ཉང་ལུགས་དྲག་པོ་བདེ་གཤེགས་འདུས་པའི་རྒྱུན་ཁྱེར་རིགས་འཛིན་བརྒྱུད་པའི་ཞལ་ལུང་།
ཉང་ལུགས་དྲག་པོ་བདེ་གཤེགས་འདུས་པའི་རྒྱུན་ཁྱེར་རིགས་འཛིན་བརྒྱུད་པའི་ཞལ་ལུང་བཞུགས་སོ། །
སངས་རྒྱས་ཀུན་འདུས་པདྨ་ཐོད་ཕྲེང་གི །ཐུགས་སྒྲུབ་ཟབ་པའི་མཐར་ཐུག་མངའ་བདག་གཏེར། །ཤིན་ཏུ་ཁྱེར་བདེའི་རྣལ་འབྱོར་ཉུང་ངུའི་ཚིག །འདྲི་བར་མཁའ་འགྲོ་གཏེར་སྲུང་གནང་བ་སྩོལ། །སྐྱབས་སེམས་ནི། བརྒྱུད་པའི་རྩ་བ་བླ་མ་རྗེ༔ དངོས་གྲུབ་འབྱུང་བའི་ཡི་དམ་ལྷ༔ ལེགས་པར་བྱིན་བརླབ་མཁའ་འགྲོའི་ཚོགས༔ རྩ་བ་གསུམ་ལ་སྐྱབས་སུ་མཆི༔ བདག་གཞན་གཉིས་མེད་དོན་ཕྱིར་དུ༔ དྲག་པོ་ཁྲོ་རྒྱལ་ཀུན་བསྒྲུབས་ནས༔ སྙིང་པོ་བླ་མེད་མཆིས་པ་དང་། །གཞན་དོན་དབྱེར་མེད་སེམས་བསྐྱེད་དོ༔ ཚོགས་ཞིང་ནི། དབང་དྲག་པདྨའི་ལྷ་ཚོགས་སྤྱན་འདྲེན་གཤེགས། །ཉི་ཟླ་པདྨའི་གདན་ལ་བཞུགས་སུ་གསོལ། །གུས་པས་ཕྱག་འཚལ་ཕྱི་ནང་གསང་མཆོད་འབུལ། །ཉེས་བཤགས་དུག་གསུམ་འདུལ་ལ་རྗེས་ཡི་རང་། །མྱ་ངན་མི་འདའ་ཆོས་འཁོར་བསྐོར་བར་བསྐུལ། །དགེ་བ་འདི་ཡིས་བྱང་ཆུབ་མཆོག་ཐོབ་ཤོག །དངོས་གཞི་ནི། ལྷ་ཚོགས་ཐིམ་པས་རང་ལུས་འོད་དུ་ཞུ། །རང་སེམས་ཧཱུཾ་ལས་འོད་དམར་དཔག་མེད་སྤྲོས། །སེམས་ཅན་ལ་ཕོག་བདེ་གཤེགས་མཆོད་པས་མཉེས། །དཔའ་བོ་མཁའ་འགྲོ་ཆོས་སྐྱོང་སྲུང་མ་བསྐུལ། །ཚུར་འདུས་གཟི་(༢ན)
ལྡན་མཚོན་ཆའི་ཚོགས་སྤྲོས་པས། །གདོན་བགེགས་ཚར་བཅད་དྲེགས་ལས་ལ་བཀོལ། །སླར་འདུས་རཾ་འཕྲོས་དུར་ཁྲོད་འབར་བའི་དབུས། །ཀེཾ་ལས་ཐོད་མཁར་ཟླུམ་དབུས་པད་ཟླའི་གདན། །དེ་སྟེང་ཧཱུཾ་ལས་ས་བོན་རིམ་འཕྲོས་པས། །འབྱུང་བཞི་རིམ་བརྩེགས་ཀེཾ་རུས་རི་རབ་སྟེང་། །ཐོད་པ་སྐམ་རློན་ལས་གྲུབ་གཞལ་ཡས་ཁང་། །གྲུ་བཞི་སྒོ་བཞི་དུར་ཁྲོད་རྒྱན་གྱིས་བརྗིད། །སླར་ཡང་འོད་ཟེར་སེར་དམར་ཚོགས་འཕྲོས་པས། །གསེར་མེའི་འཁོར་ལོ་གཡས་གཡོན་དྲག་ཏུ་འཁོར། །དབལ་ལས་ལྕགས་བསྲེགས་སྡིག་པའི་ཚ་ཚ་འཕྲོ། །ཕྱི་རོལ་རྡོ་རྗེའི་གུར་ཁང་མེ་དཔུང་དང་། །ཁྱུང་དམར་ཁྲོ་བོ་བུ་ཡུག་ལྟ་བུར་འཚུབ། །གཞལ་ཡས་དབུས་སུ་པཾ་ལས་པདྨ་དང་། །ཨ་ལས་ཟླ་བ་མ་ལས་ཉི་དཀྱིལ་སྟེང་། །རང་རིག་ཧཱུཾ་དམར་འོད་དུ་ཞུ་བ་ལས། །བདེ་གཤེགས་འདུས་པ་པདྨ་དྲག་པོ་དམར། །ཞལ་བགྲད་མཆེ་གཙིགས་སྤྱན་གསུམ་སྡང་མིག་གཟིགས། །དབུ་སྐྲ་ཕྱེད་བརྫེས་ཐོད་སྐམ་ལྔ་ཡིས་བརྒྱན། །ཨག་ཚོམ་དམར་སེར་ཕྱག་གཡས་རྩེ་དགུ་པའི། །གསེར་རྡོར་ཧཱུཾ་རཾ་དགུས་མཚན་མེ་འབར་འཕྱར། །གཡོན་པ་སྡིགས་མཛུབ་རྩེ་ལས་ལྕགས་སྲེགས་ཀྱི། །འཇིགས་རུང་སྡིག་པ་ཁ་དགུ་མིག་(༢བ)
དགུ་འགྱེད། །སྟག་ཤམ་ཞིང་ལྤགས་རྐེད་བཅིངས་གླང་ལྤགས་ཀྱིས། །སྟོད་གཡོགས་རིགས་བཞིའི་ཀླུ་ཡིས་ཡན་ལག་དཀྲིས། །བྱུག་པའི་རྫས་གསུམ་རིན་ཅེན་རུས་པ་དང་། །ཐོད་རློན་ལྔ་བཅུའི་རྒྱན་གྱིས་རབ་ཏུ་སྤྲས། །བརྗིད་གཏུམ་རྔམ་ཁྲོ་ཁམས་གསུམ་དབང་དུ་སྡུད། །སྲིད་གསུམ་ཟིལ་གནོན་གཡས་བསྐུམ་གཡོན་བརྐྱང་གིས། །དྲེགས་པའི་སྟེང་བཞུགས་བ་སྤུའི་བུ་ག་ནས། །གསེར་རྡོར་ར་དབར་ཚ་ཚ་ཆིལ་ཆིལ་ཁོལ། །དུང་ཁང་སེར་པོ་གཡས་རལ་གྲི་དང་གཡོན་སྡིགས་མཛུབ། འཇམ་དཔལ་མགྲིན་པར་རྟ་དམར་པོ་གཡས་དབྱུག་པ་དང་གཡོན་སྡིགས་མཛུབ། མགྲིན་དབང་། །ཐུགས་ཀར་ཕྱག་མཐིང་ནག་གཡས་གསེར་རྡོར་གཡོན་སྡིགས་མཛུབ། རྡོར་ལྟེ་བར་མཁའ་འགྲོ་དམར་མོ་གཡས་གྲི་གུག །གཡོན་ཐོད་ཁྲག་ཁ་ཊྭཱཾ་ག །འཁོར་རྣམས་རིགས་བཞིའི་ཚུལ། ལྔ། །སྤྱིར་བོར་བྱ་ཁྱུང་མཐིང་ནག་སྦྲུལ་འཛིན་པ་རྭ་ཕྲག་རིགས་ཀྱི་སྣང་བ་མཐའ་ཡས་སྤྲུལ་སྐུའི་ཆ་བྱད་ཅན། བདག །གསེར་འཁོར་རྩིབས་ལ་གཏུམ་མཐིང་ནག་གཡས་ཐོ་བ་དང་གཡོན་ལྕགས་ཀྱུ་འཛིན་པ། ཆེན་ཁྲོ་བོ་བཅུ། །བསྲུང་དང་བཟློག་པ་གོ་བགོའི་འཕྲིན་ལས་མཛད། །ཐུགས་ཀའི་ཧཱུཾ་ལས་འོད་འཕྲོས་ལྷ་ཚོགས་རྣམས། །ཐོགས་མེད་བྱོན་ནས་དམ་ཚིག་པ་ལ་ཐིམ། །ས་བོན་སྔགས་འཕྲེང་བ་སྤུའི་བུ་ག་ནས། །མེ་དབལ་སྤྲོས་པས་ཕྱི་ནང་སྟེང་འོག་ཁྱབ། །གནོད་བྱེད་གདོན་བགེགས་ཐལ་བའི་རྡུལ་དུ་བརླག །བསྲུང་དང་བཟློག་པའི་འཕྲིན་ལས་མ་ལུས་མཛད། །གོ་ཆའི་ལྷ་ལས་འོད་འཕྲོས་སྡིག་སྒྲིབ་བསྲེག །སྒོ་གསུམ་བདེ་ལྡན་ཆེ་བཙན་འགྲན་ཟླ་བྲལ། །པུ་རིའི་ནང་གི་གསང་བདག་ཐུགས་ཀ་རུ། །ཉི་མའི་གདན་ལ་ཧཱུཾ་མཐར་སྔགས་ཀྱི་ཕྲེང་། །མགལ་མེ་ལྟ་བུར་འཁོར་ལས་འོད་འཕྲོས་པས། །འཕྲིན་ལས་མཐའ་དག་ལྷུན་གྱིས་གྲུབ་པར་གྱུར། །གཏོར་མ་འབུལ་བ་ནི། རཾ་ཡཾ་(༣ན)
ཁཾ། ཨོཾ་ཨཱཿཧཱུཾ་མཧཱ་བྷ་ལིཾ་ཏ། ཏེ་ཛོ་བྷ་ལིཾ་ཏ། བྷ་ལ་བྷ་ཏེ། གྷུ་ཧྱ་ས་མ་ཡེ་སྭཱཧཱ། ཞེས་ལན་གསུམ་གྱིས་བྱིན་གྱིས་བརླབ་པོ། །དུར་ཁྲོད་མེ་རི་འབར་བའི་ཀློང་དཀྱིལ་ནས། །པདྨ་ཐོད་འཕྲེང་འཁོར་བཅས་འདིར་གཤེགས་བཞུགས། །དགྲ་བགེགས་བསྒྲལ་བའི་ཤ་ཁྲག་རུས་པའི་ཚོགས། །འབུལ་གྱིས་མཆོག་ཐུན་དངོས་གྲུབ་སྩལ་དུ་གསོལ། །ཨོཾ་ཨཱཿཧཱུཾ་མཧཱ་མཾ་ས་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་བྷ་སུ་ཏ་ཁཱ་ཧི། དབང་པོ་ལྔ་ཁཱ་ཧི། གོ་རོ་ཙ་ན་ཁཱ་ཧི། ཞེས་འབུལ། བསྟོད་ཅིང་འཕྲིན་ལས་གསོལ་བ་ནི། སྣང་བ་མཐའ་ཡས་སྐུ་གསུང་ཐུགས་ཀྱི་སྤྲུལ། །མཐུ་སྟོབས་དབང་ཕྱུག་པདྨ་དྲག་པོ་རྩལ། །སྣ་ཚོགས་སྤྲུལ་པ་འཇིགས་བྱེད་ཁྲོ་བཅུར་བཅས། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །བདག་ཅག་བླ་མེད་བྱང་ཆུབ་བསྒྲུབ་པ་ལ། །བར་དུ་གཅོད་པའི་དགྲ་བགེགས་འབྱུང་པོ་ཀུན། །གཏུམ་ཆེན་ཁྱོད་ཀྱིས་ཞལ་དུ་རབ་བཞེས་ནས། །དྲག་པོའི་ལས་ཀྱིས་འདུལ་བའི་འཕྲིན་ལས་མཛོད། །ཐུན་བར་དུ་གསོལ་བ་འདེབས་པ་ནི་ཚིག་བདུན་གསོལ་འདེབས་ལྟ་བུས་ཀྱང་འཐུས། །བཀའ་སྐྱོང་གཏེར་སྲུང་མཆོད་པ་ནི། དབང་དྲག་པདྨའི་བཀའ་སྲུང་མཐུ་རྩལ་ཅན། །མཧཱ་ཀཱ་ལ་ལྷ་མོ་རེ་མ་ཏཱི། །སྡེ་བརྒྱད་དྲེགས་པའི་འཁོར་གྱིས་བསྐོར་བ་དང་། །ལེགས་རྩལ་སྤུན་གསུམ་འདིར་སྤྱོན་གདན་ལ་བཞུགས། །ཨོཾ་བཛྲ་མཧཱ་ཀཱ་ལ། བཛྲ་རེ་མ་ཏཱི། ཨ་ཡ་མ་དུ་རུ་ཙ་ཤ་ན། ཨོཾ་བདུད་ཏྲི་ས་མ་ཡ། ཨོཾ་ཤུ་ལ་རཱ་ཛ། ཨོཾ་ནཱ་ག་རཱ་ཛ་ས་པ་རི་ཝཱ་ར་མཧཱ་བྷ་ལིཾ་ཏ། མཧཱ་པཉྩ། མཧཱ་རཀྟ་ཁ་རཾ་ཁཱ་ཧི། ཞེས་པས་འབུལ། བཀའ་སྐྱོང་གཏེར་གྱི་སྲུང་མ་འཁོར་བཅས་ཀྱིས། །དམ་རྫས་གཏོར་མ་འདི་ལོང་རིགས་འཛིན་བདག །པདྨ་དྲག་པོའི་ཐུགས་སྒྲུབ་ཉམས་ལེན་པའི། །འགལ་རྐྱེན་(༣བ)
ཞི་ཞིང་མཐུན་རྐྱེན་སྒྲུབ་པར་མཛོད། །ཅེས་འཕྲིན་ལས་བཅོལ། བཛྲ་མུཿ ས་རང་གནས་སུ་གཤེགས། །རྫོགས་རིམ་འོད་གསལ་དུ་བསྡུས། སླར་ཡང་ལྷའི་ང་རྒྱལ་ལ་གནས་པས་བསྔོ་བ་སྨོན་ལམ་ཤིས་བརྗོད་ཅི་རིགས་པ་བྱའོ། །མངའ་བདག་གཏེར་བྱོན་བདེ་གཤེགས་འདུས་པ་ཡི། །རྒྱུན་ཁྱེར་རིགས་འཛིན་བརྒྱུད་པའི་ཞལ་ལུང་བཞིན། །མཁའ་འགྲོའི་ཁ་རླངས་མ་ཉམས་བཀོད་པ་ལས། །གཏེར་ཁ་གཞན་དང་གསར་མའི་བསྲེ་བསླད་མེད། །གང་འདི་རིགས་བརྒྱའི་ཁྱབ་བདག་ཞ་ལུ་པ། །རིན་ཅེན་བསོད་ནམས་མཆོག་གྲུབ་དཔལ་བཟང་པོའི། །ཐུགས་དམ་སྤེལ་སླད་ཟ་ཧོར་སྔག་སྨྱོན་གྱིས། །བཀོད་པའི་ཡིག་མཁན་གནས་བཙུན་འཇམ་དབྱངས་སོ། །