རབ་བྱུང་བཅུ་གཅིག་པའི་ལྕགས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག
རབ་བྱུང་བཅུ་གཅིག་པའི་ལྕགས་སྤྲེལ་ལོར་བྲིས་པའི་ཆབ་ཤོག་འཕྲིན་ཡིག་ཁག །ལྕགས་སྤྲེལ་ལོ་གསར་(༢༦༩བ)
གྱི་ཚེ་སྡིངས་པོ་ཆེ་སྤྲུལ་སྐུའི་འཕྲིན་ལན་ཤེལ་དཀར་ཚོན་རིས། སུ ཀྲྀ དྭི སྟ རཱ ནྟཱ བྷི མཱ བིན དྷྱ མ དྷྱེ བི ཅཱ རོ ར གམྱ སྱ སཽ མཱུ རྡྷ ཛི ཧྭཿ སུ སཱ མཱ ཤྭ སེ རྴ བྡེ གརྫི ཤྩ སཱ མ ནྱ ལེ ཁཱ བྷི མཱ ཎྱོ དྱ ཏ ཎྱ ཏ ཡུ ཀྟཾ། ལེགས་(སྡེབ་སྦྱོར་མཉམ་པའི་བྲྀཏྟ་ལས་ལག་འགྲོ་ལྟུང་བ།)བྱས་གཏིང་མཐའ་མི་མངོན་ཆུ་གཏེར་དབུས། །རྣམ་དཔྱོད་ལྟོ་འགྲོའི་གདེངས་ཁ་མཛེས་པའི་ལྕེ། །སྙན་ཚིག་ཕུཊ་སྒྲ་སྒྲོག་དང་ཆབས་ཅིག་པར། །འཕྲིན་རྟེན་ནོར་བུ་དངོམ་འོད་དེང་འདིར་སོན། ཁ་བའི་རྡུལ་བརྩེགས་གོས་ཀླུབས་མརྐ་ཊ། །སུམ་ལྡན་ཁམས་ཀྱི་བགྲང་བྱའི་ཟླ་བཞིན་ངོས། །རྣམ་གསུམ་འཁོར་ལོའི་རི་དྭགས་གཟུགས་ཤར་བ། །ལངྐའི་ཕོ་བྲང་རྩིག་པར་འགྲན་གྱིས་དོགས། །གཞོམ་བྲལ་ཆོས་སྐུའི་ཀློང་དུ་སྐྱེ་རྒ་དང་། །ན་འཆི་དམིགས་སུ་མེད་ཀྱང་བྲོ་འཚལ་དིང་། །སྤྲིན་བྲལ་ཉི་ཟེར་ལྷོ་བྱང་ཕུག་པ་རུ། །འཆར་ལ་སེམས་མེད་ས་གཞི་དགོད་པས་འདར། །འདི་ན་མདོ་རྒྱུད་ཐ་སྙད་བཀྲག་པོ་ཆེས། །བྱིས་ཡིད་འདྲིད་པས་དྲུག་ཅུ་བརྒལ་ལོའི་མཐར། ཁྲིད་(༢༧༠ན)
བདག་དོན་མེད་ལོག་ལམ་མ་འཕྱན་པར། །ཐོས་བསམ་ལང་ཚོ་དར་བར་རང་བློ་བདེ། །དཀར་འཇམ་ཤོག་བུའི་པད་ཕོར་སྣོད་ཡངས་པོར། །ཤིས་བརྗོད་ཚིག་ཕྲེང་མེ་ཏོག་ཕྱུར་བུ་རུ། །ཉེར་སྤུངས་མགྲིན་པའི་སོར་རྩེས་འཐོར་བ་ལ། །མེས་པོའི་རིགས་བརྒྱུད་ཁྱོད་སྨིན་གང་གིས་འཛིན། །གསེར་རིའི་སྦུབས་ནས་ཉི་ཟླ་ཆད་མེད་དུ། །འཆར་བས་འདབ་མ་བཞད་འདོད་བ་ཀུ་ལ། །སྒུགས་སྡོད་སྙིང་ཐག་སྲིད་པའི་ཕ་མཐའ་རུ། །རྫོགས་མིན་ཚུལ་དེར་པད་དཀར་ས་མོས་འཛུམ། །རིག་བྱེད་རྫུན་གྱི་གདོང་བཞི་ལྡན་མང་ཡང་། །ངེས་དོན་ཟག་བཅས་མལ་དུ་སེམས་གནས་ལ། །བསྐལ་བརྒྱར་གཉིད་གཡུར་སྔོན་མེད་བྲཧྨ་ཎཿ། །གླིང་རས་བསྟན་པར་གཅིག་ཤར་རྀ་ཥིའི་སྤུན། །རྣམ་འདྲེན་མོས་པ་རབ་བྱོན་དགའ་སྟོན་པར། །གནམ་ལོའི་ཐོག་མར་སྭསྟི་བྷ་ཝནྟུའི། །སྙན་པོར་གཏམ་གྱི་པི་ཝཾ་རྣ་བའི་བཅུད། །འཕྲོག་བྱེད་ཞབས་བསིལ་བཞིན་དུ་རྟག་སྦྲེངས་ཤིག །ནམ་མཁའི་ངོ་བོ་ཉེར་སྟོང་ལི་ཁི་ཏ། །ལྷ་རྫས་ཁ་རྫར་ཅན་གྱི་སྟེང་བཞག་ནས། །རིག་པའི་འབྱུང་གནས་གཡོ་རུ་གྲ་ནང་དུ། །དབྱངས་ཀྱི་རྒྱལ་པོ་ཨུ་ཡིག་ཤར་ཚེ་སྤེལ། །ལྕགས་སྤྲེའི་ལོ་སྟོབས་ཀྱིས་འཁོར་ལོས་སྒྱུར་བ་འཇམ་དབྱངས་གོང་མ་རྒྱལ་པོའི་ཡན་ལག་བཞི་པའི་དཔུང་གི་ཁ་ལོ་བསྒྱུར་བ་ཙམ་གྱིས་ལོག་པར་འཁུ་བའི་རྐུན་མཐུ་སན་གུ་སྡེ་བཅས་མིང་གི་ལྷག་མར་གྱུར་བའི་ཚེ་ལེགས་སྐྱེས་འབུལ་བའི་ཐོག་མར་བཀྲ་ཤིས་པའི་གླུ་དབྱངས་སྔོན་འགྲོའི་ཞུ་ཡིག་དང་བཅས་བསམ་བློ་རབ་འབྱམས་པ་ཚུལ་ཁྲིམས་རྣམ་རྒྱལ་དང་བློ་བཟང་ཚེ་རིང་མངགས་སྐབས་ཕུལ་བའི་ཞུ་ཡིག་ཕྱོགས་ཐམས་ཅད་ལས་རྣམ་པར་རྒྱལ་བའི་གཏམ་སྙན། །ཚེ་རིང་གནམ་གྱི་ཤེ་(༢༧༠བ)
མོང་གི་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། དབྱར་དུས་ཀྱི་ཆར་རྒྱུན་ཟད་མི་ཤེས་པས་འཛིན་མའི་ཁོར་ཡུག་མཐའ་དག་ཉེ་བར་བརླན་ཏེ་ཕྲ་མོའི་རྡུལ་ཙམ་ཡང་ལྡང་བ་མེད་པའི་སྟོན་གྱི་དགའ་སྟོན་ལ་བབ་པའི་ཆུ་ཤེལ་དབང་པོའི་དཀྱིལ་འཁོར་ལྟར་དཀར་བ་གསལ་བའི་དགའ་སྤྲོའི་ཡིད་ཀྱིས་ཀུན་ནས་བླངས་ཏེ་དབང་པོའི་ཕྱོགས་དེར་འདུད་དེ་བདུག་སྤོས་འབུལ་ཞིང་མེ་ཏོག་འཐོར་བ་དང་བཅས་ཡོངས་ལ་སྔོན་འགྲོ་འགོག་མེད་དུ་བྱེད་པའི་ཆོ་ག་བསྟར་ཏེ་གསོལ་བ། གཟོད་མ་ཉིད་ནས་བསོད་ནམས་དང་ཡེ་ཤེས་ཀྱི་ཚོགས་བགྲང་དུ་མེད་པ་འདུ་བགྱིས་པའི་རྒྱལ་བའི་སྲས་པོ་འཇམ་མགོན་ཟུར་ཕུད་ལྔ་པ་གདུལ་དཀའི་སེམས་ཅན་རྣམས་རྗེས་སུ་ཆགས་པའི་བརྩེ་བ་དང་། སྙིང་སྟོབས་ཕུལ་དུ་བྱེད་པའི་སྨོན་ལམ་གྱིས་མངོན་པར་བསྐུལ་ཏེ་ཐུགས་རྗེ་དང་འཕྲིན་ལས་ཀྱི་འཇུག་པ་དུས་ལས་མི་ཡོལ་བར་གནམ་ཀ་བ་མེད་པའི་མཐོངས་ནས་བབས་ཏེ་འཛམ་གླིང་ཡོངས་ཀྱི་ལྷ་གཅིག་པོར་མང་པོས་བཀུར་བའི་རྒྱལ་ཁམས་གསེར་འབྲུག་སྡེར་མོ་ལྔ་པས་བཏེག་པའི་ཁྲི་ཆེན་པོར་ཞབས་ཟུང་གི་པདྨ་རྣམ་པར་བཀོད་དེ་མཐའ་ཀླས་པའི་གཙུག་ལག་དང་སྒྱུ་རྩལ་གྱི་ཚུལ་ལ་བྱང་བའི་བློ་གྲོས་ཀྱི་མཐུ་དང་། རྒྱལ་པོའི་རིགས་ཀྱི་ཆེ་བས་ཉི་འོག་གི་དྲེགས་ལྡན་མཐའ་དག་ཟིལ་གྱིས་གནོན་པ་རྡོ་རྗེ་རིན་པོ་ཆེའི་རྒྱན་ཁྱད་པར་དུ་གྱུར་པའམ། ཡིད་བཞིན་དབང་གི་རྒྱལ་པོ་ལྟར་སྲིད་ཞིའི་ལེགས་ཚོགས་ཀུན་གྱི་འདོད་འཇོར་བཞུགས་པ་ནི་དངོས་པོའི་གཤིགས་ལུགས་ཉིད་ལས་གཞན་དུ་ཅི། འདི་ནའང་ལུས་ཅན་མཐའ་དག་གི་མགོན་དང་། སྐྱབས་དང་(༢༧༡ན)
གླིང་དང་། དཔུང་གཉེན་དམ་པར་གྱུར་པ་འདྲེན་པ་མཉམ་མེད་ཤཱཀྱ་སེང་གེའི་བསྟན་པ་རིན་པོ་ཆེ་བླ་ནས་བླར་འདེགས་པའི་ཁུར་ཕྲག་པར་བླངས་པའི་གྲིབ་བསིལ་དུ་རྒྱུད་ལྔའི་ཡིད་ཅན་རྣམས་ངལ་གསོ་བར་སྨོན་པའི་ལྷག་བསམ་དཀར་བར་གནས། ཉེ་ལམ་ཆེད་དུ་འབུལ་བའི་སྙིང་པོ་གནམ་དང་སའི་དཀྱིལ་འཁོར་ཀུན་ལ་དབང་ཕྱུག་པས་སྲིད་ཞིའི་བྱེད་པོ་ཚངས་པ་མིའི་གཟུགས་སུ་རྣམ་པར་རོལ་བར་འབངས་ཕྲ་མོས་རྒོལ་བའི་ཀླན་ཀའི་སྐབས་ཅི་མཆིས་ཀྱང་། བར་སྐབས་སུ་མ་ཧཱ་ཙི་ནའི་ལྷོ་ཕྱོགས་ཀྱི་ཡུལ་གྲུ་འགའ་ཞིག་ཏུ་བསོད་ནམས་མ་ཡིན་པའི་འབྲས་བུར་འུ་སན་གུའི་ངན་གཡོའི་འཁྲུལ་འཁོར་བརྩམས་པ་ཉི་མའི་འོད་དང་སྲིན་བུ་མེ་ཁྱེར་བཞིན་དུ་སཱུ་ཅིང་བཅུ་གསུམ་གྱི་ཡུལ་ཀུན་ཏུ་བཀྲ་ཤིས་དང་བདེ་ལེགས་སུ་གྱུར་པའི་གཏམ་རྣ་བའི་བཅུད་ལེན་དུ་སོན་པར་བརྟེན། གཙུག་ལག་བྱེ་བའི་སྒོ་འཕར་འབྱེད་པའི་མདུན་ས་ཆེན་པོར་ལེགས་སྐྱེས་ཀྱི་བདོག་པ་ཁྲ་ཤར་འབུལ་བར་བསམ་བློ་རབ་འབྱམས་པ་ཚུལ་ཁྲིམས་རྣམ་རྒྱལ་དང་བློ་བཟང་ཚེ་རིང་གཉིས་རྫོང་བདའ་ཞུས་པར། ལྷ་མིག་དག་པའི་སྤྱན་རས་ཀྱིས་ཉེ་བར་བཅའ་བའི་བསླབ་སྟོན་ཕེབས་ཚོགས་ཆུ་ཀླུང་ཆེན་པོའི་རྒྱུན་ལྟར་ཞུ། དྲག་པོ་ཞེས་པ་ལྕགས་ཕོ་སྤྲེའུ་ལོ་ཧོར་གྱི་ཟླ་བ་ལྔ་པའི་གྲལ་ཚེས་དགེ་བར་རང་བྱུང་འཕགས་པའི་གཞལ་མེད་ཁང་དམར་པོ་རི་ནས་ཕུལ་བའི་ཞུ་ཡིག །མས་དྲོ་ཆུ་བཟང་ནས་རིགས་འཛིན་དཀོན་ཅོག་ལྷུན་གྲུབ་ཀྱིས་བྲིས་ཐད་བཞེངས་པའི་གསེར་རིས་ཀྱི་མཐུན་རྐྱེན་དགོས་ཚུལ་གྱི་འཕྲིན་ལན་ཐེག་མཆོག་རྩེ་མོར་སོན་པའི་རྒྱལ་རྔ། (༢༧༡བ)
མུ ནྱ གཾ དེ ཤ ནཱ ཤྭཱ ཀ བྷཱ བེ ཀ དེ ཝོ ཙ ཀཻ ལཱ ཤ ཀུ བྫེ གྲི ཝོ ནི རྨ ཎ༔མ དྷ ཙོ ནྨ ན ཙི ཏྟ སྱ པུ ཏྲཱ གྲ གཏྱཱ གར ཏྣཱ ནཾ རཱ བྷོ གབི དྱཱ དྷ ར། ཐུབ་(སྡེབ་སྦྱོར་མཉམ་པའི་པྲྀཏྟ་ལས་མེ་ཏོག་འཕྲེང་ཅན།)པས་ལུང་བསྟན་ཨ་ཤྭ་ཀ་ཡི་སྲིད། །གངས་ཅན་ལྷ་གཅིག་མཇིང་ཡོན་སྤྲུལ་པའི་གར། །དབུར་སྨྱོན་ཐུགས་སྲས་ལུང་རྟོགས་རྩེར་སོན་པ། །རིག་སྔགས་འཆང་བ་དཀོན་ཅོག་ལྷུན་གྲུབ་ཉིད། །དབུ་རུ་མཚན་མོའི་སྨག་རུམ་ཉེར་ལེན་ཟླ། །འཕེལ་འགྲིབ་ཟད་བྲལ་བདེ་བའི་ཆ་གང་ཞིང་། །རྣམ་གསུམ་འཁོར་ལོའི་འོད་དཀར་སྤྲོ་བ་ནས། །བློ་ལྡན་ཀུན་ད་བཞད་གཏམ་སྙན་པོར་བཅས། །དཎྜིའི་གཞུང་དངོས་ལྷ་པའི་དོན་གྱི་རྒྱན། །ཉམས་འགྱུར་རྒྱུད་དུ་དྲངས་པ་འཕྲིན་ཡིག་གི །རྟེན་བཟང་འཁོར་ལོ་གཉིས་ལྡན་སུ་ཝརྞ། །རྒྱ་ཡི་ལང་ཚོ་ངོམ་ཞིང་སོན་པས་སྤྲོ། །ན་རྒན་བྱིས་ཡིད་འཁྲུལ་སྣང་བཀྲག་པོ་ཆེས། །ཆོས་སྡེ་ཆེ་ཟུང་འདུན་སར་ཉེར་འཁྲིད་པར། །གཞན་ཕན་རློམ་པའི་(༢༧༢ན)
ངང་ནས་རྒྱལ་ཁབ་ཆེའི། །རང་གནས་ཁང་བུར་གཡེང་བའི་གཟེབ་ཏུ་ཚུད། །ཐ་སྙད་མདོ་རྒྱུད་སྤྲོས་པ་དབང་གཞུ་ལ། །བདེན་ཞེན་བྱིས་པའི་སྦར་མོ་མི་གདེང་བར། །ཕུང་པོ་འཇའ་ལུས་སྐུར་གྲོལ་རྫོགས་པ་ཆེའི། །བདུད་རྩིས་མྱོས་པའི་ལྷ་དེ་ཁྱོད་མིན་སུ། །ཡེ་དག་ཆོས་སྐུ་དམིགས་མེད་སྟོང་ཆེན་དབྱིངས། །ལྷུན་གྲུབ་མ་འགགས་གདངས་ཤར་གར་དགུའི་ཉམས། །རྣམ་རོལ་འཁོར་འདས་ཕྱག་རྒྱ་མ་ལུས་པ། །ཟིལ་གནོན་གྲུབ་པའི་རྣལ་འབྱོར་ཁྱོད་མཐར་ཕྱིན། །དྲང་སྲོང་དམོད་པའི་རྩེ་བརྒྱ་རབ་གདེངས་མོད། །བདུད་རིགས་ལྷ་མིན་མོའི་མངལ་ཅིག་ཅར་དུ། །ལྷུང་བའི་རྣམ་དཔྱོད་མིག་སྟོང་ལྡན་པ་གང་། །ཆུ་བཟང་རི་བོར་གནས་ཞེས་ལྷ་རྣམས་གླེང་། །ཏིང་འཛིན་སྔགས་རྒྱ་རྫས་ཀྱི་འཕྲུལ་པོ་ཆེའི། །སྒྱུ་མའི་རྟ་གླང་མེད་བཞིན་སྲོག་ཕྲལ་ལྟར། །ཆོས་ཀུན་སེམས་ཉིད་གཅིག་པུར་ངོ་འཕྲོད་ཚེ། །སྲིད་ཞིའི་བདེ་སྡུག་འཕྲུལ་སྣང་བག་ལ་ཞ། །དེ་འདྲ་བླ་མའི་དྲིན་གྱི་གོ་ཡུལ་ཙམ། །མཁས་ཁྱེད་སྙན་གྱི་བུ་རམ་མངར་ཆེད་ལས། །རྒྱུད་ཐོག་མ་སྨིན་རང་གི་ངང་ཚུལ་ལ། ཁྲེལ་ཡང་ད་དུང་ནེ་ཙོའི་སྨྲ་བར་ཟད། །སྙིང་དབུས་རིག་རྩལ་ཉི་ཟེར་ཆུ་སྒྲོན་སྒོར། །ཐོན་པར་ཞི་ཁྲོའི་སྐུ་གཟུགས་འབྱམས་ཀླས་ཀྱང་། །རས་བྲིས་སྣང་བརྙན་གཟིགས་མོར་གཡེངས་པའི་དཀྱུས། །རིང་པོར་བསོད་ནམས་ཚོགས་མཐར་རྫོགས་མིན་མཚར། །གསེར་སྦྱངས་ཞུན་མས་བཀྲག་མདངས་སྤེལ་བའི་རྒྱུར། །ཞོ་འཁོར་དོ་དང་བསྐུལ་རྟེན་ས་ལེ་སྦྲམ། །རིག་བྱེད་བཟོ་བོའི་གླ་ཡོན་མཐུན་རྐྱེན་དུ། །མཚམས་སྤྲིན་རྒྱ་ཡིས་ལང་ཚོས་མངོན་པར་འབྱུང་། (༢༧༢བ)
། གངྒཱའི་ཡབ་གཅིག་གཙུག་ཏོར་རྩེ་མོ་ལས། །ཆུ་ཀླུང་བུ་མོ་སྙན་འཇེབས་གླུ་ལེན་པ། །ཚད་མེད་དངོས་པོའི་གཤིས་བཞིན་ཁྱོད་མགྲིན་ནས། །ལེགས་བཤད་གཏམ་གྱི་རྒྱུད་མངས་རྟག་འཁྲོལ་ཞིག །འཕྲིན་ཡིག་གཞན་གསོས་དབྱངས་ཀྱིས་བོས་པའི་མགྲོན། །ལྷ་རྫས་ཁ་ཚར་གཡོ་བའི་གོས་དཀར་ཅན། །དཔྱིད་ཀྱི་རྒྱལ་མོ་དབུ་རུའི་གསེར་ལྡན་ཆར། །གོམ་སྟབས་བསྐྱོད་ནས་རིག་འཛིན་འདུན་སར་སོང་། །ལྕགས་སྤྲེའི་ལོ་གོང་ནས་བཀའ་ཤོག་གནང་སྦྱིན་གྱ་ནོམ་པ་དང་བཅས་སྩལ་བའི་ཞུ་ལན་འབུལ་བར་ཤར་པ་ཆོས་རྗེ་དང་བསམ་གྲུབ་སྒང་པ་ངག་དབང་དཔལ་བཟང་བཏང་བའི་དུས་ཕུལ་བའི་ཞུ་ཡིག་སྐྱེ་རྒུའི་བསོད་ནམས་འཁོར་ལོ། ཚེ་རིང་གནམ་གྱི་ཤེ་མོང་གི་སྟོབས་ཀྱི་འཁོར་ལོས་སྒྱུར་བ་གནམ་སའི་དབང་ཕྱུག་འཇམ་དབྱངས་གོང་མ་རྒྱལ་པོའི་དྲུང་དུ། ཛམ་བུ་པྲྀཀྵའི་ལྗོན་པས་མཚན་པའི་གླིང་ཆེན་པོའི་དབུས་ན་མངོན་པར་མཐོ་ཞིང་བརྗིད་པ་མང་པོས་བཀུར་བའི་རྒྱལ་ཁབ་ཕོ་བྲང་ཆེན་པོ་པི་ཅིང་གི་གསེར་གྱི་ཁྲི་འཕང་མཐོན་པོར་ཞབས་ཟུང་གི་པདྨ་མངོན་པར་བཀོད་པ་ལྟ་བུ་ལ། ལྷའི་ལྷ་མིའི་དབང་ཕྱུག་དཔལ་ལྡན་འཇམ་དབྱངས་གོང་མ་ཆེན་པོ་ག་ལ་བའི་ཕྱོགས་དེར་སྡོམ་བརྩོན་སྡེ་སྣོད་གསུམ་པ་གང་གིས་ལུས་རབ་ཏུ་བཏུད་དེ་དྲི་ཞིམ་པོའི་བདུག་སྤོས་འཐུལ་ཞིང་མེ་ཏོག་གཏོར་ནས་གནམ་དང་ས་ཀུན་གྱི་ཁྱོན་ལ་དབང་ཕྱུག་པའི་འཁོར་ལོས་སྒྱུར་བའི་རྒྱལ་པོ་ཆེན་པོ་སྐུ་ཚེ་ཉི་ཟླ་དང་མཉམ་ཞིང་རིགས་བརྒྱུད་ཆབ་འབངས་དབྱར་གྱི་ཆུ་གཏེར་ལྟ་བུར་འཕེལ་བའི་བཀྲ་ཤིས་དགེ་མཚན་གྱིས་དུས་ཀུན་ཏུ་ཁྱབ་པར་གྱུར་ཅིག་ཅེས་ཤིས་པ་བརྗོད་པའི་ཚིག་སྔོན་དུ་བཏང་སྟེ་ཞུ་བ། གྲངས་(༢༧༣ན)
མེད་པའི་བསྐལ་པ་ནས་ལེགས་བྱས་ཀྱི་ཚོགས་རླབས་པོ་ཆེ་ཚངས་པའི་ཡུལ་ས་ལས་ཀྱང་བརྒལ་བར་ནུས་པའི་ཕུང་པོ་བླ་ནས་བླར་འཕྱུར་བའི་རྒྱུ་དང་འཛམ་གླིང་སྐྱེ་རྒུའི་བསོད་ནམས་ཀྱི་མགོན་སྐྱབས་གླིང་དང་དཔུང་གཉེན་དུ་འཕགས་ཆེན་དམ་པའི་ཐུགས་བསྐྱེད་ཀྱི་སྨོན་ལམ་བཟང་པའི་རྐྱེན་ལ་བརྟེན་ནས་ལྷུན་གྱིས་གྲུབ་པའི་སྐུ་རིན་པོ་ཆེར་བརྒྱ་ཕྲག་ཉི་མའི་གཟི་བྱིན་འཕྲོག་པར་ནུས་པ་ལྷང་ངེ་ལྷན་ནེ་ལྷམ་མེར་གསལ། ཆ་ལུགས་སྤྱོད་ལམ་སྐད་རིགས་མི་གཅིག་པའི་འགྲོ་བ་རྣམས་ཀྱི་ཁམས་དང་མཐུན་པར་རབ་སྙན་གསུང་གི་རྒྱུད་མངས་ཚངས་པའི་དབྱངས་ལྟར་འཇེབས། རྡོ་རྗེ་རིན་པོ་ཆེ་ཕྲ་མོས་ཀྱང་རིན་པོ་ཆེའི་རྒྱན་ཕལ་པ་ཐམས་ཅད་ཟིལ་གྱིས་གནོན་པ་ལྟར་རྒྱལ་པོའི་བུ་ན་ཚོད་ཆུང་ངུས་ཀྱང་བློན་པོའི་ཚོགས་རྣམས་ཟིལ་གྱིས་གནོན་ན་ན་ཚོད་དར་ལ་བབ་པའི་བློ་གྲོས་ཚངས་པ་རྒན་པོའི་ངང་ཚུལ་ལྟ་བུར་འཛིན་པའི་མཁྱེན་པ་གཙུག་ལག་རྒྱ་མཚོར་འཇུག་པའི་གསང་གསུམ་རྒྱན་གྱི་འཁོར་ལོ་གཡུང་དྲུང་གི་རང་བཞིན་དུ་བརྟན་པར་བཞུགས་པ་ནས་གསེར་གྱི་ཞལ་སྒོ་ནས་ཉེ་བར་ཐོན་པའི་ལུང་བཟང་པོའི་བཀའ་ཤོག་གནང་སྦྱིན་གྱ་ནོམ་པ་དང་ཚེ་རིང་གནམ་གྱི་ཤེ་མོང་གི་བཀའ་རྟགས་པདྨ་ར་གའི་གཟི་འོད་འབར་བ་ཉམས་མེད་དུ་མཆོད་རྟེན་བླ་མ་བསྟན་འཛིན་དགེ་སློང་དང་ཕྱག་ན་རྡོ་རྗེ་གཉིས་ལ་གནང་བ་སུག་པར་སོན་པས་གསེར་ཞལ་དངོས་སུ་མཐོང་བ་ལྟ་བུའི་དགའ་བདེ་དྲང་སྲོང་བསམ་གཏན་གསུམ་པའི་ངང་ཚུལ་ལ་འགྲན་པར་གྱུར། འདིར་གནས་དགེ་སྦྱོང་རྒན་པོའང་འཕེལ་འགྲིབ་ཟད་པའི་མཐའ་དང་བྲལ་བའི་(༢༧༣བ)
འདུ་ཕུང་སིམ་པའི་ཚོར་བ་མྱོང་ཞིང་། ཆེར་སྙིགས་གདུལ་དཀའི་འགྲོ་བ་འདུལ་བར་ཐུགས་རྗེའི་མཐུ་དཔུང་ལྷག་པར་ཆེ་བ་བསྐལ་བཟང་རྣམ་འདྲེན་བཞི་པ་ཤཱཀྱ་སེང་གེའི་ལུང་དང་རྟོགས་པའི་བསྟན་པ་རིན་པོ་ཆེ་སེམས་ཅན་ཀུན་གྱི་བསོད་ནམས་ཀྱི་ཞིང་དུ་སྤེལ་བར་སྤྲོ་བ་དང་བརྩོན་པ་ཕན་ཚུན་འགྲན་པའི་ངང་དུ་གནས། སེམས་ཅན་ཐམས་ཅད་ལ་རྒྱུ་མེད་པར་མ་འདྲིས་པའི་བྱམས་བརྩེ་དང་ལྡན་པ་ནི་ས་ཆེན་པོ་ལ་གནས་པའི་རྒྱལ་སྲས་རྣམས་ཀྱི་ངང་ཚུལ་ཡིན་པས་འཇམ་དབྱངས་རྒྱལ་པོའི་སྲིད་པ་འཛིན་པ་གང་གིས་ཡངས་པའི་རྒྱལ་ཁམས་མཐའ་དག་བདེ་སྐྱིད་ལ་བཀོད་པ་ལྟར་སྐྱེ་རྒུ་མ་ལུས་པ་རྗེས་སུ་འཛིན་པའི་རྣམ་པར་ཐར་པ་ལས་མ་འདས་པས་བདག་སོགས་རྣམས་ཀྱིས་ཆེད་དུ་གསོལ་བ་ལ་བལྟོས་པ་མིན་ཀྱང་སའི་དབང་ཕྱུག་ཆེན་པོའི་ལེགས་བྱས་ཀྱི་མཐུས་འཇིག་རྟེན་ཀུན་ཏུ་གནོད་སྦྱིན་བང་མཛོད་ཁ་ཕྱེ་བ་ལྟ་བུའི་དཔལ་འབྱོར་རྒྱས་ཤིང་ནད་མཚོན་གྱི་བསྐལ་པ་མིང་གི་ལྷག་མར་བྱས་ནས་ཚེ་ཡང་རིང་དུ་གནས་པ་སོགས་དུས་ཀྱི་བདག་པོའི་ཆེ་བ་ཕུན་སུམ་ཚོགས་པའི་ཆེད་དུ་གསེར་འབྲུག་སྡེར་ལྔས་བཏེག་པའི་ཁྲི་ལ་བསྐལ་བརྒྱར་གཡོ་བ་མེད་པར་བརྟན་པར་བཞུགས་ངོས། ཡབ་མེས་གནམ་གྱི་ལྷ་རིམ་པར་བྱོན་པའི་མཛད་བཟང་བསྟན་འགྲོའི་ཕན་བདེ་སྤེལ་བ་དང་འདིར་ཡང་གཞུང་བསྟན་པ་གཅིག་ཏུ་གྱུར་པ་ལ་བརྟེན་ནས་སྔོན་བཞིན་དུ་ཐུགས་བརྩེ་བ་ཆེན་པོས་མ་དོར་བའི་ལུང་བཟང་པོའི་བཀའ་གནང་ཆུ་ཀླུང་སྐལ་ལྡན་ཤིང་རྟའི་རྒྱུན་ལྟར་ཞུ། ཞུ་ཡིག་གི་ལང་ཚོར་ལྷ་མིག་དག་པའི་སྤྱན་རས་འབབ་པའི་རྟེན་རིན་པོ་ཆེ་དཀར་དམར་གྱི་འཕྲེང་(༢༧༤ན)
བ་འཇམ་ཕྲུག་ཁ་དོག་སྣ་ཚོགས་ཐོ་ཟུར་གསལ་ལ་རྟགས་འབྱོར་དང་བཅས་དྲག་པོ་ཞེས་པ་ལྕགས་སྤྲེལ་ཧོར་ཟླ་བརྒྱད་པའི་གྲལ་ཚེས་དགེ་བར་རང་བྱུང་འཕགས་པའི་གཙུག་ལག་ཁང་དམར་པོ་རི་ནས་ཕུལ་བ་ཤྲི་ཛ་ཡནྟུ། །ལྕགས་སྤྲེལ་བལ་པོའི་རྒྱལ་པོས་སྡེ་པ་སངས་རྒྱས་རྒྱ་མཚོ་ས་སྤྱོད་པའི་རྒྱལ་པོར་བསྐོས་པའི་ཁྲི་འབུལ་བ་མི་སྣ་ཆེད་དུ་བྱུང་པའི་ཚན་ཤོག་གི་ལམ་གཡས་འཁྱིལ་ཕྱོགས་ཀུན་ཁྱབ་པའི་དུང་དཀར། ནུབ་ཕྱོགས་ནཻ་པ་ལའི་ནོར་འཛིན་གྱི་ཁྱོན་ལེགས་བྱས་ཀྱི་འཁོར་ལོ་མངོན་པར་འཕགས་པ་ཉི་མའི་རྒྱུད་ལྷའི་ལྷ་མིའི་དབང་ཕྱུག །ཁོ་ཁོམ་རྒྱལ་པོ་ཆེན་པོའི་བཀའ་ཐམ་རྟེན་སྦ་རི་གཅིག །སྟོང་ཇ་ལྟང་ཙེ་གཅིག །མུ་ཟི་ལྟང་རྩེ་གཅིག །བུར་ལྟང་གཅིག་རྣམས་ཕོ་ཉ་བ་བྷོ་ལ་ཀ་དང་ལ་ཝོར་གཉིས་ཀྱིས་ཉམས་མེད་དུ་སོན། །བསྐལ་པ་མང་པོར་བསོད་ནམས་ཀྱི་ཚོགས་རྒྱ་ཆེན་པོ་ཡོངས་སུ་བསགས་པ་ལས་གྲུབ་པའི་མིའི་བདག་པོའི་སྐུ་གསེར་གྱི་རི་བོ་ལྟ་བུར་སྙུན་མི་མངའ་བར་འབངས་ཀྱི་དབུས་སུ་ལྷུན་ཆགས་ཤིང་ལེགས་བྱས་ཀྱི་མཐུ་ཡོངས་སུ་བརྟས་པ་ལས་བྱུང་བའི་ཡུལ་ཁམས་ཀུན་ཏུ་ནད་མཚོན་མུ་གེའི་ཆད་པ་ཞི་ཞིང་ཆབ་འབངས་ཀྱི་ཁོར་ར་ཁོར་ཡུག་མཐའ་དག་ཀླས་པར་མཁོ་དགུའི་འབྱོར་པ་ཕུན་སུམ་ཚོགས་ཤིང་ཚེ་ཡང་རིང་པོར་གནས་པའི་དགའ་སྟོན་ལ་སྤྱོད་བཞིན་པར་བཞུགས་པར་ཡིད་ཀྱི་སྤྲོ་བ་མཆོག་ཏུ་འཕེལ། འདི་ནའང་ལྷ་དང་བཅས་པའི་ཡིད་ཅན་མཐའ་དག་གི་འདྲེན་པ་གཅིག་པུ་བ་དཔལ་ལྡན་ཤཱཀྱ་སེང་གེའི་ལུང་རྟོགས་ཀྱི་བསྟན་པ་དང་སྐྱེ་རྒུའི་ཕན་བདེ་སྤེལ་བ་ལ་བློ་མིག་གི་སྤྱོད་ཡུལ་ཡངས་པར་གནས། བོད་དང་བོད་(༢༧༤བ)
ཆེན་པོ་འཁོར་དང་བཅས་པའི་འགྲོ་བ་རྣམས་ཀྱིས་མང་པོས་བཀུར་བའི་ཁྲིར་སིདྡྷུ་ནའི་ལོ་ཆུ་སྟོད་ཀྱི་ཟླ་བར་རྒྱལ་སར་གསར་དུ་བསྐོས་པ་མིའི་བདག་པོ་ཉིད་ཀྱི་སྙན་དུ་དངས་པའི་ལེགས་སྐྱེས་སྤེལ་བར་འདི་པ་གཉིས་ཆེད་དུ་མངགས་པར་རྗེས་སུ་ཡི་རངས་པར་གྱུར། སྔར་ནས་བལ་བོད་དཀར་ཚོ་གཅིག་པ་ལ་ཕན་ཚུན་ཐམས་ཅད་གཡོ་བ་མེད་པ་གཞིར་བཅས་ཤིང་སླད་ནས་ཀྱང་ཕེབས་ཚོགས་གངྒཱའི་རྒྱུན་ལྟར་ཆད་པ་མེད་པ་འཚལ། རྟེན་ཁ་བཏགས་བཟང་གོས་ཕྱི་ནང་དང་བཅས་རུ་དྲར་འབོད་པའི་ལོ་ཐ་སྐར་གྱི་ཉ་བའི་ཚེས་དགེ་བར་རྒྱལ་ཁབ་ཆེན་པོ་པོ་ཏ་ལ་ནས་ཕུལ། ལྕགས་ཕོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་མཇུག་རིང་འོད་དཀར་སོགས་སྣ་ཚོགས་བྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་ཀྱི་དྲི་རྨེད་གསལ་བར་བསམ་ཡས་རྒྱལ་ཆེན་དཔོན་བློན་གྱི་སྤྱན་སྔར་སྒྱིང་ཐང་ནོར་བུ་བཏང་བའི་འཕྲིན་ཡིག་མུན་སེལ་སྣང་གཏེར། སྣང་སྲིད་དྲེགས་པ་ཡོངས་ཀྱི་སྡེ་དཔོན་དུ། །སྨོན་ལམ་མཐུས་གྲུབ་རྨུ་བདུད་དཀར་པོ་རྗེ། །ལེགས་ལྡན་གསང་བདག་གིས་བཏུལ་ཁྱུང་ཆེན་དང་། །སྤུ་གྲི་འབར་གྲགས་ལི་བྱིན་ཧ་ར་ཀྱེ། །ཀུན་རྫོབ་རྫུན་པའི་སྣང་བ་འཕྲུལ་པོ་ཆེ། །དོན་དམ་ཀ་དག་དབྱིངས་སུ་རོ་གཅིག་ཀྱང་། །གཟུང་འཛིན་གཤེར་གྱིས་ཡོངས་བསྐྱེད་རྣམ་རྟོག་འཇར། །རྨོངས་པའི་སྐྱེ་བོ་ཕལ་ཆེར་མགོ་བོ་འཁོར། །ཡེ་སྟོང་སེམས་ཉིད་ཆོས་སྐུའི་རྒྱ་མཚོ་ལས། །བཟང་ངན་བར་མའི་རླབས་ཕྲེང་ཉེར་འཁྲུག་པ། །འཇིག་རྟེན་གྲགས་ཚོད་མི་འགོག་བླང་དོར་རྣམས། །མ་འདྲེས་བསྟར་པ་དཔྱོད་ལྡན་རྣམས་ཀྱི་ལུགས། །ཆེས་སྙིགས་འགྲོ་བའི་སྙིང་ལ་ལྷ་མིན་གདོན། (༢༧༥ན)
།བཏབ་པས་སྡིག་བལྟའི་ས་བོན་དར་དྲག་ལས། །ཕྱི་རོལ་མི་ཤེས་གཟུགས་བརྙན་ཆུ་ཟླ་ལྟར། །ཤར་ཚེ་སོམ་ཉིའི་ཡིད་ངོར་ཡུར་བས་ངལ། །ལྷ་ཁྱོད་སྲིད་གསུམ་རབ་མཐོང་དཔྲལ་བའི་མིག །ལྡན་ཕྱིར་མཚན་རྟགས་རྒྱུ་དང་འབྲས་བུ་ཀུན། །གཟིགས་པས་བསྟན་འགྲོ་སྐྱེ་རྒུ་ལ་འཚེ་བའི། །ཉེས་མུན་ཀུན་སེལ་སྣང་བ་ཅིས་མི་སྦར། །ཐུབ་རྣམས་སྤང་རྟོགས་མཉམ་ཡང་གངས་ཅན་གྱི། ལྷ་གཅིག་སྔོན་གྱི་ཐུགས་བསྐྱེད་ཀྱིས་འགྲུབ་པ། །པདྨའི་དགེ་བསྙེན་རྡོ་རྗེ་གབ་པ་གཏེར། ཁྱུང་ཆེན་ཀླུ་འབྲུག་འདུལ་ཁྱོད་གཡར་དམ་དགོངས། །དངོས་བཤམས་སྔགས་རྒྱས་མང་སྤེལ་མཆོད་པའི་སྤྲིན། །ཚོགས་ཀྱི་འཁོར་ལོ་བསྐོར་ནས་དྲི་བའི་ཚིག །ཕོ་ཉའི་ངག་ནས་གསོལ་ལན་གསོང་པོའི་གཏམ། །ལུང་བསྟན་འགགས་མེད་རྡོ་རྗེའི་དབྱངས་སྒྲོགས་ཤིག །རིགས་གསུམ་སྒྱུ་འཕྲུལ་ཆོས་རྒྱལ་མེས་དབོན་འབངས། །སྒོ་གསུམ་བདེ་བའི་ཚོར་བ་སྲིད་མཐའི་བར། །མྱོང་བར་ལས་སྒྲུབ་ཞལ་འཆེས་གཡེལ་མེད་པའི། །ལྷ་རྒྱལ་ཚངས་རིས་ཡུལ་སའི་རྩེ་མོར་འཐེན། །འཇམ་གཉེན་ཕོན་རྫར་གཡོ་བའི་སྙན་ཤལ་བཅས། །རྒྱ་ནག་སྤོར་ཐང་ཁྲ་མོ་ལྕགས་བྱའི་ལོ། །ཐོག་མར་ཤར་བ་ཡར་ངོའི་ཚེས་དགེ་བར། །པེ་ཀར་ཆོས་རྒྱལ་ཆེན་པོའི་སྤྱན་སྔར་དགེ །སྡེ་བརྒྱད་རྗེ་བོར་ལས་སྨོན་དུས་གཅིག་ཏུ། །འཛོམ་པས་ཁྲག་གི་སྒོ་ང་བརྡོལ་བ་ལས། །སྐྱེ་འགྲོའི་སྲོག་གི་བདུད་གཅོད་བཙན་རྒོད་ཆེ། །དྲག་རྩལ་སྟོབས་ལྡན་གནོད་སྦྱིན་ཙེ་དམར་བ། །སྤྲུལ་པ་བཙན་རྒོད་རོལ་(༢༧༥བ)
བ་སྐྱ་བདུན་རྣམས། །གསུང་མཆོག་རྟ་མགྲིན་དཀྱིལ་འཁོར་ཆེན་པོ་རུ། །སྲོག་སྙིང་བླངས་ནས་དབང་བསྐུར་དམ་ཚིག་ཕོག །བསྟན་པའི་མེལ་ཚེ་བྱེད་པའི་གཉེར་ཁར་བསྐོས། །མེ་རི་འབར་བའི་གཉན་རི་དམར་ནག་མདུན། །བྲག་དམར་སྲིན་པོ་ལངས་འདྲ་བཅུ་གཅིག་ངོས། །ཐོད་ཕྲེང་རྩལ་གྱིས་བཀའ་བསྐོས་དམ་བསྒྲགས་པ། །གནོད་སྦྱིན་ཀུན་ཁྱབ་རྡོ་རྗེ་དྲག་པོ་རྩལ། །ཨེ་མ་སྲིད་པའི་ཤེལ་དཀར་ངོས་ཡངས་པོར། །སྣ་ཚོགས་འཁྲུལ་རྟོག་ཚོན་བརྒྱའི་མདངས་གསལ་བ། །ཀ་དག་གདོད་མའི་དབྱིངས་སུ་མི་རྙེད་ཀྱང་། །ཚུར་མཐོང་འགྲོ་བློ་ཐེ་ཚོམ་དྲ་བར་འཇུག །ངན་སྤྱོད་རྒྱུ་ལས་འབྲས་སྨིན་སྙིགས་དུས་འདིར། །གནམ་ས་བར་གྱི་མཚན་ལྟས་བཟང་ངན་འབྲིང་། །སེམས་ཉིད་གཅིག་པུའི་རྣམ་པར་འཁྲུལ་པ་རུ། །མ་ཤེས་ཀུན་རྫོབ་ལམ་མནར་ཨ་ཐང་ཆད། །རུ་བཞིའི་རྒྱལ་ཁམས་ལ་འཚེ་ཉེས་བརྒྱའི་དྲི། །འཁྲུད་པའི་དཀར་ཕྱོགས་མཐོ་རིས་ཆུ་བོའི་ཆབ། །ལུང་བསྟན་ལམ་གསུམ་འདྲེན་པའི་མངོན་ཤེས་མཁན། །སྐལ་ལྡན་ཤིང་རྟ་ཁྱོད་ལས་དམིགས་སུ་མེད། །ཟན་གཡང་གིས་མཚོན་གངས་ཅན་གནྡྷོ་ལ། །འཛིན་སྐྱོང་ངུར་སྨྲིག་གོས་དཀར་མཆོད་གནས་སྡེ། །རྣམ་གཉིས་སྲུང་མར་པདྨ་ཀ་ར་ཞེས། །དུས་གསུམ་སངས་རྒྱས་དངོས་དེས་མ་བསྐོས་སམ། །སྡེ་བརྒྱད་རྦ་ཀློང་འཁྲུག་པའི་ཕོ་བྲང་ཆེར། །འདོད་ཡོན་ལྔ་ལྡན་ཚོགས་འཁོར་མཐུན་རྫས་རྣམས། །སྙིམ་པར་ཐོགས་པ་ཕོ་ཉས་དྲི་བའི་ཚིག །གསོལ་བར་རྡོ་རྗེའི་གསུང་གསང་ལྷུག་པར་སྟོན། །ནག་པོའི་གཡུལ་ལས་རྒྱལ་བའི་དཔའ་རྟགས་སུ། །དར་(༢༧༦ན)
དཀར་རྟེན་དང་བཅས་པའི་ལི་ཁི་ཏའི། །དོན་བཞིན་དབང་དྲག་ཞི་བ་རྒྱས་བྱེད་ལས། །ཐོགས་པ་མེད་བསྒྲུབ་དགེ་ལེགས་དེང་སྩོལ་ཞིག །ལྕགས་ཕོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་འཇུག་རིང་འོད་དཀར་སོགས་ལྟས་སྣ་ཚོགས་བྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་ཀྱི་དྲི་རྨེད་གསོལ་བར་ཚངས་པ་དུང་ཐོད་ཅན་གྱི་སྤྱན་སྔར་ཆང་ཁྱིམ་པ་ངག་དབང་མཁྱེན་བརྩེ་བཏང་བའི་འཕྲིན་ཡིག་འཕྲུལ་སེལ་མེ་ལོང་། །རིས་མེད་འགྲོ་ལ་ཐུབ་རྣམས་རྗེས་བརྩེ་ཡང་། །གངས་ཅན་སྐྱེ་རྒུ་གཅིག་ཏུ་ཐུགས་རྗེའི་དཔུང་། །རྒྱལ་གཞན་ཡོངས་ཀྱིས་འགྲན་བྲལ་པདྨ་འབྱུང་། །འཛམ་གླིང་ཆེ་བའི་རིག་སྔགས་འཆང་དེས་སྐྱོངས། །གང་གི་སྤྱན་སྔར་སྟོད་སྨད་ཆོས་འཁོར་སོགས། །མཆོད་གནས་སྡེ་གཉིས་སྐྱོང་བར་ཞལ་འཆེས་པ། །གནམ་གྱི་ལྷ་ཆེན་ཚངས་པ་དུང་ཐོད་ཅན། །མ་གཡེངས་སྙན་གྱི་དབང་པོ་ཅུང་ཟད་གཏོད། །ཆོས་སྐུ་ཀ་ནས་དག་པའི་བདེ་ཆེན་ཀློང་། །བཟང་ངན་བྲལ་ཡང་གཉིས་འཛིན་སེམས་ཀྱི་ངོར། །དགེ་དང་མི་དགེའི་ཀུན་རྟོགས་བཀྲག་པོ་ཆེས། །སྒྱུ་མའི་རྟ་གླང་ལྟ་བུར་འགྲོ་རྣམས་འཁྲུལ། །དེ་ཕྱིར་ཐག་ཁྲའི་སྦྲུལ་དང་སྨིག་རྒྱུ་ལྟར། །སྒྲོ་བཏགས་ཅ་ཅོའི་གཏམ་གྱི་རྫུན་པའི་འབྲས། །ཚུར་མཐོང་བྱིས་བློ་ཉེར་འདྲིད་ཆོ་ག་ལ། །དངས་བཀྲག་འདོད་སྲེད་བསྐྱེད་ནུས་དངོས་པོའི་གཤིས། །ཤེས་བྱར་སྲིད་ཀུན་ཁྱོད་སྤྱན་མེ་ལོང་དུ། །དྲི་མེད་གསལ་བར་འཆར་བས་མ་རྟོགས་དང་། །ལོག་རྟོག་མདུད་པ་འགྲོལ་ཕྱིར་བྱ་མ་རྟ། །སྤྱན་གཟིགས་ཚོགས་ཀྱི་འཁོར་ལ་ཐོགས་ཏེ་མངགས། །སྙན་འཇེབས་རྣ་བར་མངར་བ་བུ་རམ་རོ།(༢༧༦བ)
།ཀུན་གྱི་ཡིད་བདེར་གླིང་བ་མི་ཆོས་ལུགས། །དྲང་ཚིག་སྲིད་སྒྲུབ་མདའ་ལྟར་ལུང་སྟོན་པ། །སྣང་སྲིད་དྲེགས་པའི་སྤྱི་སྲོལ་ཡིན་ཕྱིར་གསུངས། །རྟག་ཏུ་ལས་བཞི་སྒྲུབ་པར་ཞལ་བཞེས་པ། །རྡོ་ཡི་རི་མོ་མིག་གསུམ་པས་མི་དབྱེ། །སྙན་ཤལ་དང་བཅས་དུས་ཀྱི་རྒྱལ་པོ་ཆེ། །ཚེས་བཅུའི་མཆོད་པར་སྤེལ་བ་དགེ་ལེགས་འཕེལ། །ལྕགས་པོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་མཇུག་རིང་འོད་དཀར་སོགས་ལྟས་སྣ་ཚོགས་འབྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་ཀྱི་དྲི་རྨེད་གསོལ་བར་ཚོང་འདུས་བྱ་ཁྲིད་མིག་གཅིག་པའི་སྤྱན་སྔར་སྒྱིད་ཐང་ནོར་བུ་བཏང་བའི་འཕྲིན་ཡིག་ཆུ་ནང་ཟླ་གཟུགས། །སྲིད་པ་གསུམ་ན་མཐུ་སྟོབས་ལ། །འགྲན་བྲལ་ཨོ་རྒྱན་རྡོ་རྗེ་འཆང་། །མཚོ་སྐྱེས་བཛྲའི་ཀིངྐ་ར། །ལྐོག་གྱུར་མངོན་སུམ་གཟིགས་དེ་ཀྱེ། །ཤར་ཕྱོགས་སྐུ་ཡི་རྒྱལ་པོ་ཆེ། །མཐུ་ལྡན་མོན་བུ་པུ་ཏྲ་ཡི། །བློན་པོ་བྱ་ཁྲིད་མིག་གཅིག་པར། །མཐུན་རྫས་ཚོགས་མཆོད་འབུལ་བའི་དོན། །གནམ་ལ་ཕོད་དཀར་འོད་དཀར་འཆར་། །ས་ལ་ཐན་ལྟས་སྣ་ཚོགས་པ། །ཀ་དག་དབྱིངས་སུ་མི་རྙེད་ཀྱང་། །རྨོངས་པའི་མི་རྣམས་སོམ་ཉིར་འགོད། །དེ་ཕྱིར་སཱ་ལའི་སྨན་ལྗོངས་འདིར། །འབྱུང་འགྱུར་མི་ཤེས་མཚན་མའི་འབྲས། །བཟློག་བྱེད་ལྷ་མིག་གིས་གཟིགས་ནས། །གསེར་ཡིག་པ་འདིར་ལུང་བསྟན་གསོལ། །དཀར་མིན་ལས་ཀྱིས་ལྔ་བརྒྱའི་འགྲོ །ཟུག་རྔུས་མནར་བ་མི་སེལ་ན། །བསྟན་དང་འགྲོ་བའི་དཔུང་གཉེན་དུ། །ཞལ་གྱིས་བཞེས་དེ་མིང་དུ་ཟད། །དཔག་དཀའི་མཐུ་སྟོབས་རྫུ་འཕྲུལ་ཅན། །བཤན་པ་སྲོག་གི་བདག་པོ་ཡིས། །དགྲ་བགེགས་བདུད་དཔུང་ཚར་ཆོད་ལ།(༢༧༧ན)
།དཀར་པོའི་དར་ཆེན་སྲིད་རྩེར་ཕྱོར། ཁ་ཚར་མ་ཉམས་འཆི་མེད་ཀྱི། །རེག་བྱའི་སྙན་ཤལ་དང་བཅས་ཏེ། །འཕྲིན་ཡིག་སྙིང་པོ་དོན་གསལ་བ། །དྲེགས་པའི་སྡེ་དཔོན་འདུན་སར་སྤེལ། །ལྕགས་ཕོ་སྤྲེའུའི་ལོ་ཧོར་ཟླ་བཅུ་པ་དང་བཅུ་གཅིག་པར་མཇུག་རིང་འོད་དཀར་སོགས་ལྟས་སྣ་ཚོགས་བྱུང་བར་བརྟེན་རྒྱལ་ཁམས་བདེ་དོག་དང་བཟློག་ཐབས་དྲི་རྨེད་གསོལ་བར་ཐང་ཆེན་བཤན་པ་ལག་དམར་གྱི་སྤྱན་སྔར་སྒྱིད་ཐང་ནོར་བུ་བཏང་བའི་འཕྲིན་ཡིག་དོན་ཀུན་རབ་གསལ། དྲེགས་པ་རྒྱལ་ཆེན་སྐུ་ལྔའི་ཆེད། །ལྷོ་ཕྱོགས་ཡོན་ཏན་ཤིང་བྱ་ཅན། །བློན་པོ་བྱ་རྒོད་ཐང་ནག་ཅེས། །བཤན་པ་ལག་དམར་དེང་འདིར་དགོངས། །ཟ་ཧོར་ས་སྐྱོང་རིག་སྔགས་འཆང་། །ཕ་མེས་བརྒྱུད་པའི་སྲུང་མ་ཁྱོད། །དགྱེས་ཞལ་ཟླ་བ་ལྟར་དངོམ་ཞིང་། །ལྷ་སྙན་དབང་པོ་དེང་འདིར་གཏོད། །གནམ་རྟགས་འོད་དཀར་ནོར་འཛིན་གཞིར། །མི་སྡུག་མཚན་ལྟས་ངན་པའི་འབྲས། །ཀུན་རྫོབ་འཁྲུལ་ངོར་ཤར་བ་ཡི། །འཇིག་རྟེན་གྲགས་ཚོད་གང་གིས་འགོག །བསྟན་དང་དེ་འཛིན་མདོ་སྔགས་སྡེ། །ས་སྤྱོད་རྗེ་འབངས་ཚོགས་རྣམས་ལ། །ཉེར་འཚེའི་སྨག་རུམ་སངས་ནུས་པའི། །ལུང་བསྟན་ཉི་འོད་དེང་འདིར་སྤྲོས། །མཐུ་སྟོབས་རྡོ་རྗེ་རྩེ་བརྒྱ་པས། །གདོན་རིགས་ལྷ་མིན་མོ་ཡི་མངལ། །ལྷུང་དང་ལྷན་ཅིག་བདེ་སྐྱིད་མིག །སྟོང་ཕྲག་བགྲད་ནས་བལྟ་བར་བྱོས། །སྤྱན་གཟིགས་ཚོགས་ཀྱི་མཆོད་པ་རྣམས། །ཉུང་ངུ་ཏིང་འཛིན་སྔགས་རྒྱ་ཡིས། །མང་པོར་སྤེལ་ནས་འབུལ་བྱེད་ན། །ལས་བཞི་ལུས་པ་མེད་པར་སྒྲུབས། །དོན་གྱི་སྙིང་པོ་ཀུན་ཚང་བའི། །(༢༧༧བ)
འཕྲིན་ཡིག་མེ་ཏོག་མནྡ་ར། །ཐོད་བཅིངས་ཕོ་ཉ་མེ་ན་ཀ ། བཀྲ་ཤིས་ལྷ་རྫས་ཐོགས་ཏེ་སོང་། །ཨོ་རོད་བོ་ཤོག་ཐུ་རྒྱལ་པོས་མགོ་དཀར་གྱི་སྡེ་འབུམ་ཕྲག་བཅོ་ལྔ་ཙམ་འདི་གར་སྦྱོར་འཇགས་བྱུང་སྐབས་རྡོ་རྗེ་བྲག་ནས་རིག་འཛིན་སྤྲུལ་པའི་སྐུ་མཆོག་གིས་ལེགས་ཆ་མཛད་པའི་གསུང་ལན་སྔ་འགྱུར་བསྟན་པའི་ཉིན་བྱེད། །ཨཱ དྱེ བ རཱ གོ ནྭ ར ས ཏྭ པཱུ རྦ ཏོ དྠི ཏེ ན བ རྟཱ ནྟ ར གཱ ག ནཱ ནྟ ཀཿ བ གྷྣ ཥུ ནི རྨ སྱ མ ཡཱ ཀྵ ཡཱ ཛྙ ཀླུ ལཾ དྷཱ ར ས རྦཱ བྷུ ཥ མཱུ རྦྷ ར ཏྣ ཏཱ། གཟོད་(སྡེབ་སྦྱོར་མཉམ་པའི་པྲྀཏྟ་ལས་དབང་པོའི་རྒྱུད།)མ་ཉིད་ནས་འགྲོ་ལ་རྗེས་བརྩེའི་ཐུགས། །དང་པོར་བསྐྱེད་དེ་དིང་བར་ནམ་མཁའི་མཐའ། །གཞལ་བར་སྤྲུལ་པའི་སྒྱུ་འཕྲུལ་ཟད་མི་ཤེས། །རིགས་འཛིན་ཀུན་གྱི་གཙུག་རྒྱན་རིན་པོ་ཆེར། །རྟོག་གེ་ཐ་སྙད་སྦྱངས་ལ་བལྟོས་མིན་པར། །དྷཱུ་ཏཱིའི་མདུད་རྒྱ་གྲོལ་བས་འཁོར་འདས་ཆོས། །འབད་མེད་ཀློང་བརྡོལ་སྙན་འཇེབས་ཆབ་ཤོག་རྟེན། །སོན་ཚེ་འཕང་འགྲོའི་སྒྲ་ལ་སྐྱེངས་པ་བྱིན། །ཉེས་དྲིས་གཞར་ཡང་མ་གོས་སྐུ་གསུང་ཐུགས། །དཔལ་ཆེན་ཕུར་བུའི་ལྷ་(༢༧༨ན)
སྔགས་ཡེ་ཤེས་ཀྱིས། །བདུད་བཞིའི་དཔུང་ཚོགས་བཅོམ་པའི་སྒྲ་བོ་ཆེ། །ཚངས་རིས་ཡུལ་སར་ཡོངས་སྒྲོགས་གཏམ་དེ་སྙན། །བགྲང་བྱའི་ཁུར་གྱིས་ལྕི་བའི་རྒན་པོ་བདག །ཐོས་བསམ་སྒོམ་པ་ན་ཕྲ་བྱིས་པའི་ཡིད། །ཆོས་བརྒྱད་འཇའ་ལ་སྦར་འཛིན་བློ་བྲིད་ཀྱིས། །དལ་རྟེན་ཆུ་བོའི་སུམ་ཆ་སྟོང་པར་བརྒལ། །མི་བསྲུན་དྲེགས་པའི་ཀླ་ཀློ་གཉིས་འཐུང་ཀླད། །འཕྲོག་བྱེད་བསོད་ནམས་ཀྱིས་འགེམས་བོ་ཤོག་ཐུའི། །འཇིགས་མེད་སེང་གེའི་རྒྱུད་ཀྱི་ང་རོའི་དབྱངས། །བྱང་ཕྱོགས་གངས་རིའི་རྩེ་མོར་གཅིག་ཏུ་བསྒྲགས། །གཡུལ་ངོར་མཚོན་ཆ་གདེངས་པའི་མོད་ཉིད་ལ། །སྟོད་ཧོར་ས་སྤྱོད་པུས་བཙུག་གདོང་སྨད་ནས། །དཔུང་བཅས་འདུད་ཚེ་རྩོད་དུས་འཁོར་ལོས་སྒྱུར། །མི་འབྱུང་བདེན་གཏམ་ད་གདོད་རླུང་ལ་བསྐུར། །སྐྱེ་མང་སེར་སྣའི་མདུད་གྲོལ་གཏོང་ཕོད་ཀྱིས། །ཕྱེད་གཉིས་ས་ཡའི་མངའ་འབངས་སྦྱིན་པའི་སྒོ། །རབ་འབྱེད་ཕོ་ཉ་རིན་ཆེན་དུ་མ་ཡི། །ལག་རྟགས་ཐོགས་འབྱོར་མི་སྲིད་སྲིད་འཕྲུལ་བུ། །ཀུན་རྫོབ་དབུ་མར་རྟོགས་རྣམས་འཁོར་བ་ཡི། །ཕུན་ཚོགས་ཨེ་རཎྜ་ཡི་སྙིང་པོ་ལྟར། །གཟིགས་ཀྱང་ཀྲྀ་ཀྲིའི་རྨི་ལམ་གྱིས་ཟིན་པའི། །ཆོས་ཚུགས་ཅན་རྣམས་འགྲམ་ཆུ་ལྡང་ལ་འབྲེལ། །གཟུང་དང་འཛིན་པ་ཡེ་སྟོང་སྣང་བ་འདིའི། །སེམས་ཉིད་གཅིག་པུའི་རྣམ་འཕྲུལ་ཀ་དག་མཐའ། །ཀུན་རྫོབ་ལེགས་སྐྱེས་ཚན་གྲངས་(༢༧༨བ)
དབང་པོའི་གཞུ། །མ་འགགས་རང་གདངས་ཤར་བ་དེ་རྨད་བྱུང་། །རྒྱལ་དབང་པདྨའི་ཐུགས་སྲས་སྣ་ནམ་པ། །གོས་དཀར་ལྕང་ལོའི་ཕྲེང་འཛིན་རིག་སྔགས་འཆང་། །ཡང་སྲིད་མང་བརྒྱད་མཐར་དིང་ངུར་སྨིག་གོས། །མནབས་པའི་འཁོར་ལོའི་མགོན་ཁྱོད་བྱོན་ཏམ་ཅི། །སྔ་འགྱུར་བཀའ་གཏེར་བསྟན་པ་ཆུ་བོ་བཞི། །ཕྱོགས་བརྒྱར་ལེགས་འབབ་འབྱུང་ཁུངས་རིགས་འཛིན་རྗེ། །མ་དྲོས་མཚོ་ཆེན་མཆོག་གི་སྤྲུལ་སྐུའི་གར། །འོག་མིན་ཞིང་གི་གཙོ་ལྟར་རྟག་བཞུགས་གསོལ། །རྡོ་རྗེ་རཏྣའི་མཚན་འཛིན་གླིང་པ་སོགས། །ངོ་མཚར་ཟབ་གཏེར་དབང་ལུང་འཁྲིད་བཀའི་རྒྱུན། །བརྒྱར་གཤགས་རྟ་རྔ་ལྟར་ཕྲ་སྲོག་འཐུད་པར། །ཞལ་འཆེས་གསུང་མཆིད་ཉི་ཟླའི་འགྲོས་བཞིན་ཞུ། །ལྷ་རྫས་ཆུ་ཤེལ་དབང་པོ་ཉ་གང་བར། །རྟགས་ཀྱི་རི་དྭགས་མཚན་མ་རབ་བཀྲ་བ། །ཕོ་ཉ་དྲི་བཞོན་གོམ་སྟབས་གོ་ལའི་ངོས། །བསྒྱུར་ཏེ་པདྨའི་གདུང་ཚབ་ཕྱག་ཏུ་ཕུལ། །ལྕགས་སྤྲེ་ཧོར་ཟླ་དགུ་པའི་ཚེས་བཅུ་གཉིས་ཀྱི་ཉིན་དཔལ་ལྡན་ཚངས་པ་དུང་ཐོད་ཅན་ལ་སྤྱི་སྒོས་ཀྱི་བླང་དོར་ལུང་བསྟན་ཞུ་བར་ཆང་ཁྱིམ་ངག་དབང་མཁྱེན་བརྩེ་བཏང་དུས་གསོལ་བའི་འཕྲིན་ཡིག་མ་འདྲེས་གསལ་སྟོན་ངོ་མཚར་བཀོད་པ། ཨ་ཧོ་དུས་གསུམ་སངས་རྒྱས་མ་ལུས་པའི། །མཁྱེན་བརྩེ་ནུས་པ་གཅིག་བསྡུས་མཚོ་སྐྱེས་རྗེས། །གཙུག་ན་རྡོ་རྗེའི་རི་མོ་ཉེར་བཀོད་པ། །དཔལ་ལྡན་ཚངས་པ་ཆེན་པོ་དེང་དགོངས་ཀྱེ། །ཆོས་(༢༧༩ན)
ཀུན་ཡེ་ནས་སྟོང་ཆེན་དག་པའི་དབྱིངས། །ཀུན་རྫོབ་འཁྲུལ་པའི་སྣང་བ་དམིགས་མེད་ཀྱང་། །ཆུ་ནང་ཟླ་གཟུགས་ཚུར་མཐོང་བྱིས་བློ་ཅན། །ཐག་ཁྲར་སྦྲུལ་གྱི་དངངས་སྐྲག་མྱོང་བ་བཞིན། །རྨི་ལམ་ཡུལ་ཤར་སྣ་ཚོགས་བདེ་སྡུག་དང་། །སྒྱུ་མའི་སེང་གེའི་མཆེ་བ་གཙིགས་པ་ལྟར། །ཀུན་རྟོག་རི་མོར་བྲིས་པ་ཅ་ཅོའི་སྒྲ། །དལ་མེད་རྣ་བའི་བུ་གར་ཚེར་མའི་གྲོགས། །བདག་གཞན་མ་ཉམས་རང་ལ་གཅེས་འཛིན་བློ། །བརྒྱ་ཕྲག་འཆིང་བ་དམ་པོས་བཅིངས་པའི་མཐུས། །ངན་འབྲས་ཐོག་ཏུ་འབབ་བམ་མི་འབབ་ཅེས། །འཁྱོག་པོའི་ཡིད་ཀྱི་གཉའ་ཤིང་ཕྲག་པར་ལྕི། །དེ་ཕྱིར་ལྐོག་གྱུར་རྟོགས་པའི་མངོན་ཤེས་དང་། །བྲལ་བས་སྒྲིབ་མེད་གསལ་བའི་སྤྱན་ཡངས་པ། །དུང་ཐོད་ལྷ་ཡི་སྡེ་དཔོན་ཁྱོད་ཉིད་ལ། །གསང་ཚིག་འདྲི་བའི་ཕོ་ཉ་འདི་བཞིན་མངགས། །སྤྱན་གཟིགས་ཚོགས་ཀྱི་འཁོར་ལོ་འདིས་མཚོན་ཏེ། །ཡིད་སྤྲུལ་ནམ་མཁའ་མཛོད་ཀྱི་མཆོད་པའི་སྤྲིན། །དྲེགས་པའི་དབང་ཕྱུག་ཆེན་པོའི་འདུན་ས་རུ། །སྤེལ་ན་དགྱེས་པའི་ལྷ་རྒྱལ་ལན་གསུམ་ཐེན། །ཆུ་ཤེལ་དབང་པོ་རྒྱུ་སྐར་མགོས་ཉ་བའི། །ཡར་ངོའི་ལྷ་ཆོས་དགེ་བའི་དུས་ཀྱི་ཚེ། །གནམ་བསྐོས་རྒྱལ་པོའི་ཕོ་བྲང་ཆེན་པོ་ནས། །སྤེལ་བ་ཕྱོགས་དུས་ཀུན་ཏུ་ཤིས་གྱུར་ཅིག །