བཞི་པ། ཞར་བྱུང་འཕན་ཡུལ་དྲུག་བརྒྱ་བའི་རྩིས་རིག་སྨྲ་བ་ནང་སོ་བསྟན་འཛིན་གྱིས་ར་ས་འཕྲུལ་སྣང་གི་རྩིས་པ་རྣམས་ལ་དྲི་བ་བཞི་བཏང་བའི་དྲིས་ལན་ཁག
ཞར་བྱུང་འཕན་ཡུལ་དྲུག་བརྒྱ་བའི་རྩིས་རིག་སྨྲ་བ་ནང་སོ་བསྟན་འཛིན་གྱིས་ར་ས་འཕྲུལ་སྣང་གི་རྩིས་པ་རྣམས་ལ་དྲི་བ་བཞི་བཏང་བའི་དྲིས་ལན་ཁག །
དྲི་བ་དང་པོའི་དྲིས་ལན།
དྲི་བ་དང་པོའི་དྲིས་ལན།ཞར་བྱུང་ཕན་ཡུལ་དྲུག་བརྒྱ་བའི་རྩིས་རིག་སྨྲ་བ་ནང་སོ་བསྟན་འཛིན་གྱིས་(༤༥ན)
ར་ས་འཕྲུལ་སྣང་གི་རྩིས་པ་རྣམས་ལ་དྲི་བ་བཞི་བཏང་འདུག་པའི། དང་པོའི་དྲི་ཚིག་ནི། སྭ་སྟི། དགེ་ལེགས་ཀུན་གྱི་འབྱུང་གནས་ཟས་གཙང་སྲས། །དམ་ཆོས་གཏམ་ལ་འཇིགས་མེད་འཇམ་དཔལ་དབྱངས། །མགོན་དེའི་རྣམ་འཕྲུལ་རིག་ལྡན་གྲགས་པ་སོགས། །ཟོལ་མེད་དད་པའི་སྒོ་ནས་ཕྱག་བཙལ་ཏེ། །དག་པའི་ཡུལ་མཆོག་ཉི་ཤུ་རྩ་བཞི་ཡི། །ནང་ཚན་མཆོག་གྱུར་ར་ས་འཕྲུལ་སྣང་ནས། །དཔལ་ལྡན་དུས་འཁོར་རི་མོའི་ལས་ཚུལ་དང་། །གཙུག་ལག་རིག་པའི་དཔལ་མངའ་བརྒྱ་དགའི་མཚན། །མཁས་པའི་ཚུལ་འཛིན་ཁྱོད་ལ་འདི་སྐད་ཞུ། །དེ་ཡང་དཔལ་ལྡན་བསྡུས་པའི་རྒྱུད་རྒྱལ་ལས། ལོ་འདི་ནས་ནི་དྲུག་བརྒྱའི་ལོ་ཡིས་བསལ་བར་མི་བདག་གྲགས་པ་ཤམྦྷ་ལ་ཞེས་བྱ་བར་འབྱུང་། །ཞེས་གསུངས་པས་ན། འདི་ནས་ཞེས་པའི་ལོ་ངོས་གང་ནས་འཛིན། །སྟོན་མཆོག་མཉམ་མེད་ཤཱཀྱ་སེང་གེ་དེས། །དུས་འཁོར་ཆོས་གསུངས་དུས་ནས་འཛིན་མོད་ཀྱང་། །དགུང་ལོ་སོ་དྲུག་དུས་སུ་གསུངས་པ་དང་། །བརྒྱད་ཅུའི་དུས་ལ་གསུངས་པར་བཞེད་པ་གཉིས། །བརྒྱད་ཅུར་གསུངས་པ་བཞེད་ན་རྩ་རྒྱུད་ལས། །བྱ་རྒོད་ཕུང་པོའི་རི་ཆེན་པོར། །ཐེག་པ་ཆེན་པོ་བླ་ན་མེད། །བྱང་ཆུབ་སེམས་དཔའ་རྣམས་ལ་བསྟན། །དེ་ནས་གཅིག་ཏུ་མཆོད་རྟེན་ཆེར། །ཆོས་ཀྱི་དབྱིངས་ཀྱི་དཀྱིལ་འཁོར་དུ། །དམ་པ་དང་པོ་དཔལ་ལྡན་རྒྱུད། །དཔྱིད་ཟླ་འབྲིང་པོའི་ཉ་ལ་གསུངས། །འདི་ལྟར་ལུགས་ན་སོ་དྲུག་དུས་སུ་གསུངས། །ཞེས་པའི་ལུང་དོན་འདི་དང་མི་འགལ་ལམ། །སོ་དྲུག་དུས་སུ་གསུངས་པར་ཁྱེད་བཞེས་ན། །དེ་ནས་དྲུག་བརྒྱ་འདས་རྗེས་རིགས་ལྡན་ནི། །གྲགས་པ་འབྱོན་འགྱུར་མངོན་སུམ་ལུང་(༤༥བ)
བསྟན་ནི། །ལོ་གྲངས་དྲུག་བརྒྱ་ཞེ་བདུན་འདས་པ་ཡི། །ཤིང་ཕོ་སྤྲེའུ་ལ་འཇམ་དཔལ་གྲགས་པ་བྱོན། །འདི་ལྟར་བཞེད་ན་ལོ་གྲངས་ལྔ་བཅུ་ཙམ། །ལྷག་པོར་འབྱུང་བས་དྲུག་བརྒྱ་ཞེས་པ་ཡི། །ལུང་དོན་འཁྲུལ་མེད་འདི་དང་མི་འགལ་ལམ། །ཡང་ན་ལུང་རྣམས་རིགས་མཐུན་བཀྲལ་ལུགས་དགོས། །ཞེས་པ་སྟོན་པས་རྩ་རྒྱུད་དུས་ནམ་གྱི་ཚེ་གསུངས་ཚུལ་ལ་བོད་ཀྱི་དུས་ཞབས་པ་ཆེན་པོ་ཕལ་ཆེར་བཞེད་ཚུལ་སྣ་ཚོགས་སུ་གྱུར་ཅིང་། ཁྱད་པར་མཁས་པའི་གྲགས་པ་རི་བོང་བཅལ་སྒྲོག་ཙམ་མིན་པའི་ཐམས་ཅད་མཁྱེན་པ་བུ་སྟོན་ལྟ་བུའང་ཐུགས་འཁྲུལ་པའི་ཁྱོགས་ལ་འཆང་ན་བློ་ཆུང་རྣམས་མགོ་བོ་འཁོར་བ་ལས་འོས་ཅི་ཡོད། བྱ་རྒོད་ཕུང་པོའི་རི་ཆེན་པོར། །ཐེག་པ་ཆེན་པོ་བླ་ན་མེད། །ཤེས་རབ་ཕ་རོལ་ཕྱིན་པའི་ཚུལ། །བྱང་ཆུབ་སེམས་དཔའ་རྣམས་ལ་བསྟན། །དེ་ནས་གཅིག་ཏུ་མཆོད་རྟེན་ཆེར། །ཆོས་ཀྱི་དབྱིངས་ཀྱི་དཀྱིལ་འཁོར་དུ། །ཞེས་སོགས་ཀྱི་ལུང་ལ་བརྟེན་ནས། །བྱ་རྒོད་ཕུང་པོའི་རིར་ཤེར་ཕྱིན་གྱི་ཆོས་འཁོར་བསྐོར་རྗེས། འབྲས་སྤུངས་སུ་དུས་འཁོར་གསུངས་པ་དང་། དུས་ཀྱང་སྟོན་པ་མངོན་པར་རྫོགས་པར་སངས་རྒྱས་པའི་ཕྱི་ལོ་གསུངས་པར་འདོད་པ་གཉིས་དངོས་སུ་འགལ་ཏེ། སྟོན་པ་སངས་རྒྱས་ནས་བདེན་བཞིའི་ཆོས་འཁོར་བསྐོར་བ་ལ་ལོ་ཁ་ཡར་འགོར། དེ་རྗེས་ཡབ་སྲས་འཇལ་བ་སོགས་དང་ཤེར་ཕྱིན་གསུངས་པ་ཡིན། བཙུན་པ་ཡང་དག་བདེན་ལྟར་ན། འཁོར་ལོ་དང་པོ་སངས་རྒྱས་པའི་ལོ་དེ་ཉིད་ལ་གསུངས། ཆོས་འཁོར་གཉིས་པ་སངས་རྒྱས་ནས་ལོ་བདུན་ནས་གསུངས། ཆོས་འཁོར་གསུམ་པ་སངས་རྒྱས་ནས་ལོ་སུམ་ཅུ་སོ་བདུན་ནས་གསུངས་པར་བཤད་པ་སོགས་ཀྱི་རྒྱུ་མཚན་གྱི་དབང་དུ་བྱས་ན། དུས་འཁོར་སངས་རྒྱས་(༤༦ན)
པའི་ཕྱི་ལོ་གསུངས་ཚེ། དེའི་སྔོན་དུ་ཐེག་པ་ཆེན་པོ་ཕ་རོལ་དུ་ཕྱིན་པ་གསུངས་ཟིན་དགོས་ཏེ། སངས་རྒྱས་པའི་ཕྱི་ལོ་རང་དུས་འཁོར་གསུངས་ལ། དེའི་གོང་དུ་ཤེར་ཕྱིན་གསུངས་པའི་གོ་རིམ་ཡོད་པས་སོ། །དེས་ན་ལུང་དེའི་དོན་ནི། ཐེག་པ་ཐུན་མོང་པ་རྣམས་གསུངས་ཟིན་པའི་རྗེས་སུ་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོའི་འོག་ཏུ་ཆོས་དབྱིངས་གསུང་དབང་དང་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་གསུངས་པར་བཤད་པ་ཙམ་ལས་དུས་མ་བཤད་དོ། །སངས་རྒྱས་མྱ་ངན་ལས་འདས་ནས་འཇམ་དཔལ་གྲགས་པའི་བར་དུ་ཆོས་རྒྱལ་དྲུག་གིས་ཆོས་བསྟན་པའི་ལོ་གྲངས་དྲུག་བརྒྱ་འགྲོ་དགོས་པས། ལོ་འདི་ནས་ནི་དྲུག་བརྒྱའི་ལོ་ཡིས་གསལ་བར་མི་བདག་གྲགས་པ་ཤམྦྷ་ལ་ཞེས་བྱ་བར་འབྱུང་། ཞེས་པའི་ལོ་འདིའི་ངོས་འཛིན་རྒྱུད་གསུངས་པའི་ལོར་བྱེད་དགོས་ཤིང་། སངས་རྒྱས་པའི་ཕྱི་ལོ་གསུངས་པ་ལྟར་ན། ལོ་འདི་ནས་ནི་བཞི་བཅུས་ལྷག་པའི་དྲུག་བརྒྱའི་ལོ་ཡིས་གསལ་བར་མི་བདག་གྲགས་པ་ཤམྦྷ་ལ་ཞེས་བྱ་བར་འབྱུང་། ཞེས་པའི་རྒྱུད་ཚིག་ཀྱང་བཟོ་སྐྱོར་བྱེད་དགོས་པར་འགྱུར་བས། རྒྱ་ནག་པ་མདོ་རྩོམ། བོད་པ་རྒྱུད་རྩོམ། རྒྱ་གར་བསྟན་བཅོས་རྩོམ་པའི་གཏམ་ཕྱག་ཏུ་འགེལ་བ་ཞུ། གཞན་ཡང་འགྲེལ་ཆེན་ལས། ས་གའི་ཉའི་སྐྱ་རེང་ཤར་བའི་ཚེ་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་ཏེ། དེ་ནས་ཆོས་ཀྱི་འཁོར་ལོ་བསྐོར་ཅིང་། ཐེག་པ་གསུམ་བསྟན་པར་མཛད་ནས་ཟླ་བ་བཅུ་གཉིས་པ་ནག་པའི་ཉ་ལ་ཤྲཱི་དྷ་ནྱ་ཀ་ཊ་ཀར་ཞེས་པའི་དོན་ལ་ཟླ་བའི་འགོ་ཡིན་ན་ནག་ཟླ་ལས་འོས་མེད། སྟོན་པ་ས་ག་ཟླ་བར་སངས་རྒྱས་པའི་དུས་དེ་དང་པོར་བྱས་པའི་ཏི་ཐུག་སྒྲིགས་ཀྱིས་བཅུ་གཉིས་པ་ནག་ཟླར་ཟད་སྙམ་ནས་སངས་རྒྱས་པའི་ལོ་དེའི་རྗེས་མའི་ནག་ཟླར་(༤༦ན)
རྒྱུད་གསུངས་སོ་ཞེས་སྨྲ་བ་ནི། བར་དེར་བདེན་པ་དང་ཤེར་ཕྱིན་གྱི་ཆོས་འཁོར་བསྐོར་བའི་དུས་ཀྱི་ཡུན་ཡང་མ་བརྩིས་པའི་སྐྱོན་དངོས་སུ་ཡོད་ལ། ཟླ་བའི་ཐོག་མ་ནག་ཟླ་ཁོ་ནར་དགོས་པའི་རྒྱུ་མཚན་མེད་དེ། དཔྱིད་མཉམ་ཉི་མ་ལུག་ཁྱིམ་དུ་ཞུགས་པའི་དུས་དེ་ཐོག་མ་ཡིན་ཞིང་། ཁྱིམ་འཕོ་བ་ནག་ཟླའི་སྟོད་སྨད་ལ་གཅིག་ཏུ་མ་ངེས་པས། ནག་པའི་ཚེས་བཅུ་དྲུག་མན་ཆད་ལ་ཁྱིམ་སླེབ་ཀྱི་རི་མོ་ཤར་ན་མར་ངོ་སྔོན་འགྲོའི་དབང་དུ་བཏང་བའི་ས་ག་ཟླ་བ་ལ་ཟླ་བའི་ཐོག་མར་བྱེད་པ་ཡོད་པས་དེའི་དབང་དུ་བྱས་སོ། །ས་ག་ཟླ་བར་སངས་རྒྱས་ནག་ཟླར་རྒྱུད་གསུངས་པར་བཤད་པ་ས་ག་ཟླ་བ་གཅིག་ལ་སངས་རྒྱས་པ་དང་། ནག་པ་ཟླ་བ་གཅིག་ལ་རྒྱུད་གསུངས་པའི་ཟླ་བའི་ངོས་འཛིན་ཙམ་མ་གཏོགས་ཟླ་གྲངས་བཅུ་གཉིས་ཚར་གཅིག་པུ་དེའི་ཟླ་བར་འབྱུང་བའི་དོན་མིན་ནོ། །དཔེར་ན་རྒྱལ་པོའི་བུ་ཞིག་ཧོར་ཟླ་དང་པོ་ལ་བཙས་ནས་བསྐྱེད་བསྲིངས་ཏེ་ཧོར་ཟླ་བཅུ་གཉིས་པ་ཞིག་ལ་རྒྱལ་སར་བསྐོས་ཞེས་པ་ལྟ་བུ་དང་། འགྲེལ་ཆེན་གྱི་ལུང་གི་བབས་འོང་ཚུལ་གཅིག་གོ ། ཁྱིམ་འཕོ་ལ་བརྟེན་ནས་ལོ་དང་ཟླ་བའི་བདག་པོ་སོགས་ཀྱི་རྣམ་དབྱེ་སྔོན་ཆད་མཁྱེན་པ་མང་དུ་བྱུང་མོད། དེང་དུས་གྲ་ཕུག་པའི་ལུགས་འཛིན་ཙམ་མ་གཏོགས། མཛུབ་མོ་སྡུག་བསྔལ་བའི་དཀའ་ཐུབ་ལྷུར་ལེན་པའི་རྩིས་པ་རྣམས་ཀྱི་རྣ་བའི་ཡུལ་དུ་མ་གྱུར་ཏོ། །གཞན་ཡང་། རྒྱུད་གསུངས་ལོར་མ་ཟད་འཁྲུངས་ལོ་སོགས་ཐམས་ཅད་ནོར་བས། འདུལ་བ་ལུང་ལས། བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་པ་ན་གྲགས་འཛིན་མ་ལ་ཁྱིའུ་ཞིག་བཙས་སོ། །ཟླ་བའང་སྒྲ་གཅན་གྱིས་ཟིན་ཏོ་ཞེས་སངས་རྒྱས་པའི་ཚེ་གཟའ་འཛིན་བྱུང་བར་བཤད་པས། སྟོན་པ་ལྕགས་སྤྲེ་ལ་སྐུ་བལྟམས། ཤིང་རྟ་ལ་སངས་རྒྱས། ལྕགས་འབྲུག་ལ་རྒྱུད་གསུངས་ཤིང་མྱ་ངན་ལས་འདས་པར་བྱས་(༤༧ན)
པའི་ཤིང་རྟའི་ས་ག་ཟླ་བའི་ཚེས་བཅོ་ལྔ་པ་གཟའ་འཛིན་གྱི་རི་མོ་འཁྲུལ་མེད་དུ་འབྱུང་བ་སོགས་རྒྱུ་མཚན་མཐའ་ཡས་སོ། །ཞིབ་ཏུ་བརྩིས་ན་སྟོན་པ་མྱ་ངན་ལས་འདས་ནས་ཟླ་བཟང་གིས་ལོ་གསུམ་བཞུགས་པ་ཡིན་ཏེ། ཟླ་བ་བཟང་པོས། རྩ་རྒྱུད་རྒྱས་འབྲེལ་བསྟན་པའི་ལོ་གཉིས་པ་ལ་ཟླ་བཟང་གཤེགས་པར་གསུངས་པའི་གཤེགས་ལོ་དང་གཅིག །དེའི་གོང་དུ་རྩ་རྒྱུད་སྡུད་པ་དང་། རྒྱལ་འགྲེལ་སྟོང་ཕྲག་དྲུག་ཅུ་པ་མཛད་པ་སོགས་ལ་ལོ་གཉིས་དང་བཅས་པའི་ལོ་གསུམ་བྱུང་བ་ལ་དགོངས་ནས། མདོར་བསྡུས་གསུམ་པར། དེ་བཞིན་གཤེགས་པའི་ངེས་པ་དེའི་ཕྱིར་རྩ་བའི་རྒྱུད་ཀྱི་རྒྱལ་པོ་སྟོང་ཕྲག་གི་བཅུ་གཉིས་པ་དང་། རྒྱས་འགྲེལ་སྟོང་ཕྲག་དྲུག་ཅུ་པའང་ཤམྦྷ་ལ་སོགས་པའི་ཡུལ་གྱི་སྐད་གཞན་གྱིས་གླེགས་བམ་ལ་བྲིས་ནས་རྒྱལ་པོ་ཟླ་བ་བཟང་པོས་གྲོང་ཁྱེར་བྱེ་བ་ཕྲག་དགུ་བཅུ་རྩ་དྲུག་ན་གནས་པ་རྣམས་ལ་རབ་ཏུ་སྟོན་ཏོ། །དེ་ཉིད་དེ་ལ་མོས་པ་རྣམས་ཀྱིས་ཉན་ཅིང་བཀླགས་ཏེ་རང་གི་སེམས་ལ་བཟུང་ནས་གཞན་དག་ལ་རྒྱ་ཆེར་རབ་ཏུ་བསྟན་ཏོ། །རྒྱུད་བསྟན་པའི་དུས་དེ་ནས་ལོ་གཉིས་པ་ལ་སེམས་ཅན་རྣམས་ཀྱི་དངོས་གྲུབ་ཀྱི་རྒྱུའི་སླད་དུ་དཀྱིལ་འཁོར་གྱི་འཁོར་ལོ་དང་རྫུ་འཕྲུལ་བསྟན་ནས་སྤྲུལ་པའི་སྐུ་གང་ནས་བྱོན་པ་ལོངས་སྤྱོད་རྫོགས་པའི་སྐུ་དེ་ཉིད་དུ་གཤེགས་སོ། །ཞེས་བྱུང་ལ། ལོ་དྲུག་བརྒྱ་ལ་གསུམ་ལྷག་པ་ཙམ་སྣང་བ་ཕྲ་མོ་ཡིན་པས་ལུང་དོན་ལ་མི་གནོད་དེ། ལོ་བཞི་བཅུ་ཞེ་དྲུག་ཙམ་མི་འགྲིག་པའི་རྒྱ་ཆེ་མཐིལ་རྡོལ་ཚོ་དང་མི་འདྲའོ། །དེ་ནས་ཀླུ་ཡི་ལོ་བརྒྱ་རྣམས་ཀྱིས་ངེས་པར་མ་ཁའི་ཡུལ་དུ་ཀླ་ཀློའི་ཆོས་དག་རབ་ཏུ་འཇུག་ཅེས་འཇམ་དཔལ་གྲགས་པ་གཤེགས་ནས་རྒྱ་མཚོ་རྣམ་རྒྱལ་གྱི་བར་དུ་ལོ་བརྒྱད་བརྒྱ་འོང་བའི་རྒྱུ་མཚན། པདྨ་དཀར་པོ་ནས་ཤིན་ཏུ་བཟང་པོའི་བར་རིགས་ལྡན་(༤༧བ)
བརྒྱད་ཀྱིས་ཆོས་ལོ་བརྒྱ་བསྟན་པས་འགྲིག་ལ། རྒྱ་མཚོ་རྣམ་རྒྱལ་ཁྲིར་བྱོན་པ། ཀླ་ཀློ་བཞུགས་པ། མེ་མཁའ་རྒྱ་མཚོའི་རྩིས་གཞི་སོགས་དུས་མཉམ་པས་ཏུ་རུ་ཥྐ་ཞེས་གར་ལོག་གམ་ཀླ་ཀློའི་གནས་ཚད་སྟོང་བརྒྱད་བརྒྱར་བཤད་པས། རིགས་ལྡན་ཉི་མ་ནས་དྲུག་པ་འཁོར་ལོའི་བར་ལ་རིགས་ལྡན་བཅོ་ལྔ་བྱུང་བའི་ཕྱི་མ་བཅུ་གསུམ་གྱིས་ལོ་བརྒྱ་རེ་ཁྲིར་བཞུགས་པས་ལོ་སྟོང་དང་སུམ་བརྒྱ་འབྱུང་བ་ལས། དྲག་པོ་འཁོར་ལོས་དགུང་ལོ་གོ་བདུན་བཞེས་ནས་ཀླ་ཀློ་བཏུལ་བས་ལོ་སྟོང་དང་སུམ་བརྒྱ་གོ་བདུན་བྱུང་། དེའི་སྟེང་དུ་རིགས་ལྡན་བཅུ་གསུམ་གྱི་སྔོན་མ་རྒྱ་མཚོ་རྣམ་རྒྱལ་དང་། རྒྱལ་དཀའ་གཉིས་བསྡོམས་པའི་ལོ་བཞི་བརྒྱ་དང་གསུམ་བྱུང་བ་བསྲེས་པས་སྟོང་བརྒྱད་བརྒྱ་ལས་མི་ལྷག་མི་ཉུང་བ་འདི་ཐམས་ཅད་མཁྱེན་པ་ནོར་བུ་བཟང་པོ་དང་པད་དཀར་ཞལ་ལུང་རྗེས་འབྲང་དང་བཅས་པའི་དྲི་མ་མེད་པའི་ལུགས་སྲོལ་ཡིན་ནོ། །སྟག་ཚང་ལོ་ཙཱ་བས། སུམ་ཅུ་རྩ་གཉིས་གདན་གྱི་མཐར་ནི་ལྷ་མིན་དགྲ་བོ་ཚེ་ལོ་བརྒྱ་པ་ཕྱག་ན་འཁོར་ལོར་འགྱུར། ཞེས་སུམ་ཅུ་རྩ་གཉིས་ཀྱི་མཐར་ཞེས་པའི་རྒྱུད་ཚིག་གིས་རྩ་གསུམ་པ་ཡིན་པའི་སྒྲུབ་བྱེད་དང་། མཐའ་ཡས་རྣམ་རྒྱལ་གྱི་མཚན། རྒྱ་དཔེར་ཨ་ནནྟ། བི་ཛ་ཡ་ཞེས་བར་དུ་རྣམ་དབྱེའི་གཅིག་ཚིག་གིས་ཆོད་པས་སོ་སོར་གསུངས་པ་རྣམས་ལེགས་བཤད་ཆེན་པོར་སྣང་ཡང་། ཀླ་ཀློའི་གནས་ཚད་ལ་སྟོང་བདུན་བརྒྱ་ཙམ་ལས་མ་བྱུང་བའི་བརྒྱ་པོ་རགས་རྩིས་སུ་མཛད་པ་ཅུང་ཟད་མི་འཐད་པར་མངོན་མོད། ཆོས་རྒྱལ་དང་རིགས་ལྡན་བསྡོམས་པར་སུམ་ཅུ་རྩ་གསུམ་འཐད་པའི་རྗེས་སུ་འབྲང་ནའང་། རྒྱ་མཚོ་རྣམ་རྒྱལ་ཡབ་སྲས་གཉིས་ལ་མེ་མཁའ་རྒྱ་མཚོའི་ལོ་གྲངས་རང་སར་བཞག་སྟེ། དྲག་པོ་སེང་ཁྲིར་ཕེབས་མ་ཐག་ནས་ཀླ་ཀློ་བཅོམ་པའི་མགོ་བརྩམས་པར་ཁས་བླངས་ན་དུས་དེ་ནས་ཀླ་ཀློའི་བསྟན་པ་དམར་ཕྱོགས་ཀྱི་ཟླ་བ་བཞིན་རིམ་(༤༨ན)
གྱིས་འགྲིབ་པར་འགྱུར་བ་ཡིན་པས་རྒྱུ་མཚན་བཟང་པོ་ཡོད་དམ་སྙམ། ཡང་ན། རྒྱ་མཚོ་རྣམ་རྒྱལ་དང་རྒྱལ་དཀའ་གཉིས་ཀྱི་དགུང་ལོའི་ཚད་ཀྱང་བརྒྱར་བྱས་ཏེ་རིགས་ལྡན་གྲགས་པ་ཐེ་བའི་རིགས་ལྡན་བརྒྱད་ཀྱི་རྗེས་སུ་ཀླ་ཀློ་འཇུག་ཅེས་ཁས་བླངས་ན། ཤིན་བཟང་ནས་དྲག་པོའི་འཁོར་ལོའི་བར་ལ་ལོ་གསུམ་མ་གཏོགས་སྟོང་དང་བརྒྱད་བརྒྱ་ཚང་འགྲོ་བས། རང་འདོད་གཙོ་བོར་བྱེད་པའི་བསྟན་བཅོས་ལ་ལའི་དབང་དུ་སོང་ན་ཁས་བླང་དུ་རུང་ཙམ་ཡིན་ལ། འགའ་ཞིག་ཉིན་མོ་ཞེས་པའི་ཚིག་མཚན་མོ་ཞེས་པར་འདོན་པ་སྒྱུར་བ་ལྟར། རང་གང་འདོད་དུ་བྱེད་ན། དེ་ནས་ཀླུ་ཡི་ལོ་བརྒྱ་ཞེས་པ་ལ་རི་རོའི་ལོ་བརྒྱ་ཞེས་འདོན་པ་སྒྱུར་དུ་ཅིས་མི་རུང་། འོན་ཀྱང་ཆོས་ལ་དབང་ཟ་བར་བྱེད་པ་དེ་འདྲ་མཁས་པ་རྣམས་ཁྲེལ་བར་འགྱུར་བའི་ཕྱིར། ཁོ་བོ་རིགས་ལྡན་གྲགས་པ་ཐེ་བའི་བརྒྱད་ཡིན་ནོ་ཞེས་མི་སྨྲ་སྟེ། ཁམས་ལེའི་གོ་སླར། རིགས་ལྡན་རིགས་ཀྱི་ནང་ནས་ལག་པས་བསྒྱུར་བའི་དུས་ཀྱི་བུ་དང་ཚ་བོ་དང་ནི་འདས་གྱུར་པ། །དེ་ཡི་དུས་སུ་ངེས་པར་མ་ཁའི་ཡུལ་དུ་ཀླ་ཀློའི་ཆོས་ནི་རབ་ཏུ་འཇུག་པ་དག་ཏུ་འགྱུར། །ཞེས་རིགས་ལྡན་གྱི་རིགས་སུ་གྱུར་པ་རྣམས་ཀྱི་ནང་ནས་ལག་པ་སྟེ་གཉིས་ཀྱིས་དུས་ཏེ་བཞི་བསྒྱུར་བའི་རིགས་ལྡན་དྲག་པོའི་བུ་པད་དཀར་དང་། ཚ་བོ་བཟང་པོ་སོགས་བརྒྱད་འདས་པའི་མཐའ་དེར་མ་ཁའི་ཡུལ་དུ་ཀླ་ཀློའཇུག་པར་བཤད་པས་སོ། །སྟག་ཚང་ལོ་ཙཱ་བའི་བཞེད་པ་དེའི་རྒྱབ་སྐྱོར་དུ་ལུང་སྔ་མར་མ་ཟད། སེམས་ཅན་རྣམས་ཀྱི་ཐར་པའི་སླད་དུ་ས་ལ་དུས་ཀྱི་འཁོར་ལོ་རབ་ཏུ་གསལ་བར་བྱེད་པར་འགྱུར། ཞེས་རིགས་ལྡན་གྲགས་པས་རྩ་བའི་རྒྱུད་བསྡུ་བར་མཛད་ཚུལ་བསྟན་ནས། དེའི་རྗེས་སུ། གདན་ནི་ཉི་ཤུ་རྩ་ལྔ་པོ་རྣམས་རིམ་པར་ཡོངས་སུ་བགྲངས་པ་དེ་ཡིན་པ་ནས་དུས་ཀྱི་མཐར། །རིགས་(༤༨བ)
ལྡན་པའི་རིགས་ལ་ལྷ་ཡི་དབང་པོ་ལྷ་ཡི་མཆོག་གིས་བཏུད་པ་དྲག་པོའི་རིགས་ལྡན་འབྱུང་བར་འགྱུར། །ཞེས་པའི་ཚིག་གིས་པདྨ་དཀར་པོ་མན་ཆད་དུ་གདན་ཉི་ཤུ་རྩ་ལྔ་དགོས་པའི་ཁུངས་སུ་འགྲོ་བ་ལྟ་བུར་སྣང་ཡང་། ལུང་དོན་ལ་དགོངས་པ་འགྲེལ་ལུགས་སྣ་ཚོགས་བྱུང་མོད། སྐད་དོད་ཀྱི་བར་དུ་རྣམ་དབྱེས་ཆོད་པའི་བཤད་ཚུལ་དེ་ལ་བླ་ཆེན་གྱི་མི་དཀར་པོ་ལ་བརྡ་སྤྲོད་ཀྱི་ཞྭ་ནག་པོ་གྱོན་པ་དེ། ངོས་ཅག་ཡིད་ཅུང་ཟད་སྤྲོ་བར་གྱུར་ནའང་། ཞེ་འདོད་ཀྱི་གཙོ་བོ་ནི། རྗེ་ནོར་བཟང་པའི་དྲི་མེད་འོད་རྒྱན་དང་པད་དཀར་ཞལ་ལུང་གི་དགོངས་པ་ཁོ་ནའོ། །མཁས་པ་འགོས་ལོ་ཡེ་བཟང་རྩེ་པས། རིགས་ལྡན་ཁྱབ་འཇུག་སྦས་པའི་དགུང་ལོ་ང་གཅིག་པའི་རྗེས་སུ་ཀླ་ཀློ་ཞུགས་པ་ཡིན་པས། གྲགས་པ་འདས་ནས་ལོ་བརྒྱད་བརྒྱ་ནས་ཀླ་ཀློ་འབྱུང་བར་བཤད་པ་དེས་སྦྲང་རྩིའི་བློ་གྲོས་བྱེ་བྲག་ཏུ་བསྟན་གསུང་བ་རང་ལུགས་ལ་འཐད་པར་མི་སེམས་མོད། ཀླ་ཀློའི་གནས་ཚད་ལ་ལོ་གྲངས་ལྔ་བཅུ་ཙམ་མ་འགྲིག་པར་རགས་རྩིས་མུན་པའི་ཁུང་བུ་སྐྱབས་སུ་བསྟེན་པ་ལས། ཉི་མ་གྲགས་པ་ནས་མཐའ་ཡས་རྣམ་རྒྱལ་གྱི་བར་རིགས་ལྡན་བཅུ་བདུན་ལ་ལོ་གྲངས་བརྒྱ་རེ་ཆོས་སྟོན་པར་བྱས། ཁྱབ་འཇུག་སྦས་པ་དང་དྲག་པོ་འཁོར་ལོ་ཅན་གཉིས་ཀྱི་ལོ་གྲངས་ཕྱེད་ཕྱེད་དྲིལ་བས་བརྒྱ་སྟེ། སྟོང་བརྒྱད་བཅུ་འབད་མེད་དུ་འགྲུབ་པས་བེམ་རྒན་ལ་ལྷན་པ་བཟང་པོ་ཐེབས་པར་སྣང་ངོ་། །རྒྱུད་ལས། ཀླ་ཀློའི་ཚོགས་ནི་འཁོར་གྱི་སྐྱེ་བོ་དང་བཅས་རབ་ཏུ་བཅད་ནས་མི་ཡི་ལོ་ནི་བརྒྱ་ཕྱེད་ན། རིགས་ལྡན་གྲུབ་པར་འགྱུར་ཏེ། ཞེས་པའི་དོན། རིགས་ལྡན་དྲག་པོའི་འཁོར་ལོས་བཏུལ་བའི་ཀླ་ཀློ་རྣམས་ཡང་དག་པའི་ལམ་ལ་ཞུགས་ནས་མི་ལོ་ལྔ་བཅུ་ཚུན་ལ་རིགས་ལྡན་གྱི་ལམ་གྲུབ་པར་འགྱུར་བའི་དོན་ཡིན་གྱི། དེ་རྣམས་ཀྱིས་རིགས་ལྡན་གྱི་ལམ་གྲུབ་པའི་ཚེ་དྲག་པོ་(༤༩ན)
འཁོར་ལོ་ཅན་བཞུགས་དགོས་པའི་དོན་ནི་མིན་ནོ། །ཆོས་རྒྱལ་རིགས་ལྡན་བསྡོམས་པར་སོ་གཉིས་སུ་བྱས་ནས་ཀླ་ཀློ་འདུལ་དུས་དྲག་པོའི་དགུང་ལོ་ལྔ་བཅུར་བཞེད་པ་རྣམས་ལྷན་པ་བརྒྱག་ཐེབས་ཙམ་ཡང་མི་འདུག་པས་རྗེས་སུ་མི་འཇུག་སྟེ། དམ་པ་ཇི་ལྟར་རྒུད་གྱུར་ཀྱང་། །སྡིག་དང་འདྲེས་པའི་ཟས་མི་ཟ། །སེང་གེ་བཀྲེས་ཀྱང་མི་གཙང་བའི། །ངན་སྐྱུགས་ཟ་བར་མི་བྱེད་དོ། །ཞེས་སོ། །
དྲི་བ་གཉིས་པའི་དྲིས་ལན།
དྲི་བ་གཉིས་པའི་དྲིས་ལན།དྲི་བ་གཉིས་པ་ནི། གཉིས་པ་དཔལ་ལྡན་རྒྱུད་རྒྱལ་དབྱངས་འཆར་ལས། །རཱ་ཧུའི་བྱེ་བྲག་དུ་མར་བཤད་ན་ཡང་། །སྐབས་འདིར་ཟླ་རེ་ཉི་མ་རེ་བཞིན་དུ། །གསལ་བྱེད་རེ་དང་མཉམ་དུ་འཆར་བ་ཡི། །ཚེས་ཀྱི་ར་ཧུའི་མིང་དུ་བཏགས་པ་འདི། །ཟླ་བ་གཅིག་ལ་ཚེས་ཞག་སུམ་ཅུ་ལ། །གསལ་བྱེད་སུམ་ཅུ་ཐམ་པ་མ་ཉམས་བགོས་ཕྱིར། །སྤང་བྱའི་ཡི་གེ་གསུམ་པོའི་མིང་གསལ་དགོས། །ཚེས་གཅིག་གསལ་བྱེད་ཀ་ཞེས་འཆར་བ་འདི། །ཡར་ངོ་མར་ངོ་གང་ནས་ངོས་འཛིན་ཅིང་། །ཤར་ནུབ་ལྷོ་བྱང་མཚམས་བཞི་གང་ནས་འཆར། །ཤར་རྗེས་སྤང་བྱ་བསྒྲུབ་བྱའི་བྱ་བ་ཅི། །ཞེས་པ། དཔལ་གཡུལ་ལས་རྣམ་པར་རྒྱལ་བ་དབྱངས་འཆར་རྒྱུད་ལེའུ་བཅུ་པ་འདི་བོད་དུ་གློ་བོ་ལོ་ཙཱ་བས་བསྒྱུར། དེ་ལ་འགྲེལ་པ་མཛད་མཁན་ཤིན་ཏུ་མང་ཞིང་། ཁྱད་པར་ཕུག་ནས་རྗེ་ལྷུན་གྲུབ་རྒྱ་མཚོས་མཆོག་ཏུ་དགའ་བའི་སྒྲ་དབྱངས་མཛད་ཀྱང་། མན་ངག་ལ་ལྟོས་པའི་ཆེད་དུ་དངོས་བསྟན་ལ་གབ་དཀྲུགས་ཅུང་ཟད་ཡོད་པ་དང་བཅས་དུས་ཕྱིས་གཙུག་ལག་འདི་ཉིད་ཉམས་ནས་རྗེ་འཕྲིན་ལས་ཞབས་ཙམ་མ་གཏོགས་རྫོགས་པར་མཁྱེན་པ་ཉིན་སྐར་ལྟར་གྱུར་ཚེ། བླ་རྩིས་པ་ཆེན་པོ་དཔལ་མགོན་འཕྲིན་ལས་ཀྱི་དངོས་སློབ་དུས་རམ་པ་འཆི་མེད་བདེ་བས་གྲྭ་ཕུག་ཏུ་སྦྱངས་པའི་འཕྲོ་ཉུང་ངུ་ཞིག་ལུས་པ་དང་། ཅུང་ཟད་ཐུགས་གང་བ་(༤༩བ)
ཙམ་བྱུང་བས་སླར་རྒྱ་བལ་འཛུམ་ལང་གི་པཎྜི་ཏར་གཏུགས་ནས་ཚིག་གཅིག་ཀྱང་མ་ལུས་པར་སྦྱངས་པའི་གསུང་རྒྱུན་ཕྱག་ལེན་མ་ཉམས་པ། ཁོ་བོའི་སློབ་དཔོན་ཆེན་པོ་སྨོན་འགྲོ་པཎ་ཆེན་གྱི་དྲིན་ལས་ཁོང་དུ་ཆུད་པའི་བློ་གྲོས་ཀྱི་མིག་ཆུང་ངུ་ཞིག་གིས་བལྟས་ཚེ། ཁྱེད་ཀྱི་དྲི་ཚིག་དེ་ལོང་བའི་འཁར་བཙུགས་ལས་རྒྱུ་མཚན་ཤེས་པ་ཅུང་མིན་པར་སྣང་སྟེ། ཚེས་ཀྱི་རཱ་ཧུ་ཐུན་ཕྱེད་ལྟར་ཕྱོགས་བཞི་དང་མཚམས་བཞི་ནས་འཆར་རྒྱུའི་ལོག་རྟོག་གིས་བླ་བཙོངས་ཚར་འདུག་གོ །དེས་ན་དབྱངས་འཆར་བའི་ཡར་ངོ་དེ། དཔེར་ན་ནག་ཟླའི་ཚེས་བཅུ་དྲུག་ནས་གནམ་སྟོང་བར་ལ་དཀར་ཕྱོགས་དང་། ས་ག་ཟླ་བའི་ཚེས་གཅིག་ནས་བཅོ་ལྔའི་བར་ལ་དམར་ཕྱོགས་སུ་ངོས་འཛིན་པའི་དཀར་ཕྱོགས་ལ་ཀ་ནས་བརྩམས་པའི་གསལ་བྱེད་ཀྱི་བཅོ་ལྔ་དང་། ནག་ཕྱོགས་ལ་དྷ་ནས་བརྩམས་པའི་བཅོ་ལྔ་འཆར་ལ། སྤང་བྱའི་ཡི་གེ་ང་ཉ་ཎ་ཀྵ་བཞི་ཡོད་པས། གསུམ་ཞེས་དམིགས་སུ་དཀར་བ་རྒྱལ་ཁམས་མ་མཐོང་བའི་ནད་རྟགས་ཕྱིར་ཤར་བ་འདྲ། ལྷ་གཟིགས་གོང་མ་ཆེན་པོས། མིག་ཚུམ་ཚུམ་གྱིས་རྒྱབ་ཀྱི་རི་མི་མཐོང་། །ལྕེ་དིག་དིག་དེས་དགོས་པའི་གཏམ་མི་ཐོན། །ཚུལ་སྦུག་སྦུག་པས་ཡང་དག་དོན་མི་གསལ། །བློ་ཟོམ་ཟོམ་གྱིས་ཤ་སྙིང་བསྲེ་མི་ཐུབ། །གསུང་བ་ལྟར། ལྟ་བའི་ཚེ་ཕྱོགས་རེའི་མིག་ཏུ་སོང་ཞིང་། སྨྲ་བའི་ཚེ་དགོས་པའི་གཏམ་མི་ཐོན་པ་དེ་ཁྱེད་གཅིག་པུའི་སྐྱོན་མིན་པས་བག་ཚ་མི་དགོས་སོ། །དཀར་ཕྱོགས་ཀྱི་ཚེས་གཅིག་ནས་འགོ་བརྩམས་རླུང་ནས་བཟུང་སྟེ་གཡོན་སྐོར་དུ་མེའི་བར་ལ་གསལ་བྱེད་རིམ་གྱིས་འཆར་བས། ཚེས་གཅིག་ལ་ནུབ་ཕྱོགས་སྟོབས་ཆེ་ཞིང་ཤར་ཕྱོགས་སྟོབས་ཆུང་། ཁྱད་པར་དྷརྨའི་མིང་ཅན་ལྟ་བུ་དེ་ཉིན་དམག་གི་ལས་བྱེད་དུ་མི་རུང་བ་དང་ཞིབ་ཏུ་བརྩིས་ན་ཚེས་གཉིས་ལ་ནོར་བུའི་མིང་དང་གསུམ་ལ་དཔལ་གྱི་མིག་(༥༠ན)
སོགས་ལ་ངན་པར་བཤད་པས་དྲི་བ་གསུམ་པ་ལ། གསུམ་པར་མཚོན་ནོ། །
དྲི་བ་གསུམ་པའི་དྲིས་ལན།
དྲི་བ་གསུམ་པའི་དྲིས་ལན།དྲི་བ་གསུམ་པ་ནི། རིགས་ལྡན་དུག་དང་ཀླུ་ཡི་དུག །དགོས་འདོད་སྒྲུབ་པ་སྤང་བྱར་གསུངས་པའི་ཕྱིར། །འཆར་ལུགས་བཞེད་ཚུལ་ཤིན་ཏུ་མང་བས་ན། །དེང་སང་ཉིན་མཚན་མཉམ་པའི་དུས་འདི་ན། །རེས་གཟའ་ཉི་མ་དབང་པའི་དུས་ཉིན་ཚེ། །ཐུན་འཚམས་གང་འཆར་ཡུན་དུ་ཆུ་ཚོད་ཅི། །ཞེས་པ་དབྱངས་འཆར་དུ་ཀླུ་རིགས་ལྡན་ཞེས་གཅིག་ཏུ་བཤད་པས། རིགས་ལྡན་གྱི་དུག་དག་ཀླུའི་དུག་ཅེས་སོ་སོར་འདྲི་བ་ནི། སྔོན་ཡར་རྒྱབ་ཞབས་དྲུང་ཀུན་དགའ་དར་རྒྱས་ཀྱིས་ར་བ་སྟོད་པའི་སློབ་དཔོན་ལ། ཁྱེད་ཚོ་ཚད་མ་བྱེད་དམ་རྣམ་འགྲེལ་བྱེད་ཀྱི་ཡོད། ཅེས་པའི་དྲི་བ་དང་མཚུངས་པའི་ནང་ཟོང་ཕྱིར་བཏོན་ཡིན་འདུག་པས། ལན་བྱེད་ཡུལ་དུ་མི་སྣང་ཡང་། བློ་ལྡན་གཞན་ལ་ཕན་སྲིད་པས། ཉིན་མཚན་མཉམ་པའི་དུས། ཉིན་ཚད་བརྒྱད་ཀྱིས་ཕྱེ་བའི་ནོར་ཆུ་ཚོད་གསུམ་ཆུ་སྲང་ཞེ་ལྔ་འབྱུང་བ་མཁའ་རོས་བསྒྱུར། སྲང་བཅུག །རི་བོས་བསྒྱུར། མཁའ་རོས་ཐོབ་ནོར་ཆུ་ཚོད་ཉེར་དྲུག་ཆུ་སྲང་བཅོ་ལྔ་རྫོགས་ནས། ཉི་མའི་སྤེན་པའི་ལོངས་སྤྱོད་ཆུ་ཚོད་གཅིག་དང་ཆུ་སྲང་ཕྱེད་བཅས་ང་གསུམ་རྫོགས་འཚམས་ནས་རིགས་ལྡན་ཆུ་སྲང་བཅུ་དྲུག་གི་ཡུན་འཆར་བ་སོགས་རེས་གཟའ་གཞན་ལའང་སོ་སོའི་སྒྱུར་བྱེད་དང་བཅས་པས་འབྱུང་བ་ནི་རང་དུས་ལ་འཆར་བ་ཡིན་ཞིང་། དུས་སྦྱོར་ཕྱེད་པ་ལ་ཉིན་དྲུག་སྐོར་དང་མཚན་ལྔ་སྐོར་དུ་བྱས་པའི་བདག་པོའི་གཟའི་སྐབས། བདག་པོའི་གཟའ་ཉི་མ་ཡིན་ཚེ་ཆུ་སྲང་བཅུ་དྲུག་ཡུན་ཚད་སོགས་གཞན་དུས་ལ་འཆར་བ་ཡིན་པས་དེའི་དུས་སུ་འཛེམ་དགོས་ཏེ། རིགས་ལྡན་ཐུན་འཚམས་མི་ཤེས་པར། །ཟས་ཞིམ་ཟོས་ཀྱང་དུག་འགྱུར་ཞིང་། །ནད་པས་སྨན་འཐུངས་དུག་ཏུ་འགྱུར། །སྦྲུལ་སོས་(༥༠བ)
བཏབ་པ་ཁྱུང་གིས་མིན། །དེ་ཕྱིར་རིགས་ལྡན་སྦྱོར་བ་སྤང་། །ཞེས་སོ། །
དྲི་བ་བཞི་པའི་དྲིས་ལན།
དྲི་བ་བཞི་པའི་དྲིས་ལན།དྲི་བ་བཞི་པ་ནི། བཞི་པ་གཙུག་ལག་སྐོར་མགོ་མང་མཆིས་ཀྱང་། །རྒྱ་ནག་ཡུལ་དུ་སྤྱི་དོན་བཅོ་ལྔ་ཞེས། །བོད་དུ་འགྱུར་བར་རྩིས་མགོ་བཅོ་ལྔ་སྟེ། །དང་པོ་གནམ་གྱི་རིམ་པ་བཅུ་གསུམ་སྟེང་། །ཤེལ་གྱི་བྱ་ཁྱུང་དཀར་པོ་དེ་ཡི་སྟེང་། །ས་བདག་རྒྱལ་པོར་རྩིས་མགོ་ལྔ་སྟོན་ཏེ། །ཤེལ་གྱི་བྱ་ཁྱུང་དཀར་པོ་ཞེས་པ་འདི། །ལོ་འགྲོས་གང་གི་སྟེང་ནས་བསྐོར་རྒྱུ་ཡིན། །འདི་ལྟར་རྒྱུད་རྒྱལ་གཙུག་ལག་རྒྱ་མཚོ་ལས། །ཆུ་ཐིགས་ཙམ་གྱི་རིག་པ་འཆང་བ་པོ། །ཁོ་བོ་འཕན་ཡུལ་བསྟན་པའི་མིང་ཅན་གྱིས། །བྲིས་པའི་དུས་འཁོར་རི་མོའི་ལས་ཚུལ་དང་། །གཙུག་ལག་རིག་པ་སྨྲ་བའི་མཁྱེན་ལྡན་རྣམས། །རྒྱ་ལ་ལེགས་བཤད་ལུང་རིགས་མཐུན་པ་ཡིས། །ལན་འདེབས་གསལ་བ་གནས་འདིར་མྱུར་སྩོལ་ཅིག །ཅེས་པ་རྒྱ་ནག་དཔྱད་ལྡིང་བཅུ་མ་སྐོར་མགོ་ལ། གནམ་གྱི་བྱ་ཁྱུང་དཀར་པོའི་སྟེང་ནས་རྗེ་ས་བདག་རྒྱལ་པོའི་རྩིས་བྱེད་པར་འདོད་ན། གོས་སྔོན་གོང་པ་ནས་རལ་ལམ་མ་རལ། རྗེ་རྒྱལ་དབུ་ཐོད་ས་ལ་ལྷུང་ངམ་མ་ལྷུང་། ཕོ་བྲང་གི་གདན་ས་སྟོངས་སམ་མ་སྟོངས། མི་ཁ་མང་གིས་སྟོད་གླེང་བྱས་སམ་མ་བྱས། འབངས་སྟོང་སྡེའི་ཁ་ལག་བྱུང་ངམ་མ་བྱུང་། རྐང་འོག་གི་རྡེའུ་དེ་ཀླད་ལ་ཤོར་རམ་མ་ཤོར། སྟག་གཟིག་གི་གྲ་ཡལ་ལམ་མ་ཡལ། གྲུམ་ཟེའི་གདན་ས་སྟོངས་སམ་མ་སྟོངས། ཞེས་པས་མཚོན་ཏེ། གངས་ཀྱི་སེང་གེ་དཀར་མོའི་སྟེང་ནས་དགེ་བའི་བཤེས་གཉེན་གྱི་རྩིས། གསེར་སྦྲུལ་སེར་པོའི་སྟེང་ནས་གསང་སྔགས་རྡོ་རྗེ་འཛིན་པའི་རྩིས། གཡུ་འབྲུག་སྔོན་མོའི་སྟེང་ནས་གཡུང་དྲུང་བོན་གྱི་རྩིས། གསེར་གྱི་གླང་པོ་ཆེའི་སྟེང་ནས་ཕ་ཚན་གཙོ་བོའི་རྩིས། ལྕགས་སྟག་སྔོན་མོའི་སྟེང་ནས་ཞང་བློན་ངར་མའི་རྩིས། (༥༡ན)
སྲིན་མོ་དམར་མོའི་སྟེང་ནས་བཟའ་མ་བུད་མེད་ཀྱི་རྩིས། གསེར་གྱི་རྡོ་རྗེ་རྒྱ་གྲམ་གྱི་སྟེང་ནས་བྱིས་པ་ཆུང་ངུའི་རྩིས། མཐིང་གི་ནེ་ཙོའི་སྟེང་ནས་དམན་ཤར་གྱི་རྩིས། རྨེ་བ་དགུ་གླིང་གི་སྟེང་ནས་བྲན་གཡོག་གི་རྩིས། རྟ་མཆོག་ངང་པ་གསེར་ལྡན་གྱི་སྟེང་ནས་འོག་རྟའི་རྩིས། འབྲོང་པོ་རྭ་སྔོན་གྱི་སྟེང་ནས་ཕྱུགས་ལུག་གི་རྩིས། བུམ་པ་དང་འཁོར་ལོ་འབར་བའི་སྟེང་ནས་བཟའ་མི་བྱེ་བྲལ་འོང་མི་འོང་གི་རྩིས། རྨ་བྱ་མཇིང་བསྣོལ་གྱི་སྟེང་ནས་བག་མ་འགྲོ་ལམ་གྱི་རྩིས། ལྷ་ཁང་ཁྱུང་མགོའི་སྟེང་ནས་ཁང་པའི་རྩིས། གླིང་བརྒྱད་གསེར་གྱི་ས་གཞིའི་སྟེང་ནས་སོ་ནམ་ལས་བྱེད་ཀྱི་རྩིས། རིན་པོ་ཆེ་འོད་འབར་གྱི་སྟེང་ནས་དཀོར་ནོར་གྱི་རྩིས། གསེར་གྱི་ཆུ་མིག་གི་སྟེང་ནས་བྱིས་པ་བཙས་ཀླུང་གི་རྩིས། ལྷ་བྱ་དཀར་མོའི་སྟེང་ནས་ཕན་པའི་ལྷ་འགོའི་རྩིས། དུར་བྱ་ནག་མོའི་སྟེང་ནས་འདྲེ་གང་གནོད་ཀྱི་རྩིས། ཤ་བ་དམར་མོའི་སྟེང་ནས་སྐྲ་དང་རྒས་པའི་རྩིས། གསོན་པོ་རྒྱབ་སྙེས་ཀྱི་སྟེང་ནས་ནད་པ་འཚོ་འཆིིའི་རྩིས། མི་རོ་དམར་པོའི་སྟེང་ནས་གཤིན་པོའི་རྩིས། ཤིང་སྡོང་དམར་པོའི་སྟེང་ནས་ཚེ་འདས་རོ་སྲེག་གི་རྩིས། ཐོད་པ་དགུ་བརྩེགས་ཀྱི་སྟེང་ནས་དཀར་དུར་རུས་པའི་རྩིས། ས་བདག་མགོ་གསུམ་གྱི་སྟེང་ནས་གཏོ་དཀར་ནག་ཁྲ་གསུམ་ཀྱི་རྩིས། རྡོ་རྗེ་རྒྱ་གྲམ་གྱི་སྟེང་ནས་སྐྱེས་དར་མའི་སྲོག་གི་རྩིས། གཡུང་དྲུང་འཁྱིལ་བའི་སྟེང་ནས་བཟའ་མ་བུད་མེད་ལ་དབང་ཐང་གི་རྩིས། འཁོར་ལོ་རྩིབས་བརྒྱད་ཀྱི་སྟེང་ནས་བྱིས་པ་ཆུང་ངུའི་ལུས་ཀྱི་རྩིས་པདྨ་འདབ་བརྒྱད་ཀྱི་སྟེང་ནས་ཡ་རབས་གོང་མ་དང་ཡོན་ཏན་ཅན་གྱི་ཀླུངས་རྟའི་རྩིས་རྣམས་དཔྱད་ལྡིང་དཀྱུས་མར་མི་གསལ་ཡང་། མན་ངག་ལུགས་སུ་ཡོད་པའི་ཤེལ་གྱི་བྱ་ཁྱུང་གི་ཁ་ནས་ས་བདག་རྒྱལ་པོའི་རྩིས། དེ་སྤྱིར་བཏང་ལྕགས་བྱ་ནས་སྐོར་མོད། མན་ངག་ལུགས་སུ་ལྕགས་བྱ་(༥༡བ)
སྤྲེ་སྟེང་ནས་བསྐོར་ཞེས་པས། གཞན་རྣམས་ལའང་སྐོར་མགོའི་འཕྲུལ་ཞེས་དགོས་སོ། །དྲི་བའི་དངོས་དོན་ཙམ་ཞིག་བློ་ལྡན་དོན་གཉེར་ཅན་འདྲ་ལ་ཕན་སྙམ་ལན་བྲིས་པ་ལས་མཆོད་བརྗོད་སྦྱར་བྱང་སོགས་ནི་མཁས་པ་ཟུར་མཁར་བས། འདི་ན་གྲོང་པ་རྣམས་ཀྱི་ཚིག །རང་གར་རྐང་པས་བཅད་པ་ལ། །སྙན་ངག་མཁན་དུ་འཛིན་པ་ནི། །ཀྱེ་མ་འཁྲུལ་བའི་མཚང་རེ་ཆེ། །ཞེས་པའི་དོན་དུ་སྣང་བས། སོལ་བ་ནག་པོའི་རང་བཞིན་ལ་དཀར་ནག་གི་རྟོག་དཔྱོད་བྱེད་མ་དགོས་སོ། །
ཡར་ཀླུང་བཀྲ་ཤིས་རྩེའི་པཎྜི་ཏར་རློམས་པ་ཉི་འོག་མཁས་པར་གྲགས་པའི་རྩིས་རིག་ལས་འཕྲོས་པའི་དྲི་བ་འགའ་ཞིག་གི་དྲིས་ལན་གོ་བདེར་བཀོད་པ།
ཡར་ཀླུང་བཀྲ་ཤིས་རྩེའི་པཎྜི་ཏར་རློམས་པ་ཉི་འོག་མཁས་པར་གྲགས་པའི་རྩིས་རིག་ལས་འཕྲོས་པའི་དྲི་བ་འགའ་ཞིག་གི་དྲིས་ལན་གོ་བདེ་བར་བཀོད་པ།ཡར་ལུངས་བཀྲིས་རྩེ་བ་པཎྜི་ཏར་རློམས་པ་ཉི་འོག་མཁས་པར་གྲགས་པའི་དྲི་བ་ཞིག་འདུག་པ་འགོ་འཇུག་ལ་ཚིགས་བཅད་སོགས་ཀྱང་མེད་ཅིང་ཤོག་དྲིལ་ཀྱང་ཧྲུལ་ནས་ཐམས་ཅད་ཀློག་རྒྱུ་མི་འདུག་རུང་། ཕལ་ཆེར་ཚང་འདུག་པ་རྣམས་འདི་ལྟ་སྟེ། ཐུབ་པས་དུས་འཁོར་གསུངས་དུས་སུ། །ལོངས་སྐུའི་ཆ་བྱད་ཅན་ཡིན་ནམ། །སྤྲུལ་སྐུའི་ཆ་བྱད་ཅན་གྱིས་གསུངས། །གླིང་འདིར་རེས་གཟའ་འཕོ་བའི་འཚམས། །ནམ་ལངས་ཡིན་ཞེས་ཕལ་ཆེར་འདོད། །དེ་ཡི་རྒྱུ་མཚན་ཇི་ལྟར་ཡིན། །སྡིག་གཟའ་རྣམས་ཀྱི་རང་འགྲོས་ཀྱིས། །རི་རབ་དག་ལ་འཁོར་མི་འཁོར། །ཉི་ཟླ་གཉིས་ལ་འགྲོས་བཞི་ཡོད་དམ་མེད། །ཉི་ཟླ་གཡས་སུ་འཁོར་བ་ལ། །རླུང་འགྲོས་ཞེས་ནི་འདོད་མི་འདོད། །སྒྲ་གཅན་གཡས་སུ་འཁོར་བ་དང་། །ཉི་ཟླ་གཡོན་དུ་འཁོར་བ་གཉིས། །འཕྲད་འཚམས་ཤར་གྱི་ཕྱོགས་ཡིན་ན། །ཉི་མ་ནུབ་ནས་འཛིན་པ་ཅི། །གཟའ་འཛིན་དུས་སུ་མིག་སྨན་མདོག །མཐོའམ་ཉི་མ་ཟླ་བ་མཐོ། །སྣོད་ཀྱི་འཇིག་རྟེན་འཇིག་པའི་དུས། །ཉི་མའི་དཀྱིལ་འཁོར་བདུན་འཆར་བ། །ཚད་ལྡན་གཞུང་ནས་བཤད་ཨེ་ཡོད། །རྣམ་དག་གྲུབ་མཐའི་རྩིས་ཉིད་ལ། །སྐྱེས་ཁྱིམ་ཟླ་དུས་སྐྱོང་བ་དང་། །དཀར་དྲུག་ཞེ་ལྔ་སྦྱོར་བ་གཉིས། །(༥༢ན)
ངེས་དོན་ཐུགས་རྩེ་ཅི་ལ་གཏོད། །གཏོད་ན་རྒྱུ་མཚན་ཇི་ལྟར་ཡོད། །དེ་མཚུངས་ཉི་ཟླ་བསྲེས་པ་ཡིས། །སྦྱོར་བ་དག་ཏུ་འགྱུར་མོད་ཀྱང་། །ཉི་ཟླ་སྤྱོད་འགྱུར་ལོངས་སྤྱོད་ནི། །མི་མཚུངས་པས་ན་སྦྱོར་བ་ཉིད། །ཡུལ་ལ་སྤྱོད་དམ་དུས་ལ་སྤྱོད། །ལོངས་སྤྱོད་ཉིན་ཞག་གཅིག་དང་མཚུངས་སམ་ཅི། །གཟའ་ལྔ་ཉིན་ཞག་དང་ནི་ཚེས་སྤྱོད་གཉིས། །སྐྱེས་ཁྱིམ་སྦྱོང་ཁྱད་འགལ་ཁྱབ་ཆེ་བ་འདི། །སྐྱེས་སྐར་མི་གཅིག་སྙམ་ན་དགོས་པ་ཅི། །ངེས་དོན་ཕྱག་ལེན་ཐུགས་རྩེ་གང་ལ་གཏོད། །གཟའ་ལྔ་ཉིན་ཞག་མ་ནི་འདེབས་པའི་ཚེ། །རྐང་འཛིན་ཚེས་ཞག་ཉི་བར་ལ་བྱེད་པའི། །ཕྱག་ལེན་མཛད་པ་མང་དུ་འདུག་ལགས་ཀྱང་། །ཉེ་ཚེས་ལོངས་སྤྱོད་མང་ཉུང་མི་མཚུངས་པར། །གྲུབ་རྩིས་ཚེས་ཉི་དག་ལ་བྱེད་པ་ཅི། །ཕྱག་ལེན་གང་གི་སྟེང་ནས་གནང་བར་བཞེད། །གཟའ་རྣམས་ཀུན་གྱི་བགྲོད་གཞི་ཡི། །ཁྱིམ་ནི་བཅུ་གཉིས་ཡོད་པ་ལས། །ཉིན་མཚན་རིང་ཐུང་ཐམས་ཅད་དུ། །ཉིན་དྲུག་མཚན་དྲུག་འཆར་མི་འཆར། །འཆར་ན་སྔ་གསུམ་ཕྱི་གསུམ་གྱི། །འཆར་ལུགས་ཞལ་གྱིས་བཞེས་ཨེ་ཐུབ། །མི་བཞེས་འགལ་བ་ཅི་ཞིག་འབྱུང་། །བཞེས་ན་གཏད་སོ་ཇི་ལྟར་མཆིས། །བཅུ་བཞི་དང་ནི་བཅོ་ལྔ་དང་། །དེ་བཞིན་ཚེས་བརྒྱད་གནམ་སྟོང་ལ། །དུས་བཟང་འོང་བའི་རྒྱུ་མཚན་ཅི། །སྒྲ་གཅན་ལྷོ་བགྲོད་བྱང་བགྲོད་ཡོད་དམ་མེད་ལགས། །གཞན་ཡང་། ཉམས་དགའི་ཁུལ་ཞུ་ནག་རྩིས་དྲི་བ་ཞུ། །སངས་རྒྱས་མ་བྱོན་གོང་ནས་རྩིས་འདི་ནི། །གོ་རིམ་ཡོད་ཅེས་ཁ་ཅིག་སྨྲ་བ་ལ། །ཡོད་མེད་མཁས་པས་གཟིགས་ནས་ཕེབས་སྒོ་མཁྱེན། །ཁྱུང་ནག་སྒང་དྲིལ་སོགས་ནས་གསུངས་པ་ལ། །ཡར་གྱི་ལྔ་ནི་གནམ་གྱི་འཇུ་ཐག་ཡིན། །མར་གྱི་ལྔ་ནི་ས་ཡི་རྟེན་ཕུར་ཡིན། །ཡར་གྱི་བརྒྱད་ནི་གནམ་རྒྱང་ཡིན་ཞེས་དང་། །མར་གྱི་(༥༢བ)
བརྒྱད་ནི་ས་རྒྱང་ཡིན་བརྗོད་པའི། །དེ་ན་མ་བུར་ཕྲད་ན་བཟང་བ་དང་། །དགྲ་གཤེད་ཕྲད་ན་ངན་ཞེས་པ། །འབྱུང་བ་འཐབ་ལུགས་ཇི་ལྟར་དགོས་པར་བཞེད། །རྨེ་བ་བརྒྱད་ཅུ་སྐོར་བ་དག་དང་ནི། །དྲུག་ཅུ་སྐོར་བ་གཉིས་སུ་ཡོད་པ་ལས། །འཇམ་དབྱངས་ཉིད་ཀྱི་གང་ནི་གསུངས་པར་བཞེད། །ངེས་དོན་ཕྱག་ལེན་ད་ལྟ་ཇི་ལྟར་སྐྱོང་། །ཞེས་པ་འདི་རྣམས་ལ་དྲི་བ་གནང་ཡོད་མེད་སྣ་ཚོགས་གྲངས་རེ་མང་འདུག་པར། ཚིག་ལྷུག་གི་རྒྱུ་མཚན་ལུང་ཁུངས་སོགས་ཀྱི་སྒོ་ནས་ལན་བྱས་ན་ཧ་ཅང་ཡི་གེ་མངས་པར་འགྱུར་བས། ཚིགས་བཅད་དུ་སྨྲས་ན། རྒྱུད་རྣམས་རྒྱལ་བའི་སྐུའི་བཀོད་པ། །བསྒྱུར་ནས་གསུངས་ཞེས་རྩོད་སྤོང་ཆེད། །སྟོན་འཁོར་གནས་ཀུན་བྱིན་བརླབས་ནས། །གསུངས་པ་ཚད་ཐུབ་ཡོངས་ལ་གྲགས། །རེས་གཟའ་ཉིན་ཞག་ལ་དབང་བར། །ཕལ་ཆེར་འདོད་ཀྱང་ཆོས་ལོངས་དང་། །བསྟུན་པ་ལུང་རིགས་དང་འབྲེལ་མོད། །རྨོངས་འདྲིལ་མཁས་པ་ཟུར་དུ་དབྱུང་། །བུ་ཡི་རླུང་འགྲོས་གདུགས་འཁོར་དཔེར། །མཛད་ན་གཟའ་དགུས་རང་འགྲོས་ཀྱིས། །རི་རབ་དངོས་སུ་མ་བསྐོར་ཀྱང་། །བཅུ་གཉིས་ཁྱིམ་བསྐོར་དོན་གྱིས་འཐོབ། །ཉི་ཟླ་འགྲོས་བཞི་ཡེ་ཤེས་ལེར། །གསུངས་ཀྱང་གཟའ་ལྔའི་མྱུར་བ་ལྟར། །འཁྱོག་འབྱུང་འགྲོས་བཞི་བཤད་པ་དང་། །མཚུངས་མིན་དངོས་སུ་བསྟན་པ་མེད། །ཉི་ཟླ་ནུབ་འགྲོ་རླུང་འགྲོས་ཏེ། །རང་འགྲོས་དཔེར་ན་ཉི་མ་ལ། །བཞི་ཡི་ཆུ་ཚོད་ཉེར་གཅིག་སྲང་། །དབུགས་ལྔ་ཆ་ཤས་ཞེ་གསུམ་བཤད། །གཟའ་འཛིན་དུས་སུ་ཟླ་བ་དག །ཤར་ནས་འཛིན་ཅིང་རྟ་ལྗང་ཅན། །དེ་ལས་གོ་བཟློག་སྒྲིབ་བྱེད་པ། །འཁོར་ལུགས་ཤིག་གི་གནད་དུ་གོ །དུས་འཁོར་གདན་གྱི་རྩེག་ལུགས་ལྟར། །ཟླ་ཉིའི་སྟེང་གི་སྒྲ་གཅན་གྱིས། །སྒྲིབ་པ་(༥༣ན)
དཔེར་ན་དྭངས་ཤེལ་སྟེང་། །ཚོན་གཞན་གྱིས་ནི་མདོག་སྒྱུར་བཞིན། །ཉི་མ་བདུན་གྱིས་སྲེག་པ་སོགས། །མེ་ཆུ་རླུང་གིས་བསྐལ་པ་དག །འཇིག་པའི་ཚུལ་གྱི་རྣམ་གཞག་ཀུན། །ཚད་ལྡན་གཞུང་མང་དག་ལས་བཤད། །སྐྱེས་ཁྱིམ་བཤད་ཚུལ་མི་མཐུན་པ། །རི་རབ་དབུས་ཀྱི་ཚངས་ཐིག་ནས། །གཞལ་བའི་ལྷོ་བགྲོད་འགོ་རྩོམ་དང་། །ས་འདིར་བྱེ་བྲག་དབྱེ་བས་འབྱེད། །སྦྱོར་བའི་ཆུ་ཚོད་རེ་གཉིས་སུ། །བཤད་པས་གང་ཤར་འདས་པ་ཡིན། །ཆུ་ཚོད་མ་ཟད་དུས་དེའི་བར། །སྦྱོར་བའི་ལྷ་ཡིས་བཟང་ངན་བྱེད། །མཁས་པ་སུས་ཀྱང་མ་མཁྱེན་པའི། །ཉིན་ཞག་ཉི་བར་ཞལ་ལུང་ལུགས། །གཟའ་ལྔ་ཉི་ཞག་བྱེད་བཞིན་དུ། །ཉི་དག་ལ་བརྟེན་རྩིང་ཆོས་ཡིན། །བགྲོད་གཉིས་ཚེ་ཡང་ཉིན་མཚན་ལ། །ཁྱིམ་དྲུག་སོ་སོར་འཕྱུག་མེད་འབྱུང་། །ཆུ་ཚོད་སྲང་མདའི་མཐོ་དམའ་སྟེ། །དུས་ཀྱི་སྦྱོར་བས་མངོན་སུམ་མཐོང་། །འདུལ་ལུང་བསྙེན་གནས་ས་སྙིང་མདོར། །དུས་བཅུ་གསུངས་ཤིང་གཟའ་འཛིན་ཚེ། །དྷཱུ་ཏཱིར་རོ་རྐྱང་རླུང་འཇུག་པའི། །ཕྱི་ནང་སྦྱར་བའི་བཤད་པ་འཐོབ། །སྒྲ་གཅན་གདོང་དང་དུས་མེ་གཉིས། །རྒྱུ་ལམ་གཅིག་ཏུ་ངེས་པས་ན། །ཉི་ཟླ་ལྟ་བུར་ལྷོ་བྱང་དུ། །བགྲོད་པའི་གནས་སྐབས་ཅུང་ཟད་མེད། །ཟས་གཙང་སྲས་སྔོན་རྔ་བོང་དུ། །གྱུར་ཚེ་དྲུག་ཁྲིར་དཀའ་ཐུབ་མཐུས། །གཟའ་སྐར་གོ་རིམ་མཛད་ཅེས་པ། །ཉི་མའི་སྙིང་པོའི་མདོ་ལས་གསུངས། །ཡར་ལྔ་ལ་སོགས་རྟོགས་པ་ལ། །བརྩི་བྱའི་ལོ་ཡི་མ་བུ་དང་། །ཁམས་ལྔའི་འགྱུར་ཚུལ་ཤེས་དགོས་པས། །གྲྭ་ཕུག་ལུགས་ཀྱི་རྗེས་འབྲང་རིགས། །ཞེས་ཚིགས་སུ་བཅད་པའི་སྒོ་ནས་ལན་ཉུང་ངུར་བརྗོད་ཟིན་ལ། དེ་ཡང་། ལེགས་བཤད་བྱིས་པ་དག་ལས་ཀྱང་། །མཁས་པ་རྣམས་ཀྱིས་ཡོངས་སུ་ལེན། །དྲི་ཞིམ་འབྱུང་ན་(༥༣བ)
རི་དྭགས་ཀྱི། །ལྟེ་བ་ལས་ཀྱང་གླ་རྩི་ལེན། །ཞེས་པ་ལྟར། དྲི་བ་བྱེད་པོ་ཕྱི་མ་གཉིས་ཀྱི་དྲི་ཚིག་རྣམ་དཔྱོད་དང་ལྡན་པ་ཆེར་མི་འདུག་ཀྱང་། ལ་ལའི་སར་གནད་ཅུང་ཟད་སྣང་བས་ལན་བཏབ་ན་གཞན་ལ་ཕན་པར་འགྱུར་བའི་སྐབས་མཐོང་སྟེ་བྲིས་པ་ཡིན་ཞིང་། མཐར་རྒྱས་དགེ་སློང་གི་དྲི་བ་མང་པོ་ཡོད་ཟེར་བ། ཡི་གེ་མ་མཐོང་བས་ལན་འདེབས་ཚོད་ཀྱང་མ་ཟིན་ལ། བློ་དང་ལྡན་ན་མ་སྨྲས་ཀྱང་། །རྣམ་འགྱུར་ཉིད་ལས་བསམ་པ་གོ །བལ་པོའི་སེའུ་མ་ཟོས་ཀྱང་། །ཁ་དོག་ཉིད་ལས་བྲོ་བ་ཤེས། །ཞེས་པ་ལྟར། ས་བདག་འཕོ་བསྐྱེས་ཀྱི་ལོ་འགོ་དེ་རྩ་ལྟ་བའི་ལོ་འགོ་དང་མཐུན་པར་འཛིན་པ་སོགས་ཀྱིས་གཞན་རྣམས་ཀྱང་རྗེས་སུ་དཔག་ནུས་པས་ལེགས་ཉེས་ཀྱི་རྟོག་དཔྱོད་བྱེད་པའི་ཡུལ་མིན་ནོ། །
དགེ་བསྔོའི་སྨོན་ཚིག་དང་མཇུག་བྱང་།
དགེ་བསྔོའི་སྨོན་ཚིག་དང་མཇུག་བྱང་།སྨྲས་པ། རྣམ་ཀུན་མཆོག་ལྡན་འགྱུར་མེད་བདེ་ཆེན་དཔྱིད་ཀྱི་དཔལ་མོའི་མངལ་ཁུར་ལས། །མཚན་དཔེའི་མྱུ་གུ་གཡུར་དུ་ཟ་བའི་འཁྲི་ཤིང་གཞོན་ནུ་ལེགས་ལྡན་པར། །གཅིག་ལས་དུ་མར་སྣང་བའི་སྒྱུ་འཕྲུལ་ཕང་ཕུང་འདབ་མ་རྒྱས་པའི་རྩེར། །དངོས་གྲུབ་བྱེ་བའི་འབྲས་བཟང་རབ་དུད་ཡོངས་འདུ་ས་བརྟོལ་དང་པོའི་མགོན། །ཐུབ་གསུང་སྙིང་པོ་སྣ་ཚོགས་རིན་ཆེན་ཁམས། །ཟླ་བཟང་མཁྱེན་མངས་སོར་མོའི་འདུ་བྱེད་ལས། །ལེགས་བྱས་པདྨ་སྤུངས་པའི་ཕྲ་ཚོམས་ཅན། །གཏན་བདེའི་འོད་དུ་འབར་བ་རྣ་བའི་རྒྱན། །དམར་སྣུམ་རལ་པའི་རྩེ་ན་ཟླ་ཚེས་པའི། །སྲིད་ཞིའི་བྱེད་པོའི་དཔལ་གྱི་མགྲིན་པ་ལས། །ལྐོག་གྱུར་གཟུགས་ཀུན་རི་མོའི་ཨཱ་དཪྴ། །འཆར་བའི་གཡུལ་ལས་རྣམ་རྒྱལ་དབྱངས་དེ་འཇེབས། །མ་རིག་ས་ཀུ་ཙི་ཏྲའི་ཁ་ཆུ་ལ། །(༥༤ན)
ལས་ཉོན་ཐགས་སུ་གྲུབ་པའི་ཁམས་ལྔའི་དར། །བླང་དོར་ཚོན་རིགས་བསྡེབས་པའི་ཟ་འོག་གོས། །འདི་སྣང་ལུས་ལ་རེག་བྱ་འཇམ་པས་བདེ། །སྒྲ་ཚད་བཟོ་གསོའི་རི་མོ་རྣམ་བཀྲ་བའི། །སྨྲ་བའི་སྤོབས་པ་གཟེངས་སུ་མཐོ་བའི་གླུ། །མགྲིན་པའི་འཁོར་ལོའི་དབུས་ནས་བླངས་པའི་དབྱངས། །འགྱུར་ཁུགས་སྙན་པའི་དཔལ་དེ་སྒྲ་འཛིན་དཔྱིད། །ཉེས་བརྒྱའི་ཁུང་བུར་འཁྱིལ་བའི་ཚུལ་འཆོས་ཅན། །དམ་པའི་སྤྲུལ་པར་ཁས་འཆེའི་ལྕེ་གཉིས་སྐྱོང་། །སྨྲ་བཅད་སྟོབས་འབྱོར་བཟང་བརྫུའི་ལྟོ་འགྲོའི་སྲོག །ལེགས་བཤད་མཁའ་ལྡིང་འགྱིང་བའི་སྡེར་མོས་བཅད། །གཙུག་ལག་རྒྱ་མཚོར་མཁྱེན་ཅན་དཀྱུས་རིང་པོར། །འཇུག་པའི་རིག་སྔགས་འཆང་བའི་འཁོར་ལོས་སྒྱུར། །གང་དེས་ལེགས་བཤད་དྲི་ཚིག་ཏམྦུ་ར། །ཉུང་ངུ་རྣམ་གསལ་སོར་མོས་བསྐུལ་འདི་སྙན། །ཐོས་ཉུང་མཚན་མོའི་བློ་ཡིས་པདྨའི་སྦུབས། །རྨོངས་རྟུལ་འདབ་མའི་རྒྱ་ནང་འཐུམས་པའི་དབུས། །སྨྲ་བའི་རྐང་དྲུག་འཕུར་འདོད་གླུ་ལེན་ན། །བསླབ་སྦྱང་གསར་པའི་སྐྱ་རེངས་འཆར་དེ་སྒུགས། །དེ་ལྟའི་མ་རིག་མུན་པ་སྟུག་པོའི་ནང་། །ཅི་བརྟོལ་བསྐྱེད་པའི་ཚིག་འཕྲེང་འདོམ་འཇལ་མཁན། །དྲི་བྱེད་ཡུལ་བཅས་བཅུད་བྲལ་བུམ་པ་ཟུང་། །ཕན་ཚུན་འཇོ་བའི་སྒྱུ་མའི་འཁྲུལ་འཁོར་བཞིན། །འོན་ཀྱང་ཐོས་བསམ་གཤོག་རྩལ་རྫོགས་པའི་རྒོད། །བཅུ་ཕྲག་རིག་གནས་མཁའ་དབྱིངས་མཐའ་འཇལ་ཡང་། །རེས་འགའ་ཅོང་རོང་ཁྲོད་དུ་མཚུན་ཟས་ལ། །(༥༤བ)
སྤྱོད་ལྟར་དོགས་པའི་གནས་ཀུན་བསལ་བར་བྱས། །ཆུ་འཛིན་གསར་པའི་ལང་ལོང་གཡོ་བའི་དབུས། །འབྲུག་སྒྲ་དལ་གྱིས་རྒོད་ཚེ་གཙུག་ཕུད་ཅན། །སྒྲོ་གཤོག་ཟླུམ་པོར་བྱས་ནས་དགའ་བའི་བར། །སྒྱུར་བ་དབྱར་གྱི་རྒྱལ་མོའི་ངང་ཚུལ་ཡིན། །ལོ་པཎ་བརྒྱུད་པའི་ཡང་སྲིད་མཚན་སྙན་ཡང་། །བློ་ལྡན་མདུན་སར་མིག་ཕབ་ངག་བཅད་ནས། །རྔུལ་ཆུའི་མུ་ཏིག་འཕྲེང་བ་འགྲམ་འཆང་བའི། །རྣམ་པར་ཐར་དེ་བདག་འདྲས་ཟིན་མ་གྱུར། །དགུ་མཐའ་ཙམ་གྱི་རི་མོ་མི་ཤེས་པར། །དང་པོའི་སངས་རྒྱས་རྒྱུད་ཀྱི་དགོངས་འགྲེལ་དག །རྩོམ་པར་རློམ་རྣམས་རིགས་ལྡན་རིགས་ཡིན་ན། །མ་ཁའི་ཡུལ་གྱི་སྦྲང་རྩིའི་བློ་གྲོས་སུ། །ཀྱེ་མ་ལུང་རིགས་མ་འབྲེལ་མདོ་སྔགས་འཆད། །ལེགས་སྦྱར་སྡེབ་སྦྱོར་མི་ཤེས་རྡོག་བཅག་སྒྲིག །ཚད་བྲལ་བཟོ་དང་གྲོང་ཚིག་སྙན་ངག་ཏུ། །རློམ་རྣམས་གཞན་འཕྲུལ་གནས་ཀྱི་བྱེད་པོའི་བུ། ཁུངས་བྲལ་རང་བཟོའི་དབང་ཁྲིད་མན་ངག་ལུང་། །ཧ་ལའི་རྐྱལ་པ་ཐོགས་པའི་གསོ་རིག་པ། །གཟའ་སྐར་ལོག་པར་སྟོན་པའི་རྩིས་མཁན་རྣམས། །འདི་ཕྱིའི་བདེ་འཕྲོག་འཕྲོག་པའི་གཤིན་རྗེ་དངོས། །ཡང་ཡང་ཚུལ་དེ་བསམས་ཚེ་འཁྲུལ་མེད་དུ། །མང་མང་བཅུ་ཕྲག་རིག་པའི་དཀའ་གནས་ཀུན། །གསལ་གསལ་རྗེན་པར་སྟོན་པའི་ཡོངས་འཛིན་རྣམས། །དད་དད་སེམས་ཀྱིས་ལག་པད་སྙིང་གར་ཟུམ། ཁོ་བོ་སྔོན་བསགས་ལེགས་བྱས་མི་དམན་པས། །མང་ཐོས་མཁས་མཆོག་དུ་མའི་ཚོགས་དང་མཇལ། །རྒྱ་ཆེན་ཤེས་བྱའི་(༥༥ན)
གནས་ལུགས་མཐའ་ཀླས་པར། །དག་དང་མ་དག་འབྱེད་པའི་སྤོབས་པ་ཐོབ། །དེ་ལྟ་ན་ཡང་མཁས་ལས་བླུན་བྲིན་པའི། །མཐའ་འཁོབ་ཁ་བས་བསྐོར་བའི་བོད་དུ་སྐྱེས། །གཟིག་ལྤགས་གྱོན་པའི་མགྲིན་བཟང་གྲལ་རིང་དེར། །ཉམ་ཆུང་སྔོན་མེད་ཀ་ལ་པིང་ཀ་ཚུད། །འོན་ཏང་ཤར་རིའི་རྩེ་ནས་ཉིན་བྱེད་དབང་། །བགྲང་མེད་ཤར་ཡང་འཛད་མི་ཤེས་པ་ལྟར། །མགྲིན་པའི་ལམ་ནས་ལེགས་བཤད་མི་ཟད་ཀྱང་། །དང་པོའི་ལས་ཅན་དོན་དུ་ཉུང་ངུར་བཀོད། །དགེ་བའི་ལེགས་བྱས་འཕྲུལ་གྱི་ལྡེ་མིག་གིས། །སྡེ་བཞིའི་སྒོ་འཕར་ཕྱེ་བའི་གན་མཛོད་ལས། །ཆོས་སྲིད་འབྱོར་བར་སྤྱོད་པའི་གདུགས་དཀར་པོའི། །བསིལ་བའི་གྲིབ་མར་འགྲོ་ཀུན་ངལ་གསོར་ཤོག །ཅེས་རྩིས་དཀར་ནག་ལས་བརྩམས་པའི་དྲིས་ལན་ཉིན་བྱེད་དབང་པོའི་སྣང་བ་ཞེས་བྱ་བ་འདི་ནི། སློབ་དཔོན་གཞིས་ཀ་ཤར་པ་ཨ་འགུར་དང་། དཔལ་ནོར་བུ་སྤུན་གྱིས་སྔ་ཕྱིར་ནན་གྱིས་བསྐུལ་ཅིང་། གཞན་ཡང་དོན་གཉེར་ཅན་དུ་མས་བསྐུལ་བ་ལ་བརྟེན་ནས། རྡོ་རྗེ་ཐེག་པ་དང་ཐ་སྙད་ཀྱི་ཚུལ་ལ་མཁྱེན་སྤྱན་རྣམ་པར་ཡངས་པ་ཟུར་འུག་བྱ་ལུང་པའི་རིགས་ལས་རྡོ་རྗེ་འཛིན་པ་ཆེན་པོ་དཔལ་འབྱོར་འཕྲིན་ལས་རབ་རྒྱས་ཀྱི་དྲུང་དུ་དཀར་ནག་གི་རྩིས་ཕྲ་རགས་ཐོས་བསམ་གྱིས་གཏན་ལ་ཕབ། གཉགས་ཀྱི་བནྡེ་བླ་མཁྱེན་ངག་དབང་འཇམ་དཔལ་བློ་གྲོས་ལས་རྩིས་དཀར་ནག་དང་དབྱངས་འཆར་གྱི་ལེགས་བཤད་མང་དུ་ཐོས་ལ། སྨོན་མདར་སོགས་མཁས་པ་མང་དུ་བསྟེན་པས་རིག་གནས་དུ་མའི་འཕྲེང་བ་མགྲིན་པར་འཆང་བ་(༥༥བ)
ཟུག་པོ་ནས་གཞོན་ནུ་སྐལ་བཟང་པདྨ་དཀར་པོའི་ཞལ་ལུང་གི་སྟེང་ནས་རྒྱུ་མཚན་རྩིས་སོགས་ཀྱི་རིག་པ་དུ་མ་མཐའ་ཆོད་པར་མནོས་ཤིང་། རྒྱ་གར་གྱི་ཆུ་བོ་གངྒ་ཚུན་ཆད་དུ་གནས་ལྔ་རིག་པ་སྨྲ་བ་ལ་ཟླ་མེད་པའི་མཁས་པ་ཆེན་པོ་སྨོན་འགྲོ་ནས་རིག་གནས་རྒྱ་མཚོའི་འཕྲེང་བ་འཛིན་པ་ཚེ་དབང་དོན་གྲུབ་པའི་རིགས་ཆོས་ཀྱི་སྲས་ཤེས་བྱ་ཀུན་རིག་འཇམ་དབྱངས་དབང་རྒྱལ་རྡོ་རྗེའི་དྲུང་དུ་དཔལ་གཡུལ་ལས་རྣམ་པར་རྒྱལ་བའི་སྐོར་ཡོངས་སུ་རྫོགས་པ་དང་། རེའུ་མིག་རྒྱ་མཚོ་སོགས་སྐར་རྩིས་ཀྱི་གནད་དུ་མ། ནག་རྩིས་ཀྱི་གཏོ་དཀར་ནག་སོགས་ཐོས་པས། རྩིས་ཀྱི་གཙུག་ལག་ལ་སྤོབས་པ་དགེ་བ། བཅུ་ཕྲག་རིག་པའི་གནས་སྨྲ་བ་ལ་དབྱངས་ཅན་མགྲིན་པར་ཆགས་པའི་བློ་གྲོས་ཀྱི་ལང་ཚོ་དར་ལ་བབ་ཅིང་། གངས་ཅན་གྱི་ལྗོངས་འདིར་བླ་དཔོན་ཟུང་དུ་འཇུག་པ་སྡེ་སྲིད་རིན་པོ་ཆེ་ཕག་མོ་གྲུ་པའི་མདུན་ན་འདོན། ཟ་ཧོར་གྱི་རིགས་ལས་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ། མིང་གཞན་འཇམ་དབྱངས་གོང་མའི་ལུང་གིས། ཟི་ཐེན། ཏྭ་ཞན། ཅི་ཙེའི་ཕཱེ། ཤཱ་ཝུའི་ཐེན་ཞཱ། ཤི་ཀྱོའུ། ཡི་ཐུང་། བཱི་ཞི། ཏའི་ཆི་ཀྱིང་གང་། དེའི་ཁེའི། ཤང་ཟི། ཙི་ཡིན། ཞེས་སྲིད་ཞིའི་གཙུག་གི་རྒྱན་དུ་དབང་བསྐུར་བ་གང་གིས། འདྲེན་མཆོག་ཟས་གཙང་སྲས་པོ་དྲག་པོ་ཞེས་པ་ལྕགས་སྤྲེལ་སྐུ་བལྟམས་ནས་ལོ་ཉིས་སྟོང་དྲུག་བརྒྱ་བཅོ་ལྔར་སླེབ་པ། འཕགས་པའི་ཡུལ་དུ་མ་ད་ན་ཞེས་པ་ཕྱོགས་འདིར་མྱོས་བྱེད་དུ་འབོད་ཅིང་། རྒྱ་ནག་གི་ཡུལ་གྲུར་ལོ་གསར་ཟིན་པས་བིང་ཤིང་ཞེས་པ་བོད་ཡུལ་དུ་མེ་ཕོ་སྤྲེའུར་གྲགས་པ། རྟ་ལྗང་ཅན་ཆུ་སྲིན་གྱི་ཁྱིམ་དུ་སྤྱོད་པ་རྒྱ་གར་བ་པཽ་ཥྱ། རྒྱ་(༥༦ན)
ནག་པ་ཤི་དབྲི་ཡོལ་དུ་རྗོད་པའོ། །ཧོར་གྱི་ཟླ་བ་བཅུ་གཉིས་པའི་དུས་འཁོར་བ་ལུགས་ཀྱི་དམར་ཕྱོགས་ཀྱི་གང་བ་དང་པོ། ཡུ་ཎའི་དབྱངས་ཧཱ། གསལ་བྱེད། ྈྐཾྈྐཱཿ ཁམས་སྙིང་སྟོབས་ཀྱི་མུན་པ་འཇུག་པ་ཆུང་ངུའི་སྨིན་པ། དབྱངས་འཆར་བའི་དཀར་ཕྱོགས་ཀྱི་གང་བ་དང་པོ། དབྱངས་ཨཽ། གསལ་བྱེད་ཙ། ཁམས་ནམ་མཁའ། འདོད་ཡོན་སྒྲ་འཆར་བ། རྟ་བདུན་གྱི་དབང་པོ་མེ་བཞིའི་དགའ་མ་དང་རྩེ་བའི་ཏཏྐཱ་ལ་བུམ་པའི་དུས་སྦྱོར་ལ། ལུགས་གཉིས་ཀྱི་མདུན་ས་ཆེན་པོ། དགའ་ལྡན་ཕྱོགས་ཐམས་ཅད་ལས་རྣམ་པར་རྒྱལ་བའི་ཕོ་བྲང་གི་གཟིམས་ཆུང་དགའ་ལྡན་སྣང་གསལ་དུ་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་གིས་བགྱིས་པ་སིདྡྷི་རསྟུ།། །།ཡེ་དྷརྨཱ་ཧེ་ཏུ་པྲབྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་ཝཱ་དཱི་མཧཱ་ཤྲམ་ཎཿ ཤུ་བྷམ་སྟུ་སརྦྦ་ཛ་ག་ཏཾ།། །