སྐུ་འབུམ་ བྱམས་པ་གླིང 
་གི་བཅའ་ཡིག་ཉུང་ངུ་རྣམ་གསལ་སོགས།
པ ངྐ སྭ བྷཱ བ མ དྷུ ར སྭ ར བཱི ཎ དྷ རྨྨཱིཿ སྐ ནྡ པྲ ཀུ ཎྜ ལ བ ར ཎྜ ཙ ཨ དྡྷུ ཏཱ གོ །ཆོས་ཕུང་རྒྱ་མཚོའི་རང་བཞིན་དབྱངས་སྙན་རྒྱུད། །རྨད་བྱུང་ངག་གི་ཡོལ་གོར་རབ་འཁྱིལ་བའི། །གྲི ཝྱ སྱ སཱ ར སི ཏི ཥཱ ཡ ས མྱ ད ཡ ཛྙ ཤྭ རྱ དེ བ སི ཏ ཡཙྪ ཙ མ ངྒ ལི ཀྱ། །མཚུངས་མེད་མཁྱེན་བརྩེའི་དབང་ཕྱུག་དབྱངས་ཅན་ལྷ། །མགྲིན་པའི་པདྨར་བཞུགས་ལ་ཤིས་པ་སྩོལ། །སྒྲིབ་གཉིས་ཚང་ཚིང་འཁྲིགས་པའི་ནགས་ཀྱི་ཀླུང་། །ཚོགས་གཉིས་བྱིན་ཟའི་ཕུང་པོས་རབ་བསྲེགས་པའི། །རྣམ་འདྲེན་དེའི་གསུང་དགེ་འདུན་བཅས་པ་རྣམས། །བྱང་ཆུབ་སྙིང་པོའི་བར་དུ་ཕྱག་གི་ཡུལ། །རྒྱལ་བའི་ཡབ་ཅིག་འཇམ་མགོན་བཙོང་ཁ་པ། །བསམས་བཞིན་མི་ཡི་སྲིད་པ་བཟུང་བའི་སར། །རྣམ་གསུམ་འཁོར་ལོའི་བྱ་བས་རབ་མཛེས་པའི། །འདུས་པའི་སྡེ་འདི་སྐྱེ་རྒུའི་བསོད་ནམས་ཞིང་། །འོག་མིན་དག་པའི་རིན་ཆེན་ཐེམ་སྐས་ལས། །ཉེར་བབས་སྤྲུལ་སྐུའི་སྒྱུ་འཕྲུལ་དྲ་བའི་གར། །བསྟན་ཚེ་(༣༧ན)
དབུས་འགྱུར་འཆང་གི་ལུཾ་བིའི་ཚལ། །མདོ་སྨད་བཙོང་ཁའི་ཡུལ་དུ་འཕོས་པ་བཞིན། །རྒྱལ་ཀུན་མཁྱེན་པའི་འདབ་མ་རབ་རྒྱས་པར། །བརྩེ་བའི་འཛུམ་གྱིས་ཕན་བདེའི་བྷྲམ་རཿ། །བསུ་བའི་སྔོན་མེད་པད་དཀར་ཆུན་པོ་འདིས། །ཆུ་སྐྱེས་གཞན་ལ་གདུང་བའི་མདུད་པ་གྲོལ། །ཆེས་ཕྲའི་ན་ཚོད་སྒོ་ངའི་སྦུབས་རྒྱ་ནས། །གསང་གསུམ་མི་ཟད་འཁོར་ལོའི་སྐད་སྙན་ཅན། །ཀུན་མཁྱེན་ཀ་ལ་པིངྐ་འདི་མཐོང་ཚེ། །དམ་པར་རློམ་པ་ཕལ་ཆེར་ངུར་པའི་ཁྱུ། །སྲིད་ཞིའི་རྒུད་པ་རྨོངས་ཆེན་མུན་པའི་དཔུང་། །མཐར་བྱེད་དམ་ཆོས་སྣང་བའི་སྐྱ་རེངས་མ། །དཀར་མིན་འབྲས་བུའི་ཐུན་གསུམ་རྫོགས་པའི་མཐར། །འཆར་བའི་བྱེད་པོ་ཉིན་བྱེད་འདི་སུས་བསྐྲུན། །ཞིང་འདིར་མགོན་ཁྱོད་འཁྲུངས་པའི་ངོ་མཚར་གཏམ། །ཕུར་བུས་ཚིག་གི་འཕྲེང་བར་རབ་བསྒྲིགས་ཞིང་། །ཚངས་པས་ལོ་རྒྱུས་སྨྲ་བའི་དཀའ་ཐུབ་ལ། །བསྐལ་བརྒྱར་འབད་ཀྱང་རྫོགས་པའི་ཕ་མཐའ་ཅི། །དེ་ཕྱིར་བདག་བློའི་བུང་བའི་གཤོག་པ་ཡིས། །ལེགས་བཤད་གདེངས་ཅན་སྟོན་པར་ནུས་མིན་ཕྱིར། །དངོས་དོན་སྐུ་འབུམ་བྱམས་གླིང་འདུས་ཚོགས་ཀྱི། །ཆོས་ལྡན་ཁྲིམས་སུ་བཅའ་བའི་རིམ་པ་འདྲི། །ཞེས་ཤིས་བརྗོད་ཕྱག་བྱ་དངོས་པོ་ངེས་བསྟན་གྱི་ཚིག་སྙན་པོས་མདུན་བསུས་ཏེ་གླེང་བར་བྱ་བ་ལ། ཡོན་ཏན་རིན་པོ་ཆེ་སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། འཆད་དང་རིགས་པ་དག་དང་ལྡན་པར་བརྗོད་པ་དང་། མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། ཞེས་གསུངས་པ་ལྟར། སྲིད་པ་དང་ཞི་བའི་ལེགས་ཚོགས་ཐམས་ཅད་ཀྱི་(༣༧བ)
བྱེད་པོ་ནི་ཐུབ་པ་ཡང་དག་པར་རྫོགས་པའི་སངས་རྒྱས་ལ་རག་ལུས་ཤིང་། སངས་རྒྱས་རྣམས་ཀྱིས་འགྲོ་བ་འདྲེན་པའང་ལེགས་པར་གསུངས་པའི་བརྗོད་བྱ་ལུང་གི་བསྟན་པ་ཐོས་བསམ་གྱིས་གཏན་ལ་ཕབ། བརྗོད་དོན་རྟོགས་པའི་བསྟན་པ་ཉམས་སུ་ལེན་དགོས་བཞིན་དེ་ཚུལ་བཞིན་དུ་འཛིན་པ་དགེ་འདུན་གྱི་སྡེ་རྣམ་པར་དག་པ་ལ་བརྟེན་ནས་འབྱུང་བས། དེའང་སྔོན་ལྷ་བཙན་པོ་མེས་དབོན་རྣམ་གསུམ་སོགས་ཀྱི་འབངས་བོད་ཆེན་པོའི་རྒྱལ་ཁམས་སུ་གཏོགས་པ་ཤར་བཙོང་ཁའི་ཡུལ་གྲུར། དུས་གསུམ་རྒྱལ་བ་ཐམས་ཅད་ཀྱི་མཁྱེན་བརྩེ་ནུས་པའི་བདག་ཉིད་ཁམས་གསུམ་ཆོས་ཀྱི་རྒྱལ་པོ་བློ་བཟང་གྲགས་པའི་དཔལ། བསྟན་དང་འགྲོ་བའི་སྨན་ཡོན་དུ་སྤྲུལ་པའི་ཟློས་གར་བསྟན་པའི་ནོར་འཛིན་གྱི་གཞིར་ཙནྡན་གྱི་ལྗོན་པ་ལོ་འདབ་གཡུར་དུ་ཟ་བའི་སྟེང་དུ་དེ་བཞིན་གཤེགས་པ་སེང་གེའི་ང་རོའི་སྐུའི་སྣང་བརྙན་འབུམ་ཤར་བ་ལས་དད་ལྡན་གྱི་སྐྱེ་བོ་དུ་མས་མཐོང་བའི་གནས་དེར། ཆོས་སྡེ་ཞིག་ཚུགས་ན་ཤར་ཕྱོགས་རྒྱ་མཚོ་ཆེན་པོའི་མཐས་གཏུགས་པའི་བར་དུ་རྒྱལ་བ་བཙོང་ཁ་པ་ཆེན་པོའི་བསྟན་པ་འཕེལ་རྒྱས་འབྱུང་བའི་རྟེན་འབྲེལ་དུ་ཐམས་ཅད་མཁྱེན་པ་བསོད་ནམས་རྒྱ་མཚོས་ཞབས་ཀྱིས་བཅགས་ཤིང་གསུང་གི་སྣང་བ་བསྩལ་བར་བརྟེན་གསར་དུ་བསྐྲུན་པའི་སྐུ་འབུམ་
བྱམས་པ་གླིང ་གི་བཅའ་ཁྲིམས་ནི། དགེ་འདུན་སྤྱི་ལ་དགོས་པའི་ཁྲིམས་ཀྱི་རིམ་པ་རྒྱལ་བ་བཙོང་ཁ་པའི་བཀའ་འབུམ་ཐོར་བུར་བཞུགས་པའི་ཡི་གེ་གཞིར་བཞག །བྱེ་བྲག་དམིགས་ཀྱི་བསལ་བ། བླ་མ་ལས་ཐོག་པས་སྒྲིགས་བསྡམ་པ་སོགས་ཆོས་ལྡན་གྱི་བྱ་བའི་རིས་ལ་ཉན་འཇོག་མཐུན་རྐྱེན་དུ་འགྲོ་བ་མ་གཏོགས་ལོག་སྒྲུབ་མི་བྱེད། ནང་མཆོད་དང་སྨན་རྟ་མ་གཏོགས་དགོན་པའི་ནང་དུ་ཆང་མི་ལེན། གནང་(༣༨ན)
བ་མ་ཞུས་པར་བུད་མེད་མི་གཏོང་ཞིང་ཞག་ཏུ་མི་འཇོག །དགོན་པའི་སྒྲིགས་འགྲིམ་ཡིན་ཕྱིན་གཞི་བྱེས་ཚང་མར་ཕུ་ཐུང་དང་སྐྲ་རིང་གྲི་རིང་གློ་ཆ་འདོགས་པ་སོགས་འབགས་རེངས་ཀྱི་ཆས་སྤྲོས་པ་དང་། ཞྭ་སེར་མ་གཏོགས་ཞྭ་རིས་མ་གཅིག་པ་མི་གྱོན། ཚོགས་སུ་ལོང་གཏམ་སྨྲ་བ། བག་མེད་ཀྱི་སྤྱོད་པ་བྱེད་པ། གནང་བ་མ་ཞུས་པར་ཚོགས་སུ་མི་ཡོང་བ་མི་བྱེད། དཔོན་པོ་ཡུལ་ཚན་མཐུ་སྡེབས་སོགས་ལ་བརྟེན་པའི་ཆགས་སྡང་གིས་དཀྲུག་ཤིང་མི་བྱེད། དགོན་སྤྱིར་གནོད་པའི་ནང་གཏམ་ཕྱིར་བསྐྱེལ་མི་བྱེད། སོ་ནམ་སོགས་འཇིག་རྟེན་པའི་བྱ་བས་དམ་པའི་ཆོས་འདུལ་པ་སུན་དབྱུང་བ་མི་བྱེད། སྒྲིགས་དང་འགལ་བའི་རིས་ལ་བླ་མ་དགེ་སྐོས་སོགས་ཀྱིས་ཉེ་འགྱང་སྤངས་པའི་ཆད་ལས་བྱས་པ་ཚུལ་བཞིན་བསྒྲུབས་དགོས་ཤིང་། དེ་ལྟར་མི་སྒྲུབ་པ་དང་ངན་རྒྱབ་བྱས་པ་སོགས་ཆོས་སྡེའི་བསྟན་བཤིག་ཆེན་པོར་འགྲོ་བའི་རིས་ལ་གནས་དབྱུང་སོགས་ཆེ་ཆུང་བབ་ཐོབ་ཀྱི་ཆད་པ་འགེལ་ཞིང་། དེར་མ་བརྩིས་པ་བྱུང་ན་རྒྱབ་གཉེར་རྒྱ་སོག་ཀྱི་དཔོན་པོ་སུ་འོས་ཀྱིས་གྱིས། མདོར་ན་ཆོས་སྡེའི་སྒྲིགས་ཚུལ་ལྡན་དུ་བགྱིས་པ་དང་མ་བགྱིས་པའི་དཔང་པོ་དམ་ཅན་སྲུང་མ་རྣམས་ཀྱིས་མཛད་དེ་ཚར་གཅོད་རྗེས་འཛིན་གྱི་འཕྲིན་ལས་ཀྱི་སྒོ་ནས། ཆོས་སྡེ་ཆེན་པོ་འདི་ཉིད་ཇི་སྲིད་ཉི་ཟླའི་འོད་ཀྱིས་འཇིག་རྟེན་གྱི་ཁམས་སྣང་བར་བྱེད་པ་དེ་སྲིད་དུ་གནས་ཞིང་རྒྱས་པའི་མཐུན་དང་ལྡན་པར་གྱུར་ཅིག །ཕུན་ཚོགས་རྣམ་པར་དགེ་བའི་གྲུ་རྫིངས་ལ། །བརྟེན་ནས་ཀུན་མཁྱེན་ནོར་བུའི་གླིང་ཆེན་པོར། །རབ་བགོད་དོན་གཉིས་འདོད་དགུའི་དཔལ་འབྱོར་ལ། །(༣༨བ)
འགྲོ་བ་མཐའ་དག་ལོངས་སུ་སྤྱོད་གྱུར་ཅིག །ཅེས་སྐུ་འབུམ་ བྱམས་པ་གླིང ་གི་བཅའ་ཡིག་ཉུང་ངུ་རྣམས་གསལ་འདི་ནི། སྐུ་འབུམ་ཆོས་རྗེ་གྲྭ་བུ་སློབ་དང་བཅས་པས་བསྐུལ་བའི་ངོར་འཇམ་དབྱངས་གོང་མ་རྒྱལ་བའི་ལུང་གིས། ཟཱི་ཐེན་ཏཱ་བཞིན། ཙི་ཙིའི་ཕཱོ། ཤཱི་ཝུའི་ཐེན་ཞཱ། ཤི་ཀྱིའུ། ཡི་ཐུང་བི་ཞི། ལྦཱཏ་ལཱ། ཏཱ་ལའི་བླ་མ་ཞེས། ནུབ་ཀྱི་ལྷ་གནས། ཆེས་དགེ་བ། བདེ་བར་གནས་པའི་སངས་རྒྱས། བཀའ་ལུང་གནམ་འོག་གི་སྐྱེ་འགྲོ་ཐམས་ཅད་བསྟན་པ་གཅིག་ཏུ་གྱུར་པ་འགྱུར་མེད་རྡོ་རྗེ་འཆང་རྒྱ་མཚོ་བླ་མར་གྲགས་ཤིང་། མིང་གཞན་ཟ་ཧོར་གྱི་རིགས་ལས་ཨ་ཝ་དྷཱུ་ཏཱི་པའི་བཙུན་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེར་འབོད་པའི་ལྡུམ་བུ་པས། རྣམ་རྒྱལ་ཞེས་པ་ཆུ་སྦྲུལ་གྲོ་བཞིན་ཟླ་བའི་ཕྱོགས་ཕྱི་མའི་དགའ་བ་གཉིས་པའི་ཚེས་ལ། གནམ་སྔོན་ཞུན་མར་འཁྱིལ་འདྲའི་མཚོ་ཁྲི་ཤོར་རྒྱལ་མོའི་འགྲམ་ནས་བྲིས་པ་ཛཡནྟུ།དབང་དྲག་པདྨ་དྲག་པོ་ཧེ་རུ་ཀའི། །སྣང་བ་སྒྱུ་འཕྲུལ་དྲ་བའི་རོལ་གར་ལ། །ཞེན་པའི་ང་རྒྱལ་དཔའ་གདེངས་རབ་འཆང་བ། །གང་ཤར་རང་གྲོལ་དྲག་རྩལ་རྡོ་རྗེ་ཡིས། །སྣང་སྲིད་ལྷ་སྲིན་སྡེ་བརྒྱད་དྲེགས་པའི་ཚོགས། །ཁྱད་པར་རྟ་ར་ཤག་ཆེན་ཁང་པའི་ནང་། །གནས་པའི་འདྲེ་དང་ཕྱི་ནས་རྒྱུ་བྱེད་པའི། །ལུས་མེད་རྣམས་ལ་རྡོ་རྗེའི་འཕྲིན་འདི་སྤྲིངས། །སྐྱེ་བར་ཕན་བཏགས་ཕ་མར་མ་གྱུར་པའི། །འགྲོ་བ་མེད་ཕྱིར་གནོད་བྱའི་ཡུལ་མ་(༣༩ན)
ཡིན། །ཀུན་རྫོབ་འཁྲུལ་ངོར་གནོད་བྱ་གནོད་བྱེད་ཀུན། །དོན་དམ་སྟོང་པའི་དབྱིངས་སུ་སྒྲུབ་པ་མེད། །ཁྱེད་རྣམས་སྔོན་ཚེ་ཞེ་སྡང་རང་རྒྱུད་ཀྱི། །དབང་བསྒྱུར་གཞན་གནོད་འཚེ་བ་མང་བྱས་པས། །འབྲས་བུ་མི་བསྲུན་འབྱུང་པོའི་ལུས་ཐོབ་པའི། །ཚུལ་འདི་སོམས་ལ་སྡིག་སྤོང་དགེ་བ་སྒྲུབས། །ཁྱད་པར་གནང་རིགས་རྗེས་སྦྱངས་འགྲོ་བའི་གཉེན། གསོ་རིག་གཞུང་ལུགས་འཛིན་པའི་བྱང་ངོས་པ། །ནང་སོ་དར་རྒྱས་མི་ནོར་འཁོར་བཅས་ལ། །བར་ཆད་གནོད་ཅིང་འཚེ་བའི་རིགས་མི་བྱེད། །གལ་སྟེ་བསམ་ངན་སྦྱོར་བ་རྩུབ་གྱུར་ན། །རྫས་ཀྱི་མདའ་ལ་སྔགས་ཀྱི་དར་བཏགས་བཞིན། །ཏིང་འཛིན་ཡེ་ཤེས་འབར་བའི་རྡོ་རྗེ་ཡིས། །མགོ་ལུས་ཚལ་པ་བརྒྱར་ནི་འགས་པ་དང་། །ཡེ་ཤེས་སྡིག་པ་ནག་པོ་མགོ་དགུ་པ། །བཅོ་བརྒྱད་རྭ་དང་ལྡན་པས་ཁྱོད་རྣམས་ཀྱི། །སྙིང་ཁྲག་ཧུབ་ཀྱིས་འཐུང་བ་པདྨའི་བཀའ། །དམ་ཚིག་འགྱུར་མེད་ཐོག་ལྟར་བབ་ཏཱ་རེ། །དེ་སྐད་མེ་སྤྲེལ་ཧོར་ཟླ་བཅུ་གཅིག་པར། །ཡོངས་སུ་གྲགས་པ་དགའ་ལྡན་ཕོ་བྲང་ཞེས། །རིག་སྔགས་གྲུབ་པའི་བརྟུལ་ཞུགས་འཆར་བའི་གནས། །དབང་དྲག་འབར་བའི་གཞལ་ཡས་ཁང་ནས་བྲིས། །རང་སེམས་འཁྲུལ་པའི་དུག་གསུམ་ལས་སྐྱེས་པའི། །སྒྱུ་མའི་སེང་གེ་ཁྲོས་འདྲའི་ལྷ་མ་སྲིན། །སྡེ་བརྒྱད་བྲན་འཁོར་མངག་གཞུག་བཅས་པ་རྣམས། །སྔགས་འཆང་བཞད་པ་རྩལ་གྱི་གཏམ་འདི་ཉོན། །ཨ་ཆི་ཐུ་ཞེས་བྱ་བ་འདི་དག་གི །མི་ནོར་གཡོག་འཁོར་ཕྱུག་དང་བཅས་པ་ལ། །གནོད་འཚེ་སྤོངས་ལ་མཐུན་རྐྱེན་སྒྲུབ་པར་གྱིས། །དགེ་བ་བླ་མེད་བྱང་ཆུབ་མཆོག་ཏུ་བསྔོ། །གུ་ཧྱེ་ས་མ་ཡ། །