ས་བྱི་ཆོ་འཕྲུལ་མཆོད་པའི་དུས་ཇོ་ཤཱཀ །རང་བྱོན་ལྔ་ལྡན། བྱམས་པ་ཆོས་འཁོར། རྗེ་བཙུན་བཙོང་ཁ་པ། དུང་སྐྱོང་རྒྱལ་མོ་རྣམས་ལ་སྙན་ཤལ་ཕུལ་བའི་ཁ་ཡིག་ལེགས་བྱས་རྒྱ་མཚོའི་རླབས་འཕྲེང་།
ས་བྱི་ཆོ་འཕྲུལ་མཆོད་པའི་དུས་ཇོ་ཤཱཀ །རང་བྱོན་ལྔ་ལྡན་བྱམས་པ་ཆོས་འཁོར། རྗེ་བཙུན་བཙོང་ཁ་པ། དུང་སྐྱོང་རྒྱལ་མོ་རྣམས་ལ་སྙན་ཤལ་ཕུལ་བའི་ཁ་ཡིག་ལེགས་བྱས་རྒྱ་མཚོའི་རླབས་འཕྲེང་།ལྷར་ཇོ་བོ་རིན་པོ་ཆེར་བཅས་འགྲོ་བའི་ཚངས་གནས་འདབ་སྟོང་རྩེར། །བཀྲ་ཤིས་འཁོར་ལོའི་ཞབས་པད་ཟེའུ་འབྲུ། །ཕན་བདེའི་རྐང་དྲུག་བཞད་ཕྱིར་གཡུར་ཟ་བ། །ཉི་མའི་གཉེན་དང་དབྱེར་མེད་སྣང་བརྙན་དྲུང་། །ཟླ་ཤེལ་ཐགས་སུ་གྲུབ་པ་ཀ་ཤི་ཀ །བྱེད་པོས་ངོ་མཚར་རི་མོའི་ཕྲེང་བཀོད་འདི། །ཕུལ་བས་གནས་སྐབས་དོན་ཀུན་ལེགས་འགྲུབ་ཅིང་། །མཐར་ཐུག་བྱང་ཆུབ་མཆོག་ལ་རེག་གྱུར་ཅིག །རྒྱལ་ཀུན་ཐུགས་རྗེ་ཆེན་པོ་ཐུགས་རྗེ་གཅིག་བསྡུས་རང་བྱོན་གྱི། །གཟུགས་སྐུའི་བྱིན་རླབས་ཉིན་མོར་བྱེད་པ་ཡིས། །ཞི་རྒྱས་དབང་དྲག་མཆོག་གི་སྒྲུབ་པ་རྣམས། །འབད་མེད་ལྷུན་གྱིས་འགྲུབ་པར་མཛད་དུ་གསོལ། །བྱམས་པ་ཆོས་འཁོར་བྱམས་དང་བརྩེ་བའི་བསིལ་ཟེར་གྱིས། །འགྲོ་ཀུན་མི་(༢༥བ)
མཐུན་མུན་འཛོམས་ཤིང་། །དགེ་ལེགས་སྣང་བ་རབ་རྒྱས་པའི། །ཐུགས་རྗེ་ཀུན་ལ་འཇུག་གྱུར་ཅིག །འཇམ་རྗེ་བཙུན་བཙོང་ཁ་པ་མགོན་སྒྱུ་འཕྲུལ་དྲ་བའི་གར། །སྟོན་མཛད་བློ་བཟང་གྲགས་པ་ཡིས། །བདག་སོགས་གདུལ་བྱ་མ་ལུས་པ། །ཟབ་མོའི་ལས་ལ་སྤྱོད་པར་ཤོག །དཔལ་ལྷ་མོར་དཔལ་ལྡན་རྡོ་རྗེ་དབྱིངས་ཀྱི་དབང་ཕྱུག་མ། །རབ་མཛེས་ལྷ་མོའི་གཟུགས་སུ་སྟོན་མཛད་པ། །སྲིད་གསུམ་བདག་མོ་དཔལ་ལྡན་དུང་སྐྱོང་མ། །འཁོར་བཅས་རྣལ་འབྱོར་བདག་ལ་ཉེར་དགོངས་ཀྱེ། །བསྟན་སྲུང་ཁྱོད་ལ་རྩེ་གཅིག་གསོལ་འདེབས་ཤིང་། །གཏན་གྱི་སྐྱབས་སུ་གསོལ་བའི་རིག་པ་འཛིན། །བདག་ཅག་འཁོར་དང་བཅས་པའི་གནས་སྐབས་ཀྱི། །འདོད་པའི་དོན་ཀུན་ལྷུན་གྱིས་འགྲུབ་པར་མཛོད། །ཁྱད་པར་ནད་གདོན་ཐམས་ཅད་རབ་ཞི་ཞིང་། །ཚེ་དང་བསོད་ནམས་དཔལ་འབྱོར་ལོངས་སྤྱོད་རྒྱས། །ཁམས་གསུམ་དབང་སྡུད་དགྲ་བགེགས་འཇོམས་པ་ཡི། །ཐུན་མོང་དངོས་གྲུབ་མ་ལུས་འགྲུབ་པ་དང་། །ངེས་དོན་གསང་ཆེན་རྡོ་རྗེའི་ཐེག་པ་ཡི། །སྔར་ཕྱིར་འགྱུར་བའི་ཟབ་མོ་ཆོས་ཚུལ་རྣམས། །བཤད་དང་བསྒྲུབ་ཅིང་སྤེལ་བར་སྨོན་པ་དག །འབད་མེད་ལྷུན་གྱིས་འགྲུབ་པའི་འཕྲིན་ལས་མཛོད། །ས་བྱི་སྨོན་ལམ་ཆེན་མོའི་གཏོར་རྒྱག་སྐབས་སྤྲུལ་པའི་ཆོས་རྒྱལ་ཆེན་པོ་ཁོག་ཞུགས་ལ་འཕྲིན་ལས་བཅོལ་བའི་སྙན་ཤལ་ཁ་ཡིག་དྲེགས་པའི་གད་རྒྱངས། རབ་དམར་བྱུ་རུའི་ལྷུན་པོ་བརྩེགས་པ་ལ། །ཉིན་བྱེད་འབུམ་གྱིས་ལེགས་འཁྱུད་རྣམ་འགྱུར་ཅན། །དཔལ་ལྡན་སྤྲུལ་པའི་ཆོས་རྒྱལ་ཆེན་པོ་ཡིས། །བཅོལ་པའི་འཕྲིན་ལས་མ་ལུས་བསྒྲུབ་པ་དང་། །ཁྱད་པར་ནད་གདོན་ཀུན་ཞི་ཚེ་དཔལ་རྒྱས། །ཁམས་(༢༦ན)
གསུམ་དབང་བསྡ྄ུས་གནོད་བྱེད་དགྲ་སྡེའི་ཚོགས། །ཚར་ཆོད་མཆོག་དང་ཐུན་མོང་དངོས་གྲུབ་ཀྱི། །ལུགས་གཉིས་འདོད་པའི་དོན་ཀུན་སྒྲུབས་པར་མཛོད། །མདོར་ན་ཞི་རྒྱས་དབང་དྲག་ལ་སོགས་པའི། །འཕྲིན་ལས་ཇི་སྙེད་གཉེར་དུ་གཏད་པ་ཀུན། །ཐོགས་པ་མེད་པར་མྱུར་དུ་ལེགས་བསྒྲུབས་ནས། །མཐུན་རྐྱེན་ལེགས་ཚོགས་མ་ལུས་འཕེལ་བར་མཛོད། །ས་བྱི་ནག་པ་ཟླ་བའི་སྙན་དར་ཞལ་ཡིག་མི་འགྱུར་རྡོ་རྗེས་མཚན་པའི་སྟེགས། གསལ་སྟོང་དབྱིངས་རིག་དབྱེར་མེད་གདོད་མའི་མགོན། དགྲ་སྡེའི་གཤེད་དུ་བཤན་པ་སྟོབས་འཕྲོག་ནག །སྔགས་འཆང་དགྲ་ལྷ་མཐུ་དང་ནུས་པའི་བདག །དྲག་པོ་གཟི་ལྡན་དབང་ཕྱུག་འཁོར་བཅས་ཀྱིས། །དཀྱིལ་འཁོར་ཁྱབ་བདག་དང་པོའི་མགོན་པོ་དང་། །དབྱེར་མེད་བསོད་ནམས་བྱེ་བའི་ཕུང་པོ་མཆོག །རིགས་ལྡན་བཀྲ་ཤིས་འཁྱིལ་བ་ཀུན་ཏུ་བཟང་། །དགའ་ཆེན་བདག་ཉིད་ཧེ་རུ་ཀ་དཔལ་གང་། །འཇིག་མེད་རྡོ་རྗེའི་རང་བཞིན་བཞུ་བླུགས་ཀྱི། །ཁམས་ལས་ལེགས་པར་གྲུབ་པའི་དགའ་སྟོན་གྱིས། །གསང་ཆེན་སློབ་བཤད་བདུད་རྩི་མ་ལུས་པ། །ལོངས་སུ་སྤྱོད་པའི་སྐལ་བཟང་ཐོབ་པར་མཛོད། །ཐུབ་བསྟན་འཕེལ་ཞིང་སྐྱེ་རྒུའི་ཕན་བདེ་རྒྱས། །ཁྱད་པར་བདག་གི་བསམ་པའི་འདོད་དོན་ཀུན། །མཐའ་དག་འབད་པ་མེད་པར་ལྷུན་གྲུབ་པའི། །འཕྲིན་ལས་རྣམ་བཞི་མྱུར་དུ་སྒྲུབས་པར་མཛོད། །ས་བྱི་སྟོབས་ཀྱི་དབང་ཕྱུག་བསྟན་འཛིན་ཆོས་ཀྱི་རྒྱལ་པོར་དབྱར་བཞུགས་ཀྱི་གཞིས་འདམ་ཐང་ཕྲོག་བསམ་འགྲུབ་བདེ་(༢༦བ)
ཆེན་གྱི་མཁར་ལས་ཚུགས་སྐབས་བར་ཆད་མི་འཇུག་པའི་ཆེད་དུ་དྲི་ཟའི་རྒྱལ་པོ་ཟུར་ཕུད་ལྔ་པ་ཐང་ལྷ་རྡོ་རྗེ་འབར་བ་རྩལ་ལ་འཕྲིན་ལས་བཅོལ་སྐབས་ཕུལ་བའི་སྙན་དར་ཁ་ཡིག་ས་དབང་བཞེད་དོན་ལྷུན་གྲུབ། ཀཻ་ལ་ཤ་ཡི་ས་འཛིན་རབ་མཐོའི་སྤོར། །ཆུ་འཛིན་འཇའ་རིས་ཁོར་ཡུག་ལྡིང་ཁང་དབུས། །ཁྲོ་ཆགས་ཉམས་ཅན་ལྷ་མཆོག་དྲི་ཟའི་རྒྱལ། །དཔལ་ལྡན་རྡོ་རྗེ་འབར་རྩལ་འཁོར་བཅས་ལ། །ཕྱི་ནང་གསང་བ་དགྱེས་པ་སྐྱེད་པའི་རྟེན། །དངོས་བཤམས་ཡིད་སྤྲུལ་མཆོད་པའི་ཚོགས་འབུལ་ན། །དུས་གསུམ་སངས་རྒྱས་པདྨ་འབྱུང་གནས་ཀྱི། །སྤྱན་སྔར་ཁས་བླངས་དམ་ཚིག་ཉེར་དགོངས་ལ། །རྒྱལ་དབང་འཇམ་དཔལ་སྙིང་པོའི་བསྟན་རྒྱས་ཤིང་། །དེ་འཛིན་ས་དབང་བཞེད་དོན་ལྷུན་གྱིས་གྲུབ། །ནོར་འཛིན་ཁྱོན་ཀུན་ཕན་དང་བདེ་བ་ཡིས། །ཡོངས་གང་ལེགས་ཚོགས་རྒྱ་མཚོས་ཁྱབ་པར་མཛོད། །ཁྱད་པར་རིག་འཛིན་བདག་ཅག་འཁོར་བཅས་ཀྱི། །ནད་གདོན་ཉེར་འཚེའི་ཚོགས་རྣམས་རབ་ཞི་ཞིང་། །ཚེ་དཔལ་སྟོབས་འབྱོར་ལེགས་པའི་ཡོན་ཏན་ཀུན། །ཐོགས་པ་མེད་པར་གྲུབ་པའི་གཉེར་མཛོད་ཅིག །ས་བྱི་ཧོར་ཟླ་ལྔ་པར་དཔལ་ལྡན་འབྲས་སྤུངས་ཀྱི་བྱམས་ཆེན། གཙང་ཁང་ནུབ། རྣམ་ཐར་སྒོ་གསུམ། བདེ་གཤེགས་མཆོད་རྟེན་བརྒྱད། དམག་ཟོར་མའི་བྲིས་སྐུ། ནག་པོ་སྐོར་གསུམ་རྣམས་ལ་ཕུལ་བའི་སྙན་དར་ཁ་ཡིག་ལི་ཤིའི་དྲི་བསུང་། བྱམས་བྱམས་ཆེན་པའི་ཡུལ་གྱུར་སེམས་ཅན་མ་ལུས་པ། །བྱམས་ཆོས་ཡོན་ཏན་བརྒྱད་དུ་ཉེར་བཀོད་ནས། །བྱམས་མགོན་རྒྱལ་བའི་གོ་འཕང་མངོན་གྱུར་ཏེ། །བྱམས་སེམས་དཔུང་གིས་བདུད་སྡེ་འཇོམས་པར་ཤོག །གཙང་ཁང་ནུབ་བགྲང་ཡས་སྐྱེ་རྒུའི་འདྲེན་བྱེད་མེ་ལོང་ངོས། །ངོ་མཚར་རི་མོར་ཤར་པ་སྤྲུལ་སྒྱུར་མཁན། །(༢༧ན)
ཀཻ་ལ་ཤར་འཁུ་ལྷ་བབས་མཆོད་སྡོང་ཆེ། །དགེ་ལེགས་སྣང་བའི་དཔྱིད་དུ་དར་གྱུར་ཅིག །ལྷག་རྣམ་ཐར་སྒོ་གསུམ་བསམ་མ་ལ་ཡ་ཡི་སྐྱེད་ཚལ་ལས། །སྲབ་འཇམ་བླ་ན་དངར་བ་དྲི་བསུང་ཅན། །འགྲོ་རྣམས་སྡུག་བསྔལ་ཚ་གདུང་རབ་སིལ་བའི། །རླབས་ཆེན་སྨོན་ལམ་རླུང་གིས་འདྲེན་པར་ཤོག །ཆུ་བདེ་གཤེགས་མཆོད་རྟེན་བརྒྱད་འཛིན་གསར་པའི་འཕྲེང་བ་བསྒྲིགས་པ་ལ། །དབང་གཞུས་ལེགས་འཁྱུད་སྒྱུ་འཕྲུལ་རོལ་གར་ཅན། །བདེ་བྱེད་གྲངས་ལྡན་མཆོད་སྡོང་ཕྲེང་བ་ཡིས། །འགྲོ་བའི་བསོད་ནམས་སྤེལ་སླད་བརྟན་གྱུར་ཅིག །རབ་དམག་ཟོར་མའི་བྲིས་སྐུ་དཀར་མཛེས་སྡུག་ངག་དབང་དབྱངས་ཅན་མ། །རབ་འབྱམས་དྲག་པོའི་འཕྲིན་ལས་བསྒྲུབ་པའི་ཆེད། །རབ་འཇིགས་ཁྲོ་མོའི་སྐུར་བསྟན་དམག་ཟོར་མས། །རབ་ཏུ་དགྱེས་པས་དོན་གཉིས་སྒྲུབས་པར་མཛོད། །འཇིགས་འཇིགས་བྱེད་མེད་དཔལ་ལྡན་གཤིན་རྗེ་དུས་ཀྱི་དགྲས། །འཇིགས་བྲལ་རྡོ་རྗེ་རབ་འབར་མཐུ་སྟོབས་ཀྱིས། །འཇིགས་རུང་དགྲ་སྡེའི་ཚོགས་ཀུན་རབ་བཅོམ་ནས། །འཇིགས་བྱེད་དཔའ་བོ་གང་གི་སྐུ་ཐོབ་ཤོག །ཕྱག་མགོན་པོ་ཕྱག་དྲུག་པ་ན་པདྨོ་ཁྲོ་བོའི་སྐུར་བསྟན་པ། །ཕྱག་དྲུག་དཔལ་ལྡན་ནག་པོ་ཆེན་པོ་ཡི། །ཕྱག་གཡས་མཚོན་གྱིས་དགྲ་བོའི་སྙིང་ཕྱུང་ཁྲག །ཕྱག་གཡོན་ཐོད་པར་བླུག་སྟེ་རོལ་བར་མཛོད། །ལས་ལས་ཤིན་ཀྱི་ཤན་འབྱེད་དཔལ་ལྡན་མ་ཧེའི་ཞལ། །ལས་ཀུན་སྒྲུབ་ལ་ཐོགས་མེད་མཐུ་ལྡན་པ། །ལས་སྦྱོར་མངོན་སྤྱོད་དག་གིས་སྐུལ་བྱེད་ན། །ལས་བཞིའི་མཐར་ཐུག་མྱུར་དུ་གྲུབ་པར་མཛོད། །(༢༧བ)
ས་བྱི་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་དངུལ་གདུང་རིན་པོ་ཆེ། ཐུབ་པ་ཚུལ་ཁྲིམས་མ། རྡོ་རྗེ་འཇིགས་བྱེད་རྣམས་ལ་ཕུལ་བའི་སྙན་དར་ཞལ་ཡིག་བདུད་ལས་རྒྱལ་བའི་སེང་གེའི་དབྱངས། དུས་དངུལ་གདུང་གསུམ་རྣམ་འདྲེན་ཐམས་ཅད་ཀྱི། །བདག་ཉིད་འཇམ་དཔལ་སྙིང་པོའི་ཞབས། །རྨད་བྱུང་ཐུགས་རྗེ་ཆེན་པོ་ཡིས། །གྲངས་མེད་འགྲོ་ལ་དགེ་ལེགས་སྩོལ། །སྐུ་གསུམ་ཟད་པ་མེད་པའི་རྣམ་ཐར་སྒོ། །མཐའ་བྲལ་སྲིད་པར་རབ་བྱེ་ལམ་ཡངས་པོར། །ལུས་ཅན་བདེ་བར་ཁྲིད་དེ་ཞི་བའི་གླིང་། །ཀུན་མཁྱེན་ཁང་པར་འཇུག་མཛད་འདི་རྨད་བྱུང་། །ཤེས་བྱའི་རིན་ཆེན་དངས་པའི་རྩིག་ངོས་(༢༨ན)
ལ། །བློ་གྲོས་པིར་གྱིས་མཁས་བཙུན་བཟང་པོའི་གཟུགས། །ངོ་མཚར་བཀོད་པ་རྒྱ་མཚོའི་སྒྱུ་མ་མཁན། །གྲགས་པ་སྲིད་རྩེའི་བར་དུ་ཅི་ཡང་འབར། །བརྩེ་ཆེན་སྤྱན་དཀྱུས་རིང་པོར་འཆང་བའི་རྩེར། །མཁྱེན་དཔྱོད་སྨིན་མའི་ཨུཏྤལ་ནགས་ཀླུང་གིས། །ཤེས་ལྡན་ཟླ་བ་གསར་ཚེས་ལུས་ཕྲ་མ། །དགའ་བས་ཕྱོགས་དེར་ཡང་ཡང་རྒྱུག་པ་བཞིན། །རྣམ་དཀར་འཕྲིན་ལས་དཔྱིད་ཀྱིས་ནོར་འཛིན་གཞི། །མ་བཟོད་རྔུལ་ལས་ཉལ་འགྲོའི་རྒྱུན་བབས་ཚེ། །ལྷ་ལམ་སྐྲག་སྟེ་སྟོང་པའི་རང་མདང་ནི། །ཨིནྡྲནཱི་ལའི་ཁུ་བ་བྱུགས་པ་བཞིན། །དུས་གསུམ་འདྲེན་པ་ཀུན་གྱི་མཛད་པ་དང་། །མགོན་ཁྱོད་བསོད་ནམས་ཡེ་ཤེས་ཕུང་པོའི་ཚོགས། །སྲང་ལ་གཞལ་ཚེ་ལྕི་དང་ཡང་བའི་གནས། །ཀུན་མཁྱེན་ཡེ་ཤེས་ཀྱིས་ཀྱང་རྟོགས་ནུས་མིན། །གསེར་སྦྱངས་ལས་གྲུབ་པདྨའི་སྐུད་པ་ལྟར། །ཆེས་ཕྲ་ཐགས་སུ་བསྐྲུན་པའི་གན་གོས་ཀྱི། །གཟི་འོད་མངོན་པར་འབར་བ་བཟོད་མིན་ཞེས། །རྟ་ལྗང་ཅན་དེ་ཆུ་ལྷའི་མཁའ་ལ་བྲོས། །སྲབ་འཇམ་ཨུཏྤལ་འདབ་མ་ལ་འཁུ་ཞིང་། །ཁ་དོག་བཻཌཱུར་ཞུན་མའི་ཁེངས་པ་འཕྲོག །ཕ་མཐའ་ཀུན་གསལ་ཞགས་པར་འགྲན་བཟོད་པའི། །འཆི་མེད་དབང་པོའི་རེག་བྱ་དམ་པ་འདི། །དགའ་བཞི་ལས་འོངས་བདེ་བ་ཆེན་པོ་ཡི། །དགའ་ཆེན་ཁྱབ་བདག་གོ་འཕང་བརྙེས་པའི་གནས། །དགའ་ལྡན་རྣམ་པར་རྒྱལ་བའི་གླིང་མཆོག་ན། །དགའ་སྟོན་ཆོས་སུ་ལེགས་སྤྱོད་བཙོང་ཁ་པས། །རབ་འབྱམས་དུས་གསུམ་རྒྱལ་བའི་ཡོན་(༢༨བ)
ཏན་ཀུན། །རབ་བཀྲུས་ཕ་མཐའ་དང་བྲལ་ཐུགས་ཀྱི་རྟེན། །རབ་དཀར་རིན་ཆེན་གཉིས་པ་ལས་གྲུབ་པ། །རབ་མཛེས་རྒྱལ་བ་གཉིས་པའི་མཆོད་སྡོང་ཆེར། །མི་ཕྱེད་དད་པ་མཆོག་གིས་འབུལ་བགྱིད་ན། །མི་མཐུན་བདུད་སྡེའི་གཡུལ་ལས་རབ་རྒྱལ་ཞིང་། །མི་ཟད་ཕན་བདེའི་འབྱུང་གནས་ཐུབ་བསྟན་དར། །མི་ཡི་སེང་གེའི་གོ་འཕང་ཐོབ་པར་ཤོག །དཀར་ཐུབ་དབང་འཇམ་ལྷ་རྫས་ན་བཟའ་འདི། །དཀར་གསལ་དད་པས་འབུལ་བགྱིད་ན། །དཀར་མཛེས་མཚན་དཔེས་སྤྲས་པའི་སྐུ། །དཀར་ཕྱོགས་ཟླ་ལྟར་རྒྱས་གྱུར་ཅིག །ཁྲོ་གཏམ་འཇིགས་བྱེད་མི་བཟད་ང་རོ་ཡིས། །ཁྲོ་རྔམས་ཚོགས་ཀྱང་འདར་བྱེད་པའི། །ཁྲོ་རྒྱལ་གཤིན་རྗེ་གཤེད་པོ་མཆོག །ཁྲོ་བོའི་ཚོགས་ཀྱིས་འཕྲིན་ལས་སྒྲུབས། །ས་བྱི་སྟག་ལུང་ཕྱག་མཛོད་ངག་དབང་བཟང་སྦྱིན་གྱིས་ར་ས་འཕྲུལ་སྣང་དུ་སྙན་དར་ཕུལ་བའི་ཁ་ཡིག་དགོས་ཚུལ་ལྟར་བྲིས་པ་བཀའ་བརྒྱད་སྐྱེད་ཚལ་ཡོངས་བཞད། མཚན་ཇོ་བོ་རིན་པོ་དཔེའི་རང་བཞིན་རྒྱས་པའི་བཻཌཱུརཡ། །ཚོགས་གཉིས་ཡོལ་གོར་ལེགས་འཁྱིལ་ཕན་བདེའི་དཔྱིད། །འགྲོ་ལ་ཡེ་ཤེས་མཆོག་སྩོལ་སྒྱུ་དྲའི་གར། །སྟོན་མཛད་ཟས་གཙང་སྲས་པོའི་ཐུགས་རྗེ་ཡིས། །ངག་གི་དབང་ཕྱུག་སྐལ་བཟང་ཀུན་དགའི་དཔལ། །ལྷུན་གྲུབ་ངེས་དོན་ཆོས་ཀྱི་ལུང་རྟོགས་མཁར། །མཛད་བཟང་ཉིན་མོར་བྱེད་པས་རྣམ་གྲོལ་ཚལ། །རབ་བཞད་འདྲེན་པ་མཆོག་གི་སྡེར་གྱུར་པ། །ཐང་པའི་བཀའ་བརྒྱུད་འཆི་མེད་སྐྱེད་ཚལ་དུ། །ཞབས་པད་ཡོངས་འདུའི་ལྗོན་པ་རབ་ཏུ་བརྟན། །རྣམ་དཀར་འཕྲིན་ལས་ལོ་འདབ་(༢༩ན)
གཡུར་ཟ་ཞིང་། །དོན་གཉིས་འབྲས་བུའི་དཔལ་ལ་སྤྱོད་པར་ཤོག །རྒྱལ་ཐུགས་རྗེ་ཆེན་པོ་ཀུན་སྙིང་རྗེ་ཆེན་པོའི་ཟློས་གར་མཁན། །རྒྱལ་སྲས་གཞོན་ནུར་འཆར་བའི་འཕགས་མཆོག་གིས། །རྒྱལ་བའི་བསྟན་པ་ཡིད་བཞིན་དབང་གི་རྒྱལ། །རྒྱལ་མཚན་རྩེ་མོར་འབར་བའི་དགེ་ལེགས་སྩོལ། །དཔལ་དཔལ་ལྷ་མོ་ལྡན་ཉི་མའི་གཉེན་གྱི་བཀའ་སྲུང་མཆོག །དཔལ་མོའི་སྙེམས་པ་འཕྲོག་པའི་དུང་སྐྱོང་མས། །དཔལ་སྟུག་རིང་ལུགས་དཀར་ཕྱོགས་ཟླ་གཞོན་དང་། །དཔལ་གྱི་དུམ་བུ་ལྟ་བུར་རྒྱས་པར་མཛོད། །ས་གླང་གནམ་ལོ་གསར་ཚེས་ཀྱི་དུས་འདོད་ཁམས་དབང་ཕྱུག་མར་ཕུལ་བའི་སྙན་དར་ཞལ་ཡིག་ལས་བཞིའི་གཟི་འབར། ཁྱུ་མཆོག་རང་ཞལ་ངོམས་པ་གསེར་ལྡན་ཁམས། །ཕུན་ཚོགས་བགྲང་བྱ་ཐོག་མར་ཚེས་པའི་དུས། །རྨད་བྱུང་མཆོད་སྤྲིན་འཛད་མེད་ནམ་མཁའ་མཛོད། །རབ་སྤེལ་སྲིད་གསུམ་དབང་མོ་དགྱེས་བསྐྱེད་ན། །ཞྭ་སེར་ཅོད་པན་འཆང་བའི་ཆོས་སྲིད་བསྟན། །བླ་ནས་བླར་འདེགས་ཚངས་པའི་ཡུལ་སའི་རྩེར། །རབ་འབར་འཇིག་རྟེན་ཀུན་གྱི་ཕན་དང་བདེའི། །དགའ་སྟོན་གསུམ་རྩེན་མདུན་སའི་དཔལ་ཐོབ་མཛོད། །ཁྱད་པར་འཁོར་ལོའི་མགོན་ཟུང་ཞབས་པད་བརྟན། །རིགས་འཛིན་བདག་གི་བཅོལ་བའི་ཞི་རྒྱས་དབང་། །མངོན་སྤྱོད་ལས་ཀུན་ཐོགས་མེད་ལྷུན་གྲུབ་པར། །མཛོད་ཅིག་འདོད་པ་ཁམས་ཀྱི་དབང་ཕྱུག་མ། །ས་གླང་ནག་ཟླའི་བརྒྱད་གཏོར་དུས་མགོན་པོ་ཞལ་ལ་ཕུལ་བའི་སྙན་དར་ཞལ་ཡིག་ལེགས་ལྡན་གད་རྒྱངས། གཏུམ་ཆེན་ལེགས་ལྡན་ནག་པོ་(༢༩ན)
དྲག་ཤུལ་ཅན། །རྡོ་རྗེ་ནག་པོ་ཞལ་བཞི་འཁོར་བཅས་རྣམས། །དམ་རྫས་བ་ལིང་རྒྱན་ལྡན་མཆོད་གཏོར་གྱིས། །ཐུགས་དམ་གཉན་པོ་སྐོང་ངོ་ལས་ཀུན་སྒྲུབས། །ལྕགས་སྟག་ཆོ་འཕྲུལ་མཆོད་པའི་དུས་ཇོ་ཤཱཀ་རྣམས་གཉིས་རང་བྱོན་ལྔ་ལྡན་བྱམས་པ་ཆོས་འཁོར། རྗེ་བཙུན་བཙོང་ཁ་པ། མགོན་པོ་སེ་སྡོང་མ་རྣམས་ལ་ཕུལ་བའི་སྙན་དར་ཞལ་ཡིག་བསོད་ནམས་རོ་བརྒྱའི་བཅུད་འཁྱིལ། ཕན་ཤཱཀྱ་མུ་ནི་བདེའི་འབྲས་བཟང་སྨིན་པའི་རོ་བརྒྱའི་བཅུད། །ལུས་ཅན་མཐའ་དག་ལོངས་སུ་ལེགས་སྤྱོད་ལ། །ལྷུན་གྲུབ་ལེགས་ལམ་རྒྱ་མཚོའི་བཀྲ་ཤིས་ཀྱི། །ཆེས་དཀར་འགྲོ་ལ་སྩོལ་ཅིག་ཤཱཀྱའི་ཏོག །དཔལ་མི་བསྐྱོད་རྡོ་རྗེ་ལྡན་འདྲེན་མཆོག་ཉིན་མོར་བྱེད་པ་ཡིས། །དུས་ཀུན་དགེ་བའི་ཚལ་རབ་ཆེར་རྒྱས་ཤིང་། །མི་འཇིག་བཞི་ལྡན་སྦྲང་རྩིའི་བཅུད་ཆེན་པོར། །སྤྱོད་པའི་སྐལ་བ་བཟང་པོར་བདག་གྱུར་ཅིག །མིག་རང་བྱོན་ལྔ་ལྡན་སྨན་ལྟར་གནག་འཁོར་བའི་དུ༔ཁ་ཀུན། །དམིགས་མེད་སྟོང་ཆེན་དག་པས་རྒྱས་བཏབ་སྟེ། །རྟེན་ཅིང་འབྲེལ་འབྱུང་ཙམ་ལས་དོན་གཉིས་འབྲས། །འགྲོ་ལ་སྩོལ་ཅིག་འཕགས་མཆོག་འཇིག་རྟེན་མགོན། །བརྩེ་ཆེན་བྱམས་པ་ཆོས་འཁོར་ཐུགས་རྗེ་ཆེན་པོའི་རླབས། །དུས་ལས་ནམ་ཡང་མི་གཡེལ་བའི། །རྣམ་དཀར་ཡིད་བཞིན་དབང་གི་རྒྱལ། །འབད་མེད་སྩོལ་ཅིག་མི་ཕམ་མགོན། །ཨེ་རྗེ་བཙུན་བཙོང་ཁ་པ་མ་སྲིད་པའི་ནགས་ཀླུང་ན། །བསྟན་བདེའི་དྲི་བསུང་ཆེས་དངར་བའི། །མཆོད་སྤྲིན་སྒོ་འཕར་བརྒྱ་ཕྲག་རྣམས། །ཕྱེ་ཞིག་འཇམ་དཔལ་སྙིང་པོའི་ཞབས། །ཁྲག་མགོན་པོ་སེ་སྡོང་འཐུང་ལྷ་ཆེན་མཐུ་བོ་ཆེས། །མི་(༣༠ན)
མཐུན་ཕྱོགས་ཀུན་ཐལ་བར་རློགས། །བསམ་པའི་དོན་རྣམས་མ་ལུས་པ། །ལྷུན་གྱིས་གྲུབ་པར་མཛད་དུ་གསོལ། །མེ་ཕག་གི་ཇུས་འགྲོས་ལ་ཀར་སྲིད་ཀྱི་མཛད་ཁྱབ་མ་བདེ་བར་ལྕགས་སྟག་ལོ་ཟུར་འཇམ་དབྱངས་བླ་མར་མངོན་སྤྱོད་ཀྱི་ལས་སྦྱོར་མཛད་དགོས་ཚུལ་བྱུང་འདུག་པ་བཞིན་ཁམས་གསུམ་འཁྲུག་བྱེད་ཀྱི་རླུང་དམར་འཛུགས་པ་གནང་སྐབས་རྒྱབ་ཆོས་སུ་ཚེ་བདག་ནག་པོའི་རང་གཤེད་འབེབས་དགོས་ཚུལ་བྱུང་བ་ལྟར་དང་དུ་བླངས་པས་ལྕགས་ཡོས་ཟླ་བ་བཞི་པར་འབྲུག་ངག་དབང་རྣམ་རྒྱལ་དུས་ཀྱི་ཆོས་ཉིད་དུ་གྱུར་བའི་གནས་ཚུལ་ངེས་པ་བྱུང་བར། དངོས་གཞི་གུང་ཐང་ནས་གཏང་རག་བཟབ་རྒྱས་གནང་ནའང་། ཕན་བདེའི་ལེགས་བཤད་གླིང་པའི་ཚོགས་སུ་ཆོས་སྲུང་དགའ་སྟོན་གྱི་ཚེ་ཕུལ་བའི་སྙན་དར་ཞལ་ཡིག་ཡིད་སྲུབས་རྩ་བ་དྲུང་འབྱིན། འཁོར་འདས་ཕྱག་རྒྱ་ཟིལ་གནོན་དུས་དགྲའི་དབང་། །མི་བསྲུན་ལས་གཤིན་རལ་པ་ཚར་དགུ་ཅན། །སྲིད་གསུམ་དབང་སྒྱུར་དཔལ་ལྡན་རེ་མ་ཏི། །སྣང་སྲིད་ལྷ་སྲིན་སྡེ་བརྒྱད་དང་བཅས་པར། །དུས་ཀྱི་ཆད་པའི་སྣ་དྲངས་མོན་བོད་རྣམས། །མནར་བྱེད་བདུད་བརླམ་སྒོམ་ཆེན་ཆས་བཟུང་བའི། །ར་ལུག་འབྲུག་པ་ངག་དབང་རྣམ་རྒྱལ་གྱི། །བླ་སྲོག་དམར་ཟས་སྙིང་ཁྲག་ཧུབ་དྲངས་པའི། །སྔར་བཅོལ་དྲག་སྦྱོར་གྲུབ་པའི་གཏང་རག་ཏུ། །དམར་ཆེན་གཏོར་མ་རི་བོ་ལྟ་བུར་སྤུངས། །ཁྲག་ཆངབཏུང་བ་རྒྱ་མཚོ་བཞིན་དུ་སྐྱིལ། །ཕྱི་ནང་དམ་རྫས་འབུལ་ན་དགྱེས་པར་རོལ། །གོང་དུ་འདེགས་པའི་སྔོན་འགྲོར་ལྕགས་ཡོས་ལོ་རྒྱལ་འོལ་ཡར་ཀླུང་ཕྱོགས་སུ་བཏེག་སྐབས་ཐོག་མར་གདན་ས་ཆེན་པོ་དགའ་ལྡན་རྣམ་པར་(༣༠བ)
རྒྱལ་བའི་གླིང་དུ་དངུལ་གདུང་རིན་པོ་ཆེ། ཐུབ་པ་ཚུལ་ཁྲིམས་མ།ནག་པོ་སྐོར་གསུམ་རྣམས་ལ་ཕུལ་བའི་སྙན་དར་ཁ་ཡིག་མཐོང་ཐོས་དྲན་རེག་རྣམ་གྲོལ། རྒྱལ་དངུལ་གདུང་བ་རྒྱ་མཚོའི་ཞིང་ཁམས་བྱེ་བའི་རྡུལ། །ལྷན་ཅིག་གྲུབ་པའི་རང་གཟུགས་ཟློས་གར་མཁན། །ས་ལ་ཉེར་གནས་འོག་མིན་སྟུག་པོ་བཀོད། །སྐུ་བཞིའི་དབང་ཕྱུག་མ་ལུས་འབྱུང་གནས་ཆེར། །འཇམ་མགོན་ཆུ་ཤེལ་ཞུན་མར་འཁྱིལ་བའི་ཁམས། །མཁྱེན་བརྩེའི་ཆ་ཤས་ཡོངས་རྫོགས་འོད་དཀར་གྱིས། །ཐུབ་བསྟན་ཀུནྡ་ཁོང་ནས་བཞད་བྱེད་པ། །རྒྱལ་བའི་ཏོག་གྱུར་བློ་བཟང་གྲགས་པའི་དཔལ། །སྟོབས་བཅུའི་རྩལ་གསུམ་རྫོགས་པའི་ང་རོའི་སྒྲ། །འཇིགས་མེད་གདོང་ལྔའི་རྒྱུད་ལས་ལེགས་དྲངས་གླུ །སྲིད་པའི་རྩེ་མོར་ཆེར་བསྒྲགས་སྙན་འགྱུར་གྱིས། །སྐྱེ་རྒུའི་ཕན་བདེའི་ཐོས་འཛིན་གསོས་སུ་འཇེབས། །གང་གི་མཆོད་སྡོང་རིན་ཆེན་གཉིས་པ་ལ། །ལེགས་གྲུབ་འཛམ་གླིང་འགྲོ་བའི་བསོད་ནམས་ཞིང་། །མཐོང་ཐོས་དྲན་དང་རེག་པས་མངོན་མཐོ་དང་། །ངེས་པར་ལེགས་པའི་གོ་འཕང་ལ་འགོད་པར། །སྟོང་འཁུན་སོར་མོའི་སྒྱུ་འཕྲུལ་རོལ་གར་ལས། །ཟླ་བ་ཞུན་མར་རབ་འཁྱིལ་བ་ཨཱདཪྴར། །ཐུགས་ཀྱི་རི་མོ་འཆར་བའི་ཆོ་ག་དང་། །རྫོགས་པའི་སྙན་ཤལ་ཟུང་འབྲེལ་ཕུལ་བའི་མཐུས། །རྨད་བྱུང་བསྟན་དང་འགྲོ་བའི་བདེ་སྐྱིད་ཀུན། །རྣམ་པར་འཕེལ་ཤིང་རྒྱས་པའི་ཉེར་འཚོའི་གཞིར། །ཆུ་གཏེར་ཆེན་པོའི་རླབས་ཀྱི་འཕྲེང་བ་ལྟར། །(༣༡ན)
ནམ་ཡང་ཡེལ་བ་མེད་པར་འབྱུང་གྱུར་ཅིག །ཁྱད་པར་ནོར་འཛིན་དགའ་མའི་ལྟོ་བ་ན། །དགེ་བཅུའི་ལམ་བཟང་དར་བའི་བསིལ་ལྡན་ལྗོངས། །སྙིགས་མའི་རྒུད་པ་མ་ལུས་རབ་ཞི་ནས། །རྫོགས་ལྡན་གསར་པའི་རྩེ་དགའ་རྒོད་པར་ཤོག །བློ་ཆེན་རྒྱལ་བ་ཀུན་གྱི་ཏོག་གྱུར་པ། །སྐལ་བཟང་འདྲེན་པ་བཞི་པའི་རྒྱལ་ཚབ་མཆོག །གྲགས་སྙན་དཔལ་འབར་འཇམ་དབྱངས་བཙོང་ཁ་པའི། །རིང་ལུགས་སྲིད་མཐའི་བར་དུ་རྒྱས་གྱུར་ཅིག །ཐུབ་དབང་ཚུལ་ཁྲིམས་མ་མཁྱེན་བརྩེ་ནུས་པའི་ཉིན་མོར་བྱེད་པ་ཡིས། །འགྲོ་ཀུན་མི་ཤེས་མུན་ལས་རྒྱལ་མཛད་པ། །ལྷར་བཅས་འགྲོ་བའི་གཉེན་གྱུར་ཤཱཀྱའི་ཏོག །དགེ་ལེགས་རྒྱ་མཚོས་ནོར་འཛིན་ཁྱབ་པར་མཛོད། །ཨིནྡྲ་འཇིགས་བྱེད་ནཱི་ལའི་ལྷུན་པོ་ལ། །མུན་པ་བྱེ་བའི་གོས་གྱོན་ཞིང་། །དུས་ཀྱི་མེ་ལྕེའི་འཕྲེང་བ་ཅན། །དཔལ་ལྡན་མ་ཧེའི་ཞལ་ཅན་གྱིས། །ཐུབ་བསྟན་འཕེལ་ཞིང་འགྲོ་བ་ཀུན། །ཕན་དང་བདེ་བའི་དཔལ་ལ་སྤྱོད། །བདག་ཅག་དཔོན་སློབ་འཁོར་བཅས་ཀྱི། །བསམ་དོན་ལྷུན་གྱིས་གྲུབ་པར་མཛོད། །ཐུགས་ཕྱག་དྲུག་པ་རྗེའི་དབྱར་སྐྱེས་འཕྲེང་བ་ལས། །འཇིགས་རུང་ཁྲོས་པའི་གནམ་ལྕགས་ཐོག །བདུད་སྡེའི་ཀླད་པ་འགེམ་མཛད་པ། །མྱུར་མཛད་མགོན་པོས་འཕྲིན་ལས་སྒྲུབས། །ལས་གཤིན་འཆི་བདག་དུས་ཀྱི་དགྲ་(༣༡བ)
ཆེན་པོས། །ཀུན་མཁྱེན་འཇམ་དཔལ་སྙིང་པོ་ཡི། །རིང་ལུགས་སྲིད་མཐར་རྒྱས་པ་དང་། །མི་འགྱུར་བརྟན་པའི་འཕྲིན་ལས་མཛོད། །ལྕགས་ཡོས་འོལ་དགའ་རྫིང་ཕྱིར་འབྱོར་དུས་བྱམས་པའི་སྐུ་མེ་ཐུབ་མ་ཁྱད་མཚར། དངུལ་གདུང་། གནས་སྲུང་རྒྱལ་པོ་རྣམས་ལ་ཕུལ་བའི་སྙན་དར་ཞལ་ཡིག་ཕུན་ཚོགས་ནོར་བུའི་དཔྱ། མཁའ་བྱམས་པ་ལྟར་དག་པ་བྱམས་བརྩེའི་ཆུ་གཏེར་ཆེ། །དུས་ལས་ཡོལ་བ་མེད་པ་ཐུགས་རྗེའི་རླབས། །འཛད་མེད་ཕན་དང་བདེ་བ་ནོར་བུའི་དཔྱ། །སྩོལ་ཅིག་འཕགས་མཆོག་མི་ཕམ་མགོན་པོ་ཀྱེ། །ཤེལ་དངུལ་གདུང་དཀར་རྡུལ་མང་བརྩེགས་པའི་ལྷུན་པོ་ལ། །ལུས་ཅན་བསོད་ནམས་བསྐྲུན་པའི་མཆོད་སྡོང་ཆེ། །མཐོང་བས་དོན་ལྡན་འགྲུབ་པའི་ལྕགས་ཀྱུ་ཡིས། །འགྲོ་ཀུན་བདེ་སྐྱིད་འགུགས་པའི་ཕོ་ཉར་མཛོད། །བྱུ་རུའི་རྒྱལ་པོ་ལྷུན་པོ་བྱིན་ཟའི་ཕུང་པོ་ཡིས། །རྣམ་པར་འཁྱུད་པ་འཇིགས་རུང་སྲིན་པོའི་གཟུགས། །སྲོག་བདག་དྲེགས་པའི་རྒྱལ་པོ་པེ་ཧ་ར། །རིག་འཛིན་ཡོངས་ཀྱི་དགྲ་ལྷ་མཐུ་རྩལ་ཅན། །པདྨ་འབྱུང་གནས་སྤྱན་སྔར་ཁས་བླང་ལྟར། །བསྟན་དང་དགོན་གནས་འགྲོ་བའི་བདེ་སྐྱིད་སྤེལ། །ཁྱད་པར་རིག་སྔགས་འཆང་བ་བདག་ཅག་གིས། །འཕྲིན་ལས་རྣམ་བཞི་ལྷུན་གྱི་གྲུབ་པར་མཛོད། །ལྕགས་ཡོས་ཆོས་འཁོར་རྒྱལ་དུ་ཕྱིན་སྐབས་བྱམས་ཆེན་ལ་གོས་ཡུག་གི་སྙན་ཤལ་ཕུལ་བའི་ཁ་ཡིག་ཚོགས་གཉིས་དར་དཔྱང་མཛེས་པའི་དུང་དཀར་གཡས་འཁྱིལ། (༣༢ན)
ཐབས་དང་ཤེས་རབ་ཟུང་དུ་འཇུག་པ་ཡི། །བླ་མེད་སྙིང་པོ་ཡེ་ཤེས་བདུད་རྩིའི་གཏེར། །གྲུབ་པའི་རང་གཟུགས་བྱམས་མགོན་ཉིན་མོར་བྱེད། །ལེགས་ལམ་འབུམ་སྡེའི་སྣང་བ་ཆེས་དཀར་ཤོག །དགེ་ཚོགས་རལ་པ་སྟུག་པོའི་ནགས་ཀླུང་ནས། །ལེགས་བྱས་ལང་ཚོ་དར་བབས་གངྒཱའི་རྒྱུན། །སྲིད་ཞིའི་རྒུད་པའི་དྲི་མ་རབ་བཀྲུས་ནས། །ཕན་བདེའི་ཁྱབ་འཇུག་ཞབས་བསིལ་སྦྲེངས་གྱུར་ཅིག །ལུང་དང་རྟོགས་པའི་འཇམ་མཉེན་འདབ་མའི་ཁ། །འཛུམ་གྱིས་བསུས་པ་བདེ་ལེགས་བྱེ་བའི་མགྲོན། །འགུགས་བྱེད་ཐུབ་བསྟན་མནྡྷ་ར་ཡི་འཕྲེང་། །ལུས་ཅན་འཆི་མེད་ཐོད་དུ་འཆིང་གྱུར་ཅིག །བློ་གསལ་འཆི་བ་མེད་པའི་ཚོགས་རྣམས་ཀུན། །བཟང་(༣༢བ)
པོའི་བསྐལ་བར་འགྱུར་བྱེད་སྔོན་མེད་ཀྱི། །བདུད་རྩིས་རྣམ་པ་ཐམས་ཅད་མཁྱེན་པའི་སྲོག །འཚོ་བའི་གྲགས་པ་སྲིད་རྩེར་འབར་གྱུར་ཅིག །གངས་ལྡན་ར་བས་བསྐོར་བའི་ཚལ་ཆེན་པོར། །འགྲོ་ཀུན་བདེ་སྐྱིད་དཔག་བསམ་ལྗོན་ཤིང་འབྲས། །ལེགས་ལམ་ཟད་མི་ཤེས་པར་མངར་བའི་རོ། །བགྲངས་ཡས་སྐྱེ་རྒུས་ལོངས་སུ་སྤྱོད་གྱུར་ཅིག །བཀྲ་ཤིས་དགེ་མཚན་རྒྱ་མཚོར་རབ་འཁྱིལ་པའི། །དམ་པའི་ཆོས་ཀྱི་འཁོར་ལོས་ཕྱོགས་ཀུན་ལས། །རྣམ་པར་རྒྱལ་བའི་ཁྲིམས་ལྡན་འདུས་པའི་གླིང་། །དབྱར་གྱི་ཆུ་གཏེར་ཆེ་ལྟར་འཕེལ་གྱུར་ཅིག །རྣམ་སྨིན་དཀར་པོར་གཡས་སུ་རབ་འཁྱིལ་བའི། །ཚོགས་གཉིས་དར་དཔྱངས་མཛེས་པ་ཆོས་ཀྱི་དུང་། །འགྲོ་ཀུན་རྣ་བར་ལེགས་འཇེབས་སྙན་པའི་སྒྲ །སྒྲོག་བཞིན་དགའ་ལྡན་གནས་སུ་གར་བྱེད་ཤོག །ལྕགས་ཡོས་རྒྱལ་ལྷུན་གྲུབ་དགའ་ཚལ་གྱི་དེ་ཝཱི་ཀོཊིར་དཔལ་ལྡན་ལྷ་མོའི་སྐུ་བརྙན་དོན་འགྲུབ་མར་ཕུལ་པའི་སྙན་དར་ཁ་ཡིག་རབ་དགའི་གར་གྱི་རྣམ་རོལ། ཐུན་འཚམས་གོས་ཀྱིས་རབ་ཀླུབས་མིག་སྨན་རི། །དུས་ཀྱི་བྱིན་ཟའི་ཕུང་པོ་དང་འགྲོགས་པར། །གར་དགུའི་ཉམས་དང་ལྡན་ན་གང་གི་དཔེར། །སྟོན་མཛད་དཔལ་ལྡན་འདོད་ཁམས་དབང་ཕྱུག་མ། །ཁྱོད་ཀྱིས་བསྟན་དང་འགྲོ་བའི་ཕན་བདེ་སོགས། །ལེགས་བྱས་རྒྱ་མཚོའི་རླབས་ཀྱི་འཕྲེང་བ་ཅན། །ནམ་ཡང་དུས་ལས་ཡོལ་མེད་འཕྲིན་ལས་ཀྱིས། །སྔོན་མེད་གསར་པའི་རྒྱ་མཚོ་རྒྱས་པར་མཛོད། །ཁྱད་པར་བདག་གི་ཞི་རྒྱས་དབང་ལ་སོགས། །ལེགས་སྒྲུབས་(༣༣ན)
དགའ་བའི་གར་གྱི་རྣམ་རོལ་ཅིང་། །མངོན་སྤྱོད་གནམ་ལྕགས་འབར་བའི་རྡོ་རྗེ་ཡིས། །ལོག་འདྲེན་བྲག་རི་ཕྱེ་མར་འཐག་པར་མཛོད། །ལྕགས་ཡོས་རྒྱལ་དུ་སླེབས་ཐོག་གནས་ཆུང་ནས་ཆོས་རྒྱལ་ཆེན་པོས་འཕྲིན་ཡིག་རལ་གྲི་བཀུག་པ་དང་བཅས་ཏེ་ཕོ་ཉ་མངགས་ནས་བསྟན་སྲིད་ལ་ལོག་པར་འཁུ་བའི་དགྲ་བོ་ཞིག་ཚེའི་འདུ་བྱེད་བཀུམ་ཡོད་པས་རྟགས་མཚན་འདི་རྣམས་དགའ་ཚལ་གྱི་ཚེར་ཕུང་རྩ་བར་སྐྱོལ་ལ་གཏང་རག་ཐོང་གསུང་བ་བཞིན་དབྱུག་གུ་ཟླ་བའི་ཚེས་བརྒྱད་ལ་བཏང་བའི་དུས་ཀྱི་སྙན་དར་ཁ་ཡིག་གཏུམ་དྲག་བཤན་པའི་གད་རྒྱངས། རྒྱལ་བ་ཀུན་གྱི་མཐུ་སྟོབས་ནུས་པ་ཀུན། །ཟིལ་གནོན་གཤིན་རྗེ་གཤེད་པོའི་རྣམ་རོལ་ཅན། །སྲིད་གསུམ་དབང་སྒྱུར་དཔལ་ལྡན་རེ་མ་ཏི། །བསྟན་སྲུང་དམ་ཅན་རྒྱ་མཚོའི་དཔུང་གི་ཚོགས། །དམར་ནག་མདོག་ཅན་འཇིགས་སུ་རུང་བའི་གདོང་། །ཉ་རྒྱས་ཟླ་དཀྱིལ་འོད་ལ་ཅོ་འདྲི་ཞིང་། །རབ་དཀར་མཆེ་བ་མཛེས་ངོམ་འཛུམ་དང་བཅས། །དགྲ་བོའི་དོན་སྙིང་དམར་པོ་ལག་ཏུ་ཐོགས། །རྣམ་པར་རྒྱལ་བའི་རུ་མཚོན་འཕྱར་བཞིན་དུ། །དམ་ཉམས་ཐལ་བར་བརླག་ཅེས་ཁུ་སྒྲ་དང་། །བཅས་ཏེ་སྲུང་མ་ཀུན་འདུའི་སྒྲུབ་ཁང་ན། །རྣམ་འགྱུར་གར་གྱི་བྲེལ་བ་འདི་རྨད་བྱུང་། །སྔར་བཅོལ་བསྒྲུབས་པར་གཏང་རག་གཉན་པོ་དང་། །ད་འཆོལ་ལས་ཀུན་སྒྲུབ་པར་བྱེད་པའི་རྟེན། །འདུལ་ན་བསྟན་སྲུང་དྲེགས་པའི་དམག་གི་ཚོགས། །ཐོགས་མེད་གནས་འདིར་བྱོན་ལ་དགྱེས་རྒུར་རོལ། །ལྕགས་ཡོས་བསམ་ཡས་མཆིམས་ཕུར་སླེབས་སྐབས་གྲོང་སྨད་པ་འཕྲིན་ལས་རྒྱ་མཚོས་ནུ་བོ་ཚེ་དཔལ་བའི་དོན་དུ་སློབ་དཔོན་(༣༣བ)
ཆེན་པོའི་སྐུ་བསྙན་ལོ་ཆེན་བཻ་རོའི་ཕྱག་བཟོ་ཁྱད་མཚར་ལ་སྙན་དར་ཕུལ་བའི་ཁ་ཡིག་ཀུན་ཕན་སྲིད་ཞིའི་གདུང་སེལ། རིག་འཛིན་གཙོ་བོ་རྡོ་རྗེ་ཐོད་འཕྲེང་གི །རྨད་བྱུང་སྒྲུབ་གནས་གསུང་གི་ཡང་དབེན་གྱི། །སྐུ་བརྙན་ཡེ་ཤེས་སེམས་དཔའ་དངོས་བཞུགས་པར། །ལྷ་རྫས་སྙན་ཤལ་ཕུལ་བའི་དགེ་ཚོགས་མཐུས། །ལྔ་པའི་ལམ་གྱུར་ཚེ་རིངས་དཔལ་འབྱོར་གྱིས། །ལས་ཉོན་སྡིག་སྒྲིབ་ཐམས་ཅད་ལེགས་དག་ནས། །ནུབ་ཕྱོགས་བདེ་བ་ཅན་གྱི་ཞིང་ཁམས་སུ། །ཐོགས་མེད་སྐྱེས་ནས་ཆོས་ལ་སྤྱོད་པར་ཤོག །ཤུལ་ཏུ་མཆིས་པ་རྣམས་ལ་ནད་གདོན་བགེགས། །དུས་མིན་འཆི་སོགས་བར་ཆད་ཀུན་བཅོམ་སྟེ། །འཆི་མེད་པདྨའི་ཐུགས་རྗེས་ཚེ་འཕེལ་ཞིང་། །བསོད་ནམས་རབ་རྒྱས་འདོད་དོན་འགྲུབ་གྱུར་ཅིག ། བསམ་ཡས་མཆིམས་ཕུའི་ཨོ་རྒྱན་ཆེན་པོའི་སྐུ་བརྙན་བཻ་རོའི་ཕྱག་བཟོ་མར་ཕུལ་པའི་སྙན་དར་ཞལ་ཡིག་བདེ་ཆེན་དཔལ་འབར། རྒྱལ་ཀུན་གསང་བ་གསུམ་གྱིས་ཟློས་གར་མཁན། །མཚོ་སྐྱེས་ཚེ་དབང་རིག་འཛིན་ཐོད་འཕྲེང་གིས། །བསྟན་འགྲོའི་ཕན་བདེ་མ་ལུས་རྒྱས་པ་དང་། །བདག་ཅག་བསམ་དོན་འགྲུབ་པར་བྱིན་གྱིས་རློབས། །ཆུ་འབྲུག་གོང་དུ་འདེགས་པའི་ལམ་ཞོར་འདམ་བསམ་འགྲུབ་བདེ་ཆེན་དུ་བསྡད་སྐབས་ཧོར་ཟླ་བཞི་པའི་ཚེས་བཅུ་དགུའི་ཉིན་དྲི་ཟའི་རྒྱལ་པོ་ཟུར་ཕུད་ལྔ་པ་གཉན་ཆེན་པོ་ཐང་ལྷར་གསོལ་མཆོད་དང་བཅས་ཕུལ་པའི་དར་ཚོན་སྣ་ལྔའི་སྙན་དར་ཞལ་ཡིག་ལས་ཀུན་འགྲུབ་པའི་འདོད་འཇོ། ཕུན་དཀར་པོ་ཚོགས་ལང་ཚོའི་དཔལ་ལྡན་ཟླ་བཞིན་ཅན། །གར་དགུའི་ཉམས་ཀྱིས་རོལ་པའི་སྒྱུ་འཕྲུལ་གཟུགས། །ལྷ་ཡི་ལམ་ལ་དབང་པོའི་གཞུ་རིས་ལྟར། །རྣམ་བཀྲ་ལྷ་མཆོག་དྲི་ཟའི་རྒྱལ་པོ་ལ། །(༣༤ན)
རབ་དཀར་པདྨའི་འདབ་མ་བྱེད་པོ་ཡིས། །རབ་མཛེས་ཐགས་སུ་བསྐྲུན་པ་ལྷ་ཡི་གོས། །རབ་མཉེན་ལྷབ་ལྷུབ་སྙན་ཤལ་ཕུལ་བ་ཡིས། །རབ་འབྱམས་ཞི་བའི་འཕྲིན་ལས་ལྷུན་གྲུབ་མཛོད། །ཀུན་ཏུ་བཟང་པོའི་མཆོད་སྤྲིན་ལ་འགྲན་པ། །ཀུན་དགའི་དཔལ་སྟེར་ཉི་མའི་གཟི་བརྗིད་ཀྱང་། །ཀུན་ནས་འཕྲོག་བྱེད་མཚམས་སྤྲིན་མདངས་འཛིན་ལྟར། །ཀུན་བཟང་སྤྲུལ་པ་ཁྱེད་ལ་འབུལ་བགྱིད་ན། །མི་སེར་པོ་འགྱུར་སེང་གེའི་གདན་ལ་ཀུན་དགའི་དཔལ། །མ་ལུས་དཀྱིལ་འཁོར་ཀུན་གྱི་མགོན་པོ་ཟུང་། །མུ་མཐའ་བྲལ་བ་སྐལ་པ་རྒྱ་མཚོའི་བར། །མི་གཡོ་རྡོ་རྗེ་ལྟ་བུར་བརྟན་པར་མཛོད། །དབང་དམར་པོ་ཕྱུག་བརྒྱད་ཀྱི་ཡོན་ཏན་ཕུང་པོ་ལ། །དབང་དུ་ལེགས་སྒྱུར་མཐུ་སྟོབས་ནུས་པའི་བདག །དབང་གིས་རྒྱལ་པོ་ལྟ་བུར་རེ་སྐོང་བ། །དབང་དྲག་ལས་མཛད་ལྷག་པའི་ལྷ་མཆོག་ལ། །རེག་འཇམ་བདེ་སྟེར་བདེ་ལྡན་ལྷ་ཡི་གོས། །ཁ་དོག་རབ་དམར་རབ་འབྱམས་མཆོད་པའི་རྫས། །རྒྱ་ཆེར་ལེགས་སྤེལ་ལེགས་པའི་ཕུན་ཚོགས་ཀུན། །ཐོགས་མེད་དབང་དུ་དབང་གི་ལས་ཀྱིས་སྒྲུབས། །སྔོན་པོ་ལྷ་རྫས་གནམ་སྔོན་བཞུན་མར་འཁྱིལ་འདྲའི་མཚོར། །རབ་དཀར་ཡིད་ཀྱི་གཉིས་སྐྱེས་ལུས་དཀར་ཅན། །མཆོད་བསྟོད་མགྲིན་པའི་རྫ་རྔ་ལེགས་བརྡུང་ཞིང་། །སྤྱན་གཟིགས་ཕུར་ལྡིང་རྩེ་འཇོར་རྣམ་རོལ་ན། །ཡང་ཡང་མཆོད་ཅིང་བསྟོད་པས་མཉེས་བྱས་ཤིང་། །འགྲིག་འགྲིག་ཚིགས་ཙམ་ལྷུར་ལེན་མ་ཡིན་(༣༤བ)
པར། །དུང་དུང་སྙིང་ནས་བསྟེན་ཅིང་མཆོད་བྱེད་ན། །འཇིགས་འཇིགས་དྲག་པོའི་ལས་ཀུན་ཐོགས་མེད་སྒྲུབས། །ལྗང་གུ་མར་གད་མདངས་ཀྱི་རིན་ཆེན་རྩིག་པའི་ངོས། །སྡེ་བཞིའི་གཟུགས་བརྙན་བརྒྱ་ཕྲག་རབ་འཆར་བ། །མ་འདྲེས་སོ་སོར་རབ་རྟོགས་སྒྱུ་མ་མཁན། །རིག་པའི་རྩལ་འདི་ཧ་ནུ་མནྠ་བཞིན། །ཀུན་རྟོགས་པིར་གྱིས་བྲིས་འདྲའི་སྣང་བརྙན་ལ། །དབང་གཞུའི་གུར་ཁང་ལྟ་བུའི་མདངས་བཀྲག་ཅན། །སྤང་ལྗོངས་གོས་སུ་ཀླུབས་ལ་ཅོ་འདྲི་བའི། །མཉེན་འཇམ་དར་ལྗང་སྙན་ཤལ་འདི་ཕུལ་བས། །ལྷ་ཆེན་མཐུ་སྟོབས་ནུས་པ་ཡིད་བཞིན་ནོར། །མཆོད་བསྟོད་རྒྱལ་མཚན་རྩེ་མོར་རབ་བཀོད་པས། །མཆོག་དང་ཐུན་མོང་དངོས་གྲུབ་འདོད་པའི་དོན། །བསམ་པ་ཇི་བཞིན་ལྷུན་གྱིས་གྲུབ་པར་མཛོད། །གོང་དུ་འདེགས་ཤུལ་ཧོར་ཟླ་བཞི་པའི་གནམ་གང་གི་ཉིན་གླང་ལིང་ལར་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་བདུད་མགོན་སེང་གེའི་གདོང་ཅན་དང་གནོད་སྦྱིན་ཙེའུ་དམར་པོ་གཉིས་ཀྱི་གསོལ་མཆོད་བཙུགས་སྐབས་བདུད་མགོན་ལ་ཁ་བཏགས་མཐིང་ཁྲ་དང་རྩེའུ་དམར་བར་དར་ཚོན་སྣ་ལྔ་ཕུལ་བའི་སྙན་དར་ཁ་ཡིག་དངོས་གྲུབ་རྒྱ་མཚོའི་གཏེར། ཞིང་འདིར་ཐུབ་དབང་བསྟན་པ་སྲུང་བ་དང་། །ཞིང་བཅུའི་དམ་ཉམས་དགྲ་བགེགས་སྒྲོལ་བའི་ཕྱིར། །ཞིང་ལྤགས་ལ་སོགས་དྲག་པོའི་ཆས་ལྡན་པ། །ཞིང་སྐྱོངས་དབང་པོས་འཕྲིན་ལས་མ་ལུས་སྒྲུབས། །བསྟན་ཁ་བཏགས་དཀར་པོ་དང་བསྟན་ཁ་བཏགས་མཐིང་ཁྲ་འཛིན་ཆོས་སྲིད་འབྱོར་པའི་སྡེར། །གནོད་བྱེད་བདུད་རིགས་དམ་ཉམས་དགྲ་བགེགས་དང་། །བདག་སོགས་རྣམས་ཀྱི་ནད་(༣༥ན)
གདོན་བར་ཆད་ཀུན། །མ་ལུས་ཞི་བའི་འཕྲིན་ལས་མཛད་དུ་གསོལ། །དར་སེར་ཐོས་བསམ་སྒོམ་སོགས་རྣམ་དཀར་བྱ་བ་དང་། །ཚེ་དཔལ་བསོད་ནམས་སྟོབས་འབྱོར་ལེགས་ཚོགས་རྣམས། །ཡར་ངོའི་ཟླ་བ་ལྟར་བུར་རབ་འཕེལ་བ། །རྒྱས་པའི་འཕྲིན་ལས་མ་ལུས་སྒྲུབས་པར་མཛོད། །ཁྱད་པར་ངག་གི་དབང་ཕྱུག་འཇམ་དཔལ་དབྱངས་། །ཕུལ་བྱུང་བཀྲ་ཤིས་ཀུན་དགའི་དཔལ་སྟེར་དཔྱིད། །དང་པོའི་མགོན་པོ་སྐྱེ་རྒུའི་བསོད་ནམས་ཀྱི། །ཞིང་དུ་བསྐལ་བརྒྱའི་བར་དུ་བརྟན་པར་མཛོད། །དཔག་དར་དམར་པོ་བསམ་ཤིང་དང་བུམ་བཟང་འདོད་འཇོའི་བ། །ཡིད་བཞིན་ནོར་བུ་དབང་གི་རྒྱལ་པོ་ལྟར། །འདོད་པའི་རེ་བ་མ་ལུས་སྐོང་བྱེད་པ། །རབ་འབྱམས་དབང་གི་འཕྲིན་ལས་མ་ལུས་སྒྲུབས། །དར་ནག་པོ་བསམ་ངན་སྦྱོར་རྩུབ་འཆང་བ་དམ་ཉམས་དགྲ །དངོས་དང་བརྒྱུད་ནས་འཚེ་བའི་མི་བསྲུན་པ། །མ་ལུས་སྤྲུལ་པའི་ཆོས་རྒྱལ་ཆེན་པོ་ཡིས། །ཞལ་དུ་བསྟབ་པོ་དྲག་པོའི་འཕྲིན་ལན་སྒྲུབས། །དར་ལྗང་གུ་མཆོད་བསྟོད་ས་བོན་མཚར་དུ་དངར་བ་གང་། །མཐུ་སྟོབས་ནུས་པའི་ཉལ་འགྲོས་སྨིན་པ་ལས། །དངོས་གྲུབ་ལང་ཚོ་རྒྱས་པ་ཨ་ཤྭཏྠ། །ཕན་བདེའི་གྲིབ་བསིལ་ཉེར་འཚོའི་རྒྱུར་གྱུར་ཅིག ། གོང་གི་རྒྱལ་ཁབ་ཆེན་པོ་པེ་ཅིང་གི་ཉེ་འདབ་གཟིམས་ཁང་སེར་པོར་ཆུ་སྦྲུལ་ལོ་གསར་དུས་འདོད་ཁམས་དབང་ཕྱུག་མཆོད་པའི་ཚེ་ཕུལ་བའི་སྙན་དར་ཁ་ཡིག་འདབ་བཟང་དབང་པོའི་ཤུགས་ལྡན། རབ་དཀར་མདངས་ཀྱིས་མི་མཐུན་ཕྱོགས་(༣༥བ)
ཀུན་སེལ། །འཚམས་སྤྲིན་འོད་ཀྱིས་ཚེ་དཔལ་བསོད་ནམས་བསྐྱེད། །དམར་བའི་གཟི་ཡིས་ཁམས་གསུམ་དབང་དུ་སྡུད། །མཐིང་ནག་རྡོ་རྗེའི་ཚ་ཚས་དགྲ་བགེགས་འདུལ། །འཕྲིན་ལས་ཐོགས་མེད་བསྒྲུབས་པ་དམག་ཟོར་ལྷ། །དུས་ཀུན་བརྟེན་ཅིང་མཆོད་པའི་སྲུང་མ་ཁྱོད། །མི་ཟད་ཐུགས་རྗེའི་མཐུ་དཔུང་རབ་སྐྱེད་ལ། །བཅོལ་བའི་འཕྲིན་ལས་ཀུན་སྒྲུབ་དུས་ལ་བབས། །མཁས་གྲུབ་བླ་མ་ཟུང་འཇུག་ཞབས་བརྟན་ཅིང་། །བསིལ་ལྡན་བསྟན་དང་སྐྱེ་རྒུའི་ཕན་བདེ་རྒྱས། །ས་དབང་རྒྱལ་པོའི་ཆབ་སྲིད་མངའ་ཐང་འཕེལ། །ལེགས་པའི་ཡོན་ཏན་མ་ལུས་སྒྲུབས་པར་མཛོད། །རིག་འཛིན་བདག་གི་ལོ་སྐེག་ཚེ་ཡི་འཕྲེང་། །མི་བསྲུན་ནག་ཕྱོགས་འབྱུང་པོའི་བར་གཅོད་སོགས། །འདོད་དོན་སྒྲུབ་ལ་གནོད་བྱེད་དགྲ་དང་བགེགས། །མ་ལུས་ཐལ་བའི་རྡུལ་ཕྲན་བཞིན་དུ་རློགས། །ཚེ་དང་བསོད་ནམས་དཔལ་འབྱོར་སྙན་གྲགས་དང་། །ཐོས་བསམ་སྒོམས་སོགས་ཆོས་དང་མཐུན་པ་ཡི། །བསམ་དོན་འབད་པ་མེད་པར་ལྷུན་གྲུབ་པ། །ཡིད་བཞིན་དབང་གི་རྒྱལ་པོ་ལྟ་བུར་མཛོད། །བྲང་འགྲོ་གོས་སྔོན་གྱོན་པ་བགྲང་བྱ་ཡི། །ནང་འདིར་ཁ་བའི་སྨན་ལྗོངས་དབུས་འགྱུར་དུ། །འདབ་བཟང་དབང་པོ་ཇི་བཞིན་བགྲོད་པ་ཡི། །དོན་འདི་ལྷུན་གྱིས་གྲུབ་པའི་འཕྲིན་ལས་མཛོད། །མདོར་ན་བདག་ཅག་འཁོར་དང་བཅས་པ་རྣམས། །བསྟན་སྲུང་དབང་མོ་ཁྱོད་ལ་གཉེར་གཏོད་ན། །ཡིད་ལ་བསམ་པའི་བདེ་སྐྱིད་མ་ལུས་པ། །འབད་མེད་ལྷུན་གྱིས་གྲུབ་པའི་(༣༦ན)
འཕྲིན་ལས་མཛོད། །རྒྱ་ནག་གཟིམས་ཁང་སེར་པོར་ཧོར་ཟླ་དང་པོའི་ཚེས་བཅུ་བཞིའི་ཉིན་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་ལ་འདོད་ཁམས་དབང་ཕྱུག་དགྱེས་སྐྱེད་ཀྱི་མདོས་བསྐང་ཚུགས་སྐབས་ཕུལ་བའི་སྙན་དར་ཁ་ཡིག་འདོད་དོན་ཐོགས་མེད་སྒྲུབ་པའི་དབྱར་རྔ། བསམ་པའི་དོན་འགྲུབ་དཔག་བསམ་ཡོངས་འདུའི་ལྗོན། །དྲན་པས་སྲིད་ཞིའི་གདུང་སེལ་དམག་ཟོར་ལྷ། །དུས་གསུམ་རྒྱལ་བ་ཀུན་གྱི་ཡུམ་གཅིག་མ། །ཡིད་བཞིན་དབང་གི་རྒྱལ་པོ་ཁྱོད་ཉིད་ལ། །བཅོལ་བའི་འཕྲིན་ལས་གཉེར་དུ་གཏད་པ་འདི། །མཐུ་སྟོབས་ནུས་པའི་དཔུང་ཚོགས་རབ་བསྒྱེད་ནས། །སྐད་ཅིག་ཙམ་ལ་ཐོགས་མེད་ལྷུན་གྲུབ་པར། །དུས་ལ་བབ་པོ་འདོད་ཁམས་དབང་ཕྱུག་མ། །འགལ་རྐྱེན་བྱེད་པའི་དགྲ་བགེགས་ཚོགས་རྣམས་ཀྱི། །བསམ་སྦྱོར་བྱ་བྱེད་ལས་ཀུན་རྡུལ་དུ་རློགས། །འདབ་བཟང་དབང་པོའི་བགྲོད་པ་དང་མཚུངས་པར། །སཱ་ལའི་ལྗོངས་སུ་ཐོགས་མེད་བགྲོད་པར་མཛོད། །བདག་ཅག་དཔོན་སློབ་འཁོར་དང་བཅས་རྣམས་ལ། །བཤུལ་དུ་ནད་གདོན་བར་ཆད་ཀུན་ཞི་ཞིང་། །མཐུན་རྐྱེན་གང་བསམས་དོན་རྣམས་མ་ལུས་པ། །འབད་མེད་ལྷུན་གྱིས་འགྲུབ་པའི་གྲོགས་མཛོད་ཅིག ། ཆུ་སྦྲུལ་ཧོར་ཟླ་བཞི་པའི་ཚེས་བརྒྱད་ལ་ལེགས་ལྡན་ནག་པོ་ཞལ་བཞི་པ་མཆོད་པའི་དུས་ཕུལ་བའི་དར་ཚོན་སྣ་ལྔའི་སྙན་དར་ཁ་ཡིག་བདུད་དཔུང་སྙིང་ལ་དཔའ་བོའི་བྲོ་རྡུངས། བླ་མ་དཀར་པོ་མཆོག་དང་ཁྱབ་བདག་འཁོར་ལོའི་མགོན། །དགྲ་བགེགས་གཤེད་དུ་སྟོབས་འཕྲོག་སྲིན་(༣༦བ)
པོའི་གཟུགས། །དམ་ཉམས་སྲོག་རྩ་བཅད་པས་མ་ཚིམས་པར། །ད་དུང་སྙིང་ཁར་བྲོ་བརྡུང་སྟང་སྟབས་ཅན། །ཕྱི་རོལ་འཇིགས་རུང་དུར་ཁྲོད་བརྒྱད་ལ་སོགས། །དཔའ་བོ་མཁའ་འགྲོའི་གནས་ཀུན་རབ་མྱུལ་ནས། །ཐུབ་བསྟན་སྲུང་བའི་བཀའ་ཡི་བྱ་ར་བ། །ལེགས་ལྡན་ནག་པོ་གདོང་བཞིའི་མཚན་ཅན་ཁྱོད། །རྡོ་རྗེའི་ལུས་ཀྱི་ཨ་ཝ་དྷཱུ་ཏཱིའི་ནང་། །མི་ཞིག་སྒྱུ་འཕྲུལ་དྲ་བའི་ཟློས་གར་གྱིས། །རྩ་ཁམས་རླུང་གི་འདབ་བརྒྱ་གྲོལ་བའི་རྩེར། །ཟུང་འཇུག་ཟེའུ་འབྲུ་བཞད་བྱེད་ནང་གི་མགོན། །ཡེ་ནས་དག་པ་གསལ་སྟོང་རང་གི་སེམས། །ལྷུན་གྲུབ་གདོད་མའི་མགོན་པོར་རོ་ཅིག་པ། །བརྗོད་བྲལ་གཉུག་མའི་ཡེ་ཤེས་གསང་བའི་མགོན། །གང་དེར་མཁའ་ལ་མཁའ་ཡི་སྦྱོར་བ་བཞིན། །གནས་སྐབས་བར་ཆད་མི་མཐུན་ཞི་བ་དང་། །མཐར་ཐུག་སྐུ་བཞིའི་བདག་ཉིད་རྡོ་རྗེ་འཆང་། །འགྲུབ་པའི་འཕྲིན་ལས་གཉེར་དུ་གཏོད་བྱེད་ན། །ཀྭ་ཡེ་མཐུ་དཔུང་སྐྱེད་ཅིག་སྟོབས་འཕྲོག་དབང་། །དར་སེར་པོ་ཡིད་བཞིན་ནོར་དང་བུམ་བཟང་འདོད་འཇོའི་བ། །དཔག་བསམ་ཤིང་དང་མཚུངས་པའི་ནག་པོ་ཆེས། །ཚེ་དང་བསོད་ནམས་ཐོས་བསམ་སྒོམ་པ་སོགས། །ཡར་ངོའི་ཟླ་ལྟར་རྒྱས་པའི་འཕྲིན་ལས་མཛོད། །གངས་དར་དམར་པོར། ཅན་བསྟན་འགྲོའི་ཕན་བདེའི་སྣང་བ་འབུམ། །རབ་འབར་ཉི་མའི་མདངས་ལ་འགྲན་བཟོད་པར། །མཐུན་པའི་རྐྱེན་དུ་རབ་གྱུར་ཡོན་ཏན་ཀུན། །ཁབ་ལེན་རྡོ་དང་ལྕགས་བཞིན་དབང་དུ་སྡུས། །(༣༧ན)
ཁ་བཏགས་ནག་པོ་རྡོ་རྗེ་འཆང་དབང་རི་སུལ་རྣལ་འབྱོར་གཉན། །བརྩེ་ཆེན་སྙིང་པོའི་ཞབས་དང་མཚར་པ་རྗེ། །དྲིན་ཆེན་རྩ་བའི་བླ་མའི་བར་བྱོན་པས། །བཀའ་བསྒོས་དམ་ཚིག་བསྒྲགས་པ་ཉེར་དགོངས་ལ། །འགྲོ་བའི་བདེ་སྐྱིད་བསྟན་དང་ཆོས་འཁོར་འཇོམས། །རིག་འཛིན་བདག་ཅག་སྙིང་ནས་དམ་པའི་ཆོས། །སྒྲུབས་ལ་བར་དུ་གཅོད་པའི་དགྲ་དང་བགེགས། །ཐམས་ཅད་ཐལ་བའི་རྡུལ་ཕྲན་བཞིན་དུ་རློགས། །ཁྱད་པར་གངས་ཅན་སྨན་ལྗོངས་དབུས་འགྱུར་དུ། །པད་འབྱུང་ཆོས་རྒྱལ་མེས་དཔོན་བཞེད་པའི་ལྷག །བཀང་ཕྱིར་བསྟན་འགྲོའི་ཕན་བདེ་མྱུར་སྒྲུབ་པར། །བསམ་པའི་དོན་ཀུན་ལྷུན་གྱི་འགྲུབ་པར་མཛོད། །དར་ལྗང་གུ་ཐུབ་བསྟན་འཆི་མེད་ཚལ་དུ་བཙོང་ཁ་པའི། །དྲི་བྲལ་རིང་ལུགས་མྱ་ངན་མེད་ལྗོན་ཤིང་། །འཆད་རྩོད་རྩོམ་པའི་འདབ་མ་གཡུར་ཟ་ཅན། །གྲིབ་མ་སྐྱེ་རྒུའི་ངལ་གསོའི་སྟེགས་གྱུར་ཅིག །ངག་དབང་དབྱངས་ཅན་མགྲིན་པའི་བཀྲ་ཤིས་གླུ། །ཀུན་ནས་མི་ཕྱེད་མཛའ་གཅུགས་དགའ་བདེའི་མགོན། །འགྲོ་བའི་བསོད་ནམས་ཞིང་གྱུར་དཀོན་མཆོག་གསུམ། །འཕྲིན་ལས་སྐལ་ལྡན་དཔལ་དུ་རྒྱས་བརྟན་མཛོད། །རྒྱ་སོག་གི་ལྷ་འདྲེའི་འཚུབ་འགྱུརགྱིས་སྒར་ལ་ནད་རིམ་ལ་སོགས་འབྱུང་བར་ཉེ་ཚེ་རིམ་གྲོ་དགོས་ཚུལ་ཆོས་སྐྱོང་ཆེན་པོ་ཁོག་ཏུ་ཞུགས་ནས་གསུང་པར་བརྟེན་ཁའི་ཏལ་སྒར་ངེད་རང་གི་རྡོ་རྗེ་སློབ་དཔོན་བྱས་ནས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་ཀྱི་ཕུར་པ་ལྷ་ནག་གི་སྒྲུབ་པ་བཙུགས་པའི་དུས་གླགས་ལྟའི་འབྱུང་པོ་མང་པོའི་སྤྱི་བོར་ཕུར་(༣༧བ)
པ་ཐེབས་པ་མཐོང་མཁན་གྱི་སྤྱོད་ཡུལ་དུ་གྱུར་པ་སོགས་སྒྲུབ་པའི་མཚན་མ་ངོ་མཚར་བ་འབྱུང་བའི་དུས་ཕུལ་བའི་སྙན་དར་ཁ་ཡིག་བདུད་དཔུང་ཕྱེ་མར་འཐག་པའི་ཐོག་མདའ། གར་ཁ་བཏགས་དགུའི་ཉམས་ཀྱིས་བརྗིད་པའི་དབང་སྔོན་རི། །དུས་ཀྱི་མེ་ལྕེ་འབར་བའི་གོས་གྱོན་པ། །ཤེས་རབ་འཁོར་ལོ་རྒྱས་འདེབས་དགའ་མ་དང་། །མཉམ་སྦྱོར་འཕྲིན་ལས་དཔལ་ཆེན་ཧེ་རུ་ཀ །དྲན་པ་ཙམ་གྱིས་ནག་ཕྱོགས་བདུད་སྡེའི་དཔུང་། །ཐལ་བར་རློག་ཅིང་མཆོག་ཐུན་དངོས་གྲུབ་ཀུན། །འབད་མེད་སྩོལ་མཛད་རྡོ་རྗེ་ཕུར་པ་ཡི། །ལྷ་ཚོགས་རྣམས་ཀྱིས་དུས་འདིར་དངོས་གྲུབ་སྩོལ། །མཐུ་སྟོབས་དཔྱིད་ཀྱི་ཕོ་ཉས་ལེགས་བསྐྱངས་པས། །ཆོས་དང་ཉེར་མཐུན་བསམ་དོན་ཨ་མྲའི་ཤིང་། །འདོད་པའི་རེ་བ་ལེགས་སྐོང་འབྲས་བཟང་དག །མྱུར་དུ་སྩོལ་ཅིག་འཕྲིན་ལས་ཕུར་པའི་ལྷ། །ཕུར་སྐྱོང་སྲུང་མར་ཁས་བླངས་དམ་ལྡན་རྣམས། །རིགས་འཛིན་པདྨའི་དམ་ཚིག་ཉེར་དགོངས་ལ། །དེང་དུས་བཅོལ་བའི་འཕྲིན་ལས་མ་ལུས་པ། །ཐོགས་པ་མེད་པར་མྱུར་དུ་སྒྲུབ་པར་མཛོད། །ཁའི་ཏལ་སྒར་ཕུར་སྒྲུབ་དང་འབྲེལ་བར་ལོ་དུས་ཀྱི་སྲིད་གསུམ་བདག་མོ་ཐུགས་དམ་སྐོང་བའི་མདོས་བསྐང་གི་ཚེ་ཕུལ་པའི་སྙན་དར་ཞལ་ཡིག་རེ་བའི་འབྲས་བུ་དོན་ལྡན། མཛེས་གསང་དཀར་བརྗིད་ཆགས་དང་གཏུམ་རྔམས་རྣམ་འགྱུར་ཚོགས། །གྲངས་མེད་བསྟན་ནས་ཞི་རྒྱས་དབང་དྲག་ལས། །ཐོགས་མེད་སྒྲུབ་མཛད་རྒྱལ་བ་ཀུན་གྱི་ཡུམ། །དྲན་པས་སྲིད་ཞིའི་གདུང་སེལ་ལྷག་པའི་ལྷ། །ངེས་པའི་དོན་དུ་རྡོ་རྗེ་དབྱིངས་ཕྱུག་མ། །མཐུན་(༣༨ན)
མོང་གདུལ་བྱའི་སྣང་ངོར་དབྱངས་ཅན་ལྷ། །དགྲ་བགེགས་གཤེད་དུ་འདོད་ཁམས་དབང་ཕྱུག་མ། །འཁོར་བཅས་མཐུ་སྟོབས་ནུས་པའི་དཔུང་སྐྱེད་ལ། །བསྟན་པ་བསྲུང་ཞིང་ལུས་ཅན་བདེ་སྐྱིད་སྤེལ། །བདག་ཅག་འཁོར་དང་བཅས་པའི་ནད་གདོན་བགེགས། །བསམ་ངན་སྦྱོར་བ་རྩུབ་འཆང་དགྲ་དཔུང་སོགས། །བར་ཆད་མི་མཐུན་ཕྱོགས་རྣམས་ཞི་བར་མཛོད། །གངས་རིའི་དཔལ་ལྡན་དབུས་འགྱུར་སྨན་ལྗོངས་སུ། །ཐོགས་མེད་བགྲོད་ནས་ཐོས་བསམ་སྒོམ་པ་སོགས། །རྣམ་དཀར་དམ་པའི་ཆོས་ཀྱི་བྱ་བ་ཀུན། །འབད་མེད་ལྷུན་གྱིས་ཡོངས་འགྲུབ་འཕྲིན་ལས་མཛོད། །ངག་གི་དཔལ་རྙེད་དབང་ཕྱུག་བརྒྱད་ལྡན་ཞིང་། །ཐོག་མཐའ་བར་དུ་བཀྲ་ཤིས་ཆོས་ཀྱི་དུང་། །ཀུན་བཟང་ཐུགས་རྗེའི་དགའ་ཚལ་རབ་ཡངས་པོར། །ཕན་བདེའི་སྲོག་ཤིང་རྡོ་རྗེ་ལྟར་བརྟན་མཛོད། །འགྲོ་བ་ཀུན་གྱི་སྐྱབས་དང་མགོན་གཅིག་པུ། །ཐུབ་པའི་བསྟན་པ་ལུས་ཅན་བསོད་ནམས་ཀྱི། །ཞིང་དུ་སྲིད་མཐར་རབ་རྒྱས་བདག་སོགས་ཀུན། །མཆོག་གསུམ་ཐུགས་རྗེའི་དཔལ་དང་ལྡན་པར་མཛོད། །ཡིད་བཞིན་དབང་གི་རྒྱལ་པོ་འདོད་འཇོའི་བ། །གཏེར་གྱི་བུམ་པ་དཔག་བསམ་ལྗོན་ཤིང་ལྟར། །གསོལ་པ་བཏབ་པ་ཙམ་གྱིས་བསམ་པའི་དོན། །འབད་མེད་ལྷུན་གྱིས་འགྲུབ་པའི་དགེ་ལེགས་མཛོད། །གོང་མ་ཤུན་ཙི་རྒྱལ་པོས་ཉི་མ་ནུབ་ཕྱོགས་ཆོས་སྲིད་བསྟན་པ་གཅིག་ཏུ་གྱུར་པའི་ལུང་ལས་ཀྱི་སྲིད་ན་མངོན་པར་མཐོ་བའི་དཔལ་བྱིན་(༣༨བ)
ཞིང་རིང་པོར་མ་ཐོགས་པར་གེགས་མེད་དུ་བོད་ཡུལ་གྱི་སའི་ཆ་མཚོ་ཁྲི་ཤོར་རྒྱལ་མོའི་འགྲམ་དུ་སྒར་ཆེན་འབྱོར་སྐབས་བླ་མ་ཡི་དམ་ཆོས་སྲུང་ལ་གཏང་རག་ཕུལ་བའི་སྙན་དར་ཞལ་ཡིག་རེ་བའི་ལོ་འབྲས་དུད་པའི་ཨཤྭཏྠ། སྐྱབས་གསུམ་ཀུན་འདུས་རྡོ་རྗེ་དྲག་པོ་རྩལ། །དངོས་གྲུབ་ཆར་འབེབས་ཡི་དམ་ལྷ་ཚོགས་དང་། །འཕྲིན་ལས་ཀུན་སྒྲུབ་ཆོས་སྐྱོངས་སྲུང་མ་ལ། །སྔར་བཅོལ་ལས་ཀུན་སྒྲུབ་པའི་གཏང་རག་འབུལ། །མྱུར་མཛད་མགོན་པོ་གུར་མགོན་ཞལ་བཞི་པ། །རྣམ་མང་ཐོས་སྲས་པུ་ཏྲ་བེག་ཙེ་སོགས། །སྲུང་མ་དམ་ཅན་རྒྱ་མཚོའི་ཚོགས་རྣམས་ལ། །ཕྱི་ནང་གསང་བའི་ཀུན་བཟང་མཆོད་སྤྲིན་འབུལ། །དར་སྔོན་དྲན་པ་ཙམ་གྱིས་སྲིད་ཞིའི་གདུང་སེལ་ཅིང་། །འདོད་པའི་རེ་སྐོང་ཡིད་བཞིན་དབང་གི་རྒྱལ། །འདོད་ཁམས་རྒྱལ་མོ་དཔལ་ལྡན་རེ་མ་ཏིར། །སྔར་བཅོལ་འཕྲིན་ལས་གྲུབ་པའི་གཏང་རག་འབུལ། །སླར་ཡང་བསྟན་འགྲོའི་ཕན་བདེ་རབ་འཕེལ་ཞིང་། །འཁོར་ལོའི་བདག་ཉིད་ཟུང་འཇུག་ཞབས་པད་བརྟན། །རིག་འཇིན་བདག་གི་ཆོས་དང་མཐུན་པའི་དོན། །འབད་མེད་ལྷུན་གྱིས་འགྲུབ་པར་མཛད་དུ་གསོལ། །དར་སྔོན་དཔལ་ལྡན་སྔགས་ཀྱི་སྲུང་མ་ཆེན་མོ་སོགས། །བོད་ཡུལ་སྐྱོང་དང་ཟབ་གཏེར་ཆོས་སྲུང་དུ། །པདྨཱ་ཀ་རའི་སྤྱན་སྔར་ཁས་བླངས་པ། །དམ་ཅན་རྒྱ་མཚོར་དགྱེས་པའི་མཆོད་པ་འབུལ། །དར་དཀར་དྲི་ཟའི་རྒྱལ་པོ་རྡོ་རྗེ་འབར་བ་རྩལ། །བོད་ཁམས་སྐྱོང་མཛད་བསྟན་མ་བཅུ་གཉིས་ལ། །ཕྱི་ནང་གསང་བའི་མཆོད་པ་འབུལ་བྱེད་ན། །སྔར་བཅོལ་ལེགས་གྲུབ་(༣༩ན)
སླར་ཡང་འཕྲིན་ལས་མཛོད། །དར་ནག་དྲག་རྩལ་མཐུ་སྟོབས་ལྡན་པའི་རཱ་ཧུ་ལ། །བདུད་མགོན་ཞིང་སྐྱོང་སེང་གེའི་གདོང་ཅན་སོགས། །ཕ་མེས་བརྒྱུད་པའི་བསྟན་སྲུང་ཚོགས་རྣམས་ལ། །མཐུན་པའི་དམ་རྫས་རྣམས་ཀྱི་མཆོད་པ་འབུལ། །སྤྲུལ་པའི་ཆོས་རྒྱལ་ཆེན་པོ་སྐུ་ལྔ་པ། །ལས་མཁན་བཙན་རྒོད་གནོད་སྦྱིན་ཙི་དམར་བ། །སྣང་སྲིད་ལྷ་སྲིན་སྡེ་བརྒྱད་ཚོགས་རྣམས་ལ། །མཐུན་པའི་དམ་རྫས་རྒྱ་མཚོས་ཐུགས་དམ་སྐོང་། །ཆུ་སྦྲུལ་འདར་པ་ཆོས་མཛད་ངག་དབང་ཕུན་ཚོགས་ལྷུན་གྲུབ་ཀྱིས་འདར་གྲང་མོ་ཆེའི་མཚར་ཆེན་ཆོས་ཀྱི་རྒྱལ་པོའི་དངུལ་གདུང་ལ་འབུལ་རྒྱུའི་སྙན་དར་ལ་ཁ་བྱང་དགོས་ཚུལ་ལྟར་བྲིས་པ་སློབ་བཤད་བསྟན་པ་རྒྱས་པའི་སྐལ་བཟང་། ཨེ་ཝཾ་ཟུང་དུ་འཇུག་པ་སྒྱུ་དྲའི་གར། །དཔལ་ལྡན་སྐུ་བཞིའི་རོལ་པར་ཡོངས་ཤར་བ། །ཁྱབ་བདག་འཁོར་ལོའི་མགོན་པོ་རྡོ་རྗེ་འཆང་། །གདན་གསུམ་ཚང་བའི་དེད་དཔོན་མཚར་པ་རྗེ། །བརྗོད་བྲལ་གཉུག་མ་སེམས་ཀྱི་མཁའ་དབྱིངས་སུ། །བདེ་ཆེན་ལང་ཚོའི་འཇའ་ལུས་རྣམ་བཀྲ་བ། །འགྱུར་མེད་མཚན་དཔེའི་མདངས་འཛིན་རྡོ་རྗེའི་སྐུར། །རྡོས་བཅས་བེམ་པོར་སྣང་བ་བྱིས་པའི་བློ། །འོན་ཀྱང་སྐལ་བཟང་འགྲོ་བའི་བསོད་ནམས་ཀྱི། །ཞིང་རྡུལ་ལས་བསྐྲུན་ཡིད་བཞིན་ནོར་བུའི་གདུང་། །ཆ་ཤས་གསིལ་བུར་ལེགས་བཞུགས་མཆོད་སྡོང་ཆེར། །འཇམ་མཉེན་ལྷ་རྫས་སྙན་ཤལ་ཕུལ་བའི་དགེས། །ལུས་ཅན་ཕན་བདེའི་གཞིར་གྱུར་རྒྱལ་བའི་བསྟན། །སྙིང་པོ་ངེས་གསང་རྡོ་རྗེ་ཐེག་པའི་ཆོས། །ཡང་སྙིང་ཁའུ་བྲག་རྫོང་བཞེད་
པའི་སྲོལ། །ཟབ་མོ་སློབ་བཤད་ཕྱོགས་ཀུན་རྒྱས་གྱུར་ཅིག །གང་གི་ཐུགས་རྗེའི་འོད་ཀྱིས་ལེགས་བཞུ་པའི། །བདག་ཅག་ཚེ་དཔལ་སྟོབས་འབྱོར་ཆུ་བོའི་རྒྱུན། །ནམ་ཡང་ཆད་མེད་དོན་གཉིས་རྒྱ་མཚོ་ཆེར། །འབབ་པའི་སྐལ་བ་བཟང་པོར་སྤྱོད་གྱུར་ཅིག ། ཆུ་སྦྲུལ་འཇང་དབོན་བློ་བཟང་རབ་བརྟན་གྱིས་དགའ་ལྡན་དངུལ་གདུང་རིན་པོ་ཆེ། མགོན་ཁང་དང་བཅས་པ་དང་།མལ་དྲོ་གཟིམས་ཁང་ཤར་གྱི་ཕྱག་བཞི་པར་འབུལ་རྒྱུའི་སྙན་དར་ལ་ཁ་བྱང་དགོས་ཚུལ་བྱུང་བ་ལྟར་བྲིས་པ་དགེ་ལེགས་རབ་སྩོལ། དངུལ་གདུང་བློ་ཆེན་འཇམ་དབྱངས་གཞོན་ནུ་ངུར་སྨྲིག་གི །རྣམ་རོལ་སྐལ་བཟང་གདུལ་བྱའི་གཉེན་གཅིག་པུ། །མཁས་བཙུན་བཟང་པོའི་སྙན་གྲགས་ས་གསུམ་ན། །ཡོངས་ཁྱབ་རྒྱལ་བ་ཀུན་དངོས་བཙོང་ཁ་པ། །གང་གིས་ཟུང་འཇུག་བདེ་ཆེན་ཡེ་ཤེས་སྐུ། །ཆོས་ཀྱི་དབྱིངས་ལས་ནམ་ཡང་གཡོ་མེད་ཀྱང་། །རགས་པའི་གཟུགས་ཀྱི་སྐུ་གདུང་ཡིད་བཞིན་ནོར། །འདི་ཀོ་བོད་འབངས་བསོད་ནམས་ཞིང་མཆོག་ཏུ། །བཞུགས་གནས་རིན་ཆེན་ལས་གྲུབ་ཐུགས་ཀྱི་རྟེན། །ངོ་མཚར་བཀོད་མཛེས་རིན་ཆེན་ཕྲ་ཚོམས་ཅན། །མཐོང་ཐོས་དྲན་རེག་རྣམ་པར་རབ་གྲོལ་བར། །ལྷ་རྫས་གོས་ཟུང་ཕུལ་བའི་དགེ་ཚོགས་ཀྱིས། །ཀུན་མཁྱེན་འཇམ་དཔལ་སྙིང་པོའི་བསྟན་པ་མཆོག །སྲིད་མཐའི་བར་དུ་འཕེལ་ཞིང་རྒྱས་པ་དང་། །བདག་སོགས་གང་བསམས་དོན་རྣམས་མ་ལུས་པ། །འབད་མེད་ལྷུན་གྱིས་འགྲུབ་པའི་དགེ་ལེགས་སྩོལ། །མགོན་ཁང་ཀུན་མཁྱེན་རྒྱལ་བའི་བསྟན་པ་སྲུང་བ་ལ། །འཇམ་དཔལ་དཔའ་བོ་རབ་(༤༠ན)
ཁྲོས་གཤིན་རྗེ་གཤེད། །དངོས་གྲུབ་ཆར་འབེབས་མྱུར་མཛད་མགོན་པོ་དང་། །ལས་ཀྱི་གཤིན་རྗེས་འཕྲིན་ལས་མ་ལུས་སྒྲུབས། །དུས་གསུམ་རྒྱལ་བའི་བསྟན་སྲུང་ཕྱིར། །དུས་དགྲའི་དབང་པོ་ཧེ་རུ་ཀ །དུས་འདིར་ཕྱག་བཞིའི་མགོན་སྤྲུལ་བས། །དུས་ཀུན་གཡེལ་མེད་གྲོགས་མཛོད་ཅིག ། འོ་རློན་པ་ངག་དབང་ཆོས་དཔལ་གྱིས་མྱུར་མཛད་མགོན་པོའི་མལ་དྲོ་གཟིམས་ཁང་ཤར་སྙན་དར་ཁ་ཡིག་དགོས་ཚུལ་ལྟར་བྲིས་པ་བསམ་འཕེལ་ནོར་མཆོག །བསམ་འཕེལ་དབང་གི་རྒྱལ་པོ་ཡིད་བཞིན་ནོར། །དཔལ་ལྡན་ཕྱག་དྲུག་ཡེ་ཤེས་མགོན་པོ་ལ། །འཇམ་མཉེན་ལྷ་རྫས་སྙན་ཤལ་དམ་པ་འབུལ། །རྨད་བྱུང་འདོད་པའི་རེ་བ་སྐོང་དུ་གསོལ། །ཆུ་སྦྲུལ་ས་སྐྱོང་བྱ་རྒྱལ་པོ་བཀྲ་ཤིས་ཀྱིས་ཕོ་བྲང་ཡང་རྩེའི་གཟའ་ཁང་དུ་འབུལ་རྒྱུའི་སྙན་དར་ཁ་བྱང་དགོས་ཚུལ་ལྟར་བྲིས་པ་ལྷོ་ཕྱོགས་ནོར་འཛིན་མཛེས་པའི་དཔག་བསམ་ལྗོན་པ། མཐུ་སྟོབས་དྲག་རྩལ་གནམ་ལྕགས་ཐོག་མདའ་ཡིས། །དགྲ་བགེགས་བྲག་རི་ཐལ་བར་རློག་མཛད་པ། །སྡེ་བརྒྱད་དྲེགས་པའི་དམག་དཔོན་རཱ་ཧུ་ལ། །ཕ་མེས་བརྒྱུད་ཀྱི་སྲུང་མ་གཉན་པོའི་དྲུང་། །འཆི་མེད་བུ་མོའི་ལག་པད་གྱིས་བསྐྲུན་པའི་། །ཟླ་བ་བཞུན་མ་ཐགས་སུ་ལེགས་གྲུབས་དར། །ངོ་མཚར་སྣང་བརྙན་རི་དྭགས་གཟུགས་བཀྲ་བའི། །འཇམ་མཉེན་ལྷ་རྫས་རེག་བྱ་འདི་ཕུལ་བས། །རྒྱལ་བའི་བསྟན་པ་དེ་འཛིན་སྐྱེས་བུ་དང་། །ལུས་ཅན་ཀུན་གྱི་ཕན་བདེའི་ལེགས་ཚོགས་རྒྱས། །འཁྲུག་རྩོད་ནད་རིམས་དུས་མིན་འཆི་བ་སོགས། །མི་མཐུན་བར་ཆད་(༤༠བ)
གཡུལ་ལས་རྒྱལ་བར་མཛོད། །ཁྱད་པར་ལྷོ་ཕྱོགས་ནོར་འཛིན་ཡངས་པའི་གཞིར། །མངའ་འབངས་ཆོས་བཞིན་སྐྱོང་མཛད་མིའི་དབང་པོ། །བྱ་ནག་གདུང་གི་བཙུན་པའི་ཆབ་སྲིད་དང་། །མངའ་ཐང་ཡར་ངོའི་ཟླ་ལྟར་འཕེལ་བར་མཛོད། །ཕྱོགས་ལས་རྣམ་པར་རྒྱལ་བའི་ལྷུན་པོའི་རྩེར། །རྣམ་དཔྱོད་མིག་སྟོང་རབ་བཀྲ་འཆི་མེད་གཙོ། །དུས་ཀུན་ཤིས་པའི་རྡོ་རྗེ་རྩེ་བརྒྱ་པ། །ལེགས་པར་འཛིན་དེའི་ལས་ཀུན་སྒྲུབ་པར་མཛོད། །སྲིད་ཞིའི་དགེ་ལེགས་ཕུན་ཚོགས་ཀུན་གྱི་མཛོད། །འདོད་པའི་རེ་བ་སྐོང་བའི་དཔག་བསམ་དབང་། །སྲིད་པའི་རྩེ་མོར་ཉེར་དུད་འབྲས་བུ་ཡིས། །རིགས་ཆོས་ཡོན་ཏན་མ་ལུས་འཛིན་གྱུར་ཅིག །བརྣག་པའི་སེམས་ལྡན་དགྲ་བོའི་དཔུང་ཚོགས་ཀྱིས། །དམར་ཆེན་སྙིང་ཁྲག་ཞལ་དུ་གསོལ་བ་དང་། །གཉེན་སྲིད་མངའ་འབངས་སྡེ་བཅས་མ་ལུས་པ། །ཕན་དང་བདེ་བ་ཆེན་པོས་སྐྱོང་བར་མཛོད། །ཁྱད་པར་སྔགས་འཆང་ཡོངས་ཀྱི་མཐུ་བོ་ཆེ། །བྱ་ནག་རིན་ཆེན་འོད་ཀྱི་དམ་བཞག་པ། །དྲན་པར་མཛོད་ལ་བདག་གི་འདོད་པའི་དོན། །འབད་མེད་ལྷུན་གྱིས་འགྲུབ་པའི་འཕྲིན་ལས་མཛོད། །ཤིང་རྟ་གནམ་ལོ་གསར་དུ་ཚེས་པའི་དུས་འདོད་པའི་རྒྱལ་མོ་མཆོད་པའི་དགའ་སྟོན་ལ་ཁ་བཏགས་ཉིན་མོ་བདེ་ལེགས་མར་ལས་བཞི་སྤྱི་ཁྱབ་དང་། གཞན་རྣམས་ལ་སོ་སོའི་མདོག་དང་མཚུངས་པའི་འདོད་གསོལ་བཀོད་དེ་ཕུལ་བ་དུས་ཀུན་དགེ་བའི་བཀྲ་ཤིས། ཕུན་ཉིན་མོ་བདེ་ལེགས་ཚོགས་མཆོག་གི་དགའ་སྟོན་རྒྱས་པ་ཡིས། །ངོ་མཚར་བཀྲ་ཤིས་འཁྱིལ་བ་ཤིང་ཕོ་རྟའི། །གསར་ཚེས་གནམ་ལོའི་དུས་ཀྱི་ཐོག་མའི་ཉིན། །བསམ་དོན་རེ་བ་ཡོངས་སྐོང་ལྷག་པའི་(༤༡ན)
ལྷ། །དྲན་པས་ཡིད་ཀྱི་གདུང་སེལ་མཛའ་ན་མོ། །བསྟེན་པས་འདོད་པའི་རེ་སྐོང་ཡིད་བཞིན་ནོར། །བསྐུལ་བས་ཕྱོགས་ལས་རྣམ་རྒྱལ་མཆོག་སྩོལ་པ། །སྲིད་གསུམ་བདག་མོ་འདོད་ཁམས་དབང་ཕྱུག་མར། །ཉིན་མཚན་ཀུན་ཏུ་བདེ་ཞིང་སྐྱིད་པ་ཡི། །ཕུལ་བྱུང་ཤིས་པ་བརྗོད་པའི་ཚིག་གི་འཕྲེང་། །ངོ་མཚར་ཐགས་སུ་གྲུབ་པའི་རི་མོ་ཅན། །འཆི་མེད་དར་གྱི་སྙན་ཤལ་འདི་ཕུལ་བས། །ལུང་རྟོགས་ཆོས་ཀྱི་ཉི་མ་འབར་བའི་གཟིས། །བསྟན་འགྲོའི་སྣང་བ་ཀུན་ནས་རབ་གསལ་ཞིང་། །རིགས་འཛིན་བདག་གི་བསམ་དོན་མ་ལུས་པ། །ལྷུན་གྲུབ་ཡོངས་འདུའི་དབང་པོ་ལྟ་བུར་མཛོད། །དཀར། རབ་དཀར་ཞི་བའི་ཉམས་ལྡན་ལྷ་མོ་ཡིས། །ནད་གདོན་བགེགས་སོགས་མི་མཐུན་བར་གཅོད་ཀུན། །མ་ལུས་ཐོགས་པ་མེད་པར་རབ་ཞི་ནས། །ཕན་དང་བདེ་བའི་དཔལ་ལ་སྦྱོར་བར་མཛོད། །སེར་།གསེར་གྱི་མདངས་འཛིན་རྒྱས་པའི་ལྷ་མོ་ཡིས། །ཚེ་དཔལ་བསོད་ནམས་ཐོས་བསམ་སྒོམ་པ་སོགས། །ལུགས་གཉིས་ཡོན་ཏན་མཐའ་དག་རབ་རྒྱས་པའི། །ཕུན་ཚོགས་དཔལ་འབྱོར་མཆོག་ལ་སྦྱོར་བར་མཛོད། །དམར་ཆགས་པའི་ཉམས་ལྡན་དབངགི་ལྷ་མོ་ཡིས། །སྲིད་དང་ཞི་བའི་སྡེ་བཞིའི་དངོས་པོ་ཀུན། །བསམས་པ་ཙམ་གྱིས་དབང་དུ་ལེགས་བསྡུས་ནས། །འཛད་པ་མེད་པའི་འདོད་རྒུར་སྤྱོད་པར་མཛོད། །མཐིང་ཁྲོ་ཞིང་རབ་གཏུམ་དྲག་པོའི་ལྷ་མོ་ཡིས། །བསམ་ངན་སྦྱོར་རྩུབ་འཆང་བའི་དགྲ་བགེགས་ཀྱི། །སྙིང་ཁྲག་དྲོན་མོ་ཞལ་དུ་རབ་བཞེས་ནས། །མངོན་སྤྱོད་ལས་ཀྱི་འཕྲིན་ལས་འགྲུབ་པར་མཛོད། །
ཤིང་རྟ་མཆོད་དཔོན་བློ་བཟང་མཐུ་སྟོབས་ཀྱིས་བསམ་ཡས་སུ་བྱང་ཆུབ་ཆེན་པོར་འཕན་ཕུལ་བའི་ཁ་བྱང་དགོས་ཚུལ་ལྟར་བྲིས་པ་དོན་གཉིས་ཡོངས་འདུའི་འཁྲི་ཤིང་། ཚོགས་གཉིས་འབྲས་བཟང་ཡོངས་སུ་དུད་པ་ལས། །བླ་མེད་སྐུ་བཞིའི་སྡོང་བུ་རབ་རྒྱས་པ། །ཐུབ་དབང་དཔག་བསམ་ཡོངས་འདུའི་ལྗོན་པ་ཡིས། །འདོད་པའི་རེ་སྐོང་དོན་གཉིས་ལྷུན་འགྲུབ་ཤོག །ཤིང་རྟ་ལོ་རྒྱུད་སྟོད་གྲྭ་ཚང་ནས་དབུ་མཛད་སོགས་གྲྭ་པ་བརྒྱད་ཅུས་དཔལ་ལྡན་འབྲས་སྤུངས་ཀྱི་སྔགས་ཁང་དུ་མགོན་པོ་ཕྱག་དྲུག་པ་དང་ལས་གཤིན་གཉིས་ཀྱི་བསྐང་གསོ་ཁྲི་ཚར་རེ་བསགས་པའི་དུས་ནག་པོ་སྐོར་གསུམ་ལ་ཕུལ་བའི་སྙན་དར་ཁ་ཡིག་ཞྭ་སེར་ཆོས་སྲིད་རྒྱས་པའི་རུ་མཚོན། དཔལ་རྡོ་རྗེ་འཇིགས་བྱེད་ལྡན་ཁྱབ་བདག་ཟུང་འཇུག་བདེ་བ་ཆེ། །གདུག་པ་གདུལ་ཕྱིར་བཅོམ་ལྡན་མ་ཧེའི་ཞལ། །དུས་དགྲའི་དབང་པོ་རྡོ་རྗེ་འཇིགས་བྱེད་ཀྱིས། །བར་གཅོད་བདུད་དཔུང་ཆོམས་ལ་དངོས་གྲུབ་སྩོལ། །རྨད་བྱུང་མཐུ་སྟོབས་རྡོ་རྗེའི་ཐོག་མདའ་ཡིས། །བགེགས་རིགས་བྲག་གི་རི་བོ་ཐལ་བར་རློགས། །དཀར་ཕྱོགས་རྣམ་པར་རྒྱལ་པའི་རུ་མཚོན་ཆེ། །སྲིད་རྩེར་སྒྲོངས་ཤིག་འཇམ་དབྱངས་གཤིན་རྗེ་གཤེད། །རྒྱལ་བ་ཀུན་དངོས་རྗེ་བཙུན་བཙོང་ཁ་པའི། །བསྟན་པ་རིན་ཆེན་སྲིད་མཐར་རབ་རྒྱས་ཤིང་། །དེ་འཛིན་ས་སྤྱོད་སྐུ་ཚེ་ཆབ་སྲིད་རྒྱས། །བདག་སོགས་བསམ་པའི་དོན་ཀུན་ལྷུན་གྲུབ་མཛོད། །ཕྱག་དྲུག་པ་གསུང་གི་དབང་ཕྱུག་འཕགས་མཆོག་སྙིང་རྗེའི་ལྷ། །དྲན་པས་སྲིད་ཞིའི་གདུང་སེལ་སྤྱན་རས་གཟིགས། །གདུག་པ་གདུལ་ཕྱིར་ཁྲོ་བོའི་སྐུར་སྟན་པ། །དཔལ་ལྡན་མྱུར་མཛད་ཡེ་ཤེས་མགོན་པོ་ལ། །བཀྲ་ཤིས་རི་མོ་ཐགས་སུ་ལེགས་འཁྱིལ་དར། །(༤༡བ)
ཡིད་འོངས་འཇམ་མཉེན་འཆི་བ་མེད་པའི་རྫས། །ཀུན་བཟང་མཆོད་སྤྲིན་ཕུང་པོར་ལེགས་སྤྲུལ་ནས། །རབ་དཀར་ལྷག་བསམ་དག་པས་ཉེར་ཕུལ་དགེས། །བསྟན་འགྲོའི་བདེ་སྐྱིད་འདབ་བརྒྱ་ཁོང་ནས་འཛུམ། །བདག་གི་འདོད་དོན་འགྲུབ་པའི་སྣང་བྱེད་གཟི། །ཉི་འོད་འབུམ་ལྟར་འབར་བའི་འོད་སྟོང་གིས། །མི་མཐུན་མུན་སྟུག་ཚོགས་ཀུན་ཞི་བར་མཛོད། །ལས་གཤིན་མིག་སྨན་ལྷུན་པོ་བསྐལ་པའི་མེ་དཔུང་གིས། །རབ་འཁྱུད་སྲིན་པོའི་གཟུགས་ཅན་མ་ཧེའི་གདོང་། །མཐོང་བས་དགྲ་བགེགས་སྙིང་རྩ་འདར་ནུས་པ། །ཕྱོགས་ལས་རྣམ་རྒྱལ་བསྟན་སྲུང་རྒྱ་མཚོའི་གཙོ། །གང་གི་མཐུ་སྟོབས་འཕྲོག་བྱེད་སྡེར་མོ་ཡིས། །བསྟན་འགྲོར་འཚེ་བའི་འགྲོ་སྐྱོབས་གསེར་ཅན་གྱི། །མི་བསྲུན་བསམ་སྦྱོར་ལྟོ་བ་ཡོངས་ཕྲལ་ནས། །ཕན་བདེའི་དགའ་སྟོན་རྒྱས་པའི་ཆོ་ག་མཛོད། །ཁྱད་པར་བདག་གི་བསམ་དོན་ཡིད་བཞིན་ནོར། །འཕྲིན་ལས་རྣམ་བཞིའི་རྒྱལ་མཚན་རྩེར་བཀོད་ནས། །འདོད་པའི་རེ་སྐོང་དཔག་བསམ་ཡོངས་འདུའི་དབང་། །ལྷུན་གྲུབ་ཀུན་ཏུ་དགའ་བའི་དཔལ་སྩོལ་ཅིག །ཤིང་རྟ་གནས་ཆུང་ལྕོག་ཏུ་གསོལ་མཆོད་བརྒྱ་ཚར་བཙུགས་སྐབས་ཕུལ་བའི་སྙན་དར་ཁ་ཡིག་གདེང་ཅན་གཙུགས་ན་མཛེས་པའི་རིན་ཆེན། གང་ཞིག་བསྟེན་པས་འདོད་པའི་རེ་བ་ཀུན། །འབད་མེད་སྩོལ་ལ་ཡིད་བཞིན་དབང་གི་ནོར། །བསྟན་སྲུང་སྤྲུལ་པའི་ཆོས་རྒྱལ་ཆེན་པོ་ལ། །དངོས་བཤམས་ཏིང་འཛིན་ལས་བྱུང་མཆོད་ཚོགས་ཀྱིས། །དགྱེས་པ་སྐྱེད་ཀྱི་རིག་འཛིན་(༤༢ན)
བདག་ཅག་གི །ཞི་རྒྱས་དབང་དང་དྲག་པོའི་འཕྲིན་ལས་ཀུན། །བསམ་པ་ཇི་བཞིན་ལྷུན་གྱིས་འགྲུབ་པ་ལ། །ཀླུ་དབང་གཙུག་གི་རིན་ཆེན་ལྟ་བུར་མཛོད། །ཤིང་རྟ་སྲུང་མ་རང་བཞིན་གྱི་བཞུགས་གནས་རྒྱལ་ལྷུན་གྲུབ་དགའ་བའི་ཚལ་དུ་དཔལ་ལྡན་འདོད་ཁམས་དབང་ཕྱུག་མའི་བསྐང་བ་ཁྲི་ཚར་གཉིས་བཙུགས་སྐབས་ཕུལ་བའི་སྙན་དར་ཞལ་ཡིག་ཕུན་ཚོགས་སྒོ་བརྒྱ་རབ་ཕྱེ། དུང་དུང་འབྲལ་བ་མེད་པར་རྟག་བཞུགས་ནས། །འཇིགས་འཇིགས་ནག་པོའི་དཔུང་ཚོགས་ཕ་མཐར་སྐྲོད། །ཡང་ཡང་མཆོག་མཐུན་དངོས་གྲུབ་ཆར་ལྟར་འབེབས། །ལྷུབ་ལྷུབ་བསམ་པའི་རེ་སྐོང་ལྷག་པའི་ལྷ། །ལྷ་མཆོག་དཔལ་ལྡན་འདོད་པ་ཁམས་ཀྱི་བདག །བདག་སོགས་བསྟེན་ཅིང་རབ་བསྒྲུབས་སྲུང་མའི་མཆོག །མཆོག་དང་ཐུན་མོང་དངོས་གྲུབ་མ་ལུས་ཀུན། །ཀུན་ནས་སྩོལ་མཛད་བྱེད་པོ་རི་མ་ཏིས། །རྒྱལ་བ་ཀུན་དངོས་ཀུན་མཁྱེན་བཙོང་ཁ་པའི། །བཤད་སྒྲུབ་བསྟན་དང་བསྟན་འཛིན་དགེ་འདུན་སྡེ། །འགྲོ་བའི་བདེ་སྐྱིད་བདེ་ལེགས་ཕུན་སུམ་ཚོགས། །བདག་གི་དོན་གཉིས་དོན་རྣམས་འགྲུབ་པར་མཛོད། །ཤིང་རྟ་ཕོ་བྲང་གོང་རི་དཀར་པོར་གོང་དཀར་རྡོ་རྗེ་གདན་གྲྭ་པ་སུམ་ཅུ་སྐོར་གྱིས་ཕུར་མགོན་ལས་མཁན་དང་བཅས་པའི་བསྐང་གསོ་སྟོང་རྩ་བསགས་དུས་ཕུལ་བའི་སྙན་དར་ཞལ་ཡིག་ཟུང་འཇུག་དག་པའི་ལྷ་ཞལ། ཕྱི་གུར་མགོན་རོལ་དྲེགས་པའི་སྡེ་དཔོན་སྲིན་པོའི་གཟུགས། །རྡོ་རྗེའི་ལུས་ལ་གནས་པ་ནང་གི་མགོན། །གསལ་སྟོང་ཟུང་འཇུག་རང་སེམས་གསང་བའི་ལྷ། །ཁྲག་འཐུང་གུར་གྱི་མགོན་པོ་ལྕམ་དྲལ་གྱིས། །རྒྱལ་བའི་བསྟན་དང་ལུས་ཅན་བདེ་སྐྱིད་(༤༣ན)
སྤེལ། །རིག་འཛིན་བདག་ལ་ཉེར་འཚེའི་དགྲ་བགེགས་ཐུལ། །ཞི་རྒྱས་དབང་གི་འཕྲིན་ལས་མ་ལུས་པ། །འབད་མེད་ལྷུན་གྱིས་འགྲུབ་པའི་འཕྲིན་ལས་མཛོད། །ལས་པུ་ཏྲ་རྣམས་ཀུན་སྒྲུབ་མོན་པ་ཕོ་མོའི་ཚོགས། །རྩ་བརྒྱུད་བླ་མའི་དམ་ཚིག་རབ་དགོངས་ནས། །འཕྲིན་ལས་ཐོགས་པ་མེད་པར་སྒྲུབ་པ་དང་། །མི་ཟད་མཐུ་སྟོབས་ནུས་པའི་དཔུང་ཚོགས་བསྐྱེད། །ཤིང་རྟ་གོང་དཀར་དུ་དཀོན་གཉེར་དཔོན་དགེ་སྟེང་པས་གཙོས་པའི་དགེ་གཉེར་ནང་བ་རྣམས་ཀྱིས་མགོན་པོ་ཞལ་གྱི་བསྐང་བ་སྟོང་རྩ་བསགས་དུས་ཕུལ་བའི་སྙན་དར་ཁ་ཡིག་བམ་རོ་ཆེམ་ཆེམ་ཟ་བའི་བཞད་སྒྲ། རྩ་ཞལ་མི་རོ་ཆེམ་ཆེམ་ཟོས་པས་ཀྱང་། །མ་ཚིམ་བམ་རོའི་སྟེང་དུ་བྲོ་རྡུང་བའི། །སྟོབས་འཕྲོག་དབང་པོ་ལྷ་ཆེན་གདོང་བཞི་པས། །བཅོལ་བའི་འཕྲིན་ལས་མ་ལུས་གྲུབ་པར་མཛོད། །ཤིང་རྟ་ར་ས་འཕྲུལ་སྣང་དུ་གསེར་ཆབ་མཆོད་པ་འཕར་མ་ཕུལ་སྐབས་ཇོ་བོ་ཤཱཀྱ་མུ་ནིའི་སྙན་ཤལ་ཁ་ཡིག་ངེས་ལེགས་རིན་ཆེན་ཐེམ་སྐས། མཐོང་བས་ཕན་བདེར་སྦྱོར་བ་མཚན་དཔེའི་སྐུ། །ཐོས་པས་སྲིད་ཞིའི་གདུང་སེལ་ཚངས་པའི་གསུང་། །དྲན་པས་ཐར་པར་འདྲེན་ནུས་ཀུན་མཁྱེན་ཐུགས། །གསང་གསུམ་སྒྱུ་འཕྲུལ་དྲ་བ་བསྡོམས་པའི་དངོས། །ཉི་མའི་བརྒྱུད་འཁྲུངས་བདུད་རྩིའི་ཟ་མ་ཏོག །ལས་ཉོན་ནད་ཀུན་མ་ལུས་དྲུངས་ཕྱུང་ནས། །བླ་མེད་ཡེ་ཤེས་རིན་ཆེན་ཐེམ་སྐས་ལ། །འགྲོ་རྣམས་འདྲེན་པའི་དགའ་སྟོན་སྩོལ་བར་ཤོག །ཤིང་རྟ་མཆོད་དཔོན་བློ་བཟང་མཐུ་སྟོབས་དང་། དབུ་མཛད་བློ་བཟང་ཡོན་ཏན་གཉིས་ཀྱིས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་འདུ་ཁང་གི་གནམ་རྒྱན་ཡོངས་རྫོགས་(༤༣བ)
བཟོས་པའི་ཁ་ཡིག་ལེགས་བྱས་འཁྱིལ་བའི་ཆུ་གཏེར། རྣམ་པར་རྒྱལ་བ་ཕུན་ཚོགས་ཕན་བདེའི་གཞི། །ངེས་གསང་ཐེག་མཆོག་ལེགས་བཤད་མཚོར་འཁྱིལ་བ། །རིག་སྔགས་འཆང་བའི་གླིང་གི་ཀུན་ར་རུ་། །གོས་བཟང་ལས་གྲུབ་གནམ་རྒྱན་བཞི་ཕུལ་དགེས། །བསྟན་དང་བསྟན་འཛིན་དགེ་འདུན་སྡེ་རྣམས་རྒྱས། །བདག་སོགས་ནད་གདོན་བར་ཆད་ཀུན་ཞི་ཞིང་། །བླ་མེད་རྣམ་མཁྱེན་ཡེ་ཤེས་མཆོག་ཐོབ་ནས། །རང་གཞན་དོན་གཉིས་མ་ལུས་འགྲུབ་གྱུར་ཅིག །ཁྱད་པར་རྡོ་རྗེའི་སློབ་དཔོན་ཞབས་བརྟན་ཅིང་། །གསང་སྔགས་ཐེག་པ་ཆེན་པོའི་འདུས་སྡེ་འདི། །ཉི་ཟླ་ཇི་སྲིད་གནས་པ་དེ་སྲིད་དུ། །ཡར་ངོའི་ཟླ་ལྟར་འཕེལ་ཞིང་རྒྱས་གྱུར་ཅིག །ཤིང་ལུག་གནམ་ལོ་གསར་ཚེས་ཀྱིས་དུས་དཔལ་ལྡན་རེ་མ་ཏི་མཆོད་པའི་དར་ཚོན་སྣ་ལྔའི་སྙན་དར་ཁ་ཡིག་ཀུན་ཏུ་དགའ་བའི་ཟློས་གར། ལྗང་ཁུ། ཤྲཱི མ དྡེ ཝཱི ཀ མ དྷཱ ཏོ རཱི ཤྭ རེ ཎ མ མ ས རྦྦ དྷྱཱ ཡཱ རྠ ནི རཱ བྷོ གཾ ཀུ རྦ ནྟུ ། ཤེལ་དཀར་གསེར་ཞུན་པད་རག་བཻཌཱུརྱའི། །མདངས་འཛིན་སྣ་ཚོགས་ལས་གྲུབ་ལྷག་པའི་ལྷ། །སྲིད་གསུམ་བདག་མོ་འདོད་ཁམས་དབང་ཕྱུག་མས། །དུས་ཀུན་དགེ་བའི་དངོས་གྲུབ་ཆར་དུ་ཕོབ། །བཀྲ་ཤིས་འབྱུང་བ་ལྔ་ལྡན་ཤིང་མོ་ལུག །རྨད་བྱུང་གནམ་ལོ་གསར་དུ་ལེགས་ཚེས་པ། །ཀུན་ཏུ་དགའ་བའི་དུས་སྟོན་འདི་ཉིད་ནས། །ཡོངས་བཟུང་བསམ་དོན་མ་ལུས་ལྷུན་གྲུབ་མཛོད། །བསྟན་འགྲོའི་ལེགས་ཚོགས་ཀུན་ནས་རབ་འཕེལ་ཞིང་། ཁྱབ་བདག་འཁོར་ལོའི་མགོན་རྣམས་ཞབས་པད་བརྟན། །བསིལ་ལྡན་(༤༤ན)
ལྗོངས་འདིར་ནད་རིམས་འཁྲུག་རྩོད་ཞི། །བདག་གི་ཆོས་མཐུན་འཕྲིན་ལས་གྲུབ་པར་མཛོད། །དཀར་པོ། མ མ ས རྦ རོ ག གྲ ཧ ཤི ནྟཾ ཀུ རྦ ནྟུ ། །བྱིན་རླབས་བུམ་བཟང་ལས་འོངས་བདུད་རྩིའི་རྒྱུན། །ནམ་ཡང་ཆད་པ་མེད་པས་བདག་སོགས་ཀྱི། །ནད་གདོན་བར་ཆད་དྲི་མ་ཀུན་བཀྲུས་ཏེ། །བདེ་སྐྱིད་དཔལ་ལ་སྤྱོད་པའི་འཕྲིན་ལས་མཛོད། །སེར་པོ། མ མ ས རྦ ཡུ རྦུ ཎྱ པུ ཤྚིཾ ཀུ རྦ ནྟུ ། ཚེ་དཔལ་ཉི་མ་སྟོང་དུ་འབར་པའི་གཟིས། །རྒྱས་པའི་ལས་ཀུན་ལྷུན་གྲུབ་འོད་སྣང་གིས། །ཆོས་སྲིད་འདོད་པའི་དོན་རྣམས་དབྱར་མཚོ་ལྟར། །འཕེལ་བར་མཛོད་ཅིག་སྲིད་པ་གསུམ་གྱི་བདག །དམར་པོ། དྷ རྨ བྷ ཝ ས རྦ ཤྲཻ ཡ ཝ ཤཾ ཀུ རྦ ནྟུ ། །ཐུགས་རྗེའི་འོད་ཟེར་རྣོན་པོའི་ལྕགས་ཀྱུ་ཡིས། །ཐོས་བསམ་སྒོམ་དང་སྲིད་ཀྱི་འབྱོར་པ་ཀུན། །ཁབ་ལེན་རྡོ་དང་ལྕགས་ཀྱི་སྣང་ཚུལ་ལྟར། །ཐོགས་པ་མེད་པར་དབང་དུ་བསྡུ་བར་མཛོད། །སྔོན་པོ། མ མ ས རྦ རོ ག གྲ ཧ ཤ ཏྲཱུཾ བི གྷྣ ནྷ ཏཀཾ ཀུ རྦ ནྟུ། །དགྲ་བགེགས་ལ་ཁྲོས་ཁ་གདངས་མཆེ་གཙིགས་མ། །མཐུ་སྟོབས་སྐྱེད་ལ་རྣོན་པོའི་མཚོན་ཆ་ཡིས། །གནོད་བྱེད་ཚོགས་ཀྱི་སྲོག་རྩ་དམར་པོ་ཆོད། །སྙིང་ཁྲག་འཐུང་ལ་དྲག་པོའི་ལས་ཀུན་སྒྲུབས། །ཤིང་ལུག་ཆོ་འཕྲུལ་མཆོད་པའི་དུས་ཇོ་བོ་རིན་པོ་ཆེ། རང་བྱོན་ལྔ་ལྡན། བྱམས་པ་ཆོས་འཁོར། རྒྱལ་བ་བཙོང་ཁ་པ་རྣམས་ལ་ཁ་བཏགས་དང་། དུང་སྐྱོང་རྒྱལ་མོར་དར་ཚོན་སྣ་ལྔ་ཕུལ་བའི་སྙན་དར་ཁ་ཡིག་འགྲོ་ཀུན་ངལ་གསོའི་སྟེགས་བུ། སྐུ་ཇོ་བོ་རིན་པོ་ཆེ་གསུམ་མི་ཟད་དཔལ་གྱི་བེའུ་ཡི། །ངོ་མཚར་རི་མོ་སྙིང་ཁར་(༤༤བ)
ལེགས་བཀྲ་བ། །སྔོན་མེད་འཇུག་པ་བཅུ་པ་ཟས་གཙང་སྲས། །མ་འདྲིས་འགྲོ་བ་ཀུན་གྱི་གཉེན་གཅིག་པུ། །ཀུན་ལ་བྱམས་བརྩེས་མངོན་པར་གཟིགས་པའི་སྤྱན། །འཁོར་བའི་ཕ་མཐའ་རྫོགས་མིན་ཉེར་རྩའི་དཀྱུས། །མ་དག་བརྒྱུད་ལྔའི་འགྲོ་བ་ཟད་མིན་བར། །ཆོས་རྣམས་གསལ་བའི་མེ་ལོང་འདི་ཀོ་དངས། །མ་སྨད་ཐུགས་རྗེའི་ལྷོ་ཕྱོགས་དྲི་བཞོན་གྱིས། །སྲིད་པའི་ཚ་གདུང་རབ་འཇོམས་ཆོ་ག་མཁན། །ཕན་དང་བདེ་བའི་རེག་བྱ་ཡོངས་བསིལ་བ། །ལུས་ཅན་ཀུན་གྱི་ངལ་གསོའི་སྟེགས་སུ་མཚར། །གསེར་མངལ་ཅན་གྱིས་གདོང་བཞི་ལེགས་སྤྲུལ་ནས། །བསྐལ་པར་བརྗོད་ཀྱང་རྫོགས་མིན་ཡོན་ཏན་གྱི། །ཕུང་པོ་ལྕིད་ཀྱིས་གསེར་ལྡན་རྔུལ་བྱེད་པ། །གང་དེས་འགྲོ་རྣམས་རྟག་ཏུ་དགེ་བར་མཛོད། །ཐུགས་རྗེ་ཆེན་པོ་ཁྲོ་ཆགས་ཞི་བའི་ཉམས་ཅན་སྙིང་རྗེའི་ལྷ། །འཛུམ་ལྡན་ཞལ་ལས་འོངས་པའི་བདུད་རྩིའི་རྒྱུན། །ཕན་བདེའི་འཆི་མེད་རོ་བརྒྱའི་དཔལ་སྩོལ་བའི། །དགའ་སྟོན་མཆོག་དེས་རིང་དུ་སྐྱོང་བར་མཛོད། །རབ་དཀར་མཆེ་བ་གཙིགས་པའི་སྤྲིན་གསེབ་ནས། །མཐུ་སྟོབས་མི་ཟད་རྡོ་རྗེའི་ཐོག་མདའ་ཡིས། །ནག་ཕྱོགས་བར་གཅོད་རྩོམ་པ་བདུད་སྡེའི་དཔུང་། །ཐལ་བའི་རྡུལ་ཕྲན་བཞིན་དུ་རླག་པར་མཛོད། །བྱམས་པ་རྗེས་བརྩེའི་མདངས་འོད་མཚམས་སྤྲིན་མཆུ་སྒྲོས་ཀྱི། །འཛུམ་ཞལ་སྟེགས་ཀྱི་སྒོ་ལས་ཉེར་འཕགས་པ། །མི་བརྟན་འཕེལ་དང་འགྲིབ་འགྱུར་སྐྱོན་བྲལ་བར། །ཞལ་བཞེས་དམ་བཅའི་ཉི་འོད་གསལ་བར་མཛོད། །རྗེ་བླ་མ་བློ་ཆེན་ཚངས་(༤༥ན)
དབང་བདེ་འབྱུང་ཁྱབ་འཇུག་སོགས། །ཀུན་གྱི་གཙུག་ན་ཞབས་སེན་ངལ་གསོ་བ། །བསྐལ་བཟང་འགྲོ་ཀུན་གཉེན་གྱུར་གྲགས་པའི་དཔལ། །འཇམ་མགོན་བཙོང་ཁ་པ་ཡིས་དགེ་ལེགས་སྩོལ། །དཔལ་ལྷ་མོར་དར་དཀར་པོ་ཆོས་བཞིན་སྒྲུབ་ལ་བར་དུ་གཅོད་པའི་བགེགས། །ནད་གདོན་དགྲ་དཔུང་མུན་པའི་སྨག་རུམ་རྣམས། །དུང་སྐྱོང་རྒྱལ་མོའི་ཐུགས་རྗེའི་ཉི་འོད་ཀྱིས། །མངོན་པར་རབ་ཞི་ཕན་བདེའི་སྣང་བ་སྩོལ། །སེར་པོ་དཔག་བསམ་ལྗོན་པའི་ལང་ཚོ་རྒྱས་པའི་འབྲས། །ཚེ་དཔལ་བསོད་ནམས་ཁུར་གྱིས་ཉེར་དུད་པས། །ཕུན་ཚོགས་འདོད་དོན་རེ་སྐོང་ཡིད་བཞིན་ནོར། །རྒྱས་པའི་འཕྲིན་ལས་ལྷུན་གྱིས་འགྲུབ་པར་མཛོད། །དམར་པོ་སྲིད་དང་ཞི་བའི་དགེ་ལེགས་མ་ལུས་པ། །འབད་མེད་ལག་རྩེར་སྩོལ་བ་དབང་གི་རྒྱལ། །ཁམས་གསུམ་བརྟན་པ་རབ་འཕྲོག་ཀུན་དགའི་དཔྱིད། །ལྷག་པའི་ལྷ་ཀྱེ་འགུགས་པའི་འཕྲིན་ལས་མཛོད། །ནག་པོ་མི་བསྲུན་ལོག་པར་འཁུ་བའི་མཐུ་བྱེད་དང་། །སྡེ་བརྒྱད་འབྱུང་པོའི་གདོན་དང་བགེགས་ལ་སོགས། །བར་དུ་གཅོད་བྱེད་གཟུགས་ཅན་གཟུགས་མེད་ཀུན། །ཐལ་བའི་རྡུལ་ཕྲན་བཞིན་དུ་རླག་པར་མཛོད། །ལྗང་ཁུ་ཐུབ་པའི་བསྟན་པ་སྲིད་མཐའི་བར་དུ་རྒྱས། །ཁྱབ་བདག་བླ་མ་དམ་པའི་ཞབས་པད་བརྟན། །འགྲོ་བ་སྤྱི་དང་ཁྱད་པར་གངས་ཅན་གྱི། །ལུས་ཅན་མ་ལུས་ཕན་བདེར་སྦྱོར་བ་མཛོད། །ཤིང་ལུག་སྨོན་ལམ་གཏོར་རྒྱག་དུས་ཆོས་རྒྱལ་ཆེན་པོ་ཁོག་ཞུགས་ལ་འཕྲིན་ལས་བཅོལ་པའི་(༤༥བ)
སྙན་དར་ཁ་ཡིག་བསོད་ནམས་ཟླ་བ་ཡར་ཚེས། ཁྲོ་ཆགས་ཞི་དང་རྒྱས་པའི་རྣམ་འགྱུར་ཅན། །ཞི་རྒྱས་དབང་དྲག་ལས་ལ་ཐོགས་མེད་པ། །བསྟན་སྲུང་སྤྲུལ་པའི་ཆོས་རྒྱལ་ཆེན་པོ་ཡིས། །རིག་འཛིན་བདག་གིས་བཅོལ་པའི་ལས་ཀུན་སྒྲུབས། །གནོད་བྱེད་དགྲ་དང་བགེགས་རྣམས་ཐལ་བར་རློགས། །ཆོས་བཞིན་སྒྲུབ་པའི་མཐུན་རྐྱེན་ཚང་བ་དང་། །བསྟན་དང་བསྟན་འཛིན་སྐྱེ་རྒུའི་བདེ་སྐྱེད་འཕེལ། །ལེགས་ཚོགས་ཡོན་ཏན་མ་ལུས་ལྷུན་གྲུབ་མཛོད། །གངས་ཅན་ལྗོང་འདིར་མི་ནད་ཕྱུག་ནད་དང་། །འཐབ་རྩོད་མི་མཐུན་ཉེས་ཚོགས་ཀུན་ཞི་ཞིང་། །བསོད་ནམས་རབ་ཏུ་བརྟན་པའི་མི་ཡི་རྗེ། །ཚེ་དཔལ་མངའ་ཐང་མ་ལུས་རྒྱས་པར་མཛོད། །ཤིང་ལུག་ནག་པ་ཟླ་བའི་བརྒྱད་གཏོར་གྱི་དུས་གུར་ཞལ་ལས་མཁན་དང་བཅས་པར་ཕུལ་བའི་སྙན་དར་ཞལ་ཡིག་བཀའ་རྟགས་རྡོ་རྗེས་མཚན་པའི་ཅོད་པན། མིག་སྨན་དང་མཚུངས་ཆར་སྤྲིན་ལྟར་གནག་ཞལ། །དམར་ཟླུམ་སྤྱན་གྱིས་གློག་འཁྱུག་ལེགས་ཉེས་གཟིགས། །དགྲ་བགེགས་སྲོག་ལ་རྔམ་པའི་ཁ་གདངས་པ། །སྲིན་པོའི་གཟུགས་ཅན་དཔལ་ལྡན་ནག་པོ་ཆེ། །བསྟན་སྲུང་རྒྱ་མཚོའི་དབང་ཕྱུག་རྡོ་རྗེ་གུར། །གནས་སྲུང་མཁའ་འགྲོའི་གཙོ་མོ་དུད་སོལ་མ། །མཐུ་ཆེན་སྟོབས་འཕྲོག་ནག་པོ་གདོང་བཞི་པ། །བརྩེ་གདུང་བྱམས་ལྡན་ཡུམ་ཆེན་མཁའ་འགྲོ་བཞི། །སྲོག་གཅོད་གནོད་སྦྱིན་པུ་ཏྲ་མིང་སྲིང་དང་། །གནོད་སྦྱིན་བཤན་པ་བེག་རྩེ་ལྕམ་དྲལ་སོགས། །མཐུ་སྟོབས་རྫུ་འཕྲུལ་དཔག་པར་དཀའ་པ་ཡི། །བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས། །(༤༦ན)
རྡོ་རྗེ་འཆང་དབང་མཆོག་སྲེད་ཀླུ་སྒྲུབ་ཞབས། །མལ་ལོ་གཉན་དང་བླ་ཆེན་ས་སྐྱ་བ། །མཚར་ཆེན་ཆོས་ཀྱི་རྒྱལ་པོ་ནས་བཟུང་སྟེ། །རྩ་བའི་བླ་མའི་བར་གྱི་དམ་ཚིག་རྣམས། །དྲན་པར་མཛོད་ལ་རིགས་འཛིན་བདག་ཅག་གིས། །བཅོལ་བའི་ཞི་རྒྱས་དབང་དང་དྲག་པོའི་ལས། །མ་ལུས་ཐོགས་པ་མེད་པར་ལྷུན་གྲུབ་པའི། །ཕུན་ཚོགས་དགེ་མཚན་ཕྱོགས་བཅུར་རྒྱས་པར་མཛོད། །མེ་སྤྲེལ་ལོ་གསར་གྱི་ཚེ་སྲིད་གསུམ་དབང་མོ་མཆོད་པའི་དུས་ཕུལ་བའི་དར་ཚོན་སྣ་ལྔའི་སྙན་དར་ཞལ་ཡིག་འཛད་མེད་གཏེར་གྱི་བུམ་བཟང་། དཀར་པོ་ཀཻ་ལ་ཤ་ཡི་རི་བོ་ཟླ་གཞོན་གྱིས། །ལན་བརྒྱར་འཁྱུད་འདྲའི་དཀར་འཇམ་མཛེས་སྡུག་ཅན། །རྒྱལ་བ་ཀུན་ཡུམ་དཔལ་གྱི་ལྷ་མོ་ཁྱོད། །བདག་སྙིང་པདྨའི་ཟེའུ་འབྲུར་རྟག་བཞུགས་ནས། །སྲུང་བའི་རྭ་བར་བཅུག་དང་བཅས་པ་ལ། །སྔོན་ལས་འཕྲལ་རྐྱེན་ནད་གདོན་བར་ཆད་ཀུན། །རབ་ཏུ་ཞི་བའི་འཕྲིན་ལས་ལེགས་སྒྲུབ་པར། །མཁྱེན་བརྩེ་ནུས་པའི་མཐུ་དཔུང་སྐྱེད་དུ་གསོལ། །སེར་པོ་གསེར་བཞུན་བརྩེགས་པའི་ལྷུན་པོ་ལྟར་བརྗིད་ཅིང་། །ཉི་མ་འབུམ་གྱི་གཟི་འོད་མདངས་ལ་འཁུ། །དབང་ཕྱུག་ཡོན་ཏན་བརྒྱད་ལ་མངའ་འབྱོར་བ། །རྡོ་རྗེ་དབྱིངས་ཕྱུག་དཔལ་ལྡན་ལྷག་པའི་ལྷས། །རིག་འཛིན་བདག་དང་སྲུང་བར་བཅུག་རྣམས་ཀྱི། །ཚེ་དཔལ་སྟོབས་འབྱོར་མངའ་ཐང་ལོངས་སྤྱོད་སོགས། །ཆོས་དང་སྲིད་ཀྱི་ལེགས་ཚོགས་ཡོན་ཏན་རྣམས། །མ་ལུས་འཕེལ་ཞིང་རྒྱས་པའི་འཕྲིན་ལས་མཛོད། །བསམས་པ་ཙམ་གྱིས་འདོད་(༤༦བ)
པའི་རེ་བ་ཀུན། །ལེགས་སྐོང་ཡིད་བཞིན་ནོར་དང་རབ་མཚུངས་པའི། །ལྷ་ཁྱོད་རྟག་ཏུ་བདག་གི་གྲོགས་མཛད་དེ། །གང་བསམས་དངོས་གྲུབ་མ་ལུས་སྩལ་དུ་གསོལ། །དམར་པོ་ཁྲོ་ཆགས་དབང་གི་ཉམས་ལྡན་སྲིད་གསུམ་ལ། །དབང་སྒྱུར་འདོད་ཁམས་བདག་མོ་ཁྱོད་ཉིད་ཀྱི། །རྨད་བྱུང་ཐུགས་རྗེའི་བཛྲ་ཨཾ་ཀུ་ཤས། །ཡིད་ལ་བསམས་པའི་སྡེ་བཞིའི་ལེགས་ཚོགས་ཀུན། །ཨིནྡྲ་ནཱི་ལ་ལྟར་སྔོའི་རྫིང་བུ་ལ། །གཉིས་སྐྱེས་ལུས་དཀར་དབང་མེད་འདུ་བ་དང་། །པདྨའི་དྲི་ཡིས་བུང་བ་སྡུད་པ་ལྟར། །རིག་འཛིན་བདག་གི་དབང་དུ་འགྱུར་པར་མཛོད། །སྔོན་པོ་ཤུགས་དྲག་དུས་མཐའི་དྲི་བཞོན་ལྟར་འཚུབ་ནང་། །བསྐལ་པའི་མེ་དཔུང་རབ་འབར་ཀློང་དཀྱིལ་དབུས། །སྲིད་གསུམ་ཟ་བྱེད་རྔམ་པ་སྲིན་མོའི་གཟུགས། །དམག་ཟོར་ལྷ་མོ་རེ་མ་ཏི་ཁྱོད་ལ། །བསྟན་འགྲོའི་ཕན་བདེ་འཇོམས་པ་སྤྱི་ཡི་དགྲ །བསྒྲལ་བའི་ཞིང་གྱུར་གཟུགས་ཅན་གཟུགས་མེད་རྣམས། །གཏོད་ན་བླ་སྲོག་ཚེ་ལ་ཧབ་ཟས་གྱིས། །ལས་ཀྱིས་ཤི་དང་ནམ་མཁར་ཚད་མ་འཛུགས། །ལོ་ཟླར་མ་འགྱང་མི་རབས་རྩད་ནས་ཆོད། །ཤུལ་ཙམ་མ་འཇོག་རྗེས་མེད་རླུང་ལ་སྐུར། །དྲག་པོའི་ལས་སྦྱོར་མྱུར་དུ་འགྲུབ་པར་མཛོད། །ལྗང་ཁུ་ཞི་རྒྱས་དབང་དྲག་འཕྲིན་ལས་རྣམ་པ་བཞི། །བསམ་པ་ཇི་བཞིན་ལྷུན་གྱིས་གྲུབ་པ་ལ། །འདོད་འཇོའི་བ་དང་གཏེར་བུམ་དཔག་བསམ་ཤིང་། །དབང་གི་རྒྱལ་པོ་ལྟ་བུར་མཛད་དུ་གསོལ། །(༤༧ན)
ཤིང་ལུག་ཧོར་ཟླ་བཅུ་གཉིས་པའི་ཚེ་བདག་གཤིན་རྗེ་རོལ་པའི་གཏོར་ཟློག་གི་སྤྲུལ་པའི་དུ་མོན་འབྲུག་པའི་བློན་པོ་གཡུལ་སར་བར་དམིགས་ཀྱི་བཀར་བ་དགོས་ཚུལ་བྱུང་བ་ལྟར་ཟོར་ཁ་བསྒྱུར་པས་མེ་སྤྲེལ་གྱི་དབྱར་སོས་གཡུལ་སར་པ་གློ་བུར་དུ་འཇིག་རྟེན་ཕ་རོལ་དུ་སོང་པའི་གནས་ཚུལ་བྱུང་པའི་ཚེ་གཏང་རག་ཕུལ་པའི་སྙན་དར་ཞལ་ཡིག་བཤན་པ་རྣམ་རོལ། བསྟན་འཛིན་འབྲུག་གྲགས་གཤིན་རྗེའི་དམག་ཚོགས་ཀྱིས། །སྲོག་བཅད་ཤ་ཁྲག་ཚོགས་སུ་ལེགས་རོལ་པའི། །འཕྲིན་ལས་ཐོགས་མེད་གྲུབ་པའི་གཏང་རག་ཏུ། །ཕྱི་ནང་ཉེར་སྤྱོད་སྨན་གཏོར་རཀྟ་འབུལ། །གསེར་འཕྱང་གི་ལོ་ཧོར་ཟླ་ལྔ་པའི་ཉེར་གཉིས་ཀྱི་ཉིན་སྲིད་གསུམ་བདག་མོ་མདོས་ཀྱི་མཆོད་པའི་འཕྲིན་ལས་བཙུགས་སྐབས་སྙན་དར་ཞལ་ཡིག་དགྱེས་ཞལ་སྟོན་ཟླ་རྒྱས་པའི་དཀྱིལ་འཁོར། མཆོག་ཏུ་དགྱེས་པ་སྐྱེད་པ་ཞལ་གྱི་སྒོ། །སྟོན་དུས་ཟླ་བའི་དཀྱིལ་འཁོར་རྒྱས་པ་ལྟར། །བདེ་ཆེན་ཆོས་དབྱིངས་མཁའ་ལས་ཉེར་བསྟན་ནས། །སྲིད་གསུམ་སྣང་བ་སྩོལ་ཅིག་རེ་མ་ཏི། །གསང་གསུམ་མི་ཤིགས་སྒྱུ་འཕྲུལ་རྡོ་རྗེའི་གར། །གཞོན་མེད་ནཱ་དའི་དབྱར་རྔ་ཐོས་པའི་མོད། །སེམས་ཀྱི་རྨ་བྱ་དད་དུངས་སྒྲོ་གཤོག་གདུགས། །དགའ་སྤྲོའི་གུར་ཁྱིམ་མདངས་བཀྲག་འོད་དུ་འཚེར། །དཔལ་ལྡན་རྡོ་རྗེ་དབྱིངས་ཕྱུག་གསང་བའི་ཡུམ། །བདེ་ཆེན་འཁོར་ལོ་ཆེན་པོར་རྒྱས་འདེབས་མ། །ལས་ཀུན་བསྒྲུབ་ཕྱིར་དབང་ཕྱུག་ཉེར་བརྒྱད་གཙོ། །སྐབས་འགར་འདོད་ཁམས་བདག་མོའི་མཚན་གྱི་སྙན། །ལྷ་གཅིག་ཉེར་དགོངས་བརྣག་པའི་སེམས་འཆང་བ། །བགེགས་རིགས་ནུས་སྟོབས་སྲོག་དང་ལྷན་ཅིག་པར། །དམ་ཉམས་དགྲ་བོའི་སྙིང་ཁྲག་(༤༧བ)
དྲོན་མོའི་རྒྱུན། །ནལ་བུའི་ཐོད་པར་བླུགས་ནས་ཞལ་དུ་གསོལ། །དེ་ཚེ་གཟུགས་ཅན་གཟུགས་མེད་ནག་པོའི་དཔུང་། །སྡེ་དང་བཅས་པའི་གཡུལ་ལས་རྣམ་རྒྱལ་རྟགས། །བདན་དཀར་པོ་སྲིད་པའི་བརྩེར་བསྒྲེངས་ནས། །ལྷ་ཁྱོད་ཞལ་བཟང་མཐོན་པོའི་དབྱིངས་སུ་གཏོད། །སྲིད་དང་ཞི་བའི་ཕུན་ཚོགས་དངོས་པོ་ཀུན། །ཅིག་ཅར་བརྟན་པ་རབ་འཕྲོག་ཐུན་མཚམས་མདངས། །དབང་ཕྱུག་ཡོན་ཏན་གྲུབ་པའི་ལྕགས་ཀྱུ་དེས། །ནོར་འཛིན་བུ་མོའི་མངལ་ཁུར་ལྕི་བར་མཛོད། །བསོད་ནམས་ས་སྲུང་ན་ཚོད་དར་བབས་སྟེང་། །འཆི་མེད་ཚེ་ཡི་འདྲེན་བྱེད་སྟོང་ལྡན་པས། །བདེ་སྐྱིད་འབྱོར་པའི་དཔལ་ལ་བསྐལ་པ་རུ། །གཟིགས་མོར་མཚར་ཅིང་སྤྱོད་པའི་དངོས་གྲུབ་སྩོལ། །ཐུགས་རྗེའི་གསེར་རིའི་སྦུབས་ནས་མཐུ་སྟོབས་ཀྱི། །ཉི་མ་འབུམ་ཕྲག་འཆར་བའི་འོད་དཔུང་གིས། །ནད་གདོན་ཉེ་བར་འཚེ་བ་རྒུད་ཚོགས་མུན། །མིང་གི་ལྷག་མར་གཏང་ནས་ཉེར་ཞིར་མཛོད། །སངས་རྒྱས་ཀུན་གྱི་ཐུགས་རྗེའི་རྒྱ་མཚོ་ལས། །ལས་ཀུན་སྒྲུབ་ལ་ཐོགས་མེད་ཡོངས་འདུའི་ལྗོན། །ཐུབ་བསྟན་ཚལ་དུ་འཁྲུངས་པའི་ལྷ་ཁྱོད་ཀྱིས། །བསམ་པའི་རེ་སྐོང་དབང་གི་རྒྱལ་པོར་མཛོད། །ཟུར་ཆེན་ཁྱབ་བདག་ཆོས་དབྱིངས་རང་གྲོལ་པདྨ་འོད་ཀྱི་ཞིང་དུ་སྐུའི་བཀོད་པ་བསྡུས་པའི་ཚེ་སྐུ་གདུང་རིན་པོ་ཆེར་ཕུལ་པའི་སྙན་དར་ཞལ་ཡིག་རྡོར་སེམས་འཇའ་ལུས་རང་ཞལ། རིགས་ཀུན་ཁྱབ་བདག་རྗེ་བཙུན་བླ་མ་མཆོག །ཞིང་ཁམས་བྱེ་བ་ཕྲག་བརྒྱར་སྐུའི་བཀོད་པ། །སྣ་ཚོགས་བསྟན་ནས་མཁའ་མཉམ་འགྲོ་འདྲེན་པའི། །བཞེད་(༤༨ན)
པ་ཇི་བཞིན་ལྷུན་གྱིས་འགྲུབ་པ་དང་། །མགོན་ཁྱོད་སྙིང་དབུས་ཟེ་འབྲུར་རྡོ་རྗེ་སེམས། །རང་སེམས་དག་པའི་ངོ་བོར་རྟག་བཞུགས་ཀྱང་། །གངས་ཅན་ལྗོངས་འདིར་ངེས་གསང་རྡོ་རྗེའི་ཐེག །སྤེལ་ཕྱིར་སྤྲུལ་པའི་ཟློས་གར་མྱུར་སྟོན་ཤོག ། ཟུར་ཆེན་འཁོར་ལོའི་མགོན་པོ་གཟུགས་སྐུའི་བཀོད་པ་བསྡུས་པའི་ཚེ་མཁའ་ཁྱབ་ཀྱི་འགྲོ་བ་སྒྲོལ་བའི་འཕྲིན་ལས་ཇི་བཞིན་འགྲུབ་པའི་བདེན་ཚིག་མཆིམས་ཕུ་གསང་ཕུག་གི་ཨོ་རྒྱན་རིན་པོ་ཆེའི་སྐུ་བརྙན་ལ་ཕུལ་བའི་སྙན་དར་ཁ་ཡིག་འོད་གསལ་སྒྱུ་འཕྲུལ་དྲ་བ། ཀུན་ཁྱབ་དག་པའི་དབྱིངས་ནས་ལྷུན་གྲུབ་པའི། །རྨད་བྱུང་ཐུགས་རྗེའི་སྣང་བ་འཇམ་ཀླས་པ། །བགྲང་ཡས་ཞི་ཁྲོ་ཀུན་འདུས་པདྨ་འབྱུང་། །མི་ཟད་གསུངས་མཆོག་གནས་ཀྱི་རྟེན་འབྲེལ་མཐུས། །དཀྱིལ་འཁོར་རྒྱ་མཚོ་སྤྲོ་བསྡུའི་བྱེད་པ་པོ། །ལུང་དང་རྟོགས་པའི་དཔལ་འབྱོར་བང་མཛོད་ཅན། །དག་དང་མ་དག་ཞིང་ཁམས་རྡུལ་རྙེད་དུ། །རྣམ་དཀར་འཕྲིན་ལས་རབ་ཏུ་རྒྱས་གྱུར་ཅིག །རྔ་ཡབ་གླིང་དབུས་ཟངས་མདོག་དཔལ་རིའི་རྩེར། །པདྨའི་ཕོ་བྲང་དབང་གི་གྲོང་ཁྱེར་དུ། །གཉག་བན་རང་གི་གདན་ཁྲི་ག་ལ་བར། །ངོ་མཚར་དག་པའི་སྣང་བ་འཕེལ་གྱུར་ཅིག །ཆོས་དབྱིངས་ཀུན་གསལ་ངོས་སུ་རིག་པའི་རྩལ། །རང་གྲོལ་འོད་གསལ་ཀ་དག་ཀློང་ཡངས་ནས། །སྒྱུ་འཕྲུལ་མཚན་དཔེའི་འཇའ་ཚོན་རབ་བཀྲའི་མདངས། །སྤྲུལ་པའི་འོད་ཟེར་མཁའ་ལ་ཁྱབ་གྱུར་ཅིག །ས་ཁྱི་གནམ་ལོ་གསར་ཚེས་ཀྱི་ཉིན་སྲིད་གསུམ་བདག་མོ་མཆོད་པའི་དུས་ཀྱི་སྙན་དར་ཞལ་(༤༨བ)
ཡིག་རྣམ་པར་རྒྱལ་བའི་དབྱངས་སྙན། རྒྱལ་བར་གྱུར་ཅིག་སྭ་སྟིའི་དབྱངས་སྙན་པོས། །ཤིས་བརྗོད་ཚིག་གི་འཕྲེང་བ་ཉེར་སྤེལ་ན། །སྲིད་གསུམ་དབང་སྒྱུར་ལྷག་པའི་ལྷ་མོ་ཡིས། །བསམ་དོན་ལྷུན་གྲུབ་དཔག་བསམ་ཡོངས་འདུར་མཛོད། །ཟླ་རྒྱས་ཞལ་གྱི་འཛུམ་འཕྲེང་བསིལ་ཟེར་གྱིས། །ནད་གདོན་རྒུད་ཚོགས་མུན་སྟུག་རབ་ཞི་སྟེ། །བདེ་སྐྱིད་སྣང་བ་དཀར་པོས་ཡོངས་ཁྱབ་པའི། །དགའ་སྟོན་མཆོག་ལ་སྤྱོད་པའི་དཔལ་སྩོལ་ཅིག །ཚེ་དང་དཔལ་འབྱོར་སྟོབས་ཀྱི་རྒྱ་མཚོ་ཆེར། །ལེགས་བྱས་བྱེ་བའི་ཆུ་ཀླུང་ཀུན་འདུས་ཏེ། །ཕན་བདེའི་རླབས་འཕྲེང་སྲིད་པའི་རྩེ་མོའི་བར། །རབ་འཕྱུར་བླ་ནས་བླར་འདེགས་འཕྲིན་ལས་མཛོད། །ཤུགས་དྲག་བསོད་ནམས་རྟ་བདུན་གྱིས་དྲངས་ལས། །དབང་ཐང་འབུམ་ཕྲག་ཉིན་མོར་བྱེད་པའི་གཟིས། །བརྟན་གཡོའི་ཆོས་ཀྱི་དྲོ་འཇམ་ཡོངས་བཀུག་པས། །དགའ་སྟོན་སོས་ཀྱི་ལང་ཚོ་དར་བབས་མཛོད། །མི་བསྲུན་དགྲ་བགེགས་བུང་བའི་འཕུར་ལྡིང་ཀུན། །མཐུ་སྟོབས་བྱིན་ཟ་འབར་བ་རྣོན་པའི་ལྕེས། །ཕྱེ་མར་བཏགས་ཏེ་སྲིད་གསུམ་མ་ལུས་ལས། །རྣམ་པར་རྒྱལ་བའི་འཕྲིན་ལས་འགྲུབ་པར་མཛོད། །ས་ཁྱི་གནོད་སྦྱིན་བེག་རྩེ་ལ་བསྐང་བ་ཁྲི་ཚར་གྱི་སྒོ་ནས་སྒེར་གསོལ་བྱས་སྐབས་ཕུལ་བའི་སྙན་དར་ཞལ་ཡིག་མཐུ་སྟོབས་ཉི་འོད་འབར་བ། མཐུ་སྟོབས་ཉི་མའི་གཟི་བརྗིད་འོད་པོ་ཆེས། །ལེགས་བྱས་པད་དཀར་བཞད་དང་ལྷན་ཅིག་པར། །སྲིད་གསུམ་བུང་བའི་བརྟན་འཕྲོག་རྒུད་པའི་མུན། །མཐར་བྱེད་ལས་རྣམས་མ་ལུས་འགྲུབ་(༤༩ན)
པར་མཛོད། །རབ་ཁྲོས་བཤན་པ་ཁྱོད་ཞལ་གདངས་པའི་ནང་། །བརྣག་པའི་དགྲ་རྣམས་ཟས་སུ་གཏོད་བྱེད་ན། །ཤ་ཁྲག་རུས་པ་ནང་ཁྲོལ་བླ་ཚེ་སྲོག །མྱུར་དུ་བཞེས་ལ་ཐལ་བའི་རྡུལ་དུ་རློག ། ས་ཁྱི་ཆོས་འཁོར་རྒྱལ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་དུ་མཆོད་འབུལ་དང་མགོན་ཁང་རྣམས་སུ་གཏོར་གསོས་སྐང་བཤགས་བྱེད་པར་མཆོད་དཔོན་བློ་བཟང་མཐུ་སྟོབས་ཀྱིས་གཙོས་པའི་ཕན་བདེ་ལེགས་བཤད་ གླིང་པའི་གྲྭ་པ་ཁ་ཤས་བཏང་དུས་བྱམས 
་ཆེན་ལ་ཕུལ་པའི་སྙན་དར་ཞལ་ཡིག་རྣམ་པར་རྒྱལ་པའི་ཅོད་པན། བྱམས་པ་ཆེན་པོས་བདུད་ཀྱི་སྡེ་དཔུང་ལས། །རྣམ་པར་རྒྱལ་བ་རིན་ཆེན་ཅོད་པན་གྱིས། །མཛེས་པའི་ཁྱད་པར་ཅན་གྱུར་མི་ཕམ་མགོན། །དངོས་པོ་ཀུན་གྱིས་བཏུད་བྱའི་རྒྱལ་ཚབ་མཆོག །སྡིག་ཏོའི་ནད་ཀུན་རབ་ཞི་སྨན་གཅིག་པུ། །ཕ་རོལ་ཕྱིན་བཅུའི་ཆོས་ཚུལ་ཟབ་བརླིང་བས། །འགྲོ་རྣམས་ཕན་དང་བདེ་བའི་ས་ཆེན་པོར། །སྦྱོར་མཛད་དྲང་སྲོང་ཁྱོད་མིན་གཞན་ན་སུ། །ཆོས་ཀུན་གཟིགས་པའི་ས་བོན་རབ་སྨིན་པ། །ཚོགས་གཉིས་མྱུ་གུ་ཡོངས་སུ་དར་བབས་དཔྱིད། །མཚན་དཔེ་རོ་བརྒྱའི་དཔལ་དུ་དངར་བའི་འབྲས། །ཡོངས་འདུའི་མཆེད་ཟླ་ཁྱོད་ཀྱི་ཁུར་དུ་ལྕི། །འཆར་ནུབ་སྤངས་པ་ཐུགས་རྗེའི་འོད་པོ་ཆེ། །རིས་མེད་ཀུན་ལ་འཇུག་པ་སྣང་བའི་གཏེར། །ལྷག་བསམ་རླུང་གི་ཤིང་རྟས་ཉེར་དྲངས་ཚེ། །བསྟན་འགྲོའི་ལྷ་ཡི་ལམ་དེར་ཅིས་མི་རྒྱུ། །ཨུཏྤལ་མཐིང་ཁ་ལྟར་མཛེས་སྤྱན་རས་ཀྱི། །དཀྱུས་རིང་འགྲོ་བ་ཀུན་ལ་རྗེས་ཆགས་པ། །གཡེལ་མེད་རྟག་ཏུ་རྩེ་བའི་གཟིགས་པ་ཡིས། །དགེ་དང་(༤༩བ)
སྡིག་ཆོས་འབྲས་དེ་གཅིག་ཏུ་དཀར། །ཁྲོ་དང་སྡང་བ་ནག་པོའི་དྲི་མ་ཀུན། །དག་པའི་ཚེམས་ཀྱི་ཟེའུ་འབྲུ་ཞལ་གྱི་སྒོའི། །འདབ་སྟོང་འཛུམ་ལྡན་དབུས་ནས་ཉེར་བསྟན་ཚེ། །ངེས་ལེགས་ཁང་བཟང་དམ་པར་འགྲོ་རྣམས་སུ། །ཀྭ་ཡི་སྲིད་འཁོར་ཚ་གདུང་ཡོངས་གཞིལ་སླད། །བཤད་དང་སྒྲུབ་པའི་ཐུབ་བསྟན་གདུགས་དཀར་པོ། །སྡེ་བཞིའི་རིན་ཅེན་ཡུ་བས་ལེགས་བཏེགས་ནས། །རབ་མཐོའི་ཀུན་གསལ་འགྲམ་པར་འཁོར་གྱུར་ཅིག །སྙིགས་མར་སྤྱོད་པའི་མ་དག་རྙོག་མ་ཀུན། །དྲུངས་བྱེད་ཆོས་སྲིད་ནོར་བུ་ཀེ་ཏ་ཀས། །རྫོགས་ལྡན་དུས་ཀྱི་ཆུ་ཀླུང་དངས་པའི་ངོས། །བདེ་སྐྱིད་ཟླ་གཟུགས་འབུམ་ཕྲག་འཆར་གྱུར་ཅིག །རྒྱལ་མཐིལ་གྱི་མགོན་ཁང་ཆེན་མོར་ཆོས་སྐྱོང་སྤྱི་ལ་ཕུལ་བའི་སྙན་དར་ཞལ་ཡིག་དབང་ཕྱུག་དྲག་པོར་ཁྲོས་པའི་མེ་དཔུང་། ཆོས་དབྱིངས་ཀུན་གསལ་ལུས་ཕྲའི་མངལ་ཡངས་ལས། །མ་སྨད་སྙིང་རྗེའི་ཆར་སྤྲིན་རབ་སྦྲུམ་པས། །ཁྲོ་གཏུམ་དྲག་པོའི་ཐོག་སེར་འཕྲོ་བ་ཅན། །དུས་དགྲའི་དབང་པོ་འཇམ་དཔལ་མ་ཧེའི་ཞལ། །ཁྱོད་གསུང་རྡོ་རྗེའི་ཚིག་གི་མདུད་པའི་རྒྱ། །འགྲོལ་མིན་ཕྱི་ནང་གསང་གཤེད་ལས་གཤིན་གསུམ། །སྐྱེ་འགྲོའི་སྲོག་འཕྲོག་འཆི་བདག་བྱེ་བ་འཁོར། །གྲངས་མེད་གནམ་སའི་ཁྱོན་ཡང་དོག་པོར་འགོད། །ཕྱག་ན་པདྨའི་ཐུགས་རྗེའི་རང་གཟུགས་གར། །དཔལ་ལྡན་ནག་པོ་ཆེན་པོ་ཕྱག་དྲུག་པ། །གསང་ཡུམ་བཀའ་སྡོད་བཅས་པའི་རྫུ་འཕྲུལ་གྱིས། །གཙུག་ན་ཟླ་བ་ཁེངས་པ་ཐུང་ངུར་བྱེད། །ལུས་ངན་དུག་གིས་ལྷ་མིན་ཉེར་བཅོམ་ཞིང་། །ལྷ་རྣམས་བདེ་(༥༠ན)
བར་ངལ་གསོའི་དཔལ་སྟེར་བ། །རྣམ་མང་ཐོས་པའི་སྲས་ཞེས་འཇིག་རྟེན་ན། །གྲགས་པའི་མཚན་སྙན་གྱིས་ཀྱང་དབུལ་ཕོངས་སེལ། །སྲིད་ཞིའི་གདུང་བའི་མུན་པ་ཀུན་འཕྲོག་པ། །འཇམ་དང་རྩུབ་འགྱུར་ཟུང་འཇུག་ཉི་ཟླའི་གཟུགས། །གང་སྐུར་རབ་འཆར་འཕྲིན་ལས་སྒྱུ་མ་མཁན། །སྲིད་གསུམ་དབང་མོའི་མཐུ་སྟོབས་མཁའ་ལྟར་ཡངས། །མ་རུང་དགྲ་སྡེའི་ནུས་དཔུང་ཅིག་ཅར་དུ། །འཕྲོག་བྱེད་དཔའ་བོ་གཏུམ་ཆེན་བྲམ་ཟེའི་གཟུགས། །བཀའ་སྡོད་བཤན་པའི་དབང་པོ་བེག་རྩེ་ཅན་། །བསྟན་སྲུང་དམ་ཅན་རྒྱ་མཚོར་བཅས་པ་ཀྱེ། །བརྣག་པའི་སེམས་འཆང་གཟུགས་ཅན་གཟུགས་མེད་དཔུང་། །ནག་ཕྱོགས་རྩ་ལག་གཞན་འཕྲུལ་བདག་པོའི་ལུས། །མཐུ་སྟོབས་ཆེན་པོ་དབང་ཕྱུག་མིག་གི་མེས། །ཕྱེ་མར་འཐག་བྱེད་དྲག་པོའི་འཕྲིན་ལས་སྒྲུབས། །ཐུགས་རྗེའི་ཆུ་གཏེར་ཆེན་པོ་ལས་འོངས་པ། །ཞི་རྒྱས་དབང་གི་འཕྲིན་ལས་ཟིལ་དངར་ཅན། །དུས་ཀུན་ལོངས་སུ་སྤྱོད་དཔའི་དགའ་སྟོན་གྱིས། །ལེགས་བྲིས་དབང་པོའི་སྤུན་ཟླར་གྲུབ་མཛོད་ཅིག །མགོན་ཁང་ཆེན་མོའི་རྡོ་སྐུ་མེ་འབར་མའི་སྙན་དར་ཞལ་ཡིག་བསྐལ་པའི་བྱིན་ཟ་རབ་འབར། དྲག་ཤུལ་སྟོབས་ཀྱིས་སྲིད་གསུམ་མ་ལུས་པ། །འདར་མཛད་ཞིང་སྐྱོང་ཆེན་པོ་གདོང་བཞི་པའི། །སྣང་བརྙན་བསྐལ་པའི་བྱིན་ཟ་རབ་འབར་བས་། །འཕྲིན་ལས་མ་ལུས་ལྷུན་གྱིས་གྲུབ་པར་མཛོད། །རྒྱལ་མཐིལ་གྱི་ཅིང་སྒྲ་ཁང་གི་ཤོད་ཀྱི་མགོན་པོ་ཀོ་(༥༠བ)
གཏུམས་མའི་སྙན་དར་ཞལ་ཡིག་མིའུ་ཐུང་དྲག་པོར་ཁྲོས་པའི་སྲིན་པོ། ཁྱབ་བདག་ཧེ་རུ་ཀ་དཔལ་ཆེ། །མིའུ་ཐུང་སྲིན་པོའི་གཟུགས་འཆང་བ། །མ་ཧཱ་ཀཱ་ལ་འཁོར་བཅས་ཀྱིས། །བཅོལ་པའི་འཕྲིན་ལས་འགྲུབ་པར་མཛོད། །རྒྱལ་མཐིལ་མགོན་ཁང་བར་གྱི་དཔལ་ལྡན་དམག་ཟོར་མའི་སྙན་དར་ཞལ་ཡིག་འདོད་དོན་ཡོངས་འདུའི་འབྲས་བཟང་། དཔག་བསམ་ཤིང་དང་འདོད་འཇོའི་བ། །བུམ་བཟང་ཡིད་བཞིན་ནོར་བུ་ལྟར། །འདོད་པའི་རེ་བ་སྐོང་མཛད་པ། །དམག་ཟོར་ལྷ་དེས་འཕྲིན་ལས་སྒྲུབས། །རྒྱལ་ལྷུན་གྲུབ་དགའ་བའི་ཚལ་གྱི་དེ་ཝཱི་རྐོ་ཊིར་དཔལ་ལྡན་འདོད་ཁམས་དབང་ཕྱུག་མར་ཕུལ་བའི་སྙན་དར་ཞལ་ཡིག་རྫོགས་ལྡན་འཛུམ་ཞལ་དགོད་པའི་དགའ་སྟོན། ཁྱབ་བདག་ཧེ་རུ་ཀ་དང་མཉམ་སྦྱོར་བ། །བདེ་ཆེན་འཁོར་ལོ་ཆེན་པོར་རྒྱས་འདེབས་ཡུམ། །གཉིས་མེད་གཉིས་སུ་སྣང་བའི་ཟློས་གར་ཅན། །སྲིད་གསུམ་དབང་སྒྱུར་དཔལ་ལྡན་རེ་མ་ཏི། །དབང་པོའི་གཞུ་ཡིས་རབ་དཀྲིས་ཀཻ་ལ་ཤའི། །རི་བོའི་ཁེངས་པ་བསྙོལ་ནུས་མཛེས་སྡུག་ཅན། །ཡིད་འོང་མིག་གི་བདུད་རྩིར་ཟླ་མེད་པ། །དུང་སྐྱོང་མ་སོགས་རྣམ་འགྱུར་ཅི་ཡང་སྟོན། །བསོད་ནམས་ཉི་མ་སྟོང་དུ་འབར་བའི་གཟི། །ཡིད་བཞིན་དབང་གི་རྒྱལ་པོ་འདོད་འཇོ་མཁན། །འཛམ་བུའི་གསེར་སྦྱངས་ལས་གྲུབ་ལྷུན་པོ་ཡི། །སྤུན་ཟླས་གངྒཱའི་རྡུལ་གྲངས་བག་ལ་ཞ། །འགྲོ་ལ་སྙིང་རྗེས་ཆགས་པའི་འོད་མདངས་དང་། །བརྟན་གཡོའི་སྙིང་གི་བཅུད་ཁྲག་གིས་མྱོས་པ། །ལྷན་ཅིག་རྒོད་མ་ཁ་ལྟར་དམར་བའི་མདོག །གྲངས་མེད་སྤྲོས་ཚེ་སྲིད་གསུམ་འདར་ཞིང་འདུད། །དུས་མཐའི་མེ་རླུང་འདྲེས་མར་འཚུབ་པའི་(༥༡ན)
དབུས། །མིག་སྨན་མདོག་ཅན་རབ་ཁྲོས་སྲིན་མོའི་གཟུགས། །རྐྱང་སེར་དྲེའུའི་སྟེང་ན་ཕྱེད་སྐྱིལ་ཅན། །གནས་གསུམ་མཁའ་འགྲོའི་གཙོ་མོ་དམག་ཟོར་ལྷ། །ནད་གདོན་སྒྲིབ་གཉིས་འཇིལ་པའི་སྨན་གཅིག་པུ། །རབ་དཀར་འཕྲིན་ལས་གསེར་མདོག་རྣམ་པར་རྒྱལ། །འདི་ཕྱིའི་བདེ་སྐྱིད་སྲོག་འཚོའི་ཆོ་ག་མཁན། །ལྷུན་གྱིས་གྲུབ་པའི་ནུས་དཔུང་སྐྱེད་དུ་གསོལ། །བསྐལ་པར་འགྲན་པའི་ཚེ་དང་བསོད་ནམས་ཀྱི། །ཕུང་པོས་ཀུན་བཟོད་ངལ་པའི་རྔུལ་ཆུའི་རྒྱུན། །དབང་ཐང་རྒྱ་མཚོར་བབས་ཀྱང་དོག་མིན་པའི། །ལེགས་ཚོགས་བླ་ནས་བླར་འདེགས་འཕྱུར་བར་མཛོད། །འགྲོ་བའི་ཡིད་འགུགས་དམར་འོད་ལྕགས་ཀྱུའི་རྩེ། །སེམས་བྲལ་འཛིན་མར་བཏབ་ཀྱང་ཟུང་རྔུ་ཡིས། །འདར་པར་ནུས་ཕྱིར་བརྟན་གཡོའི་ཆོས་རྣམས་ཀུན། །ཁབ་ལེན་རྡོ་ཡིས་ལྕགས་ཀྱི་ཕྱེ་ལྟར་དྲོངས། །ཟས་སུ་ཉེར་གཏད་དགྲ་དང་བགེགས་ཀྱི་དཔུང་། །བདུན་བརྒྱུད་ཚུན་གྱི་བླ་ཚེ་སྟོབས་འབྱོར་དང་། །མཐུ་དང་ནུས་པ་ཉམས་ཤིང་བརླག་པ་ལ། །དུག་སྤྲུལ་སྒོང་ཁྱེར་རྗེས་སུ་བསྙེག་ལྟར་མཛོད། །ཕུན་སུམ་ཚོགས་པའི་དགའ་སྟོན་དཔལ་ལྡན་ཞིང་། །ཆོས་སྲིད་ཟུང་དུ་ཉེར་འཇུག་ཕོ་བྲང་ཆེར། །རྫོགས་ལྡན་དུས་ཀྱི་ས་དབང་ཇི་བཞིན་དུ། །བསམས་པ་ཙམ་གྱིས་དོན་ཀུན་འགྲུབ་པར་མཛོད། །དེ་ཝཱི་ཀོ་ཊིའི་ལྷ་མོ་དམག་ཟོར་མའི་གསེར་སྐུའི་སྙན་དར་ཞལ་ཡིག་འཆི་མེད་བདུད་རྩིའི་དཔལ་སྟེར། འཆི་མེད་བུ་མོ་བདུད་རྩིའི་འབྱུང་གནས་ཅན། །རྒུད་པའི་གདུང་པ་རབ་འཕྲོག་ཡོངས་(༥༡བ)
འདུའི་དབང་། །འདོད་དོན་རེ་སྐོང་ཁམས་གསུམ་དབང་སྡུད་པ། །དབྱིངས་ཕྱུག་ལྷག་པའི་ལྷ་དེས་བསམ་དོན་སྒྲུབས། །དེ་ཝཱི་ཀོ་ཊིར་བསྟན་མ་བཅུ་གཉིས་ཀྱི་སྙན་དར་ཞལ་ཡིག་གནས་གསུམ་མཁའ་འགྲོ་འབོད་པའི་འཕྱར་དར། དང་པོར་གཡུང་དྲུང་གཤེན་གྱིས་མཆོད་པའི་ལྷ། །བར་དུ་རིགས་འཛིན་པདྨའི་གཏེར་སྐྱོང་མ། །ད་ལྟ་དགོན་གནས་ཡོངས་ཀྱི་སྲུང་མ་ཆེ། །བོད་ཁམས་སྐྱོང་བའི་བསྟན་མ་བཅུ་གཉིས་དང་། །ཁྱད་པར་དཔལ་ལྡན་རྡོ་རྗེ་གཡུ་སྒྲོན་མ། །གནས་གསུམ་མཁའ་འགྲོར་བཅས་པའི་ཚོགས་རྣམས་ཀྱིས། །གངས་ཅན་བོད་ཀྱི་བདེ་སྐྱིད་སྤེལ་བ་དང་། །རིག་འཛིན་བདག་གིས་བཅོལ་བའི་ལས་ཀུན་སྒྲུབས། །དགའ་ཚལ་གྱི་བསིལ་བ་ཚལ་དུ་ཡེ་ཤེས་མགོན་པོ་གུར་ལ་ཕུལ་པའི་སྙན་དར་ཞལ་ཡིག་དཀར་པོའི་བ་དན་འཕྱར་པའི་གཏམ་སྙན། མཁའ་ལྟར་དག་པ་ཆོས་ཀྱི་དབྱིངས་ཉིད་ལས། །ཡེ་ཤེས་འོད་ལྔའི་འཇའ་ཚོན་ཡོངས་ཤར་བར། །རྣམ་སྣང་སྒྱུ་དྲའི་རོལ་གར་ནག་པོ་ཆེ། །བསྟན་སྲུང་རྒྱ་མཚོའི་སྡེ་དཔོན་རྡོ་རྗེ་གུར། །དམར་ཟླུམ་སྤྱན་གྱིས་ལེགས་ཉེས་ཀུན་གཟིགས་ནས། །བདུད་སྡེའི་སྙིང་ཁྲག་ཧུབ་ཀྱིས་འཐུང་བ་དང་། །ལྷན་ཅིག་དགྲ་སྲོག་བཅད་ཀྱང་མ་ཚིམ་པར། །བམ་ཆེན་འདམ་ལྟར་བརྫིས་པའི་སྟང་སྟབས་ཅན་། །ལྷ་མཆོག་དཀར་པའི་བ་དན་མཁའ་ལ་ཕྱོར། །ནག་པོ་བདུད་ཀྱི་རུ་མཚོན་ས་ལ་སྙོལ། །ངན་པའི་གླགས་ལྟ་གཟུགས་ཅན་གཟུགས་མེད་སྒྲོལ། །གནས་སྐབས་མཐར་ཐུག་དོན་གཉིས་ལྷུན་གྲུབ་མཛོད། །བསིལ་པ་ཚལ་དུ་(༥༢ན)
མགོན་པོ་ཞལ་ཡིག་བཞི་པར་ཕུལ་པའི་སྙན་དར་ཞལ་ཡིག་དམ་ཚིག་རྡོ་རྗེའི་སྒྲ་དབྱངས། འགྲོ་ལ་ཚད་མེད་བཞི་ལྡན་འཛུམ་པའི་ཞལ། །བདུད་བཞིའི་སྣང་ངོར་རབ་ཁྲོས་སྲིན་པོའི་གདོང་། །ཆེམ་ཆེམ་མི་རོ་གསོལ་ཡང་ཚིམ་མིན་པར། །ཁམས་གསུམ་ཅིག་ཅར་ཟ་ལ་རིངས་པ་བཞིན། །ངེས་པའི་དོན་དུ་དཔལ་ལྡན་ཧེ་རུ་ཀ །གདུག་པ་གདུལ་ཕྱིར་ཞིང་སྐྱོང་སྟོབས་འཕྲོག་དབང་། །རིག་འཛིན་བརྒྱུད་པའི་བྲན་དུ་བྲམ་ཟེའི་གཟུགས། །གཅིག་ལས་དུ་མར་སྤྲུལ་པའི་གར་མཁན་ཅན། །རྡོ་རྗེ་འཆང་དང་ཀླུ་སྒྲུབ་ལོ་ཆེན་གཉན། །ས་ཆེན་ཡབ་སྲས་བདག་ཆེན་རྡོ་རྗེ་འཆང་། །ཀུན་སྤངས་ཆོས་རྗེ་མཚར་ཆེན་མཁྱེན་བརྩེའི་དབང་། །བརྒྱུད་པའི་བླ་མ་རིམ་པར་བྱོན་རྣམས་དང་། །ཁྱད་པར་རྩ་བའི་བླ་མ་རྣམ་གཉིས་ཀྱིས། །སྔགས་འཆང་བདག་གི་གྲོགས་དང་བྲན་ཚུལ་དུ། །རྡོ་རྗེའི་བཀའ་ནན་དྲག་པོས་གཉེར་གཏད་པའི། །དམ་ཚིག་དགོངས་ལ་བཅོལ་བའི་འཕྲིན་ལས་སྒྲུབས། །བསིལ་པ་ཚལ་གྱི་པུ་ཏྲའི་སྙན་དར་ཞལ་ཡིག་བྲམ་ཟེའི་དམོད་པ་གྲུབ་པའི་བཤན་པ། རབ་ཁྲོས་བྲམ་ཟེའི་དམོད་པ་གྲུབ་པའི་འབྲས། སྐྱེ་རྒུའི་བླ་སྲོག་ཚེ་ལ་དབང་སྒྱུར་བ། །མོན་པ་པུ་ཏྲ་མིང་སྲིང་བཅས་པ་རྣམས། །རྩ་བརྒྱུད་བླ་མའི་དམ་ཚིག་ཉེར་དགོངས་ལ། །མི་མཐུན་ལོག་པར་འཁུ་བ་དགྲ་སྡེའི་དཔུང་། །སྟེང་འོག་ཕྱོགས་མཚམས་བར་གསུམ་གར་གནས་ཀྱང་། །མྱུར་དུ་ཁུག་ལ་སྙིང་ཁྲག་ཞལ་དུ་གསོལ། །འཕྲིན་ལས་
མ་ལུས་ཐོགས་མེད་འགྲུབ་པར་མཛོད། །དགའ་ཚལ་གྱི་ཆོས་འབྱུང་སྟེང་གི་མགོན་ཁང་དུ་ཆོས་སྐྱོང་སྤྱི་ལ་ཕུལ་པའི་སྙན་དར་ཞལ་ཡིག་དགྱེས་འཛུམ་བཅོ་ལྔའི་ཟླ་ཞལ། དམ་ཅན་སྤྲིན་ལྟར་འདུ་བའི་གནས་མཆོག་འདིར། །ཕྱི་ནང་གསང་གསུམ་ཀུན་བཟང་མཆོད་པའི་སྤྲིན། །དངོས་བཤམས་ཡིད་ཀྱིས་སྤྲུལ་ཏེ་འབུལ་ལགས་ན། །དགྱེས་པའི་འཛུམ་ཞལ་བཅོ་ལྔའི་ཟླ་ལྟར་སྟོན། །ཐུབ་དབང་བསྟན་དང་དགེ་འདུན་སྡེ་སྐྱོང་ཞིང་། །འགྲོ་བའི་བདེ་སྐྱིད་སྤེལ་མཛད་སྲུང་མ་སྤྱི། །ཁྱད་པར་རིགས་དང་བརྒྱུད་ལ་འགོ་བའི་ལྷ། །ཀུན་གྱིས་རིགས་འཛིན་བདག་གི་བསམ་དོན་སྒྲུབས། །ཆོས་འབྱུང་སྟེང་དུ་ཙ་རི་ཞིང་སྐྱོང་བདུད་མགོན་སེང་གདོང་གི་སྙན་དར་ཞལ་ཡིག་གདོང་ལྔའི་དབང་པོའི་གད་རྒྱངས། ཆར་སྤྲིན་འཁྲུགས་པའི་དབུས་ནས་གནམ་ལྕགས་ཟེར། །འཕྲོ་ཞིན་གློགས་འཁྱུག་དབྱར་ཀྱི་རྔ་བོ་ཆེ། །ལྡིར་འདྲའི་བདུད་མགོན་ནག་པོ་མཐུ་སྟོབས་དབང་། །སེང་གེའི་གདོང་ཅན་སྟོང་གསུམ་རབ་བསྐོར་ལ། །སྡང་བའི་དགྲ་དང་གནོད་པའི་བགེགས་ཀྱི་དཔུང་། །མ་ལུས་གནམ་ས་གདངས་འདྲའི་ཞལ་ནང་དུ། །བཞེས་ཏེ་མངོན་སྤྱོད་དྲག་པོའི་འཕྲིན་ལས་ཀྱིས། །མི་མཐུན་ཕྱོགས་ཀུན་མིང་གི་ལྷག་མར་མཛོད། །དགའ་ཚལ་པོ་ཏ་ལའི་ཤོད་ཀྱི་མགོན་ཁང་རྣམས་ལས་གནོད་སྦྱིན་བེག་རྩེ་ལྕམ་སྲིང་ལ་ཕུལ་བའི་སྙན་དར་ཞལ་ཡིག་ཐོགས་མེད་འཕྲིན་ལས་སྒྲུབ་པའི་རྒྱལ་རྔ། བསྟན་པའི་མེལ་ཚེ་དུས་ཀུན་གཡེལ་མེད་དུ། །སྒྲུབ་པའི་འཕྲིན་ལས་གཡར་དམ་འཁུར་ལྕི་བ། །དབང་དྲག་རྫུ་འཕྲུལ་ཐོགས་པ་(༥༣ན)
མེད་མངའི་ལྷ། །གནོད་སྦྱིན་བཤན་པ་བེག་རྩེ་ལྕམ་དྲལ་གྱིས། །དགོན་གནས་དགེ་འདུན་སྲིད་སྡེ་གཉེར་གཏད་རྣམས། །དུས་དྲུག་གཡེལ་མེད་བསྲུང་ཞིང་སྐྱོབ་པ་དང་། །ཡིད་ལ་བརྣག་པའི་དགྲ་དང་བགེགས་རྣམས་ཀུན། །ཚར་ཆོད་དྲག་པོའི་འཕྲིན་ལས་མྱུར་དུ་སྒྲུབས། །འཆི་མེད་ཚེ་དང་འཛད་མེད་སྟོབས་འབྱོར་ནོར། །གཏན་གྱི་བདེ་བ་ངེས་པར་ལེགས་པའི་ཆོས། །བསོད་ནམས་ཕུང་པོ་དབྱར་མཚོ་ལྟར་འཕྱུར་བའི། །བཅུ་གསུམ་རྡོ་རྗེ་འཛིན་པའི་སར་སྙེགས་མཛོད། །ཡུམ་རིག་པའི་ལྷ་མོའི་སྙན་དར་ཞལ་ཡིག་མ་ཚོགས་དབང་དུ་སྡུད་པའི་གར་མཁན། རིག་པའི་ལྷ་མོ་མཐུ་སྟོབས་ནུས་རྩལ་བདག །གར་གྱི་དབང་མོ་མ་མོའི་སྡེ་དཔོན་གྱིས། །སྐད་ཅིག་ཙམ་གྱིས་སྟོང་གསུམ་རབ་བསྐོར་ནས། །དབང་དྲག་འཕྲིན་ལས་མ་ལུས་སྒྲུབ་པར་མཛོད། །པོ་ཏ་ལའི་ཤོད་ཀྱི་ཁྱབ་འཇུག་རཱ་ཧུ་ལའི་སྙན་དར་ཞལ་ཡིག་གནམ་ལྕགས་ཐོག་སེར། གནམ་ལྕགས་རྡོ་རྗེའི་ཐོག་གི་གཟེགས་མ་དང་། །མཐོང་རེག་དུག་རླངས་ན་བུན་ལྟར་འཚུབ་པས། །སྐྱེ་འགྲོའི་དབུགས་ལེན་གཟའ་བདུད་རཱ་ཧུ་ལ། །སྣང་སྲིད་དྲེགས་པ་ཡོངས་ཀྱི་དམག་དཔོན་ཆེ། །རང་གཞན་སྲུང་མ་འཁྲུག་པའི་གཡུལ་ངོ་ན། །ཞེ་སྡང་དྲག་པོས་བསྐྱོད་པ་གློག་དམར་ལྕེས། །རབ་བརྡར་མཆེ་བ་རྣོན་པོའི་དཔལ་གྱི་རྩེར། །དགྲ་བགེགས་དཔུང་རྣམས་མི་རྟག་ལམ་དུ་འགོད། །མངོན་གྱུར་འཚེ་བའི་མི་དང་མི་མ་ཡིན། །མི་ཟད་རྣོན་པོའི་མཚོན་གྱིས་ཕྱེ་མར་གཏུབས། །ལྐོག་གྱུར་བག་ལ་ཞ་བའི་མ་རུངས་པ། །སྟོང་(༥༣བ)
ཕྲག་སྤྱན་གྱིས་གཟིགས་ལ་རྩད་ནས་ཆོད། །པོ་ཏ་ལའི་ཤོད་ཀྱི་རྒྱལ་པོ་སྐུ་ལྔའི་སྙན་དར་ཞལ་ཡིག་མཐུ་སྟོབས་བྱིན་ཟའི་ཕུང་པོ། གཉིས་འཐུང་གདོང་ལྔ་པ་དང་དྲེལ་རྟ་སོགས། །སྣ་ཚོགས་བཞོན་པ་སྟོང་གསུམ་སྐད་ཅིག་ལ། །བསྐོར་ནས་ཐོགས་མེད་འཕྲིན་ལས་སྒྲུབ་མཛད་པ། །སྤྲུལ་པའི་ཆོས་རྒྱལ་མཆེད་ལྔ་བློན་པོར་བཅས། །ཁྱད་པར་སྐྱེ་འགྲོ་ཀུན་གྱི་ཚེ་སྲོག་ལ། །དབང་སྒྱུར་གནོད་སྦྱིན་ཆེན་པོ་ཙི་དམར་བ། །མི་བཟད་གཏུམ་དྲག་རབ་འབར་དབང་ཕྱུག་ཆེ། །དྲེགས་པའི་དམག་དཔུང་བཅས་པ་དགོངས་ཤིག་ཀྱེ། །ནག་པོའི་རྩ་ལག་བསམ་སྦྱོར་བརྩེགས་པའི་ཤིང་། །མཐུ་སྟོབས་བྱིན་ཟའི་ཕུང་པོས་རབ་བསྲེགས་ནས། །ལེགས་བྱས་སྣང་བ་དཀར་པོའི་དགའ་སྟོན་ལ། །སྤྱོད་པའི་འཕྲིན་ལས་མ་ལུས་སྒྲུབ་པར་མཛོད། །པོ་ཏ་ལ་ཤོད་ཀྱི་གནོད་སྦྱིན་ཙི་དམར་བའི་སྙན་དར་ཞལ་ཡིག་སྡེ་བརྒྱད་ཁ་ལོ་སྒྱུར་བའི་བྱེད་པོ། སྔོན་ཚེ་ལི་ཡི་ཡུལ་ནས་སྨོན་ལམ་མཐུས། །སྐྱེ་འགྲོའི་སྲོག་བདུད་གནོད་སྦྱིན་རིགས་སྐྱེས་ནས། །ལྷ་སྲིན་དྲེགས་པའི་སྡེ་དཔོན་ཆེར་གྱུར་པ། །བཀའ་སྡོད་བཤན་པ་ཙིའུ་དམར་པོ་ཁྱོད། །སྣང་སྲིད་ཟིལ་གནོན་རིགས་འཛིན་པདྨའི་བཀའ། །ཉེ་བར་དགོངས་ལ་ཞི་རྒྱས་དབང་དྲག་གི །ལས་རྣམས་ཐམས་ཅད་ཐོགས་མེད་རབ་སྒྲུབ་པར། །དཔག་བསམ་ཡོངས་འདུའི་དབང་པོ་ལྟར་མཛོད་ཅིག །པོ་ཏ་ལའི་ཤོད་ཀྱི་རྡོར་ལེགས་ཀྱི་སྙན་དར་ཞལ་ཡིག་འཕྲིན་ལས་ལྷུན་གྲུབ། རིགས་འཛིན་པདྨ་འབྱུང་གནས་ཀྱི། །ཕོ་ཉ་དགེ་བསྙེན་དམ་ཚིག་ཅན། །སྙིང་ཉེ་དམ་ཅན་རྡོ་རྗེ་ལེགས། །འཕྲིན་(༥༤ན)
ལས་རྣམས་བཞི་སྒྲུབ་པར་མཛོད། །པོ་ཏ་ལའི་ཤོད་ཀྱི་གཟའ་གདོང་དམར་ནག་གི་སྙན་དར་ཞལ་ཡིག་སྲིད་གསུམ་མྱུལ་པའི་ཕོ་ཉ། མཁའ་ལྡིང་དབང་པོའི་འཕྲུལ་གྱིས་སྲིད་པ་གསུམ། །མྱུལ་བྱེད་གཟའ་གདོང་དམར་ནག་སྲོག་གི་བདུད། །ཀྭ་ཡེ་སྙིང་ལ་ནག་པོའི་ཐིག་ལེ་ཡིས། །མཚན་པའི་དགྲ་རྣམས་སྒྲོལ་ལ་འཕྲིན་ལས་སྒྲུབས། །ཇོ་བོ་རྒྱལ་མཚན་པའི་སྙན་དར་ཞལ་ཡིག་ཕུན་ཚོགས་འདོད་འཇོ། སྔོན་ཚེ་ལངྐའི་བདག་པོའི་ཕོ་བྲང་གི །སྒོ་སྲུང་རབ་དཀར་ཡིད་ཀྱི་སེམས་འཆང་བ། །སྨོན་ལམ་མཐུ་ཡིས་སྦས་ཡུལ་དཀར་པོའི་ལྗོངས། །སྲུང་བའི་ལྷ་ཆེན་དགེ་བསྙེན་རྒྱལ་མཚན་པ། །ཕུན་ཚོགས་འདོད་པ་འཇོ་བ་མཆོད་པའི་སྤྲིན། །སྒོ་ལྔར་བདེ་བ་སྐྱེད་བྱེད་ཁྱད་པར་ཆོས། །རབ་སྤེལ་འབྲས་བུ་བསམས་པའི་དོན་རྣམས་ཀུན། །ལྷུན་གྲུབ་ཡིད་བཞིན་དབང་གི་རྒྱལ་པོར་མཛོད། །རྣམ་འཕྱང་ཞེས་པ་ས་ཁྱི་སྲིད་གསུམ་བདག་མོ་མདོས་ཀྱི་མཆོད་པའི་སྐབས་ཀྱི་སྙན་དར་ཞལ་ཡིག་བདེ་སྐྱིད་འོད་སྟོང་འབར་པའི་དགའ་སྟོན། དཀར་སེར་དམར་མཐིང་མདངས་དང་རྣམ་འགྱུར་གྱིས། །འཕྲིན་ལས་དོན་ཀུན་མ་ལུས་སྒྲུབ་མཛད་པ། །སྲིད་གསུམ་དབང་མོ་གནས་འདིར་ཐོགས་མེད་དུ། །ཚུར་སྤྱོན་ཀུན་བཟང་མཆོད་པའི་སྤྲིན་ཕུང་བཞེས། །བསམ་སྦྱོར་ངན་པས་ཉེར་འཚེའི་མུན་པ་ཀུན། །མཐུ་སྟོབས་འཐོར་རླུང་དྲག་པོས་རབ་གཏོར་ནས། །བདེ་སྐྱིད་འོད་སྟོང་སྣང་གཏེར་དགའ་སྟོན་ལ། །སྤྱོད་པའི་ཞི་རྒྱས་དབང་དྲག་ལས་(༥༤བ)
སྒྲུབས་མཛོད། །ས་ཕག་ལོ་གསར་གྱི་དགའ་སྟོན་དུས་སྲིད་གསུམ་དབང་མོར་དར་ཚོན་སྣ་ལྔའི་སྙན་དར་ཕུལ་བའི་ཞལ་ཡིག་དཔག་བསམ་སྙེ་མ། དཀར་བྱིན་རླབས་མཐོ་རིས་ཆུ་རྒྱུན་གྱིས། །ནད་དོན་ཉེར་འཚེའི་དྲི་མ་ཀུན། །རྣམ་པར་བཀྲུས་པའི་དགའ་སྟོན་ནོར། །རྒྱལ་མཚན་རྩེ་མོར་འགོད་པར་མཛོད། །སེར་འཕྲིན་ལས་རྣམ་པར་དར་པའི་ཚ་དྲོད་ཀྱིས། །ཚེ་དཔལ་གསེར་གྱི་སྒོ་ང་ལེགས་སྨིན་པའི། །བསོད་ནམས་མི་ཡི་འཆི་མེད་རྩེར་སོན་ནས། །ཆོས་ནོར་འདོད་དང་ཐར་པའི་གདོང་ལྡན་མཛོད། །དམར་སྙིང་གར་ལེགས་བྱས་དཔལ་གྱི་བེའུའི་གཟུགས། །འཁྱིལ་བའི་སྒྱུ་ཐབས་སྟོང་གི་གོམས་པ་ཡིས། །བརྟན་གཡོའི་ས་ཆེན་མ་ལུས་ཅིག་ཅར་དུ། །ཐོགས་མེད་དབང་དུ་བསྡུས་བའི་འཕྲིན་ལས་མཛོད། །ནག་ཁྲོ་མེད་དུག་གསུམ་ལ་འཁུའི་ཞེ་སྡང་གིས། །རབ་མྱོས་ཉི་མ་འཆར་ཀའི་མིག་བགྲད་ནས། །དགྲ་བགེགས་སྲིད་འདིར་མངོན་སུམ་ལྟ་ཅི་སྨོས། །བག་ལ་ཞ་བ་རྣམས་ཀྱང་ཉེར་གཟིགས་ལ། །ཆུ་གཏེར་རླབས་འཕྲེང་དུས་ལས་མི་ཡོལ་ཞིང་། །དུག་ཅན་ལྟོ་འགྲོ་སྒོང་ངའི་རྗེས་བསྙེག་ལྟར། །དྲག་ཤུལ་ལས་ཀྱི་དམ་བཅའ་གནམ་ལྕགས་ཐོག །ཞིང་བཅུའི་བྲག་རི་བསྙིལ་ལ་གཡེལ་མེད་མཛོད། །ལྗང་། ཨེ་མ་ཆོས་ཀྱི་དབྱིངས་ཉིད་ནས། །རྨད་བྱུང་བདེ་བའི་ཉམས་ལྡན་པས། །ཐབས་དང་ཤེས་རབ་ཟུང་འབྲེལ་བའི། །འཁོར་ལོ་རྒྱས་འདེབས་ལྷ་མོའི་གཟུགས། །དཀྱིལ་འཁོར་མུ་རན་སྐྱོང་བའི་ཚེ། །དབང་ཕྱུག་ཉི་ཤུ་རྩ་བརྒྱད་གཙོ། །འདོད་ཁམས་ཀུན་གྱི་(༥༥ན)
བདག་མོ་རུ། །མངའ་བསྒྱུར་དཔལ་ལྡན་རེ་མ་ཏིའི། །ལྷ་སྙན་ཨུཏྤལ་དཀར་པོའི་ཚལ། །མཆོད་བསྟོད་སྣར་མའི་བདག་པོའི་འོད། །ལན་བརྒྱར་སྤྲོས་པའི་གཟེགས་མ་ཡིས། །རྣམ་པར་ཕྱེ་བར་རབ་དགོངས་ཏེ། །འབྱུང་བ་ལྔ་ཡི་གོས་ལྡན་པའི། །ནགས་ཀྱི་ཕ་ལམ་གོས་སེར་ཅན། །ཕུན་ཚོགས་དུས་ཀྱི་ཐོག་མ་ནས། །ཕན་དང་བདེ་བའི་དཔལ་འབྱོར་སྩོལ། །སྒྱུར་བྱེད་ཀྱི་ལོ་དབོ་ཟླར་ལྷ་ལྡན། ཟན་ཡང་། ཁྲ་འབྲུགཡུམ་བུ་བླ་སྒང་རྣམས་སུ་གསེར་ཆབ་སྙན་ཤལ་རྒྱ་མཆོད་འབུལ་བར་གླང་བུ་བ་དགྲ་འདུལ་ཚེ་རིང་བཏང་སྐབས་ཇོ་ཤཱཀ་ཡིད་བཞིན་ནོར་བུར་ཕུལ་བའི་སྙན་དར་ཞལ་ཡིག་སྲིད་ཞིའི་རྒུད་པ་བཅོམ་པའི་སྐལ་འཛིན་མའི་ལྟོ་བར་ལེགས་སྨིན་པའི། །བླ་མེད་ཡེ་ཤེས་སྡོང་པོ་དར་བབས་པ། །སྐུ་གསུམ་འབྲས་བཟང་མི་ཟད་འཁོར་ལོའི་མཛོད། །ཉི་མའི་གཉེན་གྱུར་ཡོངས་འདྲའི་དབང་པོ་ཡི། །གཟུགས་སྐུ་མཐོང་ཐོས་དྲན་དང་རེག་པ་ལས། །སྲིད་ཞིའི་རྒུད་པ་ཀུན་བཅོམ་ཕན་བདེའི་བཅུད། །ལོངས་སུ་སྤྱོད་དེས་དབང་རྣོན་ཆོས་རྗེས་སུ། །ལེགས་འབྲངས་དད་པའི་སྒོ་འཕར་བརྒྱ་ཕྱེ་ནས། །དངོས་འབྱོར་ཡིད་སྤྲུལ་ཀུན་བཟང་མཆོད་པའི་སྤྲིན། །ལྷག་བསམ་འཆི་མེད་ལམ་རྣམས་རབ་དཀྲིས་ཏེ། །གསོལ་འདེབས་ཐུགས་རྗེ་བསྐུལ་བའི་དབྱར་རྔ་ཡིས། །བྱིན་རླབས་འཛད་མེད་ཆར་འབབས་དངོས་པོའི་གཤེས། །དེ་ཕྱིར་ཕ་མཐའ་མི་མངོན་མར་གྱུར་འགྲོ །འདི་(༥༥བ)
དང་གཏན་གྱི་འདུན་མ་ཀུན་སྒྲུབ་པར། །བདེ་ཞིང་ཉེར་སྐྱིད་སྐལ་པ་བཟང་པོ་ལ། །རྩེ་དགར་སྤྱོད་པའི་དགའ་སྟོན་སྩལ་དུ་གསོལ། །བདེ་ལེགས་འོད་བརྒྱའི་དཔལ་གྱུར་ཉིན་མོར་བྱེད། །དངོས་པོ་བྱེ་བའི་ལུས་འཛིན་ཐུབ་པའི་བསྟན། །མངོན་མཐོང་ངེས་ལེགས་སྣང་བའི་གཏེར་ཆེན་པོས། །ཡངས་པའི་འཛིན་རྟེན་མ་ལུས་དགེ་གྱུར་ཅིག །བསམ་ཡས་ཀྱི་ཇོ་བོ་བྱང་ཆུབ་ཆེན་པོའི་སྙན་དར་ཞལ་ཡིག་བདུད་བཞིའི་གཡུལ་ལས་རྒྱལ་བའི་བ་དན། ས དེ ཝ ཀེཤ བྷྲྀ ཥི ཏཾ མ ཧ དྷོ དྷ ཡེ བ ནྡ ནཾ ཀཱ མི མེ ས རྦྦ སི དྡྷི པྲ ཡ ཙྪ ནྟུ ཨ ཧ ཉྩི ར ཉྫཱི ཝ ཀུ རྦ ནྟུ ། །བྱམས་པ་ཆེན་པོས་བདུད་བཞིའི་གཡུལ་ངོ་ལས། །རྣམ་པར་རྒྱལ་པའི་སྟོབས་བཅུ་མི་འཇིགས་བཞིའི། །བ་དན་དཀར་པོ་སྲིད་རྩེའི་ཁོང་བརྒལ་བ། །ཉི་མའི་རིགས་འཁྲུངས་རྣམ་འདྲེན་ཤཱཀྱའི་གཙོ། །མཚན་དཔེའི་སྣང་བརྙན་རབ་བཀྲ་ཐུགས་ཀྱི་མཚོར། །ཤེས་བྱའི་གཟུགས་ཀུན་སྒྲིབ་མེད་ཡོངས་ཤར་གནད། །ཟབ་རྒྱས་ཆོས་ཀྱི་དབྱིངས་སུ་གཡས་འཁྱིལ་བ། །གཅིག་ཏུ་དཀར་བའི་བཀྲ་ཤིས་དུང་འདི་སྙན། །སྐུ་གསུམ་གསང་བ་རབ་འབྱམས་དབང་གི་རྒྱལ། །བསྟན་འགྲོའི་ཕན་བདེའི་འདོད་རྒུ་འཇོ་བའི་ཆར། །གསེར་ལྡན་སྒེག་མོའི་མངལ་དུ་ལྕི་བའི་རྡུལ། །རྒྱ་མཚོའི་རླབས་ཀྱི་དོ་ཟླར་ཉེར་འགྲུབ་ཤོག །ཁྲ་འབྲུག་གི་རྒྱལ་བ་རིགས་ལྔའི་སྙན་དར་ཞལ་ཡིག་རྫོགས་ལྡན་གསར་པའི་དགའ་སྟོན། ས མཱ དཱ ན མ ཧ ཏྐ རུ ཎ ཏྲཻ སཱ ལ བུ རྦཱ ནཱ མ ཤྲ ཡཱ ཀཱ ཡ པྲ ཎམྱཾ ཨེ ཨཱ ཡུཿ ཤྲཱི ད དཱ ཏཽ ཀྲུ རུ ཨ ཧ ཉྩི ར ཉྫཱི ཝེ ཉ དྷ ཥྛ ནཿ དུས་གསུམ་དྲི་མེད་གཟིགས་པའི་སྤྱན་གྱི་དཀྱུས། །རིང་པོར་འགྲོ་ལ་(༥༦ན)
རྗེས་བརྩེས་རབ་བསྐྱངས་བའི། །ལྔ་ལྡན་ཡེ་ཤེས་གསལ་པའི་ཨཱདཪྴར། །ཐུགས་རྗེའི་གཟུགས་ཀུན་ཡོངས་འཆར་རྣམ་འདྲེན་གཙོ། །གདུལ་བྱའི་མིག་ཤེས་ཡུལ་དུ་གཟུགས་ཀྱི་སྐུར། །ཚར་དུ་དངར་བའི་བྱེ་བ་ཕྲག་བརྒྱའི་ཞིང་། །རྡུལ་སྙེད་སངས་རྒྱས་མཐུ་དཔུང་ཀུན་འདུས་པས། །རྫོགས་ལྡན་དགའ་སྟོན་དེང་འདིར་འགྲོ་ལ་སྩོལ། །འཇིག་རྟེན་ཀུན་དུ་དུས་ཀྱི་ཆད་པའི་མུན། །ཐུགས་རྗེ་ཆེན་པོའི་ཉི་མས་རབ་བསལ་ཏེ། །ཕུན་ཚོགས་བཀོད་པ་རྒྱ་མཚོའི་གཟུགས་སྣང་ཀུན། །འདྲེན་བྱེད་ཡུལ་གྱི་གཟིགས་མོར་མཚར་གྱུར་ཅིག །ཡུམ་བུ་བླ་སྒང་གི་སྙན་དར་ཞལ་ཡིག་ཕན་བདེའི་དཔལ་འབར། སྭ སྟི པྲ ཛཱ བྷྱ ཿ ཀུན་བཟང་རིགས་གསུམ་སྒྱུ་དྲའི་ཐུགས་རྗེའི་གར། །གངས་ཅན་འགྲོ་ལ་རྗེས་ཆགས་སྤྲུལ་པའི་ཞིང་། །བྱེ་བ་ཕྲག་བརྒྱའི་ཡོན་ཏན་ཀུན་ཚང་བའི། །ཕན་བདེ་དཔལ་གྱིས་ས་གསུམ་ཁྱབ་གྱུར་ཅིག ། ས་ཕག་ཧོར་ཟླ་གཉིས་པའི་ཚེས་བཅུ་གཅིག་ནས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་དཔལ་ལྡན་འདོད་ཁམས་དབང་ཕྱུག་མའི་བསྐང་མདོས་འབུམ་ཐེར་བཙུགས་སྐབས་ཕུལ་བའི་སྙན་དར་ཞལ་ཡིག་འཆི་མེད་འདུད་རྩིའི་བུམ་བཟང་། གཡས་སུ་འཁྱིལ་ལོ་ཕུན་སུམ་ཚོགས་པའི་དུང་། རྨད་བྱུང་སྙན་པའི་སྒྲ་དབྱངས་སྣ་བའི་བཅུད། །ལུས་སེམས་ཀུན་དགར་སྤྱོད་པའི་བདེ་སྐྱིད་ཀྱི། །རྫོགས་ལྡན་སྒོ་འཕར་ཕྱེ་ཞིག་དམག་ཟོར་ལྷ། །རི་རབ་གླིང་བཞི་ཉི་ཟླ་འདོད་ཡོན་གྱི། །ཟག་མེད་མཁོ་རྒུའི་གཏེར་མཛོད་(༥༦བ)
མཆོད་པའི་སྤྲིན། །སྲིད་ཞིའི་དཔལ་འབྱོར་ཡོན་ཏན་ཀུན་ཚང་བ། །སྒོ་ལྔ་དགྱེས་པ་བསྐྱེད་ཕྱིར་འབུལ་བྱེད་ན། །འཇིགས་ཆེན་བརྒྱད་སོགས་བརྟན་གཡོའི་ཉེར་འཚེའི་མུན། །མཐུ་སྟོབས་ཉིན་བྱེད་བྱེ་བའི་གཟི་བྱིན་གྱིས། །ཕ་མཐར་བསྐྲད་དེ་ཕན་དང་བདེ་བ་ཡི། །རབ་དཀར་སྣང་བས་ཀུན་ཏུ་ཁྱབ་པར་མཛོད། །བསྐལ་པར་འགྲན་པའི་ཚེ་དང་བསོད་ནམས་ཀྱི། །ས་བོན་གསེར་སྒོང་ཐུགས་རྗེའི་མངལ་ཡངས་པོར། །སྨོན་པའི་ཆོས་ནོར་འདོད་པ་ཐར་པའི་སྡེའི། །ཞལ་བཟང་ཁོང་ནས་དགོད་པའི་འཛུམ་ལྡན་མཛོད། །མཆོག་ཐུན་དངོས་གྲུབ་རིན་ཆེན་འབྱུང་བའི་གནས། །རྣམ་བཞིའི་འཕྲིན་ལས་ཡོལ་མེད་རླབས་འཕྲེང་ཅན། །སྲིད་གསུམ་བདག་མོ་ཟླ་བའི་མ་མ་ལས། །འདོད་དོན་བདུད་རྩིའི་བུམ་བཟང་ཐོབ་གྱུར་ཅིག །ས་ཕག་ནག་པ་ཟླ་བའི་བརྒྱད་གཏོར་གྱི་དུས་ཞིང་སྐྱོང་དབང་པོར་ཕུལ་པའི་སྙན་དར་ཞལ་ཡིག་ཁྲག་འཐུང་རོལ་གར། མི་བཟད་དུག་ལྔ་ཟ་ལ་ཉེར་རྔམས་པའི། །བྱམས་དང་སྙིང་རྗེ་དགའ་བ་བཏང་སྙོམས་ཞལ། །ཆོས་ཀྱི་དབྱིངས་ནས་གདངས་པའི་ཧེ་རུ་ཀ། དགྲ་བགེགས་གཤེད་དུ་ཞིང་སྐྱོང་སྟོབས་འཕྲོག་དབང་། །འཇིགས་རུང་དུར་ཁྲོད་མྱུལ་བ་བྲམ་ཟེའི་གཟུགས། །རྩ་གསུམ་འཁོར་ལོ་བཞི་དབུས་གདོང་བཞི་པ། །ལྷན་ཅིག་སྐྱེས་པའི་ཡེ་ཤེས་ནག་པོ་ཆེ། །རང་སེམས་མགོན་པོའི་རང་ཞལ་མཇལ་ལས་སུ། །འོན་ཏེ་ཀུན་རྫོབ་སྣང་བའི་ལྷ་ལམ་ངོས། །ཕྱི་ནང་གསང་བའི་མཆོད་སྤྲིན་རབ་འཁྲིགས་ལས། །ཞི་རྒྱས་དབང་དང་མངོན་སྤྱོད་ཆར་ཆེན་པོས། །འདོད་དོན་(༥༧ན)
མྱུ་གུའི་འབྲས་བཟང་རབ་སྨིན་མཛོད། །ས་སྐྱོང་ཕྱག་མཛོད་བསོད་ནམས་རབ་བརྟན་དུས་ཀྱི་ཆོས་ཉིད་དུ་གྱུར་པའི་ཚེ་ར་ས་འཕྲུལ་སྣང་། ར་མོ་ཆེ། རང་བྱོན་འཕགས་པ་མཆེད། བསམ་ཡས། ཁྲ་འབྲུགར་སྒྲེང་། དགའ་ལྡན། རྒྱལ་མེ་ཏོག་ཐང་རྣམས་སུ་བླ་བྲེ། སྙན་ཤལ་སོགས་ཕུལ་བའི་ཞལ་ཡིག་ཐར་པའི་ཁང་བཟང་འཛེག་པའི་ཐེམ་སྐས། ཤཱཀྱ་མུ་ནི་བསྙེན་སྲིད་མེད་པ་ཐུགས་རྗེའི་དྲི་བསུང་གིས། །འགྲོ་འདིའི་རྒུད་ཚོགས་ཚ་གདུང་རབ་བཅིལ་བ། །སྐུ་བཞིའི་སྡོང་བུ་དར་བབས་ཉི་མའི་གཉེན། །སྔོན་མེད་ཙནྡན་ལྗོན་པ་ཤཱཀྱའི་རྒྱལ། །མཚན་གྱི་གཟིས་ཀྱང་འཁོར་མུན་མིག་སྨན་མདོག །མཐར་བྱེད་ཕན་བདེའི་སྣང་བ་འོད་། འཁོར་བའི་ཕ་མཐའ་འཆིང་ནུས་སྤྱན་གྱི་དཀྱུས། །རིང་པོས་ཁམས་དང་བསམ་པ་ལེགས་གཟིགས་ནས། །ཀུན་འཇུག་འཕྲིན་ལས་ཕྱག་གིས་ངེས་ལེགས་གྲོང་། །སེམས་ཅན་མཐའ་དག་འཁྲིད་པའི་གཏམ་དེ་སྙན། །དེ་ཕྱིར་ཕན་བདེའི་དབུ་བ་དཀར་པོ་ཡི། །བདོག་པ་མུ་ཏིག་ཕྲེང་མཛེས་ལུས་ཕྲའི་མངལ། །འདི་དང་གཏན་གྱི་འདུན་མའི་ཁུར་ཆེན་པོས། །དུད་པའི་འབྲས་བཟང་ཡོངས་སུ་སྨིན་པར་མཛོད། །བསོད་ནམས་རབ་བརྟན་གྲངས་མེད་སྐྱེ་བ་རུ། །དཀར་མིན་ལས་ངན་མ་དག་རྙོག་མ་ཀུན། །དམིགས་མེད་ཐུགས་རྗེ་ནོར་བུ་ཀེ་ཏ་ཀས། །རབ་དྲུང་གཏན་བདེའི་གཟུགས་བརྙན་གསལ་གྱུར་ཅིག །ར་མོ་ཆེ་བཟང་པོའི་བསྐལ་པ་འདི་ལ་གྲགས་ཅན་གྱི། །རྣམ་(༥༧བ)
འདྲེན་གསུམ་པས་ཡེ་ཤེས་གཟི་ཆེན་འོད་། །འབར་མཛད་ཟས་གཙང་སྲས་ཀྱི་སྐུའི་སྣང་བརྙན། །གངས་ཅན་སྐྱེ་རྒུའི་བསོད་ནམས་ཞིང་གི་དཔྱིད། །ཀུན་ཁྱབ་ཐུགས་རྗེ་ཆེ་ལྡན་དངར་པའི་དྲི། །གཅིག་ཏུ་དད་པའི་མ་ལ་ཡ་རླུང་གིས། །དྲངས་ཚེ་ཉམ་ཐག་མཁའ་མཉམ་འགྲོ་ཀུན་གྱི། །ལས་ཉོན་འབྲས་བུར་བཅས་པའི་གདུང་སེལ་ཤོག །མི་དགེའི་ལས་ལམ་བཅུ་ཡི་ར་བ་རུ། །སྒོ་གསུམ་འབད་པས་བསོད་ནམས་མིན་པའི་གར། །རབ་བསྒྱུར་སྡིག་ལྟུང་མཁྱེན་བརྩེ་ནུས་པའི་ཆུས། །ཡོངས་འཁྲུད་མཐོ་རིས་ཀླུང་ཆེན་འདྲེན་དུ་གསོལ། །གོ་ལ་གཡས་དང་ཉི་ཟླ་གཡོན་འཁོར་བའི། །ངང་ཚུལ་འདི་ལས་ཅུང་ཟད་མི་གཡོ་ན། །སེམས་ཅན་འདྲེན་པར་ཐུགས་བསྐྱེད་སངས་རྒྱས་ཀྱི། །དམ་བཅའ་ལས་འགོང་ནམ་མཁའི་པདྨོ་བཞིན། །ཞི་བདེར་གཞོལ་ནས་བཏང་སྙོམས་ལྷུར་ལེན་ན། །ཉན་རང་དག་ལས་རྫོགས་སངས་རྒྱས་རྣམས་ཀྱི། །ལྷག་པའི་འཕྲིན་ལས་གཞུང་ལུགས་མང་པོ་རུ། །བཤད་པ་གཞན་བློ་འབྲིད་པའི་གཏམ་དུ་ཟད། །ཆོས་རྣམས་མཐའ་དག་གཟིགས་པའི་སྤྱན་རས་ཀྱིས། །ཆེས་ཆེར་སྙིགས་པའི་འགྲོ་རྣམས་རབ་བཙའ་བས། །སྔོན་བྱས་དགེ་ཚོགས་ས་བོན་ལེགས་སྨིན་པ། །བདེ་སྐྱིད་འཁྲི་ཤིང་ལོ་འདབ་འཕེལ་བར་ཤོག །བསོད་ནམས་ཕུང་པོ་མངོན་པར་འདུ་བྱས་བས། ཁྲིམས་གཉིས་རབ་ཏུ་བརྟན་པ་མི་ཡི་བདག །བྱིན་རླབས་མཐོ་རིས་ཆུ་བོས་ལས་ཉོན་ཀུན། །སྦྱངས་ཏེ་ཐར་པའི་རྒྱལ་མཚན་རྩེར་འགོད་ཤོག །རང་བྱོན་ལྔ་ལྡན། སངས་རྒྱས་རྣམས་ཀྱི་བརྩེ་(༥༨ན)
བ་ཀུན། །ཕྱག་ན་པདྨའི་གཟུགས་ཅན་དུ། །ཤར་བ་འཕགས་མཆོག་སྙིང་རྗེའི་ལྷ། །ཐུགས་རྗེས་རྒྱུད་ལྔའི་འགྲོ་རྣམས་དྲོངས། །མ་དག་སྙིགས་པའི་ལྔ་བརྒྱ་པ། །ཁྱད་པར་སཱ་ལའི་ཡུལ་ལྗོངས་ཀྱི། །དཔུང་གཉེན་ལྷ་གཅིག་འཇིག་རྟེན་དབང་། །ཁྱོད་ལས་གཞན་པ་དམིགས་སུ་མེད། །བསྟོད་དང་གཤེ་ལ་ཆགས་སྡང་གི། །ཀུན་རྟོག་འཆིང་བ་ཉེར་བཅད་ཀྱང་། །སྙིང་ནས་མོས་པ་ལྷུར་ལེན་རྣམས། །རྗེས་འཛིན་སངས་རྒྱས་ཀུན་གྱི་གཤིས། །རང་བྱོན་ལྔ་ལྡན་སྤྱན་གྱི་མེས། །རྒུད་པའི་མདའ་ལྔ་པ་བསྲེགས་ནས། །སྐྱེ་རྒུའི་ལས་ལམ་རི་སྲས་མངལ། །ལེགས་བྱས་བཅུད་ཀྱི་ཁུར་ལྕི་མཛོད། །དུས་གསུམ་བསགས་པའི་བསོད་ནམས་ཀྱི། །ནོར་བུའི་ཐེམ་སྐས་རབ་བརྟན་པར། །ཉེ་བར་འཛེགས་ཏེ་གྲུ་འཛིན་གནས། །འདབ་སྟོང་དབུས་སུ་སྐྱེ་བར་ཤོག །སྐྱེ་བསམ་ཡས་བྱང་ཆུབ་ཆེན་པོར་རྒ་ན་འཆི་ཆུ་སྲིན་འབྱུང་གནས་ཆེ། །འཁོར་བའི་མཚོ་ལས་འགྲོ་བ་རྣམས་སྒྲོལ་ཁུར། །རབ་དཀར་ལྷག་བསམ་མཐུ་ལས་ཉེར་བསྐྲུན་པ། །སངས་རྒྱས་ཞེས་བྱའི་མཚན་གྱི་པི་ཝཾ་རྒྱུད། །དད་པའི་གཞུ་ཡིས་བསྐུར་ལས་སྙན་འགྱུར་སྒྲས། །ངེས་པར་ལེགས་པའི་ཆུ་གཏེར་ཆེན་པོའི་ཀློང་། །མི་ཟད་ཉམ་ཐག་འཁོར་བའི་གཟིངས་བཤིག་ཚེ། །མྱང་འདས་ཀླུ་དབང་གྲོང་དུ་བདེ་བར་འཇུག །སེམས་ཅན་ཀུན་སྒྲོལ་དམ་བཅའ་རྫོགས་མིན་ན། །ལྕགས་གཡས་རང་ཟ་འཁྲུལ་བའི་སྐྱེ་བོ་རྣམས། །སྡུག་(༥༨བ)
བསྔལ་གསུམ་གྱིས་མནར་ལས་དབུགས་དབྱུང་སྟེ། །བདེ་སྐྱིད་དགའ་སྟོན་ལ་སྦྱོར་ཟས་གཙང་སྲས། །ཟླ་བ་གཅིག་གི་སྣང་བརྙན་ཆུ་ཡི་སྣོད། །ཀུན་ལ་འཆར་བ་ཇི་བཞིན་ཐུགས་རྗེ་ཆེ། །སེམས་ཅན་རྣམས་ལ་འཇུག་པ་མཐོ་དམའ་དང་། །ཉེ་དང་རིང་བའི་གོ་སྐབས་ག་ལ་ཞིག །དེ་ཕྱིར་ཐུགས་རྗེ་ཆེན་པོའི་ལྕགས་ཀྱུ་ཡིས། །བསོད་ནམས་དཔུང་པས་ནོར་འཛིན་སྐྱོང་བ་གང་། །ཐར་པའི་ཁང་བཟང་དམ་པར་ལེགས་དྲངས་ཏེ། །རླབས་ཆེན་སྤྱོད་མཛད་རྒྱལ་བའི་སྲས་གྱུར་ཅིག །ཁྲ་འབྲུག་སངས་རྒྱས་དངོས་སུ་བལྟ་ལ་སྐལ་ངན་ཅན། །འགྲོ་བའི་མིག་ལ་འཆར་བའི་སྒྱུ་མའི་གར། །རྟེན་དང་བརྟེན་པར་བཅས་པའི་ཞིང་ས་ལ། །བསོད་ནམས་མྱུ་གུ་དར་བབས་འབྲས་བུས་དུད། །དགེ་བའི་ཆུ་ཐིགས་བྱང་ཆུབ་རྒྱ་མཚོ་དང་། །རོ་གཅིག་ཟད་མི་ཤེས་པའི་གན་མཛོད་ཀྱིས། །སྲིད་ཞིའི་དབུལ་ཕོངས་མ་ལུས་དྲུང་འབྱིན་པ། །བླ་མེད་ཡེ་ཤེས་འདོད་རྒུར་སྤྱོད་གྱུར་ཅིག །འདོད་ཁྲོ་གཏི་མུག་བུད་ཤིང་གིས་སྦར་པའི། །གནས་ངན་བྱིན་ཟའི་ཕུང་པོ་ཆེར་འབར་བ། །རྣམ་སྨིན་བཅོས་སུ་དཀའ་ཞེས་ཡལ་འདོར་ན། །རླབས་ཆེན་སྤྱོད་པའི་དམ་བཅའ་མིང་དུ་ཟད། །བླ་མེད་ཡེ་ཤེས་སྨན་གྱི་ལྗོན་པ་ཡིས། །སྲིད་པའི་ནད་བརྒྱ་མ་ལུས་རབ་སེལ་བ། །སྟོབས་བཅུ་མངའ་བརྙེས་ཀུན་གྱི་གནས་ལུགས་ཏེ། །འདི་ལ་མཚར་དུ་འཛིན་པ་བྱིས་པའི་བློ། །དག་པའི་སྨོན་ལམ་གོམ་པ་གཅིག་གིས་ཀྱང་། །སྐུ་(༥༩ན)
གསུམ་ས་ཆེན་རང་གིར་བྱེད་ནུས་པ། །བདེ་ལེགས་དཔལ་གྱི་བེའུ་སྙིང་ཁ་རུ། །འཁྱིལ་པའི་རི་མོ་རྟག་ཏུ་གསལ་གྱུར་ཅིག །བྱིན་རླབས་མ་དྲོས་ཡངས་པའི་མཚོ་ཆེན་ལས། །མི་བདག་སྐྱེ་བར་སྡེ་བཞི་ཉལ་འགྲོའི་རྒྱུན། །ལེགས་བབས་མ་རིག་དྲི་མ་ཉེར་འཁྲུད་པའི། །སྐལ་ལྡན་ཤིང་རྟའི་ཁེངས་པ་ཐུང་ངུར་ཤོག །རྭ་སྒྲེང་ཇོ་བོ་འཇམ་དཔལ་རྡོ་རྗེ། འཇམ་དཔལ་མཁྱེན་པའི་རྡོ་རྗེའི་མཚོན་རྣོན་པོས། །སྒྲིབ་གཉིས་སྲོག་རྩ་བཅད་པས་དམར་བའི་ཁྲག །མཚམས་སྤྲིན་གཞོན་ནུའི་མདངས་སུ་ཤར་བའི་སྐུ། །དཀྱིལ་འཁོར་འཁོར་ལོའི་མགོན་པོ་ཉེར་དགོངས་ཀྱེ། །གྲིབ་མ་ལྟར་འབྲངས་དཀར་ནག་ལས་ལམ་གྱི། །བདེ་སྡུག་སྒྱུ་མའི་སྣང་བས་ཉེར་བསླུས་འགྲོ །འཁྲུལ་མེད་རང་ངོ་འཕྲོད་ནས་ངེས་ལེགས་ལམ། །ངོ་མཚར་གཏན་བདེའི་ཁང་བཟང་དམ་པར་དྲོངས། །གཉིས་འཛིན་ལས་རླུང་ཉི་མ་ཟླ་བའི་འགྲོས། །དྷཱུ་ཏཱི་སྒྲ་གཅན་ལམ་དུ་ལེགས་བཅུག་སྟེ། །ལྔ་ལྡན་འཁོར་ལོའི་མདུད་གྲོལ་ཟུང་འཇུག་པ། །འཇའ་ལུས་རྡོ་རྗེའི་འོད་སྐུར་སྨིན་གྱུར་ཅིག །རྣམ་འདྲེན་ཀུན་གྱིས་གསུངས་མིན་ཐེག་པའི་རྩེ། །ཤིན་ཏུ་རྙེད་དཀར་གསང་ཆེན་ཉེ་བའི་ལམ། །མཐའ་དང་ཚད་དུ་གཞལ་དཀའི་སྐྱེ་བ་རུ། །མི་འབྲལ་སྙིང་གི་ཐིག་ལེར་སྐྱོང་བར་ཤོག །གནས་སྐབས་སུ་ཡང་ཇོ་བོ་ཡབ་སྲས་ཀྱི། །རིང་ལུགས་བཀའ་གདམས་དྲི་མེད་བསྟན་པ་ལ། །མི་རྗེ་བསོད་ནམས་རབ་ཏུ་བརྟན་པ་གང་། །ལེགས་ཞུགས་(༥༩བ)
ཐོས་བསམ་སྒོམ་ལ་གཞོལ་བར་ཤོག །དགའ་ལྡན་དངུལ་གདུང་། རྣམ་པ་ཐམས་ཅད་མཁྱེན་པའི་རྒྱ་མཚོ་ཆེ། །བརྩེ་ཆེན་ལྷག་བསམ་རི་དབང་གིས་བསྲུབས་ལས། །བསླབ་གསུམ་གསེར་སྦྱངས་དྲ་བས་ལེགས་སྤྲས་ཅན། །སྔོན་མེད་བཤེས་གཉེན་ས་སྲུང་བཙོང་ཁ་པ། །མ་དག་དམན་བློར་ཆགས་བྲལ་ངུར་སྨྲིག་འཆང་། །ངེས་དོན་ཡབ་ཡུམ་ཟུང་འཇུག་སྒྱུ་མའི་སྐུར། །བཞེངས་གནས་དགའ་ལྡན་རྣམ་པར་རྒྱལ་བའི་གླིང་། །ས་ལ་བརྟེན་པའི་འོག་མིན་གཉིས་པ་བཞིན། །རླུང་སེམས་འོད་སྐུར་སྨིན་པ་འཁོར་ལོའི་མགོན། །བཞིན་ལག་རྣམ་པར་ཤར་ལ་མཚར་ཅི་ཆེ། །ལྔ་བརྒྱའི་གཉེན་དུ་སྦྱངས་གཞིའི་ཡིད་བཞིན་གདུང་། །ལེགས་བཞུགས་མཆོད་སྡོང་བསོད་ནམས་རྒྱ་མཚོའི་ཞིང་། །ཀུན་བཟང་མཆོད་ཚོགས་སྤྲིན་ཕུང་སྤྲོ་བའི་བློ། །ཕུང་པོ་གཅིག་ཏུ་དཀར་བའི་ལེགས་བྱས་ཀྱི། །མཁའ་མཉམ་ལུས་ཅན་ཕན་དང་བདེ་བ་ལ། །རབ་སྦྱོར་སྐལ་པ་བཟང་པོ་ཐོབ་པར་ཤོག །རྨད་བྱུང་བཀོད་པའི་ཞིང་དུ་མགོན་པོ་ཁྱོད། །བདེ་གཤེགས་སེང་གེའི་ང་རོའི་སྐུར་བསྟན་པའི། །དྲུང་དུ་བསོད་ནམས་རབ་ཏུ་བརྟན་པ་གང་། །སྐྱེས་ཏེ་ཐེག་ཆེན་ཆོས་ཀྱི་ཚིམ་བྱེད་ཤོག །རྒྱལ་བྱམས་ཆེན། རིས་མེད་ཀུན་ལ་བྱམས་པའི་དཔུང་ཆེན་པོས། །བདུད་བཞིའི་གཡུལ་ངོ་ཕམ་མཛད་མི་ཕམ་མགོན། །རྣམ་འདྲེན་དམ་པ་ཏོག་དཀར་རྒྱལ་ཚབ་ཏུ། །དགའ་ལྡན་ཆོས་ཀྱི་ཁྲི་ལ་ལེགས་བཞུགས་ཀྱང་། །དགེ་བཅུ་རྫོགས་(༦༠ན)
ལྡན་འཛམ་གླིང་བརྒྱད་ཁྲིའི་ཚེར། །བྱང་ཆུབ་ཤིང་དྲུང་མངོན་པར་སངས་རྒྱས་པའི། །ཐེག་ཆེན་ཆོས་ཀྱིས་སྲིད་འཁྱམས་སྐྱེ་རྒུའི་སྲོག །གཏན་བདེར་འཚོ་བའི་བདུད་རྩིས་ཚིམ་པར་ཤོག །མགོན་ཁྱོད་ཡིད་དམ་བཅས་པའི་གཟུང་སྔགས་དག །ཁ་བཏོན་བྱས་དང་རྣ་བར་ཐོས་ཙམ་ཡང་། །རྗེས་འཛིན་ཞལ་མཆེས་རི་མོ་རྡོ་བའི་ངོས། །ལེགས་བྲིས་དམ་པའི་ངང་ཚུལ་སུ་ཡིས་འགོད། །ཁྱོད་ཞལ་འཛམ་བུའི་གསེར་སྦྱངས་རྡུལ་བརྩེགས་རི། །ཉི་འོད་འབུམ་གྱིས་འཁྱུད་པས་བསྒྲུན་མིན་པ། །མངོན་སུམ་ལྟ་བའི་སྐལ་པ་བཟང་པོ་ལ། །གྲངས་མེད་ལུས་ཅན་མཐའ་དག་སྤྱོད་པར་ཤོག །ཐེག་ཆེན་རིགས་སད་དབང་རྣོན་གདུལ་བྱ་ལ། །ཚངས་པའི་དབྱངས་ཀྱིས་ཆོས་འཁོར་བསྐོར་བ་ཡི། །འཁོར་དུ་བསོད་ནམས་རབ་བརྟན་རྫུས་སྐྱེས་ཏེ། །འདྲེན་མཆོག་ཁྱོད་ཀྱི་སྲས་སུ་འགྱུར་བར་ཤོག །རང་བྱོན་འཕགས་པ་མཆེད། མགོན་ཁྱོད་ཐུགས་རྗེའི་སྐྱ་རེང་གིས། །དྲངས་པའི་བདེ་སྐྱིད་ཉིན་མོར་བྱེད། །ཤར་ཚེ་སྙིགས་མར་སྤྱོད་པ་ཡི། །སྨག་རུམ་བསངས་པ་ཆོས་ཉིད་དེ། །འདྲེན་བྱེད་གཟིགས་པ་ལྷུང་ཙམ་གྱིས། །སྲིད་པའི་འཁོར་ལོ་ཆ་ལྔ་པ། །བདར་བར་བྱེད་ན་རྗེས་བཟུང་ཚེ། །ཞི་བའི་ལམ་དེར་ཅིས་མི་བགྲོད། །དེ་ཕྱིར་རང་བྱུང་འཕགས་པ་མཆེད། །མཐོང་བས་དོན་དང་ལྡན་པ་ཡིས། །མཁའ་མཉམ་མར་བྱུང་སེམས་ཅན་ཀུན། །བདེ་བ་ཅན་དུ་འཁྲིད་པར་མཛོད། །བཀོད་མཛེས་རིན་ཆེན་ལས་(༦༠བ)
གྲུབ་པའི། །འོད་དཔག་མེད་མགོན་ཞིང་ཁམས་སུ། །འདབ་སྟོང་བཞད་པའི་ཟེའུ་འབྲུ་ལས། །བསོད་ནམས་རབ་བརྟན་སྐྱེ་བར་ཤོག ། གྲྭ་ཚོང་འདུས་ཀྱི་གོས་འཕན་ཞལ་ཡིག་བདུད་ལས་རྣམ་རྒྱལ། བདུད་སྡེའི་གཡུལ་ལས་རྒྱལ་པའི་རང་རྟགས་ཀྱི། །བ་དན་སྲིད་པའི་རྩེ་མོར་རབ་བསྒྲེངས་པས། །ལྷ་ཆེན་དགྱེས་པའི་ཟླ་ཞལ་འཆར་བཞིན་དུ། །རྣམ་བཞིའི་འཕྲིན་ལས་དགའ་སྟོན་ལྷུན་གྱིས་གྲུབ། །ཕུན་སུམ་ཚོགས་པའི་འདོད་པ་མ་ལུས་པ། །འཇོ་པའི་ཡིད་བཞིན་དབང་གི་རྒྱལ་པོ་ཆེ། །དཔག་བསམ་ཡོངས་འདུའི་སྙེ་མ་གཡུར་ཟ་བའི། །བདེ་སྐྱིད་རོ་བརྒྱའི་དཔལ་ལ་སྤྱོད་པར་མཛོད། །ས་ཕག་ཧོར་ཟླ་བརྒྱད་པའི་ནང་དུ་མཆོད་དཔོན་བློ་བཟང་མཐུ་སྟོབས་བསམ་ཡས་སུ་གནོད་སྦྱིན་ཆེན་པོར་སྤྱན་གཟིགས་འབུལ་པར་བཏང་སྐབས་བསེ་འཕག་སྨུག་ཆུང་གི་སྙན་དར་ཞལ་ཡིག་བསམ་དོན་ལྷུན་འགྲུབ། དྲི་མེད་རབ་གསལ་སྤྱན་རས་ཀྱིས་གཟིགས་ལ། །ལྷ་ཆེན་སྙན་གྱི་དབང་པོ་ལེགས་པར་གསོན། །བཅོལ་པའི་ལས་རྣམས་རྒྱ་མཚོའི་རླབས་ཕྲེང་ལྟར། །དུས་ལས་ཡོལ་བ་མེད་པར་མཛོད་ཅིག་ཀྱེ། །སྔོན་ཚེ་དམུ་དང་གནོད་སྦྱིན་བཤོས་པའི་སྲས། །སྡེ་བརྒྱད་དབང་ཕྱུག་པེ་ཧར་སྡེ་ལྔ་པོ། །འབའ་ཏ་ཧོར་གྱི་ཡུལ་ནས་གངས་ཅན་འདིར། །གཙུག་ལག་སྲུང་མར་རིགས་འཛིན་པདྨས་བསྐོས། །མ་གཡེལ་དམ་ཚིག་གཉན་པོ་ཐོད་ཆིངས་ལ། །དགྲ་དང་བགེགས་ཀྱི་མཐུ་སྟོབས་ནུས་པ་ཆོམས། །བདག་སོགས་ཚེ་རིང་ནད་མེད་མཐུན་པའི་རྐྱེན། །བསམ་དོན་(༦༡ན)
མ་ལུས་ལྷུན་གྱིས་འགྲུབ་པར་མཛོད། །རིགས་དང་དཀྱིལ་འཁོར་ཀུན་གྱི་ཁྱབ་བདག་འ་ཞའི་རྡོ་རྗེ་འཛིན་པ་མགོན་པོ་བསོད་ནམས་མཆོག་ལྡན་ཞིང་འདིའི་སྐུའི་བཀོད་པ་བསྡུས་པའི་ཚེ་སྐུ་གདུང་རིན་པོ་ཆེར་གོས་ཡུག་གི་སྙན་ཤལ་ཕུལ་བའི་ཞལ་ཡིག་དགྱེས་མཛད་སྒྱུ་འཕྲུལ་གར་མཁན། མཁའ་ལྟར་མཚན་མ་ཀུན་གྱིས་ཡོངས་དག་པར། །མི་དམིགས་ཆོས་སྐུ་བདེ་བ་ཆེན་པོའི་ཀློང་། །གཟུགས་སྐུའི་བཀོད་པ་དབྱེར་མེད་རོ་གཅིག་པ། །བརྗོད་བྲལ་གདོད་མའི་རང་ཞལ་ངང་ཉིད་ནས། །ཚད་མེད་རྣམ་བཞིའི་ལྷ་མོས་བསྐུལ་བ་ལས། །དགྱེས་མཛད་རྡོ་རྗེ་ཞལ་བརྒྱད་ཧེ་རུ་ཀའི། །དཀྱིལ་འཁོར་འཁོར་ལོའི་མགོན་པོར་རབ་བཞེངས་ཏེ། །སྒྱུ་འཕྲུལ་གར་གྱིས་བསོད་ནམས་ཞིང་སྤེལ་ཤོག །མཁའ་སྤྱོད་གནས་ཀྱི་ལྷ་མོས་འོག་མིན་དུ། །གཤེགས་པར་བསྐུལ་ཡང་བྱེ་བ་ཕྲག་བརྒྱའི་ཞིང་། །དག་དང་མ་དག་འགྲོ་བ་འདྲེན་པ་ཡིས། །རླབས་ཆེན་སྤྱོད་པའི་བཞེད་པ་ཡོངས་འགྲུབ་ཤོག །སྨིན་གྲོལ་ཟབ་དང་རྒྱ་ཆེ་དམ་པའི་ཆོས། །ལེགས་སྟོན་རིགས་ཀུན་ཁྱབ་བདག་རྡོ་རྗེ་འཛིན། །བཤེས་གཉེན་དམ་པའི་མགོན་གྱིས་སྐལ་བཟང་གི །གདུལ་བྱ་མཐའ་དག་རྗེས་སུ་འཛིན་གྱུར་ཅིག །གདོད་ནས་དག་པའི་རང་གི་སེམས་ཉིད་འདི། །རྡོ་རྗེའི་སློབ་དཔོན་ངོ་བོར་ཡོངས་ཤེས་ནས། །ཚད་མ་བཞི་ལྡན་སྙན་བརྒྱུད་ལམ་ཟབ་མོས། །ཟུང་འཇུག་བདེ་ཆེན་དཔལ་ལ་སྤྱོད་པར་ཤོག །འཕྱོང་རྒྱས་རྫོང་རི་བ་བློ་བཟང་པདྨ་བྲོ་ཚལ་པའི་དུས་ཕན་བདེ་ལེགས་བཤད་གླིང་དུ་(༦༡བ)
གྲྭ་ཇའི་ཐོག་འབུལ་རྒྱུའི་སྙན་དར་ཁ་ཡིག་དགོས་ཚུལ་ལྟར་བྲིས་པ་ཟུག་ངུ་རྣམ་གྲོལ། འདོད་ཁམས་བདག་མོ་བེག་རྩེ་ལྕམ་དྲལ་སོགས། །བསྟན་སྲུང་དམ་ཅན་རྒྱ་མཚོར་བཅས་པ་ཡིས། །བློ་གསལ་སྐལ་བཟང་པདྨའི་མིང་ཅན་གྱི། །ནད་གདོན་ཀུན་ཞི་ཚེ་དཔལ་རྒྱས་པར་མཛོད། །ས་ཕག་ལོ་ཞང་སྒོ་ཞང་ཚན་གཉིས་ཀྱིས་མ་རུང་པའི་བསམ་སྦྱོར་བརྩམས་པའི་རམས་འགྲོ་བཀྲས་སྒང་པ་སོགས་གཙང་པའི་དྲུང་གཟིམས་ཁ་ཡར་གྱིས་བཏེགས་ནས་སྡེ་གཟར་ལངས་པའི་ཚེ་མངོན་སྤྱོད་ཀྱི་ལས་སྦྱོར་བགྱིས་པ་རྣམས་དོན་ལྡན་གྲུབ་པའི་ཚེ་ཕན་བདེ་ལེགས་བཤད་གླིང་པའི་ཚོགས་སུ་ཡི་དམ་ཆོས་སྲུང་སྤྱི་བྱེ་བྲག་ལ་གཏང་རག་ཕུལ་པའི་སྙན་དར་ཞལ་ཡིག་གཡུལ་ལས་རྣམ་པར་རྒྱལ་བའི་རུ་མཚོན། འཇམ་དཔལ་དཔའ་བོ་དུས་ཀྱི་དགྲ་ཆེན་པོར། །འཁོར་འདས་ཕྱག་རྒྱ་ཟིལ་གྱིས་གནོན་པའི་གར། །བཅོམ་ལྡན་གཤིན་རྗེའི་གཤེད་པོར་རྣམ་རོལ་པའི། །ཚེ་བདག་ནག་པོ་དཀྱིལ་འཁོར་འཁོར་ལོའི་མགོན། །བཀའ་སྡོད་ཟོར་དང་མནན་པའི་རྣ་ཆ་ཅན། །འཇོམས་བྱེད་ཆེན་པོ་འཆར་ཀ་ནག་པོ་དང་། །ཀིང་ཀང་དམར་ནག་ལས་ཀྱི་མཐའ་སྡུད་པ། །ཀླུ་བདུད་ཆེན་པོ་ནག་པོ་ཏི་པ་ཙ། །ཁྱད་པར་ལྷོ་ཕྱོགས་རིམ་པ་བདུན་གྱི་འོག །གཤིན་རྗེའི་གྲོང་ཁྱེར་ལྕགས་མཁར་སྒོ་མེད་ནས། །འཆི་བདག་ལས་གཤིན་པེ་ཝ་ས་ཏཱ་ཆེ། །སྲིད་གསུམ་བླ་སྲོག་འཕྲོག་པའི་ཕོ་ཉར་བཅས། །དཔལ་ལྡན་སྔགས་སྲུང་ཐང་ལྷ་འབར་བ་རྩལ། །ཁྱབ་འཇུག་སྟག་ཞོན་བདུད་མགོན་སེང་གེའི་གདོང་། །རྡོ་རྗེ་ལེགས་པ་མཐུ་ཆེན་སྡེ་བཞི་སོགས། །ཆོས་དང་གཏེར་(༦༢ན)
གྱི་སྲུང་མའི་ཚོགས་རྣམས་ལ། །སྔར་བཅོལ་གྲུབ་པའི་གཏང་རག་གཉན་པོ་དང་། །ད་འཆོལ་འཕྲིན་ལས་སྒྲུབ་པར་བྱེད་པའི་རྟེན། །དམ་རྫས་རྒྱན་ལྡན་གཏོར་མ་རི་ལྟར་སྤུངས། །སྨན་ཕུད་རཀྟ་རྒྱ་མཚོ་ལྟ་བུར་བསྐྱིལ། །དངོས་སུ་བཤམས་དང་ཡིད་ཀྱིས་སྤྲུལ་པ་ཡི། །ཀུན་བཟང་མཆོད་སྤྲིན་ནམ་མཁའི་ཁྱོན་འགེང་ན། །ལོག་འདྲེན་བསྒྲལ་བས་རབ་དགྱེས་འཛུམ་ཞལ་གྱི། །ངོ་སོ་ཟླ་བཞིན་ལྟ་བུར་གསལ་བྱས་ནས། །གཡུལ་ལས་རྣམ་པར་རྒྱལ་པའི་དགའ་སྟོན་དུ། །དབང་པོ་སྒོ་ལྔ་ཚིམས་ཤིང་དགྱེས་པར་རོལ། །ཆུ་སྲིན་རྒྱལ་མཚན་ཅན་གྱི་སྡེ་བཅོམ་པའི། །རྒྱལ་རྔ་བརྡུང་ཞིང་རུ་མཚོན་མཁའ་ལ་སྒྲོངས། །མིང་རུས་བྲིས་པའི་དམ་ཉམས་དགྲ་བོ་རྣམས། །བདུན་བརྒྱུད་ཚུན་གྱི་ཚེ་སྲོག་དབང་ཐང་ཆོམས། །དམར་ཆེན་སྙིང་གི་ཁྲག་དོན་ཧུབ་ཀྱིས་དྲོངས། །མངོན་སྤྱོད་དྲག་པོའི་འཕྲིན་ལས་མྱུར་དུ་སྒྲུབས། །མ་ཧེའི་ཞལ་ཅན་དཔལ་ལྡན་གཤིན་རྗེ་གཤེད། །བླ་མགོན་དབྱེར་མེད་ཐུགས་རྗེའི་བདག་ཉིད་ཅན། །རྣམ་མང་ཐོས་སྲས་ལས་ཀྱི་གཤིན་རྗེ་གཤེད། །བསྟན་སྲུང་རྒྱ་མཚོའི་སྡེ་དཔོན་རྡོ་རྗེ་གུར། །སྟོབས་འཕྲོག་ལྷ་ཆེན་དྲག་པོ་གདོང་བཞི་པ། །བཀའ་སྡོད་པུ་ཏྲ་མིང་སྲིང་དང་བཅས་པར། །དགྲ་བགེགས་བསྒྲལ་བའི་དགའ་སྟོན་གཏང་རག་དང་། །སླད་ནས་དྲག་སྦྱོར་འཕྲིན་ལས་བསྒྲུབ་པའི་ཆེད། །ཕྱི་ནང་གསང་གསུམ་(༦༢བ)
མཆོད་སྤྲིན་རྒྱ་མཚོར་བཅས། །ས་དང་བར་སྣང་ཁྱོན་ཀུན་རབ་བཀང་སྟེ། །དངོས་བཤམས་ཡིད་ཀྱིས་སྤྲུལ་ནས་འབུལ་བྱེད་ན། །ཟག་མེད་དགྱེས་པ་ཆེན་པོའི་དབྱིངས་སུ་རོལ། །སྨན་རཀ་གཏོར་གསུམ་མཐུན་པའི་དམ་རྫས་རྣམས། །ཏིང་འཛིན་སྔགས་དང་ཕྱག་རྒྱས་རབ་སྤེལ་ནས། །མངོན་སྤྱོད་དྲག་པོའི་འཕྲིན་ལས་བསྒྲུབས་པ་དང་། །སླར་ཡང་སྒྲུབ་པའི་རྟེན་དུ་འབུལ་བྱེད་ན། །སྲིད་གསུམ་བདག་མོ་འདོད་ཁམས་རེ་མ་ཏིས། །བསམ་ངན་སྦྱོར་རྩུབ་འཆང་བྱེད་དགྲ་བོ་རྣམས། །བསོད་ནམས་མངའ་འཐང་བསྣུབས་ལ་ཚེ་སྲོག་ཆོད། །ཐལ་བའི་རྡུལ་དུ་རླག་པའི་འཕྲིན་ལས་མཛོད། ༈ །ཁྲག་གི་ཨརྒྷཾ་དབང་པོའི་མེ་ཏོག་དང་། །ཤ་ཆེན་དུད་པ་ཚིལ་ཆེན་མར་མེ་སྦར། །མཁྲིས་པའི་དྲི་ཆབ་ཤ་རུས་ཞལ་ཟས་བཤམས། །རྐང་གླིང་རོལ་མོ་དམ་རྫས་གཏོར་མ་དང་། །བདུད་རྩིའི་བཏུང་བ་སྤྱན་གཟིགས་མཐུན་རྫས་རྣམས། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ནས། །བེག་རྩེ་ལྕམ་དྲལ་ལས་མཁན་བཤན་པའི་ཚོགས། །སྤྲུལ་པའི་ཆོས་རྒྱལ་གནོད་སྦྱིན་ཙི་དམར་བར། །དྲག་སྦྱོར་འཕྲིན་ལས་སྒྲུབ་པའི་དགའ་སྟོན་དང་། །སླར་ཡང་ལས་སྦྱོར་འགྲུབ་པའི་རྟེན་དུ་འབུལ། །ཕྱོགས་ལས་རྣམ་པར་རྒྱལ་བའི་ཞལ་གྱི་ཁྱིམ། །གྲུབ་མཆོག་སྔགས་འཆང་བདག་ལ་དགྱེས་པར་སྟོན། །སྲུང་མ་ཁྱོད་ལ་གཉེར་དུ་གཏད་པ་ཡི། །དགྲ་བོ་སྔ་དགྲ་(༦༣ན)
ལག་བདར་ཕྱི་དགྲ་སེམས། །ད་ལྟ་གནོད་ཅིང་འཚེ་བར་བྱེད་པ་རྣམས། །མིང་ཙམ་བརྡ་ཙམ་མེད་པ་རྡུལ་དུ་རློགས། །ཀུན་ལྡན་ཞེས་པ་ལྕགས་བྱིའི་ལོ་གསར་དུས་འདོད་ཁམས་བདག་མོར་ཕུལ་བའི་དར་ཚོན་སྣ་ལྔའི་སྙན་ཤལ་གྱི་ཞལ་ཡིག་ལས་བཞིའི་ལྷུན་འགྲུབ། དཀར་པོ་མི་ཤིགས་སྐུ་གསུམ་བཙན་པོའི་གོ་ཆ་ཡིས། །བདུད་བཞི་ལས་རྒྱལ་རྡོ་རྗེ་དབྱིངས་ཕྱུག་མ། །དཔལ་ལྡན་ལྷ་མཆོག་དུང་སྐྱོང་དབང་མོ་ཡིས། །ཞི་བའི་ལས་རྣམས་ཐོགས་མེད་ལྷུན་གྲུབ་མཛོད། །སེར་པོ། བསོད་ནམས་ཉིན་བྱེད་སྟོང་དུ་རབ་འབར་གཟིས། །བསམ་པའི་རེ་སྐོང་དཔག་བསམ་ཡོངས་འདུའི་ལྗོན། །འཛམྦུའི་གསེར་སྦྱངས་མདངས་འཛིན་ལྷག་པའི་ལྷས། །རྒྱས་པའི་ལས་རྣམས་ཐོགས་མེད་ལྷུན་གྲུབ་མཛོད། །དམར་པོ། སྲིད་ཞིའི་ཆོས་ཀུན་འགུགས་པའི་སྒྱུ་ཐབས་ཀྱིས། །ཁམས་གསུམ་བརྟན་པ་ཅིག་ཅར་འཕྲོག་བྱེད་པའི། །འདོད་ཁམས་དབང་ཕྱུག་དམག་ཟོར་རེ་མ་ཏིས། །དབང་གི་ལས་རྣམས་ཐོགས་མེད་ལྷུན་གྲུབ་མཛོད། །ནག་པོ་སྔ་དགྲའི་ཁྲག་གིས་ཆེས་ཆེར་མྱོས་པའི་ཞལ། །ད་ལྟའི་དམ་ཉམས་ཤ་ཟར་རིངས་པ་ཡིས། །རབ་གདངས་ཁྲོ་གཏུམ་མཐུ་སྟོབས་དཔལ་འབར་ལས། །དྲག་པོའི་འཕྲིན་ལས་ཐོགས་མེད་ལྷུན་གྲུབ་མཛོད། །ལྗང་ཁུ། ཕན་དང་བདེ་བ་མ་ལུས་འབྱུང་གནས་ཆེ། །རྡོ་རྗེ་འཛིན་པའི་ལམ་མཆོག་སྙིང་པོའི་དོན། །ཉེར་སྤྱོད་བསམ་དོན་ཆོས་བཞིན་ལྷུན་གྲུབ་(༦༣བ)
པར། །ཕུན་སུམ་ཚོགས་པའི་དགའ་སྟོན་རྒྱས་པར་མཛོད། །ལྕགས་བྱི་ནག་པ་ཟླ་བའི་བརྒྱད་གཏོར་གྱི་ཉིན་མགོན་པོ་ཞལ་བཞི་པར་ཕུལ་བའི་སྙན་དར་ཞལ་ཡིག་ཆོས་ཀྱི་དབྱིངས་ནས་དགྱེས་པའི་འཛུམ་ཞལ། བྱམས་དང་སྙིང་རྗེ་དགའ་བ་བཏང་སྙོམས་བཞིའི། །དགྱེས་ཞལ་ཆོས་ཀྱི་དབྱིངས་ནས་འཛུམ་པ་ཡི། །གསལ་སྟོང་རང་སེམས་ལྷན་སྐྱེས་གདོད་མའི་མགོན། །གསང་བའི་ལྷ་ཆེན་སྟོབས་འཕྲོག་ནག་པོ་ཆེ། །རོ་རྐྱང་དྷུ་ཏཱིའི་འཁོར་ལོ་རྣམ་བཞིའི་དབུས། །རྩ་ཁམས་རླུང་གི་རང་མདངས་ཞིང་སྐྱོང་སྐུ། །ཟག་མེད་བདེ་བ་ཆེན་པོའི་ཟློས་གར་གྱིས། །ཟུང་འཇུག་རང་ཞལ་ལྟ་བ་ནང་གི་མགོན། །ཏེ་སེ་གྲུ་འཛིན་དུར་ཁྲོད་ཧ་ཧ་དགོད། །དར་ལུང་ཁའུ་ལ་སོགས་གནས་མང་པོར། །ཁྲོ་གཏུམ་སྲིན་པོའི་ཚུལ་དང་བྲམ་ཟེའི་གཟུགས། །སྟོན་མཛད་ཕྱི་ཡི་མགོན་པོ་གདོང་བཞི་པ། །བློ་འདས་བརྗོད་བྲལ་སེམས་ཉིད་གཅིག་བུའི་གཤིས། །རང་ངོ་འཕྲོད་ནས་སྐྱོང་བའི་རྣལ་འབྱོར་དང་། །རྩ་མདུད་རྒྱ་དྲིལ་རང་སེམས་དབུ་མའི་ལམ། །འཇུག་པའི་ནང་གསང་མཆོད་པ་འདི་རྨད་བྱུང་། །རྡོ་ནག་མཎྜལ་གཡག་ལུག་ཞྭ་ཕོད་ནག །གྲི་སྙིང་སྲོག་འཁོར་ཕྱི་ནང་གསང་བའི་རྟེན། །གཏོར་མའི་རི་བོར་རཀྟའི་རྒྱ་མཚོ་སོགས། །མཐུན་པའི་རྫས་ཀྱིས་ཐུགས་དམ་སྐོང་བྱེད་ན། །བསྟན་དང་བསྟན་འཛིན་སློབ་བཤད་འདུས་སྡེ་སྤེལ། །འཇིག་རྟེན་ཁམས་ཀུན་བདེ་སྐྱིད་དཔལ་ལ་དགོད། །བསམ་ངན་སྦྱོར་རྩུབ་འཆང་བྱེད་དགྲ་དང་བགེགས། །གནམ་ལྕགས་ཐོག་གིས་བྲག་རི་བསྙིལ་ལྟར་(༦༤ན)
ཆོམས། །ཀླུ་སྒྲུབ་གཉན་དང་རྗེ་བཙུན་ས་སྐྱ་པ། །ཁྱད་པར་མཚར་ཆེན་ཡབ་སྲས་བརྒྱུད་བཅས་ཀྱི། །དམ་ཚིག་དགོངས་ལ་འཕྲིན་ལས་རྣམ་པ་བཞི། །ལྷུན་གྱིས་འགྲུབ་པའི་དགའ་སྟོན་རྒྱས་པར་མཛོད། །ལུང་བསྟན་སྔ་ཕྱི་དང་། ཚངས་པ་ཆེན་པོ་དུང་ཐོད་ཅན་གྱི་བསྐུལ་མ་སོགས་ལ་བརྟེན་ནས་ལྕགས་བྱིའི་ལོ་ར་ས་འཕྲུལ་སྣང་དུ་ལྷ་ཁང་གསར་བཞེངས་བགྱིས་པའི་དུས་བོད་འབངས་བདེ་ཐབས་ལ་དམིགས་ཏེ་སྒྲུབ་མཆོད་ཆོ་ག་གཞུང་སྲོང་བར་ཕན་བདེ་ལེགས་བཤད་གླིང་པ་ཚོགས་པའི་རྡོ་རྗེ་སློབ་དཔོན་ངེད་རང་གིས་བྱས་ནས་འཕྲིན་ལས་ཕུར་པའི་དཀྱིལ་འཁོར་ཞལ་ཕྱེ་སྟེ་རབ་ཏུ་གནས་པའི་ཚེ་སྙན་ཤལ་ཕུལ་བའི་ནང་ཚན་ཚེེ་དཔག་ལྷ་ཁང་གི་སྙན་དར་ཞལ་ཡིག་འཆི་མེད་རྡོ་རྗེའི་སྲོག་ཤིང་། མཁའ་ཁྱབ་སངས་རྒྱས་ཀུན་གྱི་སྒྱུ་མའི་འཕྲུལ། །འཆི་བའི་དངོས་པོ་འཇོམས་པ་རྡོ་རྗེའི་སྲོག །གྲུབ་པའི་ངོ་མཚར་མཚན་དཔེའི་རང་གཟུགས་གར། །ལེགས་སྒྱུར་བཅོམ་ལྡན་མགོན་པོ་ཚེ་དཔག་མེད། །བྱེ་བ་ཕྲག་བརྒྱ་གངྒཱའི་རྡུལ་རྙེད་ཀྱི། །གསང་གསུམ་བཀོད་པའི་རྣམ་རོལ་བསྟན་པ་ལས། །རྣམ་འགྱུར་མཚན་གྱི་དབྱེ་བ་གཏེར་གྱི་གྲངས། །མ་སྨད་ལྷག་བསམ་བྱེད་པོས་བསྐྲུན་པའི་མཐུས། །ཀུན་མཁྱེན་གཟིགས་པས་མཐའ་དང་ཚད་བཟུང་བར། །ནུས་མིན་མ་རྒན་བརྒྱུད་ལྔའི་འགྲོ་བ་རྣམས། །མངོན་པར་མཐོ་དང་ངེས་པར་ལེགས་པའི་ལམ། །བླ་མེད་བྱང་ཆུབ་མཆོག་གི་རྒྱུར་གྱུར་ཅིག །ཁྱད་པར་གངས་ཅན་ར་བ་དཀར་པོ་ཡི། །ཁོར་ཡུག་གཅིག་ཏུ་གྱུར་པའི་རྒྱལ་(༦༤བ)
ཁམས་འདིར། །དཀར་མིན་འབྲས་བུའི་མིང་ཡང་མི་གྲགས་པར། །ཕན་བདེའི་མྱུ་གུ་གཡུར་དུ་ཟ་བར་ཤོག །བཤད་དང་སྒྲུབ་པའི་བསྟན་པ་དར་ཞིང་རྒྱས། །ནོར་འཛིན་སྐྱོང་བའི་མངའ་ཐང་ཆབ་སྲིད་འཕེལ། །རྫོགས་ལྡན་དུས་ཀྱི་ཚེ་དཔལ་འབྱོར་པ་ལ། །འགྲོ་རྣམས་སྤྱོད་པའི་སྐལ་པ་བཟང་པོར་ཤོག །མཚན་བརྒྱད་ལྷ་ཁང་གི་སྙན་དར་ཞལ་ཡིག་བསམ་པ་ལྷུན་གྱིས་གྲུབ་པའི་བདེན་གཏམ། བདེ་བར་གཤེགས་པ་ཞི་ཁྲོ་ཀུན་འདུས་པའི། །བདག་ཉིད་རིག་འཛིན་བླ་མ་ཧེ་རུ་ཀ །སྲིད་པ་གསུམ་ན་ཆེ་བའི་རིག་སྔགས་ཀྱིས། །བརྟུལ་ཞུགས་གྲུབ་མཆོག་དབང་པོ་པདྨ་འབྱུང་། །གདུལ་བྱའི་ཁམས་དང་བསམ་པའི་མེ་ལོང་ངོས། །གཟུགས་སྐུའི་བཀོད་པ་གཅིག་ལ་དུ་མའི་གར། །སྣང་བརྙན་མ་འདྲེས་འཆར་པ་མཚན་གྱི་སྒྲ །གྲགས་པ་དོན་ལྡན་ཇི་བཞིན་བསྐྲུན་པའི་མཐུས། །འགྲོ་ཀུན་འདི་དང་གཏན་དུ་བདེ་ལྡན་ཞིང་། །དེའི་རྒྱུ་ཐུབ་དབང་བསྟན་པ་རིན་ཆེན་དར། །ལུགས་གཉིས་ཁྲིམས་ཀྱི་ཉི་ཟླ་ཟུང་འཇུག་པས། །རྒུད་པའི་མུན་པ་དྲུང་ནས་འབྱིན་པར་ཤོག །ཁྱད་པར་གངས་ཅན་ལྗོངས་འདིའི་ཕན་བདེའི་ནོར། །འཕྲོག་བྱེད་ཆོམ་རྐུན་འགོང་པོ་དམ་སྲིའི་དཔུང་། །ཕུར་ཐོགས་དྲག་པོར་ཁྲོས་པས་རབ་བཅོམ་སྟེ། །ནད་མཚོན་མུ་གེའི་མིང་ཡང་མེད་པར་ཤོག །དཔལ་གྱི་མགུར་ནས་ཚངས་པའི་དབྱངས་སྙན་པོས། །བོད་འབངས་རྗེས་སུ་འཛིན་པར་ཞལ་བཞེས་བཀའ། །ལྷ་སྲས་རྒྱལ་པོར་བསམ་པ་(༦༥ན)
ལྷུན་གྲུབ་མ། །གསུངས་པའི་རེ་བ་དོན་དང་ལྡན་པར་ཤོག །སྤྱན་རས་གཟིགས་ལྷ་ཁང་གི་སྙན་དར་ཞལ་ཡིག་བདེ་སྐྱིད་ཉིན་མོའི་སྣང་བ། འགྲོ་ཀུན་རྣམ་པ་ཐམས་ཅད་མཁྱེན་པའི་སར། །བཀོད་མིན་རང་ཉིད་མངོན་འཚང་མི་རྒྱ་ཞེས། །འོད་མཚན་སྟོང་དུ་འབར་པའི་སྤྱན་སྔ་རུ། །ཐུགས་བསྐྱེད་དམ་བཅའི་ཁུར་ལྡན་འཇིག་རྟེན་དབང་། །མཐའ་ཀླས་གདུལ་བྱའི་ཁམས་དང་འཚམ་པའི་སྐུ། །གཏིང་མཐའ་མི་མངོན་དཔག་དཀའ་ཆུ་གཏེར་སྤུན། །འོན་ཏེ་ཆ་ཤས་ཙམ་གྱིས་སྐོམ་པའི་ནད། །སེལ་སྙམ་སྣང་བརྙན་འགའ་ཞིག་བཞེངས་པ་ཡིས། །མ་དག་འཁོར་བ་ཆུ་གཏེར་ཆེན་པོའི་ནང་། །མ་རིག་འཁྲུལ་པའི་དབང་གིས་ཉེར་འཁྱམས་འགྲོ །མ་ལུས་ལྷ་མོའི་ཐེམ་སྐས་ལ་འཛེགས་ནས། །མ་སྨད་ཐར་པའི་གྲོང་དུ་འཇུག་གྱུར་ཅིག །ལྷ་གཅིག་ཐུན་མོང་མིན་པའི་གདུལ་བྱའི་ཞིང་། །སཱ་ལའི་ལྗོངས་འདིར་འཐབ་རྩོད་ནད་མུག་སོགས། །རབ་ཞི་བདེ་སྐྱིད་ཉིན་མོའི་སྣང་བ་ཡིས། །ཀུན་ཏུ་ཁྱབ་པའི་དགའ་སྟོན་རྒྱས་གྱུར་ཅིག །ཟས་གཙང་སྲས་ཀྱི་བསྟན་པ་ལུང་རྟོགས་ཆོས། །དེ་འཛིན་ཐོས་བསམ་སྒོམ་པའི་སྡེ་རྣམས་འཕེལ། །སྐྱེ་རྒུ་རྣམས་ཀྱང་དགེ་བ་བཅུར་སྤྱོད་ཅིང་། །རྣམ་སྨིན་དཀར་པོའི་འབྲས་བུས་དུད་པར་ཤོག །ཆོས་རྒྱལ་ལྷ་ཁང་གི་སྙན་དར་ཞལ་ཡིག་བདེ་ལེགས་ནོར་བུའི་རྒྱལ་མཚན། སྒྲིབ་སེལ་ཀུན་བཟང་རིགས་གསུམ་སྒྱུ་དྲའི་གར། །གངས་ཅན་རྒྱལ་པོའི་རྣམ་པར་ཤར་བ་ཡིས། །
ཐུབ་བསྟན་ཀུན་བཟོད་འདེགས་པའི་སྙིང་སྟོབས་ཀྱིས། །པད་དཀར་མིག་གི་ཁེངས་པ་ཐུང་ངུར་བྱེད། །དེའི་ཕྱིར་འཕགས་ཆེན་དམ་པ་གཞན་དོན་དུ། །མི་སྐྱོའི་ལྷག་བསམ་ཁྱོགས་ལ་རབ་བརྟེན་ནས། །ཆོས་སྲིད་ཟླ་བ་ལྟ་བུའི་དཀར་མཛེས་ཀྱིས། །སྤུར་རྒྱལ་ཡངས་པའི་ས་ཀུན་བྱུགས་པ་བཞིན། །སླར་ཡང་ཐུགས་རྗེ་ཆེན་པོའི་འཇུག་པ་ནི། །གངྒཱའི་ཀླུང་ལྟར་ཆད་པ་མེད་པ་ཡིས། །མ་དག་ཉེས་བརྒྱའི་དྲི་མ་ཀུན་བཀྲུས་ཏེ། །བདེ་ལེགས་ནོར་བུའི་རྒྱལ་མཚན་སྒྲེང་པར་མཛོད། །སེམས་ཀྱི་གླང་པོ་བག་ཡོད་ལྕགས་ཀྱུ་ཡིས། །ཉེར་དུལ་སྒོ་གསུམ་མི་དགེ་ལས་གདམས་པ། །མི་ཆོས་གཙང་མ་བཅུ་དྲུག་ཁྲིམས་ཀྱི་སྲོལ། །ས་ཟླའི་གཉའ་ཤིང་རབ་ལྕི་བརྟན་གྱུར་ཅིག །རྩོད་ལྡན་དུས་ཀྱི་མུན་པ་ཕ་མཐར་བསྐྲད། །དགེ་ཚོགས་ཟླ་བའི་དཀྱིལ་འཁོར་ཆ་ཤས་གང་། །ལེགས་བྱས་རི་དྭགས་གཟུགས་ཀྱིས་རྣམ་པར་མཛེས། །སྡེ་བཞིའི་རྒྱུ་སྐར་འཕྲེང་བ་འཁྲིག་གྱུར་ཅིག །དགའ་ལྡན་ལྷ་ཁང་གི་སྙན་དར་ཞལ་ཡིག་ཆོས་སྲིད་གདུགས་དཀར་གཅིག་ཁྱབ། ཤེས་རབ་རལ་གྲི་རྣོན་པོས་བདུད་བཞི་ལས། །རྣམ་པར་རྒྱལ་བས་སངས་རྒྱས་མ་ལུས་པའི། །ཡབ་ཏུ་གྱུར་ཀྱང་གཞོན་ནུ་ཟུར་ཕུད་ཀྱི། །ལྔ་ལྡན་སྒྱུ་ཐབས་ལྷུར་ལེན་འཇམ་པའི་དབྱངས། །བློ་དམན་གདུལ་བྱའི་མངོན་སུམ་སྤྱོད་ཡུལ་དུ། །ཁྲིམས་ལྡན་ངུར་སྨྲིག་འཛིན་པའི་ཟློས་གར་ཅན། །ཁམས་གསུམ་ཆོས་ཀྱི་རྒྱལ་པོ་བཙོང་ཁ་པའི། །ངོ་མཚར་མཚན་གྱི་དབྱངས་སྙན་སྲིད་རྩེར་ལྡིར། །མགོན་(༦༦ན)
ཁྱོད་སློབ་མར་བཅས་པའི་གཟུགས་ཀྱི་སྐུ། །དཀར་ནག་རྒྱ་དང་ཧོར་བོད་སྐྱེ་རྒུ་ཡི། །འདྲེན་བྱེད་ཡུལ་དང་བསོད་ནམས་ཞིང་གྱུར་པ། །མ་སྨད་ཕྲེང་བར་སྤེལ་བའི་ལེགས་བྱས་ཀྱིས། །ཛཱཏིའི་དྲི་བསུང་འཐུལ་བའི་གུར་ཁྱིམ་ནས། །དར་ཟབ་ཐགས་སུ་ཐགས་པའི་ཡུལ་གྲུའི་བར། །གང་གི་འཛད་མེད་ཕུལ་བྱུང་འཕྲིན་ལས་ཀྱི། །ཆོས་སྲིད་གདུགས་དཀར་གཅིག་གིས་ཁྱབ་གྱུར་ཅིག །ཇི་སྲིད་ཉི་ཟླའི་འོད་ཀྱིས་གླིང་བཞིའི་མུན། །སེལ་བ་དེ་སྲིད་མཉམ་མེད་དགའ་ལྡན་པའི། །དྲི་མེད་བསྟན་པ་མི་འགྱུར་རྡོ་རྗེ་ལྟར། །རབ་བརྟན་ལུས་ཅན་ཀུན་གྱིས་དཔལ་གྱུར་ཅིག །རབ་གནས་ཀྱི་ཚེ་ཇོ་ཤཱཀ །བྱམས་པ་ཆོས་འཁོར། རང་བྱོན་ལྔ་ལྡན། དུང་སྐྱོང་རྒྱལ་མོ་རྣམས་ལ་ཕུལ་པའི་སྙན་དར་ཞལ་ཡིག་ཕན་བདེའི་སྣང་བ། ཤཱཀྱ་མུ་ནི་ཚོགས་གཉིས་རླུང་གི་ཤུགས་ལྡན་རྟ་བདུན་གྱིས། །དྲངས་པའི་བུ་རམ་ཤིང་པ་ཉིན་མོར་བྱེད། །ཐུགས་རྗེ་འོད་སྟོང་འགྲོ་བློའི་འདབ་བརྒྱའི་དབུས། །འཇུག་མཛད་མ་འདྲིས་མཛའ་བཤེས་རྒྱལ་བའི་ཏོག །མགོན་ཁྱོད་སྙིགས་མའི་དུས་ལ་ཆེས་བརྩེ་བས། །ལྔ་བརྒྱའི་གཉེན་དུ་ཞིང་འདིར་རྣམ་སྤྲུལ་གར། །ལེགས་བསྟན་པདྨ་ལྟ་བུར་རབ་བསྔགས་པ། །དོན་ལྡན་མཁྱེན་བརྩེ་ནུས་པས་འགྲོ་རྣམས་སྐྱོངས། །འདི་དང་གཏན་འདུན་འགྲུབ་བྱེད་སྡེ་བཞིའི་ཞལ། །འཛུམ་པའི་བདེ་སྐྱིད་གསེར་སྒོང་ཐབས་ཤེས་ཟུང་། །ལྷན་ཅིག་མཉམ་འཇུག་དྲོད་ཀྱིས་ལེགས་སྨིན་པས། །ཆོས་སྲིད་(༦༦བ)
བྱེད་པོའི་དབང་ཕྱུག་ཐོབ་པར་ཤོག །བྱམས་པ། བྱམས་བརྩེའི་བརླན་གྱིས་ལྷག་བསམ་ས་བོན་ཚོགས། །སྨིན་པས་སེམས་བསྐྱེད་སྡོང་བུ་དར་དྲག་པ། །མ་ཕམ་ཡོངས་འདུའི་ལྗོན་ཤིང་ཐུགས་རྗེའི་འབྲས། །གྲངས་མེད་འགྲོ་རྣམས་ལོངས་སུ་སྤྱོད་གྱུར་ཅིག །ཐུགས་རྗེ་ཆེན་པོ། འདྲེན་བྱེད་མེ་ཡིས་ནག་པོའི་དཔུང་བཅོམ་པས། །སྔོན་མེད་གཙུག་ན་ཟླ་བ་འཇིག་རྟེན་དབང་། །སྲོང་བཙན་རྒྱལ་པོའི་དུས་བཞིན་གངས་ཅན་ལྗོངས། །འཕྲིན་ལས་རྣམ་བཞིས་རྗེས་སུ་འཛིན་པར་མཛོད། །དཔལ་ལྷ། ཕྱི་ལྟར་དྲི་ཟའི་བུ་མོ་ཡིད་འོངས་མ། །ནང་དུ་ཆོས་འཁོར་སྐྱོང་བའི་དུང་སྐྱོང་ལྷ། །གསང་བ་དབང་ཕྱུག་ཉི་ཤུ་རྩ་བརྒྱད་གཙོ། །ཡང་གསང་འཁོར་ལོ་ཆེན་པོར་རྒྱས་འདེབས་ཡུམ། །རིག་འཛིན་བརྒྱུད་པའི་དམ་ཚིག་ཉེར་དགོངས་ལ། །ལུང་རྟོགས་བསྟན་དང་གཙུག་ལག་སྡེ་རྣམས་སྐྱོངས། །ཁ་བའི་ལྗོངས་འདིར་འཐབ་རྩོད་ནད་མུག་སོགས། །རྒུད་པ་ཀུན་ཞི་བདེ་ཞིང་སྐྱིད་པར་མཛོད། །ཁྱད་པར་རིག་སྔགས་འཆང་བ་བདག་ཅག་ལ། །ལོག་པར་འཁུ་བའི་དགྲ་སྡེའི་དཔུང་ཚོགས་ཆོམས། །སྐྱབས་ཡུལ་མི་ནོར་དགོན་གནས་སྲིད་སྡེ་རྣམས། །ཉིན་མཚན་དུས་ཀུན་བསྲུང་ཞིང་སྐྱོང་བར་མཛོད། །ལྕགས་བྱི་འཕྱོང་རྒྱས་སྲོང་བཙན་བང་སོར་སྨན་ལུང་པ་ཤཱཀ་གཞོན་གྱིས་བཞེངས་པའི་དཔལ་མགོན་མ་ནིང་ནག་པོར་གསོལ་མཆོད་གཟབ་རྒྱས་(༦༧ན)
སྐབས་ཕུལ་བའི་སྙན་དར་ཞལ་ཡིག་དུས་ཀྱི་བྱིན་ཟའི་ཕུང་པོ། མིག་སྨན་ལྟར་གནག་སྲིན་པོ་ཁྲོས་པའི་གཟུགས། །གར་དགུའི་ཉམས་ལྡན་དགྲ་བགེགས་འདམ་ལྟར་བརྫི། །དུས་མཐའི་མེ་ཡི་གོས་ཀྱིས་ཉེར་ཀླུབས་པའི། །ལེགས་ལྡན་དབང་པོ་དཔལ་མགོན་མ་ནིང་ཆེར། །སྨན་རཀ་གཏོར་མ་ཕྱི་ནང་གསང་བ་ཡི། །མཆོད་ཚོགས་དངོས་བཤམས་ཡིད་ཀྱིས་ལེགས་སྤྲུལ་པས། །ཐུགས་དམ་གཉན་པོ་དབྱིངས་སུ་སྐོང་བྱེད་ན། །ཟག་མེད་བདེ་བའི་ཀློང་དུ་དགྱེས་པར་རོལ། །དུས་གསུམ་སངས་རྒྱས་ཀུན་དངོས་པདྨ་འབྱུང་། །གཏེར་སྟོན་ཆོས་ཀྱི་དབང་ཕྱུག་ལ་སོགས་པ། །རིགས་འཛིན་བརྒྱུད་པའི་དམ་ཚིག་ཉེར་དགོངས་ལ། །འཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །