འབའ་དགའ་ལྡན་ཕན་བདེ་གླིང་པའི་ཁྲིམས་སུ་བཅའ་བའི་རིམ་པ་བླང་དོར་གསལ་བའི་ཟླ་བ་སོགས།

ཛྙེ ཡ ཏཱ ཡ ཐཱ བ ཏཱ བྷི བྷཱ བ དཱེ ཤ ཙ ཀྵུ ནཱ ཙ།ཇི་ལྟ་ཇི་སྙེད་ཤེས་བྱའི་ཁྱོན། །མངོན་སུམ་གཟིགས་པའི་སྤྱན་རས་ཀྱིས། །ཀཱུ ལ མཱ ཛ གོ པ དྲྀ ཀ ན ཤེ ཥ ཨཱ ཪྠ ས དྷ ན མྱ།རིས་མེད་འགྲོ་ལ་ཉེར་བཙའ་བ། །དོན་ཀུན་མ་ལུས་གྲུབ་དེར་འདུད། །གང་གི་རིང་ལུགས་ཀུན་བཟང་མའི། །རྒྱན་དུ་ལེགས་བཤད་ནོར་བུའི་འཕྲེང་། །རྣམ་དཔྱོད་སྲད་བུར་བརྒྱུད་མཁས་པ། །འཇམ་དཔལ་སྙིང་པོས་དགེ་ལེགས་སྩོལ། །དགའ་བའི་དཔལ་ལྡན་ཆོས་ཀྱི་སྒྲ། །ཕན་དང་བདེ་བའི་འབྱུང་གནས་མཆོག །སྡོམ་སྩོན་གླིང་གི་བླང་དོར་རྣམས། །གསལ་བྱེད་རི་བོང་འཛིན་འདི་ཤར། །ཚིགས་སུ་བཅད་པའི་པི་ཝང་གི་རྒྱུད་ལས་དྲངས་ཏེ་ཤིས་པར་བརྗོད་ནས། དེའང་བསྐལ་བཟང་གི་འདྲེན་པ་བཞི་པ་རྣམ་འདྲེན་ཉི་མའི་གཉེན་གྱི་བསྟན་པ་རིན་པོ་ཆེ་ས་གསུམ་གྱི་འགྲོ་བ་མ་ལུས་པའི་ཀུན་རྨོངས་ཀྱི་སྨག་རུམ་མཐའ་དག་སེལ་(༦༠བ)

བར་བྱེད་པའི་སྒྲོན་མེ་ཡིན་ལ། ཐུབ་པའི་བསྟན་པའི་སློབ་དཔོན་དབྱིག་གཉེན་གྱིས། །སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་ལུང་རྟོགས་ཀྱི་ཆོས་གཉིས་སུ་གསུངས་པའི་ཐོག་མར་ལུང་གི་ཆོས་དཀོན་མཆོག་རྣམས་ཚུལ་བཞིན་ཐོས་བསམ་གྱིས་གཏན་ལ་ཕབ་པ་ལ་བརྟེན་ནས་མངོན་པར་རྟོགས་པའི་ཡོན་ཏན་གྱི་ཚོགས་རྒྱུད་ལ་སྐྱེ་བར་འགྱུར་བས་ན། །མདོ་སྡེ་རྒྱན་ལས། འདི་ན་དང་པོར་ཐོས་ལ་བརྟེན་ནས་ཚུལ་བཞིན་ཡིད་ལ་བྱེད་པ་འབྱུང་། །ཚུལ་བཞིན་ཡིད་ལ་བྱེད་ལས་ཡང་དག་དོན་ཡུལ་ཡེ་ཤེས་འབྱུང་། །ཞེས་ཐོས་བསམ་སྒོམ་གསུམ་ཕྱིན་ཅི་མ་ལོག་པ་ཞིག་བྱུང་ན་གནས་སྐབས་དང་མཐར་ཐུག་དོན་རྒྱ་ཆེན་པ་འགྲུབ་པའི་རྒྱུ་ཡིན་པས། བློ་གྲོས་རྒྱ་མཚོས་ཞུས་པའི་མདོ་ལས། དེ་བཞིན་གཤེགས་པའི་དམ་པའི་ཆོས་འཛིན་པ། །བརྒྱ་བྱིན་ཚངས་པ་དེ་བཞིན་འཇིག་རྟེན་སྐྱོང་། །འཁོར་ལོས་སྒྱུར་དང་མི་ཡི་རྒྱལ་པོར་འགྱུར། །བདེ་དང་ཡང་བདེ་བྱང་ཆུབ་དེ་འཚང་རྒྱ། །ཞེས་བསམ་གྱིས་མི་ཁྱབ་པའི་ཡོན་ཏན་དང་ལྡན་ལ། དེ་ལྟ་བུའི་འཇུག་བྱ་རྒྱལ་བའི་བསྟན་པ་ལ་འཇུག་བྱེད་ཀྱི་ཐབས་ཐེག་པ་ཆེ་ཆུང་གི་ཆོས་ཚུལ་མཐའ་ཀླས་ནའང་། བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞིས་རྟེན་ལགས་པར་གསུངས། །ཞེས་ས་ཆེན་པོ་ལྟར་ཡོན་ཏན་ཐམས་ཅད་ཀྱི་གཞི་རྟེན་ལྷག་པ་ཚུལ་ཁྲིམས་ཀྱི་བསླབ་པ་ལ་རག་ལུས་པར་གསུངས་ཤིང་། ཁྱད་པར་ཞྭ་སེར་ཅོད་པན་འཆང་པའི་སྡེ་མཐའ་དག་ཐམས་ཅད་མཁྱེན་པ་ཤར་བཙོང་ཁ་པ་བློ་བཟང་གྲགས་པའི་དཔལ་གྱི་ཕྱག་ལེན་ལྟར་མདོ་སྔགས་ཀྱི་སྡེ་གང་ཡིན་ཡང་འདུལ་ཁྲིམས་ལ་གཙོ་བོར་མཛད་པ་ཡིན་པས་འབའ་དགའ་ལྡན་(༦༡ན)

ཕན་བདེ་གླིང་དུ་གྲགས་པའི་འདུས་སྡེ་འདིའི་ཁྲིམས་སུ་བཅའ་བའི་རིམ་པ་ལ། ཐོག་མར་གསར་བུ་བ་རྣམས་རབ་ཏུ་བྱུང་བའི་ལོ་ཚིགས་སླེབསས་མ་སླེབ་སོགས་བར་གཅོད་ཡོད་མེད་བརྟགས་ཏེ་འགལ་རྐྱེན་དང་མི་ལྡན་པ་རྣམས་ལ་ཆོས་གོས་གསུམ། ལྷུང་བཟེད། ཆུ་ཚགས། རྡུལ་བཟན་རྣམས་མ་མཐའ་བརྙན་པོ་ཚུན་གྱིས་ཚང་བར་བྱས་ཏེ་རབ་བྱུང་བསྒྲུབ། ཟླ་བ་གསུམ་མམ་ལྔ་ལས་མི་འགྱངས་པར་རུང་མཐུན་གྱི་གོས་སོགས་ཡོ་བྱད་རྣམས་རང་ཉིད་བདག་གིར་བྱར་རུང་བ་གཤོམ་པར་བྱེད། རབ་ཏུ་བྱུང་བ་དང་དེའི་རྟགས་དང་མི་ལྡན་པ་ཚོགས་སུ་མི་གཞུག །གཞན་དག་ནས་འོངས་པའི་གྲྭ་རྙིང་གི་རིས་འཇུག་པ་བྱུང་ན་གཡུང་བོ་དང་རྩ་བ་ཉམས་པ་ཡིན་མིན་བརྟག །བསྙེན་པར་རྫོགས་འདོད་རྣམས་ཀྱང་བར་མའི་སྐབས་བཞིན་མཐུན་རྐྱེན་ཚང་ཞིང་འགལ་རྐྱེན་ཡོད་མེད་བརྟག་པ་སོགས་ཀྱི་སྒོ་ནས་བསྒྲུབ། གནས་ཀྱི་སློབ་དཔོན་བསྟེན་ནས་རྣམ་འབྱེད་དང་འཕྲན་ཚེགས་བྱུང་བའི་བསླབ་བྱ་རག་རིམ་ཁོང་དུ་ཆུད་པར་བྱས་ཏེ་རབ་ཏུ་བྱུང་ནས་རིང་པོར་ལོན་པ་རྣམས་ཀྱིས་བསླབ་པ་གང་ལ་བསླབ་དང་མཚུངས་པར་སློབ། འོག་ནས་བྱུང་བའི་ཐོས་བསམ་བྱ་བར་འོས་པ་རྣམས་ཀྱང་བློ་ནུས་དང་བསྟུན་པའི་བསླབ་སྦྱང་ལ་བརྩོན་པར་བྱ། རྩ་བ་ལས་ཉམས་ན་གནས་ནས་དབྱུང་ཞིང་། ལྷག་མ་སོགས་དགེ་འདུན་དང་གང་ཟག་སོ་སོར་བཤགས་པ་གཞུང་བཞིན་བྱེད། ཡུལ་ཚན་སོགས་སྡེ་རིས་སུ་བཅད་དེ་དགེ་འདུན་གྱི་དབྱེན་ཆེན་པོ་བྱས་ན་སྟེ་པོ་སུ་ཡིན་དབྱུང་ཞིང་། གཞན་རྣམས་ལ་སྤྱི་ཐོག་ཏུ་མང་ཇ། ཚ་ར། ཐུག་དར་ལྕོག །སྙན་དར། བླ་མར་ཇ་ཁག་ཡས་གཙོས་པའི་བདུན་ཚན། སྣེ་མོ་བ་སོ་སོར་རྣམ་གཞག་གཏོང་། རེ་གཉིས་(༦༡བ)

ནས་འཐབ་རྩོད་ཀྱི་་འགྲམ་ལྟ་བུ་བྱུང་ན་རྨསཆེ་ཆུང་ལ་དཔགས་པའི་གོང་གི་ཆད་པ་རིམ་འགྲོས། རྨ་སོགས་འཇལ་སྤྱོད་སོགས་ཚུལ་ལྡན་བསྒྲུབ། དེ་མིན་ལག་འཐབ་སོགས་ལ་དཀར་མེ་སྙན་དར། གྲྭ་ཇ་བརྒྱ་ཕྱག་སོགས་ཆེ་ཆུང་ཉེས་བྱས་དང་བསྟུན་པ་འགེལ། དགེ་འདུན་སྤྱིའི་རྫས་ལ་གང་ཟག་གིས་ལོངས་མི་སྤྱོད། སྤྱོད་པར་འོས་པའི་བྲེ་སྲང་སོགས་ཀྱང་སྤྱི་སར་སྐྱེལ། ཁེ་ཚོང་སོ་ནམ་ཞིང་ལས་བུན་སྐྱེད། དུད་འགྲོ་བསྲེལ་བ། རྒྱན་པོ་འགྱེད་པ། འདུས་ལ་བལྟ་བ་སོགས་སྤོང་། བླ་མས་བེར་ཟླམ། ཕྱིང་དམར། བསེ་ཞུ། རྩེ་ཞྭ། པཎ་དོམ་ལས་ལུང་མ་བསྟན་གྱི་ཞྭ་གོས་མི་གྱོན། གྲྭ་པ་རྣམས་ཀྱིས་རྩེ་ཞྭ་ཟླ་གམ་ཞེ་མཚུངས་ལས། པཎ་ཞྭ། པགས་ཞྭ། སྒོམ་ཞྭ། འབར་ཞྭ། སླེའུ། ཕྱིང་པ། གོས་དཀར་པོ། ཕུ་ཐུང་དང་། ཕུ་གུ་ཅན་གྱི་སྐ་རགས། ཕོར་ཤུབས། སྒོམ་ཐག །དྲ་ཕད། སུག་རྩ། ཟོམ་པ། པགས་ཐུལ་སོགས་ལ་མི་སྤྱོད་ཅིང་། སྤྱད་ན་དངོས་པོ་ངོ་བོ་འཕྲོག །གླིང་གསེབ་སྐད་རྒྱངས། ཀུ་ཅོ། མཆོངས། རྡོ་སྐོར། འུར་རྡོ་འཕེན་པ། ཞིང་སྔོ་ཐོག་ལམ་བྱེད་པ། མཐང་ཤམ། རྡུལ་གཟན་མེད་པར་ལམ་སྲང་དང་ཕྱི་རོལ་སོགས་སུ་མི་འགྲོ། ཚོགས་དང་ཆོས་རར་འདུ་བའི་ཚེ་དུང་དང་གཎྜི་འཁར་རྔའི་བརྡ་དང་བསྟུན་སྤྱོད་ལམ་བག་དང་ལྡན་པས་འདུ་ཞིང་བསླབ་གྲལ་སོགས་མ་འཁྲུག་པར་བྱེད། གཉིད་ལོག་པ། ལོང་གཏམ། བཞད་གད། རྩིག་པ་དང་ཀ་བར་སྙེ་བ་དང་། བཟའ་བཏུང་ལ་སྤྱོད་པའི་ཚེ་ཅག་ཅག །ཧུ་ཧུ། ལྕེ་བལྡག་པ་སོགས་སྤོང་། (༦༢ན)

ནད་པ། མཚམས་པ། སྤྱི་པའི་ལས་བྱེད་དུ་འཁོད་པ་མིན་ཕྱིན་ཚོགས་སུ་མ་ཡོངས་པར་སྐལ་པ་མ་སྟེར། ནང་མཆོད། སྨན་རྟ། མཁར་ལས་སོགས་དམིགས་བསལ་ལ་དགོས་པ་བྱུང་ན་མ་གཏོགས་ཆང་མི་ལེན། ནད་པ་ཉམ་ཆུང་གི་རིས་ལ་དགེ་འདུན་དཀོན་མཆོག་གི་རྫས་ཀྱི་སྟེང་ནས་རིམ་གྲོ་བྱེད། ནག་ཆེན་གྱི་སྲོག་སྐྱོབ་དང་། རྒྱང་གྲགས་གཅིག་ཚུན་གྱི་བྱ་རི་དྭགས་བསྲུང་བ་སོགས་མི་འཇིགས་པའི་སྦྱིན་པ་བྱིན། དབྱར་གནས་འགག་དབྱེ་གསོ་སྦྱོང་རྣམས་འཆག་མེད་དང་། ཚོགས་འདོན་གྱི་ཆོས་སྤྱོད་སྐོར་འབྲས་སྤུངས་ཚོགས་ཆེན་སོར་གནས་ཀྱི་སྟེང་སྨན་བླ་ཆེན་མོ་འཛུགས། མདོ་ཕྱོགས་ལ་ཤེས་འདོད་ཡོད་པ་དང་འཆར་སྒོ་ཡོང་བའི་གཞོན་གྲྭ་རྣམས་ལ་དབུ་ཕར་སོགས་ཀྱི་འཆད་ཉན་བྱེད། མཚན་ཉིད་པ་རྣམས་ཀྱིས་ཆོ་ག་བསྐང་བ་སོགས་ལ་མི་བལྟ། ཡོན་ཏན་གྱི་གཞི་ཐིངས་ནས་གྲྭ་ས་ཕན་ཚུན་དུ་པོ་ཏི་ཕྱི་མའི་སློབ་སྦྱང་ལ་གཏོང་། རྒན་གྲྭ་མདོ་ཕྱོགས་ལ་ཤེས་འདོད་ཆུང་བ་རྣམས་གསང་འདུས། འཇིགས་བྱེད། ཀུན་རིག་ཆེན་མོ། མི་འཁྲུགས་པ། མགོན་པོ་ཕྱག་དྲུག་པ། ཆོས་རྒྱལ། དམག་ཟོར་མའི་བསྐང་བ་རྣམས་འཛིན་བཤར་བྱེད་ཅིང་། དེ་རྣམས་ཟུར་དུ་ཚོགས་པའི་ཚེས་བརྒྱད་ལ་མི་འཁྲུགས་པ། བཅོ་ལྔ་ལ་ཀུན་རིག །ཉེར་ལྔ་ལ་གསང་འདུས། ཉེར་དགུ་ལ་བསྐང་བ་བྱེད། གྲྭ་ཇ་ལ་ཐམས་ཅད་ལྷན་དུ་འཚོག་ཅིང་ཆོས་སྤྱོད་སྨན་བླ་སྡེབས་སུ་འདོན། ལྔ་མཆོད་སོགས་དུས་མཆོད་ཀྱི་རིས་གང་ཡོད་ལ་ལྷན་དུ་ཚོགས་ན་སྨན་བླ་དང་། མདོ་ཕྱོགས་མི་བྱེད་པ་རྣམས་ཟུར་དུ་འཚོག་ན་དེ་རྣམས་ཀྱིས་གསང་འདུས་མི་འཁྲུགས་པ་སོགས་གང་(༦༢བ)

རིས་གཏོང་། ཆོ་ག་བསྐང་གསོ་སོགས་ཀྱི་རྩི་ཞག་ཆོས་རར་བཏང་ཀྱང་འགལ་བ་མེད། ཆོས་ཐོགས་གི་དུས་གུང་ཚོགས་གྲོལ་ནས་ལམ་རིམ་ཆེ་ཆུང་། བཀའ་གདམས་གླེགས་བམ། བཀའ་གདམས་ཐོར་བུ། བློ་སྦྱོང་སོགས་སྤྱི་ཆོས་གྲྭ་པ་ཚང་མར་འཆད། སྔ་དྲོ་འབུམ་ཚར་རེ་སྒྲོག་པ་སོགས་བསྟན་པ་རིན་པོ་ཆེ་འཕེལ་རྒྱས་ཀྱི་རྒྱུར་འགྲོ་བའི་འཁོར་ལོ་གསུམ་གྱི་རིམ་པ་རྣམས་བླ་མ་རྫོང་སྡོད་ལས་འཛིན་རྣམས་ཀྱིས་འབད་པས་བསྒྲུབ་པ་ནི་ལེགས་བྱས་རྒྱ་མཚོ་འཕེལ་བའི་གཞི་དམ་པའོ། །དེ་ལྟར་ཁྲིམས་སུ་བཅའ་བའི་ཟླ་ཟེར་གྱིས། །དགའ་ལྡན་ཕན་བདེ་གླིང་གི་ཀུནྡའི་ཚལ། །རབ་བཞད་ལེགས་བྱས་ཨུཏྤལ་བྱང་ཆུབ་ཆེའི། །རྣ་གོང་མཛེས་མིན་དེ་སྲིད་རྙིང་མེད་ཤོག །སེམས་ཅན་རྣམས་ཀྱི་མཐའ་དང་མཉམ་འཇུག་པ། །སྲས་བཅས་རྒྱལ་བའི་འཕྲིན་ལས་རྒྱུན་མི་ཆད། །གསར་པའི་མཐོ་རིས་ཆུ་བོས་བདག་གཞན་གྱི། །སྡིག་ཆོས་དྲི་མ་མ་ལུས་བཀྲུ་བར་ཤོག །ཕུན་ཚོགས་འདོད་འཇོ་ནོར་འཛིན་ཡངས་པའི་མངལ། །གསེར་སྦྱངས་ཅོད་པན་འབར་བའི་གཟི་བྱིན་གྱིས། །ལེགས་ཁྱབ་ཀུན་ཏུ་དགའ་བའི་ཟློས་གར་གཟུགས། །མངོན་སུམ་མཐོང་བའི་སྣང་བ་ཆེས་དཀར་ཤོག །ཅེས་འབའ་དགའ་ལྡན་ཕན་བདེ་གླིང་པའི་ཁྲིམས་སུ་བཅའ་བའི་རིམ་པ་བླང་དོར་གསལ་བའི་ཟླ་བར་གྲགས་པ་འདི་ནི་འབའ་ལྷུན་གྲུབ་རབ་བརྟན་གྱི་རྫོང་སྡོད་དར་རྒན་དཀའ་བཅུ་པས་བསྐུལ་བ་ལྟར་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་འཇམ་དབྱངས་བསྟན་འཛིན་གྱིས་བགྱིས་པ་ཛ་ཡནྟུ། །སྣང་བ་རིག་པའི་རྩལ་དུ་ཤར་བའི་འཕྲུལ། །ཟིལ་གནོན་དབང་དྲག་གྲུབ་པའི་(༦༣ན)

བརྟུལ་ཞུགས་ཀྱི། །སེང་གེའི་རྒྱུད་ཀྱི་ང་རོའི་གཏམ་འདི་ལ། །སྣང་སྲིད་ལྷ་འདྲེ་མི་གསུམ་རྣ་བ་ལྷོག །ཆོས་སྐྱབས་ཐ་ཡང་ཆི་ཡི་མིང་འཛིན་པ། །ཚུལ་གནས་ཐོས་བསམ་སྒོམ་པར་བྱེད་པ་ལ། །བསམ་སྦྱོར་ངན་པའི་འཚེ་བ་རབ་སྤངས་ཏེ། །འདོད་དགུ་ཡིད་བཞིན་འགྲུབ་པའི་མཐུན་རྐྱེན་སྦྱོར། །འགལ་ཚེ་མ་རིག་འཁྲུལ་སྣང་སྡིག་པའི་གཟུགས། །གཏུམ་དྲག་རྔམས་པས་སྙིང་གི་ཁྲག་དྲོན་འཇིབ། །ལེགས་པར་བྱས་རྣམས་སྲིད་ཞིའི་ཕུན་ཚོགས་ལ། །སྤྱོད་བའི་བདེན་ཚིགས་བརྗོད་པར་ཡི་རང་བྱོས། །དགའ་ལྡན་ཡིད་དགའ་ཆོས་འཛིན་དང་མཚུངས་པ། །དམ་པའི་ཆོས་ཀྱི་སྐྱེད་མོས་ཚལ་ཆེན་པོ། །སྟག་ལུང་སྐུ་སྐྱེས་འབད་པས་ཉེར་བསྐྲུན་པའི། །རྨད་བྱུང་ཁྲིམས་ལྡན་འདུ་བའི་ཆོས་སྡེ་འདི། །ལེགས་ལྡན་ནག་པོ་དཔལ་ལྡན་ཕྱག་དྲུག་པ། །མ་ཧེའི་གདོང་ཅན་ལྷ་ཆེན་ཉི་མའི་བུར། །གཉེར་དུ་གཏད་ན་ཐོས་བསམ་སྒོམ་པ་དང་། །བྱ་བ་ལས་ཀྱི་འཁོར་ལོ་མ་ལུས་པ། །ཡར་ངོའི་ཟླ་བ་ལྟ་བུར་འཕེལ་བར་མཛོད། །ཅེས་ཧན་སྟག་ལུང་སྐུ་སྐྱེས་ཤ་སྦྲང་དུ་འདུས་སྡེ་གསར་དུ་བཙུགས་པའི་མིང་དང་ཆོས་སྐྱོང་ལ་གཉེར་གཏད་དགོས་ཚུལ་བྱུང་བ་ལྟར་དགོན་པའི་མིང་དགའ་ལྡན་སྐྱེད་ཚལ་དང་ཆོས་སྐྱོང་ཕྱག་དྲུག་པ་དང་ལས་གཤིན་ལ་གཉེར་དུ་གཏད་པའི་ཚིགས་བཅད་འདིའང་ཟ་ཧོར་གྱི་བནྡེས་སྦྱར་བའོ། །ཆུ་གླང་དགའ་ལྡན་ཧུང་ཐའི་ཇིས་མི་མ་ཡིན་གྱི་འཚེ་བ་ལས་སྐྱོབ་པའི་སྲོང་ཡིག་ཅིག་དགོས་ཚུལ་བྱུང་བ་ལྟར་བྲིས་པ་དཀོན་ཅོག་མཐུ་སྦྱིན་ནོ། །ན་མོ་ཏྣ་ཏྲ་ཡཱ་ཡ། སླུ་མེད་མཆོག་གསུམ་ཐུགས་རྗེའི་བྱིན་རླབས་དང་། །ཆོས་ཉིད་གདོད་ནས་འགྱུར་བ་མེད་ཅིང་དག(༦༣བ)

།ཆོས་ཅན་རྒྱུ་ལས་འབྲས་བུ་ལྷུན་གྲུབ་པའི། །རྟེན་ཅིང་འབྲེལ་པར་འབྱུང་བའི་མཐུ་ཆེན་པོས། །བསྟན་པའི་སྦྱིན་བདག་ས་ཆེན་རབ་སྐྱོང་འདིའི། །ལུས་ངག་ཡིད་གསུམ་ཚེ་སྲོག་སྟོབས་འབྱོར་ལ། །གནོད་ཅིང་འཚེ་བ་གླགས་ལྟའི་བསམ་པ་དང་། །སྦྱོར་བ་ངན་པ་མ་བྱེད་རཀྵ་ཡ། །རྩ་བརྒྱུད་བླ་མ་ཡི་དམ་ཆོས་སྲུང་གིས། །རྟག་ཏུ་བྱིན་རློབས་ལེགས་ཚོགས་ཡོན་ཏན་ཀུན། །ཡར་ངོའི་ཟླ་བ་ལྟ་བུར་རབ་འཕེལ་ཏེ། །བསམ་དོན་ནི་ཌཱ་བྷོ་ག་ཀུ་རུ་ཧོ། གུ་རུ་དེ་ཝཌཱཀི་ར་ཀྵི་ཏཻ་རེ་ཁཱདྷརཀཱཡ་ཝཀྩི་ཏྟབཛྲར་ཀྵ། །པར་མགུ་རུ་ཤྩཡ་མཱ་རི་དཻ་ཝི་རཱ་དྷི་ཥྛི་ཏེ་སྭཧཱ། རིགས་བརྒྱའི་ཁྱབ་བདག་རྡོ་རྗེ་འཆང་གིས་གསུངས་པའི་གཤེད་གྱི་རྒྱུད་ལ་བརྟེན་ནས་མཁས་ཤིང་གྲུབ་བརྙེས་ལཱ་ལི་ཏ་དང་། བིརྦྦ་པ་དཔལ་འཛིན་སོགས་འཕགས་ཡུལ་གྱི་པཎ་གྲུབ། ར་སྐྱོ་མལ་ཞང་གཉོས་ཏེ་ཕྱོགས་འདིའི་སྲོལ་འབྱེད་འཇིག་རྟེན་གྱི་མིག་གཅིག་པུ་ཐམས་ཅད་མཁྱེན་པ་བུ་སྟོན་རིན་པོ་ཆེ་རྡོ་རྗེ་འཆང་ཚར་པ་ཆོས་རྗེ་ཡབ་སྲས་སོགས་རྩ་རྒྱུད་ཀྱི་བླ་མ་དམ་པ་རྣམས་ཀྱི་བཀའ། བདུད་སྡེའི་གཤེད་དུ་འཇམ་དཔལ་དྲག་པོར་ཁྲོས་པས་འཇིགས་མཛད་རྡོ་རྗེའི་ལུང་། གོང་མའི་ལུང་གིས་དེའི་ཆིང་ཀྱིང་གང་ཞེས་སྲིད་ཞིའི་གཙུག་རྒྱན་དུ་དབང་བསྐུར་ཞིང་། འཁོར་འདས་ཕྱག་རྒྱ་ཟིལ་གནོན་འཇམ་དཔལ་དུས་དགྲའི་སྔགས་འཆང་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ་ཕྱོགས་ཐམས་ཅད་ལས་རྣམ་པར་རྒྱལ་བའི་གཏམ། ཁམས་གསུམ་ན་མངོན་པར་རྒྱུ་བའི་གཟུགས་མེད་སྣང་ཞིང་སྲིད་པའི་ལྷ་སྲིན་སྡེ་བརྒྱད། གཟུགས་ཅན་གྱི་སྐྱེ་དགུ་སྤྱི་དང་། བྱེ་བྲག་སྟོད་མངའ་རིས་སྐོར་གསུམ། བར་དབུས་གཙང་ཁྲི་སྐོར་བཅུ་གསུམ། སྨད་མདོ་ཁམས་ཀྱི་འཛིན་མར་འཁོད་པའི་ལྷ་སྡེ་མི་སྡེ་བླ་མ་ཆེ་ཕྲ། ས་སྐྱོང་བའི་མིའི་རྗེ་(༦༤ན)

བོ། དཔོན་ཆེན། དཔོན་སྐྱ། རྫོང་སྡོད། གཉེར་ལས་འཛིན། དམག་ཨར་ཇག་གི་འགྲིམ་འགྲུལ། ཀོ་གྲུ་ལྕགས་གསུམ་གྱི་མཉན་གཉེར། ལམ་འཕྲང་སྲུང་མི་སོགས་མཆོག་དམན་བར་པའི་སྐྱེ་དགུ་མཐའ་དག་ལ་སྤྲིངས་པ། མ་བྱོན་སངས་རྒྱས་གསུམ་པ་ཆོས་རྗེ་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་དང་གསང་ཆེན་རྙིང་མའི་སྔགས་ཆང་གོས་དཀར་ལྕང་ལོའི་ཕྲེང་ཅན་མཐུ་ཆེན་གཡུང་སྟན་རྡོ་རྗེ་དཔལ་བ་གཉིས་ཀྱིས་ཡོས་ལོ་ཧོར་ཟླ་བཅུ་གཉིས་པའི་ནང་དུ་འཆི་བདག་གཤིན་རྗེའི་གྲོང་ཁྱེར་ཐོད་པ་ལྕགས་ཀྱི་ཁང་པ་ནས་ལས་ཀྱི་གཤིན་རྗེ་འཁོར་སྡེ་བརྒྱད་དྲེགས་པའི་དམག་ཚོགས་དང་བཅས་པ། མངོན་འབྱོར་ཆོས་སུ་ཞུགས་པའི་སྟང་སྟོབས་དང་། ངོ་བོ་རྣལ་འབྱོར་པའི་ཏིང་ངེ་འཛིན་གྱིས་བཀུག་པའི་ཆོས་སྲུང་སོགས་སྐྱེ་ཕལ་གྱི་མིག་གི་ཡུལ་དུ་མ་གྱུར་པས་གཞི་བར་སྣང་གི་ཁྱོན་གང་བ་སྤྱན་དྲངས་ཏེ། དམ་རྫས་གཏོར་མའི་རི་བོ་དང་། དམར་ཆེན་ཁྲག་གི་རྒྱ་མཚོ་བསྐྱིལ་བ་སོགས། ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད་ཅིང་ཐུགས་དམ་བསྐང་། སྤྱི་བོར་རྡོ་རྗེ་བཞག །ལྕེ་ཐོག་ཏུ་ཨ་མྲི་ཏ་བླུག་སྟེ་བསྟན་འགྲོའི་ཕན་བདེ་འཇོམས་པའི་དགྲ་བགེགས་ཚར་གཅོད་པའི་དམ་ཚིག་བསྒྲགས་ཤིང་འཕྲིན་ལས་གཉེར་དུ་གཏད། དབྱུ་གུ་དྲུག་ཅུ་རྩ་བཞི་དང་འབྲེལ་བའི་དམར་ཆེན་གཏོར་མ་འཕེན་པའི་སྲོལ་གཏོད་པར་མཛད་པའི་རྒྱུན་དིང་སང་གི་བར་དུ་མ་ཉམས་པར་འདུག་པ་ནས། རབ་བྱུང་བཅུ་གཅིག་པའི་ཤིང་ཡོས་ཧོར་ཟླ་བཅུ་གཅིག་པའི་ནང་དུ་མ་ཧེའི་མཆོད་པ་འཛུགས་རྒྱུར་སྐྱེ་དགུ་རྣམས་ངོ་མཚར་གྱི་ལྟད་མོའི་དགའ་སྟོན་དང་། ལྷ་སྲིན་སྡེ་བརྒྱད་རྣམས་དགྲ་བགེགས་ཀྱི་ཤ་ཁྲག་ཚོགས་སུ་རོལ་པའི་མགྲོན་ལ་ཤོག་ཅིག་བརྡ་འགྲེམས་པ་རླུང་སེམས་ལ་ནང་བྱན་ཆུད་པའི་རྣལ་འབྱོར་བརྟུལ་ཞུགས་སྤྱོད་པ་འདི་(༦༤བ)
བཞིན་སོང་བ། ཁྱོད་གོང་འཁོད་རྣམས་ཀྱིས་གཞི་ལམ་བྱེས་གསུམ་ཐམས་ཅད་དུ་ཞག་བབས་སུ་གནས་མལ་གཏོང་ཞིང་བཟའ་བཏུང་མཁོ་དགུའི་ལོངས་སྤྱོད་ཀྱིས་བསྟེན་པ་དང་། ཀོ་གྲུའི་གཉེན་པས་ཀྱང་འཕྲལ་སྒྲོལ་གྱིས། གལ་ཏེ་གནོད་འགལ་དུ་འགྲོ་བ་བྱུང་ན་ཡུལ་གྲུའི་དཔོན་ཆེ་ཆུང་དང་། རྫོང་སྡོད་སོ་སོའི་ཁྲིམས་ཀྱི་བདའ་དེད་བཏང་ན་མི་འཇིགས་སམ། གོ་བར་བྱེད་པའི་ཡི་གེ་ཤིང་སྟག་སྨིན་དྲུག་ཟླ་བའི་གྲལ་ཚེས་དགེ་བར་གཙུག་ལག་ལུགས་བརྒྱའི་འདུན་ས་ཕོ་བྲང་ཆེན་པོ་པོ་ཏ་ལ་ནས་བྲིས་སོ། །