ལྷ་ས་སྨོན་ལམ་ཆེན་མོའི་ཚེ་དགེ་འདུན་རྣམས་ཀྱི་ཁྲིམས་སུ་བཅའ་བའི་རིམ་པ་སོགས།
པུ རྦ ཏྭ བུ དྡྷོ ཏྤ ད ཛ མྦུ དཱ རོ ྉྥ ལ དྭི གཱ ཎ སྱ ས རོ ཏྨ པཱ ཀྱཿ སྔོན་གོམས་ཐུགས་བསྐྱེད་འཛམ་བུའི་ཤིང་གི་འབྲས། །ཚོགས་གཉིས་ཆུ་གཏེར་ཀློང་དུ་ཡོངས་སྨིན་པའི། །ནེ མི ཏྟྱ དཱ ཧཱ ར ར མ ཉྫུ རི མྦྷུ རི ཤྱོ མུ ནེ མ ངྒ ལ མཱུ ཁ བྷ ངཿ མཚན་དཔེ་གསེར་གྱི་སྙེ་མ་གཡུར་ཟ་མཁན། །ཟས་གཙང་སྲས་ཀྱི་བཀྲ་ཤིས་སྒོ་འཕར་ཕྱེ། །ལུང་རྟོགས་ཐེག་(༦༥ན)
ལེ་མཆོག་མར་ཆགས་པའི་གདོང་། །རིག་བྱེད་ཆོས་ཕུང་བརྗོད་པ་རྣམ་དག་ཁུངས། །སྔོན་མེད་དགའ་བ་བརྒྱ་བ་བཙོང་ཁ་པའི། །ཞབས་སེན་ཟླ་བ་གཙུག་ཏོར་རྩེ་མོར་ཚེས། ཤཱཀ་སེང་རྒྱུད་སྒྲས་མུ་སྟེགས་རི་དྭགས་ཀླད། །འགེམས་པའི་མཉན་ཡོད་དུས་སྟོན་འཕགས་ཡུལ་དངོས། །ཡོངས་འཕོས་འཇམ་དཔལ་སྙིང་པོའི་མཛད་ཆེན་རྗེས། །འཇུག་རྣམས་བླང་དོར་མེ་ལོང་འདི་ལ་གཟིགས། །དེའང་སྒྲོན་མའི་བསྐལ་པ་བཟང་པོ་འདི་ལ་འོ་སྐོལ་གྱི་སྟོན་པ་ས་གསུམ་གྱི་སྒྲོན་མེ་གཅིག་པུ་པ་རྣམ་འདྲེན་བུ་རམ་ཤིང་པའི་བསྟན་པ་རིན་པོ་ཆེ་ནི། སྤྱོད་འཇུག་ལས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་རྟེན་བསོད་ནམས་བློ་གྲོས་ཐངས་འགའ་འབྱུང་། །ཞེས་དངོས་བསྟན་མུན་པ་དང་གློག་མི་ཁོམ་པ་དང་དལ་འབྱོར་གྱི་དཔེར་བཟུང་ནས་བརྒྱ་ལམ་ཙམ་དུ་རྙེད་དཀའ་བའི་དལ་འབྱོར་གྱི་རྟེན་བསོད་ནམས་ཀྱི་འབྲས་བུ་སངས་རྒྱས་ཀྱི་མཐུ་ལ་བརྟེན་ནས་ཐངས་འགའ་རེ་ཙམ་འབྱུང་བར་བཤད་པའི་ཤུགས་ལ་མུན་པའི་སྨག་ཆེན་པོའི་ནང་དུ་གློག་འཁྱུག་པ་སྲིད་པ་བཞིན་དུ་མུན་བསྐལ་མཐའ་ཀླས་པའི་བར་མཚམས་སུ་སྒྲོན་མེའི་བསྐལ་པ་ལ་དེ་བཞིན་གཤེགས་པ་བྱོན་པའི་བསྟན་པ་རིན་པོ་ཆེ་ལྷ་དང་བཅས་པའི་འཇིག་རྟེན་ཐམས་ཅད་ཀྱི་བསོད་ནམས་ཀྱི་ཞིང་རྨད་པོ་ཆེ་ཡིན་པ་ནི། བདེ་བར་གཤེགས་པའི་གསུང་རབ་ལས་བྱུང་བའི་དཀར་ནག་གི་ལས་འབྲས་ཇི་བཞིན་བསམས་པའི་བླང་དོར་ལ་བརྟེན་ནས་འདི་ཕྱི་ཀུན་གྱི་བདེ་སྐྱིད་དཔྱིད་ཀ་ས་བོན་གང་བཏབ་ཀྱི་འབྲས་བུ་སྟོན་གྱི་དུས་སུ་མི་འཚོལ་བར་འབྱུང་བའི་ཕྱིར། དབུ་མ་(༦༥བ)
རིན་ཆེན་ཕྲེང་བ་ལས། མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དག །ཅེས་གསུངས་ལ། དེ་ཡང་། སངས་རྒྱས་ཕལ་པོ་ཆེ་ལས་འདྲེན་པ་ལ་ནི་མཐར་ཐུག་མེད། །དེ་དག་སྐུ་ནི་གཅིག་ཏུ་སྣང་། །སྐུ་གཉིས་དེ་དག་བསམ་མི་ཁྱབ། །འཇིག་རྟེན་ཁམས་སུ་སྣང་གྱུར་ཀྱང་། །སྐུ་ལ་གཉིས་སུ་གྱུར་པ་མེད། །ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་འགྱུར་ཡང་། །ཟླ་བ་གཉིས་སུ་གྱུར་པ་མེད། །ཅེས་བདེ་བར་གཤེགས་པ་རྣམས་ཀྱི་འགྲོ་བའི་དབང་པོ་དང་འཚམ་པར་སྐུ་གསུང་ཐུགས་ཀྱི་བཀོད་པ་བསམ་གྱིས་མི་ཁྱབ་པ་ཞིག་སྟོན་པས་ན་འདྲེན་པ་ཉི་མའི་གཉེན་ནི་ངེས་པའི་དོན་དུ་འོག་མིན་སྟུག་པོ་བཀོད་པར་སངས་རྒྱས་ཟིན་ཀྱང་འཛམ་བུའི་གླིང་དུ་མཆོག་གི་སྤྲུལ་པའི་སྐུའི་སྣང་བརྙན་བཟུང་བའི་འགྲོ་བློའི་དྭངས་མཚོར་ཟླ་གཟུགས་བཞིན་ཤར་བ་ཐེག་པ་ཆེ་ཆུང་གི་བཤད་ཚུལ་མཐའ་ཀླས་ཤིང་། བྱེ་བྲག་མཉན་ཡོད་དུ་སྟོན་པ་དྲུག་སོགས་བཏུལ་བའི་ཆོ་འཕྲུལ་གྱི་མཆོད་པ་ཡང་མདོ་སྡེ་མཛངས་བླུན་སོགས་སུ་ཚེས་གཅིག་ནས་བཅོ་ལྔའི་བར་དུ་བསྟན་པ་དང་འདུལ་བ་ལུང་དུ་ཚེས་བརྒྱད་ཀྱི་ཆོ་འཕྲུལ་ལས་ཉི་མ་གཞན་རྣམས་མི་གསལ་ཞིང་རྟོགས་བརྗོད་རིན་པོ་ཆེ་དཔག་བསམ་འཁྲི་ཤིང་དུའང་ཐེག་དམན་གྱི་རྗེས་སུ་འབྲངས་པའི་བཤད་ཚུལ་བྱུང་ནའང་དོན་ཆོ་འཕྲུལ་གྱི་མཛད་པ་བསྟན་པར་མཚུངས་ཤིང་འཕགས་ཡུལ་དུ་དར་བའི་རྒྱུན་བཟང་པོ་གངས་ཀྱི་ར་བས་ཡོངས་སུ་བསྐོར་བའི་ལྗོངས་འདིར་སོ་སོའི་བསྟི་གནས་སུ་དུས་མཆོད་མཛད་པ་མང་དག་བྱུང་མོད། གཙོ་བོར། འཇམ་དཔལ་རྩ་བའི་རྒྱུད་ལས། དེ་བཞིན་གཤེགས་(༦༦ན)
པའི་བསྟན་འདི་ལ། །རྣམ་པ་སྣ་ཚོགས་བྱ་བ་བྱེད། །བྱང་གི་ཕྱོགས་ལ་བརྟེན་ནས་ནི། །དེ་ཡི་ཚེ་ན་འབྱུང་བར་འགྱུར། །ལྷ་ལྡན་ཡུལ་ཞེས་བྱ་བ་ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །ལི་ཙ་བཱི་རྣམས་རིགས་སུ་འབྱུང་། །དེ་ཡང་སྔགས་ཀྱི་དོན་སྒྲུབ་སྟེ། །ལོངས་སྤྱོད་ཆེ་དང་ལྡན་པར་འགྱུར། །རིག་པ་ལོངས་སྤྱོད་ལྡན་ཞེས་བྱ། །མི་ཡི་བདག་པོས་དེ་ཡང་འགྲུབ། །ལོ་ནི་བརྒྱད་ཅུར་རྒྱལ་སྲིད་བྱ། །དེས་ན་རྐུན་མ་རྣམས་པར་སྤངས། །རྒྱལ་པོ་དེས་ནི་སྲོག་སྤངས་ནས། །དེ་ཡང་སྔགས་ནི་མྱུར་འགྲུབ་སྟེ། །ཞི་དང་རྒྱས་དང་བསིལ་བྱེད་པའི། །འཇིག་རྟེན་སྒྲོལ་མ་ཞེས་གྲགས་དང་། །ལྷ་མོ་གོས་དཀར་མོ་དང་ནི། །དཀར་མོ་ཆེན་མོ་གཞན་ཕན་བཙོན། །རྟག་ཏུ་ཡིད་ནི་མི་སྐྱོ་བའོ། །དེ་ལ་སོགས་པ་གསུངས་པ་ཡི། །དེ་བཞིན་རྒྱལ་པོ་མང་པོ་ནི། །རྣམ་པ་དུ་མ་མང་པོ་དག །ཁ་དོག་སྣ་ཚོགས་སྣ་ཚོགས་གཟུགས། །ཁ་བ་ཅན་ན་ཀླ་ཀློའི་རྒྱལ། །དེ་ཡང་སྟོན་པ་མཆོད་བྱེད་པའོ། །ཁྱུ་མཆོག་ཁྱུ་མཆོག་བཟང་པོ་དང་། །ས་འོད་དེ་བཞིན་ས་འོད་བཟང་། །དེ་བཞིན་ཕ་རོལ་གནོན་ཉིད་དང་། །རྐང་པའི་འགྲོས་ཤེས་ལྡན་པ་ཡིན། །ས་སྲུངས་དང་ནི་བེའུ་དང་། །འོད་ལྡན་ཉིད་ནི་ཕྱི་མ་ཡིན། །ཐ་མར་འཆར་རྒྱལ་ངང་ཚུལ་ཏེ། །ཀླ་ཀློ་རྣམ་པ་སྣ་ཚོགས་ཡིན། །དེ་འོག་ལུགས་ནི་རྣམ་ཞིག་ཅིང་། །ཕྱི་རོལ་སྐྱེ་དགུས་ཉེ་བར་སྤྱོད། །ཅེས་བསྟན་པའི་ནང་ཚན་ཐུགས་རྗེ་ཆེན་པོའི་རྣམ་སྤྲུལ་ཆོས་རྒྱལ་སྲོང་བཙན་སྒམ་པོ་དང་ལྷ་མོ་རྣམ་གསུམ་གྱི་སྤྲུལ་པ་ཁྲི་བཙུན། ཀོང་ཇོ། འབྲི་(༦༦བ)
བཟའ་ཐོད་དཀར་རྣམས་གཏང་དཔྱལ་གྱི་ཚུལ་བཟུང་ཞིང་བཙུན་མོ་སྔ་མ་གཉིས་ཀྱི་སངས་རྒྱས་དངོས་དང་དབྱེར་མ་མཆིས་པའི་ཇོ་ཤཱཀྱ་རྣམ་གཉིས་སོགས་གདན་དྲངས། རྒྱལ་པོ་ཡབ་ཡུམ་གསུམ་གྱིས་ཕོ་བྲང་མ་རུར་སྒྲུབ་པ་མཛད་པའི་ཚེ་རིགས་གསུམ་མགོན་པོའི་ལུང་བསྟན་བཞིན་མཐའ་འདུལ་ཡང་འདུལ་རུ་གནོན་གྱི་ལྷ་ཁང་རྣམས་བོད་སྲིན་མོ་གན་རྐྱལ་དུ་བསྒྱེལ་བ་འདྲ་བའི་སའི་མེ་བཙའ་གནོན་པའི་ཚུལ་དུ་བཞེངས་པའི་མཐར་འཕྲུལ་སྣང་དང་ར་མོ་ཆེའི་གཙུག་ལག་ཁང་ལེགས་པར་བསྐྲུན་ནས་བསྟན་པའི་རིན་པོ་ཆེ་སྲོལ་བཏོད་པར་མཛད་པའི་གཞི་མ་རྟེན་དང་བརྟེན་པའི་འཁོར་ལོ་སྲིད་པ་གསུམ་ན་ཟླ་མ་མཆིས་པ་འདི་ཉིད་དུ་ཆོ་འཕྲུལ་གྱི་མཆོད་པའི་སྲོལ་བཏོད་ཅིང་ཉམས་པ་མེད་པར་གནས་པའི་མཛད་པ་པོ་ནི། རྒྱལ་རབས་བཀའ་ཁོལ་མར། དེ་ནས་ཁྱད་པར་བསྙེན་བཀུར་ཆེར་མཛད་པ། །དགེ་སློང་བྱང་སེམས་ཤར་ཕྱོགས་སྐུ་འཁྲུངས་པ། །གསང་སྔགས་འཆང་ཞིང་རྣལ་འབྱོར་ཆེན་པོ་ནི། །སྙིང་པོའི་མཐའ་ཅན་སྐྱེས་ཆེན་དམ་པས་ནི། །ཞལ་ཡང་བསྒྱུར་ཞིང་བསྙེན་བཀུར་དམ་པ་མཛད། །དེ་ལ་བསྙེན་བཀུར་ཆེར་བྱེད་དེ་དག་ནི། །འཕགས་པའི་གང་ཟག་དགེ་སྦྱོང་ཤ་སྟག་གོ །ཞེས་ཤར་ཕྱོགས་བཙོང་ཁའི་ཡུལ་དུ་སྐུ་བལྟམས་ཤིང་དགེ་སློང་གི་རྟེན་ལ་ངེས་གསང་རྡོ་རྗེ་ཐེག་པའི་རྟོགས་པ་མངོན་དུ་གྱུར་པ་འཇམ་དཔལ་སྙིང་པོའི་མཚན་དང་ལྡན་པ་གང་དེས་འོག་མིན་ཞིང་གི་གཙོ་བོ་ལོངས་སྤྱོད་རྫོགས་པའི་སྐུ་ངེས་པ་ལྔ་དང་ལྡན་པའི་རྟེན་འབྲེལ་གྱིས་གསེར་གྱི་ཤཱཀྱ་མུ་ནི་ལ་རིན་པོ་ཆེའི་དབུ་རྒྱན་སྒྲོན་ཏེ་ལོངས་སྐུའི་རྣམ་པར་ཞལ་བསྒྱུར་ཞིང་སྲི་ཞུ་རྒྱ་ཆེར་མཛད་པ་ལུང་དོན་དང་ཤིན་ཏུ་འབྱོར་བའི་ཕྱིར་རྗེ་བདག་ཉིད་ཆེན་པོའི་མཛད་ཆེན་བཞིའི་ནང་ཚན་ལྷ་སའི་སྨོན་ལམ་ཆེན་མོར་གྲགས་པ། (༦༧ན)
འདི་ཉིད་དགུང་ལོ་ང་གསུམ་པ་ས་མོ་གླང་གི་ལོའི་ཚེས་གཅིག་ནས་བཅོ་ལྔའི་བར་ལྷ་མཆོད་མི་མཆོད་ཤིན་ཏུ་རྒྱ་ཆེ་བ་དངོས་བཤམས་ཡིད་སྤྲུལ་གྱི་ཀུན་ཏུ་བཟང་པོའི་རྣམ་པར་འཕྲུལ་པ་ལས་བྱུང་བ་ཡིད་ཅན་རྣམས་ཀྱི་བློའི་ར་བ་ལས་འགོང་བར་མཛད། གཙོ་བོར་རྗེ་བཙུན་ཉིད་ནམ་མཁའ་མཛོད་ལ་མངའ་བརྙེས་པའི་འཕྲིན་ལས་ཀྱི་ཆ་ཤས་ལས་བྱུང་བ་ཡིན་མོད། གནས་སྐབས་ཀྱི་བྱེད་རྐྱེན་སྡེ་སྲིད་ཕག་མོ་གྲུ་པ་གོང་མ་ཆོས་རྒྱལ་ཆེན་པོ་ཀྭ་ཏིང་ཏའི་གུ་ཤྲི་ཧོ་ཝང་གི་ལུང་ལ་བརྟེན་ནས་སྣེའུ་རྫོང་པ་ནང་སོ་ནམ་མཁའ་བཟང་པོས་སྦྱིན་བདག་གི་མཐིལ་མཛད་ཅིང་དེ་རྗེས་མེ་ཕོ་སྤྲེའུའི་ལོ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་དང་སྣེའུ་རྫོང་པ་ཡོན་མཆོད་བཀའ་བགྲོས་ཏེ་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་བཏབ། དེ་ནས་བཟུང་རྗེ་བདག་ཉིད་ཆེན་པོས་བཀའ་གནང་བ་དང་། སྣེའུ་རྫོང་པ་དུ་དབེན་ཤ་ནམ་མཁའ་བཟང་པོའི་བཞེད་པ་སྐོང་སླད། ལྷ་ས་སྨོན་ལམ་ཆེན་མོའི་མཁན་པོས་ཐོག་དྲངས། ཞལ་ཏ་དང་ཆབ་རིལ་བས་མཐའ་བརྟེན་པ་ཡན་འབྲས་སྤུངས་པས་མཛད། ཚོགས་པ་སེར་འབྲས་གཉིས་གཙོ་བོར་གྱུར་པའི་མདོར་ན་རབ་བྱུང་གི་རྟགས་ཆ་ལུགས་དང་ལྡན་ཕྱིན་རིས་སུ་མ་ཆད་པའི་ཕྱོགས་བཞིའི་དགེ་འདུན་འདུ་བར་རྒྱལ་བ་གཉིས་པའི་ཕྱག་ལེན་ལྟར། དེ་བཞིན་གཤེགས་པ་ལ་དད་པ་མང་བ་རྣམས་གསར་དུ་དད་པ་དང་། དད་པ་དང་ལྡན་པ་རྣམས་ལའང་སླར་གསོས་བཏབ་པའི་ཆེད་དུ། སྔ་དྲོ་སྙན་ངག་མཁན་རྣམས་ཀྱི་གཙུག་གི་ནོར་བུ་དཔལ་ལྡན་དཔའ་བོས་མཛད་པའི་འཁྲུངས་རབས་སོ་བཞི་པའི་ཆོས་ཐུན་རེ་དང་། དགོངས་མོ་སྲས་བཅས་རྒྱལ་བ་སློབ་མར་བཅས་པ་རྣམས་མོས་པ་(༦༧བ)
དང་བདེན་པའི་མཐུ་ལས། མཁའ་ཁྱབ་ཏུ་སྤྱན་དྲངས་པར་མཆོད་པ་དང་མཇུག་བསྔོ་སྨོན་གྱིས་མཐའ་བརྟེན། གདན་གུང་སྐྱེ་དགུའི་ཚོགས་གསོག་གི་དུས་ཀུན་ཏུ་བཟང་པོའི་སྨོན་ལམ་སོགས་ཆོས་སྤྱོད་ཀྱི་རིམ་པ་ལ་བརྟེན་ནས་བསོད་ནམས་ཀྱི་ཚོགས་དབྱར་མཚོ་ལྟར་སྤེལ་བའི་རྣམ་དཀར་གྱི་ལས་རླབས་པོ་ཆེ་བསྐྲུན་པ་ནི། སངས་རྒྱས་ཕལ་པོ་ཆེ་ལས། སྐྱེས་བུ་ལ་ལས་རྡོ་རྗེ་ཟོས་གྱུར་དེ་ལ་ནི། །ཞུ་བར་མི་འགྱུར་གདོན་མི་ཟ་བར་ཕྱིར་འབྱུང་འགྱུར། །དེ་བཞིན་སྟོབས་བཅུ་རྣམས་ལ་མཆོད་བྱས་བསོད་ནམས་ཀྱི། །ཡེ་ཤེས་རྡོ་རྗེས་ཉོན་མོངས་མ་ལུས་འཇོམས་པར་འགྱུར། །ཙྭ་སྐམ་སྤུངས་པ་རི་བོའི་མཆོག་ཙམ་ཡོད་གྱུར་ཀྱང་། །མེ་མདག་ཡུངས་འབྲུ་ཙམ་གྱིས་དེ་ནི་ཚིག་འགྱུར་ཏེ། །དེ་བཞིན་བདེ་གཤེགས་མཆོད་པ་ཅུང་ཟད་ཅིག་བྱས་ཀྱང་། །ཉོན་མོངས་ཐམས་ཅད་ཚིག་བྱེད་མྱ་ངན་འདས་རྒྱུར་འགྱུར། །རི་བོ་ཁ་བ་ཅན་ལ་མཐོང་ལེགས་སྨན་ཡོད་དེ། །མཐོང་ཞིང་ཐོས་པས་ནད་རྣམས་ཐམས་ཅད་ཞི་བར་བྱེད། །དེ་བཞིན་སྟོབས་བཅུ་རྣམས་ནི་མཐོང་ངམ་ཐོས་གྱུར་ཀྱང་། །ཡོན་ཏན་ཀུན་ལྡན་སངས་རྒྱས་ཡེ་ཤེས་འཐོབ་པར་འགྱུར། །ཞེས་ཕན་ཡོན་མཐའ་ཀླས་ཤིང་། དགེ་བའི་རྩ་བ་རྒྱ་ཆེན་པོ་བསྐྲུན་པ་དེ་ཙམ་དུ་མ་ཟད་བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་ལ་དམིགས་ཏེ་མེ་ཏོག་ཙམ་གཏོར་བ་དང་། སྲི་ཞུར་བྱ་བ་ཅུང་ཟད་བགྱིས་པའང་བསོད་ནམས་ཀྱི་ཚོགས་གཞལ་དུ་མེད་པ་ནི། ལུང་གཞི་ལས། གང་ཞིག་རབ་དང་སེམས་ཀྱིས་སངས་རྒྱས་ཀྱི། །མཆོད་རྟེན་མེ་ཏོག་སིལ་མ་སྤུངས་པས་འཐོར། །འཛམ་བུ་ཆུ་བོའི་གསེར་ཕྱེ་བྲེ་བོ་ནི། །སྟོང་ཕྲག་བརྒྱ་ལ་དེ་དང་མཉམ་པ་མིན། །ཞེས་དང་(༦༨ན)
མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་ལ་ནི་གོམ་འདོར་ན། །འཛམ་བུ་ཆུ་བོའི་གསེར་གྱི་ཚད་སྲང་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །གང་ཞིག་རབ་དང་སེམས་ཀྱིས་སངས་རྒྱས་ཀྱི། །མཆོད་རྟེན་ལ་ནི་འཇིམ་གོང་འཇོག་བྱེད་ན། །འཛམ་བུ་ཆུ་བོའི་གསེར་གྱི་གོང་བུ་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་དང་། སྙིང་རྗེ་པད་དཀར་ལས། ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་རིགས་ཀྱི་བུའམ། རིགས་ཀྱི་བུ་མོ་རབ་ཏུ་བྱུང་བའམ། ཁྱིམ་ན་གནས་པ་གང་དག་ཁ་ཅིག་ཐ་ན་རིང་བསྲེལ་ཡུངས་འབུ་ཙམ་ལ་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ཡོངས་སུ་མྱ་ངན་ལས་འདས་པ་ཡིན་ཏེ། ཐ་མ་ཡོངས་སུ་མྱ་ངན་ལས་འདའ་བར་ང་སྨྲའོ། །ཞེས་བསོད་ནམས་ཀྱི་ཕུང་པོའི་ཚད་གཟུང་བར་དཀའ་བའི་ངང་ཚུལ་དེ་ལ་འཇུག་བྱར་ཡོད་པ་ནི། ཚེ་རབས་མང་པོར་གོམས་པའི་ལེགས་བྱས་ཀྱི་འབྲས་བུ་ཡོངས་སུ་དུད་པའི་བཟང་པོའི་སྐལ་བ་ཅན་ཡིན་ལ། ཚོགས་ཀྱི་ཞིང་དམ་པ་ནི། ལུང་གཞི་ལས། དགེ་སློང་དག་དགེ་འདུན་ནི་ལྔ་པོ་འདི་དག་ཡིན་ཏེ། ལྔ་གང་ཞེན། ངོ་ཚ་མེད་པའི་དགེ་འདུན་དང་། ལུག་ལྟར་ལྐུགས་པའི་དགེ་འདུན་དང་། ཚོགས་ཀྱི་དགེ་འདུན་དང་། ཀུན་རྫོབ་ཀྱི་དགེ་འདུན་དང་། དོན་དམ་པའི་དགེ་འདུན་ནོ། །ཞེས་སྔར་བཤད་པའི་ནང་ནས་སློབ་པ་དང་མི་སློབ་པའི་དོན་དམ་པའི་དགེ་འདུན་དང་། ཕལ་ཆེར་ཀུན་རྫོབ་སོ་སྐྱེའི་དགེ་འདུན་ཡིན་པའི་ཕྱིར། མདོ་སྡེ་ཉི་མའི་སྙིང་པོ་ལས། གལ་ཏེ་དགེ་(༦༨བ)
སློང་ཆོས་ཀྱི་ས་གནས་པ་ཚུལ་ཁྲིམས་ཡོངས་སུ་དག་པ་ངོ་ཚ་ཤེས་པ་དང་། ཁྲེལ་ཡོད་པ་ཕུན་སུམ་ཚོགས་པ་དགེ་སློང་ལྔ་ཡང་འདུན། རྒྱལ་པོ་ཆེན་པོ་དགེ་སློང་གི་དགེ་འདུན་དེ་ནི་ཆོས་ཚད་མེད་པ་དང་ལྡན་པ་ཡིན་ཅིང་སྦྱིན་གནས་ཆེན་པོ་དང་། ལྷ་དང་མི་ཐམས་ཅད་ཀྱི་མཆོད་པར་འོས་པར་འགྱུར་རོ། །ཞེས་མཆོད་གནས་ཀྱི་ཡུལ་དམ་པར་གྱུར་པ་དེ་དག་གི་སྤྱོད་ཚུལ་ཀྱང་བག་མེད་པར་གྱུར་ན། ཐེག་པ་ཆེན་པོ་ལ་དད་པ་རབ་ཏུ་སྒོམ་པ་ལས། ས་ཡི་བདག་པོ་རྟག་ཏུ་བག་ཡོད་མཛོད། །བག་མེད་སེམས་ཅན་དམྱལ་བའི་གཡངས་སར་བོར། །བག་མེད་སྤྱོད་པ་སེམས་ཅན་དམྱལ་བར་མཆི། །ཞེས་གསུངས་ཤིང་། དེའི་ལྡོག་ཕྱོགས་ནི། ལུང་ཕྲན་ཚེགས་ལས། གང་བག་ཡོད་པར་བྱོས་ཤིག །ཅེས་ཟེར་བ་བག་ཡོད་པ་ནི་ཆོས་ཐམས་ཅད་ཀྱི་རྩ་བ་ཡིན་ནོ། །ཞེས་བཤད་པའི་བག་ཡོད་པ་ནི། འཕགས་པ་ཐོགས་མེད་ཀྱིས། བག་ཡོད་པ་གང་ཞེ་ན། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། བརྩོན་འགྲུས་དང་བཅས་པ་ལ་གནས་ནས་གང་དགེ་བའི་ཆོས་རྣམས་བསྒོམ་པ་དང་ཟག་པ་དང་བཅས་པའི་ཆོས་རྣམས་ལ་སེམས་བསྲུང་བ་སྟེ། ཞེས་བཤད་པས་སྤང་གཉེན་ལ་བླང་དོར་ཕྱིན་ཅི་མ་ལོག་པ་བྱེད་པའི་གཟོབ་པས་ལྷུར་ལེན་པ་ནི་བག་ཡོད་པ་སྟེ། དེས་སྒྲུབས་ཤིག །སོ་སོ་ཐར་པར། དེ་བཞིན་གཤེགས་པ་དགྲ་བཅོམ་པར་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་དང་། གཞན་ཡང་གང་དག་དེ་ལྟ་བུ་དང་མཐུན་པ། དགེ་བའི་ཆོས་བྱང་ཆུབ་ཀྱི་ཕྱོགས་རྣམས་ཀྱང་བག་ཡོད་པས་ཐོབ་བོ། །ཞེས་དང་། མགོན་པོ་ཀླུ་སྒྲུབ་ཀྱིས། བག་ཡོད་བདུད་(༦༩ན)
རྩིའི་གནས་ཏེ་བག་མེད་པ། འཆི་བའི་གནས་སུ་ཐུབ་པས་བཀའ་སྩལ་ཏོ། །དེ་བས་ཁྱོད་ཀྱིས་དགེ་ཆོས་སྤེལ་སླད་དུ། །གུས་ལས་རྟག་ཏུ་བག་དང་ལྡན་པར་མཛོད། །ཅེས་འཁོར་རྣམ་པ་བཞིའི་རྩ་བ་བག་ཡོད་ལ་རགས་ལུས་ཤིང་བྱེ་བྲག་ཏུ། རྒན་རིམ་ལ་བསྙེན་བཀུར་དགོས་ཏེ། ལུང་གཞི་ལས། བདག་ཅག་གི་ནང་ན་སུ་རྒན་དེ་ནས་གོང་མ་སྲེག་གིས་ཤིང་ནྱ་གྲོ་དྷ་ཞིག་བསྟན་ནས། ཤེས་ལྡན་དག་སུས་ཤིང་ནྱ་གྲོ་དྷ་འདིའི་ཚད་ཇི་ཙམ་པ་མཐོང་། གླང་པོ་ཆེས་སྨྲས་པ། ཁོ་བོ་ཁྱུ་དང་ལྷན་ཅིག་ལམ་འདི་ནས་འགྲོ་བ་ན་འདིའི་ཁོ་བོའི་ལུས་དང་མཉམ་པ་ཁོ་ན་མཐོང་ངོ་། །སྤྲེའུས་སྨྲས་པ། ཁོ་བོ་ཁྱུ་དང་ལྷན་ཅིག་ལམ་འདི་ནས་འགྲོ་བ་ན་འདིའི་སྲིད་ཁོ་བོ་དང་མཉམ་པ་ཁོ་ན་མཐོང་ངོ་། །དེ་དག་གིས་སྨྲས་པ། དེ་བས་ཁྱོད་རྒན་ནོ། །རི་བོང་གིས་སྨྲས་པ། ཁོ་བོས་འདིའི་ལོ་མ་གཉིས་སྐྱེས་པ་ན་ལོ་མའི་ཟིལ་པའི་ཐིགས་པ་ལྕེས་བལྡགས་སོ། །དེ་དག་གིས་སྨྲས་པ། འདི་དག་པས་ཀྱང་ཁྱོད་རྒན་ནོ། །གོང་མ་སྲེག་གིས་སྨྲས་པ། ཁྱེད་ཅག་གི་ཤིང་ནྱ་གྲོ་དྷའི་ཚད་ཆེན་པོའི་རྣམ་པ་འདི་མཐོང་ངམ་དེ་རྣམས་ཀྱིས་སྨྲས་པ། འདི་མཐོང་ངོ་། །ཁོ་བོས་ས་བོན་རྣམས་ཟོས་ནས་ཕྱོགས་འདིར་སྟུག་པ་བོར་བ་དེ་ལས་སྐྱེས་པ་ནི་འདི་ཡིན་ནོ། །དེ་རྣམས་ཀྱིས་སྨྲས་པ། གལ་ཏེ་དེ་ལྟར་ན་བདག་ཅག་ཐམས་ཅད་ཀྱི་ནང་ན་ཁྱོད་རྒན་ནོ། །དེ་ནས་གླང་པོ་ཆེས་ཐམས་ཅད་ལ་བསྙེན་བཀུར་བྱེད་པར་བརྩམས་སོ། །སྤྲེའུ་ཡིས་ནི་རི་བོང་དང་གོང་མ་སྲེག་ལའོ། །རི་བོང་གིས་ནི་གོང་མ་སྲེག་ཁོ་ན་ལ་སྟེ། ཞེས་དུད་འགྲོ་ཡིན་ཀྱང་རྒན་གཞོན་གོ་རིམ་མ་ལོག་པར་བསྙེན་བཀུར་བས་འཇིག་རྟེན་དུ་བདེ་སྐྱིད་བྱུང་བར་བཤད་ཅིང་། ཕྲན་(༦༩བ)
ཚེགས་ལས། དགེ་སློང་དག་དེ་བས་ན་དེང་ཕྱིན་ཆད་དགེ་སློང་རྒན་རབས་རྣམས་ལ་མིང་ནས་འབོད་པར་མི་བྱ། རུས་ནས་འབོད་པར་མི་བྱ་སྟེ། བཙུན་པ་ཞེས་བརྗོད་པ་དང་། ཚེ་དང་ལྡན་པ་ཞེས་བརྗོད་པ་མ་གཏོགས་པར་ཀུན་ཏུ་སྤྱོད་པར་མི་བྱའོ། །ཞེས་བསླབ་པ་རྒན་གཞོན་སོགས་ཀྱི་རིམ་པ་མ་ནོར་བར་གྲལ་གྱི་དང་པོ་དང་རྙེད་པ་གྲལ་རིམ་ནས་འགྲིམ་པ་སོགས་འོག་མ་དག་གིས་གོང་མ་ལ་འདུད་པར་བྱ་བར་གསུངས་པས་ན་འདུས་ཚོགས་འདི་དག་ཏུའང་བརླང་སྤྱོད་བག་ཡངས་སུ་མ་སོང་བའི་གྲ་ས་ཕན་ཚུན་གྱི་གྲལ་འཛིན་སྔར་སྲོལ་གང་ཡིན་དང་། དེ་ཕྱིན་ཕྱོགས་འདུས་ཀྱི་དགེ་འདུན་ཚུལ་ལྡན་རྣམས་གཙོ་ཆེ་བ་བྱས་ནས་ཚུལ་འཆལ་དང་དགེ་སྦྱོང་གི་ཆ་བྱད་མགོ་རེག་དག་དགེ་འདུན་གྱི་རྙེད་པ་ལ་ལྷན་ཅིག་ཏུ་ལོངས་སྤྱོད་པ་ནི། ལུང་རྣམ་འབྱེད་ལས། ལྕགས་གོང་མེ་ལྕེ་འདྲ་བ་དག །ཟོས་པར་གྱུར་པ་མཆོག་ཡིན་གྱི། །ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །ཞེས་དང་། མདོ་སྡེ་ཉི་མའི་སྙིང་པོ་ལས། །སྤུ་གྲི་རྣོན་པོ་དག་གིས་སུ། །རང་གི་ཡན་ལག་གཏུབས་པ་བླའི། །བསྔོས་ཟིན་པ་ཡི་དངོས་པོ་ནི། །ཁྱིམ་པ་རྣམས་ལ་སྦྱིན་མི་བྱ། །ཞེས་ཚེ་རབས་ཕྱི་མ་རྣམས་སུ་ངན་སོང་གི་སྡུག་བསྔལ་མི་བཟོད་པའི་རྒྱུར་སྣང་མོད། འོན་ཀྱང་། སྙིང་རྗེ་པད་དཀར་ལས། ཀུན་དགའ་བོ་ཕྱི་མའི་དུས་ཟད་པའི་དུས་དམ་པའི་ཆོས་འཇིག་པར་འགྱུར་པའི་དུས་ན་གང་དག་ངའི་བསྟན་པ་འདི་ལ་རབ་ཏུ་འབྱུང་བར་འགྱུར་པ་དག་རབ་ཏུ་བྱུང་ནས་བུའི་ལག་པ་ནས་བཟུང་སྟེ། བུ་དང་ལྷན་ཅིག་ཏུ་ཆང་སྐྱོགས་གང་གི་ཕྱིར་ཆང་མའི་ཁྱིམ་ནས་ཆང་མའི་ཁྱིམ་དུ་འཁྱམ་པ། ངའི་དམ་པའི་ཆོས་འདིའི་རྗེས་སུ་བསླབ་པ་དེ་དག་ཐམས་ཅད་ཀྱང་ཀུན་དགའ་བོ་བསྐལ་པ་བཟང་པོ་(༧༠ན)
འདི་ལ་ཡོངས་སུ་མྱ་ངན་ལས་འདའ་བར་འགྱུར་རོ། །ཞེས་དང་། ཀུན་དགའ་བོ་ངའི་བསྟན་པ་འདི་ལ་གང་དག་དགེ་སྦྱོང་གི་རིགས་ཅན་དགེ་སྦྱོང་ཤིན་ཏེ་མ། དགེ་སྦྱོང་དུ་ཁས་འཆེས་པ། དགེ་སྦྱོང་ལྟར་བཅོས་པ། ངུར་སྨྲིག་གྱོན་པ་འབྱུང་བ་དེ་དག་ཐམས་ཅད་ཀྱང་བསྐལ་པ་བཟང་པོ་འདི་ལ་གང་བྱམས་པ་ནས་མོས་པ་ལ་ཐུག་གི་བར་དུ་ཕྱིས་འབྱུང་བའི་སངས་རྒྱས་བཅོམ་ལྡན་འདས་དེ་དག་གི་འོག་ཏུ་མཐར་གྱིས་མྱ་ངན་ལས་འདའ་བར་འགྱུར་རོ། །ཞེས་བསྟན་པ་འདི་ལ་རབ་ཏུ་བྱུང་བར་ཁས་འཆེས་པའི་ཚུལ་འཆལ་དང་རྟགས་ཙམ་འཛིན་པ་དག་ཀྱང་བསྐལ་པ་སོགས་ལ་མི་བལྟོས་པར་མྱང་འདས་ཐོབ་པར་དབུགས་དབྱུང་བ་ལྟར་ན་གཞན་ལས་ཁྱད་ཞུགས་ཤིང་སྙིགས་མར་སྤྱད་པའི་དུས་འདིར་ཡུལ་དང་དུས་བསྟུན་དགོས་པའི་ཕྱིར་བཀའ་སྲོལ་མི་འདུག་རུང་གྲལ་གྱི་མཐའ་དཀྱིལ་སོགས་ཀྱི་ཁྱད་གསུང་རབ་དང་བསྟུན་ན་དགོས་པར་སྣང་མོད། རང་བསྟན་ལ་ཆེད་དུ་ཕན་པར་མི་འགྱུར་བཞིན་དུ་ཕོ་རུས་སུ་མིང་བཏགས་པའི་ཀུན་སློང་ངན་པས་དབྱེན་དུ་འགྱུར་བའི་སྤྱོད་པ་ནི། སེམས་དཔའ་ཆེན་པོ་ཐོགས་མེད་བཟང་པོ་དཔལ་གྱིས། །གཞན་གནོད་གཞི་བཅས་སྤོང་བར་ཁས་བླངས་ནས། །དགྲ་ལ་སྡུག་ལས་ཐོངས་པའི་ཕོ་རྒོད་པོ། །རང་གི་སྡོམ་གསུམ་ཡུལ་ནས་འདོན་ཉེན་གདའ། །གནོད་སེམས་རྩད་ནས་ཐོན་པར་བྱིན་གྱིས་རློབས། །དགེ་སྦྱོང་ཆོས་བཞི་བསྒྲུབ་པར་དམ་བཅས་ནས། །ཁེ་དྲག་དབང་ཆེན་འདོད་པའི་ང་རྒྱལ་ཅན། །ཁས་བླངས་ཐོག་ཏུ་ཁེལ་བ་མི་གདའ་འོ། །རྟག་ཏུ་དམན་ཆ་འཛིན་པར་བྱིན་གྱིས་རློབས། །ཞེས་ཁྲོ་བ་ལ་སླར་མི་ཁྲོ། རྡེག་པ་ལ་སླར་མི་རྡེག །གཤེ་བ་ལ་སླར་མི་གཤེ། མཚང་འདྲུ་བ་ལ་སླར་མཚང་མི་(༧༠བ)
འདྲུ་བ་ཁས་འཆེས་ནས་བསམ་སྦྱོར་འཇིག་རྟེན་པ་གཞུང་མ་དང་ཁྱད་པར་མེད་པ། ཀོང་བཙུན་ཤེས་རབ་རྡོ་རྗེས། བློ་ཆགས་སྡང་གིས་འཆད་པའི་སྟོན་ཆེན་དང་། ཁོང་འཇིག་རྟེན་པའི་གཙོ་བོ་རྒད་བུ་གཉིས། ཁྱད་ཨེ་འདུག་ཀུན་སློང་སེམས་ལ་དྲིས་ཞེས་པའི་དོན་ཐོག་ཏུ་བབ་དུས་འདི་དེ་འདྲའི་ངང་ཚུལ་འབྱུང་བ། འཕགས་པ་ཡོངས་སུ་མྱ་ངན་ལས་འདས་པའི་མདོ་ལས། རིགས་ཀྱི་བུ་བདུད་སྡིག་ཅན་གྱིས་ནི་ང་འདས་པའི་ལོ་བདུན་བརྒྱ་ལོན་པ་ན། ངའི་བསྟན་པ་ཕྱེ་ཞིང་བཤིག་པར་འགྱུར་ཏེ། དམ་པའི་ཆོས་ནུབ་པའི་ཚེ་བདུད་སྡིག་ཅན་ཟག་པ་ཅན་གྱིས་ཟག་པ་མེད་པ་ལྟ་བུར་བསྒྱུར་ཏེ། བྱ་བའི་རྟགས་ཀྱིས་ཚུལ་བྱེད་པ་བཞིན་དུ་དགེ་སློང་གི་གཟུགས་དང་། དགེ་སློང་མའི་གཟུགས་དང་། དགེ་བསྙེན་གྱི་གཟུགས་དང་། དགེ་བསྙེན་མའི་གཟུགས་འདི་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དང་། རང་སངས་རྒྱས་ཀྱི་གཟུགས་དང་། སངས་རྒྱས་ཀྱི་གཟུགས་ཀྱིས་བཤིག་པར་འགྱུར་ཏེ། ཞེས་སངས་རྒྱས་ཀྱི་བསྟན་པ་ལ་གླགས་ལྟ་བའི་ཆེད་དུ་ཡིད་སྲུབས་དགེ་སྦྱོང་གི་གཟུགས་ལྟར་བཤད་པ་ནི་དུས་དབང་གིས་འབྱུང་ཉེ་ཞིང་དགེ་འདུན་རྣམས་འཐབ་རྩོད་ལ་སྦྱོར་བའི་འབྲས་བུ་དགེ་འདུན་སྲུངས་ཀྱི་རྟོགས་བརྗོད་དུ། དགུང་གི་གདུགས་ཚོད་ལ་བབས་པ་ན་རབ་ཏུ་བྱུང་བ་དག་མགོ་བོ་ཐོ་བས་བསྣུན་ཏེ་ཁྲག་བབས་པ་དང་འདུ་སྒོ་བཀག་པ་ལ་བརྟེན་ནས་བཟའ་བཏུང་ལྕགས་ཁུར་གྱུར་པར་བཤད་ཅིང་། དེར་མ་ཟད་དགེ་འདུན་གྱི་དབྱེན་བྱས་པའི་རྣམ་སྨིན་ནི། ལུང་རིགས་གཏེར་མཛོད་ལས། བར་བསྐལ་གཅིག་གི་བར་དུ་མནར་མེད་ཀྱི་སྡུག་བསྔལ་མྱོང་བར་བྱེད་ཅིང་དབྱེན་གྱི་མཚམས་མེད་གཉིས་བྱས་ན་མནར་མེད་(༧༡ན)
དུ་ལུས་ཉིས་འགྱུར་ལ་གནོད་པ་སྔར་ལས་ཉིས་འགྱུར་དུ་མྱོང་དགོས་ཏེ། བསྐལ་བར་མནར་མེད་པར་སྨིན་འགྱུར། །ལྷག་པས་གནོད་པ་ལྷག་པར་འགྱུར། །ཞེས་སོགས་གསུངས་པ་ནི། ལུང་ཕྲན་ཚེགས་ལས། ཟླ་བ་སྐར་མའི་ཚོགས་བཅས་ས་ལ་ལྷུང་ཡང་སྲིད། །ས་འདི་རི་དང་ནགས་བཅས་མཁའ་ལ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་སྐམ་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་པ་མིན། ཞེས་བདེ་བར་གཤེགས་པས་རྫུན་གསུང་པའི་སྐབས་ནི་ནམ་ཡང་མེད་པས་ངེས་པར་བདེན་ལ་དེ་ལྟར་ཡང་བཤེས་སྤྲིངས་ལས། ཁྱོད་ཀྱིས་དགེ་སློང་བྲམ་ཟེ་ལྷ་དང་ནི། །ནོར་་དང་ཡབ་ཡུམ་དག་དང་བཙུན་མོ་དང་། །འཁོར་གྱི་སླད་དུའང་སྡིག་པ་མི་བགྱིད་དེ། །དམྱལ་བའི་རྣམ་སྨིན་སྐལ་ནོད་འགའ་མ་མཆིས། །ཞེས་རང་གཞན་གང་གི་ཆེད་དུ་བསགས་པའི་སྡིག་པའི་འབྲས་བུ་བདག་ཉིད་གཅིག་པུའི་ཐོག་ཏུ་སྨིན་པའི་ཕྱིར་བློ་གྲོས་དང་ལྡན་པ་རྣམས་ཀྱི་བླང་དོར་གནད་མ་འཛོོལ་བ་ཞིག་གནད་དུ་ཆེ་ལ། སྐབས་དོན་གྱི་སྙིང་པོ། ཐུབ་བསྟན་འཆི་མེད་ལམ་དུ་གསལ་བྱེད་ཉི་ཟླ་ལྟ་བུར་ཟུང་དུ་འབྲེལ་བ་དཔལ་ལྡན་འབྲས་སྤུངས་དང་སེ་ར་ཐེག་ཆེན་གླིང་ཕན་ཚུན་རབ་བྱུང་དྲུག་པའི་ལྕགས་ཕོ་བྱི་བ་ནས་བཟུང་ཆོ་འཕྲུལ་ཆེན་མོའི་དུས་ཆབས་ཅིག་ཏུ་འདུ་ཚོགས་མཛད་བཞིན་པར་བརྗོད་གླེང་སྣ་ཚོགས་ཡོད་དོན་མི་འདུག་ཀྱང་ལས་སྣེ་བ་འདྲའི་སྐྱོན་གྱིས་སྔ་ཕྱིར་ཐུགས་མི་མཐུན་པ་ཅི་རིགས་དང་ཉེ་ཆར་རབ་བྱུང་བཅུ་གཅིག་པ་ཤིང་ཡོས་ཀྱི་ལོར་འབྲས་སྤུངས་དགེ་སྐོས་དང་བྱ་རུང་བ་ཐུག་པའི་རྐྱེན་སློང་དང་ངོ་བོ་འབྱུང་པོའི་ཆོ་འཕྲུལ་ལྟ་བུའི་ཟ་ཟིར་སྣ་ཚོགས་པའི་རྒྱ་ཆེར་ཉེ་བ་སྡེ་བའི་བསླབ་སྟོན་གྱིས་སྨོན་ལམ་བར་འགྱངས་ཤིང་དེ་རྗེས་སེ་ར་བ་དཔོན་སློབ་ནས་གཅོད་མཚམས་དགོས་ཚུལ་བྱུང་བ་ཕན་ཚུན་སོ་སོའི་ཁྱེར་ཕྱོགས་ཅི་ཡོད་ཐིངས་དཀའ་(༧༡བ)
གཤིས་གྲྭ་ཚང་གཉེར་པ་འཕྱོང་རྒྱས་པ་བློ་བཟང་སྦྱིན་པ་དང་འཕན་ཡུལ་ལྷ་ཁང་པ་སྒེར་ལོགས་ཨ་དར་གཉིས་བཏང་བའི་གསུང་རིགས་རྣམ་གྲངས་མང་བ་སོ་སོར་སྦྱངས་བཤད་ཀྱི་ཁོངས་སུ་ཐུས་པ་བྱས། མེ་གླང་རི་ཁ་བླ་མ་ཚལ་པ་རབ་འབྱམས་པ་བློ་བཟང་ཆོས་སྐྱོང་གིས་དགེ་སྐོས་དུས་གྲལ་འཛིན་གྱི་གྲལ་བཟོ་བ་དང་ཇ་གཏོང་བ་སོགས་ཕེར་རྒྱ་མང་དུ་བྱས་ཤིང་དགོན་པར་འབྱོར་ནས་འདི་བཞིན་བྱས་ཡོད་པས་དབྱར་མཇུག་གངས་ལ་སྐྱོལ་གྱི་ཚོགས་གཏམ་བཏང་བ་རིམ་གྱིས་མཆེད་པ་འབྲས་སྤུངས་པ་རྣམས་ཀྱི་ཐུགས་སུ་མ་ཤོང་བའི་རྐྱེན་གྱིས་སྐྱོར་ལུང་བླ་མ་སྒང་མགོ་རབ་འབྱམས་པ་ངག་དབང་རྒྱ་མཚོ་དང་སྤྲུལ་སྐུ་དགོས་སྐྱེས་ཀྱི་བུ་གྲགས་པ་བློ་བཟང་སོགས་དགེ་སྐོས་འགའ་རེའི་ཐོག་སེ་ར་བ་ཕྱོགས་ཀྱི་གྲལ་རྣམས་རིམ་ཤོར་དང་། དགེ་སློང་དོན་གྲུབ་རྒྱ་མཚོའི་དགེ་སྐོས་ཀྱི་ཐོག་ཇ་གཏོང་བ་ཡང་ཕྱོགས་ལྷུང་ཧ་ཅང་ཆེས་པ་དང་། རྒྱུ་རྐྱེན་ཞིག་ལ་དཔོན་ས་ལྷ་མོས་མས་སེ་ར་ཆོས་རྗེ་གཉལ་སྟོན་པའི་དྲུང་དུ་སྐྱེ་རྟགས་ཞུས་པར་ཆུ་སྲིན་དུ་སྐྱེ་བའི་སྒོ་དགག་པར་དགེ་འདུན་སྟོང་ར་ཅན་གྱིས་སྨན་བླའི་མདོ་ཆོག་ཆེན་མོ་གསུང་བར་ལུང་བསྟན་པ་བཞིན་རྒྱས་བཏབ་ར་མོ་ཆེའི་གནྡྷོ་ལར་བཙུགས་པ་ན་མཆོད་དབྱངས་པ་བཞི་མ་གཏོགས་མཁན་པོས་ཐོག་དྲངས་ལས་སྣེ་བ་ཐམས་ཅད་སེ་ར་བ་ཁོ་ནས་མཛད་པའི་སྣེ་མོ་བ་ཅི་རིགས་ཀྱི་སྐྱོན་ལ་བརྟེན་ལྷོ་པ་དང་སྤོ་འབོར་བའི་གྲལ་གྱི་བར་དུ་འབྲས་སྤུངས་པའི་བླ་མ་རྣམས་བཞུགས་དཀའ་ཞིང་གྲྭ་དམངས་ཚོགས་བྱིངས་པོའི་ཁྲོད་དུ་མཉམ་བསྲེས་ཐོག་འབྲི་ཕག་ལ་དམག་བཏང་སྐབས་གླིང་ཁུ་རུ་དབེན་པོའི་དཔའ་དར་ལ་བྱུང་བའི་ཀ་གླིང་དགུ་དང་། ཀ་བཞི་ལ་སྒོར་མོར་བྱས་པའི་ཉ་ཁུག་གྲལ་དམིགས་བསལ་དུ་བསྒྲིག་པ་ཞིག་ཡོད་འདུག་པར་ཡང་བརྡུང་འཚོག་དང་ཇ་ཐུག་ཇི་བཞིན་མི་གཏོང་བ་སོགས་ཕན་ཚུན་གཅིག་ངན་གཅིག་རྒྱག་དང་། ས་བྱའི་སྨོན་ལམ་དུས་(༧༢ན)
འབྲང་སྤུངས་དགེ་སྐོས་རྒན་པ་སྟར་སྡོང་བཀའ་བཅུ་བློ་བཟང་རབ་བརྟན་ལ་བྱེས་པའི་སོག་པོ་ཞིག་གིས་ལག་ལན་གྱི་རྣམ་པ་བྱས་པར་བྱེས་སློབ་དཔོན་པ་བྱ་བྲལ་རབ་འབྱམས་པ་འཇམ་དབྱངས་ལྷུན་གྲུབ་ཀྱིས་ལེགས་སོའི་ལྦ་དར་བཏགས་པ་སོགས་སེ་ར་ཕྱོགས་ནས་བསྟན་བཤིག་གི་གཉའ་མི་གནོན་པར་གཟེངས་བསྟོད་པ་བྱུང་ཞིང་འབྲས་སྤུངས་ཕྱོགས་ནས་དེ་རིགས་ཀྱི་སྐྱོན་མེད་ཚུལ་ཕན་ཚུན་གཟིགས་སྟངས་མ་གཅིག་ཅིང་རྨུ་རྒོད་ལ་ལ་མ་ཕེར་བའི་རིགས་ལ་སྔོན་ལས་དང་གང་དུའང་གཤའ་མ་མེད་པ་སྐད་ཀྱིས་ཟླ་གྲོགས་འཚོལ་ཞིང་ངང་པ་མཚོ་ངོམ་དང་འུག་པ་བྲག་ངོམ་གྱི་རྒྱབ་བརྟེན། ཁྲེལ་བདས་ལ་ངོ་སོར་འཁྱེར་བའི་དགེ་སྐྱོན་སྣ་ཚོགས་བྱུང་འདུག་པ་ད་ཆ་བླང་དོར་མཛད་རྒྱུའི་སྙིང་པོ་ལྷ་ས་སྨོན་ལམ་ཆེན་མོའི་གདོང་གྲལ་ནུབ་ལྟ་དང་དེའི་རྒྱབ་སྤྲོད་ཞལ་ཤར་གཟིགས་ཚུན་འབྲས་སྤུངས་པ་དང་། དེའི་རྒྱབ་ནུབ་ལྟ་རྩ་གྲལ་ནས་བཟུང་པའི་གྲལ་དྲུག་ཙམ་སེ་ར་བ་ཤ་སྟག་དང་དེ་ནས་རྨི་རུ་བཞི་སྡེ་བར་གྲལ་གཅིག །དེ་རྒྱབ་སེར་འབྲས་འདྲེས་མ་དང་ཕྱོགས་མཐའི་དགེ་འདུན་སོགས་སྣ་ཚོགས་འཚོག་པ། སེ་ར་བ་རྣམས་ཀྱིས་གྲལ་ཁུངས་ཡོད་པ་སོར་བཞག་གིས་གྲལ་འཛིན་ལ་མ་བྱོན་ན་རྩོད་པའི་རྒྱུ་ཡོད་འདུག་པས་གྲལ་འཛིན་ལ་ངེས་པར་འབྱོན། འབྲས་སྤུངས་ཀྱི་གྲྭ་ཚང་བདུན་ནས་དགེ་སྐོས་རེས་སྐོར་དང་སྤྱན་ལྟོས་ཀྱི་ཁྱད་ནས་དགེ་སྐོས་ཀྱིས་མཛུབ་མོ་གར་བསྟད་ཤར་གྱི་དཔེས་ཆུན་ཆེ་ཞིང་། སེ་རར་གྲྭ་ཚང་གསུམ་ག་ནས་དགེ་སྐོས་ལངས་པའི་ཕྱོགས་ཁྱེར་གྱིས་སོ་སོའི་གྲྭ་ཚང་མ་ཡིན་པར་རྒྱག་བརྡུང་སོགས་ཆེར་མ་ནུས་པའི་ཆུན་ཆུང་སྐྱོན་གྱི་རིགས་ལ་ཐང་ལྷོད་ཙམ་ཡོད་འདུག་པ་སྨོན་ལམ་གྱི་དུས་དགེ་སྐོས་དང་ཆར་བཏག་མས་རྒྱུན་གྱི་མིག་ཤུགས་ལ་བརྟེན་ཚོགས་འཇམ་མི་འཇམ་བྱུང་བར་སྒྲིགས་གནོན་གྱི་བརྡུང་འཚོག་བྱས་པར་སེ་ར་བ་ཕྱོགས་ནས་བསྙད་འདོགས་མི་མཛད་ཅིང་། དེ་རིགས་(༧༢བ)
མི་དགོས་ཙམ་བྱུང་ཕྱིན་ཞེན་གསོག་ཏུ་འགྲོ་བའི་བརྡུང་འཚོག་མི་བྱེད། གྲ་ས་གཉིས་ཀ་ནས་བསྟན་བཤིག་བྱད་མིའི་རིགས་ལ་ཚོགས་གཏམ་དུ་གཉའ་གནོན་མ་གཏོགས་དབུགས་དབྱུང་དང་བྱ་དགའ་མི་སྟེར། རབ་བྱུང་བཅུ་གཅིག་པའི་མེ་སྦྲུལ་ནས་བཟུང་ས་སྐྱོང་བསོད་ནམས་རབ་བརྟན་གྱིས་འབྲས་སྤུངས་པ་དཔོན་སློབ་དང་བཀའ་བགྲོས་པའི་སེ་ར་སློབ་དཔོན་གསུམ་ཚོགས་ལ་འབྱོན་པའི་ས་བཅད་མཛད་པ་ལྕགས་འབྲུག་གྲལ་འཛིན་ལ་ལག་ཐུག་བྱུང་བའི་རྐྱེན་གྱིས་ས་ཁྲི་བཤིག་འདུག་རུང་སེ་ར་བའི་སློབ་དཔོན་རྣམས་ད་ལྟ་བར་འབྱོན་བཞིན་པར་དེ་རིགས་ཀྱི་གཟེ་གསག་མི་བྱེད། དེ་གོང་ལོ་ཤས་གསུང་ཆོས་ར་བ་དང་མཎྜལ་ར་བ་སོགས་སུ་སེ་རའི་སློབ་དཔོན་གསུམ་གྱི་གཤམ་དུ་དགེ་སྐོས་དབུ་མཛད་ཀྱང་འཐུད་པར་བརྗོད་གླེང་བྱུང་མ་སོང་བ་ས་སྟག་ཟ་ཟིར་ཆེན་མོའི་སྐབས་ནས་བཅད་མཚམས་གྲུབ་འདུག་པ་བཞིན་དབུ་མཛད་དགེ་སྐོས་རྣམས་གྲྭ་དམངས་ཀྱི་ཁྲོད་ལས་སློབ་དཔོན་པ་རྣམས་ཀྱི་གཤམ་དུ་མི་བསྒྲིག །ཇ་ཐུག་རྣམས་གདོང་གྲལ་གཉིས་གོང་དུ་ཕུད། དེ་ཕྱིན་གྲལ་ཐམས་ཅད་ལ་མཉམ་ཁེབས་ཤིག་མ་བྱུང་ན་རྩོད་སློང་གི་རྒྱུར་མ་ཟད་བཞེས་པ་རྣམས་ཕྱོགས་མཚུངས་སུ་མི་ཡོང་བའི་ཚོགས་ཀྱི་ཀུན་སྤྱོད་ལ་ཡང་གནོད་པར་སྣང་། སེ་རའི་ཁམས་ཚན་གྱི་མང་འགྱེད་བྱུང་དུས་སྦྱིན་བདག་གི་སྤོས་སྣ་རེ་ཙམ་ཡོང་བ་སྔ་ཐོག་གི་ཁུངས་དང་ཡིག་རིགས་སོགས་སྐྱེལ་རྒྱུ་མི་འདུག་རུང་བར་སྐབས་སུ་ཧར་ལྡོང་གིས་ཐོག་མར་སྲོལ་བཏོད་འདུག་པས་མཚོན་ཁམས་ཚན་རྣམས་ཉེ་ཆེ་འབྲེལ་ཟབ་བྱས་འདུག་པ་སྦྱིན་བདག་གི་མི་རེ་ཙམ་མ་ཐེ་བ་བློ་མ་རངས་པའི་དགེ་འདུན་གྱི་འདུ་སྒོ་གཞན་དུ་བསྒྱུར་ཐབས་ཀྱིས་རང་གཞན་ལ་བརྟེན་ནས་སྡིག་གསོག་པའི་ཉེན་འདུག་གཤིས་དཔེར་ན་སེ་ར་ཧར་ལྡོང་གི་མང་འགྱེད་ལྟ་བུ་བྱུང་བའི་ཚེ་འབྲས་སྤུངས་དགེ་རྒན་གྱི་རྗེས་སུ་ཁམས་ཚན་གྱི་ངོ་སོ་ཙམ་གྱི་ཆེད་དུ་སེ་ར་(༧༣ན)
ཧར་ལྡོང་གི་མི་རེ་ཕྱིན་པ་སྤོས་སྣ་སྨོན་ལམ་ཆེན་མོའི་ལས་ཚན་དུ་མི་གཏོགས་གཤིས་སྐྱོན་དུ་མི་འགྱུར། འགྱེད་ཤར་ཁ་གཉིས་དགོས་པ་བྱུང་ན་འབྲས་སྤུངས་པ་རང་གི་དགེ་རྒན་གཉིས་ཀྱིས་གཏོང་ཞིང་སེ་རའི་དགེ་རྒན་ལས་གྲོགས་ལྟ་བུ་ལས་ལག་འཇུག་མི་བྱེད། གྲ་ས་སོ་སོར་ཁམས་ཚན་འཛིན་ཐེབས་དང་དགྲ་གཉེན་དབྱེ་འབྱེད་ལྟ་བུར་འགྱེད་སྐལ་སྣ་ཚོགས་གཏོང་སྲོལ་འདུག་རུང་སྨོན་ལམ་ཆེན་མོར་དེ་རིགས་བྱས་ཚེ་དགེ་འདུན་སྤྱིའི་རྙེད་པ་ལ་གནོད་པ་ནས་ཁམས་བོད་ངོ་བོ་རྣམས་དང་སྐྱིད་སྡུག་གཅིག་པའི་ཉེ་ལོགས་ཀྱི་ཁམས་པ་རྣམས་ལ་ཉིས་སྐལ་ལམ་སུམ་སྐལ། དགེ་རྒན་དང་རོགས་བྱེད་རྣམས་ལ་ལྔ་སྐལ་ལམ་བཅུ་སྐལ་ཙམ་ཡང་གཏོད་བའི་སྲོལ་ངན་བར་སྐབས་སུ་དར་འདུག་ཀྱང་ད་ཆ་གོང་གསལ་མཐའ་དག་རང་སྐལ་ལས་མི་གཏོད། འཕར་ཆག་མེད་པ་སྨོན་ལམ་གྱི་ལས་ཚན་རྣམས་དེབ་གསལ་ལྟར་ཡིན། སྡེ་པ་བསོད་ནམས་རབ་བརྟན་གྱི་དུས་འགྱེད་གཏོང་སྐབས་གཞུང་གི་སྐུ་ཚབ་རེ་ཡོང་གིན་ཡོད་འདུག་པ། ས་ཁྱི་གསང་སྒོ་ནས་བཟུང་བར་བཀབ་མ་བྱུང་འདྲ་ཡང་ད་ཆ་མཚམས་ཚིགས་ཀྱི་མིག་ལྟ་དང་བཅས་ཡོད་པ་འགབ་འབུལ་བ་རྣམ་གཞག་གི་སྐབས་འབྲས་སྤུངས་ཀྱི་བླ་མ་དབུ་མཛད་པར་བསྔོ་རྟེན་དགོས་པ་སྨོས་མ་དགོས་ཤིང་སྒོ་མངས་སློབ་དཔོན་པ་དང་ཉེ་ལོགས་ཀྱི་བླ་མ་རྣམས་ལ་འབུལ་བ་བྱས་པའི་སྟེང་སེ་ར་ཧར་ལྡོང་གི་བྱེས་པ་སློབ་དཔོན་པ་སོགས་ལ་སྒོ་མངས་སློབ་དཔོན་ཅན་ལས་རིམ་འགྲོས་ཀྱིས་ཆུང་བ་མ་གཏོགས་འདྲ་བ་མི་བྱེད། འབྲས་སྤུངས་ཧར་ལྡོང་གི་མང་ཇའི་སྐབས་སེ་རའི་ཧར་ལྡོང་གི་དགེ་རྒན་སྤོས་སྣ་མདུན་ཇ་སོགས་ལ་འབོད་པར་དགག་ས་མེད། དཔེ་འདིས་ཁམས་ཚན་གཞན་རྣམས་ལའང་མཚོན་ཞིང་ཅོ་ནེ་ཁག་ལྔའི་མང་འགྱེད་ལ་བར་སྐབས་སུ་སྤོས་སྣ་དང་འགྱེད། (༧༣བ)
གཏོང་མཁན་ཁོ་རང་ཚོའི་དགེ་རྒན་གྱིས་བྱས་འདུག་པ་འབྲས་སྤུངས་སུ་ཅོ་ནེ་རྣམས་ལ་ཁམས་ཚན་གྱི་ཐོབ་ཐང་འདུག་པས་དཔེར་ན་ཅོ་ནེ་གཞུང་པ་འབྲས་སྤུངས་སུ་རྟ་དབོན་པ་དང་རྒྱ་ཡི་ཝང་གཉིས་པོར་ལོ་རེ་མོས་ཀྱི་འབབ་ཀྱི་ཡོད་འདུག་པས་དེ་གཉིས་རེ་མོས་སུ་ཡིན་གྱིས་གཞུང་པའི་མང་འགྱེད་ལ་གོང་གི་ཧར་ལྡོང་གི་དཔེ་ཇི་ལྟ་བ་བཞིན་བྱེད། ར་མོ་ཆེའི་སྨོན་ལམ་ལ་ཡང་འབྲས་སྤུངས་ཀྱི་སློབ་དཔོན་ཙམ་བྱུང་ལ་ཟོས་གང་ལེགས་ལས་ལྷོ་པ་སྤོ་འབོར་བས་གྲལ་ལ་ཞི་བརྡུང་དང་དགེ་སྐོས་གསུམ་གྱིས་འབྲས་སྤུངས་པའི་གྲ་པ་རྣམས་ལ་དགོས་མེད་ཀྱི་ཞེན་གསོག་མི་བྱེད་ཅིང་། ཇ་ཐུག་སོགས་བཞེས་པ་རྣམས་ཀྱང་ཕན་ཚུན་ཁྱད་མེད་སྙམས་པར་གཏོང་། བྱ་རུང་པ་འདི་སྐྱེད་ཤོད་སྡེ་པ་གཡུལ་རྒྱལ་ནོར་བུའི་དུས་དབོན་པོ་བསྐལ་བཟང་ཟེར་བའི་གཟུགས་བཙུན་ཞིག་ལ་ཁོག་ཞུགས་བྱུང་ཚོད་ཆོས་སྐྱོང་དུ་བྱ་རུང་བ་ཙམ་ཡིན་བྱས་པ་ལས་མིང་དེར་ཐོགས་པ་རིམ་གྱིས་སྒྲ་འཆོལ་བ་མ་གཏོགས་ཤར་ཕྱོགས་སྐུའི་རྒྱལ་པོའི་བློན་པོ་གྲ་ཚོང་འདུས་བྱ་ཁྲིད་མིག་གཅིག་པ་མིན་པས་ནུབ་ཕྱོགས་གསུང་གི་རྒྱལ་པོའི་བློན་པོ་རྡོ་རྗེ་གྲགས་ལྡན་དུ་ཞལ་གྱིས་བཞེས་པ་ཚལ་ཡང་དགོན་རྒྱལ་ཆེན་ལྟ་བུའི་དོ་ཟླ་མིན་རུང་འབྲས་སྤུངས་ཀྱི་སྣེ་མོ་བ་རྣམས་ཀུན་རྟོག་སྣ་ཚོགས་ཀྱིས་སྡངས་ཙམ་སྣང་བ་སྔ་ཐོག་སྨོན་ལམ་ཆེན་མོའི་གྲལ་འཛིན་གྱི་དུང་མ་བཏང་ཚུན་ཁོག་ཞུགས་བཀག་ཆ་བྱེད་སྲོལ་མེད་ནའང་དེ་སྒོས་གྲལ་འཛིན་གྱི་ཉིན་གྲ་དམངས་ཐམས་ཅད་ཚོགས་ཟིན་པ་དང་གྲ་ཐོག་ཀྱང་ཡང་ཡང་བརྗེ་བའི་གཤིས་གསར་བུ་བ་རྒྱུས་མེད་འདྲས་བརྡུང་འཚོག་བྱས་ཚེ་ད་ལོ་ལྟར་དགེ་འདུན་ཐུགས་མི་མཐུན་པའི་ཕྱི་ཡུལ་དུ་གཏམ་ཆ་ནན་ཅིང་རྣམ་སྨིན་ནག་པོར་འཛག་པའི་རྒྱུན་ཁོ་ནའི་དགག་བྱ་ཆེ་ཞིང་དགོས་པ་ཆུང་བ་ནས་ར་མོ་ཆེའི་གོས་སྐུའི་དུས་བྱ་རུང་པ་གཡུལ་ཁང་རྒྱབ་ནས་ར་མོ་ཆེར་ཤར་མར་བྱོན་ངོས་བྱམས་པ་གདན་འདྲེན་མ་ཟིན་བར་ཁོག་(༧༤ན)
ཞུགས་མི་བྱེད། དེ་ཡང་སྔར་སྨོས་ཀྱི་ཕན་ཚུན་ཐུགས་མི་མཐུན་པའི་ཟིང་རྐྱེན་གྱི་རྒྱུ་བྱས་ཚེ་མཐའ་ཀླས་པའི་འདུས་ཚོགས་འདི་ལྟ་བུར་ཕལ་མོ་ཆེའི་སོ་སྐྱེའི་དགེ་འདུན་བཞིན་དུ་སྣང་ཡང་གང་ཟག་གི་ཚོད་གང་ཟག་གིས་བཟུང་མ་ནུས་པར་མདོ་ལས་བཤད་པས་སྐྱེས་བུ་ཟུང་བཞི་གང་ཟག་ཡ་བརྒྱད་སོགས་འཕགས་པའི་དགེ་འདུན་དང་དེར་མ་ཟད་བྱང་ཆུབ་ཏུ་སེམས་བསྐྱེད་པའི་ཐེག་པ་ཆེན་པོའི་དགེ་འདུན་སོགས་སྦས་པའི་ཚུལ་ཅན་དམ་པ་ཇི་སྙེད་ཅིག་ཡོད་པར་ངེས་པས། དེ་དག་ལ་ཁྲོ་བ་དང་རྩོད་པ་འཚང་འདྲུ་བ་ནི། འཇུག་པ་ལས་གང་ཕྱིར་རྒྱས་སྲས་རྣམས་ལ་ཁྲོས་པ་ཡིས། །སྦྱིན་དང་ཁྲིམས་བྱུང་དགེ་བ་བསྐལ་པ་བརྒྱར། །བསགས་པ་སྐད་ཅིག་གིས་འཇོམས་དེ་ཡི་ཕྱིར། །མི་བཟོད་ལས་གཞན་སྡིག་པ་ཡོད་མ་ཡིན། །ཞེས་འབྱུང་ལ། དེར་མ་ཟད་འཕགས་པ་དགེ་བའི་རྩ་བ་ཡོངས་སུ་འཛིན་པའི་མདོ་ལས། ཤྭ་རི་དྭཱ་ཏིའི་བུ་དེ་བཞིན་དུ་གང་བྱང་ཆུབ་སེམས་དཔའི་བྱང་ཆུབ་ཀྱི་སེམས་བསྐྱེད་པ་གཅིག་གིས་བར་ཆད་བྱེད་པ་དེ་ནི་ཆོས་དཀོན་མཆོག་གི་ཕུང་པོ་འབུམ་ཕྲག་མང་པོ་དཔག་ཏུ་མེད་པ་གྲངས་མེད་པ་དག་གི་བར་ཆད་བྱེད་པ་ཡིན་ནོ། །ཞེས་ཐེག་པ་ཆེན་པོའི་གང་ཟག་གཅིག་གིས་གཞན་ཕན་བསྒྲུབ་པ་ལ་གནོད་པར་བྱེད་པའི་སྡིག་འབྲས་བསམ་གྱིས་མི་ཁྱབ་པར་བཤད་པས་བག་དང་ལྡན་པ་འདི་ཕྱི་ཀུན་གྱི་རྩ་བ་ཡིན་པའི་ཕྱིར་གོང་སྨོས་རྣམས་ཀྱི་བླང་དོར་འཛོལ་བ་མེད་པར་བརྩོན་པས་ལྷུར་བླངས་ན་འཇིག་རྟེན་ཀུན་ཏུ་གནས་སྐབས་དང་མཐར་ཐུག་གི་བདེ་སྐྱིད་རྒྱ་ཆེན་པོ་འབྱུང་བར་འགྱུར་བ་ནི། ཇི་སྐད་དུ། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །ཅེས་(༧༤བ)
འགྲོ་བ་ཀུན་གྱི་ཉོན་མོངས་པའི་ནད་མ་ལུས་པ་འཇོམས་པའི་རྩི་སྨན་ཆེན་པོ་ཕན་པ་དང་བདེ་བ་མ་ལུས་པ་འབྱུང་བའི་སྒོ་དམ་པ་སངས་རྒྱས་ཀྱི་བསྟན་པ་རིན་པོ་ཆེ་ཡིན་ལ། དེ་ཡང་མངོན་པ་མཛོད་དུ། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ནའོ། །ཞེས་ལུང་རྟོགས་ཀྱི་བསྟན་པ་དེ་ཡང་། མ་ཕམ་པས། ཡི་གེ་འདྲི་མཆོད་སྦྱིན་པ་དང་། ཉིན་དང་ཀློག་དང་ལེན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ཀྱི། །བསོད་ནམས་ཕུང་པོ་དཔག་ཏུ་མེད། །ཅེས་དགེ་འདུན་རྣམས་ཀློག་པ་ཐོས་བསམ་དང་སྤོང་བ་བསམ་གཏན་འཕེལ་བ་ལ་རག་ལུས། དེ་ཡང་ཕན་ཚུན་མཉེས་གཤིན་པའི་ཐུགས་མཐུན་པ་རྩ་བ་ལྟ་བུ་ཡིན་པའི་ཕྱིར། གསོ་སྦྱོང་ལའང་རིགས་མང་དུ་ཡོད་པ་སྔོན་བསགས་ཀྱི་སྡིག་པ་སྦྱོང་བ་ཞི་གནས་དང་། བཅུ་བཞི་པ། བཅོ་ལྔ་པ། གནོད་པ་ཕྱིར་བཟློག །རྩོད་པ་ཕྱིར་བཟློག །བཀྲ་ཤིས་པ་རྣམས་ཚེ་འདིའི་ཟག་པ་འགོག་ཕྱིར་མཐུན་པའི་གསོ་སྦྱོང་གི་ཁོངས་སུ་བསྡུས་པའི་དགོས་པ་ཡང་ལུང་རིགས་གཏེར་མཛོད་ལས། བསླབ་པ་གསུམ་གོང་ནས་གོང་དུ་འཕེལ་བའི་སྒོ་ནས་གནས་སྐབས་མངོན་མཐོ། མཐར་ཐུག་ངེས་ལེགས་ཐོབ་པའི་དགོས་པ་ཡོད་པ་དང་། ཁྱད་པར་སྟོན་པའི་བཅས་པ་དང་མཐུན་ཅིང་ས་ཕྱོགས་བཀྲ་ཤིས་པ་དང་། ཕྱོགས་དེ་ན་གནས་པའི་སྐྱེ་བོ་མང་པོ་ལ་ཕན་པ་རྒྱ་ཆེན་པོ་འབྱུང་བའི་དགོས་པ་ཡོད་དོ། །ཞེས་གསོ་སྦྱོང་གི་ཕན་ཡོན་བཤད་པ། དེར་མ་ཟད་དགེ་འདུན་ཐུགས་མཐུན་པའི་འབྲས་བུ་ནི། སོ་སོར་ཐར་པའི་དོན་ལས། ཚེ་དང་ལྡན་པ་དགེ་འདུན་དང་ལྷན་(༧༥ན)
ཅིག་པར་མཐུན་པར་གྱིས་ཤིག །དགེ་འདུན་མཐུན་པ་མི་བྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་འདྲེས་པ་ལྟ་བུར་གྱུར་པ། སྟོན་པའི་བསྟན་པ་ཡང་གསལ་བར་བྱེད་ན་བདེ་བ་ལ་རེག་པར་གནས་པར་གྱུར་གྱི། ཞེས་རྒྱ་ཆེར་བསྔགས་ཤིང་། མགོན་པོ་ཞི་བ་ལྷས། གཙུག་ལག་ཁང་རྣམས་ཀློག་པ་དང་། ཁ་ཏོན་གྱིས་རྒྱས་ལེགས་གནས་ཤོག །རྟག་པར་དགེ་འདུན་མཐུན་པ་དང་། དགེ་འདུན་དོན་ཡང་གྲུབ་པར་ཤོག །ཅེས་སྨོན་ལམ་མཛད་པས་ཀྱང་ཤེས་ནུས་སོ། །ལུས་ཅན་བསོད་ནམས་ཉ་ཕྱིས་ཡངས་པའི་ཁོག །བདེ་སྐྱིད་མུ་ཏིག་ཕྱུང་བུར་ལེགས་སྤུངས་པ། །སྟར་བརྒྱུའི་སྲད་བུར་སྤེལ་བ་འདུས་པའི་སྡེ། །སྲིད་ཞིའི་གདུང་བ་ཀུན་གཞིལ་ཆོ་ག་མཁན། །དེ་ཕྱིར་ཕྱོགས་ལྷུང་རི་དྭགས་འཁྲུལ་རྗེས་སུ། །མ་འབྲངས་ལྷག་བསམ་རྒྱུད་ལས་དྲངས་པའི་མདོས། །དགེ་འདུན་དབྱེན་གྱི་ལངྒའི་མགྲིན་གཅོད་པའི། །འཕོངས་སྐྱེན་གཉིས་པའི་དགའ་བྱེད་ལྷ་ཞིག་སྣང་། །ལེགས་བྱས་གངྒཱའི་ཡབ་གཅིག་ལས་བབས་ཀླུང་། །མཐའ་ཀླས་ཡང་སྲིད་འཛིན་ལམ་འོངས་པའི་རྒྱུན། །བྱང་ཆེན་ཆུ་གཏེར་འཕེལ་ཀློང་མ་རྒན་ཀླུ། །གཏན་བདེ་གདེངས་ཀའི་ནོར་བུ་འོད་འབར་ཤོག །ཅེས་ལུས་ཅན་ཀུན་གྱི་མ་འདྲིས་པའི་གཉེན་གཅིག་པུ་རྣམས་འདྲེན་ཟས་གཙང་སྲས་པོའི་ཆོ་འཕྲུལ་གྱི་དུས་ཆེན་ལྷ་ས་སྨོན་ལམ་ཆེན་མོའ་ིཚེ་དགེ་འདུན་རྣམས་ཀྱི་ཉམས་བཞེས་སུ་བསྟར་བར་འོས་པའི་བཅའ་ཁྲིམས་དང་གཟུ་གཞི་མཐུན་པ་ལྟ་བུའི་ཡི་གེ་སྲིད་སྒྲུབ་ཉག་ཕྲན་འདི་ནི་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་སྲིན་པོ་ཞེས་པ་ཤིང་ཡོས་ནམ་མཐོངས་ཟླ་བའི་ཚེས་གཅིག་(༧༥བ)
སྤེན་པ་སྣར་མའི་འགྲུབ་སྦྱོར་གྱི་ཉིན་འཛིན་མའི་སྤོས་ལས་མངོན་པར་འཕགས་པའི་རྒྱལ་ཁབ་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་སྡོམ་བརྩོན་རིག་པ་འཛིན་པ་འཇམ་དབྱངས་གྲགས་པས་བགྱིས་ས་སརྦདིཀྐཱ་ལེ་ལ་ཀྵྨཱི་བྷཝནྟུ། །ཤིང་ཡོས་རྒྱལ་མོ་རྡོ་རྗེ་རབ་བརྟན་དང་། ཚེ་དབང་ལྷ་མོ་མ་བུ། ཐོར་གོད་དབུ་མཛད་ཆོས་རྗེ་ཨནྡར་བཀའ་བཅུ། དར་ཁན་དབོན་པོ་རྣམས་ལ་ལུས་མེད་ཀྱི་འཚོ་བ་བསྲུང་བའི་འཕྲིན་ཡིག་རྡོ་རྗེའི་བཞད་སྒྲ། དཔལ་ལྡན་རྩ་བ་གསུམ་གྱི་ལྷ་སྔགས་ཡེ་ཤེས་སྒྱུ་འཕྲུལ་དྲ་བའི་ཟློས་གར་གྱི་རྣལ་འབྱོར་སྤྱོད་པ་པོ་ཟིལ་གནོན་བཞད་པ་རྩལ་གྱི་ཆེད་དུ་སྨྲས་དོན། ཆོས་ཉིད་གདོད་ནས་རྣམ་པར་དག་པར་གནོད་བྱ་གནོད་བྱེད་དམིགས་སུ་མེད་ནའང་། རྡེའུ་ཤིང་བུར་རྟ་གླང་དང་། ཐག་ཁྲར་སྦྲུལ་དུ་མཐོང་བའི་དངངས་སྐྲག་བཞིན་ཀུན་རྫོབ་འཁྲུལ་པའི་སྣང་ངོར་སྔོན་བྱས་སྡིག་འབྲས་ཀྱི་ཉེར་འཚེའི་གཟུགས་བརྙན་འཆར་བས། ཁྱོད་ལྷ་མ་སྲིན་བྲན་མངག་གཞུག་དང་བཅས་པ་རྣམས་ཀྱིས་གནོད་པ་བྱས་པར་བརྟེན་ཡུལ་དེ་གནས་སྐབས་སུ་མནར་ཞིང་། བྱེད་པ་པོ་རྣམས་ཀྱང་དཀར་མིན་གྱི་འབྲས་བུ་རང་གཞན་གཉིས་འཕུང་གི་སྦྱོར་བ་ཡིན་པའི་ཕྱིར། ཆེ་གེ་མོ་ཞེས་པ་འདི་པའི་མི་ནོར་ལ་གནོད་ཅིང་འཚེ་བའི་བསམ་སྦྱོར་སྤོང་བར་གྱིས། དེ་ལྟར་ན་རིང་མིན་གསང་ཆེན་རྡོ་རྗེ་ཐེག་པའི་སྨིན་གྲོལ་ལ་བརྟེན་ནས་བྱང་ཆུབ་མཆོག་ལ་གཞོལ་བའི་ཏིང་ངེ་འཛིན་འགྲུབ་པའི་རྣམ་པར་དག་པའི་སྨོན་ལམ་གྱིས་མཚམས་སྦྱོར་བ་ཡིན། ཅི་སྟེ་ལོག་པར་སྤྱོད་ན་ཡེ་ནས་སྙིང་ལ་གནས་པའི་ལས་ཉོན་ལྕགས་ཀྱི་སྡིག་པ་ནག་པོའི་རང་གཟུགས་སུ་གྱུར་ཏེ་སྙིང་ཁྲག་འཇིབ་པ་ལ་ཡ་ང་བར་མི་འགྱུར་རམ། ཁྲག་འཐུང་རྣམ་པར་རོལ་པའི་གཏམ་གྱི་ཡི་གེ་སྲིན་པོའི་ལོ་ནམ་མཐོང་ཟླ་བའི་དམར་ཆའི་གྲལ་ཚེས་ལ་དབང་དྲག་རོལ་པའི་གཞལ་མེད་ཁང་ནས་བྲིས། །