སྐུ་གསུང་ཐུགས་རྟེན་གསར་བཞེངས་དང་རིན་པོ་ཆེའི་མཆོད་རྫས་ཁང་བཟང་གི་དཀར་ཆག་དང་ཐམ་ཕུད་དེབ་ཁྲིམས་ཡིག་འགོ་རྒྱངས་སྡེ་བཞིའི་སྒོ་འཕར་ཕྱེ་བའི་སྐལ་བཟང་གི་གླེགས་བམ་གསུམ་པ།
སྐུ་གསུང་ཐུགས་རྟེན་གསར་བཞེངས་དང་རིན་པོ་ཆེའི་མཆོད་རྫས་ཁང་བཟང་གི་དཀར་ཆག་དང་ཐམ་ཕུད་དེབ་ཁྲིམས་ཡིག་འགོ་རྒྱངས་སྡེ་བཞིའི་སྒོ་འཕར་ཕྱེ་བའི་སྐལ་བཟང་གི་གླེགས་བམ་གསུམ་པ་བཞུགས་སོ།།
བསོད་ནམས་ཡེ་ཤེས་མ་དྲོས་འཁྱིལ་བ་ནས། །སྐུ་བཞིའི་ཆུ་བོ་འགྲོ་ཁམས་གཞིར་བརྒྱུ་བས། །བྱང་ཆུབ་གསུམ་གྱི་རྒྱ་མཚོར་འཕྲིན་ལས་རླབས། །ཡོལ་མེད་ཟས་གཙང་སྲས་པོས་ཤིས་པ་སྩོལ། །མཛེས་སྡུག་མཚན་དཔེའི་སྐུ་ཡིས་ཀུན་ཡིད་བརྟན། །ཉེར་འཕྲོག་མཐོང་ན་མཐུན་སྣང་གྲུབ་པའི་ཞབས། །རྩིབས་བརྒྱད་འཁོར་(༢ན)
ལོའི་རི་མོ་རྣམ་བཀྲ་ལས། །རྡུལ་དམར་བསྐྱུག་ལ་མགོ་བོས་ལན་བརྒྱར་གཏུག །ཐུབ་དབང་ལྗགས་ཆེན་བཀྲམ་སྟེ་ཚངས་དབྱངས་རྒྱུད། །མཁྱེན་བརྩེ་སོར་རྩེས་བསྐུལ་བའི་རྟོགས་བརྗོད་གླུ། །ཁོལ་ཆུང་ཨུཏྤལ་ཆུན་པོ་སྙིགས་པ་དིང་། །གསར་པའི་སྤེལ་ལེགས་ཕྲེང་བ་ཐོད་འཆིང་མཚར། །བློ་གྲོས་ཉ་ཕྱིས་ཁོག་ནས་རྣམ་འདྲེན་གྱི། །མཛད་པའི་མུ་ཏིག་འཁྲུལ་མེད་ཚིག་སྦྱོར་ཕྲེང་། །སྲད་བུར་བརྒྱུ་ལ་སྐལ་བཟང་ཆོས་ཀྱི་མིག །རྒྱ་མཚོ་ལྟར་ཡངས་དེས་བསྐྲུན་གྲགས་པ་སྙན། །ཡོན་ཏན་བྱེ་བའི་མྱུ་གུ་བླ་ནས་སྔར། །འཕེལ་བྱེད་དད་པའི་ས་བོན་རྒྱལ་རྣམས་ཀྱི། །རྣམ་ཐར་འདྲི་ཀློག་རྒྱ་ཆེར་སྤེལ་བ་ཡི། །ཆོ་ག་དེང་དུས་ཀུ་ཤའི་རྩེ་བཞིན་ཕྲ། །སྣ་ནམ་བྱ་ནག་གདུང་དང་རིགས་ཀྱིས་བཙུན། །སྔགས་འཆང་བརྟུལ་ཞུགས་གྲུབ་པའི་ནུས་མཐུར་ལྡན། །གོང་མའི་ལུང་གིས་ལྷོ་རྒྱུད་ཁྲི་སྐོར་བདག །ནོར་འཛིན་བདེ་བར་སྐྱོང་བ་རིམ་བྱོན་ལས། །ས་སྤྱོད་རྐང་(༢བ)
འཐུང་དབུས་ན་ཡོངས་འདུ་ཡི། །འཁྲི་ཤིང་གཉིས་པ་རྒྱལ་པོ་བཀྲ་ཤིས་ཞེས། །མཁྱེན་ཡངས་ཟླ་བ་ཉ་གང་རྣམ་དཔྱོད་ཀྱིས། །མི་ཟད་པར་གྱི་ཀུནྡའི་འདབ་མ་ཕྱེ། །ཐུབ་དབང་ཡོན་ཏན་ཆ་ཤས་ཆེས་ཕྲ་ལ། །ཉེར་དད་བསོད་ནམས་སྲིད་འདིར་ཤོང་དཀའ་ན། །མཛད་པ་འཁྲུལ་མེད་དབྱར་རྔ་ཕྱོགས་བྲལ་རྣར། །བྱང་ཆེན་རྨ་བྱའི་མངལ་ཁུར་ཅིས་མི་སྦྲུམ། །བསྟན་ལ་རི་མོར་ཡོངས་བགྱིད་སྙིང་སྟོབས་ཀྱིས། །ནམ་མཁའི་ལྟོ་བ་དབྲལ་བར་གསེར་མངལ་ཅན། །དངངས་ནས་དགུ་ཚིགས་སྐུད་པས་ཉེར་འཚམ་པར། །བལྟ་བའི་ཆེད་དུ་གདོང་བཞི་སྤྲུལ་མིན་ནམ། །བསོད་ནམས་ཞིང་དབུལ་འབྲུ་ལྔ་ཆགས་པའི་འབྲས། །གླིང་བཞི་ལྷ་གནས་མངའ་སྒྱུར་སྤྱི་བོ་སྐྱེའི། །དབང་ཐང་ཆུང་ངུར་བྱེད་ནུས་ལེགས་བྱས་ཀྱི། །རི་མོ་མིག་གསུམ་པ་དེས་ག་ལ་དབྱི། །བསྟན་པར་སྲི་ཞུ་ཡོངས་བསྐྲུན་སྔོན་བྱོན་གྱི། །འཕགས་བོད་རྒྱལ་བའི་ངང་ཚུལ་གངས་ཅན་ལྗོངས། །གཉལ་བྱར་འཛིན་མར་དིང་སང་གནས་སོ་ཞེས། །མེ་ཏོག་ཕལ་ཆེར་ཕྱོགས་དེར་དགོད་པ་བཞིན། །ཆོས་དཀར་སྨིག་མའི་ཚལ་དུ་སྐྱེད་བསྲིངས་ནས། །འདི་ཕྱིའི་མདུན་མ་ལྷུན་གྲུབ་གར་མཁན་སྟེང་། །འགྱིངས་ཏེ་ཐར་ལམ་འཆི་མེད་བ་གམ་དུ། །གཞོན་ནུ་གདོང་དྲུག་ཚུལ་ལ་འཁུ་ནུས་ཤོག །མི་ཡི་དབང་ཕྱུག་བཙུན་མོ་སྲས་བཅས་རྣམས། །སྐུ་ཚེ་རིགས་རྒྱུད་ཆབ་སྲིད་ངལ་བསོས་བུའི། །གྲིབ་མར་བལྟོས་མིན་མངོན་སུམ་མཆེད་ཟླ་རུ། །འགྱུར་བའི་རྣམ་སྨིན་དཀར་པོར་འཛག་པར་ཤོག །(༣ན)
གཏོང་ཕོད་བདོག་པ་ཚངས་པའི་རལ་ཀླུང་ནས། །བསོད་ནམས་མཐོ་རིས་ཆུ་བོས་མི་བདག་གི །སྡིག་སྒྲིབ་དྲི་འཁྲུས་རྩེ་མོར་གཏན་མདུན་གྱི། །ཞབས་སེན་ཏོག་གི་འོད་སྟོང་འབར་བར་ཤོག །དར་རྒྱས་ནོར་བུས་མཚོན་པ་རིག་བྱེད་མཁན། །འདིའི་ཆེད་སྒོ་གསུམ་ངལ་བ་བསྟེན་ནོ་ཅོག །ཉི་མའི་གཉེན་གྱི་སྤྱན་རས་དཀྱུས་རིང་པོས། །མི་གནས་མྱང་འདས་འཐོབ་མིན་བཙའབར་ཤོག །དགེ་བའི་ཡོན་ཏན་ཆ་རྫོགས་ཆུ་ཤེལ་དབང་། །རྩོད་ལྡན་བརླང་སྤྱོད་འཐིབས་པོར་ཤར་བའི་མོད། །བརྒྱ་བྱིན་མིག་སྟོང་སྤྲུལ་ནས་དུཿཁའི་མུན། །བཙལ་ཀྱང་ག་རེ་ཅུང་ཟད་མི་རྙེད་ཤོག །ནམ་མཁར་ཉི་ཟླ་གཟའ་སྐར་འོད་ཟེར་འབར། །གསེར་ལྡན་ལྟོ་བར་བཀྲ་ཤིས་གཡང་དུ་ཆགས། །མཆོག་གསུམ་ལྷ་དང་དྲང་སྲོང་རིགས་འཛིན་གྱི། །བདེན་ཚིག་མེ་ཏོག་ཆར་ཆེན་བསྙིལ་བར་ཤོག །ཅེས་བྱ་བ་ཆོས་རྗེ་སྐལ་བཟང་ཆོས་ཀྱི་རྒྱ་མཚོས་དེ་བཞིན་གཤེགས་པའི་མཛད་པ་འཁྲུལ་མེད་བསྒྲིགས་པར་པར་རྙིང་ཞིག་སྣང་བ་དེང་སང་གང་དུ་ཡོད་ཆ་མ་འཚལ་བར་བརྟེན་བྱ་ནག་རིགས་ཀྱི་ཐིག་ལེ་ས་སྤྱོད་རྒྱལ་པོ་བཀྲ་ཤིས་ཀྱིས་པར་གསར་བརྐོས་ཀྱི་རྒྱུ་སྦྱོར་དང་། ཨེ་ཆོས་ལུང་དཀར་པོ་ནས་དར་རྒྱས་དང་ནོར་བུས་གཙོས་པར་མཁན་བཅུ་བཀུག་སྟེ་ཞལ་བཀོད་ཀྱིས་ཁྱབ་པའི་ཚེ་པར་བྱང་ཞིག་རྩོམས་ཤིག་པར་གསུང་གིས་བསྐུལ་བ་ལྟར་ཟ་ཧོར་གྱི་རིག་བྱེད་པ་ཚངས་སྲས་བཞད་པའི་(༣བ)
རྡོ་རྗེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །