རྒྱ་བོད་ཧོར་སོག་གི་མཆོག་དམན་བར་པ་རྣམས་ལ་འཕྲིན་ཡིག་སྙན་ངག་ཏུ་འགོད་པ་རབ་སྙན་རྒྱུད་མང་།
རྒྱ་བོད་ཧོར་སོག་གི་མཆོག་དམན་བར་པ་རྣམས་ལ་འཕྲིན་ཡིག་སྙན་ངག་ཏུ་འགོད་པ་རབ་སྙན་རྒྱུད་མང་ཞེས་བྱ་བཞུགས་སོ།།
རབ་བྱུང་བཅུ་གཅིག་པའི་ཤིང་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག །དཔལ་ལྡན་ས་སྐྱའི་ཆོས་ཀྱི་གདན་ཁྲི་ལ་བཞུགས་པ་ཞབས་དྲུང་བདག་ཆེན་ངག་དབང་བསོད་ནམས་གྲགས་པ་རྒྱལ་མཚན་དཔལ་བཟང་པོའི་ཆབ་ཤོག་གི་ལན་མཐོ་རིས་ལྡིང་བའི་གསང་པའི་ཐེམ་སྐས། ཨཱ ཛི ཏྲི གུ ཧྱཱ ས མུ དྲེ ཤྭ ར སུ རྻཱ ས དྷཱ པ ཙུ རྀ ལ ཀྵ སྨི རྨཱུ ལ སུ ཁཱི ཡ པ དྨཱ ཧ སཱ སུ ཀྲྀ །རྒྱལ་(ཁ་སྒོ་ཕན་པའི་སྡེབ་སྦྱོར།)བ་ཀུན་གྱི་གསང་གསུམ་ཆུ་གཏེར་ལས། །མཁས་དང་གྲུབ་པའི་དབང་ཕྱུག་ཉིན་མོར་བྱེད། །ལེགས་བྱས་འོད་ཟེར་འབུམ་གྱིས་ལུས་ཅན་རྣམས། །ཕན་དང་བདེ་བའི་འདབ་བརྒྱ་བཞད་པའི་དྲུང་། །(༢ན)
རིང་མིན་མཆོག་ཏུ་དགེ་བའི་དུས་ཀྱི་ཆར། །ཉེས་བརྒྱ་ར་རིའི་དྲི་མ་དྲུངས་ཕྱུང་ཞིང་། །མཚན་དཔེའི་ཆ་ཤས་བཅུ་དྲུག་ཡོངས་གང་བས། །སྔོན་མེད་ཟླ་བ་གསར་པའི་གཟུགས་ཀྱི་སྐུ། །ལེགས་བྱས་འབུམ་སྡེའི་ལུས་ཕྲའི་འཛུམ་མདངས་ཀྱིས། །ཕན་བདེའི་སྣང་བ་རྒྱ་མཚོའི་ངོ་མཚར་མགྲོན། །མཐོ་རིས་ལྡིང་ཁང་གསར་པའི་ཐེམ་སྐས་ལས། །བསུས་འདི་སྐལ་བཟང་འགྲོ་བའི་གཉེན་གཅིག་པུ། །དྲི་མེད་གདུང་གིས་མངོན་མཐོ་འཆི་མེད་རྒྱུད། །འཁོན་རིགས་མ་ལ་ཡ་ཡི་སྐྱེད་ཚལ་ལས། །མཁྱེན་བརྩེའི་འདྲི་བསུང་ཕྱོགས་བརྒྱར་འགྱེད་པའི་དཔལ། །གྲངས་མེད་སྐྱེ་བོའི་བསོད་ནམས་ཟོང་གིས་བསྒྲུབས། །འཇམ་དབྱངས་ཐུགས་རྗེའི་གུར་ཀུམ་གསར་པའི་ཚོན། །རི་མོ་ཡོངས་སུ་སྨིན་པའི་རྣམ་དཔྱོད་ཀྱིས། །ལུང་རྟོགས་བསྟན་པའི་གདུགས་དཀར་སྲིད་རྩེ་ཡི། ཁོངས་ལས་བརྒལ་བར་འཁོར་བའི་ས་སྐྱ་པ། །བཀའ་ཐམ་ཚིག་ཕྲེང་གཉིས་སྐྱེས་ལུས་དཀར་ཅན། །ངོ་མཚར་གཏམ་གྱི་མགྲིན་རྔ་སྒྲོག་བཞིན་དུ། །ཐུན་འཚམས་ཕྱག་རྒྱར་འགྲོགས་པའི་བདོག་པ་ཟུང་། །སྙིམ་པར་ཐོགས་ཏེ་སྨན་ལྗོངས་ཚལ་དུ་སོན། །རྒྱལ་བ་ཀུན་དངོས་འཇམ་མགོན་བཙོང་ཁ་པའི། །རིང་ལུགས་གསེར་གྱི་ཤིང་(༢བ)
རྟའི་ཁ་ལོ་པ། །ཟ་ཧོར་རིགས་ལས་ཤཱཀྱའི་བཙུན་པ་ཡང་། །ལྔ་རིག་རྒྱ་མཚོར་བགྲོད་པའི་འདུན་པར་མཆིས། །སྙིགས་མས་ཆེར་སྦགས་མི་བསྲུན་ཚེར་དོང་ན། །འགྲོ་ལ་རྗེས་ཆགས་འཕགས་ཆེན་དམ་པ་རྣམས། །སྙིང་སྟོབས་གོ་ཆ་བཙན་པོས་གཞན་གྱི་དོན། །སྒྲུབ་ལ་ངལ་བ་མེད་པ་ཆོས་ཉིད་ལགས། །དེ་ཕྱིར་མཁྱེན་བརྩེའི་འོད་དཀར་གར་མཁན་མས། །རྩོད་པའི་མུན་པ་རིང་དུ་སྐྲོད་པ་དང་། །རྫོགས་ལྡན་སྣང་བ་འབུམ་སྡེའི་དགའ་སྟོན་གྱིས། །ཀུན་ཁྱབ་རྣམ་པར་ཐར་པ་དེ་རྨད་བྱུང་། །གསང་ཆེན་སློབ་བཤད་དབྱར་སྐྱེས་སྙན་པའི་དབྱངས། །ཕྱོགས་བརྒྱར་བསྒྲིགས་ཀྱང་སྐལ་བཟང་མདོངས་མཐའ་ཅན། །མ་གཏོགས་འདབ་ཆགས་ཀུན་གྱི་མངལ་འཛིན་པ། །སྲིད་མིན་དམན་པའི་སྐལ་བ་ཅན་དེས་ནོངས། །བློ་གྲོས་རིན་ཅེན་སྦྲེལ་བའི་ཐེམ་སྐས་ཅན། །ཐུབ་བསྟན་རྒྱལ་མཚན་སྒྲེང་བའི་སེང་གེ་ཁྲིར། །སྙན་རྒྱུད་ཡིད་བཞིན་ནོར་བུས་ས་སྐྱ་པའི། །རིང་ལུགས་རྣམ་པར་རྒྱས་པའི་མཛད་བཟང་ངོས། །མངོན་པར་ཡངས་པའི་མཁྱེན་པ་མེས་པོའི་ཐོད། །དྲི་མ་མེད་པའི་བཀའ་མཆིད་གངྒཱའི་རྒྱུན། །སྐལ་ལྡན་ཤིང་རྟར་འགྲན་པའི་བྱ་མ་རྟས། །སུག་པར་ཐོགས་ཏེ་དགའ་བའི་གར་ཡང་བྱོས། །རི་མོ་རབ་དཀར་པདྨའི་ཚལ། །རྟེན་གྱི་འདབ་རྒྱ་གཡོ་བ་ལ། །རྟགས་ཀྱི་ཟེའུ་འབྲུ་གཡུར་ཟ་བ། །གྲུ་འཛིན་གཉིས་པའི་རྩེ་ནས་ཕུལ། །ཕོ་བྲང་ཆེན་པོ་སྣེའུ་བདོང་རྩེ་ནས་ཞབས་ཟུང་རིན་པོ་ཆེ་གོང་མ་དཔལ་ལྡན་ལྷ་གཟིགས་མི་ཕམ་བསོད་ནམས་དབང་ཕྱུག་གྲགས་པ་རྣམ་རྒྱལ་དཔལ་བཟང་པོས་ཤིང་བྱ་གནམ་ལོ་གསར་ཚེས་ཀྱི་དགའ་སྟོན་དང་བཅས་པའི་ཆབ་ཤོག་གི་ཕེབས་ལན་དགེ་མཚན་རྒྱ་མཚོའི་བདུད་རྩི། (༣ན)
ད ཤ བ ལ ཤཱི ཁཱ ཏྤ རྱ ནྟ སི དྷེ ༔ ཀུ ལ ར སྨི ས ཧ སྲ ཛཱ ལ ཧཱ། ཤཽ བྷི ཀ ཀ ར ཧཱ བ ཛྲ པུ དྡྷ བྷུ པཱ ལ ཡ ས རྦ དཱ། །སྟོབས་(ཛཱ་ཏིའི་སྡེབ་སྦྱོར་འཕགས་མ།)བཅུའི་དཔལ་གྱི་མི་ཞལ་ལམ་ཡངས་ལས། །མཐའ་ཀླས་གྲུབ་རིགས་འོད་ཟེར་སྟོང་འབར་བ། །མི་འཇིགས་བཞི་ལྡན་རྡོ་རྗེ་རྒྱལ་པོ་ཡིས། །ནོར་འཛིན་སྐྱོང་གང་དུས་ཀུན་དག་པར་མཛོད། །བྱང་ཕྱོགས་ར་བ་དཀར་པོའི་ཁོར་ཡུག་འདིར། །ཆོས་དང་སྲིད་ཀྱི་གཙུག་ཏོར་མཐོན་པོའི་རྩེར། །མང་པོས་བཀུར་བ་ལྷ་བཅས་སྐྱེ་རྒུའི་མགོན། །དཔལ་ལྡན་ལྷ་གཟིགས་མི་དབང་དམ་པའི་དྲུང་། །བརྒྱ་ཕྲག་ལེགས་པའི་ལམ་གྱི་སྐྱེད་ཚལ་དུ། །ཕུལ་བྱུང་ཉེ་བར་ལེན་པའི་ཡོངས་འདུའི་ལྗོན། །ལུགས་ཟུང་ལོ་འདབ་འབྲས་བུ་གཡུར་ཟ་བའི། །ངོ་མཚར་གཏམ་གྱིས་ཐོས་འཛིན་སྐྱེས་སུ་བྱས། །དགེ་མཚན་རྒྱ་མཚོའི་མངར་བའི་བདུད་རྩིའི་བཅུད། །གསར་ཚེས་གནམ་ལོའི་ཡོལ་གོར་རྟག་འཁྱིལ་བའི། །བགྲང་བྱའི་(༣བ)
དཔལ་མོ་བཞད་པའི་སྙན་ཚིག་འཕྲེང་། །བདོག་པ་ཕྱག་རྒྱའི་ལང་ཚོར་སྤྲས་པ་སོན། །འཇམ་དཔལ་སྙིང་པོའི་རིང་ལུགས་འཛིན་རློམ་ཡང་། །ཉེར་འཚེའི་ཤུགས་དྲག་དྲི་བཞོན་གྱིས་དབེན་ངོས། །ཐོས་བསམ་སྒོམ་པའི་གྲུ་གཟིངས་ཐབས་ཚུལ་གྱིས། །གཙུག་ལག་ནོར་བུའི་དཔྱ་ལ་སྤྱོད་སྙམ་གྲང་། །མི་དམན་དགེ་བཅུའི་ཆ་ཤས་ཀུན་རྫོགས་ཤིང་། །བདེ་ལེགས་ག་བུར་ཐིགས་པ་འབུམ་འཛག་པ། །ཟླ་འཕྲེང་ལང་ཚོའི་བཞིན་རས་ངོམ་པའི་དུས། །ས་སྤྱོད་དམ་པའི་སྡེ་བཞི་རྒྱས་གྱུར་ཅིག །ཡུན་དུ་སྙན་པའི་དབྱར་སྐྱེས་སྒྲ། །སྒྲོག་པའི་ཆར་ལྡན་དུས་ཀྱི་མགྲོན། །འབོད་མཁས་གསུང་བྲིས་ལེགས་ལྡན་དཔྱིད། །རྒྱུ་བའི་ཚུལ་འདིར་མི་བསྐྱུད་འཚལ། །རབ་དཀར་བཀྲ་ཤིས་ཐགས་ཀྱི་དར། །འཚམས་སྤྲིན་རྒྱ་ཡིས་འཁྱུད་བཞིན་དུ། །ཟླ་སྣང་རྟ་ཆེན་གྱིས་ཉ་བའི། །ཨཱི་ཡིག་འཆར་བའི་ཚེས་ལ་ཕུལ། །འཇམ་མགོན་བླ་མའི་གདན་ས་ཆེན་པོ་རི་བོ་དགའ་ལྡན་དང་གངས་རིའི་ཁྲོད་ཀྱི་རིགས་པ་སྨྲ་བ་ཀུན་གྱི་འབྱུང་གནས་གསང་ནེའུ་ཐོག་གི་རྔོག་ལོ་ཙཱ་བ་གཉིས་ཀྱི་ཆོས་ཀྱི་ཁྲི་ལ་མངོན་པར་འཛེགས་པ་ཡོངས་འཛིན་བླ་མ་དམ་པ་འཇམ་དབྱངས་དཀོན་ཅོག་ཆོས་འཕེལ་ལ་བརྟན་བཞུགས་དང་བཅས་ཏེ་ཞུ་འཕྲིན་དུ་གསོལ་བ་མི་འགྱུར་རྡོ་རྗེའི་སྙིང་པོ། (༤ན)
བི པ རྻཱ ད ནྱེ ཀ ཛྙོ ན པ ར མ ཙཱ ད རྴ བི མ ལཾ། །བི ཛྲྀ མྦྷཱ དྷ རྨ ཤྩ པྲ ཏི མ མ མ ནཱ ཊ ཀྱ བུ དྷ ཙ། །མྲྀ དུ ཤྲཱི དྷྲྀ གྨཱུ ལེ ན ར བྷ བ ས དྷཱ སཾ ག པ ཊུ ཡོ། །ཏྟ རཱ ཙ ཏྲོ ཝ རྟི ལྦི ལི ཏ ལ ཛ ཏ ཉྩ ཀྲ ཧི མ བཱཾ། །བླ་(སྡེབ་སྦྱོར་གཙུག་ཕུད་ཅན།)ན་མེད་པའི་ཡེ་ཤེས་མེ་ལོང་རྙོག་པའི་དྲི་མ་དང་བྲལ་ངོས། །ཆོས་ཀུན་མ་ལུས་ཅིག་ཅར་མཁྱེན་པའི་རང་གཟུགས་ཟློས་གར་རྣམ་འགྱིང་ཡང་། །ཟུར་ཕུད་ལྔ་པ་མི་ཡི་སྲིད་བཟུང་ཐུན་འཚམས་བླ་གོས་རབ་བཀྲ་བ། །གངས་ཅན་མཁས་གྲུབ་གསེར་གྱི་འཁོར་ལོར་ཐོགས་མེད་མངའ་སྒྱུར་གང་གི་དྲུང་། །དྲི་བྲལ་ཀུན་གསལ་འབྲས་ལྡན་དུས་ཀྱི་མཁར། །གསང་གསུམ་མཛད་པའི་ཉིན་བྱེད་འོད་རྣོན་ལས། །དད་པའི་པདྨ་དགོད་པའི་ཟེའུ་འབྲུའི་དབྱངས། །ཉམས་འགྱུར་སྟོང་གི་བཅུད་ལེན་འདི་ལྟར་གསོལ། །དེང་དུས་མི་ཟད་མཚན་བཟང་འཁོར་ལོའི་རྒྱན། །ཕུལ་བྱུང་གཟུགས་སྐུར་སྡུད་པའི་ཟླ་བྲལ་ཀྱིས། །ཞབས་སེན་མཐོན་ཀའི་འོད་སྟོང་ལྷར་བཅས་འགྲོའི། །ཟུར་ཕུད་བླ་ན་མཛེས་འདི་ཆོས་ཉིད་ལགས། །སྙན་འགྱུར་གར་དུ་རྩེ་བ་དྲི་ཟའི་རྒྱུད། །ཟག་མེད་སྐད་ཀྱི་ང་རོ་ནཱ་དེའི་སྒྲ། །ཟབ་རྒྱས་ཆོས་ཀྱི་འཇིགས་མེད་གླུར་སྒྲོག་པ། །སྲིད་འདིའི་མཁས་རློམ་རི་དྭགས་དབུས་(༤བ)
ན་བརྗིད། །མི་འགྱུར་སྟོང་གཟུགས་མཁའ་ལ་བདེ་བའི་མདངས། །གཉིས་མེད་ཐབས་ཤེས་ཟུང་དུ་འཇུག་པའི་མཐའ། །རྣམ་འདྲེན་མཁྱེན་པའི་སྲང་ལ་གཞལ་དཀའ་ན། །ཚད་དུ་རྗོད་པ་རང་ཉམས་བྱིས་པའི་བློ། །གྲུབ་མཐའ་རྣམ་བཞིའི་བཞེད་གཞུང་ཚང་ཚིང་ཁྲོད། །བློ་བཟང་རྒྱལ་བའི་དགོངས་དོན་ཨཱ་ཤཱ་དཱ། །ལེགས་བཤད་འབྲས་བུའི་གཡུར་ཟ་ལྡེམ་མཁས་པ། །གངས་ཁྲོད་ཐུབ་བསྟན་ཡོངས་ཀྱི་ཤིང་རྟ་ཆེ། །ཤིན་ཏུ་སྲ་བ་རྟོག་གེའི་ཚིག་དོན་གཞུ། །ཡང་དག་རིགས་པའི་རྒྱུད་ཀྱིས་ཉེར་བཀུག་པའི། །དགག་སྒྲུབ་ཉག་ཕྲན་རྣོན་པོས་ལོག་སྨྲའི་སྙིང་། །འབིགས་འདིས་ཆོས་ཀྱི་གྲགས་པའི་སྙེམས་པ་ཕྲོགས། །འཕགས་ཡུལ་མཁས་མང་གཙུག་རྒྱན་པཎྜི་ཏ། །མཚོ་བྱུང་སྙིང་གར་རོལ་བའི་དཔའ་བོའི་ཞབས། །རྩོམ་ཚེ་གང་གི་རྣལ་འབྱོར་ཤེས་རབ་ཀྱིས། །ཡུན་དུ་དཔྱད་ཀྱང་དབྱེ་བའི་གོ་སྐབས་བྲལ། །འཇམ་དཔལ་སྙིང་པོའི་རིང་ལུགས་དྲི་མ་མེད། །གྱེན་དུ་འདེགས་པར་ཤིན་ཏུ་ལྕི་བའི་ཁུར། །མངོན་པར་འབྱེད་ལ་བཟོད་ལྡན་དཔག་དཀའི་ཐུགས། །ཡངས་པའི་ས་འདིར་ཤོང་བ་ཨེ་མ་མཚར། །འདི་ན་ཐོས་པའི་གྲུ་གཟིངས་ལ་ཞུགས་ནས། །ལེགས་བཤད་ནོར་བུ་འཚོལ་འདོད་སྙོམ་ལས་པ། །རྣམ་གཡེང་ཆུ་ཡི་འཁྲི་ཤིང་འཁྲུག་གྱུར་ཀྱང་། །མཐུན་བྱེད་བརྩོན་པའི་དྲི་བཞོན་མེད་དམན་ཙམ། །སླད་མར་བསྟན་འགྲོའི་དཔལ་དུ་འཚོ་གཞེས་སྐུ། །མི་འགྱུར་རྡོ་རྗེའི་གཞི་ལ་རྟག་འཆེལ་ཡང་། །གཞན་ངོར་གཞོམ་པ་མེད་པའི་ཐབས་ཚུལ་གྱིས། །གྲངས་མེད་བསྐལ་པར་ཆོས་འཁོར་སྐོར་དུ་གསོལ། །བརྣག་ནས་ལས་འདས་མི་བསྲུན་ཚེར་མའི་དོང་། །མ་དག་ཉེས་བརྒྱའི་དྲི་མས་སྦགས་དུས་འདིར། །གཞན་དོན་སྙིང་སྟོབས་ལྷག་པར་མི་སྐྱེད་ན། །རྒྱལ་སྲས་ཆེན་པོའི་མཚན་གྱིས་དགོས་པ་ཅི། །ལུགས་ཟུང་(༥ན)
མཁྱེན་པའི་ལག་འགྲོའི་སྙིང་པོ་ལས། །བླང་དོར་འབྱེད་པའི་བསླབ་བྱ་དྲི་བསུང་ཅན། །འཕྲིན་ཡིག་མ་ལ་ཡ་ཀླུང་དང་འགྲོགས་ཏེ། །མོང་རྟུལ་ཚ་གདུང་སེལ་བའི་བཀའ་དྲིན་ཞུ། །སྙན་ཚིག་རྒྱུད་དུ་ཆགས་པའི་རི་བོང་ཅན། །རྙོག་བྲལ་ཐུགས་མཚོར་འཆར་བའི་ཞུ་མཆིད་གཟུགས། །བདག་གཉེན་གཞུ་ཁྱིམ་སྤྱོད་པ་མགོ་ཟླ་བའི། །དམར་ཕྱོགས་དགའ་བ་གསུམ་པའི་ཚེས་ལ་ཕུལ། །གཙང་སྟོད་བཀྲ་ཤིས་ལྷུན་པོའི་པཎ་ཆེན་བཅོ་ལྔ་པ་ཡོངས་རྫོགས་བསྟན་པའི་མངའ་བདག་མཁན་ཆེན་ཆོས་ཀྱི་རྒྱལ་པོ་བློ་བཟང་ཆོས་ཀྱི་རྒྱལ་མཚན་དཔལ་བཟང་པོ་ལ་གང་གི་གསང་བའི་རྣམ་ཐར་གྱི་ས་བོན་དགོས་ཚུལ་གྱི་ཞུ་འཕྲིནདུ་གསོལ་བ་གསང་མཛོད་ཕྱག་རྒྱ་འགྲོལ་བའི་ལྡེ་མིག །རུ བཻ རྐཱ ཡཱ ནཱ ནྡྭི བྷ ར ཙ མེ སཧ སཱ རི ས རྦྦ ཁེ། །ཛི བ རཱ བྲྀ ཥོ ད ཡཱ ཡ སྟ སྨཻ ཥ ཡུ བ ནྱ ཀྲྀ །ཚོགས་(ཁ་སྒོ་ཕན་པའི་སྡེབ་སྦྱོར།)གཉིས་ཆུ་འཛིན་རི་མོ་ཀུན། །གཟུགས་སྐུའི་ལྷ་ཡི་ལམ་ཡངས་པར། །ཤར་བས་དབྱར་སྐྱེས་ལང་ཚོ་རྣམས། །འཕེལ་མཛད་རྒྱལ་བ་མཆོག་གང་དེར། །(༥བ)
ཤེས་བྱའི་རང་བཞིན་ཀུན་གསལ་སྨིན་ལེགས་མར། །མཁྱེན་དཔྱོད་ལང་ཚོས་འཁྱུད་པའི་སྟོབས་བཅུའི་རྩལ། །ལྷུན་གྲུབ་འགྲོ་ལ་མཚན་དཔེའི་གར་མཁན་མ། །སྐལ་བཟང་སྣང་བའི་དཔྱིད་དུ་གསལ་བའི་གཏམ། །རབ་སྙན་ལྷོ་ཕྱོགས་བསེར་བུས་བསྐུལ་བའི་དྲི། །ཕན་བདེའི་ཆོ་ག་བསྟར་པའི་དགའ་སྟོན་ཅན། །སྔོན་མེད་རྣ་བའི་གསོས་ཀྱི་བདུད་རྩི་འདིས། །འཆི་མེད་བཏུང་བའི་ཁེངས་པ་ཕྲོགས་ཀྱི་དོགས། །མི་འགྱུར་བདེ་ཆེན་བཅུད་ཀྱིས་མྱོས་པའི་གདངས། །སྒྲིབ་ཕྱིར་ཐ་མལ་ཟུག་རྔུའི་ཚུལ་བསྟན་ཀྱང་། །བདུད་བཞིའི་མེས་པོའི་འཁོར་ལོས་གཞོམ་མིན་པ། །མགྲིན་པའི་སྟོང་གཟུགས་རི་མོ་བཀྲ་འདི་ཅི། །བརྗོད་བྲལ་མཛད་པ་མཆོག་གི་ཡིད་བཞིན་ནོར། །གསང་བའི་མཛོད་དུ་རྒྱ་ཡིས་ཉེར་འཆིང་ན། །ཉི་མའི་གཉེན་དེས་དཔག་དཀའི་རྫུ་འཕྲུལ་འགའ། །ཐུན་མོང་གདུལ་བྱར་བསྟན་དེ་ནོངས་མིན་ནམ། །ངན་རྟོག་ཁུང་བུར་ལོག་སྨྲའི་ཕུད་སྒྲོག་འགར། །རྟོགས་བརྗོད་དྲི་ཡིས་གདུང་སྐྱེད་ལ་དགོངས་ནས། །རྨད་བྱུང་དམ་པའི་ཆོས་ཀྱི་བདུད་རྩི་གང་། །མེ་ཏོག་མདའ་ཅན་སྙིང་ལ་མཚོན་ཆ་བཞིན། །བརྩེ་ཆེན་སྤྱན་དཀྱུས་སྙིགས་མའི་ལང་ཚོ་ལ། །རྗེས་ཆགས་རིང་པོར་རྐྱོང་ན་རྣམ་འདྲེན་གྱི། །མཛད་པའི་མཛེས་སྡུག་སྒམ་པའི་ར་རིའི་དྲིས། །གབ་པས་རྨོངས་པའི་སྲིད་ལྡན་རེ་སྐོང་ངམ། །རྩེ་བརྒྱའི་ལག་ཉལ་འདྲེན་བྱེད་སྟོང་ཕྲག་གིས། ཁྱད་འཕགས་གྲུབ་པའི་ངོ་མཚར་མི་གསལ་ན། །གྲགས་པའི་མུ་ཁྱུད་ཆོས་བཟང་མདུན་ས་ཡི། །ལེགས་བྲིས་ཚོགས་ལས་ལྷག་པའི་མཚན་ཉིད་ཅི། །སྲིད་པའི་མཚོ་འདིར་དམན་ཆ་བླངས་པའི་གཟིངས། །ནན་ཏུར་དྲི་ཟའི་རྒྱུད་ཀྱི་དང་པོ་དེ། །བརྡུངས་པས་ཞིག་ཚེ་གསང་སྤྱོད་གདེངས་ཅན་གྲོང་། །རང་ཤུགས་འཇིག་པས་ངོ་མཚར་ནོར་བུ་རྙེད། །ཆོས་དབྱིངས་དཔྱིད་ཀྱི་ལུས་ཕྲའི་ཕང་པ་ལས། །མཚན་བཟང་དར་བབ་མ་ལ་ཡར་སྐྱེས་ལྗོན། །(༦ན)
མཁས་བཙུན་བཟང་པོའི་དྲི་བསུང་སྤྲོ་བ་ཁྱོད། །ཐུབ་བསྟན་རྐང་འཐུང་དཔལ་དུ་བརྟན་གྱུར་ཅིག །རི་མོ་གཉིས་སྐྱེས་གཙུག་ཕུད་ཅན། །རྟེན་གྱི་སྒྲོ་མདོངས་རབ་བཀྲ་བ། །ཆུ་ལྷའི་ཕྱོགས་ཀྱི་བཤུལ་ལམ་དུ། །གཤོག་རླབས་བསྐྱོད་དེ་བདེ་བར་འཕུར། །སྟག་ལུང་ནས་ཞབས་དྲུང་མ་ཆེན་ངག་དབང་བཀྲ་ཤིས་དཔལ་གྲུབ་ངེས་དོན་ཆོས་ཀྱི་ཉི་མ་རྣམ་གྲོལ་མཆོག་གི་སྡེའི་ཆབ་ཤོག་ལན་གྲུབ་རིགས་རྒྱ་མཚོའི་ཤིང་རྟ། བི ཛྙཱ སཱ ག རྱཱ ཛ ཏ ད ཤ བ ལཱ མྲྀ ཏྱ ནི དྷྱཱ ཀྵ རེ ཥཾ། །བྷ ཝྱཱ བྷཱི ཏ ཥྩ ཛྭ ར བྷ ར ར སཱ ནུ ཏྟ རཽ ཥ དྷྱ ཤཱ ནྟ། །ཡེ་ཤེས་མཆོག་གི་ཆུ་གཏེར་ལས་འཁྲུངས་སྟོབས་བཅུའི་བདུད་རྩི་མི་ཟད་གཏེར། །སྲིད་འདི་ཉམ་ངའི་ནད་ཚོགས་ཞི་བ་བླ་ན་མེད་པའི་སྨན་གྱི་རོ། །(༦བ)
ཀ རྱ ཀོ ག ཙྪཱ མ ཎི བ རི ས དྷཾ མ ཧྱ ར ཐྱཱ སུ ཁཱི ཡཱ། །ཡ སྟ དྨཱུ ལོ རཱ ཤི ར མུ ཀུ ཊ ཙ ནྱཱ ས པ ཎྚི ཧྱ ཧི མྱ། །ཅི་ཡང་སྩོལ་མཛད་ཕན་བདེའི་ནོར་བུ་སྐྱེ་རྒུའི་གཙུག་གི་ཅོད་པན་དུ། །འགོད་མཁས་གངས་ཅན་གྲུབ་རྒྱུད་ཡོངས་ཀྱི་ཤིང་རྟ་ཆེན་པོ་གང་དེའི་དྲུང་། །ཆར་དུས་མཁའ་གླང་གློག་འོད་འཐུལ་བའི་ལྕེ། །རྣམ་བཀྲ་རི་མོར་རྫོགས་ཚེ་དབྱར་རྔ་བཞིན། །ཐོས་འཛིན་སྔོན་མེད་བྲོ་བའི་བསིལ་ཟེར་གྱིས། །མགྲིན་པའི་ཀུནྡ་དགོད་པའི་འཛུམ་གྱིས་གསོལ། །དེང་དུས་དྲི་བྲལ་སྐུ་ཡི་བཅུ་དྲུག་ཆ། །ཕུལ་བྱུང་མཚན་དཔེའི་རི་དྭགས་སྣང་བརྙན་གྱིས། །མངོན་པར་སྦུད་འདིས་ཐུབ་བསྟན་འཆི་མེད་ལམ། །མཛེས་བྱེད་རྒྱན་དུ་བྱེད་པོས་བགོད་པར་ངེས། །འཇིགས་མེད་ནཱ་དའི་ང་རོ་ཚངས་པའི་དབྱངས། །སྙན་འགྱུར་ཡན་ལག་དྲུག་ཅུའི་གསུང་གི་སྒྲས། ཁེངས་ལྡན་གནྡྷར་བ་ཡི་རྒྱུད་(༧ན)
མང་གླུ། །སྤོབས་པའི་མཐུ་བྲལ་རྒྱ་མཚོའི་འགྲམ་དུ་བྲོས། །གཉིས་མེད་ཟུང་དུ་འཇུག་པའི་ཨཱ་དརྴར། །ཆོས་ཀུན་མ་བསྒྲིབས་འཆར་བའི་ཐུགས་ཀྱི་གཏིང་། །ཟབ་མོར་དཔྱོད་པས་རིན་ཅེན་འབྱུང་བའི་གནས། །ཚད་དུ་འཇལ་ལ་ངལ་བའི་གོ་སྐབས་བྲལ། །མེས་པོས་སྤྲུལ་པའི་སྣོད་ཀྱི་མི་མཇེད་ཁམས། །རྒྱུ་མཚན་འཕྱང་མོར་བྱེད་ལ་ངལ་བ་སུ། །གང་གི་རླབས་ཆེན་མཛད་པའི་ཕུང་པོའི་གཟུགས། །ཡོལ་སྒོ་སྒྲུབ་ལ་དཔྱོད་ལྡན་གོར་མ་ཆག །འབུམ་ཕྲག་ཟླ་སྣང་ཕྱུགས་འདྲའི་འཕྲིན་ལས་ཀྱི། །གཅིག་ཏུ་དཀར་བའི་འོད་ཀྱིས་དབྱིག་འཛིན་ཁྱོན། ཁྱབ་ཚེ་འཕགས་ཡུལ་མཁས་པའི་བྲམ་ཟེ་རྣམས། །ལག་པད་ཟུམ་ཞེས་སྐད་གཉིས་སྨྲ་རྣམས་གླང་། །ཆོས་སྲིད་འཁོར་ལོས་སྒྱུར་བའི་འོད་སྟོང་གིས། །བསིལ་ལྡན་སྡེ་བཞིའི་འདབ་སྟོང་རྒྱས་བྱེད་པའི། །དཔལ་ལྡན་ཕག་མོ་གྲུ་པའི་ལུགས་བཟང་མཆོག །འཛིན་ལ་ལྗོངས་འདིར་ཁྱོད་ལ་དོ་ཟླ་ཅི། །བློ་ལྡན་ཕུར་བུའི་ཁེངས་པ་ས་འཛིན་རྐང་། །འཇོམས་བྱེད་སྙན་ཚིག་བཀའ་ཐམ་རྩེ་བརྒྱ་པ། །གན་དར་རྐང་འཐུང་ཕུར་མའི་ས་སྲུང་བཅས། །འགོག་མེད་སུག་པར་སོན་པས་སྤྲོ་བ་འཕེལ། །བློ་གྲོས་ཀུན་གསལ་མཛེས་མའི་འགྲམ་པ་ལ། །མཛད་བཟང་ནོར་བུའི་རྣ་རྒྱན་གྲགས་པའི་འོད། །གཟི་འབར་ཟུར་ཕུད་ལྔ་པ་ཐུན་འཚམས་གོས། །རབ་ཀླུབས་བསྟན་ལ་རྗེས་ཞུགས་ཞི་འཚོའི་དབོན། །གྱི་ནར་སྤྱོད་པ་སེམས་ཀྱི་སྒྱུ་རྩལ་སྤྱོད། །ངེས་འབྱུང་མཛའ་མོའི་ལྕགས་ཀྱུས་དམ་ཟིན་ཀྱང་། །བག་མེད་གཡེང་ལ་འཕྱན་འདིར་བསྟི་བ་ཡིས། །ཐེག་མཆོག་རྒྱ་མཚོར་འཇུག་ལ་མོས་བློ་ཙམ། །རིང་མོ་ཉིད་ནས་སྙིང་སྟོབས་གོ་གྱོན་པའི། །(༧བ)
མགོན་ཁྱོད་བརྣག་ནུས་བསྒྲུབ་པར་དཀའ་བའི་དུས། །གྲངས་མེད་འགྲོ་དབུགས་མི་དབྱུང་ཞི་བདེའི་ཆེད། །དབེན་པར་བཞུགས་པ་སེམས་དཔའི་མཛད་པ་མིན། །སློབ་ལམ་གནས་སྐབས་རྣམ་འདྲེན་ཉི་མའི་གཉེན། །ལུས་སྲོག་ལོངས་སྤྱོད་ལྷ་ལམ་མཐའ་ཀླས་པའི། །ལུས་ཅན་དོན་དུ་གཏོང་བའི་མཛད་པའི་དཔེར། ཁྱོད་ལས་གཞན་དུ་ཀུན་མཁྱེན་གཟིགས་པས་དབེན། །མཐའ་མེད་སྐྱེ་རྒུའི་མི་དམན་དཀྱུས་རིང་སྤྱན། །མ་འདྲིས་ཀུན་ལ་བརྩེ་བའི་རྒྱལ་རྣམས་ཀྱིས། །སྲིད་པའི་དུག་གསུམ་ཚ་བཅིལ་ག་བུར་ཐིགས། །བྲན་པའི་བྱེད་པོར་འོས་སོ་གཞན་དུ་མིན། །མཛའ་གཅུགས་ཀྱིས་བཅིངས་མཁྱེན་པའི་གསེར་མངལ་ཅན། །མགོ་སྐྱེས་ལས་འོངས་བཀའ་མཆིད་གངྒཱའི་རྒྱུན། །དྲང་སྲོང་ཛ་ཧུར་ཅོ་འདྲིའི་བྱ་མ་རྟ། །ནམ་ཡང་ཆད་པ་མེད་པའི་བཀའ་དྲིན་སྩོལ། །དྲི་མེད་སྣང་བྱེད་འཁོར་ལོའི་ཡན་ལག་ཅན། །ཚིག་འཕྲེང་འཛིན་མར་རྒྱུ་བའི་འབབ་སྟེགས་མཆོག །སྟོན་འཁུན་སྒེག་མོས་ཐགས་སུ་གྲུབ་པའི་དར། །སྤྲིན་ལམ་ཞུ་འདྲའི་རྫིང་བུར་རྒྱས་བཏབ་སྟེ། །བདུད་སྡེའི་བྲག་རི་དཔལ་སྟུག་སྤྲིན་ཟེར་གྱིས། །ཕྱེ་མདའ་བཏགས་པ་རྟ་ཆེན་ལུས་ཕྲ་མས། །བསིལ་སྦྱིན་མཁན་དང་རྩེ་དགར་འགྲོགས་པའི་ཟླར། །ལྷ་ལྡན་སྤྲུལ་པའི་གཙུག་ལག་ཁང་ནས་ཕུལ། །ཟུར་ཕུག་བྱ་ལུང་པའི་གདུང་ལས་རིག་སྔགས་འཆང་བའི་རྡོ་རྗེའི་སློབ་དཔོན་དཔལ་འབྱོར་འཕྲིན་ལས་རབ་རྒྱས་ཆོས་དབྱིངས་རང་གྲོལ་ལ་སྙན་ཚིག་གི་ལམ་ནས་གསོལ་བ་བཅུ་ཕྲག་རིག་པའི་གནས་ཀྱི་དོ་ཤལ། (༨ན)
ཀ ཡཱ ཤྲཱི མཱ ནྡ ནྡཱ པྲ སི ཏ ཀ ཡ ལོ ཀེ ཤྭ ར མ ཧཱ ས མུ དྲ ཤྲཱི ཙ ནྡྲི རུ ཙི ར ཡུ ཝ ན ཤྩ ཀྲ ཙ ཝ རཱ། །བི ཙཱ རཾ དེ ཝོ ཏྤ ལྱ ཧ ས ཀ ར མཽ ཁྃ བི ཛི མ ཏི པྲ ཡ ཙྪཱ བྷོ བ ཛྲ སྭ ར ཙ ཝ ར སི དྡྷཱི ཤ ཙ ཙ ཝཱ ཀྲེ ། དཔལ་(མཉམ་པའི་པྲྀཏྟ་གཙུག་ཕུད་ཅན་གྱི་སྡེབ་སྦྱོར།)ལྡན་འཇིག་རྟེན་དབང་ཕྱུག་རབ་དཀར་ཚེམས་ཀྱི་ཆུ་གཏེར་ཆེན་པོ་ལས། །མཛེས་སྡུག་ལང་ཚོའི་དཔལ་གྱི་གཟུགས་སྐུ་ཆུ་ཤེལ་དབང་པོའི་དཀྱིལ་འཁོར་མཆོག །རྣམ་དཔྱོད་བློ་གྲོས་ཨུཏྤལ་བཞད་བྱེད་རྨོངས་པའི་ཚོགས་ལས་རྣམ་རྒྱལ་ལྷ། །རྡོ་རྗེ་དབྱིངས་ཀྱི་དབང་ཕྱུག་མ་ཀྱེ་ངག་གི་དངོས་གྲུབ་སྩལ་དུ་གསོལ། །ཕུལ་བྱུང་ལེགས་པར་སྤྱོད་པའི་སྒྱུ་རྩལ་སྤྱོད། །རྣམ་དཀར་འཚམས་སྦྱོར་རི་དྭགས་མིག་ཅན་དང་། །དགའ་བདེར་གནས་ལས་རྟེན་བཟང་གཞོན་ནུ་ཅན། །མི་མཐུན་ཉེར་འཚེའི་ཚོགས་རྣམས་རིང་སྤངས་ངོས། །རིག་གནས་གཙུག་ལག་སྐྱེད་ཚལ་དོ་ར་རུ། །དཎྜཱིའི་ཚིག་རྒྱན་དཔག་བསམ་ལྗོན་ཤིང་གི །ཕྲ་རགས་རྒྱན་མེད་རྣམ་འགྱུར་དྲི་བསུང་ལ། །མངོན་པར་སྤྱོད་པའི་ཚུལ་ལས་གཞན་དུ་ཅི། །འདིར་ཡང་ཟིན་བྲལ་གཡེང་བའི་དྲི་བཞོན་རྟས། །སྣ་ཚོགས་ལས་ཀྱི་མེ་ཞལ་ལམ་ཡངས་པར། །འགོག་མེད་རྒྱུ་ཡང་ཤེས་བྱའི་པད་དཀར་ཚལ། །རྣམ་པར་བཞད་པའི་ཚུལ་འདི་མི་དམན་ཙམ། །ཟླ་ཤེལ་(༨བ)
གསར་པའི་ག་བུར་ཐིགས་པ་ཡིས། །ཚ་གདུང་ནད་ཀུན་ཅིག་ཅར་འཇོམས་པ་ལྟར། །རྒོལ་ངན་རི་དྭགས་ཚར་གཅོད་སྒྲ་ཚད་ཀྱི། །གདོང་ལྔ་པ་འདི་རིག་གནས་ཀུན་གྱི་ཕུལ། །སྒེག་མོའི་ལུས་ཀྱི་སྒྱུ་རྩལ་དྲུག་ཅུ་དང་། །འདྲེན་བྱེད་ཡོན་པོར་ལྟ་བའི་མཛེས་སྡུག་ལྟར། །ཤེས་བྱའི་གཟུགས་ཀུན་གསལ་བྱེད་ཚིག་གི་རྒྱན། །དཎྜཱིའི་གཞུང་འདི་གཙུག་ལག་ཀུན་གྱི་མིག །བི་ཤྭའི་སོར་རྩེས་སྣ་ཚོགས་དངོས་པོ་རྣམས། །རབ་མཉམ་གཅིག་ཏུ་སྟོན་ལྟར་ལེགས་སྦྱར་སྐད། །ལྕི་ཡང་ཡི་གེའི་འཕྲེང་བར་སྤེལ་བ་ཡི། །སྡེབ་སྦྱོར་གཞུང་འདི་གཙུག་ལག་ཀུན་གྱི་རྒྱུད། །ཀ་ཤི་མཛེས་དགའི་ལུས་ལ་རིན་ཅེན་རྒྱན། །འབྲས་ལྡན་དུས་ཀྱི་མཁའ་ལ་དབང་གཞུ་ལྟར། །མིང་ཚིག་མ་ལུས་མཛེས་བྱེད་མངོན་རྗོད་གཞུང་། །མཁས་དབང་ན་ཆུང་ཀུན་གྱི་མགུལ་པའི་རྒྱན། །མགྲིན་པའི་ཡིད་བཞིན་མཚོ་ཡིས་ལན་བརྒྱའི་བར། །བོས་ཉམས་སྟོན་པའི་དབྱངས་བདུན་ངང་མོ་དཀར། །སྣ་ཚོགས་སྒྲ་ཡི་བྱེ་བྲག་ཟློས་གར་ཡང་། །བློ་ལྡན་འཆི་མེད་ཐོས་འཛིན་དགའ་སྐྱེད་དབྱངས། །ངེས་གསང་སྒོ་གླེགས་ཕྱི་ནང་གཞན་གསུམ་རྣམས། །ཐབས་མཁས་འཕྲུལ་གྱིས་དབྱེ་ཐབས་སྐར་རྩིས་གཞུང་། །མགྲིན་སྔོན་གསང་ཚེག་སྲང་གསུམ་རྣམ་རྒྱལ་མཆོག །དབྱངས་འཆར་གཞུང་འདི་གནམ་ལྕགས་རྡོ་རྗེའི་ཐོག །ཕུལ་བྱུང་ཚེ་ཡི་རིག་བྱེད་ཆུ་སྐྱེས་མངལ། །གང་གིས་མངོན་པར་དྲན་པའི་ཡང་སྙིང་ལས། །ཡོན་ཏན་མགོན་པོའི་རིང་ལུགས་བདུད་རྩིའི་བཅུད། །གཞན་ཕན་དགོས་འདོད་རབ་སྩོལ་དབང་གི་རྒྱལ། །སྣ་ཚོགས་ཡུལ་གྱི་ཨཱ་ད་ར་ཡི་ངོས། །གར་དགུའི་ཉམས་ཀྱི་འགྱིང་བག་སྐེད་མེད་བཞིན། །འགོག་མེད་འཆར་བའི་གཞན་ཕན་བཟོ་རིག་རྣམས། །འདྲེན་བྱེད་ཡུལ་གྱི་ཟིལ་དངར་བླ་ན་མེད། །མདོག་ལྔའི་བཞོན་པས་དྲངས་ཏེ་པདྨོའི་གཉེན། །ཕྱོགས་བྲལ་ལྷ་ལམ་མྱུལ་ཡང་གང་གི་ཚད། །རྟོགས་མིན་སྒྱིད་སྐྱུར་(༩ན)
སྟེར་བྱེད་ནང་རིག་པའི། །ནོར་མཆོག་སྐལ་བཟང་ཀླུ་དབང་གཙུག་གི་རྒྱན། །དེ་ལྟའི་ཕྱོགས་ཀྱི་རིག་གནས་ཡིད་བཞིན་ནོར། །དྲི་མེད་ཚིག་གི་སྲད་བུར་བརྒྱུས་པའི་འཕྲེང་། །རིག་བྱེད་འཛིན་ཁྱོད་མགྲིན་པའི་མཛེས་རྒྱན་དུ། །ལེགས་པར་སྤུད་ཀྱང་ངོམས་པ་མེད་པའི་ས། །སླད་མར་དཔྱད་གསུམ་དག་པའི་ལམ་ཡངས་པར། །མི་དམན་བཟང་པོའི་བློ་གྲོས་ཤིང་རྟ་ཆེ། །ཐོགས་མེད་བགྲོད་འདི་དཀར་ཕྱོགས་བསིལ་ཟེར་ལྟར། །ཡར་ལྡན་འགྱུར་བའི་ཡུར་ཆེན་རྟག་ཏུ་སྟེན། །འཕྲིན་ཡིག་འབྲུག་སྒྲ་མངལ་འཛིན་འཇོ་སྒེག་ཅན། །སྙན་ཚིག་རྣམ་བཀྲ་འདབ་གཤོག་ལེགས་བསྐྱོད་དེ། །དབང་ཕྱོགས་དར་གྱི་གཙུག་ཕུད་ངོམ་བཞིན་དུ། །དགའ་བ་གཉིས་པའི་འཆི་མེད་ལམ་ལ་འཕུར། །འཕྱོང་རྒྱས་ཞང་མཁར་བ་རིག་བྱེད་སྨྲ་བ་འཇམ་དཔལ་རྡོ་རྗེ་ཚང་པའི་ནད་ཀྱིས་འདུ་བ་ཅུང་ཟད་འཁྲུགས་པའི་སྐབས་སྤྲིངས་པའི་ཡིད་གསོས་ག་བུར་ཐིགས་པ། སྡེབས་སྦྱོར་རྒྱུན་ཆགས་ཀྱི་ནང་ཚན་རྒྱ་མཚོ་ཞེས་པ། རུ ཙ ར ཙ ཀ ཡ རཱ པ པཾ ཌཱུ ཪྻ ར ཏྣེ ནྡྲ དྷ ནྦྷཱ ཡ བཱ ལི དྷ མཱ ནེ ལྷ ལ མ ཀྵྨི མ ཎཱི བཱ ཙ མེ རུ སྭ རི། །པྲ ས མུ ད ར ས བི ངྐི ཀ རྞྞ རྠ ཨཱ དེ ཤ ནཻ རྟ ཧྱ ཧཱ བ ངྒ ཙཱ བྷཱ ག མཱ ཏྲཱ ཙ བཱ གཱ རུ ཏི ཥ ཥྛ ཙཱ། །རིན་ཅེན་བཻཌཱུར་ལྷུན་པོ་དབང་གཞུས་འབྱུང་བ་ཇི་བཞིན་མཛེས་པའི་ཕུན་ཚོགས་གཟུགས་སྐུ་ཡིད་བཞིན་ནོར་ལྟར་དོན་ཀུན་རབ་ཏུ་བསྒྲུབས། །ཕུལ་བྱུང་ཡན་ལག་དྲུག་ཅུའི་སྒྲ་དབྱངས་རིག་བྱེད་འཛིན་པ་ཀུན་གྱི་རྣ་བའི་བཅུད་དུ་སྟོན་ཚེ་གསུང་ལ་ཆ་ཙམ་འགྲན་པའི་དཔེ། (༩བ)
རུ ཙི ར ག ག ཆ ཀཱ ནྟ ཙཱ ནེ ཏྲེ ཝཱཾ ག ཝི ཀཱ མེ ཡ ཨཱ ལཱ ས ཙི ཏྟཱ ཛྙ ཏ ཤྩཱ ནཾ ནོཾ ཏྱ བུ དྷཾ ཏྲི དྷྭཾ ཀ །ཛ ཡ ཙ ཝ ར ས གཱ ར ལཽ ཀེ ཤྭ རཾ ཙི དྷ མ དྷྱཱ ནྟ པ དྨཱ སི ནཾ ཝཱ ཀ སི དྡྷི པྲ ཡ ཙྪ ཙ མཱ ཏྲཱ ཙ ས༔། །མཛེས་སྡུག་གཞལ་དཀའི་ཕ་མཐར་སྙེམས་ལྡན་ཀུན་གསལ་ཟུར་མིག་ཅན་ལ་སྒྱིད་སྒྱུར་སྟེར་བྱེད་ཐུགས་ནི་ཀུན་མཁྱེན་དེས་ཀྱང་རྟོགས་མིན་པའི། །དུས་གསུམ་རྒྱལ་བ་རྣམས་ཀྱི་ཡུམ་མཆོག་འཇིག་རྟེན་དབང་ཕྱུག་སྲས་དེ་སྙིང་དབུས་པད་མཚོར་བཞུགས་ལ་ངག་གི་དངོས་གྲུབ་སྩལ་དུ་གསོལ། །བསོད་ནམས་མཆོག་གི་དབྱིག་འཛིན་བུ་མོའི་ལྟོར། །ལེགས་སྤྱོད་རྒྱུ་ཚོགས་ཀུནྡའི་བྱེད་པོ་ཡིས། །དལ་བའི་རྟེན་བཟང་ཡོངས་འདུའི་ལང་ཚོ་ཅན། །ཚད་ནད་གྲང་རེག་མ་ལས་རྣམ་རྒྱལ་ངོས། །སྔོན་དུས་རབ་བརྟེན་མཆོད་ཅིང་བསྟོད་པའི་འབྲས། །དབྱངས་ཅན་མ་དང་མ་གཉིས་ཡུལ་འཁོར་བསྲུང་། །གང་གི་རི་མོ་གསུམ་པའི་ཡིད་བཞིན་མཚོར། །གཙུག་ལག་ཚིག་སྒྲོག་རྣམ་དཔྱོད་གར་སྒྱུར་འདི། །བཟང་པོའི་གྲོགས་ལྟར་ཡིད་ཀྱི་ཞགས་པ་ཡིས། །བློ་གྲོས་དཔལ་དང་གཅིག་ཏུ་བསྡོམས་འདྲའི་ཚུལ། །ཟུར་མིག་མ་དང་བགྲང་བྱ་སྟོང་གི་བར། །ལྷན་ཅིག་གནས་པའི་བདེ་ལས་ལྷག་གམ་(༡༠ན)
སྙམ། །རབ་དཀར་ལས་ཀྱི་ཆོ་རུས་ལེགས་བྲིས་དབུས། །མཁན་ཆེན་ལྷ་དབང་དཔོན་རིགས་རྒྱལ་བྱེད་དུ། །གྱུར་ཀྱང་རབ་རྨོངས་སྦྱིན་སྐྱེས་གཞོམ་པའི་སླད། །གཙུག་ལག་དཔུང་གི་ངལ་བ་རྟེན་སྐབས་ཀྱང་། །ཀླུ་གཟུགས་གྲངས་ལྡན་ཟག་ཕུང་པདྨ་དཀར། །མི་མཐུན་ཉེར་འཚེའི་སྔོ་བསངས་ལས་རྒྱལ་ཕྱིར། །བགྲང་ཡས་རིག་བྱེད་ནོར་འཛིན་རབ་ཡངས་པར། །སྣ་ཚོགས་བྱེད་པོའི་གསང་ཚིག་ཆུ་གཏེར་ཆེར། །རྗེ་བཙུན་གཡུ་ཐོག་སྟོབས་ལྡན་འཆི་མེད་གཙོས། །བློ་གྲོས་རི་དབང་ཐབས་ཀྱིས་བསྲུབས་པ་ལས། །ཡང་སྙིང་ཡན་ལག་བརྒྱད་པའི་རྟ་ལྗང་དབང་། །མ་ནོར་བརྟག་ཐབས་བསིར་བུས་ལེགས་དྲངས་ཏེ། །འཆུགས་མེད་རོ་ནུས་བསྡེབས་པའི་འོད་རྣོན་གྱིས། །ལང་ཚོའི་འདབ་སྟོང་རྣམ་པར་བཞད་པ་ཡི། །མཐའ་ཡས་མཁས་པའི་ཐབས་འཕྲུལ་སྟོན་པ་ལ། །གཞར་ཡང་འགོག་མེད་བརྩོན་པ་ལྷུར་ལེན་ངོས། །སྣ་ཚོགས་ལུགས་ཟུང་ཚིག་གི་མཻ་ན་ཀ །སྐྱེས་ཐོབ་རིག་པའི་འོད་ཀྱིས་ལེགས་བཞུ་བའི། །བགྱིང་འོས་གཏམ་གྱི་འཇུག་པ་གང་གཱའི་རྒྱུན། །འཕྲིན་ཡིག་ལམ་གསུམ་དག་ཏུ་འབབ་ཀྱང་འཚལ། །དེ་སྐད་རི་མོའི་དགའ་ཚལ་རབས་ཡངས་པར། །འདྲེན་བྱེད་ར་ཡིག་གཉིས་པ་འཕུར་ལྡིང་སླད། །དབང་ཕྱོགས་དར་གྱི་སྦྲང་རྩིའི་རྒྱལ་མཚན་ལ། །མ་ཉམས་རྟགས་ཀྱི་ཟེའུ་འབྲུས་ལེགས་སྦྱར་ནས། །ཉི་གཞོན་འཁྲིག་ཁྱིམ་ལ་གནས་མཆུ་ཟླ་ཡི། །སྔ་མའི་ཕྱོགས་ཀྱི་དགའ་བ་གཉིས་པ་ལ། །བཅུ་ཕྲག་རིགས་ནས་བརྩེགས་པའི་བ་གམ་གྱི། །རིའུ་མིག་ཀུན་ཏུ་བཟང་པོའི་འཁོར་ལོར་བྲིས། །ཟུར་རྡོ་རྗེ་འཛིན་པ་དཔལ་ལྡན་བླ་མ་ཆོས་དབྱིངས་རང་གྲོལ་གྱི་སྙན་ཚིག་བྱུང་བའི་ལན་འདྲེན་བྱེད་བདུད་རྩི། སྣ་ཚོགས་བྱེད་པོའི་གཏམ་གྱི་འབྱུང་གནས་ལས། །འདྲེན་(༡༠བ)
བྱེད་ཟིལ་དངར་རི་དྭགས་མིག་ཅན་གཟུགས། །བློ་གཏེར་ངག་དབང་ལྷ་མོ་བསིལ་ཟེར་ཅན། །མགོ་བསྟེན་ཀུན་གསལ་ལས་འོངས་འདི་སྐད་ལོ། །མཆོག་ཏུ་རྣམ་དཀར་ལེགས་སྦྱར་དཔྱིད་ཀྱི་མས། །རབ་བསྐུལ་སྨོན་ལམ་ཆུ་འཛིན་མྱུ་གུའི་འབྲས། །ཟག་ཕུང་ས་མོས་ཉི་བུའི་བསིལ་ལྡན་མ། །ཀུན་མཁྱེན་གཟིགས་པའི་ལམ་ལས་གསལ་བའི་ངོས། །བརྡ་སྤྲོད་དབང་པོ་རྡོ་རྗེ་སྡེབ་སྦྱོར་གྱིས། །ལེགས་བརྒྱན་དཎྜཱིའི་ཁེངས་པ་འཕྲོག་བྱེད་པའི། །ལྷོ་ཕྱོགས་གཙུག་ལག་ལས་འོངས་སྙན་ཚིག་ཕྲེང་། །རྐང་འཐུང་ག་བུར་བཅས་པ་སུག་པར་སོན། །གཏན་དུ་བདེ་བའི་མ་ལ་ཡར་སྐྱེས་དྲི། །འདི་སྣང་གཡེང་བའི་རྡུལ་གྱི་རྒྱལ་མཚན་མཐུས། །ཚད་གདུངས་ལག་ལྡན་འགྲོ་ལ་ཕན་སེམས་པའི། །གྱི་ན་བ་ཡང་གཙུག་ལག་འཛིན་ཚུལ་ཙམ། །མིག་གིས་བསྒྱུར་བ་མདའ་ཡི་གྲངས་ལྡན་པའི། །རིག་གནས་ཁུང་བུར་བློ་གྲོས་དྲི་བཞོན་ཅན། །དཔྱད་གསུམ་དག་པས་འཇུག་པ་མི་དམན་ངོས། །དོན་མཐུན་གཏམ་གྱི་གཞོལ་འགྲོ་རྒྱས་ཀྱང་འཚལ། །ཚིག་གི་དབྱིབས་ལེགས་སྒེག་མོའི་མངོན་རྗོད་ཀྱི། །སྣ་ཚོགས་རིན་ཅེན་བྱང་ཕྲུལ་ལགས་སྦུད་ཅིང་། །དབང་ཕྱོགས་ལས་འོངས་ལྷབ་ལྷུབ་གན་དར་བཅས། །ཐུན་འཚམས་མདངས་ཀྱི་རྒྱ་དང་ལྷན་ཅིག་པར། །བཅུ་གཉིས་བདག་པོར་སྲང་གི་བ་གམ་དུ། །དགའ་བདེར་སྤྱོད་པའི་ལྟད་མོའི་ཟླ་བ་ཡི། །དཀར་པོའི་ཕྱོགས་ཀྱི་རྒྱལ་བ་གསུམ་པ་ལ། །མེ་ཏོག་མངོན་འགྲའི་ལྡིང་ཁང་གནས་ནས་བྲིས། (༡༡ན)
གངས་རིའི་ལྗོངས་འདིར་གནས་ལྔ་རིག་པ་སྨྲ་བ་ལ་ཟླ་མེད་པའི་མ་ཧཱ་པཎྜི་ཏ་སྨོན་འགྲོ་ལོ་ཙཱ་བ་རིག་གནས་རྒྱ་མཚོའི་འཕྲེང་བ་འཛིན་པ་ཚེ་དབང་དོན་གྲུབ་ལ་བསྲིངས་པའི་འཕྲིན་ཡིག་ཆོས་ཀུན་གཟིགས་པའི་མེ་ཡོད། སྡེབ་སྦྱོར་མ་མོའི་དབྱངས། ནཱ ཊ ཀ ཏུ པྲ པུ ཥྚ ཡུ བ ནཾ གྲྀ ཧཻ ནྡྲ ཡུ དྷི ཀ ཤྩ ཀཱ ནྟ རུ ཙི ར སྶཱ རྦྦ ལི ནཱི པྲ ག རྦྦ ཧ ར ཙཱ ནུ ར ཀྟི ཀ ཛ གེ ཥུ ཤུ ཀླ མྲྀ དུ ཧཱ ཙི ཏྟ ག ར ཎྜ པཽ རི ཀ ཙ ཧེ ཝ གཱི ཤྭ ར ཙ ཏུ རྨུ ཁ སྱ ཧུ ཧཾ ཏཱ། །དཀར་(སྡེབ་སྦྱོར་ཟབ་མོའི་དབྱངས།)འཇམ་གཟུགས་ཅན་གྱི་ཤིས་བརྗོད། མཛེས་སྡུག་ལང་ཚོར་རབ་རྒྱས་དབང་པོའི་གཞུ་ཡི་ལྡིང་ཁང་ན། །མཐོ་རིས་སྒེག་མོའི་སྙིམས་པ་རབ་འཕྲོག་འགྲོ་ལ་རྗེས་ཆགས་ཟློས་གར་ཅན། །དབྱངས་ཀྱི་རྒྱལ་མོའི་ཟིལ་དངར་བླ་མེད་ཡིད་ཀྱི་ཟ་མ་ཏོག་འགེངས་པའི། །(༡༡བ)
ཙ སྭ ར རཱ ཛ ནཱི ཏུ ཨ མྲྀ ཏོ ཧི ཨུ ཏྟ ར ཤུ བྷྲེ ཀྲྀ ས རྦྦ ཛ ཧ ཀ༔ ལ ཀྵྨཱི མ ཏི བ རྦྦེ ནྡཱ གྲེ། སཾ སྤྲྀ ཏ མེ གྷ ག ཛོ བ རི ཛྲྀ མྦྷ ༔ བི དྱཱ སྠཱ ནཱི དྲྀ ཥྚེ ནྡྲ ྉྤ ཊུ ཀི རྡྱ རྠ ཐ ཀཱ རྞྞི ཀ ཡ༔། །ངག་(ཛཱ་ཏིའི་སྡེབ་སྦྱོར་འཕགས་མ།)གི་དབང་ཕྱུག་ཚངས་སྲས་མ་ཀྱེ་དུས་རྣམས་ཀུན་དུ་དགེ་བར་མཛོད། །ཕུན་མཐའ་དག་གཟུགས་ཅན། ཚོགས་བློ་གྲོས་ས་འཛིན་དབང་པོའི་རྩེར། །ལེགས་སྦྱར་སྤྲིན་གྱི་གླང་པོའི་སྟེང་འགྱིང་བ། །རིག་པའི་གནས་རྣམས་གཟིགས་པ་མིག་སྟོང་ཅན། །གྲགས་པ་དོན་ལྡན་མཁས་གང་རྣ་རྒྱན་དུ། །མ་ཆ་ཤས་གཟུགས་ཅན། བསད་སྙན་ཚིག་མངལ་གྱིས་ལྕི་བའི་ཁུར། །ཡོངས་སུ་འཛིན་པའི་འཕྲིན་ཡིག་ལུས་ཕྲ་མ། །ཉམས་འགྱུར་སྔ་ན་མེད་པའི་རྒྱུད་མང་གླུ། །འོས་ཕྱིར་གནས་ལྔ་རིག་ཁྱོད་ཚུལ་འདི་གསོན། །ལན་ལྡན་པའི་གཟུགས་ཅན། གཅིག་མིན་པར་ལེགས་བྱས་མདོག་ལྔ་པ། །སྲིད་འདིའི་ལྷ་ལམ་ངོས་སུ་རྒྱུ་བ་ལས། །མངོན་པར་མཐོ་བའི་ཉེར་ལེན་བཅུ་གཉིས་བདག །བདེ་བར་སྤྱོད་པའི་འོད་རྣོན་སྤོར་མཆིས་སམ། །རིགས་གོཌ་མ་ལགྲགས་པའི་དོན་གསལ་གྱི་རྒྱན། སྟོབས་ནོར་གྱི་འོད་རྒྱས་ཕྱེད་མིན་པའི། །ལེགས་བཤད་ཆུ་སྐྱེས་འདབ་མ་འཛུམ་མི་འཛུམ། །གང་གི་རྣམ་དཔྱོད་མཛེས་མའི་(༡༢ན)
འགྲམ་ཆང་རླན། །འཕོས་ཚེ་བ་ཀུ་ལ་དེར་རང་དབང་ཅི། །དམན་གཟུགས་ཅན་གྱི་འགོག་པ། བློའི་ཁམས་ཀྱི་ས་བོན་ལས་གྲུབ་པའི། །ཕྲ་མོའི་ཡོན་ཏན་ལྕུག་ཕྲན་ཕོན་པོ་འགའ། །གྲགས་སྐམ་བསིར་བུས་བསྐྱོད་པའི་སྟོང་པའི་སྒྲར། །སྙེམས་པའི་ལྡེམ་ལྡེམ་གཡོ་ལ་སུ་ཞིག་མཚར། །ཕུལ་མཐའ་དག་གཟུགས་ཅན། བྱུང་སྦྱངས་པའི་དབྱིག་འཛིན་ལྟོ་བ་རུ། །སྐྱེས་ཐོབ་ཤེས་རབ་ལྗོན་པ་གཡུར་ཟ་བ། །ཚར་གཅོད་རྗེས་འཛིན་ནད་རིག་དྲི་བསུང་ཅན། །སྤྲོ་བའི་དཔག་བསམ་ཡོངས་འདུ་ཁྱོད་དུ་ཁུམས། །སྐྱེ་ལེའུ་དང་པོ་ནས་བསྟན་པའི་ལྷོ་ཕྱོགས་པ་ལ་གྲགས་པའི་མཛེས་པའི་ཡོན་ཏན་གཏམ་དང་སྦྱར་བ། རྒུའི་མེ་ཏོག་མཁས་པའི་ངང་ཚུལ་གྱིས། ཁྲིམས་ལྡན་ལུས་ཕྲར་འདུད་ལ་ཕྱིར་གཡེལ་བ། །གངས་ཅན་སྲིད་སྒྲུབ་བརྩོན་གྱིས་བླང་དོར་མཐུ། །ཕྲ་བའི་ཡིད་ཀྱི་ཤིང་རྟར་སུས་མ་རིག །བླུན་སེམས་ལྡན་རབ་རྟོག །སྒོམ་རྒན་པོའི་ཚུལ་བྲལ་ཤེས་བྱ་ཀུན། །ཞིབ་མོར་དཔྱོད་པའི་བརྡ་སྤྲོད་རིག་པའི་གཞུ། །ཤེས་རབ་རྒྱུད་ཀྱིས་བཀུག་ཚེ་ཀརྟི་ཀ །སྐྱེངས་ཏེ་འཆི་མེད་གནས་སུ་ཡིབ་བམ་སྙམ། །དངོས་གཟུགས་ཅན་དང་རྒྱུ་རྒྱན་དམ་པའི་ཉམས་དང་རབ་རྟོག་རྣམས་འདྲེས་པའི་རབ་སྤེལ་གྱི་རྒྱན། སྟོབས་རིགས་པའི་ངར་ལྡན་འཁོར་ལོ་ཡིས། །རྒོལ་ངན་སྲིད་སྒྲུབ་མགོ་བོ་བྲེགས་པའི་དྲི། །སྲིད་རྩེའི་བར་དུ་འཐུལ་བས་པད་དཀར་མིག །སེམས་ཀྱི་རི་དྭགས་གྱ་གྱུའི་དྲ་བར་ཚུད། །ལུས་མ་བསྡུས་པའི་གཟུགས་ཅན། ངག་ཡིད་ཀྱི་སྒྱུ་རྩལ་ཆུ་གཏེར་ཆེ། །ནམ་ཡང་ཟད་མི་ཤེས་པའི་ཕ་མཐའི་ཚད། །འཇལ་བྱེད་སྦྱངས་པའི་རྟགས་གསུམ་གྱིས་ཐོབ་པ། །བཟོ་རིག་ནོར་བུའི་དཔྱད་དེ་མཆོག་ཏུ་གཤིན། །ཚར་སེམས་ལྡན་རབ་རྟོག །དུ་དངར་བའི་འཆི་མེད་བདུད་རྩིའི་བཅུད། །ཀུན་ལ་སྟེར་བ་ཚེ་ཡི་རིག་བྱེད་སྒོ །བརྒྱ་ཕྲག་མངོན་ཕྱིར་ཡངས་པའི་སྤྱོད་ཡུལ་འདིས། །ཡོན་ཏན་མགོན་པོའི་ཚུལ་ལ་འགྲན་པ་(༡༢བ)
བཞིན། །མཆོག་ལེའུ་དང་པོ་ནས་བསྟན་པའི་རྒྱ་ཆེ་བའི་ཡོན་ཏན་ལྷོ་ཕྱོགས་པ་ལ་གྲགས་པ། དམན་ཤེལ་གྱི་རྩིག་པ་དངས་པའི་ངོས། །གྲངས་མེད་གཟུགས་ཀྱི་སྒྱུ་འཕྲུལ་དྲ་བའི་གར། །མ་འདྲེས་སོ་སོར་འབྱེད་པའི་ཤིང་རྟ་ཆེ། །ཧ་ནུ་མནྠ་གཉིས་པ་གཞན་ཡོད་མིན། །རྒྱལ་གཟུགས་ཅན་ཕུལ་བྱུང་། གསུང་ཡན་ལག་བཅུ་གཉིས་ཏམྦུ་རའི། །རྒྱུད་དུ་ཉེར་ཁུགས་དབྱངས་ཀྱི་དཀྱིལ་འཁོར་ཀུན། །ཡོངས་སུ་རྫོགས་པར་སྤྱོད་པ་དནྜཱིའི་གླུ། །ལེན་མཁས་གངས་ཅན་འདི་ན་ཁྱོད་མིན་སུ། །ལེགས་ཐེ་ཚོམ་ཕུལ་བྱུང་། སྦྱར་ལྷ་ཡི་སྐད་ཀྱི་མུཀྟི་ཀ །ཙྪནྡའི་སྲད་བུར་བརྒྱུས་པའི་རྩེ་ཕྲན་འདི། །ཤེས་ལྡན་སྒེག་མོའི་རྒྱན་དུ་བྱེད་པ་པོར། ཁྱོད་དང་ཚངས་པ་གང་ཡིན་ཕྱང་མོ་ཉུག །ལེགས་རབ་དྭངས་གྱི་གཟུགས་ཅན། བཤད་དཔྱིད་ཀྱི་དཔལ་མོས་ཡོངས་བསུས་པའི། །མངོན་རྗོད་དབྱར་གྱི་མརྒད་ཞུན་མའི་གོས། །དོན་བཟང་འཛིན་མར་ཀླུབས་པའི་གཟིགས་མོ་ལ། །སྤྱོད་པའི་མིག་ལྡོག་བོད་བླུན་ཡུལ་འདིར་དཀོན། །སྐད་རྨད་བྱུང་གི་གཟུགས་ཅན། གྱི་རང་བཞིན་བརྡ་ཡི་ཚོན་རིས་ཀྱིས། །མ་འདྲེས་ལུས་འདེགས་བཀྲ་བའི་ཟློས་གར་ཅན། །བློ་ལྡན་རྩེད་འཇོའི་རྣམ་ཐར་མངལ་འཛིན་པའི། །དབྱར་སྐྱེས་སྒྲ་འདི་སྔོན་མེད་ངོ་མཚར་དཔལ། །ལྐོག་གཟུགས་ཅན་རབ་རྟོག །གྱུར་ཤེས་བྱའི་རི་མོའི་སྣང་བརྙན་ཀུན། །རིག་པའི་མེ་ལོང་ངོས་སུ་འཆར་བྱེད་པ། །གཙུག་ལག་རྩིས་ཀྱི་ཡང་སྙིང་དབྱངས་འཆར་གྱིས། །ཀུན་མཁྱེན་ཡེ་ཤེས་ཟླ་རུ་བཅས་མིན་ནམ། །ཨེ་སེམས་ལྡན་རབ་རྟོག །མ་ཆོས་ཀྱི་རང་བཞིན་མཐའ་ཀླས་མདུད། །ཅིག་ཅར་འགྲོལ་བའི་རིག་བྱེད་རྒྱ་མཚོའི་གཞུང་། །སཱ་ལའི་ལྗོངས་འདིའི་འགྲོན་དུ་འབོད་མཁས་པའི། །བྱེད་པོར་ལྷ་ཡི་བླ་མ་འོངས་པ་འདྲ། །དབྱངས་མཐའ་དག་གཟུགས་ཅན། ཅན་ཚེ་རིང་གནམ་གྱི་ཤེ་མོང་ལས། །ཤེས་བྱའི་ས་ལ་སྤྱོད་པའི་དཔུང་པ་སྐྱེས། །འཆད་རྩོད་རྩོམ་(༡༣ན)
པའི་འཁོར་ལོ་སྒྱུར་བ་ཡི། །སྙན་གྲགས་གདུགས་དཀར་སྲིད་རྩེའི་བར་དུ་འཕྱུར། །རུ་འགལ་བའི་གཟུགས་ཅན། བཞིའི་གསེར་ལྡན་ཞགས་པའི་ཁོར་ཡུག་གིས། །རིང་དུ་བཅད་ཀྱང་ཚར་དུ་དངར་བའི་དྲི། །ཡིད་ཀྱི་ཡོལ་གོར་སྐྱུག་ལ་ཉེར་གནས་པ། །དེ་འདྲ་སྔོན་མེད་མ་ལ་ཡར་སྐྱེས་མཆོག །དཔྱད་མི་ལྡན་པའི་གཟུགས་ཅན། གསུམ་གཏམ་གྱི་སྒྲ་ཀུན་དབྱངས་བདུན་གྱི། །རོལ་མོར་འཁྲོལ་བའི་འཕྲིན་ཡིག་ཁུར་འཁྱེར་བ། །སེང་གེ་རྐང་པ་བརྒྱད་པའི་བྱ་མ་རྟ། །རྩལ་གསུམ་རྫོགས་པར་རྒྱུ་དེ་མི་བསྐྱུད་གཅེས། །འབུམ་གཟུགས་ཅན་གྱི་རྒྱན་ལ་ལེའུ་དང་པོའི་རབ་དངས་འདྲེས་པ། ཕྲག་ཟླ་བ་ཀུན་ནས་འཁྱིལ་བའི་ཁམས། །ཐགས་ཀྱི་བཅུ་དྲུག་ཆ་ཤས་ཡོངས་གང་བའི། །ངོ་མཚར་རི་མོའི་འོད་ཀྱི་མཛེས་སྡུག་ལ། །པད་རག་གཞོན་ནུའི་རྒྱ་ཡིས་དམ་དུ་འཁྱུད། །དབུས་བྱ་བའི་རང་བཞིན་རྗོད་པ། འགྱུར་སྐད་ལས་ཕྱོགས་འདི་ན། །བསྒྱུར་བ་ཉི་སྒྲོལ་བྱེད་ཀྱི་ལོ། །ཙཱི་ཎའི་རྒྱལ་ཁང་གྱ་ཤིན་གྱི། །འོད་རྣོན་འཕྲོག་བྱེད་ཁྱིམ་ཞུགས་ཚེ། །མཐོ་ཏིང་ངེ་འཛིན་དང་བདེས་པའི་འབྱོར་པ་རྒྱ་ཆེ་བའི་རྒྱན། རིས་བདུན་གྱི་ཡོན་ཏན་ཀུན། །ནོར་ལྡན་ཁུར་དུ་རབ་ལྕི་བའི། །སྡེ་བཞིའི་སྒོ་འཕར་ལེགས་ཕྱེ་བ། །དགའ་ལྡན་ཕོ་བྲང་ནས་བྲིས་དགེ ། འཕྱོང་རྒྱས་རི་བོ་བདེ་ཆེན་གྱི་བླ་མ་བློ་བཟང་བསྟན་འཕེལ་གྱི་ཚིགས་བཅད་ཀྱི་ཡི་གེ་དང་བཅས་རྣམ་སྦྱར་རམ་དེའི་རྒྱུད་བྱིན་གྱིས་བརླབ་ཏུ་རུང་བ་ཞིག་དགོས་ཚུལ་བྱུང་བའི་ལན་འདོད་པའི་རེ་སྐོང་། (༡༣བ)
ཨ དྦྷུ ཏྱཱ ཙཱ སུ ཀྲྀ ཏ ཝ ར ཨཱ ཛྙ ན སི ནྡྷཱུ པ ཏི༔ ཏྭཾ། །ཙཱ ནུ བྱ ཉྫཱ མ དྷུ སུ ཧི ཏ ཙཱ པཱུ རྦ ཨཱ ཙ ཀྲ ཙ ནྡྲ། །པྲ ཤྲ བྱཱ ཨཱ སུ བྷ ག སིཏ ཀཱ ཨུ ཏྟ རེ ཙི ཏྟ ན ནྡཱ། །ཨུ ཏྤཱ དཾ སྤྲྀ ཊ ཀྲ མྲྀ ཏ བི པུ ཥཾ བ ནྡྷུ ཅོ ཏྤ ལྗ ཡནྟུ། །རྨད་(སྡེབ་སྦྱོར་དལ་གྱིས་གནོན།)བྱུང་ལེགས་བྱས་ཡེ་ཤེས་མཆོག་གི་སྔོན་མེད་སིནྡྷའི་བདག་པོ་ལས། །བླ་ན་དངར་བའི་མཚན་དཔེའི་འཁོར་ལོ་རྣམ་པར་རྒྱས་པའི་བསིལ་སྦྱིན་མཁན། །ཕན་བདེའི་བདུད་རྩིའི་ཟེགས་མ་རབ་འཛག་སྐལ་བཟང་ཨུཏྤལ་དཀར་པོའི་སྙིང་། །ཅི་ཡང་རེག་པསདགའ་བ་སྐྱེད་མཛད་ཉི་མའི་གཉེན་ཁྱོད་རྒྱལ་གྱུར་ཅིག །རིང་མིན་སོར་མོའི་གར་མཁན་གཞོན་ནུ་མའི། །སྒྱུ་རྩལ་ཡི་གེའི་གཟུགས་སུ་ཤར་བ་དང་། །སྙན་ཚིག་རྒྱུད་མང་སྐྱེངས་བྱེད་འདིར་སོན་པས། །འདྲེན་བྱེད་ཐོས་འཛིན་ལམ་ཀུན་དོག་པོར་བགྱིས། །ཚིག་དོན་རྣམ་བཀྲ་ཕུལ་བྱུང་རྗོད་པའི་དཔྱིད། །གང་གི་མགྲིན་པར་འོངས་པས་དབང་པོའི་གཞུ། །འཆི་མེད་གྲོང་དུ་བྲོས་ཚེ་མེ་བཞི་སྐྱེས། །ས་འཛིན་ལྷུན་པོར་སྐོར་བའི་ཟོལ་གྱིས་སོང་། །མངོན་མཐོའི་རྟེན་ལྡན་ནགས་ཀླུང་སྟུག་པོའི་ཁྲོད། །ཐོས་བསམ་སྒོམ་པའི་འབྲས་བུ་གཡུར་ཟ་ཞིང་། །དྲི་བྲལ་ཚངས་སྤྱོད་ཡལ་འདབ་ལྡེམ་མཁས་པ། །ཤེས་ལྡན་ཨུ་དུམ་ཝཱ་ར་ཁྱོད་ལས་(༡༤ན)
སུ། །ཀུན་གསལ་ཞགས་པས་ཚད་དུ་འཆིང་བའི་སྟོབས། །ཕྲ་བའི་བླ་མེད་ཡེ་ཤེས་བདུད་རྩིའི་རོ། །མི་དམན་མྱང་བའི་ལྔ་རིག་བཅུད་ཀྱི་མ། །གཞར་ཡང་གཡེལ་མེད་བསྟེན་ལ་བརྩོན་པར་རིག །ཚིག་དོན་ལོག་སྨྲ་སྤོབས་པའི་གཞུ་ལས་སྐྱེས། །རྣམ་པར་ཞུམ་པའི་དབྱིག་འཛིན་འོག་བཅིངས་ཚེ། །ཉེ་དབང་རང་ཉིད་ཟླ་བྲལ་མིན་སྙམ་པའི། །ཕྱང་མོར་བྱེད་པ་སྒྲ་ཚད་རྗོད་པའི་གཙོ། །གསེར་མངལ་གསོ་རིག་གཙུག་ལག་འཆི་བ་མེད། །བཅུད་དུ་ལེན་པ་ཡོན་ཏན་མགོན་པོའི་གཞུང་། །སྣང་བྱེད་ངོ་མཚར་སྐྱེད་པའི་སྒྱུ་མ་མཁན། །སྤྲུལ་སྒྱུར་རིག་པའི་བཟོ་འདི་གཞན་ཕན་མཆོག །ཤར་ལྷོའི་ལམ་བཟང་ཉིང་ཁུའི་དནྜཱིའི་གཞུང་། །ཉམས་འགྱུར་སྟོང་གིས་ཆོས་ཀུན་འཛུམ་གྱིས་བསུ། །རྒྱ་ཆེན་དོན་གྱི་ལང་ཚོ་རྒྱས་པའི་ལུས། །རིན་ཅེན་རྒྱན་གྱིས་སྤུད་པའི་འཆི་མེད་མཛོད། །ལེགས་སྦྱར་རྒྱུད་དུ་སྤེལ་བའི་སྡེབ་སྦྱོར་འཕྲེང་། །གྲངས་མེད་སྐད་ཀྱི་ཟློས་གར་རྣ་བའི་བཅུད། །མ་འོངས་མངོན་སུམ་སྟོན་པ་གསང་བའི་ཚིག །དབྱངས་འཆར་རྩིས་ཀྱི་གཙུག་ལག་རིག་པའི་འཕྲུལ། །རྣམ་པར་ཡངས་པ་སྙིང་རྗེའི་འདབ་སྟོང་ཚལ། །འཁོར་དང་མྱང་འདས་རྒྱར་འདེབས་སྟོང་པའི་འོད། །འབྲལ་མེད་ཟུང་འཇུག་ལམ་མཆོག་ཟེའུ་འབྲུའི་བཅུད། །སྟོབས་བཅུའི་རྩལ་འདི་ཟད་མི་ཤེས་པའི་མཛོད། །མཐོ་རིས་བདུན་གྱི་ཡོན་ཏན་ནོར་འཛིན་འདིར། །འཕོས་འདྲ་རིག་ཅན་བློན་པོ་འབྱུང་བའི་བརྒྱུད། །ཕུན་ཚོགས་ས་དཔྱད་བཀྲ་བའི་རི་ངོས་དེར། །བཅུ་ཕྲག་རིག་གནས་སྦྱོང་བའི་གནས་སུ་ཤིས། །སླད་མར་ཡང་དག་གཏམ་གྱི་ཡ་མུ་ནཱ། །སྤེལ་ལེགས་ཚིག་ཏུ་སྤུད་པའི་བྱ་མ་རྟ། །ས་འཛིན་ཀ་ལིནྡ་ཡི་ལམ་ཡངས་པོར། །འགོག་མེད་བདེ་བར་འབབ་པའི་ཐབས་སུ་ཆེ། །དཔལ་སྟུག་གསུང་གི་བཅུད་ཕྱུང་སྡེ་བཞིའི་ལུང་། །ཚུལ་བཞིན་(༡༤བ)
བསྟན་པ་རྣམ་བཞིའི་འཁོར་གྱི་ཏོག །དགེ་སྦྱོང་དཔལ་གྱི་ཐུན་མོང་མིན་པའི་གོས། །འགྲུབ་བྱེད་དབང་ཕྱོགས་དར་ལ་རྒྱས་བཏབ་སྟེ། །སྤྲིན་བཅུད་ཁམས་འཛིན་རླུང་གི་ཤིང་རྟ་མ། །གནམ་ལོར་ཤར་བ་ཉིན་བྱེད་ཆུ་སྲིན་ཁྱིམ། །དགའ་བདེར་སྤྱོད་པ་རྒྱལ་གྱི་ཟླ་བ་ཡི། །དཀར་ཕྱོགས་རྒྱལ་བ་གཉིས་པའི་ཚེས་ལ་བྲིས། །ཟུར་ཆེན་རྡོ་རྗེ་འཛིན་པ་ཆེན་པོ་རྗེ་བླ་མ་ཆོས་དབྱིངས་རང་གྲོལ་གྱིས་སྙན་ཚིག་ཕྲེང་བར་སྤེལ་བའི་ལན་ཐེག་མཆོག་གངྒཱའི་ཆུ་རྒྱུན། དྷཱ ཏཽ ནཱ ནྟ ཨ སཾ ཁྱ ཨཱུ མི ཛ ག དྷཱི པ རྴེ ཥུ ཉཱ བཻ ཤྭི ཀཾ ནི རྨྨཱ ནཱ མ ཙ ལཱ ཙྩ ནཱ ནྡི ནི ཀ ཙོ ཌཱུ ཡ ཤྩ པཱ རཱ ཀྵ རཾ། །བཛྲཱ བྫཻ ཎ སི སཱ ཛི ནོ ཏྟ ར ཀ ལ ཏྲྱ ནྣཱ བྷི ཧཱ ཤྲཱ བི ཀོ ལ ཀྵེ ཙཱ མྲྀ ཏ ཀཱ རུ ཎོ ཧི ཏ སུ ཁཾ ཀི ཉྩ སྶི ཏ ༔ ཀཻ ར བཾ། །མི་(སྡེབ་སྦྱོར་སྟག་རྣམ་རྩེན།)འགྱུར་མཆོག་ལ་དགྱེས་རྒུར་སྤྱོད་པའི་མཐའ་བྲལ་དབྱིངས་སུ་གཡོ་མེད་ལས། །གྲངས་མེད་འགྲོ་བློའི་རླབས་ཕྲེང་ཅན་ངོས་སྣ་ཚོགས་སྤྲུལ་པའི་སྣང་བའི་བདག །ཐུགས་རྗེའི་ཟིལ་དངར་འབུམ་དུ་འཛག་པས་ཕན་བདེའི་ས་མོས་ཅི་ཡང་འཛུམ། །དུས་གསུམ་རྒྱལ་བའི་བླ་ན་མངོན་མཐོ་མཚོ་སྐྱེས་རྡོ་རྗེ་འོད་དཀར་ཅན། །(༡༥ན)
ཏུ ཧྱ བ ར ཡ ན ག ནྡྷི ནྱུ ད རེ མ ཏི དྷ ར ཡ རྀ ཥི ནཱ ཧཱ། །ཝ རྞྞ ལེ ཁ མུ དྲཱ རྠ། སུ ནི རྟྲུ གྲཱ ཝ རྟི པཱ ཎེ ཀྵི ཏི། །གང་(ཛ་ཏིའི་སྡེབ་སྦྱོར་ཉེ་བའི་དབྱངས།)གི་ཐེག་མཆོག་གསང་བའི་རྒྱུན་གསུམ་པ། །བློ་གྲོས་ལྟོ་བར་འཛིན་པའི་དྲང་སྲོང་གིས། །དོན་བཟང་ཕྲིན་ཡིག་ཕྱག་རྒྱའི་གཡོན་མིག་གར། །སྙིམ་པའི་རྒྱ་མཚོའི་གོས་ཅན་སྟེང་ན་སྒྱུར། །ལེགས་བྱས་འཆི་བ་མེད་པའི་དགའ་ཚལ་དུ། །རྨད་བྱུང་ཉེ་བར་ལེན་པའི་ཡོངས་འདུའི་ལྗོན། །ལང་ཚོའི་ཡལ་འདབ་རབ་རྒྱས་རྣམ་དཀར་གྱིས། །གང་བུའི་ཁུར་དུ་ལྕི་ལ་སྤྲོ་དགའ་རྟས། །ཆ་ཤས་ཡོངས་རྫོགས་ནམ་མཁའི་བསིལ་སྦྱིན་མཁན། །ཕུལ་བྱུང་ལྷག་བསམ་འོད་དཀར་མ་བཟོད་པར། །ཏིི་མིའི་གྲོང་མཐར་བྲིས་ལ་གཉིས་སྐྱེས་ཚོགས། །རྒྱ་མཚོའི་ཟླ་བར་འབོད་པའི་རྫུ་ལ་བརྟེན། །རྨོངས་པའི་ཚང་ཚིང་སྟུག་པོར་བོད་བླུན་རྣམས། །འགོག་པའི་གཉིད་ལ་ཡུར་བྱེད་གནས་ལྔའི་ཁུར། །རྣམ་དཔྱོད་ཁྱོགས་ལ་བླངས་(༡༥བ)
ཚེ་སཱ་ལའི་ལྗོངས། །བློ་ལྡན་ཕུར་བུ་གཉིས་པ་ཁྱོད་མིན་སུ། །གདོད་གནས་མི་འགྱུར་རྟག་བརྟན་ཀུན་དུ་བཟང་། །སྒྲིབ་བྱེད་སྟོབས་ལྡན་འཁུལ་བའི་མཆོད་སྦྱིན་མཁན། །འོད་གསལ་ཟླ་སྙེད་བགྲོད་པས་བཅོམ་པ་ཡིས། །རྣམ་པར་རྒྱལ་བའི་ཡེ་ཤེས་མཆོག་འདི་མཚར། །འདི་ན་ཟ་ཧོར་གདུང་འཛིན་རིག་བྱེད་པ། །ལངྒའི་གྲོང་ཁྱེར་ས་ལ་འཕོས་འདྲའི་རྫོང་། །རབ་མཐོའི་བ་གམ་གནས་སུ་ཉེར་སོན་ནས། །ཐོས་བསམ་སྒྲུབ་པའི་འདུན་པ་མི་དམན་ཙམ། །གཡུང་དྲུང་འགྱུར་བ་མེད་པའི་རྡོ་རྗེའི་ངོས། །འཆི་བའི་དངོས་པོ་འཇོམས་པའི་བདུད་རྩིའི་བཅུད། །ཤ་མཆོག་དྲི་ཞིམ་ལུས་ཕྲར་མྱོང་བའི་རོ། །བྲོ་བྱེད་ལྷ་མཆོག་བསྟེན་ལ་མི་བསྒྱུར་ངོས། །སྙན་ཚིག་རྣམ་པར་བཀྲ་བའི་ལུས་འོད་གསལ། །དོན་བཟང་འཇོ་སྒེག་གཟིགས་མོར་མཚར་བའི་དཔྱིད། །འཕྲིན་ཡིག་འབྲུག་སྒྲ་མངལ་འཛིན་ལེགས་བྲིས་ཀྱི། །བཤུལ་དུ་འགག་པ་མེད་པར་རྒྱུ་ཡང་འཆལ། །རྩ་གསུམ་ཚིག་གི་བདེན་སྲའི་རྩི་བརྒྱ་བས། །མཐར་བྱེད་འཛིན་མ་བཅོམ་པའི་གཏན་བདེའི་ལུས། །མཚུན་ལྷའི་མེ་ལོང་དལ་སྟེར་རྟག་པའི་གཞིར། །རིག་པའི་དཔའ་བོ་ཁྱོད་ཉིད་འགྲུབ་གྱུར་ཅིག །འཛམ་བུའི་ཆུ་བོ་དར་བབས་གངྒཱ་སྐྱེས། །ཟླ་འཕེལ་འོག་པག་འཁྲོལ་བའི་གར་མཁན་མ། །གན་དར་ལན་བུ་གཡོ་བའི་རྣམ་འགྱུར་ཅན། །རྟགས་ཀྱི་འདོད་པའི་མྱོས་བུམ་གྱིས་སྤྲས་ཏེ། །པཱ་ལཱ་ཤ་མདོག་མདངས་འཛིན་ནགས་ཀྱི་བདག །གོས་སུ་ཀླུབས་པའི་ཡལ་གའི་རི་དྭགས་ཀྱི། །བགྲང་བྱའི་མཛེས་སྡུག་བཞིན་རས་ངོམ་པའི་རྣར། །བཞི་ལྡན་འབྱུང་བའི་རྒྱན་གྱིས་སྤུད་ཚེ་བྲིས། །སྨོན་གྲོ་པཎྜི་ཏ་ཚེ་དབང་དོན་གྲུབ་གྱིས་ཉམས་གྱུར་སྟོང་གི་རྒྱུད་མང་འཕྲོལ་བའི་ལན་རྨོངས་པའི་ཚ་གདུང་འཇོམས་པའི་ཙནྡན་ངོས་འཛིན། (༡༦ན)
ཨཱ གུ ཎྱ ད ཏྟ ཀ རྱ ཤྩ ལ ཀྵྨཱི ཤ ནྟ སྱ བྷ ཝྱ ཙ། །ཛི ནེ ནྡྲཱཔ ར མི དྱ ཡ སྟྲ བ ཎྜི ཏ གྲྀ པཱ ལ ཅ། །ཕུན་(ཁ་སྒོ་ཕན་པའི་སྡེབ་སྦྱོར།)ཚོགས་སྲིད་དང་ཞི་བ་ཡི། །ཡོན་ཏན་ཐམས་ཅད་སྟེར་བྱེད་པའི། །རྒྱལ་བའི་དབང་པོ་ཚེ་དཔག་མེད། །གང་གིས་མཁས་ཁྱོད་སྐྱོང་བར་མཛོད། །ལེགས་བྱས་དཔྱིད་ཀྱི་བུ་མོའི་མངལ་ཁུར་ལས། །མངོན་མཐོའི་རྟེན་གྱི་དབྱར་སྐྱེས་གསར་པའི་མགྲོན། །མང་ཐོས་ཡོངས་འདུའི་འཁྲི་ཤིང་གཡུར་ཟ་བ། །གྲང་རེག་ཉེས་བརྒྱའི་དགྲ་ལས་རྣམ་རྒྱལ་ངོས། །ངོ་མཚར་ལེགས་བཤད་ཉམས་འགྱུར་སྟོང་གི་དབྱངས། །སྙན་ཚིག་དྲི་ཟའི་རྒྱུད་དུ་ཁུགས་པའི་གླུ། །འཕྲིན་ཡིག་ལུས་ཕྲའི་མགྲིན་ལས་རབ་ལེན་ཅིང་། །སྙིམ་པའི་ནོར་འཛིན་ངོས་སུ་ཟློས་གར་སྒྱུར། །ཕྲ་ཞིབ་དཀའ་གནད་གཙུག་ལག་མདུད་པའི་རྒྱ། །ཅིག་ཅར་དགྲོལ་བའི་དྲི་ལན་སོར་མོའི་འཕྲུལ། །རྣམ་པར་དཔྱོད་ལ་བློ་ལྡན་ཕུར་བུ་(༡༦བ)
ཡང་། །ལྟ་བའི་ཟོལ་གྱིས་མཁའ་ལ་རྒྱུའམ་སྙམ། །ཕ་མཐའ་རྟོགས་དཀའ་ཤེས་བྱའི་གསེར་ལྡན་མ། །བློ་གྲོས་གོམ་པ་གཅིག་གིས་གཞལ་བའི་ཚེ། །པད་དཀར་མིག་དེ་རང་མིན་གཉིས་པ་ཞིག །ཡོད་སྙམ་གྱ་གྱུའི་དྲ་བར་ཚུད་ཀྱི་དོགས། །མཛེས་སོ་སྟོབས་བཅུའི་དབུས་ན་ཉི་མའི་གཉེན། །ཀུན་གསལ་འགྲམ་པར་ཆུ་ཤེལ་དབང་པོ་སྟེ། །དབང་ཕྱུག་མགྲིན་པར་ཨིནྡྲ་ནི་ལའི་མདངས། །དཔྱོད་ལྡན་ཁྲོད་ན་བོད་ཡུལ་པཎ་ཆེན་ཁྱོད། །ཚ་བའི་གདུང་བ་མཐའ་དག་རིང་འཕྲོག་ཅིང་། །ཡིད་ལ་ཀུན་དགའ་སྐྱེད་པའི་བདེ་བ་སྟེར། །རྐང་འཐུང་གཞན་གྱིས་འགྲན་པའི་ཟླ་བྲལ་བ། །ནགས་ཀླུང་འཐུག་ཀྱང་ཙན་དན་ལྗོན་པ་དཀོན། །ཨེ་མ་མདོ་རྒྱུད་འཇིགས་མེད་སྙིང་སྟོབས་ཅན། །ཐ་སྙད་རིག་པའི་ང་རོ་ཆེར་སྒྲོག་པའི། །ཤེས་བྱ་ཀུན་གྱི་རྩལ་གསུམ་རྫོགས་པ་ལ། །བསམས་ཀྱིན་གནས་ལྔ་རིག་པར་ངེས་པ་རྙེད། །སྔོན་བྱོན་མཁས་མང་མཛད་པའི་འོད་ཟེར་གྱིས། །ཡིད་ཀྱི་སྤྲོ་དགའི་པདྨ་རབ་བཞད་པའི། །ངོས་ཀྱང་ལེགས་བཤད་སྦྲང་རྩི་གཏོང་ལེན་ལ། །ངལ་མེད་ལྡེམ་ལྡེམ་སྒྱུར་བའི་གར་གྱིས་བྲེལ། །རིས་བྲལ་བརྟན་གཡོའི་ཆོས་ཀྱི་གནས་ལུགས་གཟུགས། །གང་གི་རྣམ་དཔྱོད་མེ་ལོང་ངོས་ཤར་བའི། །སྣ་ཚོགས་གཟིགས་མོར་མཚར་བའི་ངང་ཚུལ་ལ། །ཆུ་སྐྱེས་ཚོགས་ཀྱང་དགའ་བས་འཛུམ་པ་འདྲ། །རྣམ་གསུམ་མཁས་པའི་མཛད་བཟང་འོད་དཀར་གྱིས། །ཐུབ་བསྟན་ཀུནྡ་བཞད་ཚེ་རི་བོང་ཅན། །ཆུ་གཏེར་ཆེན་པོའི་ཀློང་དུ་བྲོས་པ་ལ། །རིག་བྱེད་སྨྲ་རྣམས་ཟླ་བའི་མ་མར་འབོད། །སྨྲ་མཁས་ངག་གི་འདོད་འཇོ་དབང་གི་རྒྱལ། །ལེགས་བཤད་འདོད་རྒུ་འབད་མེད་སྩོལ་བའི་དཔྱིད། །མཁྱེན་དཔྱོད་བདེ་ལེགས་ཀུན་གྱི་ཟ་མ་ཏོག །མི་འགྱུར་རྡོ་རྗེའི་སྤོ་ལ་འཆེས་གྱུར་ཅིག །ལྷོ་ཕྱོགས་མ་ལ་ཡ་ལས་མངར་བའི་དྲི། །(༡༧ན)
བསིར་བུས་ཕྱོགས་རྣམས་འགེངས་པའི་དགའ་སྟོན་ལྟར། །ཐོས་འཛིན་བདུད་རྩིར་སྤྱོད་པའི་འཕྲིན་ཡིག་རྒྱུན། །ཛཧྣུ་ཡི་བུ་མོའི་འགྲོས་ལྟར་འཚལ། །ཚེ་དཔག་འདོད་རྒུ་ངེས་ལེགས་གྲུ་ཆར་གྱིས། །དངོས་གྲུབ་དབྱར་སྐྱེས་དགའ་སྟོན་སྤེལ་བའི་དཔྱིད། །མཐོང་ཐོས་དྲན་རེག་དོན་ལྡན་ཡིད་བཞིན་ནོར། །ཟས་གཙང་སྲས་ཀྱི་འཕེལ་གདུང་ཆུ་འཛིན་དང་། །དབང་ཕྱོགས་ཀ་ཤི་མཛེས་དགའི་སོར་མོ་ཡིས། །ལན་བརྒྱར་བསྐྲུན་པའི་ཐགས་ཀྱི་ལང་ཚོ་ཅན། །ཐུན་འཚམས་ཕྱག་རྒྱའི་མཛེས་མས་དམ་འཁྱུད་དེ། །བཟང་པོའི་ཚེས་ལ་གྲུ་འཛིན་རྩེ་ནས་བྲིས། །ཡོངས་འཛིན་དམ་པ་སྨྲ་བའི་དབང་ཕྱུག་དཀོན་མཆོག་ཆོས་འཕེལ་གྱི་བཀའ་གནང་ཐོད་དུ་བཅིངས་ཏེ་སློབ་དཔོན་མཁས་པ་ཆེན་པོ་སྨོན་འགྲོ་པཎ་ཆེན་འཇམ་དབྱངས་དབང་རྒྱལ་རྡོ་རྗེས་ཁོ་བོའི་རྟོགས་བརྗོད་ཀྱི་གླེགས་བམ་གསར་བསྐྲུན་དང་བཅས་སྙན་ངག་ངོ་མཚར་བའི་འཕྲིན་ཡིག་སྤེལ་བའི་ལན་མྱ་ངན་མེད་པའི་ལྗོན་ཤིང་། ས རྦྦ ཛི ནྱ ཛྙཱ རཱུ པ ཤྩོ ཏྟ མྱཱ བཱ དྷཱུ ནཱཊ ཀྱ ཤྩ། །བ ཎྜི ཏྱཱ ཝ རྟི རྦྲཱ ཧྨ ཎྱཱ ཙ ཤྲཱི ཡ སྟ སྨི ན གོ ཡ ཙྪ། །རྒྱལ་བ་ཀུན་གྱི་མཁྱེན་པའི་གཟུགས། །ལུས་ཕྲ་མཆོག་གི་ཟློས་གར་ཅན། །སྒྱུར་མཁས་ཚངས་པའི་བུ་མོ་ཡིས། །གང་དེར་ངག་གི་དཔལ་སྩོལ་ཅིག །(༡༧བ)
བསོད་ནམས་དཔུང་གི་མཁར་ལྡིིང་རྒྱལ་མཚན་ཅན། །སྨོན་ལམ་ཐབས་མཁས་འཕྲུལ་གྱིས་ལེགས་ཐོབ་པའི། །རྟེན་བཟང་ནོར་བུ་ས་མནྟ་ཀ་མཆོག །འདི་ཕྱིར་ཕན་བདེའི་རེ་འདོད་འཇོ་བ་ལ། །ཚངས་པའི་བུ་མོའི་མགྲིན་ལས་མ་འོངས་ཤིང་། །དབྱངས་བདུན་རྒྱུད་དུ་ཁུགས་པའི་སྒྲ་མིན་པར། །ཉམས་དང་འགྱུར་བ་སྟོང་གི་སྙན་འགྱུར་འཕྲིན། །འདི་འདྲ་སྔོན་མེད་རྣ་བའི་བདུད་རྩིར་ངེས། །སྙིགས་དུས་སྲིད་པའི་ཚང་ཚིང་སྟུག་པོའི་ཁྲོད། །སྟོབས་ལྡན་རྨོངས་པའི་ཚེར་ཅན་ཆེས་མང་ཡང་། །ལེགས་བཤད་ལོ་འབྲས་གཡུར་དུ་རབ་ཟ་བའི། །མང་ཐོས་ཨ་ཤྭདྠ་དེ་ཁྱོད་དུ་ངེས། །འཁྲུལ་བའི་རང་མཚང་འདི་སྣང་བྱ་བའི་མཁར། །གཞན་དབང་རླུང་གིས་རྒྱུ་བའི་སྙོམ་ལས་པ། །འཆད་རྩོད་རྩོམ་པའི་འོད་སྟོང་དགའ་སྟོན་ལ། །མངོན་པར་སྤྱོད་པའི་ཚུལ་ལ་ལྷོད་མིན་ཙམ། །ཆེས་ཕྲ་པདྨའི་སྐུད་པས་ལྷུན་པོ་ཡང་། །བཅིངས་ཞེས་འུད་ཀྱི་ཕུལ་བྱུང་གཏམ་གྱི་ཕྲེང་། །རྟོགས་བརྗོད་དབྱངས་སུ་འཆར་བའི་རྩ་ཀོ་ར། །མཁའ་ལྡིང་དབང་པོའི་བཤུལ་རྗེས་སྙེགས་ཀྱི་དོགས། །བདག་འདྲར་རབ་བཏགས་བསྔགས་པའི་ཟོལ་སྦྱོར་གྱིས། །བསྟན་བཅོས་བྱེད་པོར་སྡེ་སྣོད་གསར་རྙིང་སྔགས། །སྒྲ་ཚད་བཟོ་གསོ་ཐ་སྙད་རིག་གནས་ལྔ། །ཡོད་ཅེས་བསིལ་ལྡན་ལྗོངས་སུ་ངོམ་པ་བཞིན། །རིས་མེད་ཆོས་ཀྱི་ཕྲ་ཞིབ་དབང་པོའི་གཞུ། །འཁྲུལ་བྲལ་སྟོན་ལ་མཛད་པ་མེད་པ་ཡི། །དབང་ཕྱུག་ཡོན་ཏན་གྲུབ་པའི་གྲགས་སྙན་གྱིས། །འཕགས་ཡུལ་མཁས་རྣམས་ཁེངས་པ་བཏང་གི་དོགས། །ལོག་པར་རྟོག་པའི་ཤ་བ་རི་ཡི་རྒྱ། །བློ་གྲོས་མཚོན་གྱིས་བཅད་ཚེ་དེང་དུས་ཀྱི། །རྟོག་གེ་ཙམ་གྱིས་དྲེགས་པའི་བཤེས་གཉེན་ཀུན། །ང་རྒྱལ་བྲག་རྩེར་བྲོས་ནས་མུ་ཅོར་སྒྲོག།ཐེག་ཆེན་གཏམ་གྱི་འདྲེན་བྱེད་དམར་ཟླུམ་ལས། །ཟབ་རྒྱས་ལམ་གྱི་རྣམ་བཞག་མེ་(༡༨ན)
སྦར་ཚེ། །ཡིད་ཀྱི་མདའ་ལྔ་འདོད་པའི་གྲོང་མྱུལ་བའི། །སྒོམ་ཆེན་འདོད་ལྷའི་ཚུལ་འཆོས་གཟུགས་བརྙན་ཞིག །སྲིད་པའི་ཁོངས་ལས་བརྒལ་བའི་ཡོན་ཏན་ཚོགས། །བློ་གྲོས་གསེར་མངལ་མ་འདིའི་ལྟོར་སྦྲུམ་ཚེ། །བརྟན་གཡོའི་ལྕིད་ཀྱིས་རྒྱ་མཚོར་བྱིང་དོགས་ནས། ཁྱབ་འཇུག་རུས་སྦལ་ཟོལ་གྱིས་བཏེག་པ་འདྲ། །རྒྱ་ཆེན་གསུང་རབ་འཆད་ཚེ་དབྱིག་གི་གཉེན། །རྩོད་ཚེ་ཆོས་གྲགས་རྣ་བའི་དོ་ཤལ་བཟུང་། །རྩོམ་ལ་དཔའ་བོ་ལྕང་ལོའི་ཕྲེང་འཛིན་པའི། །དོ་ཟླར་འོས་པ་ཤེས་ལྡན་ཁྱེད་དུ་ཁུམས། །མཁྱེན་ཡངས་ལང་ཚོ་དར་བའི་ཐིགས་ཀྱི་གོས། །གཙུག་ལག་གུར་ཀུམ་གྱིས་བཙོས་གྲངས་མེད་དུ། །ཇི་ཙམ་སྤྱད་པས་མི་འཛད་ལེགས་བཤད་གཏེར། །བྱེད་པོས་གང་གི་བགོ་སྐལ་ཉིད་དུ་བསྐྲུན། །ཨེ་མ་མཐོང་ན་མི་མཐུན་པའི། །དྲི་མ་དང་བྲལ་རྒྱལ་བའི་སྐུ། །དོན་གཉིས་སྩོལ་བའི་རིས་བྲལ་གཉེན། །བསྟེན་པ་དོན་ཆེ་རྙེད་དཀའ་ལྟར། །གངས་ཁྲོད་བཟའ་ཤིང་ར་བ་ན། །ཡོན་ཏན་ཀུན་རྫོགས་དཔག་བསམ་ལྗོན། །བོད་ཡུལ་པཎ་ཆེན་སྨོན་འགྲོ་བ། །ཚེ་དབང་དོན་ཀུན་གྲུབ་པ་དེར། །མཁས་རློམ་ཀུན་ལ་གྲགས་དཀའ་བའི། །སྔོན་མེད་ལྟ་བུའི་ལེགས་བཤད་ལ། །ངོམས་པ་མེད་པའི་ཐོས་པ་དག །འབད་པ་ཆེན་པོས་གྲུབ་པར་མཛོད། །དོན་བཟང་ནོར་བུའི་ཕྲ་ཚོམ་ཅན། །ཚིག་གིས་སོར་མོས་ལེགས་བསྐྲུན་པའི། །རྣ་བའི་རྒྱན་ལྡན་བྱ་མ་རྟ། །བསྐྱུད་པ་མེད་པར་གཉེན་གཤིན་འཚལ། །འཕྲིན་ཡིག་གཉིས་སྐྱེས་གཙུག་ཕུད་ཅན། །ཟ་འོག་གོས་ཀྱི་སྤུ་སྡུག་བཀྲ། །སྙན་པའི་ཟློས་གར་སྒྱུ་བ་དེ། །མཁས་མཆོག་སོར་མོའི་རྩེར་དེར་འཕུར།། །། (༡༨བ)
སྤྲེ་ལོ་ངོས་ཤར་ཕྱོགས་འོལ་ཁ་སྟག་རྩེར་ཡོད་སྐབས་འཇམ་དབྱངས་བླ་མ་དཀོན་མཆོག་ཆོས་འཕེལ་ལྷ་ལྡན་དུ་མཉན་ཡོད་མགོན་དུ་ཕེབས་པར་ཕུལ་བའི་ཞུ་འཕྲིན་ཐར་པའི་སྒོ་བརྒྱ་འབྱེད་པའི་སྐལ་བཟང་། བྷ ཝ ཤ ནྟ དྷ ཏེ ཏ རྦྦེ ཥུ། །པ ཅུ ༔ ས དྷ བ ལཱ ཧ ག༔ །ཀི རྟེ རྞེ། སཱ རཱ བཱ ཀྩ། །མ ཉྫུ ཤྲཱི མཱུ ལ ས ངྐུ རུ༔། །སྲིད་(སྡེབ་སྦྱོར་ཁ་སྒོ་ཕན་པ།)ཞིའི་ཆ་ཤས་གཟུགས་ཅན། ཁམས་ཀྱི་ལྷ་ལམ་དུ། །མཁས་དང་གྲུབ་པའི་ཆུ་འཛིན་ཕྲེང་། །གྲགས་པའི་དབྱར་གྱི་རྔ་བསང་ཅན། །འཇམ་དཔལ་བླ་མ་དམ་པའི་དྲུང་། །བརྟན་དོག་པ་ཕུལ་བྱུང་། གཡོའི་ཆོས་གྱི་གཟུགས་བརྙན་འགོག་མེད་བློར། །ཤར་བའི་ཟུར་ཕུད་ལྔ་པ་འཕྲེང་བ་འདིར། །ཐུབ་བསྟན་ཡོངས་སུ་རྫོགས་པའི་བཤེས་གཉེན་དུ། །ངེས་པས་དད་པའི་ཡིད་ཀྱིས་མཆིད་འདི་ཞུ། །ངོ་སྔོན་མེད་གཟུགས་ཅན། མཚར་རྒྱ་མཚོའི་མཚན་དཔེའི་ཆུ་ཤེལ་(༡༩ན)
དབང་། །མ་རིག་ཕྱོགས་ཀྱི་འཁྲུལ་བློར་འཕེལ་འགྲིབ་ཅན། །འགྱུར་མེད་རྟག་པའི་ངོ་བོ་སྟོན་པ་འདི། །བསིལ་ལྡན་སྐྱེ་རྒུའི་བསོད་ནམས་ཟོང་གིས་བསྒྲུབས། །གྲངས་ད་ལྟར་བ་འགོག་པ། མེད་བློ་གསལ་འདུ་བའི་བཟང་པོའི་ལས། །གྲགས་སྙན་ཕྱོགས་བྲལ་རྣར་འགོད་མཛད་པའི་དཔྱིད། །རྣམ་འདྲེན་བདུད་དཔུང་གཞོམ་པའི་དགེ་བའི་དུས། །གང་གིས་ཐར་པར་མ་དྲངས་སེམས་ལྡན་སུ། །རབ་ལྡན་པའི་གཟུགས་ཅན། དམར་མཆུ་ཡི་འདབ་བརྒྱ་འཛུམ་པ་ལ། །ཤེས་བྱའི་རང་བཞིན་ཡངས་པའི་སྦྲང་རྩིའི་བཅུད། །སྐལ་བཟང་ར་ཡིག་གཉིས་པའི་སྒྲ་འཛིན་སྣོད། །ནམ་ཡང་ཟད་མི་ཤེས་པར་འབབ་འདི་མཚར། །ཆོས་ལེའུ་དང་པོའི་རབ་དངས་ཀྱི་རྒྱན། ཀུན་སྟོང་པའི་རི་མོ་གསར་པ་ལ། །བདེ་ཆེན་ཚོན་གྱི་མདངས་གསལ་རྣམ་བཀྲ་བའི། །གཉིས་མེད་ཉམས་འགྱུར་འཇོ་སྒེག་ཟློས་གར་འདི། །དུས་གསུམ་རྒྱལ་བའི་སྤྱན་གྱི་གཟིགས་མོར་འབབ། །བཅུ་གཟུགས་ཅན་གྱི་འབྱུང་འགྱུར་འགོག་པ། གསུམ་རྡོ་རྗེའི་ས་གཞི་ཉམས་དགའ་བར། །ཐབས་མཁས་མཛད་པའི་ཤིང་རྟས་རིས་བྲལ་གྱི། །འགྲོ་རྣམས་དྲངས་ཚེ་བསྐལ་པ་བཟང་པོ་འདིའི། །འབྱུང་འགྱུར་སངས་རྒྱས་གདུལ་བྱ་མཆིས་སམ་ཅི། །མཐོ་རབ་བཏགས་གཟུགས་ཅན། རིས་ཡོན་ཏན་དུད་པའི་འཕྲུལ་སྣང་དུ། །རྣམ་སྨིན་དཀར་པོར་འཛག་པའི་དགེ་བའི་རྔ། །བརྡུངས་པས་རྩོད་པའི་དུས་ཀྱི་ལུས་ཕྲ་མ། །སྐྲག་སྟེ་རྫོགས་ལྡན་གོས་ཀྱི་རྫུ་ལ་བརྟེན། །ཕུལ་གཟུགས་ཅན་ཤིས་བརྗོད། བྱུང་མངར་བའི་བདེ་ལེགས་སྟེང་གི་རོ། །དཔྱོད་ལྡན་སྐབས་གསུམ་རི་དྭགས་མིག་ཅན་ལྕེས། །མྱོང་བའི་མ་མ་རྗེ་བཙུན་ཡོངས་འདུའི་ལྗོན། །ཐུབ་བསྟན་མཐོ་རིས་དཔལ་དུ་དར་གྱུར་ཅིག །སྙན་ལྡན་པའི་གཟུགས་ཅན། ཚིག་དབྱངས་ཀྱི་ང་རོའི་རྒྱུད་མང་པོ། །སྙིམ་པར་ཐོགས་པའི་ཞུ་མཆིད་(༡༩བ)
གནྡྷརྦྷ། །སྟོང་འཁུན་མཛངས་མའི་སོར་རྩེ་ལས་བསྐྲུན་པའི། །བཀྲ་ཤིས་དར་གྱི་པཙྩ་ལི་ཀ་ཅན། །འཆི་ཤིས་བརྗོད་ཀྱི་རྒྱན། བ་མེད་པའི་ཚེ་ཡི་རེག་བྱེད་ཀྱི། །ངོ་མཚར་གཙུག་ལག་གཞུང་གི་དགོངས་པ་དང་། །དབང་ཕྱོགས་གོང་མའི་གནམ་ལོ་གསར་ཚེས་ཀྱི། །དགའ་སྟོན་དུས་སུ་ཤྲཱི་ཛ་ཡནྟུ། །ཤིང་ཕོ་སྤྲེའུའི་ལོ་ཇུར་ཇིར་བོག་ཏོ་རྒྱལ་པོས་སེ་ཆེན་ཆོས་རྗེ་སོགས་གསེར་ཡིག་པ་སྐྱ་སེར་ཚན་ཆེར་བསྔགས་ནས་རྒྱ་ནག་པོའི་ཁྱད་ནོར་མང་པོའི་སྐྱེས་དང་བཅས་ཏེ་བསྐུར་བའི་ཡིག་ལན་ལེགས་ལམ་ནོར་བུའི་འཕྲེང་བ། སྭ ར མ ཧ ཀི རྟི ཀཱ རྞི ཀ བ རེ ཥ ཊ བྷི ཛྙ མུ ནི ཛྭ ལ བི ས ཧ སྲ བྷཱ ད ཤ བ ལཾ བྷ ཝ དྷྭཏུ ཤ མཱ། །སྭ ར མྲྀ དུ ཧཱ ར མཱ ཡ ན ར ཨི ནྡ ཝ ཡ ཙྪ ཧི ནི རྟི སུ གཏ གརྟི དྷཱི སུ ཨ ག ཤ དྱ ཙ ས རྒཱ ཏུ དཱ། །སྲིད་(སྡེབ་སྦྱོར་བུམ་པ་ཅན།)དང་ཞི་བའི་ཁམས་ན་སྟོབས་བཅུའི་འོད་ཟེར་སྟོང་ཕྲག་རབ་འབར་བའི། །གྲགས་ཆེན་དབྱངས་ཀྱི་རྣ་བའི་རྒྱན་མཆོག་མངོན་ཤེས་དྲུག་ལྡན་ཟས་གཙང་སྲས། །འཇམ་དབྱངས་སྒྱུ་འཕྲུལ་དྲ་བའི་གར་མཁན་ཀུན་མཁྱེན་བློ་བཟང་གྲགས་པ་ཡིས། །(༢༠ན)
བྲ ཧྶ ཎ བི ཥྵཱ བྲི ཧ ཏ མྤ ཧི ཤ ར ཛ རྨྨ མ ཀ ར ཀ ར དྷྭ ཛ། །ལོ ཀེ ཏ སྱ བྷ རོ བ ལ བཱཾ བྷཱ ཝི ཀ ས ཏྒྲྀ པ ལཱ། ཧཱ། །གནམ་བསྐོས་མི་ཡི་དབང་པོ་ཁྱོད་ལ་དུས་རྣམས་ཀུན་དུ་དགེ་ལེགས་སྩོལ། །གསེར་(ཛ་ཏིའི་སྡེབ་སྦྱོརའཕགས་མ།)མངལ་དཔལ་གྱི་མགྲིན་དང་འཁོར་ལོའི་ལག །བློ་ལྡན་མེ་སྐྱེས་ཆུ་སྲིན་རྒྱལ་མཚན་ཅན། །འཇིག་རྟེན་འདི་ན་སྟོབས་ལྡན་ཚོགས་རྣམས་ཀྱིས། །ས་སྤྱོད་དམ་པར་ཤིས་པ་སྐྱོང་པར་མཛོད། (༢༠བ)
ཨཱ ཤྩ རྱ ཀོ ཥ སྦ ར གཱི ཏི བཻ ཌུ རློ ཤུ ཀླ ལེ ཁེ སྱ བ རཱ། མཱ ལཾ། བེ དྷཱ ན རཱཾ ག སྟུ ཡ ཙ ཀྲ ཝ རྟི ནྱཱ སཾ ཀ ལིཾ ཨེ ཥ ཨ ལ ངྐ རོ ཧཱ། །ངོ་(སྡེབ་སྦྱོར་དབང་པོ་རྡོ་རྗེ།)མཚར་བཀྲ་ཤིས་གན་མཛོད་དབྱངས་ཀྱི་གླུ །འཕྲིན་ཡིག་བཻ་ཌཱུར་དཀར་པོའི་འཕྲེང་བ་མཆོག །ཚངས་པ་མི་ཡི་ལུས་ཅན་རྩོད་དུས་འདིར། །འཁོར་ལོས་སྒྱུར་བ་གང་གི་རྒྱན་དུ་འགོད། །ཅེས་དབྱངས་བདུན་རྒྱུད་ལས་ཉེ་བར་དྲངས་པའི་ཤིས་པ་བརྗོད་པའི་ཚིག་གིས་སྔུན་བསུས་ཏེ། མཆོག་ཏུ་བདེ་ལེགས་རྒྱ་མཚོའི་སྣང་བ་གསར་དུ་སྟོན་པའི་དུས་ཀྱི་ཆར། བྱང་ཕྱོགས་ནོར་འཛིན་གྱི་ཁྱོན་ལ་མངའ་སྒྱུར་བའི་རྗེ་བོར་འཇིག་རྟེན་ཐམས་ཅད་ཀྱི་བྱེད་པོ་ཚངས་པས་གནམ་གྱི་མཐོངས་ནས་རིན་པོ་ཆེའི་བུམ་པས་སྤྱི་བོ་ནས་དབང་བསྐུར་བ། རྩོད་ལྡན་གྱི་དུས་གྱི་སྟོབས་གྱི་འཁོར་ལོས་སྒྱུར་བ་ཆེན་པོ་གང་གིས་ཕྱོགས་ཀུན་ལས་རྣམ་པར་རྒྱལ་བའི་རུ་མཚོན་སྲིད་རྩེའི་བར་དུ་སྒྲེང་བའི་ཁྲིམས་ཀྱི་གདུགས་དཀར་པོ་གཅིག་གི་གྲིབ་བསིལ་ལ་སྐྱེ་རྒུ་(༢༡ན)
ཐམས་ཅད་བདེ་བར་འཚོ་ཞིང་། མཆོག་གསུམ་དམ་པར་སླུ་བ་མེད་པའི་གཏན་གྱི་སྐྱབས་སུ་ངེས་པ་ཆེས་ཆེར་རྙེད་པས་བཟང་པོའི་བསྐལ་པ་འདིའི་བླ་ན་མེད་པའི་ཡེ་ཤེས་བརྙེས་པ་སྟོང་གི་དབུས་ན་མངོན་པར་འཕགས་པ་རྒྱལ་བ་བུ་རམ་ཤིང་པའི་བསྟན་པ་རིན་པོ་ཆེ་ལ་སྲི་ཞུ་བླ་ལྷག་ཏུ་ཉམས་སུ་བསྟར་བའི་ངོ་མཚར་བའི་གཏམ་དང་ལྷན་ཅིག་པར་ཡི་གེ་རྟེན་དེར་གསལ་གྱི་བདོག་པའི་སྐྱེས་དང་བཅས་སུག་པར་སོན་པས་ཡིད་ཀྱི་སྨན་ཡོན་དུ་འབྲོངས། འདི་ནའང་ལུས་ཅན་ཀུན་གྱི་ཕན་པའི་རྩ་ལག་ལུང་རྟོགས་ཀྱི་བསྟན་པ་རིན་པོ་ཆེ་སྤེལ་བར་འདུན་པའི་ལྷག་བསམ་ཡར་ལྡན་དུ་མཆིས། ཉེ་ཆར། བྱང་ཆུབ་སེམས་དཔའ་སྙིང་སྟོབས་ཅན་དག་བསམ་བཞིན་སྟོབས་ལྡན་རྒྱལ་པོར་སྲིད་འཛིན་པ་རྣམས་འཕྲལ་དང་ཡུན་གྱི་ལེགས་བྱས་རྒྱ་མཚོའི་འབྱུང་གནས་དགེ་བ་བཅུའི་རྒྱལ་ཁྲིམས་ཀྱིས་མངའ་འབངས་ཀུན་ཡང་དག་པའི་ལམ་ལ་འགོད་པའི་རྨད་དུ་བྱུང་བའི་མཛད་པ་ལ་དགོངས་ནས། གནམ་བསྐོས་ཀྱི་རྗེ་བོ་ཉིད་སླད་མར་ཡང་རྒྱལ་བའི་བཀའ་སྡེ་སྣོད་རིན་པོ་ཆེ་གསུམ་ལ་དབང་པོར་བགྱིས་ཏེ་ཚོགས་གཉིས་ཀྱི་སྒོ་འཕར་མཐའ་ཀླས་པ་འབྱེད་པའི་རྫོགས་ལྡན་གསར་པའི་དགའ་སྟོན་ལ་ཡུན་དུ་སྤྱོད་པའི་དཔུང་ཕྲག་པར་འཛིན་པ་དང་། །ཆོས་རྗེ་ཡཱ་ནཱ་ཀརྨ་ཞེས་རྒྱལ་བའི་འཕྲིན་ལས་པར་འབོད་པའི་འདི་ཉིད་སྔ་སོར་དེ་ཕྱོགས་སུ་ཐུབ་བསྟན་ལང་ཚོའི་རང་ཞལ་ཐོག་མར་ངོམ་པའི་བྱེད་པོར་ལེགས་ཚོགས་སུ་གྱུར་པ་ལྟར། ཉེ་ལམ་ཡང་རྒྱལ་བློན་ཀུན་ལ་མངོན་མཐོ་ངེས་ལེགས་ཀྱི་ལམ་བཅད་སྟོན་ཕྱིར་རྒྱལ་ཁབ་ཆེན་པོར་རྫོང་སྟ་བགྱིས་ཡོད་པ་ཡིད་ངོར་རྟག་ཏུ་འཆར་པར་འཚལ། ཞེས་རྟེན་རྒྱལ་བ་ཉི་མའི་གཉེན་གྱི་འཕེལ་གདུང་། འཕགས་ཡུལ་གྱི་བཟོ་བོས་བསྐྲུན་པའི་སྟོན་པའི་སྐུ་ལི་མ། རྒྱལ་བའི་གསུང་རབ་ཐམས་ཅད་ཀྱི་དོན་སྙིང་པོར་བསྒྲིལ་བ། ཆོས་ཀྱི་རྒྱལ་པོ་རྒྱལ་བ་(༢༡བ)
བཙོང་ཁ་པས་ལེགས་པར་གསུངས་པའི་བྱང་ཆུབ་ལམ་གྱི་རིམ་པའི་གླེགས་བམ། མཆོད་སྡོང་པད་སྤུངས་ལྕགས་ལྟེ་ཅན་ཇོ་བོ་ཆེན་པོ་ཨ་ཏི་ཤའི་ཕྱག་ནས་མ། སྲུང་བ་རྡོ་རྗེའི་མདུད་པ། བྱུ་རུའི་བརྒྱ་འཕྲེང་། སྤོས་ཤེལ་དང་བཅས་པས་རྟགས་ཀྱི་ལང་ཚོ་བཀྲ་བར་རྒྱ་གར་བ་བྷྲུ་པཱ་ལར་འབོད་པ་བོད་ཀྱི་ཡུལ་དུ་ས་སྐྱོང་ཞེས་གྲགས་ལ། རྒྱ་ནག་པོའི་རྒྱལ་ཁམས་སུ་མི་ཡི་འུར་རྗོད་པ། ཕྱོགས་འདིར་དབང་ཐང་དང་བསྟུན་པ་ཤིང་མོ་བྱའི་ལོ། འགྲོ་བའི་བླ་མ་ཤཱཀྱ་སེང་གེས་ཆོས་རྒྱལ་ཟླ་བཟང་ལ་དཔལ་དུས་ཀྱི་འཁོར་ལོ་གསུངས་པའི་ཟླ་བ་ཉིན་མོར་བྱེད་པ་ལུག་ཁྱིམ་དུ་སྤྱོད་པའི་ཕྱོགས་སྔ་མའི་རྒྱལ་བ་དང་པོའི་ཚེས་ལ་ལྷ་ལྡན་སྤྲུལ་པའི་གཙུག་ལག་ཁང་ནས་བྲིས་པ་ཛཱ་ཡནྟུ། ཤིང་བྱ་སློབ་དཔོན་སྨོན་འགྲོ་པཎ་ཆེན་འཇམ་དབྱངས་དབང་རྒྱལ་རྡོ་རྗེ་ཁོ་བོས་སྙན་ངག་མེ་ལོང་སྡེབ་སྦྱོར་རིན་ཅེན་འབྱུང་གནས་དབྱངས་འཆར་སོགས་ལེགས་བཤད་མང་པོ་གསར་དུ་སློབ་པར་སྔོན་སྦྱངས་ཟིན་པ་རྣམས་ལའང་སྐྱོན་ནན་ཏན་བྱེད་པའི་སློབ་དཔོན་དུ་འདེགས་པའི་བཤུལ་གྱི་མཐུན་རྐྱེེན་སོགས་སྟ་གོན་གྱི་འཕྲིན་ལན་སྤྲོ་དགའ་སྐྱེད་པའི་གཏམ། གཽ ཨི ནྡྲ བྲཱ ཧྨ ཡ ཎ ཧི དྷྱཱ མ ཎི ཀ ར ཎ འ ཙ ཛྷ ར གྲི བཿ ཤྲཱི ཏ ར པཱ ཊཱོ རྦྦ ཉ ཙ ཤྩཱ ར པྲཱ ལྒུ ལྒུ ནཱི བ ཉ ཐི གསྱ ཧ། །ངག་(སྡེབ་སྦྱོར་མཆོད་དབྱངས།)དབང་གཟུགས་ཅན་ཕུལ་བྱུང་། ཚངས་སྲས་བློ་ཡི་ནོར། །མགྲིན་པའི་ཟ་མ་ཏོག་འཆང་བའི། །དཔྱོད་ལྡན་ཕུར་བུའི་དཔལ་འཕྲོག་པ། །བསིལ་ལྡན་ལྗོངས་ཀྱི་ལྔ་རིག་པ། །(༢༢ན)
གང་གིས་སྐྱེས་ཐོབ་བློ་གྲོས་ཟླ་གཞོན་ལས། །སྙན་གཟུགས་ཅན་དང་ཉམས་ལྡན་རབ་རྟོག་གསུམ་འདྲེས་པའི་རབ་སྤེལ་གྱི་རྒྱན། ཚིག་བསིལ་ཟེར་འབུམ་ཕྲག་འཛག་པ་ཅན། །ཉམས་འགྱུར་རི་དྭགས་གཟུགས་ཀྱི་འཇོ་སྒེག་ལ། །བལྟ་ཕྱིར་ལྷ་དབང་མིག་སྟོང་སྤྲུལ་ལམ་སྙམ། །བརྡ་གཟུགས་ཅན་གྱི་རབ་རྟོག །སྤྲོད་འཛམ་བུའི་གསེར་གྱི་རྣ་རྒྱན་ལ། །སྡེབ་སྦྱོར་བླ་ཚོགས་རིན་ཅེན་འཕྲས་མཛེས་པ། །དབྱངས་ཅན་འཕང་འགྲོའི་རྒྱུད་ལས་དྲངས་པ་འདིས། །མཁས་དབང་དཔའ་བོའི་སྙེམས་པ་ཕྲོགས་ཀྱི་དོགས། །ཐུན་གྲངས་ཀྱི་ཁ་ཚིག་དང་བཅས་པའི་ངེས་པ་ཕུལ་བྱུང་།འཚམས་ལུས་ཕྲར་ཆགས་པའི་ཕང་བ་ན། །དུས་གཟུགས་བགྲང་བྱས་ལྕི་བའི་ཟུར་ཕུད་ཅན། །མི་ཟད་ངག་གི་འདོད་པ་འཇོ་བ་ལ། །དམར་སེར་མདངས་ཀྱིས་ཁྱོད་ལ་ཁྱད་པར་ཕྱེ། །ཤེས་བྱའི་གནད་དོན་འབྱེད་པའི་མིག་གི་དཀྱུས། །མ་འདྲེས་ཟུར་གྱིས་ལྟ་བའི་སིར་བུ་ཡིས། །གཙུག་ལག་དྲི་བསུང་ཚར་དུ་དངར་མི་དངར། །ཡོངས་འདུ་ཉིད་ལ་རང་དབང་ཇི་ལྟར་མཆིས། །རིང་སྔོན་མེད་གཟུགས་ཅན། པོའི་ཡུལ་གྱིས་བསྐལ་ཡང་སྙན་པའི་རྔ། །ཕྱོགས་བྲལ་གཏམ་གྱི་དབྱུ་གུས་བསྐུལ་བའི་སྒྲ། །ཐོས་འཛིན་ཡུལ་དུ་འཇེབས་ལ་ཆེས་ཉེ་བ། །འདི་འདྲ་སྔ་ན་མེད་པའི་ངོ་མཚར་གནས། །ལེགས་སླུ་བྱེད་ཀྱི་གབ་ཚིག །བཤད་དགའ་སྟོན་སྤྱོད་ཕྱིར་བཤུལ་གྱི་གྲོགས། །མཐུན་རྐྱེན་མིག་སྨན་ལ་འཁུའི་མདངས་ཀྱི་རྒྱ། །འཇིགས་བྲལ་རྟགས་ཀྱི་རི་མོ་བཀྲ་བ་དེ། །རབ་དཀར་ཤིང་གི་མ་མར་གསལ་བར་ཤར། །འཕྲིན་ལྡན་པའི་གཟུགས་ཅན། ཡིག་རྫ་རྔ་རྡུང་བའི་ངང་མོ་དཀར། །བཀྲ་ཤིས་དར་གྱི་འདབ་གཤོག་ལེགས་བསྐྱོད་ནས། །ཀུན་ཕན་ས་གས་ཉ་བ་ཕྱི་མ་ཡིས། །དཀར་ཕྱོགས་ཨི་ཡིག་འཆར་བའི་ཚེས་ལ་བྲིས། །(༢༢བ)
འཇང་ས་ཐམ་རྒྱལ་པོའི་འཕྲིན་ལན་ནོར་བུའི་རྣ་ཆ། ལ ཀྵཱ བི སྟེ ཛཻ རྡ མྱཱ ནྟ བྷ མ རྑ ཁ བུ དྡྷ ཤྩ ཏྲི གུ ཧྱཿ །ཡ ཛྙཱ ག རུ ཎཱ བྷཽ མི ཀ ཙ ལྱཱ། ཡ ཙྪ སུ བྷ ཝ པཱ ལཿ གསང་(ཛཱ་ཏིའི་སྡེབ་སྦྱོར་འཕགས་མ།)གསུམ་ཉི་མ་འབུམ་གྱི་གཟི་བརྗིད་ཀྱིས། །རྨོངས་པའི་མུན་ཚོགས་འདུལ་བའི་ཟས་གཙང་སྲས། །གང་གི་མཁྱེན་བརྩེས་ནོར་འཛིན་སྐྱོང་ཁྱོད་ལ། །ལེགས་པའི་དངོས་པོ་སྩོལ་བའི་ཤིས་པ་སྐྱོངས། །དབྱིག་འཛིན་ལུས་ཕྲའི་མངལ་དུ་ལྕི་བའི་ཁུར། །སྟེར་བྱེད་ལེགས་བྱས་རྒྱ་མཚོའི་དཔུང་པ་ཅན། །ཀུན་མཁྱེན་ཤཱཀྱའི་བསྟན་ལ་ཉེར་གུས་པའི། །བློ་ཅན་མི་བདག་རྣ་བའི་ཀུནྡ་དེར། །སྙན་ཚིག་བསིལ་ཟེར་འབུམ་འཛག་ཉམས་འགྱུར་གྱི། །ཆ་ཤས་ཡོངས་གང་སྔོན་མེད་རི་བོང་ཅན། །མགྲིན་པའི་འཆི་མེད་ལམ་ལས་ཤར་བ་ན། །སྒྲ་འཛིན་ས་མོས་དགའ་སྟོན་ངང་གི་འཕེལ། །ཤིས་པ་བརྗོད་པས་མདུན་བསུས་ཏེ། དེང་ཡང་མཆོག་ཏུ་དགེ་བའི་དུས་ཀྱི་ཆར། ལེགས་བྱས་ན་ཀྲའི་གྲོང་ཁྱེར་ལས་འོངས་པའི་ཉེར་ལེན་གྱི་བསིལ་སྦྱིན་མཁན་(༢༣ན)
པོ་ལྔ་པའི་ཆུ་འཛིན་གྱི་འཚེ་བ་ལས་རིང་དུ་གྱུར་ཅིང་། མངའ་འབངས་དགའ་སྟོན་གྱི་འོད་བརྒྱ་ཕྱོགས་བཅུར་འགྱེད་པ་ནས། རི་མོ་ལེགས་སྐྱེས་ཀྱི་རྟེན། འདུས་པའི་ཚོགས་ལ་ཟང་ཟིང་གི་སྲི་ཞུ་ཕུ་དུད་དུ་འབྱོར་པས་ཡིད་ཀྱི་སྨན་ཡོན་དུ་འབྲོངས། ཤཱཀྱའི་རིང་ལུགས་པའང་འཚོ་བ་རྟས་ཤིང་། རིས་བྲལ་གྱི་འགྲོ་ལ་ལྷག་པའི་བསམ་པ་དཀར་བར་གནས། ཉེ་ཆར་སྔོན་གྱི་རྒྱ་ཧོར་བོད་ཀྱི་ཆོས་རྒྱལ་རྣམས་ཀྱང་འགྲོ་བ་མཐའ་དག་གི་བསོད་ནམས་ཀྱི་ཞིང་མ་དམད་པ། མཉམ་མེད་རྒྱལ་བའི་བསྟན་པ་རིན་པོ་ཆེར་གུས་འདུད་ལྷུར་ལེན་པའི་རྗེས་སུ་ཞུགས་ཏེ། འཇང་ས་ཐམ་གྱི་རྒྱལ་ཁམས་ཀུན་ལེགས་བྱས་ཀྱི་སྒོ་འཕར་མ་སྨད་པར་སྐྱོང་བའི་གཏམ་ཐོས་པས་ཡིད་ཀྱི་སྤྲོ་བ་འཕེལ་ཞིང་། སླད་ནས་ཀྱང་སྔ་མཁོ་ལྟར་གྱི་སྲོལ་བཟང་པོ་སྤེལ་བ་དང་། ཁྱད་པར་རྒྱལ་བ་གཉིས་པ་བློ་བཟང་གྲགས་པའི་བསྟན་པ་དེ་ཕྱོགས་སུ་ཡོད་པ་རྣམས་འཕེལ་རྒྱས་ཀྱི་བཀོད་འདོམས་མི་དམན་པ་དང་། འཕྲོས་ཚོགས་ཀྱང་རིམ་པར་འཚལ་ཞིང་། གནས་སྐབས་མཐར་ཐུག་གི་བཞེད་དོན་འགྲུབ་པའི་ཏིང་ངེ་འཛིན་གྱི་འཇུག་པ་ཡང་བགྱིས་ཡོད། ཅེས་རྟེན་བཀྲས་བཏགས་ཀྱི་མདུད་པ། སྣམ་ཕྲུག་ལྔ་དང་བཅས་དུས་འཁོར་གྱི་ལོ་མགོ་ནག་ཟླའི་དབྱངས་འཆར་བའི་དཀར་ཕྱོགས་ཀྱི་དགའ་བ་གསུམ་པ་ལ་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་ཕོ་བྲང་གྲུ་འཛིན་ཁང་བརྩེགས་ནས་བྲིས། །
རབ་བྱུང་བཅུ་གཅིག་པའི་མེ་ཁྱི་སོགས་ལ་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་ཁྱི་སོགས་ལ་བྲིས་པའི་ཆབ་ཤོག་འཕྲིན་ཡིག་ཁག །སྨོན་འགྲོ་པཎ་ཆེན་རིགས་གནས་རྒྱ་མཚོའི་འཕྲེང་བ་འཛིན་པས་ཁོ་བོ་ལ་ཐ་སྙད་རིག་པ་ལྔ་སློབ་པར་རིགས་ཀྱི་བུ་འཇམ་དབྱངས་དབང་རྒྱལ་རྡོ་རྗེ་ལེགས་བཤད་གྱི་གླེགས་བམ་མང་པོ་དང་བཅས་ཏེ་བཏང་བའི་སྐབས་སུ་ཚིག་གི་འཕྲིན་ཡིག་སྟག་ཚང་ལོ་ཆེན་དང་ལོ་ཆེན་འགྱུར་མེད་བདེ་ཆེན་གཉིས་ཀྱིས་མཛད་པའི་རྣམ་རྒྱལ་མའི་གཟུངས་དང་ཚེ་གཟུངས་བྱིངས་སྒྲུབ་ཀྱི་ཡིག་(༢༣བ)
ཆའི་རྟེན་དང་བཅས་བསྲིངས་པའི་ལན་ལེགས་བཤད་རྒྱ་མཚོའི་རླབས་འཕྲེང་ཡོལ་བ་མེད་པའི་གཏམ། ཨ དྦྷུ ཏོ ྅ མྲྀ ཏེ ནཱ མཱ ར ཙཱ ཡུ ཤྩ ཤྱཱ བུ ཥེ ཀ ར། །ཛི མ ཏཱ ཙི ནྟ ཙ ཀྲེ ཎ ཏྭ ཡི པ ཊྭི ནྡྲ ཨ ཐྱ ཀྲྀ །རྨད་(སྡེབ་སྦྱོར་ཁ་སྒོ་ཕན་པ།)བྱུང་འཆི་མེད་བདུད་རྩི་ཡིས། །ཚེ་དང་དཔལ་ཀུན་རྒྱས་མཛད་པ། །རྒྱལ་ཡུམ་ཡིད་བཞིན་འཁོར་ལོ་ཡིས། །མཁས་དབང་ཁྱོད་ལ་ཤིས་པར་མཛོད། །ཕུན་ཚོགས་རིག་གནས་ཡོངས་ཀྱི་མདུན་ས་ཆེར། །ལེགས་བཤད་རྒྱ་མཚོའི་རླབས་ཕྲེང་ཆེར་གཡོ་བའི། །སྙན་གྲགས་ཁུར་གྱིས་ནོར་འཛིན་ངལ་བྱེད་པ། །སྲིད་ཞིའི་ཡོན་ཏན་ལྷུན་གྱིས་གྲུབ་པའི་འཕྲིན། །དོན་བཟང་གཟིགས་མོར་མཚར་བའི་འཇོ་སྒེག་ཅན། །ཤིང་གི་མ་མའི་རིན་ཅེན་རྩིག་ངོས་ལ། །གྲངས་མེད་ཤར་བའི་ཚུལ་འདིར་བལྟ་བའི་བློ། །ཧ་ནུ་མནྠར་གྱ྄ུར་ཀྱང་ཕྱང་མོ་ཉུག །ཤེས་རབ་རྫིངས་ཀྱིས་ཆོས་ཕུང་རིན་ཅེན་མཆོག །རྒྱལ་མཚན་རྩེ་མོར་བཀོད་པའི་དཔལ་འབྱོར་ཆར། །སྐལ་བཟང་འགྲོ་ལ་བསྙེལ་བའི་ལོ་ཙཱ་(༢༤ན)
དང་། །འགྱུར་མེད་བདེ་ཆེན་ལ་རོལ་སྐད་གཉིས་པས། །འཆི་བདག་གཡུལ་ལས་རྣམ་པར་རབ་རྒྱལ་མ། །ཚེ་དཔག་མེད་མགོན་གཟུངས་སྔགས་ལེགས་སྦྱར་སྐད། །བྱིངས་ལས་རྐྱེན་གྱིས་སྒྲུབ་པའི་པུ་སྟ་ཀ །རི་སྐྱེས་འཁོར་ལོ་བྱུང་བཅས་སུག་པར་འབྱོར། །གང་གི་ཡོན་ཏན་མེས་པོའི་ཐོད་ཡངས་ལས། །ལེགས་བཤད་ཉལ་འགྲོའི་རྒྱུན་བཟང་འདྲེན་མཁས་པའི། །འཇམ་དབྱངས་མགྲིན་པར་དབང་དུ་རབ་བགྱིས་པས། །ངག་གི་རྒྱལ་པོ་གྲུབ་པའི་ལོ་ཙཱ་བ། །ཕྲ་ཞིབ་རིགས་པའི་རྡོ་རྗེ་རྩེ་བརྒྱ་པས། །ལོག་རྟོག་ས་འཛིན་རྐང་པ་མཐར་བྱེད་དེས། །ཀ་ཙཎ་དཎྜཱིའི་གཙུག་ལག་སྡེབ་སྦྱོར་གཞུང་། །དབྱངས་འཆར་སུམ་རྟགས་སྐྱེས་བཟང་ཅི་ཡང་སོན། །ཆོས་མངོན་དགོངས་འགྲེལ་རྒྱལ་པོའི་སྲས་པོ་ལས། །ཀྲྀ་ཀྲིའི་རྨི་ལྟས་བཤད་པ་དུས་བབ་འདིར། །ལེགས་བཤད་རིན་ཅེན་སྤངས་ནས་མཆིང་བུའི་རྡོར། །ངལ་བ་བསྟེན་པ་བླུན་པོའི་རང་མཚང་ཡིན། །འགའ་ཞིག་མཁས་པར་འདོད་པའི་གསུང་རབ་ལ། །ཕྱོགས་རེར་སྦྱངས་ཏེ་དྲེགས་པའི་ཨུཏྤལ་ཁ། །མཐའ་བྲལ་གནས་ལྔ་ཀུན་རིག་ཉིན་བྱེད་ཀྱི། །འོད་བརྒྱ་སྤྲོས་ཚེ་ཟུམ་པ་ཆོས་ཉིད་ཡིན། །དེ་ལྟ་ན་ཡང་རིགས་ཆོས་འཛིན་པའི་སྲས། །བློ་ལྡན་ཕུར་བུའི་དཔལ་ལ་འགྲན་བཟོད་དེར། །རྣམ་དཔྱོད་མིག་སྟོང་མངའ་བའི་རིག་བྱེད་ཀུན། །སྩལ་ཚེ་ཤོང་དཔང་བརྒྱུད་པའི་བསྟན་པ་འཛིན། །འཇམ་དབྱངས་གཞོན་ནུ་མི་ཡི་སྲིད་པའི་གར། །འགྲོ་ལ་ཉེ་བར་སྟོན་པའི་བཙོང་ཁ་པ། །རྣམ་འདྲེན་གང་དེའི་རིང་ལུགས་འཛིན་བྱེད་པའི། །ཞི་འཚོའི་དཔོན་རིགས་སྡོམ་བརྩོན་ཀློག་པ་མཁན། །ཡོངས་འཛིན་དུ་མའི་དྲིན་ལས་མདོ་རྒྱུད་ཀྱི། །ཚིག་དོན་རྟོགས་དང་མཁས་ཁྱོད་ལས་འོངས་པའི། །གནས་ལྔའི་རིང་ལུགས་ཤིང་རྟ་འདྲེན་པ་ཡི། །འཆད་རྩོད་རྩོམ་པའི་ཁ་ལོ་སྒྱུར་སྐབས་གྲང་། །ཡིད་ཀྱི་རི་དྭགས་འཁྲུལ་པའི་དྲ་བ་རུ། །(༢༤བ)
ཉེ་བར་ཆུད་ལས་འདོན་པའི་དྲིས་ལན་ཚིག །དྲུག་སྐྱེས་གླུ་དབྱངས་ཐོས་པས་འཕགས་ཡུལ་གྱི། །པཎ་ཆེན་རྣམས་ལ་མོས་པ་ལྷོད་པར་བྱས། །འཕྲོས་འོས་གཏམ་གྱི་འོད་དཀར་དཀྱིལ་འཁོར་ཅན། །འཕྲིན་ཡིག་དྲི་བཞོན་རྟ་དང་ལྷན་ཅིག་ཏུ། །བཤུལ་ལམ་ཀུན་གསལ་བུ་མོའི་འགྲམ་པ་ལ། །འགོག་མེད་རྒྱུ་བའི་དགའ་སྟོན་ཅི་ཡང་མཛོད། །རྨུགས་འཛིན་དཔལ་འབྱོར་མ་ལུས་འཆར་བྱེད་པའི། །དབང་ཕྱོགས་རྒྱལ་པོའི་མི་ཟད་གན་མཛོད་ལས། །ལེགས་དངོས་ཐགས་སུ་གྲུབ་པའི་མནྡྷ་ར། །འཚམས་སྤྲིན་རྟགས་ཀྱི་ཟེའུ་འབྲུ་སྤུད་བཞིན་དུ། །རྒྱ་ནག་སྐད་དུ་བིང་ཟུའི་ཞེས། །རྗོད་པ་ཕྱོགས་འདིར་མེ་ཕོ་ཁྱིའི། །བསིལ་སྦྱིན་མཁན་པོ་གྲོ་བཞིན་དང་། །རྩེ་དགར་སྤྱོད་པའི་ཟླ་བར་བྲིས། །སློབ་དཔོན་སྨོན་འགྲོ་པཎ་ཆེན་འཇམ་དབྱངས་དབང་རྒྱལ་རྡོ་རྗེའི་འཕྲིན་ལན་ལེགས་བཤད་ངོམས་མེད་འཐུང་བར་སྦྲུལ་ཚིག་གི་པི་ཝང་། ས རྦྦ ཛི ན སྱ རཱུ བ ཛྙཱ ཡཱ ཙ སྟྱཱ ༔ ཡུབ ནྱ ནཱ ཊ བྱཱ བཱཾཾ། །སྭ ར སྭ སྟྭཱ ཏ སྨི ནྱ ཙ མ ཏི ཨུ ཏྟ མ ཙ ཡ ཙྪ ཨཱ པ ཉྩ སྠི༔། །རྒྱལ་(ཛ་ཏིའི་སྡེབ་སྦྱོར་འཕགས་མའི་དབྱངས།)བ་ཀུན་གྱི་མཁྱེན་པའི་གཟུགས། །ལུས་ཕྲའི་ལང་ཚོའི་ཟློས་གར་ཅན། །ཚངས་པའི་བུ་མོས་གནས་ལྔ་ཀུན། །རིག་དེར་བློ་གྲོས་མཆོག་སྩོལ་ཅིག །(༢༥ན)
གྲངས་མེད་ཡོན་ཏན་ཆུ་ཀླུང་མ་ལུས་ལུས་པ་མེད་པར་འབབ་བྱེད་སྟེགས། །གཏིང་མཐའ་བྲལ་བའི་ཤེས་བྱའི་གནས་ལུགས་ལུགས་སྲོལ་རླབས་ཕྲེང་ཆེར་གཡོ་བ། །སྙན་ཚིག་རིན་ཅེན་བྱེ་བའི་འབྱུང་གནས་གནས་ལྔ་རིག་པའི་ཆུ་གཏེར་ཆེ། །བློ་ལྡན་ཉལ་འགྲོའི་གཙུག་ན་རབ་མཛེས་མཛེས་སྡུག་ཚངས་སྲས་མགྲོན་འཆང་བ། །གངས་ཀྱི་རྡུལ་བརྩེགས་ཡོལ་བས་རབ་བསྐོར་རབ་ཏུ་བསིལ་ལྡན་ཁ་བའི་ལྗོངས། །ལྗོངས་འདིར་སྔོན་བྱོན་ལོ་པཎ་མཛད་བཟང་མཛད་པ་མ་ལུས་སྤེལ་མཁས་མཆོག །མཆོག་ཏུ་སྙན་པའི་གྲགས་པས་མངོན་ཁྱབ་མངོན་རྗེས་ཚད་མས་འཇལ་བྱེད་གང་། །གང་གིས་ཟད་མེད་ལུང་རིགས་ལེགས་བཤད་ལེགས་པར་འོངས་ལས་སྤྲིང་ཡིག་འཕྲེང་། །ཤར་ལྷོའི་ལུགས་བཟང་དགོད་པའི་མནྡྷ་ར། །ཉམས་འགྱུར་སྟོང་གི་གེ་སར་གཡོ་བ་ཅན། །སྙིམ་པའི་ཐོད་དུ་བཅིངས་ཚེ་མཐོ་རིས་ཀྱི། །སྒེག་མོའི་ཅོད་པན་ས་འདིར་འཕོས་པ་བཞིན། །རྨད་བྱུང་རིག་པའི་གནས་ཀྱི་རྒྱ་མཚོ་ཆེ། །རྣམ་དཔྱོད་སྲད་བུར་བརྒྱུས་པའི་ཕྲེང་བ་དག །འཛིན་མཁས་གངས་རིའི་ལྗོངས་ཀྱི་པཎྜི་ཏ། །ཚེ་དབང་དོན་ཀུན་གྲུབ་པའི་ལེགས་བཤད་རྒྱུན། །འཇམ་སྙན་ཤེས་བྱའི་དབྱངས་བདུན་ལ་དབང་བ། །ཕྱོགས་ལས་རྣམ་པར་རྒྱལ་བའི་རྡོ་རྗེ་སྡེས། །གཅིག་ཅར་འཐུངས་ཚེ་དྲང་སྲོང་ཛཧྣུ། །མངོན་པར་སྐྱེངས་ཏེ་སྐྱུགས་པའི་ཟོལ་ལ་བརྟེན། །ལེགས་བྱས་འོ་མཚོའི་རྫིང་བུ་འཁྱིལ་བའི་དབུས། །མ་སྨད་ཉེར་ལེན་ཆུ་སྐྱེས་གཞོན་ནུའི་ཚལ། །མི་མཐུན་བ་མོའི་དགྲ་ལས་རྒྱལ་བའི་གཏམ། །ངང་མོའི་མགྲིན་པར་འཁྲོལ་དེ་རྣ་བར་འཇེབས། །རྣམ་གསུམ་མཁས་པའི་བྱ་བ་ལང་ཚོའི་དཔྱིད། །དར་ལ་བབ་པའི་ཐ་སྙད་མིག་གི་དཀྱུས། །འཕངས་ཚེ་བློ་ལྡན་ཕུར་བུ་མཁའ་དབྱིངས་ལ། །རྒྱུ་བའི་ཟོལ་གྱིས་ལྟ་བར་འོངས་པ་བཞིན། །ཕུན་ཚོགས་ནོར་འཛིན་དགའ་མའི་(༢༥བ)
ཕང་བ་ན། །བཅུ་ཕྲག་རིག་པའི་ཁུར་གྱིས་རབ་ལྕི་བའི། །གང་གི་སྒྱུ་འཕྲུལ་དྲ་བའི་རོལ་གར་ལ། །ཆུ་སྐྱེས་ཕལ་ཆེར་འཛུམ་ཞིང་དགོད་པ་འདྲ། །བློ་གྲོས་བཻ་ཌཱུར་ཞུན་མ་འཁྱིལ་བའི་ངོས། །ཇི་སྙེད་ཆོས་ཀྱི་གཟུགས་བརྙན་སྟོང་འཆར་བ། །སྔོན་མེད་ཚར་དུ་དངར་བའི་གཟིགས་མོ་འདི། །བྱེད་པོ་གསེར་མངལ་ཅན་ལས་གཞན་སུ་ཞིག །དཔྱིད་ཀྱི་ཀུན་དགས་རིང་ནས་བསྐྱེད་པ་ཡི། །སྤང་ལྗོངས་ནེའུ་གསིང་རྒྱས་པའི་དགའ་ཚལ་ན། །རྐང་འཐུང་གཡུར་དུ་ཟ་བ་མང་ན་ཡང་། །དཔག་བསམ་ཡོངས་འདུ་ལྗོན་པ་ཤིན་དུ་དཀོན། །ཕུན་ཚོགས་ཡོན་ཏན་མ་ལུས་ཆེས་འཇོ་བས། །འགྲོ་བའི་རེ་བ་སྐོང་ལ་མཁས་ཁྱོད་དང་། །ཡིད་བཞིན་ནོར་མཚུངས་གང་དེ་སེམས་མེད་དེ། ཁྱོད་ནི་མཁྱེན་པའི་དབང་ཕྱུག་ངག་གི་དཔལ། །ཟ་ཧོར་གདུང་ལས་རིག་གནས་བཅུ་ཕྲག་ལ། །ཕྱོགས་ཙམ་མོས་བློར་གཞོལ་བའི་སྐད་གཉིས་པ། །མཐའ་བྲལ་ཤེས་བྱ་ཁེངས་ལྡན་གནས་ལུགས་གཞུ། །བློ་གྲོས་རྒྱུད་ཀྱིས་འགུགས་པའི་འདུན་པར་གནས། །ཤོང་པང་ལོ་ཆེན་ཆོས་སྐྱོང་བཟང་པོའི་བར། །རིམ་བྱོན་རྣམ་ཐར་གླུ་དབྱངས་མི་ལྡན་པའི། །ཟང་ཟིང་བྲག་རིར་གནས་བཅས་གཉིས་སྐྱེས་འགའ། །ཆོས་མིན་འདབ་གཤོག་སྐྱོད་པ་མང་བར་གདའ། །དྲི་བསུང་མངར་པོར་འཐུལ་བའི་མ་ལ་ཡའི། །ཙན་དན་གཞོན་ནུའི་ལྗོན་པ་གསར་པ་དག །བོར་ཏེ་ཚེར་ཅན་ཤིང་ལ་ལོ་འདབ་ཀྱི། །ལྷབ་ལྷུབ་གཡོ་ཞེས་འདུད་པའི་བླུན་པོ་མང་། །ཡིད་འོང་རིན་ཅེན་རྩིག་པས་ཡོངས་བསྐོར་བ། །ཕུན་ཚོགས་ལྷ་ཡི་ཁང་བཟང་དམ་པ་བས། །རི་བྲག་གཅོང་རོང་ཁུང་བུར་ཡིད་གཏོད་པའི། །ལྕེ་གཉིས་སྤྱོད་པའི་བྲང་འགྲོས་ཁེངས་འདི་ཅི། །སློབ་དཔོན་བསྟེན་དང་བརྩོན་པ་མ་དགོས་པར། །ཆོས་ཀུན་མ་ལུས་མཁྱེན་པར་ཁས་འཆེ་བའི། །སྐྱེ་རྒུའི་འདྲེན་པར་རློམ་པའི་(༢༦ན)
ཚུལ་བདེན་ན། །མདོ་ལས་རྒྱུ་འབྲས་གསུངས་པ་གཏམ་དུ་ཟད། །བླང་དང་དོར་བྱར་དཔྱོད་པའི་རྣ་བ་ལ། །ཕྱི་ནང་གཙུག་ལག་ནོར་བུའི་ཕྲ་ཚོམ་ཅན། །རྣམ་དཔྱོད་གཟི་འོད་འབར་བའི་དགའ་སྟོན་དེ། །དེང་དུས་ཁྱོད་ཀྱི་སྐལ་བ་ཙམ་དུ་ཁུམས། །མང་ཐོས་འཛམ་བུའི་གསེར་ཕྱེ་ཕྱིར་དོར་ནས། །བླུན་རྨོངས་དྲེགས་ལྡན་ར་གན་གཙོར་འཛིན་པའི། །བསིལ་ལྡན་སྐྱེ་བོའི་སྣང་ཚུལ་འདི་མཐོང་ཚེ། །མཁས་ཁྱོད་མཛད་པར་རྗེས་སུ་ཅིས་མི་རང་། །རྐང་མགྱོགས་གྲུབ་པའི་འཕྲུལ་གྱིས་འཕགས་པའི་ཡུལ། །ལན་བརྒྱར་བསྐོར་ཀྱང་དེང་དུས་རྙེད་མིན་པའི། །གྲགས་པ་དོན་མཐུན་བོད་ཡུལ་པཎྜི་སྨོན་འགྲོ་ལོ་ཙཱ་ཚེ་དབང་དོན་གྲུབ། ཏ། །ཨུ་དུམ་ཝཱ་ར་ལྟ་བུར་ཕྲད་དཀའ་ན། །སྒྲ་ཚད་བཟོ་གསོ་ནང་རིག་སྙན་ངག་དང་། །མངོན་རྗོད་སྡེབ་སྦྱོར་ཟློས་གར་སྐར་རྩིས་སོགས། །བསླབ་བྱར་འོས་མིན་འགའ་ཡང་མ་མཆིས་པས། །ངོམས་མེད་ཐོས་པའི་སྒྲོ་འདོགས་ཆོད་པར་མཛོད། །སྙན་ཚིག་སྤེལ་ལེགས་ནོར་བུའི་བཻ་ཌཱུརྱ། བྲྀཏྟ་ཛཱ་ཏིའི་གྲུ་གཟིངས་ལ་བརྟེན་ནས། །འཕྲིན་ཡིག་མཐུན་པའི་རླུང་དང་རང་འགྲོགས་ཏེ། །ནམ་ཡང་བསྐྱུད་པ་མེད་པའི་ཁུར་འཁྱེར་འཚལ། །སྟོང་འཁུན་སྨིན་ལེགས་སོར་མོའི་འདུ་བྱེད་ཀྱིས། །ངོ་མཚར་ཐགས་སུ་གྲུབ་པའི་ལུས་ཕྲ་མ། །ཐུན་འཚམས་རྟགས་ཀྱི་གཞོན་ནུར་མཛའ་གཅུགས་ཀྱི། །མི་ཕྱེད་དགའ་སྟོན་རྒྱ་ཡིས་དམ་དུ་བཅིངས། །དམར་འོད་གོས་བཟང་ཀླུབས་པའི་བགྲང་བྱ་ཡི། །རྟ་ལྗང་སེང་གེའི་ཁྱིམ་དུ་ཉེར་སྤྱོད་པ། །གཙུག་ན་ཟླ་བའི་ལུགས་སྲོལ་དབྱངས་འཆར་བའི། །དམར་ཕྱོགས་ཨོ་ཡིག་འཆར་བའི་ཚེས་ལ་འབྲིས། །མི་རྒན་དཀའ་བཅུ་ཤེས་རབ་རྒྱ་མཚོ་བསྟན་འཛིན་ཆོས་ཀྱི་རྒྱལ་པོའི་བོད་སོག་གི་ལོ་ཙཱར་གཙང་པ་རྣམ་རྫོང་དུ་ཡོད་ཐོག་སྤྲིངས་(༢༦བ)
པ་ནད་བརྒྱ་འཇོམས་པའ་ིསྨན་མཆོག །ཏྲི གུ ཧྱ གནྡྷ སྭ ཏི སུ ཁཱི ཡཱ། སུ ཀ ལྤ ཛ གྱཱ མྲྀ ཏ ཙ ཧི ང ཡྻ། །ཛི བྲྀ ཀྵ བ དྱཱ ཀྵ ད ར ཤྱ བ ལྱཱ། །བ རཱ ཀྲ མཱ སྭཱ དུ ཀུ རུ ཤྩ ཤུ བྷྱ། །ཕུལ་(སྡེབ་སྦྱོར་ཉེ་དབང་རྡོ་རྗེ།)བྱུང་གསང་གསུམ་ཚར་དུ་དངར་བའི་དྲིས། །སྐལ་བཟང་འགྲོ་ལ་ཕན་བདེའི་བདུད་རྩིའི་དཔྱིད། །མི་ཟད་སྟོབས་བཅུའི་རྩལ་གྱི་རོ་བྲོ་བ། །རྣམ་འདྲེན་རྐང་འཐུང་དབང་པོས་དགེ་བར་མཛོད། །རིང་ནས་གོམས་པའི་ལེགས་ལམ་སྣང་བའི་གཏེར། །མི་དམན་སྐྲུན་པའི་ཆོ་གའི་ཁྲིམས་ཀྱི་འོད། །མངོན་མཐོའི་རྟེན་བཟང་འདབ་བརྒྱའི་དགའ་ཚལ་ཅན། །ཉེར་འཚེའི་སྐྱིན་ཐང་དགྲ་ལས་རྣམ་རྒྱལ་ངོས། །ཕུན་ཚོགས་དགེ་བཅུར་གྲུབ་པ་ཉི་འོག་ཡུལ། །མཐོ་རིས་ཡོན་ཏན་ཀུན་མཁྱེན་གཡས་རུའི་ཆ། །སུམ་རྩེན་འཛིན་མར་འཕོས་སམ་གསེར་མངལ་ཅན། །བྱེད་པོས་གསར་དུ་བྲིས་འདྲའི་སྨན་ལྗོངས་སུ། །གཞན་ཕན་འཁྲི་ཤིང་གསར་པའི་ལྕུག་ཕྲན་ཅན། །མ་འདྲིས་འཁྱུད་པའི་དཔྱད་ཐག་ཐོན་པོ་མཆོག །ཡིད་ཀྱི་ག་བུར་སྟེར་ཚེ་ཆུ་ཤེལ་དབང་། །(༢༧ན)
གཉིས་པ་ས་དེར་འཕོས་སྙམ་ཀུནྡ་འཛུམ། །མི་བདག་རྗེས་འཇུག་མདུན་ན་འདོན་རྣམས་ལ། །གང་གིས་ལེགས་པར་བརྗོད་པའི་ཚིག་སྦྱོར་གྱིས། །བསིལ་ལྡན་ཡངས་པའི་ས་ཆེན་འདིར་འཁོད་པའི། །གྲངས་མེད་སྐྱེ་རྒུར་བྱམས་བརྩེས་ལེགས་སྐྱོང་ཅིང་། །ཀུན་གསལ་ལུས་ཕྲའི་ངོས་ཤར་བསིལ་སྦྱིན་མཁན། །འབུམ་ཕྲག་འདས་པའི་རྫིང་བུར་འཆར་བ་ལྟར། །རྒྱལ་བའི་རྗེས་ཞུགས་གངས་ཁྲོད་གྲུབ་པའི་མཐའ། །རིས་མེད་ཡོངས་ལ་ཕན་བདེ་སྟེར་བའི་ཐབས། །ཀུན་ཡིད་དགའ་བའི་ངལ་གསོའི་སྟེགས་བྱིན་ཅེས། །བརྗེད་ངས་དྲི་མ་འཁྲུད་ཚིག་དབུས་འགྱུར་ནས། །སེམས་ཀྱི་རྡོ་རྗེའི་རྣལ་འབྱོར་ལ་གཞོལ་བ། །ཨ་ཝ་དྡྷཱུ་ཏཱིའི་བཙུན་པ་དེ་སྐད་སྨྲ། །སླད་མར་བགྱིད་འོས་གཏམ་གྱི་སིནྡྷཱུའི་ཀླུང་། །རབ་དཀར་ཤོག་བུའི་ལམ་གསུམ་ངོས་ཡངས་པར། །ལན་གཅིག་མིན་པར་རྒྱུ་བའི་དབྱངས་བདུན་གླུ། །རྣམ་པར་སྒྲོག་པའི་མགྲིན་པ་གདེག་པར་གྱིས། །དེ་ལྟའི་འཕྲིན་ཡིག་འབྲུག་སྒྲ་མངལ་འཛིན་ཅན། །སྙན་ཚིག་སྒྲོ་ཐུལ་འགེང་བའི་གཤོག་རླབས་ཀྱིས། །གསང་བ་སྔགས་ཀྱི་མདུད་རྒྱའི་གཙུག་ཕུད་བཅས། །གྲུ་འཛིན་རི་བོའི་ཁང་བརྩེགས་སྤོ་ནས་འཕུར། །ཟུར་ཆེན་རྡོ་རྗེའི་སློབ་དཔོན་ཆེན་པོ་ཁྱབ་བདག་པདྨ་དབང་གིས་སྙན་ཚིག་འཕྲེང་བར་སྤེལ་བའི་ལན་བདེ་གཤེགས་ཞི་ཁྲོའི་གསང་ཚིག །ཕུན་ཚོགས་དགེ་བཅུའི་དཔལ་གྱིས་ལེགས་སྤུད་པ། །བསིལ་ལྡན་བསྟན་འགྲོའི་གཉེན་གྱུར་མཚོ་སྐྱེས་རྗེ། །བློ་བཟང་སྙན་གྲགས་བ་དན་མངོན་མཐོ་བ། །མཚུངས་མེད་སྐྱབས་ཀྱིས་རྟག་ཏུ་ཤིས་པར་མཛོད། །རབ་འབྱམས་ཞི་ཁྲོའི་དཀྱིལ་འཁོར་ལྷ་ཚོགས་ལ། །ཉེ་བར་བསྙེན་པས་གྲུབ་པའི་མཚན་མ་མཆོག །མངོན་གྱུར་གསང་བདག་སྒྲོ་ཕུག་རྗེ་ལ་སོགས། །ཕུལ་བྱུང་དམ་པའི་རིགས་ལས་(༢༧བ)
ཉེར་སོན་པས། །མཚུངས་མེད་རྒྱ་གར་མཁས་པའི་གཞུང་ལུགས་ཆེ། །དཎྜཱིའི་རིང་ལུགས་སྙན་ཚིག་ལམ་དྲངས་པ། །སུག་པའི་གར་དང་གཏམ་གྱི་རྒྱུད་མང་གླུ། །འདྲེན་བྱེད་སྒྲ་འཛིན་ཟུང་གི་དགའ་སྟོན་གྱུར། །ངོས་ཀྱང་དུས་ཀྱི་བསྐལ་པའི་སྣང་ཚུལ་འདིས། །ཐེག་མཆོག་ཟབ་མོའི་ཚུལ་ལ་བློ་གཞོལ་ཡང་། །མི་ཕན་ཕན་རློམ་འགྲོ་དོན་གཟུགས་བརྙན་གྱིས། །སྔོན་ཆད་གཞན་དབང་བསིར་བུས་ཅུང་ཟད་བསྐྱོད། །སླད་མར་མིག་སྟོང་ལྡན་པའི་ལག་ཉལ་བཞིན། །མི་མཐུན་ས་འཛིན་བགྲོད་པ་ཀུན་བཅོམ་ནས། །རྡོ་རྗེ་ཐེག་པའི་གཉིས་འཐུང་དབང་པོའི་སྟེང་། །ཟབ་དོན་རིན་ཅེན་རྒྱན་གྱིས་བཀྲ་བར་བྱེད། །དེ་ལྟར་ཚིག་གི་འཕྲེང་བའི་གཙུག་ཕུད་ཅན། །བརྗོད་དོན་རྒྱན་གྱི་མདོངས་མཐའ་ལེགས་ངོམ་ཞིང་། །ལྷ་རྫས་དར་གྱི་ཤོག་རླབས་རབ་བསྐྱོད་ནས། །དབང་པོའི་ཕྱོགས་ཀྱི་ལྷ་ལམ་ངོས་སུ་འཕུར། །ཆུ་མོ་ལུག་གི་ལོར་ངོས་སོག་པོའི་ཡུལ་ལ་འདེགས་མི་འདེགས་ཀྱི་འགྲོ་ལྡེང་བར་བརྟེན་རང་བཟོའི་གཏམ་སྣ་ཚོགས་སྒྲོག་པ་ན་ཟུར་ཆེན་དཔལ་རྡོ་རྗེ་འཛིན་པ་དཔལ་ལྡན་བླ་མ་ཆོས་དབྱིངས་རང་གྲོལ་གྱིས་དབུས་འགྱུར་འཆང་འདིར་སྟན་ཆགས་དགོས་པའི་སྙན་ཚིག་གི་འཕྲེང་བ་སྤེལ་བའི་ལན་ངེས་པ་དོན་གྱི་གཏམ། རབ་དང་ཀླུང་ཆེན་བཅུད་ཀྱི་སྙིང་པོའི་དཔྱིད། །དྲི་མེད་མདངས་ལྡན་མཚོར་ཤར་ཨཽ་ཌི་ཡའི། །འདབ་སྟོང་ཟེའུ་འབྲུ་དབུས་ན་སྤྲུལ་པའི་གར། །རྣམ་རོལ་འཆི་མེད་གྲུབ་པས་འགྲོ་འདི་སྐྱོངས། །ལེགས་བྲིས་བདུད་རྩིའི་ཡང་ཞུན་མ་བསྡུས་ཤིང་། །དབྱངས་བདུན་རྫོགས་པའི་གླུ་མིན་འདྲེན་བྱེད་དང་། །རྣ་བའི་དཔལ་དུ་སྤྱོད་པའི་ཟབ་མོའི་གཏེར། །མི་ཟད་ཆོས་ཀྱི་རིང་ལུགས་འཛིན་པ་ཡི། །འཕྲིན་ཡིག་དབྱངས་ཅན་འཕང་འགྲོའི་རྒྱུད་མང་ལས། །ཉེ་བར་དྲངས་པའི་ཚིག་འཕྲེང་དནྜཱིའི་ལུགས། །འགྱུར་མེད་གཞོམ་དུ་མེད་པའི་(༢༨ན)
རྡོ་རྗེའི་གླུ། །རྟེན་གྱི་ལང་ཚོ་རྟགས་ཀྱིས་བཀྲ་བ་འབྱོར། །སྣང་བཞིའི་ལམ་བཟང་རང་སེམས་གདོད་མའི་ཞལ། །ལྷུག་པར་སྟོན་པའི་ཨ་ཏིར་མི་གཡོ་ཞིང་། ཁྲག་འཐུང་དཔལ་ཆེན་ཁྲོ་བོའི་དབང་པོ་ཡི། །རྡོ་རྗེའི་ཟེགས་མ་འཕྲོ་བའི་ཏིང་འཛིན་གྱིས། །གླགས་ལྟའི་བསམ་སྦྱོར་འཆང་བའི་བདུད་སྡེའི་སྤྲིན། །གསང་བ་ཟབ་མོའི་རིག་སྔགས་འཐོར་རླུང་གིས། །རྒྱ་མཚོའི་ཕ་མཐར་བསྐྲད་གྱུར་སྙན་པའི་སྒྲ །ཐོས་འཛིན་གསོས་སུ་གྱུར་པས་སྤྲོ་བ་འཕེལ། །འདིར་ཡང་ཉི་འོག་དབུས་འགྱུར་ལྟེ་བ་རུ། །ནམ་ཡང་མི་འགྱུར་བརྟན་པའི་ཐབས་ཀྱི་སྒོ །བོད་སྐྱོང་རྡོ་རྗེ་འབར་རྩལ་གང་དེ་ལ། །ལན་ཅིག་མིན་པར་གཉེར་དུ་གཏོད་སྙམ་གྲང་། །དགེ་མཚན་རྒྱ་མཚོའི་ཡུལ་ལྗོངས་བསིལ་བའི་བཞི། །མཐོ་རིས་ཡོན་ཏན་མ་ལུས་འབྱོར་པའི་གནས། །ཚུལ་འདིར་མི་འགྱུར་ཞིང་སྐྱེས་བཅུ་གཉིས་ལ། །འཕྲིན་ལས་གཉེར་གཏད་དམ་པོས་བཅིང་བར་འཚལ། །གངས་རིའི་འོད་ལ་འགྲན་པའི་ཐགས་ཀྱི་དར། །ཙཱི་ཎའི་སྒེག་མོའི་སོར་རྩེ་ལས་གྲུབ་པ། །པད་རག་ལང་ཚོའི་མདངས་ཀྱི་རྒྱས་བཏབ་སྟེ། །གྲུ་འཛིན་རི་བོའི་གཞལ་མེད་ཁང་ནས་བྲིས། །ས་ཡོས་སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་གྱིས་སྒྲ་ཊིཀ་ནག་པོ་འགྲོ་ཤེས་གླེགས་བམ་གཡར་པོ་དང་བཅས་ཚིགས་བཅད་ཀྱི་ཆབ་ཤོག་གི་ལན་གཞོན་ནུའི་གླུ། དཔལ་ལྡན་ཕུལ་བྱུང་རིགས་ཀྱི་ཐིག་ལེ་ནོར་འཛིན་མཆོག་ཏུ་རབ་ཡངས་པར། །རྣམ་དཔྱོད་མཁྱེན་པའི་ཆུ་གཏེར་གྱིས་བསྐྲུན་སྡེ་སྣོད་གཞུང་གི་སྡོང་བུ་ལ། །སྒྲ་ཚད་རྗེས་འཛིན་འདབ་མས་ལེགས་སྤུད་མངོན་པར་རྟོགས་པའི་འབྲས་ལྡན་པ། །མཁས་གྲུབ་རྐང་འཐུང་གཙུག་རྒྱན་རྗེ་བཙུན་དཔག་བསམ་ལྗོན་པ་གང་དེའི་དྲུང་། །དེང་དུས་རྣམ་དཀར་ལེགས་སྤྱོད་ས་འཛིན་(༢༨བ)
དབང་། །རླབས་ཆེན་སྨོན་ལམ་ལེགས་བྲིས་སྟོབས་ཀྱི་སྒོའི། །འཚམས་སྦྱོར་སྒྱུ་རྩལ་འཕྲུལ་གྱིས་བསྲུབས་པ་ལས། ཁྱིམ་ཟླའི་གྲངས་ལྡན་རྒྱན་གྱི་གཟི་འོད་ཅན། །གཟུགས་སྐུ་བཅུ་གཉིས་བདག་པོའི་དཀྱིལ་འཁོར་གང་། །གཞན་ཕན་དགོངས་བཟང་མདོག་ལྔས་རབ་དྲངས་ཏེ། །གངས་ཅན་གྲུབ་དབང་རྡོ་རྗེ་རྒྱལ་པོ་ཞེས། །ཟབ་ལམ་ངེས་དོན་ཡིད་བཞིན་ནོར་བུ་མཆོག །དཔལ་སྟུག་བསྟན་པའི་རྒྱལ་མཚན་རྩེར་འགོད་པ། །གང་དེ་བཀའ་རྒྱུད་སྐབས་གསུམ་རྫིང་རིང་ངོས། །ལུས་ཅན་བསོད་ནམས་དབང་ཕྱོགས་གྱེན་འཕྱུར་སྤོར། །མི་མཐུན་ཆུ་འཛིན་དང་བྲལ་མངོན་ཤར་བས། །རྣམ་དག་གསང་གསུམ་མི་ཟད་ཚ་ཟེར་གྱིས། །སྐལ་ལྡན་ར་ཡིག་གཉིས་པའི་ཚོགས་རྣམས་ཀུན། །ལེགས་བཤད་པུཎྜ་རི་ཀའི་བདུད་རྩིའི་རོས། །མངོན་པར་མྱོས་པའི་དགའ་སྟོན་རྒྱས་པ་ནས། །རི་མོ་གསུམ་པའི་བི་ཤྭ་ཀརྨྨ་ཡི། །བཅུད་ཀྱི་མ་མའི་སྙིམ་པའི་འདུ་བྱེད་ལ། །སྟོན་མེད་ལུགས་ཟུང་བསླབ་བྱ་རིན་ཅེན་ཕྲེང་། །སྙན་ངག་ཚིག་གི་སྲད་བུ་ལ་བརྒྱུས་པའི། །བཀའ་ཤོག་ཤར་ཕྱོགས་རྒྱལ་ཁབ་གན་མཛོད་དར། །རྒྱ་བོད་མཁས་རྣམས་འཇུག་པའི་སྒོ་གཅིག་པུ། །ལེགས་སྦྱར་གཞུང་གི་འགྲེལ་པའི་གླེགས་བམ་ཟུང་། །ཕྱག་རྟགས་ལང་ཚོ་གསར་ལྡན་མངོན་ཕེབས་ཚེ། །ཀུན་མཁྱེན་ཉི་མའི་གཉེན་གྱི་རྗེས་བཞུགས་པའི། །གནས་ལྔར་མོས་བློ་འཛིན་པའི་སྙོམ་ལས་པ། །རབ་དགའི་ས་ལ་འགྲན་པའི་དགའ་བདེའི་དཔལ། །འཆི་མེད་སྐྱེད་ཚལ་གནས་སུ་སླེབ་ལྟར་གྱུར། །སླད་ནས་ཟབ་ཡངས་བློ་གྲོས་གངས་རི་ལས། །འདོར་མེད་ཐུགས་བརྩེའི་སྐལ་ལྡན་ཤིང་རྟ་ཡི། །བཀའ་གནང་ཕེབས་ཚོགས་རི་ཥིའི་ཐོས་འཛིན་རྒྱན། །འགོག་མེད་རྒྱུན་མི་འཆད་པའི་བཀའ་དྲིན་ཞུ། །འདི་ལྟའི་ཚིག་འཕྲེང་སྣང་བྱེད་བ་མ་རས། །(༢༩ན)
མངོན་པར་བཙའ་ཕྱིར་ས་འཛིན་དཀར་པོའི་མདངས། །འཕྲོག་བྱེད་ལྷ་རྫས་ཨུཏྤལ་ཟེའུ་འབྲུ་ལ། །རྟགས་ཀྱི་འདབ་མའི་རྒྱ་ཡིས་ལེགས་བཏབ་སྟེ། །འཕགས་པའི་ཡུལ་དུ་པྲ་མ་ཏིར་རྗོད་ཅིང་། །ཕྱོགས་འདིར་མྱོས་ལྡན་ཞེས་པ་ས་ཡོས་ལོའི། །ཐོས་ལྡན་ཟླ་བ་གྲགས་པའི་དཀར་ཕྱོགས་ཀྱི། །དགའ་བ་གཉིས་པའི་ཚེས་ལ་ཕུལ་བ་དགེ ། བསྟན་འཛིན་ཆོས་ཀྱི་རྒྱལ་པོའི་མཆོད་གནས་དང་མདུན་ན་དོན་ཟུང་དུ་འཇུག་པ་གུ་ཤི་བླ་མ་ཤེས་རབ་རྒྱ་མཚོ་ལ་སྤྲིངས་པ་རྒྱ་མཚོའི་ཟླ་བ། སཱུ རླཱ མི དྒ སྟྲི ལ ནྟཾ པྲ སི ཏ ཡུ བ ན ཡ ཏྤ ཪྻ ཏཱ ཡེ ན ལ ཀྵཾ། །བཻ ཌཱུ ཪྻ ཀཱ ལི ཀ ཤྲཱི ཏི མ ན གར མ ཏི༔ ཏྱ ཀྟ ཙཱ ལི ཀྱ སེ ཝ། རྟ་(འཕྲེང་བ་འཛིན་པའི་སྡེབ་སྦྱོར།)ལྗང་དབང་པོ་འབུམ་གྱི་རི་དྭགས་མིག་ཅན་མས་འཁྱུད་རབ་དཀར་བཻ་ཌཱུར་རྡུལ་བརྩེགས་སྒྱུ་རྩལ་སྤྱོད། །གང་གི་ལང་ཚོའི་དཔལ་གྱིས་ཏི་མིའི་གྲོང་མཐར་བཏང་ཡང་སྟོབས་ལྡན་གྲོས་སུ་བསྟེན་ལ་རིངས་བྱེད་པ། །(༢༩བ)
ཤྲཱི ལྱཱ གཱི ཊ དྷཻ ན ཝཱ ཥྚཱ ས ཁི ཏ ཝ ད ཡ ཝཱ ཀྐ རྞ ཀཱ ཡ ཙྪ ཙ ནྡྲ། །མཱུ རྒཱ གཱ ཧི ཏྱ ཏྟཱ ཕུ ཥ ཀུ རུ སི ཏ ཙཱ མ ཏྱ ཨུ ཏྤ ལྱ གྷོ ཥཱི། །ཕུན་ཚོགས་ངག་གི་འདོད་འཇོ་མ་ལུས་ངག་ལ་རབ་སྩོལ་རྣ་བ་བརྒྱད་པའི་སྲས་མོ་མཚོ་བྱུང་མ། ཁྱོད་ཀྱི་ཐུགས་རྗེའི་བསིལ་སྦྱིན་མཁན་པོས་རྨོངས་མུན་ཆོམས་ལ་བློ་གྲོས་ཨུཏྤལ་དཀར་པོ་རྒྱས་པར་མཛོད། །བཀྲ་ཤིས་ཟླ་བའི་ཞགས་པས་རབ་བཅིངས་པའི། །ཕུན་ཚོགས་མངོན་མཐོའི་ལུས་རྟེན་ཡོངས་འདུའི་ཤིང་། །རྣམ་དཀར་བྱ་བའི་གང་བུར་མངོན་པར་རྒྱས། །མང་ཐོས་གཏམ་གྱི་ཉལ་འགྲོར་ལེགས་སྤྱོད་ཅིང་། །ཕུལ་བྱུང་བསོད་ནམས་མེ་ཞལ་འཁྲུལ་འཁོར་ལས། །གྲངས་མེད་རྒྱལ་ཕྲན་ན་ཀྲའི་གྲོང་ཁྱེར་དབུས། །གནམ་བསྐོས་སྟོབས་ཀྱི་དབང་ཕྱུག་བཅུ་གཉིས་བདག །ཡངས་པའི་དབྱིག་འཛིན་ཀུན་གསལ་ལས་འོངས་པའི། །འཇིགས་མེད་བཟང་པོའི་ལུང་གི་འོད་རྣོན་གྱིས། །ཕན་དང་བདེ་བའི་འདབ་སྟོང་མ་ལུས་པ། །(༣༠ན)
ཅིག་ཅར་བཞད་པའི་ས་འདིའི་མིག་སྟོང་ཅན། །བགྲོད་བྱེད་ཟུང་གིས་ཕྱི་བཞིན་སྙེག་པའི་ངང་། །སྙིམ་པའི་གར་མཁན་ཤིང་གི་མ་མའི་ངོས། །ཟློས་གར་སྒྱུར་བའི་རྣམ་བཀྲ་རི་མོའི་གཟུགས། །སྣང་བྱེད་ལས་གྱུར་ཚིག་གི་བྱ་མ་རྟ། །སྒྲ་འཛིན་ལམ་དུ་ཞུགས་པས་སྤྲོ་བ་འཕེལ། །ངོས་ཀྱང་བདེ་སྣང་ཡན་ལག་བརྒྱད་ལྡན་འགྲམ། །ཟིན་བྲལ་རྣམ་གཡེང་ཅ་ཅོའི་སྒྲར་སུན་ཏེ། །ཐེག་མཆོག་སྙིང་པོའི་དལ་འབབ་ལྟོ་བ་རུ། །མངོན་པར་འདྲེན་ལ་མོས་པ་མི་དམན་ཙམ། །གཉིས་སྐྱེས་རྒྱལ་པོའི་འོད་ཀྱིས་ཀུནྡའི་ཚལ། །འཛུམ་ལ་གཞར་ཡང་འགོག་པ་མི་མངའ་ལྟར། །བགྱིད་འོས་གཏམ་གྱི་འཇུག་པ་མན་ཤེལ་ཕྲེང་། །འཕྲིན་ཡིག་ཚིག་གི་སྲད་བུར་རྒྱུ་བར་གྱིས། །དམར་ཕྱོགས་མེ་ཡིས་བཅིངས་པའི་རྫོགས་པ་ལ། །ཟླ་གཞོན་སྣང་གཏེར་སྒྲིབ་སྨྲ་རྫུན་པའི་གཏམ། །སྲ་བརྟན་སྲུང་བའི་འཁོར་ལོའི་འོད་ཀྱི་གཟི། །འབར་བ་བཟོད་མིན་ལྷུན་པོའི་ཕག་ཏུ་སོང་། །དེ་སྐད་ངག་གི་འདྲེན་བྱེད་བྷྲ་མ་ར། །དཀར་འཇམ་ཤོག་བུའི་སྐྱེད་ཚལ་མངོན་ཡངས་པར། །འཕུར་ལྡིང་རོལ་སླད་བདོག་པའི་པདྨ་དཀར། །རྟགས་ཀྱི་ལང་ཚོར་རྒྱས་བཏབ་ལི་ཁི་ཏམ། །བླང་དོར་ལ་ལྟ་བའི་མཁས་རློམ་གྱི་གུར་ཅན་ཅལ་སྒྲོག་ཙམ་གྱི་རྗེས་སུ་མི་འབྲང་བར་ཁལ་ཁ་ཨེ་ཏེ་ན་ཧོང་ཐའི་ཇིའི་འཕྲིན་ལན་གསེར་གྱི་མིག་ཐུར།(༣༠བ)
ཛྙཱ ནཾ ཛཱ ཏ ཧ སཾ ས མུ དྲ ཙ བིི ནཱ ཡ ཏྲཱ ཝ བྷ སྱཾ ཝ རཾ། །དྷ རྨྨཻ ཏ དྱ ཛི ཀ ཤྩ པ ཏྲ ཤ ཏ ཨཱ མེ གྷཾ སུ ཏི ཏྱ ཤྩ ཨཱ། །གུ ཧྱ ཏྭཾ སུ མ ཏིཾ ར སཱ རྱ བྷ ཡ ཨཱ སྭ ཪྱཾ མ དྷུ རྱ ག ཏཱ། ཨ བྷྱུ ནྣཾ ཛི བྷ ཙ བྷཱ མི ཀུ རུ པཱ ཀཱི རྟི༔ ཤུ བྷཻ ཏ ཪྻ ཧོ། །རྣམ་(སྡེབ་སྦྱོར་སྟག་རྣམ་རྩེན།)འདྲེན་གསང་གསུམ་ཟླ་འཕེལ་ལས་འཁྲུངས་ཡེ་ཤེས་མཆོག་གི་སྣང་བ་ཡིས། །འགྲོ་འདིའི་མོང་རྟུལ་སྔོ་བསངས་ལས་རྒྱལ་ཕན་བདེའི་འདབ་རྒྱ་ཅི་ཡང་འཛུམ། །ཕུལ་བྱུང་བློ་གྲོས་བཟང་པོའི་བཅུད་ཟའི་འཇིགས་མེད་ཆོས་ཀྱི་སྙན་པའི་སྒྲ། །གྲགས་པ་སྲིད་འདིར་མངོན་མཐོའི་རྒྱལ་པོས་ནོར་འཛིན་སྐྱོང་ཁྱོད་དགེ་བར་མཛོད། །ལེགས་པའི་ལམ་དུ་རིང་བསྐྲུན་དཔུང་པ་སྐྱེས། །མི་དམན་རྒྱལ་ཐབས་འཁོར་ལོའི་སུ་ཝརྞ། །འོད་སྲུང་བྱིན་འདིར་འགོག་མེད་རྒྱུ་བའི་སྟོབས། །མདོག་ལྔའི་བགྲོད་པའི་ཤུགས་ལ་སྐྱེངས་པ་སྟེར། །དབྱིག་གི་བློ་གྲོས་མེ་ཞལ་རྫིང་རིང་གོས། །གྱོན་པར་འཕྱང་མ་སྟེར་བའི་ཀླུང་ཆེན་འགྲམ། །དགེ་བཅུར་གྲུབ་པའི་གནས་ཆེན་ཡུལ་གྱི་ལྗོངས། །འདྲེན་བྱེད་དགའ་སྟོན་སྦྱོར་བ་བདུད་རྩིར་འཆེལ། །སྟོབས་བཅུ་མངའ་རྣམས་ལུས་ཅན་བསོད་ནམས་ཞིག །བླ་མེད་ཚར་དུ་དངར་ཕྱིར་བཤེས་གཉེན་གཟུགས། །དམ་པའི་བགྲོད་བྱེད་གཙུག་བསྟེན་བདེ་བ་དང་། །ཟབ་རྒྱས་གསུང་(༣༡ན)
བཅུད་རྒྱུད་མང་གླུ་ལ་འཁུ། །འཁྲུལ་མེད་བླང་དོར་ལྟ་བའི་མིག་སྟོང་དང་། །རླབས་ཆེན་དགེ་ཚོགས་གྲུབ་པའི་རྩེ་བརྒྱ་པས། །སྡིག་ལྟའི་དབྱིག་འཛིན་ཕུར་བུའི་རྐང་བཅག་ཚེ། །ལེགས་ལམ་ས་སྲུང་བུ་ཡི་སྟེང་ན་འགྱིང་། །གང་གི་སྤྲིང་ཡིག་རི་དྭགས་མིག་ཅན་མ། །སྣ་ཚོགས་ཚིག་གི་འཕྱང་འཕྲུལ་རབ་སྤུད་དེ། །དབྱངས་བདུན་རྒྱུད་ལ་ཅོ་འདྲིར་རྫུ་བ་ནས། །རྒྱ་ཡིས་སྨྲས་ཏེ་བཤུལ་ལམ་བདེ་བར་འབྱོར། །ཟ་ཧོར་རིགས་ཀྱི་ཤཱཀྱའི་དགེ་སྦྱོར་ཡང་། །ཉེར་ལེན་མ་ལ་ཡར་སྐྱེས་གཡུར་ཟ་ཞིང་། །འཆད་རྩོད་རྩོམ་པའི་ཡལ་འདབ་གཡོ་བ་ནས། །ཐེག་མཆོག་ངེས་དོན་དྲི་བསུང་མི་དམན་ཙམ། །ཚེ་རིང་གནམ་གྱི་རྒྱུད་འཛིན་དཔྱོད་ལྡན་དཔྱོད། །ཇི་སྙེད་ཤེས་བྱའི་ཀུན་གསལ་ཕ་མཐའི་ཚད། །བློ་གྲོས་ལུས་འདེགས་ཀྱིས་འཇལ་བསམ་པའི་ཁུར། །གསེར་ལྡན་ལྟོར་ཤོང་ཡངས་པའི་ཡོལ་གོ་མཚར། །ཤེས་བྱ་རིག་པའི་གནས་ཀུན་ལྟ་བའི་མིག །མིང་ཚིག་རྗོད་པ་སྨྲ་བའི་ལྕེ་ཡི་མཛོད། །ལེགས་བཤད་ཤ་མཆོག་བཻ་ཌཱུར་བརྡ་སྤྲོད་གཞུང་། །ཚུལ་འདིར་མོས་ལ་རྒོལ་བའི་ཀླན་ཀ་སུ། །ཐ་སྙད་གཙུག་ལག་མངོན་བཀྲའི་ཁང་བཟང་དབུས། །ལེགས་སྦྱར་གསེར་གྱི་ཁྲི་ལ་རྣམ་འགྱིང་བ། །སྐད་གཉིས་སྨྲ་བ་ཕུར་བུའི་བློ་ལྡན་དེར། །མི་དམན་བརྩོན་པའི་སྦྱངས་པའི་ཐབས་སུ་ཆེ། །སྣང་བྱེད་རབ་དཀར་འཁོར་ལོའི་ཡན་ལག་ཅན། །ཚིག་དོན་འདམ་སྐྱེས་འཕྲེང་སྤེལ་ཤང་ཤོང་ཆུར། །རབ་སྤྱོད་བྱེད་པོར་ས་བརྟན་རྡོ་རྗེའི་གཟུགས། །རྙོག་བྲལ་དང་དུ་ཤར་ལ་རྒྱས་བཏབ་སྟེ། །རལ་གྲིའི་སོ་ཅན་ཁྱིམ་དུ་སྣང་བའི་གཏེར། །ལེགས་གནས་མ་ཧཱ་ཙཱི་ཎའི་ཡུལ་གྲུ་རུ། །ཤི་དབྲི་ཡོལ་འབོད་ཚིམ་བྱེད་ཟླ་བ་ཡི། །དཀར་ཕྱོགས་རྒྱལ་བ་གསུམ་པའི་ཚེས་ལ་བྲིས། །(༣༡བ)
བཅོས་མིན་གྱི་ངེས་པར་འབྱུང་བའི་བློས་ཆོས་བརྒྱད་ཀྱི་མགོ་སྙོམས་པའི་གྲགས་པ་དོན་ལྡན་གྱི་གྲུབ་ཆེན་བཀའ་བཅུ་བག་དྲོ་ངག་དབང་ལྷུན་གྲུབ་ལ་སྤྲིངས་པ་དྲང་སྲོང་ཀུན་དུ་དགའ་བའི་ཟློས་གར། སྭསྟིཔྲཛབྷྱ༔ ལེགས་བྱས་དབྱར་སྐྱེས་ལང་ཚོའི་མངལ་གྱི་ཁུར། །ལྕི་བའི་དོན་གཉིས་འདབ་བརྒྱ་གེ་སར་ལས། །བདེ་ལེགས་སྦྲང་རྩི་འབུམ་དུ་འཛག་པ་ཡི། །གྲུབ་རིགས་གླུ་དབྱངས་རབ་སྒྲོག་རྐང་དྲུག་པའི། །འཕྲིན་ཡིག་སྲད་བུར་བརྒྱུས་པའི་གཏམ་གྱི་འཕྲེང་། །ལེགས་སྐྱེས་རྟེན་གྱི་གསེར་སྦྱངས་འཕྲ་བཀོད་པ། །རྟགས་ཀྱི་འོད་གཟིས་འཁྱུད་པའི་གཙུག་ཕུད་ཅན། །སྙིམ་པ་ནོར་འཛིན་ངོས་སུ་ཟློས་གར་སྒྱུར། །མི་ཁོམ་སྐྱོན་གྱིས་སྦགས་པའི་ར་རིའི་དྲི། །ལེགས་བྱས་ཉལ་འགྲོའི་རྒྱུན་གྱིས་རབ་བཀྲུས་པའི། །དལ་བའི་རྟེན་བཟང་ཉེར་འཚེ་དང་བྲལ་ཞིང་། །དོན་ལྡན་སྙིང་པོ་ལེན་ལ་སྤྲོ་དགའ་རྟས། །སྙན་དང་མི་སྙན་བདེ་སྡུག་བསྟོད་སྨད་སོགས། །ཆོས་བརྒྱད་བྱ་བའི་ངང་ཚུལ་རིང་དོར་ཏེ། །མངོན་པར་མཐོ་དང་ངེས་པར་ལེགས་པའི་ལམ། །ཕྱི་མའི་དོན་ཆེན་སྒྲུབ་པ་ལྷག་པར་གཅེས། །སྲིད་པའི་བདེ་བར་འགྱུར་བའི་སྡུག་བསྔལ་དང་། །དགྲ་གཉེན་གོ་ལྡོག་ནམ་འཆི་ངེས་པ་མེད། །ངན་སོང་སྡུག་བསྔལ་བཟོད་དཀའི་སྣང་ཚུལ་ལ། །བསམས་ཚེ་ཤེས་ལྡན་སུ་ཞིག་ཚེ་འདི་གཉེར། །སྲིད་འདིར་མངོན་མཐོ་ཚངས་དབང་འཁོར་ལོས་སྒྱུར། །འཇིག་རྟེན་སྣང་བའི་གཏེར་བྱེད་ཉི་ཟླ་ཡང་། །བྲན་གྱུར་མུན་པའི་རུམ་དུ་གནས་བྱེད་ན། །ཚེ་འདིའི་བདེ་བ་གློག་གི་གར་མཁན་བཞིན། །སྡུག་བསྔལ་གཡང་ལས་ཆེས་གྲོལ་ཞི་བདེའི་གདུགས། །རྨད་བྱུང་ཐར་པའི་རིན་ཅེན་ཡུ་བ་ཅན། །བསིལ་བའི་ངལ་གསོ་སྟེར་བའི་གྲིབ་བསིལ་ལ། །གནས་ཀྱང་དམན་པའི་ལམ་དུ་གོལ་གྱི་དོགས། །བརྒྱ་ཕྲག་དཀའ་བ་སྤྱད་དེ་ཕན་པའི་ཐབས། །ལན་གྲངས་མང་པོར་བསྒྲུབས་པའི་མར་གྱུར་འགྲོ །མཐའ་མེད་འཁོར་བའི་(༣༢ན)
མཚོ་ལས་ཡོངས་སྒྲོལ་བའི། །སྙིང་སྟོབས་ཁུར་ཆེན་འཁྱེར་བ་རྨད་བྱུང་ལམ། །ཐབས་ཤེས་འདབ་གཤོག་ཟུང་དུ་རབ་འབྲེལ་ཞིང་། །ཟབ་དོན་ཆོས་ཀྱི་དབྱངས་སྙན་ལེགས་སྒྲོག་པ། །བློ་ལྡན་འཁོར་ལོའི་ལག་དེའི་སྙན་པའི་གཏམ། །ཐོས་པས་མེ་ཏོག་ཕལ་ཆེར་འཛུམ་པ་འདྲ། །འབྲོམ་སྟོན་མར་མེ་སྐུ་མཆེད་གསུམ་ལ་སོགས། །སྔོན་བྱོན་དམ་པའི་རྣམ་ཐར་རི་དྭགས་གཟུགས། ཁྱོད་བློའི་ཟླ་གཞོན་ངོས་སུ་རྟག་བཀོད་ནས། །དེ་དོན་སྒྲུབ་པའི་འོད་དཀར་འགྱེད་པར་རིགས། །གཉེན་འདུན་མཛའ་བཤེས་རྣམ་གཡེང་རྒྱང་དུ་བསྲིངས། །དབེན་ཞིང་ཉམས་དགའ་དམ་པས་བྱིན་བརླབས་གནས། །ཉལ་འགྲོའི་ལྷུང་ལྷུང་སྒྲ་འབྱིན་སྤང་ལྗོངས་ངོགས། །བསམ་གཏན་སྒྲུབ་པའི་ལོ་མའི་ཁང་བུའི་ནང་། །དལ་བའི་རྟེན་ལ་སྙིང་པོ་ལེན་པའི་ཚེ། །ཞི་ལྷག་ཟུང་འབྲེལ་ཏིང་འཛིན་ལ་སྒོམས་པའི། །རྒྱས་སྲས་སྤྱོད་པའི་ཁུར་འཁྱེར་སྤོང་བ་པ། །དྲང་སྲོང་ཁྱོད་ཀྱི་སྣང་ཚུལ་འདི་རྨད་བྱུང་། །སྙིང་ནས་ཚེ་ཞབས་སྒྲུབ་པས་འདལ་བ་ལ། །འགྱུར་མེད་དམ་བཅའི་བསམ་པ་བརྟན་པོ་གང་། །འབད་མེད་ལག་རྩེར་གྱུར་པའི་དགེ་ལེགས་ཀུན། །མཆོག་གསུམ་དམ་པའི་མཐུ་ཡིས་འགྲུབ་གྱུར་ཅིག །དབྱངས་བདུན་རྒྱུད་ལས་འོངས་མིན་ཡང་། །བློ་གསལ་དགའ་བ་སྐྱེད་པའི་གཏམ། །སྲུང་མདུད་རྐང་འཐུང་ཕུར་མར་བཅས། །གྲུ་འཛིན་གཉིས་པའི་རྩེ་ནས་བྲིས། །
རབ་བྱུང་བཅུ་གཅིག་པའི་མེ་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག །ཁམས་གསུམ་འགྲོ་བའི་བླ་མ་བཙོང་ཁ་པ་ཆེན་པོ་མིའི་སྲིད་པ་འཛིན་པའི་ཚུལ་བསྟན་པའི་ས་སྐུ་འབུམ་བྱམས་པ་གླིང་གི་མཆོད་སྡོང་ལ་ཁར་ཁ་ཨེ་ར་ཏེ་(༣༢བ)
ཧོང་ཐའི་ཇིས་དངུལ་སྲང་ཁྲི་ཕྲག་ཏུ་ཉེ་བ་ཙམ་གྱིས་སྲི་ཞུ་བྱེད་སྐབས་རྒྱུ་མཚན་འཕྲིན་ཡིག་ཏུ་བསྲིངས་པའི་ལན་བསོད་ནམས་གསེར་གྱི་འཁོན་ལོའི་གཟི་འོད། རཱ གོ ྅ར ནུ ནི རྟཱི ཏུ ཨ སཾ ཁྱ ཛཱ གི ཀེ དྷཱི གྷནྡི ཀོ ཧཱ མྲྀ དུ ནཱ། ཧཱ ཤ ཋཾ། །ཝ རྟེ རྐ རཾ ཧཱ རུ ཙི རེ ཏ བྷཱ ཝི ཀ ཤྲཱིཏྭཾ སུ ཀིི རྟཱི རྦྷ ག ས རྦྦ ཨུ ཏྟ ར། །གྲངས་(སྡེབ་སྦྱོར་དབང་པོའི་རྒྱུད།)མེད་སྐྱེ་རྒུར་རྗེས་ཆགས་གར་མཁན་མ། །འཇམ་མགོན་གཉིས་སྐྱེས་ཟོལ་ཅན་བློ་ཡི་དཔྱིད། །སྲིད་འདི་སྐལ་པ་བཟང་པོར་སྒྱུར་བྱེད་པ། །གྲགས་པའི་དཔལ་ཁྱོད་ཀུན་གྱི་བླ་ན་མཛེས། །(༣༣ན)
ཙ ཏུ ས ན ཧི ཀོ ཥ ཤྩཱ ཤུ ར། ཏི ཤ བུ ཎྱ ཏུ། །ཛ མྦཱུ དྭཾ བ བྷཱ བི ཀ ཀྲྀ སུ ཎེ ཀ རྞ ཁ ནཱ ཡ ཙ། །ཕུལ་(སྡེབ་སྦྱོར་ཁ་སྒོ་ཕན་པ།)དུ་བྱུང་བའི་སྡེ་བཞིའི་མཛོད། །ལེགས་ལམ་དྲི་བཞོན་ཤིང་རྟ་ཡིས། །འཛམ་གླིང་ཀུན་གསལ་ལ་འདྲེན་པའི། །བྱེད་པོ་ས་སྤྱོད་རྣ་བ་གློགས། །ཀུན་གསལ་ཞགས་པས་བཅིངས་པ་སྲིད་པའི་སྣོད། །ཡིད་བཞིན་ནོར་གྱིས་ཕྱུར་བུར་གཏམས་པའི་ཟོང་། །གྲངས་མེད་ཚོགས་ཀྱིས་ཆ་ཙམ་བསྐྲུན་མིན་པའི། །མངོན་མཐོའི་རྟེན་གྱི་ཡོངས་འདུ་ས་བརྟོལ་དབང་། །གྲང་རེག་ཚུན་རོལ་ཕྲག་ལ་རིང་བརྒལ་ཞིང་། །མངའ་ཐང་འབྱོར་པའི་སྐྱེད་ཚལ་ཡངས་པ་ན། །རྒྱལ་བསྟན་གྱེན་དུ་འདེགས་པའི་མངར་བའི་དྲིས། །གང་ཚེ་ཡངས་པའི་ས་ཡང་དོག་སྙམ་བྱེད། །བརྒྱུད་པའི་ཉལ་འགྲོའི་རྒྱུན་ལས་སྒྲོལ་བྱེད་པའི། །རྗོད་ཚིག་རི་མོར་ཤར་བའི་རྟགས་གསུམ་པ། །བདོག་པའི་སྐྱེས་ཀྱི་(༣༣བ)
བ་དན་ཤུགས་འགྲོར་བཅས། །སྙིམ་པའི་ཡུལ་གྲུར་སོན་ཚེ་སྤྲོ་བ་འཕེལ། །རྣམ་འདྲེན་གསང་འབུམ་དམར་སེར་དྷཱི་ཡི་གཟུགས། །ཐབས་ཤེས་འོད་ཀྱི་ཤིང་རྟས་བཞུ་བའི་བཅུད། ཁ་སྦྱོར་བདུན་གྱི་གྲུབ་པའི་འཆི་མེད་ལམ། །ཀླུབས་བྱེད་རྒྱལ་བའི་ཏོག་གྱུར་བཙོང་ཁ་པ། །ནོར་འཛིན་བུ་མོ་འདོད་པའི་ལོངས་སྤྱོད་ཀྱིས། །ལྕི་བའི་ཁུར་གྱིས་དུད་པར་དམན་བློའི་ངོར། །མཛད་པའི་རྟགས་ཀྱིས་བཀྲ་བའི་མཆོད་སྡོང་ཆེ། །བླ་ལྷག་སྲི་ཞུར་བསྐྲུན་པའི་ལེགས་བྱས་ཀྱི། །ཕུང་པོ་མཁའ་ལ་འཕགས་པ་སུ་ཝརྞའི། །འཁོར་ལོ་རྣམ་པར་སྒྱུར་བའི་གཟི་འོད་ཀྱིས། །རྩོད་པའི་དུས་ཀྱི་རྒོལ་བ་ཆེར་སྐྲག་ནས། །རྫོགས་ལྡན་གསར་པའི་ཡོལ་བ་རིང་དུ་བརྐྱང་། །དེ་ཕྱིར་རྣ་བ་བརྒྱད་པའི་མགྲིན་སྔོན་ཅན། །འཁོར་བའི་དགྲ་བོ་གྲགས་པའི་མུ་ཁྱུད་རྣམས། །སྲིད་འབྱོར་ཁྱོད་ཀྱིས་རང་གི་བྱེད་སྙམ་པའི། །འཕྱང་མོའི་དྲ་བར་ཚུད་འདི་ཨེ་མ་མཚར། །ཐུགས་རྗེའི་མཐའ་བྲལ་དངོས་གྲུབ་རིན་ཅེན་གཏེར། །འབྱུང་གནས་འཇམ་དཔལ་སྙིང་པོའི་བསྟན་པའི་མཚོར། །ཐབས་མཁས་ཚུལ་གྱིས་དགེ་བའི་བཻ་ཌཱུརྱ། །ཡིད་ཀྱི་རྒྱལ་མཚན་རྩེ་མོར་རྟག་མཆོད་ཅིག །འཕྲིན་ཡིག་དར་གྱི་སྲད་བུ་ལ། །བརྒྱུས་པའི་རྟེན་གྱི་མཀྟི་ཀ །རྟགས་ཀྱི་འོད་དཀར་སྤྲོ་བཞིན་དུ། །གནོད་སྦྱིན་ཕྱོགས་གྱི་ལམ་ཡངས་པོར། །ཡལ་གའི་རི་དྭགས་མར་གད་ཀྱི། །སྟོད་གཡོགས་གྱོན་པའི་དག་བྱེད་ཟླའི། །དཀར་ཕྱོགས་རྒྱལ་བ་དང་པོ་ལ། །མཐོ་རིས་གྲོང་ཁྱེར་སྟག་རྩེར་བྲིས། །སློབ་དཔོན་སྨོན་འགྲོ་པཎ་ཆེན་འཇམ་དབྱངས་དབང་རྒྱལ་རྡོ་རྗེའི་འཕྲིན་ལས་དབྱངས་ཅན་མགྲིན་པར་ཞུགས་ལ་བསྔགས་པའི་གཏམ། (༣༤ན)
ཨུ ཏྟ མ སྱ མ ཏྱཱ ཀ ཥཱ ཏྶུ བྷ ཥ ཤྩ སུ ཪྻེ ཎ ཧཱ། །པ ཉྩ སྠིར པ དྨ ཤུ ཀླ པུ ཥྚོ ཤ ཏི ཤ ༔ པ ཊྭི ནྡྲ ཡ སྟ། །བློ་(ཁ་སྒོ་བཟློག་པའི་ཕན་པ།)གྲོས་ལྡན་པའི་གཟུགས་ཅན། མཆོག་གི་ཀུན་གསལ་ལས། །ལེགས་བཤད་ནམ་མཁའི་ནོར་བུ་ཡིས། །གནས་ལྔའི་པད་དཀར་རྒྱས་བྱེད་པའི། །ཕུལ་བྱུང་མཁས་དབང་གང་དེ་ཡི། །མགྲིན་མཐའ་དག་གཟུགས་ཅན། པའི་རྒྱུད་ལས་འོངས་པ་སྙན་ཚིག་གི །ཉམས་འགྱུར་སྟོང་གི་དབྱངས་ལྡན་འཕྲིན་ཡིག་མ། །སྟོན་འཁུན་དར་གྱི་གོས་རྒྱན་གཡོ་བཞིན་དུ། །སུག་པའི་ནོར་འཛིན་ངོས་སུ་ཟློས་གར་སྒྱུར། །གང་མཐུ་ཕུན་ཚོགས་ཀྱི་ཟོལ་བསྟོད། གིས་འཕགས་ཡུལ་མཁས་མང་སྐྱོངས་བྱེད་པའི། །ཕུལ་བྱུང་ཚིག་སྦྱོར་སྤེལ་ལ་མཚར་དུ་ཅི། །མི་ཟད་དབྱངས་ཅན་གང་གི་དངོས་གྲུབ་དེ། ཁྱོད་ཀྱི་མགྲིན་པའི་སྐལ་བར་ཐོབ་མིན་ནམ། །ལྕུག་ཕྲན་ཕུལ་བྱུང་། གཞོན་ནུའི་ཕོན་པོ་ལྟར་མཉེན་པ། །ལྕང་ལོའི་(༣༤བ)
འཕྲེང་བ་རབ་འཛིན་གནས་ལྔའི་གཞུ། །འགུགས་བྱེད་སྔ་ན་མེད་པའི་རྣམ་དཔྱོད་འདིས། །ཆོས་རྒྱལ་དགེ་དབང་སྙེམས་པའི་ངལ་བ་བཏང་། །བླང་ཕུལ་བྱུང་དང་སྒེག་པའི་ཉམས་འདྲེས་པ། དོར་ལྟར་ལྡོངས་ངན་ལས་བྱ་གཞག་གིས། །བྲེལ་བའི་བོད་བླུན་རང་གི་ངང་ཚུལ་རྣམས། །སྟོན་ཀྱང་རྒྱ་བལ་ཡུལ་གྱི་བློ་ལྡན་ཀུན། ཁྱོད་ཀྱི་སྙན་པའི་གྲགས་པ་སྒྲོག་ལ་བྲེལ། །ལེགས་མཐའ་དག་གཟུགས་ཅན། བྱས་ཟླ་བའི་མ་མ་ལས་འོངས་པ། །རྨད་བྱུང་ཉེ་བར་ལེན་པའི་ཆུ་ཤེལ་དབང་། །ཉེར་འཚེ་ནམ་མཁའི་གླང་པོ་ལས་རྒྱལ་བའི། །གཏམ་འདི་དཔྱོད་ལྡན་ཡོངས་ཀྱི་རྣ་བར་འཇེབས། །འཆི་ཤིས་བརྗོད། བའི་དངོས་ཀུན་འཇོམས་པའི་ཡེ་ཤེས་ཀྱི། །བདུད་རྩིའི་ལང་ཚོ་རྒྱས་པའི་མགོན་པོ་ཡིས། །གངས་ཁྲོད་གནས་ལྔ་རིག་ཁྱོད་ཇི་སྲིད་བར། །འགྱུར་མེད་གཡུང་དྲུང་ལ་གནས་ཤིས་པ་སྩོལ། །སླད་ལྡན་པའི་གཟུགས་ཅན་ལ་དངོས་དཔེ་འདྲེས་པ། མར་འོས་པའི་གཏམ་གྱི་ནོར་བུའི་འཕྲེང་། །འཕྲིན་ཡིག་སྲད་བུར་བརྒྱུས་པ་སྙིམ་པ་ཡིས། །ཐོགས་ཏེ་ངལ་མེད་རྒྱུ་བའི་བྱ་མ་རྟ། །ཀུན་ཕན་བགྲོད་པའི་རྒྱུན་ལྟར་མི་བསྐྱུད་འཚལ། །ཐགས་ལྡན་པའི་གཟུགས་ཅན། ཀྱི་ལང་ཚོ་བདོ་བའི་གཞོན་ནུ་མ། །རྒྱ་ཡི་ལུས་ཕྲས་མི་ཕྱེད་དམ་འཁྱུད་དེ། །ལེགས་ལྡན་མགྲིན་སྔོན་གཙུག་ལག་དགོངས་དོན་གྱི། །དམར་ཕྱོགས་ཨེ་ཡིག་འཆར་བའི་ཚེས་ལ་བྲིས། །གོང་མ་ཏ་མིང་གི་རྒྱལ་ས་འཛིན་པའི་ཐ་མ་ཁྲུང་གྱིང་གི་རྒྱལ་ས་ལེའུ་ཙིས་ཕྲོགས་ཏེ་སྙིགས་མ་ལས་ཀྱང་ཆེས་ཆེར་སྙིགས་པའི་མུན་པའི་སྨག་རུམ་ཅུང་ཟད་བདོ་བ་ན་ཇུར་ཇིད་བོག་དོའི་སྲས་གནམ་གྱི་ལྷ་ཧོང་དི་རྒྱལ་པོའི་བསོད་ནམས་ཉི་མའི་གཞི་བྱིན་འོད་དུ་འབར་ཏེ་འཇམ་དབྱངས་གོང་མའི་ཁྲིར་ཕེབས་ནས་ལོ་བཞི་ལོན་པ་མེ་མོ་ཕག་གི་ལོ་ཁཱ་བླ་མ་སོགས་གསེར་ཡིག་པ་སྐྱ་སེར་མང་པོ་མངགས་ཏེ་དར་ཟབ་རིན་པོ་ཆེ་རྔམས་ཆེབ་དུ་མའི་(༣༥ན)
གནང་སྦྱིན་དང་བཅས་བཀའ་ཤོག་བྱུང་བའི་ལན་རྫོགས་ལྡན་ཐོག་མར་ངོམ་པས་རང་ཞལ། པུ ཎྱཱ སཱ ག ར མ ཧྱཱ ར ཐྱཱ དེ ནྟ ན ཡ དཱི། ཝ རྱཱ ཀཱ །བྲཱ ཧྨ ཎ བྷཽ མི ཀ མ ཉྫ མྲྀ དུ པཱུ རྦྦ ར ནྱ ཡ ཧ རྒཱུ པི། །ལེགས་(ཛྭ་ཏིའི་སྡེབ་སྦྱོར་འཕགས་མ།)བྱས་རྒྱ་མཚོའི་ཤིང་རྟ་ཆེན་པོ་ཡིས། །རྫོགས་ལྡན་ཀུན་དགའ་རིང་ནས་འདྲེན་བྱེད་པར། །ནོར་འཛིན་དབང་པོར་སྤྱོད་པའི་ཚངས་པ་ཆེ། །འཇམ་དབྱངས་གོང་མ་རྒྱལ་པོ་གང་དེའི་དྲུང་། །རྨད་བྱུང་མཛད་པ་མཆོག་གི་ཉིན་བྱེད་འོད། །སྣང་བའི་སྒོ་འཕར་བརྒྱ་ཕྲག་ཕྱེ་བའི་གཟིས། །ཡིད་ཀྱི་པད་དཀར་འདབ་སྟོང་ཆེར་བཞད་པས། །ཉམས་འགྱུར་རྐང་དྲུག་དབྱངས་ལྡན་འདི་སྐད་ལོ། །འཆི་མེད་ལྡིང་ཁང་ནོར་བུའི་ཐེམ་སྐས་ལས། །ཟུར་ཕུད་ལྔ་པ་འགྲོ་བའི་དཔུང་(༣༥བ)
གཉེན་དུ། །བསམས་བཞིན་འཁོར་ལོས་སྒྱུར་བ་སྲིད་བཟུང་བའི། །ཕུལ་བྱུང་གཟུགས་སྐུ་མཚན་དཔེའི་འབྲས་ཀུན་སྨིན། །རྒྱུད་མང་གླུ་ལས་ལུགས་ཟུང་འབྱེད་པའི་སྒྲ །དབྱངས་བདུན་མགྲིན་པར་ཁུགས་པ་ཚངས་པའི་གསུང་། །སྐྱེ་རྒུའི་སྒྲ་འཛིན་བདེ་བར་ངལ་གསོ་བའི། །སྐལ་བཟང་འདི་ཡིས་རྩོད་དུས་ཕ་མཐར་བསྐྲད། །བརྟན་གཡོའི་ཆོས་ཀྱི་ངང་ཚུལ་ཕྲ་རབ་རྡུལ། །མཁྱེན་པས་ཅིག་ཅར་གཞལ་བའི་རྣམ་དཔྱོད་ཅན། །ཟབ་གསལ་ཆེས་བརླིང་གང་ཐུགས་ཨཱ་དརྴར། །མི་འཆར་ཤེས་བྱའི་སྣང་བརྙན་སུ་ཞིག་མཆིས། །སྙིང་རྗེ་སྨོན་ལམ་རླུང་ཤུགས་ཀྱིས་དྲངས་པའི། །རྡོ་རྗེའི་རང་བཞིན་གཟུགས་སྐུ་བསིལ་སྦྱིན་མཁན། །ཉེས་བརྒྱའི་ཆུ་འཛིན་ལས་བརྒལ་སྡེ་བཞི་ཡི། །འོད་དཀར་འགྱེད་པའི་གཏམ་གྱི་དབྱར་རྔ་དང་། །ལྷན་ཅིག་བཀའ་ཐམ་འབྲུག་སྒྲ་མངལ་འཛིན་ཅན། །མཁོ་རྒུའི་འབྱོར་པའི་སྒྲོ་གཤོག་རྣམ་བཀྲ་བ། །གསེར་ཡིག་དབྱར་གྱི་རྒྱལ་མོའི་ལག་པད་ཀྱིས། །ཐོགས་ཏེ་སུག་པར་སོན་པས་སྤྲོ་བ་འཕེལ། །ཀུན་ལ་སྨན་མཛད་ཟས་གཙང་སྲས་པོ་ཡི། །དྲི་མེད་རིང་ལུགས་འཛིན་པར་ཁས་འཆེ་བ། །སྡོམ་བརྩོན་ཀློག་པ་མཁན་ཡང་རིས་བྲལ་གྱི། །འགྲོ་ལ་ལྷག་པའི་བསམ་པ་དཀར་བར་མཆིས། །ཨེ་མ་འཛམ་གླིང་ཡངས་པའི་ཁོར་ཡུག་ནང་། །བསོད་ནམས་གསེར་གྱི་འཁོར་ལོས་དབང་སྒྱུར་བས། །ཕྱོགས་ལས་རྣམ་པར་རྒྱལ་བའི་དཔལ་མངའ་བ། །འཇིག་རྟེན་བྱེད་པོའི་འགྲན་ཟླར་ད་གདོད་ཁུམས། །མི་བསྲུན་དྲེགས་ལྡན་སྐྱེ་བོ་མདའ་ལྔ་པ། །གང་གི་དཔའ་མཛངས་མེ་ཡི་བསྲེགས་པ་ན། །ཀུན་ལས་མངོན་པར་མཐོ་བའི་མགྲིན་སྔོན་ཅན། །བྱེད་པོས་གླིང་འདིར་མི་ཡི་གཟུགས་སུ་བྱས། །བརྩེ་ལྡན་བྱམས་པ་མཆོག་གི་གན་མཛོད་ལས། །ཕན་དང་བདེ་བའི་ཡིད་བཞིན་ནོར་བུའི་(༣༦ན)
གཏེར། །རིས་མེད་ལུས་ཅན་ཀུན་ལ་སྩལ་བ་ཡིས། །ཕྱག་ན་པདྨའི་ངང་ཚུལ་འཛིན་ནམ་སྙམ། །བླང་དང་དོར་བྱའི་ཀ་ཤི་གསར་པའི་རས། །མཁྱེན་དཔྱོད་པིར་གྱིས་རི་མོར་བྲིས་པའི་གཟུགས། །མ་འདྲེས་རྣམ་པར་བཀྲ་བའི་ངོ་མཚར་གྱིས། །འཇམ་དཔལ་དབྱངས་དང་སོ་སོར་གང་གིས་དབྱེ། །ནག་པོར་སྤྱོད་པའི་རྩ་ལག་མུན་པའི་དཔུང་། །ཕ་མཐར་སྐྲོད་ལ་འབད་མེད་ལྷུན་གྲུབ་པ། །ཕུན་ཚོགས་ནུས་པའི་དབང་ཕྱུག་འོད་བརྒྱ་པས། །གསང་བའི་བདག་པོ་རང་གི་དཔེ་ཟླར་བྱས། །ཉེ་རིང་དང་བྲལ་མཆོག་དམན་མཐའ་དག་ལ། །སྙོམས་པར་བསྟར་བའི་བཀའ་ཁྲིམས་འཛམ་བུའི་གསེར། །གཉའ་ཤིང་འཛིན་རི་ལྟ་བུར་ཆེས་ལྕི་བས། །མང་པོས་བཀུར་བའི་རྣམ་ཐར་འཛིན་པ་བཞིན། །འཛམ་གླིང་སྐྱེ་རྒུ་བདེ་བའི་གྲིབ་བསིལ་གནས། །དཔག་བསམ་ཡོངས་འདུའི་དབང་པོ་ཁྱོད་ཉིད་དུ། །ངེས་ཕྱིར་ཆོས་སྲིད་མཛད་པ་མ་ལུས་པ། །སྔར་བཞིན་ཡར་ལྡན་འཕེལ་བར་བསྐུལ་ཕྱིར་གསོལ། །འཛམ་གླིང་བསོད་ནམས་ཟོང་གིས་ཆེར་བསྐྲུན་པའི། །དཔལ་ལྡན་མི་ཡི་དབང་པོ་ཡིད་བཞིན་ནོར། །ཕན་བདེ་ལེགས་ཚོགས་ཀུན་གྱི་འབྱུང་གནས་ཁྱོད། །བསྐལ་བརྒྱར་མི་འགྱུར་ཞབས་པད་བརྟན་གྱུར་ཅིག །གང་གི་སྤྱན་རས་བྷྲ་མ་ར། །གཟིགས་རྟེན་སྔགས་མདུད་པད་དཀར་ཚལ། །རྟེན་འདམ་ཀུན་འདུས་ཟེའུ་འབྲུ། །རྒྱལ་བའི་སྐུ་བརྙན་སྦྲང་རྩིའི་བཅུད། །སྦུར་ལེན་མེ་ཏོག་གཡུར་ཟ་བ། །སྲབ་འཇམ་ལོ་མ་ཕང་ཕུང་ཅན། །ཐུན་འཚམས་ལང་ཚོ་དར་བའི་རྟགས། །རྣམ་པར་བཀྲ་བའི་རྒྱས་བཏབ་སྟེ། །འཕགས་ཡུལ་སྐད་དུ་ཨཱ་ཛི་ཏར། །རྗོད་པ་ཐམས་ཅད་འདུལ་ཞེས་པའི། །ཀུན་ཕན་དབྱུག་པས་ཉ་བའི་ཚེ། །གྲུ་འཛིན་གཉིས་པའི་རྩེ་ནས་ཕུལ། །(༣༦བ)
གོང་མ་ཆེན་པོའི་དགུང་བློན་ཨ་མ་དབང་ལ་སྤྲིངས་པ་ལེགས་ཚོགས་འཛད་མི་ཤེས་པའི་བང་མཛོད། སྭ་སྟི་པྲ་ཛ་བྷྱ༔ སྐུ་གསུམ་འཆི་བ་མེད་པའི་ཡོངས་འདུ་ལས། །ཚེ་དང་ཡེ་ཤེས་དངོས་པོ་འདོད་རྒུའི་འཆར། །སྩོལ་མཁས་གང་དེས་ས་དབང་རྒྱལ་པོ་ཡི། །ཆོས་སྲིད་ཁ་ལོ་སྒྱུར་དེར་ཤིས་པ་སྩོལ། །ཞེས་བཀྲ་ཤིས་པའི་ཚིག་གིས་སྔུན་བསུས་ཏེ་འཇམ་དབྱངས་གོང་མ་རྒྱལ་པོའི་མདུན་ན་འདོན་གང་དེ་ལ་གདམས་པ། དེང་གི་དུས་བསོད་ནམས་ཆུ་གཏེར་ཆེན་པོ་ལས་ཉེ་བར་བསྐྲུན་པའི་ལུས་འཚོའི་བསིལ་སྦྱིན་མཁན་པོ་མངོན་པར་རྟས་ཤིང་། རྒྱལ་ཁྲིམས་གསེར་གྱི་ཤིང་རྟ་ནོར་འཛིན་ཡངས་པའི་ཁྱོན་ཀུན་ལ་མངའ་སྒྱུར་བའི་བྱེད་པོའི་མཆོག་ཏུ་གནས་པའི་ཚུལ་ཐོས་པས་སྤྲོ་བ་འཕེལ། ངོས་ཀྱང་རྒྱལ་བའི་བསྟན་པ་སྤེལ་བ་དང་། ལུས་ཅན་མཐའ་དག་ལ་ལྷག་པའི་བསམ་པ་དཀར་བ་རེ་མཆིས། སླད་མར་ཡང་གོང་མ་ཆོས་ཀྱི་རྒྱལ་པོའི་བཀའ་ཁྲིམས་གདུགས་དཀར་པོ་གཅིག་གི་གྲིབ་བསིལ་དུ་མངའ་འབངས་མཐའ་དག་ལ་ཕན་པ་དང་བདེ་བ་ཆེན་པོ་འབྱུང་བའི་ཚུལ་ཉམས་སུ་བསྟར་བས་འཕྲལ་ཡུན་ཀུན་དུ་ལེགས་ཚོགས་ཀྱི་དངོས་པོ་ཟད་མི་ཤེས་པར་འབྱུང་བ་ཡིད་ངོར་རྟག་ཏུ་འཆར་བར་འཚལ་ཞིང་། རྒྱལ་བློན་མཐའ་དག་སྐུ་ཚེ་ཆབ་སྲིད་འཕེལ་བའི་སྨོན་གནས་ཀྱང་ཡུན་དུ་བགྱིད་པ་ཡིན་ཞེས་རྟེན་སྔགས་མདུད། བྱིན་རླབས་རྟེན་གྲངས་མེད་པ་འདུས་པའི་རིལ་བུ། སྤོས་ཤེལ། སྣམ་བུ་ལེ་ཚན་དང་བཅས། ཆུ་ཤེལ་གྱི་དབང་པོ་དབྱུ་གུས་ཉ་བའི་དམར་ཕྱོགས་ཀྱི་དགའ་བ་གཉིས་པའི་ཚེས་ལ་དཔལ་རི་བོ་གྲུ་འཛིན་གཉིས་པའི་གཞལ་ཡས་ཁང་ནས་བྲིས། (༣༧ན)
བསམ་ཡས་སུ་སྡེ་བརྒྱད་ཀུན་གྱི་ཡབ་རྗེ་གནོད་སྦྱིན་རྩེའུ་དམར་པོའི་རྡོ་རྗེའི་གསུང་གི་ལན་སྤྱན་གཟིགས་ཀྱི་རྟ་ཕོ་དང་བཅས་མྱུར་མགྱོགས་སུ་སྐྱེལ་ཚུལ། འདོད་དོན་དུ་གསོལ་བ་མི་ཕྱེད་དམ་ཚིག་གི་མདུད་རྒྱ། གྲངས་མེད་དུས་གསུམ་རྒྱལ་བའི་འཁོར་ལོའི་གསང་བ་གསུམ་གྱི་ཆུ་གཏེར་ལས། །ཅིར་ཡང་སྤྲུལ་པའི་གར་གྱིས་རྣམ་རོལ་པདྨ་ལས་འཁྲུངས་རྟ་ལྗང་ཅན། །བསིལ་ལྡན་མཁའ་གློང་ཡངས་པའི་ཁྱོན་འདིར་ཐུགས་རྗེའི་འོད་ཟེར་རབ་འབར་བ། །མཚོ་ལས་སྐྱེས་པའི་རྡོ་རྗེ་གང་དེས་ལུས་ཅན་ཀུན་ལ་བཀའ་དྲིན་སྩོལ། །གང་དེས་མཆོད་བསྟོད་དྲེགས་པའི་དཀྱིལ་འཁོར་དུ། །ལེགས་བཅུག་གཙུག་ལག་སྐྱོང་བའི་སྲུང་མ་མཆོག །འཇིག་རྟེན་དྲེགས་པ་ཀུན་གྱི་དབང་ཕྱུག་ཆེའི། །མི་འགྱུར་རྡོ་རྗེའི་ཚིག་གི་འཕྲེང་བ་སོན། །དབུས་འགྱུར་ཉེ་འདབས་ནས་བཟུང་མི་ཕྱེད་པའི། །དམ་ཚིག་ཉེ་ལྡན་རིགས་སོན་བདག་ཅག་ལ། །བླང་དོར་གཏམ་དང་མཐུན་རྐྱེན་འཕྲིན་ལས་ཀུན། །ཐོགས་མེད་སྒྲུབ་པའི་ཚུལ་འདིར་སྤྲོ་བ་འཕེལ། །ལོག་འདྲེན་དགྲ་སྡེ་འཇོམས་ལ་ཐོགས་མེད་པའི། །སྤྱན་གཟིགས་དྲི་བཞོན་ཤུགས་ལ་འགྲན་པའི་རྟ། །སྤྲུལ་པའི་གནས་དེར་སྐྱེལ་བའི་བྱ་མ་རྟ། །འགྱངས་མེད་བརྩོན་པས་སྒྲུབ་པར་བྱེད་པ་ལགས། །ཙཱི་ཎའི་གན་མཛོད་ལས་འོངས་ཐགས་ཀྱི་དར། །ས་འཛིན་དཀར་པོ་བཞུ་འདྲར་ལེགས་སྨོན་པའི། །འདོད་དོན་བསམས་པའི་འདོད་རྒུ་ཡིད་བཞིན་ནོར། །ཡིད་ཀྱི་ཟ་མ་ཏོག་ཀུན་འགེངས་པར་མཛོད། །བསམ་ཡས་སུ་སྲོག་བདག་ཆེན་པོ་གནོད་སྦྱིན་རྩེའུ་དམར་པོ་ལ་སྤྱན་གཟིགས་དང་བཅས་འདོད་དོན་དུ་གསོལ་བ་ལས་བཞི་ལྷུན་གྲུབ། ཕུན་ཚོགས་ཡིད་བཞིན་རབ་ཏུ་འཁྱིལ་བའི་ཨཽ་ཌི་ཡ་ནའི་རྒྱ་མཚོ་ལས། །དྲི་མེད་ཆུ་སྐྱེས་འདབ་སྟོང་རྣམ་པར་བཞད་པའི་ཀེ་ས་(༣༧བ)
ར་ཡི་རྩེར། །རྒྱལ་བ་ཀུན་གྱི་མི་ཟད་གསང་མཛོད་གཅིག་བསྡུས་པདྨ་སཾ་བྷ་ཝས། །སྲིད་འདིར་དགེ་བའི་དངོས་པོ་བླ་ན་མེད་པ་སྩོལ་བར་མཛད་དུ་གསོལ། །གྲུབ་པའི་སློབ་དཔོན་ཆེན་པོ་མཚོ་ལས་སྐྱེས་པའི་རྡོ་རྗེས་འཇིག་རྟེན་མཆོད་བསྟོད་ཀྱི་དཀྱིལ་འཁོར་དུ་བཅུག་ཅིང་དབང་བསྐུར། དམ་ཚིག་ཉེ་བར་བསྒྲགས། མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གིས་ཐོག་དྲངས་པའི་བོད་ཡུལ་རྟེན་གནས་ཡོངས་ཀྱི་སྲུང་མར་མངའ་གསོལ་བའི་གནོད་སྦྱིན་རྒྱལ་པོ་ཆེན་པོ་གང་གི་སྤྱན་སྔར་དགྱེས་རྒུར་སྤྱོད་པའི་སྤྱན་གཟིགས་ཀྱི་བདོག་པ་ཁྲ་གསལ་ལྟར་ཕུལ་བས་སྔོན་གྱི་དམ་ཚིག་གཉན་པོ་ཉེ་བར་དགོངས་ལ་བཅོོལ་བའི་ལས་རྣམས་སྒྲུབ་པར་མཛོད། འཇིག་རྟེན་ལྷ་སྲིན་དྲེགས་པ་ཀུན་གྱི་གཙོ། །ཞིང་བཅུའི་དགྲ་བགེགས་སྒྲོལ་བའི་མཐུ་རྩལ་ཅན། །དཔལ་ལྡན་གནོད་སྦྱིན་ཆེན་པོ་འཁོར་བཅས་ཀྱིས། །འཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །རྒྱལ་བའི་བསྟན་སྲུངས་བོད་ཁམས་ཕན་བདེ་སྤེལ། །དེང་འདིར་ཡིད་ལ་སྨོན་པའི་འདོད་པའི་དོན། །ཞི་རྒྱས་དབང་དང་དྲག་པོའི་སྦྱོར་བ་ཀུན། །ཐོགས་པ་མེད་པར་སྒྲུབ་པའི་ལས་མཛོད་ཅིག །དངོས་དང་བརྒྱུད་པའི་སྒོ་ནས་མི་བསྲུན་པ། །བསམ་སྦྱོར་ལོག་པར་འཚེ་བའི་དགྲ་བགེགས་ཀྱི། །ནུས་པའི་མཐུ་ཆོམས་སྦྱོར་བའི་སྟོབས་ཀུན་ཤིག །ཚེ་སྲོག་སྡུས་ལ་ཤ་ཁྲག་ཞལ་དུ་གསོལ། །པདྨ་ཀ་རའི་དམ་ཚིག་གཉན་པོ་དང་། །རིགས་དང་ཚེ་རབས་དུ་མར་བསྟེན་མཆོད་པ། །ཉེ་བར་དགོངས་ལ་མཐུན་རྐྱེན་དངོས་གྲུབ་ཀུན། །འབད་རྩོལ་མེད་པར་རང་གིས་གྲུབ་པར་མཛོད། །ཆུ་ཤེལ་དབང་པོ་ཆུ་སྟོད་ཀྱི། །དགའ་མར་ཆགས་པའི་རྩེ་དགའི་དུས། །དཀར་ཕྱོགས་དཔའ་བོའི་འདུ་བའི་ཚེ། །གྲུ་འཛིན་གཞལ་མེད་ཁང་ནས་དགེ །(༣༨ན)
མི་རྒན་དཀའ་བཅུ་ཤེས་རབ་རྒྱ་མཚོ་འདུ་བ་འཁྲུགས་པའི་སྐབས་སྤྲིངས་པའི་འཕྲིན་ཡིག་གི་ལན་ཐེངས་གསོས་བདུད་རྩིའི་ཟ་མ་ཏོག །ཙ ནྡྲ དྲ ཀུ མཱ རེ ཎཱ རྒ ཀ ད བ རྦྦ༔ ཤྲཱི དཱ ཡུ བ ལིཾ ར ཀྵ ཏྭཾ སི ཏཏཱ རཱ། མན་(སྡེབ་སྦྱོར་དབུས་ཕྲ།)ཤེལ་རྡུལ་བརྩེགས་སྒྱུ་རྩལ་སྤྱོད། །ཆུ་ཤེལ་དབང་པོ་གཞོན་ནུ་མས། །འཁྱུད་པའི་ལང་ཚོའི་དཔལ་སྟེར་བའི། །ཡིད་བཞིན་འཁོར་ལོས་ཁྱོད་ལ་སྲུངས། །བློ་གྲོས་ཆུ་གཏེར་ཆེན་པོ་ལས། །ཚིག་རྒྱན་བྲང་འགྲོའི་ཆུན་པོ་ཅན། །འཕྲིན་ཡིག་ཕུར་སྒྲ་སྒྲོག་བཞིན་དུ། །གན་དར་ནོར་བུའི་གཙུག་ཕུད་ཀྱི། །འོད་གཟི་འབར་བའི་ཟློས་གར་དེ། །སྙིམ་པའི་བ་གམ་གཞལ་མེད་ན། །འདྲེན་བྱེད་རིན་ཅེན་ངོས་ཤར་ཚེ། །ཡིད་ཀྱི་ཧ་ནུ་(༣༨བ)
མནྠ་འཇམ། །ཨེ་མ་ལེགས་བྱས་བི་ཤྭ་ཀརྨྨ་ཡི། །སོར་མོའི་འཕྲུལ་ལས་ཐོན་པའི་མངོན་མཐོའི་རྟེན། །ཤེས་རབ་རྩལ་གྱིས་བི་ཛ་ར་ཡི་འཕྲ། །བྱང་གྲོལ་འགྲམ་པར་སྤུད་ལ་སྤྲོ་བ་འཕེལ། །སྲིད་འདིའི་སྐྱེ་བ་སྤེལ་བའི་ནགས་ཀླུང་དབུས། །དལ་འབྱོར་ཡལ་འདབ་གཡུར་ཟའི་ཡོངས་འདུའི་ལྗོན། །ཕན་བདེའི་དྲི་བསུང་འབུམ་དུ་འཛག་པ་ཡི། །དགེ་བའི་རླུང་ཤུགས་རིང་དུ་སྐྱོད་པ་དང་། །འདུ་བའི་འཕེལ་ཟད་འཁྲུགས་པའི་ལུས་ཀྱི་དགྲར། །བདུད་རྩིའི་ཡང་སྙིང་ཕྱུང་བའི་ཟླ་ཤེལ་ཐིགས། །དྲང་སྲོང་མཁས་དབང་རིག་བྱེད་ཟ་མ་ཏོག །གཞར་ཡང་ལྷོད་བྲལ་སྟེན་ཅིག་དཔྱོད་ལྡན་ཀྱེ། །བྱུ་རུའི་ནོར་འཛིན་ལྷོ་ཕྱོགས་རྒོད་མ་ཁས། །ལན་བརྒྱར་བཞུ་བའི་མདངས་ལ་འཁུ་བ་ཡི། །སྟོང་འཁུན་དར་གྱི་མདུད་པ་རྡོ་རྗེའི་གཟུགས། །རྟགས་ཀྱི་ལང་ཚོ་བཀྲ་བར་ལི་ཁི་ཏི། །བོད་ཡུལ་གྱི་པཎྜི་ཏ་སྨོན་འགྲོ་ནས་ཚེ་དབང་དོན་གྲུབ་གྱི་འཕྲིན་ལན་རིག་གནས་མི་མཇེད་ཞིང་གི་མཐའ་འཇལ། ས རྦྦ མྲྀ ཡཱ ཏི ཤྱཱ ད བྷྱ བ ཎྜི ཏ ཙཱ ད ཧི བ ར དེ ཝ༔ཤྲཱ ཤྲུ རྱ བཱ ཧུ ཡ ཏྟ སྨཻ ཧེ སཾ བྷི ཤྩ ཡ ཙྪཱ ཀྲྀ ཏྱ། །ཕུལ་(ཛཱ་ཏིའི་སྡེབ་སྦྱོར་འཕགས་མ།)བྱུང་ཚེ་ཡི་ཟིལ་དངར་ཀུན། །སྟེར་མཁས་ལྷག་པའི་ལྷ་མཆོག་གིས། །མང་དུ་ཐོས་པའི་དཔལ་གང་དེར། །འཆི་མེད་དངོས་གྲུབ་སྩོལ་ཅིག་ཀྱེ། །(༣༩ན)
རྣམ་བཀྲ་བདུད་རྩིར་བྱེད་པའི་རི་མོ་གང་། །དབྱངས་ཀྱི་རྒྱལ་མོའི་སྙན་འགྱུར་འབུམ་འཁྱིལ་བར། །ཚིག་དོན་རྒྱུད་མང་སྟོང་གི་གླུར་འཁྲོལ་བའི། །གྲངས་མེད་རིག་པའི་ཟློས་གར་ཅི་ཡང་རྩེན། །མཁས་མང་བྱེ་བའི་ཡོན་ཏན་འབུམ་ཀྱི་ཆ། །གང་བའི་གཟུགས་ཕུང་ཉེར་འཚེའི་ཆུ་འཛིན་ལས། །རབ་རྒྱལ་ལེགས་བཤད་འོད་དཀར་འགྱེད་པ་ཡི། །སྙན་གྲགས་ཕྱོགས་བྲལ་ཀུནྡས་འཛུམ་ཞིང་གླེང་། །གནམ་ལོའི་བཞིན་རས་ངོམ་པ་ཀུན་དགའི་དཔྱིད། །བཀྲ་ཤིས་དབྱངས་སུ་འཚེར་བའི་པུ་སྟ་ཀས། །ལྕང་ལོའི་ཕྲེང་བ་འཛིན་པའི་དཔའ་བོའི་ཞབས། །མཆིས་ཞེས་ཉི་ཟླ་བལྟ་ཕྱིར་མཁའ་ལ་རྒྱུ། །སྡེ་བཞིའི་གཙུག་ལག་འབྱེད་པའི་ཞལ་གྱི་སྒོ། །འཇིག་རྟེན་མེས་པོར་ཅོ་འདྲིའི་རྣམ་དཔྱོད་ཀྱིས། །རིག་གནས་མི་མཛེས་ཞིང་གི་ཕ་མཐའ་ཡང་། །འཇལ་བའི་དཀའ་བ་མེད་འདི་སུ་ཡིས་བསྐྲུན། །ཤེས་བྱ་ཀུན་དུ་རིག་པ་ནོར་བུའི་གདུགས། །རྣམ་དཔྱོད་རིན་ཅེན་ཡུ་བས་བཏེག་པའི་དཔྱ། །སྲིད་པའི་རྩེ་མོར་འཁོར་ཚེ་ལྷུན་པོ་ཡིས། །ཉི་ཟླའི་སྒྲོན་མེ་བཏེག་ནས་ལྟ་བ་བཞིན། །ས་མོས་འཇོམས་ཤིང་པདྨའི་གཉེན་མིན་པའི། །རྨོངས་མུན་ཕ་མཐར་སྐྲོད་པ་སྣང་བའི་གཏེར། །བརྟན་གཡོའི་ཆོས་ཀྱི་རང་བཞིན་ཀུན་འཛུམ་པ། །སྔོན་མེད་རྟ་ལྗང་དབང་པོའི་བྱེད་པོ་སུ། །རིག་གནས་རྒྱ་མཚོར་འཁྱིལ་བའི་ལེགས་བཤད་ནོར། །ཚིག་དོན་ཕྲེང་བར་བརྒྱུས་ཏེ་འཛིན་པ་ལ། །དཔེ་ཟླར་དབྱངས་ཅན་ལྷ་མོ་འོས་སོ་ཞེས། །ཕྱོགས་ཀྱི་སྒེག་མོས་གླེང་བའི་མཁས་ཁྱོད་ཀྱི། །དཔྱད་གསུམ་དག་པའི་ལེགས་བཤད་ཡིད་བཞིན་ནོར། ཁོ་བོའི་རྣམ་དཔྱོད་རྒྱལ་མཚན་རྩེར་བཀོད་པའི། །ཉམས་འགྱུར་འདོད་རྒུའི་གཏེར་གྱུར་གླེགས་བམ་འདི། །འཁྲུལ་པའི་དྲི་བྲལ་འདྲེན་བྱེད་གཟིགས་མོར་དངར། །ལྷོ་ཕྱོགས་བསིར་བུས་དྲངས་པའི་དྲི་བསུང་ལྟར། །ངོམས་མེད་(༣༩བ)
ལོངས་སུ་སྤྱོད་པའི་བདེ་ཆེན་དཔལ། །འཕྲིན་ཡིག་དབྱངས་སྙན་འཁྲོལ་བའི་ལུས་དཀར་ཅན། །རིག་བྱེད་རྫིང་བུར་ངལ་མེད་རྒྱུ་བར་འཚལ། །གཙུག་ལག་བྱེ་བའི་འོད་ཟེར་སྟོང་འཕྲོ་ཞིང་། །རྒྱལ་བསྟན་ཆུ་སྐྱེས་བཞད་པའི་གཉེན་གཅིག་པུ། །གངས་ཅན་ཉིན་མོར་བྱེད་པའི་པཎ་ཆེན་ཁྱོད། །མི་འགྱུར་གཡུང་དྲུང་ལྟ་བུར་བརྟན་གྱུར་ཅིག །སྙན་འགྱུར་ལུས་ཀྱི་ལང་ཚོ་རབ་དར་བའི། །འདོག་པའི་སྒྲོ་གཤོག་རྣམ་པར་བཀྲ་བ་ཅན། །འཕྲིན་ཡིག་མདོངས་མཐའ་རིག་གནས་འབྲུག་གི་སྒྲ །སྒྲོག་པའི་དབྱར་གྱི་དགའ་སྟོན་ཆེ་དེར་འཕུར། །སྨོན་འགྲོ་པཎྜི་ཏ་འཇམ་དབྱངས་དབང་རྒྱལ་རྡོ་རྗེ་འཁོར་བ་སྤྱི་བྱེ་བྲག་གི་ངང་ཚུལ་ལ་ངེས་པར་འབྱུང་བའི་སྐྱོ་ཤས་དང་འབྲེལ་བའི་སྙན་ཚིག་གི་ལན་ཡིད་ཀྱི་ངལ་གསོ། མ ཉྫུ གྷོ ཥ ཀུ མཱ ར ཛྙཱ ཡ ཏཱི ཤྭ ར ར ཊཱ ས དྷ། །བྷ ཥ ཀྟ བ ཛྲ སི ན སྱ ཀ བ ལ ཁ ཤྩ པུ སྟ ཀ །འཇམ་(ཁ་སྒོ་ཕན་པ།)དབྱངས་གཞོན་ནུའི་མཁྱེན་པ་གང་། །དབང་ཕྱུག་རྒྱལ་པོར་གྲུབ་པ་ཡི། །སྐད་གཉིས་སྨྲ་བའི་རྡོ་རྗེའི་སྡེའི། །སྙན་ངག་འཕྲིན་ཡིག་པུ་སྟ་ཀ །(༤༠ན)
སྙིང་པོར་སྤྱད་ན་མངར་བའི་བདུད་རྩི་འབུམ། །ཅི་ཡང་འཛག་པའི་རྣམ་བཀྲའི་གཤོག་རླབས་ཅན། །ཉམས་དང་འགྱུར་བའི་གཙུག་ཕུད་ལྡེམ་བཞིན་དུ། །སྙིམ་པའི་དབྱིག་འཛིན་དོ་རར་གར་གྱིས་རྩེན། །ལེགས་བྱས་འབུམ་ཕྲག་རྒྱུན་འབབ་ཆུ་གཏེར་ལས། །འོངས་པའི་ཉེ་བར་ལེན་པ་འོད་དཀར་ཅན། །ཉེས་བརྒྱའི་སྒྲ་གཅན་རྒྱུ་ལམ་རྒྱང་བསྲིངས་ཏེ། །སྡེ་བཞིའི་བསིལ་ཟེར་སྤྲོ་བ་ཐོསའཛིན་བཅུད། །རིག་གནས་རྒྱ་མཚོ་ལས་འོངས་ལེགས་བཤད་ཀྱི། །མི་འཛད་ཡིད་བཞིན་ནོར་ལ་སྤྱོད་པའི་ཚུལ། །ངོ་མཚར་གཏམ་གྱི་དབྱར་རྔ་བསྒྲགས་པ་ན། །ཡིད་ཀྱི་མདོངས་མཐའ་དགའ་བའི་གར་གྱིས་བྲེལ། །ཨེ་རཎྜར་མཚུངས་མཐའ་མེད་འཁོར་བའི་མཁར། །ལས་འབྲས་གློག་གི་བུ་མོ་གར་མཁན་མ། །བདེ་སྡུག་སྣང་དང་མུན་པར་འཆར་བའི་སྒོ །འཁྲུལ་བའི་དབྱར་གྱི་དཔལ་མོའི་རང་མཚང་ངོམ། །གྲང་རེག་བ་མོས་བཅིལ་བའི་དགུན་དུས་ཀྱི། །མི་བརྟན་རྣམ་པར་འགྱུར་བའི་སྒྱུ་མའི་དཔེར། །སོས་ཀྱི་ལང་ཚོ་ངོམ་ན་བཟང་ངན་ཀུན། །གཅིག་ཏུ་རྟག་པར་འཛིན་པ་འཁྲུལ་པའི་བློ། །མཆོག་གསུམ་ཐུགས་རྗེའི་འཕྲུལ་གྱིས་ལེགས་པའི་ལམ། །བདུད་རྩིའི་དངོས་པོ་ལྷུན་གྱིས་གྲུབ་པའི་དཔལ། །བློ་ལྡན་གསེར་མངལ་ཅན་ཁྱོད་ལུགས་ཟུང་གི །སྣང་བ་གསེར་གྱི་རྩིབས་སྟོང་འོད་དུ་འབར། །སྲི་ཞུར་བསྐྲུན་པའི་ཡུལ་མཆོག་སེམས་ཀྱི་སྣ། །བདེ་བར་འཁྲིད་ལ་བློ་ཆེན་ཚངས་པ་ལྟར། །གང་ཡང་མངོན་མི་ཡངས་པའི་དཀྱིལ་ཆེན་པོས། །འཇལ་བྱེད་ཚད་མས་ངལ་བའི་གནས་སུ་མཛོད། །རབ་ཡངས་ཤིང་གི་མ་མའི་ནོར་འཛིན་ངོས། །ཨ་འདུས་ཀ་ཕྲེང་ལྡན་པའི་ནགས་ཀླུང་ནས། །ཚིག་དོན་དྲི་བསུང་གཡོ་བའི་ཙན་དན་ལྗོན། །བསིལ་ལྡན་བདེ་བའི་རང་བཞིན་སྤེལ་བར་རིགས། །འདྲེན་བྱེད་ར་ཡིག་གཉིས་པའི་སྤྱོད་ཡུལ་ཅན། །(༤༠བ)
བདོག་པའི་པད་དཀར་གཞོན་ནུ་གཡུར་ཟ་བ། །མི་འགྱུར་རྟགས་ཀྱི་ཟེའུ་འབྲུ་ལྡེམ་པ་གང་། །དཔྱོད་ལྡན་འཆི་མེད་རྣ་བའི་རྒྱན་དུ་མཛེས། །
རབ་བྱུང་བཅུ་གཅིག་པའི་ས་བྱི་སོགས་ལ་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་བྱི་སོགས་ལ་བྲིས་པའི་ཆབ་ཤོག་འཕྲིན་ཡིག་ཁག །ས་བྱི་གནམ་ལོ་གསར་ཚེས་ཀྱི་དུས་ཕོ་བྲང་ཆེན་པོ་སྣེའུ་གདོང་རྩེ་ནས་ཞབས་དྲུང་རིན་པོ་ཆེ་ལྷ་གཟིགས་མི་ཕམ་བསོད་ནམས་དབང་ཕྱུག་གྲགས་པ་རྣམ་རྒྱལ་དཔལ་བཟང་པོས་ལེགས་སྐྱེས་དང་བཅས་པའི་ཆབ་ཤོག་གི་ལན་དབྱངས་ཀྱི་རྒྱལ་མོའི་པི་ཝང་། སྲིད་ཞིའི་འཁོར་ལོའི་རི་མོ་བཀྲ་བའི་ཞབས། །གྲངས་མེད་འཇིག་རྟེན་གསུམ་གྱི་རལ་པའི་རྩེར། །འགོད་མཛད་དཔལ་ལྡན་ཕག་མོ་གྲུ་པ་ཞེས། །ནོར་འཛིན་ཁྱོན་ཀུན་རྣམ་པར་སྐྱོང་དེའི་དྲུང་། །འཇིགས་མེད་གསང་བ་གསུམ་གྱི་ཆ་ཤས་ཀུན། །ཡོངས་སུ་གང་བའི་མཚན་དཔེའི་འོད་དཀར་འབུམ། །ཆོས་སྲིད་ཀུནྡ་ཁོང་ནས་བཞད་པའི་གཉེན། །ངོ་མཚར་བྱེ་བའི་འཛུམ་རླབས་གཡོ་བ་ནས། །ལེགས་བྱས་རྫོགས་ལྡན་རང་ཞལ་ཆེར་ངོམ་པའི། །ཀུན་འཛིན་གནམ་ལོར་གྲུབ་པའི་རིན་ཅེན་སྣོད། །ཕན་དང་བདེ་བའི་བདུད་རྩི་རབ་འཁྱིལ་བ། །ཕུན་ཚོགས་ཐོག་མར་དགེ་བའི་རྟེན་འབྱུང་དུ། །བཀའ་ཐམ་ལང་ཚོ་དར་བའི་སྨིན་ལེགས་མ། །སྙན་འགྱུར་འབུམ་གྱི་གདུབ་བསིལ་འཁྲོལ་བ་ཅན། །བདོག་པའི་སྐྱེས་ཀྱི་གོས་བཟང་གཡོ་བཞིན་དུ། །སྙིམ་པའི་དོ་ར་དགའ་བའི་གར་གྱིས་རྩེན། །འདི་ན་གསུང་རབ་མང་པོར་བརྒལ་བརྟག་ཀྱི། །རིགས་པས་དཔྱད་བཟོད་སྡོམ་རྩོན་ཀློག་པ་མཁན། །རྣམ་གཡེང་རླུང་གི་ཤིང་རྟས་མཁར་དྲངས་ཀྱང་། །ཐོས་བསམ་སྒོམ་པའི་པད་དཀར་བཞད་འདུན་ཙམ། །བྱང་ཆུབ་མཆོག་བརྙེས་དཔལ་ལྡན་གསང་བའི་བདག །མི་ཡི་སྲིད་པའི་གར་གྱིས་རྣམ་རོལ་བའི། །སྡེ་བཞིའི་རྒྱལ་མཚན་མཐོན་པོར་སྒྲེང་བའི་ཏོག །འོད་སྟོང་སུམ་རྩེན་གནས་ལས་བརྒལ་ཏེ་འབར། །ནོར་འཛིན་བུ་མོ་འདོད་འཇོའི་མངལ་ཁུར་གྱིས། །(༤༡ན)
ཉེ་བར་དུད་པའི་ས་སྐྱོང་ཐམས་ཅད་མཁྱེན། །གསེར་པ་ལོ་ཙཱར་གྲགས་པའི་ལུགས་ཟུང་གི །རྣམ་དཔྱོད་འདི་ཀོས་ཕུར་བུའི་བརྟན་པ་ཕྲོགས། །སྒྲུབ་བརྒྱུད་འཆི་བ་མེད་པའི་ལམ་ཡངས་པོར། །བཤད་པའི་ཆུ་འཛིན་ལང་ལོང་གཡོ་བའི་དབུས། །གསང་ཆེན་ཐེག་མཆོག་དབྱར་རྔ་དགོད་པ་ཡི། །དབྱངས་ཀྱི་རྒྱལ་མོའི་པི་ཝང་གཅིག་ཏུ་སྙན། །ཨེ་མ་རྨད་བྱུང་ནོར་བུའི་ཡུ་བ་ཡིས། །ཉེ་བར་བཏེག་པའི་ཆོས་ནོར་འདོད་པའི་གདུགས། །སྲིད་པའི་རྩེ་མོར་འཁོར་བའི་བྱེད་པོ་རུ། །ལྷ་ཁྱོད་འཇིག་རྟེན་མེས་པོས་བསྐོས་པར་ངེས། །སྦོམ་ཞིང་ཆེས་རིང་ཚེར་ཅན་རྐང་འཐུང་འཕྲེང་། །ནགས་ཀླུང་འཛིན་མའི་ཁྱོད་ཀུན་ཁེངས་ན་ཡང་། །མ་སྨད་མངར་བའི་དྲི་བསུང་འཐུལ་བ་དེ། །ཙན་དན་ལྗོན་པ་མིན་པ་གཞན་གྱིས་ཅི། །མཚུངས་པ་མེད་པ་མཁྱེན་བརྩེའི་འོད་སྟོང་གིས། །སྐྱེ་རྒུ་ཀུན་ལ་དགའ་བདེའི་སྣང་བའི་གཏེར། །མཆོད་སྦྱིན་སྒོ་བརྒྱ་འབྱེད་པའི་ས་དབང་ཁྱོད། །འགྱུར་མེད་སེང་གེའི་ཁྲི་ལ་བརྟན་གྱུར་ཅིག །བརྗོད་དོན་མནྡྷ་ར་ཡི་འཕྲེང་བ་མཆོག །སྤེལ་ལེགས་ཆབ་ཤོག་སྲད་བུར་ལེགས་བརྒྱུས་ཏེ། །དྲང་སྲོང་ཛ་ཧྣུའི་བུ་མོར་འཁུ་བཞིན་དུ། །ནམ་ཡང་བསྒྱུར་བ་མེད་པར་མཉེས་གཤིན་ཞུ། །སྤྱན་རས་འཁོར་ལོའི་ཡན་ལག་རྒྱུ་བའི་རྟེན། །འོ་མཚོ་ཐགས་སུ་འཁྱིལ་བའི་རྫིང་བུ་ལ། །ཨུཏྤལ་དམར་པོའི་རྒྱ་ཡིས་ལེགས་སྤྲས་ཏེ། །དམར་ཕྱོགས་དགའ་བ་གཉིས་པའི་ཚེས་ལ་ཕུལ། །དགའ་ལྡན་ཁྲི་རིན་པོ་ཆེ་ཆོས་རྗེ་བྱམས་པ་རྒྱ་མཚོའི་སྤྲུལ་པའི་སྐུའི་ཡང་སྤྲུལ་ཁར་ཁ་ཏའི་ཆིང་ཀ་ཐན་བཱ་དུར་གྱི་རིགས་སུ་བྱུང་བའི་འཕྲིན་ལན་དམར་ཆའི་སྔོ་བསངས་དྲང་ཐིག །(༤༡བ)
མ ཉྫུ ནཱ། མ ཡ ཡཱ ནི རྟི པྲ ཛཱ རྠཱ ཡ ཙ ཀི ལ ཤ །སུ དྷཱི ཀཱི རྟི ཝ སྟི ཀ ར ས ཪྻ སྟ ཏྵུ བྷ ཀ རྱ ཙ། །འཇམ་(ཁ་སྒོ་ཕན་པའི་སྡེབ་སྦྱོར།)མགོན་སྒྱུ་འཕྲུལ་དྲ་བའི་གར། །བསིལ་ལྡན་སྐྱེ་རྒུའི་དོན་གྱི་ཆེད། །སྒྱུར་མཛད་བློ་བཟང་གྲགས་པ་ཡིས། །དམ་པ་གང་དེར་དགེ་བར་མཛོད། །ལེགས་བྱས་བྱ་བའི་ཆུ་གཏེར་ལས་འོངས་པའི། །གསང་གསུམ་སྣང་བའི་དཔལ་སྟེར་ཆུ་ཤེལ་དབང་། །རྣམ་དཀར་འཕྲིན་ལས་ཡངས་པའི་འོད་དཀར་གྱིས། །ཕན་བདེའི་ཀུནྡ་ཆེས་ཆེར་བཞད་པའི་གཏམ། །འཕྲིན་ཡིག་རྟེན་གྱི་འཁོར་ལོའི་ཡན་ལག་ཅན། །སྙིམ་པའི་རབ་དཀར་འོ་མཚོའི་རྫིང་བུ་ན། །ཟློས་གར་སྒྱུར་བའི་བརྗོད་དོན་སྙན་པའི་གླུས། །རྒྱུད་མང་སྟོང་གི་སྒྲ་དེ་ངལ་བར་བྱས། །རྒྱལ་ཀུན་རང་བཞིན་གཅིག་ཏུ་གྲུབ་པའི་ཁམས། །ཐུན་འཚམས་ལང་ཚོ་ལྷན་ཅིག་འདྲེས་པའི་གཟུགས། །བཤེས་གཉེན་དམ་པར་སྣང་བར་བཙོང་(༤༢ན)
ཁ་པའི། །དྲི་མེད་རིང་ལུགས་ནོར་བུར་སྤུངས་པའི་དཔྱ། །རྣམ་དཀར་འཕྲིན་ལས་མཆོག་གི་ཤིང་རྟ་ཡིས། །གནམ་བསྐོས་ཧོར་གྱི་ནོར་འཛིན་ཡངས་པའི་སར། །འདྲེན་མཁས་འཇིག་རྟེན་དབང་ཕྱུག་བསོད་ནམས་ཀྱི། །ཞིང་མཆོག་རྒྱ་མཚོའི་གོས་ཅན་ཀུན་ཁྱབ་པའི། །རྣམ་པར་སྤྲུལ་པས་སྡེ་བཞིའི་ཡོན་ཏན་ཀུན། །ཕུང་པོ་རྒྱ་མཚོའི་ཚད་ཀྱིས་གཞལ་དཀའ་བས། །གངས་ཅན་ཕན་བདེའི་མགྲོན་ཀུན་འགུགས་བྱེད་པའི། །ངོ་མཚར་འཕྲིན་ལས་ཐོག་མའི་སྒོ་འཕར་དུ། །ཆུ་ལྷའི་བུ་མོས་བཏེག་པའི་ཕང་བ་ན། །མཆོག་དམན་བར་པའི་གདུལ་བྱ་གྲངས་མེད་ཀྱི། །འདྲེན་པར་དབང་བསྐུར་མི་ཕམ་མགོན་གཉིས་པའི། །སྣང་བ་དམ་པའི་ངོ་མཚར་ལྷུན་གྲུབ་དཔལ། །ལུང་རྟོགས་ཡོན་ཏན་འོད་དཀར་ཉེར་རྒྱས་ཀྱང་། །ན་ཚོད་ཟླ་བ་ཚེས་པ་སྤྲུལ་པའི་གར། །རྒྱ་ཧོར་བསྟན་འགྲོའི་ཀུན་གསལ་འགྲམ་པ་ལ། །རླབས་ཆེན་སྨོན་ལམ་ཤིང་རྟས་དྲངས་པར་ངེས། །བློ་བཟང་གྲགས་སྙན་འབར་བའི་རིང་ལུགས་མཆོག །མཁྱེན་བརྩེ་བྱམས་པའི་སྙིང་སྟོབས་ཀྱིས་འདེགས་པ། །དབང་ཕྱུག་བརྒྱད་མངའ་ཕྱག་ན་པདྨ་ཡི། །འཕྲིན་ལས་རྒྱ་མཚོའི་ཕ་མཐར་སྤེལ་བའི་སྡེ། །གྲངས་མེད་ལུང་རྟོགས་རྣམ་བཀྲའི་རི་མོ་གང་། །མངལ་གྱི་ར་རི་ཅུང་ཟད་གྲགས་པ་དག །ཐོས་བསམ་བྱི་དོར་ཚུལ་གྱིས་ལེགས་ཟུངས་པས། །སྐལ་བཟང་གདུལ་བྱའི་འདྲེན་བྱེད་དགའ་སྟོན་རིགས། །མང་ཐོས་མཁས་པའི་གྲུ་གཟིངས་ལ་བརྟེན་ནས། །རྒྱལ་སྲས་སྤྱོད་པའི་ཆུ་གཏེར་རབ་བརྒལ་ཏེ། །དོན་གཉིས་ཡིད་བཞིན་དབང་གི་རྒྱལ་པོ་ཆེ། །དམ་པའི་ཅོད་པན་རྒྱན་དུ་འཆིང་བར་མཛོད། །མཐོ་བཙུན་འཆི་མེད་དགའ་ཚལ་ལས་འོངས་ཤིང་། །རྗེ་བཙུན་ཡོངས་འདུའི་འཁྲི་ཤིང་གཡུར་ཟ་བ། །རྣམ་(༤༢བ)
དཀར་སྤྱོད་ཡུལ་དྲི་བསུང་སྤྲོ་བ་ཁྱོད། །འཇིགས་མེད་རྡོ་རྗེའི་སྤོ་ལ་བརྟན་གྱུར་ཅིག །ཀུན་དགའི་རང་བཞིན་འཛུམ་པའི་མཆུ་སྒྲོས་ལས། །སྙན་གྱུར་གླེང་བར་འོས་པའི་གཏམ་གྱི་ཕྲེང་། །སྐལ་ལྡན་ཤིང་རྟའི་རྒྱུན་ལ་འགྲན་བཟོད་པ། །རྟ་ལྗང་བགྲོད་པའི་རྗེས་སུ་འཇུག་པར་འཚལ། །རི་མོ་པད་དཀར་ཆུན་པོ་རྒྱས་པའི་རྩེར། །རྟེན་གྱི་ཟེའུ་འབྲུ་རི་དྭགས་མིག་ཅན་ལ། །ཐུན་འཚམས་རྒྱ་ཡི་ལང་ཚོའི་སྟོད་གཡོགས་ཀྱི། །ལྷབ་ལྷུབ་རྣམ་པར་མཛེས་པས་རབ་སྤྲས་ཏེ། །རྒྱལ་བའི་བཀོད་པ་རྒྱ་མཚོའི་ངོ་མཚར་གྱི། །རྟ་ཆེན་ཟླ་བར་གྲགས་པའི་ཕྱོགས་སྔ་མའི། །དགའ་བའི་ཚེས་ལ་བོད་ཡུལ་རྡོ་རྗེ་གདན། །ལྷ་ལྡན་སྤྲུལ་པའི་གཙུག་ལག་ཁང་ནས་བྲིས། །ཕུག་པ་དཔལ་སེང་བའི་སྐྱེ་བ་བཟང་ཡུལ་གྲོང་གསར་དུ་བྱུང་བ་ངག་དབང་སྙན་གྲགས་བཟང་པོས་གྲྭ་སྡིངས་པོ་ཆེ་ནས་སྙན་ངག་གི་འཕྲིན་ཡིག་ཕུལ་ལུགས་རིའུ་མིག་རྒྱ་མཚོའི་གླེགས་བམ་གྱི་ལེ་ཚན་འགའ་ཞིག་དང་བཅས་བསྲིངས་པའི་ལན་སྐྱོན་ཡོན་མ་འདྲེས་འཆར་བའི་མེ་ལོང་། དཱི བྷ རཱ ཏི ཤྱཱ ན ནྟྲོ བྷཱ ཝ ཤྩ ཤ ནྟ ཙ ཀྲ བྲ ས མ བྷ ས རྦྦ ཛི ནུ བ ཏྭ ནཱ ར བ སཱ ཝ ཤྲཱི མཱ ངྐི རི ནཽ ཤུ བྷ ཀྲྀ། །(༤༣ན)
སྲིད་(ཛ་ཏིའི་སྡེབ་སྦྱོར་འཕགས་མ།)དང་གཟུགས་ཅན་ཤིས་བརྗོད། ཞི་བའི་འཆི་མེད་ལམ་ཡངས་པར། །ཕུལ་བྱུང་ཚོགས་གཉིས་འཁོར་ལོ་རབ་རྫོགས་པ། །རྒྱལ་ཀུན་རང་གཟུགས་མི་ཡི་སྲིད་པ་ཅན། །དཔལ་ལྡན་ཕག་མོ་གྲུ་པས་དགེ་བ་མཛོད། །མཐའ་མཐའ་དག་གཟུགས་ཅན། ཀླས་ལེགས་བྱས་ཟླ་བའི་མ་མ་ལས། །ཉེ་བར་ལེན་པའི་ཆུ་ཤེལ་དབང་པོའི་གཟུགས། །ཐོས་བསམ་སྒོམ་པའི་འོད་དཀར་ལེགས་སྤྲོ་བཞིན། །གྲུབ་རིགས་ལྷ་ལམ་ངོས་སུ་རྒྱུ་བ་ནས། །འཕྲིན་ལྡན་པའི་གཟུགས་ཅན་ལ་ཏིང་ངེ་འཛིན་གྱིས་བརྒྱན་པ། ཡིག་ཨུཏྤལ་དཀར་པོའི་འདབ་མ་སྟོང་། །སྙན་ཚིག་ཉམས་དང་འགྱུར་བའི་འཛུམ་ཕྲེང་དབུས། །རྩིས་རིས་གླེགས་བུའི་ཟེའུ་འབྲུ་གཞོན་ནུ་ལ། །རྟགས་ཀྱི་བུང་བས་འཁྱུད་པ་སུག་པར་སོན། །སྒྲུབ་གཟུགས་ཅན་དང་ཏིང་ངེ་འཛིན་ཆོས་ཅན་འགོག་པ་གསུམ་འདྲེས་པའི་རབ་སྤེལ། བརྒྱུད་ནོར་འཛིན་བུ་མོའི་མངལ་ཁུར་ལས། །གྲངས་མེད་རྒྱལ་བའི་འཁྲི་ཤིང་གཡུར་ཟ་ན། །ཀུན་མཁྱེན་ཡེ་ཤེས་འཐོབ་གནས་འོག་མིན་ཞེས། །གཞུང་ལུགས་མང་པོར་གྲགས་པ་གཏམ་དུ་ཟད། །ཐོས་ལྷོ་ཕྱོགས་བཻ་དརྦྷ་ལུགས་ཀྱི་རབ་དངས་ཀྱི་རྒྱན། ཉུང་སྒོམ་པར་ཁས་འཆེ་རྒན་པོའི་ཚུལ། །རིང་སྤངས་ངག་གི་དབང་པོ་ཉེར་གྲུབ་པ། །མང་ཐོས་ནོར་བུའི་ཅོན་པན་འཆང་བ་དེའི། །རིང་ལུགས་འཛིན་པའི་གྲགས་སྙན་རྣ་བར་འཇེབས། །རྒྱུད་མཐའ་དག་གཟུགས་ཅན། དོན་མ་ལ་ཡར་སྐྱེས་ལྗོན་པ་ལས། །འཁྲུལ་མེད་ཕྲ་ཞིབ་རིགས་པ་མངར་བའི་དྲི། །ལེགས་བཤད་བསིལ་བུར་རིང་ནས་འགུགས་བྱེད་པའི། །ལྷུན་གྲུབ་རྒྱ་མཚོའི་ལུགས་འཛིན་འདི་རྨད་བྱུང་། །ངེས་རབ་རྟོག་གི་གབ་ཚིག །པར་ལེགས་པའི་མིག་མི་འཛུམ་པའི་སྙིང་། །ཚུལ་ཆོས་མཆུ་ཡིས་ཐལ་མར་འབིགས་བྱེད་པ། །ཆུ་སྐྱར་རྒན་པོའི་ཏིང་འཛིན་གཡོ་མེད་ཅན། །དཔྱོད་(༤༣བ)
ལྡན་ཁྱོད་ཀྱི་འདྲེན་བྱེད་ཀྱིས་མཐོང་ངམ། །བརྒལ་མ་བསྡུས་པའི་གཟུགས་ཅན། བརྟག་དཔྱད་ཀྱིས་ཉེས་བརྒྱའི་ཚད་ནད་ཀུན། །ཞི་བྱེད་ལུང་དང་རིགས་པའི་ག་བུར་ཐིགས། །ཕྱོགས་དེར་སྔོན་མེད་ལེན་པའི་ཤིང་རྟ་བ། །མཁས་ཀུན་མཁྱེན་ངག་དབང་ནོར་བུ། དབང་གང་དེའི་ལུགས་འཛིན་ཁྱོད་དུ་ངེས། །ལེགས་གཟུགས་ཅན་ཕུང་བྱུང་། སྦྱར་ཛམྦུའི་གསེར་སྦྱངས་ཀཱརྞྞི་ཀར། །ཕྱི་ནང་རིག་གནས་རིན་ཅེན་ཕྲ་ཚོམ་ཅན། །གང་གི་རྣ་བར་སྤུད་ཚེ་ལྷའི་བླ་མ། །སྐབས་གསུམ་སློབ་དཔོན་ཟོལ་གྱིས་མཁའ་ལ་བྲོས། །ལྐོག་ཕུལ་བྱུང་རབ་རྟོག །གྱུར་གཟུགས་ཀུན་གཙུག་ལག་མེ་ལོང་དུ། །རྗེན་པར་འཆར་བྱེད་གསང་ཚིག་ཁྱོད་ཀྱིས་བློས། །རང་གིར་བྱས་ཚིག་གཙུག་ན་ཟླ་བ་ཡང་། །ཏིང་འཛིན་ཟོལ་གྱིས་གངས་རིའི་ཕག་ཏུ་ཡིབ། །གང་མཛེས་པའི་རྒྱན་ཤར་ཕྱོགས་གཽ་ཌ་པ་ལ་གྲགས་པ། གི་ཐོས་བསམ་སྒོམ་པའི་གྲགས་སྙན་ནོར། །འཕྱུར་བུ་སྤུངས་པ་མ་ལུས་ཤོང་བའི་སྣོད། །བསིལ་ལྡན་ཁ་བའི་ལྗོངས་འདི་ཆེས་ཡངས་པར། །བྱེད་པོ་ཚངས་པ་ཡིན་པར་ད་གདོད་ཁུམས། །འདི་ཆ་ཤས་གཟུགས་ཅན། ན་ཟ་ཧོར་གདུང་འཛིན་རིག་བྱེད་པ། །ཆོས་སྲིད་རིན་ཅེན་བརྩེགས་པའི་བ་གམ་དབུས། །བློ་གྲོས་རྒྱུད་ཀྱིས་གནས་ལྔ་རིག་པའི་གཞུ། །འགུགས་པར་བརྩོན་པའི་བསམ་པ་མི་དམན་ཙམ། །རིགས་མཐུན་སྤྲིན་གཟུགས་ཅན་གྱི་དོན་གཞན་བཀོད་པ། ལ་རྨོངས་པའི་གདོངས་མཐའ་ཅན། །དགའ་ཡང་ཐུབ་བསྟན་ཉི་འོད་མི་གསལ་བས། །ངག་དབང་ནོར་བུའི་རྣམ་ཐར་འདབ་བརྒྱའི་ཁ། །ཟུམ་པ་སླར་ཡང་ཁྱོད་ཀྱིས་འབྱེད་པར་རིགས། །དབང་ཕྱོགས་སྨིན་ལྡན་པའི་གཟུགས་ཅན། ལེགས་སོར་རྩེའི་ཀུན་གསལ་ངོས། །ཐགས་ཀྱི་དྲ་བར་གྲུབ་པའི་དབང་པོའི་གཞུ། །སྔོན་མེད་རི་མོ་བཀྲ་བའི་ཆུ་འཛིན་བཅས། །ཐུན་འཚམས་རྒྱ་ཡི་ལུས་ཕྲས་དམ་དུ་འཁྱུད། །མགྲིན་རང་བཞིན་བརྗོད་པ། སྔོན་གཙུག་ལག་དམར་ཕྱོགས་ཀྱི། །དབྱངས་ཀྱི་རྒྱལ་མོ་ཨི་འཆར་ཚེ། གཙུག་ལག་སྒོ་འཕར་ལེགས་ཕྱེ་བ། །(༤༤ན)
དགའ་ལྡན་ཕོ་བྲང་རྩེ་ནས་བྲིས། །འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པའི་སྐྱེ་བར་གྲགས་པ་ཇོ་ནང་སྤྲུལ་སྐུ་ཀུན་དགའ་སྙིང་པོའི་ཡང་སྲིད་ཁར་ཁ་ཐུ་ཤེ་ཡེ་ཐུ་རྒྱལ་པོའི་བུར་བྱུང་བ་ལ་སྤྲིངས་པ་རྡོ་རྗེ་རྣ་བར་འཐུལ་བའི་མ་ལ་ཡའི་དྲི། བུ དྡྷ སྱ སུ དྷཱི ཤྲཱི ཏུ སཱ གརི ཀཱ ཙྩེ ནྡྲ སུ ཪྻཏི། །ཀཱ དྷ ར སྨི ཙ དྷྱཱ བ དྨ བུ ཥྚེ ལ ཀྵ ཀྲྀ། །སྟོབས་(སྡེབ་སྦྱོར་ཁ་སྒོ་ཕན་པ།)བཅུ་མངའ་བའི་ཆུ་གཏེར་ལས། །བློ་བཟང་བཅུ་གཉིས་བདག་པོའི་དཔལ། །གྲགས་པའི་འོད་ཟེར་འབུམ་ཕྲག་གིས། ཁྱོད་བློའི་པདྨ་རྒྱས་པར་མཛོད། །རྒྱལ་ཀུན་མཁྱེན་པའི་ལང་ཚོ་དར་བའི་དཔྱིད། །ཟུར་ཕུད་ལྔ་པ་མི་ཡི་སྲིད་པ་ཙམ། །སྙིགས་དུས་འགྲོ་བའི་མགོན་དུ་གཉིས་སྐྱེས་ཀྱི། །སྒྱུ་འཕྲུལ་དྲ་བའི་རོལ་གར་བཙོང་ཁ་པའི། །རིང་ལུགས་འདེགས་པའི་ཁུར་ལྡན་ཤེས་རབ་ཀྱིས། །འཇམ་དབྱངས་གཞོན་ནུས་འགྲན་བཟོད་ཆོས་(༤༤བ)
རྣམས་ཀྱི། །རྗེ་བོའི་ཐེམ་སྐས་འཛེག་པའི་ཐོས་བསམ་སྒོམ། །བཀྲ་ཤིས་དཔལ་གྱི་གཡུང་དྲུང་རྒྱན་ལྡན་འཁྱིལ། །ད་ལྟའི་ངང་ཚུལ་ཕྲ་མོའི་ན་ཚོད་ཀྱི། །སྐྱེ་བོའི་ཟློས་གར་གསར་པའི་ཆུ་ཤེལ་དབང་། །ཚེ་རིང་གནམ་བསྐོས་རིགས་ཀྱི་ལྷ་ལམ་ངོས། །ཤར་བའི་ངང་ཚུལ་འདི་ལས་གཞན་དུ་ཅི། །རབ་འབྱམས་ཆོས་ཀྱི་གནས་ལུགས་མཐའ་ཡས་མདུད། །ཅིག་ཅར་འགྲོལ་བར་རྒྱལ་བའི་གསུང་རབ་མཆོག །འཇུག་པའི་རིམ་པ་ཇི་བཞིན་འཁྲུལ་བྲལ་གྱི། །ཚུལ་འདིར་རིང་དུ་ངལ་བའི་ཁུར་སྟེན་གཅེས། །རིང་ནས་སྦྱངས་པའི་ཐོས་པའི་ལྕགས་ཀྱོ་ཡིས། །མདོ་རྒྱུད་རི་དྭགས་མིག་ཅན་རབ་འགུགས་པའི། །སློབ་བུ་ཡོངས་སུ་འཛིན་མཁས་བསོད་ནམས་ཀྱི། །གྲགས་པའི་དཔལ་འབར་དེ་ཡང་རིང་དུ་སྟེན། །སླར་ཡང་གཏམ་གྱི་མེས་པོའི་ཐོད་ཡངས་ལས། །བརྗོད་པར་འོས་པ་ཛ་ཧུའི་བུ་མོའི་རྒྱུན། །བྱེད་པོ་སྐལ་ལྡན་ཤིང་རྟའི་བྱ་མ་རྟ། །བཤུལ་དུ་འདོད་ལ་བསྐྱུད་པ་མེད་པར་གྱིས། །དེ་སྐད་འཕྲིན་ཡིག་གནྡྷར་བྷ། །སྙན་ཚིག་རྒྱུད་མང་སྙིམ་པ་ཡིས། །ཐོགས་ཏེ་མི་ཕྱེད་རྡོ་རྗེའི་རྒྱན། །རྣམ་བཀྲའི་རྒྱ་ཡིས་མཛེས་བཞིན་དུ། །རིན་ཅེན་མར་གད་ལས་བསྐྲུན་པའི། །ཡལ་གའི་རི་དྭགས་དབང་སྒྱུར་ཚེ། །གྲུ་འཛིན་གཉིས་པའི་གཞལ་མེད་ཆེ། །དགའ་ལྡན་ཕོ་བྲང་ནས་བྲིས་དགེ །བླ་མ་ལྷ་རྩེ་བ་ངག་དབང་བཟང་པོ་སྐྱེ་བ་གྲོང་མོ་ཆེ་བའི་བུར་བྱུང་བ་ངག་དབང་ཀུན་དགའ་ལྷུན་གྲུབ་ཀྱི་བ་སོའི་ཁ་ཊྭཾ་ག་ཆུང་ངུའི་རྟེན་དང་མཅས་པའི་འཕྲིན་ལས་འཆི་མེད་དབང་པོར་ཅོ་དྲི། (༤༥ན)
ཤྲཱི མཱ ནྶ དྷ མཱ ལ བྷྲཱཾ ཤཱ ཀྱ སྱ ཤཱ ས ཡ ར ཐོ མ ཧཱ། ས རྦྷ ཛི ཡ ཛ ལཾ རྣི རྟི སྟི ཋི ན ཡ ཀྲྀ ར ཛ བ ཛྲ ཤུ བྷ ཀྲྀ །དཔལ་(ཛ་ཏིའི་སྡེབ་སྦྱོར་འཕགས་མ།)ལྡན་སྒྲུབ་རྒྱུད་ཤིང་རྟ་ཆེན་པོ་གང་། །ཟས་གཙང་སྲས་པོའི་བསྟན་པའི་ནོར་འཛིན་ལ། །འདྲེན་མཛད་རྒྱལ་ཀུན་སྒྱུ་འཕྲུལ་དྲ་བའི་གར། །རྡོ་རྗེ་རྒྱལ་པོས་དུས་རྣམས་དགེ་བར་མཛོད། །མཐའ་བྲལ་ལེགས་བྱས་ཟླ་བའི་མ་མ་ལས། །རབ་ཐོན་ཉེ་བར་ལེན་པའི་ཆུ་ཤེལ་དབང་། །ཉེས་བརྒྱ་ནམ་མཁའི་གླང་པོ་ལས་བརྒལ་ཏེ། །ངེས་དོན་ཀུནྡ་བཞད་ལ་འགོག་མེད་ནས། །དཀར་འཇམ་ལྗོན་ཤིང་མ་མའི་གསེར་ལྡན་ལྟོར། །སོར་མོའི་ཟློས་གར་སྒྱུར་བའི་སྙན་ཚིག་གླུ། །དབྱངས་ཅན་འཕང་འགྲོའི་རྒྱུད་ལས་དྲངས་མིན་ན། །སྔོན་ཆད་དཔྱོད་ལྡན་རྣ་བར་འཇེབས་ལ་མཚར། །འཆི་མེད་བཟོ་བོའི་འཕྲུལ་གྱིས་མ་བསྒྲུབས་ཤིང་། །འདྲེན་བྱེད་སྒྱུ་མའི་རྩལ་གྱིས་བསླད་མིན་པའི། །ངོ་མཚར་སྣང་བརྙན་ལང་ཚོ་དར་བབ་པ། །སྟོང་འཁུན་དར་བཅས་རྒྱ་ཡིས་(༤༥བ)
སྤྲས་པ་འབྱོར། །རྒན་པོའི་བློ་འཆང་གཞོན་ནུའི་བྱེད་པོ་ཡིས། །རྨོངས་ཆེན་ཚོགས་བདག་མཆེ་བ་ཕྱུང་བའི་ཚེ། །གཞུང་བརྒྱའི་ཚིག་དོན་བཀྲ་བའི་མདོངས་མཐའ་ལ། །བརྟེན་ནས་མཁས་མང་ལེགས་བྲིས་གྲལ་ན་མཛེས། །ཐོས་དོན་ཞིབ་མོར་དཔྱོད་ལ་ལྟ་བའི་མིག །མཁའ་སྟོང་ཕྱོགས་ལྡན་བསམ་པའི་ས་སྲུང་སྟེ། །རྣམ་པར་འགྱིང་ཁྱོད་གྲགས་པའི་མུ་ཁྱུད་པ། །འགྲན་ཆེད་ཅོ་འདྲིར་བགྱིད་སྙམ་འཕྱང་མོ་ཉུག །རྟག་ཆད་ཁུང་བུར་འཁྲུལ་སྒོམ་འཁྱིལ་བའི་ཉམས། །བདེ་བར་རློམ་པའི་ལོག་པའི་འབྲས་བུ་ལྕི། རྐྱོང་མིན་ཕག་གྲུའི་དགོངས་དོན་ལྟ་བའི་གཟུགས། །ཡིད་ཀྱི་བཞིན་སྣོད་འཆར་འདི་རྨད་དུ་བྱུང་། །མུ་མཐའ་ཡོངས་བྲལ་བགྱིད་པོས་གཏམ་གྱི་རྒྱུན། །དཔྱད་གསུམ་རྣམ་པར་དག་པའི་རྙོག་བྲལ་ཀླུང་། །འཕྲིན་ཡིག་ཡངས་པའི་ལམ་དུ་འགོག་མེད་པར། །རྒྱུ་བའི་ཚུལ་ལ་བསྐྱུད་པ་མེད་པར་འཚལ། །དབང་ཕྱོགས་ཡུལ་གྲུའི་ལུས་ཕྲའི་སྙིམ་པ་ཡིས། །ཐགས་ཀྱི་དྲ་བར་བསྐྲུན་པའི་འོད་དཀར་ཅན། །རི་མོའི་སྣང་བརྙན་མཛེས་པའི་སྒྱུ་རྩལ་སྤྱོད། །ཐུན་འཚམས་བརྒྱ་ཡི་སྒེག་མོས་ལེགས་འཁྱུད་དེ། །ཡལ་གའི་རི་དྭགས་མར་གད་གསར་པའི་གོས། །རབ་ཀླུབས་ཉིན་བྱེད་སྡིག་པའི་ཁྱིམ་སྤྱོད་པའི། །དཀར་པོའི་ཕྱོགས་ཀྱི་ཨི་ཡིག་འཆར་བའི་ཚེས། །གྲུ་འཛིན་གཉིས་པའི་གཞལ་མེད་ཁང་ནས་བྲིས། །ཕོ་བྲང་གོང་རི་དཀར་པོ་ནས་བསྟན་འཛིན་ཆོས་ཀྱི་རྒྱལ་པོས་ཤིང་བྱ་ལོ་གསར་ཕུལ་བའི་ལན་སྲིད་ཞིའི་ཕུན་ཚོགས་ཆར་འབེབ་པ། མཆོག་ཏུ་དགེ་བའི་དུས་(༤༦ན)
ཀྱི་ཆར་ཡང་བཞི་ལྡན་འབྱུང་བའི་གནམ་ལོ་གསར་པའི་དགའ་སྟོན་གྱི་དཔལ་མོ་རྣམ་པར་བཞད་པའི་གུས་སྟོན་གྱི་རྩེ་དགའ་ཁོང་ནས་དགོད་པའི་སྐབས་འདིར། ས་ཆེན་པོ་ལ་མངའ་བསྒྱུར་བའི་བཀའ་ཁྲིམས་ཀྱི་དབུ་རྨོག་བཙན་པོ་འཇིགས་པ་མེད་པའི་འོད་ཀྱིས་ཕྱོགས་ཀྱི་སྣང་བ་ཆེས་ཆེར་རྒྱས་ཤིང་ལེགས་བྱས་རྒྱ་མཚོའི་མ་མ་ལས་འོངས་པའི་ཉེ་བར་ལེན་པ་རབ་ཏུ་བརྟན་ཅིང་། འཕྲོག་བྱེད་ཀྱི་ཁྲིར་འགྱུར་མེད་གཡུང་དྲུང་གི་རང་བཞིན་དུ་གཡོ་བ་མེད་པའི་གཏམ་རྣ་བར་སོན་པས། ཛཡནྟུ་ཞེས་ཤིས་པ་བརྗོད་པའི་ཚིག་གིས་སྔུན་བསུས་ཏེ། སྒྲིབ་གཉིས་མུན་པའི་དགྲ་ལས་རྣམ་རྒྱལ་ཞིང་། །ཡེ་ཤེས་མཆོག་གི་འོད་རྣོན་འབར་བ་ཅན། །སྟོབས་བཅུའི་རྩལ་ལྡན་ཡོངས་ཀྱིས་གསེར་ལྡན་མ། །སྐྱོང་ཁྱོད་རྟག་ཏུ་དགེ་བའི་དངོས་པོ་སྩོལ། །གསེར་མངལ་ཅན་དང་མགྲིན་སྔོན་པད་དཀར་མིག །མིག་སྟོང་ཅན་སོགས་ཀུན་གྱིས་ཁྱོད་ཉིད་ལ། །ཕུན་ཚོགས་སྡེ་བཞིའི་མ་སྨད་འབྱོར་བའི་དཔྱིད། །འདོད་རྒུའི་ཆར་དུ་བསྙིལ་བའི་དཔལ་གྱུར་ཅིག །གང་གི་བསོད་ནམས་ལས་གྲུབ་སུ་ཝརྞའི། །ཡོལ་གོར་ཕྱུར་བུར་སྤུངས་པའི་ཆོས་སྲིད་ནོར། །སྐྱེ་རྒུའི་རེ་བ་སྐོང་བའི་དབང་གི་རྒྱལ། །ཕན་བདེའི་སྨན་ཡོན་ཆེད་དུ་འབར་གྱུར་ཅིག །བསམ་བློ་རབ་འབྱམས་པ་ཤེས་རབ་ཉི་མའི་འཕྲིན་ལན་མུན་པའི་མདའ་འཕེན།(༤༦བ)
ས རྦྦ ཛ ཡྻ ཛྙཱ རཱུ པཱ ནི རྟི༔ སུ མ ཏི ཤྩཱ ད རྴཱ ཙ། །བྷ ཝྱེ ཏཱ ཀཱི རྟི ཪྺ རྟེ རྐྐ རྞྞ རུ དྱ ས ར ཀྵ ཏྭཾ། རྒྱལ་(ཛ་ཏིའི་སྡེབ་སྦྱོར་འཕགས་མ།)ཀུན་མཁྱེན་པའི་གཟུགས་བརྙན་གར། །བློ་གྲོས་བཟང་པོའི་ཨཱ་དརྴར། །སྒྱུར་བའི་གྲགས་པ་སྲིད་འདིའི་རྣར། །མཛེས་པར་བྱེད་དེས་ཁྱོད་ལ་སྲུངས། །ལེགས་བྱས་ས་བོན་གླིང་ནས་སྨིན་པའི་འབྲས། །མངོན་མཐོའི་རྟེན་གྱི་མ་ལ་ཡར་སྐྱེས་ཤིང་། །ཚུལ་ཁྲིམས་དྲི་བསུང་སྤྲོ་བའི་གཉིས་སྐྱེས་ཀྱི། །འཕྲིན་ཡིག་རྟེན་གྱི་བདོག་པ་བསུག་པར་སན། །ཟླ་གཞོན་ཀུནྡ་སྨིན་ལེགས་བཞིན་མདངས་ཀྱིས། །ཆ་ཙམ་འགྲན་པའི་མཐུ་བྲལ་ལྷག་པའི་སེམས། །རིས་བྲལ་འགྲོ་ལ་དཀར་བའི་བསིལ་ཟེར་གྱིས། །ཡིད་སྲུབས་མུན་པའི་སྡེ་དཔུང་ཅིས་མི་འཇོམས། །ངེས་འབྱུང་ཁྲིམས་ཀྱི་བནྡྷུ་ཛི་ཝ་ཀ །ཅོད་པན་རྒྱན་གྱུར་རྣམ་འདྲེན་འཆི་མེད་གཙོའི། །རྗེས་ཞུགས་བློ་ལྡན་ཉེ་དབང་བསྟན་པ་གང་། །བཟུང་ཚེ་(༤༧ན)
ལེགས་བྱས་དགའ་སྟོན་ཚོགས་རྣམས་འཕེལ། །དུང་དུང་འགྲོ་ལ་བརྩེ་བའི་སྙིང་རྗེ་དང་། །ལྕི་ལྕི་གཞན་ཕན་ཁུར་འཁྱེར་བྱང་ཆུབ་སེམས། །དཀའ་དཀའི་སྟོབས་བཅུའི་གོ་འཕང་འཐོབ་པའི་ཆེད། །ཡང་ཡང་བསྟེན་པ་འདི་ཕྱིའི་དོན་གྱི་དཔྱིད། །འདྲེན་པ་མཆོག་གྱུར་མཆོག་དམན་ཀུན་གྱི་ལྷ། །ལྷ་མིའི་གཙུག་ན་གཙུག་གི་རྒྱན་ལྟར་མཛེས། །མཛེས་བརྗིད་རྒྱལ་སྲས་རྒྱལ་བ་རྣམས་ཀྱི་དཔལ། །དཔལ་ལྡན་འཇམ་དབྱངས་འཇམ་ཞིང་དུལ་བའི་གཟུགས། །མ་འདྲིས་འགྲོ་བའི་ཡིད་ཀྱི་ལྷ་ལམ་དུ། །རླུང་གི་རྒྱན་མཚན་ལྟ་བུར་སྟོན་མཁས་པ། །ཀུན་མཁྱེན་བཙོང་ཁ་པ་ཡི་རིང་ལུགས་མཆོག །འཆད་རྩོད་རྩོམ་པའི་ཚུལ་གྱིས་རྒྱས་པར་གྱིས། །དུ་བའི་ཏོག་གི་ལྷབ་ལྷུབ་གོས། །གྱོན་པའི་ཟད་པ་མེད་པ་ཡི། །གསར་ཚེས་བགྲང་བྱའི་རྟ་ཟླ་བའི། །ཨི་ཡིག་འཆར་བའི་ཚེས་ལ་བྲིས། །ཕོ་བྲང་སྣེའུ་གདོང་རྩེ་ནས་དཔལ་ལྡན་ལྷ་གཟིགས་མི་ཕམ་བསོད་ནམས་དབང་ཕྱུག་གྲགས་པ་རྣམ་རྒྱལ་དཔལ་བཟང་པོའི་ཆབ་ཤོག་གི་ལན་སྐལ་བཟང་ཟློས་གར་རྗོད་པའི་དབྱངས། རབ་འབྱམས་རྒྱལ་ཀུན་མཁྱེན་བརྩེའི་དགའ་ཚལ་ལས། །ལྷ་རིགས་རླངས་ཀྱི་ཡོངས་འདུ་གསར་པ་ཅན། །ལེགས་བྱས་རོ་བརྒྱའི་དཔལ་ཀུན་འཛིན་མཁས་པ། །ཆོས་སྲིད་རྒྱ་མཚོའི་དབང་ཕྱུག་རིན་པོ་ཆེར། །སྙན་འཇེབས་བཀའ་ཐམ་རི་དྭགས་མིག་ཅན་གཟུགས། །དོན་བཟང་དྲུག་སྐྱེས་གླུ་དབྱངས་ཆེར་འཁྲོལ་ཞིང་། །བདོག་པའི་སྐྱེས་ཀྱི་རྣ་རྒྱན་འོད་གཟིར་བཅས། །སུག་པའི་ནོར་འཛིན་ངོས་སུ་ཟློས་གར་སྒྱུར། །གངས་ཅན་སྐྱེ་རྒུའི་བསོད་ནམས་ཤིང་རྟ་ཡིས། །ཉེར་དྲངས་རླངས་ཀྱི་ཡིད་བཞིན་དབང་གི་རྒྱལ། །བྱང་ཆུབ་རྒྱལ་མཚན་ཞེས་གྲགས་ཕན་བདེའི་དཔྱིད། །རིགས་ཆོས་སྲིད་ཀྱི་མ་སྨད་བརྒྱུད་པ་ཀུན། །(༤༧བ)
བྱམས་ལྡན་མི་ཕམ་བསོད་ནམས་ཕུང་པོ་ལས། །དབང་ཕྱུག་ཡོན་ཏན་བརྒྱད་ཀྱིས་ཉེར་མཛེས་པའི། །རབ་སྙན་གྲགས་པ་རྣམ་པར་རྒྱལ་བའི་རྔས། །དཔལ་ལྡན་ཕག་གྲུའི་ལུགས་སྲོལ་བཟང་པོར་བྱས། །ས་ཆེན་བྱམས་པས་ཉེར་སྐྱོང་གྲགས་པ་ཀུན། །འབྱུང་གནས་ཕྱག་བཞེས་ངེས་གསང་ཐེག་པའི་སྲོལ། །གར་ཐིག་དབྱངས་སོགས་བསྙེན་ཅིང་སྒྲུབ་པའི་ཚུལ། །རིག་འཛིན་རྒྱ་མཚོའི་ངོ་མཚར་དེ་རྨད་བྱུང་། །འཕྲིན་ལས་ལྷ་ཚོགས་དཀྱིལ་འཁོར་རབ་བཀྲ་བ། །འདྲེན་བྱེད་དགའ་བདེར་སྤྱོད་པའི་ལང་ཚོའི་མཆོག །འཇིགས་རུང་ཁྲོ་བོའི་གར་གྱི་བདུད་སྡེའི་དཔུང་། །བཅོས་པས་པད་དཀར་མིག་ཀྱང་འདར་སྙམ་བྱེད། །ཆོས་སྲུང་རྒྱ་མཚོ་འབོད་པའི་ང་རོའི་དབྱངས། །དབྱར་སྐྱེས་སྒྲ་ཡི་ཁེངས་པ་ཆེས་ཆེར་འཕྲོག །སྣ་ཚོགས་རོལ་མོའི་སྐད་ཀྱིས་ཏམྦུ་རའི། །རྒྱུད་མང་སྟོང་གི་ཆ་ཀུན་གཅིག་ཏུ་བསྡུས། །ཨེ་མ་སྡེ་བཞི་མ་ལུས་སྤུངས་པ་ཡི། །དཔལ་ལྡན་མི་དབང་མཆོག་གི་རྒྱལ་ཁབ་ཆེར། །ནོར་ལྡན་སྐྱོང་བའི་རླངས་སྟོན་མི་ཡི་རྗེའི། །མཛད་བཟང་གཏམ་གྱིས་ཐོས་འཛིན་དགའ་སྟོན་བྱས། །ཟ་ཧོར་རིགས་ལས་ཀུན་མཁྱེན་བཙོང་ཁ་པའི། །རིང་ལུགས་འཛིན་རློམ་སྡོམ་བརྩོན་ཀློག་པ་མཁན། །ཐོས་བསམ་སྒོམ་པར་ཅུང་ཟད་གཞོལ་བ་དང་། །མི་དམན་ལྷག་པའི་བསམ་པ་དཀར་བར་གནས། །མཐོ་བཙུན་གདུང་དང་དམ་པའི་ངང་ཚུལ་ཀུན། །མཛད་བཟང་སྔར་ལྟར་ཉམས་པ་མེད་པ་ནས། །ཕེབས་ཚོགས་སྐྱེས་ཀྱི་ཡན་ལག་བརྒྱད་ལྡན་ཆབ། །བཀའ་ཐམ་ལམ་གསུམ་ངོས་སུ་ཆད་མེད་འཚལ། །རབ་དཀར་ཐགས་ཀྱི་ཟླ་གཞོན་ཅན། །རི་དྭགས་རྒྱ་ཡིས་མཛེས་བཞིན་དུ། །དམར་ཕྱོགས་དགའ་བ་དང་པོ་ལ། །གྲུ་འཛིན་གཉིས་པའི་རྩེ་ནས་ཕུལ། གཞུང་ལུགས་མང་པོར་ཐོས་པའི་དཔྱོད་ལྡན་སྐུ་འབུམ་ཆོས་རྗེ་དོན་གྲུབ་རྒྱ་མཚོའི་འཕྲིན་ལན་བློ་གསལ་དབྱར་རྔ། (༤༨ན)
མ དྱ ཀྵ ཡ ཤྩ མེ གྷ༔ སུ བྷ གཀ རྞེ མ དྷུ རྱ སུ། །ཨཱ ཛྙཱ ཀཱི རྟི ཛི ཤཱ སཱ། རྦྷ ཏ ཛྱཱ བ ར ཤུ བྷྱ ཀྲྀ། །བློ་(སྡེབ་སྦྱོར་ཁ་སྒོ་ཕན་པ།)གྲོས་མི་ཟད་དབྱར་ཀྱི་རྔ། །སྐལ་བཟང་རྣ་བར་ལེགས་སྙན་པ། །གྲགས་པ་ཀུན་མཁྱེན་ཐུབ་བསྟན་དཔྱིད། །རྒྱལ་མཆོག་དེ་ཡིས་དགེ་བར་མཛོད། །དོན་གཉིས་ཡིད་བཞིན་རིན་ཅེན་དབང་གི་རྒྱལ། །བློ་གྲོས་གཟིངས་ལས་གྲུབ་པའི་རྣམ་དཔྱོད་ཀྱིས། །གསུང་རབ་རྒྱ་མཚོར་བགྲོད་པའི་བློ་ལྡན་དེའི། །འཕྲིན་ཡིག་རྟེན་གྱི་བདོག་པ་སྙིམ་པར་སོན། །ལེགས་བྱས་ཆར་གྱིས་རིང་ནས་བསྐྲུན་པ་ཡི། །ཟག་ཕུང་ལང་ཚོ་རྒྱས་པའི་པདྨ་དཀར། །ལེགས་བཤད་སྦྲང་རྩི་གཡོ་བའི་དགའ་སྟོན་ལ། །བློ་གསལ་བུང་བ་ལང་ལོང་གཡོ་བའི་གཏམ། །ཐོས་འཛིན་རྒྱན་གྱི་འཕྲེང་བར་དངར་བའི་ཚེ། །ཨེ་མ་རྒྱལ་བའི་ཏོག་གྱུར་བཙོང་ཁ་པའི། །རིང་ལུགས་ཕྱོགས་དེར་གསལ་ཕྱིར་མཁས་རྣམས་ཀྱི། །རྣམ་གསུམ་བྱ་བའི་ཚུལ་དུ་ད་གདོད་(༤༨བ)
ཁུམས། །ཀྱེ་མ་དེང་དུས་རབ་སྨིན་འབྲས་བུའི་ཁུར། །མི་ལྡན་ལོ་འདབ་ཕང་ཕུང་ཙམ་གཡོ་བར། །དཔག་བསམ་ལྗོན་པའི་ཤིང་དང་ཆབས་གཅིག་ཏུ། །བསྒྲིགས་པའི་ཚེར་མ་ཅན་གྱི་རྐང་འཐུང་མང་། །དཀའ་གནད་རྒྱལ་བའི་གསུང་རབ་མདུད་པ་ཀུན། །ཇི་བཞིན་འགྲོལ་བར་ནུས་པའི་བློ་གྲོས་ཀྱིས། །འཆད་རྩོད་རྩོམ་པས་བློ་བཟང་རྒྱལ་བསྟན་ལ། །བྱ་བ་བྱས་པར་དངོས་ཅག་ལྷག་པར་རངས། །འཇམ་དཔལ་སྙིང་པོའི་རིང་ལུགས་ཤིང་རྟ་ཆེ། །མང་དུ་ཐོས་པས་འདྲེན་པའི་སྤོབས་པ་ཅན། །སྡོམ་བརྩོན་ཀློག་པ་མཁན་ཡང་གཞུང་ལུགས་རྣམས། །བརྒལ་བརྟག་རིགས་པའི་དཔྱད་བཟོད་སྐབས་ན་མཆིས། །རྒྱལ་པོའི་ཆོས་ཚུལ་མཐའ་ཀླས་ནམ་མཁའི་ཁྱོན། །མཁྱེན་པའི་ཚད་ཀྱིས་འཇལ་ལ་ཟླ་བྲལ་བའི། །ཀུན་མཁྱེན་བཙོང་ཁ་པ་དེའི་རིང་ལུགས་ལ། །སྔར་བཞིན་མཁས་པའི་བྱ་བ་བྱེད་པར་རིགས། །སྙན་ཚིག་ཡི་གེར་གྲུབ་པའི་ཆུ་ཤེལ་དབང་། །བརྗོད་དོན་རི་དྭགས་མཚན་མ་རབ་བཀྲ་བ། །རྟེན་གྱི་ཆ་ཤས་རྫོགས་པའི་མཛེས་སྡུག་ལ། །ཐུན་འཚམས་རྒྱ་ཡིས་མི་ཕྱེད་དམ་དུ་འཁྱུད། །ལེགས་སྦྱར་སྐད་དུ་ཨཀྵ་ཡར། །འབོད་པ་ཕྱོགས་འདིར་མི་ཟད་པའི། །གྲོ་ཞུན་ཟླ་བའི་དམར་ཕྱོགས་ཀྱི། །རྒྱལ་བ་གསུམ་པའི་ཚེས་ལ་བྲིས། །ཟུང་ཆུ་རོང་ཚང་འདུལ་བ་སློབ་དཔོན་པ་གོང་དུ་འགྲོ་བའི་ཚེ་ཕུལ་བའི་ཞུ་ཡིག་ཕྱོགས་ལས་རྣམ་པར་རྒྱལ་པའི་གཏམ། རྨད་བྱུང་བསོད་ནམས་ཆུ་གཏེར་ཆེན་པོ་ལས། །ཕན་དང་བདེ་བའི་འོད་ཟེར་སྟོང་ལྡན་པ། །སྟོབས་ཀྱི་འཁོར་ལོས་སྒྱུར་བའི་ཉིན་བྱེད་དབང་། །ཚངས་པ་མི་ཡི་གཟུགས་ཅན་མཆོག་གི་དྲུང་། །ཆོས་སྲིད་མཛད་པའི་ཟླ་གཞོན་གསར་པ་ཡིས། །རྫོགས་ལྡན་ཀུནྡ་རབ་བཞད་སྙན་པའི་རྔ། །ཡང་ཡང་ཐོས་འཛིན་ལམ་དུ་སོན་པ་ཡིས། །མི་ཕྱེད་དང་བའི་ཡིད་ཀྱིས་མཆིད་(༤༩ན)
འདི་ཞུ། །དེང་དུས་བསོད་ནམས་རིན་ཅེན་བྱེ་བ་ཡིས། །ཕུང་པོར་སྤུངས་པའི་ཟོང་གིས་ཆེར་བསྒྲུབས་པས། །འཆི་མེད་བདག་པོའི་ལང་ཚོ་རྒྱས་པའི་དཔྱིད། །འདྲེན་བྱེད་བདུད་རྩིའི་དཔལ་གྱི་མཛེས་བརྗིད་སྐུ། །མཐོང་ན་མི་མཐུན་མེད་པའི་ངོ་མཚར་གྱིས། །མངའ་འབངས་སྐྱེ་བོའི་དགའ་བ་སྐྱེད་པ་དང་། །ཉི་འོག་རྒྱལ་ཕྲན་གྲངས་མེད་ཁེངས་པ་ཀུན། །ཅིག་ཅར་འཕྲོག་པའི་སྐལ་བཟང་འདི་རྨད་བྱུང་། །ཚངས་དབྱངས་མགྲིན་པར་ལེན་པའི་གསུང་གི་གདངས། །རྣ་བའི་ཡོལ་གོར་ཟའཇོ་བའི་བདུད་རྩིའི་དཔྱིད། །ཡིད་ཀྱི་ཀུན་དགའ་གསར་དུ་སྐྱེད་པ་འདིས། །མཐའ་ཀླས་ལུས་ཅན་ཚོགས་ཀྱི་དབུགས་ཕྱུང་སྙམ། །བསྟན་འགྲོ་དགེ་ལེགས་གསེར་ལྡན་དགའ་མའི་ལྕིད། །གྱེན་དུ་འདེགས་པའི་སྙིང་སྟོབས་རུས་སྦལ་ཁུར། །མཐའ་བྲལ་ཟབ་ཅིང་རྟོགས་དཀའ་མཁྱེན་པའི་ཐུགས། །ཚངས་པའི་བློ་ཡི་དཔེ་ཟླར་བྱས་པ་བཞིན། །འགྲོ་ལ་རྗེས་ཆགས་འཕགས་ཆེན་དམ་པ་རྣམས། །ཆོས་ལྡན་རྒྱལ་པོར་བསམས་བཞིན་སྲིད་བཟུང་བའི། །གསང་གསུམ་རྡོ་རྗེའི་རང་བཞིན་ཕྱོགས་ཀུན་ལས། །རྣམ་པར་རྒྱལ་འདིས་ཡིད་ཀྱི་སྤྲོ་དགའ་འཕེལ། །རྒྱལ་བའི་རིང་ལུགས་ཤིང་རྟ་རྩོད་དུས་ཀྱི། །འདམ་ལས་འདྲེན་འདོད་ལྷག་པའི་བསམ་པ་ཅན། །དངོས་ཅག་གང་གི་བཀའ་ཁྲིམས་གདུགས་དཀར་གྱི། །གྲིབ་བསིལ་དག་ལ་བདེ་བར་འཚོ་ཞིང་མཆིས། །ཨེ་མ་ཀུན་ལ་བརྩེ་ལྡན་བྱམས་པ་ཡིས། །འཛམ་གླིང་རྣམས་ལ་བདེ་བའི་ངལ་གསོའི་ནོར། །འདོད་རྒུའི་ཆར་དུ་བསྙིལ་བའི་དགའ་སྟོན་ལ། །མེ་ཏོག་ཕལ་ཆེར་འཛུམ་ཞིང་དགོད་པ་འདྲ། །མི་བསྲུན་སྐྱེ་བོ་འདུལ་ལ་རྡོ་རྗེའི་ཐོག །འགྲོ་བའི་རེ་འདོད་སྐོང་ལ་དཔག་བསམ་ལྗོན། །ལེགས་ཉེས་རྣམ་པར་དཔྱོད་ལ་འཇམ་དཔལ་དབྱངས། །འཛམ་གླིང་སྐྱེ་བོའི་གཉེན་དུ་(༤༩བ)
དེར་འདིར་གྲུབ། །ལྷ་གཅིག་གང་གི་སྡེ་བཞིའི་ཡོན་ཏན་ཀུན། །འཕྱུར་བུར་སྤུངས་པ་ཤོང་བའི་ཡོལ་གོ་རུ། །འཇིག་རྟེན་བྱེད་པོས་བརྒྱ་ཕྲག་ཐབས་མཁས་ཀྱིས། །ཡངས་པའི་སྣོད་ཀྱི་ཁམས་འདི་བསྐྲུན་པར་ངེས། །འཇམ་མགོན་ས་སྤྱོད་སྒྱུ་འཕྲུལ་དྲ་བའི་གར། །མངོན་པར་སྒྱུར་བ་མཁྱེན་བརྩེ་ནུས་པའི་བདག །བླང་དོར་མ་འདྲེས་འབྱེད་པའི་སྙན་དབང་དུ། །གཏམ་གྱི་ཕྲེང་བའི་དཀའ་ཐུབ་ངལ་བའི་རྒྱུ། །འོན་ཀྱང་དབྱར་དུས་སྤྲིན་དཀར་ལང་ལོང་དབུས། །འབྲུག་སྒྲ་དལ་གྱིས་སྒྲོག་པའི་སྒྲ་དབྱངས་ལ། །རྨ་བྱ་དགའ་བའི་རྩེད་འཇོར་རོལ་བའི་གར། །ལན་བརྒྱར་སྒྱུར་ལ་སུ་ཞིག་ཀླན་ཀ་འཇུག །ལྕགས་ཁམས་རྩེ་ཡི་འཛམ་བུའི་གསེར་སྦྱངས་སུ། །བསྒྱུར་ཏེ་མི་ཟད་ལོངས་སྤྱོད་སྤེལ་བ་ལྟར། །རྒྱལ་ཁྲིམས་དགེ་བཅུར་སྒྱུར་བའི་བཀའ་སྲོལ་གྱིས། །རང་གཞན་ཕན་བདེའི་རྩ་བ་བླ་ན་མེད། །གྲངས་མེད་སེམས་ཅན་ལེགས་པའི་ལམ་དག་ལ། །སྦྱོར་ཕྱིར་མཐའ་ཡས་རྒྱལ་དང་རྒྱལ་བའི་སྲས། །སྟོབས་ལྡན་རྒྱལ་པོར་སྐྱེ་བའི་སྲིད་འཛིན་པའི། །ཚུལ་འདི་ཐུགས་ཀྱི་མཛོད་དུ་གཏམས་པར་རིགས། །བདེ་ལེགས་འབུམ་ཕྲག་བསིལ་ཟེར་འབྱུང་བའི་མཛོད། །ཆོས་སྲིད་ཆ་ཤས་ཡོངས་སུ་གང་བའི་དཔལ། །འགྲོ་བའི་གཉེན་གཅིག་ས་དབང་འོད་དཀར་ཅན། །བསྐལ་བརྒྱར་མི་འགྱུར་ཞབས་པད་བརྟན་གྱུར་ཅིག །བསམ་ཡས་གནོད་སྦྱིན་ཆེན་པོའི་རྡོ་རྗེའི་གསུང་གི་ལན་སྦུབ་ཆོལ་ཆེ་ལེགས་སོགས་སྤྱན་གཟིགས་དང་བཅས་གསོལ་བ་སྒྲ་འཛིན་དགྱེས་རྒུར་སྐྱོད་པའི་སྐལ་བསང་། མི་འགྱུར་བདེ་ཆེན་ལྷ་ལམ་ཡངས་པ་ལས། །མཁྱེན་བརྩེ་ནུས་པའི་ཆུ་འཛིན་ཟློས་གར་ཅན། །ཕན་དང་བདེ་བའི་གྲུ་ཆར་འགྲོ་ཀུན་ལ། །སྩོལ་མཛད་པདྨ་ཀ་རས་དངོས་གྲུབ་སྩོལ། །གང་དེས་ཁྲག་འཐུང་པདྨ་དབང་(༥༠ན)
ཆེན་དང་། །འཇིག་རྟེན་དྲེགས་པའི་དཀྱིལ་འཁོར་དུ་བཅུག་ནས། །གངས་ཅན་རྒྱལ་བསྟན་ཡོངས་ཀྱི་སྲུང་མ་རུ། །ལེགས་བསྒོས་སྤྲུལ་པའི་ཆོས་རྒྱལ་ཆེན་པོ་ཡི། །དཔལ་གྱི་རི་མོ་གསུམ་པ་ལས་འོངས་པའི། །རྡོ་རྗེའི་ཚིག་གི་སྒྱུ་འཕྲུལ་དྲ་བའི་གར། །སྣ་ཚོགས་རི་མོའི་འཕྲེང་བར་ཡོངས་འཆར་བའི། །བཀའ་རྟགས་ལང་ཚོའི་ཕྱག་རྒྱ་མ་ཉམས་འབྱོར། །ཙཱི་ཎའི་ཡུལ་གྲུ་ལས་འོངས་བརྗིད་པའི་སྒྲ །མི་ཟད་འདོད་འཇོ་ཐོས་འཛིན་དགྱེས་སྐྱེད་དང་། །རོ་བརྒྱའི་དཔལ་ལྡན་རྐང་འཐུང་ཕུད་མ་གང་། །སྟོང་འཁུན་ཡུལ་གྱི་བཟོ་དབྱིབས་ཉམས་པ་མེད། །རབ་དཀར་ཆུ་ཤེལ་དབང་པོ་ཞུན་མ་དག །ཐགས་སུ་གྲུབ་ལྟའི་གན་དར་སྙན་ཤལ་ལ། །ཐུན་འཚམས་རྣམ་པར་བདོ་བའི་གཞོན་ནུ་མས། །མི་ཕྱེད་རྒྱ་ཡིས་དམ་དུ་ལེགས་བཅིངས་ནས། །བསིལ་སྦྱིན་མཁན་པོ་དབྱུག་པའི་དགའ་མ་དང་། །རྩེ་དགར་སྤྱོད་པའི་དཔའ་བོའི་དགའ་སྟོན་ཆེ། །དཔལ་ལྡན་གནོད་སྦྱིན་སྤྱན་སྔར་འབུལ་བགྱིད་ན། །འཕྲིན་ལས་རྣམ་བཞིའི་དོན་ཀུན་འགྲུབ་པར་མཛོད། །ཕོ་བྲང་ཆེན་པོ་སྣེའུ་གདོང་རྩེ་ནས་ཞབས་དྲུང་རིན་པོ་ཆེ་ལྷ་གཟིགས་བློ་བཟང་མཁྱེན་བརྩེའི་དབང་ཕྱུག་ནོར་འཛིན་ཆོས་ཀྱི་རྒྱལ་པོ་ངག་གི་ལྷའི་བཀའ་ཐམ་ལན་མང་ཐོས་བཟུང་བའི་ཅོད་པན། བློ་གྲོས་བཟང་པོའི་ཆུ་གཏེར་ལས་འོངས་པའི། །མཁྱེན་བརྩེའི་ཉིན་བྱེད་དབང་ཕྱུག་ཡོན་ཏན་འོད། །ནོར་འཛིན་ཀུན་ལ་འགྱེད་པའི་ཆོས་ཀྱི་རྒྱལ། །ངག་གི་དཔལ་གྱུར་ལྷ་རིགས་དམ་པའི་དྲུང་། །རིང་མིན་མཆོག་ཏུ་དགེ་བའི་དུས་ཀྱི་ཆར། །ལེགས་བྱས་ལང་ཚོ་དར་བའི་ཡོངས་འདུའི་སྐུ། །ཕུལ་བྱུང་རྣམ་དཔྱོད་ཡལ་འདབ་གཡུར་ཟའི་རྩེར། །ངོ་མཚར་མཛད་པའི་འབྲས་བུ་རྒྱས་པ་ནས། །བཀའ་ཐམ་ཆུ་འཛིན་གསར་པའི་(༥༠བ)
མངལ་ཁུར་ལས། །སྙན་ཚིག་རི་མོར་འཕོས་པའི་དབྱར་སྐྱེས་རྔ། །བདོག་པའི་སྐྱེས་ཀྱི་གྲུ་ཆར་གཡོ་བཞིན་དུ། །ཐུན་མཚམས་ཕྱག་རྒྱའི་མདངས་དང་ལྷན་ཅིག་སོན། །སྔོན་རབས་མཛད་པའི་རྣམ་ཐར་དཀར་པོའི་གདུགས། །ཕུལ་བྱུང་སྡེ་བཞིའི་ནོར་བུའི་ཡུ་བ་ཅན། །ཀུན་ལ་ཕན་བདེའི་གྲིབ་བསིལ་སྟེར་བྱེད་དེ། །འཛིན་མཁས་ལྷ་རིགས་རླངས་སྟོན་ཁྱོད་དུ་ངེས། །གསང་བདག་མི་ཡི་སྲིད་བཟུང་བྱང་རྒྱལ་དང་། །ས་སྐྱོང་ཐམས་ཅད་མཁྱེན་པ་གྲགས་འབྱུང་གི །ལུགས་ཟུང་མཛད་པའི་རིན་ཅེན་མུ་ཀུ་ཊ། །ལྷ་གཅིག་ཅོད་པན་རྒྱན་དུ་འཆིང་བར་མཛོད། །དམ་པའི་ཡོན་ཏན་ཆ་ཤས་ཡོངས་གང་ཞིང་། །ལེགས་བྱས་འོད་དཀར་གྲངས་མེད་སྤྲོ་མཁས་པ། །འཆི་མེད་རིགས་ཀྱི་ཆུ་ཤེལ་དབང་པོ་གང་། །རིན་ཅེན་བརྩེགས་པའི་ཁྲི་ལ་བརྟན་གྱུར་ཅིག །ངག་དབང་ལྷ་མོའི་མགྲིན་པ་ལས་འོངས་པའི། །ཉམས་དང་འགྱུར་བ་སྟོང་གི་སྙན་ཚིག་ལྟར། །ཕེབས་ཚོགས་གཏམ་གྱི་སྦྱོར་བ་ཇི་སྙེད་པ། །ཛཧྣུ་ཡི་བུ་མོར་ཅོ་འདྲིར་ཞུ། །བསིལ་སྦྱིན་མཁན་པོ་ཐགས་སུ་གྲུབ་པ་ལ། །འཚམས་སྤྲིན་རྟགས་ཀྱིས་ཉེ་བར་འཁྱུད་བཞིན་དུ། །སྨིན་དྲུག་ཅན་གྱི་དམར་ཕྱོགས་གང་བ་ལ། །གྲུ་འཛིན་གཉིས་པའི་གཞལ་མེད་ཁང་ནས་ཕུལ། །བཙུན་མོ་ཚལ་དུ་ཚངས་པ་དུང་གི་ཐོར་ཚུགས་ཅན་སྤྱན་གཟིགས་ཚོགས་འཁོར་དང་བཅས་ཏེ་འཕྲིན་དུ་གསོལ་བ་ལྐོག་གྱུར་རྙོག་མ་དྲུངས་བྱེད་ནོར་བུ། ཉི་གཞོན་དང་འདྲེས་ཤེལ་དཀར་ལྕུག་ཕྲན་ཅན། །སྔོན་མེད་མཚན་དཔེས་འཁྱུད་པའི་རི་དྭགས་མིག །འཇམ་དབྱངས་དགྱེས་རྒུར་སྤྱོད་ལ་སྒེག་མོའི་གཟུགས། །གསེར་མངལ་སྲས་ཀྱི་དུས་ཀུན་ཤིས་པར་མཛོད། །ཕུལ་བྱུང་པདྨའི་རིགས་ཀྱི་མཁའ་དབྱིངས་ལས། །གྲངས་མེད་སྤྲུལ་སྐུའི་རྣམ་རོལ་(༥༡ན)
རྟ་ལྗང་ཅན། །དབྱིག་འཛིན་བསིལ་རིས་བསྐོར་བའི་དགའ་ཚལ་འདིར། །ཐེག་མཆོག་ངེས་གསང་པད་དཀར་མངོན་རྒྱས་ཚེ། །མཐུ་ལྡན་སྟོབས་ཀྱིས་དབང་སྒྱུར་དགེ་བསྙེན་ཆེ། །མཆོད་བསྟོད་འཇིག་རྟེན་དྲེགས་པའི་དཀྱིལ་འཁོར་དུ། །ལེགས་བཅུག་ཕན་བདེའི་རྩ་ལག་རྒྱལ་བའི་བསྟན། །སྲུང་ཞིང་སྐྱོང་བར་གཉེར་གཏད་རྣམ་བཞིའི་ལས། །བསིལ་སྦྱིན་མཁན་པོ་མཁའ་ལ་རྟག་རྒྱུ་ཞིང་། །ཀུནྡ་བཞད་ལ་འགོག་པ་མེད་པ་ལྟར། །མི་འདའ་རྡོ་རྗེའི་དམ་ཚིག་གཉེན་པོ་ཡིས། །དུས་ཀུན་གཡེལ་མེད་སྒྲུབ་ལས་གཞན་དུ་ཅི། །གང་གིས་འབྱུང་འགྱུར་མཐའ་དག་རྗེན་པ་རུ། །སྟོན་པའི་ཚུལ་འདིར་ངེས་པའི་དད་པ་ཡིན། །ཅུང་ཟད་ཕོ་ཉའི་ངག་ནས་གསོལ་བ་ལ། །འགྱུར་མེད་རྡོ་རྗེའི་གསང་ཚིག་ལྷུག་པར་སྩོལ། །སྣ་ཚོགས་ཕྱི་ཡི་མཆོད་པ་མཚོན་པའི་སླད། །དབང་ཕྱོགས་ཁབ་ལས་ལེགས་འོངས་རབ་དཀར་དར། །ལྗོན་པའི་ཤིང་གི་ལོ་མའི་ཕུར་མ་དང་། །སྲ་ཞིང་བརྟན་པའི་གོ་ཆ་དང་བཅས་ཏེ། །ཉིན་མོར་བྱེད་པའི་དབང་པོ་སྨིན་ལེགས་མའི། ཁྱིམ་དུ་ལེགས་སྤྱོད་ཁྲུམས་ཀྱིས་ཉ་བའི་ཟླར། །འཕྲུལ་སྣང་གཙུག་ལག་ཁང་བཟང་འོད་ཟེར་གྱིས། །ལེགས་བསྐྱངས་དགའ་ལྡན་ཁང་གསར་ནས་བྲིས་དགེ །མདོ་སྔགས་ཀྱི་གཞུང་ལུགས་ལ་བློ་གྲོས་དང་བརྩོན་འགྲུས་གཉིས་ལྡན་གི་སྒོ་ནས་འཆད་རྩོད་མཁས་པའི་བྱ་བར་རྣམ་དཔྱོད་ཡངས་པའི་བཤེས་གཉེན་འོད་ཁ་བསམ་གླིང་སློབ་དཔོན་བསྟན་པ་རྒྱ་མཚོ་ལ་སྤྲིངས་པ་མཁས་རྣམས་སྤྲོ་བ་སྐྱེད་བྱེད་སྙིང་གི་གདུང་སེལ། (༥༡བ)
སུ ཧྱ ཏྲི ཛི ས རྦོ མ ཎྜ ལ ཙ ནྡྲ སུ བྷཱི ཀཱི རྟི པྲ ས མ བྷ༔ ཀྲ ཏྶ རྦ ཛྙཱ མྲ ཏ སུ ར ཙ ཏྭ དྷྱཱ༔ ཀ ར ཎྜ བུ ཥ ཀྲྀ །རྒྱལ་(ཛ་ཏིའི་སྡེབ་སྦྱོར་འཕགས་མ།)བ་རྣམས་ཀྱི་གསང་གསུམ་དཀྱིལ་འཁོར་ཀུན། །རབ་རྫོགས་བློ་བཟང་གྲགས་པ་འོད་དཀར་ཅན། །ཤེས་བྱ་ཐམས་ཅད་མཁྱེན་པའི་བདུད་རྩིའི་བཅུད། ཁྱོད་བློའི་ཟ་མ་ཏོག་དུ་རྒྱས་པར་མཛོད། །རྣམ་འདྲེན་བླ་ན་མེད་པའི་བསྟན་པ་ཡི། །གསུང་རབ་རྒྱ་མཚོར་བགྲོད་པར་རྣམ་དཔྱོད་གྲུ། །སྐྱེས་ཐོབ་ཤེས་རབ་ལྗོན་པ་ལས་གྲུབ་པ། །བརྒལ་བརྟག་རྫས་ལྡན་མང་ཐོས་སྒྲ་འཛིན་དེར། །འཇིགས་མེད་སྲ་བའི་རྡོ་རྗེའི་རྗེས་འགྲོ་བའི། །ལེགས་བྱས་དཔྱིད་ཀྱིས་བསྐྱངས་པའི་ལག་ལེན་གྱི། །འཁྲི་ཤིང་མྱུ་གུ་ལང་ཚོ་དར་བའི་རྩེར། །ཐོས་བསམ་སྒོམ་པའི་འབྲས་བུས་དུད་ལས་ཅི། །རིང་ནས་ས་བོན་ཉལ་འགྲོ་ཕན་པའི་གྲོགས། །དུ་མས་ཡུན་དུ་བསྲིངས་ལས་ཡལ་འདབ་དང་། །དྲི་བསུང་མངར་བའི་ལག་འགྲོའི་སྙིང་པོ་རྣམས། །ཚེར་མའི་ཤིང་དང་ལྷན་ཅིག་བསྒྲིགས་པས་ནོངས། །(༥༢ན)
རྣམ་དཔྱོད་པདྨའི་སྐུད་པ་ལྟར་ཕྲ་ཞིང་། །རྒྱལ་གསུང་ལོག་པར་སྨྲ་བའི་ལྟོ་འགྲོའི་ལྕེ། །རབ་རྐྱོང་རྨོངས་ཚིག་ཕུད་སྒྲ་ཆེར་སྒྲོག་པས། །བསིལ་ལྡན་གང་བའི་འདྲེན་བྱེད་ཀྱིས་མཐོང་ངམ། །སྤྲིན་བྲལ་ཀུན་གསལ་ངོས་སུ་སྐར་ཕྲན་གཟུགས། །ཕྲ་མོའི་འོད་སྣང་མཆིས་ལ་ས་མོས་དག །འདབ་བརྒྱ་མངོན་པར་རྒྱས་པའི་ཕང་ཕུང་གིས། །རེ་བ་སྐོང་འདོད་མིག་ཡུལ་གྱུར་ཏམ་ཅི། །སྦོམ་ཞིང་རིང་སོགས་ལྗོན་ཤིང་སྡོང་པོའི་རྩལ། །མངོན་པར་རྫོགས་པའི་རྐང་འཐུང་འཕྲེང་བ་རྣམས། །བོར་ཏེ་ཚེར་མ་ཅན་གྱི་ལྕུག་ཕྲན་དག །ཁང་བཟང་གདུང་འདེགས་བྱེད་ཅེས་སྨྲ་ཐོས་སམ། །ན་ཚོད་གསར་པའི་དབྱར་སྐྱེས་གཞོན་ནུའི་འབྲས། །རླན་གཤེར་ཐོས་པའི་དཀའ་སྤྱད་ཀྱིས་སྨིན་པའི། །མཁས་མང་མགོ་སྐྱེས་འདབ་མ་སེར་པོ་རྣམས། །ཟང་ཟིང་མེད་ཅེས་བླུན་པོས་རྩ་ལྟར་འདོར། །ཚེ་རབས་སྔ་ཕྱི་མེད་པའི་འགྲོ་བ་དག །མེད་ཕྱིར་སྐྱེ་བ་ཙམ་ལ་སུ་ཞིག་མཚར། །མོང་རྟུལ་རིགས་མཐུན་དབུས་ན་ཆེན་པོའི་གར། །འགྱིང་བ་ཡིས་ཀྱང་ཐུབ་བསྟན་ཆེས་ཆེར་ཉམས། ཁྱོད་ཀྱི་མང་ཐོས་ཡོན་ཏན་ནོར་བུའི་དཔྱ། །གཟིགས་མོར་མཚར་ཞེས་སྐར་ཚོགས་མཁའ་ལ་རྒྱུ། །རྣམ་དཔྱོད་འོད་མདངས་མ་བཟོད་ཉིན་བྱེད་དབང་། །རིངས་པར་ཆུ་ལྷའི་ཕྱོགས་སུ་བྲོས་སམ་སྙམ། །ན་ཚོད་ཡོལ་ཀྱང་ཐོས་བསམ་ལ་བརྩོན་པས། །དཔྱོད་ལྡན་མཁས་རྣམས་རྗེས་སུ་ཡི་རང་དང་། བླུན་པོ་ཚུལ་འཆོས་ཡིད་ཀྱི་ཨཱ་དརྴར། །མི་སྡུག་གར་དེ་སྒྱུར་ལ་བྲེལ་གྱི་དོགས། །བུ་རམ་ཤིང་པའི་རིང་ལུགས་དྲི་མེད་ཀྱི། །བླ་ན་མངོན་པར་མཐོ་བའི་བཙོང་ཁ་པ། །དམ་པ་གང་དེའི་ལེགས་བཤད་བདུད་རྩིའི་རྒྱུན། །སྙིང་གི་ཡོལ་གོར་སྤུངས་ཤིག་བློ་ལྡན་ཀྱེ། །དབང་ཕྱོགས་གནམ་བསྐོས་རྒྱལ་པོའི་གན་མཛོད་ལས། །འོངས་པའི་རྐང་འཐུང་ཕུར་མའི་འདབ་མ་དག །བློ་ལྡན་སྐྱེམས་སུ་འོས་ཕྱིར་རྟགས་ཀྱི་རྒྱ། །འཚམས་སྤྲིན་གསར་པའི་ལང་ཚོ་རྣམ་པར་འཕྲོས། །དུས་འཁོར་བའི་དཀར་(༥༢བ)
ཕྱོགས་ཀྱི་རྒྱལ་བ་གསུམ་པ། མུན་པའི་མུན་པ་གསལ་བ་ཆེན་པོའི་ལང་ཚོ། ཡོན་ཏན་གྱི་ཡི་གེ་ཨར་རྣམས་འཆར་ཞིང་། དབྱངས་འཆར་བའི་དམར་ཕྱོགས་ཀྱི་རྒྱལ་བ་གསུམ་པ། དབྱངས་ཨུ། གསལ་བྱེད་ཛྷ། འདོད་ཡོན་དྲི་འཆར་བའི་ཚེ་དགའ་ལྡན་ཕོ་བྲང་ནས་བྲིས། །གོང་མ་རྒྱལ་པོ་ཧོང་དེའི་དྲུང་དུ་ཨོ་བ་ཤི་པཱ་ཐའི་ཇི་བཏང་བའི་དུས་ཕུལ་བའི་ཞུ་ཡིག་འཁོར་ལོས་སྦྱར་བའི་གཏམ་སྙན། ཎི རཱ བྷོ གཱ ཏི ཤྱ གུ ཎཱ ནཱ ས མུ དྲཱ ཛི བ ཏྲི ཀ༔ ཨཱཛྙཱ ཤཱ ཀྱེ ཤྭ རེ ཎ ཤྲེ ཡ ལ ཙྪ བྷཱུ མི པཱ ལ ཧ། །ཕུལ་(སྡེབ་སྦྱོར་ཁ་སྒོ་ཕན་པ།)བྱུང་ཡོན་ཏན་ཆུ་གཏེར་ལས། །དོན་ཀུན་ལྷུན་གྲུབ་བསིལ་སྦྱིན་མཁན། །ཀུན་མཁྱེན་ཤཱཀྱའི་དབང་ཕྱུག་གིས། །ནོར་འཛིན་སྐྱོང་དེར་དགེ་ལེགས་སྩོལ། །(༥༣ན)
བློ་གྲོས་གདུགས་དཀར་གསར་པའི་གྲིབ་བསིལ་ལ། །བཟང་པོའི་ལེགས་བྱས་ངལ་གསོར་བགྱིད་པའི་གནས། །གྲགས་སྙན་ཕྱོགས་བྲལ་ཁྱབ་པའི་རིགས་ཀྱི་བདག །རྣམ་འདྲེན་བཙོང་ཁ་པ་ཡི་རིང་ལུགས་ལ། །རྣམ་དཔྱོད་གསར་པས་ཡོངས་བསྐྲུན་དད་པའི་དཔྱིད། །བསོད་ནམས་དབྱར་གྱི་དཔལ་མོ་བཞད་པའི་མགྲོན། །འགུགས་མཁས་རྩོད་པའི་དུས་ཀྱི་འཁོར་ལོས་སྒྱུར། །མི་རྗེ་ལྷ་ཡི་རྒྱལ་པོ་དམ་པའི་དྲུང་། །སྟོབས་བཅུའི་རྩལ་ལྡན་ཤཱཀྱའི་རིང་ལུགས་པ། །འགྲོ་ལ་མི་དམན་ལྷག་བསམ་ཆེས་དཀར་བས། །བགྱིད་འོས་གཏམ་གྱི་དྲི་ཟའི་པི་ཝང་རྒྱུད། །ཅུང་ཟད་སྒྲ་འཛིན་དབང་པོའི་རྒྱན་དུ་ཞུ། །འཛམ་གླིང་ལུས་ཕྲའི་ཕང་བར་བཀའ་ཁྲིམས་ཀྱི། །འཇིགས་མེད་གསེར་འཁོར་འཕགས་དང་ཆབས་གཅིག་པར། །བསྟན་འགྲོའི་ཕན་བདེའི་འདོད་རྒུ་ཆར་བསྙིལ་ཞེས། །ཐོས་པས་དང་བའི་ཡིད་ཀྱི་མངོན་པར་གསོས། །ཞེས་བཀྲ་ཤིས་པའི་ཚིག་གིས་སྔུན་བསུས་ཏེ། ཀུན་ནས་དགེ་བའི་དུས་ཀྱི་ཚེ་བསོད་ནམས་འབུམ་ཕྲག་རྣམ་པར་འཁྱིལ་བའི་འོ་མཚོ་ལས་རྩོད་པའི་དུས་སུ་རྫོགས་ལྡན་གྱི་དགའ་སྟོན་རིང་ནས་འགུགས་པའི་བྱེད་པོར་གནམ་གྱི་མཐོངས་ནས་དབང་བསྐུར་བའི་ཆོས་ལྡན་གྱི་རྒྱལ་པོ་ཆེན་པོ་ཉིད་སྐུ་གསུང་ཐུགས་ཀྱི་ཉིན་མོར་བྱེད་པ་ལ་ཉེས་ཚོགས་ནམ་མཁའི་གླང་པོའི་དྲིས་ཆ་ཙམ་དུ་ཡང་མ་གོས་ཤིང་། དབང་ཕྱུག་བརྒྱད་ཀྱི་ཡོན་ཏན་མཐའ་དག་ལྷུན་གྱིས་གྲུབ་པའི་ངོས། གནམ་བསྐོས་ཀྱི་རྒྱལ་པོ་འཇམ་དབྱངས་གོང་མའི་ཁྲིར་འཇིགས་བྲལ་རྡོ་རྗེའི་བགྲོད་བྱེད་ཟུང་སྐྱིལ་མོ་ཀྲུང་བཅས་ཏེ་ཡངས་པའི་ནོར་འཛིན་གྱི་ཁྱོན་ཐམས་ཅད་བདེ་བ་ནས་བདེ་བར་སྐྱོང་ངོ་ཞེས་པའི་གཏམ་རིམ་པར་སོན་པ་རྣ་བའི་བཅུད་ལེན་དུ་གྱུར། ཀུན་མཁྱེན་ཟས་གཙང་གི་སྲས་(༥༣བ)
པོའི་རྗེས་སུ་ཞུགས་ཤིང་། གཞུང་ལུགས་ཐོས་བསམ་གྱི་གྲྭར་གནས་པའི་ཤཱཀྱའི་བཙུན་པ་ཡང་འདུ་བ་སྙོམས་ཤིང་། རིས་མེད་པའི་ལུས་ཅན་ལ་ལྷག་པའི་བསམ་པ་དཀར་བར་གནས། འཚམས་ཞུས། བྱང་ཆུབ་སེམས་དཔའ་འགྲོ་བའི་དོན་དུ་རྗེས་ཆགས་ཀྱི་སྙིང་སྟོབས་ཅན་རྣམས་ས་ཆེན་པོ་ལ་དབང་སྒྱུར་བའི་རྒྱལ་པོའི་སྲིད་པ་བཟུང་སྟེ། གྲངས་མེད་པའི་མངའ་འབངས་དང་བཅས་པ་ལ་དགེ་བ་བཅུའི་ཁྲིམས་བཅས་ཏེ་མངོན་མཐོ་ངེས་ལེགས་སུ་འགོད་པར་མཛད་པས་རྒྱལ་པོ་ཆེན་པོ་ཡང་དེ་དང་ངང་ཚུལ་མཐུན་པའི་འཕགས་ཆེན་དམ་པའི་དབང་ཕྱུག་ཏུ་གོར་མ་ཆག་པས། སླུ་བ་མེད་པའི་མཆོག་གསུམ་དམ་པ་ལ་བླ་མར་འཛིན་ཅིང་། འདྲེན་མཆོག་ཉི་མའི་གཉེན་གྱི་ལུང་རྟོགས་ཀྱི་བསྟན་པ་རིན་པོ་ཆེར་སྲི་ཞུ། མངའ་འབངས་ཐམས་ཅད་ཆོས་ཁྲིམས་དར་གྱི་མདུད་པ་དང་རྒྱལ་ཁྲིམས་གསེར་གྱི་གཉའ་ཤིང་ཟུང་འབྲེལ་དུ་ལྕི་བའི་མཛད་པ་བཟང་པོ་ལ་ཐུགས་ཀྱི་འདུན་པ་སྔར་ལྟར་གཏོད་པ་དང་། ཉེ་ཆར་ཨོ་པ་ཤི་པཱ་ཐའི་ཇི་འདི་པ་དྲུང་དུ་རྫོང་སྟ་བགྱིས་ཡོད་པས་བདེ་ལེགས་ཀྱི་དངོས་པོ་རྣམ་པར་སྤེལ་བའི་ཕེབས་ཚོགས་ཀྱང་ཆུ་ཀླུང་སྐལ་ལྡན་ཤིང་རྟའི་རྒྱུན་ལྟར་ཞུ། ཞེས་རྟེན་ལེ་ཚན་དང་བཅས། རྒྱ་ནག་པའི་དབྱར་ཆུ་ཤེལ་གྱི་དབང་པོ་དབོས་ཉ་བའི་མགྲིན་སྔོན་ཅན་གྱི་གཙུག་ལག་གི་དཀར་ཕྱོགས། དཔལ་དུས་ཀྱི་འཁོར་ལོ་བའི་དམར་ཕྱོགས་ཀྱི་གང་བ་དང་པོ་དྲང་སྲོང་ཟླ་སྐྱེས་ལྷ་མཚམས་སྨིན་ལེགས་མ་དང་དགྱེས་རྒུར་སྤྱོད་པའི་ཚེ། ལེགས་བྱས་ཀྱི་སྒོ་འཕར་མངོན་པར་ཕྱེ་བ་བོད་ཡུལ་དབུས་ཀྱི་རྡོ་རྗེ་གདན་སྤྲུལ་པའི་གཙུག་ལག་ཁང་ནས་ཕུལ་བ་དགེ །(༥༤ན)
གོང་དུ་ཤེས་རབ་བླ་མ་འགྲོ་སྐབས་ཕུལ་བའི་ཞུ་ཡིག་མནྡྷ་རའི་འཕྲེང་བ། མ ཉྫོ རྒྷོ ཥྱཱ ནུ ཏྟ རཻ ར ཛཱ ས རྦྦ སྨི མྦྷཱུ མི བྷི༔ སུ ཀ ར མུ ཝ རྞྞ སྱ ཙ ཀྲི ཎ ཝ ཤཻ རྦ རྟི ཤྩི ཎྱ མ ཎི རྫ གེ ཥུ སུ ཁཱི ཡཱ༔ པྲ ཡ ཙྪ མཱུ ལེ། །ལེགས་བྱས་གསེར་གྱི་འཁོར་ལོས་ནོར་འཛིན་ཀུན་ལ་དབང་སྒྱུར་བ་འགྲོ་བ་རྣམས་ལ་ཕན་བདེ་སྩོལ་བའི་ཡིད་བཞིན་གྱི་ནོར་བུ་འཇམ་པའི་དབྱངས་གོང་མ་རྒྱལ་པོའི་དྲུང་དུ། རྣམ་པར་དཀར་བའི་དང་བའི་ཡིད་ཀྱིས་ཞུ་བ། མཆོག་ཏུ་གྱུར་པའི་དུས་ཉིད་ནའང་བསྐལ་པ་རྒྱ་མཚོར་ལན་གཅིག་མ་ཡིན་པར་གོམས་པའི་དགེ་ལེགས་ཀྱི་བསམ་འཕེལ་དབང་གི་རྒྱལ་པོ་ཅོད་པན་དུ་བཅིང་པ་ལས་འདོད་པའི་རེ་བ་མཐའ་དག་ཆར་དུ་བསྙིལ་བའི་དབང་ཕྱུག་ཡོན་ཏན་བརྒྱད་ཀྱི་ཆ་ཤས་ཡོངས་སུ་གང་བའི་ཚངས་པ་མིའི་གཟུགས་ཅན་གང་གི་སྐུ་གསུང་ཐུགས་ཆུ་ཤེལ་གྱི་དབང་པོའི་དཀྱིལ་འཁོར་ཉེ་བར་འཚེ་བའི་ར་རའི་དྲི་མ་ཕྲ་མོ་ཙམ་གྱིས་ཀྱང་གོས་པ་མི་མངའ་ཞིང་། འཛམ་གླིང་ཡངས་པའི་རྒྱལ་ཁམས་ཀུ་མུ་དའི་ཚལ་ཆེན་པོར་འཁོར་ལོས་སྒྱུར་བའི་རྒྱལ་པོའི་མཛད་བཟང་རྫོགས་ལྡན་གསར་པའི་བསིལ་ཟེར་གྱི་དགའ་སྟོན་ཅི་ཡང་དགོད་པའི་སྙན་པར་གྲགས་པའི་རྫ་རྔ་ཆེན་པོ་སྲིད་རྩེའི་བར་དུ་བརྡུངས་པས་ལྷ་དང་བདེན་ཚིག་གྲུབ་པའི་དྲང་སྲོང་རྣམས་ཀྱིས། རྩོད་པའི་དུས་སུ་འཁོར་ལོས་སྒྱུར་བའི་རྒྱལ་པོ་ཆེན་(༥༤བ)
པོ་འབྱུང་བ་ནི་ངོ་མཚར་ཏོ་ཞེས་བཀྲ་ཤིས་པའི་ཚིགས་སུ་བཅད་པས་མེ་ཏོག་མནྡྷ་རའི་འཕྲེང་བ་ཕྱོགས་ཀུན་དུ་ཁྱབ་པར་བྱེད་པར་གོར་མ་ཆག་ཅིང་། དངོས་ཅག་ཀྱང་ཡིད་ཀྱི་འོ་མཚོར་རྗེས་སུ་ཡི་རང་བའི་འདབ་ཆགས་ལུས་དཀར་དབང་པོ་འཕུར་ལྡིང་གཡོ་བར་མཆིས། ཆེད་དུ་ཞུ་མཆིད་འབུལ་བའི་སྙིང་པོ། ཐོག་མར་ངེས་ཤེས་སྐྱེས་ན་ཡང་། །ཕྱི་ནས་ཡང་དང་ཡང་དུ་སོམས། །ཞེས་སྔོན་གྱི་མཁས་གྲུབ་རྣམས་ཀྱི་གསུང་ལས་བྱུང་བ་ལྟར་གོང་མ་ཆེན་པོ་ཉིད་ཀྱི་སྙན་དབང་བཻ་ཌཱུཪྻ་དཀར་པོའི་སྣོད་དུ་རྒྱལ་བའི་བསྟན་པ་རིན་པོ་ཆེ་ཕན་བདེ་མཐའ་དག་གི་འབྱུང་གནས་སུ་གྱུར་པའི་བདུད་རྩིས་ཡོངས་སུ་གང་ནའང་། ཡང་སྐྱོར་གྱི་ཚུལ་དུ་གསོལ་བ་དོན་དང་ལྡན་པའི་ཕྱིར་ན་འཛམ་བུ་གླིང་པ་རྣམས་ཚེ་ལོ་བརྒྱད་ཁྲི་པའི་དུས་སུ་གསེར་དངུལ་ཟངས་ལྕགས་ཀྱི་འཁོར་ལོས་སྒྱུར་བའི་རྒྱལ་པོ་བྱུང་བ་མཐའ་དག་རྒྱལ་དང་རྒྱལ་བའི་སྲས་བསམས་བཞིན་དུ་སྲིད་པ་བཟུང་བར་གསུང་རབ་རྣམས་ལས་བཤད་ཅིང་། བོད་ཁ་བ་ཅན་གྱི་རྒྱལ་ཁམས་འདིར་ཡང་འཕགས་པ་རིགས་གསུམ་གྱི་མགོན་པོ་བསམས་བཞིན་དུ་ཆོས་རྒྱལ་མེས་དབོན་གྱི་རྣམ་པར་བསྟན་ནས་འགྲོ་བ་རྣམས་དགེ་བཅུའི་ལམ་ལ་བཀྲི་བར་མཛད། རྒྱ་ནག་གོང་མའི་ཁྲི་ལ་མངོན་པར་མཐོ་བ་མཐའ་དག་འཕགས་པ་འཇམ་དཔལ་གྱིས་བྱིན་གྱིས་བརླབས་པ་ཉག་གཅིག་ཏུ་གྲགས་པ་དོན་དང་ལྡན་པའི་ཕྱིར་ན་གོང་མ་ཆོས་ཀྱི་རྒྱལ་པོ་ཆེན་པོ་ཉིད་ཀྱིས་ཀྱང་མི་ཆོས་གཙང་མ་བཅུ་དྲུག་གི་ཁྲིམས་བཅས་པའི་སྒོ་ནས་མངའ་འབངས་མཐའ་དག་དགེ་བ་ལ་འགོད་པ་དང་། སླུ་བ་མེད་པའི་གཏན་གྱི་སྐྱབས་གནས་མཆོག་གསུམ་དམ་པ་དབུའི་ཅོད་པན་དུ་བཅིངས་ཏེ་རྒྱལ་བའི་བསྟན་པ་རིན་པོ་ཆེ་དར་རྒྱས་སུ་འགྱུར་བའི་མཛད་པ་བཟང་པོ་གཙོ་བོར་གྱུར་པ་འཕྲལ་ཡུན་ཀུན་གྱི་ལེགས་ཚོགས་ཀྱི་གཞི་ཡིན་ཞིང་། རྒྱལ་བའི་བསྟན་པ་དེ་ཡང་། (༥༥ན)
དྲང་དོན་ངེས་དོན་ཐེག་པ་ཆེ་ཆུང་སོགས་གདུལ་བྱའི་ཁམས་དང་བསམ་པ་དང་བག་ལ་ཉལ་གྱི་དབང་གིས་ཇི་སྙེད་ཅིག་མཆིས་ནའང་། གཙོ་བོར་གྱུར་པ་ནི་ཐེག་པ་ཆེན་པོའི་སྡེ་སྣོད་ཅེས་རྒྱ་བོད་ཀུན་དུ་ཡོངས་སུ་གྲགས་པའི་ཚུལ་དེ་ཉིད་གོ་རིམ་མ་འཁྲུལ་བར་སྟོན་པའི་སྐྱེས་བུ་གསུམ་གྱི་ལམ་གྱི་རིམ་པ་ཞེས་མདོ་སྔགས་གཉིས་ཀའི་ལམ་གྱི་སྲོག་ཏུ་གྱུར་པ། ཤིང་རྟ་ཆེན་པོ་དཔལ་མར་མེ་མཛད་ཀྱི་ལམ་སྲོལ་དྲི་མ་མེད་པ་དེ་ཉིད་རྗེ་བཙུན་འཇམ་དཔལ་དབྱངས་མིའི་སྲིད་པའི་གར་མཁན་མཉམ་མེད་ཆོས་ཀྱི་རྒྱལ་པོ་བཙོང་ཁ་པ་ཆེན་པོས་ལེགས་པར་རྒྱས་པར་མཛད་པས་བསྟན་པའི་སྙིང་པོ་འདི་ཉིད་ཇི་ལྟར་ཉི་མའི་འོད་ཀྱིས་འགྲོ་བའི་སྣང་བ་སྟེར་པ་དེ་སྲིད་དུ་སྤེལ་བའི་ཐབས་ཚུལ་ཉམས་པ་མེད་པ་ཞུ་ཞིང་། གོང་མ་ཆེན་པོ་ཉིད་ཀྱི་སྐུ་ཚེ་ཆབ་སྲིད་མངའ་ཐང་བཞེད་དོན་མཐའ་དག་འབད་མེད་དུ་འགྲུབ་པའི་བདེན་པའི་ཚིག་གིས་ཤིས་པ་བརྗོད་པ་དགོངས་པ་རིན་པོ་ཆེར་བཞུགས་པའི་ཕེབས་ཚོགས་ཀྱང་ཆུ་ཀླུང་སྐལ་ལྡན་ཤིང་རྟའི་རྒྱུན་ལྟར་ཞུ། ཞེས་གཟིགས་བརྟེན་སྟོབས་བཅུ་མངའ་བའི་འཕེལ་གདུང་། སྐུ་སྲུང་རྡོ་རྗེའི་མདུད་པ། རྒྱལ་བའི་སྐུ་བརྙན་འཕགས་ཡུལ་གྱི་ལི་མ་དང་བཅས་མེ་ཁྱི་སྨིན་དྲུག་ཅན་གྱི་ཡར་ཚེས་ལ་གྲུ་འཛིན་གཉིས་པའི་གཞལ་མེད་ཁང་དགའ་ལྡན་ཕོ་བྲང་ནས་ཕུལ། སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་ཀྱི་ཆབ་ཤོག་ལན་མཐོང་བས་འཛུམ་ཤོར། གྲུབ་པའི་གཙུག་གི་རྒྱན་དམ་པ་རིན་པོ་ཆེར། བཀའ་ཐམ་རྟེན་ལྡན་ཕེབས། དེང་ཕུན་སུམ་ཚོགས་པའི་ལེགས་བྱས་ཆུ་གཏེར་ཆེན་པོའི་འཇིང་ན་རྨད་བྱུང་མཁྱེན་བརྩེའི་འདབ་ལྡན་གྱིས་ལུས་ཅན་མིག་མི་འཛུམ་པ་མཐའ་དག་སིམ་པའི་དབང་པོ་ལས་ཉེ་བར་དྲངས་ཏེ་ཐར་པ་མཆོག་གི་བ་གམ་ཕྱག་(༥༥བ)
སྦལ་བྱུང་བའི་ལམ་དུ་བཅུག་པའི་འཕྲིན་ལས་ཀྱི་དབྱར་རྔས་དབང་པོའི་འདབ་ལྡན་རྨ་བྱ་མཐའ་དག་ཟློས་གར་སྒྱུར་བའི་གཏམ་གྱིས་འདིར་ཡང་རྣ་བའི་གསོས་སུ་གྱུར། ཤཱཀྱའི་རྗེས་སུ་ཞུགས་པའི་སྡོམ་བརྩོན་ཀློག་པ་མཁན་ཡང་བཀའ་སྡེ་སྣོད་གསུམ་ལ་དབང་པོར་བྱེད་པའི་ལུགས་སུ་ཡིན། སླད་ནས་བཀའ་གནང་ཕེབས་ཚོགས་ཀྱང་ཆུ་ཤེལ་ཀྱི་དབང་པོའི་བགྲོད་པའི་ཚུལ་ལ་དཔེ་ཟླར་འོས་པའི་རྒྱུན་བཟང་པོ་སྔར་ལྟར་ཞུ། རྟེན་བཀྲས་བཏགས་དང་བཅས་དབྱངས་ཨོ་འཆར་བའི་ཚེས་ལ་ཕུལ། དོན་བཟང་དམ་པ་གུ་ཤྲིའི་ལན་རྒྱུ་འབྲས་སླུ་བ་མེད་པའི་གཏན་ཚིགས། ལེགས་བྱས་མེས་པོའི་རལ་པ་སྟུག་པོ་ལས། །དལ་འབྱོར་ཛཧྣུ་ཡི་བུ་མོའི་རྒྱུན། །རྣམ་དཀར་ཁྱབ་འཇུག་བགྲོད་བྱེད་ཞབས་བསིལ་ཅན། །དོན་ཀུན་བཟང་པོར་གྲུབ་པ་དེར་སྤྲིངས་པ། །ཤིང་གི་མ་མའི་ངོས་སུ་སུག་པའི་གར། །རབ་བསྒྱུར་མགྲིན་པར་བཅིངས་པའི་ཐུན་མཚམས་ཀྱི། །ཞབས་འོད་རིང་པོར་བརྐྱང་པའི་དབང་གཞུའི་དར། །གསེར་ཡིག་སྙིམ་པར་ལྷ་ལམ་ངོས་ནས་འབྱོར། །ཕུན་ཚོགས་ཟོང་གི་འོད་བརྒྱས་ཕྱེ་མིན་ཞིང་། །དགེ་བཅུའི་སྨིན་ལེགས་འགྲམ་ཆང་གིས་འབྱེད་པའི། །མངོན་མཐོའི་རྟེན་གྱི་མེ་ཏོག་བ་ཀུ་ལ། །ཉེར་འཚེའི་བ་མོས་བསྐྱོད་པ་མེད་དེ་ཤིས། །འདི་སྣང་བདེ་བའི་ཟག་བཅས་གཉིད་ཀྱི་རོ། །ལོངས་སུ་སྤྱོད་པའི་ཆུ་བོའི་ལྕེ་ལྡན་པ། །གཞན་ཕན་བདེ་ལ་རྗེས་སུ་ཆགས་པའི་ཉམས། །ལྷག་བསམ་ཕྱོགས་ཀྱི་འདྲེན་བྱེད་ལེགས་པའི་ལམ། །ཚེ་འདིའི་སྐབས་གསུམ་དབང་པོའི་སྐྱེད་ཚལ་དུ། །དགེ་བའི་ས་བོན་བཏབ་པའི་ཨ་མྲའི་འབྲས། །སྐྱེ་བ་དུ་མའི་སྦྱིན་སྐྱེས་གྲོང་ཁྱེར་དུ། །ལྷུང་དེ་ཟ་བའི་རོ་འཛིན་ཅེས་མི་བདེ། །འཕྲིན་ཡིག་ས་སྲུང་དབང་པོ་གང་། །རྟེན་གྱི་གསེར་སྦྱངས་རྒྱན་སྤྲས་པ། །བཤུལ་རིང་དལ་བུའི་གོམ་(༥༦ན)
འགྲོས་ཀྱིས། །ཤར་ཕྱོགས་དབང་པོའི་གྲོང་དེར་སོང་། །ཁར་ཁ་ཨེར་ཏི་ན་ཧོང་ཐའི་ཇིའི་འཕྲིན་ལན་རིགས་ཀྱིས་མངོན་པར་མཐོ་བའི་དབྱངས། ད ཤ ཝ ལྱ གུ ཎྱ ཙ ནྡྲ ཤྲྀ ཥ སཾ བྷ ར རཱུ པ བཱཾ། །སུ དྷཱི ཀཱི རྟེ ཏྭ ར ཀྵ ཧ ས ཀྲྀ ཀུ ནྡ༔ སུ ཁཱི ཡ ཙ། །སྟོབས་(སྡེབ་སྦྱོར་ཁ་སྒོ་ཕན་པ།)བཅུའི་ཡོན་ཏན་ཆུ་ཤེལ་དབང་། །ཚོགས་གཉིས་རི་དྭགས་གཟུགས་བརྙན་ཅན། །ཕན་བདེའི་ཀུནྡ་བཞད་བྱེད་པའི། །བློ་བཟང་གྲགས་པས་ཁྱོད་ལ་སྲུངས། །དགེ་ལེགས་ངོ་མཚར་སྣང་བ་བྱེད་པའི་གཏེར། །གནམ་བསྐོས་ས་ལ་སྤྱོད་པའི་ཚངས་པ་ཆེའི། །སྙན་འགྱུར་དྲུག་སྐྱེས་གྲུ་ཡི་ཁེངས་འཕྲོག་པའི། །རི་མོ་རྟེན་གྱི་བདོག་པ་སུག་པར་སོན། །རིང་མིན་རྣམ་པར་དགེ་བའི་དུས་ཀྱི་ཆར། །ཉེར་ལེན་ཨུཏྤལ་སྡོང་པོ་གཡུར་ཟ་བར། །མི་མཐུན་དགུན་གྱི་རེག་པས་མི་བརྫི་བའི། །ངོ་མཚར་རྐང་དྲུག་གླུ་དབྱངས་སྒྲོག་པ་སྤྲོ། །ཤེས་བྱའི་རྒྱུད་ལས་འཕོས་པའི་བརྒལ་བརྟག་གི །ཉག་ཕྲན་རྣོན་པོས་ལོག་སྨྲ་འཇོམས་བྱེད་པའི། །འཆད་རྩོད་རྩོམ་པས་བློ་བཟང་རྒྱལ་བའི་བསྟན། །འཛིན་ལ་དངོས་ཅག་(༥༦བ)
འདུན་པ་མི་དམན་ཙམ། །འཇམ་མགོན་ཆུ་འཛིན་ལུས་ཕྲའི་ཕང་བ་ནས། །ལེགས་བཤད་ཟད་མི་ཤེས་པའི་ཆར་གྱི་རྒྱུན། །སྐལ་བཟང་མྱུ་གུ་རྒྱས་པའི་ཛ་ན་མོ། །བློ་བཟང་གྲགས་སྙན་འབར་པའི་ལུགས་སུ་ཁུམས། །ངེས་འབྱུང་གློག་གི་དོ་ར་ཡངས་པ་ན། །ཚུལ་འཆོས་སྐད་ཅིག་འོད་ཀྱི་རྩ་དགའ་ཅན། །འཇིག་རྟེན་བྱ་བའི་མུན་པར་མལ་འཆའ་བ། །དྭགས་བརྒྱུད་རྒན་པོའི་ངང་ཚུལ་རྨོངས་པའི་ལུགས། །ཚུལ་ཁྲིམས་དྲི་ལྡན་སྙིང་རྗེའི་གྲིབ་བསིལ་ཅན། །གསང་སྔགས་འབྲས་སྨིན་ལུང་རྟོགས་དཔག་བསམ་ལྗོན། །དགེ་ལྡན་བསྟན་པའི་འཆི་མེད་སྐྱེད་ཚལ་དུ། །འབྱུང་གི་གཞན་ལུགས་གཅོང་རོང་ཁྲོད་དུ་མན། །ཕན་བདེའི་པད་དཀར་བཞད་བྱེད་རྒྱལ་བསྟན་གྱི། །ཉིན་བྱེད་ཆུ་ལྷའི་མཁའ་ལ་གསལ་མི་གསལ། །དུས་འཁྲུགས་སྤྲིན་གྱི་ལང་ལོང་མཐར་སྐྲོད་པའི། །མཉེས་གཤིན་བྱམས་པའི་སེར་བུ་ལྡང་ལ་རག །མ་ཕྱིས་དྲི་མ་མེད་པའི་གང་གི་བློར། །མ་བྲིས་ཡོན་ཏན་ཚོགས་ཀྱིས་རྣམ་བཀྲ་བ། །དལ་བརྒྱད་དཀའ་ཐུབ་བསྟན་པ་མ་ཡིན་པའི། །བློ་ལྡན་ཕུར་བུ་གྲུབ་ཁྱོད་གང་ལས་འོངས། །ཨུཏྤལ་དཀར་པོའི་ཚལ་ལ་ཕྲག་དོག་ཅིང་། །གཉིས་འཐུང་ཚ་བས་རྡུང་བྱེད་རྟ་ལྗང་ཅན། །ཉེར་གནས་ཚིགས་པའི་ཆོ་ག་བསྟར་བ་ཡང་། །རིང་པོའི་མཁའ་ནས་སྣང་བའི་དགའ་སྟོན་སྟེར། །རིགས་ཀྱིས་མངོན་མཐོ་ཡ་རབས་སྤྱོད་པས་མཛེས། །དཔའ་མཛངས་བརྟུལ་ཕོད་ཇིང་གིར་གན་གྱི་བརྒྱུད། །བསྟན་ལ་ཉེར་གུས་གཟུགས་ཅན་སྙིང་པོའི་གྲོགས། །ནོར་འཛིན་སྐྱོང་ཁྱོད་རྟག་ཏུ་བརྟན་གྱུར་ཅིག །བཤུལ་རིང་ལམ་གསུམ་ལས་འོངས་པའི། །འཕྲིན་ཡིག་དྲི་བྲལ་གང་གའི་རྒྱུན། །ཕོ་ཉ་སྐལ་ལྡན་ཤིང་རྟ་ཡིས། །ཆད་མེད་འབབ་པའི་སྦྱོར་བ་འཚལ། །རྗེ་འབངས་མ་ལུས་མི་མཐུན་པའི། །མུན་སྟུག་སེལ་བའི་སྲུང་འཁོར་གྱི། །འོད་ཀྱིས་ཕན་བདེའི་སྣང་བ་དག །འཕྲལ་དང་ཡུན་དུ་སྩོལ་བ་ཡིན། །ཡི་གེ་གཉིས་སྐྱེས་འཁོར་ལོའི་ལག །རྟེན་གྱི་རྐང་གདུབ་བསིལ་(༥༧ན)
སིལ་སྒྲ །སྒྲོག་བཞིན་མིར་གན་དུ་བོན་ཆས། །བདག་གིར་བཟུང་བའི་ཡུལ་དེར་འཕུར། །གོང་ར་ལོ་ཙཱ་བ་གཞན་ཕན་རྡོ་རྗེའི་འཕྲིན་ལན་རི་ཐང་མཚམས་ཀྱི་ནད་སེལ་སྨན་དཀར་ཆིག་ཐུབ། ས ངྒྀ ཏ ཁ པ རི མ རུ དྡྷཱ ཛ ཧ ནྐུ ད ཡ བི ཙཱ ར སཱ རི སུ ཙིཏྲ ཙ། །ཛྙཱ བཱཾ དེ ཤཱ ཀྵ བྷ ཥ དྭི ཡ ཤོ ལེ ཁོ ཀྟ སུ ར ཏ སྨི ནྲ། །རྣམ་(ཛྭཏིའི་སྡེབ་སྦྱོར་འཕགས་མ།)དཔྱོད་རི་མོ་ཡོངས་སུ་དར་བའི་འཇའ། །བརྡ་སྤྲོད་ཀུན་གསལ་འགྲམ་པར་ལེགས་བཀྲ་བའི། །ཤེས་ལྡན་འདྲེན་བྱེད་ཡུལ་གྱི་ཟིལ་དངར་ཅན། །སྐད་གཉིས་སྨྲ་བར་གྲགས་པ་དེ་ལ་སྤྲིངས། །དགེ་བའི་ས་བོན་དར་བབ་ལང་ཚོའི་དཔྱིད། །མངོན་མཐོའི་ཨ་མྲའི་འཁྲི་ཤིང་སྡོང་བུ་ལས། །ཐོས་བསམ་སྒོམ་པའི་ཡལ་འདབ་གཡུར་ཟ་བ། །ཕན་བདེའི་གྲིབ་བསིལ་སྟེར་བའི་ཆོ་ག་མཁན། །དཎྜཱིའི་བཞེད་དོན་ཉམས་འགྱུར་གླུར་བླངས་པའི། །འཕྲིན་ཡིག་དབྱངས་ཀྱི་རྒྱལ་མོའི་པི་ཝང་ཅན། །མེ་ཏོག་ཕྲེང་བའི་སྡེབ་སྦྱོར་སྟོང་གི་རྒྱུད། །རབ་སྒྲོག་སྙིམ་པའི་དོ་རར་གར་ཀྱིས་འགྱིང་། །རྣམ་པར་སྲ་བ་གཞུང་ལུགས་བྱེ་བའི་རྒྱུད། །བརྒལ་བརྟག་རིགས་པའི་ཉག་ཕྲན་གྱིས་འགུགས་པར། །མངོན་པར་རློམ་པའི་(༥༧བ)
སྡོམ་བརྩོན་ཀློག་པ་མཁན། །གཙུག་ལག་བྱེ་བའི་ལྟད་མོར་གཡེང་སྐབས་གྲང་། །སྙིང་མེད་འཁོར་བའི་བདེ་བ་ཆུ་ཤིང་འབྲས། །འབྱུང་འཇིག་ཅིག་ཅར་གྲུབ་པའི་ངན་པའི་མཚང་། །སྟོན་ཕྱིར་བཞིན་རས་སྡོང་བུ་སྡུག་བསྔལ་མདོག །ནག་པོར་བརྣགས་པའི་འགྲོ་འདི་ཡ་མ་བརླ། །ཚུལ་དེས་ངེས་པར་འབྱུང་བའི་སྐྱ་རེངས་ཀྱིས། །སྲིད་པ་མུན་པའི་སྨག་རུམ་དྲུངས་ཕྱུང་ནས། །བསླབ་གསུམ་སྣང་བས་གཏན་བདེའི་འདབ་བརྒྱ་པ། །མངོན་པར་འཛུམ་དེ་ཁྱོད་ཀྱི་རྣ་བའི་བརྒྱན། །ལེགས་སྦྱར་དྲི་ཟའི་རྒྱུད་མང་བརྡུངས་པའི་སྒྲ། །དང་པོས་བོང་རྒན་ངག་སྒྲོས་གླེགས་བམ་གཟིངས། །མུ་ཅོར་གཏམ་གྱི་རྒྱ་མཚོར་ཉེར་ཞིག་པའི། །རྫུན་མཚང་རླབས་ཕྲེང་འཁྲུག་པ་འགའ་མཐོང་ངམ། །ཉམས་དང་འགྱུར་བའི་འོད་དཀར་ལྷབ་ལྷུབ་ཅན། །སྙན་ངག་ཆུ་ཤེལ་དབང་པོ་ཤར་བའི་ཚེ། །གྲོང་ཚིག་གཅེར་བུའི་ཀུན་གསལ་ལུས་ཕྲ་མ། །སྐྱེངས་པས་སྟོང་པའི་དབྱིངས་སུ་བྲོས་པ་བཞིན། །ཨ་འདུས་ཀ་འཕྲེང་སྐད་ཀྱི་གདངས་སྙན་པོར། །ཤར་བ་ལྕི་དང་ཡང་བར་སྤེལ་བའི་གཟུགས། །བྲྀཏྟ་ཛཱ་ཏིའི་སྡེབ་སྦྱོར་ཕྲེང་བ་ཡིས། །རིན་ཅེན་འབྱུང་གནས་སྤུན་ཟླར་བྱས་ཀྱི་དོགས། །རྟོག་པའི་བྱེད་པོས་བརྡ་ཡི་ཆེན་པོར་གྱིས། །ཡིད་ཀྱི་ཀ་ཤི་གསར་པའི་ངོས་ཡངས་པོར། །སྣ་ཚོགས་མིང་གི་རི་མོ་རབ་བཀྲ་བ། །མངོན་བརྗོད་གཟིགས་མོར་བྱེད་ལ་ཚར་དུ་དངར། །ཐ་སྙད་རིག་པའི་སིནྡྷུ་ཝ་རའི་ཚལ། །བཅད་ལྷུག་སྤེལ་བའི་ལུས་ཕྲའི་ཁ་ཆང་གི །འཛུམ་གྱིས་ལེགས་བཤད་མགྲོན་ཀུན་བསུ་མཁས་པའི། །ཟློས་གར་ཀེ་ས་ར་ཡི་མགོ་ལྕོགས་ལྡེམ། །ཕྲ་ཞིབ་རྟོགས་དཀའ་ཤེས་བྱའི་སྣང་བརྙན་ཀུན། །མངོན་སུམ་འཆར་བྱེད་གཡུལ་ལས་རྣམ་རྒྱལ་བའི། །དཀར་ནག་རྩིས་ཀྱི་སྔོན་མེད་མེ་ལོང་གིས། །ཀུན་མཁྱེན་ཡེ་ཤེས་ཁེངས་པ་ཕྲོགས་ཀྱི་དོགས། །རྟོག་(༥༨ན)
གེའི་ཚིག་དོན་བརྒྱད་ཀྱི་རིགས་པའི་མདས། །ཕས་རྒོལ་དམ་བཅའི་ལངྐའི་བདག་པོ་དག །སྨྲ་བཅད་ཚུན་རོལ་གྲོང་དུ་ཉེར་བཏང་ཚེ། །སྔོན་མེད་རཱ་མ་ན་ཞེས་ལྷ་རྣམས་གླེང་། །མི་ཤིས་མཚན་མོ་མུན་པའི་ཁང་པ་ན། །ངོ་མཚར་རི་མོ་གློག་གི་གར་མཁན་མ། །བསོད་ནམས་གཟུགས་ཅན་བཞིན་དུ་སྣང་བའི་དཔལ། །བྱེད་པོ་བཟོ་ཡི་རིག་བྱེད་ཕ་མཐའ་ཡས། །སྦྱོར་སྡེའི་འཁོར་ལོ་ཚ་བསིལ་སྙོམས་པའི་རྩིབས། །སྟོང་ཕྲག་རིག་པའི་འཕྲུལ་གྱི་རྣོ་བའི་དབལ། །ནད་ཀྱི་དྲ་བ་གཅོད་པའི་གསོ་རིག་གཞུང་། །ལུས་ཅན་ཀུན་གྱི་ཉེར་འཚོ་འདི་རྨད་བྱུང་། །རྣམ་པར་སྲ་བ་སྒྲིབ་གཉིས་སྲིད་སྒྲུབ་མགོ །ཐེག་ཆེན་མཚོན་གྱིས་བཅད་པའི་ཡེ་ཤེས་དྲི། །ཉམ་ངའི་འདོད་ཆགས་བཟང་པོའི་ལམ་སྒྱུར་བའི། །གསང་ཆེན་ཆོས་འདི་གསར་འགྱུར་རྩི་ཡི་གྲོགས། །རྒྱལ་ཀུན་ཡེ་ཤེས་སྒྱུ་འཕྲུལ་དྲ་བའི་གར། །མཚོ་སྐྱེས་རིང་ལུགས་རླུང་ཐུབ་གསེར་ལྡན་གཟུགས། །རྣམ་དཔྱོད་ལྟོ་བར་ཞུ་བས་གྲངས་མེད་པའི། །གཙུག་ལག་གངྒཱ་འཐུང་བར་མཁས་སོ་ལོ། །དེ་ཕྱིར་མགྲིན་པའི་འཁོར་ལོ་རྣམ་གྲོལ་བའི། །དབྱངས་ཀྱི་དཀྱིལ་འཁོར་རྫོགས་པའི་ལེགས་བཤད་གླུ། །སྐལ་བཟང་སྐྱེ་བོའི་རྣ་བར་འཇེབས་སོ་ཞེས། །ཕྱོགས་ཀྱི་སྒེག་མོས་གླེང་མོད་དེ་ལྟ་ནའང་། །ཤེས་རབ་གྲུ་གཟིངས་བློ་གྲོས་ངན་པའི་མཚོར། །རབ་ཞིག་ཆུ་སྲིན་རྒྱལ་མཚན་གྲོགས་པོ་དག །ཉེས་བཤད་རླབས་ཀྱི་དུག་སྦྲུལ་གླིང་ཕྲན་དུ། །མི་དགེའི་འཇིགས་པས་མངོན་པར་གཙེས་མིན་པའི། །རྒྱལ་བསྟན་འཁྲུལ་མེད་ཡོངས་འདུའི་རིགས་ལས་འོངས། །དཔྱད་གསུམ་དག་པའི་དྲི་བསུང་ཆེས་ཆེར་མངར། །ཟུང་འཇུག་འབྲས་བུ་སྨིན་པའི་དྲི་མེད་ཀྱི། །བསྟན་པར་ངེས་ཆེ་ཤེས་ལྡན་སུ་མི་རང་། །ལྔ་བརྒྱའི་དུས་འདིར་ཤེས་བྱ་ཀུན་མཁྱེན་པའི། །གྲགས་པ་དོན་ལྡན་བོད་ཡུལ་པཎྜི་ཏ། །ཆོས་སྐྱོང་བཟང་པོའི་ལེགས་བཤད་(༥༨བ)
འཁྲུལ་མེད་དུ། །འཛིན་པར་ངེས་ན་བསྟན་ལ་བྱ་བ་བྱས། །ཕྱིས་མིན་རྣམ་པར་དངས་པ་ཁྱོད་ཀྱི་བློར། །བྲིས་མིན་ཡོན་ཏན་རི་མོ་རྣམ་མཛེས་པ། །མཐོང་མིན་གཟིགས་མོར་ཆེད་དུ་ཡ་མཚན་པ། །བྱས་མིན་འབད་མེད་ལྷུན་གྱིས་རྣམ་པར་གྲུབ། །ངན་སྐྱུགས་ཕུང་པོས་ཉེ་བར་གང་བ་ཡི། །འཛམ་བུའི་གསེར་སྦྱངས་ལས་གྲུབ་ཟ་མ་ཏོག །སྣ་ཚོགས་རིན་ཅེན་འཕྲ་ཡིས་ཉེར་བཀོད་པ། །སཱ་ལའི་ལྗོངས་འདི་གང་བ་བཞིན་དུ་བྱེད། །ཐུབ་པའི་གསུང་རབ་རབ་ཏུ་འབྱམས་ཀླས་པ། །ཇི་བཞིན་རྗོད་མཁས་མཁས་པའི་གྲགས་པ་ལྡན། །ལེགས་སྦྱར་སྐད་སྨྲ་སྨྲ་བའི་འཇིག་རྟེན་མིག །རྗེས་འཇུག་ལོ་ཆེན་ཆེན་པོའི་མིང་འཛིན་གང་། །གང་ཞིག་རྙེད་དཀའ་དལ་བའི་རྟེན་བཟང་ལུས། །ལུས་མེད་ཐུལ་གྱི་གསུང་རབ་ཇི་བཞིན་དུ། །དུ་མར་དཔྱད་དང་བསྒོམས་པའི་སྙིང་པོའི་ཚོགས། །ཚོགས་གཉིས་བསགས་ཏེ་དོན་ལྡན་བྱ་བར་རིགས། །འཕྲིན་ཡིག་འབྲུག་སྒྲ་མངལ་འཛིན་ཅན། །སྙན་འགྱུར་སྒྲོ་གཤོག་རབ་བརྐྱངས་ཏེ། །རྟེན་གྱི་གཙུག་ཕུད་ལྡེམ་བཞིན་དུ། །ཆུ་ལྷའི་ཕྱོགས་སུ་ཉེ་བར་སོང་། །འཕགས་ཡུལ་བ་ཨཱ་དྷ་རར་འབོད་པ་ཕྱོགས་འདིར་ཀུན་འཛིན་དུ་གྲགས་ཤིང་རྒྱ་ནག་པ་ཝུན་ཙཱིར་རྗོད་པ། ལྗོངས་འདིར་ས་ཕོ་བྱི་བའི་ལོ། ཧོར་གྱི་ཟླ་བ་བདུན་པ། དུས་འཁོར་བའི་དཀར་ཕྱོགས་ཀྱི་དགའ་བ་གསུམ་པ། ཡ་ཎའི་དབྱངས་ཧ་དང་གསལ་བྱེད་དྷ་འཆར་ཞིང་། མུན་པའི་མུན་པ་གསལ་བ་ཆེན་པོའི་བུ་མོ། དབྱངས་འཆར་བའི་དམར་ཕྱོགས་ཀྱི་དགའ་བ་གསུམ་པ། དབྱངས་ཨ་གསལ་བྱེད་ཝ། ཁམས་ས། འདོད་ཡོན་དྲི། ཏཏྐལ་གཞུའི་དུས་སྤྱོད་ལ་ཆོས་སྡེ་ཆེན་པོ་དཔལ་ལྡན་འབྲས་སྤུངས་ནས་བྲིས་ཐོ། །སྟག་ལུང་མ་ཐང་རི་བོ་ཆེ་བེ་རི་སྨད་པས་བཅོམ་སྟེ་(༥༩ན)
བོན་པོས་བདག་གིར་བཟུང་བ་དགེ་སོག་མཆོད་ཡོན་གྱི་དྲིན་ལས་སྟག་ལུང་པ་རང་གི་ཕྱག་ཏུ་འགྱུར་སྐབས་ཉམས་གསོས་སུ་ཞབས་དྲུང་ཁྲི་ཐོག་པ་ཕེབས་པར་ཕྱི་ནང་གསང་བའི་བགེགས་རིགས་ལ་བརྟེན་སྟག་ལུང་བཙུན་པོས་འཛིན་པའི་སྙེམས་པ་གཏོང་བར་མངོན་དུ་ཕྱོགས་ཚེ་ཞབས་དྲུང་མ་ཆེན་ངག་དབང་བཀྲ་ཤིས་དཔལ་གྲུབ་ངེས་དོན་ཆོས་ཀྱི་ཉི་མ་རྣམ་གྲོལ་མཆོག་གི་སྡེ་ཀུན་སྤངས་ཉན་རང་གི་ཞི་བདེར་གཞོལ་བ་ལས་བཞེངས་ཏེ་བྱང་སེམས་སྙིང་སྟོབས་ཅན་གྱི་རྣམ་པར་ཐར་བས་ཁམས་ཕྱོགས་སུ་ཆིབས་ཁ་སྐྱོད་པའི་སྟ་གོན་གྱི་སྐབས་ཆབ་ཤོག་ལན་དུ་སངས་རྒྱས་ཡར་བྱོན་གྱི་ཚེམས་སོགས་སྐྱེས་དང་བཅས་གསོལ་བ་ལུགས་གཉིས་དབྱངས་སུ་འཚེར་བའི་པི་ཝང་། མ ངྒ ལྱཱ སཱ རི ཤྩི ཏྲ ཙ ཀྲ ཤྩ བྷ ཝྱཱ ཤཱ ནྟ སྱ ཤྲེ ཡོ ཥྞཱི ཥ བཱ ད ཉྩ ཀོ ཊི། ནྱཱ ས ཤྴཽ བྷ ཤྩ དྡྷཱུ ཏྱ མ ཧྱཱ ཀ རུ ཎྱཱ ཙི ཏྟཱ བ ལྱ ཀྲཱི ཤྭ རྱ མུ ནྱ པྲ ཡ ཙྪ། །སྲིད་(སྡེབ་སྦྱོར་སྣ་ཚོགས་ལྷ་མོ།)ཞིའི་དགེ་ལེགས་བྱེ་བའི་གཙུག་ཏོར་ལ། །བཀྲ་ཤིས་འཁོར་ལོའི་རི་མོ་བཀྲ་བའི་ཞབས། །འགོད་མཛད་སྙིང་སྟོབས་དབང་ཕྱུག་ཟས་གཙང་སྲས། །རྨད་བྱུང་ཐུགས་རྗེ་ཆེན་པོས་དགེ་ཚོགས་སྩོལ། །(༥༩ན)
མ ཎྜ ལ མུ ད དྷེ རྦྲ ས མ བྷཱ ན ནྟ ཀཱ ཪྻ ཅ མཱ ལ ས དྷ༔ དྷ རྨྨོ བྷ བ ཀུ མ ད ཏ སོ ཡ ཏྟ རྨཱུ ལཱ ཏི ཤ ཀུ ལ ཧི མ ལ ཀྵཱ། །མཐའ་(ཛཱ་ཏིའི་སྡེབ་སྦྱོར་མཆོག་དབྱངས།)བྲལ་གྲུབ་རྒྱུད་ཟླ་བའི་མ་མ་ལས། །འཕྲིན་ལས་དཀྱིལ་འཁོར་རབ་ཏུ་རྫོགས་པ་ཡི། །ཕུལ་བྱུང་རིགས་ཀྱི་བསིལ་ཟེར་འབུམ་ཕྲག་གིས། །ཆོས་སྲིད་ཀུནྡ་བཞད་པ་གང་དེའི་དྲུང་། །(༦༠ན)
ཡ ཀྵྨཱཻ ཏྲི མེ། ཤ བྷོ ཀྵ ཡ ཝ རྵ རྟི གཱི རྟི གུ ཧྱ གྲྀ། ཤི ཁྲཱི ཧྲི དྨཱ ཡཱ ས པྲྀ ཙྪ སཱ མཱ ཝ རྞྞ མ དྷཱུ རྱ ཙ། །མི་(སྡེབ་སྦྱོར་ཁ་སྒོ་ཕན་པ།)ཟད་གསང་གསུམ་དབྱར་གྱི་དཔལ་མོ་གླུ། །ཕུན་ཚོགས་མཛད་པའི་འབྲུག་གི་སྒྲ་དབྱངས་ཀྱིས། །ཡིད་ཀྱི་མདོངས་མཐའ་སྒྱུ་འཕྲུལ་དྲ་བའི་གར། །བཅས་ཏེ་སྙན་འགྱུར་ཚིག་གིས་མཆིད་འདི་གསོལ། །བཀའ་ཐམ་དྲི་བྲལ་འཁོར་ལོའི་ཡན་ལག་ཅན། །ཚིག་དོན་བཟང་པོའི་རྐང་གདུབ་སིལ་སྒྲ་དང་། །བདོག་པའི་སྐྱེས་ཀྱི་འཕུར་ལྡིང་གཡོ་བཞིན་དུ། །སྙིམ་པའི་རྫིང་བུར་བབས་པས་སྤྲོ་དགའ་རྟས། །རིང་མིན་ངོ་མཚར་རྒྱ་མཚོའི་དུས་ཀྱི་ཆར། །ཀུན་དགའི་མཛའ་བ་སྟེར་བའི་འཛུམ་ཞལ་ཅན། །གསར་ཚེས་གནམ་ལོའི་རི་དྭགས་མིག་ཅན་མའི། །ཟླ་བའི་ནོར་འཛིན་གོས་ཀྱི་དོ་ར་དུ། །ཚོགས་གཉིས་ལང་ཚོ་དར་ལ་བབས་པའི་འབྲས། །མཚན་དཔེའི་རང་བཞིན་རྒྱས་པའི་གཟུགས་ཀྱི་སྐུ། །འཕྲིན་ལས་སྒྱུ་འཕྲུལ་བྱེ་བའི་རྣམ་རོལ་གྱིས། །མངོན་པར་སྒྱུར་(༦༠བ)
འདི་སྐལ་བཟང་འགྲོ་བའི་གཉེན། །ཀུན་ཡིད་དགའ་བདེར་མྱོང་བྱེད་དྲུག་སྐྱེས་གླུ། །རང་རང་སྤྱོད་ཚུལ་རྗེས་སུ་འཇུག་པའི་རྫས། །འཛུམ་ཞལ་ལས་འོངས་གཟུང་གིས་རྒྱལ་བ་ཡི། །ཚངས་དབྱངས་དེ་ལ་མོས་པ་ལྷོད་པོར་བྱེད་། །ལྔ་བརྒྱའི་ངང་ཚུལ་སྣ་ཚོགས་བཀྲ་བའི་ཚོན། །ཕྲ་ཞིབ་པིར་ཀྱིས་རི་མོར་བྲིས་པ་ཡིས། །སྲིད་ཞིའི་ཆོས་ཀུན་མཁྱེན་པའི་ཐུགས་ཀྱི་མཁའ། །ཕ་མཐའ་འཇིག་རྟེན་མེས་པོས་རྟོགས་ནུས་མིན། །འཁྲུལ་བའི་དྲི་བྲལ་འཇམ་མགོན་བཙོང་ཁ་པའི། །རིང་ལུགས་དཔག་བསམ་ལྗོན་པའི་གྲིབ་བསིལ་ལ། །ངལ་གསོར་བསྟི་བའི་སྙོམ་ལས་ཀློག་པ་མཁན། །གནས་ལྔའི་ལྟད་མོར་དགའ་བའི་རིང་པོའི་བློ། །སྲིད་པའི་ཕུན་ཚོགས་སྒྱུ་མའི་ཟློས་གར་མཁན། །འཁོར་བ་ཉེས་བརྒྱའི་འབྱུང་གནས་དུག་སྦྲུལ་ཚང་། །དལ་འབྱོར་རྙེད་དཀའ་འཇིག་སླས་ངེས་བྱུང་ཡང་། །ད་དུང་དངོས་ཅག་ཟིན་མེད་བྱ་བས་བྲེལ། །འོན་ཀྱང་བསླབ་ལས་མི་གཡེལ་འགྲོ་ལ་བརྩེ། །སེམས་ཀྱི་རྡོ་རྗེའི་རྣལ་འབྱོར་ལ་གཞོལ་བ། །ཐུབ་བསྟན་སྙིང་པོར་རིག་པའི་གོ་ཡུལ་ཙམ། །ཆགས་འདི་འཇམ་དཔལ་སྙིང་པོའི་རྗེས་ཞུགས་དྲིན། །ཀུན་ལ་བྱམས་བརྩེའི་ཕྱག་གི་ཉེར་བཟུང་བའི། །ངེས་དོན་པད་དཀར་སྲད་བུའི་མི་ཕྱེད་རྒྱས། །དྭགས་བརྒྱུད་སྐལ་བཟང་ལག་ལྡན་བགྲོད་བྱེད་ཟུང་། །འཆིང་བའི་སྒྱུ་ཐབས་ཆེན་པོ་འདི་རྨད་བྱུང་། །བཀའ་བརྒྱུད་གདན་ཁྲིའི་ཀཻ་ལ་ཤ་ཡི་རྩེར། །ཆོས་ནོར་གདོད་པའི་རྩལ་གསུམ་རབ་རྫོགས་པའི། །རྗེ་བཙུན་གྲུབ་མཆོག་གདོང་ལྔའི་དབང་པོ་ཡིས། །གཅིག་ཤེས་ཀུན་གྲོལ་འཇིགས་མེད་སྒྲ་བསྒྲགས་ཚེ། །མངོན་རྗེས་ཚད་མ་བརྒལ་ཅིང་ཉེར་བརྟགས་པས། །ཀུན་ཤེས་གཅིག་ཏུ་འབྱམས་ཀླས་ས་ཆེན་པོར། །དགེ་བའི་རྩྭ་ཆུས་འཚོ་བའི་རི་དྭགས་རྣམས། །སྐྲག་སྟེ་སྲིད་པའི་སྣང་བ་འགགས་པ་བཞིན། །མི་བསྲུན་ཚེར་དོང་འཇམ་གཉེན་འདབ་(༦༡ན)
བརྒྱ་པའི། །སྐྱེད་ཚལ་ལྟར་གཟིགས་གདུལ་དཀའི་ལུས་ཅན་ཚོགས། །འདྲེན་ལ་ངལ་མེད་སྙིང་སྟོབས་གོ་ཆ་ཡིས། །སེམས་དཔའ་གཞན་རྣམས་ཞི་བདེར་མནལ་གྱི་དོགས། །གངས་ཅན་རི་བོས་བྲེས་པའི་དབང་ཕྱོགས་ཀྱི། །རྒྱ་ཆེན་སྐྱེ་རྒུའི་འདུ་སར་མཛད་བཟང་གི །ནོར་བུའི་ཡུ་བས་བཏེག་པའི་ལུགས་ཟུང་གདུགས། །སྲིད་པའི་རྩེ་མོའི་ཕ་མཐར་འཁོར་སྙམ་བྱེད། །མ་རིག་འཁོར་ལོས་ཐར་པའི་མགྲིན་ཆད་པའི། །ལུས་ཅན་ལྷ་མིན་དབང་པོ་འཚོ་བའི་སྲོག །སྟེར་བའི་བྱེད་པོ་སྔོན་ཆད་གངས་ཅན་འདིར། །མཆིས་མིན་བདུད་རྩིའི་དཔལ་འདི་སུ་ཡིས་བསྐྲུན། །འཛད་པ་མེད་པ་དམ་པའི་ཆོས་ཀྱི་དུང་། །དཔྱད་གསུམ་དག་པའི་གཡས་སུ་འཁྱིལ་བའི་གླུ། །གྲུབ་རིགས་བསྟན་པ་བསུ་ཕྱིར་ལེན་པ་ལ། །པད་དཀར་གཞོན་ནུ་ཁོང་ནས་འཛུམ་པ་འདྲ། །མཛེས་སྡུག་རྣམ་པར་བཀྲ་བའི་སྒྲོ་གཤོག་ཚོགས། །བཀོད་ལེགས་གདུགས་ལྟར་ཕུབ་པའི་འགྱིང་བག་གིས། །ཡངས་པའི་ནོར་འཛིན་དབུས་སུ་གར་སྒྱུར་བར། །མངོན་ཕྱོགས་རྨ་བྱ་གཞོན་ནུ་ཅི་ཡང་བྲེལ། །མཁའ་ལྡིང་དབང་པོའི་གཞོན་པ་མ་མཆིས་ཤིང་། །འཁོར་ལོའི་རི་མོས་ལག་པས་མཚན་མིན་ལ། །འགྲོ་སྐྱབས་གསེར་ཅན་སྲོག་དང་མ་བྲལ་བའི། །སྣ་ཚོགས་གཟུགས་ཅན་ཁྱོད་ནི་སུ་ཡིས་བསྐྲུན། །ཆུ་ཤེལ་དབང་པོས་རབ་དཀར་སྣང་བའི་དཔལ། །ལྷོ་ཕྱོགས་དྲི་ཡིས་བསིལ་བའི་རེག་བྱ་མཆོག །ཀ་ཤི་མཛེས་དགའི་བཞིན་གྱིས་འདོད་པའི་བདེ། ཁྱོད་ཀྱིས་འགྲོ་ཀུན་བྱང་ཆུབ་མཆོག་ལ་སྦྱོར། །ཆེས་སྲ་རྣམ་དཀར་རྒྱུད་ལས་ཉེར་འཕོས་པའི། །དགེ་ལེགས་མདའ་ཡིས་ཡིད་སྲུབས་སྙིང་བསྣུན་ཁྲག །མཆུ་སྒྲོས་ལན་བརྒྱར་བསྒོས་པའི་འཛུམ་རླབས་ཀྱིས། །མཚོ་སྐྱེས་འདབ་ལྡན་མགྲོན་ཀུན་(༦༡བ)
འགུགས་པ་བཞིན། །ཡང་དག་འབྲས་དོར་སྡུག་བསྔལ་སྲ་མཁྲེགས་ཅན། །འཁོར་བ་ཨེ་རཎྜ་ཡི་ལྗོན་པ་ལ། །བདེ་བའི་སྙིང་པོར་རེ་བའི་འཁྲུལ་བའི་འགྲོ ། འདྲེན་པ་ཁྱོད་ཉིད་གསེར་མངལ་ཅན་གྱིས་བསྐོས། །རྒྱུ་རྐྱེན་གློག་གིས་བདེ་གཟུགས་གཟིགས་མོའི་དཔྱིད། །ཅུང་ཟད་གྲུབ་པའི་ཕ་མཐའ་དུ༔ཁའི་མུན། །གློང་དུ་འཕྱན་རྣམས་འཁྲིད་པའི་ས་མཁན་ལ། །ཉི་མའི་གཉེན་དང་ཁྱོད་གཉིས་ཐ་མི་དད། །བཟོད་དཀའ་སྲིད་པའི་རང་བཞིན་ཡ་མ་བརླ། །གཏན་བདེར་བསྐྲུན་ཚེ་དཀར་ནག་ལས་འབྲས་རོ། །གཅིག་ཏུ་གྲུབ་པས་དགེ་སྡིག་ཤན་འབྱེད་པའི། །གསལ་བྱེད་མེ་ལོང་དེ་ལ་ཅོ་འདྲི་སྙམ། །དེ་ཕྱིར་གདུལ་བའི་ཞིང་ཁམས་གྲངས་མེད་རྡུལ། ཁམས་དང་དབང་པོར་འཚམ་པའི་མཛད་པ་ཡིས། །ཐར་པའི་བཀའ་རྒྱུད་ཤིང་རྟ་ཚུལ་དེ་ལ། །མོས་ལྡན་རྣམས་ཀྱི་བློ་ཡི་རྭ་བར་དྲོངས། །འཕྲིན་ལས་ཡོལ་བ་མེད་ལ་རྒྱ་མཚོའི་རླབས། །འགྲོ་བའི་རེ་འདོད་སྐོང་ལ་དཔག་བསམ་དབང་། །གདུང་སེལ་བདུད་རྩི་སྟེར་ལ་ཟླ་གཞོན་དང་། །མཚུངས་ཁྱོད་བསྐལ་བརྒྱར་ཞབས་པད་བརྟན་གྱུར་ཅིག །མགྲིན་པའི་འཁོར་ལོ་རྣམ་པར་གྲོལ་བ་ཡིས། །ནམ་ཡང་ཟད་པ་མེད་པའི་བཀའ་མཆིད་རྒྱུན། །དྲང་སྲོང་ཛ་ཧུའི་བུ་མོའི་སྤུན་ཟླ་གང་། །བསྒྱུར་མིན་འདྲེན་བྱེད་ཡུལ་དུ་རྒྱུ་བར་གསོལ། །ཞུ་མཆིད་ཀུནྡ་སྤྱན་ཟུང་བྷྲ་མ་ར། །འཇུག་སླད་སངས་རྒྱས་ཡར་ངོའི་ཟླ་སྣང་ཚེམས། །ལྷ་རྫས་དབང་ཕྱོགས་ས་འཛིན་རྩེར་བྱོན་པར། །རྟེན་འབྱུང་ཐུན་འཚམས་རྒྱ་ཡིས་ཉེར་སྤྲས་ཏེ། །ཀུན་ཚིག་ལང་ཚོ་རྒྱས་པའི་གནྡྷ་རྦྷ། །ཉམས་འགྱུར་སྟོང་གི་རྒྱུད་མང་འཁྲོལ་བཞིན་དུ། །ལྕི་ཡང་ཕྲེང་བར་སྤེལ་བའི་གར་སྟབས་ཀྱིས། །གནོད་སྦྱིན་ཕྱོགས་ཀྱི་ས་འཛིན་ངོས་དེར་སོང་། །འཕགས་ཡུལ་བ་ཨཱ་དྷ་ར་ཞེས་འབོད་པ་ཕྱོགས་འདིར་ཀུན་འཛིན་དུ་གྲགས་ཤིང་། (༦༢ན)
མ་ཧཱ་ཙཱི་ནའི་ཡུལ་གྲུར་ཝུན་ཙཱི་ཞེས་པ་ཁ་བའི་ཡུལ་འདིར་ས་ཕོ་བྱི་བའི་ལོ། ཧོར་གྱི་ཟླ་བ་བདུན་པ། དམར་ཕྱོགས་ཀྱི་དགའ་བ་དང་པོ། དུས་འཁོར་བའི་ཡ་ཎའི་དབྱངས་ལཱྀ། གསལ་བྱེད་དཱྀ་འཆར་ཞིང་། ཁམས་ནམ་མཁའ། སྙིང་སྟོབས་ཀྱི་མུན་པ་འཇུག་པ་ཆུང་ངུའི་བུ་མོ་དང་། །དབྱངས་འཆར་བའི་དཀར་ཕྱོགས་ཀྱི་དགའ་བ་དང་པོ། དབྱངས་ཨཱ། གསལ་བྱེད་ཙ། ཁམས་ས། འདོད་ཡོན་དྲི། ཏཏྐཱལ་བུ་མོའི་དུས་སྦྱོར་ལ་མཁས་མང་རྒྱ་མཚོའི་བསྟི་གནས་ཆོས་སྡེ་ཆེན་པོ་དཔལ་ལྡན་འབྲས་སྤུངས་ནས་ཕུལ། བསམ་ཡས་ནས་གནོད་སྦྱིན་ཆེན་པོའི་རྡོ་རྗེའི་གསུང་ལན་འཕྲིན་ལས་དཔག་བསམ་སྙེ་མ། དུས་གསུམ་རྒྱལ་བའི་སྐུ་གསུང་ཐུགས་རྡོ་རྗེ། །སྤྲུལ་སྐུའི་གཟུགས་སུ་ཤར་བ་མཚོ་སྐྱེས་རྗེའི། །བཀའ་སྲུང་སྲོག་གི་བཤན་པ་ཆེན་པོ་ཡི། །འཕྲིན་ཡིག་རྟགས་ཀྱི་མཚན་མར་བཅས་པ་འབྱོར། །བསིལ་ལྡན་ཕན་བདེའི་རྩ་ལག་སྤེལ་བ་ལ། །ལྷག་པའི་བསམ་པ་ཟླ་གཞོན་ལྟ་བུར་དཀར། །དགེ་ཚོགས་སྒྲུབ་ལ་མཐུན་རྐྱེན་མ་ལུས་པ། །གཡེལ་མེད་སྩོལ་བའི་ནུས་པའི་མཐུ་དཔུང་སྐྱེད། །སྙན་ཤལ་གསེར་སྐྱེམས་གོས་བཟང་རོལ་མོ་དང་། །རྐང་འཐུང་འབྲས་བུར་བཅས་པས་ཉེར་མཚོན་པའི། །ཕྱི་ནང་གསང་མཆོད་དངོས་བཤམས་ཡིད་སྤྲུལ་པ། །རབ་བཞེས་བཅོལ་པའི་འཕྲིན་ལས་མ་ལུས་སྒྲུབ། །སྔོན་གྱི་དམ་ཚིག་གཉན་པོ་ཉེར་དགོངས་ལ། །བདག་ལ་གནོད་པའི་དགྲ་བགེགས་མ་ལུས་པ། །སྟེང་འོག་ཕྱོགས་མཚམས་གང་དུ་གནས་ཀྱང་རུང་། །སྙིང་ཁྲག་འཐུང་ལ་མྱུར་དུ་ཚར་ཆོད་ཅིང་། །ཚེ་དང་བསོད་ནམས་དཔལ་འབྱོར་དབང་ཐང་དང་། །དམ་ཆོས་སྒྲུབ་པའི་མཐུན་རྐྱེན་ལེགས་ཚོགས་ཀུན། །བསམས་པ་ཙམ་གྱིས་རེ་བ་ཀུན་སྐོང་བའི། །ཡིད་བཞིན་(༦༢བ)
དབང་གི་རྒྱལ་པོ་ལྟ་བུར་མཛོད། །ཀུན་འཛིན་བགྲང་བྱའི་ཁྲུམས་ཟླ་ཡི། །དམར་ཕྱོགས་མཁའ་འགྲོ་འདུ་བའི་ཚེ། །གསང་ཆེན་ཆོས་ཀྱི་ཕོ་བྲང་ཆེ། །གྲུ་འཛིན་གཉིས་པའི་རྩེ་ནས་བྲིས། །འབྲི་གུང་ཞབས་དྲུང་ཁྲི་ཐོག་རིག་འཛིན་ཆེན་པོ་དཀོན་ཆོག་ཕུན་ཚོགས་ཆོས་ཀྱི་གྲགས་པ་དཔལ་བཟང་པོས་འདུལ་བའི་རྒྱ་ཆེར་འགྲེལ་གཡར་པོ་དགོས་ཚུལ་བྱུང་བ་འབུལ་བ་དང་གྲུབ་ཆེན་ཛ་བེར་གྱི་རླུང་ཁྲིད་སྐོར་གཡར་པོ་དགོས་ཚུལ་འཕྲིན་དུ་གསོལ་བ་པད་འབྱུང་གཉིས་པར་སྒྲོག་པའི་གླུ་དབྱངས། ས རྦྦཱ ཇོ ནྱཱ པ ཎྜི ཏ སི དྡྷི ཏྲི གུ ཧྱ ནཱ ཊ ཀྵཱ བཱཾ ཙ། པྲ བྷུ མ ཎྜ ལ ཙ ཀྲཱ ནཱ ཐོ དྷྲྀ གྨ ནྟྲེ ནྡྲ ཨཱ མཱུ ལེ། རྒྱལ་(ཛ་ཏིའི་སྡེབ་སྦྱོར་འཕགས་མ།)བ་ཀུན་གྱི་གསང་བ་གསུམ། །མཁས་དང་གྲུབ་པའི་ཟློས་གར་ཅན། ཁྱབ་བདག་དཀྱིལ་འཁོར་འཁོར་ལོའི་མགོན། །གསང་སྔགས་འཆང་བའི་དབང་པོའི་དྲུང་། །(༦༣ན)
དྲི་བྲལ་ཡིད་ཀྱི་ཀུན་གསལ་ངོས་ཡངས་པོར། །རྣམ་དཀར་མཛད་པའི་དབང་པོའི་གཞུ་རིས་ཅན། །ངོ་མཚར་བཀོད་པ་རྒྱ་མཚོས་རབ་བསྐུལ་ནས། །མགྲིན་པའི་འཁོར་ལོ་རྣམ་པར་གྲོལ་ཏེ་གསོལ། །མཐའ་བྲལ་བསོད་ནམས་བྱེ་བའི་ཆུ་གཏེར་ལས། །མཚན་དཔེའི་ཆ་ཤས་ཡོངས་སུ་ཉེར་གང་བ། །རྨད་བྱུང་གཟུགས་སྐུར་གྲུབ་པའི་ཟླ་སྣང་གིས། །ལུས་ཅན་ཕན་བདེའི་ཀུནྡ་དར་བའི་དཔྱིད། །འཛད་མི་ཤེས་པ་དམ་པའི་ཆོས་ཀྱི་དུང་། །ལོངས་སྤྱོད་འཁོར་ལོ་གཡས་སུ་འཁྱིལ་བའི་སྒྲ ། འགག་མེད་ཚངས་པའི་དབྱངས་སུ་ཉེར་བླངས་པས། །མེས་པོས་རྒྱལ་གསུང་དཔེ་ཟླར་སྤྲུལ་ལམ་སྙམ། །ཤེས་བྱའི་རང་བཞིན་དཔག་བསམ་ལྗོན་པའི་འབྲས། །མངོན་སུམ་རོ་བརྒྱའི་དཔལ་དུ་སྨིན་པའི་བཅུད། །མཁྱེན་པའི་སྐབས་གསུམ་དབང་པོས་ལོངས་སྤྱད་ཚེ། །སྲིད་ཞིའི་ཆོས་ཀུན་ཁྱོད་ཐུགས་ཀློང་དུ་མནལ། །ཕུལ་བྱུང་འཕྲིན་ལས་ཡན་ལག་བརྒྱད་ལྡན་རྒྱུན། །ལྔ་བརྒྱའི་ཉེས་ཚོགས་འཁྱུད་པའི་ཆོ་ག་མཁན། །བྱང་གྲོལ་བསིལ་བའི་རེག་བྱ་ལྷར་བཅས་འགྲོའི། །གཏན་བདེའི་དཔྱིད་དུ་སྤུན་ལས་གཞན་དུ་ཅི། །འདི་ན་འཇམ་མགོན་ཀུན་མཁྱེན་བཙོང་ཁ་པའི། །རིང་ལུགས་འཛིན་རློམ་སྡོམ་བརྩོན་ཀློག་པ་མཁན། །ཟ་ཧོར་རིགས་ཀྱི་ཨཱ་ཝ་དྷཱུ་ཏཱི་པ། །ཐོས་བསམ་སྒོམ་པའི་ཚུལ་ལ་མོས་བློར་མཆིས། །ཨེ་མ་རྨད་བྱུང་མཛད་བཟང་མཆོག་གི་དྲི། །གྲགས་སྙན་ལྷོ་ཕྱོགས་བསིར་བུས་རབ་བསྐྱོད་པ། །སྐྱེ་རྒུའི་ཡིད་ཀྱི་ཚ་གདུང་འཕྲོག་བྱེད་པའི། །སྔོན་མེད་མ་ལ་ཡ་ཡི་སྤུན་ཟླར་བྱས། །ཆོས་སྐུར་ངོ་སྤྲོད་དྲི་ཟའི་པི་ཝང་རྒྱུད། །དང་པོར་བརྡུངས་ཚེ་འཁྲུལ་པའི་རྒྱ་མཚོ་ཆེར། །རྣམ་རྟོག་གྲུ་གཟིངས་བཤིག་ཚེ་ས་ར་ཧ། །སྐྱེངས་པས་མཁའ་སྤྱོད་གནས་སུ་(༦༣བ)
བྲོས་ཀྱི་དོགས། །སྒྲིབ་གཉིས་མུན་པ་ཀུན་འཇོམས་སྣང་བཞིའི་ལམ། །ཚེ་གཅིག་ཀུན་བཟང་སར་འགོད་རྫོགས་པ་ཆེ། །སྔ་འགྱུར་ཆོས་ཀྱི་སྒོ་འཕར་བརྒྱ་ཕྱེ་བས། །མངལ་སྐྱེས་པདྨ་འབྱུང་ཞེས་ལྷ་རྣམས་གླེང་། །དབུགས་བྲལ་བམ་ཆེན་སྟེང་དུ་གར་རྩེ་བའི། །དོན་སྙིང་ཁྲག་གིས་མྱོས་པའི་དམ་ཅན་ཚོགས། །བྲན་ལྟར་སྐུལ་བའི་རིག་སྔགས་མཐུ་གྲུབ་པས། །གནུབས་སྟོན་རྒྱ་ཞང་ཁེངས་པ་ཕྲོགས་པ་བཞིན། །བླུན་སྒོམ་རྒན་པོའི་རང་བཞིན་ཡ་མ་བརླ། །རིང་པོར་དོར་བའི་མང་ཐོས་རྣམ་དཔྱོད་ཀྱིས། །གནས་ལྔའི་བསྟན་པ་སྤེལ་བའི་ཤོང་དཔང་དང་། །ཆོས་སྐྱོང་བཟང་པོའི་རྣམ་པར་ཐར་འདི་གསོན། །བློ་གྲོས་ཀ་ཤི་མཛེས་དགའི་འདྲེན་བྱེད་དེར། །བྱིངས་དང་རྣམ་འགྱུར་རྐྱེན་གྱི་ཁ་དོག་ཚོན། །རྣམ་བཀྲ་བརྡ་སྤྲོད་འཁྱོག་པོར་ལྟ་བའི་དཀྱུས། །བསྟན་ཚེ་ལྷ་ཡི་བླ་མའི་ཁེངས་པ་ཕྲོགས། །ཉམས་དང་འགྱུར་བའི་རྐང་གདུབ་སྒྲ་འཁྲོལ་ཞིང་། །ཤར་ལྷོའི་ལམ་བཟང་འདབ་གཤོག་རབ་སྐྱོད་པའི། །སྙན་ངག་གཉིས་སྐྱེས་ལུས་དཀར་དབང་པོ་དེ། །སྔོན་བྱོན་མཁས་རྣམས་མགྲིན་པའི་པད་མཚོར་རོལ། །བྲྀཏྟ་ཛཱ་ཏིའི་རྣམ་བཀྲ་ཟ་འོག་ཐགས། །ལྕི་དང་མང་བའི་སྣ་ཚོགས་རི་མོ་ཅན། །ལེགས་སྦྱར་སྐད་ཀྱི་བོས་སུ་ལེགས་གྲུབ་པ། །གྱོན་མཁས་གངས་རིའི་ལྗོངས་སུ་མང་ཞིག་རྒྱུ། །གྲོང་ཆོག་ན་ཀྲའི་ཚོགས་ཀྱིས་མ་གཙེས་ཤིང་། །སྙན་ཚིག་དུས་ལས་ཡོལ་བ་མེད་པའི་བརླབས། །སྔ་ན་མཆིས་མིན་མངོན་རྗོད་རྒྱ་མཚོའི་མཐར། །བགྲོད་བྱེད་ཤེས་ལྡན་རྣམས་ཀྱི་གྲུ་གཟིངས་ཆེ། །གྲངས་མེད་སྐད་རིགས་བཻ་ཌཱུར་འཁྱིལ་བའི་ཁམས། །བཅད་ལྷུག་སྤེལ་མའི་རི་མོའི་སྣང་བརྙན་ཅན། །ཀུན་གྱི་གཟིགས་མོར་མཚར་བའི་ཟློས་གར་གྱི། །ནོར་བུའི་རྣ་རྒྱན་མཁས་(༦༤ན)
རྣམས་འགྲམ་པར་སྤ། །ལྐོག་གྱུར་ཤེས་བྱའི་རི་དྭགས་མིག་ཅན་བཞིན། །དཀར་ནག་རྩིས་ཀྱི་མེ་ལོང་ངོས་ཤར་བའི། །རྣམ་དཔྱོད་ཚོགས་ཀྱིས་དཔལ་སྟུག་མཁྱེན་པ་ལ། །མོས་པའི་བློ་དང་ལྷོད་པོར་གྱུར་མིན་ནམ། །ནད་མུན་ཐུན་གསུམ་སྨག་རུམ་སྟུག་པོའི་མཐའ། །བདེ་བའི་སྐྱ་རེངས་དང་པོར་འཆར་བྱེད་སྨན། །གསོ་རིག་གཙུག་ལག་ཉིན་བྱེད་དབང་པོ་དེ། །གཡུ་ཐོག་རིང་ལུགས་རྟ་ལྗང་བདུན་གྱིས་དྲངས། །སྙིང་མེད་འཁོར་བའི་དངོས་ཀུན་གཏན་བདེའི་རྒྱུར། །སྒྲུབ་བྱེད་བསོད་ནམས་ཞིང་གི་དཔལ་གྱུར་པ། །འཕགས་ཆེན་དམ་པའི་སྣང་བརྙན་གྲངས་མེད་དང་། །སྐྲུན་བྱེད་གསོ་རིག་ཤེས་ལྡན་གཟིགས་མོར་མཚར། །ལོག་པར་སྨྲ་བའི་དམ་བཅའི་རི་དྭགས་སྙིང་། །ཕྲ་ཞིབ་རིགས་པའི་གདོང་ལྔའི་སྒྲ་དབྱངས་ཀྱིས། །ཅིག་ཅར་འགས་བྱེད་རྟོག་གེའི་ཚིག་དོན་བརྒྱད། །སྨྲ་མཁས་ཆོས་ཀྱི་གྲགས་པ་གཉིས་པ་མང་། །རྣམ་གསུམ་སྡེ་སྣོད་སྙོམས་འཇུག་ལ་གནས་ཤིང་། །གསང་ཆེན་ཐེག་པའི་སྣང་བྱེད་མེ་དཔུང་གིས། །སྒྲིབ་གཉིས་སྔོན་གྱི་ལྷ་རྣམས་སྲེག་བྱེད་པའི། །རྒྱ་བོད་མཁས་གྲུབ་དཔལ་མགྲིན་ཅན་དེ་མཚར། །འགྲོ་འདྲེན་སྙིང་སྟོབས་གོ་གྱོན་བྱང་སེམས་རྣམས། །མཐའ་ཀླས་ཤེས་བྱའི་ཚུལ་ལ་ལེགས་སློབ་ཕྱིར། །ཕྱག་རྫོགས་གྲུབ་རིགས་བསྟན་འཛིན་དབང་པོ་ཁྱོད། །བཅུ་ཕྲག་རིག་གནས་ཚད་མས་གཞལ་ལམ་ཅི། །སོས་དུས་རབ་དཀར་ཆུ་འཛིན་ལང་ལོང་དབུས། །དབྱར་རྔ་དལ་གྱིས་སྙན་པོར་སྒྲོག་པའི་སྐད། །རིང་པོའི་མཐའ་ནས་བསྒྲགས་ཚེ་གཙུག་ཕུད་ཅན། །དགའ་བའི་གར་སྟབས་སྒྱུར་ལ་ཅི་ཡང་བྲེལ། །ཡིད་འོངས་ཨེ་རཎྜ་ཡི་ལྗོན་པ་ལས། །འབྲས་བུ་ཁུར་དུ་དུད་པའི་(༦༤བ)
བཅུད་ཀྱི་རོ། །མངར་པོར་ཡོངས་སུ་སྤྱོད་འདོད་སྐྱེ་བོ་འགའ། །བདེ་བའི་སེམས་ཀྱིས་ངལ་ཏེ་གཉིད་ལ་ཡུར། །ལྷ་ལམ་ངོས་སུ་རླུང་གི་རྒྱལ་མཚན་ཅན། ཁྱབ་འཇུག་ལག་པར་འཁོར་ལོའི་རི་མོ་མཛེས། །བགྲང་ཡས་འགྲོ་བའི་ཉེར་འཚོར་ཉི་མའི་གཉེན། །སྔ་འགྱུར་བསྟན་པའི་དབུས་ན་རིག་འཛིན་ཁྱོད། །སྙིགས་དུས་ཚེར་རྣོན་འཁྱོག་པོའི་ནགས་ཀླུང་ཁྲོད། །སྐྱེ་སྤྲུལ་ཙན་དན་ལྗོན་པ་དར་བབ་གང་། །ཤར་ཕྱོགས་དབང་པོའི་ཕང་པར་ཁྱོད་ཉིད་ལ། །རེ་བའི་གདུལ་བྱར་ཕན་བདེའི་དྲི་བསུང་སྩོལ། །སྙན་འགྱུར་མགྲིན་པའི་དྲིལ་ཆུང་སིལ་ཁྲོལ་ཅན། །དོན་བཟང་འཇམ་གཉེན་སྒྲོ་གཤོག་ཆེར་ངོམ་པའི། །དཀར་མཆིད་གཞན་སོས་དཔྱིད་ཀྱི་ཕོ་ཉ་དག །དབྱར་གྱི་དགའ་སྟོན་ཆད་དུ་ཆད་མེད་ཞུ། །ཉམས་འགྱུར་སྟོང་གི་ལང་ཚོ་ཆེར་རྒྱས་པའི། །རི་མོ་སྒྱུ་རྩལ་སྤྱོད་ཀྱི་གར་མཁན་མ། །ཟླ་ཤེལ་ཐགས་སུ་གྲུབ་པའི་གོས་གྱོན་ཏེ། །འཚམས་སྤྲིན་རྒྱ་ཡི་དོ་རར་གར་གྱིས་རོལ། །དབང་ཕྱོགས་འཇམ་དབྱངས་གོང་མའི་རྒྱལ་ཁབ་ན། །ལོ་འགོ་བཅུ་གཉིས་བདག་པོ་གཞུ་ཁྱིམ་དུ། །ཉེར་སྤྱོད་དཀར་ཕྱོགས་རྒྱལ་བ་གསུམ་པ་ཡི། །དབྱངས་ཀྱི་རྒྱལ་མོ་ཨུ་ཡིག་ཆར་ཚེ་ཕུལ། །གོང་ནས་ངོས་ཕོ་བྲང་དུ་འབྱོར་དགོས་ཚུལ་གྱི་བཀའ་ཤོག་གནང་སྦྱིན་བཟང་པོ་དང་བཅས་གསེར་ཡིག་པར། ཤེས་རབ་བླ་མ། གཙང་པ་བཀའ་བཅུ། ད་ལས་ཆོས་རྗེ། མི་རྒན་པོའོ། ཚུལ་ཁྲིམས་ལ་སོགས་ས་ཁྱིའི་འཇུག་འབྱོར་བའི་དུས་མི་སྣ་རྣམས་དང་མཉམ་དུ་དཀའ་བཅུ་ཤེས་རབ་རྫོང་སྟ་བྱས་སྐབས་ཕུལ་བའི་ཞུ་ཡིག་འཇམ་དབྱངས་སྙན་གྱི་མཛེས་རྒྱན་ཨུཏྤལ་འཛུམ་ཕྲེང་། (༦༥ན)
ཨཱ ཛྙཱ མ ཉྫུ ནཱ ཐ ནི དྷི དྭི པ ཛ མྦཱི ཥ ཛ ཡྻ ཙ། བུ ཎྱཱ སི ཁྱ ཙ ཀྲ པྲ ཧྨ མཱུ ལེ ྅ དྷི ཝ རྟཾ བྷཽ མི ཀ །སྟོབས་(ཁ་སྒོ་ཕན་པའི་སྡེབ་སྦྱོར།)བཅུ་མངའ་བ་ཀུན་གྱི་མཁྱེན་པའི་གཏེར། །འཇམ་མགོན་ཟུར་ཕུད་ལྔ་པ་འཛམ་གླིང་འདིར། །གྲངས་མེད་ལེགས་པར་བྱས་པས་འཁོར་ལོ་ཡིས། །མངའ་སྒྱུར་ས་ལ་སྤྱོད་པའི་ཚངས་པའི་དྲུང་། །རྫོགས་ལྡན་དགའ་སྟོན་བཅུ་དྲུག་ཆ་ཤས་ཀུན། །ཡོངས་སུ་གང་བའི་རིང་མིན་དུས་ཀྱི་ཆར། །རབ་དཀར་དང་བའི་ཡིད་གྱི་ཀུ་མུ་ད། །རྩེ་དགའ་ཁོང་ནས་དགོད་པས་མཆིད་འདི་ཞུ། །ཚོགས་གཉིས་རིན་ཅེན་འབྱུང་གནས་ལས་འོངས་པའི། །རྨད་བྱུང་བདུད་རྩིར་འཁྱིལ་བའི་གཟུགས་ཀྱི་སྐུ། །(༦༥བ)
ཕན་བདེའི་མཆི་མེད་དཔལ་སྟེར་གྲགས་སྙན་སྒྲ། །ཐོས་འཛིན་གསོས་སུ་ཚངས་དབྱངས་དཔེ་ཟླར་བྱས། །མངོན་པར་རབ་གསལ་མཁྱེན་ཡངས་རྣམ་དཔྱོད་སྤྱན། །གཙུག་ལག་བྱེ་བའི་རྫས་སུ་ཉེར་འཇུག་པ། །སྲིད་ཞིའི་ཆོས་ཀུན་ལྟ་བའི་བློ་གྲོས་ཀྱིས། །འཇིག་རྟེན་མེས་པོའི་ཚུལ་ལ་ཅོ་འདྲི་སྙམ། །ལེགས་བྱས་གསེར་སྦྱངས་རྩིབས་སྟོང་འཁོར་ལོའི་རྩལ། །གསེར་ལྡན་ལྟོ་བར་ཐོགས་མེད་སྒྱུར་བའི་ཤུགས། །མཆོད་སྦྱིན་བརྒྱ་པའི་གནས་སུ་འགྲོ་བཟོད་པས། །སྐབས་གསུམ་པ་རྣམས་ཕྱོགས་དེར་འདུད་པ་བཞིན། །དྲང་པོར་འདེབས་པའི་ཁྲིམས་གཉིས་བསེར་བུ་ཡིས། །བདེ་སྐྱིད་མ་ལ་ཡར་སྐྱེས་དྲི་བསུང་ཚོགས། །འབད་མེད་འདྲེན་པའི་ཆོ་ག་རབ་བསྟར་བས། །འཕགས་ཆེན་དམ་པའི་སྤྱོད་པ་ད་གདོད་ཁུམས། །ཤཱཀྱའི་རིང་ལུགས་ཆུ་ཤེལ་དབང་པོ་ལ། །དད་པའི་སོར་མོའི་འདབ་མ་རབ་ཟུམ་པའི། །སྡོམ་བརྩོན་གཉིས་སྐྱེས་ཀློག་པ་མཁན་པོ་ཡང་། །ཐོས་བསམ་སྒོམ་པའི་ཚུལ་ལ་མོས་བློར་མཆིས། །བདེ་ལེགས་རབ་དཀར་འབུམ་དུ་འཛག་པའི་རྔ། །ཕུན་ཚོགས་མཛད་བཟང་དབྱུ་གུས་ཉེར་བསྐུལ་བས། །དགེ་བཅུ་རྫོགས་པར་སྤྱོད་ལྡན་སྙན་པའི་སྒྲ། །ཕྱོགས་བྲལ་རྣ་བའི་རྒྱན་དུ་དངར་བ་དང་། །འདོད་པའི་རེ་སྐོང་སྔོན་མེད་ཡིད་བཞིན་ནོར། །འཛམ་གླིང་འགྲོ་བའི་ཉེར་འཚེ་དཔག་བསམ་ལྗོན། །གནམ་བསྐོས་ནོར་འཛིན་སྐྱོང་བའི་ལྷ་ཡི་ལྷ། །མི་འགྱུར་རྡོ་རྗེའི་ཁྲི་ལ་ཞབས་བརྟན་གསོལ། །འཆི་མེད་སྒྲ་འཛིན་བཻ་ཌཱུར་ཡོལ་གོའི་ནང་། །འཁྱིལ་པོས་གཏམ་གྱི་བདུད་རྩི་ཕོ་ཉ་ཡི། །ངག་གི་སྙིམ་པས་བཏེག་ནས་ལྷ་ཁྱོད་ཀྱི། །འདུན་སར་སོང་ལ་སྤྱན་རས་ཀྱིས་བཅའ་ཞིང་། །ཚངས་དབྱངས་དྲུག་ཅུའི་རང་བཞིན་གསུང་གི་དཔྱིད། །ཀུན་དགའི་འཛའ་བ་སྟེར་བའི་འཛུམ་ཞལ་ལས། །ཉེར་འོངས་ཕེབས་ཚོགས་གངྒཱའི་ཆུ་ཀླུང་ཆེ། །ནམ་ཡང་ཆད་པ་མེད་པར་རྒྱུ་བར་ཞུ། །འདྲེན་བྱེད་ངང་མོ་རོལ་བརྟེན་རྡོ་རྗེའི་མདུད། །ལྷ་རྫས་ཤལ་དཀར་ནམ་མཁའ་དུས་ཀྱི་གྲངས། ཁ་དོག་ལྔ་ལྡན་(༦༦ན)
འཇམ་པོ་བརྒྱ་ཕྲག་གི །ཡིད་འོང་པད་དཀར་སྡིང་པོར་རྒྱས་བཏབ་སྟེ། །གསེར་སྦྱངས་བཙོ་མའི་གོས་གྱོན་གླང་གི་ལོའི། །ཀུན་ཕན་དབོ་ཡིས་ཉ་བའི་དཀར་ཕྱོགས་ཀྱི། །ཉི་མ་མེ་བཞི་དང་འགྲོགས་འགྲུབ་སྦྱོར་དུས། །གྲུ་འཛིན་གཉིས་པའི་གཞལ་མེད་ཁང་ནས་ཕུལ། །སླར་ཡང་གོང་ནས་ངོས་ཕོ་བྲང་དུ་འབྱོར་དགོས་ཚུལ་ཡང་སྐྱོར་གྱི་བཀའ་གཤོག་གནང་སྦྱིན་དང་བཅས་དཀའ་བཅུ་ཤེས་རབ་པ་དང་མཉམ་དུ་གསེར་ཡིག་པར་ནོམ་ཕྱི་བླ་མ་ནོར་བུ་དཔོན་གོ་ཐོ་ནོས་ཁཱ་རྣམས་ལྕགས་སྟག་ལོ་འགོར་འབྱོར་པ་རྣམས་དང་ཆབས་གཅིག་པར་ཆེ་ཆེན་དཔོན་པོ་བློ་བཟང་ཆོས་འཕེལ་རྫོང་སྟ་བྱས་སྐབས་ཕུལ་བའི་ཞུ་ཡིག་སྡེ་བཞིའི་སྒོ་འཕར་འབྱེད་པའི་ལྡེ་མིག །རཱུ པ ཨཱ དྨ སྱ དེ ཝཱ མྲྀ ཏཱ ཏི ཤྱ ཙཱ ཀྵ ཪྻ བ ཛྲཱ ཡུ དྷཱ ཏུ སྭ བྷ ཝྱ ས དྷ། ས རྦྦ ཀཱ ལེ མ ཧཱ རཱ ཛ མ ངྒ ལྱ ལ ཀྵྨཱི པྲ ཡ ཙྪཱ གག ནྱ ཉྩ བྷཱུ མཱི ཤྭ ར། །འགྱུར་(སྡེབ་སྦྱོར་མེ་ཏོག་ཕྲེང་བ་ཅན།)མེད་རྡོ་རྗེའི་རང་བཞིན་ཚེ་ཡི་ཁམས། །གྲུབ་པའི་རང་གཟུགས་ཕུལ་བྱུང་འཆི་མེད་ལྟར། །གནམ་སའི་དབང་ཕྱུག་ནོར་འཛིན་སྐྱོང་བ་ལ། །དུས་རྣམས་ཀུན་དུ་ཤིས་པའི་དཔལ་སྩོལ་ཅིག །(༦༦བ)
སྲིད་དང་ཞི་བའི་ཡོན་ཏན་སྙིང་པོའི་གཏེར། །གསེར་ལྡན་དགའ་མའི་མངལ་དུ་དར་བའི་དཔྱིད། །ཕྱོགས་ལས་རྣམ་པར་རྒྱལ་བའི་མི་ཡི་རྗེ། །འཇམ་དབྱངས་གོང་མ་རྒྱལ་པོ་ཆེན་པོའི་དྲུང་། །གཙུག་ལག་བྱེ་བའི་དཔལ་ལ་མངའ་འབྱོར་བའི། །རབ་སྙན་གཏམ་གྱི་ལུས་ཕྲའི་འགྲམ་ཆང་གིས། །རྣམ་པར་ཕྱེ་བས་ཡིད་ཀྱི་བ་ཀུ་ལ། །རབ་དགའི་འདབ་ཕྲེང་བཞད་པས་མཆིད་འདི་ཞུ། །མཐའ་ཀླས་བསོད་ནམས་ཆར་གྱི་ལེགས་བསྐྱངས་པའི། །གསང་གསུམ་དཔག་བསམ་ཡོངས་འདུ་གསར་པའི་འབྲས། །འདོད་པའི་རེ་བ་སྐོང་བའི་དབང་གི་རྒྱལ། །འདི་ཀོ་སྐྱེ་རྒུའི་བསོད་ནམས་ཟོང་གིས་བསྒྲུབས། །མཐོང་ན་མི་མཐུན་མེད་པའི་ངོ་མཚར་གྱི། །མཚན་བཟང་བསིལ་ཟེར་བྱེ་བ་བརྒྱ་ཕྲག་གིས། །ཀུན་ཡིད་ཨུཏྤལ་ཁོང་ནས་ལེགས་འཛུམ་པས། །རྫོགས་ལྡན་གསར་པའི་མགྲོན་དེ་འགུགས་པ་བཞིན། །ཆ་ཤས་ཟེགས་མ་རེས་ཀྱང་རྣ་བ་དང་། །ཡིད་ལ་ཀུན་དགའི་དགའ་སྟོན་སྟེར་བྱེད་པ། །སྙན་འགྱུར་གསུང་གི་སྔོན་མེད་ཟིལ་མངར་གྱིས། །འཇིག་རྟེན་མེས་པོས་ཁེངས་པར་འགྲན་གྱིས་དོགས། །ཟབ་གསལ་ཐུགས་ཀྱི་ཆུ་གཏེར་ཆེན་པོའི་ཀླུང་། །སྲིད་འདིའི་བདེ་ལེགས་སྤེལ་ལ་ཡོལ་མེད་རླབས། །ཕུན་ཚོགས་སྡེ་བཞིའི་ནོར་བུའི་འབྱུང་གནས་ཀྱི། །སྣོད་དུ་མེས་པོས་ཡངས་པའི་ས་འདི་སྤྲུལ། །རྨད་བྱུང་མཛད་པའི་ཉིན་མོའི་སྣང་བ་ཡིས། །བསྟན་འགྲོའི་ཕན་བདེའི་འདབ་སྟོང་བཞད་པ་དང་། །རྒུད་པའི་ཕུན་ཚོགས་འཇོམས་པའི་བྱེད་པོ་རུ། །གནམ་གྱི་མཐོངས་ནས་འོངས་པ་ཁྱོད་མིན་སུ། །དེ་ཕྱིར་དད་སྟོབས་ནོར་བུའི་ཡུ་བ་ཡིས། །ལེགས་པར་བཏེག་པའི་ལུགས་ཟུང་ཁྲིམས་ཀྱི་གདུགས། །རྣམ་སྨིན་དཀར་པོར་གཡོ་བའི་ཤམ་བུ་ཅན། །སྲིད་པའི་རྩེ་མོར་བརྒལ་ཏེ་འཁོར་བར་རིགས། །འཛམ་གླིང་སྐྱེ་རྒུའི་བདེ་བའི་ངལ་གསོའི་སྟེགས། །མ་སྨད་ནོར་བུའི་བཻ་ཌཱུར་ལེགས་འཁྱིལ་བའི། །རྩོད་པའི་དུས་ཀྱི་འཁོར་ལོས་སྒྱུར་བ་ཁྱོད། །(༦༧ན)
མི་འགྱུར་རྡོ་རྗེའི་བསྟན་ལ་བརྟན་གྱུར་ཅིག །དྲི་མེད་འདྲེན་བྱེད་གཉིས་སྐྱེས་ལུས་དཀར་ཅན། །ཞུ་མཆིད་དགའ་བའི་ཚལ་དུ་འབབ་པའི་རྟེན། །ཚན་གྲངས་གནམ་སྔོན་ཞུན་མའི་རྫིང་བུ་ལ། །རྟགས་ཀྱི་ཨུཏྤལ་དམར་པོས་རྒྱས་བཏབ་སྟེ། །ལྕགས་ཀྱི་དབང་ཐང་ངོམ་པ་བྱ་གྷྲའི་ལོའི། །ཀུན་ཕན་ཆུ་སྟོད་དང་འགྲོགས་བྲལ་ཚེས་ལ། །གངས་ཅན་འཛིན་མའི་ལྟེ་བའི་དབུས་འགྱུར་འཆང་། །དཔལ་ལྡན་འབྲས་སྤུངས་ཆོས་ཀྱི་སྡེ་ནས་ཕུལ། །འབྲི་གུང་ཞབས་དྲུང་ཁྲི་ཐོག་པ་ཆོས་ཀྱི་གྲགས་པ་སྔགས་འཆང་གོས་དཀར་ལྕང་ལོའི་འཕྲེང་བ་འཛིན་པ་ངུར་སྨྲིག་གི་ཆས་སུ་བསྒྱུར་ཏེ་དགེ་སློང་རྡོ་རྗེ་འཛིན་པའི་སྐབས་འདུལ་བའི་རྣམ་བཤད་གཅིག་ཐུགས་རྩོམ་མཛད་པའི་ཚེ་མདོ་རྩའི་དཔེ་དག་པ་ཞིག་དགོས་ཚུལ་གྱི་ཆབ་ཤོག་ལན་སྐུ་གསུམ་རིམ་གྱིས་སྒྱུར་བའི་གར་མཁན། གུ ཧྱཱ ཛ ཡ ནྲྀ ཏྱ ཝ རྱ ཡ ནྱཱ དྷ རྱཱ ལ ཡ ཡཱ སུ ཝ རྟི ཏཾ། །བ དྱཱ མ ནྟྲ དྷ རཱ བ ས ནྟུ བྷུ ཏྱཱ བྷ ཊྚ ར ཀ ཝ རྱ མཱུ ལ ཡཱ། །རྒྱལ་(སྡེབ་སྦྱོར་དག་པའི་སྣང་བ།)ཀུན་གསང་བ་གསུམ་གྱི་གར། །ཐེག་པ་མཆོག་གི་འཛིན་མའི་གཞིར། །ལེགས་སྒྱུར་རིག་སྔགས་འཆང་ཀུན་གྱི། །དཔྱིད་གྱུར་རྗེ་བཙུན་མཆོག་གི་རླུང་། །(༦༧བ)
དེང་དུས་མཚན་དཔེའི་ལང་ཚོ་དར་བབ་པའི། །བཀོད་པ་རྒྱ་མཚོའི་གཟུགས་སྐུའི་ཆུ་ཤེལ་དབང་། །ཕུལ་བྱུང་འཕྲིན་ལས་བསིལ་བའི་ཟེགས་མ་རེས། །བསྟན་འགྲོའི་ཀུནྡ་ཁོང་ནས་འཛུམ་པ་བཞིན། །མི་འགྱུར་བདེ་ཆེན་ཡེ་ཤེས་དབང་གི་རྒྱལ། །ཅོད་པན་ལ་འཆང་མཁས་གྲུབ་ཀླུ་དབང་ཁྱོད། །ཐུན་མོང་ཐེག་པའི་རྩོལ་བར་ལྟོས་མིན་པའི། །དགེ་ཚོགས་འདོད་རྒུ་འབྱུང་བ་འབད་མེད་གཤིས། །འོན་ཀྱང་སྒྱུ་འཕྲུལ་སྲས་དེས་འོག་མིན་ནས། །སྤངས་དང་རྟོགས་པའི་ཡོན་ཏན་རབ་རྫོགས་པ། །ཐུན་མོང་གདུལ་བྱའི་ཆེད་དུ་ངུར་སྨྲིག་གོས། །འཛིན་དེའི་རྗེས་སུ་འཇུག་པ་འདི་རྨད་བྱུང་། །གཏིང་མཐའ་ཡོངས་བྲལ་ཉོན་མོངས་རྒྱ་མཚོ་ལས། །བྲལ་ནས་མྱང་འདས་རིན་ཅེན་གླིང་མཆོག་ཏུ། །སྒྲོལ་བྱེད་ཚུལ་ཁྲིམས་བསླབ་པའི་གྲུ་གཟིངས་མཆོག །ཉི་མའི་གཉེན་གྱི་གསུང་རབ་ཀུན་གྱི་བཅུད། །ཕང་ཕུང་ཚིག་གི་ལོ་མས་མ་གཙེས་ཤིང་། །གཞུང་དོན་འབྲས་བུ་སྨིན་ལ་ཡོལ་མིན་པའི། །མདོ་རྩའི་གླེགས་བམ་ཡོངས་འདུའི་ལྗོན་པ་འདི། །མཁས་གྲུབ་ལེགས་བྲིས་གང་དེའི་དགའ་སྟོན་གནས། །བཅུ་དྲུག་ཆ་ཤས་མི་ལྡན་སྔོན་མེད་ཀྱི། །ཟླ་བ་ཐགས་ཀྱི་རི་མོས་རྣམ་བཀྲ་བ། །ཐུན་འཚམས་རྒྱ་ཡི་རི་དྭགས་གཟུགས་བརྙན་དང་། །འགྲོགས་ཏེ་ཨེ་ཡིག་འཆར་བའི་ཚེས་ལ་ཕུལ། །དཔལ་ས་སྐྱའི་ཁྲི་ཐོག་པ་ཞབས་དྲུང་ངག་དབང་ཀུན་དགར་བསོད་ནམས་གྲགས་པ་རྒྱལ་མཚན་དཔལ་བཟང་པོའི་རང་གི་རིགས་ཀྱི་སྲས་གདན་ས་ཆེན་པོའི་ཁྲི་ཐོག་ཏུ་འདོན་པར་བཞེད་ནས་སྔར་སྲོལ་བཞིན་འབྲེལ་ཅན་གྲྭ་རིགས་སྦྱིན་བདག་ཀུན་ལ་རྟེན་འབྱུང་ལེགས་སྐྱེས་ཀྱི་རིམ་པ་དགོས་ཚུལ་སྐུལ་སྲོལ་ཡོད་འདུག་པ་ལྟར་འདིར་ཡང་འབྲེལ་ཆགས་ཀྱི་དབང་དུ་བཏང་བའི་ཆབ་ཤོག་གི་ལན་དྲང་ཐིག་ནམ་མཁའི་སྐ་རགས། སྲིད་དང་ཞི་བའི་གཙུག་ཏོར་འཐོན་པའི་རྩེར། །བཀྲ་ཤིས་འཁོར་ལོས་མཚན་(༦༨ན)
པའི་ཞབས་སེན་གྱི། །ངོ་མཚར་ཅོད་པན་འགོད་པའི་འཁོར་ལོའི་བདག །བརྩེ་ཆེན་སྙིང་པོའི་ཞབས་དེས་རིང་ནས་སྐྱོངས། །གང་དེའི་རིགས་ཆོས་པདྨ་དཀར་པོའི་ཚལ། །མ་སྨད་མཁྱེན་བརྩེའི་འོད་ཀྱིས་རྒྱས་མཛད་པའི། །མཁས་གྲུབ་ཉིན་མོར་བྱེད་པའི་དབང་ཕྱུག་ཆེ། །བསྟན་འགྲོའི་དཔལ་མགོན་དམ་པ་གང་དེའི་དྲུང་། །དེང་དུས་གསང་གསུམ་རྡོ་རྗེའི་རང་བཞིན་མཆོག །ཕུལ་བྱུང་མཚན་དཔེའི་གཟི་བྱིན་མངོན་འབར་བས། །བསྟན་འགྲོའི་སྣང་བ་སྐྱེད་པའི་ཆོ་ག་ཀུན། །གྲུབ་པའི་ངོ་མཚར་སྒོ་འཕར་འབྱེད་པའི་ངོས། །ཆབ་ཤོག་ལྷོ་ཡི་ཕྱོགས་ནས་འོངས་པའི་རླུང་། །ཚིག་དོན་འཇེབས་པའི་མ་ལ་ཡ་ཡི་དྲི། །ཚན་གྲངས་བསིལ་བའི་རེག་བྱ་དང་བཅས་ཏེ། །དབུས་འགྱུར་ཆོས་ཀྱི་མདུན་སར་འགོག་མེད་ཕེབས། །མཐའ་ཀླས་རིགས་པས་གྲངས་མེད་གསུང་རབ་ལ། །བརྒལ་བརྟག་དཔྱོད་བཟོད་སྡོམ་བརྩོན་ཀློག་པ་མཁན། །འཆད་རྩོད་རྩོམ་པའི་བྱ་བར་རབ་གཞོལ་ཡང་། །སེམས་ཀྱི་རྡོ་རྗེའི་རྣལ་འབྱོར་མི་དམན་ཙམ། །ཐོས་དང་བསམ་པའི་ཡོངས་འདུའི་ལྗོན་པ་ལས། །ཚུལ་བཞིན་སྒོམ་པའི་འབྲས་བུ་གཡུར་ཟ་བ། །སྐུ་བཞི་མངར་བའི་རོ་ལ་ལོངས་སྤྱོད་པ། །རྒྱ་བོད་མཁས་གྲུབ་ཀུན་གྱི་རྣམ་པར་ཐར། ཁྱད་པར་རིགས་གསུམ་མགོན་པོའི་སྒྱུ་དྲའི་གར། །སྙིང་པོའི་ཞབས་ནས་བློ་གྲོས་རྒྱལ་མཚན་བར། །རིམ་བྱོན་འཇིགས་མེད་སེང་གེའི་ཁྲིར་འཁོད་པའི། །བཤད་དང་སྒྲུབ་པའི་བསྟན་པ་གསལ་མཛད་རིགས། །འཕགས་ཡུལ་རྣལ་འབྱོར་དབང་ཕྱུག་ཆོས་སྐྱོང་ཞབས། །ཐུན་འཚམས་བླ་གོས་གསར་པས་རབ་མཛེས་པ། །བློ་གྲོས་མཆོག་ལ་འོས་པའི་གསང་ཆེན་གྱི། །ཟབ་དོན་ཆོས་ཀྱི་རྒྱལ་མཚན་རྣམ་པར་སྒྲེངས། །སྟོབས་འབྱོར་ཅིག་ཤོས་སྒོ་ངའི་སྦུབས་ནང་ནས། །སྙན་འགྱུར་སློབ་བཤད་ཀ་ལ་པིང་ཀའི་སྒྲ། །སྒྲོག་ཚེ་(༦༨བ)
ཚོགས་པར་བཤད་པའི་ངུར་པའི་ཁྱུ། །རོ་བྲལ་ཅ་ཅོའི་སྒྲ་ཡིས་ངལ་མིན་ནམ། །ཉེ་ལམ་དྲི་མེད་གདུང་གི་ནམ་མཁའི་ངོས། །རྨད་བྱུང་རིགས་ཀྱི་ཐིག་ལེ་ཟླ་ཚེས་ཅན། །ལུགས་ཟུང་ཆ་ཤས་གང་བའི་བཞེད་པའི་དོན། །ཕན་གྲགས་ཡར་ངོའི་ཞག་གི་བགྲོད་པ་རྩོམ། །སླད་མར་བསྒྱུར་བ་མེད་པའི་ཕེབས་ཚོགས་ཀུན། །སྙན་འགྱུར་ཚིག་གི་མཐའ་མེད་ཆུ་གཏེར་ཆེ། །ཤིང་གི་མ་མའི་གསེར་ལྡན་ལྟོ་བ་རུ། །གསུང་ཤོག་རླབས་ཕྲེང་ཡོལ་བ་མེད་པ་ཞུ། །ར་མོ་ཨནྡ་རྙིལ་འདྲའི་རྫིང་བུ་ལ། །སྤྱན་རས་ལུས་དཀར་དབང་པོ་གཡོ་བའི་རྟེན། །རྟགས་ཀྱི་ཨུཏྤལ་དམར་པོའི་འཛུམ་བཞིན་དུ། །ཀུན་ཕན་དབྱུག་པས་ཉ་བའི་ཟླ་བར་ཕུལ། །སློབ་དཔོན་སྨོན་འགྲོ་པཎ་ཆེན་འཇམ་དབྱངས་དབང་རྒྱལ་རྡོ་རྗེ་འཁོར་བ་ལས་ངེས་པར་འབྱུང་སྟེ་རབ་ཏུ་བྱུང་བར་འདོད་པའི་རྒྱུ་མཚན་གྱི་འཕྲིན་ལན་པད་དཀར་ཀུནྡར་དྲི་བའི་ཉི་ཟླའི་འདམ་ཁ། སྐུ་གསུམ་དག་པ་རབ་འབྱམས་འཁོར་ལོའི་མཛོད། །མཚན་དཔེའི་ངོ་མཚར་རྒྱ་མཚོའི་སྒྱུ་དྲའི་གར། །སྐལ་བཟང་ཡིད་ངོར་འཆར་པའི་ངག་གི་ལྷ། །འཇམ་དཔལ་རྡོ་རྗེས་རྟག་ཏུ་དགེ་ལེགས་སྩོལ། །སྟོབས་འབྱོར་ཡལ་འདབ་གཡོ་ཙམ་ལྷུར་ལེན་པ། །དམན་རིགས་ལྗོན་ཤིང་ཕལ་གྱིས་འགྲན་མིན་པའི། །མ་སྨད་ཡོན་ཏན་འདོད་རྒུའི་དཔལ་སྟེར་དཔྱིད། །ཡོངས་འདུའི་རིགས་ལྡན་མཁས་དབང་གང་དེ་ཡིས། །དབྱངས་ཅན་འཕང་འགྲོའི་རྒྱུད་ལས་ཉེར་དྲངས་པའི། །སྙན་འགྱུར་འབུམ་དུ་འཛག་པ་རྣ་བའི་བཅུད། །འདྲེན་བྱེད་དགའ་སྟོན་སྤེལ་བའི་འཕྲིན་ཡིག་ཏུ། །བཀོད་ཚེ་འཇིག་རྟེན་མེས་པོའི་འོད་ཟླར་བྱས། །ལེགས་བྱས་བྱེ་བའི་རྡུལ་མང་རབ་བརྩེགས་པའི། །ཕུན་ཚོགས་དལ་འབྱོར་རྟེན་གྱི་ས་འཛིན་དབང་། །མི་མཐུན་རྒུད་པའི་རྡུལ་གྱི་རྒྱལ་མཚན་གྱིས། །ནམ་ཡང་བརྫི་བར་མི་ནུས་རང་གི་གཤིས། །གངས་ཀྱི་ར་བས་ཡོངས་(༦༩ན)
བསྐོར་སྨན་ལྗོངས་འདིར། །ཕྱོགས་རེའི་ཡོན་ཏན་འོད་སྤྲོའི་རྒྱུ་སྐར་འཕྲེང་། །མང་ཡང་གནས་ལྔ་རིག་པའི་ཆ་ཤས་ཀུན། །རྫོགས་པའི་ཟླ་བ་གསར་པ་ཁྱོད་མིན་སུ། །མང་ཐོས་འོད་ཟེར་འབུམ་ཕྲག་དུས་གཅིག་ཏུ། །སྤྲོ་མཁས་ཉིན་བྱེད་རིག་གནས་རྒྱ་མཚོའི་ཕྲེང་། །ཆུ་ལྷའི་ལྟོ་བར་མནལ་ཡང་ཤོང་དཔང་གི །བསྟན་འཛིན་ཟླ་ཁྱོད་ཤར་ཞེས་མཁས་རྣམས་གླེང་། །འདི་ན་གནས་ལྔ་རིག་པའི་བདུད་རྩི་ལ། །གཅིག་པུར་ལོངས་སུ་སྤྱོད་པའི་དྲང་སྲོང་ཞིག །རྡོ་རྗེའི་སྣ་ལྡན་ལང་ལོང་གཡོ་བའི་དབུས། །གནས་པའི་སྔོན་མེད་བློ་ལྡན་ཕུར་བུ་བཞིན། །ཚེ་འདིའི་སྲིད་འབྱོར་ཆུ་ཤིང་སྔོན་པོའི་འབྲས། །འབྱུང་འཇིག་ཅིག་ཅར་སྟོན་པ་ཡ་མ་བརླའི། །ཚུལ་འདིས་སྔོན་གྱི་བློ་ལྡན་ཕལ་ཆེར་རྣམས། །ཞི་བདེའི་ནགས་སུ་གཏན་གྱི་སྙིང་པོ་ལེན། །དོན་གཉིས་གྲུབ་པའི་ཟས་གཙང་སྲས་པོ་དེས། །རྩོད་དུས་འཁོར་ལོས་སྒྱུར་བའི་རྒྱལ་སྲིད་ཀྱང་། །གདུག་པའི་སྦྲུལ་གྱི་ཚང་ལྟར་རིང་སྤངས་ཏེ། །ཡེ་ཤེས་མཆོག་གི་བདུད་རྩིར་གཞོལ་ཚུལ་བསྟན། །དེ་ཕྱིར་དམ་པ་གོང་མའི་རྣམ་ཐར་གྱི། །སྣ་ཚོགས་རིན་ཅེན་དུ་མའི་ཐེམ་སྐས་ངོས། །འཛེག་པའི་སྙིང་སྟོབས་ལྡན་པ་ཁྱོད་ཉིད་ལ། །ཐམས་ཅད་སྒྲོལ་དང་མཚུངས་སྙམ་ལྷག་པར་རངས། །འོན་ཀྱང་ནོར་འཛིན་སྐྱོང་བའི་དབང་པོ་དང་། །གང་གི་གཉེན་དང་ལྟོས་པའི་འབངས་རྣམས་ཀྱིས། །ཚེ་དབང་དོན་ཀུན་གྲུབ་པའི་རིགས་ཆོས་ཀྱི། །བརྒྱུད་པ་འཛིན་པར་འོས་ཞེས་དར་དེར་གླེང་། །རང་དོན་དབེན་པའི་ནགས་སུ་གནས་པ་དང་། །བྱང་སེམས་གྲངས་མེད་འགྲོ་བའི་དོན་གྱི་ཕྱིར། །འཁོར་ལོས་སྒྱུར་བའི་རྒྱལ་པོར་སྲིད་འཛིན་པར། །རྒྱལ་བའི་གསུང་རབ་དུ་མར་བཤད་མིན་ནམ། ཁྱད་པར་ཁ་གཅིག་ཕྱི་རུ་པཎྜི་ཏ། །ནང་དུ་རྡོ་རྗེའི་རྣལ་འབྱོར་ལ་གཞོལ་བས། །འཕགས་པའི་ཡུལ་གྱི་ཨིནྡྲ་བྷཱུ་ཏི་དང་། །བོད་ཡུལ་མར་པ་ལོ་ཙཱའི་དཔེ་(༦༩བ)
ཟླར་འོས། །དེ་ལྟ་ན་ཡང་རྒྱུ་མཚན་རྣམ་གཉིས་པོར། །ཡང་དག་དོན་ལྡན་དགོས་པ་མཐོང་བའི་ཕྱིར། །གཅིག་ཏུ་འདམ་པར་མ་ནུས་ཁོ་བོའི་སེམས། །ཐེ་ཚོམ་འཁར་བའི་ཁྱོགས་ལ་བརྟེན་ནས་ལུས། །དབུས་གཙང་གསེར་ལྡན་དགའ་མའི་ལྟོར། །འཆད་མེད་རྒྱུ་བའི་བྱ་མ་རྟ། །ཡི་གེའི་ཕྲེང་བ་ཐེགས་བཞིན་དུ། །མཁས་དབང་གམ་དུ་ཡང་ཡང་བསྲིངས། ཁྱད་པར་གནམ་ལོ་གསར་ཚེས་ཀྱི། །སྐབས་སྦྱར་དུས་འཁོར་ཙནྡྲ་པའི། །ལེགས་བཤད་དགའ་སྟོན་སྤྱོད་པའི་ཆེད། །འཕྲོས་འོས་གཏམ་ཡང་བསྐྱུད་པ་མེད། །སྙན་འགྱུར་ཚིག་གི་རྨ་བྱ་ཞིག །རྟེན་གྱི་མདོངས་མཐའ་ངོམ་བཞིན་དུ། །གཡས་རུ་གཙང་གི་ཡུལ་ལྗོངས་དེར། །འདབ་གཤོག་སྒྲོ་ཐུལ་སྐྱོད་དེ་སོང་། །ཁར་ཁ་གཡས་རུའི་སྟོང་སྐོར་སྤྲུལ་སྐུའི་འཕྲིན་ལན་ལྷུན་པོ་ཕྱོགས་ལ་འདེགས་པའི་རྔ་སྒྲ། ཨཱ བྷཱ ཝཱ ཤ ནྟོ བྷ ཝྱ ཤྲཱི བྲ དྭྱཱ བྷ རྱཱ སཽ དྷོ ཏི ཀྱ། །ཤུ དྡྷཱ གུ ཎྱཱ ཀོ ཥཱ སི དྡྷཱ རྠཻ སྟ སྨི ནླ ཀྵྨཱི ཙཱ ཡ ཙྪ། །སྲིད་(སྡེབ་སྦྱོར་གློག་འཕྲིན།)དང་ཞི་བའི་དངོས་པོ་ཀུན། །ཚོགས་གཉིས་དཔལ་གྱིས་རབ་སྦྱངས་པ། །དག་པའི་ཡོན་ཏན་རྣམས་ཀྱི་མཛོད། །ཟས་གཙང་སྲས་དེས་དགེ་ལེགས་སྩོལ། །(༧༠ན)
དེང་དུས་ལེགས་བྱས་དཔྱིད་ཀྱི་མངལ་ཡངས་ལས། །རབ་བསྐྲུན་ཉེ་བར་ལེན་པའི་ཡོངས་འདུའི་ལྗོན། །མི་མཐུན་དགུན་གྱི་རེག་པ་རྒྱང་བསྲིངས་པའི། །རྣམ་དཀར་འཕྲིན་ལས་ལོ་འདབ་ཕང་ཕུང་ཅན། །སྙན་འགྱུར་གཏམ་གྱི་མགྲིན་རྔ་ཆེར་སྒྲོག་པ། །ངོ་མཚར་འཕྲིན་ཡིག་འཁོར་ལོའི་ཡན་ལག་ཅན། །རྟེན་གྱི་རྐང་གདུབ་སིལ་སྒྲ་ཁྲོལ་བཞིན་དུ། །དབུས་འགྱུར་སྨན་ལྗོངས་རྫིང་བུར་དལ་གྱིས་སོན། །འདི་ན་སྡོམ་བརྩོན་མང་ཐོས་ཀློག་པ་མཁན། །ཟིན་མེད་གཡེང་བའི་སྒྲོག་ཏུ་ཉེར་ཆུད་ཀྱང་། །ཐོས་བསམ་བསྒོམ་པའི་ཚུལ་ལ་མོས་བློ་དང་། །འགྲོ་ལ་དཀར་བའི་ལྷག་བསམ་འགྲན་པ་བཞིན། །ཨེ་ཝཾ་ཟུང་འཇུག་ཁྱབ་བདག་སྐུ་བཞིའི་དངོས། །གཅིག་ལས་དུ་མར་སྤྲུལ་པ་ཆུ་ཟླའི་གར། །སྐལ་བཟང་འགྲོ་བའི་ཡིད་ངོར་རབ་འཆར་བ། །མཐའ་ཀླས་རྒྱལ་བ་ཀུན་ཀྱི་ཆོས་ཉིད་གཤིས། །མི་བཟད་སྙིགས་མས་ཆེས་ཆེར་སྦགས་པ་ཡིས། །བརྣག་པར་ནུས་དཀའ་ལྔ་བརྒྱའི་འགྲོ་བ་ལ། །ཕུལ་བྱུང་སྙིང་རྗེས་མཛའ་བས་དམ་འཁྱུད་པ། །དཔལ་ལྡན་ཤཱཀྱའི་གཙོ་ལས་གཞན་ན་སུ། །གང་དེས་གྲངས་མེད་གདུལ་བྱའི་དབང་པོ་དང་། །འཚམ་པར་བསྟན་པའི་མཆོག་དམན་ཐེག་པའི་ཆོས། །མ་འདྲེས་རྒྱལ་བའི་བཞེད་གཞུང་འཁྲུལ་མེད་དུ། །སྟོན་མཛད་འཇམ་མགོན་བླ་མ་བཙོང་ཁ་པ། །མ་དག་ར་རིའི་སྣང་བརྙན་མི་ལྡན་ཞིང་། །ཕྱོགས་རེར་ཞེན་པའི་འཕེལ་འགྲིབ་བགྲོད་པ་དག །མི་སྟོན་སྔོན་མེད་ཟླ་བ་གསར་པ་གང་། །འཇམ་དབྱངས་བླ་མའི་རིང་ལུགས་ལས་གཞན་ཅི། །དེ་ཕྱིར་གནོད་སྦྱིན་ཕྱོགས་ཀྱི་གསེར་ལྡན་མའི། །ཕང་པར་བདེ་བའི་ངལ་གསོའི་སྟེགས་འཆའ་བའི། །འགྲོ་རྣམས་འཁྲུལ་མེད་གྲུབ་པའི་མཐའ་འདི་ལ། །བརྟེན་ནས་ཐར་པའི་གླིང་དེར་ཁྱོད་ཀྱིས་དྲོངས། །སླད་མར་གཏམ་གྱི་ཛཧྣུའི་བུ་མོ། །ཕོ་ཉ་སྐལ་ལྡན་ཤིང་རྟའི་བྱེད་པོ་ཡིས། །འཕྲིན་ཡིག་ལམ་གསུམ་དག་ལས་ཉེར་བབས་ཏེ། །(༧༠བ)
བརྗེད་ངས་དྲི་མ་འཁྲུད་པའི་ཆོ་གར་མཛོད། །རི་མོ་པད་དཀར་ཆུན་པོ་དག །ཚན་གྲངས་རྟེན་གྱི་ཟེའུ་འབྲུ་ཅན། །འཆི་མེད་དབང་པོ་ཁྱོད་ཉིད་ཀྱི། །རྣ་བར་མཛེས་པའི་རྒྱན་དུ་སྤུད། །གོས་དཀར་གཡོ་བ་བྱ་སྤྲེལ་ལོའི། །ཐ་སྐར་ཟླ་བ་སྔོན་མ་ཡི། །གཉིས་པའི་ཕྱོགས་ཀྱི་གང་བ་ལ། །གྲུ་འཛིན་རི་བོའི་རྩེ་ནས་བྲིས། །ལྕགས་སྟག་གི་ལོ་དཔལ་ས་སྐྱ་བ་ཞབས་དྲུང་ངག་དབང་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོའི་རིགས་ཀྱི་སྲས་གདན་ས་ཆེན་པོའི་ཁྲི་ཐོག་ཏུ་མངའ་གསོལ་བའི་ཚེ་ལེགས་སྐྱེས་ཀྱི་རྟེན་འབྱུང་སྒྲིག་པར་འོལ་ཁ་འབྲི་ལུང་པ་རྫོང་སྟ་བྱས་སྐབསཞུ་འཕྲིན་དུ་གསོལ་བ་དྲང་གཏམ་ག་བུར་རྒྱལ་པོའི་སྦྱོར་བ། ཨཱ ཛྱ ཏི ཤཱ ར ཐྱཱ མ ཧྱཱ བ ལ ཙི ཏྟ ཏྲི གུ ཧྱ མ ཎ ཡཱ༔ ཙཱ། །རཾ སུ ཁཱི ཡཱ ནཱ ཡ པ ཊོ རྦྷཱུ ཤཱ ཀ ཡེ ནྡྲཱ། ས རྦྦཱ༔ ཀུ རུ། །རྒྱལ་(ཛ་ཏིའི་སྡེབ་སྦྱོར་འཕགས་མ།)ཀུན་གསང་བ་གསུམ་གྱི་ནོར་བུ་རྣམས། །ཕུལ་བྱུང་སྙིང་སྟོབས་ཤིང་རྟ་ཆེན་པོ་ཡིས། །ལུས་ཅན་ཕན་བདེའི་འཛིན་མར་འདྲེན་མཁས་པ། །ཤཱཀྱའི་དབང་པོས་དུས་ཀུན་ཤིས་པར་མཛོད། །(༧༡ན)
འཇམ་མགོན་ཐུགས་རྗེའི་ཆབ་ཀྱིས་ཉེར་བྲན་པའི། །ལྷ་རེགས་འཁོན་གྱི་ལྗོན་ཤིང་སྐྱེད་ཚལ་ནས། །རྒྱལ་སྲས་གཞོན་ནུའི་ཁྲི་ཤིང་གཡུར་ཟ་བ། །མཚུངས་མེད་བདག་ཆེན་ཆོས་རྗེ་རིན་པོ་ཆེ། །དེང་དུས་ཐུབ་བསྟན་རིན་ཅེན་ཞལ་བའི་ངོས། །ཚོགས་གཉིས་པིར་གྱིས་བྲིས་པའི་མཚན་བཟང་སྐུ། །ངོ་མཚར་རི་མོ་བཀྲ་བའི་ཆོ་ག་ཡིས། །སྐལ་བཟང་གདུལ་བྱའི་མིག་གི་དགའ་སྟོན་བསྒྲུབས། །རི་མོ་གསུམ་པའི་ལམ་ནས་དབྱངས་བདུན་གྱི། །སྙན་འགྱུར་རྫོགས་པར་བླངས་པའི་དམ་པའི་ཆོས། །བདེ་བར་གཤེགས་པའི་ལམ་བཟང་སྟོན་པའི་གླུས། །མཆོག་དམན་སྐྱེ་རྒུའི་སྒྲ་འཛིན་ཟིལ་དངར་བྱས། །ཟབ་གསལ་ཐུགས་ཀྱི་ཟླ་བའི་མ་མའི་ལྟོར། །འཁོར་དང་མྱ་ངན་འདས་པའི་ཀླུང་ཆེན་ཀུན། །དབྱེར་མེད་ཟུང་དུ་འཇུག་པའི་གསལ་སྟོང་གི །རླབས་ཕྲེང་དུས་ལས་ཡོལ་བ་མེད་ལགས་གྲང་། །ཟད་མི་ཤེས་པའི་འཇམ་དབྱངས་མཁྱེན་པའི་མཛོད། །སྣང་བ་འབུམ་དུ་འབར་བའི་འོད་ཟེར་གྱིས། །ཐུབ་བསྟན་པད་དཀར་ཁོང་ནས་འཛུམ་བྱེད་པ། །བློ་བཟང་གྲགས་སྙན་འབར་བའི་ཉིན་མོར་བྱས། །དྲི་མེད་ཚུལ་ཁྲིམས་མན་ཤེལ་ཁམས་ལས་གྲུབ། །རབ་དཀར་ལྷག་བསམ་རྟ་བདུན་ཤིང་རྟས་དྲངས། །མདོ་རྒྱུད་བཅུ་གཉིས་ཆ་ཤས་ཡོངས་གང་བ། །ཟས་གཙང་སྲས་ཀྱི་བསྟན་པའི་ཡང་སྙིང་འདིའི། །རྗེས་ཞུགས་དྲིན་ལས་བླང་དང་དོར་བྱའི་གནས། །འཁྲུལ་མེད་ཉམས་སུ་བསྟར་པར་མངོན་རློམ་པའི། །ཟ་ཧོར་རིགས་ཀྱི་ཨ་ཝ་དྷཱ་ཏཱི་པ། །འཆད་རྩོད་རྩོམ་པའི་ཚུལ་ལ་གཤོལ་བར་མཆིས། །སྐུ་བཞིའི་དབང་ཕྱུག་རྩེ་ཆེན་བསམས་བཞིན་དུ། །ངུར་སྨྲིག་རྣམ་རོལ་བློ་གྲོས་རྒྱལ་མཚན་ཡན། །བསྟན་པའི་འཁོར་ལོ་མི་ཡི་ཤ་ཚུགས་སུ། །ཕྱོགས་བྲལ་གཟུར་གནས་ཀུན་གྱི་ཅིས་མི་ཤེས། །ཟབ་དོན་དཀའ་ཐུབ་ཞིག་ཀྱང་མཐའ་ཀླས་པའི། །གནས་(༧༡བ)
ལྔ་རིག་པའི་མིག་མེད་མོང་རྟུལ་ལྷའི། །ལུས་སྲེག་རྣམ་དཔྱོད་མཐུ་གྲུབ་གྲགས་སྙན་ཅན། །ས་སྐྱ་ལོ་ཙཱ་སྔོན་མེད་དཔལ་གྱི་མགྲིན། །ཆོས་ཀྱི་སྙིང་པོ་རྒྱལ་པོའི་སྲིད་བོར་ཏེ། །བློས་བྱས་བློན་པོའི་ཁྱིམ་དུ་བག་ཕེབ་ནས། །གང་ཤར་སྤྱོད་པའི་བཞི་མདོར་རྒྱུ་བའི་ཟོང་། །དུས་འགར་འཇིག་རྟེན་རྒན་པོས་སྤྱད་བྱའི་ཡུལ། །མངར་བའི་དྲི་བསུང་གཏམ་གྱིས་ཡིད་དྲངས་པའི། །མཆོག་དམན་སྐྱེ་བོ་མང་ཞིག་མ་ལ་ཡའི། །རྐང་འཐུང་རྩེར་འཛེག་ཆོ་ག་ལ་གཞོལ་ཡང་། །རྩ་བར་གདུག་པའི་བྲང་འགྲོས་དམ་དུ་འཁྱུད། །བདུད་རྩིས་ཉེར་གང་བརྒྱ་ཕྲག་ཀེ་ལ་ཤ །འཕྲེང་བར་བསྒྲིགས་དང་ལྷན་ཅིག་བ་ཚྭའི་ཆུས། །གང་བའི་བུམ་པ་འགའ་ཞིག་རྨ་བྱའི་མདོངས། །མཛེས་སྡུག་སྒྲོ་ཡིས་ཁ་རྒྱན་བྱས་མིན་ནམ། །འོད་གསལ་ལྷ་རིགས་གདུང་གི་སུ་ཝརྞ། །འཇམ་དབྱངས་མཁྱེན་པས་ལེགས་དྲུངས་དག་པའི་ཁམས། །རྣམ་པར་འཁྱིལ་བའི་བཻ་ཌཱུར་ཞུན་མ་གང་། །བསྟན་འགྲོའི་ཉེ་འཚོར་གྲུབ་ལས་གཞན་དུ་ཅི། །འཚམས་སྤྲིན་གོས་དར་ལྕང་ལོའི་འཕྲེང་འཛིན་འགའ། །རྣམ་ཀུན་མཆོག་ལྡན་རྡོ་རྗེའི་སྐུ་འགྲུབ་པའི། །འཇིགས་མེད་སེང་ཁྲིར་འཁོད་པའི་དགའ་སྟོན་གྱིས། །ཕྱོགས་དེའི་འགྲོ་རྣམས་སྐལ་པ་བཟང་པོར་བྱས། །སྔོན་བྱོན་འཁོན་རིགས་རྗེ་བཙུན་གོང་མ་རྣམས། །ལ་ལར་མཁས་དང་འགའ་ཞིག་གྲུབ་པའི་ཚུལ། །བསྟན་ནས་ལུགས་དེར་མོས་ལྡན་གདུལ་བྱའི་ཚོགས། །སྣ་ཚོགས་ཐབས་ཀྱིས་ཕན་དང་བདེ་ལ་བཀོད། །གོང་མའི་མཛད་བཟང་ནོར་བུའི་ཡུ་བ་ཅན། །ཕྲག་པར་ཕྱོགས་ལ་བླངས་ཏེ་ས་སྐྱ་པའི། །རིང་ལུགས་གདུགས་དཀར་འདེགས་པའི་བྱེད་པོ་རུ། །རིགས་དང་སློབ་ཚོགས་མགྲིན་(༧༢ན)
གཅིག་གླེང་བས་ན། །རྣམ་པར་འབྱེད་པའི་ཤེས་རབ་གྲུ་གཟིངས་མཆོག །རྨད་བྱུང་བརྩོན་པའི་རླུང་གིས་ཉེར་བསྐུལ་ཏེ། །ཐོས་བསམ་སྒོམ་པའི་ཆུ་གཏེར་ལས་བརྒལ་ནས། །མཁས་གྲུབ་རིན་ཅེན་གླིང་དུ་བགྲོད་པར་རིགས། །ངོ་མཚར་བཀོད་པ་རྒྱ་མཚོའི་དགེ་མཚན་གྱི། །དུས་སྟོན་གསར་པའི་ལེགས་ཚོགས་སྤེལ་བའི་ཆེད། །ཚན་གྲངས་བདོག་པའི་ལུས་དཀར་དབང་པོ་ཞིག །སྙན་འགྱུར་རྟགས་ཀྱི་སྐད་གསང་སྒྲོག་བཞིན་སོང་། །སླད་མ་ཉམས་འགྱུར་ཤེལ་གྱི་རྩིག་ངོས་ལ། །དོན་བཟང་མགྲིན་བཅུའི་གཟུགས་བརྙན་སྟོང་འཆར་བ། །བྱེད་ནུས་འཕྲིན་ཡིག་ཧ་ནུ་མནྠ་ཡི། །ཟློས་གར་ཆད་པ་མེད་པར་སྒྱུར་བར་ཞུ། །རི་མོ་གསེར་ལྡན་དགའ་མའི་ལྟོ་བ་རུ། །སྤྱན་རས་མདོངས་མཐའ་དགའ་བའི་གར་སྒྱུར་རྟེན། །དབང་ཕྱོགས་དར་དཀར་དབྱར་གྱི་རྔ་གསང་སྒྲ། །ཕྱག་རྒྱའི་ཆུ་འཛིན་དམར་པོའི་དབུས་ན་ལྡིར། །རྒྱ་ནག་གཙུག་ལག་གནམ་ལོ་གསར་ཚེས་པ། །རྟ་བདུན་གཞུ་ཁྱིམ་སྤྱོད་པ་མགོ་ཟླ་བའི། །སྔ་མའི་ཕྱོགས་ཀྱི་རྒྱལ་བ་གཉིས་པ་ལ། །ལུགས་ཟུང་མདུན་ས་ཆེན་པོའི་སྡེ་ནས་ཕུལ། །ས་སྐྱ་དཔོན་རིན་པོ་ཆེ་ཁྲི་འདྲོན་གྱི་ཚེ་ཡབ་དཔལ་ས་སྐྱ་ཞབས་དྲུང་ངག་དབང་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོ་ལ་ཞུ་འཕྲིན་དུ་གསོལ་བ་ཉེ་ལམ་ཟུང་འཇུག་གྲུབ་པའི་ཤིང་རྟ། (༧༢བ)
དྷ རྨྨ བྷ ཝྱཱ བཻ ཙུ ལ ཏི ཀི རྟྟ ནྱ ཛྙཱ མ ཡ པྲ བྷ༔ ཤཱི ནཱ། ས དྲ ཏ སྨི བུ ད ཀོ ད ཡྻཧི སུ ཁྱ ཅ། །ཆོས་སྲིད་པི་ཙུ་ལ་ཏའི་ནོར། །མཁྱེན་པའི་འོད་ཟེར་སྒྱུ་འཕྲུལ་གྱིས། །ཕན་བདེའི་ཉལ་འགྲོ་དར་མཛད་པ། །འགྲོ་བའི་དཔལ་མགོན་དམ་པ་དེར། །མ་དག་འཁོར་བའི་སྐྱེ་སྲིད་འབིགས་བྱེད་རི། །ཚོགས་གཉིས་མེ་ཞལ་མཚོན་ཆས་ལེགས་བརྡར་བས། །མཚན་བཟང་ཉི་མ་འཁོན་རིགས་མཁར་ཤར་བ། །འོད་སྟོང་སྒྲིབ་མེད་གསལ་བྱས་སྐྱེ་རྒུའི་གཉེན། །གསུང་ངག་དཔལ་གྱི་བེའུ་སྙིང་ཁ་ན། །ལེགས་འཁྱིལ་མྱུར་ལམ་གྱ་གྱུའི་གོམ་གསུམ་གྱིས། །གྲངས་རིང་རྒྱལ་སྲས་སྤྱོད་པའི་ས་ཆེན་པོ། །དུས་གཅིག་བཅད་པའི་ངང་ཚུལ་མངོན་གྱུར་ཏམ། །གང་གི་བློ་གྲོས་འཇམ་མགོན་མཁྱེན་པ་དང་། །ལྕི་ཡང་སྲང་ལ་བཏེག་ཀྱང་མ་རྟོགས་པར། །གཉིས་སྐྱེས་འགའ་ཞིག་ཟླ་གཞོན་ལ་འདྲི་(༧༣ན)
ཞེས། །དབང་ཕྱོགས་རི་རྩེར་ལྟ་བའི་ངལ་བ་བསྟེན། །འཇམ་དཔལ་རྡོ་རྗེས་རྗེས་བཟུང་འཁོན་རིགས་ཞེས། །སྙན་གྲགས་ཙན་དན་རྐང་འཐུང་དྲི་བསུང་ཚོགས། །ཕྱོགས་ཀྱི་རླུང་བཞོན་གྱིས་དྲངས་གངས་ཅན་འདིར། ཁྱབ་ཕྱིར་བློ་དང་ལྡན་ཁྱོད་ཚུལ་འདི་གསོན། །སྒྲ་དང་ཚད་མའི་རྣོ་ངར་སྡེར་མོ་ཡིས། །སྒོམ་ཆེན་རྒན་པོའི་འགྲོ་སྐྱབས་གསེར་ཅན་ལྟོ། །ཕྲལ་བས་ཉི་ཚེའི་དངོས་གྲུབ་གཏན་འདུན་དུ། །རློམ་པའི་བློ་དེ་ཆུ་ཤིང་སྙིང་པོ་བཞིན། །བཟོ་གསོ་ལ་སོགས་ཐབས་ཀྱིས་གདུལ་བྱའི་ཁམས། །ཇི་བཞིན་རྗེས་འཛིན་པདྨོའི་གཉེན་ཤར་ཚེ། །སེམས་གནས་ཙམ་ལ་རེ་འཆའི་འབྱུང་པོའི་བྱ། །བླང་དོར་ལྟ་བའི་འདྲེན་བྱེད་རྣམ་པར་ཟུམ། །སྙན་དངགས་མངོན་རྗོད་སྡེབ་སྦྱོར་ཟློས་གར་དང་། །སྐར་རྩིས་ཐ་སྙད་ལྔ་རིག་གཙུག་ལག་གིས། །མཐོ་རིས་སརྦྦ་ཛྙཱ་ཡི་རྒྱུད་འཛིན་པའི། །དྲང་སྲོང་ཕུར་བུའི་ཚུལ་ལ་ཅོ་འདྲིར་འོས། །གྲངས་མེད་ཉོན་མོངས་གཉེན་པོར་གསུངས་པའི་ཆོས། །ཀུན་གྱི་རྩེར་སོན་གསང་ཆེན་ཐེག་པ་མཆོག །ཚེ་གཅིག་ཁ་སྦྱོར་བདུན་ལྡན་འགྲུབ་པའི་ཐབས། །བཟང་པོའི་སྐལ་བ་ཅན་རྣམས་འཇུག་པའི་སྒོ །ས་ཆེན་རྣམ་པར་དགེ་བའི་རིང་ལུགས་ཀྱི། །གངྒཱས་ཐུབ་བསྟན་ཁྱབ་འཇུག་རྐང་པའི་དྲི། །འཁྲུད་ཀྱང་ལུང་རིགས་རྙོག་མའི་རྫིང་བུ་རྣམས། །བརྒལ་བརྟག་ལེགས་པར་བཤད་པའི་སྐལ་བ་ཕྲ། །དེ་ཕྱིར་གོང་མའི་བཤད་སྒྲུབ་པད་དཀར་འཕྲེང་། །སློབ་བཤད་ཟེའུ་འབྲུ་གཡུར་དུ་ཟ་བ་ཅན། །འཆད་མེད་རྣ་གོང་སྦུད་པའི་འདབ་མའི་འཛུམ། །ཟུང་འཇུག་མགྲོན་དུ་བསུ་ལས་གཡོ་མེད་དམ། །བློ་ཆེན་འཇམ་མགོན་ཚངས་པའི་ལུང་ལས་ཀྱིས། །སྐལ་བཟང་འདྲེན་པ་བཞི་པའི་རྒྱལ་སྲིད་དུ། །དབང་སྒྱུར་རིགས་ཀྱི་ཐིག་ལེའི་གྲགས་པའི་སྒྲ །འཁོར་ལོས་སྒྱུར་རྒྱལ་ཇི་བཞིན་ལྷུན་གྱིས་གྲུབ། །དྲི་མེད་རྣམ་པར་དྭངས་པའི་ཀུན་གསལ་ངོས། །ཟླ་ཉིའི་སྣང་བ་འབུམ་སྡེའི་གཟི་བྱིན་གྱིས། །སྨག་རུམ་མུན་པའི་ཚོགས་རྣམས་(༧༣བ)
སེལ་བ་ལས། །ཕྲ་མོའི་རྒྱུ་སྐར་ལ་རེ་འཁྲུལ་བའི་བློ། །བརྗེད་ངས་གླང་པོའི་གདོང་གི་མཆེ་བ་དག །རྣམ་པར་ཕྱུང་བའི་འཕྲིན་ཡིག་ཀརྟི་ཀ །ཕོ་ཉ་འབྲུག་སྒྲ་མངལ་འཛིན་ལ་གཞོན་ནས། །སུམ་རྩེན་དབུས་འགྱུར་མདུན་སར་ཆད་མེད་ཞུ། །ཆུ་ཤེལ་དབང་པོ་ཞུན་མར་འཁྱིལ་བའི་ངོས། །སྙན་འགྱུར་རི་དྭགས་གཟུགས་ཀྱི་འཇོ་སྒེག་ཅན། །ཆུ་ལྷའི་ཕང་བའི་སྟེགས་ནས་ཉེར་འཕགས་ཏེ། །ངེས་གསང་ཆོས་ཀྱི་མདུན་ས་ཆེན་པོར་སོང་། །གོང་མས་ངོས་བསུ་བར་ཆ་དཀར་བླ་མ། ཤེས་རབ་བླ་མ། དཀའ་བཅུ་བླ་མ། དོན་བསང་གུ་ཤི་རྡོ་རྗེ་དར་ཁན་ནོ་ཡོན་སོགས་མྱུར་དུ་མངགས་རྒྱུ་ཡིན་པས་དེ་ཐོག་ཏུ་འགྱུར་བ་མེད་པ་དགོས་ཚུལ་གྱི་སྔོན་འགྲོར་ཆེ་ཆེན་དཔོན་པོ་དང་མཉམ་དུ་བོ་རོ་ཚེ་རིང་གསེར་ཡིག་ཏུ་འབྱོར་པ་ཕྱིར་ལྡོག་པ་དང་མཉམ་དུ་ཆེ་ཆེན་དར་རྒྱས་བཏང་དུས་ཕུལ་བ་བཀྲ་ཤིས་གཡས་སུ་འཁྱིལ་བའི་དུང་དཀར། བུ ཎྛ སུ ཝ ཪྞ ཙ ཀྲ བ སུ དྷྲྀ བཱ ཝ ཤ ཝ རྟི ཙ། །བྲ མཾ ནྱ ནྲྀ རཱུ བ དྷྲྀ གྨཱུ ལེ མ ཧཱ རཱ ཛ པཱུ རྦ ཙ། །ལེགས་(ཁ་སྒོ་ཕན་པའི་སྡེབ་སྦྱོར།)བྱས་གསེར་གྱི་འཁོར་ལོ་ཡིས། །ནོར་འཛིན་ཀུན་ལ་དབང་སྒྱུར་བ། །ཚངས་པ་མི་ཡི་གཟུགས་འཛིན་པ། །དབང་ཕྱོགས་རྒྱལ་པོ་ཆེན་པོའི་དྲུང་། །(༧༤ན)
ཕུལ་བྱུང་མཁྱེན་དཔྱོད་རབ་ཡངས་བསིལ་ཟེར་གྱིས། །མངོན་པར་ཕྱེ་བར་ཡིད་ཀྱི་ཀུ་མུད་ད། །དད་པའི་འདབ་མ་རྣམ་པར་འཛུམ་བཞིན་དུ། །སྙན་འགྱུར་ཚིག་གི་ཟེའུ་འབྲུ་དགོད་པས་ཞུ། །དབང་ཕྱུག་དམ་པའི་རི་མོ་གསུམ་པ་ལས། །བཀའ་ཤོག་བཀྲ་ཤིས་གཡས་སུ་འཁྱིལ་བའི་དུང་། །བདོག་པའི་རྟེན་གྱི་ལྷ་རྫས་དར་དཔྱངས་ཅན། །འདྲེན་བྱེད་སྒྲ་འཛིན་བདུད་རྩིའི་དཔྱིད་དུ་ཕེབས། །དེང་དུས་འཛམ་གླིང་སྐྱེ་རྒུའི་བསོད་ནམས་ཀྱིས། །རིང་ནས་བསྐྲུན་པའི་གསང་གསུམ་དབང་གི་ནོར། །རྒྱལ་ཕྲན་བྱེ་བའི་ཅོད་པན་རྩེར་བཀོད་པའི། །སྙན་གྲགས་སྲིད་རྩེར་སྒྲེང་ལས་གཞན་དུ་ཅི། །འདི་ན་ཟས་གཙང་སྲས་ཀྱི་རྗེས་བཞུགས་པའི། །གནས་ལྔར་མོས་བློ་འཛིན་པའི་སྙོམ་ལས་པ། །སྡོམ་བརྩོན་ཀློག་པ་མཁན་ཡང་རྒྱལ་བའི་བསྟན། །ཐོས་བསམ་སྒོམ་པས་འཛིན་པའི་འདུན་པར་མཆིས། །གང་གི་བསོད་ནམས་ཕུང་པོ་འབར་བའི་གཟི། །རྟ་ལྗང་ཅན་གྱིས་བཟོད་པར་མ་ནུས་ནས། །བཅུ་གཉིས་ཁྱིམ་གྱི་བགྲོད་པ་འགོག་མིན་ཞེས། །འཆི་མེད་ལམ་དུ་དལ་མེད་རྒྱུ་བ་བཞིན། །ནོར་འཛིན་སྐྱོང་བ་ཁྱོད་དང་ཡོངས་འདུའི་ལྗོན། །འདོད་པའི་རེ་བ་སྐོང་ལ་མཚུངས་གྱུར་ཀྱང་། ཁྱོད་ནི་མཁྱེན་པའི་དབང་པོ་འཇམ་པའི་དབྱངས། །དཔག་བསམ་ཤིང་དེ་སེམས་མེད་བེམ་པོར་ངེས། །རྨད་བྱུང་མཛད་བཟང་གིས་བསྐྲུན་ཕན་བདེའི་ནོར། །གསེར་ལྡན་ལྟོ་བ་འདི་ན་ཤོང་མིན་ཞེས། །སྔོན་མེད་ནོར་འཛིན་སྤྲུལ་པའི་ཆོ་ག་ལ། །འཇིག་རྟེན་ས་བོན་མངལ་བའི་ཁུར་གྱིལ་མནར། །རྩོད་དུས་འཁོར་ལོས་སྒྱུར་རྒྱལ་མི་འབྱུང་ཞེས་། །གསུང་རབ་མང་པོར་བཤད་པ་ངེས་པར་རྫུན། །བདེན་ན་ལེགས་བྱས་རྩིབས་སྟོང་(༧༤བ)
སྲིད་རྩོལ་ན། །འཁོར་འདི་ཀུན་གྱིས་མངོན་སུམ་མཐོང་མིན་ནམ། །ཕན་དང་བདེ་བའི་མཆོད་སྦྱིན་བརྒྱ་པའི་ནོར། །རྣམ་པར་འབྱེད་མཁས་ནོར་འཛིན་སྐྱོང་བའི་ལྷ། །འཇིགས་མེད་གདོང་ལྔས་བཏེག་པའི་ཁྲི་སྟེང་དུ། །འགྱུར་མེད་རྡོ་རྗེ་ལྟ་བུར་བརྟན་པར་གསོལ། །སྙན་དབང་རིན་ཅེན་ཡོལ་གོར་ཅི་བརྟོལ་གྱི། །ཚིག་གི་ཡུལ་ལས་འགོངས་ཀྱང་དངོས་ཅག་རྣམས། །འདེགས་པའི་ཡུལ་དུས་ཕོ་ཉའི་ངག་ལམ་ནས། །འབུལ་བ་ཐུགས་ཀྱི་དཔལ་བེར་གཅགས་པ་དང་། །ཤིན་ཏུ་སྙན་ཞིང་རྣ་བར་འཇེབས་པ་ཡི། །ཕེབས་ཚོགས་ཀ་ལ་པིང་ཀའི་གྲེ་འགྱུར་གླུ། །ཆུ་ཀླུང་སྐལ་ལྡན་ཤིང་རྟའི་བགྲོད་པ་བཞིན། །འཕྲིན་ཡིག་ལས་གསུམ་དག་ཏུ་འབབ་པ་ཞུ། །སྤྱན་རས་ཆུ་ཤེལ་དབང་པོའི་དཀྱིལ་འཁོར་དག །འཆར་བྱེད་རྟེན་གྱི་གནམ་སྔོན་ཞུ་འདྲའི་རྫིང་། །རྒྱ་ཡི་ཨུཏྤལ་དམར་པོས་ལེགས་སྤྲས་ཏེ། ཁྲུམས་སྟོད་ཟླ་བའི་ཡར་ཚེས་བཟང་པོར་ཕུལ། །ས་གླང་ཕོ་བྲང་ཆེན་པོ་པོ་ཏ་ལར་དོན་གཉེར་ཅན་མང་པོ་ལ་འདོད་ཆོས་བགྱིད་སྐབས་ཉང་སྟོད་གནས་རྙིང་ཞབས་དྲུང་ཁྲི་པ་བློ་བཟང་ཀུན་དགའ་བདེ་ལེགས་རིན་ཅེན་རྒྱལ་མཚན་དཔལ་བཟང་པོ་དང་། བར་ཁམས་ནས་བ་སོ་སྤྲུལ་པའི་སྐུ་གཉིས་ཀྱིས་ངེད་རང་གི་རྣམ་ཐར་ཞིག་རྩོམ་དགོས་ཚུལ་ནན་ཆས་པས་ངོ་མ་བཟློག་པར་ཁས་ལན་ཙམ་བྱས་པ། སླར་ལྕགས་ཡོས་ནང་དུ་བ་སོ་སྤྲུལ་སྐུ་ངག་དབང་ཆོས་ཀྱི་དབང་ཕྱུག་བསྟན་པའི་རྒྱལ་མཚན་དཔལ་བཟང་པོས་ཚིགས་སུ་བཅད་པའི་འཕྲིན་ཡིག་རྟོགས་རྗོད་ཡང་སྐྱོར་དུ་བསྐུལ་བ་དང་། དབང་ཕྱོགས་གོང་མའི་རྒྱལ་ཁབ་ནས་མྱུར་དུ་ལྡོག་དགོས་པའི་ལན་སྐལ་བཟང་ཐོག་མར་འཆར་བའི་སྐྱ་རེངས། (༧༥ན)
མ ཉྫུ སྭ ར ཛྙོ ཀྵི ཏ ཀུ ངྒུ མཱ ལ ཀྵྱཱི པི རྩ ལཻ ཁི ཏྱ བེ ཙཱ ར ཀ རྟཱ། །ཛྱཱ བྷ ཝྱ སཱ མུ དྲ ཙ སཱུ ད ཡཱ དྷ རྨ སྐ ནྡྷ ཙཱ སཱ རི པ ལ ཎྜུ མཽ ཁྱཾ། འཇམ་(སྡེབ་སྦྱོར་དབང་པོ་རྡོ་རྗེ།)དབྱངས་མཁྱེན་པའི་གུར་ཀུམ་གྱིས་བྲན་པ། །ཕུན་ཚོགས་རྣམ་དཔྱོད་པིར་གྱིས་བྲིས་པ་ལས། །ཆོས་ཕུང་རྒྱ་མཚོའི་རི་མོ་ལེགས་འཆར་བའི། །བྱེད་པོ་རྒྱལ་བ་ཀུན་དངོས་བཙོང་ཁ་པ། །གང་གི་ལུགས་བཟང་མནྡྷ་ར་ཡི་འཕྲེང་། །ཐོས་བསམ་སྒོམ་པའི་ཅོད་པན་ལ་འཕྱང་བ། །བཤེས་གཉེན་འཚེ་བ་མེད་པའི་མེ་ན་ཀས། །འཕྲིན་ཡིག་སྙན་པའི་གླུ་དབྱངས་རྣ་བར་འཇེབས། །དེང་དུས་ཉེར་ལེན་ཙན་དན་ནགས་ཀྱི་རླུང་། །ལང་ཚོའི་ཡལ་འདབ་ཚར་དུ་ཆེས་དངར་ཞིང་། །མཁས་བཙུན་བཟང་པོར་གྲུབ་པའི་དྲི་བསུང་ཚོགས། །སྙན་གྲགས་མ་ལ་ཡ་མྱུར་དག་གིས་དྲངས། །བོད་ཆེན་མདོ་སྟོད་ཡངས་པའི་ནོར་འཛིན་དེར། །གཞན་ཕན་འདྲེན་པར་རློམས་པ་མང་ན་ཡང་། །འཆད་རྩོད་རྩོམ་པས་ཐུབ་པའི་བསྟན་པ་མཆོག །འཛིན་མཁས་ཤེས་ལྡན་ཁྱོད་དུ་ད་གདོད་ཁུམས། །(༧༥བ)
འཁོར་བ་ཨེ་རཎྜ་ཡི་གྲིབ་བསིལ་ལ། །གནས་ཀྱང་འགྲོ་ལ་ཕན་བློ་མ་སྙོམས་པ། །རྒྱ་ཆེན་གནས་ལྔ་རིག་པའི་ཀུན་གསལ་མཐའ། །བློ་གྲོས་ཚད་ཀྱིས་འཇལ་བའི་འདུན་པར་མཆིས། །གངས་ཅན་དབུས་འགྱུར་ལྟེ་བ་པོ་ཏ་ལར། །བློ་གསལ་རྒྱུ་སྐར་ཕྲེང་བ་འཁྲིགས་པའི་དབུས། །བསྟན་འཛིན་ཉིན་བྱེད་ཁྱོད་གསུང་འོད་རྣོན་གྱིས། །སྒྲ་འཛིན་པད་དཀར་ཚལ་དེ་ཅི་ཡང་འཛུམ། །རྒྱལ་ཀུན་གསང་བ་རབ་འབྱམས་འཁོར་ལོའི་མཛོད། །གྲངས་མེད་འགྲོ་བའི་སྣང་ངོར་ཡོངས་འཛིན་གཟུགས། །སྟོན་མཛད་སྔོན་བྱོན་དམ་པའི་ཚོགས་རྣམས་ཀྱི། །རྣམ་ཐར་རྗོད་པ་ཡང་དག་དོན་དང་ལྡན། །བདག་འདྲའི་སྙིགས་དུས་བཤེས་གཉེན་ཤ་ཚུགས་ཅན། །དུག་གསུམ་བྱ་བའི་ངན་སྐྱུགས་ཕུང་པོ་ལ། །རོ་བརྒྱའི་ལྷ་ཡི་ཟས་ལྟར་སྒྲོ་བཏགས་པས། །རྫུན་གྱི་གླེགས་བམ་སྐྲུན་པ་ངལ་བའི་གནས། །འོན་ཀྱང་དེང་དུས་ཧ་ལའི་ཟ་མ་ཏོག །འཆི་མེད་བདུད་རྩིའི་ཟོལ་གྱིས་སཱ་ལ་པའི། །ཕན་བདེའི་སྲོག་ལ་རྒོལ་བའི་ཆོ་ག་དག །རྫོགས་ཀྱང་ལེགས་པའི་ལམ་དུ་ཉེར་སྒྲོགས་ན། །དལ་འབྱོར་རྟེན་བཟང་ཞིང་ས་གཤིན་པོ་ལ། །ཐོས་བསམ་སྒོམ་པའི་མྱུ་གུ་རབ་འཕེལ་བའི། །བསྙོན་མེད་སྤྱོད་ཚུལ་དབྱར་སྐྱེས་གཞོན་ནུ་ཡིས། །ཤེས་ལྡན་ཞིང་པའི་གསོས་སུ་ཅིས་མི་འཇེབས། །དེ་ཕྱིར་སྙན་འགྱུར་ཤེལ་གྱི་རྩིག་པ་ལ། །རྟོགས་བརྗོད་གཟུགས་བརྙན་འབུམ་ཕྲག་རབ་འཆར་བའི། །སྔོན་མེད་གླེགས་བམ་མགྲིན་བཅུའི་ཕོ་བྲང་ཞིག །མྱུར་དུ་སྐྲུན་པའི་འདུན་པ་མི་དམན་ཡང་། །དོན་མེད་གཡེང་བས་བསྐྱོད་པའི་སྟོང་འུར་ལ། །རྣམ་དཀར་ལས་སུ་སྒྲོག་པ་བླ་ཆེན་སྤྱིའི། །ལུགས་སྲོལ་གཡེང་བའི་ཁོལ་པོར་བདག་ཆུད་པས། །སྔོན་ཆད་འདྲི་བའི་གོ་སྐབས་རྙེད་མ་གྱུར། །སྲིད་འདིར་དཀར་ནག་ལས་ཀྱིས་འཕངས་པའི་རྟེན། །ཐོབ་པའི་སྣང་ཚུལ་བརྗོད་ན་ཧ་ཅང་མངས། །འདི་སྣང་དགེ་དང་མི་དགེ་བར་མའི་ཚུལ། །ཀུན་རྟོག་རི་མོར་བྲིས་ཀྱང་ཕ་མཐས་དབེན། །དྲང་པོའི་གླང་ཆེན་བཏང་ན་ཚུལ་འཆོས་ཀྱི། །(༧༦ན)
མཛེས་བྱེད་གཏམ་གྱིས་ཆུ་སྐྱེས་འདམ་ལྟར་བརྫི། །འཁྱོག་པོར་བརྗོད་ཚེ་གཡོ་སྒྱུའི་ཞགས་པ་ཡིས། །བཟང་པོའི་རང་བཞིན་རི་དྭགས་བཅིངས་ཀྱི་དོགས། །ཤེས་ལྡན་པད་ཚལ་རྣམ་པར་བཞད་དཀའ་ཡང་། ཁྲེལ་བའི་ཀུནྡ་ཁོང་ནས་མི་འཛུམ་པའི། །རྟོགས་བརྗོད་སྒེག་མོའི་འགྲམ་པའི་ཆར་ཟིལ་གྱིས། །གླེགས་བམ་བ་ཀུ་ལ་ཞིག་མྱུར་དུ་འབྱེད། །འཁོན་རིགས་འཇམ་དཔལ་དཔའ་བོ་འཕགས་པ་དང་། །པད་དཀར་འཛིན་དངོས་བསོད་ནམས་རྒྱ་མཚོ་སོགས། །སྙིང་སྟོབས་མཆོག་གིས་འགྲོ་བ་འདྲེན་པ་དག །རྒྱལ་དང་དེ་སྲས་རྣམས་ཀྱི་རྣམ་པར་ཐར། །དེ་ལྟ་ན་ཡང་རྙེད་བཀུར་གྲགས་འདོད་ཕྱིར། །སྟོད་སྨད་རྒྱལ་ཁམས་མྱུལ་ནས་གཞན་དོན་ཞེས། །བརྗོད་ཚེ་དངོས་ཀྱང་ཙཱི་ཎར་བགྲོད་པ་སོགས། །སྣང་ཚུལ་འདི་དང་མཐུན་སྙམ་རྣམ་པར་ནོངས། །ཅིའི་ཕྱིར་ངན་སོང་སྡུག་བསྔལ་མེ་འོབས་དོང་། །སྲིད་པའི་ཕུན་ཚོགས་གློག་གི་སྒྱུ་དྲའི་གར། །མདོ་མེད་དུས་ཀྱི་ཕོ་ཉ་འཇིགས་བཞིན་དུ། །བློ་དམན་བདག་འདྲ་ཚེ་འདིའི་འདུན་མ་སྒྲུབ། །རང་ཉིད་ཞི་བདེ་ཙམ་གྱི་གདེངས་མེད་པར། །འགྲོ་རྣམས་མངོན་མཐོ་ངེས་ལེགས་ལ་སྦྱར་ཞེས། །དོན་མེད་མཁའ་ལ་བྲིས་པའི་རི་མོ་ཡིས། །རང་གཞན་གཉིས་ཀ་སླུ་བའི་བྱེད་པོར་དོགས། །འོན་ཀྱང་རྒྱལ་བའི་བསྟན་དང་འགྲོ་བ་ལ། །རབ་དཀར་ལྷག་བསམ་ཟླ་བ་གསར་པ་དག །ཤར་ཚེ་རྒུད་པའི་ཕུན་ཚོགས་སེལ་བ་དང་། །ཕན་བདེའི་སྣང་བ་རྒྱས་པ་ཆོས་ཉིད་ཡིན། །ལས་རླུང་ཤིང་རྟ་བདུན་པས་ཉེར་དྲངས་ཏེ། །མཐའ་འཁོབ་ཐུན་འཚམས་སྟེགས་ལ་འཕགས་ན་ཡང་། །རིང་མིན་གངས་ཅན་ས་འདིར་ཉེར་སྤྱོད་པའི། །སྐལ་བ་བཟང་པོའི་སྐྱ་རེངས་ཅིས་མི་འཆར། །གླེང་འོས་ལེགས་བཤད་གཏམ་གྱི་གངྒཱའི་རྒྱུན། །འཕྲིན་ཡིག་ལམ་གསུམ་དག་ལས་ཉེར་དྲངས་པས། །བརྗེས་ངས་དྲི་མའི་ཚོགས་ཀུན་རབ་བཀྲུས་ཏེ། །དགེ་ལེགས་ཁྱབ་འཇུག་ཞབས་བསིལ་སྒྲེང་བར་མཛོད། །(༧༦བ)
རི་མོ་རྙོག་བྲལ་རྫིང་བུར་འཆར་པ་ལ། །རུང་མཐུན་རྟེན་གྱི་གཉིས་སྐྱེས་ལུས་དཀར་ཅན། །རྟགས་ཀྱི་རྐང་གདུབ་སིལ་སྒྲ་འཁྲོལ་བཞིན་དུ། །བཤུལ་རིང་ལམ་དུ་བདེ་བར་དལ་ཀྱིས་འཕུར། །གོང་དུ་འདེགས་པའི་བཤུལ་དུ་ཞུགས་ཏེ་སྟོད་ལུང་ཕུའི་ན་དཀར་མ་ཞེས་པར་སླེབ་ཐོག་སོ་ཟུར་གནུབས་གསུམ་སྔགས་པའི་རྒྱལ་པོར་གྲགས་པའི་ནང་ཚན་ཟུར་འུག་བྱ་ལུང་པས། པོ་བྲང་ཆེན་པོ་ནས་མྱུར་དུ་ལྡོག་དགོས་པའི་ཚིགས་བཅད་ཀྱི་འཕྲིན་ལན་སཱ་ལའི་པད་ཚལ་མྱུར་བཞད་ཀྱི་བདེན་གཏམ། ལ ཀྵྨཱུ ཥྞཱཾ ཥཱ ཤཱ ནྟ བྷ བོ ནྣཱ གྲ ཙ སཱུ རྻཱ ལ ཀྵྱཱ ཨོ ཛཱ ནཱ ཁ ཙ བཱ ད སྱ སྱུ ཤུ བྷཱ། །པྲ ཛྲཱ ལཱ ཏྲཾ ལོ ཀ ཙ ར སྨྱཱ བ བྷ ས སྱ པ དྨཱ ཀ རྱཱ བུ དྡྷ ཙ ས རྦ པྲ དྷ ནཱ ཙཱ། །ཕུན་(སྡེབ་སྦྱོར་རྨ་བྱ་མྱོས་པ།)ཚོགས་སྲིད་བཞིའི་གཙུག་ཏོར་མཐོན་པོའི་རྩེར། །དགེ་ལེགས་ཞབས་སེན་ཉི་མ་འབུམ་གྱི་གཟི། །རབ་འབར་འཇིག་རྟེན་གསུམ་གྱི་སྣང་བའི་འོད། །པདྨ་འབྱུང་གནས་སངས་རྒྱས་ཀུན་གྱི་གཙོ། །(༧༧ན)
གང་དེའི་ལུགས་འཛིན་རིག་སྔགས་འཆང་བའི་ཁྲོད། །བཀའ་གཏེར་བཤད་སྒྲུབ་རབ་སྙན་ཚངས་པའི་གླུ། །མགྲིན་པར་དབྱངས་སུ་འཕྲོལ་བའི་བྱེད་པ་པོའི། །འཕྲིན་ཡིག་རྟེན་གྱི་བདོག་པ་སུག་པར་སོན། །དེང་དུས་ཉེར་ལེན་ཙན་དན་ནགས་ཀྱི་ཀླུང་། །རྒུད་པའི་གྲང་རེག་དགྲ་ལས་རྣམ་རྒྱལ་ཞིང་། །སྔ་འགྱུར་བསྟན་པའི་དྲི་བསུང་རབ་སྤྲོས་པའི། །སྙན་གྲགས་མ་ལ་ཡ་ཡི་རླུང་གིས་དྲངས། །ཐོས་བསམ་སྒོམ་ལ་གཞོལ་བློའི་ཉིན་བྱེད་བདག །ས་དབང་ཚངས་པའི་ལུང་གི་ཤིང་རྟ་ཡིས། །དྲངས་ཀྱང་སཱ་ལའི་ལྗོངས་ཀྱི་པདྨའི་ཚལ། །མྱུར་དུ་ཕན་བདེའི་འཛུམ་གྱིས་བསུ་བར་བྱེད། །འགྲོ་བའི་དབང་པོར་འཚམ་པའི་ཐེག་པའི་ཆོས། །གྲངས་མེད་རྫིང་བུ་ཟླ་བའི་གཟུགས་བརྙན་བཞིན། །འཆར་ཡང་སྙིང་པོའི་ལམ་མཆོག་ངེས་གསང་གི །རྡོ་རྗེའི་ཐེག་པར་གྲགས་ལས་གཞན་དུ་ཅི། །གསང་ཆེན་ཆོས་ཀྱི་བཟའ་ཤིང་ར་བ་ན། །ལྷུན་གྲུབ་སྣང་བཞིའི་ལམ་གྱི་འབྲས་བུའི་བཅུད། །རབ་སྨིན་རྫོགས་པ་ཆེ་ཞེས་དཔག་བསམ་གྱི། །ཡོངས་འདུའི་ལྗོན་པ་འདི་ཀོ་བླ་ན་མེད། །དེ་ཕྱིར་ཀ་དག་རིག་པའི་མཁའ་དབྱིངས་སུ། །ལྷུན་གྲུབ་ཞི་ཁྲོ་རབ་འབྱམས་འོད་ལྔའི་ཀློང་། །རྣམ་བཞིའི་འཕྲིན་ལས་འཇའ་ཚོན་རབ་འཁྱུག་པ། །གང་ཤར་རིག་པའི་རྩལ་དུ་རྫོགས་འདི་མཚར། །ལམ་བཟང་འདི་ལ་བརྟེན་ནས་གྲུབ་བརྙེས་ཁྱོད། །སྔ་འགྱུར་རྫིངས་ཀྱིས་གྲངས་མེད་ལུས་ཅན་ཀུན། །འཁོར་བའི་རྒྱ་མཚོ་ཆེ་ལས་རབ་བསྒྲལ་ཏེ། །ཀུན་བཟང་རིན་ཅེན་གླིང་དུ་འཁྲིད་པར་རིགས། །འཕྲོས་འོས་གཏམ་གྱི་དབྱངས་ཅན་འཕང་འགྲོའི་སྒྲ། །དམ་པའི་ཆོས་དང་འབྲེལ་བའི་རྒྱུད་མང་པོར། །ཉེ་བར་དྲངས་པའི་ཆད་མེད་བྱ་མ་རྟ། །ཡན་ལག་བརྒྱད་ལྡན་རྒྱུན་ལ་འགྲན་པར་འཚལ། །རི་མོ་དལ་གྱིས་རྒྱུ་བའི་གཉིས་འཐུང་དབང་། །རྟེན་གྱི་རིན་(༧༧བ)
ཅེན་དྲ་བའི་གདོང་གཡོགས་ཅན། །སྙན་འགྱུར་ཚིག་གི་སྤུ་སྡུག་བཀྲ་བཞིན་དུ། །ནུབ་ཕྱོགས་ཆུ་ལྷའི་ངོས་ཀྱང་ཕང་བར་སོང་། །སྒར་ཆེན་བྱང་ཕྱོགས་འབྲི་ཆུའི་འགྲམ་དུ་འབྱོར་ཐོག་མདོ་སྟོད་ཀྱི་བླ་དཔོན་སོགས་མཆོག་དམན་མང་པོ་དང་ལྷན་ཅིག་བར་ཁམས་རི་བོ་ཆེ་ནས་སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་ཀྱི་ཕྱག་མཛོད་པ་ངག་དབང་བཟང་སྦྱིན་བྱུང་སྐབས་བོད་ཡུལ་གྱི་རྡོ་རྗེ་གདན་དུ་མྱུར་བར་ལྡོག་དགོས་ཚུལ་གྱི་ཆབ་ཤོག་ཚིགས་བཅད་ཀྱི་འཕྲེང་བར་སྤེལ་བའི་ལན་བརྟན་བདེའི་འོད་སྣང་གསལ་བའི་ཐུན་འཚམས། ཨཱ ཤྩ རྻཱ ཙཱ ལི ངྒ ནུ པོ ཡྻ ཡུ བ ནྱཱ ཀཱ ཡཱ བྷ ངྒྷཱ ནཱ ད ཙ གྷོ ཥཱ རུ ཏ ཙཱ ཝཱ ཀ །པཻ ས རྦཱ ཛྙཱ བ རྱ ཙ ཙི ཏྟཱ ཙ བྷུ ཏཱ ཙཱ སྱཱ མཱུ ལེ སི དྡྷ ཙ ཀ ལྐ ཡ བྡྷ བ ས ནྟེ། །ངོ་(སྡེབ་སྦྱོར་རྨ་བྱ་མྱོས་པ།)མཚར་མཚན་དཔེའི་ལང་ཚོ་དར་བའི་སྐུ། །གཞོམ་དུ་མེད་པ་ན་དའི་སྒྲ་དབྱངས་གསུང་། །རྣམ་པ་ཐམས་ཅད་མཁྱེན་པ་མཆོག་གི་ཐུགས། །གྲུབ་རིགས་རྒྱ་མཚོའི་དཔྱིད་དུ་གྱུར་དེའི་དྲུང་། །(༧༨ན)
རྒྱལ་ཀུན་ཟད་མི་ཤེས་པའི་འཕྲིན་ལས་གཟུགས། །གང་གི་རྨད་བྱུང་མཛད་པའི་ཨཱ་དརྴར། །འགོག་མེད་ཤར་བའི་སྙན་འགྱུར་དབྱངས་ཀྱི་སྒྲ །རྣ་བའི་བཅུད་ལེན་གྱུར་ནས་མཆིད་འདི་གསོལ། །རིང་མིན་རྣམ་པར་དགེ་བའི་དུས་ཀྱི་ཆར། །གསང་གསུམ་མི་ཟད་རྒྱན་གྱི་འཁོར་ལོའི་གར། །གྲངས་མེད་གདུལ་བྱའི་ཁམས་དང་བསམ་པའི་ངོར། །འཚོ་ཞིང་གཞེས་པའི་སྐལ་བཟང་དེ་རྨད་བྱུང་། །ཕུན་ཚོགས་བཀྲ་ཤིས་རི་མོ་གཡས་འཁྱིལ་བའི། །མ་སྨད་དམ་པའི་མགྲིན་པ་གཟེངས་མཐོན་པོའི། །ཟབ་རྒྱས་ལེགས་པར་བཤད་པ་བཀའ་མཆིད་གཏམ། །བདོག་པའི་སྐྱེས་དང་ལྷན་ཅིག་སུག་པར་སྨིན། །ཐོས་བསམ་བསྒོམ་ལ་མོས་པའི་བློར་ལྡན་ཡང་། །དོན་མེད་རྣམ་གཡེང་གཟེབ་ཏུ་ཉེར་ཆུད་པའི། །ཟ་ཧོར་རིགས་ཀྱི་སྡོམ་བརྩོན་ཀློག་པ་མཁན། ཁམས་གཟུགས་ཚོགས་པ་མ་གྱེས་ཙམ་དུ་མཆིས། །རབ་འབྱམས་ཆོས་ཀུན་འཇལ་བའི་མཁྱེན་དཔྱོད་ཅན། །མ་འདྲིས་འགྲོ་ལ་བརྩེ་བའི་བྱམས་པའི་དཔུང་། །ནག་ཕྱོགས་ཕྱེ་མར་འཐག་པའི་མཐུ་སྟོབས་ཅན། །རིགས་གསུམ་མགོན་ཡང་ཁྱོད་ཀྱི་མཛད་པར་རྫོགས། །དཔལ་ལྡན་ཐང་པའི་སྒྲུབ་རྒྱུད་ཤིང་རྟ་ཆེ། །ཕྱོགས་དེར་དུས་ཀྱིས་བསྐལ་པའི་འདམ་རྫབ་ལས། །འདྲེན་པའི་བྱེད་པོར་དུས་གསུམ་རྒྱལ་བ་རྣམས། །ངུར་སྨྲིག་གར་གྱིས་རོལ་ལས་གཞན་དུ་ཅི། །མདོ་སྨད་བསྟན་པའི་ནགས་ཀླུང་སྟུག་པོའི་དབུས། །ཚུལ་འཆོས་འཁྱོག་པོའི་ཚེར་རྣོན་ཆེས་མང་ཡང་། །ཕན་བདེའི་དྲི་བསུང་སྤྲོ་བའི་ཙན་དན་ལྗོན། །མཁས་དབང་ཁྱོད་དུ་ངེས་ཞེས་ལྷ་རྣམས་གླེང་། །སྔོན་བྱོན་འགྲོ་བའི་མགོན་པོ་འཕགས་པ་སོགས། །ཞབས་སེན་མ་ཡི་ཚངས་པའི་ཅོད་པན་དུ། །འགོད་དེ་ཉི་མའི་གཉེན་གྱིས་འཆི་མེད་གཙོའི། །གཙུག་གི་རྒྱན་དུ་གཤེགས་དེའི་དཔེ་ཟླར་འོས། །དེ་ལྟ་ན་ཡང་མང་དུ་མ་ཐོས་ཤིང་། །དེ་དོན་བསམ་དང་(༧༨བ)
སྒོམ་ལམ་ཡོལ་བ་ཡི། །བདག་འདྲས་ཡར་ལྟའི་ཚུལ་དུ་མིག་ལྟ་བ། །ཕ་བང་མཁའ་ལྡིང་དབང་པོར་འགྲན་པར་བཞིན། །ཞི་བདེར་གནས་པའི་གདེང་ཙམ་མི་ལྡན་པར། །རྒྱ་ཆེན་གཞན་ཕན་བསྒྲུབ་ཅེས་སྟོང་འུར་གྱིས། །རང་གཞན་གཉིས་ཀ་སླུ་བའི་ཆུ་དོང་ལ། །སྙན་གྲགས་ཕུབ་མས་གཡོགས་འདི་སྐལ་བ་ཕྲ། །བཟོད་དཀའ་ངན་སོང་སྡུག་བསྔལ་མེ་འོབས་དོང་། །སྲིད་འབྱོར་གློག་གི་བུ་མོའི་གར་མཁན་མ། །ལོངས་མེད་ཚེ་འདི་ཆུ་བུར་ལྟར་མཐོང་ཡང་། །སྐལ་དམན་བདག་འདྲ་དོན་མེད་བྱ་བས་གཡེངས། །ལྟར་སྣང་གཞན་ཕན་སྨིག་རྒྱུས་རི་དྭགས་ཀྱི། །གཏན་བདེའི་སཱི་ཏཱ་འཕྲོག་པའི་བྱེད་པོ་ལ། །ཆེན་པོའི་རྣམ་པར་ཐར་ཞེས་རློམ་པ་འདི། །དལ་འབྱོར་སྟོང་པར་ཡོལ་བའི་བློ་བྲིད་མཁན། །འོན་ཀྱང་ཆབ་ཤོག་པད་དཀར་དགའ་ཚལ་དུ། །འཕྲལ་ཡུན་དགེ་བར་འགྱུར་བའི་གཏམ་སྙན་པོའི། །ཟེའུ་འབྲུ་དགོད་འདི་གཞན་གྱི་དབུགས་དབྱུང་བའི། །བདེན་པ་རྣམས་ཀྱི་ཐབས་མཁས་གསུང་དུ་ངེས། །དེ་ལྟ་ན་ཡང་ལྷག་བསམ་འོད་དཀར་གྱིས། །དབང་ཕྱོགས་ཚངས་པའི་མདུན་སའི་མུན་བསལ་ནས། །རྨད་བྱུང་ཁ་བའི་ལྗོངས་ཀྱི་ལྷ་ལམ་ངོས། །གཏན་བདེའི་སྣང་བ་འགྱེད་ལ་རིངས་པར་མཆིས། །སླད་མར་བཀའ་མཆིད་མེ་ཏོག་མནྡྷ་ར། །སྙིམ་པའི་ཐོད་དུ་བཅིངས་པའི་བྱ་མ་རྟ། །མདོ་སྟོད་ནོར་འཛིན་ས་ཡི་བཤུལ་ལམ་ནས། །ནམ་ཡང་ཆད་པ་མེད་པར་རྒྱུ་བར་ཞུ། །སྙན་ཚིག་དཔྱིད་ཀྱི་ཕོ་ཉས་ལེགས་བོས་པའི། །འཕྲིན་ཡིག་ལྗོན་ཤིང་ལང་ཚོ་རྒྱས་པ་ལ། །རྟེན་གྱི་ལོ་འདབ་ཕང་ཕུང་གཡོ་བཞིན་དུ། །བྱང་ཕྱོགས་ལོ་ཧི་རྟ་ཡི་འགྲམ་ནས་ཕུལ། །བོད་ཡུལ་གྱི་པཎྜི་ཏ་སྨོན་འགྲོ་ལོ་ཙཱ་བ་རིག་གནས་རྒྱ་མཚོའི་འཕྲེང་བ་འཛིན་པ་གང་རྒྱ་གར་གྱི་པཎ་ཆེན་པ་ལ་བྷ་དྲ་སོགས་ལ་བརྟེན་ནས་བརྡ་སྤྲོད་ཀྱི་གཞུང་ལུགས་ལ་བློ་གྲོས་མཆོག་ཏུ་ཡངས་པ་སྟག་ལུང་ལོ་ཙཱ་བ་དབུ་མ་ཆོས་མཛད་ཀྱི་འཕྲིན་ལན་དོན་གྱི་བློ་ལྡན་ཕུར་བུ། (༧༩ན)
ཨཽ ད ཡྻ སུ ཤུ བྷ ཙ ཤཱ ནྟ བྷཱ བ དྷ ཏོ ས རྦེ བྷི བྷོ ཝ བ རི ན མྱ ཙ སྠ ཙཱ ཨཱ མཱ རཱ ད ཛི དཱ ཤ བ ལ ཙཱ བ རཱ ཀྲ མཱ ཙཱ བྲཱ ཛི སུཾ ཤུ བྷ ཙ ཙཱ རྐ བ ནྡྷུ ཡཙྪ། སྲིད་(སྡེབ་སྦྱོར་རབ་དགའ་ཅན།)ཞིའི་ཁམས་ན་དར་བའི་དགེ་ལེགས་ཀྱི། །དངོས་པོ་ཀུན་གྱིས་ཡོངས་སུ་བཏུང་བྱའི་གནས། །སྟོབས་བཅུའི་རྩལ་གྱིས་བདུད་ལས་རྒྱལ་བའི་མགོན། །རྒྱལ་བ་ཉི་མའི་གཉེན་གྱིས་དགེ་ལེགས་སྩོལ། །དེང་དུས་རྣམ་སྨིན་དཀར་པོར་འཁྱིལ་བ་ཡིས། །ཉེར་ལེན་འོ་མཚོར་རྙོག་མའི་དྲི་བྲལ་ཞིང་། །ཐོས་བསམ་སྒོམ་པའི་གཉེན་སྐྱེས་འཁོར་ལོའི་ལག །ལེགས་བཤད་རྐང་གདུབ་སིལ་སྒྲ་འཁྲོལ་བའི་ངོས། །བློ་གྲོས་མགྲིན་པའི་པི་ཝང་བརྡུངས་པ་ལས། །འཕྲིན་ཡིག་དབྱངས་ཀྱི་རྒྱལ་མོ་སྙན་པའི་ཚིག །ཉམས་དང་འགྱུར་བ་སྟོང་གི་རོ་མངར་བ། །འདི་ན་ཐོས་འཛིན་དགའ་བའི་གསོས་སུ་འཇེབས། །ཟིན་མེད་གཡེང་བའི་ཤིང་རྟས་ཉེར་དྲངས་ཀྱང་། །ཐོས་བསམ་སྒོམ་པའི་འདབ་བརྒྱ་བཞད་པ་ལ། །མི་དམན་སྔོན་མེད་ཉིན་མོར་བྱེད་པ་བདག །རྒུད་པའི་ཆུ་འཛིན་ལས་རྒྱལ་བདེ་བར་(༧༩བ)
མཆིས། །ངེས་དོན་གྲུབ་པའི་སྟི་གནས་སྨན་ལྗོངས་དེར། །ལེགས་སྦྱར་སྐད་ཀྱི་འགྱུར་ཁུགས་སྙན་སྒྲོག་པ། །སྒྲ་སྒྱུར་འཇིག་རྟེན་མིག་གཅིག་ཀོ་ཀི་ལ། ཁྱོད་མིན་གཉིས་པ་གཞན་ཞིག་གང་དུ་མཆིས། །རྒྱ་ཆེན་གསུང་རབ་ཀུན་གྱི་ཞུས་ཆེན་ལ། །ཟླ་མེད་ཆོས་སྐྱོང་བཟང་པོར་གྲགས་དེ་རྫུན། །བདེན་ན་བརྡ་སྤྲོད་གཙུག་ལག་མཐའ་ཀླས་པར། །སྨྲ་བའི་དཔྱོད་ལྡན་ཁྱོད་ཉིད་སུ་ཡིས་བསྐྲུན། །རིག་གནས་རྒྱ་མཚོའི་རིན་ཅེན་འཕྲེང་བ་ཡིས། །ལེགས་སྤུད་དོན་གྱི་པཎ་ཆེན་སྨོན་འགྲོ་བ། །ཚེ་དབང་དོན་ཀུན་གྲུབ་པའི་ལེགས་བཤད་རྒྱུན། །འཛིན་པའི་བྱེད་པོར་ཚངས་པས་ཁྱོད་ཉིད་བསྐོས། །དོན་གྱི་གནད་ལ་མ་རྨོངས་སྒྲ་རིག་པའི། །ཆོས་ཀུན་འཁྲུལ་མེད་སྒྲོ་འདོགས་ལེགས་བཅད་ནས། །གཉུག་མ་ལ་གཞོལ་སེམས་ཀྱི་གངྒཱའི་རྒྱུན། །ངེས་དོན་རྒྱ་མཚོར་འབབ་པ་ཟློག་ནུས་སུ། །དེང་དུས་ཐོས་བསམ་དྲི་བསུང་མི་ལྡན་ཡང་། །སྒོམ་ཆེན་རྒན་པོའི་རྫུ་བའི་འཛིན་སྟངས་ཀྱི། །ལྕེ་གཉིས་བྲང་འགྲོས་འཁྱུད་པའི་ཚེར་མའི་ཤིང་། །ཚད་ལྡན་ཙན་དན་གྲལ་དུ་བསྒྲིག་པ་མང་། །སྡོམ་བརྩོན་ཐོས་པའི་དཀའ་ཐུབ་ཉེར་ཞིག་ཀྱང་། །སྟོབས་འབྱོར་གྱ་གྱུའི་འདྲེན་བྱེད་ལེགས་སྦར་མེས། །གཞན་སྡེའི་འདོད་ལྷ་སྲེག་པའི་ཆོ་ག་དག །རྫོགས་པའི་གཙུག་ན་ཟླ་བ་ཅི་ཡང་སྣང་། །འོན་ཀྱང་ཐོས་པའི་ཆ་ཤས་ཀུན་གང་ཞིང་། །བསམ་པའི་རི་དྭགས་མཚན་མས་རབ་མཛེས་པ། །སྒོམ་པའི་འོད་དཀར་སྤྲོ་བའི་ཟླ་བ་ཁྱོད། །མཐོང་ཚེ་སྙིང་གི་མུན་པ་ཅིས་མི་སེལ། །མི་བསྲུན་ཚངས་པའི་འཁོར་ལོ་བཞི་ལྡན་གྱིས། །ཐང་པའི་བཀའ་རྒྱུད་ཁྱབ་འཇུག་མགྲིན་བཅད་ཚེ། །འཆི་གསོས་བདུད་རྩི་སྟེར་བའི་བྱེད་པོ་ཡི། །བཀའ་བཞིན་སྒྲུབ་པ་ཡང་དག་དོན་གྱི་མཆོག །ཡི་གེ་གསེར་གྱི་གདུ་བུ་ཅན། །སྙན་འགྱུར་པད་ཀོར་རབ་མཛེས་པ། །དོན་བཟང་མཛེས་སྡུག་འཆི་མེད་ཀྱི། །ལུས་(༨༠ན)
ཕྲའི་གར་གྱིས་ཕྱོགས་ཀུན་རོལ། །སང་རག་ཐགས་སུ་བཏགས་པ་ཡིས། །པཉྩ་ལི་ཀའི་སྟོད་གཡོགས་ཅན། །དོན་གྱི་བློ་ལྡན་ཕུར་བུ་དེ། །སྙན་ཚིག་མདོངས་མཐའ་ཞོན་ནས་སོང་། །
རབ་བྱུང་བཅུ་གཅིག་པའི་ཆུ་སྦྲུལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་སྦྲུལ་ལོར་བྲིས་པའི་ཆབ་ཤོག་འཕྲིན་ཡིག་ཁག །ཆུ་སྦྲུལ་གྱི་ལོ་ཕོ་བྲང་ཆེན་པོ་ནས་བཏེག་སྐབས་གོང་ནས་ཁེ་ཤིང་གི་ཆིང་དབང་ཏའི་གའི་གཟིམས་ཁང་གསར་པའི་བར་སྐྱེལ་མར་བཏང་བ་ཕྱིར་ལོག་པ་དང་མཉམ་དུ་བསོད་ནམས་དབང་རྒྱལ་བཏང་བའི་ཞུ་ཡིག་མེས་པོའི་ཁེངས་པ་འགུགས་པའི་དབྱར་རྔ། པུ ཎྱཱ སུ ཝ རྞྞ ཤུ དྡྷཱ ར ས ཧ སྲ ཛྭཱ ལ སྱ ལ ཀྵྨཱི བ ལེ ནོ དཱ ར སྱ མ ཧཱ བྷཱུ ཧ འུ མཾ། །ཙ ཀྐྲེ ཎ བི ཝ རྟྟེ རྣ རཱ ཎཱཾ དེ ཝོ མ ཉྫུ གྷོ ཥོ ཏྟ མཻ རྨྨ ཧཱ རཱ ཛྙེ མཱུ ལ༔ བསོད་ནམས་གསེར་སྦྱངས་རྩིབས་སྟོང་འབར་བ་ཡི། །ཕུན་ཚོགས་སྟོབས་ཀྱིས་ཡངས་པའི་ས་ཆེན་པོར། །འཁོར་ལོས་རྣམ་པར་སྒྱུར་བའི་མི་ཡི་ལྷ། །འཇམ་དབྱངས་གོང་མ་རྒྱལ་པོ་ཆེན་པོ་དྲུང་། །(༨༠བ)
དེང་དུས་ལེགས་བྱས་བྱེ་བའི་ཆུ་གཏེར་ལས། །མཛེས་སྡུག་གཟུགས་སྐུའི་སྣང་བརྙན་རི་བོང་འཛིན། །མི་མཐུན་ཆུ་འཛིན་རྙོག་མས་མ་གོས་པ། །ངོ་མཚར་རྣ་བའི་དགའ་སྟོན་འགྱེད་ལས་ཅི། །ཕོ་བྲང་ཁང་བཟང་མེས་པོའི་ཞལ་གྱི་སྒོ། །གྲངས་མེད་སྡེ་བཞིའི་ནོར་བུའི་འབྱུང་གནས་ཅན། །གསེར་མངལ་ཅན་གྱིས་ཁེངས་པའི་རྒྱུད་འགུགས་པའི། །བྱེད་པོར་གནམ་ནས་འོངས་པ་ཁྱོད་མིན་སུ། །དེ་ཕྱིར་གསེར་ལྡན་དགའ་མའི་ཁོར་ཡུག་གི །ཕང་པར་གནས་པའི་མངའ་འབངས་སྐྱེ་བོ་ཀུན། །ཕན་དང་བདེ་བའི་རྫོགས་ལྡན་དགའ་སྟོན་ལ། །འགོད་པར་རིགས་སོ་ནོར་འཛིན་སྐྱོང་བའི་ལྷ། །རྒྱུ་སྐར་ས་ལ་བཀྲམ་པའི་གྲོང་ཁྱེར་དབུས། །ཕུན་ཚོགས་གསེར་གྱི་ཕོ་བྲང་ཉམས་དགའ་བར། །མི་རྗེ་ལྷ་ཡི་རྒྱལ་པོ་ཆེན་པོ་ཁྱོད། །མི་འགྱུར་རྡོ་རྗེའི་ཁྲི་ལ་བརྟན་པར་གསོལ། །རི་མོ་གནམ་སྔོན་བཞུ་འདྲའི་རྫིང་བུ་ལ། །སྤྱན་རས་ཟླ་སྣང་དབང་པོས་བཙའ་བའི་རྟེན། །རྩེ་མོ་གྲངས་དང་ལྡན་པའི་བདོག་པ་ལ། །རྟགས་ཀྱི་ལང་ཚོ་གསལ་བར་བཀོད་ནས་ཕུལ།སྤི་ལིག་ཐུ་ནང་སོ་ལ་སྤྲིངས་པ་སྒོ་ངའི་སྦུབས་ནས་འཁྲོལ་བའི་སྐད་སྙན། ཨ དྨཱ མ ཧཱ སུ ཁ ཇ མ ཀྱ ཡུ བ ཎྱ པུ ཥྚིཾ ནི རྟྱཱ ནུ བྱ ཉྫ ན ནི མི ཏྟ ཙ ཏུ ནྴ རཱི རཾ། །ཏ དྺ གྨཱུནི ནྡྲ ས དྷཱ ར མ ཀ ཤཻ ཥྱི གོ ྅ སཾ བཱཾ དཾ ཀྱ ཙེ ཏྟ མ ཤ ར ཎྱ ཙ ར ཀྵི ཏ ཏཱཾ། །(༨༡ན)
ཟུང་(སྡེབ་སྦྱོར་དཔྱིད་ཀྱི་ཐིག་ལེ།)འཇུག་སྐུ་བཞིའི་བདག་ཉིད་བདེ་བ་ཆེ། །མཚན་དཔེ་ལང་ཚོ་རྒྱས་པའི་གར་མཁན་ཅན། །ཐུབ་དབང་དེའི་གསུང་ཆོས་དང་སློབ་མར་བཅས། །སྐྱབས་མཆོག་བསླུ་བ་མེད་པས་ཁྱོད་ལ་སྲུངས། །སྐྱེ་བར་གོམས་པའི་ལེགས་བྱས་ས་བོན་མཆོག །རབ་སྨིན་དལ་བའི་རྟེན་བཟང་ཙན་དན་ལྗོན། །བླང་དང་དོར་བྱའི་དྲི་བསུང་སྤྲོ་བཞིན་དུ། །བདེ་བའི་ལོ་འདབ་གཡུར་དུ་ཟ་ལ་ཅི། །དམ་པའི་ཆོས་ཀྱི་བློ་གྲོས་ཟླ་བའི་གཟུགས། །དྲི་མེད་རྣམ་དཔྱོད་རྫིང་བུར་ལེགས་ཤར་བས། །དལ་འབྱོར་འདབ་གཤོག་རྒྱས་པའི་ངང་པ་ཁྱོད། །དགེ་སྦྱོར་མགྲིན་པའི་རྔ་དབྱངས་སྒྲོགས་འདི་མཚར། ཁྱིམ་གཟུགས་སྒོ་ངའི་སྦུགས་རྒྱ་མ་གྲོལ་བར། །ཡང་དག་སྐད་སྙན་འབྱིན་པ་ཁྱོད་མཐོང་ཚེ། །མུ་ཅོར་སྒྲ་ཡིས་རྣ་བ་གཙེར་བྱེད་པའི། །འཚམས་སྤྲིན་གོས་ཅན་ཕལ་ཆེར་ངུར་པའི་ཁྱུ། །ཅལ་སྒྲོག་རི་དྭགས་རྗེས་སུ་མི་སྙེག་པར། །བླ་མེད་ཐེག་པ་མཆོག་ནས་འདུལ་བའི་བར། །འཁྲུལ་མེད་ཉམས་ལེན་གནད་ཀྱི་སཱི་ཏཱ་མ། །རྣམ་པར་སྐྱོངས་ཤིག་བློ་ལྡན་དགའ་བྱེད་ལྷ། །སླད་མར་མི་བསྐྱུད་འཕྲོས་འོས་གཏམ་གྱི་ཆུ། །ཆད་མེད་གངྒཱའི་རྗེས་སུ་འགྲོ་བཞིན་དུ། །རྙེད་དཀའ་བསེ་རུ་ལྟ་བུའི་དལ་བའི་རྟེན། །ཡུན་དུ་འཚོ་ཞིང་སྐྱོང་བའི་ཐབས་འབད་གཅེས། །མི་མཐུན་རྒུད་པའི་མུན་ཚོགས་འཇོམས་བྱེད་པ། །དམ་རྫས་བྱིན་རླབས་ཀུན་འདུས་རིལ་བུ་དང་། །སྲུང་བ་སྲ་མཁྲེགས་རྡོ་རྗེའི་མདུད་པ་ལ། །འཚམས་སྤྲིན་རྟགས་ཀྱི་ལང་ཚོ་འཁྱུད་ནས་སོང་། །གནས་ཆུང་ནས་ཆོས་རྒྱལ་ཆེན་པོས་རྡོ་རྗེའི་གསུང་འཕྲིན་སྔ་ཕྱིར་བྱུང་བའི་ལན་རྨ་ཆུའི་འགྲམ་ནས་དར་གན་ནང་སོ་རྫངས་དུས་ཕུལ་བ་ཡིད་བཞིན་ཆར་འབེབས། (༨༡བ)
ཞི་ཁྲོ་རབ་འབྱམས་དཀྱིལ་འཁོར་འཁོར་ལོའི་མགོན། ཁམས་གསུམ་ཟིལ་གནོན་སྲིད་གསུམ་དབང་དུ་སྡུད། །ཡིད་བཞིན་ནོར་ལྟར་གྲུབ་ཀུན་ཀུན་སྩོལ་བའི། །སངས་རྒྱས་ཀུན་དངོས་པདྨ་འབྱུང་གནས་རྒྱས། །གང་དེའི་བཀའ་སྡོད་སྡེ་བརྒྱད་དྲེགས་པའི་གཙོ། །དཔལ་ལྡན་སྤྲུལ་པའི་ཆོས་རྒྱལ་ཆེན་པོ་ཡི། །རྡོ་རྗེའི་ཚིག་གི་རི་མོ་སྔ་ཕྱི་དང་། །ཉམས་མེད་སུག་པར་སོན་པའི་སྤྲོ་བ་འཕེལ། །འགྱངས་མེད་ཁ་བའི་ལྗོངས་སུ་འབྱོར་པ་སོགས། །སྔར་བཅོལ་འཕྲིན་ལས་མ་ལུས་གྲུབ་པ་ཡིས། །དམ་ཅན་བསྟེན་པའི་དགོས་པ་དོན་ལྡན་ཞེས། །ངེས་རྙེད་དགའ་བའི་གར་སྟབས་ཅི་ཡང་སྒྱུར། །སླར་ཡང་བདག་ཅག་བཤུལ་དུ་ཞུགས་པ་ཡི། །བར་ཆད་ཉེས་པའི་ཚོགས་ཀུན་སེལ་བ་དང་། །བསྟན་དང་འགྲོ་བའི་ཕན་བདེ་ལེགས་སྤེལ་ཞིང་། ཁྱབ་བདག་བླ་མ་ཟུང་འཇུག་ཞབས་བརྟན་མཛོད། །སྔགས་འཆང་བདག་གི་སྲུང་བའི་རྭ་བར་དུ། །བཅུག་རྣམས་ཉིན་མཚན་གཡེལ་མེད་སྐྱོབ་པ་དང་། །མ་རུང་བསམ་ངན་འཆང་བའི་དགྲ་བགེགས་རྣམས། །གང་དུ་འདུག་ཀྱང་སྙིང་ཁྲག་གཞལ་དུ་གསོལ། །སྤྱན་གཟིགས་སྙན་ཤལ་སྣ་ལྔ་གསེར་སྐྱེམས་དང་། །གོ་མཚོན་ཅང་ཤེས་རྟ་དང་ཕྱི་ནང་དུ། །བཅས་ཏེ་ཧོར་ཟླ་དྲུག་པའི་གྲལ་ཚེས་ལ། །ཕུན་ཚོགས་བཀྲ་ཤིས་འཁྱིལ་བའི་སྒར་ནས་དགེ །བོད་ནས་མཆོད་ཡོན་གྱི་མི་སྣར་སྒོ་མང་ཟུར་པ་སློབ་དཔོན་ངག་དབང་དཔལ་འབྱོར་དང་། དར་གན་ནང་སོ་གཉིས་ཏའི་རྒར་འབྱོར་སྐབས་ཟུར་ཆེན་མཁྱེན་བརྩེ་ནུས་པའི་དབང་ཕྱུག་ཁྱབ་བདག་བླ་མ་ཆོས་དབྱིངས་རང་གྲོལ་གྱི་སྙན་ཚིག་ལན་ཆོས་སྲིད་བདག་པོར་བཀུར་བའི་གཏམ་སྙན་གནམ་གྱི་ཤེ་མོང་། (༨༢ན)
ཨ མྲྀ ཏྱ བི དྱཱ དྷ ར ཨཱ ཛ ཡཱ ཧོ ས དྷཱ ཏྲི གུ ཧྱ སྱ ཙ བ ཛྲ ནི རྟི། །ཏྲི མཱུ ལ པ དྨཱ ཀ ར ཨཱ ས མཱ ཛཱ རྠ ཙཱ ནི རཱ བྷོ ག ཀྲྀ སི དྡྷི ཡ ཙྪ། །རྒྱལ་(སྡེབ་སྦྱོར་ཉེ་དབང་རྡོ་རྗེ)བ་ཀུན་གྱི་གསང་གསུམ་རྡོ་རྗེ་གར། །འཆི་མེད་རིག་འཛིན་གྲུབ་པའི་ངོ་མཚར་ཅན། །རྩ་གསུམ་ཀུན་འདུས་པདྨ་འབྱུང་གནས་ཀྱིས། །དངོས་གྲུབ་སྩོལ་ལ་དོན་རྣམས་ལྷུན་གྲུབ་མཛོད། །དཀྱིལ་འཁོར་རྒྱ་མཚོའི་མགོན་དེའི་ལུགས་འཛིན་པ། །རིག་སྔགས་འཆང་བའི་འཁོར་ལོས་སྒྱུར་བའི་དཔྱིད། །ཟུར་ཆེན་ཐམས་ཅད་མཁྱེན་པའི་གདུང་གསོབ་དེའི། །རི་མོ་དབྱངས་ཅན་མགྲིན་པར་ཆགས་པའི་གླུ། །ཟབ་དོན་གཏེར་ཀྱི་སྒོ་འབྱེད་སངས་གླིང་པའི། །ཕྱག་སོར་ལས་གྲུབ་བླ་མ་ཡབ་ཡུམ་སྐུ། །ཀོང་ཆེན་འཇིགས་མེད་ནམ་མཁའི་རྣལ་འབྱོར་གྱི། །འབྲལ་སྤངས་སྲུང་བར་མཛད་པའི་རྟེན་བཅས་འབྱོར། །དེང་དུས་གསང་གསུམ་འཇིགས་མེད་རྡོ་རྗེའི་ཁམས། །ལྷུན་གྲུབ་བདུད་སྡེའི་གཡུལ་ལས་རྣམ་རྒྱལ་ཞིང་། །ཐེག་(༨༢བ)
མཆོག་ཆོས་ཀྱིས་འགྲོ་ཀུན་སྨིན་གྲོལ་ལ། །ལེགས་བཀོད་སྙན་པའི་གཏམ་འདི་རྣ་བར་འཇེབས། །འདི་ན་ཟ་ཧོར་རིགས་ཀྱི་ལྡོམ་བུ་བ། །སྒྱུ་ལུས་དུས་ཀྱི་ཞགས་པས་མ་བཅིངས་ཤིང་། །ཤར་ཕྱོགས་རྒྱལ་པོའི་ཁབ་ལས་ཕྱིར་བཏེག་ནས། །དབུས་འགྱུར་གངས་ཅན་ཕྱོགས་དེར་འོང་སྐབས་ཡིན། །གནམ་གྱིས་བསྐོས་པའི་འཇམ་དབྱངས་གོང་མ་ཞེས། །ས་ལ་མངོན་སུམ་རྒྱུ་བའི་ཚངས་པ་དེས། །དངོས་ཅག་ནུབ་ཕྱོགས་ཡངས་པའི་རྒྱལ་ཁམས་ཀྱི། །ཆོས་སྲིད་བདག་པོར་ལུང་དང་ལས་ཀས་བསྐུར། །ཚུལ་འདི་སྙིང་ནས་ཆོས་ལ་ཉེར་གཞོལ་བ། །སྔོན་བྱོན་དམ་པའི་རྣམ་ཐར་མ་ལགས་ཀྱང་། །དེང་དུས་གོ་ས་ལྷུར་ལེན་རང་གཞན་གྱི། །བླ་ཆེན་ཕལ་ཀྱི་འཐོབ་མིན་གནས་ཤིག་ཡིན། །འོན་ཀྱང་སྲིད་པའི་ཕུན་ཚོགས་གློག་གི་གར། །མཐའ་མེད་འཁོར་བའི་སྡུག་བསྔལ་བཟོད་དཀའ་ཅན། །ཐེག་མཆོག་ཆོས་ཀྱི་སྙིང་པོ་རྙེད་དཀའི་དོན། །ཤེས་རྣམས་ཚུལ་འདིར་ཨ་འཐས་དགའ་བ་ཅི། །དེ་ལྟར་སྔ་ཕྱིར་འགྱུར་བའི་རྡོ་རྗེའི་ཐེག །ཟབ་མོའི་ཆོས་ཀྱིས་རང་གཞན་དོན་སྒྲུབ་པར། །གཅིག་ཏུ་མོས་པའི་ཨཱ་ཝ་དྷཱུ་ཏཱི་པ། །འདི་སྣང་ཆོས་བརྒྱད་བྱ་བས་འཆིང་ནུས་མིན། །བགྲང་བྱའི་གླེགས་བམ་བྲག་རི་ལྟར་བརྩེགས་ཀྱང་། །ཚེ་འདིའི་བྱ་གཞག་གཞོན་ནུའི་ངང་ཚུལ་ཅན། །འཁྲུལ་པའི་འབོད་གྲོགས་རི་དྭགས་རྗེས་སྙེག་རྣམས། །མཐོང་ཚེ་ཁོ་བོ་གཏན་གྱི་སི་ཏཱ་གཉེར། །དབྱར་གྱི་སྲིན་བུའི་གྲངས་ལ་ཅོ་འདྲི་བའི། །སྐད་དང་ལུགས་སྲོལ་མི་གཅིག་སྐྱེ་རྒུ་རྣམས། །སྡིག་སྤོང་དགེ་བ་བསྒྲུབ་པ་རྫོགས་ལྡན་གྱི། །སྔོན་མེད་དགའ་སྟོན་མཆོག་ལ་ཅི་ཡང་སྦྱར། །འོན་ཀྱང་དེང་དུས་རྒྱ་ཧོར་ཡུལ་གྲུ་ཀུན། །མདའ་ལྔ་སྙིང་ལ་ཕོག་པའི་བཤེས་གཉེན་དང་། །བླུན་པོ་རྫུན་དང་ཟོག་གི་འཁྲུལ་འཁོར་ཅན། །མུ་སྟེགས་ཀླ་ཀློའི་ལུགས་སྲོལ་སོགས་(༨༣ན)
ཀྱིས་གང་། །དེ་ཕྱིར་དྲི་མ་མེད་པའི་ཐུབ་པའི་བསྟན། །ཚུལ་བཞིན་གནས་པ་ཁ་བའི་སྨན་ལྗོངས་ལས། །རྒྱལ་ཁམས་གཞན་དུ་མེད་པར་ངེས་རྙེད་ན། །ཕྱོགས་དེར་བགྲོད་པར་མི་རིངས་ཤེས་ལྡན་སུ། །འཁྱོག་འགྲོ་བློ་ཡི་ལྕེ་གཉིས་རྐྱོང་ནུས་པ། །རང་གཞན་ཕུང་འཚེངས་སྒྲུབ་པའི་རྣམ་ཐར་འགའི། །རྗེས་སུ་འཇུག་ན་སྲིན་བུའི་བྱིན་ཤ་གང་། །འདར་བྱེད་མཐའ་འཁོབ་ཡུལ་ལ་དགའ་སྲིད་ཀྱང་། །དངོས་ཅག་མཁན་སློབ་ཆོས་གསུམ་བཞེད་པ་ལྟར། །རུ་བཞིའི་རྒྱལ་ཁམས་བདེ་བ་སྒྲུབ་པའི་ཁུར། །འཛིན་ལ་གཞན་འཕྲུལ་དབང་པོ་འགའ་འཁུ་ཡང་། །དུས་གསུམ་རྒྱལ་བ་མ་ལུས་དགྱེས་སམ་སྙམ། །ཨུཏྤལ་ཟེའུ་འབྲུ་དགོད་པའི་ནགས་ཀླུང་ལ། །རྐང་དྲུག་བུང་བ་རིང་ནས་འདུ་བྱེད་ཀྱང་། །དུས་ཀུན་ལྷན་ཅིག་གནས་པའི་སྦལ་པ་དག །ཅི་ཡང་མི་སེམས་རང་གི་ངང་ཚུལ་ཡིན། །ལྷོ་ཕྱོགས་མ་ལ་ཡ་ཡི་དགའ་ཚལ་དུ། །སྐྱེས་པའི་རྐང་འཐུང་འཕྲེང་བ་ཆེས་ཕྲ་ཡང་། །ཚད་པའི་གདུང་བ་སེལ་བའི་དྲི་བསུང་དག །འབད་མེད་ཤུགས་ལས་འབྱུང་བ་ཆོས་ཉིད་ཡིན། །གང་གི་ལེགས་པར་བཤད་པའི་རི་མོ་ལ། །བཀྲ་ཤིས་གཡས་སུ་འཁྱིལ་བའི་མགྲིན་པ་ལས། །ཉམས་དང་འགྱུར་བའི་རོ་ལྡན་འཕྲིན་ཡིག་ཏུ། །མངོན་རྗེས་ཚད་མས་སྒྲུབ་ནུས་དོན་དེ་བཞིན། །མཐོང་ན་མི་མཐུན་མེད་པ་རྒྱལ་བའི་སྐུ། །ཇོ་ཤཱཀ་རང་བྱོན་འཇིག་རྟེན་དབང་ཕྱུག་དང་། །འཕྲུལ་སྣང་བསམ་ཡས་ལ་སོགས་སྟོད་སྨད་ཀྱི། །ཕན་བདེའི་རྩ་ལག་ཆོས་འཁོར་གཙུག་ལག་ཁང་། །ཨུ་རྒྱན་མཁའ་འགྲོའི་གླིང་གི་རྗེས་འགྲོ་བའི། །མཚོ་སྐྱེས་རྡོ་རྗེས་བྱིན་བརླབས་གསང་བའི་གནས། །ཐུབ་བསྟན་སྤྱི་དང་ཀུན་མཁྱེན་བཙོང་ཁ་པའི། །ལུགས་འཛིན་འདུས་པའི་སྡེ་ཡིས་ས་གཞི་ཁྱབ། །རིས་མེད་དམ་པའི་ཆོས་ཀྱི་བདུད་རྩི་ཡིས། །ཡིད་ལ་ཀུན་ནས་དགའ་བའི་མཆོག་སྦྱིན་མཁན། ཁྱབ་བདག་འཁོར་(༨༣བ)
ལོའི་དབང་ཕྱུག་ཟུང་དུ་འཇུག །མཁས་གྲུབ་བསྟན་འཛིན་རྒྱུ་སྐར་ལྟ་བུར་འཁྲིགས། །ས་སྤྱོད་མཆོད་ཡོན་ཉི་ཟླ་ཟུང་གཅིག་སོགས། །བསྟན་ལ་རི་མོར་བགྱིད་པའི་སྦྱིན་པའི་བདག །ཆོས་རྒྱལ་མྱ་ངན་མེད་ཀྱི་དཔེ་ཟླ་ཡིས། །གསེར་ལྡན་མ་དེའི་ལྟོ་བ་དོག་པོར་བྱས། །དེ་ཕྱིར་ལྕག་གིས་ཡང་ཡང་ཉེར་བསྐུལ་བའི། །ཅང་ཤེས་རླུང་གི་ཤུགས་ལ་འགྲན་བཟོད་པར། །བརྟེན་ནས་དབུས་འགྱུར་ཆོས་ཀྱི་མདུན་ས་ཆེར། །མྱུར་སླེབ་བག་ཕེབས་གླེང་མོ་ཞིབ་ཏུ་བྱེད། །རབ་དཀར་ཐགས་སུ་བྱས་པའི་ངོས་ཡངས་སྟེང་། །ཕུན་ཚོགས་རིན་ཅེན་མཆོག་གི་གར་བུ་ཅན། །གསང་བ་སྔགས་ཀྱི་གྲངས་འཛིན་བརྒྱ་རྩར་བཅས། །ཆུ་སྟོད་ཟླ་བ་སྔོན་མའི་ཚེས་ལ་བྲིས། །སྒར་ཆེན་གོང་ནས་འཁོར་ཏེ་མཚོ་ཁྲི་ཤོག་རྒྱལ་མོའི་བྱང་ཕྱོགས་རང་བྱུང་ཁྲུས་ཀྱི་རྫིང་བུའི་འགྲམ་དུ་འབྱོར་ཐོག་བོད་ཀྱི་ཆེ་རྒུའི་བསུ་བ་སླེབ་པའི་སྟག་ལུང་ཞབས་དྲུང་མ་ཆེན་གྱི་ཆབ་ཤོག་ལན་སྭསྟིའི་སྒྲ་དབྱངས། ཤྲཱི ཡུ ད ཡྻ ཙཱ ནི མི ཏྟ བྷ དྲཱ ཛི ཏྲི གུ ཧྱ དྷཱ ཏུ ཙཱ ཡུ བ ཎྱ། །སཱ དྷ མཱ ལ མཱུ ལ ཙཱ མ ཧཱ ར ཐྱཱ ཙ ནི ཀ རྱ བཱ ཉྩཱ མཱ ཡཱ། །(༨༤ན)
རྒྱལ་(སྡེབ་སྦྱོར་རྨ་བྱའི་འགྲོས།)ཀུན་གསང་བ་གསུམ་གྱི་དབྱིངས། །མཚན་བཟང་ལང་ཚོ་དར་བའི་དཔལ། །སྒྱུ་འཕྲུལ་དྲ་བའི་གར་མཁན་ཅན། །སྒྲུབ་རྒྱུད་ཤིང་རྟ་ཆེན་པོའི་དྲུང་། །དེང་དུས་དག་པ་དོན་དམ་མི་ཟད་པའི། །འཁོར་ལོའི་མཛོད་དུ་འབྱོར་པའི་དབང་ཕྱུག་ཀྱང་། །ཀུན་རྫོབ་སྒྱུ་མར་སྣང་བའི་གཟུགས་ཀྱི་སྐུ། །གཞོམ་མེད་རྡོ་རྗེའི་དཔལ་ལ་སྤྱོད་པའི་ངོས། །སྔ་ཕྱིར་གནང་བའི་ཆབ་ཤོག་དྲི་ཟའི་རྒྱུད། །ཉམས་ལྡན་འབུམ་ཕྲག་འཛག་པའི་གླུ་དབྱངས་ཅན། །ཕོ་ཉ་བགྲོད་པའི་བྱེད་པོས་འགོག་མེད་དུ། །སུག་པར་སོན་ཚེ་ཡིད་དང་རྣ་བའི་གསོས། །རྣམ་དཔྱོད་སྒྲོ་གཤོག་ཕྲ་ཡང་བརྩོན་འགྲུས་ཀྱི། །སྒོ་ངའི་སྦུབས་ནས་ལྔ་རིག་སྙན་འགྱུར་སྒྲ །སྒྲོག་པའི་སྡོམ་བརྩོན་གཉིས་སྐྱེས་ཀློག་པ་མཁན། །ངོམས་མེད་ཐོས་བསམ་སྒོམ་ལ་གཞོལ་བློར་མཆིས། །གངས་ཅན་ངོ་བོའི་ཆ་ཤས་ཤར་གྱི་ཕྱོགས། །ཕྱག་རྒྱའི་གྲུབ་རིགས་དུ་མའི་སྟི་གནས་ཆེ། །ཚང་ཚིང་འཕྲེང་བ་འཁྲིགས་པའི་སྨན་ལྗོངས་དེར། །འཁོར་ལོའི་བྱ་བས་མཛེས་ཞེས་གཏམ་དུ་གླེང་། །བརྣག་དཀའ་བདུད་རིགས་ཉེར་འཚེའི་ཆུ་གཏེར་ནང་། །ཐང་པའི་རིང་ལུགས་ནོར་འཛིན་བྱིང་གྱུར་ཚེ། །སྙིང་སྟོབས་རུས་སྦལ་ཁུར་གྱིས་འདེགས་ནུས་པའི། །སྔོན་མེད་ཐ་གུའི་ལྟོ་ཅན་ཁྱོད་མིན་སུ། །མཁྱེན་ཡངས་ཟུར་ཕུད་ལྔ་པའི་རྗེས་འགྲོ་ཞིང་། །བརྩེ་ཆེན་ཕྱག་ན་པདྨའི་ངང་ཚུལ་འཛིན། །མཐུ་སྟོབས་ལག་ན་རྡོ་རྗེ་རབ་འཁུ་བ། །དེང་དུས་བཤེས་གཉེན་ཚུལ་དུ་རོལ་མིན་ནམ། །རིམ་བརྒྱུད་ཆོས་ཀྱི་བགྲོད་པའི་ལྟོས་མིན་རྣམས། །གཅིག་ཤེས་ཀུན་གྲོལ་རྣམ་རྟོག་ཆོས་ཀྱི་སྐུར། །ངེས་པའི་རིང་ལུགས་མཐའ་ཀླས་འགྲོ་བ་ལ། །སྤེལ་པའི་བྱེད་པོ་དེང་དུས་ཁྱོད་མིན་སུ། །མཉམ་མེད་དྭགས་པོའི་ལུང་རྟོགས་བསྟན་པའི་མཁར། །བསྟན་འཛིན་ཉིན་མོར་བྱེད་པའི་དབང་ཕྱུག་ཁྱོད། །རྟ་ལྗང་(༨༤བ)
གདོང་ལྔས་བཏེག་པའི་ཁྲི་སྟེང་དུ། །ནམ་ཡང་འགྱུར་བ་མེད་པར་བརྟན་པར་གསོལ། །རི་མོ་གསུམ་པའི་རྀ་ཥི་ཡི། །ངོ་མཚར་ལས་འོངས་ཕེབས་ཚོགས་ཀྱི། །ཡན་ལག་བརྒྱད་དང་ལྡན་པའི་ཀླུང་། །བདུད་རྩིའི་དཔྱིད་དུ་གྲུབ་པར་མཛོད། །རྗོད་བྱེད་མདོངས་མཐའ་ལ་བཞོན་ཀརྟི་ཀ །དོན་བཟང་སྭསྟིའི་སྒྲ་དབྱངས་སྒྲོག་པ་ཅན། །བདོག་པའི་གླེགས་བམ་སུག་པར་ཐོགས་བཞིན་དུ། །ཤར་ལྷོ་འཛིན་མའི་བཤུལ་རིང་ལམ་དུ་བསྐྱོད། །སྟག་ལུང་ཞབས་དྲུང་མ་ཆེན་གྱི་ཁམས་རི་བོ་ཆེ་ནས་སྟག་ལུང་ལོ་ཙཱ་བ་སྐར་ཆེན་བོད་དུ་འབྱོར་པའི་ལེགས་སྐྱེས་དང་བཅས་བྱུང་བའི་སྐབས་ཀྱི་ཆབ་ཤོག་གི་ལན་མྱ་ངན་མེད་པའི་སྤུན་ཟླ། ས རྦྦ ཛི ནཱ གུཧྱ ཏྲི ཙ བ སྟཱ ས ནྡྷི མུ ད དི ཏྷཱ ནཱ ཊ ཀ བཱ ཉྩ། །ནྟྭ ས ཀྲྀ པ དྨ པཱ ད མུ ཀུ ཎྱཱ གྲེ པ རི ས བྷྱཱ ཀུ ལྱ ཙ མཱུ ལ། །རྒྱལ་(སྡེབ་སྦྱོར་གསེར་ལྡན།)བ་ཀུན་གྱི་གསང་བ་གསུམ། །འཚམས་སྤྲིན་གོས་ཀྱི་ཟློས་གར་ཅན། །གྲུབ་རིགས་ཡོངས་ཀྱི་ཅོད་པན་རྩེར། །ཞབས་ཀྱི་ཆུ་སྐྱེས་འགོད་མཛད་དྲུང་། །(༨༥ན)
དེང་དུས་སྐྱེ་རྒུའི་བསོད་ནམས་ཆུ་གཏེར་ལས། །ལེགས་འོངས་མཚན་དཔེའི་རི་དྭགས་སྣང་བརྙན་ཅན། །རྨད་བྱུང་གཟུགས་སྐུ་ཆུ་ཤེལ་དབང་པོ་དག །རྒྱལ་བསྟན་མཁའ་ལ་འགོག་མེད་འཆར་བའི་ངོས། །བཀའ་ཐམ་ལེགས་བཤད་ག་བུར་གཟེགས་མ་འབུམ། །ཉམས་འགྱུར་ཚིགས་སུ་བཅད་པའི་འོད་ཟེར་གྱིས། །བདག་ཡིད་ཨུཏྤལ་ཁོང་ནས་འཛུམ་པ་དང་། །སྐྱེས་བཟང་སྣང་བས་ཀུན་གསལ་ལྷན་ཅིག་གྱུར། །མང་དུ་ཐོས་ཀྱང་སྒྲུབ་པའི་སྐལ་བ་དག །ཆེས་ཕྲ་ཟིན་བྲལ་རྣམ་གཡེང་གཟེབ་ཆུད་པའི། །ཀློག་པ་མཁན་ཡང་འཚོ་བ་བདེ་བའི་ངོས། །དབུས་འགྱུར་ཆོས་ཀྱི་མདུན་སར་སླེབས་སྐབས་ཡིན། །རིང་མིན་དུས་སུ་ཧོར་དང་རྒྱ་ནག་པོའི། །གྲངས་མེད་ཡུལ་གྲུའི་བཀོད་པ་དགེ་མཚན་དང་། །འཇམ་དབྱངས་གོང་མའི་གཙུག་ལག་ལུགས་བརྒྱའི་སྒོ །ལྟད་མོ་སྐབས་གསུམ་གྲོང་ལ་ཅོ་འདྲི་བྱས། །མཆོག་དམན་བར་མའི་སྐྱེ་རྒུའི་ཞིང་ས་ལ། །མངོན་པར་མཐོ་དང་ངེས་ལེགས་ས་བོན་ཚོགས། །བསྐྲུན་པས་རྣམ་སྨིན་དཀར་པོ་འཛག་པ་ཡི། །ངོ་མཚར་འབྲས་བུའི་སྙེ་མ་གཡུར་ཟ་ལྡེམ། །གང་གི་འཕྲིན་ལས་ཉི་མ་འབུམ་གྱི་གཟིས། །ཚང་ཚིང་སྟུག་པོས་བསྐོར་བའི་རི་བོའི་ངོགས། །རྨོངས་ཆེན་མུན་གསལ་སྒྲུབ་རྒྱུད་པད་དཀར་ཚལ། །རྒྱས་ཞེས་ཕྱོགས་བྲལ་སྒེག་མོ་དབྱངས་སུ་ལེན། །འདུས་སྡེའི་ཀུན་དགའ་ར་བ་དྲི་གཙང་ཁང་། །སྐུ་གསུང་ཐུགས་རྟེན་བཞེང་དང་གསོ་བ་སོགས། །བྱ་བ་ལས་ཀྱི་འཁོར་ལོས་མྱ་ངན་མེད། །སཱ་ལའི་ལྗོངས་འདིར་འོངས་ལས་གཞན་དུ་ཅི། །ཀུན་རྫོབ་སྤྲོས་པའི་ཆོས་ཀྱི་རླབས་འཕྲེང་རྣམས། །གཉུག་མ་སེམས་ཀྱི་རྒྱ་མཚོར་རོ་གཅིག་པའི། །ཕྱག་ཆེན་བསྟན་པ་སྤེལ་ལ་མི་ལ་རྗེ། །བསམས་བཞིན་ག་ཟིའི་རྒྱུད་དུ་བྱོན་པར་ངེས། །རིང་མིན་དབུས་གཙང་དག་པའི་ཞིང་(༨༥བ)
ཁམས་སུ། །ཕེབས་ཚུལ་ཏམྦུ་ར་ཡི་དབྱངས་སྙན་པོ། །རྣ་བ་བདུད་རྩིར་བྱས་དང་ལྷན་ཅིག་ཏུ། །ཡིད་ལ་ཀུན་དགའ་སྐྱེད་པའི་གསོས་སུ་འཇེབས། །པཉྩ་ལི་ཀའི་གོས་བཟང་ལྷབ་ལྷབ་ཅན། །འགྱུར་ཁུག་མགྲིན་པའི་དྲིལ་ཆུང་ལེགས་འཁྲོལ་བ། །ཨ་འདུས་ཀ་འཕྲེང་ལྡན་པའི་གར་མཁན་ཞིག །ངེས་དོན་གྲུབ་པའི་གནས་སུ་བདེ་བར་སོང་། །
རབ་བྱུང་བཅུ་གཅིག་པའི་ཤིང་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག །ཤིང་རྟ་བཙུན་མོ་ཚལ་ནས་ཚངས་པ་དུང་ཐོད་ཅན་གྱིས་སྐུ་རིམ་བསྐུལ་བའི་ལན་བྱིན་ཟ་ཉལ་འགྲོར་སྒྱུར་བའི་འཁྲུལ་འཁོར། སྲིད་དང་ཞི་བའི་དགེ་ལེགས་ཀུན་གྱི་གཏེར། །རིག་འཛིན་པདྨའི་བཀའ་སྲུང་དུང་ཐོད་ཅན། །གང་གི་རྡོ་རྗེའི་གསང་བའི་གསུང་གི་ཚིག །ལྷ་དང་རྟེན་དང་བཅས་པ་ཉམས་མེད་འབྱོར། །བསྟན་དང་དེ་འཛིན་མཆོད་ཡོན་མཐའ་དག་གི །མི་མཐུན་གཡུལ་ལས་རྒྱལ་བའི་རིམ་གྲོའི་ཚོགས། །ཇི་བཞིན་ཚད་མེད་སྙན་ཅིང་འཇེབས་པའི་གླུ། །དངོས་ཀྱི་ངག་ནས་ནན་ཏན་སྐུལ་མ་བྱེད། །སླད་ནས་སྔོན་གྱི་དམ་ཚིག་མ་གཡེལ་བར། །ཞི་རྒྱས་དབང་དྲག་ལས་ཀུན་སྒྲུབ་པའི་རྟེན། །རབ་དཀར་བཀྲ་ཤིས་དར་གྱི་སྙན་ཤལ་བཅས། །དཔལ་ལྡན་འབྲས་སྤུངས་ཆོས་ཀྱི་སྡེ་ནས་དགེ །གོང་དུ་འགྲོ་སྐབས་བསམ་ཡས་གནོད་སྦྱིན་ཆེན་པོར་འཕྲིན་ལས་བཅོལ་པ་རྣམས་ལྷུན་གྱིས་གྲུབ་པའི་གཏང་རག་ཕུལ་བའི་འཕྲིན་དུ་གསོལ་བ་བསམས་པ་ཡིད་བཞིན་གྲུབ་པའི་གད་བརྒྱངས། ཨེ་མ་ངོ་མཚར་ཕུལ་བྱུང་རྒྱལ་བའི་བསྟན། །བསྲུང་བར་ཞལ་བཞེས་རྡོ་རྗེ་དམ་ཚིག་ཅན། །བསྟན་བསྲུང་སྤྲུལ་པའི་ཆོས་ཀྱི་རྒྱལ་པོ་མཆོག །དཔལ་ལྡན་གནོད་སྦྱིན་ཆེན་པོ་དེང་འདིར་དགོངས། །སྔར་བཅོལ་དོན་ཀུན་ཐོགས་མེད་གྲུབ་པ་དང་། །ད་འཆོལ་འཕྲིན་ལས་གཉེར་དུ་གཏད་པའི་ཕྱིར། །ལྷ་རྫས་གོས་བཟང་གོ་མཚོན་གསེར་སྐྱེམས་སོགས། །(༨༦ན)
ཀུན་བཟང་མཆོད་པའི་སྤྲིན་གྱིས་དགྱེས་པར་མཛོད། །འཆི་མེད་རོ་བརྒྱའི་བཅུད་ལྡན་བཏུང་བའི་མཆོག །ཚེ་རིང་དོན་དང་ལྡན་པ་རྒྱ་ཇའི་བཅུད། །སྣང་སྲིད་དྲེགས་པའི་གཙོ་བོར་ལེགས་འབུལ་ན། །འདོད་པའི་དོན་ཀུན་ལྷུན་གྱིས་གྲུབ་པར་མཛོད། །བསྟན་དང་བསྟན་འཛིན་འགྲོ་བའི་བདེ་སྐྱིད་སྤེལ། །མ་རུང་བསམ་སྦྱོར་འཆང་བའི་དགྲ་དཔུང་ཆོམས། །ནག་པོ་བདུད་ཀྱི་རུ་མཚོན་ས་ལ་སྙོལ། །དཀར་ཕྱོགས་རྒྱལ་བའི་རྫ་རྔ་ཆེར་སྒྲོགས་ཤིག །ཁྱད་པར་བོད་འབངས་ཕན་བདེའི་འོད་གསལ་བར། །གནོད་བྱེད་གཞན་འཕྲུལ་དབང་པོའི་མུན་པ་ཀུན། །དྲེགས་པའི་དེད་དཔོན་ཉི་མ་འབུམ་གྱི་གཟི། །རབ་ཏུ་འབར་བའི་མཐུ་ཡིས་ཕ་མཐར་སྤྲོད། །རྒྱལ་དབང་པདྨས་དམ་བསྒྲགས་ཉེར་དགོངས་ལ། །རིགས་དང་རྒྱུད་ནས་མཆོད་པའི་ལྷ་ཁྱོད་ཀྱིས། །ཞི་རྒྱས་དབང་དྲག་འཕྲིན་ལས་མ་ལུས་པ། །ལྷུན་གྲུབ་ཡིད་བཞིན་ནོར་བུ་ལྟ་བུར་མཛོད། །བཀྲ་ཤིས་འབྱུང་བ་གསུམ་དང་ལྡན་པ་ཡི། །ལྗོན་ཤིང་འདབ་མའི་གོས་གྱོན་རྒྱལ་བའི་ལོ། །ཉིན་བྱེད་བུམ་པར་སྤྱོད་པའི་ཟླ་བ་ལ། །དཔལ་ལྡན་འབྲས་སྤུངས་ཆོས་ཀྱི་སྡེ་ནས་དགེ །སྒར་ཆེན་གོང་དུ་འདེགས་སྐབས་ཐང་པོ་ཆེར་རིགས་ཀྱི་སྲུང་མ་བཤན་པ་ལག་དམར་ལ་འཕྲིན་ལས་བཅོལ་བ་རྣམས་གྲུབ་པའི་གཏང་རག་འཕྲིན་དུ་གསོལ་བ་མཐུ་སྟོབས་འཕྲུལ་གྱི་རེ་སྐོང་། མཐུ་སྟོབས་འཕྲུལ་གྱིས་གཞན་སྡེ་དཔའ་བཀོང་པར། །དབང་ཕྱུག་ལྟ་བུར་ཕྱོགས་ལས་རྣམ་རྒྱལ་བ། །ཕ་མེས་བརྒྱུད་པའི་སྲུང་མ་མཐུ་རྩལ་ཅན། །བསྟན་སྲུང་བཤན་པ་ལག་དམར་དེང་འདིར་དགོངས། །སྔོན་ནས་གཉེར་དུ་གཏད་པའི་ལས་སྒྲུབ་ཅིང་། །སླར་ཡང་འཕྲིན་ལས་འཆོལ་བར་བྱེད་པའི་རྟེན། །གསེར་སྐྱེམས་ལྷ་རྫས་གོ་མཚོན་རྒྱ་ཇ་སོགས། །རྨད་བྱུང་མཆོད་པའི་ཚོགས་རྣམས་དགྱེས་པར་བཞེས། །ཡིད་འོང་རབ་དཀར་སྣོད་དུ་ལེགས་གཏམས་པའི། །(༨༦བ)
ཕུན་ཚོགས་རོ་བརྒྱའི་དཔལ་ཀུན་འཛིན་པའི་ཇ། །འཆི་མེད་བདུད་རྩིའི་རྒྱ་མཚོར་རབ་འཁྱིལ་བ། །བསྟན་སྲུང་དབང་པོ་འཁོར་དང་བཅས་ལ་འབུལ། །ཕན་བདེའི་འབྱུང་གནས་སངས་རྒྱས་བསྟན་པ་རྒྱས། །འགྲོ་བ་རྣམས་ཀྱང་དགའ་སྐྱིད་ལོངས་སུ་སྤྱོད། །རིག་འཛིན་བདག་གིས་བཅོལ་བའི་འཕྲིན་ལས་ཀུན། །བསམ་པ་ཇི་བཞིན་ལྷུན་གྱིས་གྲུབ་པར་མཛོད། །ངོ་མཚར་ཀུན་ནས་དགའ་བའི་ཞལ་གྱི་ཁྱིམ། །ངོམ་པའི་འབྱུང་བ་གསུམ་ལྡན་ཤིང་རྟ་ཡི། །རྟ་ཆེན་ཟླ་བའི་གྲལ་ཚེས་དུས་དགེ་བར། །དཔལ་ལྡན་འབྲས་སྤུངས་ཆོས་ཀྱི་སྡེ་ནས་དགེ །གོང་ནས་སྒར་ཆེན་བོད་དུ་སྐྱེལ་བ་དང་། བསྟན་འཛིན་ཆོས་ཀྱི་རྒྱལ་པོར་ལུང་ལ་གནང་བར། ཁཱ་བླ་མ། དར་གན་ཆོས་རྗེ། གཙང་པ་དཀའ་བཅུ། ནར་ནུ་དོར་གི་ཨཾ་བྷ། ཤུ་བྱི་ཐར་དོར་གི་ཨཾ་བྷ། མང་ཁས་རྫར་གོ་ཆི། ནོར་རས་རྫར་གོ་ཆི། རྦི་ཆི་མཱ་ཆེ། རྗེ་རེད་སོགས་ཕྱིར་འདེགས་སྐབས། རྟ་འབུལ་ནང་སོ་དང་། ལྕང་ལོ་ཅན་དཀའ་བཅུ་ངག་དབང་ནོར་བཟང་གཉིས་བཏང་བའི་ཞུ་ཡིག་འཁོར་ལོས་སྒྱུར་བའི་རང་གཟུགས། ལ ཀྵྨཱི བི ཛ པྱ སྱ མ ཏཱ ས ན ༔ བུ ཎྱཱ པ དྨ ཤུ ཀླཱ ཀ ར ག རྦྷ དེ ཝ ༔ བྲ ཧྨ ཎྱ ལོ ཀཱ ཀྲྀ མྲྀ དུ སཱ རོ ཏྟ མྱཱ པཱ ད མུ ལེ ན ར རཱུ པ རཱ ཛྙོ། །(༨༧ན)
ཕུན་(སྡེབ་སྦྱོར་དབང་པོ་རྡོ་རྗེ།)ཚོགས་རྣམ་པར་རྒྱལ་བའི་ཁྲི་ཆེན་པོར། །ལེགས་བྱས་པད་དཀར་མངལ་ལས་མཐོན་པའི་ལྷ། །འཇིག་རྟེན་བྱེད་པོ་ཚངས་པ་མི་གཟུགས་ཅན། །འཇམ་དབྱངས་གོང་མ་རྒྱལ་པོའི་ཞབས་དྲུང་དུ། །གངས་ཅན་ནོར་འཛིན་དཔལ་མོའི་ལྟོ་བ་ན། །ཀུན་མཁྱེན་རྒྱལ་བའི་དྲི་མེད་བསྟན་པ་ལ། །ཐོས་བསམ་སྒོམ་པར་མོས་བློའི་སྡོམ་བུ་པ། །སྡོམ་བརྩོན་ཀློག་པ་མཁན་དེས་མཆིད་འདི་ཞུ། །དུས་ཀྱི་བདག་པོར་གནམ་གྱི་ཤེ་མོང་གིས། །མངོན་པར་དབང་བསྐུར་ཕྱོགས་ལས་རྣམ་རྒྱལ་བ། །འཇིགས་མེད་རྡོ་རྗེའི་རིགས་ལྡན་འཁོར་ལོའི་དཔུང་། །དབང་ཕྱུག་ཡོན་ཏན་གྲུབ་པའི་ལྷ་ཁྱོད་གསོན། །དེང་དུས་སྐུ་གསུང་ཐུགས་གྱི་འོད་དཀར་ཅན། །ཉེར་འཚེ་ནམ་མཁའི་གླང་པོ་རྒྱང་བསྲིང་ཤིང་། །འཛམ་གླིང་སྐྱེ་རྒུར་སྡེ་བཞིའི་མཆོག་སྩོལ་བའི། །འབུམ་ཕྲག་ག་བུར་ཟེགས་མ་སྤྲོ་ལས་ཅི། །ཡབ་མེས་ཐའི་སུན་རིམ་བྱོན་ཉི་འོག་གི །སྟོབས་ཀྱི་རྒྱལ་པོར་རྩོད་པ་མེད་པའི་ལྷ། །འཆི་མེད་དབང་པོའི་བཤུལ་དུ་གཤེགས་པའི་ཚེ། །ཕུན་ཚོགས་སྲིད་ཞིའི་གདུགས་དཀར་ཁྱོད་ལ་གཏད། །ལྷག་པར་ཚངས་དང་ཁྱབ་འཇུག་གཙུག་ན་ཟླ། །རྣམ་གསུམ་གཅིག་ཏུ་བགྲོས་ནས་རྩོད་དུས་ཀྱི། །འཁོར་ལོས་སྒྱུར་པའི་རྒྱལ་པོར་མངའ་གསོལ་བས། །སེམས་མེད་ནོར་འཛིན་མ་ཡང་རྗེས་སུ་འབྲེང་། །གང་གི་གཟི་བརྗིད་འབར་བའི་མཁའ་ལྡིང་གིས། །གྲགས་པའི་མུ་ཁྱུད་མགྲིན་སྔོན་རྒྱན་གྱི་སྤྲུལ། །འཇིགས་ཏེ་བཤོལ་མེད་ཚོགས་བདག་གསང་བའི་རྣར། །ཞུགས་ཚེ་ལྷ་རྣམས་བཞད་གད་ཅིས་མི་སྒྲོག །ཀ་བ་མེད་པའི་གནམ་གྱི་སྒོ་ཕྱེ་ནས། །སྲབ་མེད་སེང་གེ་འཕྱོ་བའི་བརྟུལ་ཞུགས་ཅན། །དབང་ཕྱུག་འཁོར་ལོས་སྒྱུར་རྒྱལ་ཞབས་ཀྱི་རྡུལ། །སྤྱི་བོར་མི་འཛིན་སྲིད་གསུམ་འདི་ན་སུ། །འཇིག་རྟེན་འཇིག་པ་ཙམ་གྱི་དྲག་ཤུལ་དཔུང་། །ཡན་ལག་བཞི་ལྡན་མཚོན་ཆའི་(༨༧བ)
སྒྱུ་ཐབས་ཀྱི། །ཕྱེ་མར་བཏག་སྙམ་མཐོ་རིས་ཐེམ་སྐས་ལ། །འཛེགས་ཞེས་རིག་བྱེད་སྨྲ་འགའ་དར་དིར་གླེང་། །ཅུང་ཟད་བསྟེན་ཀྱང་འདོད་པའི་རེ་བ་ཀུན། །འབད་མེད་སྩོལ་ལ་གནས་པའི་དབང་ཕྱུག་དང་། །ཡོངས་འདུའི་ལྗོན་གཉིས་སོ་སོར་དབྱེ་བའི་སྒོ །བློ་ལྡན་ཕུར་བུས་དཔྱད་ཀྱང་རྟོགས་ནུས་མིན། །མི་བསྲུན་དགྲ་དཔུང་འདུལ་ལ་རྡོ་རྗེ་ཐོག །མངའ་འབངས་བྱམས་པས་སྐྱོང་ལ་འཇིག་རྟེན་དབང་། །སྲིད་ཞིའི་གཙུག་ལག་མཁྱེན་ལ་འཇམ་པའི་དབྱངས། །སྐྱེ་རྒུའི་བསོད་ནམས་དཔལ་དུ་དེང་འདིར་གྲུབ། །ལྷ་གཅིག་ལུང་གི་མཐུན་རྐྱེན་ཤིང་རྟ་ཡིས། །ཤར་ནུས་བཤུལ་རིང་ཀུན་གསལ་འགྲམ་པ་ལ། །ངོས་རྣམས་བདེ་བར་འགྲོད་ནས་དབུས་འགྱུར་འཆང་། །གྲུ་འཛིན་གཉིས་པའི་སྤོ་ལ་སླེབས་སྐབས་ཡིན། །གཏན་བདེའི་དོན་བཟང་སྒྲུབ་པ་དམ་པའི་ཆོས། །འདི་སྣང་ཕུན་ཚོགས་སྤེལ་བ་རྒྱལ་པོའི་ཁྲིམས། །ཟུང་འབྲེལ་མཛད་པ་རྒྱ་མཚོས་མཐའ་ཀླས་པའི། །འགྲོ་རྣམས་ཕན་བདེར་སྦྱོར་བའི་ཁུར་ཆེན་མཛོད། །སླར་ཡང་གསེར་ཞལ་ཛ་ཧུས་ལེགས་སྐྱུགས་པའི། །བཀའ་གནང་ཡན་ལག་བརྒྱད་ལྡན་དལ་འགྲོའི་ཀླུང་། །ཤར་ཕྱོགས་རྒྱ་མཚོའི་རྒྱལ་ཁབ་ཆེན་པོ་ནས། །སྨན་ལྗོངས་དག་པའི་ཞིང་དུ་ཚད་མེད་ཞུ། །རྟེན་འབྲེལ་སྐྱེས་སུ་འོས་པའི་མཎྡྷར། །རྣ་གོང་ཕོན་པོར་རྒྱན་དུ་དངར་བ་ཡི། །ལེགས་བྲིས་ལང་ཚོ་ལྡན་པའི་བྱ་མ་རྟ། །ཟུང་ལྡན་ཆུ་གཏེར་ཆེན་པོའི་ངོགས་སུ་སོང་། །གར་དབང་པད་རག་མདངས་འཛིན་འཆི་མེད་ལྷ། །རྨད་བྱུང་མཁྱེན་བརྩེ་ནུས་པའི་མཐུ་དཔུང་གིས། །དཔལ་ལྡན་ནོར་འཛིན་སྐྱོང་བའི་དབང་པོ་ཁྱོད། །སྐུ་ཚེ་མངའ་ཐང་ཆབ་སྲིད་རྒྱས་པར་སྨོན། མདོ་སྨད་ནས་སྐུ་འབུམ་ཆོས་རྗེ་དཔལ་ལྡན་རྒྱ་མཚོས། དྲི་བ་ལྷག་བསམ་རབ་དཀར་གྱི་དྲི་ལན་གསར་རྩོམ་དགོས་ཚུལ་གྱི་ལན་རི་བྱི་རྣ་རྒྱན།(༨༨ན)
ཨུ ཥྞི ཥྱ ཤ ནྡ ཙ བྷ ཝ སྱ བི ཙི ཏྲ ལ ཀྵྜཱི བཱ ཉྩ ཀྲ སྱ ཨ ནུ ར ཛྱ ཙ སཱ རིཾ བཱ། ནྱཱ སཱ ཀ རཱ མུ ཁ པ ལ ཎྜུ ཛི ན ཀྱ ས རྦཱ མཱུ ལ ཤྩ མེ སུ ཤུ བྷ ཡ ཙྪ ཙ མ ཉྫུ གྷོ ཥ། །དཔལ་(སྡེབ་སྦྱོར་དཔྱིད་ཀྱི་ཐིག་ལེ།)ལྡན་སྲིད་དང་ཞི་བའི་གཙུག་ཏོར་རྩེར། །འཁོར་ལོའི་རི་མོ་རྣམ་བཀྲའི་ཞབས་ཀྱི་རྡུལ། །འགོད་མཛད་རྒྱལ་བ་ཀུན་དངོས་བཙོང་ཁ་པ། །འཇམ་དབྱངས་བླ་མས་ཁྱོད་ལ་དགེ་ལེགས་སྩོལ། །ཚོགས་གཉིས་ཟླ་བའི་མ་མ་ལས་འཐོན་པ། །མཚན་དཔེའི་གཟུགས་སྐུའི་རྟ་བདུན་དབང་པོ་ཅན། །ངོ་མཚར་འགོད་པའི་འོད་ཟེར་འབུམ་འཕྲོ་བ། །གནས་དེ་ས་ལ་བརྟེན་པའི་འོག་མིན་ཞིང་། །གང་དེར་རྣམ་གསུམ་འཁོར་ལོའི་ཤིང་རྟ་ཆེ། །སྙིང་སྟོབས་གྱད་ཀྱིས་འདྲེན་པའི་བྱེད་པོ་ཡི། །འཕྲིན་ཡིག་སྙན་པའི་ཚིག་ལྡན་དུནྡུ་བྷི། །རིན་ཅེན་དོ་ཤལ་དབྱུ་གུས་བསྣུན་ཅིང་སོན། །མང་ཐོས་ས་བོན་ཡོངས་སུ་ལེགས་བཏབ་པ། །འཁྲུལ་མེད་བསམ་པའི་ཉལ་འགྲོས་བརླན་པ་ལས། །ཚུལ་བཞིན་སྒོམ་པའི་ལས་བཟང་གཡུར་ཟ་བའི། །གཏན་(༨༨བ)
བདེའི་རོ་བརྒྱའི་དཔལ་ལ་སྤྱོད་པ་མཚར། །འདི་ན་ཀུན་མཁྱེན་བློ་བཟང་གྲགས་པའི་བསྟན། །འཆད་རྩོད་རྩོམ་པས་འཛིན་རློམ་ཀློག་པ་མཁན། །ཟ་ཧོར་རིགས་ཀྱི་སྡོམ་བརྩོན་སྙོམ་ལས་པ། །འགྲོ་ལ་མི་དམན་ལྷག་བསམ་ལྡན་པར་མཆིས། །ཨེ་མ་ཐུབ་བསྟན་མ་ལ་ཡ་ཡི་ཚལ། །འཇམ་དཔལ་སྙིང་པོའི་རིང་ལུགས་ཙན་དན་ལྗོན། །དཔྱད་གསུམ་དག་པའི་དྲི་བསུང་རབ་སྤྲོས་པས། །མི་ཤེས་ཚ་གདུང་སེལ་བའི་བྱེད་པོ་མཚར། །ཀུན་གསལ་ཀ་ཤི་མཛེས་དགའི་བཞིན་རས་ལ། །རྒྱུ་སྐར་འཕྲེང་བའི་འདྲེན་བྱེད་རྣམ་བཀྲ་ཡང་། །ཉིན་དང་མཚན་མོར་མ་འདྲེས་འབྱེད་པ་ལ། །བཅུ་གཉིས་བདག་པོའི་དཀྱིལ་འཁོར་ལས་གཞན་སུ། །རང་གཞན་མཁས་གྲུབ་གྲུབ་མཐའི་ཞལ་གྱི་རྒྱུན། །དྲི་དང་བརྒལ་བརྟག་འབྲལ་བའི་གངྒཱའི་ཆབ། །མ་དག་རྙོག་མས་སྦགས་མིན་དྭངས་པའི་ཀླུང་། །འདི་གོ་སྐལ་བཟང་བཏུང་བའི་དཔྱིད་དུ་ངེས། །འཇམ་མགོན་བླ་མའི་གསུང་རབ་རྒྱ་མཚོ་ལྟར། །ཆེས་ཟབ་བདག་འདྲས་དཔོག་པར་ག་ལ་ནུས། །འོན་ཀྱང་རང་བློས་ཇི་ཙམ་གཞལ་ནུས་པ། །རིམ་གྱིས་བསྲིང་པའི་འདུན་པ་ཡིད་ལ་འགྲོགས། །དེ་སྐད་སྙན་ཚིག་མགྲིན་པར་ལེགས་སྒྱུར་བའི། །རྟེན་གྱི་རྒྱུད་མང་ཐོགས་པའི་བྱ་མ་རྟ། །མརྒད་ལྭ་བའི་གོས་ཅན་རྒྱལ་བའི་ལོའི། །དབྱངས་ཀྱི་རྒྱལ་མོ་ཨེ་ཡིག་ཤར་ཚེ་བྲིས། །དྭགས་པོ་ལྕང་ར་བ་མགོན་པོ་ཚེ་བརྟན་གྱི་འཕྲིན་ལན་འཇིགས་པ་མེད་པའི་དབྱངས།(༨༩ན)
བ རྱ སྱཱ མྲྀ ཏ ཙ ར སེ ཎཱ ཤྩ རྻཱ མ རྱ ཤྲཱི ད ཏྷཱ ཀཱ །མཱ ཏྲྀ ཛིཾ ཨཱ ཙི ནྟཱ ཙ ཀྲཱ ནུ ཏྟ ར སི དྡྷི ཡ ཙྪཱ ཙ། །རྨད་(ཛ་ཏིའི་སྡེབ་སྦྱོར་འཕགས་མ།)དུ་བྱུང་བའི་མཆོག་གི་བདུད་རྩིའི་རོས། །ངོ་མཚར་འཆི་བ་མེད་པའི་དཔལ་སྟེར་བ། །རྒྱལ་བ་ཀུན་དངོས་ཡིད་བཞིན་འཁོར་ལོ་ཡིས། །བླ་ན་མེད་པའི་དངོས་གྲུབ་སྩོལ་བར་མཛོད། །རྣམ་དཔྱོད་དར་བབ་མགྲིན་པའི་རྫིང་བུ་ནས། །ཉམས་འགྱུར་སྐད་སྙན་འཕྲིན་ཡིག་ངང་མོ་དཀར། །རྟེན་གྱི་གཤོག་རླབས་སྐྱོད་བཞིན་གཡས་རུའི་ལྗོངས། །བསམས་དོན་ལྷུན་གྱིས་གྲུབ་པའི་རྩེ་མོར་སོན། །དེང་དུས་བསོད་ནམས་ཉི་འོད་ཀྱིས་སྨིན་པའི། །ཕུན་ཚོགས་ཉེར་ལེན་པདྨ་དཀར་པོའི་ཚལ། །ལུགས་ཟུང་ཟེའུ་འབྲུ་གཡུར་དུ་ཟ་བ་ནས། །ཕན་བདེའི་འདབ་སྟོང་འཛུམ་པ་སྤྲོ་བ་འཕེལ། །འདི་ན་ཟ་ཧོར་རིགས་ཀྱི་སྐད་གཉིས་པ། །མི་བཟད་དུས་ཀྱི་ཞགས་པས་མ་བཅིངས་ཤིང་། །མཁན་ཆེན་དམ་པའི་སྤྱན་སྔར་ཉེར་ལྷགས་ཏེ། །ཉང་(༨༩བ)
ཞབས་ས་ཡི་མདུད་དུ་སླེབ་སྐབས་ཡིན། །དབུས་འགྱུར་སྨན་ལྗོངས་ས་ཡི་ཐིག་ལེ་རུ། །མྱུར་དུ་འོང་བའི་མདུན་པ་མི་དམན་ཡང་། །མཁས་གྲུབ་དམ་པའི་བསྟི་གནས་མང་པོ་ཞིག །མིག་གི་བདུད་རྩིར་སྤྱོད་འདོད་བྱེད་པོས་འགྱངས། །འཇམ་མགོན་ཐུགས་རྗེ་ཆེན་པོ་སྒྱུ་འཕྲུལ་གར། །བློ་བཟང་གྲགས་སྙན་འབར་བའི་བསྟན་པ་ལ། །མི་ཕྱེད་དད་པར་ལྡན་པའི་མི་ཡི་བདག །ཚེ་དབང་རབ་ཏུ་བརྟན་པའི་རྣམ་དཔྱོད་ཅན། །སྲིད་དང་ཞི་བའི་མེ་ལོང་དྭངས་པའི་ངོས། །བླང་དོར་གཟུགས་བརྙན་འབུམ་ཕྲག་ཤར་བ་རྣམས། །མ་འདྲེས་སོ་སོར་ལྟ་བའི་མིག་གི་དཀྱུས། །རིང་པོའི་ཕ་མཐའ་ཚངས་པས་གཞལ་ནུས་མིན། །ཨེ་རཎྜ་ལྟར་འཁོར་བའི་ཕུན་ཚོགས་ལ། །ཇི་ཙམ་ལོངས་སུ་སྤྱད་པའི་སྙིང་པོའི་འབྲས། །རྒྱལ་ཀུན་མཁྱེན་པའི་སྲང་ལ་མ་བཅལ་ཀྱང་། །འཁྲུལ་བའི་འགྲོ་རྣམས་རེ་བ་ཡ་མ་བརླ། །འཁོར་བ་ཉེས་བརྒྱའི་ཞགས་པ་གཅོད་པའི་མཚོན། །སྣ་ཚོགས་ཐེག་པའི་འཇུག་སྒོ་མང་བའི་ཕྱིར། །འདོད་ཡོན་ལམ་དུ་བྱེད་པ་ངེས་གསང་ཆོས། །ལྟས་ངན་གཡང་དུ་ལེན་དེ་ངོ་མཚར་རྨད། །སྲིད་ལས་ངེས་པར་འབྱུང་བ་གཙང་མའི་ཁྲིམས། །བདག་གཞན་བརྗེ་ནུས་རྒྱལ་སྲས་རླབས་ཆེན་སྤྱོད། །ཚེ་འདིར་གྲོལ་ལམ་ཐེག་པའི་སྙིང་པོ་མཆོག །ཆུང་འབྲིང་ཆེན་པོས་ཉེ་བར་སྤྱོད་པའི་ཡུལ། །ཆུ་འཛིན་ལང་ལོང་གཡོ་བའི་ཕང་པ་ནས། །དབྱར་རྔ་དལ་གྱིས་སྒྲོག་པའི་སྒྲ་སྙན་པོས། །རྨ་བྱའི་སྒྲོ་གཤོག་ཟླུམ་པོར་སྒྱུར་བྱེད་ཀྱང་། །འདབ་ཆགས་ཀུན་གྱི་དགའ་སྟོན་སྤེལ་ནུས་མིན། །ཕ་མེས་རྒྱུད་ཀྱིས་ཉེར་བཟུང་ཆོས་སྲིད་ཀྱི། །མ་ཉམས་ཆོ་ག་བསྟར་བས་དུས་ཀུན་དུ། །དགེ་བའི་འབྲས་བུ་ཐོབ་པས་སྔོན་རབས་ཀྱི། །དེབ་ཐེར་ཆོས་འབྱུང་རྣམས་ལ་ངེས་རྙེད་མཛོད། །སྙན་ཚིག་གཡས་འཁྱིལ་འཕྲིན་ཡིག་རབ་དཀར་དུང་། །བདོག་པའི་རྟེན་གྱི་དར་དཔྱངས་(༩༠ན)
གཡོ་བ་ཅན། །ནམ་ཡང་འཇིག་པ་མེད་པའི་དབྱངས་ཀྱི་སྒྲ །གང་གི་རྣ་བའི་བཅུད་ཀྱི་དཔལ་དུ་བསྒྲགས། །མདོ་སྨད་ནས་རྒྱ་ཡགས་འགའ་ཞིང་རབ་འབྱམས་པ་གྲགས་པ་རྒྱལ་མཚན་གྱི་འཕྲིན་ལན་ཞི་བདེའི་གཉིད་ལས་སློང་པའི་རྔ་ཆེན། སྡེབ་སྦྱོར་དཔྱིད་ཀྱི་ཐིག་ལེ། ཛཱ སྱཱ ས ཧ སྲ ཧ ར ད ཤྩ སུ ཀྲྀ ཏྱ ནཱ བྷེ ཝ དྨཱ ཤྭ ཀེ ས ར ཧ སི ཏྱ ཙ ཏུ རྨུ ཁྱ ཤྩ། །རྒྷཱཡཏཱ ངྒི ཏ ན ཡ ནྱ ཤ རཱི ཙ བཱི ཎཱ ནཱཾ ཤ པྡ དྷ རྨྨ ས ར གཱི ཏི ཙ མ ནྱ ཧ རྱ། །བསོད་(སྡེབ་སྦྱོར་དཔྱིད་ཀྱི་ཐིག་ལེ།)ནམས་ཉི་མ་སྟོང་འབར་སྐྱེ་རྒུའི་བདག །ལྟེ་བའི་འདབ་སྟོང་བཞད་པའི་གེ་སར་རྩེར། །ཡིད་འཕྲོག་དཀྱུས་རིང་མིག་གི་ཟུར་མདའ་ཅན། །རྒྱུད་མང་སྒྲ་ལས་ཆོས་ཀྱི་གླུ་དབྱངས་མ། །ཨེ་མ་དཔལ་གྱི་རི་མོ་གསུམ་པའི་ལམ། །ཉམས་འགྱུར་སྟོང་གི་སྙན་ཚིག་གཡས་འཁྱིལ་བས། །མི་ཟད་སྨྲ་བའི་བང་མཛོད་རྗེས་འགྲོ་མཁན། །འཕྲིན་ཡིག་རྟེན་གྱི་བདོག་པ་སུག་པར་སྨིན། །དཀར་མིན་ལས་རྣམས་བདར་བའི་བཅུ་གཉིས་ཆར། །ལེགས་བྱས་དཀྱིལ་འཁོར་(༩༠བ)
རྫོགས་པའི་ཚ་ཟེར་ཅན། །མི་རྟག་སྒྱུ་མའི་ཆུ་འཛིན་རྒྱང་བསྲིངས་ཏེ། །བདེ་སྐྱིད་པད་དཀར་འཛུམ་པའི་གཏམ་དེ་སྙན། །འདི་ན་སྡོམ་བརྩོན་གནས་ལྔར་མོས་བློ་ཅན། །གཙུག་ལག་རྒྱ་མཚོར་དཔྱོད་བཟོད་ཀློག་པ་མཁན། །དགེ་བཅུའི་ཡོན་ཏན་ཀུན་ཚང་སྨན་གྱི་ལྗོངས། །གངས་ཅན་ས་ཡི་ཐིག་ལེར་བདེ་བར་སླེབ། །གཞན་ཕན་མིང་གི་ཆུས་བཀྲུས་བཞིན་རས་ཅན། །ཚུལ་འཆོས་མིག་ཟུར་གཡོ་བའི་བློ་བྲིད་མ། །འདྲེན་པར་རློམ་པ་ཀུན་གྱི་ལུགས་སྲོལ་འདིས། །དལ་བའི་རྟེན་བཟང་གཡེང་བའི་ཁོལ་པོར་མཛད། །རབ་ཡངས་རྣམ་དཔྱོད་ཤེས་བྱ་འབྱམས་ཀླས་པའི། །དོན་ལྡན་སྙན་གྲགས་མགྲིན་པའི་རྟ་ལྗང་ཅན། །ལེགས་བཤད་འོ་མཚོར་འཇུག་པའི་ངང་མོ་དཀར། །རྒྱལ་གསུང་ཐོས་བསམ་རྐང་གདུབ་མཚོན་གྱིས་སྤུད། །སྙིང་མེད་འཁོར་བའི་ངང་ཚུལ་ཨེ་རཎྜ། །ཕུན་ཚོགས་དཔལ་གྱི་བདག་པོ་ཡ་མ་བརླར། །མཐོང་སྟེ་དབེན་གནས་ལོ་མའི་སྤྱིལ་བུ་རུ། །དྲང་སྲོང་བསམ་གཏན་པ་ཡི་ཚུལ་དེ་མཚར། །རིང་གོམས་དུག་གསུམ་དར་བ་ཚ་བའི་ནད། །ཏིང་འཛིན་ཀསྤུ་ར་ཡིས་དྲུངས་ཕྱུང་ཚེ། །བས་མཐར་ཆུ་ཀླུང་བུ་མོ་ངོ་མཚར་ནས། །ལྷུང་ལྷུང་སྙན་པའི་གླུ་དབྱངས་སྒྱུར་ལ་བྲེལ། །ཤར་རིའི་རྩེ་ནས་ཉི་མ་འབུམ་ཤར་ཡང་། །མུན་སེལ་སྣང་བའི་ཆོ་ག་སྒྲུབ་མཚུངས་ལྟར། །གྲངས་མེད་ཐེག་པའི་འཇུག་སྒོ་མཐའ་ཀླས་པ། །ཀུན་མཁྱེན་ཡེ་ཤེས་འཐོབ་པའི་ཐབས་སུ་ངེས། །དེ་ཕྱིར་གྲངས་རིང་གིས་བསྐལ་སངས་རྒྱས་ལམ། །ངེས་གསང་གོམ་པ་གཅིག་གིས་བགྲོད་ནུས་པ། །བླ་མེད་ཐེག་མཆོག་ཡོངས་འདུ་ས་བརྟོལ་དེས། །གཏན་བདེའི་འབྲས་བཟང་གཡུར་དུ་ཟ་བར་ངེས། །སོས་ཀྱི་ཆུ་འཛིན་ལང་ལོང་གཡོ་བའི་དབུས། །དབྱར་རྔ་དལ་གྱིས་དགོད་པའི་སྒྲ་སྙན་པོས། །རྨ་བྱ་སྒྲོ་གཤོག་ཟླུམ་པོར་གར་བྱེད་ཀྱང་། །རྡོ་རྗེའི་སྣ་ལྡན་ཡིད་ལ་དགའ་བ་ཅི། །སྙན་ཚིག་རྒྱན་གྱིས་སྤུད་པའི་མེ་ན་ཀ ། རྟེན་གྱི་རྒྱུད་མང་སྙེམ་པར་ཐོགས་(༩༡ན)
བྱས་ཏེ། །ཤིང་གི་མ་མའི་དོ་རར་གར་སྒྱུར་པའི། །འདྲེན་བྱེད་གཟིགས་མོར་འདི་ན་ཚར་དུ་དངར། །གསུམ་ལྡན་འབྱུང་བའི་ཅང་ཤེས་མརྒད་ཀྱི། །མདངས་འཛིན་གོས་ཀྱིས་ཀླུབས་པའི་བགྲང་བྱ་ཞེས། །ཀུན་དགའ་འཛུམ་ཞལ་ངོམ་པ་རྒྱལ་བ་ཡི། །རྟ་ལྗང་ལུས་ཕྲའི་ཁྱིམ་དུ་སྤྱོད་ཚེ་བྲིས། །དྭགས་ལ་སྒམ་པོའི་སྤྲུལ་པའི་སྐུ་བློ་བཟང་འཕྲིན་ལས་རྣམ་རྒྱལ་ངེས་དོན་གྲུབ་པའི་ཤིང་རྟ་མཆོག་གི་སྡེ་བརྟན་བཞུགས་ཀྱི་ཚིགས་བཅད་རྟེན་འབྱུང་དང་བཅས་པའི་ཆབ་ཤོག་ལན་མཆོག་སྤྲུལ་ཟླ་སྣང་གསལ་བའི་རྫིང་བུ། ཛྙཱ ནཱ མ ཧཱ སུ ཁ ཙ ནི རྟི བི མ ལྱ ཙ ནྡྲ རཱུ བཻ རྒ མཱ ར བ ར ནི རྨྨ ཨ ཝཱ ཏ ར དྱཱ། མཱལེཪྶདྷོདཡསམུ དྲ ཙ ཤཱ ས ན སྱཱ སཾ ཁྱ ཛ ག སྱ ཨུ བ ཛཱི ཝ ཀ ས ཙྩ ཏ སྨི ན། །ཟུང་(སྡེབ་སྦྱོར་དཔྱིད་ཀྱི་ཐིག་ལེ།)འཇུག་བདེ་བ་ཆེན་པོའི་ཡེ་ཤེས་གར། །མཆོག་སྤྲུལ་དྲི་མེད་ཟླ་སྣང་གཞོན་ནུའི་གཟུགས། །སྒྲུབ་རྒྱུད་བསྟན་པའི་རྒྱ་མཚོར་ལེགས་ཤར་བ། །གྲངས་མེད་འགྲོ་བའི་ཉེར་འཚོ་དམ་པ་དེར། །(༩༡བ)
ཆབ་ཤོག་བཻ་ཌཱུར་ཞུན་མའི་ཟ་མ་ཏོག །བདེན་པའི་ཚིག་གི་བདུད་རྩི་རབ་འཁྱིལ་བ། །ཚན་གྲངས་འགྱུར་བ་མེད་པའི་རྡོ་རྗེའི་སྟེགས། །ཉམས་མེད་སུག་པར་སྨིན་པས་མཆོག་ཏུ་དག །སྐུ་གསུམ་མི་ཟད་འཁོར་ལོའི་བང་མཛོད་ནས། །མཚན་བཟང་ལང་ཚོ་དར་བའི་ཡིད་བཞིན་ནོར། །རྙོག་བྲལ་ཆོས་ཀྱི་འདོད་རྒུའི་ཆར་ཆེན་པོས། །སྲིད་ཞིའི་དབུལ་བ་སེལ་བའི་གཏམ་འདི་སྙན། །བློ་ཆེན་ཚངས་སོགས་ཀུན་གྱི་གཙུག་གི་རྒྱན། །སྐལ་བཟང་འདྲེན་པ་བཞི་པའི་འཕྲིན་ལས་པར། །ལུང་བསྟན་ཟིལ་དངར་འཐུལ་བའི་སྒམ་པོ་པ། །ཟླ་འོད་གཞོན་ནུའི་གྲགས་པ་རྣ་བའི་རྒྱན། །རྣམ་པར་རྒྱལ་བའི་འཆི་མེད་ཁང་བཟང་དུ། །གནས་ལུགས་ངེས་པའི་དོན་གྱི་མིག་སྟོང་ཅན། །ཆོས་ཀུན་ཕྱག་རྒྱ་གཅིག་ཏུ་ཡོངས་གྲུབ་པའི། །ལག་ཉལ་བདག་འཛིན་བགྲོད་པའི་གཉེན་པོར་གདེངས། །རྒྱ་ཆེན་ཤེས་བྱར་འབྱམས་སུ་ཀླས་པ་ཀུན། །གཅིག་ཏུ་གྲོལ་བའི་རིན་ཅེན་ཕུང་པོ་ཡི། ཁུར་ལྡན་ཤིང་རྟ་འདྲེན་པའི་མཆོག་གི་སྡེ། །རྒྱལ་ཀུན་ཐུགས་རྗེའི་སྒྱུ་དྲར་ངེས་མིན་ནམ། །བཀའ་གདམས་རིང་ལུགས་ཉལ་འགྲོ་འཁྱིལ་བའི་མཚོར། །དྭགས་རྒྱུད་པད་དཀར་ཟེའུ་འབྲུས་ཉེར་སྤུད་པ། །སྔ་འགྱུར་རྫོགས་ཆེན་ཆོས་ཀྱི་ཉི་འོད་ཀྱིས། །སྨིན་པས་སྐལ་བཟང་བུང་བའི་མགྲིན་དབྱངས་སྙན། །འདི་ན་ཟ་ཧོར་རིགས་ཀྱི་ལྡོམ་བུ་པ། །གནས་ལྔ་རིག་པའི་ཀུན་གསལ་འཇལ་བྱེད་པའི། །བློ་གྲོས་རྟ་བདུན་དཀྱིལ་འཁོར་རབ་གསལ་ཡང་། །རྣམ་གཡེང་རླུང་གིས་བསྐྱོད་པས་དལ་མེད་བྲེལ། །ལས་ཉོན་ཐགས་སུ་བཏགས་པའི་ཟ་འོག་གོས། །བདེ་སྡུག་ཁ་དོག་རི་མོ་རྣམ་བཀྲ་ཡང་། །གང་གིས་བདེན་ཚིག་མཛད་པའི་བརྗོད་དོན་ལྟར། །བསྐལ་བརྒྱར་གཡོ་མེད་འདུན་པའི་རྟེན་འབྲེལ་བསྒྲིག །རྨད་བྱུང་ལེགས་པར་བཤད་པའི་གསུང་མཆིད་རྒྱུན། །རྣམ་དཔྱོད་སྐལ་ལྡན་ཤིང་རྟས་ཉེར་དྲངས་པ། །མཉེས་གཤིན་བསྐྱུད་པས་(༩༢ན)
བྲལ་བའི་པད་དཀར་མིག །དགའ་སྟོན་ཞབས་བསིལ་ཚད་མེད་སྒྲེང་བ་དང་། །གཟུགས་སྐུའི་སྣང་བ་རབ་གསལ་ཆུ་ཤེལ་དབང་། །མ་དག་ལྔ་བརྒྱའི་ཉེས་མུན་འཇོམས་པ་དང་། །ཐུབ་བསྟན་ས་མོས་བཞད་པའི་གཉེན་གཅིག་པུར། །རྡོ་རྗེའི་ཁྲི་ལ་འགྱུར་མེད་རྟག་བཞུགས་གསོལ། །འཇམ་གཉེན་པཉྫ་ལི་ཀའི་སྟོད་གཡོགས་ཅན། །ཉམས་འགྱུར་གླུ་དབྱངས་ལེན་པའི་ལུས་ཕྲ་མ། །སྨན་ལྗོངས་གསེར་ལྡན་སྟེགས་ལས་རབ་འཕགས་ཏེ། །དབང་ཕྱོགས་འཛིན་མའི་ཚལ་དེར་ཟློས་གར་སྒྱུར། །རབ་འབྱམས་སྨྲ་བ་དོན་ཡོད་རྒྱལ་མཚན་མདོ་སྨད་བྱ་ཁྱུང་བྲག་གི་གདན་སར་འབྱོར་པའི་རྒྱུ་མཚན་དང་བཅས་པའི་འཕྲིན་ལན་ང་ལས་ནུའི་ཟློས་གར། ཨ ཥྭ ཊ ཤྲི བཱ སཱ གར ཛཱ ཏ ས རྦྦེ ཥཱཾ ལོ ཀ དྷཱ ཏཱ ད ཤ ནཻ སྶི ཏཱ ཙ། །ཥ ཌྜཱ ཏ གཱི ཏྱཱ ཥ ཤྲྀ ཎུ པྲི ཡོ ྅ པཱུ རྦྦཱ ལི ངྒ ཀ ཎྛེ ཙ མ ཧཱ བི ཥ ཏྱ། །(༩༢བ)
འཇིག་(སྡེབ་སྦྱོར་དབང་པོ་རྡོ་རྗེ།)རྟེན་བྱེད་པོ་རྣ་བ་བརྒྱད་པ་ཡི། །ཚེམས་དཀར་ཟླ་བའི་མ་མ་ལས་འཁྲུངས་པ། །སྔོན་མེད་བསིལ་སྦྱིན་མཁན་པོ་དབྱངས་ཅན་མ། །མགྲིན་པར་འཁྱུད་པའི་དྲུག་སྐྱེས་གླུ་འདི་ཉོན། །གཞུང་ལུགས་མང་པོ་རབ་ཏུ་འབྱམས་ཀླས་པའི། །གྲགས་སྙན་མལླི་ཀ་ཡི་ཐོད་བཅིངས་ཅན། །ཐོས་བསམ་རི་སྲས་ལྷ་མོས་གཏན་འདུན་གྱི། ཁྱུ་མཆོག་རྒྱལ་མཚན་འགུགས་མཁས་དེ་ལ་སྤྲིངས། །ཐུབ་དབང་ཆོས་ཀྱི་རྒྱལ་སྲིད་ཡངས་པའི་ཁྲིར། །རྣམ་འདྲེན་མ་ལུས་མགྲིན་གཅིག་བླངས་པའི་དབྱངས། །ཕུན་ཚོགས་ཤིས་པའི་ཚིག་གིས་མངའ་གསོལ་བ། །ཚད་མའི་སྟོན་པ་ཀུན་མཁྱེན་བཙོང་ཁ་པ། །མགོན་དེ་ཚུར་མཐོང་བྱིས་བློའི་སྣང་བའི་ངོར། །ཡོངས་སུ་འཛིན་པའི་ནོར་བུའི་ཅོད་པན་མཆོག །དོན་ཀུན་གྲུབ་པའི་རིན་ཅེན་ཁྲིར་འཁོད་ནས། །མགྲིན་པའི་རྒྱུད་མང་འཁྲོལ་བ་རྣ་བར་སོན། །ཚོགས་དྲུག་དབུ་བའི་རིན་ཅེན་དོ་ཤལ་ཅན། །དར་བབ་ལང་ཚོའི་ཆུ་ཀླུང་སྨིན་ལེགས་མ། །དུས་ཀྱི་རྒྱ་མཚོའི་ཀློང་དུ་མ་སླེབ་ཅིང་། །དགེ་བའི་ལྷུང་ལྷུང་སྒྲོག་པའི་གླུ་དེ་སྙན། །བག་མེད་སྟེའུ་ལག་ཏུ་ཐོགས་པའི་སྲོག །གཅོད་བྱེད་གཉེན་པོའི་དུག་སྦྲུལ་གྱིས་འཁྲིལ་བར། །མངར་བའི་དྲི་བསུང་ལྡན་པའི་སོ་སོ་ཐར། །མ་ལ་ཡ་ཡི་ཚལ་དུ་བདེར་གནས་སམ། །མི་བསྲུན་དགྲར་ཡང་མཉེས་གཤིན་བུར་ལྟ་བའི། །བསྙན་སྲིང་མི་མངའ་ཀུན་ལ་རང་གི་བདེ། །གཏོང་བའི་སྙིང་སྟོབས་ཆ་ཤས་ཡོངས་རྫོགས་པ། །སྨོན་འཇུག་སེམས་ཀྱི་ཟླ་བ་ཤར་རམ་ཅི། །ཉོན་མོངས་དུག་ལྔའི་སྲིན་བུའི་ཁ་ཆུ་ཡི། །བདེ་ཆེན་སྲད་བུ་ཐགས་སུ་བཏགས་པའི་གོས། །སྟོང་ཉིད་ཚོན་(༩༣ན)
གྱིས་བསྒྱུར་བའི་ཟ་འོག་ཅན། །ལྔ་ལྡན་ཡེ་ཤེས་ཁ་དོག་བཀྲར་མཐོང་ངམ། །རྣམ་འདྲེན་ཚངས་གསུང་པི་ཝང་གཅིག་གི་སྒྲར། ཁམས་དང་དབང་པོར་འཚམ་པའི་ཕྲ་སྦོམ་གདངས། །སོ་སོར་སྣང་ཡང་སངས་རྒྱས་འཐོབ་པ་ཡི། །ཐབས་ཀྱི་ཉམས་དང་འགྱུར་བར་གོའམ་ཅི། །འདི་སྣང་ཨེ་རཎྜ་ཡི་འབྲས་སྨིན་པས། །གཏན་བདེའི་ལྗོན་ཤིང་ཉམས་པའི་ཁྱོག་སྐམ་ཅན། །ཉོན་མོངས་བྱིན་ཟའི་ཕུང་པོ་འབར་བའི་འོད། །གནས་ངན་གྲོང་ཁྱེར་སྟོན་པའི་གསལ་མེ་བཞིན། །སྲིད་འབྱོར་ལ་ཞེན་དུག་གིས་ཉེར་སྦགས་པའི། །རྣམ་དཀར་དགེ་ཚོགས་རོ་བརྒྱ་ལྡན་པའི་བཅུད། །ཐར་སྲོག་ལ་གཅེས་དཔྱོད་ལྡན་གྱིས་ཟ་བའི། །གོ་སྐབས་ཀུན་མཁྱེན་ཚད་མས་གཞལ་ནུས་སུ། །དེ་ཕྱིར་བསྐལ་པ་སྟོང་དུ་རྙེད་དཀའ་བ། །འཇམ་མགོན་བློ་བཟང་གྲགས་པའི་བསྟན་པ་ལ། །ལེགས་ཞུགས་ཐོས་བསམ་སྒོམ་པའི་སྐལ་བཟང་ཁྱོད། །མ་ནོར་སྙིང་པོའི་ཉམས་ལེན་གནད་དུ་གཅེས། །འཚམས་སྤྲིན་རྒྱ་ལས་གྲོལ་མིན་བླང་དོར་གྱི། །གཟུགས་བརྙན་གསལ་བར་སྟོན་པའི་ཉིན་མོར་བྱེད། །བདོག་པའི་འོད་ཟེར་འཕྲོ་བ་པཎྜེ་པའི། །སྙིམ་པའི་ལྷ་ཡི་ལམ་དུ་ཡུད་ཀྱིས་སོང་། །
རབ་བྱུང་བཅུ་གཅིག་པའི་ཤིང་ལུག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་ལུག་ལོར་བྲིས་པའི་ཆབ་ཤོག་འཕྲིན་ཡིག་ཁག །ཤིང་ལུག་ལོར་གོང་མས་གསེར་ཡིག་པ་ཏཱ་དབེན་མཉྫུ་ཤྲཱི། ཏཱ་དབེན་ནོར་བུ་རྒྱ་མཚོ། ཚུལ་ཁྲིམས་ཁཱ་རྣམས་གནང་སྦྱིན་བཀའ་ཤོག་སྐྱེལ་བར་འོང་བ་ལོག་པ་དང་ལྷན་ཅིག་པར་ཟུང་ཇུ་རབ་འབྱམས་པ་དངོས་གྲུབ་ཡོན་ཏན་དང་འཕྱོང་རྒྱས་ལྐོག་གྲོང་པ་མི་སྣར་བཏང་བའི་དུས་ཕུལ་བའི་ཞུ་ཡིག་བསོད་ནམས་ཉི་མ་སྟོང་འབར། (༩༣བ)
པ ཏྱ ཡུ གྱཱཾ ཤུ བྷོ ཛ ནྱ ན ནྡཽ ད ཡ རྱ པུ ཎྱཱ ས ཧ ཛཱ ལཱ ཧོ ར བི། །བཱ ད མཱུ ལེ མྲྀ དོ རྒྷོ ཥ ར ཛྱོ ད ཡཱ ཙ ཀྲ བ རྟེ༔ སུ རཱ དེ བ ཀ རྨྨཻ ཪྻུ ག །ཨེ་(མེ་ཏོག་འཕྲེང་འཛིན་གྱི་སྡེབ་སྦྱོར།)མ་བསོད་ནམས་ཉི་མ་སྟོང་འབར་བས། །རྫོགས་ལྡན་སྣང་བའི་དགའ་སྟོན་དར་མཛད་པ། །རྩོད་དུས་འཁོར་ལོས་སྒྱུར་བའི་ལྷ་ཡི་ལྷ། །འཇམ་དབྱངས་གོང་མ་རྒྱལ་པོའི་ཞབས་དྲུང་དུ། །ས་དབང་ལུང་གིས་ནུབ་ཕྱོགས་གནམ་འོག་གི །འགྲོ་ཀུན་ལུགས་གཉིས་བསྟན་པ་གཅིག་གྱུར་པའི། །བདག་པོར་དབང་བསྐུར་དེའི་ཆི་ཀྱིང་གང་གིས། །འཇིགས་མེད་གདོང་ལྔའི་རྒྱུད་ཀྱི་ང་རོས་ཞུ། །གསེར་ཞལ་བདུད་རྩིའི་ཐིགས་པའི་གཟེགས་མ་ཅན། །ཐུན་འཚམས་ཕྱག་རྒྱའི་སྟེགས་ལས་མངོན་འཕགས་པའི། །བཀའ་ཤོག་དར་བའི་རིན་ཅེན་སྐྱེས་བཟང་བཅས། །ཉམས་མེད་སོན་པའི་སྨན་ཡོན་ཡིད་ལ་འབྲོངས། །དེང་དུས་གསང་གསུམ་རྡོ་རྗེའི་རང་བཞིན་ལྟར། །གཡོ་མེད་ཉེས་པའི་དྲི་མ་རྒྱང་བསྲིངས་ཏེ། །ལྷར་བཅས་(༩༤ན)
སྐྱེ་རྒུའི་གཙུག་ན་མཐོ་བའི་ཁྲིར། །ཞབས་རྡུལ་བཀོད་པའི་གཏམ་དེ་རྣ་བར་འཇེབས། །འདི་ན་ཆོས་ནོར་འདོད་པ་ཐར་པའི་སྡེའི། །གཙུག་ལག་ལུགས་བརྒྱའི་སྒོ་འཕར་རབ་ཕྱེ་ནས། །རྒྱ་ཆེན་ཕུན་ཚོགས་དཔལ་འབྱོར་མཐའ་ཀླས་པར། །སྤྱོད་པའི་སྐལ་བ་བཟང་པོར་གྱུར་སྐབས་ལགས། །བགྲང་ཡས་དཔག་ཚད་ཀྱིས་ཆོད་བསིལ་ཟེར་གྱིས། །སྐད་ཅིག་ཀུཎྡའི་འདབ་མ་བཞད་པ་ལྟར། །རྒྱ་བོད་ས་ཡིས་རིང་དུ་བསྐལ་གྱུར་ཀྱང་། ཁྱོད་ཀྱི་སྙན་གྲགས་དྲུང་ནས་འཁོར་བཞིན་ཐོས། །ལྟ་བར་མི་བཟོད་གཟི་བརྗིད་རྟ་ལྗང་ཅན། །མཛེས་ཤིང་ལྷུན་ཆགས་ལྷ་དབང་བརྒྱ་བྱིན་དཔལ། །སྲིད་ཞིའི་བྱེད་པོར་ཚངས་པའི་སྒྱུ་འཕྲུལ་གར། །དེང་དུས་འཇམ་དབྱངས་གོང་མའི་མཚན་གྱི་སྙན། །དབྱིག་འཛིན་མངལ་དུ་སྟོབས་འབྱོར་ཕུན་ཚོགས་པའི། །ཉི་འོག་རྒྱལ་པོའི་སྙེམས་ལྡན་ཆེས་མང་ཡང་། །གནམ་གྱི་མཐོངས་ནས་འཇིག་རྟེན་མེས་པོ་ཡིས། །འཛམ་གླིང་བདག་པོར་བསྐོས་པ་ཁྱོད་ཉིད་ཙམ། །མི་བསྲུན་དུག་གི་དད་ལྡན་ལྕེ་གཉིས་འཕྲུལ། །རྦ་རླབས་ནམ་མཁར་འཕྱོ་རྣམས་བཀའ་ཁྲིམས་ཀྱིས། །ནད་སེལ་སྨན་གྱི་ཆུ་བོར་སྒྱུར་བྱེད་ན། །དྲང་སྲོང་ཨ་གསྟ་ལ་ངོ་མཚར་ཅི། །ལུས་ཅན་ཡོངས་ཀྱི་བདེ་སྡུག་བར་མའི་གྲུ། །བྱིང་འདེགས་ལས་ཀྱི་དལ་འགྲོའི་ཀླུང་ཆེན་ནང་། །དགའ་སྐྱོའི་ཆུ་གཉེར་ཤུགས་རིང་སྙན་པའི་གླུས། །བསྐལ་པར་བགྲངས་ཀྱང་འཛད་པའི་ཕ་མཐའ་མེད། །ཉི་མའི་འོད་ཀྱིས་སྣང་མུན་འབྱེད་པ་བཞིན། །སྐྱེ་རྒུའི་བདེ་སྐྱིད་ཁྱོད་ལ་རག་ལས་ཕྱིར། །བྱམས་ལྡན་སྤྱན་གྱིས་འཇིག་རྟེན་ཀུན་བརྩེ་ཞིང་། །མཁྱེན་དཔྱོད་མཛད་པའི་ཕྱག་གིས་དབུགས་དབྱུང་གསོལ། །སྣ་ཚོགས་གྲུབ་མཐའི་ལྟ་བར་མཐའ་ཀླས་ཀྱང་། །གཏན་བདེའི་ཡིད་བཞིན་ནོར་བུའི་འབྱུང་(༩༤བ)
ཁུངས་ཅན། །ཐུབ་པའི་རིང་ལུགས་ཟླ་བའི་མ་མ་ལ། །སྲིད་ཞུ་གཟུགས་ཅན་སྙིང་པོའི་སྤུན་ཟླ་མཛོད། །སྣ་མང་ཐེག་པའི་རིན་ཅེན་ཐེམ་སྐས་ལས། །འགྲོ་རྣམས་སྐུ་གསུམ་ཁང་པར་འཁྲིད་བྱེད་པ། །རྒྱལ་ཀུན་ངོ་བོ་རྗེ་བཙུན་བཙོང་ཁ་པའི། །བསྟན་ལ་སྔོན་བཞིན་དད་དང་རི་མོར་མཛོད། །ཀུན་ལ་སྙོམས་པའི་བཀའ་ཁྲིམས་དཔལ་བེའུ། །སྙིང་གར་རི་མོའི་སྣང་བརྙན་ལེགས་བཀྲ་ཡང་། །ལོག་སྤྱོད་གསེར་ཅན་གསོད་ལ་དཔའ་བ་ཡི། །འཕྲོག་བྱེད་སྡེར་མོའི་རྣོ་ངར་ལྡན་པར་མཛོད། །གཅམ་བུས་ཁ་དོག་བསྒྱུར་བའི་ཆུ་གཙང་དང་། །སྙིང་ནས་གུས་པའི་རབ་དཀར་འོ་མའི་བཅུད། །མ་འདྲེས་འབྱེད་པའི་མཁྱེན་ཡངས་ངང་པའི་མཆུས། །ས་བོན་སོ་སོར་བཏབ་པའི་འབྲས་སྨིན་མཛོད། །སྙན་ཚིག་རིན་ཅེན་ཕྲ་ཚོམ་གདུ་བུ་ཅན། །ལུགས་ཟུང་དོན་ལྡན་མཉེན་ལྕུག་སོར་མོ་ཡིས། །ལྷ་གཅིག་ཐུགས་ཀྱི་རྒྱུད་མང་བསྣུན་བྱེད་ན། །བླང་དོར་སྒྱུ་དྲའི་ཟློས་གར་ཅིས་མ་སྟོན། །མཆོག་དམན་འདྲེན་བྱེད་ཡུལ་དུ་མི་བདག་གི །གཟུགས་སུ་ཤར་བའི་སྒྲ་འཛིན་དུ་ཀཱུ་ལ། །མ་དག་དྲི་མའི་ཚོགས་རྣམས་འཁྲུད་བྱེད་པའི། །ལེགས་བཤད་ཆུ་རྒྱུན་སྦྲེང་བའི་ཟོལ་གྱིས་རྫུ། །མི་ལས་ཉེར་འདས་འོད་གསལ་ལྷ་ཡི་བུ། །དུས་ཀྱི་བདག་པོར་གནམ་གྱི་ཤེ་མོང་ཅན། །དབང་ཕྱུག་ཡོན་ཏན་བརྒྱད་མངའ་གང་གི་ཐུགས། །མེས་པོ་ཚངས་པ་མིན་པ་གཞལ་ནུས་སུ། །ལེགས་པའི་རྩིབས་སྟོང་འབར་བའི་འཁོར་ལོ་ཡིས། །གླིང་བཞིར་དབང་སྒྱུར་མི་རྗེ་ལྷ་ཡི་རྒྱལ། །དཔལ་ལྡན་ས་གཞིའི་དབང་ཕྱུག་གོང་མ་ཆེ། །བསྐལ་བརྒྱར་སེང་གེའི་ཁྲི་ལ་ཞབས་བརྟན་གསོལ། །བརྗེད་ངས་གླང་གདོང་མཆེ་བ་དྲུངས་འབྱིན་པའི། །ཕེབས་ཚོགས་རྒྱུན་ཆད་མེད་པའི་ཀརྟི་ཀ །གསེར་ཡིག་རྨ་བྱའི་བཞོན་པ་ལ་བརྟེན་ནས། །ལྗོངས་འདིར་དགའ་བའི་སྒྲོ་གཤོག་ཟླུམ་པོར་སྒྱུར། །སྤྱན་དཀྱུས་རིང་པོར་རྐྱོང་བའི་ཉི་ཟེར་གྱི། །འབབ་སྟེགས་བདོག་པའི་སྐྱེས་ཀྱི་(༩༥ན)
ཨུཏྤ་ལ། །ཐུན་འཚམས་རྟགས་ཀྱི་འདབ་མ་གཡོ་བཞིན་དུ། །ཤིང་ལུག་གྲོ་ཞུན་ཟླ་བའི་ཡར་ཚེས་ཕུལ། །བྱ་ཁྱུང་ཆོས་རྗེ་རབ་འབྱམས་སྨྲ་བ་དོན་ཡོད་རྒྱལ་མཚན་གྱི་འཕྲིན་ལན་ལྔ་བརྒྱའི་རང་གཟུགས་སྟོན་པའི་མེ་ལོང་། པྲ ཀྒ ལྒུ ནཱི བྷ བ ཙ ལོ ཀ ཨ མྲྀ ཏྱ ས རྦྦ ཛྙཱ ཡཱ ན པཱུ རྦྦ ཙ པ རཾ པ ར དྷྲྀ གྡཱི དྷཱི མཱཾ། ཏ སྨི ཤྲུ ཏེ ཡ མ དྷུ རཱ ཀྵ ཡ གཱི ཏི ད ཀྵི ཎྱ གྲཱིི བ ཀུ ཎྜ ལི ཙ དྷ རྨྨ ཛ ལཱ ཀ རཾ ཀ །མཐོ་(སྡེབ་སྦྱོར་དཔྱིད་ཀྱི་ཐིག་ལེ།)རིས་སརྦྦ་ཛྙཱ་ཡི་རྒྱུད་འཛིན་པའི། །སྔོན་མེད་བློ་ལྡན་ཕུར་བུ་གཉིས་པ་ཡི། །མགྲིན་པར་གཡས་སུ་འཁྱིལ་བའི་ཆོས་ཀྱི་དུང་། །འཛད་མེད་སྙན་པའི་གླུ་དེར་རྣ་བ་བློགས། །སྲིད་པའི་ནགས་ཀླུང་སྟུག་པོ་གཅོད་པའི་མཚོན། །དམ་པའི་ཆོས་ཀྱི་རལ་གྲི་རྣོན་པོ་ཡིས། །བཅད་པས་ངེས་ལེགས་སྤང་ལྗོངས་ཡངས་པའི་ངོགས། །གཏན་བདེའི་ཆུ་སྐྱེས་བཞད་འདུན་ཅན་དེར་སྤྲིངས། །ཚིག་སྦྱོར་དུ་ཀཱུ་ལ་ཡི་གོས་གྱོན་པའི། །འཕྲིན་ཡིག་གཉིས་སྐྱེས་ན་ཚོད་གཞོན་ནུ་(༩༥བ)
ཅན། །དག་བྱེད་སྔོ་ལྗང་རྩྭ་ཡི་ཆུན་པོའི་རྟེན། །སྭསྟིའི་སྒྲ་དབྱངས་འཁྲོལ་ཞིང་འདི་ན་སོན། །རྒྱལ་བསྟན་དབྱར་སྐྱེས་མགྲོན་དུ་བསུ་མཁས་པ། །འཇམ་མགོན་མཁྱེན་དཔྱོད་གཞན་གསོས་སྐད་སྙན་ཅན། །གཉིས་སྐྱེས་ཀུན་གྱི་རྒྱལ་པོ་བཙོང་ཁ་པའི། །རིང་ལུགས་འདི་ཀོ་སྔོན་མེད་ལེགས་པའི་ལམ། །ཚུལ་དེར་ཐོས་པའི་ས་བོན་ལེགས་བཏབ་པ། །ཡང་དག་བསམ་པའི་རླན་གཤེར་གྱིས་སྨིན་པས། །སྒོམ་པའི་འཇམ་མཉེན་འདབ་སྟོང་འཛུམ་པ་ཡིས། །བླ་མེད་སྐུ་གསུམ་གོ་འཕང་གཡུར་དུ་ཟ། །འཚམས་སྤྲིན་ཅོད་པན་འཛིན་པའི་རིགས་ཀྱིས་མཐོ། །གཞུང་ལུགས་མང་པོར་དཔྱོད་བཟོད་ཚངས་པའི་བུ། །མདོ་སྔགས་ལམ་གྱི་རིམ་པའི་བྷྲྀངྒ་རའི། །དབང་བསྐུར་སྔོན་བྱོན་མཁས་མང་སྐར་ཚོགས་བཞིན། །ངན་སོང་མངོན་མཐོ་ཞི་བདེ་སྒྲུབ་པའི་ལྕགས། །ཐབས་མཁས་རྩི་ཡིས་སྐུ་གསུམ་གསེར་སྦྱངས་སུ། །སྒྱུར་ནུས་སྐྱེས་བུ་གསུམ་གྱི་གདམས་པའི་མཛོད། །སྲིད་ཞིའི་དབུལ་བ་འཕྲོག་པའི་དབང་གི་རྒྱལ། །བསྐལ་མང་ཚེས་ཀྱི་བགྲོད་པའི་བྱ་རོག་འགྲོས། །འདོད་ཡོན་ལམ་དུ་ལེན་པ་ཐེག་པའི་རྩེ། །འདབ་བཟང་དབང་པོས་སྐད་ཅིག་གཞལ་ནུས་པ། །གསང་ཆེན་ཆོས་ཀྱི་ཉིང་ཁུ་འདུས་པའི་ལམ། །དེང་དུས་གྲངས་ཀྱི་ལྔ་བརྒྱའི་མཐའ་མིན་ཡང་། །མཁས་བཙུན་རྟགས་ཙམ་འཛིན་པའི་མིག་འཁྲུལ་ལ། །སྒྱུ་མའི་རྟ་བཞིན་རྨོངས་པའི་སྐྱེ་བོ་རྣམས། །བདེན་འཛིན་འཁྲུལ་པའི་མགོ་བོ་ཅི་ཡང་འཁོར། །བྲན་ནོར་འདུ་འཛིས་བཏེག་པའི་མཐོན་པོའི་ཁྲིར། །གདུང་རྒྱུད་སྤྲུལ་པའི་སྐུ་དང་གྲུབ་ཐོབ་ཅེས། །དར་ཟབ་གོས་ཀྱི་ཀླུབས་པ་ལྷ་ཡི་གསོབ། །དོན་མེད་འཇའ་འདྲས་ནོར་འཛིན་ལྟོ་བ་གང་། །ཀྱེ་མ་ཀུན་མཁྱེན་ཤཱཀྱའི་རིང་ལུགས་དེ། །ཐོས་བསམ་བསྒོམ་པས་སྤེལ་ལ་དམན་ནོ་ཞེས། །འཕྱོན་མའི་ཟློས་གར་སྒྱུར་ལ་བསྟན་འཛིན་སྐད། །སྨྲ་བའི་(༩༦ན)
ཚུལ་ལ་ཡིད་སྐྱོའི་མཆི་མ་ཀུ། །ཚུལ་བསྟན་གཏམ་གྱི་གུར་གུམ་ཆུས་བྱུགས་པའི། །རྨོངས་པའི་ར་གན་ཀུན་ལ་ངོམ་པ་ཡི། །གཏམ་ངན་ངོ་སོར་བྱེད་པ་ཀན་ཙི་ཀའི། །རྒྱལ་ཕྲན་མང་ཞིག་དེང་དུས་འགྲོ་བའི་སྐྱབས། །ལ་ལ་རང་རིགས་རྒན་པོའི་ངག་ཙམ་དང་། །མ་མཐུན་རྟགས་སུ་བཀོད་ནས་རྒྱལ་བའི་བསྟན། །ཚད་ལྡན་གཞན་ལ་སྨོད་པའི་ཆོས་སྤོང་གི །འདམ་བྱིང་གླང་པོ་ཐར་པའི་སྲོག་འབྲལ་སྙམ། །ལུང་དོན་རིགས་པས་གཞལ་ནུས་ལེགས་བཤད་ཚིག །འདུག་ན་མུ་སྟེགས་གྲུབ་པའི་མཐའ་ལས་ཀྱང་། །ལེན་པའི་དབང་རྣོན་ཆོས་ཀྱི་རྗེས་འབྲང་བདག །དཔྱད་བཟོད་གྲུབ་མཐར་ཕྱོགས་རིས་ག་ལ་བྱེད། །འོན་ཀྱང་ཐོག་མཐའ་བར་དུ་འཁྲུལ་བའི་རྒྱ། །འཇམ་དཔལ་རྡོ་རྗེ་རྣོན་པོས་ཡོངས་བཅད་པའི། །རྒྱལ་ཀུན་ངོ་བོ་བློ་བཟང་གྲགས་པ་ཡི། །གསུང་ལ་རྒྱུ་མཚན་ཤེས་ནས་དད་པ་ཐོབ། །འགའ་ཞིག་ཟབ་ཅིང་དོན་བཟང་མ་རྟོགས་པར། །ཚེ་འདིའི་འབྱེད་ཐབས་ཙམ་གྱི་མེ་ལོང་དུ། །ལྟོ་གོས་འབྱོར་པའི་གཟུགས་བརྙན་ཤར་རོ་ཞེས། །མོས་རྣམས་དབང་རྟུལ་དད་པའི་རྗེས་འབྲང་ཡིན། །ཞི་ལྷག་ཟུང་དུ་འབྲེལ་བའི་གྲུ་གཟིངས་ལ། །བརྟེན་ནས་འཁོར་བའི་ཆུ་གཏེར་ལས་བརྒལ་ཏེ། །ངེས་ལེགས་རིན་ཅེན་གླིང་དུ་བགྲོད་འདོད་ཁྱོད། །སྔོན་བཞིན་དམ་བཅའི་བསམ་པ་བརྟན་པོ་ཟུང་། །སུམ་རྩེན་ཡུལ་གྲུའི་དགའ་ཚལ་གསར་པ་ན། །འདྲེན་བྱེད་གཟིགས་མོར་མཚར་བའི་ཨུཏྤལ་རྩེར། །སྦྲང་རྩིའི་བཅུད་བཟང་དམར་སེར་ཟེའུ་འབྲུའི་རྒྱ། །འགྲོལ་བྱེད་གླུ་དབྱངས་སྒྲོག་པའི་བུང་བ་འཁོར། །བདུད་རྩིས་མྱོས་པའི་འཇམ་ལྡན་སྤུ་གོས་ཅན། །ཟབ་ལྗང་བེར་གྱི་སྟེང་གོས་ཀླུབས་པ་ཡི། །གདོང་ལྔའི་དབང་པོ་འདོད་པས་ཚིམ་པའི་ཚེ། །ཡི་གེའི་མ་ན་ཀ་དེ་ཟློས་གར་སྒྱུར། །ཤངས་བཀྲ་ཤིས་རྩེ་པ་བློ་བཟང་དབང་རྒྱལ་གྱི་འཕྲིན་ལན་ངེས་འབྱུང་གློག་འོད་གསལ་བའི་སྒྱུ་མའི་ལྟད་མོ། (༩༦བ)
བྷ དྲཱ བྟ གཱ ཙ ད ཤ པཱ ར མི ཏཱེ དྷ རཱ ཙཱ ཏུ རྞྞཱ ཉྩ ཨཱ ས ན མྲྀ གེ ནྡྲ མ ཏེ༔ ཀྲྀ ཨཱ ཛྙཱ། །སུ བླཱུ ཧ ར ཀྵ མ དྷུ ར ཛྭ ལ ཀཱི རྟི ཤཱ ས ཏཱཾ དྭི པྱ ཇ མུ ཙ པ ལ ཎྜུ མུ ཁ པ ཏྱཱ། །ཐམས་(སྡེབ་སྦྱོར་དཔྱིད་ཀྱི་ཐེག་ལེ།)ཅད་མཁྱེན་པར་བྱེད་པའི་བློ་གྲོས་ཀྱིས། །སྐལ་བཟང་སངས་རྒྱས་བཞི་པའི་སེང་གེའི་ཁྲིར། །ལེགས་བཀོད་སྙན་པའི་གྲགས་འབར་བཙོང་ཁ་པ། །འཛམ་གླིང་བསྟན་པའི་བདག་པོས་ཁྱོད་ལ་སྲུངས། །ཚེ་རིང་གནམ་གྱི་ཤེ་མོང་ལུང་ལས་ཀྱིས། །སྲིད་པའི་གཙུག་ཏོར་རྩ་ན་ངལ་གསོ་ཞིང་། །གནས་ལྔ་རིག་པའི་འདྲེན་བྱེད་སྟོང་ལྡན་པའི། །མང་ཐོས་འཆི་མེད་དབང་པོའི་གཏམ་འདི་ཉོན། །གཡས་རུ་བཀྲ་ཤིས་འཛིན་མའི་ཐིག་ལེའི་རྩེར། །བློ་གསལ་བཟང་པོའི་ལས་ལྡན་དལ་འབྱོར་རྟེན། །དབང་གི་རྒྱལ་པོ་ལྟ་བུ་རྙེད་དཀའ་བ། །ཐོབ་དེའི་འཕྲིན་ཡིག་ཚིགས་སུ་བཅད་པ་སོན། །སྲིད་པའི་རང་བཞིན་ཐུན་གསུམ་ཀུན་གསལ་ངོས། །སྡུག་བསྔལ་མུན་པའི་རུམ་དུ་མལ་འཆའ་བ། །ཟག་བཅས་བདེ་བར་རློམ་པའི་གློག་འོད་ལ། །གཏན་མདུན་སྙིང་པོར་རེ་རྣམས་(༩༧ན)
ཡ་མ་བརླ། །བཅོས་མིན་ངེས་པར་འབྱུང་བའི་ཀ་པུ་རས། །མི་བཟད་ལས་ཉོན་ཚ་གདུང་དྲག་པོའི་རིམས། །ཞི་བྱེད་ཆོ་ག་འགྲུབ་པའི་དང་པོ་རུ། །མྱང་འདས་འདུ་བ་སྙོམས་པའི་དགའ་སྟོན་ཅན། །དྲང་སྲོང་དམོད་པས་བསྒྲུབས་པའི་མངལ་རྫོགས་མཐར། །གཉིས་མེད་ལྕགས་ཀྱི་ཏིམ་བུ་སྐྱེས་མིན་པའི། །ཚངས་སྤྱོད་དཔལ་གྱི་བེའུ་སྙིང་ག་ན། །ཤར་བའི་རི་མོ་སྨིན་ཚེ་ཕན་བདེའི་དཔྱིད། །ཡིད་སྲུབས་སྒྱུ་འཕྲུལ་དྲ་བའི་འཚམས་སྤྲིན་སྟེང་། །ཐོས་བསམ་འཕེལ་འགྲིབ་འཁྱོག་པོའི་ཆ་ཤས་ཅན། །བསྟན་འཛིན་ཟླ་བའི་འོད་གཟི་མཐར་བྱེད་པའི། །སྔོན་མེད་ཉིན་བྱེད་འཇམ་དཔལ་སྙིང་པོའི་ཞབས། །རྒྱལ་ཀུན་ཡབ་ཏུ་བསྔགས་པའི་སྙན་པོའི་མཚན། །མི་ཤེས་མུན་པ་གཅོད་པའི་རལ་གྲི་ཅན། །འཇམ་དབྱངས་རྡོ་རྗེ་རྣོན་པོའི་སྒྱུ་དྲའི་གར། །ངུར་སྨྲིག་འཛིན་ལ་རྒོལ་བའི་ཀླན་ཀ་སུ། །ཚུལ་དེ་བློ་ཆེན་ཚངས་པའི་གདོང་པ་བཞི། །བཟང་པོ་མཛད་པར་ལྷ་ལ་ཡིད་དྲངས་པས། །རིག་བྱེད་སྨྲ་བའི་ཞལ་སྒོར་སྤྲུལ་པའི་གཏམ། །གྲགས་པའི་འཆི་མེད་དབང་པོའི་མདུན་སར་གླེང་། །མདོ་སྔགས་གཙུག་ལག་ཆོས་ཀུན་འཁྲུལ་མེད་དུ། །སྨྲ་བའི་སྤོབས་པ་ཡེ་ཤེས་ཀྱིས་ཐོབ་པ། །ཚད་མའི་མགོན་པོ་བློ་བཟང་གྲགས་པ་ཡི། །གཞུང་ལུགས་རོ་བརྒྱར་སྤྱོད་འདོད་རྣ་བར་སྙན། །བློ་གསལ་འགྲོ་ལ་དོན་བཟང་ཆོས་ཀྱི་བཅུད། །བུང་བ་སྦྲང་རྩིའི་རྒྱལ་མཚན་ཟེའུ་འབྲུ་ལྟར། །བླ་མེད་ཟིལ་དངར་བཏུང་པའི་འབྱུང་གནས་ཅན། །འདྲེན་མཆོག་དམ་པའི་ཞམ་རིང་གནས་པ་སྤྲོ། །མ་རིག་ཆུ་འཛིན་སྟུག་པོ་སྔོན་ཆགས་པ། །འཇིག་རྟེན་འཁྲུལ་པའི་གྲོང་ཁྱེར་སྔོ་བསངས་མར། །རྨད་བྱུང་ཐུགས་རྗེའི་འཐོར་རླུང་དྲག་པོའི་མཐུས། །ཕན་བདེའི་སྣང་གཏེར་རྒྱལ་ཀུན་ཕ་མཐའ་ཡས། །མཁའ་(༩༧བ)
ལྟར་དངོས་པོ་ཀུན་གྱི་མཚན་མ་ཡི། །དམིགས་སུ་མེད་པའི་སྟོང་ཆེན་ཆོས་དབྱིངས་དང་། །སྣ་ཚོགས་གཟུགས་སྐུ་དབང་པོའི་གཞུ་རིས་ཅན། །རྣམ་རྟོག་པིར་གྱིས་བྲིས་པས་མཐའ་རྫོགས་མིན། །མི་བསྲུན་ཁ་རླངས་འཐུལ་བའི་གདེང་ཀའི་གཙུག །ལེགས་བྱས་ནོར་བུའི་འོད་སྟོང་འབར་བ་ཅན། །རྒྱ་ཧོར་ཆེ་རྒུའི་སྟོན་པ་གྲངས་མེད་པར། །སྨོད་ཚིག་སེར་བས་ངེས་ལེགས་ལོ་ཏོག་གཅོད། །མ་འདྲིས་གཉེན་གཅིག་ཟས་གཙང་སྲས་ཀྱི་གསུང་། ཁམས་དང་དབང་པོར་འཚམ་པའི་ཆོས་ཀྱི་སྒོ །ཚུར་མཐོང་བྱིས་བློས་གཞལ་ནུས་སྐལ་པ་དག །ཕྲ་ཕྱིར་སྒྲིབ་པའི་གཉིད་ལ་ཡུར་གྱི་དོགས། །ཕ་མེས་རིགས་ཀྱི་འབྱོར་པའི་ཐིག་ལེའི་ཟླ། །རིང་སྤངས་དམར་སེར་གོས་ཀྱི་འདབ་ལྡན་པའི། །བློ་གསལ་ལང་ཚོ་དར་བབ་ཨུཏྤལ་ཁྱོད། །དམ་ཆོས་ཉིན་མོའི་སྣང་བ་རྟག་སྟེན་རིག །འདི་སྣང་རྣ་གོང་པདྨའི་ཕན་པོ་དག །ཀུན་རྟོག་རབ་བཀྲའི་བ་མོས་བསྙིགས་བྱས་ཤིང་། །ཕྱི་མའི་དོན་གྲུབ་ཆོས་ཀྱི་ནོར་བུའི་རྒྱན། །མ་རྙེད་དམན་པའི་ཚོགས་ཀྱང་འཕྱ་བའི་གནས། །རྣམ་དག་ཚུལ་ཁྲིམས་རྩ་བ་རབ་ཏུ་བརྟན། །མང་དུ་ཐོས་པའི་ལོ་འདབ་ཕང་ཕུང་གཡོ། །བསམ་པའི་མེ་ཏོག་བཞད་རྩེར་སྒོམ་པའི་འབྲས། །སྨིན་ན་གཏན་བདེའི་དཔག་བསམ་ལྗོན་པར་ངེས། །སྐྱེས་བུ་གསུམ་གྱི་ཐེམ་སྐས་ལ་འཛེགས་ནས། །འཁྲིད་ཆེན་བརྒྱད་སོགས་ཉེ་ལམ་སྒོ་འཕར་བརྒྱ། །ལེགས་ཕྱེ་ཟུང་འཇུག་འོག་མིན་ཁང་བཟང་དུ། །བགྲོད་ན་དལ་བའི་རྟེན་མཆོག་དོན་ཡོད་བྱས། །དེ་སྐད་དོན་ལྡན་ནོར་བུ་བཻ་ཌཱུརྱ། །སྙན་འགྱུར་ཚིག་གི་སྲད་བུ་ལ་བརྒྱུས་པའི། །ལེགས་བཤད་རིན་ཆེན་སྤེལ་ལེགས་དོ་ཤལ་གང་། །རྣམ་དཔྱོད་བི་ཤྭ་ཀརྨའི་སོར་རྩེས་བསྐྲུན། །རྒྱ་གར་པཎ་ཆེན་མེས་པོའི་ཐོད་ལས་བབས། །ཤོང་དཔང་སྐལ་ལྡན་ཤིང་(༩༨ན)
རྟས་ལེགས་པར་དྲངས། །ཆོས་སྐྱོང་བཟང་པོ་ར་ཧུའི་ཞལ་སྒོ་ལས། །འོངས་པས་གྲོང་ཚིག་རྙོག་མའི་དྲི་མ་བྲལ། །ཤེས་བྱར་སྲིད་ཀུན་ལུང་དང་རིགས་ལམ་དུ། །བློ་གྲོས་ཤིང་རྟས་འདྲེན་ནུས་སྨོན་འགྲོ་བ། །དབྱངས་ཅན་མགྲིན་པར་བཞད་པའི་སྐལ་བཟང་གླུ། །ཐོས་པས་དཎྜཱིའི་དགོངས་དོན་ཅུང་ཟད་རིག །དེ་ཕྱིར་གཟུ་ལུམས་ཚིགས་བཅད་དུ་ཀཱུ་ལ། །གདོལ་གཏམ་ཕུང་པོ་རྗེན་པར་སྟོན་པའི་ངག །སྙན་ཚིག་ཟ་འོག་གོས་སུ་རློམ་པའི་འཇའ། །གནད་འགག་གཟུང་དུ་མེད་ལ་རེ་བ་བསྐྱུངས། །འགྲོ་ཕན་མིང་དུ་བསྙད་པའི་རྣམ་གཡེང་རླུང་། །མདོག་ལྔའི་ཤུགས་ཀྱིས་དལ་མེད་བསྐྱོད་བྱས་ཀྱང་། །ཚིགས་སྦྱོར་འདབ་བརྒྱ་བཞད་ལ་ཐོགས་མེད་པའི། །སྐད་གཉིས་སྨྲ་བའི་ཉི་འོད་ཅུང་ཟད་སྤྲོས། །འཕྲིན་ཡིག་ལང་ཚོ་དར་བའི་སྨིན་ལེགས་མ། །འཚམས་སྤྲིན་རྒྱ་ཡི་མཆུ་སྒྲོས་འཛུམ་པའི་ནང་། །རབ་དཀར་ཐགས་བཟང་ཚེམས་ཕྲེང་ངོམ་བཞིན་དུ། །ཉམས་འགྱུར་སྟོང་གི་གླུ་དབྱངས་མགྲིན་པར་ལེན། །བཅུ་གཉིས་བགྲང་བྱར་གངྒཱ་སྒྲ་འཛིན་ཁུར། །བསྟེན་པའི་དཀའ་ཐུབ་རྫོགས་པ་ཨ་ག་སྟས། །ཉལ་འགྲོའི་ཚོགས་རྣམས་བདུད་རྩིར་སྒྱུར་བའི་ཚེ། ཁྱོད་ཀྱི་རྣ་བ་མཛེས་པའི་རྒྱན་འདི་སྤུད།
རབ་བྱུང་བཅུ་གཅིག་པའི་མེ་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག །བསམ་ཡས་ནས་གནོད་སྦྱིན་ཆེན་པོས་སྤྱན་གཟིགས་རྟེན་འབྱུང་གི་བདོག་པ་དགོས་ཚུལ་གྱི་གསང་བ་རྡོ་རྗེའི་འཕྲིན་ལན་སྡེ་བརྒྱད་ལས་སུ་སྐུལ་བའི་པ་ཏྲ་ཧ། འཛམ་གླིང་ཀུན་ན་ཆེ་བའི་རིག་སྔགས་ཀྱི། །བརྟུལ་ཞུགས་གྲུབ་པ་པདྨ་ཐོད་འཕྲེང་གིས། །རྡོ་རྗེའི་ཕྱག་རྒྱ་སྤྱི་བོར་ལེགས་བཀོད་པ། །སྡེ་བརྒྱད་དྲེགས་པའི་དམག་དཔོན་ཙི་དམར་བ། །གང་གིས་རྡོ་རྗེའི་ཚིག་འཕྲེང་གསང་བའི་རྔ། །སྙན་བརྗིད་རྔམ་པའི་སྒྲ་དབྱངས་ལེགས་ཁྲོལ་བ། །དར་དཀར་(༩༨བ)
ཤོག་བུའི་ངོས་སུ་ཡི་གེའི་གར། །བསྒྱུར་ཏེ་སྙིམ་པར་སོན་པ་སྤྲོ་བ་འཕེལ། །ཞི་དྲོ་རབ་འབྱམས་ཀུན་འདུས་བཀའ་བརྒྱད་ལྷའི། །ནུབ་བྱང་མཆོད་སྟོད་དྲེགས་པའི་དཀྱིལ་འཁོར་གྱི། །ཡེ་ཤེས་སྤྲུལ་པའི་ལྷ་ཡི་སྒྱུ་མ་མཁན། །མི་བསྲུན་སྲོག་གི་གཤེད་མར་རྫུ་བ་བཞིན། །གཅིག་ཏུ་གྱུར་པ་ཆོས་དབྱིངས་ཐིག་ལེའི་ཀློང་། །དུ་མར་སྣང་བ་སྲིད་གསུམ་ཀུན་ཁྱབ་པའི། །ཟླ་བ་གཅིག་ལས་གྱུར་པའི་གཟུགས་བརྙན་གྱིས། །གྲངས་མེད་ཕྱོགས་འཚམས་མ་ལུས་ཁྱབ་པ་བཞིན། །མཐུ་སྟོབས་རྩལ་གྱིས་སྲིད་གསུམ་གཡོ་ནུས་ཀྱང་། །དམ་ཚིག་སྲད་བུ་ཕྲ་མོས་འཆིང་ནུས་པ། ཁྱབ་འཇུག་འཇུག་པ་བཅུ་པའི་ངང་ཚུལ་ཅན། །གནོད་སྦྱིན་དབང་པོ་དགྱེས་པའི་འཛུམ་ཞལ་སྟོན། །རང་སྲུང་རྡོ་རྗེ་བཙན་པོའི་གོ་ཆ་དང་། །དགྲ་དཔུང་འཇོམས་བྱེད་རྣོ་ངར་འཛོམ་པའི་མཚོན། །སྟོང་གསུམ་སྐད་ཅིག་མྱུལ་བའི་རྟ་མཆོག་སོགས། །མཆིད་འཕྲེང་ཡི་གེར་འཁོད་བཞིན་འབུལ་བྱེད་ན། །ཞི་རྒྱས་དབང་གི་འཕྲིན་ལས་ཡིད་བཞིན་ནོར། །བསམ་པའི་རེ་བ་མ་ལུས་ཡོངས་སྐོང་ཞིང་། །དྲག་སྦྱོར་ཐོག་མདས་དགྲ་བགེགས་བྲག་རིའི་ཚོགས། །ཐལ་བར་རློག་ཅིག་རིགས་རྒྱུད་སྲུང་མ་ཆེ། །རྨད་བྱུང་ཀུན་ཏུ་བཟང་པོའི་མཆོད་པའི་སྤྲིན། །ཏིང་འཛིན་སོར་མོས་ཐགས་སུ་ཉེར་བཏགས་པའི། །སྙན་ཤལ་རབ་དཀར་དར་གྱི་ལྷ་རྫས་ལ། །ཐུན་འཚམས་རྒྱ་ཡིས་སྤྲས་ཏེ་ལེགས་པར་ཕུལ། །མཆིམས་ཕུ་ནས་བཙན་རྒོད་རྟ་ར་བས་འཕྲིན་ལས་སྒྲུབ་རྟེན་དགོས་ཚུལ་རིམ་གྲོའི་སྐུལ་མ་དང་བཅས་པའི་འཕྲིན་ལན་དམ་ལྡན་དཔའ་བོ་དགའ་བའི་ཟློས་གར། དུས་གསུམ་རྒྱལ་བ་མ་ལུས་ཀུན་འདུས་པའི། །བདག་ཉིད་སྲིད་གསུམ་བླ་མ་པདྨ་འབྱུང་། །མགོན་དེའི་དགེ་བསྙེན་བཙན་རྒོད་རྟ་ར་བའི། །འཕྲིན་ཡིག་མྱང་ཆེན་སྐུ་ཤའི་རྟེན་བཅས་འབྱོར། །གཡར་དམ་མི་(༩༩ན)
གཡེལ་འཕྲིན་ལས་བསྒྲུབ་པ་ལེགས། །བསིལ་ལྡན་བོད་ཀྱི་རྒྱལ་ཁམས་བདེ་བའི་ཐབས། །རྒྱལ་དབང་པདྨའི་གསུང་བཞིན་སྒྲུབ་དགོས་པའི། །རྒྱུ་མཚན་རྨེད་པ་ཇི་བཞིན་ཡིད་ལ་བབས། །ཅང་ཤེས་རྟ་དང་རྣོ་ངར་ལྡན་པའི་མཚོན། །སྒྲ་སྙན་ཕྱོགས་ལས་རྣམ་རྒྱལ་བ་དན་སོགས། །ཡི་གེའི་འཕྲེང་བར་བཀོད་པ་ཇི་བཞིན་དུ། །བསྲིངས་ཡོད་བཅོལ་བའི་འཕྲིན་ལས་སྒྲུབ་པར་གྱིས། །གངས་ཀྱི་རི་བོའི་མདངས་ལས་ཁུ་བ་ཡི། །ཟླ་བ་ཐགས་སུ་བྱས་འདྲའི་ལྷ་རྫས་ལ། །པདྨ་རཱ་གའི་མདངས་ཀྱི་རྒྱས་སྤྲས་ཏེ། །གྲུ་འཛིན་གཉིས་པའི་ཕོ་བྲང་རྩེ་ནས་བྲིས། །གོང་གི་ཡིག་རིགས་ཀྱི་བྱེད་པོ་འབི་ལིག་ཐུ་ནང་སོའི་འཕྲིན་ལན་བཞིན་རས་འཆར་བའི་མེ་ལོང་། ཀཱ ར སུ ཝུ རྞྞ ད ཤཻ རྟོ ཥ ཀ ཥྛ བཱ རྒྷ ཀུ ཡི ཤྩ ས པྲ ཥི ཏ བྷཱུ ཏི ༔ པྲ ཛྙཱ བཱཾ ཥྛ ཀྐུ ར སྱ། །ན དཱི རྒྷ སྱ ཀཱ ལ ཤྩ པ ཏི ཀཱུ ལཻ རོ གོ གྲ ཧ ཡོ ྅ ཧེ ཥ ན ཨུ ཏྤ ནྣ པ རཾ པ ར། འབི་ལིག་ཐུ་ནང་སོའི་ཡི་གེ་གསེར་ཞོ་བཅུ་ཇ་ཀོ་ཁྲ་དང་བཅས་པ་བསྲིངས་པ་འབྱོར། མི་རིང་བའི་ཆར་ཡང་ཚེ་རབས་མང་པོར་བསགས་པའི་ལེགས་བྱས་ཀྱི་འབྲས་བུའི་གཟུགས་ཕུང་ལ་མ་(༩༩བ)
བ ཧཽ སཾ བྷྲྀ ཏཱ ནཱ པུ ཎྱ སྱ ཕ ལཱ ནཱཾ རཱུ བེ བྷེ ཿ སྐ ནྟེ ཤུ། ཝ རྞྞེ གུ ལ བི ཤཱ སྱཱ ངྒུ ལཱ ནཱ ནྣཱ ཊ གཝ རྟོ སྠཱ ནོ ཏྶཱ ཧེ གགནོ བྷྲཱཻ ཤྭ ར བྷཻ རྨྨ ཧོ ཏྟ ར སྱ མཱུ ལ། །མཐུན་ནད་གདོན་གྱི་འཚེ་བ་མེད་ཅིང་། གནམ་སའི་དབང་ཕྱུག་གོང་མ་ཆེན་པོའི་དྲུང་དུ་ཡིག་རིགས་སྣ་ཚོགས་ཀྱི་སོར་མོའི་ཟློས་གར་སྒྱུར་བར་གནས་པ་སྤྲོ། །གམྦྷི རཻ རྦྦ ཛྲ སྱ ཡོ གཤྩ བྷཱ ཥ ཎ པྲ བཱ དཱ ར མྦྷ ན དྱ བཾ ཤུ ཀླ སྱ གརེ ཥུ བི ཪྻེ སྴཱ ནོ ྅ སྨ ཙ ཤ གཱ ནཱ མ རྠེ བྷྱ༔། །ཤཽ བྷེ བྷྱ ཨུ དྱ མ ཀ ར ཤྩ ས མཱ དྷི རྫ པི ཏ ཝཱ ཙྱོ ྅ དྷྱེ ཥ ཎོ བ སྠཱ ནཱ ཥྚཱ ངྒ ཤྲཱི ལ དྱ ཙཱ ར པཱ ནྟ ཡཱ བུ ན། །ངོས་ཀྱང་སེམས་ཅན་རྣམས་ཀྱི་དོན་གྱི་ཆེད་དུ་ཟབ་མོ་རྡོ་རྗེའི་རྣལ་འབྱོར་དང་འཆད་རྩོད་རྩོམ་པ་སོགས་རྣམ་དཀར་གྱི་བྱ་བ་ལ་བརྩོན་པར་གནས། སླད་ནས་ཀྱང་དཔྱོད་ལྡན་ཁྱོད་ཀྱིས་ཏིང་ངེ་འཛིན་བཟླས་རྗོད་གསོལ་འདེབས་བསྙེན་གནས་ཡན་ལག་བརྒྱད་(༡༠༠ན)
ར པི། །སུ ཏྲཱ ཏྪུ ཏེ ནཱ མོ ཥེ མ ན སྠི ར ལ བྡྷེ ན པྲ ཥི ཏཱ ཙྪེ ཛ མྦོ དྭི པེ ཥུ ནཱ། མེ ཏྲི ནཱ པཱ ར མ ནི རྨྨ ཀཱ ཡ སྱ ཀ ར དེ ཤ ན སྻཀཱ ལེ པ རི བཱ རེ ཛཱ ཏཱ དཱ ནུ དྷྀ གྱ ཛི ཏ པྲ ཏི ཛྙཱ ཡཱ དྷཱ ཪྱེ ཏ ཏྶ རྦྦ གཝི བཱ ཙྱ ཤྩ ཤྲུ ཏ༔ པའི་ཁྲིམས་སོགས་དགེ་ཚོགས་ལ་ནན་ཏན་བྱེད་པ་དང་། བྱམས་པས་དམ་བཅས་པའི་གཟུངས་འདི་ངག་ཏུ་བརྗོད་པ་དང་ཐོས་པ་ཐམས་ཅད་འཛམ་བུ་གླིང་དུ་མགོན་པོ་བྱམས་པས་མཆོག་གི་སྤྲུལ་སྐུ་མཛད་པ་སྟོན་པའི་དུས་སུ་འཁོར་དུ་སྐྱེས་ནས་རྗེས་སུ་འཛིན་པར་མདོ་མ ནཱ ནྶ མྦཱ ས ཀ རོ ཀྵ སྱ ཙ ཀྲཱ ད ཏྱ ཛ ན༔ ཨུ ད ཀ སྱ ས རི ཏཱ ཀྲྀ ཏ༔ ཀཱ ཋ ས ཛཱ ར ཙ ལ ཤྩ། །ར ཀྵེ ཧ གནྦྷ ཤྲཱ དྡྷ ཙ ཏུ རྐྐ མྦ ལི སི ཏ ཤྩ ས ཤྲི ཏཻ། །ཤྲཱི མཱཾ དྷ ནྱ ཀ ཊ ཀཻ རྔྷ རྨྨཱ ཎཱཾ མ ཧཱ། ལས་ཐོས་པས་མི་སླུ་བའི་ཡིད་བརྟན་རྙེད་ནས་བསྐུར་ཡོད། སྲུང་བའི་འཁོར་ལོ་ནས་མི་འདོར་བ་ཡིད་ལ་འགྲོགས་པ་བྱེད། འཕྲོས་འོས་ཀྱང་ཆུ་བོའི་རྒྱུན་ལྟར་གྱིས། རྟེན་སྲུང་མདུད་དད་རྟེན་སྣམ་དཀར་བཞི་དང་བཅས། (༡༠༠བ)
སེ ན ས རྦྦ དཱི གོ བི ཛ ཡ སྱ དྭི པཱ ལླི ཁཾ ཏ མ གྲཱི ན རྐ ཊ ས མྦ ནྶ ར མཱ རྐྐ ཤི རེ ཎ བཱུ ཪྞི མ སྱ དི ཀྤཱུ རྦྦ ཡ ཏྲ ཡཱ ཎཱ ཉྫི ན སྱ ཏི ཐཽ། མེ་སྤྲེ་ལོ་མགོས་ཉ་བའི་ཕྱོགས་སྔ་མའི་རྒྱལ་བ་གསུམ་པའི་ཚེས་ལ་དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་ནས་བྲིས།
རབ་བྱུང་བཅུ་གཅིག་པའི་མེ་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག །མེ་བྱ་ཡར་འབྲོག་ལྷུན་པོ་རྫོང་ནས་ཁྲི་དཔོན་ཀུན་དགའ་ཚེ་བརྟན་རྡོ་རྗེས་དད་པའི་འབྲས་གསར་ཕུལ་བའི་འཕྲོད་ལན་ཀུན་ལས་རྣམ་པར་རྒྱལ་བའི་སྒྲ་དབྱངས། ཝཱ ནེ ཀུ ལྱ མ ཧཱ ཤི ཏེ ཤྩ ཡ དྦྷཱུ ཡཱ ལྐ བི ཙཱ ར བ ཏྲ ཙ། །ལེ ཁ ངྐུ རྱ ཀུ མཱ ར བྲྀ ཀྵ བྷཱུ བཱ ལཱ ཤོ ཀ ན པཱུ རྦྦ ཨ དྦྷུ ཏ། །ལེགས་(སྡེབ་སྦྱོར་དག་པའི་སྣང་བ།)ལྡན་དབང་པོའི་རིགས་ཀྱི་ནགས་ཀླུང་དུ། །རྣམ་དཔྱོད་འདབ་མ་ནམ་ཡང་སྙིགས་མིན་པ། །ས་སྐྱོང་སྔ་ན་མེད་པའི་ཨ་ཤྭཏྠ། །རྨད་བྱུང་ལྗོན་པའི་མྱུ་གུ་གཞོན་ནུའི་འཕྲིན། །(༡༠༡ན)
རི་དྭགས་སྣང་བརྙན་ཐགས་ཀྱི་རི་མོ་རུ། །ཤར་བའི་ཟླ་བ་བཞུན་མ་ཁ་ཚར་ཅན། །དཔྱིད་ཀྱི་རྒྱལ་མོའི་མགྲིན་སྙན་འཁྲོལ་བ་ལ། །འཁོར་ལོའི་ཡན་ལག་མྱོས་པའི་འབྲས་བཅས་སོན། །མི་ཁོམ་གནས་ངན་སྨག་རུམ་མུན་པའི་ཚོགས། །འཇོམས་བྱེད་ལེགས་བྱས་བྱེ་བའི་སྐྱ་རེངས་མཐར། །དལ་འབྱོར་རྟེན་གྱི་ཉི་མ་འོད་པོ་ཆེས། །བདེ་སྐྱིད་འདབ་བརྒྱ་བཞད་པའི་གཏམ་དེ་སྙན། །འདི་སྣང་གཡེང་བའི་ཁོལ་པོར་འཛད་པ་ལ། །གཞན་ཕན་མིང་གི་སྒྲོ་བཏགས་མཁན་པོ་ཡང་། །གཙུག་ལག་རྒྱ་མཚོར་ཐོས་དང་བསམ་པ་ཡི། །ངང་ཚུལ་འདི་འདྲས་འཚོ་བ་དོན་ལྡན་སྙམ། །གཏན་དུ་བདེ་བ་ཆོས་ཀྱི་ཏོག་མཛེས་ཅན། །ཕུན་ཚོགས་འབྱོར་པའི་ཆབ་སྲིད་གདུགས་དཀར་པོའི། །ནོར་བུའི་ཡུ་བ་ཁྱོད་ལ་ཉེར་གཏད་ནས། །ཡབ་གཅིག་མཐོ་རིས་བདག་པོའི་སྐས་ལ་འཛེགས། །དེ་ཕྱིར་ལུགས་གཉིས་དཔལ་གྱི་བེའུའི་གཟུགས། །བློ་དང་བརྩོན་པར་རབ་ལྡན་སྙིང་གའི་ངོས། །འཁྱིལ་ཚེ་དཔའ་མཛངས་བརྟུལ་ཕོད་འཇུག་པ་བཅུས། །ཀུན་ལས་རྣམ་པར་རྒྱལ་བ་ཐོབ་མིན་ནམ། །བཀྲ་ཤིས་རི་མོ་གཡས་སུ་ལེགས་འཁྱིལ་བའི། །མགྲིན་པ་ལོངས་སྤྱོད་འཁོར་ལོའི་དུང་དཀར་པོ། །རབ་སྙན་མིང་ཚིག་ཡི་གེར་འཆར་བའི་འཕྲིན། །ཛཧྣུ་ཡི་བུ་མོར་ཅོ་འདྲི་འོས། །སྒྲ་འཛིན་བ་ཀུ་ལ་ཡི་འདབ་མའི་རྒྱ། །འགྲོལ་བྱེད་སྙན་ཚིག་ལུས་ཕྲའི་འགྲམ་ཆང་གི །གཟེགས་མ་འཐོར་ཚེ་སྨྲ་པོ་ཕལ་ཆེར་གྱི། །ཚིག་སྦྱོར་ཉི་མ་བྱང་གླིང་ངོས་སུ་སོང་། །མེ་བྱ་སྨན་ལུང་བླ་མ་རྣམ་དཔྱོད་དང་ལྡན་པ་བློ་གྲོས་མཆོག་གི་རྡོ་རྗེར་སྤྲིངས་པ་ཐེག་ཀུན་རྩེ་མོར་བགྲོད་པའི་གླུ། (༡༠༡བ)
སཱུ ཏྲཻ སྟ ནྟོ དྒཱི ཪྞྞ ར ཛ ཐེ ད ཤུཀཱ ྉྤ དྨཱ སཱ རཱ ཛྙ ནི དྷི མ ཏྟཱ སུ ར། ཨཱ ཡཱ ནཱ གྲེ ྅ ཏེ རྒ ཏ སཱ མྀ གྱ ལཽ གོ བེ སྟ སྨི ཤྩ བྲ ཧི ཏ ཉྩཱ ར བཱཾ། །མདོ་(སྡེབ་སྦྱོར་རྨ་བྱ་མྱོས་པ།)རྒྱུད་པདྨའི་གེ་སར་སྐྱུགས་པའི་རྡུལ། །སྙིང་པོ་བཀའ་གཏེར་བཅུད་ཀྱིས་མྱོས་པ་ཡི། །ཐེག་ཀུན་རྩེ་མོར་བགྲོད་པ་ཨ་ཏི་གླུ། །ལེན་མཁས་དཔྱོད་ལྡན་བྷ་མ་ར་དེར་སྤྲིངས། །ལེགས་བྱས་ཆུ་གཏེར་བསྲུབས་འབྲས་ལུས་ཀྱི་ཟླ། །ཚད་དུ་གཞལ་དཀའ་སྲིད་པའི་ལྷ་ལམ་ངོས། །བག་ལ་ཞ་བའི་ལས་ངན་སྒྲ་གཅན་གྱིས། ཁ་བསྒྲིབས་བདེ་སྐྱིད་ཆ་ཤས་གང་གྱུར་ཏམ། །དགེ་ལྡན་ལུགས་འཛིན་གནའ་བོའི་སྐྱེས་རབས་ཁྲིར། །ཞྭ་སེར་རིན་ཅེན་ཅོད་པན་ལེགས་འཆང་ཡང་། །རྣམ་དཔྱོད་གསེར་སྦྱངས་འཁོར་ལོས་རིགས་བྲལ་གྱི། །ཐུབ་བསྟན་གླིང་བཞིར་དབང་བསྒྱུར་འདི་ན་སྣང་། །མི་དགེའི་ནད་བརྒྱ་འཇོམས་པ་སྨན་གྱི་གྲོང་། །སྤྲུལ་ཞིང་ལྟ་ན་སྡུག་པ་ཡར་ཀླུངས་ནས། །རིག་སྔགས་དྲང་སྲོང་གྲུབ་པ་ཐ་སྐར་སྐྱེ། །འཁྲུལ་(༡༠༢ན)
མེད་ལུང་ཟིན་དམ་པའི་རྒྱུད་ལྡན་ཁྱོད། །བཅོ་བརྒྱད་རིག་པའི་གནས་ཀྱི་རྒྱུད་མང་པོ། །ཐོས་བརྩོན་སྤོབས་པའི་སོར་རྩེས་བསྐུལ་བའི་སྒྲ །དམ་པའི་ཆོས་ཀྱི་གླུ་འབབ་དབྱངས་སྙན་པོས། །མཐོ་རིས་གར་མཁན་ཁེངས་བསྐྱུང་བློ་མིག་ཡངས། །ཉེ་ཚེའི་ངེས་འབྱུང་སྦྲུལ་གྱིས་མ་འཁྲིལ་ཞིང་། །ཚུལ་ཁྲིམས་བསིལ་བའི་དྲི་ངད་ཆེར་ལྡང་བའི། །ཚངས་སྤྱོད་དཔལ་གྱི་མ་ལ་ཡར་སྐྱེས་ལྗོན། །འཁོར་བའི་ཚ་གདུང་མིང་མཐར་བྱེད་དེ་མཚར། །ཐེག་ཆེན་ཤིང་རྟ་བཅུ་པའི་རིགས་སད་ནས། །གཞན་ཕན་ལྷག་བསམ་རྒྱ་ཆེའི་རཱ་མ་ཎས། །འགྱུར་མེད་དམ་བཅའ་བཞི་ལྡན་སེམས་སྐྱེད་མདས། །བདག་འཛིན་ལང་ཀའི་མགྲིན་པ་ས་ལ་ལྷུང་། །སྣ་ཚོགས་འགྲོ་བློའི་མོས་པ་མན་ཤེལ་ཁམས། །ཀྲི་ཡོག་སྡེ་གསུམ་མཚོན་གྱིས་ཁ་བསྒྱུར་ཚེ། །རྣམ་པ་ཐམས་ཅད་མཁྱེན་པའི་ཁང་བཟང་དུ། །འཇུག་པའི་སྒོ་རྒྱན་མཛེས་བྱེད་ནོར་བུའི་འཕྲ། །བཀའ་ནས་བཀར་བརྒྱུད་མདོ་རྒྱུད་སེམས་ཕྱོགས་ཀྱི། །རྣལ་འབྱོར་མཆོག་གི་ཆོས་ཚུལ་རྒྱ་མཚོ་ཆེ། །དྲུག་པ་རྡོ་རྗེ་འཆང་གི་ཡིད་བཞིན་ནོར། །མཛད་མེད་འབྱུང་བའི་ཁུངས་འདི་རྨད་དུ་བྱུང་། །ཆོས་གཏེར་སྙིང་པོ་དབུས་གཏེར་རྩ་བ་བརྟན། །ལྷོ་གཏེར་སྡོང་བུ་ནུབ་གཏེར་ཡལ་ག་རྒྱས། །བྱང་གཏེར་མེ་ཏོག་ཤར་གཏེར་འབྲས་བུ་སྨིན། །ཟབ་གཏེར་ཨུ་རྒྱན་ཐུགས་གཏེར་དཔག་བསམ་ཤིང་། །སྔ་འགྱུར་སྟོན་གྱི་མཁའ་དབྱིངས་དངས་པའི་ངོས། །གཏེར་སྟོན་རྒྱུ་སྐར་འཕྲེང་བ་འཁྲིགས་པའི་དབུས། །ཉང་རལ་ཆོས་དབང་ཉི་ཟླ་ཟུང་འབྲེལ་གྱིས། །འཁོར་འདས་ཉམ་ངའི་མུན་པ་ཕ་མཐར་སྐྲོད། །བླ་མེད་ཡེ་ཤེས་བཙོ་སྦྱངས་སུ་ཝརྞ། །སྒྲིབ་གཉིས་དངུལ་ཆུས་གབ་པ་ཐ་མལ་མདོག །སྨིན་བྱེད་དབང་གི་མེ་ཡིས་བཅིར་(༡༠༢བ)
བ་ལས། །རང་རིག་གདོད་མའི་འཚམས་སྤྲིན་མདངས་འོད་འཕྲོ། །ཏིང་འཛིན་རྫས་ཀྱིས་ངར་བཏགས་དམོད་པའི་མཚོན། །རྣོན་པོས་ལྕགས་སྲོག་གྲུབ་ཀྱང་གཅོད་ནུས་པའི། །དྲག་སྔགས་འབར་བའི་ཐོག་གི་མདའ་བོ་ཆེས། །འགལ་བྱེད་བྲག་རི་བསྙིལ་ལ་རིངས་ཆས་སམ། །དྲག་པོའི་ཆས་ཞུགས་དཔལ་ཆེན་སྟངས་སྟབས་ཀྱིས། །དམ་ཅན་དྲེགས་པའི་དམག་གི་སྣ་དྲངས་ཚེ། །བདུད་དཔུང་ཞིག་པའི་སྒྲ་དང་ལྷན་ཅིག་ཏུ། །སྙིང་ཡང་ཤུབས་ནས་ཐོན་ཏེ་ལྐོག་མར་བྲོས། །འགལ་རྐྱེན་ཐ་སྲེག་ཞི་བའི་གཤིན་པོའི་སར། །ཚེ་དཔལ་སྟོབས་འབྱོར་མྱུ་གུ་རབ་སྨིན་པ། །ཕུན་ཚོགས་འབྲས་བཟང་འགུགས་པའི་ལྕགས་ཀྱུ་དེ། །མ་བཏབ་པར་ཡང་ཁམས་གསུམ་དབང་དུ་བྱེད། །ཀ་ནས་དག་པའི་དབྱིངས་དེར་རྒྱལ་ཀུན་གྱི། །མཁྱེན་སྤྱན་སྟོང་གིས་གཟིགས་ཀྱང་མ་རྙེད་པར། །ལྷུན་གྲུབ་མཚན་དཔེའི་འཇའ་ཚོན་ཤར་བའི་འཕྲུལ། །བྱེད་པོ་རིག་པའི་རྩལ་གྱི་སྒྱུ་མ་མཁན། །ངོ་བོ་དམིགས་མེད་བརྗོད་བྲལ་ཡེ་ནས་སྟོང་། །རང་བཞིན་གསལ་འཚེར་ཞི་ཁྲོའི་སྤྲིན་དཀར་གཡོ། །ཀུན་ཁྱབ་ཐུགས་རྗེའི་སྤྲུལ་སྒྱུར་གྲུ་ཆར་གྱིས། །གསེར་སྦྲམ་སྒྱེད་རྡོར་འཁྲུལ་བའི་དབུལ་ཕོངས་སེལ། །སྒྲོན་མ་དྲུག་གི་ཡོན་ཏན་ཆུ་བོ་ཀུན། །སྣང་བཞིའི་རྒྱ་མཚོར་ངང་གིས་གཞོལ་བའི་མཐར། །ཆོས་ཉིད་འབབ་ཆུ་རྫོགས་པར་ཟད་གྱུར་ཀྱང་། །འོད་ལུས་ནོར་འཛིན་ལྟོ་བར་དོག་མིན་ཡངས། །འདོད་སྲེད་ཁ་ཆུས་རང་ཉིད་དམ་འཆིང་བའི། །བསམ་པའི་སྲད་བུ་ཕྲ་རགས་རྒྱུ་དང་སྤུན། །ལྔ་ལྡན་ཡེ་ཤེས་ཚོན་གྱིས་བཏགས་པའི་དར། །ཀུན་བཟང་གོས་ཀྱི་གཞའ་རིས་ཡིད་མཁར་བཀྲ །གངས་ཅན་ར་བ་དཀར་པོའི་ཁོར་ཡུག་གི ། ལྷ་གཅིག་དེ་དང་དབྱེར་མེད་ཆོས་ཀྱི་དབང་། །འཁྲུལ་མེད་ཟབ་གཏེར་བསྟན་པའི་གདུགས་དཀར་པོ། །གྱེན་དུ་འདེགས་པའི་སྙིང་སྟོབས་ཕྲག་པར་ལོང་། །ཚིག་སྦྱོར་(༡༠༣ན)
གཞོན་ནུའི་མཛེས་སྡུག་མངོན་གསལ་ཡང་། །ཟབ་བརླིང་དོན་གྱི་རྒན་པོའི་བློ་འཆང་བ། །ལེགས་པའི་ཆ་བསགས་བདོག་པའི་སྒྲོ་ལྡན་ལ། །ཞོན་ནས་ཁྱོད་ཀྱི་མདུན་སར་ཟློས་གར་སྒྱུར། །མེ་བྱ་སྣ་དཀར་རྩེར་ཞང་པོ་ཁྲི་དཔོན་པ་ཀུན་དགའ་དབང་ཆེན་ཕུན་ཚོགས་ལ་སྤྲིངས་པ་ལུགས་གཉིས་ལྟ་བའི་མེ་ལོང་། ས རྦྦ དཱ ཤཽ བྷ ས དྡྷ རྨྨ ཤ ངྒཱ ཀ ཤ པྡ ས ཝ ར གྲཱི ཝ ད ཀྵི ནྱ ཀུ ཎྜ ལྱ ཙ། །ངཱ ཀྲྀ ཤཽ དྷཽ ད ནཱ ཤྲེ ཡ ཡ ཙྪོ མ དྷུ རྱཱ མྲྀ ཏཱ དྡྷུ ཏྱ ཀ རྞྞ སྱ བཱ ནྟི ཀ༔ དུས་(སྡེབ་སྦྱོར་མེ་ཏོག་འཕྲེང་ཅན།)ཀུན་དགེ་བ་དམ་པའི་ཆོས་ཀྱི་དུང་། །མགྲིན་པར་གཡས་སུ་འཁྱིལ་བའི་ཚངས་དབྱངས་སྒྲ །རྨད་བྱུང་སྙན་པའི་བདུད་རྩི་རྣ་བར་དཔྱིད། །སྦྱིན་མཛད་ཟས་གཙང་སྲས་ཀྱིས་དགེ་ལེགས་སྩོལ། །གངས་ཅན་ར་བར་རྒྱལ་སྲིད་སྣ་བདུན་གཙོར། །མང་པོས་བཀུར་བ་དཔལ་ལྡན་རླངས་ཀྱི་གདུང་། །ལྷ་གཟིགས་ཕག་གྲུའི་བཀའ་དྲིན་ཉི་ཟེར་གྱིས། །ལེགས་བསྐྱངས་དགུང་བློན་བརྒྱུད་ཀྱི་པད་དཀར་དང་། །གནམ་གྱི་ཤེ་མོང་དཔུང་པས་ས་ཀུན་ལ། །མངའ་སྒྱུར་(༡༠༣བ)
གོང་མ་རྒྱལ་པོ་ཧོང་དི་ཡིས། །སྲིད་ཞིའི་གཙུག་གི་རྒྱན་དུ་དབང་བསྐུར་བ། །དེའི་ཆི་ཀྱིང་གང་མིང་དུ་འབོད་པ་དེས། །འཇམ་དབྱངས་འཁོན་གྱི་གདུང་འཛིན་ས་སྐྱ་པའི། །བསྟན་སྲུང་མགོན་པོས་སྤྲུལ་པའི་རིགས་ཀྱི་བུ། ཁྲི་སྐོར་རྟགས་མགོ་དང་བཅས་ལུང་བཟང་པོས། །ཆེན་པོའི་ལས་ཀ་འཛིན་པའི་མི་དབང་དེར། །རིག་གནས་རྒྱ་མཚོར་སྨྲ་བའི་སྤོབས་པའི་མགྲིན། །གཟེངས་སུ་མཐོ་བའི་ལང་ཚོ་དར་དྲག་པ། །འཇམ་དཔལ་རྡོ་རྗེར་འཁྲུལ་ཏེ་དབྱངས་ཅན་ལྷས། །མགུལ་པར་འཁྱུད་པའི་དྲུག་སྐྱེས་གླུ་འདི་སྤྲིངས། །བསོད་ནམས་ཕུང་པོ་གཟུགས་སུ་སྣང་བའི་ཁམས། །ཆོས་དང་སྲིད་ཀྱི་གཙུག་ལག་བྱེད་བའི་སྣོད། །དལ་འབྱོར་འཛམ་བུའི་གསེར་སྦྱངས་ཉེར་འཚེའི་ལྷད། །ཡོངས་བྲལ་སྤྲོ་བདེའི་འོད་གཟི་འབར་ལས་ཅི། །སྣ་ཚོགས་དཀར་བའི་ལས་ཀྱི་འབྲས་བཟང་དང་། །དཔའ་མཛངས་འཕྲུལ་གྱིས་རྒྱལ་ཕྲན་རྩེར་སོན་པ། །ཨང་ལེན་མེས་ཀྱི་ལེགས་ལམ་ཡངས་པའི་ཤུལ། །བཟུང་བའི་བརྟུལ་ཞུགས་གྲུབ་ལ་བདག་ཡི་རང་། །ཟ་ཧོར་གདུང་གི་ནོར་བུའི་ཡུ་བ་ཡིས། །བཏེག་པའི་གཙུག་ལག་ལུགས་བརྒྱའི་གདུགས་དཀར་པོ། །བློ་བཟང་གྲགས་སྙན་བསྟན་པའི་ཏོག་མཛེས་ཅན། །བོད་འབངས་ཕན་བདེའི་གྲིབ་བསིལ་དལ་མེད་འཁོར། །གཏན་བདེའི་སི་ཏཱའཕྲོག་པའི་ཆོམ་རྐུན་མ། །འདོད་ལ་མངོན་སྲེད་སྒྱུ་མའི་རི་དྭགས་ཀྱིས། །སྐྱེ་རྒ་ན་འཆིའི་མྱ་ངམ་ཐང་ཆེན་པོར། །འགྲོ་མང་སེམས་ཀྱི་དགའ་བྱེད་ལྷ་དེ་ངལ། རྫོང་གཞིས་གྲོང་ཁྱེར་གདེངས་ཀ་འབུམ་ཕྲག་ལས། །ཡིད་ལ་ཚེར་ལྟར་རྩུབ་རེག་དེ་སྙེད་པས། །ས་སྤྱོད་ཀླུ་དབང་འབྱོར་པའི་སྙིང་པོ་ཀུན། །ཨེ་རཎྜ་ཡི་འབྲས་བུ་སྨིན་པ་བཞིན། །མ་རིག་མུན་འཐིབས་འཁོར་བ་མཚན་མོའི་མལ། །དུག་(༡༠༤ན)
གསུམ་གཉེར་སློང་ངེས་འབྱུང་སྐྱ་རེངས་ཀྱིས། །དྲངས་པའི་རྣམ་དཀར་དགེ་བའི་ཐུན་འཚམས་མཐར། །གཏན་མདུན་ཉི་མ་འོད་པོ་ཆེ་དེ་འཆར། །གྲངས་མེད་ཆོས་ཀྱི་ཕ་མཐའི་གནས་ལུགས་ཚད། །མཁྱེན་པའི་སྲང་གིས་གཞལ་ནུས་བཙོང་ཁ་པའི། །ངོ་མཚར་གསུང་རབ་གླེགས་བམ་ཆེ་རྣམས་ལས། །ལྷག་པའི་སངས་རྒྱས་བཀའ་དེ་དམིགས་སུ་མེད། །དེ་ལྟ་ན་ཡང་རྗེས་འཇུག་ལ་ལའི་ངག །འཁྲུལ་པའི་མཆིང་བུ་དབང་བརྟུལ་དད་པའི་རྗེས། །འབྲང་འགས་སྤྱི་བོར་བཟུང་སྟེ་མཁས་གཞན་གྱི། །བསྟན་བཅོས་ཡིད་བཞིན་ནོར་ཡང་དོར་ནས་བཤུད། །ལེགས་པར་བཤད་ཚེ་གྲངས་ཅན་རིང་ལུགས་ཀྱང་། །ཐོས་དང་བསམ་པར་བྱེད་པའི་དབང་རྣོན་བདག །ཀུན་སློང་དུག་ཆུ་མྱོས་པའི་གོམ་སྟབས་ཀྱིས། །རིས་མེད་ཐུབ་བསྟན་པད་ཚལ་ག་ལ་རྫི། །ཡིག་དྲུག་བཟླས་ལུང་སྦྱོར་དངོས་རྗེས་ཚང་ཙམ། །མི་ཤེས་བླ་ཆེན་ཁྲ་ཏའི་གྲལ་རིང་དེར། །བཅུ་ཕྲག་རིག་གནས་སྐད་སྙན་འཁྲོལ་བའི་བྱ། །གཞན་གསོས་བློ་ལྡན་བདག་ཆུང་དཀར་མིན་འབྲས། །རྒྱལ་དར་དེ་སྲས་སྤྲུལ་པའི་སྐུར་འབོད་པའི། །སྒྲོ་བཏགས་སྙན་པའི་ཕུབ་མ་འགྲམ་པའི་འོག །ཐ་མལ་ངན་སྤྱོད་ཉལ་འགྲོ་འཁྱིལ་བའི་དོང་། །ཆེས་ཆེར་སྙིགས་མ་ལྔ་བདོའི་བྱེད་པོས་སྤྲུལ། །ལོངས་སྤྱོད་འཁོར་མང་ཚུལ་འཆོས་མཛེས་པའི་གར། །བསྟན་འཛིན་གཟུགས་སུ་བསྒྱུར་ནས་གཞན་སླུ་བ། །ཐག་ཁྲ་སྦྲུལ་དུ་སྣང་ལ་དངངས་པའི་གྲོགས། །རྫུན་མཚང་གཟུགས་བརྙན་འཆར་བའི་མེ་ལོང་འདྲ། །ཉོན་མོངས་ཆོས་ལྟར་སྤྱོད་པའི་དམོད་པ་ཡིས། །གཞུང་ལུགས་མང་པོར་ཐོས་པའི་མཚན་མ་སྟོང་། །གཞན་ཕན་མིག་ཏུ་(༡༠༤བ)
བརྫུས་ནས་མོས་ལྡན་ལྷ། །འདྲིད་པའི་ཚུལ་ལ་ཡིད་སྐྱོའི་མཆི་མ་ཀུ། །འདོད་པའི་ར་གན་ཚུལ་འཆོས་གསེར་ཆུ་ཡིས། །བཀྲུས་ཟོང་ཚོང་འདུས་འགྲིམ་པའི་སྒྱུ་མ་མཁན། །སྐད་ཅིག་ཙམ་ལ་ལོ་བརྒྱའི་སྡུག་བསྔལ་བའི། །སླུ་བྱེད་འདི་ལ་ཡིད་སྟོན་སྨྱོན་པའི་གར། །ལོག་རྟོག་ཆུ་བོར་བླུན་སྒོམ་གྲུ་ཞིག་ནས། །སེམས་ཀྱི་མགྲོན་པོར་ཐར་པའི་སྲོག་བྲལ་བའི། །ཕྱག་ཆེན་མིང་གིས་བསྙད་པའི་དྭགས་བརྒྱུད་ཕལ། །ངན་སོང་ཀློང་དུ་སྤྲོ་བས་སྦྲོན་པ་བཞིན། །དེའི་རིགས་མུ་ལྟོའི་ཆས་ཀྱི་མིའུ་ཐུང་། །སྟོབས་འབྱོར་ས་གསུམ་འདོད་ཀྱང་ཆགས་བྲལ་ཞིང་། །བྱ་བཏང་ཐ་གུའི་ལྟོ་ཅན་གྱ་གྱུའི་བློ། །གཟུགས་སུ་གྲུབ་ན་མཁའ་འདི་སྣོད་དུ་ཆུངས། །ཀྱེ་མ་དེ་ལྟའི་ངན་ཕན་སྤྱོད་ཞགས་པ་ཡིས། །རང་བཞིན་འཁོར་བའི་བཙོན་རར་བཅིངས་མཐོང་ཚེ། །འཇིག་རྟེན་ཁྱིམ་གྱི་བདག་པོ་ཡ་རབས་རྣམས། །གྲགས་ཆེན་སངས་རྒྱས་དེ་ལ་མི་རིང་ཉེ། །བཀའ་བཙན་རྒྱལ་ཁྲིམས་གསེར་གྱི་གདང་བུ་རྣམས། །འཇམ་གཉེན་ཆོས་ཁྲིམས་དར་གྱིས་ལེགས་སྦྲེལ་ནས། །སྐུ་གསུམ་ཁང་པར་བགྲོད་ལ་ཚེགས་ཆུང་བ། །མི་དབང་ཁྱོད་ཀྱིས་འདི་ཕྱིའི་དོན་གཉིས་འགྲུབ། །ཨེ་མ་ཆེན་པོའི་ཁུངས་ལྡན་རིགས་ཀྱིས་བཙུན། །ལྷ་མིའི་ཆོས་རྣམས་སྒྲུབ་ལ་དཔྱོད་བཟོད་མཁས། །ཡ་རབས་ཆས་ཀྱི་མཛེས་ཤིང་སྒྲིགས་ཀྱིས་བཟང་། །སྙན་འགྱུར་ཚིག་གིས་བསྔགས་འོས་ལྷ་སྲས་ཁྱོད། །ལེགས་བྱས་སྣ་ཞགས་རིང་བརྐྱང་མྱོས་བུམ་གྱིས། །རང་རིགས་མེས་པོའི་ཁྲི་ལ་དབང་བསྐུར་བས། །ཆོས་སྲིད་བླ་ནས་བླར་འདེགས་བཙན་པོའི་ལས། །ཤུགས་ཀྱིས་གསེར་ལྡན་མ་ཡང་རྗེས་སུ་འབྲང་། །རྣམ་ཐོས་བུ་ཡི་ཁེངས་འཕྲོག་མཚན་བཟང་སྐུ། །རྗེན་པར་ལྟ་(༡༠༥ན)
བར་མ་བཟོད་བྱེད་པོ་ཡིས། །རིན་ཅེན་གའུ་རྣ་རྒྱན་དཀར་དམར་ཤལ། །རྩི་བེར་སྣལ་གོས་འཇའ་རིས་ཟོལ་གྱིས་བསྒྲིབས། །མགྲིན་པ་ལོངས་སྤྱོད་འཁོར་ལོའི་འདབ་བརྒྱ་ནས། །གསུང་གསང་འཇེབས་པའི་གེ་སར་སྐྱུགས་པའི་རྡུལ། །བཏུངས་པའི་རོས་མྱོས་ཆབ་འབངས་བུད་པའི་ཁྱུ། །དགའ་བའི་གླུ་ལེན་སྐྱིད་པའི་གར་གྱིས་བྲེལ། །ཤེས་བྱར་སྣང་ན་འབྱམས་སུ་ཀླས་པའི་བློའི། །ཉིན་བྱེད་འབུམ་ཕྲག་འཆར་བའི་ཐུགས་ཀྱི་མཁའ། །ཟབ་ཅིང་བརླིང་པའི་ཕ་མཐའ་གཟིགས་པ་ལ། །ཀུན་མཁྱེན་ཚད་མའི་སྤྱན་གྱིས་དཀྱུས་དེ་ཐུང་། །འཁོར་དང་མྱང་འདས་ཀུན་སྐྱེད་མཛའ་ན་མོའི། །བཞིན་རས་བཀྲུ་བའི་ལྔ་རིག་གངྒཱའི་ཆུ། །བློ་གྲོས་རྣ་བར་འཛིན་ལ་ངལ་མེད་པའི། །དྲང་སྲོང་ཆུ་ལྷའི་བུ་དེ་ཁྱོད་མིན་སུ། །སྒྱུ་རྩལ་དྲུག་ཅུའི་ཤལ་ལ་ཀི་ཡི་ཐགས། །ཟ་བྱེད་སྔ་ན་མེད་པའི་གླང་པོ་འདིས། །བརྒྱ་བྱིན་རང་གི་བཞོན་པའི་སྙེམས་བཏང་ནས། །བལྟ་ཕྱིར་མིག་སྟོང་སྤྲུལ་ཏེ་མཁའ་ལ་འོངས། །མཁྱེན་དཔྱོད་ས་སྲུང་སྣས་བུས་ཆབ་ཀྱི་རླངས། །ཤེས་བྱ་ནམ་མཁའི་ཕ་མཐའ་འཇལ་བ་ན། །ཐམས་ཅད་གཟིགས་པའི་གྲགས་པ་དོན་ལྡན་པ། །ཉི་མའི་གཉེན་གྱི་དཔེ་ཟླར་དེང་འདིར་གྲུབ། །པདྨའི་སྐུད་པ་ལྟར་ཕྲ་རིག་པའི་རྩལ། །བློ་གྲོས་སྟོན་གྱི་ལྷ་ལམ་དངས་པའི་ངོས། །མཐའ་ཡས་སྲིད་པའི་གནས་ལུགས་རྒྱུ་སྐར་ཚོགས། །ཅིག་ཅར་ཤར་ཡང་དོག་པ་མེད་དེ་མཚར། །དཔའ་བརྟུལ་ཡན་ལག་སྟོང་གི་སྒྱུར་ཐབས་ཀྱིས། །གཞན་སྡེ་ཐལ་མར་འབིགས་ནུས་ཉག་ཕྲན་ཆར། །འབེབས་པའི་སྲིད་སྒྲུབ་མདུན་སར་དུས་མཐའི་རླུང་། །འཚུབ་འདྲའི་བདུད་ཀྱི་དམག་དཔུང་ཆས་ཀྱང་འཇིག །ཕལ་སྤྱོད་སྐད་ངན་བརྒྱལ་ཡང་རི་དྭགས་གཙོར། །སྟོབས་འབྱོར་རམས་ཀྱི་མདངས་(༡༠༥བ)
སུ་བསྒྱུར་མིན་པའི། །གོང་མའི་ལུང་ལས་ཆོ་རིགས་རྩལ་གསུམ་ཀུན། །རྫོགས་པའི་གདོང་ལྔ་པ་དེ་ཁྱོད་དུ་ཁུམས། །ལོ་འབྲས་སྡོང་བུ་མཚུངས་པ་ལྗོན་པའི་ཤིང་། །སྐྱེད་ཚལ་ར་བར་བགྲང་ཡས་འཕྲེང་བཀོད་ཀྱང་། །བྱང་ཆུབ་ཤིང་གི་སྙིང་པོ་ཨ་ཤྭཏྠ། །གྲིབ་མ་གཉིས་པའི་གྲོགས་ལས་གཞན་ན་མེད། །དེ་ཕྱིར་ཆོས་ནོར་འདོད་དང་ཐར་པ་ཡི། །གསེར་སྒོང་རང་བློའི་དྲོད་ཀྱིས་ཡོངས་སྨིན་པའི། །འཇིག་རྟེན་བྱེད་པོར་གྲུབ་ཟིན་ཁྱོད་སྙན་དུ། །བཞེད་སྐུལ་པི་ཝང་རྡུང་བ་ངལ་བའི་རྒྱུ། །འོན་ཏེ་ཆོ་འབྲང་དཔལ་གྱི་བེའུའི་གཟུགས། །སྙིང་གར་ལེགས་འཁྱིལ་ཞང་པོར་མཛའ་བའི་ཚིག །གཙུག་ལག་སྨིག་མའི་ཚལ་རྒྱུ་གནག་གི་ཚས། །གྲོས་སུ་གླེང་བར་འོས་ཕྱིར་ཚུལ་འདི་གསོན། །དགྲ་སྡེ་རྣམ་པར་གནོན་ལ་དཔའ་བའི་རྩལ། །ཕྱག་ན་འཁོར་ལོ་ཁྲོས་པའི་དྲག་ཤུལ་དང་། །རང་སྲིད་རྫོགས་ལྡན་དུས་བཞིན་སྐྱོང་བ་ལ། །ང་ལས་ནུ་ཡི་ཁེངས་པ་ཐུང་ངུར་མཛོད། །མ་འདྲེས་འབྲས་འབྱིན་བདུད་རྩི་དུག་བུམ་ཟུང་། །མི་མངོན་ཐུགས་ཀྱི་ཆུ་གཏེར་ཀློང་སིམ་ནས། །གསུང་འཇམ་འཛུམ་པའི་རླབས་ཀྱིས་གཞན་སེམས་སྣ། ཁྲིད་ཚེ་འཇུག་པ་བཅུ་པའི་སྤུན་ཟླར་གྱུར། །ཐབས་ཀྱིས་མཚང་འདྲུ་སྙན་པར་སྨྲས་བ་ཡིས། །མི་བསྲུན་དགྲ་སྡེའི་སེང་གེའི་བློ་བྲིད་ནས། །བརྩོན་ར་ཁྲོན་པར་བཅུག་སྟེ་སྲོག་འཕྲོག་པའི། །བརྣག་པ་ཡིད་ལ་འཆང་བ་དགྲ་ཐབས་མཁས། །རྒུད་ཚེ་སྒྱིད་པའི་ཙན་དན་སྡོང་བུར་འཁྲིལ། །འབྱོར་ན་གཉའ་བའི་ཡལ་འདབ་རྩེར་ཞོན་པའི། །གུས་ཞེན་ཁ་གཅིག་ནས་རྐྱོང་ལྕེ་གཉིས་པ། །ཐབས་མཁས་རི་དྭགས་ལྟེ་བའི་དྲི་ཡིས་གདུལ། །དཀར་ནག་ལས་ཀྱིས་མཐོ་དམའ་བར་པ་རུ། །བགྲོད་པའི་བཤུལ་རྗེས་འབྲང་བ་གྲིབ་མའི་འབངས། །གཉིས་མིན་གཅིག་ཏུ་སྒྲིལ་བའི་བློ་རྩེ་ཅན། །སྙིང་གི་ཐིག་ལེར་སྐྱོང་འོས་སེམས་ཀྱི་བུ། །རིགས་བཟང་བཀྲ་ཤིས་གསེར་མིག་འཁྱིལ་བའི་ཉ། །མི་འབྲལ་མགོན་སྐྱབས་སྲུང་མའི་ཆུ་བོའི་ཀླུང་། །གསོལ་མཆོད་བསྟེན་པའི་ནོར་བུ་ཀེ་ཏ་ཀས། །(༡༠༦ན)
དགྱེས་ཞལ་མཐོན་པོར་དྲུངས་པའི་ལྷ་ངོ་བསྟོད། །མཛོད་སྤུའི་ཟེར་གྱི་ཆས་ཀྱང་འཆི་བའི་མུན། །མཐར་བྱེད་ཚེ་དཔག་མེད་དང་རྣམ་པར་རྒྱལ། །ཡིད་བཞིན་འཁོར་ལོའི་ཏིང་འཛིན་བཟླས་རྗོད་ཀྱིས། །ལས་ཀྱི་མེ་ལོང་རི་མོར་མར་མེར་བྱེད། །བག་ཡོད་ཞིང་པའི་ལུས་ཕྲ་མའི་མངལ་ནང་། །དུས་ཁྲིམས་ས་བོན་ཀུནྡ་ལེགས་སྨིན་པའི། །མཐོ་རིས་མྱུ་གུའི་ཁྱེའུ་བསྐྲུན་པ་ལས། །ཐར་པའི་འབྲས་བཟང་ན་ཚོད་དར་དེར་གཟིགས། །ཉམ་ངའི་འབྱུང་པོ་ལེགས་པར་མངོན་ཕྱོགས་བམ། །བརྩོན་པས་འགྲུབ་ཚེ་འབྱུང་བའི་ལྕེ་བཅད་ནས། །སྦྱིན་སོགས་རྒྱལ་སྲས་སྤྱོད་པར་གྱུར་པའི་གསེར། །བྱང་ཆུབ་སྙིང་པོའི་བར་དུ་མཛད་མེད་འཕེལ། །རིམ་གཉིས་ལྟེ་བ་འཕྲིན་ལས་རྩིབས་སྟོང་གིས། །བདུད་བཞིའི་དགྲ་ཚོགས་ལས་རྒྱལ་རྔ་བོ་ཆེ། །རྡུང་དང་ལྷན་ཅིག་ཟུང་འཇུག་ཐོབ་པའི་དར། །རིགས་ཀུན་བདག་པོའི་ཁང་བཟང་རྩེ་མོར་ཕྱོར། །དེ་ཕྱིར་འཚོ་བ་དོན་ལྡན་བྱེད་པའི་ཐབས། །མཁའ་འགྲོའི་ཁ་རླངས་འཐུལ་བ་ངེས་གསང་ཆོས། །ཚད་མ་བཞི་ལྡན་བསྟན་དང་སྟོན་པ་མཆོག །མཇལ་ཞིང་ཐོས་བསམ་བྱར་ཡོད་སྐལ་བ་ཆེ། །དགག་སྒྲུབ་རྣམ་པར་རྟོག་པའི་དབང་པོའི་གཞུ། །མ་དག་སེམས་ཀྱི་འཆར་སྒོར་སྣང་བའི་འཕྲུལ། །བཟོ་མེད་རིག་རྩལ་དབྱིངས་ཀྱི་དག་པའི་མཁར། །ཀུན་རྫོབ་ཆོས་ཀྱི་གཟུགས་བརྙན་གར་མ་མཐོང་། །ཨ་ཤད་དྲོད་ཀྱིས་ཧམ་ཡིག་ཞུ་དེའི་རྒྱུན། །སྟོང་དང་དབྱེར་མེད་ཟུང་དུ་འཇུག་པའི་ཁམས། །འཇའ་ལུས་རྡོ་རྗེའི་སྐུར་སྨིན་དག་ཞིང་བཅས། །སྐལ་བཟང་ཁྱོད་ཀྱི་བསྒྲུབ་བྱ་ཡིན་ནམ་སེམས། །སྭསྟི་ཀ་ཡི་སྒྲར་དྲངས་ཤིས་རྗོད་ཀྱིས། །ལྷ་གཅིག་རིན་ཅེན་མྱུ་གུ་བཀྲམ་པའི་ཁྲིར། །འབངས་རྣམས་བྱམས་པས་བདེ་བར་སྐྱོང་བའི་ཆེད། །ཡུན་དུ་གཡོ་མེད་འཚོ་ཞིང་གཞེས་ཤིག་གུ །མཉེས་གཤིན་བརྩེ་བའི་མ་ལ་ཡ་ཡི་རླུང་། །འགྲོ་འོང་ཆད་པ་མེད་པས་ཁྱེར་བའི་དྲིས། །མངོན་སུམ་མཐོང་ལ་ས་ཡིས་རིང་བསྐལ་བ། །(༡༠༦བ)
བརྣག་དཀའི་ཚ་གདུང་མིང་གི་ལྷག་མར་བྱེད། །རབ་དཀར་ལྷག་བསམ་ཆུ་བོ་བྱེ་བའི་རྒྱུན། །འབབ་པའི་ཡིད་ཀྱི་རྒྱ་མཚོ་འཕེལ་བའི་འཕྲིན། །བརླང་ཚིག་དྲི་བྲལ་ཟླ་ཤེལ་བགྲོད་པའི་འགྲོས། །རང་གི་ངང་ཚུལ་མི་གཡེལ་གཡར་དམ་གཅེས། །ཐགས་བཟང་དཱུ་ཀཱུ་ལ་ཡི་གོས་གྱོན་པའི། །ཚིག་དོན་ལྟ་ན་སྡུག་པའི་གར་མཁན་ཞིག །ཕྱོགས་ལས་རྣམ་པར་རྒྱལ་བའི་ཁང་བཟང་རྩེ། །མི་རྗེ་འཆི་མེད་བདག་པོའི་མདུན་སར་སོང་། །མེ་སྤྲེ་ལོ་གོང་གི་གསེར་ཡིག་པར་བྱམས་གླིང་སྨན་པ་སངས་རྒྱས་རྒྱལ་མཚན་དང་མཁར་སྔོན་པོའི་དེམ་ཅི་དར་གན་ཆོས་རྗེ་བྱུང་བ་ཕྱིར་ལྡོག་པ་དང་ལྷན་ཅིག་པར་ཇོ་རིག་ཐུ་དབོན་པོ་ངག་དབང་བློ་གྲོས་མི་སྣར་བཏང་བའི་དུས་ཀྱི་ཞུ་ཡིག་རྫོགས་ལྡན་པད་དཀར་བཞད་པའི་འཛུམ་མདངས། ཁ ས རྦྦ གཽ རྨ ཎྜ ལ བྲྀ ཤྱ ཙ ཀྲི ཙཱ རཱ ས ཧ སྲཱ ཨ བྷི ལ ཤྱ ཝ རྟི། མ ཉྫོ སྶ རོ ཏྟ རྱ མ ཧཱ ཙ པཱ དཱ ཀྲྀ ལོ ཀ ཤ ཉྫོ ན ར རཱུ བ མཱུ ལ། །(༡༠༧ན)
གནམ་(སྡེབ་སྦྱོར་ཉེར་སྤྱོད།)སའི་དཀྱིལ་འཁོར་ཀུན་ལ་བསོད་ནམས་ཀྱི། །རྩིབས་སྟོང་འཁོར་ལོས་མངོན་པར་དབང་སྐུར་བའི། །འཇིག་རྟེན་བྱེད་པོ་ཚངས་དབང་མིའི་གཟུགས་ཅན། །འཇམ་དབྱངས་གོང་མ་ཆེན་པོའི་ཞབས་དྲུང་དུ། །རྩོད་དུས་སྙིགས་མས་སྦགས་པའི་འདམ་རྫབ་ནང་། །རྫོགས་ལྡན་པད་དཀར་འདབ་བརྒྱད་རབ་བཞད་པས། །ཕན་བདེའི་སྦྲང་རྩི་སྟེར་བའི་གྲགས་སྙན་སྒྲ། །རྣ་བའི་བཅུད་ལེན་གྱུར་པས་མཆིད་འདི་ཞུ། །འཇམ་དཔལ་རྡོ་རྗེ་རྣོན་པོའི་སྒྱུ་མའི་འཕྲུལ། །ས་སྐྱོང་རྒྱལ་པོའི་རྣམ་པར་ཤར་བའི་གར། །མཐོང་བས་དོན་དང་ལྡན་པ་རྡོ་རྗེའི་སྐུ། །གཡོ་བ་མེད་དེ་འགྲོ་འདིའི་བསོད་ནམས་དཔལ། །སྲིད་ཞིའི་གཙུག་ཏོར་རྩེ་ན་རབ་བཀྲ་བའི། །བཀའ་ཐམ་ཚེ་རིང་གནམ་གྱི་ཤེ་མོང་ཅན། །ཕྱི་ནང་གོས་དང་སྣ་ཚོགས་རིན་པོ་ཆེའི། །རྨད་བྱུང་བདོག་པའི་སྐྱེས་དང་བཅས་པ་ཕེབས། །ཆོས་སྲིད་གཉིས་ལྡན་གངས་ཅན་དབུས་འགྱུར་འདིར། །བདེ་བར་འཚོ་བའི་སྡོམ་བརྩོན་ཀུ་སཱ་ལི། ཁམས་གསུམ་ཆོས་ཀྱི་རྒྱལ་པོ་བཙོང་ཁ་པའི། །བསྟན་པ་ཕྱོགས་བརྒྱར་སྤེལ་བའི་འདུན་པར་གནས། ཁམས་གསུམ་ཀུན་ལས་རྣམ་པར་རྒྱལ་བ་ཡི། །རིགས་ལྡན་རིགས་ཀྱི་དབང་ཕྱུག་དམ་པ་ཁྱོད། །ལྷ་བཅས་སྐྱེ་རྒུའི་གཙུག་ན་མངོན་འཕགས་པའི། །གཏམ་འདི་དྲི་ཟའི་ཕང་འགྲོའི་སྒྲ་ལས་སྙན། །གང་ཕྱིར་རྒྱལ་དང་རྒྱལ་སྲས་སྙིང་སྟོབས་ཅན། །བསམ་བཞིན་འཁོར་ལོས་སྒྱུར་བའི་སྲིད་འཛིན་པར། །ཚད་ལྡན་གསུང་རབ་དུ་མར་ལེགས་གསུངས་པའི། །ཚུལ་འདིར་ཐེ་ཚོམ་ཁྱོགས་ལ་སུ་ཞིག་འཕྱང་། །ནོར་འཛིན་མ་འདིས་བཏེག་པའི་ཁོར་ཡུག་སྟེང་། །གནས་པའི་སྐྱེ་རྒུའི་རེ་བ་སྐོང་བ་ལ། །ལྷ་ཁྱོད་དཔག་བསམ་ཡོངས་འདུའི་ལྗོན་པའམ། །ཡིད་བཞིན་དབང་གི་རྒྱལ་པོ་གཅེས་པར་ངེས། །འཁོར་ལོས་སྒྱུར་རྒྱལ་རྫོགས་ལྡན་དུས་(༡༠༧བ)
ཁོ་ནར། །འབྱུང་ཞེས་ཆོས་མངོན་གཞུང་དུ་བཤད་པ་རྫུན། །བདེན་ན་རྩོད་པའི་དུས་འདིར་གནམ་དང་ས། །ཀུན་གྱི་དབང་ཕྱུག་ཁྱོད་ཉིད་སུ་ཡིས་བསྐྲུན། །བདེ་སྐྱིད་སྣང་བ་སྟེར་ལ་ཉིན་མོར་བྱེད། །ཕྱོགས་ལས་རྣམ་པར་རྒྱལ་ལ་ལྷ་མིན་བཟང་། །གཙུག་ལག་ལུགས་བརྒྱ་སྨྲ་ལ་འཇམ་པའི་དབྱངས། །སྲིད་ཞིའི་བྱེད་པོར་གོང་མ་ཧོང་དེའི་མཚན། །ཞབས་པད་གསེར་འབྲུག་གིས་བཏེག་ཁྲི་ཆེན་པོར། །བསྐལ་བརྒྱའི་བར་དུ་ནམ་ཡང་གཡོ་མེད་ཅིང་། ཁྲིམས་གཉིས་གདུགས་དཀར་ནོར་བུའི་ཡུ་བ་ཅན། །སྲིད་པའི་རྩེ་མོའི་བར་དུ་འཁོར་གྱུར་ཅིག །ཟབ་ཅིང་དཀྱིལ་ཆེ་གངས་ཐུགས་བྱམས་བརྩེའི་མདངས། །དགྱེས་འཛུམ་ཞལ་གྱི་གངས་རི་ལས་འོངས་པའི། །ཕེབས་ཚོགས་གང་གཱའི་རྒྱུན་ལ་འགྲན་པ་དག །ཉི་ཟླའི་འགྲོས་ལྟར་ཆད་པ་མེད་པ་ཞུ། །ལྷ་མིག་རྣམ་པར་དག་པའི་སྤྱན་རས་ཀྱི། །གཟིགས་པ་འབབ་རྟེན་རིན་ཅེན་འཕྲེང་བ་གསུམ། །གཞོན་པ་མཆོག་དང་འཇམ་ཕྲུག་ཁྲེས་རྣམས་ལ། །རྟགས་ཀྱི་རེ་ཁའི་ལང་ཚོས་རྣམ་སྤྲས་ཏེ། །ཀུན་ཕན་མགོ་ཡིས་ཉ་བ་གཞུ་ཡི་ཁྱིམ། །དཀར་པོའི་ཕྱོགས་ཀྱི་རྒྱལ་བ་གསུམ་པ་ལ། །སྡེ་བཞིའི་དཔལ་མངའ་དགའ་ལྡན་ཕོ་བྲང་ཞེས། །གྲུ་འཛིན་རི་བོའི་ཁང་བཟང་རྩེ་ནས་ཕུལ། །མངའ་རིས་རུ་ཐོག་དབང་པོ་མང་ཐོས་ཡོན་ཏན་གྱི་ཁུར་ལྡན་དེ་མི་བསྲུན་གཞན་རྐྱེན་གྱིས་དབུས་གཙང་ཕྱོགས་སུ་གཞི་བབ་ནས་ཡུན་རིང་སོང་མཐར་སྙན་ཚིག་བྱུང་བའི་མཕྲིན་ལན་གདུང་སེལ་སྣང་བའི་མཆོད་སྦྱིན། (༡༠༨ན)
པྲོ བཱ དྷྱཱ ཡ ཙ ད ཏྟ གཱ མ ཤཽ བྷི ཀྱཱ ཙི ནྟ མ ཎེཿ སུ ཁཻ རྷི ཏ། སཾ བུ དྡྷ སྱ མ དྷུ རྱ ནཱ མ མེ ར ཀྵཿ ཀཱི རྟི ཙ ཏ རྦྷ ཝཱ གྲ ཙ། །དགེ་(སྡེབ་སྦྱོར་དག་པའི་སྣང་བ།)བའི་ཡིད་བཞིན་ནོར་བུ་ལས། །ཕན་བདེའི་འདོད་རྒུ་རབ་སྦྱིན་མཁན། །རྫོགས་སངས་རྒྱས་ཀྱི་མཚན་སྙན་པོ། །སྲིད་རྩེར་གྲགས་ངེས་ཁྱོད་ལ་སྲུངས། །བགྲང་བྱའི་ཁུར་གྱིས་ཡལ་ག་འཁྱོགས་ན་ཡང་། །རྣམ་དཔྱོད་བླང་དོར་འབྲས་བཟང་ཡོངས་དུད་པ། །དཔག་བསམ་ལྗོན་པའི་སྤུན་ཟླ་གཉིས་པ་དེའི། །འཕྲིན་ཡིག་སྙན་ཚིག་འཕྲེང་བ་སུག་པར་སོན། །གནམ་བསྐོས་ཤར་ཕྱོགས་གོང་མའི་ལུང་ལས་ཀྱིས། །སྲིད་ཞིའི་གཙུག་ཏོར་རྩེ་མོར་ལེགས་བཅིངས་ཤིང་། །གཙུག་ལག་རྒྱ་མཚོར་འཇུག་པའི་སྤོབས་པའི་མགྲིན། །གཟེངས་སུ་མཐོ་བའི་གཏམ་འདིར་རྣ་བ་བློགས། །ལས་ཉོན་སྲད་བུ་ཐགས་སུ་ཉེར་བཏགས་པ། །སྟོབས་འབྱོར་འོད་བཀྲག་འཚེར་བའི་ཟ་འོག་གོས། །བདེ་སྡུག་རི་(༡༠༨བ)
མོའི་སྣང་བརྙན་མཐའ་ཀླས་པ། །བྱེད་པོ་དཀར་ནག་སྒྱུ་མའི་སྤྲུལ་སྒྱུར་མཁན། །སྐོར་གསུམ་ཡུལ་གྱི་ལོག་སྤྱོད་རི་དྭགས་སྲོག །འཕྲོག་འདོད་རཱ་མ་ཎ་ཡི་སྒྱུ་ཐབས་དེས། །ངལ་མཐར་སྐྱེ་རྒུའི་བདེ་བ་སི་ཏ་མོ། །མི་བསྲུན་འབོད་གྲོགས་སྤྲུལ་པས་ཁྱེར་གྱི་དོགས། །ལྷ་གཅིག་ཞང་དབོན་སྲིད་ཀྱི་ལྗོན་ཤིང་ལ། །དམན་འབངས་ལྟོས་འགྲོའི་ལུས་ཀྱིས་ཉེར་འཁྱུད་པའི། །ཚུལ་འདི་དུས་ཀྱི་དབང་གིས་སྐལ་ངན་པར། །བྱེད་པོ་གསེར་མངལ་ཅན་དེར་འགྲོ་རྣམས་བཤུད། །དེ་ལྟའི་སྐྱེ་རྒུའི་ངང་ཚུལ་ཆུ་ཤེལ་དབང་། །སྲིད་པའི་ལྷ་ལམ་ངོས་སུ་འཕེལ་འགྲིབ་ཅན། །སྙིང་མེད་ཨེ་རཎྜ་ཡི་འབྲས་བུ་ལ། །མཁས་ཁྱོད་རྨི་ལམ་རྩེད་འཇོར་ཅིས་མི་རྟོག །མི་བཟད་འདུ་བ་འཁྲུགས་པའི་རླབས་འཕྲེང་གཡོ། །ཟུག་རྔུའི་ཆུ་སྲིན་ཆེ་བ་རབ་གཙིགས་ཀྱང་། །ལེགས་བྱས་མཐུན་པའི་རླུང་གི་ཤུགས་དྲག་པས། །དལ་འབྱོར་གྲུ་གཟིངས་བདེ་བའི་གླིང་བགྲོད་སྙམ། །འཁོར་མུན་མིག་སྨན་ལྟར་གནག་མཚན་མོའི་མཐར། །ལེགས་བྱས་སྐྱ་རེངས་དང་པོར་ཤར་བ་ལས། །ཐར་པའི་སྣང་བ་འབུམ་སྡེའི་མཆོད་སྦྱིན་མཁན། །དགེ་ཚོགས་ཉིན་མོར་བྱེད་པ་རྟག་བསྟེན་རིགས། །མཆེད་ཟླ་གཉིས་མེད་བླ་མེད་བདུད་རྩིའི་བཅུད། །དུག་གསུམ་ནད་བརྒྱ་འཇོམས་པའི་ཐངས་གསོས་སྨན། །སྟེར་བའི་སྔོན་མེད་འཚོ་བྱེད་ཟས་གཙང་སྲས། །འདི་ཀོ་གྲགས་པ་དོན་ལྡན་ཐམས་ཅད་མཁྱེན། །དེའི་གསུང་དྲི་མེད་གནམ་སྔོན་བཞུན་མའི་མཚོ། །ཕྱག་ཆེན་རྒན་པོའི་རྙོག་མས་སྦགས་པ་ཀུན། །འཁོན་རིགས་འཇམ་མགོན་ནོར་བུ་ཀེ་ཏ་ཀས། །ལེགས་དྲུངས་དཔྱོད་ལྡན་དགའ་བ་བསྐྱེད་བྱའི་ཡུལ། །རང་རིགས་རྒན་པོའི་རི་བོང་ཅལ་རྗེས་སུ། །རྒྱུག་མིན་དབང་རྣོན་ཆོས་ཀྱི་རྗེས་འབྲང་ཁྱོད། །གྲགས་སྐམ་མཆིང་བུའི་དོ་ཤལ་མི་འཆོལ་བར། །ལེགས་བཤད་ནོར་བུ་གཙུག་ཏུ་བསྟེན་དེ་མཚར། །འདི་ན་འཇམ་མགོན་མི་(༡༠༩ན)
ཡི་སྲིད་པའི་གར། །ལེགས་སྒྱུར་ཤེས་བྱ་ཀུན་གཟིགས་བཙོང་ཁ་པའི། །རིང་ལུགས་འཆད་རྩོད་རྩོམ་པས་འཛིན་རློམ་གྱི། །ཚུལ་འདིས་དལ་འབྱོར་འཚོ་བ་དོན་ལྡན་ཙམ། །སྨན་ལྗོངས་ལྟ་ན་སྡུག་པའི་གྲོང་ཁྱེར་ནས། །སྨན་གྱི་བླ་མ་བཻ་ཌཱུར་འོད་པོ་ཆེའི། །སྨན་རྒྱལ་གསེར་མདོག་ལས་འོངས་ཟིལ་དངར་གྱི། །སྨན་ཡོན་དེས་ཀྱང་ཁྱོད་གདུང་སེལ་གྱུར་ཅིག །རབ་སྙན་རྒྱུད་མང་རྗེས་སུ་སྙེག་བྱེད་པའི། །རིན་ཅེན་སིལ་སྒྲ་འཁྲོལ་བའི་གདུ་བུ་འདི། །བློ་གྲོས་འདབ་གཤོག་རབ་རྒྱས་ལུས་དཀར་བའི། །འཁོར་ལོའི་ཡན་ལག་ཅན་དེའི་རྒྱན་དུ་འོས། །
རབ་བྱུང་བཅུ་གཅིག་པའི་ས་ཁྱི་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་ཁྱི་ལོར་བྲིས་པའི་ཆབ་ཤོག་འཕྲིན་ཡིག་ཁག །ས་ཕོ་ཁྱི་ལོ་གོང་ནས་ཤེས་རབ་བླ་མ། བསམ་གཏན་དགེ་སློང་སོགས་བཀའ་ཤོག་གནང་སྦྱིན་བཟང་པོ་སྐྱེལ་བར་བྱུང་བའི་ལན་སེ་ར་རབ་འབྱམས་པ་འཇམ་དབྱངས་གྲགས་པ་དང་ཆུས་བསྐོར་སྨད་པ་ནོར་བུ་གཉིས་འབུལ་བར་བཏང་པའི་དུས་ཀྱི་ཞུ་ཡིག་གནམ་བསྐོས་རིན་ཆེན་ཅོད་པན། ཏྲཻ བྷ ཝཱ ཙཽ ཏྟ རི ཀྱ པྲ ཨུ ནྣ སྱ རཱ ཛྙོ ཙ ལོ ཀེ ཤྭ རེ ཎཱ བྷི ཥི ཉྩ སྱ ཙ། །མཽ ཀུ ཊཱ ར ཏྣ ཙཱ སྨཱ ངྐ མཽ ལཽ བི ཤེ ཥ ཙྪ བེ རྦྷཱུ ཏ མཱུ ལ ཤྩ བྲྀ ནྡཱ ར ཀ །སྲིད་(སྡེབ་སྦྱོར་མེ་ཏོག་འཕྲེང་ཅན།)པ་གསུམ་གྱི་བླ་ན་རབ་མཐོ་བའི། །རྒྱལ་པོར་ཚངས་པས་མངོན་པར་དབང་བསྐུར་བ། །རང་རྟགས་རིན་ཅེན་ཅོད་པན་དབུ་རྒྱན་དུ། །མཛེས་པའི་ཁྱད་པར་ཅན་གྱུར་ལྷའི་ཞབས་དྲུང་། །(༡༠༩བ)
འཁོར་བའི་ལྗོན་ཤིང་དམན་པ་ལས་གཞན་པར། །ལྷག་པའི་ཐར་ལམ་མ་ལ་ཡར་སྐྱེས་ཀྱི། །བསླབ་གསུམ་མངར་བའི་དྲིར་སྤྱོད་དགེ་སྦྱོང་གིས། །རབ་དཀར་ཡིད་ཀྱི་ཀུནྡ་བཞད་དེ་ཞུ། །ཚེ་རིང་གནམ་གྱི་ཤེ་མོང་ཕྱག་རྒྱ་ཅན། །ཕུན་ཚོགས་རིན་ཅེན་ཟ་འོག་སྐྱེས་དང་བཅས། །གསེར་ཡིག་ཕོ་ཉའི་ལག་སོར་གྱིས་ཐོགས་ཏེ། །ནུབ་ཕྱོགས་ཆོས་ཀྱི་མདུན་སར་འགོག་མེད་ཕེབས། །བསོད་ནམས་བྱེ་བ་ཕྲག་བརྒྱའི་ས་བོན་འབྲས། །རབ་སྨིན་དར་བབ་སྐུ་གསུང་ཐུགས་ཀྱི་མཁར། །ཆོས་སྲིད་ཉི་ཟླའི་སྣང་བ་ཟུང་འབྲེལ་བའི། །འོད་ཀྱིས་ཁམས་གསུམ་ཁྱོན་ཀུན་ཅིག་ཅར་བཀང་། །དེ་ཚེ་རྩོད་པར་རློམ་པའི་སྡིག་ཏོའི་དཔུང་། །མ་རུང་མིག་སྨན་ལྟར་གནག་མུན་པ་ཀུན། །མིང་གི་ལྷག་མར་བཏང་བས་རྒྱ་ཧོར་སོགས། །ཉི་འོག་ཁམས་ན་ཕན་བདེའི་འོད་ཀྱིས་དཀར། །རིས་མེད་སྐྱེ་རྒུར་སྐྱེད་པའི་ངལ་སྟེགས་འདི། །ལྷ་གཅིག་བཀའ་དྲིན་ཁོ་ནར་ཤེས་གྱུར་ན། །འགྲོ་རྣམས་བསྐལ་པར་བསགས་པའི་བདོག་པ་ཀུན། །གཅིག་ཏུ་སྤུངས་ཀྱང་འཇལ་ནུས་ཕ་མཐའ་ཕྲ། ཁྱོད་སྙན་གྲགས་པ་དབྱར་རྔ་ལྟར་གྱུར་པས། །ཡོན་ཏན་རྒྱ་མཚོའི་འཇིང་ལྟར་ཟབ་བརླིང་བ། །མཐའ་དག་བརྗོད་ན་གསེར་མངལ་ཅན་གྱི་བློ། །རྣམ་དཔྱོད་དྲོད་ཀྱིས་སྨིན་ཡང་ཅུང་ཞིག་ངལ། །འདི་ན་ཆེན་པོའི་ལུང་འཛིན་ཀློག་པ་མཁན། །འགྲོ་ལ་རྗེས་བརྩེའི་རབ་དཀར་ལྷག་བསམ་དང་། །ཆོས་ཀུན་དབུ་མར་རྟོགས་པ་ཟུང་འཇུག་པའི། །སྣང་ཚུལ་འདིས་འཚོ་དལ་བ་དོན་ལྡན་ཙམ། །འཛམ་གླིང་ཡོངས་ཀྱི་ཕན་བདེའི་སྲོག་གཅིག་པུ། །གནམ་སའི་དབང་ཕྱུག་ནོར་འཛིན་སྐྱོང་བའི་རྗེ། །དཔལ་ལྡན་གོང་མ་རྒྱལ་པོ་ཆེན་པོའི་ཞབས། །གསེར་འབྲུག་གིས་བཏེག་ཁྲི་ལ་བརྟན་གྱུར་ཅིག །ཆད་པ་མེད་པ་གངྒཱའི་ཆུ་བོའི་རྒྱུན། །ལམ་གསུམ་དག་ལས་རྟག་ཏུ་འབབ་པ་ལྟར། །གང་གི་བཀའ་ཐམ་གསེར་གྱི་ཟམ་པོ་ཆེ། །(༡༡༠ན)
རྒྱ་བོད་ཡུལ་དུ་ཆད་མེད་འཛུགས་པར་གསོལ། །ལྷ་མིག་རྣམ་པར་དག་པའི་སྤྱན་རས་ཀྱི། །ཡུལ་དུ་འགྱུར་བྱེད་རིན་ཅེན་འཕྲེང་བ་དང་། །སྣ་ཚོགས་འཇམ་པོ་ཕྲུག་གི་གྲངས་བཅས་པའི། །ཉུང་ངུའི་བདོག་པའི་སྐྱེས་ལ་རྒྱས་སྤྲས་ཏེ། །རྣམ་འཕྱང་ཞེས་པ་ས་ཕོ་ཁྱི་ཡི་ལོ། །ཧོར་གྱི་ཟླ་བ་གསུམ་པར་ཡོངས་གྲགས་པའི། །གྲལ་ཚེས་དགེ་བར་ཆོས་ཀྱི་སྡེ་ཆེན་པོ། །དཔལ་ལྡན་འབྲས་སྤུངས་གྲུ་འཛིན་རྩེ་ནས་ཕུལ། །བླ་མ་ལྷ་རྩེ་བའི་སྤྲུལ་སྐུ་ངག་དབང་ཀུན་དགའ་ལྷུན་གྲུབ་ལུང་ལས་ཀྱིས་འདོད་པའི་རེ་བ་ཡོངས་སུ་བཀང་བའི་ཚེ་ཐམ་ཕུད་ཀྱི་ཚུལ་དུ་སྙན་ངག་གི་མཕྲིན་ཡིག་བྱུང་བའི་ལན་མངོན་འདོད་རྩེ་དགའ་གསར་བའི་གླུ། ན ཀྵེ བ ཛ ནྨཻ རྦྷ བ ཛ ནྻཱུ ཡུ རྦཱ སྨིཾ རཱ གི ཀཱ ནཱུ བ གྲྀ ཧཱི ཏ དཱི རྒྷ། །ཨ ངྒུ རྱ ས དྡི ཥྚ ཙ བྷ བྱ བ ཡི ལཱ ཏ ལླེ ཁ ད ཏྟེ ཀྲྀ ན ཀུ ལྱ ཛཱི བཾ། །ལུས་(སྡེབ་སྦྱོར་དབང་པོ་རྡོ་རྗེ།)ཅན་ཀུན་ལ་རྗེས་སུ་ཉེར་ཆགས་པའི། །མ་སྨད་སྐྱེ་བའི་སྲིད་པ་རིང་བཟུང་བ། །དམ་པའི་མྱུ་གུའི་དུས་ཀྱང་དགེ་བའི་འབྲས། །རིགས་མེད་འགྲོ་ལ་སྟེར་བར་བྱེད་དེའི་འཕྲིན། །(༡༡༠བ)
སྙན་འགྱུར་རྒྱུད་དུ་དྲངས་པའི་ཏམྦུ་ར། །ལྕི་ཡང་སྡེབ་སྦྱོར་གླུ་རུ་ཉེར་ཁུགས་པ། །སྒྲ་འཛིན་ཡུལ་དུ་སྙད་བྱེད་སའི་ཟླ་བ། །ཐགས་ཀྱི་རི་མོ་རྣམ་བཀྲར་བཅས་པ་འབྱོར། །གཅིག་ཤེས་ཀུན་ཏུ་གྲོལ་བའི་སྒྲོན་མེ་ཡིས། །རྨོངས་མུན་རུམ་དུ་བག་ལ་ཞ་བའི་ཆོས། །དྲང་ངེས་དབྱིབས་ཚུལ་ཁ་དོག་རབ་གསལ་བའི། །སྔོན་མེད་སྒྱུ་མའི་ལྟད་མོར་འབྱམས་ཀླས་གྲང་། །འོན་ཏེ་གྲངས་མེད་ལས་ཉོན་ཆེས་ཕྲ་བའི། །སྲད་བུ་ཐགས་སུ་བྱས་ལས་བདེ་སྡུག་གི །རི་མོའི་བཀོད་པ་སྣ་ཚོགས་འཆར་བ་འདིས། །ཀུན་རྫོབ་ཆོས་ཀུན་ངེས་པར་བདེན་མིན་ནམ། །བདུད་བཞིའི་གཡུལ་ངོ་འཇིག་ལ་ཉེར་དཔའ་བའི། །སངས་རྒྱས་ཞེས་བྱའི་མཚན་གྱི་སྒྲ་བོ་ཆེ། །འཐོབ་བྱེད་གསུང་རབ་ཡན་ལག་བཅུ་གཉིས་ཀྱི། །བརྗོད་དོན་རྟོགས་པའི་ཆོས་ཕུང་མཁའ་ལྟར་ཡངས། །འགྲོ་བློའི་ལྷ་ལམ་ཟད་མིན་དམ་ཆོས་ཀྱི། །དགུ་ཚིགས་སྐེ་རགས་མེད་པ་སྲིད་མིན་ཡང་། །འཆར་དང་ནུབ་པ་སྤངས་པའི་དམ་བཅའ་ཅན། །ཕྱག་ཆེན་སྔོན་མེད་ཉི་མའི་འོད་འདི་གསལ། །ཕལ་པའི་རླུང་ལས་ཁྱད་པར་ལྟེ་སྔོན་ཅན། །རྟོགས་པ་དོན་བརྒྱུད་ཤུགས་ཀྱིས་ཐུབ་པའི་བསྟན། །ཀུན་གསལ་འགྲམ་པར་རྒྱུ་བའི་ཕག་མོ་གྲུ། །སངས་རྒྱས་གཉིས་པའི་གྲགས་པ་ཕྱོགས་ཀུན་སྙན། །གང་གི་ཡེ་ཤེས་མེ་ཡིས་གཉིས་འཛིན་ལུས། །བསྲེགས་འབྲས་སྟོང་གཟུགས་གྲུབ་ལྡན་གྲངས་མེད་པ། །སྤེལ་ཚེ་གཙུག་ན་ཟླ་བ་ཁེངས་པའི་གཞུ། །ཉེར་གུག་གངས་རིའི་ཕག་ཏུ་དཀའ་ཐུབ་བསྟེན། །ཉམས་རྟོགས་རྒྱ་མཚོར་རོ་གཅིག་གླིང་རས་ཀྱི། །སྙིང་པོའི་ཟིལ་དངར་ལོངས་སུ་སྤྱོད་མཁས་པ། །འཆི་མེད་རིགས་ཀྱི་ཟླ་བ་གསར་པ་ཁྱོད། །གྲུབ་རིགས་ཀུནྡའི་ཚལ་དེ་བཞད་ལ་དཔའ། །འོན་ཀྱང་ཐ་སྙད་རིག་པའི་དཔལ་བེའུ། །སྙིང་གའི་ངོས་སུ་མཛེས་དང་ལྷན་ཅིག་པར། །ལུང་ལས་གོམ་པ་གཅིག་གིས་ཆེན་པོའི་སར། །བགྲོད་ཚེ་ཐ་གུའི་ལྟོ་ཅན་ངལ་བར་བཀོད། །སྙིང་པོ་བདེ་བར་གཤེགས་པའི་ཁང་བཟང་དུ། །འགྲོ་ཀུན་འདྲེན་པའི་ཆོ་ག་(༡༡༡ན)
རྫོགས་པའི་ཆེད། །ཐོས་བསམ་སྒོམ་པའི་རིན་ཅེན་ཐེམ་སྐས་ལ། །འཛེག་པའི་ཁུར་ཆེན་ཡུན་དུ་བསྟེན་པ་གཅེས། །དོན་བཟང་སེམས་ཀྱི་དེ་ཉིད་ནར་སོན་ཅིང་། །ཚིག་སྦྱོར་སྒྲོ་གཤོག་རྩལ་ཀུན་ཡོངས་རྫོགས་པའི། །མི་བསྐྱུད་འཕྲིན་གྱི་གཞན་གསོས་སྐད་སྙན་ཅན། །དཔྱིད་ཀྱི་ཕོ་ཉར་ཡང་དག་རྒྱུ་ཞིག་གུ །ཉམས་དང་འགྱུར་བའི་རོ་བརྒྱའི་དཔལ་ལྡན་པ། །ཟས་སུ་བགྱིས་སྣོད་ཟླ་བ་བཞུན་མ་ལི། །མཐའ་ཀླས་གཟུགས་བརྙན་བཀྲ་བའི་ཟ་མ་ཏོག །འཚམས་སྤྲིན་གཞོན་ནུའི་མདངས་ཀྱིས་འཁྱུད་དེ་སོང་། །སྟག་རྩེ་སྤྲུལ་སྐུ་ངག་དབང་ཀུན་དགའ་ལྷུན་གྲུབ་ཀྱི་སྙན་ཚིག་གི་འཕྲིན་ལན་དམ་པའི་ཁྱད་པར་རབ་གསལ། ཨཱ ལྱ ཎྜོ ཥྚ ཤྲུ ཏ སཾ ག ལྤ མེ དྷོ ད རྱཱ གམྱཱ ཨ བ བོ དྷཱཿ སུ བ ཙྱ། །སཱ དྷཱ ཀུ ལྱཱ ཀ ར སཽ ར པྲ ཥི ཏྱཾ དཱ སྨི ནྨི ཏྲཱ ཀ མ ལཱ ས ནྱ བྷཻ ཡ། །ཐོས་(སྡེབ་སྦྱོར་ཆུ་རླབས་འཕྲེང་བ།)བསམ་དྲོད་ཀྱི་བློ་གྲོས་ལྟོ་བ་རུ། །ལུང་རྟོགས་གསེར་གྱི་སྒོ་ང་ལེགས་སྨིན་པའི། །གྲུབ་རིགས་ཁར་ཉལ་ཚོགས་ཀྱི་བྱེད་པ་པོ། །བཤེས་གཉེན་ཚངས་པའི་སྤུན་ཟླ་གཉིས་པར་སྤྲིངས། །(༡༡༡བ)
ལེགས་བྱས་རི་དབང་འཕྲུལ་གྱིས་མངོན་འཐོན་པ། །ཉེར་ལེན་ཟླ་བའི་མཆེད་ཟླ་ཡོངས་འདུའི་ཤིང་། །ཚང་ཚིང་དམན་ལས་ཁྱད་པར་འཕགས་པའི་ཆོས། །ལྷག་བསམ་རོ་བརྒྱའི་འབྲས་བུས་དུད་ལས་ཅི། །གངས་ཅན་ར་བར་མང་པོས་བཀུར་བ་ཡི། །ལྷ་གཟིགས་རིགས་ཀྱི་འཁྲི་ཤིང་མྱུ་གུའི་རྩེར། །གནས་ལུགས་དོན་གྱི་སྐད་སྙན་གཞན་གསོས་གང་། །ཉེར་བསྟེན་དབྱར་གྱི་དགའ་སྟོན་རྣ་བར་འཇེབས། །མ་རིག་རྒྱར་ཆུད་འཁྲུལ་པའི་རི་དྭགས་འགྲོ། །ཐར་པའི་སྲོག་འཕྲོག་དྲ་བ་གཅོད་པའི་མཚོན། །གཉུག་མ་སེམས་ཀྱི་རལ་གྲི་རྣོན་པོ་དེ། །རྣམ་དཔྱོད་ཕྲག་པའི་ཁྱོགས་ལ་བླངས་སམ་ཅི། །ལོག་ཤེས་སྣང་ངོར་སྒྱུ་མའི་རྟ་གླང་ཚོགས། །གསོ་དང་གསོད་པའི་ཚུལ་བཞིན་ཐ་སྙད་དུ། །ཕན་གནོད་འཕྲིན་ལས་རྟེན་འབྲེལ་སྣང་བའི་ཆ། །རྒྱུ་དང་འབྲས་བུར་ངེས་པ་རྙེད་དེ་མཚར། །བག་ཡོད་ཚུལ་བཞིན་འཆོས་པའི་དུ་ཀཱུ་ལས། །སྒྲིབ་མིན་ངན་གཡོའི་སྨྱོས་བུམ་ཆེས་དཀར་བར། །སྲིད་ལས་རྩོད་པའི་མཚན་མ་སྟེང་གསལ་བ། །རྣམ་བཀྲའི་འདྲེན་བྱེད་ཚུལ་གྱིས་བག་ལ་ཞ། །སྲིད་པའི་བདེ་ལ་ཆགས་བྲལ་དཀའ་ཐུབ་ཀྱིས། །གྲངས་མེད་སྐྱེ་རྒུའི་ལྷ་རྣམས་བློ་འབྲིད་ཀྱང་། །ཕྱོགས་ཞེན་མདའ་ལྔའི་ཤུགས་ཀྱིས་དབང་མེད་དུ། །ཚུལ་མིན་ཨུ་མར་བརྩེ་བས་ས་འདི་གང་། །ཕྱག་ན་འཇམ་མཉེན་ཆུ་སྐྱེས་འདབ་བརྒྱའི་མཚན། །སྙན་པའི་དབྱར་རྔ་ཅན་དེའི་རིང་ལུགས་ཀློག །གཡོ་མེད་འགོག་པའི་ཆུ་འཛིན་ཕག་ཞ་ན། །གྲུབ་རིགས་ཐུན་གསུམ་མུན་པར་ཉལ་ལམ་ཅི། །རོ་འཛིན་ཤར་རིའི་སྟེགས་ལས་ཉེར་འཕགས་པའི། །ལེགས་བཤད་ཉི་མའི་འོད་བརྒྱ་སྤྲོས་པའི་ཚེ། །གཏམ་མེད་པདྨ་འཛུམ་པའི་ཆུ་སྒྲོས་ནས། །ཟེའུ་འབྲུའི་ཚེམས་དཀར་སྟོན་པ་མཚར་ཆེའི་གནས། །ཕྱག་རྒྱ་གཅིག་གི་གནས་ལུགས་དེ། །ཤེས་པས་ཆོས་ཀུན་(༡༡༢ན)
གྲོལ་ལོ་ཞེས། །སྒྲོག་པའི་སྐད་གསང་མཐོན་པོ་བཞིན། །རེ་བ་དོན་དང་ལྡན་ལས་ཅི། །དེའི་ཕྱིར་ལུགས་འདིའི་གདུགས་དཀར་པོ། །འཛིན་ཁྱོད་སྙིམ་པའི་ཟ་མ་ཏོག །མན་ཤེལ་ཞུན་མ་འཁྱིལ་བའི་ངོས། །སྣ་ཚོགས་རི་མོ་ཅི་ཡང་གསལ། །འབྲི་གུང་ཞབས་དྲུང་ཆོས་ཀྱི་གྲགས་པས་ཆོས་རྒྱལ་རིན་ཅེན་ཕུན་ཚོགས་ཀྱི་རྣམ་ཐར་དང་གཤིན་རྗེ་ཁྱབ་འཇུག་སོགས་ཀྱི་པུསྟ་ཀ་དང་བཅས་ཆབ་ཤོག་གནང་བའི་ལན་གསང་གསུམ་རྒྱན་གྱི་འཁོར་ལོ། ཛྙཱ ནཾ རྦྦཱ རཱ ཎཱཾ མ ཧ ཏཿ ས མུ དྲཱ ཧོ ནི རྨྨ ཆཱ ཡཱ མྲྀ ག དྷ རྱ ནི རྟི། །ཏྲཻ གུ ཧྱ བི བྱཱ ཀྵ ཡ ར ཏྣ ཙཱུ ཌཱ ལཾ ཀ རྱ པཱུ རྞྞཻ རྦྲྀ ཥ ཙ ཀྲ ལེ ཤཱཿ ཡེ་(སྡེབ་སྦྱོར་དབང་པོ་རྡོ་རྗེ།)ཤེས་མཆོག་གི་ཆུ་གཏེར་ཆེན་པོ་ལས། །ངོ་མཚར་སྤྲུལ་པའི་བསིལ་སྦྱིན་མཁན་པོའི་གར། །གསང་གསུམ་མི་ཟད་འཁོར་ལོའི་ཆ་ཤས་ཀུན། །ལེགས་གང་རིག་འཛིན་གཙུག་རྒྱན་རིན་པོ་ཆེར། །(༡༡༢བ)
སྐུ་གསུམ་དག་པའི་རང་བཞིན་འབྱམ་ཀླས་པ། །དཀྱིལ་འཁོར་རྒྱ་མཚོའི་བྱེད་པོར་ཡོངས་ཤར་བའི། །དགེ་སློང་རྡོ་རྗེ་འཛིན་པའི་སྣང་བརྙན་ལ། །གཞན་ངོར་ཉེར་འཚེས་གོས་མིན་ཕན་བདེའི་དཔྱིད། །སྣ་ཚོགས་ཐེག་པའི་ཆོས་ཀྱིས་གདུལ་བྱ་ཡི། །རང་རང་མོས་ངོར་འཇུག་པའི་གསུང་གི་གདངས། །འགྲོ་རྣམས་ཐེག་པ་མཆོག་ཏུ་བཀྲི་བའི་གླུར། །ལེན་འདིའི་དཔེ་ཟླར་དུས་གསུམ་རྒྱལ་རྣམས་བྲེལ། །སྒྲིབ་གཉིས་རྙོག་བྲལ་དྭངས་པའི་ཐུགས་ཀྱི་མཚོར། །ཤེས་བྱའི་གཟུགས་བརྙན་མ་ལུས་ཡོངས་ཤར་བས། །སངས་རྒྱས་རྣམས་ཀྱི་འབྱུང་གནས་འོག་མིན་ཞེས། །ལོགས་སུ་འཚོལ་བ་བྱིས་པའི་བློ་གྲོས་བཞིན། །འདི་ན་སྲིད་ལས་ངེས་འབྱུང་སི་ཏཱ་མ། །དོར་ནས་གཞན་ཕན་སྨིག་རྒྱུའི་རི་དྭགས་ལ། །སྙེག་འདོད་འཁྲུལ་བའི་བློ་ཡི་རཱ་མ་ཎ། །འཁོར་བའི་ཐང་ལ་ངལ་བ་ལྷུར་ལེན་ཙམ། །འོད་སྟོང་ཕ་མཐའ་ཡས་པའི་ཐུགས་རྗེའི་ཟེར། །སིནྡྷུའི་རྒྱ་མཚོར་འཕྲོས་པའི་ཡིད་བཞིན་ནོར། །འཛམ་བུའི་གླིང་ན་ཆེ་བའི་རིགས་སྔགས་འཆང་། །པདྨ་འབྱུང་གནས་གདུང་སོབ་ཁྱོད་མིན་སུ། །རྒྱལ་ཀུན་མཁྱེན་པའི་རང་བཞིན་འཇམ་པའི་དཔལ། །དུས་དགྲར་འཁོར་འདས་ཕྱག་རྒྱ་ཟིལ་གནོན་པ། །གྲུབ་པས་བདུད་སྡེའི་གཡུལ་ལས་རྣམ་རྒྱལ་བའི། །མཐུ་སྟོབས་གྲགས་སྙན་ཕྱོགས་ཀྱི་མགྲིན་པར་འཛེར། །མཇིང་ཡོན་ལྷ་སྲས་དག་པའི་སྨོན་ལམ་གྱིས། །ཡང་སྲིད་སྐྱུར་རའི་རིགས་སུ་ཉེར་བལྟམས་པའི། །སྣ་ཚོགས་རང་གྲོལ་ཉིན་བྱེད་ཆུ་ལྷའི་ཕྱོགས། །གཞོལ་ཡང་སྤྲུལ་པའི་ཟླ་ཁྱོད་འོད་ཀྱིས་གསལ། །སྟོང་ཆེན་ཕྱག་རྒྱའི་དགུ་ཚིགས་སྐ་རགས་ཀྱིས། །ཤེས་བྱ་ནམ་མཁར་ཕ་མཐའ་འཆིང་ནུས་པ། །གཉུག་མ་ཆོས་སྐུའི་རང་ཞལ་སྟོན་པ་ལ། །འགྲོ་མགོན་ཕག་མོ་གྲུ་པའི་ཚུལ་ལ་འཁུ། །སྣང་བཞིའི་འབབ་ཆུ་ཟད་མིན་དེ་སྲིད་དུ། །འཇའ་ལུས་གསེར་ལྡན་ལྟོ་བར་ཡོངས་འབབ་པའི། །ལྷུན་གྲུབ་ཆོས་ཀྱིས་གདུལ་(༡༡༣ན)
བྱ་སྨིན་མཛད་པས། །བཻ་རོ་ཙ་ན་གཟུགས་གཞན་གཉིས་པ་བཟུང་། །ཕྱག་རྫོགས་ཟུང་འཇུག་གསེར་གྱི་མྱུ་གུ་དག །ལེགས་བཀྲམ་ཆོས་སྲིད་གཉིས་ལྡན་ཁྲི་ཆེན་པོར། །རིག་འཛིན་བྱེ་བའི་ཤིང་རྟ་ཆེན་པོ་བ། །བཤད་སྒྲུབ་བསྟན་པའི་བཅས་སུ་རྟག་བརྟན་གསོ། །བཅུ་གཉིས་ཁྱིམ་གྱི་བགྲོད་པའི་ལམ་ཡངས་པོར། །རྒྱུ་སྐར་འཕྲེང་བ་འཆད་པ་མེད་པ་བཞིན། །ལེགས་པར་བཤད་པའི་བཀའ་མཆེད་གཏམ་གྱི་འཕྲེང་། །ཛཧྣུ་ཡི་བུ་མོའི་སྤུན་ཟླར་ཞུ། །དྲི་མ་མེད་པའི་སྤྱན་རས་བྷྲ་མ་ར་། །ཉམས་དང་འགྱུར་བའི་ཚལ་དུ་འཇུག་པའི་རྟེན། །ལྷ་རྫས་རིན་ཅེན་གཉིས་པའི་པདྨ་དཀར། །རྒྱ་ཡི་ལང་ཚོས་འཁྱུད་དེ་ཕུལ་པ་དགེ །རྒྱ་གར་གྱི་རྒྱལ་པོ་ཤཱཀྱ་རཱ་ཛའི་སྲས་འབྲིང་པོ་ཤར་ཕྱོགས་བྷཾ་ག་ལའི་གྲོང་ཁྱེར་ལ་དབང་སྒྱུར་བ་རྒྱལ་པོ་ཤ་ཧ་སུ་ཛས་མ་ཧཱ་མ་ད་ཤ་བཱི་གསེར་ཡིག་སུ་མངགས་ཏེ་འཕགས་ཡུལ་གྱི་བདོག་པའི་སྐྱེས་བཟང་པོ་བྱུང་བའི་དུས་བསྲིངས་པའི་འཕྲིན་ཡིག་རིགས་སྟོབས་དཔལ་གྱི་མངོན་མཐོ། ས ཏཱ གུ ཎ སཾ བ རྞ ས ན ཏ ན སྱ མ ཧཱ ས མུ དྲ མ། ནཱ ཏ། བུ དྡྷི ས ཏཱ སྱཱ མཱུ ལ པྲ སྠིི རཾ ཥ ཌཱ རི མི ཏ བྷོ ག སྐ ནྡྷ མཱ ན། བྲ ཀྲྀ ཏི ཤུ དྡྷ ཤཱ ཁཱ པ ཏྲ བི སྟཱ ར ཏྲི ཀཱ ཡ ཕ ལ བ ཧུ ཤཿ དམ་པའི་ཡོན་ཏན་བསྔགས་པར་འོས་པའི་རྒྱ་མཚོ་ཆེན་པོ་བསྲུབས་པ་ལས། །བྱང་ཆུབ་སེམས་ཀྱི་རྩ་བ་རབ་བརྟན་ཕྱིན་དྲུག་སྤྱོད་པའི་ཡལ་ག་ཅན། །རང་བཞིན་དག་པའི་ལོ་འདབ་རབ་རྒྱས་སྐུ་གསུམ་འབྲས་བུ་གཡུར་ཟ་བའི། (༡༡༣བ)
བི ནཱ ཡ ཀ ཀ ལྤ དྲུ མ དྷ རྨྨ ཤྩ ས སཾ གྷེ ན ཏྭཱཾཾ ཤུ བྷ མ སྟུ། ཙ ཏུ རྨུ ཁ ནི ལ ཀ ཎ། མ ཧཱ བི ཥྞུཿ དེ ཝེ ནྡྲ གཎ པ ཏི ཤི ཤུ ཀཱ རྟི ཀཿ བྷཱ སྐ ར ཤཱི ཏ ར སྨྱ དི ལོ ཀ ཀ རྟྲཱ། སུ ལེ ཥྱ ཉྩ པྲ དྷཱ ནཻ ཪྻུ ཥྨཱཾ ར ཀྵ ནྟུ། ཡ ཇ ན བ ཧུ ལཾ ཀྲྀ ཏ སྱ པུ ཎྱེ ན། བི བུ ལ བྷཱུ མཱ ཡི ཤྭ ཪྻ བ རྟཱི རཱ ཛྙཱ ལ ཀྵཱི ཀུ ལཾ ཙ བ ལ སྱ ཤཱུ དྷ ར སྱ། མ ནུ བྱ སྱ པ ཏི ཏྭ མ ཡི ཛ ཡ ནྟུ། རྣམ་འདྲེན་དཔག་བསམ་ལྗོན་པ་ཆོས་དང་དགེ་འདུན་བཅས་པས་ཁྱོད་ལ་དག་གྱུར་ཅིང་། །གདོང་བཞི་པ་དང་མགྲིན་སྔོན་ཁྱབ་འཇུག་ཆེ། །ལྷ་དབང་ཚོགས་བདག་གཞོན་ནུ་ཀཱརྟི་ཀ །ཉི་ཟླ་ལ་སོགས་འཇིག་རྟེན་བྱེད་པོ་ཡི། །ལེགས་བྲིས་གཙོ་བོ་རྣམས་ཀྱིས་ཁྱོད་ལ་སྲུངས། །མཆོད་སྦྱིན་མང་པོར་སྤེལ་བའི་བསོད་ནམས་ཀྱིས། །ཡངས་པའི་ས་ལ་དབང་སྒྱུར་རྒྱལ་པོ་ཡི། །ཕུན་ཚོགས་རིགས་དང་སྟོབས་ཀྱི་དཔལ་འཛིན་པའི། །མི་ཡི་བདག་པོ་ཁྱོད་ཉིད་རྒྱལ་གྱུར་ཅིག །(༡༡༤ན)
ཨོ ཏྲཱ ཤཱི རྦཱ ད ཤཱཾ ཀ པུ རྦོ ཀྟཾ། མ དྷྱ དེ ཤ སྱ མ ཧཱ རཱ ཛཱ སཱ ལུ དྲྀ ཀྵ བ ཏཱ ཀུ ལཱ ནྣ ར ང ཏི ཤ ཧ སུ ཛཱ། སུ ཀ ལྤ ཙ ཏུ རྠ བུ དྡྷ ཤཱ ཀྱ མུ ནཱི ཏི རཱ ཛ ཤཽ དྡྷཽ ང ནི ས རྦྦཱ རྠ སི དྡྷ ཀ ཡ ཏྟ། སྱཱ ནུ སཱ ར ཏོ བ ཧུ པྲ པ ཙ ནཾ བཱ ཥ ཀ ཤྩ། དྷྱ ནེ བྷོ གསྱོ ཏྟ ར དི གྡ ཤ དྷ ཝ ལ གི རེ ཛ ན བ དེ སྠ ན སྱ ཤྲ མ ཎ ཝཱ གི ནྡྲ སུ དྷཱི སཱ གརཱ བྷ ཡ ཀ ཝ ཙ མུ ནི ཤཱ ས ན སྶ ན སྱཱ ཧ། ཅེས་ཤེས་པ་བརྗོད་པའི་ཚིགས་སུ་བཅད་པ་སྔོན་དུ་བཏང་ནས། རྒྱ་གར་གྱི་རྒྱལ་པོ་ཆེན་པོ་ཤིང་སཱ་ལ་པ་ལྟ་བུའི་རིགས་ལས་མིའི་བདག་པོ་ཤ་ཧ་སུ་ཛཱ་ལ། སྐལ་བཟང་གི་སངས་རྒྱས་བཞི་པ་ཤཱཀྱ་ཐུབ་པ་ཞེས་རྒྱལ་པོ་ཟས་གཙང་གི་སྲས་དོན་ཐམས་ཅད་གྲུབ་པ་གང་དེའི་རྗེས་སུ་ཞུགས་ཏེ་གསུང་རབ་མང་པོ་ལ་ཀློག་པ་ཁ་ཏོན་དང་། སྤོང་བ་བསམ་གཏན་དུ་སྤྱོད་པའི་ཡུལ་བྱང་ཕྱོགས་གངས་རིའི་ལྗོངས་སུ་གནས་པའི་དགེ་སྦྱོང་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་གསོལ་པ། མིའི་བདག་(༡༡༤བ)
ན ར པ ཏི ཏ ཝ ཀཱ ཡ སུ པ རྞ ཤ ར ད ཀཱ ལ སྲ པཱུ ཎ ཙ ནྡྲ པ དྭི སྟ རཾ། བི རྱཱ སྠཱ ན ཤྩ ཀ ལཱ ཡཱ ཤི ལེ བི བོ དྷི ར ཥི བྲྀ ཧ སཱ ཏཾ ཤྩཱ རྫུ ན ས ཧྲཱ ཏྲྀ མཱ ན། དཱ ས སྱ པྲ ཇཱ ས མ སྟ སུ པཱ ལ སྱ བི མོ ཀྵ སྱ མ དྷུ ར ཡ ཤ ཀ རྞེ ན ཤྲུ ཏ མུ ཏྶཱ ཧ ཤྩཱ ནུ མོ དི ཏོ བྷ ཝ ཏི། ས རྦྦ ཛྙོ ནཱ མ དྷ རཱ རྠེ བ ཧུ ན ཤྲུ ཏ སྱ ཛ ཌོ ྅ ཧ མ བི། ཏྲི བྷུ ཝ ན སྱ ས རྦ ས ཏྭ ཕི ཏཱ མ ཏཱ ཛྙཱ ཏྭ བྷ ཝ བྷཱ མ སྱ དུཿ ཁ མ པ ཡི བ ཏྭ མ ཧཱ ཀཱ རུ ཎི ཀི །པོ་ཁྱོད་ཀྱི་སྐུ་ཟོ་མདོག་བདེ་བ་སྟོན་མཚན་ཀྱི་ཟླ་བ་ཉ་གང་བ་ལྟར་རྒྱས་ཤིང་། རིག་པའི་གནས་དང་སྒྱུ་རྩལ་གྱི་ངང་ཚུལ་ལ་རྣམ་པར་བྱང་བ་དྲང་སྲོང་ཕུར་བུ་དང་སྲིད་སྒྲུབ་ཀྱི་མཆེད་ཟླ་ཅན། མངའ་འབངས་ཀྱི་སྐྱེ་རྒུ་མཐའ་དག་བདེ་བར་སྐྱོང་བའི་རྣམ་པར་ཐར་པའི་སྙན་གྲགས་རྣ་བའི་སྒོར་སོན་པས་སྤྲོ་བ་དང་རྗེས་སུ་ཡི་རང་བར་གྱུར། སརྦྦ་ཛྙཱའི་མིང་འཛིན་པ་དོན་དུ་མང་པོར་མ་ཐོས་པའི་བླུན་པོ་སྤྱི་རྟོལ་ཅན་བདག་ཀྱང་། ཁམས་གསུམ་གྱི་སེམས་ཅན་ཐམས་ཅད་ཕ་མར་ཤེས་ནས་སྲིད་པ་འཁོར་བའི་སྡུག་བསྔལ་ལ་དམིགས་ནས་སྙིང་རྗེ་ཆེན་པོས་ཡིད་དྲངས་ཏེ། (༡༡༥ན)
མ ནོ ནཱི ཏྭཱ པི ཅི ཏྟ མཱ ནྟཾ སྠཾ། གམ ན སྱ སུ ཁ ཤ མྨ རཱ ཛྙཱ མྦྷོ གཡ སྟི ས རྦྦཾ ས ནྟོ ཥ སུ ཀ རྨ པ རཱ ཀྲ མེ ཎ དཱ སཱ ལྤཱ ལཿ །ཤྲ མ ཎ བྲཱ ཧྨ ཎ རྀ ཥི བེ ད དྷ རཱཿ ས ཀ ལ ནཱ མཱ ད རཾ ཀ རྟ བྱཾ། བ ཏྲ ས ཧི ཏཾ། ལྷག་པའི་བསམ་པ་དང་ལྡན་པར་གནས། འགྲོ་བའི་བདེ་སྐྱིད་རྒྱལ་པོ་རྣམས་ཀྱི་སྤྱོད་ཚུལ་ལ་རག་ལུས་པ་ཀུན་ལ་མཉེན་གཤིན་པའི་མཛད་པ་བཟང་པོ་བརྟུལ་ཕོད་པས་མངའ་འབངས་རྣམས་སྐྱོང་ཞིང་། དགེ་སྦྱོང་བྲམ་ཟེ་དྲང་སྲོང་རིག་བྱེད་འཛིན་པ་མཐའ་དག་བླ་ནས་བླར་འདེགས་པའི་རྩ་ལག་དམ་པ་མཛད་འཚལ། ཤྭེ ཏ པཱ ཊཾ བ ར། ཤུ དྡྷ སྤ ཊི ཀ སྱ ལ། པ ཏྲཾ རི ཀ སྦི ས ཧི ཏི ཙི ཏྲ མཱ ན། ཤུ དྡྷ སྨ ཊི ཀ སྱ ཀ ལ ཤཱ ཀྵ ད ན ས ཧི ཏཾ། བ ཧ ཡ པ ཊ བ སྟྲ མཱ ཙི ཏྲཾ། ཨ བྷྱ ནྟ ར ཙི ཏྲ པ ཊ དཱི རྒྷ ཤྩ ས ཧི ཏཾ། ཞེས་རྟེན་ཁ་བཏགས། གཡང་ཏྲིའུའི་ཕུད་ཕོར་ཕུད་སྡེར་དང་བཅས་པ་བརྐོས་མ། གཡང་ཏྲེའུའི་བུམ་པ་ཁེབས་བཅས། ཕྱི་གོས་ཁྲའོ། །ནང་དར་སྨན་རྩེ་ཡུག་དང་བཅས། (༡༡༥བ)
པ ལ ཝ གསཾ བྦྷ ཏྶ ར ཤ ར ད མ དྷྱ མ མཱ ས ཤུ ཀླ པ ཀྵ སྱ དཱི ཏཱི ཡ བྷ དྲ བཱ ར བུ དྷ ཤྩ། ར ཀྵ ཏྲཱ ནུ རཱ དྷཱ མི ཤྲི ཏ སྱ སུ ཀཱ ལཾ། ཤྲཱི མ ཏྟ ཎྜཱུ ལ གཉྫ དྷ རྨྨ སྱ མ ཧཱ སེ ན ཏྭཾ ཤུ བྷཾ། རྣམ་འཕྱང་གི་ལོ་སྟོན་ཟླ་འབྲིང་པོའི་དཀར་ཕྱོགས་ཀྱི་བཟང་པོ་གཉིས་པ་རེས་གཟའ་ལྷག་པ་དང་། ཟླ་སྐར་ལྷ་མཚམས་འཛོམ་པའི་དུས་དགེ་བར། དཔལ་ལྡན་འབྲས་སྤུངས་ཆོས་ཀྱི་སྡེ་ཆེན་པོ་ནས་དགེ ། ས་ཕོ་ཁྱི་ལོ་ཧོར་ཟླ་དགུ་པའི་ཚེས་གསུམ་གྱི་ཉིན། ཟབ་ཡངས་མི་འགྱུར་ལྷུན་གྱིས་གྲུབ་པའི་སྲུང་མ་དྲེགས་པ་སྡེ་དཔོན་ཆེན་པོ་ཙི་དམར་བས་རིམ་གྲོའི་བླང་དོར་དང་། རྒྱན་དགོས་ཆེན་སྣ་ལྔའི་སྤྱན་གཟིགས་དགོས་ཚུལ་གྱི་རྡོ་རྗེ་འཕྲིན་ལན་རྣམ་པར་རྒྱལ་བའི་དབྱངས་སྙན། རྒྱལ་བར་གྱུར་ཅིག་ངོ་མཚར་དབྱངས་ཀྱི་སྒྲ། །རྡོ་རྗེའི་གསུང་གི་གསང་བ་དབྱར་གྱི་རྔ། །སྒྲ་འཛིན་ཡུལ་དུ་ཐོས་ཚེ་གཙུག་ཕུད་ཅན། །དགའ་བའི་ཟློས་གར་བཞིན་དུ་སྒྱུར་ལ་བྲེལ། །གཏུམ་ཆེན་དྲེགས་པ་བྲོས་པ་གདོང་ལྔའི་སྐད། །འཇིགས་རུང་ང་རོས་དགྲ་སྡེ་གླང་ཆེན་གྱི། །ཀླད་པ་འགེམ་ཡང་དམ་ལྡན་རིག་འཛིན་ལ། །བླང་དོར་སྟོན་པའི་སྙན་འགྱུར་འདི་ན་འཇེབས། །རྒྱལ་གསུང་འགྲེལ་པར་བྱས་པའི་གླེགས་བམ་ཀུན། །ཀློག་ཅིང་ཁྲིམས་ལྡན་འདུས་པའི་སྡེ་ཆེན་པོ། །བཀྲ་ཤིས་གྲངས་ལ་སྲིད་ཞུར་བྱ་བ་ཀུན། །མྱུར་དུ་བསྐྱུད་མེད་སྒྲུབ་པའི་འདུན་པར་མཆིས། །དབང་(༡༡༦ན)
གཞུའི་དཔེ་ཟླར་འོས་པའི་གོས་ཟུང་ལྔ། །རོ་མཆོག་བཏུང་བའི་དཔལ་ལྡན་ཉམས་མེད་ཀྱིས། །ཉེར་མཚོན་ཀུན་ཏུ་བཟང་པོའི་མཆོད་པའི་སྤྲིན། །ནོར་འཛིན་ལྟོ་བ་བཀང་སྟེ་འབུལ་གྱི་བཞེས། །བཤད་སྒྲུབ་བསྟན་པ་འགྲོ་བའི་བདེ་སྐྱིད་དང་། ཁྱད་པར་གངས་ཅན་ར་བ་དཀར་པོ་ཡིས། ཁོར་ཡུག་གཅིག་ཏུ་གྱུར་འདི་ལེགས་སྲུང་བར། །རྒྱལ་དབང་པདྨའི་བཀའ་བཞིན་གཡེལ་མེད་མཛོད། །མི་མཐུན་མུན་ཚོགས་སེལ་ལ་འོད་དཀར་ཅན། །བསོད་ནམས་འོད་སྟོང་འབར་བར་ཉིན་མོར་བྱེད། ཁམས་གསུམ་དབང་དུ་སྡུད་ལ་ཡིད་བཞིན་ནོར། །འཇམ་པོའི་ལས་རྣམས་བཅོས་ཀུན་མྱུར་དུ་སྒྲུབས། །དུག་མཚོན་གཡུལ་གཤོམ་ངན་སེམས་འཆང་བའི་དགྲ །དངོས་དང་བག་ལ་ཞ་བའི་མདའ་ལྔ་པ། །ལྷ་ཆེན་དྲག་པོར་ཁྲོས་པའི་མིག་གི་མེས། །རབ་སྲེགས་རྗེས་མེད་ཐལ་བ་རླུང་ལ་སྐུར། །དཔག་བསམ་ཡོངས་འདུའི་ཤིང་དང་འདོད་འཇོའི་བ། །བུམ་པ་བཟང་པོ་ཇི་བཞིན་བསམས་པའི་དོན། །རེ་བ་སྐོང་མཛད་ཆོས་སྐྱོང་ཆེན་པོ་ཡིས། །ཕུན་ཚོགས་དཀར་པོའི་བ་དན་དབྱིངས་སུ་ཕྱོར། །སྙན་ཤལ་ཟུང་དུ་འབྲེལ་བའི་ལྷ་རྫས་དང་། །གསེར་སྐྱེམས་ས་ཡི་ཟླ་བ་ཞོ་གསུམ་ལ། །ཐུན་འཚམས་གསར་པའི་ལང་ཚོས་རྒྱས་བཏབ་སྟེ། །དཔལ་ལྡན་འབྲས་སྤུངས་ཆོས་ཀྱི་སྡེ་ནས་ཕུལ། །འཁྲུལ་མེད་ཀྱི་གླིང་པ་བཅུ་གཅིག་གི་ནང་ཚན་གཏེར་སྟོན་སངས་རྒྱས་གླིང་པའི་ཆོས་རྒྱུད་འཛིན་པ་གནམ་གོང་བླ་མ་པདྨ་ལས་གྲུབ་ཀྱིས་ཀོང་ཡུལ་གྱི་སྔ་འགྱུར་བསྟན་པ་དར་རྒུད་བྱུང་བ་ལ་ཡིད་འབྱུང་བས་ཉམས་གསོས་ཀྱི་སྐུལ་མ་དང་བཅས་པའི་ཚིགས་བཅད་ཀྱི་འཕྲིན་ལན་བསམས་པ་ལྷུན་གྱིས་གྲུབ་པའི་བདེན་གཏམ། །(༡༡༦བ)
ནིརྨྨནྱ ནི རྟི བྷ ཝ བྷཱ ནཱ བྷི བྷཱུ ཡ ཙཱ ནཻ མི ཏྟ པྲ བྷ ཛྭ ལ ས ཧ སྲ ཙ ཏི ཛ སི ཀྱ། ཀཱ ཤཱ མ ལོ ད ཡ ས རཱ ཨ ནུ བྷཱ ཝ ཛ ནྡྭ བྱཱ མ ཧཱ པྲ རཱ ཀྲ མ ཙ ར ཀྵི ཏ མ དྡྷྲྀ བི རྱཱ། །འོད་(སྡེབ་སྦྱོར་དཔྱིད་ཐིག)མཚན་སྟོང་དུ་འབར་བའི་གཟི་བྱིན་གྱིས། །སྣང་སྲིད་ཟིལ་གྱིས་གནོན་པའི་སྤྲུལ་པའི་གར། །དྲི་མེད་གསལ་མཚོར་ཤར་བའི་ནུས་མཐུའི་རྩལ། །འཛམ་གླིང་ཆེ་བའི་རིག་སྔགས་འཆང་གིས་སྲུངས། །དམན་པའི་ཁྱད་པར་ལས་གཞན་ཐེག་མཆོག་གི །རིགས་ཀྱི་བག་ཆགས་སད་པ་མངར་བའི་དྲི། །ན་ཚོད་ལྕུག་ཕྲན་དུས་ཀྱང་ཡོངས་འཐུལ་བའི། །རིག་འཛིན་ཙན་དན་ལྗོན་པའི་འཕྲིན་སྐྱེས་འབྱོར། །བསོད་ནམས་དཀར་བའི་ཆ་ཤས་རབ་འཕེལ་བ། །ཕུན་ཚོགས་མངོན་མཐོའི་རྟེན་བཟང་བསིལ་སྦྱིན་མཁན། །ཉེར་འཚེ་སྒྲ་གཅན་མུན་གོས་རྒྱང་བསྲིངས་ཏེ། །བདེ་སྐྱིད་ཀུནྡའི་འདབ་སྟོང་བཞད་དེ་སྤྲོ། །རྣལ་འབྱོར་གསུམ་གྱི་དགོངས་པའི་ཆུ་བོ་ཀུན། །པདྨ་བཛྲ་འཁོར་ལོའི་སྨིན་གྲོལ་ལམ། །འཕྲིན་ལས་རྒྱ་མཚོར་འདུས་པའི་མཆོད་སྦྱིན་གྱི། །བྱེད་པོར་རྒྱལ་དབང་(༡༡༧ན)
པདྨས་ཁྱོད་བསྔགས་སྙམ། །ལྷ་སྲས་སྨོན་ལམ་ཡོངས་འདུའི་མྱུ་གུ་གང་། །རབ་སྨིན་སངས་རྒྱས་རྡོ་རྗེའི་འབྲས་བུའི་ཁུར། །མངོན་པར་ལྕི་བའི་ཟབ་གཏེར་རོ་བརྒྱའི་བཅུད། །མྱོང་ཁྱོད་ས་འདིར་འཕོས་པའི་ལེགས་བྲིས་བཞིན། །ཚུལ་མིན་ཞིང་བཅུའི་མེ་ཏོག་མདའ་ཅན་སྡེ། །མངོན་སྤྱོད་དྲག་སྦྱོར་ལྷ་ཆེན་མིག་གི་མེས། །མི་རྟག་ལམ་དུ་འགོད་ནུས་སྔ་འགྱུར་གྱི། །བསྟན་ལ་གངྒཱའི་རྡུལ་གྲངས་བག་ལ་ཞ །ཀུན་རྫོབ་སྒྱུ་མའི་སྤྲིན་ཕུང་ཆེར་འཁྲིགས་པར། །ལས་བཞིའི་འཕྲིན་ལས་ཆར་འབབ་གློག་འཁྱུག་ཀྱང་། །ཀ་དག་རང་གསལ་རིག་པའི་མཁའ་དབྱིངས་སུ། །ཀུན་རྫོབ་ཆོས་ཀྱི་སྣང་བ་དམིགས་སུ་མེད། ཁོར་ཡུག་ར་བ་གཅིག་གིས་དཀར་བའི་འགྲོར། །བསམ་པ་ལྷུན་གྱིས་གྲུབ་པར་ཨོ་རྒྱན་རྗེའི། །ཞལ་འཆེས་རྡོ་རྗེའི་གསུང་གིས་མི་སླུ་ན། །ཀོང་ཡུལ་གསང་རྙིང་རིང་ལུགས་ཅེས་མི་འཕེལ། །གསལ་སྟོང་དག་པའི་རང་རིག་སྟོང་པའི་དབྱིངས། །ལྷུན་གྲུབ་སྣང་བའི་འཆར་སྒོ་འཇའ་ཚོན་ལྟར། །འགག་མེད་ཤར་ཚེ་ཀུན་ཏུ་བཟང་པོ་ཞེས། །གྲགས་ཅན་སངས་རྒྱས་ལམ་དེ་མི་རིང་ཉེ། །འདི་ན་ཞྭ་སེར་ཅོད་པན་འཆང་བ་ཡི། །རིང་ལུགས་འཛིན་པའི་རིས་སུ་ཉེར་སོན་ཀྱང་། །ཤཱཀྱའི་རྗེས་ཞུགས་རིས་མེད་གྲུབ་མཐའི་ཆོས། །སྦྱངས་པས་དང་བའི་དད་པ་གཅིག་ཏུ་དཀར། ཁྱད་པར་འཇམ་མགོན་མི་ཡི་སྲིད་པའི་གར། ཁྲི་སྲོང་བོད་འབངས་འགྲོ་ལ་དགོངས་པའི་དོན། །ཕན་བདེའི་རྩ་བར་ངེས་ནས་ཟབ་མོའི་གཏེར། །དར་བའི་ལྷག་བསམ་དབྱར་གྱི་མཚོ་ལ་འགྲན། །དཔྱིད་ཀྱི་དཔལ་ལ་ཆགས་པའི་མགྲིན་པ་ནས། །ཚིག་དོན་སྙན་སྒྲོག་ཁུ་བྱུག་གཞོན་ནུ་ཡི། །གཤོག་རླབས་ཤིང་གི་མ་མའི་མཁའ་ཡངས་པོར། །རྒྱུ་བའི་འཕུར་ལྡིང་རྩེད་འཇོར་རྟག་ཏུ་རོལ། །ཉམས་འགྱུར་གླུར་ལེན་ཆུ་ཤིང་བརླ་ཅན་(༡༡༧བ)
མ། །ཐགས་བཟང་དུ་ཀཱུ་ལ་ཡི་གོས་གྱོན་ནས། །ཀོང་ཡུལ་ནགས་ཀླུང་འཁྲིགས་པའི་ཡུལ་ལྗོངས་སུ། །རིག་སྔགས་འཆང་ཁྱོད་མིག་གི་བདུད་རྩིར་སོང་། །ཝ་ཞའི་རིགས་ལས་ཁྱབ་བདག་རྡོ་རྗེ་སེམས་དཔའི་ངོ་བོ་གནས་གསར་ཆོས་རྗེ་མགོན་པོ་བསོད་ནམས་མཆོག་ལྡན་ལ་འཕྲིན་དུ་གསོལ་པ་སྨིན་གྲོལ་མཐོ་རིས་ཆུ་བོ། ཨ དྦྷུ ཏྱ པཱ ཎཱ མྲྀ ཏ ཤཱ ཤྭ པྲ ཎཱ བ ཛྲ པྲ ཆ ཏྟཱ ན པ ཧི ཏྱ ཀ ལྤ ཙ། ཛཱི ཝ ནྱ བྷཱ ཝཱ ཪྠཱ བ ཏོ མ ར ཎྱ ར སྨཱི ཎཱཾ ནི མེ ཏྟ ཛཱ ལ ཡ ཙྪ མཾ གལ །རྨད་(སྡེབ་སྦྱོར་དབང་པོའི་རྒྱུད།)བྱུང་བདུད་རྩིའི་བཏུང་བས་རབ་མྱོས་པས། །བསྐལ་བར་མི་ཤིགས་གཡུང་དྲུང་རྡོ་རྗེའི་སྲོག །འཚོ་བའི་དངོས་པོ་དོན་དང་ལྡན་པ་ཡི། །འཆི་མེད་འོད་མཚན་འབར་བས་ཤིས་པ་སྩོལ། །ཡེ་ཤེས་སྣ་ལྔའི་འོད་མདངས་འཇའ་རིས་ཅན། །གདན་གསུམ་ཚངས་པའི་རིགས་ཀུན་བདག་པོའི་དཔྱིད། །འཚམས་སྤྲིན་གོས་ཀྱི་ཟློས་གར་སྒྱུར་བའི་གཟུགས། །ལྟར་སྣང་ཉེས་དྲིས་གོས་མིན་སྤྲོ་དགའ་བརྟས། །མ་དག་ཀུན་འཁྲུད་སྨིན་བྱེད་གངྒཱའི་ཆབ། །ཚད་མ་བཞི་ལྡན་(༡༡༨ན)
ཚངས་པའི་རལ་ཀླུང་ནས། །ཚད་མེད་འབེབས་འདིས་སྐལ་ལྡན་ཤིང་རྟ་དེ། །རྡོ་རྗེའི་སློབ་དཔོན་ཟོལ་གྱིས་རྒྱུ་བ་བཞིན། །སྣོད་བཅུད་དག་པའི་སྣང་བ་རྟེན་བརྟེན་པའི། །འཁོར་ལོ་རབ་བཀྲའི་ངོ་མཚར་བཀོད་པ་ཡིས། །ཐ་མལ་ཞེན་པ་བཟློག་ཚེ་འཁོར་བའི་གནས། །འོག་མིན་ཞིང་གི་ངོ་བོར་འབྱམས་སུ་ཀླས། །ལྗོན་ཤིང་ཕལ་པའི་མངལ་གྱིས་བསྐྲུན་མིན་པ། །ཨ་ཤཱད་བྲང་སྟེང་བསྲུབས་ལས་སྐྱེས་པའི་དྲོད། །མི་བཟད་གཏུམ་མོ་འབར་བའི་རྒོད་མ་ཁས། །ལཱ་བའི་གོས་ཀྱི་ཞེན་པ་ཐུང་ངུར་བྱས། །ཨ་ཧཾ་འབར་འཇག་དགའ་བཞི་བདེ་བའི་ཉམས། །འཁོར་འདས་དབྱེར་མེད་སྟོང་པའི་ངོ་བོ་རུ། །བརྗོད་བྲལ་རོ་གཅིག་གྱུར་པས་ཟུང་འཇུག་སྐུ། །བཅུ་གསུམ་རྡོ་རྗེའི་ས་ལ་གོམ་པ་འགོད། །དེའི་ཚུལ་རྣལ་འབྱོར་དབང་ཕྱུག་བཞེད་སྲོལ་གྱི། །ལམ་དང་འབྲས་བུར་བཅས་པའི་གསང་ཆེན་ཆོས། །སྣོད་ལྡན་སློབ་མར་བཤད་བྱ་བདུད་རྩིའི་བཅུད། །ཐོབ་པའི་འཆི་མེད་བདག་པོ་ཁྱོད་མིན་སུ། །ཐུབ་བསྟན་ཡོངས་འདུ་རྫོགས་པའི་དམ་ཆོས་ཀྱི། །གོམ་པ་གཅིག་གིས་རྫོགས་སངས་རྒྱས་ཀྱི་ས། །བགྲོད་ན་མཁས་རློམ་སྟོབས་ལྡན་གཞུ་ལས་སྐྱེས། །ཕྱོགས་རེའི་ཡོན་ཏན་ཀུན་བཟང་འོག་ཏུ་སོང་། །འཇམ་དཔལ་རྡོ་རྗེའི་ཞལ་ལུང་རྣོན་པོ་ཡི། །མཚོན་ཆས་རྨོངས་ཆེན་འཁོར་བའི་དྲ་བ་ཀུན། །བཅད་ཚེ་དཀར་ནག་བལྟ་བའི་མེ་ལོང་གི །ཁུར་འཛིན་གཤིན་རྗེའི་ཕོ་ཉས་ངལ་བ་བཏང་། །ཚོགས་བཤད་གསེར་ཆུས་བྱུགས་པའི་ར་གན་ཟོང་། །ཅལ་སྒྲོག་རྨོངས་པའི་བཞི་མདོར་ཆེས་བྲིན་ཀྱང་། །བློ་ཆེན་ཁྱིམ་བདག་རྒན་པོས་ས་ལེ་སྦྲམ། །དངོས་རྫུའི་ཁྱད་པར་འབྱེད་ལ་སུ་ཞིག་གཤུད། །འདི་ན་འཕགས་ཡུལ་ཤིང་རྟ་ཆེ་གཉིས་ཀྱི། །ལེགས་བཤད་ནོར་མཆོག་སྐྱེས་བུ་གསུམ་གྱི་གཞུང་། །འཆད་རྩོད་རྩོམ་པའི་འདོད་རྒུ་ཆར་སྙིལ་(༡༡༨བ)
བས། །འཇམ་དཔལ་སྙིང་པོའི་བསྟན་ལ་བྱི་དོར་བྱས། །ལུགས་སྲོལ་དེ་དང་ཟུང་འབྲེལ་ཟབ་མོའི་ཆོས། །ངེས་གསང་ཐེག་པའི་ཡང་རྩེ་འདུས་པའི་ལམ། །དབེན་གསུམ་སྒྱུ་ལུས་འོད་གསལ་ཟུང་འཇུག་པར། །མོས་བློའི་བག་ཆགས་ཀྱིས་འཚོ་དོན་ལྡན་ཙམ། །དམ་པའི་ངང་ཚུལ་ལྡན་པ་ཙནྡན་ཤིང་། གདུལ་བྱའི་རླུང་གིས་ཇི་ཙམ་བསྐུལ་བ་ཡིས། །རྣམ་དཀར་དགེ་བའི་དྲི་བཟང་ཆེར་ལྡང་བ། །ཀུན་ཁྱབ་ཁྱོད་ཀྱི་ཡོན་ཏན་དེ་རྨད་བྱུང་། །འབྲས་ལྡན་དུས་སུ་དྲང་སྲོང་ཨ་གསྟྱས། །འོད་ཀྱིས་ཇི་ཙམ་སྣང་བྱས་ཉལ་འགྲོའི་ཚོགས། །དུག་བྲལ་བདུད་རྩིར་གྱུར་པ་ཆོས་ཉིད་དེ། །རྒྱུ་སྐར་གཞན་ལ་སྟེས་དབང་གིས་འབྱུང་མིན། །མ་རིག་ལས་འཁོན་འཇམ་དཔལ་རྡོ་རྗེ་དངོས། །ཡང་དག་དོན་གྱི་དཔལ་ལྡན་ས་སྐྱ་པ། །ཚར་ཆེན་ཡབ་སྲས་བརྒྱུད་པར་བཅས་པ་ཡི། །རིང་ལུགས་བ་དན་སྲིད་རྩེའི་བར་དུ་ཁྱོད། །དྲི་བཞོན་ལྟ་ལྗང་བདུན་གྱིས་ཉིན་མོར་བྱེད། །བསིལ་རིའི་སྦུབས་ནས་གྲངས་མེད་འདྲེན་པ་བཞིན། །མ་སྨད་ལེགས་པར་བཤད་པའི་མཆིད་འཕྲེང་ཚོགས། །ཚད་མེད་སྒྲ་འཛིན་བཅུད་དུ་སྩོལ་ཅིག་གུ །འཇིགས་པ་མེད་པའི་ཟབ་དང་རྒྱ་ཆེ་བ། །དམ་པའི་ཆོས་ཀྱི་ང་རོའི་དབྱངས་སྙན་ཅན། །གདོང་ལྔའི་དབང་པོས་བཏེག་པའི་རྡོ་རྗེའི་བཞིར། །བསྐལ་པ་རྒྱ་མཚོར་མི་གཡོ་རྟག་བརྟན་གསོལ། །བཀྲ་ཤིས་དགེ་མཚན་འཁྱིལ་བའི་གསར་ཚེས་ཀྱི། །རྩེ་དགའ་ཁོང་ནས་རྒོད་པའི་གནམ་ལོའི་བཞིན། །དགའ་བའི་འཛུམ་གྱིས་བསུ་ལ་མངོན་ཕྱོགས་ཚེ། །རབ་དཀར་བསོད་ནམས་དར་དང་བཅས་ཏེ་དགེ །རིག་པའི་གནས་ལ་མོས་པའི་བློ་ཅན་དྭགས་པོ་ལྕང་ར་བ་མགོན་པོ་ཚེ་དབང་རབ་བརྟན་སྒྲ་རིག་པ་སློབ་པར་ངམ་རིང་མཁན་པོ་མང་ཡུལ་ལོ་ཆེན་གྱི་གམ་དུ་འདེགས་པར་ཕྱོགས་པའི་ཚེ་རྣལ་འབྱོར་གྱི་ཡི་གེ་དགོས་ཚུལ་བྱུང་བ་ལྟར་བསྲིངས་པ་མཐོ་རིས་སརྦྦ་ཛྙཱ། (༡༡༩ན)
ས རྦྦེ ཥཱཾ ག ག ན ཙ བྷཱུ ཏ བུ ནྱ ཧ སྟ རྣཱ སེ ནོ ཉྩ ལ ན བ ཏེ ཤྴི རེ ཥུ ཀུ མྦྷཾ། །དི ཀྤཱུ རྦྦ ཏྟ མ ས བྷི ཥི ཉྩ ཨཱ གམེ བྷཾ ྈྐ རྨྨཱ བྷཱ ཏྐ། མ ཧ ཏོ བི ཤེ ཥ བ ཙྪ། གནམ་(སྡེབ་སྦྱོར་རབ་དཀར་ཅན།)ས་ཀུན་གྱི་བདག་པོར་སྤྱི་བོ་རུ། །ལེགས་བྱས་གླང་པོའི་སྣས་བཏེག་བུམ་པ་ཡིས། །དབང་བསྐུར་ཤར་ཕྱོགས་གོང་མའི་ལུང་ལས་ཀྱིས། །ཆེན་པོའི་ཁྱད་པར་ཅན་དུ་གྱུར་པའི་གཏམ། །གཞུང་ལུགས་ཉི་མའི་དངོས་པོ་བྱེ་བའི་གཟུགས། །རང་བཞིན་རྐྱེན་དང་རྣམ་འགྱུར་ཆོ་ག་ཡིས། །བརྡར་བས་དག་དང་མ་དག་བཅུ་གཉིས་ཆར། །འབྱེད་པའི་འཇིག་རྟེན་མི་གཅིག་དེར་སྤྲིངས་པ། །སྲིད་པའི་ནགས་ཀླུང་སྟུག་པོར་དགེ་ཚོགས་ཀྱི། །ས་བོན་སྨིན་འབྲས་ཟག་ཕུང་ཙནྡན་ལྗོན། །ཉེས་བརྒྱའི་ལྟོ་འགྲོས་འཁྲིལ་མིན་ཚུལ་ཁྲིམས་དྲིས། །ཤཱཀྱའི་རིང་ལུགས་པ་ལ་ཡར་མཛེས་སམ། །འདི་ན་ཉི་ཟླའི་འོད་ལ་ལྟོས་མིན་པའི། །དབྱངས་ཅན་མགྲིན་ཆགས་ལུས་ཕྲའི་འགྲམ་ཆང་གིས། །གཙུག་ལག་རྒྱ་མཚོའི་མེ་ཏོག་བ་ཀུ་ལ། །ཕྱེ་བས་ཐུབ་བསྟན་རྣ་(༡༡༩བ)
གོང་རྒྱན་དུ་མཛེས། །ཚེ་རབས་དོན་ལྡན་སྒྲུབ་ལ་སྙིང་སྟོབས་ཀྱིས། །གཡོ་མེད་དམ་བཅའ་བརྟན་པོའི་རྒྱལ་མཚན་རྩེར། །ཐོས་དང་བསམ་པའི་ཡིད་བཞིན་ནོར་བཀོད་པས། །དཔྱོད་ལྡན་གྲགས་སྙན་འདོད་རྒུ་ཕྱོགས་བརྒྱད་འབེབས། །ཚུལ་དེས་གངས་ཅན་ར་བར་མཁས་བྱེད་ཀྱི། །དོ་ཟླར་མིག་རྒྱང་རིང་པོས་ཉེར་བཙལ་ཀྱང་། །མ་རྙེད་གྲིབ་མ་ཙམ་ལས་ཆེད་པོ་རུ། །འཛིན་པའི་ཟླ་མེད་ནམ་མཁའི་ཟླ་བ་བཞིན། །མཐོ་རིས་བརྡ་སྤྲོད་ཆུ་བོ་གངྒཱའི་རྒྱུན། །ཅིག་ཅར་བཏུངས་པའི་དྲང་སྲོང་ཆེ་ཁྱོད་དང་། །སྔོན་གྱི་སློབ་དཔོན་ཆེན་པོ་སརྦྦ་ཛྙཱའི། །ཁྱད་པར་གནས་ཀྱི་དབྱེ་བས་བྱས་པ་ཙམ། །མཁས་རློམ་སྲེག་ཟས་བཟོད་མིན་མདོ་རྒྱུད་ཀྱི། །ས་བོན་བློ་གྲོས་གངྒཱའི་མངལ་སྦྲུམ་ཚེ། །ལེགས་བཤད་གཞོན་ནུ་རྣམ་དཔྱོད་གར་མཁན་ལ། །ཞོན་ནས་ལོག་རྟོག་གླང་པོའི་མཆེ་བ་ཕྱུང་། །དྷཱི་ཡིག་ཞུན་མ་མི་ཡི་གཟུགས་ཅན་དུ། །ཐུབ་བསྟན་ཟ་མ་ཏོག་འཁྱིལ་བཙོང་ཁ་པའི། །རིང་ལུགས་ནོར་འཛིན་འདོད་པའི་འདམ་བྱིང་པ། །འདེགས་པའི་ཁྱབ་འཇུག་ཁྱོད་ལས་དམིགས་སུ་མེད། །བྱང་ཕྱོགས་ཙྭ་མིའི་ཆོས་རྒྱལ་རིགས་ལྡན་ལྷའི། །གནའ་བོའི་མཛད་བཟང་ཉི་མ་ཐུན་འཚམས་ལས། །འགོངས་ཚ་ལུགས་གཉིས་ལོག་སྤྱོད་མེ་ཁྱེར་འོད། །ཆོས་སྲིད་སྣང་བའི་བྱེད་པོར་ཁེངས་རྣམས་མཚར། ཁྱིམ་གཟུགས་སྒོ་ངའི་སྦུབས་ནས་ལྔ་རིག་པའི། །སྐད་སྙན་འབྱིན་པ་སྔོན་ཚེ་མང་བྱུང་ན། །དེང་དུས་བསྟན་འཛིན་ཁུར་ལྡན་ངུར་པའི་ཁྱུ། །འདོད་སྲེད་ངག་བཀྱལ་སྒྲ་ཡིས་སྣ་བ་གཙེར། །ཤེས་བྱར་སྲིད་པའི་གཙུག་ལག་ཆུ་བོ་ཀུན། །བློ་གྲོས་ཟླ་བའི་མ་མར་ཡོངས་ཞུགས་ཀྱང་། །རྣམ་དཔྱོད་རྒྱ་མཚོའི་འཇིང་ལ་འཕེལ་ནུབ་དག །སྤངས་པའི་སྨོན་གྲོ་པཎ་ཆེན་ཆུ་གཏེར་བཞིན། །བཅུ་ཕྲག་རིག་གནས་མིག་སྟོང་ལྡན་པའི་ལྷ། །(༡༢༠ན)
དུས་ཀྱི་གཡེང་བའི་ས་སྲུང་སྟེང་འགྱིང་ཚེ། །ལེགས་སྦྱར་འཆད་པོར་བསྒོས་པའི་སྒྲ་རིག་མཁན། །དེ་འདྲ་ལྷ་ཡི་ཕུར་བུ་མ་ཡིན་དྲང་། །རྣམ་དཔྱོད་ཡངས་པའི་གོམ་སྟབས་མི་ལྡན་ཡང་། །ཞེ་སྡང་ཟུག་རྔུའི་ཤུགས་ཀྱིས་ལོག་པའི་ཁུང་། །ཐོགས་མེད་བགྲོད་པའི་རྩལ་ལྡན་ལྕེ་གཉིས་པ། །མི་དགེའི་ར་བར་གར་སྒྱུར་ཆོས་ཉིད་ཡིན། །དེང་དུས་དབྱར་དགུན་འདུས་པའི་ཆོས་ཀྱི་གྲྭ །བསོད་ནམས་མྱུ་གུ་བསྐྲུན་པའི་ཞིང་ས་ཆེ། ཁྲིམས་ལྡན་ངུར་སྨྲིག་གོས་འཛིན་ཁོ་ན་ལས། །ཆུ་སྲིན་རྒྱལ་མཚན་གྱིས་བརླམས་ག་ལ་སྲིད། །འོན་ཏེ་ཨ་མྲའི་ཚལ་དུ་ཨེ་རཎྜ། །ཕང་ཕུང་ལོ་འདབ་མཛེས་པར་ཉེར་འཁྲུལ་ནས། །འབྲས་བཟང་རོ་ལ་སྤྱོད་འདོད་ཡུན་རིང་པོར། །བསྒུགས་པས་བསྐལ་པའི་མཐའ་ཡང་ཐུང་ངུར་བྱེད། །ཕྲ་མོའི་ཁྱིམ་གྱི་བུག་པ་ལས་འཐོན་ནས། །འདོད་ཡོན་མཇུག་མ་ཉེར་ཐོགས་རྨི་ལམ་ལྟས། །བདེན་གཏམ་རླུང་ལ་མི་བསྐུར་རབ་བྱུང་ཕལ། །ལེགས་བཤད་སྒྲ་ལ་མཛུབ་མོས་རྣ་བ་འགེབས། །ཐོས་བསམ་སྟོབས་འབྱོར་མེ་ཆུའི་མན་ཤེལ་ཁམས། །ཆོས་སྲིད་ཉི་ཟླའི་རེག་བྱའི་ཚ་གྲང་གི །ཁྱད་པར་གོ་ས་འཕོ་བའི་སྒམ་བུ་ཕྱཱ། །འདི་འདྲ་ལྔ་བརྒྱའི་རང་མཚང་ཉིད་དུ་ཟད། །དེ་ཕྱིར་ཤར་ཕྱོགས་དྭགས་ཡུལ་ནགས་ལྗོངས་ནས། །གཙུག་ལག་དོན་གཉེར་ལྕང་ར་ཟླ་ཚེས་ཅན། ཁྱོད་སྙན་རླུང་གིས་དྲངས་ཏེ་བརྡ་སྤྲོད་ཀྱི། །ཡོན་ཏན་ཆ་ཤེས་གང་བའི་ཆེད་དུ་སོང་། །རིགས་མཐོ་ཆས་མཛེས་སྒྲིགས་ཀྱིས་རབ་སྤ་ཞིང་། །ལེགས་བཤད་འཚོལ་བ་གསེར་ལྟར་དཀོན་དུས་འདིར། །ལོ་ཆེན་ཆོས་སྐྱོང་བཟང་པོའི་ལུགས་སྲོལ་ལ། །ཉེར་བསམ་མཁས་པའི་གསུང་རྒྱུན་སྩོལ་ཅིག་གུ། །དེང་དུས་ཕྱོགས་རེར་སྦྱངས་ལ་ཀུན་མཁྱེན་ཞེས། །སྙན་གྲགས་རྫ་རྔ་ལྡིར་བ་མང་ན་ཡང་། །འཁོར་ལོ་མ་ཚང་ཤིང་རྟས་དངོས་པོ་གཞན། །འདྲེན་པའི་དོན་བྱེད་ནུས་པ་ག་ལ་སྲིད། །ཚད་(༡༢༠བ)
འཇོམས་ག་བུར་དྲི་ཡིས་རླུང་སྐྱེད་པས། །སྐྱེས་ཚད་སྨན་དུ་སྒྱུར་བའི་རོ་ནུས་ཀྱིས། །གདུང་བའི་ནད་བརྒྱ་འཇོམས་པའི་སྒྱུ་ཐབས་མཁན། །སྔོན་གྱི་དྲང་སྲོང་ཆེ་དེ་ཐམས་ཅད་མཁྱེན། །བླ་ཆེན་གྲགས་སྐམ་མུན་པའི་ཁུང་བུ་ལ། །སྐྱབས་སུ་སོང་མིན་རིས་མེད་མཁས་བསྟེན་པས། །ཤོང་དཔང་བསྟན་པའི་ཉི་མ་འོད་པོ་ཆེ། །རྒྱལ་བསྟན་གླིང་བཞིའི་སྣང་བྱེད་འདི་ན་འཆར། །མགྲིན་པའི་འཁོར་ལོ་གྲོལ་བའི་བང་མཛོད་ནས། །སྙན་ཚིག་དངོས་པོ་ཟད་པའི་ཕ་མཐའ་ཅི། །འདི་ཙམ་ཉམས་དང་འགྱུར་བའི་བདོག་པའི་སྐྱེས། །དེ་ལས་མངས་ན་ཡི་གེའི་ལས་སུ་ཆ། །ཚིག་དོན་ནོར་ལྡན་བྱ་མ་རྟ། །བགྲངས་པས་ཀུན་བཟོད་ངལ་བའི་རྡུལ། །འཕྲེང་བ་མུ་ཏིག་དཀར་པོ་ཡི། །ནམ་མཁའ་མཛེས་པའི་རྐེད་པར་འཆིང་། །སྭ་སྟིའི་སྒྲ་ལས་བདེ་ལེགས་ཀྱི། །ཤིས་པ་བརྗོད་པའི་གཉིས་སྐྱེས་དབང་། །དཀར་འཇམ་མཛེས་པའི་གོས་གྱོན་ནས། །གཡས་རུ་བྱང་གི་ཕྱོགས་དེར་སོང་། །
རབ་བྱུང་བཅུ་གཅིག་པའི་ས་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག །རྒྱལ་དབང་པདྨའི་དགེ་བསྙེན་ཚངས་པ་དུང་ཐོད་ཅན་གྱིས་ས་ཕག་ལོ་གསར་གྱི་ལྷ་ཚེས་ཐོག་མ་འོངས་འབྱུང་འགྱུར་གྱི་ལུང་བསྟན་འོང་ཚུལ་བྱུང་བ་ལྟར་སྤྱན་གཟིགས་ཚོགས་ཀྱི་འཁོར་ལོ་དང་བཅས་འཕྲིན་དུ་གསོལ་པ་ལྷ་རྒྱལ་སྙན་པའི་གད་རྒྱངས། རྒྱལ་བར་གྱུར་ཅིག་སྭ་སྟིའི་དབྱངས་ཀྱི་སྤྲས། །བདེ་ལེགས་ཕུན་སུམ་ཚོགས་པའི་དར་དཀར་པོ། །སྲིད་པའི་རྩེ་མོར་འཕྱར་བའི་ཚངས་པ་ཆེ། །ལྷ་ཆེན་སྒྲ་འཛིན་བུ་གར་གསོལ་བའི་དོན། །ལྐོག་གྱུར་ཆོས་ཀྱི་སྣང་ཚུལ་མ་ལུས་པ། །མ་འདྲེས་མངོན་སུམ་གསལ་པའི་སྤྱན་གྱི་དཀྱུས། །རིང་པོར་གཟིགས་ལ་བླང་དང་དོར་བྱའི་གནས། །སྟོན་པའི་རྡོ་རྗེའི་གསུང་སྙན་གླུ་རུ་ལོང་། །སྣང་སྲིད་དྲེགས་པ་ཡོངས་ཀྱི་སྤྱི་བོ་རུ། །བཀའ་རྟགས་ཕྱག་རྒྱ་གཉན་པོས་ཟིིལ་གནོན་པའི། །སངས་རྒྱས་ཀུན་དངོས་པདྨ་ཐོད་འཕྲེང་གི །སྤྱན་སྔར་གཡར་ངམ་ཁས་བླངས་མ་གཡེལ་བར། །བསྟན་དང་འགྲོ་ལ་འཚེ་བ་ནག་པོའི་དཔུང་། །(༡༢༡ན)
མེ་ཏོག་མདའ་ཅན་སྡེ་ཡིས་ཉེར་བརླམས་པ། །གཟུགས་ཅན་གཟུགས་མེད་རིགས་གྱུར་གར་གནས་ཀྱང་། །མངོན་སྤྱོད་དྲག་པོའི་ལས་ཀྱིས་ཚར་ཆོད་མཛོད། །བཀྲ་ཤིས་གཡས་སུ་འཁྱིལ་བའི་དུང་དཀར་གྱི། །ཅོད་པན་ཐོད་དུ་བཅིངས་པའི་དགེ་བསྙེན་ཆེ། །དཔག་བསམ་ཡོངས་འདུའི་དབང་པོའི་མཆེད་ཟླ་ཡིས། །གངས་ཅན་ལྗོངས་འདིར་བདེ་སྐྱིད་ཆར་དུ་ཕོབ། །ཀུན་ལ་བརྩེ་བའི་རབ་དཀར་ལྷག་པའི་སེམས། །བྱེད་པོས་ཐགས་སུ་བྱས་འདྲའི་སྙན་ཤལ་དང་། །མི་ཟད་འདོད་པ་འཇོ་བའི་མཆོད་པའི་སྤྲིན། །འཆི་མེད་ལམ་ཀུན་ཁྱབ་པར་རབ་བཀང་སྟེ། །ལྔ་ལྡན་འབྱུང་བའི་ཁམས་ལས་ལེགས་གྲུབ་པ། །བགྲང་བྱའི་དཔྱིད་ཀྱི་དཔལ་མོའི་ཞལ་གྱི་སྒོ། །དང་པོར་འཛུམ་པས་རྫོགས་ལྡན་གསར་པའི་མགྲོན། །བསུ་བའི་དགའ་སྟོན་དུས་སུ་ཛ་ཡནྟུ། །སྒྱུར་བྱེད་ཀྱི་ལོ་དབྱར་གྱི་དུས་སྟོན་ལ་བབ་པའི་ཚེ་གྲྭ་ཚོང་འདུས་ནས་བཤན་པ་ཆེན་པོ་བྱ་ཁྲི་མིག་གཅིག་པས་རྒྱལ་ཁམས་འདེ་ཐབས་སྒྲུབ་པའི་སྐུལ་མ་དང་། བ་དན་རོལ་མོ་སོགས་དགོས་ཚུལ་གྲྭ་ཕྱི་གཞིས་གཉེར་སྨོན་སྐྱིད་པར་བསྐུར་བྱུང་བའི་འཕྲིན་ལན་ས་ལ་རྣམ་པར་རྒྱལ་བའི་སྒྲ་དབྱངས། ས་ལ་རྣམ་པར་རྒྱལ་བའི་རྔ་བོ་ཆེའི། །སྒྲ་དབྱངས་སྲིད་པའི་རྩེ་མོར་རབ་བསྒྲགས་པ། །དྲེགས་པའི་དབང་ཕྱུག་བྱ་ཁྲི་མིག་གཅིག་པ། །དཔའ་བོའི་གད་བརྒྱངས་སྒྲོག་པའི་འཕྲིན་ཡིག་སོན། །ཞེ་སྡང་དམོད་པའི་འབྲས་བུ་ཁམས་གསུམ་གྱི། །སྐྱེ་རྒུའི་བླ་ཚེ་སྲོག་ལ་དབང་སྒྱུར་པའི། །ཤར་ཕྱོགས་སྐུ་ཡི་རྒྱལ་པོའི་བློན་པོ་ཆེ། །མི་བཟད་གཏུམ་ཆེན་ཁྲོ་བོའི་རྣ་བ་གློགས། །འཛམ་གླིང་ཆེ་བའི་བརྟུལ་ཞུགས་གྲུབ་པའི་དབང་། །སྣང་སྲིད་ཟིལ་གྱིས་གནོན་པ་པདྨ་འབྱུང་། །ཨོ་རྒྱན་སངས་རྒྱས་གཉིས་པའི་(༡༢༡བ)
བཀའ་རྟགས་ཀྱི། །རྡོ་རྗེའི་རི་མོ་སྤྱི་བོར་མཛེས་ཁྱོད་ཀྱིས། །གངས་རིའི་རྭ་བས་བསྐོར་བའི་བོད་ཡུལ་འདིར། །ཕན་བདེའི་འབྱུང་གནས་བསྟན་པ་རྒྱས་པ་དང་། །ནད་འཁྲུག་མུ་གེས་འགྲོ་ལ་མི་འཚེ་བར། །ལེགས་བྱས་ལང་ཚོ་དར་བའི་འབྲས་སྨིན་མཛོད། །བདེ་ལེགས་སི་ཏཱ་འཕྲོག་པའི་ཆོམ་རྐུན་མ། །མི་བསྲུན་བསམ་སྦྱོར་ངན་པའི་སྒྱུ་ཐབས་མཁན། །དགྲ་དཔུང་འབོད་གྲོགས་མགྲིན་པ་མཐུ་སྟོབས་མདས། །གཅོད་པའི་ར་གྷུའི་བུ་ཡི་བརྟུལ་ཞུགས་ཟུངས། །འོད་འབངས་བདེ་བྱེད་བདུད་རྩིའི་ཟ་མ་ཏོག །རྐུ་བའི་མ་རུང་ལྷ་མའི་ཁྱབ་འཇུག་ལ། །དྲག་རྩལ་འཁོར་ལོ་འབར་བས་རབ་བསྣུན་པའི། །ལྷ་ཆེན་ཚངས་པའི་དཔེ་ཟླ་ཁྱོད་ཀྱིས་སྒྲུབས། ཁྱད་པར་ཟ་ཧོར་རིག་སྔགས་འཆང་བ་ཡི། །ཆོས་སྲིད་སྒྲུབ་ལ་འཁུ་བའི་ནག་པོའི་སྡེ། །ཕྱི་ནང་སྟེང་འོག་ཕྱོགས་མཚམས་གར་འདུག་ཀྱང་། །དམར་ཆེན་སྙིང་གི་ཁྲག་དྲོན་ཞལ་དུ་དྲོངས། །རྒྱལ་ཁམས་སྤྱི་དང་སྒོས་ཀྱི་བླང་དོར་གཟུགས། །འཆར་བྱེད་ཐུགས་ཀྱི་མ་ཡོང་རྙོག་མེད་ལས། །ཇི་བཞིན་རི་མོའི་སྣང་བརྙན་མ་འདྲེས་པ། །ལྐོག་གྱུར་མངོན་སུམ་རྗེན་པར་བསྟན་དུ་གསོལ། །གངས་ཅན་ལྷ་གཅིག་ལག་ན་པདྨའི་གསུང་། །འབྲུ་དྲུག་གཡས་སུ་འཁྱིལ་བའི་དུང་དཀར་སྒྲ། །སྒྲོག་པར་བསྐུལ་བ་ཇི་བཞིན་དོན་ལྡན་དུ། །བསྒྲུབ་པའི་དམ་བཅའ་སྙིང་གི་དཔལ་བེར་འཁྱིལ། །བདུད་སྡེ་ལས་རྒྱལ་བ་དན་དམར་པོ་ཟུང་། །ལྷ་སྙན་དགྱེས་རྒུར་སྤྱོད་པའི་རོལ་མོ་དང་། །གང་བསམས་ཐོགས་མེད་བགྲོད་པ་ཅང་ཤེས་རྟ། །གསེར་སྐྱེམས་ཐགས་ཀྱི་ཟླ་བའི་ལྷ་རྫས་བཅས། པཀྵཱུའི་ཀླུང་ཆེན་དལ་གྱིས་འབབ་པའི་ལྷོ། །དགེ་བཅུའི་ཡོན་ཏན་ཀུན་ཚང་གཡོན་རུའི་ཆ། །དྲེགས་པའི་དམག་ཚོགས་འདུ་བའི་ཕོ་བྲང་དུ། །རིགས་སྔགས་གྲུབ་པའི་འཕྲིན་ཡིག་ཟློས་གར་སྒྱུར། །(༡༢༢ན)
ས་ཕག་ཧོར་ཟླ་བརྒྱད་པའི་ནང་དུ་ཚངས་པ་ཆེན་པོ་དུང་གི་ཐོར་ཚུགས་ཅན་གྱིས་སྤྱི་སྒོས་ཀྱི་རིམ་གྲོའི་བླང་དོར་སོགས་ཀྱི་སྐུལ་མར་ཚེར་གསེབ་བླ་མ་བློ་བཟང་འཇམ་དབྱངས་རྒྱ་མཚོ་རྫོང་སྟ་མཛད་པའི་གསུང་འཕྲིན་ལན་ལྷ་གོས་གསེར་འབྲུག་གི་རི་མོ་གཡས་འཁྱིལ་དང་བཅས་ཏེ་འཕྲིན་དུ་གསོལ་བ་མེ་ལོང་དངས་པའི་སྣང་བརྙན། སྣང་སྲིད་ཟིལ་གནོན་མཚོ་སྐྱེས་རྡོ་རྗེ་ཞེས། །དུས་གསུམ་སངས་རྒྱས་པདྨ་འབྱུང་གནས་ཀྱི། །ཕོ་ཉ་ལྷ་ཡི་ཚངས་པ་དགེ་བསྙེན་ཆེའི། །བླང་དོར་སྟོན་པའི་འཕྲིན་རྟེན་སུག་པར་སོན། །བསྟན་འགྲོའི་ཕན་བདེའི་ལོ་ཏོག་འཇོམས་བྱེད་པ། །ནག་པོ་བདུད་ཀྱི་སྐྱིན་ཐང་དྲག་པོའི་མདའ། །ཟློག་བྱེད་དགེ་བའི་རིག་སྔགས་ནུས་མཐུའི་རྩལ། །མེ་ལོང་ནང་གི་བཞིན་ལྟར་སྟོན་འདི་སྤྲོ། །བཀའ་སྒྲོག་ཐུགས་རྟེན་གསོ་དང་གསོལ་མཆོད་སོགས། །བགྱིད་འོས་རིམ་གྲོའི་བླང་བྱ་དེར་གསལ་རྣམས། །ལེ་ལོའི་ཆུ་བོ་ཆེ་ལས་སྒྲོལ་བྱེད་པ། །བསྐྱུད་པ་མེད་པའི་བརྩོན་འགྲུས་ཟམ་པ་འཛུགས། །ལྷ་དབང་ཁྱོད་ཀྱི་མཐུ་སྟོབས་རྡོ་རྗེ་ཡིས། །ནག་པོ་བགེགས་ཀྱི་ལྷ་མིན་མོ་ཡི་མངལ། །ལྷུང་དང་ལྷན་ཅིག་རྣམ་པར་རྒྱལ་བ་ཡི། །སྙན་པའི་རྫ་རྔ་སྲིད་རྩེའི་བར་དུ་སྒྲོགས། །གངས་ཅན་ལྷ་གཅིག་སྲོང་བཙན་སྐྱེས་ལྷ་ཆོས། །བྱང་ཕྱོགས་སཱ་ལའི་ལྗོངས་འདིའི་རྒྱལ་བློན་འབངས། །བདེ་ཞིང་སྐྱིད་པའི་གདུགས་དཀར་གྲིབ་བསིལ་ལ། །རྟག་ཏུ་ངལ་གསོར་བྱེད་པའི་འཕྲིན་ལས་མཛོད། །བོད་ཁམས་ཕུང་བའི་མུ་གེ་ནད་རིམས་དང་། །བསམ་ངན་འཆང་བའི་མཐའ་དམག་གཡུལ་གཤོམ་སོགས། །བཟློག་བསད་སྤ་བཀོང་ཚར་གཅོད་ལས་སྒྲུབ་པ། །ཨོ་རྒྱན་སངས་རྒྱས་གཉིས་པའི་ལུང་བཞིན་མཛོད། །གསེར་གྱི་སྙེ་མ་གཡུར་དུ་ཟ་བ་ཡི། །ཕུན་ཚོགས་འཛམ་བུའི་འབྲས་བུ་རོ་བརྒྱ་པ། །ཇི་བཞིན་འདོད་པའི་རེ་སྐོང་བསམ་འཕེལ་(༡༢༢བ)
དབང་། །མཛོད་ཅིག་ཚངས་པ་དུང་གི་ཐོར་ཚུགས་ཅན། །སྙན་པའི་དབྱངས་སྒྲོག་གསེར་འབྲུག་གཡས་འཁྱིལ་བའི། །རབ་དཀར་གོས་དར་སྙན་ཤལ་གསེར་སྐྱེམས་བཅས། །ཧོར་གྱི་ཟླ་བ་བརྒྱད་པའི་ཡར་ཚེས་ཀྱི། །དགའ་བ་དང་པོར་གྲུ་འཛིན་རྩེ་ནས་བྲིས། །ས་ཕག་ཧོར་ཟླ་བརྒྱད་པའི་ནང་དུ་དངོས་ཉམས་སུ་ཐུགས་དམ་སྐོང་དགོས་པའི་མཚན་མ་གསལ་བར་བྱུང་བར་བརྟེན། མཆོད་དཔོན་བློ་བཟང་མཐུ་སྟོབས་འོལ་ཁར་ཆུ་ཚན་ལ་འགྲོ་སྐབས་བསམ་ཡས་སུ་གནོད་སྦྱིན་ཆེན་པོར་འཕྲིན་དུ་གསོལ་བ་བསམ་འཕེལ་དབང་གི་རྒྱལ་པོ། ཞི་རྒྱས་དབང་གི་དངོས་གྲུབ་ཀུན། །སྩོལ་བའི་ནོར་བུ་བསམ་འཕེལ་དབང་། །དགྲ་བགེགས་ནག་པོའི་དཔུང་འཇོམས་པར། །གནམ་ལྕགས་ཐོག་གི་རྗེས་འགྲོ་ཅན། །སྔོན་ཚེ་ལི་ཡི་ཡུལ་གྲུ་ན། ཁྲིམས་ལྡན་ཁྲོས་པའི་དམོད་པའི་འབྲས། །སྲིད་གསུམ་སྐྱེ་འགྲོའི་ཚེ་སྲོག་ལ། །དབང་དུ་སྒྱུར་བའི་མཐུ་ཆེན་ཁྱོད། །འཛམ་གླིང་ཆེ་བའི་རིགས་སྔགས་འཆང་། །པད་འབྱུང་རྡོ་རྗེའི་བཀའ་རྟགས་ཀྱིས། །ཟིལ་མནན་བདུད་རྩི་ལྕེ་ཐོག་ཏུ། །བཞག་པའི་གནོད་སྦྱིན་ཙི་དམར་བ། །སྡེ་བརྒྱད་དྲེགས་པའི་དམག་དཔུང་གི །ཁ་ལོ་སྒྱུར་བའི་མཐུ་སྟོབས་ཅན། །ཆོས་འཁོར་དཔལ་གྱི་བསམ་ཡས་སོགས། །གཙུག་ལག་སྐྱོང་བའི་སྲུང་མ་ཆེ། །ལྷ་ཁྱོད་བཀའ་སྡོད་ཚུལ་གནས་པའི། །རྗེ་དཔོན་སྤེ་དཀར་རྒྱལ་ཆེན་ལྔ། །སྤྲུལ་པ་ཡང་སྤྲུལ་ཕོ་ཉར་བཅས། །ཐུགས་དམ་གཉན་པོ་བསྐང་བའི་ཆེད། །ལྷ་རྫས་ཕྱི་གོས་ནང་གི་དང་། །གོ་མཚོན་ན་བཟའ་གསེར་གྱི་ཕུད། །ཅང་ཤེས་སྒ་སྲབ་ཀྱིས་སྤྲས་སོགས། །མཐུན་པའི་དམ་རྫས་ལེགས་འབུལ་གྱིས། །བཤད་དང་སྒྲུབ་པའི་བསྟན་པ་སྲུངས། །སྲིད་འབྱོར་ཆབ་སྲིད་མངའ་ཐང་སྤེལ། །མུ་གེ་ནད་རིམས་འཁྲུག་རྒྱུན་ཆོད། །འགྲོ་རྣམས་བདེ་(༡༢༣ན)
སྐྱིད་དཔལ་ལ་སྦྱོར། ཁྱད་པར་བདག་སོགས་འཁོར་བཅས་ལ། །དུག་མཚོན་གཡུལ་གཤོམ་མཐུ་བྱ་དང་། །སྟེང་འོག་བར་གསུམ་འབྱུང་པོའི་གདོན། །བར་གཅོད་ཉེར་འཚེ་ཟློག་པར་མཛོད། །གདེངས་ཅན་དབང་པོའི་གཙུག་རྒྱན་ལས། གང་བསམས་ལྷུན་གྱིས་འགྲུབ་པ་ལྟར། །སྲུང་མ་ཁྱོད་ལ་བཅོལ་བའི་ལས། །དུས་ལས་མ་གཡེལ་སྒྲུབ་པར་མཛོད། །ཧོར་གྱི་ཟླ་བ་བརྒྱད་པ་ཡི། །ཕུར་བུ་ཐ་སྐར་དང་འགྲོགས་པའི། །བཟང་པོ་དང་པོའི་ཚེས་དགེ་བར། །གྲུ་འཛིན་གཉིས་པའི་རྩེ་ནས་སྤེལ། སྒྱུར་བྱེད་ཅེས་པ་ས་མོ་ཕག་གི་ལོ་གོང་ནས་མཆོད་རྟེན་རབ་འབྱམས་པ་དང་། མགོན་པོ་དགེ་སློང་གིས་གཙོས་པའི་གསེར་ཡིག་པ་མངགས་ཏེ་གོས་དར་ནོར་བུའི་ཁྱད་ནོར་དང་བཅས་པ་བཀའ་ཤོག་ཕེབས་པའི་ལན་འབུལ་བར་གསེར་ཏོག་ཆོས་རྗེ་དང་འཕྱོང་རྒྱས་བསོད་ནམས་དབང་པོ་གཉིས་བཏང་བའི་དུས་ཕུལ་བ་བསོད་ནམས་ཉི་མ་རྒྱས་པའི་དངོས་པོ། ཛ མྦུ དྦཱི པོ དཱ ར ཀུ ས རྦྦཱ དྷ ར ཙ ཀྲཱ རཻཿ སཱ ཧ སྲོ ཝ རྟི ཝ ཤ ནྱཱ སི ཀ ཨཱ ཛྙཱ། བཱ དེ རྨཱུ ལེ ཤཱི ཝ ར མེ ཁ ལྱི ཀ ཛི ཥྞུ ཤྲཱི མ དྨ ཏྱོ ཀ ཀུ བྷྱུ དྤི ཛ ཡ སྱ། (༡༢༣བ)
འཛམ་(སྡེབ་སྦྱོར་རྨ་བྱ་མྱོས་པ།)གླིང་ཡངས་པའི་ནོར་འཛིན་ཁྱོན་ཀུན་ལ། །བཀའ་ཁྲིམས་རྩིབས་སྟོང་འཁོར་ལོས་དབང་སྒྱུར་བ། །ས་ཡི་བརྒྱ་བྱིན་དཔལ་ལྡན་གོང་མ་ཆེ། །ཕྱོགས་ལས་རྣམ་པར་རྒྱལ་བའི་ཞབས་དྲུང་དུ། །མ་བྲིས་གསལ་བར་ཤར་བའི་ཞལ་གྱི་ཁྱིམ། །མ་བོས་སྙིང་གི་ཁང་བུར་རྟག་འོངས་ཏེ། །མ་འཐུངས་མྱོས་པའི་ཟིལ་དངར་རོ་བདའ་བས། །མ་བླངས་བསྔགས་རྗོད་སྙན་འགྱུར་གླུ་ཡིས་ཞུ། །དེང་དུས་བསོད་ནམས་ཉི་མའི་དངོས་པོ་བརྒྱའི། །ལུས་ཀྱིས་འཇིག་རྟེན་གསུམ་པོ་སྣང་བྱས་པའི། །རྒྱུད་མང་གླུ་ལས་སྙན་པར་སྒྲོག་པའི་གཏམ། །ཡིད་ལ་རྩེ་དགའ་ཁོང་ནས་དགོད་པའི་དཔྱིད། །གསེར་འབྲུག་གཙུག་གི་ནོར་བུས་བཏེག་པའི་རྩེར། །གནམ་གྱི་ཤེ་མོང་རང་རྟགས་ལྷ་ཡི་བཀའ། །བར་སྣང་མཛོད་ཀྱི་རི་མོའི་གོས་སོགས་རྟེན། །ཉེར་སོན་རྨུགས་འཛིན་འབྱོར་བའི་གཡང་ཞིག་ཆགས། །འདི་ན་ཤཱཀྱའི་རིང་ལུགས་ས་ཟླའི་མངལ། །རྣམ་དཔྱོད་དྲོད་ཀྱིས་སྨིན་པའི་དགེ་སྦྱོང་ཡང་། །རང་བློ་ཡངས་པའི་སྒོ་འཕར་བཞི་ཕྱེ་ནས། །ཐོས་བསམ་སྒོམ་པའི་རིག་བྱེད་སྤེལ་འདིར་གཟིགས། །སྟོང་གསུམ་མི་མཇེད་བདག་པོ་ཚངས་པ་ཆེ། །ལྷ་ཡི་རྨུ་ཐག་རིང་པོའི་ལམ་བརྒྱུད་དེ། །འཛམ་གླིང་ཡོངས་ཀྱི་རྒྱལ་པོར་ཤེས་པ་ལ། །ཧོང་དེའི་མཚན་ལྡན་ཁྱོད་ལས་དམིགས་སུ་མེད། །མཚོན་གྱི་བསྐལ་པ་དར་དྲག་སྡིག་ཏོའི་དཔུང་། །འཇིག་རྟེན་གླང་པོར་སྤྱོད་པའི་རྩོད་ལྡན་མ། །ལྷ་གཅིག་སྤྱན་ཟུར་ལྷུང་བའི་མོད་ཉིད་ལ། །མངོན་སུམ་ཚད་མས་མ་རྙེད་དེ་ག་རེ། །གནམ་དང་ས་ཡི་དཀྱིལ་འཁོར་ཀུན་གྱི་བདག །འཇམ་དབྱངས་གོང་མའི་སྙན་པ་ཐོས་པའི་མོད། །ལྷ་མིའི་ཐུན་མོང་རྒྱལ་སྲིད་ལ་དབང་བའི། །ང་ལ་ནུ་ཡི་(༡༢༤ན)
ཁེངས་པ་བག་ལ་ཞ། །ལེགས་བྱས་ནོར་བུའི་སྒྲོན་མེ་འབར་བའི་གཟིས། །གཙུག་ལག་གཟུགས་བརྙན་མ་འདྲེས་འཆར་བའི་སྒོ །ཐེ་ཚོམ་ཁྱོགས་ལ་མི་བརྟེན་ཚད་མ་རུ། །སྒྲུབ་པས་ཉིན་མཚན་དབྱེ་བ་ཡོངས་མི་ཕྱེད། །འཇིག་རྟེན་ཁམས་ཀུན་ནད་མེད་ལོ་ལེགས་ཤིང་། །ཚེ་ཡང་རིང་པོར་གནས་པའི་དགེ་མཚན་རྣམས། །དུས་ཀྱི་བདག་པོའི་ལས་ཤུགས་ཀྱིས་བསྒྲུབས་པར། །སྟེས་དབང་ཙམ་དུ་འཁྲུལ་རྣམས་བློ་གྲོས་རྨོངས། །མཉེས་གཤིན་བྱམས་པའི་སྙིང་ཐག་རིང་པོ་ཡིས། །ཡངས་པའི་ས་ཆེན་ཕ་མཐའ་འཆིང་ནུས་པའི། །ཕལ་དང་དམ་པའི་ངང་ཚུལ་ཁྱད་པར་ནི། །མཁའ་དང་ཕྲ་མོའི་བུག་པ་ལས་ཀྱང་ཆེ། །དྲེགས་ལྡན་རྒྱལ་ཕྲན་ཤུགས་འགྲོ་བྱེ་བ་ཡིས། །བོར་བའི་གསེར་འཁོར་འདྲེན་བཟོད་སྒྱུ་རྩལ་ཅན། །ལས་དཀར་རྣམ་དཔྱོད་མྱོས་བུམ་གཟེངས་མཐོ་བའི། །སྤོས་ཀྱི་གླང་པོའི་མཆེད་ཟླ་གཞན་སུ་ཞིག །ཨེ་མ་རྒྱུ་དང་མི་རྒྱུ་བའི། །འགྲོ་ཀུན་བདེ་བར་ངལ་གསོའི་སྟེགས། །ལྷ་མིའི་དབང་ཕྱུག་ཁྱོད་ཉིད་ཀྱི། །དྲིན་དུ་གཅམ་བུ་མིན་པར་ཤེས། །དེ་ཕྱིར་ཕན་བདེའི་དཔག་བསམ་དབང་། །རེ་བ་སྐོང་བའི་ཡིད་བཞིན་ནོར། །ཆབ་སྲིད་ཉི་ཟླས་འཇིག་རྟེན་ཀུན། །གསལ་བ་དེ་སྲིད་བརྟན་པར་སྨོན། །ལྟ་ན་སྡུག་པའི་གྲོང་ཁྱེར་དབུས། །འཆི་མེད་བདག་པོའི་ཁང་བཟང་དུ། །གསེར་གྱི་མྱུ་གུ་བཀྲམ་པའི་ཁྲིར། །ལྷ་ཁྱོད་བསྐལ་བརྒྱར་ཞབས་བརྟན་ཤོག །འཛུམ་ལྡན་ཞལ་གྱི་པདྨོ་ནས། །བཀའ་མཆིད་སྦྲང་རྩིའི་རྒྱུན་མངར་པོ། །མཛད་མེད་འཛག་པའི་རོ་བཅུད་ལ། །སྤྱོད་པའི་དགའ་སྟོན་ཆད་མེད་སྩོལ། །རིན་ཅེན་འཕྲེང་བ་འཇམ་ཕྲུག་སོགས། །རྟེན་གྱི་གདུབ་བསིལ་ལེགས་འཁྲོལ་པའི། །ཞུ་མཆིད་ལེགས་བྲིས་གར་(༡༢༤བ)
མཁན་མ། །ཤར་ཕྱོགས་དབང་པོའི་མདུན་སར་སྒྱུར། །ས་ཕག་ལོ་གད་སྒོ་ཞང་ཚན་གཉིས་ཀྱིས་འབངས་གྱེན་ལོག་ལ་བརྟེན་པའི་སྡེ་གཟར་ཁོལ་བུར་བསླང་བའི་དུས་ཧོར་ཟླ་བཅུ་གཉིས་པའི་ལྷ་ཚེས་གསུམ་གྱི་ཉིན་བསམ་ཡས་ནས་དྲེགས་པའི་སྡེ་དཔོན་ཆེན་པོས་གཙང་ཉང་སྨད་ཕྱོགས་སུ་གཟུགས་ཅན་གྱི་དོན་ལ་ལྷ་སྲིན་སྡེ་བརྒྱད་ཀྱི་དམག་ཅིག་འགྲོ་དགོས་འདུག་པར་རྟེན་འབྲེལ་གྱི་ཆེ་བའི་གོ་མཚོན། རོལ་མོ། རྟ་སོགས་དགོས་ཚུལ་བྱུང་བ་འབུལ་བར་མཁར་ལྡན་པ་འཇམ་དཔལ་བཏང་བའི་ཚེ་འཕྲིན་དུ་གསོལ་བ་ཤ་ཁྲག་ཚོགས་སུ་རོལ་བའི་དགའ་སྟོན། སྭསྟི་སིདྡྷཾ། དུས་གསུམ་སངས་རྒྱས་ཀུན་འདུས་དཔལ་ཨོ་རྒྱན་གྱི་སློབ་དཔོན་ཆེན་པོས་ཟབ་ཡངས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གིས་ཐོག་དྲངས་གངས་རིས་བསྐོར་བའི་ལྗོངས་ཀྱི་བསྟན་པ་དང་ཟབ་གཏེར་སྐྱོང་བའི་སྲུང་མར་མངའ་གསོལ་བའི་དྲེགས་པའི་སྡེ་དཔོན་གནོད་སྦྱིན་ཙིའུ་དམར་པོའི་རྡོ་རྗེའི་གསུང་གི་འཕྲིན་ཡིག་འབྱོར་པས་ཡིད་སྤྲོ། སློབ་དཔོན་ཆེན་པོའི་དངོས་ཀྱི་སློབ་མ་ཟ་ཧོར་གྱི་སྔགས་འཆང་ཨཱ་ཙརྱ་དྷརྨ་པཱ་ལ་ནས་བཟུང་ཕ་མེས་བརྒྱུད་པས་རིམ་པར་བསྟེན་ཅིང་བསྒྲུབས་པ་དང་། ཐམས་ཅད་མཁྱེན་པ་དགེ་འདུན་རྒྱ་མཚོ་ནས་འབྲེལ་བ་ཟབ་མོ་ཐོགས་པ་སོགས་སྔོན་གྱི་དམ་ཚིག་ཉེ་བར་དགོངས་པའི་སྣང་སྲིད་དྲེགས་པའི་དམག་གི་དཔུང་ཚོགས་རྣམས་གཙང་ཉང་སྨད་ཀྱི་ཕྱོགས་སུ་ཁ་ལོ་སྒྱུར་བའི་རྟེན་འབྲེལ་གྱི་སྒོ་འཕར་སྒྲིག་དགོས་ཚུལ་ལ་རྗེས་སུ་ཡི་རང་ཞིང་། དེ་དོན་ཐོ་ཟུར་གསལ་ལྟར་སྔགས་དང་ཕྱག་རྒྱས་མང་པོར་སྤེལ་ཏེ་ཐུགས་དམ་གཉན་པོ་སྐོང་བའི་རྫས་སུ་ཕུལ་བ་ལྟར་དགྱེས་པ་སྐྱེད་པར་གྱུར་ཅིག །ཆེ་མཆོག་ཧེ་རུ་ཀ་དང་གསང་བའི་བདག །པདྨ་ཐོད་ཕྲེང་རྩལ་གྱིས་དམ་ཉམས་དགྲའི། །དོན་(༡༢༥ན)
སྙིང་ཤ་ཁྲག་བླ་ཚེ་སྲོག་དབུགས་རྣམས། །བཤན་པ་ཁྱོད་ཀྱིས་ཟས་སུ་གཏད་མིན་ནམ། །སྡེ་བརྒྱད་རྦ་ཀློང་འཁྲུག་པའི་གཞལ་ཡས་ནས། །དྲེགས་པའི་སྡེ་དཔོན་དམག་གི་དཔུང་ཚོགས་རྣམས། །ཉི་མ་ནུབ་ཕྱོགས་ཉང་སྨད་བསམ་གྲུབ་རྩེར། །རྫུ་འཕྲུལ་ཤུགས་ཀྱིས་ཐོགས་པ་མེད་གཤེགས་ལ། །ལྷ་ཆོས་བཀའ་ལས་འདས་པའི་དམ་ཉམས་དགྲ། །མི་ཆོས་དྲིན་ལན་ངན་འཇལ་འབངས་གྱེན་ལོག །དགེ་འདུན་སྡེ་ཀླུང་དཀོན་ཅོག་ཁྱད་དུ་གསོད། །སེམས་ཅན་སྡུག་ལ་སྦྱོར་བའི་སྤྱི་ཡི་དགྲ། །དོག་བདེ་གད་ཁ་ས་པ་ནོར་བུ་དང་། །ལྷ་ས་སྒོ་སྣ་ཤག་པ་དངོས་གྲུབ་ཀྱི། །བཟའ་ཚང་བུ་ཚ་རིགས་རུས་བདུན་བརྒྱུད་ཚུན། །དྲན་འཁྲུལ་གྲོས་ངན་གཤོམ་པའི་འཁོར་གཡོག་དང་། །བློ་སྟོབས་བརྩོན་པས་དཔུང་པའི་ཞོར་འདེགས་པའི། །བཀྲས་སྒང་ཚེ་རིང་གདོང་དཀར་རྒྱལ་མཚན་སོགས། །བསམ་སྦྱོར་ངན་པ་འཆང་བའི་དམག་དཔུང་གི ། ཤ་ཁྲག་བསྟན་སྲུང་ཁྱོད་ཀྱིས་ཚོགས་སུ་རོལ། །དམ་ཉམས་འདི་རྣམས་མྱུར་དུ་སྒྲོལ་བ་ཡི། །མཐུ་སྟོབས་ནུས་པའི་རྣོ་ངར་མི་ལྡན་ན། །སྐྱེ་འགྲོ་སྲོག་བདུད་སྡེ་བརྒྱད་དམག་དཔོན་དུ། །གྲགས་ཤིང་ཞལ་གྱིས་འཆེས་ལ་ངོ་རེ་གནོང་། །དེ་ཕྱིར་ལོ་དང་ཟླ་བ་མ་འགྱངས་པར། །གཉེར་དུ་གཏད་པའི་དམ་ཉམས་དགྲ་ཚོགས་ཀྱི། །ཕོ་བརྒྱུད་ཤིང་སྡོང་རྩ་བ་བཅད་ལྟར་ཐོང་། །མོ་བརྒྱུད་དགུན་གྱི་ཆུ་ཕྲན་སྐེམས་ལྟར་ཐོང་། །བུ་ཚ་སྒོ་ང་བྲག་ལ་བརྡབ་ལྟར་ཐོང་། །གཡོག་འཁོར་རྩ་ཕུང་མེ་ཡིས་བསྲེགས་ལྟར་ཐོང་། །མངའ་ཐང་སྣུམ་ཟད་མར་མེ་བཞིན་དུ་ཐོང་། །མདོར་ན་མིང་དང་རྗེས་ཙམ་མེད་པར་མཛོད། །མ་གཡེལ་མ་གཡེལ་དྲེགས་པའི་དམག་ཚོགས་རྣམས། །(༡༢༥བ)
དགྲ་དཔུང་ཐལ་བར་བརླག་པའི་སྙིང་ཁྲག་གིས། །མྱོས་པའི་བཞིན་རས་ཟླ་བ་ལྟར་ཕྱར་ནས། །རྣམ་པར་རྒྱལ་བའི་རུ་མཚོན་མཁའ་ལ་སྒྲོངས། །པུར་རྒྱལ་བོད་འདིར་ནད་འཁྲུག་མུ་གེ་སོགས། །དུས་ཀྱི་ཆད་པ་ཀུན་ཞི་བདེ་སྐྱིད་འཕེལ། །ལུང་དང་རྟོགས་པའི་བསྟན་པ་རབ་རྒྱས་ཤིང་། །རིག་འཛིན་བདག་གིས་བསམས་དོན་ལྷུན་གྲུབ་མཛོད། །རབ་དཀར་ལྷ་རྫས་དར་གྱི་སྙན་ཤལ་དང་། །རིན་ཅེན་གསེར་སྐྱེམས་ཞོ་ཡི་འཁོར་ལོ་བཞི། །དམོད་ནས་ཤིས་པ་བརྗོད་པའི་མེ་ཏོག་ལ། །འཚམས་སྤྲིན་རྟགས་ཀྱི་རེ་ཁས་མཚན་པར་དགེ །ས་ཕག་རི་བོ་མཆིམས་སུ་གསང་ཕུག་གི་སྲུང་མ་བཙན་རྒོད་རྟ་ར་བས་རིམ་གྲོའི་བསྐུལ་མ་དང་། གོ་མཚོན་སོགས་སྤྱན་གཟིགས་དགོས་ཚུལ་སྐྱེལ་བར་མཁར་ལྡན་པ་འཇམ་དཔལ་བཏང་བའི་དུས་ཀྱི་འཕྲིན་ལན་དམར་ཆེན་སྐྱེམས་ཀྱིས་མྱོས་པའི་གད་བརྒྱངས། བསྟན་སྲུང་གནོད་སྦྱིན་ཆེན་པོའི་བཀའ་སྡོད་ཆེ། །མཆིམས་ཕུ་གསང་བའི་གནས་ཀྱི་སྲུང་མ་མཆོག །རྫུ་འཕྲུལ་ཤུགས་འཆང་རྟ་ར་ཀླུ་གོང་གི །བླང་དོར་སྟོན་པའི་འཕྲིན་ཡིག་སོན་པས་སྤྲོ། །རྒྱལ་དབང་པདྨའི་གསང་གསུམ་རོལ་གར་གྱིས། །བྱིན་བརླབས་སྒྲགས་ཀྱི་ཡང་རྫོང་མཆིམས་ཕུ་དང་། །མཁར་ཆུ་དཔལ་གྱི་ཕུག་རིང་རྣམ་གསུམ་དུ། །ཀི་ཀཾ་གཤིན་རྗེའི་ལས་སྦྱོར་འཕྲལ་དུ་སྒྲུབས། །བསྟན་འགྲོའི་བདེ་སྐྱིད་འཇོམས་པ་སྤྱི་ཡི་དགྲ །གད་ཁ་ས་པ་སྒོ་སྣ་ཤག་སྒོ་སོགས། །དམ་ཉམས་འབངས་ཀྱིས་གྱེན་ལོག་འཁོར་གཡོག་དཔུང་། །སྲུང་མ་ཁྱོད་ཀྱིས་སྙིང་ཁྲག་ད་ལྟ་འཐུང་། །གངས་རིའི་ལྗོངས་འདིར་མི་ནད་ཕྱུག་ནད་དང་། །དུས་ཀྱི་འཁྲུག་པ་ཉེར་འཚེ་ཀུན་ཞི་ཞིང་། །ཐུབ་པའི་བསྟན་དང་སྐྱེ་རྒུའི་བདེ་སྐྱིད་རྣམས། །དཀར་ཕྱོགས་ཟླ་བ་ལྟ་བུར་འཕེལ་བར་མཛོད། །མཚོན་ཆ་རོལ་མོ་ཁྲབ་གདན་ཐོད་ཆིངས་དང་། །རྒྱ་ཇ་དངུལ་ཕོར་དར་མཚོན་རྣམ་པ་ལྔ། །གསེར་སྐྱེམས་དམོད་ནས་མེ་ཏོག་དང་བཅས་(༡༢༦ན)
པར། །རྟགས་ཀྱི་ལང་ཚོས་སྤུད་དེ་ལི་ཁི་ཏཾ། །
རབ་བྱུང་བཅུ་གཅིག་པའི་ལྕགས་བྱི་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་བྱི་ལོར་བྲིས་པའི་ཆབ་ཤོག་འཕྲིན་ཡིག་ཁག །ཀུན་ལྡན་ཞེས་པ་ལྕགས་པོ་བྱི་བའི་ལོ་ཚངས་པ་དུང་ཐོད་ཅན་ལ་སྤྱི་སྒོས་ཀྱི་བླང་དོར་གསལ་བར་སྟོན་དགོས་ཚུལ་དང་བཅས་མཆོད་སྤྲིན་སྤྲོ་བར་གསོ་རིག་གཙུག་ལག་འཛིན་པའི་དྲང་སྲོང་དཔོན་ཚང་བྱང་ངོས་པ་ནང་སོ་དར་རྒྱས་བཏང་བའི་དུས་འཕྲིན་དུ་གསོལ་བ་བཀྲ་ཤིས་གཡས་སུ་འཁྱིལ་བའི་དུང་དཀར། བཀྲ་ཤིས་རི་མོ་མཛེས་པའི་དུང་དཀར་པོ། །ཐོར་ཚུགས་རྣམ་པར་བརྒྱན་པའི་ཅོད་པན་དུ། །གཡས་འཁྱིལ་དགེ་བསྙེན་ཆེན་པོ་ཚངས་པ་ཡི། །ལྷ་མིག་སྤྱན་གྱིས་གཟིགས་ལ་སྙན་གྱིས་གསོན། །བླང་དང་དོར་བྱ་སྟོན་པའི་རྡོ་རྗེའི་གསུང་། །ཇི་བཞིན་ལེ་ལོར་མ་ལུས་ལག་དར་བས། །ས་ཁམས་ཕག་གི་བགྲང་བྱའི་བགེགས་རིགས་རྣམས། །ཞི་བའི་ངོ་མཚར་སྒོ་འཕར་ཐོག་མར་ཕྱེ། །འོན་ཏེ་སྙིགས་མ་ལྔ་བདོའི་ལུས་མེད་དཔུང་། །བསྟན་འགྲོའི་ཕན་བདེ་འཕྲོག་པའི་ཆོམ་རྐུན་མ། །དངོས་དང་བག་ལ་ཞྭ་བའི་སྒྱུ་མའི་འཕྲུལ། །ས་འོག་སྲིན་བུ་ལྟ་བུར་དཔྱད་བཟོད་དཀའ། །བཟང་ངན་མཐའ་དག་སེམས་ཉིད་གཅིག་པུ་ཡི། །རྣམ་འཕྲུལ་ལས་གཞན་དམིགས་སུ་མེད་ན་ཡང་། །མ་རྟོགས་བདེན་ཞེན་སྒྲོག་གིས་འཁོར་བ་འདིར། །བཅིངས་རྣམས་རེ་དོགས་དབང་གིས་སྒོ་གསུམ་མནར། །མཁྱེན་པའི་མེ་ལོང་ངོས་སུ་དུས་གསུམ་གྱི། །སྣང་ཚུལ་སྒྲིབ་མེད་གཟིགས་པའི་པདྨ་འབྱུང་། །སློབ་དཔོན་སངས་རྒྱས་གཉིས་པའི་ཞལ་གྱི་ལུང་། །ལྷ་ཁྱོད་སྙན་གྱི་དབང་པོའི་སྣོད་དུ་གཏམས། །རྫུ་འཕྲུལ་ཤུགས་ཀྱིས་སྟོང་གསུམ་ཀུན་མྱུལ་ཞིང་། །དཔྲལ་བའི་སྤྱན་གྱིས་སྣང་སྲིད་མ་ལུས་པ། །སལ་ལེར་གཟིགས་པའི་འབྲས་བུ་དོན་ལྡན་ཆེད། །འབྱུང་འགྱུར་མ་སྦས་ལུང་དུ་སྟོན་པར་རིགས། །མཐོ་རིས་(༡༢༦བ)
སྨན་པ་གཉིས་པའི་རྒྱུད་འཛིན་པར། །འཆི་མེད་དྲང་སྲོང་གྲུབ་པའི་རིང་ལུགས་མཁན། །ཕོ་ཉའི་གཡར་ལམ་ཡས་གསོལ་དོགས་སེལ་ལན། །དངས་པའི་མཚོ་ལ་ཟླ་བའི་གཟུགས་བཞིན་སྟོན། །སྤྱན་གཟིགས་ཚོགས་འཁོར་ཐུགས་དམ་སྐོང་པའི་རྫས། །སྔགས་དང་ཕྱག་རྒྱས་རབ་སྤེལ་ལྷ་ཡི་ལམ། །ཀུན་བཟང་མཆོད་པའི་སྤྲིན་ཕུང་ཆེར་སྤྲོས་ཏེ། །ཚངས་དབང་ལྷ་ཡི་མདུན་ས་མཛེས་གྱུར་ཅིག །ལྕགས་བྱི་འབྲས་ལྡན་གྱི་དུས་སྟོན་ལ་བབ་པའི་ཚེ་བསམ་ཡས་ནས་དྲེགས་པའི་བསྟན་སྲུང་གནོད་སྦྱིན་ཆེན་པོས་རིམ་གྲོའི་བླང་དོར་གྱི་གསུང་འཕྲིན་བྱུང་བར་སྤྱན་གཟིགས་འབུལ་བ་དང་བཅས་མཁར་ལྡན་པ་བཀའ་འགྱུར་གྱི་དོ་དམ་ལ་བཏང་བའི་ཚེ་འཕྲིན་དུ་གསོལ་བ་མི་འདའ་རྡོ་རྗེའི་དམ་ཚིག །སངས་རྒྱས་ཀུན་གྱི་གསང་གསུམ་རྡོ་རྗེའི་གར། །པད་དཀར་ཟེ་འབྲུ་ལས་འཁྲུངས་སྤྲུལ་པའི་སྐུ། །རིག་འཛིན་པདྨའི་ཕོ་ཉ་གནོད་སྦྱིན་ཆེའི། །རྡོ་རྗེའི་གསུང་འཕྲིན་བླང་དོར་བཅས་པ་སོན། །རིང་མོ་ཉིད་ནས་མཆོད་བསྟོད་ལྷུར་བླངས་ཤིང་། །ལྕགས་ཡོས་དམ་ཚིག་གཉན་པོ་ཉེར་བསྒྲགས་པ། །རབ་དགོངས་ཅུང་ཟད་ཙམ་ཡང་མི་འདའ་བའི། །གེགས་སེལ་མཐུན་རྐྱེན་སྒྲུབ་པ་དམ་པའི་ཚུལ། །འཁྲུག་རྩོད་ནད་ཡམས་མུ་གེ་ལ་སོགས་པས། །བོད་ཁམས་སྐྱེ་རྒུ་མནར་བའི་བྱེད་པོ་ཀུན། །ཞི་བྱེད་གཙུག་ལག་ཁང་དང་ཐུགས་ཀྱི་རྟེན། །བཞེངས་འདིས་ཕན་བདེའི་སྣང་བ་སྟེར་རམ་སྙམ། །འོན་ཏེ་ལྷ་སྲིན་འཁྲུགས་པའི་ཁ་རླངས་ནད། །ཟློག་ཐབས་རྒྱལ་ཁམས་སྤྱི་ལ་སྒྲུབ་འཇུག་པས། །དེ་དོན་བསམས་པ་ལྷུན་གྱིས་འགྲུབ་པའི་གྲོགས། །བསྟན་བསྲུང་དྲེགས་པའི་དབང་པོ་ཁྱོད་ཀྱིས་མཛོད། །སྒོས་ཀྱི་རིམ་གྲོར་བརྒྱ་ཕྲག་འདུས་པའི་སྡེར། །བསྙེན་(༡༢༧ན)
བཀུར་འགྱུར་རོ་ཅོག་གི་བཀའ་སྒྲོག་ཅིང་། བསྟན་སྲུང་མཆོད་དང་མི་འདའི་བཅད་རྒྱ་སོགས། །ཡིད་ལ་རི་མོར་བྲིས་པ་ལག་ཏུ་དར། །རིག་འཛིན་སློབ་དཔོན་པདྨ་ཐོད་འཕྲེང་སོགས། །རྡོ་རྗེ་འཆང་དངོས་རྩ་བརྒྱུད་བླ་མ་ཡི། །དམ་ཚིག་རབ་དགོངས་སྔགས་འཆང་བདག་ཅག་གིས། །བཅོམ་པའི་འཕྲིན་ལས་མ་ལུས་སྒྲུབ་པར་མཛོད། །དངོས་སུ་བཤམས་དང་ཡིད་ཀྱིས་སྤྲུལ་པ་ཡི། །ཀུན་ཏུ་བཟང་པོའི་མཆོད་སྤྲིན་རྒྱ་མཚོར་བཅས། ཁྲུམས་ཀྱི་ཟླ་བའི་དཀར་ཕྱོགས་གྲལ་ཚེས་ལ། །སྡེ་བརྒྱད་ཀུན་གྱི་ཡང་རྗེའི་སྤྱན་སྔར་སྤེལ། །ལྕགས་ཕོ་བྱི་ལོ་འཕགས་ཡུལ་ཝ་ར་ཎཱ་སིའི་བྲམ་ཟེའི་རིགས་ཀྱི་པཎྜི་ཏ་བ་ལ་བྷ་དྲ་དང་། གོ་ཀུ་ལ་གཉིས་ཀྱིས་བརྡ་སྤྲོད་པའི་བསྟན་བཅོས་པཱ་ཎི་བྱཱ་ཀ་ར་ཎ་ཞེས་སྔོན་མེད་པའི་བསྟན་བཅོས་ཆེན་པོ་བོད་ཡུལ་དུ་སྤེལ་ནས་སླར་རང་ཡུལ་དུ་བདེ་བར་འཁོར་བའི་གནས་ཚུལ་དང་བཅས་ལྕགས་ཀྱི་འཕྲིན་ཡིག་བྱུང་བའི་ལན་རྣམ་དཔྱོད་ཡངས་པའི་བློ་གྲོས། ས རྦ ལོ ཀ སྱཱ ཀཱ རྟཱ བྲ ཧྨ ཤྭེ ཏ པ དྨཱ ཀྵཿ མཱུ རྡྷེ ནྡུ གཎ པ ཏི བྷ གབ དྦྷྱ སྟྭཾ ར ཀྵཿ ཤ བྡ ལ ཀྵ ཛྙ ཡ ས རྦཾ པ རི བི ཙཱ ར ཏོ དྷི མཱ ནུ། བ ཊུ བཱ ཧོ མ ཧཱ ཀྲ མ ཝ ར ཎཱ སི ནཱ མ ཀཱི རྟིཿ འཇིག་རྟེན་ཀུན་གྱི་བྱེད་པ་པོ། །གསེར་མངལ་ཅན་དང་པད་དཀར་མིག །གཙུག་ན་ཟླ་བ་ཆོས་ཀྱི་བདག །ལེགས་ལྡན་རྣམས་ཀྱིས་ཁྱོད་ལ་སྲུངས། །སྒྲ་ཚད་ཤེས་བྱ་ཐམས་ཅད་ལ། །རྣམ་དཔྱོད་ཡངས་པའི་བློ་གྲོས་ཅན། །མཁས་མང་འདུ་བའི་གྲོང་ཁྱེར་ཆེ། །ཝ་ར་ཎཱ་སི་ཞེས་སུ་གྲགས། (༡༢༧བ)
ཏ སྱ མ དྷྱོ ཀྟ བྲ ཏ སྱ པྲ ཏི བྷཱ ན སུ ཤྲཱི པྲཱ བྟཾ། བ ལ བྷ དྲ གོ ཀུ ཁེ ན མ ཧཱ པ ཎྜི ཏ སུ དཱི ཐཱ། ཨཱ ཤི རྦ ཏ པཱ ད མ དྷུ ར སྱ སྭ ར སྱ བཱི ཎ ཛྙ ལླ རཱི ལ དཱ། ལེ ཁཱ ཀྵ ར ཙ ནྡ ན ཚུ ཧ ར ཙི ཧྣ ཡུ བ ནེ ན ཙ ཏྲཾ ཡུ ཀྟཾ། དེའི་དབུས་སྨྲ་བའི་བརྟུལ་ཞུགས་ཀྱིས། །སྤོབས་པ་དགེ་བའི་དཔལ་ཐོབ་པ། །བ་ལ་བྷ་དྲ་གོ་ཀུ་ལ། །པཎ་ཆེན་རྣམ་གཉིས་བདེ་བའི་ངོས། །ཤིས་པ་བརྗོད་པའི་ཚིག་སྙན་པོའི། །དབྱངས་ཀྱི་རྒྱུད་མང་འཕྲོལ་བཞིན་དུ། །འཕྲིན་ཡིག་ཙནྡན་ཚུ་ཧ་ར། །རྟགས་ཀྱི་ལང་ཚོས་སྤྲས་པ་སོན། །ཧཻ མ ན བྲཱ ཀ ར ཤྭེ ཏེ ན པ རི བི ཏྟ སཱ ལ སྱ ཛ ན པཱ དེ། ཤཽ དྡྷཽ ད ནི ཏོ དྷ རྨ དྷ ར སྱ པ ཋོ པ དྷྱཱ ཡཱ བི ནུ ཥྚེ ཛཱི ཝཿ སཾ སྐྲྀ ཏ སྱོོ ཏྟ མ ཤཱ སྟྲེ མ ཧཱ བྱཱ ཀ ར ཎ པཱ ཎྀ མཿ ཙ ནྡྲ བ ཙྪུ ཀླ རུ ཙི རེ ཎ བྷོ ཊ དེ ཤ མཱུ རྵཱ ནྡ ཀཱ ཤཱ ཏྲ། གངས་ཅན་ར་བ་དཀར་པོ་ཡིས། །ཡོངས་བསྐོར་སཱ་ལའི་སྨན་ལྗོངས་ན། །ཟས་གཙང་སྲས་ཀྱི་ལུགས་འཛིན་པའི། །ཀློག་པ་མཁན་ཡང་བདེ་བར་འཚོ། །ལེགས་པར་སྦྱར་པའི་བསྟན་བཅོས་མཆོག །བརྡ་སྤྲོད་ཆེན་པོ་པཱ་ཎི་ཞེས། །ཟླ་བ་ལྟ་བུར་དཀར་མཛེས་ཀྱིས། །བོད་ཡུལ་རྨོངས་པའི་མུན་བསལ་ནས། །(༡༢༨ན)
པུ ན རཱ པི མ དྷྱཱ དེ ཤ པེ དོ ཀྟ བྲ ཧྨ ཎ སེ ནེ། བི དོ ཥ ཙ པྲ ཡོ གྱ སྱ ཀ །ཏ ཏྐ རྞ སྱ ར སཿ དི ཀ ད སྨི ནྲ གཏ ཙཱ ན གཏསརྦ སྱེ ཤྭ ར བུ ཎྱ སྱ། ཨ ནུ བྷཱ བ པྲ ཀྲྀ ཏི ནི ར བྷོ གཎྲྀ ཏྤ ཏེ རྴི ལ ནི ཏྱཾ། སླར་ཡང་རྒྱ་གར་འཕགས་པའི་ཡུལ། །རིག་བྱེད་སྨྲ་བའི་བྲམ་ཟེའི་སྡེར། །ཉེས་པའི་སྐྱོན་དང་བྲལ་བའི་ངོས། །འབྱོར་བའི་གཏམ་དེ་རྣ་བའི་བཅུད། །ཕྱོགས་དེར་རྒྱུ་དང་མི་རྒྱུ་བ། །ཀུན་གྱི་དབང་ཕྱུག་བསོད་ནམས་ཀྱི། །མཐུ་ཡི་རང་བཞིན་ལྷུན་གྲུབ་པ། །མི་ཡི་བདག་པོའི་ཚུལ་དེ་ངེས། །ཨ ཝ ར སྱ དྷ ནཾ སྭ སྱ པྲ མུ ཁ ཙཽ ར བ ཏོ ཧེ ཋ ནཱ ཏྲ། ར ཀྵཱ བྷ ཡ ཤ ར ཎ དཱ ན ད ཏྒཱ ཡ ཝཱ ག ཝ ཤྱ བཱི ཪྻ། ཨུ བཾ སཾ རྷ ར ནཱ མ སྱ པ ཙ ཏ ཀཾ ཧ ཏི ཀ སྱ། ཧྲྀ ཙྩ ནྡྲ ཡ དྷྱ ཤ ཡ མྲྀ གབྲ ཏི བི མྦ རུ ཙི རཿ གཞན་གྱི་ནོར་ལ་རང་གི་བཞིན། །ཆོམ་རྐུན་ལྟ་བུའི་འཚེ་བ་ལས། །སྲུང་བའི་མི་འཇིགས་སྐྱབས་ཀྱི་སྦྱིན། །སྟེར་ལ་ལུས་ངག་འབད་པས་བརྩོན། །ཨུ་བམ་སི་དྷ་ར་ཞེས་པའི། །བྱ་མ་རྟ་ལ་ཕན་གདགས་པའི། །སེམས་ཀྱི་བསིལ་ཟེར་ཅན་གྱི་ངོས། །ལྷག་བསམ་རི་དྭགས་གཟུགས་བརྙན་མཛེས། །(༡༢༨བ)
མེ དྷ རྵི ཛ ཧྣུ དྭ ཡོ ཪྶཱུ རྞ སུ བྷཱ ཥི ཏ ཀ ཐཱ། སྭ རྦ ཡོ གདྷཱ ཡོ ན དཱི བ ཏོ ན ཊུ ཊ ཡ ཙྪ ནྟུ། བ རྞ པ རི ས མཱུ ཧ མྲྀ ཎཱ ལཱ གྲ ཙ ཏྱ ཛ མྦཱ པྶུ རྦ ཎཿ མ ཉྫ རཱི བ རླུ པ བྷུ རི ཤ ཏུ ལྱ ཙ ཀྲ པཱུ རྞ ས ཧི ཏེ། །ན ཀྵ ཏྲ སུ བཽ ཥཱི སུ ཪྻ མ གར སྱ རཱ ས ཏི ཥྛ། ཧེ མ ནྟཱ ནྟ ཀཱ ལེ པུ ར པོ ཏ ལ ཏྭཾ ལི ཥི ཏཾ། བློ་ལྡན་དྲང་སྲོང་ཛཧྣུ། །ཟུང་གིས་ལེགས་སྐྱུགས་ལེགས་བཤད་གཏམ། །མཐོ་རིས་ཆུ་བོ་གངྒཱའི་རྒྱུན། །ཆད་པ་མེད་པར་སྩོལ་ཅིག་གུ། །ཡི་གེ་ཡོངས་འདུའི་འཁྲི་ཤིང་རྩེར། །རྟེན་གྱི་ཛམྦུ་ཆུ་བོའི་གསེར། །སྙེ་མ་ཡོངས་འདུ་ཉེར་དུད་པའི། །སྲང་གི་འཁོར་ལོ་གང་བཅས་ཏེ། །རྒྱུ་སྐར་རྒྱལ་གྱིས་ལེགས་ཉ་ཞིང་། །ཉིན་བྱེད་ཆུ་སྲིན་ཁྱིམ་ཞུགས་པ། །དགུན་ཟླ་ཐ་ཆུང་དུས་གྱི་ཚེ། །ཕོ་བྲང་པོ་ཏ་ལ་ནས་བྲིས། །
རབ་བྱུང་བཅུ་གཅིག་པའི་ལྕགས་གླང་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་གླང་ལོར་བྲིས་པའི་ཆབ་ཤོག་འཕྲིན་ཡིག་ཁག །(༡༢༩ན)
ལྕགས་གླང་ཕུག་པ་དཔལ་སེང་བའི་སྤྲུལ་སྐུ་ངག་དབང་སྙན་གྲགས་བཟང་པོས་ལོ་གསར་ཕུལ་བའི་འཕྲིན་ལན་འཇིགས་མེད་སྨྲ་བའི་སྙན་གྲགས། ལ ཀྵྨཱི བི ཛ ཡ ནྟུ ཤཱི ནི གཱི ཏི མ དྷུ ར བ དྱ ཙ། ན ནྡཱ སུ ཁ ཤཱི ཀ རྞ ར ས ཤྲི ཏཱི ལེ ཁ ཝ རྞ དཱ། རྣམ་(སྡེབ་སྦྱོར་ཁ་སྒོ་ཕན་པ།)པར་རྒྱལ་བར་གྱུར་ཅིག་ཅེས། །ཕུན་ཚོགས་སྙན་ཚིག་རྒྱུད་མང་གླུ། །རྣ་བའི་བཅུད་དུ་དགའ་བདེའི་དཔལ། །སྟེར་བའི་འཕྲིན་ཡིག་རྟེན་ལྡན་དང་། །ལྷན་ཅིག་འབྱུང་བ་གསུམ་ལྡན་པའི། །ཤེལ་དཀར་གོས་ཀྱིས་ཀླུབས་པའི་གླུ། །ཀུན་དགའི་རང་ཞལ་ངོམ་པ་ཡི། །ཐོག་མའི་ལེགས་སྐྱེས་དང་བཅས་འབྱོར། །ངག་ལ་མི་འཇིགས་སྨྲ་བ་ཡི། །དབང་ཕྱུག་འཕགས་ཡུལ་སྙན་གྲགས་བཟང་། །གཉིས་པ་སཱ་ལའི་སྨན་ལྗོངས་འདིར། །རྒྱུ་བ་ཁྱོད་མིན་ལས་གཞན་སུ། །ལེགས་བྱས་བྱེ་བའི་རི་དབང་གིས། །བསྲུབས་པའི་ལང་ཚོ་ཀ་ལ་ཤ །ངེས་དོན་བདུད་རྩིའི་(༡༢༩བ)
བཅུད་བཟང་པོས། །གཏམས་པ་གྲུབ་རིགས་འཆི་མེད་དཔལ། །རིག་པའི་གནས་ལྔ་སྲ་བའི་གཞུ། །བློ་གྲོས་རྒྱུད་ཀྱིས་འགུགས་ནུས་པའི། །གང་གི་རྣམ་དཔྱོད་རབ་ཡངས་པས། །སྲིད་སྒྲུབ་བསྙེམས་པའི་ངལ་བ་བཏང་། །ཟས་གཙང་སྲས་ཀྱི་ལུང་རྟོགས་བསྟན། །ཕན་བདེའི་གདུགས་དཀར་གྲིབ་བསིལ་ལ། །བདེ་བར་འཚོ་བའི་ཀློག་པ་པོ། །ལྷག་བསམ་ཟླ་བ་ལྟ་བུར་གསལ། །དཀར་མིན་འབྲས་བུའི་དྲི་མ་ཀུན། །དགེ་བའི་ཆབ་ཀྱིས་ཡོངས་བཀྲུས་པའི། །བགྲང་བྱའི་བཞིན་རས་ལེགས་འཛུམ་པས། །རྫོགས་ལྡན་གསར་པའི་མགྲོན་དེ་བསུ། །གཞོམ་དུ་མེད་པ་རྡོ་རྗེའི་རང་བཞིན་གྱི། །མི་འགྱུར་ཁྲི་ལ་རྟག་བརྟན་གཡུང་དྲུང་དུ། །གནས་པར་བདེན་པའི་ཚིག་གི་ཤིས་རྗོད་འཕྲེང་། །རེ་འབྲས་མཆོག་གསུམ་ཐུགས་རྗེས་ཅི་མི་འགྲུབ། །གསེར་རིའི་སྦུབས་ནས་ཉིན་མོར་བྱེད་པ་ཡི། །འཁོར་ལོ་ཟད་པ་མེད་པར་འཆར་བ་བཞིན། །བཀྲ་ཤིས་གནམ་ལོའི་སྙན་ཚིག་གངྒཱའི་རྒྱུན། །ལེགས་བྱས་སྐལ་ལྡན་ཤིང་རྟའི་འཕྲུལ་གྱིས་འདྲེན། ཁྱོད་ཀྱི་རྣམ་དཔྱོད་དྲོད་ལྡན་མངལ་ཡངས་པོར། །བདེན་གཉིས་ཆོས་ཀྱི་གསེར་སྒོང་ལེགས་སྦྲུམ་སྟེ། །ལེགས་བཤད་གདོང་བཞིའི་མཆེ་བ་ལས་འཁྲུངས་པའི། །བསྲིང་འོས་དབྱངས་ཅན་རྒྱུད་མང་ཅི་ཡང་འཁྲོལ། །ཉམས་དང་འགྱུར་བ་སྟོང་གི་རྣམ་རོལ་འདྲེན་བྱེད་ཡུལ་གྱི་དགའ་སྟོན་དུ། །ཚར་དུ་དངར་བའི་སྙན་འགྱུར་ཚིག་གི་མཐོ་རིས་ཀ་ཤི་མཛེས་དགའ་མ། །རབ་དཀར་དུ་ཀཱུ་ལ་ཡི་གོས་བཟང་ལྷབ་ལྷུབ་དང་བཅས་གཡོན་རུའི་ཆའི། །གྲྭ་ནང་ཕུན་ཚོགས་དགེ་བའི་ཡུལ་གྲུའི་དགའ་བའི་ཚལ་དུ་གར་གྱིས་རྩེན། །(༡༣༠ན)
ལྕགས་གླང་ལོ་གོང་ནས་དམར་སྒྱུར་རབ་འབྱམས་པ་དང་དང་གྱ་བླ་མས་གཙོས་པའི་གསེར་ཡིག་པ་མངགས་ཏེ་གནང་སྦྱིན་བཟང་པོ་དང་བཅས་བཀའ་ཤོག་ཕེབས་པའི་ལན་འབུལ་བར་ཧང་ཐོད་རབ་འབྱམས་པ་དང་རྟེན་འབུལ་དཔོན་ཆུང་གཉིས་བཏང་དུས་ཕུལ་བ་ཚེ་རིང་གནམ་གྱི་ཤིང་རྟ། ཙཀྲེཎཀཱཉྩ ནི ཀ ཨཱ ར ས ཧ སྲ དཱི རྒྷཱ ཡུཿ བུ ཥྐ རཻ ར། སུ ནཱ ཡ ཀ བྷཱུ མ ཧཱ ཙ། ས རྦྦ སྨི ནཻ ནྡྲི ཀ སུ ཝ རྟི མ ཧོ ཏྟ རཻ རྨཱུ ལེ པཱ ད དི གཱི ཛ ཡ ཧ ཎྜི བི བྷཱུ ཥ ཎ ཤྩ། ཚེ་(སྡེབ་སྦྱོར་དཔྱིད་ཀྱི་ཐིག་ལེ།)རིང་གནམ་གྱི་ཤིང་རྟས་ལེགས་དྲངས་པའི། །རྩིབས་སྟོང་གསེར་གྱི་འཁོར་ལོས་ས་ཆེན་པོ། །ཀུན་ལ་དབང་སྒྱུར་འཇམ་དབྱངས་གོང་མ་ཆེ། །ཕྱོགས་ལས་རྣམ་པར་རྒྱལ་བའི་ཞབས་དྲུང་དུ། །དྲི་བྲལ་ཡིད་མཁར་ལྷ་ཁྱོད་ཞལ་གྱི་ཟླ། །ཤར་དང་ལྷན་ཅིག་གྲགས་སྙན་བསིལ་ཟེར་གྱིས། །སྤྲོ་དགའི་ཀུནྡ་བཞད་ཚེ་སྨྲ་བའི་སྒོའི། །མཆུ་སྒྲོས་འཛུམ་དང་ལྡན་པས་མཆིད་འདི་ཞུ། །གནམ་བསྐོས་རྟགས་ཀྱི་རི་མོས་ལེགས་སྤྲས་པ། །མཉེས་གཤིན་འཇེབས་པའི་བཀའ་(༡༣༠བ)
ཐམ་སྐྱེས་དང་བཅས། །སོན་ཚེ་དྲང་སྲོང་བསམ་གཏན་གསུམ་པ་ལྟར། །ཡིད་ལ་དགའ་སྤྲོའི་ཀུན་རྟོག་ཅི་ཡང་འཕེལ། །ལུས་ཅན་ཀུན་གྱི་ཚངས་གནས་འདབ་བརྒྱ་པར། །རྗེས་ཆགས་ཞབས་སེན་ཉི་མ་འོད་པོ་ཆེ། །འཆར་ནུབ་སྤངས་ཏེ་ཟླ་མེད་གནམ་བསྐོས་ཁྲི། །རབ་བརྟན་འཛམ་གླིང་སྐྱེ་རྒུའི་བསོད་ནམས་དཔྱིད། །བྱམས་བརྩེའི་གྲིབ་མར་འགྲོ་རྣམས་ངལ་གསོ་བའི། །སྐུ་གསུམ་འབྲས་བུས་དུད་པའི་ཡོངས་འདུའི་ལྗོན། །ཟས་གཙང་སྲས་ཀྱི་རྗེས་ཞུགས་ཀློག་པ་མཁན། །ལྷག་བསམ་ཟླ་བའི་འོད་ལ་ཅོ་དྲིར་གནས། །རྩོད་ལྡན་སྡིག་ལྟའི་ལྷ་མིན་སྒྲ་གཅན་སྐེ། །དཔའ་མཛངས་དམ་བཅའི་འཁོར་ལོ་བཞི་ལྡན་གྱིས། །བཅད་ཚེ་ཚངས་པ་རྒན་པོ་ངལ་བའི་ཁུར། །ཆུང་ངུར་བྱས་ཏེ་ཟག་བཅས་གཉིད་ལ་ཡུར། །སྣ་མང་གཞན་ཟེར་སྒྱུ་མའི་རི་དྭགས་རྗེས། །འབྲང་མིན་ཟབ་ཅིང་བརླིང་བའི་འཕོངས་རྐྱེན་མངས། །མི་བསྲུན་ལང་ཀའི་གཙུག་ཏོར་སར་ལྷུང་ཚེ། །ཡབ་གཅིག་ར་གྷཱུའི་སྙིང་སྟོབས་ཕྲ་མོར་བྱས། །དཀར་ནག་རྒྱ་ཧོར་ཡངས་པའི་ཡུལ་གྲུ་ཡི། །ཆེར་རློམ་བསྙེམས་པའི་མཆེ་བ་ཉེར་ཕྱུང་སྟེ། ཁྲིམས་གཉིས་མདོངས་མཐའ་ཞོན་ནས་བག་ཡངས་སུ། །རྒྱུ་བའི་ཀརྟི་ཀ་དེ་ཁྱོད་མིན་སུ། །ཚུར་མཐོང་ཆུང་ངུའི་བློ་ཡི་མེ་ལོང་དུ། །གང་གི་ཡོན་ཏན་སྣང་བརྙན་དེ་ཙམ་སྟེ། །ལྷ་ཁྱོད་བསོད་ནམས་ཕུང་པོར་སྤུངས་པའི་ཚད། །ཀུན་མཁྱེན་གཟིགས་པའི་ཡུལ་ལས་གཞན་དུ་མིན། །ཆབ་འབངས་ཕན་བདེའི་ས་ཆེན་རྩོད་ལྡན་མཚོར། །བྱིང་ལས་འདེགས་པའི་སྙིང་སྟོབས་དཔལ་བེའུའི། །རི་མོ་ཚར་དུ་དངར་བ་ཁྱོད་ཉིད་ལས། །སྲིད་པའི་ཁོངས་འདིར་གཞན་ན་དམིགས་སུ་མེད། །དེའི་ཕྱིར་བྱམས་བརྩེའི་སྤྱན་དཀྱུས་རིང་པོ་ཡིས། །མགྲོན་དུ་བསུས་པའི་རྫོགས་ལྡན་གསར་པའི་གྲོགས། །ཕན་བདེའི་འདོད་པ་འཇོ་(༡༣༡ན)
བའི་བསམ་འཕེལ་དབང་། །འབད་མེད་སྩོལ་དང་མི་རྗེ་ལྷ་ཡི་རྒྱལ། །གཞོམ་གཞིག་མེད་པ་ཚེ་ཡི་གཡུང་དྲུང་གི །ངོ་མཚར་དཔལ་གྱི་གཟི་འོད་རྣམ་འབར་བའི། །ལེགས་བྱས་འཆི་མེད་བདུད་རྩིའི་བཅུད་ལེན་གྱིས། །བསྐལ་པ་རྒྱ་མཚོར་འཚོ་ཞིང་གཞེས་གྱུར་ཅིག །བཀའ་མཆིད་ལྷ་ཡི་ཆུ་བོའི་རྒྱལ་མཚན་རྩེར། །ལུགས་བཟང་ཏོག་གིས་མཛེས་པའི་གཟི་བྱིན་གྱིས། །གཞན་སྡེར་འཚེ་མིན་རང་སྲིད་དགའ་སྟེན་དུ། །གསེར་ཡིག་ལམ་གསུམ་དག་ལས་ཚད་མེད་ཞུ། །འཇམ་མཉེན་ཤོག་བུའི་གཟིངས་ལ་རྟེན་བཅས་ནས། །སྙན་འགྱུར་འཇོ་སྒེག་ལྡན་པའི་དེད་དཔོན་ཆ། །དཀར་དམར་ཤལ་དང་འཇམ་ཕྲུག་བདོག་པའི་སྐྱེས། །བཅས་ཏེ་གནམ་སའི་དབང་ཕྱུག་མདུན་སར་སོང་། །རབ་དཀར་དུ་ཀཱུ་ལ་ཡི་གོས་ལྡན་པའི། ཁྱུ་མཆོག་བགྲང་བྱའི་ལང་ཚོ་དར་བབ་ཚེ། །བདེ་སྐྱིད་ཆུས་བཀྲུས་ལེགས་ལྡན་གསོས་ཀྱི་བཞིན། །ཉ་རྒྱས་རི་བོང་འཛིན་ལྟར་དཀར་ཚེ་ཕུལ། །ལྕགས་གླང་ཧོར་ཟླ་ལྔ་པའི་ཉེར་བརྒྱད་ལ་བསམ་ཡས་སུ་བསམ་དར་བསྟན་འཛིན་རྫོང་སྟ་བྱས་པའི་ས་ཕག་ཚུན་གྱི་དབང་དྲག་གི་འཕྲིན་ལས་རྣམས་ལྷུན་གྱིས་གྲུབ་པའི་གཏང་རག་དང་བཅས་འཕྲིན་དུ་གསོལ་བ་རྣམ་པར་རྒྱལ་བའི་དགའ་སྟོན། སངས་རྒྱས་ཀུན་གྱི་སྐུ་གསུང་ཐུགས་རྡོ་རྗེ། །ངོ་མཚར་པདྨའི་སྦུབས་སུ་སྒྱུར་བའི་གར། །སྲིད་གསུམ་ཟིལ་གྱིས་གནོན་པའི་བརྟུལ་ཞུགས་ཅན། །རྒྱལ་དབང་པདྨ་ཀ་རས་དགེ་ལེགས་སྩོལ། །མགོན་དེས་མཆིམས་ཕུ་གསུང་གི་ཡང་དབེན་དུ། །བདེ་གཤེགས་ཞི་ཁྲོ་འདུས་པའི་བཀའ་བརྒྱད་ཀྱི། །བཅོམ་ལྡན་དྲེགས་པ་ཀུན་འདུལ་དཀྱིལ་འཁོར་དུ། །ལེགས་བཅུག་པེ་ཀར་རྒྱལ་པོ་མངག་གཞུག་བཅས། ཁྱད་པར་རྒྱལ་པོ་སྡེ་ལྔའི་ཕོ་ཉ་བ། །སྲིད་གསུམ་སྲོག་ལ་དབང་སྒྱུར་ཙི་དམར་བ། །སྔོན་གྱི་དམ་བཅའ་གཡེལ་བར་གྱུར་མིན་ཡང་། །འཕྲིན་ལས་བསྒྲུབས་དང་སྒྲུབ་(༡༣༡བ)
འགྱུར་ཚིག་འདི་སོན། །སྒྱུར་བྱེད་ཅེས་པ་ས་མོ་ཕག་གིས་ལོ་ཉི་མ་ནུབ་ཕྱོགས་གཙང་ཉང་སྨད་ཀྱི་ཕྱོགས་སུ་དམ་ཉམས་མི་བསྲུན་པ་རྣམས་ཀྱི་སྒྱུ་འཕྲུལ་ལ་བརྟེན་གློ་བུར་དུ་དུས་ཀྱི་ཆད་པས་མི་བདེ་བའི་སྐབས། གནོད་སྦྱིན་ཆེན་པོ་ཉིད་ཀྱིས་མངོན་སྤྱོད་ཀྱི་འཕྲིན་ལས་བསྒྲུབ་པར་ཞལ་གྱིས་མཆེས་པ་ལྟར་དངོས་བཤམས་ཡིད་སྤྲུལ་གྱི་མཆོད་སྤྲིན་དང་བཅས་འཕྲིན་ལས་བཅོལ་བའི་དོན་བཞིན། །རང་ཕྱོགས་སྲིད་སྡེར་བཅས་པའི་རྣམ་པར་རྒྱལ་བའི་རུ་མཚོན་མཁའ་ལ་བསྒྲེངས་ཤིང་། །ཕ་རོལ་མི་བསྲུན་པའི་སྐྱེ་བོ་ལ་ལ་ནི་ལྔ་པའི་གྲོང་ཁྱེར་དུ་སོང་། །ཕལ་ཆེར་ནི་སྟོབས་འབྱོར་ལོངས་སྤྱོད་དང་བྲལ་ཏེ་ལུས་སེམས་ལ་བརྣག་དཀའ་ཞིང་ལྕི་བའི་ཆད་པ་ཉམས་སུ་མྱོང་བ་སོགས་དྲག་པོའི་འཕྲིན་ལས་འགྲུབ་པའི་སྔར་བཅོལ་ལེགས་པའི་གཏང་རག་དང་། སླར་ཡང་ཕན་བདེའི་འབྱུང་གནས་རྒྱལ་བའི་བསྟན་པ་དར་ཞིང་སྤུར་རྒྱལ་བོད་ཀྱི་རྒྱལ་ཁམས་འདིར་བདེ་སྐྱིད་ཀྱི་དགའ་སྟོན་འཕེལ་བ་དང་། ཁྱད་པར་རིག་པ་འཛིན་པ་བདག་དང་། སྐྱབས་འོག་ཏུ་བཅུག་པའི་སློབ་བུ། ཡོན་བདག འབངས་འཁོར་རྣམས་ཀྱི་བར་ཆད་ཞི་ཞིང་འཕྲིན་ལས་སྒྲུབ་པའི་ད་འཆོལ་ལེགས་པའི་རྟེན་དུ་བཀྲ་ཤིས་པའི་སྙན་ཤལ་བཀྲས་བཏགས་ཆེ་བ། གསེར་སྐྱེམས་ཞོ་བཞི། བཟང་ཇ་ཟུར་མ་ཉམས་པ། སྨན་རྩེ་ཡུགགོས་ཡུག དར་ཡུག ཁྲབ་རྨོག འཁོར་གསུམ། རྟ། སྟག་ལྤགས། རས་ཡུག་དང་བཅས་ཧོར་ཟླ་ལྔ་པའི་བྲལ་ཚེས་ལ་དགེ །ལྕགས་གླང་ཧོར་ཟླ་ལྔ་པའི་ནང་དུ་ཚངས་པ་དུང་ཐོད་ཅན་ལ་རྒྱལ་ཁམས་བདེ་ཐབས་ཀྱི་བླང་དོར་སྤྱི་སྒོས་ཀྱི་རྒྱུ་མཚན་གསོལ་བར་བྱངགྲོང་པ་བཏང་སྐབས་གསོལ་བའི་འཕྲིན་ཡིག་གཟུགས་བརྙན་གསལ་བའི་མེ་ལོང་། ཕུན་ཚོགས་བསམ་པའི་རེ་བ་ཡོངས་སྐོང་བ། །ལྷ་ཆེན་ཚངས་དབང་དཔག་བསམ་ཡོངས་འདུའི་ལྗོན། །དུང་དཀར་གཡས་སུ་འཁྱིལ་བའི་འབྲས་བཟང་གི །ཅོད་པན་ཡོངས་སུ་དུད་པའི་སྒྲ་འཛིན་དུ། །(༡༣༢ན)
མངོན་སུམ་ཚད་མས་གཞལ་བར་ནུས་མིན་པའི། །ལྐོག་གྱུར་བག་ལ་ཞ་བའི་གནས་ལུགས་ཀྱི། །བླང་དོར་ཐེ་ཚོམ་ཕྱོགས་ལ་འཆང་བ་རྣམས། །དྲི་ཚིག་འཕྲིན་གྱི་དབྱངས་སྙན་ཅུང་ཟད་འབྲོས། །སློབ་དཔོན་སངས་རྒྱས་གཉིས་པའི་ཟབ་གཏེར་གྱི། །ལུང་དུ་མ་འོངས་གསལ་བར་ལེགས་བསྟན་ཀྱང་། །ཚིག་བརླིང་རྟོགས་པར་དཀའ་བས་མངོན་སུམ་དུ། །མ་གྱུར་དེ་སྲིད་ཤེས་པའི་སྐལ་པ་ཕྲ། །ཀུན་རྟོག་རི་མོར་བྲིས་པའི་འཕྲུལ་སྣང་གི །ངོ་མཚར་བཀོད་པའི་སྣང་ཚུལ་འབྱམ་ཀླས་པ། །རང་བློ་རང་ལ་ལྐོག་ཏུ་གྱུར་མིན་ཡང་། །ཐེ་ཚོམ་དྲ་བར་ཚུད་དེ་དཔྱད་པར་དཀའ། །དེ་ཕྱིར་དུས་རྟགས་ལུང་བསྟན་སྣ་ཚོགས་པའི། །དོགས་གཅོད་ཐོ་ཆུང་ཕོ་ཉའི་ངག་གསལ་ལྟར། །མེ་ལོང་ནང་གི་བྱད་བཞིན་མངོན་སུམ་དུ། །སྟོན་ཅིག་བསྟན་སྲུང་དབང་པོ་དུང་ཐོད་ཅན། །བརྟུལ་ཞུགས་གྲུབ་པའི་དབང་པོ་ཐོད་འཕྲེང་རྩལ། །གངས་ཅན་ལྷ་གཅིག་སྲོང་བཙན་སྒམ་པོ་སོགས། །རིག་འཛིན་བརྒྱུད་པའི་དམ་ཚིག་ཉེར་དགོངས་ལ། །རབ་དཀར་དགྱེས་པའི་འཛུམ་ཞལ་ལྷུག་པར་སྟོན། །སྙན་ཤལ་གསེར་སྐྱེམས་ལ་སོགས་མངོན་སུམ་དུ། །ལེགས་བཤམས་ཚོགས་ཀྱི་འཁོར་ལོར་བཅས་པ་རྣམས། །ཡིད་སྤྲུལ་མཆོད་པའི་སྤྲིན་དང་ལྷན་ཅིག་ཏུ། །སྣོན་ཉའི་ཤེས་རབ་ཕྱོགས་ཀྱི་ཚེས་ལ་དགེ །ལྕགས་གླང་ཧོར་ཟླ་ལྔ་པར་གྲ་ཚོང་འདུས་སུ་རྒྱལ་ཁམས་བདེ་ཐབས་ཀྱི་དྲི་ཚིག་གསོལ་བར་བསམ་དར་བ་བཏང་སྐབས་ཀྱི་འཕྲིན་ཡིག་དོགས་སེལ་ཆུ་ནང་ཟླ་གཟུགས། མི་འགྱུར་བདེ་ཆེན་ཆོས་སྐུ་འོད་དཔག་མེད། །གདུག་པ་ཀུན་འདུས་ལོངས་སྐུ་རྟ་མཆོག་དཔལ། །མཚོ་ལས་སྐྱེས་པའི་སྤྲུལ་སྐུ་ཐོད་ཕྲེང་རྩལ། །སྐུ་གསུམ་དབྱེར་མེད་ཐུགས་རྗེའི་དགའ་སྟོན་སྩོལ། །ཤར་ཕྱོགས་སྐུ་ཡི་རྒྱལ་པོའི་ཕོ་ཉ་ཆེ། །སྟོང་གསུམ་སྐད་ཅིག་མྱུལ་(༡༣༢བ)
བའི་རྫུ་འཕྲུལ་ཅན། །ལས་མཁན་བཤན་པ་བྱ་ཁྲིད་མིག་གཅིག་པའི། །རྡོ་རྗེའི་གསུང་གི་འཕྲིན་ཡིག་སུག་པར་སོན། །སྔ་སོར་བླང་དོར་གསལ་བར་བྱེད་པ་ཡི། །ལུང་བསྟན་གྱིས་བསྐུལ་རྣམ་དཀར་དགེ་བའི་ལས། །བསྒྲུབས་ཤིང་སླད་མར་བྱེད་དགོས་རིམ་པ་ཡང་། །མྱུར་དུ་སྐྲུན་པའི་བརྩོན་པ་མི་དམན་ཙམ། །ཨོ་རྒྱན་སངས་རྒྱས་གཉིས་པའི་དམ་ཚིག་གི །རྡོ་རྗེའི་རི་མོ་ཐོད་དུ་ལེགས་བཅིངས་ནས། །བཟང་ངན་གསལ་བར་སྟོན་པའི་གསང་བའི་ཚེ། །མ་སྦས་ལྷུག་པར་བསྟན་ལ་སྤྲོ་བ་འཕེལ། །བརྡ་ཡིས་བཅིངས་པའི་གོ་བར་དཀའ་བ་དང་། །ཐེ་ཚོམ་དབང་གིས་དཔྱོད་པར་མ་ཤེས་སོགས། །ཀུན་རྟོག་སེམས་ཀྱི་འཆར་སྒོའི་དྲི་ཚིག་འགའ། །ཐོ་ཆུང་དང་བཅས་ངག་ལམ་ནས་གསལ་བར། །གནོད་བྱེད་དགྲ་བགེགས་ཟློག་པའི་གཉེན་པོ་དང་། །མཐུན་རྐྱེན་ལེགས་ཚོགས་སྤེལ་བའི་ཐབས་ཚུལ་སོགས། །དོགས་སེལ་དྭངས་པའི་མཚོ་ལ་ཟླ་བའི་གཟུགས། ། འཆར་བ་ཇི་བཞིན་མ་སྦས་ལྷུག་པར་སྟོན། །སྙན་ཤལ་གསེར་སྐྱེམས ་རིན་ཅེན་ཕོར་པ་སོགས། །སྤྱན་གཟིགས་ཚོགས་འཁོར་མཐུན་པའི་དམ་རྫས་རྣམས། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ཏེ། །མཁའ་འགྲོ་འདུ་བའི་ཚེས་ལ་སྤེལ་བ་དགེ །ལྕགས་གླང་ཧོར་ཟླ་ལྔ་པའི་ནང་དུ་རིགས་རྒྱུད་ཀྱི་ལྷ་ཐང་ཆེན་བཤན་པ་ལག་དམར་ལ་འཕྲིན་བཅོལ་སྤྱན་གཟིགས་འབུལ་བར་བུ་ཤུད་བློ་བཟང་དར་རྒྱས་འཁོར་ཞག་དང་བཅས་བཏང་བའི་འཕྲིན་ཡིག་འཕྲིན་ལས་རྒྱ་མཚོའི་རླབས་འཕྲེང་། རྒྱལ་ཀུན་མཐུ་སྟོབས་རྡོ་རྗེའི་རྣོན་པོའི་མཚོན། །བདུད་སྡེ་ཕྱེ་མར་འཐག་པའི་བརྟུལ་ཞུགས་ཀྱི། །དབང་ཕྱུག་སྲིད་གསུམ་བླ་མ་ཐོད་ཕྲེང་རྩལ། །མཚོ་ལས་སྐྱེས་པའི་རྡོ་རྗེས་དགེ་ལེགས་སྩོལ། །རྒྱ་མཚོའི་རླབས་བཞིན་དུས་ལས་མི་གཡེལ་བར། །ཞི་རྒྱས་དབང་དྲག་འཕྲིན་ལས་མ་ལུས་པ། །བསམ་པ་ཙམ་གྱིས་ཐོགས་མེད་སྒྲུབ་མཛད་པའི། །ལས་(༡༣༣ན)
མཁན་བཤན་པ་ལག་དམར་སྤྱན་སྔ་རུ། །སྟེང་ན་གཏོར་མའི་རི་བོ་མཁའ་ལ་སྙེག །འོག་ཏུ་རཀྟའི་རྒྱ་མཚོ་རྣམ་པར་འཁྱིལ། །བདུད་རྩིའི་བཏུང་བ་བཟའ་དང་བཅའ་བ་སོགས། །འདོད་ཡོན་ཚོགས་ཀྱི་འཁོར་ལོས་སྣ་དྲངས་ཏེ། །དར་ཟབ་གསེར་སྐྱེམས་མཐུན་པའི་དམ་རྫས་རྣམས། །ཏིང་འཛིན་བློ་ཡིས་བྱེ་བ་ཕྲག་བརྒྱའི་ཞིང་། །ཡོངས་སུ་བཀང་སྟེ་དགྱེས་པ་སྐྱེད་བྱེད་ན། །ཐུགས་དམ་གཉན་པོ་དབྱིངས་སུ་སྐོངས་གྱུར་ཅིག །རྩ་བརྒྱུད་བླ་མའི་དམ་ཚིག་གཉན་པོ་དང་། །རིགས་དང་བརྒྱུད་ལ་བསྟེན་ཅིང་འགྲོ་བའི་མཐུས། །སྔགས་འཆང་བདག་གིས་བཅོལ་བའི་འཕྲིན་ལས་རྣམས། །བསམ་པ་ཇི་བཞིན་ལྷུན་གྱིས་གྲུབ་པར་མཛོད། །གངས་ཅན་ལྗོངས་འདིར་བསྟན་དང་འགྲོ་བ་ལ། །ཉེ་བར་འཚེ་བའི་ནག་པོ་བདུད་ཀྱི་དཔུང་། །བཅོམ་སྟེ་དཀར་ཕྱོགས་རྒྱལ་བའི་རྫ་རྔ་ཆ། །སྲིད་པའི་རྩེ་མོའི་བར་དུ་སྒྲོག་པར་མཛོད། །ལྷ་ཆེན་སྙན་གྱི་དབང་པོར་ལེགས་གསོལ་ནས། །ཐུགས་དམ་སྐུལ་བར་བྱེད་པའི་འཕྲིན་ཡིག་ལ། །རབ་དཀར་ཐམ་ཁའི་རྒྱ་ཡིས་ལེགས་འཁྱུད་དེ། །དཔའ་བོ་དགའ་སྟོན་ཚེས་ལ་རྣམ་པར་དགེ །སྔོན་སློབ་དཔོན་ཆེན་པོ་པདྨ་འབྱུང་གནས་ཀྱིས་སྤྲུལ་པའི་རྒྱལ་པོ་པེ་ཧ་རར་རྒྱལ་མཚན་ལྔའི་དབང་བསྐུར་བའི་གྲངས་དབྱིབས་དང་མཚུངས་པ་བསམ་ཡས་པེ་ཧར་ལྕོག་ཏུ་ཚུགས་ན་ལེགས་པའི་གནོད་སྦྱིན་ཙི་དམར་བའི་རྡོ་རྗེའི་གསུང་གི་འཕྲིན་ཡིག་བྱུང་བ་ལ་བརྟེན། ལྕགས་གླང་ཧོར་ཟླ་བདུན་པའི་ཚེས་བཅོ་ལྔ་ལ་རྒྱལ་མཚན་འཛུགས་པར་སྙེ་ཐང་དྲུང་ཆེན་ཤཱཀྱ་དབང་ཕྱུག་བཏང་སྐབས་གསོལ་བ་འཇིགས་མེད་གདོང་ལྔའི་སྒྲ་དབྱངས། སྲིད་ཞིའི་བརྟན་གཡོ་ཀུན་གྱི་སྤྱི་གཙུག་ནས། །ལེགས་བཏེག་ཞབས་སེན་ཉི་མའི་དངོས་པོ་བརྒྱའི། །འོད་ཀྱིས་འཇིག་རྟེན་སྣང་བྱེད་པདྨ་འབྱུང་། །ཨོ་རྒྱན་སངས་རྒྱས་གཉིས་པས་བྱིན་ཕོབ་ཅིག །མགོན་དེའི་(༡༣༣བ)
བཀའ་ཉན་སྣང་སྲིད་དྲེགས་པའི་གཙོ། །དཔལ་ལྡན་གནོད་སྦྱིན་ཆེན་པོའི་ཙི་དམར་བས། །བསྟན་འགྲོའི་ཕན་བདེ་སྤེལ་བའི་བླང་དོར་གྱི། གདོང་ལྔའི་རྒྱུད་ལས་དྲངས་པའི་སྒྲ་དབྱངས་སོན། །མི་དགེའི་རླབས་འཁྲུག་ལེ་ལོའི་ཉལ་འགྲོ་ལས། །བརྩོན་འགྲུས་རླུང་གིས་བསྐྱོད་པའི་རྣམ་དཀར་གཟིངས། །ཕུན་ཚོགས་དགའ་སྟོན་རིན་ཅེན་གླིང་ཡངས་པོར། །བགྲོད་ཐབས་སྒྱུ་འཕྲུལ་དྲ་བའི་གར་གྱིས་བྲེལ། །སྤུ་སྡུག་རྣམ་བཀྲ་སྟོབས་ཆེན་དཔའ་གཏུམ་ཅན། །སྟག་གི་རྒྱལ་མཚན་སྲིད་པའི་རྩེར་སྒྲེངས་ལ། །གཅན་གཟན་དང་མཚུངས་མ་རུངས་དགྲ་བགེགས་དཔུང་། །ཐོག་མདས་བྲག་རི་བཅོམ་པ་བཞིན་དུ་མཛོད། །གློག་ལྟར་འཁྱུག་པའི་རྩལ་ཆེན་སྒྱུ་ཐབས་མཁན། །སྤྲེའུའི་རྒྱལ་མཚན་སྲིད་པའི་རྩེར་སྒྲེངས་ལ། །འབོད་གྲོགས་མཆེད་ཟླའི་ཁེངས་ལྡན་བརྣག་པའི་དགྲ །ཉི་མས་མུན་པ་འཇོམས་ལ་འགྲན་པར་མཛོད། །ལྷ་ལམ་མཐར་ཐུག་ནམ་འཕང་གིས་སྤྱོད་པ། །བྱ་རྒོད་རྒྱལ་མཚན་སྲིད་པའི་རྩེར་སྒྲེངས་ལ། །ངན་གཡོའི་འཕུར་ལྡིང་བྱེད་པའི་ནག་ཕྱོགས་སྡེ། །དོན་སྙིང་ཤུགས་ནས་བཏོན་ཏེ་ལྐོག་མར་དྲོངས། །དབང་སྔོན་མདངས་འཛིན་རྣོ་ངར་མཆེ་བ་གཙིགས། །སྤྱང་ཀིའི་རྒྱལ་མཚན་སྲིད་པའི་རྩེར་སྒྲེངས་ལ། །རི་དྭགས་བཞིན་དུ་ཚུལ་འཆོས་ཡིད་སྲུབས་ཚོགས། །ཞུགས་ཀྱིས་རྩ་ཕུང་སྲེག་པའི་རྗེས་འགྲོར་མཛོད། །རིན་ཅེན་རྟོག་ལྡན་འཇའ་ལྟར་རབ་བཀྲ་བ། །ཟ་འོག་རྒྱལ་མཚན་སྲིད་པའི་རྩེར་སྒྲེངས་ལ། །སྡེ་བཞིའི་ཡིད་བཞིན་དབང་གི་རྒྱལ་པོ་ལས། །འདོད་རྒུའི་ཆར་གྱིས་ཡིད་ཀྱི་རེ་སྐོང་མཛོད། །དར་མཚོན་སྣ་ལྔའི་སྙན་ཤལ་གསེར་སྐྱེམས་དང་། །ལྷན་ཅིག་ཚོགས་ཀྱི་འཁོར་ལོ་བཅས་འབུལ་ན། །འཕྲིན་ལས་བཞི་ལྡན་གངྒཱའི་ཆུ་བོའི་རྒྱུན། །ནམ་ཡང་ཆད་པ་མེད་པའི་དགའ་སྟོན་སྩོལ། །(༡༣༤ན)
མང་དུ་ཐོས་པའི་དཔྱོད་ལྡན་མངའ་རིས་རུ་ཐོག་དབང་པོ་ཕུན་ཚོགས་རྣམ་རྒྱལ་གྱིས་སྙན་ངག་གི་ལམ་ནས་དྲངས་པའི་འཕྲིན་ཡིག་བྱུང་བའི་ལན་ཚངས་རིགས་གྲུབ་པའི་རྣམ་དཔྱོད། བྲྀ ཏྟ ས ཧ སྲཻ རྣེ ཏྲེ ནྡྲེ ཎོ བ དྷ ར ཙ བཱ ཎཽ དཱི པ ར བེཿ དྲྀ ཥྚཱ གྲེ བི དྦྷུ ཏ ཝ བྲ ཥི ཏ ན ལ བྡྷ གུ རུ ཏ ཏྶ མྱཿ མཆོད་(ཛཱ་ཏིའི་སྡེབ་སྦྱོར་འཕགས་མ།)སྦྱིན་བརྒྱ་པས་འདྲེན་བྱེད་སྟོང་བགྲོད་དེ། །ཉི་ཟླའི་སྒྲོན་མེ་ལག་ཏུ་ཉེར་ཐོགས་ནས། །བལྟས་ཀྱང་ཁྱོད་ཀྱི་རྩེར་སོན་མཁས་པ་དང་། །མ་རྙེད་ཕུར་བུའི་སྤུན་ཟླ་དེར་སྤྲིངས་པ། །རང་བློ་ཡངས་པའི་དྲོད་ཀྱི་མངལ་ཁུར་དུ། །ལྔ་རིག་གསེར་གྱི་སྒོ་ང་ཡོངས་སྨིན་པ། །ཚངས་རིགས་གྲུབ་པའི་རྣམ་དཔྱོད་མཆེ་བ་ལས། །ལེགས་འོངས་སྙན་འགྱུར་དབྱངས་ཅན་རྒྱུད་མང་མགྲིན། །ཡི་གེའི་གཟུགས་ཀྱི་མཁའ་ལ་རབ་ཤར་བའི། །ལྷག་བསམ་ཟླ་དཀྱིལ་ཐུགས་ཀྱི་རི་དྭགས་(༡༣༤བ)
གཟུགས། །ལེགས་བཤད་འོད་དཀར་འཕྲོ་བའི་ལིའི་ཡོལ་གོའི། །སྐྱེས་བཟང་ག་བུར་ཟེགས་མ་ཅི་ཡང་འཐོར། །བསོད་ནམས་འཁྲིལ་ཤིང་རྩེར་དུད་དལ་བའི་རྟེན། །ལེགས་ལྡན་ཐར་པའི་དོན་ཆེན་སྨིན་པའི་འབྲས། །དུས་ཀྱི་ས་ལ་མ་ལྷུང་རྣམ་དཀར་དགེའི། །དབྱར་གྱི་ནམ་མཇུག་དེས་བསྐྱངས་དངོས་པོའི་གཤིས། །གཙུག་ལག་དྲི་མ་སྦྱོང་བའི་ཞབས་བསིལ་དུ། །མང་ཐོས་ཁྲུས་ཀྱི་མཁན་པོ་གངྒཱའི་རྒྱུན། །ཆད་མེད་ཁྱོད་བློའི་རྒྱ་མཚོར་རྟག་བབས་ཀྱང་། །དོག་མིན་ཟབ་ཅིང་ཡངས་པའི་ངང་ཚུལ་ཙམ། །རིགས་མེད་ཤེས་བྱར་སྦྱངས་སྟོབས་འབོད་སྐྱེན་མདས། །དྲེགས་རྨོངས་འབོད་གྲོགས་བསྙེམས་པའི་གཙུག་ཏོར་རྩེ། །ཞུམ་པའི་ས་ལ་ལྷུང་ཚེ་རཱ་མ་ཎ། །གངས་ཅན་རྭ་བ་དཀར་པོར་འོངས་པ་བཞིན། །མདོ་རྒྱུད་ཐ་སྙད་དཀའ་བའི་གནད་ཀྱི་མདུད། །འགྲོ་ལ་འཕགས་ཡུལ་པཎ་ཆེན་ཚོགས་རྣམས་དང་། །གང་གི་རིག་པའི་མཆོག་དམན་ཁྱད་པར་ནི། །ཇི་ཙམ་བརྟགས་ཀྱང་མ་ཤེས་འཕྱང་མོ་ཉུག །གཡོ་རྒྱུས་མ་བྲིད་གནའ་བོའི་སྤྱོད་ཚུལ་ལ། །ཐོས་བསམ་རོ་བརྒྱ་བདའ་བའི་གཡང་ཆགས་གང་། །མཐོང་ཚེ་སྲིད་འབྱོར་བུ་གར་སྲེད་པའི་མཇུག །ཐོགས་པའི་ཆོས་ལྟར་བཅོས་རྣམས་ཨེ་རཎྜ། །ཤེས་ལྡན་ཚོགས་བདག་ལང་ཚོ་ཉམས་བྱེད་པོ། །དུས་ཀྱི་སྐྱེ་རྒུའི་རྣམ་དཔྱོད་ན་ཕྲ་བའི། །བག་མེད་ཁྲུང་ཁྲུང་འཇོམས་དེས་བོད་གང་ཚེ། །ས་སྤྱོད་དབང་པོའི་གྲགས་སྙན་ཡིད་ཀྱི་གསོས། །རིགས་མཐོ་ཡར་སྲིད་བརྒྱུད་རློམ་བསྟན་འཛིན་གཟུགས། །ཆུ་དང་བེར་ཅན་ཚོགས་ཀྱིས་སྦངས་པའི་ཟས། །སྒྲ་ཚད་བཟོ་གསོ་ནང་རིག་འདབ་བརྒྱའི་བཅུད། །བཏུངས་པའི་སྐལ་བཟང་བུང་བ་འདི་ན་བདེ། །མི་ཡི་བདག་པོ་བགྲང་བྱའི་ཁུར་ལྕི་བར། །ལུས་འཁྲུགས་དུཿཁ་བཅིལ་ནས་རིང་པོའི་བར། །སྲོག་གི་འཚོ་བ་སྒྲུབ་བྱེད་འཆི་གསོས་སྨན། །དྲང་སྲོང་(༡༣༥ན)
རིག་པའི་བཅུད་ལེན་བསྟེན་པར་རིགས། །མ་བརྟགས་ཟུག་རྔུ་ཡིད་ཀྱི་ཚེར་མའི་ནད། །བློ་འདས་བརྗོད་བྲལ་སེམས་ཉིད་གཅིག་པུའི་འཁྲུལ། །དཔྱད་ཚེ་འཁོར་འདས་དབྱེར་མེད་ལྟ་བའི་དབྱིངས། །བདེན་འཛིན་ཀུན་རྫོབ་ཆོས་ཀྱི་རྫུན་ཚང་རྡིབ། །ལྔ་ལྡན་སོར་མོས་ཟས་ཀྱི་བྱ་བ་ལ། །འཇུག་པའི་མགྲིན་པ་བཟང་པོས་ནོར་འཛིན་མངལ། །དོག་མོར་བྱས་མོད་ཤེས་ལྡན་ཉིན་སྐར་ཙམ། །བསམས་ཀྱིན་མཁས་ཁྱོད་འཚོ་བ་དོན་དང་ལྡན། །མི་ཟད་ཉེས་བརྒྱའི་རླབས་འཕྲེང་ཡོལ་མེད་དུག །དག་བྱེད་བསླུ་མེད་མཆོག་གསུམ་ཨ་གསྟྱའི། །ཀུན་ཁྱབ་ཐུགས་རྗེའི་ཡན་ལག་བརྒྱད་ལྡན་ཆུས། །གང་གི་དཀར་མིན་ལས་ཀུན་འཁྲུད་གྱུར་ཅིག །ཉམས་འགྱུར་ཡི་གེར་འཕོས་པའི་པི་ཝང་རྒྱུད། །དོན་བཟང་སོར་མོས་བརྡུངས་པའི་སྨིན་ལེགས་མ། །རྣམ་བཀྲ་ཟ་འོག་གོས་གྱོན་འཇོ་སྒེག་བཅས། །ཆུ་ལྷའི་ཕང་པར་དགའ་བའི་གར་གྱིས་སོང་། ལྕགས་གླང་ཧོར་ཟླ་བཅུ་གཉིས་པའི་ཚེས་བཅོ་ལྔ་ལ་བསམ་ཡས་སུ་སྤྱན་གཟིགས་འབུལ་ཞིང་བླང་དོར་གྱི་རྒྱུ་མཚན་འབུལ་བར་མཆོད་དཔོན་བློ་བཟང་མཐུ་སྟོབས་བཏང་སྐབས་གསོལ་བ་ནམ་མཁའ་མཛོད་ཀྱི་དགའ་སྟོན། དུས་གསུམ་རྒྱལ་ཀུན་མཁྱེན་བརྩེ་ནུས་པའི་གཟུགས། །སྲིད་པ་གསུམ་ན་ཆེ་བའི་རིག་སྔགས་ཀྱི། །བརྟུལ་ཞུགས་གྲུབ་པའི་སྒྱུ་འཕྲུལ་རོལ་གར་ཅན། །པདྨ་ཐོད་འཕྲེང་རྩལ་གྱིས་དགེ་ལེགས་སྩོལ། །སྔོན་ཚེ་ལྷ་ཡི་དགེ་སློང་ལེགས་ལྡན་དང་། །གསང་བའི་བདག་པོ་ཕྱག་ན་རྡོ་རྗེ་ཡིས། །དགྲ་ལྷ་ཁྱུང་ཆེན་འབར་དང་སྤུ་གྲི་འབར། །གསང་མཚན་བཏགས་ནས་དམ་ཚིག་གཉེར་དུ་གཏད། །མཚོ་སྐྱེས་རྡོ་རྗེས་གངས་ཅན་བསྟན་འགྲོ་ཡི། །བདེ་སྐྱིད་སྤེལ་བར་རྡོ་རྗེའི་དམ་བསྒྲགས་པ། །རིགས་ཀྱི་བདག་པོའི་ཚུལ་དུ་ཐོད་བཅིངས་པའི། །པེ་ཧར་རྡོ་རྗེའི་ཁྱུང་ཆེན་(༡༣༥བ)
ཀླུ་འབྲུག་འདུལ། །གང་དེའི་བཀའ་སྡོད་དྲེགས་པ་ཀུན་གྱི་གཙོ། །སྔོན་ཚེ་ལི་ཡི་ཡུལ་གྱི་རྗེ་བོའི་སྲས། །སྨོན་ལམ་དབང་གིས་ཁྲག་གི་སྒོ་ང་ལས། །བཙན་རྒོད་གནོད་སྦྱིན་ཆེན་པོ་ཙི་དམར་བ། །དཔལ་ཆེན་རྟ་མགྲིན་དབང་གི་རྒྱལ་པོ་དང་། །ཨོ་རྒྱན་སངས་རྒྱས་གཉིས་པ་པད་འབྱུང་གིས། །བཀའ་དང་དམ་ལ་བཏགས་པའི་སྲུང་མ་ཁྱོད། །སྒྲིབ་བྲལ་ལྷ་སྙན་གསོལ་པའི་ཚིག་འདི་གསོན། །ཞི་ཁྲོ་ཀུན་འདུས་གྲུབ་ཆེན་བཀའ་བརྒྱད་ལྷའི། །ནུབ་བྱང་ཕྱག་རྡོར་དྲེགས་འདུལ་དཀྱིལ་འཁོར་དུ། །དཔལ་ཆེན་ཁྲག་འཐུང་པདྨ་སམ་བྷ་ཝས། །དབང་བསྐུར་རིགས་འཛིན་དགྲ་ལྷར་ལྷ་ཁྱོད་བསྐོས། །རྗེ་འབངས་ཉེར་ལྔ་མངའ་བདག་མྱང་རལ་དང་། །ཆོས་དབང་རྒོད་ལྡེམ་པདྨ་དབང་རྒྱལ་སོགས། །བཀའ་གཏེར་རིག་འཛིན་བརྒྱུད་པའི་ཚོགས་རྣམས་ཀྱིས། །ཆད་མེད་ཡང་སྐྱོར་དམ་ཚིག་བསྒྲགས་པ་དགོངས། །ཟ་ཧོར་སྔགས་འཆང་བདག་གི་རིགས་བརྒྱུད་དང་། །ཚེ་རབས་དུ་མར་དམ་ཚིག་ལུ་གུ་རྒྱུད། །མི་ཕྱེད་ཕྱག་རྒྱས་བཅིངས་པ་ཉེར་དགོངས་ལ། །ལྐོག་གྱུར་སྟོན་པའི་ཕུང་བསྟན་སྒྲ་དབྱངས་སྒྲོགས། །གཏོར་མའི་རི་བོ་སྨན་རཀ་མཚོར་བསྐྱིལ་ནས། །རྟག་ཏུ་ལྷ་ཁྱོད་ཐུགས་དམ་སྐོང་བྱེད་ཀྱང་། །རྟེན་འབྲེལ་མཚོན་པའི་སྤྱན་གཟིགས་ཐོར་གསལ་བ། །ནམ་མཁའ་མཛོད་དུ་བྱིན་གྱིས་བརླབས་ཏེ་འབུལ། །མི་བསྲུན་གླགས་ལྟ་གཟུགས་ཅན་སྡང་བའི་དགྲ། །གཟུགས་མེད་གནོད་པར་བྱེད་པའི་བགེགས་ལ་སོགས། །ནག་པོའི་བདུད་སྡེ་དཔུང་དང་བཅས་པ་ཡི། །རུ་མཚོན་ས་འོག་སྙོལ་ལ་ཚར་ཆོད་ཅིག །བསྟན་འགྲོའི་ཕན་བདེ་དཀར་ཕྱོགས་ཟླ་ལྟར་སྤེལ། །ཕུན་ཚོགས་སྡེ་བཞིའི་འདོད་རྒུ་མ་ལུས་འཇོ། །རྣམ་པར་རྒྱལ་བའི་རྫ་རྔ་སྲིད་རྩེར་སྒྲོགས། །ཞི་རྒྱས་དབང་དྲག་ལས་ཀུན་སྒྲུབ་པར་མཛོད། །ཅུང་ཟད་ཕོ་ཉའི་གཡར་ལམ་ནས་(༡༣༦ན)
གསོལ་ལྟར། །བླང་དང་དོར་བྱའི་གནས་རྣམས་མ་ལུས་པར། །མེ་ལོང་ནང་གི་གཟུགས་བརྙན་ཇི་བཞིན་དུ། །གསལ་བར་སྟོན་ཅིག་བསྟན་སྲུང་གནོད་སྦྱིན་ཆེ། ཁྱུ་མཆོག་གོས་དཀར་གྱོན་པ་འཕར་བའི་ལོ། །ཟླ་བ་རྒྱུ་སྐར་རྒྱལ་གྱིས་ལེགས་ཉ་བའི། །དཀར་ཕྱོགས་དཔའ་བོ་དགའ་སྟོན་དུས་བཟང་པོར། །གྲུ་འཛིན་གཉིས་པའི་གཞལ་མེད་ཁང་ནས་དགེ །
རབ་བྱུང་བཅུ་གཅིག་པའི་ཆུ་སྟག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་སྟག་ལོར་བྲིས་པའི་ཆབ་ཤོག་འཕྲིན་ཡིག་ཁག །གྲྭ་ཕུག་སྤྲུལ་སྐུ་ངག་དབང་སྙན་གྲགས་བཟང་པོས་ཆུ་སྟག་ལོ་གསར་གྱི་སྐྱེས་འབུལ་བར་སྙན་ངག་གི་ལམ་ནས་དྲངས་པའི་འཕྲིན་ཡིག་བྱུང་བའི་ལན་འཇིགས་མེད་དགེ་བའི་སྤོབས་པ། དྷཱི སི དྡྷ ཀཱི རྟེ རྨ དྷུ ར ཤྩ མ ཉྫུ། ཤཱི ཨུ ཀྟ ལོ ཀེ ཤྭ ར ཏི རྞ དེ ཤ །སྠཱི རེ ཎ མེ ཡ པྲ ཏི བྷཱ ན བྷ དྲཱ། ཧོ ཤྲཱི ཤུ བྷཱ ནཱི ལི ཁི ཏི ན བྷཱི ཏ། །སྨྲ་(སྡེབ་སྦྱོར་དབང་པོ་རྡོ་རྗེ།)བ་ངག་གི་དབང་ཕྱུག་གྲུབ་པའི་བློའི། །སྙན་གྲགས་ཚངས་པའི་ཡུལ་ས་ལས་བརྒལ་བས། །དཔལ་ལྡན་ཤེས་བྱའི་གནས་ལ་འཇིགས་མེད་ཀྱི། །རྨད་བྱུང་དགེ་བའི་སྤོབས་པ་བཟང་པོའི་འཕྲིན། །(༡༣༦བ)
དགེ་ཚོགས་བྱེད་པོའི་པིར་གྱིས་ལེགས་བྲིས་པའི། །དགའ་སྐྱིད་རི་མོ་རྣམ་བཀྲའི་གོས་སྔོན་ཅན། །སྡེ་བཞིའི་རྩེ་དགའ་ཁོང་ནས་དགོད་པའི་ལོ། །གསར་ཚེས་སྐྱེས་ཀྱི་བདོག་པར་བཅས་པས་ན། །བགྲང་བྱའི་ཕུང་པོས་བཙུགས་མིན་ཕྲ་མོའི་ན། །གཞོན་ཚུལ་ཐ་སྙད་མདོངས་མཐའ་ལ་བརྟེན་ཀྱང་། །གང་ཤར་བཟོ་མེད་ཆོས་སྐུའི་གསེར་གྱི་མངལ། ཁུར་ལྡན་རྒན་པོའི་བློ་ཅན་ཁྱོད་ཉིད་ཙམ། །ཀུན་རྟོག་ཡུལ་གྱི་འཆར་སྒོ་ཇི་སྙེད་པ། །ཉམས་དང་འགྱུར་བའི་སྙན་ཚིག་ལམ་དྲངས་ཚེ། །འཕགས་ཡུལ་གྲགས་པའི་དཔལ་འབར་དགེ་བའི་དབང་། ཁྱོད་དང་དབྱེ་བའི་ཁྱད་པར་ངས་མ་ཤེས། །མི་རྟོག་སེམས་གནས་མེ་ཁྱེར་འོད་ཙམ་གྱིས། །ཐུབ་བསྟན་གླིང་བཞི་གསལ་འདོད་གྲུབ་རིགས་ཅན། །མང་ཡང་ལྔ་རིག་ཆ་ཤས་ཉ་གང་བའི། །ཟླ་ཁྱོད་རང་གི་གྲིིབ་མ་མཆེད་པོར་འཛིན། ཁྱབ་འཇུག་སྙེམས་པ་འཕྲོག་པའི་གྱ་གྱུའི་གར། །ཚུལ་འཆོས་གོས་ཀྱིས་བསྒྲིབས་པའི་ངང་ཚུལ་དང་། །གསོང་པོར་སྨྲ་བའི་དམ་པའི་རང་བཞིན་དག །ཆུ་དང་འོ་མ་ངང་པས་འབྱེད་ལྟར་གསལ། །བཀྲ་ཤིས་གླུ་རུ་ལེན་པའི་རྒྱུད་མང་སྒྲས། །རྣ་བ་བདུད་རྩིའི་དཔལ་གྱི་བང་མཛོད་དུ། །ལན་ཅིག་མིན་པའི་བྱེད་པོ་ཁྱོད་ཉིད་ཀྱིས། །བདག་ཡིད་ཀུན་དགའི་བཅུད་ལེན་ཉམས་སུ་བསྟར། །འདི་ན་ལྷག་བསམ་ཆེས་དཀར་དཔུང་པ་ཡིས། །ཆོས་སྲིད་ཟུང་དུ་འཇུག་པའི་བསྟན་པའི་ཁུར། །བཏེག་ནས་རྫོགས་ལྡན་དུས་བཞིན་སྐྱེ་རྒུ་རྣམས། །སྤྱོད་པའི་ཐབས་ཚུལ་སྤེལ་ལ་ངལ་མེད་ཙམ། །དགེ་བཅུ་ཀུན་ཚང་སཱ་ལའི་སྨན་ལྗོངས་འདིར། །སྲིད་མཐའི་བར་དུ་གཞོམ་མེད་གཡུང་དྲུང་ལྟར། །བདེན་པའི་ཚིག་ཏུ་བརྗོད་པ་དོན་ལྡན་པ། །མཆོག་གསུམ་ཐུགས་རྗེ་ཆེན་པོའི་མཐུས་གྲུབ་གྲང་། །(༡༣༧ན)
གསེར་རིའི་སྦུབས་ནས་ཉིན་བྱེད་འཆར་བ་ལྟར། །མཛད་མེད་ཕུན་ཚོགས་གནམ་ལོ་ཚེས་སོ་ཅོག །ཤིས་བརྗོད་དབྱངས་ཀྱི་རྒྱལ་མོ་སྙན་པའི་སྒྲ། །རི་མོ་གཡས་འཁྱིལ་མགྲིན་པའི་ལམ་ནས་སྒྲོགས། །ལྷུན་པོས་ཆུ་གཏེར་བསྲུབས་པར་མ་བྱས་པའི། །སྔོན་མེད་ཟླ་བ་རྣམ་བཀྲའི་རི་མོ་ཅན། །འཕྲིན་ཡིག་རླུང་གི་ཤིང་རྟས་ཉེར་དྲངས་ནས། །གྲྭ་ནང་འཆི་མེད་ལམ་དུ་བདེ་བར་སོང་། །ལྕགས་གླང་ཧོར་ཟླ་བཅུ་གཅིག་པའི་ཚེས་གསུམ་ལ་བསམ་ཡས་ནས་གནོད་སྦྱིན་ཆེན་པོས་གསུང་འཕྲིན་བྱུང་བའི་ལན་སྐལ་བཟང་བསྒོ་བརྒྱ་ཕྱེ་བའི་གཏམ་སྙན། ཕུན་ཚོགས་སྲིད་ཞིའི་ལེགས་བྱས་བྱེ་བའི་གཏེར། །བསམ་པ་ཙམ་གྱིས་སྒྲུབ་པའི་དབང་གི་རྒྱལ། །བསྟན་སྲུང་གནོད་སྦྱིན་ཆེན་པོ་ཙི་དམར་བའི། །ལྷ་ཆེན་དགྱེས་པའི་གསུང་གི་སྒྲ་དབྱངས་སྙན། །སྣང་སྲིད་དྲེགས་པ་ཡོངས་ཀྱིས་ལུས་བཏུད་ནས། །བཀའ་ཉན་མངགས་གཞུག་འབངས་སུ་དམ་བཅས་པའི། །དབང་དྲག་རོལ་པའི་གཞལ་ཡས་ཁང་གི་རྩེར། །རྣམ་པར་རྒྱལ་བའི་རྒྱལ་མཚན་བསྒྲེངས་པའི་མཐུས། །བར་དུ་གཅོད་བྱེད་དགྲ་བགེགས་ནག་པོའི་སྡེ། །མིང་གི་ལྷག་མར་གྱུར་དང་ལྷན་ཅིག་པར། །ཆོས་དང་སྲིད་ཀྱིས་བསོད་ནམས་ཕུང་པོའི་གཏེར། །གྲུབ་པའི་སྐལ་བཟང་སྒོ་བརྒྱ་ཕྱེ་བར་ངེས། །སླད་མར་ཞི་རྒྱས་དབང་དང་དྲག་པོ་ཡི། །འཕྲིན་ལས་བསམ་པ་ཇི་བཞིན་ལྷུན་གྲུབ་པར། །པདྨ་ཐོད་འཕྲེང་དམ་ཚིག་ཉེར་དགོངས་ལ། །མཛོད་ཅིག་སྡེ་བརྒྱད་དྲེགས་པའི་དམག་དཔོན་ཆེ། །རྣམ་པར་བཀྲ་བའི་ལྷ་རྫས་སྙན་ཤལ་དང་། །ས་ཟླའི་རིན་ཅེན་སྐྱེམས་བཟང་མཆོད་པའི་སྤྲིན། །མི་ཟད་ནམ་མཁའ་མཛོད་(༡༣༧བ)
དུ་ལེགས་སྤྲུལ་ཏེ། །ལེགས་ལྡན་དབང་པོའི་མདུན་ས་མཛེས་གྱུར་ཅིག །ཆུ་སྟག་ཧོར་ཟླ་གཉིས་པར་མཆིམས་བུ་རྟ་ར་བས་བླང་དོར་རྟེན་འབྲེལ་སྒྲིག་པའི་སྐུལ་མ་བྱུང་བར་མཐུན་རྫས་སྤྱན་གཟིགས་དང་བཅས་ཏེ་བསྲིང་བའི་འཕྲིན་ལན་ལྷ་བཙན་ཟླ་བཞིན་འཆར་བའི་རྫིང་བུ། ཞི་མོ་ཀུན་འདུས་བཀའ་བརྒྱད་རྟེན་བརྟེན་པའི། །དཀྱིལ་འཁོར་འཁོར་ལོའི་བདག་ཉིད་གསང་བའི་ཕུག །མཆིམས་ཕུ་གསུང་གི་དབེན་གནས་ལེགས་སྲུང་བ། །ལྷ་བཙན་རྒོད་པོ་རྟ་རའི་རི་མོ་སོན། །ཟླ་བའི་དཀྱིལ་འཁོར་ཉ་གང་སྔ་དྲོའི་ཆར། །བསངས་མཆོད་གསེར་སྐྱེམས་བ་དན་མཁའ་ལ་བསྒྲེངས། །དུས་གསུམ་མཁྱེན་པ་ཨོ་རྒྱན་རྣམ་ཐར་དང་། །ཕྱིར་ཟློག་རིམ་གྲོའི་བླང་དོར་འཕྲལ་དུ་ཟིན། །ཞི་ཁྲོ་རྣམ་རོལ་དམར་ཆེན་གཏོར་མ་ལ། །བརྟེན་ནས་མདུད་སྡེའི་གཡུལ་ལས་རྣམ་རྒྱལ་བའི། །སྤྱི་སྒོས་ཕན་བདེའི་ལེགས་ཚོགས་སྒྲུབ་པའི་ཐབས། །འགྱངས་མེད་མྱུར་དུ་བསྒྲུབ་པའི་མདུན་སར་གནས། །རང་ཕྱོགས་སྲུང་བྱེད་བཙན་པོའི་གོ་ཆ་དང་། །ཕ་རོལ་ཐལ་བར་རློག་པའི་རྣོན་པོའི་མཚོན། །གླིང་བཞི་སྐོར་བའི་རྟ་སོགས་མཐུན་པའི་རྫས། །མི་འཛད་ནམ་མཁའ་མཛོད་དུ་བརླབས་ཏེ་སྤེལ། །རབ་དཀར་དར་གྱི་སྙན་ཤལ་གསེར་སྐྱེམས་བཅས། །ཆུ་དར་གོས་སུ་ཀླུབས་པ་སྟག་གི་ལོའི། །ཀུན་ཕན་དབོ་ཡིས་ཉ་པའི་དཀར་ཕྱོགས་ཀྱི། །བཟང་པོ་གཉིས་པའི་ཚེས་ལ་བྲིས་པ་དགེ །ཆུ་སྟག་ཧོར་ཟླ་གསུམ་པའི་ནང་དུ་བོད་ཁམས་བདེ་ཐབས་ལ་བསམ་ཡས་སུ་བཏེག་སྐབས་མདོ་སྔགས་གླིང་གི་སྲུང་མ་ཁ་ཆེ་དམར་པོས་ངོས་འཕྲད་ནང་མཐུན་རྫས་དགོས་ཚུལ་བྱུང་བའི་འཕྲིན་ལན་དབང་རྟགས་རྡོ་རྗེ་འབར་པའི་ཅོད་པན། དྲེགས་པ་ཀུན་འདུས་དཀྱིལ་འཁོར་འཁོར་ལོ་ཆེར། ཁྲག་འཐུང་(༡༣༨ན)
དབང་དྲག་པདྨ་ཧེ་རུ་ཀས། །དབང་བསྐུར་རྟགས་ཀྱི་རྡོ་རྗེའི་ཅོན་པན་ཅན། །གནོད་སྦྱིན་དམར་པོའི་འཕྲིན་ཡིག་ལྷ་དར་འབྱོར། །འགྲོ་ལ་རྗེས་བརྩེའི་རབ་དཀར་ལྷག་བསམ་གྱིས། །དྲངས་པས་བདག་གཞན་མཉམ་རྗེའི་སེམས་དཔའ་ཆེའི། །དགོན་གནས་སྲིད་མཐར་ཉམས་པ་མེད་སྐྱོང་བའི། །གཡར་དམ་ཇི་བཞིན་མཐུ་སྟོབས་བསྐྱེད་དེ་སྤྲོ། །རྒྱལ་དབང་པདྨའི་དགེ་བསྙེན་མཐུ་བོ་ཆེ། །ལྷ་མི་ངོས་འཛོམ་རྟེན་འབྲེལ་ལྷུན་གྱིས་གྲུབ། །སླད་མར་འཕྲིན་ལས་བསྒྲུབ་རྟེན་སྤྱན་གཟིགས་རྣམས། །སྤེལ་བ་ཇི་བཞིན་དམ་བཅའ་གཡེལ་མེད་མཛོད། །བསྟན་དང་བསྟན་འཛིན་འགྲོ་བའི་བདེ་སྐྱིད་རྣམས། །ཡར་ངོའི་ཟླ་བ་ལྟ་བུར་རབ་ཏུ་སྤེལ། །མི་བསྲུན་ཡིད་སྲུབས་སྡེ་དང་བཅས་པའི་དཔུང་། །བཅོམ་པའི་བ་དན་སྲིད་པའི་རྩེ་མོར་ཕྱོར། ཆུ་སྟག་ཟླ་བ་བཞི་པར་འཕྱོས་ནས་བཤན་པ་རྫོང་བཙན་པས་བླང་དོར་གྱི་སྐུལ་མ་དང་མཐུན་རྫས་དགོས་ཚུལ་བྱུང་བའི་འཕྲིན་ལན་དབང་དྲག་རོལ་པའི་ལྷ་རྒྱལ། དམར་ཟླུམ་མིག་དཀྱུས་བསྟན་པའི་མེལ་ཚེ་རུ། །ལྟ་བའི་བྱ་ར་མིག་གཡེལ་བཙན་རྒོད་ཆེ། །དབང་དྲག་རྣམ་པར་རོལ་པའི་བཤན་པ་ཡི། །ལྷ་རྒྱལ་དབྱངས་སུ་ལེན་པའི་འཕྲིན་ཡིག་འབྱོར། །རིག་སྔགས་འཆང་བའི་བརྟུལ་ཞུགས་གྲུབ་པའི་རྩལ། །འཛམ་བུའི་གླིང་ན་ཟླ་བྲལ་ཨོ་རྒྱན་རྗེས། །བཀའ་རྟགས་ཕྱག་རྒྱ་གཉན་པོས་ཟིལ་མནན་པའི། །གཡར་དམ་ཇི་བཞིན་སྒྲུབ་པའི་གཏམ་དེ་སྙན། །ས་འོག་སྲད་བུ་ཐུགས་སུ་བཏགས་པའི་དར། །ལྐོག་གྱུར་གནས་ལུགས་དཔྲལ་བའི་འདྲེན་བྱེད་ཀྱིས། །མངོན་སུམ་གསལ་མཐོང་གསང་ཚིག་བླང་དོར་རྣམས། །བསྟན་པའི་ཚིག་དོན་ཡིད་ལ་རི་མོར་བྲིས། །ལྷ་ཁྱོད་ཐུགས་དམ་སྐོང་བའི་མཐུན་པའི་རྫས། །དངོས་འབྱོར་ཏིང་འཛིན་སྔགས་དང་ཕྱག་རྒྱ་ཡིས། །དཔལ་འབྱོར་འདོད་(༡༣༨བ)
རྒུའི་གཏེར་དུ་བྱིན་རླབས་ནས། །དྲེགས་པའི་དམག་དཔོན་དགྱེས་སྐྱེད་དགའ་སྟོན་སྤེལ། །དགྲ་ལྷ་རྫོང་བཙན་བཤན་པ་དམར་པོ་ཡིས། །འཕྲིན་ལས་རྣམ་བཞི་ལྷུན་གྱིས་སྒྲུབས་ཤིག་ཅེས། །གཉེར་གཏད་ཚིག་འཕྲེང་ཆུ་ཟླའི་ཡར་གྱི་ངོ་། །དཀར་ཆའི་ཟླ་བ་ཚེས་པའི་དུས་སུ་དགེ །བཙུན་མོ་ཚལ་གྱི་དགོན་པ་གསར་དུ་སྤོས་གྲུབ་པའི་ཆུ་སྟག་ཧོར་ཟླ་ལྔ་པའི་ལྷ་ཚེས་ལ། གཙུག་ལག་ཁང་གི་རྩེར་དགའ་སྟོན་གྱི་རྒྱལ་མཚན་འཛུགས་དགོས་ཚུལ་ལྷ་ཆེན་ཚངས་པའི་གསུང་ལྷར་བཙུགས་པའི་དུས་བསྲིངས་པའི་འཕྲིན་ཡིག་བཀྲ་ཤིས་རྟགས་ཀྱི་དཔལ་འབར། ཨེ་མ་ཁྲིམས་ལྡན་འདུ་བའི་གནྡྷོ་ལ། །སྡེར་བཅས་ལྷུན་གྱིས་གྲུབ་པའི་ཡངས་ཐོག་རྩེར། །བཀྲ་ཤིས་རྟགས་ཀྱི་རྒྱལ་མཚན་བསྒྲེང་བ་དང་། །ལྷན་ཅིག་ལྷ་ཆེན་དགྱེས་པའི་བསོ་སྒྲ་ལྡིར། །དཀར་ཕྱོགས་ཟླ་བ་ཚེས་པ་ཡར་གྱི་ངོ་། །གཟའ་སྐར་འཕྲོད་ཀྱིས་དགེ་བའི་དུས་བཟང་པོར། །ཐོར་ཚུགས་དུང་དཀར་གཡས་སུ་འཁྱིལ་བ་ཅན། །ཚངས་དབང་དགྱེས་པའི་འཛུམ་ཞལ་ངོམ་དེ་མཚར། །འདའ་དཀའ་པདྨ་ཐོད་འཕྲེང་རྡོ་རྗེའི་གསུང་། །ཇི་བཞིན་གངས་ཅན་བསྟན་འགྲོའི་བདེ་སྐྱིད་སྤེལ། །རིག་འཛིན་བདག་གིས་གཉེར་དུ་གཏད་པའི་ལས། །དཔག་བསམ་ཡོངས་འདུ་ལྟ་བུར་རེ་བ་སྐོངས། །རང་རྒྱུད་ལེགས་དུས་སྡེ་སྣོད་འཛིན་པ་ཡི། །འདུས་སྡེ་ཞྭ་སེར་ཅོད་པན་འཆང་བའི་གླིང་། །སྔོན་བཞིན་བསྲུང་དང་སྤེལ་བའི་འཕྲིན་ལས་རྣམས། །འབད་མེད་སྒྲུབས་ཤིག་དྲེགས་པའི་སྡེ་དཔོན་ཆེ། །ལྷ་རྫས་སྙན་ཤལ་ཟུང་ལྡན་སའི་ཟླ་བ། །མི་འཛད་ནམ་མཁའ་མཛོད་དུ་བྱིན་བརླབས་ནས། །ཆུ་སྟོད་ཟླ་བའི་དཀར་ཆ་རྩོམ་པ་ལ། །མངོན་དུ་ཕྱོགས་ཚེ་གྲུ་འཛིན་རྩེ་ནས་དགེ །(༡༣༩ན)
ལྕགས་གླང་ཧོར་ཟླ་དང་པོའི་ནང་དུ་འཇམ་དབྱངས་གོང་མའི་ཁྲིར་གསར་དུ་ཕེབས་པ་ཁང་ཤི་རྒྱལ་པོས་ལྷ་ཁང་སེར་པོའི་བླ་མ་བསམ་བློ་མིརྒན་ཆོས་རྗེས་གཙོས་པའི་གསེར་ཡིག་པ་ཆུ་སྟག་གི་ལོར་མངགས་ཏེ་གནང་སྦྱིན་བཟང་པོ་དང་བཅས། བཀའ་ཤོག་ཕེབས་པའི་ལན་འབུལ་བར་ལམ་པ་སྤྱན་སྔ་དང་རྒྱ་ཚེ་རིང་གཉིས་གཏང་རག་དུ་ཕུལ་བ་ས་གསུམ་རྣམ་པར་གནོན་པའི་གད་རྒྱངས། རྀ དྷུ པ ཏི བ ལི ཀ རྨ ཨུ དྲུ དྲ བྷཱུ མེ ཏྲི བི པྲཱ བི ཀཱ ནྟ པ བི དྲྀ ཤ ཨ ཧཾ ཀ རཱ ཀྟཱ པི ཙི ཏྟཱ ག མྨེ ཏྲཱ ནུ པཱ། ས པ ད ཀྲྀ ཏི ཨ ཧོ ཊི ཤེ ཥེ ཧི ནཱ དཱ ཪྻ དཻ བཾ བ བྷཱ མ ཀ ས ལ ཙ མ ཎྜ ལེ ཤཱ ད ཡཿ ར ཛྙ པ དྨ ལི ཡོཿ དུས་(སྡེབས་སྦྱོར་ལྕགས་ཀྱི་མདའ།)ཀྱི་བདག་པོའི་ལས་ཤུགས་དར་དྲགས་ས་གསུམ་རྣམ་པར་རབ་གནོན་ཀྱང་། །ང་རྒྱལ་སྡིག་ལྟའི་རྩུབ་སེམས་དང་བྲལ་འགྲོ་ཀུན་བྱམས་བརྩེས་རྗེས་སྐྱོང་བའི། །དམ་པའི་རང་བཞིན་ངོ་མཚར་ཁྱད་པར་དམན་ཚུལ་ལས་འཕགས་ལྷ་ཡི་ལྷ། །གནམ་སའི་དཀྱིལ་འཁོར་ཀུན་གྱི་དབང་ཕྱུག་གོང་མ་རྒྱལ་པོའི་ཞབས་དྲུང་དུ་། །རབ་དཀར་བརྩེ་ལྡན་ལྷག་བསམ་ཆུ་ཤེལ་དབང་། །རིས་མེད་འགྲོ་བའི་ཀུནྡར་རྗེས་ཆགས་པའི། །སྡོམ་བརྩོན་མང་དུ་ཐོས་པའི་ཀློག་པ་མཁན། །སྤོབས་པ་དགེ་བའི་མགྲིན་བཏེག་མཆིད་(༡༣༩བ)
འདི་ཞུ། །གནམ་གྱི་ཤེ་མོང་རི་མོ་རབ་བཀྲའི་བཀའ། །གཟེངས་སྟོད་སྐྱེས་བཟང་མུ་ཏིག་འཁྲི་ཤིང་ཆར། །འབེབས་སྣོད་བསོད་ནམས་གསེར་ཞུན་ལས་གྲུབ་པར། །འཕྱུར་པོར་འཁྱིལ་བས་ལག་པད་སྙིང་གར་ཟུམ། །མགོན་ཁྱོད་འཇམ་དཔལ་གཞོན་ནུ་མི་ཡི་རྗེར། །ཉེར་བསྟན་གསང་གསུམ་རྡོ་རྗེའི་རྣམ་རོལ་ལ། །སྐྱེ་རྒ་ན་འཆི་སྲིད་པའི་གདོན་ཆེན་པོས། །ནམ་ཡང་རྫི་བར་ནུས་མིན་རང་གི་གཤིས། །འབངས་རྣམས་ཕན་ཚུན་མཉེན་གཤིན་འབྲུ་བཅུད་སྨིན། །རིང་པོར་འཚོ་དང་ཕུན་ཚོགས་འབྱོར་པའི་དཔལ། །གང་གི་རྣམ་སྨིན་ཤིང་རྟ་བདུན་པ་ཡིས། །དྲངས་པའི་རྫོགས་ལྡན་ཉི་མ་ཤར་འདི་སྤྲོ། །གཏིང་ཟབ་མ་རྒན་འཁོར་ཚོར་བདེ་སྐྱིད་ཆུ། །ཚད་མེད་འབབ་བྱེད་ལྷག་བསམ་ཁ་བའི་གོས། །མི་འབྲལ་རྟག་གྱོན་གངྒཱའི་ཡབ་གཅིག་ང་། །རྒྱལ་བསྟན་འདེགས་པའི་དཔུང་པ་རྩེ་མོར་བསྙེགས། །མི་བདག་ལང་ཚོའི་ཆ་ཤས་མ་གང་པས། །ཆེས་ཕྲའི་ན་ཚོད་དང་པོའི་ཟླ་ཚེས་ཀྱང་། །དཔའ་མཛངས་རྟུལ་ཕོད་བཅོ་ལྔའི་འོད་དཀར་ཅན། །རྣམ་དཔྱོད་དཀྱིལ་འཁོར་རྒྱས་པའི་འོད་སྟོང་འཕྲོ། ཁྱོད་དྲིན་ག་བུར་གཟེགས་མ་རེ་རེས་ཀྱང་། །སྲིད་པའི་གདུང་བ་འཕྲོག་ནས་བསིལ་བའི་ཟེར། །མངོན་འདོད་རྩེ་དགའི་སྣང་བ་ཆེས་འབར་བས། །འགྲོ་ཀུན་སྙིང་གི་ཀུནྡར་ཅིས་མི་བཞད། །རྩོལ་བར་ལྟོས་མིན་གང་བསམས་འགྲུབ་བྱེད་པའི། །ཡིད་བཞིན་ཅོད་པན་འཆང་བ་ཁྱོད་རྗེས་སུ། །སེམས་བྲལ་ཀུན་བཟོད་མ་ནི་འབྲང་བྱེད་ན། །འབངས་མིན་ཡིད་ཅན་མེད་ལ་སུ་ཞིག་མཚར། །སྔོན་བྱོན་ཡབ་མེས་ཁྲིམས་གཉིས་(༡༤༠ན)
གདུགས་དཀར་པོའི། །ཡུ་བ་རིགས་སྲས་ཐུ་བོ་ལ་གཏད་ན། །ཕན་བདེའི་གྲིབ་བསིལ་སྲིད་གསུམ་ཡོངས་ཁྱབ་པའི། །དགེ་བཅུ་ཀུན་ལྡན་འབྲས་དཀར་འགྲོ་ལ་སྦྱིན། །བརྒྱ་བྱིན་གཙུག་ནོར་རེག་ལ་ལྟོས་མིན་པར། །མི་ཡི་ལུས་ལ་ལེགས་བྲིས་ཡོན་ཏན་ཀུན། །རྫོགས་པའི་ཁྱོད་གདོང་སྡེ་བཞིའི་ཞལ་ལྡན་ཡང་། །མངའ་འབངས་སྐྱེ་བོས་མ་མཐོང་འདྲེན་བྱེད་སྐྱོན། །བསོད་ནམས་གསེར་གྱི་འཁོར་ལོ་རྩིབས་སྟོང་ཅན། །སྲིད་པའི་གཙུག་ཏོར་རྩེ་མོར་རབ་འཕགས་པའི། །ཞབས་སེན་ཉི་དཀྱིལ་གླིང་བཞིའི་ནམ་མཁའ་ལ། །རྟག་ཏུ་འཆར་བའི་ཡིད་སྨོན་འགྲུབ་གྱུར་ཅིག །ཆེན་པོའི་ལུང་ལས་འཛིན་ལས་དགྱེས་པའི་སྤྱན། །ནམ་ཡང་མི་གཏོང་གཟིགས་པའི་བཀའ་མཆིད་སྐྱེས། །བསིལ་རིའི་སྦུབས་ནས་རི་བོང་འཛིན་པ་འབུམ། །འཆར་ཡང་མི་མཛད་རང་གི་དཔེ་ཟླར་བསྟན། །གནམ་བསྐོས་རྒྱལ་ཁབ་ཡངས་པའི་གན་མཛོད་དུ། །བརྟན་གཡོའི་ཕྲ་རགས་དངོས་པོ་ཀུན་འཇུག་པས། །མདོངས་གསོལ་རྟེན་གྱི་རིན་ཅེན་འཇམ་པའི་དཔྱ། །འགྱུར་མེད་མཚམས་སྤྲིན་གསར་པས་རྒྱས་བཏབ་པའི། །ལྷ་མིར་བཅས་པས་ཁེངས་པའི་གདོང་སྨད་དེ། །དཔྲལ་བ་ས་ལ་རེག་ནས་འདུད་པའི་ཡུལ། །གཙུག་ལག་ལུགས་བརྒྱའི་ཕོ་བྲང་ག་ལ་བར། །དང་བའི་ཡིད་ཀྱིས་ཕུལ་བ་ཛ་ཡནྟུ། །གོང་མ་རྒྱལ་པོ་ཤུན་ཛི་མཐོ་རིས་ཀྱི་སྐས་ལ་འཛེགས་ནས་འཁོར་ལོས་བསྒྱུར་བའི་ཁྲིར་ལྕགས་གླང་ཧོར་ཟླ་དང་པོར་རིགས་ཀྱི་སྲས་ཁང་ཤི་རྒྱལ་པོ་ཕེབས་པ་ན་ལེགས་པོ་འབུལ་བའི་ཐོག་མར་ཤིས་པ་བརྗོད་པ་སྔོན་དུ་འགྲོ་བ་ཅན་ཀྱི་ཞུ་ཡིག་ཆུ་སྟག་ལམ་པ་སྤྱན་སྔ་སྦྲེལ་པོ་རྫོང་སྟ་བྱས་སྐབས་ཕུལ་བ་གསར་པའི་ལྷ་ཞལ་ཚེས་(༡༤༠བ)
པའི་གཏམ་སྙན། བྷ བཱ ད མ སྶ མྦ ས ཀཱ ལ ནཱི ས པུ ཎྱ པ ཏྲ དཱི རྒྷ ཡུ ཁ རཱ ཟ ཀྲྀ ཏྱུ། ཏྲཻ གོ མ ཧེ ཤ དི ཀ མ ཉྫུ གྷཱོ ཥ ནཱ པ སྶཱ ར ཡཱ ཏེ རྨ ན པཱ ད མཱུ ལ ཡོཿ སྲིད་(སྡེབ་སྦྱོར་དབང་པོའི་རྒྱུད།)ཞིའི་ཕུན་ཚོགས་ཀུན་ཤོང་བསོད་ནམས་སྣོད། །ཚེ་རིང་གནམ་གྱི་ཤིང་རྟས་ཉེར་བསྐྲུན་པས། །ས་གསུམ་དབང་ཕྱུག་འཇམ་དབྱངས་གོང་མ་ཆེ། །མཚན་སྙན་ཡིད་ཀྱི་ངལ་གསོའི་ཞབས་དྲུང་དུ། །ཨེ་མ་སྲིད་ན་མངོན་མཐོ་ལྷ་དང་མི། །ཀུན་གྱི་ཕྱག་དང་ལེགས་སོ་འབུལ་བ་ལ། །མ་གཡེང་འདི་ན་གུས་པས་ཞུ་བའི་འཕྲིན། །སྙན་འགྱུར་གླུ་ལ་མགོན་ཁྱོད་སྙན་གཏོད་དང་། །མང་བཀུར་འཁོར་ལོས་སྒྱུར་བ་རྒྱལ་པོའི་ཁབ། །གསར་འབྲུག་སྡེར་ལྔས་བཏེག་པའི་ཁྲི་ཆེན་པོར། །གསར་པའི་ལྷ་ཁྱོད་ཚངས་པ་རྒན་པོ་ཡིས། །འགྲོ་ཀུན་གཙུག་ཏོར་རྩེར་མཛེས་རྒྱལ་པོར་བསྐོས། །སྔོན་བྱོན་ཡབ་གཅིག་མཐོ་རིས་གནམ་གྱི་སྐས། །འཛེགས་ནས་འཆི་བ་མེད་པའི་གཙོར་གཤེགས་ཚེ། །འཛམ་གླིང་མི་ཡི་བསོད་ནམས་མཐུ་ཆེན་པོས། །ཐོབ་(༡༤༡ན)
ཁྱོད་རྩོད་པའི་དུས་ཀྱི་ང་ལས་ནུ། །ས་ཟླ་བྱེ་བའི་སྲང་གིས་ཉེར་རྔན་ཞིང་། །བརྒྱ་ཕྲག་གཡོ་སྒྱུའི་འཕྲུལ་གྱིས་ཁྲིད་མིན་པའི། །གནམ་ཐིག་དྲང་པོའི་རྒྱལ་ཁྲིམས་འགྲོ་ཀུན་ལ། །འདེབས་པའི་ངང་ཚུལ་མིག་གཏོང་ཁྱོད་ཀྱི་ལུགས། །ལྷ་གཅིག་གནའ་བོའི་ཁྲིར་ཕེབས་ངེས་པའི་གཏམ། །འདི་ན་ཐོག་མར་ཐོས་པའི་དགའ་སྟོན་དུ། །བདོག་པ་སྐྱེས་སུ་འབུལ་བའི་སྔོན་འགྲོའི་སྒོར། །མགྲིན་པའི་ལམ་ནས་ཤིས་པའི་ཚིག་འདི་བརྗོད། །མཁྱེན་བརྩེ་ནུས་ལྡན་སངས་རྒྱས་བདེན་གཉིས་ཆོས། །ཕྱིར་མི་ལྡོག་པའི་དགེ་འདུན་དཀོན་ཅོག་གསུམ། །གསེར་མངལ་ཁྱབ་འཇུག་མགྲིན་སྔོན་ལ་སོགས་པའི། །འཁོར་འདས་དཔལ་གྱིས་ལྷ་ཁྱོད་ཤིས་གྱུར་ཅིག །གསེར་འཁོར་ཡིད་བཞིན་ནོར་བུ་བཙུན་མོ་མཆོག །དགུང་བློན་གླང་ཆེན་རྟ་དང་དམག་དཔོན་ཏེ། །རིན་ཅེན་སྣ་བདུན་སྔོན་འགྲོའི་ཆབ་སྲིད་འོད། །བསྐལ་པར་སྐྱེ་རྒུའི་གདུང་མུན་མཐར་བྱེད་ཤོག །མི་བདག་བཀའ་དྲིན་མ་ལ་ཡར་སྐྱེས་དྲི། །ལུས་ཅན་ཀུན་གྱི་སྙིང་ལ་འཐུལ་བའི་ངད། །སྡུག་བསྔལ་ཚ་བས་ཉེན་ཞི་བསིལ་བའི་བདེ། །རྩེ་དགའ་རྫོགས་ལྡན་གསར་པའི་དཔལ་དགོད་ཤོག །གནམ་གྱིས་སྤྱི་བོའི་གཙུག་ནས་དབང་བསྐུར་བས། །རིན་ཅེན་པོད་ཅན་འཆང་བའི་རྒྱལ་པོའི་རིགས། །སྲིད་བཞིའི་གཙུག་ལག་ཀུན་ལ་མཁས་པའི་རྒྱུད། །གངྒཱའི་རྒྱུན་ལྟར་ཆད་པ་མེད་གྱུར་ཅིག །འཛམ་གླིང་ཡོངས་ཀྱི་བདེ་སྐྱིད་ངལ་གསོ་དང་། ཁྱོད་ཞབས་མི་འགྱུར་སྲོག་གཅིག་བྱུང་པའི་སྟེགས། །གཞོམ་མེད་རྟག་པའི་རང་བཞིན་གཡུང་དྲུང་དུ། །ལུས་ཅན་ཀུན་གྱི་བསོད་ནམས་མཐུས་གྲུབ་ཤོག །ཕུན་ཚོགས་རྟེན་འབྲེལ་སྒྲིག་པའི་ཞུ་འཕྲིན་བཅུད། །དག་པའི་སྙན་དབང་བཻ་ཌཱུར་ཟ་མ་ཏོག །འཁྱིལ་རྟེན་རིན་(༡༤༡བ)
ཅེན་འཕྲེང་བ་འཇམ་པོའི་ཕྲུག །སྤེལ་བའི་སྟ་གོན་ཆོ་གས་འདི་ན་བྲེལ། །གངས་ཅན་ནོར་འཛིན་དཔལ་མོའི་སའི་ཐིག་ལེ། །ལྷ་ལྡན་སྤྲུལ་པའི་གཙུག་ལག་ཁང་གི་འདབས། །རང་བྱུང་འཕགས་པ་མཆེད་ཀྱི་ཞིང་ཁམས་མཆོག །གྲུ་འཛིན་རི་བོའི་སྤོ་ནས་ཕུལ་བ་དགེ །ཆུ་སྟག་ཧོར་ཟླ་བདུན་པའི་དགག་དབྱེའི་ཐོག་རིགས་ཀྱི་སྲུང་མ་ཐང་ཆེན་རྒྱལ་བ་བཤན་པ་ལག་དམར་ལ་ཁྲབ་གདན། གོ་ཚོན། གོས་དར། རྟ། གསེར་སྐྱེམས་སོགས་འབུལ་བར་འཕྱོས་ཆང་ཁྱིམ་པ་བཏང་སྐབས་གསོལ་བ་ཕུན་ཚོགས་སྡེ་བཞིའི་འཛུམ་ལྡན། དམར་ཟླུམ་འཁྱིལ་བའི་སྡང་མིག་ཉི་མའི་གཟིས། །ནག་པ་བདུད་སྡེའི་མུན་པ་མཐར་བྱས་ནས། །སྡེ་བཞིའི་བཞིན་རས་འཛུམ་ལྡན་སྐྱ་རེངས་མ། །འཆར་བྱེད་སྤྲུལ་པའི་རྒྱལ་ཆེན་རིགས་ཀྱི་ལྷ། །བརླང་པོར་སྤྱོད་པའི་དགྲ་སྙིང་དྲོན་མོའི་ཁྲག །བཏུངས་པས་མ་ངོམས་བམ་ཆེན་འདམ་ལྟ་བུར། །རྫི་བའི་སྟང་སྟབས་ད་དུང་མ་ཡོལ་ཀྱང་། །སྟོང་གསུམ་སྐད་ཅིག་མྱུལ་བའི་རྫུ་འཕྲུལ་ཅན། །གཙོ་ལས་གཞན་མིན་ནུབ་བྱང་དཀྱིལ་འཁོར་ལྷ། །གནས་གསུམ་དུར་ཁྲོད་ཀུན་མྱུལ་ཕོ་ཉའི་ཚུལ། །སོལ་ནག་ཐང་ཆེན་གནྡྷོ་ལའི་སྲུངས་མར། །བཤན་པ་ལག་དམར་ལྷ་སྲིན་དམག་གི་དཔོན། །འབྱམས་ཀླས་ནམ་མཁའ་མཛོད་ཀྱི་སྒོ་འཕར་བརྒྱ། །ཏིང་འཛིན་སྔགས་དང་ཕྱག་རྒྱས་རབ་ཕྱེ་བའི། །དངོས་བཤམས་སྤྲུལ་པའི་སྤྱན་གཟིགས་ལེགས་བསྟར་ན། །དམ་ཅན་སྒོ་ལྔའི་དབང་པོ་དགྱེས་དགུར་རོལ། །ལྷ་ཀྱེ་བསྟན་འགྲོའི་བདེ་འཕྲོག་དགྲ་བགེགས་སྟེང་། །དགྲ་ལྷ་ཁྱུང་འབར་དྲག་ཁྲོས་མཚོན་རྣོན་པོ། །མངོན་སྤྱོད་གནམ་ལྕགས་རྡོ་རྗེ་འབར་བའི་ཐོག །ཕབ་སྟེ་ཕྱེ་མར་འཐག་པའི་འཕྲིན་ལས་མཛོད། །སྲིད་ཞིའི་དངོས་(༡༤༢ན)
ཀུན་རང་གིར་དབང་བྱེད་པར། །དུས་ཀྱི་བདག་པོའི་ལས་ཤུགས་བཙན་པོའི་སྤུན། །གདུང་བ་ཀུན་ཞི་རིང་པོའི་ཚེ་དང་འབྱོར། །མང་པོས་བཀུར་བའི་རྗེས་འགྲོར་ཁྱོད་ཀྱིས་སྒྲུབས། །རྣམ་པར་རྒྱལ་བའི་བ་དན་སུམ་རྩེན་གྱི། །འདུན་སའི་རྩེར་བརྒལ་འཆང་དང་ལྷན་ཅིག་ཏུ། །སྙན་བརྗིད་རྫ་རྔ་སྒྲོགས་པར་བསྐུལ་བའི་འཕྲིན། །ནོར་འཛིན་འབྲས་བུ་དུད་ལ་ཕྱོགས་ཚེ་དགེ །ཆུ་སྟག་ཧོར་ཟླ་བདུན་པའི་འགྲུབ་སྦྱོར་གྱི་ཉིན་སྐྱུར་ལུང་ཆོས་སྡེ་སྤྱི་ཚོགས་ཀྱིས་མི་འགྱུར་བརྟན་པའི་རྟེན་འབྱུང་བསྒྲིག་པར་པོ་ཏ་ལར་འབྱོར་སྐབས་གནས་སྲུངས་ཁྱི་འཇུག་རྒྱལ་པོས་ཆེད་དུ་བཟོས་པའི་གདན་སོགས་ཀྱི་རྟེན་དང་བཅས་འཕྲིན་ཡིག་བྱུང་བའི་ལན་མི་ཤིགས་རྡོ་རྗེས་དཔའ་བའི་གད་བརྒྱངས། ཐུབ་བསྟན་བཤད་སྒྲུབ་ལེགས་སྤེལ་འདུས་པའི་གླིང་། ཁྲིམས་ལྡན་ཕུན་ཚོགས་བཅུད་དུ་རབ་འཁྱིལ་བ། །གཡེལ་མེད་བསྲུང་བར་གཡར་དམ་བཙན་པོ་ཅན། །ནོར་སྐྱོང་སྒྱུ་དྲའི་རོལ་གར་ལྡན་པའི་འཕྲིན། །མི་ཤིགས་རྡོ་རྗེས་རྣམ་པར་དཔའ་བའི་སྟན། །ཟླ་བ་ཞུན་མར་འཁྱིལ་བའི་ཐགས་ཀྱི་དར། །འཆི་མེད་བཏུང་བའི་རབ་དཀར་ཡོལ་གོར་བཅས། །ངོ་མཚར་རྟེན་འབྱུང་སྒོ་བརྒྱ་རྣམ་པར་ཕྱེ། །ཡིད་སྲུབས་ནག་པོའི་གདོང་བ་ཡོངས་སྨད་ཅིང་། །གངས་ཅན་ཕན་བདེའི་འོད་སྣང་འདྲེན་བྱེད་པའི། །ཞི་ཁྲོ་རྣམ་པར་རོལ་པ་བཀའ་བརྒྱད་ལྷའི། །འཕྲིན་ལས་ཉི་མའི་དཀྱིལ་འཁོར་རྟག་ཏུ་འཆར། །སྲིད་པ་གསུམ་ན་ཆེ་བའི་རིག་སྔགས་ཀྱི། །བརྟུལ་ཞུགས་གྲུབ་པ་པདྨ་ཐོད་འཕྲེང་བཀའ། །མི་འདའ་རྡོ་རྗེའི་ཅོད་པན་ཉེར་བཅིངས་ནས། །བསྟན་འགྲོའི་མེལ་ཚེ་རྟག་ཏུ་སྐྱོངས་ཤིག་གུ །རྣམ་པར་བཀྲ་བ་འཆི་མེད་དབང་པོའི་གཞུ །བྱེད་པོས་ཐགས་སུ་ཉེར་བཏགས་སྙན་ཤལ་དང་། །གསེར་སྐྱེམས་(༡༤༢བ)
འཛད་པ་མེད་པ་ནམ་མཁའ་མཛོད། །ཏིང་འཛིན་སྔགས་དང་ཕྱག་རྒྱས་བརླབས་ཏེ་སྤེལ། །ཆུ་སྟག་ཧོར་ཟླ་གསུམ་པར་བསམ་ཡས་རབ་གནས་ལ་ཕྱིན་སྐབས་གྲྭ་ཚོང་འདུས་ནས་བྱ་ཁྲིད་མིག་གཅིག་པས་སྟག་ལོ་གོ་གསོལ་ཆེན་མོའི་དུས་ལྷ་སྲིན་སྡེ་བརྒྱད་ཐམས་ཅད་འཚོག་རྒྱུ་ཡིན་པས། སྐུ་ཆས་དགོས་ཚུལ་འབྱུང་བ་ལྟར་ལོ་དེའི་ཧོར་ཟླ་བརྒྱད་པའི་ཚེས་བརྒྱད་ལ་སྙན་ཤལ་བཀྲས་བཏགས། གོས་ཕྱི་ནང་། གསེར་སྐྱེམས། ཁྲབ་གདན། ཐོད། ཤ་གོས། ལྷམ། རྟ། མདུང་དམར། འཁོར་གསུམ། བཟང་རྔ། རས་ཡུག་སོགས་མཆོད་སྤྲིན་སྤྲོ་བར་ལྕང་ལོ་ཅན་པ་བསྟན་འཛིན་དཔལ་བཟང་བཏང་སྐབས་གསོལ་བའི་འཕྲིན་ཡིག་བདེ་སྐྱིད་ཉི་མ་ཤར་བའི་འོད་སྣང་། མངོན་ཤེས་རི་མོ་བཀྲ་བའི་མིག་གི་སྒོར། །སྲིད་པ་སྤྱོད་པའི་སྣང་ཚུལ་ཀུན་ཤར་ཚེ། །ལྐོག་གྱུར་གཉིད་སློང་མངོན་སུམ་སྐྱ་རེངས་ཀྱིས། །བདེ་སྐྱིད་ཉི་མའི་དཀྱིལ་འཁོར་འདྲེན་པའི་ལྷ། །ཤར་ཕྱོགས་དུང་སྒོ་ཕྱེ་བའི་ཕོ་བྲང་ནས། །རྒྱལ་ཆེན་མོན་ནག་པུ་ཏའི་ཞལ་གྱི་ཁྱིམ། །ཚེམས་དཀར་ཟེའུ་འབྲུ་ངོམས་པའི་འཛུམ་ལྡན་དུ། །སྒྱུར་བའི་བློན་པོ་བྱ་ཁྲིད་མིག་གཅིག་བུ། །རང་སྲིད་འཆི་མེད་བདེ་བར་ངལ་གསོ་བའི། །སྟོབས་ཆེན་རྣམ་པར་རྒྱལ་བའི་རྒྱལ་མཚན་ཅན། །འཕྲིན་ལས་ནོར་བུ་མཛད་མེད་སྐྱུག་པའི་གཏེར། །འཆང་ཁྱོད་གནོད་སྦྱིན་དབང་པོའི་སྤུན་ཟླ་བཞིན། །སྲོག་དབུགས་ཤ་ཁྲག་བཟར་རྔམས་རིངས་པའི་གར། །རྣམ་འགྱུར་དཔའ་བོའི་རོལ་པ་མཐའ་ཀླས་ཀྱང་། །དཀར་ནག་ལས་ཀྱི་ཚུལ་ལ་མེལ་ཚེ་མཁན། །ཐུབ་བསྟན་རིན་ཅེན་སྐྱོང་བའི་དཔལ་དུ་ཤིས། །སྣང་སྲིད་ཟིལ་གནོན་པདྨ་འབྱུང་གནས་ཀྱི། །དབང་རྟགས་རྡོ་རྗེའི་འཕྲེང་བ་ཐོད་བཅིངས་པའི། །རི་མོར་རབ་འབར་གཡར་དམ་བསྐྱངས་པའི་ཐིག །དྲང་པོ་གནམ་གྱི་དགུ་ཚིགས་(༡༤༣ན)
དེ་ལ་འགྲན། །གྱེན་ཟློག་འབངས་ཀྱི་གྱ་གྱུ་ངན་འཆང་སྙིང་། །ལྐོག་མར་འབྱིན་དང་ལྷན་ཅིག་ཁེངས་པའི་མགོ །རྐང་སྟེགས་ས་ལ་ལྷུང་བའི་རྒྱལ་ཐབས་ཀྱི། །དབང་དྲག་རུ་མཚོན་བསྒྲེང་བར་ཁྱོད་བསྔགས་སོ། །ཉལ་འགྲོ་བདུད་རྩིར་འཁྱིལ་བ་འབྲས་ལྡན་གྱི། །ལྷ་རྒྱལ་དབྱངས་སུ་ལེན་པ་ཚེས་བརྒྱད་དུས། །གནམ་སའི་དཀྱིལ་འཁོར་གང་བ་མཆོད་པའི་སྤྲིན། །ཏིང་འཛིན་སྔགས་དང་ཕྱག་རྒྱས་འདི་ན་སྤེལ། །རྡུལ་བྲལ་དྲི་མེད་འཕྲིན་ཤོག་རྫིང་བུ་ལ། །བླང་དོར་ཟླ་བའི་སྣང་བརྙན་གྲངས་མང་ཡང་། །ཟབ་གསང་ཕྲ་ཞིབ་རི་དྭགས་གཟུགས་འཆར་བའི། །ལུང་བསྟན་ནམ་མཁའི་ཟླ་བ་མངོན་སུམ་སྟོན། །སྡེ་བཞིའི་སྒོ་འཕར་ཕྱེ་བའི་གན་མཛོད་ནས། །སྲིད་ཞིའི་ཕུན་ཚོགས་དཔལ་གྱི་བེའུའི་གཟུགས། །སྙིང་གར་དགའ་བ་གཡས་སུ་རབ་འཁྱིལ་བའི། །བསམས་དོན་འགྲུབ་པའི་བཀྲ་ཤིས་ལྷུན་གྲུབ་མཛོད། ཆུ་སྟག་ཧོར་ཟླ་བརྒྱད་པའི་ཡར་ཚེས་ལ་ཚེར་གསེབ་ནས་ཚངས་པ་དུང་གི་ཐོར་ཚུགས་ཀྱིས་སྤྱི་སྒོས་ཀྱི་རིམ་གྲོའི་བླང་དོར་དང་བཅས་ཏེ་འཕྲིན་ཡིག་བྱུང་བའི་གསུང་ལན་གཏམ་སྙན་གཡས་སུ་འཁྱིལ་བའི་དུང་དཀར། གནག་སྣུམ་རལ་པའི་ཐོར་ཚུགས་རྩེར། །གཡས་འཁྱིལ་སྙན་པའི་དུང་དཀར་པོས། །ལེགས་སྤུད་དཔལ་ལྡན་ཚངས་པ་ཡིས། །གསུང་འཕྲིན་ལྷ་དར་རྟེན་བཅས་འབྱོར། །སངས་རྒྱས་ཀུན་གྱི་བདག་ཉིད་ཅན། །པདྨ་ཀ་ར་ཞེས་གྲགས་པ། །གང་དེའི་སྤྱན་སྔར་ཁས་བླངས་པའི། །གཡར་དམ་གཡོ་མེད་ཇི་བཞིན་སྤྲོ། །གངས་ཅན་ར་བ་དཀར་པོ་ཡི། །བསྟན་དང་འགྲོ་བའི་ཉེར་འཚོ་རུ། །རྡོ་རྗེ་ལྟ་བུར་གནས་དགོས་པའི། །རྒྱུ་མཚན་ཡིད་ཀྱི་ཐིག་ལེར་སིམ། །ནག་པོ་བདུད་ཀྱི་སྡེར་བཅས་ལས། །རྣམ་(༡༤༣བ)
པར་རྒྱལ་བའི་ཐབས་ཀྱི་ཚུལ། །རིམ་གྲོའི་བླང་དོར་མ་ལུས་པ། །གཡེལ་མེད་བརྩོན་པས་ཉམས་སུ་བསྟར། །ལྷ་མཆོག་ཡིད་བཞིན་དབང་གི་རྒྱལ། །སྙན་ཤལ་མཛེས་བྱེད་ལྷ་རྫས་དར། །གསེར་སྐྱེམས་ཞོ་ཡི་འཁོར་ལོ་བཅས། །ཡར་ཚེས་དགེ་བར་ཛ་ཡནྟུ། །ཆུ་སྟག་ཧོར་ཟླ་བརྒྱད་པའི་ནང་དུ་གྲྭ་ཨར་དགེ་རྒྱལ་པོ་བྱ་ཁྲིད་མིག་གཅིག་པ་དང་བརྒྱུད་གཅིག་ཏུ་བྱེད་པ་དེ་བར་སྐབས་སུ་ཁོག་ཞུགས་མ་བྱུང་བ་འདུག་པར་མོན་བུ་ཀླུ་བཙན་གྱི་ཁོག་གཡར་ནས་ཐོག་བབས་ཀྱི་ཚུལ་དུ་ཞུགས་ནས་མཐུན་རྫས་གསོལ་མཆོད་གསར་རྩོམ་བཅས་དགོས་ཚུལ་དང་ཁོག་པ་སུ་འཚོལ་འཕྲིན་ཡིག་བྱུང་བར་དགོས་ཆ་སྤེལ་པ་དང་བཅས་ཏེ་ལན་དུ་བསྲིངས་པ་དམ་ཚིག་རི་མོ་རྣམ་བཀྲ །ཨ་ཧོ་མི་བསྲུན་བརླང་པོའི་འབྲས་སྨིན་ལྕགས། །རིགས་འཛིན་པདྨ་ཀ་རའི་མཐུ་རྩལ་རྩིས། །བསྟན་སྲུངས་དབང་པོའི་གསེར་དུ་ལེགས་བསྒྱུར་བའི། །བྱ་ཁྲིད་མིག་གཅིག་བཤན་པའི་འཕྲིན་ཡིག་འབྱོར། །ཉི་ཟླ་མཁའ་ལ་འཆར་བ་ཡོལ་མིན་ལྟར། །རྟག་ཏུ་བསྟན་པའི་བྱ་ར་གཡེལ་མེད་དུ། །སྒྲུབ་པའི་གཡར་དམ་གཉེན་པོ་ལེགས་བསྲུང་བའི། །གཙུག་ན་རྡོ་རྗེའི་རི་མོ་བཀྲ་དེས་ཤིས། །ལྐོག་གྱུར་ཆོས་རྣམས་མངོན་སུམ་ཇི་བཞིན་དུ། །ལྟ་བའི་སྒྲིབ་བྲལ་ལྷ་མིག་རབ་གསལ་བས། །གཞལ་བ་ཇི་བཞིན་སྟོན་པའི་གསང་བའི་ཚིག །མ་བརྗེད་ཡིད་ཀྱི་ཡོལ་གོར་རྟག་ཏུ་བསྟན། །སྔོན་གྱི་ཁོག་པའི་བརྒྱུད་པ་ཅན་གང་དང་། །དེང་དུས་གསར་དུ་གཡར་པོ་བྱུང་བ་གཉིས། །མོན་བུ་ཀླུ་བཙན་དེ་དང་གྲོས་མཐུན་ངོས། །ལྷ་ཁྱོད་གང་བཞེད་ཅིག་ལ་འཚོལ་བར་མཛོད། །རྒྱལ་ཆེན་དཔེ་ཧར་སྐུ་ལྔ་གཙོར་སྟོན་ལ། །བློན་པོ་བྱ་ཁྲིད་མིག་གཅིག་སྒེར་གསོལ་ཞིག །དགོས་ཚུལ་ཇི་བཞིན་ཚིག་གི་སྲད་བུ་ལ། །ལེགས་བརྒྱུས་གསར་པའི་འཕྲེང་བ་རྣམ་པར་སྤེལ། །བྱང་(༡༤༤ན)
ཕྱོགས་གངས་ཅན་སཱ་ལའི་སྨན་ལྗོངས་འདིར། །ཐུབ་བསྟན་ཡོངས་འདུ་རྒྱས་པའི་གྲིབ་བསིལ་ལ། །ལུས་ཅན་མ་ལུས་བདེ་བར་ངལ་གསོ་བའི། །ཕན་བདེའི་སྒོ་བརྒྱ་འབྱེད་པའི་འཕྲིན་ལས་སྒྲུབས། །ལྷ་དར་གསེར་སྐྱེམས་ལ་སོགས་བདོག་པའི་སྐྱེས། །ཐུགས་དམ་སྐོང་པའི་འདོད་རྒུའི་མཆོད་སྦྱིན་མཁན། །ཏིང་འཛིན་སྔགས་དང་ཕྱག་རྒྱ་བདེན་པའི་མཐུས། །དགྱེས་ཞལ་སྟོན་ཟླ་ལྟ་བུར་ངོམས་ཤིང་རོལ། །ཆུ་སྟག་ཧོར་ཟླ་བརྒྱད་པའི་ནང་དུ་འཕྱོས་ཆོས་འཁོར་སྟེང་རྒྱལ་པོའི་ལས་མཁན་བཙན་རྒོད་ཀྱིས་མཐུན་རྫས་དགོས་ཚུལ་བྱུང་བའི་འཕྲིན་ལན་ནམ་མཁའ་མཛོད་ཀྱི་ཟ་མ་ཏོག །པདྨ་རཱ་གའི་རྡུལ་བརྩེགས་ལྷུན་པོ་ལ། །ཉིན་བྱེད་འོད་ཀྱིས་འཁྱུད་པའི་གཟི་བྱིན་ཅན། །གནོད་སྦྱིན་བཙན་རྒོད་བཤན་པ་དམར་པོ་ཡི། །འཕྲིན་ཡིག་ལྷ་དར་རྟེན་དང་བཅས་པ་འབྱོར། །སྤྱི་དང་ཁྱད་པར་ཕན་བདེ་སྤེལ་བའི་ཐབས། །དམར་ཟླུམ་སྤྱན་གྱིས་གཟིགས་ནས་ལེགས་སྟོན་པའི། །བླང་དོར་ཡིད་ཀྱི་རིན་ཅེན་རྩིག་ངོས་ལ། །ཀུན་རྟོག་པིར་གྱིས་མ་བསྐྱུད་གསལ་བར་བྲིས། །སྡེ་བརྒྱད་ཀུན་གྱི་རལ་པའི་ཅོད་པན་རྩེར། །བཀའ་རྟགས་རྡོ་རྗེའི་ཕྱག་རྒྱ་ཉེར་འགོད་པའི། །པདྨ་ཐོད་འཕྲེང་རྩལ་གྱི་སྤྱན་སྔ་རུ། །གཡར་དམ་ཇི་བཞིན་བསྟན་འགྲོའི་མེལ་ཚེས་སྐྱོང་། ཁྱད་པར་གངས་ཅན་ར་བ་དཀར་པོ་ཡི། ཁོར་ཡུག་གཅིག་ཏུ་གྱུར་པའི་རྒྱལ་ཁམས་འདིར། །ནད་མུག་འཐབ་རྩོད་རྒུད་པ་ཀུན་ཞི་ཞིང་། །བདེ་སྐྱིད་དགའ་སྟོན་ལ་སྦྱོར་འཕྲིན་ལས་སྒྲུབས། །ཅང་ཤེས་བཞོན་པ་དང་བཅས་མཐུན་པའི་རྫས། །ཉེར་བསྐུལ་ཇི་བཞིན་དངོས་བཤམས་ཏིང་འཛིན་གྱིས། །འཛད་མེད་(༡༤༤བ)
ནམ་མཁའ་མཛོད་ཀྱི་ལོངས་སྤྱོད་དུ། །བརླབས་ཏེ་སྒོ་གསུམ་དགྱེས་པ་བསྐྱེད་ཕྱིར་སྤེལ། །ཤེས་བྱའི་གཙུག་ལག་མང་པོར་ལྟ་བའི་མིག་ཡངས་མངའ་རིས་རུ་ཐོག་དབང་པོ་ཕུན་ཚོགས་རྣམ་རྒྱལ་གྱིས་མདོ་སྡུད་པ། བྱམས་ཆོས་བཞི་རྣམས་སྐད་ཤན་སྦྱར་ཐམས་ཅད་མཁྱེན་པ་ཞ་ལུ་ལོ་ཙཱ་བ་ཆོས་སྐྱོང་བཟང་པོའི་ཞུས་དག་མ། གསོ་དཔྱད་ཀྱི་གཅེས་བསྡུས་རིན་ཅེན་འཕྲེང་བ། མཁྱེན་བརྩེ་ལོ་ཙཱ་བའི་སྡེ་ཚན་བདུན་པ་སྐད་ཤན་སྦྱར་དང་བཅས་པའི་གླེགས་བམ་མ་ཕྱིའི་གཡར་པོར་ཆེད་གཏད་བྱ་མ་རྟ་མངགས་ཏེ་སྙན་ཚིག་གི་འཕྲིན་ཡིག་བྱུང་བའི་ལན་རྣམ་དཔྱོད་མུ་ཏིག་གསར་པའི་འཁྲི་ཤིང་། སུ ཀྲྀ ཏྱ ད ཤྟཱཾ ཤི ར ཛ ནྨ ཏཿ བི ཙཱ ར མུ ཀྟི ན བྱ སྱ མྲྀ ཎཱ ལ བྷ རྵ ཏ། སྡེབ་སྦྱོར་རིག་གནས། ཡ། བ ཏ ཛྙེ ཡ ན ཏི ཥྛ ནེ མ གོ པྲ ཡཱ ཤུ བྷ སྟ ཎྡུ ལ པཱ ཀ ཏེ ལི ཁཾ། ལེགས་(སྡེབ་སྦྱོར་རིག་གནས།)བྱས་གླང་ཆེན་སྤྱི་བོ་ལས་སྐྱེས་པའི། །རྣམ་དཔྱོད་མུ་ཏིག་གསར་པའི་འཁྲི་ཤིང་ཆེར། །ཇི་སྙེད་ཤེས་བྱའི་གནས་ལུགས་སར་འབབ་པའི། །དགེ་བའི་འབྲས་དཀར་སྨིན་པ་དེ་ལ་སྤྲིངས། །བློ་གྲོས་རྒན་པའི་རྩེར་(༡༤༥ན)
སོན་རལ་ཀླུང་ནས། །ཉམས་འགྱུར་འཕྲིན་རྟེན་གངྒཱའི་རྒྱུན་བབས་ཚེ། །གདོང་བཞི་ཙམ་གྱིས་ཚངས་པ་ཁྱོད་ཉིད་ལས། །ལྷག་པར་འཛིན་པའི་ཀུན་རྟོག་ཡིད་ལ་བྲིས། །རྒྱལ་གསུང་སྡུད་པ་བྱམས་ཆོས་པུ་སྟ་ཀཿ །རྒྱ་དཔེའི་ལེགས་སྦྱར་སྐད་དང་ཤན་སྦྱར་བ། །དོན་ལྡན་ཐམས་ཅད་མཁྱེན་ངེས་ཞ་ལུ་བས། །དྲི་མེད་སྤྱན་རས་ཀྱིས་བཙས་འཁྲུལ་མེད་གནས། །སྐད་རིགས་མི་གཅིག་སྡེ་ཚན་བདུན་པ་རུ། །རབ་དབྱེ་མཁྱེན་ལོའི་བློ་གྲོས་ཀྱིས་སྤོབས་དང་། །སྲོག་གི་ཀ་བ་འཛུགས་པའི་བདུད་རྩིའི་བཅུད། །གཅེས་བསྡུས་རིན་ཅེན་འཕྲེང་མཛེས་འབྱོར་དེ་སྤྲོ། །སྐྱེ་བའི་འཕྲེང་བ་མི་ཟད་འཁོར་བའི་མཐའ། །འཚོལ་བྱེད་ཟུག་རྔུས་གཏམས་པའི་སྣོད་ཡིན་ཀྱང་། །དལ་འབྱོར་མཚན་ཉིད་ལྡན་པ་གང་གི་ལུས། །བདེ་བར་རང་གནས་འབྱོར་འཚོའི་གཏམ་དེ་སྙན། །འདི་ན་ཐོས་བསམ་བ་ཀཱུ་ལ་ཡི་ཁ །རྣམ་གཡེང་ཉི་ཟླའི་འོད་ཀྱིས་ཕྱེད་མིན་ཀྱང་། །སྐྱེ་ཐོབ་ཤེས་རབ་ལུས་ཕྲའི་འགྲམ་ཆང་གིས། །ཕྱེ་བའི་འདབ་མ་བཞད་འདི་མ་སྙིགས་ཙམ། །སྔོན་བྱོན་མཁས་མང་གདོང་ལྔའི་དབང་པོའི་ཤུལ། །སྟོབས་འབྱོར་རམས་ཀྱིས་བསྒྱུར་བའི་ཁ་དོག་ལ། །མཚར་བྱེད་བསྟན་འཛིན་དབྱར་གྱི་སྲིན་འབུ་ལྟར། །གང་ཚེ་ཁྱོད་ཉི་ཟླ་མེད་ནམ་མཁའི་ཟླ། །ཐོས་བསམ་རྩ་བ་སྦོམ་པོར་བསྐྱེད་བསྲིངས་པའི། །ལྔ་རིག་ཛམྦུའི་གསེར་གྱི་སྙེ་མ་ཡིས། །དུད་ཁྱོད་གཡས་རུའི་ཕྱོགས་དེར་རང་ཉིད་ཀྱི། །གྲིབ་མ་ཙམ་ལ་མཁས་པའི་མཆེད་པོར་འཛིན། །དབང་རྟུལ་དྲང་སྲོང་དམོད་ལྷུངས་བློ་དམན་མངལ།(༡༤༥བ)
།ཕྱག་ཚན་མིང་བཏགས་ལྕགས་ཀྱི་ཏིམ་བུ་བདུན། །ཉེར་བཙས་ལྟར་སྣང་ཆོས་ཀྱི་སྡིག་སྨིན་པས། །དྭགས་བརྒྱུད་གྲུབ་རིགས་ཐ་གུའི་ལྟོ་ཅན་བཞིན། །འཛམ་གླིང་རྒྱན་གྱུར་ཁ་སྤུ་ཅན་རྣམས་ཀྱིས། །གཞུང་རྒྱ་འགྲོལ་བའི་ས་དགེའི་མཁས་རྣམས་དང་། །ཟོག་རྫུན་འཕྲུལ་གྱིས་གཞན་བློ་བྲིད་པ་རྣམས། ཁྱད་པར་ཤེས་པའི་བློ་ལྡན་ཉིད་ལས་སུ། །དེ་ལྟ་ན་ཡང་རིག་ལམ་སྨྲ་བའི་གྲར། །མ་རྟགས་འཆད་རྩོད་ཕྲག་པར་ཁུར་བླངས་ཅན། །དཔྱད་ན་ཨེ་རཎྜ་ཡི་སྙིང་པོའི་གཤིས། །འདིའང་སྐལ་ངན་དུས་ཀྱི་བྱེད་པོའི་སྐྱོན། །འོན་ཏེ་དེང་དུས་ལྔ་བརྒྱ་དྲུག་པའི་སྐབས། །ད་གདོད་ལུང་གི་ཕྲག་གསུམ་འོང་ངེས་ན། །ཤོང་དཔང་ལྟ་བུའི་ངེས་པར་ཀུན་མཁྱེན་འགས། །ཐུབ་བསྟན་ཉི་འོད་གསལ་སྙམ་ཡིད་ཀྱིས་གསོས། །མི་བདག་ཐ་སྙད་ཕ་མཐའ་ཟད་མིན་ཕྱིར། །གཟུང་འཛིན་ཕ་རོལ་རླུང་རིག་དངས་མའི་འཇའ། །རྡོར་སེམས་སྙིང་དབུས་བཞེངས་པའི་ཡེ་ཤེས་ལྷ། །རང་སྣང་དེ་ལ་ངོ་འཕྲོད་ཟབ་ལམ་གནད། །མ་སྨད་སྤོབས་པ་དགེ་བའི་མགྲིན་པ་ནས། །གླེང་བར་འོས་པའི་ཆོས་དང་སྲིད་ཀྱི་གཏམ། །ཨ་འདུས་ཀ་འཕྲེང་སྲད་བུར་རྟག་རྒྱུ་བའི། །ངང་ཚུལ་དེ་ལས་ལྡོག་མིན་ཁྱོད་ཀྱི་ལུགས། །མགྲིན་པའི་པད་མཚོར་དབྱངས་ཅན་ངང་མོ་དཀར། །ཉམས་འགྱུར་སྐད་སྙན་ས་སྤྱོད་རྣ་བ་ལ། །འཁྲོལ་ཚེ་རྗེས་ཆགས་མཚོན་པའི་མཐུན་འཚམས་སྤྲིན། །ཐགས་སུ་བཏགས་པའི་ས་གཞི་མཛོད་འདིའོ། །
རབ་བྱུང་བཅུ་གཅིག་པའི་ཆུ་ཡོས་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་ཡོས་ལོར་བྲིས་པའི་ཆབ་ཤོག་འཕྲིན་ཡིག་ཁག །གྲྭ་སྡིངས་པོ་ཆེ་ནས་སྤྲུལ་སྐུ་ངག་དབང་སྙན་གྲགས་བཟང་པོས་ཆུ་ཡོས་གནམ་ལོ་གསར་ཚེས་ཀྱི་དགའ་སྟོན་སྤེལ་བར་སྙན་ངག་གི་ལམ་ནས་དྲངས་པའི་འཕྲིན་ཡིག་བྱུང་བའི་ལན། ལེགས་བཤད་རོ་བརྒྱའི་(༡༤༦ན)
གཡང་ཆགས། གྲྀ གམྦྷཱི ར མཱ ཏེ རྨ ཧཱ སཱ ག རཱ ཤྴ བྡ ཨ རྠ ཀྵ སྭཱ ར ག ཏྱ རྨི མཱ ལཱཿ ཁ བ རྵ སྱ ཀཱ ལཱ དི ནོ ལུ ཀྵུ ཨཱ ཤྲེ པ ཏོ ལེ ཁ བཱ རྞཱ སུ ཙཻ ཏྱཱ ཏ ཡུ ཀྟཾ། ཟབ་(སྡེབ་སྦྱོར་ལག་འགྲོ་ལྟུང་བ།)བརླིང་བློ་གྲོས་རྒྱ་མཚོ་ཆེན་པོ་ལས། །སྒྲ་དོན་སྙན་འགྱུར་ཉམས་ལྡན་རླབས་ཀྱི་འཕྲེང་། །གནམ་ལོའི་དུས་ཀྱི་དང་པོར་ཡོལ་མིན་པར། །ཤེས་པ་བརྗོད་པའི་འཕྲིན་ཡིག་རྟེན་བཟང་འབྱོར། །མགྲིན་པ་ལོངས་སྤྱོད་འཁོར་ལོའི་བུམ་བཟང་ནས། །ལེགས་བཤད་སྐྱུག་པའི་གཟིགས་མ་ཤོག་བུའི་སྣོད། །འཁྱིལ་བ་རོ་བདའི་གཡང་ཆགས་བྱེད་པོ་ཁྱོད། །དྲང་སྲོང་ཕུར་བུ་མི་ཡི་ཟོལ་གྱིས་འོངས། །སྣ་ཚོགས་ཐ་སྙད་ཚིག་གི་སྒྱུ་མའི་འཕྲུལ། །གང་ཤར་བཟོ་མེད་ཆོས་སྐུར་ངེས་རྙེད་པའི། །ཐོས་དོན་སྙིང་པོར་སྤྱོད་པའི་རྣལ་འབྱོར་ཆེ། །གྲུབ་རིགས་བསྟན་པའི་ཆེད་དུ་བདེར་འཚོ་སྤྲོ། །འདི་ན་ཞྭ་སེར་ཅོད་པན་འཆང་བ་ཡི། །གནའ་བོའི་ཁྲི་ལ་རང་རིགས་སྲོལ་འཛིན་ཡང་། །ཐུབ་བསྟན་རིས་སུ་མ་བཅད་གཞུང་ལུགས་(༡༤༦བ)
དང་། །ཕྱི་ནང་གཙུག་ལག་རྒྱ་མཚོར་སྤྱོད་པས་བྲེལ། །ཡིད་འཕྲོག་ལྟ་ན་ཉེར་སྡུག་མཛེས་བྱེད་མ། །ཆུ་དར་གོས་ཀྱིས་ཀླུབས་པ་བགྲང་བྱའི་ཞལ། །འཛུམ་བཞད་ནས་བརྩམས་རྫོགས་ལྡན་དགའ་སྟོན་གྱི། །རྩེ་དགའ་དགོད་པའི་ཁུར་ཆེན་ཕྲག་པར་ལན། །གྲུབ་རིས་ཕལ་གྱིས་སྤོབས་མིན་གནས་ལྔའི་གཞུ། །རྣམ་དཔྱོད་རྒྱུད་ཀྱིས་བཀུག་པའི་མདའ་བོ་ཆེས། །ལོག་རྟོགས་སྦྱིན་སྐྱེས་གྲོང་ཁྱེར་འབིགས་བྱེད་གང་། །སཱ་ལའི་ལྗོངས་སུ་གནས་པའི་མགྲིན་སྔོན་བཞིན། །སླུ་འདྲིད་སྒྱུ་མར་ཆགས་པའི་འཕོང་རྐྱེན་གྱིས། །ཆེན་པོའི་རི་དྭགས་རྗེས་སུ་སྙེག་མིན་པར། །ཐོས་བསམ་སྒོམ་པའི་སཱི་ཏ་ལེགས་སྐྱོང་ཉིད། །དྭགས་བརྒྱུད་མཛེས་རྒྱན་སྔོན་མེད་དགའ་བྱེད་ལྷ། །ངག་ལ་སྨྲ་བའི་དབང་པོའི་འདོད་པ་ཀུན། །འཇོ་བའི་སྙན་གྲགས་ལྷ་ཡི་རྔ་བོ་ཆེ། །སྲིད་པ་གསུམ་དུ་བརྡུངས་པའི་ཁོར་ཡུག་ལས། །བརྒལ་པའི་དཔལ་ལྡན་བཟང་པོའི་སྐལ་ཅན་ཀྱེ། །ངན་སྤྱོད་དྲིས་སྦགས་རྒྱ་རས་རིང་ལུགས་ཞབས། །བསིལ་བར་ན་ཚོད་ཆུང་ངུའི་དུས་ཉིད་ནས། །དག་བྱེད་ཁྲུས་ཀྱི་མཁན་པོས་གངྒཱ་ཁྱོད། །ལོག་པའི་གཡའ་བྲལ་དེ་སྲིད་ཆད་མེད་སྒྲོངས། །གསར་ཚེས་ཕུན་ཚོགས་སྒོ་བརྒྱ་ཕྱེ་འདི་ནས། །བྱམས་མགོན་དབུས་འགྱུར་མཆོག་སྤྲུལ་རྣམ་རོལ་པ། །དེ་སྲིད་བཀྲ་ཤིས་འཕྲིན་ཡིག་སྐྱེས་བཟང་རྒྱུན། །ཉི་ཟླའི་འགྲོས་ཀྱི་རྗེས་སུ་ཅིས་མི་རྒྱུ། །རྣམ་བཅུའི་ཆོས་སྤྱོད་བསྟར་བར་རྟག་འགྲུས་པའི། །དམ་པའི་ཚུལ་ལ་རངས་པའི་རབ་དཀར་བློ། །སོམ་ཉི་ར་རི་ལྡན་མིན་འོད་དཀར་ཅན། །བསིལ་ཟེར་ཕོན་རྫར་འཕྲོ་བ་འདིས་མཚོན་ནོ། །མཛེས་བྱེད་ཀྱི་ལོ་ཁྲ་འབྲུག་ནས་ཚངས་པ་ཆེན་པོས་མེ་ཏོག་མཆོད་པའི་ཐོག་གཙུག་(༡༤༧ན)
ལག་ཁང་དུ་འཕན་གདུགས་བླ་བྲེ་དགོས་ཚུལ་བྱུང་བའི་འཕྲིན་ལན་ཕན་བདེའི་གདུགས་མཛེས་ལེགས་འཁྱིལ། སངས་རྒྱས་ཀུན་གྱི་ཡེ་ཤེས་སྒྱུ་མའི་གར། སིནྡྷུ་རྒྱ་མཚོར་པདྨའི་ཟེ་འབྲུའི་རྩེར། །ལེགས་སྒྱུར་འཛམ་གླིང་ཆེ་བའི་རིག་སྔགས་འཆང་། །བརྟུལ་ཞུགས་གྲུབ་པའི་དབང་པོ་པདྨ་འབྱུང་། །གང་དེས་སྤྱི་བོར་རྡོ་རྗེའི་རི་མོ་བཀོད། །རྩ་བརྒྱད་སྟོང་སྦྱར་བདུད་རྩི་ལྕེར་བླུད་ནས། །དབང་བསྐུར་དམ་ཚིག་ཉེར་བསྒོས་སྲོག་བདག་ཆེ། །ལྷ་ཆེན་ཚངས་པའི་འཕྲིན་ཡིག་རྟེན་ལྡན་སོན། །ཆོས་རྒྱལ་མེས་དབོན་གྱིས་བསྐྲུན་གནྡྷོ་ལ། །ཨོ་རྒྱན་སངས་རྒྱས་གཉིས་པའི་སྒྲུབ་པའི་གནས། །ཟུང་འབྲེལ་གངས་ཅན་ཕན་བདེའི་རྩལ་ལག་ལ། །ཀུན་བཟང་མཆོད་པའི་སྤྲིན་ཕུང་ཉེར་སྤེལ་ཞིང་། །བསྟེན་ཅིང་བསྒྲུབ་པའི་དམ་ཅན་སྲུང་མ་དང་། །རིགས་དང་བརྒྱུད་ལ་འགོ་བའི་དགྲ་ལྷ་སོགས། །དགྱེས་ཞལ་བཅོ་ལྔའི་ཟླ་བ་ལྟར་སྟོན་པའི། །སྐུལ་བྱེད་རྡོ་རྗེའི་ཚིག་འཕྲེང་རྣ་བར་འཇེབས། །མཐའ་འདུལ་གཙུག་ལག་ཁང་བཟང་ཀུན་གྱི་གཙོ། །གཡོན་རུ་དཔལ་གྱི་ཁྲ་འབྲུག་ཆོས་འཁོར་དུ། །གདུགས་མཛེས་བཟང་གོས་ལས་གྲུབ་བླ་བྲེ་འཕན། །ཉ་རྒྱས་ཚེས་ལ་འབྱོར་ངེས་འདི་སྤེལ་ལོ། །རབ་དཀར་གངས་ཀྱི་ར་བས་ཡོངས་བསྐོར་བའི། །བོད་ཡུལ་བསྟན་འགྲོའི་ཕན་བདེ་རྒྱས་པ་དང་། །རིག་འཛིན་བདག་གིས་བཅོལ་པའི་འཕྲིན་ལས་བཞི། །ཐོགས་མེད་སྒྲུབས་ཤིག་གཡས་ཁྱིལ་དུང་ཐོད་ཅན། །ལྷ་ཁྱོད་མཛེས་པའི་སྙན་ཤལ་རིང་པོ་རུ། །འཕྱང་བྱེད་འཇའ་ཚོན་ལྟ་བུར་བཀྲ་བའི་དར། །ས་ཟླའི་སྐྱེམས་ལྡན་འཕྲིན་ཡིག་ལག་ཐོགས་པའི། །ཕོ་ཉ་ཡར་ལུངས་སྨན་གྱི་ལྗོངས་སུ་སོང་། །མཛེས་བྱེད་ཀྱི་ལོ་བསམ་ཡས་ནས་དྲེགས་པའི་སྡེ་དཔོན་ཆེན་པོས་བོད་ཁམས་བདེ་ཐབས་ལ་དམིགས་ནས་བྱང་ཆུབ་ཆེན་པོའི་སྤྱན་སྔར་མར་མེའི་རྒྱུན་བཙུགས་མཐུན་རྐྱེན་དུ་བྲེའུ་མར་གྱི་ཁལ་ལྡན་གསུམ་དགོས་ཚུལ་བྱུང་བ་ལྟར་མ་ཎི་བ་དཀོན་བློ་(༡༤༧བ)
བཏང་སྐབས་གསོལ་བ་བརྒྱ་ཕྲག་ཉི་མའི་དཔལ་འཛིན། ས་ལ་རྣམ་པར་རབ་རྒྱལ་བའི། །བ་དན་སྲིད་པའི་རྩེ་མོ་རུ། །བསྒྲེང་བའི་གནོད་སྦྱིན་ཙེའུ་དམར། །སྣང་སྲིད་དྲེགས་པའི་སྡེ་དཔོན་ཆེ། དགོད་དང་དྲག་ཤུལ་འཇིགས་རུང་བའི། །ཉམས་ལྡན་གཏུམ་ཆེན་དཔའ་བོའི་གསུང་། །ཚངས་དབྱངས་གསང་ཚིག་རྡོ་རྗེའི་འཕྲིན། །རི་མོའི་ལམ་དུ་ཤར་ཏེ་སོན། །ཕན་བདེའི་མ་ལ་ཡ་ཡི་ངད་། ཁ་བའི་ལྗོངས་འདིར་འགུགས་བྱེད་པའི། །མི་འགྱུར་ལྷུན་གྲུབ་གནྡྷོ་ལར། །མཆོད་པའི་སྤྲིན་ཕུང་སྤེལ་བ་སྤྲོ། །ཡམས་ནད་མུ་གེའི་འཇིགས་སེལ་སོགས། །སྤྱི་སྒོས་དོན་དུ་མར་མེའི་རྒྱུན། །འཛུགས་པའི་མཐུན་རྐྱེན་དྲེལ་གཞོན་གསུམ། །རྩི་བཅུད་ཁུར་གྱིས་རྣམ་པར་ལྕི། །བདེ་གཤེགས་ཞི་ཁྲོ་སྲས་བཅས་ཀྱི། །ཟན་གཡང་ལྷུན་གྲུབ་ཕོ་བྲང་ཆེར། །དཀར་ཚེས་ཉ་རྒྱས་དུས་བཟང་པོར། །སླེབས་ངེས་ཕོ་ཉ་ཤུལ་དུ་ཞུགས། །སངས་རྒྱས་ཀུན་འདུས་ཐོད་འཕྲེང་རྩལ། །བཀའ་བཞིན་ཐུབ་བསྟན་རབ་སྤེལ་ཞིང་། །བོད་འབངས་སྐྱེ་འགྲོ་མ་ལུས་པ། །བདེ་ཞིང་སྐྱིད་པའི་དཔལ་ལ་སྦྱོར། །རིག་འཛིན་བདག་དང་བསྲུང་འཁོར་དུ། །ཉེར་ཆུད་བཅས་ལ་དུག་མཚོན་གཡུལ། །ངན་ཤོམས་བྱེད་པའི་དགྲ་དང་བགེགས། །ལུས་སེམས་ཕྲོལ་ལ་རྡུལ་དུ་རློག །ནད་གདོན་ཀུན་ཞི་ཚེ་དཔལ་རྒྱས། །མི་ནོར་ཟས་གསུམ་འདུ་བ་སོགས། །བསམས་པ་ཇི་བཞིན་ལྷུན་གྲུབ་པར། །མཛོད་ཅིག་བསྟན་སྲུངས་མཐུ་རྩལ་ཅན། །ལྷ་རྫས་དར་མཚོན་སྙན་ཤལ་དང་། །གསེར་སྐྱེམས་རྩེ་མོའི་གྲངས་ཀྱི་ཞོར། །ཐུན་འཚམས་རྒྱ་ཡིས་ཉེར་སྤྲས་ཏེ། །སྣང་སྲིད་དྲེགས་པའི་འདུན་སར་སྤེལ། །འཕགས་ཡུལ་ཝ་ར་ཎཱ་སིའི་པཎྜི་ཏ་གོ་ཀཱུ་ལའི་ཚོང་པ་ཤར་ཕྱོགས་རྒྱ་ནག་གི་རྒྱལ་ཁམས་སུ་བཏང་བའི་ཚེ་འཕྲིན་ཡིག་བྱུང་བའི་ལན་ཆུ་ཡོས་ཧོར་ཟླ་དགུ་པའི་ཚེས་བརྒྱད་ལ་བསྲིངས་པ་མཁས་པ་དགའ་བསྐྱེད། (༡༤༨ན)
པྲ ཧྨ ཤུ ཀླ པ དྨ ན ཏྲ མུ རྡྷེ ཙ ནྡྲ ག ཎ པ ཏེཿ པ ཉྩ སྠཱ ན བི དྱ པ ཎྜི ཏ གོ ཀཱུ ལ མ ཤྲེ ཀུ རུ། པཱུ རྦ པ རེ ཝ རྞ ས ཧི། ནཱ ཤ བྷུ ཛ པ ཡོ གྱཾ། ཨ ཀྵ དེ ཤ བྷཱུ ཥི ཏ མ ཏྲེ བ ཙཱ རྠ མ ནེ ལི ཥྱཾ། གསེར་མངལ་ཅན་དང་པད་དཀར་མིག །གཙུག་ན་ཟླ་བ་ཚོགས་བདག་གིས། །གནས་ལྔ་རིག་པའི་པཎྜི་ཏ། །གོ་ཀཱུ་ལར་ནི་ཤིས་པར་མཛོད། །སྔ་ཕྱིར་བསྲིངས་པའི་ཡི་གེ་རྟེན། །ཉམས་མེད་སུག་པར་ཉེར་སོན་ཞིང་། །འདྲེན་བྱེད་ཡུལ་དུ་གྱུར་པའི་ཚེ། །བརྗོད་དོན་ཡིད་ལ་རི་མོར་བྲིས། །མ ག དྷ མ ལ ཡེ ཛ པ ཊུ ཏྭཾ མ དྷུ ཡ ཤ ག ནྡྷེ། །དྷཱུ ར དེ ཤ པ བྷ ག མཱུ ལེ བྷྲ མ བ ཏ ཏི རཱ ས། །ས རྦ ས ཏྭ མ ཀཱུ ལེ ད ཡ སྱ ནཱ། ཤཽ དྡྷོ ད ན། །ཏ སྱཱ ནཱ པ ས ར ཤྲ མ ཎ སྭ སྠཱ ན སུ ཛཱི བ ཀ །འཕགས་ཡུལ་མ་ལ་ཡར་སྐྱེས་ནས། །མཁས་ཁྱོད་སྙན་གྲགས་དྲི་བསུང་ནི། །ཐག་རིང་ཡུལ་གྱིས་ཉེར་བསྐལ་ཡང་། །དྲུང་ན་འཁོད་ལྟར་ཆེས་ཆེར་དངར། །སེམས་ཅན་ཀུན་ལ་རིས་མེད་དུ། །བརྩེ་བའི་མགོན་པོ་ཟས་གཙང་སྲས། །དེའི་རྗེས་ཉེར་ཐུགས་དགེ་སྦྱོང་བདག །རང་གི་གནས་སུ་བདེ་བར་འཚོ། །(༡༤༨བ)
ཡ ཙྩི ཀ ས ཏི ཥྛ ཤི ཥྱཾ ཙཱི ཎེ ག ཏྱ མ ཏྲཱ ག ཏ། བྷ བ ཏཱ ནྟྲ ཧི ཏ མཱུ ཁ རཱུ པ བཱ གྨ ནཻ རཱ ས དྷ། ལོ ཀ པཻ ཏྲ བྲ ཧྨ པུ ཏྲ བེ དོ ཀྟ སྱ བ ར པྲ ཏཾ། གང་དང་ཐབས་ཅིག་འཁོད་པའི་གྲོགས། །ཙཱོ་ཎར་བགྲོད་བཤུལ་འདིར་འོངས་པར། །དངོས་དང་བརྒྱུད་ནས་ཕན་པའི་སྒོ། །ལུས་ངག་ཡིད་ཀྱིས་འབད་པས་བསྒྲུབས། །འཇིག་རྟེན་མེས་པོ་ཚངས་པའི་བུ། །རིག་བྱེད་སྨྲ་བའི་བརྟུལ་ཞུགས་མཆོག །བྷཱ ཏྭ མཱ ད སྶོ ཁྱ པྲཻ ཥི ཏཱ ཧ ཙ ནྡྲ ག བ ཏྐུ རུ། ར ཏྣ སུ ཝ རྞ ཏ ལྱ ཙ ཀྲ ཏྲི ནཻ ཏྲ ཙི ཧྣཾ ས ཧཿ། ཤོ བྷ བྷ རྵ ཤ རཱ ཏྐ ལེ ཀོ ཊ ར ཀྟ གཱི རཽ ལི ཥྱཾ། འཛིན་ཁྱོད་སྔོན་བཞིན་བདེ་བ་ནས། །བསྲིང་འོས་ཉི་ཟླའི་འགྲོས་ལྟར་འཚལ། །རིན་ཅེན་ས་ཟླ་ཞོའི་འཁོར་ལོ། །གསུམ་ལོངས་དར་ཡུག་རྟེན་དང་བཅས། །མཛེས་བྱེད་ལོ་ཡི་འབྲས་ལྡན་དུས། །ཕོ་བྲང་དམར་པོ་རི་ནས་བྲིས། །(༡༤༩ན)
མཛེས་བྱེད་ཀྱི་ལོ་ཧོར་ཟླ་བཅུ་པའི་ཚེས་བཅུ་བཞིའི་ཉིན། དཔལ་ལྡན་ཚངས་པ་དུང་ཐོད་ཅན་གྱིས་ཚེར་གསེར་བླ་མ་བློ་བཟང་འཇམ་དབྱངས་ཕོ་ཉར་མངགས་ཏེ་རིང་པོར་འཚོ་བའི་རྟེན་འབྱུང་དུ་སྟག་གདན་ལེགས་པ་ཞིག་དང་བཅས་གསུང་འཕྲིན་བྱུང་བའི་ཚེ་རྒྱལ་ཁམས་སྤྱིའི་ལུང་བསྟན་དགོས་ཚུལ་དང་བཅས་ལན་གསོལ་བ་བདུད་ལས་རྒྱལ་བའི་དགའ་སྟོན། གནག་སྣུམ་རལ་པའི་རྩེ་ན་བཀྲ་ཤིས་དུང་། །རབ་དཀར་གཡས་སུ་འཁྱིལ་བའི་ཅོད་པན་འཆང་། །སྐབས་འགར་ལི་བྱིན་ཧ་རའི་མཚན་སྙན་ཅན། །བསྟན་སྲུངས་དབང་པོའི་གསུང་འཕྲིན་ལྷ་དར་འབྱོར། །ལྐོག་གྱུར་ཆོས་ཀུན་མངོན་སུམ་རབ་གསལ་བ། །ལྷ་མིག་རྣམ་པར་དག་པའི་སྤྱན་རས་ཀྱིས། །གཟིགས་པ་ཇི་བཞིན་སྤྱི་སྒོས་བླང་དོར་རྣམས། །ལྷ་བདག་འཕྲིན་ནང་ལྷུག་སྩལ་སྤྲོ་དགའ་བརྟས། །བདུད་ལས་རབ་རྒྱལ་དཔའ་བོ་སྟག་གི་སྟན། །ཚེ་དཔལ་འཕེལ་ཞིང་དབང་བྱེད་འཇའ་རིས་ཅན། །སྲ་བརྟན་སྲུངས་འཁོར་ལྕགས་རི་མཚོན་པའི་འཇག །རིང་པོར་འཚོ་བའི་རྟེན་འབྱུང་ལྷག་པར་འགྲིག །སྲོང་བཙན་སྐྱེས་ལྷ་དཔལ་ལྡན་ཚངས་པའི་མཚན། །དྲག་པོར་ཁྲོས་པའི་ལི་བྱིན་ཧ་ར་ཆེ། །གཡར་དམ་གཉན་པོ་ནམ་ཡང་མི་གཡེལ་བར། །རྟག་ཏུ་ལས་ཀུན་བསྒྲུབ་ལ་གཅིག་ཏུ་རང་། །སྙིགས་མར་སྤྱོད་པའི་དུས་ཀྱི་འགྱུར་ལྡོག་གི །རྒྱལ་ཁམས་སྤྱི་ཡི་བཟང་ངན་ལུང་བསྟན་དང་། །དེ་འདྲས་ངན་སེལ་བཟང་པོ་སྤེལ་བའི་ཐབས། །སྣང་ཚུལ་གསལ་བའི་ཤོག་ཁྲ་བཀོད་རིགས་སྙམ། །སངས་རྒྱས་ཀུན་གྱི་སྐུ་གསུང་ཐུགས་རྡོ་རྗེ། །སྒྱུ་འཕྲུལ་རོལ་གར་པདྨ་ཐོད་འཕྲེང་གི །དམ་ཚིག་རི་མོ་ཐོད་དུ་གསལ་བ་བཞིན། །འཕྲིན་ལས་རྣམ་བཞི་མ་ལུས་ལྷུན་གྲུབ་མཛོད། །ཟླ་རྒྱས་ཐགས་ཀྱིས་རི་དྭགས་གཟུགས་བཀྲ་(༡༤༩བ)
བ། །ལྷ་རྫས་དུ་ཀཱུ་ལ་ཡི་ཕོན་རྫར་ཅན། །ས་ཟླའི་གསེར་སྐྱེམས་ཟུང་དུ་བཅས་པ་ནི། །ཀུན་བཟང་མཆོད་པའི་སྤྲིན་དུ་སྤེལ་བ་དགེ །ཆུ་ཡོས་ཧོར་ཟླ་གསུམ་པའི་ནང་དུ་གྲྭ་ཚོང་འདུས་ནས་བཤན་པ་བྱ་ཁྲིད་མིག་གཅིག་པས་གསོལ་མཆོད་གསར་རྩོམ་ཞིག་དང་བཅས་སྦུག་ཆོལ། གསེར་རྔ་དགོས་ཚུལ་བྱུང་བ་བཞིན་ལོ་དེ་ཁའི་ཧོར་ཟླ་བཅུ་གཅིག་པའི་ལྷ་ཚེས་ཐོག་དེ་དོན་རྣམས་སྤེལ་བ་དང་རྒྱལ་ཁམས་སྤྱིའི་ལུང་བསྟན་དགོས་ཚུལ་དང་བཅས་འཕྱོས་ཆང་ཁྱིམ་པ་བློ་བཟང་དངོས་གྲུབ་བཏང་སྐབས་འཕྲིན་དུ་གསོལ་བ་ཀུན་ཁྱབ་སྙན་པའི་སྒྲ་དབྱངས། རིག་རྩལ་འཇིགས་པ་མེད་པ་རྡོ་རྗེའི་སྐུར། །གྲུབ་པའི་ཟློས་གར་པདྨ་ཐོད་འཕྲེང་གིས། །དབང་བསྐུར་རང་རྟགས་ཕྱག་རྒྱ་ཉེར་གཏད་པ། །བྱ་ཁྲིད་མིག་གཅིག་གནོད་སྦྱིན་བཤན་པ་ཆེར། །མཚོ་སྐྱེས་གསུང་གསང་འཕྲིན་ལས་དོན་བཅུ་ཞེས། །ཉང་རལ་གཏེར་བྱོན་གཙོ་བོར་གྱེར་དགོས་ཀྱང་། །རེས་འགའ་མྱུར་སྒྲུབ་ལམ་མཁོའི་གསོལ་མཆོད་འདི། །ལྷ་རྒྱལ་བཀྲ་ཤིས་དབྱངས་སྙན་མིང་དུ་ཆགས། །ཕུན་ཚོགས་འདོད་པ་འཇོ་བའི་དགའ་སྟོན་ལ། །སྲིད་གསུམ་དྲེགས་པའི་ཚོགས་རྣམས་འབོད་བྱེད་པ། །ཀུན་ཁྱབ་སྙན་བརྗིད་སྒྲ་དབྱངས་རོལ་མོའི་ཚོགས། །ལྷ་ཁྱོད་སྙན་གྱི་དབང་པོ་དགྱེས་ཕྱིར་འཁྲོལ། །འཇིག་རྟེན་སྤྱི་དང་ཁྱད་པར་གངས་ཅན་འདིར། །ལྐོག་གྱུར་སླད་མར་འབྱུང་བའི་སྣང་ཚུལ་རྣམས། །དྲི་མེད་སྤྱན་གྱི་མེ་ལོང་ངོས་ཤར་བ། །ཞིབ་རྒྱས་ལུང་བསྟན་རབ་གསལ་ཡི་གེར་འཁོད། །གངས་ཀྱི་ར་བས་ཡོངས་བསྐོར་བོད་ཡུལ་འདིར། །ནད་མུག་འཁྲུག་སོགས་ཉེས་ཚོགས་བཟློག་ཐབས་དང་། །སྒོས་ཀྱི་བླང་དོར་རིམ་གྲོའི་རིམ་པ་རྣམས། །འགག་མེད་རྡོ་རྗེའི་གླུ་དབྱངས་ཉེ་བར་(༡༥༠ན)
ཁོད། །སངས་རྒྱས་ཀུན་གྱི་མཁྱེན་བརྩེ་ནུས་པའི་འཕྲུལ། །རྒྱ་གར་པཎ་ཆེན་གཟུགས་ཤར་པདྨ་འབྱུང་། །གང་དེའི་དམ་ཚིག་གཉན་པོ་ཉེར་དགོངས་ལ། །ཞི་རྒྱས་དབང་དྲག་ལས་ཀུན་ཐོགས་མེད་སྒྲུབས། །དར་མཚོན་སྣ་ལྔའི་སྙན་ཤལ་གསེར་སྐྱེམས་ཟུང་། །མི་འཛད་འདོད་པ་འཇོ་བའི་གཏེར་བུམ་བཞིན། །ཏིང་འཛིན་སྔགས་རྒྱས་བརླབས་ཏེ་རབ་སྤེལ་ན། །དྲེགས་པའི་སྡེ་དཔོན་དགྱེས་པའི་གད་རྒྱངས་སྒྲོགས། །ཉང་སྟོད་འབྲོང་རྩེ་ལྷུན་གྲུབ་ཀྱི་གླིང་པ་བློ་བཟང་ནོར་བུས་སྙན་ངག་གི་ལམ་ནས་དྲངས་པའི་མཕྲིན་ལན་གཙང་ཕྱོགས་མུན་སེལ་གསར་པའི་ཟླ་ཚེས། དྷྲྀ བྷཱ པཱ རཱ ཏྨཾ བི ཏྟི གོ ས ཏྭ ཡོ གྱཾ མཱུ ཁ སྠཱ ནི ཏྱཾ ཡཽ བ ནཱི ཡཱ བི ཏཱ ནུ། །པ ཉྩ བི དྨཱ ཡཱུཾ པཱ ཧུ པཱ ཊཱ སུ རཱ ཎཱ མ གྲི ཡུ ཀྟཱི ཀཾ ཀ རྟི ཀོ ཀྟེ ཤྲུ བ ནྟུ། །གཟུང་འཛིན་ཕ་རོལ་རང་རིག་རྡོ་རྗེ་སེམས། །ངོ་འཕྲོད་གནས་ལུགས་ལང་ཚོ་ན་ཕྲ་ཡང་། །ལྔ་རིག་མདོངས་མཐའ་ལ་ཞོན་མཁས་མིང་ལྷའི། །རྩེར་སོན་ཀརྟི་ཀ་ཡི་གཏམ་འདི་ཉོན། །བློ་རྟུལ་འཁོར་ལོས་གཅོད་མིན་རྣམ་དཔྱོད་སྲོག །འཚོ་(༡༥༠བ)
བའི་སྙན་ཚིག་རིག་བྱེད་བདུད་རྩིའི་བཅུད། །སྤོབས་པ་ཆེས་དགེ་རོ་བརྒྱ་བདའ་བའི་གཡང་། །མགྲིན་པར་ཆགས་དེའི་ཉམས་འགྱུར་འཕྲིན་རྟེན་སོན། །སྨོན་འགྲོ་ལོ་ཙཱའི་ཉིན་བྱེད་ནུབ་པའི་ཤུལ། །རྨོངས་མུན་ཁྲོད་རྒྱུ་རིགས་མཐུན་འུག་པའི་སྲོལ། །དེང་དུས་སྒྲ་སྙན་གསར་དུ་ཉེར་ཚེས་ཟླ། །གཡས་རུའི་མཁའ་ལ་ཁྱོད་ཤར་ཡིད་ཀྱིས་གསོས། །སྦྱིན་ཚུལ་བཟོད་གོམས་ས་བོན་ལེགས་བཏབ་ལས། །དལ་དང་འབྱོར་བའི་སྙེ་མ་དར་དྲག་རྩེར། །གཏན་བདེའི་འབྲས་སྨིན་ལ་འཚེ་བ་མོ་ཡིས། །རེག་མིན་དགེ་ཚོགས་བརླན་གྱིས་སྐྱེད་བསྲིངས་སྤྲོ། །རྣམ་གཡེང་རི་དྭགས་ཀྱིས་འདྲིད་གཞན་ཕན་ཕོངས། །རྐྱེན་འདོད་འཁྲུལ་པའི་རྗེས་སུ་འབྲང་བ་ང་། །ལྷག་བསམ་རྣོན་པོའི་མདེའུས་དམན་ལམ་གྱི། །ལང་ཀའི་གཙུག་ཏོར་བཅད་དེ་འདི་ན་བདེ། །མི་ཤེས་འཐིབས་མུན་ཉལ་བའི་མ་རིག་གཉིད། །སྟུག་པོ་ལས་སློང་ཐོབ་པའི་སྐྱ་རེངས་མས། །གནས་ལྔའི་ཚ་ཟེར་དཀྱིལ་འཁོར་ཉེར་དྲངས་ཏེ། །ལེགས་བཤད་སྣང་བས་ཁྱོད་ཀྱི་སྙིང་དབུས་གསལ། །འཕགས་ཡུལ་ཁ་སྤུ་ཅན་གྱི་གཞུང་བརྒྱའི་བཅུད། །མྱངས་པའི་འཇིག་རྟེན་མིག་གཅིག་ཤོང་དཔང་དང་། །ཆོས་སྐྱོང་བཟང་པོའི་རྗེས་འབྲང་མཁས་རྣམས་ཀྱི། །རྣམ་ཐར་འཛིན་ལ་མོས་པ་ཉིན་སྐར་བཞིན། །གཙུག་ལག་སྨྲ་བའི་གླུ་དབྱངས་མི་ལྡན་ཡང་། །འདོད་ཡོན་གཞན་ལུས་ཁྲག་ལ་རྗེས་ཆགས་པ། །བསྟན་འཛིན་རྣོན་པོའི་མཆུ་ཅན་དུག་སྦྲང་ཁྱུ། །ཚུལ་དེས་རང་གཞན་བསླུ་ལ་མཆི་མ་དཀུ། །བརྒྱད་ཁྲི་བཞི་སྟོང་ཆོས་ཕུང་གངྒཱ་སྐྱེས། །བརྡ་སྤྲོད་མངོན་གསུམ་ཚད་མ་རིག་པ་ཡིས། །འཆད་རྩོད་རྩོམ་པའི་གཙོ་སྦྱངས་གསེར་འཁོར་ལོས། །ཐུབ་བསྟན་གླིང་བཞིར་སྒྱུར་བྱེད་རྒྱལ་(༡༥༡ན)
ཐབས་མཁན། །ངོ་མཚར་སྒྱུ་མའི་སྤྲུལ་བསྒྱུར་མཐའ་ཀླས་པར། །འཇིག་རྟེན་གྲགས་པའི་ཆ་ཚང་མི་འགོག་བཟོ། །འགྲོ་ལ་སྲོག་འཚོའི་མི་འཇིགས་སྦྱིན་གཏོང་སྒོ། །རབ་ཕྱེ་ཚེ་ཡི་རིག་པས་གཞན་རྗེས་འཛིན། །བློ་དང་བརྩོན་པ་ཉེ་དང་སྒྱུར་ཐབས་ཀྱིས། །ལྷུན་པོར་ནོར་རྒྱས་ཉེར་དཀྲིས་སྒྲ་དོན་མཚོར། །སྒྲིལ་བས་སྙན་དངགས་ས་སྲུངས་གོམ་འགྲོས་ཅན། །ཤེས་བྱའི་ནོར་འཛིན་མཛེས་པའི་རྒྱན་དུ་རྒྱུ། །ཐ་སྙད་ཟད་པ་མེད་པའི་ནགས་ཀླུང་ནས། །སྡེབ་སྦྱོར་མངོན་བརྗོད་ཟློས་གར་ས་མཆོག་དྲི། །ཤེས་རབ་བསེར་བུས་ལེགས་དྲངས་ལྡང་བའི་ངང་། །ཡིད་གདུང་སེལ་ལ་བདེ་བའི་ངལ་གསོའི་སྟེགས། །འོན་ཏེ་སྲིད་འབྱོར་རྨུགས་འཛིན་རྗེས་འགྲོ་དང་། །ཀུན་རྫོབ་ཚིག་ལན་མཁས་པའི་རྩེར་སོན་ཡང་། །གང་ཤར་སེམས་ཀྱི་འཁྲུལ་ངོར་རྟོགས་མིན་པར། །འཁོར་བའི་ཟུག་རྔུ་རྒྱ་མཚོའི་ཆུ་རིས་བཞིན། །དེ་ཕྱིར་ཀླུ་སྒྲུབ་གསུང་རབ་དྲི་མེད་རྒྱུན། །དྲང་ངེས་ཆོས་ཀུན་ཡོངས་གཟིགས་བཙོང་ཁ་པའི། །མདོ་རྒྱུད་རིན་ཅེན་སྤེལ་བའི་ཐེམ་སྐས་ཆེ། །ལེགས་ལྡན་ཐར་པའི་ཁང་བཟང་འཇུག་པའི་ལམ། །དཀར་ནག་གྲིབ་མ་ནམ་ཡང་གཏོང་མིན་པ། །སྐྱེ་འཆིའི་འཕྲེང་བ་མི་འཛད་འཁོར་བ་འདིར། །བསམ་བཞིན་བསམས་ན་འཚོ་བ་དོན་ལྡན་ཆོས། །ཉམས་བསྟར་དམ་བཅའི་རུས་པ་སྙིང་ལ་ཆུག །སྦྱངས་སྟོབས་མངོན་སྦྱོར་མི་དམན་གངས་རི་ལས། །བརྗེད་ངས་དྲི་མ་འཁྲུད་པ་གངྒཱའི་རྒྱུན། །ཚིག་སྦྱོར་མགྲིན་པ་གཟེངས་མཐོའི་ལམ་གསུམ་པར། །དལ་མེད་འབབ་ལ་སུ་ཞིག་ཀླན་ཀ་འཇུག །རིས་མེད་སྐྱེ་རྒུར་གཅིག་ཏུ་དཀར་བའི་བློ། །མངོན་སུམ་མཚོན་བྱེད་དུ་ཀཱུ་ལ་གོས་ཅན། །ཚིག་དོན་ཀ་ལ་པིངྐར་འཁུ་བའི་(༡༥༡བ)
གླུ། །ལེན་པའི་གར་མཁན་ཆུ་ལྷའི་ཕང་བར་སོང་། །གྲྭ་སྡིངས་པོ་ཆེ་ནས་ཕུག་པ་སྤྲུལ་སྐུ་ངག་དབང་སྙན་གྲགས་བཟང་པོས་ཤིང་ལུག་ལོ་གསར་གྱི་ཐོག་ཕུན་ཚོགས་རྟེན་འབྱུང་སྤེལ་བའི་འཕྲིན་ཡིག་དཎྜིའི་གཞུང་ལུགས་དང་མཐུན་པར་བྱུང་བའི་ལན་ཀུན་ཏུ་དགའ་བའི་ཟློས་གར། བཱ ཀི དེ བཱི སྭ ར སྟྱཽ པ པི ཥྞཱ སུ བྷཱ ཥི ཏྱ ཛ ལྤཱི ཏ པཱི ཎཱི ཤུ བྷ སྱ ནྡྲ ཙ། །ཀཱ ཥ བ སྟྲ ཎ ས ནྣ དྡྷ སཱ མི ཡ ཤ ཤྲི ཡ མ ཏྶོ ཌྷ གཾ ཙི ཧྣ ལ ཁཱ ཀྵ ར། ངག་(སྡེབ་སྦྱོར་མེ་ཏོག་འཕྲེང་ཅན།)ལ་དབྱངས་ཅན་ལྷ་མོ་ཉེར་ཞུགས་པས། །ལེགས་བཤད་རྒྱུད་མང་འཁྲོལ་ལ་དགེ་བའི་དབང་། །ངུར་སྨྲིག་གོས་ཀྱིས་ཀླུབས་པའི་སྙན་གྲགས་ཅན། །དཔལ་ལྡན་སྐལ་པ་བཟང་པོའི་འཕྲིན་ཡིག་རྟེན། །དགེ་ལེགས་ཆུ་ཡིས་ལྕི་ལྡན་གནམ་ལོའི་སྤྲིན། །བཀྲ་ཤིས་སྙན་བརྗིད་གླུ་དབྱངས་ལྡིར་བའི་འབྲུག །འཛུམ་ཞལ་ཕན་བདེའི་དགའ་སྟོན་བསུ་བའི་སྐྱེས། །ཀུན་དགའི་ཟློས་གར་བསྒྱུར་བའི་དོ་རར་སོན། །སྔོན་གོམས་བསོད་ནམས་ས་བོན་ཉེར་དུད་ལས་། །ཐོས་བསམ་སྒོམ་པའི་མུ་ཏིག་འཁྲི་ཤིང་(༡༥༢ན)
ཆར། །འབད་མེད་དལ་འབྱོར་རྟེན་གྱི་འཛིན་མ་ལས། །བབས་ཁྱོད་བདེ་བར་གནས་པའི་གཏམ་དེ་འཇེབས། །འདི་ན་ཆོས་ནོར་འདོད་དང་ཐར་པའི་སྒོ། །ཚོགས་གཉིས་ཚེ་རིང་གནམ་གྱི་ཤེ་མོང་གིས། །ཕྱེ་བའི་བདུད་རྩིས་རབ་མྱོས་ཞར་ལ་ཡང་། །བསྟན་འགྲོའི་བདེ་སྐྱིད་རྩ་ལག་གྲངས་མེད་སྒྲུབ། །འདོད་ཡོན་ཞེས་པའི་མུན་གཏིབས་ཁུང་བུ་རུ། །སེམས་གནས་གཏི་མུག་ལ་གཡུར་འཁྱིལ་བའི་སྦྲུལ། །མ་རིག་རྟོག་པར་རློམ་པའི་སྒོམ་ཆེན་རྣམས། །གདོལ་གཏམ་ཕུང་སྒྲས་ཤེས་ལྡན་རྣ་བ་རྩེར། །སྲིད་པའི་འཁོར་ལོ་རྟེན་འབྲེལ་བཅུ་གཉིས་ལ། །ངེས་པར་འབྱུང་མིན་བྲག་སྐྱིབས་ནགས་ཁྲོད་ལྗོངས། །གནས་ཙམ་གྲོལ་བར་འདོད་ན་འུག་པ་དང་། །བྱང་བོན་གྲུབ་པའི་གོ་འཕང་མཐོར་ཤེས་སམ། །ཐོས་དོན་བསམ་མཐར་བསྒོམ་པའི་བསེར་བུ་ཡིས། །ཆོས་ཀུན་སེམས་སུ་ངེས་པའི་ཙནྡྲ་དྲི། །བརྗོད་བྲལ་གཉུག་མའི་མ་ལ་ཡ་ཀླུང་ནས། །དྲངས་ཚེ་གཟུང་དང་འཛིན་པའི་ཚ་གདུང་བཅིལ། །གང་སྣང་སེམས་ཉིད་གཅིག་པུའི་ཆོ་འཕྲུལ་དུ། །གནས་སྐབས་རང་ངོ་ཤེས་པ་གདོད་མའི་གཤིས། །གསལ་སྟོང་ཟུང་དུ་འཇུག་པའི་རོལ་པ་ལས། །གུད་ན་ཕྱག་རྒྱའི་ཟབ་ལམ་འཚོལ་རྣམས་འཁྲུལ། །ཚུལ་དེ་ཤེས་པ་གངས་ཅན་སྨན་ལྗོངས་ན། །མིག་རྒྱང་རིང་པོས་བཙལ་ཀྱང་ཉིད་ཙམ་ལས། །མ་མཐོང་དགས་བརྒྱུད་གྲུབ་པའི་རིང་ལུགས་གང་། །དེང་དུས་རི་མོར་བྲིས་པའི་མར་མེ་བཞིན། །སྨྲ་བའི་ཁྱུ་མཆོག་ཁྱོད་བློའི་སྐྱེད་ཚལ་དུ། །རྣམ་དཔྱོད་ལུས་ཕྲའི་འགྲམ་ཆང་དངར་པོ་ཡིས། །ཕྱེ་བའི་སྙན་དངགས་མེ་ཏོག་བ་ཀཱུ་ལ། །སྲིད་འབྱོར་ཉི་ཟླའི་འོད་ཀྱིས་ག་ལ་འབྱེད། །དོན་ལྡན་བརྗོད་པའི་འདབ་སྟོང་གྲོལ་བའི་སྒོར། །དྷཱིཿཡིག་(༡༥༢བ)
དམར་སེར་ཞུན་མ་འཁྱིལ་བའི་སྩལ། །སྣང་སྲིད་སྒྲ་དོན་རྒྱན་གྱི་ཉམས་འགྱུར་དུ། །སྤེལ་མཁས་ཕུར་བུའི་སྤུན་ཟླར་ད་གདོད་ངེས། །ཀུན་མཐོང་མིག་སྨན་བདུད་རྩིའི་བཅུད་བསྟེན་ནས། །ཉི་ཟླའི་སྒྲོན་མེ་ཐོགས་ཏེ་སྲིད་པ་གསུམ། །མྱུལ་ཡང་བཅུ་ཕྲག་རིག་པའི་གནས་གཞལ་བར། །གང་གི་བློ་གྲོས་དོ་ཟླ་ངས་མ་རྙེད། །འཆད་རྩོད་རྩོམ་ལ་འཕགས་ཡུལ་མཁས་རྣམས་དང་། །ཉིད་ཀྱི་རིག་པའི་མཆོག་དམན་མེས་བོས་ཀྱང་། །མ་ཤེས་ཁ་སྤུས་དབུས་འགྱུར་པཎ་ཆེན་ཚོགས། ཁྱད་པར་དབྱེ་བའི་སྒམ་བུ་ཕྱ་དེ་སུ། །བག་ཡོད་ཀྱིས་བཙུན་ཤེེས་བྱར་འབྱམས་ཀླས་མཁས། །བདག་གཞན་མཉམ་བརྗེའི་བཟང་པོའི་སེམས་ལྡན་ཀྱང་། །ཐོས་ཆུང་སྒོམ་པར་ཁས་འཆེའི་འདམ་ཁྲོད་དུ། །པད་དཀར་བཞིན་དུ་གཅིག་པུར་གནས་དེ་དལ། །འོན་ཏེ་མ་སྙིགས་རྒྱལ་བསྟན་འཕྲོག་བྱེད་རྐང་། །དག་བྱེད་ལྷག་བསམ་ཡན་ལག་བརྒྱད་ལྡན་ཆབ། །སྒྲེང་མཁས་སྐལ་ལྡན་ཤིང་རྟའི་མཆེད་ཟླ་ཁྱོད། །ངང་ཚུལ་འདིས་འཚོ་དལ་བ་དོན་དང་ལྡན། །བདེ་སྐྱིད་དཔལ་གྱི་ཉི་མ་བསོད་ནམས་མཁར། །འཕོ་མེད་རྟག་ཏུ་འཆར་བ་བདེན་པའི་ཚིག །ཨོཾ་ཡིག་ཐོག་མར་བཀོད་པ་སཱ་སྟིའི་གླུར། །ལེན་དེ་བསིལ་ལྡན་ཡུལ་གྱི་ཚངས་པའི་བུ། །སྙན་འགྱུར་ཀ་ལ་པིངྐ་ལྟར་འཇེབས་ཚིག །དོན་བཟང་དཔྱོད་ལྡན་སྙིང་ལ་རོ་བརྒྱའི་བཅུད། །སྒྲོན་མེའི་བསྐལ་བར་ཚེས་པའི་གནམ་ལོའི་མཐར། །དེ་སྲིད་གངྒཱའི་རྒྱུན་རྗེས་སྙེགས་ཤིག་བུ། །སྔོན་རབས་རང་རིས་ཕལ་གྱིས་མ་ཐོབ་པའི། །མཁས་པའི་གོས་སར་ཁྱོད་སོན་སྙན་པའི་དར། །སྲིད་པའི་རྩེ་མོའི་བར་དུ་རིང་བརྐྱངས་པ། །རྗེས་དཔག་ཚད་མས་གཞལ་བ་འདིས་ཀྱང་ངོ་། །
རབ་བྱུང་བཅུ་གཅིག་པའི་ཤིང་འབྲུག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་འབྲུག་ལོར་བྲིས་པའི་ཆབ་ཤོག་འཕྲིན་ཡིག་ཁག །སྔོན་དུ་ལུང་བསྟན་གྱི་བསྐུལ་མ་(༡༥༣ན)
བྱས་པ་བཞིན་ཤིང་འབྲུག་ཧོར་ཟླ་དང་པོའི་ནང་དུ་ཚངས་པ་དུང་ཐོད་ཅན་གྱིས་ལྐོག་གྱུར་དངོས་སུ་སྟོན་པའི་ཤོག་ཁྲ་དང་བཅས་རྡོ་རྗེའི་གསུང་འཕྲིན་ལན་གླིང་བཞི་སྐད་ཅིག་མྱུལ་བའི་གཏམ་སྙན། དཀར་པོ་ཚངས་པའི་རིགས་ཀྱི་ལྷ། །སྐབས་འགར་ལི་བྱིན་ཧ་རའི་མཚན། །རྣམ་སྤྲུལ་ཅིར་ཡང་སྟོན་མཛད་པའི། །རྡོ་རྗེའི་གསུང་འཕྲིན་ལྷ་དར་སོན། ཁམས་གསུམ་སྐྱེ་འགྲོའི་ལུས་ངག་ཡིད། །སྤྱོད་ཚུལ་ལྐོག་གྱུར་གནས་ལུགས་ཀུན། །དྲི་མེད་རྣམ་དག་སྤྱན་རས་ཀྱིས། །གསལ་ལེར་གཟིགས་པའི་མངོན་ཤེས་མཁན། །བོད་དང་བོད་ཆེན་རྒྱལ་ཁམས་ཀྱིས། །དབུས་དང་ཕྱོགས་མཚམས་འབྱུང་འགྱུར་བའི། །བླང་དང་དོར་བྱའི་ལུང་བསྟན་གྱི། །ཚིག་འཕྲེང་རི་མོར་འཁོད་འདི་སྤྲོ། །ལྷུན་པོ་གླིང་བཞིར་བཅས་པ་རྣམས། །སྐད་ཅིག་མྱུལ་བའི་རྫུ་འཕྲུལ་གྱིས། །བསྟན་འགྲོའི་ཕན་བདེར་རབ་སྤེལ་ཆེད། །གཡེལ་མེད་བྱ་ར་མཛད་དེ་ལེགས། །ལྷ་གཅིག་སྲོང་བཙན་སྐྱེས་ལྷ་ཆེ། །དེའི་བསྟན་ཡུན་རིང་གནས་བྱེད་པར། །མཐུ་སྟོབས་རྫུ་འཕྲུལ་དཔུང་སྐྱེད་ཅེས། །ཞལ་གྱིས་འཆེས་ལ་བདག་ཡི་རང་། །འཇའ་ཚོན་ལྟ་བུར་རྣམ་བཀྲ་བའི། །སྙན་ཤལ་གསེར་སྐྱེམས་ཞོ་གསུམ་གྲང་། །རྒྱ་ཇ་ལོ་མའི་བམ་པོ་ཅན། །སྔགས་རྒྱས་ནམ་མཁའ་མཛོད་དུ་སྤེལ། །ཐུབ་བསྟན་སྤྱི་དང་བཙོང་ཁ་པའི། །ཆོས་སྲིད་ཉི་ཟླ་ཟུང་འབྲེལ་རྒྱས། །འཇིག་རྟེན་ཁམས་ཀུན་བདེ་སྐྱིད་ལྡན། །བདག་གི་བསམས་དོན་ལྷུན་གྲུབ་མཛོད། །ཆོས་ཀྱི་རྒྱལ་པོ་དཔལ་ལྡན་གྲགས་པའི་བསྟི་གནས་འོལ་ཁ་རིན་ཅེན་སྒང་ནས་འཕྱོང་རྒྱས་རི་བོ་བདེ་ཆེན་གྱི་མཁན་ཟུར་པ་གྲགས་པ་དོན་ལྡན་གྱི་དགེ་བའི་བཤེས་གཉེན་བློ་བཟང་མཁས་བཙུན་གྱིས་རིང་པོར་འཚོ་བའི་རྟེན་འབྱུང་གི་དངོས་པོ་དང་བཅས་འཕྲིན་ཡིག་བྱུང་བའི་ལན་ཤེས་བྱའི་མཐའ་འཇལ་རིང(༡༥༣བ)
པོའི་མིག་དཀྱུས། ཤྲཱུ ཏ པི ཪྻ ཨུ ཥྞ པཱ ཀ རཱ གརྦྷཿ ས ཀཱ ལ ཅ ཛྙཱ བྷཱ བ བ དྷཱཿ། །བཱ ཀྤཱ ཏཱི བྷ ནཽ ཙ ཙཱ ཏྭ མཱུ ཁཾ མཻ ཏྲ དཱ ཏ དྷཱི༔ ལུ ལ ཁ ཡོ གྱཾ། །ཐོས་(སྡེབ་སྦྱོར་རྨ་བྱའི་འགྲོས།)བརྩོན་དྲོད་ཀྱིས་སྨིན་པའི་གསེར་མངལ་ལས། །མཐའ་ཀླས་ཤེས་བྱར་སྲིད་པའི་རིག་བྱེད་ཀུན། །སྨྲ་བའི་སྤོབས་པ་ཆེས་མཐོའི་གདོང་བཞི་པ། །བཤེས་གཉེན་མེས་པོའི་བློ་ཅན་འཕྲིན་རྟེན་སོན། །སྦྱངས་སྟོབས་ཡོན་ཏན་ཕུང་པོར་བརྩེགས་པ་དང་། །ལྷན་ཅིག་བགྲང་བྱའི་ཁུར་ལྕིས་ན་སྨིན་ཀྱང་། །ཆ་མཉམ་འབྱུང་ལྔའི་ན་ཆུར་དགེ་བའི་གླུ། །ལྷག་བསམ་མགྲིན་པར་ལེན་པའི་གཏམ་དེ་སྙན། །ལུས་བརྟས་མིག་མི་འཛུམ་ལ་ཕྲག་དོག་པ། །འཁོར་བའི་ལས་རྐྱེན་ཟུག་རྔུ་ལྷ་མིན་དཔུང་། །མཆོག་གསུམ་དབང་ཕྱུག་མདའ་ཡིས་མཐར་བྱས་ཏེ། །དབུས་འགྱུར་འཆི་མེད་འདུན་སར་དངོས་ཅག་བདེ། །འདི་ན་དམ་པར་ཞལ་འཆེའི་རྫུན་ཟོབ་ཀྱིས། །གཞན་སླུའི་ཁས་ལེན་སྐལ་པར་ཐོབ་མིན་ཀྱང་། །དོན་ལྡན་རྟེན་བཟང་ཚེ་མཐའ་ཡས་པའི་མགོན། །ཇི་བཞིན་གནས་པར་མི་སྨོན་ཤེས་ལྡན་སུ། །དེང་དུས་གངས་ཅན་དཔལ་(༡༥༤ན)
མོའི་བཞིན་རས་ངོས། །མདོ་རྒྱུད་ཐ་སྙད་རྣམ་བཀྲ་མིག་གི་དཀྱུས། །རིང་པོས་ལྔ་རིག་ཕ་མཐའ་གཞལ་བྱེད་པ། །བཤེས་གཉེན་ཁྱོད་ལས་གཞན་དུ་ངས་མ་རྙེད། །སྡིག་པའི་དྲི་བྲལ་གང་བློ་འཕྲོག་བྱེད་རྐང་། །བག་ཡོས་མཐོ་རིས་ཆུ་གོས་རྩེར་བཀོད་པས། །བླུན་སྒོམ་ཕྱག་རྒྱའི་སྦྱིན་སྐྱེས་དོགས་བྲལ་ཞིང་། །རང་བསྟན་སུམ་རྩེན་རྒྱན་དུ་ལྷ་རྣམས་དགའ། །ཞྭ་སེར་མནབས་པའི་རིང་ལུགས་ཆུ་འཛིན་དབུས། །མཁས་ཉིད་ལེགས་བཤད་དབྱར་རྔའི་ད་དིར་ལ། །སྐལ་བཟང་རྨ་བྱ་བྲོད་པས་གར་བསྒྱུར་ཀྱང་། །བློ་རྟུལ་ངུར་བའི་ཚོགས་ལ་དགའ་བ་ཅི། །རིགས་དང་སྐྱེ་བརྒྱུད་བཏགས་མིང་ཆུ་ཤིང་ལ། །བསྟན་འཛིན་སྙིང་པོར་རེ་བའི་རྨོངས་དད་ཀྱིས། །ཐོས་བསམ་འབྲས་སྨིན་དཔྱོད་ལྡན་ཨ་མྲའི་ཚལ། །འདོར་བའི་བོད་རྒན་རང་མཚང་དགོད་རེ་བྲོ། །ཐེག་པའི་གོལ་ར་གྲངས་ངེས་བཅུ་གཉིས་ཁྱིམ། །མ་འདྲེས་སྒང་གཤོང་རྒྱུ་བའི་ཚ་ཟེར་ཅན། །གསུང་རབ་གླིང་བཞི་སྣང་ཁྱོད་རིང་འཚོ་བ། །ངེས་པར་དོན་དང་ལྡན་ཕྱིར་དེ་དོན་སྒྲུབས། །འཕགས་ཡུལ་ཁ་སྤུ་ཅན་རྣམས་ཟབ་མོའི་དོན། །དཔྱད་ནས་བསྒོམས་པས་གྲུབ་པའི་སར་གཤེགས་ཀྱི། །ད་དུང་ཐོས་བསམ་ཚུལ་ལ་ཡིད་གཞུངས་ཚེ། །འཇའ་ལུས་ས་ལ་མངོན་སུམ་རྒྱུ་ལྟར་རྙེད། །རྟག་ཏུ་གང་གི་གྲགས་སྙན་འགྲོ་འོང་དང་། །ཆབས་ཅིག་མོལ་མཆིད་སིནྡྷུའི་སྤུན་ཟླ་ཡི། །ཚུལ་དེར་གཅིག་ཏུ་དཀར་བའི་ཀུན་རྟོག་ཐགས། །སྣ་ཚོགས་བཀོད་པའི་རི་མོ་གསལ་འདིའོ། །འཇིག་རྟེན་གྱི་མིག་གཅིག་པུ་སྐད་གཉིས་སྨྲ་བའི་ལོ་ཙཱ་བ་ངམ་རིང་མཁན་ཆེན་ཚེ་བརྟན་རྒྱལ་མཚན་གྱིས་རིང་པོར་འཚོ་བའི་རྟེན་འབྱུང་གི་བདོག་པ་དང་བཅས་སྙན་ཚིག་གི་ལམ་ནས་དྲངས་པའི་འཕྲིན་ཡིག་བྱུང་བའི་ལན་ངང་པའི་བུ་མོའི་མགྲིན་རྔ། །(༡༥༤བ)
དྷ རྨོ པ དྷེ ར ཝ ཏ རོ ད དྷི ནཽ མ ཏི དྭི པྱཱ ར ཏྣ བི ཪྻ པྲྀ ཥ ད ཤྭ བ ཧུ ཤྲུ ར ཤྩ། སཽ བྷཱ ཥ ཎ པྲ ག ཏ ཏ ཙྩ མ ཨུ པཱ དྷྱཱ ཡ པྲེ ཤི ཏཱ ཀ ར མ ཎེ རྣ ཡ ནཻ ཀ ལེ ཀཻ །ཆོས་(སྡེབ་སྦྱོར་དཔྱིད་ཀྱི་ཐིག་ལེ།)ཕུང་རྒྱ་མཚོར་འཇུག་པའི་བློ་གྲོས་རྫིངས། །བརྩོན་འགྲུས་རླུང་གིས་མང་ཐོས་རིན་ཅེན་གླིང་། །རབ་བགྲོད་ལེགས་བཤད་ནོར་བུའི་འབྱུང་ཁུང་ཅན། །མཁན་ཆེན་འཇིག་རྟེན་མིག་གཅིག་དེར་སྤྲིངས་པ། །འཇམ་དཔལ་རལ་གྲིས་རྒྱ་བྲལ་མགྲིན་པའི་མདར་། །རྣམ་གྲོལ་ལོངས་སྤྱོད་འཁོར་ལོའི་རྫིང་བུ་རུ། །དབྱངས་ཅན་ངང་པའི་བུ་མོ་འཇོ་སྒེག་ཅན། །ཕང་འགྲོའི་སྒྲ་དབྱངས་འཁྲོལ་བའི་འཕྲིན་རྟེན་སོན། །འཁོར་བའི་ནགས་ཁྲོད་བསོད་ནམས་ཤལླི་ཀས། །བསྐྱེད་བསྲིངས་མངོན་མཐོའི་རྟེན་བཟང་ས་སྲུངས་བུ། །མཁས་བཙུན་བཟང་པོར་གྲུབ་པའི་གོམ་སྟབས་ཀྱིས། །ཚུལ་དེས་རིང་པོར་བདེར་འཚོ་དོན་དང་ལྡན། །འདི་ན་ཤོང་དཔང་བསྟན་པའི་ཆུ་གཏེར་ཆེ། །མ་སྨད་སྦྱངས་སྟོབས་ཁྱབ་འཇུག་སྒྱུ་ཐབས་ཀྱིས། །ལྔ་རིག་ཟིལ་དངར་བློ་གྲོས་ཟ་མ་ཏོག །འཁྱིལ་བའི་(༡༥༥ན)
རྣམ་དཔྱོད་གཞན་ལ་མི་སྨོན་ཙམ། །ངེས་འབྱུང་བྲང་སྟེང་སྲུབས་ལས་སྐྱེས་པའི་མེ། །འདོད་སྲེད་རྒྱ་མཚོར་ཆགས་བྲལ་ཕ་མཐའ་ན། །བག་མེད་ཚང་ཚིང་བསྲེག་པའི་རྒོད་མ་ཁ། །ཐར་པའི་མཁའ་ལ་སྙེག་འབད་ཉིད་དུ་འཁུམ། །སྣ་ཚོགས་འཕྲོ་འདུའི་སེམས་ཀྱི་རི་གཟར་ཆུ། །ཤེས་བཞིན་རིགས་ཀྱིས་གྱེན་བཟློག་གནས་ཆའི་མཚོར། །རྣམ་རྟོག་རླབས་བྲལ་ཏིང་འཛིན་འབྱམས་ཀླས་ཁྱོད། །དཔེ་ཟླ་གངས་ཅན་གྲུབ་རིས་རྣམས་ཀྱིས་མིན། །ཆོས་དང་གང་ཟག་བདག་ལྟ་རི་བོའི་རྐང་། །ཤེས་རབ་རྡོ་རྗེ་རྩེ་བརྒྱས་རབ་བཅོམ་སྟེ། །གནས་ལུགས་མཐོང་བའི་བསླབ་གསུམ་དབང་པོ་ཉིད། །ཞྭ་ཟེར་མནབས་པའི་བསྟན་ལ་མཛེས་པའི་རྒྱན། །རྒྱུད་ལྔའི་ལམ་འཁྱམས་སྒྲིབ་པའི་ལུས་ཅན་བདག །ཚེ་བྱིན་བརླབས་ཞེས་རྫུན་འདྲིད་གཞན་ཁྲེལ་རྒྱུ། །མཆོག་གསུམ་ཐུགས་རྗེའི་ཟླ་ཚེས་སྐྱབས་འགྲོའི་ཞག །ཐབས་ཀྱིས་བགྲོད་པས་འཆི་མེད་ཆ་ཤས་འགེངས། །དྲིན་ལས་རང་བདེས་གུས་པར་དད་པའི་སྒྲོ །བཏགས་མིང་རྒྱུ་མཚན་ཤེས་ནས་དགའ་ལྡན་བསྟན། །སྙིང་དབུས་སྐྱོང་ཁྱོད་ཡུན་འཚོའི་ཐབས་བསྟེན་ནས། །ད་དུང་འཁོར་ལོ་གསུམ་གྱི་བྱ་བ་སྒྲུབས། །བོད་འབངས་ཉེས་བརྒྱའི་དུག་གཞིལ་བདེ་སྐྱིད་ཆབ། །ཡན་ལག་བརྒྱད་དུ་སྒྱུར་བྱིད་རྀ་ཥི་ང་། །མོལ་མཆིད་གངྒཱ་རྣ་བར་འཛིན་པ་ལ། །བགྲང་བྱའི་ཁུར་གྱིས་མི་ལྕི་རྟག་ཏུ་བདེ། །གཞུང་ལུགས་བྱེ་བས་སྤོབས་མཐོའི་ལུས་བརྟས་ཤིང་། །རིས་མེད་འགྲོ་ལ་རྗེས་ཆགས་མཆུ་སྒྲོས་དམར། །ལྷག་བསམ་མདངས་ལྡན་པཉྩ་ལི་ཀའི་གོས། །གྱོན་ཏེ་གངས་ཅན་ཕུར་བུའི་འདུན་སར་སོང་། །ཡར་ཀླུང་བྱིང་པ་བདེ་ལེགས་ཤར་འོལ་ཁ་སྟག་རྩེའི་རྫོང་སྡོད་སྐབས་ཀྱི་འཕྲིན་ལན་དགེ་བསྟན་སྙིང་དབུས་འཆང་བའི་བདེན་ (༡༥༥བ)
གཏམ། ཨཱ ཛི རཱ ཡཱ ནུ བྷ ཝ ཛྙ ཙཱ ནི རྟ རླུ པཱ མ མེ ཏྲ ཀུ ལེ བྷ རྨ ཡཱ ནཱ ཊ ཀ །ཨཱ ས མཱ ཛ སྱ དྷྲྀ གྦ ཛྲ མཽ ཁཱི པ ལ ཎྚཿ སུ པྲ ཥྚ ཡ ཤྲ ལ སཱ ཡ ཙྪ ཙ། །རྒྱལ་(སྡེབ་སྦྱོར་མེ་ཏོག་འཕྲེང་ཅན།)ཀུན་མཁྱེན་བརྩེ་ནུས་པའི་རང་གཟུགས་རྣམས། །རིགས་གསུམ་སྒྱུ་འཕྲུལ་དྲ་བའི་ཟློས་གར་ཅན། །ཀུན་འདུས་ཁ་སྦྱོར་བདུན་ལྡན་བཙོང་ཁ་པ། །དགེ་ལེགས་ཆར་གྱིས་ཁྱོད་ལ་ཤིས་པ་སྩོལ། །ཞྭ་སེར་བསྟན་ལ་གཅམ་བུ་ཙམ་མིན་པར། །སྙིང་གི་འདབ་སྟོང་རྣམ་པར་བཞད་པའི་དབུས། །མ་སྨད་དང་བའི་ཟེའུ་བྲུ་གཡུར་ཟ་བ། །བདེ་ལེགས་མིང་ཅན་བྱིང་བའི་ཡིད་རྟེན་འཕྲོད། །སྐྱེ་མང་བསོད་ནམས་བྱས་པའི་དྲོད་གཤེར་ལས། །རྩ་བ་སྦོམ་པོར་སྐྱེད་བསྲིངས་མཐོ་རིས་རྟེན། །ལང་ཚོའི་ཡལ་འདབ་རྒྱས་པ་ཨ་མྲའི་ལྗོན། །དགེ་ཚོགས་འབྲས་བུའི་དུད་པའི་གཏམ་དེ་སྤྲོ། །ཆོས་བརྒྱད་ཐིག་ལེ་མཆོག་མར་ཆགས་པའི་གདོང་། །གཞན་ཕན་རིག་བྱེད་བཞི་ཡི་འབྱུང་གནས་ཞེས། །འདོད་ཡོན་གཉིས་ལ་རྟག་གཡུར་ཚངས་པའི་སྤུན། །འདི་ན་བླ་ཆེན་ཚུལ་གྱིས་རང་(༡༥༦ན)
མགོ་བསྐོར། །ལངྐའི་གྲོང་ཁྱེར་ཁ་བའི་སྨན་ལྗོངས་སུ། །འཕོས་འདྲ་མཁའ་ལ་སྙེག་པ་བཙན་རྫོང་དེ། །གནམ་བསྐོས་རྒྱལ་པོའི་ལུང་བཞིན་མི་ཡི་རྗེར། །སྙེམ་པའི་ཁུར་ཆེན་རིང་པོར་བསྟན་པར་རིགས། །སྲིད་པའི་ཚང་ཚིང་སྟུག་པོར་ལས་ཤུགས་ཀྱིས། །ཚེར་རྣོན་ཡིད་ལ་ཟུག་རྔུའི་རི་གཟར་ངོས། །ལྡོག་པའི་ཆུ་བོ་སྲིད་དེ་སྟེང་གནོན་རྡོ། །མང་ཞིག་རླུང་གིས་གཡེང་བ་བྱ་སྒྲོའི་སྐྱོན། །འབྱུང་འཁྲུགས་ཚ་གྲང་ནད་ཀྱི་གཉེན་པོའི་སྨན། །རང་བྱུང་ཁྲུས་ཀྱི་རྫིང་བུ་གྲངས་མེད་པ། །སྤྲུལ་ཞིང་ལྟ་ན་སྡུག་མཚུངས་འོལ་ཁ་དེར། །ཡུན་དུ་ལུས་ཟུངས་བདེ་ཐབས་ཞར་ལ་འགྲུབ། །ཀུན་མཁྱེན་ཆོས་ཀྱི་རྒྱལ་པོ་བཙོང་ཁ་པས། །རྒྱལ་བ་རྒྱ་མཚོའི་ཞལ་གཟིགས་འགྲོ་བ་མཛད། །གསང་གསུམ་འཁོར་ལོས་བྱིན་རླབས་ངོ་མཚར་གནས། །འོག་མིན་ཞིང་གི་དཔེ་ཟླ་གྲངས་ལས་འདས། །བར་འདིར་ས་ཡིས་རིང་པོར་བསྐལ་མིན་པས། །རེ་ཞིག་ཕྱོགས་དེར་སྒོ་གསུམ་ངལ་གསོས་ཏེ། །ཤོག་བུའི་ལམ་དུ་ཀ་འཕྲེང་གངྒཱའི་རྒྱུན། །དོན་རླབས་ཡོལ་བ་མེད་ལ་ཀླན་ཀ་སུ། །ཡིད་སྲུབས་སྡེ་བཅས་མིག་གིས་བཟོད་མིན་པས། །གཞོམ་མེད་ལྔ་ལྡན་ཡེ་ཤེས་རྡོ་རྗེའི་ཁམས། །ཏིང་འཛིན་དུས་མེས་བཞུ་བླུག་གུར་ཁྱིམ་དབུས། །རང་སེམས་དག་པའི་དབྱིངས་སུ་མོས་ཁྱོད་སྦ། །རྣམ་འདྲེན་ཐུབ་པའི་གདུང་གི་ཤ་རཱི་རམ། །མཐོང་བས་དོན་ལྡན་ཡིད་ཀྱི་གདུང་སེལ་ཟླ། །སྔགས་མདུང་རླུང་གི་ཤིང་རྟས་ཉེར་དྲངས་ཏེ། །ཕན་བདེའི་ག་བུར་གཟིགས་མ་འཕྲོ་འདི་མཚར། །མདོ་སྡུད་པ། བྱམས་ཆོས། སྡེ་ཚན་བདུན་པ། གཅེས་བསྡུས་ཀྱི་གླེགས་བམ་རྣམས་བཤུས་ཟིན་པའི་མ་དཔེ་མང་ཐོས་རུ་ཐོག་དབང་པོ་ལ་ཕྱིར་བསྐུར་སྐབས་བསྲིངས་པའི་འཕྲིན་ཡིག་དྲང་སྲོང་ཀུན་(༡༥༦བ)
ཏུ་དགའ་བའི་གར། རོ གཱཿ ཤུ དྡྷཿ ཤུ དྡྷ སྱ པྲཱ ཎ ཛཱི ཝཽ ཥ དྷེ རྡཱ པཱུ ཛོ པཱ དྷྱཱ ཡཻ དྲྀ ཥྚ ཀ ཏྣཱ ཧི མཱི པཱུཿ ཨུ ཏྤ ནྣཻ ཤྩི ཏྟཱ ཏཱི རྨ ཎ སྱ རྵི བྷཱ ཏཱ པྲ ཥི ཏྱ སྟ སྨི ཤྩཱ ར ཀུ ལྱཻཿ ཀ དྷཱ ར། གངས་(སྡེབ་སྦྱོར་སྣ་ཚོགས་ལྷ་མོ།)ཅན་ལྟ་ན་སྡུག་པའི་གྲོང་ཁྱེར་དུ། །ནད་སེལ་སྨན་གྱིས་སྲོག་འཚོའི་མཆོད་སྦྱིན་མཁན། །སྤྲུལ་པའི་དྲང་སྲོང་ཡིད་ལས་སྐྱེས་ཀྱི་སྤུན། །ཚངས་རིགས་འཛིན་པའི་དཔྱོད་ལྡན་དེ་ལ་སྤྲིངས། །ཆོས་འབར་བསོད་ནམས་འབྲས་དུད་འདུ་ཕུང་ཉི། །ཟུག་རྔུའི་རྔུལ་བྲལ་སྟོན་གྱི་མཁར་ཤར་ནས། །ལུགས་ཟུང་སྣང་བ་འབུམ་སྡེའི་ཚ་ཟེར་ཚོགས། །ལན་བརྒྱར་སྤྲོ་བའི་ཚུལ་ལས་གཞན་དུ་ཅི། །འདི་ན་མངོན་པར་རྟོགས་པའི་ཟླ་ཚེས་པ། །ལང་ཚོའི་ན་ཚོད་མ་རྫོགས་ཆེས་ཕྲ་ཡང་། །གསུང་རབ་མང་པོ་ཐོས་པའི་འོད་དཀར་གཟི། །ཕྱག་ཆེན་རྒན་པོའི་སྐར་ཚོགས་ཀྱིས་བཟོད་མིན། །བཤད་སྒྲུབ་ཤིང་རྟ་བཅུ་པའི་དཔལ་འབྱོར་ལ། །ཕྲག་དོག་དྭགས་བརྒྱུད་ལངྐའི་གྲོང་གནས་ཏེ། །ཟོག་རྫུན་མགྲིན་བཅུ་བརྩེགས་པའི་དམ་བཅའི་སྙིང་། །ལྐོག་(༡༥༧ན)
མར་འབྱིན་པའི་ས་ལོ་དགའ་གྱེད་ལྷ། །དྲི་བཅས་བོད་ཡུལ་བསྟན་པའི་ཉལ་འགྲོ་ཀུན། །ལེགས་དྲུངས་ཡན་ལག་བརྒྱད་ལྡན་ཆུ་བོ་རུ། །བསྒྱུར་ལ་དཔྱད་བཟོད་བརྒལ་བརྟག་ཨཱ་ག་སྟྱ། །བློ་བཟང་གྲགས་སྙན་བསྟན་པའི་མཁའ་ལ་ཤར། །ཚུལ་འཆལ་ངུར་སྨྲིག་ཀླུབས་པ་འཕྱོན་མའི་གར། །ཐོས་ཆུང་གྲུབ་པའི་ས་བརྙེས་མོ་གཤམ་བུ། །མུ་ལྟོའི་ཆས་ཀྱིས་འདྲིད་ནས་ཐུབ་པའི་བསྟན། །སྙིགས་བྱེད་དཀའ་ཐུབ་བསྟེན་རྣམས་ལྷག་སྤྱོད་བཞིན། །འོན་ཏེ་མཐའ་འཁོབ་སྐྱེས་ཀྱང་དབང་རྣོན་མཐུས། །ལོག་པའི་སློབ་དཔོན་ངན་པས་མ་བསླད་པར། །ཚད་ལྡན་བསྟན་དང་མཇལ་ཁྱོད་ཆོས་པའི་ཚུལ། །འཛིན་རློམ་དལ་གྱི་དོ་ཟླ་ག་ལ་ཡིན། །སྲིད་པའི་འཁོར་ལོ་རྟེན་འབྲེལ་བཅུ་གཉིས་ལས། །རྒྱལ་ཐབས་དབང་བཞིའི་ས་བོན་རབ་སྨིན་པ། །རྣམ་གྲོལ་འཁྲི་ཤིང་རྩེར་ཆགས་སྙེ་མའི་བཅུད། །སྤྱོད་གང་བློ་གྲོས་སྐལ་པ་གཅིག་ཏུ་བཟང་། །དོན་ལ་ལྟ་ཞོག་ཚིག་ཙམ་ལ་རྡུགས་པ། །མི་ཡི་ཤ་ཚུགས་ཅན་གྱིས་གང་མཐོང་ཚེ། །ཤེས་རབ་རྣོན་པོའི་རལ་གྲིས་རྨོངས་པའི་རྒྱ། །བཅད་ཁྱོད་ཡུན་འཚོ་དོན་ལྡན་ཐབས་འབད་རིགས། །ཆུ་ཀླུང་ལུས་ཕྲ་སྐད་སྙན་གླུར་ལེན་ཞིང་། །གླིང་ལྡན་གྲོགས་སུ་དལ་མེད་རྒྱུ་བྱེད་ན། །གཉེན་གཤིན་རི་མོར་སྤེལ་ཐོགས་བྱ་མ་རྟ། །བརྗེད་ངས་ཟམ་པར་འགྲོ་འོང་རྟག་ཏུ་བསྟེན། །སྐད་གཉིས་ཤན་སྦྱར་གསོ་རིག་ཀཱ་ལ་ཤ། །རབ་དཀར་དུ་ཀཱུ་ལ་ཡི་མགུལ་ཆིངས་ཅན། །མཛེས་རྒྱན་དཔག་བསམ་མེ་ཏོག་འཛུམ་པའི་མདངས། །ཐུན་མཚམས་གཞོན་ནུས་འཁྱུད་པའི་རྩེ་དགའ་དགོད། །ཁྲོ་མོ་ཞེས་པ་ཤིང་ཕོ་འབྲུག་གི་ལོ་གོང་ནས་མཆོད་རྟེན་རབ་འབྱམས་པ་དང་ཆོས་(༡༥༧བ)
འཕེལ་དགེ་སློང་གིས་གཙོས་པའི་གསེར་ཡིག་པ་མངགས་ཏེ་བཟང་ཀོས་རིན་པོ་ཆེའི་ཁྱད་ནོར་དང་བཅས་བཀའ་ཤོག་ཕེབས་པའི་ལན་འཕུལ་བར། དཀའ་བཅུ་བློ་བཟང་བཀྲ་ཤིས་དང་ཚེ་ཆེན་དར་རྒྱས་གཉིས་བཏང་བའི་དུས་ཕུལ་བ་ཚངས་རིགས་དགྱེས་ཞལ་འཆར་བའི་མེ་ལོང་། ཨཱ རི སཱ ཧ ཀྲ ཀ ཉྩ ནྱ ཙ ཀྲཻ མ ཧཱ གོ བ ཤོ བ རྟི ནཱ བུ ནྱ བྷཱ བོཥྞི ཥེ། ཨ བྷྱ ཙོ ངྐེ ཛ ཤ ཛ མྦུ དྭཱི པཱ ཡཱ སྶུ བྷཱ གཱ བུ པཱ ལ བྡྷ དེ བ སྱ པ དྨུ ལ ཀེ །རྩིབས་(སྡེབ་སྦྱོར་མེ་ཏོག་འཕྲེང་ཅན།)སྟོང་གསེར་གྱི་འཁོར་ལོས་ས་ཆེན་པོར། །མངའ་སྒྱུར་བསོད་ནམས་སྲིད་པའི་གཙུག་ཏོར་དུ། །མངོན་པར་འཕགས་པའི་དབང་ཕྱུག་འཛམ་གླིང་མའི། །བཟང་པོའི་སྐལ་བར་ཉེར་ཐོབ་ལྷའི་ཞབས་དྲུང་། །མི་ཤིགས་ཚེ་ཡི་གཡུང་དྲུང་ཁྱིལ་བའི་གཞིར། །མཐའ་ཡས་མཚན་དཔེའི་ངོ་མཚར་རྣམ་བཀྲའི་མཐུས། །ནོར་འཛིན་སྐྱོང་བར་འཆི་མེད་རྡོ་རྗེ་ཡིས། །སྲ་བརྟན་སྲོག་གི་ཀ་བ་ཚུགས་གྱུར་ཅིག །སྐྱོབ་པ་དེ་གསུང་ཚུལ་བཞིན་ཉེར་བསྒྲུབ་པ། །དཀོན་ཅོག་རིན་ཅེན་རྣམ་གསུམ་ཐུགས་རྗེས་(༡༥༨ན)
དང་། །སྲིད་པའི་མེས་པོ་ཉེ་དབང་མགྲིན་སྔོན་སོགས། །མཐོ་རིས་བདག་པོས་ཕུན་ཚོགས་དེང་འདིར་སྩོལ། །སྤོབས་པ་གཟེངས་མཐོའི་མགྲིན་ལས་སྭསྟིའི་གླུ། །ལེན་པའི་སྔོན་འགྲོར་བཀྲ་ཤིས་མེ་ཏོག་ཆར། །འབེབས་ཤིང་ས་མཆོག་ཙན་དན་བདུག་སྤོས་དྲི། །དངར་པོར་འཐུལ་དང་ལྷན་ཅིག་མཆིད་འདི་ཞུ། །གནམ་སའི་དཀྱིལ་འཁོར་གཉིས་ལ་བར་མེད་དུ། །སྤྲིངས་ཡིག་མི་འགྱུར་ཕྱག་རྒྱའི་རི་མོ་རྣམས། །རབ་འབར་བཀའ་ཤོག་རིན་ཅེན་ཕྱི་ནང་གོས། །བཟང་པོའི་རྟེན་གྱི་གནང་སྐྱེས་སུག་པར་སོན། །ལྷ་གཅིག་སྟོང་གསུམ་མི་མཇེད་འཇིག་རྟེན་གྱི། །མགོན་པོར་ཚངས་རིས་གྲུབ་པའི་ཏོག་གྱུར་ཀྱང་། །གཅིག་ཏུ་དགྱེས་ཞལ་ལྷུག་པར་བདག་ཅག་གི །ལེགས་བྱས་མེ་ལོང་གཙང་མར་འཆར་འདི་ལགས། །འཇམ་མགོན་འགྲོ་ལ་རྗེས་བརྩེའི་སྒྱུ་འཕྲུལ་གར། །མང་བཀུར་རྒྱལ་ཁབ་ཁྲི་ལ་མི་ལུས་ཟོལ། །ཉེར་བསྟན་འཕགས་ཆེན་དམ་པར་སྐྱེ་རྒ་དང་། །ན་འཆིའི་ཟུག་རྔུ་ཚད་མས་གཞལ་ནུས་མིན། །འོན་ཏེ་གཟུགས་སྐུ་བརྒྱ་ཕྲག་ཉི་མའི་གཟི། །འབར་བས་དུས་འཛིན་མཆེ་བའི་སྨག་རུམ་མུན། །མཐར་བྱས་འགྲོ་འདིའི་མངོན་སུམ་ཡུལ་གྱུར་པའི། །གཏམ་སྙན་སྙིང་ལ་བདུད་རྩིའི་ཆུ་རྒྱུན་བཞིན། །འདི་ན་སྡེ་སྣོད་གསུམ་པར་མངོན་རློམ་བདག །ཤཱཀྱའི་བསྟན་པ་ཐོས་བསམ་སྒོམ་པ་སོགས། །རྣམ་དཀར་ཁོ་ནས་འཛིན་པའི་ངང་ཚུལ་གྱིས། །འཚོ་བའི་དལ་འབྱོར་དོན་ལྡན་བསྒྲུབ་པས་གཡེང་། །གང་གི་ལེགས་བྱས་སྣོད་དུ་སྲིད་དང་ཞིའི། །ཡོན་ཏན་མ་ལུས་ཤོང་ཡང་སྙེམས་བྲལ་བ། །དམ་པའི་རྣམ་པར་ཐར་ལ་དད་སེམས་ངོར། །ཀུན་རྟོག་དྲ་བ་མཐའ་དག་གཅིག་ཏུ་བསྡེམས། ཁྱོད་མཚན་སྒྲ་འཛིན་བུ་(༡༥༨བ)
གར་ལུང་ཙམ་གྱིས། །ལུས་སེམས་མནར་བའི་གདུང་བ་དྲུང་འབྱིན་ན། །ཞབས་རྡུལ་གཙུག་ཏུ་ཅོད་པན་ལ་འཆང་ཚོགས། །སུམ་རྩེན་འདུན་སའི་དགའ་སྟོན་ཅིས་མི་མྱང་། །མཐོ་རིས་ཐེམ་སྐས་ལ་གཤེགས་རང་གི་རིགས། །མེས་རྣམས་མཁྱེན་ཅན་སྟོང་མངའ་བརྒྱ་བྱིན་ཉིད། །ཆོས་ནོར་འདོད་ཐར་ཞལ་བཞིའི་མཆུ་སྒྲོས་འདབ། །འཛུམ་པའི་ས་འདི་ཚངས་པ་ཉིད་མིན་སུ། །ཕྲ་མོར་མི་བརྙས་མཛངས་མཁས་དཀྱེལ་ཆེའི་བློ། །དྲང་སྲོང་ཕུར་བུའི་ཁེངས་པ་འཕྲོག་ནུས་གང་། །གཞན་འཕྲུལ་བདག་པོའི་དམག་ལ་བ་སྤུའི་རྩེ། །མི་འགུལ་དཔའ་ཞིང་རྟུལ་ཕོད་ཁྱེད་ཁོ་ན། །བཙན་པོའི་ལས་ཞུགས་དར་ལ་དྲག་པའི་རྗེས། ཁམས་གསུམ་སྣོད་ཀྱི་དངོས་པོ་ཡོད་དོ་ཅོག །འབྲངས་ན་ལུས་ཅན་ཡོངས་ཀྱི་ཡན་ལག་ལྔ། །ས་ལ་རེག་པའི་ཕྱག་གིས་ཅིག་མི་བྲེལ། །རིག་སྔགས་ལོག་པའི་རྩོད་དུས་རོ་ལངས་མ། །འགྲོ་བའི་བདེ་འཕྲོག་ཆོམ་རྐུན་མིང་ཙམ་ཡང་། །མི་གྲག་གླིང་བཞིའི་མི་རྣམས་ཕན་ཚུན་ཡིད། །གཉེན་གཤིན་གསར་པའི་རྫོགས་ལྡན་ཉིད་ཀྱིས་སྤྲུལ། །ལྷ་ཀླུ་གནོད་སྦྱིན་དྲི་ཟ་གྲུལ་བུམ་སོགས། །རྒྱལ་ཁབ་ཆབ་སྒོར་པུས་བཙུགས་ཐལ་སྦྱར་གཏམ། །ཐོས་ཚེ་ས་ཡིས་བསྐལ་ཡང་ལྟ་འདོད་བློ། །དབང་ཕྱོགས་འདུན་ས་ཆེ་དེར་ལན་བརྒྱར་བརྒྱུགས། །རྩོད་ལྡན་ཚེ་ཚད་ཛམྦུའི་སྙེ་མ་ཡིས། །ཆོས་དཀར་རྒྱ་མཚོའི་སྙིང་པོ་བཏུངས་པའི་འབྲས། །བརྒྱད་ཁྲིར་ལྷ་ཁྱོད་འཚོ་ཞེས་གསེར་སྦྱངས་སུ། །འགྱུར་བར་མཆོག་གསུམ་མཐུ་ཡིས་འགྲུབ་བྱིན་རློབས། །འཇིག་རྟེན་ཡོངས་ཀྱིས་གང་ལ་སྐྱབས་སོང་ན། །བདེ་སྐྱིད་མཛད་མི་ཤེས་པ་ནོར་བུའི་དཔྱ། །བཙན་པོའི་བཀའ་ཁྲིམས་དྲང་ཐིག་འདེབས་པའི་ཕྱག །རིང་པོར་བརྐྱངས་ཏེ་སྐྱེ་རྒུ་ཡོངས་ལ་སྩོལ། །སྨྲ་བ་ལན་ཅིག་རྒྱལ་པོའི་ལུང་ལས་ཀྱིས། །ནུབ་ཕྱོགས་ཆོས་སྲིད་བདག་པོར་དབང་བསྐུར་དེ། །(༡༥༩ན)
གནམ་གྱི་ཤེ་མོང་མཐུ་ཡིས་དོན་ལྡན་གཏམ། །སྤེལ་ལེགས་གསར་པའི་འཕྲེང་བས་གཟེངས་བསྟོད་ཅིག །འཇམ་ཕྲུག་གོས་མནབས་ཞུ་མཆིད་མཻ་ན་ཀཿ །རིན་ཅེན་ཆས་ཀྱིས་མཛེས་པའི་འཇོ་སྒེག་ཅན། །རྒྱུད་མངས་གླུ་ལས་དྲངས་པའི་བརྗོད་དོན་ཚིག །ཉམས་འགྱུར་སྟོང་གི་གདངས་སྙན་མགྲིན་པར་ལེན། །བརྟན་གཡོ་ཀུན་གྱིས་བཏུང་བྱའི་ཕོ་བྲང་དུ། །གསེར་འབྲུག་མར་གད་འདབ་རྒྱས་བེར་ཀླུབས་ཚེ། །རྣམ་གསུམ་འཁོར་ལོའི་དཔུང་པས་རྒྱལ་བའི་བསྟན། །བླ་ནས་བླར་འདེགས་གྲུ་འཛིན་རྩེ་ནས་ཕུལ། །ཉང་སྟོད་འབྲོང་རྩེ་ལྷུན་གྲུབ་གླིང་པའི་རིག་བྱེད་པ་བློ་བཟང་ནོར་བུས་སྙན་ངག་གི་ལམ་ནས་དྲངས་པའི་འཕྲིན་ལན་དྲང་སྲོང་བསེ་རུའི་རྗེས་འགྲོ །ད ཀྵི ཎེ ཀུ ཎྜ ལེ རྒྲཱི ཝ བཻ ཙཱ ར ལ ཁཱ ཀྵ རོ རཱ ས ཤཾ ཁཱ སུ བྷཱ ཥ དྷྭ ནཱི། སྭ རྠ ནེ ཏྲི རྨུ ཀུ ནྱཱི དུ ཀཱུ ལ སྱ རཱ སེ ཡ ན ཤྲོ ཏྲ ཏ དྷཱི རྟི ཙཱ མཱ དྷུ ར། རྣམ་(སྡེབ་སྦྱོར་མེ་ཏོག་འཕྲེང་ཅན།)དཔྱོད་གཡས་སུ་འཁྱིལ་བའི་མགྲིན་པ་ནས། །ཉམས་འགྱུར་སྒྲ་ལྡན་ལེགས་བཤད་འཕྲིན་ཡིག་དུང་། །རྟེན་བཟང་དུ་ཀཱུ་ལ་ཡི་རབ་དབྱངས་ཅན། །རྣ་བའི་བཅུད་དུ་ལེན་པའི་གླུ་དེ་སྙན། །(༡༥༩བ)
བགྲང་བྱའི་ཁུར་གྱིས་མི་ལྕི་ན་ཕྲ་ཡང་། །བློ་གྲོས་རྩལ་གྱིས་རྨོངས་ཆེན་གླང་གདོང་མཆེ། །ཕྱུང་ནས་མཁས་མང་ལེགས་བྲིས་གསར་འགྱིང་ཁྱོད། །ཟུག་རྔུས་མ་གཙེས་བདེ་བར་གནས་ལ་སྤྲོ། །འདི་ན་རང་ཕྱོགས་ལ་ཞེན་གྱ་གྱུའི་འཕྲུལ། །རྟེན་འབྲེལ་ལུགས་འབྱུང་འཁོར་བར་རྟག་འགྲུས་པ། །བསྟན་འགྲོའི་དོན་བོར་ཚུལ་འཆོས་བླ་ཆེན་སྤྱིའི། །རང་བསླུའི་རྣམ་ཐར་འཛིན་ལ་གཅིག་ཏུ་བྲེལ། །ཆོས་དཀར་ལ་གོམས་ཉ་ཕྱིས་ཁོག་ཡངས་པོར། །པཎ་ཆེན་སྨོན་འགྲོའི་གསུང་རྒྱུན་མུསྟིཀ །ཐོས་བསམ་སྲད་བུར་བརྒྱུས་ཏེ་དཔྱོད་ལྡན་གང་། །བརྒྱན་ཞེས་གཏམ་དེ་རྣར་གསོན་ཡིད་ཀྱི་གསོས། །དབྱངས་ཅན་མ་ལ་ཡ་རླུང་རེག་བྱ་ཡིས། །མི་ཤེས་ཡིད་ཀྱི་གདུང་བཅིལ་སྒྲ་དོན་རོ། །བརྒྱ་ཕྲག་སྙིང་ལ་བདའ་བའི་མཛའ་ན་མོས། །སྤོབས་པ་དགེ་བའི་དབང་ཁྱོད་མགྲིན་ནས་འཁྱུད། །རིང་པོའི་སས་བསྐལ་ལ་གནས་ཤེས་ལྡན་གང་། །ཀུན་རྟོག་རི་མོར་བྲིས་ཚེ་ཉེར་གནས་བློས། །བལྟ་འདོད་མིག་དབང་ཕྱོགས་སུ་བགྲད་བྱས་ཀྱང་། །འཁྲུལ་པའི་རང་སྣང་མངོན་སུམ་སྟོན་པ་བཞིན། །འདི་ནང་སྒྲུབ་དོན་གྲོང་ཚིག་ཟླ་ཟེར་གྱིས། །རྟོག་གེ་སྒོམ་ཆེན་ཀུནྡའི་ཁ་འཛུམ་ཡང་། །བློ་གསལ་སྙིང་གི་བ་ཀཱུ་ལ་འབྱེད་པའི། །གཙུག་ལག་འགྲམ་ཆང་གཞན་ན་བྲིན་མཁོ་ཆུང་། །སྒྲིབ་པའི་ལུས་ཅན་བདག་འདྲར་གསོལ་འདེབས་པ། །ཟས་གཅོད་མེ་ལྔ་བསྟེན་པའི་དྲང་སྲོང་ལྟར། །ངལ་བརྒྱའི་དཀའ་ཐུབ་ལེན་ཙམ་ལས་གཞན་དུ། །འབྲས་བུ་ཨེ་རཎྜ་ཡི་སྙིང་པོ་བཞིན། །འོན་ཏེ་སྐྱེས་ཐོབ་ཚེ་འདིར་སྦྱངས་པའི་མཐུས། །མགྲིན་པའི་མདུད་གྲོལ་ལས་འོངས་ཚིགས་སུ་བཅད། །རྡུལ་ཕྲན་ལྷུན་པོར་སྒྲོ་འདོགས་སྙན་ངག་ལུགས། །(༡༦༠ན)
ཡིན་ཕྱིར་མཁས་ཉིད་རེ་བ་སྐོང་ཆེད་སྤེལ། །ད་དུང་མཐའ་མེད་ཤེས་བྱ་གོ་ལའི་ཁྱོན། །བློ་གྲོས་ཤིང་རྟ་བདུན་པས་ལེགས་གཞལ་ཞིང་། །ཕྱོགས་འདིར་སྒྲ་འཛིན་འདབ་སྟོང་བཞད་བྱེད་པའི། །རྨད་བྱུང་ཚིག་དོན་སྣང་འོད་སྤྲོར་མ་ངལ། །མིག་རྒྱང་རིང་པོས་བཙལ་ཀྱང་དེང་གི་དུས། །བཅུ་ཕྲག་རིག་གནས་ལ་མོས་ཁྱོད་ཙམ་ལས། །མ་རྙེད་ཚུལ་དེར་རབ་དཀར་དངས་པའི་བློ། །ཟླ་ཞུན་ཐགས་ཀྱི་རི་མོ་འདིས་ཀྱང་མཚོན། །ཤིང་འབྲུག་ཧོར་ཟླ་དགུ་པའི་ནང་དུ་ཚངས་པ་དུང་ཐོད་ཅན་གྱི་སྐུ་ཁོག་དང་ཚེར་གསེབ་བླ་མ་གཉིས་རྫོང་སྟ་མཛད་པའི་བླང་དོར་གྱི་རྡོ་རྗེའི་གསང་འཕྲིན་བྱུང་བའི་ལན་དང་། དོགས་སེལ་དུ་ལོ་དེའི་ཧོར་ཟླ་བཅུ་གཅིག་པའི་ལྷ་ཚེས་ལ་བྱང་སྒྲོམ་པ་སྤྱན་གཟིགས་ཚོགས་འཁོར་དང་བཅས་རྫོང་སྟ་བྱས་སྐབས་འཕྲིན་དུ་གསོལ་བ་ཐེ་ཚོམ་མདུད་འགྲོལ། སྲིད་གསུམ་ཟིལ་གནོན་ཧེ་རུ་ཀ །པདྨ་ཐོད་འཕྲེང་སྤྱན་སྔ་རུ། །ཞལ་བཞེས་ལྷ་ཆེན་ཚངས་པ་ཡི། །རྡོ་རྗེའི་གསུང་འཕྲིན་སུག་པར་སོན། །གང་དེར་གསལ་བའི་སྤྱི་སྒོས་ཀྱི། །བླང་དང་དོར་བྱའི་རིམ་པ་རྣམས། །ལེ་ལོའི་དབང་དུ་མ་གྱུར་པར། །མྱུར་འགྲུབ་ཉེར་བསྡོགས་སྐབས་སུ་གནས། །ཅུང་ཟད་དཔྱོད་པར་མ་ཤེས་པའི། །ཐེ་ཚོམ་མདུད་པ་འགྲོལ་སླད་དང་། །ལྐོག་གྱུར་གནས་འགའ་འདྲི་བ་ལ། །བྱ་མ་རྟ་ནི་ཆེད་དུ་མངགས། །གཡར་དམ་རྡོ་རྗེའི་ར་བ་ལས། །ནམ་ཡང་འདའ་བ་མེད་པའི་ཕྱིར། །དྲེགས་པའི་དབང་ཕྱུག་ཆེ་ཁྱོད་ཀྱིས། །འཕྲིན་ལས་རྣམ་བཞི་ལྷུན་གྱིས་སྒྲུབས། །སྤྱན་གཟིགས་ཚོགས་ཀྱི་འཁོར་ལོ་སོགས། །དངོས་བཤམས་མཆོད་པས་ཉེར་མཚོན་པ། །ཏིང་འཛིན་སྔགས་རྒྱས་བྱིན་བརླབས་ཏེ། །ནམ་མཁའ་མཛོད་ཀྱི་སྒོ་ཕྱེ་ཕུལ། །
རབ་བྱུང་བཅུ་གཅིག་པའི་ཤིང་སྦྲུལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་སྦྲུལ་ལོར་བྲིས་པའི་ཆབ་ཤོག་འཕྲིན་ཡིག་ཁག །གྲྭ་སྡིངས་པོ་ཆེའི་སྤྲུལ་སྐུ་ངག་དབང་སྙན་གྲགས་བཟང་པོས། ཤིང་སྦྲུལ་ལོ་གསར་ཕུལ་བའི་སྙན་ཚིག་གི་ལན་གསེར་དང་ར་གན་དབྱེ་བའི་མེ་ལོང་། (༡༦༠བ)
བཻ ཙཱ ར ཎྜ ཙ ཀྲ ཧྨ ནཻ རྐཱུ ལི སི དྡྷོ དྷི ཡཱ བྲཱ ཧྨ ཎཱི བཱི ཎ རུ ཏྱོ པ ནཱ ཡཾ། ལ ཁ པྱ ཀྵ རཱ ཤྲེ བ ཏི གཱི ཏྱ གཱ པྲེ མ དྷཱུ རཱ དྦྷུ ཏ རྡྷྭཱ དི ཛྷ ལྤྱཾ ས སཱ མཱཾ། རྣམ་(སྡེབ་སྦྱོར་ལག་འགྲོ་ལྟུང་བ།)དཔྱོད་ཚངས་རིགས་གྲུབ་པའི་བློ་གྲོས་ཀྱིས། །དབྱངས་ཅན་རྒྱུད་མངས་གདངས་ལས་ཉེར་དྲངས་པ། །འཕྲིན་ཡིག་ཤིས་བརྗོད་གླུར་ལེན་རབ་སྙན་སྒྲ །རྨད་བྱུང་དུས་ཀྱི་ཐོག་མར་འཁྲོལ་དེ་འཇེབས། །ལེགས་སྨོན་བདེན་ཚིག་བདོག་པའི་ལྡེ་མིག་གིས། །ཡོངས་འབྱེད་ཕུན་ཚོགས་རྟེན་ཅིང་འབྲེལ་འབྱུང་སྒོ །སུམ་ལྡན་འབྱུང་བའི་བྲང་འགྲོ་མར་གད་གོས། །ཀླུབས་པའི་གནམ་ལོའི་རང་ཞལ་ངོམས་ཚེ་འགྲིག །མང་པོར་བསགས་པའི་ཚོགས་གཉིས་རྒྱ་མཚོའི་མངལ། །སྨོན་ལམ་རི་དབང་བསྒྲིལ་ལས་ཉེར་འཐོན་པ། །འདུ་ཕུང་ཉི་མ་གྲུང་རིས་མཁའ་དཀྱིལ་དུ། །རྟག་ཤར་ངེས་དོན་འདབ་བརྒྱ་བཞད་དེ་སྤྲོ། །འདི་ན་ཆོས་ནོར་འདོད་དང་ཐར་པའི་སྒོ། །རིས་མེད་ཀུན་ལ་གཏོང་བ་ལྷག་པའི་སེམས། །རབ་དཀར་ཁ་བའི་(༡༦༡ན)
ས་འཛིན་རྗེས་འགྲོ་ལས། །མ་སྨད་ལུགས་བརྒྱའི་གངྒཱ་ཆད་མེད་འབབ། །སྒོམ་པར་མོས་པ་ཚུལ་འཆོས་རློམ་པའི་དྲི། །རྣམ་དག་གཟུར་གནས་གང་བློའི་ཤེལ་བུམ་ལས། །ཕྱི་ནང་གཙུག་ལག་ལེགས་བཤད་རྙོག་མེད་ཀླུང་། །སྦྲེངས་འདི་གངས་ཅན་བསྟན་པའི་ཞབས་སུ་བསིལ། །མ་ཡེངས་དམ་བཅའི་རི་དྭགས་རྗེས་བསྙེགས་པས། །མཐའ་བྲལ་གནས་ལུགས་སཱི་ཏ་མ་ཟིན་ཀྱང་། །ཀ་ཙན་འཕོང་གིས་འཚོ་བའི་དཔྱོད་ལྡན་ཅན། །ར་གྷུའི་བུ་ཉིད་རྨོངས་ཆེན་ལངྐའི་གཤེད། །སྒྲིབ་གཉིས་འཆིང་རྒྱ་གྲོལ་བའི་རང་རིག་རྩལ། །སྤང་རྟོགས་ཡོན་ཏན་རྫོགས་པ་རྡོ་རྗེ་སེམས། །རང་ཞལ་རྗེན་པར་མཐོང་མིན་དེ་སྲིད་དུ། །རྣམ་རྟོག་ཆོས་སྐུར་སེམས་པ་ལོག་ཤེས་ཙམ། །འོན་ཏེ་ཆོས་ཀུན་སེམས་ཉིད་གཅིག་པུ་ཡི། །མངོན་པར་འཕྲུལ་ལས་ངེས་རྙེད་ཕྱག་རྒྱའི་ལམ། །མདའ་བསྣུན་བཞེད་གཞུང་ཉམས་སུ་རབ་བསྟར་ནས། །གཞན་ལ་སྟོན་པའི་ཚུལ་དེར་ཅིས་མི་རང་། །སྲིད་ཞིའི་དགེ་ལེགས་ཆུ་བོ་མཐའ་ཀླས་པ། །འདུ་བའི་མང་བཀུར་ཕོ་བྲང་ཆེན་པོ་འདིར། །བགྲང་བྱ་གསར་ཚེས་མཛད་མཐའ་མིན་དེ་སྲིད། །ཀུན་དགའི་ཟློས་གར་འཆད་མེད་སྒྱུར་ཅིག་གུ། །ལེགས་སྦྱར་སྐད་ལས་བསྒྲུབས་པ་སྭསྟིའི་ཚིག །སྐྱེ་བ་ལྔ་པའི་དུང་གི་སྒྲར་དྲངས་ཏེ། །དཀོན་ཅོག་མཐུ་ཡིས་དུས་ཀུན་བདེ་ལེགས་སུ། །སྤེལ་བར་སྨོན་དེ་ཁྱོད་ལ་ཤིས་གྱུར་ཅིག །དོན་བཟང་ལང་ཚོ་དར་དྲག་ལུས་ཕྲ་མ། །སྙན་ཚིག་མགྲིན་པའི་དྲིལ་ཆུང་ལེགས་འཁྲོལ་བ། །རབ་དཀར་ཐགས་བཟང་དུ་ཀཱུ་ལ་གྱོན་ནས། །དགེ་དབང་ངུར་སྨྲིག་གོས་ཅན་འདུན་སར་སོང་། །ཤིང་སྦྲུལ་ཟླ་བ་དང་པོའི་ནང་དུ། བསམ་ཡས་ནས་བསྟན་སྲུངས་གནོད་སྦྱིན་ཆེན་པོས་རྡོ་རྗེའི་གསུང་འཕྲིན་བྱུང་(༡༦༡བ)
བར། དོོགས་སེལ་གྱི་དྲིས་རྨེད་དང་བཅས་སྤྱན་གཟིགས་ཀྱི་མཆོད་སྤྲིན་གྱ་ནོམ་པ་སྤྲོས་ཏེ་བྱིས་པ་ངག་དབང་མཁྱེན་བརྩེ་བཏང་སྐབས་གསུང་ལན་ཡིད་གཉིས་མདུད་གྲོལ། གཞོམ་ཞིག་བྲལ་བ་གསང་གསུམ་རྡོ་རྗེའི་ཁམས། །མཚོ་སྐྱེས་སྤྲུལ་པའི་སྒྱུ་འཕྲུལ་རོལ་གར་མཁན། །བརྟུལ་ཞུགས་གྲུབ་པ་པདྨ་ཐོད་འཕྲེང་རྩལ། །སངས་རྒྱས་ཀུན་གྱི་བདག་ཉིད་དེས་བྱིན་ཕོབས། །གང་ཐུགས་བདེ་སྟོང་ཟུང་འཇུག་དྭངས་མའི་རྩལ། ཁྲག་འཐུང་དཔལ་ཆེན་ཆེ་མཆོག་སྐུར་ཤར་བ། །བདེ་གཤེགས་ཞི་ཁྲོ་ཀུན་འདུས་བཀའ་བརྒྱད་ལྟར། །མཆོད་བསྟོད་དྲེགས་པའི་སྲུང་མ་ཆེན་པོ་ཡི། །དྲི་མེད་དམར་ཟླུམ་སྤྱན་གྱི་མེ་ལོང་ངོས། །ཤེས་བྱར་སྲིད་པའི་ཆོས་ཀུན་ཡོངས་ཤར་བས། །འབྱུང་འགྱུར་ལུང་དུ་སྟོན་པ་རྡོ་རྗེའི་ཚིག །དབྱར་རྔ་ལྟར་སྒྲོག་གསུང་འཕྲིན་འབྱོར་བས་སྤྲོ། །ཟབ་གསང་བློ་ཡིས་གཞལ་བར་ནུས་མིན་དང་། །རྟོགས་པར་སླ་ཡང་དཔྱོད་པར་མ་ཤེས་སོ། །སོམ་ཉིའི་དྲི་བ་ཞིབ་ཆ་གཡར་ལམ་ནས། །གསོལ་བ་ཇི་བཞིན་ཐེ་ཚོམ་མདུད་པ་ཁྲོལ། །གངས་ཀྱིས་བསྐོར་བའི་སྤུར་རྒྱལ་བོད་ཡུལ་འདིར། །མཐའ་དབུས་ལྷ་འདྲེའི་གདུག་རྩུབ་ཁ་རླངས་ཀྱིས། །མི་ཕྱུགས་ནད་རིམས་འཁྲུག་རྩོད་འཚེ་བ་ཀུན། །ཞི་ཞིང་ཕན་བདེའི་དགའ་སྟོན་རྒྱས་པར་མཛོད། ཁྱད་པར་རིག་སྔགས་འཆང་བ་བདག་ཅག་གི །ཞི་རྒྱས་དབང་དྲག་འཕྲིན་ལས་མ་ལུས་པ། །སྒྲུབ་ལ་བསྟན་བསྲུང་གནོད་སྦྱིན་ཆེན་པོ་ཁྱོད། །དཔག་བསམ་ཡོངས་འདུའི་དབང་པོའི་མཆེད་ཟླར་མཛོད། །བཀྲས་བཏགས་གསེར་སྐྱེམས་རྒྱ་ཇ་ཕྱི་ནང་གོས། །རྣོ་ངར་མཚོན་ཆ་རླུང་གི་ཤུགས་འཆང་རྟ། །ཚོགས་འཁོར་དངོས་འབྱོར་མཆོད་དང་ཏིང་འཛིན་གྱིས། །འཛད་མེད་ནམ་མཁའ་མཛོད་ཀྱི་སྒོ་ཕྱེ་ཕུལ། །ཁྲོ་ཕུ་སློབ་དཔོན་ངག་དབང་བསྟན་འཛིན་(༡༦༢ན)
དབང་པོས་སྙན་ངག་གི་འཕྲིན་ཡིག་བྱུང་བའི་ལན་ཕུར་བུའི་སྤུན་ཟླར་སྒྲོག་པའི་པི་ཝང་། རཱ པཱ ཉྩ ཉྩ ཀྲ ཀ ར ཀ དྷཱ རྀ དོ ཀཱུ ཡ ཤྭེ ཏ མྲྀ དུ ཀ པཱ སྟཾ། བྲཱ ཧྨ ལེ ཁཱ ཀྵ ར བི ཙ རོ ཏྟ སྶཱ ལྱཾ མ དྷྱཱ ཛ ན བ ཏ ཡུ ཀྟཾ། ས་(སྡེབ་སྦྱོར་མྱོས་མ།)ཟླའི་འཁོར་ལོ་ལྔ་ལྡན་སྤྱི་བླུགས་འཆང་། །དཀར་འཇམ་དུ་ཀཱུ་ལ་ཡི་གོས་གྱོན་པ། །རྣམ་དཔྱོད་ཡངས་པའི་འཕྲིན་ཡིག་ཚངས་པའི་བུ། །དབུས་འགྱུར་སཱ་ལའི་སྨན་གྱི་ལྗོངས་སུ་སོན། །དེ་ཚེ་རིང་གོམས་ཁྱོད་བློའི་གངས་རི་ལས། །ཉམས་དང་འགྱུར་བ་སྟོང་ལྡན་གངྒཱའི་ཀླུང་། །ལྕི་ཡང་སྡེབ་སྦྱོར་དབུ་མའི་འཕྲེང་མཛེས་ཅན། །གཙུག་ལག་ཆུ་གཏེར་ཆེན་པོའི་ཀློང་དུ་བབས། །འདོད་ཁྲོ་གཏི་མུག་གིས་སྦར་ཟུག་རྔུའི་མེས། །ལུས་སེམས་ལྗོན་པའི་སྡོང་བུ་མ་བསྲེགས་ཤིང་། །འདབ་རྒྱས་མེ་ཏོག་གཡུར་དུ་ཟ་བའི་རྩེར། །ལེགས་བཤད་འབྲས་བཟང་དུད་པའི་གཏམ་དེ་སྙན། །འདི་ན་ངེས་ལེགས་ཉིན་བྱེད་འབོད་འདོད་པ། །སྲིད་ཞེན་ཆ་ཕྲའི་སྐྱ་རེངས་འཆར་རྩོམ་ཡང་། །དོན་མེད་མཚན་རུམ་གཡེང་བ་གཉིད་པོ་ཆེར།(༡༦༢བ)
།གཡུར་བའི་ངང་ཚུལ་འདི་ལ་རང་ཞེ་ཁྲེལ། །མཁས་ཉིད་རྣམ་དཔྱོད་ཛམྦུའི་སྙེ་མ་ཡིས། །བཏུངས་པའི་ལྔ་རིག་རྒྱ་མཚོ་ཆེན་པོ་ཀུན། །དཔྱད་གསུམ་དག་པས་གསེར་དུ་བསྒྱུར་བའི་རྒྱན། །རང་རིས་བློ་གསལ་ཡོངས་ཀྱི་རྣ་བར་མཛེས། །མི་ཤིས་གདོལ་གཏམ་རྙོག་པའི་དྲི་འཁྲུད་པ། །གཙུག་ལག་མཐོ་རིས་ཆུ་བོ་ཨརྒྷའི་རྒྱུན། །གྲུབ་རིས་པད་དཀར་མིག་གི་ཞབས་བསིལ་བར། ཁྱོད་མིན་སྐལ་ལྡན་ཤིང་རྟ་དམིགས་སུ་མེད། །ཕྱི་དུལ་ཚུལ་འཆོས་ལུས་ཀྱི་ལྷ་ལམ་ངོས། །ཆགས་སྡང་སྒང་གཤོང་གོ་ལར་ཀུན་རྟོག་ཟླ། །དལ་མེད་རྒྱུ་བས་གཏན་བདེ་འདབ་བརྒྱའི་ཁ། །ཟུམ་བྱེད་བསམ་གཏན་པའང་འཕྱོན་མའི་གར། །རགས་པའི་འགྱུ་བ་བག་ལ་ཉེར་ཞི་བས། །གཅིག་ཏུ་ཡེངས་འདྲའི་སེམས་ཀྱི་གནས་ཆ་ལ། །ཞི་ལྷག་ཟུང་འབྲེལ་མཉམ་པར་བཞག་རློམ་ཡང་། །སྲིད་རྩེའི་ཏིང་འཛིན་ཐོབ་པའི་ལྷག་སྤྱོད་བཞིན། །མང་ཐོས་སྤོབས་པའི་ཁ་འཕང་མཐོན་པོ་ཡིས། །ལེགས་ཉེས་རྣམ་པར་དབྱེ་བའི་མིག་བགྲད་ནས། །བལྟས་ཀྱང་དེང་དུས་གངས་ཅན་ར་བ་འདིར། །གནས་ལྔ་རིག་པ་ཁྱོད་ལས་ངས་མ་རྙེད། །ཤོང་དཔང་ཤིང་རྟ་བཅུ་པའི་རིགས་ཀྱི་བུ། །བརྡ་སྤྲོད་འཕོང་གིས་འཚོ་བའི་དཔྱོད་ལྡན་གང་། །ལོག་རྟོག་ལངྐའི་མགྲིན་པ་བཅད་པའི་གཏམ། །སུམ་རྩེན་དབང་པོའི་འདུན་སར་ལྷ་རྣམས་གླེང་། །འོན་ཏེ་ཐ་སྙད་ཆུ་ཡི་ཟླ་གཟུགས་བཞིན། །ཚུར་མཐོང་བྱིས་བློ་བྲིད་པའི་སྒྱུ་མའི་གར། །དཔྱད་དེ་རང་སེམས་འདི་ལ་གཅེར་བལྟས་ཚེ། །བརྗོད་བྲལ་གཉུག་མའི་གནས་ལུགས་ལས་མ་མཐོང་། །ད་དུང་འཕགས་ཡུལ་ཁ་སྤུ་ཅན་རྣམས་ཀྱི། །ཚུལ་བཞིན་མང་པོར་ཐོས་དོན་ལེགས་བསམ་ན། །མ་སྨད་ཐར་པའི་ཁང་བཟང་ཉམས་དགའ་བར། །གཏན་བདེ་རོ་བརྒྱའི་ཕུན་ཚོགས་གཡང་ཞིག་ཆགས། །མ་འོངས་དབུས་(༡༦༣ན)
འགྱུར་འཆང་དུ་མི་ཕམ་མགོན། །མགོན་དེ་མངོན་སུམ་བྱོན་དང་མཚུངས་པའི་སྐུ། །སྐུ་བརྙན་མཐོང་བས་དོན་ལྡན་དུས་རྣམས་ཀུན། །ཀུན་བཟང་མཆོད་སྤྲིན་སྤྲོ་ཁྱོད་སྐལ་བཟང་དཔྱིད། །རྟེན་འབྲེལ་ལུགས་འབྱུང་འཁོར་བ་སྒྲིབ་ལུས་ཅན། །བདག་འདྲ་སྐྱེ་འཆིར་རང་དབང་མ་ཐོབ་ཀྱང་། །འདྲེན་རློམ་ཆེན་པོ་ཕལ་གྱི་རྣམ་ཐར་བཞིན། །སྒྲུབ་ཅེས་གཅམ་བུར་སྨྲ་བའི་གཡར་དམ་འཆའ། །བློ་གསལ་ཀུན་ལ་སྐྱེས་སུ་ཉེར་འོས་པའི། །སྒྲ་དོན་སྙན་འགྱུར་ཚིག་ལ་ཟད་པའི་མཐའ། །མེད་ཕྱིར་འཕྲིན་ཡིག་ཆ་ཤས་ཡོངས་གང་ཟླ། །ཕོ་ཉ་རླུང་གི་ཤིང་རྟས་ཆད་མེད་དྲོངས། །རྒྱུད་མངས་སྒྲ་ལས་དམ་པའི་ཆོས་ཀྱི་གཏམ། །རབ་དྲངས་ཚིག་དོན་སྙན་འཇེབས་གླུར་ལེན་པ། །དྲི་ཟའི་གར་མཁན་དམར་འཇམ་སྟོད་གཡོགས་ཅན། །བློ་ལྡན་ཕུར་བུ་གཉིས་པའི་མདུན་སར་སོང་། །མཆིམས་ཕུ་བྲག་དམར་རོང་བཙན་གྱིས་འབྱུང་འགྱུར་ལུང་བསྟན་དང་བཅས་མཐུན་རྫས་དགོས་ཚུལ་གྱི་གསུང་འཕྲིན་བྱུང་བའི་ལན་ལས་བཞི་ལྷུན་གྲུབ། གངས་ཅན་ལྷ་གཅིག་ཁྲི་སྲོང་ལྡེའུ་བཙན་གྱི། །སྐྱེས་ལྷ་བྲག་བཙན་རྡོ་རྗེ་དྲག་པོ་རྩལ། །སྟོང་གསུམ་སྐད་ཅིག་མྱུལ་བའི་དཔའ་བོ་ཆེའི། །རྡོ་རྗེའི་གསུང་གི་འཕྲིན་ཡིག་སུག་པར་སོན། །ངན་གཡོའི་སེམས་ཀྱི་རྟོག་པ་འོག་འགྱུའི་འཕྲུལ། །རྩུབ་སྦྱོར་ཐགས་སུ་འཐག་ལ་གཡེལ་མེད་དུ། །དུས་ཀུན་དམར་ཟླུམ་སྤྱན་གྱིས་ཉེར་གཟིགས་ནས། །ལྐོག་གྱུར་མངོན་སུམ་སྟོན་ལ་རྗེས་ཡི་རང་། །བདེ་ལྡན་ཞིང་གི་མགོན་པོ་སྣང་མཐའ་ཡས། །མཚོ་སྐྱེས་སྤྲུལ་པའི་སྒྱུ་འཕྲུལ་རོལ་གར་མཁན། (༡༦༣བ)
།པདྨ་ཐོད་འཕྲེང་དམ་ལས་མི་འདའ་བར། །བསྟན་འགྲོའི་ལེགས་ཚོགས་རྒྱས་པའི་འཕྲིན་ལས་སྒྲུབས། ཁྱད་པར་གངས་ཅན་ལྗོངས་འདིའི་བདེ་སྐྱིད་རྣམས། །སྤེལ་འདོད་བདག་གི་རབ་དཀར་ལྷག་པའི་སེམས། །བསམ་པ་ཇི་བཞིན་ཞི་རྒྱས་དབང་དྲག་ཀུན། །ལྷུན་གྱིས་སྒྲུབས་ཤིག་དྲེགས་པའི་དམག་དཔོན་ཀྱེ། །ལྷ་དར་གསེར་སྐྱེམས་སྒྲ་སྙན་མདུང་དམར་དང་། །སྒ་སྲབ་ཀྱིས་མཛེས་ཅང་ཤེས་ལ་སོགས་པ། །དངོས་བཤམས་ཡིད་སྤྲུལ་མཐུན་པའི་དམ་རྫས་ཀྱིས། །སྒོ་ལྔ་དགྱེས་པ་བསྐྱེད་པའི་ཆེད་དུ་སྤེལ། །ངམ་རིང་མཁན་ཆེན་ལོ་ཙཱ་བ་ཚེ་བརྟན་རྒྱལ་མཚན་གྱིས་རིང་འཚོའི་རྟེན་འབྱུང་ཚན་གྲངས་དང་བཅས་འཕྲིན་ཡིག་བྱུང་བའི་ལན་གནས་ཚུལ་གསོང་པོར་སྨྲ་བའི་གཏམ། ཏྭ ད ནྱཱ དྷི ཀ སྱ སུ བོ དྷེ ཪྶ ཏྭ ན། ཛཱ ཡ ས ར མ དྷྱ ཡ བྷི བྷ ཊྚ ཌ ཀ མ ཧཱ མི ཏྲི ཀ ཀུ མཱ ཏྟ མ ཛི ཏོ དྷ རྨཱ ས ན བྷུ མི ཀ མ ཧོ པ དྷྱ ཡཻ ཀ ལོ ཀཱ ཀྴ དཱི། བདག་པས་གཞན་གཅེས་པའི་བྱང་ཆུབ་ཀྱི་སེམས་བཟང་པོས། རྒྱལ་སྲས་རྒྱ་མཚོའི་དབུས་ན་མངོན་པར་འཕགས་པའི་བཤེས་གཉེན་ཆེན་པོ་གཞོན་ནུ་རྒྱལ་མཆོག་གི་ཆོས་ཀྱི་གདན་ས་པ་མཁན་ཆེན་འཇིག་རྟེན་གྱི་མིག་གཅིག་པུ་སྐད་གཉིས་སྨྲ་བ་གང་། (༡༦༤ན)
རུ ཀྟ ཡཿ ནོ དྷཱུ རོ པ དྷོ པུ ན ར པི བ ཧུ ལཾ བྷ པེ ཤ ཏ ད ཥ སྱཱ ག ནྡྷ ཏཿ ཤུ དྡྷ ཤཱི ལ ཀྵེ ཏྲ ག མི དེ ཡཾ ཀྵ མ བཱི ཪྻ དྷྱཱ ན པྲ ཛྙཱ ནཱཾ ཤཻ ལྱ བྷཱུ ཏ པ ཪྻུ བྷཱཿ ཨ ག ནྡྷ། རིང་མིན་གྱི་ཆར་ཡང་ཡང་སྲིད་མང་པོར་ཉེས་བརྒྱའི་དྲི་མས་མ་སྦགས་པའ་ཚུལ་ཁྲིམས་དག་པའི་ཞིང་སར་སྦྱིན་གཏོང་བཟོད་བརྩོན་བསམ་གཏན་དང་ཤེས་རབ་ཀྱི་ཚུལ་ལ་གོམས་པའི་ས་བོན་ཡོངས་སུ་བཏབ་པ་དྲི་མེད་སྨོན་ལམ་ཆུ་ལུད། པྲ དྷ ཎཱ’བྦྷུ ཥྞཱ རོ རྜ ནོ ཏྭ ད ན སྱ ས མཱུ ཧ གཉྫཱ ངྒུ རི ཥ། ས དྡྲ ཧྨ ས མཱ ནེ བྷོ གསྱཱ ཙ རྱ། ཤྩ ས ཧཱི ཏ ཏྲི ཙ ཀྲ སྱསུཕ ལ པ རི གུརུ ཏྭཾ། ཨ རྠཱ ལ ངྐཱ ར ཏ ལྤ ཐོ། དྲོད་གཤེར་གྱིས་བསྐྱེད་པའི་འདུ་ཕུང་གི་མྱུ་གུ་གཡུར་དུ་ཟ་ཞིང་། ཚངས་པར་མཚུངས་པར་སྤྱོད་པའི་སློབ་དཔོན་འདུས་གྲྭ་རྣམས་དང་ཆབས་ཅིག་པར་འཁོར་ལོ་གསུམ་གྱི་འབྲས་བཟང་ཡོངས་སུ་དུད་པ་ནས། དོན་རྒྱན་གྱི་ལམ་ནས་དྲངས་པའི་འཕྲིན་གཅིག་ཡུན་རིང་པོར་བརྟན་(༡༦༤བ)
ན ཡ སྱ ལེ ཁཱ ཀྵ ར དཱི རྒྷི རྐཱ ལ ཏི ཥྛ ནྟུ ཨ ཤྲེ བ ད ཙི ཏྱ ཤྭེ ཏ ནེ ཏྲོ ས སུ བ རྞ ཏུ ལྱ ཙ ཀྲ ཤྩ དྷཱུ ཏེ ན ནོ ནཱ ཤ ན ཡུ ཀྟ མ ན སོ བྷི ཥ ཀེ བྷཱུ ཏི། ཨ སྨི ཉྩ མ དྷྱ དེ ཤ བྷོ ཊཱ ནཱཾ པ ཊུ བྷི ཪྶ དྡྷ ཀཱུ ལ ས མ། པར་གྱུར་ཅིག་པའི་ཤིས་པ་བརྗོད་པའི་རྟེན་དུ་བཀྲས་བཏགས་སུ་ཝརྞ་སྲང་གི་འཁོར་ལོ་དང་བཅས་ཕོ་ཉ་བས་ཉམས་མེད་དུ་བགྲོད་པ་ཡིད་ཀྱི་སྨན་ཡོན་དུ་གྱུར། འདི་ནའང་འཕགས་བོད་ཀྱི་མཁས་གྲུབ་རིས་སུ་མ་ཆད་པའི་གཞུང་ལུགས་ལ་སྤྱོད་པའི་ཀློག་པ་མཁན་དུ་གནས། ཡཾ བྷོ གསྱ པ ཋ ཀོ པ དྷྱ ཡེ ཏི ཥྛ། མུ ནེ རྦཱ ཙ ན ག མྦྷི ར གུ པྟ གྲ ནྠ མུ དྲི ཏ ས རྦ ཛྙཱ མ ཛྙུ ཤྲཱི གརྦྷ ནཱ མུ ཀྟ སྱ པྲ བ ཙ ན ཥུ སྟ པ དྭཾ། ཨཱ ཥྚི ཀ ད ཤ བྷུ ཏྱ རྠ བ ཏྶཱ དྷྱ ཤཱ ཀྱ ཏ ཤྴོ ཏ བུ དྡྷཱ བ། མ་ཐུབ་གསུང་ཟབ་གསང་གི་མདུད་རྒྱ་ཀུན་མཁྱེན་འཇམ་དཔལ་སྙིང་པོས་བཀྲོལ་བའི་གསུང་རབ་ལ་བརྟེན་ནས། དལ་འབྱོར་དོན་ལྡན་དུ་སྒྲུབ་ནུས་ཀྱི་གོ་ཡུལ་ཁོང་དུ་ཆུད་ཀྱང་། བླ་ཆེན་སྤྱིའི་ཟོག་ཆོས་བརྒྱད་གཡེང་བའི་ཁོལ་པོར་མཛད་པས། གཏན་འདུན་འགྲུབ་པ་སོགས། (༡༦༥ན)
ཧཱ གུ རུ ས མཱ ནྱ སྱ དྷཱ ནཱ ཥྚ ནྡྷ རྨ ཀྵེ པཱ ནཱཾ དཱ ས ཀྵ ཡེ ན། པ དྤ ཡ རྠ སི དྲཱུ ད མཱ ས སཱ ནཱ རྠ མ ཧ ཏ ཡ ན སཱ པ། ཨ ཏྲ དྲྀ ཥྚེ ན ར ཧཱི ན ས ཀ ལ ཀ གྲཱ བ ཥྭ ཧ མ དྷི ཀ དྷ ར པྲ ད ཧ ནི ཤཱི ལཱ སྟི ནཱ། དགོས་དོན་ཆེ་བར་མ་མཆིས་ཀྱང་། ཚུར་མཐོང་གི་མཆོག་དམན་མཐའ་དག་མགྲིན་གཅིག་པར་བདག་གཅེས་འཛིན་ལྷུར་ལེན་པ་ངང་ཚུལ་ཡིན་པས། རིང་པོར་འཚོ་ཐབས་ལ་འདུན་བརྩོན་ནན་ལྟར་འགྱིད་ཅིང་། ཉིད་ཅུང་ཞིག་བྲོ་འཚལ་པར་ལེ་ལོར་མ་ལུས་པའི་མྱུར་དུ་གཞིལ། དཱི རྒྷོ ཛཱི བཻ རྦེ ཏ ཙྪ ནྡ བཻ ཪྻི ཀ ཀ རོ མི། ཏྭ མ ལྤ རོ གྱ མ ལ ཤེ ནོ གཏ སྱ ཏཱུ ར ཤ ནྟ བྱཾ བ ཪྻི ཀ ཤྩ། ས ངྐ ཏེ ཡཱཿ ནཱ དཱི བ ཏྐ ར ཎི། ཙཻ ཏྱ ར ཀྵ གྲ ནྠཿ མ རྷ སྱ ནུ ཀཱུ ལ བ སྟྲ ཤྩ ས ཧི ཏི བཻ ཤ ཁ སྱ པྲ ཛྙཱ པ ཀྵ བྷ དྲ ཏི ཐཽ ལི ཁི ཏཾ། བྱེད་ལ་བརྩོན་པ་དང་། མོལ་མཆིད་གངྒཱའི་ཀླུང་ལྟར་འཚལ། རྟེན་བསྲུང་མདུད། རུང་མཐུན་གྱི་གོས་དང་བཅས་ནམ་ཐོང་གི་ཟླ་བའི་ཤེས་རབ་ཕྱོགས་ཀྱི་བཟང་པོའི་ཚེས་ལ་བྲིས། འབྲས་རི་བོ་ཆེ་ནས། སྟག་ལུང་ཞབས་དྲུང་ངག་དབང་བཀྲ་ཤིས་དཔལ་གྲུབ་ཀྱིས་ཆབ་ཤོག་ཕེབས་པའི་ལན་རི་བོ་རླུང་གིས་བསྒུལ་དཀའི་བདེན་གཏམ། (༡༦༥བ)
མ ཧཱ ཤུ ནྱཱ ཏཻ ཀ མུ དྲེ ནཻ ཀ ཏྲ ས རྦ དྷ རྨཻ རྨུ དྲི ཏ ཏུ ཡ དུ ད ཡ དྷ རྨ ཀཱ ཡ སྱཱ མཱ ཡཱ ཀུ རྦ ན ཧ ར ན རྟི ཀ ཤྲཱི བ ར ཧཱི སི དྡྷ ཏོ དྷ རྨི ཀ སྱ མཱུ རྦྷེ ཡ བྷུ ཥྩེ བྷ ཊྚ རཱ ཀ བྱཱ གྷྲ དེ ཤ ར ཏྣེ། ཨ དྷཱུ ར ཤུ བྷ སྱ པ ཀྵེ ྅ པི པ ཪྻ ནྟ། ཀ ལྤེ མེ ཀ རྡྷུ བུ དྡྷ དཱ ནཱ དི པ ར མི ཏཱ ནཱཾ ག ཎག ཉྫཱ མ ཧ ཏོ པ སཱ ཧྱཱ ན ནི མི ཏྟོ ད ཧ ར སྱ ཤྲཱི ཛྭ ལ ཏཱ རཱུ པཱ ནྱཱ བ བྷ ས མ ཏྲེ བྷཱ དྷཱ ཏ སྶུ ཁཾ། ཥ ཌྜ ཤཱ བ ཡ བ ཏོ བ ཙ ནེ ན ཀཱུ ལེ ནོ ཚེ དྱཾ ཛ གཱ ནཱ མི ཥ ཌ པཱུ རཾ། བི གནྡྷ ཛྙ ཤྩ ཀྵུ། སྟོང་ཆེན་ཕྱག་རྒྱ་གཅིག་གིས་ཆོས་ཀུན་ཅིག་ཅར་རྒྱས་བཏབ་སྟེ་གང་ཤར་ཆོས་སྐུའི་སྒྱུ་འཕྲུལ་དྲ་བའི་གར་མཁན་དཔལ་ཕག་མོ་གྲུ་པའི་རིང་ལུགས་པ་ཀུན་གྱི་གཙུག་ན་མངོན་པར་མཐོ་བ་རྗེ་བཙུན་སྟག་ལུང་རིན་པོ་ཆེར། རིང་མིན་གྱི་དགེ་བའི་ཆར་ཡང་མཐའ་སླས་པའི་བསྐལ་པར་ལན་གཅིག་མ་ཡིན་པར་གོམས་པའི་སྦྱིན་སོགས་ཕ་རོལ་དུ་ཕྱིན་པའི་ཚོགས་ཀྱི་ཕུང་པོ་ཆེན་པོས་ཉེ་བར་བསྒྲུབས་པའི་མཚན་དཔེའི་དཔལ་འབར་བའི་སྐུ་གཞན་སྣང་ཙམ་དུ་ཡང་ཟོ་མདོག་བདེ། ཡན་ལག་དྲུག་ཅུ་ལྡན་པའི་གསུང་གིས་རིས་སུ་མ་ཆད་པའི། (༡༦༦ན)
ནཱ བྷ བ ཤ ནྟ སྱ སཱ ན དྷ རྨ ན ས ཀ ལ ནོ རཱ ག ལྷ ན པ ཏི ཤྱ ཏི སཱ མ ན ཤྩ། བཾ ཤེ ཥ པ། ལོ རྡྷ དྷ ན དྷཱ པ ཀྵེ ཏི ཥྛ ཏཾ མ ནུ ཥྚ ནཱི ནཱ། གུ རུ བ ཀྲ བ ནྡྷོ སཱ མ ས ཙ ཏུ རྞཱཾ ཀ རྨ བ རྵ ས ར བ ད རྡྷ ནཱ། གདུལ་བྱ་རྣམས་ཀྱི་རེ་བ་སྐོང་། དྲི་བྲལ་མཁྱེན་པའི་སྤྱན་གྱིས་སྲིད་ཞིའི་གནས་ལུགས་མཐའ་དག་ཆགས་ཐོགས་མི་མངའ་བར་གཟིགས་ཏེ་སྤྱི་དང་། ཁྱད་པར་མདོ་སྟོད་ནོར་འཛིན་གྱི་ཆར་འཁོད་པའི་ཡིད་ཅན་རྣམས་ཀྱི་མགོན་དང་བརླིང་དང་དཔུང་གཉེན་དུ་བསྡུ་བ། དཱ ཛྙཱ ཀྵ བ ཙཻ ཏྱ ས ཧི ཏ ཡུ ཀྟེ ན མ ནོ ཧ ཏ ཀ བྷཱུ ཏཾ། ཨ སྨི ན པི ཏ ནྡྲོ བ རོ བཱ ཀ སྱ བ ད ནཱ ཏི ཤཱ ལྦཱ ན སྟི ཙ ཏྲི བ ལོ ནཱ རྦྷ དྭ ཧུ ཤུ ཤྲུ ཏེ ཙྪ སྱ དྷི ཡཱ ཝ རྞ ཀཱ ལ པུ སྟ ཀ སི ནྣ དྷི མ ཏྲེ ཏི ཥྛ ཏི། ཨུ པཔ ཀྵེ ཏ དྡེ ཤཽ ཤཱི། རྣམ་བཞིའི་འཕྲིན་ལས་དབྱར་མཚོ་ལྟར་འཕེལ་བ་ནས་བཀའ་ཐམ་རྟེན་ལྡན་ཕེབས་པ་ཡིད་ཀྱི་སྨན་ཡོན་དུ་གྱུར། འདི་ནའང་རྒྱུད་ཐོག་ཏུ་སྨིན་པའི་མྱོང་བ་རྔོ་ཐོགས་པ་ཅུང་ཟད་མ་མཆིས་ཀྱང་སྐོམ་པ་བ་ཚྭའི་ཆུ་བཞིན་མང་པོར་ཐོས་འདོད་ཀྱི་བློས་ཡིག་ནག་གི་དཔེ་གསོག། (༡༦༦བ)
མ ཏྤ། ལ ཀ སྱ ཤཱ ས ན ན ཤ བྲྀ དྡྷ ཏོ མ ཧོ རྨི ཀ ར སྱཱཾ ཤ མ ཏྲཱ དཱོ ས དྷ ན ཤྩ ཀཱ ལ སྱ དྷྲཱུ བོ གཏྲེ ཎ ཀྵ ཡ ཏོ ྅ བྷི པྲཱ ཡཱ ཤཱ བ བྷ ཙྪཱི ལ ཀཱ དྱཱ ས ཏྱ བྷཱུ ཏ པི། པུ རྦེ མ ཧཱ གི རཽ ཧ ཏོ ཀ ཏི བི ཛ ཧཱ རཱ སྟཱ དི རཱ ཛཱ ཙ། པ་ཙམ་དུ་གནས་ཉེ་ཆར་ཕྱོགས་དེར་དཔལ་ལྡན་ཐང་པའི་བསྟན་པ་ཉམས་གསོས་ཀྱི་རླབས་ཆེན་མཛད་པའི་ཆ་ཤས་ཙམ་ལས་མ་ཟིན་ཅིང་དུས་ཀྱི་ངེས་པ་ཞག་གིས་ཟད་པའི་དགོངས་པ་སོམ་ཉིར་གྱུར་ཚུལ་ཅི་སྟེ་མེད་པར་གྱུར་ནའང་། སྔ་སོར་རི་བོ་ཆེར་གཤེགས་ཤིང་ཇི་ཙམ་བཞུགས་ཆོག་པ་སོགས་རྒྱལ་པོ། ཀྵ ཏྲི ཡ དྭི བྷཱ ཏ ར མུ ཀྟཾ ཕ ལ ཏྭ མ སྨཱ ཏྶཱེ ཤ ན བྷཱུ ཏ དྷ རྨ དྷཱ ཏཽ བ ཀོ ཀྲྀ ཏ བ ཏྤུ རཱ པྱཱ མྤི ཏ དི ཙ སྠཱ བྷ རི ཏ། ཀུ རྦ ག མྦྷི ར ཀཱ ཤ ཧྲི ཏོ དྷཱ ཏཽ ཀོ ཀྲྀ ཏ སྱཱ ཀྵ དེ ཡ མེ ཧྱ བྷཱ ར གངྒཱ ཡཱཿ ན དཱི བ ཏྐུ རུ། དང་ཧོང་ཐའི་ཇི་མཆེད་གཉིས་ལ་མོལ་པའི་འབྲས་བུ་ལས་འདི་ནས་རང་དབང་དུ་གྱུར་པ་མ་ཡིན་པ་ཆོས་དབྱིངས་སུ་གཅགས་པ་བཞིན་ད་ལམ་གྱི་དུས་འགྱང་བ་སོགས་ཀྱང་གནས་ཚོད་དེ་ལྟར་དུ་གནང་བ་ཟབ་གསལ་ཐུགས་ཀྱི་གློང་དུ་གཅགས་པའི་བཀའ་གནང་ཕེབས་ཚོགས་གངྒཱའི་ཀླུང་ལྟར་ཞུ། རྟེན་གོས་ཡུག་དང་། (༡༦༧ན)
ཙེ ཏྱ པ ཊ མྦཱར ལ སྦྷ ས ཧཱི ཏཾ། བི ཤྭ བ སོ ཪྶ མྦ ཏྶ ར བི ཤ ཁ དི གྲ ཀྟ སྱ དྭི ཡ ཛ ཡཾ ད ཏྟཾ། བཅས། སྣ་ཚོགས་དབྱིག་གི་ལོ་ནམ་ཐོང་ཟླ་བའི་དམར་ཆའི་རྒྱལ་བ་གཉིས་པ་ལ་ཕུལ།རིག་བྱེད་པ་བློ་བཟང་ནོར་བུས། གོ་དགེ་པཀྴི་རྣམས་ལ་སྙན་ངག་བསླབས་ཚུལ་གྱི་འཕྲིན་ཡིག་བྱུང་བའི་ལན་ཚངས་དབང་དགོངས་པ་དཀང་བར་ཁེགས་སོ་བརྗོད་པའི་དབྱངས་སྙན། ཧཻ མ ནྱ ཀཱ ཤཾ མཱ ཧྱ གཪྦཱ གྣི ཡཱ ཏི མ ཉྫོ རྒྷོ ཥཱ དེ རཱ གམཻ རྐ རྨ ས བྟཱ ཤྭཻཿ སཽ ནཱི ཡཾ ཙཱ ཏུ རྦྷཱ བ ཤ ནྟ སྱ མུ རྡྷེ བྷཱ ནཱུ རྡྷ པྲ ཥྚཾ ཛྭཱ ལ རཱ བེ རི ཡཾ ཤྲཱུ ཏཾ། ཆེར་(སྡེབ་སྦྱོར་སྣ་ཚོགས་ལྷ་མོ།)རློམ་མེ་ཁྱེར་འཁྱུག་པ་གངས་ལྗོངས་མཁར། །འཇམ་དབྱངས་གོང་མའི་ལུང་ལས་རྟ་བདུན་པས། །ལེགས་དྲངས་སྲིད་ཞིའི་གཙུག་ན་མཐོ་བའི་འོད། །རབ་འབར་ཉིན་མོར་བྱེད་པའི་གཏམ་འདི་ཉོན། །རིག་བྱེད་སྦྱང་སྟོབས་བརྒྱ་བྱིན་གཙུག་ཏོར་རྩེ། །རེག་ཙམ་ཉིད་ནས་ཆེར་རྨོངས་མི་ལུས་ཀྱང་། །སྐད་ཅིག་མང་ཐོས་ལྷར་གྱུར་དཔྱོད་ལྡན་གྱི། །རབ་སྙན་ཕང་འགྲོའི་སྒྲ་འཁྲོལ་འཕྲིན་རྟེན་སོན། །སྐྱེ་མང་ཆོས་དཀར་ས་བོན་བཏབ་པ་ལས། །མངོན་མཐོའི་མྱུ་གུ་(༡༦༧བ)
དར་དྲག་སྡོང་བུའི་རྩེར། །ཡོན་ཏན་འབྲས་དུད་ཟུག་རྔུའི་སྐྱིན་ཐང་གིས། །གཞོམ་མེད་དབྱར་གྱི་ལང་ཚོ་བརྟས་ཏེ་སྤྲོ། །ཤེས་བྱར་སྲིད་པའི་ཆུ་བོ་གང་གི་བློའི། །ཛམྦུའི་སྙེ་མས་བཏུངས་པའི་ཕུང་པོ་རྣམས། །བརྡ་སྤྲོད་སྙན་ཚིག་ས་ཟླར་ཡོངས་སྨིན་ལས། །ལེགས་བཤད་གཏོང་བའི་སྒོ་བརྒྱ་འབྱེད་དེ་རྨད་། །འགྲོ་འདྲེན་ཕལ་ཆེར་བཟང་རྫུའི་མུན་ཁུང་དུ། །ཉལ་ཚེ་རིག་གཞུང་སྒྲོན་མེ་འདེགས་ཁྱོད་ལ། །བལྟ་ཕྱིར་ལྷ་དབང་འདྲེན་བྱེད་སྟོང་སྤྲུལ་བར། །དྲང་སྲོང་དམོད་པའི་ཟོལ་གྱི་མཐུ་ཡིས་བསྒྲིབས། །ཐ་སྙད་སྤྲོས་པ་མིག་སྒྱུའི་ཆོ་འཕྲུལ་དུ། །ཤེས་ནས་ནང་དོན་སཱི་ཏ་འཚོལ་འདོད་པས། །སྒྲིབ་གཉིས་འབོད་སྒྲོག་མགྲིན་གཅོད་ཉེར་བསྡོགས་ལ། །མོས་ཉིད་སྔ་ན་མེད་པའི་རཱ་མ་ཎ། །དགེ་སྡིག་སྤེལ་མར་གྲིབ་བཞིན་རྟག་འགྲོགས་གདུགས། །འགྲོ་ཀུན་བླ་ན་དལ་པ་མེད་འཁོར་ཀྱང་། །མངོན་སུམ་མཐོང་བའི་འཇའ་ལ་བྱིས་པ་ལྟར། །སོ་སོར་འབྱེད་པའི་རྣམ་དཔྱོད་མཐུ་ཕྲ་མང་། །ཚེ་རིང་གནམ་གྱི་ཤེ་མོང་དཔུང་པ་ཡི། །རྩོད་དུས་གསེར་གྱི་འཁོར་ལོས་ཡོངས་སྒྱུར་ལྷའི། །ལུང་གིས་ཐོས་དོན་ཆེད་འོངས་བློ་གསལ་རྣར། །ཉམས་འགྱུར་གླུ་དབྱངས་རྒྱུད་ལས་དྲངས་དེ་འཇེབས། །འཛམ་གླིང་ཡོངས་ཀྱི་བསོད་ནམས་གཟུགས་ཅན་བཞིན། །གྲུབ་པའི་འཇམ་དབྱངས་གོང་མ་དགྱེས་བསྐྱེད་ནས། །ལྷ་མིག་སྤྱན་རས་ཀྱིས་བཙའི་ཐབས་ཚུལ་ལ། །འབད་པ་བསྟན་འགྲོའི་བདེ་སྐྱིད་ངལ་གསོའི་སྟེགས། །རྣམ་བཀྲ་རིག་པ་དཔྱིད་ཀྱི་དཔལ་མོའི་མངལ། །སྦྲུམ་པའི་སྡེབས་ལེགས་ཨུཏྤལ་གསར་པའི་ཕྲེང་། །མགྲིན་པའི་པད་མཚོར་བསྐྱེད་པའི་ཆུན་པོ་ཡི། །དོ་ཤལ་སྐེ་འཛིན་རྒྱན་དུ་(༡༦༨ན)
བརྒྱུད་མར་སྤེལ། །ཉི་ཟླའི་སྒྲོན་མེ་ཐོགས་ཏེ་ལྷུན་པོའི་སྤོར། །འཛེགས་ནས་མྱུལ་ཡང་ཤོང་དཔང་རྗེས་ཞུགས་ས། །རྙེད་དཀའི་དུས་འདིར་ཁྱོད་ལ་ཡི་རང་བློ། །རབ་དཀར་ཐགས་ཀྱི་དུ་ཀཱུ་ལ་འདིས་མཚོན། །ཤིང་སྦྲུལ་ལོ་གོང་ནས་གདུགས་དཀར་ལྷ་ཁང་གི་སྐུ་གཉེར་སྦྱོར་རྒྱ་ཆོས་རྗེ་དང་། ཆ་དཀར་དར་རྒན་ཆོས་རྗེའི་དབོན་པོ་གཉིས་ཀ་གསེར་ཡིག་ཏུ་མངགས་ཏེ། བཀའ་ཤོག་འཕྲིན་ཡིག་ནང་སྤྱན་བཟང་པོ་དང་བཅས་ཕེབས་པའི་ལན་འབུལ་བར། སྟར་སྡོང་དཀའ་བཅུ་བློ་བཟང་རབ་བརྟན་དང་། ལྷོ་ངོས་རྒྱབ་པ་གཉིས་རྫོང་སྟ་བྱས་སྐབས་ཕུལ་བའི་ཞུ་ཡིག་གནམ་སའི་བདག་པོར་ངེས་བརྗོད་གང་འགྲོའི་སྒྲ་དབྱངས། ཙ ཏུ རྡྭཱི པ ཀཱ ལེ ཡུ གེ ཙ ཀྲ བ རྟེ ཪྶུ རཾ ཀ ལྤི ཏཱ པྲེ ཥི ཏཱ རཱ ཛྱ མཱ སེ། བི ཙེ རྣཱ། ཤུ དྡྷ སྱ ཙ ཀྛེ ཏྲ སཻ དྡྷྱཱ ག ཏཾ ཤྲཱི མ ཏཱ དེ རྨ ཧ ཏྤ མཱུ ལེ། གླིང་(སྡེབ་སྦྱོར་ལག་འགྲོ་ལྟུང་བ།)བཞིར་རྩོད་དུས་འཁོར་ལོས་སྒྱུར་བའི་ལྷར། །བསམས་བཞིན་མང་པོས་བཀུར་བའི་རྒྱལ་ཁབ་ཁྲིར། །འཇམ་དགོན་དག་ཞིང་ཐེམ་སྐས་ལས་བྱོན་པ། །དཔལ་ལྡན་གོང་མ་ཆེན་པོའི་ཞབས་དྲུང་དུ། །(༡༦༨བ)
གཅམ་བུས་སྙན་པར་སྒྲོ་བཏགས་ཆེན་པོའི་མིང་། །མ་ཡིན་ངེས་པར་གནམ་ས་བར་མེད་པ། །བཀའ་འབངས་སྒྱུར་ལ་ཡིད་ཆེས་དང་བའི་སེམས། །དབང་རྣོན་ཆོས་ཀྱི་རྗེས་སུ་འབྲངས་ཏེ་ཞུ། །དམ་པའི་ངང་ཚུལ་འཕེལ་འགྲིབ་མེད་ཞལ་ཟླ། །རྟག་ཏུ་དགྱེས་པའི་ཆ་ཤས་ཉ་གང་ལས། །བཀའ་ཤོག་རྟེན་ལྡན་ག་པུར་གཟེགས་མ་འབུམ། །འཕྲོས་ཚེ་སྙིང་གི་ཀུནྡ་ཁོང་ནས་བཞད། །མངོན་སུམ་ས་ལ་རྒྱུ་བའི་བསོད་ནམས་གཟུགས། །ངོ་མཚར་མཚན་དཔེའི་དཔལ་འབར་སྐུའི་སྣང་བརྙན། །གཞོམ་མེད་རྡོ་རྗེའི་ངོ་བོར་ལྷུན་གྲུབ་པ། །ཡིད་ཅན་ཡོངས་ཀྱི་ཕན་བདེའི་རྩ་ལག་བཞིན། །འདི་ན་ཤཱཀྱའི་རྗེས་ཞུགས་སྡོམ་བརྩོན་བདག །ལྷ་ཁྱེད་བཀའ་དྲིན་གྲིབ་བསིལ་ལ་བརྟེན་ངོས། །འགྲོ་ལ་ཆེས་དཀར་བསམ་པ་སྟོན་ཟླ་ལྟར། །གསལ་བའི་ཚུལ་ལ་གཅིག་ཏུ་ཡིད་དམ་བཅའ། །དགེ་ལེགས་ཆུ་གཏེར་འཇིངས་ཟབ་རྒྱ་ཆེ་ཡངས། །གནམ་བསྐོས་རྒྱལ་པོའི་མཚན་ཉིད་རོ་བརྒྱ་བྲོ། །ཡོན་ཏན་ཟད་མི་ཤེས་པའི་གཏེར་ཆེན་པོས། །ང་ལས་ནུ་དེ་གང་ག་དཔེ་ཟླ་བཞིན། །ཚངས་པའི་དབྱངས་ལྡན་བཀའ་མཆིད་ཕང་འགྲོའི་སྒྲ། །རྩ་བའི་བཅུད་དུ་བླངས་ཚེ་གདུང་བའི་ཚོགས། །རབ་བཅིལ་སྙིང་ལ་སིམ་པའི་རེག་བྱ་འདི། །བསྙེན་སྲིད་མེད་ཁྱབ་ལྷ་གཅིག་མཛད་པའི་གཤིས། །བཀའ་དྲིན་དྲན་པའི་ལྷག་བསམ་གངྒཱའི་ཡབ། །ཆེས་དཀར་སྙིང་གི་དབུས་སུ་བག་ཞ་བ། །སྒྲིབ་བྲལ་མཁྱེན་པས་གཞལ་བའི་ངང་ཚུལ་འདིས། ཁྱེད་ཀྱིས་ཤེས་བྱ་ཐམས་ཅད་མངོན་སུམ་གཟིགས། །བརླང་སྤྱོད་ཕྱོགས་སུ་བློ་ལྷུང་བདུད་ཀྱི་སྡེ། །ཀུན་ལས་རྣམ་རྒྱལ་བདེན་པའི་སྤྲིང་ཡིག་བཀའ། །ནོར་འཛིན་ལྟོ་བར་གནས་སོ་ཅོག་ཀུན་གྱི། །གཙུག་ཏོར་རྩེ་མོར་རི་བོ་བཞིན་དུ་བརྗིད། །ཡབ་གཅིག་སྐྱེ་རྒུའི་བདག་པོས་འཇིག་རྟེན་ཁམས། །མི་བདག་སྐལ་བར་སྦྱིན་པའི་དབང་ཐང་ལས། །སྣོད་བཅུད་ཡོངས་ཀྱི་དངོས་ཀུན་རྫོགས་ལྡན་དུས། །གནས་འགྱུར་ཕུན་ཚོགས་དགའ་སྟོན་འདི་ངོ་མཚར། །སྐྱེ་རྒ་ན་འཆིའི་གཉིས་འཛིན་འཆིང་རྒྱ་ལས། །རྣམ་(༡༦༩ན)
གྲོལ་འཇམ་དབྱངས་མི་ཡི་གཟུགས་འཛིན་ཉིད། །གཞན་སྣང་ཙམ་དུ་གསེར་འབྲུག་སྡེར་ལྔ་པས། །བཏེག་པའི་ཁྲི་ལ་བསྐལ་བརྒྱར་ཞབས་བརྟན་ཤོག །གོང་གི་འདུན་ས་ཆེ་ནས་གངས་ཅན་བར། །ས་ཡི་བསྐལ་པས་རིང་ཡང་གཉེན་གཤིན་ཐུགས། །བརྩེ་བས་རྟག་ཏུ་མི་བསྐྱུད་བཀའ་གནང་ཚོགས། །ཡན་ལག་བརྒྱད་ལྡན་རྒྱུན་བཞིན་འཛད་མེད་ཞུ། །དང་བའི་ཡིད་ལྡན་ལུས་བཏུད་སྤོས་བསྲེགས་ནས། །ཞུ་མཆིད་མདོངས་གསལ་བདོག་པའི་སྐྱེས་ཕུལ་བར། །གནམ་སའི་དབང་ཕྱུག་སྤྱན་རས་ཀྱིས་བཙའ་བའི། །ཡིད་ལ་ཀུན་ཏུ་དགའ་བའི་མཆོག་སྦྱིན་སྩོལ། །ཁྲོ་བུ་སློབ་དཔོན་ངག་དབང་བསྟན་འཛིན་དབང་པོ་ཟུར་པ་ཐོག་ཐུབ་མའི་རྟེན་དང་བཅས་བྱུང་བའི་སྙན་ཚིག་གི་ལན་རང་གྲིབ་གྲོགས་སུ་འཛིན་པའི་ཚུལ་ལྷག་པར་བརྗོད་པ། དྲྀ ཥྚེ ཎ བི མུ ཀྟ ཛཱ ཡ ཀཱ ཡ སྶཱ མཾ སཾ སྐྲྀ ཏ ཚ ནྡ རཱ། ཀེ ན། མ དྷྱེ ཀ དི ག ཏྲ ཧཻ མ ནཱི དྭི དྭཾ ཏྭཾ བྲཱ ཧྨ ཎི བཱི ཎི ཛ ལྦ ཡ ཀ ཎྛེ། མཐོང་(སྡེབ་སྦྱོར་བྱེད་མཉམ་པའི་བྲྀཏྟ་ལས་བཟང་པོའི་སྣང་བ།)བས་རྣམ་པར་གྲོལ་བ་རྒྱལ་བའི་སྐུ། །སྙན་ཚིག་ལེགས་སྦྱར་སྡེབ་སྦྱོར་ཤིང་རྟ་ཡིས། །དབུས་འགྱུར་ཁ་བའི་ལྗོངས་འདིར་འདྲེན་མཁས་ཁྱོད། །མགྲིན་པར་དབྱངས་ཅན་རྒྱུད་མངས་འཁྲོལ་བ་བཞིན། །(༡༦༩བ)
མི་ཡི་ཤ་ཚུགས་བ་ལང་ལྟར་རྨོངས་པ། །མ་ཡིན་གཙུག་ལག་བྱེ་བའི་ཆ་ཤས་ཉ། །ཡོངས་གང་དལ་བའི་རྟེན་བཟང་ཀུནྡའི་གཉེན། །ཉེས་བརྒྱའི་སྤྲིན་ཚོགས་དང་བྲལ་གཏམ་དེ་སྙན། །འདི་ན་གལ་ཆུང་ཆོས་སུ་ཉེར་བྱས་ཏེ། །སྲིད་འབྱོར་ལྷུར་ལེན་བླ་ཆེན་གྲལ་ཚུད་ཀྱང་། །ཐོས་བསམ་སྐྱ་རེངས་ཀྱིས་དྲངས་བསྐྱེད་རྫོགས་ལམ། །རྡོ་རྗེའི་རྣལ་འབྱོར་ཉི་འོད་མི་དམན་ཙམ། །དེང་དུས་འགོག་པའི་བརྟུལ་ཞུགས་ལྟར་བཅོས་ནས། །མི་ཚེ་སྟོང་པར་ཡོལ་བའི་ནགས་ཀླུང་ཁྲོད། །མང་ཐོས་ལོ་འབྲས་གཡུར་ཟའི་ཡོངས་འདུ་གང་། །རང་གི་གྲིབ་མ་ཙམ་ལ་གྲོགས་སུ་འཛིན། །རྨོངས་ཆེན་གླང་པོའི་མཆེ་བ་ཉེར་ཕྱུང་སྟེ། །ལེགས་སྦྱར་ཆ་བསགས་སྒྲོ་ལྡན་མདོངས་མཐའ་ལ། །ཞོན་ནས་མཁས་མང་འཆི་མེད་གྲལ་སྙེག་པའི། །ན་གཞོན་བློ་རྒན་གདོང་དྲུག་ཁྱོད་མིན་སུ། །དག་པའི་ལྷ་ཡི་མིག་དབང་ཉེར་བསྒྲུབས་ནས། །སྲིད་གསུམ་ཕྲ་རགས་འཇལ་བའི་ཀུན་རྟོག་བློར། །གནས་ཀྱང་སྒྲ་དོན་སྙན་ངག་སྨྲ་བ་ལ། །གང་གི་དཔེ་ཟླར་འོས་པ་ངས་མ་རྙེད། །ཤེས་བྱ་ནམ་མཁའི་མཐའ་དེ་བློ་གྲོས་བྱའི། །རྣམ་དཔྱོད་གཤོག་རླབས་ཟད་མིན་བར་མྱུལ་ཡང་། །རྟོགས་པའི་སྦལ་པ་ཕྲ་འདི་ཀུན་རྫོབ་ཆོས། །རྣམ་རྟོག་ཆུ་གཉེར་ལྟ་བུའི་གཤིས་ལུགས་སྐྱོན། །དོན་དམ་སྟོང་ཆེན་གཅིག་གིས་རྒྱས་འདེབས་གྲུས། །སྲིད་ཞིའི་ཆུ་གཏེར་བརྒལ་འདོད་ཆེས་མང་བ། །ཕྱིན་དྲུག་སྤྱོད་པའི་སྐྱེ་བ་མི་ལྡན་ན། །དམན་ལམ་གློང་དུ་བསྐལ་པར་འཁོར་གྱི་དོགས། །ཆོས་བརྒྱད་སྙིང་ལ་ཞེན་པའི་ཚུལ་འཆོས་ཀྱི། །འཕྱོན་མའི་ཟློས་གར་སྤངས་པ་མི་ལ་རྗེའི། །རྣམ་ཐར་བཟུང་ན་སྔོན་བྱོན་གྲུབ་རིས་ཀྱི། །ཡང་དག་བསྟན་པའི་བགྲང་བྱར་ཅི་མི་འོས། །གཉེན་གཤིན་(༡༧༠ན)
ཡིད་ཀྱི་གངས་ཅན་ལས་འོངས་པ། །ལེགས་བཤད་འཕྲིན་ཡིག་ཡན་ལག་བརྒྱད་ལྡན་ཆུ། །མགྲིན་པའི་འཁོར་ལོ་གྲོལ་བའི་ལམ་གསུམ་ལས། །འབབ་པའི་རླབས་འཕྲེང་ནམ་ཡང་ཡོལ་མེད་ཤིས། །རབ་མཛེས་དུ་ཀཱུ་ལ་ཡི་རེ་ཁཱ་ཅན། །རབ་དཀར་ལྷག་བསམ་མི་སྒྲིབ་གོས་ཙམ་སྟེ། །རབ་ཡངས་བློ་གྲོས་ལྡན་པའི་མཁས་རྣམས་ལ། །རབ་འབྱམས་ལེགས་བཤད་ཕང་འགྲོའི་སྒྲ་དབྱངས་སྙན། །
རབ་བྱུང་བཅུ་གཅིག་པའི་མེ་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག །མེ་རྟ་སྡིངས་པོ་ཆེ་སྤྲུལ་སྐུ་ངག་དབང་སྙན་གྲགས་བཟང་པོས། གནམ་ལོ་གསར་ཚེས་ཀྱི་ལེགས་སྐྱེས་འཕྲིན་ཡིག་བྱུང་བའི་ལན། སྒྲུབ་པའི་དམ་བཅའ་ཕ་རོལ་དུ་ཕྱིན་པར་བསྔགས་པ། པྲཱ ར ཀྟ རོ མ རུ ཙི བྷ རྵ ཧ ཡཱ ཎ མ ངྒ ལྱཾ ཤྲེ ཡེ ཅི ཧྞ ཅ ས མུ དྲི ཀ པཱུ ལ ལ གྷྱ། ཙཱ ཏུ རྠ སེ ན ན བ དྷཱ བ ཙ ལེ ན སཽ ཧི ཏྱཾ བྷཱུ ཏྶ སུ ཥྚ ཙ ར ཎཱ དི ཅ ན ནྡ ཀོ ཏྶ། རབ་(སྡེབ་སྦྱོར་དཔྱིད་ཀྱི་ཐིག་ལེ།)དམར་སྤུ་སྡུག་ལྡན་པ་གནམ་ལོའི་རྟ། །བཀྲ་ཤིས་དགེ་མཚན་རྒྱ་མཚོའི་སྒ་སྲབ་ཅན། །སྡེ་བཞིའི་གསར་འགྲོས་བང་གིས་ཕན་བདེའི་སར། །དཀྱུས་ཐོག་གཅོད་པའི་ཐོག་མའི་དགའ་སྟོན་ཚེ། །(༡༧༠བ)
ངག་ལ་ཚངས་དབང་སྲས་མོ་ཉེར་ཞུགས་པ། །སྙན་གྲགས་ཕྱོགས་ཀྱི་མཐར་ཁྱབ་དཔྱོད་ལྡན་གྱི། །མགྲིན་པ་ལོངས་སྤྱོད་འཁོར་ལོའི་པི་ཝང་ལས། །ཉམས་དང་འགྱུར་བའི་རྒྱུད་མངས་འཁྲོལ་ཏེ་སོན། །རྟག་ཏུ་གསོང་པོར་སྨྲ་བའི་མཐུ་བརྟས་པ། །བདེན་ཚིག་གྲུབ་པའི་ཤིས་བརྗོད་འཕྲེང་བ་དང་། །ལྷན་ཅིག་བདོག་པའི་སྐྱེས་ཀྱི་མུ་ཏིག་ཆར། །འབབ་པའི་འཁྲི་ཤིང་གཉིས་པ་མངོན་སུམ་བཞིན། །སྐྱེ་བར་ཕྱིན་དྲུག་སྤྱོད་པའི་རྒྱ་མཚོ་ཆེ། །སྨོན་ལམ་རི་དབང་སྒྲིལ་ལས་རབ་འཐོན་པ། །འདུ་ཕུང་ཡོངས་འདུའི་མཆེད་ཟླ་གྲུབ་རིས་ཀྱི། །བསྟན་པའི་ནམ་མཁར་ཆ་ཐུན་གང་འདི་མཛེས། །འདི་ན་འགྲོ་ཀུན་བདེ་སྐྱིད་རྒྱལ་བསྟན་དུ། །ངེས་ནས་མི་ནུབ་སྤེལ་ཕྱིར་ཐོས་བསམ་སྒོམ། །བསྒྲུབ་འདོད་བརྩོན་པའི་ཤུགས་ལྡན་རང་གི་སེམས། །ཟླ་འོད་སྟོང་གིས་འཁྱུད་པའི་གངས་རི་བཞིན། ཁྱོད་བློ་ཡངས་པའི་མིག་རྒྱང་རིང་པོ་ཡིས། །གནས་ལྔ་རིག་པའི་ཕ་མཐའ་ཡོངས་གཞལ་བས། །འཕགས་ཡུལ་ཙནྡྲ་གོ་མིའི་རྣམ་པར་ཐར། །ལྗོངས་འདིའི་འགྲོ་ལ་མངོན་སུམ་སྟོན་པ་བཞིན། །སྔོན་བྱུང་གྲུབ་པའི་རིང་ལུགས་ལྗོན་པའི་ཚལ། །རྩོད་དུས་རླུང་གིས་སྦར་བའི་ཆགས་སྡང་མེས། །བསྲེགས་པའི་སྡོང་དུམ་ཚངས་པའི་ཡུལ་ས་ལས། །བརྒལ་བར་རྩོམ་འདི་སྙིགས་མའི་རང་མཚང་སྐྱོན། །ཉོན་མོངས་ནད་ཀུན་གསོ་བྱེད་སྨན་གྱི་བླ། །ཕག་གྲུའི་ཐུགས་རྗེས་གང་གི་སྙིང་དབུས་སུ། །སིམ་པས་སྙིང་པོ་གྲུབ་པའི་རྒྱལ་མཚན་རྐང་། །འཛིན་པའི་དམ་བཅའི་ཕ་རོལ་ཕྱིན་ནམ་སྙམ། །འོན་ཏེ་དུས་ངན་གདུལ་བྱ་ཐ་རྒོད་སར། །ངེས་དོན་ས་བོན་ཕལ་ཆེར་ཆུད་གཟོན་རྒྱུ། །མི་ཟད་ཚིག་གི་གཏེར་ལ་མཐའ་མེད་ཀྱང་། །ཐོས་པས་ངོམས་མེད་ཤེས་ལྡན་སྤྱི་ཡི་ལུགས། །མཁས་ཁྱོད་འཛུམ་པའི་གཡར་ངོ་ལས་སྐྱུགས་ཀུན། །ལེགས་བཤད་རོ་བརྒྱ་བདའ་བའི་ཕུང་པོ་སྟེ། །སླད་མར་འཛད་མེད་(༡༧༡ན)
གནམ་ལོ་བཟེད་ཞལ་དུ། །རྟག་པར་འཁྱིལ་བའི་དགའ་སྟོན་ལྷུར་བྱོས་ཤིག །མོལ་མཆིད་འཕྲིན་ཡིག་དྲི་ཟའི་གར་མཁན་ཅན། །བཀྲ་ཤིས་རེ་ཁ་ཐགས་རིས་རབ་བཀྲའི་གོས། །མནབས་ཏེ་ཐུན་མཚམས་རྟགས་ཀྱི་དགའ་མ་ཡིས། །འཁྱུད་པའི་རྩེ་དགའ་ཁོང་ནས་དགོད་འདིའོ། །མེ་རྟ་བསམ་ཡས་ནས་བསྟན་སྲུངས་གནོད་སྦྱིན་ཆེན་པོས། མགོ་བརྙན་ཅན་གྱི་རྒྱལ་མཚན་གསར་དུ་བཟོ་བཞེང་གི་སྟ་གོན་སྐབས། རྒྱལ་མཚན་གྱི་ཁྲར་འོས་པའི་གོས་ཕྱིར་བསྲིངས་དགོས་ཚུལ་གྱི་གསུང་འཕྲིན་མཆོད་དཔོན་བློ་བཟང་མཐུ་སྟོབས་ལ་བསྐུར་བ་ལྟར། འཕྱོང་རྒྱས་ལྕང་གླིང་པ་བསོད་ནམས་དབང་པོ་འཕུལ་བར་བཏང་སྐབས་ཀྱི་འཕྲིན་གསོལ་གནོད་སྦྱིན་དགྱེས་ཞལ་རབ་འཛུམ། མཐུ་སྟོབས་གནམ་ལྕགས་རྡོ་རྗེ་ཡིས། །དགྲ་བགེགས་བྲག་རི་ཕྱེར་འཐག་ཀྱང་། །སྒྲུབ་པོའི་རེ་བ་སྐོང་བ་ལ། །ཡིད་བཞིན་ནོར་བུ་དབང་གི་རྒྱལ། །བསྟན་སྲུངས་གནོད་སྦྱིན་ཆེན་པོ་ཞེས། །དྲེགས་པ་ཀུན་གྱི་དབང་ཕྱུག་ཆེའི། །རྡོ་རྗེའི་གསུང་ཤོག་ཐུན་འཚམས་ཀྱི། །ཕྱག་རྒྱའི་ལང་ཚོའི་སྤྲོས་པ་འབྱོར། །དུས་གསུམ་སངས་རྒྱས་མ་ལུས་པའི། །བདག་ཉིད་པདྨ་འབྱུང་གནས་ཀྱི། །སྤྱན་སྔར་ཞལ་བཞེས་གཡར་དམ་ལས། །ནམ་ཡང་གཡོ་བ་མེད་པའི་ཕྱིར། །བླང་དང་དོར་བྱའི་གནས་རྣམས་ཀུན། །མངོན་སུམ་གཟིགས་པའི་སྤྱན་རས་ཀྱིས། །བསྟན་ལ་ཡིད་སྤྲོས་བརྗེད་མེད་དུ། །ཇི་བཞིན་བསྒྲུབ་པའི་འདུན་སར་གནས། ཁ་དོག་སྣ་ལྔའི་གོས་ཡུག་དང་། །ཤམ་བུར་འོས་པའི་དར་ཡུག་གསུམ། །སྔགས་དང་ཕྱག་རྒྱས་འཛད་མེད་ཀྱི། །ནམ་མཁའ་མཛོད་དུ་སྤྲུལ་ནས་འབུལ། །གངས་ཅན་བསྟན་འགྲོའི་བདེ་སྐྱིད་དང་། །ས་དབང་རྒྱལ་པོའི་མངའ་ཐང་སྤེལ། །རིགས་འཛིན་བདག་གི་བསམས་པའི་དོན། །ལྷུན་གྱིས་གྲུབ་པར་མཛོད་ཅིག་ཀྱེ། །སྙན་ཤལ་དར་དཀར་ཟུང་འབྲེལ་དང་། །ས་ཡི་ཟླ་བ་ཞོ་བཞིར་བཅས། །བོད་ཡུལ་དབུས་ཀྱི་རྡོ་རྗེ་གདན། །(༡༧༡བ)
ཕོ་བྲང་པོ་ཏ་ལ་ནས་བྲིས། །འབྲི་གུང་ཀ་ཚལ་བླ་མ་དཀོན་ཅོག་ལྷུན་གྲུབ་བཅས་གསང་ཆེན་སྙིང་མར་གསལ་ཤིང་གྲུབ་བརྙེས་དེས་འཕྲིན་ཡིག་བྱུང་བའི་ལན་ཐེག་མཆོག་བདུད་རྩིས་མྱོས་པའི་མི་ཤིགས་སྲོག་གི་ཀ་བ། སཻ ངྒ ལ བཱ ཧཱུ ཏྤཱ ལི རྡོ ལོ ཙྪ ཡཡཛྙཱ ཁ ཌྒ ཀེ ས རཱ ཏེ།བྷ བ ཤི བ ཡཱ ཛ ཊ ཧཱ རཱཿ ཙྪེ ད ན ཀ དྷི ཥྛཱ ན ཡུ ཥྨ ང སཱི། དམར་(སྡེབ་སྦྱོར་འཕགས་མ།)སེར་དཔུང་པས་བཏེག་པའི་ཨུཏྤ་ལའི། །གེ་སར་ནས་གདེངས་མཁྱེན་པའི་རལ་གྲི་ཡིས། །སྲིད་ཞི་ཀུན་ཏུ་རྨོངས་ཆེན་དྲ་བ་རྣམས། །གཅོད་མཛད་འཇམ་དཔལ་རྡོ་རྗེས་ཁྱོད་བྱིན་རློབས། །གཙུག་ལག་མང་པོར་ལྟ་བའི་བློ་གྲོས་མིག །ནམ་མཁའི་ཕ་མཐའ་འཚོལ་བ་བཞིན་བགྲངས་ཀྱང་། །ཐེག་ཀུན་རྩེ་མོར་སོན་པ་རྫོགས་པ་ཆེའི། །རྣལ་འབྱོར་མཆོག་ལ་གཞོལ་དེའི་འཕྲིན་རྟེན་སོན། །སྐྱེ་མང་ཉེར་གོམས་ལེགས་བྱས་ས་བོན་ཚོགས། །དར་དྲག་ཡོངས་སྨིན་(༡༧༢ན)
རྟེན་བཟང་ཡོངས་འདུའི་ལྗོན། །ལང་ཚོའི་ཡལ་འདབ་ཕང་ཕུང་གཡོ་བའི་རྩེར། །ཐོས་བསམ་སྒོམ་པའི་འབྲས་བུ་དུད་དེ་སྤྲོ། །འདི་ན་སྦྲང་མའི་སྦྲང་རྩི་ལྟར་བསགས་ཆོས། ཁ་བཤད་རང་རྒྱུད་དྲེགས་པོར་ལུས་བཞིན་དུ། །གཞན་སྨིན་འགྲོ་ཕན་ལ་རྫུའི་སླུ་བྲིད་མར། ཁྲེལ་ཡང་ཉེར་འཇུག་སྨྱོན་པའི་ཟློས་གར་བཞིན། །ཟབ་གསང་ཆུས་གང་བཤེས་གཉེན་ཁྲོན་པ་ཡིས། །རྗེས་སུ་བསྙེགས་ཀྱང་ཕྱོགས་དེའི་ཡིད་ཅན་ཕལ། །འཐུང་འདོད་སེམས་ཀྱི་གདུང་བ་རྟ་རྔའི་ཆ། །བརྒྱ་ཕྲག་གཤགས་པའི་ཚད་བཞིན་རྣམ་པར་ཕྲ། །འོན་ཏེ་ཆེས་རྨོངས་སྐྱེ་རྒུ་སྦྱིན་སྐྱེས་དབུས། །གསར་རྙིང་གདམས་པའི་བདུད་རྩི་རབ་བཏུངས་ནས། །ངེས་ལེགས་སྲོག་གི་ཟུངས་ཐོབ་དཔྱོད་ལྡན་ཁྱོད། །ལྗོངས་འདིའི་ལྷ་མིན་དབང་པོ་སྒྲ་གཅན་བཞིན། །ཆོས་ཀུན་ཡེ་ནས་དག་པའི་མཁའ་དབྱིངས་ངོས། །སྣང་བཞིའི་འཇའ་ཚོན་རང་རིག་རྡོ་རྗེ་སེམས། །མངོན་སུམ་རང་ངོ་འཕྲོད་ལས་སངས་རྒྱས་པ། །གུད་ནས་འཚོལ་བར་བྱེད་རྣམས་བྱིས་པའི་བློ། །མ་དག་འདོད་པའི་ཁམས་ན་རྣམ་སྨིན་ལུས། །གནས་བཞིན་ལོངས་སྐུའི་ཞིང་ཁམས་མྱུལ་ནུས་པ། །པད་འབྱུང་དྲི་མེད་བཤེས་གཉེན་སྙིང་ཐིག་ལམ། །ཉམས་བསྟར་དལ་འབྱོར་ཐོབ་འཚེངས་འདི་ཀོ་མཚར། །དཀར་པོའི་བ་གམ་མཐོར་བརྩེགས་ལའང་ཁྱབ། །ཡིད་སྲུབས་ཆོ་ག་རྫོགས་པ་དགྲ་བགེགས་གཤེད། །ནག་པོ་མངོན་སྤྱོད་ལྕགས་རིའི་ཁོར་ཡུག་ནས། །དྲག་སྔགས་དམོད་པའི་མཚོན་ཆར་འབེབས་ཏེ་འཇེབས། །སྔོན་བྱུང་འཇམ་ཡིག་འཁྲུལ་པའི་རི་དྭགས་རྗེས། །བསྙེགས་ནས་མཁས་གྲགས་སཱི་ཏ་འཚོལ་འདོད་པ། །མི་བསྐྱོད་ནག་པོའི་ཅོད་པན་འཆང་བ་སོགས། །མང་ཞིག་ཆོས་སྤོང་མྱ་ངམ་ཐང་ལ་འཁྱམས། །དེ་ཕྱིར་རང་བཟོ་ཆོས་ལྟར་བཅོས་སྟོན་(༡༧༢བ)
མཁན། །ལྟར་སྣང་བཤེས་གཉེན་མ་ཡིན་མུ་ཏིག་བཙན། །རིམ་བརྒྱུད་རཏྣ་སླར་བྱོན་ཆོས་ཀྱི་གྲགས། །བསྟེན་གང་བསོད་ནམས་བརྒྱ་ཕྲག་བསྐལ་པར་བསྒྲུབས། །ད་སྟེ་སྔོན་ཐོས་བསགས་པ་དོན་ལྡན་ཆེད། །སྒྲུབ་སྡེ་བརྒྱད་དང་བྱེ་བྲག་ཟིལ་གནོན་སོགས། །ཡི་དམ་ཆོས་སྲུངས་བསྙེན་སྒྲུབ་མཆོད་བསྟོད་དང་། །བདག་གཞན་བསྟན་པའི་དོན་པོར་ལས་ཀུན་རྩོམས། །ཀ་དག་སྣང་བཞིའི་བོགས་དབྱུང་དྷཱུ་ཏཱིའི་ལམ། །རྡུལ་དཀར་འབར་འཛག་མི་ཤིགས་འཁོར་ལོའི་ཁྱོན། །ཡོངས་གང་ལྷན་སྐྱེས་བདེ་ཆེན་གདོད་མའི་ཞལ། །ལྟ་བའི་རྣལ་འབྱོར་ལ་གཡུར་སྐལ་བཟང་དཔྱིད། །ཕྲ་ཞིབ་གཅོད་ཚེ་རྟོག་གེའི་ཐ་སྙད་ལ། །གོམས་པར་རིགས་མེད་ཨ་འཐས་འཁོར་བའི་རྒྱུ། །རྣལ་འབྱོར་མཆོག་གི་མ་དྲོས་ཀླུང་ཆེན་ལས། །གོང་འཕེལ་ཉམས་རྟོགས་སྐུ་བཞིའི་རྒྱ་མཚོར་འབབ། །བླང་དོར་རང་ཉམས་བསྟར་མི་ནུས་བཞིན་དུ། །གཞན་སྦྱོར་སྨྲ་བ་དམ་པའི་ཚུལ་མིན་ཀྱང་། །སྤོབས་པ་དགེ་བའི་མགྲིན་ལས་ལེགས་བཤད་ཀྱི། །རྒྱུད་མངས་གླུ་རུ་ལེན་ལ་ཟད་མཐའ་ཅི། །ཡིད་ཀྱི་ཀུནྡ་བཞད་ནུས་མཆིད་འཕྲིན་ཟླ། །རིགས་འཛིན་གདུང་གསོབ་ཁྱོད་བློའི་གསེར་རི་ནས། །རྟག་འཆར་ཛཧྣུ་ཡི་བུ་མོའི་འགྲོས། །ལམ་གསུམ་བགྲོད་པའི་རྗེས་སུ་རྐང་འཇོག་རིགས། །ཤོག་བུའི་ར་བར་ཡི་གེའི་ཟློས་གར་མཁན། །ཉམས་འགྱུར་མགྲིན་པའི་དྲིལ་འཁྲོལ་གཡོན་མིག་མའི། །གོས་བཟང་དུ་ཀཱུ་ལ་ཡི་ཁ་རྫར་ཅན། །རབ་དཀར་ལྷག་བསམ་ཁ་དོག་མཚོན་འདིའོ། །དབུ་རུ་སྐ་བཙལ་གྱི་བླ་མ་རིག་སྔགས་འཆང་བ་དཀོན་ཅོག་ལྷུན་གྲུབ་ཀྱིས་སྙན་ངག་གི་འཕྲིན་ཡིག་བྱུང་བའི་ལན་འཇམ་མགོན་སྙིང་ལ་ཞུགས་པའི་བདེན་གཏམ།(༡༧༣ན)
ཡོ ག རྻཱ ནཽ ཏྟ མྱི ཀ ཨ ཪྠཱ བ ཏུ པཱ པི རྦྷཱ བ ནྱཱ ཚཱ ཀཱ ཤ ཙ ཏུ རྡཱི བྷི ཏི མ རྒ། ཕུ ལླ རྫ མྦོ མྦ རྴོ ར ར བ ཧཱུཾ ད དྷྱ སུ བ ཙྱཱ ཝ རྞ ཤྲེ ཏཻཿ མ ཉྫ ནི ཀི བྷོ ཏ ཙ ཀཱ བི། དོན་(སྡེབ་སྦྱོར་རྨ་བྱ་མྱོས་པ།)ལྡན་ཐེག་པ་མཆོག་གི་རྣལ་འབྱོར་གྱིས། །འོད་གསལ་སྣང་བཞིའི་ལམ་ལ་ཉེར་གོམས་ཀྱང་། །མང་ཐོས་རྒྱ་མཚོར་སྙན་ངག་འཛམ་བུའི་འབྲས། །འཕྲིན་རྟེན་གསེར་གྱི་སྙེ་མ་ལེགས་སྨོན་སོན། །རྣམ་དཀར་ལས་ཀྱིས་འཕངས་པའི་རྟེན་བཟང་ཟླ། །ཚོར་བ་དུཿཁའི་ཉེར་འཚེ་ར་རི་དང་། །མི་ལྡན་ཐོས་བསམ་སྒོམ་པའི་ཆ་ཤས་ཀུན། །ཡོངས་གང་གཞན་ཕན་གཟིགས་མ་སྤྲོ་དེ་སྙན། །འདི་ན་སྔོན་བསགས་དཀར་མིན་ས་བོན་ལས། །ནད་ཀྱི་ཟུག་རྔུས་མནར་ཡང་དག་བྱེད་སྨན། །མཐོ་རིས་ལྷ་ཡི་ཆུ་བོས་རབ་བཀྲུས་ནས། །མི་ཤིགས་སྲོག་གི་ཀ་བ་འཛུགས་ལ་བྲེལ། །རིང་མིན་སྒོ་གསུམ་བག་མེད་ལས་དབེན་པར། །འཇམ་མགོན་ཟུར་ཕུད་ལྔ་པ་ཞི་ཁྲོ་ཡི། །བསྐྱེད་རྫོགས་རྫོགས་པ་ཆེན་པོའི་ལམ་བཟང་ལ། །གཅིག་ཏུ་གཞོལ་ཁྱོད་འབད་པ་དོན་དང་ལྡན། །(༡༧༣བ)
གནམ་ས་ལྟར་གདངས་མཆེ་བ་རྣོ་དབལ་རྩེར། །ཆེར་སྙིགས་བརླང་སྤྱོད་མི་བསྲུན་དགྲ་བགེགས་སྲོག །མི་རྟག་ལམ་དུ་བཀོད་ཚེ་ཡིད་སྲུབས་དཔུང་། །སྙིང་ཤུབས་ནས་མཐོན་ལྐོག་མར་བྲོས་ཏེ་བརྒྱལ། །ནག་པོའི་སྡེར་ཁྲོས་ཕྱག་རྒྱ་ཟིལ་གནོན་ལྷ། །ཀུན་ལ་ཆེས་འཇམ་རྣ་བར་སྙན་པའི་གསུང་། །དབྱངས་སུ་འཚེར་བ་རིགས་ལྔའི་རྣལ་འབྱོར་གྱིས། །ཚེ་འདིར་ཕུང་པོ་འོད་སྐུར་སྨིན་དེ་མཚར། །ཚུལ་འདི་ཨོ་རྒྱན་སངས་རྒྱས་གཉིས་པ་དང་། །གནུབས་ཆེན་བརྒྱུད་པར་བཅས་པའི་བཀའ་སྲོལ་རྣམས། །འཕྲུལ་མེད་འཛིན་པའི་སྔགས་འཆང་མུ་ཐི་ལའི། །འཕྲེང་བ་ཚར་དུ་དངར་ལས་གཞན་ན་སུ། །རིག་པའི་ལམ་དུ་ཤེས་བྱར་གང་སྲིད་ནོར། །མཁྱེན་དཔྱོད་ཤིང་རྟས་འདྲེན་མཁས་ལོ་པཎ་གྱི། །རྣམ་ཐར་ལ་དད་བ་སྤུའི་འཁྲི་ཤིང་ཚོགས། །གདུང་བའི་ལྷོ་ཕྱོགས་རླུང་གིས་ཅིར་ཡང་ལྡང་། །འོན་ཏེ་ཆོས་ཀྱི་ཕ་མཐའ་ཚད་བཟུང་བྲལ། །ཚེ་འདིའི་ཆུ་བོ་སུམ་གཉིས་ལོ་ཡིས་བརྒལ། །དེ་ཕྱིར་མཁའ་འགྲོའི་ཁ་རླང་བུན་ནེ་པ། །ཐེག་མཆོག་སྙིང་པོར་གཞོལ་བ་གཏན་འདུན་སྙམ། །མཁས་དང་དམ་པར་རློམ་མལ་དམན་པའི་རོ། །ཤ་ཐར་ལངས་པའི་ལན་གསུམ་ལྕེ་རྐྱོང་བ། །གཅོད་པའི་ནུས་ལྡན་དཀོན་ཕྱིར་དངོས་གྲུབ་གསེར། །རེ་བའི་བླུན་མང་ཕུང་བར་མཆི་མ་བཀུ། །ཚུལ་དེས་ཡིད་འབྱུང་བསམ་གཏན་ཁུང་བུ་རུ། །ཀ་དག་སྣང་བཞིར་གཅིག་ཏུ་གཞོལ་སེམས་ཀྱང་། །མཁན་སློབ་ཆོས་རྒྱལ་བཞེད་དོན་བོད་འབངས་ཀྱི། །བདེ་ཐབས་སྒྲུབ་ལ་སྙིང་ལས་ལྕིད་དུ་ཆེ། །ཐོས་བསམ་དོན་ཡོད་ཉམས་བསྟར་རིགས་འཛིན་ཁྱོད། །རིང་པོར་འཚོ་བའི་ཐབས་ཚུལ་མི་དམན་ངོས། །མ་དག་དྲི་མ་འཁྲུད་པའི་ཞབས་བསིལ་དུ། །འཕྲིན་ཡིག་ལེགས་བཤད་གངྒཱ་རྣམ་པར་སྒྲོངས། །བློ་བྲིད་ཉམས་དང་འགྱུར་བར་སྒྲོ་བཏགས་པའི། །ཀུན་རྟོག་སྣ་ཚོགས་རི་མོར་བྲིས་པའི་བྱ། །ཚེ་རིང་དོན་ལྡན་རྐང་འཐུང་འདབ་ཁྱེར་ནས། །དབུ་རུ་མཐའ་འདུལ་གཙུག་ལག་ཁང་དེར་འཕུར། །མང་ཐོས་རུ་ཐོག་དབང་པོའི་སྙན་ཚིག་གི་འཕྲིན་ལན་སྲོང་བཙན་རིགས་ཀྱི་ཟླ་བ་(༡༧༤ན)
རབ་གསལ། སཽ ཀྲྀ ཏྭཾ ཁཾ ཧཱི པྲ ད ཡོ ནྣ སྱ ཙ གཏྲཾ བྷཽ མཱི ཙཱ རི སཱ མི བ ཛཱ ཏཾ ན ར པ ཏྱཾ། བྷཱ བཻ རྴ ཏྣཾ ཤྲཱི གུ རྞ བ ཏྲཾ བ བྷུ བཱ མོ མཱུ རྑཱ ནཱཾ ཧཱི ཤ ཏྲུ བི ཛཱ ཡཻ ཏི ཀ ལེ ཁཾ། ལེགས་(སྡེབ་སྦྱོར་རྨ་བྱ་མྱོས་པ།)བྱས་གནམ་གྱིས་རབ་བྱིན་མཐོན་པོའི་རིགས། །ས་སྤྱོད་བརྒྱུད་དུ་ཉེར་བཙས་མི་ཡི་བདག །སྲིད་ཞིའི་ཕུན་ཚོགས་ཡོན་ཏན་སྣོད་གྱུར་པས། །རྨོངས་པའི་དགྲ་ལས་རྣམ་པར་རྒྱལ་དེའི་འཕྲིན། །རང་བློ་མཚོན་པའི་རས་དཀར་ནོར་འཛིན་ལས། །ས་ཟླའི་འཁོར་ལོ་ཆ་ཤས་ཡོངས་གངས་ཅན། །བཀྲ་ཤིས་ཐགས་ཀྱིས་བསིལ་ཟེར་འབུམ་འཕྲོ་བ། །ཕོ་ཉའི་ལག་སོར་ཤར་རིའི་རྩེ་ནས་ཐོན། །ཉིན་ཞག་རེར་ཡང་ཆོས་དཀར་དགེ་བའི་དངོས། །སྤེལ་ནུས་མཁས་ཁྱོད་དོན་ལྡན་བཟང་པོའི་རྟེན། །འཚེ་མེད་བདེ་བར་འཚོ་བའི་གཏམ་སྙན་པོ། །ཕང་འགྲོའི་སྒྲ་དབྱངས་དེ་ཡིས་བསྐྲུན་ནུས་མིན། །འདི་ན་གཙུག་ལག་ཀུན་ལ་བལྟ་བའི་མིག །རྒྱང་རིང་ཤེས་བྱའི་མཐའ་མྱུལ་ལ་གཡེངས་ཀྱང་། །སྙིང་པོ་བསྐྱེད་རྫོགས་ཟུང་འཇུག་མཆོག་གི་ལམ། །རྡོ་(༡༧༤བ)
རྗེའི་རྣལ་འབྱོར་སྤྱོད་པར་ལྷོད་མེད་ཙམ། །ལྷ་ཉིད་ལོ་མང་སྨིན་པའི་ན་ཚོད་དང་། །ལྷན་ཅིག་སྲིད་ཞིའི་ཡུལ་རྣམས་གཞལ་ནུས་བློ། །ཆེས་སྒམ་ཆོས་ནོར་འདོད་ཐར་ཞལ་གྱི་སྒོ། །བཞི་ལྡན་ལྗོངས་འདིར་གནས་པ་ཚངས་པའི་སྤུན། །གང་གི་མགྲིན་པ་སྐྱེ་བ་ལྔ་པའི་དུང་། །རབ་དཀར་གཡས་སུ་འཁྱིལ་བའི་སྒྲ་དབྱངས་ལས། །མ་སྨད་བླང་དང་དོར་བྱ་ཚར་དངར་བ། །འཛད་མེད་རྣ་བའི་བཅུད་དུ་ཅི་ཡང་ལེན། །འབངས་རིགས་བརླང་པོར་སྤྱོད་པའི་སྤྲིན་རུམ་ལས། །སྲོང་བཙན་རིགས་ཀྱི་ཟླ་བ་མཐར་བྱེད་པ། །ཚེ་རིང་གནམ་གྱི་དཔུང་བའི་དྲི་བཞོན་ཤུགས། །ལས་དཀར་དགུན་གྱི་ཕོ་ཉས་འདྲེན་ནམ་སྙམ། །དཔའ་གཏུམ་ཞེ་སྡང་དབང་གིས་གཡུལ་ངོ་རུ། །བ་སྤུ་ལྡང་བ་ཏུ་རུ་སྐ་ཡི་དཔུང་། །རྟག་ཏུ་རང་རྒྱུད་སྡིག་དང་མི་འགྲོགས་ཀྱང་། །རྒྱལ་རྔ་ལན་བརྒྱར་བརྡུངས་པ་དངོས་པོའི་གཤིས། །ཤེས་བྱའི་ཕ་རོལ་ཟད་མཐར་མ་སྦྱངས་པའི། ཁྱོད་ཡོན་མེད་ཕྱིར་སླད་མར་བསྒྲུབ་བྱ་བ། །ཨ་ཧང་མི་ཤིགས་སྲོག་གི་ཀ་བ་དེ། །འཛུགས་ཆེད་ཚེ་མཐའ་ཡས་པའི་མགོན་པོ་བསྟན། །ཆུད་མི་འཛའ་བར་གང་བསགས་འཕྲལ་ཡུན་དུ། །བསོད་ནམས་གསེར་གྱི་ཕུང་པོར་སྒྱུར་ནུས་པ། །བྱང་ཆུབ་སེམས་ཀྱི་ཆུ་གཏེར་ཆེན་པོའི་གོང་། །དགེ་ཚོགས་འཛམ་བུའི་འབྲས་བུ་ལྷུང་དེ་རྨད། །ཀུན་རྟོག་པིར་གྱིས་བྲིས་པའི་རི་མོ་ལ། །འདི་རྗེས་ཚད་དུ་གཟུང་བར་ནུས་མིན་ཡང་། །ལུགས་ཟུང་འབྲེལ་བའི་གླེང་འོས་གངྒཱའི་རྒྱུན། །ཤོག་བུའི་ལམ་གསུམ་ངོས་སུ་ཆད་མེད་དྲོངས། །མང་བཀུར་རྒྱལ་ཁབ་ཆེན་པོར་ཉེར་བཏགས་གོས། །ལྷབ་ལྷུབ་གྱོན་པའི་འཆི་མེད་གར་མཁན་མ། །སྙན་ཚིག་མགྲིན་པའི་དྲིལ་ཆུང་འཁྲོལ་བཞིན་དུ། །མི་བདག་གནས་ལྔ་རིག་པའི་གམ་དུ་སོང་། །
རབ་བྱུང་བཅུ་གཅིག་པའི་མེ་ལུག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་ལུག་ལོར་བྲིས་པའི་ཆབ་ཤོག་འཕྲིན་ཡིག་ཁག །སྤྲེའུ་ཞེས་པ་མེ་ལུག་ལོ་གསར་དུས་ཕུག་པ་སྤྲུལ་སྐུ་ངག་དབང་སྙན་གྲགས་བཟང་པོའི་སྡེབ་ལེགས་ཚིགས་སུ་བཅད་པའི་འཕྲིན་ལན་དམ་པའི་ཚུལ་ལས་མི་འགོང་བའི་གཏམ།(༡༧༥ན)
སཱི ཀ ལབྱ ཤྭེ ཏ ཙ མ རྀ ཏྲ བྷཱ ནཱཾ སྤ ཪྴཻ རྦཱ ཡུ ཛ གན ཀཱུ ལཾ། སཽ ད ཏྟི ཤཱི ཝ ཀ ས ཏ ཏཱི ཏོ ཝཱ གཱི ཤཻ ཪྶཱ མ སུ ཡ ཤ ལེ ཁྱི། ལྷག་(སྡེབ་སྦྱོར་མྱོས་མ།)པའི་བསམ་པ་རྔ་ཡབ་དཀར་པོ་ཡིས། །སེམས་པའི་དྲི་བཞོན་རེག་བྱ་རིས་མེད་འགྲོར། །ལེགས་སྟེར་དམ་པའི་ཚུལ་ལས་མི་འགོང་བ། །ངག་གི་དབང་ཕྱུག་སྙན་གྲགས་བཟང་པོའི་འཕྲིན། །ཆོས་ནོར་འདོད་ཐར་དངོས་ཀུན་ཡོངས་སྤེལ་པའི། །སྙན་ཚིག་པི་ཝང་སྭསྟིའི་རྒྱུད་མངས་ལས། །རབ་དྲངས་གླུ་དབྱངས་ལེན་པའི་མེ་ན་ཀཿ །སྙིམ་པར་བདོག་པ་ཐོགས་ཏེ་ཉེར་སོན་སྤྲོ། །གང་བརྩམས་ལས་རྣམས་དགེ་བའི་གསེར་གྱུར་པ། ཁྱོད་ལུས་འཛམ་བུའི་སྙེ་མ་ཐུབ་བསྟན་མཚོར། །གནས་པར་བདེ་གཤེགས་ཀུན་གྱིས་མགྲིན་གཅིག་ཏུ། །བདེན་ཚིག་སྲོག་གི་ཟུངས་སུ་བརྗོད་དམ་སྙམ། །འདི་ན་ལས་དཀར་འཕེན་པ་དར་དྲག་པས། །སྲིད་ཞིའི་གཙུག་ལག་འཁྱིལ་སྣོད་འདུ་ཕུང་ཡང་། །ཐོས་བསམ་བསྒོམ་པ་བསྒྲུབ་པའི་རྟེན་བཟང་དུ་། །(༡༧༥བ)
རིང་དུ་བདེ་བར་འཚོ་དེ་དོན་ལྡན་སྙམ། །འཕགས་ཡུལ་མཁས་པའི་གྲགས་འཕར་རྟ་དབྱངས་དེ། ཁ་བའི་ལྗོངས་འདིར་གཟུགས་གཞན་བཟུང་ཉིད་ལ། །ངོ་མཚར་བལྟ་བའི་སླད་དུ་མི་ཟླ་དང་། །གཟའ་སྐར་ཚོགས་ཀྱང་མཁའ་ལ་འོངས་པ་བཞིན། །དུག་གསུམ་ནད་བརྒྱའི་གཉེན་པོར་ཕྱག་རྒྱ་ཆེ། །གཅིག་ཤེས་ཀུན་གྲོལ་སྨན་དཀར་ཆིག་ཐུབ་ཀྱིས། །གྲུབ་རིས་ཟུག་རྔུ་བཅིལ་ཚེ་སྤྲུལ་པའི་གྲོང་། །ལྟ་ན་སྡུག་དེ་གྲྭ་ནང་འཕོས་པ་བཞིན། །སྐྱེ་བར་བསོད་ནམས་བསགས་པའི་གདུགས་དཀར་པོའི། །གྲིབ་མར་མཁའ་མཉམ་འགྲོ་རྣམས་ངལ་གསོ་བའི། །སྙིང་སྟོབས་རིན་ཅེན་ཡུ་བ་རྣམ་དཔྱོད་ཀྱིས། །འཛིན་ལ་ཤེས་ལྡན་ཁྱོད་ཉིད་བྲེལ་བ་བཞིན། ཁྲོ་མེད་ཀུན་ལ་བྱམས་པའི་ངང་ཚུལ་གྱིས། །བརླང་པོར་སྤྱོད་པའི་སྟེའུ་འཕྱར་བ་དང་། །སྲི་ཞུའི་ཙན་དན་བྱུག་པར་བདེ་སྡུག་གི །ཀུན་རྟོག་རྣམ་མཁྱེན་སྲང་ལ་གཞལ་ཀྱང་མཉམ། །བརྣག་དཀའ་སྙིགས་མའི་གཞན་རྐྱེན་ཚེར་དོང་སྟན། །ཤིང་བལ་འདབ་མ་བརྩིགས་པའི་མལ་བཞིན་དུ། །འཇམ་མཉེན་བདེ་བར་སྤྱོད་པ་བཟོད་པའི་གོ །ལྡན་དེ་རྒྱལ་སྲས་སྤྱོད་གང་ཐབས་ཀྱི་མཆོག །ཀུན་རྫོབ་ཆོས་ཚུལ་ནམ་མཁའ་ཕ་མཐའ་བཞིན། །ཇི་ཙམ་བཅད་ཀྱང་ཟད་པའི་སྐབས་མེད་པས། །རྣམ་རྟོག་གང་ཤར་རི་མོ་ཤོག་བུའི་ངོས། །འདྲི་བ་གཅིག་ཏུ་ཡི་གེའི་ལས་སུ་ཆ། །ཉམས་འགྱུར་རྣ་བར་འབབ་པ་ལེགས་བཤད་ཆུ། །བཀྲ་ཤིས་བདུད་རྩིར་བསྒྱུར་ལ་མི་འགྱུར་གཟེར། །དབྱངས་བདུན་རྫོགས་པའི་དྲང་སྲོང་ཨཱ་གསྟྱ། །སྲིད་པ་དེ་སྲིད་རྟག་པར་འཆར་ཞིག་གུ །ཐགས་ཀྱི་ཟླ་བའི་དཀྱིལ་འཁོར་ཉ་གང་བ། །ཐུན་འཚམས་རྒྱ་ཡི་རི་བོ་གཟུགས་བརྙན་ཅན། །ཕུན་ཚོགས་དགེ་བའི་ཡུལ་གྲུའི་ཤར་རི་ནས། །འཐོན་ཚེ་མཁས་ཁྱོད་བློ་ཡི་ཀུནྡ་བཞད། །(༡༧༦ན)
ཚངས་པ་དུང་གི་ཐོར་ཚུགས་ཅན་ལ་ས་ཟླ། ཇ་གོས་ཕྱི་ནང་། རྟ་སོགས་བདོག་པ་ཚན་གྲངས་ཀྱི་སྤྱན་གཟིགས་དང་བཅས་དུས་རྟགས་ལྐོག་གྱུར་གྱི་ལུང་བསྟན་ཞུ་བར་འཕྱོང་རྒྱས་རབ་འབྱམས་པ་ཀུན་དགའ་བསྟན་འཛིན་རྫོང་སྟ་བྱས་པའི་སྐབས་གསོལ་བའི་འཕྲིན་ཡིག་ཟུར་ཕུད་བཀྲ་ཤིས་གཡས་འཁྱིལ། སྣང་སྲིད་དྲེགས་པ་ཡོངས་ཀྱི་སྲོག་སྙིང་ལ་དབང་སྒྱུར་པདྨ་ཀ་རའི་ཕོ་ཉ་བ། །བཀྲ་ཤིས་གཡས་འཁྱིལ་དུང་དཀར་ཟུར་ཕུད་ལ། །ལེགས་སྤུད་ལྷ་ཆེན་ཚངས་པ་དེང་འདིར་དགོངས། །ས་ཟླ་དར་ཟབ་རྒྱ་ཇ་བཞོན་པ་སོགས། །བདོག་པས་ཉེར་མཚོན་ཏིང་འཛིན་མེ་ལོང་དུ། །ཡོངས་ཤར་སྒོ་གསུམ་དགྱེས་སྐྱེད་མཆོད་པའི་ཚོགས། །ཐུགས་དམ་སྐོང་ཕྱིར་ནམ་མཁའི་ཁྱོན་ཀུན་འགེངས། །དགེ་དང་མི་དགེའི་ལྟས་ཀུན་དཀར་ནག་གི །ལས་འབྲས་རང་སེམས་འཁྲུལ་ངོའི་ཆོ་འཕྲུལ་ཀྱང་། །ཀུན་རྫོབ་སྙིགས་མར་སྤྱོད་པ་དུས་ངན་གྱི། །ལེགས་ཉེས་ཚུལ་ལ་འགྲོ་རྣམས་སོམ་ཉི་འཆང་། །དེ་ཕྱིར་ལྐོག་གྱུར་ཆོས་རྣམས་དྲི་མེད་སྤྱན། །དཔྲལ་བའི་དབུས་ནས་མངོན་སུམ་གཟིགས་པ་བཞིན་། །ཞིབ་པ་ཕོ་ཉའི་ངག་ནས་གསོལ་བ་ལ། །རྡོ་རྗེའི་གསུང་གིས་བླང་དོར་གསལ་བར་སྟོན། །མཚོ་སྐྱེས་པདྨ་ཚེ་དབང་རིགས་འཛིན་གྱིས། །སྤྱི་བོར་བཞག་པའི་རྡོ་རྗེའི་རི་མོ་དེ། །ནམ་ཡང་གཞོམ་ཤིགས་མེད་ཕྱིར་དམ་ཚིག་ལས། །མ་འདའ་བསྟན་འགྲོའི་ཕན་བདེ་སྤེལ་བར་མཛོད། །ཤར་ཕྱོགས་སྐུའི་རྒྱལ་པོའི་བློན་པོ་བྱ་ཁྲིད་མིག་གཅིག་པར་གསེར་སྐྱེམས། རྐང་འཐུང་ཕུར་མ། གོས་ཕྱི་ནང་། དུང་ཆེན། རྒྱ་གླིང་། བཞོན་པ་སོགས་སྤྱན་གཟིགས་དང་བཅས་ལེགས་ཉེས་ལྟས་ཀྱི་ལུང་བསྟན་ཞུ་བར་ཞང་ཚ་དཀོན་ཅོག་རྣམ་རྒྱལ་བཏང་བའི་དུས་གསོལ་བའི་འཕྲིན་ཡིག་དགྱེས་པའི་འཛུམ་ཞལ་རབ་གསལ། དྲེགས་པའི་སྡེ་དཔོན་པི་ཧཱ་ར། །ཤར་ཕྱོགས་སྐུ་ཡི་རྒྱལ་པོ་ཡི། །བློན་པོ་བྱ་ཁྲིད་མིག་གཅིག་པ། །དགྱེས་པའི་འཛུམ་ཞལ་དེང་འདིར་སྟོན། །གསེར་སྐྱེམས་རྒྱ་ཇའི་བཏུང་བ་དང་། །འཇམ་མཉེན་ལྷ་རྫས་ཕྱི་ནང་གོས། །སྟོང་གསུམ་སྐོར་བའི་བཞོན་པ་དང་། །སྙན་བརྗིད་(༡༧༦བ)
རོལ་མོའི་མཆོད་སྤྲིན་སྤེལ། །སྟོད་སྨད་དུས་ཀྱི་འཚུབ་འགྱུར་སོགས། །སྡིག་འབྲས་སྔོན་འགྲོའི་མཚན་མ་རྣམས། །རབ་ཞི་གངས་ལྗོངས་བདེ་བའི་ཐབས། །ཕོ་ཉའི་ངག་ནས་ལེགས་གསོལ་བཞིན། །ཉེར་འཚེའི་སྡིག་འབྲས་ཟླ་འོད་ཀྱིས། ཁྱབ་པའི་མུན་པ་ལྟར་སངས་ཏེ། །ཕན་བདེའི་སྣང་བ་འོད་འབར་བའི། །བརྒྱ་ཕྲག་ཐབས་ཚུལ་གསལ་བར་སྟོན། །སངས་རྒྱས་ཀུན་འདུས་ཨོ་རྒྱན་རྗེས། །ལི་བྱིན་ཧཱ་ར་རྗེ་བློན་རྣམས། །བོད་ཡུལ་བསྲུང་བར་ཉེར་བསྐོས་ན། །གཡེལ་མེད་འཕྲིན་ལས་རྣམ་བཞི་སྒྲུབས། །དྲེགས་པའི་སྡེ་དཔོན་གནོད་སྦྱིན་ཙིའུ་དམར་པོ་ལ་གསེར་སྐྱེམས། རྒྱ་ཇ་གོས་ཕྱི་ནང་། ཅང་ཤེས་སོགས་སྤྱན་གཟིགས་དང་བཅས་ཏེ་ལེགས་ཉེས་བླང་དོར་གྱི་ལུང་བསྟན་ཞུ་བར་མཆོད་དཔོན་བློ་བཟང་མཐུ་སྟོབས་བཏང་སྐབས་གསོལ་བའི་འཕྲིན་ཡིག་ཡོངས་འདུའི་ལྗོན་པ། བདེ་གཤེགས་ཞི་ཁྲོ་ཀུན་གྱི་ནུས་མཐུའི་རྩལ། །གཅིག་ཏུ་གྲུབ་པའི་རང་གཟུགས་པདྨ་འབྱུང་། །ཚེ་དབང་རིགས་འཛིན་དེ་ཡི་ཕོ་ཉ་བ། །སྣང་སྲིད་དྲེགས་པའི་སྡེ་དཔོན་སྤྱན་སྔ་རུ། །ཕྱི་ནང་གོས་དང་གསེར་སྐྱེམས་རྒྱ་ཇ་སོགས། །དངོས་འབྱོར་མཆོད་སྤྲིན་སྔགས་དང་ཕྱག་རྒྱ་ཡིས། །ཉེར་སྤེལ་ནམ་མཁའ་མཛོད་ཀྱི་སྒོ་འཕར་བརྒྱ། །རབ་ཕྱེ་ཐུགས་དམ་སྐོང་ཕྱིར་འབུལ་བྱེད་ན། །ཕོ་ཉའི་ངག་ལས་ཞིབ་ཏུ་གསོལ་པ་ལྟར། །སྤྱི་དང་བྱེ་བྲག་ཀུན་ལ་ལེགས་ཉེས་དང་། །ངན་རིགས་བཟློག་ཅིང་བཟང་པོ་སྤེལ་བའི་ཐབས། །ལྐོག་གྱུར་མངོན་སུམ་ཇི་བཞིན་བསྟན་དུ་གསོལ། །བསམ་ངན་སྦྱོར་རྩུབ་འཆང་བ་དགྲ་སྡེའི་དཔུང་། །ལྷ་ཁྱོད་མཐུ་སྟོབས་ནུས་པས་རབ་བཅོམ་སྟེ། །འཇིག་རྟེན་ཀུན་བདེ་བསྟན་སྲིད་ལེགས་ཚོགས་རྣམས། །གྱེན་ནས་གྱེན་དུ་འདེགས་པའི་འཕྲིན་ལས་མཛོད། །ཟ་ཧོར་རིགས་འཛིན་བདག་གིས་གཉེར་བཀོལ་བའི། །ཞི་རྒྱས་དབང་དྲག་འཕྲིན་ལས་མ་ལུས་པ། །བསམ་པ་ཙམ་གྱིས་འབད་མེད་ལྷུན་གྲུབ་པའི། །དཔག་བསམ་ཡོངས་འདུའི་ལྗོན་པ་ལྟ་བུར་མཛོད། །མེ་ལུག་མོན་འཛུམ་ལང་གི་རྒྱལ་པོ་བི་ར་བྷ་རྠིའི་སྲས་ཀྱིས། དེ་བཞིན་གཤེགས་པ་གླང་པོ་ཆེ་ས་ལ་རབ་བརྟན་དུ་འཁྲུངས་པའི་མཆེ་བའི་ཁྱད་ནོར་དང་བཅས་ཕོ་ཉ་མངགས་པའི་ལན་དུ་བསྲིངས་པའི་འཕྲིན་ཡིག་ལྷག་བསམ། (༡༧༧ན)
ཟླ་ཚེས། ཏ། གཏ སྱ པཱ ཙ ན ཤི ཥྱ ས ཧཱ གཎ ཙ ཏྲི ལོ ཀ ཀ རྟཱ ཨཱ ད དེ པ རྀ ཥྀ སི དྡྷ ཀ ཀཱུ ལ དྷ ར ཀ། པྲི། སུ ཁེ པཱ ལ ཧཱ རཱ ཛ ཇུ ལ དུ བི རཱ བྷ རྠི ཀ པུ ཏྲ ཀུཾ ལ ཀྵྨི ཀཱ ལྱ ཎ ཤུ བྷ ཀ རོ མི ཨི ཏི ཨ ཤྲེ བཱ ད། དེ་བཞིན་གཤེགས་པ་དེའི་གསུང་སློབ་མར་བཅས་པའི་ཚོགས་དང་འཇིག་རྟེན་གྱི་བྱེད་པོ་གསུམ་སོགས་ལྷ་དང་དྲང་སྲོང་གྲུབ་པའི་རིགས་འཛིན་རྣམས་ཀྱིས། ས་ཆེན་པོ་བདེ་བར་སྐྱོང་བའི་རྒྱལ་པོ་འཛུམ་ལང་བི་རཱ་བྷ་ཪྠིའི་སྲས་ལ་ཕུན་སུམ་ཚོགས་པའི་དཔལ་རམ། བཾ ཙ ན། ཨ གེ ས མཱི པ དེ ཤ ན ར པ ཏི ཏྭཾ ཨཱ ཀེ ལ ཛ ནྨ བ ཧུ ཏ ཀུཾ པུ ཎྱ ཀྲྀ ཏ ཀེ ཕ ལ ཀ པ ཏ བ ཏྶ རི ར ནཱི ཀེ ཛི ཀ །ཨཱ གེ མ ཧཱ བ ལ སུཾ བྷཱུ མི ས ནྶཱ རཾ ཙ ཀྲ བ རྟི བྟ ཡ ཀ ཀཱ ལ། ཧ མཱ ར ཀུཾ པྲ ཤྭེ ཏ མ ན ཙ ནྡྲ བ ཏྐེ། པ་སྩོལ་བར་མཛོད་ཅིག་ཅེས་ཤིས་པ་བརྗོད་ནས། ཉེ་བའི་ཆར་ཡང་མིའི་བདག་པོ་ཚེ་རབས་མང་བོར་བསགས་པའི་བསོད་ནམས་ཀྱི་ཕུང་པོ་རི་བོ་དངོས་སུ་རྒྱུ་བ་ལྟ་བུའི་འབྲས་བཟང་ཉེ་བར་དུད་པའི་འདུ་བ་མཆོག་ཏུ་སྙོམས་ཤིང་། སྟོབས་ཀྱི་དཔུང་པས་སའི་དཀྱིལ་འཁོར་ལ་རང་བྱོན་དུ་སྤྱོད། (༡༧༧བ)
དྷཱ ཏ བྡ ཀེ ལེ ཡ མ ཧཱ ཧ སྠི པྲ ཌྷྲི ཌ ཀེ ད ནྟ ཕ ལི བ སྟུ ཙཱི ཌི པཱ ཡ ན ས ནྟོ ཥ བྷ ཡ སོ ཛ ན ན། ཨཱ གེ ཨཱི བཽ དྷ དྷ རྨ ཀ རྟ སཾ བ ར བི ཪྻ སེ ན པ ཏྲ ཧ མཱ རཱ། པི ཀུ ཤ ལ ཀྵེ མ ཧཻ ས རྦ ལོ ཀ ཀུཾ ཤུ བྷ ཀྲྀ ཏ མ ན མཱ ཏི ཥྠ། པུ ན ར པི དེ ཤེ དྷཱ ཀེ །བཞིན་པ་ནས། རྣམ་པར་དག་པའི་བསམ་པ་ཟླ་བ་ལྟ་བུར་དཀར་བས་ཕོ་ཉ་ཆེད་དུ་མངགས་ཏེ་གླང་པོ་ཆེ་ས་ལ་རབ་བརྟན་གྱི་མཆེ་བའི་ཁྱད་ནོར་སོགས་བདོག་པའི་དངོས་པོ་བསྲིངས་པ་ལེགས་ཚོགས་སུ་གྱུར། འདིར་ཡང་ཤཱཀྱའི་རྗེས་སུ་ཞུགས་པའི་སྡོམ་བརྩོན་སྡེ་སྣོད་གསུམ་པའང་འགྲོ་ལ་དགེ་བའི། ཙཱི ནྡཱ ནཱ ཧི ལི མཱ ན ཀི ཡ ཙཱ ཧཻ མི ཏྲ ཀཱ རོ ཙཱི ཌི ས ཏཱ ན དཱི བ ཏ དེ ཨཱི། ཙཱི ཌི ས ཧཱི ད ཏ ར ཀྵ གྲ ནྠ། རཱུ བྱཱ ཀ པ ཏྲ། པ ཊཾ བ ར དཱི རྒྷ ཚཱ པ དེ ཏེ། ཨཱ ཥཱ བྷཱི ན སྱ ཤུ ཀླེ ཏྲི ཛ ཡ དཱི ན ཀུཾ མ ཧཱ ཀོ ཊ པོ ཊ ལ སུཾ ལི ཁ ཏཱཾ། བློ་ཅན་དུ་གནས། སླད་ནས་ཀྱང་ས་ཐག་རིང་ཡང་ཕན་ཚུན་ཡིད་གཅུགས་པའི་བསམ་པ་བཟང་པོས་བསྲིངས་འོས་ཆུ་བོའི་རྒྱུན་ལྟར་འཚལ། རྟེན་བསྲུང་མདུད། དངུལ་གྱི་ཐ་སྦག གོས་ཡུག་དང་བཅས་ཆུ་སྟོད་ཀྱི་ཉ་བའི་དཀར་ཆའི་རྒྱལ་བ་གསུམ་པའི་ཚེས་ལ་ཕོ་བྲང་ཆེན་པོ་པོ་ཏ་ལ་ནས་བྲིས། (༡༧༨ན)
མེ་ལུག་གོང་ནས་རེ་ཁེ་དགེ་སློང་དང་། བློ་བཟང་ཕུན་ཚོགས་གཉིས་གསེར་ཡིག་ཏུ་མངགས་པའི་བཀའ་ཤོག་གནང་སྦྱིན་བྱུང་བའི་ཕེབས་ལམ་དང་། རྒྱ་སོག་སྐྱེ་རྒུ་རྣམས་ཀྱི་བདེ་ཐབས་གཞུང་དོན་གྱི་རྒྱུ་མཚན་གསོལ་བར་ཁ་ཆེའི་བསོད་སྙོམས་པ་ཆེན་པོ་ཤཱཀྱ་ཤྲཱིའི་གདན་ས་པ་མཁན་ཆེན་ཚུལ་ཁྲིམས་རྒྱ་མཚོ་དང་ཁང་གསར་རབ་བརྟན་གཉིས་རྫོང་སྟ་བྱས་སྐབས་ཕུལ་བའི་ཞུ་ཡིག་འཇིག་རྟེན་བྱེད་པོར་ངེས་པ་རྙེད་པའི་གཏམ། པུ ནྱ ཛ མྤུ ཀཱ ཀ ནཱ ར ཙ ཀྲ ཏ སྶ ཧ སྲ ཁོ ཏྒ ཏེ བ མ ཏྲ ཏཱ བྷ བོ ཥྞི ཥཱ གྲ ཅ པྲ ཎ མྱ པཱད ནཱ གི རཱ ཛི ཀཾ སུ བྷ ཀྟོ། ཀཱ ལ པ ཏྱ སི དྡྷ མ ཧྱ རཱ ཛ མེ པི ཏཾ དྭི ཡ སཽ ཁ ཧི ཏྱ ཚཱ ཡ ཤཱི ཏ ལ དྲུ མཻ རྣ བེ ཏྟ མ སྱ མ ཉྫུ གྷོ ཥ པཱ ད མཱུ ལ། བསོད་(སྡེབ་སྦྱོར་ཟླུམ་པ།ོ)ནམས་ཛམྦུའི་གསེར་འཁོར་རྩིབས་སྟོང་མཁའ་ལ་འཕགས་པ་ཙམ་ཉིད་ན། །སྲིད་པའི་གཙུག་ཏོར་རྩེ་མོས་ཡོངས་འདུད་ཞབས་སེན་རྡུལ་དམར་ལེགས་བསྟན་པའི། །དུས་ཀྱི་བདག་པོར་གྲུབ་པའི་ཆེ་བས་རྒྱལ་པོ་ང་ལས་ནུ་གཉིས་པ། །ཕན་བདེའི་གྲིབ་བསིལ་ཡོངས་འདུ་གསར་པ་འཇམ་དབྱངས་གོང་མའི་ཞབས་དྲུང་དུ། །ལྷ་ཀྱེ་སྤྱན་སྔར་གསོལ་བའི་སྔོན་འགྲོའི་སྒོར། །བཀྲ་ཤིས་བདེན་ཚིག་མེ་ཏོག་མནྡ་ར། །འཐོར་དང་ལྷན་ཅིག་ཙན་དན་ལྗོན་པའི་སྤོས། །དྲི་བསུང་དངར་པོར་འཐུལ་ཏེ་མཆིད་འདི་ཞུ། །སྙན་འཇེབས་དབུགས་དབྱུང་རི་མོ་དམ་པའི་གསུང་། །མང་བཀུར་རྒྱལ་པོའི་བཀའ་(༡༧༨བ)
རྟགས་རབ་གསལ་བ། །ངོ་མཚར་བདོག་པའི་གནང་སྐྱེས་གྱ་ནོམ་བཅས། །མངོན་སུམ་སུག་པར་སོན་པའི་སྐལ་བཟང་ཐོབ། །ཚངས་པའི་ཡུལ་ལས་འཆི་མེད་དམུ་ཐག་ལས། །འཛམ་གླིང་སྐྱེ་རྒུའི་མགོན་དུ་ཕེབས་པའི་ལྷ། །མཚན་དཔེའི་གཟུགས་སྐུའི་གཟི་བྱིན་བརྒྱ་ཕྲག་ཉིའི། །འོད་འབར་ཇི་བཞིན་རྒྱས་པའི་གཏམ་དེ་སྙན། །འདི་ན་ཀུན་ལ་མ་འདྲིས་འགྲོ་བའི་བཤེས། །ཐུབ་དབང་རྗེས་ཞུགས་སྡེ་སྣོད་གསུམ་པ་ཡང་། །མགོན་ཁྱོད་བཀའ་ཁྲིམས་གསེར་གྱི་གཉའ་ཤིང་ལྟར། །རབ་ལྕིའི་ཕང་བར་བདེ་བའི་ངལ་གསོར་གནས། །སྣ་བོའི་གཙུག་ལག་མང་ཤེས་དཀྱུས་རིངས་མིག །ལྟ་བའི་བློ་གྲོས་བསྙེམས་ལྡན་སྐར་ཚོགས་འོད། །ལྷ་གཅིག་ན་ཚོད་ཆེས་ཕྲའི་ཟླ་ཚེས་ཀྱིས། །གཟིལ་གྱིས་གནོན་དེ་རང་གི་གཤིས་ལུགས་ཡིན། །ཆོས་ནོར་འདོད་ཐར་སྒོ་འཕར་བཞི་ཕྱེ་ནས། །འཛད་མེད་མཆོད་སྦྱིན་སེམས་ལྡན་མཐའ་དག་ལ། །བཏང་ཡང་འཛམ་གླིང་མི་ཡིས་ཁྱོད་ཀྱི་གདོང་། །ད་དུང་གཅིག་ལས་མ་མཐོང་གང་གསན་ངོས། །ས་དབང་སྙིང་སྟོབས་རུས་སྦལ་གཟུགས་ཅན་གྱིས། ཁམས་གསུམ་སྐྱེ་རྒུའི་ཕན་བདེའི་ས་འདེགས་པ། །མངོན་སུམ་སྤྱོད་ཡུལ་གྱུར་བཞིན་མཐོ་རིས་སུ། ཁྱབ་འཇུག་འཚོལ་བའི་འཁྲུལ་པའི་སེམས་དེང་ལ། །ལེགས་བྱས་དར་དྲག་ཤུགས་ལྡན་འཕོང་སྐྱེན་མདས། །ལོག་སྤྱོད་ལྷ་མིན་གྲོང་ཁྱེར་ཕྱེར་འཐག་ཀྱང་། །ཀུན་ལ་ལྷག་བསམ་རབ་དཀར་ཟླ་བ་ཡི། །ཅོད་པན་འཆང་བའི་བདེ་འབྱུང་ཁྱོད་ཁོ་ན། །དཔུང་ཚོགས་ཡན་ལག་བཞི་པའི་ཁྱུ་མཆོག་(༡༧༩ན)
ཏུ། །མི་བདག་འཇིགས་མེད་རྒྱུད་ཀྱི་ང་རོའི་དབྱངས། །བླངས་ཚེ་ཕྱོགས་བྲལ་དྲེགས་བྱོས་གླང་པོ་རྣམས། །ཕྱག་དང་མདོངས་གསོལ་བ་བགྱིད་པའི་ཁུར་གྱིས་བྲེལ། །འོན་ཏེ་ཁྲོ་མེད་བྱམས་བརྩེས་ཡངས་པའི་ས། ཁོར་ཡུག་གཅིག་ཏུ་གནས་སོ་ཅོག་གི་འགྲོ །བདེ་བར་སྐྱོང་བ་འཕགས་ཆེན་རྒྱལ་པོ་ཡི། །ངང་ཚུལ་འདི་ལས་གཞན་དུ་ག་ལ་གཡོ། །ནུབ་ཕྱོགས་དག་ཞིང་མགོན་པོ་ཚེ་མཐའ་ཡས། །མཛོད་སྤུ་མི་ཤིགས་འཁོར་ལོའི་འོད་སྣང་གིས། །འཆི་བདག་མུན་བཅིལ་ལྷ་ཁྱོད་ལུས་ཅན་གྱི། །གཉེན་དུ་བསྐལ་པ་རྒྱ་མཚོར་ཞབས་བརྟན་ཤོག །གང་གིས་ཆེན་པོའི་ལུང་དང་ལག་རྟགས་ཀྱིས། །དབང་བསྐུར་དཀྱུས་སྤྱན་གཟིགས་པའི་སྣོད་གྱུར་པ། །འཛུམ་ཞལ་ལས་འོངས་བཀའ་མཆིད་རོ་བདའི་གཡང་། །རྟག་ཏུ་སྙིང་གི་དཔལ་བོར་ཆགས་པར་མཛོད། །གཟིགས་པ་འབབ་ཆེད་ལྷ་མིའི་དཔལ་འབྱོར་རྣམས། །རྒྱལ་ཁབ་ཆེན་པོར་འདུ་བ་དངོས་པོའི་གཤིས། །དེ་ཕྱིར་མཁྱེན་སྤྱན་དག་པའི་མེ་ལོང་ངོས། །རིན་ཅེན་ཕྲུག་སོགས་གཟུགས་བརྙན་ཅི་ཡང་བཀྲ །བླུན་ཚིག་ཞུ་མཆིད་སྲན་མའི་མེ་ཏོག་ཕྲེང་། །པད་དཀར་ཆུན་པོར་རློམ་པའི་སྤོབས་མཐོ་ཡིས། །སྐྱེ་རྒུའི་བདག་པོའི་ཞབས་རྟེན་ཁྲི་འཕང་དུ། །དང་བའི་ཡིད་ཀྱིས་ཕུལ་བ་ཛ་ཡནྟུ། །མཁས་ཤིང་གྲུབ་པ་བརྙེས་པའི་སྐ་བཙལ་བླ་མ་དཀོན་ཅོག་ལྷུན་གྲུབ་འདུ་བ་འཁྲུགས་པ་ལས་གྲོལ་བའི་ཚེ་འཕྲིན་ཡིག་བྱུང་བའི་ལན་ཟུག་རྔུའི་མདུད་རྒྱ་གྲོལ་བའི་(༡༧༩བ)
དཔྱིད་ཀྱི་ཕོ་ཉའི་གླུ། ཤུདྡྷཱ དི ཏྭཾ བྷཱ གབ ཏོ བ ཛྲ ཧི ས ཏྭཾ པྲ ཏྱ ཀྵཱ ཏཾ ཙཱ བྷི ཙ ཏུ རྠཱ རྦི ཏ པ ནྠཱཿ ཡོ གྱི མཱ ནྱཾ མཱ ནྟྲ བི དཾ ས མྦ ར བི ཪྻཾ བཱ ཧཽ ཤྲཱུ ཏཾ ཏ སྱ ཙ ཙིཾ ཧྞ ལི ཁ ཡུ ཀྟཾ། ཡེ་(སྡེབ་སྦྱོར་རྨ་བྱ་མྱོས་པ།)ནས་དག་པའི་བཅོམ་ལྡན་རྡོ་རྗེ་སེམས། །མངོན་སུམ་རང་ངོ་སྤྲོད་པ་སྣང་བཞིའི་ལམ། །རྣལ་འབྱོར་མཆོག་ལ་གཞོལ་བའི་རིག་སྔགས་འཆང་། །སྡོམ་བརྩོན་མང་དུ་ཐོས་དེའི་འཕྲིན་རྟེན་སོན། །ཉེར་ལེན་ལང་ཚོའི་ལོ་ཏོག་ལ་འཚེ་བ། །འདུས་ནད་སྐྱིན་ཐང་ལྷ་མིན་འཕྲུལ་གྱི་གདོན། །ཟིལ་གནོན་ཚངས་པའི་བརྟུལ་ཞུགས་འཁོར་ལོ་ཡིས། །མགྲིན་འཆད་དེང་དུས་བདེར་གནས་ཐོབ་པས་སྤྲོ། །འདི་ན་རང་རྒྱུད་གླང་པོ་འདུལ་ཐབས་ལ། །འབད་མིན་སྦྲང་མའི་སྦྲང་རྩི་ཇི་བཞིན་དུ། །མང་ཐོས་ལྷུར་བླངས་མིང་ཙམ་ཡི་གེ་རུ། །འགོད་པའི་དཀའ་ཐུབ་ངལ་བས་གཅིག་ཏུ་བྲེལ། །གཏན་བདེ་ལྟ་ཅི་ཚེ་འདིའི་འདུན་མ་ཡང་། །སྒྲུབ་པར་ནུས་མིན་ཕྱུགས་ཀྱི་འདུ་ཤེས་ཅན། །མངོན་མཐོའི་(༡༨༠ན)
རྟེན་དུ་རློམ་ནས་རིང་འཚོའི་ཐབས། །བརྩོན་པ་རྣམས་ལའང་ལེགས་སོ་སྟེར་བྱེད་ན། །རྣམ་པར་འབྱེད་པའི་ཤེས་རབ་སྐྱེད་ཚལ་དུ། །ཐོས་བསམ་ས་བོན་ནན་ཏན་དྲོད་གཤེར་གྱིས། །ལེགས་སྨིན་དལ་འབྱོར་ཨ་མྲའི་སྡོང་པོ་ཁྱོད། །སྲུང་བྱེད་ཚེར་ཅན་ར་བས་རྟག་བསྐོར་འོས། །རྒྱལ་དབང་པདྨས་བྱིན་བརླབས་མཐོ་རིས་ཆབ། །གཏེར་སྒོམ་རང་བྱུང་ཁྲུས་ཀྱི་རྫིང་བུ་མཆོག།བཞི་བརྒྱ་རྩ་བཞིའི་ནད་ལ་ཆིག་ཐུབ་སྨན། །བསྟེན་ནས་ཉེས་བརྒྱའི་དྲི་མ་འཁྲུད་པར་རིགས། །དམན་ལམ་ཀུནྡ་བཞད་པའི་ས་སྤྱོད་ཟླས། །བསྒྲུན་མིན་གཞན་ཕན་འདབ་བརྒྱ་འཛུམ་པའི་ཉི། །སྲོང་བཙན་བཞེད་པའི་གངས་ཅན་སའི་མེ་རྩ། །གནྡྷོ་ལར་བཅས་སྲི་ཞུར་བརྩོན་དེ་ལེགས། །རང་དགོན་སྦར་སྦུག་ཙམ་ལ་དུས་གསུམ་རྒྱལ། །སྲས་བཅས་བརྟེན་པར་དྲིལ་བསྒྲགས་མེས་དབོན་གྱི། །ཐུགས་དམ་ལྷ་ཁང་འཕྲིན་ལས་སྒོ་དགག་པའི། །ཆེན་པོའི་རྣམ་ཐར་འགའ་ལ་མཆི་མ་དཀུ། །ལྔ་ལྡན་ལ་སོགས་སྐྱོབ་པ་ནས་འོངས་ཟོང་། །དྭགས་བརྒྱུད་ཚོང་འདུས་ལ་བྲིན་མོད་ན་ཡང་། །རིན་ཅེན་ཕུན་ཚོགས་ཐུགས་ཀྱིས་གསང་མཛོད་ནོར། །ཆོས་གྲགས་དེད་དཔོན་ལས་ཐོབ་ཁྱོད་ཉིད་ཙམ། །སྣ་ཚོགས་འཕྲིན་ལས་བཞི་ཡིས་གདུལ་བྱ་རྣམས། ཁམས་དང་དབང་པོར་བསྟུན་ནས་རབ་འདུལ་ཞིང་། །ཚེ་འདིར་སྣང་གསུམ་ཟད་པར་བསྐྱེལ་ནུས་པའི། །བློ་ལྡན་ཁྱོད་ཀྱི་འདུན་མ་ཡང་རྩེར་སོན། །གསེར་རིའི་སྦུབས་ནས་འཆར་བའི་ཉི་མ་ལ། །འདི་ཞེས་གྲངས་ཀྱིས་ཚད་གཟུང་ནུས་མིན་ལྟར། །གཉེན་གཤིན་བསྐྱུད་པ་མེད་པའི་མོལ་མཆིད་རྒྱུན། །ཛཧྣུ་(༡༨༠བ)
ཡི་བུ་མོའི་སྤུན་ཟླར་བྱོས། །མ་སྨད་རོ་འདའི་གཡང་ཆགས་ལྗོན་པའི་འདབ། །ཐུན་འཚམས་མཛེས་པ་འཕྲོག་པ་བཏུང་བའི་རྒྱུན། །ལྷ་གོས་ཡོལ་གོར་གཅིག་ཏུ་ལེགས་འཁྱིལ་བ། །ཐོགས་ཏེ་དཔྱིད་ཀྱི་ཕོ་ཉ་ཕྱོགས་དེར་འཕུར། །
རབ་བྱུང་བཅུ་གཅིག་པའི་ས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁགརབ་བྱུང་བཅུ་གཅིག་པའི་ས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག །ས་སྤྲེལ་གདན་ས་ཆེན་པོ་དཔལ་ལྡན་ས་སྐྱའི་ཆོས་ཀྱི་ཁྲིར་རིགས་ཀྱི་སྲས་ངག་དབང་ཀུན་དགའ་བཀྲ་ཤིས་པའི་སྐབས་ལ་ཁྲི་ཆེན་འཇམ་དབྱངས་ངག་དབང་བསོད་ནམས་དབང་ཕྱུག་ལ་ལེགས་སྐྱེས་འབུལ་བར་འདར་པ་བློ་བཟང་དབང་ཕྱུག་རྫོང་སྟ་བྱས་སྐབས་ཕུལ་བའི་ཞུ་ཡིག་བྱམས་པའི་འདུས་དང་པོའི་མཆེད་ཟླ། ཀྵེ ཏྲཻ རྦྷཱ རྟཽ ས ར ན ཡ ན ཤེ ཥཱ ཎཱཾ ཛྙཱ དཱ ཡ ཤྩི ནུ བྷ བ ཀ ཊཱ ཀཻ ཀཾ བྷཱུ། བ ཛྲ ཪྶ ཏྭ པྲབྷུམ ཡ བ ཏྐོ ཊཱི ནཱཾ བི དྱཱ དྷཱ རཾ ཧི སུ ཀྲྀ ཏ མཱུ རྡྷོ ར ཏྣ། ཞིང་(སྡེབ་སྦྱོར་ཆུ་འཛིན་འཕྲེང་བ)ཁམས་རྒྱ་མཚོའི་རྣམ་འདྲེན་མ་ལུས་པའི། །མཁྱེན་བརྩེ་ནུས་མཐུའི་ཕུང་པོ་གཅིག་གྱུར་པ། ཁྱབ་བདག་རྡོ་རྗེ་སེམས་དཔའི་སྒྱུ་འཕྲུལ་ཅན། །རིག་འཛིན་བྱེ་བའི་གཙུག་རྒྱན་རིན་པོ་ཆེར། །(༡༨༡ན)
རིང་མིན་རྣམ་པར་དགེ་བའི་དུས་ཀྱི་ཆར། །མི་ཟད་རྒྱན་གྱི་འཁོར་ལོའི་སྐུ་གསུང་ཐུགས། །འགྱུར་མེད་གཡུང་དྲུང་ངོ་བོར་ལེགས་བཞུགས་པ། །བསྟན་དང་འགྲོ་བའི་ཕན་བདེའི་ཉེར་འཚོའི་དཔྱིད། །འདི་ན་ལང་ཚོ་ཡོལ་བས་རྒན་པོའི་གྲར། །ཆུད་ཀྱང་ལུང་རྟོགས་ཡོན་ཏན་ན་ཕྲ་བ། །སྲིད་པ་ཆུ་ཟླ་ལྟ་བུར་མཐོང་བཞིན་དུ། །རྩེ་གཅིག་སྒྲུབ་གཡེལ་རྣམ་གཡེང་ཁོལ་པོར་གནས། །འོད་གསལ་འཆི་མེད་དམུ་ཐག་ལ་བབས་པའི། །རང་རིས་གདུང་ལས་བརྒྱུད་པའི་རྒྱལ་བའི་སྲས། །འཁོན་སྟོན་འཇམ་དཔལ་གཞོན་ནུའི་ཁྲིར་ཕེབས་ལ། །བདེ་གཤེགས་སློབ་མར་བཅས་པས་མེ་ཏོག་འཐོར། །དཀྱིལ་འཁོར་ཀུན་གཙོར་བཞེངས་པའི་ཧེ་རུ་ཀ །མི་བཟད་ཁྲོ་བོ་འབར་བའི་སྟང་སྟབས་ཀྱིས། །རྡོ་རྗེའི་ཆོས་སྐྱོང་རྣམས་ལ་བཀའ་བསྒོས་ཏེ། །ཡིད་སྲུབས་སྡེ་བཅས་འཇིག་པའི་གཏམ་དེ་སྙན། །བྱམས་པའི་འདུས་པ་དང་པོ་ཇི་བཞིན་དུ། །མཆོག་དམན་བར་པར་བཅས་པའི་ཚོགས་རྣམས་ལ། །ཐེག་ཆེན་ཆོས་འཁོར་ཐོག་མར་ལེགས་བསྐོར་བ། །སློབ་བཤད་ཟབ་དོན་སྤེལ་བའི་སྔོན་འགྲོའི་སྒོ། །ན་ཚོད་ལང་ཚོའི་སྒོང་རྒྱ་མ་གྲོལ་ཀྱང་། །མཁྱེན་བརྩེ་ནུས་པའི་སྐད་སྙན་འགྱུར་ཁུགས་ཅན། །རྒྱལ་སྲས་ཀ་ལ་པིངྐའི་རྣམ་ཐར་ལ། །མཁས་རློམ་འདབ་ཆགས་ཕལ་གྱིས་བསྐྲུན་ནུས་མིན། །གདུང་བརྒྱུད་རིམ་པར་བྱོན་པའི་ཞལ་གདམས་སོགས། །མགོན་ཁྱོད་ཐུགས་གསང་དཔལ་གྱི་བེའུ་རུ། །གཏམས་པའི་ཆོས་ཀུན་བུམ་པ་གང་བྱོའི་ཚུལ། །སྩལ་ཏེ་བསྟན་པའི་བདག་པོར་མངའ་གསོལ་རིགས། །འཇིགས་མེད་སེང་གེས་བཏེག་པའི་ཁྲི་ཆེན་པོར། །རྡོ་རྗེའི་སྐྱིལ་ཀྲུང་བསྐལ་པར་རྟག་བཅས་ནས། །ཟབ་དང་རྒྱ་ཆེའི་ཆོས་ཀྱི་འཁོར་ལོ་ཡིས། །འགྲོ་རྣམས་སྨིན་གྲོལ་ལམ་ལ་འགོད་(༡༨༡བ)
པར་གསོལ། །མཚན་དཔེ་གསལ་རྫོགས་ཞལ་ཁྱིམ་འདབ་སྟོང་སྒོ། །འཛུམ་དབུས་ཚེམས་འཕྲེང་ཟེའུ་འབྲུ་བཞད་རྩ་ནས། །སྙན་འགྱུར་ཕེབས་ཚོགས་བྷཱ་མ་ར་ཡི་གླུ། །ཐོསའཛིན་ལམ་དུ་ཆད་པ་མེད་པར་ཞུ། །རབ་དཀར་ལྷ་རྫས་ཁ་ཚར་ལྡན་པའི་ཟླ། །རྟགས་ཀྱི་རིགས་དྭགས་གཟུགས་བརྙན་མངོན་གསལ་པ། །ཟུར་ཕུད་ལྔ་པ་རིམ་བྱོན་བསྟི་གནས་སུ། །ལྷག་བསམ་མཁའ་ལ་བགྲོད་དེ་ཕུལ་བ་དགེ །ས་སྤྲེལ་གྱི་ལོ་གདན་ས་ཆེན་པོ་དཔལ་ལྡན་ས་སྐྱ་པ་ཁྲི་ཐོག་ཏུ་གདུང་བརྒྱུད་རིན་པོ་ཆེ་ངག་དབང་ཀུན་དགའ་བཀྲ་ཤིས་ཕེབས་སྐབས་ལེགས་བྱའི་དགའ་སྟོན་འབུལ་བར་འདར་པ་བློ་བཟང་དབང་ཕྱུག་རྫོང་སྟ་བྱས་སྐབས་ཕུལ་བའི་ཞུ་འཕྲིན་རིགས་གསུམ་ཆོས་ཀྱི་འཁོར་ལོས་སྒྱུར་བའི་གཏམ་སྙན་སྒོ་བརྒྱ་དང་པོ། བྲ ཧྨ ཎཻ ནྡྲེ ཤ ཧ རྻཱ དཾ དེ བཻ ཪྶ མཱ ནྱཾ པྲ ཛ ཥྞཱ ཥེ ཧཱི བྷཱུ མི དྡྷི ཀེ ཏུ ཥུ། པ ཏྣ ཁ སྶཱ ནྡྷི མེ། གྱ བེ ཤེ རྨེ ཎཱ སཾ མ ཧཱ པཱ ཏྱ དྷ རྨ སྭ མཱི རཱ ཏྣ ཀེ། མེས་(སྡེབ་སྦྱོར་མེ་ཏོག་འཕྲེང་ཅན)པོ་འཕྲོག་བྱེད་མགྲིན་སྔོན་བརྒྱ་བྱིན་སོགས། །ལྷར་བཅས་སྐྱེ་རྒུའི་གཙུག་གཏོར་ས་འཛིན་རྩེར། །ཞབས་སེན་ཐུན་འཚམས་གོས་དམར་ངལ་གསོ་བའི། །མཚུངས་མེད་བདག་ཆེན་ཆོས་རྗེ་རིན་པོ་ཆེར། །(༡༨༢ན)
རིང་བསྐྱེད་ཐུགས་ཀྱི་རི་བོ་ཚོགས་གཉིས་མཚོར། །སྒྲིལ་ལས་ལེགས་ཐོན་མཚན་དཔེ་གཟུགས་སྐུའི་ཉི། །བརྒྱ་ཕྲག་གཟི་འབར་འཇིག་རྟེན་གསུམ་སྣང་བའི། །སྒྲོན་མེར་བྱེད་པོས་གཅིག་ཏུ་སྦར་བ་བཞིན། །མགྲིན་པ་སྐྱེ་བ་ལྔ་པའི་གཡས་འཁྱིལ་དུང་། །ཚངས་དབྱངས་ཡན་ལག་དྲུག་ཅུའི་སྒྲར་དྲངས་པའི། །བདེ་བར་གཤེགས་པའི་ལམ་བཟང་སྙན་འགྱུར་གླུ། །སྐལ་ལྡན་ཡོངས་ཀྱི་རྣ་བའི་རྒྱན་དུ་འཇེབས། །དྲི་བྲལ་ཐུགས་ཀྱི་མེ་ལོང་གསར་པའི་ངོས། །ཤེས་བྱར་སྲིད་དོ་ཅོག་ཀུན་འཆར་བས་ན། །རྣམ་པ་ཐམས་ཅད་མཁྱེན་པའི་ཡེ་ཤེས་དེ། །ཞིང་ཁམས་གཞན་དུ་འཚོལ་འདོད་བྱིས་པའི་བློ། །འདི་ན་སྡོམ་བརྩོན་སྡེ་སྣོད་ཀློག་པ་མཁན། །བློ་གྲོས་གཟིངས་ཀྱིས་གཙུག་ལག་རྒྱ་མཚོའི་མཐའ། །གཞལ་བར་བྲེལ་ཡང་རྡོ་རྗེའི་རྣལ་འབྱོར་མཆོག །ཀླུ་དབང་གཙུག་གི་ནོར་བུ་དོར་མིན་ཙམ། །རིགས་གསུམ་མགོན་དེ་འགྲོ་ལ་རྗེས་ཆགས་གར། །མི་ཡི་སྲིད་པ་རྒྱུན་ཆད་མེད་བཟུང་བ། །རང་རིགས་ཆོས་ཀྱི་འཁོར་ལོས་སྒྱུར་བའི་ཁྲིར། །བྱོན་པའི་གཏམ་སྙན་སྒོ་བརྒྱ་དང་པོ་ཕྱེ། །གངྒཱའི་རྡུལ་སྙེད་དཀྱིལ་འཁོར་བདག་པོ་རུ། །གདན་གསུམ་ཚང་བའི་ལྷ་ཚོགས་མ་ལུས་པས། །དབང་བསྐུར་ལུང་དུ་བསྟན་ཚེ་གངས་ལྗོངས་འདིར། །དཔལ་ལྡན་ཆོས་སྐྱོང་མངོན་སུམ་འོངས་པ་བཞིན། །མ་རིག་མུན་སྟུག་ལས་འཁོན་འཇམ་མགོན་རིགས། །ཆ་ཕྲའི་ན་ཚོད་ཟླ་བ་གསར་ཆོས་ཀྱང་། །ཉན་རང་རྒན་པོའི་རྒྱུ་སྐར་ཟིན་གནོན་པར། །སྲས་བཅས་ཕྱོགས་བཅུའི་རྒྱལ་བས་ལེགས་སོ་སྟེར། །འགྲོ་འདྲེན་(༡༨༢བ)
དམ་བཅའ་ནམ་ཡང་མི་གཏོང་བའི། །ངག་དབང་ཐུགས་བསྐྱེད་དྷཱིཿཡིག་ཞུན་མའི་ཁམས། །འཁོན་བརྒྱུད་ཉ་ཕྱིས་ཁོག་ཏུ་དར་དྲག་པ། །མུ་ཏིག་འཕྲེང་དཀར་འཛད་པ་མེད་འདི་མཚར། །རྒན་པོའི་བློ་གྲོས་འཆང་བའི་རྣམ་དཔྱོད་ཀྱིས། །དུས་གསུམ་རྒྱལ་ཀུན་ཡབ་ཏུ་རྟག་གྱུར་ཀྱང་། །གཞོན་ནུའི་ཚུལ་གྱི་ཟུར་ཕུད་ལྔ་ལྡན་པ། །མི་ཡི་སྲིད་པའི་ཟློས་གར་ཅི་ཡང་རྩེན། །སྨིན་གྲོལ་རྒྱུད་བཤད་ལུང་དང་མན་ངག་རྣམས། །གསན་བསམས་བསྒོམས་པས་གཏན་ལ་ལེགས་ཕབ་སྟེ། །ས་སྐྱའི་བླ་ཆེན་རིང་ལུགས་དབྱར་མཚོ་ལྟར། །སྤེལ་བའི་སྙིང་སྟོབས་གོ་ཆ་དང་དུ་བཞེས། །བདེ་ལྡན་དག་པའི་ཞིང་གི་མགོན་པོ་དང་། །དབྱེར་མེད་ཚེ་མཐའ་ཡས་པར་བྱིན་བརླབས་ནས། །ཆོས་སྲིད་ཉི་ཟླ་ཟུང་དུ་འཇུག་པའི་བསྟན། །འཛིན་པར་མཆོག་གསུམ་ཐུགས་རྗེའི་མཐུ་སྐྱེད་ཤོག །ཟབ་ཡངས་ཐུགས་ཀྱི་གངྒཱའི་ཡབ་གཅིག་ལས། །བཀའ་མཆིད་ཛཧྣུ་ཡི་བུ་མོའི་རྒྱུན། །དབུས་འགྱུར་ནོར་འཛིན་ལུས་ཕྲའི་ལྟོ་བ་རུ། །གཞར་ཡང་ཆད་པ་མེད་པར་འབབ་ཏུ་གསོལ། །ཕུན་ཚོགས་རྟེན་ཅིང་འབྲེལ་བར་འབྱུང་བའི་སྒོ། །སྒྲིག་བྱེད་བདོག་པའི་དངོས་པོ་ཁྲ་ཤར་དང་། །རི་མོ་སྤྱན་རས་བཙའ་ཕྱིར་ལྷ་རྫས་གོས། །མནབས་ཏེ་རྒྱལ་བླའི་ཡར་ཚེས་དགེ་བར་ཕུལ། །ས་སྤྲེལ་ལོ་གསར་ཐོག་ལྕོག་གྲ་སྤྲུལ་སྐུ་ངག་དབང་སྙན་གྲགས་བཟང་པོས་སྙན་ཚིག་གི་ལམ་ནས་དྲངས་པའི་འཕྲིན་ཡིག་དང་ལེགས་སྐྱེས་བྱུང་བའི་ལན་སྒོམ་ཆེན་རྒྱུ་སྐར་དབུས་ན་གསལ་བའི་ཟླ་བ། (༡༨༣ན)
པི ཀ ལྤ རེ ཁོ ད ཡ མཱ ལ གཎྱཱ ཉྩ དྷ རྨ ཀཱ ཡཱ སྨ ཀ བཻ བྱ སཽ ཥྚ། སྠ ན གམོ མུ དྲ ཧི ཤཱ ས ན དྷ ཀ སཱུ པ ཀྲོ ཏྟ ལླ ཁེ ཙི ཧྞ ཡུ ཀྟཾ། ཀུན་སྡེབ་སྦྱོར་ཉེ་དབང་རྡོ་རྗེ།)རྟོག་རི་མོར་འཆར་བའི་སྒྱུ་མའི་ཚོགས། །ཆོས་སྐུར་རང་ངོ་ཤེས་པའི་ཡོ་ལང་ཅན། །གནས་ལུགས་ཕྱག་རྒྱའི་བསྟན་པ་འཛིན་རྣམས་ཀྱི། །རྒྱན་ཆ་གཅིག་ཏུ་མཛེས་དེའི་འཕྲིན་རྟེན་སོན། །གང་ཤར་སེམས་སུ་ངེས་པའི་རྣལ་འབྱོར་པ། །བཟང་ངན་བླང་དོར་བྲལ་ཡང་བཏགས་ཙམ་དུ། །བསོད་ནམས་ཤིང་རྟ་སྟོང་གིས་དྲངས་པའི་ལུས། །དལ་འབྱོར་ནོར་བུ་གཡོ་མེད་བརྟན་དེ་སྤྲོ། །འདི་ན་ཆོས་ནོར་འདོད་ཐར་སྒོ་ཕྱེ་ནས། །བསྟན་འགྲོའི་ཕན་བདེ་བླ་ནས་བླར་འདེགས་ཀྱང་། །རྩོད་བྲལ་སྨིན་སྲོལ་ཟུང་འཇུག་རྡོ་རྗེའི་ཐེག །མཁས་གྲུབ་ཡོངས་ཀྱི་ཤུལ་དུ་འཇུག་འདོད་ཙམ། །ཡལ་གའི་རི་དགས་གསེར་སྦྱངས་ཞུན་མའི་གོས། །ཀླུབས་པའི་གནམ་ལོ་དང་པོར་ཤར་བའི་ཚེ། །ཤིས་བརྗོད་མེ་ཏོག་འཕྲེང་བ་(༡༨༣བ)
སྤེལ་ལེགས་ཅན། །བདོག་པའི་སྐྱེས་ཀྱི་ཚན་གྲངས་གཅིག་ཏུ་དགེ །ཀ་ཙན་བརྡ་སྤྲོད་མཐོ་རིས་ཆུ་བོའི་རྒྱུན། །བློ་གྲོས་ལྟོ་བར་འཇུག་པའི་དྲང་སྲོང་ཁྱོད། །སྒོམ་ཆེན་རྒྱུ་སྐར་དབུས་ན་ཟླ་བ་ལྟར། །རང་གི་གྲིབ་མ་ཙམ་ལ་གྲོགས་སུ་འཛིན། །གཙུག་ལག་མང་པོ་ཐོས་ཤིང་བསམས་པ་ཡི། །རྣམ་དཔྱོད་ལང་ཚོ་རྒྱས་པའི་རྐང་པ་ཟུང་། །བླང་དོར་ས་ལ་གོམ་པ་འགོད་པ་ཡང་། །གྲུབ་རིགས་ཙཱུ་ཏའི་ཁྲོད་དུ་ཆུད་དཀའི་གནས། །འོན་ཏེ་བཅུ་ཕྲག་རིག་པའི་གནས་ཀུན་ལ། །སྦྱངས་སྟོབས་མིག་རྒྱང་རིང་པོས་ཉེར་གཞལ་ཚེ། །དྲང་སྲོང་ཕུར་བུས་ཁྱོད་ཀྱི་ངང་ཚུལ་ལ། །བལྟ་ཕྱིར་ནམ་མཁའི་ལམ་དུ་ངེས་པར་རྒྱུ། །དེ་ཙམ་འཁྲུལ་ངོའི་འཆར་སྒོ་སྙན་ཚིག་གི །རྒྱུད་མངས་གླུ་རུ་བླངས་པ་རྣ་བའི་བཅུད། །མ་ལུས་རི་མོར་འདྲི་ན་རྣམ་རྟོག་མཐའ། །ཟད་པ་མེད་ཕྱིར་ཡི་གེའི་གྲོན་ལས་ཅི། །དེང་ནས་མི་ཕམ་མགོན་དེ་མ་ག་དྷར། །རྣམ་གསུམ་ཆོས་ཀྱི་འཁོར་ལོ་བསྐོར་མིན་པར། །བགྲང་བྱ་གསར་ཚེས་ཀུན་ཏུ་ཉམས་འགྱུར་སྟོང་། །འཕྲིན་ཡིག་མགྲིན་པའི་པད་མཚོར་གླུར་ལོངས་ཤིག །ཁྱོད་བློ་རིགས་མེད་ཡིད་ཅན་མ་ལུས་ལ། །གཅིག་ཏུ་དཀར་བའི་ལྷག་བསམ་མཚོན་པའི་ཆེད། །དྲི་བྲལ་ཁ་ཚར་ལྡན་པའི་དུ་ཀཱུ་ལ། །ཐུན་འཚམས་རྟགས་ཀྱིས་ལང་ཚོས་སྤུད་འདིའོ། །མེ་ལུག་གི་མཇུག་དང་ས་སྤྲེལ་གྱི་ལོ་འགོར་ས་གཡོས་དར་འོད་དཀར་སོགས་ལྟས་སྣ་ཚོགས་བྱུང་སྐབས་བསམ་ཡས་སུ་བསྟན་སྲུངས་གནོད་སྦྱིན་ཆེན་པོར་ལུང་བསྟན་ཞུ་བར་བཏང་བའི་འཕྲིན་ཡིག་སྤྱན་རས་མེ་ལོང་ངོས་ཀྱི་རི་མོ། །སྤྲུལ་པའི་ཆོས་རྒྱལ་མཆེད་ལྔའི་བཀའ་གཉན་མཆོག །ཙེའུ་དམར་པོ་འབར་བ་སྤུན་བདུན་གཙོ། ཁམས་གསུམ་སྐྱེ་རྒུའི་སྲོག་བདག་བཤན་པ་ཆེ། །གཡེལ་(༡༨༤ན)
མེད་དྲི་བའི་ཚིག་འདིར་ལྷ་སྙན་གཏོད། །མཇུག་རིང་འཇའ་རིས་སོགས་སུ་ཁ་མཚོན་གྱིས། །དཔྱོད་དཀའི་མཁའ་ལ་ལྟས་གསར་ཤར་བ་འདི། །རྣམ་སྣང་གསང་སྒྲོམ་གཏེར་གྱི་ལུང་བྱང་དུ། །འོད་དཀར་སྐྱ་རེངས་བཤད་དང་སོམ་ཉིར་གྱུར། །ཤར་ཕྱོགས་ཚང་ཚིང་འཁྲིགས་པའི་དྭགས་ཡུལ་ས། །མང་པོར་གཡོས་དང་དུས་མིན་གཡུ་འབྲུག་སྐད། །བསྒྲགས་སོགས་སྡུག་བསྔལ་བསྐྱེད་པའི་སྔོན་འགྲོ་ཡི། །ཚུལ་ལ་ཤེས་ལྡན་ཕལ་ཆེར་འཁྱོག་བློ་འཆད། །བོད་འབངས་ཕན་བདེ་བསྒྲུབ་ཐབས་པདྨའི་ལུང་། །ཇི་བཞིན་བཞེད་པའི་སྔོན་རབས་དམ་པ་འགར། །དུས་གནད་རྟེན་འབྲེལ་ཡིད་སྲུབས་རྒྱུ་ཐབས་ཀྱིས། །མ་འགྲིག་ལྗོངས་འདིའི་ལུས་ཅན་ལས་དམན་མཐུ། །འདི་ན་འགྲོ་ལ་ལྷག་བསམ་པདརྩ་ལྟར། །དཀར་ཡང་དེ་དོན་སྒྲུབ་རྔོ་ཐོགས་དཀའ་ཞིང་། །བྱ་བྱེད་བླང་དོར་ཚུར་མཐོང་བྱིས་བློ་ཡིས། །རྟོགས་མིན་མུན་པར་འཕང་པའི་ཉག་ཕྲན་བཞིན། །ལྷ་ཁྱོད་དཔྲལ་བའི་དབུས་ན་དམར་ཟླུམ་སྤྱན། །ཆོས་ཀུན་མངོན་སུམ་བལྟ་ལ་དྲི་བྲལ་བས། །ཕོ་ཉའི་ངག་ནས་གསོལ་བའི་སྨྲེང་རྣམས་ལ། །དམ་ཚིག་གཉན་པོ་མ་བྲལ་ལུང་དུ་སྟོན། །གསེར་སྐྱེམས་རྒྱ་ཇ་ལྷ་རྫས་ཕྱི་ནང་གོས། །གོ་མཚོན་ཅང་ཤེས་རྟ་སོགས་མཐུན་པའི་རྫས། །སྔགས་དང་ཕྱག་རྒྱས་རྨུགས་འཛིན་མཛོད་བཞིན་དུ། །འབུལ་ན་བསྟན་སྲུངས་དབང་པོ་དགྱེས་སྐྱེད་མཛོད། །བསམ་ངན་སྦྱོར་རྩུབ་འཆང་བའི་དགྲ་བགེགས་དཔུང་། །སྡེ་བཅས་སྙིང་གི་ཁྲག་དྲོན་གསོལ་བ་དང་། །ལྷན་ཅིག་བདག་སོགས་རིག་འཛིན་སྒྲུབ་པོ་ཡི། །བསྟན་སྲིད་ལེགས་ཚོགས་ཡར་ངོའི་ཟླ་ལྟར་སྤེལ། །རིག་པའི་རྩལ་གྱི་སྣང་སྲིད་འཁོར་འདས་ཆོས། །ཀུན་ལ་དབང་སྒྱུར་པདྨ་ཐོད་འཕྲེང་གི ། (༡༨༤བ)
ཞལ་ཤེས་མ་གཡེལ་བོད་འབངས་བསྟན་དང་འགྲོའི། །མེལ་ཚེ་མཛོད་ཅིག་དྲེགས་པའི་སྡེ་དཔོན་ཀྱེ། །ས་སྤྲེལ་མཆིམས་ཕུ་གནམ་ཐེའི་ལུང་བསྟན་གྱི་དོགས་དཔྱོད་བགྱིད་པར་ཆང་ཁྱིམ་པ་ངག་དབང་མཁྱེན་བརྩེ་བཏང་སྐབས་ཀྱི་འཕྲིན་ཡིག་ཐེ་ཚོམ་མདུད་འགྲོལ། རྒྱལ་དབང་པདྨ་ཐོད་འཕྲེང་གི །མངག་གཞུག་ལྷ་ཆེན་གནམ་ཐེ་ཡི། །འཕྲིན་ཡིག་དར་དཀར་རྟེན་དང་བཅས། །སུག་པར་སོན་པས་སྤྲོ་བ་འཕེལ། །མི་མཐུན་ཉེས་ཀུན་ཞི་བ་དང་། །ཕུན་སུམ་ཚོགས་པའི་ཡོན་ཏན་རྣམས། །འཕེལ་ཐབས་བླང་དོར་བསྟན་པའི་དོན། །ཡིད་གཉིས་དྲ་བའི་གཟེབ་ཏུ་ཚུད། །དེ་དོན་ཞིབ་ཏུ་ཕོ་ཉ་ཡིས། །དྲི་བ་གཡར་ལམ་ནས་གསོལ་བར། །ཚུལ་བཞིན་ལག་ཏུ་བསྟར་བདེ་བའི། །གནས་ལུགས་གསོང་པོར་གསལ་བར་སྟོན། །གསེར་སྐྱེམས་དར་མཚོན་སྙན་ཤལ་དང་། །རྒྱ་ཇ་ཚོགས་ཀྱི་འཁོར་ལོར་བཅས། །མཆིམས་ཕུག་གསུང་གི་དབེན་གནས་མཆོག །སྐྱོང་བའི་མཐུ་ལྡན་དབང་པོར་དགེ། མེ་ལུག་གི་འཇུག་དང་ས་སྤྲེལ་གྱི་ལོ་འགོར་འཇའ་དཀར་ས་གཡོས་དང་། དུས་མིན་གྱི་འབྲུག་སོགས་བྱུང་སྐབས་ཚོང་འདུས་སུ་བཤན་པ་བྱ་ཁྲི་མིག་གཅིག་པར་ལུང་བསྟན་ཞུ་བར་ཆང་ཁྱིམ་པ་བཏང་སྐབས་འཕྲིན་དུ་གསོལ་བ། ཐུགས་མཚོར་ཤེས་བྱ་ཀུན་གསལ། དུས་གསུམ་སངས་རྒྱས་པདྨ་ཐོད་འཕྲེང་གི །དམ་ཚིག་རྡོ་རྗེའི་རི་མོ་གཙུག་ཏོར་རྩེར། །རབ་བཀྲ་ཇི་བཞིན་ཡོལ་མེད་ལས་སྒྲུབ་པའི། །བཤན་པ་གནོད་སྦྱིན་བྱ་ཁྲིད་མིག་གཅིག་པ། །འགྲོ་ཀུན་རང་གི་ལས་ཉོན་འཁྲུལ་པའི་མདངས། །ཕྱི་རོལ་མཁའ་ལ་ཤར་བ་མི་དགེའི་ལྟས། །སྒྱུ་མའི་རྟ་གླང་རྗེས་འགྲོ་དཀར་མིན་འབྲས། །མངོན་སུམ་དོན་བྱེད་ནུས་ལ་འཁྱོག་བློ་འཆང་། ཁོལ་བུར་སྣ་ཚོགས་ས་གཞི་གཡོ་བ་དང་། །དུས་མིན་འབྲུག་སྐད་ནམ་ཟླའི་(༡༨༥ན)
གཤིས་འགྱུར་སོགས། །མཚན་མས་བོད་འབངས་མནར་བར་འགྱུར་སྙམ་ནས། །ཉེས་མངས་གཉེན་པོ་སྒྲུབ་ཟློར་གཅིག་ཏུ་འདུན། །འོན་ཏེ་ལྐོག་གྱུར་རྟོགས་པའི་མངོན་ཤེས་དང་། །མི་ལྡན་འོལ་ཅི་ཙམ་དུ་ལག་བསྟར་བ། །འཕྱུག་མེད་གནད་དུ་འགྲོ་བར་མ་ངེས་པས། །རང་སེམས་གཞན་ཕན་བསམ་པ་དཀར་བར་ཟད། །དྲེགས་པའི་དབང་ཕྱུག་ཁྱོད་ཐུགས་མཚོ་ནང་དུ། །ཤེས་བྱར་སྲིད་པའི་ཟླ་གཟུགས་འབུམ་ཕྲག་ཀྱང་། །དོག་མིན་རྣམ་པར་ཡངས་པས་དྲི་བའི་ལན། །ཐེ་ཚོམ་མུན་པ་མཐའ་དག་དྲུངས་ནས་ཕྱུང་། །ཐུབ་བསྟན་ཡོངས་འདུའི་རྩ་བ་མི་གཡོ་བརྟན། །ཁྲིམས་གཉིས་ཟུང་འབྲེལ་ཡལ་འདབ་རབ་ཏུ་རྒྱས། །གྲིབ་མར་ལུས་ཅན་ཚོགས་རྣམས་ངལ་གསོར་སྤྱོད། །བཅོལ་བའི་ལས་བཞིའི་འབྲས་བུས་དུད་པར་མཛོད། །སྤྱན་སྔར་སྤེལ་བའི་མཐུན་པའི་དམ་རྫས་ཚོགས། །ཏིང་འཛིན་སྔགས་རྒྱས་མཁའ་ཁྱབ་ཡིད་འོང་བར། །སྤྲུལ་པས་ཐུགས་དམ་གཉེན་པོ་སྐོང་གྱུར་ཏེ། །དགྱེས་ཞལ་འཛུམ་ལྡན་རྡུལ་བྲལ་ཟླ་ལྟར་སྟོན། །མེ་ལུག་གི་ལོ་མཇུག་དང་ས་སྤྲེལ་གྱི་ལོ་འགོར་ས་གཡོས་དང་འཇའ་དཀར་སོགས་བྱུང་སྐབས་བསྟེན་སྲུངས་ཚངས་པ་དུང་ཐོད་ཅན་ལ་ལུང་བསྟན་ཞུ་བར་རབ་འབྱམས་པ་ཀུན་དགའ་བསྟན་འཛིན་རྫོང་སྟ་བྱས་ཏེ་འཕྲིན་དུ་གསོལ་བ་གསང་མཛོད་ཕྱག་རྒྱ་འགྱེད་པའི་ལྡེ་མིག །སྙན་པའི་དབྱངས་འཁྲོལ་སྐྱེ་བ་ལྔ་པའི་དུང་། །གནག་སྣུམ་རལ་པའི་རྩེར་མཛེས་ཚངས་པ་ཀྱེ། །དངོས་བཤམས་ཡིད་སྤྲུལ་མཆོད་པ་སྤྱན་རས་ཀྱིས། །ཉེར་བཙའ་སྨྲེང་དུ་གསོལ་བའི་ལྷ་སྙན་གཏོད། །འཛམ་གླིང་བརྟུལ་ཞུགས་གྲུབ་པའི་རིག་སྔགས་འཆང་། །སངས་རྒྱས་གཉིས་པ་པདྨ་ཐོད་འཕྲེང་གི །ཟབ་གཏེར་ལུང་དུ་བསྟན་པའི་དུས་རྟགས་གཟུགས། །གནམ་སའི་རི་མོར་(༡༨༥བ)
འཆར་འདི་སོམ་ཉེར་འགྱུར། །ལྷ་ཁྱོད་དཔྲལ་བའི་དབུས་ཀྱི་ཡེ་ཤེས་སྤྱན། །རྡུལ་བྲལ་མེ་ལོང་གཙང་མའི་ངོས་ཡངས་པོར། །ལྐོག་གྱུར་ཤེས་བྱའི་སྣང་བརྙན་ཀུན་འཆར་བའི། །ཚུལ་ལ་ངེས་རྙེད་དྲི་བྱའི་ཡུལ་དུ་འཁུམས། །རིམས་འཁྲུག་དབུལ་སེལ་བོད་ཁམས་བདེ་ཐབས་དང་། །དེའི་གཞི་ཤཱཀྱའི་བསྟན་པ་རིང་དུ་གནས། །ས་སྤྱོད་རྒྱལ་པོར་དགེ་བའི་ཐབས་ཚུལ་སོགས། །རྒྱལ་དབང་པདྨས་གཏེར་ཁ་མང་པོར་བསྟན། །འོན་ཏེ་གཞན་ཕན་འདྲེན་རློམ་ཆེན་པོ་འགའི། །སྙིང་ལ་བདུད་ཀྱིས་ཉེར་བརླམས་ངེས་པའི་ཚུལ། །བཀག་སྟེ་རང་ཆེ་བསྒྲུབ་པའི་རྣམ་ཐར་གྱིས། ཁ་བའི་ལྗོངས་འདིར་སྔོན་ཆད་མང་ཞིག་མནར། །དྲེགས་པའི་དེད་དཔོན་རྣམས་ཀྱིས་མངོན་སུམ་དུ། །གཟིགས་པ་ཇི་བཞིན་བདག་བློ་སྟོན་ཟླ་ལྟར། །དཀར་ཡང་བོད་འབངས་ལ་སྨན་བསྒྲུབ་བྱ་ཡི། །ལས་རྗེས་ཆུ་ལ་བྲིས་པའི་རི་མོ་བཞིན། །ད་དུང་སེམས་ཀྱིས་བཟོད་མིན་ཕན་པའི་ཐབས། །བསྒྲུབས་ཟིན་རྣམས་ཀྱི་འབྲས་བུ་སྨིན་ཚུལ་དང་། །སླད་མར་བྱ་འོས་སྟོན་སོགས་བླང་དོར་གྱི། །གནད་རྣམས་རྡོ་རྗེའི་ཚིག་གི་ལུང་དུ་སྟོན། །གསེར་སྐྱེམས་ཕྱི་ནང་གོས་དང་རྒྱ་ཇ་སོགས། །མི་འཛད་ནམ་མཁའ་མཛོད་དུ་ཏིང་འཛིན་གྱིས། །བརླབས་འདི་ཡབ་གཅིག་སྲོག་བདག་ཚངས་པ་དཀར། །དགྱེས་པར་རོལ་ལ་འཕྲིན་ལས་རྣམ་བཞི་སྒྲུབས། །ས་སྤྲེལ་ཟླ་བ་གསུམ་པའི་ནང་དུ་བསམ་ཡས་སུ་ཆོས་རྒྱལ་ཆེན་པོར་སྤྱན་གཟིགས་ཚོགས་འཁོར་དང་བཅས་ལུང་བསྟན་ཞུ་བར་ཆང་ཁྱིམ་པ་ངག་དབང་མཁྱེན་བརྩེ་རྫོང་སྟ་བྱས་སྐབས་འཕྲིན་དུ་གསོལ་བ་བཏང་སྙོམས་གཉིས་ལས་སློང་བའི་རྫ་རྔ། དམུ་རིགས་ཀླུ་ཡི་ཚ་བོ་རྫུ་འཕྲུལ་ཅན། །གཅིག་ལས་དུ་མར་སྤྲུལ་པའི་ཆོས་རྒྱལ་ཆེ། །སྣང་སྲིད་དྲེགས་པའི་དམག་སྣ་འདྲེན་པའི་གཙོ། །དྲི་བྲལ་ལྷ་ཡི་(༡༨༦ན)
སྙན་དབང་དེང་འདིར་གཏོད། །རྒྱལ་ཀུན་མཁྱེན་བརྩེ་ནུས་པའི་མངའ་བདག་མཆོག །མཚོ་སྐྱེས་རྡོ་རྗེས་བོད་ཡུལ་བསྟན་སྲུངས་སུ། །བསྐོས་ན་དེང་དུས་མི་དགེའི་ལྟས་མང་བར། །བཟློག་ཐབས་བླང་དང་དོར་བྱ་ལུང་སྟོན་རིགས། །ནད་ཡམ་མུ་གེ་གཡུལ་འབྲུག་ལ་སོགས་པ། །དཀར་མིན་འབྲས་ཀྱི་ལྗོངས་འདི་མནར་གྱུར་ན། །བྲོ་བོར་དམ་བཅའ་རྡོ་ཡི་རི་མོ་ལྟར། །གྲགས་པའི་གཏམ་ཡང་མིང་གི་ལྷག་མར་ཟད། །གཙུག་ཏུ་རྡོ་རྗེའི་རི་མོ་འགྱུར་མེད་རྟགས། ཁོག་ཏུ་བརླམས་ཚེ་སྟོན་པའི་སྐབས་མཆིས་ན། །དོན་པོ་གཡར་དམ་སྲོག་བཞིན་གཅེས་བཟུང་ནས། །རུ་བཞིའི་ལུས་ཅན་མགོན་སྐྱབས་དཔུང་གཉེན་མཛོད། །རིགས་འཛིན་བདག་གིས་བཅོལ་བའི་ལས་རྣམས་ཀྱང་། །ཐོགས་པ་མེད་པར་ལྷུན་གྱིས་གྲུབ་པ་དང་། །སོམ་ཉིར་གྱུར་བའི་བླང་དོར་དྲི་བའི་ཚིག །མེ་ལོང་ནང་གི་བྱད་བཞིན་ལྟ་བུར་སྟོན། །བཀྲས་བཏགས་གསེར་སྐྱེམས་རྒྱ་ཇ་གོས་ཕྱི་ནང་། །རྣོ་མཚོན་ཅང་ཤེས་ཚོགས་ཀྱི་འཁོར་ལོ་སོགས། །ནམ་མཁའ་མཛོད་ཀྱི་ཕྱག་རྒྱས་བྱིན་བརླབས་ཏེ། །འབུལ་གྱིས་དགྱེས་ཞལ་ཟླ་བ་ལྟར་ངོམས་ཤིག །ཆོས་རྒྱལ་ཆེན་པོ་དང་ལྷན་དུ་གནོད་སྦྱིན་ལས་མཁན་ཡང་སྤྱན་དྲངས་ཏེ་ལུང་བསྟན་ཞུ་བར་ཆང་ཁྱིམ་པ་བཏང་དུས་འཕྲིན་དུ་གསོལ་བ། དྲེགས་པའི་སྡེ་དཔོན་གནོད་སྦྱིན་ཙིའུ་དམར་པོའི་སྤྱན་སྔར་སྙན་ཤལ་སོགས་ཐོགས་ལ་ཕུལ་བ་བཞིན་སྔོན་ནས་རྒྱུ་མཚན་སྨྲེང་དུ་གསོལ་བ་ལྟར། ད་ལམ་ཆོས་རྒྱལ་ཆེན་པོ་སྤྱན་དྲངས་ཐོག་ཞལ་གྱིས་འཆེས་པའི་བླང་དོར་མཐའ་དག་སྟོན་པར་མཛོད། ཞིབ་པ་ཕོ་ཉའི་གཡར་ལམ་ནས་གསོལ་བ་ལྟར་ཡིན། ཚེས་བཟང་པོར་དགེ །(༡༨༦བ)
ས་སྤྲེལ་ཟླ་བ་གསུམ་པའི་ནང་དུ་མཆིམས་ཕུ་ལྷ་མོ་རིགས་འཛིན་མའི་རྡོ་རྗེའི་གསུང་འཕྲིན་བྱུང་བའི་ལན་དུ་ཆང་ཁྱིམ་པ་བཏང་སྐབས་གསོལ་བ་གསོང་པོར་སྨྲ་བའི་གཏམ། པདྨ་ཐོད་འཕྲེང་བཀའ་ཉན་ཅན། །རིགས་འཛིན་ལྷ་མོ་རལ་གཅིག་མའི། །འཕྲིན་ཡིག་ལྷ་རྫས་རྟེན་དང་བཅས། །སུག་པར་སོན་པས་བདག་ཡི་རང་། །གསུང་གི་གནས་སྐྱོང་སྤྲུལ་པའི་སྐུར། །ཉམས་པའི་གཏམ་དང་དངོས་པོ་ཡིས། །སྦྲགས་པར་རྒྱལ་ཁྲིམས་ཀྱིས་མནར་བར། །ཕན་པ་བསྒྲུབ་སླད་སེམས་ལ་གཞོལ། ཁྱད་པར་རལ་གཅིག་ལྷ་མོ་ཡིས། །རང་གནས་དགོས་པའི་ངོ་ཆེན་གྱིས། །གངས་རིས་ཟླ་བ་ཤར་བ་བཞིན། །སླར་ཡང་ལྷག་བསམ་འཕེལ་བའི་གསོས། །བོད་ཁམས་བདེ་བའི་ཐབས་ཚུལ་རྣམས། །བསྟན་པའི་བླང་དང་དོར་བྱ་ཡང་། །མ་བརྗེད་སྙིང་ལ་རབ་སིམ་པ། །རྡོ་ལ་བྲིས་པའི་རི་མོ་བཞིན། །དར་ཚོན་གསེར་སྐྱེམས་རལ་གྲི་དང་། །ལོངས་སྤྱོད་ཚོགས་ཀྱི་འཁོར་ལོར་བཅས། །པདྨའི་གསུང་གི་གནས་སྐྱོང་བའི། །བསྟན་སྲུངས་དབང་མོའི་སྤྱན་སྔར་སྤེལ། །ས་སྤྲེལ་མཆིམས་ཕུ་རྟ་ར་བའི་བུ་ནོར་བུ་འཛིན་པའི་འཕྲིན་ལན་ངོར་མཚར་རེ་སྐོང་། དབེན་རྩ་བཤན་དམར་ཁང་པ་ནས། །ནོར་བུ་འཛིན་པའི་འཕྲིན་ཡིག་སོན། །དེར་འཁོད་དོན་ལ་དོགས་པའི་གནས། །བྱུང་རྣམས་ཕོ་ཉའི་ངག་ནས་གསལ། །ལོག་པར་རྟོག་པའི་ཐེ་ཚོམ་གྱི། །དྲ་བ་མཐའ་དག་གཅོད་པ་དང་། །མི་མཐུན་ཕྱོགས་ཀུན་རབ་ཞི་ཞིང་། །མཐུན་རྐྱེན་འགྲུབ་པའི་འཕྲིན་ལས་མཛོད། །སྙན་ཤལ་ཟུང་འབྲེས་གསེར་སྐྱེམས་ཏེ། །རྣོ་ངར་ལྡན་པའི་རལ་གྲི་དང་། །ཚོགས་ཀྱི་འཁོར་ལོའི་མཆོད་པ་ཡིས། །ལྷ་ཁྱོད་སྒོ་ལྔ་ཚེམ་པར་རོལ། །ས་སྤྲེལ་ས་སྐྱོང་འཕྲིན་ལས་རྒྱ་མཚོ་དང་བསྟན་འཛིན་ད་ཡན་(༡༨༧ན)
རྒྱལ་པོ་གཉིས་ཀྱི་དགོངས་རྫོགས་སུ། བཀའ་འགྱུར་རིན་པོ་ཆེ་ཚར་རེ་བཞེངས་རྒྱུའི་དོ་དམ་དུ་གཟིམས་ཤག་པ་དཀོན་ཅོག་དར་རྒྱས། སྟག་རུ་བ་ཚེ་དབང་བཀྲ་ཤིས། ཆ་དཀར་བཙུན་པ་གསུམ་བཏང་སྐབས་བར་གཅོད་སེལ་བའི་ཆེད་དུ་ཐང་ཆེན་རྒྱལ་པོར་སྤྱན་གཟིགས་དང་བཅས་འཕྲིན་དུ་གསོལ་བ་བསམ་པ་ཇི་བཞིན་ལྷུན་གྲུབ། རིགས་རྣམས་ཀུན་གྱི་བདག་པོ་རྡོ་རྗེ་འཆང་། །རྒྱ་གར་པཎ་ཆེན་གཟུགས་སྤྲུལ་ཐོད་འཕྲེང་རྩལ། །ཕྱག་ན་རབ་འབར་རྡོ་རྗེའི་རི་མོའི་གཟུགས། །གཙུག་ཏོར་མེ་ལོང་ངོས་ཤར་སྲུང་མ་ཀྱེ། །ཕ་མེས་རིགས་ཀྱི་དགྲ་ལྷ་མཐུ་རྩལ་ཅན། །བཤན་པ་ལག་དམར་འཁོར་བཅས་སྤྱན་ལམ་དུ། །དངོས་སྤྲུལ་ཐུགས་དམ་སྐོང་བར་བྱེད་པའི་རྫས། །ནམ་མཁའ་མཛོད་ཀྱི་སྒོ་ཕྱེ་ལེགས་འབུལ་ན། །ཐུབ་པའི་ལུགས་འཛིན་བཤད་སྒྲུབ་སྡེ་རྣམས་འཕེལ། །བོད་འདིར་ནད་ཡམས་གཡུལ་འཁྲུག་དབུལ་ཕོངས་ཞི། །རིགས་འཛིན་བདག་གིས་བཅོལ་བའི་འཕྲིན་ལས་ཀུན། །བསམ་པ་ཇི་བཞིན་ལྷུན་གྱིས་གྲུབ་པར་མཛོད། །རྒྱལ་རྣམས་གསང་གསུམ་མཛད་པའི་རབ་དང་ཕུལ། །མདོ་རྒྱུད་གསུང་རབ་གླེགས་བམ་བརྒྱ་ཕྲག་གཟུང་། །འདྲི་བར་ཉེར་འཚེའི་བགེགས་རིགས་ཀུན་བཟློག་ཅིང་། །མཐུན་རྐྱེན་ལེགས་ཚོགས་ངང་གིས་འགྲུབ་པར་མཛོད། །ལྐོག་གྱུར་བླང་དོར་ལུང་བསྟན་གསལ་པོར་སྟོན། །ཡིད་སྲུབས་བདུད་སྡེའི་བ་དན་ས་ལ་སྙོལ། །དཀར་པོ་ཆོས་ཀྱི་རྒྱལ་མཚན་སྲིད་པའི་རྩེར། །སྒྲོངས་ལ་སྙན་པའི་རྫ་རྔ་ཕྱོགས་བཅུར་སྒྲོགས། །ས་སྤྲེལ་ར་བ་སྨད་ཆོས་སྐྱོང་གིས་སྐྱེས་ཚན་གྲངས་དང་བཅས་རིམ་གྲོང་དགོས་ཚུལ་གྱི་བསྐུལ་མའི་འཕྲིན་ཡིག་བྱུང་བའི་(༡༨༧བ)
ལན་ཚུལ་བཞིན་བསྟར་བའི་དབྱར་རྔ། ལྷ་བཙན་དྲེགས་པའི་དབང་ཕྱུག་ཆེན་པོ་ཡི། །གསུང་འཕྲིན་རིང་འཚོའི་སྐྱེས་ཀྱི་ཚན་གྲངས་དང་། །གེགས་སེལ་རིམ་གྲོའི་བླང་དོར་ལུང་བསྟན་བཅས། །མ་ཉམས་ཐུན་འཚམས་རྒྱ་ཡིས་སྤྲས་པ་སོན། །ཕུན་ཚོགས་རྟེན་ཅིང་འབྲེལ་བར་འབྱུང་བའི་སྒོ། །བརྒྱ་ཕྲག་ཅིག་ཅར་སྒྲིག་པའི་སྟ་གོན་བཞིན། །ཞི་རྒྱས་དབང་དྲག་འཕྲིན་ལས་མ་ལུས་པ། །འབད་པ་མེད་པར་ལྷུན་གྱིས་སྒྲུབ་པར་མཛོད། །སྙན་ཤལ་གསེར་སྐྱེམས་རལ་གྲི་ཞགས་པ་སོགས། །མཐུན་པའི་དམ་རྫས་སྔགས་རྒྱས་རབ་སྤེལ་ནས། །ཆུ་ཤེལ་དབང་པོ་ས་ག་དང་འགྲོགས་པའི། །སྔོན་མའི་ཕྱོགས་ཀྱི་རྒྱལ་བ་གཉིས་པར་དགེ། ས་སྤྲེལ་ཨར་གེ་རྒྱལ་པོས་རིམ་གྲོའི་བསྐུལ་མ་བསྲིངས་པའི་འཕྲིན་ལན་རྡོ་ལ་བྲིས་པའི་རི་མོ། ཕུན་ཚོགས་དགེ་བའི་ཡུལ་གྲུ་ཆེར། །གྲགས་པའི་གཡུ་རུ་གྲྭ་ནང་ནས། །བསྟན་སྲུངས་བཤན་པ་དམར་པོ་ཡིས། །བླང་དོར་སྟོན་པའི་གསུང་འཕྲིན་འབྱོར། །ཚུལ་བཞིན་བགྱིད་པར་སེམས་པ་ཡི། །རི་མོ་རྡོ་ལ་བྲིས་པ་བཞིན། །མཚུངས་པར་ཁྱོད་ཀྱིས་འཕྲིན་ལས་བཞི། །སྒྲུབ་པའི་དམ་བཅའ་བརྟན་པོར་ཟུངས། །ལྷ་རྫས་གསེར་ཕུད་མཚོན་ཆ་བཅས། །བཞེད་པ་སྐོང་བའི་དམ་རྫས་སུ། །བརླབས་ཏེ་ས་གས་ཉ་བའི་ཟླའི། །དཀར་པོའི་ཕྱོགས་ཀྱི་ཚེས་ལ་དགེ། སྔ་འགྱུར་ཆོས་ཚུལ་རྒྱ་མཚོར་མཁས་ཤིང་གྲུབ་བརྙེས་སྐ་བཙལ་བླ་མ་དཀོན་ཅོག་ལྷུན་གྲུབ་ཀྱི་འཕྲིན་ལན་ཡིད་སྲུབས་སྡེ་བཅས་བཤིག་པའི་(༡༨༨ན)
སྒྲ་དབྱངས། ས རྦྦ ཤ ནྟཿ ཀྲོ དྷ ཀཱ ཡ ཝ ཀྩི ཏྟ ཀ རྨཱ ཎཱི གུ ཎཿབི ལཱ ལི ཏ མ ཧཱ ཤྲཱི ཧེ རུ ཀ པྲ བྷུ བྷ བྱ ཀུ རུཿ ཞི་(སྡེབ་སྦྱོར་ཁ་སྒོ་ཏ་ཡང་མ།)དང་ཁྲོ་བོ་མ་ལུས་པའི། །སྐུ་གསུང་ཐུགས་ཡོན་འཕྲིན་ལས་ཀྱི། །རྣམ་རོལ་ཆེ་མཆོག་ཧེ་རུ་ཀ །རིགས་ཀུན་བདག་པོས་ཤིས་པར་མཛོད། །ཡང་སྲིད་མང་པོར་ཆོས་དཀར་བདུད་རྩིའི་བཅུད། །སྙིང་གི་ཟ་མ་ཏོག་ཏུ་ཡོངས་འཁྱིལ་བས། །ཚེ་འདིར་ཤེས་བྱའི་གནས་རྣམས་ཚིགས་ཆུང་ངུས། ཁོངཆུང་རིག་སྔགས་འཆང་བའི་འཕྲིན་རྟེན་སོན། །ན་ཚོད་རྒན་པོའི་ཁུར་དང་ལྷན་ཅིག་ཏུ། །ལུང་རྟོགས་ཡོན་ཏན་འབྲས་བུ་རབ་དུད་པའི། །གཏན་འདུན་ས་ལེ་སྦྲམ་གྱི་འབྱུང་ཁུངས་ཁྱོད། །ཛམྦུ་ལྗོན་པའི་མཆེད་ཟླར་དེང་འདིར་འགྲུབ། །ངེས་པར་དལ་འབྱོར་ཆོས་ཀྱི་ཆ་ཤས་ཀུན། །གང་བས་སྒྲིབ་གཉིས་མུན་སེལ་གཟུགས་ཕུང་ཉིད། །སྣ་ཚོགས་ཟུག་རྔུ་ལྷ་མིན་དབང་པོ་(༡༨༨བ)
ཡི། །མཆེ་བའི་ཕྲག་ལས་རིང་དུ་བརྒལ་ཏེ་སྤྲོ། །ཕོངས་པས་རྒྱལ་པོའི་མཛོད་ནོར་བགྲང་བ་ལྟར། །བཅུ་ཕྲག་རིག་པའི་གནས་མང་ཉེར་ཐོས་ཀྱང་། །དོན་མེད་འདི་སྣང་འདུན་མས་བློ་བྲིད་པའི། །རབ་རྨོངས་ཁོ་བོ་མནོག་ཆུང་གཡེང་གཟེབ་ཆུད། །སྔགས་རློམས་རི་མོའི་མར་མེ་སྒྱུ་དྲའི་གར། །མ་ཡིན་ཆོས་གྲགས་དཔྱད་གསུམ་དག་པའི་ལུང་། །ཇི་བཞིན་མནན་སྲེག་འཕང་ལས་ཐོག་མདའ་ཡིས། །ཡིད་སྲུབས་དཔུང་བཅས་བཤིག་པའི་སྒྲ་དེ་སྙན། །མ་འདྲིས་ཀུན་ལ་ཁྱབ་པ་སྙིང་རྗེའི་རྩལ། །ཆོས་ཀྱི་དབྱིངས་ནས་བཞེངས་པའི་ཁྲོ་རྒྱལ་གྱིས། །འཁྲུལ་ངོའི་ཞིང་བཅུ་ཚང་བའི་ཁྲག་དྲོན་རྒྱུན། །རྔུབ་ཞལ་ཆེར་གདངས་སྲིད་གསུམ་ཟ་བ་བཞིན། །སྡེ་དཔོན་སུམ་ཅུའི་གོམ་པ་དགྲ་སྙིང་ལ། །ཉེར་བཀོད་གསོད་རྟགས་ཀ་ར་ཝཱི་རའི་རྗེས། །བཞག་པའི་མོད་ལ་དགའ་རབ་དབང་ཕྱུག་དཔུང་། །མྱ་ངན་ཁང་བུར་སོར་མོས་འགྲམ་པ་འདེགས། །ཆེར་སྙིགས་ལྔ་བརྒྱ་ཐ་མའི་ཆུ་ཀླུང་དུ། །ལོག་སྨོན་འགྲུབ་པའི་དམ་སྲི་འབྱུང་པོའི་དུག །ཤར་རྣམས་དག་བྱེད་ཞི་ཁྲོ་རོལ་པ་ཡི། །ཟབ་གསང་ཆུ་ལྷའི་བུ་དེ་གཞན་ན་ཅི། །ཡོད་ཡོད་ཐེག་མཆོག་རྒྱ་མཚོའི་དྲོད་ལྡིང་ཡང་། །དོན་དུ་རྔན་སྦྱིན་དག་ཙམ་གཏོང་བའི་ཆུ། །རྙེད་དཀའི་བན་སྔགས་ཚུལ་ལ་ཁྲེལ་དགོད་སྒྲ། །སེམས་མེད་དབྱར་སྤྲིན་མགྲིན་རྔ་སྒྲོག་པ་བཞིན། །རྣམ་འབྱེད་ཤེས་རབ་རི་བོ་སྒྲིལ་མིན་པར། ཁྱོད་བློ་ཆུ་གཏེར་གློང་གབ་(༡༨༩ན)
ལུང་རྟོགས་ཟླ། །མ་མཐོང་མཁས་རློམ་རྫིང་བུའི་རི་བོང་ཅན། །མཚར་འཛིན་རྣམ་དཔྱོད་རྡུལ་གྱི་ཆ་བཞིན་ཕྲ། །སྔ་འགྱུར་རིང་ལུགས་རྩ་བ་ཆེས་སྦོམ་ཞིང་། །རྩེ་མོ་ཐུབ་བསྟན་གནས་པ་དེ་སྲིད་མཁན་རབ་བྲས་ཐོས་བསམ་ཡལ་གར་སྨིན་གྲོལ་འབྲས། །དུད་པའི་བྱེད་པོ་དེང་དུས་ཁྱོད་དུ་འཁུམས། །འདུ་འཛིས་རིང་ཙམ་བསམ་གཏན་པ་ཀུན་ལ། །གྲགས་མོད་མཆོག་ཏུ་སེམས་ཉིད་གཉིས་འཛིན་ལས། །ཡོངས་དབེན་རང་རིག་དོན་གྱི་ཐོད་འཕྲེང་རྩལ། །རང་ཞལ་མངོན་སུམ་མཐོང་བའི་གནད་གསང་གཅེས། །ཐོས་བསམ་མུཀྟི་ལ་ཡི་འཁྲི་ཤིང་ཆར། །སྔོན་གོམས་ལེགས་བྱས་རྒྱ་མཚོའི་མཐུས་བབས་པ། །རྩོལ་བར་བལྟོས་པ་མིན་ཡང་རྡོ་རྗེ་གསུམ། །གཡོ་མེད་དམ་བཅའི་ཚུལ་ལ་ལྷག་པར་རངས། །བཀའ་གཏེར་བསྟན་སྲོག་ཁྱོད་རིང་འཚོ་བ་དང་། །ཟུངས་སུ་གྱུར་ཕྱིར་དྷཱུ་ཏཱིའི་ཀ་བ་ཡིས། །ཐབས་ཤེས་ཨ་ཧང་འགྱུར་བ་མེད་བྱིན་དུ། །རློབ་པར་རྩ་གསུམ་ཐུགས་རྗེའི་མཐུ་དཔུང་སྐྱེད། །དབྱངས་ཅན་སྤྱན་རས་ཉིན་བྱེད་བརྒྱ་ཕྲག་ཏུ། །ཕོག་པའི་ཤེས་རབ་ཏེ་སེའི་གཙུག་ཏོར་ལས། །ཆོས་དང་འབྲེལ་མཆོད་གངྒཱ་ཆད་མེད་པ། །རང་གི་ངོ་བོ་མི་གཏོང་དངོས་པོའི་གཤིས། །སྙན་ངག་ཉམས་འགྱུར་སྟོང་ལྡན་ཤ་མི་སྒྲིབ། །རྟེན་གོས་དུ་ཀཱུ་ལ་ཡི་ཁ་ཚར་ཅན། །གྱོན་པའི་འཕྲིན་ཡིག་འཆི་མེད་གར་མཁན་མ། །སྲོང་བཙན་སྤྲུལ་པའི་གནྡྷོ་ལ་དེར་སོང་། །ལུགས་ཟུང་ལ་བལྟ་བའི་དཔྱོད་ལྡན་རུ་ཐོག་དབང་པོ་ཕུན་ཚོགས་རྣམ་རྒྱལ་གྱིས་རིང་འཚོའི་རྟེན་བྱུང་དུ་འདོག་པའི་སྐྱེས་དང་བཅས་སྙན་ཚིག་གི་འཕྲིན་(༡༨༩བ)
ཡིག་བྱུང་བའི་ལན་ཉི་བུ་ལས་ཀྱི་མེ་ལོང་དོར་བའི་གཏམ་སྙན། སཱ རི ཏྱཱ གི གོ ད ཀྱཱ ཀཱ རུ ཎྱཱ ཡཱ མི ཀྱཱ ཨཱ མ ལྱ། ཙི ནྟཻ རྨཱ ཎེ ཤྩ ཀྲཱ ཙཱ རེ སྟོ ཀ ལྱཱ ཀཽ རུཿ ཤུ དྡྷཱུ ཀྲྀ། ཐུགས་(སྡེབ་སྦྱོར་གློག་འཕྲེང་།)རྗེ་གངྒཱའི་ཆུ་རྒྱུན་གྱིས། །དུས་ཀྱི་ཕོ་ཉའི་དྲི་མ་ཀུན། །དག་མཛད་ཡིད་བཞིན་འཁོར་ལོ་མས། །དཔྱོད་ལྡན་ཁྱོད་ལ་དགེ་བར་མཛོད། །སྤོབས་པ་མང་ཐོས་རྣམ་པར་སྦྱོར་བ་ཡི། །ཡོན་ཏན་ཆ་རྫོགས་ཆུ་ཤེལ་དབང་པོ་ལས། །དོན་རྒྱན་འཕྲིན་ཡིག་འོད་ཟེར་དཀར་འཇམ་དར། །ག་བུར་ངད་ལྡན་སེམས་ཀྱི་ཀུན་དའི་དཔྱིད། །འཁོར་མཚོར་སྲིད་བཟུང་མོང་བརྟུལ་འདམ་རྫབ་ཀྱིས། །མ་གོས་གནས་ལྔ་རིག་པའི་འདབ་སྟོང་ཁྱོད། །ཟུག་རྔུས་བ་མོས་མ་རེག་ལེགས་བཤད་ཀྱི། །སྦྲང་རྩི་མཛད་མེད་གཏམ་སྙན་རྣ་བའི་བཅུད། །འདིར་གནས་ཐོས་བསམ་སྒོམ་འབྲས་མི་ལྡན་ཡང་། །ན་ཚོད་རྒན་པོའི་སྡོང་པོ་ཆེས་སྦོམ་པ། །ཆོས་བརྒྱད་ཁང་བུ་ལོ་མའི་གྲིབ་བསིལ་ངོགས། །འགྲོ་(༡༩༠ན)
རྣམས་ངལ་གསོར་སྤྱོད་འདོད་རྨོངས་འདུན་ཙམ། །དཀོན་ཅོག་ཐུགས་རྗེ་བསྐུལ་བའི་མགྲིན་རྔའི་གླུ། །སྙན་ཚིག་རྒྱུད་དུ་དྲངས་པའི་སྒྲ་དབྱངས་དང་། །ལྷན་ཅིག་བདོག་པའི་སྐྱེས་ཀྱི་ཚན་གྲངས་བཅས། །ཕུན་ཚོགས་རྟེན་འབྲེལ་སྒོ་བརྒྱ་བསྒྲིགས་འདི་སྤྲོ། །ལས་ཉོན་གྱིས་འཕངས་སྒྲིབ་པའི་ལུས་ཅན་ང་། །མི་ཟད་སྐྱེ་འཆིའི་གཞན་དབང་རྗེས་འབྲང་ཡང་། །འགྲོ་མང་འདྲིད་པའི་སྒྱུ་ཐབས་ལྷུར་བླངས་ནས། །རིང་འཚོར་ཁས་འཆེའི་ཐོག་རྫུན་ཁྲེལ་དགོད་རྒྱུ། །ཀྱེ་མ་ལྐོག་ཏུ་མ་གྱུར་རང་རྒྱུད་ལ། །མངོན་སུམ་སྙོན་དུ་བྱེད་པ་བདག་གཅིག་པུ། །མ་ཡིན་བོད་འབངས་གཞན་ཕན་འདྲེན་པ་རུ། །རློམ་པའི་བླ་ཆེན་ཕལ་གྱི་རྣམ་པར་ཐར། །འོན་ཏེ་ས་སྤྱོད་ཁྱོད་ཀྱི་ལྷག་པའི་སེམས། །གངྒཱའི་ཡབ་གཅིག་སྤུན་ཟླ་ལས་བབས་པའི། །བདེན་ཚིག་རྒྱུ་འབྲས་ཡན་ལག་བརྒྱད་ལྡན་ཀླུང་། །ཆོས་ཉིད་རྒྱ་མཚོར་འབབ་དེ་གང་གིས་ལྡོག །སྲས་བཅས་རྒྱལ་བས་བྱིན་རླབས་བདུད་རྩིའི་རྒྱུན། །བདག་ཡིད་དད་པའི་ཟ་མ་ཏོག་འཁྱིལ་བས། །ཉི་མའི་བུ་ངལ་ལས་ཀྱི་མེ་ལོང་ཆེ། །དོར་ཏེ་བསྐལ་བར་གཉིད་ལ་ཅིས་མི་གཡུར། །ཚེ་དང་ཡོན་ཏན་ཀུན་གྱི་རྩེར་སོན་པའི། །སྤུར་རྒྱལ་བོད་ཀྱི་ཚངས་པ་རྒན་པོ་ཉིད། །ད་དུང་སྡེ་བཞིའི་གཡར་ངོ་འཆར་བའི་མིག །བགྲད་ནས་ཕན་བདེའི་གཟིགས་མོར་ཡུན་དུ་ལྟོས། །སྲིད་པའི་གནས་ལུགས་བརྗོད་པའི་ཚིག་གི་མཐའ། །མཛད་པའི་གོ་སྐབས་མེད་ཕྱིར་མི་ཕམ་མགོན། །དབུས་འགྱུར་ཡུལ་གྲུར་ཆོས་འཁོར་བསྐོར་མིན་པར། །བཅུ་གཉིས་ཁྱིམ་དུ་ཉི་ཟླའི་འགྲོས་བཞིན་འཚལ། །པད་རག་ཞུན་མའི་ཁུ་བ་ཉེར་འབབ་པ། །རྐང་འཐུང་(༡༩༠བ)
ཕུར་མའི་བམ་པོའི་རྩེར་སོན་པ། །མཁས་ཁྱོད་བཏུང་བར་འོས་ཕྱིར་ཆོམ་རྐུན་གྱི། །མི་ཕྱེད་ཐུན་འཚམས་རྒྱ་ཡིས་སྤྲས་འདིའོ། །ལྷ་ཆེན་ཚངས་པ་དུང་ཐོད་ཅན་གྱིས་བླང་དོར་རིམ་གྲོའི་སྐུལ་མ་བཅས་པའི་གསུང་ཤོག་བྱུང་བའི་ལན་ཚུལ་བཞིན་སྒྲུབ་པའི་བདེན་གཏམ། རྣམ་འདྲེན་ཡོངས་ཀྱི་མཁྱེན་བརྩེ་ནུས་པ་རྣམས། །རྒྱ་གར་པཎ་ཆེན་གཟུགས་སུ་ལེགས་ཤར་བ། །མཚོ་སྐྱེས་རྡོ་རྗེ་ཕོ་ཉ་མཐུ་རྩལ་ཅན། །ལྷ་ཆེན་ཚངས་པའི་གསུང་འཕྲིན་དར་དཀར་འབྱོར། །སྤྱི་དང་ཁྱད་པར་ཡོངས་ལ་ཉེར་འཚེ་བ། །ཡིད་སྲུབས་སྡེ་དང་བཅས་པའི་སྨག་རུམ་རྣམས། །མཐར་བྱེད་ཐུབ་གསུང་ཀློག་སོགས་རྣམ་དཀར་དགེའི། །ལུང་བསྟན་ཉི་མས་བདེ་སྐྱིད་སྣང་བ་སྤེལ། །ལྐོག་གྱུར་མཐའ་དག་མེ་ལོང་བྱད་བཞིན་ལྟར། །རབ་གསལ་བླང་དང་དོར་བྱ་མ་ལུས་པ། །ཇི་བཞིན་ཉམས་སུ་བསྟར་མོད་སླད་མར་ཡང་། །དཔྲལ་བའི་སྤྱན་གྱི་གཟིགས་ནས་མངོན་སུམ་སྟོན། །དེང་དུས་མི་བསྲུན་འབྱུང་པོས་རྒྱུད་བརླམས་ནས། ཁུངས་ལྡན་སྲུང་མར་རྫུ་བའི་མིག་འཕྲུལ་མཁན། །བྱུང་སྙིགས་མའི་དུས་ཀྱི་སྐལ་ངན་ཡང་། །ལྷ་ཁྱོད་མཐུ་སྟོབས་རྡོ་རྗེ་འབར་བས་ཆོམས། །འབྲས་དཀར་རིན་ཅེན་སྤུངས་པའི་ཆོས་གྲྭ་ཆེའི། །བསྟན་སྲུངས་སྔོན་ཆད་ཁོག་ཞུགས་འགྱངས་པ་ལ། །དོག་ཆའི་གནས་མེད་རིང་མིན་འབྱོན་འགྱུར་པའི། །རྒྱུ་མཚན་རྣམས་ཀྱང་ཡིད་ཀྱི་དཔལ་བེར་འཁྱིལ། །ལྷ་སྙན་མཛེས་པར་བྱེད་པའི་དོ་ཤལ་དུ། །ཟླ་ཞུན་ཐགས་སུ་བཏགས་འདྲའི་ལྷ་རྫས་ཟུང་། །གསེར་སྐྱེམས་ས་ཟླའི་འཁོར་ལོ་དང་བཅས་ཏེ། །མགོས་ཉའི་དཀར་ཆའི་དུས་ཚེས་བཟང་བར་དགེ ། ས་སྤྲེལ་ལྷོ་འབྲུག་པས་ཚུར་རྒོལ་བྱས་པར་(༡༩༡ན)
གདོང་ལེན་དུ་དཔུང་བཅུག་སྐབས་བསམ་ཡས་སུ་ལྷ་ས་ནུབ་པ་རིན་ཅེན་རྫོང་ལྟ་བྱས་ཏེ་གནོད་སྦྱིན་ཆེན་པོར་སྤྱན་གཟིགས་དང་བཅས་ཕྱིན་བཅོལ་དུ་གསོལ་བ་རྣམ་པར་རྒྱལ་བའི་རུ་མཚོན། བསྟན་འགྲོའི་ཕན་བདེ་སྤེལ་བའི་མེལ་ཚེ་མཁན། །དཔག་དཀའི་མཐུ་སྟོབས་མངའ་བའི་རྫུ་འཕྲུལ་གྱིས། །སྡེ་བརྒྱད་དམག་གི་ཁ་ལོ་སྒྱུར་བའི་དཔོན། །ཆོས་རྒྱལ་སྡེ་ལྔ་སྤྲུལ་ཡུམ་བློན་པོར་བཅས། ཁྱད་པར་སྐྱེ་རྒུ་རྣམས་ཀྱི་སྲོག་པའི་རྩར། །རང་བཞིན་ལས་ཀྱིས་གྲུབ་པའི་བླ་ཚེའི་གཤེད། །དཔལ་ལྡན་གནོད་སྦྱིན་དབང་པོའི་ཙི་དམར་བ། །བཀའ་གཉན་དྲེགས་པའི་ཚོགས་ཀུན་སྙན་གསོན་ཀྱེ། །ལྷོ་རོང་སྣ་ཚོགས་གྲུབ་མཐའ་འཛིན་མང་པོའི། །མངའ་འབངས་གཡོ་སྒྱུ་ཤེད་ཀྱིས་ཐོབ་པ་ཡིས། །མ་ཚིམ་ཚུར་རྒོལ་སྒོམ་ཆེན་ཆས་དང་མིང་། །གཟུང་ནས་འགྲོ་བའི་བདེ་སྐྱིད་འཕྲོག་ལ་གཟིགས། །རང་ཞབས་ས་མཚམས་འཛིན་པ་ལྷུར་བླངས་ཀྱང་། །ལན་ཆགས་བུ་ལོན་སྙེག་འདྲའི་བསམ་སྦྱོར་ལ། །གཟུང་དང་དཔང་མཛོད་བདེན་བརྫུན་དྲང་ཤན་ཕྱེ། །ཕ་རོལ་དགྲ་དཔུང་མངོན་སྤྱོད་ལས་ཀྱིས་སྒྲོལ། །དབུས་གཙང་རུ་བཞིའི་དཔུང་ཚོགས་བཤམས་པའི་གཡུལ། །རྣམ་པར་རྒྱལ་བའི་ལྷ་ངོ་གཟེངས་བསྟོད་དེ། །སྙན་པའི་གཏམ་དང་ལྷན་ཅིག་འཕྱར་བའི་དར། །སྲིད་པའི་རྩེ་མོའི་བར་དུ་ལེགས་སྒྲོངས་ཤིག །དངོས་བཤམས་ཐོར་གསལ་སྤྱན་གཟིགས་ཀྱིས་མཚོན་པ། །སྔགས་དང་ཕྱག་རྒྱས་ལེགས་སྤྲུལ་ནམ་མཁའི་མཛོད། །ཇི་བཞིན་འབུལ་བཞེས་ཕོ་ཉའི་ངག་གསོལ་ལན། །རྡོ་རྗེའི་གསུང་གིས་གསང་བ་སྟོན་པར་མཛོད། །ས་སྤྲེལ་ལྷོ་འབྲུག་པས་ཚུར་རྒོལ་བྱས་པར་གདོང་ལེན་གྱི་དཔུང་(༡༩༡བ)
བཅུག་སྐབས་ལྕང་ལོ་ཅན་པ་བསྟན་འཛིན་དཔལ་བཟང་རྫོང་སྟ་བྱས་ཏེ་ཚོང་འདུས་སུ་ཆོས་སྐྱོང་བཤན་པ་བྱ་ཁྲི་མིག་གཅིག་པར་སྤྱན་གཟིགས་དང་བཅས་འཕྲིན་བཅོལ་དུ་གསོལ་བ་གཞན་སྡེ་མི་རྟག་ལམ་དུ་འགོད་པའི་མཚོན་རྣོན། ལོག་འདྲེན་སྙིང་གི་ཁྲག་དྲོན་སྐན་སྒྲ་དང་། །བཅས་ཏེ་དགྱེས་གསོལ་སྲོག་གིས་བཤན་པ་ཆེ། །བསྟན་སྲུངས་ཆེན་པོ་བྱ་ཁྲིད་མིག་གཅིག་པ། །སྲིད་གསུམ་སྐད་ཅིག་མྱུལ་བའི་ལྷ་ཁྱོད་གསོན། །གཏེར་སྟོན་དྲི་མེད་ཀུན་དགའི་བར་བཀབ་ཏུ། །ལྷོ་བོད་བདེ་བའི་གཤེད་མར་སྒོམ་ཆེན་གཟུགས། །འབྱུང་བའི་ལུང་བསྟན་དུས་བབས་དེང་གི་སྐབས། །བསམ་སྦྱོར་རྩུབ་མོས་ཚུར་རྒོལ་བྱེད་པར་དགོངས། །གཟུགས་ཅན་དམག་དཔུང་བཤམས་དང་ལྷན་ཅིག་པར། །བོད་སྐྱོང་དྲེགས་པའི་གཡུལ་གཤོམས་མཚོན་རྩེ་རུ། །ལྷོ་འབྲུག་སྲིད་སྡེར་བཅས་པའི་ཚོགས་རྣམས་ཀུན། །མི་རྟག་ལན་བུ་བཀོད་ལ་དབྱིངས་སུ་སྐྲོལ། །གསེར་སྐྱེམས་གོ་མཚོན་ཅང་ཤེས་མཐུན་རྫས་ཀྱིས། །དྲེགས་པའི་དབང་པོ་ཁྱོད་བཞེད་ཡོངས་བཀང་སྟེ། །ཞིབ་པ་ཡར་ལམ་ནས་གསོལ་ལེགས་ཉེས་རྣམས། །ལྐོག་ཏུ་གྱུར་ཀྱང་གསལ་བར་སྨྲེང་དུ་གསོལ། །ས་སྤྲེལ་ལོ་འབྲུག་པས་ཚུར་རྒོལ་བྱས་པར་གདོང་ལེན་དུ་དཔུང་བཅུག་སྐབས་ཆང་མཁྱེན་པ་ངག་དབང་མཁྱེན་བརྩེ་ལ་མོར་རྫོང་སྟ་བགྱིས་ཏེ་ཆོས་སྐྱོང་ཚངས་པ་དུང་གི་ཐོར་ཚུགས་ཅན་ལ་སྤྱན་གཟིགས་དང་བཅས་འཕྲིན་བཅོལ་དུ་གསོལ་བ་བླང་དོར་བཞིན་རས་གསལ་བའི་མེ་ལོང་། ལྐོག་ཏུ་གྱུར་ཀྱང་ཁྱོད་ཀྱིས་མངོན་སུམ་དུ། །གཟིགས་པའི་དྲི་མེད་སྤྱན་ལྡན་སྲོག་གི་བདག །ཚངས་པ་དཀར་པོ་དུང་གི་ཐོར་ཚུགས་ཅན། །འབོད་པའི་སྒྲ་ལ་སྙན་གྱི་དབང་པོ་གཏོད། །རྟག་ཏུ་འཁྲུག་རྩོད་སྣ་འདྲེན་འགྲོ་བའི་བདེ། །འཇོམས་བཞིན་སྒོམ་ཆེན་མིང་འཛིན་ལྷོ་འབྲུག་གི །ཚུར་རྒོལ་བྱེད་འདི་བདེན་རྫུན་བཤན་འབྱེད་གཉེར། །(༡༩༢ན)
དྲེགས་པའི་སྡེ་དཔོན་དཔུང་ཚོགས་མ་ཡིན་ནམ། །རང་ས་བཟུང་ཀྱང་ད་དུང་མཐོ་འཚམ་པར། །དེ་ལན་འཇལ་ཕྱིར་བཤམས་པའི་གཡུལ་ངོ་འདིས། །གཞན་སྲིད་སྡེ་བཅས་བཅོམ་ནས་རྒྱལ་བའི་རྔ། །བརྡུང་བའི་སྒྲ་དབྱངས་འཛམ་གླིང་ཀུན་ཁྱབ་མཛོད། །ཨོ་རྒྱན་སངས་རྒྱས་གཉིས་པས་བོད་ཡུལ་འདིའི། །བསྟན་འགྲོའི་སྲུང་མར་བསྐོས་པ་ཁྱེད་རྣམས་ཀྱིས། །འདི་ལྟའི་གནོད་བྱེད་ཐལ་བར་མི་རློག་ན། །ཞིང་བཅུའི་གཤེད་མ་གྲགས་པ་མིང་དུ་ཟད། །དངོས་སྤྲུལ་ཐུགས་དམ་སྐོང་བའི་དམ་རྫས་འདི། །སྒོ་ལྔའི་དབང་པོར་སིམ་སྟེ་དགྱེས་བསྐྱེད་ནས། །ཅུང་ཟད་ངག་གི་ལམ་ནས་གསོལ་བ་ལྟར། །བླང་དོར་མེ་ལོང་ནང་གི་བྱད་བཞིན་སྟོན། །ས་སྤྲེལ་ལྷ་འབྲུག་པས་ཚུར་རྒོལ་བགྱིས་པར་གདོང་ལེན་དུ་དཔུང་བཅུག་སྐབས་ཐང་པོ་ཆེར་ལྕང་ལོ་ཅན་པ་བསྟན་འཛིན་དཔལ་བཟང་རྫོང་སྟ་བྱས་ཏེ་ཐང་ཆེན་རྒྱལ་པོ་ཆེན་པོར་སྤྱན་གཟིགས་དང་བཅས་འཕྲིན་བཅོལ་དུ་གསོལ་བ་ཧ་ཧའི་གད་བརྒྱངས། གནོད་སྦྱིན་རྒྱལ་པོ་ཤིང་བྱ་ཅན་གྱི་བློན། །བཤན་པ་ལག་དམར་མཐུ་སྟོབས་རྫུ་འཕྲུལ་བདག །སྤྱན་སྔར་དམ་སྐོང་མཆོད་སྤྲིན་ཐོ་གསལ་ལྟར། །འབུལ་གྱིས་ཞི་རྒྱས་དབང་གི་ལས་ཀུན་སྒྲུབས། ཁྱད་པར་མི་བསྲུན་བསམ་དང་སྦྱོར་བ་ཡིས། །ཚུར་རྒོལ་ལྷོ་འབྲུག་དམག་གི་དཔུང་ཚོགས་ཀྱི། །ཤ་ཁྲག་སྲོག་དབུགས་ཆམ་ཆེམ་ཞལ་གསོལ་བའི། །དྲག་སྦྱོར་མཐུ་ཡིས་གཞལ་སྡེ་སྦ་བཀོང་ཞིག །བོད་ཡུལ་སྐྱོང་བའི་ལྷ་སྲིན་སྡེ་བརྒྱད་ཀྱི། །ཞལ་ཁྱིམ་མཐོན་པོའི་དབྱིངས་སུ་དཔངས་སྟོད་ནས། །རང་སྲིད་དཔའ་བོའི་དཔུང་ཚོགས་རྣམས་རྒྱལ་བའི། །(༡༩༢བ)
སྭོ་སྒྲ་ཧ་ཧའི་གད་བརྒྱངས་ཕྱོགས་བཅུར་སྒྲོགས། །དཔྲལ་བའི་དབུས་ན་ཉི་མ་ལྟར་འཁྱིལ་བའི། །དམར་ཟླུམ་སྤྱན་གྱིས་སྟེང་འོག་ཕྱོགས་མཚམས་ཀུན། །གཟིགས་ནས་བགྱི་བར་འོས་དང་འོས་མིན་རྣམས། །སྟོན་ཅིག་ཕ་མེས་བརྒྱུད་པའི་བསྟན་སྲུངས་ཀྱེ། །
རབ་བྱུང་བཅུ་གཅིག་པའི་ས་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག །ས་བྱ་ལོ་གསར་དགའ་སྟོན་ཐོག་ལྕོག་གྲ་སྤྲུལ་སྐུ་ངག་དབང་སྙན་གྲགས་བཟང་པོས་སྙན་ངག་གི་ལམ་ནས་དྲངས་པའི་འཕྲིན་ཡིག་བདོག་པའི་སྐྱེས་དང་བཅས་བསྲིངས་པ་འབྱོར་བའི་ལན་ལྔ་རིག་གསེར་སྒོང་སྦྲུམ་པའི་རྒན་པོ། མ དྷྱ དེ ཤེ ད མོ པོ ཀྟ ཙཱ ཏུ རྦི ཏོ མེ དི ནཱི པཱ ཀྵི ནཱ བོ བྫ ཏ ྈྐ མྦུ རཿལ ཀྵྨི ཡོ ད ཀྵི ཎེ ཀུ ཎྜ ལཱ ཤྲི བ ཏཱ གཱི ཏ ཏེ ཀ ཎྛ བཱི ཎཱི རུ ཏཾ རྞི ཡཿ འཕགས་(སྡེབ་སྦྱོར་མེ་ཏོག་འཕྲེང་ཅན།)པའི་ཡུལ་དུ་ཞི་བར་ཉེར་འབོད་པ། །བཞི་ལྡན་ས་བྱ་གསར་དུ་ཚེས་པའི་དུང་། །ཕུན་ཚོགས་གཡས་འཁྱིལ་ཤིས་པ་བརྗོད་པའི་གླུ། ཁྱོད་མགྲིན་རྒྱུད་མངས་སྒྲར་བླངས་རྣ་བར་འཇེབས། །(༡༩༣ན)
ལེགས་བཤད་དོན་གྱི་སྐྱེས་བཟང་མཻ་ན་ཀཿ ། བདོག་པའི་ཚན་གྲངས་གོས་ཀྱིས་རབ་ཀླུབས་ནས། །དཔྱོད་ལྡན་འདུན་སར་དགའ་བའི་གར་བསྒྱུར་བ། །བླང་དོར་འབྱེད་པའི་མིག་གི་གཟིགས་མོར་ཆེ། །མང་ཐོས་ནོར་གྱི་ལྕི་བའི་ཁྱོད་ལུས་པ། །ཟུག་རྔུའི་ཆུ་གཏེར་གློང་ལས་གྱེན་འདེགས་པ། །བསོད་ནམས་གཟུགས་ཅན་བཞིན་བྱས་རུས་སྦལ་གྱི། །ངལ་བའི་ཁུར་ཆེན་མ་བཏང་ཚུལ་ལ་སྤྲོ། །འདི་ན་ཐོས་བསམ་སྒོམ་པར་མོས་བློའི་ཉི། །རྣམ་གཡེང་རླུང་གིས་མཁའ་ལ་ལྟག་བྲེལ་ཡང་། །འཆད་རྩོད་རྩོམ་པའི་སྣང་བ་འོད་པོ་ཆེས། །ཐུབ་བསྟན་འདབ་སྟོང་བཞད་ལ་མི་དམན་ཙམ། །བགྲང་བྱའི་གཟིངས་ཀྱིས་ན་ཚོད་ཆུ་བོ་ཡི། །སུམ་གཉིས་ཙམ་ལས་བཅད་པར་གྱུར་མིན་ཡང་། །ལྔ་རིག་གསེར་སྒོང་གང་བློའི་མངལ་སྦྲུམ་པས། །གཅིག་ཏུ་རྒན་པོར་གྱུར་ཏེ་ཕྱང་མོ་ཉུག །གྲུབ་བརྒྱུད་ཁ་བའི་རྡུལ་བརྩེགས་ཆེས་དཀར་བ། །སྲིད་ཞན་ན་བུན་འཁོར་བ་གཤིས་ཡིན་ཚེ། །ཆོས་བརྒྱད་རི་དྭགས་གཟུགས་བརྙན་དང་བྲལ་བའི། །མི་ལ་སྔོན་མེད་ཟླ་བར་གང་གིས་བསྙོན། །འོན་ཏེ་དེང་དུས་ཁ་བའི་སྨན་ལྗོངས་འདིར། །མར་མི་དྭགས་པོའི་རྣམ་ཐར་དྲི་མ་མེད། །འཛིན་ཀྱང་ཤོང་དཔང་བསྟན་པའི་ཉིན་མོར་བྱེད། ཁྱོད་མིན་ཕུར་བུས་བཙལ་ཀྱང་མ་རྙེད་ངལ། །དེང་ནས་མི་ཕམ་མགོན་དེ་འཕགས་ཡུལ་དུ། །འཚམས་སྤྲིན་གོས་ཀྱིས་མ་མནབས་དེ་སྲིད་བར། །གསར་ཚེས་དུས་སྟོན་འཕྲེང་བར་སྤེལ་ཀུན་ཏུ། །ཉམས་འགྱུར་སྙན་པའི་གླུ་རུ་རྟག་ལོངས་ཤིག །ནམ་ཡང་གང་གི་རྒྱུད་ལ་དུག་གསུམ་གྱིས། །བརླང་པོར་སྤྱོད་པའི་རྩུབ་རག་དང་བྲལ་བའི། །ཞི་(༡༩༣བ)
འཇམ་ཆེས་དཀར་མཆེད་པོར་འོས་པའི་རྟེན། །འཕྲིན་ཡིག་ལུས་ཕྲའི་བག་ཡོད་གོས་སུ་ཀླུབས། །ས་སྤྲེལ་གོང་ནས་ཡར་ཀླུངས་ཨེ་མཆི་དང་། ཏ་དབེན་མཛྙུ་ཤྲཱིའི་དབོན་པོ་གཉིས་གསེར་ཡིག་ཏུ་མངགས་པའི་བཀའ་ཤོག །གནང་སྦྱིན་སོག་བོད་གཞུང་གི་བདེ་ཐབས་སྙན་དུ་གསོལ་བར་ཞལ་གྱིས་འཆེས་པའི་ལུང་བཟང་པོ་དང་བཅས་བྱུང་བའི་ཕེབས་ལན་གྱི་ཞུ་ཡིག་འབུལ་སྐྱེལ་དུ་ཐང་སག་སློབ་དཔོན་བློ་བཟང་འཇམ་དབྱངས་དང་། ཁང་གསར་རབ་བརྟན་རྫོང་སྟ་བྱས་སྐབས་ཕུལ་བ་འགྲོ་ཀུན་ཕན་བདེར་སྦྱོར་བའི་གཏམ་སྙན་ཕང་འགྲོའི་སྒྲ་དབྱངས། བཱ ཧ བཱ ནཱཾ མ ཧཱ རཱ ཛྱ ཏཱ པཱ རི ཛ མྦུ དྭི པོ ཥྞཱི ཥ ཙ གྲོ ཙྩ ལཱི ཡཱ ས ནེ། ནཱི ཥ མ ཏྲཾ ས ཏཱ ཡུ བན བཱ མ ནྟྲི ཀཱ ངྐུ ཤྱ ཀྲྀ དྨ ཉྫུ གྷོ ཥཱ དི པ དྨཱུ ལ ཡོཿ མང་(སྡེབ་སྦྱོར་མེ་ཏོག་འཕྲེང་བ།)པོས་བཀུར་བའི་རྒྱལ་ཁབ་ཆེན་པོ་ན། །འཛམ་གླིང་ཡོངས་ཀྱི་གཙུག་ཏོར་རྩེར་མཛེས་ཁྲིར། །འཁོད་པའི་མོད་ལ་རྫོགས་ལྡན་གསར་པའི་མགྲོན། །འགུགས་མཛེས་འཇམ་དབྱངས་གོང་མའི་ཞབས་དྲུང་དུ། །(༡༩༤ན)
སྭ་སྟི་ཀ་ཡི་སྒྲ་ལས་ཉེར་དྲངས་པ། །ཤིས་བརྗོད་ཚིག་གི་མེ་ཏོག་ལེགས་འཐོར་ཞིང་། །ཙན་དན་སྡོང་པོའི་དྲི་བཟང་རབ་འཐུལ་ཏེ། །མི་ཕྱེད་དང་བའི་ཡིད་ཀྱིས་མཆིད་འདི་ཞུ། །ལྷ་གཅིག་བཀའ་ལུང་གནམ་གྱི་ཤེ་མོང་རྟགས། །གསེར་འབྲུག་སྡེར་ལྔས་ཡོངས་སུ་བཏེག་པ་དང་། །ཕུན་ཚོགས་བདོག་པའི་གནང་སྐྱེས་གྱ་ནོམ་བཅས། །སོན་ཚེ་ཁྱོད་ཞལ་མངོན་སུམ་མཐོང་བཞིན་སྤྲོ། །མཁྱེན་བརྩེའི་ས་བོན་རྒྱལ་རིགས་གསེར་སྒོང་དུ། །སྨིན་པས་ནོར་འཛིན་ལ་གནས་ཚངས་པ་ཆེ། །གཟུགས་སྐུ་རྡོ་རྗེ་ལྟ་བུར་རྟག་བརྟན་པ། །ལུས་ཅན་ཡོངས་ཀྱི་བསོད་ནམས་ཟོང་གིས་བསྒྲུབས། །དེ་ཚུལ་ཐོས་པའི་མོད་ལ་རབ་དཀའི་ས། །ཐོབ་འདྲའི་ཡིད་དབང་བདེ་བས་འབྱམས་ཀླས་ཚེ། །སྣ་ཚོགས་ཀུན་རྟོགས་བག་ལ་ཉེར་ཞ་བ། །བསམ་གཏན་དང་པོའི་མིག་མི་འཛུམ་རྗེས་འགྲོ། །རྩོད་དུས་གསེར་གྱི་འཁོར་ལོ་མཁར་འཕགས་པའི། །གང་གི་དྲིན་གྱིས་འགྲོ་རྣམས་རྫོགས་ལྡན་བཞིན། །སྤྱོད་པའི་གྲིབ་མར་སྡེ་སྣོད་གསུམ་པ་ཡང་། །ཐུབ་པའི་བསྟན་ལ་རི་མོར་བགྱིད་འདུན་ཙམ། །ཕྱོགས་བཅུའི་སངས་རྒྱས་ཀུན་གྱིས་མགྲིན་གཅིག་པར། །སྐྱེ་རྒུའི་མགོན་དུ་གཙུག་ནས་དབང་བསྐུར་བས། །ལྷ་ཁྱོད་བལྟམས་པའི་དུས་ལ་འཇིག་རྟེན་དུ། །རྣམ་སྨིན་ཆེས་དཀར་དགེ་བའི་མཚན་མས་ཁྱབ། །མི་བདག་བསོད་ནམས་བརྒྱ་ཕྲག་ཉི་མའི་ལུས། །འབར་བས་སྲིད་འདིའི་དྲེགས་(༡༩༤བ)
ལྡན་སྨག་རུམ་ཀུན། །ཕ་མཐར་བྱེད་ན་རྒོལ་ངན་མེ་ཁྱེར་འོད། །འཇོམས་ལ་མཚར་དུ་འཛིན་པ་བྱིས་པའི་བློ། །ལེགས་བྱས་ཉ་ཕྱིས་ཡངས་པའི་ཁོག་པ་ནས། །རྟག་ཏུ་འབབ་པའི་ཕན་བདེའི་མུ་ཏིག་ཆར། །སྤྱོད་པའི་དབང་ཐང་དར་དྲགས་སྐལ་བཟང་ཅན། །སྔོན་བྱུང་གཏམ་ལས་དེང་སང་ཁྱོད་ཉིད་ཙམ། །འཁོར་བའི་ཕུན་ཚོགས་ཡོད་རྒུ་བསྟར་བ་ལས། །ལྷག་པ་ཁམས་གསུམ་སྣོད་འདིར་ག་ལ་ཞིག །གཏན་འདུན་ཐར་པའི་ཞིང་དུ་རྒྱུད་ལྔའི་འགྲོ། །སྦྱོར་ནུས་ངེས་པར་དོན་ལྡན་དམ་པའི་ཆོས། །དེ་ཚུལ་ཉི་མའི་གཉེན་གྱི་གསུང་རབ་ཚོགས། །འཁྲུལ་མེད་ལེགས་གྲུབ་ཞྭ་སེར་འཆང་བའི་བསྟན། །རྒྱ་དང་ཧོར་གྱི་ནོར་འཛིན་ཡངས་པའི་གཞིར། །སྤེལ་ནས་མྱ་ངན་མེད་པའི་རྣམ་ཐར་སྐྱོངས། །འཕགས་ཆེན་དམ་པ་རྒྱལ་པོའི་སྲིད་བཟུང་ནས། །འགྲོ་མང་གཏན་བདེར་འགོད་པ་གཤིས་ཡིན་ན། །འཇམ་མགོན་ཐུགས་རྗེའི་སྒྱུ་འཕྲུལ་གར་མཁན་ཁྱོད། །དཀོན་ཅོག་གསུམ་ལ་རི་མོར་མཛད་པར་རིགས། །མེས་དད་ཡད་མེས་བསོད་ནམས་སྟོབས་ཀྱིས་རྒྱལ། །ཡབ་གཅིག་དུས་ཀྱི་བདག་པོར་གནམ་གྱི་བུ། །རིམ་བྱོན་བཞེད་པའི་ལུགས་གཉིས་ཁྲིམས་ཀྱི་སྲོལ། །ཟླ་མེད་མཁྱེན་པ་ལེགས་དྲུང་གསལ་བར་འོས། །དགྱེས་པའི་སྤྱན་གྱིས་དུས་ཀུན་ཉེར་བཙའ་བའི། །འཛུམ་ཞལ་ལྷུག་པར་བསྟན་པའི་བཀའ་མཆེད་འཕྲེང་། །བསྐལ་པའི་ཕ་མཐའ་རྫོགས་མིན་རབ་སྩོལ་བའི། །དགའ་སྟོན་བདུད་རྩི་ཡིད་ལ་རྟག་འབབ་མཛོད། །ལྷར་བཅས་སྐྱེ་རྒུའི་རལ་པའི་ཅོད་པན་དུ། །མི་ཤིགས་རྡོ་རྗེའི་(༡༩༥ན)
སྐྱིལ་མོ་ཀྲུང་བཅས་ནས། །ཞབས་པད་ཚེ་མཐའ་ཡས་བའི་མགོན་པོ་ལྟར། །བསྟན་སྨོན་མཆོག་གསུམ་མཐུ་ཡིས་འགྲུབ་བྱིན་རློབས། །སྲད་བུར་བརྒྱུས་པའི་དཀར་དམར་རིན་ཅེན་ཤལ། །སྣ་ཚོགས་འཇམ་ཕྲུག་ཁྲས་སོགས་བདོག་པའི་རྟེན། །དྲི་མེད་རྣམ་པར་དག་པས་འདྲེན་བྱེད་དུ། །ཐོགས་སླད་ཐུན་འཚམས་རྒྱ་ཡིས་མངོན་པར་འཁྱུད། །ཛམྦུ་ཆུ་བོའི་གསེར་གྱི་མདངས་འཛིན་པ། །ཚེ་རིང་བྱ་ཡི་གནམ་ལོའི་ནག་པའི་ཟླར། །དངོས་པོ་ཀུན་གྱིས་བཏུད་ཡུལ་ཕོ་བྲང་ཆར། །དང་བའི་ཡིད་ཀྱིས་ཕུལ་པ་ཛ་ཡནྟུ། །ས་བྱ་བསམ་ཡས་མདོ་སྡེ་མཆོད་པའི་ཐོག་རྒྱ་དྲུག་པ་དབང་འདུས་བཏང་སྐབས་ཆོས་རྒྱལ་ཆེན་པོར་འཕྲིན་དུ་གསོལ་བ་ནམ་མཁའ་མཛོད་ཀྱི་སྒོ་འབྱེད། སྲིད་གསུམ་དབང་ཕྱུག་གནག་སྣུམ་རལ་པའི་རྩེར། །པདྨ་ཐོད་འཕྲེང་བཀའ་རྟགས་ཟླ་ཚེས་པའི། །སྤྲུལ་པའི་ཆོས་རྒྱལ་གསང་ཡུམ་བློན་པོ་སོགས། །བཀའ་སྡོད་དམ་ཅན་རྒྱ་མཚོའི་ཚོགས་བཅས་ཀྱེ། །དེང་ནས་མི་འགྱུར་ལྷུན་གྲུབ་གཙུག་ལག་ཁང་། །བོད་འབངས་ཕན་བདེའི་བསོད་ནམས་ཞིང་གནས་པར། །མདོ་སྡེ་མཆོད་པའི་དུས་ཀྱི་དགའ་སྟོན་དུ། །ཐོ་གསལ་བདོག་པ་ནམ་མཁའ་མཛོད་དུ་སྤེལ། །དྲག་ཤུལ་གནམ་ལྕགས་ཐོག་གི་རྗེས་འགྲོ་ཕྱིར། །དགྲ་བགེགས་ཉེར་འཚོའི་མཐུ་སྟོབས་ཐལ་བར་རློག །ཕུན་ཚོགས་འདོད་པ་འཇོ་ལ་དཔག་བསམ་གྱི། །མཆེད་ཟླར་གྱུར་པས་བསམ་བའི་རེ་བ་སྐོངས། །ཐུབ་བསྟན་ཉི་མ་འགྲོ་བའི་བདེ་སྐྱིད་མཁར། །ནམ་ཡང་འཆར་ནུབ་སྤངས་ཏེ་རྟག་གནས་ཤིང་། གངས་ཅན་ལྗོངས་(༡༩༥བ)
འདིའི་ནད་འཁྲུག་རྒུད་པའི་མུན། །རབ་ཞི་ཀུན་དགའི་སྣང་བ་ཆེས་ཆེར་སྤེལ། །ཚེ་རིང་འདབ་ཆགས་གནམ་ལོར་ཉེར་ཤར་བའི། །སྣོན་གྱིས་ཉ་བ་སྤྲེའུ་ཟླ་བ་ཡི། །དཀར་ཕྱོགས་དགའ་བ་གསུམ་པའི་ཚེས་བཟང་བར། །གཙུག་ལག་ལུགས་བརྒྱའི་འདུན་ས་ཆེ་ནས་དགེ། ས་བྱ་བསམ་ཡས་མདོ་སྡེ་མཆོད་པའི་དུས་སྟོན་ཐོག་རྒྱ་བྲུག་པ་དབང་འདུས་བཏང་སྐབས་བསྟན་སྲུངས་གནོད་སྦྱིན་ཙེའུ་དམར་པོ་འཕྲིིན་དུ་གསོལ་བ་རྫོགས་ལྡན་དགའ་སྟོན། སྤྲུལ་པའི་ཆོས་རྒྱལ་ཆེན་པོ་ཡིས། །བཀའ་ཉན་དྲེགས་པའི་དམག་དཔོན་ཆེ། །སྲོག་བདག་གནོད་སྦྱིན་ཙིའུ་དམར་བ། །དྲི་བྲལ་ལྷ་ཡི་སྙན་གྱིས་གསོན། །མདོ་སྡེ་མཆོད་པའི་དུས་སྟོན་ལ། །ཏིང་འཛིན་སྔགས་རྒྱས་བརླབས་པའི་སྐྱེས། །དེང་ནས་ཇི་སྲིད་སྤེལ་བའི་ཆེད། །ཕོ་ཉ་བདོག་པར་བཅས་ཏེ་མངགས། །ཐོག་མེད་སྒྲུབ་པའི་རྩལ་ལྡན་པའི། །དཔག་པར་དཀའ་བའི་རྫུ་འཕྲུལ་གྱིས། །ཞི་རྒྱས་དབང་གིས་ལས་རྣམས་ཀུན། །འབད་མེད་ལྷུན་གྱིས་གྲུབ་པར་མཛོད། །ཡངས་པའི་འཇིག་རྟེན་མ་ལུས་དང་། ཁྱད་པར་སྤུར་རྒྱལ་བོད་ཡུལ་འདིར། །རྩོལ་ལྡན་ཉེས་བརྒྱའི་ཟུག་རྔུ་ཀུན། །རབ་ཞི་རྫོགས་ལྡན་ལྟར་སྤྱོད་མཛོད། །སྲིད་གསུམ་ཆེ་བའི་རིག་སྔགས་འཆང་། །པདྨ་ཐོད་ཕྲེང་སྤྱན་སྔ་རུ། །ཇི་ལྟར་དམ་བཅས་ཞལ་བཞེས་པ། །ནམ་ཡང་གཡེལ་བ་མེད་པར་མཛོད། །
རབ་བྱུང་བཅུ་གཅིག་པའི་ལྕགས་ཁྱི་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་ཁྱི་ལོར་བྲིས་པའི་ཆབ་ཤོག་འཕྲིན་ཡིག་ཁག །ལྕགས་ཁྱིའི་ལོ་གསར་དགའ་སྟོན་གྱི་ཐོག་སྤྲུལ་སྐུ་ངག་དབང་སྙན་གྲགས་བཟང་པོས་སྙན་ཚིག་ལམ་ནས་དྲངས་པའི་འཕྲིན་ཡིག་བདོག་པའི་སྐྱེས་དང་བཅས་བསྲིངས་པ་འབྱོར་པའི་ལན་ཐོས་སྒོམ་ཟུང་དུ་འཇུག་པའི་(༡༩༦ན)
གཏམ། ཨེ མ ལ ཀྵྨཱི ཥྚ སཱ ཀ ལྱ དྷཱ ནཱ བུ པ དྷྱཱ ཡ ནོ གནྷ ཤུ ཀླ སྱ བ སྟྲ པྱརཱ ཏྲ། ད ཤ ཀཱ ཏྲེ ཥུ སཽཤ རྨ ཎ པྲཻ ཡ ཀོ ཏྶཱ མུ ཁཾ བྱུ རྒྷ ནཱ ཎཱ དི ཏ ྈྐ ལ ཏུཾ། ཨེ་(ཤོ་ལོ་ཀ་དྲུག་སྡེབ་སྦྱོར་མེ་ཏོག་འཕྲེང་ཅན།)མ་ཕུན་ཚོགས་འདོད་རྒུའི་ནོར་སྐྱོངས་མཁན། །དྲི་མེད་དུ་ཀཱུ་ལ་ཡིས་གོས་གྱོན་ནས། །ཕྱོགས་འདིར་བདེ་སྐྱིད་དགའ་སྟོན་སྤེལ་བའི་སྒོ། །རྣམ་པར་འབྱེད་པའི་ཐོག་མའི་དུས་ཀྱི་ཚེ། བྱ ནྟ ཀ ཛྙེ ཡ ཅཱ སྠེ བ ཧུ ཤཱུ ཏ ཙཱ དེ པྲ ཀྲྀ ཏྱཾ མ ཧཱ མུ དྲ པ ཪྻནྷ ཏཿ མ དྷྱ ད ཤ སྱ ཤཱ ར ཧྞ བྷོ ཊཱ ཏྲ ནཱ ཀཱ ཥ ནྲྀ དྭཱ རྟ སཱ མྱཾ སཱ ཡུ ཀྟོ ཏྶ ཧཿ མཐའ་ཡས་ཤེས་བྱའི་གནས་ཀུན་མང་ཐོས་པ། །གཤིས་ལུགས་ཕྱག་རྒྱ་ཆེན་པོར་འབྱམས་ཀླས་པའི། །འཕགས་ཡུལ་མདའ་བསྣུན་ལྗོངས་འདིར་ངུར་སྨྲིག་གར། །བསྒྱུར་འདྲའི་སྙན་འཕྲིན་བདོག་པ་སོན་པས་སྤྲོ། (༡༩༦བ)
བཱ ཧུ ཀ ལྤེ ཥུ ཧི ཤྭེ ཏ དྷ རྨོ པྟ ཕ ལྱཾ སུ པཱ ཀ སྭ བྷ དྲ པྲ ཏི དྱ དྲུ མཿ སཻ དྡྷ ཤཱ ས ནྱ བཱ ནྱོ སུ བྷཱུ ཥཻ ཤྲུ བ དྷྱཱ ན པཱ ཏྲཾ པྲ པུ ཥྚེ ྈྐ། ཏ དྱ ཤཿ བསྐལ་མང་ཆོས་དཀར་ས་བོན་བཏབ་པའི་འབྲས། །ལེགས་སྨིན་མཐོ་རིས་རྟེན་བཟང་ཡོངས་འདུའི་ལྗོན། །སྒྲུབ་བརྒྱུད་བསྟན་པའི་ནགས་ཀླུང་མཛེས་རྒྱན་དུ། །ཐོས་བསམ་ཡལ་འདབ་དར་དྲག་གཏམ་དེ་སྙན། ཤཱ ས མུ ནྱེ ཥུ ཧཻ དྭཱ ད ཤོ གོ ལ གྲྀ ཧྱེ མ དྷཱི དི ནྱ ཀཱ རྨ ཧཱ ར སྨི ནཿ ཏཱུ རྞ བི ཀྵེ པ ས པྟཾ ར ཐཻ རྣཱ ཡ ཀཱ པི ཤྲུ བ དྷྱཱ ན ཧཱ སོ བྫ ཤཱ གྨཏྲ ཙཿ འདི་ན་ཐུབ་བསྟན་བཅུ་གཉིས་གོ་ལའི་ཁྱིམ། །འཇལ་བའི་བློ་གྲོས་ཉིན་བྱེད་འོད་པོ་ཆེ། །རྣམ་གཡེང་ཤིང་རྟ་བདུན་གྱིས་དལ་མེད་དུ། །དྲངས་ཀྱང་ཐོས་བསམ་འདབ་སྟོང་བཞད་ནུས་ཙམ། །(༡༩༧ན)
སྠཱ ན ནེ མ རྦྷི བུ དྡྷཾ པ རོ ྅ ཀྵཱ ནྱ དཽ དྷ རྨི ཀཱ ན སྟི ནི ཏྱཾ མུ ནེ ཤྴཱ ས ནེ། ཙི ཏྲ ཀྲྀ ཏྱཱ ཪྻབྷོ ཊ སྱ སཱ ངྐ ཏྱ བྲྀ ངྒོ དྷྭ ཛོ དྷཱི སྠ སཱ རཾ དྷཱ མ ཎྱ ཧི། གནས་ལུགས་རྟོགས་རྫུའི་ལྐོག་གྱུར་གཞན་འདྲིད་ཆོས། །མ་ཡིན་ངེས་པར་ཐུབ་པའི་བསྟན་པ་ལ། །རི་མོར་བགྱིད་ནུས་རྒྱ་བོད་བརྡ་དག་གི །གཙུག་ལག་སྤེལ་ཚེ་ཤོང་དཔང་བརྒྱུད་ཟིན་སྙམ། ད ཎྜ ཏུ ལྱཱ པྴཱ གཏྲ པྲ སཱུ ཏྲ གྲ། ཏྱེ ཥཱུ ས མྦ ཏྶ རཱུ ཎཱཾ སྲྀ ཛཱ མཱ པྟ ཧཱ། ཀ རྞ རཱ སེ ཧི ཏཱ སཱ མ ཡཽ ཏ ཀྱ གངྒཱ ས ཧཱི ཏེ ན བཱ ནྟཱ ར སཾ ནཱ ཡ ཏུ། ཆུ་ཚོད་སྲང་དབུགས་ཞག་ཟླའི་སྲད་བུ་ལ། །རབ་རྒྱུས་བགྲང་བྱའི་འཕྲེང་བ་རྫོགས་མིན་པར། །རྣ་བའི་བཅུད་དུ་འོས་པའི་སྙན་ཚིག་སྐྱེས། ཁྱབ་འཇུག་ཞབས་བསིལ་ཇི་བཞིན་ཆད་མེད་སྒྲོངས། (༡༩༧བ)
པ ཀྵེ ཤྲཱ ཛྙ ྈྐོ ཥཱི ནོ ནེ ཏྲི བྡུ ཏ པྟེ ཀུ ཎྜ ལྱེ དཾ། གི པྲ ཤྭེ ཏ སྟེ ས ཏྭཾ སཱ ནྀ ཤྱེ ནོ དཱ ཧཱ རེ དེ ཤྱཾ། དབང་(སྡེབ་སྦྱོར་གློག་འཕྲེང་།)ཕྱོགས་གན་མཛོད་ནས་འོང་དར། །ཟླ་བ་ཞུན་མ་འཁྱིལ་འདྲ་འདི། །འགྲོ་ལ་རབ་དཀར་ཁྱོད་ཀྱིས་སེམས། །མཚོན་པར་བྱེད་པའི་དཔེ་རུ་བསྟན། །མངའ་རིས་གུང་ཐང་པ་མང་ཐོས་རབ་འབྱམས་པ་བཤེས་གཉེན་རྣམ་རྒྱལ་གྱིས་སྙན་ཚིག་གི་ལམ་ནས་དྲངས་པའི་འཕྲིན་ཡིག་བྱུང་བའི་ལན་ལྔ་རིག་གསལ་བའི་ཉིན་བྱེད། (༡༩༨ན)
པཱུ རྦ བོ དྷ ནྱ པ ཪྻཀྵ དྷཱི སྟཱ ར དཱི རྒྷཻ རྫྙ ཡཱ ནཱཾ ས རཱ ནྟཱི ཡ ཏ ཉྩཱ ར ཏཿ བཱ མི ཀ ཀྵཱ ར བཱི ཎཱ དན ཡཻ རྡྷ རྨ གཱཀ རྞ རཱ སོ ཏྟི ཏཱ ཡོ གྱ ལེ ཁཻ རྦྷ བཿ སྔོན་(སྡེབ་སྦྱོར་མེ་ཏོག་འཕྲེང་ཅན།)གོམས་ཡངས་པའི་བློ་མིག་དཀྱུས་རིང་པོས། །ཤེས་བྱའི་ཕ་མཐའ་འཇལ་བའི་དཔྱོད་ལྡན་གྱི། །ཉམས་འགྱུར་རྒྱུད་མངས་ལས་དྲངས་ཆོས་ཀྱི་གླུ། །ཐོས་འཛིན་བཅུད་འབབ་འཕྲིན་ཡིག་བདོག་པ་སོན། །བཅུ་གཉིས་རྟེན་འབྲེལ་ཞིང་ས་གཤིན་པ་ལ། །ལེགས་བྱས་ས་བོན་སྨོན་ལམ་དྲོད་གཤེར་གྱིས། །རབ་སྨིན་མངོན་མཐོའི་སྙེ་མ་གཡུར་ཟ་བ། །ན་འཆི་ལྷ་མིན་གདོན་གྱིས་མ་གཅེས་སྤྲོ། །གཉིས་འཐུང་མི་ཡི་གསོབ་ཞུགས་གར་མཁན་རྣམས། །ཡུན་གནས་སྒྱུ་ཐབས་འབད་པས་ལྷུར་ལེན་ན། །དལ་འབྱོར་དོན་ལྡན་བསྒྲུབ་ཁྱོད་བསྐལ་པ་འདི། །རྫོགས་མིན་དེ་སྲིད་འཚོལ་ཡང་ཡུན་མི་རིང་། །ལས་ཉོན་མཐུས་གྲུབ་ལུས་ཅན་སོ་སྐྱེ་བདག།དམ་པར་འཁོར་སློབ་ཚོགས་ཀྱིས་(༡༩༨བ)
སྒྲོ་བཏགས་ནས། །ཉེར་བཏེག་ལྐོག་ཏུ་མ་གྱུར་རང་བློ་ལ། །ཁྲེལ་ཡང་ད་དུང་གཞན་འདྲིད་རྫུ་ལ་བརྟེན། །ཕྱོགས་རེའི་གཙུག་ལག་ཤེས་པའི་བློ་ལྡན་པ། །ནོར་འཛིན་ལྟོ་བར་མང་ཞིག་རབ་སྦྲུམ་ཡང་། །སྒྲ་ཚད་བཟོ་གསོ་ནང་རིག་ཀུན་ཤེས་ཁྱོད། ཐུབ་བསྟན་གླིང་བཞི་གསལ་བྱེད་ཉི་མ་བཞིན། །གང་གི་སྙན་པ་ཏམྦུ་ར་ཡི་སྒྲ། །ཐོས་པས་བརྒྱ་བྱིན་མིག་སྟོང་རབ་བགྲད་ནས། །ལྷུན་པོའི་སྤོ་ལ་སྐྱིལ་མོ་ཀྲུང་བཅས་ཏེ། །ཉི་ཟླའི་སྒྲོན་མེ་མཁའ་ལ་འདེགས་པ་བཞིན། །སྒོ་ངའི་སྦུབས་ན་གནས་ཀྱང་མགྲིན་རྔའི་སྒྲ། །འཁྲོལ་བའི་ཀ་ལ་པིངྐ་མཐོང་བའི་ཚེ། །འཕུར་ལྡིང་རྩེད་འཇོས་ལྷ་ལམ་འགེང་བའི་བྱ། །མ་ཡེང་ཅ་ཅོས་རྣ་བ་གཙེར་བའི་རྒྱུ། །གྲགས་དང་འབྱོར་པས་བསྟན་འཛིན་གཟུགས་བརྙན་ཙམ། །མ་ཡིན་ཁྱོད་ཀྱིས་ཐོས་བསམ་སྒོམ་པ་ལ། །ཐུབ་རྣམས་དགྱེས་པའི་ལེགས་སོའི་དབུགས་དབྱུང་བར། །མེ་ཏོག་ཚོགས་ཀྱང་དགའ་བས་འཛུམ་པ་བཞིན། །ཐམས་ཅད་མཁྱེན་ངེས་བློ་བཟང་གྲགས་པ་ཡི། །རྣམ་གསུམ་འཁོར་ལོའི་དྲང་ངེས་འབྱེད་པའི་གསུང་། །རྒྱལ་བའི་བཀའ་ལྟར་ཆེས་བརླིང་རབ་ཟབ་དེང་། །དཔྱིས་ཕྱིན་འགྲོལ་ནུས་ཨུ་དུམ་ཝཱ་རའི་སྤུན། །ཁོ་བོ་གཞུང་མང་ཐོས་པའི་གྲར་ཞུགས་ཀྱང་། །བླ་ཆེན་གྲགས་སྐམ་གཞན་དབང་ཁོས་པོ་ཡི། །ཐོས་དང་བསམ་པའི་ཕ་རོལ་མ་ཕྱིན་པས། །མེས་ཀྱི་གནམ་རུ་འགུགས་ནུས་ཡང་ཚ་མིན། །འོན་ཏེ་འཕགས་ཡུལ་རྒྱན་དྲུག་མཆོག་གཉིས་གཞུང་། །སྨྲ་བའི་དབང་ཕྱུག་དཀོན་ཆོག་ཆོས་འཕེལ་གྱི། །དྲིན་ལས་ཅུང་ཟད་ཐོས་རྣམས་རང་བློ་ཡིས། །ཇི་ཙམ་དཔོག་ནུས་འགྲེལ་ལ་སྤྲོ་འདུན་(༡༩༩ན)
ཙམ། །རང་རིགས་རྒན་པོའི་ངག་རྒྱུན་ལྷུར་ལེན་པ། །བློ་ཆུང་རློངས་པ་ཀུན་གྱི་གཤིས་ལུགས་ཏེ། །ལེགས་པར་བཤད་ཚེ་ཕྱི་ནང་ཆོས་ཀུན་ལ། །སྦྱང་བ་མཁས་པའི་ཚུལ་ཡིན་ཁྱོད་ཀྱིས་སྒྲུབས། །ལྟ་བར་ཕྱག་རྒྱའི་སྒྲོ་བཏགས་བློ་བྱས་ཆོས། །རྒྱ་གར་ཁ་སྤུ་ཅན་ལ་ཡོངས་མ་གྲགས། །སྨིན་གྲོལ་ཟབ་གསང་ལས་བྱུང་ཟུང་འཇུག་ལམ། །ཉམས་སུ་བསྟར་ན་འདུན་མའི་ལང་རྩེར་སོན། །དེའི་ཚུལ་འཁོན་རིགས་འཇམ་དཔལ་རྡོ་རྗེ་དང་། །ཀུན་མཁྱེན་བུ་སྟོན་མཉམ་མེད་བཙོང་ཁ་པའི། །གསུང་རབ་ཡོངས་འདུའི་ལྗོན་པ་རྙེད་བཞིན་དུ། །བླུན་སྒོམ་སྡོང་དུ་མངལ་བའི་ཁུར་དུ་ཟད། །བྲན་འཁོར་འདུ་འཛིའི་རླུང་གིས་རྟས་དྲངས་ནས། །སྙན་པོའི་སྐྱེས་རབས་ཉི་ཟླའི་འོད་གསལ་བ། །མདོ་རྒྱུད་བ་ཀཱུ་ལའི་ཁ་མི་འབྱེད་པས། །ཡང་དག་བཤེས་གཉེན་ལུས་ཕྲའི་འགྲམ་ཆང་སྟེན། །མིང་ཚིག་ཡི་གེའི་དར་གྱི་སྲིད་བུ་ལ། །ལེགས་བཤད་མུཀྟི་ཀ་ཡི་འཕྲེང་བརྒྱུས་པ། །དཔྱོད་ལྡན་སྣ་ཚོགས་མགུ་བའི་སྐྱེས་བཟང་པོ། ཁྱབ་འཇུག་ཞབས་བསིལ་མཆེད་པོར་རྟག་ཏུ་སྒྲོ། །འཇམ་དབྱངས་ཚད་མེད་གར་སྒྱུར་མང་བཀུར་བབ། །ཆོས་དཀར་འདོད་རྒུའི་ཆ་ཤས་གཟིགས་མའི་རྡུལ། །ལྗོན་ཤིང་ཕུར་མའི་བ་མོ་མཐུན་འཚམས་རྒྱས། །སྤྲས་ཏེ་བློ་ལྡན་ཁྱོད་ཀྱིས་བཏུང་བར་སྤེལ། །ལྕགས་ཁྱི་གོང་ནས་ཁང་ཤིའི་རྒྱལ་པོས་ཆོས་འཕེལ་དགེ་སློང་དང་བསོད་ནམས་དགེ་སློང་གཉིས་གསེར་ཡིག་ཏུ་མངགས་པའི་བཀའ་ཤོག་གོས་དར་རིན་པོ་ཆེ་གནང་སྐྱེས་བཅས་བྱུང་བའི་ལན་འབུལ་བར་ཆབ་ནག་རི་བོ་དགའ་ལྡན་གྱི་བླ་མ་བློ་བཟང་ཆོས་འཕེལ་དང་བཀྲས་རབ་པ་གཉིས་རྫོང་སྟ་བྱས་སྐབས་འཕུལ་བའི་ཞུ་ཡིག་ཁམས་གསུམ་ཟིལ་གྱིས་གནོན་པའི་བདེན་(༡༩༩བ)
གཏམ། བི ཅརརྨིདྭདཱ ཡི རྨ གོ པྲ ཛྱ ཀ རྞེ པྲ སཱ མ ཀྱ ས པྟ སྭ རྀ གཱི ཏྱ ཝཱ གཿ ཀུ མཱ རཱ པི དྷཱ བྲྀ དྡྷ དྷཱི བྷི རྟི དྷཱ ཏྭཱི ལ ཧཱི ཙཱ དྷི བྷཱུ ཡཾ བ དཱི ཤྭཱ ར མཱུ ལེ། འཇམ་(སྡེབ་སྦྱོར་ལག་འགྲོ་ལྟུང་བ།)མཉེན་བརྩེ་བས་རིགས་མེད་སྐྱེ་རྒུའི་རྣར། །རབ་སྙན་དབྱངས་བདུན་གླུར་ལེན་ངག་གི་ལྷ། །གཞོན་ནུའི་ངང་ཚུལ་འཛིན་ཡང་རྒན་པོའི་བློས། ཁམས་གསུམ་ཟིལ་གནོན་དབང་ཕྱུག་དམ་པའི་དྲུང་། །སྭ་སྟི་ཀར་དྲངས་ཕུན་ཚོགས་བརྗོད་པའི་སྒྲ། །བཀྲ་ཤིས་མེ་ཏོག་ཆར་བསྙིལ་ཙན་དན་གྱི། །བདུག་སྤོས་མངར་པོའི་དྲི་བསུང་འཐུལ་བཞིན་དུ། །དང་བའི་ཡིད་ཀྱིས་སྤོབས་མཐོར་བཏེག་ནས་གསོལ། །མགོན་ཁྱོད་འཇམ་དཔལ་རྡོ་རྗེ་མེའི་ཟློས་གར། །བསྒྱུར་ཕྱིར་རྒྱལ་ཀུན་ཡབ་གཅིག་ས་བཅུའི་ཚུལ། །འཛིན་པས་ཉོན་མོངས་སྒྲིབ་རྒྱ་ལས་གྲོལ་ནས། །སྐྱེ་རྒ་ན་འཆིའི་གདོན་གྱིས་ག་ལ་རྫི། །འོན་ཏེ་ཚུར་མཐོང་དམན་བློ་དང་བསྟུན་ནས། །མང་བཀུར་རྒྱལ་པོའི་རིགས་སུ་སྲིད་བཟུང་སྐུ། །(༢༠༠ན)
སྙན་མེད་ལང་ཚོའི་ཉི་མ་འཛམ་གླིང་འགྲོའི། །ལེགས་བྱས་མཁའ་ལ་རང་བཞིན་འབར་འདི་སྤྲོ། །རྣམ་འདྲེན་བཞི་པ་ཤཱཀྱ་སེང་གེ་ཡི། །རྗེས་ཞུགས་སྡོམ་བརྩོན་སྡེ་སྣོད་གསུམ་པ་ཡང་། །དུས་ཀྱི་ཕོ་ཉའི་ཞགས་པས་མ་བཅིངས་པར། །ཐོས་བསམ་སྒོམ་ལ་སྒོ་གསུམ་གཞོལ་བར་གནས། །ལྷ་གཅིག་མཛད་པའི་གཏམ་སྙན་ཐོས་པའི་མོད། །ཀུན་རྟོག་པིར་གྱིས་ཡིད་ལ་གང་གི་སྐུ། །ཉར་བྲིས་གསལ་བྱའི་དགའ་བདེའི་ཏིང་འཛིན་གྱིས། །ས་ཡིས་བསྐལ་ཡང་མངོན་སུམ་མཐོང་བ་བཞིན། །ཆོས་སྲིད་གཉིས་ལྡན་ཁྲིམས་བཙན་གསེར་གྱི་ཤིང་། །རྒྱ་མཚོའི་མཐའ་ཀླས་འགྲོ་བ་ཡོངས་ཀྱི་གཉེར། །ལྕི་བས་རྫོགས་ལྡན་གསར་པའི་དགའ་སྟོན་འདི། །གནམ་གྱི་ཤེ་མོང་དཔུང་པས་བཀུག་པ་བཞིན། །ལྷ་བཅས་འཇིག་རྟེན་ཡོངས་ཀྱི་རལ་བའི་རྩེར། །ཞབས་སེན་ཟླ་བ་ཚེས་ལ་མཚར་དུ་ཅི། །ཕྱོགས་བཅུའི་བདེ་གཤེགས་རྣམས་ཀྱིས་མགྲིན་གཅིག་ཏུ། །ཀུན་གཟིགས་ཞིང་གི་མགོན་དུ་སྔགས་མིན་ནམ། །ཡིད་ཅན་བརྒྱད་ཁྲིའི་ཚེ་ལོར་འཁོར་ལོ་སྒྱུར། །འབྱུང་བ་གསུང་རབ་མང་པོར་བཤད་པ་བརྫུན། །བདེན་ན་བསོད་ནམས་གསེར་འཁོར་མཁར་འཕགས་མོད། །གླིང་བཞི་ཀུན་གྱི་གཙུག་ཏོར་འདུད་འདི་ཅི། །ཡབ་གཅིག་ཤུན་ཙི་དམུ་ཐག་སྐས་འཛེགས་ནས། །ཚངས་པའི་ཡུལ་སར་མེས་པོའི་ཚུལ་བཟུང་སྟེ། །ས་ཆེན་སྐྱོང་བའི་གདུགས་དཀར་ལྷ་ཁྱོད་ལ། །གཏད་པའི་གྲིབ་མར་འགྲོ་རྣམས་བདེ་བར་འཚོ། །བརྒྱ་བྱིན་རྡོ་རྗེ་གསོད་པས་ལྷ་མིན་མོའི། །མངལ་ལྷུང་གཅིག་ཏུ་ཡ་མཚན་དེ་བས་ཀྱང་། །གང་གི་འཇིགས་པ་མེད་པ་སེང་གེའི་སྒྲས། །དྲེགས་ལྡན་ཡོངས་ཀྱི་ལྐོག་མར་སྙིང་བྲོས་མཚར། །ཆེད་(༢༠༠བ)
དུ་བྱས་པ་མིན་པར་ཟླ་བའི་འོད། །ཤར་བ་ཙམ་གྱིས་ཀུནྡ་བཞད་བྱེད་ན། །འཇམ་མགོན་མི་ཡི་སྲིད་པ་བཟུང་ཁྱོད་ཀྱིས། །འགྲོ་རྣམས་བདེ་བར་སྐྱོང་བ་ངང་ཚུལ་ཡིན། །ཕྱི་ནང་རིག་པ་སྨྲ་བ་གྲུབ་པའི་མཐའ། །འཛིན་པའི་སློབ་དཔོན་མང་ཡང་ལུས་ཅན་རྣམས། །མངོན་པར་མཐོ་དང་ངེས་པའི་ལམ་ཡངས་པོར། །སྦྱོར་བའི་བསླུ་མེད་འདྲེན་པ་ཟས་གཙང་སྲས། །མགོན་དེའི་ལུགས་འཛིན་ཤིང་རྟ་ཆེ་གཉིས་ལས། །ལེགས་འོངས་ཟབ་རྒྱས་ཆོས་ཀྱི་གངྒཱའི་རྒྱུན། །ཅིག་ཅར་འཐུང་བའི་དྲང་སྲོང་ཛཧྣུཿ། །ཀུན་མཁྱེན་བཙོང་ཁ་པ་ལས་གཞན་སུ་ཞིག །དེ་བསྟན་ལུང་རྟོགས་ཆོས་དང་འཛིན་པའི་སྡེ། །མཆོག་གསུམ་ཉེར་བཀུར་གཟུགས་ཅན་སྙིང་པོ་དང་། །མེས་དབོན་རྣམ་གསུམ་ཐང་སོགས་སྔོན་བྱོན་གྱི། །རྣམ་ཐར་འཛིན་འོས་ཁྱོད་མིན་གཞན་ན་ཅི། །ཚེ་མཐའ་ཡས་པའི་ཐུགས་གསང་དཔལ་བེའུའི། །བདུད་རྩིས་ཉེར་གཏམས་བུམ་པས་མི་ཡི་རྗེ། །བསྐལ་བརྒྱར་འཆི་བ་མེད་པར་དབང་བསྐུར་ཏེ། །སྲས་བཅས་རྒྱལ་བས་བདེན་ཚིག་བརྗོད་གྱུར་ཅིག །འཛུམ་ལྡན་དགྱེས་ཞལ་གོ་ལའི་ཁྱིམ་ཡངས་ནས། །བཀའ་མཆིད་ཆད་པ་མེད་རྒྱུ་ཉི་མའི་འགྲོས། །དོན་བཟང་སྣང་བ་རྒྱས་པའི་འོད་ཟེར་གྱིས། །བདག་སྙིང་འདབ་བརྒྱ་རྟག་ཏུ་བཞད་པར་མཛོད། །མགྲིན་པ་སྐྱེ་བ་ལྔ་པའི་རི་མོ་ལས། །མ་སྨད་ཚིག་དོན་སྙན་པའི་སྒྲ་དབྱངས་ཅན། །རིན་ཅེན་འཕྲེང་བ་འཇམ་ཕྲུག་བདོག་པའི་སྐྱེས། །མཛེས་པའི་དར་དཔྱངས་ལྷབ་ལྷུབ་ཅི་ཡང་གཡོ། །ནོར་སྐྱོང་གོས་དཀར་ཀླུབས་པའི་བགྲང་བྱ་ཡི། །རི་བོང་འཛིན་པའི་དཀྱིལ་འཁོར་ཐ་སྐར་གྱིས། །(༢༠༡ན)
མངོན་པར་རྒྱས་ཚེ་འཇིག་རྟེན་དབང་ཕྱུག་གནས། །གྲུ་འཛིན་གཞལ་མེད་ཁང་ནས་གུས་པས་ཕུལ། །ལྕགས་ཁྱི་སྔགས་འཆང་ཆེན་པོ་དཀོན་ཅོག་ལྷུན་གྲུབ་ཀྱི་ཀུན་བཟང་དགོངས་འདུས་ཀྱི་གླེགས་བམ་དང་བཅས་འཕྲིན་ཡིག་བྱུང་བའི་ལན་དབུ་རུའི་སྨག་རུམ་སེལ་བའི་ཟླ་བ། ར ཏྣ སཱ ར མ ཎྜ ལཽ ཏྶ ཧ སྱ སཾ བ ད པཱ ཛྙ དཱ ཡ ཙཱ ནུ བྷཱ བ པཱ གམུ ཀྟཻཿ བི དྱ མ ནྟུ དྷེ ནྡྲ ཏཱ ཙ ནཻ ར བྷོ གེ ཧི ལེ ཁ དེ བ དྷཱ ན ནེ ཏྲ ཙི ཧྞ ཡུ ཀྟཾ། དཀོན་(སྡེབ་སྦྱོར་ཕྱེད་མཉམ་པའི་པྲིཏྟ་ལས་བུད་མེད་མཚུངས་པ།)ཅོག་རྒྱ་མཚོའི་དཀྱིལ་འཁོར་སྤྲོ་བསྡུའི་བདག །ཕུན་ཚོགས་མཁྱེན་བརྩེ་ནུས་པས་སྨིན་གྲོལ་པས། །རིག་སྔགས་འཆང་བའི་དབང་པོར་ལྷུན་གྲུབ་པའི། །འཕྲིན་ཡིག་ལྷ་རྫས་དར་གྱི་རྟན་ལྡན་སོན། །དེང་དུས་ལྷག་བསམ་བདུད་རྩེ་ཉེར་འཇུག་པའི། །འདུ་ཕུང་ཟླ་དཀྱིལ་ར་རིའི་དྲི་མ་དང་། །མི་ལྡན་ཐོས་བསམ་སྒོམ་པའི་ཆ་ཤས་ཉ། །ཡོངས་གང་ཁྱོད་ཀྱི་ངང་ཚུལ་ཐོས་པས་སྤྲོ། །འདི་ན་དུག་གསུམ་གྱིས་བསྐྱེད་རང་འདོད་ལ། །འགྲོ་ཕན་རྣམ་(༢༠༡བ)
དཀར་འཕྲིན་ལས་གཏམ་སྙན་པོས། །གཞན་འདྲིད་བླ་ཆེན་སྤྱི་ཟོག་སྒྱུ་ཐབས་ཀྱིས། །དལ་བའི་རྟེན་བཟང་སྟོང་པར་མཛད་ལ་གཡེངས། །འོན་ཏེ་བཤེས་གཉེན་མང་བསྟེན་བཀའ་དྲིན་ལས། །ཐུབ་གསུང་དེ་འགྲེལ་རྒྱ་བོད་མཁས་གྲུབ་གཞུང་། །འཆད་ཉན་ཡིད་ལ་གོམས་བློའི་བག་ཆགས་མཐུ། །ཡང་སྲིད་མང་པོར་སད་པའི་རེ་སྨོན་ཙམ། །མ་ཞིག་ཞིབ་པོར་རྫུ་བའི་སྒྱུ་མ་མཁན། །རིགས་མཐུན་ཟོག་གཏེར་དིང་མང་རྗེས་འགྲོ་བ། །མ་ཡིན་འཁྲུལ་མེད་པད་གླིང་ཐབ་མོའི་ཆོས། །ཀུན་བཟང་དགོངས་འདུས་གླེགས་བམ་བསྲིངས་ལ་རང་། །དཔལ་ལྡན་སྐྱུར་རའི་རིགས་ཆོས་རྟ་ལྗང་ཅན། །དུས་ཀྱིས་ཆུ་ལྷའི་ཐུན་འཚམས་ཕག་ཉལ་ཚེ། །རྗེ་བཙུན་རཏྣའི་ལུགས་འཛིན་ཟླ་བ་གང་། །དབུ་རུའི་སྨག་རུམ་སེལ་བའི་བྱེད་པོར་ཤར། །ལྷག་བསམ་ཚངས་སྐུད་ཉེར་འཆང་བྲམ་ཟེ་བདག །དེ་ཚེ་སྙན་ཚིག་རིལ་པ་སྤྱི་བླུགས་ནས། །ལེགས་སོར་བརྗོད་པའི་ཨ་རྒཱའི་ཆབ་ཀྱི་རྒྱུན། །ཟླ་ཁྱོད་མཆོད་པའི་ཡོན་དུ་སྤྲེང་ལ་བྲེལ། །སྒྲ་ཚད་བཟོ་གསོ་གྲུབ་མཐའ་རྣམ་བཞིའི་གཞུང་། །མ་སྦྱངས་སྒོམ་ཆེན་ལག་རྡུམ་བྲག་འཛེག་མོད། །ཧ་ཅང་ཐོས་པར་འབྱམས་པའི་རྟོག་གེ་དང་། །ཐ་སྙད་མཁན་རྣམས་ནེ་ཙོའི་སྨྲ་བ་བཞིན། །དེ་ཕྱིར་དམ་པའི་དྲིན་ལས་རབ་ནོས་པའི། །སྒྲུབ་སྡེ་བརྒྱད་དང་སྒྱུ་འཕྲུལ་འདུས་པ་མདོ། །ཐེག་དགུའི་ཡང་རྩེ་ལྷུན་གྲུབ་རྫོགས་པ་ཆེ། །ཉམས་བསྟར་འདི་དང་ཕྱེ་མའི་གཏན་འདུན་སྒྲུབས། །ལས་ཉོན་གྱིས་འཕངས་སྐྱེ་རྒ་ན་འཆིའི་རྒྱུ། །ཆུད་པ་བདག་འདྲར་རང་དབང་མ་མཆིས་ཀྱང་། །ཉིད་ཀྱིས་རིང་པོར་འཚོ་ཞེས་མོལ་པའི་དོན། །འགྲུབ་པ་རྩ་གསུམ་འཁོར་ལོར་གསོལ་འདེབས་(༢༠༢ན)
བགྱིད། །ཡུལ་དུས་རིང་བསྐལ་རྒྱ་བལ་ཧོར་སོག་ནས། །གསེར་ཡིག་ཉི་ཟླའི་འགྲོས་འདྲའི་ངང་ཚུལ་ལ། །བསམས་ཚེ་སྐྱུད་པ་མེད་པ་རི་མོའི་ཁུར། །ཁྱེར་བའི་ཕོ་ཉའི་འགྲོ་འོང་ཆད་མེད་སྒྲུབས། །རོ་ལྡན་བདུད་རྩི་བཅུད་དུ་འབབ་པའི་ཤིང་། །ཉེར་ཐོགས་ཚེ་རིང་དོན་ལྡན་གཉིས་སྐྱེས་ཀྱིས། །བརྗོད་བྱ་རྗོད་བྱེད་ཐབས་ཤེས་འདབ་བརྐྱངས་ནས། །སྡོམ་བརྩོན་རིག་པ་འཛིན་པའི་གམ་དེར་འཕུར། །ལྕགས་ཁྱི་ཧོར་ཟླ་བཅུ་གཉིས་པའི་ལྷ་ཆོས་ལ་ཚངས་པ་དུང་ཐོད་ཆེན་པོར་སྤྱན་གཟིགས་ཚོགས་མཆོད་དང་བཅས་ལུང་བསྟན་ཞུ་བར་གྲྭ་ཚང་ཉེར་པ་བློ་བཟང་སྦྱིན་པ་བཏང་པའི་ཚེ་འཕྲིན་དུ་གསོལ་བ་ཐེ་ཚོམ་མདུད་པ་འགྲོལ་བའི་ཕྱག་རྒྱ། སྣང་བ་གདོད་ནས་རང་གི་སེམས་ཉིད་དུ། །ཡོངས་གྲོལ་སྣང་བཞིའི་ལམ་གྱིས་འཕོ་བ་ཆེའི། །སྐུ་འགྲུབ་འཆི་མེད་པདྨ་ཐོད་འཕྲེང་རྩལ། །ལྷ་ཆེན་ཁྱོད་ཀྱི་ཟུར་ཕུད་རྩེ་མོར་མཛེས། །བཅུ་གཉིས་དམ་ཚིག་ཆ་ལྡན་ཉེར་གསོལ་ཟེར། །ལྷ་སྙན་འདབ་སྟོང་བཞད་པའི་མོད་ཉིད་ལ། །ལུང་བསྟན་གེ་སར་དགོད་པའི་བཅུད་མངར་པོས། །སྐལ་བཟང་བུང་བ་སྙན་འགྱུར་གླུ་ལེན་མཛོད། །མཆོད་ཡོན་ཞབས་སུ་བསིལ་སྦྲེང་སྔོན་འགྲོར་བཅས། །ཉེར་སྤྱོད་འདོད་ཡོན་ཕྱི་ནང་གསང་མཆོད་ཀུན། །ཏིང་འཛིན་པིར་གྱིས་བྲིས་པའི་ཤེལ་ཚོན་བཞིན། །རྣམ་བཀྲ་ཚངས་པའི་ཐུགས་དམ་ཉེར་བར་སྐོངས། །དངོས་འབྱོར་བདོག་པ་ཐོར་གསལ་ལོངས་སྤྱོད་ཚོགས། །མི་མཛད་ནམ་མཁའ་མཛོད་དུ་ཉེར་བརླབས་ནས། །དབུལ་པའི་བྱེད་པོར་ཕོ་ཉ་ཆེད་མངགས་པ། །དྲི་མེད་སྤྱན་གྱི་རས་མས་བཙའ་བར་མཛོད། །ཐེ་ཚོམ་དྲ་བར་ཆུད་པའི་ཀུན་རྟོག་ཀུན། །རི་མོ་ཟུར་བཀོད་གཡར་(༢༠༢བ)
ལམ་ནས་གསོལ་ལྟར། །རྡོ་རྗེའི་གསུང་གིས་གསལ་བར་ལུང་སྟོན་ཞེས། །སྐུལ་བྱེད་འཕྲིན་ཡིག་དུས་སྦྱོར་བཟང་པོར་དགེ །
རབ་བྱུང་བཅུ་གཅིག་པའི་ལྕགས་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག །ལྕགས་ཕག་ལོ་གསར་དུས་ལྕོག་གྲ་སྤྲུལ་སྐུས་སྙན་ཚིག་བསྲེངས་ལན་གྲུབ་རིགས་བསྟན་པའི་སྲོག་ཏུ་སོང་བའི་བདེན་གཏམ། །ཡ སྱ གྲཱི བི ནོ ཏ བྷ སཱ རཱ མ ཧ དྦྷྱ སྶཱ མཱ ཏྲི སྲོ ཏཱ པཱ ཏི ལེ ཁཻ སྶ ཙི ཧྞཾ། བཻ རོ དྷཱ ཀཱ ཤཻ རྦྷཱ རྵ ཀོ ད ཡཡ ལ ཀྵྨི མཱུ ཁཾ བྷཻ རཱ ཎཱཾ པཱུ རྦ ཡུ ཀྟཱ ནུ བྷ ཀྟ། གང་(སྡེབ་སྦྱོར་སྣ་ཚོགས་ལྷ་མོ།)གི་མགྲིན་པ་མ་དྲོས་མཚོ་ཆེན་ལས། །སྙན་ཚིག་གངྒཱ་འབབ་འཕྲིན་སྐྱེས་དང་བཅས། །འགལ་བྱེད་གནམ་ལོར་ཆེས་པའི་ཕུན་ཚོགས་སྒོ། །ཕྱེ་བའི་ཐོག་མར་སོན་ལ་རྗེས་སུ་རང་། །ལྷ་མིན་ཆོམ་རྐུན་གདོན་གྱིས་མ་ཕྲོགས་པར། །དལ་བའི་རྟེན་བཟང་བདུད་རྩིའི་ཟ་མ་ཏོག །རིང་འཚོའི་སྒྱུ་ཐབས་འཁོར་ལོ་བཞི་ལྡན་ཅན། །ཚངས་པའི་བརྟུལ་ཞུགས་འཆང་བའི་གཏམ་དེ་སྙན། །འདི་ན་ཇི་སྙེད་གནས་ལྔ་རིག་པའི་ཆ། །ཕྱོགས་ཙམ་མཐོང་བས་རྒན་(༢༠༣ན)
པོའི་ཁུར་འཛིན་ཡང་། །ཇི་ལྟའི་དེ་ཉིད་མངོན་སུམ་རྟོགས་པའི་བློ། །ཕྲ་བས་ད་དུང་གཞོན་ནུའི་ངང་ཚུལ་བཞིན། །འཁོར་བའི་ཤེལ་ལ་དུག་གསུམ་ཚོན་འཆར་བ། །སྒྲིབ་པའི་ལུས་ཅན་ཀུན་གྱི་རང་མཚང་སྟེ། །གཏན་བདེའི་དབང་གཞུ་བཀྲ་བ་མི་ལའི་མཚན། །ཟླ་མེད་ནམ་མཁའི་ཟླ་འདྲ་ཁྱོད་ཉིད་ཙམ། །མཐོན་པོའི་རི་རྩེར་གནས་པའི་བུ་ཆུང་ཕལ། །ཐང་འཁྱམས་དེང་དུས་ཕྱག་རྒྱར་རླམ་པའི་ཁྱུ། །ཆོས་སྲིད་གཉིས་བྲལ་གསུམ་པར་གཉིད་གཡུར་ཚེ། །གྲུབ་རིགས་བསྟན་པའི་ལག་ཏུ་ཁྱོད་སོང་བཞིན། །རྟག་ཆད་མུན་སྟུག་གཡང་སའི་དོགས་བྲལ་ཞིང་། །ལེགས་བཤད་སྣང་གསལ་ཐ་སྙད་རིག་པ་སྔར། །རྣམ་དཔྱོད་ཉི་མ་གང་བློའི་མཁར་ཤར་བ། །བསྟན་ལ་ཟོལ་ཟོག་མེད་པའི་བྱ་བར་འཁྱམས། །རྟོགས་པ་ནང་ནས་རྡོལ་བ་གྲུབ་པའི་རྟགས། །ཕྱིར་སྟོན་སྔོན་དུས་དབྱར་རྩྭ་ལྟར་མོད་དིང་། །བྱིངས་རྨུགས་སྒོམ་དུ་རློམ་པ་ཕྱི་བ་ཡི། །ནམ་མཁའི་མཛུབ་རིས་འདི་ལ་ཚིག་དགོད་བྲོ། །སྟོབས་འབྱོར་རིན་ཅེན་འབྱུང་གནས་སར་སྙེག་ཆེད། །ཀུན་རྟོག་འོག་འགྱུ་ངལ་མེད་རྟག་འགྲོའི་ཆུ། །མངོན་གྱུར་འདོད་པའི་སྒྲ་བསྐྱུངས་བྱ་གཞག་གིས། །བཏང་བའི་འཕྱོན་མའི་གར་གྱིས་འགྲོ་མང་འདྲིད། །རྟག་འགྲུས་གྲོག་སྐམ་རྒྱ་མང་ངལ་བ་ཙམ། །ལེགས་བྱས་རི་རྩེའི་ཆུ་རྟོལ་གྱེན་ལྡོག་མིན། །ཆོག་ཤེས་ཅི་བྱས་བདེ་བ་ཆོས་པའི་རྩེ། །འདོད་ཡོན་སྤྱད་ཀྱང་སྲིད་འཕེལ་ཁྱིམ་གྱི་བདག །ངོ་ཚའི་ཚངས་སྐུད་དག་བྱེད་ཀུ་ཤའི་ཕོན། །ཡོན་ཏན་སྤྱི་བླུགས་འཆང་བའི་བྲམ་ཟེ་ཁྱོད། །དེང་ནས་བགྲང་བྱ་བརྒྱ་ཕྲག་ཚེས་ཀུན་ལ། །བཀྲ་ཤིས་རྒྱུད་ལས་སྙན་འགྱུར་གླུ་རུ་ལོངས། །དགེ་བའི་རྒྱུ་སྤུན་མཐའ་ཀླས་ཉེར་(༢༠༣བ)
བཏགས་པ། །བསོད་ནམས་རི་མོ་བཀྲ་བའི་དུ་ཀཱུ་ལ། །དཔྱོད་ལྡན་དྲང་སྲོང་ཕུབ་རུ་ཁྱོད་ཉིད་ཀྱི། །མཛེས་བྱེད་སྟོང་གཡོགས་གོས་སུ་ཀླུབས་འདིའོ། །རབ་བྱུང་བཅུ་གཅིག་པའི་ཆུ་ཡོས་ཉང་སྨད་ཞ་ལུ་གསེར་བཀང་གི་ཆོས་གྲྭར་ལས་གཤིན་མཆོད་པའི་ཚེ་སྡེ་བརྒྱད་ཡལ་བ་མེད་པའི་སྐད་གཏོང་བའི་ལམ་ཡིག་འཆི་བདག་ནག་པོའི་རྐན་སྒྲ། ན་མོ་བཛྲ་བྷཻ་ར་ཝཱ་ཡ། རིགས་ཀུན་ཁྱབ་བདག་རྡོ་རྗེ་འཆང་ཆེན་པོ་ནས། །རྒྱ་བལ་བོད་ཀྱི་མཁས་གྲུབ་རིམ་པར་བྱོན་པའི་རྩ་བརྒྱུད་ཀྱི་བླ་མ་དམ་པ་རྣམས་ཀྱི་བཀའ། འཇམ་དཔལ་རབ་ཏུ་ཁྲོས་པ་དཔལ་གཤིན་རྗེའི་གཤེད་ཀྱི་ལུང་། གོང་མའི་ལུང་གིས་དེའི་ཆི་ཀྱིང་གང་ཞེས་སྲིད་ཞིའི་གཙུག་རྒྱན་དུ་དབང་བསྐུར་ཞིང་། དུས་དགྲའི་དབང་པོའི་རྣལ་འབྱོར་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ་ཕྱོགས་ཐམས་ཅད་ལས་རྣམ་པར་རྒྱལ་བས་གོ་བར་བྱེད་པའི་གཏམ། སྲིད་པ་གསུམ་ན་གནས་ཤིང་རྒྱུ་བའི་འབྱུང་པོ་མི་དང་མི་མ་ཡིན་པ་སྤྱི་དང་ཁྱད་པར་མངའ་རིས་སྐོར་གསུམ། དབུས་གཙང་རུ་བཞི། མདོ་ཁམས་སྒང་གསུམ། རྒྱ་བལ་ཧོར་སོག་གི་ཡུལ་སྡེ་སོ་སོའི་བླ་མ། སློབ་དཔོན་རྒྱལ་བློན། །རྫོང་སྡོད། གཉེར་ལས་འཛིན། རྒན་དམངས། ཀོ་གྲུ་ལྕགས་གསུམ་གྱི་ལམ་གཉེར། །སྣེ་མོར་མངགས་པ་དང་བཅས་པའི་སྐྱེ་རྒུ་མཐའ་དག་ལ་ཟློ་བ། ཡོས་ལོ་ཟླ་བ་བཅུ་གཉིས་པའི་ཉེར་དགུ་ལ་ཆོས་གྲྭ་ཆེན་པོ་དཔལ་ཞ་ལུ་གསེར་བཀང་གི་གཙུག་ལག་ཁང་དུ། ལྷོ་ཕྱོགས་རིམ་པ་བདུན་གྱི་ས་འོག་འཇིགས་རུང་ཐོད་པ་ལྕགས་ཀྱི་གྲོང་ཁྱེར་ཆེན་པོ་ནས་དམ་ཅན་ཆོས་ཀྱི་རྒྱལ་པོ་ཡབ་ཡུམ་མ་གཤིན་དྲེགས་པའི་ཚོགས་དང་བཅས་པ་སྤྱན་དྲངས། །མཆོད་པ་དང་། གཏོར་མས་མཉེས་པར་བྱས་ནས་བསྟན།(༢༠༤ན)
འཛིན་གྱི་སྐྱེས་ཆེན་དམ་པ་རྣམས་ཞབས་པད་བརྟན་པ་དང་། བསྟན་པ་སྤྱི་སྒེར་དར་ཞིང་རྒྱས་ལ་ཡུན་རིང་དུ་གནས་པ་དང་། བསྟན་དགྲ་རྣམས་ཚར་གཅད་པའི་འཕྲིན་ལས་ཞུ་རྒྱུ་ཡིན་པས། གཟུགས་ཅན་མི་རྣམས་ངོ་མཚར་གྱི་ལྟད་མོ་མིག་གི་བདུད་རྩིར་བསྟེན་པ་དང་། གཟུགས་མེད་རྣམས་མཆོད་གཏོར་ལེན་པ་ལ་འབད་པར་རླུང་སེམས་ལས་སུ་རུང་བའི་རྣལ་འབྱོར་པ་འདི་ཕོ་ཉར་མངགས་པ་ཡིན་པས་ཁྱོད་སོ་སོས་བཀུར་སྟི་གྲོགས་སུ་གང་འགྲོ་དང་། མཚེར་བབས་སུ་གནས་མལ་སྟོབ་པ། ཀ་གྲུ་ལམ་འཕྲང་ལ་སྒྲོལ་འདོན་སོགས་མཐུན་རྐྱེན་དུ་འགྲོ་བ་གྱིས། གཟུགས་མེད་རྣམས་ཀྱིས་ཀྱང་འདི་པའི་འགལ་རྐྱེན་སེལ་བ་དང་། མཐུན་རྐྱེན་སྤེལ་པའི་གྲོགས་ཀྱིས། གལ་ཏེ་གནོད་འགལ་བྱས་ཚེ་གཤིན་རྗེའི་གཤེད་ཀྱི་རྣལ་འབྱོར་པ་རབ་ཏུ་ཁྲོས་ནས་འཆི་བདག་གཤིན་རྗེའི་ཟས་སྐལ་དུ་གཏད་ན་མི་སྐྲག་པ་ཨེ་ཡིན། མཛེས་བྱེད་ཀྱི་ལོ་ཁྲུམས་སྟོད་ཟླ་བའི་ཉེར་ལྔ་ལ་ཕོ་བྲང་ཆེན་པོ་ཏ་ལ་ནས་བྲིས། ལྕགས་གླང་ཆ་དཀར་དརྒན་ཆོས་རྗེས་བཀའ་འགྱུར་རྒྱུའི་མཐིང་ཤོག་སོགས་དངོས་པོ་མང་དུ་བྱུང་བའི་ལན་སྨོན་ལམ་དག་པའི་མཚམས་སྦྱོར། དུས་གསུམ་རྒྱལ་བ་མ་ལུས་པའི། །མཁྱེན་བརྩེ་ནུས་པ་ཀུན་གྱི་བདག །ཆོས་ཀྱི་རྒྱལ་པོ་བཙོང་ཁ་པས། །དད་ལྡན་ཁྱོད་ལ་དགེ་ལེགས་སྩོལ། །མངོན་པར་མཐོ་བའི་རྟེན་བཟང་པོ། །རིང་མིན་ཆར་ཡང་ནད་གདོན་སོགས། །མི་མཐུན་ཉེས་པས་མ་གོས་པར། །སྒོ་གསུམ་བདེ་བར་ལེགས་གནས་ཤིང་། །གནམ་སའི་དབང་ཕྱུག་གོང་མ་ཆེ། །དགྱེས་པའི་བཀའ་སྩལ་དབུགས་དབྱུང་བས། །ཕྱོགས་དེའི་བསྟན་པའི་ཞབས་འདེགས་སུ། །འགྱུར་བའི་བྱ་རྩོལ་དོན་ལྡན་ངོས། །ཡི་གེ་བཀྲ་ཤིས་ཁ་བཏགས་བཅུ། །གོས་བཟང་(༢༠༤བ)
སྲང་དོ་ཞོ་ལྔའི་གསེར། །དངུལ་གྱི་ལྷ་གཟུགས་རྣམ་པ་བརྒྱད། །ཇ་སེར་དང་བཅས་ཉམས་མེད་འབྱོར། །རྒྱལ་བའི་གསུང་རབ་བྲི་བའི་གཞི། །མཐིང་ཤོག་ཀོ་དྲ་བཞི་བཅུ་དྲུག །རྔ་མོ་བརྒྱད་དང་ལིང་ཡུག་བཅས། །ལྷག་བསམ་བློ་ཡིས་བསྲིངས་པ་ལེགས། །གནས་སྐབས་བསམས་པའི་དོན་གྲུབ་ཅིང་། །མྱུར་དུ་སངས་རྒྱས་ཐོབ་པ་ཡི། །བསྔོ་སྨོན་དཀོན་ཅོག་རིན་ཅེན་གསུམ། །དབང་པོར་བྱས་ཏེ་ནན་ཏན་བགྱིས། །སླར་ཡང་སངས་རྒྱས་དེ་སྲས་དང་། །ཉན་རང་སློབ་མ་དང་བཅས་པར། །གསོལ་བ་བཏབ་ནས་ཁྱོད་ཉིད་ལ། །ཕན་པའི་སྐྱབས་འཇུག་ཡུན་དུ་བྱེད། །དེ་བཞིན་གཤེགས་པའི་འཕེལ་གདུང་དང་། །དེའི་སྐུ་སྲུང་མདུད་རྟེན་བསྡུས་སྒྲ། །ཕྲུག་ཆེན་སྐྱེར་ཁ་འདོན་མ་དྲུག །རིང་འགག་སྲབ་འཐུག་གཟན་གཉིས་བཅས། །ལྕགས་མོ་གླང་ལོན་མ་མཐོང་ཟླའི། །གྲལ་ཚེས་དགེ་བར་བོད་ཡུལ་གྱི། །རྡོ་རྗེའི་གདན་གྱུར་འཕྲུལ་སྣང་དང་། །ཟུང་འབྲེལ་གྲུ་འཛིན་རྩེ་ནས་བྲིས། །ལྕགས་སྦྲུལ་ཁལ་ཁ་ཚོ་པ་བདུན་དང་ཨོ་རོད་ཚོ་པ་བཞི་ཕྱི་ནང་གི་གཞུང་རྣམས་སྤེལ་ཆེད་དུ་གཉེར་བའི་ཕོ་ཉ་དང་བཅས་མངགས་པའི་དུས་སྤྱིར་ལྷབ་ཤོག་དུ་བསྲིངས་པ་མཉེས་གཤིན་མཇའ་བའི་མདུད་པ། ས་འདིའི་མཆོད་སྦྱིན་བརྒྱ་པ་གནམ་བསྐོས་བདག །ཕུན་ཚོགས་བསོད་ནམས་སྟོབས་ཀྱི་དབང་ཕྱུག་བཀས། །ཕུལ་བྱུང་ལྷ་ཡི་བླ་མར་དབང་བསྐུར་བ། །ཏཱ་ལའི་བླ་མ་བཛྲ་དྷ་རའི་གཏམ། དབེན་ས་སྤྲུལ་པའི་སྐུས་གཙོས། བྱང་ཕྱོགས་ཡངས་པའི་ནོར་འཛིན་གྱི་གཞིར་འཁོད་པའི་ལུས་ཅན་སྤྱིར་ཕན་པ་བསྒྲུབ་པའི་བསམས་ལྡན་ཀུན་མཁྱེན་ཤཱཀྱའི་རྗེས་སུ་ཞུགས་ཤིང་གནས་པ་རྣམས་ལ་ཟློ་བ། དེང་གི་དུས་ཁྱེད་རྣམས་མཆོག་ཏུ་རྣམ་པར་དཀར་བའི་འབྲས་བུ་ལས་གྲུབ་པའི་ལུས་འཚོའི་ལྗོན་པ་(༢༠༥ན)
རབ་ཏུ་བརྟན་ཅིང་། རང་རང་གིས་བགྱིད་པར་འོས་པའི་ཐོས་བསམ་སྒོམ་པའི་ཡལ་འདབ་མངོན་པར་རྒྱས་པར་གནས་སམ། འདི་ཕྱོགས་སུ་ཉི་མའི་གཉེན་གྱི་རིང་ལུགས་པའང་འདུ་བ་སྙོམས་ཤིང་། སྟོབས་བཅུ་མངའ་བའི་ལུང་རྟོགས་ཀྱི་བསྟན་པ་སྤེལ་བ་དང་། ལུས་ཅན་ཀུན་ལ་གཅིག་ཏུ་དཀར་བའི་བསམ་པ་ཡར་ལྡན་དུ་མཆིས། ཉེ་བའི་ཆར་ད་ལྟ་དབུས་གཙང་གི་ལྗོངས་སུ་བསྟན་འཛིན་ཆོས་ཀྱི་རྒྱལ་པོ་འབྱོར་ཏེ། མངའ་འབངས་མཐའ་དག་དགེ་བའི་ལམ་ལ་འགོད་ཅིང་། བསྟན་པ་རིན་པོ་ཆེར་གུས་མཆོད་ལྷུར་ལེན་པར་གནས་སྐབས་བཞིན། དེ་ཕྱོགས་འཁོད་པ་རྣམས་ལ་ཡང་དྲི་སྨེད་བྱེད་པར་མཆོད་ཡོན་ཐུན་མོང་ནས་འདི་པ་རྫོང་སྟ་བྱས་ཡོད་ཅིང་། སྔ་སོར་དེ་ཕྱོགས་དར་རྒན་ནང་སོ་ཅན་ལ་ཡི་གེ་དག་བཅོས་སུ་བགྱིས་པའི་དོན་བཞིན་གཞུང་བཟང་པོ་སྤེལ་བའི་བསྟན་པའི་ཁུར་བླངས་ཀྱི་དོ་དམ་བྱས་འདུག་པའི་གནས་ཚུལ་འབྱོར་པས་ཡིད་སྤྲོ། དགེ་བ་མཐའ་དག་རྫོགས་བྱང་དུ་བསྔོ་བའི་རྒྱས་འདེབས་ནན་ཏན་དུ་བགྱིས་ཡོད་པ་དང་། སླད་ནས་ཀྱང་བསྟན་པ་རིན་པོ་ཆེ་དབྱར་མཚོ་ལྟར་སྤེལ་བའི་མཐུན་རྐྱེན་ཕུན་སུམ་ཚོགས་པ་བསྒྲུབ་པ་དང་། ཕྱོགས་དེར་འཁོད་པའི་སྐྱེ་བོ་མཐའ་དག་ལ་ཕན་བདེ་འབྱུང་བའི་ཕྱིར། ཕན་ཚུན་དུ་ཡིད་གནག་པའི་བསམ་པ་མཐའ་དག་རིང་དུ་སྤངས་ཏེ། མཛའ་གཅུགས་ཀྱིས་བཅིངས་པའི་གཞུང་བཟང་པོ་སྔར་རྒྱུན་བཞིན་དུ་གནས་པའི་དོད་བགྱིད་དགོས་ཤིང་། གལ་ཏེ་བློ་མི་བསྲུན་པ་འགའ་ཞིག་གིས་རང་རང་གི་ཡོན་བདག་སོགས་ཕྱོགས་སུ་བཟུང་སྟེ་ལུགས་གཉིས་དང་མི་མཐུན་པའི་སྨད་པ་ལས་འགལ་ཚེ། དམ་ཅན་རྒྱ་མཚོ་དཔང་དུ་བཙུགས་པའི་མངོན་སྤྱོད་དྲག་པོའི་འཕྲིན་ལས་ཀྱིས་ལུས་སེམས་ལ་བརྣག་(༢༠༥བ)
དཀའ་ཞིང་ལྕི་བའི་ཆད་པ་འབེབས་པ་ལ་མི་འཇིགས་སམ། སྨྲས་པ་དོན་ལྡན་དུ་བགྱིས་པ་རྣམས་ལ་གནས་སྐབས་མཐར་ཐུག་ཀུན་ཏུ་དགེ་བའི་ཏིང་ངེ་འཛིན་བཟང་པོའི་སྐྱབས་འཇུག་བྱེད་པ་ཡིན། ཞེས་འཕགས་པའི་ཡུལ་དུ་བྲྀ་ཥ་ཞེས་འདོད་ཅིང་། བོད་སྐད་དུ་མྱོས་ལྡན་ཞེས་བསྒྱུར་བ། ལྕགས་མོ་སྦྲུལ་གྱི་ལོའི་ཁྲུམས་སྟོད་ཟླ་བའི་ཕྱོགས་གཉིས་པའི་རྒྱལ་བ་གསུམ་པའི་ཚེས་ལ་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་ལུགས་ཟུང་གི་སྒོ་འཕར་ཅིག་ཅར་འབྱེད་པ་དགའ་ལྡན་ཕོ་བྲང་ནས་བྲིས། བྱང་ཕྱོགས་ཡངས་པའི་ནོར་འཛིན་གྱི་གཞིར་འཁོད་པའི་ཁལ་ཁའི་རྒྱལ་པོ། ཐ་བུ་ནང་མི་བཟང་དམངས་དང་བཅས་པ་མཐའ་དག་ལ་ཟློ་བ། དེང་གི་དུས་ཁྱེད་རྣམས་མཆོག་ཏུ་རྣམ་པར་དཀར་བའི་འབྲས་བུ་ལས་གྲུབ་པའི་ལུས་འཚོ་རབ་ཏུ་བརྟན་ཅིང་། རང་རང་གིས་བགྱིད་པར་འོས་པའི་བླང་དོོར་གྱི་གནས་རྣམས་ཕྱིན་ཅི་མ་ལོག་པར་འཛོལ་མེད་དུ་གནས་པའི་སྐབས་སུ་མཆིས་སམ། འདི་ཕྱོགས་སུ་དཔལ་ལྡན་ཤཱཀྱའི་འཕྲིན་ལས་པའང་འདུ་བ་སྙོམས་ཤིང་། སྟོབས་བཅུ་མངའ་བའི་རིང་ལུགས་སྤེལ་བ་དང་། ལུས་ཅན་ཀུན་ལ་གཅིག་ཏུ་དཀར་བའི་བསམ་པ་ཡར་ལྡན་དུ་མཆིས། གཞན་མ་རྣམས་གོང་དང་འདྲ་བ་ལ། གལ་ཏེ་བློ་མི་བསྲུན་པ་འགའ་ཞིག་གི་བྱེད་པས་སྨྲས་པ་ལས་འགལ་ཚེ། ཞེས་པ་ནས་གོང་དང་འདྲ་བ་ཞིག །ཁལ་ཁའི་རྒྱལ་པོ། མི་བཟང་སྡེ་དམངས་དང་བཅས་པ་ལ་གནང་བའོ། །ཀུན་མཁྱེན་ཟས་གཙང་སྲས་པོའི་འཕྲིན་ལས་པར་མིང་ཡོངས་སུ་གྲགས་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ། མིང་གཞན་ཇིང་གིར་གན་གྱི་ཡུལ་དུ་ཏཱ་ལའི་བླ་མ་བཛྲ་དྷ་ར་ཞེས་པའི་གཏམ། དད་སྟོབས་ལྡན་པ་ཛ་སག་ཐུ་རྒྱལ་པོས་གཙོས་པའི་ཁལ་ཁའི་རྒྱལ་(༢༠༦ན)
པོ་རྒྱལ་རིགས་དབང་ཐ་བུ་ནང་མི་བཟང་སོགས་ལུགས་ཟུང་གི་བྱ་བའི་ཁ་ལོ་སྒྱུར་བ་མཐའ་དག་ལ་ཟློ་བ། འགྲོ་བ་ཀུན་ལ་གཅིག་ཏུ་སྨན་པར་མཛད་པའི་ཕན་དང་བདེ་བའི་དཔུང་གཉེན་དམ་པ། རྒྱལ་བ་ཉི་མའི་གཉེན་གྱིས་མངོན་པར་མཐོ་བ་དང་ངེས་པར་ལེགས་པའི་རྒྱུ་སྒྲུབ་བྱེད་ཀྱི་ཐབས་སུ་གསུང་རབ་ཡན་ལག་བཅུ་གཉིས་བཀའ་སྩལ་བ་མཐའ་དག །བརྗོད་བྱའི་སྙིང་པོ་མི་དགེ་བ་བཅུ་སྤོང་ཞིང་། དགེ་བ་བཅུ་བསྒྲུབ་པར་གསུངས་པས། སྔོན་གྱི་འཛམ་གླིང་ཡངས་པའི་རྒྱལ་ཁམས་སུ་བྱོན་པའི་ཆོས་ལྡན་རྒྱལ་པོ་རྣམས་ཀྱིས་དགེ་བ་བཅུའི་ཁྲིམས་ལ་བརྟེན་ནས་རང་གཞན་གྱི་དོན་རླབས་པོ་ཆེ་བསྐྲུན་པ་ལྟར་སྐྱེ་རྒུ་ཀུན་གྱི་ཕན་བདེ་འབྱུང་བ། རྒྱལ་བའི་བསྟན་པ་རིན་པོ་ཆེ་ལ་རག་ལུས་ཤིང་། དེ་ཡང་ཡུལ་སོ་སོའི་ས་ཆེན་པོ་སྐྱོང་བ་རྣམས་ཀྱིས་རྒྱལ་ཁྲིམས་ཆོས་བཞིན་དུ་སྤྱོད་པ་ལ་རག་ལུས་པས། སྔོན་ནས་རྒྱུ་མཚན་རིམ་པར་སོང་བ་ལྟར། ཕྱོགས་དེའི་ཕྱི་ནང་ཀུན་ཏུ་ཕན་ཚུན་མཐའ་དག་མཉེས་གཤིན་པའི་ངང་ཚུལ་ཅན་གྱིས། རང་རང་གི་མངའ་རིས་ལ་ཆོག་ཤེས་པ་དང་། སྡིག་སྤྱོད་ཀྱི་ཚུལ་ལ་ངོ་ཚ་ཤེས་ཤིང་། སྔོན་ནས་གཉེན་དང་མཛའ་གྲོགས་སུ་གྱུར་པའི་ཁྲེལ་ཡོད་ལ་རབས་ཀྱི་སྤྱོད་ཚུལ་ནན་ཏན་དུ་བགྱིས་པའི་གཞུང་བཟང་པོ་བདེ་འཇགས་ཀྱི་ལྷག་བསམ་གྱི་ཁུར་ཆེན་པོ་དང་ལྡན་པ་དགོས་ཚུལ་ཞིབ་པ་ཨེར་ཏེ་ན་ཆོས་རྗེའི་ངག་ནས་སྨྲེང་བ་ལྟར། བརྗོད་པའི་འབྲས་བུ་ཡང་དག་པར་སྨིན་པ་ནན་ཏན་གལ་ཆེ་ཚུལ་འདིར་བསམ་སྦྱོར་ངན་པའི་ཀུན་དཀྲིས་ཀྱིས་ལོག་པར་འཁུ་ན། དམ་ཅན་རྒྱ་མཚོས་ཆད་པས་ལུས་སེམས་ལ་བརྣག་དཀའ་ཞིང་ལྕི་བར་མི་འགྱུར་རམ། སྨྲས་པ་དོན་དང་ལྡན་པ་རྣམས་ལ་གནས་སྐབས་སུ་ལེགས་པའི་དོན་རྣམས་འགྲུབ་ཅིང་མཐར་ཐུག་རྫོགས་(༢༠༦བ)
པའི་བྱང་ཆུབ་མཆོག་ལ་རེག་པའི་བསྔོ་སྨོན་གྱི་རྒྱས་འདེབས་ཡིད་ལ་འགྲོགས་པར་བྱེད། འཕགས་ཡུལ་ཨ་དྷ་རར་འབོད་པ། ཀུན་འཛིན་ཞེས་པ་ས་ཕོ་བྱི་བའི་ལོ་ཆུ་ཤེལ་དབང་པོ་གྲོ་བཞིན་གྱིས་ཉ་བའི་ཡར་ཚེས་དགེ་བར་ཆོས་སྡེ་ཆེན་པོ་དཔལ་ལྡན་འབྲས་སྤུངས་ནས་བྲིས། ཚངས་པ་དུང་ཐོད་ཅན་གྱིས་བླང་དོར་གྱི་ལུང་བསྟན་མཛད་པའི་ལན་དུ་གསོལ་བ་ཆོས་ཀུན་བསྒྲིབས་མེད་གཟིགས་ལ་བསྔགས་པ། བདེ་ལྡན་མགོན་པོ་འོད་མཚན་གར་གྱི་དབང་། །མཚོ་ལས་སྐྱེས་པའི་རྡོ་རྗེའི་རྣམ་རོལ་པ། །སྲིད་གསུམ་ཟླ་བྲལ་རིག་སྔགས་འཆང་བ་ཡི། །ཕོ་ཉ་བསྟན་སྲུང་ལྷ་མཆོག་ཚངས་པ་ཆེའི། །མགྲིན་པ་རི་མོ་གཡས་སུ་འཁྱིལ་བའི་དུང་། །བླང་དང་དོར་བྱ་གསལ་བའི་སྒྲ་དབྱངས་ཅན། །གསུང་འཕྲིན་ལྷ་དར་ཐུན་མཚམས་ཕྱག་རྒྱ་ཡིས། །རྒྱས་བཏབ་བྱ་མ་རྟ་ཡིས་ཉམས་མེད་སོན། །རབ་དཀར་ཁ་བས་བསྐོར་བ་བོད་ཡུལ་འགྲོར། །ཉེར་འཚེའི་ནད་ཡམས་ཟློག་ཐབས་མེས་དབོན་གྱི། །ཆོས་འཁོར་སྟོད་སྨད་མཆོད་དང་གསུང་རབ་སྒྲོགས། །སྒོས་རིམ་ལྷ་གསོས་སྐང་བ་དགོས་ཚུལ་ངེས། །ལས་ཉོན་གདོན་གྱི་འཆིང་རྒྱ་མ་གྲོལ་བར། །འཁོར་བའི་ཟུག་རྔུ་ལུས་གྲིབ་ལྟར་འགྲོགས་ཀྱང་། །གནས་སྐབས་རང་བཞིན་བདེ་བའི་ཐབས་ཚུལ་ཀུན། །རྡོ་རྗེའི་གསུང་གིས་བསྟན་པ་བཞིན་དུ་བསྒྲུབ། །ལྷ་ཁྱོད་དཔྲལ་བའི་དཀྱིལ་ན་དམར་ཟླུམ་སྤྱན། །ལྐོག་གྱུར་ཤེས་བྱ་སྒྲིབ་མེད་གསལ་གཟིགས་པས། །བསྟན་འགྲོའི་ཕན་བདེ་སྤེལ་བའི་ཐབས་ཚུལ་རྣམས། །མ་སྦས་མངོན་སུམ་ལྟ་བུར་སླར་ཡང་སྟོན། །ཞི་རྒྱས་དབང་གིས་འགྲོ་བ་རྗེས་འཛིན་ཅིང་། །གདུལ་དཀའ་འདུལ་ལ་དྲག་སྦྱོར་འཕྲིན་ལས་ཚོགས། །ཐོགས་མེད་སྒྲུབས་ཤིག་པདྨ་ཐོད་འཕྲེང་གི ། སྤྱན་སྔར་ཁས་བླངས་དམ་བཅའ་ཉེ་བར་དགོངས། །དབང་པོའི་གཞུ་ལྟར་བཀྲ་བའི་དར་ཚོན་གྱི། །སྙན་ཤལ་སྣ་ལྔ་གསེར་སྐྱེམས་(༢༠༧ན)
དང་བཅས་པ། །མཛད་མེད་ནམ་མཁའ་མཛོད་དུ་བྱིན་བརླབས་ནས། །ལྷ་ཆེན་ཐུགས་དམ་གཉན་པོ་སྐོང་ཕྱིར་སྤེལ། །ཀ་ཚལ་བླ་མ་རིགས་འཛིན་དཀོན་ཅོག་ལྷུན་གྲུབ་ཀྱིས་ལྕགས་ཕག་ཟླ་བ་བཅུ་གཅིག་པར་སྙན་ངག་གི་འཕྲིན་ཡིག་བྱུང་བའི་ལན་ལྷ་སྔགས་ཡེ་ཤེས་རོལ་གར། ཧེ མ ནཻ ཀ སྶུ རཻ བུ ཏྲ མཱ ཡཱ མ སཱ མ ནྱ ར ཏྣ དྭི ཏཱི ཡོ ཧི དྷ རྨཻ ཪྻཤ །མཽ ཁྱི ཀཱ མྲྀ ཏྱ སཱ དྷོ མ དོ བི དྱ དྷཱ མཽ དྲ ལེ ཁཱ སུ ཙི ཏྟཱ ངྐུ ལེ ཡུ ཀྟི ཀཿ གངས་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)ཅན་ལྷ་གཅིག་སྲས་པོའི་སྒྱུ་མའི་འཕྲུལ། །མཚུངས་མེད་རཏྣ་གཉིས་པ་ཆོས་ཀྱི་གྲགས། །ཞལ་ལུང་བདུད་རྩིས་ལེགས་མྱོས་རིག་འཛིན་གྱི། །རྒྱ་ལྡན་འཕྲིན་ཡིག་རྟེན་བཟང་སུག་པར་སོན། །དལ་བརྒྱད་འབྱོར་བཅུའི་ཆ་ཤས་ཉ་གང་ཞིང་། །ཐོས་བསམ་སྒོམ་པའི་འོད་ཀྱིས་སྲིད་ཞིའི་སྨག །མཐར་བྱེད་མཁས་ཤིང་གྲུབ་པའི་སྔོན་མེད་ཟླ། །ཉེར་འཚེའི་མཁའ་གླང་དང་བྲལ་རྣ་བའི་བཅུད། །འདི་ན་ཆེན་པོའི་རིགས་དང་གོ་ས་ཙམ། །གཞན་སྣང་འདྲིད་པའི་སྦྱོར་བར་འགྲོ་ཕན་ཞེས། །བླ་ཆེན་རྣམ་ཐར་འཕྱོན་(༢༠༧བ)
མའི་གར་བསྒྱུར་བའི། །སྟོང་ཟད་གྲུ་ཡིས་ཚེ་འདིའི་སུམ་གཉིས་བརྒལ། །ཀ་དག་མེ་ལོང་ངོས་སུ་ཞི་ཁྲོའི་སྐུ། །སྣང་བརྙན་ལྷུན་གྲུབ་ལྷ་སྔགས་ཡེ་ཤེས་ཀྱིས། །ཡིད་སྲུབས་ལས་རྒྱལ་བསྲུང་བཟློག་འཕྲིན་ལས་རྣམས། །བསྒྲུབ་པའི་རྣམ་པར་ཐར་དེར་བདག་ཡི་རངས། །མཁན་སློབ་ཆོས་སྒོ་སྐྱེ་སྤྲུལ་ཆེན་པོའི་གདུང་། །ཆེར་རློམ་ཚང་ཚིང་སྟུག་པོ་གཡུར་ཟ་ཡང་། །རིན་ཆེན་ཕུན་ཚོགས་རིང་ལུགས་ཛམྦུའི་ལྗོན། །ལེགས་བཤད་འབྲས་བུའི་རོ་བདའ་ཁྱོད་ཉིད་ཙམ། །དེ་ཕྱི་ཨ་ཧཾ་མི་ཤིགས་སྲོག་གི་ཀ །གཞོམ་མེད་རྡོ་རྗེའི་ཁམས་སུ་བསྒྲུབ་ནུས་པ། །རྩ་རླུང་ཐིག་ལེ་གཟུངས་སྔགས་བཅུད་ལེན་སྨན། །ཟབ་གཏེར་གདམས་པའི་སྙིང་པོ་ཉམས་སུ་ལོངས། །དབང་དང་རིམ་གཉིས་ཡེ་ཤེས་ལས་གོལ་བའི། །གནས་ལུགས་ཕྱག་རྒྱ་གཟུགས་མེད་ལྷ་ཡི་རྒྱུ། །ཚེ་འདིར་ཕུང་པོ་འོད་སྐུར་གྲོལ་ནུས་པའི། །རྫོགས་ཆེན་ཉམས་སུ་བསྟར་བ་གཏན་མདུན་རྩེ། །གང་གི་མགྲིན་པའི་འཁོར་ལོ་མ་དྲོས་མཚོ། །ལེགས་བཤད་ཡན་ལག་བརྒྱད་ལྡན་རྟག་འབབ་བཞིར། །འཕྲིན་ཡིག་ཆུ་ལྷ་དབུ་བའི་དོ་ཤལ་ཅན། །ཆད་མེད་བདག་བློའི་རྒྱ་མཚོར་ཕོབ་ཅིག་གུ །དོན་ལྡན་བརྗོད་པའི་རི་མོ་འདྲེན་བྱེད་ཟུར། །ལྷུང་ཕྱིར་ལྗོན་པའི་ཤིང་གི་བམ་པོའི་ངོས། །རྟགས་ཀྱི་སྤུ་སྡུག་བཀྲ་བའི་ཀོ་ཀི་ལ། །རིག་སྔགས་འཆང་བའི་དབང་ཕྱུག་མདུན་སར་འཕུར། །
རབ་བྱུང་བཅུ་གཅིག་པའི་ཆུ་བྱི་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་བྱི་ལོར་བྲིས་པའི་ཆབ་ཤོག་འཕྲིན་ཡིག་ཁག །ཆུ་བྱི་སྡིངས་པོ་ཆེ་སྤྲུལ་སྐུ་ངག་དབང་སྙན་གྲགས་བཟང་པོས་གནམ་ལོ་གསར་ཚེས་ཀྱིས་ལེགས་སྐྱེས་སྤེལ་བའི་སྙན་ཚིག་གི་འཕྲིན་ལན་བདེན་གཏམ་རླུང་མི་བསྐུར་བར་མངགས་པ། (༢༠༨ན)
ཀ ཎྛོ ཙྩཱ ལཾ པྲ ཏི བྷཱ ནཱ ཏྨ ལཱ ཤྲེ པ ཏྲཱ མྱ ཤྩ ཀྵ རི ཀཾ གཻ ཏྱ ལེ ཁཿ སྭཱ ལ ངྐཱརཻ རཁ ཙི དེ བྱ ཉྫ ལཱི ནཱཾ རེ ཁེ ནྲྀ ཏྱཾ ཀ ཏི ཀ ྈྐི ཉྩ བ རྟིཿ སྤོབས་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)པའི་མགྲིན་པ་བཏེག་ནས་ཤིས་བརྗོད་འཕྲེང་། །ཉམས་དང་འགྱུར་ཁུགས་གླུ་རུ་བླངས་པའི་འཕྲིན། །བདོག་པའི་རྒྱན་གྱིས་སྤྲས་པའི་མཻ་ན་ཀཿ །སྙིམ་པའི་ར་བར་གར་སྟབས་ཅི་ཡང་བསྒྱུར། །མཚུན་ལྷས་ངང་གིས་མ་སྲིངས་བསྐལ་པར་གཉིད། །གཡུར་བྱེད་ཚེ་ཡི་གཡུང་དྲུང་ཉ་ཕྱིས་ཁོག །མཁས་ཁྱོད་འཚེ་བའི་མུ་ཏིག་དར་དྲག་པ། །དྭགས་བརྒྱུད་བསྟན་སྲོག་ཟུངས་སུ་གྱུར་དེ་ལེགས། །འདི་ན་རྣམ་གསུམ་སྡེ་སྣོད་ཀློག་པ་མཁན། །རྩེ་གཅིག་སྒྲུབ་པའི་ཞེ་བཅད་མ་ནུས་ཀྱང་། །བཀའ་དང་དགོངས་འགྲེལ་དུ་མར་ཐོས་བསམ་གྱི། །བཟང་པོའི་བག་ཆགས་བརྟས་ལ་ཟོལ་ཟོག་མེད། །རྒྱ་བོད་བརྡ་དག་སྡེབ་སྦྱོར་སྙན་ངག་གིས་རྩིས། །ལོ་པཎ་མཁས་རྣམས་བགྲོད་པའི་ལམ་པོ་ཆེར། །རྣམ་དཔྱོད་ཤིང་རྟས་ལེགས་བཤད་ནོར་བུའི་དཔྱ། །འདྲེན་པའི་དེད་དཔོན་ཁྱོད་གྲགས་(༢༠༨བ)
རྣ་བར་འཇེབས། །བྱང་ཆུབ་རྒྱུ་ཚོགས་ཐུབ་པས་སྔོན་བསགས་པའི། །བདེན་གཏམ་རླུང་བསྐུར་གཅིག་ཤེས་ཀུན་གྲོལ་ཞེས། །སྙན་གྱི་བུ་རམ་དངར་ཡང་མི་ལ་རྗེས། །དར་བློའི་རྩོད་པ་མ་བཟློག་གང་གི་སྐྱོན། །དེ་ཕྱིར་ཀློག་ཙམ་མི་ཤེས་ལུས་བསྲངས་ནས། །ལྟ་སྟངས་ངང་ནས་དལ་འབྱོར་སྟོང་ཟད་ལས། །རྣམ་གསུམ་ཤེས་རབ་བསྐྱེད་ལ་ངེས་སྦྱར་ན། །བདག་གཞན་བསླུ་བའི་ཆོ་གར་མི་འགྱུར་དྲང་། །རང་ཞལ་གསར་དུ་ངོམས་པའི་བགྲང་བྱ་ནས། །བསྐལ་པའི་ཕ་མཐའ་དེ་སྲིད་ཕན་བདེའི་སྲོག །འཚོ་འདོད་ལྷག་བསམ་ཟླ་བ་ལས་འཛགས་པའི། །ག་པུར་ཐིགས་འཕྲེང་སྤྲོ་བ་གཅིག་ཏུ་འདུན། །ཚངས་རིས་གྲུབ་པའི་བློ་གྲོས་རྒན་པོ་ཁྱོད། །སྭསྟིའི་པི་ཝཾ་འཁྲོལ་དང་ལྷན་ཅིག་པར། །ཕུན་ཚོགས་མེ་ཏོག་མ་ན་ར་ཡི་ཆར། །ལྔ་ཕྲག་བཅུ་ཡི་ཕ་མཐའ་སྙེག་སར་ཕོབ། །ཀླ་ཀློའི་གྲོང་ཁྱེར་ནོར་གྱིས་གང་བ་ལ། །མཚར་དུ་འཛིན་པ་བྱིས་པའི་བློ་གྲོས་ཏེ། །ལེགས་པར་བཤད་ལ་དཔྱོད་ལྡན་ཚོགས་མགུ་བས། །སྙན་ཚིག་རྒྱུད་མངས་སོར་རྩེར་རབ་བསྐུལ་ཞིག །ཡི་གེའི་ཚིག་དོན་ལང་ཚོ་རྒྱས་པའི་ཟླ། །རྟེན་གྱི་ཆུ་ཤེལ་དཀྱིལ་འཁོར་ལ་གནས་བརྫུན། །བདེན་ན་ཐགས་ཀྱི་རི་མོ་མངོན་སུམ་དུ། །གསལ་བའི་ངང་ཚུལ་འདི་ལ་སུ་ཞིག་བསྙོན། །ཤཱཀྱ་སེང་གེས་ཆོ་འཕྲུལ་བཀོད་པའི་རྡུལ། །བྱེ་བ་ཕྲག་བརྒྱ་ཀུན་གྱི་གཟིགས་མོ་རུ། །ལེགས་ཤར་མཉན་ཡོད་མཆོད་པའི་དཀར་པོའི་ཆ། །རྒྱལ་བ་དང་པོར་གྲུ་འཛིན་རྩེ་ནས་བྲིས། །ལྕགས་ཕག་གོང་ནས་མེ་རེང་བྱང་གི་ཚོགས་གསེར་ཡིག་བརྒྱད་པ་ཙམ་འབྱོར་སྐབས་བཀའ་ཤོག་གོས་དར་ཕྱི་གནང་སྦྱིན་བྱུང་བའི་ལེགས་འབུལ་གྱི་ཞུ་ཡིག་དང་བཅས་བསམ་གྲུབ་དགའ་ལྡན་གྱི་བླ་མ་བློ་བཟང་བསྟན་འཕེལ་དང་ལྕང་ལོ་ཅན་པ་བསྟན་འཛིན་དཔལ་བཟང་གཉིས་བཏང་སྐབས་སུ་ཕུལ་བའི་ཞུ་འཕྲིན་འཛམ་གླིང་གཙུག་ཏོར་མཛེས་རྒྱན། (༢༠༩ན)
ན ར ས ནི དྷ དྷཱ ཏུ ནཱ ཀྵེ ཏྲ ཙཱ ཧ བྻུ ཧཱ མཱ ཡ ལཱ ལི དྦྲྀ ཏ ཏྲཻ པ། གཱི ཚ ཏཿ བ དུ ར གམ ན ཙ ནྡུ ཏཱ ནུ རྡུ བེ སཱ དྷུ ཤཱ སྟཱ པ དཱ ད རྴ ཀཾ ནཱ། ཝཱ གཱི ཤྭ ར། ཞིང་(སྡེབ་སྦྱོར་མཉམ་པའི་པྲྀཏྟ་ལས་རྒྱུན་ཆགས་དང་པོ་གཏམ་པའི་ཆར་འབེབས།)ཁམས་རྒྱ་མཚོར་ངོ་མཚར་བཀོད་པ་སྒྱུ་འཕྲུལ་རོལ་གར་གངྒཱའི་རྡུལ། །འགྲོ་བའི་དབང་པོར་འཚམ་པར་ལེགས་སྟོན་ཀུན་གཟིགས་མགོན་པོ་འཇམ་དཔལ་དབྱངས། །(༢༠༩བ)
ཧེ ནི ཀ ཙ པ རི ཛ མྦུ ཏི དྭཱི པ ཀཽ ཥྞཱི ཥི ཎ ཏྶ ཐི ཏྱ ས ཏྐ རཱ ཎཱ ཀ ཀཱ ནཱ ས ནེ། གགན བ སུ དྷ རེ ཤྭ རཻཿ ཀྵྨཱ པ ཏེ། རྴི ལ ཀོ དྷཱ མ ཧོ ཏྟཱ མ ཏ ཤྴཱི མ ཏོ མུ ལ ཏཱ། འཛམ་གླིང་ཡོངས་ཀྱི་གཙུག་ཏོར་གྱིས་བཏེག་མང་པོས་བཀུར་བའི་གསེར་གྱི་ཁྲིར། །གནམ་སའི་དབང་ཕྱུག་རྒྱལ་པོའི་ཚུལ་འཛིན་དཔལ་ལྡན་གོང་མ་ཆེན་པོའི་དྲུང་། །སྭསྟི་ཀ་ཞེས་ཤིས་པ་ཉེར་བརྗོད་པའི། །མེ་ཏོག་སིལ་མ་འཐོར་ཞིང་དྲི་ཞིམ་སྤོས། །རབ་འཐུལ་དབང་པོའི་ཕྱོགས་སུ་བཞིན་རས་དངོམ། །གུས་ཚུལ་འགོག་མེད་སྔོན་འགྲོའི་སྒོ་ཕྱེ་སྟེ། །རིས་མེད་ལུས་ཅན་མཛའ་ཤེས་དོན་རྣམས་ཀུན། །ལྷུན་གྲུབ་བུ་རམ་ཤིང་པའི་རྗེས་ཞུགས་ནས། །རྣམ་གསུམ་སྡེ་སྣོད་གཞུང་ལ་ཀློག་པ་མཁན། །སྡོམ་བརྩོན་རྒན་པོས་དང་བའི་མཆེད་འདི་གསོལ། །རྒྱལ་བའི་ཡབ་གཅིག་ཟུར་ཕུད་ལྔ་ལྡན་པ། །སྒྲིབ་གཉིས་ཟད་པར་སྤངས་པའི་སངས་རྒྱས་དངོས། །ཐུན་མོང་གདུལ་བྱར་ས་བཅུའི་ཚུལ་བཟུང་ཡང་། །སྐྱེ་རྒ་ན་འཆིའི་ཟུག་རྔུས་ག་ལ་བརྫི། །དེ་ཕྱིར་ལྷ་(༢༡༠ན)
མིའི་མགོན་པོ་ཁྱོད་ཉིད་ལ། །སྙུན་འདྲི་སྨེད་པ་བྱིས་པའི་བློ་གྲོས་ཙམ། །འོན་ཏེ་འཇིག་རྟེན་མཐུན་པར་འཇུག་པ་འདི། །ཡོངས་ཀྱི་སྲོལ་ལགས་ནོར་འཛིན་སྐྱོང་བ་གསོན། །སྐད་རིགས་རྒྱན་གོས་བྱ་རྩོལ་ཐ་དད་པ། །བགྲང་ཡས་སྐྱེ་རྒུའི་བསོད་ནམས་ཚོང་ཟོང་གིས། །བསྒྲུབས་པའི་གང་སྐུ་ཟོ་མདོག་རྒྱས་པའི་གཟི། །བརྒྱ་ཕྲག་ཉི་མའི་འོད་ལ་འགོད་དེ་སྤྲོ། །མགོན་པོ་ཁྱོད་གསུང་འཇམ་སྙན་ཀུན་བཟོད་གཞིར། །རྒྱུ་བར་གཏོགས་སོ་ཅོག་གི་དབུགས་དབྱུང་ཡང་། །བརླང་སྤྱོད་དྲེགས་ལྡན་ཕྲག་པར་བཙན་པོའི་ཁྲིམས། །གསེར་གྱི་གཉའ་ཤིང་འཛིན་རི་གཅིག་ཏུ་ལྕི། །འགྲོ་རྣམས་བུ་གཅིག་ལྟར་བརྩེ་བྱམས་པའི་ཐུགས། །པདྨའི་འདབ་བཞིན་མཉེན་ཀྱང་མི་བསྲུན་སྡེར། །གཏུམ་དྲག་གསང་བ་ཀུན་འཆང་མཐུ་སྟོབས་ཀྱིས། །འབར་བའི་རྡོ་རྗེའི་རྭ་རྩེ་ཕྱོགས་བཅུར་གདེངས། །འཛུམ་ཞལ་ལུང་གིས་ཉེར་མངགས་བྱང་གི་སོགས། །གསེར་ཡིག་དགུ་གྲངས་ལག་པད་གྱིས་བཏེག་པའི། །གནམ་གྱི་ཤེ་མོང་རི་མོའི་བཀའ་རྟགས་ཅན། །དོན་བཟང་གནང་སྐྱེས་དང་བཅས་འབྱོར་ཏེ་སྤྲོ། །འདི་ན་ལྔ་ཕུང་བྲོ་ནད་དང་བྲལ་ཞིང་། །བསྟན་དང་འགྲོ་བའི་ཕན་བདེ་དབྱིག་འཛིན་ཁྱོན། །བླ་ནས་བླར་འདེགས་ལྷག་བསམ་རུས་སྦལ་ཁུར། ཁྱབ་འཇུག་ཁེངས་པའི་རི་བོ་སྙིལ་ལ་བྲེལ། །མི་རྗེ་ཁྱོད་སྙན་ཚངས་པའི་ཡུལ་ས་རུ། །གྲགས་པས་སུམ་རྩེན་བདག་པོའི་རལ་པའི་རྩེར། །ཞབས་སེན་ཀུན་ཕན་འགོད་ཆད་མཐོ་རིས་སྐས། །བབས་ཏེ་ས་འདིར་ཡོང་ལ་རིངས་སམ་སྙམ། །ཚུལ་དེས་ཡིད་དྲངས་རི་རྒྱལ་ལྷུན་པོ་ཡིས། །ཆུ་གཏེར་མཚམས་ལས་སྐེ་རགས་ཡན་འཐོན་ཏེ། །ཉི་ཟླ་ཟུང་གི་སྒྲོན་མེ་རབ་སྦར་ནས། །(༢༡༠བ)
བལྟ་ཕྱིར་གཡོ་མེད་གཅིག་ཏུ་གནས་པ་བཞིན། །གསེར་འབྲུག་ཚང་འཁྱིལ་ལྔ་ལྡན་སྡེར་མོ་ཡིས། །བཏེག་པའི་རིན་ཆེན་ཁྲི་ལ་དབང་ཕྱུག་ཁྱོད། །ཞབས་ཟུང་བསྐལ་བརྒྱར་མི་གཡོ་རྟག་བཞུགས་པ། །མཆོག་གསུམ་ཐུགས་རྗེའི་མཐུ་ཡིས་འགྲུབ་བྱིན་རློབས། །ཡངས་པའི་ས་ལ་གནས་སོ་ཅོག་གི་འགྲོ། །བཀའ་དྲིན་གྲིབ་མར་མི་བརྟེན་མཆིས་མིན་ཡང་། །ཡབ་རྗེས་བསྟན་པ་གཅིག་ཏུ་ལུང་ལས་ཀྱིས། །དབང་བསྐུར་དངོས་ཅག་ལྷ་ཁྱོད་ཆེད་དུ་སེམས། །དེ་ཕྱིར་སྔོན་ནས་བྱམས་བརྩེའི་གྲུ་རྫིངས་ཀྱིས། །ཕན་བདེའི་རིན་ཆེན་གླིང་དུ་དྲངས་པའི་ཁ། །སྙོགས་པས་སྤྱི་བརྟོལ་བསྐྱེད་དེ་ཡང་གསོལ་པ། །མི་ཁྲེལ་དགྱེས་པའི་འཛུམ་ཞལ་ལྷག་པར་སྟོན། །བདེ་སྐྱིད་སྲོག་གི་ཀ་བ་འཛུག་པའི་སྨན། །བཀའ་ཡིག་བདུད་རྩི་སྙིང་གི་ཟ་མ་ཏོག །བྱམས་མགོན་དབུས་འགྱུར་བྱོན་མིན་དེ་སྲིད་དུ། །ནམ་ཡང་ཆད་པ་མེད་པར་འགེང་བར་གསོལ། །སྤྱན་རས་གཟིགས་པ་འབབ་བརྟེན་རིན་ཆེན་འཕྲེང་། །འཇམ་ཕྲུག་སྣ་ཚོགས་བདོག་པས་ཉེར་བཏེག་པའི། །ཞུ་མཆིད་རྒྱན་གྱིས་སྤུད་པའི་མཻ་ན་ཀཿ །གནམ་བསྐོས་རྒྱལ་པོའི་ཁབ་ཏུ་ཟློས་གར་བསྒྱུར། །ཉལ་འགྲོའི་གོས་སྔོན་ཀླུབས་པ་བྱི་བ་ལོའི། །ཆུ་ཤེལ་དབང་པོ་དབོ་ཡིས་ལེགས་ཉ་བའི། །དཔྱིད་ཀྱི་ལང་ཚོ་ངོམ་པའི་དུས་དགེ་བར། །རང་བྱུང་འཕགས་པའི་གཙུག་ལག་ཁང་ནས་ཕུལ། །རིག་སྔགས་འཆང་བའི་དབང་ཕྱུག་ཀ་ཚལ་བླ་མ་དཀོན་ཅོག་ལྷུན་གྲུབ་ཀྱིས་ངེད་འབྲུམ་ནད་ལས་གྲོལ་བའི་ལེགས་སྐྱེས་དང་ལྷན་ཅིག་པར་རྨེ་རུ་བླ་མ་བྲག་སྒོ་རབ་འབྱམས་པས་པདྨ་བཀའ་ཐང་ལ་རྩོད་པའི་ལན་གྱི་ཤོག་དྲིལ་འདི་ཇི་ལྟར་བྱུང་ཞེས་དྲིས་པའི་འཕྲིན་ལན་ནམ་མཁའི་སྐེ་རགས། (༢༡༡ན)
ཏ བ གྲཱི པ སཱ ཧ སྲ པཱ ཪྨི ཀྱ མོ ཀྟཱ གྲ ཏཱ སྭཱ ར བྷྲཾ ངྒཱ ནུ རཱ གྦཱི ཎ ཤ བྡེ། པྲ བཱ ཀྐོ ཊི གཱི ཏྱཾ བ ཏུཾ པ ཉྩ མཱ སྠཱ ན པི བྱོ ཀྟ ཏ དྤེ ཁ ཏཱ ཙི ཧྞ ཡུ ཀྟ། ཁྱོད་(སྡེབ་སྦྱོར་མཉམ་པའི་པྲྀཏྟ་ལས་ལས་འཕྲོ་ལྟུང་བ)མགྲིན་པདྨའི་འདབ་སྟོང་གྲོལ་བའི་རྩེར། །དབྱངས་ཅན་བུང་བ་རྗེས་ཆགས་རྒྱུད་མངས་སྒྲར། །གཙུག་ལག་བྱེ་བའི་གླུ་རུ་ལེན་མཁས་པ། །གནས་ལྔ་རིག་པ་སྨྲ་དེའི་འཕྲིན་རྟེན་འབྱོར། །སྡིག་འབྲས་གོ་ལའི་ཁྱིམ་དབུས་མི་རྒྱུ་བས། །ཉིས་བརྒྱ་ཟུག་རྔུ་སྒྲ་གཅན་དང་བྲལ་བའི། །དལ་རྟེན་ཟླ་བ་ཐོས་བསམ་སྒོམ་པའི་ཆ། །ཡོངས་གང་ཕན་བདེའི་བསིལ་ཟེར་འགྱེད་དེ་སྙན། །འདི་ན་རྡོ་རྗེའི་ཚེར་མས་བཅིངས་པའི་རྒྱ། །ཐབས་མཁས་འཕྲུལ་གྱི་མཚོན་ཆས་ཉེར་བཅད་ནས། །སྒོ་གསུམ་བདེ་བར་བག་ཕེབ་གཏན་གྱི་འདུན། །སྒྲུབ་འདོད་ཡིད་ཀྱི་རི་མོ་མ་ཡལ་ཙམ། །རྟོག་གེའི་ཚིག་བཤད་སྦུན་པས་མྱོས་པའི་གླང་། །ལོག་རྟོག་ཁོག་པོར་བརྗོད་པའི་གོམ་སྟབས་ཀྱིས། །སྔ་འགྱུར་པད་རྫིང་རྙོག་པ་མདའ་ལྔའི་སྟོབས། །ཆེར་འཕེལ་ལྔ་བརྒྱ་ཐ་མའི་དུས་ཀྱི་སྐྱོན། །དེང་དུས་སྐྱེད་བྱེད་(༢༡༡བ)
ངན་པའི་ཁྲོན་པ་ལ། །མཚར་འཛིན་བློ་མིག་དཀྱུས་ཐུང་བྱིས་པ་རྣམས། །རྒྱལ་ཁམས་ཤེས་བྱའི་ཕ་མཐའ་མ་མཐོང་བར། །མུ་ཅོར་སྨྲ་བའི་ཁ་དེ་བདུད་ཀྱིས་ཕྱེ། །ཐུབ་རྣམས་གྲངས་མེད་འགྲོ་བའི་བསམ་པ་དང་། །མཚུངས་པའི་རྣམ་ཐར་བཀོད་པ་མཐའ་ཀླས་ཀྱང་། །ཚད་འཛིན་བླུན་པོའི་སྙིང་སྟོབས་རང་གི་མཚང་། །འབད་པས་ཆེད་དུ་གཞན་ལ་དངོམ་པ་བཞིན། །དཔལ་སྦས་དུག་གཡོས་ནུས་བྲལ་རྟོགས་བརྗོད་དང་། །ལས་བཅུ་རྣམ་དཔྱོད་དྲང་ངེས་དགོངས་དོན་ལྟར། །པད་འབྱུང་ཕྱི་ནང་གསང་བའི་རྣམ་ཐར་མཁའ། །ཕ་ཝཾ་གཤོག་པའི་རྩལ་གྱིས་གཞལ་ནུས་མིན། །ནོར་སྐྱོང་སྲང་མདོར་སྒྲོག་པའི་སྐད་གསང་ལ། །སེང་གེ་བ་སྤུའི་རྩེ་ཡང་མི་འགུལ་བཞིན། །ལུང་རིགས་ཁས་ལེན་བྲལ་བའི་གདོལ་གཏམ་ལ། །མཁས་རྣམས་བརྒལ་ཞིང་བརྟག་པ་ངལ་བ་ཙམ། །འོན་ཏེ་སྐྱེ་མངས་གོམས་པའི་ས་བོན་ཚོགས། །རབ་སྨིན་གནས་ལྔར་སྦྱངས་སྟོབས་ཡོངས་འདུའི་ལྗོན། །ལེགས་བཤད་འབྲས་བུས་དུད་པའི་དཔྱོད་ལྡན་ཁྱོད། །སྨྲ་བའི་སྤོབས་པ་གཟེངས་སུ་མངོན་པར་མཐོ། །དེ་ཕྱིར་སངས་རྒྱས་གཉིས་པ་ཨོ་རྒྱན་གྱི། །རྣམ་ཐར་ཉེས་པའི་དྲི་བྲལ་ཆུ་བོའི་ཀླུང་། །ལོག་རྟོག་རྙོག་མར་བྱས་རྣམས་དྲུངས་པའི་གཏམ། །ཀེ་ཏ་ཀ་ནོར་གསར་དུ་བསྐྲུན་འདི་མཚར། །ཐ་སྙད་ཚིག་གི་མཐའ་ལ་མཛད་པ་མེད། །ངེས་དོན་སྙིང་པོའི་ཡང་སྙིང་རྫོགས་པ་ཆེ། །སྣང་བཞིའི་ལམ་བཟང་འོད་གསལ་ལོངས་སྐུའི་ཞིང་། །མྱུལ་བའི་ངང་ཚུལ་འདི་ལ་གཅིག་ཏུ་སྨོན། །རྣམ་གསུམ་ཡོ་གའི་རྡོ་རྗེ་རྣལ་འབྱོར་མཆོག །འཆི་མེད་ཟིལ་དངར་ཡིད་ཀྱི་ཟ་མ་ཏོག །ཉེར་གཏམས་འདི་དང་གཏན་གྱི་མདུན་མ་ཀུན། །གཡེལ་མེད་པཀྵཱའི་རྒྱུན་ལྟར་རྩོན་ཅིག་གུ། །དོན་ལྡན་རྟེན་བཟང་རིང་པོར་འཚོ་བའི་ཐབས། །མི་དམན་རྟག་ཏུ་འགྲུས་པ་ལྷུར་ལེན་ངོས། །མོལ་མཆིད་མཐོ་རིས་ཆུ་བོ་བློ་གྲོས་ཀྱི། །གདོང་བཞིའི་རལ་པའི་གློང་ནས་རྟག་འབབ་མཛོད། །རྐང་འཐུང་འདབ་མའི་སྙིང་པོ་ཉེར་(༢༡༢ན)
བརྩེགས་ཏེ། །བམ་པོར་བྱས་པ་རོ་བརྒྱ་བདའ་བའི་བཅུད། །ས་སྲུངས་མཆེད་ཟླར་འཁུ་བའི་བདོག་པ་ལ། །ཐུན་མཚམས་རྒྱ་ཡིས་མི་ཕྱེད་དམ་དུ་བཅིངས། །དཔྱིད་ཀྱི་ཕོ་ཉས་དྲངས་པ་སོས་ཀྱི་བཞིན། །མཛེས་སྡུག་ལང་ཚོ་ངོམས་པ་ནམ་མཐོང་ཟླའི། །དམར་པོའི་ཕྱོགས་ཀྱི་དགའ་བ་གཉིས་པ་ལ། །མང་བཀུར་རྒྱལ་པོའི་ཁབ་ཀྱི་རྩེ་ནས་བྲིས། །བྱམས་གླིང་མཁན་པོ་རྩེས་དང་ནུབ་སྒོ་སྟེང་པའི་རབ་འབྱམས་པ་བྱམས་པ་རྒྱ་མཚོས་གྲུབ་མཐའ་མི་གཅིག་པ་དུ་མ་ཁ་བསྒྱུར་བར་བརྩམས་པའི་མི་བསྲུན་སྒྱུ་འཕྲུལ་རོལ་གར་གྱི་སྐབས་ཆུ་བྱི་འཕྲིན་ཡིག་བྱུང་བའི་ལན་འདམ་ཁྲོད་པད་དཀར། མཻ ཏྲི ཡ ཤྴུ ཀྲ བ རྞོ པ དྲྀ ཥྚི ཧི སཽ མཱ ནྟི ཏཱ པྣི རྨ པཱ ཀྵི ཪྶུ ཀྲྀ དྷཱི པ ཀཿ། །པ ངྐ མ དྷྱ སྠ བཱ ཏ སྱ གནྡྷེ ན ནཱ སྟཱི མ ཧོ པ དྷྱ ཤུ ཀླཱ བྫ ལི ཁྱཱི ཡ ཡུ ཀ྄ །གཉེན་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)བྱམས་པ་སངས་མདངས་སོ་ཉེར་སྟོན་ཅིང་། །ཚུལ་འཆོས་ཕ་ཝང་འཕྲུལ་གཤོག་ལེགས་ངོམ་གླིང་། །འདམ་ཁྲོད་གནས་ཀྱང་དེ་དྲིས་གོས་མིན་པ། །མཁན་ཆེན་པདྨ་དཀར་པོའི་འཕྲིན་རྟེན་སོན། །རྣམ་གསུམ་སྡེ་སྣོད་བཅུད་ཀྱིས་རབ་(༢༡༢བ)
གཏམས་པ། །དལ་འབྱོར་ལང་ཚོ་རྒྱས་པའི་ཟ་མ་ཏོག །ཉེས་བརྒྱ་ཟུག་རྔུས་འཚེ་བ་དང་བྲལ་ཏེ། །ཐོས་དོན་བསམ་ལ་ངོམས་མེད་ཚུལ་དེར་རངས། །དངོས་ཅག་དམ་པར་སྒྲོ་བཏགས་སྙན་གྲགས་ཀྱིས། །འགྲོ་མངས་འདྲིད་པའི་སྒྱུ་ཐབས་བླ་ཆེན་སྤྱིའི། །རྣམ་ཐར་གཟུང་ལ་འབྱོར་པ་མེད་ན་ཡང་། །ཚེ་འདིའི་མདུན་མ་དོན་མེད་ཁོལ་པོར་ཟད། །སྔོན་གོམས་དགེ་བའི་བག་ཆགས་ཆེས་ཆེར་ཕྲ། །དཀར་སྒྲིབ་སྡིག་ལྟུང་ས་འཛིན་ལྟ་བུར་སྤུངས། །རང་ཞེ་རང་ལ་འཁྲེལ་བའི་སྤྱོད་ཚུལ་འདིས། །གཞན་ཕན་འདྲེན་པར་རློམ་པ་སྨྱོན་པའི་གར། །རབ་འབྱམས་སྨྲ་བའི་བཤེས་གཉེན་ཁྱོད་ཉིད་ཀྱིས། །རྣམ་དཔྱོད་དགུ་ཚིགས་རིང་པོར་ཉེར་བརྐྱངས་ཏེ། །ཤེས་བྱའི་ཕ་མཐའ་བཅིངས་ཚེ་དགའ་ལྡན་ནས། །འཇམ་དཔལ་སྙིང་པོ་དགྱེས་པའི་འཛུམ་ཞལ་སྟོན། །དེང་དུས་བློ་གསལ་མཁས་རྣམས་རྣ་ལྟར་དོར། །འཕྲིན་ལས་རྫས་ལ་རེ་བའི་འཆད་ཉན་པ། །ཆུ་མེད་ཁྲོན་པའི་རྗེས་སུ་འཇུག་པ་ཀུན། །སྐོམས་པའི་གདུངས་པས་མྱ་ངམ་ཐང་དུ་འཁྱམས། །གནའ་བོའི་ཆོས་ཀྱི་ཕ་གཞིས་རིང་དུ་སྐྱུར། །ལྟ་གྲུབ་གཞན་གྱི་ཞིང་ཁང་མ་རྙེད་པའི། །སྡེ་དགོན་ཟུང་གི་མཁའ་ལ་ཤེས་ལྡན་ཁྱོད། །ཟླ་བྲལ་གཅིག་པུར་གནས་པའི་ཟླ་ལྟར་སྐྱོ། །སྙིང་མེད་ཨེར་རཎྜ་ཡི་འཁོར་བ་ལ། །ངེས་པར་འབྱུང་བའི་གཏམ་འདི་གཅམ་བུའི་ཚིག །མིན་ན་གཞན་གྱི་ཆོས་ལུགས་སྣུབ་འདོད་པའི། །ཆགས་སྡང་ཚིག་གི་སྨྲ་བ་འདིས་ཀྱང་ནོངས། །ནག་པོ་རྫ་མའི་མདོག་དེ་དཀར་པོ་རུ། །བསྒྱུར་བར་སྒམ་བུ་ཕྱཱས་ཀྱང་མ་ནུས་ན། །རང་གི་བསྟན་ལ་མི་ཕན་གཞན་གྱི་རྒྱུད། །བསྲེག་པའི་ཆོ་ག་འདི་ལ་ངོ་མཚར་ཅི། །ཕྱོགས་དེའི་(༢༡༣ན)
གྲྭ་བཙུན་འཕྱོན་མའི་གར་མཁན་འགས། །མཐོན་པོའི་ར་རྩེར་ཉི་མ་བསྲོ་བའི་ཚིག །མཛེས་མཛེས་གླེང་བར་འཁྲུལ་ན་ཕུབ་མ་ཡིས། །བཀབ་པའི་ཆུ་དོང་ནང་དུ་ལྷུང་གིས་དོགས། །པཎ་ཆེན་ཤཱཀྱ་ཤྲཱིའི་ཆོས་ལུགས་ཀུན། །དེང་སང་མིང་ཙམ་ཁ་བའི་ལྗོངས་འདིར་ལུས། །རྣམ་དག་སྡོམ་པའི་རྒྱུན་དེ་ས་ལུགས་ལ། །བཙོངས་ནས་ཚོགས་ཆེན་སྡེ་བཞི་ངལ་གསོ་མཛད། །བསམ་གླིང་བདེ་ཆེན་བྱ་འདབས་སྤྱིལ་པ་དེ། །ཕན་བདེ་ལེགས་བཤད་གླིང་པས་བདག་གིར་བཟུང་། །སློང་ངམ་མི་སློང་ཁྱེད་གཙོ་སྟེར་མི་སྟེར། །གྲྭ་ཚང་ཁུར་ལེན་རྣམས་ལ་རག་གམ་སྙམ། །གླང་ལོའི་དུས་ཀྱི་ཆད་པ་སེལ་བ་ལ། །རྒྱས་འབྲིང་བསྡུས་པའི་གསུང་རབ་མང་དུ་སྒྲོགས། །གསོད་སར་ཁྲིད་པའི་དུད་འགྲོའི་སྲོག་མང་བླུ། །སཱཙྪ་ཁྲི་ཚར་བཏབ་ན་ལེགས་པར་མངོན། །ངེད་ལ་ཟབ་མོ་རྡོ་རྗེའི་རྣལ་འབྱོར་གྱི། །ཐུགས་དམ་མེད་ཕྱིར་རྟག་པ་ག་ལ་འོང་། །ཀུན་གྱིས་མོ་མར་མངའ་གསོལ་དེ་དོན་བཞིན། །སྐར་ནག་རྩིས་ཀྱི་ཇུ་ཞགས་ཕལ་ཆེར་བདེན། །པུཎྜ་རཱི་ཀའི་འདབ་མར་རྒྱུ་སྤུན་གྱི། །རི་མོ་རབ་གསལ་པཉྩ་ལི་ཀའི་དར། །ཐུན་འཚམས་རྒྱ་ཡི་ཕང་པར་ངལ་གསོ་ཞིང་། །སྐམ་པོ་གྲ་ནང་རྒྱ་མཚོའི་གླིང་དེར་སོང་། །ཆུ་བྱི་སྡིངས་པོ་ཆེ་སྤྲུལ་སྐུ་ངག་དབང་སྙན་གྲགས་བཟང་པོས་གནམ་ལོ་གསར་ཚེས་ཀྱི་ལེགས་སྐྱེས་སྤེལ་པའི་སྙན་ཚིག་གི་འཕྲིན་ལན་གཉིས་སྐྱེས་རྒན་པོར་བསྔགས་པའི་གླུ་དབྱངས། །(༢༡༣བ)
བཱ ཅ ནེ ནྡྲཻ ྉྤི ཙུ ཤྲཱི ཙ ཙཱ ཀྲཱ ངྒ ཀི གྲཱི བ སཱ རཱ བ ཏྲཾ ཏྶཱ མ ཧཱི ཛྷ པྱ རཻཿ། ཀཱི རྟི བཻ པཱ ཀྵཀཱ རྞྱེ སུ བྷ བྱ ཉྩ དྷཱི མ དྦྲྀ ཧ སྤ ཏྱབྷཱ ཙ ཏ སྨི ནླི ཁེ། ངག་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)དབང་འཇམ་དཔལ་འཁོར་ལོའི་ཡན་ལག་ལྡན། །མགྲིན་མཚོར་ཞུགས་པའི་སྙན་ཚིག་ཁྲོལ་བའི་སྒྲས། །གྲགས་པ་ཕྱོགས་བྲལ་རྣར་འཇེབས་སྐལ་བཟང་ཅན། །བློ་ལྡན་ཕུར་བུའི་མཆེད་ཟླ་དེར་སྤྲིངས་པ། །སྤོང་བདུན་སྲད་བུར་བསྒྲིལ་བའི་ཚངས་སྐུད་དང་། །རྣམ་ཐར་གཙང་དག་ཀུ་ཤའི་ཆུན་པོ་འཆང་། །ལེགས་བཤད་སྤྱི་བླུགས་ཆུ་རྒྱུན་ཆད་མེད་པ། །བཀྲ་ཤིས་དབྱངས་སུ་ལེན་པའི་བྲམ་ཟེ་ཁྱོད། །བག་ཡོད་བགྲང་བྱའི་དུས་ཀྱི་ཐོག་མ་རུ། །སྙན་འཇེབས་ཚིག་སྦྱོར་དཎྜིའི་གཞུང་ལུགས་རྒྱུད། །སྡེབ་གཟུགས་ཡི་གེའི་གླུར་འབབ་དྲི་ཟའི་སྙེམས། །འཕྲོག་པའི་ངོ་མཚར་གཟིགས་མོར་དངར་འདི་སྤྲོ། །དྭགས་བརྒྱུད་ཆོས་ཀྱི་དིང་མུན་འཇིག་རྟེན་ཟླ། །དཀར་དབུས་ཐོས་བསམ་སྒོམ་པའི་ཉི་མ་ཁྱོད། །ཉེས་བརྒྱའི་ཆུ་འཛིན་དང་བྲལ་རྒྱ་རས་ཀྱི། །བསྟན་སྲོག་རིང་(༢༡༤ན)
འཐུང་ཆོ་ག་རྫོགས་པ་བཞིན། །སྒྲ་སྙན་སྨྲ་བའི་དབང་ཕྱུག་ལོ་ཆེན་དབང་། །གཉིས་པ་ཁྱོད་ལས་གཞན་དུ་རྙེད་མིན་ཀྱང་། །ཚེ་འདིའི་བྱ་བ་བཏར་བའི་མི་ལ་རྗེ། །ངུར་སྨྲིག་ཟོལ་གྱིས་བརྫུ་སྙམ་འཕྱང་མོ་ཉུག །ཕྱག་རྒྱ་གཅིག་གིས་ཀུན་རྫོབ་བྱེད་པའི་གཟུགས། །སྟོང་ཆེན་དབྱིངས་སུ་བཏབ་པས་རྣམ་རྟོག་ཚོགས། །ཆོས་སྐུར་རང་ངོ་སྤྲོད་ཚེ་གདུལ་བྱ་རྣམས། །འོག་མིན་གནས་སུ་འཚང་རྒྱའི་རེ་བ་སྐྱངས། །དེ་ཕྱིར་གངས་ཅན་སྒྲུབ་བརྒྱུད་རིང་ལུགས་ཀྱི། །བསྟན་པའི་རྩ་ལག་ཁྱོད་དུ་ངེས་རྙེད་ན། །བདེ་ལྡན་ཞིང་གི་མགོན་པོའི་ངང་ཚུལ་བཞིན། །མི་འགྱུར་ཐབས་ལ་བརྩོན་པ་ཅིས་མི་རིགས། །འདི་ན་ཞི་འཚོའི་དཔོན་རིགས་ཀློག་པ་མཁན། །རྩེ་གཅིག་སྒྲུབ་པའི་སྙིང་ཕུར་མ་ཐེབས་ཀྱང་། །ཤེས་བྱའི་ལྷ་ལམ་གཞལ་བའི་བློ་གྲོས་ཀྱི། །ཉི་ཟླའི་བགྲོད་པར་འགྲུས་ལ་མི་ངལ་ཙམ། །བསྐལ་བཟང་འདི་ཡི་འདྲེན་པ་སྟོང་གི་མཐའ། །རྫོགས་མིན་གནམ་ལོ་ཤར་རོ་ཅོག་གི་ཚེ། །མགྲིན་པའི་རི་མོ་འཛུམ་པ་གཡས་འཁྱིལ་ལས། །བཀྲ་ཤིས་སྐད་སྙན་དུང་དཀར་སྒྲོགས་ཤིག་གུ། །བསྙེན་སྲིད་མེད་པར་ཀུན་ལ་གང་གི་སེམས། །དཀར་བའི་ལྷག་བསམ་འདི་ཞེས་མཚོན་བྱེད་དུ། །ར་རིའི་དྲི་བྲལ་དར་དཀར་ཁ་རྫར་ཅན། །ཐུན་འཚམས་ཁུ་བས་བྱུགས་པའི་རྒྱ་ཡིས་སྤྲས། །བཟའ་ཤིང་ར་བའི་ཁོར་ཡུག་གིས་བྲེས་པ། །འཆི་མེད་གྲོང་ཁྱེར་ས་ལ་འཕོས་པའི་སྤུན། །རིག་པའི་འབྱུང་གནས་གཡོ་རུ་གྲ་ནང་གི །ལྕོག་བུའི་ཤེལ་དཀར་འཕྲེང་བས་མཛེས་དེར་སོང་། །ཚངས་པ་དུང་ཐོད་ཅན་གྱི་སྐུ་ཁོག་དབོན་པོ་སངས་རྒྱས་རིན་ཆེན་ན་ཚོད་སྨིན་ཆེས་པའི་དུས་ཀྱི་ཆོས་ཉིད་ལྟ་བུར་གྱུར་ཚེ་རིང་སོར་མ་(༢༡༤བ)
ལོན་པར་རིགས་ཀྱི་ཚ་བོ་ལ་ཁོག་ཞུགས་དགོས་པའི་རྒྱུ་མཚན་གསོལ་བར་བདོག་པ་ཚན་གྲངས་ཚོགས་ཀྱི་འཁོར་ལོ་དར་བཅས་ཁང་གསར་རབ་བརྟན་ཆུ་གླང་ཟླ་བ་དང་པོའི་ཚེས་བརྒྱདལ་བཏང་སྐབས་འཕྲིན་དུ་གསོལ་བ་ལྷ་ཞལ་ཚད་མེད་སྟོན་བྱེད་སྤེལ་ལེགས་འཕྲེང་རྒྱས། །ཞི་དང་ཁྲོ་བོའི་དཀྱིལ་འཁོར་མ་ལུས་པའི། ཁྱབ་བདག་དུས་གསུམ་སངས་རྒྱས་པདྨ་འབྱུང་། །སྤྱན་སྔར་ཐུབ་བསྟན་སྐྱོང་བར་ཞལ་འཆེས་པ། །གཡས་འཁྱིལ་དུང་ཐོད་དཔལ་ལྡན་ཚངས་པ་ཀྱེ། །རིས་མེད་ཐུབ་པའི་བསྟན་དང་སྐྱེ་རྒུ་ཡི། །ཕན་བདེའི་ལེགས་ཚོགས་སྤེལ་བའི་ཁུར་ཆེན་པོས། །ཉིན་མཚན་གཡེལ་མེད་བྱ་ར་མཛད་ན་ཡང་། །ཚུར་མཐོང་སེམས་ཅན་རྣམས་ཀྱིས་རྟོགས་པ་དཀའ། ཁྱད་པར་སྲོང་བཙན་རྒྱལ་པོའི་སྐྱེས་ལྷ་ཆེ། །གངས་ཅན་ལྗོངས་འདིར་གཅིག་ཏུ་བརྩེ་མོད་ཀྱང་། །བླང་དོར་མངོན་སུམ་ལུང་དུ་མ་བསྟན་ན། །བླུན་རྨོངས་བྱིས་པ་རྣམས་ཀྱིས་ག་ལ་ཤེས། །དེ་ཕྱིར་ལུས་ཅན་ཁོག་པར་ཡེ་ཤེས་ཀྱི། །སྣང་བའི་གཟི་བྱིན་སྤར་ནས་སྔོན་བྱུང་དང་། །མ་འོངས་འབྱུང་འགྱུར་ད་ལྟའི་སྤྱོད་ཚུལ་ཀུན། །སྟོན་ཕྱིར་སྤེལ་ལེགས་འཕྲེང་བཞིན་ཆད་པ་མེད། །བོད་འདིར་ཁོག་ཞུགས་འདི་ཡིས་མཇུག་བསྡུས་ནས། །ལི་ཡུལ་ཤམྦྷ་ལ་དང་ཨོ་རྒྱན་སོགས། །གནས་གཞན་འཚོལ་ཞེས་གསང་གསང་དངོས་སྩོལ་བར། །ཕལ་ཆེར་ཐེ་ཚོམ་དྲ་བའི་འཁྱོགས་ལ་འཕྱང་། །ཐུན་མོང་ལྕགས་ཀྱི་ས་སྐྱོང་མི་དབང་གིས། །ད་ལྟའི་སྐུ་ཁོག་གཉེན་མདུན་ཚ་རིས་ལ། །ཕེབས་པར་སྩོལ་བ་དེ་བཞིན་ཞལ་འཆེས་པ། །རྡོ་ལ་བྲིས་པའི་རི་མོ་ག་ལ་འགྱུར། །འོན་ཀྱང་ད་ལྟའི་འདི་ཉིད་ནམ་མཚོའི་བར། །གསར་འབྱུང་མ་དགོས་ལྔ་པའི་ལམ་གྱུར་ཚེ། །སྔ་སོར་གཡར་དམ་མཛད་ལ་འགྱངས་མེད་དུ། །ལྷ་ཁྱོད་ཁོག་ཏུ་ཞུགས་པར་(༢༡༥ན)
ནན་ཏན་གསོལ། །གཞན་ཡང་སྤྱི་དང་བྱེ་བྲག་བླང་དོར་གནང་། །དཔྲལ་བའི་སྤྱན་གྱིས་མངོན་སུམ་གཟིགས་པ་བཞིན། །བསླབ་བྱའི་ལུང་བསྟན་མཐོ་རིས་ཆུ་བོའི་གོས། །བཀའ་མཆིད་རྒྱལ་མཚན་མཛེས་པའི་རྒྱན་དུ་ཀླུབས། །མཆོད་སྤྲིན་ཚན་གྲངས་ཐགས་ལ་ཚོགས་འཁོར་བཅས། །དམ་ལྡན་ཟུར་གྱི་རིག་སྔགས་འཆང་བའི་བརྒྱུད། །རབ་བརྟན་རྫོང་བདར་བགྱིས་པ་ཞིབ་ཆ་ཀུན། །ངག་གི་ལམ་ནས་འབུལ་བར་ལྷ་སྙན་གསོན། །དྲི་བྲལ་བཀྲ་ཤིས་ཐགས་ཀྱི་ལྷ་དར་ཟུང་། །མི་ཕྱེད་འཚམས་སྤྲིན་རྒྱ་ཡིས་ཉེར་བཏབ་ནས། །ཆུ་གླང་ཧོར་ཟླ་དང་པོའི་དཀར་ཆ་ཡི། །རྒྱལ་བ་གཉིས་པར་དམར་པོ་རི་ནས་དགེ །ཆུ་བྱི་ཧོར་ཟླ་བརྒྱད་པའི་ནང་དུ་འཛུམ་ལང་རྒྱལ་པོས་བདོག་པའི་སྐྱེས་འཕྲིན་ཡིག་དང་བཅས་མི་སྣ་ཛཱ་ལ་བྷཎྜཱ་རི་ཅན་བྱུང་བའི་ལན་གྱི་འགོ་བརྒྱངས་ཤིས་བརྗོད་གླུ་དབྱངས། བདེ་གཤེགས་སྲས་དང་སློབ་མར་བཅས་པའི་ཚོགས། །ཚངས་པ་དབང་ཕྱུག་ཁྱབ་འཇུག་དྲང་སྲོང་གིས། །ནོར་འཛིན་སྐྱོང་བ་འཛུམ་ལང་མི་བདག་ལ། །དུས་ཀུན་བཀྲ་ཤིས་དགེ་བའི་དཔལ་སྩོལ་ཅིག །
རབ་བྱུང་བཅུ་གཅིག་པའི་ཆུ་གླང་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་གླང་ལོར་བྲིས་པའི་ཆབ་ཤོག་འཕྲིན་ཡིག་ཁག །ཆུ་གླང་ནག་ཟླའི་འཇུག་ཏུ་བར་མ་ནད་ཅུང་ཟད་འཕར་བའི་དུས་ལེགས་ཉེས་ཀྱི་ལུང་བསྟན་ཞུ་བར་གྲྭ་ཚང་གཉེར་པ་བློ་བཟང་སྦྱིན་པ་སྤྱན་གཟིགས་ཚོགས་ཆས་སོགས་གྱ་ནོམ་པ་དང་བཅས་ཚངས་པ་དུང་གི་ཐོར་ཚུགས་ཅན་གྱི་སྤྱན་སྔར་མངགས་པའི་ཚེ་འཕྲིན་ཡིག་ཏུ་གསལ་བ་ལྷ་ཞལ་མཐོར་འདེགས་བསྐུལ་བའི་དབྱངས་སྙན། རྒྱལ་ཀུན་མཐུ་སྟོབས་འབར་བ་རྡོ་རྗེའི་གཟི། །སྡེ་བརྒྱད་དྲེགས་པའི་གཙུག་བཀོད་དབང་སྡུད་པ། །འཛམ་བུའི་གླིང་ན་ཆེ་བའི་རིགས་སྔགས་མཁན། །པདྨ་འབྱུང་གནས་དུས་གསུམ་སངས་རྒྱས་གཙོ། །མགོན་དེའི་བཀའ་ཉན་ལྷ་ཆེན་ཚངས་པ་གང་། །བཀྲ་ཤིས་(༢༡༥བ)
དུང་དཀར་གཡས་འཁྱིལ་ཐོད་བཅིངས་པ། །མཐོན་པོར་ཞལ་ཁྱིམ་བཏེག་ནས་དགྱེས་པའི་འཛུམ། །ཚེམས་འཕྲེང་མུ་ཏིག་ཟེའུ་འབྲུ་རྒོད་པར་མཛོད། །འདི་ན་གློ་བུར་འཚེ་བ་ཟུག་རྔུ་ཡིས། །སྒྱུ་མ་གཡར་ཁང་ཅུང་ཟད་བྲོ་འཚལ་བར། །ཕན་ཐབས་རིམ་གྲོའི་ཉེར་བསྡོགས་བགྱིད་ཚུལ་གཏམ། །ལྷ་སྙན་དབང་པོར་ཕོ་ཉའི་ངག་ནས་གསལ། །སླད་མར་བདུད་རིགས་གནོད་པ་དེ་ཙམ་གྱི། །བཟློག་དཀའི་བླང་དོར་ཡེ་ཤེས་སྤྱན་རས་ཀྱིས། །གཟིགས་ཚེ་གསོང་པོར་སྨྲ་བ་རྡོ་རྗེའི་ཚིག །ལུང་བསྟན་ལྷུག་པར་གསུངས་ཤིག་དགེ་བསྙེན་ཆེ། །སྣ་ཚོགས་སྤྱན་གཟིགས་བྱེ་བྲག་ཐོར་གསལ་བ། །ཀུན་བཟང་མཆོད་པའི་སྤྲིན་དུ་བྱིན་བརླབས་ནས། །མཐུན་པའི་རྫས་སུ་འབུལ་ན་འཕྲིན་ལས་རྣམས། །འབད་མེད་ལྷུན་གྱིས་གྲུབ་པའི་དགའ་སྟོན་སྩོལ། །ཆུ་གླང་ནག་ཟླའི་མཇུག་ཏུ་འབམ་ནད་ཅུང་ཟད་འཕར་པའི་དུས་ལེགས་ཉེས་ཀྱི་ལུང་བསྟན་ཞུ་བར་རྒྱལ་ཐང་པ་ལྷུན་གྲུབ་རྒྱ་མཚོ་སྤྱན་གཟིགས་ཚོགས་ཆས་དང་བཅས་བསམ་ཡས་སུ་རྒྱལ་པོ་ལི་བྱིན་ཧ་ར་དཔོན་བློན་གྱི་དྲུང་དུ་མངགས་པའི་ཚེ་འཕྲིན་ཡིག་ཏུ་གསལ་བ་སྣང་སྲིད་འཆར་བའི་མེ་ལོང་། དྲེགས་པའི་སྡེ་དཔོན་ལི་བྱིན་ཧ་ར་ཡི། །བཀའ་སྡོད་ཆེན་པོ་གནོད་སྦྱིན་ཡང་ལེ་བེར། །ཐུགས་དམ་བསྐུལ་ཚིག་ལྷ་ཁྱོད་སྙན་གསོལ་ན། །དམར་ཟླུམ་གསལ་བའི་སྤྱན་དེ་ཕྱོགས་བཅུར་གཟིགས། །འདི་ན་གློ་བུར་འཚལ་བའི་བྲོ་ནད་ལ། །གེགས་སེལ་བསོད་ནམས་ཚོགས་གསོག་བགྱིད་སྐབས་ཀྱང་། །ལྐོག་གྱུར་མ་རིག་སྐྱོན་གྱི་ཉེར་འཚེ་ལས། །གྲོལ་ལམ་མ་གྲོལ་བདག་གིས་ཆ་མ་འཚལ། །དེ་ཕྱིར་ཐོགས་པ་མེད་པའི་མངོན་ཤེས་དང་། །སྣང་སྲིད་འཆར་བའི་མེ་ལོང་ལ་གཟིགས་ནས། །བདུད་དཔུང་གཡུལ་ལས་རྒྱལ་བའི་ཐབས་ཀྱི་རིགས། །གསལ་(༢༡༦ན)
བར་སྟོན་ཅིག་སྡེ་བརྒྱད་དམག་དཔོན་ཆེ། །གནས་ཚུལ་ཞིབ་ཆར་གསོབ་དང་མཐུན་པའི་རྫས། ཁྲ་ཤར་ཚོགས་ཀྱི་འཁོར་ལོ་འབུལ་བ་ལ། །ཆེད་དུ་ཕོ་ཉ་འདི་ལ་ཉེར་མངགས་ན། །ལུང་བསྟན་རྡོ་རྗེའི་སྒྲ་དབྱངས་མགུར་ནས་ལོང་། །ཕ་མ་བརྒྱུད་པའི་སྲུང་མ་ཁྱོད་ཉིད་ཀྱིས། །ཉིན་མཚན་དུས་དྲུག་སྐྱོང་བ་མཛད་མོད་ཀྱང་། །ཡང་བསྐྱར་ནན་གྱིས་གསོལ་ན་དབང་དྲག་དང་། །ཞི་རྒྱས་འཕྲིན་ལས་མ་ལུས་ལྷུན་གྱིས་སྒྲུབས། །ཆུ་གླང་ནག་པ་ཟླ་བའི་མཇུག་ཏུ་འབམ་ནད་ཅུང་ཟད་འཕར་བའི་དུས་ལེགས་ཉེས་ཀྱི་ལུང་བསྟན་ཞུ་བར་རྒྱལ་ཐང་པ་ལྷུན་གྲུབ་རྒྱ་མཚོ་བདོག་པའི་ཚན་གྲངས་ཚོགས་ཆས་དང་བཅས་ཚོང་འདུས་སུ་བཤན་པ་བྱ་ཁྲིད་མིག་གཅིག་པའི་དྲུང་དུ་མངགས་པའི་ཚེ་འཕྲིན་ཡིག་ཏུ་གསོལ་བ་མི་ཤེས་མུན་པསེལ་བའི་ཉི་མ། ཤར་ཕྱོགས་སྐུ་ཡི་རྒྱལ་པོའི་བཀའ་སྡོད་ཆེ། །བཤན་པ་ལག་དམར་བྱ་ཁྲིད་མིག་གཅིག་པའི། །སྤྱན་སྔར་ཐུགས་དམ་སྐང་རྫས་ཐ་གསལ་དང་། །ཚོགས་འཁོར་ནམ་མཁའ་མཛོད་ཀྱི་མཆོད་སྤྲིན་སྤྲོ། །འདི་ན་གློ་བུར་ནད་ཀྱིས་འཚོ་བའི་གེགས། །སེལ་བྱེད་ལེགས་བྱས་སྒོ་འཕར་འབྱེད་སྐབས་ཀྱང་། །མ་ཤེས་ལྐོག་གྱུར་བླང་དང་དོར་བྱའི་རིགས། །གང་འདུག་ལྷ་ཞལ་མཐོན་པོར་བཏེག་ནས་སྩོལ། །པདྨ་ཐོད་ཕྲེང་བཀར་བཏགས་རྡོ་རྗེའི་རྒྱ། །སྤྱི་བོར་བཀོད་པའི་དམ་ཚིག་ཅན་ཁྱོད་ཀྱིས། །བདུད་ཀྱི་གཡུལ་ལས་རྒྱལ་བའི་བ་དན་དཀར། །སྲིད་པའི་རྩེ་མོའི་བར་དུ་བསྒྲེང་བར་མཛོད། །ཆུ་གླང་ནག་ཟླའི་འཇུག་ཏུ་འབམ་ནད་ཀྱིས་བྲོ་འཚལ་བའི་དུས་ལེགས་ཉེས་ཀྱི་ལུང་བསྟན་ཞུ་བར་ཉང་སྟོད་པ་ཀུན་དགའ་དོན་གྲུབ་ཚན་གྲངས་ཚོགས་ཆས་དང་བཅས་རིགས་ཀྱི་སྲུང་མ་ཐང་ཆེན་ཆོས་རྒྱལ་བཤན་པ་ལག་དམར་གྱི་དྲུང་དུ་མངགས་པའི་ཚེ་འཕྲིན་ཡིག་ཏུ་གསལ་བ་གཏུམ་ཆེན་ཁྲོ་བོ་འབར་བའི་གད་བརྒྱངས། ཟ་ཧོར་བརྒྱུད་པའི་ཕ་(༢༡༦བ)
མེས་རིགས་ཀྱི་ལྷ། །ཐང་ཆེན་བཤན་པ་ལག་དམར་མཐུ་རྩལ་ལྡན། །མ་གཡེལ་མ་གཡེལ་བཅོལ་བའི་འཕྲིན་ལས་ཀུན། །ལྷུན་གྱིས་སྒྲུབས་ཤིག་གནོད་སྦྱིན་ཤིང་བྱ་ཅན། །དར་ཟབ་རྒྱ་ཇ་ཚོགས་ཀྱི་འཁོར་ལོ་རྣམས། །སྔགས་རྒྱས་ནམ་མཁའ་མཛོད་དུ་བྱིན་བརླབས་ནས། །དབུལ་བར་ཕོ་ཉ་འདི་པ་ཉེར་མངགས་ན། །ཐུགས་དམ་གཉན་པོ་དབྱིངས་སུ་སྐོང་གྱུར་ཅིག །གློ་བུར་ནད་སེལ་རིམ་གྲོ་མང་བགྱིས་མོད། །སླར་ཡང་བསླབ་བྱའི་རིམ་པ་ལྷུག་སྩལ་དུ། །དཔྲལ་བའི་དམར་ཟླུམ་སྤྱན་གྱིས་གསལ་གཟིགས་པ། །རྡོ་རྗེའི་གསུང་གི་གསང་བ་བསྒྲིག་ཏུ་གསོལ། །ཆུ་གླང་སྣྲོན་ཟླའི་ཡར་ངོ་ལ་ཚངས་པ་ཆེན་པོའི་ལུང་བསྟན་བཞིན་བླང་དོར་ཚུལ་བཞིན་བསྟར་བར་བརྟེན་ཟུག་རྔུ་ལས་རྣམ་པར་གྲོལ་བའི་གཏང་རག་དབུལ་བར་གྲ་ཚང་གཉེར་པ་བློ་བཟང་སྦྱིན་པ་བཏང་པའི་ཚེ་འཕྲིན་དུ་གསོལ་བ་དོན་འབྲས་མངོན་སུམ་སྨིན་པའི་གད་རྒྱངས། སྒྲིབབྲལ་དག་པའི་ཡེ་ཤེས་སྤྱན་རས་ཀྱིས། །ལྐོག་གྱུར་ཤེས་བྱའི་གནས་ཀུན་ལེགས་གཟིགས་པ། །དཔལ་ལྡན་ལྷ་ཡི་ལྷ་མཆོག་ཚངས་པ་ཆེ། །བཀྲ་ཤིས་གཡས་འཁྱིལ་དུང་གི་ཐོད་མཛེས་ཀྱེ། །རབ་སྙན་མགྲིན་པའི་རྒྱུད་ལས་དྲངས་པའི་ལུང་། །དངས་པའི་མཚོ་ལ་ཟླ་བའི་གཟུགས་བརྙན་བཞིན། །མ་འདྲེས་བླང་དོར་འབྲས་བུ་དེང་སྨིན་པར། །ངེས་རྙེད་ངང་པའི་རང་བློ་གཅིག་ཏུ་དད། །དབང་དྲག་ཞི་དང་རྒྱས་པའི་འཕྲིན་ལས་རྣམས། །ལེགས་གྲུབ་གཏང་རག་ཀུན་བཟང་མཆོད་པའི་སྤྲིན། །ཚོགས་འཁོར་བདོག་པའི་དངོས་པོ་ཁྲ་ཤར་བཅས། །འབུལ་བར་འདི་པ་ཆེད་དུ་ཉེ་བར་མངགས། །པདྨ་ཐོད་འཕྲེང་སངས་རྒྱས་གཉིས་པ་དེས། །བསྒྲགས་པའི་གཡར་དམ་གཉན་པོ་ཉེར་དགོངས་ལ། །འབྱུང་འགྱུར་དངོས་སྟོན་ཉེས་བརྒྱ་ཡོངས་སེལ་བའི། །དབུགས་དབྱུང་རྡོ་རྗེའི་(༢༡༧ན)
གསུང་གསང་གླུ་རུ་ལོང་། །མཐུ་སྟོབས་འཁོར་ལོ་དམ་བཅའ་བཞི་ལྡན་གྱིས། །དགྲ་བགེགས་མགྲིན་པ་དུམ་བུར་གཅོད་པ་དང་། །ཆབས་གཅིག་འདོད་པའི་རེ་བ་ཀུན་སྐོང་བའི། །དངོས་གྲུབ་ཆར་གྱིས་ནོར་འཛིན་འགང་བར་མཛོད། །ཆུ་བྱ་ཟན་གཡང་མདོ་སྡེ་མཆོད་པའི་ཐོག་དགའ་སྟོན་གྱི་ལེགས་སྐྱེས་འབུལ་བར་ཁ་རོག་གོང་པ་བཏང་བའི་ཚེ་སྤྲུལ་པའི་ཆོས་རྒྱལ་ལི་བྱིན་ཧ་རར་ཕུལ་བའི་འཕྲིན་ཡིག་དམ་ཚིག་རྡོ་རྗེའི་ཅོད་པན། ཡེ་ཤེས་རབ་འབར་རྡོ་རྗེ་རྩེ་ལྔ་ཅན། །གསལ་བའི་རི་མོ་གཙུག་གི་རྒྱན་གྱུར་པ། །ལི་བྱིན་ཧ་ར་སྣང་སྲིད་དྲེགས་པའི་གཙོ། །འཁོར་ཚོགས་རྒྱ་མཚོའི་དབུས་འགྱིང་སྤྱན་སྔ་རུ། །མདོ་སྡེ་ལྷ་མཆོད་ཆེན་མོའི་དགའ་སྟོན་ཐོག །སྔོན་བཞིན་བདོག་པ་ཁྲ་ཤར་ལེགས་སྤེལ་ཏེ། །ཟན་གཡང་ལྷུན་གྱིས་གྲུབ་པའི་གཙུག་ལག་དེར། །ཕོ་ཉ་ཆེད་མངགས་ཅང་ཤེས་ཞོན་ཏེ་བགྲོད། །ཉེས་ཚོགས་མུན་པ་སེལ་བའི་ཟླ་བ་ཁྱོད། །ཕན་བདེའི་ཨུཏྤལདཀར་པོ་བཞད་པ་དང་། །ཁམས་གསུམ་འདོད་པས་མྱོས་ཏེ་དབང་བསྡུས་ནས། །དགྲ་བགེགས་འདབ་སྟོང་ཁ་དེ་ཟུམ་པར་མཛོད། །ཕྱོགས་ལས་རྣམ་པར་རྒྱལ་བའི་དར་དཀར་པོ། །སྲིད་པའི་རྩེ་མོའི་བར་དུ་ལེགས་བསྒྲེངས་ཏེ། །ཐོས་འཛིན་སྙན་པའི་དབྱངས་དང་མི་འབྲལ་ཞིང་། །ཕན་བདེའི་རོ་བརྒྱ་བདའ་བས་ཡིད་ཚིམ་མཛོད། །འཆི་མེད་པཉྩ་ལི་ཀའི་དར་ཟབ་ཀྱི། །ལྷ་སྙན་མཛེས་བྱེད་རྒྱན་གྱི་རྟེན་དང་བཅས། །ཆུ་ཤེལ་དབང་པོ་གདུ་བུས་ཉ་བ་ཡི། །ཡར་ངོའི་ཚེས་ལ་པོ་ཏ་ལ་ནས་དགེ ། ཆུ་གླང་ཟན་གཡང་མདོ་སྡེ་མཆོད་པའི་ཐོག་དགའ་སྟོན་གྱི་སེམས་སྐྱེད་འབུལ་བར་ཁ་རོག་གོང་བ་བཏང་བའི་ཚེ་གནོད་སྦྱིན་ཙེའུ་དམར་པོར་འཕྲིན་དུ་གསོལ་བ་དབང་དྲག་གྲུབ་པའི་རོལ་གར། བྱུ་རུ་ལྷུན་པོ་ཉི་མ་འབུམ་གྱི་གཟིས། །འབྱུང་བས་བསྒྲུན་མིན་སྲིད་གསུམ་ཟིལ་གནོན་ཞལ། །(༢༡༧བ)
སྡེ་བརྒྱད་དབུས་ན་མངོན་པར་མཐོ་བའི་ལྷ། །བཙན་རྒོད་གནོད་སྦྱིན་ཆེན་པོ་ཙེའུ་དམར། །མདོ་སྡེའི་ལྷ་མཆོད་དགའ་སྟོན་སྔོན་བཞིན་དུ། ཁྲ་ཤར་དང་བཅས་ཕོ་ཉ་ཉེར་མངགས་ན། །ཞི་རྒྱས་དབང་དྲག་འཕྲིན་ལས་སྒྲུབས་ཤིག་གུ །ཟླ་བ་ཐགས་སུ་བསྐྲུན་འདྲའི་དར་དཀར་གྱི། །སྙན་ཤལ་ལེགས་སྤེལ་རྟ་བདུན་དབང་པོ་ཅན། །འཁྲིག་པའི་ཁྱིམ་དུ་དགའ་བདེར་སྤྱོད་པ་ཡི། །དཔའ་བོ་མཁའ་འགྲོ་འདུ་བའི་ཚེས་ལ་དགེ ། རིགས་ཀྱི་སྲུང་མ་ཐང་ཆེན་བཤན་པ་ལག་དམར་ལ་སྤྱན་གཟིགས་ཚོགས་འཁོར་དང་བཅས་འཕྲིན་ལས་བསྒྲུབ་པར་གསལ་བ་དགྱེས་ཞལ་པད་དཀར་ཁོངས་འཛུམ། ཕྱོགས་ལས་རྣམ་པར་རྒྱལ་བའི་དར་དཀར་པོ། །སྲིད་པའི་རྩེ་མོར་བསྒྲེང་བའི་རིགས་ཀྱི་ལྷ། །གདུག་ཅན་ཁྲག་གིས་ལག་དམར་བཤན་པ་ཆེ། །གཡར་དམ་རྡོ་རྗེའི་མདུད་པ་རབ་དགོངས་ཤིག །དོན་དམ་དབྱིངས་སུ་རྣམ་པར་ཉེར་ཞི་བ། །གནས་སྐབས་དྲག་པོར་ཁྲོས་པའི་སྤྲིན་ནག་དབུས། །ང་རོའི་གད་བརྒྱངས་འབྲུག་གི་སྒྲ་ཆེན་པོས། །ལས་བཞིའི་རྨ་བྱ་དགའ་བའི་མངལ་འཛིན་པར། །ཟད་པ་མེད་པར་ཡོངས་སུ་སྤྱོད་པའི་རྫས། །འདོད་ཡོན་ལྔ་ལྡན་ཚོགས་ཀྱི་འཁོར་ལོ་ཡིས། །འཆི་མེད་ལམ་གྱི་དཔལ་ཀུན་མཛེས་བྱེད་པས། །དགྱེས་པས་ཞལ་གྱི་པད་དཀར་ཁོངས་ནས་འཛུམ། །འོད་མཚན་སྟོང་དུ་འབར་བའི་སྒྱུ་མའི་འཕྲུལ། །རྒྱ་གར་པཎ་ཆེན་གཟུགས་སུ་ཤར་བའི་གར། །སྲིད་པ་གསུམ་ན་ཆེ་བའི་རིག་སྔགས་འཆང་། །པད་འབྱུང་སངས་རྒྱས་གཉིས་པའི་དམ་ཚིག་བཞིན། །གངས་ཀྱི་ར་བས་བསྐོར་བའི་ཁོར་ཡུག་ལྗོངས། །ནད་འཁྲུག་མུ་གེའི་མུན་པ་མཐར་བསྐྲད་ནས། །ཕན་བདེའི་ཉི་མ་འབུམ་གྱི་འོད་པོ་ཆེ། །རྫུ་འཕྲུལ་རྟ་ལྗང་བདུན་གྱིས་དྲང་བར་གསོལ། ཁྱད་པར་བདག་གི་(༢༡༨ན)
ཚེ་དཔལ་ཟླ་བའི་ཆ། །རྣམ་པར་གང་བྱེད་དཀར་ཕྱོགས་བགྲོད་པ་ལྟར། །རབ་འཕེལ་དཔག་བསམ་ཡོངས་འདུའི་ལྗོན་པ་ཡི། །ལང་ཚོའི་དཔལ་གྱི་དོ་ཟླར་ཁྱོད་ཀྱིས་སྒྲུབས། །དངོས་སམ་བག་ལ་ཞ་བའི་ནག་པོའི་དཔུང་། །དགྲ་བགེགས་སྡེར་བཅས་མཐུ་སྟོབས་ནུས་པའི་རྩལ། །སྐྱིན་ཐང་དྲག་པོས་བཅོམ་པའི་ལོ་ཏོག་ལྟར། །མིང་གི་ལྷག་ཙམ་ལུས་པ་མེད་པར་ཆོམས། །རྣམ་པར་དག་པ་ལྷ་མིག་ཡེ་ཤེས་སྤྱན། །དྲི་མ་མེད་པས་ལྐོག་གྱུར་ཆོས་ཀྱི་གཟུགས། །མངོན་སུམ་སྣང་བ་ཇི་བཞིན་བླང་དོར་གྱི། །སྙན་པའི་སྒྲ་དབྱངས་རྣ་བའི་རྒྱན་དུ་མཛོད། །འབྱུང་བ་ལྔ་དང་ལྡན་པའི་ཁམས། །སྒྱུར་བྱེད་བགྲང་བྱའི་རྟ་ཟླ་བའི། །དཀར་ཕྱོགས་བཟང་པོ་གཉིས་པའི་ཚེ། །ཕུན་སུམ་ཚོགས་པའི་དཔལ་དུ་ཤར། །ཆུ་གླང་ལོ་གནམ་གྱི་ལྷ་འཇམ་དབྱངས་གོང་མ་ཆེན་པོ་མཆོད་རྟེན་རབ་འབྱམས་པའི་དཔོན་པོ་བསྟན་འཛིན་དགེ་སློང་དང་བསམ་བློ་ཨ་ཞང་ཨེར་ཏེ་ན་རབ་འབྱམས་ཆོས་རྗེ་གཉིས་མི་སྣར་རྫོང་བདར་གནང་བའི་བཀའ་ཤོག་གནང་སྦྱིན་བྱུང་བའི་ལན་འབུལ་བར་ཆོས་ལུང་མཁན་ཆེན་ལུང་རིག་རྒྱ་མཚོ་དང་སྐྱིད་སྟོད་པ་གཉིས་བཏང་སྐབས་ཕུལ་བའི་ཞུ་ཡིག་འཛམ་གླིང་བསོད་ནམས་དཔལ་འབར། ཨཱ ཡུ རྡཱི རྒྷཱ ཀཱ ཤ སྱ མ ཧཱ པཱ ར ཀྲ མེ ཎ བ ལ ཏ ཤྩ ཀྲ ཝ རྟི ག ག ན བྷཱུ མྱཱ ཡཱི ཤྭ ར མ ཉྫུ གྷོ ཥཱ དི རཱ ཛྙོ ནུ ལ། ཚེ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)རིང་གནམ་གྱི་ཤེ་མོང་གིས་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། འདྲེན་པ་མཉམ་(༢༡༨བ)
མེད་བུ་རམ་ཤིང་པའི་རིང་ལུགས་འཛིན་པར་ཁས་འཆེས་པའི་སྡོམ་བརྩོན་གནས་ལྔ་རིག་པ་སྨྲ་བ་གང་གིས་དད་པའི་ཡིད་ཀྱིས་ཀུན་ནས་བླངས་ཏེ་ས་བཿསྭསྟ་ཀ་རིཥྱ་ཏི་མཾག་ལཾ་བྷ་ཝནྟུ་ཞེས་བཀྲ་ཤིས་པའི་ཚིག་གི་འཕྲེང་བ་བརྗོད་ཅིང་སྤོས་བསྲེགས་མེ་ཏོག་འཐོར་དབང་བཅས་གསོལ་བ། དེང་གི་དུས་ཀྱང་གནམ་སའི་དཀྱིལ་འཁོར་མ་ལུས་པ་ལ་དབང་ཕྱུག་པའི་བདག་ཉིད་གོང་མ་རྒྱལ་པོ་ངེས་པའི་དོན་དུ་འཕགས་མཆོག་འཇམ་དཔལ་དབྱངས་མིའི་སྲིད་པ་བཟུང་བ་ལ་སྐྱེ་རྒ་ན་འཆིའི་འཚེ་བ་ལྟ་ག་ལ་ཞིག་ཀྱང་མཚན་དཔེའི་ལང་ཚོ་ཡོངས་སུ་དར་བའི་གཟུགས་སྐུ་ཚུར་མཐོང་གི་སྐྱེ་བོ་མ་རིག་པའི་སྒྲིབ་གཡོགས་ཅན་རྣམས་ཀྱི་སྣང་ངོར་གཞོམ་ཞིག་དང་བྲལ་བ་རྡོ་རྗེའི་རང་བཞིན་ཅན་བརྒྱ་ཕྲག་ཉི་མའི་འོད་ལ་འགོང་བའི་ཟོ་མདོག་བཟང་ཞིང་སྒྱུ་རྩལ་དྲུག་ཅུ་རྩ་བཞིའི་ཆོས་ལ་བྱང་ཆུབ་པ། རྒྱལ་པོ་རཱ་མ་ཎ་ལྟར་དཔའ་མཛངས་རྟུལ་ཕོད་པར་ངོ་ཚ་དང་ལྡན་ཞིང་ཆོག་ཤེས་པ་ཡ་རབས་བཟང་པོའི་རྣམ་པར་ཐར་པ་ལས་གཡོ་བ་མེད་བཞིན་པ་ནི་འཛམ་གླིང་སྐྱེ་རྒུ་མཐའ་དག་གི་བསོད་ནམས་ཀྱིས་རིན་བཙལ་ཏེ་ཉོས་པ་ལས་གཞན་དུ་ཅི་ལས་སེམས། ཆེད་དུ་ངེད་ལ་དགྱེས་པའི་སྤྱན་རས་ཀྱིས་ཉེ་བར་བཅའ་བའི་ཞལ་འཛུམ་ལྷུག་པར་བསྟན་ཏེ་གསེར་འབྲུག་གི་ཁོར་མོ་ཡུག་གིས་བཏེག་པའི་གནམ་གྱི་ཤེ་མོང་ལས་བྱུང་བའི་བཀའ་རྟགས་ཀྱི་རེ་ཁཱས་མཚན་པའི་བཀའ་ཤོག་དངུལ་མདོང་སྲང་དྲུག་ཅུ་ཡོང་བ་ཆ་གསར་གྱི་རྒྱན་ཅན། དངུལ་གྱི་བྱ་མ་བུམ་གསེར་གྱི་མཛེས་རྒྱན་གསོལ་བ། དངུལ་གྱི་ཧུན་ཏ་ཀ་གཉིས། བཟང་གོས་ཡུག་ཉི་ཤུ་རྩ་བཞི། ཁ་བཏགས་ཉིན་མོ་བདེ་ལེགས་མ་ལྔ། རྟགས་བརྒྱད་པ་བཏགས་བཞི་(༢༡༩ན)
བཅུའི་གནང་རྟེན་དང་བཅས་བསྟན་འཛིན་དགེ་སློང་དང་ཨེར་ཏེ་ན་རབ་འབྱམས་པ་གཉིས་གསེར་ཡིག་ཏུ་མངགས་ཏེ། བདེ་སྐྱིད་ཀྱི་ལོ་བཅུ་གཉིས་པ་སྟོན་ཟླ་ར་བ་གྲོ་བཞིན་གྱིས་ཉེ་བར་སུག་པར་སོན་པས་དྲང་སྲོང་བསམ་གཏན་གསུམ་པ་བཞིན་དུ་ཡིད་ལ་སྤྲོ་དགའ་ཅི་ཡང་བརྟས། འདི་ནའང་འབྲུམ་དཀར་གྱིས་བྲོ་འཚལ་བ་ལས་གྲོལ་བ་དང་བསྟན་འགྲོའི་ཕན་བདེ་སྤེལ་བའི་འདུན་པ་ཙམ་ལ་སྒྲོ་བཏགས་ཏེ་ལྷའི་བཀའ་ལུང་གིས་ལེགས་སོ་བྱིན་པའི་དབུགས་དབྱུང་བའི་ཚིག་གིས་མེ་ཏོག་གཏོར་བ་བཞིན་དཀོན་ཅོག་རིན་པོ་ཆེའི་ཐུགས་རྗེས་འདུ་བ་སྙོམས་ངོས་རྣམ་འདྲེན་ཤཱཀྱ་སེང་གེའི་ལུང་རྟོགས་ཀྱི་བསྟན་པ་དར་བ་དང་དེའི་མཐུ་ལས་འཇིག་རྟེན་ཐམས་ཅད་བདེ་ལེགས་སུ་འགྱུར་བའི་ལྷག་བསམ་སྟོན་ཟླ་ལྟར་དཀར་བ་སྔོན་ཆད་ལྷ་མིའི་བདག་པོ་གང་གིས་བཀའི་ལུང་ཕུད་དེ་གནམ་འོག་གི་སྐྱེ་རྒུ་མཐའ་དག་བསྟན་པ་གཅིག་ཏུ་གྱུར་བའི་ལུང་བཟང་པོའི་བཀའ་དྲིན་ལ་བརྟེན་ནས་གཞན་ཕན་གྱི་བགྱིད་འོས་རྣམས་ལག་ཏུ་ལོན་པར་གནས། གསེར་དངུལ་ཟངས་ལྕགས་ཀྱི་འཁོར་ལོས་སྒྱུར་བ་འཛམ་བུ་གླིང་གི་སྐྱེ་རྒུ་རྣམས་ཚེ་ལོ་བརྒྱད་ཁྲི་བའི་དུས་མ་གཏོགས་མི་འབྱུང་བར་གསུང་རབ་དགོངས་འགྲེལ་དང་བཅས་པ་ལས་བཤད་ནའང་ལྷ་དང་དྲང་སྲོང་རིག་འཛིན་གྲུབ་པ་རྣམས་ཀྱིས་རྩོད་ལྡན་ཀྱི་དུས་འདིར་སྟོབས་ཀྱི་འཁོར་ལོས་སྒྱུར་བའི་རྒྱལ་པོར་འོས་པ་ནི་འདི་ཉིད་དོ་ཞེས་མགྲིན་གཅིག་ཏུ་བསྔགས་པ་ལ་བརྟེན་ནས་འཇིག་རྟེན་གྱི་མེས་པོ་ཚངས་པས་ཀ་བ་མེད་པ་ནམ་མཁའི་མཐོངས་ཀྱི་སྒོ་ཕྱེ། རིན་པོ་ཆེའི་བུམ་པ་བདུད་རྩིས་ཡོངས་སུ་གང་བས་སྤྱི་བོ་ནས་དབང་བསྐུར་ཏེ་ཚེ་རིང་གནམ་གྱི་ཤེ་མོང་གི་དཔུང་པས་ནོར་འཛིན་གྱི་(༢༡༩བ)
དཀྱིལ་འཁོར་མཐའ་དག་རང་བྱོན་དུ་གྱུར་པའི་བྱེད་པོས་མིའི་བདག་པོ་གང་གི་བསོད་ནམས་ཀྱི་མཐུས་ཉི་འོག་གི་རྒྱལ་ཕྲན་བློན་འབངས་ཐམས་ཅད་ཟིལ་གྱིས་གནོན་པར་མ་ཟད་མཆོག་དམན་ཀུན་གྱི་བསམ་པའི་ཡུལ་ལས་དགོངས་པའི་བློ་གྲོས་ཀྱི་ཚད་གང་གིས་ཀྱང་གཞལ་བར་ནུས་པ་མ་ཡིན་པ་སྟོང་སྤྱི་ཕུད་ཀྱི་འཁོར་ལོས་སྒྱུར་བའི་རྒྱལ་པོར་གྱུར་པས་ཁམས་གསུམ་ཡོངས་ཀྱིས་པུས་མོ་ས་ལ་བཙུགས་ཏེ་མགོ་བོ་འདུད་པའི་གནས་མང་པོས་བཀུར་བའི་ཁྲི་ཆེན་པོར་ཞབས་སེན་མནར་བའི་འཕྲེང་བ་བཀོད་པ་ཙམ་ནས་ཡབ་རྗེ་གོང་མའི་དུས་པས་བསུ་རང་འགྲོ་བའི་ཡན་ལག་བཞི་པའི་དཔུང་ཙམ་ལ་ཡང་མ་ལྟོས་པར་ལྷ་གཅིག་དམ་པའི་མཚན་གྱི་ཉིན་བྱེད་ཤར་བའི་མོད་ལ་རྩོད་དུས་མུན་པའི་སྨག་རུམ་མ་ལུས་པ་མིང་གི་ལྷག་མར་བྱས་ཏེ་འཇིག་རྟེན་ཀུན་ཏུ་ནད་འཁྲུག་མུ་གེ་སོགས་དུས་ཀྱི་ཆད་པ་ཐམས་ཅད་དང་བྲལ་ལོ་ཏོག་སྦྲུམ་པ། ཚོང་དང་ཁེ་སྤོགས་ཀྱིས་མཚོན་ལོངས་སྤྱོད་ཀྱི་གཏེར་སྒོ་ནི་བྱེ་ཚེ་ཡང་རིང་པོར་གནས་པས་སིམ་པའི་ཚོར་བ་ཤ་སྟག་མྱོང་བ་དགེ་བའི་མཚན་མ་མཐའ་ཀླས་པ་བྱུང་བ་ཀུན་མིའི་བདག་པོ་ཉིད་ཀྱི་བཀའ་དྲིན་ལས་གོར་མ་ཆག་པ་བཞིན། སླད་མར་ཡང་བསྟན་དང་འགྲོ་བའི་ཉེར་འཚོར་སྐུ་ཚེ་མགོན་པོ་ཚེ་མཐའ་ཡས་པའི་རང་བཞིན་དུ་བྱིན་གྱིས་བརླབས་ཏེ་བརྟན་པར་བཞུགས་པར་ཅི་གནང་། ངེད་ཀྱིས་ཀྱང་དེ་བཞིན་དུ་འགྲུབ་པའི་མཆོག་གསུམ་དམ་པར་གསོལ་བ་འདེབས་ཤིང་བདེན་པའི་ཚིག་བརྗོད་པ་དགོངས་པ་ཟབ་མོའི་གློང་དུ་ཉེ་བར་བཞུགས་ཏེ་གསེར་གྱི་ཞལ་སྒོ་ལས་འཐོན་པའི་བཀའ་མཆིད་བསླབ་སྟོན་བཟང་པོ་ཡན་ལག་བརྒྱད་ལྡན་གྱི་ཆུ་བོའི་རྒྱུན་བཞིན་དུ། ཞེས་སྤྱན་རས་ཀྱི་གཟིགས་པ་ཅུང་ཟད་འབབ་པའི་རྟེན། བྱུ་རུའི་ཤལ་བ་གཅིག །མུ་མེན་གྱི་ཤལ་བ་ཆེ་ཆུང་(༢༢༠ན)
གཉིས། མུ་མེན་རྡོག་བཞི། སྦུར་ལེན་གྱི་ཤལ་པ་ཆེ་ཆུང་། སྣམ་བུ་སྔོ་ཐིག་ཉི་ཤུ་རྩ་བདུན། རྒྱ་ཐིག་ཉི་ཤུ་རྩ་བཞི། ལྗང་ཐིག་ཉི་ཤུ་རྩ་བདུན། དཀར་རྐྱང་ཉི་ཤུ་རྩ་ལྔ། དམར་ཐིག་ཉི་ཤུ་རྩ་གསུམ། སྔོ་རྐྱང་ཉི་ཤུ་རྩ་བདུན་དང་བཅས་བག་ཡོད་ཅེས་པ་ཆུ་མོ་གླང་གི་ལོ་ཧོར་ཟླ་དགུ་པའི་གྲལ་ཚེས་དགེ་བར་རང་བྱུང་འཕགས་པ་འཇིག་རྟེན་དབང་ཕྱུག་གི་གཙུག་ལག་ཁང་པོ་ཏ་ལ་ནས་ཕུལ། །ཆུ་གླང་ཟླ་བ་བཅུ་པའི་ཚེས་གཅིག་ལ་ཚངས་པ་དུང་ཐོད་ཅན་གྱི་དྲུང་དུ་སྤྱན་གཟིགས་ཚོགས་ཀྱི་མཆོད་སྤྲིན་བཅས་ལུང་བསྟན་ཞུ་བར་གྲྭ་ཚང་གཉེར་པ་བློ་བཟང་སྦྱིན་པ་བཏང་སྐབས་ཀྱི་འཕྲིན་གསོལ་ལྐོག་གྱུར་གསལ་བའི་མེ་ལོང་། རྒྱལ་བ་ཀུན་དངོས་པདྨ་ཐོད་འཕྲེང་རྩལ་གྱི་ཕོ་ཉ། འཇིག་རྟེན་དབང་ཕྱུག་སྲོང་བཙན་སྒམ་པོའི་སྐྱེས་ལྷ། ལྷ་ཆེན་ཚངས་པ་ཆེན་པོའི་སྤྱན་སྔར་གྲྭ་ཚང་གཉེར་པ་རྫོང་བདར་བགྱིས་ཡོད་པ་གང་གི་ཐུགས་ཀྱི་མེ་ལོང་གཙང་མར་ལྐོག་གྱུར་ཤེས་བྱའི་གཟུགས་བརྙན་ནི་འགོག་མེད་དུ་འཆར། དམར་ཟླུམ་སྤྱན་གྱིས་སྣང་ཞིང་སྲིད་པའི་ཆོས་ཀུན་རྗེན་པར་གཟིགས། རྟ་མཆོག་རླུང་གི་ཤུགས་ཅན་ལ་ཆིབས་ནས། སྟོང་གསུམ་སྐད་ཅིག་གིས་བསྐོར་ཏེ་ལུས་ཅན་རྣམས་ཀྱི་བྱ་བྱེད་ལ་སྤྱོད་དམ་པའི་ཆོས་པར་ཁས་འཆེས་པ་རྣམས་ཀྱི་ངང་ཚུལ་དང་རིག་འཛིན་རྣལ་འབྱོར་སྤྱོད་པ་ཀུན་གྱི་ལྟ་སྒོམ་གྱི་དྲོད་མྱུར་བར་མཛད་པས་རྒྱལ་ཁམས་སྤྱི་དང་ཁྱད་པར་བོད་དང་རྒྱ་ཧོར་སོགས་ཀྱི་སྐྱེ་རྒུའི་བདེ་སྡུག །སྒོས་ཀྱི་བླངདོར་སོགས་དཔལ་གྱི་མགུར་ནས་ཚངས་པའི་དབྱངས་ཀྱིས་ལུང་སྟོན་པར་གསོལ་བའི་རྟེན་དུ་ལྷ་རྫས་ཀྱི་སྙན་ཤལ་གྱིས་མཚོན་དངོས་བཤམ་ཡིད་སྤྲུལ་གྱི་མཆོད་པའི་སྤྲིན་དང་བཅས་སྨིན་དྲུག་ཟླ་བའི་ཡར་ཚེས་ལ་དམར་པོ་རིའི་ཕོ་བྲང་ནས་དགེ ། ཆུ་གླང་ཧོར་ཟླ་བཅུ་པའི་ཚེས་གསུམ་ལ་རིག་སྔགས་ཆང་བའི་དབང་ཕྱུག་མངའ་རིས་པ་དཀོན་ཅོག་ལྷུན་གྲུབ་ཀྱི་འཕྲིན་ལན་ཨ་འདུས་ཀཱ་རའི་འཕྲེང་བ།(༢༢༠བ)
མེ ཋ ཏོ རཱ ས། དྡཱ ར སུ ཁྱཱ ཏ བ རྞེ ནྡྲ ཙཱ པཱི ཡ ཤ བྡཱ རྠ བྷཱུ ཥཻ མ ཏཿ། ཀཱ པུ ར མྨཱ ལ ཡ ཏྱཱ ལི ཁཻ རྩི ནྟུ ཡུ གླ ཏྲ མེ པཱ དྡྷྱ ཡུ ཏྟཱ ར གོ ཏྶཱ ཧ ལཿ། ཀ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)རའི་རོ་ལྟར་མངར་བའི་ལེགས་བཤད་རྣམས། ཁ་དོག་འཇའ་བཞིན་སྒྲ་དོན་རྒྱན་མཚར་བའི། །ག་བུར་ངད་འཐུལ་འཕྲིན་རྟེན་སོན་པའི་མོད། །ང་ལས་ནུ་བློའི་རྗེས་འགྲོའི་སྤྲོ་བ་འཕེལ། །ཅ་རེ་མཁས་བསྟེན་ཡོན་ཏན་ནོར་གྱིས་ཕྱུག །ཆ་ལུགས་ངུར་སྨྲིག་གོས་ཀྱི་བག་ཡོད་བཙུན། །ཇ་ཆང་འདོད་ལ་སྲེད་བྲལ་ཆོག་ཤེས་ལྡན། །ཉ་རྒྱས་ཟླ་ལྟར་ལྷག་བསམ་དཀར་བ་ཉིད། །ཏ་ལེར་མངའ་རིས་སྟོད་ནས་དབུས་སུ་བརྟོལ། །ཐ་དད་གནས་ལྔ་རིག་པར་རབ་སྦྱངས་པས། །ད་ལྟ་མཁས་དང་གྲུབ་པའི་སྙན་པ་དང་། །ན་ཚོད་ལྷན་ཅིག་མཐོར་སོན་གྲགས་པ་འབར། །པ་རི་མི་ཏ་རྒྱུད་སྡེའི་ལམ་བཟང་གིས། །ཕ་རོལ་ཐར་པའི་གླིང་དུ་བགྲོད་པའི་བགེགས། །བ་གླང་ལྟ་བུའི་རྨོངས་མུན་རབ་བཅོམ་པའི། །མ་སྨད་རྣམ་པར་དཔྱོད་པ་མཁས་རྣམས་རངས། །ཙ་མ་རཱི་པའི་བསྟན་པའི་(༢༢༡ན)
སྙིང་པོ་འཛིན། །ཚ་གྲང་ཁྱད་བསད་བསྐྱེད་རྫོགས་རྫོགས་པ་ཆེ། །ཛ་ཡའི་དགོངས་པ་ཇི་བཞིན་ཉམས་བསྟར་བས། །ཝ་ལེར་གནས་ལུགས་མངོན་སུམ་རྟོགས་ལས་ཅི། །ཞྭ་ལྟར་རྡོ་རྗེའི་སློབ་དཔོན་གཙུག་ན་བསྟེན། །ཟ་བྱེད་སེང་གེ་ལྟ་བུའི་བརྟུལ་ཞུགས་ཀྱིས། །འ་འུར་སྡེ་བརྒྱད་བྲན་དུ་ཉེར་བཀོལ་ནས། །ཡ་མཚན་མངོན་སྤྱོད་རྣམ་འཕྲུལ་སྤྲོ་དེ་འཇིགས། །ར་གདེངས་རྡོ་རྗེས་སྣང་སྲིད་ཟིལ་གནོན་པ། །ལ་ལར་མ་ཡིན་ཀུན་སྐྱབས་པད་འབྱུང་གིས། །ཤ་དག་བསྟན་འཛིན་རིག་སྔགས་འཆང་བ་ཁྱོད། །ས་སྟེང་འདི་རུ་རྡོ་རྗེ་ལྟར་བརྟན་ཤོག །ཧ་ཅང་སྙིགས་མའི་དུས་འདིར་དཔྱོད་ལྡན་པའི། །ཨ་མྲའི་སྡོང་པོ་ལྟ་བུར་གཡུར་ཟ་དེར། །ཧ་རི་ཏ་ཀའི་བཅུད་མཚུངས་ཤོང་དཀར་རྩེར། །ཨ་དོན་བཞིན་དུ་འཇིགས་མེད་རྒྱས་བཏབ་བསྲིངས། །
རབ་བྱུང་བཅུ་གཅིག་པའི་ཤིང་སྟག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་སྟག་ལོར་བྲིས་པའི་ཆབ་ཤོག་འཕྲིན་ཡིག་ཁག །ཀུན་དགའ་ཞེས་པ་ཤིང་སྟག་ལོ་གསར་གྱི་ཚེ་སྡིང་པོ་ཆེ་སྤྲུལ་སྐུའི་འཕྲིན་ཡིག་བྱུང་བའི་ལན་ལེགས་ལྡན་དཔྱིད་ཀྱི་དགའ་སྟོན། ནཱ བ སཾ བ ཏྶ རོ ཏྟཱ མ ཧཱ ཏཱ ལ སཽ ཁྱཾ ཛ ཊཱ པཱ ད བ སྟྲོ ས ས ནྣ རྡྷ ཀཿ ས རྦ ར ནྡ སྱ མཻ ཏི ད ཏ སྶཽ བྷ ས ནྟོ མ ན སྦཱ ཊི ལཻ ཁྱ ལི ཙྩཻ ཏྲ ཀཿ། གསར་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)པའི་བགྲང་བྱ་ཡངས་པའི་ཐང་ཆེན་པོ། །བདེ་སྐྱིད་སྤང་ལྗོངས་གོས་ཀྱིས་ཉེར་ཀླུབས་པར། །ཀུན་དགའི་མཛའ་བ་སྟེར་བའི་ལེགས་ལྡན་དཔྱིད། །ཡིད་ཀྱི་ཤེས་ངོས་པིར་གྱིས་བྲིས་ཚོན་བཞིན། །ཨེ་མ་ཡུལ་དབུས་འགྱུར་འཆང་དུ་སྟོད་འགྲེལ་བའི་རྗེས་སུ་(༢༢༡བ)
འབྲངས་ཏེ་ཨཱནནྡ་ཞེས་གྲགས་པ། རི་ཁ་བ་ཅན་གྱི་སྨན་ལྗོངས་འདིར་གཙུག་ལག་སྤོར་ཐང་དང་བསྟུན་ཏེ་ཤིང་ཕོ་སྟག་འབྱུང་བ་སུམ་ལྡན་གྱི་གནམ་ལོ་གསར་དུ་ཚེས་པ་དགའ་བ་དང་པོའི་དུས་སུ། བག་ཡོད་གཙང་སྦྲའི་བརྟུལ་ཞུགས་བརྟན་པོ་ཅན། གནས་ལུགས་རང་ངོ་ཕྲོལ་བའི་རལ་ཁུར་བརྗིད། །བླ་གོས་རས་གཟན་ཁྲག་པར་གཅིག་ཏུ་གཟར། །རྣམ་དཔྱོད་ཚངས་སྐུད་སྤྱི་བླུགས་འཆང་བ་ཁྱོད། །འདུ་ཕུང་འཁྲུགས་པ་མེད་པའི་ལང་ཚོ་བརྟས། །མང་ཐོས་སྤོབས་པ་དགེ་བའི་མགྲིན་བཏེག་ནས། །བརྗོད་པ་དོན་ལྡན་ཕུན་ཚོགས་གཏམ་གྱི་གླུ། །བགྱིད་པའི་སྔོན་འགྲོར་མེ་ཏོག་འཐོར་དེ་མཚར། །དེ་ལྟར་གྲྭ་ནང་ཕུན་ཚོགས་དགེ་བའི་ཡུལ་གྲུའི་ཆར་ཟླ་བའི་དུམ་བུ་མཚར་དུ་དངར་འདྲའི་སྤོང་བ་བསམ་གཏན་གྱི་ལྕོག་བུས་ཁོར་ཡུག་ཏུ་བསྐོར་བའི་དྲི་གཙང་ཁང་གི་བྱ་འདབས་ནས་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མང་པོ་ལ་བློ་གྲོས་ཀྱི་ལུས་སྟོབས་ཡོངས་སུ་རྫོགས་པའི་གཉིས་སྐྱེས་ངག་དབང་སྙན་གྲགས་བཟང་པོས་སྭསྟི་ཀའི་སྒྲ་ལས་དྲངས་པའི་འཕྲིན་ཡིག་ལེགས་སྐྱེས་ཀྱི་བདོག་པ་ཆེད་དུ་བསྲིངས་པ་སུག་པར་སོན། དེ་ཚེ་སྡེ་སྣོད་གསུམ་པའི་དྲང་སྲོང་ཡང་། །ལུས་སེམས་སིམ་པའི་ཚོར་བ་ཉམས་མྱོང་གར། །ཆར་སྤྲིན་སྟུག་པར་མིག་གཏོད་རྨ་བྱ་ཡིས། །དབྱར་རྔ་ཐོས་པས་མོད་བཞིན་ཅི་ཡང་སྒྱུར། །ཀྱེ་ཟླ་བའི་འཕྲེང་བ་གོ་ལའི་རྒྱུ་ལམ་ལྟར་ནམ་ཡང་ཆད་པ་མེད་པའི་ངང་ནས་བརྩམས་ཏེ་མ་ཕམ་མགོན་པོ་མ་གདྷར་མཆོག་གི་སྤྲུལ་པའི་སྐུར་བསྟན་མིན་དེ་སྲིད་ཀྱི་བར་དུ་ལོའི་ཐོག་མའི་དུས་ཀྱི་དགའ་སྟོན་ཆད་མེད་དུ་སྤེལ་བར་རིགས་སོ། །དེ་ལྟར་བསྐུལ་ཚིག་འདྲེན་བྱེད་ཡུལ་འགྱུར་ཆེད། །འཇམ་མཉེན་དར་གྱི་ཁ་རྫར་ཅན་འདིས་ཀྱང་། །ཕན་བདེའི་སྣང་བས་སྐྱེ་རྒུ་ཀུན་ཁྱབ་པའི། །(༢༢༢ན)
རྟེན་འབྲེལ་སྒོ་འཕར་ཡོངས་ཕྱེ་ཛ་ཡནྟུ། །ཤིང་སྟག་ཧོར་ཟླ་གཉིས་པའི་ཉེར་བརྒྱད་ལ་རིགས་འཛིན་ཆེན་པོ་དཀོན་ཅོག་ལྷུན་གྲུབ་ཀྱི་འཕྲིན་ལན་ཐོས་བསམ་སྒོམ་མཐར་ཕྱིན་པའི་གཏམ་སྙན། ཡུ བྱ ཏོ དྲུ མ པཱ ཀཱ པ དྷ ཤྲུ པ ཙཱ རེ རླ ཏཱ པ ཏྲ བྷཱུ རཱི ཤ ཙཱ ལཱ གྲ ཏྲཱ། བུ དྡྷ ཕཱ ལྱཻ རྨ ཧཱ ཀཱུ ལ དྷཱ ཏ སྱ ལེ ཁཻ སྶ ཧཱི རྨུ དྲ ནཱ ཤྨཱ བྷུ ཛེ ཡུ ཀྟ ཀཿ། ན་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)ཚོད་སྡོང་པོ་སྨིན་ཀྱང་ཐོས་བསམ་གྱི། །རྣམ་དཔྱོད་ཡལ་འདབ་ཕང་ཕུང་གཡོ་བའི་རྩེར། །གོམས་པའི་འབྲས་དུད་རིག་འཛིན་ཚེ་དེའི་འཕྲིན། །རྟེན་གྱི་ཕྱག་རྒྱ་མ་ཉམས་སུག་པར་སོན། །དེང་དུས་སྒྱུ་མའི་ལང་ཚོ་མ་སྙིགས་ཤིང་། །ལྷ་སྔགས་ཡེ་ཤེས་རྣམ་པར་རོལ་པའི་གཟིས། །ཡིད་སྲུབས་སྨག་རུམ་མཐར་བྱས་རྡོ་རྗེ་གསུམ། །གཡུང་དྲུང་ལྟ་བུར་བརྟན་པའི་གཏམ་དེ་སྙན། །ཅིའི་ཕྱིར་དཀོན་ཅོག་ཕུན་ཚོགས་ཉིན་མོར་བྱེད། །ཆོས་དབྱིངས་ནུབ་རིའི་ཕང་གཞོལ་དབུ་རུའི་ཆ། །མུན་པར་གྱུར་ཚེ་མཁས་གྲུབ་ཟླ་བ་ཁྱོད། །ཤར་(༢༢༢བ)
བས་ཕྱོགས་དེའི་འགྲོ་ཀུན་སྣང་བས་ཁྱབ། །ཟ་ཧོར་རིག་སྔགས་འཆང་གི་གདུང་འཛིན་བདག །བསྐྱེད་རྫོགས་རྫོགས་ཆེན་ལམ་བཟང་ལྟ་ཞོག་གི །ཐུན་མོང་དངོས་གྲུབ་ཙམ་ཡང་མ་འགྲུབ་རུང་། །འགྲོ་འདྲེན་སྙན་པའི་གཏམ་གྱིས་མི་མགོ་བསྐོར། །མྱ་ངན་མེད་པའི་ཐུགས་བཅུད་དྲང་སྲོང་མཚོན། །རྣམ་སྤྲུལ་རིན་ཆེན་ཕུན་ཚོགས་བཞད་པའི་སྲོལ། །རྙིང་རྒན་ཕལ་གྱིས་ཤེས་པའི་རེ་མེད་སྟེང་། །ཕྱོགས་དེར་རྟོགས་པ་ཁྱོད་མིན་ངས་མ་མཐོང་། །འདི་ན་དགེ་བསྟན་ཁྲི་ལ་དབང་བསྐུར་ནས། །བསྒྲིག་རྩོམ་དེ་འདྲ་མེད་པས་ལས་ཡིན་རུང་། །གངས་ལྗོངས་རེ་ཆེ་ཀུན་ལ་དབྱར་ཆུའི་དྲོད། །ཙམ་ལས་མ་རྙེད་ནུབ་འཕངས་འབད་པས་བཀོད། །བྱིས་བློ་འཁྲུལ་པའི་སྣང་བར་ནོངས་པའི་ཚོགས། །ཡོད་སྙམ་ཅུང་ཟད་རང་སེམས་དམའ་ཞུམ་པར། །ཤེས་ལྡན་ཁྱོད་ཐུགས་གང་ནས་ལེགས་སོའི་སྒྲས། །དབུགས་དབྱུང་འདི་ཡིས་ཅི་བདེར་ངལ་གསོ་བྱས། །འཇམ་དཔལ་གཤིན་རྗེའི་རྒྱུད་ཀྱི་སྙིང་པོའི་བཅུད། །གནུབས་ཆེན་གདམས་པའི་མྱུ་གུ་མེའི་སྤུ་གྲིའི། །ངག་འདོན་ལག་ལེན་འཇུག་བདེའི་རེག་ཟིག་རྣམས། །འབད་པས་འཕྲལ་བཤུས་གླེགས་བམ་འདི་ཀོ་བསྲིངས། །དགྲ་གདོན་ཚང་ཚིང་བསྲེག་པའི་ཡེ་ཤེས་མེ། །པད་གནུབས་མན་ངག་ཟབ་དོན་ཡིད་བཞིན་ནོར། །གཙུག་བསྟེན་རིག་སྔགས་འཆང་བའི་གདེངས་ཅན་དབང་། །སྟོད་སྨད་ཀུན་ཏུ་ཉིན་མོའི་སྐར་མ་འདྲ། །ཆང་བཟིའི་བློ་ཤེད་འདྲེར་འཚོང་བརྟུལ་ཞུགས་ཀྱིས། །གང་དྲན་ཟན་གོང་ནོར་སྐྱོང་ལྟོ་བ་རུ། །ལྡུགས་ལ་རྔ་གོག་དྲག་རྡུངས་ཆེར་བརྩོན་པའི། །སྔགས་རློམ་དེ་ཡང་རི་མོའི་མར་མེ་བཞིན། །སྟང་སྟབས་ཀྱིས་ཀྱང་ལྷ་སྲིན་བྲན་འཁོལ་བའི། །གོས་དཀར་རིགས་འཛིན་སྔོན་བྱོན་མང་བྱུང་དིང་། །གསར་མའི་མིག་བལྟོས་སྙིང་རུལ་ངུར་སྨྲིག་ཅན། །སྟག་ཚང་གནས་པའི་ཝ་སྐྱེས་འཇོལ་མོ་འདྲ། །དེ་ཙམ་ཆེས་ཆེར་སྙིགས་མའི་(༢༢༣ན)
གནས་ཚུལ་རྣམས། །སྙན་ཚིག་སྡེབ་སྦྱོར་དམ་པོས་མ་བཅིངས་པར། །རང་རྒྱུད་དཀོར་གྱིས་རེངས་པའི་ཁ་འཆལ་གཏམ། །ལྷུག་པར་བྲིས་ལ་མཁས་ཁྱོད་མི་ཁྲེལ་འཚལ། །དལ་འབྱོར་རྙེད་དཀའ་མ་ཟད་ཉིད་ལྟ་བུའི། །ཐོས་བསམ་སྒོམ་པའི་སྡོམ་བརྩོན་རབ་དཀོན་པས། །པད་འབྱུང་ཇི་བཞིན་འཕོ་བ་ཆེན་པོའི་སྐུ། །བསྒྲུབས་ནས་བསྐལ་བརྒྱར་བརྟན་པའི་ཐབས་ཚུལ་མཛོད། །མཐོ་རིས་འཆི་མེད་ཆུ་བོ་གངྒཱ་དེ། །ཆད་མེད་རྒྱ་མཚོའི་གློང་དུ་འབབ་པ་ལྟར། །ནམ་ཡང་བསྐྱུད་པ་མེད་པའི་འཕྲིན་ཡིག་རྒྱུན། །ལྷ་ལྡན་འཛིན་མའི་ལྡུམ་རར་འཁྱིལ་ཅིག་གུ །ཚངས་སྤྱོད་དཔལ་ལ་གནས་པ་དགེ་སློང་གིས། །བཏུང་བར་འོས་པ་རྒྱ་ཇའི་བེམ་པོ་ལ། །པདྨ་རཱ་གའི་མདངས་འཛིན་ལག་རྟགས་ཀྱིས། །ཉེར་བཏབ་དབུ་རུའི་ཕྱོགས་སུ་བདེ་བར་སོང་། །ཀུན་དགའ་ཞེས་པ་ཤིང་སྟག་ལོ་རྒྱ་ཧོར་འཛིན་སྟངས་མ་གཅིག་པའི་དུས་ཀྱི་ཆད་པའི་དབང་གིས་ཙི་ཎའི་ལྷོ་བརྒྱུད་ཀྱི་ཡུལ་གྲུའི་གཡུལ་འཁྲུག་བྱུང་བའི་ཚེ་གོང་ནས་སོག་པོའི་བྱ་བ་བྱེད་མི་ཡ་མུ་ནས་ལ་དུ་ཇར་གོ་ཆི་ཅན་གནང་སྐབས་བཀའ་ལན་འབུལ་བར་ཁང་གསར་རབ་བརྟན་དང་འབུམ་བྲང་བསོད་ནམས་དབང་པོ་གཉིས་བཏང་བའི་ཞུ་ཡིག་གཡུང་དྲུང་འཁྱིལ་བ། ཨཱ ཡུ རྡཱི རྦྷ ཁ རུ གྲ བཱ ལ སྱ ཙ ཀྲཤ བ རྟི ཀ ག ག ན ཤྩ བྷཱ མཱི ཤྭ རཻ རྨ ཉྫུ གྷོ ཥོ ཏྟ མ རཱ ཛྙོ མཱུ ལེ། ཚེ་རིང་གནམ་གྱི་ཤེ་མོང་གི་སྟོབས་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། རབ་ཏུ་དང་བའི་(༢༢༣བ)
སེམས་ཀྱི་སྒོ་ནས་སྤོས་བསྲེགས་མེ་ཏོག་གཏོར་ཏེ་གསོལ་བ། གནམ་ཀ་བ་མེད་པའི་སྒོ་ཕྱེ་ནས་འཇིག་རྟེན་གྱི་མེས་པོ་ཚངས་པས་སྟོབས་ཀྱི་འཁོར་ལོས་སྒྱུར་བ་མང་བཀུར་གྱི་རྒྱལ་སར་དབང་བསྐུར་བ་འཇམ་དབྱངས་གོང་མ་རྒྱལ་པོ་དེང་གི་དུས་ཀྱང་འཛམ་གླིང་སྐྱེ་རྒུ་ཡོངས་ཀྱི་བསོད་ནམས་ཀྱི་དཔལ་དུ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་གཡུང་དྲུང་གི་རང་བཞིན་ལྟར་འགྱུར་བ་མེད་ཅིང་ཐུགས་རྗེའི་མཐུ་དཔུང་མངོན་པར་རྒྱས་པའི་གཟི་བྱིན་གྱིས་ལུས་ཅན་མཐའ་དག་ཕན་དང་བདེ་བའི་དཔལ་ལ་སྤྱོད་བཞིན་པ་ནས། མི་སྣ་སོག་པོའི་བྱ་བ་བྱེད་མི་ཡ་མུའི་མི་བཟང་ལ་དུ་ཇ་ར་གོ་ཆི་ཅན་ཧོར་ཟླ་བཞི་པའི་ཚེས་བཅུ་དགུ་འཚམ་པོར་འབྱོར་བའི་བཀའ་ཤོག་ཉིན་མོ་བདེ་ལེགས་ལྔ་བཅུའི་རྟེན་དང་བཅས་ཕེབས་པ་ཡིད་མཆོག་ཏུ་སྤྲོ་ཞིང་གུས་པ་འཕེལ་བར་གྱུར། འདི་ན་རྒྱལ་བ་ཟས་གཙང་གི་སྲས་པོའི་རྗེས་སུ་ཞུགས་པའི་སྡོམ་བརྩོན་ཀློག་པ་མཁན་ཡོང་འདུ་ཕུང་པོ་མདོག་བདེ་ཞིང་གང་གི་བཀའ་དྲིན་ལ་བརྟེན་ནས་ཉི་མ་ནུབ་ཀྱི་ཕྱོགས་རྣམས་ལུགས་གཉིས་དང་འབྲེལ་བའི་སྒོ་ནས་བདེ་བར་སྐྱོང་བའི་སྐབས་སུ་གནས། ད་ལམ་སྐུའི་འཚམ་འདྲི་ཞུ་བར་ཁང་གསར་རབ་བརྟན་དང་འབུམ་ཐང་བསོད་ནམས་དབང་པོ་གཉིས་རྫོང་བདར་ཞུས་པ་སྔར་རྒྱུན་བཞིན་ཐུགས་བརྩེ་བ་ཆེན་པོས་ཉེ་བར་གཟིགས་པའི་བཀའ་གནད་བསླབ་སྟོན་བཅས་པ་ཆུ་བོའི་རྒྱུན་བཞིན་ཞུ། རྟེན་ཤལ་དམར་པོ་ལེགས་པ་དང་བཅས་ཤིང་སྟག་ཧོར་ཟླ་ལྔ་པའི་ཚེས་གཉིས་ལ་རང་བྱུང་འཕགས་པ་འཇིག་རྟེན་དབང་ཕྱུག་གི་གཙུག་ལག་དམར་པོ་རི་ནས་ཕུལ། མངའ་རིས་སྔགས་འཆང་ཆེན་པོ་དཀོན་ཅོག་ལྷུན་གྲུབ་ཀྱི་འཕྲིན་ལན་ཀ་ལ་པིངྐའི་དབྱངས་ལ་བསྔགས་པ། (༢༢༤ན)
སཱ ཛ ཡ ཤྩི ཏྟ ཛཱ ལ པྲ ཎཱི དྷིཿ གི རི བཱ ལི ཏ ནྣི རྨ ཎེ རཱ བ གཾ ཛྙོ ད ཡ༔ ཤཱ ཀྱ ཤཱ སཱ ན བྷཱུ མཱི ཀ སཽ ག ཙྪ མུ དྲ པྟ སྶ དྷ ྈྐ ལ ཀོ ཊིཿ ར ཐེ། སྲས་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)བཅས་རྒྱལ་བའི་ཐུགས་མཚོར་སྨོན་ལམ་རི། །བསྒྲིལ་ལས་སྤྲུལ་པའི་ས་སྲུངས་མཁྱེན་བརྩེའི་འགྲོས། །ཐུབ་བསྟན་ས་ལ་ལྷོད་པོར་ལེགས་རྒྱུ་བ། །ཕྱག་རྫོགས་གྲུབ་རིགས་བྱེ་བའི་ཤིང་རྟ་ཆེར། །རིང་མིན་ལྷ་སྔགས་ཡེ་ཤེས་བཞུ་བླུགས་པ། །གསང་གསུམ་མི་ཤིགས་རྡོ་རྗེའི་སྒྱུ་འཕྲུལ་གར། །སྐལ་བཟང་གདུལ་བྱའི་སྣང་ངོར་བསྒྱུར་བཞིན་དུ། །སྙན་ཚིག་ཆབ་ཤོག་རྟེན་ལྡན་སྦྱོར་ཏེ་སྤྲོ། །འདི་ན་སྔོན་བསགས་ལས་སྤྲིན་སྟུག་པོའི་ནད། །སྨན་དཔྱད་ཚོགས་གསོག་དྲི་བཞོན་ཤུགས་དྲག་པོས། །མཐར་བསྐྲད་འདུ་བ་སྙོམས་པའི་ཉི་ཟེར་གྱིས། །སིམ་པའི་འདབ་སྟོང་བཞད་ལ་གཅིག་ཏུ་བྲེལ། །སྐྱེ་མངས་གོམས་པའི་བག་ཆགས་ཛམྦྷུའི་འབྲས། །སྐྱུ་རའི་བཀའ་བརྒྱུད་ཆུ་མཚོར་ལྷུངས་པ་ལས། །ཉེར་སད་དམ་པའི་ངང་ཚུལ་སུ་ཝ་རྞཿ །དར་དྲག་སྙེ་མའི་རོ་བདའ་(༢༢༤བ)
ཆེས་ཆེར་མངར། །ན་ཕྲ་རྣམ་དཔྱོད་མདོངས་མཐའ་ལ་ཞོན་ནས། །འགྲོ་འདྲེན་རྒན་མངས་བསྙེམས་པའི་གླང་པོའི་མཆེ། །ཉེར་ཕྱུངས་གོང་མའི་གདན་ས་མཐོ་རིས་སར། །འགྱིང་བའི་ཀརྟི་ཀ་དེ་གཞན་ན་སུ། །མཁས་དང་གྲུབ་པའི་འཁོར་སྒྱུར་ཆོས་ཀྱི་གྲགས། །རྔ་ཡབ་དཔལ་གྱི་རི་བོར་གཤེགས་པ་བརྫུན། །བདེན་ན་མགོན་དེའི་རྣམ་པར་ཐར་པའི་ཆ། །གང་བའི་ཟླ་བ་དབུ་རུར་ཤར་འདི་ཅི། །ལོ་མངས་ཤེས་བྱར་གོམས་རློམས་ངུར་པའི་ཁྱུ། །གྲོང་གཏམ་ཅ་ཅོས་རྣ་བ་གཙེར་བྱེད་ན། །སྦྱངས་ཕྲ་སྒོ་ངའི་སྦུབས་རྒྱ་མ་གྲོལ་བར། །ལེགས་བཤད་ཀ་ལ་པིངྐའི་སྒྲ་དབྱངས་སྙན། ཁྱོད་མགྲིན་གསེར་པད་ལས་སྐྱེས་ཚངས་པའི་རིགས། །སྤོབས་མཐོ་སྨྲ་བའི་གདོང་པ་བཞི་སྤྲུལ་ནས། །དབྱངས་ཅན་ཐིག་ལེ་མཆོག་མར་དམ་འཁྱུད་པར། །འཕྱ་བའི་མིག་སྔོན་ཅན་ཏེ་ངལ་འགྲམ་བཏེག །ཚུར་མཐོང་བྱིས་བློས་འཇལ་ནུས་ཐ་སྙད་ལ། །མཚར་ཅི་ལྐོག་གྱུར་ཆོས་ཀྱི་སྒྱུ་མའི་འཕྲུལ། །དག་པའི་སྤྱན་ཟུར་ལྷུང་བའི་མོད་ཉིད་ལ། །དངས་མཚོར་ཟླ་བའི་གཟུགས་བཞིན་གསལ་དེ་རྨད། །ཟིལ་གནོན་གྲུབ་པའི་བརྟུལ་ཞུགས་ཕྱག་རྒྱ་ཡིས། །འཁོར་འདས་སྲོག་དབང་ཐོབ་ཚེ་ལྷ་མ་སྲིན། །ལུས་མེད་ལུས་དངོས་བསྟན་ནས་བཀའ་འབངས་སུ། ཁས་འཆེའི་རྣམ་པར་འཕྲུལ་ལ་ཅི་ཞིག་གཤུང་། །དེ་ཙམ་ཀུན་རྟོག་འཆར་སྒོའི་རང་གདངས་གཟུགས། །འཛད་མེད་ཡི་གེའི་འཕྲེང་བར་སྤེལ་མོད་ཀྱི། །དམ་པའི་སྤྱོད་ཚུལ་ཕ་མཐའ་ཡོངས་གཞལ་ཚེ། །གསེར་མངལ་ཅན་ཡང་ངལ་བའི་གཉིད་ལ་གཡུར། །སྣང་སྲིད་དབང་སྡུད་མཚོ་སྐྱེས་རྡོ་རྗེ་བཞིན། །བག་ལ་ཉལ་ཆོས་དངོས་མཇལ་རྗེན་སྟོན་པའི། །ཕེབས་ཚོགས་མུ་ཐི་ལ་འཕྲེང་སྡེབ་ཚིག་གི །སྲད་བུར་བརྒྱུས་ཏེ་ཆད་པ་མེད་པར་ཞུ། །བཀྲ་(༢༢༥ན)
ཤིས་ཁ་ཛར་ཅན་དང་སྨིན་ལེགས་མ། །ཐུན་མཚམས་རྒྱ་ཡི་རྩེ་དགས་རོལ་བཞིན་དུ། །ནམ་མཐོང་ཟླ་བའི་ཤེས་རབ་ཕྱོགས་ཀྱི་ཆ། །བཟང་པོ་གཉིས་པའི་དུས་ལ་ཕུལ་བ་དགེ །རབ་བྱུང་བཅུ་གཅིག་པའི་ཤིང་ཡོས་དཔལ་ཞ་ལུ་གསེར་བཀང་དུ་འཆི་བདག་ལས་ཀྱི་གཤིན་རྗེ་ཡབ་ཡུམ་འཆམ་པའི་སྔོན་འགྲོར་སྣང་སྲིད་ལྷ་སྲིན་སྡེ་བརྒྱད་ལ་སྐད་གཏོང་བའི་ལམ་ཡིག་དཔའ་བོའི་གད་བརྒྱངས། པ་ར་མ་གུ་རུ་ཉྩ་ཡ་མཱ་རི་དེ་ཝཻ རཱ་དྷི ཥྠི ཏེ སྭཱ ཧཱ། རིགས་བརྒྱའི་ཁྱབ་བདག་རྡོ་རྗེ་འཆང་གིས་གསུངས་པའི་གཤེད་སྐོར་གྱི་རྒྱུད་ལ་བརྟེན་ནས་མཁས་ཤིང་གྲུབ་བརྙེས་ལཱ་ལི་ཏ། བིཪྠ་པ། དཔལ་འཛིན་སོགས་འཕགས་ཡུལ་གྱི་པཎ་གྲུབ། རྭ་སྐྱོ་མལ་ཞང་གཉིས་ཏེ་ཕྱོགས་འདིའི་སྲོལ་འབྱེད་སྔོན་བྱོན་དང་། འཇིག་རྟེན་གྱི་མིག་གཅིག་པུ་ཐམས་ཅད་མཁྱེན་པ་བུ་སྟོན་རིན་པོ་ཆེ། རྡོ་རྗེ་འཆང་ཚར་པ་ཆོས་རྗེ་ཡབ་སྲས་སོགས་རྩ་བརྒྱུད་ཀྱི་བླ་མ་དམ་པ་རྣམས་ཀྱི་བཀའ། བདུད་སྡེའི་གཤེད་དུ་འཇམ་དཔལ་དྲག་པོར་ཁྲོས་པ་འཇིགས་མཛད་རྡོ་རྗེའི་ལུང་། གོང་མའི་ལུང་གིས་དེའི་ཆི་གྱིང་གང་ཞེས་སྲིད་ཞིའི་གཙུག་རྒྱན་དུ་དབང་བསྐུར་ཞིང་། འཁོར་འདས་ཕྱག་རྒྱ་ཟིལ་གནོན་འཇམ་དཔལ་དུས་དགྲའི་སྔགས་འཆང་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ་ཕྱོགས་ཐམས་ཅད་ལས་རྣམ་པར་རྒྱལ་བའི་གཏམ། ཁམས་གསུམ་ན་མངོན་པར་རྒྱུ་བའི་གཟུགས་མེད་སྣང་ཞིང་སྲིད་པའི་ལྷ་སྲིན་སྡེ་བརྒྱད། གཟུགས་ཅན་གྱི་སྐྱེ་རྒུ་སྤྱི་དང་། བྱེ་བྲག་སྟོད་མངའ་རིས་སྐོར་གསུམ། བར་དབུས་གཙང་ཁྲི་སྐོར་བཅུ་གསུམ། སྨད་མདོ་ཁམས་སོགས་ཀྱི་འཛིན་མར་འཁོད་པའི་ལྷ་སྡེ་མི་སྡེ། བླ་མ་ཆེ་ཕྲ། ས་སྐྱོང་བའི་མིའི་རྗེ་བོ། དཔོན་ཆེན། དཔོན་སྐྱ། རྫོང་སྡོད་གཉེར་ལས་འཛིན། (༢༢༥བ)
དམག་ཨར་ཇག་གི་འགྲིམ་འགྲུལ། ཀོ་གྲུ་ལྕགས་གསུམ་གྱི་མཉན་གཉེར། ལམ་འཕྲང་སྲུང་མི་སོགས་མཆོག་དམན་བར་མའི་སྐྱེ་རྒུ་མཐའ་དག་ལ་སྤྲིངས་པ། མ་བྱོན་སངས་རྒྱས་གསུམ་པ་ཆོས་རྗེ་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་དང་། གསང་ཆེན་རྙིང་མའི་སྔགས་འཆང་གོས་དཀར་ལྕང་ལོའི་འཕྲེང་ཅན་མཐུ་ཆེན་གཡུང་སྟོན་རྡོ་རྗེ་དཔལ་བ་གཉིས་ཀྱི་ས་ཡོས་ལོ་ཧོར་ཟླ་བཅུ་གཉིས་པའི་ནང་དུ་འཆི་བདག་གཤིན་རྗེའི་གྲོང་ཁྱེར་ཐོད་པ་ལྕགས་ཀྱི་ཁང་པ་ནས་ལས་ཀྱི་གཤིན་རྗེ་འཁོར་སྡེ་བརྒྱད་དྲེགས་པའི་དམག་ཚོགས་དང་བཅས་པ་དངོས་འབྱོར་ཆས་སུ་ཞུགས་པའི་སྟང་སྟབས་དང་། ངོ་བོ་རྣལ་འབྱོར་པའི་ཏིང་ངེ་འཛིན་གྱིས་བཀུག་པའི་ཆོས་སྲུངས་སོ་སྐྱེ་ཕལ་གྱི་མིག་གི་ཡུལ་དུ་མ་གྱུར་པ་ས་གཞི་བར་སྣང་གི་ཁྱོན་གང་བ་སྤྱན་དྲངས་ཏེ། དམ་རྫས་གཏོར་མའི་རི་བོ་དང་། དམར་ཆེན་ཁྲག་གི་རྒྱ་མཚོ་བསྐྱིལ་བ་སོགས་ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད་ཅིང་ཐུགས་དམ་བསྐང་། སྤྱི་བོར་རྡོ་རྗེ་བཞག་ལྕེ་ཐོག་ཏུ་ཨ་མྲྀ་ཏ་བླུགས་ཏེ་བསྟན་འགྲོའི་ཕན་བདེ་འཇོམས་པའི་དགྲ་བགེགས་ཚར་གཅོད་པའི་དམ་ཚིག་བསྒྲགས་ཤིང་། འཕྲིན་ལས་གཉེར་དུ་གཏད་པའི་དབྱུག་གུ་དྲུག་ཅུ་རྩ་བཞི་དང་འབྲེལ་བའི་དམར་ཆེན་གཏོར་མ་དམན་པའི་སྲོལ་བཏོད་པར་མཛད་པའི་རྒྱུན་དིང་སང་གི་བར་དུ་མ་ཉམས་པར་འདུག་པ་ནས། རབ་བྱུང་བཅུ་གཅིག་པའི་ཤིང་ཡོས་ཧོར་ཟླ་བཅུ་གཉིས་པའི་ནང་དུ་མ་ཧེ་མཆོད་པ་འཛུགས་རྒྱུར་སྐྱེ་རྒུ་རྣམས་ངོ་མཚར་ལྟད་མོའི་དགའ་སྟོན་དང་། ལྷ་སྲིན་སྡེ་བརྒྱད་རྣམས་དགྲ་བགེགས་ཀྱི་ཤ་ཁྲག་ཚོགས་སུ་རོལ་པའི་མགྲོན་ལ་ཤོག་ཅིག་པའི་བརྡ་འགྲེམས་སུ་རླུང་སེམས་ལ་ནང་བྱན་ཆུད་པའི་རྣལ་འབྱོར་བརྟུལ་ཞུགས་སྤྱོད་པ་འདི་བཞིན་སོང་བ་ཁྱོད་(༢༢༦ན)
གོང་འཁོད་རྣམས་ཀྱིས་གཞིས་ལམ་བྱེད་གསུམ་ཐམས་ཅད་དུ་ཞག་བབས་སུ་གནས་མལ་གཏོང་ཞིང་། བཟའ་བཏུང་མཁོ་རྒུའི་ལོངས་སྤྱོད་སྟོབ་པ་དང་། ཀོ་གྲུའི་མཉན་པོས་ཀྱང་འཕྲལ་སྒྲོལ་གྱིས། གལ་ཏེ་གནོད་འགལ་དུ་འགྲོ་བ་བྱུང་ན་ཡུལ་གྲུའི་དཔོན་ཆེ་ཆུང་དང་རྫོང་སྡོད་སོ་སོས་ཁྲིམས་ཀྱི་བརྡ་འདེད་བཏང་ན་མི་འཇིགས་སམ། གོ་བར་བྱེད་པའི་ཡི་གེ་ཤིང་སྟག་སྨིན་དྲུག་ཟླ་བའི་གྲལ་ཚེས་དགེ་བར་གཙུག་ལག་ལུགས་བརྒྱའི་འདུན་ས་ཕོ་བྲང་ཆེན་པོ་པོ་ཏ་ལ་ནས་བྲིས། །ཤིང་སྟག་ཧོར་ཟླ་བཅུ་གཅིག་པའི་ཉེར་བརྒྱད་ལ་ཁྲ་འབྲུག་ཆོས་སྐྱོང་ཚངས་པའི་འཕྲིན་ལན་གཡར་དམ་འགྱུར་བ་མེད་པའི་གཏམ། འཕྲིན་ལས་གཡས་སུ་འཁྱིལ་བའི་དུང་དཀར་པོས། །ཐོར་ཚུགས་རབ་མཛེས་ལྷ་ཆེན་ཚངས་པ་ཡི། །རྡོ་རྗེའི་གསུང་གི་འཕྲིན་ཡིག་ལྷ་དང་བཅས། །ཕོ་ཉའི་སུག་པར་ཐོགས་ཏེ་སོན་པ་སྤྲོ། །དུས་གསུམ་བདེར་གཤེགས་ཀུན་འདུས་ཐོད་འཕྲེང་རྩལ། །རྡོ་རྗེའི་དམ་ཚིག་རི་མོ་གཙུག་ཏོར་རྩེར། །གསལ་ལས་ནམ་ཡང་མི་འགོང་བསྟན་དང་འགྲོ། །ཕན་བདེ་བསྐྲུན་པའི་གཡར་དམ་དེ་རྨད་བྱུང་། །ལུས་ཅན་བསོད་ནམས་རྒྱ་མཚོ་སྤེལ་བའི་ཞིང་། །ཆོས་འཁོར་སྟོད་སྨད་རྣམས་ལ་སྲི་ཞུ་དང་། །སྲིད་གསུམ་དབང་མོ་རིགས་ཀྱིས་སྲུང་མ་ལ། །གསོལ་མཆོད་བསྐུལ་དོན་ཡིད་ཀྱི་ཐིག་ལེར་སོན། །དཀར་མིན་ལས་ཀྱིས་བསྐྱོད་པའི་རྩོད་པའི་མུན། །བྱང་ཕྱོགས་འཐིབས་པ་སེལ་ལ་གཅིག་ཞོལ་མོད། །དྲེགས་པའི་སྡེ་དཔོན་ཁྱོད་ཀྱི་མཐུ་སྟོབས་ཉིས། །རབ་སངས་དགའ་བདེར་སྦྱོར་བའི་འཕྲིན་ལས་སྒྲུབས། །སྙན་ཤལ་རྐང་འཐུང་ཕུར་མ་གསེར་སྐྱེམས་ལ། །འཚམས་སྤྲིན་འོད་བཀྲའི་རྒྱ་ཡིས་ཉེར་བཅིངས་ཏེ། །གཡོ་རུ་ཁྲ་འབྲུག་གནས་སྐྱོང་སྤྱན་སྔ་རུ། །ཏིང་འཛིན་སྔགས་དང་ཕྱག་རྒྱ་ལེགས་པར་སྤེལ། སྲིན་པོ་ཞེས་པ་ཤིང་ཡོས་ལོ་གསར་ཀྱི་ཚེ་སྤྲུལ་སྐུ་ངག་དབང་སྙན་གྲགས་ཀྱི་སྙན་ཚིག་གི་ལན་དབྱངས་ཅན་ཕང་འགྲོའི་བསྙེམས་(༢༢༦བ)
འཕྲོག །བྷཱ བ ཤ ནྟེ མ དྷོ རཱ ཛྙ བཱ ཎོ བི ཙ རྻཱ ངྒུ ལེ རྩཱ ད ན སྱ ཀྵ རཱ ངྐུ ཤྱ ཏཿ ལ ཁ ཏ མྦུ ར ཏོ ནཱི ཏ གཱ སཱ ར སྭ སྟྱཱ ཡུ ཏྤཾ ག ཅ རྒ རྦི ཏཾ ཧཱ རི ཀ༔ སྲིད་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)དང་ཞི་བར་སྙན་པའི་གཏམ་གྱི་རྒྱུད། །རྣམ་དཔྱོད་སོར་མོས་བསྐུལ་བའི་འགྱུར་ཁུགས་ལས། །འཕྲིན་ཡིག་ཏམྦུ་ར་ལས་དྲངས་པའི་གླུ། །དབྱངས་ཅན་ཕང་འགྲོའི་བསྙེམས་པ་འཕྲོག་པ་བཞིན། །སྤེལ་ལེགས་བདོག་པ་སྔོན་འགྲོས་དུས་ཀུན་ཏུ། །དགེ་བར་འགྱུར་བའི་ཤིས་བརྗོད་མནྡར། །ཐོད་བཅིངས་འདི་ཀོ་འཆི་མེད་ལུས་ཕྲའམ། །འོན་ཀྱང་ངུར་སྨྲིག་འཛིན་ཞེས་འཕྱང་མོ་ཉུག །རིང་མིན་ཆར་ཡང་དགེ་སྦྱོང་ཀློག་པའི་གཞུང་། །མང་ཐོས་བསམ་དང་སྒོམ་པར་ལེགས་གཞོལ་བ། །ཟོ་མདོག་བདེ་བའི་རྣམ་སྨིན་དཀར་པོ་ལ། །སྤྱོད་ཐོས་རངས་པའི་ཡིད་དབང་ཀུན་དགའི་དཔྱིད། །ཕྲ་ཡང་བཙན་པོའི་ལས་རྗེས་འབྲངས་པའི་འབྲས། །བསླུ་མེད་རྒྱལ་གསུང་ངེས་དབང་གཞན་དག་ནས། །འཚོལ་བར་བལྟོས་མིན་མངོན་སུམ་མཐོང་ཆོས་ལ། །ཆུ་གཏེར་རྒོད་པའི་འཛུམ་(༢༢༧ན)
རླབས་ཅི་ཡང་གཡོ། །འདི་ན་ཉིན་ཞིག་སྲད་བུར་བགྲང་བྱའི་འཕྲེང་། །དྲུག་ཅུར་ཉེ་བའི་རྩིས་གདབ་མཁན་པོའང་། །སྲེད་པའི་ལྕགས་ཀྱུས་ཉེར་བཏབ་སེམས་ཀྱི་གླང་། །རྣམ་གཡེང་ཤལླི་ཀར་རྒྱུའི་རོལ་རྩེད་ཙམ། །གཙུག་ལག་མང་སྦྱངས་ངག་གི་སྤོབས་པའི་དབང་། །ཡོངས་ཐོབ་སྙན་པའི་གྲགས་འབར་སྐལ་བཟང་པ། །ཤེས་བྱའི་ཕ་མཐའ་མ་རྙེད་ངལ་བའི་སེམས། །མ་ཡེངས་ཕྱག་རྒྱའི་མལ་དུ་བག་ཕབ་བཞིན། །འགོག་པའི་བསམ་གཏན་འཐུག་པོའི་ཆུ་འཛིན་ལ། །བལྟ་བའི་ཡང་དག་འཇོག་བློའི་མདོངས་མཐའ་ཅན། །ལྷག་མཐོང་དབྱར་རྔ་བསྒྲགས་མིན་ཐར་པའི་སྒྲོ། །ཟླུམ་པོར་བསྒྱུར་བའི་དུས་དེ་རིང་ཞིག་བསྐལ། །ཟས་གཙང་སྲས་བསྟན་ལུང་དུས་ལྔ་བརྒྱའི་ནང་། །སྒྲ་ཚད་བཟོ་གསོ་ལ་སོགས་རིག་པའི་གནས། །འཆད་ཉན་དོན་དང་ལྡན་ན་མང་ཐོས་ཁྱོད། །སྒོམ་བློའི་ཁུར་དེས་ཤིང་བཟང་པགས་འོག་རྒས། །ཟག་བཅས་གཉིད་ལས་ལངས་ཏེ་ཚངས་པ་ཡིས། ཁ་བའི་ལྗོངས་འདིར་གང་གི་དཔེ་ཟླ་ཞིག །མ་རྙེད་མཐོ་རིས་གནས་ཀྱི་སརྦ་ཛྙཱཿ། །ཆེད་དུ་སྤྲུལ་པར་ངེས་ལས་གཞན་དུ་ཅི། །མ་འདྲིས་ཀུན་དང་མཛའ་བའི་སྙིང་རྗེའི་གཏེར། །ཤེས་བྱའི་ཕ་མཐའ་གཞལ་བའི་སྤྱན་དཀྱུས་རིང་། །རྒོལ་ངན་ཀླད་པ་འགེམས་པའི་དཔའ་རྟུལ་གྱིས། །རིགས་གསུམ་སྒྱུ་དྲའི་གར་དེ་ཁྱོད་ཀྱིས་བསྒྱུར། །ཆོས་ཚུལ་རྒྱ་མཚོ་སྨྲ་ལ་དབྱིག་གི་གཉེན། །རྩོམ་ལ་དགེ་དབང་བླ་གོས་གསར་པས་ཀླུབས། །བརྗོད་པ་རྣམ་དག་བཙུན་པ་ཟླ་བ་ཡི། །མཆེད་པོ་ཉིད་ལས་གཞན་དུ་སུ་ཡིས་རྙེད། །འདོད་ཡོན་འདམ་བྱིང་དྭགས་བརྒྱུད་ཤིང་རྟ་དིང་། ཁ་ལོ་སྒྱུར་བྱེད་གཅིག་པུ་ལས་གཞན་པར། །ལྷ་དབང་མིག་སྟོང་བལྟས་པས་མ་(༢༢༧བ)
རྙེད་ཕྱིར། །འཁོར་བ་ཟད་མིན་དེ་སྲིད་གཞོལ་ཅིག་གུ །བསྐལ་པར་རྫོགས་དཀའ་གནམ་ལོ་ཚེས་སོ་ཅོག །སྐྱེས་བཟང་སྙན་འཕྲིན་ཆད་མེད་བསྐུལ་བའི་རྟེན། །སྣ་ཚོགས་རི་མོ་བཀོད་པའི་དར་དཀར་པོ། །ཕོ་ཉའི་སྙིམ་པས་ཐོགས་ཏེ་ཕྱོགས་དེར་སོང་། །ཤིང་སྟག་ཚངས་པ་དུང་ཐོད་ཅན་གྱི་སྐུ་ཁོག་སངས་རྒྱས་ཕུན་ཚོགས་དུས་ཀྱི་ཆོས་ཉིད་དུ་གྱུར་པའི་ཚེ་སྙན་ཤལ་གསེར་སྐྱེམས་དམོད་ནས་དང་བཅས་རིས་ཀྱི་ཚ་བོར་བབ་པ་ཧོར་ཟླ་བཅུ་གཉིས་པའི་ཚེས་བརྒྱད་ལ་ཡིད་ཆེས་སྔོན་དུ་གྱུར་པར་བརྟེན་ཤིང་ཡོས་ཧོར་ཟླ་དང་པོའི་ཚེས་བཅུ་གཉིས་ལ་མཆོད་སྤྲིན་ཚོགས་མཆོད་དང་བཅས་དཀར་བྲག་པ་ངག་དབང་བྱམས་པ་བཏང་པའི་ཚེ་འཕྲིན་གསོལ་ལྷ་ཞལ་བག་མར་ངོམ་པའི་དགའ་སྟོན། སྭ་སྟིའི་སྒྲ་ལས་དྲངས་པའི་ཕུན་ཚོགས་ཀྱི། །ངོ་མཚར་དབྱངས་ཀྱི་འཕྲེང་བ་སྔོན་བཏང་ནས། །བཀྲ་ཤིས་གཡས་འཁྱིལ་དུང་དཀར་ཐོད་བཅིངས་པའི། །ལྷ་ཆེན་ཚངས་པ་ཆེན་པོར་ཆེད་གསོལ་དོན། །བསྟན་དང་འགྲོ་བའི་ཕན་བདེ་སྤེལ་བ་དང་། །ལེགས་ཉེས་བླང་དོར་ལུང་དུ་སྟོན་པའི་ཕྱིར། །སྐུ་རྟེན་ཁོག་པ་གསར་པར་འགྱངས་མེད་དུ། །བྱོན་པར་ཡིད་ཀྱི་སྤྲོ་བ་ཅི་ཡང་བརྟས། །སྔགས་དང་ཕྱག་རྒྱས་བྱིན་བརླབས་མཁའ་ཁྱབ་ཀྱི། །དམ་སྐོང་མཆོད་སྤྲིན་ནམ་མཁའ་མཛོད་ཀྱི་སྒོར། །མཚོན་བྱེད་དངོས་བཤམས་དཔྱད་ཁྲ་ཟུར་གསལ་བཞིན། །འབུལ་བར་ཕོ་ཉ་མངགས་ལྟར་དགྱེས་སྐྱེད་ཅིག །སངས་རྒྱས་གཉིས་པ་མཚོ་སྐྱེས་རྡོ་རྗེ་ཡི། །སྤྱན་སྔར་དམ་བཅས་ཞལ་བཞེས་མ་གཡེལ་བར། །ཐུབ་བསྟན་སྤྱི་དང་མཉམ་མེད་བཙོང་ཁ་པའི། །རིང་ལུགས་སྲིད་མཐའི་བར་དུ་རྒྱས་པ་དང་། །དགའ་ལྡན་རྣམ་པར་རྒྱལ་བའི་ཕོ་བྲང་གི །ཁྲིམས་གཉིས་གསེར་གྱི་འཁོར་ལོ་རྩིབས་སྟོང་ཅན། །ནོར་འཛིན་ཀུན་ལ་ཁྱབ་ནས་ལུས་ཅན་རྣམས། །བདེ་ཞིང་སྐྱིད་པའི་དཔལ་ལ་(༢༢༨ན)
འབྱོར་པར་མཛོད། །དཔག་བསམ་ཡོངས་འདུའི་ལྗོན་དང་ཡིད་བཞིན་ནོར། །འདོད་འཇོའི་བ་དང་བུམ་པ་བཟང་པོ་བཞིན། །ཞི་རྒྱས་དབང་དྲག་འཕྲིན་ལས་མ་ལུས་པ། །བསྒྲུབ་པར་མཛོད་ཅིག་མཐུ་ཆེན་ལྷའི་ཚངས་པ། །འབྱུང་བ་སུམ་ལྡན་ཤིང་མེ་ཡོས་ཀྱི་ལོ། །རྒྱལ་བས་བདུད་དཔུང་བཅོམ་པ་མཉན་ཡོད་ཀྱི། །དཀར་ཕྱོགས་དཔའ་བ་དགའ་སྟོན་ཚེས་བཟང་པོར། །ཕོ་བྲང་པོ་ཏ་ལ་ཡི་རྩེ་ནས་དགེ །
རབ་བྱུང་བཅུ་གཅིག་པའི་ཤིང་ཡོས་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་ཡོས་ལོར་བྲིས་པའི་ཆབ་ཤོག་འཕྲིན་ཡིག་ཁག །ཤིང་ཡོས་ཚེར་གསེབ་པ་ཆོས་སྐྱོང་ཆེན་པོ་ཁོག་ཏུ་ཞུགས་ཀྱང་ལོ་རེར་ལན་རེ་ཙམ་ལ་མི་ཕེབས་པས་མདངས་མཛད་སྐབས་ཧོར་ཟླ་གཉིས་པའི་ནང་དུ་རྒྱུ་མཚན་གསལ་བར་ཆང་ཁྱིམ་པ་བློ་བཟང་དངོས་གྲུབ་བཏང་པའི་འཕྲིན་གསོལ་ཕན་བདེའི་སྒོ་འབྱེད། དྲེགས་པ་ཀུན་གྱི་སྡེ་དཔོན་སྲོག་གི་བདག །ལྷ་ཆེན་ཚངས་པ་སྔོན་གྱི་ཞལ་བཞེས་བཞིན། །མི་ཡི་རྟེན་ལ་མངོན་སུམ་ཉེར་བརླམས་པ། །ཡོངས་ཀྱི་ཡིད་ལ་སྤྲོ་བའི་རྩེ་དགའ་བརྟས། །ལུང་རྟོགས་ནམ་མཁའི་མཐའ་མཉམ་རྙེད་པའི་མགོན། །རྒྱ་བལ་བོད་སོགས་བྱོན་པ་ཆེས་མང་ཡང་། །སྣང་སྲིད་དབང་བསྡུས་སྡེ་བརྒྱད་བྲན་འཁོལ་བ། །པདྨ་ཐོད་འཕྲེང་ཙམ་ལས་གཞན་དུ་ཅི། །སློབ་དཔོན་གང་དེའི་བཀའ་རྟགས་ཕྱག་རྒྱ་ལས། །མི་འདའ་གངས་ཅན་བསྟན་འགྲོའི་ཕན་བདེའི་ཆེད། །ལོ་རེར་ཐེངས་གཅིག་མིན་པར་མཆོག་དམན་གྱི། །རེ་བ་སྐོང་སླད་སྔར་བཞིན་ཁོག་ཞུགས་གསོལ། །ཕེབས་ན་སྐྱོན་དུ་འགྱུར་བ་མེད་སྙམ་མེད། །ལྗོངས་འདིར་བཟློག་དཀའ་མི་དགེའི་འཚུབ་སློང་ངམ། །ཡང་ན་རྫོགས་ལྡན་ལྟ་བུར་བླང་དོར་ལུང་། །བསྟན་ལ་བལྟོས་པ་མིན་པ་ཡིད་ལ་དྲང་། །སྤྱན་གཟིགས་ཁྲ་ཤར་ཚོགས་ཀྱི་འཁོར་ལོ་བཅས། །འབུལ་བར་མངགས་པའི་ཕོ་ཉའི་གཡར་ལམ་ནས། །ཞིབ་པར་ཕུལ་ལན་ལྷུག་(༢༢༨བ)
པར་རྩོལ་ཞིག་ཅེས། །བསྐུལ་རྟེན་བཀྲ་ཤིས་ལྷ་ཡི་དར་འདིས་སྤྲས། །ཤིང་ཡོས་ཚངས་པ་དུང་ཐོད་ཅན་གྱིས་རིམ་གྲོ་བསྐུལ་བའི་གསུང་འཕྲིན་བྱུང་བའི་ལན་རྣམ་པར་རྒྱལ་བའི་དབྱངས། རྒྱལ་བར་གྱུར་ཅིག་བསྟན་སྲུང་ཚངས་པ་ཆེ། །དྲེགས་པའི་སྡེ་དཔོན་དུང་ཐོད་སྲོག་གི་བདག །དཔལ་གྱི་མགུར་ནས་ལྷ་གཏམ་སྙན་པའི་འཕྲིན། །རབ་དཀར་དར་རྟེན་འབྱོར་བས་སིམ་པ་ཐོབ། །མངོན་སུམ་མི་ཡི་ཁོག་ཏུ་ཉེར་བརླམས་ཏེ། །སྐུ་ཡི་རྣམ་འགྱུར་གསུང་གི་བརྗོད་པ་དང་། །ཟབ་ཡངས་ཐུགས་ཀྱི་མཁྱེན་པ་སྔར་བྱོན་གྱི། །ཚུལ་དང་མཐུན་ལ་ཡིད་ཆེས་སྤྲོ་དགའ་བརྟས། །གེགས་སེལ་རིམ་གྲོའི་བླང་དོར་ཇི་སྙེད་ཀུན། །རྙོག་བྲལ་རྫིང་བུའི་ནང་དུ་ཟླ་གཟུགས་བཞིན། །གསལ་བར་རྡོ་རྗེའི་ཚིག་གིས་ལུང་བསྟན་པ། །མི་བསྐྱུད་སེམས་ཀྱི་དཔལ་བེར་གཅིག་ཏུ་འཁྱིལ། །སྣང་སྲིད་སྡེ་བརྒྱད་ཡོངས་ཀྱི་སྲོག་སྙིང་ལ། །དབང་སྒྱུར་ཨོཌྜི་ཡ་ནའི་སློབ་དཔོན་ཆེའི། །དམ་ཚིག་ཉེར་དགོངས་ལས་བཞི་བསྒྲུབ་བོ་ཞེས། །ཞལ་གྱིས་འཆེས་ལ་རངས་པའི་མོས་པ་ཐོབ། །གསེར་སྐྱེམས་ལྷ་རྫས་ཟུང་འབྲེལ་མཆོད་སྤྲིན་ལ། །ཐུན་འཚམས་རྒྱ་ཡིས་ལེགས་འཁྱུད་དབོས་ཉ་བའི། །དམར་ཆའི་དགའ་བ་དང་པོའི་ཚེས་ཀྱི་ཉིན། །གྲུ་འཛིན་རི་བོའི་རྩེ་ནས་སྤེལ་བ་དགེ ། ཤིང་ཡོས་རྡོ་དགའ་ལྡན་རྣམ་རྒྱལ་ནས་ཀླུ་རྒྱལ་འཛིན་པ་ལ་གསུང་གི་འཕྲིན་ལན་གདེངས་ཅན་དགའ་བྱེད། གདེངས་ཅན་གཙུག་ན་ནོར་བུ་རབ་འཆང་པ། །འཛིན་པ་ལག་མང་ཀླུ་ཡི་རྒྱལ་པོ་ཆེས། །བླང་དོར་དངས་མཚོའི་ཟླ་ལྟར་གསུང་འཕྲིན་རྟེན། །ཉམས་མེད་སོན་པས་ཡིད་ཀྱི་སྤྲོ་དགའ་བརྟས། །སྤྱི་དང་སྒོས་ཀྱི་རིམ་འགྲོ་ཚུལ་བཞིན་བགྱིད། །སྲུང་མ་ཁྱོད་ཀྱིས་(༢༢༩ན)
བསྟན་འགྲོའི་ལེགས་ཚོགས་སྤེལ། །འཇིག་རྟེན་ཁམས་སུ་ཆར་ཆུ་དུས་འབབ་ཅིང་། །ལོ་ཏོག་སྦྲུམས་སོགས་བདེ་སྐྱིད་དཔལ་ལ་སྦྱོར། །མཐུན་རྫས་གསེར་ཐུམས་ཀླུ་སྨན་རིལ་བུ་དང་། །དར་སྔོན་ཡུག་བཅས་ནག་པ་ཟླ་བ་ཡི། །ཡར་ཚེས་དགེ་བར་བོད་ཡུལ་རྡོ་རྗེ་གདན། །ཕོ་བྲང་དམར་པོ་རི་ནས་བྲིས་པ་དགེ །རབ་བྱུང་བཅུ་གཅིག་པའི་སྲིན་པོ་ཞེས་པ་ཤིང་ཡོས་ཀྱི་ལོ་འཇམ་དབྱངས་བླ་མ་ས་ཆེན་ངག་དབང་བསོད་ནམས་དབང་ཕྱུག་དང་ཀུན་མཁྱེན་མཁྱེན་བརྩེའི་རིགས་དབོན་གནས་གསར་བ་ངག་དབང་བསོད་ནམས་ཀྱིས་ཐོག་དྲངས་སྣོད་ལྡན་མང་པོར་དགེ་སྡིངས་རྡོ་རྗེའི་ཕོ་བྲང་དུ་ཁྱབ་བདག་ཞྭ་ལུ་པ་རིན་ཆེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོས་ཚད་མ་བཞི་ལྡན་སློབ་བཤད་ཀྱི་སྨིན་གྲོལ་གདམས་པའི་སྒོ་འཕར་ཆེ་བའི་ཚེ་ས་སྐྱ་ཁྲི་ཆེན་ལ་ཕུལ་བའི་ཞུ་ཡིག་ཡབ་ཆོས་འཁོར་ལོ་སྒྱུར་བའི་གཏམ། །ཛ སྦུ དྭཱི བ བ རི ཤཱ ས ན ག མ ན སྱ ཤྲཱི ནཱ། ས དྲ ཏྣེ། པ རྦི ཏྲ། འཛམ་གླིང་བསྟན་འགྲོ་ཡོངས་ཀྱི་དཔལ་མགོན་དམ་པ་རིན་པོ་ཆེར་ཕུལ། ག ངྒཱ བྷི དུ ར ས མཱ དཱ དི ཏཱ ཛི གོ ནཽ ཥྞ ས རྦ ཀཱུ ལ མྤཱ ཏྱཾ། ར ཎྜ ཝཱ ཀྱ ཙ ཏུ ཪྶེ ན མཽཁ དྷ མཻ རྒ ཎ ཛ ས རཱ ཀ བྲ ཧྨཾ། གངྒཱའི་(ཛ་ཏིའི་སྡེབ་སྦྱོར་འཕགས་མའི་དབྱངས།)རྡུལ་སྙེད་ལས་འདས་རྒྱལ་རྣམས་ཀྱི། །ཡོན་ཏན་ཐུགས་བསྐྱེད་དྲོད་ཀྱིས་རིགས་ཀུན་བདག །གསེར་སྒོང་ཡོངས་སྨིན་སྡེ་བཞིའི་ཞལ་སྒོ་ཅན། །ཆོས་ཕུང་རྒྱ་མཚོའི་འབྱུང་(༢༢༩བ)
གནས་མེས་པོ་ཆེར། །ཉེ་བའི་ཆར་ཡང་ལྷ་སྔགས་ཡེ་ཤེས་ཀྱི། །གསང་གསུམ་མི་ཟད་རྒྱན་གྱིས་འཁོར་ལོའི་གར། །འཛམ་གླིང་སྐྱེ་རྒུའི་བསོད་ནམས་མཆོད་སྡོང་དུ། །གྱུར་འདི་ཡིད་ཀྱི་ཀུན་དགའ་བསྐྱེད་པའི་གསོས། །རིང་ནས་བདུད་བཞིའི་དམག་དཔུང་མཐར་བྱས་པའི། །མཚན་དཔེའི་ལང་ཚོ་བཀྲ་བའི་ལུས་བརྟས་པར། །སྙུན་འདྲི་བྱིས་བློར་ངེས་མོད་ཚུལ་བསྟན་ཙམ། །མེད་དེ་སྐལ་བཟང་ལུས་ཅན་ལེགས་བྱས་དཔྱིད། །འདི་ན་ཕྲ་མོའི་ན་ཚོད་ཟླ་ཆེས་ནས། །ཐོས་བསམ་འཕེལ་འགྲིབ་བྱེད་པའི་བློ་དམན་བདག །སྲིད་པའི་ཉེས་སྐྱོན་མཐོང་བཞིན་ཆོས་བརྒྱད་གདོན། །སྙིང་བཏབ་སྨྱོན་པའི་གར་མཁན་ལྟ་བུར་གནས། །འདི་གསལ་ལྷ་རིགས་ཚངས་པའི་རལ་ཀླུང་ནས། །འཇམ་དབྱངས་ཐུགས་རྗེའི་ཡན་ལག་བརྒྱད་ལྡན་ཆབ། །གངས་ཅན་བསྟན་པའི་ཁྱབ་འཇུག་ཞབས་བསིལ་དུ། །ཚད་མེད་ལུང་རྟོགས་རྒྱ་མཚོར་འཁྱིལ་བ་རྨད། །གཏན་བདེའི་ནོར་བུ་དོན་གཉེན་མགྲོན་པོ་རྣམས། །བརྩེ་ཆེན་བླ་མའི་ཐུགས་བཅུད་གྲུ་གཟིངས་ལ། །བརྟེན་ནས་ཐར་པའི་རིན་ཆེན་གླིང་འཁྲིད་པའི། །དེད་དཔོན་མཆོག་དེ་ཁྱོད་མིན་གཞན་ན་ཅི། །ཡང་སྲིད་ཉེར་ལྔར་འཇམ་པའི་རྡོ་རྗེ་ཡིས། །རྗེས་བཟུང་ལྔ་རིག་འཆད་ཉན་སྒྲ་བོ་ཆེ། །ས་སྐྱ་ལོ་ཙཱའི་བསྟན་པ་གངས་ཅན་ཀུན། །ཡོངས་ཁྱབ་སྤེལ་བར་བསམས་བཞིན་སྤྱོན་ནམ་སྙམ། །ཆོས་རྒྱལ་འཕགས་པའི་གདན་ཁྲི་པད་ཅན་སྟེང་། །ཞབས་རྡུལ་དམར་འོད་ལྷུངས་པའི་འདྲེན་པ་ཁྱོད། །ས་གསུམ་སྐྱེ་རྒུའི་ཚོགས་ཀྱི་(༢༣༠ན)
གཙུག་ཏོར་རྩེར། །རྡོ་རྗེ་སྐྱིལ་ཀྲུང་གཅིག་གིས་ཁྱབ་པ་འདྲ། །ཡབ་ཆོས་རྒྱལ་སྲིད་བོར་ནས་ཁྱིམ་བདག་གི །བརྟུལ་ཞུགས་ལྷུར་ལེན་མཛད་པ་འགའ་བྱུང་མོད། །གྲགས་པའི་མཚན་སྙན་ཆེད་དུ་བསྟན་སྤེལ་དོན། །བྱོན་ངེས་ངག་དབང་ཀུན་དགའ་བསོད་ནམས་ཞབས། །མགོན་དེས་ས་སྐྱའི་བླ་ཆེན་ཡབ་སྲས་ཀྱི། །རིང་ལུགས་གདུགས་དཀར་ཡུ་བ་ཉེར་གཏད་ཀྱང་། །ད་དུང་ལྷག་མར་ལུས་རྣམས་འཆད་ཉན་གྱིས། །སྤེལ་བའི་ཁུར་འདེགས་གང་གི་རེས་སུ་བབ། །ཧེ་རུ་ཀཿདངོས་བློ་གྲོས་རྒྱལ་མཚན་བར། །ཚད་མ་བཞི་ལྡན་སྙན་ནས་སྙན་བརྒྱུད་པ། །སློབ་བཤད་སྨིན་གྲོལ་གདམས་པའི་ཉིན་བྱེད་ཀྱིས། །བོད་ཡུལ་གདུལ་བྱའི་སྣང་བ་ཆེས་དཀར་མཛོད། ཁྱབ་བདག་བློ་གསལ་ཞལ་ལུང་བདུད་རྩིའི་བཅུད། །ངེས་པར་སྐལ་བཟང་མཐའ་དག་སྣོད་གྱུར་ཀྱང་། །ཀུན་མཁྱེན་མཁྱེན་བརྩེའི་དབང་ཕྱུག་རིགས་དབོན་ལ། །བུམ་པ་གང་འབྱོའི་ཚུལ་དུ་རྗེས་བཟུང་གསོལ། །གདོང་ལྔས་བཏེག་པའི་རིན་ཆེན་ཁྲི་སྟེང་དུ། །འོག་མིན་ཞིང་གི་གཙོ་བོའི་རྗེས་འགྲོ་བར། །བསྐལ་པ་མ་སྟོངས་དེ་སྲིད་གཡོ་མེད་དུ། །བཞུགས་ནས་ཆོས་འཁོར་རྒྱུན་ཆད་མེད་བསྐོར་མཛོད། །ཕལ་དང་དམ་པའི་ཁྱད་པར་གནམ་ས་ལྟར། །རང་བཞིན་བཟང་པོ་ཀུན་ལ་མི་གཏོང་མོད། །ཐུགས་ཀྱིས་ནམ་ཡང་མི་འདོར་མཉེས་གཤིན་པའི། །བཀའ་མཆིད་ཉི་ཟླའི་བགྲོད་རྗེས་རྐང་འཇོག་གསོལ། །ཞུ་ཡིག་པདྨའི་ཚལ་དུ་སྤྱན་རས་ཀྱི། །ར་ཡིག་གཉིས་པའི་འཕུར་ལྡིང་གཡོ་བའི་སླད། །ལྷ་གོས་མརྒད་(༢༣༠བ)
མདོག་ལ་རྒྱས་སྤྲས་ཏེ། །རྒྱལ་ཁབ་དམར་པོ་རི་ནས་ཕུལ་བ་དགེ །རབ་འབྱུང་བཅུ་གཅིག་པའི་སྲིན་པོ་ཞེས་པ་ཤིང་ཡོས་ཀྱི་ལོ་རིགས་ཀུན་ཁྱབ་བདག་མཁན་ཆེན་ཞ་ལུ་བ་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོས་ཤབ་དགེ་སྡིངས་རྡོ་རྗེའི་ཕོ་བྲང་དུ་རྗེ་བཙུན་ས་སྐྱ་པ་འཇམ་པའི་རྡོ་རྗེ་ངག་དབང་བསོད་ནམས་དབང་ཕྱུག་དང་། རྡོ་རྗེ་འཆང་འཀའ་འགྱུར་བའི་དབོན་གནས་གསར་པ་ངག་དབང་བསོད་ནམས་ཀྱིས་ཐོག་དྲངས་སྣོད་ལྡན་འགའ་ཞིག་ལ་གསུང་ངག་རིན་པོ་ཆེ་སློབ་བཤད་གནང་བའི་ཚེ་བརྟན་བཞུགས་ཀྱི་ཚུལ་དུ་ཕུལ་བ་སློབ་བཤད་བསྟན་པ་རྒྱས་པའི་ཉིན་བྱེད། མ ཧོ པ དྷྱ བཛྲ དྷ ར མཧཱ ཏི ཤུ བྷཾ། སཱ པྟ ཉྩ ས མྦུ ཊྱ སུ པ རྞ ཙ ཀྲ མ ཎྜ ལྱཻ རྩ ཏུ རཱི པ ས རེ ཤ བ རྟི བཱ། ཀཱ ཥ སྱ བ སྟྲ རྡྷི ས རི ཏྱ བཱ ར ཏོ ཀྵྨཱི མ ཏོ ཧཱི ཙ ས ཏུ ཏྟ རེ ཎ ཡཿ མཁན་ཆེན་རྡོ་རྗེ་འཛིན་པ་ཆེན་པོར་དགེ །ཁ་(སྡེབ་སྦྱོར་མཉམ་པའི་གིཏྟ་ལས་དབང་པོའི་རྒྱུད།)སྦྱོར་བདུན་ལྡན་གསེར་གྱི་འཁོར་ལོ་ཡིས། །དཀྱིལ་འཁོར་རྒྱ་མཚོའི་གླིང་བཞིར་མངའ་སྒྱུར་ཀྱང་། །ཐུན་མཚམས་གོས་ཀྱི་རྫུ་བག་ལ་འཆེལ་བ། །མཆོག་གི་དཔལ་ལྡན་བླ་མ་དམ་པ་གང་། (༢༣༡ན)
།ཡོངས་དག་སྣང་སྟོང་ཧེ་རུ་ཀཿཡི་སྐུ། །སྒྲིབ་འབྲས་སྙུན་རྡུལ་རྙོག་མས་སྦགས་པའི་གནས། །སྲིད་མིན་འཁྲུལ་ངོར་སྟོན་ཀྱང་དེང་གི་དུས། །སྒྲ་གཅན་ལས་གྲོལ་ཟླ་ལྟར་གསལ་བ་སྤྲོ། །འདི་ན་ཚེ་རབས་དཀར་མིན་གྱིས་བསྐྱེད་ནད། །ཡན་ལག་ཟུག་རྔུའི་ཚེར་བྱུང་ཚེར་བའི་རོ། །གཏན་བདེར་ཞེན་པའི་དོན་མེད་རྣམ་གཡེང་མལ། །དགེ་སྡིག་འདྲེས་མའི་གཉིད་ལ་རང་ཞེ་ཁྲེལ། །གཤེགས་བཞུགས་གང་དུ་སྐལ་བཟང་གདུལ་བྱ་ལ། །དབང་པོར་འཚམ་པའི་ཆོས་སྦྱིན་བདུད་རྩི་ཡིས། །ཐར་པའི་སྲོག་རྩ་འཛིན་པའི་འཕྲིན་ལས་འདིས། །ཉི་མའི་གཉེན་ལ་གདུང་སེམས་བགས་ཀྱིས་ཞ། །མཁས་རློམ་མང་པོས་མཐོང་ཐོས་མ་གྱུར་པ། །རྡོ་རྗེ་ཐེག་པའི་སྨིན་གྲོལ་ལམ་ཆེན་པོར། །ཤེས་ལྡན་ཕལ་ཆེར་དྲངས་ཚེ་འདི་ལས་གཞན། །ཨཽ་ཌྜི་ཡཱ་ནའི་གསང་མཛོད་ལོགས་སུ་མེད། །རང་ཤུལ་འཛིན་སླད་བྲན་གྱིས་སྨིག་རྒྱུ་ལ། །ཉལ་འགྲོར་སྒྲོ་བཏགས་མཆེད་མིན་རྒྱུད་སྡེ་བཞིའི། །ཕྲ་རགས་ཕྱག་བཞེས་གསོལ་བར་བྱང་གླིང་རྗེ། །སྐྱེ་བའི་རྣམ་པར་འཕྲུལ་ལ་སོམ་ཉི་བྲལ། །རིགས་གསུམ་སྒྱུ་འདྲའི་གར་མཁན་འཁོན་གྱི་གདུང་། །འཇམ་དཔལ་དབྱངས་དངོས་ས་སྐྱའི་རྗེ་བཙུན་དང་། །ཀུན་གཟིགས་མཁྱེན་བརྩེའི་དཔོན་སོགས་དམ་ཆོས་ཀྱི། །བདག་པོར་རང་ནོར་སྤྲོད་པའི་ཚུལ་ལ་མོས། །མཁའ་སྤྱོད་རྡོ་རྗེ་བཙུན་མོའི་ཞལ་གྱི་རླངས། །མ་ཉམས་རྣལ་འབྱོར་དབང་ཕྱུག་གདམས་པའི་གནད། །ལམ་དང་འབྲས་བུར་བཅས་པའི་གསུང་ངག་འདི། །གསང་ཆེན་(༢༣༡བ)
ཆོས་ཀྱི་སྙིང་པོའི་ཉིང་ཁུ་ཡིན། །ཚོགས་པར་ཚིག་ཙམ་བཤད་པའི་ན་ཡམ་གྱིས། །ཐུན་མོང་གདུལ་བྱ་ཚིམ་དང་མི་འདྲ་བ། །ཚད་མ་བཞི་ལྡན་སློབ་བཤད་ས་སྐྱ་པའི། །གདུང་བརྒྱུད་རིམ་བྱོན་རྣམས་ཀྱི་གཅེས་པའི་ནོར། །བདག་ཆེན་རྡོ་རྗེ་འཆང་གི་གཏད་པའི་བསྟན། །འཛིན་མཁས་ཀུན་སྤངས་ཆོས་རྗེའི་ཐུགས་ཀྱི་སྲས། །བློ་གསལ་རྒྱ་མཚོའི་རྗེས་འབྲངས་མ་གཏོགས་པ། །ས་བརྫུས་ཕལ་གྱིས་རྟོགས་པའི་སྐལ་བ་ཕྲ། །ཟབ་ཟབ་དཔྱད་ན་ཁུངས་མེད་ཕྱག་རྒྱའི་སྒོམ། །ངལ་ངལ་སྦྱངས་མཐར་སྒྱིད་སྒྱུར་རྟོག་གེའི་ཆོས། །སྙན་སྙན་རང་གཞན་བློ་བྲིད་ཐ་སྙད་གཞུང་། །འགྲིག་འགྲིག་ཕལ་གྱི་དོ་ཟླ་ག་ལ་ཡིན། །མགོན་ཁྱོད་བསྟན་འགྲོར་སྨིན་པ་ཁོ་ནའི་ལས། །མཛད་ཀྱང་ཁྱད་པར་ཡང་དག་དོན་གནས་པ། །སྙན་བརྒྱུད་མ་དང་མཁའ་འགྲོའི་ཞལ་གྱི་ལུང་། །གསུངས་ཚེ་དཔལ་ལྡན་ཆོས་སྐྱོང་གཟུགས་གཞན་བསྒྱུར། །མི་འགྱུར་རྡོ་རྗེས་མཚན་པའི་རེ་ཁཱའི་སྟེང་། །མི་གཡོ་ཞབས་ཟུང་སྐྱིལ་མོ་ཀྲུང་བཅས་ནས། །མི་ཡི་སེང་གེའི་བསྟན་པ་སྲིད་མཐའི་བར། །མི་འཇིགས་མཁྱེན་བརྩེ་ནུས་པས་སྤེལ་ཆེད་བཞུགས། །དགྱེས་མཛད་རྡོ་རྗེ་ཁྲག་འཐུང་དམ་ཚིག་བཞིན། །མ་ཧཱ་ཀཱ་ལའི་སྡེ་དཔོན་གུར་གྱི་མགོན། །སྟོབས་འཕྲོག་གདོང་བཞི་པུ་ཏྲ་བེག་ཙེ་ཡིས། །བཞེད་སྐོངས་ལྷ་མིན་གདོན་གྱི་དཔུང་རྣམས་ཆོམས། །རིགས་བྱེད་མ་དང་ཚོགས་བདག་འདོད་རྒྱལ་གྱིས། །སྲིད་ཞིའི་ཚེ་དང་དཔལ་འབྱོར་དབང་ཐང་ཆར། །ཕོབ་ལ་རང་བསྟན་ཁའུ་བྲག་རྫོང་པའི། །བཤད་ཉན་དཔག་བསམ་སྙེ་མ་གཡུར་ཟ་མཛོད། །(༢༣༢ན)
རིང་ཞིང་ཡངས་པར་བརྐྱང་བའི་ལྗགས་བཟང་ལས། །བཀའ་མཆིད་ཆོས་ཀྱི་དགའ་སྟོན་སྙན་པའི་སྒྲ། །རྣ་བ་བདུད་རྩིར་བྱེད་པ་སྐལ་པའི་མཐའ། །རྫོགས་མིན་དེ་སྲིད་ཆད་པ་མེད་པར་གསོལ། །གར་དབང་ཚེ་དཔག་མེད་པའི་མགོན་པོ་རུ། །རྟེན་འབྱུང་སྒོ་བརྒྱ་བསྒྲིག་པ་དངོས་པོའི་དཔྱ། །ཆོམ་རྐུན་བསྲུང་བའི་ཁྲོ་ཤར་ཐུན་མཚམས་རྒྱས། །ལེགས་སྤྲས་ས་ག་ཟླ་བའི་ཡར་ངོར་དགེ ། ཤིང་ཡོས་བསམ་ཡས་མདོ་སྡེ་མཆོད་པའི་དུས་སྟོན་འབུལ་བར་སྦྱར་ར་དངོས་གྲུབ་བཏང་བའི་ཚེ་སྤྲུལ་པའི་ཆོས་རྒྱལ་ཆེན་པོར་འཕྲིན་དུ་གསོལ་བ་དགྱེས་ཞལ་སྟོན་ཟླ་ལྟར་ངོམས། བདེ་ལྡན་གར་དབང་ཐུགས་རྗེའི་འོད་ཟེར་སྣེ། སིནྡྷུའི་ཆུ་གཏེར་འདབ་བརྒྱར་ཟུག་པ་ལས། །རྫུས་སྐྱེས་པདྨ་ཐོད་འཕྲེང་སྲིད་གསུམ་ན། །བརྟུལ་ཞུགས་ཟླ་བྲལ་རིག་སྔགས་འཆང་བའི་རྗེ། །མགོན་དེས་ལྷ་སྲས་གཙོར་གྱུར་དམག་གི་དཔུང་། །ཡོངས་མངགས་ཧོར་གྱི་སྒོམ་གྲའི་ཀ་ཅའི་རྗེས། །ཉེ་བར་འབྲངས་ཚེ་ཟན་གཡང་ལྷུན་གྲུབ་ཀྱི། །སྲུང་མར་མངའ་གསོལ་ལི་བྱིན་ཧ་ར་ཆེ། །དྲི་མེད་དག་པའི་སྤྱན་རས་བཙའ་བའི་རྟེན། །ཀུན་བཟང་མཆོད་སྤྲིན་ཐོར་གསལ་སྔ་མཁོ་ལྟར། །རྨད་བྱུང་མདོ་སྡེ་མཆོད་པའི་དུས་སྤེལ་བར། །དགྱེས་བཞིན་རྡུལ་བྲལ་སྟོན་གྱི་ཟླ་འདྲར་དངོམས། །གངས་ཅན་གཏན་བདེ་འཕྲོག་ནུས་འདོད་ལྷའི་མདས། །སྙིང་ཟིན་ཕྱོགས་བཞི་མཚམས་ནས་ལངས་པའི་དགྲ ། སྟོབས་ལྡན་གང་དུ་འདུག་ཀྱང་མངག་གཞུག་བཅས། །འཇིག་(༢༣༢བ)
རྟེན་ཕྱི་མའི་ལྟད་མོར་མྱུར་དུ་ཁྲིད། །མང་བཀུར་རྒྱལ་ཁབ་ཁྲིམས་གཉིས་གསེར་གྱི་ཤིང་། །མཆོག་དམན་ཡོངས་ཀྱི་གཉའ་བ་མནན་པའི་ལྗིད། །རྔུལ་ཆུ་གངྒཱའི་རྒྱུན་བཞིན་ཆད་མེད་དུ། །འབབ་པའི་འཕྲིན་ལས་རྣམ་བཞི་ལྷུན་གྱིས་སྒྲུབས། །མི་བསྲུན་དྲེགས་པའི་སྡེ་དཔོན་ཚུལ་བཟུང་བ། །གཏུམ་དྲག་རྩལ་གྱིས་བདུད་སྙིང་འདར་ནུས་ཀྱང་། །དཔལ་ཆེན་ཡེ་ཤེས་སྒྱུ་འཕྲུལ་དྲ་བའི་གར། །གཞན་དོན་བསྒྱུར་ལས་ཆོས་ཀྱི་དབྱིངས་སུ་ཞི། །སྒྲོན་དར་ཟླ་བ་ཐགས་སུ་ཉེར་བཏགས་པ། །འཕྲིན་གསོལ་ཐུན་མཚམས་རྒྱས་སྤྲས་ཡོངས་བཏེག་ནས། །རྟ་ལྗང་གླིང་ཁྱིམ་ཞུགས་པའི་དཀར་ཆའི་ཚེས། །ཕོ་བྲང་དམར་པོ་རི་ཡི་རྩེ་ནས་དགེ ། སྲིན་པོའི་ལོ་ཟན་གཡང་དུ་མདོ་སྡེའི་དུས་སྟོན་གྱི་ཐོག་ལེགས་སྐྱེས་འབུལ་བར་སྦྱར་ར་དངོས་གྲུབ་བཏང་བའི་ཚེ་ལས་མཁན་གནོད་སྦྱིན་ཆེན་པོ་ཙེའུ་དམར་པོར་འཕྲིན་དུ་གསོལ་བ་གཏུམ་དྲག་དཔའ་བོའི་བཞད་སྒྲ། ལི་ཡུལ་ཚངས་སྤྱོད་རྒྱུད་འཁྲུག་དམོད་པའི་འབྲས། །འབར་བ་སྤུན་བདུན་སྲིད་གསུམ་འཇིག་རྟེན་ན། །རྒྱུ་དང་མི་རྒྱུའི་སྲོག་གི་བདག་གྱུར་གཙོ། །སྡེ་བརྒྱད་ཡོངས་ཀྱི་དམག་དཔོན་ཙེ་དམར་བ། །ཨཽཌྜི་ཡཱ་ནའི་སངས་རྒྱས་གཉིས་པ་དེས། །གསེར་གྱི་རྡོ་རྗེ་རི་མོ་གཙུག་ཏུ་བཀོད། །རྩ་བརྒྱད་སྟོང་སྦྱར་བཅུད་ཀྱིས་ཚིམ་བྱས་ནས། །རྒྱལ་བསྟན་མེལ་ཚེར་མངའ་གསོལ་ཡང་ལེ་བེར། །ཆེན་པོར་རློམ་ལ་ལས་དབང་དམ་སྲི་རུ། །གྱུར་སོགས་རྒྱ་བོད་བདུད་རིགས་འགོང་པོ་ཡིས། །འགྲོ་མང་སེམས་བསྒྱུར་སྐྱེ་རྒུའི་བདེ་འཕྲོག་པ། །ལུས་མེད་འཕྲུལ་དཔུང་འཇོམས་པའི་རྩལ་ཤུགས་(༢༣༣ན)
བསྐྱེད། །སད་སེར་ནད་རིམས་མུ་གེ་ལྟས་ངན་འབྲས། །སྟོབས་ལྡན་དཔའ་བོ་ཁྱོད་ཀྱིས་བཟློག་ནུས་མོད། །གལ་ཏེ་སེམས་ཅན་ལས་ཀྱི་མཐུ་བཙན་ན། །གཞིལ་ཐབས་བླང་དོར་ལུང་དུ་སྟོན་པར་རིགས། །སྡེ་སྣོད་གསུམ་ལས་མདོ་སྡེ་ལྷ་དང་མིའི། །འཛད་མེད་ནམ་མཁའ་མཛོད་ཀྱི་མཆོད་སྤྲིན་ཐོག །སྔོན་བཞིན་ཐུགས་དམ་སྐོང་བའི་སྤྱན་གཟིགས་རྫས། །ཏིང་འཛིན་སྔགས་དང་ཕྱག་རྒྱས་རྒྱ་ཆེར་སྤེལ། །གངས་ཅན་རྒྱལ་ཁབ་གསེར་གྱི་ཏོག་མཛེས་འོད། །འབར་བ་ཉི་མའི་དངོས་བརྒྱ་འཛིན་པའི་གཟིས། །འཛམ་བུའི་ཤིང་གིས་ལེགས་མཚན་ཡུལ་ཁམས་ཀུན། །ཟིལ་གྱིས་གནོན་པའི་འཕྲིན་ལས་མ་ལུས་སྒྲུབས། །རིང་པོར་བརྐྱང་བ་བཀྲ་ཤིས་དཀར་པོའི་དར། །ལྷ་ཁྱོད་སྙན་གྱི་རྒྱ་མཚོར་རབ་སྤུད་དེ། །ཆུ་ཤེལ་དབང་པོས་ས་ག་དང་འགྲོགས་པའི། །སྔ་མའི་ཕྱོགས་ཀྱི་དགའ་བ་གསུམ་པར་དགེ ། ཤིང་ཡོས་ཁྲ་འབྲུག་ཚངས་པ་ཆེན་པོས་རིམ་གྲོའི་བསྐུལ་མ་དང་སྦྲགས་སྦུག་ཆོལ་དགོས་ཚུལ་བྱུང་བ་ལྟར་སྤྱན་གཟིགས་ཚན་གྲངས་དང་བཅས་འབུལ་བར་ཡར་འབྲོག་སྒྲོག་མཁར་བ་བཏང་སྐབས་རྡོ་རྗེའི་གསུང་ལན་སྭསྟིའི་སྒྲ་དབྱངས། སྭ་སྟིའི་སྒྲ་ལས་དྲངས་པའི་དབྱངས་སྙན་པོས། །ལྷ་རྒྱལ་བཀྲ་ཤིས་མགྲིན་ནས་བླངས་པའི་གླུ །བདེ་ལེགས་མེ་ཏོག་ཆར་དང་ལྷན་ཅིག་པར། །ལེན་པར་ཚངས་པའི་སྒྲ་འཛིན་ཅུང་ཟད་གསོན། །གསུང་འཕྲིན་རྡོ་རྗེའི་ཚིག་གི་འདབ་བརྒྱ་པ། །བླང་དོར་ལུང་དུ་སྟོན་པའི་ཟེའུ་འབྲུ། །དོན་བཟང་སྙན་པའི་སྦྲང་རྩི་ཡོངས་(༢༣༣བ)
འཇག་ཚེ། །ཡིད་དབང་ཀུཎྜའི་དགའ་སྟོན་བཞད་ལ་བྲེལ། །བདེ་ལྡན་ཞིང་གི་མགོན་པོ་སྣང་མཐའ་ཡས། །བརྟུལ་ཞུགས་སྤྱོད་པ་རིག་སྔགས་འཆང་བའི་ཚུལ། །འཛིན་མཛད་པདྨ་ཀཱ་རའི་ཕོ་ཉ་བ། །སྲོག་བདག་ལྷ་ཡི་སྡེ་དཔོན་ཉེ་བར་དགོངས། །གངས་ཀྱིས་ཡོངས་བསྐོར་སཱ་ལའི་སྨན་ལྗོངས་འདིར། །ཀུན་མཁྱེན་ཤཱཀྱའི་བསྟན་པ་དཔག་བསམ་ལྗོན། །དར་བའི་ཕན་བདེའི་གྲིབ་མར་ལུས་ཅན་རྣམས། །སིམ་པའི་ཚོར་བ་མྱོང་བའི་ལས་སྒྲུབས་ཤིག །ཐུགས་དམ་སྐོང་བྱེད་སྙན་པའི་རོལ་མོ་སོགས། །མཐུན་རྫས་གྲངས་གསལ་སྔགས་རྒྱས་ཉེར་བརླབས་ནས། །འཛད་མེད་ནམ་མཁའ་མཛོད་ཀྱི་སྒོ་འབྱེད་ན། །དགྱེས་པའི་སྤྱན་གྱི་རས་མ་ལྷུང་ཞིག་གུ །སྒྲིབ་གཉིས་དེས་བསྐྱེད་ནད་གདོན་ཟུག་རྔུ་ཞི། །ལུང་རྟོགས་ཚེ་དཔལ་སྲིད་ཞིའི་ཡོན་ཏན་རྒྱས། །མཆོག་ཐུན་དངོས་གྲུབ་མཐའ་དག་དབང་དུ་སྡུས། །འཁོར་འདས་ཉེས་བརྒྱའི་དགྲ་དཔུང་དྲག་པོས་ཆོམས། །ཡར་ལ་དཀོན་ཅོག་མཆོད་སོགས་རྟེན་འབྲེལ་སྒོ །བསྒྲིག་ཐབས་བླང་དོར་མཚོ་ལ་བྱེད་ལྟ་བུར། །གང་གསལ་ལེ་ལོའི་སྒྲོག་ཏུ་མ་ཚུད་པར། །བརྩོན་པའི་ཐང་ལ་དཀྱུས་ཐོག་གཅོད་པར་འདུན། །རྒྱལ་བློན་སྙན་ཤལ་མཛེས་བྱེད་དར་དཀར་པོ། །ཟུང་འཇུག་རྟེན་ལྡན་སྣྲོན་ཟླའི་ཡར་ཚེས་ལ། །ས་ཡི་ཐིག་ལེ་གཡོ་རུ་ཁྲ་འབྲུག་གི །གནས་སྲུང་ཆེན་པོའི་འདུན་སར་སྤེལ་བ་དགེ །ཤིང་ཡོས་ཧོར་ཟླ་དྲུག་པའི་ཡར་(༢༣༤ན)
ཚེས་ལ་ཚངས་པ་དུང་ཐོད་ཅན་གྱི་དྲུང་དུ་སྤྱན་གཟིགས་ཚོགས་ཀྱི་འཁོར་ལོ་དང་བཅས་འཇིག་རྟེན་བདེ་སྡུག་གི་ལུང་བསྟན་ཞུ་བར་འཕྱོས་ཆང་ཁྱིམ་པ་ངག་དབང་མཁྱེན་བརྩེ་བཏང་སྐབས་གསོལ་བའི་འཕྲིན་ཡིག་ལྷ་ཆེན་སྙན་གྱི་སྒོ་འབྱེད། རྒྱལ་ཀུན་མཁྱེན་བརྩེ་ནུས་མཐུ་བཞུ་བླུགས་ཁམས། །མཚོ་སྐྱེས་སྤྲུལ་སྐུར་ཤར་བ་པདྨ་འབྱུང་། །སྲིད་གསུམ་འགྲན་ཟླ་བྲལ་བའི་རིག་སྔགས་འཆང་། །ཞབས་རྡུལ་དྲེགས་པའི་གཙུག་ཏོར་རྩེར་མཛེས་བསྔགས། །སྲོག་བདག་གོང་གི་སྡེ་དཔོན་ཚངས་པ་ཆེ། །སྙན་གྱི་དབང་པོ་གཏོད་ལ་དྲི་བའི་ལན། །ལྷ་མིག་དག་པའི་སྤྱན་གྱིས་འཇིག་རྟེན་ཁམས། །མྱུལ་ནས་སྦ་བསྲི་མེད་པར་དྲང་པོར་སྩོལ། །གངས་ཅན་སྨན་ལྗོངས་ཡུལ་འདིར་སད་སེར་ཐན། །མི་ཕྱུགས་སྣ་ཚོགས་ནད་རིགས་མཐའ་དབུས་ཀྱི། །མ་རུངས་འབྱུང་པོ་འཁྲུགས་པའི་ལྟས་ངན་འཕྲུལ། །མང་དག་ཤར་འདིར་འབྲས་བུ་ཅི་ཞིག་འབྱུང་། །སྟོད་སྨད་ལྷོ་བྱང་རྩོད་པའི་འུར་ལངས་སོགས། །དུས་ཀྱི་ཆད་པ་ཕྱིར་ལྡོག་འགྲོ་བ་རྣམས། །བདེར་འགོད་བླང་དོར་ལུང་བསྟན་ཞུ་བའི་ཚིག །ཐོར་གསལ་ཞིབ་ཆ་ཕོ་ཉའི་ངག་ནས་གསལ། །སྤྱན་གཟིགས་ཁྲོ་ཤར་ཐུན་མཚམས་མི་འགྱུར་རྒྱས། །ཡོངས་བཏབ་ཆུ་སྟོད་ཟླ་བའི་ཡར་ཚེས་ལ། །ཏིང་འཛིན་སྔགས་རྒྱས་ཉེར་བརླབས་མཆོད་པའི་སྤྲིན། །རྒྱལ་ཁབ་ལྟེ་བ་དམར་པོ་རི་ནས་སྤེལ། །ཤིང་ཡོས་གོང་ནས་སྟག་ལུང་སྐུ་སྐྱེ་དང་བློ་བཟང་དགེ་སློང་གིས་གཙོས་པའི་གསེར་ཡིག་པ་བཀའ་(༢༣༤བ)
ཤོག་རྒྱུན་གྱི་གནང་སྦྱིན་ཐོག་ཁམས་ཕྱོགས་མི་བདེ་བའི་རྩ་རྐྱེན་མཁའ་འགྲོ་ཕྱིར་དབྱུང་བར་ལེགས་སོའི་འདོག་པ་གྱ་ནོམ་པ་སྩལ་བའི་ཚེ་ཞུ་ཡིག་རྟེན་པ་རས་འབུལ་བར་ཆག་མིག་མཁན་ཆེན་རིན་ཆེན་བཀྲ་ཤིས་དང་གནས་གསར་བ་མཁྱེན་རབ་རྣམ་རྒྱལ་བཏང་བའི་དུས་ཕུལ་བ་འགྲོ་ཀུན་གཙུག་ཏོར་འཇོག་པའི་འཁོར་ལོའི་རི་མོ། པ ཏྒུ ལ སྶཽ ནི མ ཙྩཱ ཀྲི ཡ ལྤཱ རྴ ཛ མྦཱུ དི ཤེ ནྲ ཤྴི རོ ད སྱ ཁཱ ན ཏྱ ཀཿ རེ ཁ ཁོ བཱ ལི ཀོ བཱ ཧུ ནཱ བྷཱ བ ཤཱ ནྟེ རྦྷ བ སྶ རྦ ཏ སྟོ ཡ ཏོ མཱུ ལ ཏཱ། ཞབས་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)པད་མཚན་བཟང་འཁོར་ལོའི་མུ་ཁྱུད་རྩིབས། །འཛམ་གླིང་ཡིད་ཅན་སྤྱི་བོར་ཤར་བའི་བར། །རི་མོ་གནམ་གྱི་ཤེ་མོང་དཔུང་པ་ཡིས། །སྲིད་ཞིའི་དངོས་པོ་ཀུན་གྱིས་བསྟོད་བྱའི་དྲུང་། །འཇམ་མགོན་སྐྱེ་རྒུར་རྗེས་ཆགས་མེ་ལོང་ངོས། །ཚངས་པ་མི་ཡི་གཟུགས་སུ་ཡོངས་ཤར་དེར། །སྤོས་བསྲེགས་མེ་ཏོག་འཐོར་བ་སྔོན་སོང་བའི། །བཅོས་མིན་དང་བའི་ཡིད་ཀྱིས་འདི་སྐད་གསོལ། །གསེར་འབྲུག་སྡེར་ལྔ་འཁྱིལ་བས་གྱེན་བཏེག་(༢༣༥ན)
པའི། །གནམ་གྱི་ཤེ་མོང་རི་མོ་རབ་བཀྲ་བ། །བཀའ་ཤོག་དབུགས་དབྱུང་ཆེད་དུ་བསྔགས་པའི་ཚིག །སྤེལ་ལེགས་སྙན་འགྱུར་པི་ཝང་རྗེས་འགྲོའི་རྟེན། །དངུལ་གྱི་ཡོལ་གོ་བཞི་དང་བཟང་གོས་ཡུག །ཉེར་བཞི་བཀྲས་བཏགས་ཉིན་མོ་བདེ་ལེགས་ལྔ། །ནན་ཆིང་ཁ་བཏགས་བཞི་བཅུ་གསེར་གྱི་སྒ །ཆ་ཚང་ཉམས་མེད་སོན་པས་སྤྲོ་བ་འཕེལ། །ངེས་པར་མཚན་དང་དཔེ་བྱད་རྣམ་བཀྲའི་སྐུ། །མ་དག་འགྲོ་བའི་དབང་པོར་བག་ཞ་ཡང་། །གཟི་བྱིན་ཉི་མ་འབུམ་ལ་རབ་འཁུ་བས། །ཅི་སྟེ་བརྒྱ་བྱིན་ཡིན་སྙམ་འཕྱང་མོ་ཉུག །ཡོངས་ཀྱི་རྣར་འཇེབས་དྲུག་ཅུའི་དབྱངས་ལྡན་གསུང་། །ཡིད་ལ་བདེ་བ་སྟེར་བའི་ཟིལ་དངར་ཅན། །ཕས་རྒོལ་ཀླད་པ་འགེམས་ལ་དྲག་པོའི་སྒྲ །སྒྲོགས་ཚེ་ལག་ན་རྡོ་རྗེ་གཟུགས་གཞན་བཞིན། །ཤེས་བྱར་སྲིད་དོ་ཅོག་གི་གནས་ལུགས་ཟླ། །དྲི་བྲལ་ཐུགས་མཚོར་ལེགས་ཤར་ཀུན་མཁྱེན་པས། །འཁོར་འདས་ཡོངས་ཀྱི་བྱེད་པོ་ཁྱོད་ཉིད་ལས། །ལོགས་ནས་བསྐལ་བརྒྱར་བཙལ་ཀྱང་དམིགས་སུ་མེད། །དེ་ཕྱིར་སྙུན་དྲི་གསོལ་བ་བྱིས་པའི་བློ། །ཚུར་མཐོང་ཙམ་མོད་འོན་ཏེ་ཐུན་མོང་ངོར། །མང་བཀུར་རྒྱལ་ཁབ་གསེར་ཁྲིར་གཡོ་མེད་གཏམ། །རྒྱུད་མངས་གླུ་ཡིས་ཐོས་འཛིན་དགའ་སྟོན་བཞིན། །ལྷ་གཅིག་བཀའ་དྲིན་བསིལ་བའི་གྲིབ་མ་ལ། །སྤྱོད་པའི་སྡེ་སྣོད་གསུམ་པ་ཀློག་པ་མཁན། །རིས་མེད་སེམས་ཅན་བདེ་བར་སྨིན་པའི་(༢༣༥བ)
ཡིད། །རྡུལ་བྲལ་སྟོན་ཟླ་དེས་ཀྱང་མི་བསྒྲུན་ཙམ། །སྐྱེ་རྒུ་བརྒྱད་ཁྲིའི་ཚེ་དུས་འཁོར་ལོ་བཞིས། །སྒྱུར་བར་ཆོས་ཉིད་ཡིན་པར་མཚར་དུ་ཅི། །རྩོད་ལྡན་བརྒྱ་པའི་ལོ་ལ་ཀུན་བཟོད་མཐའ། །སྟོབས་ཀྱི་དཔུང་པས་འཆིང་འདི་གཅིག་ཏུ་རྨད། །བཙན་པོའི་ལས་ཤུགས་གྲངས་སྙེད་ཚངས་པ་ཡིས། །ཚེ་རིང་གནམ་ངོས་བྲིས་པ་ཟད་མིན་པར། །མངའ་ཐང་གཞོམ་པར་འདོད་པའི་སྐྱེ་བོ་དང་། །དབང་ཕྱུག་སྨྱོན་པའི་བརྟུལ་ཞུགས་འཛིན་ལ་སྡང་། །ལོག་སྤྱོད་ལམ་ལས་ལྡོག་ཕྱིར་བྱམས་པའི་ཐུགས། །མི་བཟད་རྡོ་རྗེ་ཐོས་པའི་དཔའ་རྟགས་ཀྱི། །དཔུང་ཚོགས་ཡན་ལག་རྣམ་བཞིའི་དབང་ཕྱུག་བར། །མིག་གསུམ་པ་དེས་འགྲན་ཀྱང་ཅུང་ཟད་ངལ། །བརླང་སྤྱོད་གཉའ་ནས་གནོན་པའི་ཁྲིམས་ཀྱི་རྒྱུད། །སྙེམས་པའི་གནམ་རུ་མངོན་སུམ་འགུགས་ནའང་། །ཉམ་ཆུང་མི་འདོར་བརྩེ་བའི་ཆུས་བརླན་པའི། །ཕན་བདེའི་གསེར་གྱི་སྙེ་མ་གཡུར་དུ་ཟ། །ལེགས་བྱས་ཕུང་པོར་སྤུངས་པ་སྲིད་པའི་རྩེར། །སྙེངས་ཀྱང་ཆོག་ཤེས་མི་བྱར་གསུང་རབ་ལས། །བཤད་ཕྱིར་སྐྱིལ་མོ་ཀྲུང་གཅིག་བསྐལ་མཐའི་བར། །བཅའ་ཆེད་ཚོགས་ཆེན་བསོད་ནམས་གསོག་པར་བསྐུལ། །ང་ལས་ནུས་སོགས་སྔོན་བྱོན་འཁོར་སྒྱུར་དང་། །མཚུངས་པའི་ཆར་སྲིད་འདབ་སྟོང་བཞད་པའི་ཁམས། །རྡོ་རྗེའི་དངོས་པོར་མཆོག་གསུམ་ཐུགས་རྗེ་ཡིས། །བརླབ་པར་སྨོན་པའི་འདུན་པ་གཅིག་ཏུ་སྤྲོ། །བདེ་ལྡན་ཞིང་གི་མགོན་པོ་འོད་མཐའ་ཡས། །འཆི་(༢༣༦ན)
མེད་བདུད་རྩིའི་བུམ་པས་ལྷ་ཁྱོད་གཙུག །དབང་བསྐུར་སྲོག་གི་ཀ་བ་ཉེར་བཙུགས་ནས། །བསྐལ་བརྒྱར་སྐུ་ཚེའི་གཡུང་དྲུང་འཁྱིལ་བར་ཤོག །བྱམས་པའི་འདྲེན་བྱེད་གཟིགས་པ་ལྷོད་མེད་བརྡར། །གནམ་གྱི་ལུང་བཟང་བཀའ་ཤོག་གསེར་ཡིག་རྒྱུན། །མ་ཕམ་དབུས་འགྱུར་འཆང་དུ་འབྱོན་མིན་པར། །ཉི་ཟླའི་བགྲོད་པ་ཇི་བཞིན་ཆད་མེད་སྩོལ། །མཆིང་གསོལ་རི་མོར་ལྷ་མིག་དག་པའི་སྤྱན། །དཀྱུས་རིང་ཟུར་ཙམ་ལྷུང་བའི་འབབ་རྟེན་དུ། །དཀར་དམར་རིན་ཆེན་འཕྲེང་བ་སྣམ་ཕྲུག་སོགས། །བདོག་པའི་སྐྱེས་ལ་རྟགས་ཀྱི་ལང་ཚོ་བཀྲ །ལྷབ་ལྷུབ་གོས་ལྗང་གཡོ་བ་ཡོས་ཀྱི་ལོ། །ཟླ་བ་གྲོ་བཞིན་གྱིས་ཉའི་ཡར་ཚེས་ལ། །དབང་ཕྱོགས་འདུན་སར་དགའ་བའི་བཞིན་བཏེག་ནས། །ཕུལ་བས་ཕུན་ཚོགས་དགའ་སྟོན་རྒྱས་གྱུར་ཅིག །ཤིང་ཡོས་ཧོར་ཟླ་བརྒྱད་པའི་ལྷ་ཚེས་ཐོག་བསམ་ཡས་སུ་དྲེགས་པའི་སྡེ་དཔོན་ཆོས་རྒྱལ་ལི་བྱིན་ཧ་རར་སྤྱན་གཟིགས་ཚོགས་འཁོར་དང་བཅས་དོགས་སེལ་གྱི་ལུང་བསྟན་ཞུ་བར་ཆོས་རྗེ་ཟིན་གནོན་རྡོ་རྗེ་རྫོང་བདའ་བྱས་སྐབས་འཕྲིན་དུ་གསོལ་བ་དོན་གཉིས་ཡོངས་འདུའི་ལྗོན་པ། བྷ་ཏ་ཧོར་གྱི་སྒོམ་གྲའི་ཀ་ཅ་རྣམས། །ལྷ་སྲས་བློན་པོར་བཅས་པའི་དམག་དཔུང་གིས། །དྲངས་པའི་རྗེས་འབྲངས་ལི་བྱིན་ཧ་ར་ཞེས། །སྡེ་བརྒྱད་ཡོངས་ཀྱི་སྡེ་དཔོན་ཆེན་པོ་ཀྱེ། །ཟ་ཧོར་རིགས་ལ་ཆགས་པའི་དགྲ་ལྷ་ཆེ། །ཕ་མེས་བརྒྱུད་ནས་བསྟེན་པའི་སྲུང་མ་མཆོག །ཕྱི་རོལ་རང་རྒྱུད་དྲེགས་པའི་གཟུགས་(༢༣༦བ)
འཛིན་ཡང་། །དོན་དུ་སེམས་ཉིད་གཅིག་པུའི་རྣམ་འཕྲུལ་ཙམ། །མངལ་གྱི་དྲི་བྲལ་མཚོ་སྐྱེས་རྡོ་རྗེ་ཞེས། །སངས་རྒྱས་གཉིས་པ་གང་དེའི་དམ་ཚིག་བཞིན། །གངས་ཅན་བསྟན་དང་འགྲོ་བའི་བདེ་སྐྱིད་ཀུན། །བླ་ནས་བླར་བཏེག་དབྱར་མཚོའི་རྗེས་འགྲོར་སྤེལ། །བན་བོན་མཐུ་བྱེད་སྐྱེ་བོའི་དུག་མཚོན་སོགས། །སྔགས་འཆང་བདག་ལ་སྡོ་བའི་དགྲ་བགེགས་རྣམས། །ཟླ་ཚེས་ལྟར་དཀར་མཆེ་བ་རྣོན་པོའི་རྩེར། །མི་རྟག་ལམ་དུ་བཀོད་ལ་རྡུལ་དུ་རློག །གནས་སྐབས་ཚེ་དཔལ་དབང་ཕྱུག་ཡོངས་འདུའི་ལྗོན། །ཡལ་འདབ་ཕང་ཕུང་རྒས་པའི་རྩེ་མོ་རུ། །གཏན་མདུན་ཐོས་བསམ་སྒོམ་པའི་ཆོས་ཀྱི་འབྲས། །ཡངས་སྨིན་རོ་བརྒྱ་བདའ་བའི་འཕྲིན་ལས་མཛོད། །ཀུན་རྟོག་སེམས་ཀྱི་འཆར་སྒོར་དཔྱད་མི་བཟོད། །མ་རྟོགས་ལྐོག་གྱུར་དྲི་བ་ཕོ་ཉ་ཡི། །གཡར་ལམ་ནས་འབུལ་ཐེ་ཚོམ་ཉེར་གཅོད་པའི། །ལུང་བསྟན་རྡོ་རྗེའི་ཚིག་གི་གསང་བ་སྒྲོགས། །སྙན་ཤལ་གསེར་སྐྱེམས་ལ་སོགས་ཐོར་གསལ་བཞིན། །ལྷ་ཁྱོད་ཐུགས་དམ་གཉན་པོ་སྐོང་བའི་ཆེད། །ཧོར་ཟླ་བརྒྱད་པའི་དཀར་ཆའི་ཚེས་བཟང་བར། །བསྟན་སྲུང་ཆོས་རྒྱལ་ཆེན་པོའི་སྤྱན་སྔར་དགེ ། སྲིན་པོའི་ལོ་ཁྲུམས་ཟླའི་ལྷ་ཚེས་ཐོག་ཟན་གཡང་སྲུང་མ་ཙེའུ་དམར་པོར་ཐུན་རྫས་ཚོགས་མཆོད་དང་བཅས་དྲི་སྨད་ཀྱི་རྒྱུ་མཚན་ཞུ་བར་གནུབས་བན་ཟིལ་གནོན་རྡོ་རྗེ་བཏང་དུས་འཕྲིན་གསོལ་དམ་ཚིག་གཅིག་པའི་ལྷ་སྙན་ཡོངས་བསྐུལ། སྔོན་ནས་གཡའ་དམ་གཅིག་པ་རིགས་ཀྱི་ལྷ། །གནོད་སྦྱིན་བཤན་པའི་གཙོ་བོ་ཙེའུ་དམར། །(༢༣༧ན)
སྣང་སྲིད་དྲེགས་པའི་དཔུང་གི་ཁ་ལོ་པ། །ཐུགས་དམ་བསྐུལ་བའི་ཚིགས་ལ་ཅུང་ཟད་གསོན། །འཇའ་ལུས་འཕོ་བ་ཆེན་པོའི་སྐུ་འགྲུབ་པས། །འཁོར་འདས་ཡོངས་ཀྱི་སྤྱི་མེས་རིག་སྔགས་འཆང་། །པདྨ་ཐོད་འཕྲེང་སྙན་གྲགས་དབྱར་སྐྱེས་རྔ། །གྲགས་པ་ཕྱོགས་བྲལ་རྣ་བར་འགོད་མཁས་དེས། །གངས་ཅན་གཙུག་ལག་ཁང་དང་དེ་འཛིན་པའི། །རབ་འབྱུང་དབུ་ཟླུམ་སྔགས་པ་ལྕང་ལོའི་སྡེ། །རྒྱལ་བསྟན་སྐྱོང་བའི་མེལ་ཚེ་མཁན་པོ་རུ། །དམ་ལ་བཏགས་ནས་ཁྱོད་ཉིད་བསྐོས་མིན་ནམ། ཁྱད་པར་གཏེར་བཏོན་མངའ་བདག་ཉང་རལ་སོགས། །རིགས་འཛིན་རྩ་བརྒྱུད་བླ་མའི་ཚོགས་རྣམས་ཀྱིས། །རྣལ་འབྱོར་བདག་གི་སྲུང་མར་བཀའ་བསྒོས་བཞིན། །བསམས་པའི་དོན་ཀུན་ལྷུན་གྱིས་གྲུབ་པར་མཛོད། །གངས་ཅན་ཕན་བདེ་འཕྲོག་པ་མཐའ་བཞིའི་དམག །མི་བསྲུན་དགྲ་བོའི་སྙིང་ཁྲག་འཐུང་བ་དང་། །ཆབས་གཅིག་འདྲེ་ངན་འགོང་པོ་དམ་སྲི་ཡི། །ཚེ་སྲོག་ནུས་སྟོབས་མིང་གི་ལྷག་མར་ཐོང་། །ཐེ་ཚོམ་མདུད་པ་འགྲོལ་བྱེད་དྲི་བ་རྣམས། །ཕོ་ཉའི་ངག་ནས་ཕུལ་བས་བླང་དོར་གྱི། །གནད་གསང་མ་ལུས་བཀྲལ་ཏེ་རྡོ་རྗེའི་གསུང་། །སྦ་སྲི་མེད་བར་ལུང་དུ་སྟོན་པར་གསོལ། །རྣམ་མང་སྤྱན་གཟིགས་ཚོགས་ཀྱི་འཁོར་ལོར་བཅས། །ཏིང་འཛིན་སྔགས་དང་ཕྱག་རྒྱས་ཉེར་བརླབས་ཏེ། ཁྲུམས་ཀྱི་ཟླ་བའི་ཡར་ཚེས་དགེ་བ་ལ། །སྡེ་བརྒྱད་རྦ་ཀློང་འཁྲུག་པའི་གནས་དེར་དགེ། (༢༣༧བ)
རྒྱ་ནག་ལྷོ་ཕྱོགས་སུ་དུས་འཁྲུག་བྱུང་བའི་སྐོར་ལ་བཀའ་རྟགས་གནམ་གྱི་ལུང་བཟང་པོ་བཀྲས་བཏགས་ཉིན་བདེ་མ་དང་རྟགས་བརྒྱད་མ་བཟང་གོས་ཀྱི་གནོད་སྦྱིན་དང་བཅས་དཀོན་ཅོག་མེར་རྒན་དཀར་བཅུ་དང་རྒྱ་ཐའི་ཐུང་རབ་འབྱམས་པ་གཉིས་གནང་བ་དང་ལྷན་དུ་བཀའ་ལན་འབུལ་བར་མི་སྣ་སྦྲེལ་པོ་རྫོང་བདའ་ཞུས་སྐབས་ཕུལ་བའི་ཞུ་ཡིག་འཕྲིན་ལས་གདུགས་དཀར། ཨཱ ཡུ རྡཱི རྒྷ ཁ ཏུ གྲ བཱ ལ སྱ ཙ ཀྲ བ རྟི ཀ ག ག ན ཤྩ བྷཱུ མཱི ཤྭ རེ མ ཉྫུ གྷོ ཥོ ཏྟ མ རཱ ཛྷོ མཱུ ལེ། ཚེ་རིང་གནམ་གྱི་ཤེ་མོང་གིས་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། མི་ཕྱེད་དང་བའི་ཡིད་ཀྱིས་དྲི་བཟང་པོའི་སྤོས་བསྲེགས་བཀྲ་ཤིས་པའི་མེ་ཏོག་གཏོར་ནས་མི་ཡི་བདག་པོས་སྐྱེ་རྒུ་ཐམས་ཅད་བདེ་ལེགས་སུ་མཛད་པར་གྱུར་ཅིག་ཅེས་བཀྲ་ཤིས་པའི་ཚིག་སྔོན་དུ་འགྲོ་བའི་སྒོ་ནས་གསོལ་བ། དེང་གི་དུས་ཉིད་ནའང་འཛམ་གླིང་སྐྱེ་འགྲོ་མཐའ་དག་གི་བསོད་ནམས་ཀྱི་ཞིང་དམ་པར་ལྷ་ཡི་ལྷ་ཚངས་པ་མི་ཡི་གཟུགས་ཅན་དུ་བསྒྱུར་ནས་འཇམ་དབྱངས་གོང་མ་རྒྱལ་པོའི་གསེར་གྱི་ཁྲི་ཆེན་པོར་ཞབས་ཟུང་གི་འཁོར་ལོ་མངོན་པར་བཀོད་དེ་མཐོང་ན་མི་མཐུན་པ་མེད་པའི་མཚན་བཟང་ལང་ཚོ་རྒྱས་པའི་གཟུགས་སྐུ་ཉི་མ་འབུམ་གྱི་གཟི་བྱིན་ལྟར་(༢༣༨ན)
འབར། མཆོག་དམན་བར་པའི་རྣ་བར་སྙན་ཞིང་འཇེབས་པ་དྲུག་ཅུའི་རྗེས་འགྲོའི་དབྱངས་སྙན་པོས་བདེ་སྐྱིད་ཀྱི་ལམ་དུ་བཀྲི །སྲིད་དང་ཞི་བའི་བླང་དོར་གྱི་གནས་མཐའ་དག་ལ་སྒྲིབ་པ་མེད་པའི་མཁྱེན་པས་སྙིགས་མའི་དུས་ཀྱི་ཡིད་ཅན་རྣམས་ཀྱི་སྤྱོད་ཚུལ་དང་མཐུན་པར་ཞི་དྲག་གི་ལས་སྣ་ཚོགས་ཀྱི་འཇུག་པས་ཚར་གཅོད་རྗེས་སུ་འཛིན་པའི་འཕྲིན་ལས་ཀྱི་གདུགས་དཀར་པོ་གཅིག་གི་གྲིབ་མར་རྒྱུ་བ་དང་མི་རྒྱུ་བའི་སེམས་ཅན་མཐའ་དག་ངལ་གསོར་མཛད་པ་ནས། འདིར་ཡང་དགྱེས་པའི་སྤྱན་རས་ནམ་ཡང་ལྷོད་པ་མེད་པའི་གནམ་གྱི་ཤེ་མོང་གི་རི་མོ་ཡོངས་སུ་གསལ་བའི་བཀའ་ཤོག་རྟེན་བཀྲས་བཏགས་ཉིན་མོ་བདེ་ལེགས་མ་ཉི་ཤུ། རྟགས་བརྒྱད་ཁ་བཏགས་སུམ་ཅུ། གོས་ཡུག་ལེགས་པ་གསུམ་གྱི་གནང་སྦྱིན་དང་བཅས་སྩལ་པ་གསེར་ཞལ་དངོས་སུ་མཐོང་བ་ལྟ་བུའི་དགའ་བ་ཐོབ། འདི་ནའང་སེམས་ཅན་ཐམས་ཅད་ཀྱི་མ་འདྲིས་པའི་མཛའ་བཤེས་ཆེན་པོ་དཔལ་ལྡན་ཤཱཀྱ་སེང་གེའི་བསྟན་པ་རིན་པོ་ཆེ་འཛིན་སྐྱོང་དང་ལུས་ཅན་གྱི་བདེ་སྐྱིད་སྤེལ་བའི་ལྷག་པའི་བསམ་པ་མི་དམན་པར་གནས། ད་ལམ་གོང་དུ་འཚམ་འདྲིའི་ཞུ་ཡིག་རྟེན་འབུལ་བར་རབ་འབྱམས་པ་དོན་གྲུབ་རྒྱ་མཚོ་དང་ངག་དབང་གྲགས་པ་གཉིས་རྫོང་བདའ་ཞུས་པ་མཁའ་ལྟར་ཡངས་པ་ཟབ་གསལ་ཐུགས་ཀྱི་ཀློང་དུ་གཅུགས་པའི་བཀའ་གནང་ཕེབས་ཚོགས་ཆུ་བོའི་རྒྱུན་བཞིན་ཞུ། ཞུ་ཡིག་རྟེན་བྱུ་རུའི་འཕྲེང་བ་དང་བཅས་ཤིང་ཡོས་ཧོར་ཟླ་བརྒྱད་པའི་ཚེས་བཅུ་(༢༣༨བ)
གཅིག་ལ་རང་བྱུང་འཕགས་པའི་གཞལ་ཡས་ཁང་དམར་པོ་རི་ནས་ཕུལ། ཤིང་ཡོས་སྡེ་པ་བློ་བཟང་སྦྱིན་པའི་ཁྲི་འདོན་སྐབས་འབྲི་གུང་སྤྲུལ་སྐུ་རིན་པོ་ཆེ་དཀོན་ཅོག་འཕྲིན་ལས་བཟང་པོའི་ཆབ་ཤོག་སྙན་ཚིག་གི་ཚིགས་སུ་བཅད་པའི་ལན་ཆོས་གྲགས་གཉིས་པའི་རང་ཞལ་མེ་ལོང་། ཁོ བི ཤེ དཱ ཤེ དཱ དཻ ཀ སྶུ ག ཏྱ ཀ ཀ ཎྛ ན པ ཉྩོ ང ཡི རཱུ བ བ ཏྣཱ ཡ ཀེ །བ རྞ སུ སཱ སྟི ཏ ཤྴ བྡ ནཱི ཪྤུ ཥྦ བྷཱ རྻཱ པ ཏཻ ཪྶི དྡྷ གོ སཱ ར མཱ ཧཱ ར ཐེ། མཁའ་(སྡེབ་སྦྱོར་མཉམ་པའི་བྲྀཏྟ་ལས་མེ་ཏོག་ཕྲེང་ཅན།)ཁྱབ་ཕྱོགས་བཅུའི་བདེ་བར་གཤེགས་ཀུན་གྱིས། །མགྲིན་གཅིག་ལྔ་བདེའི་ལུས་ཅན་འདྲེན་པ་པོར། །ལེགས་བསྔགས་སྭསྟིའི་སྒྲར་དྲངས་མེ་ཏོག་ཆར། །ཡོངས་བསྙིལ་གྲུབ་རིགས་རྒྱ་མཚོའི་ཤིང་རྟ་ཆེར། །གྲངས་མེད་གདུལ་བྱ་གསེར་རི་རོལ་མཚོའི་དབུས། །འཕྲིན་ལས་རིན་ཆེན་རྣམ་བཞིའི་བང་རིམ་རྩེར། །མཁྱེན་བརྩེ་ནུས་པའི་སྤྱན་སྟོང་རབ་གསལ་བ། །འདྲེན་མཆོག་ལྷ་དབང་ཆབ་ཤོག་རྟེན་ལྡན་འབྱོར། །དེང་དུས་ཀུན་གྱི་མཐོང་(༢༣༩ན)
སྣང་གཅིག་མཚུངས་པར། །མཚན་དང་དཔེ་བྱད་རི་མོ་རབ་བཀྲའི་སྐུ། །མ་དག་སྐྱེ་རྒུའི་ངོར་ཡང་གཞོམ་བྲལ་བ། །ཚེ་ཡི་གཡུང་དྲུང་ཁམས་སུ་བརླབས་དེ་སྤྲོ། །ཐོས་བསམ་སྒོམ་ལ་མོས་རློམ་བདག་བློའི་རྩེ། །བསྟད་ཀྱང་རྣམ་གཡེང་དྲི་བཞོན་གྱིས་བསྐུལ་ནས། །དོན་ཆུང་འདི་སྣང་མཁའ་ལ་དལ་མེད་དུ། །ཤིང་བལ་སྟེས་དབང་རྗེས་འགྲོའི་ངང་ཚུལ་ཙམ། །ལྷ་སྔགས་ཡེ་ཤེས་བདག་ཉིད་སྐུ་གསུང་ཐུགས། །གསང་བ་མི་ཟད་རབ་འབྱམས་འཁོར་ལོའི་མཛོད། །ངོ་མཚར་བཀོད་པའི་སྒྱུ་འཕྲུལ་རོལ་གར་གྱིས། །ཆོས་ཀྱི་གྲགས་པ་ས་འདིར་སླར་འོངས་སྙམ། །བགྲང་ཡས་ཞི་དང་ཁྲོ་བོའི་གྲོང་ཁྱེར་དབུས། །རང་ལས་མི་གཞན་རྟེན་དང་བརྟེན་པའི་གཙོར། །སྟོང་ཉིད་སྙིང་རྗེའི་ཉམས་ལྡན་ཤེས་རབ་མང་། །མཉམ་སྦྱོར་བདེ་ཆེན་གར་མཁན་ཆེ་མཆོག་བཞིན། །མི་བསྲུན་འབོད་གྲོགས་མགོན་དུ་རྔ་ཡབ་ཀྱི། །དཔལ་གྱི་རི་བོའི་རྩེ་མོར་ཐོད་འཕྲེང་རྩལ། །བཞུགས་བརྫུན་སྣང་སྲིད་དྲེགས་པ་བསྐྱར་འདུལ་དུ། །གཞོ་སྟོད་གཏེར་སྒྲོམ་ཕྱོགས་སུ་བྱོན་ནམ་སྙམ། །ཆིག་ཐུབ་དཀར་པོའི་སྨན་གྱི་གཟུང་འཛིན་བྲོ། །དབྱུངས་ནས་རྣམ་རྟོག་ཆོས་སྐུར་རྒྱ་ཡན་པའི། །སྟོང་ཆེན་སེམས་གནས་གཅིག་གིས་རྒྱས་བཏབ་ཚེ། །མདའ་བསྣུན་ཞབས་དེ་མཁའ་སྤྱོད་གནས་སུ་བྲོས། །སྐྱུ་ར་གནམ་གྱི་བརྒྱུད་ལས་སྔགས་འཆང་རིགས། །ཕག་གྲུའི་ལུང་རྟོགས་ཤིང་རྟ་འཇིག་རྟེན་མགོན། །རིང་ལུགས་མཁའ་གཟུགས་བསྟན་སྲོག་པདྨའི་(༢༣༩བ)
སྐུར །རྡོ་རྗེའི་ཁམས་སུ་བསྒྱུར་བའི་བྱེད་པོར་ངེས། །ལྷ་སྲས་མུ་ནེའི་ཡང་སྲིད་ཆོས་ཀྱི་རྒྱལ། །རྗེ་བཙུན་རཏྣའི་ཟབ་གཏེར་ཡིད་བཞིན་དབང་། །ཐུགས་ཀྱི་དཔལ་བེར་འཆད་པ་གཅེས་པའི་ནོར། །འཆད་ཉན་བསམ་སྒོམ་རྒྱ་ཆེན་སྤེལ་བར་གསོལ། །མཚུངས་མེད་རྣམ་དཔྱོད་ལང་ཚོ་རྒྱས་པའི་མགྲིན། །ལེགས་བཤད་སྙན་པའི་སྒྲ་འཁྲོལ་གཡས་འཁྱིལ་ལས། །བཀའ་མཆིད་རྒྱུད་མངས་ཀླུ་ཡིས་ཐོས་འཛིན་ལྟར། །དྲུག་དམར་བརྩེགས་པའི་རྣ་བརྒྱངས་སྐྱོངས་ཤིག་གུ །དཀྱུས་རིང་འདྲེན་མེད་ཟུར་གྱིས་གཡོ་བའི་རྟེན། །ལྷ་རྫས་དུ་ཀཱུ་ལ་ཡི་སྟོད་བཀྲིས་པའི། །ཉམས་དང་འགྱུར་བ་འཆི་མེད་གར་མཁན་མ། །དབུ་རུའི་ཕྱོགས་དེར་རི་མོ་འབུལ་བར་སོང་། །ཤིང་ཡོས་ཟླ་བཅུ་པའི་ཚེས་བཅུ་བདུན་ལ་ཚངས་པ་དུང་ཐོད་ཅན་གྱིས་ལུང་བསྟན་ཉུང་ངུ་ཞིག་ཆེད་དུ་སྐྱེལ་མི་གཏོང་བ་མཛད་པའི་གསུང་ལན་མངོན་ཤེས་འཆར་བའི་མེ་ལོང་། སྭསྟི་ཛ་ཡ་བི་ཛ་ཡ་ད་བྲཧྨ་ཎ། ལྷ་རྒྱལ་དབྱངས་སུ་ལེན་པ་སྔོན་དུ་འགྲོ་བའི་སྒོ་ནས་གསོལ་བ། ཀུན་རྫོབ་གཞན་སྣང་ཙམ་དུ་རང་རྒྱུད་བརླང་པོར་སྤྱོད་པའི་སྨོན་ལམ་གྱི་མཐུ་དྲག་པོར་བརྟས་པས་སྐྱེ་འགྲོ་ཡོངས་ཀྱི་བླ་ཚེ་ལ་དབང་བ་དེའི་ཚེ་གསང་བའི་བདག་པོ་རྟ་མགྲིན་དབང་རྒྱལ་པདྨ་ཐོད་འཕྲེང་རྩལ་སོགས་ཀྱིས་དམ་ལ་བཏགས་ནས་སྲོག་བདག་གིང་གི་རྒྱལ་པོར་མངའ་གསོལ། ངེས་པའི་དོན་དུ་དཔལ་ཆེན་པོ་ཆེ་མཆོག་ཧེ་རུ་ཀའི་ཡེ་ཤེས་རོལ་པའི་ཆ་ལས་མངོན་པར་འཕྲོས་ཏེ་སྒྲུབ་པ་ཆེན་པོ་བཀའ་བརྒྱད་ཀྱི་ནུབ་བྱང་མཆོད་བསྟོད་དྲེགས་པའི་དཀྱིལ་འཁོར་དུ་བརྟེན་པ་ལྷའི་གར་མཁན་དཔལ་ལྡན་ཚངས་པ་(༢༤༠ན)
དུང་གི་ཐོར་ཚུགས་ཅན་གྱིས་མི་འགྱུར་རྡོ་རྗེའི་གསུང་གསང་བ་ཚིགས་སུ་བཅད་དེ་མ་འོངས་འབྱུང་འགྱུར་གྱི་ལུང་བསྟན་ལྷ་དར་དཀར་པོའི་རྟེན་དང་བཅས་ཕོ་ཉ་ཆེད་དུ་མངགས་པར་རིག་པ་འཛིན་པའི་གྲངས་སུ་གཏོགས་པར་རློམ་པ་བདག་ཀྱང་སེམས་ཀྱི་སྤྲོ་བ་ཅི་ཡང་འཕེལ། གང་གི་རྣམ་སྤྲུལ་མཐའ་དག་ཀླས་པས་སྔོན་ནས་སྤྲུལ་པ་ཞིག་ཕྱོགས་དེར་གནས་ཏེ་ཆོས་རྒྱལ་སྲོང་བཙན་སྒམ་པོའི་འཁྲུངས་ལྷར་མཛད་ཅིང་། ངོ་བོ་མངའ་བདག་ཁྲི་སྲོང་ལྡེའུ་བཙན་གྱི་དུས་བྷ་ཏ་ཧོར་གྱི་ཡུལ་ནས་དྲེགས་པ་མཆེད་ལྔ་ཀ་ཅའི་རྗེས་སུ་བྱོན་པའི་ཚེ། སངས་རྒྱས་གཉིས་པ་དཔལ་ཨོ་རྒྱན་ཆེན་པོ་པདྨ་འབྱུང་གནས་ཀྱིས་དབང་བསྐུར་དམ་ལ་བཏགས་ཏེ་ཟན་གཡང་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གིས་གཙོས་སྟོད་སྨད་ཆོས་འཁོར་ཀུན་སྐྱོང་ཞིང་། ཁ་བ་རིའི་ལྗོངས་སུ་གཏོགས་སོ་ཅོག་གི་བསྟན་དང་འགྲོ་བའི་མེལ་ཚེ་མཛད་པར་མངའ་གསོལ་བའི་རྡོ་རྗེ་འབར་བའི་དམ་ཚིག་གི་ར་བ་ལས་ནམ་ཡང་མ་བྲལ་བར་ཉེ་ཆར་ཡང་འགྲོ་བ་མིའི་ཁོག་ཏུ་བརླམས་པར་རྗེས་སུ་ཡི་རངས་ཤིང་། དིང་སང་སྙིགས་མའི་དུས་ཆེས་ཆེར་བདོ་བའི་སྐྱེ་རྒུ་རྣམས་བླང་དོར་ཚུལ་བཞིན་མི་ཤེས་པར་ལེགས་ཉེས་སྟོན་པའི་ཆེད་དུ་ཁབ་ཏུ་བཞུགས་པ་ལས། གཞན་དུ་དྲེགས་པའི་སྡེ་དཔོན་སྟོང་གསུམ་སྐད་ཅིག་ཏུ་བསྐོར་བའི་རྫུ་འཕྲུལ་ཅན་དག་འགྲོ་བ་མི་ལ་བརྟེན་པའི་དོན་ལས་མ་མཆིས་པའི་ཕྱིར་ན། དིང་སང་གི་དུས་འདིར་སྟོད་སྨད་བར་གསུམ་ལ་སྤྱི་སྒོས་ཀྱི་(༢༤༠བ)
ལུང་བསྟན་རྒྱས་པ་ཞིག་ལོ་འདིའམ་ཕྱི་མའི་འགོས་ཙམ་ལ་མཛད་པར་བསྐུལ་བ་དྲི་མེད་ཡེ་ཤེས་དག་པའི་ཀློང་དུ་བཅགས་པར་འཚལ། རྟེན་བཀྲས་བཏགས་ཀྱི་སྙན་ཤལ། གསེར་སྐྱེམས་ཞོ་གསུམ། འཕྲིན་ལས་ཐམས་ཅད་འགྲུབ་པའི་གོས་ལྗང་ཡུག་དང་བཅས་སྨིན་དྲུག་ཟླ་བའི་ཤེས་རབ་ཀྱི་ཆ་བཟང་པོ་དང་པོའི་དུས་ལ་དགེ ། ཤིང་ཡོས་ཧོར་ཟླ་བཅུ་གཅིག་པའི་ཡར་ཚེས་གསུམ་གྱི་ཉིན་སྲོག་བདག་ཚངས་པ་ཆེན་པོ་དུང་ཐོད་ཅན་ལ་ཚོགས་འཁོར་སྤྱན་གཟིགས་དང་བཅས་དྲི་སྨེད་གསོལ་བར་དགེ་སློང་འཇམ་དབྱངས་གྲགས་པ་བཏང་པའི་ཚེ་འཕྲིན་ཡིག་བདེན་གཏམ་དབྱངས་སུ་འཚེར་བའི་པི་ཝང་། ཞི་དང་ཁྲོ་བོའི་དཀྱིལ་འཁོར་མ་ལུས་པ། །སྤྲོ་དང་བསྡུ་བའི་བྱེད་པོ་ཀུན་ཏུ་བཟང་། །ཐུན་མོང་འགྲོ་ངོར་རྒྱ་གར་པཎ་ཆེན་ཚུལ། །སངས་རྒྱས་གཉིས་པ་པདྨ་ཐོད་འཕྲེང་བསྔགས། །མགོན་དེས་སྲོག་བདག་སྡེ་དཔོན་ཚངས་པ་གང་། །ཆེ་མཆོག་ཁྲག་འཐུང་གཙོར་གྱུར་བཀའ་བརྒྱད་ལྷའི། །ནུབ་བྱང་དྲེགས་པའི་གཞལ་ཡས་ཆེན་པོ་རུ། །དབང་བསྐུར་དམ་བཏགས་བསྟན་པ་བསྲུང་བར་བསྐོས། །དེ་ཕྱིར་བསིལ་ལྡན་སྨན་ལྗོངས་ཡུལ་གྱི་ཆའི། །ཆོས་འཁོར་སྟོད་སྨད་མདོ་རྒྱུད་བཤད་སྒྲུབ་སྡེ། །སྤེལ་བའི་ངུར་སྨྲིག་འཛིན་དང་གོས་དཀར་ཅན། །སྔགས་འཆང་ཡོངས་ཀྱི་དགྲ་ལྷ་མ་ཡིན་ནམ། །བདེ་སྐྱིད་གངས་ཀྱི་རི་བོ་ཆེས་དངས་པར། །སྡིག་འབྲས་གླང་པོའི་ན་བུན་ཉེར་འཁྲིགས་པའི། །དུས་འདིར་སྔོན་གྱི་གཡར་དམ་རབ་དགོངས་ཏེ། །བོད་འབངས་བསྟན་འགྲོའི་མེལ་ཚེ་དཔུང་བསྐྱེད་རིགས། །ཡོངས་ལ་ལྐོག་(༢༤༡ན)
ཏུ་གྱུར་ཀུན་རྗེན་པ་རུ། །གསལ་བའི་ལྷ་མིག་དག་པའི་སྤྱན་རས་ཀྱིས། །གཟིགས་ནས་འབྱུང་འགྱུར་གཞན་ངོ་བསྲུང་མིན་པའི། །གཟུགས་མེད་གཏམ་གྱི་མདའ་དེ་དྲང་པོར་ཕོངས། །མ་དག་དུག་ལྕེ་རྣོན་པོས་ཐུབ་བསྟན་སྲོག །འཕྲོག་པའི་ལྟོ་འགྲོ་བཟང་པོར་ཚུལ་འཆོས་མཁན། །གང་ཡིན་རྒྱལ་གསུང་དཔང་དུ་ཉེར་བཞག་སྟེ། །ཆུ་དང་འོ་མ་འབྱེད་པའི་དུས་མིན་ནམ། །དེ་འདྲའི་ཆོམ་རྐུན་རང་གཞན་གྲུབ་པའི་མཐའ། །མང་པོར་སྣང་བ་ལྷ་ཁྱོད་ཀྱིས་མཁྱེན་མོད། །ཅི་སྟེ་སོམ་ཉིར་གྱུར་ན་རྔ་ཡབ་གླིང་། །བགྲོད་ནས་མཚོ་ལས་སྐྱེས་པའི་རྡོ་རྗེར་དྲིས། །རུ་བཞི་སྒང་དྲུག་མི་བདེའི་བྱེད་པོ་ཀུན། ཁྲག་ཐིགས་ཙམ་ཡང་ལྷག་མར་མ་ལུས་པ། །དྲེགས་པའི་སྡེ་དཔོན་འཁོར་དང་བཅས་རྣམས་ཀྱིས། །རྐན་སྒྲ་སྒྲོག་བཞིན་ཚོགས་ཀྱི་འཁོར་ལོར་རོལ། །སྣང་སྟོང་ཟུང་འཇུག་སེམས་ཀྱི་མ་འགགས་གདངས། །དམ་ཅན་སྲུང་མར་ཤར་ལས་གཞན་མིན་པར། །མཆོད་བྱ་མཆོད་བྱེད་བྲལ་ཡང་ཀུན་རྫོབ་ཏུ། །སྤྱན་གཟིགས་མིག་འཕྲུལ་རྗེས་འགྲོ་མཁའ་ཁྱབ་སྤྲོ། །དུག་གསུམ་འཁྲུལ་པའི་མཚོ་ལ་བྱེད་དབྱིབས་ལྟར། །བདེ་སྡུག་མེད་ཀྱང་སྒྱུ་མ་དང་མཚུངས་པ། །ཐེ་ཚོམ་སེལ་བྱེད་དྲི་བ་ཕོ་ཉ་ཡི། །གཡར་ལམ་གསོལ་བར་སྒྲ་འཛིན་དབང་པོ་གཏོད། །གོས་དམར་ལྷབ་ལྷུབ་གཡོ་བ་གསེར་གྱི་འབྲུག །གཡས་སུ་འཁྱིལ་བ་གནམ་ལོའི་ཚེས་ཀྱི་དུས། །ལྷ་རྫས་སྙན་ཤལ་ཕོན་རྫར་ཅན་དང་བཅས། །དམར་པོ་རི་ཡི་(༢༤༡བ)
ཕོ་བྲང་རྩེ་ནས་དགེ །
རབ་བྱུང་བཅུ་གཅིག་པའི་མེ་འབྲུག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་འབྲུག་ལོར་བྲིས་པའི་ཆབ་ཤོག་འཕྲིན་ཡིག་ཁག །མེ་འབྲུག་ཧོར་ཟླ་དང་པོར་རིགས་ཀྱི་སྲུང་མ་ཐང་ཆེན་བཤན་པ་ལག་དམར་ལ་སྤྱན་གཟིགས་དབུལ་བར་འབུམ་ཐང་བསོད་ནམས་དབང་པོ་བཏང་སྐབས་ཀྱི་འཕྲིན་གསོལ་ཀ་འཕྲེང་དཔའ་བོའི་གད་བརྒྱངས། ཀ་མ་ལ་ཡི་ཟེའུ་འབྲུ་རྒོད་པའི་རྩེར། ཁ་དོག་རབ་དཀར་རྫུས་སྐྱེས་གཞོན་ནུའི་ཚུལ། །ག་ན་ཞུགས་ཀྱང་ཕན་བདེ་འབྱུང་བའི་གནས། །ང་རྒྱལ་དྲེགས་ལྡན་ཚོགས་ཀྱི་གཉེན་གཅིག་བསྔགས། །ཅ་ཅོ་སྙན་པའི་དབྱངས་དང་རོལ་མོ་འཁྲོལ། །ཆ་ཤས་ཡོངས་རྫོགས་དམ་རྫས་གཏོར་མ་བཤམས། །ཇ་ཆང་གསེར་སྐྱེམས་བཏུང་བ་སྦྲེང་བྱེད་ན། །ཉ་རྒྱས་ཟླ་འདྲའི་ལྷ་ཁྱོད་དགྱེས་འཛུམ་སྟོན། །ཏ་ཐཱ་ག་ཏའི་བསྟན་པ་བསྲུང་བ་ལ། །ཐ་ཚིག་ཞལ་བཞེས་འགྱུར་མེད་བཤན་པ་ཆེ། །ད་ལྟ་སྙིགས་མ་ལྔ་བདོའི་དུས་འདི་རུ། །ན་མ་རེར་ཡང་མཐུ་སྟོབས་ནུས་རྩལ་བསྐྱེད། །པ་ཏྲའི་རི་མོ་དང་མཚུངས་སྣ་ཚོགས་སེམས། །ཕ་རོལ་རྒོལ་ངན་ཡིད་སྲུབས་སྙིང་ཞུགས་ཏེ། །བ་མོའི་རིག་པས་ལོ་ཏོག་བཞོམ་པ་ལྟར། །མ་ལུས་ཚར་ཆོད་རྗེས་མེད་རླུང་ལ་སྐུར། །ཙ་ན་ཡིན་ཀྱང་ཕ་མེས་བརྒྱུད་པའི་ལྷ། །ཚ་གྲང་ཁྱད་དུ་སད་ནས་ལེགས་མཆོད་ཕྱིར། །ཛ་ཞེས་འབོད་ཕྱིར་དར་ཚོན་གཡབ་བྱེད་ན། །ཝ་ལེར་ཐོགས་མེད་སྤྱོན་ལ་འཕྲིན་ལས་སྒྲུབས། །ཞྭ་ཡི་ཏོག་ལྟར་སྡེ་བརྒྱད་རྗེ་བོ་ཁྱོད། །ཟ་ཧོར་བརྒྱུད་པའི་དགྲ་ལྷ་མཐུ་རྩལ་ཅན། །འ་འུར་སྒྲ་ཡིས་སྟོང་གསུམ་འགེང་བཞིན་དུ། །ཡ་མཚན་ལས་བཞི་བསྒྲུབ་པའི་ཆུ་འཕྲུལ་སྟོན། །རྭ་གདེངས་རྡོ་རྗེ་འབར་བའི་ཕྱག་རྟོགས་(༢༤༢ན)
རྒྱ། །ལ་ལའི་སྡེ་བརྒྱད་མ་ཡིན་ཀུན་གྱི་གཙུག །ཤ་རྗེན་རི་མོ་གསལ་པོར་ཤར་མཛད་པའི། །ས་གསུམ་བླ་མ་པདྨའི་དམ་ཚིག་དགོངས། །ཧ་ཧར་དྲག་པོའི་བཞད་སྒྲ་དགོད་པ་དང་། །ཨ་ལ་ལ་ཞེས་དགྱེས་ཚུལ་ལྷན་ཅིག་ཏུ། །ཧ་རི་ཙན་དན་དྲི་བཞིན་སྟོན་མཛད་པར། །ཨ་མྲ་ལྟ་བུའི་མཆོད་སྤྲིན་རྒྱ་མཚོ་སྤེལ། །མེ་འབྲུག་གི་ལོ་བསམ་ཡས་པེ་ཀར་ལྕོག་གི་ཞིག་གསོས་གྲུབ་ནས་གནས་གསར་པར་ཆོས་སྐྱོང་དཔོན་བློན་ཐོག་མར་ཕེབས་པའི་ཚེ་དགའ་སྟོན་སྤེལ་བར་ཟུར་ཁར་དོན་གྲུབ་དབང་རྒྱལ་མངགས་པའི་འཕྲིན་ཡིག་ལྷ་རྒྱལ་དབྱངས་སྙན། ཨཽཎྜི་ཡཱ་ནའི་འདབ་སྟོང་བཞད་པའི་རྩེར། །ལྟ་བས་མི་ངོམས་མཚན་དཔེའི་སྒྱུ་འཕྲུལ་གར། །མཚོ་ལས་སྐྱེས་པའི་རྡོ་རྗེ་ཐོད་འཕྲེང་རྩལ། །རང་བྱུང་སྤྲུལ་པའི་སྐུ་དེས་དགེ་ལེགས་སྩོལ། །ཕྱི་རོལ་གཤིན་རྗེའི་བཤན་ཁར་སྡེ་བརྒྱད་གནས། །ནང་དུ་དམ་ཅན་འདུ་བའི་ཕོ་བྲང་ཆེ། །གསང་བ་བདག་པོའི་བདེ་ཆེན་གཞལ་ཡས་ཁང་། །ཕུན་ཚོགས་བཀོད་པའི་དུས་སྟོན་ཐོག་མ་ལ། །བཀྲས་བཏགས་གསེར་སྐྱེམས་ཕྱི་ནང་བཟང་གོས་ཇ། །ཟུར་གསལ་གྲངས་ལྡན་ཚོགས་ཀྱི་འཁོར་ལོ་བཅས། །སྤྲུལ་པའི་བསྟན་སྲུང་རྒྱལ་པོ་ཆེན་པོ་ཁྱོད། །དགྱེས་བསྐྱེད་ཆེད་དུ་འབུལ་བས་ཐུགས་དམ་སྐོངས། །ཤཱཀྱ་སེང་གེའི་རིང་ལུགས་གྲིབ་བསིལ་དུ། །འཇིག་རྟེན་གསུམ་གྱི་འགྲོ་ཀུན་ངལ་བསོས་ཤིང་། །སྔགས་འཆང་བདག་གིས་བཅོལ་བའི་འཕྲིན་ལས་རྣམས། །བསྒྲུབ་པའི་གཡར་(༢༤༢བ)
དམ་ནམ་ཡང་གཡེལ་མེད་མཛོད། །ལྷ་སྙན་མཛེས་པར་བྱེད་པའི་དར་དཀར་པོ། །རི་བོང་འཛིན་པའི་དཀྱིལ་འཁོར་རྗེས་འགྲོ་བར། །ཐུན་མཚམས་མདངས་ལྡན་རྒྱ་ཡིས་ཉེར་བཏབ་སྟེ། །ནམ་མཁའི་ནོར་བུ་འཁྲིག་ཁྱིམ་ཞུགས་ཚེ་དགེ །གཏུམ་དྲག་ལས་མཁན་བཤན་པའི་ཚུལ་འཛིན་ཀྱང་། །ངེས་དོན་གནོད་སྦྱིན་ཁྱུང་ཆེན་ཀླུ་འབྲུག་འདུལ། །གསང་མཚན་ཀུན་ཁྱབ་རྡོ་རྗེ་དྲག་པོ་རྩལ། །སྒྲིབ་བྲལ་སྒྲ་འཛིན་དབང་པོ་ཅུང་ཟད་གཏོད། །མཚན་དང་སྐུ་ཡི་རྣམ་འགྱུར་བགྲང་ཡས་ཀྱང་། །གཅིག་པུ་ཉིད་ལས་གཞན་མིན་པདྨ་འབྱུང་། །རྡོ་རྗེའི་རི་མོ་གཙུག་བཀོད་དམ་དགོངས་ལ། །གངས་ཅན་བསྟན་འགྲོའི་བདེ་སྐྱིད་ཡུན་དུ་སྤེལ། །ལྷ་སྲིན་རྦ་ཀློང་འཁྲུག་པའི་གཞལ་མེད་ཁང་། །གསར་བསྐྲུན་ཐོག་མར་དགེ་བའི་ལེགས་སྐྱེས་སུ། ཁྲ་ཤར་བདོག་པ་བཟའ་བཏུང་འདོད་དགུའི་རྫས། །དམ་སྐོང་ཆེད་དུ་དངོས་བཤམས་ཡིད་ཀྱིས་སྤྲུལ། །བརྣག་པའི་སེམས་འཆང་དགྲ་བགེགས་སྙིང་གི་ཁྲག །དྲོད་རླངས་ཡལ་བ་མེད་པར་ཧུབ་ཀྱིས་དྲོངས། །ཆོས་དང་སྲིད་ཀྱི་ལེགས་ཚོགས་མ་ལུས་པ། །ལྷུན་གྱིས་གྲུབ་པའི་མཐུ་སྟོབས་ནུས་དཔུང་བསྐྱེད། །སྣྲོན་གྱིས་ཉ་བའི་ཡར་ངོའི་ཚེས་བཟང་པོར། །རིང་པོར་བརྐྱང་པའི་སྙན་ཤལ་དཀར་པོ་ལ། །མི་འགྱུར་རྟགས་ཀྱི་མཚན་མས་ལེགས་སྤུད་དེ། །དམར་པོ་རི་ཡི་ཕོ་བྲང་རྩེ་ནས་དགེ ། མེ་འབྲུག་ཁྲ་འབྲུག་ནས་ཚངས་པ་ཆེན་པོས་ཐུན་རྫས་དགོས་ཚུལ་ལྟར་སྤུན་བདུན་པ་ཕུན་ཚོགས་དབང་པོ་མངགས་པའི་ཆེ་བ་འཕྲིན་ཡིག་ཚངས་དབང་འབོད་(༢༤༣ན)
སྒྲ། རྒྱལ་དབང་པདྨ་ཀ་ར་ཡིས། །མཆོད་བསྟོད་དྲེགས་པའི་དཀྱིལ་འཁོར་ཆེར། །དབང་བསྐུར་ལྷ་ཆེན་སྲོག་གི་བདག །དཔལ་ལྡན་གིང་གི་རྒྱལ་པོ་ཀྱེ། །མ་གཡེལ་ཐུགས་ཀྱིས་ཉེ་བར་དགོངས། །ལྷ་གཅིག་སྲོང་བཙན་སྒམ་པོ་དེས། །གངས་ཅན་ས་ཡི་མེ་བཙའ་རུ། །ལེགས་བསྐྲུན་ཁྲ་འབྲུག་གཙུག་ལག་ཁང་། །བསྲུང་བའི་མཐུ་སྟོབས་རྩལ་ལྡན་ཁྱོད། །གཟི་བྱིན་ཉི་མ་ལྟར་འབར་བས། །ནག་པོ་བདུད་སྡེའི་མུན་པ་གཅལ། །རྣམ་འདྲེན་བཤད་སྒྲུབ་ཡིད་ཅན་ཚོགས། །བསྐྱེད་པའི་བ་དན་དཀར་པོ་ཕྱོར། །མ་ད་ན་སོགས་བཏུང་བ་དང་། །ཤ་ཟན་བཟའ་དང་བཅའ་བ་བཤམས། །ཕྱི་ནང་གོས་བཟང་གསེར་སྐྱེམས་ཀྱིས། །མཚོན་པའི་འདོད་ཡོན་མཆོད་པ་སྤེལ། །སཱ་ལའི་སྨན་གྱི་ནགས་ལྗོངས་འདིར། །གཡུལ་འཁྲུག་མུ་གེ་ནད་རིམས་སོགས། །རྩོད་ལྡན་དུས་ཀྱི་ཉེས་བརྒྱའི་དྲི། །མཐུ་སྟོབས་མཐོ་རིས་ཆུ་བོས་ཁྲུས། །དུས་ཀྱི་ཆད་པའི་མིང་ཙམ་ཡང་། །མཐར་བྱས་སིམ་པའི་བདེ་བ་ལ། །ས་འོག་ས་སྟེང་ས་བླ་ཡི། །སྐྱེ་རྒུ་མ་ལུས་སྦྱོར་ཞིག་གུ །ཀཏྤུ་ར་ཡི་མདངས་འཛིན་པའི། །དཀར་འཇམ་དར་གྱི་སྙན་ཤལ་བཅས། །ཆོས་སྲུང་ཆེན་པོའི་འདུན་ས་རུ། །སྣྲོན་ཟླའི་ཡར་ཚེས་ལི་ཁི་ཏཾ། །མེ་འབྲུག་ཧོར་ཟླ་ལྔ་པའི་ལྷ་ཚེས་ལ་གིང་ཆེན་ཚངས་པ་ཆེན་པོར་ཚོགས་མཆོད་སྤྱན་གཟིགས་དང་བཅས་འཕྲིན་གསལ་ལྷ་རྒྱལ་དབྱངས་སྙན། ཨཽཌྜི་ཡཱ་ནའི་ཆུ་གཏེར་ཀློང་ནས་འདབ་སྟོང་བཞད་པའི་(༢༤༣བ)
ཟེའུ་འབྲུའི་དབུས། །དཔག་ཡས་འོད་འབར་གར་གྱི་དབང་པོའི་སྒྱུ་དྲའི་ཟེར་འཕྲེང་འཕྲོས་པ་ལས། །མཚན་དཔེ་ཉེར་གསལ་ལང་ཚོའི་མཛེས་སྐུ་ལོ་བརྒྱད་གཞོན་ནུའི་ཚུལ་འཆང་བ། །བདེ་གཤེགས་ཀུན་འདུས་ཁྲོ་རྔམས་གཟུགས་ཀྱིས་ལྷ་སྲིན་དྲན་འཁོལ་པདྨ་འབྱུང་། །མགོན་དེའི་ཕྱག་ཆ་རྡོ་རྗེའི་རི་མོ་གཙུག་ཏུ་བཀོད་པའི་རྗེས་གསལ་ཞིང་། །རྩ་བརྒྱད་སྟོང་སྦྱར་བདུད་རྩིའི་ཐིགས་པ་ལྗགས་ཀྱི་དབང་པོར་མྱངས་པའི་མོད། །ཇི་ལྟར་ཞལ་བཞེས་དམ་ལས་མི་འདའ་རྡོ་བར་བྲིས་པའི་སྣང་བརྙན་ལྟར། འགྱུར་མེད་སྲོག་བདག་གིང་ཆེན་ཚངས་པ་གཡས་འཁྱིལ་དུང་གི་ཐོད་ཅན་ཀྱེ། །མ་ད་ནའི་ཕུང་ཤ་སྣ་བཟའ་བཅའི་ཚོགས་ཀྱི་འཁོར་ལོ་ཕྱུར་བུར་སྤུངས། །འཇམ་མཉེན་རྣམ་བཀྲའི་ཕྱི་ནང་གན་གོས་གསེར་སྐྱེམས་ཇ་བཟང་གོ་མཚོན་སོགས། །སྔགས་དང་ཕྱག་རྒྱ་ཏིང་འཛིན་གྱིས་བརླབས་ནམ་མཁའ་མཛོད་ཀྱི་མཆོད་པའི་སྤྲིན། །དྲེགས་པའི་སྡེ་དཔོན་འཁོར་བཅས་སྤྱན་སྔ་ཐུགས་དམ་སྐོང་བའི་ཆེད་དུ་དབུལ། །གཉིས་མེད་བསྲུང་བའི་རིང་ལུགས་སྤྱི་དང་ཁྱད་པར་ཀུན་མཁྱེན་བཙོང་ཁ་པའི། །བཤད་སྒྲུབ་རྐང་འཐུང་འཕྲེང་བའི་གྲིབ་མར་འཇིག་རྟེན་གསུམ་གྱི་ཡིད་ཅན་ཚོགས། །བརྒྱད་ཁྲི་བགྲང་བྱའི་འགྲོ་བ་ཇི་བཞིན་སྡུག་བསྔལ་མིང་ཡང་མི་གྲགས་པར། །རིང་པོའི་ཚེ་དང་འབྱོར་པའི་དབང་ཕྱུག་མིག་གི་འཛུམ་གྱི་མཆེད་ཟླར་མཛོད། །བྱེ་བྲག་སཱ་ལའི་སྨན་གྱི་ལྗོངས་འདིར་མེས་དབོན་རྣམ་གསུམ་དགོངས་པ་ལྟར། །དགེ་བཅུའི་(༢༤༤ན)
ཁྲིམས་ལས་སིམ་པའི་ཚོར་བས་སྐྱིད་པའི་ཉི་མ་དགུང་འཆར་ཞིང་། །ཕས་རྒོལ་ཁྱབ་འཇུག་ལོག་བློའི་མངལ་དུ་དྲང་སྲོང་དམོད་པའི་འབྲས་གྲུབ་པས། །རང་སྲིད་སྡེ་བཅས་ཡར་ངོ་ཆེས་མཐོའི་རྒྱལ་རྔ་བརྡུང་བའི་ལས་མཛོད་ཅིག །ཤ་ཁྲག་དྲོད་རླངས་མ་ཡལ་ཟར་རྔམས་ཁྲོ་གཉེར་སྨིན་མཚམས་རི་མོ་ཅན། །དཔའ་བོའི་ཆས་ལྡན་ཆེ་ངར་ཤུགས་ཀྱིས་ཡབ་ཤེར་བདུད་ལྟར་རབ་འཇིགས་ཀྱང་། །ཞི་ཞིང་ཆེས་དུལ་ལྷ་ཡི་དགེ་བསྙེན་དགྱེས་པའི་འཛུམ་གྱི་ཞལ་སྒོ་ལས། །ལྐོག་གྱུར་ཆོས་ཀྱི་གནས་ལུགས་གསལ་བའི་ལུང་བསྟན་པི་ཝང་རྒྱུད་ལ་དྲོངས། །དཀར་ཕྱོགས་ལྷ་རྣམས་རྒྱལ་བའི་བསྭོ་སྒྲ་སྒྲོག་པའི་ཡར་ཚེས་ལ། །ཐོས་འཛིན་མཛེས་བྱེད་རྒྱན་དུ་ཉེར་འོས་དུ་ཀཱུ་ལ་ཡི་ཁ་ཚར་དང་། །ཐུགས་དམ་བསྐུལ་བའི་འཕྲིན་ཡིག་རྒྱ་ཅན་ཕོ་ཉའི་སུག་པས་ལེགས་བཏེག་ནས། །དབུ་རུ་སྟོད་ཕྱོགས་སྡེ་བརྒྱད་འདུ་བའི་འདུན་ས་ཆེར་སོང་ཛ་ཡནྟུ། །ཆུ་གླང་བཤན་པ་བྱ་ཁྲིད་མིག་གཅིག་པ་གཡའ་རི་གོང་གི་བྲག་ཕུག་ཏུ་བྱོན་ནས་ལོ་གསུམ་ཙམ་བཞུགས་ཏེ་སྐུ་ཕེབས་མ་བྱུང་བ་མེ་འབྲུག་ཟླ་བ་ལྔ་པར་ཁོག་ཞུགས་གསར་དུ་བྱུང་བའི་ཚེ་ལེགས་སྐྱེས་ཀྱི་སྤྱན་གཟིགས་འབུལ་བར་སྤུན་བདུན་པ་ལྷུན་གྲུབ་རྒྱ་མཚོ་བཏང་བའི་འཕྲིན་གསོལ་ལྷ་རྒྱལ་གད་བརྒྱངས། ལྷ་རྒྱལ་བསྭོ་སྒྲ་ལྡིར་བ་བཀྲ་ཤིས་གླུ། །མགྲིན་པའི་རྒྱུད་ལས་ཉེར་དྲངས་རབ་དཀར་དར། །བསྟན་སྲུང་སྙན་གྱི་རྒྱན་དུ་ལེགས་སྤུད་ནས། །འཕྲིན་གསོལ་དོན་ལ་ཡེ་ཤེས་སྤྱན་གྱིས་གཟིགས། །རྒྱ་གར་པཎ་ཆེན་དུས་(༢༤༤བ)
གསུམ་གསལ་ལེར་མཁྱེན། །འཁོར་འདས་ཡོངས་ཀྱི་སྤྱི་དཔལ་ཐོད་འཕྲེང་རྩལ། །བརྟུལ་ཞུགས་གྲུབ་པའི་བཀའ་ལས་མི་འདའ་བའི། །བྱ་ཁྲིད་མིག་གཅིག་བཤན་པའི་དམག་དཔོན་གྱི། །རྒྱ་གར་གཡའ་རི་གོང་གི་བྲག་ཕུག་དང་། །ཟུང་འབྲེལ་ཙན་དན་འཐུག་པོའི་ནགས་ཚལ་དུ། །བྱོན་ཀྱང་བོད་ཡུལ་སྲུང་མར་ཞལ་འཆེས་པར། །མི་གཡེལ་ཁོག་ཏུ་བརླམས་པའི་གཏམ་དེ་སྙན། །ལྐོག་གྱུར་རྗེན་པར་གཟིགས་པའི་འདྲེན་བྱེད་གསལ། །སྟོང་གསུམ་སྐད་ཅིག་བསྐོར་བའི་རྫུ་འཕྲུལ་ཆེ། །ལེགས་ཉེས་བྱ་ར་བལྟ་ལ་ལྷག་པར་འགྲུས། །དེ་ཕྱིར་བླང་དོར་ལུང་དུ་སྟོན་པར་རིགས། །གསར་དུ་ཁོག་ཞུགས་ཐོག་མའི་རྟེན་འབྲེལ་སྒོར། །ཐུགས་དམ་སྐོང་རྫས་ཁ་མ་ཟུར་འཐུས་དང་། །བཟའ་བཅའ་བཏུང་བའི་ཚོགས་ཀྱི་འཁོར་ལོ་རྣམས། །ནམ་མཁའ་མཛོད་དུ་བྱིན་གྱིས་བརླབས་ནས་འབུལ། །འཇིག་རྟེན་ཁམས་བདེ་ཐུབ་པའི་བསྟན་པ་དར། །རིག་འཛིན་བདག་གིས་བཅོལ་བའི་དབང་དྲག་དང་། །ཞི་དང་རྒྱས་པའི་འཕྲིན་ལས་མ་ལུས་པ། །འདོད་པའི་རེ་སྐོང་དཔག་བསམ་ཡོངས་འདུར་མཛོད། །སྤངས་ལྗོངས་མརྒད་མདངས་གྱོན་སྣྲོན་གྱི་ཟླ། །དཀར་པོའི་ཕྱོགས་ཀྱི་གང་བ་གསུམ་པའི་ཚེས། །ལྷག་པ་ལྷ་མཚམས་དགའ་མར་རབ་བརྩེ་བའི། །འགྲུབ་སྦྱོར་དུས་སུ་སརྦ་ཛ་ཡནྟུ། །འཕྱོས་བཤན་བ་སྒྲིབ་བཙན་པའི་འཕྲིན་ལན་ལས་ཀུན་བསྒྲུབ་པའི་སྒོ་འབྱེད། ཨཽཌྜི་ཡཱ་ནའི་ནུབ་བྱང་སིནྡྷུའི་ཀླུང་། །(༢༤༥ན)
དྲི་མེད་འདབ་སྟོང་ཀེ་ས་ར་ཡི་རྩེར། །རྒྱལ་ཀུན་འདུས་པའི་སྒྱུ་འཕྲུལ་རྨད་པོ་ཆེ། །པདྨ་ཐོད་འཕྲེང་རྩལ་གྱིས་ཀངྐ་ར། །ལྷ་རྫས་དར་དཀར་རྟེན་དང་བཅས་པའི་འཕྲིན། །བླང་དོར་གསལ་བར་སྟོན་པ་ཨ་དརྴ། །མཚམས་སྤྲིན་འོད་བརྒྱ་དང་འགྲོགས་ཕོ་ཉ་ཡིས། །མ་ཉམས་སུག་པར་སོན་པ་མཆོག་ཏུ་སྤྲོ། །དཀོན་པ་སྒྲིབ་བཙན་མཐུ་དང་ནུས་པའི་བདག །གཏེར་གྱི་སྲུང་མ་གནོད་སྦྱིན་བཤན་པ་ཆེ། །རླུང་གི་ཤུགས་ཅན་རྟ་མཆོག་ལ་ཞོན་ཏེ། །སྟོང་གསུམ་མྱུལ་ནས་བསྟན་འགྲོའི་མེལ་ཚེ་མཛོད། །འཇིག་རྟེན་སྤྱི་དང་ཁྱད་པར་བོད་ཡུལ་འདིར། །ནད་རིམས་དབུལ་ཕོངས་གཡུལ་འཁྲུག་ལ་སོགས་པ། །ཉེས་བརྒྱ་ཀུན་ཞི་བདེ་སྐྱིད་ལ་སྦྱོར་ཞིང་། །རིགས་འཛིན་བདག་གིས་བཅོལ་བའི་ལས་ཀུན་སྒྲུབས། །ཟླ་གཞོན་ཐགས་སུ་བཏགས་འདྲའི་སྙན་ཤལ་དང་། །ཞོ་ཡི་འཁོར་ལོས་ས་ལེ་སྦྲམ་གྱི་སྐྱེས། །འཕྱོས་ལུང་དཀར་བའི་སྡེ་བརྒྱད་འདུ་གནས་དེར། །ཆུ་སྟོད་ཟླ་བའི་དམར་ཆའི་དུས་ལ་དགེ ། ལྷོ་ཀོང་གི་དཔུང་འཇུག་སྐོར་པ་བསམ་ཡས་སུ་དྲེགས་པའི་སྡེ་དཔོན་ཆེན་པོར་འཕྲིན་འཆོལ་གྱི་སྤྱན་གཟིགས་སྤེལ་བར་ཕུ་གུ་ལུང་པ་ལྷ་དབང་རྡོ་རྗེ་བཏང་སྐབས་འཕྲིན་གསལ་དྲང་པོར་ཐིག་འདེབས། རང་རིག་དོན་གྱི་སངས་རྒྱས་པདྨ་འབྱུང་། །མངོན་སུམ་ངོ་བོ་མ་འཕྲོད་གཅིག་པུའི་ངོར། །ཟངས་མདོག་དཔལ་རིར་མཚོ་སྐྱེས་རྡོ་རྗེ་ཞེས། །སྡེ་བརྒྱད་བྲན་དུ་འཁོལ་དེའི་ཕོ་ཉ་བ། །འཇིག་རྟེན་དྲེགས་པའི་དམག་དཔོན་ཙེའུ་དམར། །ཟབ་མོ་གཏེར་གྱི་སྲུང་མ་ཡང་ལེ་བེར། །(༢༤༥བ)
སྤྱན་སྔར་དངོས་བཤམས་ཡིད་སྤྲུལ་མཐུན་པའི་རྫས། །སྣང་སེམས་གཉིས་མེད་སྒྱུ་མ་ལྟ་བུར་སྤྲོ། །ལྷོ་མོན་ཤར་ཕྱོགས་ཀོང་པོའི་ཡུལ་གྲུ་ནས། །ལངས་པའི་དགྲ་ལས་རྣམ་པར་རྒྱལ་བའི་གཏམ། །སྙན་པོ་རྣ་བའི་བཅུད་དུ་དངར་བ་ལ། །སྔར་བཅོལ་གྲུབ་པའི་གཏང་རག་ཚུལ་དུ་ཕུལ། །རང་གཞན་བདེ་ཐབས་ཆེད་དུ་ཆིངས་ཀྱི་སྐོར། །ཕན་ཚུན་གཉིས་ལོའི་དོན་ཁ་འབྲུག་ཕྱོགས་ནས། །སྔ་སར་ལུགས་ལ་མ་སོང་བྱས་གྱུར་ཚེ། །ཚུལ་བཞིན་བསྒྲུབ་པའི་ལྷག་བསམ་ཡིད་ལ་དཀར། །ལང་ཤོར་ཁོ་ནའི་རྒྱལ་པོ་ང་ལུང་གཏམ། །བྱས་ནས་ལབ་དན་གལ་ཏེ་མ་འགྲིག་ན། །བདེན་རྫུན་ལེགས་ཉེས་ལྷ་མིག་སྤྱན་རས་ཀྱིས། །གཟིགས་ལ་དྲག་པོའི་འཕྲིན་ལས་མྱུར་དུ་སྒྲུབས། །ས་ཕག་ཚུན་ནས་སེམས་ཅན་བདེ་ཐབས་ལ། །བསམས་ཏེ་རིམ་གྱིས་འཕམ་ཁུར་བྱས་པའི་ཚུལ། །ལྷ་སྲིན་སྡེ་བརྒྱད་རྣམས་ཀྱིས་མ་མཁྱེན་ན། །དཔྲལ་བའི་མིག་ཀྱང་རི་མོའི་གཟུགས་བརྙན་འདྲ། །རྒྱ་དར་དཀར་པོའི་སྙན་ཤལ་དམོད་ནས་བཅས། །སྨིན་དྲུག་ཟླ་བ་མངོན་སྤྱོད་ལས་སྦྱོར་ཀུན། །ཐོགས་མེད་གྲུབ་པ་ཡར་ངོའི་གྲལ་ཚེས་ལ། །སྡེ་བརྒྱད་རྦ་ཀློང་འཁྲུག་པའི་འདུན་སར་སྤེལ། །ཨ་ན་ལ་ཞེས་པ་མེ་འབྲུག་གི་ལོ་འཇམ་དབྱངས་གོང་མ་ཆེན་པོའི་བཀའ་ཤོག་གནང་སྐྱེས་སྤེལ་བར་ཇོ་ར་ཆེ་བླ་མ་དང་ཁང་དབུ་མཛད་གསེར་ཡིག་ཏུ་འོངས་པ་མེ་སྦྲུལ་ཕྱིར་ལྡོག་པའི་ཚེ་འབྲས་སྤུངས་འདུལ་བ་སློབ་དཔོན་ཟུར་པ་བློ་བཟང་བསྟན་འཛིན་དང་རྟ་འབུལ་ནང་སོ་གཉིས་རྫོང་བདའ་བྱས་སྐབས་ཕུལ་བའི་ཞུ་ཡིག་འཁོར་ལོའི་(༢༤༦ན)
རི་མོ་འཆར་བའི་མེ་ལོང་། ཏྲཻ བྷ བཱ གྲ ཤ ཁ ཧོ ར དེ བ ནཱ ར ཡ སྱ ཙེ ཤྭ རེ སུ རེ རྒ ག ནྱ ཏོ ཧི པཱ ལ ཀེ ན བཱ ཧུ ལེ ན སཾ མ གཻ རྨ ཧཱ ས ནེ ཥུ། ཙ ཀྲ བྷུ ཥྱ རེ ཁ ཀཱ བི ཙི ཏྲ ཙོ བྷ པཱ ད པ ཪྻ ཙ ངྒ ཀཱ ར མ ཛྫུ གྷོ ཥ ཀཱ དི རཱ ཛ མཱུ ལ ཛཱ ནུ ཏེ རྨུ ཁཱ བྷི ད ཤ ཀ ཏྭ། །འཇིག་(སྡེབ་སྦྱོར་མཉམ་པའི་པྲྀཏྟ་ལས་ཟླུམ་པོ།)རྟེན་གསུམ་གྱི་གཙུག་ཏོར་རྩེར་འཛེགས་ལྷ་དང་མི་ཡི་དབང་ཕྱུག་ཏུ། །ཚེ་རིང་གནམ་གྱི་ཤེ་མོང་ཤུགས་ཀྱིས་མང་པོས་བཀུར་བའི་ཁྲི་ཆེན་པོར། །འཁོར་ལོས་མཚན་པའི་རི་མོ་རྣམ་བཀྲ་ཞབས་ཟུང་སྐྱིལ་མོ་ཀྲུང་བཅས་པ། །ཇམ་དབྱངས་གོང་མ་རྒྱལ་པོའི་དྲུང་དུ་པུས་བཙུགས་བཞིན་རས་མངོན་ཕྱོགས་ནས། །རབ་དངས་ཤིང་ཤུན་ལོ་མའི་གོས་ཀྱིས་ཀླུབས། །བག་ཡོད་མཆོད་ཕྱིར་ཐོགས་དང་ཚངས་སྐུད་འཆང་། །ཚེ་སྤེལ་བདེན་ཚིག་བུམ་བཟང་དཱུརྦའི་རྩྭ། །ཐོགས་པ་སྔོན་འགྲོས་ཆེད་གསོལ་མགྲིན་པ་བཏེག །བསྐལ་མང་ཚོགས་ཀྱིས་བསྒྲུབས་པའི་ལེགས་བྱས་ནོར། །ཕུང་པོར་སྤུངས་ཀྱང་ཆ་ཙམ་བསྒྲུན་དཀའ་བ། །གཟི་བྱིན་ཉི་མའི་(༢༤༦བ)
དངོས་བརྒྱ་འཕྲོག་ནུས་སྐུ། །འཛམ་གླིང་སྐྱེ་རྒུའི་གཙུག་ན་འབར་བའི་ངང་། །ཚངས་པའི་དབྱངས་ལ་ཉེར་མོས་འཆིང་བའི་མདུད། །ལྷོད་པོར་འགྲོལ་བ་ཚིག་དོན་སྙན་འཇེབས་གསུང་། །ཡི་གེའི་གཟུགས་ཤར་བཀའ་རྟགས་ཕྱག་རྒྱ་ཅན། །སྲིད་པའི་དངོས་པོ་ཡོངས་བསྡུས་གནང་རྟེན་བཅས། །ལྷ་གཅིག་ཟབ་ཡངས་ཐུགས་ཀྱི་དཔལ་བེའུར། །ཤཱཀྱའི་རྗེས་ཞུགས་དགེ་སྦྱོང་གྱི་ན་བ། །ནམ་ཡང་མ་དོར་མཚོན་ཕྱིར་གསེར་ཡིག་དེས། །སྙིམ་པར་སོན་ཚེ་ཀུན་དགའི་མཆོག་སྦྱིན་ཐོབ། །འདི་ན་ལྷ་ལམ་མཐས་ཁྱབ་འགྲོ་རྣམས་ལ། །ལྷག་བསམ་སྟོན་ཟླ་ལྟར་དཀར་ཀློག་པ་མཁན། །ཉི་འོག་མཚུངས་མེད་འཁོར་སྒྱུར་ཁྱོད་དྲིན་ལས། །གཏན་མདུན་བསྒྲུབ་ལ་འཚེ་མེད་སིམ་པར་གནས། །རྒྱགས་པའི་སྙེམས་བྲལ་དམན་ལ་བརྩེ་བའི་སྤྱན། །དཀྱུས་རིང་ཀུན་ལ་ངལ་གསོར་འཇུག་བྱེད་རྫས། །ཕན་བདེའི་མཆོད་སྦྱིན་གཏོང་བའི་མ་མ་ལ། །ཤར་ཕྱོགས་རྒྱལ་པོར་འབོད་པའི་མཚན་གྱིས་སྙན། །དབུལ་བའི་གདུང་སེལ་ཕུན་ཚོགས་འདོད་དགུའི་ལྗིད། །མ་བཟོད་ནོར་འཛིན་བུ་མོར་རྔུལ་ཆུའི་རྒྱུན། །རྒྱ་མཚོར་ཚད་མེད་བབས་ཀྱང་རྣམ་ཐོས་བུས། །འགྲན་པའི་ངལ་བ་ད་དུང་མི་གཏོང་མཚར། །ལྷ་ཁྱོད་བདུད་སྡེ་ཟིལ་གནོན་ཏིང་འཛིན་ལ། །སྙོམས་ཞུགས་ཡན་ལག་རྣམ་བཞིའི་དམག་གི་དཔུང་། །རབ་ཁྲོས་གཏུམ་དྲག་འབར་བའི་འཁོར་ལོའི་རྩེར། །རྒོལ་ངན་ཀླ་ཀློའི་ཀླད་ཁྲག་ཅི་ཡང་འཐོར། །དོན་སྙིང་ལྐོག་མར་ཐོན་ཡང་རྐང་པའི་རྗེས། །(༢༤༧ན)
ལམ་ལམ་རྒྱ་མཚོའི་མཐར་བྲོས་བསྙེགས་པ་ལ། །བཀའ་བསྒོས་ཝང་གི་ལས་འཛིན་དམག་དཔོན་ཚོགས། །ཞེ་སྡང་སྲིན་པོ་རྒྱུ་ལ་འགྲན་པ་བཞིན། །སྐྱེ་མང་སྡིག་བསགས་ནག་པོའི་རྣམ་སྨིན་གྱི། །རྩོད་ལས་ཆེར་རྩོད་དུས་ཀྱི་ཆད་པའི་མུན། །མགོན་ཁྱོད་ཐུགས་རྗེའི་ཉི་མས་མྱུར་སངས་ནས། །རྫོགས་ལྡན་གཞོན་ནུའི་སྣང་བས་ཅིས་མི་ཁྱབ། །ཛམ་བུ་ཏྲཱི་ཤའི་ཤིང་གིས་མཛེས་བརྒྱན་གླིང་། །ས་ཡི་དཀྱིལ་འཁོར་ཡོངས་ཁྱབ་ཡོད་དོ་ཅོག །ཡིད་ཅན་རྣམས་ཀྱི་བསགས་པའི་བསོད་ནམས་མཐུས། །མི་བདག་བསྐལ་བརྒྱར་ཞབས་པད་བརྟན་གྱུར་ཅིག །དགྱེས་ཞལ་འཛུམ་པ་མ་དྲོས་མཚོ་ཆེན་ལས། །ཆོས་ནོར་འདོད་ཐར་ཆུ་ཀླུང་རྣམ་བཞིའི་རྒྱུན། །འཛིན་ལ་མི་ངལ་དབུས་འགྱུར་ཀུན་བཟོད་ལྟོ། །འགེངས་ལ་ཡལ་ཡོལ་མེད་པའི་ཐུགས་རྗེ་བསྐྱེད། །དཀར་དམར་རིན་ཆེན་སྣ་ཚོགས་འཇམ་ཕྲུག་སོགས། །བདོག་པས་རབ་བཏེག་ཞུ་མཆིད་སྤྱི་བརྟོལ་ཚིག །བྱམས་ལྡན་མ་ལ་བུས་པའི་ངག་བཞིན་དུ། །མཁྱེན་བརྩེའི་དབྱིངས་སུ་ཁྲེལ་བའི་གོ་སྐབས་ཅི། །ཟླ་བ་བཟང་པོར་མཆོག་གི་དང་པོའི་རྒྱུད། །ཐུབ་པས་ལྷོ་ཕྱོགས་འབྲས་སྤུངས་མཆོད་རྟེན་ཆེར། །ལེགས་གསུངས་ནག་པས་ཉ་བའི་ཡར་ཚེས་ལ། །ལུས་བཏུད་ཐལ་སྦྱར་དང་བའི་ཡིད་ཀྱིས་ཕུལ། །
རབ་བྱུང་བཅུ་གཅིག་པའི་མེ་སྦྲུལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་མེ་སྦྲུལ་ལོར་བྲིས་པའི་ཆབ་ཤོག་འཕྲིན་ཡིག་ཁག །མེ་སྦྲུལ་ཧོར་ཟླ་བཞི་པའི་ནང་དུ་ཐང་ཆེན་རིགས་ཀྱི་སྲུང་མར་འཕྱོས་ཆང་ཁྱིམ་པ་གཞོན་པ་གསོལ་མཆོད་སྤྱན་གཟིགས་འབུལ་བར་བཏང་བའི་ཚེ་འཕྲིན་གསོལ་ལྷ་རྒྱལ་སྒྲ་དབྱངས། བྱོན་ཟིན་(༢༤༧བ)
འབྱོན་གྱུར་དེ་ལྟར་བཞུགས་བཞིན་པའི། །སངས་རྒྱས་ཀུན་གྱི་མཐུ་སྟོབས་གཅིག་བསྡུས་པ། །ཨོནྜི་ཡཱ་ནའི་སློབ་དཔོན་ཞབས་སེན་ཟླ། །བྱང་ཆུབ་བར་དུ་མི་འབྲལ་གཙུག་ཏོར་རྒྱན། །མགོན་དེས་ཁྲག་འཐུང་པདྨ་ཧེ་རུ་ཀའི། །དཀྱིལ་འཁོར་ཆེན་པོར་དབང་བསྐུར་དམ་བསྒྲགས་པ། །སྤྲུལ་པའི་ཆོས་རྒྱལ་གནོད་སྦྱིན་ཤིང་བྱ་ཅན། །བློན་པོ་བཤན་པ་ལག་དམར་དེང་འདིར་དགོངས། །འདོད་ཡོན་ལྔ་ལྡན་བ་ལམ་བཟའ་བཅའ་ཡི། །ཕུང་པོ་ཕྱུར་བུར་སྤུངས་པ་རི་བོ་བཞིན། །སྨན་ཕུད་ཁྲག་ཆང་ན་དཀར་བཏུང་བའི་མཚོ། །རླབས་འཕྲེང་ཟེགས་མས་འཆི་མེད་ལམ་ཀུན་འགེངས། །གསེར་སྐྱེམས་ཕྱི་ནང་དར་སོགས་དངོས་བཤམས་དང་། །ཡིད་སྤྲུལ་ནམ་མཁའ་མཛོད་ཀྱི་སྒོ་ཕྱེ་བས། །ཕ་མེས་བརྒྱུད་པའི་བསྟན་སྲུང་མཐུ་ལྡན་ཁྱོད། །འཁོར་བཅས་ཐུགས་དམ་དབྱིངས་སུ་སྐོང་གྱུར་ཅིག །མ་རུངས་བརླང་པོར་སྤྱོད་པའི་བསམ་སྦྱོར་གྱིས། །གླགས་ལྟའི་གཟུགས་ཅན་དགུ་དང་གཟུགས་མེད་བགེགས། །གང་དུ་གནས་ཀྱང་དམར་ཟླུམ་སྤྱན་རས་ཀྱིས། །ཉེ་བར་གཟིགས་ལ་ཐལ་བའི་རྡུལ་དུ་ཀློག །ཚེ་དང་བསོད་ནམས་དཔལ་འབྱོར་དབང་ཐང་སོགས། །ཆོས་སྲིད་ལེགས་ཚོགས་བླ་ནས་བླར་སྤེལ་བར། །ཕུལ་བའི་ཞུ་འཕྲིན་སྙན་པའི་ལྷ་རྒྱལ་སྒྲ། །སོལ་ནག་ཐང་ཆེན་གཙུག་ལག་ཁང་དེར་བསྒྲག དམར་ཟེར་ཅན་གྱི་ལོ་བསམ་ཡས་མདོ་སྡེ་མཆོད་པའི་སྐྱེས་འབུལ་བར་སྤུན་བདུན་པ་ལྷུན་གྲུབ་རྒྱ་མཚོ་བཏང་བའི་(༢༤༨ན)
དུས་བསྟན་སྲུང་ཆོས་རྒྱལ་དཔོན་བློན་ལ་འཕྲིན་དུ་གསོལ་བ་ལས་བཞི་ལྷུན་གྲུབ། དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་བདག་ཉིད་ཞི་དང་ཁྲོ་བོའི་དཀྱིལ་འཁོར་ཀུན་གྱི་གཙོ་བོ་ཁྱབ་བདག་ཧེ་རུ་ཀཿརྒྱ་གར་པཎ་ཆེན་གྱི་ཚུལ་བཟུང་ནས་བརྟུལ་ཞུགས་སྤྱོད་པའི་དབང་པོ་པདྨ་ཐོད་འཕྲེང་རྩལ་གྱི་སྤྱན་སྔར་བསྟན་དང་འགྲོ་བའི་ཕན་བདེ་སྤེལ་བར་ཞལ་གྱིས་འཆེས་པ་སྤྲུལ་པའི་ཆོས་རྒྱལ་ཆེན་པོར་དམར་སེར་ཅན་གྱི་ལོ་སྣྲོན་གྱིས་ཉ་བའི་མདོ་སྡེ་མཆོད་པ་ཞེས་ལྷ་དང་མིའི་དགའ་སྟོན་ཆེན་མོའི་ཐོག་མཆོད་པའི་སྤྲིན་ཕུང་སྔར་བཞིན་སྤྲོ་བར་འདི་པ་ཆེད་དུ་མངགས་པ་སངས་རྒྱས་ཀྱི་བསྟན་པ་དར་ཞིང་འཇིག་རྟེན་སྤྱི་དང་ཁྱད་པར་ཁ་བ་ཅན་གྱི་ལྗོངས་འདིར་བཀྲ་ཤིས་དང་བདེ་སྐྱིད་ཕུན་སུམ་ཚོགས་པ་འབྱུང་བ་དང་བྱེ་བྲག་བདག་སོགས་དཔོན་སློབ་ཡོན་མཆོད་འཁོར་དང་བཅས་པའི་འཕྲིན་ལས་ཐམས་ཅད་ལྷུན་གྱིས་གྲུབ་པར་མཛད་དུ་གསོལ། ཞེས་སྙན་ཤལ་ཐོ་ཟུར་གསལ་དང་བཅས་དཀར་ཆའི་དགའ་བ་གསུམ་པའི་ཚེས་ལ་དམར་པོ་རི་ནས་དགེ ། སྐུ་གཅིག་ལ་མཚན་བརྒྱད་དུ་བསྟན་པར་མ་ཟད་གྲངས་མེད་པའི་འགྲོ་བློའི་དངས་མཚོར་ཟླ་བ་འབུམ་ཕྲག་གི་གཟུགས་བརྙན་འཆར་བ་བཞིན་ཁམས་དང་བསམ་པར་མཐུན་པའི་ངོ་མཚར་གྱི་ཆོ་འཕྲུལ་མཐའ་ཀླས་པར་སྟོན་ནའང་ཨོཌྜི་ཡཱ་ནའི་སིནྡྷུ་རྒྱ་མཚོའི་གླིང་དུ་གཙང་བྱེད་འདབ་བརྒྱའི་དབུས་སུ་རྫུས་སྐྱེས་པ་པདྨ་ཐོད་འཕྲེང་རྩལ་གྱིས་དམ་ཚིག་གཉན་པོ་ཉེ་བར་བསྒྲགས་པ་ཀུན་ཁྱབ་རྡོ་རྗེ་དྲག་པོ་རྩལ་(༢༤༨བ)
གྱི་སྤྱན་སྔར་ཧོར་ཟླ་ལྔ་པའི་ནང་དུ་ལྷ་མིའི་མཆོད་པ་རྒྱ་ཆེར་སྤེལ་བ་མདོ་སྡེ་ཆེན་མོར་གྲགས་པའི་ཐོག་སྔོན་ལྟར་ཐུགས་དམ་གཉན་པོ་དབྱིངས་སུ་སྐོང་བར་འདི་པ་ཆེད་གཉེར་མངགས་པ་འཇིག་རྟེན་གྱི་ཁམས་ཐམས་ཅད་དུ་བདེ་ལེགས་ཕུན་སུམ་ཚོགས་པས་ཁྱབ་པ་དང་། ཁྱད་པར་ཕན་བདེའི་འབྱུང་གནས་རྒྱལ་བའི་བསྟན་པ་གནས་པའི་གཞི་དབུས་གཙང་རུ་བཞིའི་རྒྱལ་ཁམས་སུ་ནད་མཚོན་མུ་གེའི་འཚེ་བ་བཟློག་ཅིང་འཕུང་བྱེད་ཀྱི་རྒོལ་བ་ངན་པ་ཐམས་ཅད་ཚར་གཅོད་པ་སོགས་བདག་སོགས་རྣམས་ཀྱི་བསམ་དོན་ལྷུན་གྱིས་གྲུབ་པར་མཛོད་ཅིག །ཅེས་ལྷ་དར་གྱི་སྙན་ཤལ་ཐོ་ཟུར་གསལ་དང་བཅས་སྣྲོན་ཟླའི་ཡར་ཚེས་ལ་དགེ། དམར་སེར་ཅན་གྱི་ལོ་ཆུ་སྟོད་ཟླ་བའི་ཚེས་གཅིག་ལ་ཚངས་པ་དུང་ཐོད་ཅན་གྱི་སྤྱན་སྔར་མཆོད་སྤྲིན་སྤྲོས་ཏེ་ལུང་བསྟན་ཞུ་བར་སྟར་སྡོང་བ་བཏང་པའི་དུས་ཀྱི་འཕྲིན་གསོལ་བདེ་སྐྱིད་འོད་དཀར། བདེ་ལྡན་ཞིང་གི་མགོན་པོར་རྟག་བཞུགས་སྣང་བ་མཐའ་ཡས་ཆོས་ཀྱི་སྐུ། །གྲུ་འཛིན་ལ་དགྱེས་ཕྱག་ན་པད་དཀར་འཆང་བ་ལོངས་སྤྱོད་རྫོགས་པའི་སྐུ། །སིནྡྷུའི་དངས་མཚོར་པདྨའི་སྦུབས་འཁྲུངས་རྔ་ཡབ་གླིང་པ་སྤྲུལ་པའི་སྐུ། །དབྱེར་མེད་ཞབས་རྡུལ་ཐོད་དུ་འཆིང་བ་ལྷ་མཆོག་ཚངས་པའི་རྣམ་རོལ་སྐུ། །ས་གསུམ་ཅིག་ཅར་གཡོ་བའི་རྫུ་འཕྲུལ་གྱིས། ཁམས་གསུམ་སེམས་ཅན་སྲོག་ལ་དབང་སྒྱུར་ཡང་། །མཆོག་གསུམ་གཙུག་བསྟེན་དམ་ལས་མི་འདའ་བ། །དུས་གསུམ་རྒྱལ་བའི་བསྟན་སྲུང་ཤེལ་གིང་ཆེ། །(༢༤༩ན)
སྐྱེ་བ་ལྔ་པའི་དུང་དཀར་ཐོད་དུ་བཅིངས། །འཇམ་མཉེན་ལྷབ་ལྷུབ་དུང་དཀར་བེར་ཆེན་གྱོན། །རྡུལ་བྲལ་སྟོན་ཟླ་ལྟར་དཀར་འཛུམ་ཞལ་ཅན། །དངོམས་ནས་བདེ་སྐྱིད་འོད་དཀར་ལེགས་སྤྲོ་བ། །སྙན་སྙན་ཚིག་ཙམ་ལ་འཆེལ་མ་ཡིན་པར། །དུང་དུང་ལྷ་ཁྱོད་ཁོག་ཏུ་བརླམས་པའི་འབྲས། །ཞིམ་ཞིམ་རྟོགས་པར་དཀའ་བའི་ལྐོག་གྱུར་ཆོས། །གསལ་གསལ་རྡོ་རྗེའི་ཚིག་གིས་ལྷུག་པར་སྟོན། །རྣམ་འདྲེན་དོན་ཀུན་གྲུབ་པའི་བསྟན་པའི་སྲོལ། །རྣམ་དག་ལུང་དང་རིག་པས་འཛིན་པ་ལ། །རྣམ་དཔྱོད་ཟླ་བྲལ་འཇམ་མགོན་བཙོང་ཁ་པའི། །རྣམ་དཀར་འཕྲིན་ལས་སྲིད་མཐར་སྤེལ་བར་མཛོད། །མ་སྨད་སྐྱེ་རྒུའི་བདེ་སྐྱིད་འཇོམས་པ་ལ། །མི་བསྲུན་སྨོན་ལམ་ལོག་པའི་ཀླ་ཀློའི་སྡེ། །མུ་མེད་ཡིད་སྲུབས་སྒྱུ་འཕྲུལ་དྲ་བའི་ཤིང་། །མེ་ལྟར་འབར་བའི་མངོན་སྤྱོད་ལས་ཀྱིས་སྲེགས། །སྲོང་བཙན་སྒམ་པོའི་འཁྲུངས་ལྷ་ཚངས་པའི་སྙན། །སྙན་ཁུང་ཨུཏྤལ་འབྱེད་ལ་གསོང་པོའི་ཚིག །ཚིག་དོན་འཁྲུལ་མེད་གསོལ་ལན་ཆུ་མཚོའི་ཟླ། །ཟླ་སྣང་བཞིན་དུ་མངོན་སུམ་སྟོན་ཞིག་གུ། །དབང་གཞུ་ལྟ་བུར་བཀྲ་བའི་སྤྱན་གཟིགས་སོགས། །དབང་པོ་ཚིམ་བྱེད་ཐུགས་དམ་བསྐང་པའི་རྫས། །དབང་ཕྱོགས་སྡེ་བརྒྱད་འདུ་བའི་ཕོ་བྲང་ཆེར། །དབང་དྲག་འཕྲིན་ལས་བསྒྲུབ་ཕྱིར་དབུལ་བ་དགེ ། མེ་སྦྲུལ་བར་ཁམས་ནས་རྟ་ཚག་སྤྲུལ་པའི་སྐུས་རིང་འཚོའི་རྟེན་འབྱུང་སྤེལ་བར་དབོན་པོ་ངག་དབང་བཀྲ་ཤིས་བཏང་བའི་དུས་གསུང་འཕྲིན་ཚིགས་བཅད་དུ་བྱུང་བའི་(༢༤༩བ)
ལན་ཉིན་བྱེད་གཉིས་པའི་རང་གཟུགས། སྭེ དྷ ན ལྤ དྡྷ ཥེ ཏ མྤུ རཻ རྦཱི ཎ མ ཏྱངྐུ ལཻ ལྤ ཪྻ ཙོ ད ནླི ཁཾ བཱ གྒི ཏཾ། །ཏ སྨི ནཱ ཀཱ ཤ ཏ སྶོ ད ཡཾ སཻ ཀ ཏཱ མུ དྲ རཾ ཁཱ པྲ ཙི ཏྲཾ བྷུ ཇེ ཡུ ཀྟ ཀ །སྤེལ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)ལེགས་ཚིག་རྒྱན་ཏམྦུ་ར་ཡི་རྒྱུད། །བློ་གྲོས་སོར་མོས་ཡོངས་བསྐུལ་གསུང་འཕྲིན་གླུ། །དེར་གསལ་བདོག་པའི་སྐྱེས་དང་ཆབས་ཅིག་པར། །ཕྱག་རྒྱའི་རི་མོ་རབ་བཀྲ་སུག་པར་སོན། །བསྐལ་མང་ཚོགས་ཀྱིས་བསྒྲུབས་འབྲས་སྣང་བརྙན་ཟླ། །མཚན་བཟང་ཆ་རྫོགས་རྣམ་དཔྱོད་ག་བུར་རྡུལ། །ཉེས་བརྒྱའི་ཚ་གདུང་བཅིལ་བར་བསྔགས་པའི་གཏམ། །སྒྲོག་ལ་གཡེང་བའི་གཉིས་སྐྱེས་མང་ཞིག་ཁྲེལ། །མདོ་སྟོད་ནོར་འཛིན་དཔལ་མོའི་ལེགས་བྱས་ཀྱི། །མངལ་ཡངས་ཁུར་དུ་ལྕི་བ་གང་གི་སྐུ། །དེང་དུས་རྡོ་རྗེའི་ཁམས་སུ་རྒྱལ་ཀུན་གྱིས། །མགྲིན་གཅིག་བགྲོས་ནས་བྱིན་གྱིས་བརླབས་སམ་སྙམ། །འདི་ན་རང་དོན་སྒྲུབ་བློ་འཕྱོན་མའི་གར། །གཞན་ཕན་(༢༥༠ན)
གཏམ་གྱིས་འདྲིད་པའི་ཚུལ་འཆོས་མཁན། །ཟིན་མེད་གཡེང་བའི་ཁོལ་པོར་ཟད་པའི་གྲུ། །ན་ཚོད་ཀླུང་ཆེན་སུམ་གཉིས་ལྷག་བཅས་བརྒལ། །རིང་གནས་རྟེན་འབྲེལ་བསྒྲིགས་ཐུགས་སྟོན་ཟླའི་འོད། །ཟིལ་གནོན་རབ་དཀར་བཞེད་དོན་དང་ལེན་མཐུ། །ལས་ཉོན་དབང་སོང་བདག་འདྲར་ཆེས་དམན་ཀྱང་། །སྒྲུབ་རློམ་རང་བློ་ལྐོག་ཏུ་གྱུར་པ་བཞིན། །འོན་ཏེ་ཡུན་འཚོར་ས་གུ་ཙི་ཡན་ཆད། །མི་འདོད་གདོན་གྱིས་མ་བཏབ་རྙེད་དཀའ་བས། །མང་པོའི་བགྲང་བྱར་འཚོ་ཐབས་མ་རྟོགས་གོང་། །ཕུད་པས་རང་དོན་བསྒྲུབས་ལ་བརྩོན་མིན་སུ། །ངག་ལ་རྣམ་དག་བརྗོད་པར་དབང་ཕྱུག་པ། །ཆོས་དཀོན་ལེགས་བཤད་མཆོག་དམན་ཡིད་ཅན་མུན། །སེལ་བའི་ཉིན་བྱེད་གཉིས་པར་གྲགས་པའི་གཟུགས། །མེས་པོས་མ་བྱས་མངོན་སུམ་གསལ་བ་ལྟར། །འགྲོ་ལ་སྙོམས་པར་བྱམས་བརྩེའི་ཆུས་བརླན་པའི། །རིས་མེད་འཇུག་པ་འཕྲིན་ལས་འདབ་སྟོང་གི །ཆུན་པོ་ཐོད་དུ་འཆིང་བ་མིག་མི་འཛུམ། །ཐུན་མཚམས་གསར་པའི་གོས་ཀྱིས་དཀྲིས་འདི་ཅི། །རྣམ་འབྱེད་ཡངས་པའི་ཤེས་རབ་སྤང་ལྗོངས་ངོས། །རང་བྱུང་སྙན་ཚིག་མེ་ཏོག་ལེགས་བཀྲ་ཡང་། །ཐོས་བསམ་དབྱར་གྱི་ལང་ཚོ་མི་གཏོང་བར། །གང་ཐུགས་དངས་མཚོར་དམ་པའི་གཟུགས་བརྙན་དངོམ། །དབུས་འགྱུར་ཀུན་བཟོད་མ་འདིར་ཁྱོད་ཞབས་ཀྱི། །འཁོར་ལོའི་རི་མོ་མྱུར་གསལ་བཞེད་དེ་སྲིད། །མགྲིན་པའི་མ་དྲོས་ཆུ་ལས་མོལ་མཆིད་ཀླུང་། །ལྷུང་ལྷུང་(༢༥༠བ)
སྒྲར་བཅས་ཆད་མེད་དབབ་ཅིག་གུ །སྤྱན་ཟུར་དཔྱིད་ཀྱི་རྒྱལ་མོ་ཉེར་འབོད་པའི། །འཕྲིན་ཡིག་གཞན་སོས་སྐད་སྙན་འགྱུར་ཁུག་ཅན། །ཐོར་གསལ་བདོག་པའི་གཤོག་རླབས་རབ་བསྐྱོད་ནས། །དབང་ལྡན་ཕྱོགས་ཀྱི་ལྷ་ཡི་ལམ་ངོས་འཕུར། །ཆོས་རྒྱལ་གཏེར་བདག་གླིང་པ་རིགས་འཛིན་གོང་མ་རྣམས་ཀྱི་རྣམ་ཐར་གྲགས་པའི་བཀའ་བབས་ཟབ་དོན་ཡོལ་མེད་ཀྱི་རྟེན་འབྲེལ་བསྒྲིག་པའི་ཚོགས་འདོན་ཚིགས་བཅད་དང་། ན་བཟའ་སྐོར། རྡོར་དྲིལ་སོགས་ཚན་གྲངས་སྨིན་གྲོལ་གླིང་དུ་མང་འགྱེད་གཏོང་བར་ཕུ་གུ་ལུང་པ་རྩིས་རིག་རྒྱ་མཚོ་འཛིན་པ་བློ་བཟང་ཡོན་ཏན་བཏང་བའི་དུས་ཕུལ་བ་རཏ་གླིང་གཉིས་པར་གསོལ་བའི་བདེན་གཏམ། དེང་ཐེག་པ་རིམ་དགུའི་རྒྱ་མཚོ་ཀུན་ནས་འཁྱིལ་བའི་དབུས་སུ་ལྷ་སྔགས་ཡེ་ཤེས་ཀྱི་འདབ་སྟོང་མངོན་པར་བཞད་པའི་ལྟེ་བར་ངོ་མཚར་མཚན་དཔེའི་གར་མཁན་རྒྱལ་དབང་པདྨ་ཀཱ་ར་གཉིས་པའི་རང་གཟུགས་གངས་ཅན་སྐྱེ་རྒུའི་ལེགས་བྱས་ཀྱི་དཔལ་དུ་འོད་གཟི་མངོན་པར་འབར་ཞིང་སྒྲིབ་གཉིས་ཡོངས་སུ་གཞིལ་བྱེད་བསྐྱེད་རྫོགས་རྫོགས་པ་ཆེན་པོའི་ཟབ་དོན་རྡོ་རྗེའི་རྣལ་འབྱོར་བླ་ན་མེད་པའི་སྨིན་གྲོལ་དང་ཐུན་མོང་དུ་གྲུབ་པ་ཆེན་པོ་བརྒྱད་དང་ཞི་རྒྱས་དབང་དྲག་གི་འཕྲིན་ལས་མཆོག་དམན་གདུལ་བྱའི་ཁམས་དང་དབང་པོར་ཉེ་བར་གང་འཚམ་དུ་འཇུག་པའི་སྙན་གྲགས་ལྷའི་དུཎྜཱུ་བྷིའི་སྒྲ་དབྱངས་སྤྱི་དང་ཁྱད་པར་ཛམྦྷུ་བྲྀཀྵས་མཚན་པའི་གླིང་ཆེན་པོའི་གཞིར་འཁོད་པའི་ལུས་ཅན་ཡོངས་ཀྱི་རྣ་ལུང་མཛེས་པར་བྱེད་པ་ལས་གཞན་དུ་ཅི། འདི་ནའང་བྱང་ཆུབ་སེམས་དཔའ་ནམ་མཁའི་སྙིང་པོ་གཞན་(༢༥༡ན)
སྣང་ཙམ་དུ་ཚངས་པའི་རྒྱལ་པོར་བསྟན་ཅིང་བོད་སྐྱོང་རྒྱལ་པོའི་སྐུ་ལྷ་ཟུར་ཕུད་ལྔ་པ་བསྙེན་མཆོད་བཀང་བའི་རིམ་པ་ལ་སྒོ་གསུམ་མི་འདའ་བའི་བཅད་རྒྱ་བདུན་གཉིས་ལྷ་གཅིག་བགྱིས་པ་ཟིན་པའི་སྤྱོད་ཡུལ་ཡངས་པར་གནས། སྤྲུལ་སྐུ་རིགས་འཛིན་ཆེན་པོ་ཉིད་རྡོ་རྗེའི་ཁྲི་ལ་སྐུ་ཚེ་གཡུང་དྲུང་གི་རང་བཞིན་དུ་བརྟན་པ་ན་བཞུགས་ནས་ཟབ་གཏེར་འཕྲིན་ལས་ཀྱི་སྒོ་འཕར་དུས་སུ་འབྱེད་པར་བཀའ་བབས་རྒྱལ་བའི་སྲས་པོ་གཏེར་ཆེན་ཆོས་ཀྱི་རྒྱལ་པོ་རཏྣ་གླིང་པའི་རྣམ་པར་ཐར་པ་དང་མཚུངས་པར་མཛད་ནས་དུས་གསུམ་སངས་རྒྱས་དཔལ་ཨོཌྜི་ཡཱ་ནའི་སློབ་དཔོན་ཆེན་པོ་མ་འོངས་སྙིགས་མའི་འགྲོ་ལ་ཐུགས་ལྷག་པར་བརྩེ་བའི་ཕན་བདེའི་སྒོ་འཕར་བརྒྱ་ཕྲག་ཏུ་འབྱེད་པའི་བཞེད་པ་ལྷུན་གྱིས་གྲུབ་པའི་རྟེན་འབྲེལ་དུ་རྩ་གསུམ་ཐུགས་རྗེའི་དྲོད་གཤེར་གྱིས་ཇི་ལྟར་སྨོན་པའི་འབྲས་བུ་ཡོངས་སུ་སྨིན་པ་རོ་བདའི་བཅུད་ལ་ལོངས་སུ་སྤྱོད་པའི་བདེན་པ་བརྗོད་པའི་ཚིགས་བཅད་བདོག་པ་ཚན་གྲངས་ཐོགས་ལ་ཨོ་རྒྱན་སྨིན་གྲོལ་གླིང་འདུས་གྲར་མང་འགྱེད་དང་བཅས་འདི་པ་ཆེད་དུ་མངགས་པ་ལོ་ཆེན་བཻ་རོ་ཙ་ན་དང་རྒྱལ་སྲས་རྡོ་རྗེ་གླིང་པ་སོགས་བོད་ཡུལ་སྐྱེ་རྒུའི་གཉེན་དུ་རིམ་པར་བྱོན་པའི་སྨོན་ལམ་གྱི་མཐུ་བཙན་པོས་བསམས་བཞིན་སྤྲུལ་པའི་རྣམ་པར་རོལ་པའི་དགོས་དོན་གྱི་གཙོ་བོ་བྱང་ཆུབ་སེམས་དཔའ་རྣམས་ཀྱི་སྤྱོད་པ་རླབས་པོ་ཆེའི་འཕྲིན་ལས་ཀྱི་གདུགས་དཀར་པོའི་གྲིབ་བསིལ་དུ་ཆེས་ཆེར་སྙིགས་མར་སྤྱོད་པའི་ལུས་ཅན་སྤྱི་དང་། ཁྱད་པར་ལྗོངས་འདིར་འཁོད་དོ་ཅོག་(༢༥༡བ)
བདེ་བར་ངལ་གསོ་བའི་སླད་དུ་ཚེ་མཐའ་ཡས་པའི་ངོ་བོར་བཞུགས་པ་གཅམ་བུ་ཙམ་མིན་པར་ཐུགས་ཉེ་བར་བསྟད་དེ་ཞལ་གྱིས་འཆེས་པ་དང་། ཕེབས་ཚོགས་ཆུ་ཀླུང་སྐལ་ལྡན་ཤིང་རྟའི་རྒྱུན་ལྟར་ཆད་མེད་འཚལ། རྟེན་བཀྲས་བཏགས་དང་བཅས་དམར་སེར་ཅན་གྱི་ལོ་མརྒ་ཤཱིཪྴེའི་གྲལ་ཚེས་ལ་རང་བྱུང་འཕགས་པའི་གཞལ་མེད་ཁང་ནས་ཕུལ། །
རབ་བྱུང་བཅུ་གཅིག་པའི་ས་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག །ས་རྟ་ལོ་གསར་ཐོག་གྲ་ལྕོག་གྲྭ་སྤྲུལ་སྐུ་ངག་དབང་སྙན་གྲགས་བཟང་པོས་ཉམས་འགྱུར་སྟོང་གིས་སྤུད་པའི་འཕྲིན་ལན་རྟོགས་པའི་རྒྱ་མཚོ་བརྡོལ་བའི་དུནྡུ་བྷི། རམ ཏྱུ དཱ རཱ ད རྴ དྟ རྨ སྐ ནྡྷ རཱུ པ ས རྦོ ད ཡ།ཝཱ གཱི ཤྭ ར ཡཱ ཤ ས ཤྲ དྷི སུ གོ མི བི དྭ ནྶ ཙ། ཡངས་(སྡེབ་སྦྱོར་སྡེབ་སྦྱོར་མསྒོ་ཏ་ཡངས་མ།)པའི་བློ་གྲོས་མེ་ལོང་དུ། །ཆོས་ཕུང་གཟུགས་བརྙན་ཀུན་ཤར་བ། །ངག་གི་དབང་ཕྱུག་སྙན་གྲགས་ཀྱི། །དཔལ་མངའ་མཁས་བཙུན་བཟང་པོ་ཡིས། །སུམ་ལྡན་འབྱུང་བའི་གསར་འགྲོས་(༢༥༢ན)
བང་དངོམ་ཞིང་། །སེ་ཤིག་ཁ་ཁྱར་མཐོན་པོས་དཀྱུས་ཐོག་གཅོད། །ཡབ་ལྷ་སྐྱ་བདུན་ཞོན་པ་ཅང་ཤེས་ལོའི། །དགའ་སྟོན་ཆོ་ག་བསྟར་བའི་འཕྲིན་རྟེན་སོན། །ཚོགས་གཉིས་བརྒྱ་བྱིན་གཙུག་ཏོར་གྱིས་རེག་པས། །སོ་སྐྱེའི་མི་ལུས་བྱང་སེམས་འཕགས་པ་ཡི། །མེ་ཞལ་གཟུགས་སུ་བསྒྱུར་བའི་དོན་ལྡན་རྟེན། །སྐལ་བཟང་གདུལ་བྱའི་ཉེར་འཚོར་དར་དེ་སྤྲོ། །ལེགས་བྱས་དྲོད་ཀྱིས་ཆོས་ནོར་འདོད་ཐར་གསེར། །མངལ་སྦྲུམ་རྣམ་དཔྱོད་གདོང་བཞིའི་ཚལ་ཡངས་པོར། །དབྱངས་ཅན་ངང་མོའི་རྐང་གདུབ་སིལ་འཁྲོལ་བདག །ལྷག་བསམ་སྟོན་མཚན་ཆུ་ཤེལ་དབང་པོར་འགྲན། །གཟུང་འཛིན་རྒྱ་མཚོའི་ཕ་མཐར་གནས་ལུགས་ཏེ། །རྣམ་རྟོག་ཆོས་སྐུར་རྗེན་མཐོང་ཕྱག་རྒྱ་ཆེའི། །རིང་ལུགས་སྤེལ་ལ་ཁྱོད་ལས་གངས་ལྗོངས་འདིར། །གཉིས་པ་ཀུན་མཁྱེན་ཡུལ་དེར་དམིགས་སུ་མེད། །ཀློག་ཙམ་མི་ཤེས་གནག་རྫི་སྐད་ཅིག་ལ། །སྨིན་མ་གཟེངས་མཐོའི་གྲུབ་ཐབ་ཤྭ་མོ་ལྟར། །རྡོལ་ཚེ་བློ་གྲོས་རྒྱུད་ཀྱིས་ལྔ་རིག་གཞུ། །འགུགས་པའི་དགེ་དབང་ས་འདིར་གཟུགས་གཞན་བཟུང་། །འཆད་པར་དབྱིག་གཉེན་གྲིབ་མར་བལྟོས་མིན་གྲོགས། །རྒོལ་ངན་སྤོབས་པ་འཕྲོག་ལ་ཆོས་ཀྱི་གྲགས། །ཉམས་འགྱུར་རྒྱན་མང་སྤེལ་བར་དཔའ་བོའི་ཞབས། །དྭགས་བརྒྱུད་གྲུབ་མཐའ་འཛིན་པའི་ཟོལ་གྱིས་བརྫུ། །ཚུལ་འཆོས་སྒྲོ་གཤོག་གཞན་འདྲིད་འབྲུག་གི་སྒྲས། །འདོད་ཡོན་མངལ་ཁུར་སྒོམ་ཞྭའི་གཙུག་ཕུད་ཅན། །ཕྱོགས་ལྷུང་སྤྲིན་ལ་མིག་གཏོད་ཐན་སྐད་གླུ། །ལེན་(༢༥༢བ)
པའི་བསྟན་འཛིན་རྨ་བྱ་ཀྱེ་མ་ཧུད། །རྒྱལ་དང་འགོག་སྙོམས་བསམ་གཏན་སྒྲོན་མེ་ལ། །ཞི་བའི་ཁང་བཟང་དུ་འཁྲུལ་འཇུག་སེམས་ཀྱིས། །གཏན་བདེའི་སྲོག་འདོར་སྒོམ་ཆེན་ཕྱེ་མ་ལེབ། །དེ་འདྲ་ལྷ་མིན་གདོན་གྱིས་སྙིང་བཏབ་བཞིན། །མི་གཡེང་ཡིད་ཀྱི་འཛིན་ཕུར་བརྟན་པོ་ནས། །སྒོམ་མེད་ཁྱབ་གདལ་གནས་ལུགས་ཡོ་ལང་ཆེར། །འཁྲིད་ལ་ཁྱོད་དང་གླིང་ཆེན་རས་པ་གཉིས། །སྤང་རྟོགས་དབྱེ་བ་ཚད་མས་གཞལ་ནུས་མིན། །གཞི་ཡི་དེ་བཅས་འབྲས་དུས་དེ་བྲལ་བ། །ཆོས་སྐུའི་ཁྱད་པར་ཤེས་ནས་སངས་རྒྱས་ཞེས། །གྲགས་ཅན་རང་སེམས་ལས་གཞན་མི་འཚོལ་བའི། །རྟོགས་པའི་རྒྱ་མཚོ་ཁྱོད་ཀྱི་ཀློང་དུ་བརྡོལ། །ཕུར་བུའི་བློ་གྲོས་མངའ་ཡང་སྙེམས་པ་བྲལ། །འཁྲུལ་པའི་ཡོ་ལང་ཞིག་ཀྱང་ཚུལ་ཁྲིམས་གཙང་། །ཐུགས་རྗེ་ཟླ་ཉ་གང་ཡང་འཕེལ་འགྲིབ་བྲལ། །ཕྱོགས་ལྷུང་སྤངས་ཀྱང་སྣོད་ལྡན་གདུལ་བྱར་ཆགས། །གཙུག་ལག་དུ་མར་བསླབ་སྦྱངས་གྲངས་ཀྱི་ཚད། །འགྲམ་པའི་ངོས་སུ་བྲིས་དང་ཆབས་ཅིག་པར། །སླར་སྐྱེས་པད་རྩའི་ཁུ་བས་ཉེར་བྱུགས་མདངས། །གཞན་ཕན་སེམས་ཀྱི་ཁ་དོག་སྟོན་པ་བཞིན། །ཕག་གྲུའི་རིང་ལུགས་ཀུན་བཟོད་སྙིགས་མའི་མཚོར། །བྱིང་ཚེ་ཐོས་བསམ་སྒོམ་པས་གྱེན་འདེགས་པར། །རུས་སྦལ་གཟུགས་སུ་བསྒྱུར་བའི་འཕྲུལ་པོ་ཆེ། །མིག་སྔོན་སཱ་ལའི་ལྗོངས་འདིར་འོངས་ལས་ཅི། །དྭགས་བརྒྱུད་ཁོག་སྟོང་པི་ཝང་ཆེས་ཡངས་པོར། །ལེགས་བཤད་སྐད་སྙན་འཁྲོལ་བའི་རྒྱུད་གཅིག་ཁྱོད། །སྲོག་གི་འཚོ་བ་རྡོ་རྗེ་རང་བཞིན་དུ། །བསླུ་མེད་མཆོག་གསུམ་(༢༥༣ན)
མཐུ་ཡིས་འགྲུབ་བྱིན་རློབས། །བྱམས་པའི་འདུས་པ་དང་པོར་འཚོག་པ་ལ། །གཡེང་བས་བྲེལ་གྱུར་དེ་སྲིད་གནམ་ལོའི་ཞལ། །ཤར་བའི་ཐོག་མར་ཤིས་བརྗོད་གླུར་ལོང་ཞེས། །མདའ་བསྣུན་མཆེད་པའི་དགེ་སྦྱོང་གང་དེར་བསྐུལ། །སྒང་གཤོངས་མེད་པར་ཀུན་ལ་རྟག་སྙོམ་པ། །སྔོན་སོང་བྱམས་བརྩེའི་རང་སེམས་མཚོན་པའི་དར། །ཐུན་མཚམས་རྒྱ་དང་འགྲོགས་ཏེ་གྲ་ཡི་ནང་། །ཕུན་ཚོགས་དགེ་བའི་ཡུལ་གྲུ་ཆེན་པོར་སྤེལ། །བོད་ཁམས་ཀྱི་ནད་ཡམས་སོགས་དུས་ཀྱི་ཆད་པ་གཞིལ་ཐབས་ཀྱི་དྲི་སྨིན་ལ་སྤྱན་གཟིགས་ཚོགས་འཁོར་དང་བཅས་སྤུན་བདུན་པ་ལྷུན་གྲུབ་རྒྱ་མཚོ་བསམ་ཡས་སུ་བཏང་པའི་འཕྲིན་གསོལ་དམ་ཚིག་སྒྲ་དབྱངས། སངས་རྒྱས་ཀུན་གྱི་སྐུ་གསུང་ཐུགས། །སྒྱུ་འཕྲུལ་རྒྱ་གར་པཎ་ཆེན་ཚུལ། །པདྨ་ཀཱ་རའི་བཀའ་རྟགས་ཀྱི། །རི་མོ་གཙུག་ཏོར་རྩེར་མཛེས་པ། །ཀུན་ཁྱབ་རྡོ་རྗེ་དྲག་པོ་རྩལ། ཁྱུང་ཆེན་ཀླུ་འདུལ་གསེག་ཤང་ཅན། །ཙེའུ་དམར་གནོད་སྦྱིན་ཡང་ལེ་བེར། །སྣ་ཚོགས་ཟློས་གར་སྟོན་མཛད་ཀྱེ། །བཟའ་བཅའ་བཏུང་བའི་ཚོགས་འཁོར་དང་། །གསེར་སྐྱེམས་ཕྱི་ནང་གོས་དང་ཇ། །དངོས་བཤམས་ཐུགས་དམ་བཀང་བའི་རྫས། །འགྲོ་ངོར་མཚོན་བྱེད་ཙམ་སྤེལ་ནས། །ཏིང་འཛིན་གྱིས་སྤྲུལ་མཆོད་པའི་སྤྲིན། །ནམ་མཁའ་མཛོད་ཀྱི་སྒོ་འབྱེད་ན། །འཕྲིན་ལས་རྣམ་བཞི་མ་ལུས་པ། །ཐོགས་པ་མེད་པར་བསྒྲུབ་ཏུ་གསོལ། །ལྐོག་གྱུར་ཆོས་རྣམས་མངོན་སུམ་དུ། །གཟིགས་པ་ཡལ་ཡོལ་བཏང་སྙོམས་ཀྱི། །(༢༥༣བ)
།དབང་དུ་མ་གྱུར་བྱ་མ་རྟར། །རྡོ་རྗེའི་གསང་ཚིག་རྗེན་པར་གསུངས། ཁྱད་པར་གངས་ལྗོངས་ཡམས་ནད་སོགས། །དུས་ཀྱི་ཆད་པ་གཞིལ་བའི་ཐབས། །སྟོན་དང་སྲུང་བཟློག་མི་མཛད་ན། །མཚོ་སྐྱེས་རྡོ་རྗེའི་དམ་ལས་འགོངས། །དེ་ཕྱིར་སྔོན་གྱི་ཞལ་བཞེས་ལྟར། །རེ་བ་འགྲུབ་བསྐུལ་འཕྲིན་ཡིག་རྟེན། །སྙན་ཤལ་དང་བཅས་ནག་ཟླ་ཡི། །རྒྱལ་ཕུར་འཛོམ་པའི་དུས་སུ་སྤེལ། །ས་རྟ་ཚོང་འདུས་ནས་བཤན་པ་བྱ་ཁྲིད་མིག་གཅིག་པས་ལུང་བསྟན་རྡོ་རྗེའི་གསུང་འཕྲིན་རིང་དུ་གནས་པའི་རྟེན་འབྱུང་དུ་ཁ་གང་མ་དང་བཅས་སྐུ་ཁོག་རྗོང་བདའ་བྱུང་དུས་ཀྱི་འཕྲིན་ལན་ཟླ་གཟུགས་དངས་མཚོར་འདྲེན་པའི་ཤིང་རྟ། རྒྱལ་ཀུན་མཁྱེན་བརྩེ་ནུས་པ་རྣམས། །ཆུ་སྐྱེས་ཟེའུ་འབྲུ་སྤྲུལ་པའི་གར། །རྣམ་རོལ་པདྨ་ཐོད་འཕྲེང་རྩལ། །ཐུགས་རྗེས་ལུས་ཅན་མཐའ་དག་སྐྱོངས། །གང་གི་དམ་ཚིག་ར་བ་ལ། །མི་དྲལ་དྲེགས་པའི་སྡེ་དཔོན་གཙོ། །སྐུ་ཡི་རྒྱལ་པོ་མདུན་ན་འདོན། །བཤན་པ་བྱ་ཁྲིད་མིག་གཅིག་ཀྱེ། །གང་གི་གསུང་གསང་རྡོ་རྗེའི་ཚིག །འབྱུང་འགྱུར་ལུང་དུ་སྟོན་པ་དང་། །ལྷན་ཅིག་རིང་པོར་གནས་པའི་སྟན། །སྤེལ་བའི་རྟེན་འབྱུང་ལེགས་པར་འགྲིག །སྔོན་དུ་བོད་ཁམས་བདེ་ཐབས་སོགས། །སྤྱི་སྒོས་རིམ་གྲོར་ཤེར་སྙིང་མདོ། །བྱེ་བ་བཀླག་པ་བསྒྲུབས་ཟིན་གྱིས། །གངས་ལྗོངས་ཕན་བདེའི་དཔལ་ལ་སྦྱོར། །སླར་ཡང་ལས་ཀུན་བསྒྲུབས་གསོལ་བའི། །འཕྲིན་རྟེན་ས་ཡི་ཟླ་བ་ཞོ། །ཟུང་འབྲེལ་དར་ཚོན་སྣ་ལྔར་བཅས། །བསྟན་སྲུང་ཆེན་པོའི་སྤྱན་སྔར་དགེ ། (༢༥༤ན)
ས་རྟ་ལོ་ཟན་གཡང་མདོ་སྡེ་མཆོད་པར་ལེགས་སྐྱེས་སྤེལ་བར་དར་བྱུང་པ་བཏང་བའི་དུས་སྤྲུལ་པའི་ཆོས་རྒྱལ་ཆེན་པོ་ལི་བྱིན་ཧ་ར་དང་ལས་མཁན་གནོད་སྦྱིན་ཆེན་པོ་ཡང་ལེ་བེར་ལ་གསོལ་བའི་འཕྲིན་ཡིག་ལྷ་རྒྱལ་སྟན་པའི་སྒྲ་དབྱངས། བསྭོ་བསྭོ་ལྷ་ཆེན་རྣམ་པར་རྒྱལ་བའི་དབྱངས། །ཚངས་པའི་ཡུལ་སར་འཐེན་པ་ཏམྦུ་རའི། །རྒྱུད་མངས་གླུ་ལས་ཉེར་དྲངས་འཕྲིན་གསོལ་བར། །སྒྲ་འཛིན་གཏོད་ཅིག་ལི་བྱིན་ཧ་ར་ཀྱེ། །མཚམས་སྤྲིན་གོས་ཀླུབས་ཅང་ཤེས་བགྲང་བྱའི་ལོ། །ཟན་གཡང་མདོ་སྡེའི་དུས་བཟང་མཆོད་པ་ཆེར། །མཛད་མེད་ཉེར་སྤྱོད་ནམ་མཁའ་མཛོད་ཀྱི་སྒོ། །ཕྱེ་འདིས་ཐུགས་དམ་གཉན་པོ་དབྱིངས་ནས་སྐོངས། །སངས་རྒྱས་ཀུན་འདུས་རྔ་ཡབ་གླིང་པ་ཡིས། །གཙུག་ཏུ་རྡོ་རྗེའི་ཕྱག་རྒྱ་ཉེར་བཀོད་ནས། །བསྟན་འགྲོའི་སྲུང་མར་ཁྱོད་བསྐོས་ཞལ་འཆེས་དིང་། །རི་མོ་མིག་གསུམ་པས་ཀྱང་ཅི་ཞིག་དབྱི། །དེ་ཕྱིར་གངས་ལྗོངས་སྐྱེ་རྒུའི་ཆུ་ཀླུང་དུ། །ནད་རིམས་མུ་གེ་འཁྲུག་རྩོད་རྙོག་མ་ཀུན། །མཐུ་སྟོབས་ནོར་བུ་ཀེ་ཏ་ཀས་བསྒྲུངས་ནས། །ཕན་བདེའི་སྣང་བརྙན་གསལ་བར་མངོན་སུམ་སྟོན། །པདྨ་འབྱུང་གནས་རིགས་འཛིན་ས་ཧ་རའི། །སྔགས་རློམ་ཨ་ཏིའི་རྣལ་འབྱོར་སྤྱོད་པ་པོའི། །འདོད་པའི་རེ་བ་སྐོངས་ལ་དཔག་བསམ་གྱི། །ཡོངས་འདུའི་མཆེད་པོར་ལྷ་ཁྱོད་རྩལ་གྱིས་སྒྲུབས། །བདག་བློ་རྨོངས་མུན་མལ་ལས་ཉེར་སློང་བ། །ལྐོག་གྱུར་ལུང་སྟོན་རྟ་ལྗང་དབང་པོའི་འགྲོས། །ཡིག་ངག་གོ་ལའི་སྒང་གཤོངས་མཐོང་དམའ་ལ། །བལྟོས་མིན་སྣང་བའི་འོད་ཟེར་སྟོང་ཕྲག་ཕྱེ། །བགྲང་ཡས་ལྷ་མིན་མངོན་འདོད་རྩེད་འཇོ་རུ། །ཀུན་དགའི་མཛའ་བ་ལེགས་འཛུམ་འདུན་ས་(༢༥༤བ)
ཆེར། །སྙིམ་པར་འཕྲིན་རྟེན་ཐོགས་པའི་བྱ་མ་རྟ། །གོམ་སྟབས་ལྷོད་པོར་བསྒྱུར་བའི་གར་གྱིས་རྩེན། །མཐོན་པོར་ལྷ་ངོ་འདེགས་པ་སྭསྟི་ཀའི། །གླུ་དབྱངས་སྤོབས་མཐོང་ཆགས་པའི་མགྲིན་པ་ནས། །ལེན་ལ་གནོད་སྦྱིན་གསེར་གྱི་ཤང་ཤང་ཅན། །གསང་མཚན་ཀུན་ཁྱབ་རྡོ་རྗེ་དྲག་རྩལ་དགོངས། །གླིང་བཞི་གླིང་ཕྲན་དཔེར་བྱས་གནྡྷོ་ལའི། །རྟེན་དང་བརྟེན་པར་བཅས་ལ་སྲི་ཞུ་རུ། །མདོ་སྡེའི་མཆོད་པ་བསྟར་བའི་དགའ་སྟོན་ཐོག །ཚར་དུ་དངར་བའི་སྤྱན་གཟིགས་དངོམ་པར་བྲེལ། །དུས་ཀྱི་ཆད་པ་ཁ་རླངས་ལྕེ་གཉིས་དུག །མཐར་བྱེད་དྲེགས་པའི་མཐུ་རྩལ་རླབས་པོ་ཆེས། །རི་དྭགས་ལྟེ་བའི་དྲི་ངད་རབ་འཐུལ་མོད། །ཕན་བདེའི་ཆོ་གས་གངས་ཅན་དཀར་པོར་མཛོད། །བདག་ཡིད་འོ་མཚོར་ཡངས་སིམ་གཏམ་སྙན་པོ། །རྐང་གདུབ་སིལ་སྒྲར་བཅས་ཏེ་མགྲིན་པའི་སྒྲ། །འཁྲོལ་པ་འཕྲིན་ལས་འཁོར་ལོའི་ལག་པ་ཡིས། །འཕུར་ལྡིང་རྣམ་རོལ་ངང་ཚུལ་ད་གདོད་སྒྲུབས། །རེ་བའི་མྱུ་གུ་བསྐྱེད་དུ་བསྲིངས་པའི་འབྲས། །ཉམས་ནུས་དགྲ་བགེགས་སྐྱིན་ཐང་དྲག་པོའི་དཔལ། །འཇོམས་བྱེད་མཐུ་སྟོབས་དུས་མཐའི་མེ་དཔུང་རྩར། །རེག་འཇམ་ཆར་གྱི་ཟེགས་མས་སིམ་པར་མཛོད། །འཇའ་ལུས་འཕོ་བ་ཆེ་གྲུབ་འཆི་བདག་གི །གཡུལ་ལས་རྒྱལ་བས་འཇིགས་མེད་ཐོད་འཕྲེང་རྩལ། །རྒྱ་གར་པཎ་ཆེན་གཡར་དམ་གཉན་པོ་གང་། །ནམ་ཡང་མི་འགོང་བསྟན་སྲུང་ཁྱོད་ཀྱི་གཤིས། །སྤངས་ལྗོངས་མརྒད་གོས་ཀྱང་དབྱར་གྱི་དུས། །ཉིན་བྱེད་འགྲིག་པའི་ཁྱིམ་ཞུགས་སྣྲོན་གྱི་ཟླར། །སྣང་སྲིད་ལྷ་སྲིན་ཡོངས་ཀྱི་དམག་དཔོན་ཆེའི། །འདུན་(༢༥༥ན)
སར་སུམ་རྩེན་ལོངས་སྤྱོད་མཆེད་ཟླ་སྤྲུལ། །ཆོས་རྒྱལ་གཏེར་བདག་གླིང་པའི་གསང་ཡུམ་གཏེར་ལུང་བཞིན་ཡར་འབྲོག་ནས་བྲི་ལྕམ་བྱོན་སྐབས་ལེགས་སྐྱེས་སྤེལ་བར་བུ་ལུང་རྩིས་རིག་སྨྲ་བ་བློ་བཟང་ཡོན་ཏན་བཏང་སྐབས་འཕྲིན་དུ་གསལ་བ་ཟུང་འཇུག་ཕན་བདེའི་སྙེ་མ། དྷ རྨཱ དྷཱ ཏུ ནོ ཀྵ ཡ ཛྙ ག སྶ ར སྭ བཻ དྱ ཀཱ ཪྠ ས རྦ བྷ དྲ མཱ རུ དྷེ ནྡྲ དྷཱ ནུ ཙཻ བ ཙི ཏྲ ཀ པྲ བྷུ ཤྲི ཡཱ སྟི བ ཛྲ ས ཏྭ། །ཤཱ ཏ ཀཱུ ལ པ ཉྩ ག ཏྲ ཀ ཏྲི ཛཱ ཏི ཡཱ དི ཀཻ ཀ ཏཱ བ ཧོ རྣྀ ཏ སྶུ བ རྟ མཱ ཡ གཱ ངྒི ཀཱ དྱ ཀེ ཧི བྷ ཊྚ རཱ ཀ བཱ ར གུ ཪྻ། ཆོས་(སྡེབ་སྦྱོར་མཉམ་པའི་པྲྀཏྟ་ལའི་ཟླུམ་པོ།)དབྱིངས་ཟད་མི་ཤེས་པའི་སྙིང་པོ་རང་རིག་དོན་གྱི་ཀུན་ཏུ་བཟང་། །མ་འགགས་རང་གདངས་གཞའ་ཚོན་ལྟར་བཀྲ་ཁྱབ་བདག་དཔལ་ལྡན་རྡོ་རྗེ་སེམས། །རིགས་བརྒྱ་རིགས་ལྔ་རིགས་གསུམ་ལ་སོགས་གཅིག་པུ་ཉིད་ལས་དུ་མའི་གར། །ལེགས་བསྒྱུར་རྣམ་འཕྲུལ་གངྒཱའི་རྡུལ་ལས་དིང་བྱོན་རྗེ་བཙུན་བླ་མ་མཆོག །གཞོམ་མེད་འཕོ་བ་ཆེན་པོ་རྡོ་རྗེའི་སྐུར། །གྲུབ་ནས་བགྲང་བྱའི་འཕྲེང་བ་མང་བརྒལ་ཡང་། །སྒྲིབ་ལུས་སྒྱུ་ཐབས་སྟོན་གང་བསྟན་འགྲོའི་དཔྱིད། །གཡུང་དྲུང་ལྟར་བཞུགས་(༢༥༥བ)
སྙན་གྲགས་རྣ་བའི་གསོས། །ཐེག་དགུའི་འཇུག་ལམ་ཕྲ་ཞིབ་མཐའ་ཀླས་སྒོར། །གདུལ་བྱའི་ཁམས་དང་དབང་པོར་འཚམ་པའི་བློ། །འཁྲིད་བྱེད་དྲུག་ཅུའི་དབྱངས་ཀྱིས་ཡིད་ཅན་རྣམས། །གྲོལ་ཚེ་རྒྱལ་གཞན་ཞི་བའི་དབྱིངས་བཞུགས་བཞིན། །ཤེས་བྱའི་སྲིད་ཀུན་སྒྲིབ་བྲལ་རྗེན་པ་རུ། །ཡོངས་འཆར་རྣམ་པ་ཐམས་ཅད་མཁྱེན་ཐུགས་ཀྱིས། །མངལ་སྐྱེས་ཨོ་རྒྱན་མཁན་པོ་དེང་སྦྱོན་ན། །གཙང་བྱེད་པདྨར་ཅོ་འདྲི་བྱིས་བློའི་ཚུལ། །ལྔ་རིག་ཚངས་སྐུད་འཆང་བའི་གཉིས་སྐྱེས་ང་། །སྭསྟིའི་སྒྲར་དྲངས་ཤིས་བརྗོད་སྔོན་འགྲོ་རུ། །ཨ་འདུས་ཀ་འཕྲེང་ཚིག་སྦྱོར་ཀུ་ཤ་ཡི། །ཆུན་པོ་རྣ་གོང་གཟར་ནས་མགྲིན་པ་འདེགས། །ཐུགས་བསྐྱེད་ས་བོན་མངར་པོ་དར་དྲག་ལས། །ཚོགས་གཉིས་རྩ་སྡོང་ཡལ་འདབ་ཕང་ཕུང་རྩེར། །འཕྲིན་ལས་འབྲས་དུད་སྔོན་མེད་ཡོངས་འདུའི་ལྗོན། །གངས་ཅན་ནགས་ཀླུང་དབུས་ན་གཡུར་དུ་ཟ། །རྣམ་རྟོག་པདྨའི་སྐུད་པས་འཆིང་བའི་ནུས། །ཉེར་བྲལ་བརྟུལ་ཞུགས་ཆང་གིས་རབ་མྱོས་གླང་། །སྤྱོད་པའི་གོམ་པ་གཅིག་གིས་སངས་རྒྱས་སར། །བགྲོད་ཚེ་རླབས་ཆེན་དཀའ་ཐུབ་ངལ་རྒྱུར་ཟད། །ཨེ་དབྱིངས་དགའ་བཞིའི་ཡེ་ཤེས་འདྲེན་པའི་མ། །ཝམ་ཡིག་བདེ་ཆེན་ཟུང་འཇུག་མཛའ་ན་མོས། །ནམ་མཁའི་ཟླ་ལྟར་ཟླ་མེད་མཁར་ཆེན་བཟའི། །མཆེད་པོ་ཨཽཌྜི་ཡཱ་ན་ལས་འོངས་ཅི། །ནང་དུ་དྷཱ་ཏཱིའི་རྩ་འཁོར་མདུད་རྒྱ་ཀུན། །ལྷུག་པར་གྲོལ་བའི་རྟེན་འབྲེལ་ཕྱི་རོལ་དུ། །རང་སྐལ་ཟབ་གཏེར་ལུས་པ་མེད་པའི་སྒོ། །འབྱེད་འདི་བསྟན་འགྲོའི་བསོད་ནམས་བྱེ་བས་རྙེད། །བགྲང་ཡས་དཀྱིལ་འཁོར་རྒྱ་མཚོ་(༢༥༦ན)
སྤྲོ་བསྡུ་ཡི། །བྱེད་པོར་ཞི་དང་ཁྲོ་བོ་མཐའ་ཀླས་པའི། །རིགས་བརྒྱའི་ཁྱབ་བདག་ཡབ་ཡུམ་ཟུང་འཇུག་ཏུ། །བཞེངས་ལ་མེ་ཏོག་ཕལ་ཆེར་ཕྱོགས་དེར་འཛུམ། །བདེ་གཤེགས་རྣམས་ཀྱིས་རིན་ཆེན་བུམ་བཏེག་ནས། །དབང་བསྐུར་རིག་མའི་ཚོགས་ཀྱིས་གླུ་དབྱངས་ལེན། །བྱང་སེམས་ཡོངས་ཀྱིས་ཤིས་བརྗོད་ཁྲོ་བོ་ཡིས། །བགེགས་སྐྲོད་ལྷ་མོས་མཆོད་སྤྲིན་སྤྲོ་འདི་རྨད། །འོག་མིན་ཞིང་གཙོར་ངེས་པ་ལྔ་ལྡན་སྐུར། །འཚང་རྒྱ་དངོས་པའི་གཤིས་ཡིན་སཱ་ལའི་ལྗོངས། །བཅུ་གསུམ་རྡོ་རྗེ་ས་ཆེན་རབ་མནན་པས། །དག་དང་མ་དག་མནལ་ཀྱང་གཅིག་ཏུ་མཉམ། །རྒྱལ་ཀུན་སྤྱི་གཟུགས་རྔ་ཡབ་གླིང་པ་ཡི། །ཟབ་གཏེར་ཆོས་ནོར་འདོད་ཐར་གདོང་བཞི་པ། །གན་ཇག་ཐང་ཏའི་ལས་འཕྲོའི་གསེར་སྒོང་དུ། །དེང་སྨིན་བོད་ཆེན་འགྲོ་རྣམས་སྐལ་བཟང་བྱས། །རྩོད་ལས་ཆེས་སྙིགས་ལྔ་བདོ་མི་ཡི་ལུས། །མགོན་ཁྱོད་ཐུགས་རྗེ་བརྒྱ་བྱིན་གཙུག་ཏོར་རྩེས། །རེག་པའི་མོད་ལ་རྫོགས་ལྡན་ལྷའི་གཟུགས་སུ། །རབ་གྱུར་ཕན་བདེའི་ཆོ་ག་ཉེར་གྲུབ་མཚར། །རང་རིག་ཡོངས་དག་པདྨ་འོད་ཞིང་འདིར། །ཚེ་དབང་རིགས་འཛིན་ངོ་བོར་ལེགས་བཞེངས་ནས། །བཀའ་གཏེར་ནམ་མཁའི་ནོར་བུ་ཁྱབ་བརྡལ་དུ། །འཆར་བར་རྩ་བ་གསུམ་གྱིས་བདེན་བརྗོད་ཅིག །བཅུ་གཉིས་གོ་ལའི་ཁྱིམ་ལམ་ཉི་ཟླའི་འགྲོད། །ཆད་མིན་དེ་བཞིན་ཆོས་སྲིད་ཟུང་འཇུག་དང་། །འབྲེལ་བའི་བཀའ་མཆིད་ཏམྦུ་ར་ཡི་རྒྱུད། །སྙན་པོ་རྣ་བའི་རྒྱན་དུ་ཡང་ཡང་འཁྲོལ། །དར་དཀར་གོས་གྱོན་མཚོན་བྱེད་ཟུར་གསལ་གྱི། །གསར་འགྲོས་གོམ་ལྡན་ལ་ཞོན་བྱ་(༢༥༦བ)
མ་རྟ། །ཨོ་རྒྱན་སྨིན་གྲོལ་ཆོས་ཀྱི་གླིང་ཡངས་པོར། །སོང་སྟེ་དམ་པའི་ཕྱག་སོར་པདྨོར་འཕུལ། །རིག་བྱེད་འཛིན་པ་པོ་འཕྱོང་རྒྱས་ལྐོག་པ་ཕུན་ཚོགས་དབང་པོ་འདུ་བ་འཁྲུགས་པའི་ཚེ་དཔོན་ཚང་དར་མོ་བས་སྨན་དཔྱད་ཀྱི་ནད་གཞིལ་བར་བྱས་སྐབས་སྙན་ངག་གི་འཕྲིན་ཡིག་བསྲིངས་ལན་གདུང་སེལ་ཟླ་བའི་ཆུ་རྒྱུན། ཀི ངྐི ཛ པ པྱེ བ ལཱ ཡ རྦྷ མ ཪྻ སྱ ཧ སྙ ངྒུ ལཱ དྷ རྨ ན མཱ ན ཏྲ བཻ ཎི ཀཿ གཱ བ ལེ ནྡོ མུ ཁ ཤྭ ཏ ཧ དྶཱི ཙ ཏ པྲཱ པ བཱ ཡ སྶ ར པྱ ཧི གོ ཡ ཙྪ ཏུ། སིལ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)ཁྲོལ་གདུ་བུས་འཁོར་ལོའི་ཕྱག་སོར་གྱིས། །ཆོས་ཀུན་གནས་ལུགས་མཐའ་དག་རྒྱུད་མངས་གླུ། །ལེན་པའི་སྨིན་ལེགས་ཟླ་བཞིན་ངང་མོ་དཀར། ཁྱོད་མགྲིན་འོ་མཚོར་སླར་སྤྱོན་ངག་སྩོལ་ཞིག །སྐྱེ་བར་ཚངས་རིས་བག་ཆགས་ཡོངས་སད་མཐུས། །ལྷ་དབང་གྲུབ་པའི་བློ་གྲོས་དར་དྲག་པས། །ཉམས་འགྱུར་ཚིག་དོན་རྒྱ་བོད་སྡེབ་སྦྱོར་ཕྲེང་། །སྤེལ་ལེགས་འཕྲིན་ཡིག་དུ་ཀཱུ་ལ་རྟེན་འབྱོར། །མི་དགེའི་ས་བོན་སྒྲིབ་ལུས་ཞིང་གི་སར། །ཉེར་བཏབ་ཟུག་རྔུའི་རིམ་པ་(༢༥༧ན)
དབྱུང་བའི་ཤུལ། །སྒོ་གསུམ་སིམ་ཆར་འབྲས་དཀར་སྙེ་མའི་བསྐྱེད། །བསྲིངས་པའི་ཆོ་ག་དེང་རྫོགས་རྣ་བའི་དཔྱིད། །བདེན་གཏམ་ཟླ་ཟེར་འཕོག་ལུས་བདེ་དྲོད་ཀྱིས། །རྔུལ་ཆུའི་ཐིགས་འཁྱིལ་ཡིད་དགའི་རྒྱ་མཚོ་ཆེ། །འཕེལ་བའི་ཀུན་རྟོག་ཁྱེའུ་ཆུང་རོ་ནུས་རྗེས། །མཛེས་མར་ཆགས་པའི་བ་སྦུ་ཚེར་ལྟར་རྩུབ། །ལས་ཉོན་གྱིས་འཕངས་རྣམ་སྨིན་ནག་པོའི་དུག །རབ་བྲལ་སྒོ་གསུམ་རྙོག་མེད་དངས་པའི་ཀླུང་། །བདེ་སྐྱིད་ཡན་ལག་བརྒྱད་ལྡན་ལྷ་ཡི་ཆུར། །སྒྱུར་བྱེད་རི་འཕེན་ལེགས་བྱས་ཤིང་རྟས་དྲངས། །ས་འདིར་མཐོ་རིས་སྨན་པ་ཐ་སྐར་སྐྱེས། །མངོན་སུམ་རྒྱུ་ཚེ་ལྟ་ན་སྡུག་པའི་གྲོང་། །མཐོང་བར་ཡུལ་གྱི་བསྐལ་སྙམ་ངལ་བའི་ཁུར། །སངས་པས་སྤྲུལ་ཞིང་གཞན་འཚོལ་རེ་བ་བསྐྱུངས། །མརྒད་ཁུ་བས་རྙེད་བྱུགས་སྤངས་ལྗོངས་མཐའ། ཁོར་ཡུག་ལྗོན་པས་ཡོངས་བསྐོར་སྐྱིད་ཚལ་ན། །བདེར་གནས་བསམ་གཏན་དང་པོའི་ཏིང་འཛིན་གྱིས། །དྲངས་པའི་ཤིན་སྦྱངས་དེས་ཀྱང་བསྒྲུན་དུ་མེད། །རྣོག་ཆུང་ཟས་སྐོམ་ཙམ་གཉེར་ཕྱུགས་འདྲའི་མི། །རིང་པོར་གནས་ལ་བརྩོན་ན་གཙུག་ལག་གཞུང་། །མཐའ་ཀླས་ལྟ་བའི་མིག་ཡངས་མེས་པོའི་རིགས། །བློ་ལྡན་ཁྱོད་སྲོག་འཆི་བ་དོན་ཡོད་སྙམ། །མང་ཐོས་གངྒཱ་མོ་མངལ་སྦྲུམས་པའི་སྲས། །ལེགས་བཤད་འདམ་བུའི་ཚལ་སྐྱེས་གདོང་དྲུག་ལྷ། །གཉིས་པ་རྣམ་དཔྱོད་གར་མཁན་ལ་ཞོན་ཏེ། །ཆེས་རློམ་གླང་པོའི་མཆེ་བ་དབྱུང་བར་བྲེལ། །རྒྱན་མང་བུད་ཤིང་འོ་མ་བུར་སོགས་ཀྱི། ཁྱད་པར་འབྱེད་ལ་སྤོབས་པ་དགེ་བའི་དབང་། །(༢༥༧བ)
ལྕང་ལོའི་ཨུཏྤལ་དོར་ཤུལ་སྙན་ཚིག་གི །སྤེལ་ལེགས་པད་དཀར་ཆུན་པོ་ཐོད་བཅིངས་འདྲ། །བྲྀཏྟ་ཛཱ་ཏི་ངོ་མཚར་རྟོགས་བྱེད་པ། །རིན་ཆེན་འབྱུང་གནས་རླབས་འཕྲེང་ཡོལ་མེད་དབུས། །རྐང་བཞིར་བཅས་པའི་ལྕི་ཡང་ཡིད་བཞིན་ནོར། །བློ་གྲོས་གདེངས་ཀའི་རྩེ་ན་འོད་དུ་འབར། །འདབ་བཟང་དབང་པོ་བཞོན་པར་བྱེད་ནུས་པ། ཁྱབ་འཇུག་སྒྱུ་ཐབས་འཕྲུལ་ལ་མ་སྙེམས་ཤིག །མཐའ་ཀླས་མིང་གི་མངོན་བརྗོད་སྐད་རིགས་ས། །ཤེས་རབ་གོམ་པ་གཅིག་གིས་བཅིངས་འདི་མཚར། །འཁོར་འདས་འཕེལ་འགྲིབ་དང་བྲལ་ཉ་གང་ཟླའི། །གདན་སྟེང་རྣམ་ཀུན་མཆོག་ལྡན་བདེ་སྟོང་གར། །ཡོངས་བསྒྱུར་ཀཱ་ལ་ཙཀྲའི་ཕྱི་ནང་གཞན། །འཇུག་སྒོ་གྲུབ་མཐའི་མཁའ་ཁྱབ་ཁྱོད་བློས་གཞལ། །སྤྱན་སྔ་མངོན་ཤེས་དྲུག་ཆེད་དཀའ་ཐུབ་ཀྱིས། །མ་བསྒྲུབས་ལྐོག་གྱུར་དངོས་སྟོན་མིག་གསུམ་པའི། །གཡུལ་ལས་རྣམ་པར་རྒྱལ་བའི་གཙུག་ལག་གིས། །མཐོ་རིས་སརྦ་ཛྙ་ཡི་སྤུན་ཟླར་བྱས། །བརྒྱད་ཅུའི་སྐོར་མགོ་སྤོར་ཐང་ཁྲ་མོ་རུ། །འགྲོ་འདིའི་བདེ་སྡུག་སོ་སོར་དབྱེ་བའི་རྡེལ། །འཇམ་མགོན་གསུང་གི་བདུད་རྩི་ཁྱོད་སྙིང་དུ། །འཁྱིལ་ན་ཀོང་རྩེ་འཕྲུལ་རྒྱལ་དམིགས་གཞན་མེད། །སྔོན་གོམས་བྲང་སྟེང་རྒྱ་བོད་ཡི་གེའི་རིགས། །ལུས་འགྱུར་བན་སྤྲོད་རྒོད་མ་ཁ་ཡི་མེས། །དྲང་སྲོང་ཨུསྦའི་སྤུན་གང་ཐུ་མི་ལས། །ཆེན་པོ་ཧོར་གྱི་ཡི་གེས་ཁྱད་པར་བྱས། །འདུ་འཁྲུགས་ནད་སེལ་རང་བྱུང་ཁྲུས་ཀྱི་རྫིང་། །རིན་ཆེན་བཅུད་ལེན་སྦྱོར་བས་ཉི་མའི་བུའི། །མེ་ལོང་རིན་མོར་བྱེད་པ་ཤ་བ་རིའི། །མངོན་བྱུང་གཏམ་རྒྱུས་སོམ་ཉི་དེང་དུས་(༢༥༨ན)
བྲལ། །བདེར་གཤེགས་སྙིང་པོ་ལྕགས་ཁམས་ནང་རིག་རྩིས། །བསྒྱུར་བའི་སྒོ་འབྱེད་ཐ་སྙད་ལྡེ་མིག་དང་། །ཡོངས་བྲལ་བླ་མེད་ཡེ་ཤེས་ཀུན་གསལ་མཐའ། །འཇལ་འདོད་མཁས་རློམ་བྱང་བསྟན་ཕུག་པའི་ཉི། །སླད་མར་མང་པོར་ཐོས་ལ་སྤྲོ་དགའི་སེམས། །གཟེངས་སུ་བསྟོད་དང་ཤེས་ལྡན་འཆི་མེད་ཀྱི། །འདུན་སར་ཡངས་པའི་བློ་གྲོས་ཕུར་བུ་ཡི། །རྗེས་སུ་བགྲོད་པའི་གོམས་འགྲོས་ལྷུག་པར་བདེ། །མིང་ཚིག་ལྷ་ལམ་འཕྲིན་ཡིག་ཆུ་འཛིན་སྦུབས། །རྣམ་དག་བརྗོད་པ་དབྱར་གྱི་རྔ་གསང་སྒྲས། །རྣ་བ་བདུད་རྩིའི་མངལ་ཁུར་འཛིན་པའི་མོད། །སེམས་ཀྱི་རྨ་བྱ་ཟློས་གར་ཡང་ཡང་བསྒྱུར། །ལྐོག་མིན་མཐོར་བརྩེགས་བསམ་དོན་ལྷུན་གྲུབ་ལ། །མཐོང་བས་ཀུན་ཡིད་ཡོངས་སྨན་བརྟན་འཕྲོག་པ། །མ་སྨད་ཕུན་ཚོགས་དབང་པོའི་ལག་པད་དུ། །སྙན་འཕྲེང་གསེར་འབྲུག་གིས་འཁྱུད་སྨྱུག་ཤུགས་སྤེལ། །ས་རྟ་གོང་ནས་ཅོ་ནེ་བླ་མ་ནོ་མོ་དགེ་སློང་དང་ཨ་ཞང་ཨ་ར་ཏི་ན་རབ་འབྱམས་ཆོས་རྗེ་གཉིས་མི་སྣར་གནང་བའི་སྐབས་བཀའ་ཤོག་གནང་སྦྱིན་བྱུང་བའི་ལན་འབུལ་བར་སྣར་ཐང་མཁན་པོ་ངག་དབང་བཀྲ་ཤིས་དང་ལྷ་རྗེ་ཐབས་མཁས་གཉིས་རྗོང་བདའ་བྱས་སྐབས་ཕུལ་བའི་ཞུ་ཡིག་མཆོག་ཏུ་དགེ་བའི་གཏམ། ཚེ་རིང་གནམ་གྱི་ཤེ་མོང་གི་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། པ་སངས་ནམ་གྲུའི་འགྲུབ་སྦྱོར་མཆོག་ཏུ་དགེ་བའི་དུས་གནམ་གྱི་ལྷ་མིའི་དབང་ཕྱུག །འཇམ་དབྱངས་གོང་མ་མང་པོས་བཀུར་བའི་རྒྱལ་ཁབ་ཆེན་པོའི་ཕྱོགས་སུ་བོད་ཡུལ་གྱི་ལྟེ་བ་འཇིག་རྟེན་དབང་ཕྱུག་གི་གཙུག་ལག་ཁང་(༢༥༨བ)
དམར་པོ་རི་ནས། ཤཱཀྱའི་སྡོམ་བརྩོན་སྡེ་སྣོད་གསུམ་པས་ཡིད་དང་བའི་སྒོ་ནས་ཁ་ཕྱོགས་ཏེ་བྷུ་མི་བྲཧྨོ་ཏྟ་མརཱ་ཛཀཱ་ལ་སརྦ་དཱ་ཨོ་སྭསྟི་མངྒལ་བྷ་ཨནྟུ་ཞེས་ལེགས་སྦྱར་གྱི་སྒྲ་ལས་དྲངས་ཏེ་སའི་ཚངས་པ། གོང་མ་རྒྱལ་པོ་དུས་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག །ཅེས་ཤིས་པ་བརྗོད་པའི་ཚིག་གི་འཕྲེང་བ་སྔོན་དུ་འགྲོ་བས་མེ་ཏོག་འཐོར་ཞིང་དྲི་ཞིམ་པོའི་སྤོས་བསྲེགས་ལག་པའི་པདྨ་ཟུམ་སྟེ་གུས་པས་གསོལ་བ། དུས་གསུམ་གྱི་རྒྱལ་བ་སྲས་དང་བཅས་པ་རྣམས་མཐའ་ཀླས་པའི་སྐྱེ་རྒུའི་དོན་དུ་ཚངས་པར་སྤྱོད་པ་པོ། །མཁས་པ་པཎྜི་ཏ་ས་ལ་གནས་པའི་གྲུབ་ཐོབ་རྣལ་འབྱོར་སྤྱོད་པ་གླིང་གཅིག་ནས་བཞིའི་བར་དུ་དབང་སྒྱུར་བའི་འཁོར་ལོས་སྒྱུར་པའི་རྒྱལ་པོ། ཁམས་ཀྱི་རྒྱལ་ཕྲན། མདུན་ན་འདྲེན། ཁྱིམ་བདག །འགྲོ་བ་དམན་པ། གྲུ་རྫིངས། ཟམ་པ། ཆུ་མཚོ་རིན་པོ་ཆེ་སོགས་སྤྲུལ་པ་སྣ་ཚོགས་སུ་སྟོན་པར་གསུང་རབ་རིན་པོ་ཆེ་ལས་བཤད་ཅིང་། ཁྱད་པར་བྱང་ཆུབ་སེམས་དཔའ་གཞན་དོན་དུ་འཁོར་ལོས་སྒྱུར་བའི་རྒྱལ་པོའི་སྲིད་པ་འཛིན་པར་གསུངས་པས་རྩོད་པའི་དུས་འདིར་སྟོབས་ཀྱི་འཁོར་ལོས་སྒྱུར་བའི་མིའི་བདག་པོ་གང་ངེས་པའི་དོན་དུ། འཕགས་མཆོག་འཇམ་པའི་དབྱངས་ལུས་ཅན་ཀུན་གྱི་མགོན་དང་སྐྱབས་དང་གླིང་དང་དཔུང་གཞན་དུ་བྱོན་པར་གོར་མ་ཆག་མོད། འོན་ཀྱང་སྙིགས་མར་སྤྱོད་པའི་སེམས་ཅན་མ་དག་པ་རྣམས་ཀྱི་ངོར་ཡང་གྲངས་མེད་པའི་བསྐལ་པ་ནས་བསོད་ནམས་ཀྱི་ཚོགས་ཀྱིས་བསྐྲུན་པའི། སྐུ་རིན་པོ་ཆེ་བརྒྱ་ཕྲག་ཉི་མའི་དཀྱིལ་འཁོར་གཅིག་ཏུ་སྤུངས་པ་(༢༥༩ན)
ལྟར་གཟི་མདངས་ལྷག་པར་རྒྱས་ཤིང་། དྲི་ཟའི་རྒྱུད་མངས་སྟོང་གིས་བསྒྲུན་པར་མི་ནུས་པའི་གསུང་གིས་མཆོག་དམན་བར་པའི་ཡིད་ཅན་མཐའ་དག་ཚར་གཅོད་རྗེས་འཛིན་སོགས་གང་འཚམ་གྱི་སྒོ་ནས་ཡིད་བདེ་བའི་ཚོར་བ་ཉམས་སུ་མྱོང་། འཇིག་རྟེན་གྱི་རྒན་པོ་བློ་གློས་ཀྱི་རྩལ་དང་ལྡན་པ་རྣམས་ཀྱིས་ལན་བརྒྱར་བསམས་ཀྱང་ཡིད་ཀྱི་ཡུལ་དུ་འཆར་བར་དཀའ་བ་གཙུག་ལག་བྱེ་བའི་ཕྲ་རགས་ཐམས་ཅད་མངོན་སུམ་མཁྱེན་པས་འཇིག་རྟེན་གྱི་མེས་པོ་ཚངས་པའི་བློ་གྲོས་ལ་འགྲན་པའི་ཐུགས་ཀྱི་དཀྱིལ་འཁོར་གཡོ་བ་མེད་པ་སྐུ་གསུང་ཐུགས་རྡོ་རྗེ་ལྟ་བུར་བརྟན་པ་ནས། བཀའ་ཤོག་རིན་པོ་ཆེ་རྐེད་དཀྲིས་ལ་གསེར་བྱུགས་པའི་དངུལ་སྲང་དྲུག་ཅུའི་མདོང་མོ་གཅིག །གོས་ཆེན་དཔུས་ལེགས་ཡུག་ཉི་ཤུ་རྩ་བཞི། ཁ་བཏགས་ཆེ་བ་ལྔ་དང་ཆུང་བ་བཞི་བཅུ། ཤེལ་དམ་གཅིག་དང་ཕོར་པ་གཉིས་བཅས་ནོ་མོ་གོན་དགེ་སློང་དང་ཨེར་ཏེ་ན་རབ་འབྱམས་པ་གཉིས་ཀྱིས་ཁྱེར་ནས་སུག་པར་སྤྲད་པ་གསེར་ཞལ་དངོས་སུ་མཐོང་བ་ལྟ་བུའི་ཡིད་ལ་སྤྲོ་དགའ་ཅི་ཡང་བརྟས། འདི་ནའང་སྟོན་པ་ཐུགས་རྗེ་ཆེན་པོ་དང་ལྡན་པ་ཤཱཀྱ་སེང་གེའི་ཞི་བདེ་དོན་དུ་གཉེར་བའི་གདུལ་བྱ་རྣམས་ལ་བཀའ་དང་པོ་བདེན་བཞིའི་ཆོས་འཁོར་སོགས་ཉན་ཐོས་དང་རྗེས་སུ་འབྲེལ་བའི་སྡེ་སྣོད། སེམས་ཅན་ཐམས་ཅད་མར་ཤེས་པས་འགྲོ་བ་གཅིག་གི་དོན་དུའང་རང་བདེ་འདོར་བར་ནུས་པ་རླབས་ཆེན་གྱི་སྤྱོད་པ་ལ་དགའ་བ་རྣམས་ཀྱི་ཆེད་དུ་བྱང་ཆུབ་སེམས་དཔའི་སྡེ་སྣོད། མྱུར་དུ་སངས་རྒྱས་འཐོབ་(༢༥༩བ)
པར་འདོད་པའི་དབང་པོ་རྣོན་པོ་རྣམས་ལ་གསང་སྔགས་ཀྱི་ཐེག་པ་སོགས་བཀའ་སྩལ་བའི་ཚུལ་ལ་ཡིད་ཀྱིས་མོས་པ་ཐོབ་སྟེ། བསྟན་ལ་ཞུགས་ཤིང་བསྟན་པ་ཐམས་ཅད་འགལ་མེད་དུ་ཉམས་སུ་ལེན་པར་མོས་བློ་ཙམ་ཐོབ་པའི་ཤཱཀྱའི་བཙུན་པའང་འགྲོ་ལ་ལྷག་པའི་བསམ་པ་དཀར་ཞིང་སྤྱི་བོ་གནམ་བསྟན་གྱི་རྒྱལ་པོ་གང་གི་བཀའ་དྲིན་ལས་གཞན་འཚེ་མེད་པར་བདེ་བར་གནས་ལགས། ད་ལམ་རྒྱལ་པོ་ཆེན་པོར་འཚམ་འདྲི་ཞུ་བར་དཔལ་སྣར་ཐང་ཆོས་སྡེ་ཆེན་པོའི་མཁན་ཆེན་ངག་དབང་བཀྲ་ཤིས་དང་། གསོ་རིག་འཛིན་པ་ངག་དབང་ཐབས་མཁས་གཉིས་རྫོང་བདའ་བགྱིས་པ་གསེར་གྱི་ཐེམ་པ་བརྫིས་ནས་གསེར་ཞལ་མངོན་སུམ་དུ་མཐོང་ཞིང་དགྱེས་པའི་འཛུམ་ཞལ་ལྷུག་པར་བསྟན་པའི་བཀའ་མཆིད་བཟང་པོ་ཆུ་བོའི་རྒྱུན་བཞིན་ཞུ་ཞུ། ཞུ་ཡིག་རྟེན་བཀྲས་བཏགས། ཤལ་དཀར་དམར། མུ་མེན་གྱི་འཕྲེང་བ། སྣམ་ཕྲུག་སོགས་ཐོ་ཟུར་གསལ་ལ་རྟགས་ཀྱི་ལང་ཚོ་བཀྲ་བར་ས་ཕོ་རྟའི་ལོ་ཧོར་ཟླ་བཅུ་གཅིག་པའི་གྲལ་ཚེས་དགེ་བར་བོད་ཡུལ་གྱི་རྡོ་རྗེ་གདན་ལྷ་ལྡན་སྤྲུལ་པའི་གཞལ་མེད་ཁང་དང་ཟུང་དུ་འབྲེལ་བ་རང་བྱུང་འཕགས་པའི་གཙུག་ལག་ཁང་དམར་པོ་རི་ནས་གུས་པས་ཕུལ་བ་དགེ་ལེགས་སུ་གྱུར་ཅིག །
རབ་བྱུང་བཅུ་གཅིག་པའི་ས་ལུག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་ལུག་ལོར་བྲིས་པའི་ཆབ་ཤོག་འཕྲིན་ཡིག་ཁག །དོན་གྲུབ་ཅེས་པ་ས་ལུག་གི་ལོ་གསར་ཐོག་གྲ་སྡིངས་པོ་ཆེ་ནས་སྤྲུལ་སྐུ་ངག་དབང་སྙན་གྲགས་བཟང་པོས་འཕྲིན་ཡིག་བྱུང་བའི་ལན་ཏམྦུ་རའི་རྒྱུད་མངས། (༢༦༠ན)
སྭཱ ར སྭ སྟྱཱ ཁྱཱ ཡུ ཀྟ བཱི ཎཻ རྨ ན ནྡྲཱ ན ནྡེ ཀྲྀ ཤྴཱ ཀཾ ཧཱི པི ཙཱ ར པྲ ཀཱ ལྱཾ། བ རྟཻ རྦྷཱི རྩཱ སྟིཾ གོ བྲྀ ཧ སྤ ཏྱི ཀ སྭཾ ཚཱ ཡེ ཏ བིསཱ བེ ཙཱ བྷི ཙ རྦྷ ཏྲ ཀེ ཪྻཿ། དབྱངས་(སྡེབ་སྦྱོར་མཉམ་པའི་པྲྀཏྟ་ལས་སྣ་ཚོགས་ལྷ་མོ།)ཅན་གཏམ་གྱི་སྦྱོར་བའི་ཏམྦུ་རས། །ཡིད་དབང་ཀུན་དགར་བྱེད་ནུས་རྣམ་དཔྱོད་རྩལ། །བསྒྱུར་ཚེ་བློ་ལྡན་ཕུར་བུ་རང་གྲིབ་ལ། །གདུང་སེལ་མངོན་སུམ་རྒྱུ་བའི་མཆེད་པོ་གང་། །ཕྲ་མོའི་ན་ཚོད་ཟླ་བ་ཚེས་པ་ནས། །ལང་ཚོའི་ཉ་རྒྱས་དེ་སྲིད་ལྔ་རིག་གི །གཙུག་ལག་རི་དྭགས་གཟུགས་ལ་རྟག་འགྲུས་པའི། །ལེགས་བཤད་ག་བུར་གཟེགས་འཐོར་དངོས་པོའི་གཤིས། །རྩོལ་མིན་ཉམས་འགྱུར་གླུ་དབྱངས་ཤུགས་འབྱུང་དུ། །མགྲིན་པའི་འཁོར་ལོར་ལེན་པ་ངང་མོ་དཀར། །འཕྲིན་ཡིག་རྐང་གདུབ་སིལ་སྒྲ་བློ་གྲོས་གོམ། །ལྷོད་པོར་འདེགས་ལས་འཁྲོལ་བ་ཐོས་འཛིན་དཔྱིད། །སྐྱེས་ཀྱི་རྩེ་མོར་སོན་པ་གཙུག་ལག་གཏམ།(༢༦༠བ)
།སྤེལ་ལེགས་མནྡ་ར་འཕྲེང་ཤེས་ལྡན་མགྲིན། །བརྒྱན་ལས་གཞན་མིན་ཟང་ཟིང་བདོག་པས་ཀྱང་། །གསར་ཚེས་གནམ་ལོའི་དགའ་སྟོན་གཅིག་ཏུ་རྨད། །ཀུན་བཟོད་ལྟེ་བ་ཡོངས་གང་སུ་ཝརྞ། །གཞལ་ཡས་རྙེད་དཀའ་ཡོན་ཏན་ཕུང་པོའི་གཏེར། །མཁས་ཁྱོད་ཟོ་མདོག་བདེ་བའི་ཉེར་ལེན་དེས། །ཐུབ་བསྟན་རྒྱན་དུ་བྱེད་པོས་སྤྲུལ་པ་བཞིན། །འདི་ན་རྒན་པོའི་ཁུར་ལྗིད་རི་བོའི་སྤུན། །ཐོས་བསམ་སྒོམ་པའི་ཤིང་བལ་ཡལ་ཡུལ་ཅན། །གྲགས་སྐམ་རླུང་གིས་ཆེ་རྒུའི་གཙུག་བགྲོད་པར། །མེ་ཏོག་ཕལ་ཆེར་ཁྲེལ་བས་འཛུམ་མམ་སྙམ། །སྟོང་ཆེན་ཕྱག་རྒྱར་བཟང་རྫུའི་བྱང་བསྟན་ཕུག །གནས་ལུགས་ཉི་ཟེར་མི་འཆར་གཏི་མུག་མལ། །ཉལ་མང་ལོག་ལམ་གཉིད་ལས་སློང་བ་ཡི། །བཤེས་གཉེན་སྐྱ་རེངས་ཁྱོད་ལས་གཞན་མ་རྙེད། །མཚམས་སྤྲིན་བླ་གོས་སྦུབས་ནས་གཡེམ་སྤྱོད་ཀྱིས། །རང་རིགས་སྲོག་ལ་རྒོལ་བའི་ཆོམ་རྐུན་མཁན། །མ་ཡིན་བག་ཡོད་བརྟུལ་ཞུགས་ངོ་ལྐོག་དང་། །བྲལ་ཁྱོད་གངས་རིའི་ལྗོངས་ཀྱི་ཉེ་བ་འཁོར། །དོན་ཀུན་ལྷུན་གྲུབ་གནམ་ལོ་ཚེས་པའི་ཐོག །བཀྲ་ཤིས་དབྱངས་སུ་ལེན་པ་མེས་པོའི་བུ། །གཙུག་ལག་བྱེ་བའི་ཚངས་སྐུད་ལེགས་འཆང་བས། །རྫོགས་ལྡན་གསར་པའི་སྒོ་བརྒྱ་འབྱེད་པ་བཞིན། །དེང་ནས་མོས་པས་ངེས་གསང་སྨིན་གྲོལ་ལམ། །ཉེར་འགོད་དགའ་སྟོན་ཆོ་ག་དེ་སྲིད་བར། །རྣ་བར་སིམ་པའི་འཕྲིན་ཡིག་དྲི་ཟའི་གླུ། །སྙན་པོ་ཡིད་ཀྱི་གསོས་སུ་རྟག་སྤེལ་ཞིག །གངྒཱའི་ཡབ་ཅིག་(༢༦༡ན)
བཞིན་རས་དངོམ་པའི་དར། །ཐུན་འཚམས་ལུས་ཕྲའི་རྟགས་ཀྱིས་ཉེར་འཁྱུད་དེ། །ལྕོག་བུ་ཆེར་སྦྲེང་ཆོས་སྐུའི་ཡོ་ལང་དུ། །འབྱམས་ཀླས་སྤོང་བའི་སར་བསྲིངས་ལ་ཀྵཱི། །དོན་གྲུབ་ཅེས་པ་ས་ལུག་གི་ལོ་གསར་དུས་རྡོ་རྗེ་བྲག་ནས་རིགས་འཛིན་སྤྲུལ་སྐུ་རིན་པོ་ཆེས་གནང་བའི་ཆབ་ཤོག་གི་ལན་པད་འབྱུང་གཉིས་པའི་རང་ཞལ། ཁོ བི ཥུ རྒཱ གནོ བ ཛྲ དྷ རྨ སྱ དྷཱ ཏོ རྩ བ རྞཱ རུ དྷཱ དི ཏྱ ས བྷོ གཀཿ ཡ དྡ མཻ རྣི རྨ ར སྨི ནྱ གཱ མཱ དི ཀཱ སཱི བ དྷཱ ཀཱུ ལ ཙ ཀྲཾ མ ཧཱ བ རྟ ནེ། །མཁའ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)ཁྱབ་མཁའ་ཡི་རྡོ་རྗེ་ཆོས་དབྱིངས་གདངས། །མ་འགགས་ལོངས་སྤྱོད་རྫོགས་པ་ཉིན་མོར་བྱེད། །གང་འདུལ་སྤྲུལ་པའི་འོད་ཀྱིས་འགྲོ་བའི་མུན། །སེལ་མཛད་རིགས་འཛིན་འཁོར་ལོས་སྒྱུར་རྒྱལ་ཆེར། །སྒྲ་དོན་(༢༦༡བ)
ཐ་སྙད་ཚིག་གི་སྲད་བུ་ལ། །ཆེད་བརྒྱུས་རྩོལ་པར་བལྟོས་མིན་མགྲིན་པའི་མདུད། །རྣམ་གྲོལ་ཉམས་འགྱུར་སྟོང་གི་རོ་བྲོ་བའི། །ཆབ་ཤོག་དབྱངས་ཅན་རྒྱུད་མངས་རྣ་བར་འཇེབས། །འཕགས་ཡུལ་སྐད་ལས་ཕྱོགས་འདིར་དོན་གྲུབ་པ། །འཇམ་དབྱངས་རྒྱལ་པོའི་ཁབ་ཏུ་གྱི་ཡི་ཞེས། །གསེར་ཞུན་གོས་སུ་ཡོངས་ཀླུབས་སུམ་ལྡན་ལོའི། །བགྲང་བྱའི་དགའ་སྟོན་ཚར་དངར་ཡིད་ཀྱི་གསོས། །གཟོད་མ་ཉིད་ནས་འཇའ་ལུས་འཕོ་བ་ཆེ། །འཆི་མེད་རིགས་འཛིན་བརྙེས་པའི་གྲལ་རིང་པོར། །བཞུགས་ཀྱང་ཐུན་མོང་འགྲོ་ངོར་སྣང་བའི་སྐུ། །མི་གཞིག་གངས་ལྗོངས་ལེགས་བྱས་ཤིང་རྟས་དྲངས། །ཐུབ་བསྟན་ཡོངས་འདུ་ས་བརྟོལ་གྲིབ་བསིལ་དུ། །རིས་བྲལ་ལུས་ཅན་འཚོ་ཐབས་ལྷུར་ལེན་པ། །ཐོས་བསམ་སྒོམ་པའི་ཆ་ཤས་མ་གང་ཡང་། །ལྷག་བསམ་ཉ་རྒྱས་དེས་ཀྱང་མཚོན་མིན་དཀར། །ལས་ཉོན་མཐུ་ཡིས་རང་དབང་ནུས་དམན་རུང་། །བདེན་ཚིག་གྲུབ་ཁྱོད་ནན་ཏན་རྟག་གསུངས་བཞིན། །རིང་འཚོར་རྩ་གསུམ་ཐུགས་རྗེ་བསྐུལ་པའི་གླུ། །དལ་མེད་མགྲིན་པར་ལེན་ལ་གཅིག་ཏུ་སྤྲོ། །སེང་གེའི་ངར་སྒྲ་ཆེར་སྒྲོགས་ཡིད་སྲུབས་སྡེ། །ཚར་གཅོད་འཆོལ་བའི་ཁྲོ་རྒྱལ་གྲོ་བོ་ལོད། །མཁྱེན་རབ་བློ་ལྡན་མཆོག་སྲེད་རིགས་ཀུན་ཀྱི། །བདག་པོར་པདྨ་རྒྱལ་པོ་ཁྱོད་དངོས་བྱོན། །སྲིད་ཞིའི་མུན་བཅིལ་ཉི་མ་འོད་ཀྱི་ཟེར། །སྤྲོ་མཛད་ཤཱཀྱ་སེང་གེར་ལེགས་སྤྲུལ་པ། །རང་སྣང་རིག་མར་མཉམ་སྦྱོར་པད་འབྱུང་དིང་། །ཚངས་སྤྱོད་པདྨ་སམྦྷའི་ཟློས་གར་བསྒྱུར། །རྔ་ཡབ་གླིང་དབུས་ལངྐའི་རྒྱལ་ཁབ་རྩེར། །འབོད་(༢༦༢ན)
སྒྲོགས་གཉེན་པོར་འཕྲིན་ལས་སྒྱུ་མའི་འཕྲུལ། །དྭངས་ཤེལ་ངོས་འཆར་གཟུགས་བཞིན་དམ་སྲིའི་གཤེད། །ལྗོངས་འདིར་མཆེད་པོར་རིག་སྔགས་འཆང་ཁྱོད་བསྟན། །ལྔ་བདོའི་སེམས་ཅན་འདྲེན་ལ་མིག་མི་འཛུམ། །ཐུགས་བསྐྱེད་སྙིང་སྟོབས་གོ་ཆར་རྒྱལ་ཀུན་གྱིས། །མགྲིན་གཅིག་བསྔགས་ན་གདུལ་དཀར་ངེས་འབྱུང་བས། །ཞི་བདེར་གཞོལ་བཞེད་སེམས་དཔའི་མཛད་པ་མིན། ཁྲི་སྲོང་ལེགས་བྱས་སྐྱ་རེངས་ཀྱིས་དྲངས་པའི། །ལོ་པཎ་ཐུགས་ཀྱི་གསང་མཛོད་བཀའ་གཏེར་ཉི། །གངས་ལྗོངས་མཁའ་ལ་འཕེལ་འགྲིབ་མེད་འཆར་བའི། །བྱེད་པོ་ཁྱོད་ལས་ཚད་མའི་ཡུལ་གཞན་མིན། ཁྱད་པར་པཎ་ཆེན་མཆེད་དང་དབང་པོའི་སྡེའི། །དྲི་བྲལ་རིང་ལུགས་མཐོ་རིས་ཆུ་བོའི་རྒྱུན། །སྔ་འགྱུར་བསྟན་པའི་རྒྱ་མཚོ་རབ་འདྲེན་པ། །སྐལ་ལྡན་ཤིང་རྟའི་སྙིང་སྟོབས་ཕྲག་པར་བཞེས། །སྔོན་དུས་ཐུབ་གཞུང་དར་ཚེ་ཆོས་ཕུང་ཚད། །སྤེལ་ལས་དིང་སང་པདྨའི་སྐུད་པ་བཞིན། །ཕྲ་འདིར་ཚིགས་བཅད་གཅིག་བཤད་དོན་ཆེན་དུ། །དགོངས་ཏེ་འཆད་ཉན་སྲོག་གི་ཀ་བ་ཚུགས། །མཚོ་སྐྱེས་རྡོ་རྗེ་བདུད་བློན་གྱིས་གཤེ་བས། །རྗེ་འབངས་སྣོད་ལྡན་འཛིན་ལ་མ་གནོད་ལྟར། །སྨིན་གྲོལ་གདམས་པ་སྲིད་མཐར་མི་ནུབ་ཆེད། །ལོག་སྒྲུབ་འཁོར་གྱི་སྐྱོ་ངལ་རིང་དུ་སྤོངས། །འབྱུང་པོའི་ཁ་རླངས་ཆེས་ངར་སྙིགས་དུས་འདིར། །འཇམ་དཔལ་རྡོ་རྗེ་ཁྲོ་བོའི་སྐུར་བསྟན་པའི། །སྟང་སྟབས་གཅིག་གིས་སྣང་སྲིད་ཕྱག་རྒྱའི་ཚོགས། །ཐམས་ཅད་ཟིལ་གྱིས་གནོན་ལ་(༢༦༢བ)
གཡོལ་མེད་གཅེས། །སྤྱི་དང་བྱེ་བྲག་གསང་ཆེན་རྙིང་མ་ཡི། །མགོན་པོར་སྲོག་གི་ཀ་བ་ཉེར་བཙུགས་ཏེ། །ཨ་ཧཾ་མི་འགྱུར་རྡོ་རྗེ་བཞུ་བླུགས་སུ། །ལྷུན་གྲུབ་རིག་འཛིན་ས་ལ་བཞུགས་ཆེད་གསོལ། །བགྲང་ཡས་ཞི་ཁྲོའི་རྟེན་དང་བརྟེན་པ་ཀུན། །རིག་པའི་རྩལ་དུ་ཤར་གྲོལ་སྟབས་ཅིག་པ། །རྣམ་གསུམ་ཡོ་གའི་ལྷ་སྔགས་ཡེ་ཤེས་ཀྱི། །འཕྲིན་ལས་སྲིད་པའི་མཐའ་རྙེད་འཇུག་པར་རིགས། །ཐུབ་བསྟན་རྡོ་རྗེས་མཚན་པའི་བྲག་རིའི་ངོས། །མི་གཞིག་སྐྱིལ་ཀྲུང་གཅིག་གིས་བདུད་བཞིའི་ཚོགས། །ཟིལ་གནོན་འོག་མིན་ཞིང་གི་མགོན་པོ་ལྟར། །འཁོར་བ་སྟོངས་མིན་བར་དུ་བརྟན་གྱུར་ཅིག །གནམ་ལོའི་བཞིན་དངོམ་བཀྲ་ཤིས་འདུན་ས་ཆེར། །དགའ་སྟོན་དེང་ནས་དབུས་འགྱུར་མི་ཕམ་མགོན། །བྱོན་མིན་དེ་སྲིད་ཚད་མེད་ཕེབས་ཚོགས་འགྲོས། །གོ་ལའི་རྒྱུན་ལམ་ཉི་ཟླའི་འགྲོས་བཞིན་ཞུ། །མེས་པོས་པདྨའི་རྩ་བ་ཐགས་རིས་སུ། །སྤྲུལ་ཏམ་ཟླ་བ་ཞུན་མས་བྱུགས་སམ་ཞེས། །སོམ་ཉིའི་འཁྱོགས་ལ་འཕྱང་བྱེད་ལྷ་རྫས་ཀྱིས། །གང་གི་རྣམ་དག་ཐུགས་བསྐྱེད་མཚོན་ནམ་སྙམ། །དོན་ཀུན་གྲུབ་པའི་ཆོ་འཕྲུལ་མ་ལ་ཡའི། །དྲི་བསུང་དངར་པོས་ལོག་ལྟའི་ཚ་གདུང་རྣམས། །རབ་གཞིལ་རྟ་ཆེན་ཟླ་བའི་ཐབས་ཀྱི་ཆའི། །རྒྱལ་བ་དང་པོར་ཕུལ་བ་ཛ་ཡནྟུ། །ཁྱབ་བདག་བླ་མ་བཀའ་འགྱུར་བ་ཆེན་པོའི་དབོན་ངག་དབང་བློ་གསལ་མཆོག་ལྡན་གྱིས་དོག་བདེ་ལྷོ་མོས་གཞིས་ཀར་ས་ཕོ་རྟའི་ལོ་སྟོན་དུས་ནས་དབུ་བཙུགས་ཏེ་བྲག་རྫོང་མའི་བསྙེན་ཆེན་མཛད་པ་གེགས་མེད་དུ་གྲུབ་ཚུལ་(༢༦༣ན)
གྱི་གསུང་འཕྲིན་བྱུང་ལན་སློབ་བཤད་ཉི་མའི་དངོས་བརྒྱ། སྣང་ཞིང་སྲིད་པའི་ཆོས་ཀུན་རྒྱུད་གསུམ་གྱི། །དྲེགས་པར་ཡོངས་ཤར་སེམས་ཉིད་གཅིག་པུའི་འཕྲུལ། །གསལ་སྟོང་ཟུང་འཇུག་དོན་གྱི་ནག་པོ་ཆེར། །རྣམ་རོལ་སློབ་བཤད་བསྟན་པའི་སྲོག་ཤིང་ཆེའི། །རང་རྒྱུད་རྡོ་རྗེ་ལུས་ཀྱི་འཁོར་ལོ་ལྔར། །སྣ་ཚོགས་ལས་གྲུབ་བླ་མ་ཧེ་རུ་ཀཿ །ལྕམ་དྲལ་བྲན་གཡོག་འཇའ་རིས་ལྟར་བཀྲ་བ། །དུ་མར་ཤར་ཡང་རོ་གཅིག་ཆུ་ཟླའི་གར། །བདེ་སྟོང་ཟུང་དུ་འཇུག་པ་ཉེ་ལམ་གྱིས། །དྷཱུ་ཏཱིའི་མདུད་བརྒྱ་ཉེར་གྲོལ་རྡོ་རྗེའི་སྐུར། །ཟུག་རྔུ་ཀུན་མཁྱེན་གཟིགས་པའི་ཡུལ་མིན་ན། །ཟོ་མདོག་བདེ་བའི་མཚར་འཛིན་བྱིས་བློ་བཞིན། །ས་བརྫུས་ཆེན་པོར་རབ་རློམ་འུར་རྒྱངས་མཁན། །ཕལ་གྱི་རྣ་བར་ནམ་སོན་རྡོ་རྗེའི་ཕྲག །གཞོམ་མེད་བསྲུང་བའི་རྫོང་ལས་བཟློག་བསད་མནན། །ས་སྐྱའི་བླ་ཆེན་སོག་འཛིན་ཁྱོད་ཉིད་ཙམ། །གུར་གྱི་མགོན་པོ་རྣམ་འཕྲུལ་ཁྲོ་བོ་བཅུས། །ཡོངས་བསྐོར་དུས་མཐའི་མེ་ཕུང་འབར་བའི་རྩེར། །ཡིད་སྲུབས་སྡེར་བཅས་རབ་བསྲེག་སྐྱེད་རིམ་གྱིས། །དགྲ་བགེགས་དཔུང་ཚོགས་མིང་གི་ལྷག་མར་བྱས། །གསང་སྔགས་བཟླས་བརྗོད་དབྱར་རྔ་བསྒྲགས་པའི་མོད། །ཟབ་དོན་ཆོས་ཀྱི་རྨ་བྱ་མངལ་སྦྲུམ་དང་། །ལྷན་ཅིག་བསྟན་འགྲོའི་བདེ་སྐྱིད་གཤོག་སྒྲོའི་གདུགས། །ཟླུམ་པོར་འཁྱིལ་བའི་ཟློས་གར་འདི་རྨད་(༢༦༣བ)
བྱུང་། །ཕྱི་རོལ་དམ་ཅན་རྩ་ཁམས་མེ་ལོང་དུ། །ཡོངས་གསལ་སེམས་སྣང་དོན་གྱི་ནག་པོ་ཆེ། །དགྱེས་མཛད་འཁོར་ལོའི་མགོན་ལས་གཞན་མིན་པར། །ཡེ་ཤེས་རང་ངོ་འཕྲོད་པས་གྲུབ་མཐའ་སྙོགས། །དཀྱིལ་འཁོར་རྒྱ་མཚོའི་འབྱུང་གནས་བཀའ་འགྱུར་བའི། །རིགས་དང་ཆོས་ཀྱི་སྐུ་ཡི་དཔོན་གྱུར་ཁྱོད། །ཚར་ཆེན་བླ་མའི་རིང་ལུགས་སྤེལ་བ་ལ། །སྙིང་པོའི་མཚན་ཅན་བྱིན་རླབས་མངོན་ཞུགས་སྙམ། །གུར་རྒྱན་དགོངས་དོན་གྲངས་བཞིན་ཉེར་བསྙེན་པས། །ལྷག་པའི་ལྷ་མཆོག་གྲུབ་མཚན་གེགས་མེད་དུ། །ཡོངས་རྙེད་རྒྱལ་རྔ་བརྡུང་དང་ཆབས་ཅིག་པར། །དཀར་པོ་ཆོས་ཀྱི་བ་དན་སྲིད་རྩེར་འཕྱར། །སླད་མར་གཉན་ལོའི་ཐུགས་ཀྱི་བདུད་རྩིའི་བཅུད། །ཙ་ཏུ་རྨུ་ཁའི་ཚེ་སྒྲུབ་སྲུང་འཁོར་སོགས། །ཟབ་ལས་ཆེས་ཟབ་ལྷ་སྔགས་ཡེ་ཤེས་ཀྱི། །རྣལ་འབྱོར་མཆོག་ལ་གཞོལ་པར་གཅིག་ཏུ་བསྐུལ། །དམ་པའི་བཏུང་བར་འོས་པ་རྐང་འཐུང་གི །ལོ་མའི་རྩེ་མོར་ཉེར་སོན་བམ་བོ་ལ། །ཐུན་མཚམས་རྒྱས་སྤྲས་དབོ་ཟླའི་དཀར་ཆ་ཡི། །རྒྱལ་བ་དང་པོའི་ཚེས་ལའི་ཁི་ཏ་མ། །ས་ལུག་གི་ལོ་སྔ་འགྱུར་གསུང་རབ་སྤྱི་དང་ཁྱད་པར་སྙིང་ཐིག་གི་རྟོགས་པ་ཀློང་དུ་གྱུར་པའི་ཁམས་པ་རྫོགས་ཆེན་པའི་འཕྲིན་ལན་ཀུན་བཟང་(༢༦༤ན)
ཞལ་དངོམ། ནོ དྷུ ཏཱི སོ ཙི ཏ ཀྵེ ཏྲ བྷཱུ མྱ རྡྲ ཏཱ ཤྲཱུ ཏ ཀོ བདྷྱཱ ན སཱ དྷ ནྱ ཀཱ པྟཱ པྟི ནཱ། དྷཱ ཏུ ཀོ རྡྷཾ མ ཧཱ པྟེ གུ རོ རླེ ཁ ཡུ བྫཱ བུ དྷ ྉྤ ཎྱ ཀ ཏྱཱ ནུ བྷཱ བེ ན ཧཱི། དལ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)འབྱོར་རྟེན་བཟང་ཞིང་ས་གཤིན་པོ་ལ། །ཐོས་པའི་ས་བོན་བསམ་སྒོམ་དྲོད་གཤེར་གྱིས། །ཡོངས་སྨིན་དོན་ལྡན་སྙེ་མ་གཡུར་ཟ་བ། །ཁམས་སྟོད་རྫོགས་ཆེན་བླ་མའི་འཕྲིན་རྟེན་སོན། །ཚེ་རབས་མང་གོམས་ལེགས་བྱས་མཐུ་བོ་ཆེས། །ཐེག་པ་ཀུན་གྱི་རྩེ་རྒྱལ་ཨ་ཏི་ལ། །བཟང་པོའི་བག་ཆགས་སད་ཁྱོད་ལྕེ་བཙུན་གྱི། །རྗེས་སུ་བསྙེག་ཆེད་རིང་པོར་འཚོ་བ་བཞིན། །འདི་ན་མདོ་རྒྱུད་ཐ་སྙད་གཞུང་འགྲེལ་འགར། །སྦྱངས་སྟོབས་ལྷོད་པོས་བགྲོད་པའི་གཉིས་མཐུང་བདག །བརྩོན་པས་རྩེ་གཅིག་སྒྲུབ་ལ་མ་བསྒྲིལ་བས། ཁ་བཤད་ནེ་ཙོའི་སྨྲ་བ་ཁོ་ནར་ཟད། །ཉམས་མྱོང་ལ་བའི་རྒྱུ་སྤུན་མེད་བཞིན་དུ། །གཞན་རྟོགས་(༢༦༤བ)
གེགས་སེལ་བོགས་འདོན་འཇམ་ཕྲུག་ཐགས། །སོམ་ཉིའི་གྲང་རེག་བསལ་ལ་ཡིད་བརྟོན་པར། །རུང་བའི་ཤ་གོས་མཁའ་དབྱིངས་པདྨའི་གྲོགས། །ན་ཚོད་ཕྲ་ནས་སྲིད་བདེར་མ་ཞེན་པར། །གཏན་འདུན་བསྒྲུབ་བློའི་རྩ་བ་སྦོམ་པོའི་ཤིང་། །སྨིན་གྲོལ་བགྲང་ཡས་ཐོས་པའི་ཡལ་འདབ་རྩེར། །ཉམས་ལེན་རོ་བདེའི་འབྲས་ལས་མཆོག་གཞན་གང་། །སུམ་ཅུའི་ཡོངས་འཛིན་ཨུ་དུམ་ཝཱ་རའི་འཕྲེང་། །ཐོད་བཅིངས་ཁྱད་པར་ཆོས་རྒྱལ་ལྷ་གྲལ་ནས། །སྙིང་ཏིག་བདུད་རྩིས་ངོམས་པའི་སྒྲ་གཅན་ཁྱོད། །ཐར་ལམ་སྲོག་གི་ཀ་བ་གཅིག་ཏུ་ཚུགས། །མཁའ་སྤྱོད་ཨོ་ཌི་ཡ་ནའི་གསང་མཛོད་དང་། །དབྱེར་མེད་པདྨཱ་ཀ་རས་སྒྲུབ་པའི་ཁང་། །མང་པོར་ཏིང་འཛིན་མི་གཡོ་གཡར་དམ་གྱིས། །གནས་ཀྱི་གང་ཟག་བརླབས་པ་གདོན་མི་ཟ། །ལོ་གསུམ་འདབ་སྦྱར་བུག་སྒོ་ཙམ་བསྟེན་པར། །མཚར་དུ་རྩི་ན་བགྲང་བྱ་བཅོ་ལྔའི་བར། །རྩེ་གཅིག་བསྒྲུབ་ལ་རབ་བརྩོན་ངང་ཚུལ་དང་། །ལྷ་རྣམས་མཁའ་ངོས་ལེགས་གསོའི་མེ་ཏོག་འཐོར། །ལོངས་སྐུའི་ཞིང་མང་མྱུལ་བ་ཐོད་རྒལ་གྱི། །དཀར་སེར་ཁྲ་མུན་སྒྲོན་མ་དྲུག་གི་གནད། །ནན་ཏན་བགྱིད་ཁྲོད་རང་རིག་ཀུན་ཏུ་བཟང་། །རང་ཞལ་མཐོང་བའི་བར་དུ་དར་ཡོལ་ཙམ། །ཆོས་ཉིད་མངོན་སུམ་ཕ་མཐར་ཕྱིན་པ་དིང་། །དཀོན་ན་གོང་འཕེལ་སྣང་བ་ཡོངས་ཤར་གང་། །སྔ་འགྱུར་ནགས་ཀླུང་སྟུག་པོ་འཁྲིགས་པའི་དབུས། །སྔོན་མེད་ཡོངས་འདུའི་ལྗོན་པ་ཁྱོད་དུ་ངེས། །(༢༦༥ན)
ཚད་ཕེབས་རྫོགས་ན་ཆོས་ཉིད་ཟད་ས་རུ། །འཁྱོལ་ལ་ཧ་ཅང་མི་རིང་ཕ་རོལ་ན། །སྐྱོན་བྲལ་ཡོན་ཏན་ཀུན་ཚང་རང་གི་སེམས། །ཁྱབ་བདག་རྡོ་རྗེ་འཆང་དུ་བཏགས་པ་ཡོད། །དེ་ཕྱིར་སྔ་འགྱུར་གྲུབ་བརྙེས་ཆེས་མང་བ། །ཕུང་པོ་འོད་སྐུར་གྲོལ་མོད་ཆེར་སྙིགས་དུས། །ཉིན་མོའི་སྐར་ལྟར་དཀོན་ཀྱང་མི་འབྱུང་མཐའ། །མ་བཀག་སྒྱིད་ལུག་མེད་པར་འབད་པས་སྒྲུབས། །རྟོག་པ་ཡོད་ན་ལྟ་བ་མིན་སྨྲ་དང་། །ཞི་གནས་མི་གཡོ་ལྷག་མཐོང་ཉ་ལྟར་འཁྱུག །སེམས་གནས་ལྟེམ་པོ་སྤྲོས་བྲལ་དངོས་འདོད་སོགས། །ས་དགེ་དྭགས་བརྒྱུད་གྲུབ་མཐའི་རིགས་མང་མོད། །དགག་སྒྲུབ་བླང་དོར་བྲལ་བ་རང་ཤར་བར། །ཅེར་གྱིས་བལྟས་པའི་མཚོ་རླབས་མཁའ་སྤྲིན་བཞིན། ཁྱབ་གདལ་གདོད་མའི་གཤིས་ལུགས་ཆོས་ཀྱི་དབྱིངས། །འཕོ་འགྱུར་བྲལ་བ་མཉམ་རྗེས་གཉིས་མེད་ལམ། །བཟང་ངན་རྟོག་པའི་འཕྲོ་འདུ་ཇི་སྙེད་ཚོགས། །ཤར་གྲོལ་དུས་གཅིག་བྱུང་ཚེ་འཁོར་ཡུག་ཏུ། །ཀ་དག་ཡེ་གྲོལ་ཀློང་དུ་ཡོངས་འབྱམས་ལས། །གནས་འཕྲོར་བལྟོས་མིན་སྣང་ཚད་ཆོས་ཀྱི་སྐུ། །དགའ་རབ་ཤྲཱི་སྲིང་པད་འབྱུང་བི་མ་ལ། །བཻ་རོ་སོ་ཟུར་གནུབས་ཉང་ལ་སོགས་པའི། །བཀའ་གཏེར་གནད་ལ་སྦྱངས་དམན་རྙིང་རློམ་འགས། །ཕྱག་རྫོགས་མ་ཕྱེད་སྲ་སྲེའི་ཆོས་སྐད་མང་། ཁྱོད་ཀྱིས་སྔོན་ཆད་བརྩོན་པས་ཉམས་བསྟར་ཀུན། །སྙིང་ཏིིག་སྙིང་(༢༦༥བ)
པོའི་དགོངས་དོན་ཇི་ལྟ་བར། །མ་རྟོགས་ལོག་རྟོག་མེད་པ་རྣམ་དག་ལམ། ཁོ་ནར་སོང་བའི་ཚུལ་ལ་གཅིག་ཏུ་རངས། །ཀྲྀ་ཀྲིའི་རྨི་ལྟས་དུས་བབ་ཆོས་གཟུགས་སྤྱོད། །ཚོན་རིས་སེམས་ཀྱི་ཤེལ་ངོས་ཤར་བ་ན། །དོན་ཆུང་གཡེང་བའི་གཟེབ་ཚུད་ཐོས་བསམ་དང་། །སྒོམ་པའི་གླེང་མོ་མ་ཕྱེད་སྐལ་བ་ཕྲ། །འོན་ཀྱང་ལྗོངས་འདིར་བགྲོད་དུས་ཤར་ཚོད་རྣམས། །མོལ་མཆིད་འོང་བར་མ་ཟད་སྔ་འགྱུར་བསྟན། །འཛིན་ངེས་གདུང་གིས་བཙུན་དང་སྐྱེས་རབས་ཀྱི། །འཕྲེང་མཛེས་མང་པོར་གཏུགས་པས་སྒྲོ་འདོགས་ཆོད། །ཚེ་འདིའི་འཁྲི་བ་བཅད་ནས་ཉམས་ལེན་ལ། །དྲིལ་དོན་གཞན་ཕན་སེམས་བསྐྱེད་ཀྱིས་ཟིན་ཕྱིར། །སྐལ་ལྡན་སྨིན་གྲོལ་བཀོད་པའི་བསོད་ནམས་ཚད། །ཆུ་གཏེར་ཆིག་གུས་བགྲངས་ཀྱང་གཞལ་ནུས་མིན། །སླད་མར་རྩེ་གཅིག་སྒྲུབ་པ་ཀུན་བཟང་གི །རྣམ་འཕྲུལ་མཆོད་སྤྲིན་རྩ་གསུམ་སྤྱན་སྔ་རུ། །ཉེར་སྤྲོའི་དམ་བཅའ་བརྟན་པོ་མ་བཏང་ངོས། །གླེང་འོས་མཐོ་རིས་ཆུ་བོ་ཚད་མེད་ཀྱིས། ཁྱོད་མིག་དྲི་བྲལ་མཁའ་དབྱིངས་ཟླ་བའི་ངོས། །ཕྱག་མཚན་སྐུ་གཟུགས་རི་མོ་ཡོངས་བཀྲ་བ། །མཚོན་བྱེད་བཀྲ་ཤིས་དར་དཀར་ཐུན་མཚམས་རྒྱས། །བཏབ་པ་ཆུ་སྟོད་ཀྱིས་ཉའི་དམར་ཆར་བྲིས། །ས་མོ་ལུག་གི་ལོ་འབྲི་གུང་སྤྲུལ་སྐུ་རིན་པོ་ཆེས་གཏེར་སྒྲོམ་དུ་ཚེ་ཆོག་དང་རྡོ་རྗེ་གྲོ་བོ་ལོད་ཀྱི་སྦྱིན་སྲེག་གནང་ནས་ཕྱིར་ཕེབས་སྐབས་ཆབ་ཤོག་བྱུང་བའི་ལན་བགྲང་ཡས་ཞི་ཁྲོའི་རོལ་གར། (༢༦༦ན)
པྲ ཀྲི ཡཱ དི ཏྭ དྷ རྨ སྱ ཀཱ ཡེ ཧི ཤཽ དྡྷཱ ཏུ དྷེ བྷོ གཀཱ ཡོ ད ཡེ ནྡཱ བྷ ནུ།ཿ། ས རྦ བི ཥྞཱ ར བྷཱ བཱ བ བྷ སྣི རྨ ནཱ རྟཱ ཡ ཀཱུ ལཱ ལ ཙཱ མུ རྡྷ བྷུ ཥྱེ ར དཱ། རང་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)རིག་གདོད་ནས་ཆོས་སྐུར་དག་པའི་གདངས། །མ་འགགས་ལོངས་སྐུར་ཤར་བའི་གཞལ་རིས་ཟེར། །ཀུན་ཁྱབ་འགྲོ་ལ་དངོས་སྣང་སྤྲུལ་པའི་གར། །བསྒྱུར་མཛད་རིགས་འཛིན་ཡོངས་ཀྱི་གཙུག་རྒྱན་དེར། །དཎྜིའི་གཞུང་ལུགས་ལས་འོངས་པི་ཝཾ་ཁོག །ཡངས་པོར་མཁྱེན་དཔྱོད་རྒྱུད་མངས་ཉེར་འཁྲོལ་བའི། །ཆབ་ཤོག་དར་དཀར་གྱིས་བཏེག་བྱ་མ་རྟའི། །འཇོ་སྒེག་དྲི་ཟའི་བུ་མོར་སྐྱེངས་པ་སྟེར། །བགྲང་ཡས་ཞི་ཁྲོའི་ལྷ་སྔགས་ཡེ་ཤེས་ཀྱི། །རྣམ་རོལ་སྐུ་གསུང་ཐུགས་ཀྱི་རྡོ་རྗེ་ཆེས། །ཚུར་མཐོང་བྱིས་པའི་འཁྲུལ་ངོར་གཞོམ་ཞིག་སྐྱོན། །བྲལ་དེ་སྤྱི་དང་བྱེ་བྲག་བསྟན་འགྲོའི་གསོས། །ནེའུ་ཙོའི་ཀློག་འདྲའི་ངང་དུ་རྒན་པོའི་གྲལ། །(༢༦༦བ)
ཚུད་དག་གཅིག་ཏུ་སྒྲུབ་ལ་གཞོལ་འོས་ཀྱང་། །ད་དུང་རྣམ་གཡེང་ཆུ་གཉེར་རྗེས་འགྲོ་འདིས། །རྙེད་དཀའི་དལ་འབྱོར་སྟོང་པར་ཟད་ཀྱིས་དོགས། །དྲག་པོའི་འཕྲིན་ལས་སྒྲུབ་གནས་གཏེར་སྒྲོམ་དེར། །འཆི་བདག་གཡུལ་ཚོགས་བཟློག་པའི་ཆོ་ག་དང་། །གནོད་བྱེད་འབྱུང་པོའི་སྡེར་བཅས་མ་དཔལ་རྩེར། །བསྲེགས་ཚེ་པདྨ་ཀ་ར་དངོས་བྱོན་ཏམ། །མཇིང་ཡོན་ལྷ་སྲས་གནམ་ལྕགས་མེ་འབར་གྱི། །ཡང་སྲིད་ཆོས་གྲགས་བྱིན་རླབས་ཐུགས་ཀློང་ནང་། །ཞུགས་ཁྱོད་སྔ་འགྱུར་བསྟན་ལ་མངལ་སྐྱེས་ཀྱི། །ཨཽ་ཌི་ཡ་ནའི་སློབ་དཔོན་གསར་བྱོན་བཞིན། །སྙན་གྲགས་ལྷ་ཡི་གཎྜི་ཆེར་བརྡུངས་སྒྲ། །སྲིད་པའི་རྩེ་མོར་བསྒྲགས་ཚེ་མིག་མི་འཛུམ། །ཕལ་ཆེར་རྒྱུ་སྐར་ཟོལ་གྱིས་དབུ་རུའི་ཆའི། །མཁའ་ངོས་བགྲོད་ལ་གཅིག་ཏུ་བྲེལ་ལམ་སྙམ། །སྟག་ཆེན་རླུང་ལྟར་འཕྱོ་སྟེང་གར་དགུའི་ཉམས། ཡོངས་བསྒྱུར་རྡོ་རྗེའི་ཕུར་མཚོན་གཟས་པའི་རྩེར། །ཡིད་སྲུབས་སྙིང་དེ་བརྒྱ་ཕྲག་བཀས་ན་ཡང་། །ད་རུང་མི་འཛད་སྐྱེ་རྒུའི་ལས་ཉོན་སྐྱོན། །འཇམ་དཔལ་ཚེ་བདག་ཧོཾ་ཁུང་གདངས་ཞལ་དུ། །ལོག་པར་འདྲེན་ནོ་ཅོག་ཆུར་ཁྲག་དྲོན་གྱི། །དབུ་བ་འཁྲིགས་པའི་བར་ནས་འགྲོ་ཀུན་ལ། །རྗེས་ཆགས་སྙིང་རྗེའི་ཚེམས་ཕྲེང་གཅིག་ཏུ་དཀར། །རིགས་གསུམ་འདུས་པ་དུག་སྡོང་ནག་པོ་ཡི། །ལྟོ་བར་འཇིག་རྟེན་གཏམས་པས་མ་ཚིམས་པར། །ལྗང་དམར་ནག་པོའི་ཁྲོ་ཞལ་ཚངས་རིས་ལས། །བརྒལ་ཚེ་བལྟ་ཕྱིར་མེས་པོས་གདོང་བཞི་སྤྲུལ། །དྲང་སྲོང་དམོད་པའི་ཐལ་བརྡབས་གཅིག་གི་བར། །སྡེ་བརྒྱད་(༢༦༧ན)
བྱ་སྒྲོ་མགར་གྱིས་སོལ་མལ་ལྟར། །གྱུར་ཚེ་རྒྱལ་བས་ལུང་བསྟན་མྱ་ངན་མེད། །སྤྲུལ་ལས་སླར་ཡང་ཡང་སྤྲུལ་མཆེད་པོར་དོགས། །དེ་ཙམ་བློ་དམན་འོག་འགྱུའི་འཆར་སྒོ་སྟེ། །ཞི་ཁྲོ་ཀུན་འདུས་ཆེ་མཆོག་ཧེ་རུ་ཀར། །བཞེངས་ལ་མ་ཚང་སྲས་བཅས་རྒྱལ་བ་ཡི། །རྣམ་འཕྲུལ་ཚང་མས་གཞལ་ཀྱང་དམིགས་སུ་མེད། །དྲེགས་ལྡན་བླུན་པོས་གཙུག་མཆོད་ལྷ་སྲིན་གྱིས། །ཆེར་བསྔགས་དངོས་པོའི་གཏོང་ལེན་གཞལ་འདྲིད་མཁན། །བླ་ཆེན་ཕལ་གྱི་ངང་ཚུལ་ཁྱོད་ཉིད་ཀྱི། །རྣམ་ཐར་མཐོང་བས་ཆུ་ཤིང་སྙིང་པོར་འཁུམས། །ཆེས་དཀོན་ཐེག་མཆོག་སྙིང་པོའི་འཕྲིན་ལས་རྒྱུན། །འཁོར་བའི་མཐའ་རྙེད་སྐལ་བཟང་གདུལ་བྱའི་དོན། །སྐུ་སྲོག་གཡུང་དྲུང་ཉ་ཕྱིས་ཁོག་ཡངས་པོར། །ཚེ་ཡི་མུ་ཏིག་ཕྱུར་བུར་ཁེངས་གྱུར་ཅིག །ནམ་ཡང་མི་བསྐྱུད་བཀའ་མཆིད་མཐོ་རིས་ཆབ། །མཁྱེན་རབ་གསེར་མངལ་ཅན་གྱི་རལ་ཀླུང་ནས། །བབས་པའི་ལེགས་བཤད་དབུ་བའི་དོ་ཤལ་ཕྲེང་། །མིང་ཚིག་ཡི་གེ་གངྒཱའི་འགྲོས་བཞིན་ཞུ། །དཀར་མཛེས་ལུས་ཕྲའི་སོར་མོས་མ་བཏགས་ཤིང་། །དཀར་གསལ་སྟོན་ཟླ་ཞུན་མ་འཁྱིལ་མིན་པར། །དཀར་འཇམ་རེག་བྱའི་ཁྱད་ཆོས་ཁ་རྫར་ཅན། །དཀར་ཕྱོགས་ཨེ་ཡིག་ཤར་ཚེ་རྒྱས་སྤྲས་ཏེ། །སྐྱུ་ར་གནམ་གྱི་སྔགས་འཆང་རིམ་བྱོན་ལས། །པདྨའི་རྒྱལ་ཚབ་རིན་ཆེན་ཕུན་ཚོགས་སོགས། །རིགས་འཛིན་ནོར་བུའི་ཕྲེང་ལྟར་ཆད་མེད་ཀྱི། །མདུན་སར་དང་བས་ཕུལ་བ་ཛ་ཡནྟུ། །ས་ལུག་ཚོང་འདུས་ནས་ཆོས་སྐྱོང་བཤན་པ་བྱ་ཁྲིད་མ་གཅིག་(༢༦༧བ)
པ་སྡེ་པའི་ཁྲི་འདོན་གྱི་ལེགས་སྤེལ་དུ་ཚན་གྲངས་བྱུང་སྐབས་དེ་ལན་ཆེད་གཉེར་མངགས་པའི་ཚེ་འཕྲིན་དུ་གསོལ་བ་བཀྲ་ཤིས་ལྷ་རྒྱལ། ཡིད་ཅན་ཡོད་དོ་ཅོག་གི་རྣམ་འདྲེན་ཆེ། །ཡང་སྒོས་གངས་ཅན་ལྗོངས་ཀྱི་ལྷ་གཅིག་པུ། །དྲན་པས་གདུང་སེལ་པད་འབྱུང་བཀའ་རྟགས་གཙུག །རབ་མཛེས་བཤན་པ་བྱ་ཁྲིད་མིག་གཅིག་དགོངས། །ལུང་བསྟན་གྱིས་ཟིན་མི་བདག་ཆུ་སྟོད་ཟླའི། །ཡར་ཚེས་དགའ་བ་གཉིས་པར་མང་བཀུར་ཁྲིར། །མངའ་གསོལ་ལེགས་སྤེལ་ཆེད་དུ་ཁོག་ཞུགས་རྟེན། །གསུང་འཕྲིན་ཚན་གྲངས་བཅས་ཏེ་འབྱོར་བས་སྤྲོ། །འདི་ན་དམ་པོའི་བཅད་རྒྱ་དང་འགྲིག་ཀྱང་། །སྣེ་ལེན་ངོ་སོ་ཐོགས་པའི་བདག་རྐྱེན་བྱས། །གོ་གསོལ་དུས་ཆེན་གྲ་བསྒྲིག་ཁྱད་སྔ་ནས། །རང་ཡུལ་མྱུར་བགྲོད་ཆོ་ག་སྔོན་དུ་བསྟར། །འགྲོ་མང་ལས་ཀྱིས་བསྐྲུན་པའི་དཀར་ནག་འབྲས། །སོ་སོར་སྨིན་པ་བཅོས་སུ་དཀའ་མོད་ཀྱང་། །ལྕགས་ཁམས་གསེར་འགྱུར་ཇི་བཞིན་བླང་དོར་ལ། །བརྩོན་ན་བདེ་སྐྱིད་སྒོ་འཕར་ཅིས་མི་འབྱེད། །དེ་ཕྱིར་ལྐོག་གྱུར་མངོན་སུམ་གསལ་བའི་སྤྱན། །དམར་ཟླུམ་ཕྱོགས་བཅུར་གཟིགས་ནས་ལེགས་སྤེལ་དང་། །ཉེས་སོལ་རྡོ་རྗེའི་ལུང་བསྟན་སྒྲ་བོ་ཆེ། །མགྲིན་བཏེག་ལྷ་རྒྱལ་དབྱངས་སུ་ད་འཚེར་ཞིག །ཨཽཌི་ཡ་ནའི་ཙན་དན་སྡོང་པོའི་འོག །ཞེ་དགུའི་ཞག་བར་མི་གཡོའི་སྐྱིལ་མོ་ཀྲུང་། །མཛད་པར་འགལ་བ་མེད་མོད་རིང་མིན་དུ། །ཁོག་ཞུགས་བསྟན་པའི་བྱ་ར་སྔོན་བཞིན་མཛོད། །དངོས་བཤམ་ཡིད་སྤྲུལ་མཆོད་པའི་བྱེ་བྲག་གིས། །ཐུགས་དམ་གཉན་པོ་སྐོང་ཕྱིར་རབ་འབུལ་ན། །དགའ་མགུར་རོལ་པ་འཕྲིན་(༢༦༨ན)
ལས་རྣམ་པ་བཞི། །བསྒྲུབ་པའི་བཀྲ་ཤིས་ཡར་ངོའི་ཟླ་ལྟར་སྤེལ། །ས་ལུག་གི་ལོ་རྣམ་གླིང་པཎ་ཆེན་དཀོན་མཆོག་ཆོས་གྲགས་འཁོར་ཞག་དུས་སྙན་ཚིག་གི་ལམ་ནས་དྲངས་པའི་འཕྲིན་ཡིག་བྱུང་ལན་ཤེས་བྱའི་གནས་ཀུན་གསལ་བའི་མེ་ལོང་། ཏྭཾ གལེ བཱི ཎ པ ཪྻ ནྟ རཱ ཏཱ བ བྷ ཀྵཱ ར བཻ ཎ སྱ གཱི ཏ སྭ རི ཪྻེ ཁ ནཿ བི ཀྲ མ སྭཱ ར ཀཱ ངྒུ སྱ ཀེ ཏུ རྩ ཙོ དཻ ཪྶ ཙི ཏྟྱཾ རུ ཙཱ ཀི ན གུཔྟཱ ད ཧོ། ཁྱོད་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)མགྲིན་པི་ཝཾ་ཁོག་པ་ཡངས་པོ་ནས། །ཉམས་འགྱུར་རྒྱུད་མངས་འཁྲོལ་བའི་གླུ་དབྱངས་འཕྲིན། །རྣམ་དཔྱོད་དབྱངས་ཅན་སོར་རྩེས་བསྐུལ་བ་དང་། །ལྷན་ཅིག་རྟེན་གྱི་གདུ་བུ་ངོམ་དེ་མཚར། །ཚངས་པས་མཐའ་བཙལ་མ་རྙེད་ཟག་བཅས་མལ། །གཉིད་ལ་གཡུར་བྱེད་བསོད་ནམས་ཆུ་གཏེར་ལས། །ཉེར་ཐོན་ལང་ཚོའི་ཟླ་བ་ཡོན་ཏན་གྱི། །ཉ་གང་ལེགས་བཤད་བསིལ་ཟེར་འགྱེད་དེ་སྤྲོ། །འདི་ན་བསམ་སྒོམ་གཞོན་ནུའི་གར་མཁན་མ། (༢༦༨བ)
།ཅུང་ཟད་ཐོས་པའི་གོས་ཀྱི་སྒྲིབ་གཡོགས་ཅན། །ཆོས་བརྫུ་བློ་བྲིད་མར་མེའི་ཁང་བཟང་ནང་། །རང་གཞན་ཕན་བདེའི་ཕྱེ་ལེབ་འདེབས་སམ་སྙམ། །འཁོར་རྩ་ཁྱིམ་ཐབ་དྲག་པོའི་དཀའ་ཐུབ་རྒྱ། །ངེས་འབྱུང་ལུས་མེད་འཇམ་མཉེན་མདས་ཕུག་པས། །བག་ཡོད་ཁྲིམས་ཀྱི་ཨུ་མ་དཀར་མོའི་བཞིན། །བསྟན་པའི་མོད་དེར་གཏན་མདུན་ནུ་ཞོ་འཛག །རབ་རྨོངས་གླང་གདོང་མཆེ་བ་ཉེར་ཕྱུང་སྟེ། །རྣམ་ལྔ་རིག་གཞུང་མདོང་མཐའ་ལ་ཞོན་ནས། །མཁས་མང་མིག་མི་འཛུམ་གྱི་གྲལ་བསྙེག་པའི། །མཆེད་པོ་ཁྱོད་ལས་གཞན་པ་དམིགས་སུ་མེད། །ལྕང་ལོའི་ཕྲེང་བ་རིང་དོར་དགེ་བའི་དབང་། །ཙནྡྲ་གོ་མི་དགེ་སློང་གཟུགས་གྱུར་ཏམ། །རྩོད་ངག་ཆོས་གྲགས་ཁེངས་ཕྲོག་འདི་གང་ཞེས། །ལྷུན་པོས་ཉི་ཟླའི་སྒྲོན་མེ་བཏེག་ནས་བལྟ། །སྲོག་འཚོའི་བདུད་རྩིར་གཞོན་ནུས་གསོས་ཀྱི་སྤུན། །རྒྱ་བོད་ཡི་གེའི་རིག་བྱེད་སམྦྷོ་ཊ། །སྡེབ་སྦྱོར་བརྡ་དག་ཀུན་ལ་ཞུས་ཆེན་གྱི། །སྔོན་བྱོན་སྐད་གཉིས་སྨྲ་བའི་རྗེས་འགྲོར་བྲེལ། །ཕྱི་ནང་གཞན་གསུམ་ཤེས་བྱེད་གྲུབ་པའི་མཐའ། །ལྐོག་གྱུར་དངོས་མཐོང་གཡུལ་ལས་རྣམ་པར་རྒྱལ། །སྤོར་ཐང་རྒྱ་ནག་མཁས་བཞེད་གཙུག་ལག་ཚོགས། །བལྟ་བའི་མིག་ཡངས་དེ་ཀོ་སུ་ཡིས་བསྐྲུན། །མངོན་བརྗོད་བཟོ་རིག་ཕྱག་ཚད་དབྱེ་བ་དང་། །དཔྱད་པ་བརྟག་ཐབས་ལུགས་ཀྱི་བསྟན་བཅོས་སོགས། །ཤེས་བྱར་སྲིད་འཇལ་བློ་སྣ་རིང་པོའི་དཀྱུས། ཁྱབ་འཇུག་གོམ་པ་གཅིག་གིས་དེས་ཀྱང་མིན། །སྡེ་སྣོད་རྒྱུད་སྡེ་བ་ཀུ་ལ་ཡི་ཁ། །ཐོས་བརྩོན་མཛེས་མའི་འགྲམ་ཆང་མངར་པོ་ཡིས། །ཕྱེ་ཚེ་ཆུ་(༢༦༩ན)
སྐྱེས་འཛུམ་བྱེད་ཉི་ཟླ་ཟུང་། །དལ་མེད་ནམ་མཁར་བགྲོད་པ་ངལ་བ་ཙམ། །གཡུ་རུ་བཟའ་ཤིང་ནགས་ཀླུང་རབ་འཁྲིགས་ཁྲོད། །རྣམ་མང་ཐོས་སྲས་འབྱོར་པར་འགྲན་ནུས་གླིང་། །ཕ་ཡུལ་སྐྱིད་པའི་གཞིས་དེར་བག་ཕེབ་ནས། །ཆེས་དཀར་དགེ་ལེགས་སྤྱོད་ཡུལ་གཅིག་ཏུ་ཡངས། །ཡིད་འོངས་ཁྱིའུ་ཆུང་ཡོངས་བསྐྱོད་སྔོན་འགྲོའི་སྒོར། །ལུས་ཕྲ་གཏོང་ལེན་གཉེན་གྱི་སྦྱོར་བའི་རྩིས། །ངན་བསྒྱུར་བཟང་པོར་སྤེལ་མཁས་བླ་མཁྱེན་དུ། །འཕྲུལ་རྒྱལ་ཀོང་རྩེའི་ཁེངས་པ་ཐུང་ངུར་བྱེད། །ལྷང་ལྷང་སྙན་པའི་གླུ་དང་དགའ་བའི་གར། །རྩེ་དགའ་ཁོང་དགོད་ཕུན་ཚོགས་དུས་སྟོན་ཆེ། །ཀུ་མུ་ད་ཡི་དཔལ་བཞིན་ཡ་རབས་ཀྱི། །བཟང་སྤྱོད་མི་ཆོས་གཙང་མའི་ངང་ཚུལ་འཇེབས། །དེ་ཕྱིར་ཨནྡ་རྙིལ་ཞུན་དབུ་འཕྲེང་རྒྱན། །པཀྵའི་ཆུ་ཀླུང་བུ་མོ་བརྒལ་དཀའ་བ། །མཁའ་མིག་ཞག་པར་ཅི་བདེར་བགྱིད་འོས་ཞེས། །སྨྲ་བའི་རོ་འཛིན་ཅུང་ཟད་བརྐྱང་མིན་ནམ། །རི་མོ་གཡས་སུ་ལེགས་འཁྱིལ་བའི། །མགྲིན་པ་སྐྱ་བ་ལྔ་པའི་དུང་། །སྙན་ཚིག་སྒྲ་དབྱངས་ཐོས་འཛིན་གྱི། །རྒྱན་དུ་ཡང་ཡང་བུས་ཤིག་གུ །ཀུན་རྟོག་འཁྲུལ་ངོའི་གཟུགས་བརྙན་རྣམས། །མངོན་སུམ་ཐགས་སུ་ཤར་འདྲ་བ། །རབ་དཀར་ཁ་ཚར་ཅན་འདི་ལ། །རྟགས་ཀྱི་མཚམས་སྤྲིན་མདངས་འོད་གསལ། །ཉི་མ་སྲང་གི་ཁྱིམ་སྤྱོད་པ། །དབྱུ་གུས་ཟླ་ཉ་ཕྱི་མའི་ཕྱོགས། །ཨཱུ་ཡིག་འཆར་བའི་ཚེས་དགེ་བར། །རྒྱལ་ཁབ་དམར་པོ་རི་ནས་བྲིས། །
རབ་བྱུང་བཅུ་གཅིག་པའི་ལྕགས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག །ལྕགས་སྤྲེལ་ལོ་གསར་(༢༦༩བ)
གྱི་ཚེ་སྡིངས་པོ་ཆེ་སྤྲུལ་སྐུའི་འཕྲིན་ལན་ཤེལ་དཀར་ཚོན་རིས། སུ ཀྲྀ དྭི སྟ རཱ ནྟཱ བྷི མཱ བིན དྷྱ མ དྷྱེ བི ཅཱ རོ ར གམྱ སྱ སཽ མཱུ རྡྷ ཛི ཧྭཿ སུ སཱ མཱ ཤྭ སེ རྴ བྡེ གརྫི ཤྩ སཱ མ ནྱ ལེ ཁཱ བྷི མཱ ཎྱོ དྱ ཏ ཎྱ ཏ ཡུ ཀྟཾ། ལེགས་(སྡེབ་སྦྱོར་མཉམ་པའི་བྲྀཏྟ་ལས་ལག་འགྲོ་ལྟུང་བ།)བྱས་གཏིང་མཐའ་མི་མངོན་ཆུ་གཏེར་དབུས། །རྣམ་དཔྱོད་ལྟོ་འགྲོའི་གདེངས་ཁ་མཛེས་པའི་ལྕེ། །སྙན་ཚིག་ཕུཊ་སྒྲ་སྒྲོག་དང་ཆབས་ཅིག་པར། །འཕྲིན་རྟེན་ནོར་བུ་དངོམ་འོད་དེང་འདིར་སོན། ཁ་བའི་རྡུལ་བརྩེགས་གོས་ཀླུབས་མརྐ་ཊ། །སུམ་ལྡན་ཁམས་ཀྱི་བགྲང་བྱའི་ཟླ་བཞིན་ངོས། །རྣམ་གསུམ་འཁོར་ལོའི་རི་དྭགས་གཟུགས་ཤར་བ། །ལངྐའི་ཕོ་བྲང་རྩིག་པར་འགྲན་གྱིས་དོགས། །གཞོམ་བྲལ་ཆོས་སྐུའི་ཀློང་དུ་སྐྱེ་རྒ་དང་། །ན་འཆི་དམིགས་སུ་མེད་ཀྱང་བྲོ་འཚལ་དིང་། །སྤྲིན་བྲལ་ཉི་ཟེར་ལྷོ་བྱང་ཕུག་པ་རུ། །འཆར་ལ་སེམས་མེད་ས་གཞི་དགོད་པས་འདར། །འདི་ན་མདོ་རྒྱུད་ཐ་སྙད་བཀྲག་པོ་ཆེས། །བྱིས་ཡིད་འདྲིད་པས་དྲུག་ཅུ་བརྒལ་ལོའི་མཐར། ཁྲིད་(༢༧༠ན)
བདག་དོན་མེད་ལོག་ལམ་མ་འཕྱན་པར། །ཐོས་བསམ་ལང་ཚོ་དར་བར་རང་བློ་བདེ། །དཀར་འཇམ་ཤོག་བུའི་པད་ཕོར་སྣོད་ཡངས་པོར། །ཤིས་བརྗོད་ཚིག་ཕྲེང་མེ་ཏོག་ཕྱུར་བུ་རུ། །ཉེར་སྤུངས་མགྲིན་པའི་སོར་རྩེས་འཐོར་བ་ལ། །མེས་པོའི་རིགས་བརྒྱུད་ཁྱོད་སྨིན་གང་གིས་འཛིན། །གསེར་རིའི་སྦུབས་ནས་ཉི་ཟླ་ཆད་མེད་དུ། །འཆར་བས་འདབ་མ་བཞད་འདོད་བ་ཀུ་ལ། །སྒུགས་སྡོད་སྙིང་ཐག་སྲིད་པའི་ཕ་མཐའ་རུ། །རྫོགས་མིན་ཚུལ་དེར་པད་དཀར་ས་མོས་འཛུམ། །རིག་བྱེད་རྫུན་གྱི་གདོང་བཞི་ལྡན་མང་ཡང་། །ངེས་དོན་ཟག་བཅས་མལ་དུ་སེམས་གནས་ལ། །བསྐལ་བརྒྱར་གཉིད་གཡུར་སྔོན་མེད་བྲཧྨ་ཎཿ། །གླིང་རས་བསྟན་པར་གཅིག་ཤར་རྀ་ཥིའི་སྤུན། །རྣམ་འདྲེན་མོས་པ་རབ་བྱོན་དགའ་སྟོན་པར། །གནམ་ལོའི་ཐོག་མར་སྭསྟི་བྷ་ཝནྟུའི། །སྙན་པོར་གཏམ་གྱི་པི་ཝཾ་རྣ་བའི་བཅུད། །འཕྲོག་བྱེད་ཞབས་བསིལ་བཞིན་དུ་རྟག་སྦྲེངས་ཤིག །ནམ་མཁའི་ངོ་བོ་ཉེར་སྟོང་ལི་ཁི་ཏ། །ལྷ་རྫས་ཁ་རྫར་ཅན་གྱི་སྟེང་བཞག་ནས། །རིག་པའི་འབྱུང་གནས་གཡོ་རུ་གྲ་ནང་དུ། །དབྱངས་ཀྱི་རྒྱལ་པོ་ཨུ་ཡིག་ཤར་ཚེ་སྤེལ། །ལྕགས་སྤྲེའི་ལོ་སྟོབས་ཀྱིས་འཁོར་ལོས་སྒྱུར་བ་འཇམ་དབྱངས་གོང་མ་རྒྱལ་པོའི་ཡན་ལག་བཞི་པའི་དཔུང་གི་ཁ་ལོ་བསྒྱུར་བ་ཙམ་གྱིས་ལོག་པར་འཁུ་བའི་རྐུན་མཐུ་སན་གུ་སྡེ་བཅས་མིང་གི་ལྷག་མར་གྱུར་བའི་ཚེ་ལེགས་སྐྱེས་འབུལ་བའི་ཐོག་མར་བཀྲ་ཤིས་པའི་གླུ་དབྱངས་སྔོན་འགྲོའི་ཞུ་ཡིག་དང་བཅས་བསམ་བློ་རབ་འབྱམས་པ་ཚུལ་ཁྲིམས་རྣམ་རྒྱལ་དང་བློ་བཟང་ཚེ་རིང་མངགས་སྐབས་ཕུལ་བའི་ཞུ་ཡིག་ཕྱོགས་ཐམས་ཅད་ལས་རྣམ་པར་རྒྱལ་བའི་གཏམ་སྙན། །ཚེ་རིང་གནམ་གྱི་ཤེ་(༢༧༠བ)
མོང་གི་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། དབྱར་དུས་ཀྱི་ཆར་རྒྱུན་ཟད་མི་ཤེས་པས་འཛིན་མའི་ཁོར་ཡུག་མཐའ་དག་ཉེ་བར་བརླན་ཏེ་ཕྲ་མོའི་རྡུལ་ཙམ་ཡང་ལྡང་བ་མེད་པའི་སྟོན་གྱི་དགའ་སྟོན་ལ་བབ་པའི་ཆུ་ཤེལ་དབང་པོའི་དཀྱིལ་འཁོར་ལྟར་དཀར་བ་གསལ་བའི་དགའ་སྤྲོའི་ཡིད་ཀྱིས་ཀུན་ནས་བླངས་ཏེ་དབང་པོའི་ཕྱོགས་དེར་འདུད་དེ་བདུག་སྤོས་འབུལ་ཞིང་མེ་ཏོག་འཐོར་བ་དང་བཅས་ཡོངས་ལ་སྔོན་འགྲོ་འགོག་མེད་དུ་བྱེད་པའི་ཆོ་ག་བསྟར་ཏེ་གསོལ་བ། གཟོད་མ་ཉིད་ནས་བསོད་ནམས་དང་ཡེ་ཤེས་ཀྱི་ཚོགས་བགྲང་དུ་མེད་པ་འདུ་བགྱིས་པའི་རྒྱལ་བའི་སྲས་པོ་འཇམ་མགོན་ཟུར་ཕུད་ལྔ་པ་གདུལ་དཀའི་སེམས་ཅན་རྣམས་རྗེས་སུ་ཆགས་པའི་བརྩེ་བ་དང་། སྙིང་སྟོབས་ཕུལ་དུ་བྱེད་པའི་སྨོན་ལམ་གྱིས་མངོན་པར་བསྐུལ་ཏེ་ཐུགས་རྗེ་དང་འཕྲིན་ལས་ཀྱི་འཇུག་པ་དུས་ལས་མི་ཡོལ་བར་གནམ་ཀ་བ་མེད་པའི་མཐོངས་ནས་བབས་ཏེ་འཛམ་གླིང་ཡོངས་ཀྱི་ལྷ་གཅིག་པོར་མང་པོས་བཀུར་བའི་རྒྱལ་ཁམས་གསེར་འབྲུག་སྡེར་མོ་ལྔ་པས་བཏེག་པའི་ཁྲི་ཆེན་པོར་ཞབས་ཟུང་གི་པདྨ་རྣམ་པར་བཀོད་དེ་མཐའ་ཀླས་པའི་གཙུག་ལག་དང་སྒྱུ་རྩལ་གྱི་ཚུལ་ལ་བྱང་བའི་བློ་གྲོས་ཀྱི་མཐུ་དང་། རྒྱལ་པོའི་རིགས་ཀྱི་ཆེ་བས་ཉི་འོག་གི་དྲེགས་ལྡན་མཐའ་དག་ཟིལ་གྱིས་གནོན་པ་རྡོ་རྗེ་རིན་པོ་ཆེའི་རྒྱན་ཁྱད་པར་དུ་གྱུར་པའམ། ཡིད་བཞིན་དབང་གི་རྒྱལ་པོ་ལྟར་སྲིད་ཞིའི་ལེགས་ཚོགས་ཀུན་གྱི་འདོད་འཇོར་བཞུགས་པ་ནི་དངོས་པོའི་གཤིགས་ལུགས་ཉིད་ལས་གཞན་དུ་ཅི། འདི་ནའང་ལུས་ཅན་མཐའ་དག་གི་མགོན་དང་། སྐྱབས་དང་(༢༧༡ན)
གླིང་དང་། དཔུང་གཉེན་དམ་པར་གྱུར་པ་འདྲེན་པ་མཉམ་མེད་ཤཱཀྱ་སེང་གེའི་བསྟན་པ་རིན་པོ་ཆེ་བླ་ནས་བླར་འདེགས་པའི་ཁུར་ཕྲག་པར་བླངས་པའི་གྲིབ་བསིལ་དུ་རྒྱུད་ལྔའི་ཡིད་ཅན་རྣམས་ངལ་གསོ་བར་སྨོན་པའི་ལྷག་བསམ་དཀར་བར་གནས། ཉེ་ལམ་ཆེད་དུ་འབུལ་བའི་སྙིང་པོ་གནམ་དང་སའི་དཀྱིལ་འཁོར་ཀུན་ལ་དབང་ཕྱུག་པས་སྲིད་ཞིའི་བྱེད་པོ་ཚངས་པ་མིའི་གཟུགས་སུ་རྣམ་པར་རོལ་བར་འབངས་ཕྲ་མོས་རྒོལ་བའི་ཀླན་ཀའི་སྐབས་ཅི་མཆིས་ཀྱང་། བར་སྐབས་སུ་མ་ཧཱ་ཙི་ནའི་ལྷོ་ཕྱོགས་ཀྱི་ཡུལ་གྲུ་འགའ་ཞིག་ཏུ་བསོད་ནམས་མ་ཡིན་པའི་འབྲས་བུར་འུ་སན་གུའི་ངན་གཡོའི་འཁྲུལ་འཁོར་བརྩམས་པ་ཉི་མའི་འོད་དང་སྲིན་བུ་མེ་ཁྱེར་བཞིན་དུ་སཱུ་ཅིང་བཅུ་གསུམ་གྱི་ཡུལ་ཀུན་ཏུ་བཀྲ་ཤིས་དང་བདེ་ལེགས་སུ་གྱུར་པའི་གཏམ་རྣ་བའི་བཅུད་ལེན་དུ་སོན་པར་བརྟེན། གཙུག་ལག་བྱེ་བའི་སྒོ་འཕར་འབྱེད་པའི་མདུན་ས་ཆེན་པོར་ལེགས་སྐྱེས་ཀྱི་བདོག་པ་ཁྲ་ཤར་འབུལ་བར་བསམ་བློ་རབ་འབྱམས་པ་ཚུལ་ཁྲིམས་རྣམ་རྒྱལ་དང་བློ་བཟང་ཚེ་རིང་གཉིས་རྫོང་བདའ་ཞུས་པར། ལྷ་མིག་དག་པའི་སྤྱན་རས་ཀྱིས་ཉེ་བར་བཅའ་བའི་བསླབ་སྟོན་ཕེབས་ཚོགས་ཆུ་ཀླུང་ཆེན་པོའི་རྒྱུན་ལྟར་ཞུ། དྲག་པོ་ཞེས་པ་ལྕགས་ཕོ་སྤྲེའུ་ལོ་ཧོར་གྱི་ཟླ་བ་ལྔ་པའི་གྲལ་ཚེས་དགེ་བར་རང་བྱུང་འཕགས་པའི་གཞལ་མེད་ཁང་དམར་པོ་རི་ནས་ཕུལ་བའི་ཞུ་ཡིག །མས་དྲོ་ཆུ་བཟང་ནས་རིགས་འཛིན་དཀོན་ཅོག་ལྷུན་གྲུབ་ཀྱིས་བྲིས་ཐད་བཞེངས་པའི་གསེར་རིས་ཀྱི་མཐུན་རྐྱེན་དགོས་ཚུལ་གྱི་འཕྲིན་ལན་ཐེག་མཆོག་རྩེ་མོར་སོན་པའི་རྒྱལ་རྔ། (༢༧༡བ)
མུ ནྱ གཾ དེ ཤ ནཱ ཤྭཱ ཀ བྷཱ བེ ཀ དེ ཝོ ཙ ཀཻ ལཱ ཤ ཀུ བྫེ གྲི ཝོ ནི རྨ ཎ༔མ དྷ ཙོ ནྨ ན ཙི ཏྟ སྱ པུ ཏྲཱ གྲ གཏྱཱ གར ཏྣཱ ནཾ རཱ བྷོ གབི དྱཱ དྷ ར། ཐུབ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)པས་ལུང་བསྟན་ཨ་ཤྭ་ཀ་ཡི་སྲིད། །གངས་ཅན་ལྷ་གཅིག་མཇིང་ཡོན་སྤྲུལ་པའི་གར། །དབུར་སྨྱོན་ཐུགས་སྲས་ལུང་རྟོགས་རྩེར་སོན་པ། །རིག་སྔགས་འཆང་བ་དཀོན་ཅོག་ལྷུན་གྲུབ་ཉིད། །དབུ་རུ་མཚན་མོའི་སྨག་རུམ་ཉེར་ལེན་ཟླ། །འཕེལ་འགྲིབ་ཟད་བྲལ་བདེ་བའི་ཆ་གང་ཞིང་། །རྣམ་གསུམ་འཁོར་ལོའི་འོད་དཀར་སྤྲོ་བ་ནས། །བློ་ལྡན་ཀུན་ད་བཞད་གཏམ་སྙན་པོར་བཅས། །དཎྜིའི་གཞུང་དངོས་ལྷ་པའི་དོན་གྱི་རྒྱན། །ཉམས་འགྱུར་རྒྱུད་དུ་དྲངས་པ་འཕྲིན་ཡིག་གི །རྟེན་བཟང་འཁོར་ལོ་གཉིས་ལྡན་སུ་ཝརྞ། །རྒྱ་ཡི་ལང་ཚོ་ངོམ་ཞིང་སོན་པས་སྤྲོ། །ན་རྒན་བྱིས་ཡིད་འཁྲུལ་སྣང་བཀྲག་པོ་ཆེས། །ཆོས་སྡེ་ཆེ་ཟུང་འདུན་སར་ཉེར་འཁྲིད་པར། །གཞན་ཕན་རློམ་པའི་(༢༧༢ན)
ངང་ནས་རྒྱལ་ཁབ་ཆེའི། །རང་གནས་ཁང་བུར་གཡེང་བའི་གཟེབ་ཏུ་ཚུད། །ཐ་སྙད་མདོ་རྒྱུད་སྤྲོས་པ་དབང་གཞུ་ལ། །བདེན་ཞེན་བྱིས་པའི་སྦར་མོ་མི་གདེང་བར། །ཕུང་པོ་འཇའ་ལུས་སྐུར་གྲོལ་རྫོགས་པ་ཆེའི། །བདུད་རྩིས་མྱོས་པའི་ལྷ་དེ་ཁྱོད་མིན་སུ། །ཡེ་དག་ཆོས་སྐུ་དམིགས་མེད་སྟོང་ཆེན་དབྱིངས། །ལྷུན་གྲུབ་མ་འགགས་གདངས་ཤར་གར་དགུའི་ཉམས། །རྣམ་རོལ་འཁོར་འདས་ཕྱག་རྒྱ་མ་ལུས་པ། །ཟིལ་གནོན་གྲུབ་པའི་རྣལ་འབྱོར་ཁྱོད་མཐར་ཕྱིན། །དྲང་སྲོང་དམོད་པའི་རྩེ་བརྒྱ་རབ་གདེངས་མོད། །བདུད་རིགས་ལྷ་མིན་མོའི་མངལ་ཅིག་ཅར་དུ། །ལྷུང་བའི་རྣམ་དཔྱོད་མིག་སྟོང་ལྡན་པ་གང་། །ཆུ་བཟང་རི་བོར་གནས་ཞེས་ལྷ་རྣམས་གླེང་། །ཏིང་འཛིན་སྔགས་རྒྱ་རྫས་ཀྱི་འཕྲུལ་པོ་ཆེའི། །སྒྱུ་མའི་རྟ་གླང་མེད་བཞིན་སྲོག་ཕྲལ་ལྟར། །ཆོས་ཀུན་སེམས་ཉིད་གཅིག་པུར་ངོ་འཕྲོད་ཚེ། །སྲིད་ཞིའི་བདེ་སྡུག་འཕྲུལ་སྣང་བག་ལ་ཞ། །དེ་འདྲ་བླ་མའི་དྲིན་གྱི་གོ་ཡུལ་ཙམ། །མཁས་ཁྱེད་སྙན་གྱི་བུ་རམ་མངར་ཆེད་ལས། །རྒྱུད་ཐོག་མ་སྨིན་རང་གི་ངང་ཚུལ་ལ། ཁྲེལ་ཡང་ད་དུང་ནེ་ཙོའི་སྨྲ་བར་ཟད། །སྙིང་དབུས་རིག་རྩལ་ཉི་ཟེར་ཆུ་སྒྲོན་སྒོར། །ཐོན་པར་ཞི་ཁྲོའི་སྐུ་གཟུགས་འབྱམས་ཀླས་ཀྱང་། །རས་བྲིས་སྣང་བརྙན་གཟིགས་མོར་གཡེངས་པའི་དཀྱུས། །རིང་པོར་བསོད་ནམས་ཚོགས་མཐར་རྫོགས་མིན་མཚར། །གསེར་སྦྱངས་ཞུན་མས་བཀྲག་མདངས་སྤེལ་བའི་རྒྱུར། །ཞོ་འཁོར་དོ་དང་བསྐུལ་རྟེན་ས་ལེ་སྦྲམ། །རིག་བྱེད་བཟོ་བོའི་གླ་ཡོན་མཐུན་རྐྱེན་དུ། །མཚམས་སྤྲིན་རྒྱ་ཡིས་ལང་ཚོས་མངོན་པར་འབྱུང་། (༢༧༢བ)
། གངྒཱའི་ཡབ་གཅིག་གཙུག་ཏོར་རྩེ་མོ་ལས། །ཆུ་ཀླུང་བུ་མོ་སྙན་འཇེབས་གླུ་ལེན་པ། །ཚད་མེད་དངོས་པོའི་གཤིས་བཞིན་ཁྱོད་མགྲིན་ནས། །ལེགས་བཤད་གཏམ་གྱི་རྒྱུད་མངས་རྟག་འཁྲོལ་ཞིག །འཕྲིན་ཡིག་གཞན་གསོས་དབྱངས་ཀྱིས་བོས་པའི་མགྲོན། །ལྷ་རྫས་ཁ་ཚར་གཡོ་བའི་གོས་དཀར་ཅན། །དཔྱིད་ཀྱི་རྒྱལ་མོ་དབུ་རུའི་གསེར་ལྡན་ཆར། །གོམ་སྟབས་བསྐྱོད་ནས་རིག་འཛིན་འདུན་སར་སོང་། །ལྕགས་སྤྲེའི་ལོ་གོང་ནས་བཀའ་ཤོག་གནང་སྦྱིན་གྱ་ནོམ་པ་དང་བཅས་སྩལ་བའི་ཞུ་ལན་འབུལ་བར་ཤར་པ་ཆོས་རྗེ་དང་བསམ་གྲུབ་སྒང་པ་ངག་དབང་དཔལ་བཟང་བཏང་བའི་དུས་ཕུལ་བའི་ཞུ་ཡིག་སྐྱེ་རྒུའི་བསོད་ནམས་འཁོར་ལོ། ཚེ་རིང་གནམ་གྱི་ཤེ་མོང་གི་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། ཛམ་བུ་པྲྀཀྵའི་ལྗོན་པས་མཚན་པའི་གླིང་ཆེན་པོའི་དབུས་ན་མངོན་པར་མཐོ་ཞིང་བརྗིད་པ་མང་པོས་བཀུར་བའི་རྒྱལ་ཁབ་ཕོ་བྲང་ཆེན་པོ་པི་ཅིང་གི་གསེར་གྱི་ཁྲི་འཕང་མཐོན་པོར་ཞབས་ཟུང་གི་པདྨ་མངོན་པར་བཀོད་པ་ལྟ་བུ་ལ། ལྷའི་ལྷ་མིའི་དབང་ཕྱུག་དཔལ་ལྡན་འཇམ་དབྱངས་གོང་མ་ཆེན་པོ་ག་ལ་བའི་ཕྱོགས་དེར་སྡོམ་བརྩོན་སྡེ་སྣོད་གསུམ་པ་གང་གིས་ལུས་རབ་ཏུ་བཏུད་དེ་དྲི་ཞིམ་པོའི་བདུག་སྤོས་འཐུལ་ཞིང་མེ་ཏོག་གཏོར་ནས་གནམ་དང་ས་ཀུན་གྱི་ཁྱོན་ལ་དབང་ཕྱུག་པའི་འཁོར་ལོས་སྒྱུར་བའི་རྒྱལ་པོ་ཆེན་པོ་སྐུ་ཚེ་ཉི་ཟླ་དང་མཉམ་ཞིང་རིགས་བརྒྱུད་ཆབ་འབངས་དབྱར་གྱི་ཆུ་གཏེར་ལྟ་བུར་འཕེལ་བའི་བཀྲ་ཤིས་དགེ་མཚན་གྱིས་དུས་ཀུན་ཏུ་ཁྱབ་པར་གྱུར་ཅིག་ཅེས་ཤིས་པ་བརྗོད་པའི་ཚིག་སྔོན་དུ་བཏང་སྟེ་ཞུ་བ། གྲངས་(༢༧༣ན)
མེད་པའི་བསྐལ་པ་ནས་ལེགས་བྱས་ཀྱི་ཚོགས་རླབས་པོ་ཆེ་ཚངས་པའི་ཡུལ་ས་ལས་ཀྱང་བརྒལ་བར་ནུས་པའི་ཕུང་པོ་བླ་ནས་བླར་འཕྱུར་བའི་རྒྱུ་དང་འཛམ་གླིང་སྐྱེ་རྒུའི་བསོད་ནམས་ཀྱི་མགོན་སྐྱབས་གླིང་དང་དཔུང་གཉེན་དུ་འཕགས་ཆེན་དམ་པའི་ཐུགས་བསྐྱེད་ཀྱི་སྨོན་ལམ་བཟང་པའི་རྐྱེན་ལ་བརྟེན་ནས་ལྷུན་གྱིས་གྲུབ་པའི་སྐུ་རིན་པོ་ཆེར་བརྒྱ་ཕྲག་ཉི་མའི་གཟི་བྱིན་འཕྲོག་པར་ནུས་པ་ལྷང་ངེ་ལྷན་ནེ་ལྷམ་མེར་གསལ། ཆ་ལུགས་སྤྱོད་ལམ་སྐད་རིགས་མི་གཅིག་པའི་འགྲོ་བ་རྣམས་ཀྱི་ཁམས་དང་མཐུན་པར་རབ་སྙན་གསུང་གི་རྒྱུད་མངས་ཚངས་པའི་དབྱངས་ལྟར་འཇེབས། རྡོ་རྗེ་རིན་པོ་ཆེ་ཕྲ་མོས་ཀྱང་རིན་པོ་ཆེའི་རྒྱན་ཕལ་པ་ཐམས་ཅད་ཟིལ་གྱིས་གནོན་པ་ལྟར་རྒྱལ་པོའི་བུ་ན་ཚོད་ཆུང་ངུས་ཀྱང་བློན་པོའི་ཚོགས་རྣམས་ཟིལ་གྱིས་གནོན་ན་ན་ཚོད་དར་ལ་བབ་པའི་བློ་གྲོས་ཚངས་པ་རྒན་པོའི་ངང་ཚུལ་ལྟ་བུར་འཛིན་པའི་མཁྱེན་པ་གཙུག་ལག་རྒྱ་མཚོར་འཇུག་པའི་གསང་གསུམ་རྒྱན་གྱི་འཁོར་ལོ་གཡུང་དྲུང་གི་རང་བཞིན་དུ་བརྟན་པར་བཞུགས་པ་ནས་གསེར་གྱི་ཞལ་སྒོ་ནས་ཉེ་བར་ཐོན་པའི་ལུང་བཟང་པོའི་བཀའ་ཤོག་གནང་སྦྱིན་གྱ་ནོམ་པ་དང་ཚེ་རིང་གནམ་གྱི་ཤེ་མོང་གི་བཀའ་རྟགས་པདྨ་ར་གའི་གཟི་འོད་འབར་བ་ཉམས་མེད་དུ་མཆོད་རྟེན་བླ་མ་བསྟན་འཛིན་དགེ་སློང་དང་ཕྱག་ན་རྡོ་རྗེ་གཉིས་ལ་གནང་བ་སུག་པར་སོན་པས་གསེར་ཞལ་དངོས་སུ་མཐོང་བ་ལྟ་བུའི་དགའ་བདེ་དྲང་སྲོང་བསམ་གཏན་གསུམ་པའི་ངང་ཚུལ་ལ་འགྲན་པར་གྱུར། འདིར་གནས་དགེ་སྦྱོང་རྒན་པོའང་འཕེལ་འགྲིབ་ཟད་པའི་མཐའ་དང་བྲལ་བའི་(༢༧༣བ)
འདུ་ཕུང་སིམ་པའི་ཚོར་བ་མྱོང་ཞིང་། ཆེར་སྙིགས་གདུལ་དཀའི་འགྲོ་བ་འདུལ་བར་ཐུགས་རྗེའི་མཐུ་དཔུང་ལྷག་པར་ཆེ་བ་བསྐལ་བཟང་རྣམ་འདྲེན་བཞི་པ་ཤཱཀྱ་སེང་གེའི་ལུང་དང་རྟོགས་པའི་བསྟན་པ་རིན་པོ་ཆེ་སེམས་ཅན་ཀུན་གྱི་བསོད་ནམས་ཀྱི་ཞིང་དུ་སྤེལ་བར་སྤྲོ་བ་དང་བརྩོན་པ་ཕན་ཚུན་འགྲན་པའི་ངང་དུ་གནས། སེམས་ཅན་ཐམས་ཅད་ལ་རྒྱུ་མེད་པར་མ་འདྲིས་པའི་བྱམས་བརྩེ་དང་ལྡན་པ་ནི་ས་ཆེན་པོ་ལ་གནས་པའི་རྒྱལ་སྲས་རྣམས་ཀྱི་ངང་ཚུལ་ཡིན་པས་འཇམ་དབྱངས་རྒྱལ་པོའི་སྲིད་པ་འཛིན་པ་གང་གིས་ཡངས་པའི་རྒྱལ་ཁམས་མཐའ་དག་བདེ་སྐྱིད་ལ་བཀོད་པ་ལྟར་སྐྱེ་རྒུ་མ་ལུས་པ་རྗེས་སུ་འཛིན་པའི་རྣམ་པར་ཐར་པ་ལས་མ་འདས་པས་བདག་སོགས་རྣམས་ཀྱིས་ཆེད་དུ་གསོལ་བ་ལ་བལྟོས་པ་མིན་ཀྱང་སའི་དབང་ཕྱུག་ཆེན་པོའི་ལེགས་བྱས་ཀྱི་མཐུས་འཇིག་རྟེན་ཀུན་ཏུ་གནོད་སྦྱིན་བང་མཛོད་ཁ་ཕྱེ་བ་ལྟ་བུའི་དཔལ་འབྱོར་རྒྱས་ཤིང་ནད་མཚོན་གྱི་བསྐལ་པ་མིང་གི་ལྷག་མར་བྱས་ནས་ཚེ་ཡང་རིང་དུ་གནས་པ་སོགས་དུས་ཀྱི་བདག་པོའི་ཆེ་བ་ཕུན་སུམ་ཚོགས་པའི་ཆེད་དུ་གསེར་འབྲུག་སྡེར་ལྔས་བཏེག་པའི་ཁྲི་ལ་བསྐལ་བརྒྱར་གཡོ་བ་མེད་པར་བརྟན་པར་བཞུགས་ངོས། ཡབ་མེས་གནམ་གྱི་ལྷ་རིམ་པར་བྱོན་པའི་མཛད་བཟང་བསྟན་འགྲོའི་ཕན་བདེ་སྤེལ་བ་དང་འདིར་ཡང་གཞུང་བསྟན་པ་གཅིག་ཏུ་གྱུར་པ་ལ་བརྟེན་ནས་སྔོན་བཞིན་དུ་ཐུགས་བརྩེ་བ་ཆེན་པོས་མ་དོར་བའི་ལུང་བཟང་པོའི་བཀའ་གནང་ཆུ་ཀླུང་སྐལ་ལྡན་ཤིང་རྟའི་རྒྱུན་ལྟར་ཞུ། ཞུ་ཡིག་གི་ལང་ཚོར་ལྷ་མིག་དག་པའི་སྤྱན་རས་འབབ་པའི་རྟེན་རིན་པོ་ཆེ་དཀར་དམར་གྱི་འཕྲེང་(༢༧༤ན)
བ་འཇམ་ཕྲུག་ཁ་དོག་སྣ་ཚོགས་ཐོ་ཟུར་གསལ་ལ་རྟགས་འབྱོར་དང་བཅས་དྲག་པོ་ཞེས་པ་ལྕགས་སྤྲེལ་ཧོར་ཟླ་བརྒྱད་པའི་གྲལ་ཚེས་དགེ་བར་རང་བྱུང་འཕགས་པའི་གཙུག་ལག་ཁང་དམར་པོ་རི་ནས་ཕུལ་བ་ཤྲི་ཛ་ཡནྟུ། །ལྕགས་སྤྲེལ་བལ་པོའི་རྒྱལ་པོས་སྡེ་པ་སངས་རྒྱས་རྒྱ་མཚོ་ས་སྤྱོད་པའི་རྒྱལ་པོར་བསྐོས་པའི་ཁྲི་འབུལ་བ་མི་སྣ་ཆེད་དུ་བྱུང་པའི་ཚན་ཤོག་གི་ལམ་གཡས་འཁྱིལ་ཕྱོགས་ཀུན་ཁྱབ་པའི་དུང་དཀར། ནུབ་ཕྱོགས་ནཻ་པ་ལའི་ནོར་འཛིན་གྱི་ཁྱོན་ལེགས་བྱས་ཀྱི་འཁོར་ལོ་མངོན་པར་འཕགས་པ་ཉི་མའི་རྒྱུད་ལྷའི་ལྷ་མིའི་དབང་ཕྱུག །ཁོ་ཁོམ་རྒྱལ་པོ་ཆེན་པོའི་བཀའ་ཐམ་རྟེན་སྦ་རི་གཅིག །སྟོང་ཇ་ལྟང་ཙེ་གཅིག །མུ་ཟི་ལྟང་རྩེ་གཅིག །བུར་ལྟང་གཅིག་རྣམས་ཕོ་ཉ་བ་བྷོ་ལ་ཀ་དང་ལ་ཝོར་གཉིས་ཀྱིས་ཉམས་མེད་དུ་སོན། །བསྐལ་པ་མང་པོར་བསོད་ནམས་ཀྱི་ཚོགས་རྒྱ་ཆེན་པོ་ཡོངས་སུ་བསགས་པ་ལས་གྲུབ་པའི་མིའི་བདག་པོའི་སྐུ་གསེར་གྱི་རི་བོ་ལྟ་བུར་སྙུན་མི་མངའ་བར་འབངས་ཀྱི་དབུས་སུ་ལྷུན་ཆགས་ཤིང་ལེགས་བྱས་ཀྱི་མཐུ་ཡོངས་སུ་བརྟས་པ་ལས་བྱུང་བའི་ཡུལ་ཁམས་ཀུན་ཏུ་ནད་མཚོན་མུ་གེའི་ཆད་པ་ཞི་ཞིང་ཆབ་འབངས་ཀྱི་ཁོར་ར་ཁོར་ཡུག་མཐའ་དག་ཀླས་པར་མཁོ་དགུའི་འབྱོར་པ་ཕུན་སུམ་ཚོགས་ཤིང་ཚེ་ཡང་རིང་པོར་གནས་པའི་དགའ་སྟོན་ལ་སྤྱོད་བཞིན་པར་བཞུགས་པར་ཡིད་ཀྱི་སྤྲོ་བ་མཆོག་ཏུ་འཕེལ། འདི་ནའང་ལྷ་དང་བཅས་པའི་ཡིད་ཅན་མཐའ་དག་གི་འདྲེན་པ་གཅིག་པུ་བ་དཔལ་ལྡན་ཤཱཀྱ་སེང་གེའི་ལུང་རྟོགས་ཀྱི་བསྟན་པ་དང་སྐྱེ་རྒུའི་ཕན་བདེ་སྤེལ་བ་ལ་བློ་མིག་གི་སྤྱོད་ཡུལ་ཡངས་པར་གནས། བོད་དང་བོད་(༢༧༤བ)
ཆེན་པོ་འཁོར་དང་བཅས་པའི་འགྲོ་བ་རྣམས་ཀྱིས་མང་པོས་བཀུར་བའི་ཁྲིར་སིདྡྷུ་ནའི་ལོ་ཆུ་སྟོད་ཀྱི་ཟླ་བར་རྒྱལ་སར་གསར་དུ་བསྐོས་པ་མིའི་བདག་པོ་ཉིད་ཀྱི་སྙན་དུ་དངས་པའི་ལེགས་སྐྱེས་སྤེལ་བར་འདི་པ་གཉིས་ཆེད་དུ་མངགས་པར་རྗེས་སུ་ཡི་རངས་པར་གྱུར། སྔར་ནས་བལ་བོད་དཀར་ཚོ་གཅིག་པ་ལ་ཕན་ཚུན་ཐམས་ཅད་གཡོ་བ་མེད་པ་གཞིར་བཅས་ཤིང་སླད་ནས་ཀྱང་ཕེབས་ཚོགས་གངྒཱའི་རྒྱུན་ལྟར་ཆད་པ་མེད་པ་འཚལ། རྟེན་ཁ་བཏགས་བཟང་གོས་ཕྱི་ནང་དང་བཅས་རུ་དྲར་འབོད་པའི་ལོ་ཐ་སྐར་གྱི་ཉ་བའི་ཚེས་དགེ་བར་རྒྱལ་ཁབ་ཆེན་པོ་པོ་ཏ་ལ་ནས་ཕུལ། ལྕགས་ཕོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་མཇུག་རིང་འོད་དཀར་སོགས་སྣ་ཚོགས་བྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་ཀྱི་དྲི་རྨེད་གསལ་བར་བསམ་ཡས་རྒྱལ་ཆེན་དཔོན་བློན་གྱི་སྤྱན་སྔར་སྒྱིང་ཐང་ནོར་བུ་བཏང་བའི་འཕྲིན་ཡིག་མུན་སེལ་སྣང་གཏེར། སྣང་སྲིད་དྲེགས་པ་ཡོངས་ཀྱི་སྡེ་དཔོན་དུ། །སྨོན་ལམ་མཐུས་གྲུབ་རྨུ་བདུད་དཀར་པོ་རྗེ། །ལེགས་ལྡན་གསང་བདག་གིས་བཏུལ་ཁྱུང་ཆེན་དང་། །སྤུ་གྲི་འབར་གྲགས་ལི་བྱིན་ཧ་ར་ཀྱེ། །ཀུན་རྫོབ་རྫུན་པའི་སྣང་བ་འཕྲུལ་པོ་ཆེ། །དོན་དམ་ཀ་དག་དབྱིངས་སུ་རོ་གཅིག་ཀྱང་། །གཟུང་འཛིན་གཤེར་གྱིས་ཡོངས་བསྐྱེད་རྣམ་རྟོག་འཇར། །རྨོངས་པའི་སྐྱེ་བོ་ཕལ་ཆེར་མགོ་བོ་འཁོར། །ཡེ་སྟོང་སེམས་ཉིད་ཆོས་སྐུའི་རྒྱ་མཚོ་ལས། །བཟང་ངན་བར་མའི་རླབས་ཕྲེང་ཉེར་འཁྲུག་པ། །འཇིག་རྟེན་གྲགས་ཚོད་མི་འགོག་བླང་དོར་རྣམས། །མ་འདྲེས་བསྟར་པ་དཔྱོད་ལྡན་རྣམས་ཀྱི་ལུགས། །ཆེས་སྙིགས་འགྲོ་བའི་སྙིང་ལ་ལྷ་མིན་གདོན། (༢༧༥ན)
།བཏབ་པས་སྡིག་བལྟའི་ས་བོན་དར་དྲག་ལས། །ཕྱི་རོལ་མི་ཤེས་གཟུགས་བརྙན་ཆུ་ཟླ་ལྟར། །ཤར་ཚེ་སོམ་ཉིའི་ཡིད་ངོར་ཡུར་བས་ངལ། །ལྷ་ཁྱོད་སྲིད་གསུམ་རབ་མཐོང་དཔྲལ་བའི་མིག །ལྡན་ཕྱིར་མཚན་རྟགས་རྒྱུ་དང་འབྲས་བུ་ཀུན། །གཟིགས་པས་བསྟན་འགྲོ་སྐྱེ་རྒུ་ལ་འཚེ་བའི། །ཉེས་མུན་ཀུན་སེལ་སྣང་བ་ཅིས་མི་སྦར། །ཐུབ་རྣམས་སྤང་རྟོགས་མཉམ་ཡང་གངས་ཅན་གྱི། ལྷ་གཅིག་སྔོན་གྱི་ཐུགས་བསྐྱེད་ཀྱིས་འགྲུབ་པ། །པདྨའི་དགེ་བསྙེན་རྡོ་རྗེ་གབ་པ་གཏེར། ཁྱུང་ཆེན་ཀླུ་འབྲུག་འདུལ་ཁྱོད་གཡར་དམ་དགོངས། །དངོས་བཤམས་སྔགས་རྒྱས་མང་སྤེལ་མཆོད་པའི་སྤྲིན། །ཚོགས་ཀྱི་འཁོར་ལོ་བསྐོར་ནས་དྲི་བའི་ཚིག །ཕོ་ཉའི་ངག་ནས་གསོལ་ལན་གསོང་པོའི་གཏམ། །ལུང་བསྟན་འགགས་མེད་རྡོ་རྗེའི་དབྱངས་སྒྲོགས་ཤིག །རིགས་གསུམ་སྒྱུ་འཕྲུལ་ཆོས་རྒྱལ་མེས་དབོན་འབངས། །སྒོ་གསུམ་བདེ་བའི་ཚོར་བ་སྲིད་མཐའི་བར། །མྱོང་བར་ལས་སྒྲུབ་ཞལ་འཆེས་གཡེལ་མེད་པའི། །ལྷ་རྒྱལ་ཚངས་རིས་ཡུལ་སའི་རྩེ་མོར་འཐེན། །འཇམ་གཉེན་ཕོན་རྫར་གཡོ་བའི་སྙན་ཤལ་བཅས། །རྒྱ་ནག་སྤོར་ཐང་ཁྲ་མོ་ལྕགས་བྱའི་ལོ། །ཐོག་མར་ཤར་བ་ཡར་ངོའི་ཚེས་དགེ་བར། །པེ་ཀར་ཆོས་རྒྱལ་ཆེན་པོའི་སྤྱན་སྔར་དགེ །སྡེ་བརྒྱད་རྗེ་བོར་ལས་སྨོན་དུས་གཅིག་ཏུ། །འཛོམ་པས་ཁྲག་གི་སྒོ་ང་བརྡོལ་བ་ལས། །སྐྱེ་འགྲོའི་སྲོག་གི་བདུད་གཅོད་བཙན་རྒོད་ཆེ། །དྲག་རྩལ་སྟོབས་ལྡན་གནོད་སྦྱིན་ཙེ་དམར་བ། །སྤྲུལ་པ་བཙན་རྒོད་རོལ་(༢༧༥བ)
བ་སྐྱ་བདུན་རྣམས། །གསུང་མཆོག་རྟ་མགྲིན་དཀྱིལ་འཁོར་ཆེན་པོ་རུ། །སྲོག་སྙིང་བླངས་ནས་དབང་བསྐུར་དམ་ཚིག་ཕོག །བསྟན་པའི་མེལ་ཚེ་བྱེད་པའི་གཉེར་ཁར་བསྐོས། །མེ་རི་འབར་བའི་གཉན་རི་དམར་ནག་མདུན། །བྲག་དམར་སྲིན་པོ་ལངས་འདྲ་བཅུ་གཅིག་ངོས། །ཐོད་ཕྲེང་རྩལ་གྱིས་བཀའ་བསྐོས་དམ་བསྒྲགས་པ། །གནོད་སྦྱིན་ཀུན་ཁྱབ་རྡོ་རྗེ་དྲག་པོ་རྩལ། །ཨེ་མ་སྲིད་པའི་ཤེལ་དཀར་ངོས་ཡངས་པོར། །སྣ་ཚོགས་འཁྲུལ་རྟོག་ཚོན་བརྒྱའི་མདངས་གསལ་བ། །ཀ་དག་གདོད་མའི་དབྱིངས་སུ་མི་རྙེད་ཀྱང་། །ཚུར་མཐོང་འགྲོ་བློ་ཐེ་ཚོམ་དྲ་བར་འཇུག །ངན་སྤྱོད་རྒྱུ་ལས་འབྲས་སྨིན་སྙིགས་དུས་འདིར། །གནམ་ས་བར་གྱི་མཚན་ལྟས་བཟང་ངན་འབྲིང་། །སེམས་ཉིད་གཅིག་པུའི་རྣམ་པར་འཁྲུལ་པ་རུ། །མ་ཤེས་ཀུན་རྫོབ་ལམ་མནར་ཨ་ཐང་ཆད། །རུ་བཞིའི་རྒྱལ་ཁམས་ལ་འཚེ་ཉེས་བརྒྱའི་དྲི། །འཁྲུད་པའི་དཀར་ཕྱོགས་མཐོ་རིས་ཆུ་བོའི་ཆབ། །ལུང་བསྟན་ལམ་གསུམ་འདྲེན་པའི་མངོན་ཤེས་མཁན། །སྐལ་ལྡན་ཤིང་རྟ་ཁྱོད་ལས་དམིགས་སུ་མེད། །ཟན་གཡང་གིས་མཚོན་གངས་ཅན་གནྡྷོ་ལ། །འཛིན་སྐྱོང་ངུར་སྨྲིག་གོས་དཀར་མཆོད་གནས་སྡེ། །རྣམ་གཉིས་སྲུང་མར་པདྨ་ཀ་ར་ཞེས། །དུས་གསུམ་སངས་རྒྱས་དངོས་དེས་མ་བསྐོས་སམ། །སྡེ་བརྒྱད་རྦ་ཀློང་འཁྲུག་པའི་ཕོ་བྲང་ཆེར། །འདོད་ཡོན་ལྔ་ལྡན་ཚོགས་འཁོར་མཐུན་རྫས་རྣམས། །སྙིམ་པར་ཐོགས་པ་ཕོ་ཉས་དྲི་བའི་ཚིག །གསོལ་བར་རྡོ་རྗེའི་གསུང་གསང་ལྷུག་པར་སྟོན། །ནག་པོའི་གཡུལ་ལས་རྒྱལ་བའི་དཔའ་རྟགས་སུ། །དར་(༢༧༦ན)
དཀར་རྟེན་དང་བཅས་པའི་ལི་ཁི་ཏའི། །དོན་བཞིན་དབང་དྲག་ཞི་བ་རྒྱས་བྱེད་ལས། །ཐོགས་པ་མེད་བསྒྲུབ་དགེ་ལེགས་དེང་སྩོལ་ཞིག །ལྕགས་ཕོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་འཇུག་རིང་འོད་དཀར་སོགས་ལྟས་སྣ་ཚོགས་བྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་ཀྱི་དྲི་རྨེད་གསོལ་བར་ཚངས་པ་དུང་ཐོད་ཅན་གྱི་སྤྱན་སྔར་ཆང་ཁྱིམ་པ་ངག་དབང་མཁྱེན་བརྩེ་བཏང་བའི་འཕྲིན་ཡིག་འཕྲུལ་སེལ་མེ་ལོང་། །རིས་མེད་འགྲོ་ལ་ཐུབ་རྣམས་རྗེས་བརྩེ་ཡང་། །གངས་ཅན་སྐྱེ་རྒུ་གཅིག་ཏུ་ཐུགས་རྗེའི་དཔུང་། །རྒྱལ་གཞན་ཡོངས་ཀྱིས་འགྲན་བྲལ་པདྨ་འབྱུང་། །འཛམ་གླིང་ཆེ་བའི་རིག་སྔགས་འཆང་དེས་སྐྱོངས། །གང་གི་སྤྱན་སྔར་སྟོད་སྨད་ཆོས་འཁོར་སོགས། །མཆོད་གནས་སྡེ་གཉིས་སྐྱོང་བར་ཞལ་འཆེས་པ། །གནམ་གྱི་ལྷ་ཆེན་ཚངས་པ་དུང་ཐོད་ཅན། །མ་གཡེངས་སྙན་གྱི་དབང་པོ་ཅུང་ཟད་གཏོད། །ཆོས་སྐུ་ཀ་ནས་དག་པའི་བདེ་ཆེན་ཀློང་། །བཟང་ངན་བྲལ་ཡང་གཉིས་འཛིན་སེམས་ཀྱི་ངོར། །དགེ་དང་མི་དགེའི་ཀུན་རྟོགས་བཀྲག་པོ་ཆེས། །སྒྱུ་མའི་རྟ་གླང་ལྟ་བུར་འགྲོ་རྣམས་འཁྲུལ། །དེ་ཕྱིར་ཐག་ཁྲའི་སྦྲུལ་དང་སྨིག་རྒྱུ་ལྟར། །སྒྲོ་བཏགས་ཅ་ཅོའི་གཏམ་གྱི་རྫུན་པའི་འབྲས། །ཚུར་མཐོང་བྱིས་བློ་ཉེར་འདྲིད་ཆོ་ག་ལ། །དངས་བཀྲག་འདོད་སྲེད་བསྐྱེད་ནུས་དངོས་པོའི་གཤིས། །ཤེས་བྱར་སྲིད་ཀུན་ཁྱོད་སྤྱན་མེ་ལོང་དུ། །དྲི་མེད་གསལ་བར་འཆར་བས་མ་རྟོགས་དང་། །ལོག་རྟོག་མདུད་པ་འགྲོལ་ཕྱིར་བྱ་མ་རྟ། །སྤྱན་གཟིགས་ཚོགས་ཀྱི་འཁོར་ལ་ཐོགས་ཏེ་མངགས། །སྙན་འཇེབས་རྣ་བར་མངར་བ་བུ་རམ་རོ།(༢༧༦བ)
།ཀུན་གྱི་ཡིད་བདེར་གླིང་བ་མི་ཆོས་ལུགས། །དྲང་ཚིག་སྲིད་སྒྲུབ་མདའ་ལྟར་ལུང་སྟོན་པ། །སྣང་སྲིད་དྲེགས་པའི་སྤྱི་སྲོལ་ཡིན་ཕྱིར་གསུངས། །རྟག་ཏུ་ལས་བཞི་སྒྲུབ་པར་ཞལ་བཞེས་པ། །རྡོ་ཡི་རི་མོ་མིག་གསུམ་པས་མི་དབྱེ། །སྙན་ཤལ་དང་བཅས་དུས་ཀྱི་རྒྱལ་པོ་ཆེ། །ཚེས་བཅུའི་མཆོད་པར་སྤེལ་བ་དགེ་ལེགས་འཕེལ། །ལྕགས་པོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་མཇུག་རིང་འོད་དཀར་སོགས་ལྟས་སྣ་ཚོགས་འབྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་ཀྱི་དྲི་རྨེད་གསོལ་བར་ཚོང་འདུས་བྱ་ཁྲིད་མིག་གཅིག་པའི་སྤྱན་སྔར་སྒྱིད་ཐང་ནོར་བུ་བཏང་བའི་འཕྲིན་ཡིག་ཆུ་ནང་ཟླ་གཟུགས། །སྲིད་པ་གསུམ་ན་མཐུ་སྟོབས་ལ། །འགྲན་བྲལ་ཨོ་རྒྱན་རྡོ་རྗེ་འཆང་། །མཚོ་སྐྱེས་བཛྲའི་ཀིངྐ་ར། །ལྐོག་གྱུར་མངོན་སུམ་གཟིགས་དེ་ཀྱེ། །ཤར་ཕྱོགས་སྐུ་ཡི་རྒྱལ་པོ་ཆེ། །མཐུ་ལྡན་མོན་བུ་པུ་ཏྲ་ཡི། །བློན་པོ་བྱ་ཁྲིད་མིག་གཅིག་པར། །མཐུན་རྫས་ཚོགས་མཆོད་འབུལ་བའི་དོན། །གནམ་ལ་ཕོད་དཀར་འོད་དཀར་འཆར་། །ས་ལ་ཐན་ལྟས་སྣ་ཚོགས་པ། །ཀ་དག་དབྱིངས་སུ་མི་རྙེད་ཀྱང་། །རྨོངས་པའི་མི་རྣམས་སོམ་ཉིར་འགོད། །དེ་ཕྱིར་སཱ་ལའི་སྨན་ལྗོངས་འདིར། །འབྱུང་འགྱུར་མི་ཤེས་མཚན་མའི་འབྲས། །བཟློག་བྱེད་ལྷ་མིག་གིས་གཟིགས་ནས། །གསེར་ཡིག་པ་འདིར་ལུང་བསྟན་གསོལ། །དཀར་མིན་ལས་ཀྱིས་ལྔ་བརྒྱའི་འགྲོ །ཟུག་རྔུས་མནར་བ་མི་སེལ་ན། །བསྟན་དང་འགྲོ་བའི་དཔུང་གཉེན་དུ། །ཞལ་གྱིས་བཞེས་དེ་མིང་དུ་ཟད། །དཔག་དཀའི་མཐུ་སྟོབས་རྫུ་འཕྲུལ་ཅན། །བཤན་པ་སྲོག་གི་བདག་པོ་ཡིས། །དགྲ་བགེགས་བདུད་དཔུང་ཚར་ཆོད་ལ།(༢༧༧ན)
།དཀར་པོའི་དར་ཆེན་སྲིད་རྩེར་ཕྱོར། ཁ་ཚར་མ་ཉམས་འཆི་མེད་ཀྱི། །རེག་བྱའི་སྙན་ཤལ་དང་བཅས་ཏེ། །འཕྲིན་ཡིག་སྙིང་པོ་དོན་གསལ་བ། །དྲེགས་པའི་སྡེ་དཔོན་འདུན་སར་སྤེལ། །ལྕགས་ཕོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་མཇུག་རིང་འོད་དཀར་སོགས་ལྟས་སྣ་ཚོགས་བྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་དྲི་རྨེད་གསོལ་བར་ཐང་ཆེན་བཤན་པ་ལག་དམར་གྱི་སྤྱན་སྔར་སྒྱིད་ཐང་ནོར་བུ་བཏང་བའི་འཕྲིན་ཡིག་དོན་ཀུན་རབ་གསལ། དྲེགས་པ་རྒྱལ་ཆེན་སྐུ་ལྔའི་ཆེད། །ལྷོ་ཕྱོགས་ཡོན་ཏན་ཤིང་བྱ་ཅན། །བློན་པོ་བྱ་རྒོད་ཐང་ནག་ཅེས། །བཤན་པ་ལག་དམར་དེང་འདིར་དགོངས། །ཟ་ཧོར་ས་སྐྱོང་རིག་སྔགས་འཆང་། །ཕ་མེས་བརྒྱུད་པའི་སྲུང་མ་ཁྱོད། །དགྱེས་ཞལ་ཟླ་བ་ལྟར་དངོམ་ཞིང་། །ལྷ་སྙན་དབང་པོ་དེང་འདིར་གཏོད། །གནམ་རྟགས་འོད་དཀར་ནོར་འཛིན་གཞིར། །མི་སྡུག་མཚན་ལྟས་ངན་པའི་འབྲས། །ཀུན་རྫོབ་འཁྲུལ་ངོར་ཤར་བ་ཡི། །འཇིག་རྟེན་གྲགས་ཚོད་གང་གིས་འགོག །བསྟན་དང་དེ་འཛིན་མདོ་སྔགས་སྡེ། །ས་སྤྱོད་རྗེ་འབངས་ཚོགས་རྣམས་ལ། །ཉེར་འཚེའི་སྨག་རུམ་སངས་ནུས་པའི། །ལུང་བསྟན་ཉི་འོད་དེང་འདིར་སྤྲོས། །མཐུ་སྟོབས་རྡོ་རྗེ་རྩེ་བརྒྱ་པས། །གདོན་རིགས་ལྷ་མིན་མོ་ཡི་མངལ། །ལྷུང་དང་ལྷན་ཅིག་བདེ་སྐྱིད་མིག །སྟོང་ཕྲག་བགྲད་ནས་བལྟ་བར་བྱོས། །སྤྱན་གཟིགས་ཚོགས་ཀྱི་མཆོད་པ་རྣམས། །ཉུང་ངུ་ཏིང་འཛིན་སྔགས་རྒྱ་ཡིས། །མང་པོར་སྤེལ་ནས་འབུལ་བྱེད་ན། །ལས་བཞི་ལུས་པ་མེད་པར་སྒྲུབས། །དོན་གྱི་སྙིང་པོ་ཀུན་ཚང་བའི། །(༢༧༧བ)
འཕྲིན་ཡིག་མེ་ཏོག་མནྡ་ར། །ཐོད་བཅིངས་ཕོ་ཉ་མེ་ན་ཀ ། བཀྲ་ཤིས་ལྷ་རྫས་ཐོགས་ཏེ་སོང་། །ཨོ་རོད་བོ་ཤོག་ཐུ་རྒྱལ་པོས་མགོ་དཀར་གྱི་སྡེ་འབུམ་ཕྲག་བཅོ་ལྔ་ཙམ་འདི་གར་སྦྱོར་འཇགས་བྱུང་སྐབས་རྡོ་རྗེ་བྲག་ནས་རིག་འཛིན་སྤྲུལ་པའི་སྐུ་མཆོག་གིས་ལེགས་ཆ་མཛད་པའི་གསུང་ལན་སྔ་འགྱུར་བསྟན་པའི་ཉིན་བྱེད། །ཨཱ དྱེ བ རཱ གོ ནྭ ར ས ཏྭ པཱུ རྦ ཏོ དྠི ཏེ ན བ རྟཱ ནྟ ར གཱ ག ནཱ ནྟ ཀཿ བ གྷྣ ཥུ ནི རྨ སྱ མ ཡཱ ཀྵ ཡཱ ཛྙ ཀླུ ལཾ དྷཱ ར ས རྦཱ བྷུ ཥ མཱུ རྦྷ ར ཏྣ ཏཱ། གཟོད་(སྡེབ་སྦྱོར་མཉམ་པའི་པྲྀཏྟ་ལས་དབང་པོའི་རྒྱུད།)མ་ཉིད་ནས་འགྲོ་ལ་རྗེས་བརྩེའི་ཐུགས། །དང་པོར་བསྐྱེད་དེ་དིང་བར་ནམ་མཁའི་མཐའ། །གཞལ་བར་སྤྲུལ་པའི་སྒྱུ་འཕྲུལ་ཟད་མི་ཤེས། །རིགས་འཛིན་ཀུན་གྱི་གཙུག་རྒྱན་རིན་པོ་ཆེར། །རྟོག་གེ་ཐ་སྙད་སྦྱངས་ལ་བལྟོས་མིན་པར། །དྷཱུ་ཏཱིའི་མདུད་རྒྱ་གྲོལ་བས་འཁོར་འདས་ཆོས། །འབད་མེད་ཀློང་བརྡོལ་སྙན་འཇེབས་ཆབ་ཤོག་རྟེན། །སོན་ཚེ་འཕང་འགྲོའི་སྒྲ་ལ་སྐྱེངས་པ་བྱིན། །ཉེས་དྲིས་གཞར་ཡང་མ་གོས་སྐུ་གསུང་ཐུགས། །དཔལ་ཆེན་ཕུར་བུའི་ལྷ་(༢༧༨ན)
སྔགས་ཡེ་ཤེས་ཀྱིས། །བདུད་བཞིའི་དཔུང་ཚོགས་བཅོམ་པའི་སྒྲ་བོ་ཆེ། །ཚངས་རིས་ཡུལ་སར་ཡོངས་སྒྲོགས་གཏམ་དེ་སྙན། །བགྲང་བྱའི་ཁུར་གྱིས་ལྕི་བའི་རྒན་པོ་བདག །ཐོས་བསམ་སྒོམ་པ་ན་ཕྲ་བྱིས་པའི་ཡིད། །ཆོས་བརྒྱད་འཇའ་ལ་སྦར་འཛིན་བློ་བྲིད་ཀྱིས། །དལ་རྟེན་ཆུ་བོའི་སུམ་ཆ་སྟོང་པར་བརྒལ། །མི་བསྲུན་དྲེགས་པའི་ཀླ་ཀློ་གཉིས་འཐུང་ཀླད། །འཕྲོག་བྱེད་བསོད་ནམས་ཀྱིས་འགེམས་བོ་ཤོག་ཐུའི། །འཇིགས་མེད་སེང་གེའི་རྒྱུད་ཀྱི་ང་རོའི་དབྱངས། །བྱང་ཕྱོགས་གངས་རིའི་རྩེ་མོར་གཅིག་ཏུ་བསྒྲགས། །གཡུལ་ངོར་མཚོན་ཆ་གདེངས་པའི་མོད་ཉིད་ལ། །སྟོད་ཧོར་ས་སྤྱོད་པུས་བཙུག་གདོང་སྨད་ནས། །དཔུང་བཅས་འདུད་ཚེ་རྩོད་དུས་འཁོར་ལོས་སྒྱུར། །མི་འབྱུང་བདེན་གཏམ་ད་གདོད་རླུང་ལ་བསྐུར། །སྐྱེ་མང་སེར་སྣའི་མདུད་གྲོལ་གཏོང་ཕོད་ཀྱིས། །ཕྱེད་གཉིས་ས་ཡའི་མངའ་འབངས་སྦྱིན་པའི་སྒོ། །རབ་འབྱེད་ཕོ་ཉ་རིན་ཆེན་དུ་མ་ཡི། །ལག་རྟགས་ཐོགས་འབྱོར་མི་སྲིད་སྲིད་འཕྲུལ་བུ། །ཀུན་རྫོབ་དབུ་མར་རྟོགས་རྣམས་འཁོར་བ་ཡི། །ཕུན་ཚོགས་ཨེ་རཎྜ་ཡི་སྙིང་པོ་ལྟར། །གཟིགས་ཀྱང་ཀྲྀ་ཀྲིའི་རྨི་ལམ་གྱིས་ཟིན་པའི། །ཆོས་ཚུགས་ཅན་རྣམས་འགྲམ་ཆུ་ལྡང་ལ་འབྲེལ། །གཟུང་དང་འཛིན་པ་ཡེ་སྟོང་སྣང་བ་འདིའི། །སེམས་ཉིད་གཅིག་པུའི་རྣམ་འཕྲུལ་ཀ་དག་མཐའ། །ཀུན་རྫོབ་ལེགས་སྐྱེས་ཚན་གྲངས་(༢༧༨བ)
དབང་པོའི་གཞུ། །མ་འགགས་རང་གདངས་ཤར་བ་དེ་རྨད་བྱུང་། །རྒྱལ་དབང་པདྨའི་ཐུགས་སྲས་སྣ་ནམ་པ། །གོས་དཀར་ལྕང་ལོའི་ཕྲེང་འཛིན་རིག་སྔགས་འཆང་། །ཡང་སྲིད་མང་བརྒྱད་མཐར་དིང་ངུར་སྨིག་གོས། །མནབས་པའི་འཁོར་ལོའི་མགོན་ཁྱོད་བྱོན་ཏམ་ཅི། །སྔ་འགྱུར་བཀའ་གཏེར་བསྟན་པ་ཆུ་བོ་བཞི། །ཕྱོགས་བརྒྱར་ལེགས་འབབ་འབྱུང་ཁུངས་རིགས་འཛིན་རྗེ། །མ་དྲོས་མཚོ་ཆེན་མཆོག་གི་སྤྲུལ་སྐུའི་གར། །འོག་མིན་ཞིང་གི་གཙོ་ལྟར་རྟག་བཞུགས་གསོལ། །རྡོ་རྗེ་རཏྣའི་མཚན་འཛིན་གླིང་པ་སོགས། །ངོ་མཚར་ཟབ་གཏེར་དབང་ལུང་འཁྲིད་བཀའི་རྒྱུན། །བརྒྱར་གཤགས་རྟ་རྔ་ལྟར་ཕྲ་སྲོག་འཐུད་པར། །ཞལ་འཆེས་གསུང་མཆིད་ཉི་ཟླའི་འགྲོས་བཞིན་ཞུ། །ལྷ་རྫས་ཆུ་ཤེལ་དབང་པོ་ཉ་གང་བར། །རྟགས་ཀྱི་རི་དྭགས་མཚན་མ་རབ་བཀྲ་བ། །ཕོ་ཉ་དྲི་བཞོན་གོམ་སྟབས་གོ་ལའི་ངོས། །བསྒྱུར་ཏེ་པདྨའི་གདུང་ཚབ་ཕྱག་ཏུ་ཕུལ། །ལྕགས་སྤྲེ་ཧོར་ཟླ་དགུ་པའི་ཚེས་བཅུ་གཉིས་ཀྱི་ཉིན་དཔལ་ལྡན་ཚངས་པ་དུང་ཐོད་ཅན་ལ་སྤྱི་སྒོས་ཀྱི་བླང་དོར་ལུང་བསྟན་ཞུ་བར་ཆང་ཁྱིམ་ངག་དབང་མཁྱེན་བརྩེ་བཏང་དུས་གསོལ་བའི་འཕྲིན་ཡིག་མ་འདྲེས་གསལ་སྟོན་ངོ་མཚར་བཀོད་པ། ཨ་ཧོ་དུས་གསུམ་སངས་རྒྱས་མ་ལུས་པའི། །མཁྱེན་བརྩེ་ནུས་པ་གཅིག་བསྡུས་མཚོ་སྐྱེས་རྗེས། །གཙུག་ན་རྡོ་རྗེའི་རི་མོ་ཉེར་བཀོད་པ། །དཔལ་ལྡན་ཚངས་པ་ཆེན་པོ་དེང་དགོངས་ཀྱེ། །ཆོས་(༢༧༩ན)
ཀུན་ཡེ་ནས་སྟོང་ཆེན་དག་པའི་དབྱིངས། །ཀུན་རྫོབ་འཁྲུལ་པའི་སྣང་བ་དམིགས་མེད་ཀྱང་། །ཆུ་ནང་ཟླ་གཟུགས་ཚུར་མཐོང་བྱིས་བློ་ཅན། །ཐག་ཁྲར་སྦྲུལ་གྱི་དངངས་སྐྲག་མྱོང་བ་བཞིན། །རྨི་ལམ་ཡུལ་ཤར་སྣ་ཚོགས་བདེ་སྡུག་དང་། །སྒྱུ་མའི་སེང་གེའི་མཆེ་བ་གཙིགས་པ་ལྟར། །ཀུན་རྟོག་རི་མོར་བྲིས་པ་ཅ་ཅོའི་སྒྲ། །དལ་མེད་རྣ་བའི་བུ་གར་ཚེར་མའི་གྲོགས། །བདག་གཞན་མ་ཉམས་རང་ལ་གཅེས་འཛིན་བློ། །བརྒྱ་ཕྲག་འཆིང་བ་དམ་པོས་བཅིངས་པའི་མཐུས། །ངན་འབྲས་ཐོག་ཏུ་འབབ་བམ་མི་འབབ་ཅེས། །འཁྱོག་པོའི་ཡིད་ཀྱི་གཉའ་ཤིང་ཕྲག་པར་ལྕི། །དེ་ཕྱིར་ལྐོག་གྱུར་རྟོགས་པའི་མངོན་ཤེས་དང་། །བྲལ་བས་སྒྲིབ་མེད་གསལ་བའི་སྤྱན་ཡངས་པ། །དུང་ཐོད་ལྷ་ཡི་སྡེ་དཔོན་ཁྱོད་ཉིད་ལ། །གསང་ཚིག་འདྲི་བའི་ཕོ་ཉ་འདི་བཞིན་མངགས། །སྤྱན་གཟིགས་ཚོགས་ཀྱི་འཁོར་ལོ་འདིས་མཚོན་ཏེ། །ཡིད་སྤྲུལ་ནམ་མཁའ་མཛོད་ཀྱི་མཆོད་པའི་སྤྲིན། །དྲེགས་པའི་དབང་ཕྱུག་ཆེན་པོའི་འདུན་ས་རུ། །སྤེལ་ན་དགྱེས་པའི་ལྷ་རྒྱལ་ལན་གསུམ་ཐེན། །ཆུ་ཤེལ་དབང་པོ་རྒྱུ་སྐར་མགོས་ཉ་བའི། །ཡར་ངོའི་ལྷ་ཆོས་དགེ་བའི་དུས་ཀྱི་ཚེ། །གནམ་བསྐོས་རྒྱལ་པོའི་ཕོ་བྲང་ཆེན་པོ་ནས། །སྤེལ་བ་ཕྱོགས་དུས་ཀུན་ཏུ་ཤིས་གྱུར་ཅིག །
རབ་བྱུང་བཅུ་གཅིག་པའི་ལྕགས་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་བྱ་ལོར་བྲིས་པའི་ཆབ་ཤོག་འཕྲིན་ཡིག་ཁག །ལྕགས་བྱ་ལོ་སྔ་འགྱུར་བསྟན་པའི་ཉིན་བྱེད་དབང་ཆེན་རྣམ་སྤྲུལ་ཐུགས་སྲས་སྤྲུལ་སྐུའི་འཕྲིན་ལན་ཆོས་ཀུན་ཟད་པའི་(༢༧༩བ)
རང་གདངས། ཨཱ དི ཏ ཧྭཾ དྭི གཱ ཎཱ བི ན དྷེ ཏཱ བྷི ཙོ རྦཱ ད ཏཱ ནཾ ཧི ཤཱ ཤྭ ཏྱ མཱ ཡེ ནྲྀ ཧཿཔཱུ རྦ ཙཱ ལླཱ ས ཁོ ཏྠི ད མཱ དྱཱ ཧ ཏོ བཱ ཙ ལ བཱ བྷ ཙ རྟྱ མ ནཱ བྫཱ ཧ ས། གཟོད་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)མ་ཉིད་ནས་ཚོགས་གཉིས་ཆུ་གཏེར་ལས། །མངོན་པར་བསྐྲུན་པའི་མི་ཤུགས་སྒྱུ་འཕྲུལ་གར། །སྔ་འགྱུར་བསྟན་པའི་མཁར་འཕགས་སྔོན་མེད་ཉིའི། །གསུང་འཕྲིན་རྟེན་འོད་ཡིད་ཀྱི་ཆུ་སྐྱེས་བཞད། །བདུད་སྡེས་གླགས་ལྟའི་ན་བུན་མི་འཐུལ་བ། །གཟུགས་སྐུ་གངྒཱའི་ཡབ་ཅིག་རྣམ་དཀར་ལས། །ཚད་མེད་མཁའ་ལ་བསྙེག་པར་དུས་གསུམ་གྱི། །རྒྱལ་ཀུན་ཐུགས་རྗེའི་ཟླ་བས་བྱུགས་པ་བཞིན། །མཚོ་སྐྱེས་བྲག་གི་ཉེ་འདབས་འབྲོག་དགོན་པར། །གཅིག་པུར་རིགས་འཛིན་བླ་མ་རང་སེམས་སུ། །ངོ་འཕྲོད་ཀ་དག་འདུས་མ་བྱས་པའི་ཀློང་། །ཆོས་སྐུའི་ཡོ་ལང་རྒྱུན་ཆད་མེད་དེ་མཚར། །ལྟར་སྣང་འདུ་འཁྲུག་ཟུག་རྔུས་མ་གཙེས་པར། །སྒོ་གསུམ་བདེ་བ་ཆེན་པོ་རོ་བདེའི་བཅུད། །མྱོང་(༢༨༠ན)
བ་གང་གིས་མཛད་པར་མཆོག་གསུམ་རྣམས། །དགྱེས་པའི་སྤྱན་གྱིས་རྟག་ཏུ་བཙའ་ལས་ཅི། །རིས་མེད་གྲུབ་མཐའི་ཁ་འཛིན་ཆེ་ཕྲ་དིང་། །ཚེ་འདིའི་བྱ་བཞག་འཁོལ་པོར་འཕྱན་མཐོང་ཚེ། །ཆོས་བརྒྱད་འཆིང་བ་གྲོལ་ཁྱོད་རྣམ་པར་ཐར། །ལྕེ་བཙུན་སེང་གེ་དབང་ཕྱུག་གཉིས་པ་བཞིན། །སྔ་འགྱུར་རིང་ལུགས་འཛིན་ལ་སྙིང་སྟོབས་ཁུར། །ཕྲག་པར་བླངས་རློམ་ཕལ་ཆེར་སྒྱུ་མའི་རྟ། །བླུན་པོའི་མིག་སྔར་བརྒྱུག་པའི་མཛེས་ཆོས་ཀྱི། །ཆུ་དོང་ཕུབ་མས་གཡོགས་ལ་འགྲོ་མང་འཁྲིད། །ཚུལ་འཆོས་མཆོག་འཛིན་ལ་ལ་སྒམ་པོར་བསྙེམས། །ཆགས་ལམ་གཙོར་འདོན་འགའ་ཞིག་ཁྱིམ་སྤྱོད་དངོས། །མཐའ་གཉིས་ལྷུངས་ལས་པད་འབྱུང་དགོངས་བཞེད་ཀྱི། །དབུ་མར་གནས་པ་ཉིན་མོའི་སྐར་མ་ཙམ། །དེ་ཕྱིར་མཆོག་སྤྲུལ་མངའ་རིས་པཎ་ཆེན་ཐུགས། །གཏིང་ནས་ཁྲེལ་བའི་གསོང་པོའི་འུར་རྡོ་ཡིས། །སྐྱེ་བར་བརློམ་དང་སྔགས་བརྒྱུད་ཁེངས་ལྡན་གྱི། །དབུ་ཞབས་ལ་བསྣུན་བཞིན་རས་རྫ་ལྟར་གནག །དེ་ཙམ་དངོས་པོའི་གནས་ཚོད་ཐོལ་སྐྱེས་སུ། །ཤར་མོད་དོན་དམ་འཁོར་འདས་མ་ལུས་པ། །རང་རིག་ཀུན་ཏུ་བཟང་པོའི་ངོ་བོ་རུ། །རྟོགས་པའི་དག་སྣང་སྦྱོང་ལས་གཞན་དུ་ཅི། །འདི་ན་ལྕགས་ཁམས་འདབ་ཆགས་གནམ་ལོའི་ནང་། །སྒྱུ་ལུས་ཁང་རུལ་མ་གས་ཆེས་སྲ་ཡང་། །ལྷ་སྔགས་ཡེ་ཤེས་རྣལ་འབྱོར་རྟག་འགྲུབ་པར། །ངེས་པས་གང་ཐུགས་བདེ་བའི་ངལ་གསོར་མཛོད། །དབང་ཆེན་སྤྲུལ་པའི་གར་(༢༨༠བ)
སོགས་ཁྱོད་ཉིད་ཀྱི། །རང་བཞིན་བརྗོད་པའི་ཡོན་ཏན་ཁོ་ན་ལས། །ཕུལ་བྱུང་རབ་བཏགས་སོགས་ཀྱི་དོགས་མེད་ཕྱིར། །བཅོས་བསྒྱུར་མེད་པའི་ཞལ་འདོན་མཛད་པར་རིགས། །ཆོས་དབང་སངས་གླིང་ལ་སོགས་གཏེར་ཆོས་སུ། །གསུང་འདི་རྙེད་པའི་ཡིད་ཆེས་མ་མཐོང་ཡང་། །པད་གླིང་གསུམ་པས་མཛད་ལས་ཟུར་ཁྱད་ཅན། །མ་ཐོན་ཕྱིར་ན་འདི་དོན་ཁོ་ནར་ངེས། །དོན་གཉིས་བགྲང་བྱའི་འཕྲེང་གི་རྒྱ་མཚོ་ལས། །སྒྲོལ་བྱེད་ཚེ་མཐའ་ཡས་པའི་ཐབས་ཀྱི་གཟིངས། །དམ་པའི་དེད་དཔོན་ཁྱོད་ཀྱིས་འདྲེན་པའི་དུས། །ཆུ་ཁྱིའི་སྟོན་འཇུག་ཉེ་ལེན་འཚམ་པར་གོ །མེ་ལོང་རྡོ་རྗེ་མཁའ་ལྡིང་རྗེས་བཤུལ་དུ། །སྙོམས་ལས་བདག་འདྲའི་བུང་བས་མི་བགྲོད་ཀྱང་། །རྩ་གསུམ་ཐུགས་རྗེའི་དྲི་བཞོན་ལ་བརྟེན་ནས། །འཆི་མེད་གྲོང་དུ་འཇུག་པར་གཅིག་ཏུ་སྨོན། །སླད་མར་སྐུ་ཡི་འཚོ་སྐྱོང་ཕ་ལམ་གྱི། ཁམས་ལས་ལེགས་གྲུབ་རྡོ་རྗེའི་རྣལ་འབྱོར་མཆོག །མདའ་ལྔས་གཡོ་བར་མ་ནུས་བདུད་བཞི་ལས། །རྣམ་པར་རྒྱལ་བའི་བརྩོན་པ་སྒྲུབས་ཤིག་གུ། །གོ་ལའི་ཁྱིམ་དུ་ཆད་མེད་ཉི་ཟླའི་འགྲོས། །ཇི་བཞིན་གཅམ་བུ་བྲལ་བའི་མོལ་མཆིད་ཆུ། །རིག་པ་འཛིན་ཁྱོད་ཞལ་སྒོ་ཚངས་པ་ཡི། །རལ་པའི་ཀླུང་ནས་ནམ་ཡང་ཚད་མེད་འཚལ། །ཡ་རབས་སྐྱེས་སུ་འོས་པ་བཏུང་བའི་རྩེ། །བདུད་རྩི་ལོ་མའི་བམ་པོར་མཚམས་སྤྲིན་རྒྱས། །བཏབ་སྟེ་སྔོན་བྱོན་དམ་པའི་རྗེས་ཞུགས་པ། །གཏན་མདུན་ལེགས་བསྒྲུབ་དབེན་པའི་གནས་དེར་སོང་། །(༢༨༡ན)
ལྕགས་བྱ་ཧོར་ཟླ་བཅུ་གཉིས་པའི་ནང་དུ་བྱ་རིགས་གདུང་གིས་མངོན་པར་མཐོ་བ་ས་སྐྱོང་རྡོ་རྗེ་རྣམ་རྒྱལ་གྱིས་སྙན་ཚིག་ལམ་ནས་དྲངས་པའི་གསུང་འཕྲིན་བྱུང་བའི་ལན་གཞན་གསོལ་སྐད་སྙན། ཨུ ཙྪཻ སྟེ བོ མྱ སྠི མ ཎཻ བི མཱ ལ ཏོ ལ ཀྵྨཱི གུཎཱ ཀཱ མ མ ཧ ནྟ རྵ ཀཿ མེ དྷ སྱ བྷཱུ མཱི གཏ ཏཱ ལི ཙ བྱ ལཱ དཻ བ བཱ ལཱ ཤྭ ཡ ལེ ཁ ཡུ ཀྟ ཀཿ མཐོ་(སྡེབ་སྦྱོར་མཉམ་པའི་བྲིཏྟ་ལས་དབང་པོའི་རྒྱུད།)བཙུན་གདུང་གི་ནོར་བུ་དྲི་མེད་ལས། །ཕུན་ཚོགས་ཡོན་ཏན་འདོད་དགུའི་ཆར་ཆེན་པོ། །བློ་གྲོས་འཛིན་མར་ཤོང་བ་ཡ་རབས་ཀྱི། །ཚུལ་ལྡན་ལྷ་སྲས་གཞོན་ནུའི་འཕྲིན་རྟེན་སོན། །ཡན་ལག་བཅུ་གཉིས་སྲིད་པའི་རྒྱ་མཚོ་ཆེར། །སྐུ་འཚོའི་རྫིངས་འཇིག་རྒྱུད་མངས་དང་པོ་རུ། །རབ་གདུངས་བྲག་ཅ་མཐར་བྱས་ཆོས་ནོར་འདོད། །ཐར་པའི་རིན་ཆེན་གླིང་བགྲོད་རྣ་བའི་གསོས། །སྡོམ་བརྩོན་སྡེ་སྣོད་གསུམ་པར་(༢༨༡བ)
ཁས་འཆེའི་ཟླ། །ཐོས་བསམ་སྒོམ་ཆ་མ་རྫོགས་ཆོས་བརྒྱད་ཀྱི། །རི་བོང་གཟུགས་ལ་མཚར་འཛིན་ལྔ་པའི་མགྲོན། །མ་གཉེར་སྒྱུ་མར་ཞེན་རློམ་འདི་ན་བདེ། །ཐོས་བརྩོན་དྲོད་ཀྱིས་རྣམ་དཔྱོད་ས་ཟླའི་སྒོང་། །སྨིན་པས་ལྔ་རིག་ཐིག་ལེ་མཆོག་མ་ལ། །ཆགས་པས་གདོང་བཞི་སྒྲུབ་པ་ཚངས་པའི་བུ། །གཉིས་པ་ལྷོ་རྒྱུད་ཀུན་གཟོད་ལྟོ་ན་མཛེས། །གནའ་བོའི་ས་སྤྱོད་གཟུགས་བརྙན་གངས་ཅན་གྱི། །ལྷ་མིན་ཀུན་སྣང་མཚོར་གསལ་ལེགས་ཉེས་ཀྱི། །རྣམ་འགྱུར་འཕྲུལ་ལ་བློ་ལྡན་ཕུར་བུ་ཡང་། །དང་བས་བལྟ་ཕྱིར་ཁྱོད་དྲུང་ཡང་ཡང་འཁོར། །སྲིད་གསུམ་སྣོད་བཅུད་ཡིད་ཀྱི་སྲང་བཅུག་ནས། །འདེགས་པའི་ང་རྒྱལ་འགྲོ་སྐྱབས་གསེར་ཅན་ལྟོ། །མཁས་བླུན་དབྱེ་བའི་སྡེར་མོས་འདྲལ་ནུས་པ། །ས་འདིའི་སྣ་ཚོགས་གཟུགས་ཅན་ཁྱོད་མིན་སུ། ཁྱུང་ནག་རིགས་ཀྱི་ཐིག་ལེ་དགའ་བྱེད་ལྷ། །ཤེས་རབ་རྒྱུད་ལས་འཕོས་པའི་ཉག་ཕྲན་གྱིས། །རྨོངས་ཆེན་ལངྐའི་མགྲིན་པ་གཅོད་པ་དང་། །མཁས་གྲགས་སཱི་ཏར་བརྩེ་བའི་ཆོ་གས་བྲེལ། །ལེགས་ལྡན་རིགས་འཛིན་ཏམྦུའི་བུ་དང་གཉེན། །སྦྲེལ་བ་ཁྱབ་འཇུག་སྒྱུ་ཐབས་རྣམ་བཀྲ་ཡང་། །འདབ་ཆགས་ཕལ་པའི་བཞོན་པ་ཙམ་གྱི་ཆེད། །ངོ་སྲུང་ཐག་གུའི་སྐ་རགས་དེས་ཀྱང་དམན། །བྱུ་རུའི་ཞགས་རིང་བརྐྱང་ནས་བླང་དོར་རྣམས། །ཞག་དང་ཉི་མར་མ་འཕུལ་བརྩོན་པའི་རླུང་། །ཤུགས་དྲག་བསྐྱོད་པས་ལུགས་གཉིས་གོ་ལའི་ཁྱིམ། །རང་འགྲོས་ཉི་ཟླའི་མཆེད་ལ་འགྲན་པར་རིགས། །ལུགས་ཟུང་གདུགས་དཀར་ཡུ་བ་(༢༨༢ན)
ཡབ་མེས་ཀྱིས། །གཏད་ནས་རྡུལ་དང་མུན་པས་བསྒྲིགས་པའི་ཁྲིར། །མི་ཡི་བདག་པོར་བསྐུར་ཚེ་གོང་མའི་སྲོལ། །ལེགས་འཛིན་ཁུར་ཆེན་བློ་གྲོས་ཕྲག་པར་ལོང་། །བྱར་གཉལ་དབང་ཕྱོགས་རི་བོའི་རྩེ་མོ་ནས། །ཚེས་གསུམ་ཟླ་མེད་ཟླ་ཁྱོད་ཤར་བའི་མོད། །ལྷོ་རྒྱུད་སྐྱེ་རྒུའི་བདེ་སྐྱིད་ས་མོས་ཚལ། །བཞད་པས་སྙན་གྲགས་གེ་སར་དྲི་བསུང་འཐུལ། །འཇིག་རྟེན་ཁྱིམ་གྱི་བདག་པོ་སྡིག་སྤྱོད་དུ། །སྨྲ་ཡང་ལྷག་བསམ་ཆུ་འཛིན་སྟུག་པོ་ནས། །དགེ་བའི་འབྲུག་སྒྲ་བསྒྲགས་ཚེ་གཏན་མདུན་གྱི། །རྨ་བྱའི་མངལ་ཁུར་སྦྲུམ་ལས་གཞན་དུ་ཅི། །སེམས་གནས་འཐུག་པོར་འབྱམས་པའི་སྒོམ་ཆེན་པ། །དགག་སྒྲུབ་ཚིག་སྐམ་ལ་ཞེན་སྟོན་ཆེན་དང་། །ཐ་སྙད་རྫུན་གྱི་འཁྲུལ་འཁོར་བསྐོར་དེས་ཀྱང་། །ངེས་ལེགས་གྲོང་དུ་བགྲོད་ལ་ཅུང་མ་ཉེ། །གཟུང་འཛིན་མཚན་མོའི་སྨག་རུམ་ཕ་རོལ་ན། །ས་ལམ་སྐྱ་རེངས་མས་དྲངས་དགེ་སེམས་ཉིས། །སྒྲིབ་བྲལ་སྣང་བའི་འོད་བརྒྱ་སྤྲོས་མིན་པར། །ངལ་བརྒྱའི་དཀའ་ཐུབ་འཁྲུལ་པའི་འཁོར་ལོར་ཟད། །རིགས་ཀྱི་ཡི་དམ་བསྙེན་དང་སྲུང་མ་མཆོད། །ཚེ་དང་ཤེས་རབ་སྤེལ་བའི་འདོད་ལྷ་བསྒྲུབ། །མཐོ་ལ་ཕུ་དུད་དམའ་བའི་སྐྱོང་བྲན་སོགས། །མཛངས་པའི་ངང་ཚུལ་གཡར་དམ་གཅེས་པར་འཚལ། །གཅམ་བུའི་ན་བུན་འཁོར་མིན་གསོང་པོའི་འཕྲིན། །ཉམས་འགྱུར་ཁ་བའི་རྡུལ་བརྩེགས་ལས་བབས་པའི། །སྙན་ཚིག་ལྷུང་ལྷུང་སྒྲར་བཅས་འབབ་པའི་ཀླུང་། །མི་བསྐྱུད་ལམ་གསུམ་ངག་ཏུ་རྒྱུ་བར་རིགས། །(༢༨༢བ)
བཟའ་དང་ཆང་དུ་གཞལ་མིན་ཡིད་ཅན་ལ། །གཅིག་ཏུ་རབ་དཀར་ལྷག་བསམ་དག་པའི་མདོག །འདི་ཞེས་མངོན་སུམ་མཚོན་བྱེད་ཐགས་རིངས་སུ། །ཉེར་བསྐྲུན་ཁ་ཚར་མ་ཉམས་པས་ཀྱང་ངོ་། །
རབ་བྱུང་བཅུ་གཅིག་པའི་ཆུ་ཁྱི་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་ཁྱི་ལོར་བྲིས་པའི་ཆབ་ཤོག་འཕྲིན་ཡིག་ཁག །ཆུ་ཁྱི་ལོ་གོང་ནས་དཔོན་པོ་དགེ་སློང་དང་ཨ་ཆི་ཐུ་དགེ་སློང་གཉིས་གསེར་ཡིག་པར་མངགས་ཏེ་རྟེན་དཔངས་མཐོ་བ་བཅས་བཀའ་ཤོག་བྱུང་བའི་ལན་འབུལ་བར་ཧོར་ཟླ་དྲུག་པའི་ཚེས་བཅུ་བདུན་ལ་ཐང་ཆེན་མཁན་པོ་དུང་དཀར་སྐུ་སྐྱེ་ཚངས་དབྱངས་འབྲུག་སྒྲ་དང་ངག་དབང་རིན་ཆེན་བཏང་བའི་དུས་ཕུལ་བའི་ཞུ་ཡིག་དགེ་ལེགས་ཉིན་བྱེད་དངོམ་བརྒྱ། གནམ་སའི་དབང་ཕྱུག་འཇམ་པའི་དབྱངས་གོང་མ་རྒྱལ་པོའི་དྲུང་དུ། ཡིད་དང་བའི་སྒོ་ནས་མེ་ཏོག་གཏོར་ཏེ་གསོལ་བ། ཚེ་རིང་གནམ་གྱི་ཤེ་མོང་གི་ལུང་བཙན་པོས་གནམ་དང་སའི་དཀྱིལ་འཁོར་བར་མཚམས་མེད་པར་དབང་ཕྱུག་པའི་རྒྱལ་སྲིད་བདུན་ལྡན་གྱིས་ཆེ་བས་མཐོ་བ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་ལྷ་མིའི་བདག་པོ་དེང་སང་གི་དུས་ནའང་སེང་གེས་བཏེག་པའི་གསེར་གྱི་ཁྲི་ཆེན་པོར་མི་འཇིགས་པ་སྟོབས་ཀྱི་དཔུང་པ་ལས་འཁྲུངས་པའི་ངོ་མཚར་མཚན་བཟང་དང་ལྡན་པའི་ཐུགས་གསུང་སྐུའི་བཀོད་པ་སྲིད་པ་གསུམ་ན་མཚུངས་པ་མེད་པ་མངོན་པར་མཐོ་བ་གསེར་གྱི་ལྷུན་པོ་ལྟར་ཤིན་ཏུ་བརྗིད་ཅིང་ཞབས་ཟུང་མི་ཤིགས་རྡོ་རྗེའི་རང་བཞིན་བརྟན་པོའི་རྩ་བ་འཛམ་གླིང་སྐྱེ་འགྲོ་མཐའ་དག་གི་སྤྱི་བོར་བཀོད་དེ་ཁྲིམས་གཉིས་ཉིན་མོའི་དབང་ཕྱུག་གི་སྣང་བས་ཡིད་ཅན་ཡོངས་ཀྱི་སྲོག་གི་ཀ་བ་བརྟན་པོ་ཉེ་བར་འཛིན་པ་ནས་བཀའི་གསེར་འཁོར་ནམ་མཁར་འཕགས་པ་ཙམ་ན་འདོད་དགུ་ཕུན་སུམ་ཚོགས་པར་སྦྱོར་བའི་བཀའ་ཤོག་གནང་རྟེན་(༢༨༣ན)
སྐྱེད་དཀྲིས་གསེར་བྱུགས་པའི་དངུལ་མདོང་། གསེར་བྱུགས་པའི་བྱ་མ་བུམ། དངུལ་ཕོར་གཉིས། ཁ་བཏགས་ཆེ་བ་ལྔ། ཆུང་བ་བཞི་བཅུ། གོས་ཡུག་ཉི་ཤུ་དང་བཅས་མི་སྣ་དབོན་པོ་དགེ་སློང་དང་ཨ་ཆི་ཐུ་དགེ་སློང་གཉིས་ལ་སྩལ་བ་བདེ་སྐྱིད་ཀྱི་ལོ་ཉེར་གཅིག་པའི་ས་གས་ཉ་པའི་གྲལ་ཚེས་ལ་ཕེབས་པ་དང་ལྷན་ཅིག་ཏུ་ཡིད་ཀྱི་རྒུད་པ་མ་ལུས་པ་ཞི་སྟེ་སྤྲོ་བ་འཕེལ། འདི་ནའང་གང་གི་ཐུགས་རྗེར་བརྟེན་འོ་སྐོལ་གྱི་སྟོན་པ་ཤཱཀྱ་སེང་གེའི་རིང་ལུགས་པ་དགེ་སློང་སྡེ་སྣོད་གསུམ་པའང་སྒོ་གསུམ་གཡར་ཁམས་བདེ་ཞིང་སངས་རྒྱས་ཀྱི་བསྟན་པ་རིན་པོ་ཆེ་དྲི་མ་མེད་པ་ལ་རི་མོར་བགྱིས་ཏེ་བླ་ནས་བླར་འདེགས་པའི་ཐབས་རྩོལ་ལ་ལྷག་བསམ་གྱི་སྒོ་འཕར་ཕྱེ་སྟེ་ཉི་མ་ནུབ་ཕྱོགས་ཀྱི་འགྲོ་བ་རྣམས་ཀྱང་ཕན་བདེའི་ལམ་བཟང་ལ་བཀྲི་བའི་བློ་གྲོས་ཀྱི་འཇུག་པ་མི་དམན་ཞིང་དོག་ཆར་བརྟེན་རང་གཞན་གྱི་དོན་ཆེན་བསྒྲུབ་པའི་ཆེད་དུ་ལྷ་སྔགས་ཡེ་ཤེས་ཀྱི་ཉམས་ལེན་གཙོར་བཏོན་གྱི་བཅད་རྒྱའི་སྐབས་སུ་གནས། གང་ཅིར་གསུང་གི་གསང་བ་བསམ་གྱིས་མི་ཁྱབ་པའི་བསླབ་སྟོན་སྙིང་གི་ཟེའུ་འབྲུར་བླུག་སྟེ་སླར་ཡང་སྐུའི་འཚམ་འདྲི་གསེར་ཞལ་འཆི་མེད་ཀྱི་བདུད་རྩི་འཐུང་བར་ཐང་ཆེན་མཁན་པོ་དུང་དཀར་སྐུ་སྐྱེ་དང་ངག་དབང་རིན་ཆེན་སྦྲེལ་པོ་རྫོང་བདའ་ཞུས་པ་སྔར་ལས་བཟང་པོ་བཞིན་རྣམ་པ་ཐམས་ཅད་དུ་རྒྱལ་ཐབས་ཀྱི་མཛད་འཕྲིན་ཚད་མ་མཆིས་པ་རྫོགས་ལྡན་གྱི་དུས་ལྟར་བསོད་ནམས་སྟོབས་ཀྱི་མཚན་ཐོས་པ་ཙམ་གྱིས་ཀྱང་རྒོལ་ངན་མཐའ་དག་ཟིལ་གྱིས་གནོན་པ་དང་སྐུ་(༢༨༣བ)
ཚེའང་བདེ་ལྡན་ཞིང་གི་མགོན་པོ་བཞིན་བརྟན་པར་བཞུགས་པ་ལ་མཆོག་གསུམ་དཔང་པོར་བྱས་ནས་གསོལ་བ་འདེབས་པ་ཡིན། སླད་ནས་ཀྱང་ཐུགས་བརྩེ་བས་དགོངས་ཏེ་བཀའ་མཆིད་ཀྱི་འཁོར་ལོ་ཆད་མེད་ཉི་ཟླའི་འགྲོས་ལྟར་ཞུ། ཞེས་ཞུ་བའི་ཡི་གེ་སྤྱན་རས་ཀྱི་བུང་བ་འབབ་སྟེགས་སུ་རིན་པོ་ཆེ་སྔོ་དམར་སེར་གསུམ་གྱི་ཤལ་བ་རེ། འཇམ་ཕྲུག་སྔོ་ཐིག་བུགས་ཉི་ཤུ་རྩ་ལྔ། དཀར་པོ་བཅུ་དྲུག །རྒྱ་ཐིག་བཅུ། དཀར་ཐིག་བཅུ་གསུམ། སེར་ཐིག་བདུན། ལྗང་ཐིག་བཅུ་གཅིག །སྔོ་རྐྱང་བཅོ་བརྒྱད། དམར་པོ་དགུ །རྒྱ་ཚོས་བཅུ་དྲུག །ལྗང་གུ་བཅུ་དྲུག་དང་བཅས་རྔ་ཆེན་གྱི་ལོ་ཧོར་ཟླ་བ་དྲུག་པ་ཆུ་སྟོད་ཀྱིས་ཉ་བའི་དམར་ཆའི་ཚེས་བཟང་པོར་རང་བྱུང་འཕགས་པའི་གཙུག་ལག་ཁང་དམར་པོ་རི་ནས་ཕུལ། །ཆུ་ཁྱི་ལོ་རྡོ་རྗེ་བྲག་ནས་རིགས་འཛིན་སྤྲུལ་པའི་སྐུ་བློ་བཟང་པདྨ་འཕྲིན་ལས་ཀྱི་ཆབ་ཤོག་གི་འཕྲིན་ལན་གཅིག་ལས་དུ་མའི་རྣམ་འགྱུར། སྣ་ནམ་སྒྱུ་དྲའི་ལང་ཚོ་ཆེས་དར་བ། །ལྷ་སྔགས་ཡེ་ཤེས་རོལ་པའི་གཟི་བྱིན་གྱིས། །མི་བསྲུན་སྨག་རུམ་ཡོངས་བཅིལ་གསང་གསུམ་མགོན། ཁྱབ་བདག་ཧེ་རུ་ཀར་ཏེ་ཁྱོད་གཅིག་བསྔགས། །སྙན་ཚིག་ཙམ་གྱི་གསོང་གཏམ་ཟླ་དཀྱིལ་ལ། །འགྲན་པའི་བརྩེ་གདུང་དྲག་པོས་ཉེར་བསྐུལ་ཏེ། །དངོས་མཛའི་བརྩེ་དགའ་མགྲོན་དུ་ལེགས་བསུ་བའི། །ཚུལ་ལ་ཡི་རང་སྤྲོ་བ་ལྷག་པར་འཕེལ། །འདི་ན་ལས་ཉོན་གྱིས་བསྐྱེད་འདོད་ཞེན་ལ། །རྣམ་པར་དཀར་བའི་འཕྲིན་ལས་ཡིན་ནོ་ཞེས། །རླབས་ཆེན་བློ་བྲིད་རྒྱུ་སྟོབས་འཕྲུལ་པོ་ཆེས། །དལ་རྟེན་སྟོང་ཟད་(༢༨༤ན)
གཏོང་བར་རིགས་པ་བཞིན། །འོན་ཏེ་སྐྱེ་མང་དགེ་མཐུས་བཤེས་གཉེན་འགའི། །དགོངས་ཟིན་འཆད་རྩོད་རྩོམ་པར་བག་ཆགས་ཙམ། །སད་ལ་རེ་འཆའི་སྣང་ཚུལ་ཁོ་ན་ཉིད། །བཟུང་བར་ཅི་འདིར་སྡོད་ལས་གཞན་སྐབས་བྲལ། །དུང་དུང་ཉིན་མཚན་མི་འབྲལ་རྟག་བཞུགས་ཏེ། །འཇིགས་འཇིགས་ལོག་འདྲེན་སྡེ་དཔུང་རབ་ཏུ་བཅོམ། །མང་མང་མཆོག་ཐུན་དངོས་གྲུབ་ལེགས་ཕབ་པས། །ཡང་ཡང་བསམས་དོན་སྩོལ་མཛད་སྲུང་མ་ཆེ། །ཕྱི་རོལ་དྲེགས་ཚོགས་བྲན་བསྐུལ་སྲིན་པོའི་གཟུགས། །ནང་དུ་རྩ་ཁམས་ཡོངས་དག་ཧེ་རུ་ཀཿ །གསང་བ་རང་སེམས་ངེས་རྙེད་གསལ་སྟོང་མགོན། །འཕྲལ་དུ་འགྲོགས་དང་མཐར་ཐུག་བློ་བག་བྲོ། །མ་ཡིན་གནས་སྐབས་ཟོལ་ལ་བརྟེན་དགོས་པའི། །སྲུང་མའི་གཡར་དམ་དང་དུ་ལེན་མཆིས་པ། །དགེ་སྦྱོར་མི་ནུས་ཉིན་གཅིག་ལོ་བས་ཀྱང་། །རིང་པོར་བརྩི་བའི་ངང་ཚུལ་སུ་འདོད་སོམས། །གཏན་གྱི་བདེ་བ་ལྟ་ཞོག་འདི་སྣང་གི །ཆེད་དུ་བརྩོན་པས་འདིས་མཚོན་གཏེར་ལུང་ནས། །འཕྲེང་སོགས་བཤད་པར་ཐམས་ཅད་འདོད་དུངས་ཀྱིས། །ཡལ་འདོར་མི་ནུས་བྱིས་པའི་བློ་གྲོས་ཙམ། །གང་ཤར་སེམས་ཀྱི་རོལ་ཤར་རྣལ་འབྱོར་པར། །བླང་དོར་བཟང་ངན་བྲལ་བས་འཚོ་ན་ཡང་། །རྣམ་དཀར་དགེར་ངེས་དེ་སྟེང་མ་ཁེལ་བའི། །ཡོ་ལང་རྨི་ལམ་ཡུལ་གྱི་འཆར་སྒོ་ཡིན། །འོན་ཀྱང་རྙེད་དཀའ་དལ་འབྱོར་རིན་ཆེན་ལུས། །རིང་པོར་གནས་ཚེ་རང་གཞན་དོན་གྱི་(༢༨༤བ)
ཆེད། །ལེགས་མོད་ཚད་མ་བཞི་ལྡན་བཀའ་དྲིན་གྱིས། །ཤི་ཡང་མཁའ་སྤྱོད་ཞིང་བགྲོད་སུ་ཞིག་འཚེར། །སྒྲོ་བཏགས་ཉེན་ཁའི་ཕྲེང་བ་ཉེར་བསྒྲིགས་དབྱངས། །ཆེས་ཆེར་བླངས་ནས་བཅད་རྒྱའི་མིང་སྙན་པོ། །དགེ་སྙིང་ཁྲོད་དུ་ཙུ་ཏའི་རྐང་གཉིས་པ། །སོང་དོགས་བསྙེན་སྒྲུབ་རྣམ་གཡེང་སོ་སོར་སྤེལ། །དོན་དམ་དཀྱིལ་འཁོར་རྒྱ་མཚོ་སྤྲོ་བ་པོར། །ལེགས་བྱོན་མཆོག་གི་སྤྲུལ་པའི་ཟློས་གར་ལ། །བསྟན་སྲུང་དབང་པོའི་རུ་ང་ཕྲག་དོག་པས། །འཁྲེན་ཅིང་དོ་ཟླར་གྱུར་པ་མི་སྲིད་ཀྱང་། །ཀུན་རྫོབ་བླ་དཔོན་འགྲན་ཟླར་རབ་མང་དང་། །སྔོན་མཐོ་རྒྱ་ཡི་ཁོངས་སུ་མ་ཚུད་བཅས། །ཡོངས་ཀྱི་ཡོ་གའི་གཏམ་ལ་རབ་འཇིགས་ཤིང་། །ངེས་པར་འདའ་དཀའི་ཚིག་ལས་འགལ་གྱི་དོགས། །ན་ཚོད་རྒན་པོའི་སྡོང་པོ་བསྐྱེད་བསྲིངས་པས། །མ་སྙིགས་ལོ་འདབ་རྒྱས་པའི་གྲིབ་མ་རུ། །ཉེར་ཞུགས་ཚ་རེག་རབ་བསལ་དགའ་སྤྲོའི་དཔལ། །མྱུར་དུ་སྤྱོད་པའི་སྨོན་ལམ་ཡང་དག་ཞུ། །
རབ་བྱུང་བཅུ་གཅིག་པའི་ཆུ་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཆུ་ཕག་ལོར་བྲིས་པའི་ཆབ་ཤོག་འཕྲིན་ཡིག་ཁག །བསམ་ཡས་ནས་གནོད་སྦྱིན་ཆེན་པོས་དཀར་པོ་བའི་དོན་སྐོར་ཆེད་དུ་ཆུ་ཕག་ཟླ་བ་བདུན་པའི་ཚེས་བཅུ་དྲུག་ལ་བྱུང་བའི་ཕྲིན་ལན་དྲང་པོའི་བདེན་ཚིག །ཞི་དང་ཁྲོ་བོའི་དཀྱིལ་འཁོར་མ་ལུས་པའི། ཁྱབ་བདག་ཁམས་གསུམ་ཟིལ་གནོན་སྲིད་པ་གསུམ། །དབང་སྡུད་ཡིད་བཞིན་ནོར་ལྟར་འདོད་དོན་རྣམས། །སྩོལ་མཛད་སངས་རྒྱས་ཀུན་དངོས་པདྨ་འབྱུང་། །བཀའ་ཉན་དྲེགས་པའི་སྡེ་དཔོན་སུམ་ཅུ་ཡི། །གཙོ་བོ་གནོད་སྦྱིན་ཙེའུ་དམར་པོའི་གཙུག །རྡོ་རྗེ་རབ་བཀོད་ལྕེ་ལ་བདུད་རྩིའི་བཅུད།།(༢༨༥ན)
བླུད་པའི་དམ་ཚིག་ཉེར་དྲན་གསུང་ཕྲིན་སོན། །སངས་རྒྱས་སྲས་བཅས་གསང་གསུམ་ཉིན་བྱེད་གཟི། །བརྒྱ་ཕྲག་འབུམ་འཁྱིལ་པད་དཀར་འཆང་བའི་མགོན། །གླིང་དགུའི་འགྲོ་བའི་རྨོངས་མུན་མཐར་བྱེད་པར། །སྲོང་བཙན་སྒམ་པོས་བསྟན་པའི་གཞི་མ་བཙུགས། །འཇམ་དཔལ་རྣམ་འཕྲུལ་ཁྲི་སྲོང་ལྡེའུ་བཙན་གྱིས། །ངོ་མཚར་བགྲང་ཡས་བཀོད་པ་ཆེས་ཟབ་པས། །ཟན་གཡང་གིས་མཚོན་གཙུག་ལག་དཀོར་ཆར་བཅས། །བསྲུང་ན་ཞལ་འཆེས་མཛད་པར་ཡི་རང་གྱུར། །དེ་ཕྱིར་པདྨ་ཀ་རའི་རྗེས་འཇུག་གིས། །རྟེན་དང་བརྟེན་པར་བཅས་པའི་ཁུར་འཛིན་པ། །དུས་བབས་གཞན་ངོར་ཁུར་ལེན་བྱེད་སྤྲོ་ན། །ཧལ་རྩེ་སོགས་སུ་དམ་བསྒྲགས་མ་བསྙེལ་ལམ། །སྔ་འགྱུར་བསྟན་འཛིན་ནུས་ལྡན་ཀུན་གྲགས་ཀྱིས། །ཕྱི་ནང་བར་གྱི་གསོ་ཐབས་སྲི་ཞུའི་ཚོགས། །རྒྱ་ཆེན་སྲོལ་བཏོད་ལེགས་སོར་ལྷ་ཁང་རྣམས། །བདག་ཟུང་མིང་ཙམ་ལུས་པ་སྐྱོན་མེད་སྙམ། །མོལ་མོད་འཕོ་ཡང་རྙིང་བསྟན་སྒོར་ཞུགས་ལས། །ས་དགེ་ཀར་འབྲུག་གཞན་མར་གཉེར་སྤྲོད་པ། །ས་དབང་རྒྱལ་པོའི་མངའ་ཐང་རྒྱས་བསྙད་དེ། །འཇིག་རྟེན་དྲེགས་བྱེད་ཀུན་ཀྱང་འཕྱང་ཉུག་བྲེལ། །གངས་ཅན་སྤྱི་དང་ཁྱད་པར་སྔ་འགྱུར་གྱི། །བསྟན་འཕེལ་ལུས་ཅན་བདེ་བར་མཐའ་འདུལ་དང་། །ཡང་འདུལ་རུ་གནོན་ལ་སོགས་གནས་ཆེན་རྣམས། །བཀུར་སྟི་ཕུ་དུད་བགྱིད་པར་རབ་བརྩོན་པའི། །གུ་རུའི་རྗེས་ཞུགས་གཉེར་ཀ་ཕོ་ཤར་(༢༨༥བ)
ཀྱང་། །ད་ལྟའི་དཀར་པོའི་མིང་འཛིན་འདི་ཉིད་ལ། །གུང་མེད་བརྟེན་ཐབས་ས་ཞིང་རྐྱེན་ཐེག་པ། །ཅི་འགབ་གླེང་བར་སྤྲོ་བས་བྱ་མ་རྟ། །གནམ་ལོའི་རང་ཞལ་མ་དངོམ་ཚུན་རྫོང་བ། །ཨོ་རྒྱན་དམ་ཚིག་གཉན་སོགས་ཉེར་དགོངས་ཏེ། །ཕ་རྒྱུའི་གཟུགས་ཅན་རྗེས་འབྲངས་མི་འཚལ་བར། །རྡོ་རྗེའི་གསུང་ཕྲིན་བླང་དོར་གསལ་བར་སྟོན། །དེ་སྐད་གསོལ་རྟེན་དབང་གཞུའི་མདངས་ཚང་བའི། །ལྷ་དར་གསེར་སྐྱེམས་ཞོ་ཡི་འཁོར་ལོར་བཅས། ཁྲུམས་ཟླར་མར་ངོའི་དུས་ཚེས་བཟང་པོ་ལ། །གྲུ་འཛིན་སྤོ་ནས་སྡོམ་བརྩོན་རྒན་པོས་ཕུལ། །ཁྲག་སྐྱུག་གི་ལོ་ཧོར་ཟླ་བ་གཉིས་པའི་ལྷ་ཚེས་ལ་གནོད་སྦྱིན་ཙེའུ་དམར་པོར་ཚོགས་འཁོར་མཆོད་རྫས་དང་བཅས་དེང་རང་གི་རྐང་ལག་གི་ནད་རོ་འཕར་བ་དང་བོད་ཁམས་བདེ་ཐབས་ཀྱི་ལུང་བསྟན་ཞུ་བར་དགེ་སློང་འཇམ་དབྱངས་གྲགས་པ་བཏང་པའི་ཚེ་གསོལ་ཕྲིན་སྙན་ཚིག་ཚངས་པའི་ང་རོ། རྒྱལ་ཀུན་གསང་གསུམ་མི་ཟད་གཅིག་བསྡུས་ནས། །མཁས་གྲུབ་ཡོངས་ཀྱི་གཙུག་རྒྱན་ཐོད་འཕྲེང་རྩལ། །བརྟུལ་ཞུགས་སྤྱོད་པས་ཁམས་གསུམ་དབང་སྡུད་ཅིང་། །སྲིད་གསུམ་ཟིལ་གྱིས་གནོན་པའི་དངོས་གྲུབ་སྩོལ། །ཆོས་ཉིད་ཞི་བའི་ངང་ལས་མ་གཡོས་ཀྱང་། །མི་བསྲུན་གཤེད་དུ་དྲག་ཤུལ་ཁྲོ་གཏུམ་ཅན། །མཐུ་སྟོབས་དབང་ཕྱུག་གནོད་སྦྱིན་རྒྱལ་པོ་ཆེ། །དམར་ཟླུམ་ཡེ་ཤེས་སྤྱན་གྱིས་ཉེ་བར་གཟིགས། །ཆོས་འཁོར་གཙུག་ལག་སྲིད་ན་ཡོད་དོ་ཅོག །ཁྱོད་ལ་གཉེར་གཏད་དམ་བཅས་མ་བསྙེལ་བར། །སྟོང་གསུམ་སྐད་ཅིག་མྱུལ་ཏེ་བླང་དོར་གྱི། །ལུང་(༢༨༦ན)
བསྟན་གསལ་པོར་སྟོན་ཅིག་སྲུང་མའི་གཙོ། །སྟོད་སྨད་བར་གྱི་དགེ་དང་མི་དགེའི་ཚོགས། ཁྱད་པར་འགྲོ་བའི་ལས་ཉོན་དེས་བསྐྱེད་པའི། །འཐབ་རྩོད་ཀྱིས་མཚོན་ཉེར་ཞི་སྐྱེ་རྒུ་རྣམས། །ཕན་བདེར་སྦྱོར་པའི་ཐབས་མཆོག་གསལ་པོར་སྟོན། །གཏོར་མའི་རི་བོ་སྨན་རག་རྒྱ་མཚོར་བསྐྱིལ། །དར་ཟབ་མཆོད་སྤྲིན་སྔགས་རྒྱས་རྒྱ་ཆེར་སྤེལ། །དགྱེས་སྐོངས་རྒྱལ་དབང་པདྨ་ཀ་ར་ཡི། །དམ་ཚིག་གཉན་ལས་མ་འདའ་སྲུང་སྐྱོབས་མཛོད། །ཆུ་ཕག་ཧོར་ཟླ་གཉིས་པའི་ལྷ་ཚེས་ལ་ཤར་ཕྱོགས་སྐུའི་རྒྱལ་པོའི་བློན་པོ་བྱ་ཁྲིད་མིག་གཅིག་པར་ཚོགས་འཁོར་སྤྱན་གཟིགས་དང་བཅས་ངེད་རང་གི་རྐང་ལག་གི་ནད་རོ་འཕར་བའི་སྐབས་སྤྱི་སྒོས་ཀྱི་ལུང་བསྟན་ཞུ་བར་ལྐོག་པ་ཕུན་ཚོགས་དབང་པོ་བཏང་བའི་གསོལ་ཕྲིན་ཟླ་བའི་ཆུ་རྒྱུན། རིགས་རྣམས་ཡོངས་ཀྱི་བདག་པོ་ཀུན་ཏུ་བཟང་། །པཎ་ཆེན་ཚུལ་བཟུང་མཚོ་སྐྱེས་རྡོ་རྗེ་ཆེའི། །བཀའ་རྟགས་རི་མོའི་གཟུགས་བརྙན་སྤྱི་བོའི་གཙུག །མེ་ལོང་ལྟར་ཤར་རྗེན་མཐོང་དགྲ་ལྷ་ཀྱེ། །བསྟེན་བསྒྲུབས་མཆོད་པའི་སྲུང་མ་མཐུ་རྩལ་ཅན། །སྐུ་ཡི་བློན་ཆེན་འཁོར་བཅས་སྤྱན་ལམ་དུ། །དངོས་གྲུབ་མཆོད་པས་ཐུགས་དམ་སྐོང་བྱེད་རྫས། །མི་ཟད་ནམ་མཁའ་མཛོད་ཀྱི་སྒོ་འཕར་ཕྱེ། །འབུལ་བས་ཐུབ་བསྟན་དེ་འཛིན་བཅས་པའི་སྡེ། །སྤེལ་ཞིང་གངས་ཅན་ལྗོངས་ཀྱི་སྐལ་ངན་ཞི། །རྣལ་འབྱོར་བདག་གིས་ཇི་ལྟར་བཅོལ་བའི་ལས། །མ་ལུས་ཐོགས་པ་མེད་པར་སྒྲུབ་པར་མཛོད། །ལྷ་ཁྱོད་དཔྲལ་བའི་དབྱིངས་ན་ཉེར་ཤར་བའི། །དྲི་མེད་ཡེ་ཤེས་སྤྱན་གྱིས་སྲིད་ཞི་ཡི། །ལྐོག་གྱུར་ཆོས་རྣམས་གཟིགས་ནས་ཕོ་ཉ་ལ། །གསང་ཚིག་སྙན་པོས་བླང་དོར་གསལ་པོར་སྟོན། །སླད་མར་ཅི་(༢༨༦བ)
དགོས་དོན་ཆེན་བསྒྲུབ་པའི་ཆེད། །ཤེས་བྱར་སྲིད་ཀུན་ཟླ་གཟུགས་འབུམ་ཕྲག་ཀྱང་། །དོག་བྲལ་ཤིན་ཏུ་ཡངས་པས་དྲི་རྨེད་ལན། །སོམ་ཉིའི་མུན་ཚོགས་མཐའ་དག་ལེགས་པར་སོལ། །
རབ་བྱུང་བཅུ་གཅིག་པའི་ཤིང་བྱི་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ཤིང་བྱི་ལོར་བྲིས་པའི་ཆབ་ཤོག་འཕྲིན་ཡིག་ཁག །ཤིང་བྱི་གནམ་གྱི་འཇམ་དབྱངས་གོང་མ་རྒྱལ་པོས་བློ་བཟང་དགེ་སློང་དང་ཆ་དཀར་བླ་མའི་དབོན་པོ་དགེ་སློང་གཉིས་ལ་བཀའ་ཤོག་གནང་སྦྱིན་དང་བཅས་རྫོང་བདའ་གནང་བའི་ལན་འབུལ་བར་སྤོམ་མདའ་མཁན་ཆེན་བློ་གྲོས་རིན་ཆེན་དང་བཀའ་བཅུ་ཡིད་བཞིན་མངགས་སྐབས་ཕུལ་བའི་ཞུ་ཡིག་ཕུན་ཚོགས་སྙན་གྲགས་གཡས་འཁྱིལ། (༢༨༧ན)
ཛི ཏྶ རྦ ཙཱ སཾ ཁྱ ནི དྷཱི བི ཙཱ ར རཻ ཀཾ པ ཉྩ ཙཱི ར པྲ ཛ བ ནྡྷུ བྷི རྨ ཧཱ། ཙ ཀྲཻ རྦ འ ཤཱ ལ དྷ རི ཏྲི བ པྲ ལ བ རྟཱི ན རཻ ནྡྲ སྶུ ར རཱ ཛྙ མཱུ ལ ཧྲི། །བགྲང་(སྡེབ་སྦྱོར་མཉམ་པའི་བྲྀཏྟ་ཡི་གེ་བཅུ་གཉིས་པ་སྐྱེ་འགྲོ་ལ་རྣམ་གྲངས་བཞི་སྟོང་སོ་དྲུག་ཡོད་པ་ལས། སྟོང་དང་སུམ་བརྒྱ་གྱ་གཅིག་པ་དབང་པོའི་རྒྱུད་ཅེས་བྱ་བ།)ཡས་རྒྱལ་ཀུན་རྣམ་དཔྱོད་གཅིག་འདུས་གཏེར། །ཟུར་ཕུད་ལྔ་ལྡན་སྐྱེ་རྒུའི་དཔུང་གཉེན་ཆེར། །སྟོབས་འཁོར་ཚུལ་གྱིས་འཛིན་མའི་ཁྱོན་ཡངས་པོར། །དབང་སྒྱུར་མི་རྗེ་ལྷ་རྒྱལ་དམ་པའི་དྲུང་། །སྟོབས་བཅུའི་རྩལ་མངའ་བུ་རམ་ཤིང་པ་ཡི། །རིང་ལུགས་ཉེར་བཟུང་འགྲོ་ལ་ལྷག་པའི་སེམས། །ཆེས་དཀར་བགྱིད་འོས་སྭསྟི་ཀ་ཕྲེང་སྒྲ། །སྙན་གྱི་དབང་པོར་འདྲེན་པའི་སྔོན་འགྲོའི་སྒོར། །ཕུན་སུམ་ཚོགས་པའི་བཀྲ་ཤིས་མེ་ཏོག་ཆར། །རབ་འཐོར་ཙན་དན་སྡོང་པོའི་དྲི་དངར་པོ། །འཐུལ་བཞིན་དང་བའི་ཡིད་ཀྱིས་རྩེ་གཅིག་ཏུ། །ཡོངས་བསྒྲིམས་སྤོབས་མཐོ་བསྐྱེད་དེ་འདི་ལྟར་གསོལ། །ཚོགས་གཉིས་ཆུ་གཏེར་ཆེ་ལས་ཉེར་ཐོན་པའི། །ཕུལ་བྱུང་བདུད་རྩིའི་བཅུད་འཁྱིལ་མཚན་བཟང་སྐུ། །བདེ་སྐྱིད་འཆི་མེད་དཔལ་སྟེར་གཏམ་སྙན་པོ། །རྣ་རྒྱན་ཚངས་དབྱངས་དོ་ཟླར་བྱེད་པ་དང་། །ལྷན་ཅིག་གནམ་གྱི་ཤེ་མོང་བཀའ་རྟགས་ཆེ། །སྡེར་ལྔའི་གསེར་འབྲུག་སྐད་གསང་སྒྲོག་ལྟ་བུས། །ལེགས་བཏེག་དངོས་པོའི་གནང་སྐྱེས་གྱ་ནོམ་བཅས། །སོན་ཚེ་ཁྱོད་ཞལ་མཐོང་འདྲའི་དགའ་སྤྲོ་འཕེལ། །དཔག་གཡས་བསོད་ནམས་ཟིམ་ཆར་གྱིས་བརླན་པའི། །གསང་གསུམ་མི་ཟད་ཡོངས་འདུའི་ལྗོན་འབྲས་ཀྱིས། །ཅི་འདོད་རེ་སྐོང་ཡིད་བཞིན་དབང་གི་རྒྱལ། །ལུས་ཅན་རྣམ་དཀར་མཐའ་ཀླས་ཟོང་གིས་བསྒྲུབས། །རྨད་བྱུང་མཛད་ཕྲིན་ཚ་ཟེར་འོད་པོ་ཆེ། །བསྟན་འགྲོའི་ཕན་བདེ་འབུམ་ཕྲག་པདྨའི་ཚལ། །ཡོངས་བཞད་རྒོལ་ངན་སྨག་རུམ་གཞིལ་བའི་སླད། །བྱེད་པོར་གནམ་གྱི་མཐོངས་ནས་ལྷ་ཁྱེད་བསྐོས། །ལོག་པར་འཁུ་བའི་ལྷ་མིན་སྒྲ་གཅན་སྐེ། །བརྟུལ་ཕོད་དམ་བཅའ་རྣམ་བཞིའི་འཁོར་ལོ་ཡིས། །བཅད་པས་མེས་པོ་ངལ་ཁུར་རབ་ལྕི་བ། །བཏང་སྟེ་ཟག་མལ་གཉིད་དུ་གཡུར་ལས་ཅི། །གཏིང་མཐའ་མི་མངོན་ཐུགས་ཀྱི་རྒྱ་མཚོ་ཆེར། །བརྟན་གཡོའི་(༢༨༧བ)
ལེགས་ཚོགས་ཡོལ་བ་དང་བྲལ་རླབས། །སྲིད་རྩེའི་བར་འཕྱུར་སྡེ་བཞིའི་ཡིད་བཞིན་ནོར། །བར་མཚམས་མེད་གང་མི་ལེན་སུ་ཞིག་བསྙོན། །ལྷར་བཅས་ཡིད་ཅན་ཀུན་གྱི་ཅོད་པན་དུ། །ཞབས་སེན་བཀོད་ལ་བྱིས་རྣམས་མཚར་འཛིན་ཀྱང་། །ཕྱོགས་བཅུའི་རྒྱལ་བ་མ་ལུས་གསུང་གཅིག་གིས། །བདེ་ལྡན་ཞིང་གི་མགོན་པོར་ཡང་དག་བསྔགས། །བསོད་ནམས་ཉ་ཕྱིས་རྒྱ་ཆེ་ཁྱོན་ཡངས་ལས། །ཚད་མེད་འབབ་པའི་ལེགས་བྱས་མུ་ཏིག་ཆར། །མི་འཛད་དབང་ཐང་དར་དྲག་རྫོགས་ལྡན་དུས། །སྔོན་བྱུང་གཏམ་ཙམ་དེང་སང་ཆེས་ཆེར་རྨད། །གྲུབ་མཐའི་བཞེད་གཞུང་ཕྱི་ནང་རིགས་ལམ་ནས། །ཉེར་དྲངས་སྨྲ་ངན་མང་ཡང་ལུས་ཅན་རྣམས། །གནས་སྐབས་མངོན་མཐོ་མཐར་ཐུག་ཐར་པ་དང་། །ཀུན་མཁྱེན་གོ་འཕང་ལ་སྦྱོར་ཤཱཀྱའི་བསྟན། །དེ་ཡི་སྲོལ་འབྱེད་ཀླུ་སྒྲུབ་ཐོགས་མེད་ཀྱིས། །བཀྲལ་བའི་ཟབ་རྒྱས་ཆོས་ཚུལ་ཆུ་ཀླུང་གཏེར། །རྣམ་དཔྱོད་ཧུབ་གཅིག་འདྲེན་པའི་དྲང་སྲོང་མཆོག །ཁམས་གསུམ་འགྲོ་བའི་བླ་མ་བཙོང་ཁ་པ། །སངས་རྒྱས་དེ་གསུང་ཐེག་གསུམ་དགེ་འདུན་བཅས། །བསྙེན་ཅིང་བཀུར་བར་གཟུགས་ཅན་སྙིང་པོ་དང་། །མྱ་ངན་མེད་དཔལ་མེས་དབོན་ཐང་རྒྱལ་སོགས། །སྔོན་བྱོན་རྣམ་ཐར་ཁྱོད་མིན་སུ་ཡིས་གཟུང་། །དེ་ཕྱིར་འོད་དཔག་མེད་མགོན་མཉམ་བཞག་སྟེ། །རྩི་བཅུད་ཀྱིས་གཏམ་བུམ་པས་མི་ཡི་རྗེར། །དབང་བསྐུར་བསྐལ་པ་རྒྱ་མཚོར་མི་འགྱུར་བའི། །སྲ་མཁྲེགས་ཀ་བ་བརྟན་པོ་ཉེ་བར་ཚུགས། །དཔག་དཀའི་ཚད་ཀྱིས་ཆོད་ཀྱང་ཟླ་བའི་འོད། །ཕོག་པའི་མོད་ལ་ཀུནྡ་ཉེར་བཞད་བཞིན། །མཐའ་ཡས་ས་ཡི་རིང་པོར་བསྐལ་ན་ཡང་། །ཐུགས་རྗེའི་མཛད་པ་བཟང་པོས་ཅིས་མི་སྐྱོང་། །(༢༨༨ན)
རྟ་བདུན་ཟེར་གྱིས་སྨག་རུམ་སངས་བྱེད་ན། །བསྟན་དང་འགྲོ་བ་ཉེར་འཚོ་འབྱུང་བའི་གཞིར། །རག་ལུས་བརྩེ་བའི་སྤྱན་དཀྱུས་ཆེས་ཡངས་པོས། །ལེགས་གཟིགས་མི་འཇིགས་སྤོབས་པ་དེང་འདིར་སྩོལ། །ཆོས་ནོར་འདོད་ཐར་གྱིས་གཙོས་གཙུག་ལག་གི །བརྒྱ་ཕྲག་ལུགས་བཟང་སྒོ་འཕར་ཡོངས་འབྱེད་པར། །བླར་མཐོའི་མངའ་ཐང་དཔལ་འབྱོར་ཆོས་བཙན་བཀས། །རང་གི་ལོངས་སྤྱོད་སྐལ་བཟང་སླར་ཡང་བསྐྲུན། །དུས་རྣམས་ཀུན་ཏུ་དགྱེས་པའི་སྤྱན་རས་ཀྱིས། །བཙའ་བའི་འཛུམ་ཞལ་ལྷུག་པར་རབ་བསྟན་ནས། །ནམ་མཁའ་གཟུགས་གཞན་མ་གྱུར་དེ་སྲིད་བར། །སྩོལ་བའི་དགའ་སྟོན་ཡིད་ལ་རྟག་འབེབས་མཛོད། །འདྲེན་བྱེད་ངང་མོ་རོལ་གར་བསྒྱུར་བའི་རྟེན། །རིན་ཆེན་དོ་ཤལ་སྣ་ལྔའི་སྣམ་འཕྲུལ་ཁྲེས། །འཇམ་མཉེན་པད་རྫིང་ངོགས་སུ་ཐུན་མཚམས་ཀྱི། །རྟགས་མཚན་འདབ་བརྒྱ་གསར་པ་རབ་ཏུ་གཡོ། །མརྒད་ཞུན་མར་འགྲན་བཟོད་བྱི་བའི་ལོ། །འབྱུང་བ་སུམ་ལྡན་ས་ག་ཟླ་བ་ཡི། །གྲལ་ཚེས་དགེ་བར་ཀུན་གྱིས་བཏུད་བྱའི་གནས། །ཕོ་བྲང་ཆེན་པོར་ཕུལ་བ་བི་ཛ་ཡ། །ཤིང་བྱི་ལོ་ནས་གསེར་ཡིག་པ་ཨ་ཆི་ཐུ་དགེ་སློང་དང་བསྟན་པ་གསལ་བྱེད་གཉིས་ཁལ་ཁ་ཛ་སག་ཐུའི་དོན་སྐོར་ལ་བཀའ་ཤོག་གནང་སྦྱིན་བཀའ་ངག་དང་བཅས་ཆེད་གཉེར་རྫོང་བདའ་གནང་བའི་ལན་འབུལ་བར་རབ་འབྱམས་པ་བློ་བཟང་ནོར་བུ་དཔལ་གདོང་ངག་དབང་གྲགས་པ་མངགས་པའི་ཚེ་ཕུལ་བ་སྐྱེ་རྒུའི་བདེ་སྐྱིད་ཉི་མ་དགུང་ཤར། ཚེ་རིང་གནམ་གྱི་ཤེ་མོང་གིས་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། སྭསྟི་ཀའི་སྒྲ་ལས་ཉེ་བར་དྲངས་ཏེ་ཤིས་པ་བརྗོད་པའི་ཚིག་གི་མེ་ཏོག་ཕུན་སུམ་ཚོགས་པ་རབ་ཏུ་འཐོར་ཞིང་དང་བའི་མི་ཕྱེད་པ་དང་བཅས་པ་ཕུལ་དུ་བྱུང་བའི་(༢༨༨བ)
དད་ལྡན་བསྲེགས་པའི་དྲི་བཟང་གིས་ཕྱོགས་ཀུན་ཡོངས་སུ་ཁྱབ་པ་སྔོན་དུ་འགྲོ་བའི་སྒོ་ནས་གསོལ་བ། འཇིག་རྟེན་གྱི་མེས་པོས་གནམ་ཀ་བ་མེད་པའི་སྒོ་ཕྱེ་ནས་གང་ལའང་འཇིགས་མེད་སྟོབས་ཀྱི་དཔུང་གིས་མངའ་སྒྱུར་བ་མང་བཀུར་གྱི་ཁྲི་མི་ཤིགས་མི་འགྱུར་གཡུང་དྲུང་གི་རང་བཞིན་ཆེས་ཡངས་པོར་དབང་བསྐུར་བ་འཇམ་དབྱངས་གོང་མ་རྒྱལ་པོ་དེང་གི་དུས་ཉིད་ནའང་འཛམ་གླིང་སྐྱེ་རྒུ་མཐའ་ཀླས་པའི་བསོད་ནམས་བསམ་གྱིས་མི་ཁྱབ་ཅིང་ཟད་མི་ཤེས་པས་ཐོག་མ་མེད་པ་ནས་བསྒྲུབས་པའི་དཔལ་ཡོན་དམ་པ་སྐུ་མཐོང་ན་མི་མཐུན་པ་དང་བྲལ་བའི་མཚན་བཟང་པོ་ཉི་མ་བྱེ་བ་འབུམ་གྱིས་ཀུན་ནས་དཀྲིས་པས་མཆོག་དམན་བར་མའི་ཡིད་ཅན་མཐའ་དག་གི་བློ་མུན་མ་ལུས་པ་ཉེ་བར་བསལ་ལོ་ཞེས་པའི་གཏམ་སྙན་ཤིན་ཏུ་འཇེབས་པ་དྲུག་ཅུའི་དབྱངས་ཀྱི་རྗེས་འགྲོ་རྣ་བའི་བུ་གར་སོན་པ་དང་། ཆབས་ཅིག་པར་དགྱེས་པའི་སྤྱན་རས་ནམ་དུའང་ལྷོད་པ་མེད་པའི་རིང་ནས། ཚེ་རིང་གནམ་གྱི་ཤེ་མོང་གི་བཀའ་རྟགས་པད་རཱག་གི་གཟི་འོད་འཕྲོ་བཞིན་པ། གནང་སྦྱིན་བཀྲས་བཏགས་ཉིན་བདེ་མ་བཅུ། རྟགས་བརྒྱད་བཅུ་ཕྲག་གཉིས། རིན་པོ་ཆེའི་དཔྱད་པ་ལེ་ཚན། གསེར་མདོང་། དངུལ་གཞོང་། མཛོད་གོས་ཡུག་སྣ་ཚོགས་སུམ་ཅུའི་དངོས་པོ་གྱ་ནོམ་པ་དང་བཅས་ཨ་ཆི་ཐུ་དགེ་སློང་དང་བསྟན་པ་གསལ་བྱེད་ཆེད་དུ་རྫོང་བདའ་གནང་བ་སུག་པར་འབྱོར་བའི་གསེར་ཞལ་མཇལ་བ་ལྟར་ཡིད་ལ་སྤྲོ་དགའ་ཆེས་ཆེར་འཕེལ། འདི་ནའང་དགེ་སྦྱོང་སྡེ་སྣོད་འཆང་བ་པོ་ལུས་ཀྱི་ཟོ་མདོག་བདེ་ཞིང་། གང་གི་ཐུགས་རྗེར་བརྟེན་ནས་ཉི་མ་ནུབ་ཕྱོགས་ཀྱི་ལུགས་གཉིས་དང་འབྲེལ་བའི་ཁྱབ་ཆ་མི་དམན་ཞིང་། ལྷག་པར་ལུས་ཅན་ཐམས་ཅད་ཀྱི་མགོན་སྐྱབས་(༢༨༩ན)
དཔུང་གཉེན་གཅིག་པུ་པ་བསྐལ་བཟང་སངས་རྒྱས་སྟོང་གི་ནང་ནས་སྙིང་སྟོབས་འགྲན་ཟླ་མ་མཆིས་པ་སྙིགས་མའི་མགོན་པོ་སྟོན་པ་ཐུབ་པའི་དབང་པོ་རྒྱལ་བ་ཟས་གཙང་གི་སྲས་པོའི་ལུང་དང་རྟོགས་པའི་བསྟན་པ་རིན་པོ་ཆེ་བླ་ནས་བླར་འདེགས་པའི་ཁུར་ལྕིའི་བརྩོན་པ་ཉེ་བར་བླངས་པའི་ཐུགས་རྗེ་ཆེན་པོའི་གྲིབ་མར་སྐྱེ་འགྲོ་མཐའ་དག་ངལ་གསོར་སྤྱོད་པའི་ལྷག་བསམ་ཀུནྡ་ལྟར་དཀར་བའི་བགྱི་བ་ཡར་ལྡན་དུ་གནས། ཛམྦྷུབྲྀཀྵའི་ལྗོན་པས་མཚན་པའི་གླིང་འདིར་ལྷ་མིའི་དྲང་སྲོང་རིགས་འཛིན་གྲུབ་ཐོབ་རྣམས་ཀྱིས་རྩོད་པའི་དུས་སྟོབས་ཀྱི་འཁོར་ལོས་སྒྱུར་བ་འབྱོན་པར་ཡོངས་སུ་བསྔགས་པ་བཞིན་མིའི་བདག་པོ་ཁྱོད་ཀྱི་སྐུ་བསོད་ཀྱི་མཐུས་འཇིག་རྟེན་གྱི་ཁམས་སུ་ནད་འཁྲུག་མུ་གེ་སོགས་སྐལ་ངན་གྱི་ཆད་པ་ཐམས་ཅད་མིང་གི་ལྷག་མར་གྱུར་ཏེ་ཆར་ཆུ་དུས་བབས་ཀྱིས་རྩི་ཤིང་ནགས་ཚལ་རྒྱས་ཤིང་ལོ་ཏོག་སྦྲུམས་པ་ལས་སྒོར་ཁེ་སྤོབས་ཐོན་པས་མཚན་མི་འཛད་པའི་ལོངས་སྤྱོད་ཀྱི་གཏེར་སྒོ་བརྒྱ་ཕྲག་ཕྱེ་ཞིང་བསྐལ་འཚོའི་ཚེ་བསོད་ནམས་དབང་ཐང་གི་སིམ་མཚོར་ཤ་སྟག་གི་དགེ་མཚན་ལ་སྤྱོད་པའི་བསྟན་འགྲོའི་རྩ་ལག་དམ་པའི་གཞིར་འཚོ་བཞེས་ཚེ་མཐའ་ཡས་པའི་མགོན་པོ་ལྟར་སྐུ་ཚེ་བྱིན་གྱིས་བརླབས་པ་དེ་བཞིན་ལྷུན་གྱིས་གྲུབ་པར་དཀོན་ཅོག་རིན་པོ་ཆེ་རྣམ་པ་གསུམ་དཔང་པོར་བགྱིས་ནས་བདེན་ཚིག་བརྗོད་ལགས་པ་དགོངས་པ་ཟབ་མོའི་ཀློང་དུ་བཞུགས་པའི་བཀའ་མཆིད་བསླབ་སྟོན་བཟང་པོ་འཆི་མེད་ལྷའི་ཆུ་བོའི་རྒྱུན་བཞིན་ཞུ། ཞེས་ལྷ་མིག་དག་པའི་སྤྱན་ཟུར་གཡོ་རྟེན་རིན་པོ་ཆེའི་ཤལ་དཀར། སྣམ་ཕྲུག་ཚོས་ཁ་སྣ་ཚོགས་ཀྱི་ཁྲེལ་སྔགས་ལ་རྟགས་ཀྱི་ཚིམ་བུས་སྤྲས་ཏེ་མིག་དམར་ཞེས་པ་ཤིང་བྱི་ཧོར་ཟླ་དྲུག་པའི་ཚེས་གཅིག་ལ་རང་བྱུང་འཕགས་པའི་གཙུག་ལག་ཁང་དམར་པོ་རི་ནས་ཕུལ།། །།