ཉང་སྨད་བསམ་དོན་ལྷུན་གྱིས་གྲུབ་པའི་རྫོང་ཆེན་དུ་ཚེའི་རིག་བྱེད་གསོ་བ་རིག་པའི་གྲྭ་ཚང་དྲང་སྲོང་འདུས་པའི་གླིང་གི་བཅའ་ཡིག
ཨེ མ དྲྀ ཥྚེ སུ ཀཱ ནྟ ཀྱ ཤུ ཏྐཱེ ཏྲི ཙཽ ཥཱ དྷ ཏོ ཧཱི མ ཧཱ གྲཱ མ ཀོ དི ན རྨ ནྲྀ ཏ །ངོ་མཚར་ལྟ་ན་སྡུག་པ་དག་པའི་ཞིང་། །སྨན་གྱི་གྲོང་ཁྱེར་ཆེན་པོར་མཆོག་སྤྲུལ་གར། །སཱ དྷུ བ རྟི ཀྱ བཻ ར ཌཱུ ཪྻ ར སྨི ཉྩ སཾ བུ དྡྷ ཀཱ རུ ནྱ གཱ མྲྀ ཏྤ ཎ ཤཱ ས ཏུ། །ལེགས་བསྒྱུར་བཻཌཱུརྱ་འོད་རྫོགས་སངས་རྒྱས། །ཐུགས་རྗེ་ཟིལ་དངར་འགྲོ་སྲོག་ཟུངས་འགྱུར་མཛོད། །དྲང་སྲོང་གཉིས་ཀྱི་ཞུ་བ་ཞུས་ལན་ཚིག །མ་སྨད་བྱིན་གྱིས་བརླབས་པ་རྒྱལ་བའི་བཀའ། །བདུད་རྩི་སྙིང་པོ་ཡན་ལག་བརྒྱད་པའི་རྒྱུད། །ཆོས་ཕུང་རྒྱ་མཚོའི་རབ་དང་ཕུལ་རྩེར་སོན། །དེ་ཚུལ་བཤད་ཅིང་ཉན་པས་འཁྲུལ་མེད་དུ། །གཏན་ལ་འབེབས་པའི་འཕགས་ཡུལ་པཎ་གྲུབ་ཚོགས། །གངས་ཅན་ལྷ་ཡི་རྗེ་བོ་མུ་ཐི་ལིའི། །ཕྲེང་མཛེས་དགེ་འདུན་ལེགས་བྱས་བྱ་བའི་ཞིང་། །ཚེ་ཡི་རིག་གཞུང་སྟོན་འཆང་མཆོག་གསུམ་དངོས། །རིགས་འདུས་སྨན་གྱི་བླ་མ་གཡུ་ཐོགས་པ། །ཡོན་ཏན་མགོན་པོའི་བཀའ་དྲིན་འཇིག་རྟེན་ཁམས། །ཛམྦུའི་གསེར་གྱིས་བཀང་ཡང་གཞལ་ནུས་ཅི། །(༧༦བ)
ཕྱོགས་འཛིན་གདོན་གྱིས་མ་བསླད་མ་འདྲིས་པའི། །སྐྱེ་དགུ་གདུང་བའི་མི་ལུས་སྐད་ཅིག་ལ། །བདེ་སྐྱིད་ལྷ་ཡི་གཟུགས་སུ་བསྒྱུར་ནུས་པ། །གསོ་རིག་བརྒྱ་སྦྱིན་གཙུག་གི་ནོར་བུ་བཞིན། །བྱང་པ་རིགས་ལྡན་བྲང་ཏི་རིམ་བྱོན་དང་། །དྲང་སྲོང་མཉམ་ཉིད་རྡོ་རྗེ་ཟུར་མཁར་བའོ། །བཞེད་སྲོལ་བཤད་བཀའ་ཕྱག་བཞེས་མན་ངག་རྒྱུན། །སྲིན་མཐར་མི་ནུབ་ཕན་བདེའི་དཔག་བསམ་ལྗོན། །གངས་ཅན་ཚངས་པ་རྒན་པོའི་བརྒྱུད་འཛིན་མཁན། །གནད་རིགས་འཚོ་བྱེད་གཙང་སྟོད་ཚ་རོང་པ། །ཚེ་བརྟན་རྡོ་རྗེ་མཆེད་ཀྱིས་ལེགས་ལམ་དུ། །གཟུར་གནས་བློ་གསལ་མང་པོ་བཀྲི་འདི་མཚར། །དེ་ཕྱིར་ཉང་སྨད་ཉི་མ་ཕུང་པོའི་རི། །སྲིན་པའི་རྫོང་ཆེན་བསམ་དོན་ལྷུན་གྲུབ་པར། །འཆི་བའི་དངོས་འཇོམས་རིག་བྱེད་འཛིན་པའི་སྡེ། །བླང་དོར་མ་འདྲེས་ཡོངས་སུ་བསྟར་བའི་ཆེད། །བག་མེད་ཅི་བདེར་རྒྱུ་བ་གླང་པོའི་སྣར། །བཅའ་ཡིག་རྣོན་པོའི་ལྕགས་ཀྱུ་ཉེར་འདེབས་ན། །ཐོས་བསམ་ཤལླི་ཀ་ཡི་ནགས་ཡངས་པོར། །རྣམ་དཔྱོད་ལུས་སྟོབས་རྒྱས་པའི་ཚུལ་འདི་མཚར། །ཞེས་ཕུན་སུམ་ཚོགས་པའི་ཚིགས་སུ་བཅད་པས་སྔུན་བསུས་ཏེ་སྐབས་དོན་གླེང་བར་བྱ་བ་ནི། འཇམ་དབྱངས་ས་སྐྱ་པཎྜི་ཏས། །རང་བློ་ཤེས་བྱ་ཀུན་ལ་མ་སྦྱངས་ན། །ཐམས་ཅད་མཁྱེན་པ་ནམ་མཁའི་མཐའ་ལྟར་རིང་། །དེ་ལྟར་དགོངས་ནས་རྒྱལ་དང་དེ་སྲས་ཀྱིས། །ཤེས་བྱའི་གནས་ཀུན་སྦྱངས་ཞེས་ལེགས་པར་གསུང་། །ཞེས་བླ་ན་མེད་པའི་བྱང་ཆུབ་སྒྲུབ་པར་བྱེད་ལ་ཤེས་བྱ་མཐའ་དག་ལ་ལེགས་པར་བསླབ་དགོས་པར་གསུངས་ཤིང་བསླབ་བྱའི་ཡུལ་རིག་པའི་གནས་ཆེན་བཅོ་བརྒྱད་སོགས་སྔོན་གྱི་མཁས་པའི་ལུགས་སྲོལ་མང་ནའང་སྙིང་པོར་དྲིལ་ན། མདོ་སྡེ་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །(༧༧ན)
འཕགས་མཆོག་ཅི་སེམས་ཐམས་ཅད་མཁྱེན་པ་འཐོབ་མི་འགྱུར། །དེ་བས་གཞན་རྣམས་ཚར་བཅད་རྗེས་སུ་གཟུང་ཕྱིར་དང་། །རང་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱེད། །ཅེས་རིག་པའི་གནས་ལྔ་གསུངས་པའི་ལོག་སྨྲ་ཚར་གཅོད་པ་སྒྲ་ཚད། གཞན་རྗེས་སུ་འཛིན་པ་བཟོ་གསོ། རང་ཉིད་ཀུན་ཤེས་པར་བྱ་བ་ནང་རིག་པ་སྟེ་ལྔ་ལས་ཕྱི་མ་ཉིད་ཀྱིས་ཆོག་གམ་སྙམ་ན། མགོན་པོ་ཞི་བ་ལྷས། རྒྱལ་སྲས་རྣམས་ཀྱིས་མི་བསླབ་པའི། དངོས་དེ་གང་ཡང་ཡོད་མ་ཡིན། །དེ་ལྟར་གནས་པའི་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་རྒྱལ་བའི་སྲས་པོ་རྣམས་ཀྱིས་སེམས་ཅན་གྱི་དོན་སྒྲུབ་པ་ལ་བསླབ་བར་མི་བྱ་བའི་གནས་གང་ཡང་མེད་པར་གསུངས་ཤིང་ཁྱད་པར་གསོ་བ་རིག་པ་ནི། རྟོགས་བརྗོད་རིན་པོ་ཆེ་ལས། བདུད་རྩིའི་ཆུ་གཏེར་མ་བསྲུབས་ཤིང་། །ནོར་རྒྱས་ཐང་ཡང་མ་བཅད་ལ། །རི་བོ་སྒྲིལ་བ་མེད་པར་ནི། །གླང་པོ་འདི་ནི་སུ་ཡིས་བསྐྲུན། །ཞེས་ནོར་རྒྱས་ཀྱིས་སྲུབས་ཐག །ལྷུན་པོས་སྲུབས་ཤིང་བྱས་ནས་ལྷ་རྣམས་ཀྱིས། །རྒྱ་མཚོ་བསྲུབས་པ་ལས་ཉི་ཟླ། །ལྷ་མོ་དཔལ་མོ། གླང་ཆེན་ས་སྲུངས། རྟ་ཐོར་ཐོས། ཆང་རྣམས་བྱུང་བ་རིག་བྱེད་ཀྱི་གཞུང་ནས་བསྟན་ལ། དེ་ཡང་བསྟན་པ་འདིའི་སྔོན་རོལ་དུ་ལྷ་ཤེད་བུ་དང་ཤེད་ལས་མི་རྣམས་ཐོག་མར་བྱུང་བའི་ཚེ་དེ་གཉིས་ཀྱིས་སའི་ཞག་ཟོས་པས་མ་འཇུ་བའི་ནད་ཀྱིས་བཏབ་པར་ཚངས་པས་ཆུ་སྐོལ་བཏང་བས་ནད་པ་ལ་སྔ་བ་ཤེད་བུ་དང་ཤད་ལས། ནད་ལ་སྔ་བ་མ་འཇུ་བ། སྨན་ལ་སྔ་བ་ཆུ་སྐོལ། སྨན་པ་ལ་སྔ་བ་ཚངས་པ་ཞེས་གྲགས་ཤིང་། རྒྱ་མཚོའི་གཏིང་དུ་བདུད་རྩི་ཤེལ་བུམ་གང་འདུག་པ་སྒྲ་གཅན་གྱིས་མཐོང་སྟེ་ལྷ་རྣམས་ལ་སྦྲན་པས་དེ་དག་གིས་རྒྱ་མཚོ་བསྲུབས་(༧༧བ)
པའི་སྐབས་དེར་ཐོག་མར་དུག་ཧ་ལ་ཞེས་བྱ་བ་གདོང་དགུ་པ་གང་གིས་ཀྱང་འདུལ་བར་དཀའ་བ་ཞིག་ཐོན་པ་ཚངས་པས་སངས་རྒྱས་ཀྱི་ལུང་བསྟན་དྲན་ཏེ་ཧཱུྃ་ཞེས་སྡིགས་མཛུབ་མཛད་པས་དེ་ཞིག་ནས་རྒྱུ་དང་མི་རྒྱུ་བའི་དུག་གཉིས་སོང་ཞིང་དེ་རྗེས་སུ་བདུད་རྩི་ཐོན་པ་ལྷ་མ་ཡིན་གྱིས་སྒྲ་གཅན་བརྐུ་བར་བཏང་བ་ལྷའི་བུར་སྤྲུལ་ནས་བདུད་རྩི་འདྲེན་པ་པོ་བྱས་ཏེ་རང་ཉིད་ཀྱིས་བཏུངས་ཤིང་ལྷག་མ་ཁུར་ནས་བྲོས་པར་ཟླ་བས་ལྷ་རྣམས་ར་མདར་སྦྲན་པ་སྒྲ་གཅན་གྱིས་འཁོར་ལོ་འཕངས་པ་ཚངས་པའི་འཁུར་ཚོས་ལ་ཕོག །མེས་པོའི་འཁོར་ལོ་དམ་བཅའ་བཞི་ལྡན་གྱིས་སྒྲ་གཅན་གྱི་སྐེ་བཅད་པའི་ཚེ་ཚངས་པས་རང་གི་རྨའི་ཟུག་རྔུ་དང་སྒྲ་གཅན་གྱི་སྐེ་བཅད་པའི་སྙིང་རྗེས་སྡུག་བསྔལ་རབ་ཏུ་ཞི་བའི་ཏིང་ངེ་འཛིན་ལ་མཉམ་པར་བཞག་པས་མཁུར་ཚོས་ལས་ཨོ་ཨ་ཐ་ཞེས་པའི་སྒྲ་བྱུང་བའི་རྐྱེན་གྱིས་སྔོན་སངས་རྒྱས་ཤཱཀྱ་ཐུབ་པ་ཆེན་པོས་གསུངས་པའི་གསོད་དཔྱད་འབུམ་སྡེ་དྲན། དེ་ལ་བརྟེན་ནས་ཚངས་པས་གསང་བ་སྙིང་པོའི་དོན་བསྡུས་མཛད་དེ་རིམ་གྱིས་སྐྱེ་དགུའི་བདག་པོ་དང་བརྒྱ་བྱིན་ལ་སོགས་པར་བརྒྱུད་པ་ནི་ལྷའི་ལུགས། བརྒྱ་བྱིན་གྱི་སློབ་མ་རྒྱུན་ཤེས་ཀྱིས་སྨན་གྱི་བསྐོས་བསྟན་པ་དང་། ཙ་ར་ཀ་སྡེ་བརྒྱད་སོགས་དྲང་སྲོང་གི་ལུགས། དབང་ཕྱུག་ཆེན་པོའི་སྐ་རགས་ཀྱི་རྒྱུད་དང་སྐྲ་ཤད་འཛིངས་པའི་རྒྱུད་སོགས་ཕྱི་རོལ་པའི་ལུགས་སུ་གྲགས་ལ། རྡོ་རིང་མཛེས་བྱེད་དུ། གཅིག་ན་རིག་བྱེད་རྫུན་ཡིན་པར། །གཞུང་ལུགས་ཆེན་པོ་འགའ་ལས་བཤད། །མི་གཅིག་ཅེ་ན་སྤྱི་སྒོས་ཀྱི། །གཏམ་རྒྱུད་གང་གིས་སྒོ་ནས་འཆད། །ཅེས་པའང་སྒྲ་ཡངས་པའི་དབང་དུ་བྱས་ན་སྲོག་འཚོ་བའི་ཐབས་མཐའ་དག་ཚེའི་རིག་བྱེད་དུ་སྨྲ་མི་རུང་བ་མིན་ཅིང་། དོག་ན་དཔལ་ལྡན་རྒྱུད་བཞི་སྨན་རྒྱལ་གྱིས་བཀའ་སྩལ་ཕྱིན་གོང་གི་ལོ་རྒྱུས་ལ་བལྟོས་མི་དགོས་པར་སེམས་(༧༨ན)
བསྟན་པ་འདི་ལ་འོ་སྐོལ་གྱི་སྟོན་པས་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བའི་དང་པོ་བདེན་བཞིའི་ཆོས་འཁོར་གྱི་དུས་འདུལ་བ་སྨན་གྱི་གཞི་གསུངས་པ་ནི་ནད་ཐམས་ཅད་བཀྲིས་པ་དང་འདུ་བ་གཉིས་སུ་བསྡུས། སྨན་ཐམས་ཅད་དུས་རུང་མཐུན་ཚོད། ཞག་བདུན། འཚོ་བའི་བར་བཅད་པ་བཞིར་བསྡུས་པའི་སྔོན་མ་གསུམ་དངོས་བསྟན་གསོ་རིག་ལ་མི་མཁོ་བ་འདྲ་ཞིག་སྣང་ཡང་སྨན་དཔྱད་མཐའ་དག་ལུས་ཡུན་དུ་གནས་པའི་ཐབས་ལས་མ་འདས་པས། ཤེས་སྤྲིང་ལས། ཁ་ཟས་སྨན་དང་འདྲ་བར་རིག་པ་ཡིས། །འདོད་ཆགས་ཞེ་སྡང་མེད་པར་བསྟེན་བགྱི་སྟེ། །རྒྱགས་ཕྱིར་མ་ལགས་བསྙེམས་པའི་ཕྱིར་མ་ལགས། །འཚག་ཕྱིར་མ་ལགས་ལུས་གནས་འབའ་ཞིག་ཕྱིར། །ཞེས་པས་ཀྱང་རྟོགས་སམ་སྙམ། བར་པ་མཚན་ཉིད་མེད་པའི་དུས་རྒྱལ་པོ་པདྨའི་དཔལ་གྱིས་དབྱར་གནས་ལ་སྤྱན་དྲངས་པའི་ཚེ་ཤཱ་རི་བུ་དང་འོད་མཛེས་ལ་གཅེར་མཐོང་རིག་པའི་རྒྱུད། གནོད་སྦྱིན་ལག་ན་རྡོ་རྗེའི་གནས་སུ་ལྷ་དང་དྲང་སྲོང་གི་འཁོར་ལ་རྒྱུད་ཤེལ་གྱི་མེ་ལོང་། ཐ་མ་ལེགས་པར་རྣམ་པར་ཕྱེ་བའི་སྐབས་གསེར་འོད་དམ་པའི་ཆུ་འབེབས་ཀྱི་ལེའུ་གསུངས་ཤིང་དུས་དེའི་ཚེ་ཐུབ་པའི་དབང་པོ་སྨན་གྱི་བླའི་རྣམ་པར་བསྟན་ནས་ནུབ་ཕྱོགས་ཨོ་རྒྱན་གྱི་ཡུལ་དུ་གྲོང་ཁྱེར་ལྟ་ན་སྡུག །མ་ལ་ཡ་སོགས་རི་བོ་བཞིས་མཚོན་པའི་གནས་ཀྱི་ཁྱད་པར་དཀྱིལ་འཁོར་གྱི་མཐའི་དུར་ཁྲོད་དང་ལྷ་ཀླུ་ལྟར་དེ་དང་། དེའི་མིང་དུ་བཏགས་པ་ལས་དོན། ཧེ་བཛྲ་ལས། འཆད་པ་པོ་ང་ཆོས་ཀྱང་ང་། རང་གི་ཚོགས་ལྡན་ཉན་པ་ང་། ཞེས་ཐམས་ཅད་གཙོ་བོའི་ཡེ་ཤེས་བཟུང་བྱའི་རྣམ་པར་འཕྲུལ་པ་ཤ་སྟག་ཏུ་གསུངས་པ་དང་འདྲ་བའི་གནས་དེར་སྟོན་པ་ཉིད་ཀྱིས་བྱིན་གྱིས་རླབས་ཤིང་སྤྲུལ་པའི་(༧༨བ)
དྲང་སྲོང་རིག་པའི་ཡེ་ཤེས་དང་ཡིད་ལས་སྐྱེས་གཉིས་ཀྱིས་ཞུ་བ་དང་ཞུས་ལན་གྱི་ཚུལ་དུ་བདུད་རྩིའི་སྙིང་པོ་ཡན་ལག་བརྒྱད་པ་རྩ་བཤད་མན་ངག་ཕྱི་མའི་རྒྱུད་འདི་བཀའ་སྩལ་ཞིང་དྲང་སྲོང་ཡིད་ལས་སྐྱེས་ཀྱིས་གསེར་གྱི་ལྗང་ཤོག་ལ་བཻཌཱུརྱའི་ཁུ་བས་བྲིས་ཏེ་གླེགས་བམ་དུ་བྱས་པར་གྲགས་པ་དེའང་མཁས་པ་མང་དག་འདི་ནི་རྗེ་བཙུན་གཡུ་ཐོག་པས་མཛད་པའི་བསྟན་བཅོས་སུ་བཞེད་ནའང་ལུགས་འདི་ལ་གཡུ་ཐོག་པ་རིགས་འདུས་སྨན་པའི་རྒྱལ་པོ་དཀྱིལ་འཁོར་གྱི་གཙོ་བོ་དངོས་ཡིན་པས་དེའི་གསུང་རྒྱུད་མིན་པར་མི་འགྲོ་ཞིང་། ཆ་ལག་བཅོ་བརྒྱད་ཀྱི་ཁོག་དབུག་ལས། བཀའ་མན་ངག་ཡིན་པའི་ཕྱིར། །མན་ངག་གི་ཆེ་བ་དགུ་ཡིས་བཤད། དེ་ལྟར་ཆེ་བ་སུམ་ལྡན་གྱི་རྒྱུད་འདི་ཇི་ལྟར་ཡིན་པའི་ཁུངས་ནི། དང་པོར་རྒྱུད་ཡིན་ཏེ། གླེང་གཞི་གླེང་སློང་ཞུས་པ་དང་། །ཞུ་ལན་ལེའུ་འབྲེལ་བཅས་པ་དང་། །འཁོར་གྱིས་བསྟོད་དང་སྟོན་པས་བསྟོད། །དེ་བདུན་ལྡན་ཕྱིར་རྒྱུད་ཅེས་བྱ། །དེ་ནི་རྒྱུད་ཡིན་ནོ། །ཞེས་དང་། སྟོན་པ་སྨན་གྱི་བླའི་བཀའ་ཡིན་པས་དེ་ལ་ལུང་ཞེས་བྱའོ། །ལུང་དེ་ཡང་ཡིད་ཆེས་བདུན་གྱིས་བཤད་དེ། སྟོན་པའི་ཐུགས་ལས་རྩ་རྒྱུད་བྱུང་བས་རྩ་རྒྱུད་ཆོས་སྐུའི་ལུང་དུ་ཡིད་ཆེས། སྟོན་པའི་སྐུ་ལས་བཤད་རྒྱུད་བྱུང་བས་བཤད་རྒྱུད་ལོང་སྐུའི་ལུང་དུ་ཡིད་ཆེས། སྟོན་པའི་ཡོན་ཏན་ལས་མན་ངག་རྒྱུད་བྱུང་བས་ངོ་བོ་ཉིད་ཀྱི་ལུང་དུ་ཡིད་ཆེས། སྟོན་པའི་འཕྲིན་ལས་ལས་ཕྱི་མའི་རྒྱུད་བྱུང་བས་སྤྲུལ་སྐུའི་ལུང་དུ་ཡིད་ཆེས། སྟོན་པའི་གསུངས་ལས་ཞུ་བ་པོ་དང་དྲང་སྲོང་ཡིད་ལས་སྐྱེས་བྱུང་བས་ཞུས་ཚད་པདྨའི་ལུང་དུ་ཡིད་ཆེས། རྒྱུད་བཞི་སྐུ་ལྔ་ལྷུན་གྲུབ་ཏུ་བྱུང་བས་སངས་རྒྱས་སྨན་བླའི་ལུང་དུ་ཡིད་ཆེས། ཞེས་པས་ལོག་རྟོག་སེལ་བར་མངོན། བཀའ་རུ་བཞེད་པ་ལ་ལ་བསྐྱེད་རྫོགས་དང་དབང་བཞི་བླ་མེད་ལ་ཡིན་པས། (༧༩ན)
།འདི་བྱ་རྒྱུད་ངོས་འཛིན་པར་མི་དགོས་ཤིང་རིག་གཏད་རྗེས་གནང་བྱ་རྒྱུད་ལ་ཡོད་པ་འདིར་ཡང་ཚང་བའི་རྒྱུ་མཚན་ནི་གཞུང་ལས་ཏིང་ངེ་འཛིན་བསྒོམ་པ། སྙིང་པོ་བཟློ་བ། ཤིས་པ་བརྗོད་པ། རིགས་འཛིན་མཆོད་པ་སོགས་ལ་བརྟེན་ནས་རྗེ་གཡུ་ཐོག་པས་སྨན་བླ་གསང་སྒྲུབ། དྲང་སྲོང་བརྒྱུད་པའི་བྱིན་འབེབས། སྨན་གྱི་ལྷ་མོའི་བཀའ་གཏད་རྣམས་ཡོད་པའི་སྒྲུབ་བྱེད་མཛད་ནའང་རྒྱུད་འདི་ཉིད་དྲང་སྲོང་ཡིད་ལས་སྐྱེས་ཀྱིས་འཚོ་བྱེད་གཞོན་ནུ། དེས་མགོན་པོ་ཀླུ་སྒྲུབ། དེས་དཔལ་ལྡན་པའོ། །དེས་ཁ་ཆེ་པཎ་ཆེན་ཟླ་བ་མངོན་དགའ་ལ་གསུངས་པ་སློབ་དཔོན་འདིས་ཚེའི་རིག་འཛིན་བརྙེས་ཤིང་རྒྱུད་འདི་ལྐོག་ཆོས་དང་ཅ་ར་ཀ་སོགས་གཞུང་། གཞན་རྣམས་ཐུན་མོང་དུ་འཆད་ཉན་མཛད་པར་མ་ཟད་འཕགས་ཡུལ་དང་རྒྱ་ནག་གིས་མཚོན་ཡུལ་གྲུ་གཞན་ཚོར་གསོ་དཔྱད་ཤིན་ཏུ་དར་མོད་བོད་འདིར་མངའ་བདག་ཁྲི་སྲོང་ལྡེའུ་བཙན་གྱི་དུས་རྒྱ་གར་གྱི་སྨན་པ་ཞི་བའི་སྙིང་པོ། རྒྱ་ནག་ནས་སྟོང་གསུམ་གང་བ་དང་བྷཱ་ལ་ཧཱ་ཤང་། ཁ་ཆེ་ནས་གུ་ལ་མཉྫུ། སྟག་གཟིགས་ཧ་ལ་ཤནྟི། གྲུ་གུ་ནས་སེ་དོ་འོད་ཆེན། དོལ་པོ་ནས་ཁྱོལ་པོ་སིའུ། བལ་པོ་ནས་དྷརྨཱ་ཤཱི་ལ་རྣམས་གདན་དྲངས་ཏེ་ཚོད་བགམས་པས་ཐུགས་ཡིད་ཆེས་ནས་མཆིམས་ཕུར་སློབ་དཔོན་ཆེན་པོས་དབང་དང་སྐ་ཅོག་གཉིས་ཀྱིས་ལོ་ཙཱ་མཛད་དེ་སོ་སོའི་གཞུང་མན་ངག་དང་བཅས་པ་བསྒྱུར་བར་མངའ་བདག་དགྱེས་ཏེ། བོད་ཀྱི་རྗེ་བློན་འབངས་བཅས་གུས་པས་ཉོན་འཚོ་མཛད་སྨན་པར་གྱུར་པ་འདི་རྣམས་ལ། བོད་འབངས་མགོ་ནག་ཡོངས་ཀྱི་བཀུར་བར་གྱིས། །ཅི་ཕྱིར་འདིས་ནི་ཚེ་སྲོག་སྟེར་བའི་ཕྱིར། །མགོ་ནག་ཡོངས་ཀྱི་ལྷ་ནི་བཙན་པོ་སྟེ། །དེས་ཀྱང་བཀུར་བས་མཚན་ཡང་ལྷ་རྗེར་ཐོགས། །ཞེས་པ་ནས། བདག་(༧༩བ)
གིས་ཕུལ་བའི་བཀའ་ཚིགས་བཅུ་གསུམ་པོ། །གང་གིས་འགལ་ཀྱང་ཆད་ལ་བཅད་པར་བྱ། །ཞེས་རྒྱ་ཆེན་བསྔགས་ཤིང་གསོ་བ་རིག་པའི་གཞུང་ལུགས་སྟོད་སྨད་ཀུན་ཏུ་དར་དུས་དེར། ཐང་ཡིག་ལས། ལོ་ཙཱར་བཏགས་ཀྱང་དོན་ལ་པཎྜི་ཏཿ འདི་ཡི་ཆོས་དྲིན་ཡོད་དོ་ཕྱི་རབས་རྣམསཿ ཞེས་པའི་ལོ་ཙཱ་བ་ཆེན་པོའི་བཻ་རོ་ཙ་ནས་ཁ་ཆེ་ཟླ་མངོན་ལ་གསན་ནས་བསྒྱུར་ཏེ་མངའ་བདག་རྒྱལ་པོ་ཕུལ་བ། མཐའ་བཞིའི་གཞུང་ལུགས་འདི་རྣམས་མ་འོངས་སྐྱེ་དགུའི་བློར་ཆུད་དཀའ་བས་དེའི་ཚེ། སྲོག་འཚེའི་སྐྱབས་སྦྱིན་བླ་ན་མེད་པ་ཚིག་ཉུང་དོན་རྒྱས་ཀྱི་རྒྱུད་འདི་ཡིད་བཞིན་གྱི་ནོར་བུ་ལྟར་དགོངས་པ་བཞིན་དཔལ་ཨོ་རྒྱན་ཆེན་པོས་ཆོས་སྐྱོང་ཞང་བློན་རྡོ་རྗེ་བདུད་འདུལ་དང་གཏེར་སྲུང་རྒྱལ་པོ་ཤིང་བྱ་ཙན་ལ་བཀའ་བསྒོས། རྗེ་བཙད་པོས་བསམ་ཡས་དབུ་རྩེ་བར་ཁང་གི་ཀ་བའི་ནང་དུ་གཏེར་དུ་སྦས་ཏེ་སྨོན་ལམ་མཛད་པ་དེ་ནས་ལོ་བརྒྱ་དང་ལྔ་བཅུ་འགྲོ་བའི་ཚེ། ཐང་ཡིག་ལས། ཏའི་དུས་བརྩིགས་པའི་རྩིག་པ་སྡུག་པ་འོངས་པཿ ཇིང་དང་རྒྱ་རྣམས་གྲོག་མ་ཚང་ཞིག་འདྲཿ ཇོ་མོ་གླིང་གསུམ་སྦས་པའི་གཏེར་ཁ་འདིཿ མི་བཞག་འདོན་པའི་རྟགས་དེར་བསྟན་ནས་འབྱུང་། གཏེར་སྟོན་གྲ་པ་མངོན་ཤེས་ཞེས་བྱ་འབྱུང་༔ ས་སྟེང་གནས་གཞི་བརྒྱ་དང་རྩ་བརྒྱད་འགེངས༔ གྲ་མདའ་འདི་ལ་གཙུག་ལག་ཁང་ཞིག་འབྱུང་༔ རྒྱལ་པོས་བཞེངས་པའི་ལྷ་ཁང་བདག་པོ་བྱེད༔ ཅེས་པ་ལྟར་དགེ་བའི་བཤེས་གཉེན་གྲ་པ་མངོན་ཤེས་ཀྱི་སྤྱན་དྲངས་ནས་རིམ་པར་བརྒྱུད་དེ་རྗེ་བཙུན་གཡུ་ཐོག་པ་ཆེན་པོར་བཀའ་བབས་ཤིང་རྒྱུད་ཀྱི་ཤུགས་བསྟན་གྱི་ཆ་ནས་སྨན་རྒྱལ་རིགས་འདུས་ཀྱི་དབང་བཞི་བསྐྱེད་རྫོགས་རྫོགས་པ་ཆེན་པོའི་ལམ་ཟབ་མོའི་སྙིང་ཏིག་གི་སྲོལ་ལེགས་པར་ཕྱེ་བས་རྒྱུད་འདི་བྱ་རྒྱུད་དུ་འགྲེལ་བའི་ངལ་བ་མི་དགོས་པར་(༧༩བ)
བསྐྱེད་པ་མ་ཧཱ་ཡོ་ག་སྒྲུབ་སྡེ་བརྒྱད་ཀྱི་ནང་ནས་ཚེ་མཆོག་བདུད་རྩིའི་རྒྱུད་ཀྱི་སྡེ་ཚན་དུ་བཞུགས་ཤིང་དངོས་བསྟན་དུའང་ཁོག་དབུབ་ལས། སྨོན་པ་ཚད་མེད་པས་བྱང་ཆུབ་མཆོག་ཏུ་སེམས་བསྐྱེད་པས་དེའི་འཇུག་སྒོ་མ་ལོག་སྟེ་ཐེག་པ་གཞན་གྱི་སྒོ་རུ་འཇུག་མི་དགོས་པའི་ཆེ་བ། དམན་ལྷག་ལོག་པའི་མཐའ་དང་བྲལ་བའི་དབུ་མར་བལྟ་ཞིང་ལྟ་སྒྲིབ་པ་མེད་པའི་ཆེ་བ། འཇུག་པ་ཚད་མེད་པ་བཞི་ཉམས་སུ་ལེན་པའི་སྒོམ་ལ་གོལ་ས་མེད་པའི་ཆེ་བ། མི་དགེ་བཅུ་ལ་སོགས་པ་སྨྱོ་འཆལ་ཐོ་ཅོའི་ངན་སྤྱོད་ཐམས་ཅད་དོར་བས་དམ་ཚིག་མ་ཉམས་པའི་ཆེ་བ། ལམ་ཕ་རོལ་ཏུ་ཕྱིན་པ་དྲུག་ལ་སྤྱད་དེ་བྱང་ཆུབ་ཏུ་སེམས་བསྐྱེད་ནས་སྨན་སྦྱར་ཏེ་བྱིན་པས་སྦྱིན་པ། ཉེས་སྐྱོན་གྱི་དྲི་མས་མ་གོས་པར་བྱེད་པས་ཚུལ་ཁྲིམས། དལ་བྲེལ་ཁྱགས་ལྟོགས་ལ་སོགས་པ་དང་ནད་པའི་ཚིག་བཟོད་པས་བཟོད་པ། ལེ་ལོ་མེད་པར་ནད་པ་གསོ་བའི་བྱ་བ་ལ་བརྩོན་པས་བརྩོན་འགྲུས། སྨན་དཔྱད་ལ་རྟོག་ཅིང་བསམ་པར་བྱེད་པས་བསམ་གཏན། དེ་ལྟར་བཅོས་པས་སྨན་དཔྱད་ལ་ངེས་ཤེས་སྐྱེ་བས་ན་ཤེས་རབ་བོ། །དེ་ལྟར་ཕ་རོལ་ཏུ་ཕྱིན་པ་དྲུག་ལ་སྐྱེད་པའི་ཚོགས་གཞན་བསག་མི་དགོས་པའི་ཆེ་བ། ཐར་པ་དང་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པས་འབྲས་བུ་གཞན་ནས་བཙལ་མི་དགོས་པའི་ཆེ་བ། བཤད་པ་ལག་ལེན་འདི་རང་ལ་ཚང་བ་གསོ་དཔྱད་གཞན་ལ་བལྟོས་མི་དགོས་པའི་ཆེ་བ། དགྲ་ལའང་ཕན་ཐོགས་པས་དགྲ་བོ་གཉེན་དུ་ཆོད་པའི་ཆེ་བ། ཡུལ་ལ་ཕྱོགས་རིས་མེད་པར་ཡུལ་གང་དུ་བསྡད་ཀྱང་གཞན་གྱིས་ཕུད་དུ་འཁུར་བའི་ཆེ་བ། དེ་ལྟར་ཆེ་བ་དགུ་དང་ལྡན་པར་བཤད་པས་སྨན་གྱི་སྦྱོར་སྡེ་དང་དཔྱད་ཀྱི་རིགས་རྣམས་ཀྱི་ནང་ཐུན་མོང་གི་ལག་ལེན་མཚུངས་པ་ལྟར་སྣང་ཡང་(༨༠བ)
ལྟ་སྒོམ་སྤྱོད་པའི་ཁྱད་པར་དེ་དག་གིས་ཁྱད་ཞུགས་པ་ཡིན་ལ། གཞན་དུ་ཕྱག་རྒྱ་བ་རྒན་པོའི་ཅི་ཡང་ཡིད་ལ་མི་བྱེད་པ་ལས་ལྷག་པ་སྲིད་རྩེའི་མཐར་ཐུག་ཏུ་འགྲོ་བའི་ཏིང་འཛིན་མུ་སྟེགས་བྱེད་ལ་ཡོད་པས་ཟུར་མཁར་ལེགས་བཤད་འཚོལ་གྱིས། ཆོས་འདི་ཁོ་ནས་མངོན་མཐོ་དང་ངེས་ལེགས་ཐོབ་པའི་གནད་ཨེ་ཡོད། །གཞན་དུ་ཁྲིམས་དང་སྔགས་ལམ་ལ། །མ་བརྟེན་འདི་གཉིས་མེད་པར་གསུངས། །ཞེས་པའི་དོགས་གནས་ཀྱང་རང་སར་གྲོལ་ལམ་སྙམ་ཞིང་མིན་ན་ཐུགས་ཞེན་མཛད་ཡུལ་གྱི་བཀའ་བརྒྱུད་པའི་མགོ་ལ་ཆུ་དྲངས་ཀྱི་དོགས་སོ། །ཧྲིལ་གྱི་དྲིལ་ན། མཇུག་དོན་ཡོངས་གཏད་ལས། རྩ་བ་ཐུགས་ཀྱི་རྒྱུད་འདི་ས་བོན་འདྲ། །འདི་ལས་མ་སྐྱེས་གསོ་དཔྱད་ཡོད་མ་ཡིན། །སྐུ་ཡི་བཤད་རྒྱུད་བར་སྣང་ཉི་ཟླ་འདྲ། །ཚིག་དོན་མ་ལུས་སྒྲིབ་མེད་གསལ་བར་སྟོན། །མན་ངག་ཡོན་ཏན་རྒྱུད་འདི་ནོར་བུ་འདྲ། །དགོས་པ་མ་ཚང་བ་ནི་གཅིག་ཀྱང་མེད། །ཕྱི་མ་འཕྲིན་ལས་རྒྱུད་འདི་ཕ་ལམ་འདྲ། །ནད་ཀྱི་སྟེང་དུ་ཐོགས་པ་ཡོད་མ་ཡིན། །ཞེས་གསོ་བྱའི་ལུས། གསོ་བྱེད་གཉེན་པོ། ཇི་ལྟར་གསོ་བའི་ཚུལ། གསོ་བ་པོའི་སྨན་པ་བཞི་གནད་འགག་ཐམས་ཅད་མདོར་བསྟན་རྒྱས་བཤད་ཀྱི་སྒོ་ནས་མ་ཚང་བ་མེད་པར་བསྟན་པའི་རྒྱུད་འདི་ཉིད་ཀྱི་ཕན་ཡོད་ཀྱང་། ཉི་མའི་འོད་ཀྱིས་ཟླ་སྐར་ཟིལ་གནོན་བཞིན། །རྒྱུད་རྒྱལ་འདི་ཡིས་གསོ་རིག་ཀུན་ཟིལ་གནོན། །འདི་ནི་སྔགས་མེད་པ་ཡི་སྲུང་སྐུད་ཡིན། །འཆི་བདག་བདུད་སྡེ་བཟློག་པའི་འཁྲུལ་འཁོར་ཡིན། །ནད་ཀྱིད་དགྲ་དཔུང་འཇོམས་པའི་དཔའ་བོ་ཡིན། །འདུ་བ་འཕེལ་ཟད་སྙོམ་པའི་སྤྱི་བོ་ཡིན། །དུས་མིན་འཆི་ཞགས་གཅོད་པའི་འཁོར་ལོ་ཡིན། །ནད་ཀྱི་ཟུག་གཟེར་ཅོག་པའི་ཐོ་བ་ཡིན། །(༨༡ན)
སྡུག་བསྔལ་འདམ་ནས་འདྲེན་པའི་ལྕགས་ཀྱུ་ཡིན། །འཆི་བའི་སྲོག་སྐྱོབ་མི་འཇིགས་སྦྱིན་པ་ཡིན། །འཆི་བ་སློང་བྱེད་བདུད་རྩི་བུམ་པ་ཡིན། །ཅེས་བསམ་གྱིས་མི་ཁྱབ་པའི་ཡོན་ཏན་ཕུན་སུམ་ཚོགས་པ་དང་ལྡན་པའི་རིས་སུ་མ་ཆད་པའི་ལུས་ཅན་ཀུན་གྱི་སྤྱི་ནོར་རྩི་སྨན་གྱི་ལྗོན་པ་ཆེན་པོ་གང་འདི་སྨན་རྒྱལ་མིའི་གཟུགས་ཅན་གཡུ་ཐོག་ཡོན་ཏན་མགོན་པོ་ནས་དབུས་གཙང་གི་ཕྱོགས་ཀུན་ཏུ་དར་ཞིང་རྒྱས་པའི་འཕྲིན་ལས་ཀྱི་རྒྱུན་རིགས་ལྡན་ཆེན་པོ་རྣམ་རྒྱལ་གྲགས་བཟང་དང་བྲང་ཏི་པ་ཡབ་སྲས་སོགས་བྱང་སྨན་འཚོ་མཛད་མཐའ་ཀླས་པ་དང་ཟུར་མཁར་ཆོས་རྗེ་མཉམ་ཉིད་རྡོ་རྗེ། མཚོ་སྨད་མཁན་ཆེན། ཤཱཀྱ་དབང་ཕྱུག །མཚུངས་མེད་བྱར་ཕོ་པཎ་ཆེན་གྱིས་མཚོན་པའི་དབུས་འགྱུར་ཚེའི་རིག་བྱེད་འཛིན་པ་རྣམས་ཀྱིས་བཤད་པ་ས་བཅད་ཕྱག་ལེན་མན་ངག་སོ་སོའི་ལུགས་བཞིན་རྒྱུན་མ་ཆད་པ་ཞིག་བྱུང་ན་རིས་མེད་པའི་སྐྱེ་དགུ་མཐའ་དག་ལ་འཆི་མེད་ཚེའི་མཆོད་སྦྱིན་བླ་ན་མེད་པར་མཐོང་ནས་དབུས་གཙང་གཉིས་ཀར་འཛུགས་འདོད་ལྷག་བསམ་རྡུལ་བྲལ་གྱིས་སྟོན་ཟླ་ལྟར་དཀར་བའི་ཟེར་གྱི་བློ་བརྩོན་ཀུནྡ་ཡོངས་སུ་བཞད་པའི་ཉང་སྨད་རྫོང་ཆེན་བསམ་གྲུབ་རྩེར་དཔོན་ཚང་ཚ་རོང་པ་ཚེ་དབང་རྣམ་རྒྱལ་སློབ་དཔོན་དུ་བསྐོས་པའི་རྒྱུན་རིགས་ཀྱི་བུ་དྲང་སྲོང་ཚེ་བརྟེན་རྡོ་རྗེ་སྤུན་གྱིས་བཟུང་སྟེ་གསོ་རིག་སློབ་གྲ་དྲང་སྲོང་འདུས་པའི་གླིང་གི་བླང་དོར་ཉམས་སུ་བསྟར་བ་ལ་དབྱར་ཆོས་ཧོར་ཟླ་ལྔ་པའི་ཚེས་གཅིག་ནས་བཙུགས་པའི་བདུན་པའི་གནམ་གང་བར། དགུན་ཆོས་ཟླ་བ་བཅུ་པའི་ཚེས་གཅིག་ནས་གཉིས་པའི་གནམ་གང་བར། དེ་འཕྲོས་ཟླ་བ་བཞི་ཆོས་མཚམས་བྱེད་པར་དུས་ཚེས་སྔ་ཕྱི་གཉིས་ཀའི་ཆོས་ཚུགས་གདོང་སློབ་མ་འཛོམ་པའི་རྫོང་སྡོད་ཕྱག་རྟེན་དང་བཅས་(༨༡བ)
རྒྱུ་མཚན་སྨེད་ངོས་མི་གྲངས་དུ་ཡོད་ཀྱི་ཕོགས་ལེན། སློབ་དཔོན་ལ་ཐོག་མར་འབྱོར་པ་དང་བསྟུན་པའི་འབུལ་ཚན་དང་ལོ་རྗེས་མ་རྣམས་སུ་ཕྱག་རྟེན་སྐབས་སུ་གང་བབ། དུས་ཚེས་ལམ་སླེབས་ན་ཞག་གྲངས་དང་མཉམ་པའི་ཕོགས་ལྡབ་གཅོག །གྲྭ་པར་མ་ཟད་མི་སྐྱ་ཡིན་ནའང་ནག་ཆང་སོགས་དོན་མེད་གཡེང་བས་མི་ཁྱེར་བའི་ཆེད་དུ་དཔེ་འཛིན་སྐབས་སྡོད་ཡུལ་སྤེལ་དཀར་སྦུས་འབྱེད་ཡན། ཤར་སྟེང་བར་སྒོ་ཡས་མས་ཚུན་ལ་གཞན་འདྲེས་མང་པའི་མཚམས་ཆོད་དང་གནང་བ་མ་ཞུས་བར་དེ་ཕན་འགྲོ་འོང་མི་བྱེད། ཤག་ཆེ་ཆུང་དང་བསྟུན་པའི་མི་གྲངས་བརྒྱད་ནས་ལྔ་ཚུན། ཁང་དཔོན་གྱིས་ཁང་དེབ་ནང་བཞིན་ཤག་འདུ་ཁང་། ཐབ་ཚང་ལྡེ་མིག་དང་བཅས་པ་རྩིས་སྤྲོད་གྲུབ་མཚམས་ནས་ཤག་སོ་སོའི་རྒན་པ་རེ་དགེ་རྒན་དུ་བསྐོས་པའི་ཁང་པ་ལ་བག་མེད་ཀྱི་ཆུད་མི་ཟ་བ་བྱེད། སྐད་ལེགས་ཤིང་འདོན་ཆ་ངེས་པ་ཞིག་གིས་དབུ་མཛད་དང་དགེ་རྒན་རྣམས་ཞག་བཅོ་ལྔ་རེས་བསྐོར་གྱི་དགེ་བསྐོས་བགྱིས་ཏེ་སྒྲིགས་རྣམ་གཞག་ལ་ཉེ་འགྱང་སྤངས་པའི་དོ་དམ་ཆེ་བ་བྱེད། དེ་འོག་རྒན་གྲ་རེ་མོས་ཀྱི་ཇ་མར་ལེན་གཏོང་སོགས་སྤྱི་གཉེར་སྤྲེལ་པོ་དང་ཇ་མ་གཅིག་བསྐོས་པའི་རྩིས་ཁྲི་ཐོ་ནང་ལྟར་སྤྲོད། ཇ་ཐུག་དྲུག་རེ་གཏོང་བའི་དགོས་ཆ་སྤྲད་ནས་ནམ་གསེང་ལ་ཐུག་པ། ཚ་རྟིང་སྔ་ཕྱོགས་ཇ།ཉིན་གུང་ཐུག་པ། དགོངས་་ཇ་རྣམས་ཤག་་སོ་སོར་འདྲེན་པར་གཏོང་། ཇ་གཉིས་དགོངས་མོ་འདོན་ཆོས་ལ་ཚོགས། ཇ་ཐུག་སྐོལ་འདྲེན་ལ་ཤ་ཚའི་སྤང་བླང་མ་གཏོགས་རང་འདོད་ཁ་ཁྱེར་གྱིས་ཕུགས་གླེང་བརྗོད་མི་ཡོང་བ་བྱེད། ཉིན་ལྟར་དཔེ་འཛིན་་དབང་པོ་རྣོ་རྟུལ་སྡེ་ཚན་ལྔར་ཕྱེ་སྟེ། གྲ་ཐང་རྒྱུད་བཞི་བར་མར་ཆ་བཞག་པའི་རབ་ཀྱིས་ཡིག་འཕྲེང་བདུན་ནམ་དྲུག །དེ་འོག་གི་ལྔ་འམ་བཞི། དེ་(༨༢ན)
འོག་གིས་བཞི་འམ་གསུམ། དེ་འོག་གིས་གསུམ་མམ་གཉིས། ཐ་མས་གཉིས་སམ་གཅིག་རྣམས་བཟུང་དགོས་པར་ཐོག་མར་ཐོ་རེངས་ཚ་དུད་བཏང་བ་དང་བསྟུན་དགེ་རྒན་སོ་སོས་སྐུལ་ལྕག་བྱས་པའི་ནམ་ལང་བར་བཤར་སྦྱང་ནམ་གསེང་ནས་ཉིན་ཕྱེད་མ་ཟིན་བར་སོ་སོའི་རང་མལ་དུ་དཔེ་འཛིན་ལ་འཇུག་ཅིང་དེ་མཚམས་དགེ་རྒན་ཚོས་རྒྱུགས་དང་ཞག་བཅུ་མཚམས་སུ་སློབ་དཔོན་གྱིས་རྒྱུགས་ལེན། གུང་ཚིགས་གྲོལ་ནས་ཉི་མ་ཕྱེད་ཡོལ་བར་གུང་གསེང་བྱེད་པར་མིག་མངས་རྒྱལ་གླིང་དམག་འཁྲུགས་སོགས་བག་མེད་ཀྱི་རྩེ་མོ་མི་བྱ། དེ་ནས་སློབ་དཔོན་གྱི་དྲུང་དུ་ཚོགས་པའི་ཐོག་མར་འདོན་ཆ་སོགས་རིམ་སློབ་བྱས་རྗེས་དབང་པོ་དང་འཚམས་པའི་འགྲེལ་བཤད་མན་ངག་གི་གནད། སྨན་གྱི་སྦྱོར་སྡེའི་གོ་དོན་ངག་སློབ་རྩི་བཞག་འོས་འཚམས་རེ་གཏོང་། ཉི་ཚོད་ཀྱི་བརྡ་དང་བསྟུན་དཔེ་འཛིན་ལ་འཇུག །ཉི་མ་བཞུད་ཙམ་ལ་འཁར་རྔ་བརྡུངས་འཕྲལ་་འདུ་ཁང་དུ་འཆག་པར་གྲྭ་པ་གང་ཡིན་ཟླ་གམ་སོགས་རབ་བྱུང་གི་རྟགས་ལྡན་དང་སྐྱ་བོ་རྣམས་ཀྱང་ཕྱམ་ཙེ་དམར་སེར་གང་རུང་གི་སྟེང་གྱོན་བྱེད་པས་མཚོན་ཀུན་སྤྱོད་གང་ལེགས་ངོས་སྒོ་གསུམ་གཞན་དུ་མ་ཡེངས་པའི་ངང་ནས་སྐྱབས་སེམས། སྨན་བླ་དང་གཡུ་ཐོག་ཡོན་ཏན་མགོན་པོ་སོགས་བརྒྱུད་པའི་གསོལ་འདེབས། སྨོན་ལམ་ཚིགས་བཅད། ཕྱག་འཚལ་ཉེར་གཅིག །ཞང་བློན་གྱི་གཏོར་འབུལ། ཤེས་རབ་སྙིང་པོ། ཚེ་གཟུངས། ཤིས་བརྗོད། ཆོས་སྤྱོད་གང་འཚམ་དང་ཉ་སྟོང་བརྒྱད་གསུམ་ལྟ་བུར་སྨན་བླའི་མདོ་ཆོག་ཆེན་མོ་ཚར་རེ་གཏོང་། རྒྱུན་ཚོགས་གྲོལ་ནས་སོ་སོའི་ཤག་ཏུ་ཁྱུག་ཙམ་ཕྱིན་པའི་མུན་མཚམས་ནས་སྲོད་འཁོར་བར་སོགས་ནམ་རིང་ཐུང་ལ་དཔགས་པའི་འཕྲོས་བརྡ་མ་བྱུང་(༨༢བ)
བར་བདེ་ཡངས་དང་ཐོག་ཏུ་བཤད་སྦྱང་བྱེད་པར་འཁྱམས་རྒྱུག་ལོང་གཏམ་གྱིས་མཚོན་རྣམ་གཡེང་མི་བྱེད། གལ་སྲིད་བྱུང་ན་བརྒྱ་ཕྱག་སོགས་སྐབས་ཐོབ་འགེལ། ཚོགས་དང་བཤར་སྦྱང་ག་དུས་ནད་ཀྱིས་མནར་ན་དགེ་སྐོས་ལ་གནང་བ་ཞུ་བཞིན། རང་འཚམ་གྱིས་བསྡད་ན་བརྒྱ་ཕྱག་གཉིས་རེ་འཚལ། ཞོལ་སོགས་ཉེ་སྐོར་དུ་འགྲོ་བར་སློབ་དཔོན་ལ་མ་ཞུས་པར་མི་འགྲོ། གལ་སྲིད་ཕྱིན་ན་མང་ཇ་རེ་སྐོལ། ཞག་གཅིག་ཕན་ལ་འགྲོ་ཚེ་རྫོང་སྡོད་ལ་དགོངས་པ་ཞུ། ཆོས་ཐོག་ཚུགས་རིང་སྐྱ་བོ་རྣམས་ཀྱང་ནག་ཆང་གི་འབྲེལ་སྤང་ཞིང་སྐྱ་སེར་ཚང་མས་མཛེས་ལམ་བོར་བའི་ཁ་ལག་འཁྲུག་པའི་དཔེ་སྲོལ་ལ་གནོད་པ་སུས་བྱས་ཀྱང་བྱས་ཚབས་དང་བསྟུན་བརྒྱ་ཕྱག་མང་ཇ་གྲངས་བཅད། རྣམ་གཞག་སོགས་འགེལ། ཆོས་མཚམས་ལ་འགྲོ་གདོང་སྔར་བཟུང་རྣམས་ཡང་བསྐྱར་གྱིས་རྒྱུགས་བླངས་པ་ཐོར་བཀོད་གྲྭ་པ་རྣམས་གཞིས་དགོན་སོ་སོར་སློབ་གཉེར་ལས་གཞན་དུ་མ་ཡེངས་པའི་དཔེ་འཛིན་བྱེད་ཅིང་། སྐྱ་བོ་རྣམས་ཀྱང་གསར་འཛིན་མ་ཐུབ་རུང་ཐོར་འཁོད་པ་མ་བརྗེད་པ་བྱས་རྗེས་འཁོར་བསྟུན་སྐྱ་སེར་ཚང་མས་རྒྱུགས་སྤྲོད། གོང་གསལ་སྔར་བཟུང་བརྗེད་པ་བྱུང་ཚེ་ཟླ་གྲངས་ཀྱི་ཕོགས་གཅོད་པའམ་འཁོར་ཞག་རྗེས་མའི་དུས་དཔེ་མཚམས་ལ་སྡོད་པ་གང་རིགས་བྱེད། འཛིན་གྲྭ་མཐོ་ཞིང་ཤེས་རབ་ཆེ་བའི་རིགས་ཆོས་མཚམས་སྐབས་དཔེ་མཚམས་ལ་དམིགས་བསལ་སྒོར་བ་ཚོ་ཆོས་ཐོག་ལས་བརྩོན་གཤིས་སླར་ངོ་སོ་ཐོན་པ་རྒྱུགས་སྤྲོད། རྒྱུན་གཏན་བཙུན་པ་གང་ཡིན་གྲྭ་པའི་སྒྲིགས་དང་མཐུན་པའི་རང་ཚུགས་མ་བོར་བ་དང་སྐྱ་བོ་རྣམས་ཀྱང་པ་ལོ་ཞེ་གཅིག་ལ་སརྦ་མགོ་སོགས་མགོ་སྟབས་དང་ལུས་ཆས་ཡ་མ་ཟུང་གི་རིགས་མི་བྱེད་པར་ཞྭ་འབོག་དོ། གོས་དང་སྟོད་གོས་གཟན་སོགས་ཚོས་མ་ལས་གཞན་པའི་དཀར་པོ་ཁྲ་བོ་མི་གྱོན་(༨༣ན)
ཞིང་གྲི་རིངས་ཐེབ་ཀྲད་ཀྱིས་མཚོན་ཧོར་འདྲའི་རྩིང་སྤྱོད་སྤངས་པའི་གཞེས་ལམ་བྱེས་གསུམ་ཐམས་ཅད་དུ་འཇོལ་ཆས་དང་འདྲེན་པའི་ཀུན་སྤྱོད་ཁོ་ནར་གནས་པ་བྱེད། འོན་ཀྱང་རྣ་རྒྱན་སོགས་བསྙེམས་ཆས་ཀྱི་རིགས་ཤིས་པའི་ཡན་ལག་ཡིན་པས་བྱས་པར་འགལ་བ་མེད། རྒྱུད་བཞི་མ་འཁྲིལ་བར་ལག་ལེན་ལ་འཇུག་ཅིང་རང་རྐྱ་མ་ཕེར་པར་སློབ་མ་བསྟེན་པ་སོགས་མིག་ལྟོས་ལ་གནོད་པའི་རིགས་གཏན་ནས་མི་བྱེད་པས་མཚོན་གསོ་བ་རིག་པའི་གཙུག་ལག་གི་རྒྱུན་བཟང་པོ་བླ་ནས་བླར་འཕེལ་བ་དགོས་རྒྱུ་ཡིན། གསོ་རིག་མ་ལ་ཡ་ལས་ཕན་བདེའི་དྲི། །ལྷག་བསམ་རླུང་གིས་དྲངས་པའི་ངང་པོ་ཆེས། །དུག་གསུམ་དེས་བསྐྱེད་ནད་ཀྱི་ཚ་གདུང་ཀུན། །དྲུང་ནས་འབྱིན་པའི་སྐལ་བཟང་ཐོབ་པར་ཤོག །ཟུག་རྔུའི་དྲི་བཀྲུ་མཐོ་རིས་སྨན་གྱི་ཆབ། །རྣམ་དཔྱོད་རྒྱལ་མཚན་ཏོག་ཏུ་འབར་བའི་འོད། །འགྲོ་གཞན་དོགས་མེད་མི་ཡི་རྟེན་བཟང་པོ། །རྙེད་རྣམས་དགའ་སྟོན་དཔལ་ལ་སྤྱོད་པར་ཤོག །སྨན་གྱི་བླ་མ་དྲང་སྲོང་རིག་པ་འཛིན། །རྡོ་རྗེ་བདུད་འདུལ་གནོད་སྦྱིན་ཡོངས་ཀྱི་རྗེ། །གཏེར་གྱི་སྲུང་མ་ཤིང་བྱ་ཅན་སོགས་ཀྱིས། །འཕྲིན་ལས་རྣམ་བཞི་ལྷུན་གྱིས་གྲུབ་པར་མཛོད། །ཅེས་ཉང་སྨད་བསམ་དོན་ལྷུན་གྱིས་གྲུབ་པའི་རྫོང་ཆེན་དུ་ཚེའི་རིག་བྱེད་གསོ་བ་རིག་པའི་གྲྭ་ཚང་དྲང་སྲོང་འདུས་པའི་གླིང་གི་བཅའ་ཡིག་གསོང་པོར་སྤྱོད་པའི་རྒྱུད་མངས་འདི་ནི་ཚ་རོང་དཔོན་ཚང་ཚེ་བརྟན་རྡོ་རྗེས་ས་བོན་དང་བཅས་བསྐུལ་བ་ལྟར་མེ་འབྲུག་ནག་པ་ཟླ་བའི་དཀར་ཆའི་བཟང་པོ་དང་པོའི་ཚེས་ལ་ཟ་ཧོར་གྱི་བནྡེ་འཇམ་དབྱངས་དགའ་བའི་བཤེས་གཉེན་གྱིས་རྒྱལ་ཁབ་ཆེན་པོ་དམར་པོ་རིར་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བགྱིས་པ་སིནྡྷིརསྟུ།། །།