རབ་བྱུང་བཅུ་གཅིག་པའི་ས་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ས་རྟ་ལོར་བྲིས་པའི་ཆབ་ཤོག་འཕྲིན་ཡིག་ཁག །ས་རྟ་ལོ་གསར་ཐོག་གྲ་ལྕོག་གྲྭ་སྤྲུལ་སྐུ་ངག་དབང་སྙན་གྲགས་བཟང་པོས་ཉམས་འགྱུར་སྟོང་གིས་སྤུད་པའི་འཕྲིན་ལན་རྟོགས་པའི་རྒྱ་མཚོ་བརྡོལ་བའི་དུནྡུ་བྷི། རམ ཏྱུ དཱ རཱ ད རྴ དྟ རྨ སྐ ནྡྷ རཱུ པ ས རྦོ ད ཡ།ཝཱ གཱི ཤྭ ར ཡཱ ཤ ས ཤྲ དྷི སུ གོ མི བི དྭ ནྶ ཙ། ཡངས་(སྡེབ་སྦྱོར་སྡེབ་སྦྱོར་མསྒོ་ཏ་ཡངས་མ།)པའི་བློ་གྲོས་མེ་ལོང་དུ། །ཆོས་ཕུང་གཟུགས་བརྙན་ཀུན་ཤར་བ། །ངག་གི་དབང་ཕྱུག་སྙན་གྲགས་ཀྱི། །དཔལ་མངའ་མཁས་བཙུན་བཟང་པོ་ཡིས། །སུམ་ལྡན་འབྱུང་བའི་གསར་འགྲོས་(༢༥༢ན)
བང་དངོམ་ཞིང་། །སེ་ཤིག་ཁ་ཁྱར་མཐོན་པོས་དཀྱུས་ཐོག་གཅོད། །ཡབ་ལྷ་སྐྱ་བདུན་ཞོན་པ་ཅང་ཤེས་ལོའི། །དགའ་སྟོན་ཆོ་ག་བསྟར་བའི་འཕྲིན་རྟེན་སོན། །ཚོགས་གཉིས་བརྒྱ་བྱིན་གཙུག་ཏོར་གྱིས་རེག་པས། །སོ་སྐྱེའི་མི་ལུས་བྱང་སེམས་འཕགས་པ་ཡི། །མེ་ཞལ་གཟུགས་སུ་བསྒྱུར་བའི་དོན་ལྡན་རྟེན། །སྐལ་བཟང་གདུལ་བྱའི་ཉེར་འཚོར་དར་དེ་སྤྲོ། །ལེགས་བྱས་དྲོད་ཀྱིས་ཆོས་ནོར་འདོད་ཐར་གསེར། །མངལ་སྦྲུམ་རྣམ་དཔྱོད་གདོང་བཞིའི་ཚལ་ཡངས་པོར། །དབྱངས་ཅན་ངང་མོའི་རྐང་གདུབ་སིལ་འཁྲོལ་བདག །ལྷག་བསམ་སྟོན་མཚན་ཆུ་ཤེལ་དབང་པོར་འགྲན། །གཟུང་འཛིན་རྒྱ་མཚོའི་ཕ་མཐར་གནས་ལུགས་ཏེ། །རྣམ་རྟོག་ཆོས་སྐུར་རྗེན་མཐོང་ཕྱག་རྒྱ་ཆེའི། །རིང་ལུགས་སྤེལ་ལ་ཁྱོད་ལས་གངས་ལྗོངས་འདིར། །གཉིས་པ་ཀུན་མཁྱེན་ཡུལ་དེར་དམིགས་སུ་མེད། །ཀློག་ཙམ་མི་ཤེས་གནག་རྫི་སྐད་ཅིག་ལ། །སྨིན་མ་གཟེངས་མཐོའི་གྲུབ་ཐབ་ཤྭ་མོ་ལྟར། །རྡོལ་ཚེ་བློ་གྲོས་རྒྱུད་ཀྱིས་ལྔ་རིག་གཞུ། །འགུགས་པའི་དགེ་དབང་ས་འདིར་གཟུགས་གཞན་བཟུང་། །འཆད་པར་དབྱིག་གཉེན་གྲིབ་མར་བལྟོས་མིན་གྲོགས། །རྒོལ་ངན་སྤོབས་པ་འཕྲོག་ལ་ཆོས་ཀྱི་གྲགས། །ཉམས་འགྱུར་རྒྱན་མང་སྤེལ་བར་དཔའ་བོའི་ཞབས། །དྭགས་བརྒྱུད་གྲུབ་མཐའ་འཛིན་པའི་ཟོལ་གྱིས་བརྫུ། །ཚུལ་འཆོས་སྒྲོ་གཤོག་གཞན་འདྲིད་འབྲུག་གི་སྒྲས། །འདོད་ཡོན་མངལ་ཁུར་སྒོམ་ཞྭའི་གཙུག་ཕུད་ཅན། །ཕྱོགས་ལྷུང་སྤྲིན་ལ་མིག་གཏོད་ཐན་སྐད་གླུ། །ལེན་(༢༥༢བ)
པའི་བསྟན་འཛིན་རྨ་བྱ་ཀྱེ་མ་ཧུད། །རྒྱལ་དང་འགོག་སྙོམས་བསམ་གཏན་སྒྲོན་མེ་ལ། །ཞི་བའི་ཁང་བཟང་དུ་འཁྲུལ་འཇུག་སེམས་ཀྱིས། །གཏན་བདེའི་སྲོག་འདོར་སྒོམ་ཆེན་ཕྱེ་མ་ལེབ། །དེ་འདྲ་ལྷ་མིན་གདོན་གྱིས་སྙིང་བཏབ་བཞིན། །མི་གཡེང་ཡིད་ཀྱི་འཛིན་ཕུར་བརྟན་པོ་ནས། །སྒོམ་མེད་ཁྱབ་གདལ་གནས་ལུགས་ཡོ་ལང་ཆེར། །འཁྲིད་ལ་ཁྱོད་དང་གླིང་ཆེན་རས་པ་གཉིས། །སྤང་རྟོགས་དབྱེ་བ་ཚད་མས་གཞལ་ནུས་མིན། །གཞི་ཡི་དེ་བཅས་འབྲས་དུས་དེ་བྲལ་བ། །ཆོས་སྐུའི་ཁྱད་པར་ཤེས་ནས་སངས་རྒྱས་ཞེས། །གྲགས་ཅན་རང་སེམས་ལས་གཞན་མི་འཚོལ་བའི། །རྟོགས་པའི་རྒྱ་མཚོ་ཁྱོད་ཀྱི་ཀློང་དུ་བརྡོལ། །ཕུར་བུའི་བློ་གྲོས་མངའ་ཡང་སྙེམས་པ་བྲལ། །འཁྲུལ་པའི་ཡོ་ལང་ཞིག་ཀྱང་ཚུལ་ཁྲིམས་གཙང་། །ཐུགས་རྗེ་ཟླ་ཉ་གང་ཡང་འཕེལ་འགྲིབ་བྲལ། །ཕྱོགས་ལྷུང་སྤངས་ཀྱང་སྣོད་ལྡན་གདུལ་བྱར་ཆགས། །གཙུག་ལག་དུ་མར་བསླབ་སྦྱངས་གྲངས་ཀྱི་ཚད། །འགྲམ་པའི་ངོས་སུ་བྲིས་དང་ཆབས་ཅིག་པར། །སླར་སྐྱེས་པད་རྩའི་ཁུ་བས་ཉེར་བྱུགས་མདངས། །གཞན་ཕན་སེམས་ཀྱི་ཁ་དོག་སྟོན་པ་བཞིན། །ཕག་གྲུའི་རིང་ལུགས་ཀུན་བཟོད་སྙིགས་མའི་མཚོར། །བྱིང་ཚེ་ཐོས་བསམ་སྒོམ་པས་གྱེན་འདེགས་པར། །རུས་སྦལ་གཟུགས་སུ་བསྒྱུར་བའི་འཕྲུལ་པོ་ཆེ། །མིག་སྔོན་སཱ་ལའི་ལྗོངས་འདིར་འོངས་ལས་ཅི། །དྭགས་བརྒྱུད་ཁོག་སྟོང་པི་ཝང་ཆེས་ཡངས་པོར། །ལེགས་བཤད་སྐད་སྙན་འཁྲོལ་བའི་རྒྱུད་གཅིག་ཁྱོད། །སྲོག་གི་འཚོ་བ་རྡོ་རྗེ་རང་བཞིན་དུ། །བསླུ་མེད་མཆོག་གསུམ་(༢༥༣ན)
མཐུ་ཡིས་འགྲུབ་བྱིན་རློབས། །བྱམས་པའི་འདུས་པ་དང་པོར་འཚོག་པ་ལ། །གཡེང་བས་བྲེལ་གྱུར་དེ་སྲིད་གནམ་ལོའི་ཞལ། །ཤར་བའི་ཐོག་མར་ཤིས་བརྗོད་གླུར་ལོང་ཞེས། །མདའ་བསྣུན་མཆེད་པའི་དགེ་སྦྱོང་གང་དེར་བསྐུལ། །སྒང་གཤོངས་མེད་པར་ཀུན་ལ་རྟག་སྙོམ་པ། །སྔོན་སོང་བྱམས་བརྩེའི་རང་སེམས་མཚོན་པའི་དར། །ཐུན་མཚམས་རྒྱ་དང་འགྲོགས་ཏེ་གྲ་ཡི་ནང་། །ཕུན་ཚོགས་དགེ་བའི་ཡུལ་གྲུ་ཆེན་པོར་སྤེལ། །བོད་ཁམས་ཀྱི་ནད་ཡམས་སོགས་དུས་ཀྱི་ཆད་པ་གཞིལ་ཐབས་ཀྱི་དྲི་སྨིན་ལ་སྤྱན་གཟིགས་ཚོགས་འཁོར་དང་བཅས་སྤུན་བདུན་པ་ལྷུན་གྲུབ་རྒྱ་མཚོ་བསམ་ཡས་སུ་བཏང་པའི་འཕྲིན་གསོལ་དམ་ཚིག་སྒྲ་དབྱངས། སངས་རྒྱས་ཀུན་གྱི་སྐུ་གསུང་ཐུགས། །སྒྱུ་འཕྲུལ་རྒྱ་གར་པཎ་ཆེན་ཚུལ། །པདྨ་ཀཱ་རའི་བཀའ་རྟགས་ཀྱི། །རི་མོ་གཙུག་ཏོར་རྩེར་མཛེས་པ། །ཀུན་ཁྱབ་རྡོ་རྗེ་དྲག་པོ་རྩལ། ཁྱུང་ཆེན་ཀླུ་འདུལ་གསེག་ཤང་ཅན། །ཙེའུ་དམར་གནོད་སྦྱིན་ཡང་ལེ་བེར། །སྣ་ཚོགས་ཟློས་གར་སྟོན་མཛད་ཀྱེ། །བཟའ་བཅའ་བཏུང་བའི་ཚོགས་འཁོར་དང་། །གསེར་སྐྱེམས་ཕྱི་ནང་གོས་དང་ཇ། །དངོས་བཤམས་ཐུགས་དམ་བཀང་བའི་རྫས། །འགྲོ་ངོར་མཚོན་བྱེད་ཙམ་སྤེལ་ནས། །ཏིང་འཛིན་གྱིས་སྤྲུལ་མཆོད་པའི་སྤྲིན། །ནམ་མཁའ་མཛོད་ཀྱི་སྒོ་འབྱེད་ན། །འཕྲིན་ལས་རྣམ་བཞི་མ་ལུས་པ། །ཐོགས་པ་མེད་པར་བསྒྲུབ་ཏུ་གསོལ། །ལྐོག་གྱུར་ཆོས་རྣམས་མངོན་སུམ་དུ། །གཟིགས་པ་ཡལ་ཡོལ་བཏང་སྙོམས་ཀྱི། །(༢༥༣བ)
།དབང་དུ་མ་གྱུར་བྱ་མ་རྟར། །རྡོ་རྗེའི་གསང་ཚིག་རྗེན་པར་གསུངས། ཁྱད་པར་གངས་ལྗོངས་ཡམས་ནད་སོགས། །དུས་ཀྱི་ཆད་པ་གཞིལ་བའི་ཐབས། །སྟོན་དང་སྲུང་བཟློག་མི་མཛད་ན། །མཚོ་སྐྱེས་རྡོ་རྗེའི་དམ་ལས་འགོངས། །དེ་ཕྱིར་སྔོན་གྱི་ཞལ་བཞེས་ལྟར། །རེ་བ་འགྲུབ་བསྐུལ་འཕྲིན་ཡིག་རྟེན། །སྙན་ཤལ་དང་བཅས་ནག་ཟླ་ཡི། །རྒྱལ་ཕུར་འཛོམ་པའི་དུས་སུ་སྤེལ། །ས་རྟ་ཚོང་འདུས་ནས་བཤན་པ་བྱ་ཁྲིད་མིག་གཅིག་པས་ལུང་བསྟན་རྡོ་རྗེའི་གསུང་འཕྲིན་རིང་དུ་གནས་པའི་རྟེན་འབྱུང་དུ་ཁ་གང་མ་དང་བཅས་སྐུ་ཁོག་རྗོང་བདའ་བྱུང་དུས་ཀྱི་འཕྲིན་ལན་ཟླ་གཟུགས་དངས་མཚོར་འདྲེན་པའི་ཤིང་རྟ། རྒྱལ་ཀུན་མཁྱེན་བརྩེ་ནུས་པ་རྣམས། །ཆུ་སྐྱེས་ཟེའུ་འབྲུ་སྤྲུལ་པའི་གར། །རྣམ་རོལ་པདྨ་ཐོད་འཕྲེང་རྩལ། །ཐུགས་རྗེས་ལུས་ཅན་མཐའ་དག་སྐྱོངས། །གང་གི་དམ་ཚིག་ར་བ་ལ། །མི་དྲལ་དྲེགས་པའི་སྡེ་དཔོན་གཙོ། །སྐུ་ཡི་རྒྱལ་པོ་མདུན་ན་འདོན། །བཤན་པ་བྱ་ཁྲིད་མིག་གཅིག་ཀྱེ། །གང་གི་གསུང་གསང་རྡོ་རྗེའི་ཚིག །འབྱུང་འགྱུར་ལུང་དུ་སྟོན་པ་དང་། །ལྷན་ཅིག་རིང་པོར་གནས་པའི་སྟན། །སྤེལ་བའི་རྟེན་འབྱུང་ལེགས་པར་འགྲིག །སྔོན་དུ་བོད་ཁམས་བདེ་ཐབས་སོགས། །སྤྱི་སྒོས་རིམ་གྲོར་ཤེར་སྙིང་མདོ། །བྱེ་བ་བཀླག་པ་བསྒྲུབས་ཟིན་གྱིས། །གངས་ལྗོངས་ཕན་བདེའི་དཔལ་ལ་སྦྱོར། །སླར་ཡང་ལས་ཀུན་བསྒྲུབས་གསོལ་བའི། །འཕྲིན་རྟེན་ས་ཡི་ཟླ་བ་ཞོ། །ཟུང་འབྲེལ་དར་ཚོན་སྣ་ལྔར་བཅས། །བསྟན་སྲུང་ཆེན་པོའི་སྤྱན་སྔར་དགེ ། (༢༥༤ན)
ས་རྟ་ལོ་ཟན་གཡང་མདོ་སྡེ་མཆོད་པར་ལེགས་སྐྱེས་སྤེལ་བར་དར་བྱུང་པ་བཏང་བའི་དུས་སྤྲུལ་པའི་ཆོས་རྒྱལ་ཆེན་པོ་ལི་བྱིན་ཧ་ར་དང་ལས་མཁན་གནོད་སྦྱིན་ཆེན་པོ་ཡང་ལེ་བེར་ལ་གསོལ་བའི་འཕྲིན་ཡིག་ལྷ་རྒྱལ་སྟན་པའི་སྒྲ་དབྱངས། བསྭོ་བསྭོ་ལྷ་ཆེན་རྣམ་པར་རྒྱལ་བའི་དབྱངས། །ཚངས་པའི་ཡུལ་སར་འཐེན་པ་ཏམྦུ་རའི། །རྒྱུད་མངས་གླུ་ལས་ཉེར་དྲངས་འཕྲིན་གསོལ་བར། །སྒྲ་འཛིན་གཏོད་ཅིག་ལི་བྱིན་ཧ་ར་ཀྱེ། །མཚམས་སྤྲིན་གོས་ཀླུབས་ཅང་ཤེས་བགྲང་བྱའི་ལོ། །ཟན་གཡང་མདོ་སྡེའི་དུས་བཟང་མཆོད་པ་ཆེར། །མཛད་མེད་ཉེར་སྤྱོད་ནམ་མཁའ་མཛོད་ཀྱི་སྒོ། །ཕྱེ་འདིས་ཐུགས་དམ་གཉན་པོ་དབྱིངས་ནས་སྐོངས། །སངས་རྒྱས་ཀུན་འདུས་རྔ་ཡབ་གླིང་པ་ཡིས། །གཙུག་ཏུ་རྡོ་རྗེའི་ཕྱག་རྒྱ་ཉེར་བཀོད་ནས། །བསྟན་འགྲོའི་སྲུང་མར་ཁྱོད་བསྐོས་ཞལ་འཆེས་དིང་། །རི་མོ་མིག་གསུམ་པས་ཀྱང་ཅི་ཞིག་དབྱི། །དེ་ཕྱིར་གངས་ལྗོངས་སྐྱེ་རྒུའི་ཆུ་ཀླུང་དུ། །ནད་རིམས་མུ་གེ་འཁྲུག་རྩོད་རྙོག་མ་ཀུན། །མཐུ་སྟོབས་ནོར་བུ་ཀེ་ཏ་ཀས་བསྒྲུངས་ནས། །ཕན་བདེའི་སྣང་བརྙན་གསལ་བར་མངོན་སུམ་སྟོན། །པདྨ་འབྱུང་གནས་རིགས་འཛིན་ས་ཧ་རའི། །སྔགས་རློམ་ཨ་ཏིའི་རྣལ་འབྱོར་སྤྱོད་པ་པོའི། །འདོད་པའི་རེ་བ་སྐོངས་ལ་དཔག་བསམ་གྱི། །ཡོངས་འདུའི་མཆེད་པོར་ལྷ་ཁྱོད་རྩལ་གྱིས་སྒྲུབས། །བདག་བློ་རྨོངས་མུན་མལ་ལས་ཉེར་སློང་བ། །ལྐོག་གྱུར་ལུང་སྟོན་རྟ་ལྗང་དབང་པོའི་འགྲོས། །ཡིག་ངག་གོ་ལའི་སྒང་གཤོངས་མཐོང་དམའ་ལ། །བལྟོས་མིན་སྣང་བའི་འོད་ཟེར་སྟོང་ཕྲག་ཕྱེ། །བགྲང་ཡས་ལྷ་མིན་མངོན་འདོད་རྩེད་འཇོ་རུ། །ཀུན་དགའི་མཛའ་བ་ལེགས་འཛུམ་འདུན་ས་(༢༥༤བ)
ཆེར། །སྙིམ་པར་འཕྲིན་རྟེན་ཐོགས་པའི་བྱ་མ་རྟ། །གོམ་སྟབས་ལྷོད་པོར་བསྒྱུར་བའི་གར་གྱིས་རྩེན། །མཐོན་པོར་ལྷ་ངོ་འདེགས་པ་སྭསྟི་ཀའི། །གླུ་དབྱངས་སྤོབས་མཐོང་ཆགས་པའི་མགྲིན་པ་ནས། །ལེན་ལ་གནོད་སྦྱིན་གསེར་གྱི་ཤང་ཤང་ཅན། །གསང་མཚན་ཀུན་ཁྱབ་རྡོ་རྗེ་དྲག་རྩལ་དགོངས། །གླིང་བཞི་གླིང་ཕྲན་དཔེར་བྱས་གནྡྷོ་ལའི། །རྟེན་དང་བརྟེན་པར་བཅས་ལ་སྲི་ཞུ་རུ། །མདོ་སྡེའི་མཆོད་པ་བསྟར་བའི་དགའ་སྟོན་ཐོག །ཚར་དུ་དངར་བའི་སྤྱན་གཟིགས་དངོམ་པར་བྲེལ། །དུས་ཀྱི་ཆད་པ་ཁ་རླངས་ལྕེ་གཉིས་དུག །མཐར་བྱེད་དྲེགས་པའི་མཐུ་རྩལ་རླབས་པོ་ཆེས། །རི་དྭགས་ལྟེ་བའི་དྲི་ངད་རབ་འཐུལ་མོད། །ཕན་བདེའི་ཆོ་གས་གངས་ཅན་དཀར་པོར་མཛོད། །བདག་ཡིད་འོ་མཚོར་ཡངས་སིམ་གཏམ་སྙན་པོ། །རྐང་གདུབ་སིལ་སྒྲར་བཅས་ཏེ་མགྲིན་པའི་སྒྲ། །འཁྲོལ་པ་འཕྲིན་ལས་འཁོར་ལོའི་ལག་པ་ཡིས། །འཕུར་ལྡིང་རྣམ་རོལ་ངང་ཚུལ་ད་གདོད་སྒྲུབས། །རེ་བའི་མྱུ་གུ་བསྐྱེད་དུ་བསྲིངས་པའི་འབྲས། །ཉམས་ནུས་དགྲ་བགེགས་སྐྱིན་ཐང་དྲག་པོའི་དཔལ། །འཇོམས་བྱེད་མཐུ་སྟོབས་དུས་མཐའི་མེ་དཔུང་རྩར། །རེག་འཇམ་ཆར་གྱི་ཟེགས་མས་སིམ་པར་མཛོད། །འཇའ་ལུས་འཕོ་བ་ཆེ་གྲུབ་འཆི་བདག་གི །གཡུལ་ལས་རྒྱལ་བས་འཇིགས་མེད་ཐོད་འཕྲེང་རྩལ། །རྒྱ་གར་པཎ་ཆེན་གཡར་དམ་གཉན་པོ་གང་། །ནམ་ཡང་མི་འགོང་བསྟན་སྲུང་ཁྱོད་ཀྱི་གཤིས། །སྤངས་ལྗོངས་མརྒད་གོས་ཀྱང་དབྱར་གྱི་དུས། །ཉིན་བྱེད་འགྲིག་པའི་ཁྱིམ་ཞུགས་སྣྲོན་གྱི་ཟླར། །སྣང་སྲིད་ལྷ་སྲིན་ཡོངས་ཀྱི་དམག་དཔོན་ཆེའི། །འདུན་(༢༥༥ན)
སར་སུམ་རྩེན་ལོངས་སྤྱོད་མཆེད་ཟླ་སྤྲུལ། །ཆོས་རྒྱལ་གཏེར་བདག་གླིང་པའི་གསང་ཡུམ་གཏེར་ལུང་བཞིན་ཡར་འབྲོག་ནས་བྲི་ལྕམ་བྱོན་སྐབས་ལེགས་སྐྱེས་སྤེལ་བར་བུ་ལུང་རྩིས་རིག་སྨྲ་བ་བློ་བཟང་ཡོན་ཏན་བཏང་སྐབས་འཕྲིན་དུ་གསལ་བ་ཟུང་འཇུག་ཕན་བདེའི་སྙེ་མ། དྷ རྨཱ དྷཱ ཏུ ནོ ཀྵ ཡ ཛྙ ག སྶ ར སྭ བཻ དྱ ཀཱ ཪྠ ས རྦ བྷ དྲ མཱ རུ དྷེ ནྡྲ དྷཱ ནུ ཙཻ བ ཙི ཏྲ ཀ པྲ བྷུ ཤྲི ཡཱ སྟི བ ཛྲ ས ཏྭ། །ཤཱ ཏ ཀཱུ ལ པ ཉྩ ག ཏྲ ཀ ཏྲི ཛཱ ཏི ཡཱ དི ཀཻ ཀ ཏཱ བ ཧོ རྣྀ ཏ སྶུ བ རྟ མཱ ཡ གཱ ངྒི ཀཱ དྱ ཀེ ཧི བྷ ཊྚ རཱ ཀ བཱ ར གུ ཪྻ། ཆོས་(སྡེབ་སྦྱོར་མཉམ་པའི་པྲྀཏྟ་ལའི་ཟླུམ་པོ།)དབྱིངས་ཟད་མི་ཤེས་པའི་སྙིང་པོ་རང་རིག་དོན་གྱི་ཀུན་ཏུ་བཟང་། །མ་འགགས་རང་གདངས་གཞའ་ཚོན་ལྟར་བཀྲ་ཁྱབ་བདག་དཔལ་ལྡན་རྡོ་རྗེ་སེམས། །རིགས་བརྒྱ་རིགས་ལྔ་རིགས་གསུམ་ལ་སོགས་གཅིག་པུ་ཉིད་ལས་དུ་མའི་གར། །ལེགས་བསྒྱུར་རྣམ་འཕྲུལ་གངྒཱའི་རྡུལ་ལས་དིང་བྱོན་རྗེ་བཙུན་བླ་མ་མཆོག །གཞོམ་མེད་འཕོ་བ་ཆེན་པོ་རྡོ་རྗེའི་སྐུར། །གྲུབ་ནས་བགྲང་བྱའི་འཕྲེང་བ་མང་བརྒལ་ཡང་། །སྒྲིབ་ལུས་སྒྱུ་ཐབས་སྟོན་གང་བསྟན་འགྲོའི་དཔྱིད། །གཡུང་དྲུང་ལྟར་བཞུགས་(༢༥༥བ)
སྙན་གྲགས་རྣ་བའི་གསོས། །ཐེག་དགུའི་འཇུག་ལམ་ཕྲ་ཞིབ་མཐའ་ཀླས་སྒོར། །གདུལ་བྱའི་ཁམས་དང་དབང་པོར་འཚམ་པའི་བློ། །འཁྲིད་བྱེད་དྲུག་ཅུའི་དབྱངས་ཀྱིས་ཡིད་ཅན་རྣམས། །གྲོལ་ཚེ་རྒྱལ་གཞན་ཞི་བའི་དབྱིངས་བཞུགས་བཞིན། །ཤེས་བྱའི་སྲིད་ཀུན་སྒྲིབ་བྲལ་རྗེན་པ་རུ། །ཡོངས་འཆར་རྣམ་པ་ཐམས་ཅད་མཁྱེན་ཐུགས་ཀྱིས། །མངལ་སྐྱེས་ཨོ་རྒྱན་མཁན་པོ་དེང་སྦྱོན་ན། །གཙང་བྱེད་པདྨར་ཅོ་འདྲི་བྱིས་བློའི་ཚུལ། །ལྔ་རིག་ཚངས་སྐུད་འཆང་བའི་གཉིས་སྐྱེས་ང་། །སྭསྟིའི་སྒྲར་དྲངས་ཤིས་བརྗོད་སྔོན་འགྲོ་རུ། །ཨ་འདུས་ཀ་འཕྲེང་ཚིག་སྦྱོར་ཀུ་ཤ་ཡི། །ཆུན་པོ་རྣ་གོང་གཟར་ནས་མགྲིན་པ་འདེགས། །ཐུགས་བསྐྱེད་ས་བོན་མངར་པོ་དར་དྲག་ལས། །ཚོགས་གཉིས་རྩ་སྡོང་ཡལ་འདབ་ཕང་ཕུང་རྩེར། །འཕྲིན་ལས་འབྲས་དུད་སྔོན་མེད་ཡོངས་འདུའི་ལྗོན། །གངས་ཅན་ནགས་ཀླུང་དབུས་ན་གཡུར་དུ་ཟ། །རྣམ་རྟོག་པདྨའི་སྐུད་པས་འཆིང་བའི་ནུས། །ཉེར་བྲལ་བརྟུལ་ཞུགས་ཆང་གིས་རབ་མྱོས་གླང་། །སྤྱོད་པའི་གོམ་པ་གཅིག་གིས་སངས་རྒྱས་སར། །བགྲོད་ཚེ་རླབས་ཆེན་དཀའ་ཐུབ་ངལ་རྒྱུར་ཟད། །ཨེ་དབྱིངས་དགའ་བཞིའི་ཡེ་ཤེས་འདྲེན་པའི་མ། །ཝམ་ཡིག་བདེ་ཆེན་ཟུང་འཇུག་མཛའ་ན་མོས། །ནམ་མཁའི་ཟླ་ལྟར་ཟླ་མེད་མཁར་ཆེན་བཟའི། །མཆེད་པོ་ཨཽཌྜི་ཡཱ་ན་ལས་འོངས་ཅི། །ནང་དུ་དྷཱ་ཏཱིའི་རྩ་འཁོར་མདུད་རྒྱ་ཀུན། །ལྷུག་པར་གྲོལ་བའི་རྟེན་འབྲེལ་ཕྱི་རོལ་དུ། །རང་སྐལ་ཟབ་གཏེར་ལུས་པ་མེད་པའི་སྒོ། །འབྱེད་འདི་བསྟན་འགྲོའི་བསོད་ནམས་བྱེ་བས་རྙེད། །བགྲང་ཡས་དཀྱིལ་འཁོར་རྒྱ་མཚོ་(༢༥༦ན)
སྤྲོ་བསྡུ་ཡི། །བྱེད་པོར་ཞི་དང་ཁྲོ་བོ་མཐའ་ཀླས་པའི། །རིགས་བརྒྱའི་ཁྱབ་བདག་ཡབ་ཡུམ་ཟུང་འཇུག་ཏུ། །བཞེངས་ལ་མེ་ཏོག་ཕལ་ཆེར་ཕྱོགས་དེར་འཛུམ། །བདེ་གཤེགས་རྣམས་ཀྱིས་རིན་ཆེན་བུམ་བཏེག་ནས། །དབང་བསྐུར་རིག་མའི་ཚོགས་ཀྱིས་གླུ་དབྱངས་ལེན། །བྱང་སེམས་ཡོངས་ཀྱིས་ཤིས་བརྗོད་ཁྲོ་བོ་ཡིས། །བགེགས་སྐྲོད་ལྷ་མོས་མཆོད་སྤྲིན་སྤྲོ་འདི་རྨད། །འོག་མིན་ཞིང་གཙོར་ངེས་པ་ལྔ་ལྡན་སྐུར། །འཚང་རྒྱ་དངོས་པའི་གཤིས་ཡིན་སཱ་ལའི་ལྗོངས། །བཅུ་གསུམ་རྡོ་རྗེ་ས་ཆེན་རབ་མནན་པས། །དག་དང་མ་དག་མནལ་ཀྱང་གཅིག་ཏུ་མཉམ། །རྒྱལ་ཀུན་སྤྱི་གཟུགས་རྔ་ཡབ་གླིང་པ་ཡི། །ཟབ་གཏེར་ཆོས་ནོར་འདོད་ཐར་གདོང་བཞི་པ། །གན་ཇག་ཐང་ཏའི་ལས་འཕྲོའི་གསེར་སྒོང་དུ། །དེང་སྨིན་བོད་ཆེན་འགྲོ་རྣམས་སྐལ་བཟང་བྱས། །རྩོད་ལས་ཆེས་སྙིགས་ལྔ་བདོ་མི་ཡི་ལུས། །མགོན་ཁྱོད་ཐུགས་རྗེ་བརྒྱ་བྱིན་གཙུག་ཏོར་རྩེས། །རེག་པའི་མོད་ལ་རྫོགས་ལྡན་ལྷའི་གཟུགས་སུ། །རབ་གྱུར་ཕན་བདེའི་ཆོ་ག་ཉེར་གྲུབ་མཚར། །རང་རིག་ཡོངས་དག་པདྨ་འོད་ཞིང་འདིར། །ཚེ་དབང་རིགས་འཛིན་ངོ་བོར་ལེགས་བཞེངས་ནས། །བཀའ་གཏེར་ནམ་མཁའི་ནོར་བུ་ཁྱབ་བརྡལ་དུ། །འཆར་བར་རྩ་བ་གསུམ་གྱིས་བདེན་བརྗོད་ཅིག །བཅུ་གཉིས་གོ་ལའི་ཁྱིམ་ལམ་ཉི་ཟླའི་འགྲོད། །ཆད་མིན་དེ་བཞིན་ཆོས་སྲིད་ཟུང་འཇུག་དང་། །འབྲེལ་བའི་བཀའ་མཆིད་ཏམྦུ་ར་ཡི་རྒྱུད། །སྙན་པོ་རྣ་བའི་རྒྱན་དུ་ཡང་ཡང་འཁྲོལ། །དར་དཀར་གོས་གྱོན་མཚོན་བྱེད་ཟུར་གསལ་གྱི། །གསར་འགྲོས་གོམ་ལྡན་ལ་ཞོན་བྱ་(༢༥༦བ)
མ་རྟ། །ཨོ་རྒྱན་སྨིན་གྲོལ་ཆོས་ཀྱི་གླིང་ཡངས་པོར། །སོང་སྟེ་དམ་པའི་ཕྱག་སོར་པདྨོར་འཕུལ། །རིག་བྱེད་འཛིན་པ་པོ་འཕྱོང་རྒྱས་ལྐོག་པ་ཕུན་ཚོགས་དབང་པོ་འདུ་བ་འཁྲུགས་པའི་ཚེ་དཔོན་ཚང་དར་མོ་བས་སྨན་དཔྱད་ཀྱི་ནད་གཞིལ་བར་བྱས་སྐབས་སྙན་ངག་གི་འཕྲིན་ཡིག་བསྲིངས་ལན་གདུང་སེལ་ཟླ་བའི་ཆུ་རྒྱུན། ཀི ངྐི ཛ པ པྱེ བ ལཱ ཡ རྦྷ མ ཪྻ སྱ ཧ སྙ ངྒུ ལཱ དྷ རྨ ན མཱ ན ཏྲ བཻ ཎི ཀཿ གཱ བ ལེ ནྡོ མུ ཁ ཤྭ ཏ ཧ དྶཱི ཙ ཏ པྲཱ པ བཱ ཡ སྶ ར པྱ ཧི གོ ཡ ཙྪ ཏུ། སིལ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)ཁྲོལ་གདུ་བུས་འཁོར་ལོའི་ཕྱག་སོར་གྱིས། །ཆོས་ཀུན་གནས་ལུགས་མཐའ་དག་རྒྱུད་མངས་གླུ། །ལེན་པའི་སྨིན་ལེགས་ཟླ་བཞིན་ངང་མོ་དཀར། ཁྱོད་མགྲིན་འོ་མཚོར་སླར་སྤྱོན་ངག་སྩོལ་ཞིག །སྐྱེ་བར་ཚངས་རིས་བག་ཆགས་ཡོངས་སད་མཐུས། །ལྷ་དབང་གྲུབ་པའི་བློ་གྲོས་དར་དྲག་པས། །ཉམས་འགྱུར་ཚིག་དོན་རྒྱ་བོད་སྡེབ་སྦྱོར་ཕྲེང་། །སྤེལ་ལེགས་འཕྲིན་ཡིག་དུ་ཀཱུ་ལ་རྟེན་འབྱོར། །མི་དགེའི་ས་བོན་སྒྲིབ་ལུས་ཞིང་གི་སར། །ཉེར་བཏབ་ཟུག་རྔུའི་རིམ་པ་(༢༥༧ན)
དབྱུང་བའི་ཤུལ། །སྒོ་གསུམ་སིམ་ཆར་འབྲས་དཀར་སྙེ་མའི་བསྐྱེད། །བསྲིངས་པའི་ཆོ་ག་དེང་རྫོགས་རྣ་བའི་དཔྱིད། །བདེན་གཏམ་ཟླ་ཟེར་འཕོག་ལུས་བདེ་དྲོད་ཀྱིས། །རྔུལ་ཆུའི་ཐིགས་འཁྱིལ་ཡིད་དགའི་རྒྱ་མཚོ་ཆེ། །འཕེལ་བའི་ཀུན་རྟོག་ཁྱེའུ་ཆུང་རོ་ནུས་རྗེས། །མཛེས་མར་ཆགས་པའི་བ་སྦུ་ཚེར་ལྟར་རྩུབ། །ལས་ཉོན་གྱིས་འཕངས་རྣམ་སྨིན་ནག་པོའི་དུག །རབ་བྲལ་སྒོ་གསུམ་རྙོག་མེད་དངས་པའི་ཀླུང་། །བདེ་སྐྱིད་ཡན་ལག་བརྒྱད་ལྡན་ལྷ་ཡི་ཆུར། །སྒྱུར་བྱེད་རི་འཕེན་ལེགས་བྱས་ཤིང་རྟས་དྲངས། །ས་འདིར་མཐོ་རིས་སྨན་པ་ཐ་སྐར་སྐྱེས། །མངོན་སུམ་རྒྱུ་ཚེ་ལྟ་ན་སྡུག་པའི་གྲོང་། །མཐོང་བར་ཡུལ་གྱི་བསྐལ་སྙམ་ངལ་བའི་ཁུར། །སངས་པས་སྤྲུལ་ཞིང་གཞན་འཚོལ་རེ་བ་བསྐྱུངས། །མརྒད་ཁུ་བས་རྙེད་བྱུགས་སྤངས་ལྗོངས་མཐའ། ཁོར་ཡུག་ལྗོན་པས་ཡོངས་བསྐོར་སྐྱིད་ཚལ་ན། །བདེར་གནས་བསམ་གཏན་དང་པོའི་ཏིང་འཛིན་གྱིས། །དྲངས་པའི་ཤིན་སྦྱངས་དེས་ཀྱང་བསྒྲུན་དུ་མེད། །རྣོག་ཆུང་ཟས་སྐོམ་ཙམ་གཉེར་ཕྱུགས་འདྲའི་མི། །རིང་པོར་གནས་ལ་བརྩོན་ན་གཙུག་ལག་གཞུང་། །མཐའ་ཀླས་ལྟ་བའི་མིག་ཡངས་མེས་པོའི་རིགས། །བློ་ལྡན་ཁྱོད་སྲོག་འཆི་བ་དོན་ཡོད་སྙམ། །མང་ཐོས་གངྒཱ་མོ་མངལ་སྦྲུམས་པའི་སྲས། །ལེགས་བཤད་འདམ་བུའི་ཚལ་སྐྱེས་གདོང་དྲུག་ལྷ། །གཉིས་པ་རྣམ་དཔྱོད་གར་མཁན་ལ་ཞོན་ཏེ། །ཆེས་རློམ་གླང་པོའི་མཆེ་བ་དབྱུང་བར་བྲེལ། །རྒྱན་མང་བུད་ཤིང་འོ་མ་བུར་སོགས་ཀྱི། ཁྱད་པར་འབྱེད་ལ་སྤོབས་པ་དགེ་བའི་དབང་། །(༢༥༧བ)
ལྕང་ལོའི་ཨུཏྤལ་དོར་ཤུལ་སྙན་ཚིག་གི །སྤེལ་ལེགས་པད་དཀར་ཆུན་པོ་ཐོད་བཅིངས་འདྲ། །བྲྀཏྟ་ཛཱ་ཏི་ངོ་མཚར་རྟོགས་བྱེད་པ། །རིན་ཆེན་འབྱུང་གནས་རླབས་འཕྲེང་ཡོལ་མེད་དབུས། །རྐང་བཞིར་བཅས་པའི་ལྕི་ཡང་ཡིད་བཞིན་ནོར། །བློ་གྲོས་གདེངས་ཀའི་རྩེ་ན་འོད་དུ་འབར། །འདབ་བཟང་དབང་པོ་བཞོན་པར་བྱེད་ནུས་པ། ཁྱབ་འཇུག་སྒྱུ་ཐབས་འཕྲུལ་ལ་མ་སྙེམས་ཤིག །མཐའ་ཀླས་མིང་གི་མངོན་བརྗོད་སྐད་རིགས་ས། །ཤེས་རབ་གོམ་པ་གཅིག་གིས་བཅིངས་འདི་མཚར། །འཁོར་འདས་འཕེལ་འགྲིབ་དང་བྲལ་ཉ་གང་ཟླའི། །གདན་སྟེང་རྣམ་ཀུན་མཆོག་ལྡན་བདེ་སྟོང་གར། །ཡོངས་བསྒྱུར་ཀཱ་ལ་ཙཀྲའི་ཕྱི་ནང་གཞན། །འཇུག་སྒོ་གྲུབ་མཐའི་མཁའ་ཁྱབ་ཁྱོད་བློས་གཞལ། །སྤྱན་སྔ་མངོན་ཤེས་དྲུག་ཆེད་དཀའ་ཐུབ་ཀྱིས། །མ་བསྒྲུབས་ལྐོག་གྱུར་དངོས་སྟོན་མིག་གསུམ་པའི། །གཡུལ་ལས་རྣམ་པར་རྒྱལ་བའི་གཙུག་ལག་གིས། །མཐོ་རིས་སརྦ་ཛྙ་ཡི་སྤུན་ཟླར་བྱས། །བརྒྱད་ཅུའི་སྐོར་མགོ་སྤོར་ཐང་ཁྲ་མོ་རུ། །འགྲོ་འདིའི་བདེ་སྡུག་སོ་སོར་དབྱེ་བའི་རྡེལ། །འཇམ་མགོན་གསུང་གི་བདུད་རྩི་ཁྱོད་སྙིང་དུ། །འཁྱིལ་ན་ཀོང་རྩེ་འཕྲུལ་རྒྱལ་དམིགས་གཞན་མེད། །སྔོན་གོམས་བྲང་སྟེང་རྒྱ་བོད་ཡི་གེའི་རིགས། །ལུས་འགྱུར་བན་སྤྲོད་རྒོད་མ་ཁ་ཡི་མེས། །དྲང་སྲོང་ཨུསྦའི་སྤུན་གང་ཐུ་མི་ལས། །ཆེན་པོ་ཧོར་གྱི་ཡི་གེས་ཁྱད་པར་བྱས། །འདུ་འཁྲུགས་ནད་སེལ་རང་བྱུང་ཁྲུས་ཀྱི་རྫིང་། །རིན་ཆེན་བཅུད་ལེན་སྦྱོར་བས་ཉི་མའི་བུའི། །མེ་ལོང་རིན་མོར་བྱེད་པ་ཤ་བ་རིའི། །མངོན་བྱུང་གཏམ་རྒྱུས་སོམ་ཉི་དེང་དུས་(༢༥༨ན)
བྲལ། །བདེར་གཤེགས་སྙིང་པོ་ལྕགས་ཁམས་ནང་རིག་རྩིས། །བསྒྱུར་བའི་སྒོ་འབྱེད་ཐ་སྙད་ལྡེ་མིག་དང་། །ཡོངས་བྲལ་བླ་མེད་ཡེ་ཤེས་ཀུན་གསལ་མཐའ། །འཇལ་འདོད་མཁས་རློམ་བྱང་བསྟན་ཕུག་པའི་ཉི། །སླད་མར་མང་པོར་ཐོས་ལ་སྤྲོ་དགའི་སེམས། །གཟེངས་སུ་བསྟོད་དང་ཤེས་ལྡན་འཆི་མེད་ཀྱི། །འདུན་སར་ཡངས་པའི་བློ་གྲོས་ཕུར་བུ་ཡི། །རྗེས་སུ་བགྲོད་པའི་གོམས་འགྲོས་ལྷུག་པར་བདེ། །མིང་ཚིག་ལྷ་ལམ་འཕྲིན་ཡིག་ཆུ་འཛིན་སྦུབས། །རྣམ་དག་བརྗོད་པ་དབྱར་གྱི་རྔ་གསང་སྒྲས། །རྣ་བ་བདུད་རྩིའི་མངལ་ཁུར་འཛིན་པའི་མོད། །སེམས་ཀྱི་རྨ་བྱ་ཟློས་གར་ཡང་ཡང་བསྒྱུར། །ལྐོག་མིན་མཐོར་བརྩེགས་བསམ་དོན་ལྷུན་གྲུབ་ལ། །མཐོང་བས་ཀུན་ཡིད་ཡོངས་སྨན་བརྟན་འཕྲོག་པ། །མ་སྨད་ཕུན་ཚོགས་དབང་པོའི་ལག་པད་དུ། །སྙན་འཕྲེང་གསེར་འབྲུག་གིས་འཁྱུད་སྨྱུག་ཤུགས་སྤེལ། །ས་རྟ་གོང་ནས་ཅོ་ནེ་བླ་མ་ནོ་མོ་དགེ་སློང་དང་ཨ་ཞང་ཨ་ར་ཏི་ན་རབ་འབྱམས་ཆོས་རྗེ་གཉིས་མི་སྣར་གནང་བའི་སྐབས་བཀའ་ཤོག་གནང་སྦྱིན་བྱུང་བའི་ལན་འབུལ་བར་སྣར་ཐང་མཁན་པོ་ངག་དབང་བཀྲ་ཤིས་དང་ལྷ་རྗེ་ཐབས་མཁས་གཉིས་རྗོང་བདའ་བྱས་སྐབས་ཕུལ་བའི་ཞུ་ཡིག་མཆོག་ཏུ་དགེ་བའི་གཏམ། ཚེ་རིང་གནམ་གྱི་ཤེ་མོང་གི་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། པ་སངས་ནམ་གྲུའི་འགྲུབ་སྦྱོར་མཆོག་ཏུ་དགེ་བའི་དུས་གནམ་གྱི་ལྷ་མིའི་དབང་ཕྱུག །འཇམ་དབྱངས་གོང་མ་མང་པོས་བཀུར་བའི་རྒྱལ་ཁབ་ཆེན་པོའི་ཕྱོགས་སུ་བོད་ཡུལ་གྱི་ལྟེ་བ་འཇིག་རྟེན་དབང་ཕྱུག་གི་གཙུག་ལག་ཁང་(༢༥༨བ)
དམར་པོ་རི་ནས། ཤཱཀྱའི་སྡོམ་བརྩོན་སྡེ་སྣོད་གསུམ་པས་ཡིད་དང་བའི་སྒོ་ནས་ཁ་ཕྱོགས་ཏེ་བྷུ་མི་བྲཧྨོ་ཏྟ་མརཱ་ཛཀཱ་ལ་སརྦ་དཱ་ཨོ་སྭསྟི་མངྒལ་བྷ་ཨནྟུ་ཞེས་ལེགས་སྦྱར་གྱི་སྒྲ་ལས་དྲངས་ཏེ་སའི་ཚངས་པ། གོང་མ་རྒྱལ་པོ་དུས་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག །ཅེས་ཤིས་པ་བརྗོད་པའི་ཚིག་གི་འཕྲེང་བ་སྔོན་དུ་འགྲོ་བས་མེ་ཏོག་འཐོར་ཞིང་དྲི་ཞིམ་པོའི་སྤོས་བསྲེགས་ལག་པའི་པདྨ་ཟུམ་སྟེ་གུས་པས་གསོལ་བ། དུས་གསུམ་གྱི་རྒྱལ་བ་སྲས་དང་བཅས་པ་རྣམས་མཐའ་ཀླས་པའི་སྐྱེ་རྒུའི་དོན་དུ་ཚངས་པར་སྤྱོད་པ་པོ། །མཁས་པ་པཎྜི་ཏ་ས་ལ་གནས་པའི་གྲུབ་ཐོབ་རྣལ་འབྱོར་སྤྱོད་པ་གླིང་གཅིག་ནས་བཞིའི་བར་དུ་དབང་སྒྱུར་བའི་འཁོར་ལོས་སྒྱུར་པའི་རྒྱལ་པོ། ཁམས་ཀྱི་རྒྱལ་ཕྲན། མདུན་ན་འདྲེན། ཁྱིམ་བདག །འགྲོ་བ་དམན་པ། གྲུ་རྫིངས། ཟམ་པ། ཆུ་མཚོ་རིན་པོ་ཆེ་སོགས་སྤྲུལ་པ་སྣ་ཚོགས་སུ་སྟོན་པར་གསུང་རབ་རིན་པོ་ཆེ་ལས་བཤད་ཅིང་། ཁྱད་པར་བྱང་ཆུབ་སེམས་དཔའ་གཞན་དོན་དུ་འཁོར་ལོས་སྒྱུར་བའི་རྒྱལ་པོའི་སྲིད་པ་འཛིན་པར་གསུངས་པས་རྩོད་པའི་དུས་འདིར་སྟོབས་ཀྱི་འཁོར་ལོས་སྒྱུར་བའི་མིའི་བདག་པོ་གང་ངེས་པའི་དོན་དུ། འཕགས་མཆོག་འཇམ་པའི་དབྱངས་ལུས་ཅན་ཀུན་གྱི་མགོན་དང་སྐྱབས་དང་གླིང་དང་དཔུང་གཞན་དུ་བྱོན་པར་གོར་མ་ཆག་མོད། འོན་ཀྱང་སྙིགས་མར་སྤྱོད་པའི་སེམས་ཅན་མ་དག་པ་རྣམས་ཀྱི་ངོར་ཡང་གྲངས་མེད་པའི་བསྐལ་པ་ནས་བསོད་ནམས་ཀྱི་ཚོགས་ཀྱིས་བསྐྲུན་པའི། སྐུ་རིན་པོ་ཆེ་བརྒྱ་ཕྲག་ཉི་མའི་དཀྱིལ་འཁོར་གཅིག་ཏུ་སྤུངས་པ་(༢༥༩ན)
ལྟར་གཟི་མདངས་ལྷག་པར་རྒྱས་ཤིང་། དྲི་ཟའི་རྒྱུད་མངས་སྟོང་གིས་བསྒྲུན་པར་མི་ནུས་པའི་གསུང་གིས་མཆོག་དམན་བར་པའི་ཡིད་ཅན་མཐའ་དག་ཚར་གཅོད་རྗེས་འཛིན་སོགས་གང་འཚམ་གྱི་སྒོ་ནས་ཡིད་བདེ་བའི་ཚོར་བ་ཉམས་སུ་མྱོང་། འཇིག་རྟེན་གྱི་རྒན་པོ་བློ་གློས་ཀྱི་རྩལ་དང་ལྡན་པ་རྣམས་ཀྱིས་ལན་བརྒྱར་བསམས་ཀྱང་ཡིད་ཀྱི་ཡུལ་དུ་འཆར་བར་དཀའ་བ་གཙུག་ལག་བྱེ་བའི་ཕྲ་རགས་ཐམས་ཅད་མངོན་སུམ་མཁྱེན་པས་འཇིག་རྟེན་གྱི་མེས་པོ་ཚངས་པའི་བློ་གྲོས་ལ་འགྲན་པའི་ཐུགས་ཀྱི་དཀྱིལ་འཁོར་གཡོ་བ་མེད་པ་སྐུ་གསུང་ཐུགས་རྡོ་རྗེ་ལྟ་བུར་བརྟན་པ་ནས། བཀའ་ཤོག་རིན་པོ་ཆེ་རྐེད་དཀྲིས་ལ་གསེར་བྱུགས་པའི་དངུལ་སྲང་དྲུག་ཅུའི་མདོང་མོ་གཅིག །གོས་ཆེན་དཔུས་ལེགས་ཡུག་ཉི་ཤུ་རྩ་བཞི། ཁ་བཏགས་ཆེ་བ་ལྔ་དང་ཆུང་བ་བཞི་བཅུ། ཤེལ་དམ་གཅིག་དང་ཕོར་པ་གཉིས་བཅས་ནོ་མོ་གོན་དགེ་སློང་དང་ཨེར་ཏེ་ན་རབ་འབྱམས་པ་གཉིས་ཀྱིས་ཁྱེར་ནས་སུག་པར་སྤྲད་པ་གསེར་ཞལ་དངོས་སུ་མཐོང་བ་ལྟ་བུའི་ཡིད་ལ་སྤྲོ་དགའ་ཅི་ཡང་བརྟས། འདི་ནའང་སྟོན་པ་ཐུགས་རྗེ་ཆེན་པོ་དང་ལྡན་པ་ཤཱཀྱ་སེང་གེའི་ཞི་བདེ་དོན་དུ་གཉེར་བའི་གདུལ་བྱ་རྣམས་ལ་བཀའ་དང་པོ་བདེན་བཞིའི་ཆོས་འཁོར་སོགས་ཉན་ཐོས་དང་རྗེས་སུ་འབྲེལ་བའི་སྡེ་སྣོད། སེམས་ཅན་ཐམས་ཅད་མར་ཤེས་པས་འགྲོ་བ་གཅིག་གི་དོན་དུའང་རང་བདེ་འདོར་བར་ནུས་པ་རླབས་ཆེན་གྱི་སྤྱོད་པ་ལ་དགའ་བ་རྣམས་ཀྱི་ཆེད་དུ་བྱང་ཆུབ་སེམས་དཔའི་སྡེ་སྣོད། མྱུར་དུ་སངས་རྒྱས་འཐོབ་(༢༥༩བ)
པར་འདོད་པའི་དབང་པོ་རྣོན་པོ་རྣམས་ལ་གསང་སྔགས་ཀྱི་ཐེག་པ་སོགས་བཀའ་སྩལ་བའི་ཚུལ་ལ་ཡིད་ཀྱིས་མོས་པ་ཐོབ་སྟེ། བསྟན་ལ་ཞུགས་ཤིང་བསྟན་པ་ཐམས་ཅད་འགལ་མེད་དུ་ཉམས་སུ་ལེན་པར་མོས་བློ་ཙམ་ཐོབ་པའི་ཤཱཀྱའི་བཙུན་པའང་འགྲོ་ལ་ལྷག་པའི་བསམ་པ་དཀར་ཞིང་སྤྱི་བོ་གནམ་བསྟན་གྱི་རྒྱལ་པོ་གང་གི་བཀའ་དྲིན་ལས་གཞན་འཚེ་མེད་པར་བདེ་བར་གནས་ལགས། ད་ལམ་རྒྱལ་པོ་ཆེན་པོར་འཚམ་འདྲི་ཞུ་བར་དཔལ་སྣར་ཐང་ཆོས་སྡེ་ཆེན་པོའི་མཁན་ཆེན་ངག་དབང་བཀྲ་ཤིས་དང་། གསོ་རིག་འཛིན་པ་ངག་དབང་ཐབས་མཁས་གཉིས་རྫོང་བདའ་བགྱིས་པ་གསེར་གྱི་ཐེམ་པ་བརྫིས་ནས་གསེར་ཞལ་མངོན་སུམ་དུ་མཐོང་ཞིང་དགྱེས་པའི་འཛུམ་ཞལ་ལྷུག་པར་བསྟན་པའི་བཀའ་མཆིད་བཟང་པོ་ཆུ་བོའི་རྒྱུན་བཞིན་ཞུ་ཞུ། ཞུ་ཡིག་རྟེན་བཀྲས་བཏགས། ཤལ་དཀར་དམར། མུ་མེན་གྱི་འཕྲེང་བ། སྣམ་ཕྲུག་སོགས་ཐོ་ཟུར་གསལ་ལ་རྟགས་ཀྱི་ལང་ཚོ་བཀྲ་བར་ས་ཕོ་རྟའི་ལོ་ཧོར་ཟླ་བཅུ་གཅིག་པའི་གྲལ་ཚེས་དགེ་བར་བོད་ཡུལ་གྱི་རྡོ་རྗེ་གདན་ལྷ་ལྡན་སྤྲུལ་པའི་གཞལ་མེད་ཁང་དང་ཟུང་དུ་འབྲེལ་བ་རང་བྱུང་འཕགས་པའི་གཙུག་ལག་ཁང་དམར་པོ་རི་ནས་གུས་པས་ཕུལ་བ་དགེ་ལེགས་སུ་གྱུར་ཅིག །