མཆོད་བརྗོད་དང་རྩོམ་པར་དམ་བཅའ་བ།
བྲ སུ ར བ ཏི ཨ བྷི ཛྭ ལ སྶ རྦྦ དྷ རྨྨི རྨ ཡུ ཁྱོ ཛ པ ཪྻྻཱ ད ན ྉྤ ཤྱ ཀཱ རྞྞ སྱམ ཎྱཱ ས ན ཀ ན ཀ མ དྷུ ར ཀི རྟི ཙི ཏྟཱ བ ལ ྅ བྷ ཡ ཡཀ ནྟ ཤྩ དྲྀ ཥྚོ ན ག རྱ སྱ མ ས དྱ ཉྩ ཀ ལྦ ཤྴུ བྷ
བསྐལ་པ་བཟང་པོའི་ལྟ་ན་སྡུག་པའི་གྲོང་ཁྱེར་དབུས་ན་འཇིགས་བྲལ་སྙིང་སྟོབས་གསེར་གྱི་གདན་ཁྲི་ལ། །གྲགས་སྙན་ནོར་བུའི་རྣ་རྒྱན་འོད་གཟི་མངོན་པར་རབ་འབར་ཆོས་ཀུན་མ་ལུས་གཟིགས་པའི་མིག་སྟོང་ཅན། །(༢ན)
ཨ དྷི ད ཤ བ ལ པྲྀ ཤྱ ཤཽ དྷཽ ད ནཱ ནྟ དྭ དཻ ཏྱཱ བྷ གཱ སེ ན དུ ནྡུ བྷྱ ཛི ནྱཱ ས ཧ སྭཱ ཧ ཏ ཏྲི བི བི ཤ བྷ ར ཀེ ཏུ ཙ ཤྲེ ཡ ཀ རྱ ཏྲི ལོ ཀེ པྲ དྷཱ ནེ བྷི རཱ དྷི ཏྱ ཨུ ནྣ སྱ ཨུ ཏྟ རྱ ཙཱ།
མཐའ་གཉིས་བཅུད་བྲལ་སྡེར་བཅས་བཅོམ་པའི་རྒྱལ་རྔ་སྟོང་བརྡུངས་སྟོབས་བཅུ་མངའ་བ་མཁར་ཉལ་ཚོགས་ཀྱི་དཔལ། །བླ་མ་མཐོ་བའི་ཁྱུ་མཆོག་ཟས་གཙང་སྲས་པོ་འཆི་མེད་གཙོ་བོས་འཇིག་རྟེན་གསུམ་དུ་དགེ་ལེགས་མཛོད། །(༢བ)
ཤཱ ཤྭ ཏ མ ཀྴ ཡཱ ཀ ར པ རོ བི ཀོ ཥ མྲྀ ཏ བྷཱ བ ནཱ ཤ ཡ ཀུ རོ རྦ ཛྲ ཙ ན པྲ མཱ རྡི ན མི ཥུ ཉྩ དོ ཧ ན ས ནཱ ཏ ནཱ ཡུ བི བྷ བཿ
འཆི་(སྡེབ་སྦྱོར་ཟབ་མོའི་དབྱངས།) བའི་དངོས་པོ་རྣམ་པར་འཇོམས་པའི་གཞོམ་མེད་ཚེ་ཡི་གཡུང་དྲུང་རྟག་པའི་རྡོ་རྗེ་གང་། །ལོངས་སུ་སྤྱོད་ལ་ཟད་མི་ཤེས་པར་འདོད་པ་འཇོ་བའི་འབྱུང་གནས་མཆོག་གི་གན་མཛོད་ཀྱི། །(༣ན)
ཤྱཱ ཡུ བི པཱ ཀ ཀ པླ ཏ རུ ཙཱ ག ཛི ཏྲི ཡུ ག སི དྡྷི ཕ ལྱ ཙ པི བྷུ ཛྙཱ ན ཙ ཨཱ ཡཱ ནུ ཏྟ ར པ རཱི ནྡྲ ཙཱ པ རི མི ཏཿ སུ བཱ ཙྱ ཀུ རུ དཱ།
ཁྱབ་བདག་དབང་པོར་དུས་གསུམ་རྒྱལ་བ་ཡོངས་ཀྱིས་ལེགས་བསྔགས་ཚེ་དང་ཡེ་ཤེས་དཔག་ཏུ་མེད། །ཚེ་དཔལ་ཡོངས་འདུའི་ལྗོན་པ་དུས་སུ་སྨིན་པའི་དངོས་གྲུབ་འབྲས་བུ་བླ་ན་མེད་པ་སྩོལ། །(༣བ)
ཨཱ ཤྩ རྱཱ མ དྷཱུ རཱ ཀུ མཱ ར བཱ ཡུ ནཱཾ ཀུ ཤྱེ ན ཀེ ག རྱ ཙཱ ས རྦྦཾ དྷ རྨྨ ཝ ཤ དྨ ཙི ཏྟ ཧ ཏ ཙ ཛྙཱ ཡཿ པ ར བ སི ཏཱ།
ཚར་དུ་དངར་བའི་མཁྱེན་པའི་གེ་སར་གཞོན་ནུའི་ལང་ཚོའི་ལྕགས་ཀྱུ་ཡིས། །ཆོས་ཀུན་རི་དྭགས་མིག་ཅན་མ་ཡི་སྙིང་ལ་བསྣུན་པའི་རང་དབང་དུ། །(༤ན)
ཀྲ ཧྱེ པ རྴ ཨུ ད ཡ ཡ རྨྨ ཏ ག ཎཱ ད རྴ ཉྩ ནཱ ཊ ཀྱ ཙཱ རྴ པཱ ཀཱ ཎྛི ཀ སཱ རི སཱ ཨ བ ག ཏཱ གཱི ནཿ ཀུ མཱ ར ཤྴུ བྷཾ
འདུ་འབྲལ་ཟློས་གར་རི་མོའི་སྣང་བརྙན་ཆོས་ཉིད་མེ་ལོང་གཙང་མའི་ངོས། །རྗེན་པར་འཆར་བའི་བྱེད་པོ་ཟུར་ཕུད་ལྔ་པ་མགྲིན་པའི་རྒྱན་དུ་བཞུགས། །(༤བ)
ལ ཀྵཱ སཱུ རྨྨཱ མ ཡུ ཁྱ ཧཱ ར གུ ཎ ཙཱ ལི ངྒཱ ཀྲྀ བ ཤྱེ པ ར སྠི སྠི རྱཱ བྷཱ བ ཙ ལཿ ས མ ཏྟ པ ཝ ལ ཛྙཱི མཱུ ཏ ད ནྟི ནྱ ཙ།
སྣང་མཛོད་འབུམ་གྱི་དྲ་བས་འཁྱུད་པའི་བྱུ་རུའི་རྡུལ་བརྩེགས་ལ། །བརྟན་གཡོའི་དངོས་ཀུན་དབང་དུ་བྱེད་པའི་ཡོན་ཏན་ཡོངས་རྫོགས་པའི། །(༥ན)
ཤཱ ཤྭ ཏྱཱ བྷ ལི ཀ ཡ ཡ རཽ བི ཀ ཀུ རུ ར ཐ ཐ རྱཱ ཨ དྷི ར ཝ ཡ རྟི ཙཱ དེ ལོ བྱ ཏྟ རྱ ཀ རོ ཏི ཀུ ལླ ན ཡ ནཾ ཏཱ མ ཏྲི བྷ བྱ སྨ ར། །
ཟུར་མིག་ཉག་ཕྲན་ཙམ་གྱི་དགེ་བའི་གཟུགས་ཅན་འདུས་མ་བྱས། །འདར་མཛད་རིག་བྱེད་ལྷ་མོས་སྲིད་པ་གསུམ་ལ་མངའ་སྒྱུར་ཅིག །(༥བ)
མུ ཁ མ ན ཀཱ ནྟོ ྅ དྭཱ པ ར དཱ བྷྲ མ བཱ སྱཱ ཀྲྀ དྲི ཛ ཏུ ངྒཱི ཤེ ག ཙ ཤི ཏི བཻ ཌཱུ པྲ དྷ ར སི ཏོ ཀྟ ཤོ པ སི དྷི གོ རཱ ཊ ཀྲ །
ཡིད་འོང་བཞིན་རས་ཟླ་གཞོན་འཁོར་ལོ་གཉིས་སྐྱེས་ལ། །འཁྲུལ་པ་སྟེར་ཡང་འཕྱང་མོ་སེལ་བྱེད་མགོ་སྐྱེས་ཀྱི། །བཻཌཱུར་མཐིང་ཁའི་ལན་བུར་རབ་འཕྱང་དབྱངས་ཅན་མ། །སྨྲ་བའི་དབང་ཕྱུག་ངག་གི་རྒྱལ་པོ་ཉེར་གྲུབ་མཛོད། །གངས་ཅན་ལྷ་ལམ་ཡངས་པའི་ཁྱོན་འདིར་རྒྱལ་བའི་བསྟན་པ་བཅུ་གཉིས་བདག་པོའི་གུར་ཁང་མཆོག །མཁྱེན་བརྩེ་ནུས་པའི་ནམ་མཁའི་གྲུ་ཡིས་ཉེ་བར་འདྲེན་མཛད་ཆོས་རྒྱལ་མེས་དབོན་རྣམ་གསུམ་དང་། །རྒྱལ་བ་ཀུན་དངོས་མཚོ་སྐྱེས་རྡོ་རྗེ་བསྟན་པའི་རྩ་ལག་ཐམས་ཅད་མཁྱེན་པ་ཞི་བ་འཚོའི། །བཀའ་དྲིན་གཟུགས་ཅན་དབྱིག་འཛིན་ལྟོ་འདིར་ཤོང་འགྱུར་མིན་ན་ཀུན་མཁྱེན་སྲང་ལས་གང་གིས་གཞལ། །ལི་ཁྲིའི་ལྕུག་ཕྲན་མཁྱེན་པའི་སྣང་བ་ཅན། །འཇམ་(༦ན)
མགོན་བློ་ཡི་ལང་ཚོ་བཟང་པོའི་ཚོན། ཁ་དོག་སོ་སོར་བཀྲ་བའི་གྲགས་པའི་རྒྱན། །ཕྱོགས་བྲལ་རྣ་ལུང་འགོད་མཁས་རྟག་ཏུ་རྒྱལ། །དཔལ་ལྡན་ཆོས་ཀྱི་རང་བཞིན་ངོས་ཡངས་པར། །གནས་ལྔའི་བང་མཛོད་འབྱོར་བར་ལྷུན་གྲུབ་པའི། །མངའ་སྒྱུར་བགྲོད་བྱེད་བན་དྷུ་ཛི་ཝ་ཀ །རྨད་བྱུང་ཅོད་པན་མཆོག་ཏུ་རྣམ་པར་བསྔགས། །རྒྱ་ཧོར་ལུང་དང་རིགས་ཀྱིས་མངོན་མཐོ་ཞིང་། །བཀའ་ཁྲིམས་གསེར་འཁོར་མཆོག་དམན་གཉའ་གནོན་པའི། །ས་སྐྱའི་འཇམ་མགོན་དཔལ་ལྡན་རླངས་ཀྱི་གདུང་། །ཆོས་ལྡན་ས་སྐྱོང་རྒྱལ་པོར་སུ་མི་དད། །སྨྲ་བའི་འབབ་སྟེགས་མདུད་པའི་རྒྱར་བཅིངས་ཀྱང་། །མཐོན་པོའི་ཁྲི་ལ་དྲེགས་པས་འགྱིང་མིན་པའི། །ལེགས་བཤད་གཏམ་གྱི་འབྱུང་གནས་བློ་ལྡན་ཅན། །གང་དུ་གནས་ཀྱང་དད་པའི་སྤྲོ་བ་འཕེལ། །ཡ་རབས་དམ་པའི་སྤྱོད་ཚུལ་པད་དཀར་ཚལ། །ཆེས་ཆེར་བདོ་བ་སྙིགས་མའི་བསིལ་ཟེར་གྱིས། །ཟུམ་པའི་དུས་འདིར་དེབ་ཐེར་གཏམ་རྒྱུད་སོགས། །བརྗོད་པ་རང་ཉིད་ངལ་བའི་རྒྱུ་རུ་ཟད། ཁྱད་པར་བཅུ་ཕྲག་རིག་པའི་ཆུ་གཏེར་ཆེ། །བློ་གྲོས་གཟིངས་ཀྱིས་སྒྲོལ་འདོད་རིག་བྱེད་པ། །ཤེས་བྱའི་ཚུལ་ལ་མ་སྦྱངས་བསྟན་བཅོས་དག །རྩོམ་པར་རིག་པའི་ཚུལ་ལ་ཡིད་མི་གཏོད། །འོན་ཏང་སྟོབས་ཀྱིས་ཡངས་པའི་ནོར་འཛིན་ལ། །འཁོར་ལོ་སྒྱུར་བའི་བཀའ་ཡི་དྲི་བཞོན་གྱིས། །དེབ་ཐེར་རྫོགས་ལྡན་གསར་པའི་དགའ་སྟོན་མགྲོན། །འབོད་བྱེད་མ་ལ་ཡ་ཡི་རྒྱུད་འདི་སྤྲོ། །