རྗེ་བཙུན་བཅོམ་ལྡན་འདས་མ་ཚེ་སྦྱིན་ཡིད་བཞིན་འཁོར་ལོ་མཆོག་དང་རྗེས་སུ་འབྲེལ་བར་བརྟན་བཞུགས་བྱ་ཚུལ་འདོད་པའི་རེ་སྐོང་སོགས།
རྗེ་བཙུན་བཅོམ་ལྡན་འདས་མ་ཚེ་སྦྱིན་ཡིད་བཞིན་འཁོར་ལོ་མཆོག་དང་རྗེས་སུ་འབྲེལ་བར་བརྟན་བཞུགས་བྱ་ཚུལ་འདོད་པའི་རེ་སྐོང་སོགས། །ན་མོ་གུ་རུ་ཤྣ ཡུ རྡ་ཙཱིནྟ ཙཀྲཱ བྷྱཾ། མཚན་ཙམ་དྲན་པའི་མོད་ལ་འཆི་བདག་མུན། །མཐར་བྱས་སྲོག་གི་ཟུངས་ཀྱུར་ཟིལ་དངར་གྱིས། །ཡིད་དབང་སིམ་པའི་ཆོ་ག་རྟག་སྟེར་མཁན། །འཕགས་མ་དགྱེས་པའི་སྤྱན་གྱིས་དུས་ཀུན་གཟིགས། །ཚེ་སྦྱིན་ཟབ་དོན་གངས་ལྡན་རི་བོ་ལས། །དམ་པའི་བཞེས་སྲོལ་བཀའ་བབས་ཆུ་ཀླུང་རྣམས། །མཁྱེན་དཔྱོད་ཟླ་བའི་མ་མར་ལེགས་འཁྱིལ་བའི། །བློ་གསལ་རྒྱ་མཚོ་སྙན་བརྒྱུད་བྱེ་བའི་མཛོད། །ཞལ་ལུང་རྗེས་གནང་ཉམས་ཁྲིད་མན་ངག་སོགས། །ཉེར་སྩོལ་རྡོ་རྗེ་འཆང་དངོས་གནས་གསར་བ། །ཟུར་རིགས་ཀུན་མཁྱེན་ཁྱབ་བདག་ཞ་ལུ་པ། །རྣམ་གསུམ་བླ་མའི་མཛད་པས་ཡིད་རབ་འཕྲོག །བགྲང་ཡས་བདེ་གཤེགས་མ་ལུས་བསྐྱེད་པའི་ཡུམ། །འཆི་མེད་ཚེ་ཡི་མཆོག་སྦྱིན་སྩོལ་བའི་མར། །གསོལ་བཏབ་མཚོན་གྱིས་ལྷ་ཆེན་ཉི་བུའི་ཞགས། །བཅད་དེ་མི་འགྱུར་བརྟན་བདེར་ངེས་པ་བརྙེད། །དེ་ཕྱིར་ཚད་མའི་ཕྱག་བཞེས་མང་མཐོང་དང༌། །ལུང་རིགས་གཏན་ཚིག་ཚོགས་ཀྱིས་བསྒྲུབ་ནུས་པས། །རྡོ་རྗེ་སློབ་དཔོན་འོག་མིན་ཞིང་གཙོ་ལྟར། །བཞུག་ཐབས་འདོད་པའི་རེ་སྐོང་འདི་ན་སྤེལ། །དེའང་བརྟན་བཞུགས་ཀྱི་ཆོ་ག་ཞེས་བྱ་བ་གསང་སྔགས་སྔ་འགྱུར་གྱི་ཕྱོགས་སུ་མཁའ་འགྲོའི་བརྟན་བཞུགས་སོགས་བརྡ་ཆད་གསལ་བར་བྱུང་ཞིང༌། ཕྱི་འགྱུར་དང་མདོ་ཕྱོགས་སུ་དེ་རིགས་ཀྱི་གསལ་ཁ་ཆེར་མ་བྱུང་ནའང་ཡན་ལག་བདུན་པ་རྣམས་ཀྱི་དྲུག་པ་མྱ་ངན་ལས་མི་(༡༨༢བ)
འདའ་བར་གསོལ་བ་གདབ་པ་དོན་གྱི་བརྟན་བཞུགས་ཡིན་ལ། འཆི་མེད་རྔ་སྒྲ་སོགས་སུ་འཆི་བླུའི་ཆོ་ག་བཤད་པ་བརྟན་བཞུགས་ཀྱི་དགོས་དོན་འཆི་བདག་གི་གཡུལ་ལས་རྒྱལ་བའི་ཐབས་སུ་དགོངས་པ་གཅིག་ཅིང་རྒྱུ་མཚན་དེ་དག་ལ་བརྟེན་ནས་མཁས་གྲུབ་དུ་མས་ཆོ་ག་ལ་བརྟེན་པ་དང་མ་རྟེན་ཡང་རྟེན་ཅིང་འབྲེལ་བའི་སྒོ་བསྒྲིག་ཐབས་མང་དུ་གསུངས་པའི་ནང་ནས་ཡུལ་དེ་སྐྱེ་འཆི་ལ་དབང་དུ་གྱུར་པ་ཡིན་ན་ཞུ་བ་པོའི་རེ་བ་སྐོང་བའི་སླད་དུ་སྐུ་ཚེ་བྱིན་གྱིས་བརླབ་ལ། གཞན་དག་ལའང་དཀོན་མཆོག་གི་ཐུགས་རྗེ་བསྐུལ་བའི་བྱིན་རླབས་དང་ལྷ་སྔགས་ཡེ་ཤེས་ཀྱི་མཐུ་དང་བདེན་ཚིག་སོགས་ཀྱི་ནུས་པས་བར་ཆད་ལས་རྒྱལ་བས་མཆོག་དམན་བར་པ་གང་ལའང་བྱ་རུང་བར་མངོན་ཞིང་རཀྴ་གཏེར་སྟོན། ཆོས་དབང་རིན་པོ་ཆེ། རཏྣགླིང་པ། དྲི་མེད་ཀུན་དགའ་སོགས་ཀྱི་གཏེར་ཁས་མཚོན་པ་རྣམ་གྲངས་ཇི་སྙེད་པར་མཁའ་འགྲོ་བསུ་བཟློག་གི་ཆོ་ག་དཀྱིལ་འཁོར། མདོས་གཏོར་མར་བརྟེན་པའི་རྒྱས་འབྲིང་བསྡུས་གསུམ་ཤིན་ཏུ་མང་བར་གཞོགས་དྲུང་པ་རྒོད་ཚང་པའི་གསང་ཡུམ་མཁའ་འགྲོ་མ་འགྲོ་བ་བཟང་མོ་ནས་བརྒྱུད་པར་གྲགས་པའི་མཁའ་འགྲོའི་དར་ལམ་གཅོད་པའི་ཡི་གེ་དགས་རྒྱུད་ཤས་ཆེ་བའི་གྲུབ་མཐའ་མང་པོར་དར་བ་མི་འཕྱིང་པ་དང་ཁྱི་མཇུག་མའི་དཔེ་ལྟར་མཚན་ཉིད་དང་མི་ལྡན་པའི་རིགས་དགོས་པ་ཆུང་ཞིང་ཁྱད་པར་སྔགས་གསར་མའི་ཆེ་བ་ལ་སྦྱར་ན་ཉ་དང་ཉུང་མ་བསྲེས་པ་ལྟ་བུའི་དཔྱོད་ལྡན་མགུ་བའི་ཡུལ་དུ་མི་འགྱུར་བར་མཐོང་ལ། དེའང་རྗེ་བཙུན་ཚེ་སྦྱིན་སྒྲོལ་དཀར་ཡིད་བཞིན་འཁོར་ལོ་སྐུ་ཚེ་བསྲིང་(༡༨༣ན)
བར་བྱིན་རླབས་ཆེ་བ་ལོ་རྒྱུས་རྣམས་སུ་གྲགས་པ་དོན་ལའང་གནས་ཤིང་དཀྱིལ་འཁོར་གྱི་ཆོ་གར་མ་བརྟེན་པས་འཇུག་བདེ་དོན་ཚང་གི་དབང་དུ་བགྱིས། དེའི་སྒོ་ནས་རྡོ་རྗེ་སློབ་དཔོན་བསྐལ་བརྒྱར་བཞུགས་པའི་རྟེན་འབྲེལ་བསྒྲིག་པར་རྗེ་བཙུན་མ་འདི་ཉིད་ལ་ཐུན་མོང་མ་ཡིན་པ་དང་ཐུན་མོང་བ་བཀའ་བབས་བདུན་ལྡན་གྱི་རྗེས་གནང༌། ཉམས་འཁྲིད། ལས་ཁ་ཚར་གྱི་ཡི་གེ་པཎྜིཏ་ངག་དབང་གྲགས་པའི་འཆི་བླུའི་ཡི་གེ་རྣམས་སུ་མི་གསལ་ཡང་ཛེ་ཏཱ་རིའི་ཚེ་དཔག་མེད་དུ་གསུངས་པ་སྤྱིར་གསང་སྔགས་ནང་གཤིན་པས་རྒྱུ་མཚན་དང་འབྲེལ་བའི་རུང་མཐུན་སྦྱར་སྲོལ་ཡང་སྣང་ཞིང་ཁྱད་པར་བྱ་རྒྱུད་པདྨའི་རིགས་ཀྱི་གཙོ་བོ་དང་སྒྲོལ་དཀར་རིགས་ཀྱི་ཡུམ་དུ་གཏོགས་པ་འབྲེལ་ཆགས་པར་མངོན་པས་འདི་ཉིད་ཀྱི་རྗེས་སུ་གནང་བ་ལེགས་པར་ཐོབ་པའི་རྣལ་འབྱོར་པས་འཆི་བ་བླུ་བའི་ཕྱག་ལེན་ཁ་བསྒྱུར་བར་གཤིན་རྗེའི་གཟུགས་དང་བྲེ་སྲང་སོགས་ཡོ་བྱད་རྣམས་སྟ་གོན་གྲུབ་ནས་མདུན་བསྐྱེད་ཀྱི་ཚོམ་བུ། བུམ་པ། མཆོད་གཏོར་སོགས་ཉེ་བར་མཁོ་བའི་རྫས་དང་ཡོ་བྱད་རྣམས་བསྒྲིག་གཤོམ་དང་བུམ་པ་སྒྲུབ་ཚུལ་སོགས་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་གི་ཟིན་ཐོ་དང་དེའི་མཐར་རམ་སྟེགས་གཞན་མ་གང་ཡང་རུང་བར་སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྟེན་རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་སོགས་བཤམས་ལ་གནས་ཡོ་བྱིན་གྱིས་རླབ། བདག་མདུན་བུམ་གསུམ་བསྐྱེད་ཆོག་རྡོ་རྗེ་འཆང་ཚར་པ་ཆོས་རྗེས་མཛད་པའི་ཚེ་འཁྲིད་ཟླ་བའི་ཆུ་རྒྱུན་གྱི་ཉམས་ལེན་བསྡུས་པའི་སྟེང་ནས་རྗེས་(༡༨༣བ)
གནང་གི་སྐབས་བཞིན་ཉམས་སུ་བསྟར། ལོང་སྐབས་དང་བསྟུན་པའི་བཟླས་པ་དང་ཚོམ་བུ་རྗེ་བཙུན་མར་གསལ་བ་ལ་བླ་མ་དམ་པ་སོགས་འབུལ་ཡུལ་གང་ཡིན་པ་དེའི་སྐུ་ཚེའི་བར་ཆད་ཞི་ཞིང་བསྐལ་བརྒྱར་འཚོ་ཞིང་གཞེས་པར་བྱིན་གྱིས་བརླབས་པའི་འདོད་དོན་གྱི་གསོལ་བ་ནན་ཏན་དུ་གདབ་ཅིང་དཔང་པོ་ཞུ། །ཆོས་སྐྱོང་ལ་གཏོར་སྔོའི་དུས་ཀྱང་འཕྲིན་ལས་འཆོལ། །དེ་ནས་འཆི་བླུའི་ཆོ་ག་མཁན་རྡོ་རྗེ་འཆང་རིན་ཆེན་བསོད་ནམས་མཆོག་གྲུབ་ཀྱིས་མཛད་པའི་ཚེ་དཔག་མེད་འཆི་མེད་རྔ་སྒྲ་འཆི་བླུ་མཐོང་བས་དོན་གྲུབ་སོར་བཞག་ལ་ལྷ་སྔགས་སོགས་སྐབས་ཐོབ་ཀྱི་འབྱིན་འཇུག་དང་འདོན་པ་བསྒྱུར་བ་རིག་པས་འཕུལ་ཤེས་པར་བྱ། །བརྟན་བཞུགས་དངོས་ལ། དར་རས་སོགས་ལ་བྲིས་པའི་སྣ་ཚོགས་རྡོ་རྗེའི་རི་མོ་ཅན་འབུལ་ཡུལ་གྱི་སྟན་དུ་བཏིང༌། འབུལ་ཡུལ་སྭ་བྷ་ཝས་སྦྱངས། སྟོང་པའི་ངང་ལས་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་གཞོམ་གཞིག་དང་བྲལ་བ་སྣ་ཚོགས་རྡོ་རྗེས་མཚན་པའི་དབུས་སུ་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དུས་གསུམ་སངས་རྒྱས་ཀུན་གྱི་ངོ་བོ་དཔལ་ལྡན་བླ་མ་དམ་པའི་ཐུགས་རྣམ་པར་མི་རྟོགས་པའི་ཡེ་ཤེས་བདེ་སྟོང་ཟུང་དུ་འཇུག་གང་ཟག་དཀྱུས་མའི་རིགས་ལ་ཆེ་གེ་མོའི་རྣམ་པར་ཤེས་པ་ཞེས་བསྒྱུར། པའི་ངོ་བོ་ཏཱཾ་ཡིག་དཀར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་བ་ལས་རྡོ་གང་ཟག་གཞན་ལ་ཚིག་ཟུར་བསྒྱུར། རྗེ་སློབ་དཔོན་རྗེ་བཙུན་ཡིད་བཞིན་འཁོར་ལོ་སྐུ་མདོག །(༡༨༤ན)
ཅེས་པ་ནས་རྒྱས་གདབ་ཀྱི་བར་མདུན་བསྐྱེད་བཞིན་སྙིང་ག་སོགས་ཀྱིས་མཚོན་པའི་འབུལ་ཡུལ་ལ་ཁ་བསྒྱུར། སྦྱར། མཆོད་པ་རྣམས་བྱིན་གྱིས་བརླབ། མཎྜལ་ཚོམ་བུ་སོ་བདུན་མ། ལྷ་རྫས་ལས་གྲུབ་ཡན་ལག་བརྒྱད་ལྡན་ཆུ། །འཐུངས་པས་གདུང་སེལ་མཆོད་ཡོན་ཡིད་འོང་འདི། །ནམ་མཁའ་རབ་འབྱམས་ཁམས་ཀྱིས་མཐའ་གཏུགས་པ། །བཀང་སྟེ་བཅོམ་ལྡན་འཁོར་དང་བཅས་ལ་འབུལ། །ཨོཾ་གུ་རུ་ཨཱརྱ་ཏཱ་ར་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཧཱུཾ། ཞེས་སོགས་ཆུ་བཞི། ཉེར་སྤྱོད་རོལ་མོ། གོས་ཟུངས། རྒྱལ་སྲིད་སྣ་བདུན། ཉེ་བའི་རིན་ཆེན་སྣ་བདུན། བཀྲ་ཤིས་རྟགས་བརྒྱད། འདོད་ཡོན་ལྔ། ཇ་བྲེ། གདུགས། རྒྱལ་མཚན། བ་དན། སིལ་སྙན། མཆོད་པ་ཉི་ཤུ་ལྔ་དང་བཅས་པ་གསང་འདུས་འཇམ་རྡོར་གྱི་སྒྲུབ་ཐབས་ཤར་ཆེན་ཡེ་ཤེས་རྒྱལ་མཚན་གྱི་དངོས་སློབ་ཟར་བྱང་ཕུག་པ་ཀུན་དགའ་ལེགས་པས་མཛད་པ་ལྟར་བྱ་ཞིང་མཆོད་ཕྲེང་གི་རིགས་གཞན་ནས་ཇངས་ཀྱང་མི་འགལ། བསྟོད་པ་ནི། འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་འཆི་རྣམས་ལས་སྒྲོལ། །སྒྲོལ་མ་ལ་ནི་ཕྱག་འཚལ་ལོ། །པདྨ་དཀར་པོའི་དབུས་གནས་པའི། །ཟླ་རྒྱས་གཟུགས་ཀྱི་གདན་སྟེང་ན། །རྡོ་རྗེ་སྐྱིལ་ཀྲུང་བཅས་མཛད་ཅིང༌། །མཆོག་སྦྱིན་མ་ལ་ཕྱག་འཚལ་ལ། །སྟོན་ཀའི་ཟླ་བའི་མདངས་འདྲ་ཞིང༌། །ཟླ་བ་ལ་ནི་རྒྱབ་བརྟེན་མ། །རྒྱན་རྣམས་ཐམས་ཅད་ཡོངས་སུ་རྫོགས། །ཨུཏྤལ་བསྣམས་ལ་ཕྱག་(༡༨༤བ)
འཚལ་ལོ། །བཅུ་དྲུག་ལོ་ལོན་སྐུ་ཉམས་ལྡན། །རྫོགས་སངས་རྒྱས་ཀུན་དེ་ཡི་སྲས། །འདོད་སྦྱིན་དཔལ་ནི་འཆང་བའི་ཡུམ། །འཕགས་མ་སྒྲོལ་མ་ལ་ཕྱག་འཚལ། །འཁོར་ལོ་དཀར་པོ་འོད་ཟེར་དཀར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་བསྐོར་བའི་རྣམ་པ་ཅན། །འཁོར་ལོ་ཅན་ལ་ཕྱག་འཚལ་ལོ། །ཞེས་པཎྜི་ཏ་ངག་དབང་གྲགས་པས་མཛད་པའི་བསྟོད་པ་འདི་དང་གཞན་ཡང་རྒྱ་བོད་ཀྱི་མཁས་གྲུབ་ཀྱིས་མཛད་པའི་རིགས་ཀྱང་སྤྲོ་ན་བྱ། །སྔ་མ་རྗེ་བཙུན་མར་གསལ་བའི་ཐུགས་ཀར་ཟླ་བའི་རང་བཞིན་གྱི་འཁོར་ལོ་དཀར་པོ་རྩིབས་བརྒྱད་པ་ཞེས་པ་ནས། །དེའི་ཕྱི་རོལ་ཏུ་འོད་ཟེར་སྣ་ལྔའི་ཕྲེང་བ་གཡས་སྐོར་དུ་འབར་བར་བསམ་པའི་བར་མངོན་རྟོགས་ལྟར་ལ། དེ་ནས་མདུན་གྱི་ནམ་མཁར་རྩ་བརྒྱུད་ཀྱི་སྔ་མ་རྣམས་མངོན་སུམ་དུ་བཞུགས་པར་མོས་ཏེ་ཐུགས་དམ་གྱི་བརྒྱུད་བསྐུལ་བ་ནི། བཅོམ་ལྡན་ཐུབ་པའི་དབང་པོ་ཡང༌། གནས་འདིར་སྤྱན་འདྲེན་གཤེགས་སུ་གསོལ། །གནས་མཆོག་འདི་རུ་བྱོན་ནས་ཀྱང༌། །དཔལ་ལྡན་ཇ་མ་དམ་པ་ཡི། །སྐུ་ཚེ་བསྐལ་བརྒྱའི་བར་དུ་སྲིངས། །འཆི་བ་མེད་པ་ཚེ་ཡི་དངོས་གྲུབ་སྩོལ་མཛོད། །ཨོཾ་ཏཱ་རེ་ཏུ་ཏྟཱ་རེ་ཏུ་རེ་སངྒུ་རང་དོན་མ་མའི་ཚབ་ཏུ་འབྲུ་གསུམ་བཅུགས་པ་ཡིན། རོ་རཱ་ཡུར་པུ་ཎྱ་ཛྙཱ་ན་པུཥྟིཾ་ཀུ་རུ་སྭཱ་ཧཱ། རྗེ་བཙུན་ཡིད་བཞིན་འཁོར་ལོ་དང༌། །མཁས་པ་ངག་དབང་གྲགས་པ་དང༌། །པཎ་གྲུབ་རྡོ་རྗེ་གདན་པ་ཡང༌། །གནས་འདིར་སྤྱན་འདྲེན་གཤེགས་སུ་གསོལ། །འགྲེལ་ཆེན་རིན་ཆེན་གྲགས་པ་དང༌། །གྲུབ་པའི་དབང་ཕྱུག་སླེ་ནག་པ།(༡༨༥ན)
།བཤེས་གཉེན་སྒྲེ་པ་ཆེན་པོ་ཡང༌། །གནས་འདིར་༝། ཆོས་རྒྱལ་ཟླ་འོད་གཞོན་ནུ་དང༌། །སྒམ་པ་ཚུལ་ཁྲིམས་སྙིང་པོ་དང༌། །སྒོམ་ཆུང་ཤེས་རབ་བྱང་ཆུབ་ཀྱང༌། །གནས་འདིར་༝། མཚུངས་མེད་དྭགས་པ་འདུལ་འཛིན་དང༌། །ཆོས་རྗེ་འབྲི་གུང་གླིང་པ་དང༌། །བླ་མ་དམ་ཆོས་གླིང་པ་ཡང༌། །གནས་འདིར་༝། རྣམ་འདྲེན་ཆོས་ཀྱིས་ཚུལ་ཁྲིམས་དང༌། །མཉམ་མེད་བླ་མ་ལྷ་ལུང་པ། །མཁས་གྲུབ་ཐོག་གནས་ཆེན་པོ་ཡང༌། །གནས་འདིར་སྤྱན་འདྲེན་གཤེགས་སུ་གསོལ། །མཁས་བཙུན་ཆོས་ཀྱི་དབང་ཕྱུག་དང༌། །འདྲེན་མཆོག་བྱང་ཆུབ་བཟང་པོ་དང༌། །ཀུན་མཁྱེན་བཀྲ་ཤིས་རྣམ་རྒྱལ་ཡང༌། །གནས་འདིར་༝། །སྤྱན་སྔ་བསོད་ནམས་ལྷ་དབང་དང༌། །ཡོངས་འཛིན་དཔལ་ལྡན་རྒྱལ་མཚན་དང༌། །པཎ་ཆེན་ཕྱོགས་ལས་རྣམ་རྒྱལ་ཡང༌། །གནས་འདིར་༝། ཚར་ཆེན་ཆོས་ཀྱི་རྒྱལ་པོ་དང༌། །ཀུན་མཁྱེན་མཁྱེན་བརྩེའི་དབང་ཕྱུག་དང༌། །མཁན་ཆེན་བསླབ་གསུམ་རྒྱལ་མཚན་ཡང༌། །གནས་འདིར་༝། ཁྱབ་བདག་དབང་ཕྱུག་རབ་བརྟན་དང༌། །རྡོ་རྗེ་འཆང་དབང་བཀའ་འགྱུར་བ། །མཁན་ཆེན་ཚེ་དབང་ལྷུན་གྲུབ་ཀྱང༌། །གནས་འདིར་༝། ཞེས་ཚེ་དཔག་མེད་གྲུབ་རྒྱལ་མའི་ཚེ་འཛབ་ཀྱི་གདངས་དང་བཅས་རྩེ་གཅིག་ཏུ་གསོལ་བ་བཏབ་པས་བླ་མ་རྣམས་དང་མདུན་བསྐྱེད་ཀྱི་ཚོམ་བུ་ཐུགས་ཀ་ནས་ཀྱང་འོད་ཟེར་གྱི་ཚོགས་དཔག་ཏུ་མེད་པ་འཕྲོས་ཤིང༌། དེ་དང་དུས་མཉམ་དུ་སྤྱི་བོའི་བླ་མ་འོད་དཔག་མེད་(༡༨༥བ)
ཡོངས་སུ་གྱུར་པ་ལས། ཞེས་པ་ནས། གདོན་བགེགས་ཐམས་ཅད་བྱ་སྒྲོ་མགར་གྱི་སོལ་མལ་དུ་བབས་པ་ལྟར་གཞོབ་ཐུལ་ཐུལ་ཚིག་པར་བསམ་གྱི་བར་མངོན་རྟོགས་བཞིན་བྱ། དེ་ནས་དམིགས་པ་དང་མ་བྲལ་བར་ཡི་གེ་བཅུ་པ་སྤེལ་ཚིག་ཅན་བརྒྱ་རྩ་ཙམ་ཟླ། བླ་མའི་ཕྱག་ཏུ་རྗེ་བཙུན་མའི་སྐུ་བྲིས་འབུར་གང་ཡང་རུང་བ་ཕུལ་ཏེ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་ལྡན་བླ་མ་དམ་པ་བསྟན་དང་འགྲོ་བའི་དཔུང་གཉེན་དང་བདག་སོགས་གདུལ་བྱ་རྣམས་ཀྱི་བསོད་ནམས་ཀྱི་ཞིང་དུ་སྐུ་མི་ཟད་པ་རྒྱན་གྱི་འཁོར་ལོ་དུས་འཁོར་བ་མ་སྟོངས་ཀྱི་བར་དུ་བརྟན་པར་བཞུགས་སུ་གསོལ། ཚེ་མདོའི་གླེགས་བམ་ཕུལ་ཏེ་བསོད་ནམས་ཀྱི་ཞིང་དུ་ཡན་གོང་ལྟར་ལ། གསུང་མི་ཟད་པ་རྒྱན་གྱི་འཁོར་ལོ་ཟབ་པ་དང་རྒྱ་ཆེ་བའི་དམ་པའི་ཆོས་ཀྱི་སྒྲ་དབྱངས་ཕྱོགས་བཅུར་སྒྲོག་པར་མཛད་དུ་གསོལ། པད་སྤུངས་ཕུལ་ཏེ། ཐུགས་མི་ཟད་པ་རྒྱན་གྱི་འཁོར་ལོ་རིམ་གཉིས་ཟབ་མོའི་ཏིང་ངེ་འཛིན་ལ་གཡོ་བ་མེད་པས་འགྲོ་བའི་དོན་རྒྱ་ཆེན་པོ་མཛད་དུ་གསོལ། བུམ་པ་བཅུད་ལྡན་ཕུལ་ཏེ། འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་གྱི་ཕུང་པོ་ཟད་མི་ཤེས་པ་ཡིད་བཞིན་གྱི་ནོར་བུ་ལྟར་འགྲོ་བའི་རེ་བ་མ་ལུས་པ་སྐོང་བར་མཛད་དུ་གསོལ། རིགས་ལྔའི་ཕྱག་མཚན་ཕུལ་ཏེ། རིགས་སོ་སོའི་བློ་དང་འཚམ་པར་ཟབ་མོ་རྡོ་རྗེ་ཐེག་པའི་ཆོས་ཀྱི་འཁོར་ལོ་བསྐོར་བའི་འཕྲིན་ལས་འཁོར་བ་ཇི་སྲིད་ཀྱི་བར་རྒྱུན་མི་ཆད་པ་གདུལ་བྱ་རྣམས་ཀྱི་ཁམས་དང་བསམ་པ་བཞིན་འཇུག་པར་མཛད་དུ་གསོལ། རྒྱལ་(༡༨༦ན)
སྲིད་སྣ་བདུན་རིམ་པར་ཕུལ་ཏེ། །ལྷ་རྫས་ལས་གྲུབ་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཞིང་མུ་ཁྱུད་རབ་མཉམ་བཟང༌། །སྡང་བའི་དགྲ་ལས་རྣམ་པར་རྒྱལ་གྱུར་བའི། །འཁོར་ལོ་རིན་ཆེན་འབུལ་གྱི་བརྟན་པར་བཞུགས། །ཨོཾ་ཙཀྲ་རཏྣ་ནཱིཪྻ་ཏ་ཡ་མི། སོ་སོའི་ཚིག་རྐང་ཐ་མའི་ཟུར་བསྒྱུར་ཞིང་སྔགས་འབྱིན་འཇུག་བྱེད། བཀྲ་ཤིས་རྫས་བརྒྱད་རབ་གནས་ཀྱི་སྐབས་བཞིན་དབུལ། ཚིགས་སུ་བཅད་པའི་བརྟན་བཞུགས་ཀྱི་རིགས་རྣམས་ཀྱིས་གསོལ་བ་བཏབ་རྗེས། ཡུན་ཇི་ཙམ་བཞུགས་ཀྱི་ཞལ་བཞེས་ཞུས་ཏེ་ཞལ་གྱི་བཞེས་པའི་ཡོན་ཏན་དུ་མཎྜལ་དབུལ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ་སོགས་བཀྲ་ཤིས་ཀྱི་ཚིགས་སུ་བཅད་པས་མེ་ཏོག་གི་ཆར་དབབ། རྟེན་འབྲེལ་གྱི་ཁྱད་ནས་མདུན་བསྐྱེད་ཀྱི་ཚོམ་བུ་ཞག་གསུམ་ཙམ་གྱི་བར་བསྡུ་ཆོག་མི་བྱ་ཞིང༌། དེ་ནས་མཇུག་ཆོག་སྤྱི་དང་འདྲའོ། །སྨྲས་པ། རྡོ་རྗེ་སློབ་དཔོན་འཁོར་བ་ཇི་སྲིད་བར། །བསྟན་འགྲོའི་དཔུང་གཉེན་དམ་པར་ལེགས་བཞུགས་ཤིང༌། །མི་བདག་ལ་སོགས་མཆོག་དམན་འཆི་བདག་ལས། །མཐར་བྱེད་རྟེན་ཅིང་འབྲེལ་བར་འབྱུང་འདི་མཚར། །སྔོན་རབས་མཁས་པའི་བཞེད་པ་འགའ་མཐོང་བར། །ཡོངས་དཔྱད་ངེས་རྙེད་སྟེར་བའི་ཁུངས་ལྡན་ལས། །གཞན་ཟེར་ཚིག་རྗེས་ཙམ་འབྲེང་འཁོར་བ་ལ། །བརྟེན་པའི་བླུན་པོའི་གདོལ་གཏམ་འདི་མ་ཡིན། །དེ་འདྲ་རྒྱལ་བ་ཀུན་འདུས་གནས་གསར་བའི། །གསུང་གི་བདུད་རྩི་སྙིང་གི་ཟ་མ་(༡༨༦བ)
ཏོག །ཡོངས་སུ་འཁྱིལ་བས་བརྗོད་པ་དོན་ཡོད་གླུ། །སྤོབས་པའི་རྒྱུད་མངས་སྒྲ་དང་ལྷན་ཅིག་ལེན། །དགེ་དེས་གདན་གསུམ་ཚང་བའི་འཁོར་ལོའི་མགོན། །ཐ་མལ་གདུལ་བྱའི་སྣང་ངོར་ངུར་སྨྲིག་གར། །ལེགས་བསྒྱུར་དྲིན་ཆེན་འདྲེན་པ་ཞ་ལུ་པ། །འོག་མིན་ཞིང་གཙོའི་མགོན་ལྟར་གཡོ་མེད་ཤོག །ལུས་སུ་སྣང་བ་ཡིད་བཞིན་འཁོར་ལོའི་སྐུ། །ངག་གི་སྒྲ་ཀུན་ཡི་གེ་བཅུ་པའི་གདངས། །ཡིད་ངོར་གང་ཤར་བདེ་ཆེན་ཡེ་ཤེས་ལ། །རྣམ་པར་རོལ་བའི་བཀྲ་ཤིས་དགའ་སྟོན་ཤོག །ཅེས་སྐྱིད་ཤོད་འཛིན་མའི་ཐིག་ལེ་ལྷོ་མོས་གཞིས་ཀར་རིགས་བརྒྱའི་ཁྱབ་བདག་མཁན་ཆེན་ཞ་ལུ་པ་ཚེ་དབང་ལྷུན་གྲུབ་རབ་བརྟན་བསྟན་པའི་རྒྱལ་མཚན་དཔལ་བཟང་པོས་གསང་བ་ལས་ཀྱང་ཆེས་གསང་བ་ལམ་འབྲས་བུ་དང་བཅས་པའི་སྙན་རྒྱུད་ཚད་མ་བཞི་ལྡན་གསང་ཆེན་སློབ་བཤད་ཀྱི་ཆོས་ཀྱི་འཁོར་ལོ་རྒྱ་ཆེར་བསྐོར་བའི་ཚེ་དཀྱིལ་འཁོར་རྒྱ་མཚོའི་མངའ་བདག་ཆོས་རྗེ་བཅོ་བརྒྱད་པ་བྱམས་པ་ངག་དབང་ལྷུན་གྲུབ་དང་དྲིན་ཅན་རྡོ་རྗེ་འཆང་བཀའ་འགྱུར་བ་ཆེན་པོའི་རིགས་ཀྱི་དབོན་ནམ་མཁའ་བསོད་ནམས་དབང་གི་རྒྱལ་པོ། ལྕགས་ཟམ་རྗེ་དྲུང་ངག་དབང་བསྟན་འཛིན་ཕུན་ཚོགས་གསུམ་གྱིས་རྗེ་བླ་མ་དམ་པ་ལ་ངེད་མཆེད་གྲོགས་རྣམས་ཀྱིས་བརྟན་བཞུགས་བཟབས་རྒྱས་ཤིག་འབུལ་རྩིས་ཡིན་པ་ཡིད་བསྲུབས་ཀྱི་གཡུལ་ལས་རྒྱལ་བར་གང་ཟབ་ཅིག་ཁྱོད་ཀྱིས་བརྟགས་ནས་ཆོ་ག་སྒྲིགས་ཤིག་པར་གསུང་གིས་བསྐུལ་བ་ན་རྗེ་བཙུན་མ་ཉིད་སྐབས་སུ་བབས་པར་མངོན་ནས་རྒྱལ་བ་ཀུན་(༡༨༧ན)
ཡུམ་ཚེ་སྦྱིན་ཡིད་བཞིན་འཁོར་ལོའི་ཆོ་ག་དང་འབྲེལ་བར་འཆི་བླུ་དང་བརྟན་བཞུགས་ཀྱིས་མཛེས་རྒྱན་དུ་བྱས་པ་འདོད་པའི་རེ་སྐོང་འདི་ནི་མེ་འབྲུག་ས་ག་ཟླ་བའི་དཀར་ཆའི་ཚེས་བཞི་ལ་ཟ་ཧོར་གྱི་བནྡེས་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པས་བགྱིས་པ་འདིས་ཀྱང་ངེས་གསང་བསྟན་པའི་ཉི་མ་ཕྱོགས་བཅུར་འཆར་བའི་རྒྱུར་གྱུར་ཅིག །སྲང་གྲངས་བཅོ་ལྔའི་རིན་ཆེན་གཉིས་པ་ལས། །ལེགས་གྲུབ་གསང་འདུས་བླ་མའི་སྒྲུབ་གཏོར་སྣོད། །ཆོས་རྗེ་བློ་བཟང་པདྨས་ལེགས་ཕུལ་མཐུས། །ཐོད་ཕྲེང་རྩལ་གྱིས་རྟག་ཏུ་རྗེས་འཛིན་ཤོག །ཅེས་པའང་གྲྭ་ཚང་གི་དགེ་སྐོས་ལས་སྣའི་འཇོག་ཏུ་ཕུལ་བའི་ཟ་ཧོར་གྱིས་བནྡེས་སྦྱར། །འཇོན་དམར་གསེར་ཞུན་ལས་གྲུབ་པའི། །འདྲ་འབག་ངག་དབང་འཇམ་དབྱངས་ཀྱིས། །བཞེངས་འབྲས་འདི་ཕྱི་དུས་ཀུན་ཏུ། །ཕན་བདེའི་དཔལ་ལ་སྤྱོད་པར་ཤོག །ཅེས་པའང་ཟ་ཧོར་གྱིས་བནྡེས་བཀོད། །རིན་ཆེན་ལས་གྲུབ་འདྲ་བའི་གཟུགས། །ཆང་ཁྱིམ་བློ་བཟང་དངོས་གྲུབ་ཀྱིས། །བཞེངས་པས་སྲིད་དང་ཞི་བ་ཡི། །ལེགས་ཚོགས་ཐམས་ཅད་ལྷུན་གྲུབ་ཤོག །ཅེས་པའང་ཟ་ཧོར་བནྡེས་བྲིས།།གཟུགས་བརྙན་རིན་ཆེན་རྒྱུ་ཚོགས་ལས། །དཀར་བྲག་ངག་དབང་བྱམས་པ་ཡི། །རྒྱུ་སྦྱར་འབྲས་བུ་མངོན་མཐོ་དང༌། །ངེས་ལེགས་དོན་ཀུན་འགྲུབ་པར་ཤོག །ཅེས་པའང་ཟ་
ཧོར་བནྡེས་བཀོད། །ཆོས་ཀུན་རྣམ་པར་འབྱེད་པའི་ཤེས་རབ་ཀྱིས། །ལེགས་བཤད་སྦྱིན་པས་གདུལ་བྱ་ཚིམ་མཛད་པ། །བློ་ལྡན་སྐལ་བཟང་དགའ་སྟོན་སྤེལ་བའི་གཉེན། །རྡོ་རྗེ་ལྟ་བུར་མི་འགྱུར་བརྟན་པར་ཤོག །དཀོན་མཆོག་རིན་ཆེན་རྣམ་གསུམ་བྱིན་རླབས་མཐུ། །ལྷ་དང་དྲང་སྲོང་བདེན་ཚིག་གྲུབ་རྣམས་ཀྱིས། །དེང་འདིར་སྨོན་ལམ་ཇི་ལྟར་བཏབ་པ་བཞིན། །འདོད་པའི་འབྲས་བུ་ཡོངས་སུ་སྨིན་པར་མཛོད། །ཅེས་པ་འདིའང་ཉི་ཐང་སྤྱི་ཚོགས་ཀྱི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཟླ་བ་ལན་བརྒྱར་བྱུགས་པའི་ཤེལ་དཀར་གྱིས། །ཆ་ཙམ་བསྒྲུན་མིན་འཕགས་མའི་མཛེས་ཞལ་ཁྱིམ། །བསྟན་ནས་ཚེ་ཡི་མཆོག་སྦྱིན་རྒྱལ་ཀུན་ཡུམ། །ཡིད་བཞིན་འཁོར་ལོས་བགྲང་ཡས་འགྲོ་འདི་སྐྱོངས། །དབང་སྔོན་རལ་ཁུར་གྱིས་དཔལ་འཕྲོག་བྱེད་ཀྱིས། །ལེགས་བཏེག་རྡོ་རྗེའི་རི་མོ་བཀྲ་བའི་ཁྲིར། །རིས་མེད་འགྲོ་བ་འདྲེན་པའི་དེད་དཔོན་དུ། །དཔལ་ལྡན་བླ་མ་བསྐལ་བརྒྱར་བརྟན་པར་ཤོག །རྫོགས་སངས་རྒྱས་དངོས་རྗེ་བཙུན་བཙོང་ཁ་པའི། །རིང་ལུགས་ཆོས་དང་སྲིད་ཀྱི་ཀུན་བཟོད་མཐའ། །བཅིངས་མིན་དེ་སྲིད་བདེ་ལྡན་ཞིང་མགོན་ལྟར། །བཞུགས་གསོལ་འདོད་པའི་རེ་བ་དོན་ཡོད་ཤོག །སྟོབས་ཀྱི་འཁོར་ལོ་ནམ་མཁར་འཕགས་པ་ཡི། །ལེགས་བྱས་དཔུང་གིས་ནོར་འཛིན་རབ་སྐྱོང་བ། །རབ་བརྟན་ཆབ་སྲིད་དཀར་ཆའི་ཟླ་བ་ལྟར། །འཕེལ་བའི་དུས་སྟོན་ལྷུན་གྱིས་གྲུབ་པར་
ཤོག །བཤེས་གཉེན་གར་མི་ཡོན་ཏན་གཡུང་དྲུང་གི །ཀུན་དགའ་ར་བར་ཟུང་འབྲེལ་དྲི་གཙང་ཁང༌། །འདུས་པའི་སྡེ་བཅས་ལྔ་བརྒྱ་ཕྲག་བཅུའི་བར། །མི་ཉམས་བླ་ནས་བླ་རུ་འཕེལ་བར་ཤོག །དགེ་བཅུར་ལོངས་སུ་སྤྱད་པའི་རྣམ་སྨིན་གྱིས། །གསིལ་བའི་ག་བུར་ཟེགས་རྡུལ་ཉེར་བབས་པས། །འཇིག་རྟེན་ཀུན་ཏུ་བདེ་སྐྱིད་ཨུཏྤལ། །དཀར་པོའི་འདབ་མ་ཡོངས་སུ་བཞད་པར་ཤོག །འཇམ་དཔལ་དྲག་པོར་ཁྲོས་པ་མ་ཧེའི་ཞལ། །ལེགས་ལྡན་ནག་པོ་མྱུར་མཛད་ཡེ་ཤེས་མགོན། །སྲིད་གསུམ་དབང་སྒྱུར་དམག་དང་ཟོར་གྱི་ལྷས། །སྨོན་ལམ་བཏབ་པ་ཇི་བཞིན་འགྲུབ་པར་མཛོད། །མི་ཡི་སེང་གེ་ངེས་གསུངས་ལུང་རྟོགས་ཆོས། །ཉེར་འཛིན་སློབ་མར་བཅས་པའི་བྱིན་རླབས་མཐུས། །ལུས་ཅན་ཡོངས་ལ་རྟག་ཏུ་བདེ་ལེགས་ཀྱི། །ཕུན་སུམ་ཚོགས་པས་དུས་ཀུན་ཁྱབ་པར་ཤོག །ཅེས་རྫིང་ཕྱི་ཆོས་སྡེ་སྤྱི་ཚོགས་ཀྱིས་བསྐུལ་བ་ལྟར་ཟ་ཧོར་གྱིས་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །འདུས་ཚོགས་བསོད་ནམས་ཞིང་དུ་གྱུར་པའི་ཚལ། །འཁོར་ཡུག་གཉིས་མེད་ཤཱཀྱ་སེང་གེ་བཅས། །སྣང་བརྙན་མཁའ་ལ་འཇའ་ཚོན་ལྟར་བཀྲ་བ། །མིག་གི་བདུད་རྩི་གསར་པའི་དགའ་སྟོན་དཔྱིད། །རྒྱལ་བའི་སྐུ་གསུང་ཐུགས་རྟེན་བསྐྲུན་པ་དང༌། །ཕྱག་མཆོད་བཀུར་བསྟི་བགྱིད་ལ་མངོན་ཕྱོགས་པའི། །སྒོ་གསུམ་འདུ་བྱེད་ཕྲ་མོའི་ལེགས་བྱས་ཀྱི། །ཕུང་པོ་མི་མཇེད་འཇིག་རྟེན་འདིར་ཤོང་མིན། །རང་རྒྱུད་འདུལ་བར་(༡༨༨བ)
ནུས་པའི་སློབ་དཔོན་ཆེ། །མཐོ་བཙུན་ཆིང་གིས་གནམ་གྱི་རིགས་ལས་སོན། །བློ་བཟང་དགའ་ལྡན་ལྷག་བསམ་སྟོན་ཟླ་ལྟར། །ཆེས་དཀར་མཐུ་ལས་ཚུལ་བདེ་འབད་པས་བསྒྲུབས། །དགེ་འདིས་རྒྱལ་ཀུན་ཡབ་ཅིག་འཇམ་དཔལ་དབྱངས། །བཤེས་གཉེན་སྒྱུ་དྲའི་རྣམ་འཕྲུལ་བཙོང་ཁ་པའི། །བསྟན་པ་དབུས་འགྱུར་འཆང་དུ་བྱམས་པ་མགོན། །མ་བྱོན་དེ་སྲིད་འཕེལ་ཞིང་རྒྱས་གྱུར་ཅིག །ངག་དབང་དབྱངས་ཅན་ལྷ་མོ་མགྲིན་འཁྱུད་པའི། །བློ་གྲོས་ཡངས་པའི་སྤོབས་པ་བཟང་པོ་ཡིས། །རྒྱ་མཚོ་ལྟར་ཟབ་ལྔ་རིག་གཙུག་ལག་ཀུན། །འཛིན་ཁྱོད་རྡོ་རྗེ་ལྟ་བུར་བརྟན་པར་ཤོག །བློ་བཟང་སྙན་གྲགས་འབར་བའི་རྗེས་སུ་ཞུགས། །དགའ་སྤྲོས་ཐོས་བསམ་ལྷུར་བླངས་དོན་ལྡན་གྱིས། །ཐོག་མ་མེད་ནས་ད་ལྟའི་བར་བསགས་པའི། །སྡིག་ལྟུང་དྲི་མའི་ཚོགས་ཀུན་བྱང་བར་ཤོག །མི་ཁོམ་བགྲོད་དཀའི་ཆུ་བོ་ཆེན་པོ་ལ། །དལ་འབྱོར་རྟེན་གྱི་ཟམ་པ་རབ་བཙུགས་ནས། །ཕ་རོལ་ངེས་ལེགས་གནས་སུ་ཉེར་སོན་ཏེ། །རྟག་དུ་སིམ་པའི་ཚོར་བ་མྱོང་བར་ཤོག །ཞི་བདེ་དམན་ལམ་གོལ་བའི་ཉེས་སྐྱོན་སོགས། །ཤེས་ནས་བདག་གཞན་མཉམ་བརྗེའི་སེམས་བསྐྱེད་དེ། །རིན་མིན་སྟོབས་བཅུ་མངའ་བའི་གོ་འཕང་མཆོག །མངོན་གྱུར་འགྲོ་བ་མ་ལུས་འདྲེན་པར་ཤོག །འདིས་མཚོན་བྱས་སོ་ཅོག་གི་བསོད་ནམས་ཀྱི། །འབྲས་བུ་རང་ཉིད་ཁོ་ན་བསམས་མིན་པ། །མཐའ་དང་ཚད་དུ་བྲལ་བའི་ལུས་ཅན་ཀུན། །ཕན་དང་བདེ་བ་འབྱུང་བའི་རྒྱུ་རུ་བསྔོ། །ཞེས་འདུལ་བ་སློབ་དཔོན་ལྷ་བཙུན་བློ་བཟང་དགའ་ལྡན་གྱིས་སྟོད་ལུང་རྫིང་གའི་ཀུན་(༡༨༩ན)
དགའ་ར་བར་ལྡེབས་བྲིས་བགྱིས་པའི་དགེ་བ་བསྔོ་བའི་སྨོན་ལམ་འདི་བཞིན་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །རིག་རྩལ་འཕོ་མེད་ཆོས་སྐུའི་ཀློང་ཆེན་པོར། །ཡེ་ཤེས་འོད་ལྔའི་མཚན་དཔེ་རྫོགས་པའི་གར། །ཀུན་ཁྱབ་འགྲོ་འདྲེན་མཚོ་སྐྱེས་རྡོ་རྗེ་ཡིས། པདྨ་ཚུལ་ཁྲིམས་རྗེས་བཟུང་ཐར་པར་དྲོངས། །ཉོན་མོངས་རྩ་བ་གཏི་མུག་མུན་པའི་སྨག །ཐུགས་རྗེ་ཉི་མའི་འོད་ཀྱིས་ཉེར་སྦྱངས་ནས། །མེ་ལོང་ཡེ་ཤེས་གསལ་བའི་སྣང་མཛད་ཀྱིས། །པདྨའི་སྦུབས་སུ་ཚུལ་ཁྲིམས་མིང་ཅན་དྲོངས། །རྣམ་པར་སྣང་མཛད་ཐུགས་རྗེའི་ཆུ་རྒྱུན་གྱིས། །ཚེ་འདས་ཐོག་མེད་ནས་བསགས་སྡིག་པའི་དྲི། །རབ་བཀྲུས་དག་པ་བདེ་བ་ཆེན་པོའི་སར། །ལེགས་བཀོད་དོན་གཉིས་མ་ལུས་འགྲུབ་བྱིན་རློབས། །ཞེས་པའང་གསང་མཁར་བས་མའི་དོན་དུ་བྲིས་ཐང་གསུམ་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །རྒྱལ་བ་ཀུན་འདུས་པདྨ་ཐོད་འཕྲེང་དང༌། །དབྱེར་མེད་དྲིན་ཅན་རྩ་བའི་བླ་མ་ལ། །བྱང་ཆུབ་མ་ཐོབ་བར་དུ་གསོལ་བ་འདེབས། །འདི་ཕྱིའི་དོན་ཀུན་འགྲུབ་པར་བྱིན་གྱིས་རློབས། །ཞེས་པའང་གསང་མཁར་བ་བདེ་ཆེན་དབང་རྒྱལ་གྱི་ཁ་ཏོན་དུ་དགོས་ཚུལ་ལྟར་བྲིས། །འཁོར་འདས་ཕྱག་རྒྱ་ཟིལ་གནོན་ཀུན་ཏུ་བཟང༌། །འཇམ་དཔལ་རྡོ་རྗེ་བཞད་པའི་འཕྲིན་ལས་རྣམས། །ཐོགས་པ་མེད་སྒྲུབ་(༡༨༩བ)
རྩལ་ལྡན་འདྲེན་པ་མཆོག །བསླུ་མེད་སྐྱབས་ཀྱི་ངོ་བོར་གསོལ་བ་འདེབས། །ཆོས་ཀུན་གདོད་ནས་དག་དབྱིངས་འདུ་མ་བྱས། །གསལ་སྟོང་རིག་པའི་ཁྱབ་བདག་རྡོ་རྗེ་སེམས། །བཤེས་གཉེན་གཟུགས་ཀྱི་རྣམ་རོལ་སྲིད་མཐའི་བར། །གཙུག་ཏོར་མཛེས་བྱེད་རྒྱན་དུ་བརྟན་གྱུར་ཅིག །རྡོས་བཅས་ཆོས་ཀུན་ཡེ་དག་འཇའ་འོད་ལུས། །ཟད་སར་འཁྱོལ་ཏེ་བརྗོད་བྲལ་བདེ་བ་ཆེ། །ཐོབ་མིན་སྐྱེ་བར་ཟབ་མོའི་ལམ་བསྒོམས་ནས། །འདི་ཕྱི་གཏན་གྱི་མདུན་མ་འགྲུབ་པར་ཤོག །ཅེས་པའང་ངག་དབང་འཇམ་དབྱངས་ཀྱིས་ཁ་ཏོན་དུ་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བསོད་ནམས་ཉེར་བསགས་གྲངས་མེད་སྐྱེ་བའི་མཚོར། །མགོན་ཁྱོད་ཐུགས་རྗེའི་ཟླ་གཟུགས་རྟག་ཤར་ཏེ། །བྱང་ཆུབ་བར་དུ་འབྲལ་མེད་རྗེས་འཛིན་པར། །སྨོན་པའི་རེ་བ་ཇི་བཞིན་འགྲུབ་གྱུར་ཅིག །ཅེས་པ་འདིའང་གསོལ་དཔོན་གེ་ར་བ་བློ་བཟང་མཁྱེན་བརྩེས་ངེད་རང་གི་འདྲ་འབག་བཞེངས་པའི་ཁ་བྱང་སྐྱེ་བར་རྗེས་འཛིན་གྱི་སྨོན་ལམ། རབ་གནས་བརྒྱ་རྩ་དང་བཅས་དགོས་ཚུལ་བྱུང་བ་ལྟར་ཟ་ཧོར་གྱི་བནྡེས་སྦྱར། །འགྲིན་པར་ངག་དབང་དབྱངས་ཅན་འཇོ་སྒེག་གིས། །འཆད་རྩོད་རྩོམ་པའི་བློ་ཡིས་སྐལ་བཟང་གི །གདུལ་བྱ་རྒྱ་མཚོར་སྨྲ་བའི་འཇིགས་མེད་གོ །ཆ་གང་ཐུབ་བསྟན་ལང་ཚོའི་སྡེར་གསོལ་འདེབས། །ཚངས་སྲས་ཟླ་ཞིན་བཞད་པའི་འཇུམ་ཟེར་གྱིས། །ལྔ་རིག་ཨུཏྤལ་འདབ་སྟོང་ཡོང་གྲོལ་བས། །བླུན་རྨོངས་ཉེས་བརྒྱ་འཇོམས་པ་རྡོ་རྗེའི་མཚོན། (༡༩༠ན)
།གདེགས་མཛད་དཔལ་ལྡན་བླ་མར་གསོལ་བ་འདེབས། །ཐ་སྙད་གཙུག་ལག་རྣམས་དང་ནང་དོན་གྱི། །མ་མར་ལྟ་བའི་རྣམ་དཔྱོད་གདོང་དྲུག་པར། །བསྙེམས་པའི་སྔོན་མེད་ལང་ཚོར་དར་བབ་ཅན། །བློ་གསལ་ཡིད་དབང་འགུགས་པར་གསོལ་བ་འདེབས། །རྡུལ་མུན་གྱིས་བསྒྲིབས་མཐོར་བརྩེགས་ཁྲི་སྟན་ལ། །མི་ཤིགས་སྐྱིལ་ཀྲུང་གཅིག་གིས་རྗེས་ཤར་བ། །མིག་གསུམ་འཕྲུལ་ཆེ་དེས་ཀྱང་མི་དབྱི་བར། །དོན་གྲུབ་དེ་གསུང་འདུས་པས་དེང་བྱིན་རློབས། །བློ་གྲོས་སྤོབས་པ་ཡངས་པར་འཇམ་པའི་དབྱངས། །མཆོག་ཏུ་དགའ་བས་མཐོན་མཐིང་སྤྱན་རས་ཀྱིས། །མངོན་པར་ཡོངས་བཙའ་མ་འདྲེས་འགྲོ་བའི་བཤེས། །ཉི་མའི་གཉེན་གྱི་བདེན་པས་རབ་བརྟན་ཤོག །གཡོན་འཁྱིལ་ནམ་མཁའི་རང་བཞིན་གཡུང་དྲུང་གི །ཁོག་པར་ཚུགས་པ་སྲོག་གི་ཀ་བ་ལ། །རྡོ་རྗེ་ལུ་གུ་རྒྱུད་ཀྱིས་ཉེར་བསྡམས་པར། །ལྷ་དང་དྲང་སྲོང་དམོད་པ་འདོར་གྱུར་ཅིག །ཐོས་བསམ་མེ་ཏོག་ཆུན་པོ་མ་རྙིངས་པར། །ཐུབ་བསྟན་ལུས་ཕྲར་འཁྱུད་པའི་རྩེ་དགའ་ཅན། །རྣམ་གསུམ་འཁོར་ལོའི་ནུ་མར་སེན་རྗེས་རིས། །བློ་བཟང་གྲགས་པའི་རིང་ལུགས་འཕེལ་བར་ཤོག །རྡུལ་བརྩེགས་ཁ་བའི་དོ་ར་ཡངས་པའི་ནང༌། །རྣམ་སྨིན་དཀར་པོར་འཛག་པའི་ཟློས་གར་གྱིས། །འགྲོ་ཀུན་སིམ་པའི་ཚོར་བས་ཡིད་བརྟས་ཏེ། །སྐྱིད་པའི་དགའ་སྟོན་སྐབས་གསུམ་མཆེད་ཟླར་ཤོག །ས་འོག་ས་སྟེང་ས་བླར་བཅས་པ་ལ། །བཀྲ་ཤིས་བདེ་ལེགས་ཆེན་པོས་ཡོངས་ཁྱབ་པར། །སྐྱབས་གནས་ཚོགས་ལ་ཐལ་སྦྱར་(༡༩༠བ)
གསོལ་འདེབས་ན། །རེ་འབྲས་དོན་དང་ལྡན་པར་བདག་བྱིན་རློབས། །ཞེས་གསོལ་འདེབས་སྨོན་ལམ་དང་འབྲེལ་བའི་ཚིགས་སུ་བཅད་པ་འདི་ནི་རྟ་ཚགས་རྗེ་དྲུང་རིན་པོ་ཆེ་ངག་དབང་དཀོན་མཆོག་ཉི་མའི་གསུང་གིས་བསྐུལ་བ་ལྟར་འདུ་ཤེས་གསུམ་པ་ཟ་ཧོར་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་ཙོང་ཁ་པའི། །ཆོས་སྲིད་བསྟན་པ་རིན་པོ་ཆེ། །རབ་སྤེལ་བློ་ལྡན་སྐལ་བཟང་རྟེན། །རྒྱ་མཚོའི་གོས་ཅན་དེ་ལ་འདུད། །བསླུ་མེད་དཀོན་མཆོག་རྣམ་གསུམ་གྱི། །རྨད་བྱུང་ཐུགས་རྗེ་ཆེན་པོའི་མཐུས། །བསྐལ་པར་མགོན་ཁྱོད་རྡོ་རྗེའི་ཁྲིར། །གཡུང་དྲུང་ལྟ་བུར་བརྟན་པར་ཤོག །བདག་སོགས་རྣམས་ཀྱི་བསོད་ནམས་དང༌། །ཚེ་དཔལ་དབང་ཐང་རབ་རྒྱས་ཤིང༌། །སྐྱེ་བར་བདེ་འགྲོའི་རྟེན་རྙེད་ནས། །རིན་མིན་སངས་རྒྱས་ཐོབ་པར་ཤོག །ཅེས་གསོལ་འདེབས་སྨོན་ལམ་དང་འབྲེལ་བ་འདིའང་ས་དཀར་འགོ་པ་ལྷུན་གྲུབ་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་འཇམ་མགོན་ཙོང་ཁ་པ། །བློ་བཟང་གྲགས་པའི་བསྟན་སྲིད་གདུགས་དཀར་གྱིས། །རྒྱ་མཚོའི་གོས་ཅན་ཡོངས་ཁྱབ་འཕྲིན་ལས་ཅན། །རྗེ་བཙུན་བླ་མ་མཆོག་ལ་གསོལ་བ་འདེབས། །ནད་གདོན་བར་ཆད་མི་མཐུན་ཕྱོགས་ཀུན་ཞི། །ཚེ་དང་བསོད་ནམས་དཔལ་འབྱོར་དབང་ཐང་རྒྱས། །ཕྱི་མ་བདེ་བ་ཅན་དུ་པདྨའི་སྦུབས། །སྐྱེས་ནས་རྣམ་གྲོལ་ལམ་ལ་འགོད་པར་ཤོག །(༡༩༡ན)
ཅེས་གསོལ་འདེབས་སྨོན་ལམ་དང་བཅས་པ་འདི་ནི་གོང་དཀར་རྟ་ར་མདོ་པ་འཛམ་ལས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འོད་དཔག་མེད་མགོན་འཁོར་དང་བཅས་པ་ལ། །རྩེ་གཅིག་གདུང་ཤུགས་དྲག་པོའི་ཡིད་བསྟད་མཐུས། །འདི་ནས་ཉིང་མཚམས་བདེ་ལྡན་སྐྱེད་ཚལ་གྱི། །འདབ་སྟོང་ཟེའུ་འབྲུའི་དབུས་སུ་སྦྱོར་བར་ཤོག །ཅེས་རྟ་ར་མདོ་པ་ངག་དབང་ལྷུན་གྲུབ་ཀྱིས་ཉམ་སྒོམ་གྱི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །འབོད་སྒྲོགས་ཟིལ་གནོན་པདྨ་རྒྱལ་པོའི་ཁབ། །དཔལ་གྱི་རི་བོར་དབྱངས་སྐྱིད་ཉེར་དྲངས་ནས། །ཐེག་མཆོག་སྣང་བ་བཞི་ཡི་ལམ་ཟབ་མོར། །ཕུང་པོ་འོད་སྐུར་གྲོལ་བར་བྱིན་གྱིས་རློབས། །ཞེས་པ་འདི་ཡང་དགེ་སློང་འཇམ་དབྱངས་གྲགས་པས་མའི་དོན་དུ་བསྐུལ་བ་ལྟར་ཟ་ཧོར་གྱི་བནྡེས་སྦྱར། །ཡོན་སྦྱོར་ཐོགས་མེད་ནས་བསགས་སྡིག་ལྟུང་དྲི། །སུམ་ཅུ་རྩ་ལྔའི་སངས་རྒྱས་ཐུགས་རྗེའི་ཆུས། །རབ་བཀྲུས་མྱང་འདས་ཕོ་བྲང་ཉམས་དགའ་བར། །སྤྱོད་པའི་སྐལ་བ་བཟང་པོར་རྗེས་སུ་བཟུང༌། །མ་རིག་འཁོར་འཁྱམས་འཁྲུལ་བའི་འགྲོ་བ་རྣམས། །བདེ་ཆེན་དབྱིངས་སུ་རྣམ་པར་གྲོལ་བྱེད་ལྷ། །ཞི་དང་ཁྲོ་བོའི་སྐྱེད་རྫོགས་རྫོགས་པ་ཆེས། །ཚེ་འདིར་འཕོ་བ་ཆེན་པོ་འགྲུབ་བྱིན་རློབས། །རྒྱ་བོད་མཁས་དང་གྲུབ་པ་དུ་མའི་སྐུ། །རི་མོར་ལེགས་སྤེལ་བསོད་ནམས་མཐུ་བརྟས་པས། །སྐྱེ་བར་དགེ་(༡༩༡བ)
བའི་བཤེས་དང་མི་འབྲལ་བར། །ཟབ་རྒྱས་ཆོས་རྣམས་ཐོས་བསམ་སྒོམ་པར་ཤོག །དུས་ཀྱི་དགྲ་བོ་གར་དགུའི་གཟི་བརྗིད་ཀྱིས། །འཁོར་འདས་ཕྱག་རྒྱའི་ཚོགས་རྣམས་ཟིལ་གནོན་ལྷས། །འདི་ཕྱི་བར་དོ་ཐམས་ཅད་རྗེས་བཟུང་ནས། །ཀུན་བཟང་འཇམ་དཔལ་མངོན་དུ་འགྱུར་བར་མཛོད། །ཅེས་གྲམ་པ་བློ་བཟང་ངག་དབང་གིས་བྲིས་ཐང་ལ་ཚན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །གང་ཞིག་མོས་པའི་མཚོ་ནང་ཆུ་ཤེལ་དབང༌། །སྣ་ཚོགས་སྒྱུ་འཕྲུལ་དྲ་བ་མཁའ་དབྱིངས་ཀྱི། །ཟླ་གཟུགས་ངོ་བོ་མི་གཏོང་འོད་ཟེར་གྱིས། །བདག་སོགས་གཏན་བདེའི་ཀུནྡ་རྒྱས་པར་ཤོག །ཅེས་པ་འདི་ཡང་འགྲེས་ལྔ་ཆུ་སྐོར་པ་ངག་དབང་འཕྲིན་ལས་ཀྱིས་རྗེ་དགེ་འདུན་གྲུབ་ཀྱི་འཁྲུངས་རབས་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད་དོ། །འཇམ་མགོན་ལྗོངས་འདིར་ངུར་སྨྲིག་ཚུལ་བཟུང་ཡང༌། །ངོ་མཚར་རྨད་བྱུང་བཀོད་པའི་ཞིང་ཁམས་ན། །སེང་གེའི་ང་རོའི་ཚུལ་སྟོན་ཙོང་ཁ་པས། །བྱང་ཆུབ་མ་ཐོབ་བར་དུ་བདག་རྗེས་བཟུང༌། །ཞེས་པའང་འཕྱོང་རྒྱས་པ་བློ་བཟང་དབང་ལྡན་གྱིས་རྗེ་བཙུན་བཙོང་ཁ་པའི་བྲིས་ཐང་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་བཀོད་དོ། །མཁའ་སྤྱོད་དག་པའི་ཞིང་ལས་མ་གཡོས་པར། །ཉི་ཤུ་རྩ་བཞིའི་གནས་ཀྱི་གཙོ་མོ་མཆོག །དཔལ་ལྡན་ཁྲོས་(༡༩༢ན)
མ་ནག་མོས་རྗེས་བཟུང་ནས། །བདེ་ཆེན་རིགས་འཛིན་ས་རུ་འགོད་པར་ཤོག །འཕགས་བོད་པཎ་གྲུབ་རྒྱལ་བློན་སྣ་ཚོགས་ཀྱི། །སྣང་བརྙན་ཚོན་རིས་དང་ཉེ་ཤེལ་དཀར་བཞིན། །རྣམ་པར་བཀྲ་བའི་བསོད་ནམས་གང་ཐོབ་དེས། །སྲིད་དང་ཞི་བའི་དགེ་ལེགས་འཕེལ་བར་ཤོག །ཆོས་རྣམས་མ་ལུས་བསྐྱེད་མཛད་ཤེར་ཕྱིན་མའི། །མ་སྨད་ཐུགས་རྗེས་ཉོན་མོངས་ཕྲག་དོག་ཚོགས། །ཡོངས་དག་བྱ་བ་གྲུབ་པའི་ཡེ་ཤེས་སྐུར། །བསྟན་འཛིན་མངོན་པར་རྫོགས་པ་འཚང་རྒྱ་ཤོག །ཅེས་ཆོས་རྗེ་རྐན་ཕུ་བ་ཟིལ་གནོན་རྡོ་རྗེས་རང་དང་ནུ་བོའི་དོན་དུ་བྲིས་ཐང་ལེ་ཚན་བཞེངས་པའི་རྒྱབ་ཡིག་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ལྷ་ཡི་ལྷར་གྱུར་ཤཱཀྱ་སེང་གེའི་ཞབས། །སྤྲུལ་པ་དགྲ་བཅོམ་གནས་བརྟན་བཅུ་དྲུག་ཚོགས། །དགེ་བསྙེན་ཆོས་འཕེལ་ཕྱོགས་སྐྱོང་རྒྱལ་པོ་བཞི། །འཁོར་ཚོགས་འདིར་སྤྱོན་བདེན་པའི་དཔང་པོར་བཞུགས། །བརྗོད་པ་རྣམ་དག་ངག་ལ་དབང་ཕྱུག་བློས། །སྐལ་བཟང་གདུལ་བྱའི་རེ་བ་ཡོངས་སྐོང་བར། །རྒྱ་ཆེན་གཙུག་ལག་མཚོ་ལྟར་གཏིང་ཟབ་མཐའ། །ཉེར་འཇལ་བཤེས་གཉེན་རྡོ་རྗེ་ལྟར་བརྟན་ཤོག །རྩེ་གཅིག་དད་དུངས་ཞིང་ས་གཤིན་པོ་ལ། །བཏབ་པའི་སྨོན་ལམ་སྨྱུ་གུ་བསྐྱེད་བསྲིངས་པ། །རེ་བ་དོན་ལྡན་འབྲས་བུ་རབ་དུད་ཁུར། །ལེགས་སྨོན་རོ་བདའི་ཟས་ལ་སྤྱོད་པར་ཤོག །ཅེས་འདི་ཡང་གཉལ་བ་བློ་བཟང་རྣམ་དག་གིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །(༡༩༢བ)
ཝཱ གི ནྡྲཻ ར སུ མ ཏི ར ས མུ དྲ སེ ནེ དཾ བི མྦ ཀ རོ ཏྠི སེ ཕ ལཿ ནཱ། །ཏཾ ན མི ཏཱ བྷ ཀེ བ མཱ ནཱ ཤཱ ཀྱེ ཥུ ཧི གོ རུ བཻ རླ བྷཻ། ངག་དབང་བློ་བཟང་རྒྱ་མཚོའི་སྡེའི། །སྣང་བརྙན་འདི་བསྐྲུན་ལེགས་བྱས་འབྲས། །མགོན་ཁྱོད་ཚེ་མཐའ་ཡས་པ་ལྟར། །གཞོམ་མེད་རྡོ་རྗེའི་སྐུ་བརྙེས་ཤིང༌། །རྒྱུ་སྦྱོར་དེང་ནས་བྱང་ཆུབ་བར། །ཡང་དག་དགེ་བའི་བཤེས་མཛད་དེ། །འདི་ཕྱི་གཏན་མདུན་མ་ལུས་པ། །བསམས་པ་ཇི་བཞིན་འགྲུབ་པར་ཤོག །ཅེས་པའང་དཔལ་གྲོང་སྔགས་རམས་པས་རྟེན་བཞེངས་དུས་བསྐུལ་བ་ལྟར་ཟ་ཧོར་གྱི་བནྡེས་བྲིས། །འཁོར་ལོའི་མགོན་པོ་ཁྱབ་བདག་རྡོ་རྗེ་སེམས། །དངོས་གྲུབ་ཀུན་སྩོལ་ཕྱག་རྒྱ་ཟིལ་རྡོ་རྗེ་དྲག་པོ་རྩལ། སེང་ལྡེང་ནགས་གྱི་སྒྲོལ་མ། གནོན་ལྷ། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །རྩ་གསུམ་ཡོངས་འདུས་བཤེས་གཉེན་གཟུགས་ཅན་གྱིས། །བདག་(༡༩༣ན)
སོགས་རྣམ་པ་ཐམས་ཅད་མཁྱེན་པའི་སར། །འགྲོ་མིན་ཐར་བའི་ས་མཁན་ལེགས་མཛད་ནས། །འདི་ཕྱི་བར་གྱི་མདུན་མ་གྲུ་བཞི་རུ། །འགྲུབ་པའི་སྐལ་བ་བཟང་པོར་བྱིན་གྱིས་རློབས། །སྒོ་གསུམ་འབད་པའི་ཆོས་དཀར་ཕུང་པོའི་ཚོགས། །རང་ཉིད་གཅིག་པུའི་ཆེད་མིན་མཁའ་མཉམ་གྱི། །འགྲོ་ཀུན་དོན་དུ་དམིགས་པའི་བསོད་ནམས་རྒྱུན། །མཐོ་རིས་ཆུ་བོ་ལྟ་བུར་ཆད་མེད་ཤོག །རྩ་བ་གསུམ་དང་དབྱེར་མེད་དུ་མོས་གདུང་གིས་བྱིན་རླབས་འཇུག་བྱེད་འདི་ལྟ་བུ་ཞིག་དགོས་ཞེས་ལྷ་ས་བ་བློ་གྲོས་ལེགས་པ། ངག་དབང་མཁས་བཙུན། བསྟན་འཛིན་རྒྱ་མཚོ་གསུམ་གྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རང་སེམས་དྲི་བྲལ་མེ་ལོང་གཙང་མའི་ངོས། །ཁྱབ་བདག་རྡོ་རྗེ་སེམས་དཔའ་ངུར་སྨྲིག་གར། །བསྒྱུར་བར་ངེས་རྙེད་འཇམ་དབྱངས་དགའ་བའི་བཤེས། །དཔལ་ལྡན་བླ་མ་དམ་པར་གསོལ་བ་འདེབས། །མགོན་ཁྱོད་སྐྱེ་རྒུའི་བསོད་ནམས་ཞིང་མཆོག་ཏུ། །རྟག་པར་འགྱུར་བ་མེད་པ་གཡུང་དྲུང་གི །དངོས་པོར་སྐུ་ཚེ་འཚོ་ཞིང་ཉེར་གཞེས་པའི། །སྨོན་ལམ་མཆོག་གསུམ་མཐུ་ཡིས་འགྲུབ་བྱིན་རློབས། །བདག་སོགས་ཚེ་འདིར་བདེ་སྐྱིད་དཔལ་ལ་སྤྱོད། །ཡང་སྲིད་ཕྱི་མར་མངོན་མཐོ་ངེས་ལེགས་ཀྱི། །ཐེམ་སྐས་རིམ་བགྲོད་ཟུང་འཇུག་རྡོ་རྗེ་འཆང༌། །མངོན་གྱུར་འགྲོ་བ་མ་ལུས་འདྲེན་གྱུར་ཅིག །ཅེས་པ་འདིའང་རབ་འབྱམས་པ་བློ་བཟང་ཆོས་ལྡན་གྱི་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །(༡༩༣བ)
ཀ ལྐ དུ རྑ སྱ ན ཀྟོ ད ཡཻ རྨཻ ཏྲ ཧཱ ཡོ པ ནཱ ཀཱ རུ ཎཱ ཤེ ནྡ བོ ར སྨི ནཱ། ཤྲཱ མ བྷཱ ནཱུ ཏྶ བེ བཱ ར དོ པ དྷྱ ཡཱ ཥྟ ནྭི ནཱ ཡཱ དྱ ཧེ ག མྱ བྷི པྲཱ ཡ ཀཿ ཆེར་སྙིགས་དུ༔ཁའི་སྨག་ཏུ་བྱམས་བརྩེའི་རྟས། །ཉེར་དྲངས་ཐུགས་རྗེའི་ཆ་གང་ཟླ་ཟེར་གྱི། །བདེ་སྐྱིད་སྣང་བའི་དགའ་སྟོན་མཆོག་སྦྱིན་མཁན། །རྣམ་འདྲེན་བརྒྱད་ཀྱི་བདག་སོགས་འགྲོ་ལ་དགོངས། །ཐོག་མེད་འཁོར་འཁྱམས་སུ་བསགས་ལས་ཉོན་དྲི། །འཁྲུད་པའི་བྱིན་རླབས་ཆུ་བོ་ལྷབ་ལྷུབ་སྟེང༌། །གཏན་བདེ་འཕྲོག་བྱེད་རྐང་པའི་ཏོག་བརྗིད་པ། །ངེས་ལེགས་འཆི་མེད་ཁང་རྩེར་བསྒྲེང་བར་ཤོག །མགོན་པོ་རྣམས་ཀྱིས་སྨོན་ལམ་གང་བཏབ་པའི། །འབྲས་བཟང་རོ་བརྒྱ་འབར་བར་བདག་ཉིད་ཙམ། །མིན་པར་མཁའ་མཉམ་འགྲོ་ཀུན་ལོངས་སྤྱོད་རྒྱུར། །ཉེར་བསྔོས་བྱང་ཆུབ་མཆོག་བར་འཛད་མེད་ཤོག །རྒྱལ་གཞན་གྱིས་སྤངས་གདུལ་དཀའ་འདུལ་(༡༩༤ན)
བ་ལ། །མ་སྨད་ཐུགས་རྗེའི་མཐུ་དཔུང་ཟླ་མེད་པ། །བུ་རམ་ཤིང་པ་ཁྱོད་བསྟན་རབ་འཛིན་པས། །རྒྱན་དྲུག་མཆོག་གཉིས་སྙན་པའི་གྲགས་པ་དཀར། །གསེར་གྱི་མདོག་ཅན་འཁོར་ལོས་མཚན་པའི་ཕྱག །རིང་པོ་རྒྱུ་སྦྱོར་གྱིས་མཚོན་ལུས་ཅན་གྱི། །སྤྱི་བོར་བཀོད་ནས་སྲིད་ཞིའི་འཇིགས་པ་ལས། །དབུགས་དབྱུང་ཕན་བདེའི་ས་ལ་སྦྱོར་བྱིན་རློབས། །ཤིང་རྟ་ཆེ་གཉིས་རྗེས་འབྲངས་གཞུང་ལུགས་ལ། །དེང་ནས་སྐྱེ་བར་ཐོས་བསམ་སྒོམ་པའི་འབྲས། །རིང་མིན་ཀུན་མཁྱེན་ཡེ་ཤེས་མངོན་གྱུར་ནས། །མཁའ་མཉམ་འགྲོ་འདྲེན་དེད་དཔོན་བགྱིད་པར་ཤོག །འབྲོམ་སྟོན་ཆོས་ཀྱི་རྒྱལ་པོའི་སྤྲུལ་པའི་གར། །ངོ་མཚར་འཕྲེང་བར་སྤེལ་ལེགས་མཛེས་རྒྱན་དུ། །མར་མེ་མཛད་དཔལ་རྒྱལ་དབང་བཙོང་ཁ་པའི། །སྣང་བརྙན་མཐོང་ན་མི་མཐུན་མེད་བཀོད་ཅིང༌། །མོས་བློའི་དངས་མཚོར་ཤར་གཟུགས་མཁའ་ཟླའི་གྲལ། །ཉེར་བསྒྲིགས་ངག་དབང་བརྟན་པའི་འཁོར་ལོ་ཡིས། །རྗེས་བཟུང་བློ་གསལ་སྐལ་བཟང་རྒྱ་མཚོའི་མཐར། །ཡོངས་ཁྱབ་འདྲེན་རློམས་འདྲ་འབག་ལེགས་བྲིས་དགེས། །ཟོ་ཆུན་འཁྱུད་ལྟར་འཁོར་བའི་སྲིད་ལམ་ལས། །བགྲོད་དེ་ཐར་པའི་གྲོང་དུ་མ་སླེབས་བར། །ཡང་དག་དགེ་བའི་བཤེས་ཀྱི་ས་མཁན་དང༌། །ནམ་ཡང་འབྲལ་མེད་རྗེས་སུ་འཛིན་པར་ཤོག །ཡོན་སྦྱོར་བྱེད་པོ་འདི་སྣང་མཐོ་རིས་ཀྱི། །བདག་པོའི་ཚེ་དང་དཔལ་འབྱོར་ལ་སྤྱོད་ཅིང༌། །མྱུར་དུ་མཐའ་མེད་འཁོར་བ་མཐའ་ཅན་(༡༩༤བ)
དུ། །བྱས་ཏེ་མི་འཇིགས་བཞི་ལྡན་མངོན་གྱུར་ཤོག །ཅེས་འཕྱོང་རྒྱས་སྤུན་བདུན་པ་ལྷུན་གྲུབ་རྒྱ་མཚོས་སྨན་བླ་བདེ་གཤེགས་བརྒྱད། ཐུབ་དབང་ལ་རྒྱན་དྲུག་མཆོག་གཉིས་ཀྱིས་བསྐོར་བ། རྗེ་དགེ་འདུན་གྲུབ་པའི་འཁྲུངས་རབས་ཏེ་གསུམ་བཞེངས་པའི་རྒྱབ་ཡིག་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །བདེ་གཙོ་ཐང༌། གཤེགས་ཡོངས་འདུས་གསང་གསུམ་མི་ཟད་པ། །རྒྱན་གྱི་འཁོར་ལོ་ཡོངས་རྫོགས་ཞི་དང་ཁྲོའི། །སྟང་སྟབས་གར་ལ་རྡོ་རྗེ་སློབ་དཔོན་ཆེ། །ཉེར་བཞེངས་ཐུགས་རྗེ་བྱང་ཆུབ་བར་འཇུག་ཤོག །རྒྱུད་ཐིག་ལེ་བཅུ་དྲུག །སྡེ་རྣམ་བཞིའི་ལྷ་དང་ཇ་མ་ཀུན། །བཅུ་དྲུག་ཐིག་ལེར་ཤར་བའི་གནད་གཅིག་ལ། །ཐུབ་བསྟན་ཡོངས་སུ་རྫོགས་པ་ཉམས་ལོངས་པར། །ཇོ་འབྲོམ་ཡབ་སྲས་རྣམས་ཀྱིས་བདག་བྱིན་རློབས། །དུག་ཐུགས་རྗེ་ཆེན་པོ་འཇིག་རྟེན་དབང་ཕྱུག །ལྔ་ཡེ་དག་ཕུང་པོ་རྣམ་པ་ལྔ། །གནས་བསྒྱུར་ཡེ་ཤེས་ལྔ་ཡི་ཚོན་རིས་མདངས། །འཇིག་རྟེན་དབང་ཕྱུག་གཙོ་འཁོར་རྟེན་བརྟེན་པར། །སྣང་བས་ཆེར་སྙིགས་འགྲོ་རྣམས་ཐར་ལམ་དྲོངས། །རིགས་བཀའ་བརྒྱད་རིགས་འཛིན་ཞལ་ལུང་འཛིན་བྱིན་རླབས་ས་བོན་སྙིང་དབུས་སར། །སྨིན་འབྲས་རིག་པ་སྒྲུབ་སྡེ་བརྒྱད་ཀྱི་སྐུར། །རང་ཤར་ལྷུན་གྲུབ་ཡེ་ཤེས་འོད་ལྔའི་ཟེར། །ཡོངས་ཁྱབ་འཕྲིན་ལས་འགྲོ་ལ་རྟག་འསྔུག་ཤོག །ངོ་ཐུགས་སྒྲུབ་ཡང་སྙིང་ཀུན་འདུས་མཚར་བཀོད་པའི་ཆོ་འཕྲུལ་(༡༩༥ན)
མཐའ་ཀླས་དིང༌། །བརྒྱད་གྲངས་མཚན་སྙན་ལྷ་ཚོགས་འབོད་སྒྲོགས་མགོན། །བསྟན་དེས་དཔལ་གྱི་རི་ནས་གངས་ཅན་འགྲོར། །གཟིགས་ཏེ་ཐུགས་རྗེའི་འབླུག་པ་ཆད་མེད་མཛོད། །ཀུན་བཀའ་བརྒྱད་ཞི་ཁྲོ་རྣམ་རོལ། ལ་རྗེས་ཆགས་ཁྲག་གིས་མྱོས་པའི་གར། །བདེ་ཆེན་སང་རོལ་དཔལ་དགུ་ཝཾ་ཡིག་ཐབས། །སྟོང་ཉིད་ཤེས་རབ་ཨེ་དབྱིངས་མཉམ་སྦྱོར་བས། །ཚེ་འདིར་རིག་ངོ་འཕྲོད་ནས་རང་གྲོལ་ཤོག །མ་རུངས་རྟ་མགྲིན་དམ་སྲི་ཟིལ་གནོན། དམ་སྲིའི་སྙིང་ག་འདམ་ལྟ་བུར། །བརྫི་བའི་དྲག་པོའི་བྲོ་ཡིས་ནག་ཕྱོགས་དཔུང༌། །ཟིལ་གནོན་སྲིད་གསུམ་ཁྱབ་པའི་རྟ་སྐད་སྒྲས། །ཁྱབ་མཛད་དབང་ཆེན་ལྷ་དེས་བདག་རྗེས་བཟུང༌། །ཚེ་ཚེ་དཔག་མེད་འཆི་མེད་མཆོག་སྦྱིན། ལྷ་རིགས་འདུས་ལྔ་ལྡན་འཆི་མེད་རྒྱུན། །མཆོག་ཏུ་སྦྱིན་མཛད་དཔལ་ལྡན་གར་དབང་ལྷ། །དངོས་གྲུབ་བྱེ་བའི་གཏེར་མཛོད་སྒོ་འཕར་བརྒྱ། །ཕྱེ་ནས་བདག་སོགས་ཕན་དང་བདེ་ལ་སྦྱོར། །ཉོན་ཡང་གསང་ཀརྨ་དྲག་པོ། མོངས་དུག་ལྔ་ལྷོང་ལྷོང་འཚུབ་དུས་འདིར། །བདུད་བཞིའི་སྙིང་ལ་གནམ་ལྕགས་ཕུར་བའི་དཔལ། །གཟིར་མཛད་ཡང་གསང་དྲག་པོའི་ལྷ་ཚོགས་ཀྱིས། །མཐུ་སྟོབས་ནུས་རྩལ་གཟི་བྱིན་བསྐྱེད་དུ་གསོལ། །མཚོ་སྐུ་གསུམ་སྒྱུ་འཕྲུལ་རོལ་པ། སྐྱེས་རྡོ་རྗེ་གཅིག་པུ་ཉིད་ཀྱི་གར། །དུ་མར་བསྒྱུར་བ་སྐུ་གསུམ་སྒྱུ་མའི་འཕྲུལ། །གཅིག་ཏུ་བརྩེན་པའི་ངོ་མཚར་རོལ་གར་གྱིས། །མཁའ་མཉམ་འགྲོ་ཀུན་རྒྱུད་ལ་བྱིན་ཆེན་ཕོབ། །ཕྱག་ཕྱག་རྡོར་དྲེགས་འདུལ་བདུད་སྡེ་ཕྱེར་འཐག(༡༩༥བ)
ན་རབ་འབར་མཚོན་རྣོན་རྡོ་རྗེ་ཡི། །རི་མོ་འཇིག་རྟེན་དྲེགས་པ་མཐའ་དག་གི །གཙུག་ཏུ་འཆར་བ་མཐུ་ཆེན་གསང་བདག་ཀྱེ། །སྡེ་བརྒྱད་ཀུན་འདུལ་ནུས་དབང་སྩལ་དུ་གསོལ། །བགྲང་རྡོ་རྗེ་གྲོ་ལོད། ཡས་རྩ་གསུམ་དཀྱིལ་འཁོར་འཁོར་ལོའི་མགོན། །འཆོལ་བའི་ཁྲོ་རྒྱལ་གཏུམ་དྲག་གྲོ་བོ་ལོད། །རྡོ་རྗེ་ཉེར་གཟས་ཕུར་པ་ཕྱིར་གདེངས་རྩེ། །དགའ་རབ་དབང་ཕྱུག་སྡེ་བཅས་སྙིང་ལ་གཟིར། །ཐབས་ཚེ་དཔག་མེད་དངས་མ་བཅུད་འདྲེན། ཤེས་ཟུང་འཇུག་དགའ་བ་བཞི་ཡི་ཆ། །དངས་མ་བཅུད་དུ་དྲངས་པས་འཆི་བའི་དངོས། །ཉེར་བཅོམ་སྲོག་གི་ཀ་བ་གཡུང་དྲུང་དུ། །འགྲུབ་པར་ཚེ་དཔག་མེད་ཀྱིས་བྱིན་གྱིས་རློབས། །རྟ་རྟ་མགྲིན་ཁམས་གསུམ་ཟིལ་གནོན། ཞལ་མགྲིན་ནས་འཚེར་བ་སྐད་བསངས་སྒྲ། །འབྲུག་སྟོང་ལྟ་བུར་བསྒྲགས་པས་ཁམས་གསུམ་ཀུན། །ཁྱབ་ཚེ་སྣང་སྲིད་དྲེགས་པ་ཟིལ་གནོན་པའི། །མཐུ་རྩལ་དབང་བསྐུར་བདག་ལ་དེང་སྩོལ་ཞིག །རྡོ་དཔལ་ལྡན་ལྷ་མོ་རྗེ་དབྱིངས་ཕྱུག་སྲིད་པའི་རྒྱལ་མོ་རུ། །རྣམ་པར་སྤྲུལ་པ་འདོད་ཁམས་དབང་སྒྱུར་མ། །དམག་དང་ཟོར་གྱིས་མི་བསྲུན་དགྲ་སྡེ་ཀུན། །འསྔོམས་མཛད་རེ་མ་ཏཱི་ཡིས་ལས་རྣམས་སྒྲུབས། །ཨེ་མ་ཆོས་ཀུན་རྫུན་པའི་རང་དཔལ་ལྡན་ལྷ་མོ། འཚང་ལ། །མིག་འཕྲུལ་བྱིས་པ་ཇོ་འདྲིད་ངེས་པར་བརྫུན། །འོན་ཏེ་རྩ་གསུམ་ལྷ་ཚོགས་ལེགས་བཞེངས་པའི། །བསོད་ནམས་ཕ་མཐའ་ནམ་མཁས་གཞལ་ནུས་མིན། །དེ་ཕྱིར་རྒྱ་བོད་ཡིག་རིགས་ལ་སྦྱངས་ཤིང༌། །ཚད་མ་བཞི་ལྡན་ཆོས་ཀྱིས་རྒྱུད་སྨིན་པ། །འཇམ་དབྱངས་བསྟན་(༡༩༦ན)
འཛིན་ཇོ་བརྩོན་གཏོང་ཕོད་ཀྱིས། །གཙུག་ལག་གཉིས་པ་ཤེས་འགའ་བརྟེན་ནས་བསྐྲུན། །དགེ་འབྲས་རྒྱལ་བསྟན་དར་ཞིང་དེ་འཛིན་ཀུན། །ཞབས་བརྟན་ཕ་མས་གཙོ་བྱས་མཁའ་མཉམ་འགྲོ། །མཐོ་རིས་ཐེམ་སྐས་ལ་འཛེགས་མི་རིང་བར། །མྱ་ངན་འདས་པའི་གྲོང་དུ་འསྔུག་པར་ཤོག །ཡོན་སྦྱོར་ལས་བྱེད་ཕན་པར་བསྒྲུབས་པ་ཀུན། །སྐྱེ་བར་མི་ཁོམ་གནས་བྲལ་དལ་འབྱོར་ཐོབ། །ཟབ་རྒྱས་ཆོས་ལ་ཐོས་བསམ་སྒོམ་བྱས་ནས། །མྱུར་དུ་ཟུང་འཇུག་སྐུ་བཞི་མངོན་གྱུར་ཤོག །ཅེས་གོང་དཀར་གནས་གསར་བ་སྔགས་བཙུན་འཇམ་དབྱངས་བསྟན་འཛིན་གྱིས་འབད་པ་ཆེན་པོས་ཡོ་བྱད་རྣམས་འདུ་བྱས། ལྷ་བྲིས་པ་གསང་སྔགས་མཁར་དབུ་མཛད་ཚེ་འཕེལ། བྱམས་པ་རྒྱལ་མཚན། བསོད་ནམས་དོན་འགྲུབ། བསོད་ནམས་མགོན་པོ། གོས་བཟོ་པ་དགོས་པ། དོན་ཆེན་པ་རྣམས་ཀྱིས་བྱས་ཏེ་རྒྱ་ཅན་གྱི་བྲིས་ཐང་བཞེངས་ནས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པར་རབ་དཀར་དང་བའི་ཡིད་ཀྱིས་སྤྱི་འབུལ་བྱས་པའི་རྒྱབ་ཡིག་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་ཛ་ཡནྟུ། །དད་མཚོར་གདན་གསུམ་ཚང་བའི་ངག་གི་དབང༌། །བློ་བཟང་སྐལ་ལྡན་རྒྱ་མཚོའི་སྣང་བརྙན་ལ། །ཤཱཀྱ་སེང་གེ་གནས་བརྟན་བཅུ་དྲུག་དང༌། །རྒྱལ་ཆེན་སྡེ་བཞི་དགེ་བསྙེན་ཧ་ཤང་བཅས། །སྲིད་གསུམ་ཟིལ་གནོན་པདྨ་ཐོད་འཕྲེང་རྩལ། །ཐམས་ཅད་མཁྱེན་དངོས་ཀུན་(༡༩༦ན)
མཁྱེན་ཙོང་ཁ་པས། །ཉེར་མཚོན་སྐྱབས་གསུམ་འདུས་ཚོགས་རབ་བཀྲ་བ། །བློ་བཟང་ཆོས་ལྡན་བརྩོན་པས་ཡོངས་བསྐྲུན་དགེས། །སྐྱེ་བར་རྗེས་འཛིན་ནུས་པར་སྨོན་པའི་འབྲས། །འགྲུབ་སྟེ་འདི་ཕྱིར་བདེ་སྐྱིད་དཔལ་ལ་སྤྱོད། །རིང་པོར་མི་ཐོགས་མཁའ་མཉམ་ལུས་ཅན་ཀུན། །སྟོབས་བཅུ་མངའ་བའི་ས་ལ་རབ་སྦྱོར་ཤོག །ཅེས་བྱིང་པ་བློ་བཟང་ཆོས་ལྡན་གྱིས་ངེད་རང་གི་འདྲ་འབག་ལ་གནས་བཅུ་སོགས་ལྷ་མགྲོན་དུ་མས་བསྐོར་བའི་བྲིས་ཐང་གི་རྒྱབ་ཡིག་སྨོན་ལམ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བྱུ་རུའི་ལྷུན་པོ་ཉི་འོད་གོས་ཀླུབས་པས། །གཟི་འབར་ཚེ་མཐའ་ཡས་པའི་མགོན་པོ་ཡིས། །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །གཡུང་དྲུང་ལྟ་བུར་མི་འགྱུར་བརྟན་བྱིན་རློབས། །ལྷ་ཡི་རྗེར་གྱུར་གསོ་རིག་རྒྱ་མཚོ་ལ། །ཡངས་པའི་བློ་ཡིས་སྐལ་བཟང་གདུལ་བྱའི་མགོན། །ཆོས་ཀྱི་སྙན་གྲགས་འཕྲིན་ལས་ཡོངས་ཁྱབ་པ། །མཚུངས་མེད་མཁས་པའི་དབང་པོར་གསོལ་བ་འདེབས། །སྨན་བླ་དྲང་སྲོང་རིགས་འཛིན་སྲུང་མ་ཡིས། །འདྲེན་པ་མཆོག་ཁྱོད་རྡོ་རྗེ་ལྟར་བརྟན་ཞིང༌། །དཔལ་ལྡན་རྒྱུད་བཞི་ཆ་ལག་བཅས་པའི་གཞུང༌། །འཆད་ཉན་དར་ཞིང་གོ་འཕང་རྒྱས་པར་ཤོག །ཅེས་འདི་གར་རིང་འཚོ་དང་དར་མོ་སྨན་རམས་པ་བློ་བཟང་ཆོས་གྲགས་ཀྱི་གསོལ་འདེབས་བརྟན་བཞུགས་ཤིག་དགོས་ཞེས་འཚོ་བྱེད་ངག་དབང་སྐལ་ལྡན་སོགས་(༡༩༧ན)
སློབ་མ་རྣམས་ཀྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བླ་མ་དགྱེས་མཛད་རྡོ་རྗེ་གུར་གྱི་མགོན། །སྟོབས་འཕྲོག་དབང་པོ་ལ་སོགས་མཁའ་འགྲོ་ལྔས། །ངག་དབང་མཁྱེན་བརྩེའི་བདག་ཉིད་རབ་བརྟན་ཞིང༌། །གསང་ཆེན་བསྟན་པའི་ཉི་འོད་གསལ་བར་ཤོག །ཅེས་པའང་སྐུ་ཞང་དབོན་བརྒྱུད་གསར་ཚེས་ཀྱི་རྟེན་འབྱུང་དུ་ཟ་ཧོར་གྱི་བནྡེས་སྦྱར། །སྒྲིབ་བྲལ་ཡེ་ཤེས་སྤྱན་གྱིས་ཤེས་བྱའི་ཁྱོན། །མངོན་སུམ་གཟིགས་པ་ལྔ་ལྡན་ཟུར་ཕུད་ཅན། །ངུར་སྨྲིག་གར་གྱི་སྒྱུ་འཕྲུལ་བཙོང་ཁ་པ། །གཡེལ་མེད་ཐུགས་རྗེའི་འཇུག་པ་སྐུལ་བྱེད་ན། །རབ་འབྱམས་སྨྲ་བ་དགེ་འདུན་ཆོས་འཕེལ་གྱིས། །བཀའ་དང་བསྟན་བཅོས་པར་དུ་གསར་བསྐྲུན་པ། །ཤོག་གྲངས་ཆིག་ཁྲི་དྲུག་སྟོང་བཞི་བརྒྱ་ལྷག །ཞིབ་མོར་དཔྱད་དེ་ཞུས་དག་བགྱིས་པ་དང༌། །དགེ་གཞོན་བློ་གྲོས་བརྟན་པས་དེའི་ཆེད་དུ། །སྐུ་གསུང་ཐུགས་རྟེན་ཆེས་མང་བཞེངས་པའི་མཐུས། །སྐྱེ་བར་མངོན་མཐོའི་ཐེམ་སྐས་ལ་འཛེགས་ནས། །རིང་མིན་རྣམ་པ་ཐམས་ཅད་མཁྱེན་ཐོབ་ཤོག །ཅེས་པའང་པར་ཞུས་པ་བློ་གྲོས་བརྟན་པས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་བསམ་མཐོང་པ་ཕུན་ཚོགས་དབང་པོའོ། །ཀུན་ཁྱབ་ཀུན་བཟང་པདྨ་ཚེ་དབང་རྩལ། །རང་རིག་རང་གསལ་གཞོན་ནུ་བུམ་པའི་སྐུར། །ཡེ་ནས་ཡེ་ཤེས་ཆེན་པོར་ལྷུན་གྲུབ་མཐུས། །རྟག་ཏུ་རྟག་པའི་རྡོ་རྗེ་བཞུགས་(༡༩༧བ)
བྱིན་རློབས། །ཆེ་མཆོག་ཞི་ཁྲོ་འདུས་པའི་སྲིད་ཞིའི་ཚོགས། །ཟིལ་གནོན་འཇམ་དཔལ་འགྲུབ་པའི་བཞད་པ་རྩལ། །རྩ་བ་གསུམ་གྱི་བསྐལ་པ་རྒྱ་མཚོའི་བར། །གཞོམ་མེད་ཁྲི་སྟེང་འོག་མིན་མགོན་ལྟར་ཤོག །ལྷ་སྲས་མངྒའི་མཚན་ཅན་འཕྲིན་ལས་ཆ། །ཨེ་ཝཾ་ལྕོག་སྒར་འདུས་གྲ་མ་དང་བུ། །གསང་སྔགས་ཆོས་འཁོར་གླིང་ཟུར་འབྲེལ་བའི་སྡེ། །སྲིད་མཐའི་བར་དུ་བླ་ནས་བླར་འཕེལ་ཤོག །པདྨ་ཀ་ར་འཕགས་ཡུལ་རིགས་འཛིན་བརྒྱད། །རྗེ་འབངས་ཉེར་ལྔ་སོ་ཟུར་གནུབས་ཉང་སོགས། །མཁས་གྲུབ་རིམ་བྱོན་ཡི་དམ་བསྟན་སྲུང་གིས། །འདོད་པའི་རེ་འབྲས་ཡོངས་སུ་སྨིན་པར་མཛོད། །སྭསྟི་ཀ་ཡི་རྒྱུད་མངས་ལས་དྲངས་པ། །དུས་ཀུན་བཀྲ་ཤིས་སྙན་པའི་གླུ་དབྱངས་ཀྱིས། །ཡངས་པའི་འཇིག་རྟེན་ཁམས་རྣམས་ལེགས་ཁྱབ་སྟེ། །བདེ་སྐྱིད་ཟློས་གར་རྟག་ཏུ་རྩེ་བར་ཤོག །ཅེས་པ་འདིའང་ཐུབ་བསྟན་རྡོ་རྗེ་བྲག་ཨེ་ཝཾ་ལྕོག་སྒར་བ་དང་ཡར་འབྲོག་སྟག་ལུང་གསང་སྔགས་ཆོས་འཁོར་བ་མ་བུའི་འདུས་ཚོགས་ཀྱི་ཞལ་འདོན་དུ་རིགས་འཛིན་སྤྲུལ་པའི་སྐུ་མཆོག་གིས་རྩོམས་ཤིག་པའི་གསུང་དང་དུ་བླངས་ནས་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །དྲུག་ཅུ་ལྷག་བཅས་པཉྩ་ལི་ཀའི་དར། །དབང་གཞུ་ལྟ་བུར་བཀྲ་བའི་ལྡ་ལྡིའི་ཚོགས། །རྣམ་ལྔའི་མཁའ་འགྲོ་དགྱེས་པའི་མཆོད་སྤྲིན་དུ། །མི་ཟད་ནམ་མཁའ་མཛོད་བཞིན་སྤེལ་བའི་མཐུས། །མཐའ་ཀླས་འགྲོ་ལ་བདེ་སྐྱིད་འབྱུང་བའི་གཞི། །ལུང་རྟོགས་བསྟན་པ་དེ་འཛིན་སྐྱེས་བུ་དང༌། །(༡༩༨ན)
འདུས་པའི་སྡེ་རྣམས་དཀར་ཆའི་ཟླ་བ་ལྟར། །བླ་ནས་བླར་ཡང་ཆ་ཤས་ཀུན་འཕེལ་ཞིང༌། །རྒྱུ་སྦྱོར་འདི་སྣང་ལྷ་མིའི་བདེ་སྐྱིད་མྱོང༌། །སྐྱེ་བར་རྩ་བ་གསུམ་གྱིས་རྗེས་བཟུང་ནས། །རིང་མིན་ཟུང་འཇུག་རྡོ་རྗེ་འཆང་གི་སྐུ། །མངོན་གྱུར་དོན་གཉིས་ལྷུན་གྱིས་གྲུབ་པར་ཤོག །ཅེས་དན་འབག་བློ་བཟང་དབང་རྒྱལ་གྱིས་ཕན་བདེ་ལེགས་བཤད་གླིང་དུ་སྙན་དར་དྲུག་ཅུ་ལྷག་བཅས་ཕུལ་བའི་ཚེ་ཁ་བྱང་དགོས་ཚུལ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཚེ་དཔག་མེད་སོགས་དུས་གསུམ་རྒྱལ་ཀུན་གྱི། །ཐུགས་རྗེའི་མཐུ་ལས་ངག་དབང་བློ་ཡི་གཏེར། །སྐལ་བཟང་གདུལ་བྱ་རྒྱ་མཚོའི་མགོན་གྱུར་པ། །གཞོམ་མེད་གཡུང་དྲུང་ལྟ་བུར་གནས་པར་ཤོག །ངག་གི་དབང་ཕྱུག་རྗེ་བཙུན་བཙོང་ཁ་པའི། །འཕྲིན་ལས་ནམ་མཁའི་ཕ་མཐར་ཁྱབ་མཛད་པས། །འཇམ་དབྱངས་རབ་དགྱེས་ངོ་མཚར་སྤྲུལ་པའི་སྐུ། །བསྐལ་པ་རྒྱ་མཚོར་འཚོ་གཞེས་ཞབས་བརྟན་ཤོག །དཀོན་མཆོག་རྣམ་གསུམ་ཐུགས་རྗེའི་དཔུང་ཚོགས་དང༌། བསྟན་སྲུང་དམ་ཅན་རྒྱ་མཚོའི་ནུས་པའི་སྟོབས། །རྟེན་ཅིང་འབྲེལ་འབྱུང་བསླུ་བ་མེད་པའི་མཐུས། །ཇི་ལྟར་སྨོན་པ་ལྷུན་གྱིས་གྲུབ་པར་ཤོག །ངེད་རང་དང་དེ་མོ་སྤྲུལ་པའི་སྐུ་ངག་དབང་ནམ་མཁའ་འཇམ་དབྱངས་ཀྱི་བརྟན་བཞུགས་འདི་ལྟ་བུ་དགོས་ཞེས་སྤོ་བོ་སྐུ་སྐྱེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ལྷ་སྔགས་ཡེ་ཤེས་རྡོ་རྗེ་རྩེ་བརྒྱ་པ། །ཡིད་སྲུབས་ལྷ་མིན་འཇོམས་ལ་ཐོགས་མེད་དུ། །ཉེར་གདེངས་(༡༩༨བ)
བརྟུལ་ཞུགས་གྲུབ་པའི་རྩལ་འཆང་བ། །འཁོར་ལོའི་མགོན་པོ་མཆོག་ལ་གསོལ་བ་འདེབས། །རྨ་བྱ་བརྒྱད་ཀྱིས་རབ་བཏེག་རིན་ཆེན་ཁྲི། །པདྨ་ཉི་ཟླ་འོད་ཟེར་འབར་བའི་དབུས། །མགོན་ཁྱོད་རྩ་གསུམ་འདུས་པའི་ཐོད་ཕྲེང་རྩལ། །ཚེ་དབང་རིགས་འཛིན་ངོ་བོར་རྟག་བཞུགས་གསོལ། །བཻ་རོའི་རྣམ་སྤྲུལ་འགྱུར་མེད་རྡོ་རྗེ་རྩལ། །མགྲིན་པའི་འཁོར་ལོ་གྲོལ་བའི་ངག་གི་དབང༌། །རྒྱལ་དབང་པདྨའི་བསྟན་སྲོག་འཛིན་པའི་ཆེད། །བསྐལ་པ་རྒྱ་མཚོར་གཡོ་མེད་བརྟན་པར་ཤོག །རིགས་འཛིན་གཏེར་བདག་གླིང་པའི་རང་སྐལ་དུ། །ཟབ་རྒྱས་ཆོས་དད་དམ་རྫས་ཡོད་དོ་ཅོག །གེགས་མེད་སྤྱན་དྲངས་ཁ་བའི་སྨན་ལྗོངས་འདིར། །ཕན་བདེ་ཉི་མའི་དངོས་བརྒྱ་འབར་བར་ཤོག །ཨྱོན་མཁན་པོ་པདྨ་འབྱུང་གནས་ཀྱི། །སྨིན་གྲོལ་རིང་ལུགས་འཛིན་པ་འདུས་པའི་གླིང༌། །རྣམ་གསུམ་འཁོར་ལོའི་རིམ་པ་བླ་ནས་བླར། །དཀར་ཆའི་ཟླ་བ་ཇི་བཞིན་འཕེལ་བར་ཤོག །བཀའ་གཏེར་དངོས་བརྒྱུད་བླ་མའི་ཚོགས་རྣམས་དང༌། །ཡི་དམ་སྒྲུབ་པ་བཀའ་བརྒྱད་དཀྱིལ་འཁོར་ལྷ། །མ་མགོན་དྲེགས་པའི་སྡེ་དཔོན་བཅས་པ་ཡིས། །བསམ་དོན་མ་ལུས་གྲུབ་པར་མཛད་དུ་གསོལ། །མཆོག་ཏུ་མི་འགྱུར་བདེ་ཆེན་མཁའ་དབྱིངས་ངོས། །མཆོག་གསུམ་ཐུགས་རྗེའི་ཆུ་འཛིན་ཁྲིགས་པ་ལས། །མཆོག་དང་ཐུན་མོང་དངོས་གྲུབ་འདོད་དགུའི་ཆར། །མཆོག་དམན་བར་མའི་འཇིག་རྟེན་ཀུན་ཁྱབ་ཤོག །ཅེས་པ་འདིའང་རྒྱལ་དབང་པདྨའི་གདུང་འཚོབ་ཆོས་རྒྱལ་གཏེར་བདག་གླིང་པའི་དབོན་ཀུན་དགའ་ཚུལ་ཁྲིམས་རྒྱ་མཚོས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་(༡༩༩ན)
དཔལ་གྲོང་སྔགས་རམས་པའོ། །ངོ་མཚར་ཞིང་ཁམས་བདེ་ལྡན་སྐྱེད་ཚལ་དུ། །འདབ་སྟོང་ཟེའུ་འབྲུར་ཀུན་ཕན་ཉ་གང་སྟེང༌། །མཚན་དཔེའི་གཟི་འབར་པད་རཱག་མདངས་འོད་ཅན། །མགོན་པོ་ཚེ་མཐའ་ཡས་པའི་ཐུགས་རྗེའི་མཐུས། །ངག་གི་དབང་ཕྱུག་བློ་བཟང་གྲགས་སྙན་བསྟན། །རྒྱ་མཚོའི་གོས་ཀྱི་ཕ་མཐའ་དེ་སྲིད་བར། །སྤེལ་ཕྱིར་འགྱུར་མེད་གཡུང་དྲུང་རང་བཞིན་དུ། །སྨོན་པའི་རེ་འབྲས་ལྷུན་གྱིས་འགྲུབ་པར་ཤོག །སྟོབས་བཅུ་མངའ་བ་བཞི་ལྡན་མངོན་གྱུར་བར། །འཁོར་བ་མྱ་ངན་ཐང་ལས་ཉེར་བསྒྲལ་ཏེ། །ཐར་པའི་རིན་ཆེན་གླིང་དུ་ཡོངས་བགྲོད་ནས། །འགྲོ་རྣམས་ཕན་བདེའི་འདོད་དགུས་ཚིམ་བྱེད་ཤོག །ཅེས་པ་འདིའང་རི་སྒོ་ཤག་ལྷོ་པ་བློ་བཟང་མཁས་བཙུན་གྱིས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཚངས་གནས་འཁོར་ལོའི་ལྟེ་བར་སེང་ཁྲིའི་སྟེང༌། །འཇམ་དཔལ་དབྱངས་དངོས་དགའ་བའི་བཤེས་གཉེན་ལ། །སྙིང་ནས་མི་ཕྱེད་གུས་པས་གསོལ་བ་འདེབས། །མགོན་ཁྱོད་རྡོ་རྗེ་ལྟ་བུར་བརྟན་པར་ཤོག །དཀོན་མཆོག་རིན་ཆེན་རྣམ་གསུམ་མ་ལུས་པ། །འདུས་པའི་ངོ་བོར་རབ་མོས་བྱིན་རླབས་མཐུས། །བདག་སོགས་འདི་ཕྱི་བར་དོ་ཐམས་ཅད་དུ། །བདེ་སྐྱིད་དགའ་སྟོན་དཔལ་ལ་སྤྱོད་པར་ཤོག །ཅེས་པའང་ལྷ་བྲིས་པ་ལེགས་པ་རྒྱལ་མཚན་གྱིས་བསྐུལ་བའི་ངོར་ཟ་ཧོར་གྱི་བནྡེས་བཀོད། །བཞི་ཡིས་ལྷག་པའི་བཅུ་ཕྲག་དངུལ་དཀར་ལས། །པདྨའི་(༡༩༩བ)
འདབ་ཅན་དམ་རྫས་གཏོར་མའི་སྣོད། །སྔགས་བན་བློ་བཟང་ངག་དབང་གིས་ཕུལ་མཐུས། །མཆོག་ཐུན་དངོས་གྲུབ་མ་ལུས་ཆར་དུ་ཕོབ། །ཅེས་གྲམ་པ་བ་བློ་བཟང་ངག་དབང་གིས་དགེ་སྐོས་ཀྱི་འཇོག་ལ་ཕུལ་བའི་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད། །ཨེ ཀྵ ར པྲ ཛྙ པ དྨ སྱ ཀེ སཱ ར རཱ སཾ བ མ ཀྵ ཪྻ བཱ རོ པ ཡ སྭཱ དུ རཿ ཨེ་དབྱིངས་ཤེས་རབ་པདྨའི་ཟེའུ་འབྲུའི་བཅུད། །ཝཾ་ཡིག་ཐབས་མཆོག་བྷྲ་མ་རས་མྱངས་པས། །སུ ཁྱ ཤཱུ ནཱ དཤུ མཱ དྷོ ཧ མོ ནཱ དྱ དྷཱུ ཏཱ བ བྷཱི ཥྟཱ ཀྲྀ ཌ པྲཱི ཡ ཏོ མི ཏྲི ཀཱ། བདེ་སྟོང་དངས་མའི་སྦྲང་རྩི་ཧཾ་གི་རྒྱུན། །དྷཱུ་ཏཱིར་མངོན་འདོད་རྩེ་དགའི་མཛའ་ན་མོ། །ཕྱི་རུ་གནས་གསུམ་ཌཱ་ཀཱི་ཡོངས་ཀྱི་གཙོ། །ནང་གི་རྡོ་རྗེ་བཙུན་མོ་ཝཾ་གི་དབྱིབས། །གསང་བ་སེམས་ཉིད་གཅིག་པུའི་རྣམ་འཕྲུལ་གྱི། །གསལ་སྟོང་མཁའ་ལ་སྤྱོད་པའི་སྨིན་ལེགས་མ། །བླ་མེད་ཐེག་པའི་གནད་ཀུན་དབང་བཞི་རུ། །ཚང་པ་རྒྱལ་(༢༠༠ན)
ཡུམ་ཁྱོད་ཀྱི་བསྐྱོད་རྫོགས་ལམ། །ཉམས་བསྟར་ཉེ་སྙིང་བཀླགས་པ་དམ་བཅའི་གཟུགས། །རི་མོ་ཡིད་མཁར་ནམ་ཡང་མ་ཡལ་མཐུས། །དྲིལ་བུའི་ཞབས་དང་རྗེ་བཙུན་ནཱ་རོ་པ། །འཁོན་རིགས་འཇམ་མགོན་ཚར་པ་ཡབ་སྲས་སོགས། །གོང་མའི་རྣར་ཐར་བདག་གིས་ཉེར་འཁྱོངས་ནས། །རྟེན་འདིར་རབ་མཛེས་ལྷ་མོས་ཞལ་སྟོན་གསོལ། །སྐལ་དམན་ཚེ་གཅིག་མཁའ་སྤྱོད་མ་འགྲུབ་ན། །སྒྱུ་མའི་སྐྱས་ཆེན་འདེགས་དུས་རྗེས་བཙུན་མས། །སེམས་གྱི་ཁྱེའུ་ཆུང་དཔའ་བོ་དཔའ་མོའི་གྲོང༌། །ཁྲིད་ནས་ཟུང་འཇུག་གོ་འཕང་མངོན་འགྱུར་ཤོག །མིང་བཏགས་སྐྱེ་བའི་གྲགས་སྐམ་མ་ཡིན་པར། །གངྒཱའི་ཀླུང་རྡུལ་སྙེད་ཀྱི་སྤྲུལ་པའི་གར། །ཞིང་ཁམས་རྒྱ་མཚོར་བསྒྱུར་ནས་འགྲོ་འདྲེན་པ། །འཕགས་ཆེན་དམ་པའི་རྣམ་ཐར་འཛིན་པར་ཤོག །བཤད་ཡམས་བློས་བྱས་ཟོག་རྫུན་དང་བྲལ་བ། །སྙན་བརྒྱུད་ཚད་མ་བཞི་ཡིས་བརྒྱན་པའི་ཆོས། །རྣམ་དག་བསྟན་པས་སྐལ་བཟང་གདུལ་བྱ་ཀུན། །འདྲེན་པའི་དེད་དཔོན་མཆོག་ཏུ་བདག་འགྱུར་ཤོག །ཅེས་པ་འདིའང་ལེགས་སྦྱར་གྱི་བསྟན་བཅོས་པཱ་ཎི་པ་སོགས་གཙུག་ལག་རྒྱ་མཚོར་བློ་གྲོས་གྱི་འཇུག་པ་ཡངས་པ་སེ་སྐར་རིགས་ཀྱི་ཐེག་ལེ་འདར་ལོ་ངག་དབང་ཕུན་ཚོགས་ལྷུན་གྲུབ་ཀྱིས། དགེ་སྦྱོར་གྱི་དམིགས་རྟེན་དུ་རྡོ་རྗེ་བཙུན་པོའི་སྐུ་བརྙན་བཞེངས་པའི་རྒྱབ་ཡིག་དགོས་ཚུལ་ལྟར་སློབ་བཤད་པ་ཟ་ཧོར་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ངག་གི་དབང་ཕྱུག་འཇམ་དཔལ་(༢༠༠བ)
དབྱངས། །བློ་བཟང་གྲགས་པའི་ཆོས་སྲིད་བསྟན། །རྒྱ་མཚོའི་གོས་ཅན་མཐར་སྤེལ་བའི། །མགོན་ཁྱོད་ཚེ་དཔག་མེད་པ་ལྟར། །འཁོར་བ་མ་སྟོངས་བར་བཞུགས་ནས། །འགྲོ་ཀུན་ཕན་དང་བདེ་བ་ཡི། །ཕུལ་བྱུང་དགའ་སྟོན་རྟག་སྦྱོར་ཤོག །ཞྭ་སེར་ཅོད་པན་འཆང་བའི་བསྟན། །དེ་འཛིན་དགེ་འདུན་འདུས་པའི་སྡེ། །རྒྱ་ཧོར་བོད་ཡུལ་ཡོངས་ཁྱབ་ཅིང༌། །ལུས་ཅན་ངལ་གསོར་འགྱུར་བར་ཤོག །ས་སྐྱོང་རྒྱལ་པོའི་སྐུ་ཚེ་དང༌། །མངའ་ཐང་ཆབ་སྲིད་མཚན་ཇུས་རྒྱས། །ངག་གིས་འདི་བསྐུལ་མཆོད་སྤྲིན་སྦྱོར། །དབང་བའི་ཤེས་རབ་རབ་ཏུ་རྒྱལ། །དཔལ་ལྡན་མྱུར་མཛད་ཡེ་ཤེས་མགོན་པོ་དང༌། །དབྱེར་མེད་བླ་མ་སྙིང་གའི་པདྨ་རུ། །བྱང་ཆུབ་བར་དུ་མི་འབྲལ་རྟག་བཞུགས་ནས། །མཆོག་མཐུན་དངོས་གྲུབ་མ་ལུས་སྩལ་དུ་གསོལ། །ཞེས་པའང་བསམ་བློ་ཆོས་རྒྱ་མཚོའི་ངོར་ཟ་ཧོར་བནྡེས་སྦྱར། །ངག་ལ་བརྗོད་པ་རྣམ་དག་དབང་ཕྱུག་བློས། །སྐལ་བཟང་རྒྱ་མཚོ་དགའ་བསྐྱེད་འདྲེན་པ་མཆོག །འོག་མིན་ཞིང་མགོན་ལྟ་བུར་རྟག་བཞུགས་ནས། །ཕན་བདེའི་ཉི་མས་འཇིགས་རྟེན་གསུམ་ཁྱབ་ཤོག །གསུང་ངག་ཆད་མེད་དབང་དང་གྲོལ་བའི་ལམ། །ལེགས་སྟོན་བླ་མ་ཡི་དམ་ཆོས་སྲུང་ཚོགས། །ཀུན་བཟང་མཆོད་པས་མཉེས་བྱེད་ཤེས་རབ་ཀྱིས། །མ་སྨད་རི་མོ་ཐགས་སུ་བསྐྲུན་འདི་མཚར། །ཞེས་པའང་ཝཱ་གིནྡྲ་པྲ་ཛྙཱས་རྩོལ་བས་བསྒྲུབས་པའི་ཚེ་མྲྀ་དུ་སྭ་ར་པྲི་ཡ་སྱ་མི་ཏྲས་བྲིས་པ་དགེ་བར་གྱུར་ཅིག །གཙང་(༢༠༡ན)
བྱེད་འདབ་སྟོང་ཀེ་ས་ར་ཡི་དབུས། །མཚན་དཔེའི་ལང་ཚོ་མིག་གི་གཟིལ་དངར་ཅན། །གཞོམ་མེད་འཕོ་བ་ཆེན་པོའི་སྐུ་འགྲུབ་པའི། །ཐོད་ཕྲེང་རྩལ་སོགས་རྩ་བརྒྱུད་བླ་མ་དང༌། །ཞི་ཁྲོ་འདུས་སོ་ཅོག་གི་རྟེན་བརྟེན་པར། །ཡོངས་སུ་རྫོགས་པའི་ཁྱབ་བདག་ཧེ་རུ་ཀ༔ །ཆེ་མཆོག་དཔལ་དགུའི་ཡེ་ཤེས་སྒྱུ་མའི་འཕྲུལ། །རྣམ་གསུམ་ཡོ་གར་འབྱམས་ཀླས་ཡི་དམ་ལྷ། །ཕོ་རྒྱུད་མོ་རྒྱུད་སྣང་སྲིད་དྲེགས་པའི་ཚོགས། །གཉིས་མེད་རིག་པའི་རང་རྩལ་ཁྲག་འཐུང་དབང༌། །དགྲ་སྲོག་གཅོད་ལ་དཔལ་མགོན་མ་ནིང་ནག །གནམ་ལྕགས་སྤུ་གྲི་ངར་མའི་བསྟན་སྲུང་ཀྱི། །དིང་དུས་པད་འབྱུང་གསུང་གི་སྲས་གཅིག་པུ། །བཻ་རོའི་རྣམ་སྤྲུལ་ཟབ་གཏེར་ཆོས་ཀྱི་སྒོ། །འབྱེད་མཛད་རྡོ་རྗེ་སེམས་དཔའ་མི་ཡི་ཟོལ། །ཉེར་འཛིན་གང་གི་བཞེད་པའི་སྙིང་པོའི་དོན། །དངོས་ཉམས་གཏེར་བྱོན་ལུང་བསྟན་ལས་བྱུང་ལྟར། །ཨྱོན་སྨིན་གྲོལ་གླིང་ཞེས་རིག་སྔགས་སྡེའི། །གནྡྷོ་ལ་དང་དཔའ་བོའི་གྲོང་ཁྱེར་གྱི། །དགོན་གནས་ལས་ཀྱི་འཁོར་ལོའི་མཛད་པའི་འབྲས། །རྒྱལ་བསྟན་སྙིང་པོའི་ཡང་སྙིང་ཐེག་པའི་རྩེ། །བཀའ་གཏེར་ཟུང་འཇུག་སྔ་འགྱུར་རིང་ལུགས་ཀྱིས། །ཁ་བའི་སྨན་ལྗོངས་དོག་པོར་ཡོངས་བཀོད་མཐུས། །ཨཽཌྜི་ཡ་ནའི་གླིང་དང་མཚུངས་པར་ཤོག །རྒྱལ་སྲས་གཏེར་བདག་གླིང་པའི་སྐུ་ཚེ་འཕྲེང༌། །ཀུན་སྒྲོལ་ཕ་མཐར་ཕྱིན་ནས་རང་སྐལ་གཏེར། །རྫོགས་པར་གདན་དྲངས་དེ་འཛིན་སྨིན་གྲོལ་གླིང༌། །ཆོས་སྲིད་མཐའ་དག་བླ་ནས་བླར་འཕེལ་ཤོག །པདྨ་འབྱུང་གནས་དགྱེས་(༢༠༡བ)
པའི་སྤྱན་རས་ཀྱི། །གཟིགས་པ་མི་ཡོལ་རྡོ་རྗེ་ཐོགས་མེད་རྩལ། །ཟིལ་གནོན་འཇམ་དཔལ་གྲུབ་པའི་རིག་པ་འཛིན། །ཨ་ཧཾ་སྲོག་གི་ཀ་བ་ཚུགས་པར་ཤོག །མི་བསྲུན་བརླང་པོར་སྤྱོད་པ་དགྲ་བགེགས་དཔུང༌། །ཕྱོགས་མཚམས་སྟེང་འོག་གར་གནས་མ་ལུས་པ། །རྩ་གསུམ་མཐུ་སྟོབས་འབར་བའི་ཐོག་མདའ་ཡིས། །ཕྱེར་བཏགས་མིང་གི་ལྷག་མར་གཏོང་བར་ཤོག །གནམ་བསྐོས་དགའ་བ་ལྡན་པའི་ཕོ་བྲང་ནས། །ཡངས་པའི་ས་ཆེན་སྐྱོང་བ་རྒྱལ་པོའི་ཁྲིམས། །གསེར་གྱི་གཉའ་ཤིང་མཆོག་དམན་མཐའ་དག་གི །ཕྲག་པར་ནམ་ཡང་མི་འགྱུར་ལྕི་བར་ཤོག །བོད་ཡུལ་སཱ་ལའི་ལྗོངས་འཁོད་འབངས་རྣམས་ཀུན། །གཡུལ་འཁྲུག་དབུལ་ཕོངས་ནད་རིམས་རྩོད་པའི་སྐྱོན། །ཡོངས་བྲལ་རིང་པོའི་ཚེ་དང་རྣམ་ཐོས་བུའི། །དཔལ་འབྱོར་ལ་སྤྱོད་རྫོགས་ལྡན་དུས་ལྟར་ཤོག །རིགས་འཛིན་རྗེ་ལ་དངོས་བརྒྱུད་འབྲེལ་ཐོགས་ཚོགས། །སྐྱེ་བར་སྒྲིབ་པའི་ལུས་ཀྱི་འཆིང་རྒྱ་ལས། །གྲོལ་ནས་ཞི་བའི་གོ་འཕང་བདེ་བ་ཆེ། །མྱོང་བའི་བཟང་པོའི་སྐལ་པ་ཅན་འགྱུར་ཤོག །དེ་ལྟར་བདེན་བརྗོད་སྨོན་ལམ་ས་བོན་རྣམས། །མཆོག་གསུམ་ཐུགས་རྗེའི་བརླན་གཤེར་གྱིས་སྨིན་པས། །བཞེད་དོན་དཔག་བསམ་ཡོངས་འདུ་ས་བརྟོལ་འབྲས། །ལས་ལྡན་འཆི་མེད་དགའ་སྟོན་ལ་སྤྱོད་ཤོག །ཅེས་པ་འདིའང་གཏེར་ཆེན་ཆོས་ཀྱི་རྒྱལ་པོ་རྡོ་རྗེ་གླིང་པ་སོགས་གཏེར་སྟོན་རིམ་པར་བྱོན་པའི་ཡང་སྲིད་སྤྲུལ་པའི་སྐྱེ་མཆོག་པདྨ་དབང་འགྱུར་མེད་རྡོ་རྗེ་རྩལ་གྱིས་གཡོ་རུ་གྲ་ཕྱི་ཡོན་ཏན་དུ་མས་བརྒྱན་པའི་ཡུལ་གྲུར་ཨྱོན་སྨིན་གྲོལ་གླིང་པར་གྲགས་པའི་སྔགས་(༢༠༢ན)
སྡེའི་རྟེན་བརྟེན་པ་མཐའ་དག་འཕྲིན་ལས་ཀྱི་ཆ་ཤས་ལས་ལེགས་པར་བསྐྲུན་པའི་ཚེ་གཟུངས་འབུལ་གྱི་སྤེལ་ཚིག་དང་ཚོགས་འདོན་གྱི་ཆེད་དུ་རྩོམས་ཤིག་པར་བཀས་བསྐུལ་བ་དང་དུ་བླངས་ཏེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །ཞོ་བཞིས་ལྷག་པའི་ཉེར་གཉིས་སྲང་གི་དངུལ། །ལས་གྲུབ་ཀོང་བུ་ཕུལ་བས་མ་རིག་མུན། །གསལ་བྱེད་ཡེ་ཤེས་སྒྲོན་མེས་འཇིག་རྟེན་གསུམ། །ཕན་བདེའི་སྣང་བ་མཆོག་ལ་འགོད་པར་ཤོག །ཅེས་པ་རྩེས་དང་བྲག་གདོང་པ་བློ་བཟང་ཚེ་དབང་གིས་སྔགས་རམས་པ་བྱས་སྐབས་དགོས་ཚུལ་ལྟར་ཟ་ཧོར་གྱི་བནྡེས་བཀོད་དོ། །མཁྱེན་བརྩེ་རབ་ཏུ་ཡངས་པའི་བློ་ལྡན་མས། །རྡོ་རྗེ་བཙུན་མོ་སྒྲུབ་པ་ཉེ་བའི་ལམ། །བསྟར་པའི་འབྲས་བུས་མ་དང་དཔའ་བོའི་གླིང༌། །མཁའ་སྤྱོད་ཞིང་དུ་ཐོགས་མེད་བགྲོད་བྱིན་རློབས། །ང་རྒྱལ་སེར་སྣའི་ལས་སྒྲིབ་བག་ཆགས་ཀུན། །ཡོངས་དག་ཚར་བའི་ཕུང་པོ་གནས་བསྒྱུར་ཏེ། །མཉམ་ཉིད་ཡེ་ཤེས་ངོ་བོར་སངས་རྒྱས་ནས། །ནམ་མཁའི་མཐའ་སྙེད་འགྲོ་རྣམས་སྒྲོལ་བར་ཤོག །སློབ་ལམ་སྤྱོད་ཚེ་ཚད་མ་བཞི་ལྡན་ཆོས། །སྟོན་པའི་རྡོ་རྗེ་སེམས་དངོས་བཤེས་གཉེན་གྱིས། །རྗེས་བཟུང་འདུས་པ་གསུམ་གྱི་འཕྲང་བསྒལ་ཏེ། །རིང་མིན་ཟུང་འཇུག་ཡེ་ཤེས་མངོན་འགྱུར་ཤོག །ཅེས་འ་ཞ་མཁྱེན་རབ་བློ་ལྡན་གྱི་ཕྱི་རྟེན་དུ་འ་ཞ་མཁྱེན་རབ་རྣམ་རྒྱལ་གྱིས་རྗེ་བཙུན་མཁའ་སྤྱོད་དབང་མོར་རིན་འབྱུང་གིས་བསྐོར་བའི་བརྒྱ་ཐང་བཞེངས་པའི་ཚེ་དགོས་ཚུལ་ལྟར་(༢༠༢བ)
ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་གྲགས་སོ། །ཟིལ་གནོན་འཇམ་དཔལ་དཔའ་བོ་བཞད་པ་རྩལ། །འཁོར་ལོའི་མགོན་པོར་ངེས་ནས་གསོལ་འདེབས་ན། །གཡོ་མེད་རྡོ་རྗེ་ལྟར་བརྟན་བྱིན་རླབས་ཀྱིས། །བདུད་རྩིས་བདག་སྙིང་ཟ་མ་ཏོག་འགང་ཤོག །ཅེས་པའང་ནམ་མཁའ་རྒྱ་མཚོས་དགོས་ཚུལ་ལྟར་ཟ་ཧོར་གྱི་བནྡེས་བྲིས། །དགའ་ལྡན་རྣམ་པར་རྒྱལ་བའི་འདུས་གླིང་གི །སངས་རྒྱས་གཉིས་པ་རིམ་བྱོན་རིན་ཆེན་ཁྲིའི། །མཛེས་རྒྱན་སྤྲུལ་པའི་ཟློས་གར་ངག་གི་དབང༌། །བློ་བཟང་བསྟན་པ་འཛིན་ལ་གསོལ་བ་འདེབས། །མགོན་ཁྱོད་སྤྱི་དང་ཁྱད་པར་མཐའ་འཁོབ་ཀྱི། །འགྲོ་རྣམས་ཐར་པར་ཁྲིད་པའི་དེད་དཔོན་དུ། །ཚེ་དཔག་མེད་མགོན་ལྟ་བུར་རབ་བརྟན་ཞིང༌། །ཆོས་འཁོར་རྒྱུན་ཆད་མེད་པར་སྐོར་བར་ཤོག །ཅེས་ཤར་ཁང་ཆོས་ཀྱི་རྒྱལ་པོའི་བརྟན་བཞུགས་འདི་ནི་འཇམ་དབྱངས་སྤྲུལ་པའི་སྐུའི་གསུང་གིས་བསྐུལ་བ་བཞིན་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །མ་འདྲིས་ལུས་ཅན་ཀུན་གྱི་གཉེན་གཅིག་པུ། །ལྔ་བརྒྱའི་མགོན་པོ་ཤཱཀྱ་སེང་གེ་ཡི། །བསྟན་པའི་གྲིབ་མར་འགྲོ་རྣམས་ངལ་གསོ་བ། །ངག་དབང་བློ་བཟང་རྒྱ་མཚོར་གསོལ་བ་འདེབས། །དད་པའི་མེ་ལོང་ངོས་སུ་ཐུགས་རྗེའི་གཟུགས། །མངོན་སུམ་ཤར་བའི་བྱིན་རླབས་རྨད་པོ་ཆེས། །སྐྱེ་བར་དལ་འབྱོར་ཚང་བའི་རྟེན་རྙེད་ནས། །རིང་མིན་སྟོབས་བཅུ་མངའ་བ་ཐོབ་པར་ཤོག །ཅེས་པའང་ཨུ་ཆུ་མུ་ཆུ་ཆེ་ཆེན་ཆིང་དབང་གི་དེ་ཤི་དང༌།(༢༠༣ན)
པོ་རོ་གཉིས་ཀྱི་ངོར་ཟ་ཧོར་གྱི་བནྡེས་སྦྱར། །བཀའ་དྲིན་མཉམ་མེད་རྩ་བའི་བླ་མ་དང༌། །དབྱེར་མེད་སེང་ལྡེང་ནགས་ཀྱི་སྒྲོལ་མ་ལ། །དེང་ནས་བྱང་ཆུབ་སྙིང་པོར་མཆིས་ཀྱི་བར། །གསོལ་འདེབས་སོ་ཐུགས་རྗེས་བྱིན་གྱིས་རློབས། །གླང་ཆེན་སེང་གེ་མེ་དང་སྨྱོན་པ་སྦྲུལ། །ལྕགས་སྒྲོག་ཤ་ཟ་རྒྱ་མཚོའི་འཇིགས་གྲོལ་ཏེ། །ཚེ་དང་བསོད་ནམས་དཔལ་འབྱོར་མངའ་ཐང་སོགས། །ཐུན་མོངའདོད་པའི་རེ་བ་ཡོངས་འགྲུབ་ཤོག །སྐྱེ་བ་ཀུན་ཏུ་མི་ཁོམ་གནས་བརྒྱད་སྤངས། །མཐོ་རིས་སྐས་ལས་ཐར་པའི་ཁང་པར་ཞུགས། །ཉིང་མཚམས་སྦྱར་དུས་བདེ་ལྡན་ཞིང་ཁམས་སུ། །སྐྱེས་ནས་འོད་དཔག་མེད་ཀྱི་རྗེས་འཛིན་ཤོག །ཅེས་པའང་སྒྱིད་ཐང་ནོར་བུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རང་ལུས་ཞི་ཁྲོའི་དཀྱིལ་འཁོར་ཆེན་པོ་རུ། །མངོན་སུམ་ངོ་སྤྲད་ཁྱབ་བདག་བླ་མ་དང༌། །དབྱེར་མེད་རིགས་འཛིན་རྡོ་རྗེ་དྲག་པོ་རྩལ། །རིག་པའི་རང་ངོར་ངེས་པས་གསོལ་བ་འདེབས། །མ་རིག་མལ་དུ་མི་ཁོམ་གཉིད་པོ་ཆེ། །སང་བྱེད་རྩ་གསུམ་ཐུགས་རྗེའི་སྐྱ་རེངས་མས། །ཡང་སྲིད་བཅུ་གཉིས་ཁྱིམ་ཀུན་མངོན་མཐོ་དང༌། །ངེས་ལེགས་སྣང་བའི་རྩེད་འཇོར་རོལ་བར་ཤོག །སྐྱབས་མཆོག་བླ་མ་ལྷར་བཅས་བྱིན་རླབས་ཀྱིས། །གནས་སྐབས་ནད་གདོན་དབུལ་ཕོངས་དགྲ་ལས་རྒྱལ། །རིང་འཚོའི་ཚེ་དང་ལོངས་སྤྱོད་དབང་ཐང་རྣམས། །འཆི་མེད་བདག་པོའི་དཔལ་དང་སྐལ་(༢༠༣བ)
མཉམ་ཤོག །རང་རིག་པད་འབྱུང་གདོད་ནས་ལྷུན་གྲུབ་གདངས། །མ་འདྲེས་འོད་ལྔར་མངོན་སུམ་ཤར་བའི་རྩལ། །ཆོས་ཉིད་ཟད་སར་འཁྱོལ་ནས་འཕོ་བ་ཆེ། །ཚེ་འདིར་ཉམས་སུ་མྱོང་བར་བདག་བྱིན་རློབས། །དྲུག་ལྡན་རྩ་བརྒྱུད་བླ་མ་ཡི་དམ་དང༌། །ཆོས་ནོར་གཏེར་སྲུང་མཐུ་ལྡན་ཚོགས་རྣམས་ཀྱིས། །མཆོག་ཐུན་དངོས་གྲུབ་ཆར་ཀྱིས་བདག་རྒྱུད་ཞིང༌། །ཉེར་བརླན་གཏན་བདེའི་མྱུ་གུ་སྨིན་པར་ཤོག །ཅེས་གྲ་ཕྱི་སྨོན་གྲུབ་པ་རིན་ཆེན་བཀྲ་ཤིས་ཀྱིས་བྱང་གཏེར་ཐུགས་སྒྲུབ་དྲག་པོ་རྩལ་གྱི་ཉམས་ལེན་དང་འབྲེལ་བ་འདི་ལྟ་བུ་ཞིག་དགོས་ཞེས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །རྒྱལ་ཀུན་ངོ་བོ་ཚེ་དབང་རིགས་འཛིན་དང༌། །དབྱེར་མེད་ཆེས་ཆོག་འདུས་རྩལ་བླ་མ་རྗེ། །སྙིང་དབུས་པདྨར་བཞུགས་ལ་གསོལ་འདེབས་ན། །བྱང་ཆུབ་བར་དུ་བྱིན་གྱིས་བརླབ་ཏུ་གསོལ། །རྩ་གསུམ་ཐུགས་རྗེ་རྟེན་འབྲེལ་མི་བསླུ་དང༌། །བདག་སོགས་རྣམས་ཀྱིས་དད་མཐུས་མགོན་པོ་ཁྱོད། །སྐུ་ཚེ་གཡུང་དྲུང་རང་བཞིན་ལྟར་གྱུར་ནས། །བཞེད་པའི་དོན་ཀུན་ལྷུན་གྱིས་འགྲུབ་པར་ཤོག །ཅེས་པའང་རྟ་དཔོན་རྣམ་འཇོམས་ཀྱིས་རིང་འཚོའི་རྟེན་འབྱུང་བསྒྲིགས་པའི་ཚེ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །བདེ་ལྡན་ཞིང་མགོན་ཕྱག་གི་བུམ་བཟང་ལས། །ཟག་མེད་བདུད་རྩི་ཚེ་ཡི་སྙིང་པོའི་བཅུད། །རེག་པའི་མོད་ལ་འགྲོ་རྣམས་འཆི་བདག་གི། །མེ་ཏོག་མདའ་ཅན་གཡུལ་ལས་རྒྱལ་བར་མཛོད། །(༢༠༤ན)
མི་ཡི་སེང་གེའི་རིང་ལུགས་འཛིན་པའི་རྗེ། །མི་ཤིགས་རྡོ་རྗེའི་ཁྲི་ལ་རྟག་བཞུགས་ནས། །མི་འགྱུར་མཆོག་ཏུ་ཡངས་པའི་བདེ་བ་ཆེར། །མི་སོགས་ལྷར་བཅས་འགྲོ་ཀུན་སྦྱོར་བར་ཤོག །ཚངས་སྲས་ངག་གི་དབང་ཕྱུག་ངང་མོ་དཀར། །བློ་གྲོས་འོ་མའི་རྫིང་བུར་རྟག་རྒྱུ་བས། །མཁས་བཙུན་བཟང་པོའི་འཕྲིན་ལས་རྒྱ་མཚོ་ཆེས། །མཐའ་ཀླས་བསྐལ་པའི་བར་དུ་ཁྱབ་པར་ཤོག །ཕ་རོལ་རྒོལ་བར་འཇིགས་མེད་འཆད་རྩོད་དང༌། །རྩོམ་པའི་གོ་ཆ་བརྟན་པོས་ཐུབ་བསྟན་གྱིས། །ལང་ཚོ་སླར་འཕེལ་ཐོས་བསམ་སྒོམ་པའི་སྡེ། །འཇམ་དབྱངས་དགའ་བའི་བཤེས་ཁྱོད་ཞབས་བརྟན་ཤོག །དགའ་ལྡན་ཡིད་དགའ་ཆོས་འཛིན་གཉིས་པའི་གཟུགས། །གཙང་རོང་སར་འཕོས་བྱམས་ཆེན་འདུས་ཚོགས་གླིང༌། །སྲིད་མཐའི་བར་དུ་བཤད་དང་སྒྲུབ་པ་ཡིས། །དཀར་ཆའི་ཟླ་བ་ལྟ་བུར་འཕེལ་བར་ཤོག །འཇིག་རྟེན་ཀུན་ཏུ་འགྲོ་རྣམས་ནད་མཚོན་དང༌། །དབུལ་ཕོངས་ཉེས་བརྒྱའི་དྲི་མ་ཉེར་ཞི་ཞིང༌། །རྫོགས་ལྡན་དུས་ལྟར་བདེ་སྐྱིད་ཕུན་ཚོགས་ལ། །སྤྱོད་པའི་སྐལ་བ་བཟང་པོར་བདག་འགྱུར་ཤོག །ཅེས་རིང་འཚོའི་ཚིགས་བཅད་འདིའང་གསོ་རིག་གཙུག་ལག་འཛིན་པ་སྒོ་མོ་རབ་པ་རཏྣ་ཨཱི་ཤས་བསྐུལ་བའི་ངོར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །དཔའ་གཏུམ་སྟག་སྟེང་གར་དགུའི་ཉམས་འགྱུར་ཅན། །འཆོལ་བའི་ཁྲོ་རྒྱལ་གནམ་ལྕགས་ཕུར་བུ་ཡིས། །བདུད་དཔུང་ཚར་བཅད་ཚེ་ཡི་བར་གཅོད་ཀུན། །བརྟུལ་(༢༠༤བ)
ཞུགས་དྲག་པོའི་སྟོབས་ཀྱིས་ཐལ་བར་རློག །མཚོ་སྐྱེས་རིགས་འཛིན་བླ་མའི་ཐུགས་རྗེའི་མཐུས། །འཁོར་ལོའི་མགོན་པོ་རྡོ་རྗེ་ཐོགས་མེད་རྩལ། །མི་འགྱུར་སྲོག་གི་ཀ་བ་གཡུང་དྲུང་གི །ངོ་བོར་བྱིན་རླབས་བསམས་དོན་ལྷུན་གྲུབ་ཤོག །ཅེས་པ་འདིའང་ལྷ་ས་བ་བློ་བཟང་རབ་བརྟན་གྱིས་ཁ་ཏོན་དུ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པའོ། །ཁ་ཚར་ཕུན་ཚར་དང་ལྡན་ཟ་འོག་གི །རྣམ་བཀྲ་ངོ་མཚར་རི་མོ་བཀོད་ལེགས་ཅན། །སྐྱབས་གསུམ་དམ་པར་བསྐྲུན་པའི་སྲི་ཞུ་ཡིས། །ཚོགས་གཉིས་ཕུང་པོ་བླ་ནས་བླར་མཐོ་ཤོག །བགྲང་ཡས་ཞི་ཁྲོ་དགེ་འདུན་དཀོན་མཆོག་གཟུགས། །སྐྱེ་རྒུའི་མིག་ལ་མངོན་སུམ་རབ་གསལ་བར། །བཀུར་སྟིའི་ཆེད་དུ་གནམ་རྒྱན་ཡོངས་སྤེལ་བས། །འཁོར་འདས་ཡོན་ཏན་དབྱར་མཚོ་ལྟར་འཕྱུར་ཤོག །མཆོད་དཔོན་ངག་དབང་ཤེས་རབ་སྤུན་ཚས་ཕུལ་བའི་ཁ་བྱང་ཟ་ཧོར་གྱི་བནྡེས་བཀོད་པ་དགེ །དཔལ་ལྡན་རྩ་གསུམ་མཐུ་བྱིན་རབ་འབར་བས། །བདུད་སྡེའི་གཡུལ་ལས་རྣམ་པར་ཡོངས་རྒྱལ་བ། །སྲིད་ཞིའི་ཕན་བདེའི་འབྱུང་གནས་རྡོ་རྗེའི་ཐེག །ལེགས་བཤད་དབྱངས་སྙན་འཁྲོལ་བའི་འདུལ་གླིང་དུ། །རྒྱ་ཧོར་བཟང་གོས་སྣ་ཚོགས་ཉེར་བསྒྲིགས་ནས། །ནམ་མཁའི་རྒྱན་དུ་སྒོ་འཕར་ཕྱེ་བའི་མཛོད། །མཆོད་སྤྲིན་སྤྲོ་བྱེད་ངག་དབང་ཤེས་རབ་ཀྱི། །སྟོན་མཚན་ཟླ་འདྲའི་ལྷག་བསམ་གྱིས་ཕུལ་མཐུས། །ཐུབ་བསྟན་དེ་འཛིན་སྡེར་བཅས་མཐའ་ཀླས་འགྲོའི། །བསོད་(༢༠༥ན)
ནམས་བྱེ་བའི་ཞིང་དུ་ཉེར་འཕེལ་ཞིང༌། །རྒྱུ་སྦྱོར་འདི་དང་གཏན་གྱི་ལེགས་ཚོགས་ཀུན། །རབ་རྒྱས་འདོད་པའི་རེ་བ་ཡོངས་སྐོང་ཤོག །དམར་སེར་ཅན་ཞེས་པ་མེ་མོ་སྦྲུལ་གྱི་ལོར་དིང་ཕོན། ཧོར་གོས་བར་སྣང་མཛོད་ལེ་ཚན། རྒྱ་གོས་ཐོན་ཐི་ཚོན་ཁྲ། རྒྱན་བཞི་སོགས་གོས་སྣ་ཚོགས་ལས་གྲུབ་པའི་རྒྱུར་གྲ་རྒན་དང་ལྷ་ས་གནས་ཚད་ཀྱིས་གསུམ་བཅད་འབྲིང་པོར་བརྩིས་པའི་གོང་ཐང་གསེར་ཞོ་བརྒྱད་བརྒྱ་རི་བ་འབྲས་སྤུངས་གསང་སྔགས་ཕོ་བྲང་གི་ཁྲིའི་སྟེང་ལྷོ་ཏལ་རྒྱུད། ཤར་གླིང་གཉིས། ནུབ་གླིང་གཉིས། བྱང་གླིང་གཅིག་བཅས་འདུ་ཁང་ཁེབས་པའི་བླ་བྲེ་ཡར་ཀླུངས་ཁེ་གསུམ་པ་མཆོད་དཔོན་ངག་དབང་ཤེས་རབ་སྤུན་ཚས་ཕུལ་བའི་ཚེ་ཁ་བྱང་དགོས་ཚུལ་ལྟར་ཟ་ཧོར་གྱི་བནྡེས་བཀོད་པ་ལཀྵྨཱི། །སྒྲིབ་ཤར་གླིང་གཉིས་པ་བྲལ་རྣམ་པ་ཐམས་ཅད་མཁྱེན་པའི་ཐུགས། །རིས་མེད་འགྲོ་འདྲེན་རྗེས་སུ་ཉེར་འཇུག་པས། །ཀུན་ར་ཡོངས་ཁྱབ་གནམ་རྒྱན་འདིའི་ཆེད་དུ། །འབད་རྣམས་དོན་གཉིས་ལྷུན་གྱིས་གྲུབ་པར་མཛོད། །རྒྱལ་ནུབ་གླིང་དང་པོ་བ་ཞི་ཁྲོའི་རོལ་གར་བསྟན་པའི་སྐུ། །རབ་བཞུགས་ཕོ་བྲང་མཁའ་ཁྱབ་མཛེས་རྒྱན་གྱི། འབྲས་བུ་འཁོར་དང་མྱང་འདས་རྣམ་པར་སྨིན། །ཆེས་དཀར་བྱང་ཆུབ་བར་དུ་མྱོང་བར་ཤོག །རྫོགས་ནུབ་གླིང་གཉིས་པ། ལྡན་སྐྱེ་རྒུ་ལྟ་བུའི་རིང་པོའི་ཚེ། །ཕུན་ཚོགས་འབྱོར་པར་མྱོང་བའི་བདེ་སྐྱིད་ལ། །ཡོན་སྦྱོར་ཕན་པ་སྒྲུབ་ཀུན་ལོངས་སྤྱོད་པར། །སངས་རྒྱས་སྲས་དང་བཅས་པས་བྱིན་གྱིས་རློབས། །གནོད་བྱང་གླིང༌། བྱེད་གཟུགས་(༢༠༥བ)
ཅན་གཟུགས་མེད་ནག་པོའི་མུན། །རྩ་གསུམ་ཐུགས་རྗེ་ཆེན་པོའི་ཉི་འོད་ཀྱིས། །མིང་གི་ལྷག་མར་བྱས་ནས་ཕན་དང་བདེའི། །སྣང་བ་དམ་པའི་གཟི་བྱིན་འབར་བར་ཤོག །རིགས་རྣམས་ཀུན་གྱི་རྒྱལ་སྲིད་ཆེན་པོའི་ཁྲིར། །ཧོར་གོས་ལྷབ་ལྷུབ་མཉེ་ཤུན་ལེགས་བསྐྲུན་པའི། །དགེ་ཚོགས་བདེ་ཕྱི་བར་གྱི་མདུན་མ་དག །ལྷུན་གྱིས་གྲུབ་པར་མཆོག་གསུམ་མཐུས་བྱིན་རློབས། །ཞེས་པའང་གསང་སྔགས་ཕོ་བྲང་གི་ཁྲིའི་མཉེ་འབོལ་དང་འབོལ་ཤུན་ཁེབས་དང་བཅས་ཧོར་གོས་ལས་གྲུབ་པ་མཆོད་དཔོན་ངག་དབང་ཤེས་རབ་ཀྱིས་ཕུལ་བའི་ཁ་བྱང་ཟ་ཧོར་གྱི་བནྡེས་བཀོད་པ་དགེ ། གོང་གསལ་དང་སྔོན་མའི་གནམ་རྒྱན་གྱི་ཨ་ལོང་རྒྱབ་ཤ་བླ་བྲེའི་ཤམ་བུ་སོགས་ཁྱོན་བསྡོམས་རིན་ཐང་གསེར་ཞོ་སྟོང་དང་སོ་བདུན་སོང་ངོ༌། །ཟ་འོག་སྣ་ཚོགས་རི་མོ་རབ་མཛེས་པ། །དབང་གཞུ་ལྟར་བཀྲ་སྤེལ་ལེགས་འཕན་གྱི་འཕྲེང༌། །རྒྱལ་བ་རྒྱ་མཚོའི་ཞིང་ཁམས་འཕྲུལ་སྣང་གི །རྟེན་དང་བརྟེན་པར་བཅས་ལ་ཕུལ་བའི་དགེ །ཟུར་རིགས་སྔགས་འཆང་གུ་རུ་སྤུན་ཟླ་བརྒྱུད། །ཁྱོ་ཤུགས་མཐའ་དག་ཚེ་འདིར་རྫོགས་ལྡན་ལྟར། །བདེ་སྐྱིད་དཔལ་ལ་ཡུན་དུ་སྤྱོད་པ་དང༌། །བགྲང་རིང་སྐྱེ་བར་ལྷ་མིའི་ལུས་ཐོབ་ནས། །རང་གཞན་དོན་གཉིས་གྲུབ་པ་སངས་རྒྱས་ཀྱི། །གོ་འཕང་མངོན་གྱུར་འདིས་མཚོན་དགེ་བ་ཀུན། །མི་མཛད་བྱང་ཆུབ་ཆེན་པོའི་རྒྱུ་རུ་བསྔོ། །ཞེས་གཞིས་ཀ་ཤར་པ་ཨ་གུར་ནང་མིར་བཅས་པའི་གོན་པའི་ཕྱི་ཤ་སོགས་བཟང་གོས་སྣ་ཚོགས་ལས་གྲུབ་པའི་འཕན་མེ་(༢༠༦ན)
སྦྲུལ་ས་ག་ཟླ་བའི་དུས་ཆེན་གསུམ་འཛོམ་གྱི་ཉིན་འཕྲུལ་སྣང་དུ་ཕུལ་བའི་སྨོན་ལམ་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །མཆོད་ཁང་སྤྱི། གང་གི་ཡོན་ཏན་ཆ་ཙམ་དྲན་པའི་མོད། །འཁོར་འདས་གདུང་གཅིལ་ཀུན་མཁྱེན་ཉི་མའི་གཉེན། །སྲས་དང་སློབ་མར་བཅས་ལ་སྲི་ཞུའི་གོས། །བླ་བྲེ་ལྷག་བསམ་དག་པས་ཡོངས་ཕུལ་དགེས། །ཟད་པའི་མཐའ་བྲལ་མར་གྱུར་འགྲོ་བ་རྣམས། །སྡུག་བསྔལ་གསུམ་ལས་རྣམ་གྲོལ་ངེས་ལེགས་ཀྱི། །རིན་ཆེན་ཁང་པར་བདེ་བ་ཆེན་པོ་ལ། །ལོངས་སུ་སྤྱོད་བྱིན་རློབས་ཤིག་འཕགས་མཆོག་ཀྱེ། །བསོད་ནམས་བྱས་འབྲས་འཛད་མེད་ཆུ་གཏེར་ཆེ། །ཉེས་ཚོགས་རོ་དང་ལྷན་ཅིག་མི་གནས་ཤིང༌། །ཚེ་དང་དབང་ཐང་གཏན་མདུན་ཐར་པའི་བདེའི། །ཡིད་བཞིན་ནོར་གྱི་འདོད་དགུ་བསྙིལ་བར་ཤོག །ཇོཤཱཀ་རྣམ་སྦྱར། ཐུབ་དབང་ཞལ་སྐྱིན་མཐོང་བས་དོན་ལྡན་པར། །གོས་བཟང་བླ་གོས་ཕུལ་བས་སྐྱེ་བ་ཀུན། །རྣམ་དག་ཆོ་ག་ལ་བརྟེན་རབ་བྱུང་ནས། །གཙང་མའི་ཚུལ་ཁྲིམས་བསྲུང་བར་བདག་བྱིན་རློབས། །བྱམས་པ་ཆོས་འཁོར། ཡིད་དགའ་ཆོས་འཛིན་མགོན་པོ་འཛམ་གླིང་འདིར། །དངོས་བྱོན་ལྟ་བུའི་སྣང་བརྙན་འོད་སྲུངས་ཆེས། །ཡེ་ཤེས་སེམས་དཔའ་བཅུག་པའི་བྱམས་ཆེན་མེས། །བདུད་བཞིའི་ཚང་ཚིང་མ་ལུས་བསྲེག་པར་ཤོག །བྱམས་པ་ཁྲུས་མཛད། ལྷ་གཅིག་སྲོང་བཙན་ཡབ་ཡུམ་ཁྲུས་གསོལ་བའི། །སྨན་འདམས་ལས་གྲུབ་མ་ཕམ་མགོན་པོ་ཡིས། །སྤྱི་དང་ཁྱད་པར་གངས་ཅན་དུ༔ཁའི་(༢༠༦བ)
མུན། །མཐར་བྱས་ཕན་བདེའི་འོད་ཀྱིས་འགེང་བར་མཛོད། །རྗེ་བཙུན་སྒྲོལ་མ། རྒྱལ་བ་ཀུན་ཡུམ་ཨཱཪྻ་ཏཱ་རཱ་ཀྱེ། །བདག་སོགས་འགྲོ་ལ་གཟིགས་པའི་སྤྱན་རས་ཀྱིས། །འཇིགས་ཆེན་བརྒྱད་མཚོན་ཉེས་ཚོགས་ལས་སྐྱབས་ནས། །དགའ་ཞིང་སྐྱིད་པའི་དཔལ་ལ་རྟག་ཏུ་སྦྱོར། །བཀའ་འགྱུར་རིན་པོ་ཆེ། ཐུབ་རྣམས་མཛད་པའི་ཡང་རྩེ་ལུང་གི་ཆོས། །གླེགས་བམ་གཟུགས་ཤར་འགྱུར་རོ་རོ་ཅོག་གི་བཀའ། །མཐོང་ཐོས་དྲན་དང་རེག་པས་རྣམ་གྲོལ་བའི། །དོན་བཟང་བདག་སོགས་འགྲོ་རྒྱུད་ལ་འཇུག་ཤོག །གནས་བཅུ། འགྲོ་ངོར་ཉན་ཐོས་ཚུལ་གྱིས་ཐུབ་པའི་བསྟན། །འཛིན་ཀྱང་ཚོགས་གཉིས་ཡོངས་རྫོགས་སངས་རྒྱས་དངོས། །འཕགས་པའི་གནས་བརྟན་རྣམས་ཀྱིས་ཉེས་བརྒྱའི་མུན། །མཐར་བྱས་སྒོ་གསུམ་སིམ་པ་མྱོང་བྱིན་རློབས། སྨན་བླ་བདེ་གཤེགས་བརྒྱད། མཚན་ལེགས་རིན་ཆེན་ཟླ་བ་གསེར་བཟང་དང༌། །མྱ་ངན་མེད་དཔལ་ཆོས་སྒྲགས་མངོན་པར་མཁྱེན། །སྨན་བླ་ཤཱཀྱ་ཐུབ་པའི་ལྷ་ཚོགས་ཀྱིས། །བདག་སོགས་སྙིགས་མའི་ལུས་ཅན་རྗེས་སུ་བཟུང༌། མཆོད་རྟེན་གངས་ལ་ཉི་ཤར། མི་འགྱུར་ཆོས་སྐུ་བདེ་གཤེགས་ཐུགས་ཀྱི་རྟེན། །བྱིན་རླབས་གཟི་བྱིན་རབ་འབར་རྨད་པོ་ཆེ། །གངས་ལ་ཉི་མ་ཤར་ལྟར་མཁའ་མཉམ་འགྲོའི། །དུག་ལྔའི་སྨག་རུམ་དཔུང་ཚོགས་ཕ་མཐར་མཛོད། །དམར་སེར་ཅན་གྱི་ལོ་ས་ག་ཟླ་བའི་ནང་དུ་སྟོད་ཧོར་གྱི་གོས་རྒྱ་གོས་ཚོན་ཁྲ་ཁྱད་མཚར་དྲང་གསེར་གཞི་མ་གཉིས་ཀྱིས་གཙོས་པའི་བེར་ཉེར་གཅིག་ནང་ལྡན། ར་ས་འཕྲུལ་སྣང་དང་ར་མོ་ཆེའི་གནམ་རྒྱན་དུ་ཕུལ་ཞིང་འགན་སྦྱར་གཉིས་ལ་བླ་གོས་ཀྱི་ཚལ་བུས་བརྒྱན་ཏེ་ཇོ་ཤཱཀ་གཉིས་ལ་ཕུལ་བའི་ཆེ་བ་བྱང་དུ་ཟ་ཧོར་གྱི་བནྡེས་སྦྱར་(༢༠༧ན)
བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །གཅད་བྱེད་འདབ་སྟོང་གྲོལ་ལས་སྤྲུལ་པའི་གར། །རྒྱལ་ཀུན་ཡོངས་འདུས་རྔ་ཡབ་གླིང་པ་ཡི། །ཐུགས་གསང་བྱིན་ཆེན་ཉེར་འཕྲོས་འོད་ཟེར་གྱིས། །འཇིག་རྟེན་གསུམ་སྣང་དགེ་བའི་ཤིས་པ་སྩོལ། །པདྨ་ཐོད་ཕྲེང་རིང་ལུགས་འཛིན་པའི་གཙོ། །སྐད་གཉིས་སྨྲ་བ་བཻ་རོའི་སྒྱུ་མའི་འཕྲུལ། །ལེགས་བསྟན་མཁས་གྲུབ་ཡང་སྲིད་གངས་ལྗོངས་མཁར། །ངོ་མཚར་སྤྲུལ་པའི་ཟླ་བ་ཚེས་པར་ཤོག །བསླུ་མེད་རྟེན་འབྲེལ་མཐུ་ཡིས་རྩ་གསུམ་དང༌། །ཆོས་སྲུང་ཕྲིན་ལས་ས་བོན་རབ་སྨིན་པས། །སྨོན་ལམ་དཔག་བསམ་ལྗོན་པ་རྒྱས་པའི་རྩེར། །འདོད་དོན་འབྲས་བཟང་སྙེ་མས་དུད་གྱུར་ཅིག །ཅེས་རྩེ་ལེ་སྤྲུལ་པའི་སྐུ་པདྨ་ལེགས་གྲུབ་ཀྱི་སྤྲུལ་སྐུ་མྱུར་འབྱོན་གྱི་སྨོན་ལམ་དགོས་ཚུལ་བུ་སློབ་སྤྱི་ཚོགས་ནས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་གྲགས་པའོ། །རྒྱུད་མངས་གླུ་ལས་ཆོས་ཀྱི་དབྱངས་སྙན་སྒྲ། །འཁྲོལ་ཡང་སྲིན་མོའི་གཟུགས་ཅན་རེ་མ་ཏཱི། །ཞི་བའི་ལས་ལ་དུང་སྐྱོང་སྟོན་ཟླའི་བཞིན། །འཆི་མེད་ལུས་ཕྲའི་ལང་ཚོའི་དཔལ་འཕྲོག་ཀྱེ། །འཁོར་ལོའི་རི་མོ་རྣམ་པར་བཀྲ་བའི་གདུགས། །དངོས་བཤམས་ཡིད་སྦྲུལ་མཆོད་དང་ཆབས་ཅིག་པར། །དབང་ལྔའི་ཡུལ་དུ་ཟག་བྲལ་བདེ་བའི་གདངས། །ཡོངས་ཤར་བསོད་ནམས་ཚངས་པའི་ཡུལ་བརྒལ་དེས། །ལས་གཞི་གསེར་སྒོང་ཡོངས་སུ་སྨིན་པའི་སྦུབས། །གངས་ཅན་བསྟན་འགྲོའི་བདེ་སྐྱིད་ཞལ་སྒོ་ལས། །ཆོས་ནོར་འདོད་ཐར་དགའ་སྟོན་ལ་སྤྱོད་བའི། །རེ་སྐོང་དཔག་བསམ་སྙེ་མ་(༢༠༧བ)
དུད་པར་མཛོད། །ཅེས་སྣྲོན་ཟླའི་བཟང་པོའི་ཚེས་ལ་དཔལ་ལྡན་དུང་སྐྱོང་མར་དབུ་ཁེབས་བུམ་གདན་མ་ཕུལ་བའི་ཁ་བྱང་དུ་ཟ་ཧོར་གྱི་བནྡེས་བཀོད་པའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །སྲིད་ཞིའི་འཇིགས་པ་ཀུན་སྐྱོབ་ལྷ་ཡི་ལྷ། །མཐོང་བས་རྣམ་གྲོལ་ཤཱཀྱ་མུ་ནེའི་སྐུར། །བཀྲ་ཤིས་འཁོར་ལོའི་རི་མོ་རབ་བཀྲ་བ། །ངུར་སྨྲིག་གོས་ཟུངས་ཕུལ་བའི་ལེགས་བྱས་འབྲས། །མཐའ་དང་ཚད་དུ་གཞལ་དཀའི་མ་གྱུར་འགྲོ། །འཁོར་བའི་མཚོ་ལས་སྒྲོལ་བའི་གྲུ་བོ་ཆེ། །སྟོབས་བཅུ་མངའ་བའི་གོ་འཕང་མྱུར་ཐོབ་ནས། །ངེས་ལེགས་རིན་ཆེན་གླིང་དུ་འཁྲིད་བྱིན་རློབས། །བསིལ་ལྡན་སྐྱེ་རྒུའི་ཕན་བདེའི་རྩ་ལག་གཞི། །བློ་བཟང་སྙན་པའི་གྲགས་འབར་ཆོས་སྲིད་ཀྱི། །བསྟན་པའི་ཉི་མ་འཇིག་རྟེན་གསུམ་གྱི་མཁར། །རྟག་ཏུ་འཆར་བའི་འོད་སྣང་འབར་བར་ཤོག །ཅེས་མེ་སྦྲུལ་སྣོན་ཟླའི་བཟང་པོའི་ཚེས་ལ་ཇོ་བོ་ཤཱཀྱ་མུ་ནེའི་ན་བཟའ་བུམ་གདན་མ་ཕུལ་བའི་ཁ་བྱང་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གྲོང་སྨད་པ་སངས་རྒྱས་རྒྱ་མཚོའོ། །བསླུ་མེད་དཀོན་མཆོག་རིན་ཆེན་ཐུགས་རྗེ་དང༌། །མི་ཕྱེད་དད་པའི་རྟེན་ཅིང་འབྲེལ་འབྱུང་མཐུས། །ནམ་མཁའི་མཐའ་ཁྱབ་འགྲོ་བ་འདྲེན་པ་ལ། །རྣམ་པ་རབ་བཀྲ་རྟག་ཏུ་ཤིས་པར་ཤོག །ཡང་སྲིད་ཕྱི་མར་འདྲེན་བྱེད་སྤྱོད་ཡུལ་དུ། །བཤེས་གཉེན་དམ་པས་མངོན་སུམ་ཉེར་བལྟ་བར། །ལེགས་སྨིན་ས་བོན་ཡོངས་དུད་ཨ་མྲའི་ཤིང༌། །རེ་བའི་འབྲས་བུ་རོ་བརྒྱའི་དཔལ་ལྡན་ཤོག །ཅེས་པ་འདིའང་བྱ་ལུང་བླ་མ་ནམ་མཁའ་བཀྲ་ཤིས་ཀྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །(༢༠༨ན)
དྲྀ ཥྟེ ན ཀཱུ ལཱ སུ ནི མི ཏྟ བ ཌཱོ ཌ ཤྱཻ ཪྻུ བཱ ངྴེ ཥུ སུ པཱུ རྞ ཛཿ མཐོང་ན་མི་མཐུན་མེད་པའི་མཚན་བཟང་ཅན། །བཅུ་དྲུག་ལང་ཚོའི་ཆ་ཤས་གང་བའི་གཟིས། །ནོ མྲྀ ཏྱ བཱ ལཱ ཧི ག །ཎི ཀྱ ན ཀྟ ཏྲ སྱཱ བྷི བྷཱུ ཡཱ ཛ ཡ མཱ ཏ རཱ ཪྻེ། འཆི་མེད་ལུས་ཕྲ་རྒྱུ་སྐར་ཚོགས་ཀྱི་ཟིལ། །གནོན་མཛད་རྒྱལ་བ་ཀུན་ཡུམ་འཕགས་མ་ཀྱེ། །བསྐལ་མང་ཐིབས་པོར་སྤུངས་པ་མུན་པའི་སྨག །ཉི་མའི་དཀྱིལ་འཁོར་གཅིག་ཤར་སངས་པ་བཞིན། །སྒྲིབ་གཉིས་དེས་བསྐྱེད་སྲིད་ཞིའི་སྡུག་བསྔལ་རྣམས། །བཅོམ་ལྡན་འདས་མའི་ཐུགས་རྗེས་གཞིལ་བར་མཛོད། །འདོད་ཞེན་ཉེར་འཇུངས་ང་རྒྱལ་ཞེ་སྡང་བ། །ཕྲག་དོག་ལྟ་ངན་ཐེ་ཚོམ་ཉེས་ཀུན་གཞི། །གཏི་མུག་འཇིགས་ཆེན་བརྒྱད་ཀྱིས་འཁོར་བའི་མཚོར། །འཕྱན་ལས་མྱུར་དུ་སྒྲོལ་ཞིག་རྗེ་བཙུན་མ། །མཐོ་རིས་ཡོན་ཏན་བཅུན་ཚང་རྟེན་བཟང་པོ། །ཆད་མེད་ལེགས་ཐོབ་བདེ་ལྡན་དག་ཞིང་དུ། །(༢༠༨བ)
གར་དབང་འོད་མཐའ་ཡས་པས་རྗེས་བཟུང་ཏེ། །དོན་གཉིས་ལྷུན་གྱིས་གྲུབ་པར་བདག་བྱིན་རློབས། །སྣང་བརྙན་འདི་སྒྲུབ་བྱེད་པོར་གཏོགས་སོ་ཅོག །དཔལ་མོ་ཁྱོད་ཞབས་དྲན་པའི་མོད་ཉིད་ལ། །འཁོར་འདས་འཇིགས་ཀུན་མིང་ཡང་མི་གྲག་པར། །སྲིད་དང་ཞི་བའི་ཕུན་ཚོགས་སླར་འཕེལ་ཤོག །ཅེས་མེ་སྦྲུལ་སྣོན་གྱི་ཟླ་བར་རྗེ་བཙུན་སེང་ལྡེང་ནགས་ཀྱི་སྒྲོལ་མའི་སྐུ་བརྙན་དད་རྟེན་དུ་རི་མོ་བ་དབུ་མཛད་རག་ཁ་ཨ་བར་དང༌། དགོས་བསམ་གཉིས་ཀྱིས་བཟབས་བྲིས་སུ་བྱས་པའི་ཚེ་རྒྱབ་ཡིག་གི་སྨོན་ལམ་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པས་བགྱིས་པ་སརྦྦཱརྠནིརཱབྷོགབྷཝནྟུ། །ཀྱེ་མ་སྲོག་གཅོད་སྤངས་པའི་རྣམ་པར་སྨིན། །གཅིག་ཏུ་དཀར་པོར་འཛག་པ་མུ་ཐི་ལ། །ཚེ་ཡི་གཡུང་དྲུང་ཉ་ཕྱིས་ཁོག་ཡངས་པོར། །ལེགས་འཁྱིལ་རྟེན་ཅིང་འབྲེལ་འབྱུང་སླུ་མེད་ཤོག །ལུས་ངག་ཡིད་གསུམ་བག་ཡོད་ར་བ་རུ། །ཉེར་བཅུག་བསོད་ནམས་དར་དྲགས་ས་སྲུང་དབང༌། །བློ་མིག་སྟོང་ལྡན་ཐུབ་བསྟན་ཆོས་བཟང་གི །རིན་ཆེན་ཁྲི་ལ་རྟག་ཏུ་འགྱིང་བར་ཤོག །རྒྱ་ཆེའི་གཙུག་ལག་རྒྱུད་མང་གླུར་འདྲེན་པ། །མཚོ་བྱུང་མགྲིན་ཆགས་འཆད་རྩོད་རྩོམ་པ་ལ། །འཇིགས་པ་མེད་པར་རྣམ་དཔྱོད་ཡངས་པའི་གོ །དཀར་ཆའི་ཟླ་བ་ལྟར་འཕེལ་བརྟན་པར་ཤོག །བདུད་བཞི་ཉེར་ཐུབ་ཤཱཀྱ་སེང་གེའི་བསྟན། །ཐོས་བསམས་རབ་བསྒོམས་ལང་ཚོ་རྒྱས་པའི་སྡེ། །ཁྲིམས་ལྡན་འདུས་པའི་ཚོགས་ཀྱིས་རྩེ་གཅིག་ཏུ། །སྨོན་པའི་འབྲས་བུ་ཡོངས་སུ་སྨིན་པར་ཤོག །རྒྱལ་(༢༠༩ན)
སྲས་ཉན་རང་གཙང་རིས་མགོན་རྣམས་ཀྱི། །བདེན་ཚིག་མཐུ་ཡིས་ཀུན་མཁྱེན་ཙོང་ཁ་པའི། །བསྟན་པ་གདུགས་དཀར་གྲིབ་མར་འཇིག་རྟེན་གསུམ། །བདེ་བའི་སྟེགས་ལ་དགའ་སྐྱིད་ངལ་གསོར་ཤོག །ཅེས་རྟེན་འབྱུང་གི་ཚིགས་བཅད་འདི་ནི་ཤར་ཕྱོགས་བསྟན་པའི་སྒྲོན་མེ་དྭགས་གྲ་ཚང་བླ་སྤྱི་ཐུན་མོང་ནས་དོན་གཉེར་ཆེན་པོས་དགོས་ཚུལ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སྟོན་མཚན་ཟླ་བས་བསྒྲུན་མིན་བཞིན་རས་ཀྱི། །དཀྱུས་རིང་སྤྱན་རས་གཟིགས་པའི་མོད་ཉིད་ལ། །འཆི་བའི་དངོས་ཀུན་འཇོམས་པ་འཕགས་མའི་ཞབས། །ཡིད་བཞིན་འཁོར་ལོས་ཕུན་ཚོགས་དགའ་སྟོན་སྩོལ། །རྒྱལ་དབང་བློ་བཟང་གྲགས་པའི་བསྟན་སྲིད་རྒྱུན། །མི་འཛད་མཆོད་སྦྱིན་སྒོ་བརྒྱ་འབྱེད་མཁས་པ། །ས་སྤྱོད་ཁྲིམས་གཉིས་སྲོང་བའི་འགྱུར་མེད་ཁྲིར། །གཡུང་དྲུང་ལྟ་བུར་ཞབས་ཟུང་རྟག་བརྟན་ཤོག །རྣམ་དག་བརྗོད་པའི་བདེན་ཚིག་ཁུག་པ་ལ། །མཆོག་གསུམ་ཐུགས་རྗེའི་ལྕགས་ཀྱུ་ཡོངས་བཏབ་པས། །སུམ་རྩེན་སར་སྙེག་རིང་འཚོའི་སྐུ་ཚེ་ཡི། །སྐལ་པ་འཇིག་རྟེན་མེས་པོ་དང་མཉམ་ཤོག །ཅེས་ས་སྐྱོང་བློ་བཟང་སྦྱིན་པའི་བརྟན་བཞུགས་འདི་ཤར་ཕྱོགས་དྭགས་གྲ་ཚང་བླ་སྤྱིས་བསྐུལ་བ་ལྟར་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །འཇམ་དབྱངས་དགའ་བའི་བཤེས་གཉེན་ངག་གི་དབང༌། །བློ་བཟང་གྲགས་སྙན་རབ་འབར་བསྟན་པ་ཡི། །རྒྱ་མཚོའི་གོས་ཅན་ཀུན་བཟོད་ཡངས་(༢༠༩བ)
པའི་མཐའ། །འཆིང་མཛད་རྗེ་བཙུན་བླ་མར་གསོལ་བ་འདེབས། །ཆུ་སྲིན་རྒྱལ་མཚན་དཔུང་ལ་འཇིགས་མེད་པ། །འགྲོ་ལ་རྗེས་ཆགས་བྱམས་བརྩེའི་གོ་ཆ་ཡིས། །ཐུབ་བསྟན་ལང་ཚོ་རྒྱས་པའི་དཔྱོད་ལྡན་སྡེ། །མཚུངས་བྲལ་ཡོངས་འཛིན་མཆོག་ལ་གསོལ་བ་འདེབས། །འཇམ་མཉེན་པདྨ་ཟླ་བ་ཉ་གང་སྟེང༌། །ཚེ་མཐའ་ཡས་པའི་སྐུར་གསལ་ཚངས་དབྱངས་སྒྲས། །གདུལ་བྱར་དགའ་སྟོན་སྤེལ་བའི་མ་འདྲིས་བཤེས། །སྐྱེ་རྒུའི་དཔུང་གཉེན་བསྐལ་བརྒྱར་མི་གཡོ་ཤོག །ངག་དབང་མཁྱེན་པའི་འོད་ཀྱིས་བློ་མུན་མཐར། །ཉེར་བསྐྲད་དོན་བཟང་རྒྱ་ཆེའི་རྗོད་བྱེད་གཞུང༌། །མཚོ་ལྟར་གཏིང་དཔག་དཀའ་ལ་འཇིགས་མེད་མགོན། །རྡོ་རྗེའི་ཁྲི་ལ་འགྱུར་བ་མེད་པར་ཤོག །གཞན་ཟེར་ཚིག་རྗེས་མི་འབྲང་གྲུབ་མཐའ་བཞིའི། །བཞེད་སྲོལ་གོ་རིམ་མ་འཁྲུགས་ཆ་རྫོགས་པས། །ཐུབ་དབང་བསྟན་པའི་སྙིང་པོ་ཐོས་བསམ་སྒོམ། །སྤེལ་ཕྱིར་འོག་མིན་མགོན་ལྟར་བརྟན་པར་ཤོག །ལང་ལོང་གཡོ་བའི་སྤྲིན་དབུས་དབྱར་རྔའི་སྒྲས། །རྨ་བྱ་མངལ་ཁུར་འཛིན་ཚོའི་དགའ་བསྐྱིད་ན། །སཱ་ལའི་སྨན་ལྗོངས་སྡེ་བཞིའི་སྒོ་འཕར་བརྒྱ། །འབྱེད་ཆེད་གསོལ་བཏབ་རེ་བ་འབྲས་ལྡན་ཤོག །བགྲང་རིང་བགྲོད་དཀའི་སྐྱེ་བ་ཐམས་ཅད་དུ། །མགོན་པོ་ཁྱོད་ཀྱིས་ཉེར་བསྟན་དམ་པའི་ཆོས། །ཟབ་རྒྱས་ཉམས་སུ་བསྟར་བས་གནས་སྐབས་དང༌། །མཐར་ཐུག་དོན་ཀུན་ལྷུན་གྱིས་གྲུབ་པར་ཤོག །ཁྱད་པར་ཁྲག་འཐུང་རྡོ་རྗེ་གཞོན་ནུ་ཡིས། །རྗེས་བཟུང་འཕྲིན་ལས་ཕུར་པའི་རིགས་འཛིན་དུ། །གྱུར་ནས་བདུད་སྡེའི་གཡུལ་ལས་རབ་རྒྱས་ཞིང༌། །རང་(༢༡༠ན)
རིག་དཔལ་ཆེན་རང་ངོ་མྱུར་འཕྲོད་ཤོག །མདོར་ན་དུས་གསུམ་བསགས་པའི་ལེགས་བྱས་མཐུས། །འབྲས་བུ་རོ་བརྒྱ་བདའ་བར་མཁའ་མཉམ་གྱི། །མ་གྱུར་འགྲོ་དང་ལྷན་ཅིག་ལོངས་སྤྱོད་པར། །ཀུན་ཏུ་བཟང་པོའི་སྨོན་ལམ་ཇི་བཞིན་བསྔོ། །ཞེས་པ་འདིའང་བྱ་རིགས་རྣམ་སྣང་གི་བཙུན་པ་རྣམ་གླིང་ཆོས་མཛད་ངག་དབང་བློ་གསལ་གྱིས་བསྐུལ་བའི་ངོར་ཟ་ཧོར་གྱི་ཡི་གེ་པ་ནི་གནས་བརྟན་འཇམ་གྲགས་པའོ། །ཕུན་ཚོགས་ངོ་མཚར་རྨད་བྱུང་བཀོད་པར་དེང༌། །སེང་གེའི་ང་རོར་བསྟན་ཀྱང་ཐུགས་རྗེའི་ཉི། །འཇིག་རྟེན་གསུམ་མཁར་འཆར་ནུབ་ཉེར་སྤངས་པ། །ཀུན་མཁྱེན་ཙོང་ཁ་པ་དེས་དགེ་ལེགས་སྩོལ། །མགོན་དེའི་བཤད་སྒྲུབ་བསྟན་ལ་ངག་གི་དབང༌། །བློ་གྲོས་ལང་ཚོ་རྒྱས་པའི་སྐལ་བཟང་ཅན། །གཙུག་ལག་རྒྱ་མཚོར་ལྟ་བའི་མིག་ཡངས་པ། །རིས་བྲལ་སྐྱེ་རྒུའི་གཉེན་དུ་མི་གཡོ་ཤོག །ངག་གི་དབང་ཕྱུག་དཀོན་མཆོག་རྣམ་གསུམ་དང༌། །དབྱེར་མེད་བསྟན་པའི་ཉི་མ་ཡོངས་འདུའི་ལྗོན། །བསྐལ་བརྒྱར་ཞབས་བརྟན་རིབ་མར་གདུལ་བྱ་རྣམས། །ངལ་གསོས་བདེ་སྐྱིད་དགའ་སྟོན་མྱོང་ཐོབ་ཤོག །གངས་ཅན་ར་བས་ཡོངས་བསྐོར་སྟོད་སྨད་ཀྱི། །རིགས་ལམ་སྨྲ་བ་གཞན་གྱིས་ཟླ་བྲལ་བ། །ཆོས་གྲགས་རིང་ལུགས་སྣང་བ་འོད་པོ་ཆེས། །ཀུན་ཁྱབ་འདུས་སྡེ་རྟག་ཏུ་དར་བར་ཤོག །རྒྱ་ཆེན་སྤྱོད་དང་ཟབ་མོ་ལྟ་བ་ཡི། །དངོས་བརྒྱུད་བླ་མ་ཡི་དམ་སྲུང་མར་བཅས། །བདེན་ཚིག་གྲུབ་པ་རྣམས་ཀྱི་ནུས་པའི་མཐུས། །སྨོན་ལམ་ཅི་བཏབ་རེ་འབྲས་འགྲུབ་པར་ཤོག །འདི་ལྟ་བུ་ཞིག་དགོས་ཞེས་འཕྱོས་པ་སྐུ་སྐྱེ་བསྟན་འཛིན་རྒྱ་མཚོས་བསྐུལ་བའི་ངོར་(༢༡༠བ)
ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །འཇམ་དཔལ་རྡོ་རྗེ་ཙོང་ཁ་པའི། །སྣང་བརྙན་ལྷག་པའི་བསམ་པ་ཡིས། །ལེགས་བསྐྲུན་དགེ་བས་ཚེ་རབས་སུ། །རྗེས་བཟུང་དམ་ཆོས་འཛིན་པར་ཤོག །མོས་ངོར་གདན་གསུམ་ཡོངས་ཚང་བ། །ངག་དབང་བློ་བཟང་རྒྱ་མཚོའི་སྡེས། །སྐྱེ་བ་ཀུན་ཏུ་བཤེས་མཛད་ནས། །རང་རྒྱུད་སྨིན་ཅིང་གྲོལ་བར་ཤོག །ཅེས་རབ་འབྱམས་པ་བློ་བཟང་སྐྱེས་མཆོག་གིས་དད་རྟེན་བཞེངས་པའི་ཁ་བྱང་དགོས་ཚུལ་བཞིན་ཟ་ཧོར་གྱི་བནྡེས་བཀོད། །