དཔལ་ལྡན་འབྲས་སྤུངས་ཀྱི་འདུས་ཚོགས་གྲྭ་རིགས་སྦྱིན་བདག་དང་བཅས་པས་གོ་བར་བྱེད་པའི་ཡི་གེ་དང་ལྷོ་རྒྱུད་དང་གཙང་རྒྱུད་ཀྱི་དགོན་ཁག་འགའི་བཅའ་ཚེ།

སྭ ར སྭ སྟི བ གི ཤྭ རེ ན ནེ མ ས རྦྦཱ སྨི མངྒ ལཾ ཤེ ཡ ཁྲ ཡ ཙྪ། དབྱངས་ཅན་ངག་གི་དབང་ཕྱུག་གིས་དུས་ཐམས་ཅད་ལ་བཀྲ་ཤིས་དགེ་ལེགས་སྩོལ། །བཻ ཌཱུ ཪྻ ལ ཀྵྨི ར ཛ ཀཱུ ཊ ཀ ལཱ པྲ པ ཉྩཾ ནཱ སཾ ཁྱ སཱུ ཪྻ མྲྀ ག ནཱ ཡ ནི ཀཱ ཙི ཏེ ན། ཕུན་ཚོགས་བཻཌཱུར་རྡུལ་བརྩེགས་སྒྱུ་རྩལ་སྤྲོས། །གྲངས་མེད་རྟ་ལྗང་རི་དྭགས་མིག་ཅན་གྱིས། །ཨཱ ལེ ངྒཱི ཏཱ ན མ བྷི ཡ སྱ ཙ ཀཱ ཡ ཀཱ ལྱ སྭ དྡྷོ པ ལ ཤ ས ན སཱུ ཪྻ ཙ བ ནྡྷུ རི ཀྵཾ། །མངོན་པར་འཁྱུད་པས་གང་སྐུའི་ཆ་ཤས་ལ། །འགྲན་པའི་དཔེར་བསྟན་ཉི་མའི་གཉེན་དེས་སྐྱོངས། །དཔལ་སྟུག་བསྟན་པ་རྣམ་རྒྱལ་ཁང་བཟང་དུ། །དཔག་དཀའ་བློ་གྲོས་དབྱུ་གུའི་འཕྲུལ་གྱི་(༢ན)

སྒོས། །མདོ་རྒྱུད་བཟང་པོའི་ལེགས་བཤད་འཆི་མེད་རྔའི། །གྲགས་པ་སྲིད་གསུམ་སྒེག་མོའི་ཐོས་འཛིན་རྒྱན། །མཁྱེན་རབ་བཀྲ་ཤིས་རྟགས་ཀྱི་སྒྱུ་ཐབས་ལས། །མཁས་གྲུབ་གསེར་གྱི་འདབ་ཅན་ཚོགས་རྣམས་ཀྱི། །གསུང་རབ་ལུས་སྟོབས་སྙེམས་པ་འཕྲོག་མཛད་པའི། །དཔལ་ལྡན་མི་ཡི་སེང་གེ་སྤྱི་བོས་མཆོད། །ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་འདུས་ཚོགས་གྲྭ་རིགས་སྦྱིན་བདག་བཅས་པ་མཐའ་དག་གིས་ངེས་རྒྱུར། སྒོ་མང་བཀའ་བཅུ་བ་ངག་དབང་རྒྱ་མཚོ་དང་། སྔགས་པ་དགེ་ལེགས་ཕུན་ཚོགས་གཉིས་འོས་འདུ་མཐུན་ནང་དུ་གྲུབ་པ་བྱུང་བ་བཞིན་ཆོས་ཁྲིམས་པར་བསྐོ་བཞག་བགྱིས་པ་ཡིན་པས། ཉི་མའི་གཉེན་གྱི་རིང་ལུགས་ཀྱི་སྙིང་པོ་འདུལ་བའི་སྡེ་སྣོད་ལས་ཇི་ལྟར་འབྱུང་བ་བཞིན། ཤཱཀྱའི་དགེ་སྦྱོང་རྣམས་ཀྱིས་སྤང་བླང་གི་གནས་རྣམས་སོ་སོར་མ་འདྲེས་པར་ཡང་དག་པར་བསྒྲུབ་པ་དང་། ཆོས་ཁྲིམས་པས་ཀྱང་རང་འདོད་ཕྱོགས་ལྷུང་དང་ཉེ་འགྱངས་སྤངས་པའི་སྒོ་ནས་བཅའ་ཁྲིམས་དག་ལ་འབད་རྩོལ་ལྷུར་ལེན་བགྱིད་པ་ཅི་ནར་གལ་ཆེ། ཞེས་འཕགས་པའི་ཡུལ་དུ་པྲ་མ་ཏི་ཞེས་བརྗོད་(༢བ)

ཅིང་། གངས་ཅན་གྱི་ལྗོངས་འདིར་མྱོས་ལྡན་དུ་འབོད་པ་ས་མོ་ཡོས་ཀྱི་ལོ་ཐོས་ལྡན་ཟླ་བའི་དཀར་ཕྱོགས་ཀྱི་ བཟང་པོ་དང་པོའི་ཚེས་ལ་བྲིས། །ཕུལ་བྱུང་བྱམས་བརྩེའི་ལེགས་བྲིས་དཔུང་ཚོགས་དག་གིས་ཆུ ་སྲིན་རྒྱལ་མཚན་བཅུད་བྲལ་སྡེ་བཅས་རྣམས། །ལེགས་བཅོམ་ཐབས་མཁས་བསོད་ནམས་སྟོབས་བཅུའི་འཁོར་ལོས་ལྷ་ལམ་བདེ་ཆེན་ངོས་སུ་རྟག་རྒྱུ་བའི། །ཕྱོགས་བྲལ་འགྲོ་བ་འཆི་མེད་རྣམས་ཀྱི་ཕན་བདེའི་གཉེན་གྱུར་ཟས་གཙང་སྲས་པོ་མིག་སྟོང་ཅན། །འདྲེན་མཆོག་ཁྱོད་ཀྱིས་དུས་ཀུན་དགེ་ཚོགས་བདུད་རྩིའི་དཔལ་གྱི་དགའ་སྟོན་འདོད་འཇོ་རྒྱས་པར་མཛོད། །ཕུན་ཚོགས་གནམ་བསྐོས་དབང་ཕྱོགས་རྒྱལ་པོ་ཡི། །བཀའ་ཁྲིམས་བཟང་པོའི་ལུང་གིས་ལྷའི་བླ་མར། །རབ་གྲགས་ཉི་མའི་གཉེན་གྱི་འཕྲིན་ལས་པ། །ཚངས་སྲས་བཞད་པའི་རྡོ་རྗེ་གང་དེའི་གཏམ། །ཁྲིམས་ལྡན་འདུས་གླིང་དབྱིག་འཛིན་གྱི་སྤོ་ལས་མངོན་པར་འཕགས་པའི་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་སློབ་དཔོན་གྲྭ་རིགས་སྦྱིན་བདག་དང་བཅས་པ་རྣམས་ལ་ཟློ་བ། ཆོས་ཁྲིམས་གསེར་གྱི་ཤིང་རྟ་ཁ་ལོ་མངོན་པར་སྒྱུར་བའི་བྱེད་པོར། བློ་གསལ་གླིང་ནས་དགེ་སློང་དོན་གྲུབ་རྒྱ་མཚོ་དང་། བདེ་ཡངས་ནས་དགེ་སློང་ངག་དབང་བསོད་ནམས་གཉིས་འོས་འདུ་སྤྱི་མཐུན་དུ་འདུག་པ་ལྟར་བསྐོ་གཞག་བྱས་ཡོད་པས། ཁྱོད་གོང་འཁོད་རྣམས་ཀྱིས་སྟོན་པ་བུ་རམ་ཤིང་པའི་ལུང་རྟོགས་ཀྱི་བསྟན་པ་སྤྱི་དང་ཁྱད་པར་རྗེ་བཙུན་འཇམ་དཔལ་སྙིང་པོའི་རིང་ལུགས་དྲི་མ་མེད་པ་ལས་ལེགས་པར་བྱུང་བའི་འཁོར་ལོ་གསུམ་གྱི་བྱ་བ་མཐའ་དག་ཡར་ལྡན་དུ་འགྱུར་བའི་བླང་དོར་གྱི་གནས་རྣམས་ལ་བརྩོན་པ་ལྷུར་ལེན་དུ་བགྱིད་པ་གལ་ཆེ། ཞེས་(༣ན)

དབུས་འགྱུར་འཆང་དུ་བཱི་ར་ཞེས་གྲགས་པ། བསིལ་བའི་ལྗོངས་འདིར་དཔའ་བོར་འབོད་ཅིང་། ཤར་ཕྱོགས་རྒྱ་ནག་གི་རྒྱལ་ཁམས་སུ་དབང་ཐང་དང་བསྟུན་པ་ལྕགས་འབྲུག་ཧོར་གྱི་ཟླ་བ་དྲུག་པའི་དཀར་ཕྱོགས་ཀྱི་རྒྱལ་བ་དང་པོའི་ཚེས་ལ།ལོ ཀེ ནྡྲདཱ ཥྚཱ ཤི བ ས ལི ཀ སུ ནཱ སཱི རཱ ཧཱི དྲྭེ མཱ ཏུ ཪྻ ཤྱ མ རུ པ ཀ ཙ ཀ རྟི ཀྱཾ ། འཇིག་རྟེན་དབང་པོ་རྣ་བ་བརྒྱད་པ་གཙུག་ན་ཟླ་བ་པད་དཀར་མིག །གྲགས་པའི་མུ་ཁྱུད་མ་གཉིས་པ་དང་སྔོ་བསངས་ལུས་ཅན་ཀཪྟིཀ །ཏྲཻ བྷཱ བ ཀྱཱ སྨིཾ བ ལ ཀ བ ཧུ ཤི རེ པ ཏ ན ཡ སྶཽ ཁྱི ཤྲཱི དཱ ཡཾ སུ ག ཏ ས ཀ ལ ཀཱ ལེ ཛི ཏྲ། སྲིད་གསུམ་འདི་ན་དྲེགས་ལྡན་ཀུན་གྱི་སྤྱི་བོར་བགྲོད་བྱེད་ཉེར་འགོད་པ། །ཕན་དང་བདེ་བའི་དཔལ་སྟེར་རྣམ་འདྲེན་ཟས་གཙང་སྲས་པོ་དུས་ཀུན་རྒྱལ། །ཆོས་རྒྱལ་མེས་དབོན་བཀའ་དྲིན་ནོར་འཛིན་དབུས། །མཁན་ཆེན་ཞི་འཚོའི་སོ་ཐར་དཔག་བསམ་ལྗོན། །མཚོ་སྐྱེས་ཐེག་མཆོག་གང་བུའི་གཡུར་ཟ་ལྡེམ། །བྱེད་པོ་ལོ་པཎ་རྒྱལ་བློན་ཕྱག་གི་ཡུལ། །ས་ཧོར་རིགས་ཀྱི་མཁའ་ལས(༣བ)

ལྔ་རིག་པའི། །འོད་སྟོང་བཀའ་གདམས་བསྟན་པའི་པདྨའི་ཚལ། །རྒྱས་ཚེ་འབྲོམ་སྟོན་རྗེ་སོགས་བྷྲ་མ་རཿ། །ཐེག་ཆེན་གླུ་དབྱངས་འགྲོ་འདིའི་ཕན་བདེའི་དཔྱིད། །འཇམ་མགོན་བློ་བཟང་མཁྱེན་པའི་གདོང་དྲུག་གིས། །ལེགས་བཤད་འབྲུག་སྒྲ་མངལ་འཛིན་མངོན་གྱུར་ཚེ། །ཤེས་རློམ་གླང་གདོང་ཚིག་གི་མཆེ་བ་ཀུན། །ཕྱུང་བའི་གྲགས་པ་སྲིད་འདིའི་རྣ་བའི་རྒྱན། །ཕུལ་བྱུང་བསོད་ནམས་རི་སྐྱེས་འཁོར་ལོ་ཡིས། །འཇིགས་བྲལ་ཆོས་ཀྱི་གླིང་བཞིར་མངའ་སྒྱུར་བ། །འཕྲིན་ལས་རྒྱ་མཚོའི་མཐའ་ཡང་དོག་པོར་མཛད། །ཟླ་བྲལ་བརྒྱུད་པར་བཅས་པ་རྒྱལ་འགྱུར་ཅིག །ཅེས་ཤིས་པ་བརྗོད་པའི་ཚིག་གི་འཕྲེང་བ་སྔོན་དུ་བཏང་ནས། ཚེ་རིང་གནམ་གྱི་ཤེ་མོང་ལ་བརྟེན་ནས་སྟོབས་ཀྱི་འཁོར་ལོས་སྒྱུར་བ་དབང་ཕྱོགས་གོང་མ་རྒྱལ་པོའི་ལུང་གིས་རྡོ་རྗེ་འཆང་ལྷའི་བླ་མར་འབོད་ཅིང་། གནམ་གྱི་བུ་བོ་དོན་ཆ་མུར་གན་གྱི་རིགས་བརྒྱུད་ལས་སོན་པ་ཇིང་གིར་ཧོར་གྱི་རྒྱལ་པོའི་མངའ་འོག་ཡངས་པའི་ཆར། ཏཱ་ལའི་བླ་མ་བཛྲ་དྷ་ར་ཞེས་མིང་ཡོངས་སུ་གྲགས་པའི་གཏམ། སྡེ་དྲུག་གིས་ཐོག་དྲངས་པའི་ལྷོ་ཕྱོགས་ཀྱི་རྒྱུད་དུ་འཁོད་པའི་ཁྲིམས་ལྡན་འདུས་པའི་ཚོགས་རྣམས་ལ་ཟློ་བ། གྲངས་མེད་པའི་ལུས་ཅན་ཐམས་ཅད་ཀྱི་ཕན་པ་དང་བདེ་བའི་དྲི་བསུང་དམ་པ་ཡུན་དུ་གནས་པ། ཀུན་མཁྱེན་སྟོབས་བཅུ་མངའ་བའི་བསྟན་པ་དྲི་མ་མེད་པ་དཔག་བསམ་གྱི་ལྗོན་པ་ཆེན་པོ་ལ་རག་ལུས་ཤིང་། དེའང་འདུས་པའི་ཚོགས་རྣམས་ཀྱིས་བགྱིད་པར་འོས་པའི་གནས་འཁོར་ལོ་གསུམ་གྱི་བྱ་བ་ཡང་དག་པར་བསྒྲུབ་པ་ལ་རག་ལུས་པས། ཀེ་ལ་ཤ་ཡི་ར་བས་ཡོངས་སུ་བསྐོར་བའི་ལྗོངས་འདིར། ཆོས་ཀྱི་རྒྱལ་པོ་མེས་དབོན་རྣམ་པ་གསུམ་དང་། མཁན་སློབ་གཉིས་ལ་སོགས་པའི་ལོ་པཎ་རྣམས་ཀྱི་གཞལ་དུ་མེད་པའི་བཀའ་དྲིན་ལས། (༤ན)

ཐུབ་པའི་ལུང་དང་རྟོགས་པའི་བསྟན་པ་རིན་པོ་ཆེ་དབྱར་དུས་ཀྱི་ཆུ་གཏེར་བཞིན་ཆེས་ཆེར་རྒྱས་པར་མཛད་ཅིང་། ཁྱད་པར་དུའང་རྒྱལ་བའི་གསུང་རབ་མཐའ་དག་ལ་ཕྱོགས་སུ་ལྷུང་བ་མི་མངའ་བར་མདོ་སྔགས་ཀྱི་བསྟན་པའི་སྲོལ་མཐའ་དག་སྤེལ་བར་མཛད་པ་ལ་གཅིག་ཏུ་གཞོལ་པའི་ཁམས་གསུམ་ཀྱི་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་རྣམ་དཀར་གྱི་མཛད་པ་མཐའ་ཡས་པ་ལས། ལྷོ་ཕྱོགས་ཀྱི་རྒྱུད་དུ་བསྟན་པ་རིན་པོ་ཆེའི་བཙས་སུ་ལུང་གྲྭ་ཞེས། ཐལ་འགྱུར་བ་དང་རང་རྒྱུད་པའི་གྲུབ་མཐའི་གཞུང་ལུགས་རྣམས་ལ་དངོས་སྟོབས་ཀྱིས་རིགས་པའི་སྒོ་ནས་ལེགས་པར་གཏན་ལ་འབེབས་པའི་སྲོལ་དེང་སང་གི་བར་དུ་གནས་པའི་ཚོགས་དཔོན་དུ་དབུས་འགྱུར་འཆང་སོགས་འཕགས་ཡུལ་གྱི་མཁས་པ་ཀུན་གྱི་ཅོད་པན། ཡོངས་རྫོགས་གནས་ལྔ་རིག་པའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲའི་ཆོས་ཀྱི་གདན་ཁྲི་ལ་མངོན་པར་འཛེགས་པའི་མཁན་ཆེན་བློ་བཟང་དགེ་ལེགས་རྒྱལ་མཚན་པར་མངའ་གསོལ་ཡོད་པས། ཁྱོད་གོང་འཁོད་མཐའ་དག་གིས་རྗེས་སུ་འཇུག་པ་རྣམས་ཀྱིས་བགྱིད་པར་འོས་པའི་ཀློག་པ་ཐོས་བསམ་དང་སྤོང་བ་བསམ་གཏན་གྱི་བྱ་བ་སོགས་བླང་དོར་གྱི་གནས་ཀུན་ལ་བཀའ་གདམས་གསར་རྙིང་གི་རྣམ་པར་ཐར་བའི་སྲོལ་ལས་མི་གཡེལ་བའི་སྤང་བླང་འཛོལ་མེད་ཉེ་བར་འཛིན་པ། ཆེན་པོའི་གསུང་བཞིན་གྱིས་ཞེས་གོ་བར་བྱ་བའི་ཡི་གེ་ཁྱུ་མཆོག་ཅེས་པ་ལྕགས་མོ་སྦྲུལ་གྱི་ལོའི་དབྱངས་འཆར་བ་ཉིན་མོར་བྱེད་པ་གླང་གི་ཁྱིམ་དུ་ཞུགས་པའི་ཕྱོགས་སྔ་མའི་དགའ་བ་དང་པོའི་ཚེས་ལ་ཆོས་སྡེ་ཆེན་པོ་དཔལ་ལྡན་འབྲས་སྤུངས་ཀྱི་ལུགས་ཟུང་མཐའ་དག་སྒོ་འཕར་ཅིག་ཅར་འབྱེད་པ་དགའ་ལྡན་ཕོ་བྲང་ནས་བྲིས། །(༤བ)

ཨ ནུ ཏྟ ར ཛྙ ན རུ པ པྲ ཀྲྀ ཏྱ བྷཱ བ ས དྡྷ དཱ ཤཻ རྦ ལ བ ཙྩ ནཱ ཐི ཀ །བླ་ན་མེད་པའི་ཡེ་ཤེས་རང་བཞིན་ལུས། །སྲིད་འདིར་གྲུབ་པའི་སྟོབས་བཅུ་མངའ་བའི་མགོན། །ཤྲི ཡ ཉྩ ཤཽ དྡྷོ ད ན ཀཱི རྟི གྷོ ཥ ཤ བྡ ཏ དྷཱ ཏ ནཱུ ནཱ ཉྩ བ ས ནྟ པོ ཥ ཏུ། །དཔལ་ལྡན་ཟས་གཙང་སྲས་ཀྱི་གྲགས་པའི་དབྱངས། །སྒྲ་འཛིན་ལུས་ཕྲའི་དཔྱིད་དུ་རྒྱས་གྱུར་ཅིག །རླུང་གི་རྒྱལ་མཚན་རབ་བཀྲའི་ལྡིང་ཁང་ནས། མཚམས་སྤྲིན་མི་ཡི་སྲིད་པའི་ལང་མཚོ་ལ། རྗེས་ཆགས་མཚན་དཔེའི་སྣང་བ་མི་ཟད་པའི། །འཇམ་མགོན་བཙོང་ཁ་པ་དེས་དགེ་བར་མཛོད། །གཟུགས་སྐུའི་ཟླ་སྣང་ཆ་ཤས་ཡོངས་རྫོགས་པར། །མཛེས་སྡུག་རི་དྭགས་ངོ་མཚར་དྲ་བའི་གར། །གསེར་མངལ་མཆེ་བའི་པིར་གྱིས་རབ་བྲིས་པའི། །དབྱངས་ཅན་ཚངས་པའི་སྲས་ཀྱི་དགེ་ལེགས་སྩོལ། །ཞེས་དབྱངས་ཅན་བདུན་གྱི་རང་བཞིན་མི་ཟད་པའི་འདོད་པ་འཇོ་བའི་རྒྱུད་ལས་ཉེ་བར་དྲངས་པའི་ཤིས་པ་བརྗོད་པ་སྔོན་དུ་འགྲོ་བས་གནམ་(༥ན)

སྐོས་ས་ལ་སྤྱོད་པའི་ཚངས་པ་མིའི་གཟུགས་ཅན། རྒྱ་ནག་གོང་མའི་ལུང་གིས་ཀྭདིང་གུ་ཤྲཱི་ཞེས་ཆོས་ཀྱི་རྒྱལ་པོ་རྒྱལ་ཁམས་ཐམས་ཅད་ཀྱི་འདྲེན་པར་དབང་བསྐུར་བ་གང་གི་ཡི་གེ །འཕགས་མཆོག་རིགས་གསུམ་གྱི་མགོན་པོའི་ཟློས་གར་བོད་རྒྱལ་པོར་ཤར་བ་རྣམས་ཀྱི་བཀས་རུ་བཞིར་གྲགས་པའི་གཡས་རུ་གཙང་གི་ཆར། བསྐལ་བ་བཟང་པོ་འདིའི་འདྲེན་པའི་དབང་ཕྱུག་རྒྱལ་བ་བུ་རམ་ཤིང་པའི་བསྟན་པ་རིན་པོ་ཆེའི་འཆད་རྩོད་རྩོམ་གསུམ་གྱི་སྒོ་ནས་འཛིན་པའི་ངམ་རིང་ཆོས་སྡེའི་འདུས་པ། དགོན་ཕྲན། སྦྱིན་བདག སྣེ་སླེབས་དང་བཅས་པ་མཐའ་དག་ལ་ཟློ་བ། ཆོས་སྡེའི་ཁྲི་ཐོག་ཏུ་སྔོན་གྱི་འཇིག་རྟེན་གྱི་མིག་གཅིག་བུ་རྣམས་ཀྱི་རྗེས་སུ་ཞུགས་པ། ཐུབ་བསྟན་ཡོངས་སུ་རྫོགས་པའི་རབ་འབྱམས་སྨྲ་བ་ལོ་ཙཱ་བ་ཚེ་བརྟན་རྒྱལ་མཚན། བསྟན་འཛིན་ཆོས་ཀྱི་རྒྱལ་པོ་མཆོད་ཡོན་ནས་བསྐོ་བཞག་མཛད་སོང་བ། ཁྱོད་གོང་འཁོད་རྣམས་ཀྱིས། ཀློག་པ་ཐོས་བསམ་དང་སྤོང་བ་བསམ་གཏན་སོགས་རབ་ཏུ་བྱུང་བས་བགྱིད་པར་འོས་པའི་གནས་ཐམས་ཅད་དང་ཁྱད་པར་རབ་འབྱམས་ཀྱི་གྲྭ་སྐོར། བསྟན་པ་རིན་པོ་ཆེའི་མིག་རྐྱེན་དུ་གང་འགྱུར་དགོས་པ། །གང་སར་མཁན་པོས་ཇི་ལྟར་མནོས་པ་ལས་མི་གཡོ་བ་བྱེད་དགོས། ཞེས་འཕགས་ཡུལ་བ་བྷུ་པཱ་ལར་འབོད་པ། ཕྱོགས་འདིར་ས་སྐྱོང་དུ་གྲགས་ཤིང་། རྒྱ་ནག་པ་ཡི་ཡིའུར་བརྗོད་པ། ལྗོངས་འདིའི་སྐད་དུ་ཤིང་མོ་བྱ་ལོ། །ཧོར་གྱི་ཟླ་བ་དྲུག་པའི་དམར་ཕྱོགས་ཀྱི་དགའ་བ་དང་པོ། །དུས་འཁོར་བ་ཡ་ཎའི་དབྱངས་ལ་དང་གསལ་བྱེད་ཊཾ་འཆར་ཞིང་། ཁམས། ས། སྙིང་སྟོབས་ཀྱི་མུན་པ་འཇུག་པའི་ཆུང་ངུའི་བུ་མོ་དང་དབྱངས་འཆར་བའི་དཀར་ཕྱོགས་ཀྱི་དགའ་བ་དང་པོ། །ཨཱ་དང་ཀ །ཁམས་ས་དང་འདོད་ཡོན་དྲིའི་ཆར་ཆེ་དགའ་ལྡན་ཕྱོགས་ཐམས་ཅད་ལས་རྣམ་པར་རྒྱལ་བའི་ཕོ་བྲང་ནས་བྲིས། །(༥བ)

མེ ཡ ཛྙཱ ས རྦྦ ཨ ཀྵ ཡ ྉྥ ལ ཙཱ མ ཏ ཀཿ སུ ཁོ མ ཧཱ། །ཤེས་བྱ་ཐམས་ཅད་མཁྱེན་པའི་བདུད་རྩི་ལ། །སྤྱོད་པའི་མི་ཟད་འབྲས་བུ་བདེ་བ་ཆེ། །ད ཤ བ ལ ཀུ བུ ར སྐྲྀ ཏཿ ས དེ བེ ཀྚཱ ཀུ བ རཱ ཎ དེ ཤ ཧཱ། །སྟོབས་བཅུའི་འཆི་བ་མེད་པའི་འདུན་ས་སྟེ། །བུ་རམ་ཤིང་པ་མིག་སྟོང་ཅན་གྱི་ཡུལ། །ཤྭ ཪྻ པ དྨ ཧྲི ད ཡཾ ར སོ དྷ རྨཱ ཧཱ ཨ སྃ ཁྱ ཤྩ མ དྷ རྐ ར ཎྜ། མཚར་དུ་དངར་བའི་པདྨའི་སྙིང་པོའི་བཅུད། །གྲངས་མེད་ཆོས་ཕུང་སྦྲང་རྩིའི་ཟ་མ་ཏོག །གྷ རྦྷ པྲ པུ ཥྚི ཉྩ སུ ཁཱི ཡ ཛེ ཏཿ ཤཽ དྡྷཽ ད ནཤྲེ ཡ ཀུ རུ ཀོ རུཿ ཀ རོ ཧཱ། །འགྲོ་འདིའི་ཕན་བདེའི་དཔྱིད་དུ་རབ་རྒྱས་པའི། །བྱེད་པོ་ཟས་གཙང་སྲས་ཀྱིས་དགེ་ལེགས་མཛོད། །