་སྐྱེས་ཏེ་བློན་པོ་རྣམས་ལ་འཚོ་བྱེད་སྨན་པའི་རྒྱལ་པོར་དབང་བསྐུར་ཞིག །ཐལ་བ་བཏབ་པས་ལོང་བ་དེས་སྨྲས་པ། ལྷ་སྲས་ལ་བྱམས་པས་སམ་མཁས་པས་དབང་བསྐུར། མཁས་པས་ཞེ་ན་ཁོ་བོའི་མིག་ལོང་བས་སོ་ཞེས་པ་ལ། འཚོ་བྱེད་ཀྱིས་ཁྱོད་མིག་གིས་ཀྱང་མ་མཐོང་ངོ་། །དེས་མེད་ཀྱང་ཁྱོད་ཀྱིས་བསྟན་པ་ལྟར་གཞན་གྱིས་སོ། །དེའི་ཁམས་ཀྱང་གཞན་ལ་ཁྱོད་ཀྱི་ཁམས་ཀྱང་གཞན་ཡིན་པས་སླད་ནས་འདི་ལྟ་བུ་ཞིག་གྱིས་ཞེས་བསྟན་པ་ལྟར་བྱས་པས་སོས་ནས་སྨྲས་པ། ལྷ་འདི་ནི་ལྷག་པར་མཁས་པས་དབང་བསྐུར་དུ་གསོལ། དེ་ནས་གླང་པོ་ཆེ་ལ་བསྐྱོན་ཏེ་དཔལ་གྱི་འབྱོར་པ་ཆེན་པོ་ནས་སྨན་པའི་རྒྱལ་པོ་ཆེན་པོར་དབང་བསྐུར་རོ། །ཡང་རྒྱལ་པོའི་ཁབ་ན་སྨན་པ་ཕལ་གྱིས་སྤངས་པའི་སྐྲན་ནད་པ་ཞིག་ཡོད་པ་དེས་འཚོ་བྱེད་དཔྱད་མཛད་དུ་གསོལ། དེས་སྨན་འདི་ནི་རྙེད་དཀའོ་བྱས་པས་འདིས་ཀྱང་སྤངས་སོ་སྙམ་ནས་དུར་ཁྲོད་དུ་སོང་བ་དང་དེ་ན་རོ་བསྲེགས་པའི་མེ་འབར་བའི་ནང་ན་ནིའུ་ལེ་དང་སྲོག་ཆགས་གོ་དྷ་ཙནྡན་འཐབས་པ་ལྷུངས་པའི་ཤ་ཟོས་ཏེ། དུར་ཁྲོད་ཀྱི་འོད་པའི་ཆུ་འཐུངས་ནས་གནག་ལྷས་ཀྱི་ཀོ་དྲའི་ཆང་དང་མར་ཕྱུང་བའི་ཞོ་འཐུངས་པས་སྐྲན་རྡོལ་ཏེ་འཁྲུ་སྐྱུགས་བྱུང་ནས་སོས་སོ། རེ་ཞིག་ན་བཙུན་མོ་ལུས་འཕགས་མ་དེ་གོས་ཅན་གྱི་འདོམས་སུ་ཕོལ་མིག་བྱུང་བ་ལ། རྒྱལ་པོས་མ་གཡར་མའི་དཔྱད་བྱོས་ཞིག །དེས་ཟན་སླ་མོའི་ཁར་འདུག་ཏུ་(༡༩༠བ)
བཅུག་ལ་ཁུར་ཤོག་དེ་མཐོང་ནས་སྨིན་པའི་སྨན་བཏབ་སྟེ་ཟན་ལ་བཙག་བུ་བཙུགས་ནས་སྔར་བཞིན་སྡོད་དུ་བཅུག་པས་བརྡོལ་ཏེ་བསྐ་བའི་ཆུས་བཀྲུས་ནས་འཚོ་སྨན་བཏབ་པས་སོས་སོ། །རྒྱལ་པོས་དེ་ལ་དཔྱད་བྱས་སམ། ལྷ་བྱས་སོ། །གཅེར་མོར་མ་བལྟས་སམ། མ་བལྟས་ཏེ་རྒྱུ་མཚན་བཤད་པས་མགུ་ནས་ཡང་དབང་བསྐུར་ཞིག །སྐྲན་ནད་པས་སྔར་བཞིན་སྨྲས་པས། འཚོ་བྱེད་ཀྱིས་ངས་དཔྱད་ནས་མ་བྱས་སྨན་རྙེད་དཀའོ་བྱས་རྙེད་དཀའ་བ་གང་ཡིན། འཚོ་བྱེད་ཀྱིས་མར་ངོའི་ཚེས་བཅུ་བཞི་ལ་མི་སེར་སྐྱ་ཤི་བའི་རོ་དུར་ཁྲོད་དུ་བསྲེགས་པ་ལ་སོགས་སྔར་བཞིན་སྨྲས་པས་ཤིན་ཏུ་ལེགས་ཏེ་དེ་བཞིན་བགྱིས་སོ་ཞེས་མགུ་ནས་ལྷ་དེ་བཞིན་རྔོ་ཐོག་གི་དབང་བསྐུར་དུ་གསོལ། སླར་ཡང་སྔར་བཞིན་ནོ། །གང་གི་ཚེ་མ་སྐྱེས་དགྲ་ལྷས་བྱིན་གྱིས་བསྐུལ་ནས་ཕ་བསད་པའི་རྗེས་སུ་སྐྲན་ནད་ཀྱིས་ཐིབས་སོ། །སྨན་པ་ཀུན་བསགས་ཀྱང་དེ་རྣམས་ཀྱིས་རྔོ་མ་ཐོགས་ནས་འཚོ་བྱེད་ཀྱིས། གཞོན་ནུ་འཆར་བྱེད་བཟང་པོའི་ཤ་གསོལ་ནའོ། །དེས་ཁྱོད་རྒྱལ་སྲིད་འདོད་དམ། འདི་མིན་པའི་དཔྱད་མེད་དོ། །རང་ལས་འཕངས་པ་མེད་པས་ཁས་བླངས་སོ། །དེའི་ཚེ་བུ་སྦས་ནས་མི་ཤ་གཞན་བཙོས་ནས་བྱིན་པས་ཟ་བར་བརྩམས་པའི་ཚེ་འཕྲོགས་ནས་ཀླད་ལ་བརྒྱབ་སྟེ། སྔར་ཕ་བསད་དེ་བུ་ཤ་ཟ་བའི་གླེན་པ་ཞེས་སྨད་པས་མི་བཟོད་པ་སྐྱེས་པས་རྡོལ་ཏེ་འཁྲུ་སྐྱུགས་ཀྱི་སྒོ་ནས་སོས་ཤིང་བུ་གཏད་པས་ཆེས་དགའ་བས་དབང་གསུམ་པ་བསྐུར་རོ། །དེའི་ཚེ་ཁོ་བོ་དང་མཉམ་པའི་འཚོ་ཐབས་པ་མེད་སྙམ་པའི་(༡༩༡ན)
ཁེངས་པ་སྐྱེས་ནས། ལུས་ཀྱི་དཔྱད་བྱེད་པའི་མཆོག་ནི་ཁོ་བོ་ཡིན་ལ། སེམས་ཀྱི་དཔྱད་བྱེད་པའི་མཆོག་ནི་སངས་རྒྱས་ཡིན་སྙམ་སྟེ་སངས་རྒྱས་ཀྱི་སྤྱན་སྔར་སོང་ངོ་། །དེ་ཅི་ཙམ་ཉན་ཡང་བདེན་པ་མ་མཐོང་། རྒྱུ་དེ་མཁྱེན་ནས་རིའི་རྒྱལ་པོ་གངས་ཅན་ལ་སོང་ལས་སྨན་ཅི་འདོད་པ་ལོང་ཞིག །འཇིགས་སོ་ཞེས་པ་ལ་ལག་ན་རྡོ་རྗེ་དང་སྙམ་དུ་སོང་ལ་ལོང་ཞིག །དེས་དེ་བླངས་ནས་དྲུང་དུ་སླེབས་པའི་ཚེ། འཚོ་བྱེད་འདི་ཅི་ཡིན་གསུངས་པ་ལ་ཕལ་ཆེར་ཤེས་ཀྱང་གཞན་མང་རབ་ཀྱི་མིང་ཙམ་ཡང་མ་ཤེས་པ་ལ། སངས་རྒྱས་ཀྱིས་མིང་དང་ཕན་ཡོན་སོགས་གསུངས་པས་བཅོམ་ལྡན་འདས་ཀྱིས་སྨན་དཔྱད་ཀྱང་མཁྱེན་ལགས་སམ། ཞེས་ཞུས་པས་བཀའ་སྩལ་པ། འཚོ་བྱེད་སྨན་པ་ཟུག་རྔུ་འབྱིན་པ་ཡན་ལག་བཞི་དང་ལྡན་པ་ནི་རྒྱལ་པོ་ལ་འོས་པ། རྒྱལ་པོ་ལ་མཁོ་བ་རྒྱལ་པོའི་ཡན་ལག་གི་གྲངས་སུ་འགྲོའོ། །བཞི་གང་ཞེ་ན། དེ་ལ་སྨན་པ་ཟུག་རྔུ་འབྱིན་པ་ལ་མཁས་པ་ཡིན། ནད་ཀུན་ནས་སློང་བ་ལ་མཁས་པ་ཡིན། ནད་བྱུང་བ་སྤངས་པ་ལ་མཁས་པ་ཡིན། སྤང་བ་ཕྱིས་མི་འབྱུང་བ་ལ་མཁས་པ་ཡིན་ཏེ། ནད་ལ་མཁས་པ་ཅི་ལྟ་བུ་ཞེ་ན། དེ་ལ་སྨན་པ་ཟུག་རྔུ་འབྱིན་པས་ནད་ཤེས་ཤིང་། ནད་འདི་ནི་འདི་ལྟ་བུ་དང་འདི་ལྟ་བུ་ཡིན་ནོ་ཞེས་དེ་ལྟར་ནད་ལ་མཁས་པ་ཡིན་ནོ། །ནད་ཀུན་ནས་སློང་བ་ལ་མཁས་པ་ཅི་ལྟ་བུ་ཞེ་ན། དེ་ལ་སྨན་པ་ཟུག་རྔུ་འབྱིན་པས་ནད་ཤེས་ཤིང་འདི་ནི་རླུང་གིས་ཀུན་ནས་བསླང་བའམ། མཁྲིས་པས་ཀུན་ནས་(༡༩༡བ)
བསླང་བའམ། བད་ཀན་གྱིས་ཀུན་ནས་བསླང་བའམ། བདག་ལས་གྱུར་པའམ། གཞན་ལས་གྱུར་པའམ། འདུས་པ་ལས་གྱུར་པའོ། །ཞེས་དེ་ལྟར་ནད་ཀུན་ནས་སློང་བ་ལ་མཁས་པ་ཡིན་ནོ། །ནད་བྱུང་བ་སྤོང་བ་ལ་མཁས་པ་ཅི་ལྟ་བུ་ཞེ་ན། དེ་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་ནད་འདི་ནི་མིག་སྨན་ནམ། བཀུ་མཉེའམ། སྐྱུགས་སྨན་ནམ། བཀྲུ་སྨན་ནམ། སྣར་སླུག་པའམ། དུ་བས་བདུག་པའམ། ནན་རྩིའི་ལས་ཀྱིས་སྤོང་བར་འགྱུར་རོ། །ཞེས་དེ་ལྟར་བྱུང་བ་སྤོང་བ་ལ་མཁས་པ་ཡིན་ནོ། །ནད་སྤངས་པ་ཕྱིས་མི་འབྱུང་བ་ལ་མཁས་པ་ཅི་ལྟ་བུ་ཞེ་ན། དེ་ལ་སྨན་པ་ཟུག་རྔུ་འབྱིན་པ་ནད་ཤེས་ཤིང་ནད་འདི་ནི་འཕྲོད་པའི་ཆོག་འདི་ལྟ་བུ་དང་འདི་ལྟ་བུ་དག་བྱས་ཏེ་སྤངས་ན་ཕྱིས་མི་འབྱུང་ངོ་། །ཞེས་དེ་ལྟར་ནད་སྤངས་པས་ཕྱིས་མི་འབྱུང་བ་ལ་མཁས་པ་ཡིན་ནོ། །དེ་ལྟར་ན་སྨན་པ་ཟུག་རྔུ་འབྱིན་པ་ཡན་ལག་བཞི་དང་ལྡན་པ་རྒྱལ་པོ་ལ་འོས་པ་ཡིན་ནོ། །རྒྱལ་པོ་ལ་མཁོ་བ་ཡིན། རྒྱལ་པོའི་ཡན་ལག་གི་གྲངས་སུ་འགྲོ་བ་ཡིན་ནོ། །དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་རྫོགས་པའི་སངས་རྒྱས་ཡན་ལག་བཞི་དང་ལྡན་པའམ་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བྱའོ། །འཚོ་བྱེད་བཞི་གང་ཞེ་ན། དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་(༡༩༢ན)
བདེན་པའོ།། ཞེས་ཡང་དག་པར་ཇི་ལྟ་བ་བཞིན་རབ་ཏུ་མཁྱེན་ཏོ། །འཚོ་བྱེད་སྨན་པ་ཟུག་རྔུ་འབྱིན་པས་ནི་སྐྱེ་བའི་རྩ་བ་ཅན་གྱི་སྡུག་བསྔལ་རྣམས་སྤོང་བའི་སྨན་མི་ཤེས་སོ། །རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མི་བདེ་བ་འཁྲུགས་པའི་རྩ་བ་ཅན་གྱི་སྡུག་བསྔལ་རྣམས་སྤོང་བའི་སྨན་མི་ཤེས་སོ། །འཚོ་བྱེད་དེ་བཞིན་གཤེགས་པ་ནི་སྐྱེ་བའི་རྩ་བ་ཅན་གྱི་སྡུག་བསྔལ་རྣམས་སྤོང་བའི་སྨན་མཁྱེན་ནོ། །རྒ་བ་ནས་འཁྲུགས་པའི་རྩ་བ་ཅན་གྱི་བར་གྱི་སྡུག་བསྔལ་རྣམས་སྤོང་བའི་སྨན་མཁྱེན་ནོ། །དེ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་སྨན་པ་ཟུག་རྔུ་འབྱིན་པ་བླ་ན་མེད་པ་ཞེས་བྱ་བའོ། །ཞེས་པའི་ཆོས་ཀྱི་རྣམ་གྲངས་བསྟན་པ་ལས་འཚོ་བྱེད་གཞོན་ནུས་བསྐྱེད། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་འཚོ་བྱེད་གཞོན་ནུ་བསྐྱེས་ཀྱིས་ཆོས་མཐོང་བ་དང་ཐོས་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་དང་ཐེ་ཚོམ་ལས་བརྒལ་བ་དང་། གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་བ་དང་། སྟོན་པས་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ག་ལ་བ་དེར་ཐལ་མོ་སྦྱར་བ་བཏུད་དེ་འདི་སྐད་ཅེས་གསོལ་ཏོ། །བཙུན་པ་བདག་ནི་འཕགས་སོ། །མངོན་པར་འཕགས་སོ། །བཅོམ་ལྡན་འདས་དང་ཆོས་དང་དགེ་སློང་གི་དགེ་འདུན་ལ་(༡༩༢བ)
སྐྱབས་སུ་མཆིའོ། །བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ཇི་སྲིད་འཚོའི་བར་དུ་སྲོག་དང་བསྡོས་ཏེ་སྐྱབས་སུ་མཆི་ལགས་སོ་ཞེས་གསོལ་ཏོ། །དེའི་ཚེ་རིའི་རྒྱལ་པོ་གངས་ཅན་རྟག་ཏུ་ཁ་བས་གཡོགས་ཤིང་ལྷག་པ་ཆེ་བས་བཅོམ་ལྡན་འདས་གྲང་ནད་ཀྱི་བསྙུན་གྱིས་ཐེབས་པ་དང་། འཚོ་བྱེད་ཀྱིས་བསམ་པ། དཔེར་ན་འཁོར་ལོས་སྒྱུར་བའི་རྒྱལ་པོ་ལ་བྱེད་པ་བཞིན་བཅོམ་ལྡན་འདས་ཀྱི་རིམ་གྲོ་བདག་ཉིད་ཁོ་ནས་བྱའོ་སྙམ་མོ། །དེ་ནས་མེ་ཏོག་ཨུཏྤ་ལ་སུམ་ཅུ་རྩ་གཉིས་བཀྲུ་སྨན་གྱི་རྫས་དང་སྦྱར་ནས་ཕུལ་ཏེ་འདི་རྣམས་ཤངས་ཀྱི་མནམ་དུ་གསོལ། བཅོམ་ལྡན་འདས་ཀྱིས་མནམས་པ་ལས་ཐེངས་སུམ་ཅུ་རྩ་གཉིས་ཁྲུས་པར་གྱུར་ཏོ། །དེ་ནས་བཅོམ་ལྡན་འདས་ལ་ཅི་དགར་ལེགས་པར་འཁྲུས་ལགས་སམ་། བཀའ་སྩལ་པ། འཚོ་བྱེད། སྐྱོན་གང་དག་གཡོས་ལ་མ་འཁྲུས་པ་དག་ཀྱང་ཡོད། འཁྲུས་ལ་མ་གཡོས་པའང་ཡོད། འཁྲུས་ལ་གཡོས་པའང་ཡོད། མ་འཁྲུས་མ་གཡོས་པ་དག་ཀྱང་ཡོད་དོ། །གསོལ་བ་དེ་ལྟ་ན། བུ་རམ་དང་ཨ་རུ་ར་གསོལ་ལ་འཁྲུ་བའི་རིམ་པ་ཡང་མཛོད་ཅིག །དེས་དེ་བཞིན་མཛད་པས་སྙུན་དངས་པར་གྱུར་ཏོ། །འཚོ་བྱེད་ཀྱི་ཀུན་ཏུ་སྤྱོད་པ་ནི་རྒྱལ་པོའམ་བློན་པོའམ་གང་སུའི་དཔྱད་བྱས་ཀྱང་རུང་སྟེ། དེས་དེ་ལ་གྲོང་ངམ་མཆོག་སྦྱིན་པར་བྱེད་པ་ཡིན་ནོ། །དེ་ནས་ཡུལ་འཕགས་རྒྱལ་གྱི་རྒྱལ་པོ་མུ་ཁྱུད་མཐའ་ཡས་ཀྱི་བུ་རབ་སྣང་ཞེས་བྱ་བ་དབང་པོ་ལྔ་དང་ཉེ་དབང་ལྔ་དང་མཆོག་ལྔ་ལ་སོགས་པ་ཕུན་སུམ་ཚོགས་ཀྱང་ནད་དུ་གཉིད་མེད་ཅིང་(༡༩༣ན)
མར་ལ་སྡང་ལ་ཆང་ལ་དགའ་བ་ཞིག་པས། དེ་ལ་སྨན་པ་རྣམས་ཀྱིས་རྫས་ཁྱད་པར་སྣ་ཚོགས་པ་མར་དང་སྦྱར་ཏེ་བླུད་པར་བརྩམས་པའི་ཚེ་མི་མཐུང་ཞིང་། མར་གྱི་མིང་ཙམ་སྨོས་པ་དེའི་མགོ་བོ་གཅོད་པར་བྱེད་པར་གཏུམ་པོ་རབ་སྣང་ཞེས་བྱ་བར་གྲགས་སོ། །དེ་གཉིད་མེད་པས་ཐམས་ཅད་ཀྱི་རེ་མོས་སུ་མེལ་ཚེ་བགྱིད་དགོས་པ་ལ། སྤོས་ཚོང་གི་ཁྱིའུ་ཞིག་ལ་བབ་པས་བསད་དོགས་ནས་ས་འཛིན་པ་ཞིག་བརྔན་ནས་ཚབ་ལ་བཏང་། དེ་མཁས་པ་ཞིག་པས། འུག་པ་ཁྲུང་ཁྲུང་མུཉྫ་དང་། །ནག་པོ་སྲེག་པ་བུམ་པ་དང་། །ལན་ཚ་ཕྱེ་དང་ཤི་བ་དང་། །དོང་ཐགས་རྫ་མ་སྡིག་པའོ། །ཞེས་པའི་བསྡོམས་དང་མཐུན་པའི་སྒྲུང་གིས་རྒྱལ་པོ་དགའ་བར་བྱེད་དོ། །མཇུག་ཏུ་དེ་ལྟར་ཁྱོད་ཀྱིས་ཐམས་ཅད་ཤེས་ན་ང་གཉིད་མེད་པའི་རྒྱུ་མཚན་ཅི་ཡིན། མི་འཇིགས་པ་སྩོལ་ནའོ། །སྦྱིན་ནོ། །སྡིག་པ་ལས་སྐྱེས་པའི་རྒྱུ་མཚན་གྱིས་སོ། །གང་ལས་ཤེས། མངོན་སུམ་དུ་བྱའོ་ཞེས་སྨྲས་ནས། ས་དོང་དུ་བ་ལང་གི་ལྕི་བ་སྐམ་པོས་བཀང་བའི་སྟེང་དུ་རྒྱལ་པོ་བཞག་མ་ཐག་གཉིད་ལ་སོང་ངོ་། སད་ནས་དེ་ལྟར་ཡིན་པ་ཤེས་ཀྱང་ཡུམ་ལ་དྲིས་པས་མི་འཇིགས་པར་སྩོལ་ཞིག །དེ་ལྟར་བགྱིའོ་གསུངས་ཤིང་། ཁྱོད་ཀྱི་ཡབ་བཙུན་མོའི་འཁོར་ཀྱང་ཆེན་པོ་དང་ལྡན་པས། བདག་ཟླ་མཚན་དང་ལྡན་པའི་དུས་སུ་ཁྲུས་བྱེད་པའི་ཚེ་སྡིག་པ་ཞིག་མཐོང་བ་ལ་བློ་སྐྱེས་པ་ལ་དེ་ཕོ་ཞིག་པས་འདོད་པ་སྤྱད་པས་ཁྱོད་སྐྱེས་སོ། །རྒྱལ་པོས་བསམ་པ། ས་འཛིན་པ་དེ་མཁས་པ་ཞིག་པས་དེས་གཞན་ལ་སྨྲ་འོང་། མི་འཇིགས་པ་བྱིན་པས་བསད་(༡༩༣བ)
དུ་མི་རུང་ཡང་གཞན་དུ་དབྱུང་ངོ་སྙམ་ནམ་པ་ཎ་ལྔ་བརྒྱ་བྱིན་ཏེ་བསྐྲད་དོ། །དེ་ནས་ནད་དེ་གཞི་ཆེར་གྱུར་པ་ལ་སྨན་པ་རྣམས་བསགས་ནས་དཔྱད་གྱིས་ཤིག་པར་བསྒོས་ཀྱང་། དེ་རྣམས་ན་རེ། ངེད་ཅག་རྣམས་ཀྱི་རྔོ་མ་ཐོགས་ཀྱི། རྒྱལ་པོའི་ཁབ་ན་གཟུགས་ཅན་སྙིང་པོའི་བུ་སྨན་པའི་རྒྱལ་པོ་འཚོ་བྱེད་གཞོན་ནུས་གསོས་ཞེས་བྱ་བ་ཡོད་ཀྱི་དེས་རྔོ་ཐོགས་སོ། །དེས་ཡི་གེ་སྤྲིངས་ཏེ་འཚོ་བྱེད་འགྲོ་བར་བརྩམས་པ་ན། བང་ཆེན་པ་ལ་ན་ལུགས་དྲིས་ཏེ་ཆང་གི་དྲི་རོ་ཁ་དོག་ཡོད་པའི་མར་སྦྱར་ཏེ་ཁུར་ནས་ཕྱིན་ནོ། །ལམ་གྱི་ཡུལ་ཀ་ན་ཀུ་རྫར་སྨན་པའི་ཁྱེའུ་ཞིག་ཡོད་པ་དེ་དང་མཉམ་དུ་སོང་ངོ་། །སླེབ་པ་ན་བཀུར་སྟི་ཡང་དག་པས་ནང་དུ་བོས་ནས་དཔྱད་གྱིས་ཤིག་ཟེར་ཏོ། །དེ་ལ་འབྲོས་ས་གོམས་སུ་འཇུག་པའི་ཆེད་དུ་སྨན་དཀོན་པ་འཚོལ་བ་ལྟར་བྱས་ནས། ཉིན་ཞག་གཅིག་ལ་དཔག་ཚད་བརྒྱད་ཅུར་བགྲོད་པའི་གླང་མོ་བཟང་ལྡན་ལ་ཞོན་ཏེ་སྔ་ཕྱི་ཅི་རིགས་པའི་ཚུལ་གྱི་སླེབ་པར་བྱས་ནས་མཐར་སྨན་པའི་ཁྱིའུ་ལ་བརྡ་བྱས་ནས་ཁྲུས་མཛོད་ཅིག །གདུགས་ཚོད་གསོལ་ཞིག །བདག་གིས་འཁུར་བའི་སྐྱེམས་བཞེས་ཤིག་ཅེས་བྱས་ནས་བྲོས་སོ། །དེ་འཐུང་མ་ཐག་གཉིད་དུ་སོང་ནས་ནམ་ཕྱེད་ན་སད་པའི་ཚེ་མར་གྱི་སྒྲེག་པ་བྱུང་ནས་མི་དགའ་བས་གསོད་པར་བརྩམས་པ་ན་བྲོས་པར་ཤེས་ནས། འཕར་མ་པ་ཁ་ཞེས་པ་ཉིན་ཞག་གཅིག་ལ་དཔག་ཚད་ཉི་ཤུ་ཆོད་པ་དེ་ཉིན་ཞག་གཅིག་ལ་དཔག་ཚད་བརྒྱ་ཆོད་པའི་གླང་པོ་ཆེ་ལ་བསྐྱོན་ནས་ཁྲིད་ཤོག་བསྒོས་སོ། །ཟིན་ལ་ཁད་པ་ན་གླང་མོའི་ཆུ་བཏང་བའི་དྲིས་ཅུང་ཟད་ཐོགས་སོ། །དེ་ནས་(༡༩༤ན)
སྐྱུ་རུ་རའི་ཚལ་ཞིག་ཏུ་ཟིན་ནས་ཁྲིད་པར་བརྩམས་པ་ན། ཁ་ཅི་རིངས་རེ་ཞིག་སྐྱུར་རུ་ར་ཟོ་ཞིག །ལྷའི་གསུང་གིས་ཅི་བྱིན་ཀྱང་མ་ཟ་ཟེར་བས་སོ། །དེ་ལྟར་ན་ཕྱེད་ཕྱེད་ཟ་བོ་བྱས་ནས་སེན་མོ་འཁྲུ་སྨན་གྱིས་བཀང་བས་བཅད་ནས་བྱིན་པས་ཤིན་ཏུ་འཁྲུས་ནས་རི་འོར་ཞིག་ཏུ་བཞག་སྟེ། འདི་རྣམས་རྒྱལ་པོའི་མཆོག་གསུམ་ཡིན་པས་རིམ་གྲོ་འདི་དང་འདི་ལྟ་བུ་གྱིས་ལ་ཕུལ་ཞིག །གཞན་དུ་ཁྱོད་རྣམས་ཕུང་བར་འགྱུར་རོ་བྱས་ནས་རྒྱལ་པོའི་ཁབ་ཏུ་སོང་ངོ་། ཁ་དེ་མཛེ་ཅན་ཞིག་པས་སོས་ནས་ལོགས་པའི་ཚེ་རྒྱལ་པོའང་ནད་དེ་ལས་གྲོལ་ནས་དྲིས་པས། བྲོས་སོ། །མ་ལེགས། ལྷ་ཟིན་ན་ཅི་བགྱི་གསོད་དོ། །ཅི་ངེད་རང་གཉིས་ཀ་སོས་པར་བྱས་པ་མ་ཡིན་ནམ། འོ་ན་ཅི་བྱ། བྱ་དགའ་སྟེར་མོད། ལེགས་ཏེ་དེ་བཞིན་བགྱིའོ་ཞེས་བྱས་ནས་ནོར་མང་པོ་སྤྲིངས་པ་ན། འཚོ་བྱེད་ཀྱིས་ཁོ་བོ་ལ་ནོར་ཡོད་ཀྱི། སྨན་པའི་ཁྱེའུ་ལ་གནང་བའི་རིགས་སོ། །དེས་སྨན་པའི་ཁྱེའུ་ལ་བྱ་དགའ་ཆེན་པོ་བྱིན་ཞིང་། འཚོ་བྱེད་ལའང་བརྒྱ་སྟོང་རི་བའི་རས་ཡུག་པོ་ཆེ་བྱིན་ནོ། །དེའང་བཅོམ་ལྡན་འདས་ལ་ཕུལ་ནས་ཆོས་གོས་གསུམ་མཛད་དོ། །འཚོ་བྱེད་གཞོན་ནུས་གསོས་ཀྱི་སློབ་མ་ནི་དངོས་བསྟན་ཡིན་མིན་ལ་ཐེ་ཚོམ་གྱི་གཞིར་སྣང་ཡང་དེང་སང་ཡོངས་གྲགས་ལ་ངོས་འཛིན་པ་ལྟར། འཇམ་དཔལ་རྩ་རྒྱུད་ལས། དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་འབོད་འབྱུང་། །བསྟན་པ་ལ་ནི་དད་ཅིང་ཕན། །རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །(༡༩༤བ)
བདག་ཉིད་ཆེན་པོ་དེས་ཀྱང་འགྲུབ། །བསྟན་བཅོས་སྣ་ཚོགས་དོན་དང་ནི། །དངོས་པོ་མེད་པའི་དོན་དེ་རིག །གང་ཚེ་ལུས་དེ་བོར་བ་ན། བདེ་བ་ཅན་དུ་སྐྱེ་བར་འགྱུར། །དེ་ནི་མཐར་གྱི་སངས་རྒྱས་ཉིད། །ངེས་པ་ཁོ་ན་ཡང་དག་ཐོབ་ཅེས་ལུང་བསྟན་པ་ལྟར་སངས་རྒྱས་གཉིས་པ་དཔལ་མགོན་འཕགས་པ་ཀླུ་སྒྲུབ་སྤྱིར་ཇི་ལྟ་ཇི་སྙེད་ཀྱི་ཤེས་བྱའི་གནས་ཀུན་ལ་མཁས་པར་མ་ཟད་ཚེའི་རིག་བྱེད་ཀྱང་མཐར་ཕྱིན་པས་གསོ་རིག་གི་བསྟན་བཅོས་སྦྱོར་བ་བརྒྱ་པ། འཚོ་བའི་མདོ་ཚིགས་སུ་བཅད་པ། རྩ་ཨ་བའི་ཆོ་ག །སྨན་རིན་པོ་ཆེའི་རིམ་པ། དངུལ་ཆུའི་སྦྱོར་བ་རིན་ཅེན་འཕྲེང་བ་རྣམས་མཛད། དཔལ་མགོན་འཕགས་པ་ཀླུ་སྒྲུབ་ཀྱི་སློབ་མ་ནི། ཀུན་ཤེས་ལས། ལམ་འདིའི་ཤིང་རྟའི་སྲོལ་འབྱེད་ཤེས་རབ་ཅན། །ཕ་མའི་བྲན་མཛད་ཕ་ཁོལ་མ་ཁོལ་དང་། །དེ་གཉིས་ངག་བཅག་ལྷ་ཆེན་བསྒྲུབས་པ་ཡིས། །ཕ་གོལ་མ་གོལ་ཞེས་ཀྱང་མཚན་དུ་གྲགས། །ཕྱི་རོལ་རིག་བྱེད་མཁས་པའི་མཐར་སོན་པས། །མངལ་སྐྱེས་སུས་ཀྱང་མ་ཐུབ་རིག་སྨྲའི་མཆོག །རྫུས་སྐྱེས་འཕགས་པ་ལྷས་བཏུལ་སྟོན་པ་དང་། །བསྟན་ལ་དད་པའི་མཆོག་གྱུར་སྙན་ངག་པ། །ཕྱི་མོའི་དབུ་མ་པར་ངེས་དཔའ་བོ་ཡི། །ཕྱི་ནང་གཞུང་ལུགས་ཟླ་མེད་དུ་མ་བརྩམས། ཁྱད་པར་ཡན་ལག་བརྒྱད་པ་ཆེན་པོ་སོགས། །སྨན་དཔྱད་མཁས་པ་དགའ་བྱེད་བཞི་ཙམ་མཛད། །དེ་ཡི་ནང་ནས་ཡན་ལག་བརྒྱད་པ་ཡི། །སྙིང་པོ་བསྡུས་པ་ཞེས་བྱ་འདི་མཛད་ནས། ཞེས་པ་ལྟར། བདུད་རྩི་བུམ་པ། ཕ་ཁོལ་མ་ཁོལ། ཕ་གོལ་མ་གོལ། དཔལ་(༡༩༥ན)
ཆེན་དགེ་བ། རྟ་དབྱངས། དགའ་བྱེད། མ་ཏི་ཙི་ཏྲ། ཨ་ཤྭ་ཀ །ཐུབ་རྒྱལ་ནག་པོ་ཞེས་པར་གྲགས་ཤིང་ནང་པར་ཞུགས་ནས་དཀོན་ཅོག་འབངས། རབ་འབྱོར་སྐྱངས། བྷ་ཝི་ལྷ། མར་མེ་མཛད། ངོ་བོོ་གཉིས་མེད་པ། བཀོད་མ་འཛིན། བཙུན་པ་དཔའ་བོ། དགྲ་ལས་རྣམ་རྒྱལ། རྡོ་རྗེའི་མཚོན་ཆ། ལྷ་གསུམ་པ། བྷ་བ་བྷ། གཞན་ལ་ཕན་པའི་དབྱངས་ཏེ་མཚན་ཉི་ཤུ་རྩ་གཉིས་སུ་གྲགས་པའི་མཁས་མཆོག་དཔའ་བོ་ནི། འཇམ་དཔལ་རྩ་རྒྱུད་ལས། ཉམས་དགའ་གྲོང་ཁྱེར་རྒྱལ་པོའི་ཁབ། །འོད་མའི་ཚལ་གྱི་ས་སྟེང་དུ། །སློབ་མའི་ཚོགས་དང་ལྷན་ཅིག་ཏུ། །ཇི་ལྟར་བདེ་བར་ང་བཞུགས་ཚེ། །དེར་ནི་བྱ་རོག་གཅིག་ཡོད་པས། །ང་ལ་སེམས་ནི་དད་བྱས་ནས། །ལུས་ཞིག་ནས་ནི་མཐོ་རིས་སོང་། །ལྷ་རྣམས་ལས་ནི་ཤི་འཕོས་ནས། །མི་ཡི་ནང་དུ་སྐྱེས་ནས་ཀྱང་། །ང་ཡི་བསྟན་ལ་རབ་ཏུ་བྱུང་། །ཡོན་ཏན་ལྡན་ཞིང་ཚུལ་ཁྲིམས་ལྡན། །མང་དུ་ཐོས་ཤིང་ཆོས་ཀྱང་སྨྲ། །མ་ཁོལ་ཞེས་བྱའི་བརྟུལ་ཞུགས་ཅན། །དེ་ནི་དེ་ཚེ་འབྱུང་བར་གྱུར། །ང་ལ་ཇི་བཞིན་བསྟོད་པའི་མཆོད། །རྣམ་པ་སྣ་ཚོགས་དེ་དག་གིས། །ལེགས་པར་དཔྱད་ལ་རབ་བྱེད་པའོ། །བློ་ལྡན་དེ་ནི་མཐར་གྱིས་ཀྱང་། །ཐམས་ཅད་མཁྱེན་པ་བྱང་ཆུབ་ཐོབ། །ཅེས་པའི་དོན་བཞིན། ཐོག་མར་ཕྱི་རོལ་པའི་གྲུབ་མཐའ་རྒྱ་མཚོའི་མཐར་སོན་པ་རྗེས་སུ་ནང་པའི་བསྟན་པ་ལ་ཞུགས་ཏེ་སློབ་དཔོན་འཕགས་པ་ཡབ་སྲས་ཀྱི་སྲས་ཀྱི་ཐུ་བོ། གཞུང་ཕྱི་མོའི་དབུ་མ་པ། ཕྱི་ནང་གི་(༡༩༥བ)
རིག་པའི་གནས་མཐའ་དག་ལ་གཞན་དྲིང་མི་འཇོག་པའི་མཁས་པ་ཆེན་པོ་འདིས་ལས་འབྲས་ལ་སྐུར་པ་བཏབ་པའི་སྡིག་བཤགས་སུ་ཡན་ལག་བརྒྱད་པ་ཆེན་པོ། ཡན་ལག་བརྒྱད་པ་ལ་འཇུག་པ། ཡན་ལག་བརྒྱད་པའི་སྙིང་པོ་བསྡུས་པ། ཡན་ལག་བརྒྱད་པ་བསྡུས་པ་སྟེ་བཞི། ངག་གི་སྡིག་བཤགས་ལ་སྐྱེས་རབས། ཡིད་ཀྱི་སྒྲིབ་པ་སྦྱང་ཕྱིར་རྩ་ལྟུང་། གཞན་ཡང་རིག་པའི་གནས་ལྔ་གར་བསྟན་བཅོས་མང་དུ་མཛད་ཅིང་དེའི་ནང་ནས་ཡན་ལག་བརྒྱད་པའི་སྙིང་པོ་བསྡུས་པ་རྩོམ་པའི་དུས་སུ། ས་གསུམ་དགེ་ལེགས་འགྱུར་བ་ཡི། །དགེ་བའི་ལྟས་ནི་སྣ་ཚོགས་འབྱུང་། །ཞེས་གསུངས་པ་ལྟར་ས་འོག་ཀླུའི་ཡུལ་དུ་འོད་སྣ་ཚོགས་ཀྱི་ཁུག་སྣ་སྤྲིན་དུ་ཆགས་པ། དེ་ལ་བདུད་རྩིའི་ཆར་འབབ་པ། ཤིང་རྣམས་ལས་དུས་མིན་དུ་འབྲས་བུ་སྨིན་པ་གསུམ། ས་བླ་ལྷའི་ཡུལ་དུ་བ་དན་དང་རྒྱལ་མཚན་གཡོ་བ། དེ་ལས་འོད་ཟེར་འཕྲོས་ཏེ་ཕྱོགས་ཀུན་ཁྱབ་པ། མེ་ཏོག་གི་ཆར་པ་འབབ་པ་གསུམ། ས་སྟེང་མིའི་ཡུལ་དུ་ས་གཡོ་བ། ཨུཏྤ་ལའི་ཆར་འབབ་པ། དུག་གི་མེ་ཏོག་རྙིངས་པ་། གསེར་གདུགས་རང་བཞིན་གྱིས་འཁོར་བ། དུང་རྣམས་རང་སྐད་འབྱིན་པ། ཤིང་གི་བཅད་མཚམས་ནས་འོ་མ་དང་སྦྲང་རྩི་འབབ་པ། ལུས་འཕགས་ཀྱི་རྒྱལ་པོ་ནོར་འཛིན་དམུས་ལོང་ལ་མིག་བྱུང་བ། ཡུལ་དབུས་འགྱུར་འཆང་གི་ཡམས་ནད་ཆད་པ། མུ་སྟེགས་ཀྱི་མཁན་པོ་ར་ལ་པ་ཏྲ་ང་རྒྱལ་ཆག་ནས་ལྟོ་བ་ས་ལ་སྦྱར་བ། རྫ་རྔ་ལས་རིག་སྔགས་ཀྱི་སྒྲ་འབྱུང་བ། དཀོན་ཅོག་གི་རྟེན་རྣམས་མདངས་དང་ལྡན་པ། ནང་པའི་པཎྜི་ཏ་རྣམས་ཀྱིས་ཤིས་པ་(༡༩༦ན)
བརྗོད་པ་སྟེ་བཅུ་གཉིས་དང་བཅས་པ། དེ་ལྟར་ས་གསུམ་དུ་རྩོམ་པའི་རྣམ་འཕྲུལ་བཅོ་བརྒྱད་གསལ་བར་གྱུར་ཅིང་རིག་པའི་དབང་ཕྱུག་གིས། རྒྱལ་པོ་མེ་ཏོག་ཀུན་ཏུ་རྒྱས་པའི་དྲིས་ལན་དུ། ཙནྡྲ་གོ་མི་བརྗོད་པ་རྣམ་པར་དག །སྙན་ངག་དཔའ་བོ་ལས་བྱུང་སྡེབ་སྦྱོར་མཁས། །ཞེས་བསྟན་བཅོས་རྩོམ་པ་ལ་ཕུལ་དུ་བྱུང་བར་བསྔགས། ཀུན་ཤེས་ལས། ཁ་ཆེ་ཟླ་དགའ་ལ་བཤད་དེ་ཡིས་ཀྱང་། །ཟླ་ཟེར་ཞེས་བྱའི་རྒྱ་ཆེར་འགྲེལ་པ་མཛད། །ཅེས་བྱུང་བ་ལྟར། དེའི་སློབ་མ་ཁ་ཆེ་ཟླ་བ་མངོན་དགའ་ཡིན་པར་གསོ་རིག་ཆོས་འབྱུང་དུ་མ་དང་བརྒྱུད་འདེབས་གསན་ཡིག་མང་པོར་བྱུང་ལ། སྒྲ་སྦྱོར་ངེས་པར། ཆགས་ལ་མངོན་པར་དགའ་བའི་བུ། །ཟླ་བ་མངོན་དགའ་ཞེས་བྱ་བས། །ཞེས་དང་། ཟླ་ཟེར་དུ། བདག་གི་མེས་པོར་གྱུར་པ་ནི། །དཔལ་ཆེན་དགེ་བ་ཞེས་གྲགས་ཡིན། །དེ་ནི་ད་ལྟའང་ས་གསུམ་ན། །གྲགས་པ་དྲི་མེད་སྒྲག་པར་བྱེད། །དེ་སྲས་ཆགས་པ་མངོན་པར་དགའ། །དེའི་བུ་ཟླ་བ་མངོན་དགའ་བདག །སློབ་དཔོན་བློ་གྲོས་ཆེན་པོ་ནི། །རྒྱུད་ཤེས་དོན་ལྡན་མིང་བཏགས་ལ། །དོན་དམ་ཞེས་བྱ་སྨན་པའི་མཆོག །ཁ་ཆེའི་ཡུལ་དུ་སྐྱེས་པ་ཡིན། །ཞེས་དཔལ་ཆེན་དགེ་བ་སློབ་དཔོན་དཔའ་བོ་དང་། དེའི་སྲས་ཆགས་པ་མངོན་དགའ། །དེའི་སྲས་ཁ་ཆེ་ཟླ་མངོན་ཡིན་ཀྱང་དུས་བསྒྲིགས་ན་ཡབ་ཀྱི་ཞབས་ལ་མ་ཐུག་པའི་ཉེས་པ་མི་འཇུག་ཅིང་ཡང་ན་མེས་དབོན་གྱི་བར་དུ་ཆགས་པ་མངོན་དགའ་དགོས་པ་བརྒྱུད་ཡིག་ཏུ་མ་ཆད་པའི་ངེས་པ་མི་སྣང་ཞིང་མེས་ཀྱི་ཡན་ལག་(༡༩༦བ)
བརྒྱད་པ་ཆེན་པོ། དེ་ལ་འཇུག་པ། བསྡུས་པ་རྣམས་དང་། ཙ་ར་ཀ་འབུམ་སྡེ་སོགས་གསོ་རིག་གི་གཙུག་ལག་མཐའ་ཀླས་པར་བརྟེན་ཅིང་། རང་ཉིད་ཀྱིས་རྣམ་པར་དཔྱོད་པའི་རིག་ལམ་ནས་དྲངས་ཏེ་སྙིང་པོ་བསྡུས་པ་རྒྱས་པར་འགྲེལ་བར་ཚིག་དོན་ཟླ་ཟེར། དེའི་སྨན་མིང་ཟུར་དུ་བཀོད་པར་ཚིག་དོན་སྒྲ་སྦྱོར་ངེས་པ་སོགས་མཛད་དེ་འཕགས་ཡུལ་གྱི་རིག་བྱེད་འཛིན་པ་རྣམས་ཀྱི་གཙུག་གི་ནོར་བུ་ལྟ་བུར་གྱུར། འཕགས་ཡུལ་མ་ཟད་གངས་རིས་བསྐོར་པའི་ལྗོངས་འདིར་ཡང་མངའ་བདག་ཆོས་སྐྱོང་བ་ཁྲི་སྲོང་ལྡེ་བཙན་གྱི་སྐུ་རིང་ལ་མཐའ་བཞིའི་སྨན་པ་རྣམས་བཀུག་ནས་གསོ་བ་རིག་པའི་གཞུང་ལུགས་རྒྱས་པར་སྤེལ་ཞིང་ཁྱད་པར་ཁ་ཆེའི་པཎྜི་ཏ་ཟླ་བ་མངོན་དགའ་དང་སྐད་གཉིས་སྨྲ་བའི་དབང་པོ་ལོ་ཆེན་བཻ་རོ་ཙ་ན་གཉིས་ཀྱིས་བསྒྱུར་ཏེ་གཏན་ལ་ཕབ། དུས་དེར་གསོ་བ་རིག་པའི་གཞུང་གཞན་མང་ཞིང་དར་ཆེ་བས་མ་འོངས་སྙིགས་མའི་དོན་དུ་ཡོན་མཆོད་རྣམས་བཀའ་བགྲོས་ཏེ་བསམ་ཡས་བར་ཁང་གི་ཀ་གཞུ་ལ་གཏེར་དུ་སྦས། ཨྱོན་ཆེན་པོ་པདྨ་ཐོད་འཕྲེང་གིས་ཞང་བློན་རྡོ་རྗེ་བདུད་འདུལ་ལ་ཆོས་སྐྱོང་དང་གནོད་སྦྱིན་ཤིང་བྱ་ཅན་ལ་གཏེར་གྱི་སྲུང་མར་བཀའ་བསྐོས། དེ་ནས་མི་ལོ་བརྒྱ་དང་ལྔ་བཅུར་ཉེ་བ་ན་དགེ་བཤེས་གྲ་པ་མངོན་ཤེས་ཀྱིས་གཏེར་ནས་སྤྱན་དྲངས། དེས་རོག་གི་བནྡེ་དཀོན་ཅོག་སྐྱབས་ལ་ཆིག་བརྒྱུད་ཀྱི་ཚུལ་དུ་གནང་། དེས་གཡུ་ཐོག་པ་ཆེན་པོ་ཡོན་ཏན་མགོན་པོ་ལ་གསུངས་པ་ནས་རྒྱ་ཆེར་འཕེལ་བར་གྲགས། མཁས་པ་དང་མི་མཁས་པ་མང་དག་བོད་མར་འདོད་པའི་ལུང་རིགས་ཕྱོགས་རེ་ཙམ་(༡༩༧ན)
ལ་བརྟེན་ནས་བསྒྲུབ་པའི་འདོད་པ་གཙོར་བཏོན་ལ་མཐའ་གཅིག་ཏུ་ངེས་བཟུང་དཀའ་ཡང་། ཀུན་ཤེས་ལས། དེ་ནས་ལེགས་བརྒྱུད་ལོ་ཆེན་སྐྱེས་བུ་མཆོག །རིན་ཅེན་བཟང་པོས་བསྒྱུར་བཤད་གཏན་ལ་ཕབ། །མཁས་པ་དུ་མར་སྤེལ་ནས་བོད་ཡུལ་དུ། །རྒྱ་ཆེར་སྤེལ་ལས་བོད་ཀྱི་ཤིང་རྟ་ཆེ། །གཡུ་ཐོག་སོགས་ཀྱིས་རྒྱུད་བཞིར་གྲགས་པ་སྤེལ། །ཞེས་བྱུང་བ། འཇིག་རྟེན་གྱི་མིག་གཅིག་པུ་སྟག་ཚང་ལོ་ཆེན་འདི་ལུང་རིགས་ཀྱི་དཔྱད་པ་ཤིན་ཏུ་བཟོད་ཅིང་དེས་མཛད་པའི་སྨན་དཔྱད་སྤྱིའི་རྣམ་བཞག་ཕྱོགས་གཅིག་ཏུ་བསྡུས་པའི་གཞུང་མཁས་པའི་ཡིད་འཕྲོག་དང་ལག་ལེན་གཅེས་བསྡུས་རེག་པས་ནད་སེལ་ཞེས་བྱ་བ་མཁས་རློམ་གཞན་ལས་ཁྱད་ཞུགས་པའི་ལེགས་བཤད་ཅིག་སྣང་བས་རྒོལ་བར་ག་ལ་སྤོབས། དེ་ལྟ་ནའང་ཕྱོགས་འདི་གའི་རང་སྐད་གཙོར་བཏོན་ལ་བླ་མ་གསང་འདུས་སོགས་གུ་རུ་ཞི་དྲག་གི་དཀྱིལ་འཁོར་གྱི་གཙོ་བོར་སློབ་དཔོན་ཆེན་པོ་ཉིད་རིགས་ཀྱི་བདག་པོའི་རྣམ་པར་བཞེངས་ནས་གསུངས་པ་དང་། བཀའ་གདམས་ཐིག་ལེ་བཅུ་དྲུག་ཇོ་བོ་ཡབ་སྲས་ཀྱི་ཡེ་ཤེས་སྒྱུ་དྲའི་རོལ་གར་ལས་ཤར་ནའང་དོན་གྱི་བརྒྱུད་པ་རྡོ་རྗེ་འཆང་ནས་རིམ་པར་བྱུང་བ་ལྟར་རྗེ་གཡུ་ཐོག་པ་རིགས་འདུས་སྨན་པའི་བདག་པོའི་དཀྱིལ་འཁོར་གྱི་གཙོ་བོར་བཞེངས་ནས་སྙིང་ཐིག་གི་ཆོས་སྐོར་རྣམས་གསུངས་ཤིང་སྤྲུལ་པའི་གྲོང་ཁྱེར་ཆེན་པོར་སྨན་པའི་རྒྱལ་པོའི་རྣམ་པས་རྒྱུད་གསུངས་པར་ཁས་བླངས་ཀྱང་དོན་རྒྱུད་གོང་མ་རྣམས་འབྱུང་བར་གོར་མ་ཆག་ཅིང་རྗེ་བཙུན་གཡུ་ཐོག་པ་སྨན་པའི་རྒྱལ་པོར་གཏིང་(༡༩༧བ)
ནས་ངེས་པ་རྙེད་པའི་གང་ཟག་ཚོར་དོན་ལ་ཁྱད་པར་མེད་པར་སེམས་སོ། །དེ་ལྟར་པུར་རྒྱལ་གྱི་ཡུལ་ཁམས་འདིར་འཇིག་རྟེན་མིག་གཅིག་པུ་ལོ་ཆེན་རིན་ཅེན་བཟང་པོས་བསྒྱུར་བ་ཡན་ལག་བརྒྱད་པའི་སྙིང་པོ་བསྡུས་པ་དང་སྔོན་ཆོས་རྒྱལ་གྱི་དུས་མཐའ་བཞིའི་སྨན་པས་གཏན་ལ་ཕབ་པ་རྣམས་དཔེ་དང་མིང་ཙམ་དུ་ལུས་ནའང་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་དུ་གྲགས་པ་རྩ་བཤད་མན་ངག་ཕྱི་མ་སྟེ་རྒྱུད་བཞི། ཆ་ལག་བཅོ་བརྒྱད། གཞན་ཡང་བྲང་ཏི། བྱང་པ་རིགས་ལྡན་ཆེན་པོ། ཟུར་མཁར་བ་ཁུ་དབོན་སོགས་མཁས་པ་མང་པོས་མཛད་པའི་འགྲེལ་བཤད། མན་ངག་གཅེས་སོ་འཚལ་ཕྱོགས་གཅིག་ཏུ་བསྒྲིགས་པའི་བེའུ་བུམ། བདུད་རྩིའི་བུམ་པ་སོགས་གཏེར་ཁ་སྣ་ཚོགས་པའི་མན་ངག་རྣམས་ཀྱང་གལ་ཆུང་ཆོས་སུ་བྱེད་པའི་དུས་ཀྱི་བསྐལ་པས་ནམ་མཇུག་སྡུད་ཀའི་ཆུ་ཕྲན་ལྟར་ཇེ་ཕྲར་གྱུར་པའི་དུས་འདིར་གསར་བྱུང་གི་གཙུག་ལག་གྲོག་མཁར་དང་སྦྲང་མའི་སྦྲང་རྩི་ལྟ་བུ་ལ་རྣམ་པ་གཅིག་ཏུ་དགོས་པ་མེད་པ་འདྲ་ཞིག་མཆིས་ཀྱང་། ལེགས་བཤད་རིན་པོ་ཆེའི་གཏེར་ལས། །རིག་པ་ནང་པར་འཆི་ཡང་བསླབ། །ཚེ་འདིར་མཁས་པར་མ་གྱུར་ཀྱང་། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་པ་འདྲ། །ཡོན་ཏན་ལྡན་ན་སྐྱེ་བོ་ཀུན། །མ་བསྡུས་པར་ཡང་དེ་ཉིད་འདུ། །དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འཁོར། །མཁས་པ་ཡོན་ཏན་ཀུན་བསླབ་པ། །མཐར་ཕྱིན་གཅིག་གིས་འཇིག་རྟེན་གསལ། །བློ་ངན་(༡༩༨ན)
ཤེས་པ་མང་ན་ཡང་། །རྒྱུ་སྐར་བཞིན་དུ་གསལ་མི་ནུས། །མཁས་པ་ཡོན་ཏན་དཔག་མེད་ཀྱང་། །གཞན་གྱི་ཡོན་ཏན་ཆུང་ངུ་ལེན། །དེ་ལྟར་རྒྱུན་དུ་སྤྱད་པ་ཡིས། །མྱུར་དུ་ཐམས་ཅད་མཁྱེན་པར་འགྲོ། །ཞེས་པ་ལྟར་རིག་པའི་གནས་རྣམས་ལ་ཐོས་བསམ་བགྱིས་པས་འདི་ཕྱི་ཀུན་ཏུ་རང་གཞན་གྱི་དོན་རྒྱ་ཆེན་པོར་འགྱུར་བའི་ཕྱིར་ན་དུས་ངན་སྐྱེ་བོའི་ངང་ཚུལ་ལ་སྒྱིད་མ་ལུག་པར་སྔོན་བྱོན་དམ་པའི་རྣམ་ཐར་གྱིས་ཡིད་དྲངས་པར་མ་ཟད། མཁས་པའི་དབང་པོ་དཔང་ལོ་ཆེན་པོས། དིང་སང་བསྟན་པ་ཉམས་དམའ་བས། །འདི་འདྲའི་ཚུལ་ལ་མཐུན་འཇུག་དང་། །འཇུག་པ་ཤིན་ཏུ་དཀོན་མོད་ཀྱི། །ཤེས་ན་མཁས་པའི་གོ་འཕང་ཐོབ། །གང་ཞིག་མཁས་པར་བྱ་འདོད་ཀྱི། །གང་ཞིག་མཁས་པར་བྱེད་འདོད་ན། །འདི་དང་འདི་འདྲ་ཚུལ་མི་སློབ། །དེ་དག་བློ་ནི་བེམ་པོའམ་ཅི། །ཞེས་པ་ལྟར། ལ་ལ་དག་རང་ཉིད་བློ་གྲོས་རྨོངས་པའི་སྒྲིབ་གཡོགས་སུ་ནང་རིག་པ་ལ་ཐོས་བསམ་བྱར་ཡོད་བཞིན་དུ་ཐ་སྙད་ཀྱི་རིག་པ་རྣམས་ལ་དགོས་པ་མེད་པ་སྐད་དུ་ཟོག་རྫུ་འུག་པ་སྤྲོས་པ་ལྟར་འགྱིད་ནའང་། ཇི་སྐད་དུ། །སྨན་པས་ཟས་སུ་སྒྲོ་བཏགས་ནས། །སྨན་གྱིས་ནད་ཆེན་གསོ་བ་ལྟར། །འཇིག་རྟེན་ལུགས་ཀྱི་རྗེས་འབྲངས་ནས། །བདག་གིས་དམ་པའི་ཚུལ་འདི་བཤད། །ཅེས་པ་ལྟར། ཕྱི་ནང་མཐུན་མོང་བའི་གཙུག་ལག་རྣམས་ཀྱང་རང་ཉིད་གནས་སྐབས་སུ་མཁས་པར་གྱུར་པ་ཙམ་དུ་མ་ཟད་ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཀྱིས་རྩིས་ཟིན་ན་བླ་ན་མེད་པའི་བྱང་ཆུབ་མངོན་དུ་བྱས་(༡༩༨བ)
ནས་དེའི་གྲིབ་བསིལ་དུ་སེམས་ཅན་ཐམས་ཅད་མངོན་མཐོ་དང་ངེས་ལེགས་ཀྱི་ལམ་ལ་ཅི་དགར་ལོངས་སྤྱོད་པས་ན། ཇི་སྐད་དུ། དེ་ཉིད་གཟིགས་པ་དངར་དང་རབ་ཏུ་རྒྱས་པའི་འཁྲི་ཤིང་ཀུན་དགའི་དཔྱིད། །ཡ་མཚན་ཡལ་ག་སྟོང་གིས་དྲེས་པའི་ཡོན་ཏན་སྐལ་པ་བཟང་པོའི་མཐའ། །རྒྱལ་བ་རྣམས་ཀྱིས་སྤོང་བ་མིན་པའི་གནས་ལ་བྱང་ཆུབ་གྲིབ་བསིལ་བ། །རིགས་ཚོགས་ཁ་བའི་འཛུམ་ལྡན་གངྒཱའི་དཔལ་མོ་སྤྲོ་བའི་རྒྱུན་འཛིན་སྙིང་གི་དཔལ། །ཞེས་གསུངས་པ་ལྟར་རོ། །དེ་ཡང་སྔར་སྨོས་པའི་ཕྱི་ནང་དྲང་སྲོང་གི་ཚེའི་རིག་བྱེད་རྒྱ་མཚོ་ལྟ་བུའི་ནང་ནས་མང་དག་ཡུལ་དབུས་འགྱུར་འཆང་དུ་གཙུག་ལག་གཉིས་པ་ཤེས་པའི་མཁས་མང་ལ་བརྟེན་ནས་དར་རྒྱས་སུ་ཡོད་པའི་སྨན་དཔྱད་ལ་མཁས་པ་ཁ་བ་ཅན་གྱི་ལྗོངས་འདིར་དུ་མ་ཞིག་འོངས་ཚོད་དུ་འདུག་རུང་པཎྜི་ཏ་སྨྲྀ་ཏི་ཕན་ཚུན་སྐད་ཀྱི་བརྡ་མ་འཕྲོད་པས་རྟ་ནག་ཏུ་ལུག་རྫི་མཛད་པའི་ལོ་རྒྱུས་ལྟར་ཅི་ཡིན་ཆ་མ་འཚལ་བར་རང་ཡུལ་དུ་ཕྱིར་ལྡོག་སྟེ་གཞན་ཕན་གྱི་འཕྲིན་ལས་མ་བྱུང་བ་དང་། ལ་ལས་ཚེའི་རིག་བྱེད་ཤེས་པའི་རྣ་ཐོས་ཙམ་གོ་ཡང་བོད་ཀྱི་གསོ་རིག་པས་ཆོག་ཤེས་ནས། ལེགས་བཤད་རིན་པོ་ཆེར། ཙནྡན་གསེར་ལས་རིན་ཆེ་བ། །བླུན་པོས་སོལ་བར་བྱས་ལ་ལྟོས། །ཞེས་པ་ལྟར་ཤེས་བཞིན་ཁྱད་གསོད་ཀྱིས་དོར་བའམ་མཆིས་རུང་རབ་བྱུང་བཅུ་གཅིག་པའི་ཤིང་འབྲུག་གི་ལོར་ཤཱཀྱ་མུ་ནེའི་ཕོ་བྲང་ཆེན་པོའི་མདུན་ཕྱོགས་རྒྱ་གར་བའི་མི་རིགས་དུ་མ་ཚོགས་ཁྲོད་དུ་སྨན་པ་མཁས་པ་ཞིག་ཡོད་དམ་ཟེར་བའི་གཏམ་ཐོས་པས་རྐྱེན་བྱས་འདར་པ་ལོ་ཆེན་དྲི་མལ་བྱེད་དུ་བཅུག་པ་འཕགས་ཡུལ་(༡༩༩ན)
ནུབ་ཕྱོགས་མ་ཧཽ་རའི་སའི་ཆར་བྲམ་ཟེ་གཙང་མའི་རིགས་སུ་སྐྱེས་པ་སིནྱ་སི་གོ་ད་ར་རཉྪོ་ར་སྟེ་ཁྱིམ་སྤངས་ས་སྤྱོད་ཅེས་བྱ་བས་རྒྱ་གར་དབུས། ཤར་ནུབ་ལྷོ་བྱང་། ནཻ་པཱ་ལ་དང་བཅས་པ་ཆུ་བཞིན་མྱུལ་ནས་སློབ་དཔོན་གོ་ཏ་མབྷརྠི། ཨུཏྟ་མ་གི་རི། ཨུ་ཀཱ་ར་བྷཪྠིསོགས་གུས་པས་བསྟེན་པའི་མཁས་པ་ཆེན་པོར་རྟོགས་ཏེ་འདར་པ་པཎ་ཆེན་གྱིས་ལོ་ཙཱ་བགྱིས་དར་མོ་སྨན་རམས་པ་བསླབ་ཏུ་བཅུག་པར་གསོ་རིག་གི་ལག་ལེན་ངོ་མཚར་བ་དུ་མ་བྱུང་རུང་ཕྱོགས་འདི་མི་རྙེད་པའི་སྨན་གྱི་རིགས་འཚོལ་བར་རྒྱ་བལ་ཕྱོགས་སུ་ཕྱིར་བཏེག་བལ་པོ་ཡམ་བུའི་རྒྱལ་བློན་ལ་རོགས་དན་དགོས་ཚུལ་གྱི་སྡེ་པའི་ཧུང་རྒྱའི་མཚམས་སྦྱོར་སོང་བ་ལ་བརྟེན་སྨན་གྱི་རིགས་རྣམ་གྲངས་ཤིན་ཏུ་མང་བ་བཅས་མེ་མོ་སྦྲུལ་ལོའི་དབྱར་འབྱོར་བའི་རྒྱ་བལ་གྱི་སློབ་དཔོན་མཁས་པ་རྣམས་ཀྱི་ཞལ་གྱི་བདུད་རྩི་ལས་འོངས་པའི་ཚེའི་རིག་བྱེད་ཀྱི་མན་ངག་གནད་ཀྱི་སྙིང་པོ་བསྡུས་པ་འདི་ཉིད། མི་ཆོས་གནད་འཕྲེང་ལས། སྔོན་དུས་བོད་འདི་སྲིན་པོའི་རྒྱལ་ཁམས་འདྲ། །དིང་སང་དུས་སུ་རྒྱ་གར་འཕགས་ཡུལ་འདྲ། །བསམས་ཀྱིན་ལོ་ཙཱ་བོད་ལ་བཀའ་དྲིན་ཆེ། །ཞེས་དང་། ས་པཎྜི་ཏས། །བདེ་བར་གཤེགས་པའི་གཞུང་ལུགས་བླ་ན་མེད། །ཞུ་མཆན་སྒྱུར་བྱེད་མཆན་བུའི་གནས་ཐོབ་པ། །སྐད་གཉིས་སྨྲ་མཁས་ལོ་ཙཱ་དེ་དག་ནི། །དེ་དག་བདག་ཅག་རྣམས་ཀྱི་མིག་བཞིན་གྱུར། །ཞེས་གསུངས་པ་ལྟར། པཱ་ཎི་བྱཱ་ཀ་ར་ཎ་སོགས་སྒྲ་མདོ་ཆེན་པོ་བཞི་ལ་བློ་གྲོས་ཀྱི་ལང་ཚོ་མཆོག་ཏུ་རྒྱས་པ་སེ་(༡༩༩བ)
དཀར་རིགས་ཀྱི་ཐིག་ལེ་འདར་པ་ལོ་ཙཱ་ངག་དབང་ཕུན་ཚོགས་ལྷུན་གྲུབ་ཀྱིས་ཞུ་ཆེན་དང་གསོ་བ་རིག་པའི་གཞུང་ལུགས་ལ་སློབ་དཔོན་མཁས་པ་བཅུ་ཕྲག་ཙམ་བསྟེན་ནས་སྦྱངས་པའི་ཡར་སྟོད་དར་མོ་སྨན་རམས་པ་བློ་བཟང་ཆོས་གྲགས་ཀྱིས་འབད་པ་ཆེན་པོས་གཏན་ལ་ཕབ་པའི་པུ་སྟ་ཀ་འདི་ཉིད་ཀྱི་ཐོག་མར་ནད་ཀྱི་མཚན་ཉིད་བསྟན་པ། རྩའི་སྒོ་ནས་ངོས་བཟུང་སྟེ་གཏན་ལ་འབེབས་པ། དངུལ་ཆུ་བཙོ་བཀྲུ། གསེར། ཞ་ཉེ་དཀར་ནག །ཏི་ཚ། ཟངས། ལྕགས་རྣམས་འདུལ་ལུགས་དང་། དེ་དག་ལ་བརྟེན་པའི་སྦྱོར་བ། རླུང་མཁྲིས་བད་ཀན། ནད་གློ་བུར་བ་རྣམས་སོ་སོར་གཏོང་རྒྱུའི་ཐད། ཟླ་བའི་དུས་དང་སྦྱར་ནས་སྦྱོངས་གཏོང་ལུགས། མུ་ས་ལི། རིམས་འཕྲོག་ལྕགས་ཀྱུ། གོ་ཡུའི་བཅུད་ལེན་གྱིས་མཚོན་སྤྱི་འཇོམས་དང་སྒོས་སྨན་སོགས་ཤིན་ཏུ་གཅེས་པའི་སྦྱོར་སྡེ་དང་ཁ་བསྒྱུར་བསྡོམས་པ་སུམ་བརྒྱ་ལྷག་བཅས། འཁོར་ལོ་དང་སྔགས་ལ་བརྟེན་པ་བཅུ་ཕྲག་ལྔ་བརྒལ་བ། མེ་བཙའི་སྐོར་ཀརྐོ་ཊའི་བཅུད་ལེན་ལ་བརྟེན་པའི་ཚེ་ཉི་ཟླ་དང་མཉམ་ཞིང་ལུས་རྡོ་རྗེ་ལྟར་བརྟེན་པ་རྣམས་ཀྱི་ཕྱག་ལེན་མན་ངག་མཐའ་དག་ཉམས་འོག་ཏུ་ཆུད་པའི་ཐོས་བསམ་གྱི་མཐུ་ལ་བརྟེན་ནས་འགྲོ་བ་མང་པོ་བཟོད་དཀའ་ཟུག་རྔུའི་འཕྲང་ལས་རྣམ་པར་གྲོལ་ཏེ་བདེ་ཞིང་སྐྱིད་པའི་དཔལ་ལ་སྦྱོར་བར་གདོན་མི་ཟའོ། །ཆུ་གཏེར་སླར་ཡང་མ་བསྲུབས་སྔོན་མེད་པའི། །རིག་བྱེད་བདུད་རྩིའི་བུམ་པ་ཐོབ་པའི་ཚེ། །མེས་པོས་དྲན་པའི་གསོ་དཔྱད་དབྱར་སྐྱེས་ཀྱི། །རྔ་བསངས་དེ་ལ་མོས་པ་ཅུང་ཟད་ལྷོད། །ཏེ་སེའི་མདངས་ལྟར་རབ་དཀར་ལྷག་པའི་ཡིད། །(༢༠༠ན)
ལུས་ཅན་ཚོགས་ལ་རྗེས་ཆགས་ཀུནྡའི་ཚལ། །འཛུམ་པའི་ཆོ་ག་གཏོང་མིན་སེམས་བསྐྱེད་ཀྱི། །བསིལ་སྦྱིན་མཁན་པོའི་ཆ་ཤས་ཉེ་བར་གང་། །ཕྱོགས་བརྒྱར་གཟེགས་མ་འཐོར་བ་ཀཏྤུ་རའི། །ངད་པ་ཚ་གདུང་གཅིལ་ལ་མཚར་འཛིན་པ། །ཡོངས་གྲུབ་བརྒྱ་དང་རྩ་གཅིག་བྲོ་ནད་གཉེན། །སྨན་གྱི་དཔག་བསམ་འཁྲི་ཤིང་འདི་སུས་བསྐྲུན། །རིས་སུ་མ་ཆད་འགྲོ་ལ་འཇིགས་བྲལ་བའི། །སྦྱིན་པའི་ཕ་རོལ་ཕྱིན་རྫོགས་རྒྱལ་སྲས་ཀྱི། །རླབས་ཆེན་སྤྱོད་ལ་འཇུག་རྣམས་སངས་རྒྱས་ཞེས། །གྲགས་ཅན་བགྲོད་དཀའི་ས་དེ་མི་རིང་སྙམ། །བཟོད་མིན་ཚོར་བ་དྲག་པོའི་ནད་གདོན་དང་། །དེ་རྒྱུ་སྒྲིབ་གཉིས་ལུས་པ་མེད་བཅས་པ། །འཇོམས་པའི་སྨན་པ་ཆེ་མཆོག་རྫོགས་སངས་རྒྱས། །འགྲུབ་པའི་སྐལ་བ་བཟང་པོར་བདག་གྱུར་ཤོག །ཙནྡན་འབྱུག་དང་སྟེའུས་རྡེག་པ་ལ། །སྙོམས་པར་ཞལ་འཆེས་ཐུགས་རྗེ་སྙིགས་དུས་འདིར། །བསྐུལ་ན་འཇིག་རྟེན་གསུམ་གྱི་དུཿཁ་རྣམས། །མཁྱེན་བརྩེ་ནུས་པས་ཕ་མཐའ་མཛད་དུ་གསོལ། །འགྲོ་མང་སྲོག་ཟུངས་བཅུད་ལེན་བདུད་རྩིའི་གཏེར། །མྱངས་པའི་འབྲས་བུ་ནམ་མཁས་གཞལ་དཀའ་བའི། །དགེ་ཚོགས་མ་ལུས་མཐའ་བྲལ་སེམས་ཅན་ཀུན། །བླ་མེད་བྱང་ཆུབ་ཐོབ་པའི་རྒྱུ་རུ་བསྔོ། །ཞེས་ཚེའི་རིག་བྱེད་མཐའ་དག་གི་སྙིང་པོ་བསྡུས་པའི་གླེགས་བམ་གྱི་ཆེ་བརྗོད་སྨོན་ལམ་གྱི་རིམ་པ་འདི་ནི་ཟ་ཧོར་གྱི་བནྡེ་ཚངས་སྲས་བཞད་པའི་རྡོ་རྗེས་དམར་སེར་ཅན་གྱི་ལོ་ཁྲུམས་ཀྱི་ཟླ་བའི་དཀར་ཆའི་རྒྱལ་བ་དང་པོའི་ཚེས་ལ་རྒྱལ་ཁབ་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བགྱིས་པ་ཛ་ཡནྟུ། ཉན་བྲན་གྲོང་སྨད་པའི་གཞིས་ཀ་མཚོ་སྨད་ཁང་གསར་དང་སྨོན་གྲོང་གཉིས་(༢༠༠བ)
ཀྱི་བོགས་ཤས་ཀྱི་དེབ་ཐེར་འགོ་བརྗོད་ཕུན་ཚོགས་འདོད་འཇོ། (སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།) མཉྫུམཱཏྤཱུཏྤལཱངྒུཤྱཧོཧོཏྲིལོཀཱནུཔཱཀཪྵྱལཀྵྨཻཥྚཀཱནྡྷཻནབཿ སཽ་མི་རེཀོཙྩསཱ་མཱརྒཧཱིཏེཥྭཏིཥྱཻཀུཊཱབྡྷིབྷགྷཱལཱུཤྩགོཀྲྀཏྶུརཿ །འཇམ་མཉེན་ཨུཏྤལ་ལྕགས་ཀྱུས་འཇིག་རྟེན་གསུམ། །ཉེར་བཀུག་ཕུན་ཚོགས་འདོད་དགུ་འཇོ་བའི་འབྲས། །ལྷུན་པོའི་སྤོ་དང་མཉམ་པའི་ཕྱུར་བུ་རུ། །ཆེས་ཆེར་སྤུངས་ཤིག་བཅོམ་ལྡན་རིག་བྱེད་ལྷ། །གསེར་སྦྱངས་རི་བོ་ལྟར་བརྗིད་ཛམ་བྷ་ལའི། །ཕྱག་གི་ནིའུ་ལེས་རབ་སྐྱུགས་ཡིད་བཞིན་གཏེར། །ནོར་རྒྱུན་སྒེག་མོའི་སྙེ་མ་ལས་འོངས་པའི། །བགྲང་ཡས་འབྲུ་ཡིས་དབྱིག་འཛིན་ལྕི་བར་མཛོད། །ཚངས་རིས་སྲིད་གསུམ་མགོན་གྱུར་དྲི་ཟའི་རྒྱལ། །རྒྱས་པའི་ལས་ཀུན་བསྒྲུབས་པ་འབར་བ་རྩལ། །འཇིག་རྟེན་ཀུན་གྱི་མཁོ་དགུའི་དཔལ་འབྱོར་རྣམས། །རང་གིར་དབང་དུ་བྱེད་པར་མཐུ་དཔུང་བསྐྱེད། །བསམ་དོན་ལྷུན་གྲུབ་བཀྲ་ཤིས་གཡང་ཆགས་ཁང་། །བྲེ་འབོར་འཇལ་(༢༠༡ན)
བ་སྟོན་ཀའི་རྩེ་འཇོ་ལ། །ཀུན་དགའ་ཁོང་ན་རྒོད་པ་གསར་པའི་མགྲོན། །འཆི་མེད་ཡུལ་གྱི་འབྱོར་བར་ཅོ་འདྲི་ཞིང་། །གང་ལ་མངའ་སྒྱུར་ས་ཡི་དྲུག་ཆའི་ཁྲལ། །རྗེ་འབངས་སོ་སོར་དྲང་པོའི་ཐིག་འདེབས་པ། །འགྱུར་མེད་ཡི་གེའི་འཕྲེང་བར་ཡོངས་སྤེལ་བ། །དེབ་ཐེར་མེ་ལོང་གདོང་གི་རྣམ་ཐར་བཞིན། །ཞེས་ཤིས་པ་བརྗོད་པས་སྔུན་བསུས་ཏེ་དམར་སེར་ཅན་ཞེས་པ་མེ་སྦྲུལ་གྱི་ལོ་སྟོད་ལུང་མཚོ་སྨད་ཁང་གསར་དང་སྨོན་གྲོང་གི་བོགས་དེབ་གསར་སྒྲིགས་བཀོད་པ་ལ། (སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།) མཱནསཾཧཱརརཏྣཱཙྩསིདྡྷཻརྦིམཱནཏྲིཀཱུཊྚནསཽཛསྦུརཱཔཪྤཏཿ ཤཱཏསཱུཪྻསྱབཱསྟྲེཎཧིཔྲཱབིབྷཱུཥིཊབཻཤྲཱམཱཎཻརྦྷཱུཏིབྷཪྵཏྷཏུ།ཡིད་འཕྲོག་རིན་ཅེན་ལས་གྲུབ་གཞལ་མེད་ཁང་། །གསུམ་བརྩེགས་ལྟེ་བར་འཛམ་བུའི་གསེར་ཞུན་རི། །བརྒྱ་ཕྲག་ཉི་མའི་གོས་ཀྱིས་རབ་ཀླུབས་པ། །རྣམ་མང་ཐོས་སྲས་འབྱོར་བའི་གྲུ་ཆར་ཕོབ། ཁྱོད་འཁོར་དཔལ་ལྡན་གནོད་སྦྱིན་ཆེན་པོ་བརྒྱད། །(༢༠༡བ)
ཅང་ཤེས་རྟ་ཆོག་ཞོན་རྣམས་སྲིད་གསུམ་ཡོངས། །མྱུར་ཏེ་རིན་ཅེན་གཞོང་པར་སྲིད་ཞིའི་དངོས། །རབ་བསྡུས་ཕྱུར་བུར་གཏམས་ལ་རིངས་པ་བཞིན། །འདོད་འཇོའི་བ་དང་མི་ཟད་གཏེར་གྱི་བུམ། །དཔག་བསམ་ལྗོན་ཤིང་དབང་གི་རྒྱལ་པོ་ལྟར། །མཁོ་དགུའི་ལོངས་སྤྱོད་རྨུགས་འཛིན་བང་མཛོད་སྒོ། །བརྒྱ་ཕྲག་འབྱེད་ནུས་དངོས་གྲུབ་ལྡེ་མིག་སྦྱིན། །ཅི་བསམ་དོན་གྱི་རེ་འབྲས་མ་ལུས་པ། །འབད་བརྩོན་མེད་འགྲུབ་བདེ་སྐྱིད་ཁང་གསར་དུ། །རྣམ་མང་འབྲུ་རིགས་ཕུན་སུམ་ཚོགས་པའི་དཔྱ། །ཉེར་སྡུད་བླ་ནས་བླར་མཐོར་ཉེར་བརྩེགས་འགྲོ། །དཀར་འཇམ་ཤིང་གི་མ་མའི་ཡོལ་གོ་རུ། །ནོར་བུ་གཡས་འཁྱིལ་མིང་ཚིག་ཡི་གེའི་གཟུགས། །རྣམ་དག་བརྗོད་པའི་དེབ་ཐེར་རྫིང་བུའི་ངོགས། །དོན་བཟང་ངང་མོའི་མགྲིན་ལས་དབྱངས་སྙན་སྒྲོགས། །ཞེས་ཤིས་པ་བརྗོད་དེ་མཚོ་སྨད་བསམ་གྲུབ་ཁང་གསར་དང་སྨོན་གྲོང་གི་ཤས་དེབ་མེ་མོ་སྦྲུལ་ལོ་གསར་དུ་སྒྲིགས་པ་ལ། (སྡེབ་སྦྱོར་མཉམ་པའི་པྲྀཏྟ་ལས་རྨ་བྱ་མྱོས་པ།) ཉྫུཤྲཱིཧཱིཤཏཀཱུལཔྲསྲྀཏཱཔྲོཏྠངྐཱལེཤཏྲིནྡྲམཧཱིཪྵསྱམུཁོཧཱི།བཻཀུཏྤནྡྲཡོདཤཙཀྲཔྲཏིབིམྦཛྙཱནཾསཏྭོབྷཱབཏཐཱབྟགརཱཤ །(༢༠༢ན)
འཇམ་དཔལ་རྡོ་རྗེ་རིགས་བརྒྱའི་ཁྱབ་བདག་ཏུ། །རབ་བཞེངས་དུས་དགྲའི་དབང་པོ་མ་ཧེའི་ཞལ། །བཅུ་གསུམ་འཁོར་ལོའི་སྣང་བརྙན་འཕྲུལ་པོ་ཆེར། །ཡེ་ཤེས་སེམས་དཔའ་དངོས་སུ་གཞུ་བླུབས་བཞིན། །ཕྱོགས་འདིར་རྒྱ་བོད་མཁས་གྲུབ་བཞེད་པའི་སྲོལ། །སྐར་ཚོགས་དབུས་ན་ཆུ་ཤེལ་དབང་པོ་ལྟར། །རཱ་ཆེན་ལོ་ཙཱའི་དགོངས་དོན་མ་འཁྲུལ་བ། །གཟུར་གནས་དཔྱོད་ལྡན་ཡིད་ཀྱི་གདུང་སེལ་དཔྱིད། །མགོན་དེའི་ཕྲ་རགས་བསྐྱེད་རིམ་ཏིང་ངེ་འཛིན། །རྩེ་གཅིག་ཐུགས་དམ་རྟེན་གྱི་བྲིས་སྐུ་དངོས། །མཁའ་འགྲོའི་སྙན་བརྒྱུད་ཇི་བཞིན་གཏན་ཚིགས་འདིས། །འཁྱོག་བཤད་སོམ་ཉིའི་དྲ་བ་ཅི་ཡང་གཅོད། །དེ་ཕྱིར་རྭ་ལུགས་འཇིགས་མཛད་རྡོ་རྗེ་ལ། །ངེས་པར་མཁས་ཤིང་གྲུབ་བརྙེས་ཚར་ཆེན་ཞེས། །ཡབ་སྲས་སྨིན་གྲོལ་བརྒྱུད་པའི་གདམས་པ་ཆེར། །དབང་རྣོན་ཆོས་རྗེས་འབྲངས་ནས་གཅིག་ཏུ་དད། །འདི་སྒྲུབ་ཆེད་དུ་ངལ་བ་བསྟེན་པ་ཀུན། །བགྲང་ཡས་སྐྱེ་བར་ཟུར་ཕུད་ལྔ་ལྡན་དེ། །སྙིང་གི་པདྨར་བཞུགས་ནས་སྲིད་དང་ཞིའི། །འདོད་པའི་རེ་བ་མ་ལུས་སྐོང་བར་ཤོག །ཅེས་རྭ་ཆེན་ལོ་ཙཱ་བ་རྡོ་རྗེ་གྲགས་ཀྱི་ཐུགས་དམ་རྟེན་བྲིས་ཐང་ཤིན་ཏུ་ཧྲུལ་བ་ཞིག་ལག་ཏུ་སོན་པ་རྭ་ཁྲིད་མཁའ་འགྲོ་སྙན་བརྒྱུད་ཀྱི་དགོངས་པ་དང་མཐུན་པའི་ཕན་ཚུན་གཅིག་གིས་གཅིག་ལ་གཏན་ཚིགས་ཡང་དག་ཏུ་འགྱུར་བར་མཐོང་ནས། རྭ་ལུགས་རྣམ་པར་དག་པ་འདིའོ་ཞེས་ས་དགེ་ཞལ་གསུམ་གྱི་འདྲེན་བྱེད་དུ་གཟིགས་མོར་འབུལ་བའི་ཆེད་དམར་སེར་ཅན་གྱི་ལོར་ཟུར་གྱི་སྔགས་འཆང་འཕྲིན་ལས་རྣམ་རྒྱལ་དང་(༢༠༢བ)
སློབ་མ་བསྟན་པ་ཚུལ་ཁྲིམས་གཉིས་བྲིས་ཤུས་བྱེད་བཅུག་པའི་ཚེ་རྒྱབ་ཡིག་ཏུ་ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངེས་གསང་ཐེག་པའི་མ་དྲོས་མཚོ་ཆེན་ལས། །སྨན་གྲོལ་གདམས་པ་བཤད་དཀའི་ཆུ་བོ་བཞི། །རིན་ཅེན་ལྟ་བུའི་གདུལ་བྱ་ཟླ་འཕེལ་ནང་། །འབབ་འདི་སྐལ་བཟང་གདེངས་ཅན་རྣམས་ཀྱི་དཔྱིད། བགྲང་ཡས་རྒྱུད་སྡེའི་རྩེར་སོན་འདུས་པའི་གཞུང་། །སྙིང་པོ་རིམ་པ་ལྔར་དྲིལ་ཡོངས་རྫོགས་ལམ། །སྙིགས་དུས་ཚེ་ཐུང་གཅིག་ལ་མི་སློབ་པའི། །ཟུང་འཇུག་ཁང་པར་བགྲོད་བྱེད་མན་ཤེལ་སྐས། །མཐའ་གཉིས་འཁྱོག་འགྲོར་འཕྱན་མིན་དབུ་མ་རུ། །སྲིད་སྒྲུབ་ཉག་ཕྲན་ལྟར་དྲང་འཕགས་པ་མཆོག །ཤིང་རྟ་ཆེན་པོའི་བཞེད་སྲོལ་འཛིན་པ་ལ། །ནཱ་རོ་ཏ་པ་པཎ་གྲུབ་འཁོར་ལོས་སྒྱུར། །འཇིག་རྟེན་མིག་གཅིག་ཆོས་ཀྱི་བློ་གྲོས་ཀྱི། །ཟླ་མེད་སློབ་མའི་མཆོག་གྱུར་རྔོག་སྟོན་ནས། །མཐའ་ཡས་ཡོན་ཏན་རྒྱ་མཚོ་ཆེན་པོའི་བར། །སྙན་ནས་སྙན་བརྒྱུད་འཆི་གསོོས་བདུད་རྩིའི་བཅུད། །འཇམ་དབྱངས་བསོད་ནམས་རྒྱལ་མཚན་གསུང་ཟེར་གྱིས། །ཀུན་མཁྱེན་བུ་སྟོན་སྒྲ་འཛིན་ཨུཏྤལ་ཁ། །ཕྱེ་ལས་ཟབ་དོན་དམར་ཁྲིད་ཟ་མ་ཏོག །ཚེ་གཅིག་ཐར་འདོད་ཡོངས་ཀྱི་གཅེས་པའི་མཛོད། །ཕྲ་རགས་བསྐྱེད་རིམ་ཚུལ་ལ་ངེས་རྙེད་དེ། །དབེན་གསུམ་སྒྱུ་ལུས་འོད་གསལ་ཟུང་འཇུག་གི །ཁ་སྦྱོར་བདུན་ལྡན་སར་བགྲོད་ལམ་པོ་ཆེ། དུས་གསུམ་སངས་རྒྱས་ཀུན་གྱི་གཤེགས་པའི་བཤུལ། །མར་ལོའི་རྗེས་འཇུག་ཡིན་ཞེས་ཞལ་འཆེས་(༢༠༣ན)
ནས། །རྒྱུད་རྒྱལ་སྙིང་པོའི་གནད་གསང་མ་ཐོས་པར། །ཆད་ལྟར་གནས་ལུགས་ཕྱག་རྒྱའི་སྒྲོ་འདོགས་ཀྱིས། །སྨིག་རྒྱུས་ཕལ་ཆེར་སྐོམས་པའི་གྲི་རུ་འཆི། །ཡིད་བཞིན་ནོར་ལས་ཆེས་དཀོན་ཟ་མ་ཏོག །མཁས་རློམ་མང་དག་རི་མོའི་མར་མེ་ལྟར། །གྱུར་ཚེ་ཚར་པ་ཆོས་རྗེའི་གསུང་རྒྱུན་ལ། །ཀུན་མཁྱེན་མཁྱེན་བརྩེས་ཁ་འབྱེད་ལྡེ་མིག་མཛད། །ཤེས་བྱའི་མཐའ་འཇལ་ལོ་ཆེན་བྱང་རྩེ་དང་། །རྒྱལ་བ་མཆོག་གྲུབ་འཇམ་དཀར་ལ་སོགས་པའི། །འཁྲིད་ཡིག་སོ་སོར་བྱུང་ལས་ཟུར་བརྒྱན་ན། །གངས་ཀྱི་རི་བོར་ཟླ་འོད་ཤར་རྗེས་འགྲོ། །རྩ་བཤད་རིམ་ལྔའི་གཞུང་དང་སྤྱོད་བསྡུས་སོགས། །བཀའ་དང་བསྟན་བཅོས་ལུང་གི་ཁུངས་སྦྱར་བར། །འཁྲུལ་མེད་རིགས་པ་སྤྲད་པའི་རྒྱས་བཤད་ན། །གསེར་སྦྱངས་རྒྱན་ལ་རིན་ཅན་ཕྲ་ཚོམ་འདྲ། །བློ་གྲོས་ནོར་འཛིན་ལྟོ་བར་བརྗོད་བྱེད་ཚིག །མང་སྤེལ་རི་གླིང་མཚོ་ཡིས་མཛེས་བྱེད་མོད། །བྱང་གླིང་བཀྲ་ཤིས་རྒྱལ་མཚན་གསུང་རབ་ཀྱིས། །དང་པོའི་ལས་ཅན་འཁྲིད་པར་གཅིག་ཏུ་སྨན། །སོ་སོའི་རྟགས་རྣམས་ཉམས་མྱོང་ཚད་མ་བཞིས། །རང་གི་རྒྱུད་ལ་ཡིད་ཆེས་རྙེད་མིན་པར། །ཏིང་འཛིན་ངང་དུ་སྒོ་གསུམ་ཉེར་གཞོལ་བ། །བརྒྱུད་ལྡན་བླ་མའི་ཕྱག་ལེན་གཙོ་བོར་བཞེད། །འོན་ཏེ་སྔ་བདོའི་དབང་གིས་སྔོན་བྱོན་པ། །དམ་པའི་རྣམ་ཐར་འཁྱོངས་པར་སྒྲུབ་དཀའ་ཡང་། །མ་འཁྲུགས་དམིགས་རྐང་སོ་སོར་ནན་ཏན་གྱིས། །ཐུན་དུ་བཅད་དེ་བསྟར་བ་ལུགས་འདིའི་སྲོལ། །བཀླགས་ལུང་ཙམ་གྱིས་འཁྲིད་ཀྱི་གོ་བཅོད་ཅིང་། །སྦྱོར་བ་སྐྱབས་སེམས་བོར་བའི་ཉམས་ཁྲིད་མཁན། །(༢༠༣བ)
མ་བསྒོམས་མྱོང་འབྲས་སྨྲ་བའི་སྟོང་བཤད་སོགས། །འཕྱོན་མའི་གར་གྱིས་གངས་ཅན་སྨན་ལྗོངས་ཁེངས། །དལ་འབྱོར་རྟེན་བཟང་ཐོབ་ཀྱང་འདི་འདྲའི་ཆོས། །སྒྲ་འཛིན་བུ་གར་མ་གྱུར་མཐའ་ཀླས་ན། །ཐོས་བསམ་སྒོམ་པར་བྱེད་པ་བསྐལ་མང་ནས། །བསགས་པའི་བསོད་ནམས་ལས་རྙེད་ད་གདོད་འཁུམས། །ཡང་ཡང་འཇལ་དཀའ་ཐབས་རྒྱུད་ཡོངས་ཀྱི་རྩེ། །ཟབ་ཟབ་སྙིང་གི་ཐིག་ལེར་འཆང་བའི་ཆོས། །གསལ་གསལ་རྗེན་པར་སྟོན་པའི་བླ་མ་ལ། །དུང་དུང་དད་པ་དབྱར་གྱི་མཚོ་ལྟར་འཕེལ། །རྒྱལ་ཀུན་བགྲོད་ལམ་གཅིག་གྱུར་གནད་ཀྱི་མདུད། །རྒྱལ་བ་གཉིས་པ་ཀླུ་སྒྲུབ་ཀྱིས་བཀྲལ་གཞུང་། །རྒྱལ་བའི་རྣམ་སྤྲུལ་བུ་སྟོན་རིན་ཅེན་གྲུབ། །རྒྱལ་ཚབ་ཚར་ཆེན་ཡབ་སྲས་དྲིན་ལས་དར། །རྡོ་རྗེ་འཆང་ནས་མཚུངས་བྲལ་བླ་མའི་བར། །བར་མ་ཆད་དུ་བྱོན་པའི་ནོར་བུའི་འཕྲེང་། །འཕྲེང་མཛེས་ཞལ་ལུང་སྲད་བུར་བརྒྱུད་འདི་འདྲ། །འདྲ་བཅོས་རྒྱས་བཀབ་མཁན་གྱི་སྤྱོད་ཡུལ་མིན། །འདིར་འབད་ལེགས་བྱས་ས་བོན་དར་དྲག་པ། །རབ་སྨིན་མྱུ་གུ་བསྐྱེད་དུ་བསྲིངས་པའི་རྩེར། །ཟུང་འཇུག་སྐུ་བཞིའི་འབྲས་བུ་གཡུར་ཟ་བ། །བརྒྱ་ཕྲག་ལྗགས་དཀྱིལ་སྐྱེ་བར་རོ་མྱོང་ཤོག །རྒྱ་བོད་མཁས་གྲུབ་ཐུགས་དམ་སྙིང་པོའི་མཐིལ། །རིམ་ལྔའི་ཉམས་ལེན་ཟབ་མོ་དམར་ཁྲིད་དུ། །འཆད་ཉན་ཉི་མའི་གཉེན་གྱི་བསྟན་པའི་རྒྱུན། །མ་ནུབ་དེ་སྲིད་དར་ཞིང་རྒྱས་པར་ཤོག །རྒྱལ་ཀུན་ངོ་བོ་མཁན་ཆེན་ཞ་ལུ་པ། །ཚེ་དབང་ལྷུན་གྲུབ་རབ་ཏུ་བརྟན་པར་ཤོག །རིང་ལུགས་འདི་འཛིན་ཚོགས་རྣམས་རྡོ་རྗེའི་ཁྲིར། །མི་འགྱུར་(༢༠༤ན)
ཆོས་འཁོར་བསྐོར་བའི་རྒྱུ་རུ་བསྔོ། །དུས་གསུམ་རྒྱལ་བ་ཐམས་ཅད་ཀྱི་ངོ་བོ་ཐམས་ཅད་མཁྱེན་པ་བུ་སྟོན་རིན་པོ་ཆེས་མཛད་པའི་རིམ་ལྔའི་དམར་ཁྲིད་ཡིད་བཞིན་ནོར་བུའི་ཟ་མ་ཏོག་ལ་ཀུན་མཁྱེན་མཁྱེན་བརྩེའི་ཞབས་ཀྱི་ཁ་འབྱེད་ཀྱི་ལྡེ་མིག་གནང་བའི་མཛད་བྱང་འཕྲོད་ལུས་པ་རྩོམས་ཤིག་ཅེས་རིགས་ཀུན་བདག་པོ་ཞ་ལུ་པ་ཆེན་པོ་བཀའ་སྩལ་པ་ལྟར་ཕྱོགས་འདི་ལ་བག་ཆགས་ཀྱི་མཐུ་ཅུང་ཟད་བརྟས་པ་ཟ་ཧོར་གྱི་བནྡེ་འཇམ་དབྱངས་དགའ་བའི་བཤེས་གཉེན་ཀྱིས་དམར་སེར་ཅན་གྱི་ལོར་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །དྷཱིཿཡིག་བཞུ་བླུགས་མི་ཡི་གཟུགས་ཅན་དུ། །ཉེར་ཤར་མཁྱེན་པའི་སྲང་ལ་ཤེས་བྱའི་ཁྱོན། །གཞལ་ཀྱང་དོག་མིན་རྗེ་བཙུན་བཙོང་ཁ་པ། །འཇམ་དཔལ་རྡོ་རྗེ་དངོས་ལས་གཞན་ན་ཅི། །གང་གི་གསུང་རབ་ཆ་ལ་ཉེས་པའི་དྲི། །གངྒཱའི་ཀླུང་རྡུལ་ཙམ་ཡང་རྣམ་མཁྱེན་གྱིས། །མ་རྙེད་དེ་ཚེ་ཚངས་པ་རྒན་པོ་སོགས། །འཇིག་རྟེན་བྱེད་པོ་ཕལ་ཆེར་གཉིད་དུ་གཡུར། །འཁྲུལ་པའི་ལྷད་བྲལ་ལེགས་བཤད་ས་ལེ་སྦྲམ། ཁོ་ནར་ངེས་ཀྱང་ཛམྦུ་ཆུ་བོའི་གསེར། །ཇི་བཞིན་རིམ་པ་ལྔ་ཡི་གནད་གསང་ཀུན། །གསལ་བྱེད་སྒྲོན་མེས་འཇིག་རྟེན་གསུམ་མུན་སེལ། །འཛམ་གླིང་གཡས་སུ་བཞག་པ་ནོར་བུའི་དཔྱ། །ཕུང་པོར་སྤུངས་པ་བཙལ་ཡང་རྙེད་དཀའ་བ། །རྣམ་དག་བརྗོད་པའི་རྒྱུད་ལས་ཉེར་དྲངས་གང་། །དོན་བཟང་པི་ཝང་སྒྲ་དབྱངས་རྣ་བའི་རྒྱན། །རིས་འབྲལ་ཀུན་ལ་ཆོས་ཀྱི་སྦྱིན་པའི་སྒོ། །ཕྱེ་བས་(༢༠༤བ)
མཐའ་དྲུག་ཚུལ་བཞིའི་དཀའ་གནད་ཀྱི། །དབུལ་ཕོངས་སྡུག་བསྔལ་རྙེད་ཡུལ་དམིགས་མེད་དུ། །འཚོལ་འདོད་འཁྱོག་པོའི་བློ་དེ་ད་ག་རེ། །བསོད་ནམས་བྱས་འདིས་ངེས་པ་ལྔ་ལྡན་སྐུར། །རྫོགས་སངས་རྒྱས་མིན་བར་དེར་མགོན་ཁྱོད་ཀྱི། །ལེགས་བཤད་རོ་བརྒྱ་མྱོང་བའི་བློ་གྲོས་ཀྱི། །འབུམ་ཕྲག་ཟད་མི་ཤེས་པའི་སྐལ་བཟང་ཤོག །འདི་སྒྲུབ་ཆེད་དུ་སྒོ་གསུམ་འབད་པ་རྣམས། །བློ་བཟང་གྲགས་སྙན་འབར་བའི་བསྟན་པ་ལ། །ཡང་སྲིད་ཀུན་ཏུ་ཞུགས་ནས་གནས་སྐབས་དང་། །གཏན་མདུན་འགྲུབ་པའི་བདེན་ཚིག་འབྲས་སྨིན་ཤོག །ཅེས་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྫོགས་རིམ་གྱི་གནད་དོན་འགྲེལ་པ་ལ་འགྲན་པའི་ཟླ་ཐམས་ཅད་དང་བྲལ་བ་རིམ་ལྔ་གསལ་བའི་སྒྲོན་མེ་ཆོས་སྦྱིན་མི་འཛད་པའི་པར་འདི་གསར་བརྐོའི་འདུན་པ་ཡོད་སྟེང་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བསྐུལ་མའི་མཚམས་སྦྱར་བ་དང་བཅས་དམར་སེར་ཅན་གྱི་ལོ་དགའ་ལྡན་ཕུན་ཚོགས་གླིང་དུ་བརྐོས་པའི་ཞུ་ཆེན་དང་དོ་དམ་གཉིས་ཀ་བྱེད་མི་ཡར་འབྲོག་པ་དགེ་སློང་བློ་གྲོས་བརྟན་པ། རྩེ་སྐོར་བ་དགེ་སློོང་བློ་གསལ་མཁས་པ། བཀྲ་ཤིས་གླིང་པ་དགེ་སློང་སྨྲ་བའི་དབང་ཕྱུག་གསུམ་དང་། ཡིག་མཁན་བློ་བཟང་དམ་ཆོས། བློ་བཟང་ཉི་མ་དགའ་ལྡན་བསྟན་འཛིན། ཀུན་དགའ་རྣམ་རྒྱལ། རྐོས་མཁན་དབུ་མཛད་དགོས་སླེབས། དབུ་ཆུང་རྒྱལ་བཀྲ་ཤིས། བྱིངས་གྲས་རབ་བརྟན། ཚངས་འཕེལ། གཞུང་རྡོར། ནམ་མཁའ་རབ་བརྟན། རྒྱལ་མཚན། གྲགས་པ། ནོར་བུ་(༢༠༥ན)
ལྷ་སྐྱབས། ཨ་གཅེས། སུམ་འཕེལ། རབ་རྒྱས། དཔལ་ཁང་དཔལ་འབར། སྒྲོལ་བ་དབང་རྒྱལ། ཡར་འཕེལ། ཚེ་རིང་དཔལ་འབྱོར། འོམ་སྦུག་དཔལ་འབར། དཔུང་སོགས། གསུམ་པ། བྲག་སྣ་དབང་རྒྱལ། རྡོ་རྗེ་དབང་རྒྱལ། ཀུན་དགའ་ཚེ་བརྟན། ནོར་བུ་ཚེ་བརྟན། ཚངས་སྐྱིད། དཀར་པོ། ཕུན་ཚོགས། ཚེ་རིང་དར་རྒྱས། ཀུན་དགའ་ཚུལ་ཁྲིམས། འཇམ་དབྱངས་རྒྱ་མཚོ། སྙིང་པོ། ཚེ་དབང་དཔལ་ལྡན། ཚངས་པ། འབྱོར་རྒྱས། ཚངས་ཆེན་ཟམ་རྒྱལ། རྡོ་རྗེ་བཀྲ་ཤིས། རྒྱ་མཚོ། ཀུན་དགའ་ཚེ་དབང་། ཤིང་བཟོ་བ་ཨ་དཀར། དབུ་ལྷ་འདྲི་མི་བཞད་པ་ཀུན་དགའ་མཐའ་ཡས་རྣམས་ཀྱིས་ཆེད་དུ་བསྒྲུབས་པའི་དཀར་ཆག་འདི་ནི་ཟ་ཧོར་གྱི་རིགས་ལས་ཤཱཀྱའི་བཙུན་པ་འཇམ་དབྱངས་དགའ་བའི་བཤེས་གཉེན་གྱིས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་སརྦ་ཛ་ཡནྟུ། གདུལ་བྱའི་དྭངས་མཚོར་རྟེན་དང་བརྟེན་པའི་ཟླ། །ཤར་ཀྱང་མཁྱེན་བརྩེ་ནུས་མཐུའི་རི་བོང་ཅན། །ཐུགས་རྗེའི་འོད་ཀྱི་ཕན་བདེའི་ཀུ་མུ་ད། །བཞད་པས་འགྲོ་བ་ཀུན་སྒྲོལ་པད་དཀར་འཆང་། ཨྱོན་རྣོག་ཆོས་མཛད་ལྔ་འདུས་པའི་གཏེར། །སྙིང་པོའི་ཡང་ཞུན་འཕགས་མཆོག་དཀྱིལ་འཁོར་ཆེ། །མཐོང་ཐོས་དྲན་རེག་སྲིད་ཞིའི་རྒྱ་མཚོ་ལས། །སྒྲོལ་བའི་གྲུ་ཆེན་སྔོན་མེད་ལེགས་པའི་ལམ། །འདིས་མཚོན་ངེས་གསང་འདུས་སྡེའི་ཉེར་སྤྱད་རྫས། །སྟོན་མཚན་ཟླ་འདྲའི་ལྷག་བསམ་གྱིས་དྲངས་ཏེ། །སྒོ་གསུམ་འབད་པའི་བསོད་ནམས་གངྒཱའི་རྒྱུན། །ཡང་སྲིད་ལམ་བརྒྱུད་(༢༠༥བ)
བྱང་ཆུབ་མཚོར་འབབ་ཤོག །ཅེས་པ་འདིའང་མེ་འབྲུག་དང་མེ་སྦྲུལ་གཉིས་ཀྱི་ལོར་སྔགས་རམས་པ་བློ་བཟང་ཀུན་དགའ། སྔགས་རམས་པ་བློ་བཟང་ཆོས་ལྡན། ལྷ་ས་བ་ངག་དབང་དཀོན་ཅོག་གསུམ་གྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་དཀོན་གཉེར་གྱི་ལས་ཐོག་བྱས་སྐབས་སྤྱི་རྫས་ཀྱི་འཇོག་ལ་ཐུགས་རྗེ་ཆེན་པོ་འགྲོ་བ་ཀུན་སྒྲོལ་གྱི་དཀྱིལ་ཐང་མཐའ་འཇག་ཞལ་ཁེབས་ཅན། འཇམ་དཔལ་ཚེ་བདག་རྩ་བའི་ལྷ་དྲུག་གི་ཙཀ་ལི། བུམ་པའི་མགུལ་ཆིངས་རྒྱ་གོས་གསེར་མ་དཀར་དམར་ལྗང་གསུམ་བརྩེགས་པ་གཅིག །ཧོར་གོས་བུམ་གདན་མ་གཞི་དམར་མཐོངས་འཁོར་ལོ་ཟུར་བཞིར་སྣ་ཚོགས་རྡོ་རྗེ། མཐར་རྡོ་རྗེ་གསང་ལམ་ཡོད་པ་གཅིག །ཡང་རྒྱུ་གོང་མཚུངས་མཐོངས་འཁོར་ལོ་མེ་ཏོག་ཟླུམ་འཁོར་དང་བཀྲ་ཤིས་རྟགས་བརྒྱད་ཡོད་པ་གསུམ། ཧོར་གོས་ཏཱ་སི་མེ་ཏོག་རིས་ལེགས་པའི་མཆོད་ཁེབས་གཅིག །དངུལ་གྱི་པད་སྡེར་བཅུ་ཐམ་པ། ཚོགས་འཁོར་བཞེང་བའི་ལྗང་སེར་གྱི་པད་སྡེར་ཆེ་ངེས་གཉིས་དང་མེ་ཏོག་གི་ཕོར་པ་ཁེབས་བཅས་བཞི། སྦྲོན་སྐྱོགས་གཅིག །ལིང་རོ་གཏོར་མར་འབུལ་སྣོད་ཀྱི་ཐོད་པ་ཟངས་ཀྱི་ནང་ཤ་ཅན་གསུམ། ལྕགས་ཀྱི་མར་ལྕུགས་འཐེན་ཆས་ཆ་གཅིག །ཏིང་ཤག་རྣམས་ཀྱི་ཤུབས་མཚལ་རྩི་གསེར་རིས་ལྗང་སེར་གྱི་པར་བཀབ་མཛོ་སྣ་ཨ་ལུང་རྒྱབ་བཟུང་བ་དཀྲི་ལྕགས་བཟུང་གདན་དང་བཅས་པ་སུམ་ཅུ་སོ་གཅིག །སྤོས་མདོང་གཞི་ནག་ཚོན་ཁྲ་གསེར་ཤོག་ཤིང་ལོ་འབྲུག་རིས་ལྗང་སེར་གྱི་ཤན་བསྡམས་བཞི་དང་
(༢༠༦ན)རྒྱབ་ལག་བཟུང་བ་དཀྲི་ལྕགས་སྒོ་ལྕགས་ལྡེ་བཅས་ཁུར་ཐག་བཟུང་བ་ཨ་ལུང་དང་བཅས་པ་གསུམ་འབྱར་ཆ་གཅིག །ཆོག་གྲའི་དུས་རྡོ་རྗེ་སློབ་དཔོན་གྱི་ཉེར་སྤྱད་རྣམས་འཇོག་སྟེགས་ཀྱི་ཆ་སྒྲོམ་མཚལ་རྩི་གསེར་ཤོག་གི་པདྨ་ནོར་བུ་རྡོ་རྗེ་སྒོ་ཁྱེམ་མཐའ་འཇའ་སོགས་ཡོད་ཅིང་ཡོད་བྱད་རྣམས་འཇུག་སྣོད་ཞར་ལ་ཡོང་རྩིས་ཀྱི་སྒོ་ལ་ལྗང་སེར་གྱི་མཛོ་སྣ་དཀྲི་ལྕགས་སྒོ་ལྕགས་ལྡེ་བཅས་ཡོད་པ་ཆ་གཉིས། སྒམ་ཚོན་རྩི་ཁྲ་གསེར་ཤོག་གི་ཟུར་དགག་པ་ཏྲ་ནོར་གཞོང་མཐའ་འབྱེད་སོགས་ཡོད་པར་ལྕགས་ཤན་རྒྱབ་ལག་མཛོ་སྣ་དཀྲི་ལྕགས་སྒོ་ལྕགས་ལྡེ་བཅས་རེ་འབྱར་བ་ལྕགས་གདན་དང་བཅས་པ་ཆེ་བ་ཆ་བཞི། གཏོར་མ་རྫི་སྣོད་གཞོང་སྒོར་ཆེ་ལེགས་གཅིག །སྐྱི་སྒམ་དམར་པོ་ལྕགས་ཤན་རྒྱབ་ལག་མཛོ་སྣ་དཀྲི་ལྕགས་དང་བཅས་པ་གཅིག །བསེ་ཊོ་ར་མཚལ་རྩི་གསེར་ཤོག་དང་ལྡན་པ་ཆ་གཉིས། དྲིལ་དམངས་གཏོང་དུས་ཀྱི་སྣོད་ཤིང་ཁྲོལ་མཚལ་རྩི་ཚོན་ཁྲ་ལྕགས་ཤན་མ་ཆ་གཉིས། ཨན་དར་རྣམས་འཇོག་པའི་ཁྲི་སྒོམ་ཆེ་བ་གཅིག། ཞུན་མར་འཇུག་སྣོད་སྒམ་ལྕོག་གཟུགས་གཅིག །གདན་ཁྲི་རིང་བ་ཆ་གཉིས། ཚེ་དཔག་མེད་དངས་མ་བཅུད་འདྲེན་གྱི་བུམ་གདན་པདྨ་འདབས་བརྒྱད་དང་བཅས་པའི་རྒྱུ་སོང་ལ་དགེ་སྐོས་ཐེངས་ཟིན་རྣམས་ཚོགས་ཐོག་ནས་ཡས་བསུ་མས་སྐྱེལ་གྱི་གོང་དངུལ་ཐོག་ཏུ་ཕབ་པར་སྲང་ཉིས་བརྒྱ་ལྔ་བཅུ་ང་གཅིག་ཞོ་བདུན་སྐར་ཕྱེད་གསུམ་བྱུང་འདུག་པ་འཇོག་དཔངས་མཐོ་ངེས་བྱས་པའི་དུས་དཀྱིལ་ཐང་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་པའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །