རྩིས་སྐར་ནག་ལས་བརྩམས་པའི་དྲིས་ལན་ཉིན་བྱེད་དབང་པོའི་སྣང་བ།
རྩིས་སྐར་ནག་ལས་བརྩམས་པའི་དྲིས་ལན་ཉིན་བྱེད་དབང་པོའི་སྣང་བ་ཞེས་བྱ་བ་བཞུགས་སོ། །
མཆོད་བརྗོད་དང་རྩོམ་པར་དམ་བཅའ་བ།
དི བཱ རེ ནྡྲ སྱ དྱཱ ནུ ནཱ མོ ག ཎ ཀི རྣ ཀྵ ཏྲེ བྷི ཤྩཱི ནཱ དཱ ར མྦྷ རྣཱཾ བྲ ཤྣོ ཏྟ རོ བི ཧ ར ཏི སྨ། བ ནྡྷི ཏྱོ ཥྞཱི ཥ ཨ གྲཱ ཏི ཤ ཙ སུ ཁ མ ཧཱ ཙ པྲ པུ ཥྚི ར ཡུ བ ནྱཱ ཨཱི བཱ ཤུ ཀླ ཀུ མུ ངྻ ཤྴརཝ ན ཀ ར མ ཎཽ ཀུ ཎྜ ལི༔ པ ཏྲ ཤུ ཀྲ། ཕུལ་བྱུང་བདེ་ཆེན་ལང་ཚོ་རབ་རྒྱས་ཀུན་ད་ལྟར་དཀར་བྱང་ཆུབ་སེམས། །ནམ་ཡང་འཕོ་མེད་གཙུག་ཏོར་རྩེར་བཅིངས་ནོར་བུའི་ཡོལ་གོར་ལེགས་འཁྱིལ་བས། །(༢ན)
།བྱོ ཏྟ རྱི རྣཱ ཤ ཡཱ པ དྦྷ ར ཛ མ ཀ ན མཿ ཀཱ ལ ཙ ཀྲོ ནི མི ཏྟཱ ནུ བྱ ཉྫ རྱཱ དི བུ དྡྷ ཤྴི བ ཙ བྷ ཝ ཨ ཧོ མཱ ཡ ཙཱ ཤུ ནྱ རཱུ པ ། སྟོང་གཟུགས་མཚན་དཔེའི་ངོ་མཚར་སྒྱུ་འཕྲུལ་སྲིད་ཞིའི་རྒུད་པའི་ཚོགས་བཅིལ་བ། །རྣམ་ཀུན་མཆོག་ལྡན་དང་པོའི་སངས་རྒྱས་ཟུང་འཇུག་དུས་ཀྱི་འཁོར་ལོར་འདུད། །ལེགས་པའི་ཆ་བསགས་གྲོང་ཁྱེར་ཤམྦྷ་ལར། །ས་དབང་ཚུལ་བཟུང་ཁྱབ་བདག་འཁོར་ལོའི་མགོན། །ཆོས་རྒྱལ་བདུད་དང་རིགས་ལྡན་ཉེར་ལྔ་ཡི། །ཞབས་སེན་བུང་བ་སྤྱི་བོའི་པད་མཚོར་བསྟེན། །(༢བ)
མཁྱེན་དཔྱོད་རླུང་གིས་གཞུང་ལུགས་ཉིན་མོར་བྱེད། །གངས་ཅན་ལྷ་ཡི་ལམ་དུ་འདྲེན་མཛད་པས། །ལོ་པཎ་མཁས་པའི་རྣམ་པར་ཐར་པ་ལ། །བསམ་ཀྱིན་བརྗོད་དུ་མེད་པའི་བཀའ་དྲིན་དྲན། །རྒྱལ་ཀུན་མཁྱེན་བརྩེའི་སིནྡྷུ་ཝ་རའི་མདངས། །འཇམ་དཔལ་རྡོ་རྗེ་རྣོན་པོར་ཤར་བའི་གར། །བཤེས་གཉེན་ཚུལ་གྱིས་རྣམ་རོལ་བཙོང་ཁ་པ། །མཁས་གྲུབ་ཡོངས་ཀྱི་འཁོར་ལོས་སྒྱུར་པའི་དཔལ། །གསུང་རབ་ཕྱོགས་རེར་སྦྱངས་པའི་གོམ་སྟབས་ཅན། །མཁས་རློམ་གླང་པོའི་ལྷ་ཆེན་མཐོང་བའི་ཚེ། །གྲགས་པ་དོན་ལྡན་ལོ་ཆེན་སྟག་ཚང་པ། གནས་ལྔའི་བསྟན་པ་རྒྱས་མཛད་ཁྱོད་མིན་སུ། །རྒྱ་ཆེན་ཤེས་བྱ་ཀུན་རིག་ཆོས་ཀྱི་གྲགས། །ཟུང་འཇུག་སྒྱུ་མའི་གར་མཁན་ནོར་བུ་བཟང་། །ཕུག་ལུགས་ཤིང་རྟ་ཆེན་པོ་ལྷུན་རྒྱམ་པ། །དཔལ་མགོན་འཕྲིན་ལས་སྙན་པའི་གྲགས་པ་འབར། །གཙུག་ལག་སྨྲ་བའི་དབང་ཕྱུག་ཟུར་རིགས་རྗེ། །རིག་གནས་རྒྱ་མཚོའི་འཕྲེང་འཛིན་སྨོན་འགྲོ་བ། །མདོར་ན་བདག་བློ་ཆེས་ཕྲའི་ཟ་མ་ཏོག །ལེགས་བཤད་བདུད་རྩིས་གང་བར་མཛད་རྣམས་རྒྱལ། །དཀའ་གནས་དྲི་བའི་ཚིག་གི་པདྨ་དཀར། །ཟབ་ཅིང་བརླིང་པའི་འདབ་མ་སྟོང་ལྡན་པ། །བླུན་རྨོངས་ཚོགས་པའི་ཐུན་གསུམ་ཟུམ་པའི་ཁ། །དྲིས་ལན་ཉི་མའི་གཟེར་གྱིས་རྣམ་པར་འབྱེད། །རི་མོར་བྲིས་མཚུངས་མཚུངས་མེད་བླ་གྲལ་དུ། །ཆུད་མིན་འཇམ་དབྱངས་དབྱངས་ཅན་ངག་གི་ལྷས། །སྨྲ་བའི་རྣམ་དཔྱོད་དཔྱོད་ལྡན་མགུ་ནུས་མཆོག །བྱིན་པས་ལེགས་བཤད་བཤད་པའི་སྤོབས་པ་ཐོབ། །མཛེས་མཛེས་གཞན་མགོ་སྐོར་བའི་ཚུལ་འཆོས་དང་། །ཟོབ་ཟོབ་ཚེ་འདིའི་འབྱིད་ཐབས་མི་ཤེས་ཀྱང་། །འགྲིག་འགྲིག་མགྲིན་པའི་ལམ་ནས་ལེགས་དྲངས་པའི། །སྙན་སྙན་དྲི་ཟའི་རྒྱུད་ཀྱི་(༣ན)
དབྱངས་འདི་ཉོན། །ཞེས་སྙན་ཚིག་གི་ལམ་ནས་སྔུན་བསུས་ཏེ།
གླེང་གཞི།
གླེང་གཞི། གླེང་བར་བྱ་བ་ནི། ལུས་ཅན་མཐའ་དག་གི་འདྲེན་མཆོག་དམ་པ། བསྐལ་བ་བཟང་པོ་འདིའི་སངས་རྒྱས་ཀྱི་སྟོང་གི་ནང་ཚན། དཔལ་ལྡན་སྟོབས་བཅུའི་རྩལ་འཆང་བ་ཟས་གཙང་གི་སྲས་པོ་དེ་ཉིད་ཀྱིས་གདུལ་བྱའི་དབང་པོ་དང་འཚམ་པར་དམ་པའི་ཆོས་ཀྱི་བདུད་རྩིའི་སྒོ་འཕར་བརྒྱ་ཕྲག་ཕྱེ་སྟེ། མངོན་པར་མཐོ་བ་དང་ངེས་པར་ལེགས་པ་བླ་ན་མེད་པའི་གོ་འཕང་གི་སྲོག་འཚོ་བའི་འཇིགས་པའི་སྦྱིན་པ་རླབས་པོ་ཆེ་སྩལ་པའི་ནང་ཚན་གྱི་གཙོ་བོ་ནི་སྤྱི་རྒྱུད་ལས། འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམ་ཝཱ་རའི་མེ་ཏོག་ལྟར། །རྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཆོ་ག་ནི། །དེ་བས་ཀྱང་ནི་དཀོན་པ་སྟེ། །ཞེས་གསུངས་པ་ལྟར། ཆེས་དཀོན་པ་ནམ་མཁའི་པདྨ་ལྟ་བུ་དང་། དོན་ཆེན་པོ་དང་ལྡན་པ་ཡིད་བཞིན་གྱི་ནོར་བུ་རིན་པོ་ཆེ་དང་མཚུངས་པ་ནི་ཟབ་མོ་རྡོ་རྗེ་ཐེག་པར་གྲགས་ལ། དེའི་ནང་ནས་ཀྱང་བཤད་རྒྱུད་རྡོ་རྗེ་འཕྲེང་བར། ཨེ་ནི་གསང་བ་མཁའ་དབྱིངས་དང་། །བྷ་ག་ཆོས་འབྱུང་པདྨ་དང་། །ཆོས་དབྱིངས་སེང་གེའི་ཁྲི་དང་ནི། །མཆོག་ཏུ་རྨད་བྱུང་རྗོད་པར་བྱེད། །ཝ་ནི་རྡོ་རྗེ་རྡོ་རྗེ་སེམས། །རྡོ་རྗེ་འཇིགས་བྱེད་དབང་ཕྱུག་ཆེ། །ཧེ་རུ་ཀ་དང་དུས་འཁོར་ལོ། །དང་པོའི་སངས་རྒྱས་ལ་སོགས་མཚན། །ཞེས་གསུངས་པའི་ཕྱི་མ་དང་པོའི་སངས་རྒྱས་ནི་རྩ་རྒྱུད་ལས། བྱ་རྒོད་ཕུང་པོའི་རི་ཆེན་པོར། །ཐེག་པ་ཆེན་པོ་བླ་ན་མེད། །ཤེས་རབ་ཕ་རོལ་ཕྱིན་པའི་ཚུལ། །བྱང་ཆུབ་སེམས་དཔའ་རྣམས་ལ་བསྟན། །དེ་ནས་གཅིག་ཏུ་མཆོད་རྟེན་ཆེར། །ཆོས་ཀྱི་དབྱིངས་ཀྱི་དཀྱིལ་འཁོར་དུ། །ཞེས་དང་། མདོར་བསྡུས་(༣བ)
དང་པོའི་བཤད་སྦྱར་སྙིང་པོའི་སྣང་བར་ཡང་། ཟླ་བ་བཟང་པོ་གྲོང་དགུ་བཅུ་རྩ་དྲུག་གི་རྒྱལ་པོ་དང་བཅས་པས་ཤམྦྷ་ལ་ནས་འབྲས་སྤུངས་སུ་འོངས་ཏེ་རྒྱུད་གསུང་བའི་དོན་དུ་གསོལ་བ་བཏབ་པར་བཤད་པ་ལྟར། འཕགས་ཡུལ་དབུས་གྱུར་འཆང་བཛྲཱ་ས་ན། བོད་སྐད་དུ་རྡོ་རྗེ་གདན་དུ་གྲགས་པའི་ལྷོ་ཕྱོགས། ཤྲི་དྷ་ན་ཀ་ཊ་ཀ་ཞེས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར། ལས་ལྡན་གྱི་ཆོས་རྒྱལ་ཟླ་བ་བཟང་པོ་ལ་དུས་ཀྱི་འཁོར་ལོའི་རྒྱུད་སྟོང་ཕྲག་བཅུ་གཉིས་པ་བཀའ་སྩལ་པའི་ལུགས་སྲོལ་དེ་ཉིད་བྱང་ཕྱོགས་ཀ་ལཱ་པའི་གྲོང་ཁྱེར་ཆེན་པོར་དར་བའི་རྩ་རྒྱུད་ལས་ཕྱུང་བའི་བསྡུས་རྒྱུད་དང་འགྲེལ་ཆེན་གཉིས་ཙི་ལུ་པ་དང་དུས་ཞབས་པའི་དྲིན་ལས་འཕགས་ཡུལ་དང་། དེ་ནས་རྭ་འབྲོ་ཤོང་གི་མཁྱེན་དཔྱོད་བརྩོན་པའི་བྱེད་པོས་བོད་གངས་ཅན་གྱི་ལྗོངས་འདིར་དར་ཏེ། ཐོས་བསམ་སྒོམ་པས་གཏན་ལ་འབེབས་པའི་རིང་ལུགས་ཆེས་ཆེར་འཕེལ་བར་གྱུར་པའི་ཟབ་མོ་རྡོ་རྗེའི་རྣལ་འབྱོར་འདི་ཉིད་ཚུལ་བཞིན་རྟོགས་པ་ལ་ཕྱི་ནང་གཞན་གསུམ་ཤེས་དགོས་པས། ཕྱི་རོལ་ཤེས་པའི་ཡན་ལག་སྐར་རྩིས་ཀྱི་གཞུང་ལུགས་འདི་ཉིད་མ་ཤེས་ན་སངས་རྒྱས་ཀྱང་ཐོབ་པར་མི་འགྱུར་རོ། །ཅིའི་ཕྱིར་ན། རྒྱལ་པོ་ཤིང་རྟ་ཅན་གྱིས་མ་ག་དྷའི་རྒྱལ་པོ་བྱེད་ཅིང་། སེནྡྷ་པས་ཨོ་ཏནྟ་པུ་རིའི་གཙུག་ལག་ཁང་འཛིན་པའི་ཚེ་དུས་ཞབས་པ་ཆུང་བ་བྱོན་ཏེ། ནཱ་ལནྡཿའི་སྒོ་གོང་ལ་རྣམ་བཅུ་དབང་ལྡན་དང་། དེའི་འོག་ཏུ། གང་གིས་དང་པོའི་སངས་རྒྱས་མི་ཤེས་པ་དེས་མཚམས་ཡང་དག་པར་རྗོད་པ་མི་ཤེས་ཞེས་པ་ནས་རྡོ་རྗེ་འཛིན་པའི་ལམ་དང་བྲལ་བ་སྟེ་འཁོར་བ་པའོ་ཞེས་པའི་བར་བྲིས་པས་སོ། །རྒྱ་ནག་གི་རྩིས་གཞུང་ཡང་འཕགས་པ་འཇམ་དཔལ་དབྱངས་ཀྱིས་རི་བོ་རྩེ་ལྔར་གསུངས་ནས། མ་ཧཱ་ཙི་ནའི་རྒྱལ་ཁམས་སུ་དར་བ་རྒྱ་མོ་བཟའ་ཀོང་ཇོས་ཐོག་མར་བོད་དུ་བསྣམས་(༤ན)
ནས་མཆོག་དམན་ཀུན་གྱིས་སྤང་བླང་བྱ་བར་མེད་དུ་མི་རུང་བ་སྟེ། སྐར་ནག་རྩིས་ཀྱི་ཚུལ་གཉིས་ལས་བརྩམས་པའི་དྲི་བ་ཚིག་ཉུང་ཞིང་དོན་བརླིང་བ། མཁས་པའི་མགུལ་རྒྱན་དུ་གྲགས་པ་ཞིག་སྔོན་རྗེ་མངའ་བདག་ཁྲི་སྲོང་ལྡེའུ་བཙན་གྱི་དུས་དཔལ་ཨཽ་ཌྜི་ཡཱ་ནའི་སློབ་དཔོན་ཆེན་པོའི་པདྨའི་ཟབ་ཆོས་ཀྱི་བཀའ་བབས་སོ་ཟུར་གནུབས་གསུམ་སྔགས་པའི་རྒྱལ་པོར་གྲགས་པའི་ཟུར་འུག་བྱ་ལུང་པའི་རིགས་ལས་ཉེ་བར་སོན་པ་འཁོར་ལོའི་མགོན་པོ་སྔགས་རམ་པ་དཔལ་འབྱོར་འཕྲིན་ལས་རབ་རྒྱས་ཀྱིས་མཛད་སྣང་བ། རིག་སྔགས་འཆང་བ་ཆེན་པོ་ཉིད་ཐོག་མར་སྔགས་རྙིང་མ་བཀའ་གཏེར་ལ་ཐོས་བསམ་སྒོམ་པ་མཐར་ཕྱིན་པར་མ་ཟད། ཡོན་ཏན་ལྡན་ན་སྐྱེ་བོ་ཀུན། །མ་བསྡུས་པར་ཡང་རང་ཉིད་འདུ། །དྲི་ལྡན་མེ་ཏོག་རྒྱང་རིང་ཡང་། །བུང་བ་སྤྲིན་གྱི་ཚོགས་བཞིན་འདུ། །ཞེས་པ་ལྟར། རིགས་དང་དཀྱིལ་འཁོར་ཀུན་གྱི་ཁྱབ་བདག །མཁས་པ་དང་གྲུབ་པ་ཐམས་ཅད་ཀྱི་འཁོར་ལོས་སྒྱུར་བ། རྒྱ་ཆེན་གནས་ལྔ་རིག་པའི་པཎྜི་ཏ་ཆེན་པོ་དཔལ་འབྱོར་ལྷུན་གྲུབ་ཀྱི་སྙན་གྲགས་ཀྱིས་ཐུགས་ཕྲོགས་ཏེ། ཆོས་ཀྱི་རྒྱལ་པོ་སྲོང་བཙན་སྒམ་པོའི་སྒྲུབ་གནས་སྐྱིད་ཤོད་ཉང་བྲན་ཕ་བོང་ཁར་ཡུན་རིང་པོ་ཞབས་པད་བསྟེན་ནས་གསང་སྔགས་ཕྱི་འགྱུར་དང་ཐ་སྙད་ཀྱི་རིག་གནས་མཐའ་ཡས་པར་སྦྱང་པ་མཛད་དེ། གཙུག་ལག་མང་པོར་གཞན་དྲིང་མི་འཇོག་པའི་མཁས་པ་ཆེན་པོར་གྱུར་པས། དྲི་ཚིག་གི་དོན་འདི་ལ་སོམ་ཉི་ག་ལ་མངའ་ནའང་། དེང་སང་གི་དུས་འདིར་གདུང་རུས་ཆེ་ཆེ་མོ་དང་། སྐྱེ་བ་མང་པོ་བརྒྱུད་བརྒྱུད་པར་གྲགས་པའི་ཆེད་རློམ་མང་པོ་དང་། ལྔ་བསྡུས་མགྱོགས་རྩིས་གཟའ་འཛིན་གྱི་རི་མོ་བྲེ་གང་རྡེ་དྲུག་གི་ནག་རྩིས་ཙམ་ཤེས་པའི་མངོན་པའི་ང་རྒྱལ་ཅན་དང་། དགུ་མཐའ་ཙམ་ཡང་མི་ཤེས་པའི་དུས་འཁོར་མཁན་པོ་ངོ་མཚར་(༤བ)
ཅན་རྣམས་ལ་ཅོ་འདྲི་ཤིང་། ལས་དང་པོ་པ་རྣམས་ལ་ཕན་པའི་ཆེད་དུ་མཛད་པར་གོར་མ་ཆག་ལ། རྩིས་རིགས་སྨྲ་བར་ཡིད་གཞུངས་པའི་གཟུར་གནས་ཀྱི་བློ་དང་ལྡན་པའི་དྲིས་ལན་དགོས་ཚུལ་ནན་ཏན་དུ་བྱུང་བ། དྲི་ཚིགས་ཐོག་མར། བླ་མ་དང་དུས་ཀྱི་འཁོར་ལོ་འཇམ་དཔལ་གཞོན་ནུའི་ཞབས་ལ་ལུས་ངག་ཡིད་གསུམ་ཕྱག་འཚལ་ལོ། །ལྷ་བཅས་འགྲོ་བའི་བླ་མ་ཟས་གཙང་སྲས། །དཔལ་ལྡན་བདེ་ཆེན་དུས་ཀྱི་འཁོར་ལོ་དང་། །མཁྱེན་དང་བརྩེ་བའི་བདག་ཉིད་འཇམ་དཔལ་དབྱངས། །ཕྱོགས་བཅུའི་རྒྱལ་བ་སྲས་བཅས་གུས་བཏུད་ནས། །གནས་འདིའི་དཀར་ནག་རྩིས་ཀྱི་ལེགས་བཤད་ལ། ཚེ་རབས་སྔོན་ནས་སྦྱངས་པར་ཞལ་བཞེས་པའི། །མཁས་དབང་རྣམས་ལ་དྲི་བ་ཞུ་ཚིག་ལ། ཁོ་བོ་སྦྱངས་པ་ཆུང་ཞིང་བརྩོན་པ་ཞན། །ཤེས་རབ་དམན་པས་རྟོགས་དཀར་གྱུར་པ་ནི། །ཞེས་པའི་དོན་ལྟར་ན་ཚེ་རབས་མང་པོར་མཁས་པ་རིམ་པར་བརྒྱུད་པ། ཁྱད་པར་དུས་འཁོར་སོགས་ལ་སྦྱངས་པའི་སྔོན་གནས་རྗེས་དྲན་ཡོད་པ་ཞིག་འདྲི་བའི་ཡུལ་ཡིན་འདུག་པ། རིགས་པ་ནངས་པར་འཆི་ཡང་བསླབ་། །ཚེ་འདིར་མཁས་པར་མ་གྱུར་ཡང་། །སྐྱེ་བ་ཕྱི་མར་བཅོལ་བ་ཡི། །ནོར་ལ་རང་ཉིད་ལེན་དང་མཚུངས། །ཞེས་པ་ལྟར་ན། རྒྱ་བོད་ཀྱི་མཁས་གྲུབ་ཐམས་ཅད་ཀྱི་ཡང་རྩེ་འཕགས་མཆོག་ཀླུ་སྒྲུབ་དང་། ཐམས་ཅད་མཁྱེན་པ་བུ་སྟོན་ལྟ་བུའི་སྐྱེ་བའོ་ཞེས་ཚེ་རབས་སྔོན་མའི་གནས་རྗེས་སུ་དྲན་པར་ཞལ་གྱིས་མཆེས་ཤིང་། མངོན་མཁྱེན་གྲུབ་རྟགས་སོགས་ཀྱང་ཐོག་མེད་དུ་ཡོད་པར་རློམ་པ་རྣམས་གཙུག་ལག་རྒྱ་མཚོར་གཟིགས་པར་དཀའ་བའི་གནས་སུ་མི་འགྱུར་སྙམས་པ་འདུག་ཀྱང་། དུས་སྙིགས་མ་བས་ཀྱང་ཆེས་ཆེར་སྙིགས་པར་གྱུར་བའི་སྐྱོན་ཡིན་ནམ། དམན་པ་སྤྱོད་པ་བཟང་གྱུར་ཀྱང་། །དེ་ནི་བཅོས་(༥ན)
མའི་རྣམ་ཐར་ཡིན། །ཤེལ་ལ་ནོར་བུས་ཁ་བསྒྱུར་ཀྱང་། །ཆུ་དང་ཕྲད་ན་རང་མདོག་སྟོན། །ཞེས་པའི་དོན་མིན་ལས་ཆེ། །དེ་འདྲའི་རིགས་ཕལ་ཆེར་ནི་ལེགས་བཤད་སྨྲ་བའི་ལྗགས་ཐུང་ངུར་གྱུར་འདུག་པས་ན། ས་ཕྱོགས་དེ་ནས་ཙནྡན་འཁྲུང་རིགས་མིན་འདྲ་བས། ཡོན་ཏན་མེད་པའི་སྐྱེ་བོ་འགའ། །ཡོན་ཏན་ལྡན་ལ་ལྷག་པར་སྡང་། །གངས་ཀྱི་ཡུལ་དུ་དགུན་སྐྱེས་པའི། །ལོ་ཏོག་ལྟས་ངན་ཡིན་ཞེས་སྒྲོག །ཅེས་དང་། བརྒྱ་ཡི་ནང་ན་མཁས་པ་དཀོན། །སྟོང་གི་ནང་ན་དཔའ་བོ་དཀོན། །བརྒྱ་སྟོང་ལས་ཀྱང་ཆེས་དཀོན་པ། །ཚིག་གི་མདུད་འགྲོལ་རེ་རེ་ཙམ། ཞེས་པའི་དོན་དུ་མངོན་ནོ། །རང་ཉིད་ལ་དོགས་གནས་གྱུར་བ་འམ། གཞན་ལ་ཕན་སེམས་ཀྱིས་དྲི་བ་དང་། དཔྱད་པའི་གནད་ནི། །སློབ་དཔོན་ཉི་མ་སྦས་པས། གནམ་བསྐོས་རྒྱལ་པོའི་ཕོ་བྲང་དུ། །པཎ་ཆེན་ལྔ་བརྒྱ་འདུ་བའི་གནས། །ལེགས་བཤད་འཚོལ་དང་འདྲི་བ་དང་། །དཀའ་བའི་དོགས་སེལ་དེ་རུ་གྱིས། །ཞེས་པ་ལྟར་མཁས་པ་མང་པོ་ལ་འདྲི་བར་གསུངས་ནའང་། དུས་དབང་གིས་རིག་པའི་གནས་ལྔ་ཤེས་པའི་མཁས་པ་མང་པོ་གནས་གཅིག་ཏུ་ཚོགས་པ་ལྟ་ཅི་སྨོས། གཉིས་གསུམ་ཚོགས་པའང་དཀའ་བའི་ཕྱིར་ན། མཁས་པ་འཇམ་གསར་བས་རྨི་ལམ་གྱི་དགའ་མའི་དྲི་ལན་དུ། སྐབས་ཤིག་ཚོང་འདུས་ཆེན་པོའི་དུས་སྟོན་བལྟས། །སྐྱེ་བོ་ཕར་འགྲོ་བརྒྱ་དང་ཚུར་འོང་སྟོང་། །བློ་ལྡན་མཁས་པའི་གྲོགས་པོ་ཉིན་སྐར་ཙམ། །ཁོ་བོ་ཙུ་ཏའི་ཡུལ་ན་རྐང་གཉིས་པ། །དེ་ནས་གཞན་ཕོངས་འཇིགས་མེད་སེང་གེའི་སྒྲ། །སྔོན་དུ་བསྒྲགས་པའི་ཆོས་གྲྭ་ཆེན་པོར་སླེབ། །མི་བརྟགས་བཞག་ཚེ་བསོད་ནམས་རྒྱ་མཚོའི་ཞིང་། །བརྟགས་ན་ཆུ་ཤིང་ལྟ་བུའི་སྐྱེ་བོས་གང་། །ཞེས་པའི་དོན་ཐོག་ཏུ་བབས་པའི་དུས་ཚོད་འདིར་བདག་ལྟ་བུས་ཝ་(༥བ)
སྐྱེས་སེང་གེར་བརྫུ་བའི་ཟོལ་གྱིས་དྲིས་ལན་ཅུང་ཟད་བགྱིས་པར་དཔྱོད་ལྡན་རྣམས་རྗེས་སུ་ཡི་རང་བར་མི་འགྱུར་བ་མ་ཡིན་ཏེ། ལྷ་མདོངས་ལོ་ཙཱ་བས་བལ་ཡུལ་གྱི་ལམ་ཡིག་ཏུ་འཇམ་དབྱངས་ཕྱག་གིས་སྩལ་བའི་པིར། །གང་གིས་བདེ་བར་འཛིན་པ་ཡི། །སྨན་ཐང་སྤྲུལ་སྐུ་འཇམ་དབྱངས་པས། །ལེགས་བཤད་སིལ་བུའི་གླེང་མོ་མཛད། །སྙོམ་ལས་མྱོས་ཆུས་ངོམས་པ་བདག་ལྟ་ཡིས། །རིག་གནས་མིང་ཙམ་ཡོད་པར་མི་ནུས་ཀྱང་། །ཅུང་ཟད་ཙམ་ལ་ལན་ལྡོན་ཅི་ནུས་ཕུལ། །ཕན་ཚུན་རྗེས་སུ་ཡི་རང་གནས་སུ་གྱུར། །ཅེས་པའི་དོན་དུ་སེམས། །འོན་ཀྱང་ཚེ་རབས་སྔ་མ་ནས་སྦྱངས་པའི་མཁས་པའི་སྐྱེ་བ་ཡིན་ནོ་ཞེས་ཁས་ལེན་ཅིང་དེར་རློམ་པ་ནི་མ་ཡིན་ཏེ། རྒྱུ་མཚན་གང་གི་ཕྱིར་ན། བསྟན་པའི་མངའ་བདག་མཁན་ཆེན་བློ་བཟང་ཆོས་ཀྱི་རྒྱལ་མཚན་དཔལ་བཟང་པོ་དང་། འཇམ་དབྱངས་བླ་མ་དཀོན་མཆོག་ཆོས་འཕེལ་གྱིས་ཐམས་ཅད་མཁྱེན་པ་ཡོན་ཏན་རྒྱ་མཚོའི་སྐྱེ་བ་ཡིན་ནོ་ཞེས་ངོས་འཛིན་པར་གནང་བ་ནི་གཞན་ངོ་ཙམ་ལ་དགོངས་པར་སེམས། རང་ངོས་ནས་སྐྱེ་བ་དྲན་པ་དང་། མངོན་ཤེས་གྲུབ་རྟགས་སོགས་ནི་ལྟ་ཅི་སྨོས། རྨི་ལམ་བཟང་བ་ཙམ་ཡང་འོང་མ་མྱོང་བས། གོང་གི་འདྲི་ཡུལ་གྱི་ཁྲོད་དུ་ཚུད་པར་མ་གྱུར་ཀྱང་། ན་ཚོད་ཆུང་ངུ་ནས་བསྟན་པ་རིན་པོ་ཆེའི་སྒོར་ཞུགས། མཁས་པའི་དབང་ཕྱུག་མང་པོ་དང་མཇལ་ཏེ་ཐོས་བསམ་ཅུང་ཟད་བྱས་པས། བླུན་པོའི་དབུས་ན་དགའ་ཞིང་རྩེ། །མཁས་པའི་དབུས་ན་ཞུམ་ཞིང་བཟུང་། །ནོག་དང་ལྐོག་ཤལ་མེད་ན་ཡང་། །ཡ་སོ་ཅན་གྱི་བ་གླང་ཡིན། ཞེས་པའི་གྲལ་དུ་སྡོད་མ་དགོས་ཙམ་ཡོད་པ་དང་། ཡབ་རྒྱལ་པོ་ཟས་གཙང་གི་གསུང་ལས། ང་ཡི་བུ་ནི་རིགས་དག་དང་། །རུས་ལ་ངོ་མཚར་འཛིན་མ་ཡིན། །ཡོན་ཏན་བདེན་པ་ཆོས་ཀྱི་རྣམས། །དེ་ལ་འདི་ཡི་ཡིད་དགའ་བའོ། །ཞེས་དང་། ལུང་བར་མ་ལས། (༦ན)
མེ་ཏོག་དྲི་ནི་རྫི་ཕྱོགས་མིན་མི་འགྲོ། །རྩ་བའམ་རྒྱ་སྤོས་ཙནྡན་ཡང་མ་ཡིན། །མཁས་རྣམས་དྲི་ནི་རྫི་ཕྱོགས་མིན་འགྲོ་སྟེ། །སྐྱེས་བུ་དམ་པ་ཕྱོགས་རྣམས་ཀུན་དུ་འགྲོ། །ཞེས་གསུངས་པ་ལྟར། ཐོས་བསམ་གྱི་ཆ་ལ། སྔོན་བྱོན་མཁས་པའི་རྣམ་ཐར་ལ་མིག་ཡར་ལྟའི་ལུགས་སུ་བྱས་ཤིང་། སེམས་ཅན་ལ་སངས་རྒྱས་ཀྱི་མིང་བཏགས་པའི་བླ་ཆེན་གྱི་གོ་སར་གནས་ཀྱང་། དེ་དག་གི་ཁྱུ་ཚོགས་སུ་སྤྱི་འདྲེ་མ་བྱས་པའི་རྒྱུ་མཚན་གྱིས། ལན་ཅུང་ཟད་སྤྲོ་བར་བྱའོ། །
དྲི་བ་དང་པོ། སྐར་ནག་གཙུག་ལག་འདི་ཉིད་རིག་གནས་ལྔ་པོ་གང་གི་ཁོངས་སུ་གཏོགས་མིན་གྱི་དྲིས་ལན།
དྲི་བ་དང་པོ།སྐར་ནག་གཙུག་ལག་འདི་ཉིད་རིག་གནས་ལྔ་པོ་གང་གི་ཁོངས་སུ་གཏོགས་མིན་གྱི་དྲིས་ལན།དེས་ན་དྲི་བ་དང་པོ་ནི། དེ་ཡང་དང་པོ་སྐར་ནག་གཙུག་ལག་འདི། །རིག་པའི་གནས་ལྔའི་ཁོངས་སུ་གཏོགས་དགོས་པས། །བཟོ་དང་གསོ་བ་སྒྲ་ཚད་ནང་དོན་ཏེ། །རིག་གནས་ལྔ་པོ་གང་གི་ཁོངས་སུ་གཏོགས། །དེ་རྣམས་གང་གི་ཁོངས་སུ་གཏོགས་མིན་ན། །ཡན་ལག་རིག་བྱེད་བཞི་ལ་གཏོགས་དགོས་པས། །སྙན་ངག་མཆོད་སྦྱིན་སྲིད་སྲུང་ངེས་རྗོད་ཀྱི། །རིག་བྱེད་བཞི་པོ་གང་གི་ཁོངས་སུ་གཏོགས། །དེར་ཡང་མ་གཏོགས་གཙུག་ལག་ཆོས་འདི་ཉིད། །རིག་གནས་ཁོལ་བུ་ཞིག་ཏུ་ཁས་ལེན་ན། །རིག་པའི་གནས་དྲུག་དག་ཏུ་འགྱུར་བའི་ཕྱིར། །རིག་གནས་ལྔ་རུ་བསྡུས་པ་དོན་མེད་དོ། །ཞེས་པ་ལ། སྤྱིར་མགོན་པོ་བྱམས་པས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་ཅི་སེམས་ཐམས་ཅད་མཁྱེན་ཉིད་ཐོབ་མི་འགྱུར། །དེ་ལྟ་བས་ན་གཞན་དག་ཚར་ཅད་རྗེས་གཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱེད། །ཅེས་སྨྲ་ངན་ཚར་གཅོད་པ་སྒྲ་ཚད། །བློ་ལྡན་རྗེས་སུ་འཛིན་པ་བཟོ་གསོ། །རང་ཉིད་ཀུན་ཤེས་པར་བྱེད་པ་ནང་རིག་པ་སྟེ། ལྔར་གསུངས་པ་ནི་སྤྱིར་བཏང་ལས་མཐའ་གཅིག་ཏུ་གྲངས་ངེས་སུ་གཟུང་བར་བྱ་མི་ནུས་ཏེ། དེ་ལས་སྤྲོ་བསྡུ་སྣ་(༦བ)
ཚོགས་འབྱུང་བར་བསྒྲུབ་ནུས་པས་སོ། །རྒྱུ་མཚན་ཅིའི་ཕྱིར་ན། ཉུང་ངུར་བྱེད་ཚེ་རིག་གནས་ཐམས་ཅད་བཟོ་རིག་པའི་ཁོངས་སུ་བསྡུ་ནུས་ཏེ། བཟོ་རིག་པ་ལ་ལུས་བཟོ་ངག་བཟོ་ཡིད་ཀྱི་བཟོ་དང་གསུམ་དུ་བཤད་པའི་ཕྱིར། ལུས་བཟོ་མཆོག་ནི་བདེ་གཤེགས་སྲས་བཅས་ཀྱི་སྐུ་གསུང་ཐུགས་ཀྱི་རྟེན་ཡིན་ལ། དེ་ཡང་། དབྱངས་ཅན་མས་རྗེས་སུ་བཟུང་བའི་དཔལ་ལྡན་བློ་གྲོས་བཟང་པོས། རྒྱལ་བའི་སྐུ་གཟུགས་ཐལ་མོ་བཅུ་པ་ལ། །རྒྱལ་སྲས་རྣམས་ཀྱི་མཐོ་བཅུ་ཞན་པ་དང་། །རྒྱལ་ཡུམ་སོགས་ཀྱི་ཞལ་ཚད་དགུ་པ་དང་། །རྒྱལ་དབང་ཁྲོས་པ་རྣམས་ལ་གདོང་བརྒྱད་དང་། །མིའུ་ཐུང་ལ་ལུས་ཚད་མཐོ་དྲུག་གོ །ཞེས་སོགས་སྐུའི་ཕྱག་ཚད་གསལ་བར་གསུངས་པའི་ཁུངས། དུས་འཁོར་སམ་བུ་ཊི། སྡོམ་འབྱུང་སོགས་རྒྱུད་སྡེ་མང་པོ་དང་། ཤཱ་རིའི་བུས་ཞུས་པ་སོགས་མདོ་ལས་བྱུང་བའི་ཕྱག་ཚད་རྣམས་ཡིན་ཞིང་། མཐོ་ཚད་རེ་རེར་སོར་ཕྱེད་བཅུ་གསུམ་དུ་བཤད་པའི། གཙུག་ཏོར་ནས་གསར་གནས་ཀྱི་བར་ལ་མཐོ་ལྔ། གསང་གནས་ནས་རྟིང་པའི་བར་ལ་སྟེ། བསྡོམས་པས་སོར་བརྒྱ་ཉེར་ལྔར་བཤད་ལ། དེ་ཡང་དུས་འཁོར་གྱི་ལུགས་ལ། སྤྲུལ་སྐུའི་ཆ་ཚད་རགས་པར་སོར་མོ་བརྒྱ་དང་བཅུ་གཉིས་སུ་བཤད་པ་དང་། མདོ་ཕྱོགས་དང་རྒྱུད་སྡེ་འགར་ཡང་། རྡོ་རྗེ་སེམས་དཔའ་བཞེངས་པའི་ཚད། །གདོང་པ་དགུ་ལས་འགྱུར་བ་མེད། ཅེས་གསུངསས་པ་ནི་ཕྲ་རགས་ཀྱི་དབྱེ་བ་དང་མདོ་སྡེ་སྔགས་ཀྱི་ཁྱད་པར་མི་འདྲ་བའི་དབང་དུ་བྱས་པ་ཡིན་ཏེ། ཕར་ཕྱིན་ཐེག་པའི་སྐབས་སུ། ས་བཅུ་པ་ཆོས་ཀྱི་སྤྲིན་ཐོབ་མ་ཐག་ཏུ་འཕོ་རླུང་སྟོང་བརྒྱད་བརྒྱ་པ་ཕྲ་རགས་བཅུ་འགགས། ས་བཅུ་པ་དེ་ཉིད་མཐར་ཕྱིན་ཕྱིན་གྱི་བར་དུ། འཕོ་རླུང་སྟོང་བརྒྱད་བརྒྱ་པ་ཕྲག་གཉིས་འགགས་ནས། མདོ་ལུགས་ཀྱི་ལོངས་(༧ན)
སྐུ་འཐོབ་པར་འདོད་ནའང་། གསང་སྔགས་ལ། ད་དུང་འཕོ་བའི་བག་ཆགས་བེམ་ཆོས་ཕྲ་མོ་སྟོང་བརྒྱད་བརྒྱ་པ་ཕྲག་བཅུ་གཉིས་ལུས་པ། ཀུན་དུ་འོད་ལ་སོགས་པའི་ས་བཅུ་གཉིས་ཀྱིས་སྤོང་ཞིང་། སྤང་བྱ་དེ་ཉིད་ཕར་ཕྱིན་ཐེག་པའི་ལུགས་ཀྱི་རྟོགས་པའི་སངས་རྒྱས་ཀྱི་སྤངས་བྱར་དོན་གྱིས་འགྲོ་བས། དེ་ལྟ་བུའི་སྤང་རྟོགས་ཡོངས་སུ་རྫོགས་པ་ན་ལོངས་སྐུ་འཐོབ་པས། གནད་འདི་ལ་བརྟེན་ནས་ལུས་ཚད་ཆེ་ཆུང་གི་རྣམ་གཞག་འབྱུང་ནའང་། སྔགས་ཀྱི་ཁྱད་འཕགས་ཀྱི་ས་ཀུན་ཏུ་འོད་སོགས་བཅུ་གཅིག་པོ་དུས་ཡུན་རིང་པོར་མི་འགོར་བར་རྫོགས་འགྲོ་བའི་ཕྱིར་ཕྲ་བའི་གནད་དེ་དང་བསྟུན་པའི་ལུས་ཚད་འཇོག་པར་དཀའོ། །ཚུལ་འདི་དག་ལ། གྲགས་པ་དོན་ལྡན་གྱི་མཁས་པ་སྟག་ཚང་ལོ་ཙཱ་བས། མདོ་སྔགས་ཀྱི་ལོངས་སྤྲུལ་ལ་སོར་གྱི་དབྱེ་བར་གསུངས་པ་ནི། གནད་དེ་དག་ལ་དགོངས་པ་ཡིན་གྱི། དེང་སང་ལག་ལེན་གྱི་སྐབས། པིར་ཐོགས་དབང་པོ་སྨན་བླ་དོན་གྲུབ་པས་མཛད་པའི་ཆ་ཚད་གྱི་ཡི་གེ་ཆེན་མོ་དང་། དེའི་རྗེས་འཇུག་དབྱངས་ཅན་ལྷ་མོས་རྗེས་སུ་བཟུང་བ་སྤྲུལ་སྐུ་རིང་མཁར་བ་སོགས་མཁས་པ་རྣམས་ཀྱིས་མཛད་པའི་ཡི་གེ་དང་ཕྱག་ལེན་གྱི་དཀྱུས་སུ། དེ་བཞིན་གཤེགས་པའི་སྐུ་ལ་སོར་བརྒྱ་ཉེར་ལྔ་འབྱུང་བ་དེ་ལས་གཞན་པའི་རིང་ཐུང་གི་དབྱེ་བ་མི་མཛད་ཅིང་། ཞལ་ཚད་བཅུ་དང་། དེ་ལས་ཅུང་ཟད་ཐུང་བའང་། གཙོ་འཁོར་ལྟ་བུ་གཞི་གཅིག་ལ་བརྟེན་པའི་བལྟོས་ས་ལྟོས་འཇོག་དགོས་པར་མངོན་ནོ། །ད་ལྟ་ཡོངས་གྲགས་ཀྱི་ལོངས་སྤྲུལ་ནི། རྡོ་རྗེ་འཆང་ལྟ་བུ་ལོངས་སྐུ་དང་། ཤཱཀྱ་ཐུབ་པ་ལྟ་བུ་སྤྲུལ་སྐུར་ངོས་འཛིན་པ་མང་ཡང་། གསང་སྔགས་ཀྱི་དཀྱིལ་འཁོར་རྟེན་བརྟེན་པ་རྣམས་ནི་གང་ལ་གང་འདུལ་དུ་སོ་སོར་སྤྲུལ་པས་སྤྲུལ་སྐུར་ངོས་འཛིན་དགོས་པས་དྲི་(༧བ)
ཟའི་རྒྱལ་པོ་རབ་དགའ་འདུལ་ཕྱིར་དྲི་ཟའི་ཆ་བྱད་དུ་བསྟན་པ་ནི་བཟོ་བོ་སྤྲུལ་སྐུ། འཁོར་ལོས་སྒྱུར་རྒྱལ། ཁྱིའུ། བུ་མོ། གྲུ་ཟམ་སོགས་སུ་སྤྲུལ་པ་ནི་སྐྱེ་བ་སྤྲུལ་སྐུ། བྱང་ཆུབ་མཆོག་མངོན་དུ་མཛད་པའི་ཚུལ་སྟོན་པ་མཆོག་གི་སྤྲུལ་སྐུར་བཤད་པ་ལྟར་རོ། །གསུང་རྟེན་ནི་ཡི་གེ་སྟེ། ཇི་སྐད་དུ། ངོ་བོ་གཟུགས་དང་བྱེད་ལས་དང་། །ངེས་ཚིག་དབྱེ་བསྡུ་རྒྱུ་ཀློག་ཚུལ། །ཞེས་གསུངས་པའི་ཡི་གེའི་ངོ་བོ་ནི། སྤང་ལོ་ཆེན་པོས། བརྗོད་འདོད་དབང་གིས་རླུང་གིས་རླུང་གཡོས་ཤིང་། །དེ་ཡིས་གནས་དང་བྱེད་པ་དང་། །རྩོལ་པ་བསྐྱེད་དེ་དབུགས་འབྱུང་དང་། །ལྷན་ཅིག་ཡི་གེའི་གདངས་རྣམས་སྐྱེ། །ཞེས། གནས་དང་བྱེད་པ་དང་རྩོལ་བ་རྣམས་ལས་ཡི་གེ་འབྱུང་བའི་གཟུགས་ཀྱི་དབྱེ་བ་ནི། ཚངས་པའི་ཡི་གེ་ལཱཉྩ་ན། དེ་དང་ཆ་མཐུན་པ་དྷ་རི། དེའི་མགོ་གྱེན་དུ་བཟེད་པ་ན་ག་ར། དེའི་མགོ་ཐུར་དུ་བཀུག་པ་ཝ་རྟུ་ལ། འདྲ་མིན་ཤས་ཆེ་བ་ཀསྨཱི་ར། གཞན་ཡང་། གཽ་ཌ། ག་འུ་ར། རྒྱ་མཚོ་མཐའི་ཡི་གེ་སིན་དྷུ། བྲུ་ཤ །རྒྱ་དང་བོད་ལ་སོགས་པའི་ཡི་གེའི་གཟུགས་རྣམས་ཡོད་དོ། །མདོ་རྒྱ་ཆེ་རོལ་པར་ཡང་ཚངས་པའི་ཡི་གེ་དང་ཞེས་སོགས་ཡིག་རིགས་དྲུག་ཅུ་རྩ་བཞི་ཙམ་བཤད་དེ། ཚངས་པའི་ཡི་གེ་དང་། ཁ་རོ་ཥྚའི་ཡི་གེ་དང་། པདྨའི་སྙིང་པོའི་ཡི་གེ་དང་། ཨངྒཱའི་ཡི་གེ་དང་། བངྒིའི་ཡི་གེ་དང་། མ་ག་དྷའི་ཡི་གེ་དང་། བཀྲ་ཤིས་པའི་ཡི་གེ་དང་། སོར་གདུམ་གྱི་ཡི་གེ་དང་། ས་ཀཱ་ནཱིའི་ཡི་གེ་དང་། སཱ་དྷ་ནཱིའི་ཡི་གེ་དང་། ཨཱ་ཧུ་བའི་ཡི་གེ་དང་། རྩུབ་མོའི་ཡི་གེ་དང་། འགྲོ་ལྡིང་བའི་ཡི་གེ་དང་། མོན་ཡུལ་གྱི་ཡི་གེ་དང་། ལྷོ་ཕྱོགས་པའི་ཡི་གེ་དང་། དྲག་པོའི་ཡི་གེ་དང་། གྲངས་ཀྱི་ཡི་གེ་དང་། སྤྱིའུ་ཚུགས་ཀྱི་ཡི་གེ་དང་། རྗེས་སུ་མཐུན་པའི་ཡི་གེ་དང་། བྷ་ར་དའི་ཡི་གེ་དང་། ཁྱཱ་སྱའི་ཡི་གེ་དང་། རྒྱ་ནག་གི་ཡི་གེ་དང་། ཧཱུ་ནའི་ཡི་གེ་དང་། དབུས་ཀྱི་ཡི་གེ་དང་།
རྒྱལ་གྱི་ཡི་གེ་དང་། ལྷའི་ཡི་གེ་དང་། ཀླུའི་ཡི་གེ་དང་། གནོད་སྦྱིན་གྱི་ཡི་གེ་དང་། དྲི་ཟའི་ཡི་གེ་དང་། མི་འམ་ཅིའི་ཡི་གེ་དང་། ལྟོ་འཕྱེ་ཆེན་པོའི་ཡི་གེ་དང་། ལྷ་མ་མིན་གྱི་ཡི་གེ་དང་། ནམ་མཁའ་ལྡིང་གི་ཡི་གེ་དང་། རི་དྭགས་འཁོར་ལོའི་ཡི་གེ་དང་། བྱ་རོག་སྐད་ཀྱི་ཡི་གེ་དང་། སའི་ལྷའི་ཡི་གེ་དང་། བར་སྣང་གི་ལྷའི་ཡི་གེ་དང་། བྱང་སྒྲ་མི་རྙན་གྱི་ཡི་གེ་དང་། ནུབ་བ་གླང་སྤྱོད་ཀྱི་ཡི་གེ་དང་། ཤར་ལུས་འཕགས་པོའི་ཡི་གེ་དང་། འདེགས་པའི་ཡི་གེ་དང་། བཞག་པའི་ཡི་གེ་དང་། རབ་ཏུ་བཞག་པའི་ཡི་གེ་དང་། རྒྱ་མཚོའི་ཡི་གེ་དང་། རྡོ་རྗེའི་ཡི་གེ་དང་འཕྲིན་ཡིག་རབ་ཏུ་སྤྲིང་པའི་ཡི་གེ་དང་། རྣམ་པར་བཞག་པའི་ཡི་གེ་དང་། ཆུང་ངུ་མ་ཡིན་པའི་ཡི་གེ་དང་། བསྟན་བཅོས་བསྐོར་བའི་ཡི་གེ་དང་། རྩིས་བསྐོར་བའི་ཡི་གེ་དང་། འདེགས་པ་བསྐོར་བའི་ཡི་གེ་དང་། རྐང་པས་བྲིས་པའི་ཡི་གེ་དང་། ཚིག་ཕྱི་མ་གཉིས་གྲུབ་པའི་ཡི་གེ་དང་། ཇི་སྲིད་ཚིག་ཕྱི་མ་བཅུ་གྲུབ་བྱའི་ཡི་གེ་དང་། བར་མ་སྒྲུབ་པའི་ཡི་གེ་དང་། སྒྲ་ཐམས་ཅད་ཀུན་བསྡུས་པའི་ཡི་གེ་དང་། རིག་པ་དང་རྗེས་སུ་མཐུན་པའི་ཡི་གེ་དང་། རྣམ་པར་བསྲེས་པའི་ཡི་གེ་དང་། དྲང་སྲོང་དཀའ་ཐུབ་ཀྱིས་གདུངས་པའི་ཡི་གེ་དང་། གསལ་བའི་ཡི་གེ་དང་། ས་རབ་ཏུ་ལྟ་བའི་ཡི་གེ་དང་། སྨན་ཐམས་ཅད་ཀྱི་རྒྱུ་མཐུན་པའི་ཡི་གེ་དང་། སྙིང་པོ་ཐམས་ཅད་ཀུན་བསྡུས་པའི་ཡི་གེ་རྣམས་ཏེ། ཡི་གེ་དྲུག་ཅུ་རྩ་བཞིའོ། །ཐུགས་ཀྱི་རྟེན་ནི། ཐུབ་དབང་སྐུ་བལྟམས་ཚེ་སེར་སྐྱར་བཀྲ་ཤིས་སྒོ་མང་གི་མཆོད་རྟེན། མ་ག་དྷར་སངས་རྒྱས་ཚེ་བྱང་ཆུབ་མཆོད་རྟེན། ཝ་ར་ནཱ་སིར་ཆོས་བསྟན་ཚེ་བདུད་འདུལ་མཆོད་རྟེན་ནམ་ཆོས་འཁོར་མཆོད་རྟེན། སུམ་ཅུ་རྩ་གསུམ་དུ་ཡུམ་བདེན་པ་ལ་བཀོད་ཚེ་ལྷ་བབས་མཆོད་(༨བ)
རྟེན། མཉན་ཡོད་དུ་མུ་སྟེགས་བཏུལ་ཚེ་པདྨ་སྤུངས་པའི་ཆོ་འཕྲུལ་མཆོད་རྟེན། རྒྱལ་པོའི་ཁབ་ཏུ་དགེ་འདུན་གྱི་དབེན་བཟླུམས་པའི་ཚེ་དབྱེན་བཟླུམས་མཆོད་རྟེན། ཡངས་པ་ཅན་དུ་སྐུ་ཚེ་བྱིན་གྱིས་བརླབས་པའི་ཚེ་རྣམ་རྒྱལ་མཆོད་རྟེན། རྩ་མཆོག་གྲོང་དུ་མྱ་ངན་ལས་འདས་ཚེ་མྱང་འདས་མཆོད་རྟེན་ནོ། །མདོར་ན་བློས་སླངས་དང་། དཀྱིལ་འཁོར་དྲི་ཐིག །དུས་འཁོར། མཁའ་འགྲོ་མ་རྡོ་རྗེ་གུར། ཡོ་ག །འཕྲེང་བ་སོགས་ནས་བཤད་པའི་ས་གར། མཆོད་གར། ཞི་ཁྲོ་སྒྱུ་འཁྲུལ། སྒྲུབ་པ་བཀའ་བརྒྱད། དཔལ་ཆེན་ཕུར་པ་སོགས་རྩ་འཆམས། འབྲུབ་འཆམས་ཇི་སྙེད་པ་སྣང་ངོ་། །ལུས་བཟོ་ཕལ་པ་ནི། རྒྱ་མཚོ་ཆེན་པོར་བགྲོད་པའི་གྲུ་གཟིངས་ཆེན་པོ། རྒྱ་གར་བལ་པོ་རྒྱ་ནག་སོགས་ཀྱི་ཆུ་ལ་བགྲོད་པའི་གྲུ་ཆུང་། ཁང་ཁྱིམ། ཁང་བརྩེགས། ཁང་མིག་ལྔ་བརྒྱ་པ། བཟའ་བཏུང་གི་གཡོས། གོས་རྒྱན་གྱི་ཁྱད་པར། གཞན་ཡང་བསྡུས་རྒྱུད་ལས། གཡུལ་དུ་ཕམ་པའི་དགྲ་བོ་དག་ནི་གལ་ཏེ་འཕྲལ་ལ་རྫོང་གི་ནང་དུ་ཞུགས་པར་གྱུར་པ་ན། ཕྱི་རོལ་ཏུ་ནི་འཁྲུལ་འཁོར་བྱ་སྟེ་རྒྱུན་ཆད་མེད་པར་རྡོ་དང་མེ་མདའ་རབ་ཏུ་བབ་པ་དང་། རལ་གྲི་ལ་སོགས་གཅོད་པའི་འཁྲུལ་འཁོར་དག་དང་ས་གཞིའི་གནས་ལ་གུར་དང་གོ་ནི་དབྱེ་བ་ཡིས། དེ་ཡི་རྫོང་ནི་ཕྱེ་མར་བྱས་ཏེ་ཉིན་ཞག་ཅུང་ཟད་དག་གིས་གདུག་པ་དེ་ནི་བསྒྲུབ་པར་བྱ། ཞེས། ངོ་མཚར་བའི་སྦྱོར་བ་ཐང་རྫོང་གཞིག་པ་རྡོའི་འཁྲུལ་འཁོར་ཏེ་མགྱོགས་ཆུ་རྫོང་འཇོམས་པ་གྲུའི་འཁྲུལ་འཁོར། རི་རྫོང་འཇོམས་པ་མེའི་འཁྲུལ་འཁོར། རལ་གྲི་འཁོར་བ་གྲི་གུག་གི་འཁྲུལ་འཁོར། རྩེ་མོ་འབྱེད་པ་རླུང་གི་འཁྲུལ་འཁོར། རྩིག་པ་འཇིག་པ་གུར་གྱི་འཁྲུལ་འཁོར་ཏེ་གོ་ཆ་འཇིགས་པ་ལྕགས་མདའི་འཁྲུལ་འཁོར་རྣམས་དང་། རང་(༩ན)
ཕྱོགས་སྲུང་བ་རལ་གྲིའི་འཁྲུལ་འཁོར། རྒྱལ་རིགས་འཐབ་པ་ཤིང་རྟའི་ཚད། ལྟད་མོ་ལ་འགྲོ་བའི་དོན་དུ་ཁང་བཟང་གི་མཚན་ཉིད། དགའ་སྟོན་གྱི་དོན་དུ་ཁྱོགས་ཀྱི་མཚན་ཉིད་དོ་ལྡུམ་ར་བཅུ་པའི་དོན་དུ་ཆུ་གྱེན་དུ་འདྲེན་པའི་འཁྲུལ་འཁོར་སོགས་དུས་འཁོར་ལས་གསུངས་པ་དང་། ངག་བཟོའི་གཙོ་བོ་ནི། ལོ་ཆེན་རིན་ཆེན་བཟང་པོ་སོགས་ནས་དར་བའི་ཡོ་ག་དང་། གཞན་ཡང་སྔགས་གསར་མའི་ཡི་དམ་ཆོས་སྐྱོངས་ལ་བརྟེན་པའི་གདངས་དབྱངས་དང་། སྔགས་རྙིང་མའི་གྱེར་དབྱངས་ལ། འགྱུར་ཁུག་འདེགས་འཇོག་སྦོམ་ཕྲ་སྟེ་དྲུག་ལྡན་སྙན་བརྗིད་རྔམས་པ་སོགས་མ་འདྲེས་པའི་རིགས་དང་། དཀོན་མཆོག་མཆོད་པའི་ཆེད་དུ་རོལ་མོའི་སྐད་ཀྱི་གདངས་སྣ་ཚོགས་སུ་ཁྲོལ་བ། ངག་བཟོ་ཕལ་པ་ནི། དུས་ཀྱི་དགའ་སྟོན་གྱི་ཚེ་སྐྱེ་བོ་མང་པོའི་དབུས་སུ་གླུ་ལེན་པ། པི་ཝང་སོགས་རྡུང་བ་ཇི་སྙེད་པ། ཡིད་བཟོའི་གཙོ་བོ་ནི། ལུས་ངག་གི་བཟོར་མི་གཏོགས་པའི་གཙུག་ལག་ལ་ཐོས་བསམ་སྒོམ་པ་ཐམས་ཅད་དང་། ཕལ་པ་ནི། ས་གཞི་དང་། རིན་པོ་ཆེ་དང་། ལྗོན་ཤིང་དང་། གོས་དང་། གླང་པོ་ཆེ་དང་། རྟ་དང་། སྐྱེས་པ་དང་། བུད་མེད་བརྟག་པ་སོགས་ཏེ། སེམས་ལྡན་དང་སེམས་མེད་ཀྱི་དཔྱད་དོན་གྱི་རིམ་པ་རྣམས་ཡིན་པས། དོན་དྲིལ་ན། དམན་པའི་ལས་རྫ་བཟོ་ནས་བཟུང་སྟེ། སྙིང་པོའི་མཆོག་ཟབ་མོ་རྡོ་རྗེ་རྣལ་འབྱོར་ལ་བརྟེན་ནས་ཚེ་གཅིག་ལ་འཚང་རྒྱ་བའི་ལམ་སྒྲུབ་པའི་བར་ཐམས་ཅད་བཟོ་རིག་ཏུ་བསྡུ་ནུས་པའི་ཕྱིར་ན། དཔལ་དུས་ཀྱི་འཁོར་ལོ་ནས་གསུངས་པའི། ལྔ་བསྡུས། སྒྲ་གཅན། ལོ་འཕོ། ཟླ་འཕོ། གཟའ་འཛིན། གཟའ་ལྔ། དུས་སྦྱོར། ཞག་གསུམ་གྱི་རྣམ་པར་དབྱེ་བའི་སྐོར་སོགས་སྐར་རྩིས་དང་། དབང་ཕྱུག་ཆེན་པོས་ལྷ་མོ་དབུ་མ་ལ་གསུངས་པའི་(༩ན)
རྒྱལ་པོ་ལྟ་བུ་ལ་དབྱངས་གསལ་འཆར་ཚུལ། ཚེ་ཚད། འཆི་བ་བརྟགས་པ། བློན་པོ་ལྟ་བུ་ལ། པདྨའི་འཁོར་ལོ། བུམ་པའི་འཁོར་ལོ། རལ་གྲིའི་འཁོར་ལོ། མདའ་གཞུའི་འཁོར་ལོ་སོགས་བེམ་པོའི་རིགས་དང་། སྦྲུལ་གྱི་འཁོར་ལོ། སྡེ་རྒྱད་ཀྱི་འཁོར་ལོ། འདབས་ཆགས་ཀྱི་འཁོར་ལོ། དགྲ་གཤེད་ཀྱི་འཁོར་ལོ། རུས་སྦལ་གྱི་འཁོར་ལོ། བྱ་ཁྱུང་གི་འཁོར་ལོ་སོགས་སྲོག་ཆགས་ལ་བརྟེན་པ། བག་རྩིས་ཁྱོ་ཤུག་རིགས་གསུམ་སོགས་རང་རིགས་ཀྱི་འཁོར་ལོ། དམག་མི་ལྟ་བུ་ལ་གླང་ཆེན་མཆེ་བའི་འཁོར་ལོ། རྐང་པ་བརྒྱད་པའི་འཁོར་ལོ། རྐང་པ་བརྒྱད་ཅུ་རྩ་གཅིག་པའི་འཁོར་ལོ། རུས་སྦལ་གྱི་འཁོར་ལོ། སེང་གེ་ལྡན་གྱི་འཁོར་ལོ། གདུགས་ཀྱི་འཁོར་ལོ། མཚོན་ཆ་ལྟ་བུ་ལ། སྒྲ་ཅན་རྩ་བའི་འཁོར་ལོ། དཀར་ཕྱོགས་དང་ནག་ཕྱོགས་ཀྱི་ཚེས་ལ་འཆར་བའི་སྒྲ་ཅན་གྱི་འཁོར་ལོ། ཡུད་ཙམ་ར་ཧུའི་འཁོར་ལོ་གཉིས། ཟླ་ཕྱེད་ར་ཧུའི་འཁོར་ལོ། ཐུན་ཆེད་ར་ཧུའི་འཁོར་ལོ། མདུང་རྩེ་བཅུ་གཉིས་ཀྱི་ར་ཧུའི་འཁོར་ལོ། བི་ཥྚིའི་འཁོར་ལོ། ཐུན་འཚམས་བརྒྱད་ཀྱི་ར་ཧུའི་འཁོར་ལོ་སྟེ་ར་ཧུའི་འཁོར་ལོ་བཅུ། ཕྱོགས་མཚམས་གཟའ་བརྒྱད་ཀྱི་འཁོར་ལོ། རྣལ་འབྱོར་མ་བརྒྱད་ཀྱི་འཁོར་ལོ། དུས་སྦྱོར་ཕྱེད་པའི་འཁོར་ལོ། ཐུན་ཕྱེད་ཀྱི་འཁོར་ལོ། བདུད་རྩིའི་ཐུན་མཚམས་ཀྱི་འཁོར་ལོ། རིགས་ལྡན་འཆར་ཚུལ་གྱི་འཁོར་ལོ། བཙུན་མོ་ལྟ་བུ་ལ། ཏཏྐ་ལའི་དུས་སྦྱོར་ལ་འཁོར་ལོ་བརྒྱད་ཅུ་ལྷག་བཅས་འཁོར་གཡོག་ལྟ་བུ་ལ་མིང་སྐར་སྐྱེས་སྐར་འཚོལ་ཐབས། དཀར་པོའི་འཁོར་ལོ་མཛེས་མ་དབང་སྡུད། དམར་པོའི་འཁོར་ལོ་རི་དྭགས་གཤོར་བ། ནག་པོའི་འཁོར་ལོ་དགྲ་བགེགས་སྒྲོལ་བ་སོགས་དཔལ་གཡུལ་ལས་རྣམ་པར་(༡༠ན)
རྒྱལ་བའི་རྩིས་དང་། འཕགས་པ་འཇམ་དཔལ་གྱིས་ཀོང་རྩེ་འཕྲུལ་གྱི་རྒྱལ་པོ་ལ་གནང་བའི་ལོ་ཟླ་ཞག་དུས་ཚོད། སྲོག་ལུས་དབང་ཐང་རླུང་རྟ་སྤར་རྨེ་སོགས་རྩིས་གཞིར་བཟུང་ནས། གསོན་རྩིས་ལ་མི་འགྱུར་རྩ་བའི་རྡེའུ་དྲུག །གཅོད་དྲལ་གྱི་རྡེའུ་ཉི་ཤུ་རྩ་གཅིག །རྡེའུ་ཞེ་བདུན་མ་བཅུ་བཞི་མ། བརྒྱད་མ། ནད་རྩིས་ལ། ཐང་ཤིང་གི་རྩིས། ཚེ་རྩིས་ལ། རྒྱ་མ་ཕ། ངག་གི་རྩིས། གཟའ་བཞི་མ་ཀླུང་གི་རྩིས། ལྷ་དཔལ་ཆེ་གསུམ་གྱི་རྩིས། གིང་གོང་གཉེར་སྦྱོར་གྱི་རྩིས། གཤིན་རྩིས་ལ། ཟང་འཁྱམ་རྣམ་གྲངས་མི་འདྲ་བ་བཅུ་གསུམ་སོགས་རྒྱ་ནག་གཙུག་ལག་གི་རྩིས་རྣམས་ཀྱང་གོང་དུ་བཤད་པ་ལྟར་ཡིད་བཟོར་བསྡུ་ནུས་སོ། །འོན་ཀྱང་དེང་སང་རིག་པའི་གནས་ལྔར་ཡོངས་སུ་གྲགས་པ་ལྟར་ན། བཟོ་གསོ་སྒྲ་ཚད་ནང་རིག་ལྔ་པོ་རིག་གནས་ཆེ་བ་ལྔ་ཡིན་པས་འདི་ལྔ་ཤེས་པ་ལ་རྒྱ་གར་འཕགས་པའི་ཡུལ་དུ་མ་ཧཱ་པཎྜི་ཏ་ཞེས་ལྔ་རིག་པ་ཆེན་པོ་འམ་མཁས་པ་ཆེན་པོར་གྲགས་ལ། རང་ཅག་བོད་ཡུལ་འདིར་མཁས་བླུན་དབྱེ་བ་མེད་པས་རིག་གནས་ཕྱོགས་རེ་ཙམ་ཤེས་པ་ལའང་ཐམས་ཅད་མཁྱེན་པ། ཀུན་མཁྱེན། པཎྜི་ཏ། མཁས་པའི་དབང་པོ་སོགས་མིང་སྙན་པོར་འབོད་པ་ནི། བྱ་བ་འགའ་ལ་མཁས་པ་ཡིས། །གཞན་དག་ཤེས་པའི་ངེས་པ་མེད། །ཆུ་ལས་འོ་མ་འབྱེད་ཤེས་པའི། །ངང་པས་གཟུགས་བརྙན་ཟས་སུ་སྒོམ། །ཞེས་པའི་དོན་ལྟར་རོ། །ལྔ་པོ་དེའི་བྱེ་བྲག་པ་སྒྲ་རིག་པ་རྗོད་བྱེད་ཀུན་གྱི་གཞིར་བཟུང་ནས། དེ་ཉིད་ལས་འཕྲོས་པའི་རིག་གནས་ཆུང་བ་ལྔ་ནི། སྙན་ངག་ཤེས་ན་ཚིག་རྒྱན་ལ་མི་རྨོངས། སྡེབ་སྦྱོར་ཤེས་ན་ཚིགས་བཅད་ལ་མི་རྨོངས། མངོན་བརྗོད་ཤེས་ན་མིང་ལ་མི་རྨོངས། ཟློས་གར་ཤེས་ན་སྐད་རིགས་ལ་མི་རྨོངས། སྐར་རྩིས་ཤེས་ན་བླང་དོར་(༡༠བ)
ལ་མི་རྨོངས་པས་དོན་དེ་ལ་དགོངས་ནས། འཇིག་རྟེན་གྱི་མིག་གཅིག་པུ་ལོ་ཆེན་ཐམས་ཅད་མཁྱེན་པའི་ཞལ་ནས། སྐར་རྩིས་སྙན་ངག་སྡེབ་སྦྱོར་དང་། །མངོན་རྗོད་ཟློས་གར་འདི་ལྔ་ལ། །རིག་གནས་ལྔ་ཞེས་འཕགས་ཡུལ་ན། །གྲགས་པའི་བ་དན་རླུང་ལྟར་སྒྲོག །ཅེས་སོ། །འཇམ་དབྱངས་ཁ་ཆེ། སྣ་ཐང་པཎ་ཆེན་སཾགྷ་ཤྲཱི། རིན་སྤུངས་ངག་དབང་འཇིགས་གྲགས་སོགས་ཀྱིས་སྒྲ་ཐེ་བའི་རིག་གནས་ཆུང་བ་ལྔར་མཛད་པ། རིག་གནས་བཅུ་ཕྲག་ཏུ་བཤད་པར་དགུ་ལས་མི་འབྱུང་བའི་སྐྱོན་འཇུག་གམ་སྙམ་མོད། །དེ་དག་ནི་གྲགས་པ་དོན་ལྡན་གྱིམ་ཁས་པར་བདའ་བས། བབ་ཅོལ་མིན་པའིཁུངས་ཤིག་ཡོད་ངེས་ཏེ། ཤེས་རབ་ལྡན་པས་ཉེས་པ་དག །སེལ་བར་ནུས་ཀྱི་བླུན་པོས་མིན། །ནམ་མཁའ་ལྡིང་གིས་དུག་ཅན་སྦྲུལ། །གསད་པར་ནུས་ཀྱི་ཁྭ་ཏས་མིན། །ཞེས་པ་ལྟར་རོ། །དེ་ལྟ་བུའི་རིག་གནས་ལྔ་ལ་རིག་པའི་གནས་ཆུང་བ་ལྔའི་ཐ་སྙད་བྱེད་པས། དེ་ལྔ་ཤེས་པ་ལ་ཨལྤ་པཎྜི་ཏ་ཞེས་པཎ་ཆུང་གི་མིང་ངོ་། །མཁས་པ་ཟུར་མཁར་བློ་གྲོས་རྒྱལ་པོས་ཀྱང་། རིག་གནས་བཅུ་ཕྲག་གཅིག་ལ་སྤུངས་པའི་མཐུས། །མཁས་པའི་བྱ་བ་འཆད་རྩོད་རྩོམ་པ་གསུམ། །མཁས་པ་མང་པོ་ཚོགས་པའི་མདུན་སར་ཡང་། །མཁས་རྣམས་ཁྲེལ་བའི་གཏམ་ནི་སྨྲ་མི་མྱོང་། །ཞེས་གསུང་པ་རང་ཉིད་མཁས་པའི་གོ་འཕང་ཐོབ་པ་ལ་བྲོད་ཁ་རྙེད་པའི་གཟེངས་བསྟོད་པར་སྣང་ཡང་། དུས་དེར་སྐྱོགས་སྟོན་ལོ་ཙཱ་བ་རིན་ཆེན་བཀྲ་ཤིས་བློ་གྲོས་ངོ་མཚར་བྱེ་བའི་གཏེར་མཛོད། དཔལ་ཁང་ལོ་ཙཱ་བ་དབྱངས་ཅན་བསྙེམས་པའི་སྡེ། ལྷ་མདོངས་ལོ་ཙཱ་བ་བཤེས་གཉེན་རྣམ་རྒྱལ། འབྲུག་པ་ལོ་ཙཱ་བ་ངག་དབང་གྲགས་པ་སོགས་མཁས་པ་མང་པོའི་བསྒང་(༡༡ན)
མཇུག་སྒང་རྒན་འོད་ཟེར་རྒྱལ་མཚན། གྲངས་ཆེན་རབ་འབྱམས་པ་འཇམ་དཔལ་རྡོ་རྗེ། སྐད་གཉིས་སྨྲ་བ་སངས་རྒྱས་དཔལ་བཟང་། སྨོན་འགྲོ་པཎྜི་ཏ་རིག་གནས་རྒྱ་མཚོ་པ་ཚེ་དབང་དོན་གྲུབ་སོགས་མཁས་པ་མང་པོ་ཆུ་གཉེར་ལྟར་གཅིག་རྗེས་གཅོག་ནོན་དུ་འབྱུང་བར་མངོན་དུ་ཕྱོགས་པའི་དུས་སྐབས་བཟང་པོར་སོང་བས་མཁས་པ་མཁས་པའི་དྲུང་ན་མཛེས་པར་སྣང་། དེང་སང་ནི་ཟུར་མཁར་བ་རང་བཞུགས་ཀྱང་། བླུན་པོའི་དྲུང་ན་མཁས་པ་བས། །སྤྲེའུ་འཛིན་པ་ཁྱད་པར་འཕགས། །སྤྲེ་འཛིན་ཟས་དང་ནོར་གྱིས་མཆོད། །མཁས་པ་ལག་པ་སྟོང་པར་འགྲོ། །ཞེས་པའི་དོན་ཐོག་ཏུ་བབས་པའི་དུས་ཀྱི་དབང་ལས་ཏེ། སྔོན་བྱོན་མཁས་པའི་རྗེས་སུ་འཇུག་པའང་ཉིན་སྐར་ལྟ་བུར་གྱུར་ཅིང་། རིག་གནས་བཅུ་ཕྲག་ཕྱོགས་ཙམ་ཤེས་པ་བྱུང་སྲིད་ནའང་ཆོ་ག་ཉམས་པར་བྱེད་པ་རྣམས། ཆོ་ག་ཚང་བར་བྱེད་ལ་བརྙས། །ཙཱུ་ཏའི་ཡུལ་དུ་ཕྱིན་པ་ན། །རྐང་གཉིས་པ་ལ་མིར་མི་རྩི། །ཞེས་པའི་དཔེ་དང་མཚུངས་པར་མངོན་ནོ། །སྤྱིར་རིག་གནས་ཀྱི་དབྱེ་བ་ལ་མདོ་རྒྱུད་དང་མཁས་པས་བཤད་ཚུལ་མང་བས་མཐའ་གཅིག་ཏུ་གྲངས་འདི་ཙམ་མོ་ཞེས་བཟུང་མི་ནུས་ཏེ། འདུལ་བ་ལུང་དུ་བྲམ་ཟེ་རྣམས་ཀྱི་ལས། གསང་སྔགས་ཀྱི་རྒྱུད་དང་། ཆོ་ག་ཞིབ་མོ་དང་། གཏན་ཚིགས་རིགས་པ་དང་། རིག་བྱེད་དང་། བརྡ་སྤྲོད་པ་དང་། སྒྲ་ངེས་པར་སྦྱོར་བ་དང་། ཤེས་གསལ་དང་། ངེས་པའི་ཚིག་དང་། སྡེབ་སྦྱོར་བསྡུས་པ་དང་། སྐར་མའི་རིག་པ་དང་། རྟོག་བྱེད་ཀྱི་རིག་པ་དང་། ཆུར་ལྷུང་གི་རིག་པ་དང་། ཆེར་སྤྱོད་ཀྱི་རིག་པ་དང་། འཇིག་རྟེན་རྒྱང་འཕེན་པའི་རིག་པ་དང་། བྱེ་བྲག་པའི་རིག་པ་དང་། རྒྱུད་དྲུག་ཅུ་པ་དང་། ཁྱུར་མིད་ཀྱི་རིག་པ་དང་། གནས་འདུག་གི་རིག་པ་སྟེ་བཅོ་(༡༡བ)
བརྒྱད་གསུངས་པ་ལྟ་བུས་མཚོན་ནུས་སོ། །གཞན་ཡང་སྙན་ངག་མེ་ལོང་དུ། འདི་ལྟར་རྒྱུ་རྩལ་དྲུག་ཅུ་བཞིར། །ཞེས་པ་ལྟར། བཟོ་ལ་སོགས་པར་གཏོགས་པ་སུམ་ཅུ། རོལ་མོའི་བྲེ་བྲག་བཅོ་བརྒྱད། གླུ་དབྱངས་ཀྱི་ངེས་པ་བདུན། གར་གྱི་ཆ་བྱད་དགུའོ། །དང་པོ་བཟོ་ལ་སོགས་པར་གཏོགས་པ་སུམ་ཅུ་ནི། ཡི་གེ །ལག་རྩིས། གྲངས། རྩིས་ཆེན། ཐོད་ཚུགས། གོམ་སྟབས། ལྕགས་ཀྱུས་སྒྱུར་ཐབས། རལ་གྲིའི་ཐབས། ཞགས་པ་གདབ་པ། མདའ་བོ་ཆེ་འཕེན་པ། མདུན་དུ་བསྣུར་བ། ཕྱིར་བསྣུར་བ། གཅད་པ། དྲལ་བ། དབུག་པ། རྒྱང་ནས་འཕོག་པ། སྒྲ་དྲག་པར་འཕོག་པ། གནད་དུ་འཕོག་པ། མི་ཚོར་བར་འཕོག་པ། ཚབས་ཆེ་བར་འཕོག་པ། མཆོངས་པ། གྱད་ཀྱི་འཛིང་སྟངས། བང་རྐྱལ། བརྒལ་བ། གླང་པོ་ཆེའི་གཉར་ཞོན་པ། རྟ་ལ་ཞོན་པ། ཤིང་རྟའི་བཟོ་ཐབས། མདའ་གཞུའི་བཟོ་ཐབས། འགྱེད་སྟོབས་དང་སུམ་ཅུའོ། །རོལ་མོའི་བྱེ་བྲག་བཅོ་བརྒྱད་ནི། །བྲོ། རྔ་བོ་ཆེ། རྫ་རྔ། རྔ་ཕྲན། རྫ་རྔ་ཆེན་པོ། འཁར་རྔ། པི་ཝང་རྒྱུད་གཅིག་པ། རྫ་རྔ་ཁ་གཅིག་པ། ལྕགས་ཀྱི་སིལ་ཁྲོལ། འཁར་བའི་སིལ་འཁྲོལ། པི་ཝང་རྒྱུད་གསུམ་པ། རྔ་མུ་ཀུནྡ། སིལ་སྙན་གླུ་དབྱངས་དང་བསྟུན་པ། ཕེག་རྡོབ་རོལ་མོའི་སྒྲ་པི་ཝང་གླིང་བུ་དང་བཅོ་བརྒྱད་དོ། །གླུ་དབྱངས་ཀྱི་ངེས་པ་མདུན་ནི། བར་མ་པ། དྲང་སྲོང་བ། ས་འཛིན་པ། དྲུག་ལྡན། ལྔ་པ། བློ་གསལ། འཁོར་ཉན་དང་བདུན་ནོ། །གར་གྱི་ཆ་བྱད་དགུ་ནི། སྒེག་པ། དཔའ་བ། མི་སྡུག་པ། དྲག་ཤུལ། བཞད་གད། འཇིགས་རུང་བ། སྙིང་རྗེ། དམ་པ། ཞི་བ་དང་དགུའོ། །གཞན་ཡང་། ཐེབ་ཀྱི་ཤ་ནོན་པ། རྐྱལ་གྱིས་ཆུ་ཆེན་ཆོད་པ། ཡང་རྩལ་བྱ་ལྟ་བུ་སྟེ་ལུས་རྩལ་གསུམ། ལོ་རྒྱུས་ཀྱིས་དགེ་འཐོན་པ། གཏམ་གྱིས་བཞད་གད་འཐོན་པ། གཤགས་ཀྱིས་ཕ་རོལ་གནོན་པ་སྟེ་ངག་གི་རྩལ་གསུམ། མཛངས་ལ་བློ་འགྱུ་བ། དཔའ་ལ་བསྲན་ཚུགས་པ། ཁ་གསལ་ཞིང་(༡༢ན)
གཏིང་མི་རྟོགས་པ་སྟེ་ཡིད་ཀྱི་རྩལ་གསུམ་བཅས་པའི་ཕོ་རྩལ་སྣ་དགུ་དང་། གཏམ་ཡིག་རྩིས་གསུམ། མདའ་རྡོ་མཆོངས་གསུམ། བང་རྐྱལ་སྦེ་གསུམ་སྟེ་ཕོ་རྩེད་སྣ་དགུ་སོགས་རྒྱུ་རྩལ་དང་རིག་གནས་ཀྱི་དབྱེ་བ་ནི་བགྲང་ཡས་པའི་ཕྱིར་མཐའ་དག་སྤྲོ་བར་ག་ལ་ནུས་སོ། །
དྲི་བ་གཉིས་པ། ཟླ་བཤོལ་ཇི་ལྟར་འདོན་ལུགས་སོགས་ཀྱི་དྲིས་ལན།
དྲི་བ་གཉིས་པ།ཟླ་བཤོལ་ཇི་ལྟར་འདོན་ལུགས་སོགས་ཀྱི་དྲིས་ལན།དྲི་བ་གཉིས་པ་ནི། གཉིས་པ་དེང་སང་ཟླ་བཤོལ་འདོན་པ་ལ། །བཞེད་ལུགས་མཚན་མོའི་སྐར་ཚོགས་ལྟར་མང་བའི། །ལ་ལ་དབུགས་ཐོབ་བསྒང་ཚད་གཙོ་ཆེ་ཟེར། །ལ་ལ་ཟླ་དགའ་འབར་བ་ཡིན་ནོ་སྐད། །རྒྱ་ནག་རྩིས་དང་གསོ་དཔྱད་གཞུང་ལུགས་སོགས། །བགྲང་ཡས་དཔག་མེད་བཞེད་ལུགས་འདུག་མོད་ཀྱང་། །དུས་འཁོར་རྒྱུད་ཀྱི་རི་མོའི་ངེས་པ་འདི། །གཙོ་ཆེར་གོ་བས་རེ་ཞིག་བརྟག་པར་བྱ། །དེ་ཡང་ཁྱིམ་ཟླ་འདི་ཡིས་སྟོན་པའི་ཕྱིར། །ཁྱིམ་ཟླ་གནས་གཉིས་བཞག་པའི་འོག་མ་ནི། །ལྷག་པ་འཚོལ་བའི་བཞི་རུ་གསུངས་འདུག་པས། །དབུགས་འདི་ཞག་ཏུ་ལོངས་ཚུལ་ཇི་ལྟར་ཡིན། །དེ་བསགས་ཟླ་བ་ཕྱེད་བཅས་སོ་གཉིས་ནས། །ཟླ་བཤོལ་གཉིས་སུ་ལོངས་པར་ཁས་ལེན་ནམ། །ཟླ་རོས་བགོས་པའི་ལྷག་མ་དེ་ཡིས་ཀྱང་། །གཉིས་སོགས་བྱུང་ན་ཕྱེད་ཟླར་གསུངས་འདུག་པ། །སྔ་མའི་ཕྱེད་དམ་རྗེས་མའི་ཕྱེད་གང་ཡིན། །དེ་ལྟར་དབུགས་སོགས་སྔ་མ་བསགས་པ་ཡིས། །ཕྱི་མ་ཕྱི་མའི་ཟླ་བཤོལ་འབྱུང་འགྱུར་ན། །བཅུ་གཉིས་ལོན་ཚེ་ལོ་བཤོལ་འབྱུང་ངམ་ཅི། །དེ་ལྟར་ཡིན་ན་ཟླ་བཤོལ་འདི་ཉིད་ཀྱང་། །འདོན་པར་རིགས་མི་འགྱུར་ཏེ་དབུགས་སོགས་ཀྱི། །བཤོལ་བསགས་ཞག་ཏུ་ལོངས་ཚེ་དོར་ཟིན་པས། །དེ་བསགས་ཟླ་བཤོལ་འབྱུང་དོན་མེད་པར་འདོད། །འདི་དོན་རྒྱས་པ་ལུང་རིགས་འཐད་ངོས་ནས། །ཐེ་ཚོམ་མེད་པར་མྱུར་དུ་སྩལ་ཏུ་གསོལ། ཁོ་བོ་བླུན་རྨོངས་གནས་སུ་གྱུར་པས་ན། །ལུང་ཡང་བསྡུས་རྒྱུད་རྩ་(༡༢བ)
རྒྱུད་ཁོ་ན་འདོད། །ཅེས་པ་སྤྱིར་ཟླ་བཤོལ་འདི་མདོ་རྒྱུད་ཐ་སྙད་ཀྱི་གཙུག་ལག་མང་པོ་ནས་གསུངས་ལ། དེའང་ཕྲ་མོ་ནས་བརྩིས་ཏེ་ལོ་ཟླ་འཇོག་དགོས་པས། དམ་པའི་ཆོས་འདུལ་བའི་ལུགས་ལ། མཛོད་ལས། སྐད་ཅིག་མ་བརྒྱ་ཉི་ཤུ་ལ། །དེ་ཡི་སྐད་ཅིག་དེ་དག་ཀྱང་། །དྲུག་ཅུ་ལ་ནི་ཐང་གཅིག་གོ །ཡུད་ཙམ་ཉིན་ཞག་ཟླ་གསུམ་ནི། །གོང་ནས་གོང་དུ་སུམ་ཅུར་འགྱུར། །ཞག་མི་ཐུབ་དང་བཅས་པ་ཡི། །ཟླ་བ་བཅུ་གཉིས་ལ་ལོ་གཅིག །ཅེས། སྐྱེས་བུ་དར་བབ་ཀྱི་སེ་གོལ་གཅིག་པ་ལ་དྲུག་ཅུ་རྩ་བཞིར་ཕྱེ་བའི་གཅིག་ལ་དུས་མཐའི་སྐད་ཅིག་མ། དེ་བརྒྱ་ཉི་ཤུ་ལ་དེའི་སྐད་ཅིག་མ། དེ་འདྲ་དྲུག་ཅུ་ལ་ཐང་གཅིག །དེ་སུམ་ཅུ་ལ་ཡུད་ཙམ། དེ་སུམ་ཅུ་ལ་ཉིན་ཞག །དེ་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བཤད་ཅིང་། འཇིག་རྟེན་ལ་ལོ་རེ་ལ་སྟོན་ཐོག་རེ་ལས་མི་འོང་བས། ལོ་ལེགས་ཉེས་ཞེས་རྗོད་པར་བྱེད་ལ། ལོའི་སྐད་དོད་ཝ་ཎ་ཞེས་པ་ངེས་ཚིག་གིས་བཤད་ན། ཡོངས་བགྲང་། བགྲང་གཞི། རང་སྐྱོབ། འདོར་བྱེད་དུ་གྲགས་པས་འཆི་མེད་མཛོད་ལས། ཡོངས་བགྲང་བགྲང་གཞི་རང་སྐྱོབ་དང་། །འདོར་བྱེད་ཅེས་བྱ་ལོ་ཡི་མིང་། །ཞེས་སོ། །ལོ་དེ་ལ་དུས་ཚིགས་འབྱེད་ཚུལ་མང་དུ་ཡོད་པ་ལས། དགུན་དཔྱིད་དབྱར་གསུམ་བསྡུས་ནས། དུས་ཚིགས་གསུམ་དུ་བཤད་པའི་དགོས་པ་ཕྱག་དར་ཁྲོད་པའི་གོས་དེ་ཁྱིམ་པས་ཟླ་བ་བཞིར་ལོངས་སྤྱད་ནས་འཇོག་ལ། དེ་རྟོགས་པའི་ཕྱིར་གསུངས་པས། དགྲ་བཅོམ་པ་ས་ག་ལྷས་ཟླ་བཞི་ལ་སོགས་ལོངས་སྤྱད་པའི། གོས་དེ་སྡོམ་བརྩོན་གྱིས་རྟོག་ན། ཞེས་སོ། །དུས་ཚིགས་བཞིར་ཕྱེ་བ་ནི། དཔྱིད་དབྱར་སྟོན་དགུན་ཏེ་དུས་བཞིར་འཇིག་རྟེན་ན་གྲགས་པ་དང་མཐུན་པའི་ཆེད་ཡིན་ལ། འོན་ཀྱང་རྒྱ་གར་ན་དབྱར་སྟོན་དགུན་དཔྱིད་ཀྱི་ཐ་སྙད་ཡོད་ཀྱང་། རབ(༡༣ན)
འབྲིང་ཐ་ཆུང་གི་ཐ་སྙད་མེད་པས། རྒྱ་དཔེར་མགོ་ཟླ་བ་ལ་མཱརྒ་ཤིཪྵི་ཞེས་པ་ལས་ར་བའི་སྐད་དོད་མེད་དོ། །དུས་ཚིགས་ལྔར་ཕྱེ་བ་ནི། དབྱར་ཕྱི་མ་ཁས་ལེན་པ་ལ་དབྱར་ཐུང་ངུ་ཤེས་པའི་ཆེད་དེ། རྒྱ་ཆེར་འགྲེལ་ལས། དེ་ནི་ཉིན་ཞག་གཅིག་སྟེ། དབྱར་ཟླ་ཐ་ཆུང་གི་ཚེས་བཅུ་དྲུག་གོ་ཞེས་བྱ་བའི་ཐ་ཚིག་གོ །ཞེས་གསུངས་པས། དབྱར་སྔ་མ་ཁས་མ་བླངས་པ་ཞིག་ལ། ཟླ་བ་བདུན་པར་དབྱར་ཟླ་ཐ་ཆུང་དུ་བྱས་པའི་ཚེས་བཅུ་དྲུག་ལ་དབྱར་ཁས་མ་བླངས་ན་ལོ་གཅིག་བུ་དེར་དབྱར་གནས་མི་འཆགས་པས་ཤི་ཟླ་དང་འདྲ་བའི་ཐ་སྙད་ཀྱང་བཏགས་སོ། །དུས་ཚིགས་དྲུག་ཏུ་ཕྱེ་བ་ནི། ཞག་མི་ཐུབ་ཤེས་པའི་ཆེད་ཡིན་ཏེ། ཚེས་ཞག་ལས་ཡུད་ཙམ་ཕྱེད་ཕྱེད་ཀྱིས་ཉིན་ཞག་རིང་བས། ཟླ་བ་ཕྱེད་དང་གཉིས་ནས་ཞག་མི་ཐུབ་ཀྱི་གསོ་སྦྱོང་འོང་བའི་ཕྱིར། ལོ་དྲི་བ་ལས། རྒྱལ་དང་དབོ་དང་ས་ག་ཅན། །ཆུ་སྟོད་འཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་སོ། །དེ་ལ་བརྟེན་ནས་ལོ་རེ་ལ་ཟླ་བ་བཅུ་གཉིས། དེ་རེ་རེ་ཞག་སུམ་ཅུར་བྱས་པའི་ཟླ་བ་བཅུ་གཉིས་པོ་དེས་ཀྱང་མི་ཆོག་གི །ཞག་མི་ཐུབ་ཀྱི་ཞག་དྲུག་དང་བཅས་ཞག་སུམ་བརྒྱ་རེ་དྲུག་རེ་རྫོགས་པའི་དབང་དུ་བཏང་ནས། ལྷག་པར་འགྱུར་བ་དེ་བསགས་པ་ན་ཟླ་བཤོལ་འགྱུར་ཏེ། འདུལ་བ་ལུང་ལས། བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ་ན་དགེ་སློང་རྣམས་ལ། ལོ་ལྔ་ལྔ་ན་བཤོལ་དོར་ཅིག་བཀའ་སྩལ་པས་དགེ་སློང་རྣམས་ལོ་ལྔ་ན་བཤོལ་འདོར་པར་བྱེད་ཅེས་གསུངས་ལ། རྒྱལ་པོའི་ལུགས་དང་མ་མཐུན་པར་འཕྱ་བ་ན་མདོ་ལས་བློན་པོ་རྣམས་ཡུས་ཏེ། དེ་ལྟར་ན་རྒྱལ་པོའི་གཞུང་བཞིན་དུའང་གྱིས་ཤིག །ཅེས་དང་།(༡༣བ)
བསྟན་བཅོས་ལས། ཟླ་བའི་བཤོལ་འདོར་བ་ནི་རྒྱལ་པོའི་རྗེས་སུ་འབྲང་བས་ཤེས་པར་བྱའོ་ཞེས་གསུངས་སོ། །འོན་ཀྱང་འདུལ་བ་འཛིན་པ་ཕལ་ཆེར་གྱིས་བཤད་པའི་སྐོར་རྣམས་རགས་བརྩིས་སུ་འདུག་པས་དཔྱད་ནས་ཞག་གསུམ་གྱི་རྣམ་དབྱེ་མ་དགོངས་པའི་སྐྱོན་ཅུང་ཟད་ཡོད་པར་སྣང་། མཁས་པ་ལ་ལ། རྟ་བྱ་བྱི་བ་ཡོས་ལ་བཤོལ། །སྟོན་དགུན་དཔྱིད་དབྱར་འབྲིང་པོ་གཉིས། །ཞེས་རྟ་ལོ་ལ་སྟོན་དང་། བྱ་ལོ་དགུན་འབྲིང་བཤོལ་ན་ཟླ་བ་ཉི་ཤུ་རྩ་བརྒྱད་ལ་བཤོལ་འོང་བར་འདུག་པས་རྩིང་པོའི་བློ་ཅན་ཏེ། འདུལ་མངོན་དང་། དུས་འཁོར་གང་གི་རྗེས་སུ་འབྲང་ཡང་ལེགས་པར་མ་མཐོང་ངོ་། །རྒྱ་ནག་གི་ལུགས་ལ། ཀོང་རྩེའི་ཞུ་ལན་དུ། དུག་པ་ཅན་གྱི་ལོ་དག་ལ། །དུག་པ་ཅན་གྱི་ཟླ་བ་གདོན། །ཞེས། སྟག་རི་མོ་མ་ཡལ་བས་ཟླ་གཅིག་ཤོལ། སྦྲུལ་ཤུན་ལྤགས་མ་རྗེས་པས་ཟླ་བ་གཅིག་བཤོལ། སྤྲེའུ་ཤིང་ཐོག་མ་སྨིན་པས་ཟླ་གཅིག་བཤོལ། ཕག་ངུར་སྒྲ་མ་ཡལ་བས་ཟླ་གཅིག་བཤོལ་བར་བཤད་པས། དཔེར་ན་སྟག་གི་ལོ་ལ་སྟག་གི་ཟླ་བ་བཤོལ་བས་མཚོན་ནུས་སོ། །དོན་གྱི་སྙིང་པོ། དུས་འཁོར་དང་དབྱངས་འཆར་སོགས་ཀྱི་དགོངས་པ་སྐར་རྩིས་འདི་རིགས་རྩིས་ལ་མ་བལྟོས་པར་ཕྲ་མོ་ནས་དཔྱད་པའི་རྩིས་ཡིན་པས། མཁས་པ་མགུ་བ་སྐྱེ་བའི་གནས་ཁོ་ནར་སྣང་ཞིང་། དྲི་བའི་སྙིང་པོར་ཡང་འདུག་པས་ཅུང་ཟད་བརྗོད་པར་སེམས་ཀྱང་། རིག་པ་གླེགས་བམ་ནང་གནས་དང་། །མ་བསྒྲུབས་པ་ཡི་གསང་སྔགས་དང་། །བརྗེད་ངས་ཅན་གྱིས་བསླབས་པ་རྣམས། །དགོས་པའི་ཚེ་ན་སླུ་བ་མང་། །ཞེས་དང་། འཕགས་པ་ཀླུ་སྒྲུབ་ཀྱིས། མཁས་པའི་མདུན་སར་ཅི་བརྟོལ་གྱིས། །སྨྲ་བྱེད་དུད་འགྲོའི་གདོལ་ཐབས་ཡིན། །ཉིན་པར་ཨཱུ་ལུ་ཀ་ཡི་སྒྲ། (༡༤ན)
།ངོ་མཚར་རྩིས་སུ་སུ་ཞིག་བྱེད། །དུད་འགྲོའི་སྐད་གསང་ཕྱུགས་དཀྱིལ་དུ། །འབྱིན་ན་ཤིན་ཏུ་མཛེས་པ་ཡིན། །བློ་ལྡན་སྐྱེ་བོའི་ཁྲོད་ནང་དུ། །འབྱིན་ལ་ངོ་མཚར་སུ་ཞིག་འཛིན། །ཞེས་གསུངས་པ་ལྟར། ཁོ་བོ་བརྩོན་པ་ཆུང་བ་དང་སྦྱངས་པ་ཞན་ལ་ཤེས་རབ་དམན་པས། ཕྲ་མོའི་གནད་འདི་དག་ཚུལ་བཞིན་སྨྲ་བའི་སྤོབས་པ་ཐོབ་པར་མ་གྱུར་ཅིང་། ཁྱད་པར་དུས་འཁོར་མཁན་པོར་རློམ་པ་འགས་གླེགས་བམ་ཆེན་པོ་རྩོམ་པ་ན་ཞིབ་རྩིས་མ་འགྲིག་པས་འབྱོལ་ཐབས་ལྷུར་ལེན་པའི་ཚིག་འདྲི་བ་དང་། རྗེས་འཇུག་གིས་རྐང་རྗེས་ལག་སུབ་བྱེད་པ་མཐོང་ཚེ། བློ་དམན་བདག་འདྲས་དཔྱོད་ལྡན་རྣམས་དགྱེས་པ་སྐྱེད་མི་ནུས་པར་མ་ཟད་བླུན་གཏམ་ཅི་བརྟོལ་དུ་སྨྲས་པར་གྱུར་དོགས་མོད། འོན་ཀྱང་། གང་ཞིག་གསེར་གྱི་རི་ལ་གནས་བཅས་པ། །དེ་ཡི་འདབ་ཆགས་རྣམས་ཀྱང་གསེར་དུ་འགྱུར། །ཞེས་པའི་དཔེ་ལྟར། སྟག་ཚང་ལོ་ཙཱ་བ་ཤེས་རབ་རིན་ཆེན། དུས་ཞབས་པ་ཆེན་པོ་ཆོས་ཀྱི་གྲགས་པ། ཐམས་ཅད་མཁྱེན་པ་ནོར་བཟང་རྒྱ་མཚོ། མཁས་པའི་དབང་པོ་ཕུག་པ་ལྷུན་གྲུབ་རྒྱ་མཚོ། དཔལ་མགོན་འཕྲིན་ལས་ཞབས་རྣམས་ཀྱི་ལེགས་བཤད་ལ་ཅུང་ཟད་ཐོས་པ་བྱས་པའི་བྱེད་པོས། མཁས་པ་རྣམས་ཁྲེལ་བའི་གནས་སུ་མི་འགྱུར་ཙམ་ཞིག་གི་རྒྱུ་མཚན་གླེང་ན། ཞིབ་རྩིས་ཚད་ལྡན་ཞིག་བྱེད་པར། ཐམས་ཅད་མཁྱེན་པ་བུ་སྟོན་ཞབས་ཀྱི་མཁས་པ་དགའ་བྱེད་དང་། དུས་ཞབས་པ་ཆེན་པོ་ལྷུན་གྲུབ་རྒྱ་མཚོའི་པད་དཀར་ཞལ་ལུང་ལྟ་བུ་ཞིག་གི་རྒྱུ་མཚན་རྩིས་ལ་སྦྱང་དགོས་ཤིང་། བྱེ་བྲག་བཤོལ་སོགས་ལ་ཞག་གསུམ་གྱི་རྣམ་པར་དབྱེ་བའི་རྣམ་གཞག་ལ་བརྟེན་དགོས་ནའང་། དེང་སང་ནི། རྨིག་རྗེས་སུ་ཆུ་ཡིས་དགང་སླ་སྟེ། །མཛོད་ཆུང་ནོར་གྱིས་དགང་བ་སླ། །ཞིང་ཆུང་ས་བོན་གདབ་སླ་(༡༤བ)
སྟེ། །བློ་ཆུང་རིག་པས་མགུ་བ་སླ། །ཞེས་པ་ལྟར། དུས་འཁོར་ཤེས་པར་ཁས་འཆེ་བ་དགུ་མཐའ་ཙམ་ཡང་སློབ་མ་མྱོང་པའི་མུན་ནག་འདོམ་འཇལ་གྱི་རིགས་མཐའ་ཀླས་ཤིང་། ལྔ་བསྡུས་གཟའ་འཛིན་ཙམ་ཤེས་པས་རྩིས་པ་ཆེན་པོ་སྲིད་སྒྲུབ་གཉིས་པ་ལྟ་བུར་རློམ་པ་མང་ལ། ཞག་གསུམ་རྣམ་དབྱེ་རྣ་བའི་ཁུང་བུར་སོན་པ་ཉུང་བར་སྣང་། རང་ལུགས་པདྨ་དཀར་པོའི་ཞལ་ལུང་གི་དགོངས་པ་གཙོ་བོར་བྱས་ཏེ་བཤད་ན། ལོ་གཅིག་བུ་དེ་མཁའ་དུས་མེས་བསྒྱུར་བས། སུམ་བརྒྱ་དྲུག་བཅུ་བྱུང་བ་དེས་ཁྱིམ་ལོའི་ཞག་གྲངས་བསྟན་པ་ཡིན་ལ། ཁྱིམ་ལོའི་དོན་ཉི་མས་ལུགས་སོགས་ཁྱིམ་བཅུ་གཅིག་ལ་རྫོགས་པར་སྤྱོད་པའི་ཡུན་ཚད་དོ། །བཤད་མ་ཐག་པའི་ཞག་གྲངས་དེ་གནས་གཉིས་སུ་བྱས་པའི་འོག་མ་མིག་གིས་བསྒྱུར། མདའ་རོས་སྟེང་དུ་བགོས་པས་སུམ་བརྒྱ་དོན་གཅིག་བྱུང་བ་དེ་ཚེས་ཞག་གི་གྲངས་ཡིན་ལ། ཟླ་བ་འཕེལ་འགྲིབ་ཀྱི་དབང་གིས་ཚེས་ལོངས་ལ་བརྟེན་ནས་བཞག་པ་ཡིན་ནོ། །ཞལ་ལུང་གི་དགོངས་པ་ལྟར་ཆུ་ཚོད་སོགས་ལག་ལེན་ཞིབ་ཏུ་བྱས་ན། ཚེས་དཀྱིལ་ཆུ་ཚོད་བཞི། ཆུ་སྲང་སོ་དྲུག །དབུགས་ལྔ། ཆ་ཤས་བདུན་ཡོད་པས། དཀྱིལ་འཁོར་སུམ་བརྒྱ་དོན་གཅིག་པོ་མཁའ་རོས་བསྒྱུར། ཆུ་ཚོད་བཅུག །དེ་བཞིན་དུ་རང་རང་འཁོར་ལོས་བསྒྱུར་ལ། ཆ་ཤས་ཀྱི་བང་རིམ་བཞིན་བཅུག །དེ་རི་མཁའ་རིས་བསྒྱུར་བས་ཐེར་འབུམ་ཆེན་པོ་བདུན། ཐེར་འབུམ་གསུམ། དུང་འཕྱུར་དྲུག །བྱེ་བ་དྲུག །ས་ཡ་བརྒྱད། འབུམ་ཕྲག་གཉིས། ཁྲི་ཕྲག་དྲུག །སྟོང་ཕྲག་བརྒྱད། བརྒྱད་བརྒྱ་རྣམས་བྱུང་བ་གནས་གསུམ་དུ་བཞག །འོག་མར་མཁའ་རིས་བགོས། བར་མར་སྦྱིན། དེ་ལ་མཚོ་རོས་བགོས་སྟེ་མར་ཕྲི་བའི་ལྷག་མ་རིམ་པ་བཞིན། རི་མཁའ་རི། འདོད་པ། རོ། མཁའ་རོ། མཁའ་རོ་རྣམས་ཀྱིས་བགོས་ལྷག་སུམ་(༡༥ན)
བརྒྱ་དྲུག་ཅུ་རྩ་ལྔ་བྱུང་བ་ནི་ཉིན་ཞག་གི་དཀྱིལ་འཁོར་ཏེ། ཆུ་ཚོད་བཅུ་དྲུག །ཆུ་སྲང་བཅུ་བཞི། དབུགས་གཅིག །འདོད་ཆ་བཅུ་གཉིས། རི་མཁའ་རིའི་ཆ་བརྒྱ་ཉེར་གཅིག་ཡོད་དོ། །ཚེས་ཞག་གི་ཡུན་ཚད་ནི། ཟླ་རྐང་ལས་བྱུང་བའི་ལོངས་སྤྱོད་ལ་རག་ལུས་པས། རིམ་པའི་སྔ་རྐང་དུ་རྒྱུན་དང་ཞག་གཉི་ཀ་ལ་ནོར། ཕྱི་རྐང་དུ་རྒྱུན་ལ་ནོར་དང་། ཞག་ལ་བུ་ལོན། རིམ་མིན་གྱི་སྔ་རྐང་དུ་རྒྱུན་དང་ཞག་གཉིས་ཀ་ལ་བུ་ལོན། ཕྱི་རྐང་དུ་རྒྱུན་ལ་བུ་ལོན་དང་ཞག་ལ་ནོར་དུ་འགྲོ་བ་ཡིན་པས་ལོངས་སྤྱོད་དེ་རྣམས་གཟའི་ཆུ་ཚོད་མན་ཆད་དུ་བསྣན་པའི་ཚེ། ཚེས་འཕེལ་དུ་ཆུ་ཚོད་རེ་བཞིའི་བར་དུ་འབྱུང་ཡང་ཚེས་འགྲིབ་དུས་ཆུ་ཚོད་ང་བཞིའི་བར་དུ་འོང་བས། རྐང་པ་ལུགས་འབྱུང་དུ་སྤྱོད་དུས་ཚེས་འཕེལ་པས་ཟླ་བའི་འཕེལ་གྲིབ་བུལ་ལ། རྐང་པ་ལུགས་ལྡོག་གི་དུས་སུ་ཚེས་འགྲིབ་པས་ཟླ་བའི་འཕེལ་འགྲིབ་མགྱོགས་པའི་དོན་གྱིས་ཚེས་ཞག་དེ་རྣམས་ཟླ་བའི་དཀར་ནག་གི་ཆ་རེ་རེ་ནས་འཕེལ་འགྲིབ་བྱེད་པའི་དབང་གིས་བཞག་པའི་ཞག་ཡིན་པས། ཆ་རེ་འཕེལ་བའི་ཡུན་ཚད་ལ་ཡར་ཚེས་རེ་དང་། ཆ་རེ་འགྲིབ་པ་ལ་མར་ངོའི་ཚེས་སུ་བཏགས་པའི་སྒོ་ནས་དེ་ལྟར་བཤད་ཀྱི་ཟླ་བའི་དཀར་ནག་གི་ཆ་ལ། ཆ་བཅོ་ལྔ་ལས་གཞན་དུ་ཆེ་ཆུང་ཡོད་པ་ནི་མིན་ནོ། །ཉིན་ཞག་ནི། ལོ་རེ་ལ་རེས་གཟའ་སུམ་བརྒྱ་ལྔ་བཅུ་རྩ་ལྔ་ཅུང་ལྷག་པར་འགྱུར་པས་བཞག་གྲངས་ཀྱང་དེ་ལྟར་བྱུང་ཞིང་། ཉིན་ཞག་གི་ཡུན་ཚད་ཀྱང་ཚེས་ལོངས་ཀྱི་རི་མོར་ཤར་བ་ལ་མ་ལྟོས་པས། དྲི་མེད་འོད་ལས། ཉིན་ཞག་གི་ཐོག་མ་ནམ་ཕྱེད་ནས་འགོ་བརྩམས་པའི་གཟའི་འཕོ་འཚམས་ཀྱང་གསུང་ལ། ད་ལྟ་འཇིག་རྟེན་གྲགས་ཚོད་དང་བསྟུན་ནས། ནམ་ལངས་དུས་སུ་དུས་རྒྱུན་དུ་འཕོ་བའོ། །དྲི་མེད་འོད་ཀྱིས་ཉིན་ནས་མཚན་ཕྱེད་ཀྱི་བར་ཉིན་དང་(༡༥བ)
ལྷག་མར་མཚན་མོའི་ཐ་སྙད་མཛད་པར་ལོ་ཆེན་ནམ་མཁའ་བཟང་པོས། མངོན་པར་འབྱུང་བའི་མདོ་ལས། གཞོན་ནུས་བླ་ན་དེ་ཐོས་པ་དང་ཉི་མ་དེ་ཉིད་ལ་གྲགས་འཛིན་མ་ལའང་ཁྱིའུ་ཞིག་བཙས་སོ། །བདུད་རྩི་ཟས་ལའང་ཁྱིའུ་ཞིག་བཙས་སོ། །དེ་ཉིད་ཀྱི་ཉིན་མོ་ཟླ་བའང་སྒྲ་ཅན་གྱིས་ཟིན་ཏོ། །ཞེས་པར། དུས་དེར་ཕྱི་རོལ་པའི་ལུགས་ཀྱི་རྩིས་ལས་མེད་པའི་ཁུངས་དང་བཅས་ཏེ་འབྲུ་གཉེར་བ་དང་། ཆོས་རྗེ་མཁས་གྲུབ་དགེ་ལེགས་པས། ཉིན་མོ་ཞེས་པ་མཚན་མོར་འདོན་པ་བསྒྱུར་བར་མཛད་པ་སོགས་སྨྲ་བོ་ཐམས་ཅད་ཉིན་མ་བདུན་ཉིན་མཚན་གཉིས་ཀྱི་ཟླས་ཕྱེད་པའི་ཉིན་མོ་ལས་འོད་མི་སྙམས་གསུང་བར་སྣང་མོད། འཁྲུལ་མེད་ཀྱི་དུས་ཞབས་པ་ལྷུན་གྲུབ་རྒྱ་མཚོས། དེ་ཉིད་ཀྱི་ཞགས་ཟླ་བ་སྒྲ་གཅན་གྱིས་འཛིན་པའི་དོན་དུ་གསུངས་པ་ནི་སྔོན་མེད་ཀྱི་ལེགས་བཤད་དེ། སྔ་མ་ཚོ་ལྟར་ན་ཉིན་ཞག་གི་ནང་དུ་མཚན་མོ་མི་འདུ་བར་ཁས་ལེན་དགོས་པར་དོན་གྱིས་སོང་བས་མཁས་པར་རློམ་པ་རྣམས་ཀྱང་ཞག་གསུམ་རྣམ་དབྱེ་ལ་སྦྱང་འཚལ། ཁྱིམ་ཞག་ནི་ཉི་མས་ཁྱིམ་རེ་རེར་སྤྱོད་པའི་ཡུན་ཚད་དེ་སུམ་ཅུར་བགོས་པའི་ཞག་སུམ་བརྒྱ་དྲུག་ཅུ་སྟེ། དཔེར་ན་ཉི་མ་ལུག་གི་ཁྱིམ་དུ་ཞུགས་ནས་གླང་ཁྱིམ་དུ་འཕོ་བའི་བར་ལ་རགས་རྩིས་སུ་ཚེས་ཞག་སུམ་ཅུ་རྩ་གཅིག་འབྱུང་བར་མངོན་ཡང་། ཞིབ་ཏུ་བརྩིས་ན་ཚེས་ཞག་སུམ་ཅུའི་སྟེང་དུ་ཆུ་ཚོད་གཅིག །ཆུ་སྲང་ལྔ་བཅུ། དབུགས་བཞི། འདོད་ཆ་བརྒྱད་རྫོགས་ནས་ཁྱིམ་འཕོས་པ་ན་ཚེས་ཞག་སུམ་བརྒྱ་དོན་གཅིག་དང་འགྲིག་གོ །ཉིན་ཞག་ནི། ནམ་ལངས་ནས་ནམ་ལངས་བར་ལ་ངོས་བཟུང་སྟེ། རེས་གཟའ་ཚེས་ཀྱི་ཆུ་ཚོད་ལ་མ་ལྟོས་པར། གཟའ་ནི་ནམ་ལངས་ནས་ནམ་ལངས་ཀྱི་བར་དུ་འཕོ་ཞེས་པ་ལྟ་བུ་དང་། ཚེས་ཞག་ནི་ངེས་པ་མེད་པར། ཚེས་ཀྱི་ཆུ་ཚོད་འཕེལ་དུས་ཆུ་ཚོད་དྲུག་(༡༦ན)
ཅུ་རྩ་བཞི་ཙམ་འབྱུང་བའི་སྐབས་ཡོད་ནའང་འགྲིབ་དུས་ཆུ་ཚོད་ལྔ་བཅུ་རྩ་བཞི་ཙམ་ལས་མི་འོང་པས་ཟླ་བའི་ཆ་བཅོ་ལྔ་པོ་འཕེལ་འགྲིབ་ལ་ལྟོས་པས་ན་ཕལ་ཆེར་ནམ་མ་ལངས་གོང་ནས་རྫོགས་པ་མང་བས། དཔེར་ན་ཆོས་ཀྱི་དུས་ལོངས་ལ། ཆུ་ཚོད་ང་དགུ། ཆུ་སྲང་གསུམ། དབུགས་བཞི། ཆ་ཤས་བཅུ་དྲུག །ཉིན་ཞག་གི་དུས་ལོངས་ལ་ཆུ་ཚོད་དྲུག་ཅུ། ཁྱིམ་ཞག་གི་དུས་ལོངས་ལ། ཆུ་ཚོད་དྲུག་ཅུ། ཆུ་སྲང་ང་གཉིས། དབུགས་བཞི། ཆ་ཤས་བརྒྱ་རེ་བརྒྱད་འབྱུང་བ་ཡིན་པའི་ཕྱིར་ན། ཚེས་ཞག་གིས་ཉིན་ཞག་གི་དོད་མི་ཐུབ། ཉིན་ཞག་གིས་ཁྱིམ་ཞག་གི་དོད་མི་ཐུབ་པ་ལ། དེ་ཡང་ཟླ་བར་མ་ལོངས་པར་ཉིན་ཞག་ཤུགས་ཆེ་བས་མཁས་རྨོངས་ཀུན་ལ་ནམ་ལངས་ནས་ནམ་ལངས་ཀྱི་བར་ཉིན་ཞག་ཏུ་སོང་ཞིང་། ཟླ་བར་ལོངས་ན། ཚེས་ཞག་ཤུགས་ཆེ་བས་ཉིན་ཞག་སུམ་ཅུ་སོང་མ་སོང་ལ་མ་ལྟོས་པར། ཟླ་བ་ཉ་བ་ནས་ཉ་བའི་བར་ལ་ཟླ་བ་ལོངས་བར་ངོས་འཛིན། ལོ་རུ་ལོངས་ན་ཁྱིམ་ཞག་ཤུགས་ཆེ་བས། དོན་གྱིས་ལོ་གཅིག་ལ་ཁྱིམ་ཞག་སུམ་བརྒྱ་དང་དྲུག་ཅུ་ལས་མེད་པས་སོ། །ཚུལ་དེ་ལྟར་མཁས་པ་ཡོངས་ལ་གྲགས་ཀྱང་། ཞག་གསུམ་གྱི་རྣམ་པར་དབྱེ་བའི་དོན་ལ་ཞིབ་ཏུ་དཔྱད་ཚེ་ཞག་གསུམ་ཀྱི་ལྔ་བསྡུས་མི་འདྲ་བ་རི་མོས་གཏན་ལ་འབེབས་ནུས་ནའང་ལུགས་གཞན་གཉིས་ཀྱི་ལག་ལེན་བྱས་པས། རིགས་པའི་རྣམ་གྲངས་ཙམ་ལས་དགོངས་དོན་ལྷག་པོ་མི་འབྱུང་བའི་ཕྱིར་ན། ད་ལྟའི་ལག་རྩིས་སུ་བྱེད་པ་འདི་དག་སྔོན་གྱི་མཁས་པ་རྣམས་ཀྱིས་ཚེས་ཞག་གི་ལྔ་བསྡུས་སུ་མཛད་པ་ཡིན་པས། རེས་གཟའ་ཚེས་ལོངས་ལ་ལྟོས་བར་ལུང་རིགས་ཀྱིས་སྒྲུབ་ནུས་ཤིང་། སྨོན་འགྲོ་པཎྜི་ཏ་དང་གཙང་འདར་སྟོད་ཀྱི་རིག་བྱེད་པ་དགྲ་འདུལ་དོན་གྲུབ་རྡོ་རྗེ་སོགས་མཁས་པ་མང་པོ་ཞལ་མཐུན་པར་སྣང་ངོ་། །འོན་ཀྱང་(༡༦བ)
ད་ལྟ་ལག་ལེན་དུ་བྱེད་མཁན་ཤིན་ཏུ་ཉུང་བས་ཕྱོགས་འདི་ལ་རོ་འཛིན་གཡོ་བར་ནུས་པའི་མཁས་པ་རྣམས་ཀྱིས་ལེགས་བཤད་ཀྱིས་ཟུར་བརྒྱན་པར་འཚལ་ལོ། །འཇིག་རྟེན་ན་ཡོངས་སུ་གྲགས་པའི་ལོ་གཅིག་ལ་ཞག་སུམ་བརྒྱ་དྲུག་ཅུར་བཤད་པའང་སྤྱིར་བཏང་སྟེ། ཚེས་ལོངས་ཐུང་བ་རྣམས་བསྟུད་མར་བྱུང་ཚེ། ཚེས་ཞག་གི་ཆུ་ཚོད་ང་བཞི་ཙམ་དེས། ཉིན་ཞག་དྲུག་ཅུ་མ་ཐུབ་པར། ཉིན་གཅིག་པུ་དེར་ཚེས་སྔ་མའི་ཆུ་ཚོད་ནས་ཀྱང་གཅིག་གཉིས་མར་འཕྱུགས། ཕྱི་མའི་ཆུ་ཚོད་ནས་ཀྱང་གཉིས་གསུམ་ཡར་འཕྱུགས་པས་ན་ཚེས་ཞག་གསུམ་གྱི་ངོ་མཐོང་བས་ཆུ་ཚོད་བར་པ་ལྔ་བཅུ་ང་བཞི་ཙམ་པ་དེ་དོན་དུ་མི་ཆད་ཀྱང་། དངོས་བསྟན་ལ་ད་ནངས་སྔ་གྲོ་ནི་ཁོ་མ་སླེབ། སང་སྔ་དྲོ་ནི་ཁོ་རྫོགས་ཟིན་པས་མ་མཐོང་ངོ་། །དཔེར་ན་ཚེས་གཅིག་ལ་གཟའ་ཉི་མར་ཆུ་ཚོད་གཉིས། ཚེས་གཉིས་ལ་ཉི་མ་བལྡབས་ནས་ཆུ་ཚོད་ང་བརྒྱད་ཙམ་འདུག་ན་ཚེས་གཅིག་གི་ཚེས་ལོངས་ང་བརྒྱད་གནམ་སྟོང་ལ་རྫོགས་ཟིན། ཚེས་གཉིས་ནས་ཚེས་ལོངས་གཉིས་ཙམ་ལས་ཚེས་གཅིག་ལ་དངོས་སུ་མ་ཕན་པས་ཚེས་གཅིག་གི་ཞག་ནང་དེར་ཆུ་ཚོད་ང་བཞི་ཡོད་པའི་ཚེས་གཅིག་རྫོགས་པ་དོན་གྱིས་འཐོབ་ཅིང་དངོས་བསྟན་ཚེས་གཅིག་ཆད་ཀྱང་དོན་ལ་ཚེས་གཉིས་ཆད་པར་ངོས་འཛིན་པ་ལྟ་བུའོ། །དོན་དྲིལ་ན་བཤད་མ་ཐག་པས་དཔེར་མཚོན་ཏེ། སྔ་ཚེས་ཀྱི་གཟའ་ཉི་མས་བདག་བྱས་པའི་ཉིན་ཞག་དེ་ལ་ཚེས་ལོངས་བཞི་ལས་ལྷག་པ་མ་བྱུང་ལ། ཕྱི་ཚེས་ལ་གཟའ་གསར་པའི་ངོ་མ་མཐོང་ཞིང་ཚེས་ཞག་འོག་མའི་ངོའང་མཐོང་བས་ཚེས་གཉིས་ཀྱི་ཚེས་ལོངས་རྣམས་ཚེས་གཅིག་གི་ཁོངས་སུ་བསྡུ་དགོས་ཤིང་། མ་བསྡུས་ན་ཚེས་ལོངས་བཞི་ལས་མེད་པའི་ཚེས་ཞག་གཅིག་ཁས་ལེན་དགོས་པར་འགྱུར་ལ། དེ་ལྟ་བུ་མི་སྲིད་པས་སོ། །ཚེས་ལྷག་པའི་དུས་ཚེས་ལོངས་དྲུག་ཅུ་རྩ་བཞི་ཙམ་པ་མང་བ་བསྟུད་(༡༧ན)
པས་ཉིན་ཞག་གི་ཚེས་ཞག་མ་ཐུབ་པར། ཚེས་ལོངས་དྲུག་ཅུ་རྩ་བཞི་པོའི་དྲུག་ཅུས་ཉིན་ཞག་རྫོགས་ནས་ལྷག་མ་བཞི་པོས། ཉི་མ་སྔ་ཕྱི་གཉིས་ཀར་ཆུ་ཚོད་གཉིས་རེ་ཙམ་དོན་གྱིས་ཐོབ་པས་ན་ཚེས་ཞག་གཅིག་ལ་ཉིན་ཞག་གསུམ་གྱི་དོན་མེད་པས། དཔེར་ན་ཚེས་གཅིག་ལ་རེས་གཟའ་ཉི་མ་ལ་ཚུ་ཚོད་ང་བརྒྱད། རྐང་པའི་ལོངས་སྤྱོད་རྣམས་ནོར་གྱི་དབང་གིས་ཚུ་ཚོད་འཁོར་ལོར་ལོངས་པས་གཟའ་མཆོངས་ཏེ་ཚེས་གཉིས་ལ་རེས་གཟའ་མིག་དམར་ལ་ཚུ་ཚོད་གསུམ་ཙམ་ཡོད་ན། ཚེས་གཅིག་གི་ལོངས་སྤྱོད་ཀྱི་སྟེང་ནས་ཆུ་ཚོད་གཉིས་ཡར་འཚངས་ཏེ་གནམ་གང་གི་ངོ་ཐོང་། ཆུ་ཚོད་གསུམ་བཞི་ཙམ་ཚེས་གཉིས་ཀྱི་སྔ་དྲོ་བསྡད་པས་ཚེས་ལོངས་དྲུག་ཅུ་རེ་བཞི་ཡོད་པའི་ཚེས་དེ་སྔ་དྲོ་ལན་གཉིས་བྱུང་བས་ཚེས་གཉིས་ལྷག་པོར་འདོན་པ་ལྟ་བུའོ། །དོན་དྲིལ་ན་སྔ་ཚེས་ཀྱི་གཟའི་ཆུ་ཚོད་ང་བརྒྱད་ལོངས་སྤྱོད་རྒྱུ་ཡོད་པའི་སྟེང་དུ། ཕྱི་ཚེས་ཀྱི་ལོངས་སྤྱོད་བདུན་ཡང་བྱུང་བས་ན་ཚེས་ཞག་གཅིག་ལ་ཆུ་ཚོད་བརྒྱ་དང་བཅོ་ལྔ་ཙམ་ཁས་ལེན་དགོས་ཤིང་། དེ་འདྲ་མི་སྲིད་པས་ཕྱི་ཚེས་ཀྱི་ཁོངས་ནས་ཚེས་ལྷག་པོར་བཏོན་པ་ཡིན་ནོ། །ཆད་ལྷག་གི་སྐབས་ཚེས་ཞག་གཅིག་གིས་ཉིན་ཞག་གསུམ་གྱི་ངོ་མཐོང་བ་དང་། ཉིན་ཞག་གཅིག་གིས་ཚེས་ཞག་གསུམ་གྱི་ངོ་མཐོང་བའི་ཁྱབ་པ་རྣམ་པ་ཀུན་ཏུ་ཁས་ལེན་མི་དགོས་ཏེ། པད་དཀར་ཞལ་ལུང་དུ། ཉིན་ཞག་གཅིག་གིས་ཚེས་ཞག་གསུམ་གྱི་ངོ་མཐོང་བའམ། མ་མཐོང་ཡང་འདྲའོ། །ཉིན་ཞག་གཅིག་གིས་ཚེས་ཞག་རིལ་པོ་གཅིག་དང་། ཚེས་ཞག་འོག་མའི་ཡང་ངོ་མཐོང་བ་ནམ་བྱུང་བའི་ཚེ། ཆད་པར་སྣང་བ་འབྱུང་ལ། ཞེས་སོགས་གསུངས་པས་མཚོན་ནོ། །དོན་ལ་ཆད་ལྷག་བྱུང་བ་ནི་མིན་ཏེ། ཆད་པའི་ཚེ་ཚེས་བཅོ་ལྔ་ལ་ཟླ་བའི་ཆ་མ་རྫོགས་པར་ནག་ཁྱུར་པའང་མེད་ཅིང་། ལྷག་པའི(༡༧བ)
ཚེ་ཟླ་བའི་ཆ་ཟླུམ་པོ་ལ་ཕྱོགས་གཅིག་འབུར་མོར་ཡང་མི་འབྱུང་བས་སོ། །དེ་ལྟར་ཚེས་ཞག་དང་ཉིན་ཞག་གཉིས་ཕན་ཚུན་གཅིག་གིས་གཅིག་གི་དོད་མ་ཐུབ་པར་ལོ་རེ་ལ་ཚེས་ཆད་པ་བཅུ་གཉིས་ཙམ་དང་ལྷག་པ་དྲུག་ཙམ་བྱུང་བ། ཆད་ལྷག་ཕན་ཚུན་མགོ་བསྡེབས་པའི་ལྷག་མ་རྣམས་ཀྱི་ནུས་པས། འཇིག་རྟེན་ཡོངས་གྲགས་ཀྱི་ལོ་གཅིག་ཉིན་ཞག་སུམ་བརྒྱ་དང་ང་བཞི་ལས་མི་འོང་བ་མངོན་སུམ་གྱིས་གྲུབ་པས། ཆད་ལྷག་འབྱུང་བ་ཟླ་བའི་འཕེལ་གྲིབ་ལ་བརྟེན་ནས་ཚེས་ཞག་གི་ནུས་པ་ཡིན་པ་རྒྱུ་མཚན་དུ་བྱས་ཏེ། ཉིན་ཞག་ལ་ཆད་ལྷག་གཏན་ནས་མ་བརྩིས་ན་ལོར་ལོངས་པའི་ཚེ་ཚེས་བཅོ་ལྔར་སླེབ་དུས་ཚེས་བརྒྱད་དགུ་ཙམ་གྱི་མིང་འདོགས་དགོས་པ་རྒན་མོ་ཞིག་གིས་ཆད་ལྷག་མ་བརྩིས་པས་ཉེར་དགུ་ལ་བཅོ་ལྔའི་ཟླ་བ་ཤར་པའི་དཔེ་འདིར་འོང་ངོ་། །རྒྱུ་མཚན་དེས་ན་ཚེས་ཞག་སུམ་བརྒྱ་དོན་གཅིག་གི་སྟེང་ནས་ཚེས་ཟླ་བཅུ་གཉིས་ལ་སུམ་བརྒྱ་དྲུག་ཅུར་ལོངས་པའི་ཚེ། ལྷག་མ་ཚེས་ཞག་དང་ཁྱིམ་ཞག་གི་བར་ཁྱད་ཀྱི་ནུས་པས་ཐོན་པ་ཚེས་ཞག་བཅུ་གཅིག་ཚུ་ཚོད་བཞི། ཆུ་སྲང་སོ་དྲུག །དབུགས་ལྔ། འདོད་ཆ་བདུན་རྣམས་ལུས་ཤིང་། བ་ལང་རྫི་ཡན་གྱིས་ཤེས་པའི་ཉིན་ཞག་སུམ་བརྒྱ་རེ་ལྔའི་སྟེང་ནས་ཚེས་ཞག་དང་ཉིན་ཞག་གི་བར་ཁྱད། ཆུ་སྲང་ང་བདུན། དབུགས་གཅིག །འདོད་ཆ་བཞི། ཆ་ཤས་སུམ་བརྒྱ་རེ་དྲུག་བྱུང་བ་ལ་བརྟེན་ནས། ཞག་མི་ཐུབ་ཚེས་ཞག་ལྔ་རྗེས་འབྲང་དང་བཅས་པའི་དབང་གིས། ཞག་སུམ་བརྒྱ་ང་ལྔ། ཆུ་ཚོད་བཅུ་གཅིག །ཆུ་སྲང་སོ་བདུན། དབུགས་གཉིས། འདོད་ཆ་ལྔ། ཆ་ཤས་བརྒྱ་ཉེར་གཅིག་ལས་མི་འགྲོ་ལ། ལྷག་མ་ཉིན་ཞག་ལྔ་རྗེས་འབྲང་དང་བཅས་པ་དང་ཚེས་དཀྱིལ་དང་ཉི་དཀྱིལ་གྱི་བར་ཁྱད། ཚེས་ཞག་ལྔ། ཆུ་ཚོད་ཞེ་བརྒྱད། ཆུ་སྲང་ཉེར་གཉིས། དབུགས་གསུམ། འདོད་ཆ་བདུན། (༡༨ན)
རི་མཁའ་རིའི་ཆ་ལྔ་བརྒྱ་གྱ་དྲུག་དང་བཅས་པ་མི་རྫོགས་ཤིང་། ཚེས་ཞག་ལྷག་པོ་བཅུ་གཅིག་རྗེས་འབྲང་དང་བཅས་པའི་ལྷག་པོ་བཅུ་གཅིག་དང་དོད་སྙོམས་པའི་ཉིན་ཞག་གི་དབང་དུ་བྱས་ཏེ་རྩི་ན། དྲུག་ཅུ་རེ་ལྔ་པའི་ལྔ་པོ་དང་། བར་ཁྱད་ཉིན་ཞག་དུ་བཏང་བའི་ཞག་ལྔ། ཆུ་ཚོད་ཞེ་གཉིས། ཆུ་སྲང་ང་ལྔ། དབུགས་གསུམ། འདོད་ཆ་གཉིས། རི་མཁའ་རིའི་ཆ་ལྔ་བརྒྱ་དང་ཉེར་གཅིག །རི་རོའི་ཆ་ལྔ་བཅུ་ང་དྲུག་རྣམས་འབྱུང་། དྲུག་ཅུ་རེ་ལྔའི་ལྔ་རྗེས་འབྲང་དང་བཅས་པ་དང་བར་ཁྱད་བཏོན་པའི་ལྔ་རྗེས་འབྲང་དང་བཅས་པ་བསྡོམས་པས་ཉིན་ཞག་བཅུ། ཆུ་ཚོད་ང་དགུ །ཆུ་སྲང་དགུ །དབུགས་ལྔ། འདོད་ཆ་གཅིག །རི་མཁའ་རིའི་ཆ་དྲུག་བརྒྱ་ཞེ་གཉིས། རི་རོའི་ཆ་ང་དྲུག་རྣམས་འོང་ངོ་། ཁྱིམ་ཞག་གི་སུམ་བརྒྱ་དྲུག་ཅུ་ནས་ཁྱིམ་ཞག་གི་དབང་དུ་བཏང་བའི་ཞག་བཅུ། ཆུ་ཚོད་ཞེ་བཞི། ཆུ་སྲང་ཞེ་དྲུག །དབུགས་གསུམ། འདོད་ཆ་ལྔ། རི་མཁའ་རིའི་ཆ་ཤས་བཅུ་དྲུག་མ་རྫོགས་པས་དོན་གྱིས་ལོ་རྫོགས་པ་ལ་ཁྱིམ་ཞག་རྫོགས་དགོས་སོ། །རྗེ་འཕྲིན་ལས་པས་འབྲས་རྩིས་རིན་ཆེན་འཕྲེང་བར། ཉི་ཚེས་དུས་ཚོད་ལ་དབང་བའི། །ས་བདག་འབྲས་བུ་བསྟན་པ་ཡི། །ཞེས་པ་ལྟར་ན། ད་ལྟ་ཉིན་ཞག་རེ་ལ་དབང་བར་ཁས་ལེན་པའི་ས་བདག་རྣམས་ཚེས་ལོངས་ལ་ལྟོས་དགོས་མི་དགོས་དཔྱད་པར་མ་བཟོད་པས་བློ་ལྡན་གྱིས་ནག་རྩིས་ཀྱི་ཁུངས་མ་རྣམས་ལ་ཞིབ་ཏུ་བལྟས་ཏེ་མཐའ་ཆོད་པ་བྱ་བར་རིགས་སོ། །མཁས་བླུན་མང་པོས་ཆད་ཚེ་སྔ་མ་ཆད། ལྷག་ཚེ་ཕྱི་མ་ལྷག་པར་བཤད་པ་ནི་ལུང་རིགས་ཀྱི་སྒྲུབ་བྱེད་ག་ལ་ཡོད། ཞལ་ལུང་དུ། ལྟ་བ་འོག་མ་མངོན་པར་ཞེན་པའི་ཁྲིགས་ངེས་རྣམ་པ་ཐམས་ཅད་དགོས་པའི་འཐད་པ་མི་སྣང་ལ། འོན་ཀྱང་ཐ་སྙད་སྐྱོང་བདེ་བ་ལ་ཚུལ་འདི་མི་ལེགས་(༡༨བ)
ཏེ། རྒྱུ་མཚན་ནི་གོང་དུ་བཤད་པའི་རང་ལུགས་ཀྱིས་ཤེས་སོ། །ཞེས་པ་ལྟར། ཆུ་ཚོད་མང་བའི་ཚེས་འཆད་ཅིང་ཉུང་བའི་ཚེས་ལྷག་པ་ནི་ལེགས་ལ། ཁྱད་པར་རྩིས་སྐར་ནག་སྒོ་བསྟུན་པའི་ཚེ་ཆད་ལྷག་གི་སྔ་ཕྱིའི་དུས་ངེས་ཅན་དུ་མ་བྱུང་ན་ས་བདག་འཕྱུགས་པའི་ཉེས་པ་འབྱུང་བར་མངོན་ནོ། །མཁས་པ་དག་གིས་གཟའ་འདས་པར་གསུངས་པ་དང་། ལ་ལ་དག་འདས་པ་དང་མ་འདས་པའི་ཆ་སྣ་ཚོགས་ཡོང་པར་འཆད་པ་ལ། ལུགས་ཕྱི་མ་ནི་མི་འཐད་པར་རྟོགས་པ་སླ་བ་ལུགས་སྔ་མ་ལ་དུས་བཞི་ཆེན་པོའི་རྗེས་སུ་དཔྱིད་འབྲིང་གནམ་སྟོང་གི་རྩིས་བྱས་པར། གཟའ་ཉི་ཤུ་རྩ་དགུ་དང་ཆུ་ཚོད་སུམ་ཅུ་སོགས་བཤད་པས་གཟའ་ཉེར་དགུ་པ་དེ་འདས་ནས་དངོས་བསྟན་གཟའ་སུམ་ཅུ་པར་ཁས་མ་བླངས་ན། ལོ་གཅིག་ལ་གཟའ་སུམ་བརྒྱ་དྲུག་ཅུ་རྩ་ལྔ་མི་འབྱུང་བའི་སྐྱོན་ཡོད་པའི་གནོད་བྱེད་དང་། ཐིག་ལ་ཤར་བ་ན་གཟའི་འཁོར་ལོ་ལོངས་ནས་དོར་པ་མ་ཡིན་པར་ཐལ་ཏེ། ད་དུང་གཟའ་སྤེན་པ་ཡོད་པའི་ཕྱིར་རོ། །ཞེས་དང་། དེར་མ་ཟད་སྟོང་གཟུགས་མ་ཡིན་པའི་མངོན་སུམ་གྱིས་གྲུབ་པ། ནས་ཁལ་གཅིག་དང་བྲེ་བཅོ་ལྔ་ལྟ་བུར། ཁལ་གཅིག་པུ་དེ་འདས་ཟིན་ནས་བྲེ་བཅོ་ལྔའི་སྟེང་དུ་བྲེ་ལྔ་བསྣན་ན་ཁལ་གཉིས་པར་འགྱུར་པའི་རིགས་པ་སོགས་རྣམ་གྲངས་མང་ནའང་། དོན་གྱི་སྙིང་པོ་གཟའ་ད་ལྟར་བར་ཁས་ལེན་དགོས་ཏེ། གཅིག་ཤར་ན་ཉི་མར་ཁས་ལེན་དགོས་པས་སོ། །རྒྱུ་མཚན། འགྲེལ་ཆེན་ལས། དྲིས་པའི་དབྱངས་ཀྱི་སྐབས་སུ། བདུན་གྱི་ཆའི་ལྷག་མ་ནི་གཟའི་ཆ་ལྷག་མ་སྟེ། ཟླ་བ་སྟེ་གཟའ་གཅིག་པ་ལ་གནས་པ་དང་། མེ་སྟེ་གཟའ་གསུམ་པ་ལ་གནས་པ་དང་། མདའ་སྟེ་གཟའ་ལྔ་པ་ལ་གནས་པ་དང་། རི་བོ་སྟེ་གཟའ་བདུན་པ་ལ་ལྷག་མ་གནས་པར་གྱུར་ན་མི་རྣམས་ལ་གྲུབ་པ་ཡོད་པ་མ་ཡིན་ཏེ། ཉི་མ་དང་། བཀྲ་ཤིས་དང་། ཕུར་བུ་(༡༩ན)
དང་། སྤེན་པ་སྟེ་མི་མཉམ་པ་རྣམས་ལའོ། །མིག་སྟེ་གཟའ་གཉིས་པ་དང་། རིག་བྱེད་དེ་གཟའ་བཞི་པ་དང་། རོ་སྟེ་དྲུག་པ་ལ་བྱ་བ་འགྲུབ་པར་གྱུར་རོ་ཤིན་ཏུ་མཉམ་པའི་གནས་སུ་གྱུར་པ་ཟླ་བ་དང་། གཟའ་ལག་པ་དང་། པ་ཝ་སངས་རྣམས་ལ་ལྷག་མ་གནས་པར་གྱུར་ནའོ། །ཞེས། བདུན་གྱིས་བགོས་པའི་ལྷག་མ་གཅིག་ཉི་མ་ཡིན་པ་སོགས་རྡོ་རྗེའི་ཚིག་འདི་ལ་ཀླན་ཀ་མི་འཇུག་པས་སོ། །གཞན་ཡང་ད་ལྟ་ལྔ་བསྡུས་ལ་གཟའ་སྐར་ཉི་མ་སྦྱོར་བྱེད་ཅེས་ཡན་ལག་ལྔར་བཤད་པའི་ཡན་ལག་གཅིག་མ་ཚང་བའི་སྐྱོན་དུ་གྱུར་ཏེ། དངོས་སུ་ཤར་བའི་གཟའ་དེ་འདས་ཟིན་པས་གཟའ་མ་ཚང་བའི་སྐྱོན་ཡོད་དོ། །བཤོལ་གྱི་རྣམ་གཞག་ལ། དབུགས་བཤོལ། ཞག་བཤོལ། ཟླ་བཤོལ། ལོ་བཤོལ་སོགས་རིགས་པས་དཔྱད་ན་རྣམས་གྲངས་མང་པོར་འགྱུར། འགྱུར་ཚུལ་འཇིག་རྟེན་ཁམས་ལེར། སྟོང་ཕྲག་ཉི་ཤུ་རྩ་གཅིག་རོ་བརྒྱ་ལྡན་པ་དག་ལས་སོ་ཡི་ཆ་ཡིས་ངེས་པར་ཕྱུང་གྱུར་པ། ལུས་ལ་དབུགས་ལྷག་གང་དག་ཉིན་ཞག་སོ་སོའི་དུས་སུ་འབྱུང་བ་རི་དང་དུས་རྣམས་དག་གི་གྲངས། སྟོང་ཕྲག་སུམ་ཅུ་རྩ་དྲུག་དག་གིས་བསྒྱུར་བ་རྣམས་ཀྱང་ལོ་བརྒྱའི་ཚད་དུ་རབ་ཏུ་གྲགས་པ་སྟེ། སྟོང་དུས་མེ་ཡིས་རབ་ཏུ་ཕྱེ་བ་རྣམས་ནི་ཆུ་ཚོད་དུ་འགྱུར་དྲུག་ཅུའི་ཆ་ཡིས་ཉིན་ཞག་ཀྱང་། ཞེས་རྒྱུར་ཚིག་གིས་བཤོལ་གྱི་རྣམ་གཞག་འདི་ཙམ་ལས་གཞན་གསལ་བར་བསྟན་པ་མེད་ཅིང་། རྗེ་འཕྲིན་ལས་ཞབས་ཀྱིས། དབུགས་འབྱུང་འདུག་དང་བར་མ་སྟེ། དེ་ལ་དབུགས་གཅིག་ཅེས་གྲགས་པའི། ཞེས་པ་ལྟར། དབུགས་འབྱུང་འཇུག་གནས་གསུམ་དུ་བྱས་པའི་དབུགས་སུམ་ཅུ་ན་རགས་རྩིས་ཀྱི་དབུགས་བཤོལ་འཐོོན། སུམ་ཅུ་སོ་གཉིས་ན་འབྲིང་པོར་བརྩིས་པའི་བཤོལ་འཐོན། ཕྱེད་བཅས་སོ་གཉིས་ན་ཤིན་ཏུ་ཞིབ་པའི་བཤོལ་འཐོན་(༡༩བ)
པར་འགྱུར་ལ། ལ་ལ་རགས་པ་ཟླ་བའི་ཡེ་ཤེས་ཀྱི་ཆ། འབྲིང་ཉི་མའི་ཡེ་ཤེས་ཀྱི་ཆ། ཕྲ་བ་སྒྲ་གཅན་གྱི་ཡེ་ཤེས་ཀྱི་ཆར་འདོད། འགའ་ཞིག་ཟླ་བ་རང་ལ་རགས་འབྲིང་ཕྲ་གསུམ་གྱི་ཡེ་ཤེས་ཀྱི་ཆར་བཤད་པའང་བྱེད་དོ། །རྒྱུད་ཀྱི་སྐབས་འདིར་སྟོང་ཕྲག་ཉི་ཤུ་ལ་ཁྲི་ཚོ་གཉིས། རྩ་གཅིག་གི་གཅིག་པུས་སྟོང་ཕྲག་གཅིགརོ་བརྒྱས་དྲུག་བརྒྱ་བསྟན་པས་ཞག་གཅིག་ལ་དབུགས་ཉི་ཁྲི་ཆིག་སྟོང་དྲུག་བརྒྱ་བྱུང་བ་ལ། སོ་ནི་སུམ་ཅུ་རྩ་གཉིས་ཀྱི་མངོན་རྗོད་ཡིན་པས། རགས་འབྲིང་ཞིབ་གསུམ་གྱི་ནང་ནས་འབྲིང་པོའི་དབང་དུ་བཏང་བ་ཡིན། དེ་བཞིན་དུ། ཞག །ཟླ་བ། ལོ་རྣམས་ལ་ཕྲ་རགས་ཀྱི་དབང་གིས་སུམ་ཅུ་དང་། སོ་གཉིས་དང་། ཕྱེད་སོ་གཉིས་ཀྱི་རྣམ་གཞག་བྱར་ཡོད་པ་ལས་དབུགས་བཤོལ་བཏོན་ན་ཧ་ཅང་ཐག་ཉེ་གྲགས། ཞག་བཤོལ་ནི་ཆད་ལྷག་གི་དབང་གིས་ཇི་བཞིན་འདོན་པར་མི་ནུས། ལོ་བཤོལ་ནི་ཐག་ཧ་ཅང་རིངས་པས་ཉེས་པ་དུ་མ་འབྱུང་བའི་ཕྱིར་རིང་ཐུང་འཚམ་པ་ཟླ་བ་ལ་བཤོལ་མཛད་པ་ཡིན་ནོ། །དེ་ཡང་། ཚེས་ཞག་སུམ་ཅུའི་དུས་ཉི་མས་ཁྱིམ་ནས་འཕོ་མ་ནུས་པའི་དབང་གིས་ཚེས་ཟླ་ཕྱེད་བཅས་སོ་གསུམ་ནས་བཤོལ་དགོས་ཏེ། འགྲེལ་ཆེན་ལས། འདིར་ཟླ་བ་ཕྱེད་དང་བཅས་པའི་སུམ་ཅུ་གཉིས་ན་ལྷག་པའི་ཟླ་བར་འགྱུར་ཏེ། གནམ་སྟོང་ལ་ཉི་མའི་འཕོ་བ་མེད་པའི་ཕྱིར་རོ། །དེས་ན་ལོངས་སྤྱོད་པར་མི་འགྱུར་རོ། །ཞེས་འབྱུང་ལ། དེ་ཡང་ཕྱི་རུ་ཟླ་བ་ཕྱེད་དང་སོ་གསུམ། ནང་དུ་འཕོ་རླུང་སུམ་ཅུ་སོ་ཕྱེད་དང་གསུམ་གསུམ་ན་ཡེ་ཤེས་ཀྱི་རླུང་རེ་རེ་ཡོད་པས་འཕོ་རླུང་སྟེང་ནས་ཆད་པ་བསགས་པའི་རྒྱུ་མཚན་གྱིས་ཀྱང་ཤེས་དགོས་སོ། །ཆ་ཤས་དང་འདོད་ཆ་ལ་གྲངས་མང་ཉུང་མཐའ་གཅིག་ཏུ་ངེས་པ་མེད་པས་ན། བཅུ་གསུམ་དང་། རི་མཁའ་རི་དང་། རི་རོ་དང་། བུ་མཁའ་མིག་བུག་ཡིད་སོགས་འཁོར་ལོ་ཤིན་ཏུ་རྣམ་གྲངས་མང་བས། རྩིས་གསར་བ་རྣམས་འཁོར་ལོའི་(༢༠ན)
དབང་གིས་ཆ་ཤས་ལ་མང་ཉུང་ཡོད་དམ་སྙམ་པའི་ཐེ་ཚོམ་གྱི་དྲ་བར་ཚུད་ནའང་། འདི་ལ་ཉིན་ཞག་མང་པོར་བསམ་བློ་བཏང་བའི་དཀའ་ཐུབ་ཀྱི་ངལ་བ་སྟེན་མི་དགོས་ཏེ། དཔེར་ན། ནད་ཀྱི་ཕུང་པོ་གཅིག་འཇལ་བྱེད་ཀྱི་བྲེ་འབོ་སྣ་ཚོགས་ཡོད་པ་ལྟ་བུའོ། །འོན་ཀྱང་། རི་མཁའ་རིས་བསྒྱུར་བའི་ཆ་ཤས་བཅུ་བཞི་ལྟ་བུས་བགོས་པ་ནི་མིན་ནོ། །དེ་ལྟར་གཟའ་ལྟ་བུ་མཚོན་ན། ཞག་གཅིག་ལ་ཆ་ཤས་བྱེ་བ་གཅིག །ས་ཡ་ལྔ། འབུམ་ཚོ་གཉིས། །ཁྲི་ཚོ་བདུན། སྟོང་དང་ཉིས་བརྒྱ་ཡོད་པ་དེ་རི་མཁའ་རིའི་འཁོར་ལོའི་ངོ་སྐལ་གྱི་ཐོབ་ནོར་རེར་དབུགས་གཅིག །དབུགས་དྲུག་ཏུ་ལོངས་པ་ན་ཆུ་སྲང་གཅིག །ཆུ་སྲང་དྲུག་ཅུར་ལོངས་པ་ན་ཆུ་ཚོད་གཅིག །ཆུ་ཚོད་དྲུག་ཅུ་ལོངས་པ་ན་ཞག་གཅིག །ཞག་སུམ་ཅུར་ལོངས་པ་ན་ཟླ་བ་གཅིག །ཟླ་བ་བཅུ་གཉིས་སུ་ལོངས་པ་ན་ལོ་གཅིག །དེ་ལྟ་བུའི་ལོ་ཇི་ཙམ་རིགས་པ་འདས་ལོར་བཞག་ནས་ཟླ་དག་སྒྲུབ་དགོས་པས། ཁམས་ལེ། མེ་མཁའ་རྒྱ་མཚོ་རྣམས་ལ་རབ་བྱུང་ལ་སོགས་འདས་པ་རྣམས་བསྲེས་ཀླ་ཀློའི་ལོ་ནི་རབ་ཏུ་གྲུབ། ཀླ་ཀློའིདབང་པོའི་ལོ་ནི་ལག་པ་གདངས་ཅན་ཟླ་བས་དམན་པའི་ལྷག་མ་དག་ཀྱང་ཉི་མས་བསྒྱུར། ནག་པ་ལ་སོགས་ཟླ་བ་བསྲེས་ཏེ་འོག་ཏུ་དུས་ཀྱིས་བསྒྱུར་བ་མཁའ་མེ་ཟླ་བས་རྣམ་པར་དབྱེ། རྙེད་པ་སྟེང་དུ་བསྲེས་པ་དག་ནི་མི་ཡི་བདག་པོ་ཟླ་བའི་ཚོགས་པ་རྣམ་པར་དག་པར་འགྱུར། ཞེས་བྱུང་བས། མེ་མཁའ་རྒྱ་མཚོ་ལ་འདས་ལོ་འཆོལ་པའམ། ཡང་ན། རབ་བྱུང་རེ་རེ་ཞེས་རྩིས་གཞི་སྤོ་བ་སོགས་གང་བྱེད་ཀྱང་འདས་ལོ་དེ་གནས་གཉིས་སུ་བཞག་པའི་གོང་མ་ཉི་མས་བསྒྱུར་ཏེ་ཟླ་བར་གསིལ་བ་དེ་ལ། མཁས་རློམ་འགའ་ཞིག་གིས། ཟླ་བའི་ཚོགས་དེ་ཚེས་ཟླ་ཡིན་ཞེས་སྨྲ་བ་ནི་ཤིན་ཏུ་མི་རིགས་ཏེ། ཚེས་ཞག་ལ་ཚེས་ཞག་གིས་བཤོལ་འདོན་མི་(༢༠བ)
ཐུབ་པའི་ཕྱིར་ན། གནས་གཉིས་སུ་བཞག་པའི་འོག་མའི་ཆོ་ག་རྣམས་བྱེད་མི་དགོས་པར་འགྱུར་རོ། །ཟེར་རྒྱུས་ཕོངས་པ་གཅིག་གིས། འདས་ཟླ་དེ་ལ་ཁྱིམ་ཟླ་དང་ཚེས་ཟླ་ཅི་རིགས་སུ་ཡོད་ཟེར་བ་ནི། གླང་ལ་མཛུབ་མོ་བཙུགས་ནས་འདི་ལ་བ་དང་གླང་ཅི་རིགས་སུ་ཡོད་ཟེར་བ་དང་ཁྱད་པར་ཅི་ཡོད། མཁས་གྲུབ་ཊིཀ་ཆེན་དུ། དེ་དག་ཁྱིམ་ཟླ་དང་ཚེས་ཟླ་གང་ཡང་མིན་གྱི། སོ་སོར་མ་ཕྱེ་བའི་ཟླ་བའི་ཕུང་པོ་ཡིན་ནོ། །ཞེས་དམ་བཅའ་བ་ནི། ནས་ཕུང་ལ་འདི་ནི་ནས་དང་རྩམ་པ་གང་ཡང་མ་ཡིན་གྱི། སོ་སོར་མ་ཕྱེ་བའི་ཟས་ཀྱི་ཕུང་པོ་ཡིན་ནོ་ཟེར་བ་དང་འདྲ་བས། མཆོག་འདི་ལ་བྱང་པའི་མཁས་པ་རྣམས་དགའ་བ་བསྐྱེད་པའི་གནས་མ་ཡིན་ནོ། །དེས་ན་བཤད་མ་ཐག་པའི་ཟླ་བ་དེ་ཁྱིམ་ཟླའི་ཕུང་པོ་ཡིན་ལ། བགོས་བྱེད་ཕྱེད་བཅས་སོ་གཉིས་པོ་སྲིད་པའི་དོན་དུ་བཞིས་བསྒྱུར་ནས་མཁའ་མེ་ཟླ་བར་བཏང་། དེ་དང་གཤེད་མཚུངས་པར་བྱ་བའི་ཕྱིར་ཁྱིམ་ལོ་རྣམས་གནས་གཉིས་སུ་བཞག་པའི་འོག་མ་བཞིས་བསྒྱུར་སྟེ། བརྒྱ་སུམ་ཅུས་བགོས་པའི་ཐོབ་ནོར་རྣམས་ནི་སྔར་རྩིས་གཞི་སྤོས་པ་ནས་བཟུང་སྟེ་ཟླ་བཤོལ་བྱུང་བའི་གྲངས་ཡིན་ལ། དེ་གནས་སྟེང་མར་བྱིན་པས་ཁྱིམ་ཟླ་དེ་ཚེས་ཟླར་སོང་བ་ཡིན་ནོ། །ད་ལྟ་ལག་རྩིས་སུ། འོག་མ་མིག་བསྒྱུར་རྩིས་འཕྲོས་བརྒྱན། །མདའ་རོས་ཐོག་པ་སྟེང་དུ་སྦྱིན། །ཞེས་པ་དང་གོང་གི་རྒྱུད་ཚིག་གཉིས་ཅུང་ཟད་མ་ཐུན་པ་ལ། མཁས་པ་ཡེ་བཟང་རྩེ་པས། ཐོག་མ་བཞིས་བསྒྱུར་བའི་རྒྱུ་མཚན་མཁའ་མེ་ཟླ་བས་བགོས་པའི་ལྷག་མ་ལ་རྟེན་ནས་དྷུ་བ་འཚོལ་བའི་ཆེད་ཡིན་གསུང་པར་རྒྱུ་མཚན་ཆེ་བ་མེད་དེ། ཟླ་རོའི་ལྷག་མས་ཀྱང་དྷྲུ་བ་འཚོལ་ཐུབ་པས་སོ། །དེས་ན་རྒྱུད་དུ་བཞིས་བསྒྱུར་བ་རྒྱ་དཔེ་ལ་སྡེབ་སྦྱོར་འགྲིག་པའི་དབང་གིས་ཡིན་ཞེས་ཤོང་པང་བུ་སོགས་ཚད་ཐུབ་གྱི་མཁས་(༢༡ན)
པ་རྣམས་གསུང་པ་ལེགས་སོ། །རྗེ་སྟག་ཚང་པས། ཆ་ཤས་ཕྲ་མོ་ཞིབ་ཏུ་རྩི་ན་ཅུང་ཟད་ཡོད་ཀྱང་རྩིས་ཀྱི་གྲུབ་མཐའ་དང་བྱེད་པ་གང་ལའང་ཕན་གནོད་བྱེད་མི་ནུས་པས་མཛུབ་མོ་ཚ་བ་འབྲས་བུར་ཟད་དེ། ཞེས་གསུང་པ་ལོ་འགའ་ཞིག་གི་རིང་ཆ་ཤས་མ་བརྩིས་ཀྱང་ཆུ་ཚོད་ཡན་ལག་ལ་ཉེས་པ་སྐྱེད་མི་ནུས་པ་སོགས་ལ་དགོངས་ནས་བྱེད་རྩིས་ཀྱི་རྗེས་སུ་འབྲངས་པར་མངོན་ཏེ། བྱེད་རྩིས་ལ་བྱེད་རྩིས་དང་བྱེད་རྩིས་རྣམ་དག་གཉིས་སུ་གྲགས་པའི་སྔ་མ་ནི། ཁམས་ལེར། ཚེས་རྣམས་སྦྱིན་དང་དོར་དང་སླར་ཡང་སྦྱིན་པ་དག་ནི་གཟའ་དང་ཆུ་ཚོད་རྐང་པ་རྣམས་སུ་སྟེ། ཚོགས་ཀྱི་ཆ་ལ་ཆུ་གཏེར་ཟླ་བས་མཉམ་དང་མི་མཉམ་ཐོབ་པ་དག་ལ་སྦྱིན་དོར་རྐང་པའི་དོན། ཞེས་སྐབས་འདིར་ཚེས་རྩིས་དང་གོང་དུ་དྷྲུ་བ་ཐམས་ཅད་གནས་གཉིས་སུ་མཛད་ནས། བྱ་སླ་བ་དང་། མུ་སྟེགས་རྣམས་གདུལ་བའི་དོན་དུ་དེ་དག་གི་བྱེད་པ་དང་མཐུན་པར་བསྟན་པ་ཡིན་ཞིང་། མུ་སྟེགས་ཀྱི་བྱེད་པ་དེའང་ཐོག་མ་ཉིད་ནས་མ་དག་པ་མ་ཡིན་ཡང་། བར་སྐབས་སུ་སློབ་དཔོན་འགའ་ཞིག་གིས་ཆོས་ལ་དཔེ་མཁྱུད་ཀྱི་དབང་གིས་གབ་དྲགས་པས་མན་ངག་གི་རྒྱུན་ཉམས་ཞེས་མཁས་པ་རྣམས་འཆད་དོ། །ཕྱི་མ་བྱེད་རྩིས་རྣམ་དག་ཏུ་གྲགས་པ་ནི་དེང་སང་རྩིས་པ་མཐའ་དག་ལག་ལེན་དུ་བྱེད་པའི་གནས་ལྔ་མ་དེ་ཡིན་ནའང་། གཟའི་སྐབས་སུ་ཞག་རེ་ལ་ཆ་ཤས་བཅུ་དྲུག་གིས་ཆད་པ་བསགས་པས་ལོ་ཉིས་བརྒྱ་ཉེར་གཅིག་ན་ཆུ་ཚོད་ལྔ་ཙམ་ཆད་པའི་ཉེས་པ་འབྱུང་ཞིང་། ཉི་མ་ལ་ཞག་རེར་ཆ་ཤས་ཞེ་བཞིས་མ་ངེས་པའི་ལྷག་པོ་བསགས་པས། ལོ་ཉིས་བརྒྱ་ཉེར་གཅིག་ན་ཆུ་ཚོད་བརྒྱད་ཙམ་གྱིས་མངས་བའི་སྐྱོན་ཡོད་པས། ཆ་ཤས་ཕྲ་མོ་ཚུན་ཆད་ཀྱི་སྐྱོན་དང་བྲལ་བར་བརྩིས་(༢༡བ)
པའི་གྲུབ་པའི་མཐའ་འདི་ཉིད་ཡིད་ཆེས་ཀྱི་གནས་ཡིན་ནོ། །རྒྱུ་མཚན་དེས་ན། བོད་གངས་ཅན་གྱི་ལྗོངས་འདིར་བླ་དཔོན་ཟུང་དུ་འཇུག་པ་གནམ་བསྐོས་ཀྱི་རྒྱལ་པོ་དཔལ་ཕག་མོ་གྲུ་པའི་བླ་རྩིས་པ་ཆེན་པོ་ཕུག་ནས་ཆོས་རྗེ་འཕྲིན་ལས་པ་དང་། དེའི་དངོས་སློབ་པ་རྣམས་ཀྱི་ལེའུ་ཐོར། གཟའ་འཛིན་སོགས་ཀྱི་སྐབས། བྱེད་རྩིས་ཀྱི་རི་མོ་ཅུང་ཟད་མ་གཏོགས། རྒྱུན་གྱི་གཟའ་སྐར་མཐའ་དག་གྲུབ་རྩིས་ཁོ་ན་ལ་བརྟེན་འདུག་ནའང་། དེང་སང་ནི་ཕུག་ལུགས་པའི་རྗེས་འབྲང་རྣམས་ཀྱང་མོན་པ་ཏྲོོ་པས་གསུང་རབ་ལ་ཞུས་དག་བྱས་པའི་དཔེ་ལྟར་བྱེད་མཁན་མང་བ་རྟགས་སུ་བཀོད་ནས་བྱེད་རྩིས་ཀྱི་ཟླ་སྐར་སོགས་ལུང་སྟོན་པར་སྣང་མོད། གཟུར་གནས་ཀྱི་བློ་ལྡན་ཞིག་གིས་བརྟགས་ན་ཉི་དག་གི་ཆ་ཤས་མ་དག་པའི་དབང་གིས་ཉི་སྐར་འཕྱུགས་ལ། དེ་ལ་བརྟན་ནས་ཟླ་བའི་སྐར་མའང་སྐར་མ་རེ་རེ་སྔོན་དུ་འགྲོ་བ་འདི་མ་དག་པ་རིགས་པས་འགྲུབ་པས། ཟླ་སྐར་ཡང་གྲུབ་པའི་མཐའ་ལ་བརྟེན་པར་རིགས་སོ། །དཔལ་འཆི་མེད་བདེ་བས། ཕུག་ལུགས་ལ་གྲུབ་རྩིས་ཀྱི་ཟླ་སྐར་འདས་པར་བྱེད་ཅེས་གསུངས་པའི་རྒྱུན་ལྟར་ན། བྱེད་རྩིས་དང་སྐར་མ་མཐུན་པ་འོང་རྒྱུར་སྣང་ཡང་། བླ་རྩིས་གར་དབང་བ་སོགས་ཕལ་ཆེར། སྐར་མ་ད་ལྟར་བར་མཛད་ལ། མིག་སྐར་དང་བསྟུན་ཚེ་མཚན་མོ་བྱེད་རྩིས་དང་མཐུན་པས། ཉིན་མོ་གྲུབ་རྩིས་ཀྱི་ཟླ་སྐར་ད་ལྟར་བ་དང་འགྲིག་པར་རྗེས་སུ་དཔག་ནུས་པས་ན། ད་ལྟ་ལག་ལེན་དུ་དེ་ལྟར་བྱེད་ནའང་། ལུགས་མི་འདྲ་བར་གསུང་བ་པོ་གཉིས་ཀ་རྗེས་འཕྲིན་ལས་ཞབས་ཀྱི་དངོས་སློབ་ཡིན་པས། ཅུང་ཟད་ཐེ་ཚོམ་གྱི་གཞི་འདུག་པར། བློ་གྲོས་དང་ལྡན་པ་རྣམས་ཀྱིས་དཔྱད་པར་འཚལ་ལོ། །དེ་ལྟར་རྩིས་ཀྱི་དཀའ་གནས་ཀྱི་འཕྲོས་དོན་ལ་སྔོན་གྱི་མཁས་པ་ཆེན་པོ་ཀུན་གྱི་ཚད་མའི་(༢༢ན)
གནས་སུ་གྱུར་པ་ཤོང་པང་བུ་གསུམ། ཕྱིས་ཀྱི་མཁས་པ་སྟག་ཚང་ལོ་ཆེན། ཞ་ལུ་ལོ་ཆེན་རྣམས་དང་། ལ་ལར་ལེགས་པར་བཤད་ཅིང་འགའ་ཞིག་ཏུ་ཉེས་བཤད་སྣ་ཚོགས་ཀྱང་ཡོད་པའི་སྔོན་གྱི་མཁས་པ་ཇོ་བོ་ནང་ཀུན་མཁྱེན་དོལ་པོ་བ་དང་། ཐམས་ཅད་མཁྱེན་པ་བསོད་ནམས་རྒྱལ་མཚན་སོགས། ཕྱིས་ཀྱི་མཁས་པ་ཡེ་བཟང་རྩེ་པ། བྱང་པ་རིགས་ལྡན་རྣམ་རྒྱལ་གྲགས་བཟང་། མཁས་གྲུབ་དགེ་ལེགས་དཔལ་བཟང་། པཎ་ཆེན་བྱམས་པ་གླིང་པ། ཁྲུས་ཁང་ལོ་ཙཱ་བ། ཀརྨ་པ་མི་བསྐྱོད་རྡོ་རྗེ། འབྲུག་པ་ཐམས་ཅད་མཁྱེན་པ་པདྨ་དཀར་པོ་སོགས་དུས་ཞབས་ཆེན་པོར་ཞལ་གྱིས་བཞེས་པ་རྣམས་ཀྱི་ཡིག་ཆ་དང་གསུང་རྒྱུན་རྣམས་ལ་འཐད་མི་འཐད་ཀྱི་དཔྱད་པ་བློ་དམན་བདག་འདྲས་རང་བློའི་སྟོབས་ཀྱིས་བྱ་བར་ག་ལ་ནུས། འོན་ཀྱང་ཟུང་འཇུག་སྒྱུ་མའི་གར་མཁན་དུས་ཞབས་པ་ཆེན་པོ་མཁས་གྲུབ་ནོར་བཟང་རྒྱ་མཚོའི་ཞལ་སྔ་ནས་དང་། དང་པོའི་སངས་རྒྱས་ཀྱི་ཤིང་རྟ་པ་ཆེན་པོ་ལྷུན་གྲུབ་རྒྱ་མཚོ་གཉིས་ཀྱི་ལེགས་བཤད་ལ་བརྟེན་ནས་ཅུང་ཟད་སྤྲོ་བར་ནུས་ནའང་། ཧ་ཅང་ཡི་གེ་མངས་པས་འཇིགས་པ་དང་། དངོས་མེད་ཀྱི་དོན་རྒྱས་བཤད་ཀྱི་ཁོངས་སུ་འཐོར་དོགས་པས་རེ་ཞིག་བཏང་སྙོམས་སུ་གཞག་སྟེ་དྲིས་ལན་གྱི་དོན་སྙིང་པོར་དྲིལ་ན། དེང་སང་གངས་ཅན་གྱི་ལྗོངས་འདིར་རྩིས་རིགས་སྨྲ་བ་མང་པོར་ཚོགས་པའི་སོ་སོའི་ལུགས་ལ་བརྟགས་ཚེ་འགོས་ལོ་སོགས་མང་པོས་ཟླ་བཤོལ་རགས་པ་ཙམ་འཐོན་རྩིས་ཀྱི་ཟླ་བ་སུམ་ཅུ་མ་ལོངས་པ་ནས་བཤོལ་བར་བཤད་པའི་རྗེས་སུ་འབྲངས་ནས་ལུང་སྟོན་པ་ཐམས་ཅད་མ་ནིའི་ཟླས་ལུང་སྦྱོར་དངོས་རྗེས་ཚང་ཙམ་ཡང་མི་ཤེས་པའི་མཐོང་ཐོས་དྲན་རེག་ཏུ་གྲགས་པའི་བླ་ཆེན་གྱི་སྐྱབས་གནས་དང་འདྲ་བས་(༢༢བ)
ཉེས་པ་མངོན་སུམ་བྱེད་བཞིན་དུ། གཡོ་ཅན་ཚིག་གིས་ཕ་རོལ་སླུ། །ལྷ་ཆེན་སྨྲེ་སྔགས་ཤོར་བ་ལ། །སྡུག་བསྔལ་བདེན་པ་བསྒྲགས་སོ་ལོ། །ཞེས་པའི་དོན་ཐོག་ཏུ་བབས་པར་སྣང་། ཆག་ལོ་རིན་ཆེན་ཆོས་རྒྱལ་གྱིས། རབ་བྱུང་ཤིང་ཕོ་བྱི་བ་ནས། །ས་ཕོ་འབྲུག་གིས་ཐར་ཐུག་པར། །ལོ་ནི་དྲུག་ཅུ་རྩ་ལྔའི་བར། །ཟླ་བ་བདུན་བརྒྱ་བརྒྱད་ཅུ་ལ། །ཟླ་བ་ཕྱེད་བཅས་སོ་གཉིས་ན། །ཟླ་བཤོལ་རེ་རེ་འབྱུང་བའི་ཕྱིར། །ཟླ་བཤོལ་ཉི་ཤུ་རྩ་བཞིའོ། །ཞེས་པའང་རབ་བྱུང་མེ་ཡོས་ལ་སྦྱོར་རྒྱུ་ཤིང་བྱིར་སྦྱར་བས་ནོར་ཞིང་བཤོལ་ཡང་རགས་རྩིས་སོ། །འགའ་ཞིག་ཟླ་དག་འཕར་བའི་ཚེ་ཟླ་བ་ཕྱི་མ་འདོན་ཟེར་བ་ནི་ལྕ་རློན་པར་ཡོད་པ་རྒྱུ་མཚན་དུ་བྱས་པ་འདྲ། ལ་ལ་དག་དབུས་ནས་བཤོལ་པ་དང་མཐའ་ནས་བཤོལ་བའི་དོན་མ་གོ་བར། མདའ་རོའི་ལྷག་མར་གཅིག་བྱུང་ཚེ་ངོ་ཐོག་འདོན་པ་དང་། ཐིག་ཤར་ཚེ་ཟླ་བ་རྟིང་མ་འདོན་ཟེར་བ་ཡང་མུན་ནག་གི་འདོམ་འཇལ་ཏེ། ཟླ་དག་འཕར་ནས་ཀྱང་ཟླ་བ་མ་བཏོན་ན་ཉི་མ་ཤར་ཟིན་ནས་ད་དུང་ནམ་མ་ལངས་ཟེར་བ་དང་འདྲའོ། །བྱེད་རྩིས་པ་ཁ་ཅིག་གིས་གསང་བའི་མན་ངག་ཡིན་ཟེར་ནས་ཟླ་དག་འཕར་ནས་བརྩིས་པའི་བདུན་ཟུར་གྱི་སྟེང་དུ་བཤོལ་འདོན་པ་རིག་པའི་རྩལ་གྱིས་འཐོན་པ་མི་འདུག་ནའང་། འ་ཞ་བོས་པས་བླ་གཡུའི་མངོན་ཤེས་ལྟར་སྟབས་རང་འགྲིག་ཏུ་སོང་ནས་མཁས་པའི་ཕྱག་ལེན་དང་འགྲིག་པར་གདའ། མཁས་རློམ་ཁ་ཅིག་ཁྱིམ་ལོ་ཕྱེད་བཅས་སོ་གཉིས་ནས་ཚེས་ལོ་རེ་རེ་འཕར་བས་མཐར་ལོ་བཤོལ་འོང་ཟེར་བ་ནི་ཤིན་ཏུ་མ་བརྟགས་པ་སྟེ། ཁྱིམ་ཟླ་ཕྱེད་བཅས་སོ་གཉིས་ཀྱི་དུས་ཟླ་བཤོལ་མ་བཏོན་ན་ཟླ་བ་སུམ་བརྒྱ་དང་བརྒྱད་ཅུ་གྱ་བཞི་ལ་ལོ་བཤོལ་ཐོན་འོང་། དེ་ལྟར་བྱས་ན་ཟླ་བ་བརྒྱ་དང་སོ་གཉིས་ཙམ་ན་སྟོན་གྱི་དུས་(༢༣ན)
སུ་ཤིང་རྩི་ཁ་འབུས་ཤིང་དགུན་གྱི་ཚེ་ཆུ་བོ་བསྒང་རྒྱས་འོང་པའི་ཕྱིར་དུས་ཚིགས་ཐམས་ཅད་འཕྱུགས་འགྲོ་ལ། ཟླ་བ་ཕྱེད་བཅས་སོ་གཉིས་ནས་བཤོལ་བཏོན་པས་ཚེས་ཞག་ལྷག་པོ་ཆུ་རང་སར་སིམ་པ་ལྟར་ལོ་བཤོལ་རྒྱུ་མེད་དོ། །དེ་ལྟར་བཤད་མ་ཐག་པའི་རང་བཟོ་དང་ཡིག་ཧྲུལ་འགའ་ཞིག་ལ་བློ་བཀལ་ཏེ་སྨྲ་བ་དེ་དག་ནི་ཆུ་ཤིང་ལྟར་སྙིང་པོ་མེད་པར་མཐོང་ལ། མཁས་པའི་ཕྱག་བཞེས་ཁུངས་དང་འགྲེལ་བ་ནི་འདི་ལྟ་སྟེ། དངོས་བསྟན་རྒྱུད་ཀྱི་དགོངས་པ་གོང་དུ་བཤད་པ་ལྟར། །སོ་ཡི་ཆ་ཡིས་ངེས་པར་ཕྱུང་གྱུར་པ། །ཞེས་པའི་ཚིག་གི་ནུས་པ་དངོས་བསྟན་སོ་གཉིས་ཡིན་ཡང་། ཞིབ་པར་ཕྱེད་བཅས་སོ་གཉིས་སུ་བྱས་པ་སོ་གཉིས་གཉིས་ཀྱིས་བསྒྱུར་བས་དྲུག་ཅུ་རེ་བཞིར་སོང་། ཕྱེད་པོ་དེ་གཉིས་ཀྱིས་བསྒྱུར་ནས་བསྲེས་པས་མདའ་རོར་སོང་བ་དེས་བགོས་པའི་ནོར་སྟེང་མར་བྱིན་པས་ཁྱིམ་ལོ་ཕྱེད་བཅས་སོ་གཉིས་ཀྱི་ཚེ་ཟླ་དག་གྲངས་མཆོངས་པ་ན་ཆད་པའི་གྲངས་དེ་བསབ་དགོས་པས་ཟླ་བཤོལ་འཐོན་པ་ཡིན་ནོ། །ལུགས་འདིའི་རྗེས་སུ་འབྲང་བའི་མཁས་པ་ཤིན་ཏུ་མང་ཞིང་། ཁྱད་པར་སྨོན་འགྲོ་པཎྜི་ཏ་ཚེ་དབང་དོན་གྲུབ་དང་། རིག་བྱེད་མཁན་པོ་མདར་པ་དགྲ་འདུལ་དོན་གྲུབ་རྡོ་རྗེ་གཉིས་ཀྱི་དྲུང་དུ་དཀར་ནག་རྩིས་ཀྱི་ཟབ་གནད་མཐའ་དག་ལ་ལེགས་པར་སྦྱངས་པའི་གཙུག་ལག་འཛིན་པ་གཞོན་ནུ་སྐལ་བཟང་ལས་ཁོ་བོས་པདྨ་དཀར་པོའི་ཞལ་ལུང་གི་དགོངས་པའི་གནད་རྣམས་ཞིབ་མོར་ཐོས་ཤིང་དཔྱད་པའི་ཚེ། བཤོལ་ཡང་ཟླ་འཕར་དང་བསྟུན་པའི་རྒྱུད་དོན་འཕྱུག་མེད་སྨོན་མདར་སོགས་མཁས་པ་ཚད་ཐུབ་རྣམས་ཀྱི་ཕྱག་ལེན་དུ་མཛད་ཚུལ་གྱི་རྒྱུ་མཚན་ལ་ངེས་ཤེས་རྙེད་པས་ན། ཕྱག་ལེན་འདི་ཉིད་གྲོང་རྩིས་པ་འདྲས་རང་བཟོ་བྱས་པ་མ་ཡིན་པའི་ཡིད་(༢༣བ)
ཆེས་ཀྱི་གནས་སུ་ངེས་པ་རྙེད་དོ། །དེ་ལྟར་ན་ལུགས་འདི་དང་མི་མཐུན་པ་རྣམས་ཚད་མ་མ་ཡིན་ནམ་སྙམ་པའི་ལོག་རྟོག་ནི་བྱེད་མི་དགོས་ཏེ། རྒྱུད་ཀྱི་དངོས་བསྟན་བྱེད་པའི་རྩིས་ཡིན་ལ་དེ་ལས་གྲུབ་པའི་རྩིས་ཉིད་རྣམ་པར་དག་པས་སོ། །གཞན་ཡང་མཁས་པ་མགུ་བ་སྐྱེད་པའི་ལུགས་གཅིག་ལ། གྲགས་པ་དོན་ལྡན་གྱི་མཁས་གྲུབ་ཆེན་པོ་ནོར་བཟང་རྒྱ་མཚོའི་བཞེད་པ་ཉི་ལྡོག་འཁོར་ལོར་གྲགས་པ། ལོ་གྲངས་བདུན་བརྒྱ་དང་བརྒྱད་ཅུའི་འཁོར་ལོ་ངོ་མཚར་ཅན་རི་མོའི་སྒོ་ནས་སྒྲུབ་ཚུལ། དེ་ལ་གསལ་བྱེད་སྲོང་བཙན་གདུང་གིས་མཐོ་ཞིང་གཞུང་ལུགས་རྒྱ་མཚོའི་ཕ་མཐར་སོན་པ་ལྷ་བཙུན་བསོད་ནམས་དཔལ་བཟང་གིས་མཛད་པ་ཡོད་ལ། འཁོར་ལོའི་རེའུ་མིག་ཕྱི་ནང་བཞི་རིམ་དུ་ཡོད་པའི་ནང་མར་རྒྱ་གར་གྱི་ཉི་ལྡོག །དེའི་ཕྱི་མར་ལོ་བདག །དེའི་ཕྱི་མར་བོད་ཀྱི་ཉི་ལྡོག །དེའི་གཡོན་དུ་བཅུ་གཅིག་གམ་བཅུ་གཉིས་འགོད་པ་ཉི་ལྡོག་གི་ཟླ་བ་སྟོན་བྱེད། དེའི་ཕྱི་མ་ཟླ་བཤོལ་མཐའ་དབུས་གང་ནས་འཐོན་རྣམས་གསལ་བར་བཀོད་དོ། །ལུགས་འདི་དང་གྲུབ་རྩིས་ཀྱི་ཟླ་དག་འཕར་བའི་སྔ་མ་འདོན་པ་གཉིས་གུང་འགྲིག་པས། ལྷ་བཙུན་རིན་པོ་ཆེའི་གསུང་ལས། དེས་ན་གནད་ཀྱི་སྙིང་པོ་ནི། །ཁྱིམ་ཟླ་གནས་གཉིས་བཞག་པ་ཡི། །འོག་མ་མིག་བསྒྱུར་རྩིས་འཕྲོ་བསྲེ། །མདའ་རོས་ཐོབ་པ་སྟེང་དུ་སྦྱིན། །སྟེང་དུ་གཉིས་འཕར་བྱུང་བའི་ཚེ། །རང་གིས་བརྩིས་པའི་ཟླ་བ་ལྷག །དེ་ཡང་ལྷག་མར་གཅིག་བྱུང་ཚེ། །ཟླ་བཤོལ་ཟླ་བའི་དབུས་དང་ནི། །ཐིག་ལེ་ཤར་ཚེ་མཐའ་ནས་བཤོལ། །དེ་ཡང་ལོ་གྲངས་བདུན་བརྒྱ་དང་། །བརྒྱད་ཅུའི་ཉི་ལྡོག་ཟླ་བཤོལ་གྱི། །ཁྲ་མ་གཟིགས་པས་མངོན་སུམ་འགྲུབ། །ཅེས་གསུངས་སོ། །ཟླ་བ་སྔ་མ་ལ་བཤོལ་ཐོན་ཟིན་པའི་ནུས་པས་ཟླ་བ་རྟིང་མ་ལ་ཟླ་དག་འཕར་བ་ཡིན་ཞིང་། མདའ་རོའི་ལྷག་མར་གཅིག་བྱུང་བ་ན་ཟླ་དག་(༢༤ན)
འཕར་བའི་ཟླ་བ་དེ་ཤར་ཚེ་ཟླ་བཤོལ་བྱུང་ནས་ཟླ་བ་ཕྱེད་སོང་བ་ཡིན་ལ། མདའ་རོའི་ལྷག་མར་ཐིག་ཤར་ཚེ་ཟླ་བཤོལ་རྫོགས་པ་དང་ཟླ་དག་འཕར་བའི་ཟླ་བ་དེ་ཤར་བ་དུས་མཉམ་པའི་དོན་ཡིན་ནོ། །གཞན་ཡང་འདས་ཟླ་སྲེ་པའི་སྐབས་ཟླ་དག་འཕར་བའི་ངོ་ཐོག་གི་ཟླ་བ་དེ་མི་སྲེ་བས་ཀྱང་ཟླ་བ་གོང་མ་བཤོལ་བའི་སྒྲུབ་བྱེད་བླ་ན་མེད་པའོ། །ད་ལྟའི་རྩིས་རིག་ཕལ་ཆེར་དང་། འཇིག་རྟེན་རྒན་པོ་ཚོད་ཅན་གྱི་ཁུར་འཛིན་ཐམས་ཅད་མགྲིན་གཅིག་ཏུ་ཕྱེད་བཤོལ་ཡོད་ཅེས་གླེང་བའི་ཞེ་ཕུགས་ལ་ཕྱེད་ཟླ་འཐོན་དུས་ཞག་བཅོ་ལྔ་ཙམ་ཞིག་རང་འཐོན་པའི་ཉམས་ཤར་ནས། ད་ལོའི་སྔ་ཕྱིའི་བབས་གང་ལ་བལྟས་ཀྱང་ཟླ་བ་ཧྲིལ་པོའི་ཡུན་ཙམ་འཐོན་པ་མི་འདུག་ཟེར་མོད། དེ་དག་ནི་ལོག་རྟོག་གིས་བཏགས་པའི་གཏམ། བཀའ་བརྒྱུད་པའི་བླ་མ་ཞིག་གིས་སྤང་བྱ་གོང་མོ། བླང་བྱ་བྱ་བོན། དགག་བྱ་ཕོ་རོག་ཡིན་ཟེར་བ་དང་འདྲ་བས་དགག་བསྒྲུབ་ཀྱི་ཡུལ་མིན་ལ། ཕྱེད་བཤོལ་ཞེས་པ་དཔེར་ན། ས་ག་ཟླ་བ་ལ་བཤོལ་འཐོན་ཚེ་ཟླ་བ་ཧྲིལ་པོར་བཏོན་ན། མདའ་དུས་ཧོར་ཟླ་ལྔ་པའི་བསྒང་། །ཐག་མ་དུས་མར་སྙེ་མ་འཐོན། །རང་ཅག་གནས་པའི་ས་འདིར་ནི། །དབྱར་གྱི་ཉི་མ་ལྡོག་པའི་དུས། །འདི་ཡི་ཤར་ནུབ་ས་ཡི་ཁྱོན། །ཐ་དད་གྱུར་ན་ཤིང་གྲིབ་ཀྱིས། །བརྟགས་ཏེ་ལྡོག་ཚུལ་ཐ་དད་སྨྲ། །ཞེས་སོགས་ཟླ་བ་ལྔ་པའི་ནང་དུ་འཆར་རྒྱུའི་ཐག་མ་དུས་མར་སྙེ་མ་འཐོན་པ་སོགས་དུས་ཀྱི་སྣང་ཚུལ་རྣམས་ཟླ་བ་བཞི་པར་ཡར་འཕྱུགས་ཆེས་ན། ཟླ་བ་བཞི་པའི་ཚེས་བཅུ་དྲུག་ནས་གནམ་གང་གི་བར་ཚེས་གཅིག་དང་། སྣྲོན་ཟླ་བའི་ཚེས་གཅིག་ནས་བཅོ་ལྔའི་བར་ཚར་གཅིག་འཐེབ་ལ་བཏོན་ན། དུས་ཀྱི་སྔ་ཕྱིའི་བབས་ནས་འགྲིག་པའི་དབང་དུ་མཛད་པ་ཡིན་ཡང་། དངོས་སུ་འདོན་མི་ཐུབ་སྟེ། དེ་ལྟར་བྱས་ན་གནམ་གང་ལ་ཟླ་བ་ཉ་ཞིང་། ཚེས་བཅུ་བཞི་ལ་དགུ་ཞལ་ཡོད་པ་ཞིག་གནག་(༢༤བ)
རྫི་རྒན་པོ་ཡན་ཆད་ཀྱིས་མངོན་སུམ་དུ་མཐོང་ནས་སྨོད་པའི་ཡུལ་དུ་འགྱུར་ཞིང་། འཇིག་རྟེན་གྱི་གྲགས་ཚོད་འགོག་མི་ནུས་པས། དོན་གྱིས་འཐོབ་ཀྱང་ལག་ལེན་དུ་བྱེད་མི་རུང་ངོ་། །རང་ལུགས་ཐུན་མོང་མ་ཡིན་པ་ཕུག་ལུགས་ཀྱི་ཕྱག་བཞེས་ནི། གོང་དུ་བཤད་པ་ལྟར་ཞག་གསུམ་གྱི་རྣམ་གཞག་གི་དོན་དྲིལ་ན། ཞག་གསུམ་སོ་སོའི་གྲངས་ལ་མང་ཉུང་ཡོད་ཀྱང་དོན་དུ་ཚེས་ཞག་སུམ་བརྒྱ་དོན་གཅིག་དང་། ཁྱིམ་ཞག་སུམ་བརྒྱ་དྲུག་ཅུ་གཉིས་ཡུན་ཚད་སྙོམས་པའི་རྒྱུ་མཚན། དཔེར་ན། རེ་ཁ་ཡུག་རིང་ཐུང་སྙོམས་པ་གཉིས་སྟེང་འོག་ཏུ་བྲིས་པའི་རེ་ཁ་སྟེང་མར་རིའུ་མིག་ཞེང་ཆེ་བ་བཅུ་གཉིས་དང་། འོག་མར་རིའུ་མིག་ཞེང་ཆུང་བ་བཅུ་གསུམ་བྱས་ན་རིའུ་མིག་གི་གྲངས་ལ་ཁྱད་ཡོད་ནའང་། མཐའི་ཚད་ལ་རིང་ཐུང་མེད་པར་སྙོམས་འགྲོ་བ་ལྟར། ཁྱིམ་ཟླ་ཕྱེད་དང་སོ་གཉིས་ཀྱི་ཚེ་ཟླ་རེ་རེ་འཕར་བས་ཚེས་ཟླ་ཕྱེད་དང་སོ་གསུམ་ནས་ཚེས་ཞག་ལ་ཉི་ཁྱིམ་མ་རྫོགས་པའི་རིང་ཐུང་ཤོར་བ་དེའི་ཉེས་པ་སེལ་འགྲོའོ། །དེ་ལྟར་ཟླ་བ་སོ་སོའི་དབུགས་ཟླ་བ་ལྔ་མའི་ཉེར་བརྒྱད་ཙམ་ལ་ཐོབ། ཁྱིམ་ངོ་ཐོག་གི་ཚེས་ལྔ་ཙམ་ལ་སླེབ། བསྒང་ཚེས་བཅུ་དྲུག་ཙམ་ལ་འོང་དགོས་རྒྱུ། ལོ་གཅིག་ལ་ཚེས་ཞག་སུམ་བརྒྱ་དྲུག་ཅུར་བྱས་པས་ཉི་མས་ཁྱིམ་འཕོ་མ་ནུས་པར་རིམ་གྱིས་ཕྱི་གྲོས་སུ་ལུས་པས་བཤོལ་འཐོན་ཁར་བསྒང་ཚད་གནམ་སྟོང་དང་། བཤོལ་འཐོན་མ་ཐོག་བསྒང་ཚད་ཚེས་གཅིག་གཉིས་ལ་འོང་བ་མངོན་སུམ་དུ་གྲུབ་པས་ཟླ་བའི་བསྒང་ཚད་ཕྱི་མའི་ཚེས་གཅིག་ལ་ཤར་དུས་སྔ་མ་བཤོལ་དགོས་ཏེ། མ་བཤོལ་ན་མགོ་ཟླའི་བསྒང་ཚད་རྒྱལ་ཟླར་འཕོས་པ་དེའི་ཚེ་དགུན་ཉི་ཟླ་བ་བཅུ་གཉིས་པ་ལ་ལོག་འགྲོ་བར་ཁས་ལེན་དགོས་པས་དུས་མི་འགྱུར་བའི་གཟེར་མངོན་སུམ་དུ་འཕྱུག་པ་སོགས་གནོད་བྱེད་མི་ཟད་པ་ཐོག་ཏུ་འབབ་བོ། །གོང་དུ་རྗེ་ནོར་བཟང་(༢༥ན)
པའི་ལུགས་ཀྱི་ཉི་ལྡོག་འཁོར་ལོའི་གསལ་བྱེད་དུ། ད་ལྟའི་རིའུ་མིག་འོག་མ་ཡི། །གཡོན་དུ་དྲག་པོ་ཕལ་ཆེར་བཀོད། །ཟླ་ལྷག་ཡོད་ཚེ་སྐབས་འགའ་རུ། །ཉི་མ་འགོད་པར་མཛད་པ་ནི། །ཡུལ་འདིའི་དགུན་ཉི་ལྡོག་པ་ཡི། །ཟླ་བའི་ངོས་འཛིན་ཡིན་པར་ངེས། །ཞེས་པ་བྱུང་བས། ཕུག་ལུགས་ཀྱི་ཕྱག་ལེན་ཐུན་མོང་མ་ཡིན་པ་འདི་ལས་ཟླ་བ་དྲུག་གི་བཤོལ་འཕྱི་བས་ན། དགུན་ཉི་ཟླ་བ་བཅུ་གཉིས་པའི་ཚེས་བདུན་ཙམ་ལ་ལོག་པ་ཞིག་འབྱུང་བས་དེ་ལ་དགོངས་ནས་ཉི་མ་བཀོད་པ་ཡིན་ཞིང་། འཇིག་རྟེན་ཁམས་ལེར། གང་ཕྱིར་རི་ལ་སྐྱེ་བོ་རྣམས་ཀྱི་ཉིན་མཚན་མཉམ་པར་འགྱུར་ཏེ་ལུག་ཉི་སྲང་གི་ཉི་མ་ལའོ། །ཞེས་ཉིན་མཚན་མཉམ་པ་ལུག་དང་སྲང་གིས་ལོངས་སྤྱོད་པའི་སྐབས་སུ་བསྟན་ཅིང་། དེ་བཞིན་དུ་བགྲོད་པ་མཐར་ཐུག་པ་གཉིས་ཀྱང་ཀརྐཊ་དང་། ཆུ་སྲིན་གྱི་ཁྱིམ་དུ་བཤད་པས། དབྱར་དགུན་གྱི་ཉི་ལྡོག་ཀྱང་ཧོར་ཟླ་དྲུག་པ་དང་བཅུ་གཉིས་པ་ལ་འབྱུང་བའི་ཕྱིར་ན། གོང་དུ་དུས་མི་འགྱུར་བའི་གཟེར་ཞེས་བཤད་པ་མི་འཐད་དོ་སྙམ་ན། འཛམ་གླིང་ཆུང་ངུ་འདི་ཡོངས་སུ་རྫོགས་པའི་ཉི་མ་དུས་གཅིག་ལ་ལྡོག་ན། ཁམས་ལེའི་དངོས་བསྟན་དང་མི་མཐུན་པའི་སྐྱོན་འདི་འབྱུང་ནའང་ལྷོ་གླིང་འདིའི་ཁྱོན་ཡོངས་སུ་རྫོགས་པར་མ་ཟད། ལྷོ་གླིང་ཤར་མ་ནས་དབུས་དྲང་ཐད་ཀྱི་བར་ལ་ཉི་ལྡོག་སུམ་ཅུ་ལྷག་ཙམ་འབྱུང་བར་ཐམས་ཅད་མཁྱེན་པ་ནོར་བཟང་རྒྱ་མཚོས་སློབ་དཔོན་ཨ་བྷ་ཡའི་དུས་འཁོར་ལ་འཇུག་པའི་ཁུངས་དང་བཅས་ཏེ་གསུངས་པས་ཉེས་པ་དེས་འཇུག་གོ །དེ་ལྟར་རྒྱུད་ནས་གསུངས་པའི་བགྲོད་པ་གཉིས་དང་མཉམ་པ་གཉིས་སོགས་བསྟན་པ་ཐམས་ཅད་ལྷོ་གླིང་དབུས་མའི་ཚངས་ཐིག་དྲང་པོ་ལ་དགོངས་ཏེ་གསུངས་ལ། རྗེས་འཇུག་གི་མཁས་པ་རྣམས་ཀྱིས་དེའི་ཤུགས་ལས་ཉི་ལྡོག་སུམ་བརྒྱ་དྲུག་ཅུ་འབྱུང་བའི་ཚུལ་རྟོགས་ཏེ། རང་ཅག་(༢༥བ)
གནས་པའི་བོད་ཀྱི་ཡུལ་འདིར་འཁྲིག་པ་དང་གཞུའི་ཁྱིམ་དུ་ཉི་མ་ལྡོག་པར་ཁས་བླངས་པ་ཡིན་ནོ། །འོ་ན་ཐམས་ཅད་མཁྱེན་པ་ནོར་བཟང་རྒྱ་མཚོས། འདས་ལོའི་ཐོག་མ་རབ་བྱུང་མེ་ཡོས་ལོ་དྲུག་ཅུ་སྐོར་བདུན་དང་། ལོ་རྐྱང་ཉི་ཤུ་པ་མི་ཟད་པ་མེ་ཕོ་ཁྱིའི་དགུན་ཉི་ལྡོག་དུས་ལ་ཐུར་ཤིང་གིས་བརྟགས་པས། ལོ་དེའི་ཧོར་ཟླ་བཅུ་གཉིས་པའི་ཚེས་ལྔའི་ཉིན་ཐུར་ཤིང་གི་གྲིབ་མ་བྱང་ནས་ལོག་པར་མངོན་སུམ་གྱིས་མཐོང་བས་དེའི་སྔོན་མའི་ཚེས་བཞི་དེ་ལ་རང་ཅག་རྣམས་གནས་པའི་ས་ཁྱོན་འདིར་དགུན་ཉི་ལོག་པར་གྲུབ་ལ། ཞེས་བཀའ་སྩལ་པ་ལྟར་ན་ཧོར་ཟླ་བཅུ་གཉིས་པའི་ཚེས་བཞི་ལ་དགུན་ཉི་ལྡོག་པ་ཞིག་འབྱུང་བས། གོང་གི་དམ་བཅའ་དེ་ལ་གནོད་དམ་སྙམ་ན། མི་གནོད་དེ། རྒྱུད་ལུགས་ཀྱི་ཟླ་བཤོལ་ཟླ་དག་འཕར་བའི་དབང་དུ་བཏང་ཞིང་། ལུགས་དེ་དང་ཕྱོགས་མཐུན་ཙམ་དུ་ཉི་ལྡོག་འཁོར་ལོའི་ཕྱག་ལེན་མཛད་པས། ལུགས་དེའི་ཟླ་བཤོལ་འཐོན་པ་ཉེ་བའི་ཟླ་བ་བཅུ་གཉིས་པའི་ནང་དུ་ཉི་ལྡོག་གི་རི་མོ་ཤར་བ་ཡིན་ལ། ཟླ་བ་བཅུ་གཉིས་ལ་དེ་ནི་བོད་ཀྱི་ཡུལ་འདི་ཁོ་ནའི་དབང་དུ་བཏང་བའི་ཉི་ལྡོག་དང་བསྟུན་པའི་ཟླ་བ་བཅུ་གཉིས་པ་མ་ཡིན་པས་སོ། །འདི་དག་ལས་འཕྲོས་པའི་དཀའ་གནས་ཀྱི་ལེགས་བཤད་ནི་རྗེ་ནོར་བཟང་རྒྱ་མཚོས་མཛད་པའི་ཉི་ལྡོག་གསལ་སྒྲོན་སོགས་ལས་ཤེས་པར་བྱའོ། །གཞན་ཡང་ཉི་མས་འཛམ་གླིང་ཆུང་ངུ་འདིར་ལྡོག་ཐེངས་གཅིག་ལས་མི་འོང་ཞིང་། དེ་རྒྱུད་ནས་བཤད་པ་དང་མཐུན་དགོས་པ་ཡིན་ན། རྒྱུད་ནས་བཤད་པའི་དགུན་ཉི་ལྡོག་པའི་ཚེ་ལྷོ་ཕྱོགས་རྟ་གདོང་གི་མེ་རི་ལ་བཅར་ཏེ་དེ་ནས་ཕར་ཅུང་ཟད་ཙམ་ཡང་འགྲོ་མི་ནུས་པའི་ལྷོ་བགྲོད་མཐར་ཐུག་པ་ཡིན་པས། དེའི་དུས་ལས་ས་ཆུ་འཁྱགས་ཤིང་གྲང་ངར་ཆེ་བ་མེད་ལ། ད་ལྟ་བོད་ཀྱི་ཡུལ་འདིར་ཉི་མ་ལོག་ནས་ཞག་ཉི་ཤུ་རྩ་བདུན་(༢༦ན)
གྱི་བར་དགུ་འདྲེན་པ་ཞེས་ངེས་པར་གྲང་དུ་འགྲོ་བ་ཀུན་ལ་གྲགས་ཤིང་མངོན་སུམ་གྱིས་གྲུབ་པས། ས་འདིར་འོས་པའི་ཟླ་བཤོལ་ཉི་ལྡོག་དུས་སྦྱོར་སོགས་རིགས་པའི་ལམ་ནས་འདྲེན་དགོས་པ་མངོན་སུམ་གྱིས་གྲུབ་པ་ལྟ་བུའོ། །དཔེར་ན། ཉི་མ་ནམ་སོའི་ཆུ་ཚོད་ཞེ་ལྔའི་སྟེང་ནས་སྐྱེས་པས། ཁམས་ལེར། དུས་ཀྱི་རྒྱུ་སྐར་རྐང་པ་གསུམ་བཅས་བུ་ལོན་དག་སྟེ་ཉི་མའི་ལོངས་སྤྱོད་དབུས་ནས་སྤྱད་པར་བྱ། ཞེས། དྲུག་དང་ཞེ་ལྔས་སྐྱེས་ཁྱིམ་སྦྱོང་བར་བསྟན་ཅིང་། ནམ་སོའི་རྐང་པ་གསུམ་པའི་མཐའ་ནས་ཉི་མ་སྐྱེས་པ་དང་ལྷོ་བགྲོད་ཀྱི་འགོ་བརྩམས་པ་ཡིན་པས། རྩིས་རིག་སྨྲ་བའི་གཙུག་རྒྱན་དཔལ་མགོན་འཕྲིན་ལས་ཀྱིས་ཐུར་ཤིང་གི་གྲིབ་མས་ཞིབ་མོར་གཏན་ལ་ཕབ་པ་ན། བོད་ཡུལ་འདིར་སྐར་མ་ལག་གི་རྐང་པ་དང་པོའི་ཆུ་ཚོད་དྲུག་པའི་སྟེང་ནས་ལྷོ་བགྲོད་ཀྱི་མགོ་བརྩམས་པ་མངོན་སུམ་གྱིས་གྲུབ་པས། ཕྱག་ལེན་ཐུན་མོང་མ་ཡིན་པའི་སྐྱེས་ཁྱིམ་ཟླ་དུས་ཀྱིས་སྦྱོང་བའང་ཤེས་ནུས་སོ། །དེ་བཞིན་དུ་དུས་སྦྱོར་ཡང་། གངས་ལྡན། ཀཻ་ལ་ཤ །རྒྱ་ནག །ལི། བོད། འཕགས་ཡུལ་ཏེ་ཡུལ་དྲུག་ཏུ་དུས་སྦྱོར་མི་འདྲ་བའི་དབང་གིས་རྗེ་འཕྲིན་ལས་ཞབས་ཀྱིས། དེ་ལྟར་དུས་སྦྱོར་ས་གཞན་འབྱུང་པོའི་བྱ། །འདིར་འོས་རྟ་ལྗང་རྒྱལ་པོས་ཕྱོགས་མཐར་དང་། །ཅེས་དང་། སྔོན་མེད་ལེགས་པར་བཤད་པ་ཡི། །ས་འདིར་འོས་པའི་དུས་སྦྱོར་དག །ཅེས་རྒྱ་བལ་ནས་འགྱུར་བའི་དུས་སྦྱོར་གྱི་ཚིག་ཟིན་ཙམ་ལ་མ་བརྟེན་པར་རིག་པའི་འཕྲུལ་བླ་ན་མེད་པ་མཛད་དོ། །བསྒང་ཚད་འདོན་ལུགས་ཀྱང་ཕུག་ལུགས་ཀྱི་རྗེས་འབྲང་མང་དུ་སྣང་བར། ཁོ་བོས་ཟུར་ཆེན་འཁོར་ལོའི་མགོན་པོའི་དྲུང་དུ་བླ་བརྩིས་པ་གར་དབང་ཕུན་ཚོགས་ནས་བརྒྱུད་པའི་སྐར་རྩིས་མཐའ་ཆོད་པར་སྦྱངས་ཤིང་། རྗེས་སུ་གཡུ་ལོ་གཡུལ་རྒྱལ་བའི་མན་ངག་གཉག་བན་ངག་དབང་འཇམ་དཔལ་བློ་གྲོས་ལས་ཐོས་པ་གཉིས་ཀར་ཁྱིམ་འཕོ་དབུགས་ཐོབ་(༢༦བ)
བསྒང་ཚད་གསུམ་ག་ཉི་བར་ལ་ངོས་འཛིན་ཅིང་། ཕུག་ནས་ལྷུན་གྲུབ་རྒྱ་མཚོ་དང་དཔལ་མགོན་འཕྲིན་ལས་གཉིས་ཀའི་བཞེད་པར་མཛད། དེ་ལ་འདོད་ཆ་དང་འདོད་ཆའི་ལྔ་ཆ་གནོན་ལུགས་བླ་རྩིས་གར་དབང་བའི་མན་ངག་སོགས་ངོ་མཚར་བ་ཁོང་དུ་ཆུད་པ་དང་། ཆུ་རྟ་གཡས་རུ་གཙང་གི་རྒྱལ་ཁམས་མྱུལ་བར་ཕྱིན་སྐབས་བོད་ཡུལ་གྱི་པཎྜི་ཏ་ཆེན་པོ་སྨོན་འགྲོ་ལོ་ཙཱ་བ་རིག་གནས་རྒྱ་མཚོའི་འཕྲེང་བ་འཛིན་པ་ཞེས་སྐུ་ཡོན་དུ་མ་ཟད་སྐུ་ཚེའང་ཕ་མཐར་བརྒལ་བ་དེ་ལས་དཀའ་གནས་མང་པོའི་ཞུན་ཐར་བཅད་ཚེ་ཕུག་ལུགས་ལ་གསར་རྙིང་གཉིས་སུ་ཡོད་པའི་ཞལ་ལུང་ཕུག་རྙིང་པ་དང་། དེར་མི་གསལ་བའི་མན་ངག་ཟུར་པ་རྣམས་དཔལ་མགོན་འཕྲིན་ལས་པས་གསལ་བར་མཛད་པའི་སྐོར་ཕུག་གསར་བ་ཡིན་ཞེས་ཟབ་གནད་འདི་བླ་རྩིས་པ་ཆེན་པོ་འཕྲིན་ལས་ཞབས་ཀྱི་ལུགས་སུ་བཞེད་པར་འདུག་པས་ཀྱང་བཤད་མ་ཐག་པའི་ལུགས་འདི་ཁུངས་ཐུབ་པར་སྣང་། གཞན་ཡང་མཁས་པ་ཟུར་མཁར་བའི་གསུང་ལས། ཚུལ་འདི་ལྟར་ན་སྤུར་རྒྱལ་འདར། །གཞན་ཀུན་ལ་ཕྱོགས་མེད་གཏོང་བ་དང་། །རང་ལེགས་བཤད་འཚོལ་བར་རློམ་ན་ཡང་། །དོན་སྦྱིན་ལེན་གཉིས་ཀ་གསེར་ལས་དཀོན། །ཞེས་པ་ལྟར། རིག་པའི་གནས་མང་པོར་སྦྱངས་ཟེར་བ་ཕྲད་ཚད་ལ་དྲི་བ་དུ་མ་བྱེད་ཀྱིན་ཡོད་པས། ཕུག་ལུགས་པར་ཁས་འཆེ་བ་འདྲ་ལ་རྩད་བཅད་ཚེ་ལ་ལ་ཁྱིམ་འཕོ་ཉི་བར་དང་གཞན་གཉིས་ཉི་དག་ལ་བྱེད་ཟེར་བ་དང་། འགའ་ཞིག་ནི། དེ་ཡང་སྐྱེས་ཁྱིམ་ཟླ་དུས་ཀྱི། །སྦྱངས་པའི་ཉི་དག་སྐར་དབྱུག་ཏུ། །མཁའ་རོ་མེ་ཤར་གསན་པའི་བསྒང་། །ཞེས་སོགས་དངོས་བསྟན་ལ་ཞེན་ནས་མན་ངག་གབ་པ་མ་རྟོགས་པར་མཐོང་བས། མཁས་པ་ཇི་ལྟར་ཐབས་རྡུགས་ཀྱང་། །བླུན་པོ་འཇུག་པའི་ལམ་མི་འགྲོ། །ཆར་འདོད་བྱིའུ་ཁ་སྐོམ་ཡང་། །ས་ལ་འབབ་པའི་ཆུ་མི་འཐུང་། །ཞེས་པ་ལ་བསམས་ནས་ཡིད་བརྟན་དུ་མ་བཟུང་ངོ་། །
དྲི་བ་གསུམ་པ། རྒྱ་ལུགས་ཀྱི་རྩིས་གཞུང་ལས་སྐོར་འགོའི་གཙོ་ཆེ་སྐྱེ་རྨེ་འཛིན་པ་ལ་བརྒྱད་ཅུ་སྐོར་དང་དྲུག་ཅུ་སྐོར་ཞེས་ལུགས་གཉིས་ལས་གང་ཞིག་ཁུངས་དང་ལྡན་མིན་གྱི་དྲིས་ལན།
དྲི་བ་གསུམ་པ།རྒྱ་ལུགས་ཀྱི་རྩིས་གཞུང་ལས་སྐོར་འགོའི་གཙོ་ཆེ་སྐྱེ་རྨེ་འཛིན་པ་ལ་བརྒྱད་ཅུ་སྐོར་དང་དྲུག་ཅུ་སྐོར་ཞེས་ལུགས་གཉིས་ལས་གང་ཞིག་ཁུངས་དང་ལྡན་མིན་གྱི་དྲིས་ལན།དྲི་བ་གསུམ་པ་ལ། གསུམ་པ་རྒྱ་ནག་རྩིས་ཀྱི་གཞུང་ལུགས་འདི། །སྔ་འགྱུར་ཕྱི་འགྱུར་བར་འགྱུར་ཡང་འགྱུར་བཞི། །བོད་དུ་འགྱུར་བ་རླུང་ལྟར་གྲགས་མོད་ཀྱི། །སྐོར་འགོའི་གཙོ་ཆེ་སྐྱེ་རྨེ་འཛིན་པ་ལ། །བརྒྱད་ཅུ་སྐོར་དང་དྲུག་ཅུ་སྐོར་ཞེས་པའི། །བཞེད་ལུགས་མི་མཐུན་གཉིས་སུ་འདུག་པ་འདི། །དགོངས་པ་ཅན་ནམ་སྔ་ཕྱི་གང་ཁས་ལེན། །སྔ་འགྱུར་བར་འགྱུར་རྒྱུད་རྣམས་གཞིར་བཞག་པའི། །བརྒྱད་ཅུ་སྐོར་ཉིད་དག་པར་ཁས་ལེན་ན། །འགྱུར་ཡང་སྔ་མ་རྒྱུད་ཀྱང་ཁུངས་ཐུབ་ནས། །ད་ལྟ་རྒྱལ་བ་ཤཱཀ་ཐུབ་བསྟན་པ་ལ། །རྨེ་འཕྲེང་བར་མ་ཤིང་བྱི་བཞི་ལྗང་ནས། །བརྒྱད་དཀར་བར་གྱི་དྲུག་ཅུ་འདི་ཉིད་ལ། །སྐྱེ་རྨེ་འཛིན་པ་འཁྲུལ་མེད་ཡིན་པར་གསུངས། །ཕྱི་འགྱུར་རིན་ཆེན་གསལ་སྒྲོན་གཞིར་བཞག་ནས། །དྲུག་ཅུ་སྐོར་ཉིད་དག་པར་ཁས་ལེན་ན། །རྩིས་རྒྱུད་འཁྲུལ་མེད་རིན་ཆེན་ཀུན་འདུས་ལས། །ཤིང་བྱི་གཅིག་དཀར་ནས་གཟུང་སྟེ། །ཆུ་ཕག་གཉིས་ནག་བར་དག་ཏུ། །སམ་ཁ་གསུམ་གྱི་རྨེ་བ་ཚང་། །འཁོར་ཞིང་འཁོར་བ་མ་རྫོགས་པ། །ལྷག་དང་བཅས་པ་འབྱུང་མི་སྲིད། །ཞེས་གསུངས་གཞན་ཡང་མཁས་པ་ཁྱུང་ནག་གིས། བཞི་ནས་བརྒྱད་ཀྱི་བར་དག་གི །རྨེ་བ་གསུམ་ཆད་གང་གིས་གསོ། །ཞེས་གསུངས་དེར་མ་ཟད་དེ་བཀའ་ཐང་ནས། དུས་གསུམ་མཁྱེན་པ་པདྨ་འབྱུང་གནས་ཀྱིས། །བོད་རྩིས་དྲུག་ཅུ་སྐོར་ཞེས་གསལ་སྒྲོན་ཞེས། །རྩིས་རྒྱུད་ཀུན་དང་མི་མཐུན་དར་བར་འགྱུར། །ཞེས་པ་ལོག་པའི་རྩིས་གཞུང་གསུངས་པས། འདི་རྣམས་རྩོད་པ་གང་གི་སྒོ་ནས་སྤོང་། ཞེས་པར། གཙུག་ལག་ཁང་གི་རྩིས་གཉིས་སུ་གྲགས་པའི་ནག་རྩིས་ནི། མཁས་པའི་དབང་པོ་སྟག་ཚང་ལོ་ཙཱ་བས། ནག་རྩིས་ནི་རྒྱ་ནག་ནས་བྱུང་བ་འཇམ་དཔལ་དབྱངས་ཀྱིས་གསུངས་པ་ས་བདག་(༢༧བ)
གི་རིགས་བརྟགས་ལ་ཤིན་ཏུ་ཉེ་བར་མཁོ་ཞེས་གསུངས་པ་ལྟར། རིག་པའི་གནས་མི་ཆུང་བ་ཞིག་ཡིན་ཡང་། དེང་སང་འཇིག་རྟེན་རྨོངས་པའི་གྲགས་ཚོད་ལ། ལྷ་གསོལ་དང་སྐར་རྩིས་ཁོ་ན་བྱེད་མཁན་ལ་བོན་དཀར་བ་དང་། ནག་རྩིས་པར་བོན་ནག་གི་མིང་འདོགས་པ་ནི་སྔ་མ་སྐར་མའི་ཡིག་སྡེབས་ཀྱི་ས་མགོ་ཡོད་པ་དང་། ཁ་དོག་གི་དཀར་བ་དས་འཕུལ་སོགས་ཀྱི་བརྡ་ཙམ་ཡང་མ་ཤེས་པས། བཀའ་རྒྱུད་པ་ཕྱོགས་ཀྱི་ངག་བགྲོས་སུ་ན་རོ་པར་རྩ་བཤད་པ་ཞེས་པའི་དོན་མ་གོ་བར་ཨ་ནན་དང་རོ་རུ་སོང་ཟེར་བ་དང་འདྲ་བས་དཔྱད་བཟོད་པ་ག་ལ་ཡིན་ཏེ། དམ་པ་ཁྲོས་ཀྱང་བཏུད་ན་ཞི། །དམན་ལ་བཏུད་ན་ལྷག་པར་རེངས། །གསེར་དངུལ་སྲ་ཡང་བཞུ་ནུས་ཀྱི། །ཁྱི་ལུད་བཞུ་ན་དྲི་ངན་འབྱུང་། །ཞེས་པ་ལྟར་ཡིན་ལ། ནག་རྩིས་ཞེས་པ་རྒྱ་ནག་པོའི་ཡུལ་ནས་དར་པའི་རྒྱུ་མཚན་གྱིས་ནག་རྩིས་སུ་བཤད་པ་མ་གཏོགས་ཤིན་དུར་གྱི་རྩིས་ཙམ་ཞིག་གི་བྱེད་ལས་དང་བཅས་ཁ་དོག་ནག་པོར་བཞག་པའི་དོན་མིན་པས་རྣམ་དཔྱོད་དང་ལྡན་པ་རྣམས་ཀྱི་ཐོས་བསམ་གྱི་ཡུལ་ཡིན་ནོ། །དེ་ཡང་འཇམ་དཔལ་རྩ་བའི་རྒྱུད་ལས། རྒྱ་དང་རྒྱ་ནག་ཆེ་ཉིད་ལས། །འཇམ་པའི་དབྱངས་ནི་རབ་ཏུ་གྲུབ། །ཅེས་དང་། དེ་ཡི་ཡུལ་ན་འཇམ་པའི་དབྱངས། །བྱིས་པ་གཞོན་ནུའི་ཚུལ་གྱིས་ནི། །མངོན་སུམ་དུ་ནི་རྒྱུ་བར་བྱེད། །ཅེས་པའི་དོན་ལྟར། འཕགས་པ་རིགས་གསུམ་གྱི་མགོན་པོ་ལས། ཁ་བ་ཅན་གྱི་ལྗོངས་འདི་སྤྱན་རས་གཟིགས་ཀྱིས་འདུལ། ཨོ་རྒྱན་གྱི་ཡུལ་ཕྱག་ན་རྡོ་རྗེས་འདུལ་རྒྱ་ནག་གི་རྒྱལ་ཁམས་འཇམ་དབྱངས་ཀྱི་གདུལ་བྱ་ཡིན་པས། རྩིས་ཀྱི་གཙུག་ལག་སོགས་ཐབས་སྣ་ཚོགས་ཀྱི་སྒོ་ནས་རྒྱ་ནག་གི་སྐྱེ་རྒུ་རྣམས་མངོན་མཐོ་ངེས་ལེགས་ཀྱི་ས་ལ་བཀྲི་བར་དགོངས་ཏེ། རི་བོ་རྩེ་ལྔར་སྐུ་འཁྲུང་པའི་ཚུལ་བསྟན། ཀོང་རྩེ་སོགས་དངོས་ཀྱིས་འདུལ་པའི་ཞིང་(༢༨ན)
ཀུན་རྗེས་སུ་བཟུང་ནས་རྩིས་འགོ་སུམ་བརྒྱ་དྲུག་ཅུ་རྒྱས་པར་མཛད། ད་ལྟའང་སྐལ་ལྡན་རྣམས་ཀྱི་སྣང་ངོར་དངོས་སུ་བཞུགས་པར་གྲགས་སོ། །དེ་ལྟ་བུའི་སྟོན་པ་མཚན་ཉིད་དང་ལྡན་པ་འཇམ་དཔལ་དབྱངས་ཀྱིས་གསུངས་པའི་གཙུག་ལག་འདི་ཉིད་ལ་བོད་དུ་འགྱུར་ཚུལ་རྒྱ་ནག་སྔ་འགྱུར་རྙིང་མའི་རྙིང་མར་གྲགས་པ་ནི། ལྷ་མོ་དྲི་མ་མེད་པས་ཞུས་པའི་མདོ་ལས། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་རྒྱས་པར་འགྱུར་རོ་ཞེས་གསུངས་པ་ལྟར། བོད་ཡུལ་འདི་སངས་རྒྱས་ཀྱི་བསྟན་པ་རིན་པོ་ཆེ་དབུ་བརྙེས། སྲོལ་བཏོད། དར་རྒྱས་སུ་གྱུར་པའི་བར་པ་སྲོལ་བཏོད་པར་དགོངས་ཏེ། འཕགས་པ་ཕྱག་ན་པད་མ་རྒྱལ་པོའི་ཚུལ་བཟུང་སྲོང་བཙན་སྒམ་པོས། བསྟན་པ་རྒྱས་པར་མཛད་པའི་སླད་དུ་བསྟན་པའི་བདག་པོའི་སྣང་བརྙན་གསེར་གྱི་ལྷ་ཤཱཀྱ་མུ་ནི་གདན་འདྲེན་པ་ལ་རྒྱ་དང་གཉེན་དུ་སྦྲེལ་ན་བུ་མོའི་རྟེན་སྐལ་དུ་ཇོ་བོ་རིན་པོ་ཆེ་བོད་དུ་སྦྱན་འདྲོངས་པར་མཁྱེན་ནས། ཐབས་མཁས་པའི་རྣམ་པར་དཔྱོད་པས་འཇིག་རྟེན་དང་སྒོ་བསྟུན་ཏེ། རྒྱ་ནག་ཐང་གི་རྒྱལ་པོ་ལ་ཆེ་བ་ཐང་ཁུ་ཐུ་ཧན་ཆན་གྱིས་མཚན་དུའང་འབོད་ལ། ཡོངས་གྲགས་ལ། ཐང་ཀའུ་ཛུང་གི་རྒྱལ་པོར་གྲགས་པའི་སྲས་ཐའི་ཇུང་དང་གཉེན་བྱེད་པའི་ཚུལ་གྱིས་དེའི་སྲས་མོ་འུན་ཤིང་ཀོང་ཇོ་ཞེས་བྱ་བ། བོད་སྐད་དུ་མཚོ་ནང་གི་པདྨ་ཟེར་བ། སྒྲོལ་མའི་སྤྲུལ་པ་དེ་བཙུན་མོར་བསུས་པའི་ཚེ་སྤོར་ཐང་བརྒྱད་ཅུ་སྐོར་དུ་གྲགས་པའི་ནག་རྩིས་ཀྱི་གཙུག་ལག་གངས་ཅན་གྱི་ཡུལ་དུ་ཐོག་མ་བྱུང་བ་ཡིན། འབྱུང་བ་རིན་ཆེན་ཀུན་འདུས། རྒྱུད་གབ་པ་གནད་གཟེར། རིན་ཆེན་སྤུངས་པ། སྡོང་པོ་ཀུན་འདུས་སོགས་ལ་བརྟེན་པ་རྒྱ་རྩིས་སྔ་འགྱུར། རྒྱུད་ཉི་མ་གསེར་འཕྲེང་། གཏེར་མཛོད་(༢༨བ)
རིན་ཆེན་སྒྲོན་མེ་སོགས་ཀྱི་རྗེས་སུ་འབྲང་བ་རྒྱ་རྩིས་པར་འགྱུར། རྒྱུད་སྟག་སྣ་དང་། མདོ་བྱང་སོགས་ཀྱི་རྗེས་སུ་འབྲང་བ་རྒྱ་རྩིས་ཕྱི་འགྱུར་དང་གསུམ་དུ་བྱུང་ལ། རྒྱ་ནག་སྔ་འགྱུར་ལ་རྒྱ་བཟའ་དང་ལོ་ཙཱ་བ་དར་ཆེན་ཐིག་ལེས་བསྒྱུར་བ་དང་། མངའ་བདག་ཁྲི་སྲོང་ལྡེ་བཙན་གྱི་དུས་ལོ་ཆེན་བཻ་རོ་ཙ་ན་སོགས་ཀྱིས་བསྒྱུར་བ་གཉིས་ཀ་མཐུན་པས་བཻ་རོའི་འགྱུར་དེ་བར་འགྱུར་དུ་གྲགས་ཀྱང་དོན་སྔ་འགྱུར་ཕྱི་མར་གཏོགས་པའི་ལུགས་དང་། ཕྱི་འགྱུར་མངའ་བདག་ཁྲི་རལ་གྱི་དུས་བསྒྱུར་བ། ཡང་འགྱུར་ལོ་ཙཱ་བ་ཁམ་པ་ཁྲ་མོས་གསལ་སྒྲོན་སོགས་བསྒྱུར་བའི་འགྱུར་སྔ་ཕྱི་བཞི་ཙམ་བཤད་པ་དང་། ཡང་ལུགས་གསུམ་དུ་བྱས་པའི་རྒྱ་ནག་སྔ་འགྱུར་གྱི་རྗེས་འབྲང་གྲྭ་ཕུག་ལུགས། བར་འགྱུར་གྱི་རྗེས་འབྲང་བྱང་པ་རིགས་ལྡན་ཆེན་པོ་དང་སྤུག་སྟོན། ཕྱི་འགྱུར་གྱི་རྗེས་འབྲང་མཁས་པ་རྒྱ་དྲུག་པ་དང་ཟུར་མཁར་བ་མང་ཐོས་བློ་གྲོས་རྒྱལ་པོ་སོགས་བྱུང་བར་སྣང་མོད། འོན་ཀྱང་ལོ་རྒྱུས་རྙིང་པ་རྣམས་སུ་ཆོས་རྒྱལ་ཁྲི་སྲོང་ལྡེའུ་བཙན་གྱི་ཡུམ་རྒྱ་བཟའ་རང་གི་ལུས་ནས་ཆད་པའི་བུ་དབང་རྒྱུ་མ་བྱུང་བར་བརྟེན་བོད་ཀྱི་ས་དཔྱད་ཐམས་ཅད་ཀྱང་ཉམས་སུ་བཅུག་རྩིས་ཀྱི་སྐོར་འགོ་ཐམས་ཅད་འཕྱུགས་པར་བྱས་པས་ལོ་འགོ་སོགས་མ་དག་པ་བྱུང་ཟེར་བ་ལྟར་ན་བཻ་རོའི་འགྱུར་དང་། རྒྱ་བཟའ་སྔོན་མའི་རྩིས་གཉིས་ཞུས་དག་ཕེར་མི་ཕེར་སོམ་ཉིའི་ཡུལ་དུ་འདུག་ཅིང་། གང་ལྟར་གོང་དུ་དྲངས་པའི་གྲྭ་ཕུག་པ་སོགས་མཁས་པ་དེ་རྣམས་ལོ་འགོ་ལ་རིམ་པ་ལྟར། མགོ་ཟླ་རྒྱལ་ཟླ། མཆུ་ཟླ་གསུམ་གྱི་ངོས་འཛིན་སོ་སོར་བྱུང་ཞིང་སྒྲུབ་བྱེད་ཀྱང་སྣ་ཚོགས་པ་ཞིག་སྣང་ལ། གཏེར་སྟོན་སངས་རྒྱས་གླིང་པས་སྤུ་རི་ཕུག་མོ་ཆེ་ནས་གདན་དྲངས་པའི་དགོངས་འདུས་ཀྱི་སྐར་ཡིག་གི་ལོ་འགོ་རྒྱལ་ལ་ངོས་བཟུང་འདུག་པས། དེ་ལྟ་ན་བཻ་རོའི་(༢༩ན)
འགྱུར་སོགས་བར་འགྱུར་གྱི་རྗེས་སུ་འབྲང་བ་རྣམས་ཀྱི་ལུགས་དང་མཐུན་དགོས་འདྲ་ནའང་། འགྱུར་རྙིང་དག་རྩིས་ཁུངས་མ་དེ་དང་མ་མཐུན་ཚེ་ལྷད་ཅན་དུ་འགྲོ་ལ། རྣམ་པར་མི་དག་པ་ལོ་ཆེན་བཻ་རོ་ལྟ་བུས་བསྒྱུར་བའི་སྐབས་ག་ལ་སྲིད། བར་སྐབས་སུ་བླུན་པོ་སྙིང་ཁམས་ཅན་གྱིས་རང་དང་མ་མཐུན་པ་རྒྱུ་མཚན་དུ་བྱས་ཏེ་ལྷད་སྣ་ཚོགས་པ་མ་བཅུག་པའི་ངེས་པ་ནི་མི་འདུག་རུང་། དགོངས་འདུས་གཏེར་ཆོས་སུ་སོང་བས་བར་སྐབས་སུ་ལྷད་རང་ནི་འོང་དོན་མི་འདུག །དུས་གསུམ་མཁྱེན་པ་ཨོ་རྒྱན་འཁྲུལ་པ་མི་སྲིད། སངས་རྒྱས་གླིང་པ་གཏེར་སྟོན་རྣམ་དག་ཏུ་ངེས་ནའང་། སྐར་ཡིག་དེ་གདུལ་བྱའི་ཁམས་ཅི་རིགས་ལ་དགོངས་པའི་དྲང་དོན་ཡིན་ནམ། གལ་ཏེ་དགོངས་པ་ཅན་མིན་ན་བླུན་པོ་སྙིང་ཁམས་ཅན་གྱི་ལེའུ་ཐོ་རྙིང་པ་ཞིག་ལ་འགོ་རུ་མཁའ་འགྲོའི་བརྡ་ཡིག་དང་མཇུག་ཏུ་ས་མ་ཡ་རྒྱ་རྒྱ་བྲིས་ནས་གཏེར་ཆོས་ཀྱི་ཁྲོད་དུ་བཅུག་པ་མིན་ལས་ཆེ་སྙམ་ཕྱང་མོ་ཉུག་ཏུ་གྱུར་ཏོ། །གོང་གི་ལུགས་སྲོལ་དེ་དག་རྣམ་གྲངས་མང་ཞིང་། ལུང་རིགས་རྣམ་དག་གིས་དཔྱད་བཟོད་མི་བཟོད་ཀྱང་སྣ་ཚོགས་སྣང་བར་བར་སྐབས་སུ་ལྷད་ཆེས་མང་བ་ཞུགས་པའི་སྐྱོན་དུ་རྟོགས་པས། རྒྱལ་ཟླར་ལོ་འགོ་བྱེད་པ་རྒྱ་བཟས་རྩིས་གཞུང་དཀྲུགས་སྐྱོན་ཁོ་ནར་གོ་ཞིང་། རྟ་ཟླར་བྱེད་པ་ནི། མིང་ལའང་ཧོར་གྱི་ཟླ་བ་དང་པོར་གྲགས་ཤིང་། ཧོར་ཇིང་གིར་རྒྱལ་པོས་མི་ཉག་གི་ལག་ནས་རྒྱའི་རྒྱལ་ས་ཐོབ་པའི་ཟླ་བ་བཀྲ་ཤིས་པའི་དགའ་སྟོན་བྱས་པ་ལོ་གསར་དུ་བཟུང་བ་དཀྱུས་སུ་ཤོར་བས། ཇིང་གིར་གིས་སན་པ་བརྙེད་པའི་ཟླ་བ་ཟེར། བུ་སྟོན་ཐམས་ཅད་མཁྱེན་པས་ཀྱང་འདུལ་བའི་དུས་གོ་བློ་གསལ་མཛེས་རྒྱན་དུ། ཀྱེ་མ་གངས་ཅན་ལྗོངས་འདིར་ན། །མཁན་སློབ་ཁྱིམ་པས་བྱེད་པ་དང་། །(༢༩བ)
སྡོམ་པ་གཏོར་མས་ལེན་པ་དང་། །ལོ་འགོ་ཧོར་ཟླས་བྱེད་པ་སོགས། །ཞེས་འབྲེལ་ཁུངས་ཆུང་བར་མཛད་ལ། དེ་ལྟར་ན་ཅིའུ། ཚིན་ཏྲི་ཧྭང་། ཧ་ན། ཨང་མཾ། ཧན། ཚ་བོ་ཚ། འུ་མ། ཧེའུ་ཅིང་། ཆིང་སང་། སུའི་གཡང་དི་ཡི། ཐང་། ཧང་མའོ། ལྱེང་། མི་ཉག །ཧོར། རྟ་མིང་། མཉྫུ་སོགས་མུ་ཏིག་གི་རྒྱལ་ས་འཕོ་ལེན་ཤིན་ཏུ་མང་བས་ལོ་འགོའང་སྣ་ཚོགས་པར་འགྱུར་མོད། དེང་སང་གི་རྒྱ་རྣམས་ཀྱི་ལེའུ་ཐོ་ཧོར་ཟླ་དང་པོ་རང་ལ་ལོ་འགོར་བྱས་ནས་ས་བདག་བཀོད་ཟེར་བ་ཁ་མཐུན་ལན་གསུམ་ཙམ་ཐོས་པ་ནི་ཝན་ལི་རྒྱལ་པོའི་རྗེས་སུ་ཁྲིམས་ལྷོད་པས་ཡུལ་གྲུ་ཁོལ་བུར་བྱས་པ་འདྲ། མཁས་པ་ལ་ལ་ཐང་གི་རྒྱལ་རབས་རྫོགས་ནས་ལྱེང་གི་དུས་ཤིག་དུས་འཁོར་རྒྱ་ནག་ཏུ་ཕེབས་པས་འབྱུང་བ་སྐྱེ་རིམ་དང་མཐུན་པར་མཆུ་ཟླ་ལ་ལོ་གསར་མཛད་གསུང་བས་ཀྱང་ཀོང་ཇོའི་དུས་མཆུ་ཟླའི་ལོ་འགོ་མེད་པ་དང་དུས་འཁོར་གྱི་ཁུངས་དྲངས་པས་ནག་རྩིས་རང་ལུགས་མིན་པའི་སྒྲུབ་བྱེད་དུ་སོང་བས་སྤྲང་པོ་རྡུང་བའི་ལག་ཆ་སྤྲང་པོ་རང་གིས་ཁྱེར་རོ། །འཁྲུལ་པ་དང་བྲལ་ཞིང་བློ་གྲོས་དང་ལྡན་པ་མགུ་བ་སྐྱེ་བའི་གནས་སུ་གྱུར་པ་ནི། ཁྱུང་ནག་གིས། དཔྱིད་ཟླ་ར་བ་སྟག་ཡིན་ཏེ། །མགོ་ལ་ཉ་ན་ཟླ་བཤོལ་མེད། །ཅེས་གསུངས་པ་ལྟར། དགུན་ཉི་ལྡོག་པའི་ཟླ་བར་ལོ་འགོ་འཛིན་རིགས་པས། རིན་ཆེན་སྤུངས་པ་ལས། ཟླ་བ་མ་ནོར་ངེས་པ་ནི། །དཔྱིད་ཟླ་ར་བ་རྐང་མཐོ་བདུན། །འབྲིང་པོ་དྲག་ལ་ཐ་ཆུང་ལྔ། །དབྱར་ར་བཞི་དང་འབྲིང་པོ་གསུམ། །ཐ་ཆུང་གཉིས་དང་སྟོན་པ་གཅིག །དེ་ཉིན་རང་གྲིབ་རང་ལ་འཁོར། །ཞེས་དང་། མན་ངག་སྣང་གསལ་ལེའུ་བརྒྱ་དང་བཅུ་བཞི་མ་ལས། ཟླ་བ་མ་ནོར་ལེགས་པར་བརྩིས། །དཔྱིད་ཟླ་ར་བ་རྐང་མཐོ་བདུན། །ཞེས་ཉི་མའི་གུང་གི་དུས་རང་གྲིབ་ལ་རྐང་མཐོ་བདུན་འབྱུང་བ་ཉི་མ་གཞུ་ཁྱིམ་དུ་སྤྱོད་པའི་སྐབས་(༣༠ན)
ཡིན་པས། སྒྲུབ་བྱེད་ཤིན་ཏུ་བཟང་ལ། སྣང་གསལ་ལས། ཐེ་སེ་རྒྱལ་པོ་རླུང་ལ་ཞོན། །ཐེ་ཁྱིམ་རྒྱལ་པོའི་བཙུན་མོ་དེ། །ཞག་གཉིས་རྟིང་ལ་སྐྱ་བོར་འགྱུར། །ཞེས་ཐེ་སེ་རྒྱལ་པོ་ལོ་འཕོ་འཚམས་ནས་གནས་སྤོ་བས་ཀྱང་རྟོགས་ནུས་ཤིང་། འབྱུང་བ་ཁོང་ཁྲོལ་ལེའུ་བཅུ་པ་ལས། ལོ་ཟླ་བས་འཕོ། ཟླ་བ་ཚེས་གྲངས་ཀྱི་འཕོ། ཚེས་གྲངས་དུས་ཚོད་ཀྱིས་འཕོ། དཔྱིད་ཟླ་ར་བའི་ཚེས་གཅིག་གི་ནམ་ལངས་ནས་ལོ་གསར་བར་རྩིས་ཤིག །ཅེས་སོགས་ལུང་རིགས་མཐའ་ཡས་སོ། །རྨེ་བ་མ་འཁྲུལ་བར་ངེས་པ་ཞིག་བྱུང་ཡང་ཟླ་བ་འཕྱུགས་ན་ཟླ་བའི་སྲོག་ལུས་དབང་ཐང་དང་རྨེ་བ་འཐབ་པའི་སྐབས་ཇི་ལྟ་བ་མི་འོང་བས། རྩིས་ཚད་ལྡན་ཞིག་བྱེད་པའི་སྔོན་དུ་རྒྱ་གར་སྐད་ལྟ་བུའི་མེད་དུ་མི་རུང་བ་ཐོག་མར་ལོ་དང་ཟླ་བའི་འགོ་ཚུལ་བཞིན་ཤེས་དགོས་པས་མཐའ་ཅུང་ཟད་དཔྱད་པ་ཡིན། མཁས་པ་ཆེན་པོ་ཟུར་མཁར་བ་བློ་གྲོས་རྒྱལ་པོས་ཞུ་དག་མཛད་པའི་གྲ་ཐང་གི་གསོ་དཔྱད་ཀྱི་རྒྱུད་བཞི་སྤར་མར། དཔྱིད་ཟླ་གསུམ་ནི་ཤིང་རྩི་ཁ་འབུས་དུས། །རྟག་པ་དབོ་དང་ནག་པས་ནམ་ཚོད་འཛིན། །བྱིའུ་ཅོ་ཀ་རང་སྐད་འབྱིན་པའི་དུས། །བདུན་ཅུ་རྩ་གཉིས་ཤིང་ཁམས་མཆིན་རྩ་རྒྱུ། །ཅོ་ཀའི་སྐད་ལྟར་ཕྲ་ལ་གྲིམས་པར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །ཞེས་དག་ཆ་མཛད་ནས་མེས་པོའི་ཞལ་ལུང་དུ། དཔྱིད་ཟླ་ར་བ་སྟག་གི་ཟླ་བ་མ་ནོར་བ་ནི། བྱ་གཞུག་ལྕགས་ཀྱི་སྒོ་མོས་ཚེས་ནས་རྟ་པ་གསེར་གྱི་སྒོ་མོས་ཉ། རང་རྟགས་སུ་སྟག་གཅན་གཟན་གྱི་རྒྱལ་པོ་སྒྲ་དོན། གཅན་གཟན་ཐམས་ཅད་འཇུག །ཕྱི་རོལ་ཤིང་གི་ཁམས་འཕེལ་བ་ལ་དྲོད་བག་ཙམ་ཕེབས། ཤིང་རྩི་ཁ་འབུས། བར་ན་ཅོ་ག་སྐད་འབྱིན། བྱ་གོ་བོ་ཚང་གསོག །རླུང་དམར་འགོ་ལྡང་། (༣༠བ)
ཉེར་གསུམ་ལ་ཕྱི་ཐོལ་བབས། ཞེས་སོགས་ཀྱི་སྒྲུབ་བྱེད་མཐའ་ཡས་པར་མཛད་ཅིང་། དེ་དག་ལ་བརྟེན་ནས་ལ་ལ་ཟུར་མཁར་བའི་ལུགས་ཁོ་ན་ལ་ཞེན་པས་ཕུག་ལུགས་སུན་འབྱིན། ལ་ལ་ཕུག་ལུགས་ལ་ཞེན་པས་གསོ་དཔྱད་ཀྱི་ཕྱོགས་ལ་དགག་པ་བྱས་ནས་ཚ་གྲང་ལྟར་མཐོང་མོད། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་འདི་དངོས་གཞི་ནག་རྩིས་པའི་བརྡ་ཆད་གཙོ་ཆེ་བ་ཡོད་པས། ནག་རྩིས་པའི་ལུགས་ལ་དཔྱིད་ར་སྟག་ལ་ལོ་འགོ་བྱེད་པར་གྲགས་པའི་རྗེས་སུ་འབྲིང་བ་ཙམ་ཡིན་ནའང་ནག་རྩིས། ཚད་ལྡན་དང་ཅུང་མི་མཐུན་པའི་རྒྱུ་མཚན། གསོ་དཔྱད་ལ་འབྱུང་བ་ལྔ་མ་བུ་དགྲ་གྲོགས་ཀྱི་སྐོར་དང་། ཆུ་མདོའི་སྐབས། གདོན་ཆུ་གང་བཏང་ངོས་དེ་ཤར་དུ་བརྩི། །ཆུ་དེ་སྲིད་པའི་རུས་སྦལ་གན་རྐྱལ་གནས། །མགོ་བོ་ལྷོར་བསྟན་ཐིག་བཞིས་ས་དགུར་གཅད། །གཡས་གསུམ་ལྷ་ས་མི་ས་གདོན་ཀྱི་ས། །གཡོན་གསུམ་དུར་ས་ཁང་ས་ཞིང་གི་ས། །དབུས་གསུམ་ཕ་མེས་རང་དང་བུ་ཚའི་ས། །ལིང་ཚེ་དགུ་པོའི་ས་དེར་གཟུགས་བརྙན་བརྟག །ཅེས་པ་སོགས་འགའ་ཞིག་མ་གཏོགས་སྤར་རྨེ་སོགས་ཀྱི་ཞིབ་ཆ་མེད་པར། གཙོ་བོར་གསོ་བ་གཉེན་པོ་སྨན་གྱི་སྦྱོར་སྡེ་བྱེད་པ་ལ། གསོ་བྱའི་ནད་ངོས་ཟིན་དགོས། དེ་ལ་དུས་བཞི་ཁམས་ལྔའི་རྩ་མ་ནོར་བར་རྟོགས་དགོས་པ། ནད་ལུས་ཀྱི་ཤིང་རྩ་དར་བ་ཕྱི་རོལ་གྱི་ཤིང་རྩི་རྒྱས་པ་ལ་ལྟོས་དགོས་པར། ཇི་སྐད་དུ། པདྨའི་མཚོ་ལ་ངང་པ་འདུ། །དྲི་ལྡན་མེ་ཏོག་བུང་བ་སྡུད། །འབྲོག་བཟང་དུ་ནི་རི་དྭགས་འཁོར། །ཤ་ཡི་དྲི་ལ་ཤ་སྦྲང་འཁོར། བཟའ་གཏུང་མང་སར་སྐྱེ་བོ་འཚོག །གལ་ཏེ་དེ་དག་མི་ལྡན་ན། །བསྡུས་ཀྱང་སྐྱེ་བོ་ཕལ་ཆེར་འབྲོས། །ཞེས་དང་། མགོན་པོ་ཀླུ་སྒྲུབ་ཀྱིས། རྟེན་ཅིང་འབྲེལ་པར་འབྱུང་འདི་རྒྱལ་བ་ཡི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །གང་གི་འདི་ནི་(༣༡ན)
ཡང་དག་མཐོང་བ་དེས། །སངས་རྒྱས་དེ་ཉིད་རིག་པ་རྣམས་མཆོག་མཐོང་། །ཞེས་པ་ལྟར། རྟེན་འབྲེལ་གྱི་ཆོས་ཉིད་འདི་མི་སླུ་བས་མ་མཛོལ་བར་འགྲིག་དགོས་པ་ཡིན། དེའི་དབང་དུ་བྱས་ནས་རྩ་བརྟག་པའི་དབང་གིས་ཕྱིའི་དུས་གཙོ་ཆེ་བར་བྱུང་ཞིང་། དེ་ཡང་རྟ་ཟླ་ལ་གཙང་མཁྲིས་མདའ་སྐོར་གྱི་ཤིང་རྩི་ཁ་འབུས། དབོ་ཟླ་ལ་བར་ཚིགས་པ་རྣམས་ཀྱི་ཤིང་རྩི་ཁ་འབུས། ནག་ཟླ་ལ་ཕུ་རགས་ཀྱི་ཤིང་རྩི་ཁ་འབུས་པས་རྩ་རྟོགས་པའི་ཆེད་དུ་འདི་གཙོ་བོར་འདོན། ཚེས་ལ་རྒྱུ་བའི་ས་བདག་སོགས་ཀྱི་མཁོ་བྱེད་མེད་ལ། གྲ་ཕུག་པ་བའི་ལུགས་ནི་རྩའི་ཕྱི་ནང་གི་དུས་མི་གཙོ་བར། ལོ་ཟླ་ཞག་ཚེས་ཀྱི་ས་བདག་མི་འཕྱུག་པ་གཙོ་ཆེ་བས། ལུང་རིགས་གཞན་གྱི་སྒྲུབ་བྱེད་ལྟ་ཅི་སྨོས། ས་བདག་རྒྱལ་པོ་ཐེ་སེ་རང་གནམ་ལོའི་རྟ་ལ་ཞོན་ནས་མགོ་ཟླའི་ནང་དུ་འཕོས་པའི་རྒྱུ་མཚན་གྱིས་ཐེ་སེ་གར་གནས་ཀྱི་བྱི་བ་སོགས་གནམ་ལོ་ཡིན་པར་སོང་བས་ཀྱང་ལོ་འགོའི་སྒྲུབ་བྱེད་གཞན་གྱིས་བྱེད་མ་དགོས་པར་ཐེ་སེ་རང་གིས་བྱས་པ་ཡིན་ནོ། །དེས་ན་སྔ་མས་དུས་བཞིའི་འགྱུར་ལྡོག་དང་བསྟུན་ནས་རྩ་ལྟ། ཕྱི་མས་ནི་ས་བདག་གི་རྗེས་སུ་འབྲངས་ནས་སྤང་བླང་སྟོན་པ་ཡིན་པས་དགོངས་པ་མི་འགལ་བར་ནག་རྩིས་རང་བྱེད་དུས་ཧོར་ཟླ་བཅུ་གཅིག་པ་དང་། གསོ་དཔྱད་ལ་འཇུག་དུས་ཧོར་ཟླ་དང་པོར་ལོ་འགོ་ཟུངས་ཤིག་ཅེས་གསོ་བ་རི་པའི་གཙུག་ལག་དང་། རྒྱ་ནག་སྤོར་ཐང་གི་རྩིས་ཕྱོགས་ཙམ་མཐོང་བའི་སྙོམ་ལས་མཁན་ཙུ་ཏིའི་ཡུལ་གྱི་རྐང་གཉིས་པ་ཞིག་མགྲིན་པའི་ལམ་ནས་ངོ་མཚར་བའི་གཏམ་ཅུང་ཟད་སྨྲ་བ་ལགས་སོ། །ཀོང་ཙེ་ལྟ་བུའི་མཁས་མཆོག་དཔལ་མགོན་འཕྲིན་ལས་དང་། དྲང་སྲོང་ཡིད་ལས་སྐྱེས་ལྟ་བུའི་ཟུར་མཁར་བློ་གྲོས་རྒྱལ་པོ་གཉིས་ཀྱི་དགོངས་པའི་ཞི་ཕུགས་མ་གོ་བའི་ཚིག་ཙམ་ལ་ཐོས་སྒྲོག་ཏུ་(༣༡བ)
བྱེད་པའི་ད་ལྟའི་ཕྱོགས་རེའི་མིག་ཅན་འགའ་རེས་གསོ་རིག་ལ་ཞེན་པ་རྒྱུ་མཚན་དུ་བྱས་ཏེ་ཟླ་བ་བཅུ་གཅིག་པ་བཅུ་གཉིས་པ་དང་པོ་གསུམ་གྱི་ས་བདག་རྣམས་དང་པོ་གཉིས་པ་གསུམ་པ་གསུམ་ལ་བཀོད་ནས་འཇིག་རྟེན་ཕུང་བའི་སྦྱོར་བ་རྩོམ། རྩིས་ལ་ཞེན་ཅིང་གསོ་དཔྱད་ཅུང་ཟད་ཤེས་པ་འགའ་ཞིག་གིས་ཟླ་བ་བཅུ་གཅིག་པ་ཆུ་གོང་བུར་འདྲིལ་དུས་ལྕགས་ཁམས་ཀྱི་རྩ་འཕར་བ་ཤིང་ཁམས་སུ་ངོས་བཟུང་ནས་ནད་བུ་ཅན་སྐལ་དམན་མང་པོའི་གཤེད་དུ་གཤིན་རྗེའི་ཞགས་ཐོགས་མངོན་སུམ་དུ་རྒྱུ་བ་རྣམས་གོང་དུ་བཤད་པ་དེ་དག་བརྟེན་ནས་བློ་ནང་དུ་འགུགས་རིགས་ནའང་། ངན་པ་ཇི་ལྟར་བཅོས་གྱུར་ཡང་། །རང་བཞིན་བཟང་པོ་འབྱུང་མི་སྲིད། །སོལ་བ་འབད་དེ་བཀྲུས་ན་ཡང་། །ཁ་དོག་དཀར་པོ་མི་སྲིད་དོ། །ཞེས་གསུངས་པ་ལྟར་ཕན་པར་དཀའོ། །འཕན་ཡུལ་རྒྱལ་གྱི་ལྷ་རྗེ་གནས་བརྟན་པས། ཧོར་ཟླ་དང་པོ་ལ་ཤིང་རྩི་ཁ་མི་འབུས་ཞེས་སྨྲས་པ་ན། ཟུར་མཁར་བས། ཁྱོད་རང་འཕན་ཡུལ་གྱི་ལུང་པའི་ཕུར་བསྡད་པས། གཙང་མཁྲིས་ཀྱི་ཤིང་རྩི་ཁ་འབུས་པ་མ་མཐོང་བར་འདུག་ཅེས་གསུངས་པར་སྣང་། དེ་སང་ཡང་བློ་ཆུང་མང་པོས། ཧོར་ཟླ་བཅུ་གཅིག་པ་དཔྱད་པ་ཡིན་པའི་འགྲོས་ཐོས་ཚེ། དགུ་འདྲེན་དུས་དཔྱིད་ཀ་མི་འོང་ཞེས་གཏམ་རྔམས་པོ་ཆེར་རྩི་བ་ནི་རྒྱལ་ཁམས་མ་མཐོང་བའི་སྐྱོན་ཏེ། མཁས་པའི་གསུང་ལས། ཁམས་ཀྱི་དབྱེར་མོ་ཐང་ཞེས་པར། །སྟོན་ཡང་དཔྱིད་ལ་དཔྱིད་ཀྱང་སྟོན། །མོན་ཡུལ་མཐིལ་གསུམ་དཔྱིད་ཀྱང་སྟོན། །ཀོང་ཡུལ་བྲི་སྣར་དགུན་ཡང་དབྱར། །བྱང་ཁམས་སྣ་བརྒྱད་དབྱར་ཡང་དགུན། །དེ་བས་དེ་ལྟར་རིག་པར་འཚལ། །ཞེས་པ་ལྟར་རོ། །འོན་ཀྱང་གསོ་དཔྱད་དང་རྩིས་སུ་མ་ཟད་རིག་གནས་གང་ལའང་དུས་དབང་གི་ཐོས་བསམ་བྱས་པ་ཉུང་ཞིང་ཚུལ་(༣༢ན)
བཞིན་ཤེས་པ་རེ་གཉིས་བྱུང་ནའང་། མཁས་པ་མཁས་པའི་ནང་ན་མཛེས། །བླུན་པོས་མཁས་པ་ཇི་ལྟར་གོ །ཙན་དན་གསེར་ལས་རིན་ཆེ་བ། །བླུན་པོས་སོལ་བར་བྱས་པ་ལྟོས། །ཞེས་པའི་དོན་ལྟར་རྣམ་དཔྱོད་དང་ལྡན་པ་རྣམས་ལྷ་མེད་དབང་པོ་མ་ཚང་བར་སོང་ཞིང་། དུད་འགྲོ་ཆེ་གེ་མོ་དང་། མི་ཆེ་གེ་མོའི་སྤྲུལ་པའོ། ཞེས་བསླབས་ཤེས་ཏེ་ཡོན་ཏན་གང་ཡང་མེད་པ་ལ། གྲུབ་ཐོབ་དང་སྤྲུལ་སྐུའི་མིང་སྙན་སྙན་པོར་བྱས་ཏེ་ཆེན་པོའི་ཁེངས་དྲེགས་དང་བཅས་ནས་མ་བསླབས་པ་དང་མི་ཤེས་པར་ངོ་སོ་བྱེད་པ་མང་བས། གཏིང་ནས་ཉམས་པའི་ཁྲེལ་འདས་རྣམས། །རང་གི་གཏམ་ངན་ངོ་སོར་འཁྱེར། །ཀན་རྩིའི་ཡུལ་གྱི་རྒྱལ་རིགས་འགའ། །ཕ་བསད་པ་ལ་རྒྱལ་རྔ་རྡུང་། །ཞེས་དང་། མཁས་རྣམས་རིག་པ་ཡོན་གྱིས་བླུ། །བླུན་པོ་རིག་པ་བསླབས་ཀྱང་སྤོང་། །ཕལ་ཆེར་ནད་ལ་སྨན་ཟ་ཡང་། །ལ་ལ་གསོན་པོར་ལྕེབ་པ་ཡོད། །ཅེས་པའི་བརྗོད་དོན་ནོ། །འགའ་ཞིག་མདོ་འཛངས་བླུན་ལས། དེའི་ཚེ་དཔྱིད་ཟླ་ར་བའི་ཚེས་ཞག་གཅིག་གི་ཉིན་བཅོམ་ལྡན་འདས་ཆོ་འཕྲུལ་འགྲན་པའི་གནས་སུ་གཤེགས་པ་དང་། རྒྱལ་པོ་གསལ་རྒྱལ་གྱིས་མཆོད་པའི་ཡོ་བྱད་དང་ཞལ་ཟས་བཤམས་ནས། བཅོམ་ལྡན་འདས་ལ་ཕྱག་བདར་ཏེ་ཕུལ་ལོ། །བཅོམ་ལྡན་འདས་ཀྱི་ཚེམས་ཤིང་གསོལ་ནས། །ཚེམས་ཤིང་ས་ལ་བཙུགས་སོ། །ས་ལ་གཙུག་མ་ཐག་ཏུ་སྐྱེས་ནས་ཡལ་ག་དང་ལོ་མ་རྒྱས་པ། མཐོ་ཁྱད་དཔག་ཚད་ལྔ་བརྒྱ་བར་གྱུར་ཏེ། ཡལ་ག་དང་ལོ་མ་ཁོ་ར་ཁོར་ཡུག་ཏུ་དཔག་ཚད་ལྔ་བརྒྱ་ཁེབས་སོ། །ཞེས་པ་ཁུངས་སུ་འདྲེན་པ་ནི་མི་རིགས་ཏེ། སྤྱིར་མདོ་ལས་ཁུངས་ཆེ་བ་ཅི་ཡོད་ཀྱང་། མདོ་ནས་བཤད་པ་རྣམས་རྒྱ་གར་བའི་ལུགས་ཡིན་ལ། རྒྱ་གར་དུ་ས་བདག་སོགས་ཀྱི་རྣམ་གཞག་མེད་པ་སོགས་(༣༢བ)
ལུགས་སྲོལ་མི་འདྲ་ཞིང་། དུ་འཁོར་བ་ནག་ཟླ་ནས་ལོ་འགོ་བྱེད་པ་དང་། འདུལ་མངོན་ཧོར་ཟླ་བརྒྱད་པ་དགུ་པ་བཅུ་པ་གསུམ་ལ་ལོ་འགོ་ངོས་འཛིན་ནང་མི་མཐུན་པ་སྣ་ཚོགས་ཡོད་ལ། མར་བ་ལོ་ཙཱ་བས། ཆོ་འཕྲུལ་ཁྲ་ཡི་ཟླ་བ་ལ། །མི་ཁོ་བོ་རྒྱ་གར་ལམ་དུ་ཆས། །ཞེས་ཧོར་ཟླ་གཉིས་པར་མཛད་པ་དང་། བྱམས་པ་ལུང་བསྟན་པ་ཚིགས་སུ་བཅད་པ་བརྒྱད་པར། ཆོ་འཕྲུལ་ཝ་ཡི་ཟླ་བ་ལ། །ཞེས་པར་བརྟེན། ཝ་ནི་སྐར་མ་སྐག་ཡིན་ལ་དེ་རྒྱལ་དང་ཉེ་བའི་དབང་དུ་བཏང་ནས་ཧོར་ཟླ་བཅུ་གཉིས་པར་འཆད་པའང་སྣང་། ལུགས་སྲོལ་ཐ་དད་པ་མང་བས་ན་སོ་སོའི་རང་སྐད་དབྱེ་ཤེས་པའི་རིག་པའི་བདག་ཉིད་ཕྱེད་དགོས་པས། མཁས་པ་རང་གིས་དཔྱོད་ཤེས་ཀྱི། །བླུན་པོ་གྲགས་པའི་རྗེས་སུ་འབྲང་། །ཁྱི་རྐན་ཀུ་ཅོ་འདོན་པ་ན། །རྒྱུ་མཚན་མེད་པར་གཞན་དག་རྒྱུག །ཅེས་པའི་ལུགས་སུ་སོང་ན་མཁས་པའི་ཁྱུར་མི་ཆུད་དོ། །དཔལ་ཡེ་བཟང་རྩེ་བས། ཆོ་འཕྲུལ་ཝ་ཞེས་པའི་ཝའི་སྐད་དོད་རྒྱ་དཔེ་ལ་མེད་གསུང་བ་ལེགས་པར་བཤད་པ་ཡིན་མོད། ད་ནི་དུས་དབང་གིས་ཆེར་རློམ་དང་མཁས་རློམ་ཕལ་ཆེར་རྣམས་རྒྱ་དཔེ་ཕ་རི་ངོས་སུ་བཞག་ནས་བོད་དཔེ་གཟིགས་ཁྱད་ཀྱིས་ཀ་མད་སུམ་ཅུར་ཐུགས་གཉེར་གནང་བ་ཞུ། དངོས་དོན་གྱི་སྙིང་པོ་དྲུག་ཅུ་སྐོར་བར་གྲགས་པའི་ལུགས་ལ། མར་མེ་མཛད་ཀྱི་བསྟན་པ་ལ། །ཤིང་ཕོ་བྱི་བའི་གཅིག་དཀར་ནས། །ཆུ་མོ་ཕག་གི་ལྔ་སར་ཟད། །མ་འོངས་བྱམས་པའི་བསྟན་པ་ལ། །ཤིང་ཕོ་བྱི་བའི་བདུན་དམར་ནས། །ཆུ་མོ་ཕག་གི་གཉིས་ནག་ཟད། །ད་ལྟ་ཐུབ་པའི་བསྟན་པ་ལ། །ཤིང་ཕོ་བྱི་བའི་བཞི་ལྗང་ནས། །ཆུ་མོ་ཕག་གི་བརྒྱད་དཀར་ཟད། །ཅེས་ཁུངས་བྱེད་པ་ནི། བློ་ངན་ལས་ལ་སྤྱོད་པ་ལ། །རང་གི་འབད་པས་ཐོབ་པར་སེམས། །ཁྱི་རྒན་ཡ་སྐན་ཕུག་པའི་ཁྲག །རུས་པའི་བཅུད་དུ་བསྒོམས་(༣༣ན)
ནས་འཆའ། །ཞེས་པ་དང་འདྲ་བས་སྙིང་པོ་ཅི་ཡང་མེད་དེ། སྔོན་འབྱུང་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྐྱོང་ལ་བུ་སྟོང་དང་ལྔ་ཡོད་པར། བྲམ་ཟེ་རྒྱ་མཚོའི་རྡུལ་གྱིས་རིལ་བ་བྷྲིཾ་ཀ་ར་བྱ་བར་གཞོན་ནུ་རྣམས་ཀྱི་མཚན་བཅུག་སྟེ་རིམ་གྱིས་བཏོན་ནས་བརྟགས་པའི་ཚེ། འོ་ཀོལ་གྱི་སྟོན་པ་ཤཱཀྱ་ཐུབ་པ་ལ་གཞོན་ནུ་མིག་མི་འཛུམ་དུ་གྱུར་པ་དེས་སྙིགས་མ་བས་ཀྱང་སྙིགས་མའི་དུས་སུ་འཚང་རྒྱ་བར་ཞལ་གྱིས་བཞེས་པར་བཤད་པའི་སངས་རྒྱས་དེ་སངས་རྒྱས་སྟོང་གི་བཞི་པ་ཡིན། བསྐལ་བཟང་སོགས་ནས་བཤད་པའི་སངས་རྒྱས་སྟོང་མཐར་ཆགས་སུ་འབྱུང་རྒྱུའི་བསྐལ་པ་འདི་ལ་བཟང་པོའི་བསྐལ་པར་གྲགས་ཤིང་། མར་མེ་མཛད་ནི་བསྐལ་པ་འདིའི་སྔོན་དུ་བྱུང་བས། དེའི་དུས་འཇམ་དབྱངས་ཀྱིས་རྩིས་གསུངས་ཟིན་པའི་སྒྲུབ་བྱེད་ཚད་ལྡན་ཅི་ཡོད། དེ་ལྟར་ན། མདོ་དང་འདུལ་བ་ལུང་ལས་གསུངས་པའི་སངས་རྒྱས་འཁོར་བ་འཇིག །གསེར་ཐུབ། འོད་སྲུང་སོགས་ཀྱི་རྨེ་བའང་དོན་གྱིས་འཐོབ་པས། བསྐལ་བ་འདི་ལ་རྨེ་འཕྲེང་སྟོང་ཙམ་དགོས་པར་འགྱུར། རྨེ་འཕྲེང་བར་མ་རྐྱང་པར་འཁོར་ཚེ་རྨེ་བ་ལྔ་སེར་དྲུག་དཀར་བདུན་དམར་གསུམ་ཆད་ནས་མཆོངས་པའི་ཉེས་པ་འཇུག་ཅིང་། དེ་ལ་སྐྱོན་མི་འོང་ན་ལོའང་ངེས་མེད་འཆོལ་བར་བྱས་ནའང་འགལ་བ་ཅི་ཡོད། ལུགས་ངན་འདི་འདྲ་ལ་ཡིད་རྟོན་པ་ནི། གྱོལ་པོ་གསུམ་གྱིས་ཡུལ་འཇིག་པའི་དཔེ་འདིར་འོང་ངོ་། །དེས་ན་རིན་ཆེན་སྤུངས་པའི་རྒྱུད་ལེའུ་དྲུག་པ་ལས་སྲོག་གི་སྐྱེ་བོ་དབུས་བཞག་སྟེ། །སྲོག་ནས་བཞི་ནི་ལུས་ཡིན་ལ། །ལུས་ནས་བཞི་ནི་དབང་ཐང་ཡིན། །ཞེས་དང་། བཞི་ཡི་ཐ་མ་བརྒྱད་ལ་ཟད། །བརྒྱད་ཟད་པ་དེ་བདུན་ལ་འཁོར། །བདུན་གྱི་ཐ་མ་གཉིས་ལ་ཟད། །གཉིས་ཟད་པ་དེ་གཅིག་ལ་འདྲོངས། །གཅིག་གི་ཐ་མ་ལྔ་ལ་ཟད། །ལྔ་ཟད་(༣༣བ)
པ་དེ་བཞི་ལ་འཁོད། །ཞེས་རྨེ་འཕྲེང་ལ་དྲུག་ཅུ་ཚར་གསུམ་ཡོད་པའི་དྲུག་ཅུ་སྐོར་རེ་ལ་རྨེ་འཕྲེང་རེ་སྤྱད་པས། དཔལ་མགོན་འཕྲིན་ལས་ཞབས་ཀྱི་དུས་དྲུག་ཅུ་སྐོར་དགུ་པའི་ཚེ། རྨེ་འཕྲེང་གོང་མར་རེས་བབས། དེ་ནས་ད་ལྟ་དྲུག་ཅུ་སྐོར་བཅུ་གཅིག་པའི་ཚེ་རྨེ་འཕྲེང་འོག་མར་ཡོད་ལ། རྨེ་འཕྲེང་ཆད་ལྷག་མེད་པར་འཁོར་བས། རྨེ་བའི་རྒྱུད་སམ་བཀའ་སུམ་འགྱུར་ལས་ཀྱང་། ཕོ་བྲང་དང་པོ་གཅིག་འབྱུང་སྟེ། །གཅིག་གི་ཐ་མ་ལྔ་ལ་ཟད། །ལྔ་ཟད་པ་དེ་བཞི་ལ་འདྲོངས། །བཞི་ཡི་ཐ་མ་བརྒྱད་ལ་ཟད། །བརྒྱད་ཟད་པ་དེ་བདུན་ལ་འདྲོངས། །བདུན་གྱི་ཐ་མ་གཉིས་ལ་འདྲོངས། །གཉིས་ཟད་པ་དེ་གཅིག་ལ་འཁོར། །འཁོར་ཞིང་འཁོར་བ་མ་གཏོགས་པ། །ལྷག་ཅིང་ཆད་པ་ལོགས་ན་མེད། །རྨེ་བ་དྲུག་ཅུ་ཚན་གསུམ་ལ། །བརྒྱ་དང་བརྒྱད་ཅུ་ཐམ་པ་འབྱུང་། །བརྒྱད་ཅུ་སྐོར་ཞེས་བརྗོད་པ་ཡིན། །ཞེས་སོ། །དེ་ལྟར་ལྷག་ཆད་མེད་པའི་སྲོག་ལུས་དབང་ཐང་གི་རྨེ་འཕྲེང་གསུམ་པོ་དེ་ཡང་། ཕོ་བྲང་བརྒྱད་ཅུའི་འགྲེལ་པ་ལས། དང་པོ་རྨེ་བའི་རྩིས་འགོ་ནི། །སྲོག་སྐྱེས་པ་ཡི་རྨེ་བ་ལ། །ཤིང་ཕོ་བྱི་བའི་གཅིག་དཀར་ནས། །ཆུ་མོ་ཕག་གི་ལྔ་སེར་བར། །ལོ་འགྲོས་དྲུག་ཅུ་ཐམ་པ་ཚང་། །དེ་ནས་ལུས་ཀྱི་རྨེ་བ་ནི། །ཤིང་ཕོ་བྱི་བའི་བཞི་ལྗང་ནས། །ཆུ་མོ་ཕག་གི་བརྒྱད་དཀར་བར། །ལོ་འགྲོས་དྲུག་ཅུ་ཐམ་པ་ཚང་། །དེ་རྗེས་དབང་ཐང་སྐྱེས་རྨེ་དེ། །ཤིང་ཕོ་བྱི་བའི་བདུན་དམར་ནས། །ཆུ་མོ་ཕག་གི་གཉིས་ནག་བར། །ལོ་འགྲོས་དྲུག་ཅུ་ཐམ་པ་ཚང་། །དེ་ནས་ཤིང་བྱི་གཅིག་འཁོར། །དེ་ལྟར་དྲུག་ཅུ་ཚན་གསུམ་ལ། །བརྒྱ་དང་བརྒྱད་ཅུ་ཐམ་པ་ཡོད། །ཅེས་སོ། །གཞན་ཡང་གནམ་གྱིས་བསྐོས་པའི་རྒྱལ་པོ་སྡེ་སྲིད་ཕག་མོ་གྲུ་པའི་ཕོ་བྲང་སྣེའུ་གདོང་རྩེར་དྲུག་ཅུ་སྐོར་བདུན་པའི་(༣༤ན)
མཇུག་གི་ཆུ་ཕོ་ཁྱི་ལ་རྟེན་འབུལ་བ་འོངས་སྐབས། ཆིང་ཤྲི་སྐལ་བཟང་གིས་ཁྱེར་བའི་རྒྱལ་པོས་ཁྲིམས་ཀྱིས་བཅད་པའི་ཁྱི་ལོའི་ལིའུ་ཐོ་ལ་དགུ་དམར་དབུས་སུ་བྱས་པ་དང་། ཡང་དྲུག་ཅུ་སྐོར་དགུ་པའི་ཆུ་སྤྲེ་ལོ་ལ་གཉིས་ནག་དབུས་སུ་བྱས་པ་སོགས། རྩིས་རིག་སྨྲ་བའི་གཙུག་རྒྱན་ཆོས་རྗེ་འཕྲིན་ལས་པས་མངོན་སུམ་དུ་གཟིགས་ཤིང་། ཁོ་བོས་ཀྱང་ཤར་ཕྱོགས་འཇམ་དབྱངས་གོང་མའི་རྒྱལ་ཁབ་ཏུ་བགྲོད་ཚེ་ལིའུ་ཐོ་ཚར་གཉིས་ཙམ་མཐོང་བའི་ཚེས་ཀྱི་ཆད་ལྷག་བཤོལ་སོགས་ཐམས་ཅད་གྲྭ་ཕུག་ལུགས་ཀྱི་ཕྱག་ལེན་དང་ཞུས་དག་ཕེར་བར་སྣང་ངོ་། །
དྲི་བ་བཞི་པ། རྒྱ་ནག་འགྱུར་གྱི་སྐོར་འགོ་ཚུལ་བཞིན་ཤེས་པ་ལས་མངོན་མཐོ་ངེས་ལེགས་སོགས་འཐོབ་པའི་གནས་ཡོད་མེད་ཀྱི་དྲིས་ལན།
དྲི་བ་བཞི་པ།རྒྱ་ནག་འགྱུར་གྱི་སྐོར་འགོ་ཚུལ་བཞིན་ཤེས་པ་ལས་མངོན་མཐོ་ངེས་ལེགས་སོགས་འཐོབ་པའི་གནས་ཡོད་མེད་ཀྱི་དྲིས་ལན།དྲི་བ་བཞི་པ་ནི། བཞི་པ་དཔལ་ལྡན་དུས་འཁོར་རྒྱུད་དོན་གྱི། །ལམ་ལ་གཞུང་བཞིན་ལུགས་ནས་ཉམས་བླངས་ན། །ངེས་ལེགས་མཐར་ཐུག་ཟུང་འཇུག་འཁྲུལ་མེད་ཀྱང་། །རྒྱ་ནག་འགྱུར་གྱི་གཙུག་ལག་མདོ་རྒྱུད་ཀྱི། །རྒྱུད་དོན་སྐོར་འགོ་ཚུལ་བཞིན་ཤེས་པ་ཡིས། །མངོན་མཐོ་ངེས་ལེགས་འཐོབ་པའི་གནས་ཨེ་ཡོད། །གཞན་དུ་ཁྲིམས་དང་སྔགས་ལམ་མ་བསྟེན་པར། །མངོན་མཐོ་མཐོ་རིས་གསུམ་དང་ངེས་ལེགས་ཀྱི། །མཐར་ཐུག་ཟུང་འཇུག་འཐོབ་པར་མ་གསུངས་སོ། །མངོན་མཐོ་ངེས་ལེགས་འཐོབ་པའི་གནད་ཡོད་ན། །དེ་ཉིད་འགྲུབ་བྱེད་རྒྱུ་ཡི་གཙོ་བོ་དང་། །ལམ་གྱི་འགྲོས་རྣམས་བཀའ་དང་མི་འགལ་བའི། །ལུང་རིགས་འཁྲུལ་མེད་ཅིག་ནི་སྟོན་དགོས་སོ། །དེ་ཉིད་འཐོབ་པའི་གནད་ནི་མེད་གྱུར་ན། །གཙུག་ལག་ཁོ་ནའི་ལམ་གྱིས་ཟུང་འཇུག་སྐུ། །འཐོབ་པ་ལྟ་ཞོག་མཐོ་རིས་གསུམ་ཙམ་ཡང་། །འཐོབ་སྐལ་མེད་ན་དེང་སང་དུས་ཀྱི་ནི། །མོ་གཤེན་རྣམས་དང་ཁྱད་པར་ཅི་ཡོད་དེ། །ལྟོ་རྒྱབ་ཁོལ་བུ་ཙམ་དུ་ཟད་པར་ཐལ། །དེ་ཡི་ཚེ་ན་རྗེ་བཙུན་འཇམ་དབྱངས་ཀྱང་། །སྟོན་པར་བཟུང་ལ་དགོས་པ་ཅི་ཞིག་ཡོད། དཔེར་ན་མིག་མང་(༣༤བ)
བརྒྱ་དང་མ་འབྲེལ་ན། །རྡེའུ་ཇི་ལྟར་མང་ཡང་ཤི་རོར་འགྱུར། །དེ་བཞིན་མངོན་མཐོ་ངེས་ལེགས་མི་འཐོབ་པའི། །གཙུག་ལག་མདོ་རྒྱུད་མང་ཡང་རོ་དང་འདྲ། །ཞེས་པ་སྤྱིར་མགོན་པོ་ཀླུ་སྒྲུབ་ཀྱིས་མཛའ་བོ་བདེ་སྤྱོད་ལ་སྤྲིངས་པར། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པ་ལྟར་རྒྱུ་བ་བཅུད་ཀྱི་སེམས་ཅན་དང་། །མི་རྒྱུ་བ་སྣོད་ཀྱི་འཇིག་རྟེན་ཐམས་ཅད་ས་ཆེན་པོ་ལ་བརྟེན་པ་ལྟར་སྲིད་ཞིའི་ཡོན་ཏན་ཐམས་ཅད་འབྱུང་བའི་གཞི་ཚུལ་ཁྲིམས་ཡིན་ཏེ། ཞི་བ་མྱང་འདས་ཐོབ་པར་བྱེད་པ་ལ་དེ་སྒྲུབ་པའི་རྟེན་མངོན་མཐོའི་གོ་འཕང་ཐོབ་དགོས་པས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་གསུངས་པས་འགྲུབ་ལ། ལྷ་མིའི་རྟེན་འཐོབ་པ་ཡང་ཚུལ་ཁྲིམས་ལ་རག་ལུས། རྟེན་དེ་ལ་ཚུལ་ཁྲིམས་དག་པའི་འབྲས་བུ་ཐར་པའི་གོ་འཕང་འཐོབ་ནུས་པས། མདོ་ལས། ངའི་དགེ་སློང་ཚུལ་ཁྲིམས་དྲི་མ་མེད་པ་དེ་ལ་མཐོ་རིས་ནི་རས་ཡུག་གིས་ཆོད་པ་ཙམ་ལ། ཐར་པ་ནི་ཡོལ་བས་ཆོད་པ་ཙམ་མོ། །ཞེས་གསུངས་ཤིང་བསྙེན་པར་རྫོགས་མ་ཐག་པ་ལ། ཚེ་དང་ལྡན་པ་ཁྱོད་བསྙེན་པར་རྫོགས་ཟིན་གྱིས། བག་ཡོད་པར་སྒྲུབས་ཤིག་ཅེས་བརྗོད་པར་སྣང་བས། བག་ཡོད་པ་ན། ཆོས་མངོན་པ་ལས། བག་ཡོད་པ་གང་ཞེ་ན། མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པ་དང་བརྩོན་འགྲུས་དང་བཅས་པ་ལ་གནས་ན་དགེ་བའི་ཆོས་རྣམས་སྒོམ་ཞིང་། ཟག་པ་དང་བཅས་པའི་ཆོས་རྣམས་ལ་སེམས་སྲུང་བ་སྟེ། ཞེས་བཤད་དོ། །ཁམས་གསུམ་ཆོས་ཀྱི་རྒྱལ་པོ་ཙོང་ཁ་པས། །གནས་སྐབས་འབྲས་བུ་ལྷ་མི་དང་། །མཐར་ཐུག་འབྲས་བུ་(༣༥ན)
བྱང་ཆུབ་གསུམ། །ཐོབ་པར་འགྱུར་ཞེས་གསུངས་པའི་ཕྱིར། །དཔྱོད་ལྡན་རྣམས་ཀྱིས་སོ་སོ་ཐར། །མཉན་པའི་ཕྱིར་ནི་འབད་པར་བྱ། །ཞེས་པ་ལྷ་མིའི་ལུས་འཐོབ་པ་ནི་ཐབས་གཞན་ལ་ལྟོས་མི་དགོས་པར་ཚུལ་ཁྲིམས་རྣམ་པར་དག་པ་གཅིག་པུས་ཆོག་ལ། བྱང་ཆུབ་གསུམ་ཡང་འཐོབ་པའི་རྒྱུར་འགྱུར་བར་དགོངས་སོ། །གོང་དུ་མདོ་ལུང་གི །དགེ་སློང་ཞེས་པ་གཙོ་ཆེ་བའི་དབང་དུ་བཏང་བ་སྟེ། གཞན་དུ་ན་དེ་བཞིན་གཤེགས་པ་ནི་ཐབས་ལ་མཁས། ཐུགས་རྗེ་ཆེ་བས་ཉིན་ཞག་གཅིག་པའི་ཁྲིམས་ཡན་ལག་བརྒྱད་པས་ཀྱང་འགྲུབ་བོ། །སངས་རྒྱས་འཐོབ་པ་ལ་གསང་སྔགས་བླ་མེད་ཀྱི་ལམ་ཉམས་སུ་བླངས་པ་ཞིག་ངེས་པར་དགོས་ཏེ། ལས་མཐའ་རྣམ་འབྱེད་ལས། བསྐལ་པ་མཐའ་ཡས་རྣམས་སུ་ཡང་། །མགོ་དང་རིན་ཆེན་སོགས་བྱིན་པས། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །མཐའ་ཡས་བསྐལ་པ་རྣམས་སུ་ཡང་། །དེ་བཞིན་ཚུལ་ཁྲིམས་བཟོད་སོགས་ཀྱིས། །སྣང་བ་གསུམ་པོ་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །མཐའ་ཡས་བསྐལ་པ་རྣམས་སུ་ཡང་། །སྔགས་ཀྱི་སྐུ་ཡི་ཏིང་འཛིན་གྱིས། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །སྣང་བ་གསུམ་པོ་དག་པ་ནི། །ཐམས་ཅད་མཁྱེན་ཉིད་ཐེ་ཚོམ་མེད། །ཅེས་ཕ་རོལ་ཏུ་ཕྱིན་པ་དང་། བསྐྱེད་རིམ་ཙམ་དང་། རྒྱུད་སྡེ་འོག་མ་གསུམ་གྱིས་སྣང་བ་གསུམ་དག་མི་ནུས་པས་ན་ངེས་པར་རྣལ་འབྱོར་བླ་མེད་ཀྱི་རྫོགས་རིམ་ལ་བརྟེན་དགོས་པར་བཤད་པས་སོ། །མན་ངག་སྙེ་མ་ལས་ཀྱང་། མཆོག་ཏུ་མཐར་ཐུག་པ་ནའང་ངེས་པར་ཐབས་འདི་ལ་ལྟོས་སོ་ཞེས་བརྗོད་པར་བྱ་སྟེ། དཔེར་ན་ནམ་(༣༥བ)
མཁར་བཞུགས་པའི་རྫོགས་པའི་སངས་རྒྱས་རྣམས་ཀྱིས་གནང་བའི་ཤེས་རབ་ཀྱི་དབང་ལ་ཤཱཀྱའི་མགོན་པོ་བྱང་ཆུབ་ཀྱི་ཤིང་དྲུང་དུ་བཞུགས་པ་བྱང་ཆུབ་འཐོབ་པའི་ཆེད་དུ་མཚན་ཕྱེད་ན་ལྟོས་པ་བཞིན་དང་། ཇི་ལྟར་ཡང་བཅོམ་ལྡན་འདས་འདི་ཁོ་ནས་རྡོ་རྗེ་སྙིང་པོ་ལ་ཐིག་ལེ་མཆོག་མས་དབང་བསྐུར་བ་བྱིན་པ་བཞིན་ནོ། །ཞེས་དང་། གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་བར་དུ་ཚོགས་བསགས་ཀྱང་། །འདི་དོན་མ་རྟོགས་ནི་རཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དཀྱིལ་ལྟར་རྣམ་དག་པའི། །ཟབ་གསལ་དྲི་མེད་རབ་བསྟན་ཏོ། །ནམ་ཕྱེད་དུས་སུ་བརྒྱལ་བ་ལྟར། །དེ་ཉིད་བསྒོམས་པས་ཐོ་རངས་སུ། །སྐད་ཅིག་གིས་ནི་ཡང་དག་རྟོགས། །ཞེས་གསལ་བར་བྱུང་ལ། ཁྱད་པར་བླ་མེད་ཀྱི་ནང་ནས་མཆོག་ཏུ་གྱུར་པ་དཔལ་གསང་བ་འདུས་པ་སྟེ། རྒྱུད་ཕྱི་མ་ལས། ཨེ་མའོ་ཤིན་ཏུ་རྙེད་དཀའ་བ། །བྱང་ཆུབ་སྒྲུབ་པའི་ཐབས་འདི་ཡིན། །རྒྱུད་ཀྱི་ཕྱི་མའི་ཕྱི་མར་གྱུར། །གསང་བ་འདུས་པ་ཞེས་བྱའི་རྒྱུད། །ཅེས་དང་། སྒྲོན་གསལ་ལས་ཀྱང་། ཇི་སྲིད་ཡ་ར་ལ་ཧའི་བར། །ཀ་ཁ་གྷ་མཐའ་ཎ་ཛའི་མཐའ། །ཏ་དྷའི་མཐའ་དང་མ་མཐར་བཅས། །དེ་དེའི་རྩ་བ་ཡི་གེ་གསུམ། །ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་བཞི་སྟོང་གསུངས་པ་ཡི། །དཔལ་ལྡན་འདུས་འདི་སྣོད་ཡིན་ཏེ། །དེ་བས་དེ་ནི་རྒྱུད་ཀྱི་རྩེ། །ཞེས་སོ། །དོན་ཧྲིལ་གྱིས་དྲིལ་ན། མི་སློབ་པའི་ཟུང་འཇུག་འཐོབ་པ་ལ། སློབ་པའི་ཟུང་འཇུག་ཐོབ་དགོས། དེ་འཐོབ་པ་ལ་སྒྱུ་ལུས་ཐོབ་དགོས། སྒྱུ་ལུས་ཀྱི་བསྒྲུབ་གཞི་སེམས་དབེན་གྱི་ཡེ་ཤེས་རྫོགས་པར་སྐྱེད་པ་ཕྱིའི་ལས་རྒྱ་ལ་ལྟོས་པས། རིམ་ལྔ་ལས་སྒྱུ་མ་དང་ནི་ཐམས་ཅད་ལས། །(༣༦ན)
བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། །གསལ་བར་འདི་ལས་མཚོན་པར་འགྱུར། །ཞེས་གསུངས། དེ་ལྟ་བུའི་དབང་པོ་གཉིས་སྦྱོར་གྱི་བདེ་བ་ལམ་དུ་བྱེད་ཚུལ་འདི་རྣལ་འབྱོར་རྒྱུད་མན་ཆད་ཐམས་ཅད་ལ་མེད་ཅིང་། སོ་སོ་སྐྱེ་བོ་ཚེ་གཅིག་ལ་གསང་སྔགས་རང་ལམ་གྱིས་བགྲོད་པར་ཚུལ་དེ་དགོས་པར་མ་ཟད། ཕ་རོལ་ཏུ་ཕྱིན་པའི་ས་བཅུའི་ལམ་མཐར་ཕྱིན་པ་རྣམས་ཀྱང་། མཐར་འཚང་རྒྱ་བའི་ཚེ་དངོས་ཀྱི་རིག་མ་ལ་བརྟེན་ནས་དབང་སྐུར་དགོས་པའི་ཁུངས་སུ། ཀྱེ་རྡོ་རྗེ་ལས། འབར་བའི་འཕྲེང་བ་འཁྲུག་པ་ཡི། །དཀྱིལ་འཁོར་རབ་ཏུ་བཞེངས་ནས་ནི། །རྡོ་རྗེ་སྙིང་པོ་དབང་སྦྱིན་ཕྱིར། །ཐིག་ལེ་མཆོག་ཉིད་བཀུག་པ་ཉིད། །ཅེས་གསུངས་སོ། །འདུས་པ་བདེ་དགྱེས་སོགས་སུ་ལས་རྒྱ་ལ་མ་བརྟེན་ན་ཚེ་གཅིག་ལ་འཚང་མི་རྒྱ་བར་བཤད་དོ། །དེ་ལྟ་ནའང་ཐམས་ཅད་མཁྱེན་པ་ཙོང་ཁ་པས། མདོ་རྒྱུད་གཞན་དང་བཤད་སྲོལ་མི་འདྲ་བའི། །ཤིང་རྟའི་སྲོལ་འབྱེད་དུས་ཀྱི་འཁོར་ལོའི་རྒྱུད། །ཅེས་པ་ལྟར་དམ་པ་དང་པོའི་སངས་རྒྱས་དུས་ཀྱི་འཁོར་ལོར་གདུལ་བྱ་དམན་པ་ལ་བྱང་ཆུབ་ཀྱི་སེམས་འཛག་པའི་བགྲོད་པ་དང་། འབྲིང་ལ་གཡོ་བའི་བགྲོད་པ་དང་། མཆོག་ལ་མི་གཡོ་བའི་བགྲོད་པ་གསུམ་ལས་དང་པོ་ལས་ཀྱི་ཕྱག་རྒྱ། གཉིས་པས་ཡེ་ཤེས་ཀྱི་ཕྱག་རྒྱ། གསུམ་པས་ཕྱག་རྒྱ་ཆེན་མོ་གསུམ་ལ་རིམ་བཞིན་བརྟེན་ནས་མཆོག་ཏུ་མི་འགྱུར་བས་བདེ་ཆེན་སྒྲུབ་པས་ན། རྩ་རྒྱུད་ལས། མཆོག་ཏུ་མི་འགྱུར་བསྒོམ་པར་བྱ། །པདྨར་རྡོ་རྗེ་རབ་བཀོད་ནས། །སྲོག་ནི་ཐིག་ལེར་གཞུག་པར་བྱ། །འཁོར་ལོ་ཐིག་ལེ་ཐིག་ལེ་ཡིས། །གཡོ་བ་རྡོ་རྗེ་དགག་པར་བྱ། །རྟག་ཏུ་རྟག་རེངས་རྣལ་འབྱོར་པ། །རྟག་ཏུ་སྟེང་དུ་ཁུ་(༣༦བ)
བར་འགྱུར། །ཕྱག་རྒྱ་ཆེན་པོ་སྦྱོར་བ་ཡིས། །རྡོ་རྗེ་འབེབས་པས་བྱིན་གྱིས་རླབས། །མཆོག་ཏུ་མི་འགྱུར་སྐད་ཅིག་ནི། །སྟོང་ཕྲག་ཉི་ཤུ་རྩ་གཅིག་དང་། །དྲུག་བརྒྱ་རྫོགས་པས་རྒྱལ་པོ་ཆེ། །རྡོ་རྗེ་སེམས་དཔའ་རང་ཉིད་འགྱུར། །ཞེས་གསུངས་ལ། གདུལ་བྱ་མཆོག་གིས་མི་འགྱུར་བའི་བདེ་བ་སྟེན་ནུས་པ་དང་། དམན་པ་དང་བར་མས་ཕྱག་རྒྱ་གཞན་གཉིས་སྤངས་ནས་ཡེ་རྒྱ་ཁོ་ན་ལ་བརྟེན་ནུས་པའི་ས་མཚམས་ཀྱང་། སྒྲུབ་ལེའི་རྒྱ་གོ་དགུ་པ་ལས། སེམས་ནི་རྙོག་པ་དང་བཅས་ལས་ཀྱི་ཕྱག་རྒྱ་འདི་དང་བཏགས་པའི་ཡེ་ཤེས་ཕྱག་རྒྱ་སྤང་བྱ་སྟེ། ཡང་དག་རྫོགས་པའི་བྱང་ཆུབ་ཆེད་དུ་རྒྱལ་བ་མཆོག་གི་སྐྱེད་མ་མཆོག་གི་ཕྱག་རྒྱ་དགོས་པ་མེད། །རྣམ་པར་འགྱུར་བ་མེད་ཅིང་མཁའ་མཉམ་མུན་བཅོམ་ཁྱབ་བྱེད་རྣལ་འབྱོར་དག་གིས་བགྲོད་བྱེད་ཐེར་ཟུག་གནས། །ཡེ་ཤེས་གཟི་བརྗིད་སྲིད་པའི་དྲི་མ་འཕྲོག་ཅིང་དུས་ཀྱི་འཁོར་ལོས་རྗེས་སུ་རིག་པ་བསྒོམ་པར་བྱ། ཞེས་སོགས་ཀྱིས་ཤེས་སོ། །འཇམ་མགོན་ཆོས་ཀྱི་རྒྱལ་པོ་བཙོང་ཁ་པས། །འདི་ན་རྫོགས་སངས་རྒྱས་སུ་བགྲོད་པ་ལ། །ཟབ་མོ་རྡོ་རྗེ་ཐེག་དང་ཕར་ཕྱིན་ཐེག །རྣམ་པ་གཉིས་ཡོད་གསང་སྔགས་ཕར་ཕྱིན་ལས། །ཤིན་ཏུ་ཁྱད་པར་འཕགས་པ་ཡིན་ནོ་ཞེས། །ཉི་མ་ཟླ་བ་ལྟ་བུར་ཀུན་ཏུ་གྲགས། །ཞེས་གསུངས་པ་ནི། བསྐྱེད་རིམ་ནས་བཟུང་སྟེ་འོད་གསལ་གྱི་བར་གྱི་ལམ་གྱི་དོད་ཐུབ་རྣམས་སྔགས་ལམ་ལ་མ་ལྟོས་པར། ཕར་ཕྱིན་ཐེག་པ་རང་ལམ་གྱིས་བགྲོད་པའི་ས་བཅུའི་བྱང་ཆུབ་སེམས་དཔའ་སྲིད་པ་ཐ་མར་གྱུར་པ་ལ། ཕྱོགས་བཅུའི་སངས་རྒྱས་རྣམས་ཀྱིས་དབང་གསུམ་པ་དངོས་དབང་དུ་བསྐུར་ཏེ། སློབ་པའི་ཟུང་འཇུག་དང་། དེའི་རྗེས་སུ་དབང་བཞི་པ་བསྐུར་ནས་སྤྱོད་པ་བྱེད་དུ་བཅུག་པས། མི་སློབ་པའི་ཟུང་འཇུག་མངོན་དུ་བྱེད་པར་བཤད་པས། མཐར་(༣༧ན)
དུས་ཡུན་ཐུང་ངུ་ཞིག་ལ་ཟུང་འཇུག་གི་ལམ་མངོན་དུ་བྱས་པ་ཙམ་ལས་གཞན་སངས་རྒྱས་ཀྱི་སར་བགྲོད་པའི་ལམ་ཕལ་ཆེར་ཕ་རོལ་ཏུ་ཕྱིན་པ་ལ་བརྟེན་ནས་བགྲོད་པ་ལ་དགོངས་སམ་མཉམ། གལ་ཏེ་སྔགས་ལམ་ལ་མ་ལྟོས་པར་ཕར་ཕྱིན་ཁོ་ནའི་ལམ་ལ་བརྟེན་ནས་སངས་རྒྱས་སུ་བགྲོད་པ་ཡོད་པའི་དགོངས་པ་ཡིན་སྲིད་ནའང་། མདོ་ཕྱོགས་ཀྱི་རང་སྐད་ལ་ཡོད་པའི་དབང་དུ་གནང་བ་སྟེ། སྤྱིར་བཏང་དང་ནི་དམིགས་བསལ་དག །བསྟན་བཅོས་ཀུན་ལ་གཅེས་པ་ཡིན། །ཞེས་སྤྱིར་བཏང་དང་དམིགས་བསལ་ལ་དགོངས་པ་ཡིན་ནོ། །དེ་ལྟར་བསྟན་པ་སྤྱིའི་སྐད་དུ་བྱེད་ན། མངོན་མཐོ་འཐོབ་པ་ཁྲིམས་དག་པ་དང་། སངས་རྒྱས་འཐོབ་པ་ངེས་གསང་རྡོ་རྗེ་ཐེག་པ་རྣལ་འབྱོར་བླ་ན་མེད་པ་ལ་རག་ལུས་ནའང་། དེ་གཉིས་མ་གཏོགས་ཆོས་གཞན་གྱིས་དགོས་པ་མེད་པ་ལྟ་བུར་གོ་ན་སངས་རྒྱས་འཐོབ་མི་ནུས་ཏེ། རྒྱལ་བས་ཆོས་ཚུལ་གྲངས་མེད་གསུངས་པ་ཐམས་ཅད་སེམས་ཅན་རྣམས་ཀྱིས་སངས་རྒྱས་འཐོབ་པའི་ཐབས་སུ་གསུངས་པས་སོ། །ཚུལ་དེ་ལ་བརྟེན་ནས་འབྲོམ་སྟོན་པས། བསྟན་པ་ཐམས་ཅད་གྲུ་བཞི་ལམ་འཁྱེར་ཤེས་པ་ངའི་བླ་མ་ཞེས་དཔལ་མར་མེ་མཛད་ལ་བསྔགས་པ་བརྗོད་པ་དང་། རྒྱལ་བ་བཙོང་ཁ་པས། བསྟན་པ་ཐམས་ཅད་འགལ་མེད་རྟོགས་པ་དང་། །གསུང་རབ་མ་ལུས་གདམས་པར་འཆར་བ་དང་། །ཞེས་པའང་། རང་ཉིད་ངན་འགྲོ་ལས་ཐར་པ་ཙམ་དོན་དུ་གཉེར་བ་སོགས་དམིགས་བསལ་ཅན་འགའ་རེ་མ་གཏོགས་སྐྱེས་བུ་ཆུང་ངུའི་ཆོས་རྣམས་ཀྱང་འབྲིང་ཉམས་སུ་ལེན་པ་ལ་དགོས། རང་ཉིད་གཅིག་པུ་ཞི་བདེ་དོན་གཉེར་སོགས་འགའ་རེ་མ་གཏོགས་འབྲིང་གི་ཆོས་རྣམས་ཆེན་པོའི་(༣༧བ)
ཉམས་ལེན་ལ་དགོས་ཤིང་། རྡོ་རྗེ་ཐེག་པའི་སྔོན་དུ་ལམ་ཐུན་མོང་བའི་རྒྱུད་སྦྱང་འགྲོ་དགོས་པ་ལ། དེང་སང་ཐེག་པ་གསུམ་དང་གྲུབ་མཐའ་བཞི་སོགས་ཀྱི་རྣམ་གཞག་ལ་ཐོས་པ་ཅུང་ཟད་ཀྱང་མ་བྱས་པར་ཕྱག་རྒྱ་ཆེན་པོའི་རྟོགས་པ་ཀློང་དུ་གྱུར་པ་སྐད་བྱས་ནས་རི་སུལ་ཀུན་དུ་གྲོག་ཚང་རྡོལ་བ་ལྟ་བུ་ནི། སྒོམ་ན་ཐོས་པ་མི་དགོས་ཞེས། །བླུན་པོ་བློ་རྒྱ་ཆུང་དུ་སྨྲ། །ཐོས་པ་མེད་པར་སྒོམ་པ་ཙམ། །འབད་ཀྱང་དུད་འགྲོའི་སྒྲུབ་ཐབས་ཡིན། །ཞེས་པ་ལྟར་རོ། །འོ་ན་ནང་རིག་པ་ཙམ་ལ་ཐོས་བསམ་བྱས་པས་མྱ་ངན་ལས་འདས་པའི་གོ་འཕང་འགྲུབ་བམ་སྙམ་ན། སྤྱོད་འཇུག་ལས། རྒྱལ་སྲས་རྣམས་ཀྱིས་མི་བསླབ་པའི། །དངོས་དེ་འགའ་ཡང་ཡོད་མ་ཡིན། །དེ་ལྟར་གནས་པའི་མཁས་པ་ལ། །བསོད་ནམས་མི་འགྱུར་གང་ཡང་མེད། །ཅེས་དང་། རྗེ་བཙུན་ས་སྐྱ་པཎྜི་ཏས། རང་བློ་ཤེས་བྱ་ཀུན་ལ་མ་སྦྱངས་ན། །ཐམས་ཅད་མཁྱེན་པ་ནམ་མཁའི་མཐའ་ལས་རིང་། །ཞེས་གསུངས་པ་ལྟར་རྒྱལ་བའི་སྲས་གཞན་ཕྱིར་བླ་ན་མེད་པའི་བྱང་ཆུབ་དོན་དུ་གཉེར་བ་རྣམས་རང་དང་གཞན་གྱི་གྲུབ་པའི་མཐའ་ཐམས་ཅད་ལ་སྦྱང་དགོས་པ་ཡིན་ཏེ། དཔལ་ཆོས་ཀྱི་གྲགས་པས་གྲངས་ཅན་གྱི་གྲུབ་མཐའི་གསང་ཚིག་རྣམས་ཤེས་པའི་ཆེད་དུ་བྲན་དུ་བརྫུས་ཏེ་ཞང་པོའི་ཆུང་མའི་གཡོག་བྱས་ནས་གྲུབ་མཐའི་གནད་འདི་འདྲ་དྲི་དགོས་བྱས་པས། འདོད་པ་སྤྱོད་ཚེ་དྲི་ཡིས། ཁྱེད་རང་ཡིད་ལ་ཟུངས་ཟེར་བ་ལྟར་བྱས། དེའི་ཚེ་མོའི་རྐང་པ་ལ་ཐ་གུ་བཏགས་ནས་གང་དཀའ་སར་ཐེན་ཐེན་བྱས་ཚེ་མོས་ནན་ཆེན་དྲིས་པས་མཁྱེན་ཏོ། །དེ་བཞིན་གཤེགས་པས་གྲུབ་མཐས་བློ་མ་འགྱུར་བའི་སྐྱེ་བོ་བ་ལང་ལྟ་བུ་ལ། སྐྱེ་བ་སྔ་ཕྱི་དང་ལས་འབྲས་མེད་པར་འདོད་པའི་མུ་སྟེགས་རྒྱང་པན་གྱི་བསྟན་བཅོས་(༣༨ན)
བསྟན་པའི་སྒོ་ནས་བཀྲི་བའི་སྐབས་ཡོད་དེ། ཅིའི་ཕྱིར་ན། རྒྱང་པན་པས་ཀྱང་རིགས་པ་ཁས་ལེན་པས་སོ། །སྔོན་བསམ་ཡས་སུ་མཁན་པོའི་ཞལ་ཆེམས་ལྟར་རྗེ་བཙན་པོས་ཧྭ་ཤང་གདུལ་དོན་དུ་མཁས་པ་ཀ་མ་ལ་ཤཱི་ལ་གདན་དྲངས་ཚེ་ཐོག་མར་ཧྭ་ཤང་དང་། པཎྜི་ཏ་ཆུ་ཕ་རི་ཚུ་རི་བྱུང་བར། པཎྜི་ཏས་ཚོད་བརྟག་པའི་ཕྱིར་དུ། ཆག་ཤིང་ཀླད་ལ་ལན་གསུམ་བསྐོར་བས། ཧྭ་ཤང་གིས་ཁམས་གསུམ་འཁོར་བར་སྐྱེ་བའི་རྒྱུ་དྲིས་པར་གོ་ནས་གཟུང་འཛིན་གཉིས་ཡིན་པའི་བརྡ་ཆད་དུ་བེར་གྱི་མཐུ་བ་ལན་གཉིས་ས་ལ་བརྡབས་པས། ཀ་མ་ལའི་ཐུགས་ལ་ཧྭ་ཤང་རིགས་པ་ཁས་ལེན་པས་ཐུལ་བར་དགོངས་པའི་ལོ་རྒྱུས་དང་། འཇིག་རྟེན་གྱི་གཏམ་ལའང་། ཤེས་ཅན་དེ་དགྲ་ལ་ཡོད་ཀྱང་མཁོ་ཟེར་བའི་དཔེ་འདིར་འོང་། སླར་རྒྱང་པན་དེ་སྐྱེ་བ་སྔ་ཕྱི་ཙམ་འདོད་པའི་མུ་སྟེགས་དཔྱོད་པ་པ་དང་། དེ་ཡང་ཐར་པ་འདོད་པའི་མུ་སྟེགས་གྲངས་ཅན་དང་གཅེར་བུ་པ་སོགས་ཀྱི་ལུགས་སུ་འཁྲིད་ལ། དེ་དག་གིས། ཁ་བ་རྒྱ་སྤོས་མེ་ཏོག་དང་། །བ་ཞོ་བ་མོ་མུ་ཏིག་མདོག །གདུགས་དཀར་བཟུང་བའི་དབྱིབས་འདྲ་བ། །ཐར་པ་ཡིན་པར་རྒྱལ་བས་བཤད། །ཅེས་པ་ལྟ་བུ་འདོད། མྱང་འདས་ཁས་ལེན་པ་ལ། ཆོས་རྣམས་བདེན་མེད་དུ་བློར་མི་ཚུད་པ་ལ་བྱེ་བྲག་སྨྲ་བ་དང་། དེ་ལས་བཟློག་སྟེ་བྱ་བྱེད་ལས་གསུམ་ཡུལ་སྟེང་ནས་མ་གྲུབ་པའི་བློས་བཏགས་འདོད་པ་ལ་མདོ་སྡེ་པ་དང་། ཕྱི་དོན་བཀག་ནས་གཟུང་འཛིན་གཉིས་སྟོང་གི་ཤེས་པ་བདེན་གྲུབ་ཏུ་འདོད་པ་ལ་སེམས་ཙམ་པ། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་བདེན་མེད་དུ་བློར་ཆུད་པའི་རིགས་ལ་དབུ་མའི་གྲུབ་མཐའ་སྟེན། བརྟག་གཉིས་ལས། ལྟ་དང་རྒོད་དང་ལག་བཅིངས་དང་། །གཉིས་གཉིས་འཁྱུད་དང་རྣམ་པ་བཞི། །སྲིན་བུའི་ཚུལ་གྱིས་རྒྱུད་བཞིན་(༣༨བ)
གསུངས། །ཞེས་ཤིང་ལ་གནས་པའི་སྲིན་བུས་ཤིང་ཉིད་ལྷག་མེད་དུ་ཟ་བ་ལྟར། ཉོན་མོངས་སྤང་བྱར་མ་བྱས་པར་ལམ་དུ་འཁྱེར་ཚུལ་བཞིའི་སྒོ་ནས་སངས་རྒྱས་སྒྲུབ་པའི་ཐབས་དམ་པ་སྟོན་པའི་སྣོད་དུ་གྱུར་པ་དབང་པོ་ཆེས་རྣོན་པོ་རྣམས་ལ་གསང་སྔགས་ཀྱི་ཐེག་པ་སྟོན་པས་ན། ལྷ་མོ་དབྱངས་ཅན་མའང་ངེས་དོན་དུ་གཤིན་རྗེ་གཤེད་དང་མཉམ་པར་སྦྱོར་བའི་གཉིས་མེད་གཉིས་སུ་སྣང་བའི་ཡུམ་རྡོ་རྗེ་དབྱིངས་ཕྱུག་མ་ཡིན་ལ། ཕྱི་རོལ་པ་རྣམས་ཀྱི་དོན་དུ་ཚངས་པའི་བུ་མོར་བསྟན་ཅིང་། ནང་པའི་ལུགས་འཛིན་རྣམས་ཀྱི་ངོར་སྤྱན་རས་གཟིགས་ཀྱི་མཆེ་བ་ལས་འཁྲུངས་པར་གྲགས། སྤྱན་རས་གཟིགས་ཀྱང་བཀའ་གདམས་གླེགས་བམ་རིན་པོ་ཆེར། བོན་གྱི་ངོར་གཤེན་ལྷ་འོད་དཀར་དུ་བསྟན་པར་གསུངས་ཤིང་། དུས་གསུམ་མཁྱེན་པ་ཨོ་རྒྱན་གྱི་ཟབ་གཏེར་མང་པོར་ལྷ་ཆེན་དབང་ཕྱུག་གི་སྒྲུབ་སྐོར་ལ། འཕགས་པ་འཇིག་རྟེན་དབང་ཕྱུག་དམར་པོར་སྒྲུབ་པ་ཞེས་ཕྱག་ན་པདྨར་བསྟན། དེ་ལྟར་མུ་སྟེགས་རྒྱང་པན་གྱི་གྲུབ་མཐས་ཀྱང་མཐར་མངོན་མཐོ་དང་སངས་རྒྱས་ཀྱི་སར་འཁྲིད་ནུས་པ་ཡོད་ན། རྒྱ་ནག་གི་གཙུག་ལག་རྩིས་ཀྱིས་མངོན་མཐོ་དང་སངས་རྒྱས་ཐོབ་པར་འགྱུར་བ་ཡོད་པ་ལ་སོམ་ཉི་མི་འཚལ་གྱི། འོན་ཀྱང་འདི་ཁོ་ནས་མངོན་མཐོ་ངེས་ལེགས་འཐོབ་མི་ནུས་མོད། དེ་རྒྱུ་མཚན་དུ་བྱས་ནས་ཡང་དག་པ་མ་ཡིན་པར་སྒྲུབ་མི་རུང་སྟེ། སངས་རྒྱས་འཐོབ་པ་ལ་དོན་གྱི་གནད་ནང་རིག་པ་ཐེག་པ་གསུམ་གྱི་ཆོས་ཚུལ་ལ་མ་རྨོངས་པ་ཞིག་དགོས། ཐེག་པ་གསུམ་གྱི་གཞུང་ལུགས་ལ་མཁས་པར་བྱེད་པ་ཚིག་གི་ཆ་ལ་འཁྲུལ་པ་སེལ་བ་གཏན་ཚིགས་རིག་པ་དང་དོན་གྱི་ཆ་ལ་འཁྲུལ་པ་སེལ་བ་སྒྲ་རིག་པ་ལ་ལྟོས་པས། ཐམས་ཅད་མཁྱེན་པ་ལོ་ཆེན་ཆོས་སྐྱོང་བཟང་པོས། མཁས་ཤེས་བྱ་བ་མང་ན་ཡང་། །སྒྲ་ཚད་ཀྱི་(༣༩ན)
འཕྲང་ལ་བཅུར་ན་ཤེས། །ཞེས་གསུངས་སོ། །གཞན་དུ་ན་ལེགས་སྦྱར་གྱི་བསྟན་བཅོས་ཁོ་ན་ལ་བརྟེན་ནས་ཀྱང་འཚང་རྒྱ་བར་མི་ནུས་པས། བརྡ་སྤྲོད་ཀྱི་གཞུང་ཀུན་ཡང་དོན་མེད་དུ་འདོད་དགོས་པར་འགྱུར་རོ། །ནག་རྩིས་ཁོ་ནས་བྱང་ཆུབ་མཆོག་འཐོབ་མི་ནུས་པས་དེ་སྟོན་པ་པོ་རྗེ་བཙུན་འཇམ་དབྱངས་སྟོན་པ་ཡང་དག་ཏུ་བཟུང་མི་རིགས་པར་མི་འགྱུར་ཏེ། ནག་རྩིས་སུ་མ་ཟད་སྲིད་པ་འཁོར་བའི་སྡུག་བསྔལ་དྲུངས་ནས་འབྱིན་ནུས་པའི་ཟབ་མོ་སྟོང་པ་ཉིད་སྟོན་པའི་གཞུང་ལུགས་ཀྱང་འཇམ་དབྱངས་ཀྱིས་མགོན་པོ་ཀླུ་སྒྲུབ་ལ་གསུངས་ཤིང་། འཇམ་པའི་རྡོ་རྗེ་དཀྱིལ་འཁོར་གྱི་གཙོ་བོར་བཞེངས་ནས། རྡོ་རྗེའི་རྣལ་འབྱོར་མཆོག་གི་ཆོས་ཚུལ་རྒྱ་ཆེར་བསྟན་ཏོ། །གཞན་ཡང་། དེ་བཞིན་གཤེགས་པས་གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་རང་གི་མཚན་ཉིད་ཀྱིས་གྲུབ་པར་བསྟན་པའི་མདོ་དང་། རྡོ་རྗེ་གུར་དུ། མིག་སྨན་དང་ནི་རྐང་མགྱོགས་དང་། །རལ་གྲི་དང་ནི་ས་བོན་འགྲུབ། །རིལ་བུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱི་ལེན། །ཐ་མལ་པ་ཞེས་བཤད་པ་ཡིན། །ཞེས་གྲུབ་ཆེན་བརྒྱད་དང་། སྒྲོན་གསལ་ལས། དགོས་པ་ཡང་ནི་བཤད་བྱ་སྟེ། །ཞི་སོགས་བྱ་བའི་ཆོ་ག་དང་། །ཞེས་ཞི་རྒྱས་དབང་དྲག་གི་ལས་རབ་འབྱམས་སོགས་རྒྱུད་སྡེ་མང་པོར་བྱུང་བ། བཤད་མ་ཐག་པའི་དོན་ཙམ་བརྗོད་བྱར་བྱེད་པའི་མདོ་རྒྱུད་ཙམ་ལ་བརྟེན་ཀྱང་སངས་རྒྱས་མི་འཐོབ་པས། དེ་རྣམས་བཀའ་ཚད་མ་མིན་པ་དང་། དེ་བཞིན་གཤེགས་པའང་སྟོན་པ་རྣམ་དག་ཏུ་འཛིན་མི་རུང་བར་འགྱུར་བ་སོགས་རིགས་པ་གོ་མཚུངས་སོ། །ནག་རྩིས་ཀྱི་རང་གཞུང་ཁོ་ནས་མངོན་མཐོ་ངེས་ལེགས་མི་འཐོབ་པ་རྒྱུ་མཚན་དུ་བྱས་ནས། བྱེད་པ་པོ་རྣམས་ཀྱི་ལྟོ་གོས་(༣༩བ)
སོགས་ཚེ་འདི་འབྱིད་ཐབས་རྐྱང་པར་འགྲོ་བའི་ངེས་གཟུང་མེད་དེ། མདོ་སྔགས་ཐ་སྙད་ཀྱི་རིག་པ་སོགས་གང་ལའང་བྱེད་པ་པོའི་བསམ་པ་གཙོ་ཆེ་བས་སོ། །ཅིའི་ཕྱིར་ན། ད་ལྟ་མཆོག་དམན་བར་མ་ཐམས་ཅད་ཀྱི་ངག་ལས་རླུང་ལྟར་རྗོད་ཅིང་། ཆོས་ཐམས་ཅད་ཀྱི་ཡང་རྩེར་བྱེད་པའི་ངེས་དོན་ཕྱག་རྒྱ་ཆེན་པོར་གྲགས་པ་འདི་ལ། སྤྱིར་སྡོམ་གསུམ་དུ། ངེད་ཀྱི་ཕྱག་རྒྱ་ཆེན་པོ་ནི། །དབང་ལས་བྱུང་བའི་ཡེ་ཤེས་དང་། །རིམ་པ་གཉིས་ཀྱི་ཁྱད་པར་ལས། །བྱུང་བའི་རང་བྱུང་ཡེ་ཤེས་ཡིན། །ཞེས་ཕྱག་རྒྱ་ཆེན་དེ་གསང་སྔགས་བླ་མེད་ཀྱི་ལམ་དུ་མཛད་པས་ན། སྔགས་རྙིང་མ་ལས་ཐེག་པ་རིམ་དགུར་གསུངས་པས་དབང་དང་རིམ་གཉིས་ལས་བྱུང་བའི་ཕྱག་རྒྱ་ཆེན་པོའི་ཡེ་ཤེས་ལས་མཐོ་བ་རྫོགས་པ་ཆེན་པོ་ལྷུན་གྲུབ་འོད་གསལ་སྣང་བཞིའི་ལམ་ཡོད་པར་བཞེད་ནའང་། གསར་མ་སོར་བཞག་པར། རྣལ་འབྱོར་བླ་མེད་ཀྱི་གོང་ན་ཐེག་པ་གཞན་མེད་པས་ཆོས་ཀུན་གྱི་རྩེ་མོར་སོན་པ་ཡིན་མོད། ད་ལྟའི་ཕྱག་རྒྱ་པའི་ལུགས་འདི་གནས་ལུགས་ཕྱག་ཆེན་ཞེས་ལྟ་བ་ལ་སྦྱར་ནས་མདོ་ལུགས་ཡིན་ཟེར་བས་ཕྱག་ཆེན་མཚན་ཉིད་ཚང་བར་མི་འགྲོའང་དོན་རྣལ་མ་ཞིག་བྱུང་ན་ཞི་ལྷག་ཟུང་འབྲེལ་ལྟ་བུར་སྣང་ལ། དེས་ན་མདོ་སྡེ་རྒྱན་ལས། ཆོས་ཀྱི་མིང་ནི་སྡོམ་པའང་འདི། །ཞི་གནས་ལམ་དུ་ཤེས་པར་བྱ། །ལྷག་མཐོང་ལམ་མིན་དེ་དོན་རྣམས། །རྣམ་པར་དཔྱོད་པར་ཤེས་པར་བྱ། །ཞེས་ཆོས་རྣམས་ཀྱི་གནས་ལུགས་ལས་མི་གཡེལ་བར་བསྡུས་ཏེ། རྩེ་གཅིག་ཏུ་ཉམས་སུ་ལེན་པ་ཞི་གནས་དང་། ལྷག་མཐོང་ནི་མི་གཡེང་བར་བརྟན་པ་ཐོབ་པའི་ངང་ནས་སོ་སོར་རྣམ་པར་དཔྱོད་པ་ཡིན་པས། ལྷག་མཐོང་གི་སྒོ་ནས་གནས་ལུགས་ཕྱིན་ཅི་མ་ལོག་(༤༠ན)
པ་ཤེས་པར་བྱེད་པ། དེ་ཉམས་སུ་བསྟན་པའི་གཞི་རྟེན། ཞི་གནས་ལ་རག་ལུས་པས། མདོ་སྡེ་དགོངས་འགྲེལ་ལས། དེ་གཅིག་ཏུ་དབེན་པར་འདུག་སྟེ་ནང་དུ་ཡང་དག་པར་བཞག་ནས་ཇི་ལྟར་ལེགས་པར་བསམ་པའི་ཆོས་དེ་དག་ཉིད་ཡིད་ལ་བྱེད་ཅིང་། སེམས་གང་གིས་ཡིད་ལ་བྱེད་པའི་སེམས་དེ་ནང་དུ་རྒྱུན་ཆགས་སུ་ཡིད་ལ་བྱེད་པས་ཡིད་ལ་བྱེད་དོ། །ཞེས་གསུངས་ལ། དེར་མ་ཟད་དཔེར་ན་མར་མེ་གསལ་ཡང་རླུང་གིས་བསྐྱོད་ནས་གཟུགས་བརྙན་ཚུལ་བཞིན་མི་མཐོང་བ་ལྟར། དམིགས་པ་ལས་མི་གཡོ་བའི་ཞི་གནས་མེད་ན་ལྷག་མཐོང་གིས་དོན་ཚུལ་བཞིན་དུ་གཡོ་བ་མེད་པར་མི་མཐོང་ཞིང་། གལ་ཏེ་དེ་ལྟར་གཡོ་མེད་དུ་མཐོང་ནུས་ན་ལྷག་མཐོང་གིས་སོ་སོར་དཔྱད་པ་ཙམ་གྱིས་གནས་ལུགས་ཀྱི་དོན་ལ་དམིགས་པའི་ཏིང་ངེ་འཛིན་ཇེ་འཕེལ་དུ་སོང་ནས་རི་དང་མཚུངས་པར་ཤིན་ཏུ་བརྟན་པར་འགྱུར་ཏེ། ཟླ་བ་སྒྲོན་མའི་མདོ་ལས། ཞི་གནས་སྟོབས་ཀྱིས་གཡོ་བ་མེད་པར་འགྱུར། །ལྷག་མཐོང་གིས་ནི་རི་དང་འདྲ་བར་འགྱུར། །ཞེས་གསུངས་སོ། །དེ་བཞིན་དུ་ཕྱག་ཆེན་པོ་རྣམས་ཀྱིས་ཀྱང་གནས་པ་སྐྱོང་ཞེས་སྨྲ་བ་འདི། ཞི་གནས་ཀྱི་ལུགས་སུ་བྱེད་འདུག་པ། ཁྱེད་རྣམས་ཀྱིས་གནས་པ་བརྟན་པོ་ཡོད་པར་སྒོམ་ཆེན་བཟང་བཟང་མོ་བྱེད་པས་ན། དེ་ལྟ་བུའི་ཉམས་ལེན་དེ་སྐྱབས་འགྲོ་དང་སེམས་བསྐྱེད་ཀྱི་རྩིས་མ་ཟིན་ན་མུ་སྟེགས་བྱེད་ལ་གནས་ཆ་དེ་འདྲས་ཆ་ཙམ་དུའང་སྒྲུན་མི་ནུས་པའི་སྲིད་རྩེའི་བར་དུ་འགྲོ་བའི་ཏིང་འཛིན་ཡོད་པས། ཕྱག་རྒྱ་བའི་སྒོམ་ཆེན་པ་དེ་ནང་པ་སངས་རྒྱས་པའི་བྲལ་དུའང་མི་ཚུད་ལ། ཡང་ནག་རྩིས་པ་ཞིག་གིས་གཤིན་གསོན་གྱི་རྩིས་རྣམས་སྐྱབས་འགྲོ་དང་སེམས་བསྐྱེད་ཀྱིས་ཟིན་པའི་སྒོ་ནས་བྱས་ན་སངས་རྒྱས་འཐོབ་པའི་རྒྱུར་འགྱུར་བའི་རྒྱུ་མཚན་ཟན་ཆངས་གཅིག་ཙམ་(༤༠བ)
བྱང་ཆུབ་ཀྱི་སེམས་ཀྱི་སྒོ་ནས་བྱིན་ཀྱང་སངས་རྒྱས་འཐོབ་པའི་རྒྱུར་འགྱུར་ན། ནག་རྩིས་ཀྱི་སྒོ་ནས་འགྲོ་རྣམས་བདེ་སྐྱིད་ལ་འགོད་ནུས་ཏེ། གཤིན་རྩིས་ཀྱིས་ཡུལ་དང་ཉེ་འབྲེལ་ལ་ཕན་པར་མ་ཟད་གཤིན་པོ་རང་གི་སྡིག་པ་སྦྱོང་ཐབས་སུ་འགྱུར་བས། ཁྱུང་ནག་གི་ཟངས་སྐྱེམ་བསྡུས་དོན་བཅུ་གསུམ་མ་ལས། འཇམ་དཔལ་དཔལ་དང་ལྡན་པའི་མཆོག །དག་པར་བྱེད་ཅིང་སྡིག་སེལ་པ། །ངན་སོང་ཐམས་ཅད་སྦྱོང་བ་ཡི། །ཡེ་ཤེས་ལས་བྱུང་ཁྱོད་ལ་འདུད། །འགྲོ་བའི་ལས་དང་རྐྱེན་དབང་གིས། །སྡུག་བསྔལ་ཆུ་བོ་བཞི་ཡིས་གདུངས། །འཇིག་རྟེན་ཕ་རོལ་ཚེ་འཕོས་པའི། །གཤིན་བཅོས་ཕུང་པོ་གཏང་ཐབས་བདུན། །ཞེས་འཇམ་དཔལ་གྱི་ཐུགས་རྗེས་ངན་སོང་སྦྱོང་བར་གསུངས་ཤིང་། དེར་མ་ཟད། སྟེང་ལྷའི་ཡུལ་ན་ལྷ་དབང་བརྒྱ་བྱིན་ལ་འདོད་ཁམས་དང་གཟུགས་ཀྱི་ལྷས་བསྐོར་བ་དེར་སྐྱེས་སམ་བྱ་བ་དང་གཅིག །འོག་གཤིན་རྗེའི་འཇིག་རྟེན་གཤིན་རྗེ་ཆོས་ཀྱི་རྒྱལ་པོ་ལ། འཁོར་ངན་སོང་གསུམ་གྱིས་བསྐོར་བ་དེར་སྐྱེས་སམ་བྱ་བ་དང་གཉིས། བར་མིའི་འཇིག་རྟེན་ན་བར་དོའི་སེམས་ཅན་དེ་གར་སྐྱེ་ངེས་པར་གནས་པ་དང་གསུམ་ཞེས་བརྟགས་ནས། སྐྱེ་གནས་བཟང་པོར་སྒྱུར་ཞིང་ངན་པ་འགེགས་པའི་ཐབས་ཡོད་པས། སྔགས་རྙིང་མའི་ན་རག་གི་སྐོང་དང་། གསར་མའི་ཀུན་རིག་དང་ཆ་མཐུན། གསོན་རྩིས་ལ་ཁྱུང་ནག་སྒང་དྲིལ་ལས། འགྲོ་བའི་གཙོར་གྱུར་རྐང་གཉིས་མི་ལུས་འདི། །འབྱུང་བ་ལས་གྲུབ་རྣམ་རྟོག་རྐྱེན་དབང་གིས། །འདུས་པའི་ནད་དང་གདོན་གྱི་ཡེ་འབྲོག་འབྱུང་། །ཚེ་འདིར་ལེགས་ཉེས་སྐྱིད་སྡུག་འབྱུང་བས་བྱེད། །དེ་ཕྱིར་འབྱུང་བ་རྩི་བ་ཤིན་ཏུ་གཅེས། །ཞེས་པ་བརྩི་བྱའི་སྐོར་ལ་གོ་རྡེའུ་བདུན་མ་སོགས་ཀྱི་སྒོ་ནས་བླང་དོར་བསྟན་པས། ཚེ་རིང་ཞིང་ནད་(༤༡ན)
ཉུང་བ། ལོངས་སྤྱོད་འཕེལ་བ་སོགས་ཕན་པ་རྒྱ་ཆེར་འབྱུང་། ནད་པར་ཕན་དོན། ཐང་ཤིང་ཆེན་པོ་བཞི་ཡི་རྩིས་དང་གཅིག །གསེར་གྱི་ཟམ་ཆེན་བཅོ་ལྔའི་རྩིས་དང་གཉིས། །གཡུང་དྲུང་ཤུག་པ་འདབ་རྒྱས་རྩིས་དང་གསུམ། །དཔག་བསམ་ལྗོན་ཤིང་འབྲས་བུའི་རྩིས་དང་བཞི། །དཔལ་ཁྱིམ་དང་ནི་བྱུང་ཁྱིམ་རྩིས་དང་ལྔ། །ཤི་མིག་གསོན་མིག་བགྲང་བའི་རྩིས་དང་དྲུག །ལིང་ཚེ་བརྒལ་ལམ་མ་བརྒལ་རྩིས་དང་བདུན། །ཞེས་འདུ་བ་འཁྲུགས་པའི་དུཿཁས་མནར་བ་རྣམས་འཆི་གསོས་ཀྱི་བདུད་རྩིའི་སྨན་དང་དེ་མཚུངས་པས། རྗེ་འཕྲིན་ལས་ཞབས་ཀྱིས། དགེ་ལེགས་ཚོགས་གཉིས་ཆེས་ཆེར་རབ་བསྒྲུབས་པས། །གང་གི་ཐུགས་རྗེས་ས་གསུམ་ལུས་ཅན་གྱི། །དུག་གསུམ་ལས་སྐྱེས་བཞི་བརྒྱ་རྩ་བཞིའི་ནད། །ཞི་བར་མཛོད་ཅིག་འཇམ་དཔལ་སྨན་པའི་རྒྱལ། །ཞེས་དང་། དེ་སྐད་ནད་ཀྱིས་གདུངས་པའི་འགྲོ་བ་ལ། །ཕན་དོན་ཐང་ཤིང་ཆེན་པོ་རྩིས་ཀྱི་གཞུང་། །ཞེས་པའི་དོན་གྱིས་ཤེས་ལ། ག་གོང་གཉན་སྦྱོར་གྱི་རྩིས་ཀྱི་གནས་སྐབས་སུ་ཕན་པའི་བྱེད་ལས། དབྱངས་འཆར་རིན་ཆེན་རྒྱ་མཚོ་ལས། །བུད་མེད་སྐྱེས་མིང་སྐར་མ་ནི། །ཁྱོ་ཡི་སྙིང་ལ་སོང་བ་ན། །ཚེ་རིང་ཡིད་གཅུག་འགྲོགས་པར་འགྱུར། ཁྱོ་ཡི་སྐྱེས་སྐར་བུད་མེད་སོང་། །དེ་དང་འདྲ་སྟེ་སྐྱིད་པ་ཡིན། །བུད་མེད་གཟའ་དེ་པ་ཝ་སངས། ཁྱོ་ཡི་སྙིང་ལ་སོང་བ་ན། །ཕྱོགས་ཀུན་རྣམ་པར་རྒྱལ་འགྱུར་ཏེ། །མཆོག་ཏུ་དག་ཞིང་སྐྱེད་པ་ཡིན། །ལྷག་པ་སྐྱེས་པའི་གཟའ་ཡིན་ཏེ། །བུད་མེད་སྙིང་ལ་སོང་བ་ན། །བཞོན་དང་ནོར་རྣམས་འཕེལ་བ་དང་། །བུ་ལྔ་དག་ནི་སྐྱེ་བ་ཡིན། །ཞེས་སྐར་རྩིས་ལས་བྱུང་བ་དང་། ཁྱད་པར་ནག་རྩིས་དངོས་བསྟན་དུའང་། བདེ་ལེགས་ཀུན་འབྱུང་ལས། སྲོག་གི་འབྱུང་བ(༤༡བ)
མཐུན་འགྱུར་ན། །ཚེ་རིང་གཅིག་སྒྲ་གཅིག་གིས་འཐུ། །གཅིག་གི་གཉེར་མ་གཅིག་གིས་འདྲེན། །ཤིན་ཏུ་འགྲོགས་ཡུན་རིང་བ་ཡིན། །ལུས་མཐུན་བུ་ཚ་འཕེལ་བ་སྟེ། །མལ་གང་ཤི་ཆད་མེད་པ་ལ། །དབང་པོ་སྐྱོན་མེད་བཞིན་ལེགས་སྐྱེ། །དབང་མཐུན་ནོར་རྫས་ལོ་ཕྱུགས་འཕེལ། །ལག་པ་མི་ལ་མི་གདེང་ཞིང་། །ཟས་ནོར་ཕུན་སུམ་ཚོགས་པ་འོང་། །རླུང་རྟ་མི་ཁ་བྱམས་པ་སྟེ། །ཕྱི་མི་ནང་མི་ཐམས་ཅད་བྱམས། །ལྷག་པར་ཡ་རབས་གོང་མས་སྐྱོང་། །ཞེས། འདི་སྣང་གི་བདེ་སྐྱིད་ཀྱི་དཔལ་ཕུན་སུམ་ཚོགས་པ་ལ་སྤྱོད་པར་འགྱུར་བར་མ་ཟད། འདི་ཕྱིའི་ལེགས་ཚོགས་ཐམས་ཅད་ཀྱི་རྩ་བ་དམ་པའི་ཆོས་སྒྲུབ་པའི་རྟེན་དལ་འབྱོར་གྱི་མི་ལུས་དང་། ཁྱད་པར་གསང་སྔགས་རྡོ་རྗེ་ཐེག་པ་བསྐྱེད་རྫོགས་ཀྱི་ཟབ་ལམ་ཉམས་སུ་ལེན་པ་ལ་རྟེན་མངལ་སྐྱེས་ཁམས་དྲུག་དང་ལྡན་པ་ཞིག་དགོས་པས་ན། སྡུག་བསྔལ་རྒྱ་མཚོའི་སྣོད་གྱུར་པ། །ལུས་ཀྱི་དགྲ་དང་འདྲ་མོད་ཀྱི། །བློ་དང་ལྡན་པས་འཁོལ་ཤེས་ན། །འདི་ལ་བསོད་ནམས་བརྟན་དུ་རུང་། །སྐད་ཅིག་འཇིག་པའི་ཚེ་ན་ཡང་། །དགེ་བའི་བག་ཆགས་རིང་དུ་འཁྱེར། །རླུང་གིས་གོས་པའི་ཙན་དན་དྲི། །རིང་དུ་འཐུལ་ཡང་དགའ་བ་སྐྱེད། །ཅེས་པ་ལྟར་རོ། །མི་ལུས་སྐྱེད་པའི་ཆ་ནས་གཏན་བདེའི་རྒྱུར་འགྱུར་བས་བཟང་པོར་སྒྲུབ་རིགས་པའི་རྒྱུ་མཚན། དཔེར་ན་ཚོང་པ་རྣམས་ཀྱི་ཐོབ་བྱའི་གཙོ་བོ་རིན་པོ་ཆེ་ཡིན་ཡང་། དེ་འཐོབ་པ་ལ་རྒྱ་མཚོ་ཆེན་པོ་ལ་བགྲོད་དགོས་ཤིང་བགྲོད་པའི་ཐབས་གཟིངས་དང་ཕུག་རོན་དུང་གསོན་པོ་སོགས་དགོས་ཏེ། ཕུག་རོན་མེད་ན་ཆུ་སྲིན་བརྟག་མི་ཐུབ། དུང་མེད་ན་ཆུ་སྲིན་གསོད་མི་ཐུབ་པར་ཆུ་སྲིན་གྱིས་གྲུ་འཇིག་པས། དོན་ཆེན་པོ་དབུལ་བའི་སྡུག་བསྔལ་སེལ་བའི་ནོར་བུ་ལེན་པ་འདབ་ཆགས་དམན་པ་ཕུག་རོན་ལ་ལྟོས་པ་ལྟར། གཏན་བདེའི་དོན་ཆེན་པོ་ལྷུན་གྱིས་(༤༢ན)
གྲུབ་པའི་ཟུང་འཇུག་རྡོ་རྗེ་འཆང་གི་ས་འཐོབ་པ། དེ་སྒྲུབ་པར་བྱེད་པའི་རྟེན་མངལ་སྐྱེས་ཁམས་དྲུག་ལྡན་གྱི་ལུས་བཟང་པོ་སྐྱེད་པ་ཕན་ཚུན་གཉེན་དུ་འབྲེལ་པ་ལ་ལྟོས་སོ། །ཚུལ་དེ་དང་ཆ་མཐུན་འབྲས་བུ་ཕུན་སུམ་ཚོགས་པ་སྐྱེད་བྱེད་ཀྱི་རྒྱུ་ལ་རག་ལུས་པའི་དབང་དུ་མཛད་ནས། བཅོ་ལྔའི་ཟླ་བ་ཉ་བ་དེ་ཚེས་གཅིག་གི་ཟླ་བ་ཚེས་པ་ལས་བྱུང་བ་ལྟར་བདག་ཅག་གི་སྟོན་པ་ཤཱཀྱ་ཐུབ་པ་རང་དང་རྒྱུད་མི་གཅིག་པ་འཕགས་པ་འཇམ་དཔལ་དབྱངས་སོགས་ཀྱིས་དགེ་བའི་བཤེས་གཉེན་མཛད་ནས་སེམས་སྐྱེད་དུ་བཅུག །རང་དང་རྒྱུད་གཅིག་པའི་ཡུལ་ཤི་པི་པའི་རྒྱལ་པོ་སོགས་ཀྱིས་རྒྱལ་སྲས་ཀྱི་སྤྱོད་པ་ལ་བསླབས་ཏེ་སངས་རྒྱས་པས་མཚོན་པའི་དེ་བཞིན་གཤེགས་པ་ཐམས་ཅད་རང་རྒྱུ་བྱང་ཆུབ་སེམས་དཔའ་ལས་འཁྲུངས་པར་དགོངས་ཏེ། འཕགས་པ་དཀོན་མཆོག་བརྩེགས་པ་ལས། འོད་སྲུང་། དཔེར་ན་ཟླ་བ་ཚེས་པ་ལ་ཕྱག་འཚལ་བ་ལྟར་ཉ་བ་ལ་ནི་མ་ཡིན་ནོ། །འོད་སྲུང་། དེ་བཞིན་དུ་གང་དག་ང་ལ་དད་པ་དེ་དག་གིས་བྱང་ཆུབ་སེམས་དཔའ་རྣམས་ལ་ཕྱག་བྱ་ཡི། དེ་བཞིན་གཤེགས་པ་རྣམས་ལ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི་དེ་བཞིན་གཤེགས་པ་རྣམས་འབྱུང་ངོ་། །ཞེས་སོ། །དྲི་ཚིག་གི་མཇུག་ཏུ། དེ་ལྟར་དྲི་བ་བརྩམས་པ་བཞི་པོ་འདི། །མིན་པའི་རྒྱ་ཆེ་ཞུ་རྒྱུ་མང་འདུག་ཀྱང་། །འདི་འདྲར་དོགས་པ་ཙམ་ཡང་མི་འདུག་པས། །ཟུར་ཙམ་ཞུས་མོད་དྲིས་ལན་སྩོལ་བར་རིགས། །ཞེས་པ་རྩིས་དཀར་ནག་ལ་དཀའ་གནས་ཀྱི་དོགས་པའི་གནས་མཐའ་ཡས་ཀྱང་། ད་ལམ་དྲི་བ་བཞི་ཙམ་ལས་མ་མཛད་འདུག་པ་སྐབས་སུ་བབ་སྟེ། དྲི་ཚིག་ཉུང་ངུ་འདི་ཙམ་གྱིས་ཀྱང་། དྲི་བའི་ཡུལ་སྐུ་ཚེ་མང་པོར་སྤྱིར་མཁས་པ་དང་གྲུབ་པའི་སྐྱེས་རབས་(༤༢བ)
ཀྱི་འཕྲེང་བ་འཛིན་པ་དང་། དགོས་སུ་དུས་འཁོར་ལ་སྦྱངས་པའི་སྤྲུལ་པར་ཞལ་གྱིས་བཞེས་པ་དང་། ཚེ་འདིར་སྦྱངས་རློམ་གྱི་རྩིས་རིག་སྨྲ་བ་མང་པོ་ལན་མེད་དུ་གྱུར་པས་ན། ཤེས་རབ་མེད་པའི་བླུན་པོ་རྣམས། །མང་ཡང་དགྲ་བོའི་དབང་དུ་འགྲོ། །གླང་ཆེན་སྟོབས་ལྡན་ཁྱུར་ལོངས་པ། །རི་བོང་བློ་ལྡན་གཅིག་གིས་བཏུལ། །ཞེས་པའི་དོན་དུ་སྣང་ངོ་། །ཡང་། མི་ཐེབས་པ་རྣམས་བདག་ལ་ཕྲག་དོག་དང་། སྡང་སེམས་མི་འཚལ་གཏན་ལ་འབེབས་རྒྱུའི་དོན། །ད་དུང་འཁྲུལ་མེད་ལེགས་པར་མ་བཙལ་ན། །རང་གཞན་ཐམས་ཅད་སླུ་བའི་ཉེན་བརྡའོ། །ཞེས་པ་ལ། ནོར་ལྡན་བླུན་པོའི་ནང་ན་མང་། །དཔའ་བོ་གཅན་གཟན་ཁྲོད་ན་མོད། །ལེགས་བཤད་མཁས་པའི་ཁྲོད་འབྱིན་པ། །དམ་པ་འཇིག་རྟེན་འདི་ན་དཀོན། །ཞེས་པ་ལྟར་དེང་དུས་སྐྱེས་བུ་དམ་པའི་མཚན་སྙན་གྱི་པི་ཝང་རྡུང་བའི་ཡུལ། སྔོ་བསངས་མའི་སྐར་ཚོགས་ལྟ་བུ་ལས་ལེགས་པར་བཤད་པའི་ལྗགས་ཐུང་ངུར་མ་གྱུར་པ་ཡིད་བཞིན་གྱི་ནོར་བུའི་དོ་ཟླར་སོང་བས། རལ་གྲི་ཤུགས་ཆུད་ཀྱིས་བྱ་སླ་ཞིང་། ཚེ་རྟ་ལྟག་སྤྲོད་མས་དོན་འགྲུབ་པའི་སྤྱན་ལྟོས་སྐྱོ་མ་སྔ་བཙན་གྱི་དབང་གིས་མདུང་རིང་སྣ་གཅུར་ཁུགས་དཀའ་སྟེ། ཕལ་ཆེར་བུ་ཚའི་སྤྱོད་པ་ནི། །རིགས་རྒྱུད་སྔ་མའི་རྗེས་སུ་འབྲང་། །ཁུ་བྱུག་ཕྲུ་གུ་བྱེ་ཁྲ་རུ། །འགྲོ་བ་རྒྱ་ལམ་སྲིད་པ་ཙམ། །ཞེས་པ་ལྟར་དང་། ད་ལྟའི་རྩིས་པར་ཁས་འཆེ་བ་ཕལ་ཆེར་ཡང་། བླུན་པོས་བྱ་བ་ལེགས་གྲུབ་ཀྱང་། །སྟེས་དབང་ཡིན་གྱི་བསྒྲུབས་པས་མིན། །སྲིན་བུའི་ཁ་ཆུ་དར་སྐུད་དུ། །འགྲོ་བ་མཁས་ནས་བྱུང་བ་མིན། །ཞེས་པ་ལྟར། གཟའ་འཛིན་གྱི་སྒོ་ཡིག་སྦྱར་བ་སྐབས་རེ་འགྲིག་པ་དང་། སྦྱིན་བདག་བསོད་ནམས་ཅན་ལ་ཐང་རེ་གཉིས་གཟའ་ཚེས་དུས་སྦྱོར་ས་བདག་ཕྱུགས་ཀྱང་ཉེས་སྐྱོན་མ་བྱུང་བ་རྟགས་སུ་བཀོད་དེ། ངེད་རང་ཚོའི་ཕ་མེས་ནས་(༤༣ན)
ལག་ལེན་འདི་ག་བྱེད་ཀྱི་ཡོད་ཟེར་ནས་གཟུར་གནས་ཀྱི་ཚིག་དག་ཏུ་གླེང་བ་ལ་ངོ་མཚར་འཛིན་པ་རྣམས། སླར་ཐོས་བསམ་ལ་འཇུག་པ་དཀའ་སྟེ། སྐྱེ་བོ་ངན་པ་འབྱོར་ཐོབ་ཀྱང་། །ལྷག་པར་སྤྱོད་པ་ངན་པར་འགྱུར། །འབབ་ཆུ་ཇི་ལྟར་བཟློག་གྱུར་ཀྱང་། །ཐུར་དུ་བབ་པ་ཁོ་ནར་འདོད། །ཅེས་དང་། བྱང་པ་ཏ་དབེན་གྱིས། ཆོས་ལོག་པར་སྒྲུབ་པའི་ཐར་ལམ་དཀའ། །ཆོས་བྱས་ཚད་ལམ་དུ་འགྲོ་བ་དཀའ། །ལམ་ནོར་བ་དགོས་སར་སླེབ་པ་དཀའ། །ཡུལ་འཛམ་བུ་གླིང་དུ་སྐྱེ་བ་དཀའ། །ཞེས་པའི་དོན་ལྟར་རོ། །སྦྱར་བྱང་དུ། ཞེས་པ་འདི་ཉིད་ཁ་བ་ཅན་པ་ཡི། །འཛིན་པའི་ཐིག་ལེ་སྐྱིད་ཤོད་སྟོད་སྨད་ཀྱི། །མཁས་པའི་ཁྲོད་ནས་ཕུལ་དུ་ཕྱིན་གྱུར་པ། །ལྕང་ལོ་འཛིན་པ་འཁོར་ལོའི་དབང་ཕྱུག་དང་། །རིག་གནས་འདི་ཡི་མཁས་མང་ཞབས་གཏུགས་པ། །ཡིད་ཀྱི་ལྷ་ལམ་རྟོག་བརྗོད་རྒྱུ་སྐར་བཀྲ། །ངག་གི་དབྱར་སྐྱེས་རྔ་ཆེན་དལ་དུ་དགོད། །སོར་མོའི་ཆུ་འཛིན་དག་ནས་རིག་གནས་ཆར། །འབེབས་མཁས་ཤཱཀྱའི་བཙུན་པ་སྙོམ་ལས་པས། །ཐུབ་དབང་ལྕགས་སྤྲེར་བལྟམས་ནས་ཉིས་སྟོང་དང་། །ལྔ་བརྒྱ་གྱ་ལྔ་བཟླས་པ་ཤིང་གླང་ལོའི། །གྲོ་ཞུན་ཟླ་བའི་དཀར་ཕྱོགས་བཅོ་ལྔ་ལ། །སྤྲུལ་པའི་རྒྱལ་པོ་སྲོང་བཙན་སྒམ་པོ་སོགས། །སྐྱེས་ཆེན་དུ་མས་བྱིན་གྱིས་ལེགས་བརླབས་ཤིང་། །ད་ལྟ་མདོ་སྔགས་བསྟན་པའི་བདག་པོ་ནི། །མཚུངས་མེད་དཔལ་ལྡན་བླ་མ་ཞུགས་པའི་གནས། །བྱང་ཆུབ་ཤིང་གི་ནགས་ཁྲོད་དག་ཏུ་སྦྱར། །ཅེས་དྲི་བ་མཛད་པ་པོ་རང་གི་ཆ་ནས་གྱ་ཚོམ་དུ་བྲིས་པ་མིན་པར་ཚུལ་དེ་དག་ལ་ལེགས་པར་རྟོགས་ནས་བྲིས་སོ་ཞེས་གསུངས་པ་ཁུངས་དང་ཤིན་ཏུ་འབྲེལ་ཏེ། གང་ཞིག་འཇིག་རྟེན་ཐམས་ཅད་ཀྱིས། །རང་ལ་ཚད་མར་བྱེད་འདོད་ན། །དེ་ཡི་གཞུང་འདི་(༤༣བ)
ལེགས་བརྟགས་ཏེ། །གཉེན་པོ་སྐྱེད་ལ་འབད་དེ་སྒྲུབས། །ཞེས་དང་། མཁས་འཇུག་ལས། དེས་ན་བློ་གྲོས་ལྡན་པ་ཡིས། །དང་པོ་སློབ་དཔོན་མཁས་བསྟེན་ཏེ། །ཕྱིས་ནས་རང་གིས་ལེགས་བརྟགས་ན། །དྲི་ཟའི་དབང་པོ་ལྟ་བུར་འགྱུར། །ཞེས་དང་། བྱང་ཏ་དབེན་གྱིས། གཟུགས་ལྷ་རུ་ཤེས་པའི་སྔགས་པ་སླ། ཕྱ་གཡང་དུ་ཁུགས་པའི་བོན་པོ་སླ། །འཁྲུལ་རྩིས་ལ་སྦྱངས་པའི་རྟེན་འབྲེལ་སླ། །གྲོས་གང་བྱས་འགྲུབ་པའི་གཙོ་བོ་སླ། །སྨན་འཚོ་བྱེད་ཤེས་པའི་ལྷ་རྗེ་སླ། །མཛངས་དཔའ་ངར་འཛོམ་པའི་སྟག་ཤར་སླ། །སྒོ་ཁྲེལ་ལྕག་ཡོད་པའི་དམན་ཤར་སླ། །ཤེས་རིག་པ་རྒྱས་པའི་བྱིས་པ་སླ། །གཞན་ཁག་འཁུར་ཡོད་པའི་མདུན་གྲོས་སླ། །ཚོང་བོད་འབྲོག་འཆམ་པའི་གནས་པོ་སླ། །བློ་ཤེས་རབ་ཅན་ལ་གང་ཡང་སླ། །ཞེས་པའི་དོན་ལྟར་ཐོག་མའི་སློབ་དཔོན་འཁོར་ལོའི་དབང་ཕྱུག་ཀུ་མཱ་རཱརྦ་ནི། ཀུན་མཁྱེན་ཀློང་ཆེན་པ་གངས་རི་ཐོད་དཀར་དུ་བཞུགས་སྐབས་པཎ་ཆེན་བི་མ་ལ་མི་ཏྲ་ཞལ་གཟིགས་ནས། ངའི་སྙིང་ཐིག་འདི་དོན་འདུས་ཤིང་གོ་སླ་བའི་ཉིང་ཁུར་བསྡུས་པ་ཞིག་ཏུ་རྩོམས། ཁྱོད་ལ་ཆོས་འདི་སྟོན་པའི་བླ་མ་ཀུ་མཱ་ར་དཱ་ཛའི་སྐྱེ་བ་ད་ལྟའི་སློབ་མ་གཞོན་ནུ་སངས་རྒྱས་འདི་ཡིན་པས་དེ་ལ་སྟོན། དེ་ནས་ཀྱང་སྣ་ལ་ཨ་ཡིག་གིས་མཚན་པའི་ཀུ་མཱའི་མིང་ཅན་བདུན་འབྱུང་བར་ལུང་བསྟན་པའི་ཀུ་མཱའི་མིང་ཅན་ཞིག་ཏུ། མངའ་བདག་ཁྲི་སྲོང་ལྡེའུ་བཙན་གྱི་ཡོན་ཏན་གྱི་རྣམ་འཕྲུལ་ཆོས་རྒྱལ་དཔལ་བཀྲ་ཤིས་སྟོབས་རྒྱལ་གྱིས་ངོས་འཛིན་མཛད་པས་གཙུག་ལག་ཁང་འདི་ལ་སྦྱངས་སྟོབས་ཀྱང་ཕུལ་དུ་ཕྱིན་པའོ། །འདྲེན་མཆོག་ཐུབ་པའི་དབང་པོ་འཁྲུངས་ལོ་རྗེ་བཙུན་ས་སྐྱ་པ་ས་འབྲུག །སྟོད་ལུང་པ་ཇོ་བོ་ཆེན་པོ་ཚུལ་ཁྲིམས་ཤིང་གླང་། ནེལ་པ་པཎྜི་ཏ་ཆུ་བྱི། བོད་རྒྱལ་པོའི་ཞལ་ཆེམས་སུ་གྲགས་པའི་འདས་ལོ་མང་བའི་ཕྱོགས་དང་(༤༤ན)
ཉུང་བའི་ཕྱོགས་ཐམས་ཅད་མཁྱེན་པ་བུ་སྟོན་མེ་རྟ། སྟག་ཚང་ལོ་ལོ་ཆེན་ས་བྱི། ཙན་དན་ཇོ་བོའི་ལོ་རྒྱུས་སོགས་མང་དུ་བྱུང་ཡང་། མཁས་གྲུབ་ནོར་བཟང་བ་དང་ཞལ་ལུང་གི་དགོངས་པ་འཁྲུལ་བྲལ་གྱི་གཏན་རྩིས་ལྕགས་སྤྲེར་སྐུ་བལྟམས་པ་འདི་ཉིད་དཔྱད་བཟོད་བླ་ན་མེད་པ་ཡིན་ནོ། །སྐྱིད་ཤོད་ཉང་བྲན་ཕ་བོང་ཁ་འདི་ཆོས་རྒྱལ་སྲོང་བཙན་སྒམ་པོས། ར་ས་འཕྲུལ་སྣང་གི་གཙུག་ལག་ཁང་བཞེངས་པའི་སྔོན་འགྲོ་ས་གཞི་བྱིན་གྱིས་རློབ་པར་རིགས་གསུམ་མགོན་པོའི་སྒྲུབ་པ་མཛད་པའི་གནས་ཡིན་པར་མ་ཟད། རྡོ་རྗེ་མཁའ་འགྲོའི་རྒྱུད་ལས། བོད་ཀྱི་ཡུལ་དང་དེ་བཞིན་དུ། །མ་ལ་ཝ་དང་པུ་ལླི་སོགས། །ཉི་ཤུ་རྩ་བཞིའི་ཡུལ་ཡིན་ནོ། །ཞེས་དང་། གཞན་ཡང་དཔལ་འཁོར་ལོ་སྡོམ་པའི་རྒྱུད་ཉུང་ངུ་ལས། རྣལ་འབྱོར་མ་ཡི་ས་དང་གནས། །ཧེ་རུ་ཀ་དཔལ་རྒྱུ་ཡན་ལག །ཐམས་ཅད་བརྟན་གཡོའི་བདག་ཉིད་ཅན། །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་འདིར་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་བ། །ཙྪན་དོ་ཧ་ནི་མངོན་གྱུར་ཉིད། །ཉེ་བའི་ཙྪན་དོ་སྦྱང་དཀའ་བ། །འདུས་པ་རིང་དུ་སོང་བ་ཡིན། །ཉེ་བར་འདུས་པ་མི་གཡོ་ལ། །དུར་ཁྲོད་ལེགས་པའི་བློ་གྲོས་ཉིད། །ཉེ་བའི་དུར་ཁྲོད་ཆོས་ཀྱི་སྤྲིན། །ཤཱི་ཧེ་རུ་ཀ་གཞུང་སྤྱོད་པའི། །འདི་ནི་ནང་གི་བདག་ཉིད་ས། །ཕ་རོལ་ཕྱིན་བཅུ་ས་རྣམས་ནི། །རྣལ་འབྱོར་མ་ཡི་བརྡ་ཡི་སྐད། །མཐོ་རིས་ས་སྟེང་ས་འོག་ཏུ། །དཔའ་བོའི་ཡན་ལག་བརྟན་གཡོའི་བདག །པཱུ་ལླིར་ལ་སོགས་གང་བསྟན་པ། །ཕྱི་ནང་བདག་ཉིད་ཅན་དུ་གནས། །ཞེས་པའི་ནང་ཚན། གནས་དི་ཝཱི་ཀོ་ཊི་བོད་སྐད་དུ་ལྷ་མོ་མཁར་ཞེས་པ་ཙཱ་རི། དེ་དང་འབྲེལ་པའི་ཞིང་ཙྭ་གོང་ཡིན་ལ། ཉེ་བའི་གནས་དི་ཝཱི་ཀོ་ཊི་དེ་ཕ་བོང་ཁ་དང་། ཉེ་(༤༤བ)
བའི་ཞིང་ལྷ་ལྡན་སྤྲུལ་པའི་གཙུག་ལག་ཁང་ཉེ་འཁོར་གྱི་གྲོང་ཁྱེར་དང་བཅས་པ་ཡིན་པའི་རྒྱུ་མཚན། ཕ་བོང་ཁའི་རྒྱབ་རི་ངལ་པོ་ཆེ་ཕྱི་གདུགས་རང་བྱོན་གྱི་རྣམ་པ་ལ་ནང་འཁོར་ལོ་སྡོམ་པའི་ཕོ་བྲང་དུ་ཡོད་ཅིང་། ཕ་བོང་ཁ་རང་གི་ཤར་གྱི་བྲག་འོག་ཏུ་དབང་ཕྱུག་གི་རྟེན་རང་བྱོན་ཤིན་ཏུ་གསལ། ལྷ་སའི་བདུད་རྩི་མའི་ཆུ་རྒྱུན་གྱི་ཆུ་མིག་འདི་ལྷ་མོ་ཨུ་མའི་གསང་གནས་ཀྱི་མཚོན་བྱེད་དུ་ཡོད་པ་འདི་མ་ཤེས་པར། ས་བོན་མ་བཏབ་ཀྱང་མྱུ་གུ་རང་བབས་སུ་འཁྲུངས་པའི་མཁས་པ་འགས་འཕྱ་བ་ནི་རང་ཉིད་གསལ་བར་སྟོན་པའི་མེ་ལོང་ངོ་། །ཉེ་བའི་གནས་ཁྱད་འཕགས་དེ་སྔོན་གྱི་དམ་པ་གྲངས་མེད་པས་བྱིན་གྱིས་བརླབས་ཤིང་། རིགས་དང་དཀྱིལ་འཁོར་ཀུན་གྱི་ཁྱབ་བདགམཁས་པ་དང་གྲུབ་པའི་འཁོར་ལོས་སྒྱུར་བ། མཁོན་རིགས་འཇམ་དབྱངས་དཔའ་བོ་དཔལ་འབྱོར་ལྷུན་གྲུབ་ཆོས་ཀྱི་ཁྲིར་ཞབས་པད་འགོད་བཞིན་པའི་དུས་སུ་ཕྱོགས་བྲལ་གྱི་རྣ་ལུང་དུ་དྲི་ཚིག་གི་རྒྱན་སྡུད་པའི་དོན་དུ་ངེས་སོ། །སྨྲས་པ། མ་ལ་ཡ་ལས་འོངས་པའི་དྲི་བསུང་གིས། །མི་བཟད་ཚ་གདུང་མ་ལུས་འཇོམས་པ་ལྟར། །ལེགས་བཤད་ཀེ་ཏ་ཀ་ཡིས་གཙུག་ལག་གི །དོན་མང་རྙོག་པ་ཀུན་གསལ་དྲུངས་པར་བྱས། །ཕུལ་བྱུང་མཁྱེན་དཔྱོད་ཧ་ལུ་མནྠ་ཡིས། །གཙུག་ལག་འབོད་གྲོགས་གཟུགས་དང་སྣང་བརྙན་དག །སོ་སོར་ཕྱེད་ཀྱང་མཁས་རློམ་སྤྲེ་ཚོགས་ཀྱིས། །རྟོགས་པའི་སྐལ་བ་ཕྲ་ཕྱིར་གསལ་བར་བཤད། །མཁས་དབང་དྲི་ཚིག་དར་གྱི་སྲད་བུ་ལ། །ལེགས་བཤད་ནོར་བུ་བརྒྱུས་པའི་དོ་ཤལ་འདི། །བློ་གྲོས་ལང་ཚོ་རྒྱས་པའི་ཟུར་མིག་ཅན། །ཀ་ཤི་མཛེས་དགའི་ཚོགས་རྣམས་ད་གྱོན་ཅིག །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །