གངས་ཅན་ཡུལ་གྱི་ས་ལ་སྤྱོད་པའི་མཐོ་རིས་ཀྱི་རྒྱལ་བློན་གཙོ་བོར་བརྗོད་པའི་དེབ་ཐེར་རྫོགས་ལྡན་གཞོན་ནུའི་དགའ་སྟོན་དཔྱིད་ཀྱི་རྒྱལ་མོའི་གླུ་དབྱངས།

---

^{[མ་དཔེ་གཟིགས་ན་འདིར་གནོན།]}

གངས་ཅན་ཡུལ་གྱི་ས་ལ་སྤྱོད་པའི་མཐོ་རིས་ཀྱི་རྒྱལ་བློན་གཙོ་བོར་བརྗོད་པའི་དེབ་ཐེར་རྫོགས་ལྡན་གཞོན་ནུའི་དགའ་སྟོན་དཔྱིད་ཀྱི་རྒྱལ་མོའི་གླུ་དབྱངས་ཞེས་བྱ་བ་བཞུགས་སོ། །

མཆོད་བརྗོད་དང་རྩོམ་པར་དམ་བཅའ་བ།

---

^{[མ་དཔེ་གཟིགས་ན་འདིར་གནོན།]}

བྲ སུ ར བ ཏི ཨ བྷི ཛྭ ལ སྶ རྦྦ དྷ རྨྨི རྨ ཡུ ཁྱོ ཛ པ ཪྻྻཱ ད ན ྉྤ ཤྱ ཀཱ རྞྞ སྱམ ཎྱཱ ས ན ཀ ན ཀ མ དྷུ ར ཀི རྟི ཙི ཏྟཱ བ ལ ྅ བྷ ཡ ཡཀ ནྟ ཤྩ དྲྀ ཥྚོ ན ག རྱ སྱ མ ས དྱ ཉྩ ཀ ལྦ ཤྴུ བྷ
བསྐལ་པ་བཟང་པོའི་ལྟ་ན་སྡུག་པའི་གྲོང་ཁྱེར་དབུས་ན་འཇིགས་བྲལ་སྙིང་སྟོབས་གསེར་གྱི་གདན་ཁྲི་ལ། །གྲགས་སྙན་ནོར་བུའི་རྣ་རྒྱན་འོད་གཟི་མངོན་པར་རབ་འབར་ཆོས་ཀུན་མ་ལུས་གཟིགས་པའི་མིག་སྟོང་ཅན། །(༢ན)

---

^{[མ་དཔེ་གཟིགས་ན་འདིར་གནོན།]}

ཨ དྷི ད ཤ བ ལ པྲྀ ཤྱ ཤཽ དྷཽ ད ནཱ ནྟ དྭ དཻ ཏྱཱ བྷ གཱ སེ ན དུ ནྡུ བྷྱ ཛི ནྱཱ ས ཧ སྭཱ ཧ ཏ ཏྲི བི བི ཤ བྷ ར ཀེ ཏུ ཙ ཤྲེ ཡ ཀ རྱ ཏྲི ལོ ཀེ པྲ དྷཱ ནེ བྷི རཱ དྷི ཏྱ ཨུ ནྣ སྱ ཨུ ཏྟ རྱ ཙཱ།
མཐའ་གཉིས་བཅུད་བྲལ་སྡེར་བཅས་བཅོམ་པའི་རྒྱལ་རྔ་སྟོང་བརྡུངས་སྟོབས་བཅུ་མངའ་བ་མཁར་ཉལ་ཚོགས་ཀྱི་དཔལ། །བླ་མ་མཐོ་བའི་ཁྱུ་མཆོག་ཟས་གཙང་སྲས་པོ་འཆི་མེད་གཙོ་བོས་འཇིག་རྟེན་གསུམ་དུ་དགེ་ལེགས་མཛོད། །(༢བ)

---

^{[མ་དཔེ་གཟིགས་ན་འདིར་གནོན།]}

ཤཱ ཤྭ ཏ མ ཀྴ ཡཱ ཀ ར པ རོ བི ཀོ ཥ མྲྀ ཏ བྷཱ བ ནཱ ཤ ཡ ཀུ རོ རྦ ཛྲ ཙ ན པྲ མཱ རྡི ན མི ཥུ ཉྩ དོ ཧ ན ས ནཱ ཏ ནཱ ཡུ བི བྷ བཿ
འཆི་(སྡེབ་སྦྱོར་ཟབ་མོའི་དབྱངས།) བའི་དངོས་པོ་རྣམ་པར་འཇོམས་པའི་གཞོམ་མེད་ཚེ་ཡི་གཡུང་དྲུང་རྟག་པའི་རྡོ་རྗེ་གང་། །ལོངས་སུ་སྤྱོད་ལ་ཟད་མི་ཤེས་པར་འདོད་པ་འཇོ་བའི་འབྱུང་གནས་མཆོག་གི་གན་མཛོད་ཀྱི། །(༣ན)

---

^{[མ་དཔེ་གཟིགས་ན་འདིར་གནོན།]}

ཤྱཱ ཡུ བི པཱ ཀ ཀ པླ ཏ རུ ཙཱ ག ཛི ཏྲི ཡུ ག སི དྡྷི ཕ ལྱ ཙ པི བྷུ ཛྙཱ ན ཙ ཨཱ ཡཱ ནུ ཏྟ ར པ རཱི ནྡྲ ཙཱ པ རི མི ཏཿ སུ བཱ ཙྱ ཀུ རུ དཱ།
ཁྱབ་བདག་དབང་པོར་དུས་གསུམ་རྒྱལ་བ་ཡོངས་ཀྱིས་ལེགས་བསྔགས་ཚེ་དང་ཡེ་ཤེས་དཔག་ཏུ་མེད། །ཚེ་དཔལ་ཡོངས་འདུའི་ལྗོན་པ་དུས་སུ་སྨིན་པའི་དངོས་གྲུབ་འབྲས་བུ་བླ་ན་མེད་པ་སྩོལ། །(༣བ)

---

^{[མ་དཔེ་གཟིགས་ན་འདིར་གནོན།]}

ཨཱ ཤྩ རྱཱ མ དྷཱུ རཱ ཀུ མཱ ར བཱ ཡུ ནཱཾ ཀུ ཤྱེ ན ཀེ ག རྱ ཙཱ ས རྦྦཾ དྷ རྨྨ ཝ ཤ དྨ ཙི ཏྟ ཧ ཏ ཙ ཛྙཱ ཡཿ པ ར བ སི ཏཱ།
ཚར་དུ་དངར་བའི་མཁྱེན་པའི་གེ་སར་གཞོན་ནུའི་ལང་ཚོའི་ལྕགས་ཀྱུ་ཡིས། །ཆོས་ཀུན་རི་དྭགས་མིག་ཅན་མ་ཡི་སྙིང་ལ་བསྣུན་པའི་རང་དབང་དུ། །(༤ན)

---

^{[མ་དཔེ་གཟིགས་ན་འདིར་གནོན།]}

ཀྲ ཧྱེ པ རྴ ཨུ ད ཡ ཡ རྨྨ ཏ ག ཎཱ ད རྴ ཉྩ ནཱ ཊ ཀྱ ཙཱ རྴ པཱ ཀཱ ཎྛི ཀ སཱ རི སཱ ཨ བ ག ཏཱ གཱི ནཿ ཀུ མཱ ར ཤྴུ བྷཾ
འདུ་འབྲལ་ཟློས་གར་རི་མོའི་སྣང་བརྙན་ཆོས་ཉིད་མེ་ལོང་གཙང་མའི་ངོས། །རྗེན་པར་འཆར་བའི་བྱེད་པོ་ཟུར་ཕུད་ལྔ་པ་མགྲིན་པའི་རྒྱན་དུ་བཞུགས། །(༤བ)

---

^{[མ་དཔེ་གཟིགས་ན་འདིར་གནོན།]}

ལ ཀྵཱ སཱུ རྨྨཱ མ ཡུ ཁྱ ཧཱ ར གུ ཎ ཙཱ ལི ངྒཱ ཀྲྀ བ ཤྱེ པ ར སྠི སྠི རྱཱ བྷཱ བ ཙ ལཿ ས མ ཏྟ པ ཝ ལ ཛྙཱི མཱུ ཏ ད ནྟི ནྱ ཙ།
སྣང་མཛོད་འབུམ་གྱི་དྲ་བས་འཁྱུད་པའི་བྱུ་རུའི་རྡུལ་བརྩེགས་ལ། །བརྟན་གཡོའི་དངོས་ཀུན་དབང་དུ་བྱེད་པའི་ཡོན་ཏན་ཡོངས་རྫོགས་པའི། །(༥ན)

---

^{[མ་དཔེ་གཟིགས་ན་འདིར་གནོན།]}

ཤཱ ཤྭ ཏྱཱ བྷ ལི ཀ ཡ ཡ རཽ བི ཀ ཀུ རུ ར ཐ ཐ རྱཱ ཨ དྷི ར ཝ ཡ རྟི ཙཱ དེ ལོ བྱ ཏྟ རྱ ཀ རོ ཏི ཀུ ལླ ན ཡ ནཾ ཏཱ མ ཏྲི བྷ བྱ སྨ ར། །
ཟུར་མིག་ཉག་ཕྲན་ཙམ་གྱི་དགེ་བའི་གཟུགས་ཅན་འདུས་མ་བྱས། །འདར་མཛད་རིག་བྱེད་ལྷ་མོས་སྲིད་པ་གསུམ་ལ་མངའ་སྒྱུར་ཅིག །(༥བ)

---

^{[མ་དཔེ་གཟིགས་ན་འདིར་གནོན།]}

མུ ཁ མ ན ཀཱ ནྟོ ྅ དྭཱ པ ར དཱ བྷྲ མ བཱ སྱཱ ཀྲྀ དྲི ཛ ཏུ ངྒཱི ཤེ ག ཙ ཤི ཏི བཻ ཌཱུ པྲ དྷ ར སི ཏོ ཀྟ ཤོ པ སི དྷི གོ རཱ ཊ ཀྲ །
ཡིད་འོང་བཞིན་རས་ཟླ་གཞོན་འཁོར་ལོ་གཉིས་སྐྱེས་ལ། །འཁྲུལ་པ་སྟེར་ཡང་འཕྱང་མོ་སེལ་བྱེད་མགོ་སྐྱེས་ཀྱི། །བཻཌཱུར་མཐིང་ཁའི་ལན་བུར་རབ་འཕྱང་དབྱངས་ཅན་མ། །སྨྲ་བའི་དབང་ཕྱུག་ངག་གི་རྒྱལ་པོ་ཉེར་གྲུབ་མཛོད། །གངས་ཅན་ལྷ་ལམ་ཡངས་པའི་ཁྱོན་འདིར་རྒྱལ་བའི་བསྟན་པ་བཅུ་གཉིས་བདག་པོའི་གུར་ཁང་མཆོག །མཁྱེན་བརྩེ་ནུས་པའི་ནམ་མཁའི་གྲུ་ཡིས་ཉེ་བར་འདྲེན་མཛད་ཆོས་རྒྱལ་མེས་དབོན་རྣམ་གསུམ་དང་། །རྒྱལ་བ་ཀུན་དངོས་མཚོ་སྐྱེས་རྡོ་རྗེ་བསྟན་པའི་རྩ་ལག་ཐམས་ཅད་མཁྱེན་པ་ཞི་བ་འཚོའི། །བཀའ་དྲིན་གཟུགས་ཅན་དབྱིག་འཛིན་ལྟོ་འདིར་ཤོང་འགྱུར་མིན་ན་ཀུན་མཁྱེན་སྲང་ལས་གང་གིས་གཞལ། །ལི་ཁྲིའི་ལྕུག་ཕྲན་མཁྱེན་པའི་སྣང་བ་ཅན། །འཇམ་(༦ན)
མགོན་བློ་ཡི་ལང་ཚོ་བཟང་པོའི་ཚོན། ཁ་དོག་སོ་སོར་བཀྲ་བའི་གྲགས་པའི་རྒྱན། །ཕྱོགས་བྲལ་རྣ་ལུང་འགོད་མཁས་རྟག་ཏུ་རྒྱལ། །དཔལ་ལྡན་ཆོས་ཀྱི་རང་བཞིན་ངོས་ཡངས་པར། །གནས་ལྔའི་བང་མཛོད་འབྱོར་བར་ལྷུན་གྲུབ་པའི། །མངའ་སྒྱུར་བགྲོད་བྱེད་བན་དྷུ་ཛི་ཝ་ཀ །རྨད་བྱུང་ཅོད་པན་མཆོག་ཏུ་རྣམ་པར་བསྔགས། །རྒྱ་ཧོར་ལུང་དང་རིགས་ཀྱིས་མངོན་མཐོ་ཞིང་། །བཀའ་ཁྲིམས་གསེར་འཁོར་མཆོག་དམན་གཉའ་གནོན་པའི། །ས་སྐྱའི་འཇམ་མགོན་དཔལ་ལྡན་རླངས་ཀྱི་གདུང་། །ཆོས་ལྡན་ས་སྐྱོང་རྒྱལ་པོར་སུ་མི་དད། །སྨྲ་བའི་འབབ་སྟེགས་མདུད་པའི་རྒྱར་བཅིངས་ཀྱང་། །མཐོན་པོའི་ཁྲི་ལ་དྲེགས་པས་འགྱིང་མིན་པའི། །ལེགས་བཤད་གཏམ་གྱི་འབྱུང་གནས་བློ་ལྡན་ཅན། །གང་དུ་གནས་ཀྱང་དད་པའི་སྤྲོ་བ་འཕེལ། །ཡ་རབས་དམ་པའི་སྤྱོད་ཚུལ་པད་དཀར་ཚལ། །ཆེས་ཆེར་བདོ་བ་སྙིགས་མའི་བསིལ་ཟེར་གྱིས། །ཟུམ་པའི་དུས་འདིར་དེབ་ཐེར་གཏམ་རྒྱུད་སོགས། །བརྗོད་པ་རང་ཉིད་ངལ་བའི་རྒྱུ་རུ་ཟད། ཁྱད་པར་བཅུ་ཕྲག་རིག་པའི་ཆུ་གཏེར་ཆེ། །བློ་གྲོས་གཟིངས་ཀྱིས་སྒྲོལ་འདོད་རིག་བྱེད་པ། །ཤེས་བྱའི་ཚུལ་ལ་མ་སྦྱངས་བསྟན་བཅོས་དག །རྩོམ་པར་རིག་པའི་ཚུལ་ལ་ཡིད་མི་གཏོད། །འོན་ཏང་སྟོབས་ཀྱིས་ཡངས་པའི་ནོར་འཛིན་ལ། །འཁོར་ལོ་སྒྱུར་བའི་བཀའ་ཡི་དྲི་བཞོན་གྱིས། །དེབ་ཐེར་རྫོགས་ལྡན་གསར་པའི་དགའ་སྟོན་མགྲོན། །འབོད་བྱེད་མ་ལ་ཡ་ཡི་རྒྱུད་འདི་སྤྲོ། །

རྒྱ་གར་གྱི་རྒྱལ་རབས་བརྗོད་པ།

---

^{[མ་དཔེ་གཟིགས་ན་འདིར་གནོན།]}

རྒྱ་གར་གྱི་རྒྱལ་རབས་བརྗོད་པ།ཤིས་པ་བརྗོད་པའི་དབྱངས་ཀྱི་ང་རོ་ཏམ་བུ་རའི་རྒྱུད་ལས་ཉེ་བར་དྲངས་ཏེ། བླ་ན་མེད་པའི་ཡེ་ཤེས་ཀྱི་བདུད་རྩི་ཟད་མི་ཤེས་པའི་འབྱུང་གནས་ཟ་(༦བ)

---

^{[མ་དཔེ་གཟིགས་ན་འདིར་གནོན།]}

མ་ཏོག་དབང་གི་རྒྱལ་པོ་རྨད་དུ་བྱུང་བའི་ཐུགས་ཀྱི་གསང་མཛོད་དཔལ་བེའུའི་མཛེས་རྒྱན་དུ་སྤུད་པའི་བསྐལ་པ་བཟང་པོ་འདིའི་འདྲེན་མཆོག་སྟོབས་བཅུ་མངའ་བ་སྟོང་གི་མི་ལྟུང་འཕྲེང་བའི་དབུས་ནས་ཆུ་ཤེལ་དབང་པོའི་དཀྱིལ་འཁོར་ཉ་གང་བ་ལྟ་བུར་མངོན་པར་འཕགས་ཤིང་། མདའ་ཡིས་བཅིངས་པའི་རླབས་པོ་ཆེའི་སྨོན་ལམ་གྱི་མཐུ་ཕུལ་དུ་བྱུང་བའི་བདེན་སྟོབས་དྲི་མ་མེད་པས་པད་དཀར་ལྟ་བུར་བསྔགས་པའི་དབྱངས་ཀྱི་རྒྱལ་མོའི་རྔ་བོ་ཆེ་སྲིད་པ་གསུམ་གྱི་ཁོར་མོ་ཡུག་བརྡུང་བའི་རྒྱལ་བ་བུ་རམ་ཤིང་པ་འདི་ཉིད་ཀྱི་བསྟན་པ་རིན་པོ་ཆེ་ནི་ལྷ་དང་བཅས་པའི་འགྲོ་བའི་ལེགས་བྱས་གྲངས་མེད་པའི་ཟོང་གིས་བསྒྲུབས་པའི་ཕན་བདེ་ཀུན་གྱི་རྩ་ལག་སྟེ། དེ་ཡང་འབྱུང་ཞིང་འཕེལ་བ་དང་། ཡར་ལྡན་དུ་རྒྱས་པའི་བྱེད་པོ་ནི་ཡངས་པའི་ནོར་འཛིན་གྱི་ཁྱོན་ལ་མངའ་སྒྱུར་བའི་རྒྱལ་པོ་ཆེན་པོ་ཞིག་ལ་རག་ལུས་པས་ན། འོ་སྐོལ་གྱི་སྟོན་པས་ཀྱང་རིགས་དང་། ཡུལ་དང་། དུས་དང་། བརྒྱུད་དང་། བུད་མེད་དེ་གཟིགས་པ་ལྔ་ལ་གཟིགས་ནས། ཟས་གཙང་གི་སྲས་སུ་བལྟམས་པར་མཛད་པས། ཐོག་མར་འདི་ཉིད་ཀྱི་གདུང་རབས་ཅུང་ཟད་བརྗོད་པར་བྱ་སྟེ། འཕགས་པའི་ཡུལ་གྱི་མི་ཕལ་ཆེ་བ་འཆི་མེད་ཀྱི་གནས་ནས་ཆད་པས། གཞལ་དུ་མེད་པའི་ཚེ་དང་འདོད་རྒུ་ལ་ལོངས་སྤྱོད་ཅིང་མཐའ་ཡས་པའི་ཡོན་ཏན་དུ་མ་ལ་དབང་འབྱོར་པའི་ཚེ། འབད་རྩོལ་གྱི་མཐུ་ལ་རག་མ་ལས་པའི་བདུད་རྩི་སའི་བཅུད་དང་། སའི་ཞག །མྱུ་གུའི་ཚལ། མ་རྨོས་པའི་འབྲས་ས་ལུ་རྣམས་ལ་ལོངས་སྤྱོད་པས། ལྷ་ལས་ཆད་པའི་ཡོན་ཏན་ཕལ་ཆེར་ལས་གཞན་དུ་གྱུར་ཅིང་། མ་རྨོས་པའི་འབྲས་ཀྱང་རྣམ་པར་གཡེང་བའི་གཞན་དབང་དུ་(༧ན)

---

^{[མ་དཔེ་གཟིགས་ན་འདིར་གནོན།]}

གྱུར་པ་ཞིག་གི་བྱེད་པ་ལ་བརྟེན། སོ་ནམ་གྱི་བྱ་བ་ལ་བརྩམས་པས། ཕན་ཚུན་དུ་རྩོད་པ་དང་མཚང་འབྲུ་བ་བྱུང་བ་རྣམས་ལ་དང་པོའི་ཐིག་གིས་གཅོད་པའི་ཞལ་ལྕེ་བར། ཀུན་གྱིས་བཀུར་ཞིང་འདུད་པ་ལས། མང་པོས་བཀུར་བའི་རྒྱལ་པོ་ཞེས་རྒྱལ་པོ་ལ་སྔ་བར་གྲགས་ཤིང་། དེ་ནས་རིམ་བཞིན་འོད་མཛེས། དགེ་བ། དགེ་མཆོག །གསོ་སྦྱོང་འཕགས་ཏེ་སྔོན་གྱི་རྒྱལ་པོ་སྡེ་ལྔར་བརྗོད་ལ། གསོ་སྦྱོང་འཕགས་ཀྱི་སྤྱི་བོར་ཤ་རྨེན་ཞིག་བྱུང་བ་ལས་ང་ལས་ནུ། དེའི་བརླ་གཡས་པར་ཤ་རྨེན་ཞིག་བྱུང་བ་ལས་མཛེས་པ། དེའི་བརླ་གཡོན་པར་ཤ་རྨེན་ཞིག་བྱུང་བ་ལས་ཉེ་མཛེས། དེའི་རྐང་པ་གཡས་པར་ཤ་རྨེན་ཞིག་བྱུང་བ་ལས་མཛེས་ལྡན། དེའི་རྐང་པ་གཡོན་པར་ཤ་རྨེན་ཞིག་བྱུང་བ་ལས་ཉེ་མཛེས་ལྡན་ཏེ། འདི་ལྔ་ལ་འཁོར་ལོས་སྒྱུར་བའི་རྒྱལ་པོ་ལྔར་གྲགས་ཤིང་། ཕྱི་མ་བཞིས་ནི་གླིང་བཞི་ནས་གཅིག་གི་བར་ལ་དབང་སྒྱུར་བས། གསེར་དངུལ་ཟངས་ལྕགས་ཀྱི་འཁོར་ལོས་སྒྱུར་བའི་རྒྱལ་པོ་ཡིན་ནོ། །རྒྱལ་པོ་འདི་དག་ནས་རིམ་པར་བརྒྱུད་དེ་ཟས་གཙང་ཡན་ཆོད་དུ། ས་ཡ་ཆིག་འབུམ་ཉི་ཁྲི་ཆིག་སྟོང་ལྔ་བརྒྱ་བཅུ་བཞི་བྱུང་བར་གྲགས་ལ། འཇིག་རྟེན་གདགས་པར། རྒྱལ་པོ་འབུམ་ཕྲག་བརྒྱད་སུམ་ཁྲི་བཞི་སྟོང་ལྔ་བརྒྱ་སུམ་ཅུ་རྩ་བཞི་ཡོད་པར་བཤད་པའི་ལུགས་གཉིས་ཀ་སྙིགས་དུས་ཀྱི་ལོ་རྒྱུས་སྨྲ་བ་ཀུན་གྱི་གཙུག་རྒྱན། གཞོན་ནུ་དཔལ་གྱིས་འདྲེན་པར་མཛད་པ་ལས་གསལ་བར་མ་གསུངས་པས། སླད་ནས་ཀྱང་ལོ་རྒྱུས་ལ་འདྲིས་པར་འདོད་པའི་བློ་ལྡན་དག་གིས་དཔྱད་པར་བྱའོ། །དེ་ཡང་སྟོན་པ་འདི་ཉིད་ཀྱི་གདུང་ལ་ཉི་མའི་གཉེན་དང་བུ་རམ་ཤིང་པ་ཤཱཀྱ་(༧བ)

---

^{[མ་དཔེ་གཟིགས་ན་འདིར་གནོན།]}

ཞེས་བརྗོད་པ་ནི། ཡུལ་གྲུ་འཛིན་དུ་རྒྱལ་པོ་བརྒྱ་ཐམ་པ་བྱུང་བའི་མཐའ་མ་རྣ་བ་ཅན་གྱི་བུ་གཽ་ཏ་མ་དང་བྷ་ར་དྷཱ་ཛ་གཉིས་ལས། སྔོན་མས་རབ་ཏུ་བྱུང་སྟེ་ལོ་མའི་སྤྱིལ་པོ་ཡིད་དུ་འོང་བའི་བསམ་གཏན་གྱི་ཁང་བུར་གནས་པའི་ཚེ། གཡོ་ཅན་པདྨའི་རྩ་ལག་དང་བཟང་མོ་དགའ་མགུར་སྤྱོད་པའི་དུས་ལས་ཡོལ་བས། བཟང་མོ་བསད་པའི་རལ་གྲི་ཁྲག་ཅན་ལོ་མའི་སྤྱིལ་པོའི་ཉེ་འདབས་སུ་བོར་བའི་རྐྱེན་གྱིས་གཽ་ཏ་མ་བསལ་ཤིང་ལ་བསྐྱོན་པའི་དུས། དྲང་སྲོང་མདོག་ནག་གི་རྫུ་འཕྲུལ་གྱིས་གྲུ་ཆར་གྱི་ཐིགས་པ་དང་། དྲི་བཞོན་ལུས་ལ་རེག་པའི་རྐྱེན་གྱིས་འདོད་པའི་གནས་རྗེས་སུ་དྲན་པའི་ཡིད་ཀྱི་ཤིང་རྟས་དྲངས་ཏེ། ཁམས་ཀྱི་དྭངས་མ་གཉིས་ལྷན་ཅིག་ཏུ་ལྷུངས་པ་ལས་སྒོ་ང་གཉིས་སུ་གྱུར་པ་ཉི་འོད་ཀྱིས་བསྐྱངས་ཤིང་ཁྱེའུ་གཉིས་བུ་རམ་གྱི་ཤིང་གསེབ་ཏུ་ཞུགས་པས་མིང་དེ་ལྟར་དུ་གྲགས་ལ། བུ་རམ་ཤིང་པའི་བརྒྱུད་ལ་རྒྱལ་པོ་བརྒྱ་བྱུང་བའི་མཐའ་མ་འཕགས་སྐྱེས་པོ། འཕགས་སྐྱེས་པོ་ལ་སྲས་བཞི་བྱུང་ཡང་བཙུན་མོ་འདས་ཏེ་སླར་སྟོབས་ལྡན་གྱི་རྒྱལ་པོ་གཞན་ཞིག་གི་བུ་མོ་ཁབ་ཏུ་བླངས་པར་སྲས་བྱུང་ན་རྒྱལ་སྲིད་དུ་དབང་བསྐུར་བར་ཁས་བླངས་པའི་དམ་བཅས། སྲས་སྔོན་མ་རྣམས་སྤྱུགས་པ་རང་རང་གི་སྲིང་མོ་དང་བཅས་ཏེ་ཆུ་བོ་སྐལ་ལྡན་ཤིང་རྟའི་འགྲམ་དུ་མིང་སྲིང་ལྷན་ཅིག་ཏུ་འདུས་པ་ལས་ཤཱཀྱའི་བརྒྱུད་ཅེས་གྲགས་པ་ཡིན་ནོ། །དེ་ཡང་ཀུན་མཁྱེན་ཉི་མའི་གཉེན་འདི་ཉིད་འཁྲུངས་ལོར་མཁས་གྲུབ་རྣམས་ཀྱི་བཞེད་ཚུལ་མང་དུ་མཆིས་ཀྱང་དོན་གྲུབ་ཅེས་པ་ས་ལུག་དབྱར་ཟླ་འབྲིང་པོའི་ཆུ་སྟོད་ཀྱི་ཉ་བའི་ཚེས་བཅོ་ལྔའི་དུས་སུ། ཡུམ་གསོ་སྦྱོང་ལ་གནས་པའི་ལྷུམས་སུ་གླང་པོ་ཆེའི་ཕྲུག་གུ་ཐལ་(༨ན)

---

^{[མ་དཔེ་གཟིགས་ན་འདིར་གནོན།]}

དཀར་གྱི་རྣམ་པར་གྱུར་ནས་ཞུགས། ཟླ་བ་བཅུ་ཕལ་ཆེར་ལོན་པ་ལེགས་པར་སྦྱར་བ་ལྷའི་སྐད་དུ་རུ་དྲ་ཞེས་པ་བསིལ་ལྡན་པ་རྣམས་དྲག་པོར་བརྗོད་པ། རྒྱ་ནག་པ་དབང་ཐང་དང་བསྟུན་པའི་མིང་གིང་ཤིང་། བོད་ཡུལ་དུ་ལྕགས་ཕོ་སྤྲེའུར་འབོད་པའི་དཔྱིད་ཐ་ས་གས་ཉ་བ་མེ་ཏོག་ཅན་གྱི་ཟླ་བ། རྒྱ་ནག་པ་སི་ཡོལ་དུ་བརྗོད་པའི་ཡར་ངོའི་ཚེས་བདུན་གྱི་རེས་གཟའ་འོད་ཟེར་བདུན་པ་དང་། ལས་སྐར་རྒྱལ་ལ་བབས་པ་ན་ལུམྦི་ནིའི་ནགས་སུ་སྐུ་བལྟམས། དེ་ནས་ལང་ཚོའི་ཀུན་ད་རྣམ་པར་རྒྱས་པའི་ཟིལ་མངར་གྱི་སྒྱུ་རྩལ་དྲུག་ཅུ་རྩ་བཞིའི་ཡལ་འདབ་ཀྱི་ཡོན་ཏན་ཀུན་ལ་རང་གིར་བགྱིས་ཤིང་། པདྨོའི་སྙེམས་པ་ཐོགས་པའི་རི་དྭགས་མིག་ཅན་གྱི་དོན་ཡོངས་སུ་ཚང་བའི་གྲགས་འཛིན་མ་དང་ས་མཚོ་མ་སོགས་བཙུན་མོར་དབང་བསྐུར་ཏེ་ལོ་ཉི་ཤུ་རྩ་དགུའི་བར་དུ་ཉི་འོག་གི་རྒྱལ་ཕྲན་གཉིས་འཐུང་གི་སྤྱི་བོར་འཇིགས་པ་མེད་པའི་རྒྱལ་ཐབས་ཀྱི་བྱ་བའི་སྐད་གསང་མཐོན་པོས་རང་བྱིན་དུ་འགྱིང་བར་དབང་ཐོབ་ནའང་། མཆོག་གི་སྤྲུལ་སྐུའི་མཛད་པ་སྟོན་པའི་ཆེད་དུ། དགུང་ལོ་ཉེར་དགུ་པ་ཀུན་འཛིན་ཞེས་པ་ས་ཕོ་བྱི་བ་ལ་རང་བྱུང་གི་སྒོ་ནས། རབ་བྱུང་གི་དངོས་པོ་ཡོངས་སུ་རྫོགས་ཏེ། ལོ་དྲུག་ཏུ་དཀའ་བ་སྤྱད་པས་ལང་ཚོ་ཕུན་སུམ་ཚོགས་པ་ལས་གཞན་དུ་གྱུར་པ་ན། དགའ་མོ་དང་དགའ་སྟོབས་མས་བ་སྟོང་གི་འོ་མ་ལན་བཅུ་དྲུག་གི་བར་དུ་ཉིང་ཁུར་བྱས་པའི་འོ་ཐུག་སྦྲང་རྩི་དང་སྦྱར་བའི་ཀུན་ཏུ་བཟང་པོའི་མཆོད་སྤྲིན་གྱི་སྐུ་སུ་ཝརྞའི་མཆོད་སྡོང་ཉི་གཞོན་འབུམ་གྱིས་འཁྱུད་པ་ལྟར་གྱུར་ཏེ་རྡོ་རྗེ་གདན་དུ་བྱང་ཆུབ་ཀྱི་ཤིང་དྲུང་ན་འཆི་མེད་བདག་པོས་རྩ་འཚོང་གི་རྣམ་པར་(༨བ)

---

^{[མ་དཔེ་གཟིགས་ན་འདིར་གནོན།]}

སྤྲུལ་ཏེ་ཕུལ་པའི་རྩའི་གདན་ལ་བཞུགས་ནས། ཆུ་སྲིན་རྒྱལ་མཚན་ཅན་སྡེ་དང་བཅས་པའི་གཡུལ་ལས་རྣམ་པར་རྒྱལ་བའི་བ་དན་ནམ་མཁའི་མཐའ་ཀླས་པར་བསྒྲེངས་ཏེ། དགུང་ལོ་སོ་ལྔ་པ་རྒྱལ་བ་ཞེས་པ་ཤིང་རྟའི་ས་གས་ཉ་བའི་བཅོ་ལྔའི་སྐྱ་རེངས་ཤར་བ་ན་ཡེ་ཤེས་མཆོག་གི་བདུད་རྩི་མངོན་དུ་མཛད་དོ། །མདོ་ལས། དེའི་ཉིན་མོ་ཟླ་བ་སྒྲ་གཅན་གྱིས་བཟུང་བ་དང་། སྒྲ་གཅན་འཛིན་དང་བདུད་རྩི་ཟས་ཀྱི་ཁྱིའུ་ཞིག་ཀྱང་སྐྱེས་པར་བཤད་པའི་གཟའ་འཛིན་གྱི་རི་མོ་ནི་གཟའ་གནས་སུ་གཅིག་ཆུ་ཚོད་སོ་བརྒྱད་ཟླ་སྐར་གྱི་སྐར་གནས་སུ་བཅུ་དྲུག་ཆུ་ཚོད་སྟོང་པ་སྒྲ་གཅན་གདོང་གི་སྐར་མར་བཅུ་དྲུག །ཆུ་ཚོད་ཉེར་དགུ་བྱུང་བས་གཟའ་འཛིན་གྱི་རི་མོ་ནི་ཚད་མའི་ཨཱ་དརྴ་གཙང་མའི་ངོས་སུ་གསལ་བར་ཤར་བ་ཡིན་ནོ། །དེ་ནས་ཞག་ཞེ་དགུའི་བར་དུ་དམ་པའི་ཆོས་ཀྱི་བདུད་རྩིའི་སྒོ་བརྒྱ་མ་ཕྱེ་བའི་ཚུལ་བསྟན་པས། འཇིག་རྟེན་གྱི་བྱེད་པོ་གསེར་མངལ་ཅན་གྱིས་སྐལ་བ་མཆོག་གི་བཟང་པོའི་དཔལ་དང་ལྡན་པའི་དོན་དུ་གསོལ་བ་ལ་བརྟེན་ནས། མཆོག་དམན་གྱི་གདུལ་བྱ་སོ་སོའི་བློ་དང་འཚམ་པར་ཟབ་རྒྱས་ཆོས་ཀྱི་སྒོ་གླེགས་རྣམ་པར་བཀྲལ་ནས་ཐེག་པ་ཆེ་ཆུང་གི་རིགས་ཅན་གྱི་ཡོལ་གོ །རང་འདོད་པའི་ཚོགས་མཐའ་དག་གཅིག་ཏུ་འཇོ་བའི་རོ་ཟད་མི་ཤེས་པ་མཁའ་ཁྱབ་ཏུ་བྲོ་བའི་འཁོར་ལོ་བསྐོར་ཏེ། མཐར་གྱད་ཀྱི་ཡུལ་རྩ་མཆོག་གི་གྲོང་དུ་དགུང་ལོ་གྱ་གཅིག་པ་དཔའ་བོ་ཞེས་པ་ལྕགས་འབྲུག་གི་ལོར་མི་འགྱུར་བའི་བདེ་བ་ཆེན་པོ་ཆོས་ཀྱི་སྐུའི་མཁའ་ཀློང་དུ་སྣ་ཚོགས་པའི་སྤྲུལ་སྐུའི་ཟློས་གར་གྱིས་རོལ་པའི་ཆུ་འཛིན་གྱི་གཟུགས་སྐུ་ཐ་མི་དད་པའི་མཛད་པ་བསྟན་ཏོ། །དེ་ལྟར་བསྟན་པ་རིན་པོ་ཆེ་ཡུལ་དབུས་སུ་འགྱུར་ནས་(༩ན)

---

^{[མ་དཔེ་གཟིགས་ན་འདིར་གནོན།]}

ཆར་དུས་ཀྱི་དལ་འགྲོའི་ཀླུང་རང་བབས་སུ་འགྱུར་བའི་གཤིས་ལུགས་བཞིན་ཐ་གྲུར་ཁྱབ་པ་ལས། འགྲོ་བའི་བླ་མ་ཤཱཀྱ་སེང་གེ་གྱ་གཅིག་པ་ཆུ་འབྲུག་ལ་ནག་ཉར་ཤྲཱི་དྷཱ་ནྱ་ཀ་ཊ་ཀར་གསང་བ་ཀུན་གྱི་གན་མཛོད་རྣམ་པར་འཛིན་པའི་མིའི་དབང་ཕྱུག་ཟླ་བ་བཟང་པོར་ཤོ་ལོ་ཀ་སྟོང་ཕྲག་བཅུ་གཉིས་ཀྱི་བདག་ཉིད་ཅན་གྱི་དཔལ་དང་པོའི་སངས་རྒྱས་དུས་ཀྱི་འཁོར་ལོའི་རྒྱུད་གསུངས་པ་ཤམ་བྷ་ལར་སྤྱན་དྲངས་ནས་མ་ལ་ཡའི་སྐྱེད་ཚལ་དུ་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་གྱི་སྣང་བརྙན་ཡེ་ཤེས་ཀྱི་གཟི་བྱིན་མངོན་པར་འབར་བའི་སྒྱུ་མའི་གར་གྱིས་བརྩོན་པའི་འདྲེན་བྱེད་ཀྱི་དགའ་སྟོན་གསར་པ་བསྐྲུན་ཏེ། རྡོ་རྗེ་ཐེག་པའི་བགོ་སྐལ་ཀ་ལཱ་པའི་གྲོང་ཁྱེར་གྱི་སྐྱེ་རྒུར་འབྱེད་པའི་མུ་མཐའ་བྲལ་བའི་མཛད་པ་ནས་བཟུང་འཇིགས་པ་མེད་པའི་གདོང་ལྔའི་ཁྲི་ལ་བགྲོད་བྱེད་རྩིབས་སྟོང་འཁོར་ལོའི་རི་མོ་མཆོག་ཏུ་བཀྲ་བའི་ཆོས་རྒྱལ་རིགས་ལྡན་སུམ་ཅུ་རྩ་གསུམ་དུ་བྱོན་པ་མཐའ་དག་གིས་ཕྱི་ནང་གཞན་གསུམ་སྦྱོར་བའི་གསང་ཆེན་ནཱ་དའི་སྒྲ་དབྱངས་ཀྱི་ནོར་བུའི་ཕྱང་འཕྲུལ་ལས་ལྡན་གྱི་རྣ་བར་སྤུད་པར་མཛད་པའི་ཐ་མ། དྲག་པོའི་འཁོར་ལོ་ཅན་གྱིས་དགུང་ལོ་དགུ་བཅུ་རྩ་བརྒྱད་པར་ཀླ་ཀློའི་དཔུང་ཚོགས་མཐའ་དག་མིང་གི་ལྷག་མར་བྱས་ནས་བླ་ན་མེད་པས་ས་ཆེན་པོའི་ཁོར་ཡུག་ཀུན་ཏུ་ཁྱབ་པར་མཛད་དོ། །དེ་ཡང་རིགས་ལྡན་དྲག་པོ་དགུང་ལོ་ལྔ་བཅུའི་སྟེང་དུ་ཀླ་ཀློ་བཅོམ་པར་བཞེད་པ་ལྟར་ན། ཀླ་ཀློའི་གནས་ཚད་སྟོང་དང་བརྒྱད་བརྒྱར་བཤད་པ་ལས་ལོ་གྲངས་བཞི་བཅུ་རྩ་བདུན་ཙམ་མི་འགྲིག་པའི་སྐྱོན་ཡོད་ཅིང་། དེ་དག་རགས་རྩིས་སུ་འཆད་ན་ཞིབ་རྩིས་ནི་འབྱུང་(༩བ)
བའི་སྐབས་མེད་པས་གཟུར་གནས་ཀྱི་ཤེས་ལྡན་རྣམས་སོམས་ཤིག །

གངས་རིས་བསྐོར་བའི་ལྗོངས་འདིར་རྒྱལ་བའི་འཕྲིན་ལས་འཇུག་ཚུལ་ལས་གཉའ་ཁྲི་བཙན་པོ་ནས་གནམ་རི་སྲོང་བཙན་བར་གྱི་རྒྱལ་རབས་བརྗོད་པ།

---

^{[མ་དཔེ་གཟིགས་ན་འདིར་གནོན།]}

གངས་རིས་བསྐོར་བའི་ལྗོངས་འདིར་རྒྱལ་བའི་འཕྲིན་ལས་འཇུག་ཚུལ་ལས་གཉའ་ཁྲི་བཙན་པོ་ནས་གནམ་རི་སྲོང་བཙན་བར་གྱི་རྒྱལ་རབས་བརྗོད་པ།དེ་ལྟར་ཤམ་བྷ་ལས་མཚོན་ཏེ། ཨོ་རྒྱན་བལ་ཡུལ། རྒྱ་ཧོར་སོགས་སུ་བསྟན་པ་བྱུང་ཚུལ་ནི་མཐའ་ཡས་ཀྱང་མང་གིས་དོགས་པས་མ་སྤྲོས་ལ། སྐབས་སུ་བབ་པ་རང་ཅག་གངས་རིས་བསྐོར་བའི་ལྗོངས་འདིར་རྒྱལ་བའི་འཕྲིན་ལས་ཀྱི་འཇུག་བཤད་ཚུལ་ནི། དེ་ཡང་ཟླ་གཞོན་ལན་བརྒྱར་བཞུ་བའི་ཁུ་བས་བྱུགས་པའི་མན་ཤེལ་གྱི་ལྷུན་པོའི་འཕྲེང་བ་ཚར་དུ་མངར་བ་ལྟ་བུའི་གངས་རིའི་འདབ་མ་ཁོར་མོ་ཡུག་ཏུ་འཁྲིགས་པའི་ཡུལ་ལྗོངས་འདིར་མིའི་འགྲོ་བ་ཆགས་ཚུལ་ལ། མཁས་པ་རྣམས་ཀྱི་བཞེད་ཚུལ་མཐའ་ཀླས་ཤིང་། འགའ་ཞིག་ནི་རང་ཉིད་ཀྱི་ལུགས་ཁོ་ན་ལ་ཞེན་པའི་ལུང་རིག་དཔྱད་པ་མེད་པར་ལུགས་གཞན་དག་རྣམས་ཚད་ལྡན་མ་ཡིན་པ་ཁོ་ནར་སྨྲ་བའི་གཏམ་གྱི་འབྲུག་སྒྲས། ཆོས་སྤོང་གི་རྨ་བྱ་རང་དབང་མེད་པར་དགའ་བའི་ལས་ཀྱི་སྒྲིབ་པའི་སྒྲོ་གཤོག་ཕྱོགས་བཅུར་སྐྱོང་བ་འགའ་མཆིས་ནའང་། རིས་སུ་མ་ཆད་པའི་གསུང་རབ་ཀྱི་རྒྱ་མཚོ་ཆེན་པོའི་ལྗིང་ལས་རྣམ་དཔྱོད་གྲུ་གཟིངས་ཀྱིས་རང་དབང་དུ་སྤྱོད་པ་གཞོན་ནུ་དཔལ་བའི་གསུང་ལས། བོད་ཀྱི་ཡུལ་འདི་ཡང་རྒྱ་གར་དང་འདྲ་བར། ཡུལ་དང་མི་ལ་སོགས་པ་གནས་པའི་བསྐལ་པ་ནས་བྱུང་བར་བྱས་ན་ཡང་། ལུང་དང་རིག་པའི་གནོད་པ་མེད་ཅིང་ཞེས་སྤྱི་ཁྱབ་ཏུ་གསུངས་ནས། ལུགས་གཞན་ཡང་འདྲེན་པར་མཛད་པའི་གུང་འགྲིག་མི་འགྲིག་གི་བརྗོད་བྱ་ཙམ་ལས་མཐའ་གཅིག་ཏུ་གསལ་བར་མ་གསུངས་ལ། ལྷ་ལས་ཕུལ་བྱུང་གི་བསྟོད་འགྲེལ་ལས་བཤད་པའི་རྒྱལ་པོ་རུ་པ་ཏི་དཔུང་བཅས། རི་ཁ་བ་ཅན་གྱི་ཁྲོད་དུ་ཞུགས་པ་(༡༠ན)

---

^{[མ་དཔེ་གཟིགས་ན་འདིར་གནོན།]}

ལས་འཕེལ་བའི་རིགས་ཀྱང་ཡོད་སྲིད། གཙོ་བོ་ནི་ཕྱག་ན་པདྨའི་ཐུགས་རྗེའི་འཕྲིན་ལས་ཀྱི་འོད་ཟེར་འགོག་པ་མེད་པར་ཤར་བས། གངས་ཁྲོད་ཀྱི་འགྲོ་བའི་པད་ཚལ་རྣམ་པར་རྒྱས་པ་ཞིག་སྟེ། དེ་དག་གི་ཚུལ་གནས་ལྔ་ཡོངས་སུ་རྫོགས་པའི་པཎྜི་ཏ་ཆེན་པོ་དཱི་པཾ་ཀ་ར་ཤྲཱི་ཛྙཱ་ནས་ཀ་བ་ཤིང་ལོ་ཅན་གྱི་བྱང་ངོས་ནས་བཞེས་པའི་བཀའ་འཁོལ་མ་དང་། མ་ཎི་བཀའ་འབུམ་སོགས་གངས་ཅན་གྱི་ལྗོངས་ན་དར་རོ་ཅོག་གི་ཐུགས་རྗེ་ཆེན་པོའི་ཆོས་སྐོར་དུ་མ་ཞིག་དགོངས་པའི་ཁོག་གཅིག་པ་ལས། སྤྲེའུ་དང་བྲག་སྲིན་མོ་ལྷན་ཅིག་འདུས་པའི་ཕྲུག་གུ་གདོང་དམར་ཤ་ཟན་གྱི་རིགས་སུ་བཤད་པ་ལྟར། རྒྱལ་བ་ཉི་མའི་གཉེན་གྱི་ཚད་མེད་པའི་ཐུགས་རྗེའི་མངལ་ཁུར་ལས་ཐོན་པའི་གསུང་གི་སྣང་བསྩལ་བ་ལ་བརྟེན་ནས། བོད་ཆེན་པོའི་རྒྱལ་ཁམས་སུ་འཕགས་པ་རིགས་གསུམ་གྱི་མགོན་པོས་དྲི་མ་མེད་པའི་འདྲེན་བྱེད་ཀྱིས་གཟིགས་པ་ན། སྟོད་མངའ་རིས་ཀྱི་ཆ་ནི་གླང་པོ་ཆེ་དང་རི་དྭགས་ཀྱི་ཡུལ། བར་དབུས་གཙང་གི་ཆ་ནི་རི་དྭགས་དང་སྤྲེའུའི་ཡུལ། སྨད་མདོ་ཁམས་ཀྱི་ཆ་ནི་སྤྲེའུ་དང་བྲག་སྲིན་གྱི་ཡུལ། དེ་ཡང་སྟོད་གཡའ་རི་དང་གངས་རི། བར་བྲག་དང་སྤང་ལྗོངས། སྨད་རྩི་ཤིང་དང་ནགས་ཚལ་གྱི་ཡལ་ག་སྟུག་པོས་དབྱིག་འཛིན་གོས་སུ་ཀླུབས་པ་ལྟ་བུར་རྒྱུ་བའི་འགྲོ་བ་ཀུན་ཀྱང་སྲོག་གཅོད་སོགས་ངན་སོང་གི་རྒྱུ་ལ་བག་མེད་དུ་ལོངས་སྤྱོད་པའི་རྐྱེན་གྱིས་ཡུལ་གྲུ་དེ་དག་གི་འོག་ཏུ་མི་ཟད་པའི་དུཿཁའི་འབྱུང་གནས་དམྱལ་བའི་ལྕགས་ཀྱི་ཟ་མ་ཏོག་འདྲ་བའི་ནང་དུ་ལྷུང་བར་ཡེ་ཤེས་གཟིགས་པས་མཁྱེན་ནས་འཕགས་པ་རྣམ་གསུམ་བཀའི་བགྲོ་བ་ལས་ཐོག་མར་འཇིག་(༡༠བ)

---

^{[མ་དཔེ་གཟིགས་ན་འདིར་གནོན།]}

རྟེན་དབང་ཕྱུག་གིས་འདུལ་བའི་ཕུལ་དུ་བྱུང་བའི་དགོངས་པ་ལ་བཞུགས་ཏེ་འཕགས་པ་ཕྱག་སྟོང་སྤྱན་སྟོང་གི་སྐུའི་རྣམ་པས་ལྷ་སའི་ཐད་ཀྱི་འཛིན་མའི་ངོས་སུ་བྱོན་པས་དམྱལ་བའི་གནས་ཀྱང་ཡིད་དུ་འོང་བའི་འཆི་མེད་བདག་པོའི་དགའ་བའི་ཚལ་ལ་སྐྱེངས་པ་སྟེར་བར་གྱུར་པ་ལྟ་བུའི་སྣང་བ་དང་བཅས་ཏེ་དེར་གནས་པའི་སྤྲིན་མགྲིན་ཕལ་ཆེར་ལྷའི་བདེ་བ་ལ་སྤྱོད་པར་དབུགས་དབྱུང་ནས། བོད་ཀྱི་འགྲོ་བའི་དོན་མཛད་པར་ཡང་དུད་འགྲོ་ནི་གླེན་ཞིང་གཏི་མུག་པའི་ངང་ཚུལ་ཅན་ལ་བླང་དོར་གྱི་གནས་ཚུལ་བཞིན་སྟོན་པའི་མཐུ་དམན་པས་མིའི་རིགས་སྤེལ་བར་དགོངས། འཕགས་པའི་ཐུགས་རྗེས་རིགས་བསྒྱུར་བའི་སྤྲེའུ་ཞིག་དང་། འཕགས་མ་སྒྲོལ་མའི་བྱིན་རླབས་ཀྱི་རི་དྭགས་གཟུགས་བརྙན་བློའི་ཟླ་གཞོན་དངས་པའི་ངོས་སུ་ཤར་བའི་བྲག་སྲིན་མོ་གཉིས་ཚོགས་པ་ལས་རིགས་དྲུག་ནས་ཚེ་འཕོས་པའི་སྤྱོད་ཚུལ་མི་འདྲ་བའི་ཕྲུག་གུ་དྲུག་བྱུང་བ་ཡང་། ཕ་རིགས་རྣམས་འཆར་སྒོ་མྱུར་ཞིང་སྙིང་རྗེ་ཆེ་བ་ཁོག་གྲིམས་པ། མ་རིགས་རྣམས་གདོང་དམར་སྡིག་ལས་ལ་བརྔམས་ཤིང་རོ་གྱོང་པ་བྱུང་བ་དེ་དག་ལས་རིམ་པར་འཕེལ་བས་བོད་མིའི་རྒྱལ་ཁམས་སུ་གྱུར་ཏེ། རུས་ཆེན་བཞི་ལས་གྱེས་པའི་ཁམས། ཡེ་སང་དཀར་པོ་གནམ་གྱི་འཇུ་ཐག་ཅན་དང་གཅིག །ཡེ་སྨོན་ནག་མོ་ཁྲོ་ཆུའི་ཕ་བོང་འདྲ་བ་དང་གཉིས། སྤྱང་ཁྲིག་ཡེ་ཤེས་ལྷའི་སྒྲོན་མེ་དང་གསུམ། མོན་རྫུ་ནག་པོ་ཁྱིའི་རྔ་ལྗང་ཅན་དང་བཞིར་དབྱེ་བ་བྱུང་། དེ་ཡང་རྒྱལ་ཕྲན་བསིལ་མ་མང་དུ་བྱུང་ཡང་འཕགས་པ་མཆོག་གིས་བྱིན་གྱིས་བརླབས་པ་མ་མཆིས་ཤིང་། ཁྱད་པར་འགྲོ་བ་ཡོངས་ལ་(༡༡ན)

---

^{[མ་དཔེ་གཟིགས་ན་འདིར་གནོན།]}

མངའ་སྒྱུར་བའི་རྒྱལ་པོ་ཞིག་མེད་ན། རྒྱལ་བའི་བསྟན་པ་འབྱུང་དཀའ་བར་དགོངས་ནས། མང་པོས་བཀུར་བའི་བརྒྱུད་ལས་བྱུང་བའི་རྒྱལ་པོ་དམག་བརྒྱ་པ་ཞེས་བྱ་བ་ལས་སྲས་འཕགས་པས་བྱིན་རླབས་ཀྱི་བྱེད་པོས་མི་ལས་འདས་པ་ཞིག་བལྟམས་ཏེ། མིག་མས་འགྲིབས་སུ་ཡོད་པ། གཡུའི་སྨིན་མ་ཅན། སོ་དུང་སོ་འཁོར་མར་ཡོད་པ། ལག་པ་འཁོར་ལོའི་ཡན་ལག་ཅན་ལྟ་བུར་ཡོད་པའི་མཚན་ལྡན་ཞིག་བྱུང་བ། ཡབ་ཀྱིས་ལྷ་འདྲེའི་སྤྲུལ་པར་དགོངས་ནས་སྤྱུགས་པས། པད་དཀར་འཛིན་པའི་ཡེ་ཤེས་མཆོག་གི་འོད་ཟེར་གྱིས་སྣང་བ་བསྒྱུར་ནས། ལྷ་རི་གྱང་ཐོའི་རྩེ་ལ་བྱོན་ནས་གཟིགས་པས། ཡར་ཀླུང་གི་ཡུལ་ནི་མཐོ་རིས་ཀྱི་ཡོན་ཏན་ས་ལ་འཕོས་པ་ལྟར་བཟང་ཞིང་། ཡར་ལྷ་ཤམ་པོའི་གངས་རི་འདི་ལྷུན་པོའི་མཛེས་སྡུག་ལ་ཆགས་པའི་ཆུ་ཤེལ་གྱི་དབང་པོ་ཉ་གང་བས་འཁྱུད་པ་ལྟར་མཁྱེན་ནས། ལྷ་རི་རོལ་པོའི་རྩེ་ལ་གཤེགས་ནས་ལྷ་སྐས་ལ་བབས་ཏེ། བཙན་ཐང་སྒོ་གཞིར་ཞབས་ཟུང་གི་འཁོར་ལོ་བསྐྱོད་པས་བོན་པོ་སོགས་ཡོན་ཏན་ཅན་གྱི་མི་བཅུ་གཉིས་ཕྱུགས་སྐྱོང་བས་མཐོང་སྟེ་གང་ནས་འོངས་ཞེས་གཏམ་དྲིས་པར། མཁའ་ལ་མཛུབ་མོ་ཀེར་བས་ལྷ་ལས་ཆད་པར་གོ་ནས་བོད་ཁམས་ཀྱི་རྗེར་འོས་སོ་ཞེས་གཉའ་བར་ཁྲི་བྱས་བཏེག་ནས་འོངས་པས་རྗེ་གཉའ་ཁྲི་བཙན་པོར་གྲགས་ལ། དེབ་སྔོན་དུ་ཁྲི་བཙན་པོ་འོད་ལྡེ་ཞེས་པ་དང་དོན་གཅིག །རྗེ་འདིས་ཕོ་བྲང་ཡུམ་བུ་བླ་སྒང་བརྩིགས། ཚེ་མི་གཤེན་གྱི་རྨུ་རྒྱལ་གྱི་དོན་བསྒྱུར། ང་དང་གནམ་མུག་མུག་གི་སྲས་མུ་ཁྲི་བཙན་པོ། དེ་དང་ས་དིང་དིང་གི་སྲས་(༡༡བ)

---

^{[མ་དཔེ་གཟིགས་ན་འདིར་གནོན།]}

དིང་ཁྲི་བཙན་པོ། དེ་དང་སོ་ཐམ་ཐམ་གྱི་སྲས་སོ་ཁྲི་བཙན་པོ། དེ་དང་དོག་མེར་མེར་གྱི་སྲས་མེར་ཁྲི་བཙན་པོ། དེ་དང་གདགས་ཀྱི་ལྷ་མོ་དཀར་མོའི་སྲས་གདགས་ཁྲི་བཙན་པོ། དེ་དང་སྲིབ་ཀྱི་ལྷ་མོའི་སྲས་སྲིབ་ཁྲི་བཙན་པོ། འདི་རྣམས་རྨུ་ཐག་ལ་བྱས་ནས་མཁའ་ལ་ཡལ་བས་བང་སོ་མེད་པར་གྲགས་ཤིང་། གནམ་གྱི་ཁྲི་བདུན་ནོ། །སྲིབ་ཁྲི་བཙན་པོ་དང་། ས་བཙུན་རླུང་རྗེའི་སྲས་གྲི་གུམ་བཙན་པོ། དེ་དང་ཀླུ་བཙན་མེར་ལྕམ་ལ་སྲས་གསུམ་བྱུང་ཡང་། བློན་པོ་ལོ་ངམ་དང་འཐབས་པས་རྒྱལ་པོ་བཀྲོངས། བོད་དུ་ཁྲབ་ཀྱི་ཐོག་མ་འདིའི་དུས་སྨར་ཁམས་ནས་བླངས། སྲས་རྣམས་ཡབ་མེས་ཀྱི་དཀོར་མཛོད་ནས་རྟེའུ་གླང་རུ་དཀར་ཞེས་པའི་གླང་འཕུར་ཤེས་ལ་ཞོན་ནས་ཀོང་པོའི་ཕྱོགས་སུ་བྲོས་ཤིང་ཡུག་ཅིག་བློན་པོས་རྒྱལ་སྲིད་བཟུང་། མི་རིང་བར་རྒྱལ་པོའི་བཙུན་མོ་དང་ཡར་ལྷ་ཤམ་པོའི་སྤྲུལ་པ་ཅིག་འདུས་པ་ལས་བྱུང་བའི་བློན་པོ་རུ་ལས་སྐྱེས་ཀྱི་ལོ་ངམ་བསད་དེ། སྲས་བྱ་ཁྲི་རྒྱལ་སར་བསྐོས། རྗེ་གྲི་གུམ་ནས་རྨུ་ཐག་ཆད་པས་བུར་བྱུང་བ་ཟངས་ཀྱི་གའུར་བཅུག་སྟེ་ལྕགས་གཟེར་བཏབ་ནས་ཆུ་ལ་བསྐྱུར་བ་ཀོང་ཆུ་རླག་ཏུ་ཁྱེར་བ་ཆུ་སྲིན་བྱེ་མ་ལག་རིང་གིས་བརྙེད་ནས་ཇོ་མོར་ཕུལ་བ་མཛོད་དུ་སྦས་པ་ལས་བཏོན་ནས། འཕྱིང་ཡུལ་དར་ཐང་དུ་བང་སོ་བརྩིགས་དེ་བང་སོའི་ཐོག་མ་ཡིན་ཞིང་། ཡུམ་གྱིས་ལྷ་ལ་དམོད་བོར་བས་ནམ་མཁའ་ནས་ཁྱོད་ཀྱི་བུ་དེ་ཀུན་ལས་རྒྱལ་བར་འགྱུར་རོ་ཞེས་པའི་སྒྲ་བྱུང་བས་བྱ་ཁྲིའི་མཚན་ལ་སྤུ་དེ་གུང་རྒྱལ་ཟེར། ཡབ་ཀྱི་རིང་ལ་ཞང་ཞུང་དང་། བྲུ་ཤའི་གཤེན་གྱི་དུར་བོན་བྱུང་ཞིང་། སྲས་ཀྱི་རིང་ལ་སྐུ་མཁར་ཕྱིང་བ་སྟག་རྩེ་བརྩིགས། སྒྲུང་དང་ལྡེའུ་གནམ་(༡༢ན)

---

^{[མ་དཔེ་གཟིགས་ན་འདིར་གནོན།]}

བོན་གཤེན་པོ་ཆེ་བྱུང་། རུ་ལས་སྐྱེས་དང་སྲས་ལྷ་བུ་མགོ་དཀར་ཏེ་བློན་པོ་གཉིས་ཀྱི་རིང་། ཆུ་ཡུར་བར་དྲངས། སྤང་ཞིང་དུ་རྨོས། རྡོ་བཞུ་བས་དངུལ་ཟངས་ལྕགས་གསུམ་བཏོན། ཆུ་ལ་ཟམ་པ་བཙུགས། རྒྱལ་པོ་དེ་དག་བར་གྱི་སྟེང་གཉིས་ཡིན། བང་སོ་གཡའ་དང་རྫ་ལ་བཏབ་བོ། །སྤུ་དེ་གུང་རྒྱལ་དང་བོམ་ཐང་རྨང་མཉའི་སྲས་ཨེ་ཤོ་ལེགས། དེ་དང་རྨུ་ལྕམ་བྲ་མ་ནའི་སྲས་དེ་ཤོ་ལེགས། དེ་དང་ཀླུ་སྨན་མེར་མོའི་སྲས་ཐི་ཤོ་ལེགས། དེ་དང་བཙུན་མོ་གུར་སྨན་གྱི་སྲས་གུ་རུ་ལེགས། དེ་དང་མཚོ་སྨན་འབྲོང་མའི་སྲས་འབྲོང་ཞི་ལེགས། དེ་དང་སྨན་བུ་མོའི་སྲས་ཨི་ཤོ་ལེགས། དེ་རྣམས་སའི་ལེགས་དྲུག་སྟེ་བང་སོ་གཡའ་སྤང་མཚམས་སུ་བཏབ་བོ། །ཨི་ཤོ་ལེགས་དང་རྨུ་ལྕམ་སྨིན་ལེགས་ཀྱི་སྲས་ཟ་ནམ་ཟིན་ལྡེ། དེ་དང་མཚོ་སྨན་ཁྲི་དཀར་གྱི་སྲས་ལྡེ་འཕྲུལ་ནམ་གཞུང་བཙན། དེ་དང་སེ་སྙན་མང་མའི་སྲས་སེ་སྣོལ་གནམ་ལྡེ། དེ་དང་ཀླུ་མོ་མེར་མའི་སྲས་སེ་རྣོལ་པོ་ལྡེ། དེ་དང་འོ་མ་སྟེ་མོ་མཚོའི་སྲས་ལྡེ་སྣོལ་ནམ། དེ་དང་ཁྲི་སྨན་རྗེ་མའི་སྲས་ལྡེ་རྣོལ་པོ། དེ་དང་སེ་བཙུན་གཉན་རྗེའི་སྲས་ལྡེ་རྒྱལ་པོ། དེ་དང་སྨན་བཙུན་ལུག་སྒོང་གི་སྲས་ལྡེ་སྤྲིན་བཙན། དེ་དག་ལྡེ་བརྒྱད་དེ་བང་སོ་ཆུ་བོའི་གཞུང་ལ་བཏབ་བོ། །ལྡེ་སྤྲིན་བཙན་དང་ཉི་བཙུན་མང་མ་རྗེའི་སྲས། རྒྱལ་ཏོ་རི་ལོང་བཙན། འདི་ཡན་ཆད་ཀྱི་རྒྱལ་པོ་རྣམས་ལྷ་ཀླུའི་བུ་མོ་འབའ་ཞིག་བཙུན་མོར་བསྟེན་པས་ཡུམ་རྣམས་གྲོངས་པའི་ཚེ་བུར་མ་བྱུང་ཞིང་། འདི་མན་ནས་འབངས་དང་གཉེན་བསྲེས་ཏེ། རྒྱལ་ཏོ་རི་ལོང་བཙན་དང་འོ་མ་ལྡེ་བཟའ་ཁྲི་བཙུན་བྱང་མའི་སྲས་སུ་ཁྲི་(༡༢བ)

---

^{[མ་དཔེ་གཟིགས་ན་འདིར་གནོན།]}

བཙན་ནམ། དེ་དང་སྨན་བཟའ་ཁྲི་དཀར་གྱི་སྲས་ལ་ཁྲི་སྒྲ་དཔུང་བཙན། དེ་དང་སྨན་བཟའ་ཀླུ་སྟེང་གི་སྲས་ཁྲི་ཐོག་རྗེ་བཙན་ཏེ་གདུང་རབས་ཉེར་བདུན་གྱི་རིང་ཆབ་སྲིད་སྒྲུང་ལྡེའུ་བོན་གསུམ་གྱིས་བསྐྱངས་པ་ཡིན་ནོ། །སྨྲས་པ། ཕྱག་ན་པདྨའི་གསང་བ་གསུམ་གྱི་ངོས། །བསིལ་ལྡན་ལྗོངས་འདིའི་རྗེ་འབངས་རི་མོའི་གར། །བློ་གསལ་ཡིད་ངོར་བསྒྱུར་བའི་གཏམ་གྱི་དཔྱ། །ལོ་རྒྱུས་ཟོང་གིས་བསྒྲུབ་པའི་སྐལ་བར་བྱིན། །སྟོབས་དང་ལོངས་སྤྱོད་འཁྱོག་པོའི་ཡལ་ག་དེ། །བླུན་རྨོངས་ཚང་ཚིང་ཁོང་ན་མང་མཆིས་ཀྱང་། །ཕྲ་ལྡེམ་གཉེན་ལྕུག་དྲི་བཟང་ཕོན་པོ་ཅན། །ཤེས་ལྡན་མ་ལ་ཡ་དབུས་གཡུར་ཟ་ལྡེམ། །མྱང་ན་དངར་བའི་དཔལ་སྟེར་ཞིམ་པའི་རོ། །ཡིག་ཚང་སྦྲང་རྩིའི་བཅུད་ཀྱི་ཉིང་ཁུ་ཅན། །འཆལ་གཏམ་མྱོས་བྱེད་རྫས་ཀྱིས་མ་བསླད་པར། །རྐང་དྲུག་མཛོད་ཀྱི་གླེགས་བུ་རྨད་དུ་བྱུང་། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །དེ་ཡན་ཆད་དུ་དོན་གྱི་ཐུགས་རྗེ་ཆེན་པོའི་བྱིན་རླབས་ཀྱི་མཐུ་ཕུལ་དུ་བྱུང་བ་ལས་བསྐྲུན་པའི་རྒྱལ་རིགས་ཤ་སྟག་ཀྱང་གནས་སྐབས་སུ་ཆོས་ལྡན་གྱི་རྒྱལ་པོ་མ་བྱུང་ཞིང་། འདི་ནས་དམ་པ་ཆོས་ཀྱི་དབུ་བརྙེས་པ་ཡིན་པས། ཁྲི་རྗེ་ཐོག་བཙན་དང་། རུ་ཡོང་བཟའ་སྟོང་རྒྱལ་ན་མོ་ཚོའི་སྲས་སུ་དཔལ་དགེ་ལེགས་ཀུན་ཏུ་འབར་བའི་བཟང་པོའི་སྣང་བ་ཅན་གྱི་རྣམ་འཕྲུལ། ལྷ་ཐོ་ཐོ་རི་གཉན་བཙན་འཁྲུངས་ཏེ། རྒྱལ་པོ་འདིའི་རིང་ལ་ཕོ་བྲང་ཡུམ་བུ་བླ་སྒང་གི་ཡང་ཐོག་གི་སྟེང་དུ་སྤང་ཀོང་ཕྱག་རྒྱ་པ། གསེར་གྱི་མཆོད་རྟེན། མདོ་སྡེ་ཟ་མ་ཏོག་གི་སྙིང་པོ་ཡི་གེ་དྲུག་པ། ཙིནྡྷ་མ་ཎིའི་སྐོར་ཕོར་(༡༣ན)

---

^{[མ་དཔེ་གཟིགས་ན་འདིར་གནོན།]}

རྣམས་མཁའ་ལས་བབས་ཏེ། གདུང་རབས་ལྔ་ནས་འདིའི་དོན་ཤེས་པ་འབྱུང་བའི་ལུང་བསྟན་གྱི་སྒྲ་ནམ་མཁའ་ལས་བསྒྲགས་པས། ངོ་མི་ཤེས་པ་ལྟར་བཅོས་ཀྱང་། ངོ་མཚར་དུ་བཟུང་ནས། ཕོ་བྲང་གི་དཀར་ཁང་དུ་མིང་གཉན་པོ་གསང་བར་བཏགས་ནས་མཆོད་པ་དང་བཅས་ཏེ་བཞུགས་སུ་གསོལ་བའི་མཐུས་རྒྱལ་པོ་དགུང་ལོ་བརྒྱད་ཅུ་པ་སླར་ན་ཚོད་དར་ལ་བབས་པའི་ལང་ཚོ་ལྟར་ཡ་མཚན་དུ་གྱུར་ཅིང་། ཡོངས་སུ་བསྒྲིལ་བས་ལོ་བརྒྱ་ཉི་ཤུའི་བར་དུ་བཞུགས་སོ། །དེབ་སྔོན་དུ་ནེལ་པ་པཎྜི་ཏའི་ལུགས་དང་སྦ་བཞེད་གཙང་མ་གུང་བསྒྲིགས་པ་མཁས་པའི་གསུང་ཡིན་ཀྱང་། ནེལ་པ་པཎྜི་ཏས་ནམ་མཁའ་ལས་བབས་པ་མི་འཐད་པར་སྨྲ་བ་ནི་བློ་ཆུང་གི་གཏམ་སྟེ། བསྟན་པའི་དབུ་བརྙེས་པའི་རྟེན་འབྲེལ་དུ་འཕགས་པའི་གང་ཟག་གི་སྤྲུལ་པ་དང་ཐུགས་རྗེ་བསམ་ལས་འདས་པས་སོ། །དེ་རྣམས་ལ་བཙན་ལྔར་གྲགས་ཤིང་བང་སོ་ཕྱིང་ལུང་དར་ཐང་དུ་བཏབ་བོ། །བཙན་པོ་དེ་དང་རྣོ་ཟ་མང་པོ་རྗེའི་སྲས་ཁྲི་གཉན་གཟུང་བཙན་ཏེ་བང་སོ་དོན་མཁར་མདར་བརྩིགས། དེ་དང་འབྲོང་བཟའ་མོ་དུར་ཡངས་གཞེར་ལ་སྲས་འགྲོ་གཉན་ལྡེའུ་སྟེ་བཙུན་མོ་མཆིམས་བཟའ་ཀླུ་རྒྱལ་ངན་བུ་མཚོ་ཁབ་ཏུ་བཞེས་པས་དེ་ཀླུའི་རིགས་ཡིན་པས་སྦལ་པའི་རོ་མར་ཁུར་བཙོས་པའི་ཟ་མའི་རིགས་མཛོད་ཕུགས་སུ་བཞག་པ་གཟིགས་པས་རྣམ་པར་རྟོག་པའི་དབང་དུ་གྱུར་ནས་སྙུན་དུ་ཀླུ་ནད་ཀྱིས་ཐེབས་ཤིང་སྲས་ཀྱང་དམུས་ལོང་ཞིག་བྱུང་བས་མིང་དམུས་ལོང་དཀོན་པ་བཀྲ་ཞེས་བཏགས་པ་ལ་ཞལ་ཆེམས་སུ། བསམ་པ་བཟང་པོ་གསེར་དང་འདྲ་བ་སྟེ། །བཟང་པོའི་གྲོས་ནི་བདུད་(༡༣བ)

---

^{[མ་དཔེ་གཟིགས་ན་འདིར་གནོན།]}

རྩི་ཡིན་ཞེས་ཉོན། །ངན་པ་རྣམས་ཀྱང་མེ་དང་འདྲ་བས་གསོས། །མི་ཆོས་རྟོག་པ་ཡིན་གྱི་རྣམ་རྟོག་སྐྱུངས། ཁྱོད་ཡབ་མེས་ཀྱི་གཉན་པོ་གསང་བར་མཆོད་པ་གྱིས། །འ་ཞའི་ཡུལ་ནས་སྨན་པ་བོས་ལ་མིག་ཕྱེ། མིག་མ་བྱུང་ན་སུམ་པའི་ཡུལ་ན་བོན་པོ་ཞིག་གི་ཆུང་མ་རྒྱ་མོ་རྒྱ་ལྕམ་བྱ་བ་ལ་ནུབ་ཅིག་འགྲོགས་པའི་ཤག་མོ་ཙམ་པ་ལ་སྐྱེས་པའི་སུམ་རི་རིང་མོ་བྱ་བ་ཡོད་པས་དེ་བོས་ལ་གཅེན་ཆོལ་རྒྱལ་སར་ཆུག་གསུངས་ནས་བང་སོ་ཞིང་མདར་བརྩིགས་པ་ཡབ་ཡུམ་གསོན་པོར་བཞུགས་སྐད་དོ། །དེ་ནས་སྲས་ཀྱིས་ཡབ་ཀྱི་གསུང་བཞིན་བྱས་པས་མིག་བྱེ་སྟེ། སྐྱིད་ཤོད་སྟག་མོ་རི་ལ་གཉན་འདུག་པ་གཟིགས་པས་སྟག་རི་གཉན་གཟིགས་སུ་གྲགས། བང་སོ་དོན་མཁར་མདའ་རུ་བརྩིགས་སོ། །རྗེ་དེ་དང་འོལ་གོང་བཟའ་སྟོང་བཙུན་འགྲོ་དཀར་གྱི་སྲས་གནམ་རི་སྲོང་བཙན་ཏེ་འདིའི་རིང་ལ་རྒྱ་ནས་རྩིས་དང་སྨན་བྱུང་ཞིང་། བ་དམར་མོའི་འོ་མས་སྤྲུས་པའི་འཇིམ་པ་ལས་བརྩིགས་པའི་ཕོ་བྲང་ཁྲི་བརྩེགས་འབུམ་གདུགས་ཞེས་བྱ་བ་བརྩིགས། བྲག་གསུམ་ལྡིང་མའི་མཚོ་འགྲམ་ནས་རྟ་མདོ་ཝ་ཅང་ཤེས་བརྙེད་པར་ཆིབས་ནས། ཕུང་གཡག་ཐལ་དཀར་རུ་རིང་ཞེས་བྱ་བའི་འབྲོང་བསད་པའི་ཤ་སྒ་ལ་བཏགས་པ་ས་ལ་ལྷུངས་པ་ལས་ཚྭ་རྙེད། བང་སོ་དོན་ཁར་མདར་བརྩིགས་པ་ཡིན་ནོ། །སྨྲས་པ། གསང་བའི་མཛོད་འཛིན་རྒྱལ་སྲས་མཆོག་གི་ལེགས་པར་བྱས་པའི་གྲུ་གཟིངས་ཀྱིས། །ཐབས་མཁས་འཕྲུལ་གྱི་སྒོ་འཕར་ལས་འོངས་གཉན་པོ་གསང་བའི་ཡིད་བཞིན་གྱི། །ནོར་བུ་དབང་རྒྱལ་བོད་འབངས་ཡོངས་ཀྱི་རྒྱལ་མཚན་རྩེ་མོར་ལེགས་འགོད་པའི། །སྐལ་པ་(༡༤ན)
མཆོག་གི་དབྱངས་སུ་ལེན་འདི་དྲི་ཟའི་རྒྱུད་ལ་རྣམ་པར་འཁུ། ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

ཆོས་རྒྱལ་སྲོང་བཙན་སྒམ་པོ་ནས་ཁྲི་ལྡེ་གཙུག་བརྟན་བར་གྱི་རྒྱལ་རབས་བརྗོད་པ།

---

^{[མ་དཔེ་གཟིགས་ན་འདིར་གནོན།]}

དེ་ལྟར་དམ་པའི་ཆོས་ཀྱི་འཆི་མེད་བདག་པོའི་བ་གམ་མངོན་པར་མཐོ་བ་དག་གི་སྒོ་གླེགས་གྲངས་མེད་དུས་གཅིག་ཏུ་ཕྱེ་བའི་སྲོལ་གྱིས་དགེ་ལེགས་ཀྱི་འདོད་རྒུ་རྣམ་པར་བཀྲ་བའི་སྡེ་བཞིའི་འབྲས་བུ་ཟད་མི་ཤེས་པའི་བདོག་པ་རིས་སུ་མ་ཆད་པའི་འགྲོ་བ་ཀུན་ལ་གཏོང་བའི་ཕྱག་རིང་དུ་བརྐྱངས་པའི་དགེ་མཚན་དུ་ཆེ་བའི་མི་རྗེ་སྲོང་བཙན་སྒམ་པོ་ནི། བཀའ་གདམས་གླེགས་བམ་ལས། འདི་ནས་སྐྱེ་བ་གཞན་གྱིས་མ་ཆོད་པར། །བོད་ཁམས་མགོན་མེད་ཡུལ་དུ་བདེ་བར་སོང་། །བོད་ནི་རྒྱལ་པོ་དག་ལ་ཚད་མར་བྱེད། །ཅེས་དང་། ཐང་ཡིག་ཏུ། ཁ་བ་ཅན་དུ་གནམ་རི་ཞེས་བྱའི་བརྒྱུད། །སྲོང་བཙན་སྒམ་པོ་ཞེས་བྱ་རྒྱལ་བུར་སྐྱེ། །ཞེས་སོགས་དྲི་མ་མེད་པའི་ལུང་བསྟན་གྱིས་བསྔགས་པ་ལྟར། ཡབ་རྒྱལ་པོ་གནམ་རི་སྲོང་བཙན། ཡུམ་ཚེ་སྤོང་བཟའ་འབྲི་མ་ཐོད་དཀར་གྱི་སྲས་སུ། ཀུན་མཁྱེན་ཉི་མའི་གཉེན་ཞི་བ་ཆོས་དབྱིངས་སུ་མྱ་ངན་ལས་འདས་ནས་ལོ་སྟོང་དང་ལྔ་བརྒྱ་ཉག་མ་བརྒྱད་འདས་པ། འགལ་བ་ཞེས་པ་ས་མོ་གླང་གི་ལོ་ལ་ཕོ་བྲང་བྱམས་པ་མི་འགྱུར་གླིང་དུ་སྐུ་འཁྲུངས། དགུང་ལོ་བཅུ་གསུམ་བཞེས་པ་ན་ཡབ་ཀྱི་འཇིགས་པ་མེད་པའི་སེང་གེའི་ཁྲི་ལ་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་དབང་བསྐུར། དེའི་ཚེ་རྒྱལ་བའི་ཐུགས་དགོངས་ལ། ངས་ཁ་བ་ཅན་པའི་འགྲོ་དོན་བྱེད་པ་ལ་དབང་བསྐུར་བ་པོ་ཞིག་བྱུང་ན་ཅི་མ་རུང་སྙམ་དུ་དགོངས་པའི་ཚེ། དཔལ་ཀུན་ཏུ་བཟང་པོས་རིན་པོ་ཆེའི་བུམ་པ་ལྷའི་བདུད་རྩིའི་ཆུས་གང་(༡༤བ)

---

^{[མ་དཔེ་གཟིགས་ན་འདིར་གནོན།]}

བས་སྐུ་ཁྲུས་གསོལ་ཞིང་། ཨ་མི་དེ་ཝས་རྒྱལ་པོའི་བུ་ལ་རེག་ནས་དབང་བསྐུར་བས་བརྗོད་པར་དཀའ་བའི་སྤྲུལ་པ་སྣ་ཚོགས་འགྱེད་པ་དང་གཟིགས་པ་སོགས་ངོ་མཚར་བའི་མཚན་མ་མཐའ་ཀླས་པར་གྱུར་ཏེ། པོ་ཏ་ལའི་རི་འདིའི་རྩེ་ལ་ཕོ་བྲང་བཏབ་ནས་བཞུགས་ན་མཐའ་བཞིའི་གུས་ལྡན་གྱི་རྒྱལ་པོ་ཐམས་ཅད་ཀྱིས་རང་དབང་མེད་པར་གུས་པས་འདུད་པའི་དབང་ཕྱུག་བརྒྱད་ཀྱི་ཡོན་ཏན་མཐའ་དག་ལྷུན་གྱིས་གྲུབ་པར་དགོངས་ནས་བཤུལ་དུ་ཞུགས་ཏེ་གེ་རེའི་འཕྲེང་དུ་ཕེབས་པ་ན། ཡིག་དྲུག་རང་བྱོན་ཞལ་གཟིགས་ནས་སྐུ་ཁྲུས་གསོལ་ཞིང་གསོལ་བ་བཏབ་པས། དེ་ལས་དབང་པོའི་གཞུ་ལྟར་བཀྲ་བའི་ཁ་དོག་སྣ་ལྔ་འཕྲོས་པ་ཕ་རི་བྲག་ལ་སྤྱན་རས་གཟིགས། སྒྲོལ་མ། རྟ་མགྲིན་གྱི་སྐུའི་སྣང་བརྙན་རང་བྱོན་དུ་ཤར་བ་ལ་ཕོག །དེ་ལས་ཀྱང་ཡི་གེ་དྲུག་པ་ལ་ཚུར་ཕོག་པའི་འོད་ཟེར་གྱི་འཕྲེང་བ་འདྲེན་བྱེད་ཀྱི་ཡུལ་དུ་ངོ་མཚར་བའི་གཟིགས་མོར་གྱུར་པ་འཇའ་མདངས་ཞེས་སྐྱེ་བོ་རྣམས་གླེང་ངོ་། །དེ་ནས་བལ་པོའི་ལྷ་བཟོ་དག་གིས་སོར་མོའི་སྒྱུ་རྩལ་གྱིས་སྐུ་དང་གསུང་གི་རྟེན་རྣམས་ཇི་ལྟར་བྱོན་པ་བཞིན་དུ་གསལ་བར་བརྐོས། རིམ་བཞིན་རྒྱལ་པོ་འཁོར་བཅས་པོ་ཏ་ལར་ཕེབས་ནས་འཆི་བ་མེད་པའི་ཕོ་བྲང་ས་ལ་འཕོས་པ་ལྟར་ཡིད་དུ་འོང་ཞིང་ཀུན་གསལ་བུ་མོའི་འགྲམ་སྟེགས་ལྟར་མཐོ་བཙན་གྱི་ཕོ་བྲང་བཞེངས་ནས་སྤྲུལ་པའི་དམག་དཔུང་དང་ལྷན་ཅིག་ཏུ་བཞུགས་པས། མཐའི་རྒྱལ་པོ་ཐམས་ཅད་ཀྱི་རྣ་བར་ད་ལྟ་བོད་ཀྱི་ཡུལ་ན་རྒྱལ་པོ་མགོ་གཉིས་པ་ཐོགས་པ་མེད་པར་སྤྲུལ་པའི་དམག་འགྱེད་ཐུབ་པའི་རྫུ་འཕྲུལ་ཡོད་པ་ཐོས་པས་འཇིགས་རྔམ་གྱི་དབང་གིས་དུས་གཅིག་ཏུ་ཡོང་བའི་(༡༥ན)

---

^{[མ་དཔེ་གཟིགས་ན་འདིར་གནོན།]}

ཆེད་སོ་ཡོད་པ་ལྟར་ཕོ་བྲང་གསར་དུ་བརྩིགས་པ་ལ་ལེགས་ཇར་བསྙད་པའི་དོན་ཞུ་གསོལ་གུས་འདུད་ལྷུར་ལེན་གྱི་སྐྱེས་བཟང་པོའི་ཡི་གེ་དང་བཅས་བློན་པོ་མངགས་པ་རྣམས་ལན་གྱི་ཆབ་ཤོག་སོ་སོའི་ཡི་གེར་བཏབ་ཅིང་། བཟང་པོའི་གསུང་དང་གྱ་ནོམ་པའི་དངོས་པོས་ཚིམ་པར་བྱས་ཏེ་བརྫངས་པས། རྒྱལ་པོ་ཀུན་ཡིད་རང་དབང་མེད་པར་དགའ་བར་མཛད་དོ། །རྗེ་བཙུན་འཇིག་རྟེན་དབང་ཕྱུག་མི་རྗེའི་ཚུལ་གྱིས་འགྲོ་བ་སྐྱོང་བར་ཤེས་བྱ་ཐམས་ཅད་ལ་ལྐོག་ཏུ་གྱུར་པའི་མུན་པ་མཁྱེན་པའི་འོད་སྟོང་གིས་ཆ་ཙམ་ཡང་མེད་པར་བསལ་ནའང་། བློ་དམན་གྱི་འགྲོ་བའི་སྣང་ངོ་དང་འཚམ་པའི་ཕྱིར་དུ། རྒྱལ་སྲིད་ལུགས་ཟུང་གི་ཁྲིམས་རྣམ་པར་དག་པས་འཛིན་པ་ལ་ཡེ་གེ་འདི་ཡོན་ཏན་ཐམས་ཅད་ཀྱི་རྩ་བ་ལྟ་བུར་དགོངས་ནས། མགོན་པོ་ཟུར་ཕུད་ལྔ་པའི་བྱིན་རླབས་ཀྱི་ག་བུར་གསར་པའི་ཐིགས་པ་སྙིང་ལ་འཕོག་པས། རྨོངས་རྟུལ་གྱི་ཚ་གདུང་ལྷག་མེད་བཅིལ་བའི་མདུན་ན་འདོན་གཉལ་ནས། ཐོན་མི་ཨ་ནུའི་བུ་སཾ་བྷོ་ཊ་བྲན་དང་བཅས་པར་གསེར་ཕྱེ་བྲེ་གང་དང་གསེར་གྱི་པ་ཊ་སོགས་རིག་བྱེད་སྨྲ་བའི་སྟོན་པ་ཡིད་རང་དབང་དུ་བྱེད་པའི་དངོས་པོ་དང་བཅས་ནས་འཕགས་ཡུལ་དུ་ཡི་གེ་སློབ་པར་བཀས་གནང་སྟེ། བཤུལ་དུ་འཚེ་བ་དང་བྲལ་ནས་བགྲོད་དེ་བྲམ་ཟེ་ལི་བྱིན་ལ་ཡིག་རིགས་སུམ་བརྒྱ་དྲུག་ཅུ་རྩ་བཞི་དང་། པཎྜི་ཏ་ལྷའི་རིག་པའི་སེང་གེ་ལ་སྒྲ་པཱ་ཎི་བྱཱ་ཀ་ར་ཎ། རྟོགས་སླ་བ་རྒྱལ་པོ་ལུགས་ཀྱི་བསྟན་བཅོས། ཀ་ལཱ་པ། རྟོགས་དཀའ་བ་པཎྜི་ཏ་ལུགས་ཀྱི་བསྟན་བཅོས། ཙནྡྲ་པ་རྣམས་ཀྱིས་རིས། སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་དང་བཅས་པ་བསླབས་ནས། བདག་ཅག་བློན་(༡༥བ)

---

^{[མ་དཔེ་གཟིགས་ན་འདིར་གནོན།]}

པོ་ཐོན་མི་ལ། །མ་ལུས་གནང་བ་ཐུགས་ལ་བཏགས། །རྒྱ་གར་ཡུལ་དུ་ཕྱིན་པ་ཡིན། །མཁས་གྲུབ་ཁྱེད་དང་མཇལ་བ་ཡིན། །ཞེས་དོན་དུ་གཟོ་བའི་གསུང་བྲམ་ཟེ་ལ་བྱོན་ཏེ་བོད་དུ་ཕེབས་ནས། རྒྱལ་བློན་གཉིས་ཕོ་བྲང་མ་རུར་ལོ་གསུམ་མཚམས་གཅད་དེ་ཡི་གེ་དང་སྒྲ་རྣམས་སློབ་པའི་ཚུལ་མཛད་པས་མཁས་པའི་དཔྱིད་དུ་གྱུར་ཀྱང་དེའི་ནང་དུ་བོད་སྐད་ལ་ཉེ་བར་མཁོ་བའི་སྒྲ་དང་ཡིག་རིགས་མི་འདུག་པར་དགོངས་ནས་བློན་པོར་གསུངས་པས། ཐོན་མིས་འཇམ་དཔལ་དབྱངས་ལ་གསོལ་བ་བཏབ་པའི་ཐུགས་རྗེའི་ཆར་གྱིས་ཡིད་ཀྱི་ཞིང་ས་བརླན་པ་ལས། བོད་ཀྱི་ཡི་གེའི་གཟུགས་སྡེབ་ཀྱི་རྣམ་འགྱུར་གྱི་མྱུ་གུ་ཤར་བའི་འབྲས་བུ་མངོན་དུ་གྱུར་ཚུལ་ནི། དབྱངས་བཅུ་དྲུག་ལས་ཨི་ཨུ་ཨེ་ཨོ་བཞི་དང་གསལ་བྱེད་སུམ་ཅུ་རྩ་བཞི་ལ་ལོག་པ་ལྔ་འཐུག་པོ་ལྔ་ཥ་ཀྵ་རྣམས་དོར་བའི་སྟེང་དུ་ཨ་དྲངས་པའི་རྩ་བཞིར། གཅིག །ཆོས། འཇིག་རྟེན། གཞོན་ནུ། གཟི་བརྗིད། འོ་མ་སོགས་ཀྱིས་མཚོན་པར་རྒྱ་སྐད་ལ། ཨེ་ཀ །དྷརྨ། ལོ་ཀ །ཀུ་མཱ་ར། ཏེ་ཛསྲ། པ་ཡས་བརྗོད་པས། ཅ་ཆ་ཇ་ཞ་ཟ་འ་རྣམས་མི་དགོས་པ་འདིར་བསྣན་ཏེ། དབྱངས་བཞི་གསལ་བྱེད་སུམ་ཅུར་གཏན་ལ་ཕབ་ནས། ལནྫ་ལ་དཔེ་བྱས་ནས་དབུ་ཆེན། ཝ་ཏུ་ལ་དཔེ་བྱས་ནས་ཤར་མ་སོགས་ཡི་གེའི་གཟུགས་དང་བརྡ་གསལ་བར་བྱེད་པའི་སུམ་རྟགས་སོགས་བོད་ལ་ཉེར་མཁོའི་བསྟན་བཅོས་བརྒྱད་མཛད་ནས་རྒྱལ་པོ་ལ་ཕུལ། སྤྱན་རས་གཟིགས་ཀྱི་མདོ་རྒྱུད་ཉི་ཤུ་རྩ་གཅིག་སོགས་ཆོས་དུ་མ་བསྒྱུར་བ་ནི་ལྗོངས་འདིར་དམ་པའི་ཆོས་བསྒྱུར་བའི་ཐོག་མ་ཡིན་ནོ། །རྒྱལ་པོས་བསྟན་པ་རིན་པོ་ཆེའི་བཙས་སུ་དགོངས་ནས་བློན་པོ་ལ་བཀུར་སྟི་རྒྱ་ཆེར་མཛད་(༡༦ན)

---

^{[མ་དཔེ་གཟིགས་ན་འདིར་གནོན།]}

པས། བློན་པོ་གཞན་ཕྲག་དོག་པར། ཐོན་མིས། ཡུལ་མཐའ་འཁོབ་བོད་ཀྱི་རྒྱལ་ཁམས་འདིར། །མི་མཁས་པ་སླེབ་པའི་སྔོན་མ་ཡིན། །ང་མུན་པ་སེལ་བའི་སྒྲོན་མེ་ཡིན། །རྗེ་རྒྱལ་པོ་ཉི་ཟླའི་ཚུལ་དུ་བཞུགས། །གྲོགས་བློན་པོའི་ཁྲོད་ན་ང་ཙམ་མེད། །བོད་ཁ་བ་ཅན་པའི་མི་རྣམས་ལ། །ང་ཐོན་མི་བཀའ་དྲིན་མི་ཆེའམ། །ཞེས་གཞན་གྱི་འགྲན་སེམས་ཀྱི་བྲག་རི་དྲི་མ་མེད་པའི་དཔྱོད་ལྡན་གྱི་མཛད་པ་དང་གསུང་གི་གནམ་ལྕགས་ཀྱི་ཐོག་མདས་སིལ་བུར་བཏང་ངོ་། །གསུང་འདི་དག་ལ་དཔགས་ན་དུས་སྐབས་བཟང་པོ་དེ་དག་ཏུ་ཡང་བླུན་པོས་ཤེས་ལྡན་ལ་གཤེ་བ་འདི་ཡོད་ཚོད་དུ་འདུག་གོ །དེ་ལྟར་ཡི་གེ་འདྲི་ཀློག་གི་སྲོལ་ལེགས་པར་བཏོད་ནས། དགེ་བ་བཅུའི་ཁྲིམས་ཀྱི་སྟེང་དུ་དཀོན་ཅོག་ལ་གུས་པ། དམ་ཆོས་བསྒྲུབ་པ། ཕ་མ་ལ་བཀུར་བ། ཡོན་ཏན་ཅན་གོང་དུ་བཀུར་བ། རིགས་མཐོ་དང་རྒན་ལ་ཕུད་དུད། མཛའ་བཤེས་ལ་གཞུང་། ཡུལ་མི་ལ་ཕན་འདོགས་པ། ཡིད་དྲང་བ། མིག་ཡ་རབས་ལ་ལྟ་བ། ཟས་ནོར་ལ་སྤྱོད་ཤེས་པ། དྲིན་ཅན་ལ་ཕན་ལན། བྲེ་སྲང་ལ་གཡོ་སྒྱུ་མེད་པ། སྤྱི་སྙོམས་ཤིང་ཕྲག་དོག་མེད་པ། བུད་མེད་ཀྱི་ཁ་ལ་མི་ཉན་པ། ངག་འཇམ་ཞིང་སྨྲ་མཁས་པ། ཐེག་པ་ཆེ་ཞིང་བློ་ཁོག་ཡངས་པ་སྟེ། མི་ཆོས་གཙང་མ་བཅུ་དྲུག་གི་ཁྲིམས། བཙན་པོས་ཕྱག་རྒྱས་བཏབ་སྟེ་འབྲས་ལྡན་དུས་ཀྱི་མཁའ་ལ་རྟ་ལྗང་གི་དབང་པོ་ཤར་བ་ལྟར་གསལ་ཞིང་། གསེར་གྱི་གཉའ་ཤིང་འཛིན་རི་ལྟར་ལྕི་བར་མཛད་པས། བོད་ཆེན་པོའི་རྒྱལ་ཁམས་ཀྱི་ཁྱོན་ཀུན་ལ་གནས་པའི་སྐྱེ་རྒུ་མཐའ་དག་མངོན་པར་མཐོ་བ་དང་ངེས་པར་ལེགས་པའི་དགའ་སྟོན་(༡༦བ)

---

^{[མ་དཔེ་གཟིགས་ན་འདིར་གནོན།]}

ལན་ཅིག་མིན་པར་མྱོང་བར་མཛད་དོ། །སྨྲས་པ། འགྲོ་བའི་བསོད་ནམས་དཔྱིད་ཀྱི་མངལ་ཁུར་ལས། །དཔག་བསམ་ཡོངས་འདུའི་རྒྱལ་སྲས་མཚར་སྡུག་ཅན། །འཐོན་པའི་ཕྱག་ན་པདྨ་མི་ཡི་སྲིད། །བཟུང་འདིས་རྫོགས་ལྡན་དྲི་དེ་རིང་ནས་འགུགས། །མཁའ་མེའི་སྲད་བུར་བརྒྱུས་པའི་ཀ་འཕྲེང་ལ། །རྒྱ་མཚོ་དབྱངས་ཀྱིས་བརྒྱན་པའི་ཡི་གེའི་བརྡའི། །རིན་ཅེན་ཕྱང་འཕྲུལ་རིན་དུ་གསེར་ལྡན་ལྟོ། །ནོར་བུའི་ཟོང་གིས་བཀང་ཡང་ཁུགས་སམ་ཅི། །ཤུགས་དྲག་མི་དགེའི་མུན་པ་ས་འཛིན་རྐང་། །རྣམ་དཀར་དགེ་བའི་འོད་སྟོང་ཞི་འཐུང་རུས། །ལག་ཉལ་གྲུབ་པས་བཅོམ་ཚེ་ཁྲིམས་ཀྱི་གཟི། །ལེགས་བྱས་ས་སྲུང་སྟེང་ན་འོད་དུ་འབར། །ཞེས་བྱ་བ་ནི་བར་སྐབས་ཚིགས་སུ་བཅད་པའོ། །དེ་ནས་རྒྱལ་པོས་འགྲོ་བ་རྣམ་ཐར་པ་བླ་ན་མེད་པ་ལ་འགོད་པར་བྱེད་པའི་གྲོགས་སུ་ཡི་དམ་གྱི་ལྷ་ཞིག་ལ་བརྟེན་དགོས་པར་མཁྱེན་པ་ན། ལྷའི་བུ་མང་པོས་ནམ་མཁའ་ལས་ལུང་བསྟན་པ་ལྟར། སྨིན་མཚམས་ཀྱི་མཛོད་སྤུ་ལས་སྤྲུལ་པའི་དགེ་སློང་ཨ་ཀ་ར་མ་ཏི་ཤཱི་ལ་བྱོན་པ་ཕོ་ཉར་མངགས་ཏེ། རྒྱལ་པོ་ཨུ་ཊ་མ་ཊ་གེ་སར་ཞེས་བྱ་བ་དཔག་པར་དཀའ་བའི་རྫུ་འཕྲུལ་གྱིས་བཏུལ་ཏེ། ནང་པའི་བསྟན་པ་ལ་བཅུག་ནས་རྒྱལ་པོའི་དཔུང་དང་བཅས་ནས་འཕགས་པའི་མཐུས་སྐད་ཅིག་ལ་རྒྱ་མཚོའི་འགྲམ་གྱི་བྱེ་གླིང་ན་བྱོན་ནས་ས་བརྐོས་པའི་འོག་ཏུ་ཙན་དན་སྦྲུལ་གྱི་སྙིང་པོའི་གར་དུ་བྱུང་བ་བཅད་པའི་ནང་ནས་ཐུགས་རྗེ་ཆེན་པོ་བཅུ་གཅིག་ཞལ་དང་། པོ་ཏ་ལ་ནས་ཙན་དན་གོར་ཤི་ཤའི་དུམ་བུ། རྒྱ་མཚོའི་གླིང་གི་འཇག་མ་དང་གནས་ཆེན་བརྒྱད་ཀྱི་བྱེ་མ། ཆུ་བོ་ནཻ་རཉྫའི་བྱེ་མ་རྣམས་སངས་(༡༧ན)

---

^{[མ་དཔེ་གཟིགས་ན་འདིར་གནོན།]}

རྒྱས་དང་བྱང་ཆུབ་སེམས་དཔའ་མཐའ་ཡས་པ་བཞུགས་པ་གཟིགས་ནས་བྱེ་མའི་ཐུམ་བུ་དང་། རྩྭའི་ཕོན་པོ། མཆོད་རྟེན་པདྨའི་འཁོར་ལོ་ཅན་ནས། འཁོར་བ་འཇིག །འོད་སྲུངས། ཤཱཀ་ཐུབ་གསུམ་གྱི་རིང་བསྲེལ་སྙིམ་པ་རེ་དང་བཅས་པ་བསྣམས་ཏེ་རྒྱལ་པོ་ལ་ཕུལ། སླར་ཡང་ཡི་དམ་གྱི་ཐུགས་ཀ་ནས་སྤྲོས་པའི་འོད་ཟེར་གྱི་བརྔས་བསྟན་པ་ལྟར་སྤྲུལ་པའི་དགེ་སློང་གིས་བལ་ཡུལ་ནས་ཙན་དན་ཧ་རིའི་སྡོང་པོ་ལས་འཕགས་པ་ལོ་ཀེ་ཤྭ་ར་སྤྱན་དྲངས་ཏེ། རྒྱལ་པོའི་སྨིན་མཚམས་སུ་ཐིམ་མོ། །དེ་ཡང་བཀའ་གདམས་གླེགས་བམ་ལས། རྗེ་དཀོན་ཅོག་འབངས་ནི་བོད་དུ་འགྲོ །བོད་གློ་བུར་རྒྱལ་པོ་ཆོས་ལ་སྤྱོད། །བོད་མཐའ་འཁོབ་ཡུལ་རྣམས་འདུལ་བར་བྱེད། །ང་རྒྱ་ནག་ཡུལ་ནས་དེར་དྲངས་ཏེ། །མི་ཁོ་ལ་ཉོན་མོངས་མི་མངའ་ཡང་། །ང་འཇིག་རྟེན་སྒྲོན་མ་ཟག་མེད་ལ། །མི་ཁོ་བོའི་བཙུན་མོ་བྱེད་དོ་སྐད། །རྒྱ་ནག་པོའི་མཆོད་གནས་བོད་དུ་འདྲེན། །བོད་ཡུལ་གྱི་དབུས་སུ་བྱེད་དོ་སྐད། །ཞེས་པའི་ལུང་བསྟན་གྱི་བདུད་རྩིའི་བུམ་པ་ལུས་ཅན་འཆི་བ་མེད་པའི་དགའ་སྟོན་དུ་སྤྱོད་པའི་དུས་ལ་བབ་སྟེ། འཕགས་པ་མཆོག་གི་འཕྲིན་ལས་ཀྱི་འཇུག་པ་ཀུན་གསལ་གྱི་མཐའ་ཀླས་པར་འཆར་བར་བྱེད་པའི་ཐབས་སུ་ཇོ་མོ་ཁྲོ་གཉེར་ཅན་གྱི་སྤྲུལ་པ་ལྷ་གཅིག་ཁྲི་བཙུན་བྱ་བ་ལོ་བཅུ་དྲུག་ལོན་པ་ལང་ཚོའི་ཟིལ་མངར་དར་ལ་བབས་པའི་མཚན་བཟང་ཅན། ཞལ་ནས་ཧ་རི་ཙན་དན་གྱི་དྲི་བྲོ་བ་ཞིག་དང་། རྒྱ་ནག་པོའི་གྲོང་ཁྱེར་ན་ཇོ་མོ་སྒྲོལ་མའི་སྤྲུལ་པ་ལྷ་གཅིག་ཀོང་ཇོ་བྱ་བ་ལོ་བཅུ་དྲུག་ལོན་པ། མཚན་དཔེའི་མཛེས་སྡུག་རྣམ་པར་རྒྱས་པའི་དཔལ་(༡༧བ)

---

^{[མ་དཔེ་གཟིགས་ན་འདིར་གནོན།]}

ཡོན་ཅན། ཞལ་ནས་ཨུཏྤལ་དྲི་བྲོ་བ་ཞིག་ཡོད་པ་ལས། རྒྱལ་པོས་ཡི་དམ་གྱི་ལྷ་ལ་གསོལ་བ་བཏབ་པས། འཕགས་པས་བྱིན་གྱིས་བརླབས་པའི་སྤྲུལ་པའི་ཟློས་གར་བུད་མེད་ཀྱི་སྲིད་བཟུང་བ་གཉིས་ཡོད་པ་བཙུན་མོར་སྤྱན་འདྲེན་དགོས་པའི་ལུང་བསྟན་གྱི་སྒྲ་ནམ་མཁའ་ལས་བྱུང་བ་དང་། སྤྲུལ་པའི་རྒྱལ་པོའི་སྤྱན་གཉིས་ལས་འོད་ཟེར་འཕྲོས་པ་ཤར་ནུབ་ཏུ་སོང་བ་ལ། དྲི་མ་མེད་པའི་ལྷའི་སྤྱན་གྱིས་གཟིགས་པས། ནུབ་ཕྱོགས་བལ་པོའི་ཡུལ་གྱི་གྲོང་ཁྱེར་ཡ་འབུ་ཡ་འགལ་བྱ་བ་ན། བལ་པོའི་རྒྱལ་པོ་ནི་ས་མ་འབྲི་ཤོ་བྱ་བའི་ཆོས་སྲིད་ཀྱི་འབྱོར་བ་ཕུན་སུམ་ཚོགས་པའི་དབང་ཕྱུག་དམ་པ་ལ་ཡིད་དུ་འོང་བའི་སྲས་མོ་ལྷ་གཅིག །རིན་པོ་ཆེའི་དཀོར་མཛོད། རྒྱལ་བ་ཉི་མའི་གཉེན་དགུང་ལོ་བརྒྱད་པའི་སྐུ་ཚད་ཀྱི་སྣང་བརྙན་དང་། རྒྱ་ཡུལ་གྲོང་ཁྱེར་བཀྲ་ཤིས་སྒོ་ཁྲི་ན་རྒྱ་ཀོང་རྩེ་འཕྲུལ་ཆུང་བྱ་བ། སྟོབས་ཀྱི་འཁོར་ལོས་ས་ལ་རང་དབང་དུ་སྤྱོད་པའི་མི་རྗེ་ལ་སྲས་མོ་མི་ལས་འདས་པའི་ལྷ་གཅིག་མིག་སྐྱའི་ལོངས་སྤྱོད་ལ་རྣམ་པར་འཁུ་བའི་འབྱོར་པའི་བང་མཛོད། རྒྱལ་བ་བུ་རམ་ཤིང་པ་དགུང་ལོ་བཅུ་གཉིས་པའི་སྐུ་བརྙན་སོགས་ཚད་མའི་ཡུལ་དུ་གྱུར་པ་ལས། ལྷ་གཅིག་གཉིས་ཁབ་ཏུ་བཞེས་ན། རྒྱ་བལ་གྱི་ཕུན་སུམ་ཚོགས་པའི་ཡོན་ཏན་གྱི་དངོས་པོ་ཐམས་ཅད་ཁབ་ལེན་གྱི་རྡོ་དང་ལྕགས་ཀྱི་སྣང་ཚུལ་ལྟར་འབྱུང་བར་དགོངས་ནས་འཇིག་རྟེན་མིའི་ཆོས་ལུགས་དང་སྒོ་བསྟུན་ཏེ། གནས་སྐབས་སུ་བོད་མཐའ་འཁོབ་ཀྱི་རྒྱལ་པོར་གྱུར་པས། ཕོ་ཉ་བ་ཙམ་མངགས་པ་ལ་མི་སྟེར་བར་དགོངས་ནས། རྒྱལ་པོ་ཉིད་ཀྱི་སྤྱན་གཡས་པའི་འོད་ཟེར་ལས། འཁོར་ལོས་སྒྱུར་བའི་རྒྱལ་པོ་(༡༨ན)

---

^{[མ་དཔེ་གཟིགས་ན་འདིར་གནོན།]}

མཚན་དཔེ་དང་ལྡན་ཞིང་། རྟ། གླང་པོ། བློན་པོ། དམག་དཔོན། བཙུན་མོ། འཁོར་ལོ། ནོར་བུ་སྟེ། སྔོན་དུ་འགྲོ་བའི་དཔུང་ཚོགས་ཡན་ལག་རྣམ་བཞི་དང་བཅས་པའི་སྤྲུལ་པ་བལ་པོའི་རྒྱལ་པོའི་སྒོ་དྲུང་དུ་ཕྱིན་ཏེ། བློན་པོ་རིན་པོ་ཆེས་བརྡ་སྦྱར་ནས། ངེད་ཁ་བ་ཅན་གྱི་ཡུལ་འཕགས་པ་ཕྱག་ན་པདྨས་བྱིན་གྱིས་བརླབས་ཤིང་། འཕགས་པ་ཉིད་རྒྱལ་པོའི་ཚུལ་བཟུང་བ་ཡིན་པས། རྒྱལ་པོ་ཁྱེད་ཀྱི་བུ་མོ་ཁྲོ་གཉེར་ཅན་མའི་སྤྲུལ་པར་འདུག་པ་ངེད་ཀྱི་ཇོ་མོར་བསུ་བས། རྟེན་སྐལ་ཤཱཀྱ་མུ་ནི། བྱམས་པ་ཆོས་འཁོར། ཙན་དན་གྱི་སྒྲོལ་མ་རྣམས་རྫོངས་སུ་སྐུར་ཞིག །དེ་ལྟར་མི་བྱེད་ན་ཡུལ་འདིར་ཁ་བ་ཅན་གྱི་རྒྱལ་པོའི་ཕོ་བྲང་འདེབས་སོ་ཞེས་བལ་སྐད་དུ་སྨྲས་པས། བལ་པོའི་རྗེ་འབངས་ཀུན་སྐྲག་ནས་རང་དབང་མེད་པར་ཁས་བླངས་ཏེ། ཡབ་ཀྱིས་ལྷ་གཅིག་ལ་འགྲོ་བར་གསུངས་པས། ལྷ་གཅིག་གིས་ཡབ་ལ་ཞུ་བ་ཕུལ་བ། ཀྱེ་མ་ཡབ་གཅིག་རྒྱལ་པོ་ལགས། །བོད་ཅེས་བྱ་བ་དམངས་རིགས་གདོལ་བའི་རིགས། །བླུན་ཞིང་མཐའ་འཁོབ་སྟོན་པས་ཞབས་མ་བཅགས། །མཆོད་གནས་མེད་ཅིང་ཚོགས་གསོག་རྟེན་མ་མཆིས། །རྒྱལ་བའི་འཁོར་བཞི་གྲོགས་བཟང་དགེ་འདུན་མེད། །ཆོས་དང་ཆོས་མིན་མི་ཤེས་མུན་པའི་སྨག་རུམ་འདྲ། །ཞེ་སྡང་གདུག་སེམས་ཆེ་བ་གནོད་བྱེད་སྲིན་པོའི་རིགས། །འཆར་ལ་སྙོམ་བག་ཆེ་བ་བྱོལ་སོང་སྤྲེའུའི་རིགས། །དེ་འདྲའི་མཐའ་འཁོབ་གནས་སུ་བདག་མཆིས་ན། །བདག་གི་བསོད་ནམས་གསོག་པའི་རྟེན་དང་མཆོད་གནས་སུ། །ཡབ་ཀྱི་མཆོད་གནས་ཤཱཀྱ་མུ་ནི་དང་། །བྱམས་པ་སྒྲོལ་མ་བདག་ལ་གནང་བར་ཞུ། །བོད་ཅེས་(༡༨བ)

---

^{[མ་དཔེ་གཟིགས་ན་འདིར་གནོན།]}

བྱ་བ་ཡི་དྭགས་གྲོང་ཁྱེར་ཏེ། །མི་ལྟོགས་རྒྱལ་ཁམས་ཡིན་པར་རྒྱལ་བས་ལུང་བསྟན་པས། །རིན་ཅེན་བང་མཛོད་མང་པོ་བདག་ལ་རྒྱུ། ཁ་བ་ཅན་གྱི་རྒྱལ་ཁམས་བསིལ་ཞིང་གྲང་། །ཚེ་གཅིག་དྲོད་པའི་གོས་ཤིག་བདག་ལ་ཞུ། །དེ་ལྟར་མ་འདྲིས་མི་ཡི་ཁྲོད་ནང་དུ། །བསམ་རྒྱུད་སྤྱོད་པ་བྱ་བ་ཇི་ལྟར་བགྱི། །ཡབ་གཅིག་རྒྱལ་པོ་བདག་ལ་བཀའ་སྩོལ་ཅིག །ཅེས་ཞུས་པས། རྒྱལ་པོས། ཀྱེ་མ་མིག་འབྲས་འདྲ་བའི་བུ་མོ་ཚུར་གསོན་ཅིག །བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་དྲོ་བ་ལྷ་གནས་གཞལ་ཡས་ཁང་། །ཆུ་བོ་བཞི་འབབ་རྒྱ་མཚོ་བཞི་ཡིས་མཛེས། །འབྲུ་སྣ་སྣ་ཚོགས་རིན་ཅེན་སྣ་ཚོགས་འབྱུང་། །རྐང་འགྲོས་སྒུར་སྤྱོད་རྩི་ཐོག་མར་ལ་སྤྱོད། །རྗེ་ནི་ལྷ་ཡིན་འབངས་ནི་མི་ཡིས་བྱས། །འཁོར་བཞི་མེད་ཀྱང་བྱང་ཆུབ་སེམས་དཔའི་བརྒྱུད། །དམ་ཆོས་མེད་ཀྱང་རྒྱལ་པོའི་བཀའ་ཁྲིམས་གནས། །དགེ་འདུན་མེད་ཀྱང་རྒྱལ་པོ་སྤྲུལ་པ་ཡིན། །ཞེས་བོད་ཀྱི་རྗེ་འབངས་ཡུལ་གྲུ་ལ་བསྔགས་པ་མཛད་ནས། ལྷ་གཅིག་གི་སྤྲོ་བ་བསྲིངས་ཏེ། བོད་ཀྱི་སྤྲུལ་པའི་བློན་པོ་རིན་པོ་ཆེ་དང་། ལྷ་གཅིག་རྒྱུ་མཚན་མཐུན་པའི་མཆོད་གནས་དམ་པ་འཆི་བ་མེད་པའི་བདག་པོ་མཆོད་སྦྱིན་བརྒྱ་པས་སྦྱིན་བདག་བྱས་ཏེ། སྤྲུལ་པའི་བཟོ་བོ་ལས་སྣ་ཚོགས་པའི་སོར་མོའི་འདུ་བྱེད་ལས་བསྐྲུན་པའི་ཤཱཀྱ་མུ་ནི་དགུང་ལོ་བརྒྱད་པའི་སྐུ་ཚད་ཅན་རྒྱལ་བ་ཉིད་ཀྱིས་རབ་གནས་མཛད་པ། སངས་རྒྱས་འོད་སྲུངས་ཀྱིས་རབ་གནས་མཛད་པའི་བྱམས་པ་ཆོས་འཁོར། ཙན་དན་གྱི་སྒྲོལ་མ་རང་བྱུང་། ནོར་བུ་རཏྣ་ད་ཝ། སྟག་(༡༩ན)

---

^{[མ་དཔེ་གཟིགས་ན་འདིར་གནོན།]}

ཤེ་དེ་ཝ། བཻ་ཌཱུརྱའི་ལྷུང་བཟེད་སོགས། རིན་པོ་ཆེའི་བང་མཛོད་བདུན་གྱིས་ཐོག་དྲངས་མཁོ་དགུའི་ཡོ་བྱད་རྣམས་སྐལ་རྫོངས་སུ་མཛད་དེ། ཁྲི་བཙུན་ལ་བསླབ་བྱ་འདི་ལྟར། སྔོན་ཚེ་བུ་མོས་ཕ་ཡུལ་བཟུང་བ་མེད། །དེ་ཕྱིར་བུ་མོ་ཁྱོད་ཀྱང་བོད་ཡུལ་སོང་། བཀའ་བཏགས་ཆོས་ལུགས་བཟང་པོ་དར་བར་གྱིས། །རྗེ་ཡི་སྐུ་མཁར་ཕོ་བྲང་བཙན་པོ་འཆོས། །ཆོས་བཞེངས་དཀོན་ཅོག་གསུམ་གྱི་རྟེན་ཡང་ཚུགས། ཁྱད་པར་འཕགས་པའི་རྟེན་ཡང་བཞེངས་སུ་གསོལ། །གཙུག་ལག་རྒྱལ་བའི་སྐུ་གཟུགས་དམ་པ་བཞེངས། །སངས་རྒྱས་བསྟན་པ་རྒྱས་པར་མཛད་པ་ཡི། །དགེ་འདུན་སྟོན་པའི་བསྟན་པ་དར་བར་མཛོད། །ཅེས་སོགས་འཕྲལ་ཡུན་དུ་དགོས་པའི་བསླབ་བྱ་དང་བཅས་ཏེ་བོད་དུ་བརྫངས། དེའི་ཚེ་སྐྱེས་བུ་མཆོག་དམན་བར་པ་གསུམ་ལ་སྣང་བ་མི་འདྲ་བ་གསུམ་བྱུང་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་གཟིགས་ངོར། འཕགས་པ་སྤྱན་རས་གཟིགས་དང་ཇོ་མོ་ཁྲོ་གཉེར་ཅན་མཇལ་ནས་མཁའ་ལ་འོད་ཟེར་དང་བཅས་ཏེ་བོད་དུ་བྱོན་ནས་བཞུགས་པར་གཟིགས། བལ་པོའི་རྗེ་འབངས་རྣམས་ཀྱིས། ཁྲི་བཙུན་བཙུན་མོ་རིན་པོ་ཆེའི་ཆས་སུ་ཞུགས་ནས་བོད་དུ་བཞུད་པར་མཐོང་། བོད་འབངས་རྣམས་ཀྱིས་བཻ་ཌཱུརྱའི་ཁྲབ་ཀྱིས་རྟེན་དང་བཅས་ཏེ་བོད་བློན་རྟ་པ་ལྔ་བརྒྱ་བལ་ཡུལ་དུ་རྫངས་པ་རྣམས་ཀྱིས་ཁྲི་བཙུན་རྒྱལ་པོའི་བཙུན་མོར་སྤྱན་དྲངས་པ་མཐོང་། དེ་ནས་རྒྱལ་པོས་བཀོད་པས་ཁྱད་པར་འཕགས་པའི་བསུ་བ་དང་། དགའ་སྟོན་རྒྱ་ཆེན་པོ་མཛད་དེ་ལྷ་གཅིག་བཙུན་མོ་རིན་པོ་ཆེའི་ཁྲི་ལ་དབང་བསྐུར་རོ། །ཤཱཀྱ་མུ་ནི་སོགས་སྐལ་རྫོངས་(༡༩བ)

---

^{[མ་དཔེ་གཟིགས་ན་འདིར་གནོན།]}

ཀྱི་རྟེན་ཁྱད་པར་ཅན་རྣམས་དང་། སྔར་སྤྲུལ་པའི་དགེ་སློང་གིས་སྤྱན་དྲངས་པའི་རྟེན་རྣམས་ལྷན་ཅིག་ཏུ་མཆོད་པའི་ཁང་བཟང་ཡིད་དུ་འོང་བར་བཞུགས་སུ་གསོལ་ནས། ཀུན་ཏུ་བཟང་པོའི་མཆོད་པའི་སྤྲིན་གྱིས་མཆོད་ཅིང་། བཙན་པོ་ཡང་སྐུ་རྣམས་ཀྱི་ཐད་ཀ་ནས་འབེན་ཚད་གང་ལས་རིང་དུ་མི་བཞུད་པར་བཞུགས་པས། ཁྲི་བཙུན་གྱི་ཐུགས་ལ། རྒྱལ་པོ་འདི་ལྷ་དང་མིས་ཁྱད་པར་དུ་འཕགས་པའི་ཡོན་ཏན་མངའ་བ་ཞིག་འདུག་ནའང་། ཕོ་བྲང་གྱི་ཕྱི་རོལ་དུ་མི་འབྱོན་པ་ནི་མཐའི་དམག་ལ་འཇིགས་པར་གདའ་བས། ཕོ་བྲང་བཙན་པོ་ཞིག་རྒྱག་པར་བཞེད་ནས། དམར་པོ་རིའི་ས་ཕྱོགས་སུ་ལྕགས་རིའི་འཕྲེང་བ་གསུམ་དུ་བསྐོར་བའི་ནང་དུ་མཁར་དགུ་བརྒྱ་དགུ་བཅུ་རྩ་དགུ །དམར་པོ་རིའི་རྩེར་གཅིག་སྟེ་སྟོང་ཡོད་པ་དེ་དག་རྣམས་ལ་དྲིལ་བུ་དང་རྔ་ཡབ་མུ་ཏིག་གི་དྲ་བ་ཕྱེད་ཀྱིས་མཛེས་ཤིང་ཡིད་དུ་འོང་བ། རྣམ་པར་རྒྱལ་བའི་ཁང་བཟང་ལ་འགྲན་པ། རྒྱལ་པོ་དང་བཙུན་མོའི་ཕོ་བྲང་གི་བར་དུ་དངུལ་དང་ཟངས་ཀྱི་ཟམ་པ་སྦྲེལ་བ། མཁར་གྱི་རྩ་བར་ཤིན་ཏུ་རྣོ་བའི་མདུང་ལ་བ་དན་ལྷབ་ལྷུབ་ཏུ་འཕྱོ་བ་སྟོང་བཙུགས་པ་ཕྱོགས་བཞི་ན་འདོད་རྒུའི་ཡོ་བྱད་མཐའ་དག་རང་དབང་མེད་པར་འདུ་བའི་སྒོ་བཞི་ལ་ལྕོག་བཞིས་རྣམ་པར་བརྒྱན་པ། ཕྱི་རོལ་ཏུ་རྟའི་རྒྱུགས། ཟབས་སུ་འདོམ་དོ། །ཞེང་འདོམ་བཅོ་བརྒྱད་སྙུངས་སུ་འདོམ་སུམ་བརྒྱ་ཡོད་པ། དེ་ལ་སྤང་ལེབ་བསྒྲིགས་པའི་སྟེང་དུ་སོ་ཕག་བཏིང་བ། རྟ་གཅིག་བརྒྱུགས་ཀྱང་དུ་མ་བརྒྱུགས་པའི་སྒྲ་འབྱུང་བ། མདོར་ན་སྲིན་པོའི་རྒྱལ་པོ་ལང་ཀ་མགྲིན་བཅུའི་གྲོང་ཁྱེར་བསོད་ནམས་ཀྱི་མཐུས་གངས་ཅན་གྱི་ལྗོངས་སུ་(༢༠ན)

---

^{[མ་དཔེ་གཟིགས་ན་འདིར་གནོན།]}

འཕོས་པ་ལྟ་བུ་ཞིག་བརྩིགས་ནས། རྗེ་བློན་འབངས་འཁོར་མཐའ་དག་འདོད་པའི་ཡོན་ཏན་ལྔ་ལ་ལོངས་སྤྱོད་པའི་སྐབས་སུ། སྤྲུལ་པའི་རྒྱལ་པོས་ཤར་ཕྱོགས་ནས་རྒྱ་རྗེའི་སྲས་མོ་ཀོང་ཇོ་སྤྱན་འདྲེན་པའི་ཉེར་བསྡོགས་སུ་སྤྱན་གཡོན་པའི་འོད་ཟེར་ལས་འཁོར་ལོས་སྒྱུར་བའི་རྒྱལ་པོ་སོགས་སྔར་ལྟར་སྤྲུལ་ནས། རྒྱའི་ཕོ་བྲང་ཀེ་རུའི་ཁྲི་སྒོར་ཕེབས་ཏེ་བློན་པོ་རིན་པོ་ཆེས། ངེད་བོད་ཀྱི་རྒྱལ་པོ་ཐུགས་རྗེ་ཆེན་པོའི་སྤྲུལ་པ་ཡིན་པས་ཁྱེད་ཀྱི་ལྷ་གཅིག་འདི་སྒྲོལ་མའི་སྤྲུལ་པ་ཡིན་པ་བཙུན་མོར་སྤྱན་འདྲེན་པས་སྐལ་རྫོངས་སུ་ཤཱཀྱ་མུ་ནི་དང་བཅས་པ་གནང་བར་མཛོད་ཅིག །དེ་ལས་ཕྱི་རོལ་དུ་གྱུར་ན་རྒྱ་ཡུལ་འབྱིན་ཅིང་། ཚུལ་བཞིན་བསྒྲུབས་ན་རྒྱ་བོད་ཀྱི་འཁྲུག་པ་ཕྱིས་ནས་རྒྱུན་གཅོད་དོ་ཞེས་རྒྱ་ནག་གི་སྐད་དུ་བརྡ་སྦྱར་བས། རྒྱལ་བློན་རྣམས་ཤིན་ཏུ་འཇིགས་པས་ཁས་བླངས་ཏེ་ལྷ་གཅིག་ལ་འགྲོ་བར་གསུངས་པས། ལྷ་གཅིག་གིས་མཛའ་གཅུགས་ཀྱིས་བཅིངས་པའི་གཉེན་འཁོར་དང་མི་འཕྲད་ཅིང་། ཆོས་དང་སྲིད་ཀྱི་འབྱོར་པ་ལས་གཞན་དུ་གྱུར་པའི་ཡུལ་དེར་མི་འགྲོ་བར་ཞུས་ཀྱང་། བོད་ཀྱི་རྒྱལ་པོའི་བླ་ན་མེད་པའི་སྤྲུལ་པའི་འཁོར་ལོས་སྒྱུར་བའི་རྒྱལ་ཐབས་ཀྱི་གཟི་བྱིན་རྒྱ་རྗེས་མ་བཟོད་པའི་དབང་གིས་བཀའ་མ་གནང་བས། ལྷ་གཅིག་གིས་བདག་ཁ་བ་ཅན་གྱི་རྒྱལ་ཁམས་སུ་འགྲོ་དགོས་ན། ལྷ་ཤཱཀྱ་མུ་ནི། བོད་ལྷ་སྲིན་མ་རུངས་པའི་ཡུལ་ས་རྒོད་རྡོ་རྒོད་ལ་སོགས་པའི་དགྲ་རྣམས་འདུལ་བའི་གཙུག་ལག་གི་གབ་རྩེ་དང་འདོད་པ་འཇོ་བའི་དངོས་པོ་ཟད་མི་ཤེས་པའི་རིན་པོ་ཆེའི་གན་མཛོད་གནང་བར་ཞུས་པ་བཞིན་བརྫངས་ཏེ། རྒྱ་རྗེའི་ཞལ་ནས། (༢༠བ)

---

^{[མ་དཔེ་གཟིགས་ན་འདིར་གནོན།]}

ཀྱེ་མ་བུ་མོ་བདག་ལ་ཚུར་གསོན་དང་། །བོད་ཅེས་བྱ་བ་ཁ་བ་ཅན་གྱི་ཡུལ། །ཡུལ་ལ་ཁྱད་དུ་འཕགས་པ་དེ་ཡིན་ཏེ། །གངས་རི་རང་བྱུང་མཆོད་རྟེན་ཡ་མཚན་ཅན། །ལྷུན་གྱིས་གྲུབ་པའི་གནས་མཆོག་དམ་པ་ནི། །མཚོ་བཞི་གཡུ་ཡི་མཎྜལ་བཀྲམ་པ་འདྲ། །ཐང་བཞི་རང་བཞིན་མཆོད་པ་བཤམས་པ་འདྲ། །ཆུ་བོ་བཞི་ཡི་མགོ་བཞི་རང་བཞིན་ཅན། །རི་མཐོ་ས་གཙང་གངས་རི་གཉན་གྱི་ལྗོངས། །བཀྲ་ཤིས་ཉམས་དགའ་གཡུང་དྲུང་བྲིས་པ་འདྲ། །རྒྱལ་ཁམས་གཞན་གྱི་མི་རྗེ་མི་ཡིས་ནི། །བྱས་པ་ལ་ནི་ངོ་མཚར་ཆེ་རྒྱུ་མེད། །བོད་ཡུལ་མི་རྗེ་ལྷས་བྱས་ངོ་མཚར་ཆེ། །མཐའ་བཞིའི་རྒྱལ་པོ་ཀུན་གྱིས་ལེགས་པར་བཀུར། །ཆོས་ཀྱི་རྒྱལ་པོ་སྲོང་བཙན་སྒམ་པོ་ནི། །བྱང་ཆུབ་སེམས་དཔའི་སྤྲུལ་པ་མི་དྲུག་ལྡན། །ཡོན་ཏན་དཔག་ཏུ་མེད་པའི་རྒྱལ་པོ་ཡིན། །ཞེས་སྤྲོ་བ་བསྲིངས་ནས། བུ་ཚ་ཡིག་ཚང་སློབ་ཅིང་དགེ་བ་དག་ལ་སྦྱར། །དཀོན་ཅོག་དབུ་འཕངས་བསྟོད་ཅིང་དད་དང་གུས་པ་སྐྱེད། །ཆོས་འཁོར་གཙུག་ལག་བཞེངས་ཤིང་གནས་གྲར་དགེ་གནས་ཚུགས། །སངས་རྒྱས་སྐུ་གཟུགས་བཞེང་ཞིང་དམ་ཆོས་གཞུང་ཡང་བྲིས། །ཐོས་བསམ་སྒོམ་པ་བྱ་ཞིང་དམ་ཆོས་ནང་དུ་སྤྱད། །དགེ་འདུན་རྙེད་བཀུར་བྱ་ཞིང་དམ་ཚིག་སྡོམ་པ་སྲུངས། །དམ་ཆོས་དུས་དྲན་བྱས་ལ་དེ་རིང་ཉིད་ནས་འབད། །ཆོས་ལ་ལོང་ཡོད་མི་སེམས་ཚེ་འདིར་ཆགས་མི་བྱ། །སྐྱབས་ཆེན་ལྷ་རུ་གཟུང་ལ་དཀོན་ཅོག་སྐྱབས་འགྲོ་བྱ། །ལས་དང་འབྲས་བུ་སེམས་ལ་སྡིག་སྤོང་དགེ་ལ་འབད། །འཁོར་བའི་ཉེས་དམིགས་བསམ་ལ་ངེས་འབྱུང་བློ་གཏད་བྱ། །འཁོར་བའི་ཉོན་མོངས་སྤངས་ཤིང་(༢༡ན)

---

^{[མ་དཔེ་གཟིགས་ན་འདིར་གནོན།]}

དེ་ཡི་གཉེན་པོ་སྟེན། །བྱམས་དང་སྙིང་རྗེ་བསམ་ལ་བྱང་ཆུབ་སེམས་ཀྱང་སྐྱེད། །བྱང་ཆུབ་སྤྱོད་པ་སྤྱད་ཅིང་ཐེག་ཆེན་ལམ་བགྲོད་བྱ། །དེ་ལྟར་བྱས་ན་བཀྲ་ཤིས་དགེ་བར་འགྱུར། །གཏམ་གྱིས་མཐའ་མ་ཡིན་ནོ་བུ་མོ་དེ་ལྟར་མཛོད། །ཅེས་སོགས་ཆོས་དང་སྲིད་ལ་མཁོ་བའི་ཞལ་གདམས་མང་དུ་གསུངས་ནས་བོད་ཀྱི་རྒྱལ་པོའི་བཙུན་མོ་རིན་པོ་ཆེར་བརྫངས་སོ། །དུས་དེར་མཐོང་སྣང་གསུམ་བྱུང་བ་ནི། ཕྱོགས་བཅུའི་བདེ་གཤེགས་བྱང་སེམས་རྣམས་ཀྱི་གཟིགས་མོར་རྗེ་བཙུན་ཕྱག་ན་པདྨོ་དང་ཇོ་མོ་སྒྲོལ་མ་གཉིས་ཕན་ཚུན་དུ་ཐུགས་རྗེའི་འོད་ཟེར་གྱིས་བསྐུལ་བའི་མཐུས། བོད་ཁམས་ཀྱི་དོན་དུ་གཤེགས་པར་གཟིགས། རྒྱ་ནག་པོ་རྣམས་ཀོང་ཇོ་བོད་ཀྱི་སྤྲུལ་པའི་རྒྱལ་པོའི་བཙུན་མོར་འཁྱེར་བར་མངོན། བོད་འབངས་རྣམས་ཀྱིས་ནི། དཔའ་མཛངས་འཕྲུལ་ལྡན་ཀྱི་བློན་པོ་མགར་སོགས་རྒྱ་རྗེའི་ཕོ་བྲང་དུ་ལྷ་གཅིག་སྤྱན་འདྲེན་པའི་རྟེན་དུ་བཻ་ཌཱུརྱའི་རྨོག་དང་བཅས་ཏེ་མངགས་པ་རྒྱལ་ཁབ་ཏུ་སླེབ་པ་དང་། རྒྱ་རྗེ་ཡབ་ཡུམ་སྲས་ལྷ་གཅིག་དང་བཅས་པ་མཐའ་དག་བོད་ལ་སྟེར་མ་འདོད་པའི་བསྙད་དུ། རྒྱལ་པོ་ཆེན་པོ་གཞན་ཞིག་ལ་སྟེར་བར་གྲོས་མཐུན་ཀྱང་། ནང་གསེས་ཀྱི་ཡབ་ཆོས་ལ་དགྱེས། ཡུམ་ལོངས་སྤྱོད་འདོད། སྲས་དམག་ལ་དགའ། ལྷ་གཅིག་གཟུགས་ཡིད་དུ་འོང་བ་ལ་འདོད་པའི་དབང་གིས་ཕོ་ཉ་སོ་སོར་མངགས་པས། རྒྱ་གར་ཆོས་ཀྱི་རྒྱལ་པོ། སྟག་གཟིག་ནོར་གྱི་རྒྱལ་པོ། གེ་སར་དམག་གི་རྒྱལ་པོ། གཟུགས་མཛེས་ཁྲོམ་གྱི་རྒྱལ་པོ་བཞིའི་བློན་པོ་ལྔ་བརྒྱ་ཡང་ལྷ་གཅིག་སྤྱན་འདྲེན་པའི་ཆེད་དུ། རྒྱ་རྗེའི་ཕོ་བྲང་དུ་སླེབ་པ་ལས། རྒྱ་(༢༡བ)

---

^{[མ་དཔེ་གཟིགས་ན་འདིར་གནོན།]}

ཐམས་ཅད་བོད་ལ་མི་དགའ་ཡང་། ཁྲིམས་ལ་ཉེ་རིང་མི་བརྟུལ་བའི་དབང་གིས་བློན་པོ་རིག་པ་སུ་རྣོ་བ་ཞིག་ལ་སྟེར་བར་བྱས་ཏེ། བཙན་པོའི་བླ་གཡུ་ཕུབ་ཙམ་ལ་མིག་གཅིག་མཐའ་ན་ཡོད་ཅིང་མིག་གཅིག་དཀྱིལ་ན་ཡོད་པ་ནང་གི་མིག་ཀྱང་ཕུབ་ཀྱི་སྤ་རིམ་ལྟར་ཡོད་པའི་ཁྱད་འཕགས་ཞིག་ཡོད་པ་དེ་གཏད་ནས་མིག་ཏུ་དར་ཡུག་སུས་ཚུད་ལ་སྦྱིན་ནོ་ཟེར་བས། བློན་པོ་གཞན་རྣམས་ཀྱིས་ཉི་མ་མང་པོའི་བར་དུ་ཐབས་སྣ་ཚོགས་བྱས་ཀྱང་མ་ཚུད་པར། མགར་གྱིས་རྒྱའི་གྲོག་མ་གཟན་གྱིས་གསོས་པའི་མཐེ་བོང་ཙམ་ཞིག་གི་རྐེད་པ་ལ་དར་སྐུད་དང་། དེའི་སྣེ་ལ་དར་ཡུག་བཏགས་ཏེ་དབུས་ཀྱི་མིག་ཏུ་བཅུག་ནས་ཕུས་བཏབ་པ་མཐར་འཐོན་ཏེ་ལྷ་གཅིག་གནང་བར་ཞུས་ཀྱང་། བོད་ལ་སྟེར་མ་འདོད་པའི་བསྙད་ཀྱིས། དེ་ཙམ་གྱིས་བྱ་བ་མ་རྫོགས་པ་སྐད་དུ། བྱ་མ་བརྒྱ་བུ་བརྒྱ། ཤིང་ཟླུམ་པོ་རྩ་རྩེ། ཉིན་གཅིག་མི་རེས་ལུག་ཤ་སྦུགས་རེ་ཟ་བ་ལྤགས་པ་མཉེས་ཟིན་པ་དང་། ཆང་བན་རེ་འཐུང་བ། མ་བཟི་བ་སོགས་འགྲུབ་པར་དཀའ་བའི་རིག་པ་མང་པོ་འགྲན་བཅུག་པས། མགར་གྱིས་སྦང་མ་གཏོར་བས་བྱ་མ་བུ་ཤེས། ཤིང་ཆུ་ལ་བསྐྱུར་བས་རྩ་རྩེ་ཤེས། ལུག་རྣམས་ཀྱི་ཤ་ལྤགས་སོ་སོར་སྤུངས་ནས་ཤ་ཉུང་ངུ་རེ་ཚྭ་ལ་བགྲེས་ཏེ་ཟར་བཅུག་པས་ཟོས་ཟིན་པ། པགས་པ་རྣམས་གྲལ་འགོ་ནས་རིམ་བཞིན་ཕུར་པ་རེ་བྱས་པས་ཐུལ། ཆང་སྣོད་ཆུང་ངུ་རེར་འཐུང་བསྐོར་བྱས་པས་མ་བཟི་བར་བཏུངས་ཟིན། སྔོན་པོ་གཞན་རྣམས་དེ་ལས་ཕྱི་རོལ་དུ་གྱུར་ནའང་ལྷ་གཅིག་མ་བྱིན་པར། ནུབ་ཅིག་གི་ཚེ་རྔ་བོ་ཆེ་བརྡུངས་བྱུང་བས། རྒྱལ་པོ་གཞན་རྣམས་ཀྱི་བློན་པོ་ཕོ་བྲང་དུ་སོང་(༢༢ན)

---

^{[མ་དཔེ་གཟིགས་ན་འདིར་གནོན།]}

བ་དང་། མགར་གྱིས་རྔ་དེ་སྐྱོན་ཅན་དུ་གོ་ནས། རང་གི་གནས་ཀྱི་ཕྱི་སྒོའི་ཡ་ཐེམ་ལ་རྡོ་རྗེ་དང་། མ་ཐེམ་ལ་གཡུང་དྲུང་མཚལ་གྱིས་བྲིས། སྒོ་གཞན་རྣམས་ལ་ཡང་མཚན་མ་རེ་བཏབ་སྟེ་ཕོ་བྲང་དུ་ཕྱིན་པས། རྗེས་དོ་ནུབ་ལམ་མ་འཛོལ་བར་རང་ཁྱིམ་དུ་སུས་སླེབ་པར་སྟེར་ཟེར་བས། གཞན་རྣམས་ལམ་ནོར། མགར་གྱིས་སྒྲོན་མེ་བཏེག་ནས་སྔར་རྒྱབ་པའི་རྟགས་རྣམས་དང་བསྟུན་ནས་འོངས་པས་རང་ཁྱིམ་དུ་བདེ་བར་སླེབ། འོན་ཀྱང་རྒྱ་རྗེའི་ཞལ་ནས་སངས་ཉིན་ཐང་ལ་ཡིད་དུ་འོང་བའི་ན་ཆུང་སུམ་བརྒྱ་ཚོགས་པས། དེ་དུས་སུས་ངོ་ཤེས་པ་ལ་སྟེར་ཟེར་བས། མགར་གྱིས་སྔར་ནས་འདྲིས་པའི་རྒྱ་མོ་ཞིག་ཡོད་པར་གསེར་གྱི་རྔན་པ་བྱིན། རྒྱའི་རྩིས་ཁོག་ཏུ་མི་ཚུད་པའི་ཐབས་བྱས་ཏེ་དྲིས་པས། ཀོང་ཇོའི་སྐུ་དབྱིབས་དང་ཆ་ལུགས་རྣམས་ངེས་པར་བྱས་ནས། ནང་པར་བློན་པོ་གཞན་རྣམས་ཀྱིས་ཆས་དང་གཟུགས་ལ་བལྟས་ཏེ་བུ་མོ་འགའ་ཞིག་ཁྲིད་པའི་རྗེས་སུ། བོད་བློན་རྣམས་ཀྱིས་ལྷ་གཅིག་གི་གོས་ཀྱི་གོང་བ་ནས་མདའི་ལྷོང་གིས་བཟུང་སྟེ་ཁྲིད་པས། ལྷ་གཅིག་མི་དགའ་བའི་རྣམ་འགྱུར་བྱེད་པར། མགར་གྱིས་སྤྲོ་བ་བསྐྱེད་པའི་རམ་མཐོན་མི་དང་འབྲི་སེ་རུ་གུང་ཐུན་གཉིས་ཀྱིས་བཏེག་ནས། ཨེ་མ་ངོ་མཚར་ཆེ། ལྷ་གཅིག་ཀོང་ཇོ་ཁྱེད། །བདག་གི་ཚིག་ལ་གསོན། །བཀྲ་ཤིས་ཉམས་སུ་དགའ། །བོད་ཀྱི་རྒྱལ་ཁམས་ན། །རིན་ཅེན་སྣ་ལས་གྲུབ། །རྒྱལ་པོའི་ཕོ་བྲང་ན། །མི་རྗེ་ལྷ་ཡིས་མཛད། །སྲོང་བཙན་སྒམ་པོ་དེ། །རིགས་གཟུགས་དཔལ་གྱིས་བརྗིད། །མཐོང་ན་སེམས་ཡིད་འཕྲོག །ཐུགས་རྗེ་ཆེན་པོ་ལགས། །རྒྱལ་སྲིད་(༢༢བ)

---

^{[མ་དཔེ་གཟིགས་ན་འདིར་གནོན།]}

ཆོས་བཞིན་སྐྱོང་། །འབངས་རྣམས་བཀའ་ལ་ཉན། །རྒྱལ་བློན་འཁོར་འབངས་རྣམས། །དགའ་སྐྱིད་གླུ་རུ་ལེན། །ཆོས་ཀྱི་ཉི་མ་ཤར། །དཔལ་གྱི་སྒྲོན་མེ་བཏེག །རི་ལ་ཤིང་སྣ་ཚང་། །ས་གཞི་ཡངས་པ་ལ། །འབྲུ་སྣ་ལྔ་ཡི་ཚོགས། །གོ་མཚམས་མེད་པར་སྐྱེ། །གསེར་དངུལ་ཟངས་ལྕགས་སོགས། །རིན་ཅེན་དུ་མ་ཡོད། །གནག་རྟ་ལུག་གསུམ་རྒྱས། །དགའ་སྐྱིད་དེ་ལྟར་ཡོད། །ཨེ་མ་ངོ་མཚར་ཆེ། །ལྷ་གཅིག་ཀོང་ཇོ་གསོན། །ཞེས་སྙན་པའི་དབྱངས་སུ་བླངས་པས། ལྷ་གཅིག་གི་ཐུགས་བསོས། རྒྱལ་པོས་ལྷ་གཅིག་བཤུལ་དུ་ཞུགས་པའི་སྐྱེས་ཐུང་ལ་བྱོན་པའི་གྲལ་དུ། འབྲི་སེ་རུ་གུང་ཐུན་གྱིས་ཕྲག་དོག་གི་གཏམ་ལ་བརྟེན་ནས། རྒྱ་རྗེས་མགར་རྒྱ་ཡུལ་དུ་སྡོད་དགོས་པར་གསུངས་པ་ལ། འདོད་པ་ལྟར་བཅོས་ནས་བསྡད་པས། རྒྱ་རྣམས་བག་ཡངས་སུ་གྱུར་ཅིང་། བློན་པོ་རིག་པ་ཅན་གྱི་བརྒྱུད་པ་འབྱུང་བའི་ཆེད་དུ་མཚར་སྡུག་གི་ལང་ཚོ་ཅན་ཞིག་ཇོ་མོར་བྱིན་ཀྱང་ན་བ་ལྟར་བྱས་ཏེ་མ་འབྲེལ་བར་བློན་པོའི་ནད་ལ་ཕན་པའི་ལྟོ་བཅོས་སུ། དར་ཟབ་བསྲེགས་པའི་ཐལ་བ། ཙན་དན་བསྲེགས་པའི་སོལ་མདུད། ལུག་གི་མཚེར་ཁྲག་སོགས་མི་འགྲུབ་པ་བསྒྲུབ་ཏུ་བཅུག་པ་དང་། ནས་རྣམས་བརྔོས་ཏེ་ས་བོན་དུ་འདེབས་པ་སོགས་ཐབས་འཕྲུལ་དུ་མས་མ་ཧཱ་ཚི་ནའི་རྒྱལ་ཁམས་ཆམ་ལ་ཕབ་སྟེ་ཐབས་མཁས་ཀྱི་བོད་དུ་ཡོང་ཁར། དཱ་རི་དྲ་ཞིག་ལ། ཐག་རིང་གི་ར་ཕོ་རྒྱ་བོ་ལ་ངོ་ཤེས་མི་བྱའོ། ཁ་རོག་སྡོད་ལ་ཀུ་ཅོ་ཐོང་། །ནག་པོ་ལྕགས་མཁར་ཐུབ་ནས་ཡོད། །ལུང་པ་ཕུ་རྡུགས་མདའ་རྡུགས་སུ། །ཐུ་རུ་ཅོག་བྲག་ཁོང་ལ་བཞོག །(༢༣ན)

---

^{[མ་དཔེ་གཟིགས་ན་འདིར་གནོན།]}

དར་དཀར་སྒྲིལ་ལ་དར་ནག་རྐྱོང་། །ཟླ་བས་ཉི་མའི་རྩེ་རུ་སླེབ། །ཅེས་རྒྱ་ཡུལ་དུ་ངན་བྱས་པ་དང་། ཁོང་རང་ཐབས་ཀྱིས་འོང་བ་སོགས་ཀྱི་ལོག་སྐད་ཀོང་ཇོ་དཔོན་གཡོག་ལ་སྤྲིངས་སོ། །དེ་ནས་མགར་གྱིས་ནད་འདི་བོད་ཀྱི་ལྷ་མ་དགའ་བར་འདུག་པས་ལྷ་གསོལ་བའི་ཆས། རྟ་མོག་དྲོ་མགོ་དམར་དང་། ཚྭ་ཆུ་བྱུགས་པའི་ཤ་སྐམ་སོགས་སྟ་གོན་བྱས་ནས་བོད་ཀྱི་རི་མཐོང་སར་གྱད་མི་བཞི་དང་བཅས་ཏེ་འོངས་པ་དང་། མགར་གྱིས་གྱད་མི་བཞི་ལ་ཤ་སྐམ་བྱིན་པས་སྐོམ་པའི་ནད་མི་བཟོད་པས་གདུངས་ཏེ། ཆང་གི་བཏུང་བ་མང་པོར་ལོངས་སྤྱད་པས། ར་རོ་བའི་བར་དུ་མགར་གྱིས་གྱད་ཀྱི་རྟའི་སུག་པོ་བྲེགས། མཚོན་ཆ་རྣམས་བཅག །རྟ་མོག་དྲོ་མགོ་དམར་དེ་ཞོན་ནས་འདི་སྐད་ཟེར་རོ། །དར་ཟབ་མེ་ལ་བསྲེགས་པའི་ཐལ་བ་དེ། །རྒྱལ་པོ་ཉེ་རིང་ཅན་དེའི་ན་བཟའ་མཛོད། །སྙེ་མ་འབྲུ་མེད་ཐལ་བ་ནག་པོ་དེ། །བཙུན་མོ་སེར་སྣ་ཅན་དེའི་བརྒྱགས་ཕྱེ་མཛོད། །ནགས་ལ་མེ་རྒྱབ་སོལ་བའི་མདུད་ཤིང་དེ། །རྒྱལ་བུ་ལུས་རྩལ་ཅན་དེའི་མདུང་ཤིང་མཛོད། །ལུག་ལ་མཚེར་ཁྲག་མེད་པར་བསད་པ་དེ། །ལྷ་ཡི་དྲུང་དུ་སྡིག་བཤགས་སྨོན་ལམ་བྱ། །ལུས་ལ་ནད་མེད་མལ་དུ་ཉལ་བ་ལ། །སྔས་མགོར་སྨན་པ་བོས་ནས་ཅི་ཞིག་བྱ། ཁོ་བོ་མི་སྡོད་རང་གི་ཡུལ་དུ་འགྲོ། །ཞེས་ཟེར་ནས་འོངས་པས། སྒོ་གདོང་སྒོ་མོའི་རྩར་ཀོང་ཇོ་དཔོན་གཡོག་གི་རྗེས་ཟིན་སྐད་དོ། །དེ་ལྟར་ཐབས་སྣ་ཚོགས་ཀྱིས་རྒྱ་མོ་བཟའ་ཀོང་སྔོ་བོད་རྒྱལ་པོའི་བཙུན་མོར་ཐོབ་པ་མཐོང་ངོ་། །སྨྲས་པ། ལེགས་ལམ་མཆོག་གི་མན་ཤེལ་གསར་པའི་གོས། །ཀླུབས་པའི་མི་བདག་ཐུགས་(༢༣བ)

---

^{[མ་དཔེ་གཟིགས་ན་འདིར་གནོན།]}

རྗེའི་ལྕགས་ཀྱུ་ཡིས། །རྒྱ་བལ་ཕུན་ཚོགས་དངོས་ཀུན་བསྡུས་པ་ན། །གསེར་མངལ་ཅན་ཡང་འདུད་སྙམ་འཕྱང་མོ་ཡུག །ངལ་བ་མེད་པར་མཁའ་དབྱིངས་ལུས་ཕྲ་མས། །བཞིན་ངོས་འཁོར་ལོས་སྒྱུར་ཐབས་སྨིན་མའི་གློག །ཀུན་གྱི་གཟིགས་མོར་མཚར་བའི་འཕྲེང་བ་འདིས། །རྒྱལ་ཐབས་རྡོ་རྗེའི་གཟེགས་མ་འཕྲོས་སྙམ་བྱེད། །ཨེ་མ་རི་དྭགས་མིག་ཅན་འབུམ་ཕྲག་གི །བྱེད་པོས་ལང་ཚོའི་ཚོགས་ཀུན་བསྡུས་པའི་དཔྱིད། །རིན་ཅེན་བཙུན་མོར་གྲུབ་པའི་ཕན་བདེའི་ནོར། །བོད་འབངས་ཡོལ་གོའི་ནང་དུ་འཕྱུར་བུར་གཏམས། །ཞེས་བྱ་བ་ནི་སྐབས་ཀྱི་ཚིགས་སུ་བཅད་པའོ། །དེ་ནས་ཀོང་ཇོ་འཁོར་བཅས་རྣམས་ལྷ་སའི་ཕྱོགས་སོ་སོར་འཁོད་པའི་སྐྱེ་བོ་རྣམས་ལ་སྤྲུལ་པའི་དབང་གིས་མཐོང་སྣང་མི་འདྲ་བ་དུ་མ་བྱུང་ཡང་། དོན་དུ་བྱང་ཕྱོགས་ནས་བྱོན་ཏེ་ལྷ་གཅིག་རྩིས་ཀྱི་གཙུག་ལག་ལ་མཁས་པས། བོད་སྲིན་མོ་གན་རྐྱལ་དུ་འགྱེལ་བའི་དབྱིབས་སུ་གཟིགས། ཀླུའི་ཕོ་བྲང་གི་སྟེང་དུ་ཇོ་བོ་བཞུགས་ན་ནོན་པར་མཁྱེན་ནས། དེ་ཉིད་དུ་སྐུའི་ཕྱོགས་བཞིར་ཀ་བ་བཙུགས་ནས། དར་གྱི་ཡོལ་བས་མཐའ་བསྐོར་ཏེ། ཇོ་བོ་ཤཱཀྱ་མུ་ནི་ལ་མཆོད་པའི་རོལ་མོ་དྲི་ཟའི་རྒྱུད་མང་ལྟ་བུར་དཀྲོལ་བས། བལ་མོ་བཟས་ཅི་ཡིན་སྙམ་ནས་ཕོ་བྲང་གི་རྩེ་ནས་བལྟས་པས། ཀོང་ཇོ་དཔོན་གཡོག་བྱོན་པ་མཐོང་ནས། ཕྲག་དོག་སྟེ། རྒྱལ་པོ་དང་ཀོང་ཇོ་མཇལ་བའི་གེགས་བྱས་པར། བློན་པོ་མགར་གྱིས་ཁྲི་བཙུན་ལ། ཀོང་ཇོ་སྤོར་ཐང་གི་རྩིས་ལ་མཁས་པའི་དབང་གིས་གཙུག་ལག་ཁང་གི་དཔྱད་སོགས་འདྲི་དགོས་པས། རྒྱལ་པོ་དང་མཇལ་དུ་བཅུག་པ་འཐད་ཅེས་གྲོས་བཏབ་ནས། (༢༤ན)

---

^{[མ་དཔེ་གཟིགས་ན་འདིར་གནོན།]}

མཇལ་འཕྲད་ཀྱི་དགའ་སྟོན་འཆི་བ་མེད་པའི་དཔལ་ལ་འགྲན་པ་བྱས་པའི་དུས་སུ། བལ་བཟས། རྒྱ་མོ་འུན་ཤིང་ཀོ་ཇོ་ཁྱོད། །དཀའ་ལས་བྱས་ནས་སྙེ་བོས་བཀུག །བོད་ཀྱི་ཡུལ་དུ་བྱོན་ན་ཡང་། །ང་ནི་སྔ་བས་ཆེན་མ་ཡིན། །ཞེས་སོགས་སྨྲས་པར། ཀོང་ཇོས། འགྲན་པའི་འགྲན་སེམས་མེད་མོད་ཀྱང་། ཁྱོད་ཀྱིས་འགྲན་ནོ་ཞེས་སྨྲས་པས། །ཐེམ་པ་སྔ་བརྒལ་ཆེན་མ་ཁྱོད། །ལྷ་ཁང་རྒྱ་མཚོའི་སྟེངས་སུ་བཞེངས། །ཞེས་སོགས་ཀྱི་ལན་བརྗོད་པའི་ཆེན་ཆུན་གྱི་གཏམ་བྱུང་སྐད། དེ་ནས་ལྷ་གཅིག་ཁྲི་བཙུན་གྱིས་བཙན་པོ་ལ་ལྷ་ཁང་རྩིག་པའི་གྲོས་ཞུས་པས། ཁྱོད་རང་གང་ལེགས་སུ་བརྩིགས་ཤིག་གསུངས་པ་ལྟར། ལ་གདོང་གི་ནེའུ་ཁར་བརྩིགས་པར་མཚན་མོ་ལྷ་འདྲེས་བཤིག་པས། གཡོག་མོ་ཞིག་ལ་གསེར་ཕྱེ་བྲེ་གང་བསྐུར་ནས། ཀོང་ཇོ་ལ་རྩིས་བྱེད་པར་ཞུས་པས། སྤོར་ཐང་བརྒྱད་ཅུ་སྐོར་གྱི་སྟེང་ནས་བརྩིས་པས། ཁ་བ་ཅན་གྱི་ཡུལ་འདི་སྲིན་མོ་གན་རྐྱལ་དུ་འགྱེལ་བ་ལྟ་བུར་འདུག་པ་ལས། འོ་ཐང་གི་མཚོ་འདི་སྲིན་མོའི་སྙིང་ཁྲག །དམར་ལྕགས་ཀྱི་རི་འདི་སྙིང་གི་རུས་པའི་རྣམ་པར་འདུག་ནའང་། མཚོའི་སྟེང་དུ་ཤཱཀྱ་མུ་ནི་བཞུགས་པ་དང་། རིའི་རྩེར་རྒྱལ་པོའི་ཕོ་བྲང་ཡོད་པས་ནོན་ཅིང་། དེ་དག་གི་མཐའ་སྐོར་ན་ས་དཔྱད་སྐྱོན་ཡོན་གཉིས་ལས། ཡོན་ཏན་ནི། ཤར་ན་མཆོད་སྡོང་བཙུགས་པ་འདྲ་བ། ལྷོ་ན་རིན་པོ་ཆེའི་མཆོད་རྟེན་འདྲ་བ། ནུབ་ན་མཉྫིའི་སྟེང་ན་དུང་ཕོར་བཞག་པ་འདྲ་བ། བྱང་ན་པདྨ་ཁ་ཕྱེ་བ་འདྲ་བ་སྟེ། ཁྱད་པར་དུ་འཕགས་པའི་རི་བཞི། དེའི་ནང་བསྐོར་དུ་ཉང་བྲན་འཕན་དཀར་གྱི་རི་ལ་གདུགས། མལ་གྲོང་གི་རི་ལ་ཉ། མདོངས་མཁར་གྱི་བྲག་(༢༤བ)

---

^{[མ་དཔེ་གཟིགས་ན་འདིར་གནོན།]}

ལ་པདྨ། གྲིབ་ཀྱི་འཁྱགས་རུལ་ལ་དུང་། རྫོང་བཙན་གྱི་རི་ལ་བུམ་པ། ཡུག་པའི་རི་ལ་དཔལ་བེའུ། འཕན་དཀར་གྱི་རི་ལ་རྒྱལ་མཚན། བྲང་བུའི་སྲས་ལ་འཁོར་ལོ་སྟེ་བཀྲ་ཤིས་པའི་རྟགས་བརྒྱད། ལྕགས་ཁ་རི། ཤུག་པ་གདོང་། ར་ཁ་བྲག །ཇོ་མོ་ཟེ་རྣམས་ལ་གསེར་དངུལ་ཟངས་ལྕགས་ཀྱི་གཏེར་ཁ། ཤར་གྱི་སྟག་དགའ་གདོང་འོག་མ། ལྷོའི་གཡུ་འབྲུག་གཙང་ཆབ། ནུབ་ཀྱི་བྱ་རྟི་བུ་གདོང་། བྱང་གི་རུས་སྦལ་ཕ་བོང་ཁ། མདོར་ན་གནམ་ལ་འཁོར་ལོ་རྩིབས་བརྒྱད་དང་། ས་ལ་པདྨ་འདབ་བརྒྱད་དེ་གཙུག་ལག་ཁང་རྩིག་པའི་ཡོན་ཏན་ཕུན་སུམ་ཚོགས་པ་ཡོད་ལ། འོན་ཀྱང་སྐྱོན་ནི། ཤར་བྱེ་མའི་རི་ལ་སྲིན་མོ་འདོམས་བཟེད་པ་ལྟ་བུ། ལྷོ་ན་སྡིག་པ་གཟན་ལ་རུབ་པ་འདྲ་བ། ནུབ་ཤུན་གྱི་བྲག་ལ་བདུད་བྱ་ར་བྱེད་པ་ལྟ་བུ། བྱང་ཉང་དོགས་ཀྱི་བར་ན་གླང་པོ་ཆེ་གཡུལ་དུ་ཞུགས་པ་ལྟ་བུའི་རི། ཤར་ལྷོ་མཚམས་ན་བཙན་གྱི་རྒྱུ་ས། ལྷོ་ནུབ་མཚམས་ན་འདྲེའི་འདུ་ཕུང་། བྱང་ན་མ་མོའི་ཉལ་ས། གཞན་ཡང་སྐུམ་པ་རི་ལ་ཆུ་སྲིན་དྲེའུ་ཁྲིད་པ་འདྲ་བ། གནམ་སྒོ་བྱེ་བ་གནམ་རལ་གྲི་འདྲ་བ། ས་སྒོ་བྱེ་བ་ཕག་པའི་སྣ་འདྲ་བ་སོགས་ས་དཔྱད་ངན་པ་རྣམས་གནོན་པར་བྱེད་པའི་ཐབས་སུ། ཐོག་མར་རྒྱལ་པོ་ཡབ་ཡུམ་གསུམ་གྱིས་སྐྱིད་ཤོད་ཉང་བྲན་ཕ་བོང་ཁར་སྒྲུབ་པ་མཛད་ནས། སྒྲུབ་པའི་རྟགས་ཐོན་པ་དང་། སྲིན་མོའི་ཡན་ལག་དང་སྲིན་ལག་གནོན་པར་བྱེད་པ་ལ། གཡོན་རུ་ཁྲ་འབྲུག །གཡས་རུ་གཙང་འགྲམ། སྦུས་རུ་བཀའ་ཚལ། རུ་ལག་གྲུམ་པ་རྒྱང་གི་ལྷ་ཁང་སྟེ། མཐའ་འདུལ་གྱི་ལྷ་ཁང་བཞི། ཀོང་པོ་བུ་ཆུ། ལྷོ་དྲག་མཁོ་མཐིང་། བྱམས་སྤྲིན་(༢༥ན)

---

^{[མ་དཔེ་གཟིགས་ན་འདིར་གནོན།]}

དགེ་རྒྱས། བྱང་པྲ་དུམ་རྩེ་སྟེ། ཡང་འདུལ་གྱི་ལྷ་ཁང་བཞི། ཁམས་གློང་ཐང་སྒྲོལ་མ། སྤ་གྲོ་སྐྱེ་ཆུ། ཚལ་རིགས་ཤེས་རབ་སྒྲོལ་མ། ཚངས་པ་རླུང་གནོན་ཏེ། རུ་གནོན་གྱི་གཙུག་ལག་ཁང་རྣམས་བརྩེགས། སྔར་བཤད་པའི་ཉེ་སྐོར་གྱི་སའི་དགྲ་ངན་པ་རྣམས་ལ་མཆོད་རྟེན། རྡོའི་སེང་གེ །དབང་ཕྱུག་གི་རྟེན། བྱ་ཁྱུང་། དུང་དཀར་སོགས་ཀྱིས་བཅོས། དེ་རྗེས་མཚོ་བསུབས་པའི་སྟེང་དུ་གཙུག་ལག་ཁང་བརྩིགས་ཏེ་རྒྱ་བལ་གྱི་ལྷ་རྣམས་བཞུགས་ན་སངས་རྒྱས་ཀྱི་བསྟན་པ་དར་ཞིང་། ཕྱིས་དབོན་སྲས་རྣམས་ཀྱི་རིང་ལའང་དགེ་འདུན་གྱི་སྡེ་དང་མདོ་རྒྱུད་ཀྱི་བཤད་སྒྲུབ་འཕེལ་རྒྱས་སུ་འབྱུང་བར་འདུག་གསུང་། གཡོག་མོས་འཕྲིན་སྔ་ཕྱི་རྣམས་ནོར་ཞིང་འགའ་ཞིག་འཚེབ་པས། ཁྲི་བཙུན་གྱིས་ར་ལ་ས་བཀལ་ནས་མཚོར་བླུགས་པས་རྙོག་མ་ལོང་དུ་སོང་ནས་ཟུབས་སུ་མ་འདོད་པས། རྒྱ་བཟས་ངན་བསླབས་པར་གོ་ནས། རྒྱལ་པོ་ལ་ཞུས་པས། དེ་མ་ཐག་ཙན་དན་གྱི་སྐུ་ལ་གསོལ་བཏབ་པ་དང་། སྤྱན་གཡས་ལས་འོད་ཟེར་བྱུང་ནས་མཚོ་ཐམས་ཅད་ཁེངས་པ་གཟིགས་པས། རྒྱལ་པོས། ཁྲི་བཙུན་ལྷན་ཅིག་ཏུ་མཚོ་འགྲམ་དུ་བྱོན་ནས་གསེར་གྱི་སོར་གདུབ་མཁའ་ལ་འཕངས་པ་གང་བབས་སུ་ལྷ་ཁང་གི་རྨང་འདིང་བར་དམོད་བོར་ཏེ་བསྐྱུར་བས། མཚོ་ནང་དུ་བབས་ཏེ་འོད་ཀྱི་དྲ་བས་གང་བར། རྒྱལ་པོའི་ཞལ་ནས་ལྷ་གཅིག་ཁྲི་བཙུན། བལ་པོ་རྡོ་བཟོ་བས་འོད་ཀྱི་དྲ་བའི་རྗེས་སུ་རྡོ་རྒྱོབ་ཅིག་གསུངས་པ་ལྟར་བྱས་པས། རྡོའི་སྤྲེའུ་མཆོད་རྟེན་ལྟ་བུ་ཞིག་བྱུང་བར། མེ་ཆུའི་གནོད་པ་མི་འབྱུང་ཆེད་དུ་རྡོ་རྗེའི་འཇིམ་པ་བྱུགས་པའི་ཤིང་རྣམས་ཀྱི་རྩེ་གཏད་(༢༥བ)

---

^{[མ་དཔེ་གཟིགས་ན་འདིར་གནོན།]}

པའི་ཁར་ཁྲོ་ཆུའི་ཕ་གུ་བཀྲམ། སྲུབས་རྣམས་མཁར་བའི་ཆུས་བསྡམས་དེའི་སྟེང་དུ་བསོ་བག་དང་ས་བཟང་བ་རིམ་པས་གཏང་ནས་མཚོ་བསུབས་ཏེ། ཆོས་རྒྱལ་དགུང་ལོ་ཉེར་ལྔ་པ་ཆུ་མོ་གླང་གི་ལོ་ལ་འཕྲུལ་སྣང་གཙུག་ལག་ཁང་གི་རྨང་བཏིངས་ནས་བརྩིགས་ཀྱང་། སྔར་ཀོང་ཇོས་བརྩིས་པའི་བཅོས་ཐབས་རྣམས་མ་བྱུང་བར་བརྟེན། ལྷ་འདྲེས་བཤིག་པས་སླར་ཀོང་ཇོའི་རྩིས་རྣམས་ཞིབ་པར་རྒྱལ་པོའི་སྙན་དུ་གསན་ནས་ཤིན་ཏུ་དགྱེས་ཏེ་སྐྱིད་ཤོད་ཉང་བྲན་ཕ་བོང་ཁའི་བྲག་སྟེང་དུ་ས་ཕག་ཁྲོ་ཆུ་ལ་སྦྱར་ནས་མཁར་དགུ་ཐོག་ཡོད་པ་བརྩིགས་ནས་ཕྱོགས་བཞིར་ལྕགས་ཐག་བཏགས། བརྟན་པར་བྱས་ཏེ་སྒྲུབ་པ་མཛད་པས་ཞག་བདུན་ན་རིགས་གསུམ་མགོན་པོ་མཁའ་ལ་བྱོན་ནས། ཁྱོད་ཀྱིས་སྨོན་ལམ་རྒྱ་ཆེན་པོ་ཐོབ་ཅིག །ངེད་ཀྱིས་སྨོན་ལམ་མཐའ་དག་འབད་མེད་དུ་འགྲུབ་པའི་དཔང་པོ་བྱེད་པ་ཡིན་གསུངས་ནས་རྡོ་ལ་ཐིམ་པའི་རང་བྱོན་བལ་པོའི་ལྷ་བཟོ་བས་ཇི་བཞིན་བརྐོས་པ་དིང་སང་ཡང་ལུས་ཅན་ཀུན་གྱི་འདྲེན་བྱེད་དགའ་སྟོན་དུ་གསལ་བར་ཡོད་ཅིང་། དེ་ནས་བཙན་པོས་སྤྲུལ་པ་བཀྱེ་སྟེ། མི་འགྱུར་བའི་གཟེར་གྱི་གཙུག་ལག་ཁང་བཅུ་གཉིས་བརྩིགས། ལྷ་མ་སྲིན་གདུག་པ་ཅན་རྣམས་ཀྱི་དཔུང་རྣམས་བཟློག་པའི་ཕྱིར་དུ་རྒྱལ་པོ་རང་གི་སྐུ་ཚད་དང་མཉམ་པའི་ཐུགས་རྗེ་ཆེན་པོའི་སྐུ་ཞིག་བཞེང་བར་དགོངས་ཏེ། ཙན་དན་སྦྲུལ་གྱི་སྙིང་པོ་བདར་བའི་ཕྱེ་མ་དང་། གནས་ཆེན་བརྒྱད་ཀྱི་ས། ཆུ་བོ་ནཻ་རཉྫ་ནའི་བྱེ་མ་རྣམས་བ་དམར་མོའི་འོ་མས་སྤྲུས་པའི་འཇིམ་པ་རྣམས་སྟ་གོན་བྱས་ཏེ། བལ་པོའི་ལྷ་བཟོ་ཁྲོ་བ་ཞེས་བྱ་བར་བཞེང་བའི་བཀའ་གནང་བར་ནང་པར་སྤྱན་རས་གཟིགས་བཅུ་(༢༦ན)

---

^{[མ་དཔེ་གཟིགས་ན་འདིར་གནོན།]}

གཅིག་ཤལ་གྱི་སྐུར་གྲུབ་ནས་གདའ་བས། རྒྱལ་པོས་ལྷ་བཟོ་བ་ལ་སྐུ་འདི་ཤིན་ཏུ་ལེགས་ཏེ་ཙན་དན་གྱི་སྐུ་དང་མཆོད་སྡོང་ཐུགས་ཀར་བཞུགས་སྒྱུ་ཡིན་པ་ལ་གསུངས་པས། དེ་མ་ཐག་ཞབས་གཡོན་པའི་ཤམ་ཐབས་པུས་མོའི་གོང་དུ་བརྫེས་ཏེ་ཞབས་མཐིལ་ལས་བྱུང་བའི་འོད་ཟེར་གྱིས་དེ་རྣམས་དྲངས་ཏེ་ཐུགས་ཀར་ཐིམ་མོ། །དེ་ནས་ལྷ་ཁང་རྩིག་པར་མངོན་དུ་ཕྱོགས་པ་ན་ལྷོ་ནུབ་གླ་བའི་ཚལ་ན་ལྷ་མ་སྲིན་རྣམས་འཚོགས་ཏེ། འདྲེ་སྒང་པོ་བདུད་མི་ཟན་བྱ་བ་གཅིག་ན་རེ། བུདྡྷ་དྷརྨ་སཾ་གྷ་ཟེར་བ་རྣམས་ལ་སྐྱབས་སུ་འགྲོ་བའི་སྲོག་གཅོད། སྔར་བརྩིགས་པའི་ལྷ་ཁང་བཤིག །ཆོས་བྱེད་ཟེར་བ་ལ་རིམས་ནད་དང་། བོད་ཁམས་སུ་ལོ་ཉེས་གཏོང་བའི་མདུན་མ་བྱེད་པ་རྒྱལ་པོས་གཟིགས་ནས། རང་བྱོན་ཐུགས་རྗེ་ཆེན་པོ་ལ་གསོལ་བ་བཏབ་པས། ཇོ་བོ་བཞད་པའི་ཞལ་ནས་འོད་ཟེར་བྱུང་བ་མེར་གྱུར། ཁྲོས་པའི་ཞལ་ནས་འོད་ཟེར་བྱུང་བ་རྟ་མགྲིན་དང་བདུད་རྩི་འཁྱིལ་བར་གྱུར། ཁྲོ་བོ་མེ་དང་བཅས་པ་སྐར་མདའ་འཕངས་པ་ལྟར་སོང་འདྲེའི་འདུ་ཕུང་བཤིག་ནས། དུས་མཐའི་རླུང་ངང་མའི་ཤུགས་ལ་འགོད་པར་ནུས་པའི་རྫུ་འཕྲུལ་གྱིས་གདུག་པ་ཅན་མཐའ་དག་ཕྱིའི་རྒྱ་མཚོའི་ཕ་རོལ་དུ་བསྐྲད། ཟླ་བ་ཚལ་གྱི་བྲག་ལ་སྣང་བ་མཐའ་ཡས། ཁ་སཪྤ་ཎི། རྟ་མགྲིན་གསུམ་རང་བྱོན་དུ་བྱོན་པ་ཇི་ལྟ་བ་བཞིན་བལ་པོའི་ལྷ་བཟོས་གསལ་བར་བརྐོས་སོ། །དེ་ནས་རྒྱལ་པོས་སྤྲུལ་པ་མཐའ་ཡས་པ་བསྟན་ཏེ་ཆར་ཟིམ་བུ་འབབ་པའི་ན་བུན་གྱི་འཕྲེང་བ་འཁྲིགས་པའི་ངང་དུ་གཙུག་ལག་ཁང་གི་འོག་ཁང་རྣམས་བརྩིགས་ནས། ནང་པར་སྤྲུལ་པ་རྣམས་ཀྱིས་ཤིང་(༢༦བ)

---

^{[མ་དཔེ་གཟིགས་ན་འདིར་གནོན།]}

བཟོ་བྱེད་པའི་སྐབས། ཁྲི་བཙུན་རང་གིས་ཞལ་སྐྱེམ་འདྲེན་དུ་བྱོན་པ་ལ། གཡོག་མོས་སྒོ་སྲུབས་ནས་བལྟས་པས། དར་ཐོད་ཅན་གཞན་ལས་ཆེ་བ་ཞིག་ལ་འདྲེན་གྱི་འདུག་པ་མཐོང་བས། སྤྲུལ་པ་ཁོ་ནར་འདུག་ཅེས་བགད་པས། རྒྱལ་པོ་སྤྱན་ཡེངས་ནས་སྟེའུ་ཁ་ཐལ་བས་སེང་གེ་བརྒྱའི་སྣ་བཅད། གཟོང་ཁ་ཐལ་བས་བུག་པ་བརྒྱ་ཕུབ། སོག་ལེ་ཁ་ཐལ་བས་ཀ་བ་བརྒྱའི་ཟུར་ཉམས་སྐད། དེའི་མཚན་འོག་ཁང་གི་ཐག་ཕུབ། དེ་ནས་ཁྲི་བཙུན་གྱིས་བལ་ཡུལ་ནས་བཟོ་བོ་མཁས་པ་དུ་མ་བོས་ནས། སྟེང་ཁང་རྣམས་བཞེངས་པ་དང་དུས་མཚུངས་པར་ཀོང་ཇོས་རྒྱའི་བཟོ་བོ་མཁས་པ་རྣམས་བཀུག་ནས་ར་མོ་ཆེའི་གཙུག་ལག་ཁང་བཞེངས་ཏེ། ཐུགས་རྗེ་ཆེན་པོ་འཇིག་རྟེན་དབང་ཕྱུག་ཡབ་ཡུམ་གྱི་ཡེ་ཤེས་སྒྱུ་མས་སྤྲུལ་པའི་གཙུག་ལག་ཁང་ཆེན་པོ་རྫོགས་པར་གྲུབ་ནས། ཇི་སྲིད་རྟ་བདུན་གྱི་དབང་པོས་གདུང་བྱེད་ཀྱི་ཡུལ་དེ་སྲིད་སྐྱེ་རྒུ་ཀུན་ལ་ཕན་པ་དང་བདེ་བ་བླ་ན་མེད་པ་འབྱུང་བའི་སྒོ་དམ་པ་མཛད་དོ། །དེ་ནས་རྒྱལ་པོས་འཕྲུལ་སྣང་གི་གཙང་ཁང་བྱང་ངོས་སུ་རང་བྱོན་ཐུགས་རྗེ་ཆེན་པོ་གཙོ་འཁོར་སྤྱན་འདྲེན་པའི་སྟ་གོན་མཛད་པས། མཚན་ཕྱེད་ལ་ཕོ་བྲང་གི་མཐོང་ཁོང་ནས་གཤེགས་ཏེ་གཙང་ཁང་བྱང་མར་ཕེབས། ནང་པར་རྒྱལ་པོ་འཁོར་བཅས་ཀྱིས་ལྷ་རྣམས་སྤྱན་འདྲེན་པའི་བྱ་བ་ལ་ཞུགས་པའི་ཚེ་སྐུ་རྣམས་མི་སྣང་བས་ཐེ་ཚོམ་དུ་གྱུར་པ་ན། སྤྲུལ་པའི་ནེ་ཙོ་ཞིག་གིས་སྔར་གྱི་རྒྱུ་མཚན་རྣམས་བརྗོད་པས་དོན་ལ་གནས་པར་གདའ་བས་རྒྱལ་པོ་དགྱེས་ཏེ། ལྷ་དང་མི་ལས་ཁྱད་པར་དུ་འཕགས་པའི་དངོས་བཤམས་ཡིད་ཀྱིས་སྤྲུལ་པའི་ཆུ་འཛིན་གྱི་འཕྲེང་བ་མཐའ་ཀླས་པར་འཁྲིགས་པ་ལས་(༢༧ན)

---

^{[མ་དཔེ་གཟིགས་ན་འདིར་གནོན།]}

མཆོད་པའི་གྲུ་ཆར་མི་ཟད་པའི་བདག་ཉིད་ཅན་གྱི་ལེགས་བྱས་ཀྱི་མྱུ་གུ་སྐལ་བཟང་སྐྱེ་རྒུའི་དབྱིབ་དུ་སྨིན་པར་མཛད་དོ། །དེ་ནས་ར་སའི་གཙུག་ལག་ཁང་གི་གཙང་ཁང་དབུས་མར་དེ་བཞིན་གཤེགས་པ་མི་འཁྲུགས་པ་གཙོ་འཁོར་དགུ། གཙང་ཁང་གཡས་ལ་སངས་རྒྱས་སྣང་བ་མཐའ་ཡས་གཙོ་འཁོར་དགུ །གཙང་ཁང་གཡོན་དུ་བྱམས་པ་ཆོས་ཀྱི་འཁོར་ལོ་གདན་དྲངས་ཏེ་འཁོར་དུ་སྒྲོལ་མ་བརྒྱད། གཙང་ཁང་ལྷོ་ན་ཇོ་བོ་མི་བསྐྱོད་རྡོ་རྗེ་གདན་དྲངས་པའི་འཁོར་དུ་ཁྲོ་བོ་དང་གནོད་སྦྱིན་སྟོབས་ལྡན་གྱིས་བསྐོར་བ། གཙང་ཁང་བྱང་དུ་རང་བྱོན་ཐུགས་རྗེ་ཆེན་པོ་གཙོ་འཁོར་གསུམ་གྱི་སྟེང་དུ་ཡི་གེ་དྲུག་པ། དོན་ཞགས། ཁ་སཪྤ་ཎི། འཇིག་རྟེན་དབང་ཕྱུག །རྟ་མགྲིན། བདུད་རྩིི་འཁྱིལ་བ་རྣམས་བཞེངས། ཀླུ་སྦྲུལ་མགོ་ཉི་ཤུ། དགའ་བོ། འཇོག་པོ། གནོད་སྦྱིན་ནཱ་ག་ཀུ་བེ་ར། དྲི་ཟ་ཟུར་ཕུད་ལྔ་པ། དཔལ་ལྷ་མོ་རྣམས་སོ་སོས་བསྐུལ་བ་བཞིན་བཞེངས། གཞན་ཡང་བོན་དང་སྒྲུང་གི་གཏམ་རྒྱུད་ལས་བྱུང་བའི་བཀོད་པ་མཐའ་ཡས་པ་ཡང་བྲི་བར་མཛད། ར་མོ་ཆེར་ཤཱཀྱ་མུ་ནི་གཙོ་འཁོར་རྣམས་བཞུགས་སུ་གསོལ་ཏེ། ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་རྨད་དུ་བྱུང་བའི་ཞིང་ཁམས་དམ་པར་བདེ་བར་གཤེགས་པ་ཞི་བ་དང་ཁྲོ་བོའི་ལྷ་ཚོགས་རྣམས་ཀྱི་དཀྱིལ་འཁོར་གྱི་འཁོར་ལོ་ཀུན་གསལ་བུ་མོའི་འགྲམ་པར་རླུང་གི་རྒྱལ་མཚན་གྱིས་འཁྱུད་པ་ལྟར་རྣམ་པར་བཀྲ་ཤིང་། མཛེས་སྡུག་རྣམ་བརྗིད་ཀྱི་རྣམ་འགྱུར་གྲངས་མེད་པ་འདྲེན་བྱེད་ཀྱི་ཡུལ་དུ་ཆོག་མི་ཤེས་པ་སྟོན་པར་མཛད་པའི་མཆོག་གསུམ་དམ་པའི་སྐུ་བརྙན་གྱིས་གང་བའི་ར་ས་འཕྲུལ་གྱི་གཙུག་(༢༧བ)

---

^{[མ་དཔེ་གཟིགས་ན་འདིར་གནོན།]}

ལག་ཁང་ཟུང་ལ་རབ་ཏུ་གནས་པའི་དགའ་སྟོན་གྱིས་མཆོད་པའི་ཡོ་བྱད་བཀོད་པས་ཁྱད་པར་དུ་འཕགས་པ་བཤམས་ནས། ཆོས་རྒྱལ་ཡབ་ཡུམ་བློན་འབངས་རྣམས་ཀྱིས་ཕྱག་ཏུ་མེ་ཏོག་གི་འཕྲེང་བ་བཟུང་བ་དང་བཅས་བདེན་ཚིག་གི་སྨོན་ལམ་རྒྱ་ཆེན་པོའི་རྟ་བདུན་གྱིས་དྲངས་པས། བདེ་སྟོང་གཉིས་མེད་ཟུང་དུ་འཇུག་པའི་འགྱུར་བ་མེད་པ་མཆོག་གི་དབྱིངས་ལས། རང་སྣང་ལྷུན་གྱིས་གྲུབ་པའི་གཞལ་མེད་ཁང་ཆེན་པོ་ནས། བདེ་བར་གཤེགས་པ་ཞི་ཁྲོ་རབ་འབྱམས་ཀྱི་ཉིན་བྱེད་དབང་པོ་འགོག་པ་མེད་པར་རྒྱུ་བས། མཐའ་འཁོབ་བསིལ་ལྡན་གྱི་ས་གཞི་ཀུན་ལ། རྒྱལ་བའི་བསྟན་པ་པདྨ་དཀར་པོའི་འདབ་བརྒྱ་རྣམ་པར་རྒོད་པས་བོད་འབངས་ར་ཡིག་གཉིས་པའི་ཚོགས་ཀུན་དགའི་གར་དང་སྙན་པའི་དབྱངས་ཀྱི་ང་རོ་སྲིད་རྩེའི་བར་དུ་སྒྲོགས་པར་གྱུར་ཏོ། །སྨྲས་པ། མ་སྨད་ལེགས་བྱས་མངལ་གྱིས་ལྕི་བའི་ཁུར། །ངོ་མཚར་སྙིང་པོ་ཡེ་ཤེས་སྒྱུ་མའི་གར། །ཕན་བདེ་ཟླ་ཤེལ་གསར་པའི་ག་བུར་ཐིགས། །འབུམ་ཕྲག་འཛག་པའི་རྣམ་པར་དཀར་བའི་རྒྱུན། །གཅིག་ཏུ་བསྡོམས་པའི་ཀེ་ལ་ཤ་ཡི་ཆུས། །སྲིད་འདིར་འཁོར་བའི་མ་རིག་དྲི་མའི་ཚོགས། །དྲུངས་ནས་བྱུང་བྱེད་ལྷ་ལྡན་ཡིད་བཞིན་དབང་། །བདེ་ལེགས་སྣང་བའི་གཟི་བྱིན་འོད་དུ་འབར། །དེ་ཕྱིར་རྣ་བ་བརྒྱད་པ་པད་དཀར་མིག །མགྲིན་སྔོན་མིག་སྟོང་ཅན་སོགས་འཆི་མེད་རྣམས། །སྙིམ་པར་རྨད་བྱུང་མཆོད་པའི་ཚོགས་རྣམས་ཀུན། །ཐོགས་ཏེ་ལྷ་ལམ་ཁྱོན་ཀུན་དོག་པོར་འགོད། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ནས་རྒྱ་བཟའ་དང་བལ་བཟའ་(༢༨ན)

---

^{[མ་དཔེ་གཟིགས་ན་འདིར་གནོན།]}

གཉིས་ལ་སྲས་མ་བྱུང་བར། རུ་ཡོང་བཟའ་དང་། ཞང་ཞུང་བཟའ། མོང་བཟའ་ཁྲི་ལྕམ་རྣམས་ཁབ་ཏུ་བཞེས་པར། སྔོན་མ་གཉིས་ལ་སྲས་མ་བྱུང་ཡང་། བྲག་ལྷ་དང་། ཐིམ་བུ་ལྐོག་གི་ལྷ་ཁང་བཞེངས། མོང་བཟའ་ལ་སྲས་གུང་རི་གུང་བཙན་འཁྲུངས། ཡུམ་སྲས་གཉིས་ཀྱི་རྟེན་སྐལ་དུ་འཕགས་མ་སྒྲོམ་མའི་དབྱིབས་ཅན་གྱི་རི། དཔལ་གྱི་ཡེར་བའི་ལྷ་ཁང་བཞེངས། ལོ་བཅུ་གསུམ་ལོན་ཚེ་རྒྱལ་སར་དབང་བསྐུར། བཙུན་མོ་འ་ཞ་བཟའ་ཁོ་འཇོ་མོང་རྗེ་ཁྲི་དཀར་ཏི་ཤགས་བྱ་བ་ཁབ་ཏུ་བཞེས་པས་སྲས་མང་སྲོང་མང་བཙན་འཁྲུངས། གུང་རི་གུང་བཙན་དགུང་ལོ་བཅོ་བརྒྱད་ལོན་ནས་གཤེགས། བང་སོ་དོན་མཁར་མདར་བརྩིགས། སླར་ཡབ་རྒྱལ་པོས་རྒྱལ་སྲིད་བཟུང་སྟེ། མི་བསྲུན་པའི་སྐྱེ་བོ་རྣམས་ཡང་དག་པའི་ཁྲིམས་ལ་འཇུག་པའི་སླད་དུ། མི་འགའ་ཞིག་གི་མིག་བཏོན་པ་དང་། མགོ་ལག་བྲེགས་པ་སོགས་ལྕགས་རིའི་ཁ་ན་རྒྱུན་མི་ཆད་པར་སྤྲུལ་པའི་དུས། ཐུགས་རྗེ་ཆེན་པོ་བོད་ཀྱི་རྒྱལ་པོར་ཡོད་པའི་ལུང་བསྟན་བྱུང་བ་ལ་བརྟེན་ནས། ཆེད་དུ་འོངས་པའི་ལི་ཡུལ་གྱི་དགེ་ཚུལ་གྱིས། ཁྲིམས་བཅད་པའི་མགོ་ལག་མཐོང་བས། ལོག་ལྟ་སྐྱེས་པ་བསལ་ཕྱིར་ཨ་མི་དེ་ཝ་བསྟན་ཅིང་དམ་པའི་ཆོས་ཀྱིས་ཚིམ་པར་མཛད་ནས། སྐད་ཅིག་ལ་ལི་ཡུལ་དུ་སླེབ་པའི་རྫུ་འཕྲུལ་མཛད་པ་དང་། ཁྲ་འབྲུག་གི་མཆོད་རྟེན་རྩེ་ལྔའི་དྲུང་ན་རབ་བྱུང་གི་རྟགས་ཅན་ཧྲུལ་པོ་ཞིག་ལ་ཕྱག་མཛད་ནས། ང་བོད་ཀྱི་རྒྱལ་པོ་ཞིག་གིས་བསྟན་པ་ལ་བསམས་ཏེ་ཁྱོད་ལ་ཕྱག་བཙལ་བ་ངོ་མཚར་རམ་གསུངས་པས། རབ་བྱུང་དེས་མཆོད་རྟེན་སོར་མོའི་རྩེ་ལ་བླངས་ཏེ་འདི་ངོ་(༢༨བ)

---

^{[མ་དཔེ་གཟིགས་ན་འདིར་གནོན།]}

མཚར་རམ་ཟེར་བར། ལན་དུ་རྒྱལ་པོས་ཨ་མི་དེ་ཝ་བསྟན་པས། བཙུན་པས་གྲི་གུག་གིས་བྲང་ཁ་ཕྱེ་ནས་སངས་རྒྱས་སུམ་ཅུ་རྩ་ལྔ་བསྟན་པ་སོགས་དཔག་པར་དཀའ་བའི་རྫུ་འཕྲུལ་མཛད་ཅིང་། རྒྱལ་པོས་ཀྱང་ཀ་བ་ཤིང་ལོ་ཅན་ན་ཆོས་གཏེར། སེང་གེ་ལག་ཟན་དང་སྦྲུལ་མགོ་ཅན་ལ་དྲག་སྔགས། བུམ་བཙན་ལ་རིན་པོ་ཆེའི་གཏེར། ཀླུ་ཁང་ན་ཀླུ་གཏེར་དང་རིན་པོ་ཆེ་རཏྣ་དེ་ཝ། དཀྱིལ་འཁོར་འོག་ལ་རིན་པོ་ཆེ་སྟག་ཤ་ཆུ་དར་གྱིས་བསྒྲིལ། སྦྲུལ་ལྤགས་ཀྱིས་གཏུམས་པ། ཐེམ་པའི་ཉེ་སྐོར་ན་བཻ་ཌཱུརྱའི་ལྷུང་བཟེད་རྣམས་སྦས། སྐལ་ལྡན་རྣམས་ལ་ཐུགས་རྗེ་ཆེན་པོ། རྟ་མགྲིན། གཤིན་རྗེའི་གཤེད་སོགས་ཡི་དམ་གྱི་ལྷ་མང་པོའི་ཟབ་ཆོས་དང་། མ་འོངས་ལུང་བསྟན། རྗེ་འབངས་ཡོངས་ལ་ཞལ་གདམས་མཐའ་ཡས་པ་སྩལ་བ་ཕལ་ཆེར་ཡི་གེར་བཏབ་ནས། རྒྱལ་པོའི་བཀའ་བཞིན་བློན་པོ་རྣམས་ཀྱིས་གཏེར་དུ་དཀོར་མཛོད་དང་རྟ་མགྲིན་གྱི་ཞབས་འོག་ཏུ་སྦས་སོ། །དེ་ནས་ཐུན་མོང་ཞེས་པ་ལྕགས་ཕོ་ཁྱིའི་ལོ་ལ་ལས་ཅན་འགའ་ཞིག་གི་སྣང་ངོར་ཆོས་རྒྱལ་ཡབ་ཡུམ་གསུམ་གཙང་ཁང་བྱང་མར་བྱོན་ནས་གསུམ་ག་འོད་ཀྱི་གོང་བུར་བྱས་ཏེ་ཐུགས་རྗེ་ཆེན་པོའི་ཐུགས་ཀར་ཐིམ་པར། མོང་བཟའ་ཁྲི་ལྕམ་གྱིས། རྒྱལ་པོ་ཡབ་ཡུམ་གསུམ་དེ་ལྟར་མཛད་ན། ངེད་བོད་འབངས་རྣམས་ཇི་ལྟར་བྱེད་ཅེས་སྨྲེ་སྔགས་བཏོན་པས། ཐུགས་རྗེ་ཆེན་པོའི་ཐུགས་ཀ་ནས་རྒྱལ་པོ་དང་། ནུ་མ་གཉིས་ནས་ཁྲི་བཙུན་དང་ཀོང་ཇོས་དབུ་ཉུག་མཛད་དེ་ཞལ་གདམས་འགའ་ཞིག་གསུངས་སོ། །དེ་ནས་ད་ལྟའི་རབ་བྱུང་བཅུ་གཅིག་པའི་ཆུ་ལུག་འདི་ཡན་ལ་ལོ་དགུ་བརྒྱ་དང་སུམ་ཅུ་རྩ་གཉིས་སོང་། དེ་ནས་(༢༩ན)

---

^{[མ་དཔེ་གཟིགས་ན་འདིར་གནོན།]}

ཐུགས་རྗེ་ཆེན་པོ་རང་བྱོན་ལྔ་ལྡན་གྱི་ཐུགས་ཀ་ལས་འོད་ཟེར་སྟོན་ཀའི་ཟླ་ལྟར་དཀར་བ་ཤར་ནས། གཙུག་ལག་ཁང་གི་ཕྱི་ནང་ཐམས་ཅད་གསལ་བར་བྱས་པས་བསྐུལ་ཏེ་རྟ་མགྲིན། སྒྲོལ་མ། སྨན་བླ། བྱམས་པ་ཆོས་རྗེ། ཇོ་བོ་མི་བསྐྱོད་པ། རྨེ་བ་བརྩེགས་པ། འོད་དཔག་མེད། མར་མེ་མཛད་རྣམས་ཀྱི་ཐུགས་ཀ་ལས་འོད་ཟེར་སྣ་ཚོགས་པ་འཕྲོས་ཏེ། འཕྲུལ་སྣང་གི་བར་མཚམས་མེད་པར་ཁྱབ་པས་འོད་ཟེར་འཕྲོས་པའི་ལྷ་བརྒྱད་དུ་གྲགས་སོ། །དུས་དེར་བློན་པོ་སྣ་ཆེན་པོ་དང་ཁྲི་ལྕམ་གཉིས་མ་གཏོགས་མེད་པས། སླར་གཞན་རྣམས་འཕྲུལ་སྣང་དུ་འཚོགས་ཏེ་ཐེ་ཚོམ་དུ་གྱུར་པ་ན། སྔར་གྱི་བྱུང་ཚུལ་རྣམས་བཤད་པ་དང་། ཐོན་མིས་ལི་ཡུལ་གྱི་དགེ་ཚུལ་དང་། ཁྲ་འབྲུག་གི་སྤྲང་བན་ལ་རྒྱལ་པོས་སྤྲུལ་པ་བསྟན་པའི་ལོ་རྒྱུས་བཤད་པས་ངེས་ཤེས་སུ་གྱུར། འོན་ཀྱང་འབངས་བྱིངས་ཀྱི་སྣང་ངོར་བྲན་མོ་ཞིག་རིམས་ནད་ཀྱིས་བཏབ་པ་བལ་མོ་བཟའ་ལ་འགོས། དེ་ལས་ཆོས་རྒྱལ་དང་ཀོང་ཇོ་གཉིས་ལ་ཡང་མཆེད་དེ། ཡབ་ཡུམ་གསུམ་ཀ་འཕན་ཡུལ་ཟལ་མོའི་སྒང་དུ་གཤེགས་པའི་པུར་ཡར་ཀླུང་འཕྱོང་རྒྱས་སུ་སྤྱན་དྲངས་ཏེ་བང་སོ་བརྩིགས་སོ། །ཆོས་ཀྱི་རྒྱལ་པོ་འདི་ཉིད་ཀྱི་རིང་ལ་རྒྱལ་བའི་སྐུ་གསུང་ཐུགས་ཀྱི་རྟེན་དང་བརྟེན་པའི་གཙུག་ལག་ཁང་བཞེང་བ། དམ་པའི་ཆོས་བསྒྱུར་བ་དང་། ཐོས་བསམ་སྒོམ་གསུམ་སོགས་ཀྱི་སྲོལ་ལེགས་པར་བཏོད་པས། རང་ཅག་གངས་ཅན་པ་རྣམས་ཀྱིས་ནི་འདི་ཉིད་ཀྱི་བཀའ་དྲིན་འཛིན་མའི་ཁྱོན་མཐའ་དག་ཡིད་བཞིན་གྱི་ནོར་བུ་རིན་པོ་ཆེས་བཀང་ཡང་འཁོར་བའི་ཐབས་རྙེད་པ་མ་ཡིན་ནོ། །ཆོས་རྗེ་བསོད་ནམས་(༢༩བ)

---

^{[མ་དཔེ་གཟིགས་ན་འདིར་གནོན།]}

གྲགས་པས། རྒྱལ་པོ་འདི་ཉིད་ཀྱི་རིང་ལ་བསྟན་པའི་དབུ་བརྙེས་པར་འཆད་པ་ནི་དེབ་ཐེར་ཡིག་ཚང་སོགས་ལ་ཞིབ་ཆ་དམན་ཞིང་། རྟོག་གེའི་རིག་པ་ཙམ་གྱིས་རང་བཟོ་ལ་ཐལ་བའི་སྐྱོན་ཡིན་ནོ། །དེ་ཡང་རྒྱལ་པོ་བཀའ་ཆེམས་དང་ལུང་བསྟན་མངས་པའི་ནང་དུ། བསྟན་པ་རིན་པོ་ཆེ་འཛིན་པ་དང་། ཁྱད་པར་འཕྲུལ་སྣང་གི་གཙུག་ལག་ཁང་འདི་ལ་ཕུད་དུད་མཛད་པའི་དམ་པ་རྣམས་ཀྱི་ལུང་བསྟན་མཐའ་ཡས་པ་ཡོད་པའི་ཁྲོད་ནས། དགེ་སློང་བྱང་སེམས་ཤར་ཕྱོགས་སྐུ་འཁྲུངས་པའི། །གསང་སྔགས་འཆང་ཞིང་རྣལ་འབྱོར་ཆེན་པོ་ནི། །སྙིང་པོའི་མཐའ་ཅན་སྐྱེས་ཆེན་དམ་པས་ནི། །ཞལ་ཡང་བསྒྱུར་ཞིག་རྙེད་བཀུར་དམ་པ་མཛད། །ཅེས་པའི་དོན་ཤར་ཕྱོགས་ཙོང་ཁའི་ཡུལ་དུ་སྐུ་འཁྲུངས་ཤིང་འཇམ་དཔལ་སྙིང་པོའི་མཚན་ཅན་གྱིས་ཤཱཀྱ་མུ་ནི་སྤྲུལ་སྐུ་ལོངས་སྐུར་བསྒྱུར་ཞིང་། ཆོ་འཕྲུལ་གྱི་མཆོད་པ་རྒྱ་ཆེན་པོ་མཛད་ཚུལ་གྱི་རྒྱལ་བ་ཙོང་ཁ་པ་ཆེན་པོའི་ལུང་བསྟན་མངོན་སུམ་གྱི་ཚད་མས་གྲུབ་པ་ལ། དཔའ་བོ་གཙུག་ལག་འཕྲེང་བས། བྱང་ཆུབ་སེམས་དཔའ་ཤར་ལྷོར་སྐུ་བལྟམས་པ། །ཞེས་བཅོས་བྱས་ནས། དྭགས་པོ་སྒོམ་ཚུལ་གྱི་ལུང་བསྟན་དུ་སྨྲ་བ་ནི། རང་ཉིད་ཆོས་བརྒྱད་ཀྱི་ཆང་གིས་བག་མེད་དུ་མྱོས་ཤིང་། བླང་དོར་ལ་བལྟ་བའི་མིག་ཕྱོགས་ལྷུང་དྲག་པོའི་རབ་རིབ་ཀྱིས་ལྡོངས་པས། རང་དང་རྗེས་སུ་ཞུགས་པ་མཐའ་དག་གཏམ་ཡ་མཚན་ཅན་དུ་འདོད་ཀྱང་། དོན་དུ་མཁས་པའི་དབང་པོ་འཇམ་མགོན་ས་སྐྱ་པཎྜི་ཏའི་གསུང་ལས། བློ་ངན་ལས་ལ་སྤྱོད་པ་ལ། །རང་གི་འབད་པས་ཐོབ་པར་སེམས། ཁྱི་རྒན་ཡ་རྐན་ཕུག་པའི་ཁྲག །རུས་པའི་བཅུད་དུ་བསྒོམས་ནས་འཆའ། །(༣༠ན)

---

^{[མ་དཔེ་གཟིགས་ན་འདིར་གནོན།]}

ཞེས་པ་ལྟར་ཤེས་ལྡན་རྣམས་ཀྱིས་བརྟགས་ཚེ་བཞད་གད་ཀྱི་གནས་ཏེ། སྒམ་པོ་ཚུལ་ཁྲིམས་སྙིང་པོ་གཉལ་བོད་སྙིར་འཁྲུངས་པས། ལྷོ་རྒྱུད་གཉལ་ཞེས་ཀུན་ལ་གྲགས་ཤིང་། མཁས་པ་ཀུན་གྱིས་གླེང་བའི་ལུང་བསྟན་ལ་བཟོ་བཅོས་བྱེད་པ་ནི་བྱེད་པ་པོ་རང་ཉིད་བླུན་པོར་དངོས་སུ་བསྟན་པའི་ཕྱིར་ན་ཚིག་གཞན་རྣམས་ལ་ལེགས་ཉེས་ཀྱི་རྟོག་དཔྱོད་བྱ་མ་དགོས་སོ། །གཞན་ཡང་ཆོས་ཀྱི་རྒྱལ་པོ་ཐུགས་རྗེ་ཆེན་པོའི་ཐུགས་ཀར་ཐིམ་པའི་སྐོར་དེར་གཏམ་རྒྱུད་སྔོན་མ་འགའ་ཞིག་གི་ལུགས་བསྐྱར་བ་ལས། རང་ལུགས་དང་གཞན་ལུགས་ཀྱི་དབྱེ་བ་ཕྱེད་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་དཔྱད་པ་མེད་པའི་དགོས་མེད་ཀྱི་ཚིག་ཚོགས་སོགས་ཀྱིས་མཚོན་པ་ལ་རྨོངས་པ་རྣམས་ཡང་དག་པར་འདོད་སྲིད་ནའང་། བློ་ལྡན་དག་ཅིའི་ཕྱིར་རྗེས་སུ་འཇུག་སྟེ། མི་གཙང་བའི་ངན་སྐྱུགས་ཀྱི་ཕུང་པོ་ལ་ཁྱི་ཕག་སོགས་ཀྱིས་ལོངས་སྤྱོད་ནའང་། མིའི་འགྲོ་བ་སུ་ཞིག་གིས་ཟ་བར་མི་བྱེད་པ་བཞིན་ནོ། །དེ་ནས་དབོན་སྲས་མང་སྲོང་མང་བཙན་གྱིས་རྒྱལ་སྲིད་བཟུང་། དུས་དེར་རྒྱ་རྣམས་ཀྱིས་སྤྲུལ་པའི་རྒྱལ་པོ་མ་བཞུགས་པར་ཤེས་ནས་དམག་འོངས་པ་འཕྲུལ་སྣང་དུ་སླེབ་པ་དང་། རྨེ་བརྩེགས་ཀྱི་སྐུ་ལས་སྤྲུལ་པའི་དམག་བྱུང་བས་ཕྱིར་བྲོས། དེའི་ལན་དུ་མགར་གྱིས་བོད་དམག་འབུམ་ཚོ་ཁྲིད་ནས་རྒྱ་རྣམས་བཅོམ། མགར་ཡང་དམག་ཐོག་ཏུ་གྲོངས། དེ་ནས་སླར་རྒྱ་དམག་གི་སྐད་ཆེན་པོ་བྱུང་བས་ཇོ་བོ་ལྷོ་སྒོ་མེ་ལོང་ཅན་དུ་བཅུག །སྒོ་ལ་ཞལ་བ་བྱས་ནས་འཇམ་དབྱངས་ཀྱི་སྐུ་བྲིས། མི་རིང་བར་རྒྱ་དམག་རྣམས་ལྷགས་ཏེ་པོ་ཏ་ལའི་ཕོ་བྲང་མེ་ལ་བསྲེགས། ཇོ་བོ་ཤཱཀྱ་མུ་ནི་འཁྱེར་(༣༠བ)

---

^{[མ་དཔེ་གཟིགས་ན་འདིར་གནོན།]}

མ་ཐུབ་ཀྱང་མི་བསྐྱོད་རྡོ་རྗེ་སྔ་དྲོ་གཅིག་གི་སར་གདན་དྲངས་སོ། །མང་སྲོང་དགུང་ལོ་ཉི་ཤུ་རྩ་བདུན་ལ་གཙང་གི་བར་སྣང་སྒང་དུ་གཤེགས། བང་སོ་གུང་སྲོང་གི་གཡོན་དུ་བརྩིགས། རྗེ་དེ་ལ་འབྲོ་བཟའ་ཁྲ་བོ་ཁྲི་མ་ལོད་ཁབ་ཏུ་བཞེས་པའི་སྲས་འདུས་སྲོང་མང་པོ་རྗེ་རླུང་ནམ་འཕྲུལ་གྱི་རྒྱལ་པོ་ཡབ་འདས་ནས་ཞག་འགའ་ཞིག་སོང་བ་དང་འཁྲུངས། འདིའི་རིང་ལ་རྔོག་རིང་ལ་ནག་པོས་གླང་པོ་ཆེའི་ཕྲུ་གུ་ཐེག་པ། རྔོག་གླིང་གམ་གྱིས་གཡག་གྲུས་པོ་ཆེ་ཐེག །གནོན་རྒྱལ་མཚན་གྱིས་མདའ་སྟེའུ་ཁ་མས་བྱ་ཁྲིའི་རྐེད་པ་གཅད། དབས་རྒོད་ལྡོངས་བཙན་གྱིས་མིག་རྒྱང་གསུམ་ལ་མདའ་རྒྱང་གིས་སླེབ། འགོས་གཡག་ཆུང་གིས་ཤ་བའི་རླིད་བུ་བྱེ་མས་བཀང་བ་ཀླད་ལ་བསྐོར། ཅོག་རོ་འབྲོང་ཤོར་གྱིས་འབྲོང་འཐུར་དུ་བརྒྱུགས་པ་གྱེན་ལ་འཐེན། གནོན་ཁྲི་བཙུན་གཡུ་སྦྱིན་གྱིས་རྟ་གཡང་ལ་མཆོངས་པ་གྱེན་ལ་འཐེན་ནུས་པ་སྟེ། རྩལ་པོ་ཆེ་བདུན་བྱུང་། བང་སོ་མང་སྲོང་གཡོན་དུ་བརྩིགས། རྗེ་དེ་དང་མཆིམས་བཟའ་བཙན་མོ་རྟོག་གེའི་སྲས་ཁྲི་ལྡེ་གཙུག་བརྟན་མེས་ཨག་ཚོམས་ཕོ་བྲང་ལྡན་མཁར་དུ་འཁྲུངས། ཆོས་རྒྱལ་སྲོང་བཙན་སྒམ་པོས། ད་སྟེ་གདུང་རབས་ལྔ་ན་ངའི་དབོན་སྲས་རྒྱལ་པོ་ལྡེ་ཞེས་བྱ་བའི་རིང་ལ་དམ་པའི་ཆོས་འབྱུང་བའི་ལུང་བསྟན་ཟངས་ཀྱི་བྱང་བུ་ལ་བྲིས་པ་བརྙེད་པས། རང་ཉིད་དུ་གོ་སྟེ། གངས་ཏི་སེ་ནས་པཎྜི་ཏ་སངས་རྒྱས་གསང་བ་དང་སངས་རྒྱས་ཞི་བ་གཉིས་གདན་དྲངས་ཀྱང་མ་འདྲོངས། འོན་ཀྱང་ཕོ་ཉ་བས་ཐེག་པ་ཆེན་པོའི་མདོ་སྡེ་ལྔ་བློ་ལ་བཟུང་ནས་འོངས་པས། གླེགས་བམ་ལྔ་པོ་བཞེངས་ཏེ། བཞུགས་ཁང་དུ་བྲག་དམར་མགྲིན་བཟང་། བྲག་དམར་ཀེ་རུ། གསང་མཁར་(༣༡ན)

---

^{[མ་དཔེ་གཟིགས་ན་འདིར་གནོན།]}

བྲག །མཆིམ་པོ་སྣ་རལ། མ་ས་གོང་གི་ལྷ་ཁང་དང་ལྔ་བཞེངས། རྒྱ་ཡུལ་ཀིང་ཤི་ནས་གསེར་འོད་དམ་པ་དང་འདུལ་བ་ལས་རྣམ་པར་འབྱེད་པ་དང་། སྨན་དཔྱད་ཀྱི་རིགས་འགའ་ཞིག་བསྒྱུར། ལི་ཡུལ་ནས་རབ་ཏུ་བྱུང་བ་སྤྱན་དྲངས་ནས་གུས་པར་མཛད་ཀྱང་བོད་ཀྱི་མིས་རབ་ཏུ་བྱུང་བ་ནི་མ་བྱུང་། ཕྱིང་བ་སྟག་རྩེ་ནས་ནོར་ཁྱད་དུ་འཕགས་པ་གཡུ་ཞིག་རྙེད། འཇང་མོ་ཁྲི་བཙུན་ཁབ་ཏུ་བཞེས་པར་སྲས་མཇང་ཚ་ལྷ་དབོན་ཞེས་པ་ལྟ་བས་ཆོག་མི་ཤེས་པའི་མཛེས་སྡུག་ཅན་ཞིག་འཁྲུངས་པར་བོད་ན་དེའི་བཙུན་མོར་འོས་པའི་ན་ཆུང་མ་རྙེད་པས། རྒྱ་རྗེ་ཡག་འཇམ་ལི་ཁྲི་བཞེར་ལང་མའི་སྲས་མོ་ཀོང་ཇོ་བསུ་བའི་སྐྱེས་ཀྱི་དངོས་པོ་དང་ཕོ་ཉ་མངགས་པར་ལེགས་ཉེས་སྟོན་པའི་མེ་ལོང་ཞིག་ཡོད་པར་བལྟས་པས་ཡར་ཀླུངས་ཀྱི་ཡུལ་དགེ་བཅུའི་ཡོན་ཏན་ཡོངས་སུ་ཚང་ཞིང་། རྒྱལ་བུ་དེ་ལྷའི་ཁྱེའུ་ལྟར་མཛེས་པ་ཞིག་ཏུ་མཐོང་ནས་བྱོན་ནའང་། གཉགས་ཀྱི་བུ་མོ་མ་བླངས་པའི་འཁོན་གྱིས་གཉགས་ཁྲི་བཟང་ཡང་འདོན་གྱིས་རྒྱལ་བུ་བཀྲོངས། བང་སོ་མུ་ར་རི་ལ་བརྩིགས། དུས་དེར་ཀོང་ཇོས་མེ་ལོང་ལ་བལྟས་པས། རྒྱལ་བུ་བཞིན་མི་སྡུག་པ་ཞིག་ཏུ་མཐོང་བ་བཞིན་བོད་ནས་གཏམ་ངན་པ་སྐྱེལ་མི་བྱུང་ནའང་བྱོན། ཇོ་བོ་རྒྱལ་རབས་གསུམ་དུ་མུན་པར་བཞུགས་པ་ལྷོ་སྒོ་མེ་ལོང་ཅན་ནས་བཏོན་ཏེ་གཙང་ཁང་དབུས་མར་བཞུགས་སུ་གསོལ་ནས་མཆོད་པ་བཙུགས། མཆིམས་ཕུར་མེས་ཨག་ཚོམས་ཀྱི་བཙུན་མོར་མངའ་གསོལ་ལོ། །སྨྲས་པ། ལེགས་བྱས་ས་འཛིན་དབང་པོས་བསྲུབས་པའི་འཕགས་མཆོག་ཐུགས་རྗེའི་ཆུ་གཏེར་ལས། །མངོན་པར་འཐོན་པའི་སྲོང་བཙན་ཉིན་བྱེད་(༣༢བ)
ནུབ་ཕྱོགས་ཆུ་ལྷའི་ལྟོར་གཟིམས་ཀྱང་། །སླར་ཡང་ཁྲི་སྲོང་བསིལ་སྦྱིན་མཁན་པོ་དབང་ཕྱོགས་རི་བོའི་སྤོར་སོན་པས། །ཕན་དང་བདེ་བའི་ཀུན་ད་བཞད་དོ་ལུས་ཅན་གཉིས་སྐྱེས་གར་བྱོས་ཀྱེ། །བགྲོད་དགའི་ཡུལ་ཀུན་དལ་བ་བརྒྱ་ཕྲག་གིས། །དཱ་རི་དྲི་བཞིན་མྱུལ་བར་མ་ཕྱིན་ཀྱང་། །བརྟན་གཡོའི་ཆོས་ཀྱི་གནས་ཚུལ་ཀུན་འཆར་བ། །སྐྱེས་ཐོབ་ཤེས་རབ་མེ་ལོང་གསར་པའི་དྲིན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

ཆོས་རྒྱལ་ཁྲི་སྲོང་ལྡེའུ་བཙན་ནས་གླང་དར་བར་གྱི་རྒྱལ་རབས་བརྗོད་པ།

---

^{[མ་དཔེ་གཟིགས་ན་འདིར་གནོན།]}

ཆོས་རྒྱལ་ཁྲི་སྲོང་ལྡེའུ་བཙན་ནས་གླང་དར་བར་གྱི་རྒྱལ་རབས་བརྗོད་པ།དེ་ཡང་མགོན་པོ་ཟུར་ཕུད་ལྔ་པའི་འཕྲིན་ལས་སུ་ཝ་ཎའི་འཁོར་ལོའི་ལྟ་བ་ལྷུན་གྱིས་གྲུབ་པའི་མཆོད་སྡོང་ཆེན་པོ་བོད་ཀྱི་རྒྱལ་པོའི་རིགས་ཀྱི་སྐྱེས་བུ་མིའི་ཁྱུ་མཆོག་ཏུ་འཕགས་པར་སྤྲུལ་ནས་ལུགས་ཟུང་གི་རྩིབས་སྟོང་ཐོགས་པ་མེད་པར་འཁོར་བའི་ཆེད་དུ་ཡབ་ཁྲི་ལྡེ་གཙུག་བརྟན་དང་། ཡུམ་ཀོང་ཇོ་གཉིས་ཀྱི་སྲས་སུ་སྣ་ཚོགས་ཞེས་པ་ཆུ་རྟའི་ལོ་ཕོ་བྲང་བྲག་དམར་དུ་རྒྱལ་པོ་ཁྲི་སྲོང་ལྡེའུ་བཙན་སྐུ་བལྟམས། དུས་དེར་རྒྱལ་པོའི་བཙུན་མོ་རྣམ་སྣང་བཟས་ཀྱང་རྒྱལ་པོའི་སྲས་ཞིག་མངལ་དུ་ཆགས་པ་སྐད་ཟེར་ནས་ཀོང་ཇོའི་སྲས་ཕྲོགས་ཏེ་ཁོང་རང་ལས་སྐྱེས་པ་ལྟར་བྱས་པས། རྗེ་བློན་རྣམས་ཐེ་ཚོམ་དུ་གྱུར་པས་ཞལ་ལྕེ་གཅོད་པའི་སྤོབས་པ་མ་བྱུང་ཞིང་། ཀོང་ཇོ་ཡིད་མ་རངས་པར་བོད་ཀྱི་ས་དཔྱད་བཟང་བ་འགའ་ཞིག་ཉམས་སུ་བཅུག །མི་རིང་བར་སྲས་ཞབས་འཛུགས་ཀྱི་དགའ་སྟོན་ལ་བཙུན་མོ་གཉིས་ཀྱི་ཕ་མིང་དང་བློན་འབངས་རྣམས་འཚོགས་པའི་དབུས་སུ། རྒྱལ་པོས་འབྲས་ཆང་གིས་བཀང་པའི་གསེར་གྱི་ཕོར་པ་སྲས་ཀྱི་ལག་ཏུ་གཏད། སྣོད་གསེར་སྐྱོགས་ཆང་གིས་གང་བ་འདི། །བུ་ཁྱོད་རང་གི་ཞང་པོའི་ལག་ཏུ་ཐོད། །མ་གང་(༣༢ན)

---

^{[མ་དཔེ་གཟིགས་ན་འདིར་གནོན།]}

ཡིན་གྱི་ཡིད་ཆེས་དེ་ལ་བྱེད། །གསུངས་པས། སྲས་ཀྱིས་རིན་པོ་ཆེའི་ཕོར་བ་རྒྱ་རྣམས་ཀྱི་ལག་ཏུ་གཏད་ནས། ང་ཁྲི་སྲོང་ལྡེ་བཙན་རྒྱ་ཚ་ཡིན། །རྣམ་སྣང་གང་གི་དོན་མི་འཚལ། །གསུངས་པ་དང་། ཀོང་ཇོ་ཡིད་རབ་ཏུ་དགའ་སྟེ། ཚེ་སྔོན་མའི་ལས་ཀྱི་འཕེན་པ་ཡིས། །ང་རྒྱ་ནས་འོངས་པའི་བུ་མོ་ལ། །རྗེ་འགྲན་མེད་རྒྱལ་པོའི་སྲས་ཤིག་འཁྲུངས། །ཞེས་སོགས་ཀྱི་གཏམ་སྨྲས་ནས། སྔར་ས་དཔྱད་ཉམས་སུ་བཅུག་པ་རྣམས་བསོས་སྐད། །དཔའ་བོ་གཙུག་ལག་འཕྲེང་བས། ཆོས་རྒྱལ་འཁྲུངས་ལོ་ལ་སྦ་བཞེད་བུ་སྟོན་གྱི་ལུགས་སོགས་ཡིག་ཚང་མང་པོ་ཞིག་གི་འདོད་པ་བསྐྱར་ཞིང་། སྦ་བཞེད་ཀྱི་ལུགས་དེ་འཁྲུལ་བར་བཤད་མ་ཐག་ཏུ། སྦ་བཞེད་ཀྱི་གཏམ་རྒྱུད་ཚང་བར་བྲིས་པ་ལ། རང་ལུགས་འཐད་ལྡན་དུ་བཞག་པ་དང་། གཞན་ལུགས་མི་འཐད་པར་དགག་པའི་རྣམ་དབྱེ་མེད་པར་མིག་གིས་མཐོང་ཚད་དང་རྣ་བས་ཐོས་ཚད་ཡི་གེར་བྲི་བ་ནི་སོས་དུས་ཀྱི་ཉ་མ་འཕུལ་བྱེད་ཀྱི་ཐབས་ནི་ཡིན་མཆིས། མཁས་པ་ཆེན་པོ་བུ་སྟོན་ཞབས་ཀྱི་གསུང་ཕལ་ཆེར་ཚད་མར་གདའ་བས། རྒྱལ་པོ་ས་རྟ་ལ་འཁྲུངས་པར་གསུངས་པ་འདི་ཡིག་མཁན་གྱིས་ནོར་བའི་རྒྱུན་འབྱམས་པ་ཞིག་ཡིན་ནམ། གང་ལྟར་ཆོས་རྗེ་བསོད་ནམས་གྲགས་པ་སོགས་འགའ་ཞིག་གིས། རྒྱལ་པོ་ཁྲི་སྲོང་ལྡེ་བཙན་ས་རྟ་ལ་འཁྲུངས་པ་དང་།ཆོས་རྒྱལ་སྲོང་བཙན་སྒམ་པོ་མེ་གླང་ལ་འཁྲུངས་པར་བྱེད་པ་ནི། གཙུག་ལག་རྩིས་ཀྱི་གཞུང་ལུགས་ལ་བློ་གྲོས་ཀྱི་འཇུག་པ་ཤར་བ་ཞིག་གིས་བརྟགས་ཚེ་ལོ་གྲངས་བཅུ་གཉིས་ཙམ་མི་འགྲིག་པའི་མུ་ཅོར་གྱི་གཏམ་དུ་ཟད་དོ། །སྲས་(༣༢བ)

---

^{[མ་དཔེ་གཟིགས་ན་འདིར་གནོན།]}

དགུང་ལོ་ཆུང་ངུའི་དུས། རྒྱ་ཡུལ་དུ་སང་ཤི་གཙུག་ལག་འགའ་ཞིག་ལེན་དུ་བཏང་བར་ལམ་དུ་ཞུགས་པ་དང་། རྒྱ་ཡུལ་གྱི་ཇུ་ཞག་མཁས་པ་ཞིག་གིས། ད་སྟེ་ཟླ་བ་གསུམ་ན་ནུབ་ཕྱོགས་ནས་བོད་བཙན་པོའི་ཕོ་ཉ་རྟགས་དང་ཤ་ཚུགས་འདི་འདྲ་བ་འབྱུང་ཞེས་གཟུགས་བརྙན་བྲིས་ནས་རྒྱལ་པོར་གསོལ་བ་བཞིན་བྱུང་བས། རྒྱ་རྗེ་དགྱེས་པའི་བཀའ་སྩལ་ཞིང་། མཐིང་ཤོག་ལ་གསེར་གྱིས་བྲིས་པའི་གླེགས་བམ་སོགས་བྱ་དགའ་ཆེན་པོ་གནང་། དུས་སྐབས་དེ་དག་ན་བོད་དུ་ཡབ་རྒྱལ་པོ་དགུང་ལོ་དྲུག་ཅུ་རེ་གསུམ་ལ་གཤེགས། བང་སོ་མུ་ར་རི་ལ་བརྩིགས། སང་ཤི་སླར་བོད་དུ་ཡོང་བའི་ལམ་དུ་ཧ་ཤང་མངོན་ཤེས་ཅན་ཞིག་ལ་བོད་ཀྱི་བདེ་དོག་དྲིས་པས། བཙད་པོ་གཤེགས། རྒྱལ་བུ་ནར་མ་སོན། བདུད་བློན་རྣམས་ཀྱིས་ཁྲིམས་བུ་ཆུང་བཅས་ནས་ཆོས་བསྣུབ་པ་སོགས་ཀྱི་ལུང་བསྟན། འོན་ཀྱང་རྒྱལ་བུ་ནར་སོན་པ་ན་གླེགས་བམ་གསུམ་པོ་འདི་རྣམས་རིམ་གྱིས་སྙན་དུ་གསོལ། ཟ་ཧོར་གྱི་དགེ་སློང་ཤནྟ་རཀྵི་སྤྱན་དྲོངས་ཤིག་ཅེས་ཟེར་བ་ཡིད་ལ་བཟུང་ནས་ཧྭ་ཤང་གཅིག་ཁྲིད་ནས་བོད་དུ་འོངས་པ་ན། མ་ཞང་སོགས་ཀྱིས་རྒྱལ་པོ་སྐུ་ཚེ་ཐུང་བ་དང་བཀྲ་མི་ཤེས་པ་ཆོས་ཀྱིས་ལན་པས་ཆོས་བྱར་མེད་པའི་ཁྲིམས་བཅས་ཏེ། ཤཱཀྱ་མུ་ནི་རྒྱ་ཡུལ་དུ་སྐྱེལ་བའི་ཐབས་བྱས་ཀྱང་མ་ཐེག་པར་ས་འོག་ཏུ་སྦས། འཕྲུལ་སྣང་དུ་བཤས་ར་བྱས་དུས་དེར་སྣ་རྣམ་ཁྲི་ཐོག་རྗེ་ཐང་ལྷ་འབར་བྱ་བ་རྒྱལ་བས། ལྕོག་རོ་སྐྱེས་བཟང་རྒྱལ་མགོ་བྱད་བསྐམས་ནས་ཤི་བས། ལྟས་མཁན་དང་མི་ཕལ་ཆེར་གྱིས་ལྷ་ས་འོག་ཏུ་སྦས་པས་ལན་ཟེར་བས། སྐྱིད་གྲོང་དུ་བསྐྱལ། བྲག་དམར་མགྲིན་བཟང་བཤིག་འདུག་(༣༣ན)

---

^{[མ་དཔེ་གཟིགས་ན་འདིར་གནོན།]}

པས། སང་ཤིས་རྒྱའི་གླེགས་བམ་རྣམས་མཆིམས་ཕུའི་རྫ་ལ་སྦས། ཧྭ་ཤང་སློག །སྐབས་དེར་སྦ་གསལ་སྣང་གི་བུ་མོ་ཤི་བ། ཧྭ་ཤང་གིས་རོའི་ཁར་མུ་ཏིག་མཚལ་གྱིས་བྱུགས་པའི་མཚན་མ་བྱས་བཅུག་ནས་མའི་མལ་འོག་ཏུ་སྦས། བུ་མོ་མའི་བུར་སྐྱེ་བའི་ལུང་བསྟན་པ་བཞིན་བཙས་པའི་སྐབས་སུ་ཁ་ན་མུ་ཏིག་བྱུང་བས། ཚེ་ཕྱི་མ་ཡོད་པའི་ངེས་པ་རྙེད་ནས། གསལ་སྣང་ཆོས་ཀྱི་ཆེད་དུ་ལྷོ་བལ་དུ་འགྲོ་བར་རྗེ་ལ་གསོལ་པས་མང་ཡུལ་གྱི་ཁད་དཔོན་དུ་བརྫངས། སྦ་བཞེད་དུ། གསལ་སྣང་མང་ཡུལ་དུ་སོང་བའི་རྗེས་སུ་སང་ཤི་རྒྱ་ནག་ནས་འཁོར་བར་བཤད་འདུག་པ་དང་། དཔའ་བོ་གཙུག་ལག་ཀྱང་དེའི་རྗེས་སུ་འབྲངས་ནའང་། གོང་འོག་ཚིག་གི་འགལ་འདུ་ཡོད་མེད་མ་བརྟགས་པའི་བབ་ཅོལ་ཏེ། ཧྭ་ཤང་ནི་རྒྱའི་ཆོས་སྟོན་པའི་སློབ་དཔོན་ཡིན་ཞིང་། ཆོས་ཁྲིམས་བཤིག་པའི་དོན་གྱིས་ར་མོ་ཆེའི་ཧྭ་ཤང་སོགས་བོད་ན་ཡོད་པ་ཀུན་ཕྱིར་བསྐྲད་ཟིན། གསལ་སྣང་གི་བུ་མོ་བུར་སྐྱེ་བའི་ལུང་བསྟན་བྱེད་པ་པོ་དེ་སང་ཤིས་གསར་དུ་ཁྲིད་ཡོངས་པའི་ཧྭ་ཤང་དེར་ངོས་འཛིན་དགོས་པས། སྙིགས་དུས་ཀྱི་མཁས་པ་ཀུན་གྱི་གཙུག་གི་ནོར་བུ་གཞོན་ནུ་དཔལ་བའི་དེབ་སྔོན་དང་། ཤེས་བྱ་ཀུན་ལ་གཟིགས་པའི་སྤྱན་ལྡན་སྤྲུལ་སྐུ་ངག་དབང་ནོར་བུའི་ཆོས་འབྱུང་བསྟན་པའི་པདྨ་རྒྱས་པའི་ཉིན་བྱེད་དུ། སང་ཤི་བོད་དུ་སླེབ་ནས་གསལ་སྣང་སྟོད་དུ་སོང་བའི་གོ་རིམ་མཛད་པ་འདི་འཐད་དོ། །མི་རིང་བར་རྒྱལ་བུ་སྐུ་ནར་སོན་ཏེ། མེས་རྣམས་ཀྱི་ཡིག་ཚང་གཟིགས་པས་ཆོས་མཛད་པར་དགོངས་པའི་གཏམ་མཛད་པས་སང་ཤིས་སྔར་ཧྭ་ཤང་གིས་ལུང་བསྟན་པའི་(༣༣བ)

---

^{[མ་དཔེ་གཟིགས་ན་འདིར་གནོན།]}

དུས་དེར་གོ་ནས་གླེགས་བམ་རྣམས་རྫ་ཁྲོད་ནས་བླངས་ཏེ། དགེ་བ་བཅུའི་མདོ། རྡོ་གཅོད། ས་ལུ་ལྗང་པ་རྣམས་གཟིགས་སུ་ཕུལ་བས་ལྟ་སྤྱོད་དག་ཅིང་ཟུང་དུ་འབྲེལ་བར་གོ་ནས་དད་དེ། རྒྱ་མེ་མགོ་དང་ཁ་ཆེ་ཨ་ནནྟས་སྐད་འགྱུར་བྱས་པས་མ་ཞང་སོགས་ཀྱིས་བཀག །ཆོས་བློན་རྣམས་ཀྱིས་སང་ཤི་སྟོད་དུ་བརྫངས། གསལ་སྣང་གིས་བྱང་ཆུབ་ཆེན་པོ་དང་། ན་ལེནྡྲར་མཆོད་པ་བྱས། མཁན་པོ་རིན་པོ་ཆེ་དང་མཇལ་ཏེ་མང་ཡུལ་དུ་སྤྱན་དྲངས། གསལ་སྣང་གི་བཙད་པོའི་དྲུང་དུ་འོངས་ནས་མཁན་པོའི་གསུང་དང་རྒྱུ་མཚན་རྒྱལ་པོར་གསོལ། མ་ཞང་གི་ཆད་པ་བྱུང་དོགས་ནས་གསལ་སྣང་ཡིབས་སུ་བཅུག །བཙད་པོས་ལྐོག་ཏུ་འགོས་རྒན་སོགས་ཆོས་བློན་རྣམས་དང་བཀའ་བགྲོས་ནས། མོ་རྩིས་པ་སོགས་ལུང་བསྟན་མཁན་པོ་རྣམས་ལ་བྱ་དགའ་བྱིན་ཏེ། རྒྱལ་པོ་རྒྱལ་སྲིད་དང་བཅས་པ་ལ་ཆགས་ཆེན་པོ་བདོག་པས། དེའི་རིམ་གྲོར་བློན་པོ་ཆེ་བ་ཞིག་ཟླ་བ་གསུམ་གྱི་བར་ལ་དུར་དུ་འཇུག་དགོས་པར་བསྒྲག་ཏུ་བཅུག་སྟེ། འགོས་ཀྱི་རྐང་པ་ལ་བྱ་རྒོད་ཀྱི་ལྷམ་གོན་པ་སོགས་ཐབས་འཕྲུལ་དུ་མས་མ་ཞང་དང་ལྷན་ཅིག་བར་དུར་ནང་དུ་ཕྱིན་ནས་ཕྱིར་བྲོས་པས་མ་ཞང་གིས་བསྙབས་ཀྱང་རྒོད་སྤུ་སྙིམ་པ་གང་ལས་མ་བྱུང་། དེ་མ་ཐག་དོང་ཁ་བཅད་དེ། རྗེ་བློན་ཀུན་ཆོས་བྱེད་པའི་ཆད་སོ་བྱས། དེ་ནས་རིགས་ཀྱིས་མངོན་པར་མཐོ་བ་ཟ་ཧོར་རྒྱལ་པོའི་གདུང་ལས་འཁྲུངས་ཤིང་། ཇི་ལྟ་བ་དང་ཇི་སྙེད་པའི་ཆོས་ཀྱི་བརྒྱུད་གནས་ལྔ་རིག་པའི་ཉག་ཕྲན་གྱིས་བཀུག་པའི་མཁས་པ་མཐའ་དག་གི་བླ་ན་མཐོ་བ་རྣམ་པར་དག་པའི་ཚུལ་ཁྲིམས་དྲི་མ་མེད་པའི་མ་ལ་ཡའི་རླུང་བཞོན་གྱིས་སྡོམ་བརྩོན་གཉིས་(༣༤ན)

---

^{[མ་དཔེ་གཟིགས་ན་འདིར་གནོན།]}

བཟུང་གི་ཚོགས་ལ་དགའ་མགུར་སྤྱོད་པའི་དཔལ་སྟེར་བ། བདེ་སྟོང་ཟུང་དུ་འཇུག་པའི་ཡེ་ཤེས་མངོན་དུ་མཛད་པའི་གྲགས་སྙན་ཀརྞི་ཀའི་ཅོད་པན་ཕྱོགས་ཀྱི་འགྲམ་པར་འགོད་པའི་མཁན་པོ་རིན་པོ་ཆེ་བོ་དྷི་ས་ཏྭ་སྤྱན་འདྲེན་པའི་ཕོ་ཉར་གསལ་སྣང་བརྫངས་པ་བཞིན་རིམ་གྱིས་ཕེབས་ཏེ། འོམ་བུ་ཚལ་དུ་མཇལ། མཁན་པོས་རྒྱལ་པོ་ལ་དགེ་བ་བཅུ་དང་ཁམས་བཅོ་བརྒྱད་ལ་སོགས་པའི་ཆོས་མང་པོ་བཤད་པས། བོད་ཀྱི་ལྷ་སྲིན་རྣམས་ཁྲོས་ནས་དམར་པོ་རིའི་ཕོ་བྲང་ལ་ཐོག་བརྒྱབ། ལོ་ཉེས་དང་མི་ཕྱུགས་ལ་ནད་ཆེན་པོ་བྱུང་བས། སྡིག་བློན་རྣམས་ཀྱིས་འགོ་བྱས་པའི་བོད་འབངས་ཕལ་ཆེར་གྱིས་ཆོས་བྱས་པས་ལན་ཟེར་ནས་མི་དགའ་བ་བྱས་པས། བཙད་པོས་རྒྱུ་མཚན་མཁན་པོའི་སྙན་དུ་གསོལ་བ་ལ། མཁན་པོས་ཡབ་མེས་ཀྱི་རིང་ལ་གཙུག་ལག་ཁང་རྟེན་དང་བརྟེན་པར་བཅས་པ་བཞེང་བ། ཆོས་བསྒྱུར་བ་སོགས་མཛད་ནའང་། ལྷ་སྲིན་རྣམས་མ་བཏུལ་བས། བཙན་པོ་འགའ་ཞིག་གི་སྐུ་ཚེ་ལ་བར་ཆད་དང་། ཆོས་ལ་སྐེད་ཉག་སོགས་སྐྱོན་འགའ་ཞིག་བྱུང་འདུག་པས། ས་གཞི་འདི་དག་དྲག་པོས་འདུལ་བའི་ཆེད་དུ། ཨོ་རྒྱན་གྱི་སློབ་དཔོན་པདྨ་འབྱུང་གནས་ཞེས་བྱ་བ་འཛམ་བུ་གླིང་ན་ཆེ་བའི་རིགས་སྔགས་མཁན་ཞིག་ཡོད་པ་དེ། རྒྱལ་པོ་ཉིད་དང་སྔོན་མཆོད་རྟེན་བྱ་རུང་ཁ་ཤོར་བཞེང་བའི་དུས་སུ་སྨོན་ལམ་གྱི་འབྲེལ་བ་ཡོད་པས་སྤྱན་དྲངས་ན། བཙད་པོའི་རྣམ་པར་དཀར་བའི་ཐུགས་ཀྱི་བཞེད་པ་མཐའ་དག་འགྲུབ་པར་ལུང་བསྟན་ནས། མཁན་པོས་བལ་པོར་བྱོན། དེ་ནས་སླར་བཙན་པོས་ཐབས་ལ་མཁས་པའི་མཛད་པས་འབངས་མཐའ་(༣༤བ)

---

^{[མ་དཔེ་གཟིགས་ན་འདིར་གནོན།]}

དག་ཆོས་བྱ་བར་ཁས་བླངས། མཁན་པོས་ལུང་བསྟན་པ་དེ་རྨི་ལམ་དུ་བྱུང་བ་ལྟར་མཛད་ནས། སངས་རྒྱས་སྣང་བ་མཐའ་ཡས་ཀྱི་ཡེ་ཤེས་མཆོག་གི་ཟློས་གར་ལས་སིན་དྷུ་རྒྱ་མཚོའི་གླིང་དུ་སྐུ་འཁྲུངས་ཤིང་འཆི་མེད་ཚེའི་རིགས་འཛིན་དང་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པ། དུས་གསུམ་ཅིག་ཅར་དུ་མཁྱེན་པའི་སློབ་དཔོན་ཆེན་པོ་མཚོ་ལས་སྐྱེས་པའི་རྡོ་རྗེ་སྤྱན་འདྲེན་པའི་ཕོ་ཉ་སྔ་རྟ་ིང་དུ་བརྫངས་ཤིང་། སླར་སྣ་ནམ་རྡོ་རྗེ་བདུད་འཇོམས་སོགས་ལམ་དུ་བཤད་དྲག་པོས་རིན་པོ་ཆེའི་ཕྱག་རྟེན་དང་བཅས་ཏེ་མངགས་པས་ཕོ་ཉ་རྣམས་ངལ་ཞིང་དུབ་པ་སློབ་དཔོན་གྱིས་མཁྱེན་ནས། རྫུ་འཕྲུལ་གྱིས་མང་ཡུལ་གུང་ཐང་དུ་ཕེབས་པ་ན་མཇལ། སློབ་དཔོན་གྱིས་ཉི་ཟླ་ཐང་ལ་འབབ་པ། ཆུ་བོ་གྱེན་ལ་བཟློག་པ་སོགས་སྐུའི་བཀོད་པའི་རྫུ་འཕྲུལ་མཐའ་ཡས་པ་བསྟན་ཏེ་ཕོ་ཉ་རྣམས་ལྡོག་ཏུ་མེད་པའི་མོས་པ་བརྟན་པོ་ཐོབ། ཕྱག་རྟེན་གྱི་གསེར་རྣམས་མངའ་རིས་ཕྱོགས་སུ་གཏོར་ཏེ། མ་འོངས་པར་བོད་དུ་གསེར་གྱི་འདོད་རྒུ་འབྱུང་བའི་རྟེན་འབྲེལ་མཛད། དེ་ནས་རིམ་གྱིས་ལམ་དུ་ཞུགས་ཏེ་ཕེབས་པ་ན། བོད་ཀྱི་ལྷ་འདྲེ་སྟོབས་པོ་ཆེ་ཕལ་ཆེ་བས་གོ་མཚམས་པར། གསང་བ་གསུམ་གྱི་མཐའ་ཀླས་པའི་ནུས་མཐུས་སྲོག་གི་སྙིང་པོ་བླངས་ནས་དམ་ལ་བཏགས། སྟོད་ལུང་གཞོང་པ་མདའ་རུ་ཕེབས་པ་ན། ལྷ་བཟང་ཀླུ་དཔལ་སོགས་བློན་པོ་རྣམས་ཀྱིས་བསུ་བ་དང་མཇལ་ནས་དྲོ་འདེབས་པར་ཆུ་མེད་པ་ལ་སློབ་དཔོན་གྱིས་ཕྱག་འཁར་བཏབ་པས་ཉལ་འགྲོའི་རྒྱུན་བབས་པ། གཞོང་པ་ལྷ་ཆུར་གྲགས། དེ་ནས་མངའ་བདག་རྒྱལ་པོ་འཁོར་བཅས་བསུ་བའི་བཀོད་པ་རྒྱ་ཆེན་པོ་དང་བཅས་ཏེ་མཇལ་ནས། (༣༥ན)

---

^{[མ་དཔེ་གཟིགས་ན་འདིར་གནོན།]}

བྲག་དམར་མགྲིན་བཟང་དུ་བཞུགས། སླར་མཁན་པོ་གདན་འདྲེན་གྱི་ཕོ་ཉ་མངགས་ཏེ་ཕེབས། དུས་དེར་རྗེ་བློན་གཙུག་ལག་ཁང་རྩིག་པའི་བཀའ་བགྲོས་ནས་འབངས་རྣམས་བསགས་ཏེ། ཞང་པོ་རྒྱའི་ཡུལ་མཐོང་བའི་མཁར་ཞིག་རྩིག་གམ། ཤེལ་གྱི་མཆོད་རྟེན་ཤར་རི་དང་མཉམ་པ་ཞིག་རྩིག་གམ། གཙང་པོ་སྦུབས་སུ་འཇུག་གམ། ལྷ་ཁང་བྲེ་ཚད་ཙམ་ཞིག་རྩིག་གམ། ཞེས་འདམ་ཀ་བཏང་བས་གཞན་རྣམས་བློའི་ཡུལ་ལས་འདས་ཏེ་ལྷ་ཁང་རྩིག་པར་ཁ་འཆམ། ཤཱཀྱ་མུ་ནི་མང་ཡུལ་ནས་གདན་དྲངས་ཏེ་འཕྲུལ་སྣང་གཙུག་ལག་ཁང་དུ་བཞུགས་སུ་བཅུག །སློབ་དཔོན་བོད་དུ་ཡུན་རིང་བཞུགས་མ་བཞུགས་ཀྱི་ལོ་རྒྱུས་དུ་མ་སྣང་བ། མཆོག་དམན་གྱི་བློ་ངོར་ཤར་ཚུལ་ཡིན་ཡང་། རྒྱུ་མཚན་མ་གོ་བར་སོ་སོའི་ལུགས་ལ་ཞེན་ཏེ་གཏམ་སྣ་ཚོགས་སྨྲ་བ་ནི། རྗེ་ས་པཎ་གྱིས། མཁས་པ་རང་གིས་དཔྱོད་ཤེས་ཀྱི། །བླུན་པོ་གྲགས་པའི་རྗེས་སུ་འབྲང་། ཁྱི་རྒྱན་ཀུ་ཅོ་འདོན་པ་ན། །རྒྱུ་མཚན་མེད་པར་གཞན་དག་རྒྱུག །ཅེས་གསུང་བའི་རྣམ་ཐར་འཛིན་པ་ཡིན་ཞིང་། བྱ་བ་སྤྲུལ་པའི་སྐུ་པདྨ་དཀར་པོར་གྲགས་པའི་སྙིགས་དུས་ཀྱི་མཁས་པ་ཆེན་པོ་དེའི་གསུང་ལས། དེ་ནི་དུས་གཅིག་ལ་སྐུའི་བཀོད་པ་སྣ་ཚོགས་སྟོན་པའི་རྫུ་འཕྲུལ་ཅན་ཡིན་པས། དེ་དག་ལ་གོ་རིམ་མི་དགོས་ཀྱི་གཏན་ཚིགས་སུ་བསྒྲུབ་དཀའོ། །ཞེས་པ་ནི་རྣམ་དཔྱོད་ཀྱི་རྩལ་དང་ལྡན་པའི་ལེགས་བཤད་ཀྱི་གསུང་ཡིན་ནོ། །དེ་ནས་སློབ་དཔོན་གྱིས་སྡེ་བརྒྱད་ཐམས་ཅད་དམ་ལ་བཏགས་ཏེ་ལྷ་འདྲེ་རྣམས་དགའ་བའི་མཐུན་རྫས་དང་བཅས། དྲེགས་པ་ཟིལ་གནོན་གྱི་མགུར་གསུངས་ནས་ནམ་མཁའ་ལ་རྡོ་རྗེའི་གར་མཛད་ཅིང་ས་(༣༥བ)

---

^{[མ་དཔེ་གཟིགས་ན་འདིར་གནོན།]}

གཞི་བྱིན་གྱིས་བརླབས། རྒྱལ་པོས་དར་དཀར་གྱི་ན་བཟའ་གསོལ། གསེར་གྱི་སྟ་རེ་ཐོགས་ནས་རྨང་བརྐོས་པས་ཁྲུ་གང་ཙམ་གྱིས་འོག་ནས་ས་ཞག་དཀར་སེར་དམར་གསུམ་རོ་ཕུན་སུམ་ཚོགས་པ་བྲོ་མྱུར་བས་བཙན་པོ་ཐུགས་དགྱེས་སོ། །དེ་ནས་མཁན་པོས་གཙུག་ལག་ཁང་གི་བཟོ་དབྱིབས་ཀྱི་བཀོད་པ་མཛད་པར་བཞེད་དེ། སྔོན་མུ་སྟེགས་ཀྱི་རིགས་འཛིན་ཞིག་གིས་རོ་བསྒྲུབས་པས་དངོས་གྲུབ་ལེན་པར་ཉེ་བ་ན། གྲོགས་རྟགས་མཚན་དང་ལྡན་པ་ཞིག་དགོས་པས། དབུས་འགྱུར་འཆང་གི་དགེ་སློང་སྒྲུབ་པ་པོའི་དགེ་ཚུལ་ལ་ལྡན་པར་ཤེས་ནས། གསེར་གྱི་མཎྜལ་དགེ་སློང་ལ་རིན་དུ་ཕུལ་ནས། དགེ་ཚུལ་དང་ལྷན་ཅིག་དུ་སྒྲུབ་ཁང་དུ་ཕྱིན་ཏེ། དགེ་ཚུལ་ལ་རོའི་ལྕེ་གཅོད་ཚུལ་བསླབས་ཏེ། ལྕེ་གསེར་གྱི་རལ་གྲིར་འགྲོ་བ་བཟུང་ནས་ཡིད་ལ་གང་ཡོད་སར་འགྲོ་ནུས་པས་དེད་ལ་ཐོང་། རོ་གསེར་དུ་འགྲོ་བ་ཁྱོད་ལ་རྔན་པར་བྱིན་ན་ཟེར་བས། ལྕེ་དར་ཤམ་ཙམ་པ་ལན་གཉིས་སུ་བྱུང་ཡང་མ་ཟིན། དེར་མུ་སྟེགས་ཀྱིས། ང་ལན་ཅིག་འོང་བ་དེ་མ་ཟིན་ན། ངེད་རང་གཉིས་ཀྱིས་འགོ་བྱས་པའི་སྲིད་པ་གསུམ་གྱི་སེམས་ཅན་གསོད་པས་སྒྲིམས་ཤིག་ཟེར་བ་དང་། ལྕེ་སོས་བཟུང་ནས་བཅད་པ་རལ་གྲིར་གྱུར་པ་དགེ་ཚུལ་གྱིས་ནམ་མཁའ་ལ་དབྱུགས་ནས་རི་རབ་ཀྱི་ཁར་ཕྱིན། གླིང་བཞི་གླིང་ཕྲན་ལྕོག་དང་བཅས་པ་ལེགས་པར་བལྟས་ནས་སླར་གྲི་མུ་སྟེགས་ལ་གཏད། རོ་གསེར་དུ་གྱུར་པས་ཡོ་བྱད་བྱས་ནས། རི་རབ་གླིང་བཞི་གླིང་ཕྲན་དང་བཅས་པ་ལ་དཔེ་བྱས་ནས་བཞེངས་པ་ཨོ་ཏནྟ་པུ་རིའི་གཙུག་ལག་ཁང་ཞེས་བྱ་བ་ལ་མཚན་ཅན་ཞིག་ཡོད་པས། དེ་ལ་དཔེ་བྱ་བར་གསུངས་ཏེ། དགེ་བྱེད་ཅེས་(༣༦ན)

---

^{[མ་དཔེ་གཟིགས་ན་འདིར་གནོན།]}

པ་ཆུ་ཕོ་སྟག་གི་ལོ་ལ་བསིལ་ལྡན་ཁ་བས་བསྐོར་བའི་དོ་རར་འཁོད་པའི་ལུས་ཅན་ཀུན་གྱི་བསོད་ནམས་ཀྱི་ཞིང་རླབས་པོ་ཆེར་གྱུར་པ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་རྨང་བཏིངས། རྒྱ་ཁྱོན་གྱི་ཚད། བཙད་པོ་རང་གི་མདའ་རྒྱང་གང་བར་གསུངས་པས། བློན་པོ་རྣམས་ཀྱིས་ལྐོག་ཏུ་བགྲོས་ཏེ། རྗེའི་མདའ་རྒྱང་གང་ལ་གཞན་གྱི་གསུམ་ཡོད་པས་དེ་ཙམ་མི་འགྲུབ་ཅིང་། བཀའ་བཅག་པ་ཡང་མི་རིགས་པས་ཐབས་ཤིག་བྱེད་པར་མཐུན་ཏེ། མདའི་སྨྱུག་སྡུགས་སུ་དངུལ་ཆུ་བླུག་པས་གཞན་གྱི་མདའ་རྒྱང་གང་དང་མཉམ་པ་བྱུང་ལ། དེ་ཡང་དབུ་རྩེ་རི་རབ་གླིང་བཞི་གླིང་ཕྲན་བརྒྱད། ཡཀྵ་གོང་འོག་ཉི་ཟླ། མཐར་ལྕགས་རི། ཟུར་བཞིར་མཆོད་རྟེན། སྒོ་བཞིར་རྡོ་རིང་ཁྱད་པར་ཇོ་མོའི་གླིང་གསུམ་དང་བཅས་པ། སློབ་དཔོན་གྱིས་དྲེགས་པ་ཅན་ཐམས་ཅད་ལས་ལ་བཀོལ་བས་ཉིན་མིས་བརྩིགས་པ་བས། མཚན་ལྷ་འདྲེས་བརྩིགས་པ་མཐོ་བར་གྱུར། དུས་དེར་རྒྱལ་པོའི་མནལ་ལམ་དུ། ཧས་པོ་རིའི་རྩེར་བྱོན་པས་ཤཱཀྱ་ཐུབ་པ་གཙོ་འཁོར་དགུ་སངས་རྒྱས་དངོས་ཀྱིས་བྱིན་གྱིས་བརླབས་པ་འདུག་པ་གཟིགས་པས་དགྱེས་པའི་རྣམ་འགྱུར་མཛད་པའི་ངང་ལ་མནལ་སད་དེ། ནང་པར་བློན་པོ་ཁམས་པ་གོ་ཆ་ཁྲིད་ནས་གཟིགས་པར་བྱོན་པས། བྱེ་མའི་འོག་ནས་རྡོ་སྐུ་རང་བྱུང་འཐོན་ཏེ་གཙང་ཁང་དུ་སྤྱན་དྲངས་པས་ས་གཡོས་པ་སོགས་ལྟས་ཁྱད་པར་ཅན་བྱུང་བའི། ཇོ་བོ་བྱང་ཆུབ་ཆེན་པོ་ནང་རྟེན་དུ་བཞུགས་པའི་མ་ཧཱ་བོ་དྷིས་ཐོག་དྲངས། འོག་ཁང་བར་ཁང་སྟེང་ཁང་འཁོར་ས་བར་མ་དང་ཆེན་མོ། གླིང་གཞན་(༣༦བ)

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་བདེ་གཤེགས་ཞི་ཁྲོ་འཁོར་དང་བཅས་པའི་སྐུའི་སྣང་བརྙན་ཐམས་ཅད་འདྲེན་བྱེད་ཀྱི་དགའ་སྟོན་རྨད་དུ་བྱུང་བའི་ཟིལ་མངར་དུ་གྱུར། ཁྱད་པར་མཆོད་རྟེན་དཀར་པོར་མ་ག་དྷའི་རྒྱལ་པོའི་སྒོ་མདུན་གྱི་རིན་པོ་ཆེའི་བུམ་པ་ནས་བླངས་པའི་བདེ་བར་གཤེགས་པའི་གདུང་རིང་བསྲེལ་དང་། མེས་ཀྱི་གཉན་པོ་གསང་བ་དང་མདོ་ལྔ་བཞུགས་པས་བྱིན་རླབས་མཆོག་ཏུ་ཆེ་བར་གྲགས་ཤིང་། འགྲོ་བཟའ་ཁྲི་རྒྱལ་མང་མགོ་བཙུན་གྱིས་དགེ་རྒྱས་ཀྱི་ལྷ་ཁང་ལ། ཕ་མིང་ཐག་རིང་ཞིང་སྲས་མེད་པས། ཞིག་གསོས་དང་མཆོད་པ་འབྱུང་བར་དཀའ་བར་བསམས་ཏེ། རྩིག་པ་སོ་ཕག་ལ་ཞ་ཉེའི་ཆུ་སྦྱར། ཟངས་ཀྱི་ཐོག་བཀབ། མཆོད་པར་རོལ་མོར་ཅོང་བཏགས། མར་མེར་རིན་པོ་ཆེ་མརྒད་སྐུ་གཟུགས་ཀྱི་དཔྲལ་བར་བཏབ་ཟེར། ཕོ་ཡོང་བཟས་བུ་ཚལ་གསེར་ཁང་ལོགས་ལ་རྩིག་པ་མེད་པ། ནང་ན་ཀ་བ་མེད་པ་སོགས་བཟོ་སྣ་བཅུ་གསུམ་གྱིས་ཁྱད་པར་དུ་འཕགས་སྐད། དེ་ཡང་ལོ་རྒྱུས་སྨྲ་ལ་ཟླ་མེད་དཔལ་ཡེ་བཟང་རྩེ་པས། རྒྱལ་པོའི་འཁྲུངས་ལོ་གསལ་བར་མ་མཛད་འདུག་ཅིང་། མཁས་པའི་དབང་པོ་བུ་སྟོན་རིན་པོ་ཆེ་སོགས་ས་རྟ་ལ་འཁྲུངས་པར་བཞེད་ལ། སྦ་བཞེད་དུ་རྒྱལ་པོ་ཡོས་ལ་འཁྲུངས་པའི་དགུང་ལོ་བཅུ་གསུམ་པ་ཡོས་སྟེང་དུ་གཙུག་ལག་ཁང་བརྩིགས་པར་བཤད་ནའང་། རྒྱལ་པོའི་དགུང་སྙིང་རྟ་ལོར་འདོད་པ་རྣམས་ཀྱིས་གཙུག་ལག་ཁང་ཡོས་ལ་བརྩིགས་པས་སྨྲ་བ་ཁུངས་ཆེ་བར་མ་མཐོང་ཞིང་། བློ་ཆུང་རྣམས་གཙུག་ལག་ཁང་རྒྱ་ཁྱོན་ཧ་ཅང་ཆེ་བས་ལོ་ལྔ་ཙམ་ལ་མི་འགྲུབ་སྙམ་པ་འཆར་ཡང་། དུས་དེའི་མཁན་སློབ་ཆོས་གསུམ་སོགས་དུ་མ་ཞིག །བདེ་བར་གཤེགས་པ་དང་བྱང་(༣༧ན)

---

^{[མ་དཔེ་གཟིགས་ན་འདིར་གནོན།]}

ཆུབ་སེམས་དཔའ་མིའི་སྲིད་པ་བཟུང་བའི་སྤྲུལ་པའི་ཟློས་གར་མུ་མཐའ་མེད་པར་སྟོན་པ་ལ། །སྐྱེ་བོ་ཐ་མལ་པའི་སྣང་ཚུལ་དཔེར་བཟུང་མི་དགོས་སོ། །དེ་ལྟར་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཟིལ་གནོན་ཞེས་པ་མེ་ཕོ་རྟའི་ལོ་ལ་རྫོགས་པར་གྲུབ་སྟེ། མཁན་སློབ་གཉིས་ཀྱིས་རབ་ཏུ་གནས་པར་མཛད་པས། དབུ་རྩེའི་ལྷ་རྣམས་ཕྱི་རོལ་དུ་བྱོན་པ། རྟ་མགྲིན་གྱིས་རྟ་སྐད་ཐང་གསུམ་བཏོན་པ། པདྨའི་སྡོང་པོ་སྐྱེས་པ་སོགས་ངོ་མཚར་བའི་ལྟས་ཁྱད་པར་དུ་འཕགས་པ་བྱུང་བའི་གྲགས་སྙན་དབྱངས་བདུན་བརྒྱུད་དུ་འཁྲུགས་པའི་རྔ་བོ་ཆེ་སྲིད་རྩེའི་བར་དུ་བསྒྲགས་སོ། །དེ་ལྟར་རབ་གནས་དགའ་སྟོན་གྱི་ཚེ། རྗེ་འབངས་ཐམས་ཅད་ཀྱིས་ཕུན་སུམ་ཚོགས་པའི་རྒྱན་གོས་བཟང་པོ་སྤྲས་ཏེ་ལྷ་དང་མིའི་འདོད་ཡོན་ལོངས་སྤྱོད་ཐམས་ཅད་བྱེད་པོས་གཅིག་ཏུ་བསྡུས་པ་ལྟ་བུའི་ཕྱི་ནང་གསང་བའི་མཆོད་པ་དང་། མཁོ་རྒུའི་ཡོ་བྱད་ཀྱི་དཔལ་འབྱོར་རྨུགས་འཛིན་གྱི་བང་མཛོད་ལ་དགའ་བདེར་སྤྱོད་པ་ལྟ་བུ་དང་བཅས་ཏེ། ཏམ་བུ་རའི་རྒྱུད་ལས་ཉེ་བར་དྲངས་པའི་སྙན་པའི་དབྱངས་དང་དགའ་བའི་གར་གྱིས་འཛིན་མའི་ཁྱོན་མཐའ་དག་རྣམ་པར་གང་བས་སྐབས་གསུམ་པ་ཐམས་ཅད་མེ་ཏོག་གི་ཆར་སོགས་མཆོད་སྤྲིན་མངོན་པར་སྤྲོ་བའི་ཟོལ་གྱིས་ལྟ་བར་ལྷགས་སོ། །སྨྲས་པ། ཞི་བ་མཆོག་གི་མཁའ་དབྱིངས་ལུས་ཕྲའི་མིག །སྡོམ་གསུམ་དབང་གཞུའི་རི་མོ་རྣམ་བཀྲའི་འོད། །ཐུན་མཚམས་དར་ཕབ་གཞོན་ནུ་འགུགས་བྱེད་པའི། །ངེས་ལེགས་ས་བོན་སྲོག་འཚོའི་སྨན་གྱི་བཅུད། །ལོག་འདྲེན་དྲེགས་པའི་རྫུ་འཕྲུལ་ལྕགས་ཀྱི་ཟོང་། །མཁྱེན་བརྩེ་ནུས་(༣༧བ)

---

^{[མ་དཔེ་གཟིགས་ན་འདིར་གནོན།]}

པའི་རྩིས་བསྒྱུར་འཛམ་བུའི་གསེར། །མི་མཐུན་གཡང་དུ་ལོན་པའི་འཁྲུལ་འཁོར་གྱིས། །མུན་གླིང་བསིལ་ཟེར་ཅན་ལས་གཅིག་ཏུ་དཀར། །རིན་ཅེན་སྣ་བདུན་འདོད་རྒུ་སྤྱོད་པ་ལྷའི། །ཕན་བདེའི་སྒོ་འཕར་བརྒྱ་ཕྱེ་གཙུག་ལག་ཁང་། །ལེགས་བྱས་ནོར་བུ་ཆར་དུ་བསྙིལ་བའི་གཟིས། །རུ་བཞིའི་སྐྱེ་རྒུའི་ཅོད་པན་གཙུག་ན་འབར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ཡང་སྦ་བཞེད་སོགས་སྔོན་གྱི་ཡིག་རྙིང་རྣམས་སུ་བསམ་ཡས་བརྩིགས་པའི་དགའ་སྟོན་ལོ་བཅུ་གཉིས་ཀྱི་བར་དུ་བྱས་པས་རྗེ་བློན་རྣམས་རྩེ་སྤོ་ལ་ཡེངས་ནས་གཙུག་ལག་ཁང་གི་མཆོད་པ་དང་ཞབས་ཏོག་མ་བྱུང་བར་བརྟེན། ལུག་གི་ལོ་ལ་ཐམས་ཅད་ཡོད་སྨྲའི་དགེ་སློང་འགའ་ཞིག་སྤྱན་དྲངས་ནས། སྦ་ཁྲི་གཟིགས་ཀྱིས་རབ་ཏུ་བྱུང་བར་བཤད་པ་སོགས་ནི་ལྷད་ཞུགས་པའི་བླུན་ཚིག་སྟེ། དེ་ལྟར་ན་སྦ་བཞེད་དུ་གཙུག་ལག་ཁང་ཡོས་ནས་ཡོས་ལ་བརྩིགས་གྲུབ་པར་བཤད། དགའ་སྟོན་ལོ་བཅུ་གཉིས་ཀྱི་བར་དུ་བྱས་པས། ཡོས་ནས་སྟག་གི་བར་དུ་དུས་སྟོན་གྱིས་ཡེངས་པས་དེ་ལ་བརྟེན་ནས་སྦས་རབ་ཏུ་བྱུང་བའི་རྒྱུ་མཚན་གྱིས། ཐམས་ཅད་ཡོད་སྨྲའི་དགེ་སློང་ཡོས་ཀྱི་ལོ་ལ་གདན་འདྲེན་དགོས་པར། ལུག་ཏུ་བྱས་ན་ལོ་བཞི་ཙམ་གྱི་འཁྱམས་རྒྱུག་པས། བསྟན་བཅོས་ཀྱི་འགོར་བྲིས་པའི་ལོ་ཚིགས་རྣམས་ལ་བསམ་བློ་མ་བཏང་བའི་གཏམ་ཡིན་ཞིང་། སྤྱིར་ཡང་སྐྱེ་བོ་ཡ་རབས་དག་ཀྱང་རང་གིས་འབད་པས་བསྒྲུབས་པའི་བྱ་བ་ཡལ་བར་མི་འདོར་ན། བཙན་པོ་ཁྲི་སྲོང་ལྡེ་བཙན་ལྟ་བུ་རྗེ་བཙུན་བསྟན་པའི་འཁོར་ལོ་འགྲོ་བའི་མགོན་དུ་རྒྱལ་པོའི་ཚུལ་གྱིས་(༣༨ན)

---

^{[མ་དཔེ་གཟིགས་ན་འདིར་གནོན།]}

རྣམ་པར་རོལ་པའི་སྤྲུལ་པའི་གང་ཟག་གི་ཕན་བདེའི་སྨན་ཡོན་དུ་ཐབས་མཁས་ཀྱི་མཛད་པ་བརྒྱ་ཕྲག་གིས་བརྩིགས་པའི་གཙུག་ལག་ཁང་དགའ་སྟོན་གྱི་གཞན་དབང་དུ་བཏང་ནས་མཆོད་པ་དང་ཞབས་ཏོག་མེད་པར་སྨྲ་བ་དམ་པའི་ཡུལ་ལ་སྐུར་པ་བཏབ་པའི་སྒྲིབ་པ་དཔག་ཏུ་མེད་པ་གསོག་ཅིང་། སྐྱེ་བོ་ཐ་ཆད་པ་འགའ་ཞིག་དུས་སྟོན་དུ་མིང་གིས་བཏགས་པའི་ཆང་སོགས་ཀྱིས་བག་མེད་པར་མྱོས་ཏེ། ཆོས་སྲིད་ཀྱི་བྱ་བ་མཐའ་དག་ཡལ་བར་འདོར་བའི་རྣམ་པ་ཆོས་ཀྱི་རྒྱལ་པོ་དེ་དག་ལ་འཆར་བའི་ཚིག་འདི་རྣམས་ལ་བརྟགས་ན། མཁས་པ་ཕལ་ཆེར་གྱི་སྦ་བཞེད་ལ་ཁུངས་སུ་མཛད་ཀྱང་བསླད་པ་མ་ཞུགས་པའི་ཁུངས་ཐུབ་པ་ཞིག་དཀའ་བར་སྣང་ངོ་། །དེ་ལྟར་རབ་གནས་ཀྱི་དགའ་སྟོན་གྲུབ་ནས། རྒྱལ་བའི་བསྟན་པ་རིན་པོ་ཆེ་འཕེལ་རྒྱས་སུ་འབྱུང་བར་བྱེད་པ་ནི་དགེ་འདུན་གྱི་སྡེ་ལ་རག་ལས་པས། བོད་ཡུལ་གྱི་མིས་རབ་ཏུ་བྱུང་བའི་བསླབ་པ་བསྲུང་ནུས་མི་ནུས་བརྟག་པའི་ཕྱིར་དུ། མེ་མོ་ལུག་གི་ལོ་ལ་རྒྱ་གར་དུ་རྩ་བའི་སྡེ་པ་བཞི་ལས་ཐམས་ཅད་ཡོད་པར་སྨྲ་བའི་སྡེ་པ་བོད་དུ་ལེགས་པར་དགོངས་ནས། དགེ་སློང་བཅུ་གཉིས་སྤྱན་དྲངས། གནས་ལྔ་མཁྱེན་པ་ཞི་བ་འཚོས་མཁན་པོ་མཛད་དེ། མྱ་ངན་ལས་འདས་པའི་བསམ་པ་མཆོག་གིས་ཡོངས་སུ་ཟིན་པའི་སད་མི་མི་མདུན་གྱིས་བསྟན་པའི་རྩ་བ་སོ་སོར་ཐར་པའི་སྡོམ་པ་མནོས། དེའི་རྗེས་སུ་བློ་གསལ་ཞིང་ཡིད་གཞུངས་པའི་ལས་ལྡན་གྱི་སྐྱེས་བུ་དུ་མས་རབ་ཏུ་བྱུང་ཞིང་། ཤེས་རབ་ཀྱི་རྩལ་དང་ལྡན་པ་དག་ལ་ལོ་ཙཱ་བསླབས་པས། བྱཱ་ཀ་ར་ཎའི་གནད་མཐའ་དག་ལ་སྒྲོ་འདོགས་ཆོད་ཅིང་། གཞུང་ལུགས་(༣༨བ)

---

^{[མ་དཔེ་གཟིགས་ན་འདིར་གནོན།]}

ཀྱི་དོན་ཁོང་དུ་ཆུད་པའི་འཇིག་རྟེན་གྱི་མིག་གཅིག་པུ་སྐད་གཉིས་སྨྲ་བ་མང་དུ་བྱོན། ལོ་པཎ་དེ་དག་གིས་དམ་པའི་ཆོས་བསྒྱུར་ཞིང་བཤད་ཉན་གྱིས་གཏན་ལ་འབེབས་པར་བྱེད་པ་ལ་མི་བསྲུན་པའི་སྐྱེ་བོ་རྣམས་རང་ཉམས་ཀྱིས་སྤྱོད་པར་མི་ནུས་པའི་ཁྲིམས་བཙན་པོ་ཞིག་དགོས་པས། མེས་སྲོང་བཙན་སྒམ་པོ་སོགས་ཀྱིས་བཀས་བཅད་པའི་ཁྲིམས་ཡིད་བཞིན་གྱི་ནོར་བུ་རིན་པོ་ཆེ་བར་སྐབས་སུ་མི་དགེ་བར་སྤྱོད་པའི་དྲི་མས་ཅུང་ཟད་སྦགས་པ་རྣམས་སླར་བྱི་དོར་མཛད་ནས། རྒྱལ་ཁྲིམས་གསེར་གྱི་གཉའ་ཤིང་ལྟར་ཅི་བས་མཆོག་དམན་ཀུན་གྱི་གཉའ་བ་གནོན་པར་མཛད་དོ། །དེ་ནས་རྒྱ་གར་སོགས་ཡུལ་གྲུ་དུ་མའི་པཎ་གྲུབ་འགའ་ཞིག་སྤྱན་དྲངས། རྒྱལ་པོའི་བཀས། སྡེ་པ་གཞན་གསུམ་བོད་ལ་མི་འཚམ་པས། ཐམས་ཅད་ཡོད་སྨྲའི་ལུགས་ཀྱི་འདུལ་བའི་སྡེ་སྣོད་དང་། གཞན་ཡང་མདོ་སྡེ་དང་། མངོན་པའི་སྡེ་སྣོད་རིན་པོ་ཆེ་རྣམ་པ་གསུམ། རྒྱུད་སྡེ་འོག་མ་རྣམས་བསྒྱུར་བར་བཀས་གནང་བ་བཞིན་བཀའ་བསྟན་བཅོས་མཐའ་དག་བསྒྱུར་ཏེ། བོད་ཆེན་པོའི་རྒྱལ་ཁམས་ཀུན་ཏུ་དམ་པའི་ཆོས་ཀྱི་ཉིན་བྱེད་དབང་པོས་ལུང་དང་རྟོགས་པའི་པད་ཚལ་རྒྱས་པར་མཛད། རྣལ་འབྱོར་ཆེན་པོ་སོགས་ཐེག་པའི་རྩེ་མོ་ཁྱབ་གདལ་དུ་མི་བསྒྱུར་བར། སྣོད་ལྡན་རྣམས་ཀྱིས་སྤྱད་བྱར་བཀས་གནང་སྟེ། ལོ་ཙཱ་བ་ཆེན་པོ་བཻ་རོ་ཙ་ན། དགེ་སློང་ནམ་མཁའི་སྙིང་པོ་སོགས་སྔ་ཕྱིར་རྒྱ་གར་དུ་བྱོན་ཏེ་ཟབ་དོན་བླ་ན་མེད་པའི་བདུད་རྩིའི་ཟིལ་མངར་ཤིང་གི་བུམ་པར་གཏམས་ཏེ། བོད་དུ་བྱོན་ཀྱང་སྡིག་བློན་རྣམས་ཀྱི་ཕྲ་མའི་དབང་གིས་རེ་ཞིག་སྤྱུགས་ནའང་། སླར་སྤྱན་དྲངས། པཎ་ཆེན་བི་མ་ལ་(༣༩ན)

---

^{[མ་དཔེ་གཟིགས་ན་འདིར་གནོན།]}

མི་ཏྲའི་གྲགས་སྙན་གྱི་ནོར་བུ་བཙན་པོའི་འགྲམ་པར་འཕྱང་བས་གདན་དྲངས་ཏེ། རྫོགས་པ་ཆེན་པོའི་ཆོས་ཀྱི་ཟས་རོ་བརྒྱ་བས་ཚིམ་པར་མཛད། སྔར་བོད་འདིར་བོན་དར་ཞིང་ཕལ་ཆེར་དེའི་རྗེས་སུ་འཇུག་པས། ཆོས་སྒྲུབ་པའི་གེགས་མང་དུ་བྱུང་ཡང་། དུས་དེར་ལོ་པཎ་རྣམས་ཀྱི་ས་བོན་གྱི་རིང་ལུགས་མཐའ་དག་དྲི་མ་མེད་པའི་གཏན་ཚིགས་རིག་པས་ཚར་བཅད། སློབ་དཔོན་གྱིས་མཆིམས་ཕུ་སོགས་སུ་ངེས་གསང་རྡོ་རྗེ་ཐེག་པའི་རྒྱུད་སྒྲུབ་ཐབས་མང་དུ་བསྒྱུར་ཏེ། འཇིགས་པ་མེད་པའི་སྒྲོམ་བུར་རྒྱས་བཏབ་ནས་ལས་ཅན་ལ་སྨོན་ལམ་དང་རྗེ་འབངས་དུ་མ་སྨིན་གྲོལ་དུ་མཛད་པའི་མཐུ་ཕུལ་དུ་བྱུང་བའི་ངོ་མཚར་བའི་རྟགས་ཀྱི་གྲགས་པའི་རྣ་རྒྱན་ཕྱོགས་བྲལ་གྱི་རྣ་བའི་ལམ་དུ་དོག་པོར་འགེང་བར་མཛད་དོ། །དེ་ནས་གཙུག་ལག་ཁང་གི་སྲུང་མར་མཁན་སློབ་ཆོས་གསུམ་བཀའ་བགྲོས་ཏེ། རྒྱལ་པོའི་དམག་གིས་བྷ་ཏ་ཧོར་གྱི་སྒོམ་གྲྭ་བཅོམ་པའི་ཀ་ཅའི་རྗེས་སུ་དཔེ་ཧར་འབྲངས་ཏེ་བྱུང་བར་དཀོར་སྲུང་བཅོལ། འགའ་ཞིག་ཏུ་མཁན་སློབ་ཆོས་གསུམ་གྱིས་ཕོ་ཉ་འཕྲིན་ཡིག་མངགས་པ་ལྟར། གཡུའི་ཐུབ་པ་བསེ་འབག །ཟ་ཧོར་རྒྱལ་རིགས་དྷརྨཱ་པཱ་ལ་རྣམས་ཀྱིས་སྣ་དྲངས་པའི་རྗེས་ལ་དཔེ་ཧར་བྱོན་པར་བཤད་པ་འདི་སྐྱེ་འགྲོ་རྣམས་ལ་སྨྱོ་འབོག་སོགས་འཚེ་བ་ཆེ་དྲགས་པར། སློབ་དཔོན་གྱིས་ཨར་ལ་གཏད་པས་བྷ་ཏ་ཧོར་གྱི་ཡུལ་དུ་བྲོས་པར་བཤད་པ་དང་གོ་རིམ་འགྲིག་པར་མངོན་ནོ། །སྨྲས་པ། །མདོ་རྒྱུད་ཆོས་ཕུང་ཡན་ལག་བརྒྱད་ལྡན་ཆབ། །མཁས་གྲུབ་ལོ་པཎ་གངས་རིའི་ཞལ་སྒོ་ལས། །འོངས་པའི་གླེགས་བམ་དལ་འགྲོའི་མཛའ་ན་མོས། །རྒྱལ་བསྟན་རྩ་ལག་མི་(༣༩བ)

---

^{[མ་དཔེ་གཟིགས་ན་འདིར་གནོན།]}

ཕྱེད་དམ་དུ་འཁྱུད། །སྐྱོན་བྲལ་རྟེན་བཟང་རྒྱུད་ཀྱི་ཞིང་ས་ལ། །མྱང་འདས་སེམས་ཀྱི་ས་བོན་གསོལ་བཞིའི་བརླན། །རྣམ་པར་བཞད་པས་ཚུལ་ཁྲིམས་མྱུ་གུའི་འབྲས། །མངོན་མཐོའི་དཔལ་ཡོན་བླ་ན་སྤེལ་བར་ཤིས། །གསང་སྔགས་མཐུ་གྲུབ་རྗེ་འབངས་ཉེར་ལྔ་ཡི། །བརྗོད་བྲལ་བློ་ལས་འདས་པའི་རྫུ་འཕྲུལ་གྱིས། །འཕགས་ཡུལ་གྲུབ་པའི་དབང་ཕྱུག་དམ་པ་རྣམས། །འབྲོག་དགོན་དབེན་པའི་གནས་སུ་ཡིབས་སམ་སྙམ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །རེ་ཞིག་ནས་རྒྱའི་ཧྭ་ཤང་མ་ཧཱ་ཡ་ན་བོད་དུ་འོངས་ཏེ། ལུས་ངག་གི་དགེ་བ་བྱས་པས་འཚང་མི་རྒྱ། ཅི་ཡང་ཡིད་ལ་མི་བྱེད་པས་འཚང་རྒྱ་ཟེར་ནས་སྒོམ་བསླབས་པས་བོད་འབངས་མང་པོ་ལོག་པའི་ལམ་ལ་ཁྲིད། བཙན་པོ་ཡང་བཀས་བཅད་དཀའ་བར་གྱུར་ཀྱང་མཁན་པོའི་གསུང་དྲན་ཏེ། རྒྱ་གར་ནས་ཀ་མ་ལ་ཤཱི་ལ་གདན་དྲངས་པ་བཞིན་བྱོན་ཏེ། ཏྭོན་རྩེན་རྩོད་པས་ཏྭོན་མུན་ཕམ་སྟེ་ཧྭ་ཤང་རྒྱ་ཡུལ་དུ་བརྫངས། དེའི་ལུགས་མི་བྱེད་པར་བཀས་བཅད། ཀ་མ་ལས་སྒོམ་རིམ་གྱི་བསྟན་བཅོས་བརྩམས། སྦ་བཞེད་དུ། བཙན་པོས་རྒྱའི་ཆོས་འདི་མིན་ནམ་བྱས་པས་ཏྭོན་མུན་དང་། ལུས་ལ་མེ་གཏོང་བའི་བརྩེ་བ་དེ་ཆོས་མིན་ནམ་བྱས་པས་བརྩེ་མིན་པར་གྲགས་པར་བཤད་པ་ནི་ལྷད་ཞུགས་པའི་བླུན་ཚིག་གི་རྟོག་བཏགས་ལས་རྒྱུ་མཚན་མེད་ཅིང་། ཏྭོན་མུན་དང་རྩེན་མུན་ཞེས་པ་རྒྱ་ནག་གི་སྐད་དེ། བོད་སྐད་དུ་ཅིག་ཅར་བ་དང་རིམ་གྱིས་པར་འགྱུར་ཞེས་མཁས་པའི་དབང་པོ་བུ་སྟོན་ཞབས་གསུང་བ་ལེགས་སོ། །དེ་ཡང་རྒྱལ་པོ་རྣམ་གནོན་ཞེས་པ་ལྕགས་ཕོ་འབྲུག་གི་ལོ་ལ་བོད་འབངས་(༤༠ན)

---

^{[མ་དཔེ་གཟིགས་ན་འདིར་གནོན།]}

བྱིངས་ཀྱི་སྣང་ངོར་ཚད་པའི་སྙུན་གྱིས་མྱ་ངན་ལས་འདས་ལ། ལས་ལྡན་རྣམས་ཀྱི་ཡིད་ངོར་ཆོས་དབྱིངས་བདེ་བའི་རང་བཞིན་ཟད་མི་ཤེས་པའི་ཆུ་གཏེར་ཆེན་པོར་སྣ་ཚོགས་སྤྲུལ་པའི་བཀོད་པ་ཉལ་འགྲོའི་རྒྱུན་ཀུན་གཉིས་མེད་ཀྱི་ངང་དུ་མཛད་དེ་རྗེ་བཙུན་འཇམ་དཔལ་རྡོ་རྗེའི་ཐུགས་ཀར་ཐིམ་མོ། །བང་སོ་མུ་ར་རི་ལ་བརྩིགས། ཆོས་ཀྱི་རྒྱལ་པོ་འདི་ལ་བཙུན་མོ་འགའ་ཞིག་ཡོད་ཀྱང་ཚེ་སྤོང་བཟའ་ལ་སྲས་གསུམ་བྱུང་བའི་ཆེ་བ་མུ་ནི་བཙན་པོ་རྒྱལ་སར་བསྐོས། འབངས་ཀྱི་ལྟོགས་ཕྱུག་ལན་གསུམ་དུ་སྙོམས་ཀྱང་། མི་འགྱངས་པར་སྔར་བཞིན་གྱུར་པར། ལོ་པཎ་རྣམས་ཀྱིས་སྔོན་གྱི་སྦྱིན་པའི་འབྲས་བུ་ཡིན་པར་གསུངས་པས། རྣམ་དཀར་གྱི་ལས་ལ་ལྷག་པར་མོས་པ་ཐོབ་སྟེ། བསམ་ཡས་སུ་སྡེ་སྣོད་གསུམ་གྱི་མཆོད་པ་བཙུགས། མདོ་སྡེའི་མཆོད་པ་དེང་སང་ཡང་ཡོད། རྒྱལ་སྲིད་མཛད་ནས་ལོ་གཅིག་དང་ཟླ་བ་བདུན་ལ་ཡུམ་གྱི་དུག་བཏང་ནས་གྲོངས། བང་སོ་མུ་ར་རི་ལ་བརྩིགས། མུ་ཁྲི་བཙན་པོ་དང་འདི་གཉིས་དོན་གཅིག་མིང་གི་རྣམ་གྲངས་ཡིན་པ་མ་གོ་བར་དཔའ་བོ་གཙུག་ལག་གིས། འདིའི་གཅེན་དུ་མུ་ཁྲི་བཙན་པོ་བྱུང་བའི་ཐ་ཆད་ཀྱི་གཏམ་སྨྲས་ཤིང་། ཆོས་རྗེ་བསོད་ནམས་གྲགས་པས། ལོ་གཅིག་དང་ཟླ་བ་བདུན་གྱི་རིང་ལ་ལྟོགས་ཕྱུག་ལན་གསུམ་སྙོམས་ལོང་མེད་ཅེས་ཞིབ་པ་ལྟར་སྨྲ་བ་ནི་མུ་ཅོར་ཏེ། སྔོན་གྱི་ལས་འབྲས་ཀྱི་ཤུགས་དགག་པར་མ་ནུས་པའི་བྱེད་པོས་དབུལ་པོ་རྣམས་ལ་མཁོ་རྒུའི་ཡོ་བྱད་ཕུན་སུམ་ཚོགས་པ་བྱིན་ཀྱང་མི་རིང་བར་ཕོངས་པ་ཡིན་ལ། སྐབས་ཤིག་ན་ལྟོགས་ཕྱུག་སྙོམས་པ་ཙམ་དུ་མ་ཟད་འདུས་བྱས་ཐམས་ཅད་འཇིག་པའི་(༤༠བ)

---

^{[མ་དཔེ་གཟིགས་ན་འདིར་གནོན།]}

ཆོས་ཉིད་ཅན་ཡིན་པས་སོ། །འབྲིང་པོ་མུ་རུག་བཙན་པོ་ནི་སྔར་རྒྱལ་པོ་དང་བློན་པོ་ཞང་གཉིས་འཛམ་གླིང་གསུམ་གཉིས་དབང་དུ་བསྡུ་བའི་གྲོས་མཛད་ཚེ། སྲས་ཀྱི་བཀའ་བགྲོས་སར་བྱོན་པས། ཞང་གི་བུ་འུ་རིངས་ཀྱིས་རྗེ་བློན་བཀའ་འགྲོས་སར་རེ་ཞིག་མ་འབྱོན་བྱས་པར། སྲས་ཀྱི་ཆུ་གྲི་བསྣུན་ཏེ་བཀུས། བློན་པོ་འགོས་ཀྱིས་ཞལ་ལྕེ་འདར་གསུམ་དང་དགའ་གསུམ་བཅད་དེ། སྲས་རེ་ཞིག་སྤྱུགས་པ་སླར་མོན་ནས་སྤྱན་དྲངས་ཏེ་རྒྱལ་སྲིད་ལ་བསྐོ་བར་རྩོམ་པ་ན། བློན་པོའི་ཤུལ་མི་ཞང་སྣ་ནམ་གྱིས་བཀྲོངས་སོ། །དེ་ཡང་དཔའ་བོ་གཙུག་ལག་གིས། མུ་ནེ་བཙན་པོ་ཡབ་ཀྱི་དགུང་ལོ་སོ་བཞི་པ་ཆུ་སྟག་ལ་འཁྲུངས་བར་བཤད་པ་ལྟར་ན། ཆུ་ཕོ་སྟག་གི་ལོ་ཆོས་རྒྱལ་དགུང་ལོ་སོ་བཞིར་སླེབ་པ་དངོས་སུ་བསྟན་པས། ཤིང་སྦྲུལ་ལ་སོ་བདུན་པའི་དགུང་སྐག་ཡོད་པས། གོང་དུ་རྒྱལ་པོ་ལྕགས་ཕོ་རྟ་ལ་འཁྲུངས་པ་དག་པའི་ཕྱོགས་བཟུང་བ་དང་། སྦ་བཞེད་དུ་ཡོས་ལ་འཁྲུངས་པའི་བཞེད་པ་བསྒྱུར་བ་སོགས་གང་དང་ཡང་མི་འགྲིག་པའི་ནང་འགལ་གྱི་ཚིག་མངོན་སུམ་དུ་སྟོན་པ་འདི་འདྲ་ནི། གཞུང་ལུགས་ལ་ཐོས་བསམ་བྱས་པ་ལྟ་ཅི་སྨོས་ཤེས་པ་རང་བཞིན་དུ་གནས་པ་སུས་ཀྱང་མི་སྨྲ་བས་གཟུར་གནས་ཀུན་ལེགས་པར་སོམས་ཤིག །སྲས་ཆུང་བ་མུ་ཏིག་བཙན་པོ་སད་ན་ལེགས་འཇིང་ཡོན་གྱིས་དགུང་ལོ་བཞིའི་སྟེང་དུ་རྒྱལ་སྲིད་བཟུང་། སློབ་དཔོན་གྱིས་ཆོས་སྐལ་སྩལ། རྒྱལ་རབས་འགའ་ཞིག་ཏུ་རྒྱལ་པོ་འདིའི་མཚན་ལ་ཁྲི་ལྡེ་སྲོང་བཙན་དུ་འཆད་པ་ནི་སྒྲ་སྦྱོར་བམ་གཉིས་པ་སོགས་མ་མཐོང་བའི་སྐྱོན་ནོ། །ཡབ་མེས་ཀྱི་གཙུག་ལག་ཁང་རྣམས་ལ་མཆོད་པ། ཤུལ་ན་བཞུགས་པའི་ལོ་པཎ་རྣམས་ལ་ཕུལ་(༤༡ན)

---

^{[མ་དཔེ་གཟིགས་ན་འདིར་གནོན།]}

དུ་བྱུང་བའི་བསྙེན་བཀུར་དང་བཅས་ཏེ། སྔར་མ་འགྱུར་བའི་གསུང་རབ་འགའ་ཞིག་བསྒྱུར། བོད་ཀྱི་རྒྱལ་པོ་ལ་ང་ཆེ་བས་ལྷ་ཁང་ཉི་མ་ཙམ་ཞིག་རྩིག་གོ་གསུངས་པས། སློབ་དཔོན་མཛོད་མཁན་གྱིས་ཉི་མའི་རྒྱར་དཔག་ཚད་ལྔ་བཅུ་རྩ་གཅིག་ཡོད་པས། བོད་འདིར་མི་ཤོང་ཞེས་ཞུས་པར། ཟླ་བ་ཙམ་ཞིག་རྩིག་གསུང་བར་དེ་ཡང་སྔོན་དང་འདྲ་ཚུལ་སྨྲས། སྐར་མ་ཙམ་ཞིག་རྩིག་གསུང་བར་རྒྱང་གྲགས་བཅོ་བརྒྱད་ཡོད་ཚུལ་བཞིན། བྱང་འབྲོག་གི་ཐང་ཡངས་ས་ཞིག་ཏུ་རྩིག་པར་བཀའ་གནང་བས། བློན་པོ་ཀུན་གྱིས་བྱང་དུ་བརྩིགས་ན་ལྷ་ཁང་སྟོང་པར་ལུས་འགྲོ་ཚུལ་ཞུས་པ་དང་། སླར་རྗེ་འབངས་ཀུན་གྲོས་མཐུན་པར། རྒྱལ་སྡེ་དཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། བོད་ཀུན་ཕན་པ་དང་བདེ་བའི་ལམ་དུ་འགོད་པར་མཛད་ནས་གཤེགས་ཏེ། བང་སོ་འཕྲུལ་རྒྱལ་མདུན་ན་བརྩིགས་སོ། །དེ་ཡང་ལྷ་སྲས་མུ་ཏིག་བཙན་པོ་དང་། སད་ན་ལེགས་མཇིང་ཡོན་དོན་གཅིག་མིང་གི་རྣམ་གྲངས་ཡིན་ཅིང་། རྒྱལ་སྲས་ལྷ་རྗེ་དེའི་སྲས་ཡིན་པ་སོགས་རང་ཉིད་ཀྱི་རྒྱུ་མཚན་གོ་རིམ་མ་ངེས་པར། དཔའ་བོ་གཙུག་ལག་གིས། ཡིག་ཆ་གཞན་དག་ལ་ཕྱི་རབས་ཀྱི་རྩོམ་རིགས་ཁོ་ནར་སྣང་བའི་དཔྱད་མི་བཟོད་པ་སོགས་སྨྲ་བ་ནི། རྗེ་བཙུན་ས་པཎ་གྱིས། ཁྭ་ཏས་མི་གཙང་ཟོས་པའི་མཆུ། །གཙང་མའི་ངོས་ལ་འབད་དེ་འཕྱིད། །ཞེས་པའི་དོན་དང་མཚུངས་པས། ཕུ་ཐག་མཆོད་པའི་ཅལ་ཅོལ་གྱི་གཏམ་ཉུང་བར་བྱོས་ཤིག །རྒྱལ་པོ་དེ་ལ་སྲས་གཙང་མ། ལྷ་རྗེ། ལྷུན་གྲུབ། དར་མ། རལ་པ་ཅན་དང་ལྔ་བྱུང་ཀྱང་། ལྷུན་གྲུབ་ཆུང་ངུར་(༤༡བ)

---

^{[མ་དཔེ་གཟིགས་ན་འདིར་གནོན།]}

གཤེགས་པས་བང་སོ་མེད། ལྷ་རྗེ་ནི་དགུང་ལོ་བཅོ་ལྔ་ལ་གཤེགས་པའི་བུར་སྐྱེ་བ་བདུན་པ་ཤེལ་གྱི་བྲག་ལ་རྒྱས་བཏབ་བོ། །སྨྲས་པ། དཔལ་ལྡན་གསང་བ་ཀུན་གྱི་གན་མཛོད་ལས་འོངས་འཛམ་བུ་ནཱ་ད་མཆོག །ལུས་ཅན་ཡོངས་ཀྱི་བླ་ན་སྤྱོད་པའི་མི་བདག་མཆོད་སྡོང་རབ་འབར་བར། །གྲུབ་པའི་རང་གཟུགས་ཟློས་གར་གསར་པ་ཁམས་གསུམ་མན་ཤེལ་རྩིག་ངོས་ལ། །ཤར་བའི་ས་སྤྱོད་འགྲོ་འདིའི་བསོད་ནམས་འབུམ་ཕྲག་ཟོང་གིས་ཁུགས་ཡས་ཅི། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །སྲས་ཆེ་བ་གཙང་མ་ནི། སྲིད་པའི་ཕུན་ཚོགས་ཀྱི་དགའ་སྟོན་མཐའ་དག་ལྷ་ལམ་ལུས་ཕྲའི་བཞིན་རས་ཀྱི་ངོས་སུ་འདྲེན་བྱེད་རླུང་གི་རྒྱལ་མཚན་འཁྱུག་པ་ལྟར་མི་བརྟན་ཞིང་། ཉེས་པ་བརྒྱ་ཕྲག་བསྐྱེད་པའི་རྩ་བར་གཟིགས་ཏེ་མྱ་ངན་ལས་འདས་པའི་བསམ་པ་མཆོག་གིས་ཟིན་པའི་སྒོ་ནས་རྒྱལ་བའི་བསྟན་པ་རིན་པོ་ཆེ་ལ་ཞུགས། དེ་འོག་དར་མ་ནི། རྣམ་པར་དཀར་བའི་དགེ་ཚོགས་བསྒྲུབ་པའི་བསམ་པ་ལས་ཕྱི་རོལ་ཏུ་གྱུར་ཏེ། ཆུ་སྲིན་རྒྱལ་མཚན་ཅན་གྱི་རྗེས་སུ་འཇུག་པའི་ཅེ་སྤྱང་ལ་རྒྱལ་ཁྲིམས་དམ་པའི་ཆོས་ཀྱིས་སྐྱོང་བའི་རྗེ་བོ་གདོང་ལྔའི་དབང་པོ་འཁོད་པའི་གདན་ཁྲིར་མངའ་གསོལ་བ། གཙུག་ལག་ལུགས་གཉིས་དང་མི་མཐུན་པར་འཕྲུལ་ལྡན་རིག་པའི་སྲས་ཀྱི་ཁྲིམས་ཀྱི་ཅང་ཤེས་ཁ་ལོ་མངོན་པར་སྒྱུར་བ་རྣམས་ཀྱིས་རྟོགས་ཏེ། མཐུ་སྟོབས་ཀྱི་དབང་ཕྱུག་གསང་བའི་བདག་པོ་རྗེ་བཙུན་ཕྱག་ན་པདྨ་དང་། ཟུར་ཕུད་ལྔ་པ་མིའི་སྲིད་པ་བཟུང་ནས་དགེ་ལེགས་ཀྱི་མཚན་མ་མཆོག་ཏུ་དྭངས་པའི་རི་མོ་སྣང་བརྙན་སླར་ཡང་དཔྱད་པ་གསུམ་གྱིས་ར་རིའི་དྲི་མ་ཙམ་ཡང་(༤༢ན)

---

^{[མ་དཔེ་གཟིགས་ན་འདིར་གནོན།]}

དྲུངས་ནས་ཕྱུང་སྟེ་རྣམ་པར་དཀར་བའི་མཛད་པ་བླ་ལྷག་ཏུ་སྟོན་པའི་ཆེད་དུ་འཇིག་རྟེན་ཀུན་གྱི་ཅོད་པན་ལ་ཞབས་སེན་པདྨ་དཀར་པོའི་ཆུན་བུ་མཛེས་བྱེད་ཀྱི་རྒྱན་དུ་སྤུད་པའི་རིགས་སྟོབས་ཀྱིས་ཁྱད་པར་དུ་འཕགས་པའི་ཟ་མ་ཏོག་ཏུ་དབང་ཕྱུག་བརྒྱད་ཀྱི་ཡོན་ཏན་འཕྱུར་བུར་བལྟམས་པའི་མངའ་བདག་ཁྲི་ལྡེ་སྲོང་བཙན་རལ་པ་ཅན་བོད་འབངས་ཡོངས་ཀྱི་རལ་པའི་ལན་བུ་རྣམ་པར་འདུད་པའི་སེང་གེ་རྐང་པ་བརྒྱད་པའི་ཁྲི་ལ་མངའ་གསོལ། དེ་ཡང་མངའ་བདག་འདི་མི་ཟད་པ་ཞེས་པ་མེ་ཕོ་ཁྱིའི་ལོ་ལ་འཁྲུངས་པ་ནས་བཟུང་སྟེ་ལང་ཚོ་གཞོན་ནུའི་དུས་ཉིད་ནས་སྔོན་གྱི་བག་ཆགས་བཟང་པོ་སད་པའི་རྣམ་འགྱུར་ཅི་ཡང་མཛད་ཅིང་། ཁྱད་པར་ཁྲི་ཐོག་ཏུ་ཕེབས་ནས་རྒྱལ་ཐབས་ཀྱི་བྱ་བ་ལེགས་བྱས་ཀྱི་རྒྱུར་བསྒྲུབས་ནས་འབྲས་བུའི་དགའ་སྟོན་ལ་སྤྱོད་པར་རབ་ཏུ་ཆས་པ། ཆོས་བློན་བྲན་ཁ་དཔལ་གྱི་ཡོན་ཏན་གྱིས་བྱས། སྒྲ་སྦྱོར་བམ་གཉིས་པ་ལས། རྟའི་ལོ་ལ་བཙན་པོ་ཁྲི་ལྡེ་སྲོང་བཙན་ཕོ་བྲང་གིའུ་ཤང་རྡོ་ན་བཞུགས། སྟོད་སྨད་ཀྱི་དམག་རྗེ་དང་རྐུན་ཆེན་བཏུལ། གར་ལོག་གི་ཕོ་ཉས་ཕྱག་འཚལ་ཞེས་སོགས་ལྟར། ཉི་འོག་གི་མཁན་པོ་ཛེ་ན་མི་ཏྲ། སུ་རེན་ཏྲ་བོ་དྷི། དྷ་ན་ཤཱི་ལ་སོགས་པཎྜི་ཏ་དུ་མ་དང་། ལོ་ཙཱ་བ་སྐ་ཅོག་སོགས་གདན་འཛོམ་པར་བྱས་ཏེ། སྔར་ཡབ་མེས་ཀྱི་རིང་ལ་མདོ་སྔགས་ཀྱི་ཆོས་ཕལ་ཆེ་བ་བསྒྱུར་ཟིན་ནའང་། ཡུལ་དབུས་འགྱུར། ཨོ་རྒྱན། བལ་ཡུལ། རྒྱ་ནག་སོགས་སྐད་དུ་མ་ལ་བརྟེན་ནས་བསྒྱུར་བའི་བོད་སྐད་ལ་བསྒྱུར་དུ་མ་བཏུབ་པ་འགའ་ཞིག་སོ་སོའི་རང་སྐད་དུ་བཞག་པས་གོ་དཀའ་ཞིང་། བརྡ་རྙིང་དང་སྡེབ་འགའ་ཞིག་ལ་བརྟེན་ནས་འགྱུར་མི་བདེ་བ་དང་ཀླག་(༤༢བ)

---

^{[མ་དཔེ་གཟིགས་ན་འདིར་གནོན།]}

དཀའ་ཞིང་ལེགས་སྦྱར་གྱི་སྐད་དང་མི་མཐུན་པ་རྣམས་དབུས་འགྱུར་གྱི་རྒྱ་དཔེ་སཾ་སྐྲྀ་ཏའི་ལུགས་གཞིར་བྱས་པ་རྣམས་དང་སྒོ་བསྟུན། རྒྱ་དཔེའི་བཅད་ལྷུག་སྤེལ་མའི་སྡེབ་སྦྱོར་སོགས་བོད་སྐད་ལ་ཇི་བཞིན་མི་འབྱུང་ཞིང་། དེ་དང་བསྟུན་ན་གོ་མི་བདེ་བས་དོན་རྟོགས་སླ་བ་གཙོ་བོར་བྱས། རྒྱ་སྐད་དུ་ཚིག་བསྡོམས་པ་རྣམས་དེ་ལྟར་བསྒྱུར་ན་གངས་ཅན་ལྗོངས་ཀྱི་སྐད་དུ་འཕྱུགས་འགྲོ་བ་དག་ཕྲལ་ཏེ་བསྒྱུར་བ། ཀུ་ཤ་ལ་ཨི་ཀཎ་གྱི་རྐྱེན་བྱིན་པའི་ཀཽ་ཤི་ཀ་ལྟ་བུ་སྒྲ་གཅིག་དོན་མང་གཅིག་ཏུ་འཆད་པར་གཏན་ཚིགས་ཀྱིས་བསྒྲུབ་དཀའ་བ་ཀུན་རང་སོར་བཞག །མདོར་ན་བྱིངས་ལས་མིང་དང་ཚིག་གིས་བསྒྲུབས་ཤིང་། རྣམ་དབྱེ་དེ་ཕན་ཉེ་སྒྱུར་ཚིག་ཕྲད་སོགས་མཐའ་དག་ལ་ཞིབ་མོར་དཔྱད། དེ་ཉིད་བོད་ཀྱི་སྐད་ལ་དོན་འགྱུར་གཙོ་བོར་བྱས་ཏེ་གཏན་ལ་ཕབ། ཆོས་ཀྱི་རྒྱལ་པོ་མེས་དབོན་གྱི་རིང་ལ་མཆོག་དམན་མཐའ་དག་གི་སེམས་ཀྱི་རི་དྭགས་རང་ཉམས་སུ་འཁྱམ་པར་མི་ནུས་པའི་ཞགས་པ་དམ་པོས་ཡངས་པའི་རྒྱལ་ཁམས་མཐའ་དག་རང་སར་བདེ་བའི་ཁྲིམས་ཀྱི་བྱ་བ་མཐའ་ཀླས་པར་མཛད་པས། ཡིད་འཕྲོག་མའི་གཏམ་རྒྱུད་ལས། བྱང་ཕྱོགས་ལྔ་ལྡན་སྐྱིད་ཅིང་རྒྱལ་བ་དེ། རྒྱལ་པོ་དེ་ཡི་རྒྱལ་ཁྲིམས་ཆོས་བཞིན་སྤྱད་པ་དང་། འབངས་འཁོར་གཡོག་རྣམས་ཀྱིས་རྒྱལ་པོའི་བཀའ་ལ་ཉན་པས་སྐྱིད་པ་ཡིན་ཞེས་པའི་དོན་དང་མཐུན་པར་གྱུར་ཅིང་། དེ་ཡང་ཁྲིམས་ནི་བོད་རྒན་པོ་ཡ་རབས་རྣམས་ཀྱི་གླེང་བའི་སྲིད་པའི་ཁོག་རུབ་ཆེན་པོ་ལ་དོན་སུམ་ཅུ་རྩ་གཉིས་སུ་གྲགས་པའི་བཅུ་དགུ་པ་ཁྲིམས་ཆེན་པོ་ལ། ཁྲི་རྩེ་འབུམ་གཞེར་གྱི་ཁྲིམས། གསེར་ཐང་ཤ་བ་ཅན་གྱི་ཁྲིམས། རྒྱལ་ཁམས་དཔེ་བླངས་ཀྱི་ཁྲིམས། མདོ་(༤༣ན)

---

^{[མ་དཔེ་གཟིགས་ན་འདིར་གནོན།]}

ལོན་ཞུས་བཅད་ཀྱི་ཁྲིམས། དཀོན་ཅོག་གི་ཆོས་ཁྲིམས། ཇོ་མོ་མངའ་དགས་ཀྱི་ཁྲིམས་དང་དྲུག་ཏུ་ཕྱེ་བས། ངན་ལ་ཆད་པ་གཅོད་ཅིང་བཟང་ལ་བྱ་དགའ་སྟེར། མཐོ་བའི་གཉའ་ནས་གནོན་ཅིང་དམའ་བ་ཐབས་ཀྱིས་སྐྱོང་བའི་བཀའ་ཁྲིམས་ཀྱི་སྲོལ་བཟང་པོའི་འོད་སྣང་སྲིད་རྩེའི་བར་དུ་ཁྱབ་པའི་བདེ་སྐྱིད་ཀྱི་པུཎྜ་རི་ཀ་ཆེས་ཆེར་རྒྱས་པ་བར་སྐབས་སུ། སྡིག་བློན་མི་གཙང་བའི་འདམ་གྱི་དྲི་མས་ཅུང་ཟད་སྦགས་པ་ལྷག་མ་ཙམ་ཡང་དག་པར་མཛད་དེ་ཡངས་པའི་ནོར་འཛིན་གྱི་ཁྱོན་ཀུན་ཏུ་དྲིལ་བསྒྲགས་གཞན་ཡང་སྨན་གྱི་བཅོས་ལུགས་བཞི། དཔྱད་མཁན་གྱི་གབ་རྩེ་ལྔ། ཡ་རབས་ཀྱི་སྐྱེན་བདུན། མཛངས་པའི་མིག་བཅུ་གཉིས། ཕོ་ལྟང་གི་ཉེར་བརྒྱད། མོ་ལྟང་གི་ཉེར་བཅུ་གཉིས། ཕྱག་རྒྱ་དྲུག །རྒྱལ་པོའི་གདན་བཞི། བློན་པོའི་གྲལ་བརྒྱད། ཕྱག་རྐ་རྩ་བུ་བརྒྱད། མཛའ་སྡུམ་བཞི་སོགས་བོད་འབངས་ཀྱི་གཏམ་དང་ཡིག་ཚང་དུ་གྲགས་ཤིང་། ལག་ཏུ་སྟེར་འོས་པ་རྣམས་ལེན་པའི་སྲོལ་ཆོས་ཀྱི་རྒྱལ་པོ་འདི་ཡན་དུ་མ་ཉམས་པར་གནས་པ་ཡིན་ནོ། །དཔའ་བོ་གཙུག་ལག་གིས། གསང་སྔགས་རྫོགས་འཚང་རྒྱ་བའི་རྒྱུ། །ནོར་བུ་མི་བཙོང་སྙིང་ལ་བཅང་། །ཞེས་པའི་ཁྲིམས། ཆོས་རྒྱལ་སྲོང་བཙན་སྒམ་པོའི་སྐབས་བྱུང་བར་སྨྲ་བ་ནི་བླུན་ཚིག་སྟེ། ཆོས་རྒྱལ་གྱི་དུས་སྣོད་ལྡན་འགའ་ཞིག་ལ་བཙན་པོ་རང་གི་ཐུགས་རྗེ་ཆེན་པོ་ཞི་ཁྲོ་སོགས་གནང་བ་ལས། གསང་སྔགས་ཀྱི་ཆོས་ནོར་གྱི་ཕྱིར་འཚོང་པ་ལྟ་བུའི་ཁྱབ་གདལ་དུ་གྲགས་པ་མེད་པས། ཁྱད་གཞི་མེད་པའི་ཁྱད་ཆོས་དང་། དགེ་བཅུའི་ཁྲིམས་ཀྱི་སྟེང་དུ་མི་ཆོས་གཙང་མ་བཅུ་དྲུག་གི་ཁྲིམས་མཛད་པར། དེ་གཉིས་དྲིལ་བས་བཅུ་དྲུག་ཡིན་པ་ལྟར་སྨྲ་བ་སོགས། འཆལ་(༤༣བ)

---

^{[མ་དཔེ་གཟིགས་ན་འདིར་གནོན།]}

ཤིན་ཏུ་མང་ངོ་། །འདིའི་དུས་སུ་རྒྱ་བོད་གཉིས་མ་མཐུན་པར། གཏུམ་དྲག་རྔམ་བརྗིད་དང་ལྡན་པའི་དམག་གི་དཔུང་ཚོགས་ཆེན་པོ་རྒྱ་ནག་པོའི་ཡུལ་དུ་གཡུལ་བཤམས་ཏེ། ཙི་ནའི་རྒྱལ་ཁམས་དུ་མ་བཅོམ་ཞིང་། མི་དཔོན་དང་། དཔའ་བོ་སྟག་ཤར་མང་དུ་བསད་དེ་ཆམ་ལ་ཕབ། དེ་ནས་རྒྱའི་ཧྭ་ཤང་དང་བོད་ཀྱི་ལོ་པཎ་རྣམས་ཀྱིས་བར་དུ་བཞུགས་དེ་ཚིག་གི་སྦྱངས་བཤད་ཀྱིས་དབོན་ཞང་མཐུན་པར་མཛད། རྒྱའི་གུང་གུ་རྨེ་རུར་རྡོ་རིང་ཞིག་བཙུགས་ཏེ་རྒྱ་བོད་ཀྱི་ས་མཚམས་སུ་བཅད་ནས་ཕན་ཚུན་གཉིས་ཀས་ས་མཚམས་ལས་ཕྱི་རོལ་དུ་བསྒྲལ་བའི་དམག་གི་གཡུལ་བཤམས་པ་སོགས་མི་བྱེད་པའི་དཔང་དུ་ལྷ་ཀླུ་གཉན་པོ་བཞག་སྟེ་བྲོ་བོར་བའི་ཡི་གེ་ལྷ་ས། རྒྱ་རྗེའི་ཕོ་བྲང་། རྨེ་རུ་གསུམ་གྱི་རྡོ་རིངས་ལ་བྲིས། དུས་དེར་རྒྱ་བོད་གཉིས་མཐུན་ཞིང་འབྲེལ་བཟང་བར་བྱུང་བས། གནམ་ལ་ཉི་ཟླ་ཟུང་གཅིག་དང་། ས་ལ་བཙན་པོ་དབོན་ཞང་ཞེས་གླེང་སྐད། དེ་ཡང་བཙན་པོའི་ཐུགས་སུ་འགྲོ་བ་ཀུན་ལ་ཕན་པ་དང་བདེ་བ་མ་ལུས་པར་འབྱུང་བའི་སྒོ་དམ་པ་ནི་ལུང་དང་རྟོགས་པའི་བསྟན་པ་རིན་པོ་ཆེ་ལ་རག་ལས་ཤིང་དེ་འཛིན་ཞིང་སྤེལ་བར་བྱེད་པ་དགེ་འདུན་ལ་ལྟོས་པར་དགོངས་ཏེ། དབུ་སྐྲ་ལ་དར་ཡུག་བཏགས་པའི་སྟེང་ལ་རབ་ཏུ་བྱུང་བ་རྣམས་བཞུགས་སུ་འཇུག་པ་དང་། དགེ་འདུན་མི་རེ་ལ་འབངས་མི་ཁྱིམ་བདུན་དུ་བཅད་དེ་འབུལ་བ་སོགས་འཕགས་པའི་ཡུལ་དུ་བྱུང་བའི་ཆོས་ཀྱི་རྒྱལ་པོ་རྣམས་ཀྱི་མཛད་པ་ལས་བླ་ལྷག་ཏུ་གྱུར་པའི་མཛད་པ་བཟང་པོའི་གཏམ་ཀུན་གསལ་གྱི་མཐའ་ཀླས་པར་ཁྱབ་བོ། །དེ་ནས་མེས་རྣམས་ཀྱི་གཙུག་ལག་ཁང་ལ་རྙེད་བཀུར་ཞིག་གསོས་མཛད་ཅིང་། གསར་དུ་གཙུག་ལག་ཁང་འོག་ཐོག་གསུམ་(༤༤ན)

---

^{[མ་དཔེ་གཟིགས་ན་འདིར་གནོན།]}

རྡོ། བར་ཐོག་གསུམ་ས་ཕག །སྟེང་ཐོག་གསུམ་ཤིང་ལས་གྲུབ་པ། ཐོག་རེ་རེ་བཞིན་བྱ་འདབ། སྒོ་ཕ་གུ་དྲ་ཕྱེད་སོགས་ཀྱིས་རྣམ་པར་མཛེས་ཤིང་། སྟེང་གི་རྒྱ་ཕུབ་རླུང་གིས་བསྐྱོད་ཚེ་གདུགས་ལྟར་འཁོར་བའི་ངོ་མཚར་གྱི་ཆུ་འཛིན་འཕྲེང་བ་ཡིད་ཀྱི་སྐབས་གསུམ་པའི་ལམ་དུ་འཁྲིགས་པ་ལས། ཆེད་དུ་བརྗོད་པའི་དབྱར་སྐྱེས་ཀྱི་རྔ་གསང་ཕྱོགས་བྲལ་གཙུག་ཕུད་ཅན་གྱི་རྣ་བར་སྒྲོག་པའི་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས་པའི་སྟེང་ཐོག་ཏུ་མཆོག་གསུམ་དམ་པའི་སྐུ་གསུང་ཐུགས་ཀྱི་རྟེན་རྣམས་བཞུགས། བར་གྱི་ཐོག་གསུམ་དུ་ལོ་པཎ་རྣམས་ཀློག་པ་ཐོས་བསམ་དང་སྤོང་བ་བསམ་གཏན་གྱིས་དུས་མདའ། འོག་ཐོག་གསུམ་དུ་རྗེ་བློན་རྣམས་སྡེ་བཞིའི་སྒོ་འཕར་བརྒྱ་ཕྲག་མངོན་པར་ཕྱེ་ནས་མཆོག་དམན་ཀུན་ལ་བདེ་སྐྱིད་ཀྱི་དཔལ་འབྱོར་ཆར་དུ་བསྙིལ་ལོ། །སྨྲས་པ། སྡེ་བཞིའི་ཆ་ཤས་ཡོངས་རྫོགས་རྒྱལ་ཐབས་ཀྱི། །འཁོར་ལོ་ལྷ་ལམ་འཛིན་མར་རྒྱུ་བའི་འོད། །ཕན་བདེའི་ས་སྨོས་འཕྲེང་བ་རབ་བཞད་ཚེ། །ལེགས་བྱས་ག་བུར་གསར་པའི་ཐིགས་པ་འཛག །གངས་ཅན་ཁ་བའི་ངོས་སུ་སུམ་རྩེན་མདངས། །དྲི་བྲལ་གསར་དུ་འཕོས་པའི་སྒྱུ་མའི་གྲོང་། །སྔོན་མེད་གཙུག་ལག་གཟུགས་བརྙན་ངོ་མཚར་གཏམ། །སྐབས་གསུམ་པ་རྣམས་གླེང་བའི་ཅ་ཅོ་སྒྲོག །རྩོད་ལྡན་ས་འཛིན་བགྲོད་པ་ཁྲིམས་གཉིས་ཀྱི། །གཞོམ་མེད་རྡོ་རྗེ་རྩེ་བརྒྱས་བཅོམ་པའི་ཚེ། །རྫོགས་ལྡན་གསར་པའི་མགྲོན་དེ་འགུགས་པའི་སླད། །ཕན་བདེའི་གཉིས་འཐུང་སྣ་ཞབས་རིང་དུ་རྐྱོང་། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལྟར་ཚུལ་(༤༤བ)

---

^{[མ་དཔེ་གཟིགས་ན་འདིར་གནོན།]}

བཞིན་རྣམ་པར་སྤྱོད་པ་མ་ཡིན་པའི་སྟོབས་ཀྱི་ཁེངས་པས་དྲེགས་པ་མཐའ་དག་རང་ཉམས་སུ་བྱེད་པའི་ལུགས་ཀུན་ཆུ་ཤིང་གི་སྙིང་པོ་ལྟ་བུར་མཛད་དེ་རབ་ཏུ་ལྕི་བའི་རིན་པོ་ཆེའི་གདན་ཁྲི་ལ་གཡོ་བ་མེད་པའི་ཕྱོགས་ལས་རྣམ་པར་རྒྱལ་བའི་གདུགས་དཀར་པོའི་ཁོར་ཡུག་བདེ་སྐྱིད་ཀྱི་གྲིབ་བསིལ་ལ། སྐྱེ་རྒུ་མཐའ་དག་ངལ་གསོའི་བདེ་བ་ལ་སྤྱོད་པའི་སྐབས། ནག་པོའི་ཕྱོགས་ཀྱིས་ཡིད་རྣམ་པར་བརླམས་པའི་སྡིག་བློན་རྣམས་མི་བཟོད་བའི་ཟུག་རྔུ་ཆེན་པོས་མནར་བར་གྱུར་ཏེ། ཆོས་ཁྲིམས་འཇིག་པའི་གྲོས་བཤམས་ནས། མོ་རྩིས་མཁན་པོ་རྣམས་བྱ་དགས་ཚིམས་པར་བྱས་ནས། ལྷ་སྲས་གཙང་མ་མ་སྤྱུགས་ན། རྒྱལ་སྲིད་འཇིག་པར་ལུང་བསྟན་པ་བཞིན་དུ་མོན་ལ་སྤྱུགས། སྦས་སྟག་སྣས་བློན་པོ་བྲན་ཁ་དཔལ་ཡོན་དང་བཙུན་མོ་གཉིས་མཐུན་ཞེས་རྒྱལ་པོ་ལ་ཕྲ་མ་བཅུག་པས། བཙུན་མོ་ངང་ཚུལ་ལྕེབས། བྲན་ཆེན་པོས་ལྕགས་ཀྱི་སྲོག་རྩ་བསྒྲུབས་པས་མ་འགྲུབ་པར་བཀུམ། དེ་རྗེས་བཙད་པོ་བློ་ངན་ཞེས་པ་ཆུ་མོ་བྱའི་ལོ་ལ་སྦས་སྟག་སྣ་སོགས་སྡིག་བློན་རྣམས་ཀྱིས་ཞལ་ལྟག་པའི་ངོས་སུ་གཅུས་ཏེ་བཀྲོངས་ནས་བང་སོ་དོན་མཁར་མདའི་གཡོན་ཕྱོགས་སུ་བརྩིགས་སོ། །དེ་ནས་རི་དྭགས་མཚན་མ་ཅན་གྱི་ཀཽ་མུ་དཱི་རྣ་བ་བརྒྱད་པའི་བྱེད་པོས། སཱ་ལའི་ནགས་ལྗོངས་ཀྱི་ཡུལ་གྲུར་ཁོར་ཡུག་ཚར་དུ་དངར་བའི་སྤྲིན་གྱི་སོ་ཅན་དག་གི་ལོངས་སུ་སྤྱོད་པའི་ཤེད་ལས་སྐྱེས་མཐའ་དག་གི་བདེ་ལེགས་ཀྱི་མཐུ་ཤིན་ཏུ་ཕྲ་བར་གྱུར་པས། གྱ་གྱུའི་བྲོ་གར་རྩེ་བའི་མདུན་ན་འདོན་བཟློག་ཏུ་མེད་པའི་ལས་ཀྱི་མཐུ་མི་ཟད་པའི་ཆུ་འཛིན་གྱི་འཕྲེང་བ་སྟུག་པོ་ལས། མི་དགེ་བ་བཅུ་ལ་བག་མེད་པར་སྤྱོད་པའི་སྐྱིན་ཐང་དྲག་པོས་ལེགས་བྱས་(༤༥ན)

---

^{[མ་དཔེ་གཟིགས་ན་འདིར་གནོན།]}

དཔྱིད་ཀྱི་མ་མའི་མངལ་ཁུར་ལས་འདས་པའི་ཐུབ་བསྟན་མྱུ་གུའི་འཁྲི་ཤིང་གསར་པ་མིང་ཙམ་དུ་གྱུར་པས། ཚངས་འཇོམས་སྡེར་བཅས་རྣམ་པར་དགེ་བའི་གཡུལ་ལས་རྒྱལ་བའི་ཀུ་ཅོ་དྲག་པོ་འདོན་བཞིན་དུ། གླང་དར་མ་འུ་དུམ་བཙན་རྒྱལ་སྲིད་དུ་དབང་བསྐུར། སྦས་སྟག་སྣས་ནང་བློན་བྱས་ཏེ། ཆོས་བསྣུབ་པར་བསམས་ཀྱང་བསྙད་མ་རྙེད་པའི་སྐབས་སུ། སང་སར་མུ་གེ་ནད་ཡམས་འགའ་ཞིག་བྱུང་བ་ལ་བསྙད་གདགས་པར་འདོད་དེ་འབངས་རྣམས་ལ་རྒྱུ་མཚན་དྲིས་པས་མ་ཤེས་ཟེར་བར། བཙད་པོས་རྒྱ་མོ་ཀོང་ཇོ་ཞེས་བྱ་བའི་གནོད་སྦྱིན་མོ་ཞིག་གིས་གནོད་སྦྱིན་གྱི་ལྷ་ཤཱཀྱ་མུ་ནི་བྱ་བ་བོད་དུ་ཁྱེར་འོངས་པས་ལན་ཏེ། དེ་ཡང་དང་པོར་ལྷ་འདི་རི་རབ་ཀྱི་རྩེར་འོངས་པས་ལྷ་རྣམས་ཀྱི་གཡུལ་ཕམ་ཞིང་འོངས། དེ་ནས་ཨོ་རྒྱན་མ་ག་དྷ་རྒྱ་ནག་སོགས་སུ་རིམ་གྱིས་འོངས་པས་མི་ཤིས་པ་བྱུང་བ་སོགས་ཡིད་ནག་པོའི་གདོན་གྱིས་བསྐྱོང་བའི་གཏམ་དུ་མ་སྨྲས། ལོ་པཎ་ཕལ་ཆེར་གཞན་དུ་བྲོས་ཤིང་། མ་བྱོན་པ་འགའ་ཞིག་བཀུམ། རབ་བྱུང་ཕལ་ཆེར་འདུལ་བའི་སྡེ་སྣོད་ལས་གསང་བའི་རྟགས་དང་བྲལ་ཞིང་། མི་ཉན་པ་རྣམས་རྔོན་པ་བྱེད་དུ་བཅུག །གསུང་རབ་ཕལ་ཆེར་ལྷ་སའི་བྲག་ལ་སྦས་ཤིང་། འགའ་ཞིག་མེ་དང་ཆུར་སྦྱངས། གཙུག་ལག་ཁང་རྣམས་འཇིག་པའི་ཐོག་མ་འཕྲུལ་སྣང་ནས་བྱ་བར་བརྩམས་ཏེ། ཇོ་བོ་རྣམ་གཉིས་ཆུ་ལ་བསྐྱུར་བའི་གཏམ་སྨྲས་པ་དང་། བློན་པོ་ཆོས་ལ་དགའ་བ་རྣམས་ཀྱིས། སྐུ་གཟུགས་ཧ་ཅང་ལྕི་བས་སྐུ་ལས་ནུས་པར་བསྙད་བཏགས་ཏེ་བྱེ་ལྟོངས་སུ་སྦས། བྱམས་པ་ཆོས་འཁོར་ཡིན་པ་ལྟར་བྱས་ནས་རྡོ་མཚོ་ལ་བསྐྱུར་ཏེ་ཀུ་སྒྲ་ཆེན་པོ་བཏོན་(༤༥བ)

---

^{[མ་དཔེ་གཟིགས་ན་འདིར་གནོན།]}

པས། བསམ་ཡས། ར་མོ་ཆེ་རྣམས་ཀྱི་གཙུག་ལག་ཁང་གི་སྒོ་ལ་ཞལ་བ་བྱས། རྒྱལ་པོ་དགྱེས་སུ་རེ་ནས་བཙུན་པ་ཆང་འཐུང་བ་སོགས་ཀྱི་གཟུགས་བརྙན་གྱིས། འོན་ཀྱང་ཁྱིམ་པ་གོས་དཀར་གྱི་རྟེན་ལ་གསང་སྔགས་སྒྲུབ་པ་དག་ནི་ནང་གི་དེ་ཉིད་རྒྱལ་བློན་གྱིས་མ་རྟོགས་ཤིང་། རབ་བྱུང་གི་རྟགས་མེད་པས་གནོད་པ་མ་བྱུང་བ་དཔག་མེད་ཡོད་པས། ཀུན་མཁྱེན་ཡེ་བཟང་རྩེ་པའི་ཞལ་ནས། དེ་ལྟར་འདུལ་བའི་བསྟན་པ་ལ་འཕེལ་འགྲིབ་བྱུང་མོད་ཀྱི། ཐེག་པ་ཆེན་པོ་གསང་སྔགས་ནི་དེང་སང་གི་བར་དུ་ནུབ་མ་མྱོང་ལ་ཞེས་གསུང་བ་ཡང་འདི་ལ་དགོངས་སོ། །དུས་དེར་ཡེལ་པར་ལྷ་ལུང་དཔལ་གྱི་རྡོ་རྗེ་ཏིང་ངེ་འཛིན་ལ་ཁོར་མོ་ཡུག་ཏུ་གནས་པའི་སྐབས། དཔལ་ལྷ་མོས། དེང་སང་བོད་ན་གྲུབ་ཐོབ་ཁྱོད་ལས་མེད་པས། རྒྱལ་པོ་སྡིག་ཅན་བསྒྲལ་རན་ཟེར་བའི་བརྡ་ཞིག་བྱུང་བས། ནང་པར་བྲན་ལ་རྒྱུ་མཚན་དྲིས་པར་ལོ་རྒྱུས་རྣམས་ཞིབ་ཏུ་བཤད་པས་བསྒྲལ་བྱའི་ཞིང་དུ་དགོངས་ཏེ། རྟ་དཀར་པོ་ལ་སོལ་བ་བྱུགས། གོས་ཕྱི་ནག་ནང་དཀར་གྱོན། ལྷ་སར་འོངས་པ་དང་། བཙད་པོ་རྡོ་རིང་གི་ཡི་གེ་ཀློག་པའི་སྐབས་སུ་འགྲིག་པས། ཕྱག་བྱེད་པ་ལྟར་བྱས་ཏེ་མཐེབ་ལྟོང་སྦྱར། བདེན་པ་བདར་ཏེ་བརྒྱབ་པས་བྲང་ལ་ཕོག །དེ་མ་ཐག་བྲོས་ཏེ་གྲིབ་ཀྱི་མ་གདོང་གི་ཆུ་ལ་བཤན་པས་སོལ་བ་དག་སྟེ་རྟ་དཀར་པོར་སོང་། གོས་ཕྱི་ནང་བསྐྱུར་བར་གྲགས་ཤིང་། དོན་དུ་མཆོག་གསུམ་དམ་པའི་ཐུགས་རྗེ་དང་རང་གི་གྲུབ་པའི་མཚན་མ་སོགས་ཀྱིས་སྣ་ཚོགས་པའི་མཐོང་སྣང་གྲུབ་བོ། །བཙད་པོ་ལག་པ་གཉིས་ཀྱིས་མདའ་ལ་འཇུ་ཞིང་། ཡང་ན་ལོ་གསུམ་གྱིས་གསོད་པ་སྔས། ཡང་ན་ལོ་གསུམ་གྱིས་འཕྱིས་ཞེས་སྨྲ་བའི་མུས་ལ་(༤༦ན)
ལྔ་པའི་ལམ་དུ་གྱུར་ཏོ། །བང་སོ་འཕྲུལ་དང་རྒྱལ་ཆེན་བར་དུ་བརྩིགས་པ་འཕྲོར་ལུས་སྐད། དུས་དེར་བཙད་པོའི་བཙུན་མོ་ཆུང་བ་ལ་སྲས་ཤིག་བཙའ་བར་ཉེེ་སྐབས་སུ་ཡོད་པར་བཙུན་མོ་ཆེ་བས་ཤེས་ཏེ། ལུས་ལ་གོས་མང་པོར་བཀྲིས་ནས་མངལ་དུ་སྲས་ཆགས་པ་སྐད་སྨྲས་མི་རིང་བར་ཆུང་མ་ལ་ཟླ་དུས་ཐིམས་པ་དང་སྲས་འཁྲུངས་པ་ཤིན་ཏུ་གཅེས་པས་མཚན་མོ་མར་མེའི་འོད་ཀྱིས་བསྲུངས་པས་གནམ་ལྡེ་འོད་བསྲུངས་སུ་གྲགས་ཤིང་། ཆེན་མས་ཀྱང་སྤང་ཕྲུག་ཅིག་རིན་གྱིས་ཉོས་ཏེ། མདང་འདི་སྐྱེས་པ་ཡིན་ནོ་ཞེས་བསྟན་པས། སོ་འདུག་པ་མཐོང་སྟེ། མདང་སྐྱེས་ཀྱི་བུ་ཆུང་ལ་སོ་ནི་གདའ། འོན་ཀྱང་ཡུམ་གྱི་བཀའ་བརྟན་དུ་ཆུག་ཟེར་བས། ཁྲི་ལྡེ་ཡུམ་བརྟན་དུ་མིང་ཆགས། དེ་ནས་མངའ་བདག་གཉིས་ལང་ཚོ་ཡར་ལྡན་དུ་གྱུར་པ་དང་། ཆོས་བློན་རྣམས་ཀྱིས་རྒྱུ་མཚན་བརྗོད་པ་ལྟར། ཇོ་བོ་རྣམ་གཉིས་དང་བྱམས་མགོན་རྣམས་སོ་སོའི་ཁྲི་ལ་བཞུགས་སུ་བཅུག་ཅིང་། གཙུག་ལག་ཁང་རྣམས་སུ་མཆོད་པའི་རྒྱུན་འཛུགས་པ་སོགས་མཛད། འོན་ཀྱང་མངའ་རིས་ལ་མ་འཆམ་པར་འོད་བསྲུངས་ཀྱིས་གཡོན་རུ་དང་། ཡུམ་བརྟན་གྱིས་སྦུས་རུ་བཟུང་སྟེ་འཁྲུག་ལོང་ཆེན་པོ་བྱུང་བས། དེ་དག་ནས་བཟུང་སྟེ་རྗེ་གཉའ་ཁྲི་བཙན་པོའི་གདུང་བརྒྱུད་ཀྱིས་བོད་ཀྱི་སྤྱི་ལ་དབང་མ་སྒྱུར་སྐད་དོ། །

འོད་སྲུང་ནས་བརྒྱུད་པའི་མངའ་རིས་སྟོད་ཀྱི་རྒྱལ་རབས་དང་། ཇོ་བོ་རྗེ་དཔལ་ལྡན་ཨ་ཏི་ཤ་གདན་དྲངས་པ་སོགས་ཀྱི་སྐོར།

---

^{[མ་དཔེ་གཟིགས་ན་འདིར་གནོན།]}

འོད་སྲུང་ནས་བརྒྱུད་པའི་མངའ་རིས་སྟོད་ཀྱི་རྒྱལ་རབས་དང་། ཇོ་བོ་རྗེ་དཔལ་ལྡན་ཨ་ཏི་ཤ་གདན་དྲངས་པ་སོགས་ཀྱི་སྐོར།དེ་ནས་མི་རིང་བར་གྱེན་ལོག་བྱུང་སྟེ། དེ་ཡང་གྱེན་ལོག་ནི། ནམ་མཁའ་ལ་བྱ་གཅིག་འཕུར་བར་བྱ་གཞན་མང་པོ་འདུས་ཏེ་གནོད་པ་བྱེད་པར་དཔེ་བྱས། །ཐོག་མར་ཁམས་ནས་ལོག །དེ་ཡང་རྐྱེན་བློན་པོ་བྲན་ཁ་དཔལ་ཡོན་ཉེས་མེད་དུ་ཁྲིམས་ལ་སྦྱར་བའི་རྐྱེན་གྱིས་གནོད་སྦྱིན་དུ་སྐྱེས་ནས་བསྐུལ་བ་པོ་བྱས་ཏེ་ལྷ་འདྲེ་གདུག་(༤༦བ)

---

^{[མ་དཔེ་གཟིགས་ན་འདིར་གནོན།]}

པ་ཅན་དུ་མས་མི་རྣམས་བརླམས་པར། བུ་སྟོན་གྱིས་མཛད་པའི་བསྟན་བཅོས་རིན་ཅེན་བང་མཛོད་དུ་བཤད་ཅིང་། གྱེན་ལོག་གི་རྗེས་སུ་བང་སོ་ཕལ་ཆེར་ཀྱང་བྲུས་ཏེ་བཤིག་གོ །དེ་ལྟར་ཡུམ་བརྟན་གྱི་བརྒྱུད་པ་སྐྱིད་གཡོར་ཀུན་ལ་ཤིན་ཏུ་མང་ཞིང་། འོད་བསྲུངས་གཤེགས་པའི་བང་སོ་འཕྲུལ་རྒྱལ་གྱི་རྒྱབ་ཏུ་བརྩིགས། དེ་ནས་བང་སོ་རྩིག་པའི་སྲོལ་ནུབ་ཅིང་། དེའི་སྲས་མངའ་བདག་དཔལ་འཁོར་བཙན། དེ་ལ་སྲས་ཁྲི་བཀྲ་ཤིས་བརྩེགས་པ་དཔལ་དང་། ཁྲི་ཀྱི་ལྡེ་ཉི་མ་མགོན་གཉིས་འཁྲུངས། ཉ་མ་མགོན་གྱིས་མངའ་རིས་སུ་བྱོན་ཏེ་ཆབ་སྲིད་བཟུང་། སྲས་གསུམ་བྱུང་བའི་ཆེ་བ་དཔལ་ལྡེ་རིག་པ་མགོན་གྱིས་མང་ཡུལ་བཟུང་། བར་པ་བཀྲ་ཤིས་ལྡེ་མགོན་གྱིས་སྤུ་རངས་བཟུང་། ཆུང་བ་ལྡེ་གཙུག་མགོན་གྱིས་ཞང་ཞུང་བཟུང་། ལྡེ་གཙུག་མགོན་ལ་སྲས་ཁོ་རེ་དང་། ཀྲོང་ངེ་གཉིས་བྱུང་བའི། གཅེན་གྱིས་རབ་ཏུ་བྱུང་བའི་མཚན་ཡེ་ཤེས་འོད་དུ་གྲགས། འདིའི་དུས་བསྟན་པ་སྒ་དར་ཉམས་ཏེ་པཎྜི་ཏ་འབྱོན་པའི་སྲོལ་ནུབ་ནས་ཡུན་རིང་བར་སོང་ཞིང་དུས་དེར་བལ་པོ་སླེ་རུ་རྩེ་བྱ་བའི་ལོ་ཙཱ་མཁས་པ་ཞིག་གིས་པཎྜི་ཏ་ཕྲ་ལ་རིང་བ་དང་། པཎྜི་ཏ་སྨྲྀ་ཏི་གཉིས་གདན་དྲངས་ཏེ་འོངས་པས། ལོ་ཙཱ་བ་ཤི །པཎྜི་ཏ་གཉིས་ཀྱིས་བོད་སྐད་མི་ཤེས་པས་ཡུན་རིང་པོར་འཁྱམས། སྨྲྀ་ཏིས་རྟ་ནག་ཏུ་ལུག་རྫི་མཛད། འོན་ཀྱང་རིང་མོ་ཞིག་ནས་མཁས་པ་འདྲ་དང་ཕྲད་པས་གཉིས་ཀས་ཁམས་སུ་བྱོན་ཏེ་བཤད་ཉན་གྱི་འཕྲིན་ལས་འགའ་ཞིག་བྱུང་། སྨྲྀ་ཏིས་སྨྲ་སྒོ་མཚོན་ཆར་གྲགས་པའི་བསྟན་བཅོས་མཛད་དོ། །ལར་ནི་དུས་སྐབས་དེ་དག་ཏུ་ཡང་བོད་སྟོན་གསུང་རབ་ཀྱི་གནས་ལ་བལྟ་བའི་མིག་དང་བྲལ་(༤༧ན)

---

^{[མ་དཔེ་གཟིགས་ན་འདིར་གནོན།]}

བའི་དྲེགས་ལྡན་བླུན་པོ་དག་ལ་བཀུར་ཞིང་། པཎྜི་ཏ་སྨྲི་ཏི་ལྟ་བུའི་མཁས་པ་ཡང་རྫི་བོ་སོགས་ངན་པའི་ལས་འཚོལ་བ་འདི་དག་ལ་དཔགས་ཀྱང་། རྗེ་བཙུན་ས་པཎ་གྱིས། ཙུ་ཏའི་ཡུལ་དུ་ཕྱིན་པ་ན། །རྐང་གཉིས་པ་ལ་མིར་མི་རྩི། །ཞེས་དང་། ཙན་དན་གསེར་ལས་རིན་ཆེ་བ། །བླུན་པོས་སོལ་བར་བྱས་ཞེས་གྲགས། །ཞེས་གསུང་བ་ཐུགས་མེད་པར་སྣང་ངོ་། །ལྷ་བླ་མ་ཡེ་ཤེས་འོད་ཀྱིས་རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་པཱ་ལ་སྤྱན་དྲངས་ནས་འདུལ་བའི་བཤད་པ་དང་ལག་ལེན་རྒྱས་པར་མཛད། སློབ་མ་པཱ་ལ་རྣམ་གསུམ་བྱུང་བ་སྟོད་འདུལ་བར་གྲགས། ཁོ་རེའི་སྲས་ལྷ་ལྡེས་པཎྜི་ཏ་སུ་བྷུ་ཏི་ཤྲཱི་ཤཱནྟི་གདན་དྲངས་ནས་ཤེར་ཕྱོགས་ཀྱི་བསྟན་བཅོས་མང་དུ་བསྒྱུར། ལོ་ཆེན་རིན་ཅེན་བཟང་པོ་དབུའི་མཆོད་གནས་སུ་མཛད་ཅིང་། ལོ་ཙཱ་བ་འདི་གུ་གེའི་སའི་ཆར་སྙུང་ཝཾ་རཏྣ་དུ་ཞེས་བྱ་བར་འཁྲུངས་ཤིང་། ལོ་གཉིས་ལོན་པའི་ཚེ་དབྱངས་གསལ་གྱི་སྔགས་གསུང་ཞིང་ས་ལ་རི་མོ་འབྲི་བ་སོགས་ཚེ་རབས་སྔོན་མ་རྣམས་སུ་བློན་པོ་ལུག་ལྟ་བུའི་སྐྱེ་བ་མ་ཡིན་པར་མཁས་པ་པཎྜི་ཏ་རིམ་པར་བརྒྱུད་པའི་མཛད་པ་ངོ་མཚར་བ་བསྟན། ཁྱད་པར་རྒྱ་གར་དུ་འབྱོན་པའི་བསྐུལ་མ། པཎྜི་ཏ་བསོད་སྙོམས་པ་ཅིག་གིས་རྒྱ་དཔེ་ཀློག་མ་མཁྱེན་པས་ཐུགས་ཕྱུང་ནས། ཤིང་གི་གྲིབ་མ་ལ་གཟིམས་པའི་མནལ་ལམ་དུ་མཁའ་འགྲོའི་རྟགས་ལྡན་གྱི་བུད་མེད་ཅིག་གིས། སྲིན་བུའི་ཁ་ཆུས་རང་ལུས་བཅིངས་པ་ལྟར། །ཡུལ་ལ་ཞེན་པས་བདུད་ཀྱི་རྒྱ་རུ་ཚུད། །དེ་འདྲ་ཐར་བར་འདོད་པའི་མི་སུ་དག །བྱང་ཕྱོགས་ཁ་ཆེའི་ཡུལ་དུ་ཕྱིན་ནས་ཀྱང་། །རྒྱ་གར་ཤར་ནུབ་ཆུ་བཞིན་མྱུལ་ནས་(༤༧བ)

---

^{[མ་དཔེ་གཟིགས་ན་འདིར་གནོན།]}

ནི། །དམ་ཆོས་རྒྱ་མཚོ་བོད་དུ་བསྒྱུར་ན་བདེ། །ཞེས་པའི་ལུང་བསྟན་བྱུང་བས་རྐྱེན་བྱས་ཏེ། དཀའ་སྤྱད་དུ་མས་ཁ་ཆེར་བྱོན། ཀ་ལ་ཝ་རི་བྱ་བའི་གྲོང་དུ་སླེབ། བྲམ་ཟེ་ཞིག་གིས་ཕྱག་གི་རི་མོ་བལྟས་ཏེ་ཤིས་པ་བརྗོད། རྐང་མགྱོགས་ཡིད་བཞིན་ནོར་བུ་བསམ་འཕེལ་བྱ་བ་ལ་བརྟེན་ནས་གྲོང་ཁྱེར་ཏ་མ་ལ་སནྟིར་བྱོན་ནས། པཎྜི་ཏ་ཤྲདྷ་ཀོ་ར་ཝརྨ་དང་མཇལ་ཏེ། ཡོ་གའི་རྒྱུད་སྒྲུང་ཐབས་རྣམས་གསན་ཅིང་བསྒྱུར། པཎྜི་ཏ་གཞན་མང་པོ་ལའང་སྒྲོ་འདོགས་བཅད་དེ་བོད་དུ་འབྱོན་པར་བཞེད་པའི་ཚེ། རྨི་ལམ་གྱི་ལྟས་ལ་བརྟེན་ནས་པཎ་ཆེན་ནཱ་རོ་པ་དང་། ཀ་མ་ལ་གུཔྟ། ཛི་ན་མི་ཏྲ་སོགས་ལ་ཟབ་པ་དང་རྒྱ་ཆེ་བའི་ཆོས་དཔག་ཏུ་མེད་པ་གསན། མདོར་ན་པཎྜི་ཏའི་བླ་མ་ཡང་བདུན་ཅུ་རྩ་ལྔ་བསྟེན་པས་གསུང་རབ་རྒྱ་མཚོ་ཆེན་པོའི་ཕ་རོལ་དུ་སོན་ཅིང་བསྟན་པ་ཕྱི་དར་ལ་སྐད་གཉིས་སྨྲ་བ་འདི་ཉིད་འགྲན་ཟླ་ཐམས་ཅད་དང་བྲལ་བས། མཁས་པའི་དབང་པོ་ཡེ་བཟང་རྩེ་པས་ཀྱང་བསྟན་པ་སྔ་དར་ལས་ཕྱི་དར་སྔགས་ཀྱི་བསྟན་པ་བོད་དུ་དར་བ་ཡང་། ལོ་ཙཱ་བ་འདི་ཁོ་ནའི་བཀའ་དྲིན་ཡིན་ཞེས་ཆེ་བ་མཛད་པ་ཡིན་ནོ། །ལྷ་ལྡེ་ལ་སྲས་འོད་ལྡེ། ཞི་བ་འོད། བྱང་ཆུབ་འོད་དང་གསུམ་ལས། ཆུང་བ་དགེ་སློང་བྱང་ཆུབ་འོད་བྱ་བ། ཕྱི་ནང་གི་ཆོས་དང་ལོ་ཙཱ་ལ་ཤིན་ཏུ་མཁས་པ་ཞིག་བཞུགས་ཤིང་། དེ་ཡང་ཡེ་ཤེས་འོད་རང་གི་གཅུང་ལ་རྒྱལ་སྲིད་གཏད་ཟིན་ཀྱང་། གར་ལོག་དང་འཐབ་པའི་དམག་དཔོན་དུ་བྱོན་པས་གཡུལ་ཕམ་སྟེ་བཙོན་དུ་ཤོར་བ་ན། གར་ལོག་གིས། དཀོན་ཅོག་གི་སྐྱབས་འགྲོ་འདོར་རམ། ལུས་ཀྱི་ལྗིད་དང་མཉམ་པའི་གསེར་གང་ཡང་རུང་བ་བྱུང་ན་ཕྱིར་གཏོང་ཞེས་པདྨ་ཁ་བྱུང་(༤༨ན)

---

^{[མ་དཔེ་གཟིགས་ན་འདིར་གནོན།]}

བས། དབོན་སྲས་རྣམས་ཀྱིས་གསེར་མང་དུ་བཙལ་ཀྱང་ཡུན་དུ་འགོར་ཞིང་། ཡེ་ཤེས་འོད་ཀྱིས་གསུང་ལས། ད་ངེད་ན་ཚོད་མཐོན་པོར་གྱུར་པས་འདི་ནས་ཐོན་ཀྱང་བསྟན་འགྲོ་ལ་ཕན་པར་དཀའ་བས། གསེར་རྣམས་ཀྱིས་པཎྜི་ཏ་སྤྱན་དྲོངས་ལ་ཆོས་དར་བར་བྱེད་པའི་བཀའ་གནང་སྟེ། མི་རིང་བར་གྲོངས། ལས་ཆེན་ཀུན་རྒྱལ་བས། ལྷ་བླ་མ་ཡེ་ཤེས་འོད་གསེར་འཚོལ་དུ་བྱོན་པ། གར་ལོག་གིས་བཙོན་དུ་བཟུང་བར་བཤད་པ་ནི། སྐྱེ་བོ་ཕལ་པ་ནོར་སློང་བ་ལྟ་བུའི་རྣམ་པར་ཤར་བ་བློ་གྲོས་དམན་པ་སྟེ། འདི་ཉིད་མངའ་རིས་ཀྱི་བཙད་པོ་ཆེན་པོ་ཡིན་པས། རྒྱུ་མཚན་ཞིབ་ཏུ་མ་དཔྱད་པའི་སྐྱོན་ནོ། །དུས་སྐབས་དེ་དག་ཏུ་རྔ་ལ་ཞོན་ནས་ནམ་མཁའ་ལ་འཕུར་ཐུབ་པའི་རྫུ་འཕྲུལ་ཅན། ཨ་ར་མོ་བན་དྷེ་བཅོ་བརྒྱད་སོགས་ཀྱི་ལུགས་འཛིན་དུ་མས་སྐྱེ་བོ་མཚོན་གྱིས་གསོད་པ་དང་། ཤ་ཆང་བུད་མེད་བག་མེད་དུ་སྤྱོད་པ་དང་། འདུལ་བའི་བསྟན་པ་ཡང་གོང་དུ་བླ་ཆེན་པོ་སོགས་ནས་བརྒྱུད་དེ་དར་རྒྱས་ཆེ་བར་ཡོད་ནའང་། བསྟན་པ་སྔ་དར་གྱི་པཎྜི་ཏའི་ཕྱག་སྲོལ་ཕལ་ཆེར་ཉམས། གསར་དུ་པཎྜི་ཏ་ཚད་ཐུབ་མང་དུ་མ་བྱོན་པ་སོགས་ཀྱིས། བོད་སྟོན་རྣམས་ཀྱིས་སོ་སོའི་འདོད་སྦྱར་གྱི་ལུགས་རེ་བྱས་པས། བསླབ་བྱའི་གནས་ཕྲ་ཞིང་ཞིབ་པ་མཐའ་དག་ལུང་སྡེ་བཞི། དེ་དག་གི་འགྲེལ་པ་དང་བཅས་པའི་དགོངས་པ་བཞིན་འཕགས་ཡུལ་མཁས་པའི་ལུགས་དང་མཐུན་པ་ཞིག་མེད་པར་མཁྱེན་ནས་ལྷ་བླ་མ་བྱང་ཆུབ་འོད་ཀྱིས། གངས་ཅན་གྱི་ལྗོངས་འདིར། ལོག་པར་རྟོགས་པའི་ཚུལ་མིན་གྱི་མུན་པ་དྲངས་ནས་ཕྱུང་བར་བྱ་བའི་གནས་ལྔ་མཁྱེན་པ་(༤༨བ)

---

^{[མ་དཔེ་གཟིགས་ན་འདིར་གནོན།]}

རྟ་ལྗང་གི་དབང་པོ་ལྟ་བུ་ཞིག་སྤྱན་དྲང་བར་དགོངས་སོ། །འོན་ཀྱང་ལས་ཆེན་ཀུན་རྒྱལ་བས། ཨ་ཙརྱ་དམར་པོས་གསང་སྔགས་ཐིག་ལེའི་སྐོར་བསྒྱུར་ནས་རབ་བྱུང་དུ་མ་ཁྱིམ་པར་ཕབ་པས་ཆོས་ལོག་མཁན་པོ་ཡིན་ཞེས་སྨྲ་བ་ནི། པཎྜི་ཏ་རང་གི་རྟོགས་པའི་ཡོན་ཏན་གྱི་དོད་མ་མཉམ་པའི་རབ་ཏུ་བྱུང་བ་འགའ་ཞིག་སྔགས་ཀྱི་དེ་ཁོ་ན་ཉིད་མ་རྟོགས་པར་འཆལ་བའི་སྐྱོན་བྱུང་བ་བདེན་ནའང་། པཎྜི་ཏ་གསང་བ་ཤེས་རབ་ལྟ་བུའི་གྲུབ་པའི་དབང་ཕྱུག་ཆོས་ལོག་མཁན་པོ་ཞེས་ངན་སྨྲས་བྱེད་པ་ནི། རང་ཉིད་ངན་སོང་མུ་མཐའ་མེད་པར་བསྒྲུབ་པའི་རྒྱུ་ཡིན་པས་ཤེས་ལྡན་རྣམས་བག་ཡོད་པར་བྱོས་ཤིག །སྨྲས་པ། ཡིད་སྲུབས་བྱེད་པའི་དཔུང་གི་སྔོ་བསངས་མའི། །བདེ་སྲིད་རྣམ་པར་བཞད་པའི་འདབ་སྟོང་ཚལ། །ཟུམ་ཚེ་སླར་ཡང་སྐལ་བཟང་རྟ་བདུན་གྱིས། །ཐུབ་བསྟན་ཉིན་བྱེད་གསར་པ་དྲངས་སོ་ཀྱེ། །ནུས་པའི་སྟོབས་ལྡན་དཔའ་དང་རྟུལ་ཕོད་པའི། །དཔལ་ལྡན་ཕྱོགས་ལས་རྒྱལ་བའི་རྡོ་རྗེའི་སྡེ། །རྣོན་པོའི་ཉག་ཕྲན་རྒྱུད་ལས་འཕོས་པའི་ཚེ། །སྡིག་ཅན་བཙད་པོའི་སྙིང་ལ་ཟུག་རྔུ་བྱིན། །ཨེ་མ་མཁས་བཙུན་བཟང་པོའི་སྙན་གྲགས་ཀྱི། །ཡོན་བོར་བལྟ་བའི་མིག་གི་ལྕགས་ཀྱུ་ཡིས། །བྱང་ཆུབ་འོད་སྟོང་གསལ་མཛད་སྒྲ་འཛིན་གྱིས། །ཞགས་པའི་ཕོན་པོ་ཡང་ཡང་འགུགས་སམ་སྙམ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ནས་མི་གཡོ་བའི་སྙིང་སྟོབས་ཕུལ་དུ་བྱུང་བའི་རྒྱལ་བའི་སྲས་ཀྱི་སྤྱོད་པ་རླབས་པོ་ཆེ་བསྐྲུན་པ་ལ་བག་ཚ་བ་མི་མངའ་ཞིང་། རྣམ་པར་དག་པའི་ཚུལ་ཁྲིམས་ཡན་ལག་བརྒྱད་དང་ལྡན་པའི་དལ་འགྲོའི་ཀླུང་གིས། རྒྱལ་བའི་བསྟན་པ་མཁའ་ལྡིང་རྒྱལ་མཚན་ཅན་གྱི་བགྲོད་བྱེད་ལ་སྲི་ཞུའི་(༤༩ན)

---

^{[མ་དཔེ་གཟིགས་ན་འདིར་གནོན།]}

དཀའ་ཐུབ་ཀྱི་བརྟུལ་ཞུགས་ཡང་དག་པར་བཟུང་། ཐུན་མོང་དང་ཐུན་མོང་མ་ཡིན་པའི་རིག་པའི་གནས་ཀྱི་ཡ་ལད་བཙན་པོ་གྱོན་ཞིང་། མཛངས་པའི་ཡོན་ཏན་གྱི་དུ་ཀཱུ་ལའི་བ་དན་དཀར་པོ་སྲིད་པའི་རྩེ་མོར་གཡོ་བའི་པཎ་གྲུབ་དམ་པ་དཱི་པཾ་ཀ་ར་ཤྲཱི་ཛྙ་ནའི་སྙན་གྲགས། ལྷ་བླ་མའི་སྙན་གྱི་དབང་པོར་སོན་པ་ལ་བརྟེན་ནས། ནག་ཚོ་ལོ་ཙཱ་བ་རྒྱ་གར་དུ་ཆོས་སློབ་པར་ཕྱིན་པར་སླར་རང་ཡུལ་དུ་འཁོར་བ། ཞབས་སེན་གྱི་པདྨོ་རྣམ་པར་བསྐྱོད་པའི་ཕོ་ཉར། རིན་པོ་ཆེ་གསེར་གྱི་ཕྱག་རྟེན་སོགས་གྱ་ནོམ་པའི་དངོས་པོ་དང་བཅས་རྫངས་པ་ལམ་དུ་ཉེས་པའི་སྐྱོན་དང་བྲལ་ནས། བྲི་ཀ་མ་ལ་ཤཱི་ལར་སླེབས་ཏེ། རྒྱ་བརྩོན་སེང་གེས་མཇལ་བའི་གྲོགས་བགྱིས་ཏེ། ཇོ་བོའི་སྤྱན་སྔར་ཕྱག་རྟེན་རྣམས་དང་བཅས། སྔར་བསྟན་པ་ལ་འཕེལ་འགྲིབ་བྱུང་ཚུལ། དེང་སང་བསྟན་པ་དར་ཡང་སྡེ་སྣོད་ལག་ལེན་དུ་འདེབས་པར་དཀའ་ཞིང་། དེ་དག་གི་ཚུལ་ལ་བླང་དོར་གྱི་གནས་སྟོན་པར་ཇོ་བོ་ལྟ་བུ་ལས་གཞན་པའི་པཎྜི་ཏས་ཕན་ཐོགས་པར་དཀའ་ཚུལ་རྣམས་ཞུས་ཏེ། ལོ་ཙཱ་བ་རེ་ཞིག་སློབ་གཉེར་བྱེད་པ་ལྟར་བསྡད། ཇོ་བོས་ཡི་དམ་གྱི་ལྷ་དང་གྲུབ་པའི་རྣལ་འབྱོར་མ་ལ་དྲི་བ་མཛད་པས། སྤྱི་སྒོས་མཐའ་དག་ཏུ་འཕྲིན་ལས་ཀྱི་སྒོ་ཆེ་ཞིང་། ཁྱད་པར་ཨུ་པ་སི་ཀ་ཞིག་ལ་བརྟེན་ནས་ཕན་ཐོགས་འབྱུང་བར་ལུང་བསྟན་པར་བརྟེན། ཐབས་མཁས་ཀྱི་མཛད་པས་མངའ་རིས་སུ་བྱོན་ཏེ། མཐོ་ལྡིང་གི་གཙུག་ལག་ཁང་དུ་བཞུགས་ནས། ལྷ་བླ་མ་སོགས་ལས་ཅན་རྣམས་ཟབ་རྒྱས་ཀྱིས་ཆོས་དུ་མ་གསུངས་ཤིང་། བོད་དུ་ཆོས་བབ་ཅོལ་དུ་སྤྱོད་པ་རྣམས་ཀྱི་གཉེན་པོར་བྱང་ཆུབ་ལམ་གྱི་སྒྲོན་མར་གྲགས་པའི་བསྟན་(༤༩བ)

---

^{[མ་དཔེ་གཟིགས་ན་འདིར་གནོན།]}

བཅོས་ཁྱད་པར་མཛད། སྔར་རྒྱ་གར་ནས་ཕེབས་ཁར་ལོ་གསུམ་ལ་ཕྱིར་ཕེབས་པའི་ཁས་ལེན་གནས་བརྟན་ཤཱི་ལཱ་ཀ་རའི་དྲུང་དུ་ནག་ཚོས་ཁས་བླངས་པ་བཞིན་འཕགས་པའི་ཡུལ་དུ་འབྱོན་པར་ཆས་པའི་ཚེ། འབྲོམ་སྟོན་པ་རྒྱལ་བའི་འབྱུང་གནས་ཇོ་བོ་བསེ་བཙུན་གྱི་དྲུང་ན་ཡོད་སྐབས། མངའ་རིས་སུ་པཎྜི་ཏ་ཕེབས་པའི་གཏམ་གསན་པས་མགྱོགས་པར་བཤུལ་དུ་ཞུགས་ཏེ་ཇོ་བོ་དང་མཇལ། དབུས་ཕྱོགས་སུ་ལྷ་ས་དང་བསམ་ཡས་ཀྱི་ཐོག་དྲངས་པའི་གཙུག་ལག་ཁང་དང་། དགེ་འདུན་གྱི་སྡེ་རྣམས་ཀྱི་བསྔགས་བརྗོད་མཛད་པས། ཇོ་བོ་ཆེན་པོ་དགྱེས་པའི་རྣམ་འགྱུར་གྱིས་ཕྱག་ལན་གྲངས་མང་པོར་གནང་བས་སྤོབས་པ་ལྷག་པར་སྐྱེས་ཏེ། དབུས་སུ་འབྱོན་པར་གསོལ་བ་བཞིན་ཞལ་གྱིས་བཞེས། དུས་དེར་འབྲོམ་གྱིས་བོད་སྟོན་རྣམས་ལ། ཤིང་རྟའི་དབྱིབས་འདྲ་འཛམ་གླིང་གི །ཞེས་སོགས་འཕྲིན་ཡིག་བརྫངས་པ་བཞིན་བསུ་བ་ལ་བྱོན། དེ་ནས་རིམ་གྱིས་གཡས་རུ་གཙང་གི་སའི་ཆར་ཕེབས་ཏེ། ཡོལ་ཆོས་དབང་ལ་སོགས་པའི་སློབ་མ་ཁྱད་པར་ཅན་འགའ་ཞིག་སྨིན་པར་མཛད། ཁུ་སྟོན་གྱི་ཡུལ་ཡར་ཀླུང་བཟང་བའི་བསྔགས་པ་བརྗོད་པ་ལ་བརྟེན་ནས་ཐང་པོ་ཆེར་ཕེབས་ཀྱང་། བསྙེན་བཀུར་ཚུལ་བཞིན་མ་བྱུང་བས་དྲོས་སྟབས་སུ་བསམ་ཡས་ལ་ཕེབས། རྒྱ་དཔེ་རྣམས་སློངས་པས་སྔར་མ་གཟིགས་པ་མང་པོ་མཆིས་པས། སློབ་དཔོན་པདྨས་མཁའ་འགྲོའི་གསང་མཛོད་ནས་བླངས་པ་ཡིན་ནམ་གསུངས། དེ་ནས་བང་སྟོན་དང་རྔོག་སོགས་ཀྱིས་བཏེག་ནས། སྙེ་ཐང་། ལྷ་ས། ཡེར་པ། ལན་པ་སོགས་སུ་ཕེབས་ཏེ། གདུལ་བྱའི་བློ་མཆོག་དམན་དང་བསྟུན་པའི་ཐེག་པ་ཆེ་ཆུང་གི་ཆོས་ཀྱི་མན་(༥༠ན)

---

^{[མ་དཔེ་གཟིགས་ན་འདིར་གནོན།]}

དྷ་ར་བའི་འཕྲེང་བ་སྤེལ་ལེགས་ཁ་བ་རི་བའི་ལུས་ཅན་རྣམས་ཀྱི་གྲོང་དུ་འཆིང་བར་མཛད་དོ། །འོད་ལྡེའི་སྲས་རྩེ་ལྡེའི་དུས་སུ་དབུས་གཙང་ཁམས་གསུམ་གྱི་སྡེ་སྣོད་འཛིན་པ་ཕལ་ཆེར་འདུས་ཏེ། ཆོས་ཀྱི་འཁོར་ལོ་བསྐོར་བའི་བསྙེན་བཀུར་དང་བདག་རྐྱེན་མཛད། ཟངས་མཁར་ལོ་ཙཱ་བས་ཚད་མ་རྒྱན་ཡང་དུས་དེར་བསྒྱུར། རྭ་ལོ། གཉན་ལོ། ཁྱུང་བོ་ཆོས་བརྩོན། བཙན་ཁ་བོ་ཆེ། རྔོག་བློ་ལྡན་ཤེས་རབ། མར་ཐུང་དད་པ་ཤེས་རབ་རྣམས་དང་བསྡེབས་ཏེ། དྭགས་པོ་དབང་རྒྱལ་རྣམས་ཀྱི་ཆོས་འཁོར་ལོ་ལ་བསྙེགས་ཏེ་བྱོན། བཙན་ཁ་བོ་ཆེས་སཛྫ་ནལ་བྱམས་ཆོས་བསླབས། རཱ་གཉན་གྱིས་ཆོས་འཁོར་ཐོན་ནས་རྒྱ་གར་དུ་བྱོན། དེ་ནས་མི་རིང་བར་དགེ་བཤེས་བྲག་དཀར་བས་སྐྱིད་ཤོད་ཉང་བྲན་ཕ་བོང་ཁར་དགེ་འདུན་གྱི་སྡེ་བཙུགས་ཏེ་བཤད་སྒྲུབ་ཀྱི་བསྟན་པ་སྤེལ། དེ་དག་དང་དུས་མཚུངས་སུ་བཀའ་གདམས་གཞུང་པ་གླང་ཤར། གདམས་ངག་པ་ལོ། བྱ་ཡུལ། རྒྱ་མ་རིན་ཆེན་སྒང་པ་རྣམས་ཀྱིས་ལྷ་ཆོས་བདུན་ལྡན་གྱི་བརྒྱུད་པའི་བསྟན་པ་སྤེལ། གསང་ཕུར་རྔོག་ལོ་ཡབ་སྲས་ཀྱིས་རིག་ལམ་ནས་དྲངས་པའི་བཤད་ཉན། པ་ཚབ་ལོ་ཙཱ་བས་དབུ་མའི་གཞུང་། རྒྱ་འདུལ་འཛིན། མཚོ་སྣ་བ་སོགས་ཀྱི་འདུལ་བའི་སྡེ་སྣོད། གཉལ་ཞིག་ཡབ་སྲས་ཀྱིས་ཕར་ཚད། རྔོག་ཨཱརྱ་དེ་ཝ་འདུལ་བ་འགོས་ལུགས། བྱ་སྒང་པ་བསོད་ནམས་རིན་ཅེན་གྱིས་འདུས་པ་མར་ལུགས། བླ་མ་རྔོག་པ་ཡབ་སྲས་ཀྱིས་མར་ལུགས་གུར་བརྟག་སམ་གསུམ། ཟུར་ཆུང་པ་དང་རྗེ་སྒྲོ་ཕུག་པ་སོགས་ཀྱིས་ལུང་གི་མདོ་བདུན། སྒྱུ་འཕྲུལ་སྡེ་བརྒྱད། སེམས་སྡེ་ཉི་ཤུའི་སྐོར། རྭ་ཆོས་རབ། རོང་(༥༠བ)

---

^{[མ་དཔེ་གཟིགས་ན་འདིར་གནོན།]}

པ་རྒ་ལོ། དཔྱལ་ལོ། གློ་བོ་ལོ་ཙཱ་བ། འབྲོ་ལོ་ཙཱ་བ་སོགས་ཀྱིས་གཤེད་སྐོར་དང་དུས་འཁོར། ས་སྐྱ་བ་དཀར་པོ་རྣམ་གསུམ་སློབ་བརྒྱུད་དང་བཅས་པས་འབྲོག་མི་ལུགས་ཀྱི་གསུང་ངག་གུར་བརྟག་སམ་གསུམ། བདེ་མཆོག་སྐོར། རྗེ་བཙུན་མི་ལ། སྒམ་པོ་པ། འབྲུག་པ། ཁྲོ་ཕུ། འབྲི་སྟག་སོགས་ཀྱིས་ཕྱག་རྒྱ་ཆེན་པོ་དང་ཆོས་དྲུག་གི་སྐོར། པཎ་ཆེན་ཤཱཀྱ་ཤྲཱི་སོགས་ཀྱིས་མདོ་སྔགས་གཉིས་ཀའི་རིག་ལམ་སྤེལ་བར་མཛད་པས། དུས་ཚོད་དེར། སྟོབས་བཅུ་མངའ་བ་ཟས་གཙང་སྲས་པོའི་ལུང་དང་རྟོགས་པའི་བསྟན་པ་རིན་པོ་ཆེ་དཀར་ཕྱོགས་ཀྱི་རྫོགས་པ་གསུམ་པའི་ཆུ་ཤེལ་དབང་པོ་ལྟར་འཆད་རྩོད་རྩོམ་པ་དང་ཐོས་བསམ་སྒོམ་པའི་ཆ་ཤས་ཀྱི་ཉ་ཡོངས་སུ་གང་བ་ཡིན་ཅིང་། མཁས་གྲུབ་དེ་དག་དགུང་ལོ་བགྲེས་གཞོན་མ་གཏོགས་ཕལ་ཆེར་དུས་མཚུངས་པར། མཁས་པའི་དབང་པོ་ཡེ་བཟང་རྩེ་པ་ཞི་བ་ཆོས་ཀྱི་དབྱིངས་སུ་སྐུའི་བཀོད་པ་བསྡུས་པའི་རྗེས་སུ། རང་དང་གཞན་གྱི་གྲུབ་པའི་མཐའ་རྒྱ་མཚོ་ཆེན་པོའི་ཕ་རོལ་དུ་སོན་ཞིང་། ཐུབ་བསྟན་ཡོངས་ཀྱི་རྩ་ལག་གཅིག་པུ་གྲངས་མེད་རྒྱལ་བའི་འཁོར་ལོའི་དབང་ཕྱུག་འཁོན་སྟོན་ཆོས་ཀྱི་རྒྱལ་པོས་ཡུལ་དེ་ཝི་ཀོ་ཊ་མིང་གཞན་ཕ་བོང་ཁའི་དཀར་ཆག་ཏུ་བཀའ་སྩལ་ཏོ། །རྩེ་ལྡེའི་སྲས་འབར་ལྡེ། དེའི་སྲས་བཀྲ་ཤིས་ལྡེ། དེའི་སྲས་བྷ་ནེ། དེའི་སྲས་ནཱ་ག་དེ་ཝ། དེའི་སྲས་བཙན་ཕྱུག་ལྡེ། འདིས་ཡ་ཚེར་བྱོན། དེའི་སྲས་བཀྲ་ཤིས་ལྡེ། དེའི་སྲས་གྲགས་བཙན་ལྡེ། དིའི་སྲས་གྲགས་པ་ལྡེས་གསེར་ཕྱེ་བྲེ་བདུན་ལས་གྲུབ་པའི་འཇམ་དབྱངས་དང་། དངུལ་དཀར་སྟོང་ཕྲག་བཅུ་གཉིས་ལས་གྲུབ་པའི་བྱམས་པ་སོགས་སྐུ་གསུང་ཐུགས་རྟེན་མང་དུ་བཞེངས། དེའི་(༥༡ན)

---

^{[མ་དཔེ་གཟིགས་ན་འདིར་གནོན།]}

སྲས་ཨ་སོ་ལྡེས་རྡོ་རྗེ་གདན་དུ་མཆོད་པའི་རྒྱུན་བཙུགས། དེའི་སྲས་འཛི་དར་རྨལ་དང་ཨ་ནན་རྨལ་གཉིས། ཕྱི་མས་གསེར་གྱི་བཀའ་འགྱུར་བཞེངས། དེའི་སྲས་རིའུ་རྨལ་གྱིས་དངུལ་དཀར་བཞི་བཅུ་ལ་སྨན་བླ་མཆེད་བརྒྱད་དང་། འཕྲུལ་སྣང་དུ་གསེར་ཐོག་ཕུབ། དེའི་སྲས་སངྒཱ་རྨལ། དེའི་སྲས་འཛི་དར་རྨལ་གྱིས་སྲས་ཨ་འཛིད་རྨལ་གྱིས་རྒྱལ་ས་མ་ཐོབ་གོང་དུ་ས་སྐྱར་རབ་བྱུང་མཛད། སླར་སྲིད་བཟུང་། དེའི་སྲས་ཀ་ཀན་རྨལ། དེའི་སྲས་བར་བཏབ་རྨལ། འདི་ནས་ཡ་ཚེའི་གདུང་བརྒྱུད་ཆད་དེ་པུ་རང་ན་མངའ་བདག་བསོད་ནམས་ལྡེ་སྤྱན་དྲངས་ནས་སྲིད་བཟུང་བས་བུ་ཎྱ་རྨལ་དུ་གྲགས་སོ། ཁྲི་བཀྲ་ཤིས་བརྩེགས་པ་དཔལ་ལ་སྲས་དཔལ་ལྡེ། འོད་ལྡེ། སྐྱིད་ལྡེ་གསུམ་བྱུང་བའི་ཆེ་བའི་བརྒྱུད་པ་གུང་ཐང་པ། ཀླུ་རྒྱལ་བ། སྤྱི་བ་ལྷ་རྩེ་གླང་ལུང་རྩང་བསྐོར་རྣམས་དང་། ཆུང་བའི་བརྒྱུད་པ་འཇད་རྟ་ནག་ཏུ་ཕོག་པ་ལས་མཆེད་པའི་འབྲོ་བ། གཡས་རུ་རུ་ལག་ཉང་། མུས་སོགས་ཀྱི་བཙད་པོར་གྲགས་པ་མང་ཞིང་། འབྲིང་པོ་ལ་སྲས་ཕ་བ་དེ་སེ། ཁྲི་ལྡེ། ཁྲི་ཆུང་། ཉག་པ་བཞི་ལས། དང་པོ་དང་བཞི་པ་གཙང་རོང་གི་ཕྱོགས་དང་། གཉིས་པ་མདོ་སྨད་ཙོང་ཁར་ཡོད་ཅིང་། གསུམ་པ་ཁྲི་ཆུང་གིས་ཡར་ཀླུངས་སུ་བཞུགས་ནས་སྐུ་མཁར་འཕྱིང་བ་སྟག་རྩེ་བཟུང་། དེའི་སྲས་འོད་སྐྱིད་འབར་ལ་སྲས་བདུན་བྱུང་བའི་གཡུ་ཅན་གྱིས་བྱ་སར་བཞུགས། དེའི་སྲས་ཇོ་དགའ་ལ་གསུམ་ལས་དར་མ་ལ་སྲས་བཞི་ལས་ཇོ་བོ་རྣལ་འབྱོར་གྱིས་འབན་ཚིགས་སུ་བཞུགས་རྗེ་སྤྱན་སྔ་རིན་པོ་ཆེ་ལ་མཆོག་ཏུ་གུས་ཤིང་གདན་ས་ཆེན་པོ་དཔལ་ཕག་མོ་གྲུར་ཕུད་དུད་མ་སྨད་པ་མཛད། དེའི་(༥༡བ)

---

^{[མ་དཔེ་གཟིགས་ན་འདིར་གནོན།]}

སྲས་གསུམ་གྱི་ཇོ་འབག་ལ་སྲས་ལྔ་ལས་ཤཱཀྱ་མགོན་གྱིས་ཕོ་བྲང་གནས་ཆུབ་བཟུང་། རྗེ་ས་སྐྱ་པཎྜི་ཏ་ཆོས་འཁོར་བསྐོར་བའི་མཐུན་རྐྱེན་མཛད། དེའི་སྲས་ཤཱཀྱ་བཀྲ་ཤིས་ཀྱིས་ཕོ་བྲང་རྙིང་མ་བརྩིགས། སྲས་གཉིས་བྱུང་བའི་ཆུང་བ་མངའ་བདག་གྲགས་པ་རིན་ཅེན་གྱིས་འགྲོ་མགོན་འཕགས་པའི་ཞབས་ཕྱིར་གོང་མའི་དྲུང་དུ་བྱོན། འཇའ་ས་བླངས་ནས་བྲག་ཁའི་ཕོ་བྲང་བཏབ། གནས་ལྔ་རིག་པ་ཤཱཀྱ་ཤྲཱའི་རིང་ལུགས་པ་ཇོ་གདན་ཚོགས་པར་བསྙེན་བཀུར་ཕུལ་དུ་བྱུང་བ་མཛད། སྲས་བཞི་བྱུང་བའི་གཉིས་པ་མངའ་བདག་ཤཱཀྱ་མགོན་པོས་ལོ་ཙཱ་བ་ལེགས་པ་རྒྱལ་མཚན་སོགས་མཁས་གྲུབ་དུ་མའི་ཞབས་ནས་བཏེག །ཕོ་བྲང་ཡུམ་བུ་བླ་སྒང་དུ་གཙུག་ལག་ཁང་བཞེངས། དེའི་སྲས་ཆོས་རྗེ་ཤཱཀྱ་རིན་ཅེན་ལྡེ་སྟེ། འདི་ཡན་ཆད་ཀྱི་ནང་ནས་དར་མ་ལས་གཞན་དུ་གྱུར་པ་ཀུན། མཉམ་མེད་སྟོབས་བཅུ་མངའ་བའི་བསྟན་པ་རིན་པོ་ཆེར་སྲི་ཞུ་དང་། ས་ཆེན་པོ་ལ་སྤྱོད་པའི་སྐྱེ་རྒུ་མཐའ་དག་ལ་བདེ་སྐྱིད་མ་ལ་ཡའི་རླུང་གཞོན་གྱིས་དུཿཁའི་ཚ་གདུང་བཅིལ་བའི་ལྷག་བསམ་བཻ་ཌཱུརྱའི་རི་བོ་ཆུ་ཤེལ་དབང་པོའི་གོས་ཀྱིས་ཀླུབས་པ་ལྟར་དཀར་བའི་ཁུར་འཆང་བ་ཤ་སྟག་ཏུ་བྱོན་པའི་སྙན་གྲགས་ཧ་རི་ཙན་དན་གྱི་སྡོང་པོ་ཟླ་འཕྲེང་གྲངས་མེད་པའི་ས་འཛིན་གྱི་ཁོང་ལས་བརྒལ་བར་གཡུར་ཟ་ལྡེམ་མོ། །སྨྲས་པ། སྐབས་གསུམ་རྨུ་ཡི་ཉག་ཐག་ལས་བརྒྱུས་ས་མཚོའི་མུ་ཏིག་འཕྲེང་བ་ཅན། །གནམ་གྱི་སྐས་ལས་བདེ་བར་བབས་པའི་འཁོར་ལོ་རིན་ཅེན་རྒྱུ་བའི་ཤུགས། །ཚངས་བཅོམ་སྡེར་བཅས་མགོ་བོ་བྲེགས་ཚེ་ས་འདིར་འཕོས་པའི་རཱ་མ་ཎ། །མཐོ་རིས་ངོ་མཚར་གཏམ་གྱི་ཨུཏྤལ་སྐལ་ལྡན་རྣ་བའི་རྒྱན་དུ་སྤུད། །(༥༢ན)
རིགས་ཀྱི་མངོན་མཐོའི་ཉེ་བའི་ཚལ་ན་ལྡེམ་ལྡེམ་འཁྲིགས་པའི་ལག་འགྲོའི་སྙིང་པོའི་ས་སྐྱེས་དཔལ། །དཔལ་ཁྱིམ་ལྟར་དཀར་ལེགས་ལམ་ཡལ་ག་ལིང་ལིང་གཡོ་བར་དགེ་བཅུའི་ལྕུག་ཕྲན་བྱ་མ་རྟ། །རྟ་མཆོག་སྲབ་སྐྱོགས་ཁྲིམས་ཀྱི་མེ་ཏོག་ལོང་ལོང་འདབ་མ་པད་དཀར་གཞོན་ནུའི་ཆུན་པོ་བཞིན། །བཞིན་རས་ཕན་བདེའི་རྒྱན་མཆོག་ཟེའུ་འབྲུ་ཤིག་ཤིག་སྤུངས་པའི་བྱང་གྲོལ་དྲི་བཟུང་བླ་ན་མཚར། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །

དཔལ་ལྡན་ས་སྐྱ་འཁོན་གྱི་གདུང་རབས་ཀྱི་སྐོར།

---

^{[མ་དཔེ་གཟིགས་ན་འདིར་གནོན།]}

དཔལ་ལྡན་ས་སྐྱ་འཁོན་གྱི་གདུང་རབས་ཀྱི་སྐོར། དེ་ལྟར་ཕུལ་དུ་བྱུང་བའི་སྙིང་སྟོབས་ཀྱི་གོ་ཆ་བཙན་པོ་གྱོན་ནས་རྣོ་ངར་མི་བཟད་པའི་མཚོན་ཆས་བདུད་སྡེའི་སྙིང་ལ་བརྣག་ནུས་ལས་འདས་པའི་དུཿཁ་སྟེར་བའི་བྱེད་པོ་ལྷ་ལུང་དཔལ་རྡོ་རྗེས། མེ་ཏོག་མདའ་ཅན་གྱི་འདབ་བརྒྱ་རྣམ་པར་བཞད་པའི་ཟེའུ་འབྲུ་གླང་དར་མ་འུ་དུམ་བཙན་ཉི་མའི་བུའི་གངས་རིའི་དུམ་བུ་གསར་དུ་ཆད་པའི་འཕྲེང་བ་ལྟ་བུའི་མཆེ་བའི་གྲོང་ཁྱེར་དུ་སྤྱུགས་པའི་མཇུག་ཏུ། རྗེ་འབངས་ཀྱི་གོ་རིམ་རྣམ་པར་ཞིག་ནས་ལོ་སུམ་བརྒྱ་ལྷག་པ་འདས་པའི་དུས། འཇམ་དབྱངས་གོང་མའི་ཁྲི་ལ་གནམ་སྐོས་ཀྱི་རྒྱལ་པོ་ཧོར་གྱི་ལུང་བྱུང་བ་ཡིན་ལ། དེ་ཡང་མ་ཧཱ་ཙི་ནའི་ཡུལ་གྲུ་ཆེན་པོར་སྟོབས་ཀྱི་དཔུང་པས་ས་ལ་རང་དབང་དུ་སྤྱོད་པའི་རྒྱལ་པོ་མཆོག་གི་སེང་གེ་རྐང་པ་བརྒྱད་པས་བཏེག་པའི་རིན་པོ་ཆེའི་ཁྲི་ལ་ཞབས་ཟུང་གི་པདྨོ་མངོན་པར་འདུ་བགྱིས་ཏེ། རིན་པོ་ཆེ་སྣ་བདུན་སྔོན་དུ་འགྲོ་བ་ཅན་ས་ལ་སྤྱོད་པའི་མཐོ་རིས་ཀྱི་རྒྱལ་པོ་གང་ཡིན་པ་དག་ནི་འཇམ་མགོན་ཟུར་ཕུད་ལྔ་པའི་བྱིན་རླབས་ཀྱི་བསིལ་ཟེར་སྙིང་ལ་འཕོས་པའི་ཀུན་དགའི་བདུད་རྩི་འབུམ་དུ་འཛག་པ་ཤ་སྟག་འབྱུང་བར་གྲགས་ཤིང་། དེ་ཡང་ས་སྐྱོང་(༥༢བ)

---

^{[མ་དཔེ་གཟིགས་ན་འདིར་གནོན།]}

ཆེན་མོ་ཀུན་དགའ་རྡོ་རྗེའི་གསུང་ལས་སྙིགས་དུས་ཀྱི་མཁས་པའི་དབང་པོ་འགོས་ལོ་གཞོན་ནུ་དཔལ་གྱིས་བཏུས་པར། སྤྱི་བོའི་རྒྱལ་པོ་སུམ་ཅུ་རྩ་དྲུག །ཚིན་ཧྲི་ཧང་གི་རྒྱལ་པོ་གཉིས། ཧན་གྱི་རྒྱལ་པོ་བཅུ་གཉིས། ཨང་མང་གཉིས། ཧན་ཉི་ཤུ་རྩ་དྲུག །ཚའོ་ཚ་ལྔ། འུམ་གཅིག །ཧེའུ་ཅིང་གཅིག །བ་སི་ཅིང་གཅིག །ཆིང་སང་བརྒྱུད་པ་སུའི་གཡང་དི་ཡི་ལ་རྒྱལ་པོ་བཅུ་གཉིས་བྱུང་བར་བཤད་པ་སོགས་རྒྱ་དང་མི་ཉག་གི་རྒྱལ་ཁམས་ཐམས་ཅད་ལ་དབང་དུ་བྱེད་པ་ནི། ནག་མོ་ཨ་ལན་ལ་ཉི་མ་དང་ཟླ་བའི་ཟེར་ལས་སྐྱེས་པའི་བུ་བོ་དོན་ཆར་མུ་གན་གྱི་རིགས་བརྒྱུད་ལས་བྱུང་བ་ཚེ་རིང་གནམ་གྱི་ཤེ་མོང་ལས། ཡངས་པའི་ས་ཆེན་པོ་ཀུན་ལ་དབང་སྒྱུར་བ་ཧོར་ཇིང་གིར་རྒྱལ་པོ་ཡིན་ལ། དེ་ལ་སྲས་མང་དུ་ཡོད་པའི་ག་གན་ལ་གོ་ཡུག་གན་དང་། གོ་དན་རྒྱལ་པོ་སོགས་ལས་ཕྱི་མའི་དུས། དོར་རྟ་ནག་པོས་གཙོས་པའི་ཧོར་དམག་བོད་དུ་ལྷགས་ཏེ། འཇིག་རྟེན་ན་མངོན་པར་མཐོ་བ་གཙུག་ན་ཟླ་བ་ཡང་ཞུམ་པར་བྱེད་པའི་དགྲ་ཐབས་ཀྱིས་བོད་དང་བོད་ཆེན་པོའི་རྒྱལ་ཁམས་ཐམས་ཅད་སྤ་བཀོང་བར་བྱས། དེ་ཡང་ཆོས་རྗེ་བསོད་གྲགས་པས། ཇིང་གིར་རྒྱལ་པོ། སྦོར་ཏ་ཆེའི་བརྒྱུད་པ་ཡིན་པ་ལྟར་བཤད་པ་ནི་མ་ངེས་པ་སྟེ། དུ་བུན་མེར་གན་ནས་བརྒྱུད་པ་ཆད་དེ། ནག་མོ་ཨ་ལན་ལ་བུ་ཉི་ཟླའི་ཟེར་ལས་སྐྱེས་པ་ཡང་བཤད་ཅིང་། གཏམ་རྒྱུད་འགའ་ཞིག་ཏུ་གཞོན་ནུ་ཁ་དོག་སེར་པོ་ཅན་ཞིག་གུར་གྱི་མཐོང་ནས་བབས་ཏེ་དགའ་མགུར་སྤྱད་ནས་ཕྱིར་འགྲོ་བ་ན་གུར་གྱི་སྒོ་ལས་ཁྱིའི་གཟུགས་འཐོན་པ་ཞིག་གི་བུ་བྱུང་བས་གནམ་གྱི་བུ་ཞེས་བཏགས་པར་གྲགས་ཤིང་། གང་ལྟར་བོ་དོན་ཆར་མུ་གན་ཡིན་པས། མ་ངེས་པའི་གཏམ་མང་པོ་སྨྲ་བ་ནི་རང་ཉིད་གསལ་བར་(༥༣ན)

---

^{[མ་དཔེ་གཟིགས་ན་འདིར་གནོན།]}

སྟོན་པའི་རྒྱུ་ཡིན་ལ། རྭ་སྒྲེང་དང་རྒྱལ་ལྷ་ཁང་དུ་ཧོར་དམག་གིས་དགེ་འདུན་དུ་མ་བཀྲོངས་པའི་གླིང་ལོག་དེ་ནི། དགེ་བའི་བཤེས་གཉེན་པོ་ཏོ་བ་དང་དུས་མཚུངས་པས་དུས་ཚོད་འདི་དག་ལས་སྔ་བར་མངོན་ནོ། །དེ་ནས་མི་རིང་བར་རྒྱལ་པོ་རྣམ་པར་དཀར་བའི་ལས་ལ་འཇུག་པའི་བསམ་པ་སྐྱེས་ཏེ་རྒྱ་སྨན་དང་། དབོན་པོ་དོར་རྟ་བོད་དུ་བཏང་བར་སོག་མཇལ་མོར་བབས། རྗེ་སྤྱན་སྔ་རིན་པོ་ཆེ་ལ་དུན་ཐང་དུ་བྱོན་ཏེ། སྒོམ་པ་ཤཱཀ་རིན་སྣ་ལེན་དུ་བཏང་བ་གསོད་པར་བརྩམས་པ་ན། སྤྱན་སྔ་རིན་པོ་ཆེས་སྒྲོལ་མ་ལ་གསོལ་བ་བཏབ་པས་རྡོ་ཆར་བབས་པར། སྤྱན་སྔ་རིན་པོ་ཆེ་ལ་གུས་པར་བྱས་ཏེ། བོད་ཤིང་སྒོ་ཅན་ཕལ་ཆེར་གྱི་བབས་བླངས་ནས། ཤར་ཀོང་པོའི་ཡུལ་ཡན་ཆད་ནས། ནུབ་བལ་པོ་དང་། ལྷོ་མོན་ལ་ཐུག་པ་ཚུན་ཆད་ཀྱི་བཙན་པོའི་མཁར་རྣམས་བསྒྱེལ་ཞིང་། གོང་མ་རྒྱལ་པོའི་ལུང་ལས་མི་འདའ་བའི་རྒྱལ་ཁྲིམས་བཙན་པོས་གཉའ་བ་མནན་ཏེ་ཕོ་བྲང་ཆེན་པོར་ཕོ་ཉ་བ་མངགས་ནས། བོད་མཐའ་འཁོབ་ཀྱི་རྒྱལ་ཁམས་ན། དགེ་འདུན་གྱི་སྡེ་ནི་བཀའ་གདམས་ཆེ། ངོ་བསྲུང་ནི་སྟག་ལུང་ཆོས་རྗེ་མཁས། གཟི་བརྗིད་ནི་འབྲི་གུང་སྤྱན་སྔ་ཆེ། ཆོས་ནི་ས་སྐྱ་པཎྜི་ཏ་མཁས་པར་འདུག་པས་གང་སྤྱན་འདྲེན་གྱི་ལུང་སྩོལ་ཅིག །ཞུས་པར། ཚེ་འདིའི་དཔལ་འབྱོར་ཕུན་ཚོགས་མཐའ་དག་འཛམ་གླིང་འདི་ན་ཇིང་གིར་རྒྱལ་པོའི་ལུགས་བཞིན་སྤྱད་པ་ལས་ལྷག་པ་མ་མཆིས་པས། འཇིག་རྟེན་ཕྱི་མ་ཕན་ཆད་དུ་ཐར་པ་དང་ཐམས་ཅད་མཁྱེན་པའི་ལམ་བཟང་པོ་སྟོན་པའི་བླ་མ་ཞིག་གལ་ཆེ་བར་འདུག་པས། ས་སྐྱ་པཎྜི་ཏ་སྤྱན་འདྲེན་པའི་བཀའ་མཆིད་དང་། ཆོས་རྗེ་ས་སྐྱ་བར་(༥༣བ)

---

^{[མ་དཔེ་གཟིགས་ན་འདིར་གནོན།]}

ཆབ་ཤོག་དང་བཅས་ཕོ་ཉ་ཕྱིར་སོན་པ་བཞིན། རྒྱ་སྨན་གྱིས་ས་སྐྱར་ཕྱིན་ཏེ་ལུང་བསྒྲགས་པས། རྗེ་ས་པཎ་ཅི་ཡང་། རྗེ་བཙུན་གྲགས་པའི་ཞལ་ཆེམས་སུ། ཁྱོད་ཀྱི་ཚེ་མཇུག་ལ་ཞྭ་ཁྲ་འཕུར་བ་འདྲ་བ། ལྷམ་ཕག་གི་སྣ་འདྲ་བ་གྱོན་པ། ཡུལ་སྐད་རིགས་མི་གཅིག་པའི་རྒྱལ་ཁམས་ནས་གདན་འདྲེན་པ་འབྱུང་བས། དཀོན་ཅོག་གསུམ་གྱི་སྒྲ་མི་གྲགས་པའི་སར། རྒྱལ་བའི་བསྟན་པ་རིན་པོ་ཆེ་དར་རྒྱས་འོང་བས་ཐེ་ཚོམ་མེད་པར་སོང་ཞིག་པའི་བཀའ་དྲན་ཏེ་ཞལ་གྱིས་བཞེས་པ་ཡིན་ལ། དེ་ཡང་རྗེ་བཙུན་ཆེན་པོ་འདི་ཉིད་ཀྱི་རིགས་ནི། གནམ་ནས་ལྕེ་རིང་གཡུ་རིང་། གཡུ་བསེ་མཆེད་གསུམ་ལས། ཆུང་བས་མི་རྗེ་མཛད་དེ། གཡུ་བསེ་བྱི་ལ་སྤུན་བཞི་བྱུང་བ། གདོང་གི་རུས་ཆེན་བཅོ་བརྒྱད་དང་འཁྲུགས་པས་གནམ་ལ་གཡུ་རིང་གི་རོགས་མཛད་དེ་བཏུལ་ནས་དྲན་དུ་བཀོལ། གཡུ་རིང་གི་རྨུའི་བུ་མོ་དམུ་ས་ལྡེམ་ཁབ་ཏུ་བཞེས་པར་སྲས་མ་སངས་སྤུན་བདུན་བྱུང་བའི་ཆེ་བ་དྲུག་དང་ཡབ་ལྷ་ཡུལ་དུ་བྱོན། ཆུང་བའི་སྲས་ཐོག་ཚ་དཔའ་བོ་སྟག་བྱུང་བར་མོན་བཟའ་མཚོ་མོ་རྒྱལ་ཁབ་ཏུ་བསུས་པ་ལ་སྲས་གཡའ་སྤང་སྐྱེས་འཁྲུངས། སྲིན་པོ་སྐྱ་རེངས་ཁྲག་མེད་བསད། གཡའ་གྲུམ་བསིལ་མ་ཕྲོགས་ཏེ་ཁབ་ཏུ་བཞེས་པར་སྲས་ཞིག་བྱུང་བ་དེ་སྲིན་པོ་དང་འཁོན་པའི་བར་དུ་སྐྱེས་པས་མིང་འཁོན་པར་སྐྱེས་སུ་བཏགས་པ་ལ་འཁོན་གྱི་གདུང་བརྒྱུད་ཅེས་པའི་དོན་དེ་ལྟར་ཡིན་ཞིང་། ཆོས་རྗེ་དཀོན་ཅོག་ལྷུན་གྲུབ་པས། དེ་ལྟར་འཆི་མེད་འོད་གསལ་ལྷ་ཡི་རིགས། །མ་རིག་ལས་འཁོན་འཇམ་དབྱངས་སྤྲུལ་པའི་སྐུ། །ས་སྐྱ་པ་ཞེས་གྲགས་པ་གསལ་ལྡན་པ། །ཞེས་གསུངས་པ་ཡང་ཟུར་གནས་ཀྱིས་བལྟས་ན་རང་བཞིན་(༥༤ན)

---

^{[མ་དཔེ་གཟིགས་ན་འདིར་གནོན།]}

བརྗོད་པའི་རྒྱན་དུ་མཆིས་སོ། །འཁོན་པར་སྐྱེས་ཀྱིས་ཇོ་མོ་བཙན་མོ་བཟའ་ལྕེ་སྨན་གཉིས་ལ་སྲས་དཔལ་པོ་ཆེ་འཁྲུངས་པ། ཡབ་ཀྱིས་ཡུལ་གང་བཟང་ལྟར་བཏང་བས། ལ་སྟོད་གཉན་སེ་ཐར་གྱི་ཡ་ཚངས་ལ་ཡུལ་གྱིས་མཚན་བརྒྱད་མཐོང་སྟེ་བཟུང་། མངའ་བདག་ཁྲི་སྲོང་ལྡེ་བཙན་གྱི་མདུན་ན་འདོན་དུ་གྱུར་ཏེ། རླངས་ལོ་ཙཱ་བའི་བུ་མོ་ལྷ་ས་ཁྲིམ་བུ་ཁབ་ཏུ་བཞེས་པར་སྲས་ཁྲེན་མཛེས། ལྷ་ལེགས། ཚེ་ལ་དབང་ཕྱུག །འཁོན་ཀླུའི་དབང་པོ་ཚེ་འཛིན་རྣམས་ལས་ཀླུའི་དབང་པོས་མཁན་པོ་རིན་པོ་ཆེ་བོ་དྷི་ས་ཏྭའི་དྲུང་དུ་རབ་ཏུ་བྱུང་ཞིང་། སློབ་དཔོན་ཆེན་པོའི་བྱིན་རླབས་ཀྱི་བདུད་རྩི་སྙིང་ལ་ཞུགས། གཅུང་གི་སྲས་རྡོ་རྗེ་རིན་ཅེན་སློབ་དཔོན་ཆེན་པོས་རྡོ་རྗེ་ཐེག་པའི་དཀྱིལ་འཁོར་དུ་སྨིན་པར་མཛད། གྲུབ་པའི་དབང་ཕྱུག་ཆེན་པོ་དེ་ལ་སྲས་དྲུག་བྱོན་པའི་ལྔ་པ་ཡན་གྱི་རུས་ཚོ་མང་དུ་གྱེས་ཤིང་། དྲུག་པ་ཤེས་རབ་ཡོན་ཏན་གྲོམ་པར་བྱོན་པ་ལ་སྲས་གཉིས་བྱུང་བའི་ཆུང་བ་བྱང་དུ་ཆད་པར་འཁོན་ཚོ་སྟོད་སྨད་དུ་གྱེས། ཆེ་བ་ཡོན་ཏན་འབྱུང་གནས་ལ་སྲས་གསུམ་བྱུང་བའི་བར་པ་ཚུལ་ཁྲིམས་རྒྱལ་པོ། དེ་ལ་སྲས་གསུམ་བྱུང་བའི་ཆེ་བ་རྡོ་རྗེ་གཙུག་ཏོར་ཤེས་རབ། དེ་ལ་སྲས་བདུན་བྱུང་བའི་ཆུང་བ་དགེ་སྐྱབས། དེའི་སྲས་དགེ་མཐོང་། འདིས་ཤབ་ཏུ་བཞུགས་ཤིང་། སྲས་བལ་པོ་ཞེས་པ་འཁྲུངས་པ་ཚ་མོ་རོང་གི་བྲག་ལ་སྒྲུབ་པ་མཛད་པས་ཡབ་མེས་ཀྱི་ཡི་དམ་གྱི་ལྷ་རྡོ་རྗེ་ཕུར་པ་ཞལ་གཟིགས། དེའི་སྲས་ཤཱཀྱ་བློ་གྲོས་ཀྱིས་གཡའ་ལུང་འཇག་གཤོངས་བཏབ། དེའི་སྲས་གཉིས་ལས། གཅེན་འཁོན་རོག་ཤེས་རབ་ཚུལ་ཁྲིམས། འདི་ཡན་ལ་ཡི་དམ་གྱི་ལྷའི་ཞལ་གཟིགས་ཤིང་། (༥༤བ)

---

^{[མ་དཔེ་གཟིགས་ན་འདིར་གནོན།]}

མཆོག་ཐུན་གྱི་དངོས་གྲུབ་ཐོབ་པའི་རྡོ་རྗེ་འཛིན་པ་བརྒྱུད་མར་བྱོན་པ་ཡིན་ལ། གཅུང་འཁོན་དཀོན་ཅོག་རྒྱལ་པོ། སྔགས་གསར་མའི་ལོ་ཙཱ་བ་བླ་ཆེན་འབྲོག་མི། བ་རི་ལོ་ཙཱ་བ། རྨང་ལོ་ཙཱ་བ། པུ་རང་ལོ་ཙཱ་བ། གནམ་ཁའུ་པ་སྐུ་མཆེད་སོགས་བླ་མ་དམ་པ་དུ་མའི་ཞབས་ཀྱི་པདྨོ་སྤྱི་བོའི་གཙུག་ཏུ་བསྟེན་ཅིང་། གསུང་གི་བདུད་རྩིས་མྱོས་པར་མཛད་དེ། གྲ་བོ་ལུང་པར་དགོན་པ་ཞིག་བཏབ་པས་ས་སྐྱ་གོག་པོར་གྲགས་ཤིང་། དེའི་ཚེ་རིའི་རྩེ་ནས་གཟིགས་པས། དཔོན་པོ་རིའི་ངོས་འགྲམ་ནས་དཀར་ཞིང་སྣུམ་པ་བཀྲ་ཤིས་པའི་དགེ་མཚན་དུ་མ་དང་ལྡན་པའི་ཡུལ་དུ་མཁྱེན་ཏེ། བདག་པོ་རྣམས་ལ་ནོར་བུའི་འཕྲེང་བ་སོགས་ཀྱི་རིན་གྱིས་ཉོས་ཏེ། དཔལ་ལྡན་ས་སྐྱའི་དགོན་པ་བཏབ། འཁོན་དཀོན་ཅོག་རྒྱལ་པོར་ཇོ་མོ་མ་གཅིག་ཞང་མོ་ལ་སྔ་མ་ས་སྐྱ་པ་ཆེན་པོ་ཀུན་དགའ་སྙིང་པོ་འཁྲུངས་ཏེ་མདོ་སྔགས་ཀྱི་ཆོས་དུ་མ་ལ་ཐོས་བསམ་སྒོམ་པ་ཕུལ་དུ་ཕྱིན་པ་མཛད། འཇམ་དབྱངས་ཨ་ར་པ་ཙ་ནའི་གསང་བ་གསུམ་གྱི་བདུད་རྩིའི་ཆུ་རྒྱུན་གྱིས་ཐུགས་ཀྱི་བུམ་བཟང་ཡོངས་སུ་གང་བས། རྗེ་བཙུན་འཇམ་དཔལ་དབྱངས་ཀྱི་རྣམ་འཕྲུལ་དུ་ཤེས་ལྡན་མཐའ་དག་གོར་མ་ཆགས་པས་དཔལ་ས་སྐྱ་པ་འཇམ་དབྱངས་འཁོན་གྱི་རིགས་ཞེས་གྲགས་ཤིང་། ཁྱད་པར་གསང་ཆེན་རྡོ་རྗེ་ཐེག་པའི་བསྟན་པའི་བདག་པོར་གྱུར་པས། རྒྱ་གར་དུ་ཡང་བིཪྺ་པའི་སྤྲུལ་པ་ས་སྐྱ་པ་བྱ་བའི་གྲགས་སྙན་གྱི་ཟེའུ་འབྲུ་ཕྱོགས་བྲལ་ཐོས་འཛིན་འདམ་སྐྱེས་ཀྱི་ངོས་སུ་གཡུར་ཟ་ལྡེམ་ཞིང་། མདོར་ན་དུས་གཅིག་ཏུ་སྐུའི་བཀོད་པ་མི་འདྲ་བ་མཐའ་ཡས་པ་སྟོན་པ་སོགས་རྗེ་བཙུན་ས་ར་ཧས་མཚོན་པའི་འཕགས་ཡུལ་གྱི་གྲུབ་པའི་དབང་ཕྱུག་མཐའ་དག་གི་ཁེངས་པའི་(༥༥ན)

---

^{[མ་དཔེ་གཟིགས་ན་འདིར་གནོན།]}

རྒྱུད་འགུགས་པར་བྱེད་པའི་ཁ་སྦྱོར་བདུན་ལྡན་གྱི་བླ་ན་མེད་པའི་ལམ་གྱི་པདྨ་དཀར་པོའི་ཆུན་པོ་འདོད་པའི་བདེ་བ་གཉིས་མེད་མཐའ་ཀླས་པའི་ཅོན་པན་རྣམ་པར་བཅིངས་པས་འབྲས་བུའི་ཐེག་པ་ལ་གཅིག་ཏུ་བཀའ་དྲིན་ཆེ་ལ། དམ་པ་འདི་ལ་སྲས་བཞི་བྱུང་བའི་ཆེ་བ་འཁོན་ཀུན་དགའ་འབར་རྒྱ་གར་དུ་བྱོན་པ་ཚད་པས་གཤེགས། དེ་འོག་མི་ཐུབ་ཟླ་བའི་སྤྲུལ་པ་འཁོན་བསོད་ནམས་རྩེ་མོ་ནི་ཡབ་མེས་ཀྱི་ཆོས་འབྲས་བུའི་ཐེག་པ་དང་། གསང་ཕུར་ཆ་པ་ལ་རྒྱུའི་ཐེག་པར་ཐོས་བསམ་མཛད། དེའི་གཅུང་འཁོན་གྲགས་པ་རྒྱལ་མཚན་ནི་རྡོ་རྗེ་འཛིན་པའི་ཆོས་ཀྱི་རྒྱལ་སྲིད་ལ་མངའ་སྒྱུར་བས་གྲུབ་པའི་དབང་ཕྱུག་ཆེན་པོ་དེ་ཐོས་བསམ་སྒོམ་པའི་གྲུ་གཟིངས་ལ་བརྟེན་ནས་ཟུང་འཇུག་ནོར་བུའི་གླིང་དུ་གཤེགས་པ། ཡོན་ཏན་གྱི་དངོས་པོ་བརྗོད་པའི་མཐའ་དང་བྲལ་ཞིང་། ཁ་ཆེ་པཎ་ཆེན་གྱིས་ཉི་ཟླ་གཟའ་འཛིན་འབྱུང་བར་ལུང་བསྟན་པ། རྗེ་གྲགས་པས་རྩ་རླུང་ལ་གཟིར་བས་མ་བྱུང་བ་དང་། རྡོ་རྗེ་དང་དྲིལ་བུ་ནམ་མཁར་འཇོག་ནུས་ཤིང་རང་སྒྲ་འཁྲོལ་བ། མ་མགོན་ལྕམ་དྲལ་བྲན་དུ་འཁོལ་ནུས་པ་སོགས་ངོ་མཚར་བའི་མཛད་པ་ཤིན་ཏུ་མང་། དེའི་གཅུང་འཁོན་དཔལ་ཆེན་འོད་པོ་ཆེའི་སྲས་གཉིས་ལས། ཆེ་བ་འཁོན་དཔལ་ལྡན་དོན་གྲུབ་ནི་སྐྱེ་བ་ཉི་ཤུ་རྩ་ལྔ་ལ་མིའི་སྲིད་པ་བཟུང་ཞིང་། འཇམ་དཔལ་དབྱངས་ཀྱི་བྱིན་རླབས་ག་བུར་གསར་པའི་ཐིགས་པ་སྙིང་ལ་སིམ་པས་མི་ཤེས་པའི་ཚ་གདུང་རྒྱང་རིང་པོར་བསྲིངས་པས་ཆུང་ངུའི་དུས་ནས་སཾ་སྐྲྀ་ཏའི་སྐད་སྨྲ་བ། ལཉྩ་དང་ཝརྟུའི་ཡི་གེ་འདྲི་བ་སོགས་སྔོན་གྱི་བག་ཆགས་སད་པའི་རྣམ་འགྱུར་དུ་མ་མཛད་ཅིང་། རྗེ་གྲགས་པའི་དྲུང་དུ་དགེ་བསྙེན་གྱི་སྡོམ་པ་བླངས་པའི་མཚན་ཀུན་དགའ་རྒྱལ་(༥༥བ)

---

^{[མ་དཔེ་གཟིགས་ན་འདིར་གནོན།]}

མཚན་དུ་བཏགས། གཞོན་ནུའི་དུས་ནས་སྒོམ་ཆེན་རྒན་པོའི་རྣམ་ཐར་འཛིན་པའི་རྫུ་བག་གི་མི་ཚེ་དོན་མེད་དུ་སྟོང་པར་ཡོལ་བའི་ལུགས་རྣམས་ཆུ་ཤིང་གི་སྙིང་པོ་ལྟ་བུར་གཟིགས་ནས་མཁས་པ་དང་གྲུབ་པའི་བླ་མ་དུ་མ་བསྟེན་ཏེ། བཟོ་རིག་པ། གསོ་བ་རིག་པ། སྒྲ་རིག་པ། གཏན་ཚིགས་རིག་པ། ནང་རིག་པ་སྟེ་ཆེ་བ་ལྔ་དང་། སྙན་དངགས། མངོན་བརྗོད། སྡེབ་སྦྱོར། ཟློས་གར། སྐར་རྩིས་སོགས་མདོར་ན་རིག་པའི་གནས་མཐའ་དག་ལ་མཁས་པར་སྦྱངས་ཤིང་། ས་སྐྱ་པཎྜི་ཏ་ཞེས་སྙན་པའི་གྲགས་པ་དབུས་འགྱུར་རྡོ་རྗེ་གདན་གྱི་མཛེས་རྒྱན་དུ་སྦུད། བོད་འདིར་གནས་ལྔ་རིག་པའི་སྲོལ་འབྱུང་བ་འདི་ཉིད་ཀྱི་བཀའ་དྲིན་ཡིན་ཅིང་། མིང་དང་དོན་མཐུན་པའི་མཁས་པ་ཟུར་མཁར་བློ་གྲོས་རྒྱལ་པོས། སེམས་ཀྱི་ཆོས་ཉིད་རྗེན་འཆར་མ་མཐོང་ཀྱང་། །ཚེ་འདིར་མཁོ་བའི་ཤེས་བྱའི་ཚིག་དོན་ཤེས། །ཞེས་གསུང་བ་ཡང་གངས་ཁྲོད་ཀྱི་བླུན་སྒོམ་རྣམས་ཀྱི་ཚུལ་ལ་དཔགས་ན་ཐུགས་ཤིན་ཏུ་མད་དོ། ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲའི་དྲུང་དུ་བསྙེན་པར་རྫོགས་པའི་སྡོམ་པ་མནོས་ཏེ། མཁན་པོའི་མཚན་གྱིས་མཐའ་ཅན་དུ་བྱས་ནས་ཀུན་དགའ་རྒྱལ་མཚན་གྱི་མཇུག་ཏུ་དཔལ་བཟང་པོ་སྦྱར། མུ་སྟེགས་ཀྱི་སྟོན་པ་འཕྲོག་བྱེད་དགའ་བ་ལྟ་བུ་སྒྲ་ཚད་ཀྱི་རིག་པའི་ལུས་སྟོབས་རྣམ་པར་རྒྱས་པའི་གཉིས་འཐུང་ཡང་། འཇིགས་པ་མེད་པའི་རྩོད་པའི་ང་རོས་ཚར་བཅད། འོན་ཀྱང་འཕྲོག་བྱེད་དགའ་བོས་རྫུ་འཕྲུལ་གྱིས་ནམ་མཁའ་ལ་འཕུར་བས། སློབ་དཔོན་འདར་འཕྱར་རོགས་སུ་སྦྲན་ནས་བཏུལ་ཏེ་ནང་པའི་བསྟན་པ་ལ་འཇུག་པར་ཁས་བླངས། རབ་ཏུ་འབྱུང་བར་ཞུས་ཀྱང་། མུ་སྟེགས་ཀྱི་རྟགས་མ་བོར་བར་ཡོད་རྣམས་ངོ་མཚར་བའི་ཆེད་དུ་ཁྲིད་བྱོན་པ་(༥༦ན)

---

^{[མ་དཔེ་གཟིགས་ན་འདིར་གནོན།]}

སློབ་དཔོན་མཚོ་སྐྱེས་རྡོ་རྗེས་བསྟན་མ་བཅུ་གཉིས་ལ་བཀའ་བསྒོས་པའི་མཐུས། འཕྲོག་བྱེད་ཁ་ནས་ཁྲག་སྐྱུགས་ཏེ་ཤི་བའི་རལ་པའི་ཅོན་པན་དཔལ་ལྡན་ས་སྐྱའི་ཀ་པའི་མཛེས་བྱེད་དུ་ཡོད་དོ། །དེ་ནས་ཧོར་རྒྱལ་པོའི་ལུང་བྱུང་བ་བཞིན་རྒྱ་ཧོར་གྱི་རྒྱལ་ཁམས་སུ་བྱོན་ཏེ། དཔག་པར་དཀའ་བའི་སྐུ་གསུང་ཐུགས་ཀྱི་མཛད་པ་དུ་མས་མཐའ་ཁོབ་ཀྱི་རྒྱལ་ཁམས་མཐའ་དག་དམ་པའི་ཆོས་ཀྱིས་གསལ་བར་མཛད་ཅིང་། རྒྱལ་པོས་བདག་གི་ནད་ཀྱིས་ཐེབས་པ་ལས་རྣམ་པར་གྲོལ་བའི་མི་འཇིགས་པའི་སྦྱིན་པ་སྔ་ན་མེད་པ་སྩལ། ཤར་པདྨའི་སྡེར་མདོ་ཕྱོགས་ཀྱི་བཤད་པ། ལྷོ་དབང་གི་སྡེར་དབང་བྱས་བརྒྱ་རྩ། ནུབ་རྒྱ་མཚོའི་སྡེར་ཀླུའི་རྒྱལ་པོ་རྣམས་དབང་དུ་བསྡུས་ཏེ་དམ་ལ་བཏགས་ནས་ཆར་ཆུ་དུས་སུ་འབེབས་པ་སོགས་འཇིག་རྟེན་ཀུན་ཏུ་འབྲུ་ནོར་ལོངས་སྤྱོད་ཟད་མི་ཤེས་པའི་འདོད་འཇོ་ཆར་དུ་འབེབ་པར་མཛད། བྱང་དུ་སྒྱུ་མ་མཁན་གྱི་སྤྲུལ་པའི་གྲོང་ཁྱེར་ལ་མེ་ཏོག་འཐོར་བས་སྒྱུ་མ་བཤིག་མ་ཐུབ་པས་སྤྲུལ་པའི་སྡེ་ཞེས་ཡ་མཚན་ཅན་དུ་གྲགས་ཤིང་། སྐུའི་བཀོད་ཀ་ཡང་སྤྲུལ་པའི་སྡེ་ཉིད་དུ་བསྡུས། ཆོས་རྗེའི་གཅུང་ཟངས་ཚ་བསོད་ནམས་རྒྱལ་མཚན་ལ་སྲས་ལྕམ་སྲིང་བརྒྱད་བྱུང་བའི་མ་གཅིག་ཀུན་དགའ་སྐྱིད་ཀྱི་སྲས་བླ་མ་འཕགས་པ་དང་། ཕྱག་ན་གཉིས་ལས་ལོ་ཙཱ་བ་སྐ་བ་དཔལ་བརྩེགས་ཀྱི་སྐྱེ་མཐའ་འཕགས་པ་རིན་པོ་ཆེ་ནི་ཆུང་ངུའི་དུས་ནས་གསུང་རབ་ལ་ཐོས་བསམ་ལེགས་པར་མཛད་ཅིང་། ཧོར་ཡུལ་དུ་འབྱོན་པའི་དུས། དབུས་ཀྱི་སའི་ཆར་རབ་ཏུ་བྱུང་བའི་མཚན་བློ་གྲོས་རྒྱལ་མཚན་དཔལ་བཟང་པོར་གསོལ་ཞིང་། ཆོས་རྗེ་ས་པཎ་དང་རྒྱལ་པོ་གོང་མ་མཆོད་ཡོན་ཞི་བར་གཤེགས་རྗེས། སེ་ཆེན་རྒྱལ་པོ་གོང་མའི་ཁྲི་ཐོག་ཏུ་བྱོན་(༥༦བ)

---

^{[མ་དཔེ་གཟིགས་ན་འདིར་གནོན།]}

པ་དང་། འཕགས་པ་རིན་པོ་ཆེ་དགུང་ལོ་བཅུ་དགུ་ལོན་པ་རྒྱལ་པོའི་ཏི་ཤྲིར་གྱུར་ནས། གཱན་དིན་གུ་ཤྲིའི་མཛད་མེད་གཡང་ཊིའི་དམ་ཁ། གསེར་དང་མུ་ཏིག་གིས་བརྒྱན་པའི་སྣམ་སྦྱར། རིན་པོ་ཆེས་སྤྲས་པའི་ཕྱམ་རྩེ། རིན་པོ་ཆེའི་ལས་ཞྭ། གསེར་གྱི་གདུགས་དང་། ཁྲིའུ་སོགས་བཀོད་པས་ཁྱད་པར་དུ་འཕགས་པའི་དངོས་པོ་དུ་མ་དང་། གཞན་ཡང་གསེར་བྲེ་དངུལ་བྲེ། རྟ་རྔ་མོང་། ཇ་གོས་དར་སོགས་བདོག་པའི་ཡོ་བྱད་ཀྱི་འདོད་རྒུ་མཐའ་ཡས་པ་ཕུལ། དེ་ནས་མདོ་ཁམས་སུ་ཕེབས་ནས་མཁན་པོ་གྲགས་པ་སེང་གེའི་དྲུང་དུ་སྤོང་བདུན་འཁོར་བཅས་ཀྱི་ཚུལ་ཁྲིམས་ཡང་དག་པར་མནོས་ཏེ། སླར་གོང་མའི་ཕོ་བྲང་དུ་ཕེབས། ཧོར་ཡིག་གསར་བསླབས་པའི་ཡིག་ཕུད་ལ། བནྡེ་ཤེད་སྐྱེས་ཀྱི་འཇའ་ས་ཐོག་མ་གནང་། རྒྱལ་པོས་རྡོ་རྗེ་ཐེག་པའི་ཆོས་ཀྱི་བདུད་རྩིའི་དགའ་སྟོན་ལན་གསུམ་དུ་སྤྱད་པའི་དང་པོའི་དུས་སུ་བོད་ཁྲི་བསྐོར་བཅུ་གསུམ་ཕུལ། གཉིས་པའི་དུས་སུ་བོད་ཆོལ་ཁ་གསུམ་ཕུལ། གསུམ་པའི་དུས་སུ་རྒྱའི་མི་ཡུར་ཆེན་མོ་དང་། རྒྱལ་པོ་མ་སྐྱེས་དགྲའི་གདུང་སྐལ་གྱི་བདེ་བར་གཤེགས་པའི་འཕེལ་གདུང་རྣམས་ཕུལ། རྒྱལ་པོས་བོད་གྱི་བནྡེ་རྣམས་ས་སྐྱ་པའི་ཆོས་ལུགས་མ་གཏོགས་གཞན་བྱེད་དུ་མི་འཇུག་པའི་གསུང་སྔ་ཕྱིར་བྱོན་པ་ན། འགྲོ་མགོན་འཕགས་པས་སོ་སོའི་ལུགས་བཞིན་བྱེད་དུ་འཇུག་པར་ཞུས་པས། རྒྱལ་པོས་བླ་མ་དེ་ལྟར་གསུང་ན་རང་རང་གི་ལུགས་བཞིན་གྱིས་ལ། ངེད་ལ་སྨོན་ལམ་ཐོབ་གསུང་བའི་འཇའ་ས་གནང་། དབུས་གཙང་གི་ཕྱོགས་སུ་ཆས་རྐྱེན་དུ་མ་བརྫངས་པ་ལ་བརྟེན་ནས། དཔོན་ཆེན་ཤཱཀྱ་བཟང་པོས་གསེར་འོད། ནང་རྟེན་ཐུབ་ཆེན། ཕྱི་རྟེན་གསེར་འབུམ་བཞེངས། མི་རིང་བར་བླ་མ་ཡང་ས་སྐྱར་ཕེབས། གསེར་(༥༧ན)

---

^{[མ་དཔེ་གཟིགས་ན་འདིར་གནོན།]}

འབུམ་བཀྲ་ཤིས་སྒོ་མང་དང་། ཕྱིའི་སྐྱ་འབུམ་བདུན་ལ་གསེར་ཟངས་ལས་གྲུབ་པའི་གདུགས་ཆོས་འཁོར་དང་། ས་པཎ་གྱི་གསེར་འབུམ་ལ་གསེར་ཐོག་བཟོས། རྒྱལ་བའི་བཀའ་པོ་ཏི་ཉིས་བརྒྱ་ལྷག་ཙམ་གསར་གྱིས་བཞེངས་སླར་གོང་མས་གདན་འདྲེན་གྱི་གསེར་ཡིག་ནན་ཆེན་མངགས་པ་ལ་བརྟེན། བཤུལ་དུ་བཞུགས་པའི་ཞར་བྱུང་དུ་གྱེ་རེ་ལྷ་ཁང་དུ་ཕེབས་ནས་གཟིགས་རྟོག་མཛད་དེ། མི་ལ་ཉེ་གནས་གོ་ཆོད་འདི་འདྲ་བྱུང་འདུག་གསུངས་པས་རྐྱེན་བྱས་ཏེ། དཔོན་ཆེན་ཤཱཀྱ་བཟང་པོས་གྱེ་རེ་ལྷ་ཁང་ལ་ཐིག་ཚད་བླངས་ཏེ་ཁྲི་བསྐོར་བཅུ་གསུམ་བསྐུལ་ནས་ལྷ་ཁང་ཆེན་མོ་བརྩིགས། འགྲོ་མགོན་ཕོ་བྲང་ཆེན་པོར་ཕེབས་པ་ན། རྒྱལ་པོས་གནམ་གྱི་འོག །སའི་སྟེང་། རྒྱ་གར་གྱི་ལྷའི་སྲས་པོ། ཡི་གེ་རྩོམ་མི། སྤྲུལ་པའི་སངས་རྒྱས། རྒྱལ་ཁམས་འཇགས་སུ་འཇུག་མི། སྙན་ངག་གི་རྒྱུ། པཎྜི་ཏ་འཕགས་པ་ཏི་ཤྲི་ཞེས་པའི་མཚན་དུ་མངའ་གསོལ། །འབུལ་བ་ལན་རེ་ལ་ཚན་ཆེ་བ། དངུལ་བྲེ་ཆེན་སྟོང་ར་ཅན་ཚན་པ་གཉིས། གོས་དར་ལྔ་སྟོང་དགུ་བརྒྱ་བཞི་བཅུ་ཕུལ། སྐབས་ཤིག་ཀརྨ་བཤེས་ཆུ་ལ་འཛུལ་བ། མཁའ་ལ་འཕུར་བ། ཕ་བོང་བརྫི་བ་སོགས་རྫུ་འཕྲུལ་དུ་མ་བསྟན་པ་ན། རྒྱལ་པོས། རང་རེའི་ཏི་ཤྲི་འཕགས་པ་འདི་སངས་རྒྱས་སྣང་བ་མཐའ་ཡས་མིའི་གཟུགས་སུ་སྤྲུལ་པ་ཞིག་ཡིན་ཀྱང་། རྫུ་འཕྲུལ་དང་རྟོགས་པ་རྟོགས་ལྡན་རྒྱལ་པོ་འདི་མཐོ་བར་འདུག་གསུངས་པས། བཙུན་མོ་ཆའུས་བླ་མའི་དྲུང་དུ་རྒྱུ་མཚན་རྣམས་བསྐྱར་ཏེ། པཀྵི་ལ་མཆོད་གནས་ཀྱི་གཙོ་བོ་བཅོལ་ནས་ས་སྐྱའི་གདུང་བརྒྱུད་རྣམས་ལ་གནོད་པས་རྫུ་འཕྲུལ་སྟོན་པར་ཞུས་པས། རྒྱལ་བློན་གྱི་དབུས་སུ་བླ་མས་རལ་གྲིས་དབུ་དང་(༥༧བ)

---

^{[མ་དཔེ་གཟིགས་ན་འདིར་གནོན།]}

ཕྱག་ཞབས་རྣམས་སོ་སོར་ཕྲལ་ཏེ། རྒྱལ་བ་རིགས་ལྔར་བྱིན་གྱིས་བརླབས་ཏེ་བསྟན་པ་སོགས་སྤྲུལ་པ་ངོ་མཚར་བ་དུ་མ་འདྲེན་བྱེད་ཀྱི་དགའ་སྟོན་དུ་སྩལ། དེ་ནས་སླར་གདན་ས་དཔལ་ལྡན་ས་སྐྱར་ཕེབས་ཏེ། དགེ་འདུན་འབུམ་དུ་ཉེ་བ་ལ་བསྙེན་བཀུར་ཕུན་སུམ་ཚོགས་པའི་དུས་སྟོན་ཁྱད་པར་ཅན་ཆུ་མིག་ཆོས་འཁོར་དུ་གྲགས་པ་མཛད། དུས་དེར་ཀུན་དགའ་བཟང་པོ་དཔོན་ཆེན་དུ་ཡོད་པ་བླ་མའི་ཐུགས་དང་འགལ་བ་འགའ་བྱས་ཞེས་ཉེ་གནས་ཀྱིས་གོང་མ་སེ་ཆེན་ལ་ཕྲ་མ་ཞུས་པས། ཧོར་དམག་གིས་བྱ་རོག་རྫོང་ཕབ་དཔོན་ཆེན་བསད། བྱ་རོག་རྫོང་དུ་དམག་གི་ཁྲིམས་རྔ་བརྡུང་། །སྙིང་མེད་པོ་ཚོ་གསེར་ཕྱེ་ཆུ་ལ་འབོ། །ཞེས་པའི་ལུང་བསྟན་དུས་ཐོག་ཏུ་བབས། དེའི་སྔོན་མའི་ལོ་ནང་དུ་བླ་མ་འཕགས་པ་ལྷ་ཁང་བླ་བྲང་དུ་ཞི་བར་གཤེགས་པ་འགའ་ཞིག་ཉེ་གནས་ཀྱིས་ཧོར་དམག་དྲངས་པ་བླ་མས་མཁྱེན་དོགས་ནས་ལྐོག་ཏུ་བཀྲོངས་ཀྱང་ཟེར། འདི་དག་གི་དུས་དཔོན་ཆེན་འགའ་ཞིག་གི་བྱེད་པ་ལ་བརྟེན་བོད་དུ་མི་བདེ་བ་དུ་མ་བྱུང་བས། སྣ་ཐག་སས་བྱས་ཧོར་དམག་བོད་དུ་ཡོང་། །ངན་སོང་ཟེར་ཡང་དེ་འདྲའི་སྡུག་བཇལ་མེད། །ཅེས་པའི་ལུང་བསྟན་གྱི་དུས་སྐབས་ཡིན་ཞིང་། འགྲོ་མགོན་གྱི་གཅུང་ཕྱག་ན་ཆོས་རྗེའི་ཕྱག་ཕྱིར་གོང་མའི་གམ་དུ་བྱོན། བོད་ཀྱི་དཔོན་དུ་བསྐོས་ཤིང་ཧོར་ཆས་བྱེད་དུ་བཅུག །ཟངས་ཚའི་ཇོ་མོ་ཤབ་ཀྱི་ཇོ་འགྲོམ་ལ་སློབ་དཔོན་རིན་ཅེན་རྒྱལ་མཚན་དང་། ལྕམ་འདི་ལེ་གཉིས་བྱུང་བའི་གཅེན་གྱི་རྒྱུད་ལུང་མན་ངག་དུ་མ་མཁྱེན་ཅིང་། འཕགས་པ་རིན་པོ་ཆེ་བོད་དུ་བྱོན་པའི་ཤུལ་དུ་གདན་ས་མཛད། སྤྱིར་བལ་པོ་ནས་མདོ་ཁམས་ཡན་གྱི་རྒྱལ་བའི་བཀའ་འགྱུར་རོ་ཅོག་དགེ་འདུན་རྣམས་ཀྱིས་ཀློག་པའི་བསྙེན་བཀུར་དང་། རྒྱ་བལ་(༥༨ན)

---

^{[མ་དཔེ་གཟིགས་ན་འདིར་གནོན།]}

མཚམས་ན་བཞུགས་པའི་འཕགས་པ་འཇའ་མ་ལིའི་གོང་མ་འཕགས་པ་མཆེད་གསུམ་པ་དེ་གདན་ས་ཆེན་པོར་གདན་དྲངས། གསེར་གླིང་ལྷུན་གྲུབ་སྡིངས་ཀྱི་དགོན་པ་བཏབ། སློབ་དཔོན་ཟངས་ཚ་ཇོ་མོ་གུང་ཐང་ལྷ་གཅིག་མཛེས་མ་ལ་སློབ་དཔོན་མ་བསོད་ནམས་འབུམ་དང་ཉི་མ་འབུམ་གཉིས་བྱུང་། དེའི་ཉེ་གནས་མ་རྗེ་རོང་མ་རྡོ་རྗེ་ལྡན་ལ་སློབ་དཔོན་ཡེ་ཤེས་འབྱུང་གནས་འཁྲུངས། འཇངས་ཡུལ་གྱི་རྒྱལ་པོ་ཧཱུ་ཏ྄་ཀ་ར་རྗེའི་བླ་མ་མཛད། སློབ་དཔོན་ཟངས་ཚའི་ཇོ་མོ་ཇོ་ལྕམ་ཧོར་མོ་ལ་སློབ་དཔོན་རིན་ཅེན་འབྱུང་གནས་འཁྲུངས་པ་ཆུང་ངུ་ནས་གཤེགས། འགྲོ་མགོན་ཕྱག་ནའི་ཇོ་མོ་མ་གཅིག་མཁའ་འགྲོ་འབུམ་ལ་སྲས་དྷརྨ་པཱ་ལ་རཀྵི་ཏ་འཁྲུངས། སློབ་དཔོན་ཡེ་ཤེས་འབྱུང་གནས་ཀྱི་སྲས་སུ་བདག་ཉིད་ཆེན་པོ་བཟང་པོ་དཔལ་བ་བོ་དོང་ཨེར་འཁྲུངས། འཕགས་པ་རིན་པོ་ཆེ་གཤེགས་རྗེས་འགྲོ་མགོན་ཕྱག་ན་སྐུ་དབང་བཙན་པས་དྷརྨ་རཀྵི་ཏ་ཁོང་རང་གི་སྲས་སུ་སོང་བས་གདན་སའི་མཐིལ་དུ་བཞག །གོང་མའི་དྲུང་དུ་བདག་ཉིད་ཆེན་པོ་བཟང་པོ་དཔལ་བ་ས་སྐྱའི་གདུང་བརྒྱུད་མིན་ཚུལ་སོགས་ཀྱི་སྙན་ཕྲ་ཕུལ་པ་ལ་བརྟེན། རྒྱལ་པོའི་ལུང་གིས་རྒྱ་མཚོ་ཆེན་པོའི་ཆུ་འཇམ་ཉི་ཤུ་བསྒྲལ་བའི་གླིང་ཆུང་ཞིག་ཏུ་ཕེབས་དགོས་པ་བྱུང་། དེའི་བར་དུ་དྷརྨ་པཱ་ལ་རཀྵི་ཏ་ཡབ་སྲས་གཤེགས་པས། ས་སྐྱའི་དཔོན་ཆེན་སོགས་བཀའ་གྲོས་ལ་དབང་བ་རྣམས་ཀྱིས་བླ་མ་བདག་ཉིད་ཆེན་པོ་གདན་དྲངས་ཆོག་པའི་གོང་སར་མི་སྣ་བཏང་ཀྱང་དོན་མ་མཐོང་བས། ཆོས་རྗེ་ཁུ་དབོན་གྱི་མགོན་པོའི་བཀའ་བབས་ཀྱི་སློབ་མ་གྱ་ཨ་སྙན་དམ་པ་ཀུན་དགའ་གྲགས་ཀྱི་བྱོན་ཏེ། རྒྱལ་པོའི་ཕོ་བྲང་སྟེང་དུ་(༥༨བ)

---

^{[མ་དཔེ་གཟིགས་ན་འདིར་གནོན།]}

ཁའུའི་རྡོ་ཆར་དང་། བྱ་རོག་རེའུ་ཆུང་གི་བོང་ཚོད་ཙམ་ལྕགས་ཀྱི་མཆུ་སྡེར་ཅན་ཞིག་སྐད་སྒྲོག་ཅིང་གཤོག་པ་བརྡེབ་པ་སོགས་བྱུང་བས། དམ་པ་ཀུན་གྲགས་པས། བླ་མ་བདག་ཉིད་ཆེན་པོ་ས་སྐྱ་པའི་ཞལ་ངོ་ཡིན་པ་ལ་བརྙས་པས་ལན་པའི་རྒྱུ་མཚན་ཞུས་པས། བདག་ཉིད་ཆེན་པོ་ཕོ་བྲང་དུ་སྤྱན་དྲངས། བཀུར་སྟི་ཕུན་སུམ་ཚོགས་པ་དང་བཅས་གདན་ས་ཆེན་པོའི་ཁྲིར་ཕབས་སུ་བཅུག །བར་སྐབས་སུ་ཞལ་ངོ་ཉག་ཕྲ་བ་ལ་བརྟེན། ཤར་པས་ཁྲི་བསྐོར་བཅུ་གསུམ་ལ་ལུང་གཏོང་བ་བྱུང་། སྔ་མ་བདག་ཉིད་ཆེན་པོའི་སྲས་བསོད་ནམས་བཟང་པོ་མདོ་ཁམས་སུ་གྲོངས། དབུས་གཙང་དུ་ཇོ་མོ་བདུན་བླངས་པའི་ཀུན་དགའ་འབུམ་གྱི་སྲས་ཀུན་དགའ་བློ་གྲོས་ཧོར་ཡུལ་དུ་བྱོན་ནས་བུ་ཡན་རྒྱལ་པོ། གི་གན་རྒྱལ་པོ། ཡེ་སུན་ཐེ་མུར་གསུམ་གྱི་ཏི་ཤྲཱི་མཛད། མ་གཅིག་ཡོན་བདག་མོའི་སྲས་ཆེ་བ་ཆུང་ངུའི་དུས་གྲོངས། ཀུན་དགའ་ལེགས་འབྱུང་གི་ཡེ་སུན་ཐེ་མུར་ཀུན་དགའ་རྒྱལ་མཚན་གྱིས་རནྟ་ཤྲཱི་དང་ཐོ་གན་ཐི་མུར་གྱི་བླ་མར་ཧོར་ཡུལ་དུ་བྱོན། མ་གཅིག་ནམ་མཁའ་རྒྱལ་མོ་ལ་སྲས་ནམ་མཁའ་བཤེས་གཉེན་ནམ་མཁའ་ལེགས་པ། ནམ་མཁའ་རྒྱལ་མཚན་གསུམ་བྱུང་བའི་ནམ་མཁའ་ལེགས་པས་གདན་ས་ཆེན་པོའི་ཁྲི་ཐོག་ཏུ་བཞུགས། མ་གཅིག་གཞོན་ནུ་འབུམ་ལ་ཀུན་དགའ་ཉི་མ། དོན་ཡོད་རྒྱལ་མཚན། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གསུམ་འཁྲུངས་པའི་ཆོས་རྗེ་བླ་མ་ནི། རིག་པའི་གནས་མཐའ་དག་ལ་ཕུལ་དུ་ཕྱིན་ཞིང་རྡོ་རྗེ་འཛིན་པའི་ས་ཆེན་པོ་མངའ་བརྙེས་པས་བསྟན་འཛིན་ཀུན་གྱི་གཙུག་རྒྱན་དམ་པར་གྱུར་པ་ལ། ཁྱད་པར་གོང་མ་སྡེ་སྲིད་ཕག་མོ་གྲུ་པའི་ཡོངས་འཛིན་དུ་གྱུར་པས་ཁྱད་པར་འཕགས། མ་གཅིག་ཉི་(༥༩ན)

---

^{[མ་དཔེ་གཟིགས་ན་འདིར་གནོན།]}

མ་རིན་ཅེན་ལ་ཉི་མ་དཔལ། ཀུན་དགའ་ལེགས་རྒྱལ། ཀུན་དགའ་རྒྱལ་མཚན་གསུམ་འཁྲུངས། ཀུན་སྤངས་ལྕམ་མོ་ལ་བློ་གྲོས་རྒྱལ་མཚན་དང་། ཁང་གསར་དཔོན་མོ་ལ་བསོད་ནམས་བློ་གྲོས་དང་གྲགས་པ་རྒྱལ་མཚན་གཉིས་འཁྲུངས། དེ་ཡང་ཏི་ཤྲི་ཀུན་དགའ་བློ་གྲོས་ཀྱིས་གཅུང་པོ་རྣམས་ལ་བླ་བྲང་བཞི་སོ་སོར་དགོས་ཏེ་གནང་བས། མཁས་བཙུན་ནམ་མཁའ་ལེགས་པའི་སྲས་ཏ་དབེན་ཀུན་དགའ་རིན་འབྱུང་། དེ་ལ་བཙུན་མོ་གཉིས་ལས་ཆེ་བའི་སྲས་གུ་ཤྲི་བློ་གྲོས་རྒྱལ་མཚན་ཆུང་བའི་སྲས་སློབ་དཔོན་གྲགས་པ་བློ་གྲོས་དང་། ཀུན་དགའ་བློ་གྲོས་རྒྱལ་མཚན། ལྕམ་གཅིག་དང་གསུམ་བྱུང་། གྲགས་པ་བློ་གྲོས་ཀྱི་སྲས་སུ་བློ་གྲོས་དབང་ཕྱུག་འཁྲུངས། ཡབ་སྲས་འདི་གཉིས་ལ་ཆུ་མིག་བདག་ཆེན་དུ་གྲགས། ཀུན་དགའ་བློ་གྲོས་ཀྱི་སྲས་ཀུན་དགའ་དབང་ཕྱུག་འཁྲུངས། རིམ་པར་བྱོན་པའི་གདུང་བརྒྱུད་འདི་རྣམས་ལ་བཞི་ཐོག་བླ་བྲང་ཞེས་སོ། །བླ་མ་དམ་པའི་གཅེན་དོན་ཡོད་རྒྱལ་མཚན་གྱི་སྲས་ཉི་མ་རྒྱལ་མཚན་དང་། ཟླ་བ་རྒྱལ་མཚན་གཉིས། ཕྱི་མའི་སྲས་བླ་ཆེན་ཀུན་དགའ་རྒྱལ་མཚན། དེ་ལ་འཇམ་དབྱངས་ནམ་མཁའ་རྒྱལ་མཚན་དང་། ཞ་ལུ་བ་བསོད་ནམས་རྒྱལ་མཚན་ལྕམ་སྲིང་གཉིས་འཁྲུངས་པ་ལས། ནམ་མཁའ་རྒྱལ་མཚན་གྱི་སྲས་རྒྱ་གར་ཤེས་རབ་རྒྱལ་མཚན་དང་། བདག་ཆེན་རྡོ་རྗེ་འཆང་ལྕམ་བཞི་དང་དྲུག་འཁྲུངས། ཞ་ལུ་བའི་སྲས་སློབ་དཔོན་གྲགས་པ་རྒྱལ་མཚན་ཏེ། རིན་ཅེན་སྒང་བླ་བྲང་དུ་གྲགས་ལ་གསང་ཆེན་བློ་བཤད་སོགས་དཔལ་ལྡན་ས་སྐྱ་པའི་ཟབ་དོན་གྱི་བདག་པོ་རིམ་པར་བྱོན་། ཏི་ཤྲི་ཀུན་དགའ་ལེགས་འབྱུང་གི་གཅུང་ཀུན་དགའ་རྒྱལ་མཚན་གྱི་སྲས་ཏ་(༥༩བ)

---

^{[མ་དཔེ་གཟིགས་ན་འདིར་གནོན།]}

དབེན་ཆོས་ཀྱི་རྒྱལ་མཚན་དང་། ཏ་དབེན་བློ་གྲོས་རྒྱལ་མཚན་གཉིས་སྔ་མ་ལ་ཇོ་མོ་གསུམ་ལས་དང་པོའི་སྲས་ཐེག་ཆེན་ཆོས་ཀྱི་རྒྱལ་པོ། གཉིས་པ་ལ་དྷརྨ་དྷྭ་ཛ། རིན་ཅེན་རྡོ་རྗེ། གསུམ་པ་ལ་སློབ་དཔོན་བསོད་ནམས་བཀྲ་ཤིས། དེའི་སྲས་སློབ་དཔོན་བདེ་ལེགས་བཀྲ་ཤིས། དེའི་སྲས་བསོད་ནམས་རྒྱལ་མཚན། ཤཱཀྱ་སེང་གེ །བསམ་གྲུབ་རྒྱལ་མཚན། དོན་གྲུབ་རྒྱལ་མཚན། ཤཱཀྱ་སེང་གེའི་བཙུན་མོ་ཆེ་བའི་སྲས་ཀུན་དགའ་བཀྲ་ཤིས། ཀུན་དགའ་རྒྱལ་མཚན། ཀུན་དགའ་སྙིང་པོ་གསུམ་ལས་བར་པས་ཁམས་ཀྱི་ཕྱོགས་སུ་ཕེབས་པར་སྲས་ཆོས་ཀྱི་རྒྱལ་མཚན་ས་ཀུན་དགའ་བློ་གྲོས་ལེགས་པའི་འབྱུང་གནས་མཆེད་གཉིས་འཁྲུངས། འདི་རྣམས་ལ་ལྷ་ཁང་བླ་བྲང་དུ་གྲགས། སློབ་དཔོན་ཉི་མ་དཔལ་གྱི་གཅུང་པོ་ཀུན་དགའ་ལེགས་པ་ལ་ཇོ་མོ་གཉིས་ལས། ཆེ་བའི་སྲས་སློབ་དཔོན་བསོད་ནམས་འབུམ། ཆུང་བའི་སྲས་བླ་ཆེན་བསོད་ནམས་བློ་གྲོས། གཞོན་ནུ་ལ་གཤེགས་པ་གཅིག །དབང་གྲགས་པ་རྒྱལ་མཚན། འདི་ལ་ཇོ་མོ་གཉིས་ལས། དང་པོ་ལ་ཀུན་དགའ་ལེགས་པའི་བློ་གྲོས་དང་། དབང་རྣམ་སྲས་རྒྱལ་མཚན་གཉིས་འཁྲུངས། གཉིས་པ་ལ་ཆོས་ཀྱི་རྒྱལ་མཚན་འཁྲུངས། དབང་རྣམ་སྲས་པར་ཇོ་མོ་གཉིས་ལས། དང་པོའི་སྲས་ཀུན་དགའ་བློ་གྲོས། གཉིས་པ་ལ་དབང་ནམ་མཁའ་ལེགས་པ་དང་ལྕམ་ལྔ་འཁྲུངས། ནམ་མཁའ་ལེགས་པ་ལ་ཇོ་མོ་གཉིས་ལས། དང་པོ་ལ་ལྕམ་གཉིས། གཉིས་པ་ལ་དབང་ནམ་མཁའ་རྒྱལ་མཚན། དེ་ལ་ཇོ་མོ་གསུམ་ལས། དང་པོ་ལ་ལྕམ་གཅིག །གཉིས་པ་ལ་ནམ་མཁའ་རིན་ཆེན། གསུམ་པ་ལ་ནམ་མཁའ་བཀྲ་ཤིས། དེའི་སྲས་ས་ལོ་ཐམས་ཅད་མཁྱེན་པ། བདག་ཆེན་(༦༠ན)

---

^{[མ་དཔེ་གཟིགས་ན་འདིར་གནོན།]}

ངག་གི་དབང་ཕྱུག །འཇམ་དཔལ་གྲགས། ནམ་མཁའ་དོན་གྲུབ། དེའི་སྲས་ཀུན་དགའ་བསམ་གྲུབ་དང་སྔགས་འཆང་ཆེན་པོ་ཀུན་དགའ་རིན་ཅེན། སྔ་མའི་སྲས་བདག་ཆེན་ཀུན་དགའ་བདེ་ལེགས། དེའི་སྲས་བསོད་ནམས་ལྷུན་གྲུབ། ཀུན་དགའ་ལྷུན་གྲུབ། འཇིག་རྟེན་དབང་ཕྱུག །དེའི་སྲས་བསོད་ནམས་བློ་གྲོས། བྱམས་པ་བསོད་ནམས་ལྷུན་གྲུབ། ངག་དབང་བསོད་ནམས་ལྷུན་གྲུབ་རྣམས་འཁྲུངས། ཀུན་དགའ་རིན་ཅེན་ལ་ཇོ་མོ་གསུམ་ལས། དང་པོ་ལ་ལྕམ་གཉིས། གཉིས་པ་ལ་ངག་དབང་བསོད་ནམས་དབང་པོ། ལྕམ་གསུམ། གསུམ་པ་ལ་གྲགས་པ་བློ་གྲོས། དེ་ལ་སྲས་ལྕམ་སྲིང་དྲུག་ལས། སྲས་བགྲེས་པ་གཉིས་གཞོན་ནུ་ནས་གཤེགས། དེ་འོག་ཀུན་དགའ་དབང་རྒྱལ། མཐུ་སྟོབས་དབང་ཕྱུག །ངག་དབང་ཀུན་དགའ་བསོད་ནམས་གསུམ་འཁྲུངས་ཏེ། འཁོན་ས་སྐྱ་པའི་གདུང་བརྒྱུད་རིན་པོ་ཆེ་དང་། མདོ་རྒྱུད་ཀྱི་བསྟན་པ་ནི་དེང་སང་གི་བར་དུ་གནས་པ་ཡིན་ནའང་། སྲིད་ཀྱི་སྟོབས་འབྱོར་ཕུན་སུམ་ཚོགས་པ་ནི། འགྲོ་མགོན་ཆོས་རྒྱལ་འཕགས་པ་ནས། འགྲོ་མགོན་བསོད་ནམས་པའི་བར་དུ་ལུང་གི་བསྐོས་པའི་དཔོན་ཆེན་གཅིག་གཉིས་སླར་ལྡབ་པ་དང་བཅས་པའི་ཉི་ཤུའི་བར་དུ་དབུས་གཙང་ཆོས་ཀྱི་ཆོལ་ཁ། མདོ་སྟོད་མིའི་ཆོལ་ཁ། མདོ་སྨད་རྟའི་ཆོལ་ཁ་སྟེ། བོད་ཆེན་པོའི་ཆོལ་ཁ་གསུམ་གྱི་རྒྱལ་ཁམས་ཀུན་ལ་མངའ་སྒྱུར་ཅིང་། ཁྱད་པར་ལ་སྟོད་ལྷོ་བྱང་། གུར་མོ། ཆུ་མིག །ཤངས་དང་། ཞ་ལུ་སྟེ་གཙང་ཁྲི་དྲུག རྒྱ་མ། འབྲི་གུང་། ཚལ་པ། ཐང་པོ་ཆེ་པ། ཕག་གྲུ། གཡའ་བཟང་སྟེ་དབུས་ཁྲི་དྲུག །དབུས་གཙང་གི་མཚམས་སུ་ཡར་འབྲོག་ཁྲི་བསྐོར་གཅིག་(༦༠བ)

---

^{[མ་དཔེ་གཟིགས་ན་འདིར་གནོན།]}

སྟེ་བོད་ཀྱི་ཁྲི་བསྐོར་བཅུ་གསུམ་གྱི་ཉེས་ལ་ཆད་པ་དང་བཟང་ལ་བྱ་དགའ་སྟེར་བ་སོགས་ཁྲིམས་ཀྱི་བྱེད་པོ་ནི། སྔར་སྨོས་པའི་དཔོན་ཆེན་ཤཱཀྱ་བཟང་པོ་དང་། ཀུན་དགའ་བཟང་པོ་གཉིས་ཀྱི་རྗེས་སུ་ཞང་བཙུན་བན་དཀར་བ་གཉིས་ཀྱི་ལས་ཀ་བཟུང་། དེ་རྗེས་བྱང་རིན་བསྐོས་པ་སོ་ཐིན་སིའི་དམ་ཁ་དང་། ཤེལ་དམ་བྱུང་ཡང་ཤངས་ཀྱི་སྡོང་མོ་ཐང་དུ་གཡོག་གིས་བསད། དེ་རྗེས་ཀུན་གཞོན་དང་གཞོན་དབང་གཉིས་ཀྱི་རིན་ལ་དབུས་གཙང་གི་ཆེ་གསལ་ཆེན་པོ་དང་ཁྲིམས་ཀྱི་ཞིབ་ཆ་བྱས། དེ་རྗེས་དཔོན་ཆེན་བྱང་རྡོར། དེ་ནས་ཨ་ལེན། འདིས་ས་སྐྱའི་ལྕགས་རི་ཕྱི་མ་དང་། བོན་པོ་རིའི་ལྕགས་རི། ཁང་གསར་གླིང་རྣམས་བརྩིགས་ཤིང་། ས་འབྲི་ནང་འཁྲུགས་པས། ཨང་ལེན་གྱིས་ཁྲི་བསྐོར་བཅུ་གསུམ་གྱི་དམག་འབྲི་གུང་དུ་དྲངས་ཏེ། ལྷ་ཁང་མེ་ལ་བསྲེགས་པ་སོགས་འབྲི་གུང་གླིང་ལོག་ཏུ་གྲགས་པ་དེ་བྱས་ཤིང་། དྭགས་པོ་སོགས་སུ་དཔུང་ཁྱེར་བྱས་པའི་ས་མཚམས་ཀྱི་བྲག་ལ་ཨང་ལེན་གྱི་མིང་བྲིས་འདུག་ཟེར་བ་སོགས་དཔོན་ཆེན་ཞིག་ལ་དྲག་ཤུལ་འདི་ཉིད་ཆེ་ཞིང་། དེའི་རྗེས་སུ་གཞོན་དབང་བསྐྱར་ནས་བསྐོས་པ་ལམ་དུ་གྲོངས། དེ་ནས་ལེགས་པ་དཔལ། སེང་གེ་དཔལ། འོད་ཟེར་སེང་གེ་འདིས་སྭོན་ཇིང་དབེན་གྱི་དམ་ཁ་བཟུང་། དེ་ནས་ཀུན་རིན། དོན་ཡོད་དཔལ། ཡོན་བཙུན། ཡང་འོད་ཟེར་སེང་གེ །རྒྱལ་བ་བཟང་པོ། དབང་ཕྱུག་དཔལ། བསོད་ནམས་དཔལ། ཡང་རྒྱལ་བ་བཟང་པོ། དབང་བརྩོན། འདི་གཉིས་ཀྱི་དུས་ཕག་མོ་གྲུ་པ་དང་མ་མཐུན་པས། དཔྱིད་ཀྱི་མ་མས་བསྐྱངས་པའི་སོས་དུས་ཀྱི་ལང་ཚོ་མངོན་པར་བདོ་བ་ན། དགུན་གྱི་གྲང་རེག་མཐའ་དག་རང་ཤུགས་ཀྱིས་འཇིག་པ་དངོས་པོའི་ཆོས་(༦༡ན)

---

^{[མ་དཔེ་གཟིགས་ན་འདིར་གནོན།]}

ཉིད་དུ་སྣང་བ་ཇི་བཞིན་དུ། འཇིག་རྟེན་གྱི་མེས་པོ་ཚངས་པའི་ལུང་གིས་སྡེ་བཞིའི་དཔལ་འབྱོར་མཐའ་དག་སྡེ་སྲིད་ཕག་མོ་གྲུ་པས་རང་བྱན་དུ་མཛད་པས། དེའི་རྗེས་སུ་ནམ་མཁའ་བརྟན་པ་སོགས་དཔོན་ཆེན་འགའ་ཞིག་འདྲེན་ཡང་དཔོན་ཆེན་སྔ་མ་རྣམས་ལྟར་བོད་ཆོལ་ཁ་གསུམ་ལ་ལུང་སྒྱུར་བ་ནི་མ་བྱུང་ངོ་། །དེ་ལྟར་དཔལ་ལྡན་ས་སྐྱ་བའི་རིགས་རུས་ཆོ་འབྲང་ཆོས་སྲིད་ཀྱི་ངང་ཚུལ་འདི་ལ་དཔགས་ན། གཡུང་པོའི་རིགས་ཅན་གྱི་དྲེགས་ལྡན་མཐའ་དག་ཕ་ཝང་ནམ་འཕང་སྤྱོད་པའི་ཚུལ་ལྟར་ངེས་པས། མི་ཤིས་གདོལ་པའི་ཕྲུག་གུ་འཕོངས་པ་ཡི། །འཁོར་གྱིས་བཏེག་ལ་འཇིག་རྟེན་འདྲེན་པ་ཞེས། །སྨིག་སྒྱུ་འབབ་ཆུར་སྒྲོག་པའི་གྲགས་སྟོང་སྒྲས། །འཇིག་རྟེན་ཡངས་མོར་བྱེད་དང་འདི་མི་མཚུངས། །ཞེས་ཆོས་རྗེ་དཀོན་ཅོག་ལྷུན་གྲུབ་གསུང་བ་ཡང་དག་པའི་གཏམ་མོ། །སྨྲས་པ། གསེར་ལྡན་ལྟོ་བ་འཁོད་སྙོམས་ལུས་ཕྲ་མཆོག་གི་བཞིན་རས་ངོས་ཡངས་པར། །རིགས་རུས་ནག་ཀླུང་སྟུག་པོའི་འཁྲི་ཤིང་མིག་སྨན་གཡོ་བའི་གར་བསྒྱུར་དབུས། །འཁོན་རིགས་སཱ་ལའི་ལྗོན་པའི་དབང་པོ་མ་འདྲེས་འཁྱུག་པའི་ཟུར་མིག་ཅན། །ཆོས་སྲིད་འབྲས་བུའི་ཁུར་གྱིས་དུད་པའི་མཛེས་སྡུག་རྣམ་འགྱུར་ཅི་ཡང་བཀྲ། ཨེ་མ་རྩོད་དུས་གསེར་འཁོར་ཅན། །ས་ལ་རྒྱུ་བའི་གནམ་གྱི་སྲས། །གང་གི་ལུང་བཞིན་བོད་འབངས་གཙུག །བདེ་འབྱུང་རལ་པའི་ཟླ་ཚེས་ལྟར། །མཛེས་བྱེད་རྒྱན་དུ་སྤུད་པའི་དཔྱིད། །བསྟན་པའི་བདག་པོ་ས་སྐྱ་པའི། །གདུང་རབས་ཧ་ལའི་ཀེ་ལ་ཤ །བློ་གསལ་བདེ་འབྱུང་མགྲིན་པར་མཛེས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ཡང་མོན་གོར་རྒྱལ་(༦༡བ)

---

^{[མ་དཔེ་གཟིགས་ན་འདིར་གནོན།]}

པོས་འབྲི་གུང་པ། སེ་ཆེན་རྒྱལ་པོས་ཚལ་བ། ཧུ་ལ་ཧུས་ཕག་མོ་གྲུ་པ་རྣམས་སོ་སོར་མཆོད་གནས་སུ་བཟུང་སྟེ། བོད་རྣམས་རྒྱལ་པོ་སོ་སོས་རིས་སུ་བཅད་དེ་བདག་པོ་མཛད་པ་རྣམས་མཆོད་གནས་སོ་སོར་སྦྱར་བའི་མོན་ལུག་མགོ་སྟེང་ཚུན་ཆད། གཉལ་སྟོད་སྨད། གྲུ་ཤུལ། ལོ་རོ་དཀར་ནག །བྱ་པོ། ཨེ་ཆེ་བའི་ནང་ནས་ཨེ་ཆུང་། ཐང་པོ་ཆེ། འཕྱོང་རྒྱས། འཕྱོས། མོན་མཁར། མཁར་ལྟག་དོ་བོ། སྲེགས་ལྟེ། འོན་སྣ། ནམ་ཞལ་ལྔ། བསམ་ཡས་ཤར་སྒོ་གདོང་མན་ཆད་དང་། ལྷོ་བྲག་ཤར་ནས། མཆོད་སྡེ། བ་ཞི་བོད་འབྲོག་གཉིས། མངའ་རིས་ནས་ཀོ་རོན་མདོ་ཡན་ཆད། སྤུ་རིག་ལ་རྩ་མན་ཆད་རྣམས་རྒྱལ་པོ་ཧུ་ལ་ཧུར་གཏོགས་པའི་དོན་གྱི་ཕག་མོ་གྲུ་པའི་འོག་ཏུ་ཡོད་པ་དཔེས་མཚོན་ཏེ་འབྲི་གུང་དང་ཚལ་པ་རྣམས་ལ་ཡང་དེ་དང་དོད་མཚུངས་པ་ཡོད་པའི་དབང་གིས། གཡའ་བཟང་བ་ཁྲི་བསྐོར་གྱི་ཁ་གྲངས་སུ་བགྲངས་ཀྱང་དོན་ཕག་མོ་གྲུ་པའི་འོག་ཏུ་གནས་པ་ལྟར། སྣ་དཀར་རྩེ་པ་འབྲི་གུང་པའི་འོག་དང་། དེས་མཚོན་ཁྲི་དཔོན་གཞན་རྣམས་ཕག་འབྲི་ཚལ་གསུམ་ལ་ཆོས་སྲིད་གཉིས་ཀའི་སྒོ་ནས་འགྲན་པར་མི་ནུས་པས་འདི་གསུམ་ཁྲི་དཔོན་རྣམས་ཀྱི་ནང་ནས་མངོན་པར་མཐོ་བ་ཡིན་ལ། དེ་ཡང་ཚལ་པ་ནི་ཞང་འགྲོ་བའི་མགོན་པོའི་རྣམ་པར་དཀར་བའི་འཕྲིན་ལས་ཀྱི་གདུགས་དཀར་པོ་དབྱིག་འཛིན་གྱི་ཁྱོན་ཀུན་ཁྱབ་པ་ལས་བརྒྱུད་དེ་ཁྲི་དཔོན་དུ་གྱུར་བ་ཡིན་པས། ལྷ་དབང་བརྒྱ་བྱིན་གྱི་སྤྲུལ་པར་གྲགས་པ་ཉེ་གནས་དར་མ་གཞོན་ནུས། འགྲོ་མགོན་རིན་པོ་ཆེའི་ཐུགས་སྲས་མཛད་དེ། གུང་ཐང་གི་གཙུག་ལག་ཁང་བརྩིག་པའི་ཞབས་ཏོག་ཕུན་སུམ་ཚོགས་པ་བསྒྲུབས། འགྲོ་མགོན་གཤེགས་(༦༢ན)

---

^{[མ་དཔེ་གཟིགས་ན་འདིར་གནོན།]}

ཁར་སྡེ་གཙུག་ལག་ཁང་གཉིས་ཀྱི་བདག་པོར་བསྐོས་ཏེ། ཕྱིའི་ཁྱམས་སྨད་དང་མགོན་ཁང་། ནང་དུ་གདུང་རྟེན་བཀྲ་ཤིས་འོད་འབར་དང་། སྐུ་འབུམ་ཆེན་མོའི་འཕྲོ་སོགས་གྲུབ་པར་མཛད། དེའི་རུས་དབོན་འབྱུང་གནས་བཙུན་འགྲུས་ཀྱིས་དཔོན་གྱི་གོ་ས་བཟུང་ནས་ལུགས་ཟུང་གི་བྱ་བ་མི་དམན་པ་འགའ་ཞིག་བྱས་ཤིང་། དེའི་དབོན་ཡེ་ཤེས་འབྱུང་གནས་ཀྱི་སྲིད་མ་བཞི་བུ་བརྒྱད་དུ་གྲགས་པའི་སྐྱིད་སྨད་ཀྱི་ཡུལ་གྲོང་མང་པོ་མངའ་འོག་ཏུ་ཆུག །དེ་རྗེས་དཔོན་སངས་རྒྱས་དངོས་གྲུབ་ནི་གནམ་གྱི་མཐོང་ནས་མི་ཡུལ་དུ་བབས་པས། མགར་ཚེ་ནམ་ཚ་འབྲུག །དེ་ནས་མགར་བླ་མ་མཁྱེན་ཆེན་པོ། མགར་སྟོང་མེས་ཁྲི་ཆགས། དེའི་སྲས་མགར་སྟོང་བཙན་ཡུལ་བཟུང་གིས་ཆོས་རྒྱལ་སྲོང་བཙན་སྒམ་པོའི་བློན་པོ་མཛད། ལུགས་གཉིས་ཀྱི་མཛད་པས་རྗེའི་ཞབས་ཏོག་དང་བོད་འབངས་ལ་བཀའ་དྲིན་ཆེ། དེའི་སྲས་བཙན་པོ་ཡོན་ཏན་རྒྱལ་བཟུང་། དེ་ནས་རིམ་བཞིན་ལྷ་གཅིག་སྙན་ལྡེམ་བུ། ཁྲི་ཟངས་དུམ་བུ། ཁྲི་གཉེར་ཁྲི་ལྕགས། དེའི་སྲས་སྟོང་མེས་ཁྲིས་སྣང་། ཁྲི་སྟོ་རོ་སྟག་གཟུང་། བློན་ཆེན་ཆས་པ་སྒོ་དྲུག །དེའི་སྲས་རྨུ་བཟའ་དང་འཕགས་གཟིགས། དེ་ནས་རིམ་བཞིན་མགར་ཐོག་ཡང་རྒྱལ། རྒྱལ་ལེ། མགར་རྒྱལ་བ་འབྱུང་གནས། འདི་དང་ཞང་རིན་པོ་ཆེ་མཆོད་ཡོན་དུ་གྱུར་ཏེ། སྲས་ཕུན་སུམ་ཚོགས་པ་འབྱུང་བའི་ལུང་བསྟན་དང་མཐུན་པར་དཔོན་སངས་རྒྱས་དངོས་གྲུབ་འཁྲུངས་པ་དཔོན་དུ་བསྐོས། དགེ་འདུན་ཚལ་པའི་བསྟན་པའི་རྩ་བ་བཙུགས། དེའི་སྲས་དཔོན་ཆེན་རིན་རྒྱལ་གྱིས་དཔོན་གྱི་ལས་ཀ་བཟུང་སྟེ་གོང་དུ་བྱོན། སེ་ཆེན་རྒྱལ་པོས་སྐྱིད་ཤོད་(༦༢བ)

---

^{[མ་དཔེ་གཟིགས་ན་འདིར་གནོན།]}

སྟོད་སྨད། སྟོད་ལུང་། གྲ་ཐོལ། འཕྱོང་པོ། རྒྱལ་སྨན། ཨེ་དྭགས་གཉལ་གསུམ་སོགས་ལྷ་ཁང་ཞིག་གསོས་བྱེད་པའི་མི་སྡེ་ཤེས་སུ་ཆུག་གི་འཇའ་ས་གནང་། གུང་ཐང་དུ་བྱོན་ཏེ་གཟིམས་ཁང་ཤར་དང་ཁྱིམ་གྲ་ཆེན་མོ་བརྩིགས། འདི་ལ་སྲས་གསུམ་ལས་ཆེ་བ་ཉི་མ་ཤེས་རབ་ཀྱིས་འགྲོ་མགོན་འཕགས་པའི་ཕྱག་ཕྱིར་གོང་དུ་བྱོན་ཏེ་འཇའ་ས་བླངས། གཉིས་པ་དཔོན་དགའ་བདེ་མགོན་པོ་བྱ་རོག་གདོང་ཅན་གྱི་སྤྲུལ་པར་གྲགས་ཤིང་། ཚལ་པའི་དགོན་སྡེའི་དོན་དུ་གོང་མའི་དྲུང་དུ་ལན་བདུན་བྱོན། མི་ཆེན་ཟམ་ཁ་ལྷ་པའི་ཉེ་གནས་འདམ་རིང་གི་གཞན་དབང་དུ་གྱུར་ཏེ། དཔོན་དགའ་བདེ་ལ་རྩ་ར་མང་དུ་བྱས་པས། ལྐོག་ཏུ་རྒྱལ་པོར་ཞུས་པར་གོང་མའི་ན་བཟའ་འབྲུག་སྡེར་ལྔ་པ་ཞིག་གནང་བ་དེ་འོག་ཏུ་གྱོོན་སྐབས། ཟམ་ཁས་ཁྲིམས་རར་ཁྲིད་དེ་སྟེང་གོས་བཤུས་པས། རྒྱལ་པོའི་ན་བཟའ་འདུག་པ་མཐོང་སྟེ་ཟམ་ཁ་འཇིགས། མི་རིང་བར་ཟམ་ཁ་ལ་ནག་ཕོག་པས། དགའ་བདེས་སྙིང་ཚིམ་གྱི་ཆང་དྲངས་ནས། ངེད་རང་གཉིས་པོ་ཁྱད་པར་ཆེ། །ང་ནི་དགེ་འདུན་ཚལ་པ་ཡིན། །དགའ་བདེ་དཔལ། བློ་བདེ་དཔལ། སྐྱིད་པའི་དཔལ། ད་ལྟ་ཚལ་པའི་དགའ་བདེ་དཔལ། ཞེས་གླུ་བླངས་སྐད། དེ་ནས་རྒྱའི་བཟོ་བོ་མཁས་པ་དང་བཅས་ཏེ། བར་ཁང་རྒྱ་ཕིབས། གསེར་འཕྲུ་སོགས་རྟེན་དང་བརྟེན་པར་བཅས་པ་མཐའ་དག་ཕུལ་དུ་བྱུང་བའི་བཀོད་པས་ཁྱད་པར་དུ་འཕགས་པ་བཞེངས། ཆོས་འཁོར་གླིང་བཏབ་ནས་མཚན་ཉིད་ཀྱི་བཤད་གྲྭ་དང་། དབུས་གླིང་དུ་སྔགས་གྲྭ་འཛུགས་པ་སོགས་རྣམ་དཀར་གྱི་མཛད་པ་རྒྱ་ཆེན་པོས་གོང་མ་ཤིན་ཏུ་དགྱེས། འདིའི་གཅུང་པོ་རིན་ཅེན་དབང་ཕྱུག་རབ་ཏུ་བྱུང་། དགའ་བདེའི་སྲས་གཉིས་(༦༣ན)

---

^{[མ་དཔེ་གཟིགས་ན་འདིར་གནོན།]}

ལས། ཆེ་བ་རིན་ཅེན་སེང་གེ །ཆུང་བ་སྨོན་ལམ་རྡོ་རྗེ། འདི་ཉིད་ཀྱིས་ལྷ་སའི་བར་སྐོར་དང་། བྲག་ལྷ་ཀླུ་སྦུག་གི་རྒྱ་ཕིབས། ཇོ་བོ་དང་ཐུགས་རྗེ་ཆེན་པོ་གཉིས་ཀྱི་དབུ་ཐོག་ཏུ་གསེར་ཐོག །འབུམ་མོ་ཆེའི་གཉྫི་ར། བཀའ་འགྱུར་དང་། དབུས་གླིང་འོད་གསལ་འཕྲུལ་གྱི་ལྷ་ཁང་བཞེང་བ་སོགས། དཀར་ཕྱོགས་ཀྱི་མཛད་པ་བླ་ན་མ་མཆིས་པ་མང་ཞིང་། སྲིད་ཀྱི་མངའ་ཐང་ལྔ་ཀུན་གསལ་གྱི་འགྲམ་པ་ལ་རེག་པ་ལྟ་བུར་གྱུར། འདིའི་སྲས་ཆེ་བ་དཔོན་ཀུན་དགའ་རྡོ་རྗེ་ཡབ་མེས་ཀྱི་ཆོས་དང་རིག་པའི་གནས་ཐམས་ཅད་ལ་མཁྱེན་པ་མཆོག་ཏུ་ཡངས་ཤིང་། གོང་ནས་ཕྱིར་བྱོན་ཏེ། སྐུ་གསུང་ཐུགས་ཀྱི་རྟེན་དང་རི་བོ་དགེ་འཕེལ་འདེབས་པ་སོགས་ཆོས་སྲིད་ཀྱི་མཛད་པ་མི་དམན་པ་མཐའ་ཡས། སླར་ཡང་ཁྲི་དཔོན་གྱི་ལས་ཀ་གཅུང་པོ་གྲགས་པ་ཤེས་རབ་ལ་གཏད་དེ་རབ་ཏུ་བྱུང་བའི་མཚན་དྲུང་ཆེན་ཐམས་ཅད་མཁྱེན་པ་དགེ་བའི་བློ་གྲོས་སུ་གྲགས། མཁས་པའི་དབང་པོ་བུ་སྟོན་རིན་པོ་ཆེ་ཚལ་དུ་བཀའ་འགྱུར་གྱི་རབ་གནས་ལ་གདན་དྲངས་སྐབས། ཚལ་པ་དཔོན་པོའི་ཁ་ཡ་བྱེད་དགོས་པས་རང་དགར་ཕྱིན་ན་མི་ཡོངས་གསུངས་ནས། ཕྱག་དཔེ་མང་པོ་བསྣམས་ཏེ་ལམ་དུ་གཟིགས་སྐད། ཆོས་རྗེ་བསོད་ནམས་གྲགས་པས། ཆོས་འཁོར་གླིང་དྲུང་ཆེན་སྨོན་ལམ་རྡོ་རྗེས་བཏབ་པ་དང་། སི་ཏུ་དགེ་བའི་བློ་གྲོས་དང་དྲུང་ཆེན་ཀུན་དགའ་རྡོ་རྗེ་སོ་སོར་འདྲེན་པ་སོགས་ནི་ཡིག་ཚང་གི་ཞིབ་ཆ་མ་ངེས་པའི་འོལ་ཚོད་ཀྱི་གཏམ་སྟེ། འདི་དག་ལ་འདྲིས་པ་ཆུང་བའི་དབུས་སུ་ཝ་སྐྱེས་རྒྱལ་པོའི་རྣམ་ཐར་འཛིན་པའི་ཚུལ་ཡིན་མཆིས་ནའང་། དེབ་ཐེར་ལ་འདྲིས་པ་རྣམས་ཀྱིས་བརྟགས་ཚེ་བཞད་གད་ཀྱི་གནས་སོ། །(༦༣བ)

---

^{[མ་དཔེ་གཟིགས་ན་འདིར་གནོན།]}

དྲུང་ཆེན་ཀུན་དགའ་རྡོ་རྗེའི་སྲས་སི་ཏུ་དགེ་ལེགས་བཟང་པོ། དེ་ལ་སྲས་ཏྲེ་ཧོས་དཔལ་འབྱོར་བཟང་པོ། ལེགས་པ་རྒྱལ་མཚན། ལེགས་ལྡན་བཟང་པོ་དང་གསུམ་གྱི་དང་པོའི་སྲས་ཏྲེ་ཧོས་དགའ་བདེ་བཟང་པོ་དང་དངོས་གྲུབ་རྒྱལ་མཚན་གཉིས་འཁྲུངས་གདུང་བརྒྱུད་རིམ་པར་བྱོན་པ་དེ་དག་ཐམས་ཅད་ཀྱང་གོང་མའི་ལུང་དང་ལས་ཀས་མངོན་པར་མཐོ་ཞིང་། ཆོས་དང་སྲིད་ཀྱི་མཛད་པ་མི་དམན་པ་ཤ་སྟག་ཏུ་བྱོན། འོན་ཀྱང་དཔོན་ཀུན་དགའ་རྡོ་རྗེས་། ས་སྐྱའི་དཔོན་ཆེན་རྒྱལ་བ་བཟང་པོ། དབང་བརྩོན་གཡའ་བཟང་བ་སོགས་དང་བསྡོངས་ཏེ། སྡེ་སྲིད་ཕག་མོ་གྲུ་པ་ལ་ངན་བཤོམས་མང་དུ་བྱས་པས། འདབ་ཆགས་ཕལ་གྱིས་མཁའ་ལྡིང་གི་རྗེས་སུ་སྙེག་པ་རང་ཉིད་ངལ་བའི་རྒྱུར་འགྲོ་བ་བཞིན་དུ་སྔར་དཔོན་དགའ་བདེ་དང་། དྲུང་ཆེན་སྨོན་ལམ་པའི་དུས་མཐའ་སྒྱུར་བའི་གོང་མའི་འཇའ་སའི་ནང་གི་འབངས་ནི་ཕལ་ཆེར་ཤོར་རོ། །དཔལ་ཕག་མོ་གྲུ་པའི་འཕྲིན་ལས་ཀྱི་རྒྱུན་ལས། སྒྲུབ་བརྒྱུད་ཀྱི་བསྟན་པ་རིན་པོ་ཆེའི་དགོན་གནས་སློབ་རྒྱུན་དར་རྒྱས་སུ་སྤེལ་བར་མཛད་པ་པོ་ནི་སྐྱུ་ར་རིན་པོ་ཆེ་ཡིན་ལ། གདན་རབས་བཞི་ཙམ་གྱི་བར་དུ་དམ་པའི་ཆོས་ཁོ་ན་དོན་དུ་གཉེར་བ་ལས། འཇིག་རྟེན་གྱི་སྟོབས་དང་གོང་མའི་ལག་རྟགས་སོགས་མེད་འདུག་པས། སི་ཏུ་རིན་པོ་ཆེའི་བཀའ་ཆེམས་དེབ་ཐེར་ལས། དེ་དུས་ཀྱི་བླ་མ་དེ་སྤྱན་སྔ་རིན་པོ་ཆེ་ཡིན། སྒོམ་པ་ཤཱཀ་རིན་ཡིན་ཏེ་དམ་ཁ་མ་ཐེ་བ་རྗེས་ཙམ་ཡང་ཁྱེད་བླ་དཔོན་ལ་མེད། རྒྱལ་པོའི་བླ་མ་ཏི་ཤྲི་ཡང་མ་བྱས་གསུངས་པ་ལྟར་ཡིན་ལ། དེ་ཡང་བསྟན་པ་སྔ་དར་གྱི་དུས་སྐྱུ་རའི་རིག་སྔགས་འཆང་བ་ཞིག་ལ་མཁའ་འགྲོའི་རིག་ཅན་གྱི་སྣ་ནམ་བཟའ་བྱ་བའི་ཇོ་མོ་(༦༤ན)

---

^{[མ་དཔེ་གཟིགས་ན་འདིར་གནོན།]}

ཞིག་བླངས་པ་མི་ལས་འདས་པའི་སྤྲུལ་སྒྱུར་སྣ་ཚོགས་སྟོན་པ་ཞིག་བྱུང་བ། དེང་སང་འབྲི་གུང་ཨ་ཕྱིར་འབོད་པ་འདི་ཡིན་ལ། དེ་གཉིས་ཀྱི་སྲས་ལ་ནམ་མཁའ་དབང་ཕྱུག་གི་བརྒྱུད་ལས་ཨ་མེས་དབང་རྒྱལ་གྱི་སྲས་བཞི་པ་རྡོ་རྗེ་ལ་ཇོ་མོ་རྗེ་བཙུན་མ་བྱ་བ་བླངས་པའི་སྲས་སུ་འབྲི་གུང་རིན་པོ་ཆེ་འཁྲུངས་ཏེ་འགྲོ་མགོན་རིན་པོ་ཆེའི་དྲུང་དུ་ཟབ་རྒྱས་ཀྱི་ཆོས་བུམ་པ་གང་བྱོའི་ཚུལ་དུ་གསན་ཞིང་མཚན་རིན་ཅེན་དཔལ་དུ་གྲགས། འགྲོ་མགོན་གཤེགས་རྗེས་ཞང་སུམ་ཐོག་པའི་མཇུག་ཏུ་གདན་ས་མཛད་ཀྱང་འཕྲིན་ལས་བཞེད་པ་བཞིན་མ་བྱུང་བས་བྱང་ཕྱོགས་སུ་བྱོན་ནས་རྟོགས་ལྡན་མི་ཉག་སྒོམ་རིན་གྱི་དགོན་པ་ཉེ་གནས་ཀྱིས་ཕུལ་བར་ཕྱག་ཕབ་སྟེ་དར་རྒྱས་སུ་མཛད་པས་འབྲི་གུང་ཐེལ་ཞེས་གངས་རིའི་ཁྲོད་ཀྱི་སྒྲུབ་བརྒྱུད་པའི་གཙུག་ན་མངོན་པར་མཐོ་བ་བྱུང་ཞིང་། སྐྱོབ་པ་རིན་པོ་ཆེའི་ཁུ་བོ་དཀོན་ཅོག་རིན་ཅེན་གྱི་སྲས་ཨ་མེས་གྲགས་རྒྱལ། དེ་ལ་སྲས་མཆེད་གསུམ་ལས་ཆེ་བ་དཔོན་རིན་པོ་ཆེ། འབྲིང་དཔོན་བརྒྱུད་རྡོ་རྗེ་སེང་གེ ། ཆུང་བ་གཅུང་རིན་པོ་ཆེ་རྡོ་རྗེ་གྲགས་པ་ལས། གཅུང་རིན་པོ་ཆེ་ཏི་ལི་བའི་སྤྲུལ་པར་གྲགས་ཤིང་། འདིའི་དུས་སུ་སྒོམ་པ་ལ་ཁྲི་དཔོན་གྱི་འཇའ་ས་ལོན་ཏེ། བྱར་དགས་ཚུན་ལུང་གིས་མངའ་སྒྱུར་བས་སྟོབས་འབྱོར་གྱི་ལོངས་སྤྱོད་ཤིན་ཏུ་ཆེ། དེ་དག་ལ་བསམས་ནས་ཕྱིས་སུ་གོང་མ་སི་ཏུ་རིན་པོ་ཆེ་ལ་འབྲི་གུང་སྒོམ་པས། ད་ལྟ་ས་སྐྱ་པས་བདག་བྱེད་པ་འདི་སྔོན་ངེད་འབྲི་གུང་པས་བྱེད་པར་སྣང་ཟེར་བའི་ཁེངས་དྲེགས་ཀྱི་གཏམ་སྨྲས་སྐད། འོན་ཀྱང་སྒོམ་པ་གསུམ་བཞིའི་རིང་ལ་ས་སྐྱ་པ་དང་མ་མཐུན་པས། འབྲིང་པོའི་སྲས་ཟོག་ཁ་པ་རིན་ཅེན་སེང་གེ་དང་སྤྱན་སྔ་མཚམས་(༦༤བ)

---

^{[མ་དཔེ་གཟིགས་ན་འདིར་གནོན།]}

བཅད་པའི་རྗེས་སུ་གནུབས་གདན་སར་བཞུགས་ཐོག་གླིང་ལོག་ཆེན་པོ་དེ་བྱུང་སྐབས་འདུ་ཁང་ལ་མེ་བརྒྱབ་པས་དགེ་འདུན་ཁྲི་ཚོ་ཙམ་གནམ་གཡང་ནས་མཁའ་ལ་འཕུར་ཟེར་ཞལ་ངོ་ཀོང་པོར་བྲོས། མངའ་ཐང་ཡང་ཅུང་ཟད་བྲི། དེ་རྗེས་རྡོ་རྗེ་རིན་ཆེན། རྡོ་རྗེ་རྒྱལ་པོ། ཉེར་གཉིས་རིན་པོ་ཆེ། དོན་གྲུབ་རྒྱལ་པོ་རྣམས་རིན་པར་བྱོན་ཏེ་སྤྱན་སྔའི་གོས་དང་སྒྲུབ་བརྒྱུད་ཀྱི་བསྟན་པ་སྤེལ་བ་ཁོ་ན་ལས། འཇིག་རྟེན་གྱི་སྲིད་འཛིན་པ་ནི་ས་སྐྱའི་དཔོན་ཆེན་གྱི་དོད་པོ་ལྟ་བུ་འབྲི་གུང་གི་སྒོམ་པ་ཡིན་པས། དེ་དག་གི་གོ་རིམ་ནི། སྒོམ་པ་རྡོ་རྗེ་སེང་གེ །ཤཱཀྱ་རིན་ཅེན། བྱང་ཤེ། བྱང་ཆུབ། སྦང་རས། ཆོས་སེང་། རིན་ཅེན་སེང་གེ །སྒོམ་པ་དཔོན་པོ། སྒོམ་པ་ཤཱཀྱ་དང་། རིན་ཅེན་གྲགས། ཡེ་ཤེས་དཔལ། འདི་གྲོངས་པའི་དུས་སི་ཏུ་རིན་པོ་ཆེ་འབྲི་གུང་དུ་འཕྲད་མོལ་བྱོན། བཀྲ་ཤིས་ལྗོངས་སུ་རིན་པོ་ཆེ་དང་མཇལ། སི་ཏུ་རིན་པོ་ཆེས་ཀྱང་རིན་ཅེན་རྡོ་རྗེ་སྒོམ་པ་ཆེ་བ་ལ་བསྐོས། ཀུན་རིན་ཆུང་བ་ལ་བསྐོས་ན་ལེགས་པའི་རྒྱུ་མཚན་ཕུལ་བ་བཞིན་མཛད། དེ་ནས་རིན་རྡོར་འདས་རྗེས་ཀུན་རིན་ལ་གོང་མའི་ལུང་མེད་ནའང་། དབུས་གཙང་སྭོན་ཝི་སི་བ་རྣམས་ཀྱིས་ཁྱོན་བསྐོས་བྱས། སྤྱིར་གདན་ས་ཕན་ཚུན་གཉིས་ཟུང་འབྲེལ་ཡིན་པ་དང་། ཁྱད་པར་སྒོམ་པ་རང་ལ་སི་ཏུ་བཀའ་དྲིན་ཆེ་བར། སློབ་དཔོན་ཀུན་རིན་གྱིས་སྡེ་སྲིད་ཕག་མོ་གྲུ་པ་ལ་ངན་བཤོམས་ཀྱི་གྲ་སྒྲིག་འགའ་ཞིག་བྱས་པ་ལ་བརྟེན། འབྲི་གུང་གི་སྲིད་ལ་ཕན་པ་ཆེ་བ་མ་བྱུང་ཞིང་། དེ་རྗེས་ཤཱཀྱ་བཟང་པོས་སྒོམ་པའི་ལས་ཀ་བཟུང་། དེ་ནས་རྫོང་ཇི་བསོད་རིན་དང་སྐུ་ཞང་ཚུལ་རྒྱལ་སོགས་ཀྱིས་སྲིད་འཛིན་པའི་སྲོལ་བྱུང་འདུག་ནའང་། ཆོས་རྒྱལ་རིན་ཅེན་དཔལ་(༦༥ན)

---

^{[མ་དཔེ་གཟིགས་ན་འདིར་གནོན།]}

བཟང་གི་ཐོག་བླ་དཔོན་སྦྲགས་ཏེ་ཆོས་སྲིད་ཀྱི་ལུང་བཟང་པོ་ཡོངས་སུ་བཟུང་། སྲས་གཉིས་འཁྲུངས་པའི་ཆུང་བ་བཅོ་ལྔ་རིན་པོ་ཆེ་ཆོས་སྲིད་ཀྱིས་མངོན་པར་མཐོ་བའི་གོ་སར་བྱོན། སྲས་གསུམ་བྱུང་བའི་ཆེ་བ་ཕག་མོར་བྱོན། འབྲིང་པོ་ཆོས་རྗེ་ཀུན་དགའ་རིན་ཅེན་གདན་སར་བཞུགས། འདིའི་དུས་ཞལ་ངོ་ནང་མཚམས་མ་མཐུན་པ་དང་། སྔ་ཐོག་འབྲི་གུང་པ་དང་དགའ་ལྡན་པ་གཉིས་ལུགས་གཉིས་ཀྱི་འབྲེལ་ཟབ་པའི་མུ་ཅན་དུ་ཡོད་ནའང་། འདི་ཉིད་ཀྱི་འབྲི་གུང་མངའ་འོག་ན་ཡོད་པའི་དགེ་ལུགས་ཀྱི་དགོན་པ་རྣམས་ཀྱི་ཞྭ་བསྒྱུར་བ་དང་། དགོན་པ་གཞན་ལའང་དཔུང་གི་སྦྱོར་བ་བཤམས་པ་སོགས་སྡེ་འཁྲུག་ཁོ་ནས་དུས་འདའ་བས། འབྲི་གུང་བཀའ་བརྒྱུད་ཀྱི་བསྟན་པ་ལ་ཕན་པ་ཆེར་མ་བྱུང་བའི་ངང་དུ་གྲོངས། གཅུང་ཆོས་ཀྱི་རྒྱལ་པོས་སྦུ་ལུང་བཟུང་བའི་སྲས་དཔོན་རིན་ཅེན་ཕུན་ཚོགས་ནི་རྒྱ་བོད་ཀྱི་མཁས་གྲུབ་འགའ་ཞིག་གི་སྐྱེ་བ་གསལ་བར་དྲན་ཞིང་གདན་སར་བྱོན། རཏྣའི་མིང་ཅན་འགྲོ་བའི་ཁ་ལོ་སྒྱུར། །ཞེས་པའི་ལུང་བསྟན་དང་མཐུན་པར་མངའ་ཐང་གུང་དུ་འཕེལ། འདིའི་རྗེས་སུ་ཕག་མོ་ནས་དཔོན་རིན་པོ་ཆེ་གདན་སར་བྱོན། ཐོག་ཁ་ནང་སོས་ཀོང་དམག་དྲངས། འབྲི་གཙང་སྲིད་དུ་བསྒྲིལ་པ་དང་། གོང་མ་སྡེ་སྲིད་ལ་འབངས་གྱེན་ལོག་གི་རྣམ་པ་མཛད་པ་ལ་བརྟེན། དུས་མི་བདེ་བ་མང་དུ་བྱུང་། དེ་རྗེས་སུ་ཟུར་པའི་སྲས་རྗེ་ཆོས་རྒྱལ་ཕུན་ཚོགས་རྒྱལ་པོ་གཙུག་ལག་འཛིན་གྱི་སྤྲུལ་པར་གྲགས་ཤིང་། དེ་ལ་སྲས་རྗེ་བཀྲ་ཤིས་ཕུན་ཚོགས་རྗེ་དྲུང་དཀོན་ཅོག་ཡན་ལག་གི་སྤྲུལ་སྐུ། རྗེ་དཀོན་ཅོག་རིན་ཆེན། རྗེ་དཀོན་ཅོག་ཕུན་ཚོགས་བཞི་ལས། ད་ལྟ་ཆོས་རྗེ་རིན་པོ་ཆེ་དཀོན་ཅོག་ཕུན་(༦༥བ)

---

^{[མ་དཔེ་གཟིགས་ན་འདིར་གནོན།]}

ཚོགས་གདན་སར་བཞུགས་ཏེ་ཆོས་སྲིད་ཀྱི་མངའ་ཐང་གི་རྒྱུན་གནས་སོ། །དེ་ལྟར་གོང་དུ་སྨོས་པ་བཞིན་ཁྲི་སྐོར་གཞན་རྣམས་ཀྱིས་འབྲི་གུང་དང་ཚལ་པའི་མངའ་ཐང་དཔལ་འབྱོར་ལ་འགྲན་པར་མི་ནུས་ནའང་། སྣ་དཀར་རྩེ་པས་འབྲོག་ཁྲི་དཔོན་གྱི་ལུང་དང་ལག་རྟགས་ལོན་ཞིང་། འབྲི་གུང་དུ་གླིང་ལོག་གཏོང་བའི་ས་སྐྱའི་དཔོན་ཆེན་ཨང་ལེན་ཞེས་མགོན་པོ་གུར་གྱི་སྤྲུལ་པར་གྲགས་པའི་དཔའ་རྟགས་ཀྱི་གྲགས་སྙན་ཅན་དེ་ཡང་འདིའི་ཞལ་ངོ་ཡིན། སྡེ་པ་བསྟན་འཛིན་པའི་དུས་རིན་པོ་ཆེ་ལས་གྲུབ་པའི་བདེ་བར་གཤེགས་པའི་མཆོད་རྟེན་བརྒྱད་ལས། རྟེན་འབྲེལ་གྱི་སྒོ་ནས་མྱང་འདས་མཆོད་རྟེན་གྱི་ཚབ་ཏུ་མཆོད་རྫས་ཀྱི་རིམ་པ་བཞེང་བ་སོགས་རྣམ་དཀར་གྱི་དགེ་ལས་ཆེ་ཞིང་། ཡར་འབྲོག་སྟག་ལུང་གི་བཙན་རྫོང་ཡང་འདི་ཉིད་ཀྱི་དུས་བསླངས་པས་ཆོས་སྲིད་གཉིས་ཀ་ནས་གྲགས་ཆེ། གཙོ་བོར་དཔལ་ལྡན་ས་སྐྱ་པ་དང་། ཆོས་རྗེ་བོ་དོང་པའི་བསྟན་པ་ལ་ཕུ་དུད་མ་དམད་པ་མཛད། གྲུབ་མཐའ་གཞན་དག་ལའང་ཀུན་སློང་སྐྱོན་ཅན་གྱི་སྦྱོར་བ་མི་རྩོམ་པས་མཚན་ཇུས་བརྟན་ཆགས་ཤིང་། ཞལ་ངོ་རིམ་པར་བྱོན་པ་རྣམས་མཁྱེན་སྒོ་ཡངས་པ་དང་ཐབས་མཁས་ཀྱི་མཛད་པས་དིང་སང་ས་སྐྱོང་ཀུན་དགའ་དབང་ཆེན་ཕུན་ཚོགས་མཆེད་ཀྱི་བར་དུ་ཆབ་སྲིད་ལ་འཕོ་འགྱུར་མེད་པར་ཡོད་དོ། །བྱང་པ་བདག་པོ་ནི་ཕུན་སུམ་ཚོགས་པའི་བསོད་ནམས་ཀྱི་དཔལ་ལས་གྲུབ་པའི་དབང་ཕྱོགས་རྒྱ་ནག་གོང་མའི་ཁྲི་ལ་གནམ་གྱི་ལུང་གིས་དབང་སྒྱུར་བ་མི་ཉག་སིའུ་རྒྱལ་པོ་ནས་གདུང་རབས་བདུན་པ་མི་ཉག་རྒྱལ་རྒོད་ལས་རིམ་པར་བརྒྱུད་པའི་རིགས་ལས་མི་ཉག་སེང་གེ་དར། དེའི་སྲས་རྡོ་རྗེ་དཔལ་གྱི་རྗེ་བཙུན་གྲགས་པ་(༦༦ན)

---

^{[མ་དཔེ་གཟིགས་ན་འདིར་གནོན།]}

རྒྱལ་མཚན་གྱི་ཞབས་ལ་གཏུགས་ནས། དཔལ་ས་སྐྱ་པ་དང་འབྲེལ་བའི་འགོ་ཚུགས། དེའི་སྲས་དཀོན་ཅོག །དེ་ལ་སྲས་གསུམ་ལས། འབུམ་སྡེས་ཆོས་རྗེ་ས་པཎ་ལ་གུས་འདུད་ལྷུར་མཛད། འདི་ལ་སྲས་དྲུག་ལས་གྲགས་པ་དར་གྱི་གོང་མ་སེ་ཆེན་རྒྱལ་པོའི་ལུང་བཞིན་རིན་པོ་ཆེའི་དམ་ཁ་དང་སི་ཏུའི་ལས་ཀ་བླངས། བྱང་ངམ་རིང་གི་ཆོས་སྡེ་ཆེན་པོ་བཙུགས། དཔོན་ཆེན་གྲགས་པ་དར་མིང་གཞན་ཡོན་བཙུན་ཞེས་གྲགས་སྙན་ཅན་དེའི་སྲས་རྡོ་རྗེ་མགོན་པོས་ཡབ་མེས་ཀྱི་སྲོལ་བཞིན་ས་སྐྱའི་དཔོན་ཆེན་གྱི་ལས་ཀ་བཟུང་། ཚོགས་སྡེ་བཞི་ལ་བཀུར་སྟི་བླ་ལྷག་ཏུ་མཛད། དེ་ལ་སྲས་དྲུག་ལས། ནམ་མཁའ་བརྟན་པས་གོང་སར་བྱོན་ནས་སྟག་མགོ་ནོར་བུ་གསུམ་པ་གུའི་གུང་གི་མཚན་ཤེལ་གྱི་ཐོ་ཤུ་རྣམས་གནང་། སླར་ཏ་དབེན་གུ་ཤྲི་མིང་དང་ཤེལ་གྱི་དམ་ཁ་བླངས། དཔལ་ལྡན་ས་སྐྱ་དང་ངམ་རིང་གིས་གཙོས་པའི་ཆོས་སྡེ་རྣམས་སུ་བསྙེན་བཀུར་སོགས་ལུགས་གཉིས་ཀྱི་མཛད་པ་བཟང་། དེ་ལ་སྲས་རིན་ཅེན་རྒྱལ་མཚན་དང་། ནམ་མཁའ་རིན་ཅེན་གཉིས་ལས། གཅེན་གྱིས་ཡབ་ཀྱི་ཆེན་པོའི་ལས་ཀ་རྣམས་བླངས། སྤྱན་རས་གཟིགས་ཀྱི་སྤྲུལ་པར་གྲགས། འདིའི་སྲས་སྔ་ཚར་གུའི་གུང་ཆོས་གྲགས་དཔལ་བཟང་གིས་སི་ཏུ་ཆང་གུའི་ལས་ཀ་བླངས། སྲས་ཕྱི་ཚར་ཟླ་བ་རྒྱལ་མཚན། འཁོན་སྟོན་བསོད་ནམས་པའི་ཡུམ་རྣམས་འཁྲུངས། གཅུང་འཇམ་དབྱངས་པ་རྗེ་བཙུན་ས་པཎ་གྱི་དུས་སུ་འཁོར་དུ་སྐྱེས་པ་དྲན། ཤེས་བྱའི་གནས་ལ་བློ་གྲོས་ཀྱི་འཇུག་པ་མཆོག་ཏུ་ཡངས་ཤིང་། ཀྭ་དིང་གུ་ཤྲིའི་ལས་ཀ་བཟུང་། ཡབ་དང་གཅེན་གྱི་བཀའ་བཞིན་རབ་བྱུང་གི་བསླབ་པ་ཕུལ། སྲས་ལྕམ་སྲིང་གསུམ་(༦༦བ)

---

^{[མ་དཔེ་གཟིགས་ན་འདིར་གནོན།]}

འཁྲུངས། གུའི་གུང་ཆོས་གྲགས་པའི་སྲས་ཆེ་བ་བདག་ཆེན་རྣམ་རྒྱལ་གྲགས་བཟང་གིས་ཏའི་སི་ཏུའི་ལས་ཀ་དང་། གཅུང་དཀོན་ཅོག་ལེགས་པས་ཤྲིའི་ཟིའི་དྲེ་ཧོས་ཀྱི་ལས་ཀ་བཟུང་ཏེ་སྲིད་ཀྱི་འབྱོར་པ་ཤིན་ཏུ་ཆེ། ཁྱད་པར་གཅེན་གྱི་ལོ་ཆེན་བྱང་ཆུབ་རྩེ་མོ་སོགས་དམ་པ་དུ་མའི་གསུང་གི་བདུད་རྩི་མྱང་། རྒྱ་གར་རྡོ་རྗེ་གདན་གྱི་མཁན་པོ་ཤཱ་རི་བུ་ཏྲ་དང་། བོ་དོང་ཕྱོགས་ལས་རྣམ་རྒྱལ་བ་ལ་ཟབ་རྒྱས་ཀྱི་ཆོས་མང་དུ་གསན། ཁྱད་པར་དཔལ་དུས་ཀྱི་འཁོར་ལོ་ལ་མཁས་པའི་ཕུལ་དུ་ཕྱིན་པས། མཁས་པ་རྡོ་རྗེ་རྒྱལ་མཚན་དང་། མི་ཉག་ཆོས་གྲགས་བཟང་པོ་སོགས་ཀྱིས། ཆོས་རྒྱལ་འདི་ཉིད་ཀྱི་ཞབས་ལ་གཏུགས་ནས། དུས་འཁོར་གྱི་རྒྱུད་འགྲེལ་གསན། རྩེས་ཐང་པ་སངས་རྒྱས་ལྷུན་གྲུབ་ཀྱིས་རིགས་ལྡན་འདི་ཉིད་ཀྱི་དྲུང་དུ་དུས་ཀྱི་འཁོར་ལོའི་རྒྱུད་འགྲེལ་མཐར་ཕྱིན་པར་གསན་ནས། སླར་དབུས་སུ་པཎ་ཆེན་བྱམས་པ་གླིང་པའི་དྲུང་དུ་རིག་གནས་ཀྱི་ཐུགས་སྦྱོང་མཛད་པའི་སྐབས། བདག་ཆེན་འདི་ཉིད་ཀྱིས་ལེགས་པར་བཤད་པའི་དུས་འཁོར་གྱི་གསུང་གླེང་བྱུང་བས་ཐུགས་ཧ་ལས་ཏེ། ཉིད་ཀྱི་གསུང་འདི་ལྟར་ན་ངེད་ཀྱིས་སྔར་བརྩམས་པ་རྣམས་ལ་ཡང་བཅོས་བྱེད་དགོས་པར་འདུག་གསུངས་སྐད། མདོར་ན་དབུས་གཙང་མཐའ་དག་ཏུ་ཟུར་གནས་རྣམས། རིགས་ལྡན་པདྨ་དཀར་པོ་སླར་བྱོན་པ་ཡིན་ཞེས་གླེང་ཞིང་། གཞན་ཡང་ཐེག་པ་ཆེ་ཆུང་གི་གསུང་རབ་མཐའ་དག་ལ་མཁྱེན་སྤྱན་ཡངས་པས། སྐབས་ཤིག་དུས་བཞི་ཅིག་ཅར་བ་དང་རིམ་གྱིས་པའི་སྐོར་ལ་བདག་ཆེན་ཉིད་ཀྱིས་ན་བཟའ་བེར་གྱི་ཕུ་དུང་བརྫེེས་ཏེ་ཐལ་འགྱུར་འཕེན་པ་སོགས་མཁས་པ་རྣམས་སྤ་བཀོང་བར་མཛད། དུས་ཀྱི་འཁོར་ལོའི་དགོངས་འགྲེལ་དང་། འཇིག་(༦༧ན)

---

^{[མ་དཔེ་གཟིགས་ན་འདིར་གནོན།]}

རྟེན་མེས་པོའི་གཙུག་ལག་མི་མཐུན་པའི་ནད་ཀྱི་རྩ་བ་དྲུངས་ནས་དབྱུང་བར་བྱེད་པའི་གསོ་བ་རིག་པའི་གཞུང་ལུགས་ཀུན་གྱི་ཡང་སྙིང་རྗེ་བཙུན་གཡུ་ཐོག་པ་ཆེན་པོའི་རིང་ལུགས་གསལ་བར་བྱེད་པའི་བསྟན་བཅོས། ལོག་སྨྲ་ཚར་གཅོད་པ་སྒྲ་རིག་པའི་བསྟན་བཅོས་ཀྱི་ཉིང་ཁུ་ཀ་ལཱ་པའི་མདོ་རྒྱན། བཟོ་རིག་པ་དེ་བཞིན་གཤེགས་པའི་སྐུ་གཟུགས་ཀྱི་ཕྱག་ཚད། བསྟན་པའི་གནས་ཚད། གསང་བ་སྔགས་ཀྱི་ལྷའི་སྒྲུབ་ཐབས་ཀྱི་རིམ་པ། མ་འོངས་མངོན་སུམ་གསལ་བར་སྟོན་པ་གཙུག་ལག་རྩིས་ཀྱི་སྐོར། མཁས་གྲུབ་ཆོས་རྗེའི་རྩོད་ལན་སོགས་ལེགས་པར་བཤད་པའི་རྩོམ་པའི་རིག་ཇི་སྙེད་ཅིག་མཆིས་ཤིང་། དུས་ཀྱི་འཁོར་ལོའི་བློས་སློངས་སོགས་སྐུ་གསུང་ཐུགས་ཀྱི་རྟེན་བཞེང་མང་དུ་མཛད། མནལ་ལམ་དུ་སློབ་དཔོན་ཆེན་པོ་ཞལ་གཟིགས་པ་དང་རྗེ་ས་ཆེན་ལ་ཐུགས་དད་ཤུགས་དྲག་པོ་འཁྲུངས་པས་ས་ཆེན་དབུ་གཙུག་ནས་ཐིམ་པའི་སྣང་བ་སོགས་རྟོགས་པའི་ཡོན་ཏན་ཀྱང་མཐའ་ཡས་ཤིང་རིག་པའི་གནས་མཐའ་དག་ལ་མཁྱེན་པའི་སྤྱན་ཡངས་པས་རྒྱལ་པོ་པཎྜི་ཏ་ཞེས་སྙན་པའི་རྒྱུད་ཀྱིས་རྒྱ་གར་མཁས་པའི་ཁེངས་དྲེགས་ཀྱི་གཞུ་ཡོངས་སུ་འགུགས་ཤིང་། རིན་པོ་ཆེའི་རྒྱན་སོགས་མི་ཆེན་གྱི་ཆ་ལུགས་དང་ལྡན་བཞིན་དུས་དགེའི་མཚན་ཉིད་ཀྱི་སློབ་དཔོན་མཁས་པ་རྣམས་ལ་གསུང་རབ་མཐའ་དག་བརྒལ་བརྟག་གིས་གཏན་ལ་འབེབས་པའི་བགྲོ་གླེང་མཛད་པ་སོགས་འཆད་རྩོད་རྩོམ་པས་དུས་འདའ་བས་སྤྱིར་ཡང་ངོ་མཚར་ཆེ། ཁྱད་པར་འགྲོ་བའི་འདྲེན་པར་རློམ་པའི་དྲེགས་ལྡན་ཆོས་སྨྲ་བའི་ལྕེ་མདུད་པ་བརྒྱ་ཕྲག་གིས་བཅིངས་པ་རྣམས་ཀྱི་སྣང་ཚུལ་ལ་དཔགས་ན་རྗེས་སུ་(༦༧བ)
ཡི་རང་ངོ་། །དེ་རྗེས་ནམ་མཁའ་ཚེ་དབང་རྡོ་རྗེ། དེའི་སྲས་ནམ་མཁའ་རིན་ཅེན་བསོད་ནམས་རྒྱལ་མཚན། ཀུན་དགའ་ལེགས་པ་གསུམ་ལས་འབྲིང་པོ་རབ་ཏུ་བྱུང་། ཆུང་བ་ལྷོ་བྱང་ཡོངས་ལ་མངའ་སྒྱུར། དཔའ་གཏུམ་གྱི་གྲགས་ཆེ། མཆེད་གསུམ་གྱི་རིགས་ལས་ནམ་མཁའི་རྒྱལ་མཚན་ཀུན་དགའ་རིན་ཆེན། བཀྲ་ཤིས་སྟོབས་རྒྱས་དབང་པོའི་སྡེ་སོགས་འཁྲུངས་པ་ལས། འདི་ཉིད་སློབ་དཔོན་ཆེན་པོའི་ཟབ་ཆོས་ཀྱི་བདག་པོར་བཀའ་བབས་སོ། །སྨྲས་པ། འོད་གསལ་འཆི་མེད་ལམ་ལས་བབས་པའི་འཁོན་གྱི་བརྒྱུད་པ་རིན་པོ་ཆེ། །ཤར་ཕྱོགས་གོང་མའི་རྒྱལ་མཚན་རྩེར་མཛོད་ཆེན་པོའི་ལས་ཀ་འདོད་རྒུའི་ཆར། །འཛམ་གླིང་ཁྱོན་ཀུན་མངོན་པར་སྙིལ་བའི་མུ་ཐི་ལ་ཡི་ཀཱརྞི་ཀ །རིན་ཅེན་ཉམས་འགྱུར་ཕྲ་ཚོམས་ཀྱིས་མཛེས་ཡ་རབས་མདུན་སའི་རྒྱན་དུ་སྤེལ། གཡུང་པོའི་ལུགས་མིན་རིགས་རུས་ཆོ་འབྲང་ལྡན། །གོང་མའི་ལུང་འཛིན་སྲིད་ཀྱིས་མངོན་མཐོའི་མཁར། །རྣམ་དཀར་ཟླ་ཤེལ་དྲི་མེད་ཟིལ་མངར་ཅན། །བདེ་སྐྱིད་ཀུཎྜ་དགའ་བའི་གྲོགས་སུ་འཛག །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

ལྷ་གཟིགས་རླངས་ཀྱི་གདུང་རབས་བརྗོད་པ་དང་། ཕག་གྲུའི་རྒྱལ་རབས་ཀྱི་སྐོར།

---

^{[མ་དཔེ་གཟིགས་ན་འདིར་གནོན།]}

ལྷ་གཟིགས་རླངས་ཀྱི་གདུང་རབས་བརྗོད་པ་དང་། ཕག་གྲུའི་རྒྱལ་རབས་ཀྱི་སྐོར།ཁ་བས་བསྐོར་བའི་ལྗོངས་ཆེན་པོ་འདི་ཉིད་དུ་དཔལ་དྭགས་པོའི་བཀའ་བརྒྱུད་ཀྱི་བསྟན་པ་ནགས་ཀླུང་སྟུག་པོའི་དབུས་སུ་དཔག་བསམ་ཡོངས་འདུའི་ལྗོན་པ་ལྟ་བུ་ནི་དཔལ་ཕག་མོ་གྲུ་པ་རྡོ་རྗེ་རྒྱལ་པོ་ཞེས་དབང་པོ་ཐ་མལ་པ་རྩོད་དུས་ཀྱི་གདུལ་བྱའི་སྣང་ངོར་རིམ་གྱིས་སྦྱངས་པའི་སར་གནས་ཀྱི་སེམས་དཔའི་ཚུལ་འཛིན་ཅིང་། དབང་པོ་ཡང་རབ་ལ་དུས་གསུམ་གྱི་སངས་རྒྱས་ཡིན་པར་ཞལ་གྱིས་བཞེས་པའི་སྙན་གྲགས་ལྷ་ཡི་རྫ་ལྔ་སྒྲུབ་བརྒྱུད་རྣམ་པར་རྒྱལ་བའི་ཁང་བཟང་(༦༨ན)

---

^{[མ་དཔེ་གཟིགས་ན་འདིར་གནོན།]}

གི་རྩེ་མོར་བརྡུངས་པས་མེ་ཏོག་མདའ་ཅན་ལྷ་མིན་གྱི་ཚོགས་མཐའ་དག་བརྣག་ནུས་ལས་འདས་ཏེ་ཕུན་སུམ་ཚོགས་པའི་ལེགས་བྱས་ཀྱི་བདུད་རྩིར་སྤྱོད་པ་ལ་ཉེར་འཚེའི་བསམ་པ་རིང་དུ་གཏོང་བའི་བྱེད་པོ་ཐེག་པ་ཆེན་པོའི་གླང་ཆེན་ས་ལ་རབ་བརྟན་གྱི་སྟེང་དུ་རྣམ་པར་འགྱིང་ཞིང་། ཡེ་ཤེས་འདྲེན་བྱེད་སྟོང་གིས་ཇི་ལྟ་ཇི་སྙེད་ཀྱི་ཆོས་མཐའ་དག་ཆེན་པོར་འཆར་བ་ཀུན་སྟོང་ཆེན་ཕྱག་རྒྱ་གཅིག་གི་རྒྱས་ཐེབས་པའི་རྡོ་རྗེ་རྩེ་བརྒྱ་པས་བདག་འཛིན་རི་བོའི་བགྲོད་པ་མིང་གི་ལྷག་མར་བཏང་བའི་སྐྱེས་མཆོག་མཆོད་སྦྱིན་བརྒྱ་པ་འདི་ཉིད་ཀྱི་བཀའ་བརྒྱུད་ཡིན་ལ། དེ་ཡང་ཆོས་སྲིད་ཀྱི་འབྱོར་པ་བླ་ན་མེད་པའི་སྒོ་ནས་ཡར་ལྡན་དུ་སྤེལ་བ་ནི་རྗེ་སྤྱན་སྔ་རིན་པོ་ཆེ་དང་། གོང་མ་ཏའི་སི་ཏུ་སོགས་དཔལ་ལྡན་རླངས་ཀྱི་གདུང་ལས་རིམ་པར་བྱོན་པ་རྣམས་ཡིན་པས། རླངས་ཀྱི་པོ་ཏི་བསེ་རུ་ལས། ལར་སྐྱེས་པའི་མིས་རང་གི་སྐྱེ་བརྒྱུད་མ་ཤེས་ན་ནགས་ཁུང་གི་སྤྲེའུ་དང་འདྲ། མི་རང་གི་ཆོ་འབྲང་མ་ཤེས་ན་གཡུ་འབྲུག་ཟོལ་མ་དང་འདྲ། ཡབ་མེས་ཀྱི་ཆེ་གེའི་ཡིག་ཚང་མ་ཤེས་ན། མོན་ཕྲུག་ཡལ་བོར་དང་འདྲ་ཞེས་དང་། སྐྱེས་པའི་མི་ལ་གྲགས་པའི་གཏམ་དགོས། བྱས་པའི་ཆོས་ལ་གྲུབ་པའི་མཐའ་དགོས། ཆེ་བའི་མི་ལ་མཐོ་བའི་རྟགས་དགོས་ཞེས་གསུངས་པ་ལྟར། བོད་གསིལ་བུར་མ་སོང་བའི་སྔ་རབས་ཀྱི་དུས་རྗེ་འབངས་མཐའ་དག་རིགས་རུས་འཆོལ་བར་མི་སྤྱོད་པས་ཁུངས་དང་ཡིག་ཚངས་ལ་ནན་ཏན་དུ་བྱེད་པའི་སྲོལ་འདུག་ཅིང་། དེང་སང་ནི་འདི་རིགས་ཀྱི་རྒྱུ་མཚན་མང་དུ་སྨྲ་བ། སྤྲེལ་རྒན་རྣམས་ཀྱིས་མི་བཟུང་ནས། །མཇུག་མ་མེད་ཅེས་བཞད་གད་བྱེད། །ཅེས་པའི་ཚུལ་ལྟ་བུར་འགྲོ་བར་གདའ་ནའང་(༦༨བ)

---

^{[མ་དཔེ་གཟིགས་ན་འདིར་གནོན།]}

གོང་གི་འཕྲོས་ལས་འདི་ཉིད་ཅུང་ཟད་བརྗོད་ན། པོ་ཏི་བསེ་རུ་ལས། འབངས་ཀྱི་མི་རབས་ལ། འབྱུང་བ་སྣ་ལྔའི་སྙིང་པོ་ལ། སྒོ་ང་ཆེན་པོ་གཅིག་ཡོངས་པ། ཕྱིའི་སྒོང་ཤུན་ལ་ལྷ་བྲག་དཀར་པོ་ཆགས། ནང་གི་སྒོང་ཆུ་ལ་དུང་མཚོ་དཀར་མེར་འཁྱིལ། བར་གྱི་སྒོ་ངའི་དར་ཆ་ལ། རིགས་དྲུག་སེམས་ཅན་ཀུན་ཏུ་གྲོལ། །སྒོ་ང་འཕྲུལ་གྱི་བཅོ་བརྒྱད་ཆགས། །སྒོ་ང་བཅོ་བརྒྱད་འབྲིང་པོ་དེ། །དུང་སྒོང་གཅིག་ཏུ་ཡར་ནས་བྱུང་། །ཞེས་བཤད་པ་ལྟར། དུང་གི་སྒོ་ང་དེ་ལ་དབང་པོ་ལྔ་དང་ཡན་ལག་རྣམས་སོ་སོར་དོད་དེ་མཚར་སྡུག་གྱི་ཁྱེའུ་ཡིད་ལ་སྨོན་པ་ལྟ་བུ་ཞིག་བྱུང་བས་མིང་ཡེ་སྨོན་རྒྱལ་པོར་བཏགས། དེའི་ཇོ་མོ་ཆུ་ལྕག་རྒྱལ་མོ་ལ། འཕྲུལ་སྲས་དབང་ལྡན་འཁྲུངས། དེས་དུང་བཟའ་དངུལ་མོ་བླངས་པ་ལ། ཀྭོ་སྲས་སྐྱེས་གཅིག་འཁྲུངས། དེའི་སྲས་མི་རབས་མཆེད་གསུམ་ལས། ཆུང་བ་སྟག་ཚལ་འལ་འོལ་གྱི་ཇོ་མོ་འཚམས་བཟའ་ཁྱད་ཁྱུད་ལ་སྲས་མགུར་ལྷ་མཆེད་བཞི་བྱུང་། ཆུང་བའི་སྲས་ཡབ་ལྷ་སྡེ་དྲུག་གི་ཆུང་བ་འོ་དེ་གུང་རྒྱལ་གྱི་ཇོ་མོ་ལྷ་མོ་ལ། ལྷ་ཚ་མཆེད་དགུ་བྱུང་། ཇོ་མོ་གཉན་མོ་ལ་གཉན་ཚ་མཆེད་དགུ། ཇོ་མོ་རྨུས་མོ་ལ། རྨུ་ཚ་མཆེད་དགུ། ཇོ་མོ་ཀླུ་བཟའ་ལ་ཀླུ་ཚ་མཆེད་བརྒྱད་བྱུང་། ཀུན་བསྒྲིལ་བས་སྲས་སུམ་ཅུ་རྩ་ལྔ་བྱུང་། དེ་རྣམས་ཀྱི་ཆུང་བ་སྣེ་ཁྲོམ་ལག་ཁྲའི་ཇོ་མོ་ལྷ་ལྕམ་ལ། ལ་ཁ་རྒྱལ་པོ་འཁྲུངས། དེའི་ཇོ་མོ་ལུང་ཁ་ཧྲིལ་མོ་ལ་སྲས་གསུམ་གྱི་ཆེ་བ་མཐིང་གི །དེའི་ཇོ་མོ་ལྷ་ལྕམ་དཀར་མོ་ལ་སྲས་བོད་འཇོངས་ལ་བྲང་གི་རྨུ་བཟའ་མཐིང་བསྒྲིལ་ཁབ་ཏུ་བཞེས་པར་རྒྱ་ཁྲི་ལ་ཞང་འཁྲུངས། དེ་ལ་སྲས་རྒྱལ་པོ་ཆེ་ཆུང་གསུམ། བརྒྱུད་བརྒྱད་ཡོད་པ་ལས། ཆུང་བའི་ཇོ་མོ་མཐིང་མོ་ལ་སྲས་གསུམ་(༦༩ན)

---

^{[མ་དཔེ་གཟིགས་ན་འདིར་གནོན།]}

བྱུང་བའི་ཁྲི་རྗེ་གཉན་ཐང་གི་སྲས་དཔལ་ལྷ། དེའི་སྲས་ཨ་མི་མུ་ཟི་ཁྲི་དོའི་ཇོ་མོ་གཉན་བཟའ་ཤ་མིག་ལ་སྲས་གསུམ་དང་། རྨུ་བཟའ་ལ་སྲས་གཅིག །སྲེན་བཟའ་ལ་སྲས་གཉིས་ཏེ་དྲུག་བྱུང་ལ། འདི་དག་ལས་མཆེད་པ་རུས་ཆེན་བཅོ་བརྒྱད། འབྲས་ལ་དཀར་ནག །ཁྲ་གསུམ་སོགས་དང་། བོད་མིའི་གདུང་དྲུག །བྱུང་ཚུལ་ཤིན་ཏུ་མང་ཞིང་། སྟོད་ཀྱི་འབྲས་དཀར་མཆེད་དགུ་ལ། །བལ་པོ་དང་བལ་ཡོ་བལ་སྲིད་གསུམ། །མ་སྟོང་བལ་སྟོང་ཅོན་སྟོང་དྲུག །མར་བ་དང་ཞང་ཆུང་པུ་རངས་དགུ །ཞེས་སོགས་དབྱེ་བ་ཤིན་ཏུ་མང་ཞིང་། བསེ་ཁྱུང་འབྲས་ཀྱི་ཇོ་མོ་བཙན་བཟའ་དགེ་ལྡན་མའི་སྲས། འབྲས་ཁྲབ། དེའི་ཇོ་མོ་སྲུན་བཟའ་ཁྲ་མོ་ལ་སྲས་བཞི་བྱུང་བའི་ས་ཆེས་ཧོར་བཟའ་འབུམ་མོ་ཁབ་ཏུ་བཞེས་པ་ལ་ཁྱུང་རུ་དཀར་པོ། དེའི་སྲས་འབུམ་རེ་ཤལ་མིག །དེའི་སྲས་ཨར་རྗེ་གཙུག་གསུམ། དེ་ལ་གནམ་ལྷ་མཆེད་བརྒྱད་ཀྱི་ལྔ་པས་སྲས་སུ་སྤྲུལ་པའི་མིང་མང་ལྡོམ་སྟག་བཙན། དེའི་ཇོ་མོ་རོང་བཟའ་ཁྱེ་ལྕམ་ལ་སྲས་མ་བྱུང་བས་ཐུགས་མ་བདེ་བར་ལྷ་ཡུལ་དུ་བྱོན་ཏེ་རང་གི་གཅེན་རྣམས་ལ་དྲིས་པར། རང་རེ་ལྷ་སྲས་མཆེད་བརྒྱད་ཀྱི། ཁྱེད་ནི་མི་ཡི་སྲས་སུ་སྤྲུལ། །བུ་དང་སྲས་མེད་ཐུགས་ཆད་ན། །ཟླ་བ་བཅུ་གསུམ་སྒྲུབ་པ་མཛོད། །ཡི་དམ་བསྒོམས་ལ་གསང་སྔགས་བགྲོངས། །ལོ་གསར་ཟླ་བ་བཅུ་གསུམ་ལ། །ལྷ་རི་གཉན་པོ་ཅན་དུ་བྱོན། །བསངས་དང་མཆོད་པ་གསོལ་བ་ཐོབ། །ལྷ་ཚངས་སྲས་མོ་འགྲུབ་སྟེ་འོང་། །ལྷ་ཚངས་སྲས་མོ་འགྲུབ་པ་ན། །ལྷ་ཡི་སྲས་ལ་མི་ཡི་བརྒྱུད། །རིགས་བརྒྱུད་ཁྱད་དུ་འཕགས་པ་འོང་། །མི་རབས་བདུན་ཅུ་རྩ་གསུམ་པར། །བླ་མ་མི་དཔོན་རྒྱུན་མི་ཆད། །(༦༩བ)

---

^{[མ་དཔེ་གཟིགས་ན་འདིར་གནོན།]}

སེམས་ཅན་ཀུན་གྱི་འདྲེན་པ་དང་། །དཔའ་བོས་རྒྱལ་ཁམས་འདུལ་བ་དང་། །གྲགས་པ་ས་སྟེང་ཁེབས་པ་འོང་། །ཞེས་གསུངས་པ་དང་མཐུན་པར་མི་ཡུལ་དུ་བྱོན་ཏེ་སྒྲུབ་པ་མཛད། ལོ་གསར་གྱི་ཟླ་བ་ལ་ལྷ་རིའི་རྩེར་བྱོན་ཏེ་མཆོད་པ་མཛད་པས་ནམ་མཁའ་ལས་འཇའ་ཚོན་སྣ་ལྔ་པ་བྱུང་ཞིང་བར་སྣང་ལ་རོལ་མོའི་སྒྲ་སོགས་ཆོ་འཕྲུལ་སྣ་ཚོགས་བྱུང་བས། ཚངས་སྲས་ལྷ་མོ་འཁོར་བརྒྱད་དང་བཅས་པ་བྱོན་པར་གཟིགས་ཏེ། ཆུང་མ་མཛད་པར་གསོལ་བ་བཞིན་འཁོར་རྣམས་འོད་དུ་ཡལ། ལྷ་མོས་ཞལ་གྱིས་བཞེས། རྡོ་རྗེ་རྣམ་འཇོམས་ཀྱི་ཁྲུས་ཆུས་ཇོ་མོའི་སྐུ་ལུས་བཀྲུས་ནས་ཡུལ་དུ་བྱོན། ཡུན་རིང་དུ་སོང་ཀྱང་སྲས་མ་བྱུང་། སྐབས་ཤིག་ནམ་མཁའ་ནས་སྒྲ་ཞིག་ལ། མང་ལྡོམ་སྟག་བཙན་དམག་ལ་བྱོན། །རྒྱ་དམག་བོད་དུ་ལྷགས་དོགས་ཡོད། །རྒྱ་དམག་བོད་དུ་ལྷགས་པ་ན། །ཁྱོད་མིན་གང་གིས་ཐུབ་མི་འགྱུར། །ཞེས་བྱུང་བས། མང་ལྡོམ་གྱིས་ཆིབས་ངང་དཀར་གཡུག་ཤོག་ལ་ཆིབས། དངུལ་དཀར་གྱི་དུང་ཁྲབ་དང་ཤེལ་དཀར་གྱི་རྨོག་དེ་གྱོན། འོད་འབར་གྱི་མཚོན་བཏགས་ནས། ནམ་མཁའ་ལ་ལྷ་དམག་དང་ཆུ་རྒྱུད་ལ་ཀླུ་དམག་རྣམས་འགྲིམ་དུ་བཅུག་སྟེ་བྱོན་པས། རྒྱ་རྣམས་བྲོས་ཏེ་གཡུལ་ལས་རྒྱལ། སྐབས་དེར་སྨན་བཙུན་གྱིས་ལྷ་ཡུལ་ནས་ཁྲིད་པའི་དུང་གི་མཛོ་མོ་བྲོས་པ་མང་ལྡོམ་གྱིས་བཀག །སྨན་བཙུན་གྱིས་མཛོ་མོ་འཚོལ་དུ་འོངས་པ་གཟིགས་ནས། མཛོ་མོ་མི་འགྲོ་བའི་ཕྱག་རྒྱས་བཅིངས་ཏེ་ཕ་བོང་གུར་འདྲའི་ནང་དུ་བྱོན། སྒོ་བསྡམས་ཏེ་ཟུར་གཅིག་ནས་གཟིགས་པས། སྨན་བཙུན་གྱིས་མཛོ་མོ་ལ་འོ་མ་བཞོས་པའི་ཕུད་ཀྱིས་དཀོན་ཅོག་དང་། མང་ལྡོམ་གྱི་སྐྱབས་ལྷ་ལ་མཆོད་(༧༠ན)

---

^{[མ་དཔེ་གཟིགས་ན་འདིར་གནོན།]}

པ་ཕུལ། ལྷག་མ་ཆུ་ལ་བླུག་ནས། རིགས་བརྒྱུད་ཁྱད་འཕགས་འབྱུང་བའི་སྨོན་ལམ་བཏབ་པས་མང་ལྡོམ་མཉེས། དུས་དེར་ནམ་མཁའ་ནས་སྤྲུལ་པའི་ལྷ་བརྒྱུད་སྤལ་རན་པས། སང་ཕོད་དུས་ཀྱི་དེ་ཙམ་ན། །རིགས་ཀྱི་སྲས་བུ་འཁྲུངས་པར་འགྱུར། །ཟེར་བའི་སྒྲ་བྱུང་བ་དང་། མང་ལྡོམ་ཀྱིས་སྨན་བཙུན་གྱི་རྩར་བྱོན་ནས་གཟིམས། ཐོ་རངས་མི་དཀར་རྟ་དཀར་དུ་སྤྲུལ་ནས། མཆེད་བདུན་ལ་གསུང་བ་བཞིན་བྱས་ཡོད། སྲས་ཇི་ལྟར་འཁྲུངས་ཞུས་པའི་ལན་དུ། མི་བརྒྱུད་ལྷ་རབས་གསུམ་དུ་ཡོད། །གཅིག་གིས་བླ་མའི་བརྒྱུད་པ་འཛིན། །སེམས་ཅན་ཀུན་གྱི་འདྲེན་པ་བྱེད། །གཅིག་གིས་བོད་ཁམས་དཔོན་དུ་འགྱུར། །བོད་ཁམས་ཀུན་གྱི་རྗེ་བྱེད་ཅིང་། །གཅིག་གིས་དཔའ་བོའི་རིགས་སུ་ཡོང་། །ཞེས་གསུངས། དེ་ནས་ཟླ་བ་བདུན་རྫོགས་དུས་ཉམས་སད་པའི་ཕྱིར་དུ་བདག་གི་སྲས་མ་ལགས་ཞེས་ལྷ་མོ་ལ་གསུངས་པས། སྲས་འཁྲུངས་ཁར་སྨན་བཙུན་གྱིས་སྔར་གཟིམས་སར་བྱོན། མནལ་ལམ་དུ་གསེར་གྱི་མཆོད་རྟེན་རིན་པོ་ཆེས་སྤྲས་པ་ལ། བང་རིམ་གྲངས་མེད་ཅིང་ཐོག་མཐའ་བར་གསུམ་ལ་རིམ་བཞིན་བླ་མ། ལྷའི་བུ་བུ་མོ་བསྒྲིགས་པ་ཞིག་པང་དུ་བྱུང་བ་རྨིས། སང་སྲས་འཁྲུངས་པ་ལྷ་རིའི་རྩེར་ཁྱེར་ཏེ། གཡམ་སྒྲོམ་གྱི་ནང་དུ་སྲས་བཞག་ནས། མང་ལྡོམ་གྱི་སྲས་ཡིན་ན་མི་བརྒྱུད་ལྷ་ལས་སྲ་བ་དང་། མིན་ན་བྱ་དང་གཅན་གཟན་གྱིས་ཟ་བའི་སྨོན་ལམ་བཏབ། མིའི་དྲི་མ་ཕོག་པའི་སྟབས་ཀྱིས་ལྷ་གནས་སུ་མ་ཐོན་པར་ཡུལ་དུ་ལོག །དེར་མང་ལྡོམ་ལ་རྒྱུ་མཚན་རྣམས་བཤད་པས། དེ་མ་ཐག་ཡབ་ཡུམ་(༧༠བ)

---

^{[མ་དཔེ་གཟིགས་ན་འདིར་གནོན།]}

གཉིས་ཀྱིས་ལྷ་རིའི་རྩེར་ཕྱིན་པ་ན། ཁྱེའུ་གཡུའི་ཟུར་ཕུད་ཅན་སྤྱི་གཙུག་ན་རླངས་པ་དཀར་པོ་ཡོད་པ་གཅིག་ལ་གཡུ་འབྲུག་གིས་ངར་ཆུ་བླུད། སེང་གེས་ནུ་ཞོ་བསྣུན། རྒོད་ཀྱི་གཤོག་པས་བཀབ། གཅན་གཟན་རི་དྭགས་ཀྱིས་སྐོར་བ་བྱེད། འཇའ་ཚོན་གྱི་གུར་ཕུབ་འདུག་པ་གཟིགས་པས། ཡབ་དགྱེས་ཏེ། རླངས་སོ་རླངས་སོ་ལན་གསུམ་རླངས། གསུངས་པས་རླངས་ཀྱི་གདུང་བརྒྱུད་ཅེས་མིང་དེ་ནས་ཆགས། འགའ་ཞིག་ཏུ་ག་གླ་བཏགས་སུ་སྣང་བ་ནི་ཡིག་མཁན་གྱིས་མ་དག་པའི་རྒྱུན་འབྱམས་པར་ངེས་སོ། །དེའི་ཇོ་མོ་ལྡོང་བཟའ་ཁྲི་སྒྲོན་ལ་སྲས་དཔའ་བོ། །དེའི་ཇོ་མོ་ལྕོག་རོ་བཟའ་ལྷ་གནམ་གྱི་སྲས་སྟོང་ཐོ། དེའི་སྲས་ཆེ་ཆེ། དེའི་སྲས་རྒོད་ལྡིང་། གཅེན་པོའི་སྟེང་དུ་རྒོད་ལྡིར་བ་ལྟར་འཕུར་བས་མིང་དེ་ལྟར་ཆགས། དེའི་སྲས་སྟོང་དགེ །དེའི་སྲས་སྟོང་ཁྲི། དེའི་སྲས་ཕག་ཚང་། དེའི་སྲས་ལྡང་ར། དེའི་སྲས་གཙུག་གཉེན་རྫོང་ཁོང་། དེའི་སྲས་བཙན་པ་འདབ་ཤོང་། དེའི་སྲས་སྣང་གཉན་ཁོང་སླེབ། དེའི་སྲས་མང་པོ་ཆེ་སྒྲོ་ཁ། དེའི་སྲས་སྟག་པོ་ཆེ་དར་དཔལ། འདིས་མ་ཕམ་གཡུ་མཚོའི་འགྲམ་དུ་གསེར་ཀྱི་ཤཱཀྱ་མུ་ནི་བཞེངས། གཡུ་སྣང་བ་འོད་ལྡན་ཡོན་དུ་ཕུལ། བྱུ་རུ་བཀྲ་ཤིས་འོད་འབར་གྱི་མཆོད་རྫས་བྱས། གྲུབ་ཐོབ་སེང་གེ་རབ་གནས་སུ་གདན་དྲངས་པའི་ཚེ། སྒང་བཟའ་ལྷ་མོ་ལ་སྲས་གཅིག་འཁྲུངས་པ། གྲུབ་ཐོབ་ཀྱིས་མཚོ་ནི་བཟང་ཞིང་སྲས་འདི་ལྷའི་སྤྱན་གྱིས་གཟིགས་པ་ཞིག་བྱུང་བས། མཚོ་བཟང་ལྷ་གཟིགས་སུ་ཐོགས་གསུང་། འདི་ནས་བཟུང་སྟེ་རླངས་ལྷ་གཟིགས་སུ་གྲགས་ལ། འདིའི་སྲས་ཨ་མི་བྱང་ཆུབ་འདྲ་འཁོལ་ཏེ། དགུང་ལོ་བརྒྱད་ལ་ཨོ་རྒྱན་དུ་བྱོན་པ་དང་། (༧༡ན)

---

^{[མ་དཔེ་གཟིགས་ན་འདིར་གནོན།]}

སྲིན་པོ་བཏུལ་ནས་ཕྱིར་བྱོན་པའི་ཚེ་ཡི་དམ་གྱི་ལྷ་ཞལ་གཟིགས་པ་དང་། གེ་སར་གྱིས་གླིང་ཡུལ་དུ་ལན་གཉིས་གདན་དྲངས་པའི་ཕྱི་མའི་ཚེ། ཕ་བོང་གྲ་བ་རྟ་འདྲ་བ་ལ་ཆིབས་ནས་ཕྱོགས་བཞིར་གདོན་ཆེན་པོ་བཞི་བཏུལ་བ་སོགས་རྫུ་འཕྲུལ་ནི་མཐའ་ཡས་ཤིང་། སྔར་བྱང་ཆུབ་རྡོ་རྗེ་ཟེར་ཡང་། ཕྱིས་ལྷ་སྲིན་བྲན་དུ་འཁོལ་བས་འདྲེ་འཁོལ་དུ་མཚན་ཆགས། སློབ་དཔོན་ཆེན་པོ་པདྨས་ཀྱང་། བྱང་དང་ཆུབ་ཅེས་བྱ་བ་ཡི། །མི་བུ་ཁྱད་དུ་འཕགས་པ་འོང་། །དེ་ནི་ང་ཡི་ཐུགས་ཀྱི་སྲས། །ཞེས་གསུངས་ཤིང་། བྱང་ཆུབ་འདྲེ་འཁོལ་ཉིད་ཀྱི་གསུང་དུ་ཡང་། ད་ནས་མི་རབས་བཅུ་གསུམ་ན། །བོད་ཁམས་ཡོངས་ཀྱི་བདག་པོ་འོང་། །ཞེས་ལུང་བསྟན་པ། འཇམ་དབྱངས་གོང་མ་རྒྱལ་པོའི་ཕོ་བྲང་ཚུན་གྱི་མཆོག་དམན་གྱི་སྐྱེ་བོ་མཐའ་དག་གི་མིག་དང་རྣ་བའི་སྤྱོད་ཡུལ་དུ་གྱུར་པ་དེ་ལྟར་ཡིན་ལ། འདིའི་ཇོ་མོ་སྐལ་ལྡན་མ་ལ་སྲས་དཔལ་གྱི་སེང་གེ །གཉན་ཐོག་ཨ་ཁྲོམ། སྟག་ཚབ་གསུམ་ལས། འབྲིང་པོ་གཉན་ཟོག་ཨ་ཁྲོམ་གྱི་སྲས་གཉན་པོ་ཉ་མོག་ཁྲི། དེའི་སྲས་རླངས་སྟོན་བྱ་ཞུ་ནག་པོ། དེའི་སྲས་ཨ་སེང་། དེའི་སྲས་ཨ་སེར། དེའི་སྲས་སྐྱབས་བདུན་དཔལ་དང་བརྒྱད། བཙན་དང་དགུ་ཞེས་པའི་ཆེ་བ་ཡོན་ཆེན་རྒྱལ་བ་སྐྱབས་ཡིན་ལ། དེ་ཡང་རླངས་སྟོད་ཐོ་ཡི་སྤྱི་དཔོན་མཛད། མགོ་རུམ་སེང་གེ་རྒྱ་བཅོམ། རྩེ་འཐོན་གྱིས་དྲག་པོ་སྤུན་བཞི་བཏུལ། ལྡོང་སྲས་ཀྱི་འདོན་ཡུལ་དབང་དུ་བསྡུས་པ་སོགས་འཇིག་རྟེན་མི་ཆོས་ནས་མངོན་པར་མཐོ་བ་ཤིན་ཏུ་མང་ཞིང་། དམ་པའི་ལྷ་ཆོས་ཀྱི་སྒོ་ནས། བྱང་ཆུབ་འདྲེ་འཁོལ་ནི་གོང་དུ་སྨོས་ཟིན་པ་དང་། དེའི་སྲས་གསུམ་གྱིས་དཔག་(༧༡བ)

---

^{[མ་དཔེ་གཟིགས་ན་འདིར་གནོན།]}

པར་དཀའ་བ་སྤྲུལ་སྒྱུར་མཛད་པ་དང་། རླངས་ཁམས་པ་གོ་ཆས་རབ་ཏུ་བྱུང་བའི་སད་མི་མི་བདུན་གྱི་བར་མར་གྲགས། རླངས་དཔལ་གྱི་སེང་གེས་སློབ་དཔོན་ཆེན་པོའི་ཐུགས་སྲས་མཛད་དེ་གྲུབ་པ་བརྙེས། ཡེ་ཤེས་རྡོ་རྗེས་ཉི་མ་ལྟོང་ལ་མནན། ཡེ་ཤེས་སེང་གེས་དཔལ་ཐང་དུ་ཇག་པ་བཏུལ། དཔལ་གྱི་འབྱུང་གནས་ཀྱིས་ལྷ་འདྲེ་དམ་ལ་བཏགས། དར་མ་སེང་གེས་དུར་ཁྲོད་བསིལ་བ་ཚལ་དུ་བྱོན། དཔལ་གྱི་རྡོ་རྗེས་ཉི་ཟེར་ལ་ཆོས་གོས་བཀལ་བ་སོགས་གྲུབ་པ་བརྙེས་པའི་མཐུ་སྟོབས་དང་རྫུ་འཕྲུལ་དཔག་པར་དཀའ་བ་ཤ་སྟག་ཏུ་བྱོན་པ་ཡིན་ནོ། །སྨྲས་པ། །འཆི་བ་མེད་པའི་ལམ་ལས་ལེགས་འོངས་ལྷ་རིགས་རླངས་ཀྱི་པད་དཀར་ཚལ། །མཁས་གྲུབ་ར་ཡིག་གཉིས་པའི་ཚོགས་འདུ་ངོ་མཚར་འཕུར་ལྡིང་རོལ་གར་ཅན། །གསང་ཆེན་ཐེག་པའི་ཟེའུ་འབྲུ་རབ་ལྡེམ་དངོས་གྲུབ་སྦྲང་རྩིའི་ཟ་མ་ཏོག །ལོ་རྒྱུས་མྱངས་ན་ཞིམ་པའི་རོ་བཅུད་སྐབས་གསུམ་བདག་པོའི་བདུད་རྩི་བཞིན། །མདོ་ཁམས་ཡུལ་གྱི་ཟླ་བའི་མ་མ་ལས། །ལྷ་གཟིགས་གདུང་གི་མངོན་མཐོའི་བསིལ་ཟེར་ཅན། །གངས་ཅན་ལེགས་བྲིས་ལམ་དུ་འཕགས་པའི་ཚེ། །སྐལ་བཟང་སྐྱེ་རྒུའི་ས་སྨོས་འདོད་པ་འཇོ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ཡང་ཡོན་ཆེན་རྒྱལ་བ་སྐྱབས་ལ་ཇོ་མོ་འབྲོ་ལྡོག་བཟའ་དང་། དེ་གུ་མ། འབྲོ་བཟའ་ཡེ་ཤེས་མཚོ་དང་གསུམ་ལས། དང་པོའི་སྲས་རྗེ་སྤྱན་སྔ་རིན་པོ་ཆེ་དཔོན་སངས་རྒྱས་བསྐྱབས། དཔོན་ཤེས་རབ་རྒྱལ། གཉིས་པའི་སྲས་དབོན་མགོན་པོ་རྒྱལ་མཚན་གསུམ་པའི་སྲས་རྒྱལ་བ་རིན་པོ་ཆེ། བཅུ་གཉིས་པ་གཏེར་རྒྱབ་པ་རིན་ཅེན་རྡོ་རྗེ་རྣམས་ལས་(༧༢ན)

---

^{[མ་དཔེ་གཟིགས་ན་འདིར་གནོན།]}

རྗེ་སྤྱན་སྔ་རིན་པོ་ཆེ་ནི་ཡབ་མེས་དང་བཀའ་བརྒྱུད་ཀྱི་ཆོས་ཀྱིས་གཙོ་མཛད། རྒྱལ་བའི་གསུང་རབ་རྒྱ་མཚོ་ལྟ་བུ་ལ་ཐོས་བསམ་ལྷུར་བླངས་པས། སྒྲུབ་རིས་ཡོངས་ཀྱི་བསྟན་པའི་བདག་པོར་གྱུར། ཤར་རྒྱལ་པོའི་ལུང་གིས་མཐོང་ཚད་བསད་ན་ཐོས་ཚད་སྐྲག་པའི་ལས་རྔམ་པོ་ཆེ་གསོག་པའི་བྱེད་པོ་དོར་རྟ་ནག་པོ་ཡང་རྫུ་འཕྲུལ་གྱིས་འདུལ་བར་མཛད་པས། ཁ་བ་རི་བ་རྣམས་ལ་གཅིག་ཏུ་བཀའ་དྲིན་ཆེ། དེ་རྗེས་རྒྱལ་བ་རིན་པོ་ཆེ་རབ་ཏུ་བྱུང་བའི་མཚན་གྲགས་པ་བརྩོན་འགྲུས་ཏེ། དབུས་སུ་ཕེབས་ནས་རྗེ་སྤྱན་སྔ་རིན་པོ་ཆེས་བྱིན་གྱིས་བརླབས་པས་ཆོས་ཐམས་ཅད་མཉམ་པ་ཉིད་ཀྱི་རྟོགས་པ་འཁྲུངས། མཁས་གྲུབ་ཀྱི་ཡོན་ཏན་ཕུལ་དུ་བྱོན་ཞིང་། ནམ་མཁའ་ལས་ཐོག་བབས་པ་སྐུ་ཆོས་སུ་གཏུམས་པས་རྒྱལ་སྲས་ཐོག་རྡུགས་པ་ཞེས་ནུས་མཐུའི་སྙན་པ་ཆེ། གདན་སར་ཕེབས་ནས་སིང་གྷ་གླིང་ཏི་ར་ཧུ་ཏི་ཡ་རྩེ་རྒྱལ་པོ་རྣམས་ཀྱིས་རྣམ་ཐོས་ཀྱི་བུ་ལ་འགྲན་པར་ནུས་པའི་མཁོ་དགུའི་ཡོ་བྱད་བསམ་གྱིས་མི་ཁྱབ་པ་ཕུལ་ཞིང་། ཁྱད་པར་སོག་པོ་རྦད་འགྱེལ་དུ་གྲགས་པའི་ནོར་བུ་སོགས་ནོར་སྣའི་རིགས་ཀྱི་མཆོད་རྫས་བོད་ཡུལ་དུ་གདན་ས་ཐེལ་བཟང་བར་གྲགས་པ་ཡང་འདིའི་དུས་བྱུང་། སྤྱན་སྔ་རིན་པོ་ཆེ་ཡན་ཆད་དུ་གོང་མའི་འཇའ་ས་སོགས་མེད་འདུག་ནའང་། འདི་ཉིད་ཀྱི་དུས་ཧུ་ལ་ཧུང་གཏོགས་པ་རྣམས་གོང་མའི་ལུང་གི་འཇའ་ས་དང་བཅས་ལྡན་མ་སྒོམ་བརྩོན་གྱིས་སྤྱི་དཔོན་བྱས་ནའང་ལུགས་དང་འབྲེལ་བར་མ་བྱུང་བས། དཔོན་རྡོ་རྗེ་དཔལ་རྐང་བཞིའི་དཔོན་བྱེད་ཀྱི་ཡོད་པ་རྒྱལ་བ་རིན་པོ་ཆེས་ཚུར་བཀུག་སྟེ་ཁྲི་དཔོན་དུ་བསྐོས། གོང་སར་ལན་གསུམ་བྱོན། ཕོ་(༧༢བ)

---

^{[མ་དཔེ་གཟིགས་ན་འདིར་གནོན།]}

བྲང་སྒང་། ཚོང་འདུས་བྲག་ཁ། སྣེའུ་གདོང་། སྣ་མོ། ཧ་ལ་སྒང་། ཐང་པོ་ཆེ་གླིང་སྨད། འཕྱོས་གཞིས་ཀ །མོན་མཁར་བཀྲ་ཤིས་གདོང་། རྒྱལ་ཐང་། ལྕགས་རྩེ་གྲི་ཁུ། མཆོད་རྟེན་གླིང་། ཆད་དཀར་ཏེ་གཞིས་ཀ་བཅུ་གཉིས་བརྩིགས། མངའ་ཐང་ཤིན་ཏུ་མཐོ་ཞིང་། དཔོན་རང་ཡང་མགོ་ལ་སྒོམ་ཞྭ་དང་། ལུས་ལ་ཆོས་གོས་རྣམ་གསུམ་གྱོན། བཙུན་ཚུགས་མ་དོར་བས་ལུགས་གཉིས་ཐད་ནས་ཀུན་གྱིས་མཐོ་བཟོས་ཆེ། འཁོར་རྣམས་ཀྱང་མཚུན་ཆེ་བའི་སྟབས་ཀྱིས་གཞན་མཐའ་དག་གིས་དཔོན་གྱིས་གཟིགས་སར་བག་ཡངས་ཀྱི་སྤྱོད་པ་བྱེད་མི་ནུས་སྐད། ཆོས་རྗེ་བསོད་གྲགས་པས། བཅུ་གཉིས་རིན་པོ་ཆེའི་དུས་གོང་མའི་འཇའ་ས་བྱུང་བ་དང་། ཚེས་བཞི་པའི་དུས་དཔོན་རྡོ་རྗེ་རིན་ཅེན་གྱིས་ཁྲི་དཔོན་བྱས་པར་སྨྲ་བ་སོགས་ནི་ཡིག་ཚང་ཁུངས་ཐུབ་རྣམས་མ་གཟིགས་པར་ཚོད་འཇོག་ཏུ་བྲིས་པའི་སྐྱོན་ཁོ་ན་སྟེ། ལོ་རྒྱུས་རྣམས་མ་ངེས་བཞིན་དུ་འདྲི་དགོས་པ་མོ་རྩིས་པ་བཞིན་གྱིས་ལུང་བསྟན་བྱུང་བ་ཡིན་ན་ཐུགས་བདེན་པར་མཆིས་སོ། །འགྲོ་མགོན་རིན་པོ་ཆེའི་སྤྲུལ་པ་བཅུ་གཉིས་རིན་པོ་ཆེ་རྡོ་རྗེ་ནི་ལུང་རྟོགས་ཀྱི་ཡོན་ཏན་མཐའ་ཡས་ཤིང་། གདན་སར་ཕེབས་ནས་པུ་རངས་ལོ་ཆུང་གི་ཐུགས་དམ་དགྲ་ནག་ལ་གསོལ་བ་བཏབ་པས་ལྷོ་བརྒྱུད་ཀྱི་འཁྲུག་པ་ཞི་བ་དང་མངོན་པར་མཁྱེན་པ་ཐོགས་པ་མེད་པ་སོགས་རྣམ་ཐར་ཡ་མཚན་ཅན་མང་ཞིང་། འདིའི་དུས་ཁྲི་དཔོན་རྡོ་རྗེ་དཔལ་གྲོངས་ནས་ཁོང་གི་གཅུང་གཞོན་ནུ་རྒྱལ་མཚན་ཁྲི་དཔོན་གྱི་གོ་སར་བསྐོས་ཀྱང་། མགོ་ལ་སྨྱུག་ཞྭ། ལུས་ལ་ཧོར་གོས། རྐང་པ་ལ་ཧོར་ལྷམ་གྱོན། མཚན་ཕྱེད་ཀྱི་རིན་གླུ་ལེན་ཞིང་བྲོ་བརྡུང་། ཉིན་ཕྱེད་ཀྱི་བར་ཉལ་བ་སོགས་བག་མེད་ཀྱི་སྤྱོད་པ་ཁོ་ནས་(༧༣ན)

---

^{[མ་དཔེ་གཟིགས་ན་འདིར་གནོན།]}

དུས་འདའ་བས་ཕག་མོ་གྲུ་པའི་སྡེ་ཚུགས་ལ་ཤིན་ཏུ་གནོད་པ་བྱུང་། ཁོང་འདས་རྗེས་ལྷོ་བྲག་གཤོང་སྡེ་མཁན་པོ་རིན་རྒྱལ་གོང་སར་བཏང་སྟེ་འཇའ་ས་ཞུས། དེ་རྗེས་ཡར་འབྲོག་པ་བྱང་གཞོན་ཁྲི་དཔོན་དུ་བསྐོས་ནའང་སྔོན་མའི་མིག་ལྟོས་ཀྱིས་བག་མེད་ཀྱི་སྤྱོད་པ་ཁོ་ནའི་དབང་དུ་སོང་། དཔོན་མགོན་པོ་རྒྱལ་བ་སྲས་རིན་ཅེན་ཤེས་རབ། གྲགས་པ་ཡེ་ཤེས། གྲགས་པ་རིན་ཆེན། རིན་ཅེན་སྐྱབས་དང་བཞི་ལས། གྲགས་པ་ཡེ་ཤེས་ནི་ས་སྐྱར་འགྲོ་མགོན་འཕགས་པའི་དྲུང་དུ་འབྱོན་དུས་མདོ་སྡུད་པའི་ཚོད་ཙམ་གྱི་ཕྱག་དཔེ་ཞོགས་རེ་ལ་བཟུང་བས་མཁྱེན་རབ་ཀྱིས་གྲགས་པ་ཆེ། གདན་སར་བཞུགས་རིན་འགྲོ་ཕན་གྱི་སྒོ་མཆོག་ཏུ་ཡངས། ཁྲི་དཔོན་བྱང་གཞོན་གྱི་རྗེས་སུ་གཞོན་ནུ་ཡོན་ཏན་གྱིས་ཁྲི་དཔོན་ལོ་དྲུག་བྱས་ནའང་། ཆང་ནག་ཁོ་ན་དོན་དུ་གཉེར་བས་སྡེའི་འཛིན་ཚུགས་མ་བྱུང་། གཅུང་གྲགས་པ་རིན་ཅེན་ཐོས་བསམ་སྒོམ་པ་མཐར་ཕྱིན་ཞིང་གདན་སར་བཞུགས་ཐོག་ཏི་ཤྲི་གྲགས་འོད་དང་། རྒྱལ་པོ་ཐེ་མུར་བོག་གཉིས་ཀྱི་འཇའ་ས་སྟག་མགོ་ཕུལ། ཁྲི་དཔོན་ཟུར་དུ་མ་བསྐོས་བར་བླ་དཔོན་སྦྲགས་ནས་མཛད། དོ་སྔོན། རྒྱལ་ཐང་། སྨོན་མཁར། ས་འཐོན། བྱི་ཆུང་། ཟ་ར་ཟོ་ཐང་། ལྡིང་གསུམ། གཡུ་སྲིང་། མོན་མཁར་སོགས་གཞོན་རྒྱལ་འོད་དུ་དབེན་ཤ །དཔོན་ཆེན་ལེགས་པ་དཔལ། སློབ་དཔོན་ཨ་ཙ་ར། དཔོན་ཆེན་ཨ་བློན། ས་སྐྱ་བ་སོགས་ལ་ཤོར་བ་རྣམས་ཕྱག་རྫས་ཀྱིས་བསླུ་བར་མཛད་པས། ཕག་གྲུ་ཁྲི་བསྐོར་ལ་བཀའ་དྲིན་ཤིན་ཏུ་ཆེ་ཞིང་། དེའི་དོན་གྱིས་སི་ཏུ་རིན་པོ་ཆེའི་བཀའ་ཆེམས་སུ། སྣེའུ་གདོང་གི་ཐབ་མགོ་འཛིན་པའི་གཞིས་ཀ་མིང་ཅན་འདི་རྣམས་ཞི་(༧༣བ)

---

^{[མ་དཔེ་གཟིགས་ན་འདིར་གནོན།]}

བར་གཤེགས་པས། ཕྱག་རྫས་ཀྱིས་བསླུས་པའི་གཞིས་ཀྱང་ཡིན་ཅིང་། སྐུ་དྲིན་ཆེ་བའི་དོན་གྱིས་ད་ལྟ་ཉི་ཤུ་གཉིས་མཆོད་འདི་རང་རེ་ནང་སོ་དང་བཟའ་པ་མི་སྡེ་དང་བཅས་པས་བདག་རྐྱེན་བྱེད་པའི་དོན་དེ་ཡིན་ཞེས་གསུང་། དཔོན་རིན་ཅེན་སྐྱབས་ལ་ཛེམ་ཞང་ལྕམ་མ་དང་ཁྲི་སྨོན་འབུམ་སྐྱིད་གཉིས་ལས། དང་པོའི་སྲས་རྒྱལ་མཚན་དཔལ་བཟང་། གྲགས་པ་རྒྱལ་མཚན། གྲགས་པ་བཟང་པོ་དང་གསུམ། འབུམ་སྐྱིད་ཀྱི་སྲས་གོང་མ་ཏའི་སི་ཏུ་བྱང་ཆུབ་རྒྱལ་མཚན། གྲགས་པ་ཤེས་རབ། བསོད་ནམས་བཟང་པོ་སྟེ་ཡུམ་མི་གཅིག་པའི་སྐུ་མཆེད་དྲུག་ལས། གྲགས་པ་རྒྱལ་མཚན་ཐོས་བསམ་སྒོམ་པ་མང་དུ་མཛད་ཅིང་། ཁྱད་པར་མགོན་པོའི་བཀའ་བབས་བྱུང་ཞིང་གདན་ས་ཡུན་རིང་དུ་མཛད། འདིའི་དུས་སློབ་དཔོན་རྒྱལ་མཚན་བཟང་པོས་གོང་མའི་དྲུང་དུ་ཕྱིན་ཏེ་ལུང་དང་ལག་རྟགས་སྦྲེལ་ནས་ཁྲི་དཔོན་བྱས་ནའང་། བག་ཡངས་ཀྱི་དབང་དུ་སོང་ནས་ལུགས་གཉིས་ཀྱི་འཛིན་བཀོད་ཚར་མ་བྱུང་ཞིང་། དེའི་རྗེས་སུ་རྒྱལ་མཚན་སྐྱབས་ཀྱིས་ཁྲི་དཔོན་གྱི་གོ་སར་བསྡད་ཀྱང་འཁོས་ཀ་ཆུང་བས་ཀུན་གྱིས་བརྙས་པ་བྱས་ཏེ། ཕག་མོ་གྲུ་པའི་སྡེ་སྲིད་ཀྱི་འཛིན་ཚུགས་ཉག་ཕྲ་བ་བྱུང་། དེ་རྗེས་ཏའི་སི་ཏུ་ཁྲི་དཔོན་གྱི་གོ་སར་ཕེབས་པ་ཡིན་ལ། འདི་ཉིད་ནི་ཐང་ཡིག་ལས། ཡར་ཀླུངས་མཐིལ་ནས་རྣམ་སྨིན་བསྐྱེད་རྒྱལ་འབྱུང་། །བག་གིས་ས་རློག་དབུས་ཁམས་ས་ཧོར་ཟ། །བཙན་རྫོང་བརྒྱ་དང་རྩ་བརྒྱད་ཕྱོགས་སུ་འབྱུང་། །ཞེས་པའི་ལུང་བསྟན་ཐོག་ཏུ་བབས་པ་སྟེ། འཇིག་རྟེན་ཐམས་ཅད་ཀྱི་བྱེད་པོ་གསེར་མངལ་ཅན་གྱིས་གནམ་ཀ་བ་མེད་པའི་སྒོ་ཕྱེ་ནས། རིན་པོ་ཆེ་སྣ་བདུན་སྔོན་དུ་འགྲོ་བ་ཅན་གྱི་གདོང་ལྔའི་དབང་པོའི་གད་(༧༤ན)

---

^{[མ་དཔེ་གཟིགས་ན་འདིར་གནོན།]}

རྒྱངས་ཟད་མི་ཤེས་པར་སྒྲོགས་པའི་ཁྲི་ཆེན་པོར་སྙིང་སྟོབས་དཔའ་རྟགས་ཀྱི་ལུས་སྟོབས་ཡོངས་སུ་རྫོགས་པའི་ས་སྲུང་དབང་པོའི་སྣར་རིགས་པ་དང་མི་རིགས་པའི་སྡེ་བཞིའི་སྤྱོད་ཚུལ་ལ་རྨོངས་པའི་དྲ་བ་མཐའ་དག་གཅོད་པའི་ཤེས་རབ་ཀྱི་སྤུ་གྲི་རྣོན་པོ་རང་བྱན་དུ་འཁོར་ཡང་ངོ་ཚ་དང་ཁྲེལ་གཞུང་སོགས་ཡ་རབས་དམ་པའི་སྤྱོད་ཚུལ་གྱི་འཛམ་བུ་ཆུ་བོའི་གསེར་གྱི་རྒྱན་བཟང་པོས་མཛེས་པར་སྤུད་པས་སྐྱེ་རྒུ་མཐའ་དག་གི་རལ་པའི་ཅོད་པན་གྱི་རྩེ་མོར་འགྱིང་བ་ལ་སྐྱེ་བས་ཐོབ་པའི་སྐལ་བ་མཆོག་གི་ལེགས་བྱས་ཀྱི་ཞགས་པ་རིང་པོ་སྟོང་སྤྱི་ཕུད་ཀྱི་རྒྱལ་ཁམས་སུ་ཁྲིམས་ཀྱི་ཐིག་དྲང་པོར་འདེབས་པའི་ས་ལ་སྤྱོད་པའི་མཐོ་རིས་ཀྱི་རྒྱལ་པོ་ཏའི་སི་ཏུ་བྱང་ཆུབ་རྒྱལ་མཚན་དགེ་བྱེད་ཅེས་པ་ཆུ་ཕོ་སྟག་གི་ལོ་ལ་སྐུ་བལྟམས། དགུང་ལོ་གསུམ་ལ་འབྲི་ཀློག་མཁྱེན་པ་དང་། དྲུག་ལ་ཆོས་སྐྱོང་བྱ་རོག་གདོང་ཅན་གྱི་རྗེས་གནང་གསན་པས་ཤིན་ཏུ་འགོ་བ་བྱུང་། དགུང་ལོ་བདུན་པ་ལ་སྤྱན་སྔ་ཆོས་བཞི་པའི་དྲུང་དུ་དགེ་བསྙེན་གྱི་སྡོམ་པ་མནོས། མཚན་བྱང་ཆུབ་རྒྱལ་མཚན་དུ་བཏགས། དགུ་པ་ལ་མཁན་ཆེན་ཚུལ་དར་བ་དང་། སློབ་དཔོན་པུ་རངས་པ་ལ་རབ་ཏུ་བྱུང་། བདེ་མགོན་གྱི་བསྙེན་པ་མཛད་པས་དངོས་གྲུབ་ཀྱི་མཚན་མ་ཁྱད་པར་ཅན་བརྙེས། དགུང་ལོ་བཅུ་བཞི་ལོན་པའི་ནག་པ་ཟླ་བའི་ཚེས་བཅུ་བདུན་ལ་ས་སྐྱར་འབྱོན་པའི་གྲབས་མཛད། ཟླ་བ་བཞི་པའི་ཟླ་སྟོད་ལ་སྣེའུ་གདོང་ནས་ཐོན་ཏེ་གླུར་བཞུགས་པའི་གོངས་འཁོར་རྣམས་ཀྱིས་ཆང་མང་དུ་བླངས་ཏེ་བག་མེད་ཀྱི་སྤྱོད་པ་བྱེད་པར་བརྩམས་པས། བདག་ཆེན་རིན་པོ་ཆེར་འབུལ་རྒྱུའི་རྟ་ལ་ཆིབས་ཏེ་མ་བཞུགས་པར་བྱོན་པས་གཞན་རྣམས་ཀྱང་(༧༤བ)

---

^{[མ་དཔེ་གཟིགས་ན་འདིར་གནོན།]}

ཕྱི་ལ་ཡོང་དགོས་པ་བྱུང་ཞིང་། སྐབས་འགར་གུང་གི་དྲོ་ཕྱིས་བས་མ་གསོལ་བ་སོགས་རབ་ཏུ་བྱུང་བའི་བླ་མར་ཁས་འཆེ་བ་འགའ་ཞིག་ལས་འདི་ཉིད་བསླབ་པ་ལ་གུས་ཤིང་། གོང་དཀར་བས་མི་ཁལ་ལ་གནོད་པ་བྱས་པར་ངོས་ཀྱིས་བྱོན་ཏེ་བཅུ་ཧུ་བསྟན་ནས་ངའི་འགོ་ཁག་ཁྱེད་རྣམས་ལ་ཡོད་དོ་ཞེས་སོགས་ཀྱི་ན་ཕྲ་མོ་ནས་གསུང་སྒམ་པོ་བྱོན་པས་འཇིགས་ཏེ་གཏོང་ལེན་དང་བཟོད་གསོལ་བྱས། གན་པ་ཕུར་ལྕང་གོང་གི་རྒྱལ་པོས་བར་ཆད་བརྩམ་པ་སྒོམ་བཟླས་མཛད་པས་མ་ཚུགས། དེ་ནས་རིམ་གྱིས་ས་སྐྱར་ཕེབས་ཏེ། དཔོན་ཆེན་འོད་ཟེར་སེང་གེས་བན་རྩ་བྱས་ནས་བདག་ཆེན་རིན་པོ་ཆེར་ཕག་གྲུའི་དཔོན་པོ་འདི་སློབ་གཉེར་བྱུང་ན་རབ། མ་བྱུང་ན་བཞི་ཐོག་པའི་དྲུང་འཁོར་ལས་ཚན་ཞིག་ཞུས་འདུག་པ་ལྟར་དམ་གཉེར་ལ་བསྐོས་ནས། བདག་ཆེན་པ་ཐུགས་གཏུམ་པས་གསོལ་གཟིམས་དམ་གཉེར་སོགས་ལ་བཀའ་བཀྱོན་འཕྲལ་འཕྲལ་ཡོང་བ་ཞིག་འདུག་པས། དགོངས་བཞུས་ཏེ་རང་བཞིན་ལས་ཚན་མང་བར་བཞུགས། སྤྲུལ་པའི་དཔྱིད་ཆོས་ལ་ཆུ་མིག་ཏུ་ཕེབས་སྐབས་ཞབས་ཕྱིར་མཚན་ཉིད་ཀྱི་བླ་མ་འཇམ་དཔལ་དང་། སྔགས་ཀྱི་བླ་མ་ཀུན་དབང་སོགས་དགེ་བའི་བཤེས་གཉེན་གྱི་རིམ་པ་དང་། དཔོན་ཆེན་དབང་ཕྱུག་དཔལ། སང་ཡེ་དཔོན་པོ། བ་དེ་ལུང་བའི་དཔོན་པོ། སྟག་ལུང་དཔོན་པོ་རྣམས་ཀྱི་སྔ་བས་ཁར། སི་ཏུ་ལ་ཕག་གྲུ་དཔོན་པོར་འབོད་ཅིང་། དཔོན་པོ་རྣམས་ཀྱི་ནང་ནས་མཐོང་བཟོས་ཆེ་བར་མཛད། ཆག་ཆག་ལ་ཁར། བདག་ཆེན་རིན་པོ་ཆེ་ཆིབས་བཤོལ་སྐབས་སི་ཏུའི་ཆིབས་འཛིན་པ་སྔོན་ལ་སོང་ནས་མེད་པས། ཆིབས་འདྲོགས་ཏེ་རྒྱང་རིང་པོར་ཁྱེར་བས། རྒྱལ་ཚ་རིན་དབང་གིས་རྟ་ནས་བབས་ཏེ་རོགས་བྱས་འདུག་པ་(༧༥ན)

---

^{[མ་དཔེ་གཟིགས་ན་འདིར་གནོན།]}

ཡར་ཀླུངས་པའི་ཞེན་ཡིན་འདུག་ཅིང་། བཀའ་ཆེམས་སུ། ང་རྟ་ཐོག་ནས་མ་ལྷུངས་པ་ཁོའི་དྲིན་ཡིན་གསུང་། ས་སྐྱར་ཕེབས་སྐབས་དྲུང་འཁོར་རྣམས་ཆང་གི་དགའ་སྟོན་བྱེད་པར། བྲང་ཁང་ཤར་ན་སི་ཏུ་བང་ཡོད་པར་བདག་ཆེན་པའི་སྐུ་གཞོགས་ནས་འབོད་མཁན་བསྟུད་མར་གནང་བྱུང་བ་ལ་བྱོན་པས། གསོལ་རས་གསེར་གྱི་ཐེབ་རྩའི་ནང་དུ་གནང་ཆེས་མེད་པར་ཕྱག་རྗེན་པས་བཟུང་ཆོག་པའི་དགྱེས་པའི་བཀའ་སྩལ་ཞབས་གོམ་འཁྱོར་བ་ཙམ་ཡོད་ནའང་ཐུགས་རུས་མཛད་དེ་གསོལ། བདག་ཆེན་པོ་རིན་པོ་ཆེ་མངོན་མཁྱེན་ཐོགས་མེད་མངའ་བས། སི་ཏུ་ལ། ཁྱེད་ལ་ཁྲི་དཔོན་ཡོང་གཡུལ་རྒྱལ་སློབས་གསུང་བ་སོགས་མ་འོངས་པ་མཁྱེན་པའི་གསུང་མང་དུ་མཛད། དེའི་རྒྱུ་མཚན་གྱིས་བཀའ་ཆེམས་སུ། བླ་མ་བདག་ཆེན་པའི་དྲུང་དུ་ཐུགས་ལ་དཔེ་མེད་བཏགས་པ་དེ་ངའི་བསོད་ནམས་ཆེན་པོ་ཡོད་པ་འདི་མཁྱེན་པར་འདུག་བསམ་པའི་དག་སྣང་དང་མོས་གུས་བསམ་གྱིས་མི་ཁྱབ་པ་ཡོད་གསུང་། སྟོན་ཆོས་ཐོག་བླ་མ་མཉམ་མེད་པའི་དྲུང་དུ་བརྟག་གཉིས་ཀྱི་གསན་སྦྱོང་མཛད་སྐབས། སློབ་དཔོན་ནམ་བློ་དང་མ་འཆམ་པའི་ཚིག་རྩོད་ཀྱི་གཏམ་བླ་མས་གསན་པས། ཁྱེད་ཚེ་རླུང་གིས་འདས་པའི་བྱེ་རི་ཡིན། ཕག་གྲུ་དཔོན་པོ་སྲིད་པས་བསྐོས་པའི་གངས་རི་ཡིན་གསུངས་སྐད། དེ་ནས་རྟ་ལོའི་ལོ་གསར་ལ་རིན་ཅེན་སྒང་དུ་དཔོན་ཆེན་རིན་ཅེན་སེང་གེའི་རྩར་བྱོན་པས་འབྲུམ་པས་བསྙུང་དེ་གྲག་པ་དང་། འཇད་དུ་ཟླ་བ་གསུམ་བཞི་སྐོར་བཞུགས། དེ་ནས་དབུས་སུ་འབྱོན་ཁར་བདག་ཆེན་རིན་པོ་ཆེའི་དྲུང་དུ་ཕྱག་འབུལ་ལ་བྱོན་པས། བླ་མ་མཁས་བཙུན་པ་དང་། སི་ཏུ་གཉིས་ཕྱག་སྦྲེལ་ནས་མཁས་བཙུན་པས་སི་ཏུ་པའི་མགོ་གཉེར་(༧༥བ)

---

^{[མ་དཔེ་གཟིགས་ན་འདིར་གནོན།]}

དང་། སི་ཏུས་མཁས་བཙུན་པའི་ཞབས་ཏོག་ཏུ་འགྱུར་བ་བྱེད་དགོས་པའི་གསུང་ནན་ཆེ་བ་བྱོན། དེ་ནས་དབུས་སུ་བྱོན་ཏེ་མི་རིང་བར་གོང་མ་རྒྱལ་པོས་སྟག་མགོན་ནོར་བུ་གསུམ་པ་དང་བཅས་ཁྲི་དཔོན་གྱི་ལས་ཀ་གནང་། ཁྱི་ལོ་ཟླ་བ་བརྒྱད་པའི་ནང་ཚུན་དུ་རྒྱལ་མཚན་སྐྱབས་ཀྱིས་ཁྲི་དཔོན་བྱས་ནའང་། ལུགས་གཉིས་ཀྱི་བྱེད་པ་མཐུ་དམན་ཞིང་ཁྱད་པར་ཁོང་རང་གིས་ལས་ཀ་ལེན་པར་གོང་མའི་གསེར་ཞལ་ལན་གསུམ་མཐོང་བའི་རྒྱལ་དཔལ་སྒྲོལ་མ་སྐྱིད་འཕྲོག་འདོད་པའི་ཆེད་དུ་བསད་ཅིང་། སི་ཏུ་ལ་ཚིག་ངན་བསྐུར་བ་སོགས་ཀྱིས། སི་ཏུས་བླ་ཆེན་ཀུན་བློ་གོང་མའི་གམ་ནས་ས་སྐྱར་བསྙེན་རྫོགས་ལ་བྱོན་པའི་སྡེབས་ཀར་སི་ཏུ་རིན་ཅེན་གྲགས། དཔལ་ལྡན་ཇུ་དབེན་ཧུར་དཔོན་གྱི་དམ་ཁ་ཁྲིམས་ར་དང་བཅས་འབྱོར་འདུག་པའི་དུས་སུ་གཏུག་གཤེར་བྱས། རྒྱལ་མཚན་སྐྱབས་ལས་ཀ་ལས་ཕབ། ཁྱི་ལོ་ཟླ་བ་དགུ་པའི་ཚེས་དགུའི་ཉིན་བཀའ་ཤོག་བཅུ་ཧུ་རྣམས་བསྒྲགས། བཅུ་བཞི་ལ་སྣེའུ་གདོང་རྩིས་བླངས། གཞོན་ནུ་འོད་གཉེར་པར་བསྐོས་ཀྱང་ཕྱི་ནང་གི་ཞིབ་ཚགས་ཚུལ་དང་མཐུན་པ་མ་བྱུང་ཡང་གཉེར་རྩིས་ལེན་པ་ལས་གཞན་པའི་ཅ་ར་མ་མཛད། འབྲུག་ལོ་ལ་ཨ་ཏུ་ལ་ཡར་ཀླུངས་སུ་བྱོན། ཡུན་རིང་བཞུགས། ཉིན་གཅིག་ཨ་ཏུ་ལས། སི་ཏུ་རྟ་རར་ཁྲིད་ནས་རྟ་བྲེས་ཀྱི་ཁ་ཤིང་གོག་ལ་ཁད་ཅིག་འདུག་པ་དེ་བསྟན་ནས། ཁྲི་དཔོན་བློ་ཞིབ་དགོས་པ་ཡིན། འདི་ལ་ས་ཕག་གསུམ་བཞག་ན་འགྲིག་པས། རྟ་ལ་སྣད་ཡར་མི་ཡོང་བ་ཡིན། རྟ་རབ་ལ་དངུལ་བྲེ་རེ། དངུལ་བྲེ་དེ་གསེར་སྲང་བརྒྱད་ཡིན་གསུང་བ་སོགས་འཇིག་རྟེན་མི་ཆོས་ལ་དགོས་པའི་བསླབ་བྱ་ཆེ་ཕྲ་དུ་མ་མཛད། དེ་ནས་སྦྲུལ་ལོ་སི་ཏུའི་རབ་ཏུ་བྱུང་བའི་མཁན་པོ་ཚུལ་དར་བའི་དཔོན་(༧༦ན)

---

^{[མ་དཔེ་གཟིགས་ན་འདིར་གནོན།]}

པོ་འཕྱོང་རྒྱས་པ་ཧོར་གཞོན་ནུ་བཟང་པོ་གཉེར་དུ་བསྐོས། དེ་རྗེས་གཞིས་ཀ་རྣམས་ཀྱི་གསོ་ཕྲན་དང་། ཡུལ་གྲུ་སོ་སོར་སྐྱེ་ཤིང་འཛུགས་པ། གཤམ་ཆུ་ལ་ཟམ་མོ་ཆེ་འཛུགས་པ། སྣེའུ་གདོང་རྩེའི་ཕོ་བྲང་རྒྱ་བསྐྱེད་དེ་རྣམ་པར་རྒྱལ་བར་ཁང་བཟང་ས་ལ་འཕོས་པ་ལྟ་བུ་མཛད། དེ་ནས་མི་རིང་བར་གཡའ་བཟང་པ་དང་ཁ་མཆུ་མང་དུ་བྱུང་ཞིང་། གཡའ་བཟང་པ་འདི་ཆོས་ཕྱོགས་ནས་ཕག་གྲུའི་སློབ་བརྒྱུད་དང་། འཇིག་རྟེན་ནས་ཧུ་ལ་ཧུར་གཏོགས་པའི་ཕག་གྲུའི་འོག་ཏུ་དགོས་རྒྱུ་ཡིན་ནའང་ལས་ཀྱི་ཤུགས་ཀྱིས་བདས་པ་ན། བློ་ཆེན་ལོག་པའི་ལམ་ལ་འགྲོ། །མུ་སྟེགས་བྱེད་ཀྱི་སྟོན་པ་མཆོག །དབང་ཕྱུག་སྨྱོན་པའི་བརྟུལ་ཞུགས་འཛིན། །ཞེས་པའི་དཔེ་ལྟར་གཡའ་བཟང་པས་ཕག་མོ་གྲུ་པའི་སྟེང་དུ་དམག་གིས་ཚུར་འགེབས་ལན་འགའ་བྱས་ཤིང་ཚལ་པ་རྒྱབ་ཕུགས་སུ་ཡོད་པ་དང་། དཔོན་ཆེན་རྣམས་ཀྱང་ཡོ་བས་ཁ་མཆུ་ཡང་གཡའ་བཟང་པ་རྒྱལ་བ་འགའ་རེ་བྱུང་ནའང་། ཁ་མཆུའི་རྩ་བ་མ་ཆོད་པས་གཡའ་ཕག་བར་ཐང་དུ་གཡུལ་འཁྲུགས་པས་ཕག་གྲུ་ཕམ་སྟེ། སྟོན་པ་གཞོན་འོད་ཀྱིས་འགོ་བྱས་མི་གཅེས་བཅུ་གསུམ་ཙམ་བསད། སི་ཏུ་དང་མཉམ་དུ་གཞོན་ནུ་བཟང་པོས་འགོ་བྱས་མི་བཅོ་ལྔ་ཙམ་མ་གཏོགས་ཕལ་ཆེར་བྲོས། དེ་ནས་དཔོན་ཆེན་དབང་ཕྱུག་དཔལ་བའི་དྲུང་དུ་གཡའ་ཕག་གཏུག་གཤེར་བྱས་པས་ཕག་གྲུ་བདེན་པ་ཆེ་བ་ཙམ་བྱུང་ཀྱང་། དཔོན་ཀུན་རྡོར་གྱིས་གྱོག་བྱས་པར་བརྟེན་གཡའ་བཟང་པ་རྒྱལ། དེ་ནས་མི་རིང་བར་དཔོན་ཆེན་དབང་བརྩོན་གྱིས་དོགས་ལུམ་པར་སི་ཏུ་སྟོན་མོ་ལ་བོས་ཐོག །ལབ་བསླུས་ཀྱི་རྣམ་པར་སྟག་མགོ་གཏོང་དགོས་པའི་ཚ་འཇུན་ཅི་ཡང་བྱས་ཤིང་། ཞག་བཅུ་དགུ་ཙམ་གྱི་རིང་གུང་ཐང་དུ་(༧༦བ)

---

^{[མ་དཔེ་གཟིགས་ན་འདིར་གནོན།]}

བཙོན་ལ་འཇུག་པ་སོགས་བྱས་ཀྱང་། ཤེས་རབ་ལྡན་པ་མགོ་བསྐོར་ཡང་། །བྱ་བའི་ཆ་ལ་རྨོངས་མི་འགྱུར། །སྲོག་ཆགས་གྲོག་མ་མིག་མེད་ཀྱང་། །མིག་ལྡན་གཞན་ལས་ལྷག་པར་མགྱོགས། །ཞེས་པ་ལྟར་མཁྱེན་རབ་དང་སྙིང་སྟོབས་ཕུལ་དུ་བྱུང་བས། དཔོན་ཆེན་གྱིས་གླགས་མ་རྙེད་པར་ཕྱིར་ཕེབས། དེ་ནས་སི་ཏུ་དར་མ་རྒྱལ་མཚན། མངའ་རིས་ཕྱིན་གྱི་འཇགས་བྱེད་པ་དང་། བོད་ཆོལ་ཁ་གསུམ་གྱི་ཕྱེ་གསལ་བྱེད་པར་བྱོན་དུས། འདམ་དང་ཚོང་འདུས་འགུར་མོ་གཉིས་སུ་གཏུག་གཤེར་བྱེད་མ་ཐུབ་ཀྱང་། མངའ་རིས་འཁོར་ནས་ཡར་ཀླུངས་སུ་སེ་ཆེན་རྒྱལ་པོའི་འཇའ་ས་ལི་ཇི་བཅུ་ཧུ་སོགས་ཡིག་རིས་རྣམས་བསྟན་པས་སི་ཏུ་དར་རྒྱལ་བ་ཧ་ལས། གཡའ་ཕག་གི་ཁ་མཆུའི་བཅད་མཚམས་ལེགས་པར་བྱས་ནའང་། གཡའ་བཟང་ཚུལ་འབུམ་འོད་ཀྱིས། ཨེ་གཉལ་གྱི་དམག་རྣམས་བསྐུལ་ཏེ་རྡོག་པོ་རྒྱུད་དུ་འཁྲུགས་པས་ཕག་གྲུ་རྒྱལ་ཏེ། མ་དགའ་དགྲ་དགས་འགོ་བྱས་མི་ཉི་ཤུ་ཙམ་བསད་ཀྱང་། གཡའ་བཟང་པས་འབྲས་མོའི་ནང་དུ་གཞོན་ནུ་བཟང་པོ་དཔོན་གཡོག་གི་སྟེང་དུ་བཀབ་པར། སི་ཏུ་དཔོན་གཡོག་གིས་འགབ་སངས་འབྱོར་ཏེ་གཡའ་བཟང་པའི་དམག་རྣམས་ཕྱིར་བྲོས། གཡའ་བཟང་དགོན་པ་དང་གཞིས་ཀ་རྣམས་རྩིས་བླངས། དེ་ནས་ས་སྐྱར་བླ་མ་ཀུན་སྤངས་པ་དང་། དཔོན་ཆེན་རྒྱལ་བཟང་པ་གཉིས་ཀྱིས་སི་ཏུ་གསོད། སྣེའུ་གདོང་རྩིས་ལེན་པའི་གྲོས་ངན་བཤམས་པ་རིམ་གྱིས་མཆེད་ནའང་། སྔར་ནས་ས་ཕག་གཉིས་འབྲེལ་ཟབ་ཅིང་། ཁྱད་པར་སི་ཏུ་རང་བདག་ཉིད་ཆེན་པོ་བཟང་པོ་དཔལ་པའི་དྲུང་འཁོར་ཡིན་པའི་སྟབས་ཀྱིས། དཔོན་ཆེན་ལ་དགྲ་དབང་མཆོངས་བྱེད་པའི་རྩིས་ཡོད་སྐབས། དཔོན་ཆེན་རྒྱལ་བཟང་བ་དབུས་ཕྱོགས་སུ་བྱོན་ཏེ་(༧༧ན)

---

^{[མ་དཔེ་གཟིགས་ན་འདིར་གནོན།]}

རིམ་གྱིས་ཡར་ཀླུངས་སུ་ཕེབས། སང་གཡའ་ཕག་གཉིས་གཏུག་གཤེར་བྱེད་རྒྱུའི་ཉིན། སི་ཏུ་པས་གཞོན་ནུ་བཟང་པོས་འགོས་བྱས་བློན་པོ་རྣམས། སང་ངེད་དང་གཡའ་བཟང་པ་གཉིས་ཁྲི་དཔོན་གྱི་མདུན་དུ་གཏུག་གཤེར་བྱེད་རྒྱུ་ཡིན་པས། མ་ངེས་པའི་དཔོན་ཆེན་གྱི་ངེད་བཟུང་བ་བཞིན་བྱུང་ན་ངེད་ཀྱི་ལྤགས་པ་དམར་བཤུས་བྱེད་ཀྱི་འདུག་ཟེར་འབྱུང་ཀྱང་། སྣེའུ་གདོང་མ་གཏོད་སོགས་ཀྱི་བསླབ་སྟོན་རྣམས་མཛད། སང་དཔོན་ཆེན་གྱིས་སི་ཏུ་བཟུང་ཀྱང་ཐེལ་རྩེ་མེ་ལ་བསྲེགས་པས་ཡི་གེ་ལེན་རྒྱུ་མ་བྱུང་། དེ་ནས་དཔོན་ཆེན་གྱིས་སྣེའུ་གདོང་དུ་བསྐོར་གཡང་བྱས་པར་བློན་པོ་རྣམས་ཀྱིས་ཞལ་ངོ་ལས་སྡེ་སྲིད་གལ་ཆེ་ཟེར་ནས་མ་གཏད། དེ་ནས་དཔོན་ཆེན་གྱིས་སི་ཏུ་ལ་ཀོ་ཤ་བརྒྱ་དང་སུམ་ཅུ་རྩ་ལྔ་ཙམ་བརྒྱབ། ཞྭ་རྔ་མ་ཅན་གཅིག་དབུ་ལ་བསྐོན་པ་སོགས་བཙོན་ཆས་ཀྱི་རྣམ་པས་ཡར་ཁྲིད་སྐྱི་ནག་བར་དུ་ཚལ་པའི་དམག་གིས་བསྐྱལ་པས་ཁ་ངན་གཏོང་བ་དང་འདེད་དྲག་བྱས། ཆེན་པོ་རེ་ཞིག་གུད་གྱུར་ཀྱང་། །དེ་ལ་གདུང་བ་སྐྱེ་མི་དགོས། །ཟླ་བ་རེ་ཞིག་གཟས་ཟིན་ཀྱང་། །དེ་མ་ཐག་ཏུ་གྲོལ་བར་འགྱུར། །ཞེས་པ་ལྟར། ཉུག་ཆོས་རྫོང་དུ་ཟླ་བ་ཕྱེད་གཉིས་དང་། ཀོ་སྤྲེལ་དུ་ཟླ་གཅིག་བཞུགས་དེ་ནས་བོ་དོང་དུ་དཔང་ལག་གི་ཐོག་དཔོན་ཆེན་དབང་བརྩོན་འཇའ་ས་དང་བཅས་མཐོང་སྨོན་དུ་སླེབས་པ་དང་། དཔོན་ཆེན་རྒྱལ་བཟང་གིས་སི་ཏུ་ལ་དམ་སྦྲགས་མ་བྱས་པར་སི་ཏུ་དབུས་སུ་བྱོན། སྣེའུ་གདོང་དུ་གཞོན་ནུ་བཟང་པོས་འགོ་བྱས་བློན་པོ་རྣམས་ལ་ཁ་མཆུ་འདིའི་དབྱེ་གསལ་མ་བྱུང་བར་ཆོས་བྱེད་པ་སྐད་མི་ཟེར་བའི་ཁས་ལེན་བསྐོར། དེ་ནས་དཔོན་ཆེན་དབང་བརྩོན་གྱིས་ཁྲི་དམག་རྣམས་བསྡུས་ཏེ་དོག་ལུང་པར་(༧༧བ)

---

^{[མ་དཔེ་གཟིགས་ན་འདིར་གནོན།]}

བྱུང་བ་དང་། སི་ཏུས་ཀྱང་རྫོང་རྣམས་ཀྱི་འཛིན་ཆ་དང་དཔུང་གི་བསྡུ་སོགས་མཛད་བྱང་གི་ལ་ཁར་ཁྲོམ་པོ་ལྷ་བཙུན་དཔོན་གཡོག་བརྒྱ་སྐོར་དང་། དཔོན་ཆེན་གྱི་དམག་རྣམས་ཐུག་པ་ལྷ་བཙུན་པ་ཅན་ལག་དཔངས་མཐོ་བར་བྱུང་བའི་གཏམ་སྙན་པ་སླབ། སང་གཞོན་ནུ་བཟང་པོས་དམག་དཔོན་བྱས་ཏེ། ཕག་གྲུ་ཁྲི་བསྐོར་གྱི་དམག་རྣམས་བཏེག །ལྷུམ་སྟེང་དུ་དྲོ་ལ་སླེབ། དེར་རྟ་རྣམས་སྒུགས་བསླངས། བབ་ཅོལ་དུ་སྤྱོད་པ་མ་ཡིན་པར་དཔའ་བོ་དམག་ལ་ཆས་པ་སྟག་ལྟར་མཆོང་པ་ལ་མེད་མི་རུང་གི་མི་བཞིའི་ནང་གི་ཐུག་དཀར་བས་ལྷ་གསོལ། གཡུལ་རྒྱལ་བས་ལྟོ་བསྒྱུར། དུས་ཚོད་རྩིས་དང་བསྟུན་ནས་དཔུང་རྣམས་འགྲིམས། དཔོན་ཆེན་གྱིས་ཁྲི་དམག་མོན་མཁར་མདའ་ན་རུ་བསྒྲིགས་པའི་སྟེང་དུ་བཀབ་ནས་འཁྲུགས་པས་ས་སྐྱ་པའི་དབུས་གཙང་གི་ཁྲི་དམག་མཐའ་དག་སྤུབ། ཕག་གྲུ་པའི་ཇུས་རྣམ་པར་རྒྱལ་བའི་རུ་མཚོན་སྲིད་རྩེའི་བར་དུ་བསྒྲེང་ནས། དགྲ་མགོ་རུ་དར་དང་བཅས་ཕོ་བྲང་ཆེན་པོ་སྣེའུ་གདོང་ཆེར་ལག་རྟགས་སུ་བསྐུར་བས་ཀུན་གསལ་སྒེག་མོ་རླུང་གི་རྒྱལ་མཚན་གྱི་གོས་གྱོན་པ་ལྟར་རྣམ་པར་བཀྲ་བའི་དར་གྱི་ལྷབ་ལྷུབ་དང་གྲགས་སྙན་རྫ་རྔའི་སྒྲ་ཆེན་པོས་ནམ་མཁའི་ནོར་བུ་ཡང་སྐྲག་ནས་གླིང་བཞི་བསྐོར་བའི་ཟོལ་གྱིས་རྒྱུ་བར་བྱས་སོ། །སྔར་དཔོན་ཆེན་རྒྱལ་བཟང་གིས་སི་ཏུ་བཟུང་སྐབས་ཕོ་བྲང་ཆེན་པོར་འཁྲ་ཕུར་ཚུགས་ཤིང་། ཉེ་ལམ་དབང་བརྩོན་གྱིས་ཁྲི་སྐོར་བཅུ་གསུམ་གྱི་དཔུང་བཤམས་པ་བཏུལ་བ་སོགས་གཞན་སྡེ་རྣམ་པར་འཇོམས་པའི་དགྲ་ཐབས་ཀྱིས་སྡེ་སྲིད་ཕག་མོ་གྲུ་པའི་བསྟན་ཇུས་ཚུགས་པའི་རྩ་བ་ལྟ་བུ་ཧོར་གཞོན་ནུ་བཟང་པོ་ཡིན་པས། བཀའ་ཆེམས་སུ། སྣེའུ་གདོང་དགྲ་ལག་(༧༨ན)

---

^{[མ་དཔེ་གཟིགས་ན་འདིར་གནོན།]}

ཏུ་མ་ཤོར་བ་བྱུང་བས་ངའི་སྲོག་ཐོན། དེ་ལ་བརྟེན་ནས་སྡེ་འདི་ཟུག་ཆགས་བྱུང་བས་ཁོ་དྲིན་ཆེ་བ་ཡོད་པའི་དོན་དེ་ཡིན་ཞིང་། ད་དུང་ཚུན་བཅད་དུ་ང་ལ་སྔས་གཏོད་པ་འདི་ཡིན་པས་ཤི་གསོན་གང་བྱུང་ཡང་ནང་ནས་བསྡུར་དགོས། ད་ལྟའང་གཞོན་ནུ་རྒྱལ་མཚན་གྱིས་འགོ་བྱས་སྤུན་སྐྱ་སེར་ཀུན་ལ་བློ་ཐུབ་དང་། ནང་མི་འཆེལ་བའི་དོན་དེ་ཡིན་གསུང་ལ། དེ་ནས་སི་ཏུ་རང་ཡང་དཔུང་ཐོག་ཏུ་ཕེབས། གྲ་ཕྱི་འཕྱོང་རྒྱས་སོགས་ལྷོ་རྒྱུད་ཀྱི་ས་ཆ་རྫོང་གཞིས་ཕལ་ཆེར་བླངས། འཐབ་བརྩོད་སྔ་ཕྱིར་བྱུང་ཡང་གཞན་དག་རྣམས་རྨེག་མེད་པར་བཅོམ། དེ་ནས་དཔོན་ཆེན་དབང་བརྩོན་གྱིས་དམག་བསགས་པར་བླ་མ་དམ་པས་བཀའ་ཕེབས་དང་། དེ་རྗེས་ཁ་མཆུ་བསྡུམ་མཁན་མང་དུ་བྱུང་ཡང་། དཔོན་ཆེན་གཞན་གྱིས་བསྐྱོད་སྟབས་སུ་སོང་བས་མ་འགྲིག་པའི་ཟིར་བུན་གྱི་ངང་ལ་སི་ཏུས་གོང་དཀར་བླངས་ཏེ། དེ་ལ་དཔོན་ཆེན་གྱི་དཔུང་བཅུག་པར་བསད་བཟུང་ཚུལ་ལྕེབས་པ་སོགས་མང་དུ་བྱུང་ནས་སི་ཏུ་བ་རྒྱལ་ཏེ། ཁ་རག་ཕྱིན་གཙང་ལ་ཡར་གཏོགས་ལྷ་འབྲུག་རྣམས་རྟ་རྨིག་འོག་ནས་བླངས། དེ་ནས་ཏ་དབེན་པ་དང་མཇལ་ཏེ་གོང་མའི་དྲུང་དུ་ཁྱེད་རང་འགྲོའམ་མི་གཏོང་བ་གང་རིས་འཐད་གསུང་བ་བཞིན་དབང་ཕྱུག་དང་ཤེས་རབ་རྡོ་རྗེ་གཉིས་བཏང་བ་ཉེས་མེད་དུ་འཁོར་ཏེ་ཁྲི་བསྐོར་ལ་དགོས་པའི་དངུལ་གྱི་དམ་ཁ་དང་ཅྭ་ཧུ་སོགས་འགྲུབ། དེ་ནས་འབྲི་གུང་སྒོམ་པ་ཀུན་རྡོར་གྱིས་སྔ་ཕྱིར་བྱེད་སྤྱོད་མ་མཁས་པ་ལ་བརྟེན། ཕག་གྲུ་དང་འབྲི་གུང་པ་འགལ་ཏེ་སྡེ་འཁྲུག་ལན་མང་དུ་བྱུང་ཞིང་། ཁྱད་པར་འབྲི་གུང་པ། ནམ་གྲགས་པ། གཡའ་བཟང་པ་གསུམ་གྱིས་གྲོས་བཤམས་ནས། ཕག་གྲུའི་སྟེང་(༧༨བ)

---

^{[མ་དཔེ་གཟིགས་ན་འདིར་གནོན།]}

དུ་བཀབ་པར་གཞོན་ནུ་བཟང་པོས་འགོ་བྱས་ཡར་སྟོད་ཀྱི་དམག་རོགས་འབྲས་མོ་བསྲུང་བ་ལ་བཞག །སི་ཏུ་རང་གིས་གཙོས་དབྱར་ཆེན་བྱང་ཁར་བཏོན་ནས་འབྲི་གུང་པར་ཇུས་ཉེས་བཏང་བས། གཡའ་བཟང་པ་ཡང་ཕྱིར་བྲོས། ཚལ་པ་དང་། ནམ་གྲགས་པ་གཉིས་ཀྱི་ཁྲོན་པ་རི་དང་གཡུ་རྩི་བྲག་ལ་རྗོང་རྩིག་པ་སོགས་ཀྱི་བྱེད་པར་རྟེན། ཕག་གྲུའི་དམག་རྣམས་གསང་མདར་ཕོངས་ཐོག །གཡའ་བཟང་བ་འབུམ་ཕྲག་འོད་ཀྱིས་གཉལ་དམག་རྣམས་ཁྲིད་ནས་ལྷུན་པོ་རྩེར་སླེབ་པའི་འཕྲོད་བྱུང་བ་དང་ཕྱིར་ལོག་སྟེ་འཁྲུགས་པས་འབུམ་ཕྲག་འོད་ཀྱིས་འགོ་བྱས་དགུ་བརྒྱ་ཙམ་ལྷུན་པོ་རྩེའི་ནང་ལ་བཅུར། དེ་རྗེས་གཉལ་དམག་ཡོངས་པ་རྣམས་ཀྱང་མང་དུ་བསད་ཅིང་གོ་མཚོན་རྣམས་ཐོབ། འབུམ་གྲགས་འོད་དཔོན་གཡོག་རྣམས་ཀྱིས་འབབས་ཁ་བླངས། གཉལ་ཤེལ་མཁར་སོགས་གཞིས་ཀ་རྣམས་སུ་རྗོང་དཔོན་བཏང་ཞིང་ཟུག་པ་བཙུགས། དེ་ནས་སྐབས་ཤིག་ཆོས་རྗེ་བླ་མ་དམ་པས་བར་མཛད་ནས། སི་ཏུ་དང་དཔོན་ཆེན་རྒྱལ་བཟང་པ་གོང་དཀར་དུ་མཇལ་འཕྲད་མཛད། དཔོན་ཆེན་གྱིས་སི་ཏུ་ལ་བཟོད་གསོལ་བྱས་ཏེ་མཐུན་སྐབས། ནམ་གྲགས་ཀྱིས་ཤངས་མཐོང་སྨོན་ལ་བརྒྱབ་པས། དཔོན་ཆེན་གྱི་རོགས་སུ་ཕག་གྲུའི་དམག་རྣམས་ཆེན་པོས་འགོ་བྱས་ཕྱིན་པར་ཤབ་ཆུའི་ལྷོ་ཁར་འཁྲུགས་ཏེ། ནང་པའི་དཔུང་རྣམས་བཅོམ། དེ་ནས་ཕག་གྲུའི་དམག་རྣམས་ས་སྐྱར་འགྲོ་བར་ཐག་བཅད་ཀྱང་། དཔོན་ཆེན་གཞན་གྱིས་མགོ་བསྐོར་གྱི་དབང་དུ་སོང་སྟེ་དམག་རྣམས་ཕྱིར་སློག །དེ་ནས་དཔོན་ཆེན་ས་སྐྱར་བྱོན་པས་བླ་མ་ཏི་ཤྲིའི་སྲས་པོ་གཉིས་ཀྱིས་བཙོན་དུ་བཅུག་པས། སི་ཏུས་དཔུང་(༧༩ན)

---

^{[མ་དཔེ་གཟིགས་ན་འདིར་གནོན།]}

ཆེན་གཙང་དུ་བཏེག །ཞི་དྲག་གི་ཐབས་དུ་མའི་སྒོ་ནས་དཔོན་ཆེན་བཙོན་ནས་བཏོན། གཙང་གི་ས་ཆ་ཕལ་ཆེར་ཆབ་འོག་ཏུ་བཅུག་སྟེ། ཕྱིར་འབྱོན་པའི་ལམ་ཞོར་དུ་གཞིས་ཀ་རིན་སྤུངས་རྩིག་པའི་ཞལ་བཀོད་མཛད། དེ་ཡང་དུས་སྐབས་འདི་དག་ཏུ་ས་སྐྱ་པ་ཞལ་ངོ་མང་བས་བླ་བྲང་གོ་བཞིར་གྱེས་ནས་ནང་མི་མཐུན་པ་སོགས་ཀྱིས་བསྟན་ཇུས་མཐའ་དག་ཕག་གྲུ་པའི་འོག་ཏུ་ཤོར་བ་ནི། ས་ནང་གྲུམས་ནས་ཕག་གིས་ས་རློག་འཇིག །ཡར་ཀླུངས་ནང་ནས་ཕྱག་རྡོར་སྤྲུལ་པ་འབྱུང་། །ཞེས་པའི་ལུང་བསྟན་གྱི་དོན་དང་མཐུན་པར། གོང་མ་ཏའི་སི་ཏུ་འདི་ཉིད་ནི་གསང་ཆེན་རྡོ་རྗེ་ཐེག་པའི་བཀའི་བསྡུ་བ་པོ་རྗེ་བཙུན་ཕྱག་ན་རྡོ་རྗེའི་གསང་བ་གསུམ་གྱི་རྨད་དུ་བྱུང་བའི་ཟློས་གར་ལས། ཆོས་ཀྱི་རྒྱལ་པོ་མེས་དབོན་གསུམ་གྱིས་མཛད་པའི་སྣང་བརྙན་དྲི་མས་ཅུང་ཟད་སྦགས་པ་བསལ་བའི་སླད་དུ་དབུས་གཙང་རུ་བཞིའི་རྒྱལ་ཁམས་ལ་སྟོབས་ཀྱིས་མངའ་སྒྱུར་བར་གནམ་གྱི་ལུང་གིས་སྤྱི་བོ་ནས་དབང་བསྐུར་བར་གོར་མ་ཆག །དེ་ནས་གོང་མ་རྒྱལ་པོས། དར་ཁ་ཆེ་སོགས་གསེར་ཡིག་པ་མངགས་ཏེ་ཏའི་སི་ཏུའི་མིང་དང་དམ་ཁ་གནང་།དེ་ནས་འབྲི་གུང་པས་ཕག་གྲུའི་སྟེང་དུ་དམག་ཚན་ཆེར་བསགས་པར་བརྟེན། སི་ཏུས་གོང་དཀར་གྱི་དམག་རྣམས་བཏང་སྟེ་བྲག་དཀར་ཕབ། དེ་སྐབས་ས་སྐྱར་བླ་མ་ཀུན་སྤངས་པ་བཀྲོངས་པ་སོགས་ནང་འཁྲུག་བྱུང་བས། ཁ་མཆུ་ལབ་པར་སི་ཏུ་གཙང་དུ་བྱོན། དཔོན་ཆེན་རྒྱལ་བཟང་འབོད་པར་བཏང་བ་ཁོང་ལྷ་རྩེ་བཀའ་གྲོས་ལ་བྱོན་ཐོག་དཔོན་ཆེན་དབང་བརྩོན་དང་མཁན་པོ་ནམ་མཁའ་ཡེ་ཤེས་ཀྱིས་དུག་བཏང་ཡང་ཟེར། ཨ་རག་མང་བས་ལན་ཀྱང་ཟེར། གང་ལྟར་དཔོན་ཆེན་གྲོངས།(༧༩བ)

---

^{[མ་དཔེ་གཟིགས་ན་འདིར་གནོན།]}

དེ་ནས་སི་ཏུས་ས་སྐྱས་གཙོས་པའི་ཆེ་གཉན་རྣམས་ཀྱི་བཅྭ་ཚེ་བླངས། མཇུག་བསྡོམས་སུ་ས་སྐྱར་བྱོན། བཅྭ་ཚེའི་ནང་དང་འགལ་བ་བྱུང་ན་རྩ་ར་གཏོང་བའི་ཁྲིམས་བསྒྲགས། ལྷ་ཁང་ཆེན་མོར་རིན་ཅེན་འོད་ཀྱིས་འགོ་བྱས་བརྒྱ་སྐོར་ཞིག་ཟུག་པར་བཞག །ས་སྐྱའི་ལོ་རྒྱུས་ན་འདི་སྐབས་རྫོང་ཆུང་པ་གཟུངས་ཀྱི་དཔལ་བས་སི་ཏུ་ལ་མངོན་སྤྱོད་ཀྱི་ལས་མཛད་པས་མཚན་མ། ཁྱད་པར་ཅན་བྱུང་སྐད། དེ་ནས་སི་ཏུ་དབུས་སུ་བྱོན་རྗེས་ལྷ་རྩེ་པ་དང་བྱང་པ་འཁྲུགས། དེ་ལ་བཅྭ་ཚེ་དར་མཐུན་པའི་རྩ་ར་གཏོང་བར་ཆེན་པོས་གཙོས་པའི་དམག་བརྫངས་པ་སྙི་ཚར་སླེབ་དུས་ལྷ་རྩེ་ནས་དཔོན་ཆེན་དབང་བརྩོན་གྱི་དཔུང་གིས་ས་སྐྱ་ལྷ་ཁང་ཆེན་མོར་བསྐོར་བ་ཐོས་པས་དཔུང་རྣམས་སྙི་ཚར་ནས་ས་སྐྱར་ཕྱིན་ཏེ་འཁྲུགས་པས་མང་དུ་བསད། དཔོན་ཆེན་བཟུང་། བཞི་བརྒྱ་སྐོར་ལ་ཁྲིམས་ལུགས་བྱས། དེ་ནས་ཏི་ཤྲི་ཀུན་དགའ་རྒྱལ་མཚན། སློབ་དཔོན་བསོད་ནམས་བློ་གྲོས། གཡའ་བཟང་ཁྲི་དཔོན། ཚལ་པ་ཁྲི་དཔོན་སོགས་ཀྱིས་གོང་སར། སི་ཏུས་ས་སྐྱ་དམག་གིས་བཅོམ། ཁྲི་དཔོན་གཞན་རྣམས་ལ་མཐར་འདེད་བྱས་སོགས་ཀྱི་ཞུ་ལོག་རིམ་པར་ཕུལ་བར་བརྟེན། གོང་མ་ཐུགས་ཚོམ་པ་སེལ་བའི་ཆེད་དུ། དྲུང་ཆེན་ཤེས་རབ་བཀྲ་ཤིས་ཀྱིས་སེང་གེ་དཀར་མོའི་པགས་པ་སྡེར་བཞི་མ་ཉམས་པས་གཙོས་པའི་འབུལ་བ་དང་བཅས་གོང་མའི་སྐུ་གཞོགས་སུ་བཏང་བས། གདུང་རབས་ནས་གདུང་རབས་སུ་ཕན་པའི་འཇའ་ས་དང་ལུང་བཟང་པོ་གྲུབ། དེ་ལྟར་འབྲི་ཚལ་གཡའ་བཟང་ས་སྐྱའི་དཔོན་ཆེན་སོགས་སྟོབས་སྦྱོར་དྲེགས་པས་མྱོས་པའི་རྒོལ་བའི་ཀླན་ཀ་ཅན་རྣམས་ལ། ཅེ་སྤྱང་དུས་མིན་དུ་ང་རོའི་སྐད་འབྱིན་པར། གདོང་ལྔའི་དབང་(༨༠ན)

---

^{[མ་དཔེ་གཟིགས་ན་འདིར་གནོན།]}

པོ་དགྲ་ཟླར་མི་སེམས་པའི་ངང་ཚུལ་བཞིན་མཛད་ཀྱང་། ཚུར་འགེབས་ཀྱི་བྱེད་པ་དུག་སྦྲུལ་སྒོང་འཁྱེར་གྱི་སྣང་ཚུལ་ལ་བརྟེན་ནས་གཞན་སྡེའི་མངའ་ཐང་ཐམས་ཅད་དཔུང་ཤེད་ཀྱིས་བཅད་ནས་ནུབ་ཕྱོགས་ཆུ་ལྷའི་མཐར་ཐུག་གི་བར་དུ་བཀའ་རྟགས་ཀྱི་ཕྱག་རྒྱ་བཙན་པོས་གསེར་གྱི་གཉའ་ཤིང་ལྟ་བུར་ལྕི་བའི་རྒྱལ་ཁྲིམས་ཀྱི་འོག་ཏུ་བཅུག་སྟེ། ཉི་འོག་གི་རྒྱལ་ཕྲན་མཐའ་དག་གིས་ཡུལ་སྲོལ་དང་མཐུན་པའི་ནོར་གྱི་དབྱེ་འབུལ་བ་སོགས་མདོར་ན་བསིལ་ལྡན་གངས་ཀྱི་རི་བོ་དར་དཀར་ཀྱི་ཡོལ་བས་བྲེས་པའི་ཁོངས་སུ་འཁོད་པའི་སྐྱེ་རྒུ་མཐའ་དག་གིས་བདེ་བའི་རྩ་རྐྱེན་གྱི་བྱེད་པོ་ཀུན་ང་རྒྱལ་བའི་གདོང་པ་དམད་ནས་གཏིང་སེལ་གཙང་བར་ཚར་བཅད། གོང་དཀར། བྲག་དཀར། སྣེའུ། འོལ་ཁ། སྟག་རྩེ། བསམ་འགྲུབ་རྩེ། ལྷུན་གྲུབ་རྩེ། རིན་སྤུངས་སོགས་དབུས་གཙང་འཛིན་མའི་ལྟེ་བའི་ས་མདུད་རྣམས་ལ་རྫོང་ཆེན་བཅུ་གསུམ་བརྩིགས། ཕོ་བྲང་ཆེན་པོ་སྣེ་གདོང་རྩེར་རྒྱལ་སྒོ་ཕྱི་ནང་གསུམ་དུ་བྱས་པའི་ནང་མལ་ནག་ཆང་གི་ཁྲིམས་བསྡམས་ཤིང་། སི་ཏུ་ཉིད་ཆང་དང་ཕྱི་དྲོའི་ཁ་ཟས་སྤོང་བ་སོགས་རབ་བྱུང་གི་ཚུལ་ལ་གནས་པས་ལྷ་སྡེ་དང་མི་སྡེ་ཀུན་གྱི་སྤྱི་བོའི་ཅོད་པན་དུ་ནོར་བུ་དབང་གི་རྒྱལ་པོ་ལྟར་བསྟེན། དེ་ཡང་སྔར་དཔལ་ལྡན་ས་སྐྱ་པས་བོད་ཙམ་དུ་མ་ཟད་བོད་ཆེན་པོའི་རྒྱལ་ཁམས་ལ་མངའ་སྒྱུར་ནའང་། གདུང་བརྒྱུད་ཞལ་ངོ་རྣམས་ཐུགས་འདོད་ཀྱི་འཐེན་ཕྱོགས་སོ་སོར་སོང་ཞིག །དཔོན་ཆེན་རྣམས་ཀྱང་ཏིག་མི་ཆགས་པར་སྤོ་ལེན་མང་བ་གོང་མའི་ཁྲིམས་ཀྱང་ཧོར་གྱི་ཤན་ཤོར་བའི་ཧང་ཟོམ་སོགས་ལ་བརྟེན། ཐང་ལྷོད་དང་མཐོ་དམའ་ཅི་རིགས་དང་། ཁྱད་པར་ཧོར་ཁྲིམས་ལ་མི་བསད་ན་སྲོག་ཚབ་ཏུ་སྲོག་(༨༠བ)

---

^{[མ་དཔེ་གཟིགས་ན་འདིར་གནོན།]}

གཏོང་བས་མཚོན་པའི་ཁྲིམས་རྣམས་སྡིག་པའི་ལས་ཤས་ཆེ་བར་བརྟེན། བོད་ཆོས་རྒྱལ་གོང་མའི་ལུགས་སྲོལ་བཟང་པོ་དགེ་བ་བཅུས་གཞི་བཟུང་བ་འདི་ཉིད། ཏའི་སི་ཏུས་གཙོ་བོར་མཛད་པར་བཞེད་དེ། ཚུལ་དེ་ཉིད་སྒྲུབ་པར་བྱེད་པ་ལ་ཁས་ཞན་རྣམས་ཡལ་བར་དོར་ཞིང་། དྲེགས་པོ་རེངས་སུ་བཅུག་པ་མ་ཡིན་པའི་བདེན་རྫུན་ཐང་མར་བརྡལ་ནས། དཀར་ནག་ཤན་ཕྱེད་པའི་ཁྲིམས་ཀྱིས་རྒྱལ་ཁམས་རྒན་མོ་གསེར་ཁུར་ལྟ་བུར་བདེ་བའི་ཆེད་དུ། དཔའ་བོ་སྟག་གི་ཞལ་ལྕེ། སྡར་མ་ཝའི་ཞལ་ལྕེ། སྣེ་མོ་ལས་འཛིན་ཀྱི་ཞལ་ལྕེ། ཞུ་བཞེས་བདེན་རྫུན་གྱི་ཞལ་ལྕེ། བཟུང་བཀྱིགས་ཁྲིམས་རའི་ཞལ་ལྕེ། ནག་ཅན་ཁྲག་བཅོད་ཀྱི་ཞལ་ལྕེ། དྲན་འཛིན་ཆད་ལས་ཀྱི་ཞལ་ལྕེ། ཧོར་འདྲ་ཟ་རྐང་གི་ཞལ་ལྕེ། བསད་པ་སྟོང་གི་ཞལ་ལྕེ། རྨས་པ་ཁྲག་གི་ཞལ་ལྕེ། སྨྱོན་ཧམ་མནའ་དག་གི་ཞལ་ལྕེ། བརྐུས་པ་འཇལ་གྱི་ཞལ་ལྕེ། ཉེ་འབྲེལ་འབྲལ་བཟླུམས་ཀྱི་ཞལ་ལྕེ། བྱི་བྱས་བྱི་རིན་གྱི་ཞལ་ལྕེ། ནམ་བར་ཚུར་གྱི་ཞལ་ལྕེ་སྟེ་བཅོ་ལྔའི་སྒོ་ནས་གཏན་ལ་ཕབ། དེ་ཡང་མི་བསྲུན་ལོག་པར་འཁུ་བའི་དགྲ་སྡེ་ཚར་བཅད་ནས། ཇུས་དོན་བཞེད་ཐོག་ཏུ་འཁྱོལ་བའི་ཐབས་སུ་དྲག་པོ་དཔུང་གི་སྦྱོར་བ་བཤམས་ཚུལ། ཚུར་འགེབས་ལ་བཙན་པོའི་རྫོང་ལ་འཁྲ་འཕུར་བྱེད་ཚུལ། སྣེ་མོར་མངགས་སླེབ་རྣམས་ཀྱིས་རྣམ་དཀར་གྱི་ལས་ལ་སྤྱོད་ཅིང་ཉེ་འགྱང་སྤངས་པའི་གཞུང་དོན་གཙོ་བོར་བྱེད་ཚུལ། མི་བསད་ལ་ལན་འཇལ་གྱི་གཉིས་ཕུང་སྡིག་ལས་བྱེད་དུ་མི་འཇུག་པར་སྟོང་སྤྲོད་ལེན་སོགས་ཕྲ་ཞིབ་མཛངས་པའི་བློས་ཁྲིམས་ཀྱི་འཇམ་དར་ཡུག་གཅིག་ཏུ་བརྐྱངས་པའི་འཛུམ་གྱིས་རྫོགས་ལྡན་གསར་པའི་མགྲོན་རིང་ནས་འགུགས་པར་མཛད་དོ། །སྨྲས་པ། །འཇིགས་བྲལ་སྲ་བརྟན་གཡུལ་(༨༡ན)

---

^{[མ་དཔེ་གཟིགས་ན་འདིར་གནོན།]}

ངོར་དཔའ་བའི་རུ་མཚོན་རྩེ་ལ་དགྲ་སྡེའི་སྲོག་དབུགས་བླངས་པ་ན། གསེར་ལྡན་རུམ་དཀར་ཁྱབ་པའི་མདངས་ཀྱིས་ཟླ་གཞོན་སྐྲག་སྟེ་བྱང་གླིང་ངོས་ཀྱི་མཁའ་ལ་བྲོས། ཁྲག་གི་རྦ་རླབས་འཕྱུར་བའི་འོད་དམར་ཟི་ཡིས་རྒོད་མ་ཁ་ངོ་རྒྱ་མཚོའི་འགྲམ་དུ་ཡིབས། །རྣམ་པར་རྒྱལ་བའི་རྫ་རྔ་ལྡིར་བས་སུམ་རྩེན་བདག་པོ་འདུད་པར་གྲོས་པའི་ཅ་ཅོ་གླེང་། །ཨེ་མ་རྩོད་པའི་དུས་འདིར་སུ་ཝརྞའི། །འཁོར་ལོ་ནམ་མཁར་འཕགས་པའི་རྒྱལ་ཐབས་ཀྱིས། །གྲགས་སྙན་དུ་ཀཱུ་ལ་ཡི་བ་དན་དཀར། །སྲིད་པའི་རྩེ་མོར་ཁྱབ་ཅེས་ལྷ་རྣམས་སྒྲོག །གོང་མའི་ལུང་གིས་གཙུག་ན་ཟླ་བའི་མཆོག །ཐོབ་པས་སྟོབས་ལྡན་འགྲོ་སྐྱབས་གསེར་ཅན་འགའ། །དཔའ་མཛངས་སེང་གེའི་སྡེར་མོས་བསད་པ་ན། །པད་དཀར་མིག་ཅིག་གཉིས་པ་ས་འདིར་སྣང་། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ནས་དྭགས་པོ་བཀའ་བརྒྱུད་ཀྱི་ཕྱོགས་སུ་མདོ་ཕྱོགས་ཀྱི་བཤད་གྲའི་སྲོལ་མེད་པ་གསར་དུ་བཏོད་པའི་ཆེད་དུ་ཆོས་གྲྭ་ཆེན་པོ་རྩེས་ཐང་བཏབ། ཕར་ཚད་སོགས་བཀའ་པོ་ཏི་དུ་མ་ལ་རིག་ལམ་ནས་དྲངས་པའི་བཤད་ཉན་བཙུགས། དེ་དང་ཐེལ་གྱི་སྒོམ་གྲྭ་གཉིས་ཀ་ལ་ཕུན་སུམ་ཚོགས་པའི་མཐུན་རྐྱེན་སྦྱོར་བ། བདེ་བར་གཤེགས་པའི་སྐུ་བརྙན་དུ་མ་དང་། གསེར་གྱི་བཀའ་འགྱུར་རོ་ཅོག་བཞེང་པ། ར་ས་འཕྲུལ་སྣང་དང་བསམ་ཡས་ཀྱིས་མཚོན་པའི་གནས་ཆེན་ཁྱད་འཕགས་རྣམས་ལ་མཆོད་འབུལ་སོགས་ཐར་པ་དང་ཐམས་ཅད་མཁྱེན་པའི་ལམ་བླ་ན་མེད་པ་བསྒྲུབས་པའི་ཚོགས་གཉིས་ཀྱི་ཆུ་གཏེར་ཆེན་པོ་དབྱར་མཚོ་ལྟར་གྱུར་པའི་མཐུས་དཀར་ནག་གི་ལས་ཀྱི་འབྲས་བུ་ཆོས་ཐམས་ཅད་རྗེན་པར་འཆར་བའི་ཚད་མའི་སྲང་ལ་གཞལ་བས། ནག་པོའི་འབྲས་བུ་ཆ་ཙམ་དུ་ཡང་མ་གྱུར་པས། (༨༡བ)

---

^{[མ་དཔེ་གཟིགས་ན་འདིར་གནོན།]}

དགེ་ལེགས་ཆུ་ཟླའི་འོད་དཀར་གྲངས་མེད་པ་སྤྲོས་པས་མངོན་པར་མཐོ་བས་ངེས་པར་ལེགས་པའི་གང་བུ་ཡོངས་སུ་སྨིན་པས་ནོར་འཛིན་གྱི་བུ་མོ་མངལ་ཁྱུད་ཀྱིས་ལྕི་བར་མཛད། འདི་ཉིད་གཤེགས་རྗེས་འཇམ་དབྱངས་གུ་ཤྲི་ཆེན་པོ་ནི་དཔོན་བསོད་ནམས་བཟང་པོའི་ཇོ་མོ་ཉི་རུ་མ་དང་མང་ཉམ་གཉིས་ལས་སྔ་མ་ལ་ཉིད་དང་བདག་པོ་ཤཱཀ་རིན་པ་གཉིས། ཕྱི་མ་ལ་དཔོན་རིན་རྡོར་འཁྲུངས་པ་ལས། འཇམ་དབྱངས་པ་བླ་མ་ཀླུ་ལུང་གྲགས་པ་ལ་ཀློག་ཡིག་བསླབས། ཆོས་བཞི་གྲགས་པ་རྒྱལ་མཚན་གྱི་དྲུང་དུ་དགེ་བསྙེན་གྱི་སྡོམ་པ་མནོས་སློབ་དཔོན་གཞོན་བརྩོན་ལ་རབ་ཏུ་བྱུང་བའི་མཚན་ཤཱཀྱ་རྒྱལ་མཚན་དུ་གསོལ། གདན་སར་བརྟག་གཉིས་དང་། རྩེས་ཐང་དུ་བཀའ་པོ་ཏི་བཞིས་བཤད་པ་མཛད་པས་མཁས་པའི་གྲགས་པ་ཐོབ། བུ་སྟོན་རིན་པོ་ཆེའི་དྲུང་དུ་རྡོ་རྗེ་ཐེག་པའི་རྒྱུད་བཤད་དབང་ལུང་མང་དུ་གསན་པས། མགོན་པོ་གདོང་གི་རི་མན་གྱི་ཡར་ཀླུངས་ཀྱི་ཞིང་རེའི་ཁར་དཀྱིལ་འཁོར་རིགས་མི་འདྲ་བ་རེ་བཞེངས་ཀྱང་ཁེབ་པར་ཡོད་ཅེས་བུ་སྟོན་ཆོས་རྗེས་ཞལ་ཕོ་གསུང་། ཆོས་རྗེ་བླ་མ་དམ་པའི་དྲུང་དུ་བསྙེན་པར་རྫོགས་ཏེ་ལྷ་སར་ཆོས་འཁོར་དང་། རྩེས་ཐང་གི་ཚོགས་པ་ལོ་བཅུ་གསུམ་གྱི་བར་དུ་སྐྱོང་བར་མཛད། མི་རིང་བར་ཕོ་བྲང་སྣེའུ་གདོང་རྩེའི་ཁྲི་ཐོག་ཏུ་ཕབས་ཏེ་ཧོར་གོང་མ་རྒྱལ་པོས། ཏའི་སི་ཏུ་དང་ཆང་གུའི་ལུང་། ཀྭ་དིན་གུ་ཤྲི་ལས་ཀ་དང་དམ་ཁ་གནང་། བོད་ཆོལ་ཁ་གསུམ་བརྒྱུད་པ་དང་བཅས་པ་ཤེས་སུ་འཇུག་པའི་འཇའ་སས་སྤུར་རྒྱལ་བོད་ཀྱི་རྒྱལ་ཁམས་ན་མངོན་པར་མཐོ། གཙང་ཕྱོགས་སུ་ལོག་པར་འཁུ་བའི་ཀུན་དཀྲིས་ཀྱིས་བརྣག་པའི་སེམས་ལྡན་འགའ་ཞིག་གི་སྟེང་དུ་དཔུང་གི་སྦྱོར་བ་བཤམས་དུས། ཆོས་སྐྱོང་བྱ་རོག་གདོང་ཅན་གྱི་ནུས་པས་དམག་རྣམས་གཙང་པོ་ལ་ཐོགས་མེད་དུ་ཕྱིན། ཕྱིར་(༨༢ན)

---

^{[མ་དཔེ་གཟིགས་ན་འདིར་གནོན།]}

ཕེབས་ནས་དཔལ་ལྡན་བླ་མ་དམ་པ་གཙོ་བོར་བཞུགས་པའི་དགེ་འདུན་ཁྲི་ཕྲག་མང་པོ་ཞག་བཅུ་སྦྲེལ་དུ་གྱ་ནོམ་པའི་བཀུར་སྟི་མཛད་ནས་ཆོས་འཁོར་བཙུགས། མངའ་འབངས་ཐམས་ཅད་བདེ་སྐྱིད་ཀྱི་དཔལ་ལ་འགོད་པར་མཛད། དཔོན་རིན་ཅེན་རྡོ་རྗེས་ཟིན་བཀྲ་ཤིས་སྐྱིད་དང་། དོ་བྲག་མ་རིན་ཅེན་འཚོ་གཉིས་ཁབ་ཏུ་བཞེས་པའི་སྔ་མ་ལ་རྒྱལ་སྲས་གྲགས་པ་རིན་ཅེན་དང་ཆོས་རྗེ་ཆོས་བཞི་བ་གཉིས་ལས། ཆོས་བཞི་བ་ཆུང་ངུའི་དུས་སུ་མཁན་ཆེན་སེང་གེ་རྒྱལ་མཚན་གདན་དྲངས་པས། སྨན་བླའི་ཕོ་བྲང་གི་ཐུགས་ཀ་ནས་འོད་ཟེར་འཕྲོས་པ་སྐུ་ལུས་ལ་ཐིམ་པ་གཟིགས་པའི་ལུང་བསྟན་མཛད། རྒྱལ་སྲས་གྲགས་རིན་པ་ལ་བརྟག་གཉིས་ཀྱི་ལུང་ཞུས་ཏེ་ཐུགས་སྐྱོང་དང་། སྤྱན་སྔ་གྲགས་ཤེ་བ་ལ་དགེ་བསྙེན་གྱི་སྡོམ་པ་མནོས་པའི་མཚན་གྲགས་པ་བྱང་ཆུབ་ཏུ་གསོལ། འཇམ་དབྱངས་གུ་ཤྲི་ཆེན་པོས་གདུང་བརྒྱུད་སྤེལ་བའི་བཀའ་གནང་ཀྱང་མ་བཞེད་པར། ཆོས་རྗེ་དཔལ་ལྡན་བླ་མའི་དྲུང་དུ་བསྙེན་རྫོགས་ཀྱི་སྡོམ་པ་བཞེས། དེ་ནས་གདན་ས་ཆེན་པོའི་གོ་སར་བཞུགས་ནས་ཟབ་རྒྱས་ཆོས་ཀྱིས་སྐལ་བཟང་གི་གདུལ་བྱ་སྨིན་པར་མཛད་ཅིང་། གུ་ཤྲི་ཆེན་པོའི་རྗེས་སུ་ཕོ་བྲང་སྣེའུ་གདོང་རྩེའི་ཁྲི་ཐོག་ཏུ་བྱོན་ནས་བླ་དཔོན་སྦྲགས་ཏེ་རྒྱལ་སྲིད་ཆོས་བཞིན་དུ་བསྐྱངས། སྙིགས་དུས་ཀྱི་རྒྱལ་བ་གཉིས་པ་ཙོང་ཁ་པ་ཆེན་པོ་ཡང་འདི་ཉིད་ཀྱི་ཞབས་ལ་གཏུགས་ནས་མི་འཕྲོག་པའི་དད་པ་ཚད་མེད་པ་འཁྲུངས་ཏེ། མཁས་དབང་དཎྜཱིའི་གཞུང་ལུགས་ནས་དྲངས་པའི་རྟོགས་བརྗོད་དཔག་བསམ་ལྷུན་པོར་གྲགས་པའི་ལེགས་པར་བཤད་པའི་རྩོམ་པ་གནང་། སྤྱན་སྔ་རིན་པོ་ཆེ་ཡང་རྒྱལ་བ་ཙོང་ཁ་པ་ཆེན་པོའི་རྨད་དུ་བྱུང་བའི་མཁྱེན་རབ་ཀྱིས་གསུང་རབ་རྒྱ་མཚོ་ཆེན་པོའི་ཕ་རོལ་དུ་བྱོན་པ་གཟིགས་ནས་བསྔགས་(༨༢བ)

---

^{[མ་དཔེ་གཟིགས་ན་འདིར་གནོན།]}

པ་རྒྱ་ཆེར་མཛད། འདི་ཉིད་ཀྱི་གཅུང་ཆོས་རྗེ་བསོད་ནམས་གྲགས་པ་དོ་བྲག་དཔོན་མོ་ལ་འཁྲུངས། མཁན་ཆེན་གཞོན་དབང་པའི་དྲུང་དུ་རབ་ཏུ་བྱུང་། རྩེད་ཐང་གི་གདན་སར་ཕེབས་ནས་འཆད་རྩོད་རྩོམ་པའི་སྐྱེས་བཟང་པོས་མཁས་པ་རྣམས་ཀྱི་ཡིད་ཡོངས་སུ་ཕྲོགས། ལྷ་སར་དགེ་འདུན་དཔག་ཏུ་མེད་པ་ལ་ཆོས་འཁོར་བསྐོར། ལོ་ཆེན་བྱང་ཆུབ་རྩེ་མོའི་དྲུང་དུ་བསྙེན་པར་རྫོགས་པའི་སྡོམ་པ་བཞེས། ཕོ་བྲང་ཆེན་པོའི་ཁྲི་ཐོག་ཏུ་ཕེབས་ནས་ཕན་བདེའི་བསིལ་ཟེར་མངའ་འབངས་ཀུནྡའི་སྙིང་ལ་དྲན་པར་མཛད། ས་སྐྱོང་ཤཱཀྱ་རིན་ཅེན་གྱིས་ཟིན་རིན་ཅེན་འཛོམ་ཞེས་པ་གྲོངས་ཚེ་ལས་དག་རྣམས་ཀྱི་སྣང་ངོར་སེང་གེ་ལ་ཆིབས་ནས་མཁའ་འགྲོས་སྤྱན་དྲངས་པ་མཐོང་ཞིང་། ཆམས་ལ་དུང་གཡས་འཁྱིལ་བྱོན་པའི་རྗེ་བཙུན་རྡོ་རྗེ་རྣལ་འབྱོར་མའི་རྣམ་པར་སྤྲུལ་པ་དེ་ཉིད་ཁབ་ཏུ་བཞེས་པའི་སྲས་མོའི་དབང་པོ་གྲགས་པ་རྒྱལ་མཚན། དྲུང་བྱང་ཆུབ་རྡོ་རྗེ། སྤྱན་སྔ་བསོད་ནམས་བཟང་པོ། སྤྱན་སྔ་དཔལ་ལྡན་བཟང་པོ། སྤྱན་སྔ་བསོད་ནམས་རྒྱལ་མཚན། དྲུང་སངས་རྒྱས་རྒྱལ་མཚན་རྣམས་སྐུ་བལྟམས་པ་ལས། མིའི་དབང་པོ་གྲགས་པ་རྒྱལ་མཚན་ནི། འཇམ་དབྱངས་ཆེན་པོའི་སྐུའི་སྐྱེ་བ་གསལ་བར་དྲན་ཞིང་། མཁྱེན་རབ་མཆོག་ཏུ་ཡངས་པས་ཀློག་ཡིག་སོགས་ཆེད་གཉེར་དུ་བསླབ་སྦྱངས་མ་དགོས་པར་འབད་མེད་དུ་མཁྱེན། མཁན་པོ་གཞོན་དབང་བའི་དྲུང་དུ་རབ་ཏུ་བྱུང་། སྤྱན་སྔ་གྲགས་པ་བྱང་ཆུབ་ལ་ཆོས་ཁྲིད་རྣམས་རྫོགས་པར་གསན། མཚན་གྲགས་པ་རྒྱལ་མཚན་དཔལ་བཟང་པོར་གསོལ། ཆོས་གྲྭ་ཆེན་པོ་རྩེས་ཐང་གི་གདན་སར་ཕེབས་ནས་རིག་པའི་དབང་ཕྱུག་ཆོས་ཀྱི་གྲགས་པའི་བསྟན་བཅོས་ཚད་མ་རྣམ་འགྲེལ་གསུངས་པས་ཤིན་ཏུ་ཕྲ་བ་རྟོག་གེའི་རིག་པ་ལ་མངོན་པར་ང་རྒྱལ་བའི་མཁས་རློམས་སྲུང་རྣམས་(༨༣ན)

---

^{[མ་དཔེ་གཟིགས་ན་འདིར་གནོན།]}

ཀྱི་སྤོབས་པ་ཕྲོགས། དེ་ནས་ཕོ་བྲང་ཆེན་པོའི་སེང་གེའི་ཁྲིའི་དགའ་ཚལ་དུ་ཞབས་ཟུང་སཱ་ལ་ཆེན་པོའི་ལྗོན་པ་རྣམ་པར་འགོད་པའི་རྫོགས་ལྡན་གསར་པའི་དྲི་བསུང་མ་ལ་ཡའི་རླུང་བཞོན་གྱིས་བོད་ཆེན་པོར་འཁོད་པའི་སྐྱེ་རྒུ་ཀུན་གྱི་དུཿཁའི་ཚ་གདུང་གི་འཇིགས་པ་མིང་གི་ལྷག་མར་མཛད་ནས། ཕན་པ་དང་བདེ་བའི་ཆར་ཆེན་པོ་ཐ་གྲུ་ཀུན་ཏུ་ཕབ། བཀྲ་ཤིས་སྒོ་མང་གསུམ་གྱིས་ཐོག་དྲངས་པའི་ཐུགས་དང་སྐུའི་རྟེན། བདེ་བར་གཤེགས་པའི་བཀའ་དྲི་མ་མེད་པ་བོད་དུ་འགྱུར་བའི་གླེགས་བམ་མཐའ་དག་ས་ལེ་སྦྲམ་གྱི་སྙིང་པོ་ལས་གྲུབ་ཚར་གཉིས། གསེར་དངུལ་ལ་འདྲེས་མ་གཅིག །ཆབ་ཤོག་དཀར་པོ་ལ་བྲིས་པ་ཚར་གསུམ་གྱིས་ཐོག་དྲངས་གསུང་རྟེན་མཐའ་ཡས་ཤིང་། དེ་དག་ཀྱང་རྒྱལ་མཁར་རྩེའི་སྡེ་དགོན་དུ་བཀའ་འགྱུར་ཤིན་ཏུ་མང་བ་ཆར་རྩིས་ནས་བྲིས་པ་སྣང་བ་ལྟ་བུ་མ་ཡིན་པར་རྒྱུ་ཕུན་སུམ་ཚོགས་པའི་སྟེང་དུ། བོད་ཀྱི་ཡི་གེ་མཐའ་དག་གངས་ཁྲོད་པ་རྣམས་ལ་བཀའ་དྲིན་འགྲན་ཟླ་མ་མཆིས་པ་ཐོན་མི་སཾ་བྷོ་ཊས་མཛད་པའི་སུམ་རྟགས་དང་། དེ་དག་ལ་བརྟེན་ནས་བོད་ཀྱི་མཁས་པའི་དབང་པོ་རྣམས་ཀྱི་ཡི་གེའི་བརྡ་དག་གིས་བསྟན་བཅོས་མང་དུ་སྣང་བ་རྣམས་ལ་བརྟེན་ནས་སྡེབ་ཀྱི་སྦྱོར་ལུགས་མཐའ་དག་ལ་ཞིབ་མོར་དཔྱད། རྒྱུད་འབུམ་སོགས་སུ་ལེགས་པར་སྦྱར་བ་ལྷའི་སྐད་ཀྱི་སྔགས་མཐའ་དག་བྱ་ཀ་ར་ཎའི་དོན་ཁོང་དུ་ཆུད་པའི་སྐད་གཉིས་སྨྲ་བ་རྣམས་ཀྱིས་རང་བཞིན། རྐྱེན། རྣམ་འགྱུར་གསུམ་ལ་བརྟེན་ནས་གཏན་ལ་ཕབ་པས། བཀའ་འགྱུར་དེ་རྣམས་གཅིག་ཏུ་བསྟན་པའི་རྩ་ལག་ལྟ་བུར་གྱུར། གཙུག་ཏོར་དྲི་མ་མེད་པའི་གཟུངས་གསེར་གྱིས་བཞེངས་པའི་སྙིང་པོ་ཅན་གྱི་འབུམ་ཐེར་གྲངས་མང་བ་དང་། འབུམ་ཐེར་གདུང་ལོའི་གྲངས་ལོ་རེ་བཞིན་(༨༣བ)

---

^{[མ་དཔེ་གཟིགས་ན་འདིར་གནོན།]}

བཞེངས་པ། སྤྱན་སྔ་རིན་པོ་ཆེ་བསོད་ནམས་རྒྱལ་མཚན་གྱིས་ཆོས་འབྱུང་མིག་འབྱེད་འོད་སྟོང་མཛད་པའི་ལོ་ས་ཁྱི་ཡན་ལ་ལོ་ཉི་ཤུ་རྩ་གཉིས་སྟར་ཆགས་སུ་བྱུང་བར་གསུངས་འདུག་པས་དེ་ནས་ཀྱང་ས་ཕག་ནས་ལྕགས་ཕག་གི་བར་ལོ་བཅུ་གསུམ་གྱི་རིང་རྒྱུན་མ་ཆད་པར་མངོན། གཞན་ཡང་རིས་སུ་མ་ཆད་པའི་གྲུབ་པའི་མཐའ་ཐ་དག་ལ་བསྙེན་བཀུར་དང་། ཡོངས་འཛིན་རྣམས་ཆོས་ཀྱི་གསན་པ་མཛད་པ། པཎ་ཆེན་ཤཱཀྱ་ཤྲཱིའི་རྒྱུན་འཛིན་ཚོགས་སྡེ་འགའ་ཞིག་ལ་བསྟན་པའི་རྩ་ལག་མཁན་ཆེན་ཐམས་ཅད་མཁྱེན་པ་ཞི་བ་འཚོའི་ཐུགས་དམ་བདེ་གཤེགས་བདུན་གྱི་སྨོན་ལམ་འབུམ་ཕྲག་མང་དུ་བསྐུལ་བ། ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་སྲིད་འདིའི་ལེགས་བྱས་རྣམ་པར་དཀར་བའི་ནམ་མཁའི་གླང་པོ་ཡོངས་སུ་འཁྲིགས་པ་ལས་བྱུང་བའི་འཕྲལ་ཡུན་ཀུན་ཏུ་དགེ་ལེགས་ཀྱི་འཇུག་རྒྱུན་མི་ཆད་པའི་གྲུ་ཆར་གྱིས། ཡེ་ཤེས་མཆོག་གི་མྱུ་གུ་ཟད་མི་ཤེས་པའི་ཟོང་དུ་བསྐྲུན་པའི་ཐབས་མཁས་ཀྱི་སྒོ་འཕར་བརྒྱ་ཕྲག་ཕྱེ་བའི་ཀུན་མཁྱེན་ཟས་གཙང་སྲས་པོས་ཆོ་འཕྲུལ་བསྟན་པའི་དུས་ཁྱད་པར་ཅན་ཆུ་ཤེལ་དབང་པོ་རྟ་ཆེན་དགའ་མའི་ཁྱིམ་དུ་རྩེ་དགར་སྤྱོད་པའི་ཟླ་བར། བོད་ཡུལ་ཀྱི་རྡོ་རྗེ་གདན་ལྷ་ལྡན་སྤྲུལ་པའི་གཙུག་ལག་ཁང་དུ་སྨོན་ལམ་གྱི་དུས་སྟོན་ཁྱད་པར་ཅན་འཛུགས་པ་མཛད་པའི་མཐུན་རྐྱེན་ཡང་དག་པར་བསྒྲུབས། རིང་མོ་ཉིད་ནས་བསོད་ནམས་ཀྱི་ཚོགས་རླབས་པོ་ཆེ་བསགས་པའི་རྟེན་འབྲེལ་གྱིས་ཁྲི་ཐོག་ཏུ་ཕབས་པ་ནས་བཟུང་སྟེ། འཇིག་རྟེན་ཀུན་ཏུ་མུ་གེ་ཡམས་ནད་སོགས་མེད་ཅིང་མཁོ་དགུའི་ཡོ་བྱད་ལ་ལོངས་སྤྱོད་པའི་འདོད་རྒུ་རྨུགས་འཛིན་གྱི་བང་མཛོད་ལ་རང་དབང་དུ་སྤྱོད་པ་ལྟ་བུར་གྱུར། དེ་ཡང་འདིའི་ཡབ་ས་སྐྱོང་ཆེན་པོ་ཤཱཀྱ་རིན་ཅེན་ལ་ཐོ་གན་ཐི་མུར་གྱིས་ལུང་གནང་ནས་ཕོ་བྲང་(༨༤ན)

---

^{[མ་དཔེ་གཟིགས་ན་འདིར་གནོན།]}

ཆེན་པོར་ཁྲི་དཔོན་དུ་ཕེབས་ཤིང་། ཐོ་གན་ཐི་མུར་གྱི་དུས་གྲུ་ཐ་ལ་གྲུ་རྒྱ་ནག་གི་ཡུལ་གྲུ་ཆེན་པོ་འགའ་ཞིག་ཏུ་ཁྲལ་ལེན་པར་བཏང་བས། དེ་དང་རྒྱའི་མི་དཔོན་འགའ་ཞིག་གྲོས་མཐུན་ཏེ་ཤིང་རྟ་འཁོར་ལོ་མང་དུ་བྱས་པའི་འོག་ཏུ་དམག་དང་། སྟེང་དུ་རིན་པོ་ཆེ་དང་གོས་དར་གྱི་ཚོགས་བཞག་སྟེ་ཁྲལ་སྐྱེལ་བ་ལྟར་བྱས་ནས་ཕོ་བྲང་གི་ཉེ་ལོགས་སུ་ཡོངས་ཏེ་དམག་གིས་བསྐོར་བས། རྒྱལ་པོ་གསང་སྒོ་ཞིག་ལ་བྲོས། གྲུ་ཐ་ལ་གྲུས་མངའ་འབངས་ཐམས་ཅད་ཆབ་འོག་ཏུ་བཅུག་པའི་སྲས་ཀྱེན་འུན། དེའི་སྲས་ཡུང་ལོ་ཏ་མིང་རྒྱལ་པོའི་དུས་གསེར་གྱི་དམ་ཁ་དང་། སླར་ཡང་ཤེལ་གྱི་དམ་ཁ། དབང་གི་འཇའ་ས་གནང་བས་མཚན་དབང་གྲགས་པ་རྒྱལ་མཚན་ཞེས་སྙན་པའི་རྫ་རྔ་སྐབས་གསུམ་པའི་ལམ་དུ་བརྡུངས་པས་འཇིག་རྟེན་གྱི་མེས་པོ་ཚངས་པས་གནམ་རིམ་པ་བཅུ་གསུམ་གྱི་མཐོང་ནས་རིན་པོ་ཆེའི་བུམ་པ་དྲི་བཟང་གི་ཆུས་གང་བས་སྤྱི་བོ་ནས་དབང་བསྐུར། རྫོང་ཆེན་རྣམས་ཀྱི་རྫོང་སྡོད་སོ་སོ་ལ་མི་བརྒྱུད་དང་བཅས་པར་འཇའ་སའི་ཤེལ་དམ་གནང་། མཆོག་དམན་གྱི་སྐྱེ་རྒུ་མཐའ་དག་གོང་མ་ཆོས་རྒྱལ་ཆེན་པོ་ཞེས་གླེང་ཞིང་། ཉང་སྟོད་ཤར་ཁ་བ་རྒྱལ་རྩེ་རབ་བརྟན་ཀུན་བཟང་འཕགས་པས་གོང་མ་འདི་གཉིས་ཀྱི་གཟིམས་དཔོན་གྱིས་ལས་ཀ་བཟུང་ཞིང་། སྡེ་སྲིད་འདི་ཉིད་ཀྱི་བཀའ་དྲིན་ལས་མངའ་ཐང་ཆེ་བར་ཡོད་ཀྱང་། ཅུང་ཟད་བྱེད་མ་མཁས་པས་གོང་མའི་ཐུགས་ལ་ཕོག་སྟེ། ཉང་སྟོད་དུ་དཔུང་གི་འཇུག་སྒོ་ལན་གཉིས་ཙམ་མཛད་པས། ཡར་ཀླུངས་པ་རྣམས་དགྲ་ཉང་སྟོད་ཤར་ཁ་བ་ཟེར་བའི་སྐབས་བྱུང་ཞིང་། འོན་ཀྱང་དྲན་འཛིན་ཙམ་ལས་རྒྱལ་མཁར་རྩེ་རྩིས་ལེན་པ་སོགས་མ་མཛད། དེ་ཙམ་མ་གཏོགས་དབུས་གཙང་མཐའ་དག་བདེ་འཇགས་ལས། དཔུང་གི་འཇུག་སྒོ་སོགས་སྡིག་པའི་ལས་ཀྱི་སྦྱོར་བ་ལ་མི་རེ་བར་ཆོས་ལྡན་(༨༤བ)

---

^{[མ་དཔེ་གཟིགས་ན་འདིར་གནོན།]}

རྒྱལ་པོའི་ཁྲིམས་ཉིན་བྱེད་དབང་པོ་ཤར་བ་ན། མི་བསྲུན་པའི་སྐྱེ་བོ་ཞེ་སྡང་གི་འདབ་མ་རྣམ་པར་རྒྱས་པའི་ཀུ་མུཏའི་ཚལ་མཐའ་དག་རང་ཤུགས་ཀྱིས་ཟུམ་པར་གྱུར་ཏོ། །གོང་མ་འདིའི་དུས་དཔའ་མཛངས་རྟུལ་ཕོད་པའི་རྒྱལ་པོའི་བྱ་བ་ལ་མཁས་པའི་བློན་པོ་རིན་སྤུངས་ནམ་མཁའ་རྒྱལ་མཚན་རིན་སྤུངས་ཀྱི་རྫོང་དཔོན་དང་། ས་སྐྱའི་ལྷ་ཁང་ཆེན་མོའི་དཔོན་ཆེན་གྱི་ཁྲིར་བསྐོས། འཕྱོང་རྒྱས་པ་ཧོར་དཔལ་འབྱོར་བཟང་པོར་བསམ་འགྲུབ་རྩེའི་རྫོང་དཔོན་དང་དམག་དཔོན་གྱི་ལས་ཀ་གནང་། གཞན་ཡང་སྣེའུ་པ་ནམ་མཁའ་བཟང་པོ། བྲག་དཀར་པ་རིན་ཅེན་དཔལ་རྣམས་གྲགས་ཆེ། རིགས་རུས་ཡོན་ཏན་མངའ་ཐང་སོགས་ལུགས་གཉིས་ཀྱི་གོ་རིམ་དང་མཐུན་པའི་དྲུང་འཁོར་ཤིན་ཏུ་མང་ཞིང་། དེ་དག་ཀྱང་ཆེན་པོའི་ལས་ཚན་གྱི་སྒོ་དང་བསྟུན་པའི་རྒྱན་གོས་ཀྱི་རིམ་པ་དང་། ཁྱད་པར་གནམ་ལོ་གསར་དུ་ཚེས་པའི་དགའ་སྟོན་དུས་རིན་ཅེན་རྒྱན་ཆར་གྲགས་པའི་བཀོད་པས་ཁྱད་པར་དུ་འཕགས་པའི་རྒྱན་སྤྲོད་དང་། རྒྱུན་མར་ཡང་རིན་པོ་ཆེའི་ཕྲ་ཚོམས་ཀྱིས་རྣམ་པར་མཛེས་པའི་ཀྵརྞི་ཀ་རྣ་བའི་རྒྱན་དུ་སྤུད་པ་སོགས་མཛད་ལ། མདོར་ན་ལུགས་གཉིས་ཀྱི་མཛད་པ་བཟང་པོ་གཞན་དག་ལྟ་ཅི་སྨོས། གནས་སྐབས་ཀྱི་སྤྱོད་ལམ་ཡང་ཡ་རབས་བཟང་པོ་ཆེ་བཙུན་གྱི་ངང་ཚུལ་ལས། ལུང་མ་བསྟན་གྱི་ཞྭ་གོས་གྱོན་པ། སྒྲིགས་ཀུན་སྤྱོད་ཀྱི་སྲང་ལ་བཅུར་བ་མེད་པའི་ཡིད་ལ་ཤར་ཚད་ལག་ཏུ་མི་ལེན་པའི་མིག་ལྟོས་མཆོག་ཏུ་བཟང་། ཆོས་རྗེ་བསོད་གྲགས་པས། ཆོས་རྒྱལ་ཆེན་པོ་འདི་ཉིད་ཀྱི་བློན་པོའི་ཁྲོད་དུ་བྲག་དཀར་པ་ཤེས་རབ་བཀྲ་ཤིས་འདྲེན་པ་ནི། ཤེར་བཀྲས་པས་གོང་མ་ཏའི་སི་ཏུའི་སྐབས་ཧོར་རྒྱལ་པོའི་དྲུང་དུ་འཇའ་ས་ཞུ་བར་བྱོན་པའི་དུས་དགུང་ལོ་བཞི་བཅུ་རྩ་བདུན་གྱི་ཁར་སླེབ་ཅིང་། སི་ཏུ་རིན་པོ་ཆེ་ནས་གོང་མ་འདིའི་རིང་ལ་གདན་རབས་ཀྱང་འགའ་ཞིག་སོང་བས། རླུང་ཆེན་(༨༥ན)

---

^{[མ་དཔེ་གཟིགས་ན་འདིར་གནོན།]}

ཤེར་བཀྲས་པ་འོང་བའི་དོན་མེད་ཅིང་། རིན་སྤུངས་ནམ་མཁའ་རྒྱལ་པོ་ནམ་མཁའ་རྒྱལ་མཚན་གྱི་སྲས་ཡིན་ཀྱང་། ནམ་མཁའ་རྒྱལ་མཚན་གྱི་སྔོན་ལ་འདྲེན་པ་སོགས་དམུས་ལོང་གཅིག་པུར་རྒྱུ་བ་ལྟ་བུར་ཀུན་དང་མི་མཐུན་པའི་གཏམ་མང་ངོ་། །སྨྲས་པ། ཕུལ་བྱུང་བསོད་ནམས་ཤིང་རྟས་ལེགས་དྲངས་པས། །དབང་ཕྱུག་བརྒྱད་ཀྱི་ཡོན་ཏན་འབར་བའི་གཟིས། །སྡེ་གསུམ་ཅིག་ཅར་གསལ་བའི་གྲགས་པའི་གཟུགས། །རླུང་གི་རྒྱལ་མཚན་ལྟ་བུར་ཚར་དུ་དངར། །ཐ་གུའི་ལྟོ་ཅན་འཇུག་པ་བཅུ་པའི་སྒྱུས། །ཀུན་ལས་རྣམ་པར་རྒྱལ་ལ་མཚར་དུ་ཅི། །གཡོ་མེད་དྲང་པོའི་ཚུལ་གྱིས་ལྷར་བཅས་འགྲོའི། །གཙུག་ན་ཞབས་སེན་ཨུ་དུམ་ཝཱ་ར་འཛུམ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཅུང་སངས་རྒྱས་རྒྱལ་མཚན་གྱིས་རིན་སྤུངས་ནས་བདག་མོ་ཞིག་ཁབ་ཏུ་བཞེས་པར་གྲགས་པ་འབྱུང་གནས་དང་། ཀུན་དགའ་ལེགས་གཉིས་འཁྲུངས། གྲགས་པ་འབྱུང་གནས་སྐུ་ན་ཕྲ་མོ་ནས་ཐུན་མོང་དང་ཐུན་མོང་མ་ཡིན་པའི་རིག་པའི་གནས་ལ་མཁས་པར་སྦྱངས། ཁྱད་པར་རྡོ་རྗེ་ཐེག་པ་ལ་ཐུགས་རབ་ཀྱི་རྩལ་ཤིན་ཏུ་ཆེ་བས། མཁས་པའི་དབང་པོ་འགོས་ལོ་ཡེ་བཟང་རྩེ་པའི་ཞལ་ནས། དེ་རྗེས་མིའི་དབང་པོ་གྲགས་པ་འབྱུང་གནས་པ་ཐུགས་རབ་ཤིན་ཏུ་ཆེ་ཞིང་གསང་སྔགས་ཀྱི་མཁྱེན་པ་ཤིན་ཏུ་རྒྱས་པར་གྱུར་ཀྱང་། གདན་སའི་བཞུགས་ཁྲི་རིན་པོ་ཆེ་ཤིན་ཏུ་གཉན་པར་དགོངས་ནས་གདན་སར་མ་བཞུགས་ཀྱང་། གནས་ཆེན་དུ་འགྲོ་བའི་རི་པ་རྣམས་ལ་མགྱོགས་ཁྲིད་གསུངས་ཞེས་དེབ་སྔོན་དུ་གསུངས་པ་ལྟར་ཡིན་ལ། དེ་ཡང་ཆོས་རྒྱལ་ཆེན་པོ་གཤེགས་རྗེས། འདི་ཉིད་སྐུ་ན་ཕྲ་བས་ཕོ་བྲང་ཆེན་པོའི་ཁྲིར་ཡབ་སྲས་གཉིས་སུ་བསྐོ་ལ་བཀའ་བློན་རྣམས་གྲོས་མ་མཐུན་པར་སྤྱན་སྔ་རིན་པོ་ཆེ་བསོད་ནམས་རྒྱལ་མཚན་(༨༥བ)

---

^{[མ་དཔེ་གཟིགས་ན་འདིར་གནོན།]}

ལ་ཞུས་པས། སྲས་བསྐོ་བར་བཀའ་གནང་བ་བཞིན་མཛད་ཀྱང་སྤྱན་སྔ་གཤེགས་རྗེས། ཡབ་ཀྱིས་ཁྲི་ཐོག་ཡོང་བའི་ཆེད་དུ་གནང་སྒོ་མ་ལེགས་པར་བརྟེན། ཡར་ཀླུངས་སུ་སྡེ་གཟར་ལངས་ཏེ་ཡབ་ཆེ་ས་དཔོན་བློན་ཡར་རྒྱབ་ཏུ་འབྱོན་དགོས་བྱུང་། དེ་ནས་གོང་མ་དབུས་ཀྱི་གཞིས་བསྐོར་ལ་ཕེབས་སྐབས་སྣེའུ་རྫོང་དུ་མཁས་གྲུབ་ཆོས་རྗེ་དགེ་ལེགས་དཔལ་བཟང་དང་གསང་ནེའུ་ཐོག་གི་ཆོས་རྗེ་རྣམ་གཉིས། དྲུང་ཆེན་སློབ་དཔོན་སོགས་མཇལ་བར་ཕེབས། གོང་མའི་སྐུ་གཞོགས་སུ་བཞུགས་གྲལ་གྱི་ཐོག །གསུང་རབ་ཀྱི་འབྲེལ་གཏམ་མཛད་ཁར་མཁས་གྲུབ་ཆོས་རྗེ་དང་གསང་ཕུའི་ཆེན་པོ་རྣམས་སོ་སོ་ནས་བཤད་པ་མཛད་རྒྱུ་འོང་དུ་རེ་ཡང་། གོང་མའི་ཞབས་ཕྱིར་འགོས་ལོ་ཙཱ་བ་གཞོན་ནུ་དཔལ་བ་ཡོང་བས་ཁོང་གི་རྩེས་ཐང་པའི་བརྟུལ་ཞུགས་ཀྱི་ཐོག་མར་གཞུང་ལེན་པ་མཛད་སྐད། དེ་ནས་འཇམ་དབྱངས་གོང་མ་རྒྱལ་པོ་ཀྱེན་ཐའི་ཡིས་དབང་གི་འཇའ་ས་གནང་བ་ནས་བཟུང་། དབང་གྲགས་པ་འབྱུང་གནས་སུ་གྲགས། ཐེལ་དང་རྩེས་ཐང་གཉིས་སུ་གདན་ས་ཟུར་དུ་མེད་ནའང་། གསུང་ཆོས་འགངས་ཆེ་བ་རྣམས་རྩེ་ནས་གནང་ཞིང་། ཟུར་འཆད་སློབ་དཔོན་རྣམས་ལ་བཀའི་འཁོར་ལོས་ཁྱབ་པ་དང་། གསེར་གྱི་བཀའ་འགྱུར་བཞེང་བ་སོགས་ལུགས་ཟུང་གི་མཛད་པ་མཐའ་དག་གོང་མན་རིམ་གྱི་སྲོལ་བཟང་པོ་མ་ཉམས་པར་བཟུང་། ཡར་རྒྱབ་ནས་ཆེ་ས་རྩེས་ཐང་དུ་གདན་དྲངས། ཞལ་ངོ་ནང་མཚམས་ཀྱི་འཁོན་ཞི་ནས་ཐུགས་ཡིད་གཅིག་ཏུ་འདྲེས། བྱང་ཕྱོགས་ཀྱི་བསོ་ཁ་བསྲུང་བར་འུ་ཡུག་གླིང་དཀར་གྱི་རྫོང་བརྩིགས། རིན་སྤུངས་ནོར་བུ་བཟང་པོ། འཕྱོང་རྒྱས་པ་ཧོར་དཀོན་ཅོག་རིན་ཅེན་ནི་ཆོས་རྒྱལ་ཆེན་པོའི་ཞབས་ལ་གཏུགས་ཀྱང་གོང་མ་འདིའི་དུས་སུ་ཁྲིམས་ཀྱི་ཁ་ལོ་སྒྱུར་བའི་བློན་པོ་མཛད། གཅུང་ཀུན་དགའ་ལེགས་པས་གསུང་རབ་ལ་སྦྱངས་པ་མ་སྨད་པ་མཛད་དེ། (༨༦ན)

---

^{[མ་དཔེ་གཟིགས་ན་འདིར་གནོན།]}

རྩེས་ཐང་གི་གདན་སར་ཕེབས། རིན་སྤུངས་ནས་བདག་མོ་ཁབ་ཏུ་བཞེས་པར་སྲས་རིན་ཅེན་རྡོ་རྗེ་དབང་གི་རྒྱལ་པོ་འཁྲུངས། འཇམ་དབྱངས་གོང་མ་ཆེན་ཧང་རྒྱལ་པོས་དབང་གི་འཇའ་ས་གནང་། འདི་ཉིད་རྟོགས་པའི་ཡོན་ཏན་ཕུལ་དུ་བྱུང་བའི་གྲུབ་པའི་དབང་ཕྱུག་ཆེན་པོ་ཞིག་ཡིན་པར་འདུག་ནའང་གནས་སྐབས་སུ་སྐྱེ་བོ་རྣམས་ཀྱི་སྣང་ངོར་མཛད་སྒོ་ལེགས་རྒྱུ་མེད་ཙམ་ཡང་འདུག་པར་དཔགས། གཙང་གི་གཞིས་བསྐོར་ལ་ཕེབས་དུས་རིན་སྤུངས་ནོར་བཟང་པས་གུས་འདུད་བླ་ན་མེད་པ་མཛད་ཀྱང་གནང་སྒོའི་ཁོག་ལ་མ་མགུ་སྐད། དེ་ནས་གོང་མ་ཀ་བཞི་བ་སྐུ་མཆེད་ཀྱིས་གང་ཞུས་ལ་གསན་པས། ཡབ་ཡུམ་ནང་མཚམས་སུ་སེལ་ཆེན་པོ་ཞུགས་ཏེ། ཡར་གོང་བྱ་བསམ་སྡེ་པ་སོགས་བདག་མོ་ཕྱོགས་དང་། སྣེའུ་འོལ་དགའ་རྣམས་གོང་མའི་ཕྱོགས་སུ་ཆད་ནས་དུས་མི་བདེ་བ་མང་དུ་བྱུང་། འོན་ཀྱང་འཕྱོང་རྒྱས་པ་རྡོ་རྗེ་ཚེ་བརྟན་ཕན་ཚུན་གཉིས་ཀའི་ཕྱོགས་སུ་མ་ལྷུངས་པས་སྡེ་གཟར་བཟླུམས་ཤིང་། ཞལ་ངོ་ནང་མཚམས་ཀྱི་ལེགས་སྤེལ་མཛད་པས་སྡེ་སྲིད་ཀྱི་ཞབས་ཏོག་ཏུ་འགྱུར་བ་བྱུང་། དེ་ནས་ཡུམ་གཤེགས་རྗེས་རིན་སྤུངས་པ་མཚོ་སྐྱེས་རྡོ་རྗེས་མཁར་ཐོག་བཟུང་། དེ་ཡང་དེབ་ཐེར་སྔོན་པོ་ལས། དེ་རྗེས་བདག་པོ་ཀུན་དགའ་ལེགས་པ་དང་། ཆེ་ས་སངས་རྒྱས་རྒྱལ་མཚན་བཀའ་བགྲོས་མཛད་དེ། ཤིང་ཕོ་ཁྱིའི་ལོ་ཟླ་བ་བཅུ་གཅིག་པའི་ཚེས་བཅུ་ལ་ཆོས་ཀྱི་རྗེ་རིན་པོ་ཆེ་དཔལ་ངག་གི་དབང་པོ་དགུང་ལོ་བཅུ་དྲུག་བཞེས་པ་ཞིག་རིན་པོ་ཆེའི་གདན་སེང་གེའི་ཁྲི་ལ་བཞུགས་སུ་གསོལ་ཞེས་གསུངས་པ་ལྟར། བར་སྐབས་སུ་ཐེལ་གྱི་གདན་ས་སྟོངས་ནའང་། སླར་སྤྱན་སྔ་ངག་གི་དབང་པོ་འདི་ཉིད་བཞུགས་པ་ཡིན་ལ། འདིའི་ཡབ། ལ་ལ་དག་ཚེས་ལྔ་རིན་པོ་ཆེ་གྲགས་པ་འབྱུང་གནས་ཡིན་པར་འཆད། འགའ་ཞིག་ཚེས་ལྔ་རིན་པོ་ཆེ་སྐུ་(༨༦བ)

---

^{[མ་དཔེ་གཟིགས་ན་འདིར་གནོན།]}

ཚེའི་སྟོད་སྨད་མཐའ་དག་ཏུ་རབ་ཏུ་བྱུང་བ་ཡིན་པས། མ་ཡིན་པར་སྨྲ་བ་ཡང་ཡོད་ལ། འདི་ཉིད་ཀྱིས་མཛད་པའི་ཕུར་པའི་འཕྲིན་ལས་རྒྱ་མཚོའི་མཛད་བྱང་དུ། ཇོ་སྲས་ཀུན་བཟང་རོལ་པའི་རྡོ་རྗེ་ཞེས་གསུང་བ་ལ་དཔགས་ན་ཡབ་ཡིན་ནམ་སྙམ། གང་ལྟར་ཤེས་ལྡན་རྣམས་ཀྱིས་དཔྱད་པར་བྱའོ། །དེ་ཡང་སྤྱན་སྔ་ངག་གི་དབང་པོ་གཞོན་ནུ་ནས་དཔལ་ཡེ་བཟང་རྩེ་པ་སོགས་ཡོངས་འཛིན་དུ་མ་བསྟེན་ནས་གསུང་རབ་ལ་ཐོས་བསམ་བསྒོམ་པ་མང་དུ་མཛད། བསྟན་པ་ལ་ཞུགས་ཏེ་ཡོངས་སུ་རྫོགས་པའི་དགེ་སློང་གི་སྡོམ་པ་མནོས་ཏེ་གདན་ས་ཆེན་པོའི་སྤྱན་སྔར་ཕེབས། བར་སྐབས་སུ་གོང་མའི་གནང་བཀོད་ལ་བརྟེན་ནང་མཚམས་སུ་མི་མཐུན་པ་བྱུང་ཡང་། སླར་རིམ་པས་འཇགས་སྐབས། རིན་སྤུངས་དོན་ཡོད་རྡོ་རྗེས་གཙང་དཔུང་རྣམས་དབུས་སུ་བཅུག་སྟེ་གཞིས་ཀ་སྣེའུ་བའི་ལག་ནས་རྫོང་གཞིས་འགའ་ཞིག་བླངས། དེ་ནས་སྤྱན་སྔ་རིན་པོ་ཆེ། རིན་སྤུངས་མཚོ་སྐྱེས་པ་དང་དོན་ཡོད་རྡོ་རྗེ་གཉིས། འཕྱོང་རྒྱས་པ་ཧོར་ཚེ་དབང་རྣམ་རྒྱལ་དང་། ཧོར་རིན་ཅེན་རྒྱལ་མཆོག་སྐུ་མཆེད་ཀྱིས་གཙོས་པའི་སྣེའུ་བ་དཔལ་འབྱོར་རྒྱལ་པོ། ལར་རྒྱབ་པ་རིན་ཅེན་རྒྱལ་པོ། བྱང་པ་བཀྲ་ཤིས་དར་རྒྱས་སོགས་བློན་པོ་རྣམས་ཀྱིས་གྲོས་ཐོག་ནས་ཕོ་བྲང་ཆེན་པོར་སྤྱིར་སྤྱན་དྲངས། མི་རིང་བར་ཞལ་ངོ་གོང་མ་རྣམས་གཤེགས་པས་ལྷ་རིགས་རླངས་ཀྱི་གདུང་འཛིན་པ་སྤྱན་སྔ་ཉིད་མ་གཏོགས་མེད་པར་བརྟེན། ཇི་ལྟར་གྲོང་ཁྱེར་སེར་སྐྱའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་སངས་རྒྱས་ཆོས་རྣམས་བསྐྱེད་ལ་ཕན། །ཞེས་པའི་དོན་ལྟར། བོད་ཁ་བ་ཅན་འདིར་ཀུན་མཁྱེན་བུ་རམ་ཤིང་པའི་བསྟན་པ་རིན་པོ་ཆེ་དང་། སྐྱེ་རྒུ་རྣམས་ཀྱི་ཕན་བདེ་ནི་གནམ་བསྐོས་ཀྱི་རྒྱལ་པོ་ཕག་མོ་གྲུ་པའི་སྡེ་སྲིད་ལ་རག་ལུས་པས། གོང་དུ་སྨོས་པའི་བློན་པོ་(༨༧ན)

---

^{[མ་དཔེ་གཟིགས་ན་འདིར་གནོན།]}

རྣམས་ཀྱིས་གོང་མ་སྤྱན་སྔ་རིན་པོ་ཆེར་ནན་གྱིས་ཞུས་ཏེ། རྫོང་ཁ་པའི་སྲས་མོ་ཞིག་བདག་མོར་ཕུལ། ཡབ་མེས་ཀྱི་ལུགས་སྲོལ་བཟང་པོ་རྣམས་དཀར་ཕྱོགས་ཀྱི་ཟླ་ཚེས་ལྟ་བུར་ཆེས་ཆེར་གསལ་བར་མཛད། སྲས་ངག་དབང་བཀྲ་ཤིས་གྲགས་པ་སྐུ་བལྟམས་ནས་རིང་པོར་མ་ལོན་པར་སྤྱན་སྔ་ཞི་བར་གཤེགས་ཁར་སྲས་སྐུ་ན་ཧ་ཅང་ཕྲ་བས་དེ་ལ་ཐུགས་ཆགས་པའི་ཚུལ་གྱིས་སྐུ་ངལ་བ་ཆེན་པོར་གྱུར་སྐབས། སྤྱན་སྔ་ཆོས་ཀྱི་གྲགས་པས་གདུང་བརྒྱུད་རིན་པོ་ཆེ་ནར་མ་སོན་པའི་རིང་ཁོང་རང་གིས་ཐེལ་གྱི་སྤྱན་སྔའི་ཁུར་བཞེས་དང་། ཐེལ་རྩེས་ཐང་གི་ཆེན་པོ་གྲོས་དབང་པོ་བློན་པོ་རྣམས་དང་བཅས་པར་གནང་བཀོད་བཀའ་ནན་སོགས་ཀྱིས་ཁྱབ་པའི་སྡེ་སྲིད་ཀྱི་ལར་རྒྱ་མི་འཕྱུག་པའི་ཞལ་ལེན་མཛད། དེ་ཡང་དཔོན་ཚབ་ཐེལ་གཏོང་བྱེད་པར་རིན་སྤུངས་མཚོ་སྐྱེས་རྡོ་རྗེས། བློན་པོ་གཞན་རྣམས་ལ་གྲོས་མེད་པར་འགའ་ཞིག་འདོད་པ་ལྟར་མཛད་པས། སྡེ་དཔོན་གཞན་རྣམས་མ་འདོད་པའི་དབང་གིས་སྡེ་གཟར་ལངས། འོན་ཀྱང་འཕྱོང་རྒྱས་ནས་སྡེ་སྲིད་ཀྱི་ལར་རྒྱ་ལ་དགོངས་ཏེ་ཐུགས་ཁོག་ཆེ་བར་མཛད་པས་ཡོ་འཁྱོམས་ཆེར་མ་བྱུང་། དེ་ནས་འཇམ་དབྱངས་གོང་མས་སྤྱན་སྔ་རིན་པོ་ཆེར་དབང་གི་འཇའ་ས་གནང་ཡང་སྤྱན་སྔ་ཞིང་བརྗེས་པས་གནང་སྦྱིན་རྣམས་ཕྱག་མཛོད་དུ་བཞག་ནས་གསེར་ཡིག་པ་ཕྱིར་ལོག །དེ་རྗེས་རིན་སྤུངས་པ་དང་འཕྱོང་རྒྱས་པ་གཉིས་ཀྱིས་གཙོས་པའི་བློན་པོ་རྣམས་བཀའ་བགྲོས་ཐོག་ནས་གདུང་བརྒྱུད་རིན་པོ་ཆེ་ངག་དབང་བཀྲ་ཤིས་གྲགས་པ་ཕོ་བྲང་ཆེན་པོའི་ཁྲི་ཐོག་ཏུ་སྤྱན་དྲངས། གཞོན་ནུའི་དུས་ཉིད་ནས་རོལ་རྩེད་སོགས་སྐྱེ་བོ་ཕལ་པ་དག་གི་སྤྱོད་ཡུལ་ལས་རྣམ་པར་འདས་པས་འཇིག་རྟེན་མེས་པོ་རྣམས་ཀྱིས་ཀྱང་བློས་འཁྱུད་པར་དགའ་ཞིང་། ཆོས་དང་སྲིད་ཀྱི་ཡོན་ཏན་མ་ལུས་ཅིག་ཅར་དུ་ཤོང་(༨༧བ)

---

^{[མ་དཔེ་གཟིགས་ན་འདིར་གནོན།]}

པའི་ཟ་མ་ཏོག་ལྟོ་བ་རབ་ཏུ་ཡངས་པ། ཆེན་པོའི་རྣམ་པར་ཐར་པའི་ཁ་རྒྱན་གྱིས་མཛེས་པའི་གཟི་བརྗིད་ཀྱི་རྒྱལ་པོ་ཉིན་མོར་བྱེད་པ་ལ་སྐྱེངས་པ་སྟེར་བས་རིགས་སྟོབས་སུ་མ་ཟད། བློ་སྟོབས་ཀྱིས་ཀྱང་བོད་ཆེན་པོའི་རྒྱལ་ཁམས་སུ་འཁོད་པའི་གོང་མའི་མདུན་ན་འདོན་བློ་ཅན་ཤེལ་གྱི་མེ་ལོང་ལྟ་བུ་རྣམས་ཀྱང་ཟིལ་གྱིས་གནོན་པའི་བཀའ་ཁྲིམས་བཟང་པོས་བོད་འབངས་ཐམས་ཅད་བདེ་བ་ནས་བདེ་བར་སྤྱོད་པའི་བདེ་སྐྱིད་ཀྱི་གླུ་དབྱངས་སྙན་པོས་དྲི་ཟའི་རྒྱལ་པོ་གན་དྷརྦྷ་ཁ་བ་རིར་གནས་སམ་སྙམ་དུ་སྐབས་གསུམ་པ་རྣམས་ལ་འཕྱང་མོ་སྟེར་བར་བྱེད་དོ། །འོན་ཀྱང་འདི་ཉིད་ཀྱི་དུས། གྲགས་འབྱུང་མིང་ཅན་སྣེ་ཡི་གདོང་པོ་འཛིན། །བདུད་སྤྲུལ་མི་དགུས་ཕག་ཚང་ཡོས་ལྟར་རྔོད། །ཅེས་པའི་ལུང་བསྟན་ལྟར། རིན་སྤུངས་ངག་དབང་རྣམ་རྒྱལ་གྱིས་ཨེ་གཉལ་གྱི་ཕྱོགས་སུ་དམག་གི་དཔུང་ཁྱེར་བྱེད་པ་སོགས་གོང་མའི་དགོངས་པར་ཕོག་པ་མཛད་པར་བརྟེན། ཞྭ་དམར་བ་བཞི་པས། ཕག་མོ་གྲུ་པའི་སྡེ་སྲིད་འདི། སྤྱིར་རྒྱལ་ཁམས་ཡོངས། སྒོས་སྡེ་དཔོན་རྣམས། ཡང་སྒོས་ཁྱེད་ནི་རིན་སྤུངས་པ་ལ་གཅེས་པས་དགོངས་བསམས་མཛད་དགོས་ཚུལ་གསུངས་ཀྱང་བཞེད་པ་ཞིག་མ་བྱུང་། དེ་ཡང་ལུང་བསྟན་དུ་གྲགས་འབྱུང་ཞེས་པ་ནི་གོང་མ་གྲགས་འབྱུང་བའི་སྐབས་དུས་མི་བདེ་བ་འགའ་ཞིག་བྱུང་བས་འགོ་ཟིན་པ་ལ་དགོངས་ཀྱི། དངོས་གཞི་གོང་མ་འདིའི་དུས་སོ། །དེ་སྐབས་འཇམ་དབྱངས་གོང་མས་དབང་གི་མཚན་དང་འཇའ་ས་གནང་། ཞབས་དྲུང་གོང་མ་ཆེན་པོ་དཔལ་ངག་གི་དབང་ཕྱུག་བཀྲ་ཤིས་གྲགས་པ་མཚན་ཕྱོགས་ཐམས་ཅད་ལས་རྣམ་པར་རྒྱལ་བ་ཀྭ་དིན་གུ་ཤྲི་ཧོ་ཝང་གི་མཚན་གྱི་ཟློས་གར་སྲིད་པ་གསུམ་གྱི་མེ་ལོང་གི་ངོས་སུ་གསལ་བར་ཤར་རོ། །མི་རིང་བར་རིན་སྤུངས་པས་མེ་ཏོག་མདའ་ཅན་གྱི་ལས་དང་ཚངས་པ་མཚུངས་པར་སྤྱོད་པའི་སྡིག་སེམས་ཀྱིས་(༨༨ན)

---

^{[མ་དཔེ་གཟིགས་ན་འདིར་གནོན།]}

སྡེ་གཟར་བསླངས་པས། ལྷ་མ་ཡིན་ལྷའི་མངའ་ཐང་ལ་ཕྲག་དོག་གི་བསམ་པས་གཡུལ་བཀྱེ་བ་ན་ལེགས་བྲིས་པ་རྣམས་ཀྱི་བསོད་ནམས་ཀྱི་མཐུས་ལྷ་མིན་མཐའ་དག་མིང་གི་ལྷག་མར་འགྱུར་བ་དེ་བཞིན་དུ་སྡེ་སྲིད་མཚན་ཇུས་རྒྱལ། འོན་ཀྱང་ཞྭ་དམར་ཆོས་གྲགས་པས་བར་མཛད་ནས་ལོ་གསུམ་གྱི་ཆིངས་བསྡམས་ནའང་། རིན་སྤུངས་པས་སླར་སྡེ་གཟར་བསླངས་ཏེ་རྒྱལ་མཁར་རྩེར་བཏེག་སྐབས། འཕྱོང་རྒྱས་པ་རིན་ཅེན་རྒྱལ་མཆོག་གིས་གཙོས་གོང་མའི་དཔུང་ཆེན་རྣམས་ཉང་སྟོད་བར་དུ་བྱོན། དགའ་ལྡན་པ་དམག་དཔོན་བསོད་ནམས་རྒྱལ་པོས་སྐྱིད་འཕན་གྱི་དཔུང་རྣམས་ཁྲིད་དེ་ཤངས་ཀྱི་བར་དུ་བཏེག་པས་རི་ལ་སྤྱི་བོས་བརྡུང་བའི་རྣམ་ཐར་འཛིན་པ་ཆེར་རློམ་གྱི་དྲེགས་ལྡན་གཞིས་ཀ་རིན་སྤུངས་པ་འབངས་གྱེན་ལོག་གི་རྒྱུ་མི་ཟད་པ་བསགས་པའི་འབྲས་བུ་དུས་གཅིག་ཏུ་སྨིན་པས་ཅི་བྱ་གཏོལ་མེད་དུ་གྱུར་ནའང་། རྒྱལ་རྩེ་དང་པ་སྣམ་པའི་ས་ཆ་བཤོར་བ་རྣམས་ཕྱིར་སྤྲོད་པ་དང་། གོང་སར་དགོངས་བསངས། རྫོང་དཔོན་གྱི་ལས་ཀ་ཞུ་བ། ཕྱིན་ཆད་མ་རུངས་པའི་སེམས་འདོར་བ་སོགས་ཀྱི་དན་ཁ་ལས་མཐའ་མེད་དུ་གཏོང་བ་མ་མཛད། དེ་ལྟ་ནའང་དུས་ཀྱི་བསྐལ་པས་འགྲོ་བའི་བསོད་ནམས་མཐུ་དམན་ཞིང་། ནག་པོའི་ཕྱོགས་ཀྱིས་ཡིད་བསྒྱུར་བ་བདུད་ཀྱི་ལས་འགྲུབ་པའི་འབྲས་བུའི་ཤུགས་གང་གིས་ཀྱང་དགག་དཀའ་བར་བརྟེན། རིན་སྤུངས་པ་དཔོན་བློན་གྱིས་སྡེ་གཟར་ཚན་ཆེ་བར་བསླངས་ཀྱང་། སྡེ་སྲིད་ཀྱི་མཚན་ཇུས་ལ་སྐྱོན་མ་བྱུང་། གོང་མ་འདི་ཉིད་ཀྱིས་བདེ་བར་གཤེགས་པའི་གསུང་གི་སྙིང་པོ་གསེར་ཞུན་མའི་ཁུ་བས་བྲིས་པའི་བཀའ་འགྱུར་དང་། སྟོང་འཁུན་མཛངས་མའི་སོར་མོའི་འདུ་བྱེད་ལས་བསྐྲུན་པའི་གན་གོས་ཁ་དོག་སྣ་ཚོགས་ལས་གྲུབ་པའི་སྐུ་བརྙན་བཞེང་བ་ཕྱོགས་ལྷུང་གི་བསམ་པས་རིས་སུ་མི་གཅོད་པར། (༨༨བ)

---

^{[མ་དཔེ་གཟིགས་ན་འདིར་གནོན།]}

སྟོན་པ་བུ་རམ་ཤིང་པའི་རྗེས་སུ་ཞུགས་པའི་གྲུབ་པའི་མཐའ་ཐམས་ཅད་ལ་བསྙེན་བཀུར་དང་མགོ་འདྲེན། ཇོ་ཤཱཀྱ་རྣམ་གཉིས་དང་བྱང་ཆུབ་ཆེན་པོས་ཐོག་དྲངས་པའི་གངས་ཁྲོད་ཀྱི་སྐུ་གསུང་ཐུགས་རྟེན་ཁྱད་འཕགས་རྣམས་ཀུན་ཏུ་བཟང་པོའི་མཆོད་པའི་སྤྲིན་མངོན་པར་སྤྲོ་བ་དང་། རྗེ་བཙུན་ཕྱག་ན་པདྨ་བསོད་ནམས་རྒྱ་མཚོ་དང་། དཔལ་འབྲུག་པའི་རིང་ལུགས་པདྨ་དཀར་པོ་རྣམས་ཏི་ཤྲིར་བསྟེན། མདོར་ན་འཇིག་རྟེན་དང་འཇིག་རྟེན་ལས་འདས་པའི་དབང་ཕྱུག་མཐའ་དག་འབད་མེད་དུ་འགྲུབ་པའི་རྒྱུ་དགེ་བ་བཅུ་ལ་རྫོགས་པར་ལོངས་སྤྱོད་པ་དང་ལྡན་པའི་མེ་ཏོག་གཞོན་ནུ་གསར་དུ་དགོད་པའི་འཁྲི་ཤིང་ནམ་མཁའི་མཐའ་ཀླས་པར་འཁྱུད་པའི་ཁོར་ཡུག་དང་པོ་བདེ་བར་གཤེགས་པའི་སྙིང་པོ་མཆོག་གི་གོ་འཕང་སྲིད་པའི་རྩེ་མོར་བསྙེག་པའི་ཐེམ་སྐས་སུ་འཛུགས་པར་མཛད། འདི་ཉིད་ཀྱི་དུས་རིན་སྤུངས་པ་དང་དཔོན་བློན་ནང་མཚམས་སུ་སེལ་ཆེ་བར་བྱུང་ཡང་། ཕྱི་རྒྱའི་བློན་ཆེན་གྱི་གྲལ་དུ་རིན་སྤུངས་ངག་དབང་རྣམ་རྒྱལ། སྲས་དོན་གྲུབ་ཚེ་བརྟན་རྡོ་རྗེ་རྣམ་གཉིས། འཕྱོང་རྒྱས་པ་ཧོར་རིན་ཅེན་རྒྱལ་མཆོག་སྐུ་མཆེད། སྲས་ཧོར་བསོད་ནམས་མགོན་པོ་མཆེད་གསུམ། དེའི་སྲས་ཧོར་བསོད་ནམས་དར་རྒྱས་རྣམས་རིམ་པ་བཞིན་དང་། བྲག་དཀར་འཇམ་དཔལ་ཚེ་རིང་རྒྱལ་པོ། ཡར་རྒྱབ་རིན་ཅེན་བཀྲ་ཤིས། དགའ་ལྡན་པ་བསོད་ནམས་རྒྱལ་པོ། བྱ་ནོར་བུ་བཀྲ་ཤིས་སོགས་བློན་པོ་དང་། དྲུང་འཁོར་འགངས་ཆེ་བ་ཤིན་ཏུ་མང་། གོང་མ་འདི་ཉིད་ལ་རིན་སྤུངས་ཀྱི་སྲས་མོ་ཞིག་ཁབ་ཏུ་བཞེས་པར་སྲས་གོང་མ་འགྲོ་བའི་མགོན་པོ་དང་། སྤྱན་སྔ་གྲགས་འབྱུང་བ་གཉིས་ལས། གོང་མ་འགྲོ་བའི་མགོན་པོ་གོང་དཀར་དུ་ཕེབས། དཔོན་ས་འཕྱོང་རྩེའི་དྲུང་ཁབ་(༨༩ན)

---

^{[མ་དཔེ་གཟིགས་ན་འདིར་གནོན།]}

ཏུ་བཞེས་པའི་སྲས་ཞབས་དྲུང་ངག་དབང་གྲགས་པ་སྐུ་བལྟམས། འགྲོ་བའི་མགོན་པོ་གཤེགས་པའི་གདུང་རྟེན་རིན་པོ་ཆེའི་ཕྲ་ཚོམས་ཀྱིས་སྤྲས་པ་ཕོ་བྲང་གོང་རི་དཀར་པོར་བཞེངས། སྤྱན་སྔ་གྲགས་འབྱུང་བ་ཐེལ་གྱི་གདན་སར་ཕེབས། ཞབས་མི་བདེ་བའི་དབང་གིས་ཟབ་བཞེས་ཐུགས་དམ་གྱི་རིམ་པ་གཙོ་བོར་མཛད། ཁྱད་པར་གཤེད་སྐོར་དང་མ་མགོན་བྱ་རོག་གདོང་ཅན་ལ་རྩལ་དུ་ཐོན་པས་སྡེ་པ་འོས་ཁ་བ་ཕུན་ཚོགས་རབ་བརྟན་པས་ཐེལ་གྱི་མཆོད་གཞིས་སོགས་ལ་ལོག་བསྒྲུབ་མང་དུ་མཛད་པར་མངོན་སྤྱོད་ཀྱི་ལས་སྦྱོར་གནང་བས། དུས་དེ་སྐབས་དེར་ཐམས་ཅད་མཁྱེན་པ་བསོད་ནམས་རྒྱ་མཚོ་འོལ་ཁ་རྩེར་བཞུགས་ཡོད་པ་མཚན་ལྟས་འགྱུར་ཏེ་རྒྱལ་དུ་ཕེབས། མི་རིང་བར་སྡེ་པ་སྐུ་རྦབ་ལ་ཤོར་བའི་རྐྱེན་གྱིས་གྲོངས། ཐེལ་པ་རྣམས་ལྷུངས་པའི་ཚེ་བར་སྣང་ཁམས་ནས་བྱ་རོག་ཞིག་གིས་ཕྱག་བཅད་ནས་ཁྱེར་སོང་བ་ཡིན་ཟེར་བའི་ཐེལ་གྱི་མགོན་ཁང་ན་ད་ལྟ་ལག་པ་ཞིག་སྟོན་རྒྱུ་ཡོད་སྐད། ཞབས་དྲུང་ངག་དབང་གྲགས་པ་གོང་དཀར་ན་བཞུགས་སྐབས། རྩེར་ཡུམ་མི་གཅིག་པའི་སྐུ་མཆེད་ཡོད་པར་བརྟེན། དཔོན་ས་འཕྱོང་རྩེ་མས་གནང་བཀོད་མ་ལེགས་པའི་ཟེར་བུན་བསླངས་ཏེ། རིན་སྤུངས་པ་དང་དགའ་ལྡན་པ་སོགས་ཞབས་དྲུང་ངག་དབང་གྲགས་པའི་ཞབས་ཏོག་ཏུ་རྩེར་དཔུང་གི་སྦྱོར་བ་བཤམས། ཧོར་བསོད་ནམས་དར་རྒྱས་སོགས་བློན་པོ་གཞན་རྣམས་དཔུང་ཁྱེར་གྱི་ཕྱོགས་ལྷུང་མངོན་ཚན་ཅན་མེད་ནའང་། གོང་མ་ཆེན་པོས་བཀྲ་ཤིས་རྩེ་བར་ནང་བློན་བཅོལ་བར་མ་རངས་པའི་བར་ཞུགས་ཁོག་ནས་རྩེར་དཔུང་གིས་བསྐོར་མ་དགོས་པའི་ངོས། གོང་མ་འོན་རྒྱལ་བཟང་དུ་ཕེབས་བཅུག་ནས། ཞབས་(༨༩བ)

---

^{[མ་དཔེ་གཟིགས་ན་འདིར་གནོན།]}

དྲུང་ངག་དབང་གྲགས་པ་རྩེའི་ཁྲི་ཐོག་ཏུ་གདན་དྲངས། འོན་ཀྱང་འབྲུག་པ་སྤྲུལ་སྐུ་པདྨ་དཀར་པོས་སྡེ་དཔོན་རྣམས་ལ་རྒྱུ་མཚན་གནང་ཡང་ཟེར། གང་ལྟར་འགྱངས་མེད་དུ་གོང་མ་ཕྱིར་རྩེར་ཕེབས། ཞབས་དྲུང་ངག་དབང་གྲགས་པ་གོང་དཀར་དུ་བཞུགས་པ་ལ་ཡང་བསྐོར་རྒྱག་ཆ་གྲུལ་ཆེ་བ་འབྱུང་སྐབས་གོང་དཀར་འདི་དབུས་གཙང་གཉིས་ཀྱིས་མདུད་འཛོམ་པའི་ལྟེ་བ་ལྟ་བུར་འདུག་པས་རང་རེའི་མི་ངོ་ཞིག་གིས་མ་བཟུང་ན་བོད་ཀྱི་བདེ་སྐྱིད་ལ་གནོད་པས་རྫོང་གཏོད་མི་དགོས་ཚུལ་གྱི་གོང་མའི་བཀའ་ཤོག་གོང་དཀར་དུ་གནང་བ་བསྐོར་མི་རྣམས་ཀྱི་ལག་ཏུ་བརྒྱབ་པས་དམག་རྣམས་གྱེས་ཏེ་བདེ་འཇགས་ཆེ་བ་བྱུང་། ཞབས་དྲུང་ངག་དབང་གྲགས་པ་འདི་ཉིད་ཀྱིས་ལུགས་ཟུང་གི་མཛད་པ་མཐའ་ཡས་ཤིང་། ལྷག་པར་དགེ་འབྲུག་གཉིས་ལ་ཐུགས་མོས་ཆེ་བས་དམ་པའི་ཆོས་ཀྱི་གསན་པ་མང་དུ་མཛད། སྒེར་དུ་ཐམས་ཅད་མཁྱེན་པ་བསོད་ནམས་རྒྱ་མཚོ་དང་མཆོད་ཡོན་ཉི་ཟླ་ཟུང་གཅིག་ལྟ་བུར་ཐུགས་སྣང་དག་པ་བྱུང་བས་གོང་དཀར་འཇམ་དབྱངས་གོང་མའི་ཕོ་བྲང་ནས་རྟེན་འབུལ་གྱི་རྒྱུན་འཛུགས་པ་གནང་། གོང་མ་ཆེན་པོའི་སྲས་ཟུར་པ་སོགས་ཀྱིས་སྣེའུ་གདོང་རྩེའི་ཁྲིར་བཞུགས་ཤིང་། བདུད་མི་སྤུན་དགུས་དབུས་གཙང་ལན་མང་དུ་དཀྲུགས་པའི་སྲི་ངན་ལངས་ཏེ། བྱི་གླང་སྡེ་གཟར་གྱི་སྐབས་འཕོ་འགྱུར་ཤིན་ཏུ་ཆེ་བ་བྱུང་། ཞབས་དྲུང་ངག་དབང་གྲགས་པ་ལ་སྲས་བཀའ་བརྒྱུད་རྣམ་པར་རྒྱལ་བ་དང་། རྣམ་རྒྱལ་གྲགས་པ་གཉིས་འཁྲུངས་པར་གཅུང་ཡར་རྒྱབ་ནས་བདག་མོ་བྱོན་སྐབས་རིགས་འཛིན་ཆེན་པོའི་རྒྱལ་སྲས་པདྨ་ཆོས་རྒྱལ་དང་། ལྷ་རྩེ་བ་གཉིས་ཀྱིས་སྲུང་འཁོར་མཛད་དུས། རྒྱལ་སྲས་པས་ཐུན་བྲབ་སོགས་ཚམ་རྔམ་ཧ་ཅང་ཆེ་(༩༠ན)
བས་བདག་མོ་འཛངས་ཏེ་འབྱོན་མ་ནུས་པར་བགེགས་སྐྲོད་ཀྱི་མཚམས་ཅུང་ཟད་བཞག་པས་རྟེན་འབྲེལ་འཕྱུགས་ནས་མ་འགྱངས་པར་ཞབས་དྲུང་རྣམ་རྒྱལ་གྲགས་པ་སྐུ་གཤེགས། གཅེན་བཀའ་བརྒྱུད་རྣམ་པར་རྒྱལ་བ་ལུགས་ཟུང་གི་མཁྱེན་སྒོ་ཡངས་ཤིང་ཁྱད་པར་ཕྱག་རྒྱ་ཆེན་པོ་སོགས་ངེས་དོན་གྱི་སྐོར་ལ་ཐགས་གཞོལ། འདི་ཉིད་ཀྱིས་སྲས་མི་ཕམ་བསོད་ནམས་དབང་ཕྱུག་གྲགས་པ་རྣམ་རྒྱལ་དཔལ་བཟང་ད་ལྟ་ཕོ་བྲང་སྣེའུ་གདོང་རྩེར་བཞུགས་སྐབས་སོ། །སྨྲས་པ། རྨད་བྱུང་རླངས་ཀྱི་གསེར་སྐྱོགས་ཀྱིས་བཅུས་ལྷ་རིགས་བདུད་རྩིའི་ཟིལ་དངར་ཅན། །མཐོ་རིས་ཡོན་ཏན་བདུན་གྱི་མངའ་འབྱོར་ཡུལ་དབུས་སྨན་ལྗོངས་ཡོལ་གོའི་ནང་། །འཕྱུར་བུར་གཏམ་པའི་རིན་ཅེན་གདུང་བརྒྱུད་ཆོས་སྲིད་བླ་ན་དངར་བའི་རོ། །གངས་ཅན་ལྗོངས་འདིའི་སྐྱེ་རྒུ་མེ་ཞལ་ཡོངས་ཀྱི་དགའ་སྟོན་ཨེ་མ་མཚར། །སྐྱེ་བས་ཐོབ་པའི་རིགས་གཟུགས་ཆུ་ནང་ཟླའི། །སྡེ་གསུམ་གཅིག་ཏུ་དཀར་བའི་བསིལ་ཟེར་གྱིས། །ནམ་མཁའི་རི་བོང་ཅན་དེ་ཕམ་མོ་ཞེས། །ཆུ་འཛིན་ལང་ལོང་འཁྲིགས་པས་སྒྲིབ་སྙམ་བྱེད། །གནམ་བསྐོས་རྒྱལ་སྲིད་སཱ་ལའི་སྡོང་པོ་ལ། །ལས་ཀས་མངོན་མཐོའི་སྟོབས་ལྡན་ཡལ་གའི་ཚོགས། །སྲིད་འབྱོར་ལོ་མའི་ཕང་ཕུང་གཡོ་བཞིན་དུ། །ལེགས་བྱས་འབྲས་བུའི་འདོད་འཇོ་དཔྱིད་དུ་དར། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

རིན་སྤུངས་པའི་སྐོར།

---

^{[མ་དཔེ་གཟིགས་ན་འདིར་གནོན།]}

རིན་སྤུངས་པའི་སྐོར།དེ་ལྟར་གོང་མ་སྡེ་སྲིད་ཀྱི་བཀའ་ཁྲིམས་ཀྱི་ཤིང་རྟ་ཆེན་པོའི་ཁ་ལོ་བ་རྣམས་ལས། རིན་སྤུངས་པ་ནི། སྔོན་བོད་རྗེ་ཤ་ཁྲི་བཙན་པོའི་དུས་མ་སངས་ལ་ཁར་ཁྱེའུ་མཚན་དང་ལྡན་པ་ཞིག་བྱུང་བར་སྒེར་དཔལ་ལེགས་འོད་ནས་བཟུང་། ཕྱི་སྒེར། ནང་སྒེར། གྲུབ་ཐོབ་ཀྱི་སྒེར་(༩༠བ)

---

^{[མ་དཔེ་གཟིགས་ན་འདིར་གནོན།]}

དང་གསུམ་ལས། རིམ་བཞིན་མི་རབས་ཉེར་ལྔ་པ་ན་ནང་སྒེར་རལ་པ་འཛིན་གྱིས་གྲུ་གུའི་ཡུལ་ནས་གཟིངས་བདུན་གྱིས་རིན་པོ་ཆེ་གཡུའི་ཟོང་དྲངས། ཁྲག་གི་ལུས་ལ་མགོ་ལྔ་པ་འབྲུག་གི་སྐད་འབྱིན་པ་ཞིག་རིག་སྔགས་ཀྱིས་བཏུལ་པས་ནུས་མཐུ་ཆེ་བར་གྲགས་ཤིང་ཕྱག་ན་པདྨ་མི་རྗེའི་ཚུལ་བཟུང་བ་སྲོང་བཙན་སྒམ་པོའི་ནང་བློན་མཛད། དེ་ཉིད་ཀྱི་བརྒྱུད་ལས་བློ་གྲོས་ཀྱི་རྩལ་ལྡན་ཟླ་བ་རྒྱལ་མཚན་གྱིས་མངའ་བདག་ཁྲི་སྲོང་ལྡེའུ་བཙན་གྱི་ཆོས་བློན་དུ་གྱུར་པ་ནས་བཟུང་མི་རབས་ཉི་ཤུའི་མཐར། སྒེར་ཤཱཀྱ་འབུམ་གྱི་སྲས་ནམ་མཁའ་རྒྱལ་མཚན་གྱིས་གོང་མ་སྡེ་སྲིད་དབང་གྲགས་པ་རྒྱལ་མཚན་གྱི་ཞབས་ལ་གཏུགས་གཞིས་ཀ་རིན་སྤུངས་ཀྱི་རྫོང་དཔོན། ཆུ་མིག་གི་ཁྲི་དཔོན་དཔལ་ལྡན་ས་སྐྱའི་ལྷ་ཁང་ཆེན་མོའི་དཔོན་ཆེན་དུ་བསྐོས། དེའི་སྲས་ནམ་མཁའ་རྒྱལ་པོ་ན་ཚོད་ཕྲ་མོ་ནས་ལུགས་གཉིས་ཀྱི་མཁྱེན་པའི་སྤྱན་མཆོག་ཏུ་ཡངས། དེའི་སྲས་ནོར་བུ་བཟང་པོས་གོང་མའི་ཞབས་ལ་གཏུགས་ཤིང་། ཡབ་མེས་དུས་ཀྱི་རྫོང་སྡོད་ཁྲི་དཔོན་རྣམས་ཀྱི་འཇའ་ས་གནང་། དཔུང་གི་སྦྱོར་བས་རྟ་གཡག་གི་རྫོང་དང་། ལྕགས་ཐག་མགོ་སྦྲེལ་དུ་གྲགས་པའི་རྒྱལ་ཕྲན་མང་པོའི་མངའ་འབངས་རྣམས་བླངས། ཉང་སྨད་བསམ་འགྲུབ་རྩེའི་རྫོང་དཔོན་མཛད། གཏེར་སྟོན་ཀུན་སྐྱོང་གླིང་པས། བསྟན་མ་གསོལ་ཞིང་རྗེ་ཡི་མགུར་ལྷ་མཆོད། །མི་རབས་བཅུ་གསུམ་བར་དུ་མི་རབས་བརྟན། །ཞེས་པའི་ལུང་བསྟན་བཟང་པོ་མཛད། དེ་ནས་རོང་བྱམས་ཆེན་གྱི་ཆོས་སྡེ་བཏབ། དགེ་འདུན་རྣམས་ལ་དབྱར་དགུན་དཔྱིད་ཆོས་ཀྱི་ཕོགས་སོགས་མཐུན་རྐྱེན་གྱི་ནོམས་པ་སྦྱར། སྐུ་གསུང་ཐུགས་ཀྱི་རྟེན་མང་དུ་བཞེངས་པར་པཎ་ཆེན་ནགས་ཀྱི་རིན་ཅེན་གྱིས་མེ་ཏོག་(༩༡ན)

---

^{[མ་དཔེ་གཟིགས་ན་འདིར་གནོན།]}

གཏོར། བྲག་དམར་ཆོས་སྡེ་རྙིང་པའི་འདབས་སུ་སྤྱིལ་པོ་བརྒྱ་ལྷག་ཙམ་བརྩིགས་ཏེ་ཐོས་བསམ་སྒོམ་པ་ཚུལ་བཞིན་དུ་བྱེད་པའི་འདུས་གྲ་བཙུགས། མདོར་ན་རིས་མེད་པའི་གྲུབ་པའི་མཐའ་ཐམས་ཅད་ལ་བསྙེན་བཀུར་བླ་ན་མེད་པ་མཛད་པས་མངོན་པར་མཐོ། ཆོས་རྗེ་བསོད་གྲགས་པས། ཆོས་རྗེ་ངོར་ཆེན་པས་རིན་སྤུངས་ནོར་བཟང་པ་ལ། རྗེ་དགེ་འདུན་གྲུབ་ཀྱིས་དགོན་པ་འདེབས་པ་འགོག་དགོས་ཚུལ་གསུངས་པ་ནི་ངག་རྒྱུན་མ་དག་པའི་འཆལ་གཏམ་ཞིག་བྲིས་པར་སྣང་སྟེ། ཐམས་ཅད་མཁྱེན་པ་དགེ་འདུན་གྲུབ་ཀྱིས་བཀྲ་ཤིས་ལྷུན་པོ་འདེབས་སྐབས། བསམ་འགྲུབ་རྩེའི་རྫོང་དཔོན་འཕྱོང་རྒྱས་པ་ཧོར་དཔལ་འབྱོར་བཟང་པོ་ཡིན་ཞིང་། འདི་ཉིད་ཀྱིས་རྗེ་དགེ་འདུན་གྲུབ་ཀྱི་སྦྱིན་བདག་གི་མཐིིལ་མཛད་པར་མིང་ཙམ་གྱི་མཁས་པ་མ་ཡིན་པའི་གྲགས་པ་དོན་དང་མཐུན་པའི་པཎ་ཆེན་བྱམས་པ་གླིང་པ་བསོད་ནམས་རྣམ་པར་རྒྱལ་བས་མཛད་པའི་ཡར་རྒྱབ་ཀྱི་གདུང་རབས་ན་གསལ་བར་གསུངས་སོ། །རིན་སྤུངས་ནོར་བཟང་པའི་སྲས་ཨུ་པ་སི་ཀ །ཀུན་བཟང་པ། དོན་གྲུབ་རྡོ་རྗེ། མཚོ་སྐྱེས་རྡོ་རྗེ། ཤཱཀྱ་རྒྱལ་མཚན་དང་ལྔ་ལས། དཔོན་ཆུང་ངུ་ནས་གྲོངས །ཀུན་བཟང་པས་དབང་གྲགས་པ་འབྱུང་གནས་སྐུ་མཆེད་ཀྱི་ཞབས་ལ་གཏུགས། ཡབ་མེས་ཀྱི་འཇའ་ས་ལས་ཀ་གནང་སྟེ་རིན་སྤུངས་ཀྱི་རྫོང་དཔོན་མཛད། དཔལ་ལྡན་ས་སྐྱ་པའི་རང་ལུགས་པ་ཀུན་མཁྱེན་སངས་རྒྱས་འཕེལ་དང་གོ་རམས་བསོད་ནམས་སེང་གེ་དང་མཆོད་ཡོན་དུ་འབྲེལ་ཏེ་འབྲས་ཡུལ་སྐྱེད་མོས་ཚལ་གྱི་བཤད་གྲྭ་བཙུགས་ཤིང་། རྟ་ནག་ཐུབ་བསྟན་རྣམ་རྒྱལ་གྱི་དགོན་པ་འདེབས་པའི་མཐུན་རྐྱེན་མཛད། དོན་གྲུབ་རྡོ་རྗེས་གཞིས་ཀ་(༩༡བ)

---

^{[མ་དཔེ་གཟིགས་ན་འདིར་གནོན།]}

བསམ་འགྲུབ་རྩེའི་རྫོང་དཔོན་གྱི་ལས་ཀ་བཟུང་། མ་སངས་མཚོ་སྐྱེས་རྡོ་རྗེས་ཡར་ཀླུངས་མཁར་ཐོག་གི་རྫོང་བཟུང་ཞིང་སྤྱན་སྔ་དཔལ་ངག་གི་དབང་ཕྱུག་གཤེགས་རྗེས་གདུང་བརྒྱུད་སྐུ་ན་ཆེས་ཕྲ་བས། ཕོ་བྲང་སྣེའུ་གདོང་རྩེར་དཔོན་ཚབ་ཀྱི་ཐེལ་གཏོང་མཛད། ཤཱཀྱ་རྒྱལ་མཚན་གྱིས་ཉང་ཁོག་གི་རྫོང་གཞིས་སུ་བཞུགས་ནས་བདག་པོ་རྒྱལ་མཁར་རྩེ་པ་གཙེར་བ་སོགས་དགྲ་ཐབས་ཀྱི་བྱ་བ་ལ་མཁས་པར་གྲགས། ཀུན་བཟང་པ་ལ་སྲས་རྡོ་རྗེ་ཚེ་བརྟན་དང་། དོན་ཡོད་རྡོ་རྗེ་གཉིས་ལས། དོན་ཡོད་རྡོ་རྗེས་རྫོང་ཆེན་གཉིས་ཀྱི་ལས་ཀས་མཐོ་བ་དང་བཅས་དབུས་ཕྱོགས་ནོར་འཛིན་གྱི་ཆར་དཔུང་གི་འཇུག་སྒོས་གཞིས་ཀ་བྲག་དཀར་དང་ཆུ་ཤུལ་ལྷུན་པོ་རྩེ་སོགས་སྣེལ་པའི་ལག་ནས་བླངས། མི་རིང་བར་འཕྱོང་རྒྱས་པ་སོགས་བློན་པོ་གཞན་རྣམས་དང་གྲོས་ཁོག་བསྟུན་པའི་སྤྱན་སྔ་ངག་གི་དབང་ཕྱུག་ཕོ་བྲང་སྣེའུ་གདོང་རྩེའི་ཁྲིར་མངའ་གསོལ་བའི་བྱེད་པོ་མཛད། ལ་སྟོད་དང་ལྷོ་རྒྱུད་ཕྱོགས་སུ་དམག་ལན་ཁ་ཡར་མཛད་པ་རྣམས་རྒྱལ་ཞིང་། དེ་རྗེས་སྤྱན་སྔ་གོང་མ་སྐུ་གཤེགས། གདུང་བརྒྱུད་རིན་པོ་ཆེ་ནར་མ་སོན་པའི་བར་དུ་བག་ཡངས་པ་དང་། ཁྱད་པར་ལྟ་གྲུབ་ཀྱི་ཀུན་སློང་དྲག་པོ་སྙིང་ལ་གཟེར་བའི་འགྲོ་བའི་འདྲེན་པར་རློམ་པ་མེ་ཏོག་མདའ་ཅན་གྱི་ཞགས་པས་བཅིངས་པ་འགའ་ཞིག་གིས་ཡིད་རྣམ་པར་བསྐྱོད་པ་ལ་བརྟེན་ནས་སྐྱིད་ཤོད་ཕྱོགས་སུ་དཔུང་འཇུག་བྱས་པར་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་ནས་མཁས་ཤིང་གྲུབ་པའི་དབང་ཕྱུག་ཀུན་མཁྱེན་སྨོན་ལམ་དཔལ་བས་མགོན་པོ་ཕྱག་དྲུག་པའི་གཏོར་ཆེན་གྱི་ལས་སྦྱོར་མཛད་པར་བརྟེན། དམག་ལན་གཉིས་རྐྱེན་གཞན་གྱི་དབང་གིས་ཕྱིར་བཟློག་དགོས་པ་བྱུང་། སླར་ཀུན་(༩༢ན)

---

^{[མ་དཔེ་གཟིགས་ན་འདིར་གནོན།]}

མཁྱེན་སྨོན་ལམ་དཔལ་བ་སྐུ་གཤེགས་པའི་གཏམ་བྱུང་རྗེས་དམག་གི་འཇུག་སྒོ་བྱས་པ་དང་། དགའ་ལྡན་པ་ནམ་མཁའ་རྒྱལ་པོ་ངོ་བལྟས་པ་སོགས་ཀྱིས་སྡེ་གཟར་ཆབས་སུ་བརྒྱུགས་ཏེ་གཞིས་ཀ་སྣེའུ་རྩིས་ལེན་པ་སོགས་མཛད་འོན་ཀྱང་གོང་མ་ཆེན་པོ་སྣེའུ་གདོང་རྩེའི་ཁྲི་ཐོག་ཏུ་གདན་འདྲེན་པར་བློན་པོ་གཞན་རྣམས་ཀྱི་གྲོགས་སུ་འགྱུར་བའི་མཛད་པས་ངོ་ཚ་ཁྲེལ་ཡོད་ཀྱི་གོས་དང་ལྡན། ཞྭ་དམར་ཆོས་ཀྱི་གྲགས་པ་དང་མཆོད་ཡོན་བཀའ་བགྲོས་ནས་ཡངས་པ་ཅན་གྱི་གཙུག་ལག་ཁང་སྡེ་དང་བཅས་པ་འཛུགས་པའི་མཐུན་རྐྱེན་མཛད། རྗེ་དྲུང་ཆོས་གྲགས་རྒྱ་མཚོའི་བཞེད་པ་ལྟར་ལྷ་ལྡན་ཉེ་འདབས་སུ་དགོན་པ་བཏབ་ནའང་། ལས་འབྲས་ཀྱི་ཤུགས་འདི་གང་གིས་ཀྱང་དགག་པར་མ་ནུས་པས་ཡུན་དུ་མ་གནས། མཚོ་སྐྱེས་རྡོ་རྗེའི་སྲས་ངག་དབང་རྣམ་རྒྱལ་གོང་མ་སྤྱན་སྔའི་ཞབས་ལ་གཏུགས་ནས་རྫོང་དཔོན་གྱི་ལས་ཀ་བླངས། རིག་གནས་ཆུང་བ་ལྔ་དང་། སྒྱུ་རྩལ་དྲུག་ཅུ་རྩ་བཞི་སོགས་ལ་བློ་གྲོས་ཀྱི་འཇུག་པ་གསལ་བར་ཤར། ཨེ་གཉལ་གྱི་ཕྱོགས་སུ་དམག་གི་མཛད་སྒོ་སོགས་ལ་བརྟེན། གོང་མ་ཆེན་པོའི་ཐུགས་ལ་ཕོག་པར་རྗེ་འབངས་གོ་རིམ་མ་ལོག་པའི་དགོངས་བསངས་ཁེངས་དྲེགས་ཀྱི་དབང་གིས་མ་མཛད་པར་བརྟེན། དབུས་ཕྱོགས་ཀྱི་སྣེའུ་སོགས་རྫོང་གཞིས་རྣམས་ཤོར་ཏེ་མངའ་ཐང་ཅུང་ཟད་ཉམས། འོན་ཀྱང་གཙང་ཕྱོགས་སུ་སེང་གེ་རྩེ་པ་དང་། ལ་སྟོད་ལྷོ་སོགས་འོག་ཏུ་བཅུག །བྱམས་ཆེན་གྱིས་གཙོས་པའི་གཙང་རོང་གི་ཆོས་སྡེ་རྣམས་ལ་འཚོ་རྐྱེན་སོགས་དགེ་རྒྱུན་བཟང་པོ་སྦྱར། རིན་སྤུངས་ཉིད་དུ་ཕོ་བྲང་ཆེན་པོའི་མིག་ལྟོས་ཀྱིས་གསང་བ་སྔགས་ཀྱི་དུས་རིམ་གྱི་སྲོལ་བཙུགས། དེ་ཉིད་ལ་སྲས་གསུམ་(༩༢བ)

---

^{[མ་དཔེ་གཟིགས་ན་འདིར་གནོན།]}

ལས། ཆེ་བ་ཆུང་ངུ་ནས་གྲོངས། དེ་འོག་དོན་གྲུབ་ཚེ་བརྟན་རྡོ་རྗེས་སྔར་ཡབ་མེས་ཀྱི་དུས་མ་ལོན་པའི་པ་སྣམས་ལྷུན་གྲུབ་རྩེའི་རྫོང་མངའ་འབངས་དང་བཅས་པ་རང་དབང་དུ་བྱས། རྗེ་དྲུང་མི་བསྐྱོད་རྡོ་རྗེའི་གསུང་བཞིན་གསུང་རབ་གླིང་གི་དགོན་པ་བཏབ། བཀྲ་ཤིས་དཔལ་བཟང་བླ་མར་བསྟེན་ནས་ཐེག་པའི་རྩེ་མོ་ཉམས་སུ་བླངས། གཅུང་ངག་དབང་འཇིགས་གྲགས་མཁྱེན་རབ་ཀྱི་ཀློང་རྣམ་པར་ཡངས་པས་རིག་པའི་གནས་ཆེ་བ་ལྔ་དང་ཆུང་བ་ལྔ་སྟེ་བཅུ་ཕྲག་གཅིག་ལ་སློབ་དཔོན་མཁས་པ་བསྟེན་ནས། རྒྱལ་པོ་པཎྜི་ཏའི་རྣམ་ཐར་བཟུང་། ཧོར་གོས་བཟང་པོའི་རྒྱུ་ལས་གྲུབ་པའི་རིགས་ལྡན་ཡོལ་བར་གྲགས་པའི་བཀོད་པས་ཁྱད་པར་དུ་འཕགས་པ་དེ་ཉིད་བཞེངས། རྗེ་ཀུན་དགའ་གྲོལ་མཆོག་པ་རབ་གནས་སུ་སྤྱན་དྲངས། དཎྜིའི་དགོངས་རྒྱན་འཇིགས་མེད་སེང་གེའི་རྒྱུད་ཀྱི་ང་རོས་ཐོག་དྲངས་པའི་ཚིག་སྦྱོར་ཕུན་སུམ་ཚོགས་པའི་བསྟན་བཅོས་ཀྱི་རྩོམ་པ་མང་དུ་མཛད། ལུགས་གཉིས་ལ་རྣམ་དཔྱོད་ཀྱི་སྒོ་འཕར་མཆོག་ཏུ་ཡངས། འོན་ཀྱང་ཕག་ཚང་ཡོས་ལྟར་དཀྲུག་པའི་ལུང་བསྟན་ཐོག་ཏུ་བབ་པའི་མཚན་རྟགས་ཀྱིས་ཞིང་གཤག་པས་འབངས་གྱེན་ལོག་བྱས་སྐབས་སྲས་པདྨ་དཀར་པོ་བཀྲོངས་པའི་གཏམ་བྱུང་བ། རིན་ཅེན་སྤུངས་པར་དམག་འཁྲུག་དར་བ་འབྱུང་། ཞེས་པའི་དུས་སུ་མངོན། སྐུ་ཚེའི་མཇུག་ཏུ་མངའ་ཐང་ཕལ་ཆེར་ཤོར། སྲས་ཟླ་བ་བཟང་པོའི་བརྒྱུད་དེང་སང་ཡང་སྣང་ངོ་། །གོང་མའི་བློན་པོ་ཧོར་གཞོན་ནུ་བཟང་པོ་ནི། ཟ་ཧོར་གྱི་རྒྱལ་རིགས་ཏེ་གྲོང་ཁྱེར་ཤིང་ཐབས་ཅན་ན་རྒྱལ་པོ་ཤིང་རྟ་བཅུ་པ་ཞེས་བྱ་བ་བྱུང་བའི་སྲས་ཆོས་རྒྱལ་མྱ་ངན་མེད་ཅེས་བྱ་བ་བདེན་ཚིག་གི་མཐུས་མཆོད་རྟེན་བྱེ་བ་བཞེངས་པ། དེའི་སྲས་(༩༣ན)

---

^{[མ་དཔེ་གཟིགས་ན་འདིར་གནོན།]}

རྒྱལ་པོ་ཛ་ཞེས་པ་སྨོན་ལམ་གྱི་མཐུས་རྡོ་རྗེ་སེམས་དཔའི་གླེགས་བམ་གྱི་ཆར་ཕོ་བྲང་གི་སྟེང་དུ་བབ་པས་མདོ་སྡེ་ཟ་མ་ཏོག་རླུང་གིས་ཁྱེར་ཏེ་ཕོ་བྲང་ཡུམ་བུ་བླ་སྒང་གི་སྟེང་དུ་བབས་པ་ལྷ་ཐོ་ཐོ་རི་སྙན་ཤལ་གྱི་གཉན་པོ་གསང་བར་བཏགས་ལ། དེའི་སྲས་ཟ་ཧོར་རྒྱལ་པོ་ཨིནྡྲ་བྷཱུ་ཏི་སྔགས་ལ་མོས་པས། པོ་ཏི་གཉིས་ཕྱག་ན་རྡོ་རྗེའི་བྱིན་རླབས་ཀྱིས་རྙེད་ཀྱང་བརྡ་མ་འཕྲོད་པས་གྲུབ་ཐོབ་ཀུ་ཀུ་རཱ་ཛ་སྤྱན་དྲངས་ཏེ་སྨིན་པར་མཛད། དེ་ལ་སྲས་མོ་གོ་མ་ད་ཝ་དང་། སྲས་ཤ་ཀྲ་གཉིས་ཀྱིས་རིག་པ་འཛིན་པའི་ས་གྲུབ་ཅིང་། དེའི་སྲས་རྒྱལ་པོ་གཙུག་ལག་འཛིན་བྱ་བ་སློབ་དཔོན་ཆེན་པོའི་ཟབ་མོའི་ཆོས་དང་ལུང་གིས་དབུགས་དབྱུང་བ། དེ་ལ་སྲས་དྷརྨ་རཱ་ཛ། མཁན་ཆེན་ཞི་བ་འཚོ། ལྷ་ལྕམ་མན་དྷ་ར་བ་གསུམ་ལས། བར་པ་གནས་ལྔ་རིག་པའི་ཕ་རོལ་དུ་བྱོན་ཞིང་། གངས་ཅན་བསྟན་པའི་རྩ་ལག་མཛད། ཕྱི་མ་ཡེ་ཤེས་མཁའ་འགྲོ་ཀུན་གྱི་གཙོ་བོ་གྱུར། དང་པོས་རྒྱལ་སྲིད་བསྐྱངས་པའི་དྷརྨཱ་པཱ་ལ། ཤཱཀྱ་དེ་ཝ། མ་ཧཱ་དེ་ཝ་གསུམ་བྱུང་ལ། དེ་ཡང་གངས་ཅན་གྱི་ལྗོངས་སུ་མངའ་བདག་ཁྲི་སྲོང་ལྡེའུ་བཙན་གྱིས་དཔལ་བསམ་ཡས་ཀྱི་གཙུག་ལག་ཁང་བཞེང་བའི་སྲུང་མར། སློབ་དཔོན་ཆེན་པོས་ཀླུ་ཟུར་ཕུད་ལྔ་པ་ལ་བཀའ་བསྒོས་པས། ངེད་ཀྱིས་མི་འོངས། ཟ་ཧོར་གྱི་ཡུལ་ན་དམུའི་རིགས་ལ་ཀླུའི་ཚ་བོ་རྒྱལ་པོ་ཧུ་ཞེས་བྱ་བ་ནོར་རྒྱ་ཁབ་ཙམ་གྱི་རྗེས་ལ་བྱ་རྒོད་པོའི་ཉིན་ལམ་བཅོ་བརྒྱད་འགྲོ་བ་ཞིག་ཡོད་པས་དེ་བསྐོ་བར་ཞུས་པས། རྣམ་སྲས་སེང་སྔོན་ཅན་རྟ་བདག་བརྒྱད་དང་བཅས་པ་བཀུག་ནས་གཟུགས་བརྙན་བྲིས་པའི་རུ་དར་ལ་བསྟིམས་ནས། ཁམས་ཀྱི་གཡེར་མ་ཐང་དུ་དམག་སྒར་བཏབ། སློབ་དཔོན་(༩༣བ)

---

^{[མ་དཔེ་གཟིགས་ན་འདིར་གནོན།]}

ཆེན་པོས་ཏིང་ངེ་འཛིན་གྱིས་པེ་དཀར་བཀུག་ནས་ལན་ཅིག་བོད་དུ་ཡོངས་ཀྱང་ཧ་ཅང་གདུག་རྩུབ་ཆེ་བར་བྱུང་ཞིང་། སླར་མཁན་སློབ་ཆོས་གསུམ་གྱིས་ཟ་ཧོར་དུ་ཕོ་ཉ་མངགས་ནས། རྒྱལ་པོ་དྷརྨ་པཱ་ལ། གཡུའི་ཐུབ་པ་རང་བྱོན། ཞལ་བརྙན་བསེ་འབག །ཆིབས་ཤེལ་གྱི་སེང་གེ་དང་བཅས་ཏེ་སྣ་དྲངས་པེ་དཀར་ཡང་རིན་པོ་ཆེས་སྤྲས་པའི་ཤིང་བྱ་ལ་ཞོན་ནས་ལྷ་མི་རྣམས་བོད་དུ་བྱོན། སློབ་དཔོན་ཆེན་པོས་སྤྱི་བོར་རྡོ་རྗེ་བཞག་སྟེ་དམ་ཚིག་བསྒྲགས། དེང་སང་ཡང་རྒྱལ་པོ་ངེས་པར་བརླམས་ན་སྤྱི་གཙུག་ཏུ་རྡོ་རྗེའི་རྗེས་ཡོང་། རྣམ་སྲས་སྤྲིན་གསེབ་མའི་ལོ་རྒྱུས་དང་པེ་དཀར་ཨར་གཏད་ཀྱི་ལོ་རྒྱུས་གཉིས་འདི་དང་གུང་འགྲིག་པར་མངོན། དྷརྨ་པཱ་ལས་མངའ་བདག་ཁྲི་སྲོང་ལྡེ་བཙན་གྱི་བླ་མ་མཛད། དཔལ་ཆུ་བོ་རིར་ཐེག་པ་མཆོག་གི་རྣལ་འབྱོར་ཟབ་མོའི་གྲུབ་པའི་རྟགས་ཁྱད་ཅན་བརྙེས། དེས་ཕོ་ཡོང་བཟའ་བྱ་བ་མཁའ་འགྲོའི་རིགས་ཅན་ཞིག་ཁབ་ཏུ་བཞེས་པའི་སྲས་དཔལ་གྱི་རྡོ་རྗེ་དང་རིན་ཅེན་རྡོ་རྗེ་གཉིས་ལས། གཅུང་རྒྱ་གར་དུ་བྱོན། ཐོས་བསམ་སྒོམ་པ་མང་དུ་མཛད། སི་ཏའི་གྲོང་ཁྱེར་དུ་སྐུ་ལུས་མ་སྤངས་པར་མཁའ་སྤྱོད་དུ་གཤེགས། དཔལ་གྱི་རྡོ་རྗེས་པ་ཚབ་ཀྱི་རིགས་ཀྱི་ཇོ་མོ་ཞིག་བླངས་པར་སྲས་རྡོ་རྗེ་གྲགས་པ། རིན་ཅེན་གྲགས་པ། ཆོས་ཀྱི་གྲགས་པ་གསུམ་ལས། གཅུང་ནི་རབ་ཏུ་བྱུང་། གཅེན་གྱིས་སྒྲུབ་པ་མཛད་པས་ཡི་དམ་གྱི་ལྷ་མང་པོ་ཞལ་གཟིགས། ཞིང་སྐྱེས་ཀྱི་ཌཱ་ཀཱི་ཞིག་ཕྱག་རྒྱར་བསྟེན་པས་སྲས་ཟླ་བ་གྲགས། དེའི་སྲས་རིག་པ་སེང་གེ །དེ་ལ་སྲས་ཤཱཀྱ་བློ་གྲོས། ཡོན་ཏན་བློ་གྲོས། གྲགས་པ་ཡེ་ཤེས་གསུམ་གྱིས་གཡོན་རུ་སའི་ལྟེ་བ་ཡར་ཀླུངས་སུ་ཕེབས། གཅེན་གྱི་གཡོན་རུ་ཁྲ་འབྲུག་དང་ཁད་ཉེ་བའི་གཡུ་སྲིད་སྨོན་མཁར་དུ་བཞུགས་(༩༤ན)

---

^{[མ་དཔེ་གཟིགས་ན་འདིར་གནོན།]}

འབྲིང་གནམ་ལྡེ་འོད་སྲུངས་ཀྱི་བླ་མ་མཛད་ནས་མཁར་ཐོག་བཏབ། ཆུང་བས་ལྷ་སྨན་ཇོ་མོས་ས་སྐྱོང་བའི་ཕྱོགས་སུ་ལྷ་ཁང་བཏབ་ནས་བཞུགས། འགའ་ཞིག་བྱེས་ལྷ་ཁང་ཡིན་ཟེར། ཡོན་ཏན་བློ་གྲོས་ཀྱི་སྲས་རྡོ་རྗེ་གསལ་བ་དང་རྡོ་རྗེ་རིན་ཅེན་གཉིས། འདིའི་དུས་རྒྱ་དང་ཤར་ག་བྱ་དང་རྔོག་དང་ཁུ་དང་དབུས་དཀར་སོགས་རུས་ཆེན་གྱི་འབངས་མང་དུ་བྱུང་། གཅེན་གྱི་སྲས་ཡེ་ཤེས་རྡོ་རྗེ། དེས་གཡུ་རུ་ནམ་མཁའ་རི་ཁུ་མོ་སྐྱིད་ཁབ་ཏུ་བཞེས་པ་ལ་སྲས་མོ་ཞིག་ལས་མ་འཁྲུངས་པར་མཁར་ཐག་དང་བཅག་གནས་རྒྱ་ལ་བྱིན་པས་ཕོ་བྲང་རྒྱའི་མཁར་ཐོག་ཏུ་མིང་ཆགས། རིན་ཅེན་རྡོ་རྗེ་མངའ་བདག་དཔལ་འཁོར་བཙན་གྱིས་གདན་དྲངས། ཕུ་ལུང་འདི་ངན་ལམ་རྒྱ་མཚོ་དང་གཙང་པ་མི་བདུན་དུ་གྲགས་པའི་རིགས་སྔགས་པས་ཀྱང་མ་ཐུལ་ཚུལ་ཞུས་ནས། གསེར་གྱི་ཕྱགས་ཤིང་ཁྲུ་དོ་པ་ཞིག་ཕུལ། བླ་མཆོད་དུ་བཀུར་བས་ཕུ་ལུང་གི་ལྷ་འདྲེ་རྣམས་བཏུལ། དེར་དགོན་པ་སྟེགས་ཁ་མོ་བཏབ། ཇོ་མོ་མཆིལ་མོ་ཞིག་ཁབ་ཏུ་བཞེས་པར་སྲས་རྡོ་རྗེ་གྲགས་པ་དང་རྡོ་རྗེ་འབར་བ་གཉིས་འཁྲུངས། ཡབ་སྲས་གསུམ་གྱིས་ཧོར་པ་སར་བྱོན། སྒང་ཁ་སྤེལ་ཞེས་བྱ་བའི་ཕོ་བྲང་ཞིག་བཏབ། རྒྱ་གར་གྱི་སྲོལ་བཞིན་སྲས་ཆེ་བ་ཁང་པ་ཕྱི་མར་ཕོག་པས་སྲས་ཁང་ཕྱི་པར་གྲགས། རྡོ་རྗེ་འབར་གླུ་སྡིངས་སུ་ཕོག་པས་ལྕང་ལྡུར་བར་གྲགས། མཆེད་གཉིས་ཀྱིས་གཡུ་སྲིད་ཀུན་དགའ་བར་ས་དཔྱད་ལེགས་པར་མཁྱེན་ནས་ཕྱག་ཕབ། ཡབ་བསྙེན་པར་རྫོགས་པའི་མཚན་རྡོ་རྗེ་རྒྱལ་པོར་གསོལ། རྡོ་རྗེ་འབར་པ་ལ་སྲས་ཧོར་ད་དར་པ་ཞེས་བྱ་བ་སྦས་པའི་རྣལ་འབྱོར་ནུས་མཐུའི་མངའ་བདག་ཆེན་པོ་ཞིག་བྱུང་བས། ཧོར་སེ་ཆེན་རྒྱལ་པོས་གསན་ནས་གསེར་ཡིག་པ་མངགས་ཏེ་སྤྱན་(༩༤བ)

---

^{[མ་དཔེ་གཟིགས་ན་འདིར་གནོན།]}

དྲངས་ཀྱང་། ཐབས་མཁས་ཀྱི་མཛད་པས་བཏུལ་ཏེ་མ་ཕེབས། དེའི་སྲས་ཧོར་བཀྲ་ཤིས་འབུམ་དང་མཁན་ཆེན་ཚུལ་དར་བ་གཉིས་ལས། མཁན་ཆེན་པ་དཔལ་ལྡན་རླངས་ཀྱི་གདུང་ལས། སྤྱན་སྔ་བཅུ་གཉིས་རིན་པོ་ཆེར་སོ་སོར་ཐར་པའི་སྡོམ་པ་མནོས། བཀའ་བརྒྱུད་རིན་པོ་ཆེའི་ཟབ་ཆོས་མང་དུ་གསན་ཞིང་། སྤྱན་སྔ་གྲགས་པ་ཤེས་རབ་དང་། ཏའི་སི་ཏུ་བྱང་ཆུབ་རྒྱལ་མཚན་གཉིས་ཀྱི་དབུ་སྐྲའི་ཕུད་བཞེས་ཏེ་བླ་མ་མཛད། ཧོར་བཀྲ་ཤིས་འབུམ་ལ་སྲས་གཞོན་ནུ་བཟང་པོ་དང་བཀྲ་ཤིས་བསམ་གྲུབ། གཉིས་ཀས་གོང་མ་སི་ཏུའི་ཞབས་ལ་གཏུགས། ཁྱད་པར་གཅེན་གྱི་གསོལ་ཇ་བ་ནས་བཟུང་བཀའ་བློན་གྱི་བར་ལས་ཚན་རིམ་པར་མཛད། དཔོན་ཆེན་རྒྱལ་བཟང་པས་སི་ཏུ་བཙོན་དུ་བཟུང་པའི་སྐབས། དམག་གིས་བསྡིགས་པའི་བསྐོར་གཡང་མང་དུ་བྱས་ཀྱང་སྣེ་གདོང་རྩེར་འཁྲ་ཕུར་བཟུང་ཞིང་། དཔོན་ཆེན་དབང་བརྩོན་གྱིས་ཁྲི་བསྐོར་བཅུ་གསུམ་གྱི་དམག་ཡར་ཀླུངས་སུ་བཏེག་པ་དུས་ཀྱི་མེ་ལྕེའི་འཕྲེང་བ་ལ་ཕྱེ་མ་ལེབ་མཆོངས་པའི་ངང་ཚུལ་བཞིན་བཅོམ་པས། སྟོབས་འབྱོར་གྱི་དྲེགས་པས་མྱོས་པའི་ས་སྐྱའི་དཔོན་ཆེན་ཀྱང་སྤ་དཀོང་པར་མཛད་པ་སོགས་ཀྱིས་སྡེ་སྲིད་ཕག་མོ་གྲུ་པའི་བསྟན་ཇུས་ཚུགས་པའི་རྩ་བ་ལྟ་བུར་བྱུང་བས། སི་ཏུས། གཞོན་ནུས་སྙིང་བགྱིས། གཞན་རྣམས་ཡན་ལག་གི་ཚུལ་བགྱིས་ཞེས་དང་། གཞན་ཡང་ཡ་གི་གཙང་ས་སྐྱ་ནས། སྨད་འཇང་ཞབས་ལྷོ་མོན་དང་བཅས་པ་མངའ་འོག་ཏུ་འདུ་བ་གཞོན་ནུ་བཟང་པོའི་དྲིན་ཡིན་གསུངས། གཅུང་བཀྲས་བསམ་པའི་སྲས་གཞོན་ནུ་རྒྱལ་མཚན། ཀུན་དགའ་དཔལ་བཟང་། ནམ་མཁའ་རིན་ཆེན། དབང་ཕྱུག་རིན་ཅེན་དང་བཞི་བྱུང་བ་རྣམས་ཀྱིས་སྤྱན་སྔ་རིན་པོ་ཆེ་དང་གོང་མ་སི་(༩༥ན)

---

^{[མ་དཔེ་གཟིགས་ན་འདིར་གནོན།]}

ཏུའི་ཞབས་ལ་གཏུགས། རྒྱལ་སྲིད་སྐྱོང་བའི་བློན་པོའི་བྱ་བ་རྣམས་གོང་སའི་དགོངས་པ་དང་བསྟུན་པར་མཛད། ཀུན་དགའ་དཔལ་བཟང་གི་སྲས་དཔལ་འབྱོར་བཟང་པོ། བསོད་ནམས་དཔལ་ལྡན། སངས་རྒྱས་སྐྱབས། དཀོན་ཅོག་རིན་ཅེན་བཞི་འཁྲུངས། དཔལ་འབྱོར་བཟང་པོས་ཚེས་བཞི་གསར་མ་བའི་ཞབས་ལ་གཏུགས། ཉང་སྨད་བསམ་འགྲུབ་རྩེའི་རྫོང་དཔོན་དང་། ཕྱིས་སུ་དམག་དཔོན་ལ་བསྐོས་པས་དགྲ་ཤ་དྲོད་མ་ཡལ་བར་བླངས་པས་སྲིན་པོ་ཡང་བྱིན་ཤ་འདར་ཞེས་དཔའ་རྟགས་བྱུང་། ཐམས་ཅད་མཁྱེན་པ་དགེ་འདུན་གྲུབ་དང་མཆོད་ཡོན་དུ་འབྲེལ་བས། རྒྱལ་བ་གཉིས་པ་ཙོང་ཁ་པའི་རིང་ལུགས་ལ་མོས་པ་ཐོབ། བསམ་རྩེ་ན་ཀུན་མཁྱེན་བུའི་ཕྱག་བྲིས་དང་ཕྱག་རྟགས་འབྱོར་པའི་བཀའ་འགྱུར་བཞུགས་པ་ཕྱིང་བར་སྟག་རྩེར་གདན་དྲངས། གཅུང་གསུམ་གྱིས་ས་སྐྱོང་གྲགས་པ་རྒྱལ་མཚན་གྱི་ཞབས་ལ་གཏུགས། ཁྱད་པར་ནང་སོ་དཀོན་ཆོག་རིན་ཅེན་གོང་མའི་ལུགས་གཉིས་ཀྱི་མཛད་པ་མཐའ་དག་སྤེལ་བའི་ནང་བློན་མཛད། བོད་ཀྱི་བློན་པོ་རིག་པ་ཅན་རྒྱུན་མར་འབྱུང་བའི་རྟེན་འབྲེལ་གྱི་རི་བོའི་འདབས་རོལ་དུ་ཕྱིང་བར་སྟག་རྩེའི་བཙན་རྫོང་ལྷའི་གྲོང་ཁྱེར་མི་ཡུལ་དུ་འཕོས་པ་ལྟ་བུར་ཡིད་དུ་འོང་བ་བརྩིགས། དེའི་སྐབས་སྲས་ཉག་ཕྲ་བར་བྱུང་བས། གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་ནས་ཆོས་རྗེ་ཞ་ལུ་པ་ལེགས་པ་རྒྱལ་མཚན་གདན་དྲངས། གཤེད་དམར་གྱི་སྒོ་ནས་རིགས་བསྐྲུན་པའི་ཆོ་ག་མཛད་པས་ཧོར་རྡོ་རྗེ་ཚེ་བརྟན་འཁྲུངས། སྐབས་ཤིག་ལྷ་མོ་འོད་ཟེར་ཅན་མའི་ལས་ཚོགས་ལ་བརྟེན་ནས། རྒྱ་ཁབ་རྩེར་བརྒྱུས་དགྲ་ཕྱོགས་སུ་བསྟན་པས་དམག་དཔུང་ཆེན་པོར་མཐོང་བ་དང་། རྫོང་ལ་(༩༥བ)

---

^{[མ་དཔེ་གཟིགས་ན་འདིར་གནོན།]}

ཆུ་མེད་པར་དབྱངས་འཆར་གྱི་སྒོ་ནས་ལུམ་བཏོན་པ་སོགས་བཀའ་དྲིན་ཆེ་བས་དགའ་ལྡན་དོས་སྐྱེལ་དུ་གྲགས་པ་ཞལ་ངོ་རིམ་པར་མཛད། ཧོར་རྡོ་རྗེ་ཚེ་བརྟན་དབང་གྲགས་པ་འབྱུང་གནས་སྐུ་མཆེད་ཀྱི་ཞབས་ལ་གཏུགས་ནས་བཀའ་ཁྲིམས་སྒྱུར་བའི་བློན་པོ་མཛད། ཕྱིང་བར་སྟག་རྩེའི་གླང་པོ་ཆེ་ལྟ་བུའི་ངོས་སུ་རི་བོ་བདེ་ཆེན་གྱི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས། ཐོན་མི་སམྦྷོ་ཊའི་གདུང་ལས་གནས་ལྔ་རིག་པའི་པཎྜི་ཏ་ཆེན་པོ་བྱམས་པ་གླིང་པ་བསོད་ནམས་རྣམ་པར་རྒྱལ་བ་མི་ཕམ་དགའ་བའི་བཤེས་གཉེན་སྤྱན་དྲངས་ནས་རབ་ཏུ་གནས་པ་མཛད། འཕགས་པའི་ཡུལ་གྱི་མཁས་གྲུབ་རྣམས་ཀྱི་གསུང་གངས་ཅན་གྱི་ལྗོངས་འདིར་འགྱུར་བའི་གླེགས་བམ་རྣམས་ཀྱི་སྟེང་དུ། རྒྱལ་བ་ཙོང་ཁ་པ་ཆེན་པོའི་གསུང་འབུམ་པོ་ཏི་བཅུ་དྲུག་བསྣན་པའི་པུ་སྟ་ཀ་མཁའ་མདའ་མིག་གི་གྲངས་ལྡན་བཞུགས་ཤིང་། བསྟན་འགྱུར་སྔ་མ་རྣམས་ལ་མེད་པའི་སྐད་གཉིས་སྨྲ་བའི་དབང་པོ་ཞ་ལུ་ལོ་ཆེན་གྱིས་བསྒྱུར་བའི་མངོན་པའི་འགྲེལ་པ་གནམ་ལྕགས་ཐོག་གཟེར་ཡང་ཡོད་དོ། །མཆེད་རྣམས་ཀྱི་སྲས། ཚེ་དབང་རྣམ་རྒྱལ་དང་རིན་ཅེན་རྒྱལ་མཆོག་གཉིས་ལས་གཅེན་ནི་རིག་པའི་གནས་བཅོ་བརྒྱད་དང་སྒྱུ་རྩལ་དྲུག་ཅུ་རྩ་བཞི་ལ་མཁས་པར་བྱུང་ཞིང་། ཧོར་རིན་ཅེན་རྒྱལ་མཆོག་ནི་སྲིད་ཞིའི་ཡོན་ཏན་ནོར་བུའི་འཕྲེང་བ་མགྲིན་པའི་དོ་ཤལ་དུ་སྤུད་ཅིང་། དཔའ་མཛངས་རྟུལ་ཕོད་སོགས་ལུགས་གཉིས་ཀྱི་བླ་ན་མཐོ་བའི་གོང་མ་ཆེན་པོས་ཐུགས་ཤིན་ཏུ་འཇོག་པའི་བློན་པོ་རྣམས་ཀྱི་གཙོ་བོ་ལྟ་བུར་གྱུར། གོང་མའི་བཀའ་ཤོག་ཧུང་རྒྱ་མའི་ནང་དུ། དབུས་གཙང་གི་ཆིངས་ཀྱི་སྐོར་ལ་གནས་ཚུལ་དྲི་བར་བཏང་འདུག་པ། འདི་ཚོར་ཆེ་ཆུང་ཇི་འདྲ་ཞིག་བྱེད་ཀྱང་ཁྱོད་རང་ལ་འདྲི་བ་ལས་འོས་མེད་པས་(༩༦ན)

---

^{[མ་དཔེ་གཟིགས་ན་འདིར་གནོན།]}

སྒོ་གང་ཟབ་ཀྱི་ཐག་དེ་ཁ་ནས་ཆོད་གསུང་བ་སོགས་རྒྱལ་པོ་ལས་བློན་པོ་གཙོ་བོའི་གཏམ་ཕྱག་ལེན་དུ་མཛད། སྲོང་བཙན་གཞིས་ཀར་ཞྭ་དམར་ཆོས་ཀྱི་གྲགས་པ་སྤྱན་དྲངས། ཡངས་པ་ཅན་གྱི་ཆོས་སྡེར་མཆོད་གཞིས་སོགས་ཀྱི་མཐུན་རྐྱེན་གོང་སར་ཞུ་བ་གནང་། བདེ་སྐྱིད་གླིང་དུ་སྤྱན་སྔ་བཀའ་བརྒྱུད་བྲིས་འབུར་དང་། བཀའ་འབུམ་ཡོངས་རྫོགས་གསེར་གྱིས་འདྲི་བ་གནང་། ཇོ་མོ་ལ་བསམ་ཡས་རྒྱལ་པོའི་གནོད་པ་བྱུང་བར། གསོལ་ཁ་བཤོལ་ནས་ཨར་ལ་གཏད་པས་ཆོས་སྐྱོང་གིས་ཚུར་བཏུད་དེ། དངོས་གྲུབ་སྟེར་བར་གསུངས་པ་བཞིན་ཉི་མ་གཅིག་ལ་རྫོང་བཅུ་གསུམ་བླངས། དབུས་གཙང་གི་ཆིངས་བདག་མཛད་པས། གྲམ་པ་ཤར། སྟོད་ལུང་རྨད་སོགས་སྨྱུ་གུ་མཆུ་རིན་ལ་བཞེས། དེའི་སྲས་བསོད་ནམས་མགོན་པོ། ཚེ་དབང་བཀྲ་ཤིས་རིན་ཅེན་ཚེ་བརྟན་རྣམས་ལས། གཅེན་གོང་མའི་ཐུགས་ལ་བཏགས་པས་དམག་དཔོན་གྱི་ལས་ཀ་བཟུང་། སྐྱིད་ཤོད་དཔལ་འབྱོར་ལྷུན་པོ་ཐབ་སྐྱོང་ལ་གནང་། འབྲིང་པོ་འཇིགས་པ་མེད་པ་དཔའ་བོའི་དབང་ཕྱུག་སྟེ། རྒྱལ་པོ་རཱ་མ་ཎ་ལྟར་དགྲ་ཐབས་ལ་མཁས་པས་ཡན་ལག་རྣམ་བཞིའི་ཁྱུ་མཆོག་ཡིན་ལ། ཆུང་བ་ཡང་རྣམ་དཔྱོད་ཟླ་བ་གསར་པའི་ངོས་སུ་གཙུག་ལག་རི་དྭགས་ཀྱི་གཟུགས་བརྙན་འཆར་བ་ཞིག་གོ །མཆེད་རྣམས་ལ་བྱ་བཀྲ་ཤིས་དར་རྒྱས་ཀྱི་སྲས་མོ་དོན་ཡོད་སྒྲོལ་མ་ཇོ་མོར་བཞེས་པར་སྲས་ཧོར་བསོད་ནམས་དར་རྒྱས་དང་། དོན་གྲུབ་རྡོ་རྗེ་གཉིས་ལས། གཅེན་ལུགས་གཉིས་ཀྱི་གཙུག་ལག་མཐའ་དག་ལ་མཁྱེན་པའི་སྤྱན་དང་ལྡན་ཞིང་། ཁྱད་པར་བཀའ་བརྒྱུད་ཀརྨ་ཀ་ཚང་གི་རིང་ལུགས་པ་དོན་དང་མཐུན་པའི་མཁས་པའི་དབང་པོ་དཔལ་ཁང་ལོ་ཙཱ་བའི་དྲུང་དུ་ཐུན་མོང་པའི་རིག་པའི་གནས་མཐའ་(༩༦བ)

---

^{[མ་དཔེ་གཟིགས་ན་འདིར་གནོན།]}

དག་ལ་ཕུལ་དུ་བྱུང་བའི་སྦྱངས་པ་མཛད། ཐམས་ཅད་མཁྱེན་པ་བསོད་ནམས་རྒྱ་མཚོ་གདན་དྲངས་ཏེ་དམ་པའི་ཆོས་ཀྱི་བགོ་སྐལ་སྩལ། གཅུང་འཁོར་བའི་ཕུན་ཚོགས་མཐའ་དག་ཆུ་ཤིང་གི་སྙིང་པོ་ལྟར་གཟིགས་ཏེ། སྡོམ་གསུམ་རིམ་གྱིས་མནོས་པའི་གྲུབ་པའི་དབང་ཕྱུག་ཆེན་པོར་གྱུར། ཧོར་བསོད་པའི་ཇོ་མོར་དགའ་ལྡན་པ་ས་སྐྱོང་བཀྲ་ཤིས་རབ་བརྟན་གྱི་ལྕམ་སྲིང་ཚེ་དབང་རྒྱལ་མོ་བླངས་པར་སྲས་བསོད་ནམས་སྟོབས་ཀྱི་རྒྱལ་པོ། ཚེ་དབང་བསོད་ནམས་བསྟན་འཛིན། ཀརྨ་ངག་དབང་གྲགས་པ་གསུམ་གྱི་ཆེ་བ་ཕུན་སུམ་ཚོགས་པའི་གཟི་བརྗིད་ཀྱིས་ནམ་མཁའི་ནོར་བུ་ལ་སྐྱེངས་པ་སྟེར་བར་ནུས་ལ། གཡུལ་ངོར་ཆས་པའི་དྲག་ཤུལ་གྱིས་ཐོབ་རྒྱལ་ལྷ་རྩེའི་རྫོང་མངའ་ཞབས་དང་བཅས་པ་ཆབ་འོག་ཏུ་བཙུད། དུས་གསུམ་མཁྱེན་པ་མཚོ་སྐྱེས་རྡོ་རྗེའི་རིང་ལུགས་པ་སློབ་དཔོན་བཻ་རོ་ཙ་ནའི་ཐུགས་སྤྲུལ་གཏེར་སྟོན་ཤེས་རབ་འོད་ཟེར་ཏི་ཤྲིར་བསྟེན་ནས། ས་འཛིན་དཔལ་གྱི་རི་ལ་ཐེག་མཆོག་སྒྲུབ་པའི་འདུས་སྡེ་བཏབ། ཤེར་ཕྱིན་སུམ་བརྒྱ་པ། ཤེལ་བྲག་གི་ཐང་ཡིག །སེམས་ཉིད་ངལ་གསོ་རྣམས་པར་དུ་བཞེངས། འབྲུག་ནས་སྤྲུལ་པའི་སྐུ་ཀུན་མཁྱེན་ངག་དབང་ནོར་བུ་སོགས་དམ་པ་དུ་མ་ལ་ཕུ་དུད་མཛད། དཀར་ཕྱོགས་རྫོགས་པ་གཉིས་པའི་ཚེས་ལ་དཔའ་བོ་མཁའ་འགྲོའི་དགའ་སྟོན་སྤྲོས་བཅས་དང་སྤྲོས་མེད་ཀྱི་ཟློས་གར་ལེའུ་བརྒྱད་པའི་ཆོག་བསྒྲིགས་བཞིན་བཙུགས། གདན་ས་ཆེན་པོ་རི་བོ་དགའ་ལྡན་གྱི་ཤར་པ་ཆོས་རྗེ་ནམ་མཁའ་རྒྱལ་མཚན་ཞེས་རིག་པའི་གནས་ལྔ་ལ་མ་རྨོངས་པའི་མཁས་པ་དེ་སྤྱན་དྲངས་ནས་རི་བོ་བདེ་ཆེན་སེར་ཁྱིམ་པ་ལྟ་བུར་སོང་བ་སླར་གཙང་དགོན་མཛད། འབྲིང་པོས་རྒྱལ་བའི་བསྟན་པ་(༩༧ན)

---

^{[མ་དཔེ་གཟིགས་ན་འདིར་གནོན།]}

སྤྱི་དང་། ཁྱད་པར་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བསྟན་པ་ལ་རྨད་དུ་བྱུང་བའི་བཀུར་སྟི་དང་ཕུ་དུད་མཛད། ཆུང་བ་གཙུག་ལག་རྩིས་ཀྱི་གཞུང་ལུགས་ལ་མཁྱེན་པའི་སྤྱན་ཡངས་སོ། །མཆེད་རྣམས་ལ་ཇོ་མོ་འོད་གསལ་ལྷའི་གདུང་བརྒྱུད་མི་དབང་བྱམས་པ་རབ་བརྟན་གྱི་སྲས་མོ་དོན་གྲུབ་བླངས་པར་སྲས་ངག་གི་དབང་པོ་བསོད་ནམས་གྲགས་པ་འཇིག་རྟེན་དགའ་བའི་རྒྱན་དང་། ལྷའི་དབང་ཕྱུག་མཆེད་གཉིས་དང་ལྕམ་གསུམ་འཁྲུངས། དང་པོ་ནི། ལྷུམས་སུ་ཞུགས་པའི་སྐབས་མཚན་མ་ཁྱད་པར་ཅན་མང་དུ་བྱུང་ཞིང་། ལུགས་གཉིས་ལ་མཁྱེན་པའི་སྤྱན་ཡངས། འཆི་མེད་གྲུབ་པའི་རིང་ལུགས་པ་ཆོས་རྒྱལ་ཁྲི་སྲོང་ལྡེའུ་བཙན་གྱི་ཡོན་ཏན་གྱི་སྤྲུལ་པ་བྱང་པ་བདག་ཆེན་ཏི་ཤྲིར་བསྟེན། ཁྱད་པར་གསང་ཆེན་རྡོ་རྗེ་ཐེག་པ་ལ་རྩལ་དུ་ཐོན་པས་རིམ་གཉིས་ཀྱི་རྣལ་འབྱོར་ཟབ་མོ་ལ་ཐུགས་དམ་གྱི་མཐིལ་དུ་མཛད། ཡི་དམ་དང་ཆོས་སྲུང་གི་གནང་བ་ཐོབ་པས་ལྷ་སྲིན་དྲན་དུ་འཁོལ་ནུས་པའི་མཐུ་སྟོབས་དབང་ཕྱུག་གི་སྙན་པ་ཆེ་ཞིང་། སྟག་རྩེ་ལ་ཞུགས་ཀྱི་གནོད་པ་བྱུང་སྐབས། སྔགས་ཆས་ཀྱི་ན་བཟའ་སྐོར་རྣམས་མ་ཚིག་ཅིང་། ཞལ་དཀར་མ་ཆག་པ་སོགས་བྱིན་རླབས་དང་ཐུགས་རྗེའི་ངོ་མཚར་བླ་ལྷག་ཏུ་ཆེ། མེའི་གནོད་པ་འདི་ཡང་། རིག་པ་འཛིན་པའི་དབང་ཕྱུག་འདི་ཉིད་ཟ་ཧོར་རྒྱལ་པོ་གཙུག་ལག་འཛིན་གྱི་སྐྱེ་བའི་མཐའ་མ་ཡིན་པས་ལས་ཀྱི་རྣམ་པར་སྨིན་པའི་མཐའ་བརྟུལ། པདྨ་འོད་ཀྱི་གཞལ་ཡས་སུ་ཐེགས་ཁར། དྲུང་འཁོར་འགའ་ཞིག་ལ་སློབ་དཔོན་ཆེན་པོའི་རྣམ་ཐར་ཞལ་ཐང་གྲ་ཚར་ཁྲོད་ནས་གང་ཟིན་པ་ཞིག་ཁྱེར་ཤོག་གསུང་བ་ལྟར་ཕྱག་ཏུ་ཕུལ་བས། སློབ་དཔོན་རྒྱལ་སྲིད་སྤངས་ནས་བརྟུལ་ཞུགས་(༩༧བ)

---

^{[མ་དཔེ་གཟིགས་ན་འདིར་གནོན།]}

ཀྱི་སྤྱོད་པ་མཛད་པའི་ཐད་དེ་འབྱུང་ན་ནས། ད་བུ་ཆུང་གིས་ཀྱང་སྡེ་སྲིད་འདི་ཟིན་པ་ཞིག་མི་འོང་བར་འདུག་གསུང་བ་སོགས་མ་འོངས་པ་མངོན་སུམ་དུ་མཁྱེན་པའི་བཀའ་སྩལ་ཏོ། གཅུང་ནི་ཐུན་མོང་བའི་གཙུག་ལག་རྣམས་ལ་བློ་གྲོས་པད་དཀར་རྣམ་པར་སྤྲོ་ཞིང་། མཆོད་སྦྱིན་བརྒྱ་པའི་དཔུང་ཚོགས་རྩུབ་འགྱུར་གྱི་ཚལ་དུ་སླེབ་པ་ལྟ་བུར་ཤུགས་དྲག་དམག་གི་སྦྱོར་བ་ལ་སྙིང་སྟོབས་ཀྱི་གོ་ཆ་བཙན་པོ་གྱོན་པ་ཞིག་སྟེ། མཆེད་གཉིས་སྲས་དང་བཅས་པ་རིམ་པར་བྱོན་ནོ། །ཏའི་སི་ཏུའི་བློན་པོ་དྲུང་ཆེན་གྲགས་པ་བཟང་པོ་ནི། ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་མཁན་སློབ་རྣམ་གཉིས་ཀྱི་སློབ་མ་གྲུབ་པའི་དབང་ཕྱུག་ཉང་ཏིང་འཛིན་བཟང་པོའི་གདུང་ལས་རིམ་པར་བརྒྱུད་དེ། བཙན་ཐང་ཤར་ཕྱོགས་སུ་ཉང་གྲགས་པ་བཟང་པོ་འཁྲུངས། གོང་མ་ཏའི་སི་ཏུའི་ཞབས་ལ་གཏུགས་ཏེ་འོལ་ཁ་སྟག་རྩེའི་རྫོང་དཔོན་མཛད། དེའི་སྲས་བཙན་ཐང་སྒོམ་གྲགས་དང་སྒོམ་ཤེ་གཉིས་ཀྱིས་ཡར་ཀླུངས་མགོན་ནག་གི་སྲས་མོ་བཀྲ་ཤིས་སྐྱིད་མོ་ཇོ་མོར་བླངས་པ་ལ་སྲས་དྲུང་ཆེན་ཤེས་རབ་བཀྲ་ཤིས། ཀུན་གྲགས་པ། ཀུན་དབང་བ་གསུམ་ལས། འབྲིང་པོས་འོལ་ཁ་རྩེའི་རྫོང་དཔོན་དང་། ཆུང་བས་རྩེས་ཐང་དུ་སློབ་གཉེར་མཛད། ཤེས་རབ་བཀྲ་ཤིས་གོང་མའི་ཞབས་ལ་གཏུགས། ས་སྐྱ་པ་བླ་མ་ཀུན་དགའ་རྒྱལ་མཚན་དང་། ཚལ་པ། གཡའ་བཟང་པ་སོགས་ཀྱིས་ཧོར་རྒྱལ་པོ་ལ་ཞུ་ལོག་ཕུལ་བས། དགོངས་པ་དག་བྱེད་ཀྱི་རྒྱུ་མཚན་འབུལ་བར་ཤེར་བཀྲས་པས་ལུས་སྲོག་ལ་བལྟོས་པ་མེད་པར་ཧོར་རྒྱལ་པོ་ཐོ་གན་ཐི་མུར་གྱི་དྲུང་དུ་བྱོན། རྒྱུ་མཚན་འབུལ་མཁས་པས་འཕྲལ་ཡུན་དུ་ཕན་པའི་འཇའ་ས་འགྲུབ། སྡེ་སྲིད་ཀྱི་ཞབས་ཏོག་ཏུ་འགྱུར་བ་བྱུང་བར་དཔགས། གཞིས་(༩༨ན)

---

^{[མ་དཔེ་གཟིགས་ན་འདིར་གནོན།]}

ཀ་བྲག་དཀར་ཁྱོད་ཤེས་རབ་བཀྲ་ཤིས་མི་བརྒྱུད་དང་བཅས་པས་ཤེས་སུ་ཆུག་གི་བཀའ་ཤོག་གནང་། དེའི་སྲས་དྲུང་རིན་ཅེན་དཔལ་དང་། དགེ་སློང་གཉིས་ལས་ཆེ་བ་ལ་གོང་མ་ཆོས་རྒྱལ་ཆེན་པོས་རྫོང་དཔོན་གྱི་ལས་ཀ་གནང་། རྒྱལ་བ་ཙོང་ཁ་པ་ཆེན་པོའི་སྦྱིན་བདག་གི་མཐིལ་ལེན་མཛད་ནས། རི་བོ་དགའ་ལྡན་གྱི་དགོན་པ་འདེབས་པའི་མཐུན་རྐྱེན་སྔ་ཕྱིར་བསྒྲུབས། དེ་ལ་འཕྱོང་རྒྱས་ནས་ཇོ་མོ་སངས་རྒྱས་མ་བླངས་པར་སྲས་རིན་ཅེན་ལྷུན་པོ། ལྷུན་གྲུབ་པ། གྲགས་པ་རྒྱལ་མཚན། དངོས་གྲུབ། ཀུན་དགའ་འཛོམ་པ་རྣམས་ལས། ཆེ་བ་གོང་མ་ཆེན་པོས་རྫོང་དཔོན་དུ་བསྐོ་བཞག་གནང་། རི་བོ་དགའ་ལྡན་གྱི་རྩ་བའི་སྦྱིན་བདག་མཛད། དེ་འོག་གོང་མའི་གསོལ་དཔོན་གྱི་ལས་ཀ་བཟུང་། དེ་འོག་རབ་ཏུ་བྱུང་སྟེ་གསུང་རབ་ལ་སྦྱངས་ནས་སེ་ར་ཐེག་ཆེན་གླིང་གི་གདན་ས་མཛད། དེ་འོག་ཆེ་ས་སངས་རྒྱས་རྒྱལ་མཚན་གྱི་གསོལ་དཔོན་དང་། དེ་འོག་གོང་མ་ཀུན་དགའ་ལེགས་པས་རྫོང་དཔོན་གྱི་ལས་ཀ་གནང་། མཆེད་རྣམས་ལ་གཞིས་ཀ་རིན་སྤུངས་ནས་སྲས་མོ་ལྷ་མོ་ཆོས་སྐྱོང་ཇོ་མོར་བླངས་པ་ལ། ནང་སོ་དཀོན་ཅོག་པ་དང་སྲི་ཆོད་རྒྱལ་པོ་གཉིས་ལས། ཆེ་བས་རབ་ཏུ་བྱུང་། ཆུང་བ་ལ་ཚེས་གཉིས་རིན་པོ་ཆེས་རྫོང་དཔོན་གྱི་ལས་ཀ་གནང་། གནས་རྙིང་ཀུན་དགའ་བདེ་ལེགས་དང་། ཆོས་རྗེ་སྨོན་ལམ་དཔལ་བ་སོགས་མཁས་པ་རྣམས་ལ་དམ་པའི་ཆོས་ཀྱི་གསན་པ་མང་དུ་མཛད། དེ་ལ་རྒྱ་མ་བའི་སྲས་མོ་བུ་ཁྲིད་ཁབ་ཏུ་བཞེས་པ་ལ། ནང་སོ་འཇམ་དཔལ་ཚེ་རིང་། བདུད་འདུལ་རྒྱལ་པོ། མ་ཞིག་པ། བསོད་ནམས་རྒྱལ་པོ། ལྕམ་གཉིས་དང་དྲུག་ལས། འཇམ་དཔལ་བའི་ཇོ་མོར་ཡར་རྒྱབ་ནས་ཚེ་རིང་དཔལ་འཛོམ་བླངས་པར། (༩༨བ)
སྲས་ཚེ་བརྟན་རྡོ་རྗེས་རྫོང་དཔོན་གྱི་ལས་ཀ་བཟུང་། ཆབ་སྲིད་བསྐྱངས་སོ། །

གཞིས་ཀ་སྣེལ་པ་དང་། རྒྱལ་མཁར་རྩེ་པ། འོལ་ཁ་བ་སོགས་ཀྱི་སྐོར།

---

^{[མ་དཔེ་གཟིགས་ན་འདིར་གནོན།]}

གཞིས་ཀ་སྣེལ་པ་དང་། རྒྱལ་མཁར་རྩེ་པ། འོལ་ཁ་བ་སོགས་ཀྱི་སྐོར།གཞིས་ཀ་སྣེལ་པ་ནི། ཆེན་པོ་རིན་ཅེན་བཟང་པོས་གོང་མ་སི་ཏུའི་ཞབས་ལ་གཏུགས། ས་སྐྱར་དམག་ལ་འབྱོན་སྐབས། སི་ཏུས་ཕག་གྲུའི་ཁྲི་དམག་རྣམས་ཀྱིས་ཆེན་པོ་ལ་ཕྱག་འཚལ་དགོས་པ་སོགས་གསུངས་ནས་དཔོན་ཚབ་དུ་བསྐོས། དུས་དེར་དཔོན་ཆེན་བཟུང་བ་སོགས་ཇུས་ཀྱི་འགྲོ་ཁྱབ་ཆེ་བ་བྱུང་། ས་སྐྱ་པ་དང་ཧོར་རྒྱལ་པོ་མཆོད་ཡོན་དུ་འབྲེལ་བའི་དུས་ཀྱི་ནོར་སྣ་ཁྱད་འཕགས་རྣམས་དབུས་སུ་དྲངས། དཔོན་ཆེན་རྣམས་ཀྱིས་གཙོས་པས་གཞན་སྡེ་རྣམས་ལ་ཁྲིམས་ར་ཉི་མ་བཅུ་གསུམ་བསྒྱུར་ཅིང་བྱ་ཁྲ་མའི་སྟེང་དུ་མི་ལྔ་བརྒྱ་ཙམ་ཁྲིམས་ལ་སྦྱར་བའི་དྲག་ཤུལ་གྱིས་འབོད་གྲོགས་ཀྱང་འདར། སྐམ་པོ་གྲོང་དུ་སྒེར་གཞིས་ཀྱི་མཁར་ལས་མཛད། བྱ་སར་སྒེར་གྲུ་བཙུགས། ཡོན་བདག་བློ་བདེའི་སྲས་མོ་བདེ་སྐྱིད། ཁམས་མོ། དཔོན་མོ་དཔལ་ལྡན་འབུམ་གསུམ་ཇོ་མོར་བླངས་པ་ལས། དང་པོ་ལ་རྒྱལ་བ་རིན་ཆེན། དྲུང་ནམ་མཁའ་བཟང་པོ། གཉིས་པ་ལ་དཔོན་ཤག་པ། གསུམ་པ་ལ་དཔལ་ལྡན་ཆོས་སྐྱོང་དང་། བསོད་ནམས་བཟང་པོ་འཁྲུངས། དཔལ་ལྡན་ཆོས་སྐྱོང་གི་ཉང་སྨད་བསམ་གྲུབ་རྩེའི་རྫོང་དཔོན་ཐོག་ཅིག་མཛད། དྲུང་ཆེན་དཔོན་གྲགས་པས་གོང་མའི་ཞབས་ལ་གཏུགས། སྤྱན་སྔ་གྲགས་པ་བྱང་ཆུབ་དང་། རྫོང་ཕྱི་རྒྱལ་མཚན་བཟང་པོ་དཔོན་བློན་བཀའ་བགྲོས་ཐོག་སྣེའུའི་རྫོང་དཔོན་དུ་བསྐོས། གོང་དཀར་ནས་སྒོམ་ལོག་ཆོས་རྒྱལ་གཅུང་པོ་རྩེས་ཐང་དགེ་བསྙེན་དང་། པ་སྡེ་མཁན་པོས་གཙོས་པའི་དམག་གི་སྦྱོར་བ་བཤམས་པ་མཚོ་སྣ་གདོང་དུ་སླེབས་སྐབས། དཔོན་གྲགས་པ་རང་གིས་དམག་དཔོན་མཛད་ནས་འཁྲུགས་པས་རྒྱལ་ཏེ། པ་སྡེ་མཁན་(༩༩ན)

---

^{[མ་དཔེ་གཟིགས་ན་འདིར་གནོན།]}

པོས་གཙོས་པའི་མི་དྲུག་ཅུ་ཙམ་ལྔ་པའི་ལམ་དུ་བཏང་། དེ་རྗེས་སྟོད་པ་འཇམ་དཔལ་གྱི་ཐོག་ཏུ་དཔུང་བཏེག །གཉའ་གནོན་དུ་གཞིས་ཀ་སྨོན་མཁར་བརྩིགས། ལྷ་ལྡན་སྤྲུལ་པའི་གཙུག་ལག་ཁང་གི་གྱོ་ཐོག་རྡོ་གཅལ་གསར་རྗེས་ཁྱམས་ར་དང་། བར་བསྐོར་གྱི་ཐོག་འབུབས། ལྡེབ་བྲིས། གོང་མ་སི་ཏུའི་དགོངས་རྫོགས་སུ། ཆོས་རྫོང་། བཀྲ་ཤིས་སྒང་། བྲག་ནག །དབུས་གླིང་སོགས་སྐྱིད་ཤོད་སྟོད་སྨད་ཀྱི་སྔགས་གྲྭ་རྣམས་སུ་དཀྱིལ་འཁོར་སྒྲུབ་མཆོད་བཙུགས། བྱམས་པ་ཆོས་འཁོར་གྱི་དྲུང་དུ་དགེ་འདུན་བཞི་སྡེས་བྱམས་པས་དམ་བཅས་པའི་གཟུངས་སྨོན་ལམ་དང་བཅས་པའི་རྒྱུན། དུང་མཚོར་སྔར་དུང་མཚོ་རས་པས་ངན་སློང་ལ་སྐྱོ་ཚུལ་བཙུགས་པ་བར་སྐབས་སུ་ཆད་པ་གསེར་བྲེའི་ནས་ཁལ་ལྔ་བཅུ་ལྔ་བཅུས་ལོ་ལྟར་དུ་གསོས། ཆེན་པོ་རིན་བཟང་པ་ཡབ་ཡུམ། རྒྱལ་བ་རིན་ཅེན་སྐུ་མཆེད་ཀྱི་སྒྲིབ་སྦྱོང་ལ། ཇོ་བོ་རྣམ་གཉིས་དྲུང་དུ་སྨན་བླ་འདོན་པའི་རྒྱུན། གསང་ནེའུ་ཐོགས་སོགས་དགེ་འདུན་གྱི་སྡེ་རྣམས་སུ་མཐུན་རྐྱེན་སྦྱོར་བ་སོགས་རྣམ་དཀར་གྱི་ལས་གཅིག་ཏུ་དེ་ཆེ། དྲུང་ཆེན་ནམ་མཁའ་བཟང་པོ་གོང་མའི་ལུང་གིས་སྣེའུའི་རྫོང་དཔོན་དུ་བྱོན། རྒྱལ་བ་ཙོང་ཁ་པ་ཡབ་སྲས་ལ་རྩ་བའི་བླ་མར་མཛད། ཁྱད་པར་དཔལ་ལྡན་འབྲས་སྤུངས་ཀྱི་ཆོས་སྡེ་ཆེན་པོ་འདེབས་པའི་མཐུན་རྐྱེན་ཕུལ་དུ་བྱུང་བ་དང་། རྟ་ཆེན་གྱི་ཟླ་བའི་ཆོ་འཕྲུལ་གྱི་དུས་ཁྱད་པར་ཅན་ལ་འགྲོ་བའི་བསོད་ནམས་དམོད་པར་བསྐྲུན་པའི་ཐབས་དམ་པ་ལྷ་ས་སྨོན་ལམ་ཆེན་མོ་འཛུགས་པའི་མཐིལ་ལེན་མཛད། འདི་ཉིད་ཀྱིས་ལྕམ་རིན་ཅེན་སྒྲོལ་མ་ཇོ་མོར་བླངས་པར། དྲུང་ཆེན་ནམ་མཁའ་དཔལ་འབྱོར་འཁྲུངས། གོང་མ་གྲགས་པ་རྒྱལ་མཚན་གྱིས་རྫོང་དཔོན་གྱི་ལས་(༩༩བ)

---

^{[མ་དཔེ་གཟིགས་ན་འདིར་གནོན།]}

ཀ་གནང་། གསེར་གྱི་བཀའ་འགྱུར་བཞེང་བ་དང་། འཕྲུལ་སྣང་གཙུག་ལག་ཁང་རྟེན་དང་བརྟེན་པར་བཅས་པའི་ཞབས་ཏོག །དཔལ་ལྡན་འབྲས་སྤུངས་ཀྱི་ཆོས་སྡེ་ཆེན་པོའི་མཇུག་ཆགས་རྣམས་མཛད། དཔོན་གྲགས་པས་ཚལ་པ་དཔོན་མོ་ཇོ་མོར་བླངས་པའི་སྲས། དྲུང་ཆེན་གྲགས་པ་དཔལ་བཟང་གིས་གོང་མ་གྲགས་འབྱུང་བའི་ཞབས་ལ་གཏུགས། སྟག་སྣའི་དམག་རེས་བྱེས་གཉེར་དང་། ཁྲིམས་ལས། གསོལ་དཔོན་སོགས་ལས་ཚན་རིམ་པར་མཛད། རྒྱལ་མཁར་རྩེའི་སྲས་མོ་སྐལ་བཟང་མ་ཇོ་མོར་བླངས་ཀྱང་། བར་སྐབས་སུ་བདེ་དོག་ཅི་རིགས་ལ་བརྟེན་རབ་ཏུ་བྱུང་། སླར་ཧོར་ཆས་སུ་བསྒྱུར་ནས་གོང་སས་དུ་དབེན་ཤྲིའི་ལས་ཀ་གནང་། བྱང་སྦྲ་ཐག་འཐེན་ཚད་ཀྱི་དཔོན་དུ་བསྐོས། རིན་སྤུངས་པ་ལ་མཛོ་རིར་ཇུས་ཉེས་ཆེན་པོ་བཏང་བས་དཔའ་གྲགས་ཆེ། དེའི་སྲས་དྲུང་ཆེན་དཔལ་འབྱོར་རྒྱལ་པོ། དབང་གྲགས་འབྱུང་བ་སྐུ་མཆེད་ཀྱིས་རྫོང་དཔོན་གྱི་ལས་ཀ་གནང་། བསྟན་པ་སྤྱི་དང་ཁྱད་པར་རྒྱལ་བ་ཙོང་ཁ་པའི་བསྟན་པ་ལ་ཕུལ་དུ་བྱུང་བའི་བསྟི་སྟང་མཛད། མངའ་ཐང་ཡང་ཤིན་ཏུ་མཐོ་བས། འབྲི་གུང་རྡོ་ཐམ་མན། ཁ་རག་རྡོ་བུག་པ་ཅན་ཡན། ཡར་ཀླུངས་ཁྲ་འབྲུག་ཚུན་ཞེས་ལམ་ཡིག་མཛད་སྐད། འདི་ཉིད་ཀྱི་སྲས། ངག་དབང་བསོད་ནམས་རྒྱལ་པོ། ངག་དབང་བསོད་ནམས་ལྷུན་པོ། ངག་དབང་བསོད་ནམས་རྣམ་རྒྱལ་གསུམ་ལས། དང་པོ་ཆུང་ངུ་ལ་གྲོངས། ཕྱི་མ་གཉིས་ཀྱི་དུས་རིན་སྤུངས་དོན་ཡོད་རྡོ་རྗེས་དཔུང་གི་སྦྱོར་བས་མངའ་ཐང་རྣམས་ཤོར་རོ། །རྒྱལ་མཁར་རྩེ་པ་ནི། སྔོན་འདོད་ཁམས་སྟོད་དུ་དབྲ་རྒོད་ལྡོང་བཙན་བྱ་བ། སྟག་ལྤགས་བརྒྱའི་ཐུལ་བ་གྱོན་པ། དྲེད་ལ་སྦར་འཛིན་བྱེད་པ། ཁྲོམ་གེ་སར་རྒྱལ་པོའི་མག་པ་བྱས་པའི་བུ་ཚ་བརྒྱུད། ཡོན་བདག་(༡༠༠ན)

---

^{[མ་དཔེ་གཟིགས་ན་འདིར་གནོན།]}

འབུམ་ཉེག་བྱ་བའི་སྲས་སློབ་དཔོན་ནམ་མཁའ་བྱང་ཆུབ་བྱ་བ་གསང་སྔགས་རྡོ་རྗེ་ཐེག་པའི་སྒོ་ནས་གྲུབ་པ་བརྙེས་པ་ཞིག་གི་སྲས་སློབ་དཔོན་ནམ་མཁའ་ལྷུན་གྲུབ། དེའི་སྲས་སློབ་དཔོན་ནམ་མཁའ་བཟང་པོ། དེ་ལ་སྲས་བརྩོན་འགྲུས་རྡོ་རྗེ། གྲགས་པ་བརྩོན་འགྲུས། གཞོན་ནུ་འཕགས་གསུམ་ལས། ཆེ་བས་སྣར་ཐང་དུ་རབ་ཏུ་བྱུང་། ཆུང་བས་ཏི་རི་གྲགས་འོད་པའི་ཡིག་དཔོན་མཛད། བར་པ་ལ་སྲས་རྒྱལ་མཚན་ཡིག་རིས་མང་དུ་མཁྱེན། འདི་ཉིད་ཀྱིས་བརྩམས་པའི་བཀའ་པོཏ་ཡང་སྣང་། འདི་ཆོས་རྗེ་ཀརྨ་པ་དང་ཐུགས་འབྲེལ་ཆེ་བས། མཚུར་ཕུའི་བྱང་ཆུབ་ཆེན་པོ་བཞེང་བར་བྱོན་སྐབས། བཟོ་རྒྱུས་ལྡངས་ན་ཁོ་བོས་མདུན་གྱི་ནགས་རི་འདི་ཙམ་བློར་ཤོང་ཞུས་པས། སྤྲུལ་སྐུ་ནགས་རི་པར་གྲགས། འདིས་མ་གཅིག་ལྷ་སྨན་ཇོ་མོར་བླངས་པར་སྲས་དཔལ་ལྡན་བཟང་པོ། དཔལ་ལྡན་རིན་ཆེན། མ་ཟངས་དར་པོ་གསུམ་འཁྲུངས། ཉང་སྟོད་འདུལ་ཆུང་ཆུ་ནུབ་ཀྱི་ནང་ཚན། ལྷན་ཡུལ་སྔོན་མོ་ལུང་རིངས་སུ་བྱོན་པའི་ལམ་ཁར་ལྕགས་པའི་གདུང་བརྒྱུད་འཕགས་པ་རྒྱལ་ལ་དང་མཇལ་ཏེ་མིང་ཞུས་པས། གཅེན་གཉིས་ལ་འཕགས་པ་དཔལ་བཟང་དང་། འཕགས་པ་རིན་ཅེན་དུ་བཏགས། འཕགས་པ་དཔལ་བཟང་གིས་དཔལ་ལྡན་ས་སྐྱ་པའི་ལས་ཚན་བཟུང་གཏམ་ཡིག་རྩིས་གསུམ། མདའ་ཁ་དཔལ་རྩལ་དང་ལྡན་པའི་ཤར་དུང་ལྷོ་དུང་འདུལ་བའི་རྒན་པོར་ས་སྐྱ་ནས་བསྐོན་ཆ་དང་བཅྭ་ཚེ་གནང་། དེ་ནས་བཞི་ཐོག་ཉེ་གནས་ཀྱི་གོ་ས་བཟུང་། པ་ཤི་ད་ར་ཁ་ཆེ་ཤར་ཕྱོགས་གོང་མའི་དྲུང་དུ་བརྫངས་པས། འབྲི་མཚམས་གངས་དཀར་པོ་ཚུར་ཤེས་སུ་བཅུག་པའི་འཇའ་ས་གནང་། གོང་མ་སི་ཏུའི་དྲུང་དུ་བྱོན་པར། སློབ་དཔོན་རྣམ་རྒྱལ། ཤེར་བཟང་། པ་ཤི་དཀོན་(༡༠༠བ)

---

^{[མ་དཔེ་གཟིགས་ན་འདིར་གནོན།]}

ཅོག་རྣམས་ཀྱིས་རིན་སྤུངས་སུ་བསྐོར་ནས། གྲྭ་ཚོང་འདུས་སུ་བསྐྱལ་ཏེ་དམ་གཅུར་བྱས་པ་ལས་གྲོལ་ཏེ་ཡར་བྱོན་སྐབས། ཧོར་རྒྱལ་པོས་ནང་ཆེན་གྱི་འཇའ་ས་གནང་། རྩེ་ཆེན་དང་ཕག་རི་རྣམ་རྒྱལ་གྱི་རྫོང་བརྩིགས། རྒྱལ་རྩེ། སྣ་བོ་རྫོང་གཉིས་ཉི་མ་གཅིག་ལ་འགྲམ་བཏིངས། ཁྱུང་རྩེ་སོགས་རྫོང་མང་དུ་བརྩིགས། རྩེ་ཆེན་གཙུག་ལག་ཁང་བཏབ། བདག་ཆེན་འཕགས་པ་དཔལ་ལ་སྲས་མང་དུ་ཡོད་ཀྱང་། ཇོ་མོ་མ་གཅིག་དཔལ་མ་ལ་ནང་ཆེན་ཀུན་དགའ་འཕགས་འཁྲུངས། དེ་ལ་སྲས་དཔོན་མོ་མགོན་པོ་སོགས་སྲས་ལྕམ་སྲིང་མང་དུ་འཁྲུངས་པ་ལས། བདག་ཆེན་རབ་བརྟན་ཀུན་བཟང་འཕགས་འདི་ཉིད་ཕོ་བྲང་སྣེའུ་གདོང་རྩེར་གོང་མ་གྲགས་པ་རྒྱལ་མཚན་པའི་དྲུང་དུ་བྱོན། གོང་མས་སྣེའུ་གདོང་དགའ་ལྡན་རྩེའི་རྟེན་གསུམ་རྣམས་ཀྱི་ནང་ནས་དཔོན་རབ་བརྟན་དང་ཇི་ལྟར་འདོད་པ་ཞིག་ཁྱེར་གསུངས་པས། ཐུབ་དབང་རྡོ་རྗེ་གདན་ཆུང་མ་ཞིག་ཞུས་པས། ཐུགས་ཉམས་ཆེ་བའི་གྲགས་པ་བྱུང་། དེང་སང་ཡང་རྒྱལ་རྩེའི་ལི་མ་ལྷ་ཁང་དུ་བཞུགས་ཡོད་འདུག་ཅིང་། གཙང་དུ་བྱོན་ནས་གྲོགས་པོ་བརྒྱ་རྩར་རིན་སྤུངས་ནམ་མཁའ་རྒྱལ་པོའི་དཔུང་རྣམས་སྤུབ་སྟེ་མཚན་ཇུས་ལེགས་པ་བྱུང་། མཁས་གྲུབ་རིན་པོ་ཆེ་དང་མཆོད་ཡོན་དུ་འབྲེལ་ནས། དཔལ་འཁོར་བདེ་ཆེན་གྱི་གཙུག་ལག་ཁང་སྡེ་དང་བཅས་པ་བཏབ། སྔགས་གྲྭ་པ་རྣམས་ཀྱིས་དཀྱིལ་འཁོར་མང་པོའི་ཞལ་འབྱེད་དང་། མདོ་གྲྭ་པ་རྣམས་ཀྱིས་དབྱར་ཆོས་ཐོག་བཀའ་པོཏ་རྣམས་ལ་རབ་འབྱམས་གྲྭ་བསྐོར་གྱི་རྒྱུན་སྲོལ་བཙུགས། སྐུ་འབུམ་བཀྲ་ཤིས་སྒོ་མང་དང་གོས་སྐུ་ཆེན་མོ། བཀའ་འགྱུར་རྒྱུན་འཇགས་སུ་བཞེང་བ་སོགས་དབུས་གཙང་གི་སྡེ་དཔོན་ཞིག་ལ་རྣམ་དཀར་གྱི་མཛད་པ་འདི་ཉིད་ཆེ་བར་མངོན། འདིའི་སྲས་རབ་བརྟན་བཀྲ་(༡༠༡ན)

---

^{[མ་དཔེ་གཟིགས་ན་འདིར་གནོན།]}

ཤིས་འཕགས། དེའི་སྲས་དོན་གྲུབ་འཕགས་ནས་བཟུང་སྟེ་བདག་པོ་ཕུན་སུམ་པ་ཡན་ཆད་དུ་མངའ་ཐང་རྒྱུན་གནས་ཤིང་། བར་སྐབས་སུ་དུས་མི་བདེ་བ་འགའ་ཞིག་བྱུང་ཡང་། གོང་མ་སྡེ་སྲིད་ནས་རྒྱབ་གཉེར་མཛད་པས་སྐྱོན་དུ་མ་གྱུར་ཏོ། །སྡེ་པ་འོལ་ཁ་བ་ནི། དྲུང་ཆེན་བཀྲ་ཤིས་རྒྱལ་མཚན་ལ་སྡེ་སྲིད་གོང་མ་གྲགས་པ་རྒྱལ་མཚན་གྱིས་རྫོང་དཔོན་གྱི་ལས་ཀ་གནང་། ཆོས་རྗེ་བཟང་སྐྱོང་པས་ཉི་མ་གླིང་གི་དགོན་པ་འདེབས་པའི་སྦྱིན་བདག་གི་མཐིལ་མཛད། རིན་པོ་ཆེའི་ཁུ་བས་བྲིས་པའི་བདེ་བར་གཤེགས་པའི་བཀའི་གླེགས་བུ་ཁ་བས་བསྐོར་བའི་ལྗོངས་སུ་འགྱུར་རོ་ཅོག་བཞེང་བ་སོགས་སྐུ་ཚེའི་སྟོད་ལ་རྒྱལ་སྲིད་ཆོས་བཞིན་དུ་བསྐྱངས་ཤིང་། རྗེས་སུ་རིགས་ཀྱི་སྲས་ནར་སོན་པ་དང་། ཆོས་རྗེ་རྒྱལ་ཚབ་པའི་དྲུང་དུ་བསྟན་པའི་རྩ་བ་སོ་སོར་ཐར་པའི་སྡོམ་པ་མནོས། འོལ་ཁ་དགེ་སྦྱོང་ཆེན་པོར་སྐྱེ་བོ་རྣམས་གླེང་། དེ་རྗེས་ནོར་བཟང་པ་དང་། རྒྱ་མཚོ་བ་མཆེད་ཀྱིས་སྲིད་བསྐྱངས་ཤིང་སྡེ་པ་རྒྱ་མཚོ་པ་ལ་གོང་མ་ཆེན་པོས་དམག་དཔོན་གྱི་ལས་ཀ་གནང་བས། གཞན་སྡེ་འཇོམས་པ་ལ་སྙིང་སྟོབས་ཀྱི་རྩལ་དང་ལྡན་སྐད། དེ་ནས་མཁན་ཆེན་པས་མཆོད་ཁང་དང་། རྗེ་བཙུན་མི་ཕམ་མགོན་པོའི་སྐུའི་སྣང་བརྙན་བཞེང་བ་སོགས་གོང་མའི་རྒྱུན་བཟང་པོ་བཟུང་། དེ་རྗེས་དོན་ཡོད་རྣམ་རྒྱལ་རྡོ་རྗེས། མཁས་ཤིང་གྲུབ་པའི་དབང་ཕྱུག་རྗེ་བཙུན་ནོར་བཟང་རྒྱ་མཚོ་ཞེས་དང་པོའི་སངས་རྒྱས་དཔལ་དུས་ཀྱི་འཁོར་ལོའི་གཞུང་ལུགས་སྔོན་ཆད་གངས་ཅན་པ་རྣམས་ཀྱིས་མ་རྟོགས་པ་དང་ལོག་པར་རྟོགས་པའི་ཐེ་ཚོམ་གྱི་དྲ་བ་མཐའ་དག་དྲུངས་ནས་འབྱིན་པའི་ཤིང་རྟ་ཆེན་པོ་དང་། ཐམས་ཅད་མཁྱེན་པ་དགེ་འདུན་རྒྱ་མཚོ་རྣམས་ལ་གུས་མཆོད་ལྷུར་ལེན་ཞིང་། (༡༠༡བ)

---

^{[མ་དཔེ་གཟིགས་ན་འདིར་གནོན།]}

ཁྱད་པར་གསང་བ་མཁའ་འགྲོའི་སྦས་པའི་བསྟི་གནས་ཆོས་འཁོར་རྒྱལ་གྱི་འདུས་སྡེ་རྟེན་དང་བརྟེན་པར་བཅས་པ་ལ་འཚོ་བའི་ཡོ་བྱད་བཟང་པོ་གོང་འཕེལ་དུ་སྦྱར་བ་སོགས་དགེ་བའི་ལས་ཀྱི་ཤུགས་ཟད་པ་མེད་པའི་རལ་གྲིས་མུ་མཐའ་མེད་པའི་འཁོར་བ་ནགས་ཀླུང་སྟུག་པོའི་མཐའ་དབྲལ་ཏེ། སྲས་ཕུན་ཚོགས་རབ་བརྟན་གཤེགས་པར་བརྟེན། ཞལ་ངོའི་བརྒྱུད་རིང་བར་མ་བྱུང་ཡང་། ཕྱིས་སུ་འོད་གསལ་ལྷ་ལས་བབས་པའི་ས་སྐྱོང་པ་དང་ཁྱོན་གཅིག་པར་གྱུར་ཏོ། །ཡར་རྒྱབ་པ་ནི། ཆོས་ཀྱི་རྒྱལ་པོ་སྲོང་བཙན་སྒམ་པོའི་བློན་པོ་ཐོན་མི་སཾ་བྷོ་ཊ་ཞེས་བྱ་བ་འཇམ་དབྱངས་ཀྱི་རྣམ་པར་སྤྲུལ་པ། སྔར་བོད་དུ་ཡི་གེའི་སྲོལ་མེད་པ་ལ། རྒྱ་ཡིག་ལྔ་བཅུ་ཐམ་པ་བོད་ཡིག་སུམ་ཅུར་གཏན་ལ་འབེབས་པའི་ཤིང་རྟ་ཆེན་པོ་དེ་ཉིད་ཀྱི་གདུང་བརྒྱུད་ཡིན་ལ། ཁ་ཅིག་བྷོ་ཊ་ཞེས་སྨྲ་བ་ནི་མི་རིགས་པར་སཾ་བྷོ་དྲར་འདོད་པ་མཆིས་ནའང་སཾ་བྷོ་ཊ་ཞེས་གངས་རིས་བསྐོར་བའི་ལྗོངས་འདིར་ལེགས་པར་སྦྱར་བ་ལྷའི་སྐད་སྨྲ་བ་ལ་འགྲན་པའི་ཟླ་ཐམས་ཅད་དང་བྲལ་བ་ཞུ་ཆེན་གྱི་ལོ་ཙཱ་བ་ཆེན་པོ་ཞ་ལུ་བ་ཆོས་སྐྱོང་བཟང་པོས་མཛད་པའི་བརྡ་སྤྲོད་པའི་བསྟན་བཅོས་ཟ་མ་ཏོག་ཏུ། གངས་ཅན་ཁྲོད་པའི་བླ་མ་མཆོག །སཾ་བྷོ་ཊ་ཞེས་རབ་གྲགས་པའི། །ཞེས་གསུངས་པས་སོ། །ཆོས་བློན་ཆེན་པོ་འདི་ཉིད་ཀྱི་སྲས་མ་ཧཱ་ས་ཏྭ། དེའི་སྲས་ཡེ་ནག །དེའི་སྲས་ཉི་མ་ཀློང་གསལ། དེའི་སྲས་བེར་ནག་ཅན། དེའི་སྲས་མོན་མོ། དེའི་སྲས་གཙོ་བོ་ལྷ་སྲས། འདི་རྣམས་དགུང་ལོ་བརྒྱ་ལྷག་ཙམ་བཞུགས་པ་ཤ་སྟག་བྱུང་། དེའི་སྲས་བསོད་ནམས་རྒྱལ་པོ། དེའི་སྲས་རྒྱལ་པོ་དགའ། དེའི་སྲས་རྟ་མགྲིན་རྒྱལ་མཚན། དེའི་སྲས་རྡོ་རྗེ་བཀྲ་ཤིས། འདིས་དཔལ་ལྡན་ས་སྐྱར་ཏི་ཤྲི་ཀུན་བློའི་ཞབས་ལ་གཏུགས། དེ་ཉིད་ཀྱི་ཧོར་རྒྱལ་པོའི་(༡༠༢ན)

---

^{[མ་དཔེ་གཟིགས་ན་འདིར་གནོན།]}

དྲུང་དུ་བརྫངས་པས། དུ་དབེན་ཤའི་བྱ་ལས་ཆེན་པོ་གནང་། དེའི་སྲས་དཔོན་བཞི་འཛོམ། གོང་མ་གྲགས་པ་རྒྱལ་མཚན་གྱིས་གཞིས་ཀ་གོང་དཀར་གྱི་རྫོང་དཔོན་ལ་བསྐོས། དེའི་སྲས་རྒྱལ་བ་ཤེས་རབ། དེའི་སྲས་དཔོན་ཆེན་གྲལ་ལྔ། འདི་ཉིད་ཀྱིས་སྐུ་ཚེའི་སྟོད་ལ་གོང་མ་གྲགས་པ་འབྱུང་གནས་ཀྱིས་ཡར་རྒྱབ་དཔོན་ཆེན་དང་གོང་དཀར་རྫོང་དཔོན་གྱི་ལས་ཀ་གནང་། འོན་ཀྱང་སྤྲུལ་པའི་གང་ཟག་ཁྱད་པར་དུ་འཕགས་པ་ཡིན་པས། སྐུ་ཚེའི་སྨད་ལ་རབ་ཏུ་བྱུང་བ་སྟེ་གསང་བ་སྔགས་ཀྱི་ཆོས་སྡེ་གོང་དཀར་རྡོ་རྗེ་གདན་དུ་གྲགས་པའི་ངོ་མཚར་ཅན་དེ་བཏབ། འདི་ཉིད་ཀྱིས་དཔོན་སྲས་ནས་བཟུང་སྟེ། སྡེ་པ་རྣམ་རྒྱལ་བ་སྐུ་མཆེད་ཀྱི་བར་དུ་མངའ་ཐང་ཡར་རྒྱས་སུ་གནས་སོ། །བྱ་པ་ཁྲི་དཔོན་ནི། ཡུལ་ཡར་ཀླུངས་ཀྱི་སྨད། མ་ཡུལ་ལྗོངས་ཀྱི་འདབས་སུ་བྱའི་རྒྱལ་པོ་གཤོག་བཟང་དང་འདབ་བཟང་གི་རིགས་ལས་མཆེད་པ་མང་དུ་བྱུང་བས་བྱ་བ་ཞེས་གྲགས་ལ། ཡར་ཀླུངས་མཐིལ་དུ་རྣམ་སྨིན་བསྐྱེད་པ་ཡིན། །གློ་བུར་རྒྱལ་པོ་བྱ་མིག་མས་ཀྱིས་འགེབས། །ཞེས་པའི་ལུང་བསྟན་དུ་གླེང་། ཡུལ་དེར་བྱ་ཆོས་ཀྱི་ཀ་བ་དང་། གཅུང་ཐོད་པ་གཡུའི་སྨིན་མ་ཅན་མཆེད་གཉིས་ལས། ཆུང་བའི་སྲས་མཁན་པོ་ཡོན་ཏན་མཆོག་དང་། བྱ་ཤཀ་གཉིས་འཁྲུངས་པས་གཅེན་གྱི་འབྲིང་སྡེ་ལ་རབ་ཏུ་བྱུང་། ཨེ་ནས་ཀློགས། བྱར་ནས་ཤར་མདའ། དྭགས་པོ་ནས་གྲོམ་མདའ། གཉལ་ནས་སྲིན་མོ་མིག་རྣམས་བཟུང་། བྱ་ཤ་ཀ་ལ་སྲས་རྡོ་རྗེ་ལེགས་པ་དང་རྡོ་རྗེ་དབང་ཕྱུག་གཉིས་བྱུང་བ་གཉལ་ཕྱོགས་སུ་བྱོན། རྒྱ་མཚོ་གྲོང་མཁར་བཏབ། གཅུང་གི་སྲས་བླ་མ་བྱ་ནག་ཆེན་པོ་རིན་ཅེན་འོད་འཁྲུངས། ཁ་ཆེ་པཎ་ཆེན་དང་མཇལ་ནས་སྤྱོད་རྒྱུད་དཀྱིལ་འཁོར་བཅུ་གཉིས་ཞུས། (༡༠༢བ)

---

^{[མ་དཔེ་གཟིགས་ན་འདིར་གནོན།]}

གཞན་ཡང་རྒྱལ་བ་ཐོག་རྡུགས་པ། སྐྱེ་འོད་འབྱུང་། འཇད་རྟ་མིག་པ་སོགས་བླ་མ་མང་དུ་བསྟེན་ནས་ཐོས་བསམ་སྒོམ་པ་ལྷུར་མཛད། ཁྱད་པར་སྤུ་གྲི་སྐོར་གསུམ་སོགས་ཡི་དམ་ཆོས་སྐྱོང་ལ་རྩལ་དུ་ཐོན་པས་ཡང་རྩེའི་གཙུག་ལག་ཁང་ཀྱང་གཉན་པའི་གྲགས་ཆེ། འདི་ཉིད་ཀྱིས་གཙུག་ལག་ཁང་བརྩིགས་དུས་སྟག །སྤྲེའུ། ཤོ་མོང་གསུམ་བོང་ཚོད་ཤིན་ཏུ་ཆེ་བའི་ཆོ་འཕྲུལ་བྱུང་བས། སྟག་དང་ཤོ་མོང་གཉིས་བསད་པའི་སོབ་ཀྱང་རྩེའི་མགོན་ཁང་སྤྱན་གཟིགས་ཁྲོད་དུ་ཡོད་སྐད། སྤྲེའུ་དེ་གསོད་ཐུབ་ན་དབུས་གཙང་སྤྱི་དང་ཁྱད་པར་ལྷོ་རྒྱུད་ཀྱི་མི་བདེ་བའི་རྩ་བ་ཞི་བ་གཅིག་འོང་རྒྱུ་ཡིན་ཀྱང་། འགྲོ་བའི་ལས་ཀྱི་མཐུས་སྤྲེའུ་ཤོར་བས་ཕྱིས་སུ་སྐུ་རབ་པ་བྱུང་། བླ་མ་འདི་ལ་བྱར་སྨད་དུ་ཚལ་སྒོམ་ཆོས་ལ་དགའ། ལོ་རོང་རབ་དགའ་བ་ཆེན་པོ། དྭགས་པོར་བ་ཚོ་རས་པ། གཙང་དུ་འུ་ཡུག་པ་ཆེན་པོ་སྟེ་ཆོས་ཀྱི་བུ་བཞི། གཉལ་དུ་ཆོས་གྲྭ་གྲོང་མཁར། ཨེར་སེ་པོ། དྭགས་སུ་ནགས་མོ་ཤོད། བྱར་ན་རྒྱ་མཚོ་བླུག་གང་སྟེ་སྡེ་བཞི་བྱུང་ལ། རིགས་ཀྱི་སྲས་བྱ་ཇོ་སྲས། དེའི་སྲས་མངའ་བདག །དེ་ལ་སྲས་དགེ་སློང་བ། བྱ་རིན་ཆེན། ཆོས་རྒྱལ་དཔལ་བཟང་གསུམ་ལས། དང་པོའི་སྲས་རིན་ཅེན་དཔལ། དབང་ཕྱུག་རིན་ཅེན་བཟང་པོ། དྭགས་པོ་བ་བཞི་བྱུང་། དྭགས་གཉལ་ལོ་རོ་རྣམས་སུ་གཞིས་ཀ་མང་དུ་བརྩིགས། བྱ་རིན་ཅེན་གྱིས་ཨེ་གཉལ་བྱར་དྭགས་ལོ་རོ་རྣམས་ཀྱི་སྒོ་སྡུད་མཛད་ནས་ཧོར་དམག་བཟློག་པས་ཀུན་གྱིས་དཔོན་དུ་བཀུར། འདིའི་སྲས་ཀུན་དགའ་རིན་ཅེན་གྱིས་ས་སྐྱའི་དཔོན་ཆེན་ཀུན་དགའ་བཟང་པོ་ལ་གཏུགས། བྱ་ཆོས་རྒྱལ་དཔལ་བཟང་པས་འགྲོ་མགོན་འཕགས་པའི་དྲུང་དུ་བྱོན། ཤར་པ་ཀུན་བསོད་ལ་སློབ་དཔོན་བཅོལ་ནས་རྒྱུད་གསུམ་མན་ངག་དང་བཅས་པ་(༡༠༣ན)

---

^{[མ་དཔེ་གཟིགས་ན་འདིར་གནོན།]}

སྦྱངས་པ་མཛད། ཨ་མི་བྱ་ནག་གི་དུས་ལ་ཡང་རྩེར་མགོན་ཁང་སོགས་ཡོད་པའི་སྟེང་དུ། སླར་གཙུག་ལག་ཁང་དུ་གྲགས་པའི་མཁར་ལས་རྒྱ་བསྐྱེད། རྒྱ་ཧོར་གྱི་ནོར་སྣ་མང་པོ་བསྡུས་ནས་མཛོད་ནག་ཏུ་རྒྱས་བཏབ། རྒྱལ་བའི་བཀའ་འགྱུར་གསེར་ལས་གྲུབ་པ་བཞེངས། ཆོས་སྲིད་ཀྱིས་མཐོ་བའི་འགོ་ཚུགས། འདིའི་སྲས་ཀུན་དགའ་རྒྱལ་མཚན། མཁན་ཆེན་སྤྱིལ་བུ་བ། མངའ་བདག་ཆོས་སེང་འོད། བྱ་ཐུབ་པ་དཔལ་རྣམས་ལས། དང་པོས་དཔོན་ཆེན་འོད་ཟེར་སེང་གེ་ལ་འདམ་དུ་རྫོངས་ཞུ་བར་བྱོན། རྟེའུ་རའི་གྱ་གཉེར་ཀྱང་འདིའི་རིང་ལ་བྱུང་། མངའ་བདག་ཆོས་སེང་འོད་འབྲི་གུང་གི་སྐུ་ཚ་ཡིན་པར་བརྟེན། འབྲི་གུང་ནས་བྱར་དྭགས་ཀྱི་དཔོན་དུ་བསྐོས། དེའི་སྲས་མཁན་ཆེན་ཚུལ་ཁྲིམས་བཟང་པོས་ཟངས་མོ་ཆེའི་མཁན་པོ་མཛད། སླར་ཡང་རྩེར་ཁྲི་དཔོན་གྱི་གོ་སར་བྱོན། དེའི་སྲས་དཀོན་ཅོག་བཟང་པོ། དེའི་སྲས་བཀྲ་ཤིས་དཔལ་བཟང་གིས་རྩེས་ཐང་དུ་སློབ་གཉེར་མཛད། བཤད་སྟོན་བཟང་པོ་བཏང་། གོང་མ་སྡེ་སྲིད་གྲགས་པ་རྒྱལ་མཚན་གྱིས་བྱ་པའི་ཁྲི་དཔོན་ལ་བསྐོས། དེའི་སྲས་རྒྱལ་བ་བཀྲ་ཤིས། ཤཱཀྱ་དཔལ་མགོན། ཐུབ་པ་རྒྱལ་མཚན་རྣམས་ལས། དང་པོས་སྣེའུ་གདོང་རྩེར་བྱོན། གོང་མ་སྡེ་སྲིད་ཀྱི་དྲུང་འཁོར་མཛད། བྱ་པ་ཁྲི་དཔོན་གྱི་གོ་སར་བསྐོས། སྲས་བྱ་བཀྲ་ཤིས་དར་རྒྱས། པདྨ་རྟ་མཆོག་རྒྱལ་པོ། བྱ་ཚེ་དབང་རྒྱལ་པོ། སྐལ་བཟང་ཆོས་ཀྱི་རྒྱ་མཚོ། བྱ་ནོར་བུ་རྒྱ་མཚོ་རྣམས་འཁྲུངས། གཅུང་ཤཱཀྱ་དཔལ་མགོན་མཁན་ཆེན་ཡོན་ཏན་དབང་ཕྱུག་ལ་རབ་ཏུ་བྱུང་སྟེ་ཐོས་བསམ་སྒོམ་ལ་ལྷུར་བླངས་ནས། ཟངས་མོ་ཆེར་མཁན་ཐོག་ཏུ་བཞུགས། སྐལ་བཟང་ཆོས་ཀྱི་རྒྱ་མཚོ་ནི་མཛད་པ་འཁྲུལ་མེད་སོགས་བསྟན་བཅོས་མང་(༡༠༣བ)

---

^{[མ་དཔེ་གཟིགས་ན་འདིར་གནོན།]}

དུ་མཛད་ཅིང་གསུང་རབ་ལ་མཁས་པར་གྲགས། བྱ་བཀྲ་ཤིས་དར་རྒྱས་རྩེས་ཐང་ནས་དཔོན་ས་རྡོ་རྗེ་རིན་ཅེན་དབང་གི་རྒྱལ་པོས་ལྷོ་རྒྱུད་ལུང་གི་ཁྲི་དཔོན་དུ་བསྐོས་སླར་ཡང་སྣེའུ་གདོང་རྩེ་ནས་གོང་མ་ངག་གི་དབང་ཕྱུག་གིས་བསྐོ་ཇ་བཟང་པོ་གྱ་ནོམ་པ་གནང་། བྱ་པ་ཁྲི་དཔོན་གྱི་ཞལ་ངོ་གཅིག་ལ་འདི་ཉིད་གྲགས་ཆེ་ཞིང་། ཆོས་རྗེ་ཀརྨ་པ་རྗེ་དྲུང་ཆོས་གྲགས་རྒྱ་མཚོ་ལ་མཆོག་ཏུ་གུས། གསེར་གྱི་བཀའ་འགྱུར་གྱིས་ཐོག་དྲངས་སྐུ་གསུང་ཐུགས་ཀྱི་རྟེན་བཞེང་བ་སོགས་རྣམ་དཀར་གྱི་དགེ་ལས་མང་དུ་མཛད། འདི་ཉིད་ཀྱིས་རྡོ་རྗེ་གོས་དཀར་མ་ཇོ་མོར་བླངས་པའི་སྲས། བྱ་ནོར་བུ་བཀྲ་ཤིས་དང་། གྲགས་པ་རྒྱལ་མཚན་མཆེད་གཉིས་འཁྲུངས་ཤིང་། དེ་ཡང་རྡོ་རྗེ་གླིང་པའི་ལུང་བསྟན་དུ། གཉལ་ལུང་པ་རྒྱལ་པོ་གཅིག་གིས་འབངས་སུ་སྡུད། སྤྱན་རས་གཟིགས་ཀྱི་སྤྲུལ་པའི་སྐུ་ཞིག་རྒྱལ་པོར་འབྱོན་ཞེས་པའི་ལུང་བསྟན་དུ་འགའ་ཞིག་གླེང་བར་མཆེད་གཉིས་ཀྱི་ནང་ནས་འབྲུག་པ་སྤྲུལ་པའི་སྐུ་འཇམ་དབྱངས་ཆོས་གྲགས་པས་སྐུ་ཚེའི་སྟོད་ལ་ཡབ་ཡུམ་གྱི་བཀའ་ནན་བཞིན་རྒྱལ་སྲིད་བསྐྱངས་པའི་སྲས་བསྟན་འཛིན་ནོར་བུ་དང་མཚོ་སྐྱེས་རྡོ་རྗེ། དེའི་སྲས་གོང་མ་ཆེན་པོ་མི་ཕམ་ཚེའི་དབང་པོ་དང་། དམག་དཔོན་སྟག་རྡོ་རྗེ་དེ་གཉིས་ཀྱི་སྲས་ཀརྨ་ཚེ་དབང་གྲགས་པ་དང་། གངས་དཀར་རྣམ་རྒྱལ་བྱུང་ངོ་། །དགའ་ལྡན་པ་དམག་དཔོན་བསོད་ནམས་རྒྱལ་པོ་ནི། སྐྱིད་ཤོད་ཡར་ཕྱོགས་གླིང་ཞེས་པར། མི་ཆུང་དོན་རྒྱལ་དུ་གྲགས་པ་དེས་ཆོས་རྒྱལ་སྲོང་བཙན་སྒམ་པོའི་བློན་པོ་མགར་གྱི་རིགས་ལས། ཏྲེ་ཧོས་དགའ་བདེ་བཟང་པོ་ཞེས་པ་ཚལ་པ་ཁྲི་དཔོན་གྱི་གོ་སར་ཡོད་པར་དེ་ལ་གཏུགས། དུས་འགྱུར་གྱི་དབང་གིས་སྡེ་སྲིད་ཕག་མོ་གྲུ་པའི་རྫོང་དཔོན་གཞིས་ཀ་སྣེལ་པའི་ཕྱག་གཡོག་མཛད། ཉང་བྲན་དགའ་ལྡན་གྱི་མེ་དཔོན་དུ་བསྐོས་པས་དགའ་(༡༠༤ན)

---

^{[མ་དཔེ་གཟིགས་ན་འདིར་གནོན།]}

ལྡན་པའི་མིང་ཐོགས། དེ་ལ་སྲས་བསོད་ནམས་རྒྱལ་པོ། དབང་དར། རྣམ་སྲས་གསུམ་གྱི་ཆེ་བ་སྣེལ་པ་དཔལ་འབྱོར་རྒྱལ་པོའི་ཐུགས་ལ་བཏགས་པས། དབྱི་ནག་བསོད་རྒྱལ་དུ་གྲགས་ཤིང་། བྱང་ཕྱི་ཆོས་ལུང་དང་ཡང་དགོན་ནང་སོར་གཏོགས་པ་ཕུད་རྗེས། ཀླན་ཀ་གཉིས་ཀས་གཙོས། ལོ་སྤྲེལ་སྣ་གདོང་ཕྱིན་གྱི་འཇའ་ས་གནང་། འབྲིང་པོ་སྣམས་བོན་གྲོང་གི་བདག་པོ་མཛད། ཆུང་བ་འབྲོང་རི་སྔོན་རྫོང་དུ་ཡོད་ཐོག །རིན་སྤུངས་པའི་དཔུང་གིས་བསྐོར་བའི་རྒྱོགས་ནད་ལ་བརྟེན་རྫོང་གཏད་ནས། ཚལ་དུ་མཁར་ལས་མཛད་ནས་བཞུགས། དབྱི་ནག་བསོད་རྒྱལ་མ་མཆེད་ཀྱི་སྲས་ནང་སོ་ནམ་མཁའ་རྒྱལ་པོས་བར་སྐབས་ཆུ་ཤོལ་ལྷུན་པོ་རྩེ་བཟུང་། འོན་ཀྱང་སྣེལ་པ་ནང་ཟློས་དུས་རིན་སྤུངས་པའི་དཔུང་སྙེ་ཐང་དུ་འབྱོར་ཐོག་ཆུ་ཤོལ་གཏད། ནམ་མཁའ་རྒྱལ་པོའི་སྲས་ཚེ་བརྟན་རྒྱལ་པོ་དང་། བསོད་ནམས་གཉིས་ལས། ཆེ་བ་རབ་ཏུ་བྱུང་། ཆུང་བ་ལ་སྣེལ་པ་སྐུ་མཆེད་ཀྱི་དགོངས་པར་མི་བདེ་བ་མང་དུ་བྱུང་བར་བརྟེན། རིན་སྤུངས་དོན་ཡོད་རྡོ་རྗེས་དཔུང་སྐྱིད་ཤོད་དུ་བཅུག་སྐབས། རིན་སྤུངས་པར་ངོ་གཏད་པའི་དམག་གི་སྣེ་བསུ་མཛད་པས་སྣེའུ་དང་པོ་ཏ་ལ་སོགས་རིན་སྤུངས་པའི་ཕྱག་ཏུ་འབྱོར་པའི་ལག་རྟགས་སུ་རྙིང་ཁུང་གི་སྟེང་སྙེ་མདའ་ཆུ་སོ་ཁ་ཡན་གྱི་འཇའ་ས་གནང་། དེ་ནས་མི་རིང་བར་སྡེ་སྲིད་གོང་མ་ཆེན་པོའི་དཔུང་གཞུང་པོ་རར་ཕེབས་སྐབས། ཡར་རྒྱབ་རིན་ཅེན་བཀྲ་ཤིས་ཀྱིས་འཚམས་སྦྱར་ནས། དགའ་ཤག་གཉིས་ཀྱིས་གོང་མའི་ཞབས་ཕྱིར་འབྲངས། ཤག་པ་ལ་སྐྱོར་མོ་ཀླུང་དང་སྐྱིད་ཤོད་གཡས་རུའི་རུ་དཔོན། དགའ་ལྡན་པར་བདེ་ཆེན་དུ་གཏོགས་པའི་ཆུ་ལྷོ་བྱང་རྣམས་དང་། ཡར་རྒྱབ་པར་སྣེའུ་རྫོང་དཔོན་གྱི་ལས་ཀ་གནང་། གོང་མའི་(༡༠༤བ)

---

^{[མ་དཔེ་གཟིགས་ན་འདིར་གནོན།]}

ཞབས་ཏོག་ཏུ་འགྱུར་བས་བོད་ཡུལ་གྱི་རྡོ་རྗེ་གདན་འཕྲུལ་སྣང་གིས་གཙོས་སྐྱིད་ཤོད་ལུང་པའི་ཁྲིམས་བདག་ཏུ་ལུང་བུད། གཏན་ཁྲ་ཤེལ་ཐམ་གྱིས་ཆོད། འདི་ཉིད་ཀྱི་སྲས་ར་ནུ་ལྷ་བསྲུང་གིས་གོང་མ་ཆེན་པོ་ཆུ་ཤོལ་དུ་བཞུགས་སྐབས། རིན་སྤུངས་པའི་དམག་གིས་ཁང་བཅར་བར་ར་ནུ་ལྷ་བསྲུང་གིས་གཙོས་པས་ཁ་སྤུབ་ཆེ་བར་བཏང་བས། གོང་ས་ནས་དམག་དཔོན་བསོད་ནམས་རྒྱལ་པོའི་མིང་ནང་། བྱི་རི་སྟག་རྩེའི་མི་བརྒྱུད་རྫོགས་རྗེས་དགའ་ལྡན་པ་དང་ཁྱོན་སྒྲིལ་བར་སྲས་ལྕམ་སྲིང་དྲུག་འཁྲུངས་པས་གཉིས་ཆུང་ངུ་ལ་གྲོངས། ལྕམ་ཚེ་དབང་རྒྱལ་མོ་འཕྱོང་རྒྱས་ཧོར་བསོད་པའི་ཇོ་མོ་དང་། ལྕམ་དུ་དཀར་སྡེ་སྲིད་ཀྱི་བདག་པོར་བཞེས། དེ་འོག་ནང་སོ་དོན་གྲུབ་རྒྱལ་པོས་གངས་ནས་རྫོང་དཔོན་གྱི་ལས་ཀ་ཞུས། མི་རིང་བར་སྡེ་སྲིད་ཞལ་ངོ་ནང་དུ་སེལ་ཞུགས་སྐབས་དགའ་ལྡན་པའི་དཔུང་གིས་སྐྱོར་མོ་ཀླུང་རྫོང་དམར་འབེབས་སུ་བཏང་། སྟོད་ལུང་དང་འཕན་ཡུལ་གྱི་རྫོང་མངའ་ཞབས་ཕལ་ཆེར་བླངས། གངས་ནས་ཆུ་ཤོལ་མཁན་ཆེན་པར་བཀའ་བཀྱོན་གནང་བའི་དཔུང་གི་རྐངས་མཛད་ནས་ཆུ་ཤོལ་འབེབས་པ་དང་། གོང་དཀར་ནས་ཞབས་དྲུང་ངག་དབང་གྲགས་པ་རྩེའི་ཁྲིར་ཕེབས་པའི་ཞབས་འདེགས་མཛད། གཅུང་སྡེ་པ་བཀྲ་ཤིས་རབ་བརྟན་པས། གོང་མར་ལར་རྒྱབ་ནས་ཞབས་འདྲེན་ཞུས་སྐབས་སྐྱིད་ཤོད་ཀྱི་དཔུང་རྣམས་ལྷོ་ཁར་བཏོན་པ་སོགས་སྡེ་སྲིད་ཀྱི་ཞབས་ཏོག་ཏུ་འགྱུར་བར་བརྟེན། གཞིས་ཀ་བྲག་དཀར་གྱི་རྫོང་དཔོན་གནང་། སྐྱིད་སྨད་རྣམ་རྒྱལ་སྒང་གི་སྒྲུབ་མཆོད་གླིང་མཁར་དུ། སྣེ་གདོང་ཡར་རྒྱབ་སོགས་ལྷོ་རྒྱུད་ཀྱི་དཔུང་རྣམས་འབྱོར་པའི་སྟེང་དུ། སྡེ་པ་བཀྲ་ཤིས་པ་ཉིད་ཀྱིས་འགོ་མཛད་ནས་(༡༠༥ན)

---

^{[མ་དཔེ་གཟིགས་ན་འདིར་གནོན།]}

མཆོངས་པ་དང་། སྟོད་ལུང་མཚོ་སྣ་གདོང་དུ་ཡར་གོང་ཆུ་སྙུག་གཉལ་བྱར་ལོར་གསུམ། ལྷོ་བྲག་དྭགས་ཀོང་དུ་རྒྱལ་བཟང་གི་དཔུང་ཞིབ་སྒྲིལ་བྱུང་བ་བཟློག་ཐུབ་པ་སོགས་དགྲ་ཐོབ་ཏུ་མངོན་པར་ལྕི་བའི་དཔའ་གྲགས་ཀྱིས་སྲིན་པོའི་རྒྱལ་པོ་ལང་ཀ་མགྲིན་བཅུ་ལ་སྐྱེངས་པ་སྟེར་ནུས། དགའ་ལྡན་དངུལ་གདུང་རིན་པོ་ཆེར་སྒོ་རྒྱན། འཕྲུལ་སྣང་གཙུག་ལག་གི་གསེར་ཐོག་བཟོ་བ། རིན་ཅེན་སྒང་དུ་རིག་པའི་དབང་ཕྱུག་ཆོས་ཀྱི་གྲགས་པའི་རིང་ལུགས་ཀྱི་བཤད་གྲྭ་འཛུགས་པ་སོགས་རྣམ་དཀར་གྱི་མཛད་པའི་ཟླ་སྣང་གིས་ལེགས་བྱས་པུཎྜ་རི་ཀའི་ཚལ་ཆེས་ཆེར་རྒྱས་པར་མཛད་ཅིང་། རིགས་རུས་ཡོན་ཏན་དུ་མས་མངོན་པར་མཐོ་བའི་ལྷའི་བཙུན་པ་བསོད་ནམས་དཔལ་བཟང་དང་། མཁས་པའི་དབང་པོ་ཤར་པ་ཆོས་རྗེ་ནམ་མཁའ་རྒྱལ་མཚན་སོགས་ཏི་ཤྲིར་བསྟེན་ནས་བཀུར་སྟི་བླ་ལྷག་ཏུ་མཛད། ཐུན་མོང་དང་ཐུན་མོང་མ་ཡིན་པའི་རིག་པའི་གནས་མཐའ་དག་ལ་རྣམ་དཔྱོད་ཀྱི་རྩལ་རྨད་དུ་བྱུང་བའི་ཡོན་ཏན་དུནྦྷུའི་བྷིའི་སྒྲ་དབྱངས་སྐབས་གསུམ་བདག་པོའི་གནས་སུ་བསྒྲགས་སོ། །འདི་ཉིད་ཀྱི་སྲས་སྡེ་པ་གཡུལ་རྒྱལ་ནོར་བུ་ལུགས་གཉིས་མངོན་པར་མཐོ་ཞིང་སྲས་བསོད་ནམས་རྣམ་རྒྱལ། ཡིད་བཞིན་ནོར་བུ་ཆོས་རྗེ་གསུམ་ལས། གཅེན་གཉིས་ཀྱིས། རྩེ་ནས་གོང་མའི་ལྕམ་ཇོ་མོར་བསུས་པའི་སྲས་མགོན་པོ་རབ་བརྟན། རྡོ་རྗེ་རྣམ་རྒྱལ་ཆོས་རྗེ་མཚོ་སྐྱེས་རྡོ་རྗེ་རྣམས་བྱུང་ངོ་། །སྨྲས་པ། སྡེ་བཞིའི་དཔལ་འབྱོར་ཡོངས་འདུ་རླངས་ཀྱི་ལྗོན། །གནམ་བསྐོས་རྒྱལ་སྲིད་ཡལ་འདབ་སྟུག་པོ་ལས། །བསོད་ནམས་དཔུང་གིས་སྤྱོད་པའི་མི་བདག་འབྲས། །མངའ་འབངས་དགའ་བའི་འདོད་རྒུ་ཆར་དུ་ཕབ། །(༡༠༥བ)

---

^{[མ་དཔེ་གཟིགས་ན་འདིར་གནོན།]}

རིགས་རུས་བཟང་པོའི་ནོར་འཛིན་དབུས། །སྟོབས་འབྱོར་གསེར་གྱི་འཛིན་མས་བསྐོར། །ཡ་རབས་རྣམ་ཐར་ལྷུན་པོའི་རྩེར། །རྒྱལ་ཕྲན་ཉེ་དབང་ཚོགས་ཀྱི་འདུས། །ཆོས་སྲིད་བླང་དོར་གནས་ཀུན་ལ། །མ་འདྲེས་གཟིགས་པའི་སྤྱན་སྟོང་ལྡན། །སྡེ་སྲིད་མཆོད་སྦྱིན་བརྒྱ་པ་གང་། །སྲིད་འདིར་མཐོ་བའི་ཁྲི་ལ་འགྱིང་། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ལྟར་གོང་མ་ཏའི་སི་ཏུ་ནས་བཟུང་སྟེ། བོད་གཉན་ཞན་གྱི་གོ་རིམ་སིལ་བུར་མ་གྱུར་གྱི་བར། སྲིད་ཀྱིས་མངོན་པར་མཐོ་བ་ཕལ་ཆེར་ནི་སྡེ་སྲིད་གོང་མའི་ཐུགས་ལ་བཏགས་ཤིང་། ལུང་དང་ལས་ཀ་གནང་བ་ཤས་ཆེ་ནའང་། ས་སྐྱོང་ལྷ་རྒྱ་རི་བ་ནི། གོང་ནས་ལུང་དང་འཇའ་ས་ཆེད་དུ་མ་བླངས་པར། ཉི་འོག་གི་རྒྱལ་པོར་གྱུར་པ་ཞིག་སྟེ། དེ་ཡང་བོད་ཆོས་རྒྱལ་གྱི་གདུང་བརྒྱུད་དྲི་མ་མེད་པ་གནམ་ལྡེ་འོད་སྲུངས་ཀྱི་སྲས་མངའ་བདག་དཔལ་འཁོར་བཙན་གྱི་བརྒྱུད་ཚ་བ་ཁྲི་བཀྲ་ཤིས་བརྩེགས་པའི་སྲས་གསུམ་གྱི་འོད་ལྡེ་ལས་རིམ་པར་བྱུང་བ། འོད་སྐྱིད་འབར་གྱི་སྲས་གཙང་ཚ་སྤུན་དྲུག་ལས་བརྒྱུད་དེ། གདན་ས་ཐེལ་གྱི་མདར་བཙད་པོ་ཚ་བ་རོང་པ་ཞེས་མི་དཔོན་ཞིག་དཔལ་ཕག་མོ་གྲུ་པ་རྡོ་རྗེ་རྒྱལ་པོའི་དུས་བྱུང་ཞིང་། དེ་ནས་རིམ་པར་བརྒྱུད་ནང་སོ་མདའ་སྨད་པས། ཨེ་སྟོད་ཆུ་ཚན་ཁ་ཞབས་སུ་རི་ལ་རྩ་རྒྱ་བོ་སྐྱེས་པ་ཞིག་ན་གཞིས་ཀ་བརྩིགས་པས་རྒྱ་རི་ཞེས་མིང་དུ་ཆགས། དེ་ནས་ལྷ་ཆོས་ཀྱི་བཤེས་གཉེན་སོགས་ཞལ་ངོ་རིམ་པར་བྱུང་བ་ལས། ལྷ་དགྲ་ལས་རྣམ་རྒྱལ་གྱིས་རྒྱ་རི་རྫོང་དུ་བཞུགས། ཐམས་ཅད་མཁྱེན་པ་དགེ་འདུན་རྒྱ་མཚོ་དང་མཆོད་ཡོན་དུ་འབྲེལ། རྒྱ་རི་ལྕོག་མཁར་དུ་ལོ་གསར་གཏོར་ཆེན་གྱིས་ཕྱག་སྲོལ་བཙུགས། ལྷ་དགྲ་ལས་པས་སེ་ཆེན་རི་སྒོ་ཕྱོགས་སུ་ཕེབས་པས། ཡུལ་དུ་བཀྲ་(༡༠༦ན)

---

^{[མ་དཔེ་གཟིགས་ན་འདིར་གནོན།]}

ཤིས་པའི་དགེ་མཚན་མང་དུ་བྱུང་བས། ཡུལ་མི་རྣམས་ཀྱིས་ནས་ཕུད་ཁལ་རེ་ཕུལ། བླའི་དཔོན་དུ་གྱུར་ཏེ། རི་སྒོ་བཀྲ་ཤིས་ཆོས་རྫོང་དུ་ཕོ་བྲང་གི་ལྟེ་བ་མཛད། དེ་ནས་ལྷ་འཇིག་རྟེན་དབང་ཕྱུག་ཁྲི་ཐོག་ཏུ་ཕེབས་རྗེས། ལྷ་བྱམས་པ་རབ་བརྟན་དང་ལྷ་ཡུལ་འཁོར་དབང་ཕྱུག་སྐུ་མཆེད་གཉིས་བྱུང་། འདིའི་དུས་སུ་སྤྲུལ་སྐུ་བདེ་ཆེན་གླིང་པས། ཨེ་ཡི་ནང་དུ་ཁྲག་མཚོ་ལན་གསུམ་ཁོལ། །རྒྱལ་པོ་བྱམས་པའི་མིང་ཅན་བྱ་བ་འབྱུང་། །རྒྱལ་པོ་དེ་ཡིན་བསྟན་པ་རྒྱས་པ་ལ། །ཞེས་སོགས་ཀྱི་དོན་དང་མཐུན་པར་མངའ་ཐང་གོང་དུ་འཕེལ། ཁྱད་པར་ལྷ་ཡུལ་འཁོར་བས་ལང་ཀའི་གྲོང་ཁྱེར་ས་ལ་འཕོས་པ་ལྟ་བུའི་བཙན་རྫོང་འོལ་ཁ་སྟག་རྩེ་མངའ་འབངས་དང་བཅས་པ་རང་དབང་དུ་མཛད། དེ་ནས་ལྷ་བསོད་ནམས་རབ་བརྟན་སྐུ་མཆེད་གསུམ་ལས། བསོད་ནམས་རབ་བརྟན་ཁྲི་ཐོག་ཏུ་ཕེབས། ཆད་དཀར་རྫོང་གི་ཉེ་འདབས་སུ་དགེ་འདུན་གྱི་སྡེ་འཛུགས་པ་སོགས་རྒྱལ་སྲིད་ཆོས་བཞིན་དུ་བསྐྱངས། དེ་རྗེས། ལྷ་དགའ་ལྡན་དཔལ་འབར་གྱིས་ཁྲིར་ཕེབས་ནས་རྒྱལ་བའི་བསྟན་པ་སྤྱི་དང་། ཁྱད་པར་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་བསྟན་པ་ལ་སྲི་ཞུ་བླ་ལྷག་ཏུ་མཛད། རོག་པ་རྩར་མི་བསྲུན་པའི་སྐྱེ་བོ་རང་ཉམས་ཀྱི་བློའི་སྤྱོད་ཡུལ་ཅན་རྣམས་མིང་གི་ལྷག་མར་བཅོམ་པས་མགོ་ལག་ཁྲག་གི་རལ་པས་སྦགས་པ་བླངས་པ་སོགས་འཇིགས་པ་མེད་པའི་སྙིང་སྟོབས་ཀྱིས་རྣམ་པར་རྒྱལ་བའི་དབུ་རྨོག་བཙན་པོ་གྱོན། དེ་རྗེས་ཁྲི་ཐོག་ཏུ་བློ་བཟང་མཐུ་སྟོབས་ཆོས་རྒྱལ་བྱོན་ནས་སྙིང་རྗེ་ཆེན་པོའི་གཞན་དབང་གིས་སྡེ་འཁྲུག་སྙོལ་བ་གཙོ་བོར་མཛད། འོན་ཀྱང་ལས་ངན་གྱི་རྦ་ཀློང་དྲག་པོས་བདས་པའི་སྐྱེ་བོ་འཕར་འགྲོའི་རིགས་ཅན་ན་ཀྲའི་མགྲིན་པར་འཇུག་འདོད་ཀྱིས་ཚུར་རྒོལ་གྱི་སྡེ་གཟར་འགའ་ཞིག་བྱུང་(༡༠༦བ)

---

^{[མ་དཔེ་གཟིགས་ན་འདིར་གནོན།]}

བ་རྣམས་བཀའ་ཁྲིམས་སྒྱུར་བའི་བྱེད་པོ་བསོད་ནམས་རབ་བརྟན་སོགས་ཀྱིས་ཞི་དྲག་གི་སྦྱོར་བ་དུ་མས་བཟློག་པར་བྱས། ཁྲི་ཆེན་འདི་ཉིད་ནི་རྣམ་དཀར་དགེ་བའི་ལས་ལ་མཆོག་ཏུ་བརྩོན་ཞིང་། ཁྱད་པར་གསང་སྔགས་ཟབ་མོའི་རྣལ་འབྱོར་ལྷུར་མཛད་དེ། དེ་རྗེས་ལྷ་ངག་གི་དབང་ཕྱུག་དགའ་ལྡན་རབ་ཏུ་བརྟན་པ་མི་འགྱུར་རྣམ་པར་རྒྱལ་བ་ཁྲི་ཐོག་ཏུ་བྱོན་ཏེ། ཕུན་སུམ་ཚོགས་པའི་མངའ་ཐང་འགོག་པ་མེད་པའི་སྣང་བ་རབ་ཏུ་རྒྱས་སོ། །སྨྲས་པ། མཆོད་སྦྱིན་བརྒྱ་ཡིས་འཆི་མེད་དབང་པོའི་སར། །སྐབས་གསུམ་རིགས་ཀྱི་བདག་པོར་དབང་སྒྱུར་ན། །ནོར་འཛིན་ཚེས་བཞིན་སྐྱོང་བའི་ལེགས་བྱས་ཀྱིས། །སྟོང་གསུམ་ཀུན་ཀྱང་རང་གིར་བྱས་ཀྱིས་དོགས། །ཨེ་མ་ཁྱོད་ཀྱིས་སྡེ་བཞིའི་ནོར། །བསོད་ནམས་གསེར་གྱི་འཁོར་ལོ་ཡིས། །དྲངས་པའི་མཛད་མེད་གན་མཛོད་འདི། །རེ་བ་སྐོང་བའི་དཔག་བསམ་དབང་། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །དེ་ཡང་གནམ་བསྐོས་ཀྱི་རྒྱལ་པོ་འཇམ་དབྱངས་གོང་མ་སེ་ཆེན་གན་གྱི་ལུང་གིས། ཁ་བའི་རྡུལ་མང་ཡོངས་སུ་བརྩེགས་པའི་བོད་དང་བོད་ཆེན་པོའི་རྒྱལ་ཁམས་མཐའ་དག་དཔལ་ལྡན་ས་སྐྱ་པ་ལ་ཕུལ་ཏེ། གནམ་ལ་ཉི་ཟླ་ཟུང་གཅིག་ས་ལ་མཆོད་ཡོན་རྣམ་གཉིས་ཞེས་གྲགས་ཤིང་། དེ་ནས་ཟླ་བའི་འཕྲེང་བ་བཅུ་ཕྲག་བདུན་གྱི་ཕྱོགས་སུ་ཉེ་བ་ན། གང་གིས་ཀྱང་གཞོམ་གཞིག་ནུས་པའི་གོ་སྐབས་ཕྲ་མོ་ཙམ་ཡང་རིང་དུ་སྤངས་པའི་བསོད་ནམས་ཀྱི་དཔུང་པ་ཅན། སའི་ཚངས་པ་ཏའི་སི་ཏུ་བྱང་ཆུབ་རྒྱལ་མཚན་གྱིས་གཞན་དྲིང་མི་འཇོག་པའི་དཔའ་མཛངས་རྟུལ་ཕོད་པའི་རྣམ་དཔྱོད་ཀྱིས་བོད་ཡངས་པའི་ས་ཀུན་ལ་དབང་སྒྱུར་བ་ནས་བཟུང་། དུས་ཡུན་རིང་པོའི་བར་དུ་དཔལ་ཕག་མོ་གྲུ་པའི་སྡེ་སྲིད་ཀྱི་བཀའ་ཁྲིམས་གདུགས་དཀར་པོ་(༡༠༧ན)

---

^{[མ་དཔེ་གཟིགས་ན་འདིར་གནོན།]}

གཅིག་གིས་འོག་ཏུ་ཁྱབ་ཚུལ་སྔོན་དུ་བརྗོད་མ་ཐག་པ་དེ་ལྟ་ནའང་། ཞབས་དྲུང་གོང་མ་ཆེན་པོ་ཞིང་ཁམས་གཞན་དུ་འཕོ་བའི་ཚུལ་བསྟན་པའི་མཇུག་ཏུ། ཕག་གྲུའི་མཚན་དོན་མི་རྒྱུག་པ་དང་། གློ་བུར་གྱི་རྒྱལ་བ་ཞིག་འབྱུང་བ་སོགས་དུས་འགྲིག་པས། འཕྲེང་མགོ་གཏེར་སྟོན་ཤེས་རབ་འོད་ཟེར་གྱི་ཐུགས་རྗེ་ཆེན་པོ་པདྨའི་དབང་ཕྱུག་གི་ལུང་བསྟན་དུ། སྒྲ་སྙན་འདྲ་བའི་གནས་སྒོ་རུ། འཇིག་རྟེན་དབང་ཕྱུག་སྤྲུལ་པ་ཉིདཿ ཨར་ཐའི་མིང་འཛིན་བྱུང་གྱུར་ན༔ ལྷོ་བྱང་གློ་བུར་རྒྱལ་པོ་བྱེད༔ སྒྲུབ་པ་སྙིང་པོའི་བསྟན་པ་འཛུགས༔ མི་ལོ་ལྔ་བཅུར་བདེ་ལ་འགོད༔ སྐྱེ་བའི་རྟེན་འབྲེལ་མ་འགྲིག་ན༔ ཡུལ་དེ་རང་འཕོ་གུད་པ་དང་༔ མཐའ་མ་རླུང་གིས་འཁྱེར་དུ་ཉེ༔ ཞེས་སྡེ་པ་འཕྲེང་མགོ་བའི་མི་ངོ་ཞིག་གིས་གློ་བུར་གྱི་རྒྱལ་པོ་བྱེད་པའི་ལུང་བསྟན་དང་། གནང་རྩེ་ནས་ཀྱི་གསང་བའི་ལུང་བསྟན་དུ། གཙང་ཕྱོགས་རྒྱལ་པོ་པདྨའི་མིང་ཅན་འབྱུང་༔ སྐུ་ཚེ་མཐར་ཕྱིན་བདུད་དབང་མ་གྱུར་ན༔ ཞེས་པ་ལྷད་བཅུག་པ་མིན་ན་རིན་སྤུངས་པའི་སྲས་པདྨ་དཀར་པོས་བོད་སྤྱིའི་རྒྱལ་པོ་བྱེད་པར་བཤད་པ་སོགས་ནི་རྟེན་འབྲེལ་འཕྱུགས་པས་ཐོག་ཏུ་མ་ཕེབས། པདྨའི་རྒྱལ་ཚབ་མངའ་རིས་པཎ་ཆེན་དང་རིགས་འཛིན་ལེགས་ལྡན་པའི། བླ་མ་བཀའ་བརྒྱད་ཡོངས་འདུས་ཀྱི་ལུང་བསྟན་དུ། འཛམ་གླིང་ཤར་ལྷོའི་ཕྱོགས་མཚམས་སུ༔ བདུད་མོ་རྣོ་མྱུར་ནག་མོ་ལ༔ བུ་དགུ་སྐྱེས་ནས་འཛམ་གླིང་འཇོམས༔ ཁྱད་པར་བོད་ཡུལ་གངས་ཅན་འདིར༔ མ་འོངས་བཞི་བཅུར་ཉེ་དུས་སུ༔ བདུད་སྤྲུལ་དགུ་དང་དེ་བློན་དགུ༔ བཙུན་མོ་ཕྱི་ནང་ལས་བྱེད་དགུ༔ བང་འཕྲིན་དབུ་གཙོ་དམག་དཔོན་དགུ །དགུ་དགུ་བརྒྱད་ཅུ་རྩ་གཅིག་གིས༔ འགྲོ་ཀུན་ཁ་ལོ་ཐུར་དུ་(༡༠༧བ)

---

^{[མ་དཔེ་གཟིགས་ན་འདིར་གནོན།]}

འཁྲིད༔ ཅེས་པའི་དུས་རྟགས་ཐོག་ཏུ་ཁེལ་ཏེ། རིན་སྤུངས་པའི་བློན་པོ་ཞིང་གིས་བསམ་འགྲུབ་རྩེའི་རྫོང་དཔོན་གྱི་ཐོག །སྣར་ཐང་བ། ནོར་བྱུང་བ། བརྒྱ་ཚོ་བ་སོགས་ལྷོ་བྱང་གི་དཔོན་རིགས་མང་པོ་དང་འབྲེལ་བཏགས་བྱས་པའི། སྡེ་པ་རོང་པར་འབངས་གྱེན་ལོག་གིས། སྡེ་གཟར་ལན་སྔ་ཕྱི་ཁ་ཡར་དུ་བྱུང་བའི་མཐར་ཇེ་འཕེལ་དུ་སོང་སྟེ། གཙང་སྟོད་རྒྱལ་པོ་ལུང་གིས་དབུས་གཙང་མཐའ་དག་རིམ་གྱིས་ཆབ་འོག་ཏུ་བཅུག་པའི་མངའ་ཐང་གི་དཔལ་ཕུན་སུམ་ཚོགས་པ་དག །ཇི་ལྟར་ཉི་མའི་དཀྱིལ་འཁོར་སེང་གེ་མོའི་བུའི་མགྲིན་པར་ཆུད་པ་ལྟར། མངའ་འབངས་མཐའ་དག་ཅིག་ཅར་དུ་རང་གིར་འཛིན་པའི་བྱེད་པོ་ནི། རྩོད་དུས་ཀྱི་འཁོར་ལོས་སྒྱུར་བ་བསྟན་འཛིན་ཆོས་ཀྱི་རྒྱལ་པོ་སྟེ། འདི་ཉིད་ནི། གཏེར་སྟོན་དྲི་མེད་ལྷུན་པོའི་ལུང་བསྟན་ལས། སྤྱིར་ཡང་མཐའ་དམག་ལན་བདུན་མཐའ་མ་ལ༔ བཛྲ་པཱ་ཎིའི་སྤྲུལ་པའི་རྒྱལ་པོ་ཞིག༔ བོད་ཁམས་དར་ཅིག་བདེ་ལ་སྦྱོར་བ་འབྱུང་༔ ཞེས་གསང་བའི་བདག་པོ་ཕྱག་ན་རྡོ་རྗེ་མིའི་སྲིད་པའི་ཟློས་གར་ཅན་ཡིན་པར་ལུང་གིས་ཟིན་པས། བྱང་སེམས་འཕགས་པ་སྙིང་རྗེ་དང་། སྨོན་ལམ་གྱི་དབང་གིས་འགྲོ་བའི་དོན་དུ་བསམས་བཞིན་ཆོས་ལྡན་རྒྱལ་པོར་སྐྱེ་བ་བཟུང་ནས་ཕན་བདེའི་འོད་བརྒྱ་ཕྱོགས་བཅུར་བཀྱེད་པ་སྟེ། གང་ཞིག་ཐ་མལ་གྱི་སྐྱེ་བོ་རང་ཉམས་ཀྱིས་སྤྱོད་པའི་སྣང་ཚུལ་མུན་པ་མཐའ་དག་རྒྱང་དུ་བསྲིངས་པ་ནི་གོར་མ་ཆག་ལ། དེ་ཡང་བྱང་ཕྱོགས་ཧོར་སོག་གི་རྒྱལ་ཁམས་ན་སྡེ་ཆེན་པོ་གྲངས་མེད་པ་ཡོད་པའི་ཡ་གྱལ། ཨོ་རོད་ཚོ་པ་བཞིར་གྲགས་པའི་ནང་ཚན། ཧོ་ཤོད་ཀྱི་དཔོན་པོ་ཧ་ནའི་ལ་ཇོ་མོ་ཨ་ཧའི་ཧ་ཐུན་བླངས་པར་སྲས་ལྔ་བྱུང་བའི་གསུམ་པ་རྒྱལ་པོ་འདི་ཉིད་ཆུ་ཕོ་རྟའི་ལོ་ལ་(༡༠༨ན)

---

^{[མ་དཔེ་གཟིགས་ན་འདིར་གནོན།]}

འཁྲུངས། མཚན་ཐོ་རོལ་བའི་ཧུར་བཏགས་སོ། །དགུང་ལོ་བཅུ་གསུམ་ལོན་པའི་ཚེ། མགོ་དཀར་གྱི་དམག་ཁྲི་ཕྲག་ཙམ་གྱི་སྟེང་དུ། དམག་རྣམས་ཀྱིས་སྣ་དྲངས་ཏེ་མཆོངས་པས་ཕ་རོལ་གྱི་དཔུང་ཚོགས་མཐའ་དག་འཇིག་རྟེན་ཕྱི་མའི་ལྟད་མོ་དུས་གཅིག་ཏུ་མྱོང་བར་བྱས་པའི་གྲགས་པས། སྲིན་པོའི་རྒྱལ་པོ་ལང་ཀ་མགྲིན་བཅུ་མིའི་ཡུལ་དུ་རྒྱུ་བའི་འགྲན་ཟླ་གཉིས་པ་བྱས་སོ། །དེ་སྐབས་ཡུལ་ཕྱོགས་དེ་དག་མཐའ་འཁོབ་ལས་ཀྱང་ཆེས་མཐའ་འཁོབ་ཏུ་གྱུར་པ་ཀླ་ཀློའི་རྒྱལ་ཁམས་ལྟ་བུར་གནས་པ་ལས། སོག་པོའི་ཡུལ་གྲུ་གཞན་དག་ཏུ། ཐམས་ཅད་མཁྱེན་པ་བསོད་ནམས་རྒྱ་མཚོ་དང་། གསེར་གྱི་རྒྱལ་པོ་མཆོད་ཡོན་ཟུང་གཅིག་ལ་བརྟེན་ནས་དམ་པའི་ཆོས་དར་ཞེས་པའི་ཆོས་ཀྱི་མིང་ཙམ་ཐོས་འཛིན་གྱི་རྒྱན་དུ་གྱུར་པས་ཡིད་དགའ་སྤྲོ་དང་བཅས་ཏེ་ཕྱོགས་དེར་ཕྱག་བཙལ་བས་དཔྲལ་བ་སྐྲངས་པ་ཙམ་དུ་གྱུར་ཅིང་། བསྟན་པའི་དབུ་བརྙེས་པ་ནི། ལྷ་ཐོ་ཐོ་རི་གཉན་ཤལ་ལ་གཉན་པོ་གསང་བ་འབྱུང་བ་བཞིན་ནོ། །མེ་རྟ་དགུང་ལོ་ཉེར་ལྔར་སླེབས་པའི་ཚེ། ཡུམ་གྲོངས་པའི་རྐྱེན་གྱིས་མཁོ་དགུའི་འབྱོར་པ་མཐའ་དག་མཆོག་དམན་གྱི་སྐྱེ་བོ་རྣམས་ལ་སྦྱིན་པར་བཏང་ཞིང་། དེ་ཡང་ཚེ་འདིའི་སྙན་གྲགས་དང་། རྣམ་སྨིན་ལན་ལ་རེ་བ་ཙམ་མ་ཡིན་པར། སློབ་དཔོན་ཟླ་གྲགས་ཀྱིས། སྦྱིན་པ་སྦྱིན་བྱ་ལེན་པོ་གཏོང་པོས་གཏོང་། །ཞེས་གསུངས་པ་ལྟར། འཁོར་གསུམ། བདེན་སྟོང་གི་རྩིས་ཟིན་པའི་འཕགས་ཆེན་དམ་པའི་རྣམ་ཐར་རོ། །བྱང་འཕགས་རྣམས་ནི་གཞན་དོན་དུ་འགྱུར་ཚེ་དམྱལ་བའི་མེ་འོབས་ཀྱང་མཐོ་རིས་ཀྱི་དགའ་བའི་ཚལ་བཞིན་དུ་འཇུག་པར་མཛད་པ་ནི་ཆོས་ཉིད་དེ། དེ་སྐབས་ཁར་ཁ་དང་ཨོ་རོད་ཕན་ཚུན་དུ་གཡུལ་(༡༠༨བ)

---

^{[མ་དཔེ་གཟིགས་ན་འདིར་གནོན།]}

རླབས་པོ་ཆེ་བཤམས་པའི་འཁྲུག་ལོང་གིས། སྲོག་གཅོད་པའི་སྡིག་པའི་ལས་རྔམ་པོ་ཆེས། ངན་སོང་མུ་མཐའ་མེད་པའི་ནགས་ཀླུང་སྟུག་པོར་བསྒྱུར་བའི་སྦྱོར་བ་ལ་བརྩོན་པ་དག་ལ་དམིགས་པ་མེད་པའི་སྙིང་རྗེ་ཆེན་པོའི་གཞན་དབང་དུ་གྱུར་ཏེ། ཁར་ཁ་ཨོ་རོད་ཕན་ཚུན་དུ་འགྲུལ་ཙམ་ཡང་བྱེད་མི་ནུས་པའི་སྐབས། བདག་གཞན་བརྗེ་བའི་སྙིང་སྟོབས་ཀྱིས་གོ་ཆ་བཙན་པོ་གྱོན་ཏེ། ཁར་ཁའི་ཁྲོད་དུ་ཚམ་ཚོམ་མེད་པར་བྱོན་ནས། གཞུང་དཀའ་ཚེགས་ཆུང་ངུས་བཟླུམས་པར་མཛད་པ་དག་ལེགས་པའི་ཕ་རོལ་དུ་ཕྱིན་པ་ལྟ་བུའི་རྣམ་ཐར་རོ། །སྟོང་འཁོར་ཆོས་རྗེ་དང་ཁར་ཁའི་རྒྱལ་བློན་རྣམས་ཡི་རངས་ཏེ། དའི་གུ་ཤྲི་ཞེས་ཆོ་ལོ་བྱིན། སླར་རང་ཡུལ་དུ་བྱོན། རྗེ་བསོད་ནམས་རྒྱ་མཚོ་ལ་ཨོ་རོད་ཅིག་གིས་མདོ་སྡེ་གསེར་འོད་དམ་པ་ལ་ཕྱག་ནས་ཞུས་པའི་ཚེ། གསུང་རབ་གྱི་མིང་དྲི་བ་གནང་བར། ཨལ་ཏན་གེ་རིལ་ཟེར་ཞུས་པས། ད་ནས་མི་ལོ་ཉི་ཤུ་ན་ཁྱོད་ཀྱི་ཡུལ་དུ་ཆོས་འདི་དར་བར་འགྱུར་རོ། །ཞེས་ལུང་བསྟན་པ་ལྟར། གསེར་འོད་དམ་པ་སོགས་ཆོས་མང་དུ་སྒྱུར་བའི་སྦྱིན་བདག་མཛད་པ་སོགས་བསྟན་པའི་སྲོལ་བཏོད་པ་ནི། ཆོས་སྐྱོང་བའི་རྒྱལ་པོ་སྲོང་བཙན་སྒམ་པོ་གཉིས་པ་ས་འདིར་འོངས་སོ་ཞེས་ལྷ་རྣམས་གླེང་ངོ་། །སྔར་སོག་པོ་ཚོ་ཆེན་དྲུག་ལ་གཞུང་དང་ཆིངས་ཡོད་པ་རྣམས། ཆ་དཀར་རྒྱལ་པོས་བཤིག་པའི་དུས་འཁྲུག་ལ་བརྟེན། བྲོས་པོ་འགའ་ཞིག་ཁར་ཁའི་ཁྲོད་དུ་འོངས་པར། དཔོན་པོ་ནང་ཕན་ཚུན་རྩོད་པའི་རྐྱེན་གྱིས། ཁར་ཁ་ཆོག་ཐུ་རང་ཡུལ་ནས་སྤྱུགས་ཏེ་མཚོ་ཁར་འོངས་པ། སྡིག་ཅན་གྱི་ཡུལ་དུ་རིན་པོ་ཆེའི་ཆར་བབ་པའི་གཏམ་རྒྱུད་ལྟར། རེ་ཞིག་མངའ་ཐང་ཆེ་བར་བྱུང་བས། ནག་པོའི་གདོན་གྱིས་ཡིད་རྣམ་པར་བརླམས་པས། བསྟན་པ་སྤྱི་དང་ཁྱད་པར་རྒྱལ་བ་ཙོང་ཁ་པའི་བསྟན་(༡༠༩ན)

---

^{[མ་དཔེ་གཟིགས་ན་འདིར་གནོན།]}

པ་ལ་ལོག་པར་འཁུ་བའི་བསམ་སྦྱོར་ངན་པ་ཉམས་སུ་བསྟར་པ་ལ་བསྟེན། རྒྱལ་པོ་འདི་ཉིད་ཀྱིས་བསྟན་པ་འབའ་ཞིག་ཐུགས་སུ་བཅུག་པའི། རང་ཡུལ་ནས་དམག་གི་དཔུང་ཚོགས་དང་ཆབས་གཅིག་པར་བཏེག་པ། མེ་གླང་ཟླ་བ་དང་པོར་མཚོ་ཁར་འབྱོར་ཏེ། སྟོབས་ལྡན་གྱི་རྒྱལ་པོ་རཱ་མ་ཎས་ལང་ཀའི་བདག་པོ་ལྔ་པའི་ལམ་དུ་བཏང་བ་བཞིན་ཆོག་ཐུའི་དམག་ཁྲི་ཕྲག་བཞི་དང་བཅས་པ་མིང་གི་ལྷག་མར་བཏང་། ཤར་ཕྱོགས་རྒྱ་མཚོའི་མཐའ་ཚུན་མངའ་འོག་ཏུ་བསྡུས་ཏེ་ཆོས་སྲིད་གཉིས་ལྡན་གྱི་སྒོ་ནས་མངའ་འབངས་རྣམས་བདེ་བར་བསྐྱངས། རིམ་གྱིས་ཉི་མ་དབུས་ཀྱི་རྒྱལ་ཁམས་སུ་བྱོན། བསོད་ནམས་ཀྱི་ཚོགས་རྒྱ་ཆེར་སྤེལ་བའི་དགའ་སྟོན་བསྒྲུབས། བོད་ཡུལ་གྱི་རྡོ་རྗེ་གདན་ར་ས་འཕྲུལ་སྣང་གི་གཙུག་ལག་ཁང་དུ། རྒྱལ་ཕྲན་ཀུན་གྱི་ཅོད་པན་དུ་བགྲོད་བྱེད་ཟུང་ཉེ་བར་འགོད་པའི་ངལ་སོར་མཛད་པའི་ཆོས་ཀྱི་རྒྱལ་པོ་ཆེན་པོའི་མཚན་དང་ལས་ཀ་སོགས་མངོན་པར་བླངས་ཏེ། ཕྱིར་ལམ་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་ཕེབས། དེ་དགོངས་ཉེར་བདུན་ཡིན་ནའང་། སྲོད་ཀྱི་དུས་རྡེའུ་ཕྲ་མོ་ཙམ་ཡང་མཐོང་བའི་མུན་པ་ཤིན་ཏུ་དཀར་བ་བྱུང་བས། བསྟན་སྲིད་མཐའ་དག་དཀར་འཇམ་དུ་འགྱུར་བའི་རྟེན་འབྲེལ་འགྲིག །དེ་སྐབས་བོད་དང་བོད་ཆེན་པོ་མཐའ་དག་མངའ་འོག་ཏུ་ཆུག་པའི་མཚན་ལྟས་ལེགས་པའང་འགའ་ཞིག་བྱུང་འདུག །གླང་ལོའི་དགུན་ཐོག་མཚོ་ཁར་ཕྱིར་བྱོན། དེ་ཡང་བར་ཁམས་སུ་བེ་རི་དོན་ཡོད་ཀྱིས། ཀུན་མཁྱེན་བུ་རམ་ཤིང་པའི་རྗེས་སུ་ཞུགས་པ་མཐའ་དག་ཉེ་བར་འཚེ་ཞིང་། བོན་ཁོ་ན་སྤེལ་བ་ལ་བརྟེན། ས་ཡོས་ཧོར་ཟླ་ལྔ་པའི་ནང་དུ་བེ་རིའི་ཐོག་ཏུ་དཔུང་ཚོགས་རྣམས་བཏེག །མངའ་འབངས་ཕལ་ཆེར་བླངས། (༡༠༩བ)

---

^{[མ་དཔེ་གཟིགས་ན་འདིར་གནོན།]}

ལྕགས་འབྲུག་ཟླ་བ་བཅུ་གཅིག་པའི་ཉེར་ལྔ་ལ། བེ་རི་དཔོན་པོ་སོགས་མཐའ་བཙན་པོར་གྲོས་པ་རྣམས་ཀྱང་། གང་གིས་བསོད་ནམས་ཀྱི་ལྕགས་ཀྱུ་རྣོན་པོས། ཁབ་ལེན་རྡོ་བ་དང་ལྕགས་ཕྱེའི་སྣང་ཚུལ་ལྟར་ཁྲིམས་ཀྱི་དོ་ར་ཆེན་པོར་ཡོངས་སུ་བཅུག །མི་བདེ་བའི་རྩ་རྐྱེན་མཐའ་དག་གནས་ནས་དབྱུང་། ས་དགེ །ཀར་འབྲུག །སྟག་ལུང་པ་སོགས་ཀྱི་བླ་དཔོན་ཁྲིམས་དོང་དུ་ཚུད་པ་རྣམས་བཏོན་ཏེ་རང་གནས་སུ་བསྐྱལ། འཇང་རྒྱལ་པོ་ཚུན་ཆད་ཀྱི་སྐྱེ་རྒུ་རྣམས་ཀྱིས་ནོར་གྱི་དཔྱ་ཁྲལ་ཕུལ་ཞིང་གུས་འདུད་ལྷུར་བླངས། དེ་ནས་དབུས་གཙང་གི་ཕྱོགས་དཔུང་གི་ཚོགས་བཤམས་པར་མངོན་དུ་ཕྱོགས་པ་ནི། མངའ་རིས་སྐུ་མཆེད་ཀྱི་གཏེར་ལུང་དུ། ཁྱད་པར་གདུག་པ་སྦྲུལ་གྱི་ལོ་ཤར་དུས༔ གནམ་རྟགས་འོད་དཀར་སྐྱ་རེངས་ཡང་ཡང་ཤར༔ གཟའ་སྐར་འཁྲུག་ཅིང་བྱང་དུ་ཧོར་སོག་གསོ༔ འོལ་ཁའི་ཕྱོགས་སུ་རྐྱེན་བྱས་འཁྲུག༔ དབུས་གཙང་སྡེ་འཁྲུག་འགྲོ་རྣམས་ཉམ་ཐག་འགྱུར༔ ས་གཡོས་ནད་རིམས་ལོ་གསུམ་ལོ་ཉེས་འབྱུང་༔ ལོ་དགུའི་བར་དུ་དབུས་གཙང་དབུ་རུར་འཚོགས༔ ཁྲག་གི་ཆར་པ་ལོ་བདུན་བར་དུ་འབབ༔ ཅེས་དང་། ཡོལ་མོ་སྤྲུལ་སྐུའི་གཏེར་གསར་དུ། ཡོས་ཀྱི་ལོ་ལ་ངལ་སོ་བྱེད༔ འབྲུག་གི་ལོ་ལ་འབྲུག་ལྟར་འདིར༔ སྦྲུལ་ལ་སྦྲུལ་ཤུན་བཞིན་དུ་འཐོར༔ དེ་ཕྱིར་ཡོས་བུའི་ལོ་ལ་ལོང་༔ ཞེས་པའི་དུས་རྟགས་དང་མཚུངས་པར་དཔུང་ཚོགས་བྱེ་བ་ཕྲག་བརྒྱའི་གཡུལ་བཤམས་ཏེ། ལྷོ་ཕྱོགས་གཤིན་རྗེའི་མཐར་ཐུག་པ་ཚུན་དབང་དུ་བསྡུས། ཆུ་རྟ་ཟླ་བ་གཉིས་པའི་ཉེར་ལྔ་ལ། བོད་ཤིང་སྒོ་ཅན་ཡོངས་ཀྱི་རྒྱལ་བློན་རྣམས་ཀྱང་ང་རྒྱལ་གྱི་གདོང་པ་སྨད་དེ་གུས་འདུད་ལྷུར་ལེན་གྱི་སྦྱོར་བ་ལ་ཉེ་བར་ཞུགས། ཆུ་ཤེལ་གྱི་(༡༡༠ན)

---

^{[མ་དཔེ་གཟིགས་ན་འདིར་གནོན།]}

དབང་པོ་ནག་པས་ཉ་བ། དུས་འཁོར་བའི་ལོའི་ཐོག་མའི་དུས་ཚེས་ནས་བོད་ཆོལ་ཁ་གསུམ་གྱི་རྒྱལ་པོར་གྱུར་ཏེ། བཀའ་ཁྲིམས་ཀྱི་གདུགས་དཀར་པོ་སྲིད་རྩེའི་བར་དུ་འཁོར། རིས་བྲལ་གྱི་གྲུབ་པའི་མཐའ་རྣམས་ལ་གུས་འདུད་ལྷུར་ལེན་གྱི་ལྷག་པའི་བསམ་པ་མངའ་ནའང་། ཀར་སྲིད་རྣམས་ཀྱིས་བྱེད་སྤྱོད་མ་མཁས་པར་བརྟེན། ཤར་ཕྱོགས་ཀོང་པོའི་ཡུལ་ཚུན་དཔུང་ཤེད་ཀྱིས་སྤྱད། གཏེར་སྟོན་འཇའ་ཚོན་པས་རང་གཏེར་དུ་སློབ་དཔོན་ཆེན་པོའི་སྤྲུལ་པར་བསྟན་ཡོད་ཅེས་ངོས་བཟུང་། རྒྱ་གར་གྱི་རྒྱལ་པོར་ཁོ་ཤིང་། བལ་ཡུལ་ཡམ་བུའི་རྒྱལ་པོ། མངའ་རིས་རྒྱལ་པོ་སོགས་མཐའི་རྒྱལ་པོ་མང་པོས་ཀྱང་ཡུལ་ལུགས་ཀྱི་སྐྱེས་མང་དུ་ཕུལ། དེ་ཡང་རཏྣའི་བསྟན་པ་སྤྱི་ལུང་དུ། འབྲི་ཡི་རཱ་ཅོ་ཕག་གི་མཇུག་མ་ཅན༔ གུང་གི་ཚང་འཆའ་ས་ཡིས་ཟས་ཟ་ཞིང་༔ ཞེས་པའི་འོག་ཏུ་དབུས་གཙང་ཐམས་ཅད་སྐུ་ཡི་མངའ་འོག་འདུ༔ དེ་ལྟའི་བསྟན་པ་མི་ལོ་དྲུག་ཅུ་འབྱུང་༔ ཞེས་པ་འབྲི་གུང་པ་དང་ཕག་གྲུའི་བསྟན་པ་གཡག་ཙམ་ལས་རྭ་ཅོ་དང་མཇུག་མ་ལུས་པའི་ཚོད་ཙམ་གྱི་དུས་རྟགས་དང་གནས་ཚད་བསྟན་ནོ། །དེ་ཡང་རྒྱལ་བ་ཙོང་ཁ་པ་ཆེན་པོའི་ཐུགས་རྗེའི་བདུད་རྩི་གང་གིས་གསང་བ་གསུམ་གྱི་ཟ་མ་ཏོག་ཏུ་བལྟམས་པས་ཆོས་སྲིད་མཐའ་དག་གསེར་གྱི་འཁོར་ལོས་སྒྱུར་བའི་རྒྱལ་པོའི་དཔལ་ལ་འགྲན་པ་འདི་བཞིན་ནོ། །
མཛད་བྱང་།སྨྲས་པ། དབྱངས་གསལ་སྡེབ་ཀྱི་སྲ་བར་བཅིངས་པའི་ལྕགས་རྗེའི་ཁོར་ཡུག་དབུས་ན་མངོན་མཐོ་གླེགས་བུའི་རིན་ཅེན་རྡུལ་མང་བརྩེགས་པའི་བ་གམ་ན། །འགལ་བའི་ཁུར་མང་གྱ་གྱུའི་ཚུལ་སྤངས་ལེགས་བཤད་ཁམས་ཀྱིས་དྭངས་མ་ཀུན་བསྡུས་ཚར་དུ་དངར་བའི་དེབ་ཐེར་རི་དྭགས་མིག་ཅན་མ། །ཉམས་འགྱུར་འཇོ་སྒེག་གར་གྱི་རྣམ་རོལ་བཅད་(༡༡༠བ)

---

^{[མ་དཔེ་གཟིགས་ན་འདིར་གནོན།]}

ལྷུག་སྤེལ་མའི་དབྱངས་བདུན་ལྷུར་ལེན་ཚིག་དོན་མ་འདྲེས་ཟུར་མིག་དབང་གཞུ་ལྟར་འཁྱུག་ཅིང་། །མངོན་བརྗོད་ཨུ་དུམ་ཝཱ་རའི་འཕྲེང་མཛེས་གཏམ་རྒྱུད་མགོ་སྐྱེས་གཡོན་འཁྱར་མ་འདི་བློ་ལྡན་བརྒྱ་བྱིན་དག་ལས་གཞན་གྱི་སྤྱོད་ཡུལ་མིན། །ཀ་རཎྜ་ལྟར་ཡ་རབས་མཆོག་གི་སྤྱོད་ཚུལ་སྣོད་དུ་ཅ་ཅོའི་ངག་སྤངས་ཁུངས་ལྡན་ལོ་རྒྱུས་དབུས་འགྱུར་ཏ་ལའི་གླེགས་བམ་ཇི་བཞིན་རབ་གསལ་བ་ཏི་ཛྭཱ་ཡི་པུ་སྟ་ཀ །ཁ་དོག་ཚིག་དོན་མ་འདྲེས་ལང་ཚོ་རྣམ་པར་བཀྲ་བའི་ཆ་ཤས་ཡོངས་རྫོགས་སྙན་ཚིག་བསིལ་ཟེར་མདངས་ཀྱི་ཐ་གྲུ་ཀུན་ཁྱབ་སྒྲ་འཛིན་བདུད་རྩིས་ཕ་རོལ་ཤེས་ལྡན་དགའ་སྟོན་ཆེ། །ག་ཛ་ལྟ་བུའི་དྲེགས་པའི་བླུན་པོ་ལེགས་བཤད་སྐྱེས་ལས་ཇ་ཆང་བཏུང་བ་འབའ་ཞིག་དོན་དུ་གཉེར་ཕྱིར་ད་ལྟའི་དུས་ཀྱི་སྣང་ཚུལ་འདི་ལ་བ་གླང་སྤྱོད་ལས་གཞན་མི་བྲིན། །ང་ཞེས་སྟོབས་ནོར་སྙེམས་པས་འགྱིང་ཡང་ཤེས་ལྡན་རིག་པའི་ཉ་གར་གཞལ་ཚེ་ལྕི་དང་ཡང་བའི་མཐའ་བྲལ་ན་རའི་དབུས་ན་གཡུང་པོར་མཐོང་བས་མ་དམད་འགྲོ་བ་ཤིན་ཏུ་དཀོན། །ཙ་ཀོ་ར་ཡི་ལུས་འདེག་བློ་ཡིས་ཤེས་བྱའི་མཁའ་ལ་འགྲོད་ཚེ་ཞ་བོ་ཇི་བཞིན་མཐུ་དང་བྲལ་ཡང་ར་ནག་གསེར་གྱི་ཟོལ་ཅན་འགའ་ཞིག་གིས། །ཚ་ཟེར་ལ་སོགས་གྲང་དྲོའི་འཇིགས་པ་ཁྱད་བསད་བསྒྲུབས་རྣམས་གཏན་བདེ་ཟ་བར་བྱེད་པ་གོར་མ་ཆག་མོད་ལ་ལར་འདི་སྣང་རྣམ་དཔྱོད་ཚུལ་དང་བྲལ། །ཛ་ཊའི་ཅོད་པན་ཆོས་རྒྱལ་མེས་དབོན་འཁོན་རིགས་རླངས་སོགས་གྲགས་སྙན་འ་འུད་སྲིད་པའི་རྩེ་མོ་ཀུན་ཏུ་ཤ་ཤིའི་འོད་འཛིན་བློ་གསལ་ཚོགས་རྣམས་ཀྱིས། །ཝ་ལེར་སྒྲོག་འདོད་སེམས་ཀྱིས་བསྐུལ་བས་བསྔགས་བརྗོད་རྒྱུད་མང་གླུ་བླངས་ཡ་མཚན་དཔལ་གྱིས་སྐབས་གསུམ་པ་རྣམས་ས་ལ་བལྟ་ཕྱིར་རྒྱུ་སྐར་ཟོལ་གྱིས་ལྷགས། །ཧ་ཅང་ས་ཆེན་(༡༡༡ན)

---

^{[མ་དཔེ་གཟིགས་ན་འདིར་གནོན།]}

སྐྱོང་བའི་ཆོས་ལྡན་རྒྱལ་བ་ཨ་ཤྭདྠ་ཡི་ལྗོན་པའི་དབང་པོ་དར་བའི་མཆོག །ཧ་རི་ཙན་དན་དཔུང་པ་སྐྱེས་ཀྱི་དབུས་མཐོ་ཨ་ག་རུ་ཡི་རྒྱལ་ཕྲན་ཀུན་གྱིས་ཟླ་བྲལ་བ། །ཧ་རི་ཀ་ཡི་མགྲིན་དབྱངས་ཁྲིམས་གཉིས་ང་རོས་ཨ་མྲའི་ཡོངས་འདུ་མངའ་འབངས་ཡོངས་ཀྱི་འདབ་མ་འཛུམ། །ཧ་ཧར་བཞད་པའི་ཕུལ་བྱུང་དགའ་སྟོན་བཟང་པོས་ཨ་མྲི་ཏ་ཡི་སྙིང་པོའི་ཟིལ་དངར་བླ་ན་མེད། །སྲིད་ཞིའི་ཁམས་ཀྱི་ལྷ་ལམ་ཡངས་པའི་ངོས། །རྒྱལ་དབང་ཡེ་ཤེས་སྒྱུ་མའི་འོད་དཀར་ཅན། །བསིལ་ལྡན་ཆུ་སྣོད་སོ་སོར་ཤར་བ་ལས། །བཀའ་ཁྲིམས་དགེ་བའི་བཅུ་དྲུག་ཆ་ཤས་རྫོགས། །གངས་ཅན་ཀུན་གསལ་མཛེས་མའི་བཞིན་རས་ལ། །ཐུབ་བསྟན་ནམ་མཁའི་སྒྲོན་མེའི་སྤྱན་གྱི་དཀྱུས། །ལུང་རྟོགས་ཁྲོལ་པའི་སྣང་མཛོད་ལྕགས་ཀྱུ་ཡིས། །ཕན་བདེའི་འོད་དཀར་གཞོན་ནུ་རིང་ནས་འགུགས། །སྲོང་བཙན་དགེ་བཅུའི་ལེགས་ལམ་ཟླ་ཚེས་ཅན། །ལོག་སྤྱོད་ར་རིའི་དྲི་མ་བྱུང་བའི་འོད། །གྲགས་སྙན་རལ་པར་སྤུད་ཚེ་མགྲིན་སྔོན་ཅན། །ས་བླའི་ལྗོངས་སུ་སོང་ཞེས་ལྷ་རྣམས་གླེང་། །ཡིད་སྲུབས་ཀྱིས་བརླམས་སྡིག་ལྟའི་སེམས་འཆང་རིགས། །ལེགས་བྱས་སྣང་བ་འགོག་ཚེ་ཁྲི་སྲོང་ལྷས། །ཐབས་མཁས་འཕྲུལ་གྱིས་སྤེལ་བས་དགེ་ལེགས་འོད། །སྤུར་རྒྱལ་ཡངས་པའི་ས་ལ་ཀུན་ཏུ་འབར། །རལ་པའི་ཟུར་ཕུད་བླ་བྲེར་བྲེས་པའི་མཁར། །ཐུན་མཚམས་ལང་ཚོའི་སྡེ་ཡིས་ལེགས་འཁྱུད་པས། །བདུད་སྡེའི་རྒྱལ་མཚན་ནགས་ཀྱི་མེ་ཁྱེར་དག །གངས་ལྡན་ར་བའི་ངོས་ལས་ཕྱི་རོལ་བརྒལ། །མ་རིག་སྟུག་པོར་འཕྱན་བྱེད་དགྲ་སྡེའི་ལྷར། །མངོན་པར་འཁོན་པའི་བདུད་རྩི་བོད་ཡུལ་ཟོང་། །འཐུངས་པས་ཆོས་སྲིད་བདག་པོ་ས་སྐྱ་བ། །སྟོབས་ལྡན་སྒྲ་གཅན་གཉིས་པ་ས་འདིར་སྣང་། །རིན་ཅེན་བདུན་གྱི་འདོད་(༡༡༡བ)

---

^{[མ་དཔེ་གཟིགས་ན་འདིར་གནོན།]}

རྒུར་མངའ་སྒྱུར་བའི། །ས་དབང་རྒྱལ་པོའི་གོ་སར་གནམ་གྱི་མཐོངས། །སྒོ་འཕར་ཡངས་པའི་སྤོ་ནས་བུམ་བཟང་གིས། །སྤྱི་བོར་དབང་བསྐུར་སྡེ་སྲིད་ཕག་མོ་གྲུ། །ཨེ་མ་སྔོན་བྱོན་ས་སྤྱོད་ལྷ་རྣམས་ཀྱིས། །བོད་འབངས་འདབ་བརྒྱ་བཞད་པའི་ཕན་བདེའི་འོད། །སྤྲོས་ཚེ་ཉིན་བྱེད་བདག་གིས་ཅི་བྱ་ཞེས། །གནོད་སྦྱིན་ཕྱོགས་ཀྱི་འཁྲིག་པའི་ཁྱིམ་དུ་བྲོས། ཁྲིམས་གཉིས་སྲབ་ཀྱིས་མ་གཙུག་རེངས་པའི་གཉར། །དྲང་ཐིག་འཛམ་བུ་གསེར་གྱི་འཁོར་ལོ་ཡིས། །མནན་ཚེ་ངན་སྤྱོད་སྐྱེ་བོའི་བག་ཡངས་ཀུན། །བཀྲེས་སྐོམ་གདུང་བས་མནར་ལུས་ཇི་བཞིན་སྙམ། །བརྣག་ནུས་ལས་འདས་ཕ་རོལ་རྒོལ་པའི་གཡུལ། །རྣམ་པར་བཅོམ་པའི་མགོ་འཕྲེང་ཁྲག་གིས་བརླན། །ལན་ཅིག་མིན་པར་གཤེར་བའི་དམར་འོད་ཀྱིས། །རྒོད་མ་ཁ་དེ་རྒྱ་མཚོའི་མཐའ་རུ་ཡིབས། །གསེར་མངལ་སྟོབས་ལ་རྨུགས་འཛིན་འབྱོར་པའི་མཛོད། །གཅིག་ཏུ་བསྡུས་འདྲའི་སྲིད་ཀུན་དགེ་ཕྱོགས་སུ། །བསྒྱུར་བས་རྣམ་སྨིན་དཀར་པོའི་ཐིགས་པ་འབུམ། །འཛག་བྱེད་དམ་པའི་སྤྱོད་ཚུལ་རྨད་དུ་བྱུང་། །མཐོན་པོའི་མངའ་ཐང་ཕུན་ཚོགས་དཔལ་འབྱོར་ཀུན། །བཀོད་པས་ཁྱད་འཕགས་རྣམ་དཔྱོད་དབྱར་རྔའི་སྒྲས། །ཆེ་བའི་རྣམ་ཐར་བཟང་པོའི་གཙུག་ཕུད་ཅན། །ཡ་རབས་དགའ་སྟོན་རྣམ་བཀྲའི་གཤོག་རླབས་ངོམ། །ཀྱེ་མ་ཐོས་བསམ་བདུད་རྩི་ཡལ་བོར་ནས། །ངན་གཡོ་ཟང་ཟིང་རྙོོགས་པའི་བཟའ་བཏུང་གིས། །ལྟོ་བ་ཁེངས་པའི་དྲེགས་ལྡན་མཐོན་པོའི་ཁྲིར། །འཛེགས་ཀྱང་ཐ་ག་པ་དང་ཁྱད་པར་ཅི། །ཡ་རབས་ཚལ་དུ་རིགས་རུས་ཆོ་འབྲང་གི །ཡོངས་འདུའི་ལྗོན་པ་རྒྱས་པ་རྨད་བྱུང་ཡང་། །ཚེ་ལྡན་བྱ་བའི་སྦྱོང་ཚུལ་མི་ཤེས་ན། །གསེར་སྐྱོགས་སྣོད་དུ་ངན་སྐྱུགས་བླུག་དང་མཚུངས། །མཁས་དང་གྲུབ་པའི་སྐྱེ་བར་ཁས་འཆེ་(༡༡༢ན)

---

^{[མ་དཔེ་གཟིགས་ན་འདིར་གནོན།]}

ནས། །འཆད་རྩོད་རྩོམ་པའི་བློ་གྲོས་མཐུ་དམན་ན། །གནོད་སྦྱིན་ནོར་ལ་སྤྱོད་པ་ཚེ་འཕོས་ནས། །དབུལ་པོའི་ཁྱིམ་དུ་སྐྱེས་དང་ཁྱད་པར་ཅི། །མི་མཛད་སྟོབས་འབྱོར་གཏེར་ལ་མངའ་སྒྱུར་ཡང་། །འདི་ཕྱིའི་ཕུན་ཚོགས་བསྒྲུབ་པའི་རྣམ་དཔྱོད་མིག །ལོངས་ཚེ་ས་འོག་གནས་པའི་ཀླུ་ཚོགས་དང་། །སྲང་ལ་བཏེག་ཚེ་ལྕི་ཡང་གང་གིས་འབྱེད། ཁུངས་ལྡན་ལོ་རྒྱུས་མཐོང་བར་རིག་ལམ་ནས། །འདྲེན་པའི་རྣམ་འབྱེད་ཤེས་རབ་མཐུ་ཕྲ་ཡང་། །དམུས་ལོང་གཅིག་པུར་རྒྱུ་བའི་གོམ་སྟབས་བཞིན། །འགལ་འདུའི་ཁུར་གྱིས་ལྕི་བའི་གླེགས་བམ་མང་། །ལོ་རྒྱུས་གཞུ་ལ་དྲང་པོའི་རྒྱུད་དྲངས་ནས། །ལེགས་བཤད་འདབ་ལྡན་གཡོ་བའི་ཉག་ཕྲན་ཅན། །མི་ཤེས་རྨོངས་པའི་སྙིང་ལ་ཕོག་སྲིད་ཀྱང་། །གཟུར་གནས་མཁས་པས་མཐོང་ཚེ་སྤྲོ་བ་འཕེལ། །མི་མཛད་ཞིང་གི་གངས་རིའི་སྤོ་ལ་སྡེ་བཞིའི་རྩལ་གསུམ་ཡོངས་སུ་རྫོགས་པའི་མཐོ་རིས་རྒྱལ་པོ་གདོང་ལྔའི་དབང་། །རིམ་པར་བྱོན་ལ་བསྔགས་ཚིག་སྭ་སྟིའི་སྒྲ་ཡི་གདུབ་སིལ་འཁྲོལ་བས་ཡ་རབས་མདུན་སའི་ཁ་རྒྱན་སྤེལ་ལེགས་འདི། །ཤེས་བྱའི་རྦ་ཀློང་ཡིད་མཚོར་རོལ་པའི་བནྡེ་ཚངས་དབང་སྲས་མོས་བཞད་པའི་འཛུམ་ལྡན་ལེགས་བཤད་གཏེར་མཛོད་ཀྱིས། །མི་བདག་གསུང་གི་རི་བོ་མན་དྷ་ར་ཡིས་བསྐུལ་ལྟར་དཔྱད་གསུམ་དག་པའི་འཆི་མེད་ལུས་ཕྲའི་པདྨོ་བསྐྲུན། །གངས་ཅན་འཛིན་མའི་དཔྱིད་ཀྱི་མངལ་ཁུར་ལས། །བློ་གྲོས་ཡལ་འདབ་དར་བའི་ཤེས་ལྡན་རྣམས། །ངོ་མཚར་གཏམ་གྱི་ལེགས་བཤད་སྐྱེས་འདོད་ན། །དེབ་ཐེར་དཔྱིད་ཀྱི་རྒྱས་མོའི་དབྱངས་འདི་བསྟེན། །ཐུབ་བསྟན་ཀུན་གསལ་མཛེས་མའི་ཁོར་ཡུག་ཏུ། །རུང་མཐུན་གོས་ཀྱི་ཐུན་མཚམས་ཟོལ་བསྟེན་ནས། །ངེས་གསང་ཐེག་པའི་ཡང་རྩེ་སྔོ་སྐྱེས་འབྲས། །ཡོངས་སྨིན་གང་(༡༡༢བ)

---

^{[མ་དཔེ་གཟིགས་ན་འདིར་གནོན།]}

བུ་རྒྱས་པའི་གཡུར་ཟ་ལྡེམ། །དེ་ལྟ་ན་ཡང་ངེས་པ་ལྔ་ལྡན་གཟུགས། །བཤེས་གཉེན་དམ་པའི་ཨཱ་དརྴ་ཡི་ངོས། །ཟློས་གར་བསྒྱུར་བའི་དྲིན་ལས་རིག་པའི་གནས། །སྨ་ཚེ་དབྱངས་ཅན་དགྱེས་པའི་འཛུམ་གྱིས་བསུ། །ལྷག་བསམ་རབ་དཀར་དྲི་བྲལ་ཡིད་ཀྱི་མཁར། །བསྟན་བཅོས་ཆུ་ལྷའི་བུ་ཡི་པུ་སྟ་ཀས། །སྐྱེ་རྒུའི་ཉོན་མོངས་འདུ་བ་འཁྲུགས་པའི་ནད། །ལེགས་བཤད་ཆུ་ཀླུང་དྭངས་པོས་དྲུངས་འབྱིན་ཅིང་། །འཛམ་བུའི་ལང་ཚོ་དར་བབས་འཁྲི་ཤིང་གིས། །ཉེར་མཚོན་ཡངས་པའི་ནོར་འཛིན་སྐྱོང་བ་ཀུན། །རྩུབ་འགྱུར་དཔལ་གྱི་རྣོ་ངར་རབ་ཞི་ནས། །དགེ་བཅུའི་ཁྲིམས་ཀྱིས་རྫོགས་ལྡན་འབོད་པར་ཤོག །ཕན་བདེའི་གདུགས་དཀར་སྲིད་པའི་རྩེ་མོའི་བར། ཁོར་ཡུག་གཅིག་ཏུ་ཁྱབ་པའི་ལེགས་པའི་ལམ། །སྟོབས་བཅུའི་རྩལ་འཆང་རིང་ལུགས་སྙིང་པོའི་བརྒྱུད། །འགྲོ་བའི་བསོད་ནམས་ཞིང་དུ་འབར་གྱུར་ཅིག །ཅེས་གངས་རིས་བསྐོར་བའི་ལྗོངས་སུ་མཆོག་གསུམ་དམ་པར་གཏན་གྱི་སྐྱབས་སུ་འཛིན་ཅིང་། རྣམ་འདྲེན་ཟས་གཙང་སྲས་པོའི་བསྟན་པ་རིན་པོ་ཆེ་ལ་ཕུད་དུད་སོགས་བླ་ན་མེད་པར་བཀུར་བའི་ས་ལ་སྤྱོད་པའི་མཐོ་རིས་ཀྱི་རྒྱལ་བློན་རྣམས་གཙོ་བོར་བཀོད་པའི་དེབ་ཐེར་རྫོགས་ལྡན་གཞོན་ནུའི་དགའ་སྟོན་དཔྱིད་ཀྱི་རྒྱལ་མོའི་གླུ་དབྱངས་ཞེས་བྱ་བ་འདི་ཡང་། སྟོབས་ཀྱི་དབང་ཕྱུག་བསྟན་འཛིན་ཆོས་ཀྱི་རྒྱལ་པོའི་བཀས་བསྐུལ་བར་བརྟེན། བཀའ་ཆེམས་བཀའ་ཁོལ་མ། ཐུགས་རྗེ་ཆེན་པོའི་སྐོར། མཁས་པའི་དབང་པོ་འགོས་ལོ་གཞོན་ནུ་དཔལ་དང་། ཚལ་པའི་དེབ་ཐེར་སོགས་ཁུངས་ཐུབ་ཀྱི་ཡིག་ཚང་རྣམས་ལ་ཞིབ་མོར་དཔྱད། མཁས་རློམ་དྲེགས་ལྡན་གྱི་ཁུངས་མེད་བླུན་ཚིག་གི་གླེགས་བམ་རྣམས་ལ་དགག་གཞག་ཅུང་ཟད་བགྱིས་ཏེ། སྙིགས་དུས་ཀྱི་རྒྱལ་(༡༡༣ན)

---

^{[མ་དཔེ་གཟིགས་ན་འདིར་གནོན།]}

བ་གཉིས་པ་རྗེ་བཙོང་ཁ་པའི་བསྟན་ལ་ཞུགས་པས་རྒྱུ་མཚན་ཤེས་ནས་མི་ལྡོག་པའི་དད་པ་ཐོབ་ཀྱང་། འཐད་ལྡན་གྱི་གྲུབ་པའི་མཐའ་རྣམས་ལ་ཆོས་སྤོང་གི་སྒྲིབ་པས་མ་སྦགས་ཤིང་། བཅུ་ཕྲག་རིག་པའི་གནས་ལ་བློ་གྲོས་ཀྱི་འཇུག་པ་ཅུང་ཟད་ཤར་བའི་ཟ་ཧོར་གྱིས་རིགས་ལས་ལོ་རྒྱུས་སྨྲ་བའི་བཙུན་པ་ངག་དབང་བློ་བཟང་རྒྱ་མཚོ། མིང་གཞན་ཚངས་སྲས་བཞད་པའི་རྡོ་རྗེ་འཇིགས་མེད་གོ་ཆ་ཐུབ་བསྟན་ལང་ཚོ་གསར་པའི་སྡེས། འགྲོ་བའི་བླ་མ་ཤཱཀྱ་སེང་གེ་དྲག་པོ་ཞེས་པ་ལྕགས་སྤྲེལ་ལོར་བལྟམས་ནས་ལོ་ཉིས་སྟོང་དྲུག་བརྒྱ་དང་ཉག་མ་གསུམ་འདས་པ། འཕགས་པའི་ཡུལ་དུ་སཱུཪྻ་ཞེས་པ་གངས་ཅན་ཀྱི་ལྗོངས་འདིར་ཉི་མར་གྲགས་ཤིང་། མ་ཧཱ་ཙི་ནའི་རྒྱལ་ཁམས་སུ་དབང་ཐང་དང་བསྟུན་པའི་སྐད་གུའི་ཝུའི། ཕྱོགས་འདིར་ཆུ་མོ་ལུག་ཏུ་བརྗོད་པའི་གླུ་དབྱངས་ཀྱི་ཟླ་བའི་ཕྱོགས་སྔ་མའི་རྒྱལ་བ་དང་པོའི་ཚེས་ལ། སྨན་ལྗོངས་སའི་ལྟེ་བ་དགའ་ལྡན་ཕོ་བྲང་མེ་ཏོག་མངོན་པར་བཀྲ་བའི་ལྡིང་ཁང་དུ་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ།། །།མངྒ་ལཾ།། །།