ལྷ་སའི་བླ་མ་ལྷ་ཁང་གི་རྗེ་བཙུན་བཙོང་ཁ་པ་ཆེན་པོའི་སྐུ་བརྙན་ལ་ཕུལ་བའི་ཁ་བཏགས་ཉིན་མོ་བདེ་ལེགས་མའི་ཞལ་བྱང་།
ལྷ་སའི་བླ་མ་ལྷ་ཁང་གི་རྗེ་བཙུན་བཙོང་ཁ་པ་ཆེན་པོའི་སྐུ་བརྙན་ལ་ཕུལ་བའི་ཁ་བཏགས་ཉིན་མོ་བདེ་ལེགས་མའི་ཞལ་བྱང་། །རྒྱལ་ཀུན་བློ་གྲོས་ལྡན་པས་མཁས་པའི་དཔྱིད། །ཕྲ་མོའི་ལྟུང་བས་མ་གོས་བཙུན་པའི་མཆོག །བདག་གཞན་མཉམ་བརྗེའི་ལྷག་བསམ་བཟང་པོ་ཅན། །གྲགས་པ་དོན་ལྡན་འཇམ་མགོན་བཙོང་ཁ་པ། །མངོན་སངས་རྒྱས་གནས་རྨད་བྱུང་བཀོད་ཞིང་དུ། །ས་སྤྱོད་འཕྲིན་ལས་རྒྱ་མཚོ་ཉེར་དྲངས་ཏེ། །དམ་ཆོས་བདུད་རྩིས་ཡིད་ཀྱི་ཟ་མ་ཏོག །ལེགས་གཏམས་ཟུངས་འཇུག་ས་ལ་འགོད་བྱིན་རློབས། །ར་མོ་ཆེར་ཇོ་བོ་མི་བསྐྱོད་རྡོ་རྗེ་ལ་ཕུལ་བའི་བཀྲས་བཏགས་ཉིན་མོ་བདེ་ལེགས་མའི་ཞལ་བྱང་། ཞབས་སེན་རྡུལ་གྱི་ཆ་ཙམ་གཙུག་ཏོར་རྩེར། །ལྷུངས་པས་འཁོར་བའི་ཟུག་རྔུ་དྲུངས་འབྱིན་ན། །དངོས་དང་དབྱེ་བའི་སྐབས་བྲལ་སྣང་བརྙན་གཟུགས། །མཐོང་བས་རྣམ་གྲོལ་མི་བསྐྱོད་རྡོ་རྗེའི་དྲུང་། །འགྲོ་རྣམས་མགོན་ཁྱོད་སར་འགོད་ལྷག་པའི་སེམས། །མཚོན་པའི་འཆི་མེད་དུ་ཀཱུ་ལ་ཡི་གོས། །རེག་བྱའི་ཁྱད་པར་བདེ་བའི་གཏེར་ཆེན་པོར། །ཏིང་འཛིན་མོས་པའི་བློས་སྤྲུལ་འབུལ་བྱེད་ན། །འཕྲིན་ལས་རྒྱ་མཚོར་འབོད་པའི་ནོར་འཛིན་བདག །སྐྱེ་མང་འདབ་ཆགས་བགྲོད་དང་ལྷན་ཅིག་པར། །མགོན་ཁྱོད་ཐུགས་རྗེ་རང་གྲིབ་གཉིས་པའི་གཟུགས། །ནམ་ཡང་མི་འབྲལ་མཐུ་ཡིས་ཡིད་ཅན་ཀུན། །འཁོར་མཚོ་ལས་སྒྲོལ་གཟིངས་སུ་གྱུར་བར་ཤོག །རྣམ་སྦྱར་གཞི་མཆིན་ཁ་དང་མཐའ་སྔོན་པོའི་ལྕགས་རི་དང་སངས་རྒྱས་སྟོང་སྐུ་ཡོད་པ་ར་མོ་ཆེའི་ཇོ་བོར་ཕུལ་བའི་ཁ་བྱང་། (༡༡༣ན)
རྒྱལ་བའི་ཞལ་ཁྱིམ་མི་བསྐྱོད་རྡོ་རྗེའི་སྐུར། །ཟ་འོག་རབ་བཀྲར་འདྲེན་པ་སྟོང་ཕྲག་གི །སྣང་བརྙན་ཚར་དུ་དངར་བའི་རུང་མཐུན་གོས། །རེག་བདེའི་ཁྱད་པར་གཡང་ཆགས་འདི་ཕུལ་བའི། །རྣམ་སྨིན་ཆེས་དཀར་འཛག་པ་མཐོ་རིས་ཆུས། །ས་དབང་འཕྲིན་ལས་རྒྱ་མཚོའི་ལས་ཉོན་དྲི། །རབ་བཀྲུས་སྤང་དང་རྟོགས་པའི་ཡོན་ཏན་ཏོག །ཟུང་འཇུག་རྒྱལ་མཚན་རྩེར་མོར་འོད་འབར་ཤོག །ར་མོ་ཆེར་གོས་གཞི་སྔོན་ཚོན་ཁྲའི་འཕན་དུ་ཕུལ་བའི་ཞལ་བྱང་། གནམ་སྔོན་ཐགས་སུ་འཁྱིལ་བའི་རྫིང་བུ་རུ། །ས་གཞི་མཛོད་ཀྱི་འདབ་བརྒྱ་བཞད་པའི་འཕྲེང་། །མགོན་ཁྱོད་མཛེས་པའི་རྒྱན་དུ་ལེགས་སྤུད་ནས། །མ་སྨད་ཐུགས་རྗེ་འཇུག་པའི་སྨྲེང་གསོལ་ན། །མི་བདག་འཕྲིན་ལས་རྒྱ་མཚོར་གཟིགས་པའི་སྤྱན། །དཀྱུས་རིང་འཁོར་བའི་ཕ་མཐའ་ལས་བརྒལ་ཏེ། །བྱང་ཆུབ་སྙིང་པོའི་བར་དུ་ཉེར་བཙའ་བར། །མཛོད་ཅིག་རྣམ་འདྲེན་དོན་ཀུན་གྲུབ་པ་ཀྱེ། །རང་བྱུང་འཕགས་པ་མཆེད་ལ་ཕུལ་བའི་ཁ་བཏགས་ཉིན་མོ་བདེ་ལེགས་མའི་ཞལ་བྱང་། ལག་ན་པད་དཀར་འགྲོ་ལ་མངོན་སུམ་དུ། །སྟོན་ཕྱིར་རང་བྱུང་འཕགས་མཆོག་མཆེད་གཉིས་སྐུ། །དྲན་པས་སྲིད་ཞིའི་གདུང་བ་ཀུན་འབྱིན་པའི། །སྒྲིབ་པའི་ནད་བརྒྱ་འཇོམས་པའི་རྩི་སྨན་ཆེས། །ས་སྐྱོང་འཕྲིན་ལས་རྒྱ་མཚོའི་བདེ་ལྡན་གྱི། །ཞིང་དུ་འདབ་སྟོང་དབུས་སྐྱེས་ལྷ་ཁྱོད་ཞལ། །མཐོང་ནས་ཟབ་རྒྱས་ཆོས་ཀྱིས་རྒྱུད་སྨིན་ཏེ། །རྣམ་པར་གྲོལ་བའི་ལམ་བཟང་མངོན་འགྱུར་ཤོག །འཕན་མགོ་བར་གཟུགས། །མ་གོས་སྔོན་ཐོག་སེའུ་ཚོན་ཁྲའི་པ་ཏྲ། །དེའི་དབུས་གསུམ་སོ་སོར་འཕན་མགོའི་དབྱིབས་འདྲའི་གསེར་ཟངས་ཀྱི་རྒྱན་ལག་པ་ཙམ་རེར་(༡༡༣བ)
གཡུ་བྱུ་རུ། ནལ། མཆོང་སོགས་རིན་པོ་ཆེའི་ཕྲ་ཡོད། །མཐའི་མུ་རན་ལ་གསེར་ཟངས་ཀྱི་འབུ་ཧྲིལ་འཕུལ་མའི་མཚམས་བཞིར་བྱུ་རུ་མུ་ཏིག་སོགས་ཀྱི་བརྒྱན། སྐེད་མཚམས་སུ་བྱུ་རུ་སེ་འབྲས་ཙམ་བཞི་བཅུ་རེ་ལོང་པར་སྟོང་སྐུད་སྔོ་དམར་ཟི་ཧུན་སོགས་སྣ་ཚོགས་ཀྱི་རྫར་ཡན་ལག་གོས་ཚོས་ཁ་སྣ་ཚོགས་སྤེལ་མའི་ཐོག་སེའུ་ཚོན་ཁྲའི་རྒྱལ་མཚན་དང་། ལཉྪའི་མ་ཎི། སྤྲིན་དང་པདྨ་སོགས་ཡོད་པའི་བཅད་གསེར་སྐུད། །རྒྱབ་ཤ་ལིང་དམར་ཞི་མ་འགྲེས་བྱས་པའི་འདོགས་ཐག་དངུལ་གྱི་ཨ་ལོང་བཅས་ལེགས་པ་ཆ་གཉིས་བསམ་ཡས་སུ་བྱང་ཆུབ་ཆེན་པོར་ཕུལ་བའི་ཞལ་བྱང་། ལྟ་བར་མི་མངོན་གཙུག་ཏོར་ལས་འཕྲོས་ཟེར། །ཞིང་ཁམས་རྒྱ་མཚོ་སྣང་བྱེད་རྫུ་འཕྲུལ་ཅན། །ལྷ་ཡི་ལྷར་གྱུར་དོན་ཀུན་གྲུབ་པའི་དཔལ། །ཆེར་སྙིགས་ལྔ་བརྒྱའི་འགྲོ་ལ་རབ་བརྩེས་དགོངས། །བྱིན་རླབས་མཐོ་རིས་ཆུ་བོས་མི་ཡི་བདག །འཕྲིན་ལས་རྒྱ་མཚོར་འབོད་པའི་སྡིག་སྒྲིབ་ཀྱི། །དྲི་བཀྲུས་དལ་འབྱོར་ཁྱབ་འཇུག་རྐང་པའི་རྩེར། །ཐར་པའི་རྒྱལ་མཚན་ཏོག་གིས་མཛེས་པར་ཤོག ། ལིང་སྐྱེར་ཁ། ལི་ཧུན། སྔོན་པོ། དཀར་པོ། རྒྱལ། ངུར་རྨིག ལྗང་ཁུ་སོགས་ཤམ་བུ་བརྩེགས་བཅུ་གསུམ་རེ་ཡོད་པའི་རྒྱལ་མཚན། ཐོད་གོས་སྔོན་འཇམ་སང་། ཤམ་གོང་གོས་སྔོ་འཇམ་སྟེང་ཇུས་དཀར་གྱི་མུ་ཏིག །ཤམ་གདན་ལྷོ་རས་ཀྱི་བྱས་པའི་ལེགས་པ་ཆ་གཅིག་ཁྲ་འབྲུག་ཏུ་ཕུལ་བའི་ཞལ་བྱང་། སྡིག་དང་ལྷན་ཅིག་མི་གནས་རང་རྒྱུད་སར། །དགེ་བའི་ས་བོན་བཏབ་པའི་བྱང་ཆེན་གྱི། །མྱུ་གུ་ཡོངས་སུ་སྨིན་པའི་འབྲས་བུ་ལ། །མཁའ་མཉམ་ཅན་ཀུན་གྱིས་སྤྱོད་པར་ཤོག ། དགའ་ལྡན་དངུལ་གདུང་རིན་པོ་ཆེར་སྙན་ཤལ་གོས་དམར་ཡུག་ཕུལ་བའི་ཞལ་བྱང་། །གངས་ལྗོངས་འཇམ་མགོན་ངུར་སྨྲིག་གོས་འཆང་ཡང་། །ངོ་མཚར་རྨད་བྱུང་བཀོད་པའི་ཞིང་ཁམས་ན། །རྒྱལ་མཆོག་སེངྒེའི་ང་རོའི་སྐུར་བསྟན་པ། །ཐུགས་རྗེ་བསྐུལ་ཚིག་གསོལ་ལ་མ་གཡེལ་དགོངས། །ས་སྐྱོང་འཕྲིན་ལས་རྒྱ་མཚོ་(༡༡༤ན)
བར་མའི་སྲིད། །འཛིན་པའི་དུས་འདིར་ཡ་ངའི་འཇིགས་སྐྲག་དང་། །མི་ཁོམ་གནས་ཀྱི་མུན་ཞི་བདེ་སྐྱིད་ཀྱི། །སྣང་བ་ཐུགས་རྗེའི་ཉི་མས་སྤར་དུ་གསོལ། །མཐོ་རིས་བདུན་དང་ལྡན་པའི་རྟེན་བཟང་ཐོབ། །དམ་པས་རྗེས་བཟུང་ཐོས་བསམ་སྒོམ་པ་སྒྲུབ། །འབྲས་བུ་རང་གཞན་དོན་གཉིས་ལྷུན་གྲུབ་པའི། །རྣམ་པ་ཐམས་ཅད་མཁྱེན་པ་འཐོབ་བྱིན་རློབས། །འདིས་མཚོན་ལྷག་བསམ་བློས་སྤྲུལ་མཆོད་པའི་སྤྲིན། །ཀུན་ཏུ་བཟང་པོའི་རྣམ་ཐར་བཞིན་ཕུལ་བས། །མི་དབང་འཕྲིན་ལས་རྒྱ་མཚོ་སྲིད་ཞིའི་རྒྱ། །ལས་གྲོལ་རིང་མིན་བྱང་ཆུབ་མཆོག་རྙེད་ཤོག །ཅེས་ས་སྐྱོང་འཕྲིན་ལས་རྒྱ་མཚོའི་ཆེད་དུ་ཇོ་ཤཱཀ་གང་ལའང་ཕུལ་ཆོག་པའི་སྙན་དར་གྱི་ཞལ་བྱང་འདི་ནི་ཡི་གེའི་འདུ་བྱེད་པ་དར་རྒྱས་བཀྲ་ཤིས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་སོ། །ས་སྤྲེལ་སོག་བོད་ཀྱི་མི་རྗེ་བསྟན་འཛིན་དཱ་ཡན་རྒྱལ་པོ་དུས་ཀྱི་ཆོས་ཉིད་དུ་གྱུར་པའི་ཚེ་ལྷ་ས། ར་མོ་ཆེ། པོ་ཏ་ལ། བསམ་ཡས་སོགས་སུ་སྙན་ཤལ། བླ་གོས། གོས་འཕན། རྒྱལ་མཚན་བཅས་ཕུལ་བ་རྣམས་ཀྱི་ཁ་བྱང་མངོན་མཐོ་ངེས་ལེགས་ཀྱི་སྙེ་མ། ལྷ་སར་ཕུལ་བའི་བླ་བྲེའི་ཞལ་བྱང་། འཕྲུལ་སྣང་བརྟེན་དང་རྟེན་པའི་གཙུག་ཏོར་རྩེར། །དབང་གཞུའི་མདངས་འཕྲོག་བཟང་གོས་བླར་བྲེས་པས། །བསྟན་འཛིན་དཱ་ཡན་རྒྱལ་པོས་ལྷ་མིའི་རྟེན། །བརྒྱུད་མར་རྙེད་ནས་རིང་མིན་འཚང་རྒྱ་ཤོག །ཇོ་བོ་རིན་པོ་ཆེར་སྣམ་སྦྱར་སངས་རྒྱས་སྟོང་སྐུ་ཡོད་པ་ཕུལ་བའི་ཞལ་བྱང་། ལྟ་ན་ཉེར་སྡུག་མཚན་དང་དཔེ་བྱད་གཟི། །མངོན་སུམ་ལྟར་འབར་གསེར་དམར་ཞུན་མའི་སྐུར། །འདྲེན་པ་སྟོང་གི་སྣང་(༡༡༤བ)
བརྙན་རབ་བཀྲ་བའི། །དགེ་སྦྱོང་མཆོག་གི་ན་བཟའ་ཕུལ་བའི་འབྲས། །ཧོར་བོད་ཟུང་དུ་འཇུག་པའི་མི་ཡི་བདག །སྟོབས་ཀྱིས་བསྟན་འཛིན་དཱ་ཡན་ཆོས་ཀྱི་རྒྱལ། །སྐྱེ་བར་མཐོ་རིས་བདུན་ལྡན་སྲིད་བཟུང་ཞིང་། །རིང་མིན་རྣམ་པ་ཐམས་ཅད་མཁྱེན་གྱུར་ཅིག །ར་མོ་ཆེའི་ཇོ་བོར་ཕུལ་བའི་སྣམ་སྦྱར་གྱི་ཞལ་བྱང་། སྤང་རྟོགས་ཡོན་ཏན་མཐོ་དམའ་མེད་མཉམ་པར། །སྙིང་སྟོབས་བརྩོན་པ་ས་གཅིག་ཏུ་མངོན་མཐོ་བ། །དོན་ཀུན་གྲུབ་པའི་ཞལ་སྐྱིན་མཛེས་སྐུ་ལ། །མུ་ཏིག་ལས་སྤྲས་རུང་མཐུན་གོས་སྤུད་པས། །ཐུབ་བསྟན་བསྐལ་མཐར་མི་ཉམས་འཛིན་སྐྱོང་ལ། །བློ་སྟོབས་མེས་པོའི་རྗེས་སུ་རབ་སྙེག་པ། །གནམ་སའི་མངའ་བདག་དཱ་ཡན་རྒྱལ་པོ་ཡི། །ཡང་སྲིད་བརྒྱུད་མར་དལ་འབྱོར་རྟེན་རྙེད་ཤོག །མཐོ་རིས་རིན་ཆེན་སྐས་ལ་གྱེན་འཛེགས་ནས། །མི་གནས་མྱ་ངན་འདས་པའི་ཁང་བཟང་དུ། །ཉེར་ཞུགས་གསང་གསུམ་བཀོད་པའི་ཆོ་འཕྲུལ་གྱིས། །མཁའ་མཉམ་ལུས་ཅན་མ་ལུས་འདྲེན་གྱུར་ཅིག ། ར་མོ་ཆེར་འཕན་སྟོད་གསེར་མ་ལ་སྨད་ཚོན་ཁྲས་བྱས་པ་ཕུལ་བའི་ཁ་བྱང་། ཐགས་རིས་ཚོན་ཁྲའི་བ་དན་མགོན་ཁྱོད་ཀྱི། །སྤྱན་སྔར་སྲི་ཞུའི་ཚུལ་གྱིས་ཉེར་བསྒྲེང་བས། །བསྟན་འཛིན་དཱ་ཡན་རྒྱལ་པོ་བྱང་ཆུབ་བར། །བདུད་བཞིའི་གཡུལ་ལས་རྣམ་པར་རྒྱལ་བར་ཤོག ། ར་མོ་ཆེར་གོས་འཕན་སྔོན་པོ་ཕུལ་བའི་ཁ་བྱང་། །མཁའ་དབྱིངས་དབང་གཞུས་འཁྱུད་ལ་ཉེར་འཁུ་བའི། །གན་གོས་བ་དན་བསྒྲེང་པས་སྒྲིབས་གཉིས་ཀྱི། །གཡུལ་ལས་བསྟན་འཛིན་དཱ་ཡན་རབ་རྒྱལ་ཏེ། །བྱང་ཆུབ་མཆོག་གིས་ས་ཆེན་སྐྱོང་བར་ཤོག །བསམ་ཡས་སུ་ཕུལ་བའི་རྒྱལ་མཚན་གིས་ཁ་བྱང་། །བཟང་གོས་(༡༡༥ན)
རྣམ་བཀྲ་བརྩེགས་པའི་རྒྱལ་མཚན་རྩེར། །མི་ཡི་བདག་པོའི་བསོད་ནམས་རྐང་པའི་རྡུལ། །བཀོད་ཚེ་འགྲན་ཟླའི་རྒོལ་བར་དོགས་མེད་ཅིང་། །གཉེན་འདུན་རྩ་ལག་ཡིད་ལ་སིམ་པར་ཤོག ། ས་སྤྲེལ་སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་གཞན་སྣང་དུ་བསྐྲུན་པའི་ཚེ་ཕྱག་མཛོད་བློ་བཟང་ངག་དབང་གིས་ཇོ་ཤཱཀ་གཉིས། རང་བྱོན་ལྔ་ལྡན། འཕགས་པ་མཆེད་བཅས་པར་སྙན་དར་འབུལ་སྐབས་ཁ་བྱང་དགོས་ཚུལ་ལྟར་བྲིས་པ་གཟུགས་སྐུ་སྲིད་མཐར་བརྟན་བྱེད་གཡུལ་དྲུང་འཁྱིལ་བ། ཇོ་བོ་རིན་པོ་ཆེར། བསྐལ་བཟང་འདྲེན་པ་སྟོང་གི་ནང་ཚན་ནས། །གདུལ་དཀའ་འདུལ་ལ་སྨོན་ལམ་ཁྱད་པར་གྱིས། །མཆོག་གྱུར་ཀུན་མཁྱེན་བུ་རམ་ཤིང་པ་ཡི། །ཐུགས་རྗེ་ཉི་མ་དངོས་བརྒྱའི་འོད་སྤྲོས་ནས། །དེང་དུས་གྲུབ་རིས་རྒྱ་མཚོའི་གཙུག་གི་རྒྱན། །ངག་གི་དབང་ཕྱུག་བཀྲ་ཤིས་དཔལ་གྲུབ་པ། །ཚུལ་བསྟན་བསྙུན་གྱི་མུན་པ་ཉེར་སངས་ཏེ། །ཚེ་མཐའ་ཡས་པའི་མགོན་ལྟར་བྱིན་གྱིས་རློབས། །འཕགས་པ་ཝ་ཏིར། ངག་གི་དབང་ཕྱུག་བཀྲ་ཤིས་དཔལ་གྲུབ་རྗེ། །བསྙུན་ཚུལ་གཞན་ངོར་བསྟན་ལས་རྣམ་གྲོལ་ཏེ། །སྲིད་མཐའི་བར་དུ་གཡོ་མེད་རྡོ་རྗེ་ལྟར། །བཞུགས་པར་མཛོད་ཅིག་འཕགས་མཆོག་ཝ་ཏི་བཟང་། །བཅུ་གཅིག་ཞལ། སྔོན་ཚེ་ཁྱོད་ཞལ་ལས་འཕྲོས་མེ་དཔུང་གིས། །ཡིད་སྲུབས་སྡེ་བཅས་བཅོམ་པའི་གྲགས་སྙན་ལྟར། །ངག་དབང་བཀྲ་ཤིས་དཔལ་གྲུབ་སྐུ་ཚེ་ཡི། །བར་བཅོད་ཕ་མཐར་སྐྲོད་ཅིག་ནམ་མཁའི་རྒྱལ། །འཕགས་པ་ལོ་ཀེ་ཤ་ར། ཕྱག་མཐིལ་ལས་བབས་བདུད་རྩིའི་ཆུ་རྒྱུན་གྱིས། །ངག་གི་དབང་ཕྱུག་བཀྲ་ཤིས་དཔལ་གྲུབ་པའི། །ཚུལ་བསྟན་ཉེས་བརྒྱའི་དྲི་མ་ཅན་བཀྲུས་(༡༡༥བ)
ནས། །གཡོ་མེད་བརྟན་པར་མཛོད་ཅིག་སྙིང་རྗེའི་གཏེར། །ར་མོ་ཆེའི་ཇོ་བོར། ཡིད་སྲུབས་སྡེ་བཅས་བ་དན་ཡོངས་བསྙལ་ནས། །སྐུ་བཞིའི་རྒྱལ་མཚན་སྲིད་པའི་རྩེར་བསྒྲེང་བ། །ཐུབ་དབང་བརྒྱད་པའི་ལང་ཚོར་བབས་པའི་སྐུ། །མཐོང་ཐོས་དྲན་རེག་དོན་ལྡན་ལ་སྦྱོར་ཀྱེ། །གྲུབ་རིས་ཤིང་རྟ་རྙོག་མའི་འདམ་རྫབ་ལས། །འདྲེན་མཛོད་དྭགས་བརྒྱུད་གཙུག་རྒྱན་ངག་གི་དབང་། །བཀྲ་ཤིས་དཔལ་གྲུབ་ངེས་དོན་ཆོས་ཀྱི་ཉི། །རྣམ་གྲོལ་མཆོག་སྡེ་སྲིད་མཐར་བརྟན་བྱིན་རློབས། །ས་བྱ་གནམ་ལོ་གསར་ཚེས་ཀྱི་གཏོར་ཆེན་ཐོག་སྲིད་གསུམ་དབང་སྒྱུར་རེ་མ་ཏཱིར་དར་ཚོན་སྣ་ལྔའི་སྙན་ཤལ་ཕུལ་བའི་ཁ་བྱང་ཕན་བདེའི་ཡོངས་འདུ་གཡུར་ཟ། ལྗང་། དོན་ཀུན་གྲུབ་པའི་བསྟན་ལ་སྨོན་ལམ་གྱིས། །མཐུ་རྩལ་ཆོས་སྲུང་གཞན་ལས་ཁྱད་པར་དུ། །ཆེས་ལྷག་དབྱངས་ཅན་ལྷ་མོ་ཁྲོ་གཏུམ་གཟུགས། །རབ་འཛིན་འདོད་ཁམས་ཀུན་ལ་མངའ་སྒྱུར་མ། །སྲིད་པའི་རྒྱལ་མོ་འཕྲིན་ལས་དཀྱིལ་འཁོར་ལྷར། །མ་མོ་གཡག་གི་མགོ་ཅན་ཐོད་རློན་འཆང་། །ངེས་པའི་དོན་དུ་རྡོ་རྗེ་དབྱིངས་ཕྱུག་མ། །ཐམས་ཅད་རྣལ་འབྱོར་སེམས་ཀྱི་རོལ་པའི་རྩལ། །ཁྱོད་བསྟེན་ཡིད་བཞིན་དབང་གི་རྒྱལ་པོ་ལྟར། །ཅི་འདོད་བསམས་པའི་མོད་ལ་འབད་མེད་དུ། །ལས་བཞིའི་འཕྲིན་ལས་དངོས་གྲུབ་ཆར་ཆེན་པོ། །ལེགས་ཕོབ་ཕན་བདེའི་ཡོངས་འདུ་གཡུར་ཟར་མཛོད། །དཀར། སྲིད་པའི་ཉེས་བརྒྱ་ཀུན་དང་ལྷན་ཅིག་ཏུ། །སྒྲིབ་གཉིས་སྟུག་པོའི་སྨག་རུམ་མ་ལུས་པ། །ཁྱོད་ཞལ་ཟླ་བ་དཀར་པོ་ཤར་ཙམ་གྱིས། །རབ་གཞིལ་བདེ་སྐྱིད་སྣང་བ་རྒྱས་པར་མཛོད། །སེར།ཛམྦུའི་གསེར་སྦྱངས་བརྒྱ་ཕྲག་གཉིས་བཞུ་བའི། །འོད་ཀྱིས་འཁོར་(༡༡༦ན)
འདས་ཡོན་ཏན་མ་ལུས་པ། །བསོད་ནམས་ཉམས་སུ་མྱོང་བར་བྱིན་གྱིས་རློབས། །དམར།ཕྱག་མཚན་པད་རཱག་ལྕགས་ཀྱུ་ཕྱར་ཙམ་གྱིས། །བརྟན་གཡོའི་དངོས་ཀུན་བཀུག་པའི་གཙུག་ཏོར་རྩེར། །རྐང་སེན་ཟླ་བ་ཚེས་པའི་ཅོད་པན་གྱིས། །མཛེས་པར་མཛོད་ཅིག་ཁམས་གསུམ་དབང་བྱེད་ལྷ། །ནག་པ།གནག་པའི་ཡིད་ལ་གང་ཤར་སྦྱོར་བ་ཡི། །རྩོམ་བྱེད་གཟུགས་ཅན་དགྲ་དང་གཟུགས་མེད་བགེགས། །རྣོ་ངར་མཚོན་གྱིས་ཁོག་པ་ཉེར་གཤགས་ཏེ། །དོན་སྙིང་ཁྲག་དྲོན་བཅས་པ་ཞལ་དུ་རྔུབས། །ས་བྱའི་བརྒྱད་གཏོར་ཐོགས་མགོན་པོ་ཆེ་ཆུང་འཁོར་བཅས་ལ་ཕུལ་བའི་སྙན་དར་ཞལ་བྱང་བདུད་སྡེའི་གཡུལ་ངོ་བཅོམ་པའི་རྒྱལ་མཚན། བསྟན་སྲུངས་རྒྱ་མཚོའི་འཁོར་ལོས་སྒྱུར་རྒྱལ་དུ། །རྣམ་སྣང་ཐུགས་ལས་སྤྲུལ་པའི་ནག་པོ་ཆེ། །ལྕམ་དྲལ་ཕོ་ཉ་བཀའ་སྡོད་བྲན་གཡོག་ཚོགས། །བདུད་ཀྱི་སྡེ་ཆོམས་ཕན་བདེའི་རྒྱལ་མཚན་སྒྲོངས། །དར་དཀར།བདེ་ཆེན་འཁོར་ལོར་ཆུ་ཤེལ་ཞུན་མའི་མདངས། །ལེགས་གསལ་ཕྱག་གི་བུམ་ཐོད་བདུད་རྩི་ཡིས། །མི་ཤིགས་སྲོག་གི་ཀ་བ་རབ་བཙུགས་ཏེ། །འཆི་མེད་རིག་འཛིན་འགྲུབ་པར་བདགབྱིན་རློབས། །དར་སེར།སྤྲུལ་པའི་འཁོར་ལོར་ཛམྦུའི་གསེར་མདངས་ཅན། །རིན་ཆེན་བྱུར་བུར་གཏམས་པའི་ཀ་པ་ལིས། །ཅི་འབྱོར་ཆར་དུ་སྙིལ་ཏེ་ཚེ་འབྱོར་སྟོབས། །ལུང་རྟོགས་སྲིད་ཞིའི་ཡོན་ཏན་རྒྱས་པར་མཛོད། །དར་དམར།ལོངས་སྤྱོད་འཁོར་ལོར་པད་རཱག་མདངས་འཛིན་པའི། །ལྕགས་ཀྱུ་ནམ་མཁའི་དབྱིངས་སུ་གཟས་ཙམ་གྱིས། །འཁོར་འདས་ཀུན་གྱི་ལེགས་ཚོགས་མ་ལུས་པ། །(༡༡༦བ)
ཐོགས་མེད་དབང་དུ་བསྡུ་བའི་འཕྲིན་ལས་མཛོད། །དར་མཐིང་། །ཆོས་ཀྱི་འཁོར་ལོར་མིའུ་ཐུང་སྲིན་པོའི་གཟུགས། །གྲི་གུག་འབར་བའི་རྩེ་ལ་དགྲ་བགེགས་དཔུང་། །མི་རྟག་ལམ་དུ་བཀོད་དེ་མངོན་སྤྱོད་ཀྱི། །ལས་སྦྱོར་རྡོ་རྗེའི་ཐོག་མདའ་མྱུར་དུ་སྒྲུབས། །དར་ལྗང་། །བདེ་ཆེན་འཁོར་ལོ་སྡོམ་མཛད་བཅོམ་ལྡན་འདས། །དགྲ་བགེགས་སྟེང་དུ་བྲོ་བརྡུངས་སྲིན་པོའི་གཟུགས། །སྟོབས་འཕྲོག་དབང་པོ་ལྷ་ཆེན་གདོང་བཞི་པ། །བཀའ་སྡོད་ཚོགས་བཅས་མ་གཡེལ་གནས་འདིར་སྤྱོན། །དམར་ཆེན་གཏོར་མའི་རི་བོ་མཁའ་ལ་སྙེག །ཁྲག་ཚང་བཏུང་བ་རྒྱ་མཚོ་ལྟ་བུར་འཁྱིལ། །ཕྱི་ནང་གསང་རྟེན་ཀུན་ཏུ་བཟང་པོ་ཡི། །མཆོད་སྤྲིན་མི་འཛད་མཛོད་དུ་སྤེལ་འདི་བཞེས། །སྨིན་གྲོལ་གདམས་པའི་ཆུ་རྒྱུན་མ་ནུབ་འཕེལ། །སྙན་བརྒྱུད་མཁའ་འགྲོའི་ཁ་རླང་ངད་མ་ཡལ། །ཚད་མ་བཞི་ལྡན་འཛིན་པའི་རྣལ་འབྱོར་ཀྱིས། །བཅོལ་བའི་ཞི་རྒྱས་དབང་དྲག་ལས་ཀུན་སྒྲུབས། །འཆི་བདག་གཤིན་རྗེའི་རྒྱལ་པོ་པུ་ཏྲ་ནག །འཁོར་བཅས་མ་གཡེལ་བསམ་ངན་སྦྱོར་རྩུབ་དགྲའི། །དོན་སྙིང་ཁྲག་དྲོན་ཧུབ་ཀྱིས་མྱུར་དྲོངས་ལ། །ནག་པོའི་རྩ་ལག་སྡེ་དང་བཅས་པ་ཆོམས། །གནོད་སྦྱིན་སྡེ་དཔོན་སྐྱེས་བུ་དབང་གི་མདོག །རིག་པའི་ལྷ་མོ་ལྕམ་དྲལ་བཀའ་སྡོད་བཅས། །དམར་ཟླུམ་སྤྱན་གྱིས་ཕྱོགས་བཅུར་རབ་གཟིགས་ནས། །ཚར་གཅོད་རྗེས་འཛིན་ལས་རྣམས་མྱུར་དུ་སྒྲུབས། །ས་བྱ་ཧོར་ཟླ་གསུམ་པའི་ནང་དུ་མཆོད་དཔོན་བློ་བཟང་མཐུ་སྟོབས་ཆོས་འཁོར་རྒྱལ་མི་གྱུར་ལྷུན་གྱིས་གྲུབ་པའི་གཙུག་ལག་ཁང་དུ་གཏོར་གསོ་ལ་བཏང་སྐབས་བྱམས་ཆེན་ལ་དར་ཚོན་སྣ་སོགས་ཀྱི་སྙན་ཤལ་ཕུལ་བའི་ཁ་བྱང་དངོས་གྲུབ་འཛད་མི་ཤེས་(༡༡༧ན)
པའི་ཆུ་རྒྱུན། ཀུན་ལ་གཅིག་བརྩེའི་བྱམས་པའི་དཔུང་ཆེན་པོས། །བདུད་བཞིའི་གཡུལ་ལས་རྣམ་པར་རབ་རྒྱལ་ཏེ། །རིགས་དྲུག་ངེས་ལེགས་ལ་སྦྱོར་ས་བཅུའི་གཙོ། །མི་ཕམ་མགོན་ཞལ་དགྱེས་འཛུམ་ལྷུག་པར་སྟོན། །སྒྲིབ་གཉིས་སྡིག་པའི་ཆོས་ཀྱིས་གོས་མིན་པར། །རྫོགས་སངས་རྒྱས་ཀུན་ཡོན་ཏན་མ་ལུས་པ། །ཁྱོད་ཀྱིས་རང་གིར་བཟུང་བའི་སྤོབས་མཐོ་ཡིས། །ཆེར་སྙིགས་འགྲོ་འདྲེན་དམ་བཅའི་ཁུར་དུ་ལྕི། །གང་ཐུགས་བསྐུལ་བའི་གསོལ་འདེབས་ཏམྦུརའི། །རྒྱུད་ལས་ཉེར་དྲངས་དབྱངས་སྙན་རབ་འཁྲོལ་ན། །མཁྱེན་བརྩེ་ཉི་མའི་དངོས་བརྒྱ་ཡོངས་སྤར་ཏེ། །འཇིག་རྟེན་གསུམ་གྱི་དུཿཁའི་སྨག་རུམ་སོལ། །མི་དགེ་སྤྱད་འབྲས་རྩོད་པའི་དུས་སྨིན་པ། །འགྲོ་འདིའི་རང་ཉེས་གཞན་གྱིས་(༡༡༧བ)
བཅོས་མིན་པས། །ད་དུང་ལྕགས་ལ་གསེར་འགྱུར་ཇི་བཞིན་དུ། །རྫོགས་ལྡན་མྱོང་པའི་གོ་སྐབས་མེད་དམ་ཅི། །ས་བོན་མ་བཏབ་མྱུ་གུའི་རྗེས་འགྲོ་ལྟར། །རང་འདོད་བླུན་ཚིག་གིས་གསོལ་རིགས་མིན་ཡང་། །དུས་གསུམ་བསགས་པའི་ལེགས་བྱས་ཕུང་པོ་འདིས། །ཡིད་ཅན་འཆི་མེད་བདེ་ལ་སྤྱོད་སྦྱིན་རློབས། །འཇམ་མགོན་བློ་བཟང་གྲགས་པའི་ཆོས་སྲིད་གདུགས། །ཚངས་པའི་ཡུལ་སར་བླ་ནས་བླར་འཁོར་བའི། །གྲིབ་མར་སྤུར་རྒྱལ་ཡངས་པའི་རྒྱལ་ཁམས་ཀྱི། །སྐྱེ་རྒུ་སིམ་པའི་ངལ་གསོར་གཡུར་བར་ཤོག །བསོད་ནམས་ཨ་མྲའི་ཚི་གུ་གངྒཱའི་རྡུལ། །གྲངས་སྙེད་བསྔོ་སྨོན་གཤེར་གྱིས་ཡོངས་སྨིན་པས། །སྲིད་དང་ཞི་བར་ཉེར་བདེ་ལྗོན་ཤིང་གི །འབྲས་བུར་བྱང་ཆུབ་བར་དུ་སྤྱོད་པར་ཤོག །རིང་ནས་རྣམ་འདྲེན་ཀུན་དང་སྤང་རྟོགས་ཚོགས། །མཉམ་ཡང་ཆོས་སྦྱིན་ས་ལ་གནས་ཟོལ་གྱིས། །བསྐལ་བཟང་སྒྲོན་མེ་ལྔ་པར་དབུས་འགྱུར་དུ། །མྱུར་འཚང་རྒྱ་བར་ཞལ་འཆེས་བྱམས་མགོན་ཀྱེ། །ཁྱོད་ཕྱག་རིང་པོར་བརྐྱངས་ནས་འཁོར་འཁྱམས་འགྲོ །ཀུན་གྱི་དབུགས་དབྱུང་མཐོ་རིས་ཐར་པའི་སར། །རབ་བཀོད་བསྟན་འགྲོའི་བདེ་སྐྱིད་དཀར་ཆའི་ཟླ། །བསྐལ་པའི་ཕ་མཐའ་དེ་སྲིད་འཕེལ་བར་མཛོད། །བདག་སོགས་ཚེ་དཔལ་སྟོབས་འབྱོར་ལུང་རྟོགས་ཆོས། །འཁོར་འདས་དགེ་ལེགས་འབྲས་བུས་ཡོངས་དུད་ཅིང་། །གང་བསགས་ཆོས་དཀར་མཁའ་མཉམ་ལུས་ཅན་ཚོགས། །ཀུན་མཁྱེན་ཡིད་བཞིན་འཐོབ་པའི་རྒྱུ་རུ་བསྔོ། །མཐིལ་མགོན་ཁང་ཆེན་མོའི་ཆོས་སྐྱོང་སྤྱིར་གོས་དམར་མེ་ཏོག་ཟླུམས་མཛེས་སུ་ཕུལ་བའི་ཁ་བྱང་། འཇམ་དཔལ་ཁྲོས་པའི་འཇིགས་མཛད་མ་ཧེའི་ཞལ། །ལས་བྱེད་དུས་ཀྱི་དགྲ་བོ་ཕྱི་(༡༡༨ན)
ནང་གསང་། །བླ་མགོན་དབྱེར་མེད་མིའུ་ཐུང་སྲིན་པོའི་གཟུགས། །གནོད་སྦྱིན་བྱེ་བའི་སྡེ་དཔོན་ངལ་བསོས་བུ། །སྲིད་རྒྱལ་འདོད་ཁམས་དབང་མོ་རེ་མ་ཏཱི། །སྟོབས་འཕྲོག་ནག་པོ་ལྷ་ཆེན་གདོང་བཞི་པ། །བཀའ་སྡོད་བཤན་པ་བེག་ཙེ་ལྕམ་དྲལ་སོགས། །མཐུ་ལྡན་བསྟན་སྲུངས་རྒྱ་མཚོའི་ཚོགས་བཅས་ལ། །དངོས་འབྱོར་མཆོད་གཏོར་སྤྱན་གཟིགས་ཡོངས་བསྟར་བ། །ཏིང་འཛིན་སྔགས་རྒྱས་ནམ་མཁའི་ཁམས་བཀང་སྟེ། །འབུལ་ན་འཕྲིན་ལས་རྣམ་བཞི་མ་ལུས་པ། །ཐོགས་པ་མེད་པར་ལྷུན་གྱིས་གྲུབ་པར་མཛོད། །རྡོ་སྐུ་མེ་འབར་མར་མཐིང་ཁ་མེ་ཏོག་འདབ་དྲུག་རིས། བསྟེན་པས་དངོས་གྲུབ་སྩོལ་ལ་ཡིད་བཞིན་དབང་། །རྦད་ན་དགྲ་དཔུང་ཚར་གཅོད་གནམ་ལྕགས་ཐོག །དྲན་པས་ཡིད་ཀྱི་གདུང་སེལ་ཞལ་བཞི་པ། །སྙིང་དབུས་འདབ་བརྒྱའི་ཟེའུ་འབྲུར་རྟག་བཞུགས་མཛོད། །མགོན་པོ་ཀོ་གཏུམས་མ་ལ་མེན་དམར་པོ་ཁ་གསུམ། ལྷ་ཁྱོད་གཡར་ངོ་འཕྱར་བའི་མོད་ཉིད་ལ། །གནག་པའི་བསམ་སྦྱོར་འཆང་བའི་དཔུང་བཅས་རྣམས། །ཕྱེ་མར་འཐག་པའི་ལེགས་ལྡན་ནག་པོ་ཆེས། །བསྟན་དང་བསྟན་འཛིན་སྡེ་དང་བཅས་པ་སྐྱོངས། །ཚེ་བདག་ལ་ཁ་བཏགས་འདོམ་འཁོར། གང་གི་མཐུ་སྟོབས་ནུས་པའི་དཔུང་ཆེན་པོས། །འཁོར་འདས་ཕྱག་རྒྱ་མ་ལུས་ཟིལ་གནོན་ཕྱིར། །འཇམ་དཔལ་དུས་དགྲར་ཁྲོས་པ་ཚེ་བདག་ནག །བན་བོན་བྱད་ཁ་རང་གཤེད་རང་ལ་ཕོབ། །ཙེ་ཏྲང་ཀ་ལ་གོས་ནག་གསུམ་འབྲེལ། འཁོར་འགྲོ་སྲིད་དོ་ཅོག་གི་གཉའ་བ་ན། །གདོད་ནས་གྲུབ་པའི་འཆི་བདག་ཡབ་ཡུམ་གྱིས། །གནམ་ས་ལྟ་བུར་གདངས་པའི་ཁ་ནང་དུ། །དགྲ་བགེགས་གནོད་བྱེད་བསྟབ་བོ་ཁ་རཾཁཱ
ཧི། །སྟག་ཞོན་ལ་ཁ་བཏགས་འདོམ་འཁོར། སྣང་སྲིད་སྡེ་བརྒྱད་རྦ་ཀློང་འཁྲུག་པའི་དབུས། །སྟག་ཆེན་སྨྱོན་པར་ཞོན་ནས་དགྲ་བོའི་བླ། །འགུགས་མཛད་དཔལ་མགོན་ལེགས་ལྡན་ནག་པོ་ཡིས། །གནོད་བྱེད་གདུག་པའི་ཚོགས་རྣམས་ཚར་ཆོད་ཅིག །མཐུ་ཆེན་སྡེ་བཞི་ལ་ཁ་བཏགས་འདོམ་འཁོར། ཟབ་གཏེར་བསྟན་སྐྱོང་ལྷ་བཙན་བདུད་ཀྱི་བུ། །ཀླུ་བདུད་རྡོ་རྗེ་སྤྱན་གཅིག་མར་བཅས་པའི། །མཐུ་ཆེན་སྡེ་བཞི་འཁོར་བཅས་ཁྱེད་རྣམས་ཀྱིས། །འགལ་རྐྱེན་ཀུན་སོལ་མཐུན་རྐྱེན་མ་ལུས་སྒྲུབས། །མགོན་ཁང་བར་དམག་ཟོར་མར་ལིང་ཡུག་གསུམ་འབྲེལ། དབྱངས་ཅན་ངེས་པའི་དོན་དུ་དབྱིངས་ཕྱུག་ལྷ། །མ་མོའི་གཙོ་མོར་རབ་སྤྲུལ་རེ་མ་ཏཱིས། །བསྟན་དང་བསྟན་འཛིན་རྣལ་འབྱོར་ལེགས་སྐྱོངས་ལ། །ཡིད་སྲུབས་སྡེ་བཅས་བ་དན་ས་ལ་སྙོལ། །དེ་ཝཱི་ཀོཊིའི་དམག་ཟོར་མར་གོས་དམར་རྒྱན་བཞི་ཕུལ། ཀུན་ལ་བཏང་སྙོམས་སྤྲོས་བྲལ་ཉེར་ཞིའི་གདངས། །ཆོས་ཀྱི་དབྱིངས་ནས་ཡོངས་ལ་རྟག་འཆར་ཡང་། །དགྲ་བགེགས་གཤེད་དུ་ཁྲོ་གཏུམ་སྲིན་མོའི་གཟུགས། །སྟོན་མཛད་དམག་དང་ཟོར་གྱི་སྣ་འདྲེན་མ། །ཁྱོད་སྐུ་དཀར་སེར་དམར་མཐིང་དབང་གཞུའི་མདོག །གཅིག་ལས་དུ་མར་སྒྱུར་བའི་གར་མཁན་གྱིས། །ཅི་འདོད་འཕྲིན་ལས་སྒྲུབ་པ་རིག་པའི་རྩལ། །མཁའ་ལ་འཇའ་འདྲའི་ཚུལ་དུ་ངེས་པ་རྙེད། །དྲེགས་པའི་ཚུལ་འཛིན་མ་མོ་སྲིད་པའི་རྒྱལ། །ཚངས་པའི་བུ་མོར་དབྱངས་ཅན་ལུས་ཕྲའི་ཚུལ། །འཁོར་ལོའི་གཙོ་མོར་རྡོ་རྗེ་དབྱིངས་ཕྱུག་མ། །མཆོག་དམན་བར་པར་འཛིན་པ་འཁྲུལ་པའི་བློ། །ཨེ་མ་དང་པའི་མཚོ་ལ་སྣང་བརྙན་བཞིན། །གང་གང་ཐབས་ཀྱིས་འདུལ་བའི་སྒྱུ་མ་མཁན། །ངེས་པའི་དོན་དུ་ཀུན་ཏུ་བཟང་མོ་(༡༡༩ན)
རུ། །བཅོས་མིན་ཡིད་ཀྱིས་གསོལ་བ་གདབ་བྱེད་ན། །རྒྱལ་བསྟན་དེ་འཛིན་སྲིད་སྡེ་བོད་འབངས་བཅས། །བསོད་ནམས་ཛམྦུའི་སྙེ་མ་ཟད་མི་ཤེས། །རྟག་པར་ལོངས་སྤྱོད་སེམས་ལ་གདུང་བའི་ཚེར། །མངོན་སུམ་ལྟ་ཞོག་མིང་ཡང་མེད་པར་མཛོད། །ཁྱད་པར་རིག་སྔགས་འཆང་བ་བདག་ཅག་ལ། །ས་བྱ་ལྕགས་ཁྱིར་རྩུབ་པའི་བར་གཅོད་མུན། །ཐུགས་རྗེའི་སྐྱ་རེངས་ཀྱིས་དྲངས་མཐུ་སྟོབས་ཉིས། །མཐར་བྱས་ཕན་བདེའི་སྣང་བ་འབར་བར་མཛོད། །དགྲ་སྡེའི་དཔུང་ཆོམས་སྲིད་གསུམ་དབང་དུ་སྡུས། །ཚེ་དཔལ་འབྱོར་རྒྱས་ནད་གདོན་ཉེར་འཚེ་དང་། །ཉོན་མོངས་ཤེས་བྱའི་སྒྲིབ་པ་ཀུན་ཞི་བའི། །འཕྲིན་ལས་སྒོ་ཕྱེ་དམག་ཟོར་ལྷ་མོ་ཀྱེ། །ལྷ་མོའི་གསེར་སྐུར་ཁ་བཏགས་དཀར་པོ། ལྷ་ཁྱོད་བསྟེན་པའི་མོད་ལ་ཡོངས་འདུ་དང་། །བུམ་བཟང་འདོད་འཇོའི་བ་མོ་ཇི་བཞིན་དུ། །སྔོན་ཆད་བསམས་དོན་ལྷུན་གྱིས་གྲུབ་པ་ལྟར། །བྱང་ཆུབ་ཐོབ་མེད་དེ་སྲིད་སྒྲུབ་པར་མཛོད། །བསྟན་མ་བཅུ་གཉིས་ལ་ཁ་བཏགས་འདོམ་འཁོར་ལེགས། གནས་སྲུངས་མཁའ་འགྲོའི་དབང་མོ་གཡུ་སྒྲོན་མ། །གཙོར་གྱུར་བོད་སྐྱོང་བསྟན་མ་བཅུ་གཉིས་ཚོགས། །རིགས་འཛིན་པདྨའི་དམ་ཚིག་ཉེར་དགོངས་ལ། །དེང་འདིར་བཅོལ་བའི་འཕྲིན་ལས་ཡིད་བཞིན་སྒྲུབས། །སིལ་པ་ཚལ་གུར་མགོན་པོ་ལ་ཁ་བཏགས་འདོམ་འཁོར། རྣམ་སྣང་ཐུགས་ཀྱི་ཀློང་ནས་ནག་པོ་ཆེ། །མིའུ་ཐུང་སྲིན་པོའི་ཟློས་གར་སྒྱུར་པ་ལ། །བསྟན་སྲུངས་རྒྱ་མཚོའི་སྡེ་དཔོན་གུར་མགོན་ཞེས། །འཕགས་བོད་ཀུན་ཏུ་ཉི་ཟླ་ལྟར་གྲགས་ལྷ། །མཆོག་སྲེད་ལ་སོགས་པཎ་གྲུབ་བགྲང་ཡས་དང་། །རིན་བཟང་མལ་ལོ་འཇམ་དབྱངས་ས་སྐྱ་པ། །རིམ་པར་བྱོན་(༡༡༩བ)
པའི་དམ་ཚིག་རྡོ་རྗེའི་ཐོད། །འཆང་བ་ཇི་བཞིན་ཐུབ་པའི་བསྟན་པ་སྲུངས། །ཁྱད་པར་རྣམ་དག་དབང་གི་རྒྱུན་མ་ནུབ། །མན་ངག་མཁའ་འགྲོའི་ཁ་བརླང་ངད་མ་ཡལ། །སྙན་བརྒྱུད་ཚད་མ་བཞི་ལྡན་འཛིན་བདག་གིས། །བཅོལ་བའི་འཕྲིན་ལས་མ་ལུས་མྱུར་སྒྲུབས་མཛོད། །ཞལ་ལ་ཁ་བཏགས་འདོམ་འཁོར། དག་པའི་སྣང་བར་ཚད་མེད་བཞི་ཡི་སྒོ། །ལོག་འདྲེན་དགྲ་བོའི་འཁྲུལ་ངོར་གདངས་པའི་ཞལ། །ཆེམ་ཆེམ་བམ་རོ་བཟས་ཀྱང་མ་ཚིམ་པར། །ཞིང་བཅུའི་སྟེང་དུ་བྲོ་རྡུང་སྟོབས་འཕྲོག་ནག །ཀླུ་སྒྲུབ་རྣལ་འབྱོར་དབང་མོ་ལོ་ཆེན་གཉན། །འཁོར་རིགས་འཇམ་མགོན་གདུང་གསོབ་རིམ་བྱོན་དང་། །ཁྱད་པར་ཀུན་སྤངས་བླ་མ་མཚར་པ་རྗེ། །ཡབ་སྲས་བརྒྱུད་པའི་དམ་ཚིག་ཉེར་དགོངས་ལ། །བསྟན་འགྲོའི་ལེགས་ཚོགས་ཡར་ངོའི་ཟླ་ལྟར་རྒྱས། །རིགས་འཛིན་བདག་གི་ཆོས་སྲིད་ཡོན་ཏན་སྤེལ། །གནག་པའི་དགྲ་བགེགས་མ་ལུས་རྡུལ་དུ་རློག །ཕྱོགས་ལས་རྣམ་པར་རྒྱལ་བའི་འཕྲིན་ལས་སྒྲུབས། །པུ་ཏྲ་ལ་ཁ་བཏགས་འདོམ་འཁོར། །གནོད་སྦྱིན་ཡབ་ཡུམ་པུ་ཏྲ་ལྕམ་དྲལ་རྣམས། །ཀླུ་སྒྲུབ་པདྨ་ཐོད་འཕྲེང་ས་སྐྱ་པ། །རྩ་བརྒྱུད་བླ་མའི་དམ་དགོངས་དེང་གི་དུས། །བདག་གིས་བཅོལ་བའི་ལས་བཞི་མ་ལུས་སྒྲུབས། །ཆོས་འབྱུང་སྟེང་དུ་ཆོས་སྐྱོང་སྤྱིར་གོས་ནག་རྒྱན་བཞི་ཕུལ། ཁྲོ་ཆགས་འཇོ་སྒེག་ལ་སོགས་རྣམ་རོལ་གྱིས། །བསྟན་པ་སྐྱོང་ལ་དཔག་དཀའི་རྫུ་འཕྲུལ་ཅན། །དམ་ལྡན་སྲུང་མ་རྒྱ་མཚོའི་ཚོགས་རྣམས་ཀྱིས། །བསམས་པའི་དོན་ཀུན་ལྷུན་གྱིས་གྲུབ་པར་མཛོད། །ཞིང་སྐྱོང་ལ་དར་མཐིང་། ཕ་མེས་རིགས་ཀྱི་སྲུང་མ་བདུད་ཀྱི་མགོན། །སེང་གེའི་གདོང་ཅན་ལྕམ་དྲལ་འཁོར་བཅས་ཀྱིས། །བདག་(༡༢༠ན)
ལ་མཐོ་འཚམས་དགྲ་བགེགས་མ་ལུས་སྒྲོལ། །ཆོས་སྲིད་ལེགས་ཚོགས་བླ་ནས་བླར་འཕེལ་མཛོད། །བེག་རྩེ་ལྕམ་སྲིང་ལ་ཁ་བཏགས་འདོམ་འཁོར། ཟངས་ཀྱི་ཁྲབ་ཅན་སྐྱེས་བུ་དབང་གི་མདོག །ལྕམ་དྲལ་སྲོག་གཤེད་བཤན་པ་ཉེར་གཅིག་སོགས། །འཁོར་བཅས་མཐུ་དཔུང་བསྐྱེད་ལ་བདག་ཅག་གིས། །བཅོལ་བ་རྣམ་བཞིའི་འཕྲིན་ལས་མྱུར་དུ་སྒྲུབས། །རིག་པའི་ལྷ་མོ་ལ་ཁ་བཏགས་འདོམ་འཁོར། །རིག་པའི་ལྷ་མོ་མི་ཟན་དྲེད་ཞོན་ཏེ། །སྟོང་གསུམ་སྐད་ཅིག་མྱུལ་ནས་བསམ་ངན་དང་། །སྦྱོར་བ་རྩུབ་སྟོན་དགྲ་བགེགས་གར་འདུག་ཀྱང་། །སྙིང་ཁྲག་འཐུང་ལ་པགས་རློན་གོས་སུ་གྱོན། །རཱ་ཧུ་ལར་ཁ་བཏགས་འདོམ་འཁོར། ལུས་ལ་ཁྲག་གི་མིག་སྟོང་རབ་གསལ་བས། །གཟིགས་ནས་སྟེང་འོག་ཕྱོགས་མཚམས་གར་གནས་པའི། །གནོད་བྱེད་གཟུགས་ཅན་གཟུགས་མེད་བདུད་ཀྱི་སྡེ། །ཐལ་བར་རློག་ཅིག་གཟའ་བདུད་རཱ་ཧུ་ལ། །རྒྱལ་པོ་སྐུ་ལྔ་ལ་ཁ་བཏགས་འདོམ་འཁོར། ཁྱོད་ཀྱི་མཐུ་སྟོབས་ཡིད་བཞིན་དབང་གི་རྒྱལ། །འཕྲིན་ལས་རྒྱལ་མཚན་རྩེ་མོར་བཀོད་པའི་ཚེ། །བསམས་པ་ལྷུན་གྱིས་གྲུབ་པའི་འདོད་དགུའི་ཆར། །ཕོབ་ཅིག་སྤྲུལ་པའི་ཆོས་རྒྱལ་སྡེ་ལྔ་པོ། །ཙི་དམར་བར་ཁ་བཏགས་ཟངས་ཁ། ལི་ཡུལ་ཁྲིམས་ལྡན་དམོད་པ་འགྲུབ་པའི་འབྲས། །གནོད་སྦྱིན་ཆེན་པོ་ཡ་བ་སྐྱ་བདུན་གྱིས། །སྡེ་བརྒྱད་དམག་གི་ཁ་ལོ་ཉེར་བསྒྱུར་ནས། །དགྲ་དང་བགེགས་ཀྱི་དཔུང་ཚོགས་ཕྱེ་མར་རློགས། །རྡོར་ལེགས་ལ་ཁ་བཏགས་ཟངས་ཁ། མཆེད་འཁོར་སུམ་བརྒྱ་དྲུག་ཅུར་བཅས་པ་ཡིས། །པདྨའི་བཀའ་རྟགས་གཙུག་ན་ཉེར་བསྟན་བཞིན། །མ་གཡེལ་མ་གཡེལ་བཅོལ་པའི་ལས་རྣམས་ཀུན། །མྱུར་དུ་(༡༢༠བ)
སྒྲུབས་ཤིག་དམ་ཅན་ཐིག་ལེ་རྩལ། །གཟའ་གདོང་དམར་ནག་ལ་ཁ་བཏགས་འདོམ་འཁོར། གཟའ་རྒོད་མིག་དམར་བཤན་པའི་དབང་པོ་ཁྱོད། །པདྨ་ཐོད་འཕྲེང་ཐ་ཚིག་ཉེར་དགོངས་ལ། །རིགས་འཛིན་བདག་ལ་གནོད་པའི་དགྲ་བགེགས་སྙིང་། །ཐོད་པར་བླུག་ནས་ཞལ་དུ་ཆེམ་ཆེམ་གསོལ། །ཇོ་བོ་རྒྱལ་མཚན་པར་ཁ་བཏགས་འདོམ་འཁོར། སྔོན་ཚེ་ལངྐའི་ཡུལ་དུ་དཀར་པོའི་ཕྱོགས། །སྐྱོང་བའི་མཐུ་ལྡན་ཇོ་བོ་རྒྱལ་མཚན་པ། །མཆོད་གཏོར་སྙན་ཤལ་རྫས་ཀྱིས་ཉེར་སྐོང་ན། །བར་གཅོད་ཀུན་སོལ་མཐུན་རྐྱེན་སྒྲུབས་པར་མཛོད། །རྟ་རྒོད་ཤེལ་ལྕགས་ལ་ཁ་བཏགས་འདོམ་འཁོར། ཏེ་སེའི་མཛེས་པ་འཕྲོག་པའི་གངས་རི་ལ། །གནས་བཅས་གནོད་སྦྱིན་རྟ་རྒོད་ཤེལ་ལྕགས་ལ། །དངོས་འབྱོར་ཡིད་སྤྲུལ་མཐུན་པའི་རྫས་འབུལ་ན། །གཞི་ལམ་བྱེས་གསུམ་ཀུན་ཏུ་སྟོང་གྲོགས་མཛོད། །མངོན་དགའ་ལྕོག་གི་རྒྱལ་པོར་ཁ་བཏགས་འདོམ་འཁོར། ཆོས་རྒྱལ་ཆེན་པོ་གསང་ཡུམ་སྤྲུལ་པ་ལྔ། །ཕོ་ཉ་བློན་པོ་བཀའ་སྡོད་བཅས་རྣམས་ཀྱིས། །འགྲོ་ཀུན་བདེ་ཞིང་འདྲེན་པའི་བསྟན་པ་རྒྱས། །རིགས་འཛིན་བདག་གི་བསམས་དོན་ལྷུན་གྲུབ་མཛོད། །འཛིན་པ་ལག་མང་གི་དར་ལྕོག་ལ་འབྲི་རྒྱུ། ཡིད་བཞིན་འདོད་པ་འཇོ་བའི་གདེངས་ཅན་དབང་། །འཛད་མེད་རིན་ཆེན་གཏེར་གྱི་སྒྲོམ་བུ་ལས། །བསམ་པའི་རེ་བ་མ་ལུས་ཡོངས་སྐོང་ཞིང་། །ནད་གདོན་དབུལ་ཕོངས་ཉེས་བརྒྱ་ཞི་བར་མཛོད། །ས་བྱ་ཟླ་བ་བཞི་པའི་ཚེས་ལྔ་ནས་བཟུང་ཉིན་བདུན་གྱི་བར་བསམ་ཡས། ཁྲ་འབྲུག །ཡོམ་བུ་གླ་སྒང་གསུམ་གྱི་རྟེན་བརྟེན་པའི་ཚོགས་ལ་བརྒྱ་མཆོད་སྣ་ལྔ་ཕུལ་ཞིང་གསེར་ཆབ་སྤྱན་འབྱེད་བགྱིས་པའི་དུས་ཕུལ་བའི་སྙན་དར་ཞལ་བྱང་འདི་ཕྱིའི་འདུན་མ་ལྷུན་གྲུབ། བསམ་ཡས་སུ་བྱང་ཆུབ་ཆེན་པོར། སྤང་རྟོགས་མཐོ་དམའ་མེད་མཉམ་སངས་རྒྱས་ཀྱི། །རང་བཞིན་མཚུངས་(༡༢༡ན)
པར་ཐུགས་རྗེ་ཆེར་སྙོམས་ཀྱང་། །སྙིགས་མའི་འགྲོ་འདྲེན་སྙིང་སྟོབས་ཁྱོད་གཅིག་པུས། །ཁུར་བའི་དམ་བཅའ་གཏོང་མིན་ཤཱཀྱའི་རྒྱལ། །མཚན་དཔེའི་སྣང་བརྙན་དངོས་ལྟའི་སྐལ་ཕྲ་རྣམས། །མཐོང་ཐོས་དྲན་རེག་དོན་ལྡན་ལ་སྦྱོར་བ། །ཁྱད་པར་འབྱེད་པའི་སྐབས་བྲལ་བྱང་ཆུབ་ཆེ། །ལེགས་བྱས་རྒྱ་མཚོའི་ཞིང་མཆོག་ཉེར་དགོངས་ཀྱེ། །ཕན་བདེའི་གཟུགས་སྒྲིབ་ཉོན་མོངས་ཤེས་བྱའི་མུན། །བསགས་ཀུན་གང་བྱིན་མཐུ་ཡི་ཉི་འོད་ཀྱིས། །རབ་བསལ་སིམ་པར་ཚོར་བའི་སྣང་བ་ལ། །དེང་ནས་བྱང་ཆུབ་བར་དུ་སྤྱོད་པར་ཤོག །འགྲོ་རྣམས་དཀར་མིན་ལས་སྐྱེས་ཟུག་རྔུའི་ཚེར། །ཐུགས་རྗེའི་བཅད་ཀྱིས་དབྱུང་ནས་རྟག་བདེ་ཞིང་། །དེ་རྒྱུ་རྒྱལ་བསྟན་རིན་ཆེན་མུ་ཀུ་ཊ། །འཇིག་རྟེན་གསུམ་གྱི་ཐོད་དུ་མཛེས་གྱུར་ཅིག །ཁྱོད་ཀྱི་བྱམས་པ་ཆེན་པོའི་ཏིང་འཛིན་གྱིས། །ལྗོངས་འདིའི་ཡིད་སྲུབས་མ་ལུས་གདོང་སྨད་དེ། །དཀར་ཕྱོགས་སྐྱོང་བར་ཞལ་འཆེས་རྣམས་ཀྱི་མཐུ། །འཕེལ་བའི་ཐུགས་རྗེའི་འཇུག་པ་ཉེར་སྩོལ་ཞིག །ཁྲ་འབྲུག །སོམ་ཉི་དང་བྲལ་དད་ཅན་འགྲོ་རྒྱུད་ལ། །བྱིན་རླབས་འཇུག་པར་ཆགས་ཐོགས་མི་མངའ་བ། །སངས་རྒྱས་ཀུན་གྱི་ཐུན་མོང་ཡོན་ཏན་ཏེ། །ཐུགས་རྗེ་བསྐུལ་བར་གསོལ་ལ་ཉེར་དགོངས་ཤིག །བདག་སོགས་མཁའ་མཉམ་སྐྱེ་རྒུས་ཉེར་སྤྱོད་པའི། །ནག་པོའི་ལས་ཀྱི་རྩ་ལག་དྲུངས་ཕྱུང་ནས། །བྱང་ཆུབ་བར་དུ་སྒོ་གསུམ་བདེ་སྐྱིད་ལ། །རྟག་ཏུ་སྤྱོད་པའི་སྐལ་བཟང་མཆོག་སྦྱིན་སྩོལ། །བོད་ཡུལ་ཕུང་བྱེད་ནག་པོའི་རིས་ཀྱི་སྟོབས། །འཇོམས་པར་དཀར་ཕྱོགས་ལ་འདུན་ལྷ་རྣམས་ཀྱི། །རྒྱུད་ལས་སྲས་བཅས་རྒྱལ་བའི་ཐུགས་རྗེའི་མཐུ། །(༡༢༡བ)
ཆད་མེད་མྱུར་དུ་འཇུག་པར་མཛད་དུ་གསོལ། །ཡོམ་བུ་བླ་སྒང་། བསྙན་སྲིང་མི་མངའ་བྱམས་པའི་གོ་ཆ་ཡིས། །སེམས་ཅན་སྤྱི་དང་ཁྱད་པར་ལྡན་གངས་ལྗོངས་འགྲོ །བདག་སོགས་མོས་པར་ལྡན་རྣམས་ཡིད་སྲུབས་མདས། །ནམ་ཡང་འབུག་པ་མེད་པར་བྱིན་གྱིས་རློབས། །ས་བྱ་ཟླ་བ་བཞི་པའི་སངས་རྒྱས་སྐུ་ལྟམས་པའི་དུས་ཆེན་ཚེས་བདུན་ནས་བཟུང་བདུད་བཏུལ་ཏེ་སངས་རྒྱས་པའི་དུས་ཚེས་བཅོ་ལྔའི་བར་ར་ས་འཕྲུལ་སྣང་། ར་མོ་ཆེ། པོ་ཏ་ལ་དང་བཅས་པའི་གནས་རྟེན་ཁྱད་པར་ཅན་རྣམས་ལ་བརྒྱ་མཆོད་སྣ་ལྔ་ཕུལ་ཞིང་ཞལ་གསེར་སྤྱན་འབྱེད་བགྱིས་པའི་དུས་སྙན་ཤལ་ཕུལ་བའི་ཞལ་བྱང་ཕུན་ཚོགས་ཕན་བདེའི་དཔལ་སྟེར། ཇོ་བོ་རིན་པོ་ཆེ། དྲན་པའི་མོད་ལ་སྲིད་ཞིའི་ཉེས་བརྒྱའི་ཚོགས། །ཡོངས་བཅིལ་ལུས་ཅན་རྣམས་ཀྱི་མ་འདྲིས་བཤེས། །དོན་ཀུན་གྲུབ་པའི་བཅུ་གཉིས་བགྲང་བྱ་ཡི། །ཞལ་སྐྱིན་ཤཱཀྱ་མུ་ནིའི་སྣང་བརྙན་མཆོག །འགྲོ་ངོར་རིན་ཆེན་ཞུན་མའི་སྐུར་ཤར་ཡང་། །ངེས་པར་དུས་གསུམ་བདེ་གཤེགས་ཀུན་འདུས་ལྷ། །ཕུལ་བྱུང་བསོད་ནམས་ཞིང་དུ་ངེས་བརྙེད་ནས། །ནམ་མཁའི་མཛོད་ཀྱི་མཆོད་སྤྲིན་སྟོབས་ལ་སྤྲོ། །སྔོན་བསགས་ལས་ཉོན་འབྲས་བུའི་བ་མོ་རྣམས། །ཐུགས་རྗེའི་ཉི་ཤར་མོད་ལ་ཉེར་དག་སྟེ། །སྒོ་གསུམ་གཅིག་ཏུ་བདེར་གནས་བསྟན་འགྲོའི་དོན། །སྒྲུབ་པའི་འདོད་འཇོ་ཡོངས་འདུའི་དཔེར་བྱིན་རློབས། །འཁོར་འཁྱམས་འགྲོ་བའི་ཟུག་རྔུ་ཞི་བའི་སྨན། །ལུང་དང་རྟོགས་པའི་རྒྱ་མཚོ་ཆེར་རྒྱས་ལྟོར། །འགྲོ་བསྔོའི་བསོད་ནམས་ཆུ་ཀླུང་འདུས་སོ་ཅོག །བྱང་ཆུབ་སྙིང་པོའི་ཀློང་དུ་རོ་གཅིག་ཤོག །ལག་ན་རྡོ་རྗེ་འཆང་བས་མུ་སྟེགས་སྡེ། །བཏུལ་བ་ཇི་བཞིན་ལྗོངས་འདིའི་ནག་པོའི་དཔུང་། །བདུད་རིས་མིང་ཙམ་ལྷག་བྱས་དཀར་པོའི་ཕྱོགས། །སྐྱོང་རྣམས་མཐུ་དཔལ་འབར་པར་ཁྱོད་བྱིན་(༡༢༢ན)
རློབས། །བཅུ་གཅིག་ཞལ། ལྷ་གཅིག་བཞད་ལས་ཉེར་འཕྲོས་དུས་མཐའི་མེས། །གདུག་པའི་ལྷ་སྲིན་བཏུལ་ལྟར་དེང་གི་དུས། །གཟེངས་མཐོའི་ནག་ཕྱོགས་མ་ལུས་རབ་བཅོམ་སྟེ། །དགེ་བའི་དར་ཆེན་སྲིད་རྩེར་བསྒྲེང་བར་མཛོད། །བྱམས་པ་ཆོས་འཁོར། ཀུན་ལ་བཏང་སྙོམས་བྱམས་པ་ཆེན་པོའི་རྩིས། །བདུད་རིས་རྩུབ་སེམས་ལྕགས་ཁམས་གསེར་སྦྱངས་སུ། །ལེགས་སྒྱུར་རབ་དཀར་ཕན་བདེའི་སྣང་བ་ཡིས། །གངས་ཅན་སཱ་ལའི་ལྗོངས་འདི་གང་བར་མཛོད། །མར་མེ་མཛད། སྲིད་འཁྱམས་ཡིད་ཅན་ཀུན་གྱི་མ་རིག་མུན། །གང་གི་བྱིན་རླབས་མར་མེ་ཆེར་སྤར་ནས། །གསལ་མཛད་བདེ་སྐྱིད་སྣང་བརྙན་ཀུན་མཐོང་བར། །སླར་ཡང་མགོན་པོ་ཐུགས་རྗེའི་མཐུ་དཔུང་སྐྱེད། །བླ་མ་ལྷ་ཁང་དུ་རྗེ་རིན་པོ་ཆེར། བློ་གྲོས་ཡངས་པས་མཁས་བཙུན་བཟང་པོའི་གར། །ལེགས་སྒྱུར་གྲགས་པ་ཀུན་ཁྱབ་བཙོང་ཁ་པ། །འཇམ་དཔལ་དུས་དགྲའི་ངོ་བོར་ཐུགས་བསྐྱེད་ནས། །ནག་པོའི་རྩ་ལག་མ་ལུས་ཞི་བར་མཛོད། །དཔལ་ལྷར། ཧེ་རུ་ཀར་སྦྱོར་རྡོ་རྗེ་བཙུན་མོའི་སྐུ། །ཞིང་བཅུའི་གཤེད་དུ་དམག་དང་ཟོར་གྱི་ལྷ། །ཞི་རྒྱས་དབང་གི་ལས་སྒྲུབ་དུང་སྐྱོང་མ། །དང་བའི་ཡིད་ཀྱིས་གསོལ་བ་མ་གཡེལ་དགོངས། །ཉེར་འཚེའི་ནད་གདོན་དེ་བསྐྱེད་དུག་གསུམ་བཅས། །རབ་བསལ་ཚེ་དང་བསོད་ནམས་དབང་ཐང་རྒྱས། །འཁོར་འདས་ལེགས་ཚོགས་མ་ལུས་སྡུད་བྱེད་པའི། །འཕྲིན་ལས་སྨོན་པ་ཇི་བཞིན་ལྷུན་གྲུབ་མཛོད། །ཁ་བའི་ལྗོངས་འདིར་ནད་རིམས་དབུལ་ཕོངས་དང་། །གཡུལ་འཁྲུག་དུས་ཀྱི་ཆད་པ་ཀུན་ཞི་ཞིང་། །དེང་དུས་ནག་པོའི་རྩ་ལག་ལུས་མེད་དཔུང་། །ཆེར་ཆོད་དཀར་ཕྱོགས་རྒྱལ་(༡༢༢བ)
པའི་རུ་མཚོན་སྒྲོངས། །འཕགས་པ་ལོ་ཀེ་ཤ་ར། རྒྱུད་ལྔའི་ལུས་ཅན་རྣམས་ལ་ཉེར་བརྩེ་ཡང་། །བོད་ཡུལ་ཁྱོད་ཀྱིས་འདུལ་བའི་ཞིང་ཡིན་པས། །ནག་པོའི་ལྷ་སྲིན་འཚུབ་པའི་སྦྱོར་ངན་ཀུན། །ཁྲག་འཐུང་རྟ་མཆོག་སྐུར་བཞེངས་ཚར་གཅོད་ཅིང་། །སྔོན་གྱི་སྨོན་ལམ་ཐུགས་བསྐྱེད་བདེན་པའི་མཐུས། །ལྗོངས་འདིའི་འགྲོ་རྣམས་སུམ་རྩེན་ལྷ་ཡི་ཚེ། །རྨུགས་འཛིན་འབྱོར་བར་སྤྱོད་པའི་སྐལ་བཟང་དུ། །ལེགས་བསྒྱུར་ཉེས་བརྒྱའི་ཟུག་རྔུ་དྲུང་འབྱིན་མཛོད། །སྙིང་ནས་གུས་པས་གསོལ་བ་ཉེར་གདབས་རྣམས། །ལུས་ངག་ཡིད་ཀྱི་གདུང་བ་ཀུན་ཞི་ཞིང་། །དེང་ནས་རྣམ་པ་ཐམས་ཅད་མཁྱེན་མིན་པར། །མགོན་སྐྱབས་བཤེས་གཉེན་མཛོད་ཅིག་འཇིག་རྟེན་དབང་། །འཕགས་པ་ཝ་ཏི་བཟང་པོ། གར་དབང་མགོན་པོའི་སྤྱན་སྔར་འགྲོ་བ་སྤྱི། །ཁྱད་པར་བོད་ཡུལ་སྐྱོང་བར་ཞལ་འཆེས་པའི། །བཞེད་པ་ཇི་བཞིན་འགྲུབ་པའི་སྙིང་སྟོབས་ཁུར། །བརྩོན་པའི་འཕྲག་པར་ལོངས་ཤིག་ཝ་ཏི་བཟང་། །ར་མོ་ཆེའི་ཇོ་བོར། ས་སྤྱོད་ཀྲྀ་ཀིའི་བསོད་ནམས་མཆོད་སྡོང་ཆེར། །བསྐལ་བཟང་འདྲེན་པ་གསུམ་པས་བྱིན་བརླབས་པའི། །མཐོང་ཐོས་དྲན་རེག་མི་བསྐྱོད་རྡོ་རྗེ་ཞེས། །དོན་གྲུབ་བརྒྱད་པའི་སྐུ་ཡི་སྣང་བརྙན་དྲུང་། །དངོས་འབྱོར་ཡིད་སྤྲུལ་ཀུན་བཟང་མཆོད་པའི་སྤྲིན། །སྤྱན་སྔར་ཡོངས་བསྟར་ཐུགས་རྗེ་ཉེར་བསྐུལ་ན། །དབུས་འགྱུར་འཆང་དུ་ལུས་མེད་བཏུལ་བ་བཞིན། །ནག་པོ་བདུད་སྡེའི་ཚོགས་རྣམས་ཞི་བར་མཛོད། །བྱམས་ཐུགས་ཏེ་སེའི་གཙུག་ཏོར་ལས་བབས་པའི། །བྱིན་རླབས་ཡན་ལག་བརྒྱད་ལྡན་ཆུ་བོ་ཡིས། །བདག་སོགས་ཁ་བའི་སྨན་ལྗོངས་འགྲོ་རྣམས་ཀྱི། །ཉེས་བརྒྱའི་དྲི་མ་མ་ལུས་(༡༢༣ན)
བཀྲུ་བྱིན་རློབས། །ས་བྱ་ཧོར་ཟླ་བཞི་པའི་ནང་དུ་རྣམ་པར་རྒྱལ་པའི་ཕན་བདེ་ལེགས་བཤད་གླིང་པ་རྣམས་ཀྱིས་ཉིན་བདུན་གྱི་བར་དྲི་ཟའི་རྒྱལ་པོ་རྡོ་རྗེ་འབར་བ་རྩལ་གྱི་གསང་བའི་སྤྱན་གཟིགས་དང་བཅས་པ་ཟབས་གསོལ་བགྱིས་པའི་ཐོག་ཕུལ་བའི་སྙན་དར་ཞལ་བྱང་དངོས་གྲུབ་འདོད་པ་འཇོ་བའི་བུམ་བཟང་། མི་བསྲུན་སྡེ་བརྒྱད་འདུལ་བའི་གཉེན་པོ་རུ། །བྱང་ཆུབ་སེམས་དཔའ་ནམ་མཁའི་སྙིང་པོ་གང་། །ཤེལ་གིང་གནམ་ལྷ་དཀར་པོའི་སྐུར་བསྟན་པ། །ཟུར་ཕུད་ལྔ་པ་རྡོ་རྗེ་འབར་བ་རྩལ། །གསང་ཡུམ་རྡོ་རྗེ་གཡུ་སྒྲོན་གནམ་མཚོའི་རྒྱལ། །མཆེད་འཁོར་གཙང་མའི་རིས་ཀྱི་ཚོགས་རྣམས་ཀུན། །པདྨ་ཐོད་འཕྲེང་གཏེར་སྟོན་རྒོད་ལྡེམ་སོགས། །རྩ་བརྒྱུད་བླ་མའི་དམ་ཚིག་ཉེར་དགོངས་ལ། །ནད་རིམས་གཡུལ་འཁྲུག་བྱད་ཕུར་སྡེ་བརྒྱད་ཀྱི། །ཉེར་འཚེ་བར་དུ་གཅོད་པའི་ཕྱོགས་རྣམས་ཀུན། །ལྷ་ཁྱོད་ཞི་རྒྱས་དབང་དྲག་ཟློས་གར་གྱིས། །མཐུ་སྟོབས་གནམ་ལྕགས་འབར་བས་ཕྱེ་མར་ཐོགས། །ཚེ་རིང་ལོངས་སྤྱོད་རྒྱས་ཞིང་རིགས་བརྒྱུད་སྤེལ། །བསྒྲུབ་བྱ་དབང་སྡུས་ཕ་རོལ་ཟིལ་གྱིས་གནོན། །ལེགས་ཉེས་པྲ་སྟོན་ལུས་དང་གྲིབ་མ་བཞིན། །འབྲལ་མེད་བསྲུང་སྐྱོབ་སྦ་བའི་འཕྲིན་ལས་མཛོད། །ནག་པོའི་སེམས་འཆང་མཐའ་དབུས་འདྲེ་གདོན་དཔུང་། །གང་གི་འཇིགས་རུང་སྣ་ཚོགས་ཟློས་གར་གྱིས། །ཐལ་བར་རློག་སྟེ་ནམ་ཡང་སྦྱོར་རྩུབ་རྣམས། །ལྡང་དུ་མེད་པའི་འཕྲིན་ལས་གཉན་པོ་མཛོད། །ལྷ་ཆེན་ཁྱོད་ཀྱིས་བསྲུང་ཞིང་སྐྱོང་བའི་ཡུལ། །གངས་རིའི་འཕྲེང་མཛེས་བོད་ཀྱི་རྒྱལ་ཁམས་འདིའི། །མི་མཐུན་ཉེས་པའི་ཚོགས་རྣམས་ཀུན་ཞི་ཞིང་། །མ་སྨད་བདེ་སྐྱིད་དཔལ་ལ་སྤྱོད་པར་(༡༢༣བ)
མཛོད། །ཡིད་བཞིན་ནོར་བུར་ཡོངས་འདུ་ས་བརྟོལ་དང་། །བུམ་བཟང་འདོད་པ་འཇོ་བའི་བ་མོ་བཞིན། །དཔལ་ལྡན་དྲི་ཟའི་རྒྱལ་མོ་ཁྱོད་ཉིད་ཀྱིས། །རིགས་འཛིན་བདག་གི་བསམ་དོན་ལྷུན་གྲུབ་མཛོད། །ས་བྱ་མཆོད་དཔོན་ངག་དབང་ཤེས་རབ་ཀྱིས་ཕན་བདེའི་ལེགས་བཤད་གླིང་པའི་མགོན་ཁང་དུ་དམག་ཟོར་ལྷ་མོ། བེག་ཙེ། རྡོར་ལེགས། རྒྱལ་བཙན་རྣམས་ལ་སྙན་དར་ཞལ་ཡིག་འབུལ་སྐབས་ཁ་བྱང་ཞིག་དགོས་ཚུལ་བྱུང་བ་ལྟར་བྲིས་པ་འཛད་མེད་ནམ་མཁའ་མཛོད་ཀྱི་སྒོ་འབྱེད། འདོད་ཁམས་བདག་མོར་ཀུན་བཟང་མཆོད་པའི་སྤྲིན། །གངྒཱའི་རྒྱུན་ལྟར་ཆད་པ་མེད་འབུལ་བའི། །རེ་བ་ཇི་བཞིན་འགྲུབ་པར་བྱིན་བརླབས་ནས། །འཕྲིན་ལས་རྣམ་བཞིའི་དངོས་གྲུབ་སྩལ་དུ་གསོལ། །གནོད་སྦྱིན་བེག་རྩེ་ལྕམ་དྲལ་བཀའ་སྡོད་བཅས། །རིགས་ཀྱི་སྲུང་མ་རྡོ་རྗེ་ལེགས་པ་ལ། །ལྷ་རྫས་དར་གྱི་སྙན་ཤལ་འདི་འབུལ་ན། །དེང་ནས་བྱང་ཆུབ་བར་དུ་བསྲུང་ཞིང་སྐྱོབས། །ཆོས་རྒྱལ་སྐུ་ལྔ་གསང་ཡུམ་བློན་པོར་བཅས། །སྡེ་བརྒྱད་དམག་དཔོན་ཙེའུ་དམར་པོ་ཡིས། །གནོད་བྱེད་དགྲ་བགེགས་དཔུང་ཚོགས་ཚར་ཆོད་ལ། །ཞི་རྒྱས་དབང་གི་འཕྲིན་ལས་ཐོགས་མེད་སྒྲུབས། །ལྕགས་ཁྱི་གནམ་ལོ་གསར་ཚེས་ཀྱི་གཏོར་ཆེན་ཐོག་དཔལ་ལྡན་དམག་ཟོར་རྒྱལ་མོར་དར་ཚོན་སྣ་ལྔའི་སྙན་ཤལ་ཕུལ་བའི་ཁ་བྱང་ཕན་བདེའི་སྣང་བ་འཛད་མེད། དར་དཀར། གང་ཐུགས་རབ་དཀར་བྷྱོཿཡིག་ལས་འཕྲོས་པའི། །འོད་གཟིས་བདག་སོགས་རྣམས་ཀྱི་ནད་གདོན་མུན། །ཞི་དང་ལྷན་ཅིག་ལྗོངས་འདིའི་ཡིད་ཅན་ལ། །འཚེ་བའི་རིམས་འཁྲུག་ཉེས་བརྒྱའི་མུན་སངས་མཛོད། །སེར། ཁྱོད་ཐུགས་དཔལ་གྱི་བེའུར་ཞུན་མའི་གསེར། །འཁྱིལ་འདྲའི་བྷྱོཿཡིག་ལས་འཕྲོས་ཟེར་འཕྲེང་གིས། །ཚེ་དང་(༡༢༤ན)
བསོད་ནམས་ལུང་རྟོགས་ཡོན་ཏན་ཀུན། །འཕགས་ཆེན་དམ་པའི་ཚོགས་དང་སྐལ་མཉམ་མཛོད། །དམར། ཐུགས་ཀའི་བྷྱོཿཡིག་དམར་པོ་ལས་འཕྲོས་པའི། །ལྕགས་ཀྱུ་ལྟ་བུའི་འོད་ཀྱིས་སྲིད་དང་ཞིའི། །སྣོད་བཅུད་ཀུན་གྱི་ཕུན་ཚོགས་མ་ལུས་པ། ཁབ་ལེན་རྡོ་ཡིས་ལྕགས་ཕྱེ་ལེན་ལྟར་དྲོངས། །མཐིང་། མཐིང་ནག་བྷྱོཿཡིག་ལས་འཕྲོས་ཕོ་ཉ་དང་། །རབ་འབར་མེ་ལྕེ་མཚོན་ཆའི་ཚ་ཚ་ཡིས། །ཆོས་སྲིད་ཚེ་སྲོག་ལ་འཁུའི་དགྲ་བགེགས་ཚོགས། །རྩི་སྦུར་ཞུགས་ཀྱིས་བསྲེགས་ལྟར་རྡུལ་དུ་རློག །ལྗང་། མི་འགྱུར་ཆོས་དབྱིངས་མཁའ་ཀློང་ཡངས་པ་ལས། །སྣ་ཚོགས་སྤྲུལ་པའི་ཉིན་བྱེད་མཐའ་ཀླས་པས། །ཡིད་སྲུབས་སྨག་རུམ་དྲུངས་འབྱིན་ཕན་དང་བདེའི། །སྣང་བ་མི་འཛད་འདོད་དགུའི་གཏེར་གྱུར་ལྷ། །སྟོན་མཚན་ཟླ་བ་ཛམྦུ་ཆུ་བོའི་གསེར། །པདྨ་རཱ་ག་མིག་སྨན་ཁུ་བའི་མདངས། །འཇའ་ཚོན་བཞིན་དུ་མ་འདྲེས་སྐུར་བསྟན་ནས། །ཞི་རྒྱས་དབང་དང་མངོན་སྤྱོད་འཕྲིན་ལས་རྣམས། །ཐོགས་མེད་སྒྲུབ་མཛད་འདོད་ཁམས་དབང་ཕྱུག་མ། །ནོར་སྐྱོང་གོས་དཀར་འཛིན་པ་གནམ་ལོའི་ཞལ། །ངོམ་པ་འདི་ནས་བསྐལ་པ་ཇི་སྲིད་བར། །བསྟན་འགྲོའི་ཆོས་སྲིད་ལེགས་བྱས་རབ་འཕེལ་ཞིང་། །རྣལ་འབྱོར་བདག་གི་བསམས་དོན་ལྷུན་གྲུབ་མཛོད། །ལྕགས་བྱི་ནག་པ་ཟླ་བའི་བརྒྱད་གཏོར་ཐོག་མགོན་པོ་ཆེ་ཆུང་ལས་མཁན་གཉིས་དང་བཅས་པར་ཕུལ་བའི་སྙན་དར་ཞལ་ཡིག་དཔག་བསམ་འདོད་པའི་རེ་སྐོང་། འོག་མིན་ཞིང་ཁམས་ཞིང་གི་གཙོར་བཞུགས་པའི། །རྣམ་སྣང་ཐུགས་རྗེའི་ཟློས་གར་ནག་པོ་ཆེ། །ཕྱི་ནང་གསང་བའི་མཆོད་(༡༢༤བ)
སྤྲིན་ཉེར་འབུལ་ན། །ཞི་རྒྱས་དབང་དྲག་འཕྲིན་ལས་ཐོགས་མེད་སྒྲུབས། །དཀར། སྟོན་མཚན་ཉ་རྒྱས་ཟླ་བའི་འཛུམ་ཞལ་གྱིས། །ཉེར་བཀུག་འཆི་མེད་བདུད་རྩི་བུམ་ཐོད་དུ། །རབ་འཁྱིལ་བཅུད་ཀྱིས་ལུས་བརྟས་མི་ཤིགས་པའི། །རྡོ་རྗེའི་སྲོག་གི་ཀ་བ་ཚུགས་པར་མཛོད། །སེར། ཡིད་བཞིན་ནོར་བུས་ཡོངས་གཏམས་ཐོད་པ་ལས། །འཛད་མེད་མཆོག་ཐུན་དངོས་གྲུབ་ཆར་ཆེན་པོས། །སྲིད་ཞིའི་ཡོན་ཏན་མྱུ་གུ་གཡུར་ཟ་བའི། །བདེ་སྐྱིད་སྙེ་མ་འབྲས་བུས་ལྕི་བར་མཛོད། །དམར། ཀུན་གསལ་ཕ་མཐའ་འཆིང་བའི་ཞགས་པ་ཡིས། །འགྲོ་ཀུན་ཡིད་དབང་རབ་འཕྲོག་གཙུག་ཏོར་རྩེར། །ཉེར་བཀོད་གོམ་པའི་སོར་མོའི་རྗེས་གསལ་བ། །རྡོ་བའི་རི་མོ་ཇི་བཞིན་བརྟན་པར་མཛོད། །མཐིང་། སྣ་ཚོགས་མཚོན་གྱིས་དགྲ་སྙིང་འབིགས་པ་དང་། །མཚུངས་པར་ཞུགས་ཀྱི་ཕུང་པོར་བགེགས་དཔུང་རྣམས། །བསྲེགས་ནས་དགའ་རབ་དབང་ཕྱུག་མྱ་ངན་གྱི། །ཁང་བུར་ཆུག་ཅིག་ལེགས་ལྡན་ནག་པོ་ཆེ། །ལྗང་། མིག་སྨན་ལྟར་གནག་སྲིན་པོའི་ཞལ་གདངས་ནས། །ལོག་འདྲེན་སྡེར་བཅས་ཆེམ་ཆེམ་གསོལ་ན་ཡང་། །ཞི་དང་བརྗིད་ཆགས་སྣ་ཚོགས་ཟློས་གར་གྱིས། །ལས་རྣམས་ཀུན་སྒྲུབ་སྟོབས་འཕྲོག་གདོང་བཞི་པ། །དྲི་བྲལ་དམར་ཟླུམ་སྤྱན་རས་ཉེར་བགྲད་ནས། །མངོན་གྱུར་བག་ལ་ཞ་བའི་དགྲ་བགེགས་ཀྱི། །སྙིང་ཁྲག་ལོང་ལོང་ཐོད་པར་ཁོལ་བའི་རྒྱུན། །གསོལ་ལ་སྡེ་དཔུང་སྲིད་བཅས་ཐལ་བར་རློག །ཐོས་བསམ་སྒོམ་པའི་བསྟན་པ་རིན་ཆེན་སྤེལ། །ཉི་འོག་འགྲོ་རྣམས་ཕན་དང་བདེ་ལ་སྦྱོར། །རྣལ་འབྱོར་བདག་གི་འདོད་པའི་རེ་བ་ཀུན། །(༡༢༥ན)
བསམས་པ་ཙམ་གྱིས་འབད་མེད་ལྷུན་གྲུབ་མཛོད། །པུ་ཏྲ། གནོད་སྦྱིན་ཕོ་མོ་བཤོས་ནས་སྤྲུལ་པའི་སྲས། །གཤིན་རྗེ་པུ་ཏྲ་མིང་སྲིང་འཁོར་བཅས་རྣམས། །ཚུར་གཤེགས་ཁྲག་ཆང་མཆོད་གཏོར་འདི་བཞེས་ལ། །དགྲ་བོའི་མགོ་འཕྲེང་དཔའ་རྟགས་རྒྱན་དུ་ཆོངས། །བེག་ཙེ། རིགས་འཛིན་བདག་ཅག་མི་ནོར་དགོན་གནས་བཅས། །གཉེར་དུ་གཏད་ན་ཉིན་མཚན་དུས་དྲུག་ཏུ། །མ་གཡེལ་སྲུངས་ཤིག་བེག་ཙེ་ལྕམ་དྲལ་ཀྱེ། །ཕྱོགས་ལས་རྣམ་པར་རྒྱལ་བའི་རུ་མཚོན་སྒྲོངས། །ལྕགས་བྱི་སྐྱིད་ཤོད་ཕ་བོང་ཁར་རྡོ་རྗེ་འཆང་དཔལ་འབྱོར་ལྷུན་གྲུབ་ཀྱི་དངུལ་གདུང་རིན་པོ་ཆེར་མཆོད་ཚོགས་སྙན་ཤལ་ཕུལ་བའི་ཞལ་བྱང་གླིང་མཚོ་སྒྲོལ་བའི་གྲུ་ཆེན། གཟོད་མ་ཉིད་ནས་སྤང་རྟོགས་ཡོན་ཏན་ཀུན། །རྫོགས་སངས་རྒྱས་ཀྱང་ཚུར་མཐོང་བྱིས་པའི་བློ། །བྲིད་ཕྱིར་སློབ་པའི་ལམ་གྱི་ཟོལ་བསྟེན་པའི། །མགོན་ཀྱེ་དག་པའི་ཞིང་ནས་ཉེ་བར་དགོངས། །བསྟན་འགྲོའི་དཔལ་མགོན་ཆོས་ཀྱི་འབྱོར་པའི་མཛོད། །ལྷུན་གྲུབ་གདན་གསུམ་ཚང་བའི་དེད་དཔོན་གྱིས། །བྱང་ཆུབ་སྙིང་པོའི་བར་དུ་བཤེས་མཛད་དེ། །ཐེག་མཆོག་ཆོས་ལ་རྟག་ཏུ་ལོངས་སྤྱོད་ཤོག །ཀུན་གསལ་ལུས་ཕྲའི་གོམ་པས་འཇལ་བའི་མཐས། །རྙེད་མིན་མ་རྒན་སྐྱེ་རྒུ་བགྲང་ཡས་རྣམས། །སྲིད་མཚོ་ཐུགས་རྗེའི་གྲུ་ཡིས་རབ་བསྒྲལ་ཏེ། །རྨད་བྱུང་ཐར་གླིང་བགྲོད་པར་བྱིན་གྱིས་རློབས། །ལྕགས་ཁྱི་སྐྱིད་ཤོད་གུང་ཐང་དུ་ཁྱབ་བདག་བླ་མ་ཆོས་དབྱིངས་རང་གྲོལ་གྱི་དངུལ་གདུང་རིན་པོ་ཆེར་མཆོད་པ་སྙན་དར་ཕུལ་བའི་ཞལ་བྱང་། མཁྱེན་བརྩེ་ནུས་པའི་ཚོན་རིས་རབ་བཀྲ་བ། །གདུལ་བྱའི་མན་ཤེལ་ལང་ཚོར་ཤིས་པའི་
དངོས། །ཀུན་དགའ་དགེ་ལེགས་དཔལ་འབྱོར་ཡོངས་སྩལ་བའི། །འཕྲིན་ལས་སྲིད་མཐར་རབ་རྒྱས་རྡོ་རྗེ་འཛིན། །ལངྐའི་རྒྱལ་ཁབ་ཞི་ཁྲོའི་གཞལ་ཡས་སུ། །གཉག་བན་རང་གི་ཁྲི་ལ་ངལ་གསོ་ཡང་། །ད་དུང་ཕྱོགས་འདིའི་གདུལ་བྱ་རྫོགས་མིན་པས། །ངོ་མཚར་སྐྱེ་བའི་འཕྲེང་བ་གཟུང་དུ་གསོལ། །ཁྱོད་ཞབས་གཙུག་ཏུ་བསྙེན་པའི་རྣལ་འབྱོར་གྱིས། །རྩ་གསུམ་མ་ལུས་རང་རིག་དག་པའི་ངོར། །རང་ངོ་འཕྲོད་ནས་འགྲོ་འདྲེན་ས་མཁན་དུ། །འགྱུར་བར་བྱིན་རླབས་སྙིང་ལ་སིམ་པར་མཛོད། །ལྕགས་ཁྱི་ཡར་ཀླུང་བཀྲ་ཤིས་ཆོས་སྡེར་རིགས་ཀུན་བདག་པོ་མགོན་པོ་བསོད་ནམས་མཆོག་ལྡན་གྱི་དངུལ་གདུང་རིན་པོ་ཆེར་མཆོད་སྤྲིན་སྙན་དར་ཕུལ་བའི་ཞལ་བྱང་ཚེ་འདིར་གྲུབ་མཐའ་སྙོག་པའི་བདེན་ཚིག །གྲངས་མེད་གདུལ་བྱའི་མགོན་པོ་ཧེ་རུ་ཀ །ངུར་སྨྲིག་གར་བསྒྱུར་བསོད་ནམས་ཞིང་གི་མཆོག །སྐལ་ལྡན་ཡོངས་ཀྱི་གཙུག་ཏོར་མཐོན་ཀའི་རྩེར། །ཞབས་སེན་ཟླ་བ་ཉེར་ཚེས་དགེ་བའི་བཤེས། །འོག་མིན་ཞིང་ཁམས་ཞིང་གི་གཙོར་བཞུགས་ཀྱང་། །འགྲོ་མགོན་མི་གཏོང་ཐུགས་བསྐྱེད་ཞལ་འཆེས་པ། །དམ་པའི་ངང་ཚུལ་གཞན་དུ་འགྱུར་མིན་ཕྱིར། །མ་སྨད་ཐུགས་རྗེའི་སྤྱན་གྱི་དཀྱུས་རིང་ཁྱོངས། །བསྟན་འགྲོའི་ཕན་བདེ་བླ་ནས་བླར་འཕེལ་ཞིང་། །བདག་སོགས་སྙན་བརྒྱུད་ཚད་མ་བཞི་ལྡན་ཆོས། །སྐྱེ་བར་གོམས་པས་གྲུབ་པའི་མཐའ་སྙོགས་ཏེ། །རིང་མིན་རྡོ་རྗེ་འཆང་དབང་འགྲུབ་བྱིན་རློབས། །ལྕགས་ཁྱི་ལྷག་བསམ་དགེ་བའི་དབང་པོས་རྟེན་ལ་ན་བཟའ་ཕུལ་བའི་ཁ་བྱང་མུ་ཏིག་འཁྲི་ཤིང་། མཆོག་ཞིང་བཀུར་འབྲས་གཏམ་གྱིས་ཡིད་དྲངས་ནས། །དར་ཟབ་ཐགས་བསྐྲུན་པཉྩ་ལི་ཀའི་གོས། །སྲས་བཅས་རྒྱལ་བའི་ཡེ་(༡༢༦ན)
ཤེས་དངོས་ཞུགས་སྐུ། །ཉེར་ཕུལ་འཛད་མེད་ས་བོན་ལེགས་བཏབ་པས། །གདན་སུམ་ཚང་བའི་བཤེས་གཉེན་རྡོ་རྗེ་འཛིན། །འཇིག་མེད་སེང་གེའི་ཁྲི་ལ་རྟག་བརྟན་ཤིང་། །ས་སྤྱོད་མི་དབང་སྐུ་ཚེ་ཆབ་སྲིད་རྣམས། །དཀར་ཕྱོགས་ཟླ་བའི་ཆ་བཞིན་འཕེལ་བར་ཤོག །རྒྱུ་སྦྱོར་བྱེད་པོ་འདི་སྣང་རྟག་བདེ་ཞིང་། །སྐྱེ་བར་ལྷ་མིའི་རྟེན་རྒྱུད་རིང་མིན་དུ། །ཡེ་ཤེས་མཆོག་ཐོབ་མཁའ་མཉམ་ལུས་ཅན་ཚོགས། །སྟོབས་བཅུའི་རྩལ་མངའ་ཐོབ་པའི་རྒྱུ་རུ་བསྔོ། །