བྱང་གཏེར་ཐུགས་སྒྲུབ་འབྲིང་པོའི་འཕྲིན་ལས་རིན་ཅེན་འཕྲེང་བ།
བྱང་གཏེར་ཐུགས་སྒྲུབ་འབྲིང་པོའི་འཕྲིན་ལས་རིན་ཅེན་འཕྲེང་བ་ཞེས་བྱ་བ་བཞུགས་སོ། །
གུ་རུ་པདྨ་སིདྡྷི་ཧཱུཾ་ཧྲཱིཿ བྷོ་ཊ་དེ་ཤེ་སརྦ་སུ་ཁ་ཤརྨ་པྲ་ཡཙྪ། མཁྱེན་བརྩེ་ནུས་པའི་འཕྲིན་ལས་མཁའ་མཉམ་འགྲོར། །ཆད་མེད་འཇུག་ཀྱང་ཁྱད་པར་གངས་ཅན་འདིར། །ཐུགས་རྗེའི་མཐུ་དཔུང་དུས་གསུམ་རྒྱལ་གཞན་གྱིས། །སྒྲུན་མིན་པདྨཱ་ཀཱ་རས་རྟག་ཏུ་སྐྱོངས། །སིནྡྷུ་རྒྱ་མཚོར་འདབ་སྟོང་ཀེ་ས་རར། །རྫུས་སྐྱེས་མཚན་དཔེའི་གཟི་འབར་སྤྲུལ་པའི་སྐུ། །རྒྱ་གར་པཎ་ཆེན་ཚུལ་གྱིས་འཛམ་གླིང་ན། །བརྟུལ་ཞུགས་ཆེ་བའི་རིག་སྔགས་འཆང་དེ་རྒྱལ། །སྲིད་གསུམ་དྲེགས་པ་ཡོངས་ཀྱི་གཤེད་མ་རུ། །སྒྲུབ་པ་སྡེ་བརྒྱད་ལྷ་ཡི་ཚོགས་རྣམས་ཀུན། །ལུས་ཀྱི་དཀྱིལ་འཁོར་ལ་རྫོགས་དྲག་པོ་རྩལ། །རྩ་གསུམ་འདུས་པའི་བདག་ཉིད་ཁྱོད་ཁོ་ན། །རྩེ་གཅིག་ཉམས་སུ་བླངས་པས་བླ་མ་དང་། །ཡི་དམ་མཁའ་འགྲོ་ཆོས་སྲུང་ཡོངས་འགྲུབ་པ། །གསང་ཆེན་ཐེག་མཆོག་མན་ངག་བཅུད་ཕྱུང་བ། །པད་འབྱུང་དགོངས་པའི་བཞེད་ཕུགས་གཞན་དུ་མེད། །དེ་ཕྱིར་སྔོན་འགྲོ་གནད་ཀྱི་གཟེར་ལྔ་སོགས། །ལྷན་(༢ན)
ཐབས་འཕྲིན་ལས་འབྲིང་པོར་ཡོངས་བསྡེབས་པ། །རིན་ཅེན་འཕྲེང་བ་ཕྱག་བཞེས་འཁྲུལ་བྲལ་གྱི། །སྲད་བུར་བརྒྱུས་ནས་སྐལ་ལྡན་རྒྱན་དུ་སྤེལ། །དེ་ལ་འདིར་མཛོད་ལྔ་འདུས་པའི་ཟབ་གཏེར་གྱི་ནང་ཚན་ལྷོ་གསེར་མཛོད་སེར་པོ་ནས་གཏེར་ཆེན་ཆོས་ཀྱི་རྒྱལ་པོ་རིགས་འཛིན་རྒོད་ཀྱི་ལྡེམ་ཕྲུས་སྤྱན་དྲངས་པའི་ཐུགས་སྒྲུབ་དྲག་པོ་རྩལ་གྱི་འཕྲིན་ལས་འབྲིང་པོ་ལྷན་ཐབས་དང་སྦྱར་ཏེ་ཁྲིགས་ཆགས་སུ་བཀོད་པ་ལ། སྔོན་འགྲོ་རིན་ཅེན་གནད་ཀྱི་གཟེར་ལྔ་ནི། ན་མོ། ཀུན་བཟང་ཐུགས་ལ་ཕྱག་འཚལ་ལོ༔ དང་པོ་དད་ལྡན་སྐྱེས་བུ་རྣམས༔ འཁོར་བའི་ཆོས་ལ་སྐྱོ་བ་སྐྱེས༔ ཡང་དག་སྙིང་པོའི་དོན་འཚོལ་ན༔ ལེགས་པར་ངན་སོང་སྡུག་བསྔལ་བསམ༔ དབེན་པའི་གནས་སུ་ཡོ་བྱད་བསགས༔ བདེ་བའི་སྟན་ལ་འདུག་པར་བྱ༔ རིན་ཅེན་གནད་ཀྱི་གཟེར་ལྔ་བརྩིས༔ དང་པོ་སྐྱབས་འགྲོ་སེམས་བསྐྱེད་ནི༔ བདག་དང་ཁམས་གསུམ་སེམས་ཅན་ཀུན༔ ལོག་པའི་ལམ་ལས་ལྡོག་ནས་ཀྱང་༔ དཀོན་ཅོག་གསུམ་ལ་སྐྱབས་སུ་འགྲོ༔ ཉོན་མོངས་དབང་གྱུར་སྡུག་བསྔལ་(༢བ)
ལས༔ ཐར་བར་བྱ་ཕྱིར་སེམས་བསྐྱེད་དོ༔ བདག་གི་སྤྱི་བོར་ནམ་མཁའི་ཁམས༔ ཉི་ཟླ་པདྨའི་གདན་སྟེང་དུ༔ བླ་མ་བཀྲག་དང་གཟི་མདངས་ལྡན༔ མཛེས་པའི་ན་བཟའ་སྐུ་ལ་གསོལ༔ ཞལ་འཛུམ་མདངས་དང་ལྡན་པར་བསམ༔ ཤར་ཕྱོགས་མདུན་གྱི་ནམ་མཁའ་ལ༔ ཤཱཀྱ་སེང་གེ་ལ་སོགས་པའི༔ ཡི་དམ་ལྷ་ཚོགས་ཐམས་ཅད་ཀུན༔ ཁ་དོག་ལྔར་གསལ་རྣམ་དག་བསམ༔ ལྷོ་ཕྱོགས་བདེ་བར་གཤེགས་པའི་གསུང་༔ གླེགས་བམ་ཡི་གེའི་རྣམ་པ་ལ༔ དམ་ཆོས་མ་ལུས་འདུས་པར་བསམ༔ ནུབ་ཕྱོགས་བྱང་ཆུབ་སེམས་དཔའི་ཚོགས༔ རིགས་གསུམ་མགོན་པོ་བྱམས་པ་དང་༔ འགྲོ་དོན་མཛད་པ་ཐམས་ཅད་བསམ༔ བྱང་ཕྱོགས་དམ་ཆོས་སྐྱོང་བ་ཡི༔ ཆོས་སྐྱོང་མཁའ་འགྲོ་དམ་ཅན་རྣམས༔ བཀའ་ཉན་ལས་བྱེད་ཕོ་ཉར་བསམ༔ འོག་ཏུ་རིགས་དྲུག་སེམས་ཅན་རྣམས༔ སྙིང་རྗེའི་སེམས་ཀྱིས་ཀུན་བསྡུས་ནས༔ ལས་ལ་འགྱོད་པས་སེམས་བསྐྱེད་བསམ༔ རྩེ་གཅིག་གུས་པས་སྐྱབས་འགྲོ་བྱ༔ཀྱེ་མ། ཁམས་གསུམ་འཁོར་བར་འཁྱམས་པའི་སེམས་ཅན་ཀུན༔ བླ་མེད་དཀོན་ཅོག་གསུམ་ལ་སྐྱབས་སུ་མཆི༔ མ་རིག་མུན་པས་བསྒྲིབས་པའི་ལས་ངན་སྦྱངས༔ དག་པ་ཡེ་ཤེས་རང་གནས་བསྟན་དུ་གསོལ༔ བདག་དང་འགྲོ་དྲུག་སེམས་ཅན་ཐམས་ཅད་ལ༔ བྱང་ཆུབ་མ་ཐོབ་བར་དུ་ཐུགས་རྗེས་གཟིགས༔ ཡོན་ཏན་ཀུན་འབྱུང་དངོས་གྲུབ་མཆོག་གི་གནས༔ བླ་མ་རིན་པོ་ཆེ་ལ་སྐྱབས་སུ་མཆི༔ གང་ལ་གང་འདུལ་འགྲོ་བའི་དོན་མཛད་པའི༔ ཡི་དམ་ལྷ་ཚོགས་རྣམས་ལ༝༔ སངས་རྒྱས་གསུང་ལས་སྤྲུལ་(༣ན)
པའི་ཡི་གེར་བྱོན༔ ཉོན་མོངས་འཇོམས་བྱེད་ཆོས་ལ༝༔ ཐུགས་རྗེ་ཆེན་པོས་འགྲོ་དོན་སྟོབས་ཆེན་མཛད༔ བྱང་ཆུབ་སེམས་དཔའི་ཚོགས་ལ༝༔ གདུལ་བྱའི་དོན་དུ་དྲག་པོའི་སྐུར་སྟོན་པ༔ ཆོས་སྐྱོང་དམ་ཅན་རྣམས་ལ༝༔ ཡོན་ཏན་ཀུན་འབྱུང་མ་ནས་འདི་བར་ཚར་གསུམ། བདག་གིས་དུས་གསུམ་བསགས་པའི་དགེ་བ་ཡིས༔ འགྲོ་བ་མ་ལུས་བྱང་ཆུབ་མཆོག་ཐོབ་ཤོག༔ རང་བྱུང་རིག་པ་རང་ཤར་ཆོས་ཀྱི་སྐུ༔ ཡང་དག་སྙིང་པོ་མྱུར་དུ་རྟོགས་པར་ཤོག༔ བདག་ནི་དུས་འདི་ནས་བཟུང་ཚེ་རབས་སུ༔ འགྲོ་བ་འདྲེན་པའི་དེད་དཔོན་བྱེད་པར་ཤོག༔ ཚར་གསུམ། དབང་པོ་རབ་འབྲིང་ཐ་མ་ཡིས༔ ཞག་གསུམ་ལྔའམ་བདུན་གྱི་བར༔ རིམ་པར་སྐྱབས་འགྲོ་སེམས་བསྐྱེད་བྱ༔ གཉིས་པ་བདག་འཛིན་བཀྲོལ་བ་ནི༔ བསོད་ནམས་ཚོགས་གཉིས་བསག་པའི་ཕྱིར༔ ཟས་དང་ལོངས་སྤྱོད་ཅི་འབྱོར་པ༔ འཕངས་དང་སྙིང་བརྩེ་ཐམས་ཅད་ཀུན༔ བདེ་གཤེགས་མཆོད་ཅིང་སྦྱིན་པར་བཏང་༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ ཕྱི་ནང་གསང་བའི་མཎྜལ་འབུལ༔ ཞེས་གསུངས་པ་ལྟར། ཕྱིའི་མཎྜལ་ནི། ན་མོ། དབང་ཆེན་གཞལ་ཡས་དབུས་ཀྱི་ལྟེ་བ་ལ༔ རི་རྒྱལ་ལྷུན་པོ་བརྗིད་ཅིང་འགྱིང་བག་ལྡན༔ གསེར་གྱི་རི་བདུན་རོལ་བའི་མཚོ་བདུན་རྣམས༔ མཉེན་ལྕུག་སྲ་བརྟན་རིན་ཅེན་རྩིག་པར་གཏམས༔ གླིང་བཞི་གླིང་ཕྲན་བརྒྱད་ཀྱིས་ཕྱོགས་མཚམས་བསྐོར༔ ལྷ་དང་མི་ཡི་འདོད་ཡོན་རྒྱན་གྱིས་གང་༔ ཉི་ཟླའི་འོད་ཀྱིས་འཇིག་རྟེན་མུན་པ་སེལ༔ ལྕགས་རི་མུ་ཁྱུད་མཐའ་ནས་ལེགས་པར་བསྐོར༔ (༣བ)
ཕྱི་ལྟར་སྣོད་ཀྱི་འཇིག་རྟེན་སྣང་བ་འདི༔ བླ་མེད་དཀོན་ཅོག་གསུམ་ལ་གུས་པས་འབུལ༔ བདག་གཞན་བསོད་ནམས་ཡེ་ཤེས་ཚོགས་རྫོགས་ནས༔ ཡང་དག་སྙིང་པོ་མྱུར་དུ་རྟོགས་པར་ཤོག༔ ནང་གི་མཎྜལ་ནི༔ ན་མོ། འཇིག་རྟེན་ལས་ཀྱིས་འདུས་པའི་བར་དོ་རུ༔ བདག་ལུས་ཤིན་ཏུ་གཅེས་པར་བཟུང་བ་ཡི༔ ཡུལ་འཁོར་ལོངས་སྤྱོད་འདོད་པའི་ར་བར་བཅས༔ བྱམས་པའི་ཕ་མ་མཛའ་བའི་གྲོགས་དང་ནི༔ བུ་དང་བུ་མོ་གཅེས་པའི་འཁོར་གྱིས་བསྐོར༔ ཟས་ནོར་གོས་དང་ལོངས་སྤྱོད་རྒྱན་དང་ལྡན༔ བཀྲག་མདངས་མཛེས་པའི་ཁ་དོག་རང་འོད་བཅས༔ འཛིན་པའི་སེམས་ཀྱིས་གཅེས་པར་བཟུང་བ་ཡི༔ བདག་གི་འཇིག་རྟེན་འདི་ཡི་གཅེས་པ་ཀུན༔ གུ་རུ་རཏྣ་སྤྲུལ་པའི་སྐུ་ལ་འབུལ༔ བདག་གི་ཉོན་མོངས་འཛིན་པའི་ཡུལ་དག་ནས༔ དག་པ་ཡེ་ཤེས་རང་གནས་བསྟན་དུ་གསོལ༔ གསང་བའི་མཎྜལ་ནི། ཧཱུཾ། བདག་ལུས་འབྱུང་བཞི་འདུས་པའི་ཕོ་བྲང་དུ༔ སེམས་ཀྱི་རྟེན་གནས་ཙིཏྟ་འབར་བ་ལ༔ དབང་པོ་སྒོ་ལྔའི་རྟེན་གྱིས་མཐའ་བརྟེན་བྱས༔ རྣམ་ཤེས་ཚོགས་བརྒྱད་འཁོར་གྱིས་རབ་ཏུ་བརྒྱན༔ ཤ་ཁྲག་རུས་པ་ནང་འཁྲོལ་སྣ་ཚོགས་ལྡན༔ མིག་གཉིས་དངས་མའི་འོད་ཀྱིས་མུན་པ་སེལ༔ བདག་ལུས་ལོངས་སྤྱོད་རྒྱས་པའི་སྒྱུ་ལུས་འདི༔ ངེས་པའི་དོན་སྟོན་བླ་མ་ཉིད་ལ་འབུལ༔ བདག་གི་ལམ་གྱི་འཁྲུལ་སྣང་ཀུན་དག་ནས༔ རང་རིག་ཡེ་ཤེས་རྟོགས་པར་མཛད་དུ་གསོལ༔ གསུམ་པ་སྒྲིབ་སྦྱོང་བཤགས་པའི་གཟེར༔ ལས་ཀྱི་སྒྲིབ་པ་མ་དག་པར༔ ཡང་དག་སྙིང་པོ་མི་རྟོགས་པས༔ རང་གི་སྒྱུ་ལུས་བེམ་པོ་འདིའི༔ སྤྱི་གཙུག་པདྨ་ཉི་ཟླའི་སྟེང་༔ ཨཱཿལས་རྡོ་རྗེ་སེམས་(༤ན)
དཔའ་ཉིད༔ དུང་མདོག་ཞལ་གཅིག་ཕྱག་གཉིས་པ༔ རིན་ཅེན་རྒྱན་གྱིས་མཛེས་པར་བརྒྱན༔ ཕྱག་གཡས་རྡོ་རྗེ་ཐུགས་ཀར་འཛིན༔ གཡོན་པ་དྲིལ་བུ་དཀུ་ལ་བརྟེན༔ ཞབས་གཉིས་སེམས་དཔའི་སྐྱིལ་ཀྲུང་མཛད༔ དེ་ཡི་ཐུགས་ཀར་ཡི་གེ་ཨཱཿ ཨཱཿལས་འོད་འཕྲོས་མདངས་དང་ལྡན༔ ཨཱཿལས་བདུད་རྩིའི་ཆུ་རྒྱུན་བབས༔ བདག་གི་སྤྱི་གཙུག་རྐང་མཐིལ་བར༔ ཕྱི་ནང་ལུས་བཀྲུས་དག་པར་བསམ༔ ཡི་གེ་བརྒྱ་པ་དང་། ཨཱོཾ་བཛྲ་སཏྭ་ཧཱུཾ་ཨཱཿ ཐུན་བཞི་ཐུན་དྲུག་གང་བདེའི་བར༔ ཡང་སྙིང་གཟུངས་དང་བཅས་པ་བཟླས༔ དབང་པོ་རབ་འབྲིང་ཐ་མ་ཡིས༔ ཞག་གསུམ་བདུན་ནམ་ཉེར་གཅིག་གམ༔ རིམ་པར་སྒྲིབ་སྦྱོང་ལས་ལ་འབད༔ བཞི་པ་མི་རྟག་བསྐུལ་འདེབས་གཟེར༔ རང་གི་ཡུལ་འཁོར་ཁང་ཁྱིམ་དང་༔ ས་རྡོ་རི་བྲག་འཇིག་རྟེན་ཁམས༔ བརྩིག་དང་གནས་དང་འཇིག་པ་དང་༔ དུས་ཀྱི་འཕོ་འགྱུར་ལེགས་པར་བསམ༔ བར་དུ་རང་གི་དགྲ་དང་གཉེན༔ སྲོག་ཆགས་ཀུན་དང་རང་གི་ལུས༔ སྐྱེ་དང་གསོན་དང་འཆི་བར་བསམ༔ ཐ་མ་འཁོར་བ་རིགས་དྲུག་གི༔ སྡུག་བསྔལ་རིམ་པར་བརྟག་ཅིང་བསམ༔ ཐུན་དུ་བཅད་ལ་མི་རྟག་བསྒོམ༔ མི་རྟག་བསྒོམས་པས་ཆོས་ལ་འཇུག༔ ལྔ་པ་བླ་མའི་རྣལ་འབྱོར་ནི༔ དུས་གསུམ་བདེ་གཤེགས་ཐམས་ཅད་ཀྱི༔ ཐུགས་རྗེས་འགྲོ་བའི་དོན་མཛད་ཀྱང་༔ བདག་ནི་འཁོར་བའི་གནས་སུ་འཁྱམས༔ ད་ལྟ་ངེས་པའི་དོན་སྟོན་པའི༔ བླ་མ་དེ་ནི་སངས་རྒྱས་ཀྱི༔ སྤྲུལ་པ་ཡིན་ཏེ་སྐུ་དྲིན་ཆེ༔ དཔེར་ན་ཡིད་བཞིན་ནོར་བུ་(༤བ)
དེ༔ འབྱུང་བ་ལྔ་ཡི་བཅུད་ཡིན་ཀྱང་༔ འཁོར་ལོས་སྒྱུར་བའི་རྒྱལ་པོ་ལ༔ རྩོལ་བ་མེད་པར་གྲོགས་སུ་འབྱུང་༔ རྒྱལ་པོ་དགུང་དུ་གཤེགས་པའི་ཚེ༔ ས་རྡོ་གཞན་གྱིས་མི་ཐུབ་པར༔ འབྱུང་བ་ལྔ་ལ་ཟང་ཐལ་དུ༔ གཤེགས་ཏེ་རྒྱ་མཚོ་ཆེན་པོའི་ནང་༔ རིན་ཅེན་གསེར་གྱི་ས་གཞི་ལ༔ ནོར་བུ་རིན་ཅེན་ཆགས་པར་འགྱུར༔ དེ་བཞིན་མན་ངག་ཟབ་མོའི་ཆོས༔ ངེས་དོན་སྟོན་པའི་བླ་མ་དེ༔ སངས་རྒྱས་ཀུན་གྱི་སྤྲུལ་པ་ཡིན༔ བདག་ལ་སངས་རྒྱས་དངོས་ལས་ལྷག༔ ལས་ཅན་གང་ཟག་ཡོད་པའི་སར༔ རྩོལ་བ་མེད་པར་འབྱུང་བར་འགྱུར༔ དད་མེད་ལོག་ལྟ་སྡིག་སྤྱོད་གནས༔ དེར་ནི་བཞུགས་པར་མི་འགྱུར་ཏེ༔ དག་པའི་ཞིང་དུ་གཤེགས་པར་འགྱུར༔ གསང་སྔགས་ངེས་པའི་དོན་འདོད་ན༔ བླ་མའི་རྣལ་འབྱོར་བསྒོམ་པར་བྱ༔ ཞེས་གསུངས་སོ༔ ཐུགས་དམ་ལྷ་ལ་ཕྱག་འཚལ་ལོ༔ གསང་མཚན་ཐུགས་སྒྲུབ་བླ་མ་ཡི༔ རྣལ་འབྱོར་པདྨ་བདག་གིས་བཤད༔ ཧཱུཾ། རང་ལུས་དེར་འཛིན་མེད་པ་ཡི༔ སྤྱི་བོར་པདྨ་ཉི་ཟླ་དང་༔ དར་ཆེན་ལྟབ་ཁྲི་བརྩེགས་པའི་གདན༔ དེ་སྟེང་གུ་རུ་དྲག་པོ་རྩལ༔ མཐིང་ནག་འཇིགས་པའི་ཆ་ལུགས་ལ༔ ཞལ་གཅིག་ཕྱག་གཉིས་བརྗིད་པའི་སྐུ༔ ཕྱག་གཡས་གནམ་ལྕགས་རྡོ་རྗེ་གདེངས༔ གཡོན་པ་དྲིལ་བུ་དཀུ་ལ་བརྟེན༔ ཞབས་གཉིས་དོར་སྟབས་རུ་དྲ་བརྫིས༔ ཞལ་བགྲད་མཆེ་གཙིགས་ཨག་ཚོམས་འབར༔ སྤྱན་གསུམ་ཉི་ཟླ་ལྟ་བུར་གཟིགས༔ དབུ་སྐྲའི་ཐོར་ཚུགས་དར་གྱིས་བཅིངས༔ རིགས་ལྔའི་སངས་རྒྱས་དབུ་ལ་བརྒྱན༔ རིན་ཅེན་རུས་རྒྱན་དུར་ཁྲོད་ཆས༔ ཐམས་ཅད་སྐུ་ལ་ལེགས་པར་(༥ན)
བརྒྱན༔ ཟབ་ཆེན་བརྗིད་པའི་ན་བཟའ་གསོལ༔ གར་དགུའི་ཉམས་དང་ལྡན་པ་ལ༔ འགྱིང་བག་རོལ་པའི་སྟབས་སུ་བཞུགས༔ ཞལ་ནས་ཧཱུཾ་གི་སྒྲ་ཆེན་སྒྲོག༔ ཐུགས་ནི་དྲག་པོའི་ངར་དང་ལྡན༔ དུས་གསུམ་སངས་རྒྱས་ཡི་དམ་ལྷ༔ རྣམ་དག་བརྒྱུད་པའི་བླ་མ་རྣམས༔ བཀྲག་མདངས་འོད་དུ་མེར་རེ་རེ༔ མ་ཧཱ་གུ་རུའི་སྐུ་ལ་འདུས༔ ཀུན་འདུས་བླ་མའི་ངོ་བོ་ལ༔ རྩེ་གཅིག་དད་པས་ཕྱག་འཚལ་ལོ༔ གཉིས་མེད་རོལ་པའི་མཆོད་པ་འབུལ༔ སྐུ་གསུང་ཐུགས་ཀྱི་དངོས་གྲུབ་སྩོལ༔ དེ་ནས་བརྒྱུད་པའི་གསོལ་བ་གདབ༔ ཨཱོཾ་ཨཱཿཧཱུཾ། འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ༔ ཀུན་བཟང་ཆེ་མཆོག་ཧེ་རུ་ཀ་ལ་གསོལ་བ་འདེབས༔ རང་བྱུང་རྣམ་པར་དག་པའི་གཞལ་ཡས་སུ༔ ལོངས་སྐུ་རྒྱལ་བ་རིགས་ལྔ་ལ༝༔ ལྕང་ལོ་ཅན་གྱི་གནས་མཆོག་དམ་པ་རུ༔ གསང་བདག་ཕྱག་ན་རྡོ་རྗེ་ལ༝༔ བྱང་ཆུབ་སེམས་ཀྱི་གཞལ་ཡས་ཆེན་པོ་རུ༔ སྨུག་ནག་དབང་གི་མཁའ་འགྲོ་ལ༝༔ གནས་ཆེན་རི་རྒྱལ་ལྷུན་པོའི་རྩེ་མོ་རུ༔ ཚངས་པའི་རྒྱལ་པོ་གདོང་གསུམ་ལ༝༔ སྟེང་ཕྱོགས་རྣམ་པར་རྒྱལ་བའི་ཁང་བཟང་དུ༔ རིགས་འཛིན་ལྷ་དབང་བརྒྱ་བྱིན་ལ༝༔ སིནྡྷུ་རྒྱ་མཚོ་རོལ་པའི་མཚོ་གླིང་དུ༔ རིགས་འཛིན་ཀླུ་རྒྱལ་འཇོག་པོ་ལ༝༔ རི་རྒྱལ་མ་ལ་ཡ་ཡི་རྩེ་མོ་རུ༔ སྐལ་ལྡན་རྒྱལ་པོ་ཛ་ལ༝༔ ཟ་ཧོར་ཡུལ་གྱི་གནས་མཆོག་དམ་པ་རུ༔ མཁས་པ་ཤཱཀྱ་པྲ་བྷ་ལ༝༔ བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ༔ རིགས་འཛིན་པདྨ་འབྱུང་གནས་ལ༝༔ ཆུ་བོ་ཆེན་པོ་གངྒཱའི་རྩ་བ་རུ༔ མཁས་པ་བི་མཱ་མི་ཏྲ་ལ༝༔ (༥བ)
མ་བལ་ནགས་ཀྱི་རི་ཡི་རྩ་བ་རུ༔ བལ་པོ་ཤཱི་ལ་མཉྫུ་ལ༝༔ ལྷོ་ཕྱོགས་མོན་ཁ་སེང་གེའི་ཡང་རྫོང་དུ༔ མཁར་ཆེན་བཟའ་ཡི་འཚོ་རྒྱལ་ལ༝༔ རོང་ཞེས་གྲགས་པའི་བྲག་དམར་ཀེའུ་ཚང་དུ༔ སྣ་ནམ་རྡོ་རྗེ་བདུད་འཇོམས་ལ༝༔ གནས་ཆེན་རི་རྒྱལ་བཀྲ་བཟང་ཤར་འདབས་སུ། །གཏེར་སྟོན་རིགས་འཛིན་ཡབ་སྲས་ལ༝། །ཐུགས་རྗེ་འགྱུར་མེད་གཞལ་ཡས་ཆེན་པོ་རུ། །དྲན་མཆོག་རྡོ་རྗེའི་མཚན་ཅན་ལ༝། །མཁའ་སྤྱོད་དག་པ་ཆེན་པོའི་གཞལ་ཡས་སུ། །སྔགས་འཆང་རྡོ་རྗེ་མགོན་པོ་ལ༝། ཤྲཱི་བྱང་རྫོང་དཔལ་གྱི་སྒྲུབ་ཁང་དུ། །མཚན་ལྡན་བྱམས་པ་བཤེས་གཉེན་ལ༝། །གནས་ཆེན་རྡོ་རྗེ་ཕུར་པའི་གཞལ་ཡས་སུ། །མཚན་ལྡན་ངག་དབང་གྲགས་པ་ལ༝། །བྱང་ཕྱོགས་སྐྱ་བོ་ཁ་གདངས་གནས་མཆོག་ཏུ། །ཆོས་རྗེ་སངས་རྒྱས་དཔལ་བཟང་ལ༝། །བདེ་གྲོལ་གསང་སྔགས་ཆོས་གླིང་ཕོ་བྲང་དུ། །ཐུགས་སྲས་ནམ་མཁའ་རྒྱལ་མཚན་ལ༝། སྦས་ཡུལ་ཡོལ་མོ་གངས་ཀྱི་ར་བ་རུ། །སྔགས་འཆང་ཤཱཀྱ་བཟང་པོ་ལ༝། །དཔལ་ཆེན་ཆུ་བོ་རི་ཡི་གནས་མཆོག་ཏུ། །མངའ་རིས་རིགས་འཛིན་ཆེན་པོ་ལ༝། །གུ་རུ་པདྨའི་ཨེ་ཝཾ་ལྕོག་སྒར་དུ། །ཆོས་རྒྱལ་དབང་པོའི་སྡེ་ཉིད་ལ༝། །སྨོན་ཐང་དཔལ་གྱི་དབེན་གནས་དམ་པ་རུ། །རིགས་འཛིན་ངག་གི་དབང་པོ་ལ༝། །བདེ་བའི་རྡོ་རྗེའི་མི་འགྱུར་ཕོ་བྲང་དུ། ཁྱབ་བདག་ཆོས་དབྱིངས་རང་གྲོལ་ལ༝། །གར་བཞུགས་དག་པའི་ཞིང་ཁམས་སོ་སོ་ན། །སྣ་ཚོགས་བརྒྱུད་པའི་བླ་མ་ལ༝། །ཐེག་མཆོག་ཆོས་ཀྱི་ཕོ་བྲང་ཆེན་པོ་ན། །ཆོས་རྒྱལ་གཏེར་བདག་གླིང་པ་ལ༝། །འབྲལ་མེད་སྙིང་ག་ཆོས་ཀྱི་ཕོ་བྲང་དུ། །(༦ན)
དྲིན་ཅན་རྩ་བའི་བླ་མ་ལ༝། །རང་ལུས་རྒྱལ་བའི་དཀྱིལ་འཁོར་ཆེན་པོ་རུ༔ རང་རིག་མ་ཧཱ་གུ་རུ་ལ༝༔ གཏེར་མཛོད་བསེ་སྒྲོམ་སྨུག་པོའི་གཞལ་ཡས་སུ༔ གསང་སྔགས་སྙིང་པོའི་མཐར་ཐུག་ལ༝༔ སྨུག་ནག་གྲུ་གསུམ་དབང་གི་གཞལ་ཡས་སུ༔ བཀའ་སྲུང་ཨེ་ཀ་ཛཱ་ཊཱི་ལ༝༔ རྩ་དང་ཐིག་ལེའི་གཞལ་ཡས་ཆེན་པོ་རུ༔ མ་དང་ཡེ་ཤེས་མཁའ་འགྲོ་ལ༝༔ བཀའ་དང་དམ་ཚིག་ཆེན་པོའི་གཞལ་ཡས་སུ༔ བཀའ་སྲུང་ཆོས་སྐྱོང་གཏེར་བདག་ལ༝༔ རང་སྣང་དག་པ་ཆེན་པོའི་གཞལ་ཡས་སུ༔ མཆེད་ལྕམ་རྡོ་རྗེ་སྤུན་གྲོགས་ལ༝༔ དངོས་དང་བརྒྱུད་པའི་བླ་མ་ཁྱེད་རྣམས་ལ༔ རབ་གུས་རྩེ་གཅིག་གདུང་བས་གསོལ་བ་འདེབས༔ རང་རིག་མ་བཅོས་བླ་མའི་ངོ་བོ་རུ༔ ད་ལྟ་ཉིད་དུ་རྟོགས་པར་བྱིན་གྱིས་རློབས༔ དཔལ་ལྡན་རྩ་བའི་བླ་མ་བཀའ་དྲིན་ཆེ༔ མཆོག་གི་མཆོག་གྱུར་སྐུ་གསུང་ཐུགས་ཀྱི་དབྱིག༔ གསོལ་འདེབས་བརྒྱུད་འཛིན་སྐལ་ལྡན་བདག་ཅག་ལ༔ འབད་མེད་ལྷུན་གྱིས་གྲུབ་པར་མཛད་དུ་གསོལ༔ བླ་མ་འོད་དུ་མེར་གྱི་ཞུ༔ བདག་གི་སྤྱི་བོར་ཐིམ་པ་ལས༔ ཐ་མལ་ལུས་འདི་འོད་དུ་ཞུ༔ བདག་གི་ལུས་ངག་ཡིད་གསུམ་པོ༔ མ་ཧཱ་གུ་རུའི་ངོ་བོར་གྱུར༔ རང་རིག་བླ་མའི་ངང་དེར་ནི༔ དར་ཅིག་མ་ཡེངས་གློང་ལ་བཞག༔ དེ་ནས་བླ་མའི་རྣམ་པར་ལྡང་༔ ཐམས་ཅད་སྐུ་གསུམ་བླ་མར་བལྟ༔ ས་མ་ཡ༔ རྒྱ་རྒྱ་རྒྱ༔ ཨཱོཾ་ཨཱཿཧཱུཾ། མ་ཧཱ་གུ་རུ་སརྦ་སིདྡྷི་ཧཱུཾ། འཇིག་རྟེན་སྣང་བ་སྒྱུ་མར་གོ་ལགས་ཀྱང་། །འཕྲལ་སྣང་འདི་ལ་ད་དུང་བདག་འཛིན་(༦བ)
སྐྱེས། །བདག་གི་ཉོན་མོངས་བག་ཆགས་མ་སྟོངས་བར། །ཆགས་ཞེན་རྩད་ནས་ཆོད་པར་བྱིན་གྱིས་རློབས། །ཨཱོཾ༝། སྙིགས་མའི་ལས་ངན་མི་རྟག་རང་གཟུགས་ལ། །ངེས་འབྱུང་སྐྱེས་ནས་ཆགས་ཞེན་ཡུལ་བོར་ཡང་། །ཕྱིས་ནས་རང་བདེའི་ཡུལ་འདོད་དུཿཁས་མནར། །འདོད་སེམས་རྩད་ནས་ཆོད་པར༝། ཨཱོཾ༝། དུག་གསུམ་ཉོན་མོངས་སེལ་བའི་ཐབས་ཆེན་པོ། །རྒྱལ་བས་ལུང་བསྟན་མང་པོར་གསུངས་ལགས་ཀྱང་། །སྤོང་དཀའི་བག་ཆགས་དབང་དུ་ཤས་ཆེར་ཤོར། །ལས་ངན་རྩད་ནས་ཆོད་པར༝། །ཨཱོཾ༝། ཕྱི་རྐྱེན་ནང་རྐྱེན་དེ་མ་ཐག་པའི་རྐྱེན། །ཐམས་ཅད་བསྐྱེད་པའི་རྩ་བ་གཉིས་འཛིན་དུ། །ད་གཟོད་གོ་ཡང་མདུད་པའི་རྩ་མ་གྲོལ། །རང་སེམས་གཅེར་བུར་འཆར་བར༝། ཨཱོཾ༝། །གཉིས་འཛིན་སྒྲོག་ལས་གྲོལ་བར་བྱིན་གྱིས་རློབས། །ཤེས་པ་བཟོ་མེད་རང་ལུགས་ལྷུག་པ་ལ། །མཁས་ཀྱང་ལེགས་པའི་རང་བཟོ་མ་བྱས་ཤིང་། །བྱིང་འཐིབས་གཡེང་བའི་བཙོན་རར་མ་བཅིངས་པར། །བཀྲག་མདངས་རང་འོད་འཚེར་བའི་རིག་པ་འདི། །ཆོས་ཉིད་ཡངས་པའི་མ་དང་བུ་འཕྲད་ནས། །ལེ་ལོ་རྐྱེན་གྱི་གྲོགས་ཕྱིར་མ་འཐོམས་པར། །ལེགས་པའི་ཁང་བུར་གཅེས་པའི་གཉེར་བྱས་ཏེ། །མྱུར་དུ་ཆོས་ཉིད་མ་དང་བུ་འཕྲད་ནས། །ཕྱིན་ཆད་འགྲོ་དོན་སྟོབས་ཆེན་བྱེད་པར་ཤོག །བྱང་ཆུབ་སེམས་དཔའི་སྤྱོད་པ་བྱེད་པར་ཤོག །གཞན་དོན་དགེ་བ་རླབས་ཆེན་འགྲུབ་པར་ཤོག །འཁོར་བ་དོང་ནས་སྤྲུག་པའི་མཐུ་ཐོབ་ཤོག །ཅེས་པ་འདི་ནི་སྤྲུལ་སྐུ་རིགས་འཛིན་ཆེན་པོ་རྒོད་ཀྱི་ལྡེམ་ཕྲུ་(༧ན)
ཅན་གྱིས་མཛད་པའོ། །ཐུན་མོང་མ་ཡིན་པའི་སྔོན་འགྲོ་ལ། ཐུགས་སྒྲུབ་ལས་བྱང་ཁ་བསྐང་ཕྱིར༔ བདག་ཉིད་ལྷ་ཡི་བསྒོམ་ཐབས་ལ༔ ལྷ་ཡི་དཀྱིལ་འཁོར་བསྒོམ་པ་ནི༔ སྟན་བདེ་བ་ལ་ལུས་ཙོག་པུར་འདུག༔ ལྷ་ཐམས་ཅད་ཀྱི་སྐུའི་ངོ་བོ་རྡོ་རྗེ་སློབ་དཔོན་ལ་འདུས་པས། བདག་ཉིད་ཀྱིས་ཧཱུཾ་ཧཱུཾ་ཞེས་བརྗོད་པས༔ སྐད་ཅིག་དྲན་རྫོགས་སུ་མ་ཧཱ་གུ་རུ་པདྨ་འབྱུང་གནས་རྡོ་རྗེ་དྲག་པོ་རྩལ་ཞེས་བྱ་བ། སྐུ་འཇིགས་པའི་ཆ་ལུགས་སུ་བསྟན་པ༔ གསུང་རྔམ་པའི་ང་རོ་སྒྲོག་པ༔ ཐུགས་དྲག་པོའི་ངར་དང་ལྡན་པ༔ འགྱིང་བག་དང་རོལ་པའི་སྟང་སྟབས་སུ་བཞུགས་པ། ཕྱག་གཡས་གནམ་ལྕགས་ཀྱི་རྡོ་རྗེ་རྩེ་དགུ་པ་ནམ་མཁའ་ལ་འཕྱར་བ། གཡོན་པ་གསེར་གྱི་དྲིལ་བུ་དཀུ་ལ་བརྟེན་པ། རུས་པའི་རྒྱན་དྲུག་དང་རིན་པོ་ཆེའི་དབུ་རྒྱན་དང་། སྦྲུལ་གྱི་གདུ་བུས་བརྒྱན་པ། ཁྲོ་གཏུམ་བརྗིད་པའི་གར་དགུ་དང་ལྡན་པ། སྤྱན་གསུམ་ཉི་ཟླ་འཁྱིལ་བ་ལྟར་གཟིགས་པ། ཚེམས་གངས་རི་གཏམས་པ་ལྟར་བཞད་པ༔ ཨག་ཚོམས་དུས་མཐའི་མེ་ལྟར་འབར་བ། ཞལ་ནས་ཧཱུཾ་གི་སྒྲ་འབྲུག་ལྟར་སྒྲོག་པ༔ ཟ་འོག་གི་བེར་སྨུག་པོ་དང་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། དབུ་སྐྲའི་ཐོར་ཚུགས་རུས་པས་བརྒྱན་པ། ཞབས་གཉིས་སྟང་སྟབས་སུ་བགྲད་དེ་ཉི་ཟླ་པདྨའི་སྟེང་དུ་རཀྴ་སྲིན་པོ་ཕོ་མོ་བརྫིས་པའི་གདན་ལ་བཞུགས་པ༔ བསྐལ་པའི་མེ་ལྟར་འབར་བའི་ཀློང་དཀྱིལ་ན་འགྱིང་བག་ཏུ་བརྗིད་པ༔ ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་བདག་ཉིད་ཅན་དུ་གྱུར༔ ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། བརྒྱ་ཙམ་བཟླ༔ ཐུགས་(༧བ)
སྒྲུབ་ལས་བྱང་ཁ་བསྐང་ཕྱིར། རྒྱལ་ཆེན་སྡེ་བཞིའི་མཆོད་ཐབས་ལ། ཧཱུཾ། བདག་ཉིད་ལྷ་ཡི་ཐུགས་ཀ་ནས། དཀར་སེར་དམར་ལྗང་ཧཱུཾ་ཆེན་བཞི། འཕྲོས་འདུས་འོད་དུ་ཞུ་བ་ལས། ཡེ་ཤེས་རྒྱལ་པོ་བཞི་རུ་གྱུར། ཨཱོཾ་ཛྙཱ་ན་རཱ་ཛ་ས་མ་ཡ་ཧཱུཾ་ཛཿ ཧཱུཾ། རི་རྒྱལ་ལྷུན་པོའི་ཤར་ཕྱོགས་ན། ཕོ་བྲང་ཆེན་པོ་སྤོས་ངད་ལྡན། ཟབ་ཅིང་རྒྱ་ཆེ་གཟིགས་འཕགས་པོ། རྒྱལ་པོ་ཆེན་པོ་ཡུལ་འཁོར་བསྲུང་། སྐུ་མདོག་དཀར་པོ་པི་ཝཾ་འཛིན། བཙུན་མོ་སྲས་དང་བློན་པོར་བཅས། འཁོར་ནི་དྲི་ཟ་འབུམ་གྱི་བསྐོར། སྡེ་བོ་ཆེ་ལ་སྟོབས་པོ་ཆེ། མཆོད་གཏོར་འདི་བཞེས་ཤར་ཕྱོགས་ཀྱི། གདོན་རྣམས་བཟློག་ཅིང་ཕྱི་མཚམས་སྲུངས། ཧཱུཾ། རི་རྒྱལ་ལྷུན་པོའི་ལྷོ་ཕྱོགས་ན། ཕོ་བྲང་ཆེན་པོ་བཻ་ཌཱུཪྻ། ཟབ་ཅིང་༝། རྒྱལ་པོ་ཆེན་པོ་འཕགས་སྐྱེས་པོ། སྐུ་མདོག་སེར་པོ་རལ་གྲི་འཛིན། བཙུན་མོ༝། འཁོར་ནི་གྲུལ་བུམ༝། སྡེ་བ༝། མཆོད་གཏོར་འདི་བཞེས་ལྷོ་ཕྱོགས་ཀྱི། གདོན་རྣམས༝། ཧཱུཾ། རི་རྒྱལ་ལྷུན་པོའི་ནུབ་ཕྱོགས་ན། ཕོ་བྲང་ཆེན་པོ་རྒྱ་མཚོའི་རྦ། ཟབ་ཅིང་༝། རྒྱལ་པོ་ཆེན་པོ་སྤྱན་མི་བཟང་། སྐུ་མདོག་དམར་པོ་སྦྲུལ་ཞགས་འཛིན། བཙུན་མ༝། འཁོར་ནི་ཀླུ་དབང་༝། སྡེ་བོ་ཆེ་ལ་སྟོབས་པོ་ཆེ། མཆོད་གཏོར་འདི་བཞེས་ནུབ་ཕྱོགས་ཀྱི། གདོན་རྣམས༝། ཧཱུཾ། རི་རྒྱལ་ལྷུན་པོའི་བྱང་ཕྱོགས་ན། ཕོ་བྲང་ཆེན་པོ་ལྕང་ལོ་ཅན། ཟབ་ཅིང་༝། རྒྱལ་པོ་ཆེན་པོ་རྣམ་ཐོས་སྲས། སྐུ་མདོག་ལྗང་གུ་རྒྱལ་མཚན་འཛིན། བཙུན་མོ༝། འཁོར་ནི་གནོད་སྦྱིན༝། སྡེ་བོ༝། མཆོད་གཏོར་འདི་བཞེས་བྱང་ཕྱོགས་ཀྱི། གདོན་རྣམས༝། (༨)
ཧཱུཾ། རྒྱལ་པོ་ཆེན་པོ་སྡེ་བཞི་པོ། དོན་གྱི་སངས་རྒྱས་ཡིན་མོད་ཀྱང་། གསང་སྔགས་བསྟན་པ་བསྲུང་བའི་ཕྱིར། བར་ཆད་འདུལ་བར་མཛད་དུ་གསོལ། ཐུགས་དམ་ལྷ་ལ་ཕྱག་འཚལ་ལོ། བདག་འདྲ་པད་མ་འབྱུང་གནས་ཀྱིས། ལྔ་བརྒྱ་ཐ་མ་ཤར་བའི་ཚེ། རི་བོ་བཀྲ་བཟང་ཤར་འདབས་སུ། ལས་ཅན་སྦས་པའི་རྣལ་འབྱོར་པ། རྒོད་ཀྱི་ལྡེམ་ཕྲུ་ཅན་ཞིག་འབྱུང་། དེ་ཕྱིར་ང་ཡི་ཐུགས་སྒྲུབ་བཞག །ཚེ་སྒྲུབ་ལྕགས་ཀྱི་སྡོང་པོ་ཡིན། ནོར་སྒྲུབ་རིན་ཅེན་སྤུངས་པ་ཡིན། སྡེ་བརྒྱད་འདུལ་བའི་གཉེན་པོ་ཡིན། སྒྲུབ་ཆེན་བཀའ་བརྒྱད་འདུས་པ་ཡིན། པདྨ་འབྱུང་གནས་སྙིང་ཐིག་ཡིན། མཁའ་འགྲོ་རྣམས་ཀྱི་སྙིང་ཁྲག་ཡིན། ཀུན་བཟང་ཐུགས་ཀྱི་དགོངས་པ་ཡིན། ལས་ཅན་བུ་ཡི་དངོས་གྲུབ་ཡིན། ང་ཡི་རྗེས་འཇུག་རྣལ་འབྱོར་པ། མན་ངག་འདི་དང་འཕྲད་པའི་ཚེ། བརྩོན་འགྲུས་དྲག་པོས་བར་ཆད་སྤོངས། ཉམས་ལེན་དྲག་པོས་དངོས་གྲུབ་ཐོབ། ཐེ་ཚོམ་སྤོངས་ལ་སྒྲུབ་པ་མཛོད། བུ་ཁྱོད་ཡི་དམ་འདི་ལ་མཛོད། བདག་དང་གཞལ་མཇལ་ལུང་སྟོན་ངེས། ཨེ་མ་ཧོ། འདི་ཉིད་སྒྲུབ་པའི་རྣལ་འབྱོར་པས། དབེན་པའི་གནས་སུ་མཎྜལ་བཤམ། མདུན་དུ་པདྨ་ང་ཡི་སྐུ། རབ་གནས་ལྡན་པ་བཞུགས་སུ་གསོལ། ཐུགས་སྒྲུབ་སེམས་ལ་ལོངས་སྤྱོད་ཕྱིར། སྒྲུབ་རྫས་མཆོད་གཏོར་བཤམ་མི་འཚལ། སྤྱན་འདྲེན་མཆོད་བསྟོད་བསྐུལ་མི་དགོས། དཀྱིལ་འཁོར་གསུམ་གྱི་སྒྲུབ་པ་བྱ། དེ་ནས་བསྙེན་པའི་རྟགས་རྫོགས་ནས། དངོས་གྲུབ་བླང་བའི་ཆོ་ག་བྱ། མཆོད་རྫས་སྤྱན་གཟིགས་སྣ་ཚོགས་(༨བ)
བཤམ། ཐུགས་སྒྲུབ་འཕྲིན་ལས་ཏིང་འཛིན་ནི། ཧཱུཾ། དང་པོ་རང་ཉིད་དབེན་པའི་གནས་སུ་འདུག །ཕྱི་ནང་སྣོད་བཅུད་སྣང་བ་ཐམས་ཅད་ཀུན། རང་རིག་སེམས་ལས་བྱུང་བའི་ཆོ་འཕྲུལ་ཏེ། །སེམས་ཉིད་དངོས་པོ་གཟུང་འཛིན་བྲལ་བའི་ངང་། དེ་ལྟར་རྟོགས་ན་བགེགས་རྣམས་རང་སར་གྲོལ། ཧཱུཾ། དེ་ཉིད་ངང་ལས་སྐད་ཅིག་དྲན་རྫོགས་སུ། འཇིགས་བྱེད་ཆེན་པོ་རྡོ་རྗེ་དྲག་པོ་རྩལ། བསྐལ་པའི་མེ་འབར་རྡོ་རྗེའི་ཚ་ཚ་འཕྲོ། འཇིག་རྟེན་ཐམས་ཅད་རྨང་ནས་ལྡེག་ཅིང་འཁྲུག །བདུད་དང་དམ་སྲི་བགེགས་རིགས་བརླག་པར་བྱེད། བཤགས་པ་བྱ་བ་ནི། ཧཱུཾ། དུས་གསུམ་བདེ་གཤེགས་མཁའ་འགྲོ་དམ་ཅན་རྣམས། ཏིང་འཛིན་རྩེ་གཅིག་དད་པས་སྤྱན་དྲངས་ནས། བསྐལ་པ་དཔག་མེད་དུས་ནས་ད་ལྟའི་བར། དུག་ལྔའི་དབང་གྱུར་ངན་སོང་གསུམ་གྱི་ལས། ལུས་ངག་ཡིད་གསུམ་སྡིག་སྒྲིབ་མཐོལ་ལོ་བཤགས། བྱིན་དབབ་པ་ནི། ཧཱུཾ། བདག་ཉིད་སྡིག་སྒྲིབ་དག་པའི་ཕུང་པོ་ལ། ལྷ་རྣམས་དགྱེས་ཤིང་འོད་ཟེར་སྟོང་གསུམ་གང་། བདག་ལ་ཐིམ་པས་ཡི་དམ་ལྷར་གྱུར་ཏེ། སྐུ་གསུང་ཐུགས་ཀྱི་དངོས་གྲུབ་ཐོབ་པ་ཡི། མཆོག་དང་ཐུན་མོང་དངོས་གྲུབ་བྱིན་ཆེན་ཕོབ། བདུད་རྩི་བྱིན་རླབས་ནི། ཧཱུཾ། བདག་ལས་འོད་འཕྲོས་བྷནྡྷ་གཞལ་ཡས་ཁང་། གཡས་གཡོན་ཐབས་དང་ཤེས་རབ་ཕྱག་རྒྱ་ལས། རིགས་ལྔ་ཡབ་ཡུམ་སྦྱོར་མཛད་བྱང་ཆུབ་སེམས། བདུད་རྩི་མུ་ཏིག་དཀར་པོ་ཆར་ལྟར་བབས། སྣོད་བཅུད་ཐམས་ཅད་བདུད་རྩིའི་རྒྱ་མཚོས་གང་། ཧྲཱིཿམ། མཐེབ་སྲིན་སྦྱར་བ་རྟ་མགྲིན་ཡུམ་བཞིར་བཅས། བདུད་
རྩི་འཁྱིལ་ཞིང་དངོས་གྲུབ་སྟེར་མཛད་ལྷ། བདག་ལ་རེག་པས་དམ་ཚིག་ཉམས་སྒྲིབ་དག །རྫས་ལ་གཏོར་བས་མ་དག་སྐྱོན་རྣམས་སྦྱངས། བགེགས་ལ་ཕོག་པས་བདུད་དང་དམ་སྲི་བསྐྲད། གཏོར་མ་བྱིན་རླབས་ནི། ཧཱུཾ། སྣོད་ཀྱི་འཇིག་རྟེན་དུར་ཁྲོད་ཁོག་པ་རུ། སྙིང་ཁྲག་ཤ་རུས་ཆུ་སེར་ཉོན་མོངས་ལྔ། རྣམ་དག་ཡེ་ཤེས་ལྔ་དང་འདོད་ཡོན་དྲུག། བཅུད་ཀྱི་འཇིག་རྟེན་ལྷ་མོ་དྲུག་གིས་ཁེངས། དམ་རྫས་གཏོར་མ་མཆོད་པར་བྱིན་གྱིས་བརླབས། རཀྟ་བྱིན་རླབས་ནི། ཧཱུཾ། བྷནྡྟ་འབར་བ་རཀྟ་དམར་གྱི་སྣོད། ཁམས་གསུམ་འཁོར་བའི་རྒྱུ་ནི་འདོད་ཆགས་ཏེ། རྣམ་ཤེས་ཚོགས་བརྒྱད་འདུས་པའི་རྩ་ཆེན་ཁྲག །རཀྟ་ཆོས་ཉིད་སྐྱེ་བ་མེད་པ་ལ། གསང་བ་ཡུམ་གྱི་ཐིག་ལེ་བདེ་བའི་ངང་། ཕྱི་མཆོད་བྱིན་རླབས་ནི། ཧཱུཾ། ཨརྒྷཾ་བདུག་སྤོས་མེ་ཏོག་མར་མེ་དང་། དྲི་ཆབ་ཕྱི་ཡི་མཆོད་པ་རྣམ་པ་ལྔ། ཡིད་འོང་མཛེས་པའི་ལྷ་མོ་རྣམ་པ་ལྔས། རྣམ་དག་གཙང་མར་སྦྱར་ཏེ་བསྣམས་ནས་ཀྱང་། ཡི་དམ་ལྷ་དང་མཁའ་འགྲོ་མཆོད་པའི་རྫས། དངོས་གཞི་ལ། དེ་བཞིན་ཉིད་ཀྱི་ཏིང་འཛིན་ནི། ཧཱུཾ། འདི་ལྟར་སེམས་ཀྱི་རྩལ་སྣང་མ་འགགས་པ། སྣ་ཚོགས་སྣང་བ་འདི་ནི་ཡེ་ཤེས་ཏེ། སྣང་བའི་དུས་ན་ངོ་བོ་སྟོང་པའི་ངང་། ཆོས་ཀྱི་དབྱིངས་ཉིད་སྤྲོས་དང་བྲལ་བར་གནས། དབྱེར་མེད་བྱང་ཆུབ་སེམས་ནི་བདེ་བ་ཆེ། ཀུན་ཏུ་སྣང་བའི་ཏིང་འཛིན་ནི། །ཧཱུཾ། དེ་ལྟར་མ་རྟོགས་འཁྲུལ་པའི་སེམས་ཅན་རྣམས། སྙིང་རྗེ་ཆེན་པོ་བྱམས་པའི་ཏིང་འཛིན་གྱིས། རང་རིག་འོད་ཟེར་ཁ་དོག་ལྔ་དང་ལྡན། (༩བ)
གསལ་འཚེར་སྣང་བ་མ་འགགས་དངས་པ་ལ། ངོ་བོ་བརྩེ་བའི་སྙིང་རྗེ་ཆེན་པོ་བསྒོམ། རྒྱུའི་ཏིང་འཛིན་ནི། ཧཱུཾ། དེ་ལས་འོད་ལྔ་འདུས་པའི་ཡི་གེ་ནི། ཧཱུཾ་ཆེན་སྔོན་པོ་འབར་བ་ཉི་ཟླ་བཞིན། སྣང་སྟོང་དབྱེར་མེད་ངང་དུ་གསལ་བར་ཤར། སྐར་ཆེན་ཐང་ལ་བབས་པའི་ཚུལ་བཞིན་དུ། འབྲས་བུ་རྒྱུ་ཡི་ཡི་གེ་ཧཱུཾ་དུ་ཤར། འབྱུང་བ་རིམ་བརྩེགས་ནི། ཧཱུཾ། ཡི་གེ་ཧཱུཾ་ལས་ཧཱུཾ་ལྔ་འཕྲོས་པ་ལས། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། གངས་ལ་ཐིག་པ་བབ་པ་བཞིན་དུ་ཆགས། དེ་ལས་འོད་འཕྲོས་འབྱུང་བ་ཆེན་པོ་ལྔ། འོག་གཞི་དབང་ཆེན་གཞལ་ཡས་གསལ་བར་བསྒོམ། ཡེ་ཤེས་ལྔ་དང་ཡུམ་ལྔ་རྣམ་དག་ཀློང་། ཧཱུཾ། ནམ་མཁའ་མཐིང་ནག་གྲུ་གསུམ་གདལ་བ་ལ། རླུང་ནག་རྡོ་རྗེ་རྒྱ་གྲམ་རབ་ཏུ་གཡོ། མེ་དཔུང་བསྐལ་པ་དུས་མཐའི་མེ་ལྟར་འབར། རཀྟའི་རྦ་རླབས་རྒྱ་མཚོའི་ཀློང་ལྟར་འཁྱིལ། ཀེང་རུས་ཆེན་པོའི་རི་རབ་ལྷུན་སྡུག་བརྗིད། ཧཱུཾ། རྒྱུ་ཡི་ཡི་གེ་ཉིད་ལས་འོད་འཕྲོས་པས། སྣང་བ་སྣོད་ཀྱི་འཇིག་རྟེན་ཐམས་ཅད་ཀུན། བདག་གི་གཟུགས་ཀྱི་ཕུང་པོ་གཞལ་ཡས་ཁང་། ཙིཏྟའི་གའུ་རིན་ཅེན་ཕོ་བྲང་མཛེས། རྩ་ཆེན་རྩ་ཕྲན་ཀ་གདུང་རྒྱན་དང་ལྡན། བྷནྡྷའི་རྩིག་པ་ནང་ཁྲོལ་དྲ་བར་ལྡན། རྣམ་ཤེས་ཚོགས་བརྒྱད་གཟེར་གྱིས་རབ་ཏུ་གཏམས། གསལ་བྱེད་མིག་གཉིས་ཉི་ཟླའི་མཐོངས་ཁུང་ལ། སྟེང་འོག་རྒྱུ་ལམ་བཞི་ལ་སྒོ་བཞི་གནས། བྱང་ཆུབ་སེམས་ལས་ཀུན་འབྱུང་གཞལ་ཡས་ཁང་།ཧཱུཾ། རྒྱུ་ཡི་ཡི་གེ་འོད་འཕྲོས་འདུས་པ་ལས། མ་ཆགས་པདྨ་ཐབས་ཤེས་ཉི་ཟླའི་སྟེང་། སྲིན་པོ་རུ་དྲ་བརྫིས་པའི་གདན་སྟེང་དུ། མ་ཧཱ་གུ་རུ་རྡོ་རྗེ་དྲག་པོ་རྩལ། (༡༠ན)
རང་རིག་རང་བྱུང་རང་ཤར་གསལ་བར་བསྒོམ། ཧཱུཾ། སྐུ་མདོག་མཐིང་ནག་འཇིགས་པའི་ཆ་ལུགས་ལ། ཕྱག་གཡས་གནམ་ལྕགས་རྡོ་རྗེ་རྩེ་དགུ་བསྣམས། ཕྱག་གཡོན་གསེར་གྱི་དྲིལ་བུ་དཀུ་ལ་བརྟེན། རིན་ཅེན་རུས་རྒྱན་ཟབ་ཆེན་བེར་ལ་སོགས། མཁའ་འགྲོ་དམ་ཅན་དབང་སྡུད་རྒྱན་གྱིས་བརྒྱན། དུར་ཁྲོད་ཆས་བརྒྱད་བརྗིད་པའི་གར་དགུ་ལྡན། སྐུ་གསུང་ཐུགས་དང་ཡོན་ཏན་འཕྲིན་ལས་ཀྱིས། ལྷ་ཚོགས་ཐམས་ཅད་ཉིད་ཀྱི་སྐུ་ལ་རྫོགས། བདེ་གཤེགས་ཀུན་འདུས་རྡོ་རྗེ་དྲག་པོ་རྩལ། ཞབས་གཉིས་གྱད་ཀྱི་འགྱིང་བག་སྟབས་སུ་བཞུགས། སྤྱི་བོ་ཚངས་པའི་བུ་གའི་རྩ་འདབ་སྟེང་། མགོན་པོ་ཚེ་དཔག་མེད་ཀྱི་ལྷ་ཚོགས་རྫོགས། ཀླད་པ་དུང་ཁང་རྩ་ཡི་འཁོར་ལོ་ལ། འཇམ་དཔལ་སྐུ་ཡི་ལྷ་ཚོགས་ཐམས་ཅད་རྫོགས། མགྲིན་པ་ལོངས་སྤྱོད་འཁོར་ལོའི་རྩ་འདབ་ལ། པདྨ་གསུང་གི་ལྷ་ཚོགས་ཐམས་ཅད་རྫོགས། སྙིང་ག་ཆོས་ཀྱི་འཁོར་ལོའི་རྩ་འདབ་ལ། རྡོ་རྗེ་ཐུགས་ཀྱི་ལྷ་ཚོགས་ཐམས་ཅད་རྫོགས། ལྟེ་བ་འཁོར་ལོ་འདུས་པའི་རྩ་འདབ་ལ། བདུད་རྩི་ཡོན་ཏན་ལྷ་ཚོགས་ཐམས་ཅད་རྫོགས། གསང་གནས་བདེ་སྐྱོང་འཁོར་ལོའི་རྩ་འདབ་ལ། ཆེ་མཆོག་མ་མོའི་ལྷ་ཚོགས་ཐམས་ཅད་རྫོགས། རྩ་ཆེན་རྩ་ཕྲན་སྟོང་གི་འཁོར་ལོ་ལ། མཁའ་འགྲོ་འབུམ་ཕྲག་མང་པོའི་ལྷ་ཚོགས་རྫོགས། དབུ་ལ་རྒྱལ་བ་རིགས་ལྔས་དབང་བསྐུར་མཛད། སྐུ་ནི་རྡོ་རྗེ་ཁྲོས་པའི་སྐུ་གསུང་ཐུགས། ཕྱག་གཡས་གནམ་ལྕགས་རྡོ་རྗེ་རྩེ་དགུ་ལ། འཇིགས་བྱེད་ཁྲོ་བཅུའི་ལྷ་ཚོགས་ཐམས་ཅད་རྫོགས། ཕྱག་གཡོན་གསེར་(༡༠བ)
གྱི་དྲིལ་བུ་ཁྲོ་མོ་བཅུ། ཞབས་གཉིས་བརྐྱང་བསྐུམ་རུ་དྲ་བརྫིས་པ་ལ། ཕྱོགས་སྐྱོང་སྡེ་བརྒྱད་དྲེགས་པའི་སྲོག་རྩ་འདུས། དེ་ནས་རོལ་མོའི་སྒྲ་དང་བཅས། གདུང་བའི་དབྱངས་ཀྱིས་སྤྱན་དྲང་བ་ནི། ཧཱུཾ། སྔོན་གྱི་བསྐལ་པའི་དང་པོ་ལ། ཨྱོན་ཡུལ་གྱི་ནུབ་བྱང་མཚམས། པདྨ་གེ་སར་སྡོང་པོ་ལ། ཡ་མཚན་མཆོག་གི་དངོས་གྲུབ་བརྙེས། པདྨ་འབྱུང་གནས་ཞེས་སུ་གྲགས། འཁོར་དུ་མཁའ་འགྲོ་མང་པོས་བསྐོར། ཁྱོད་ཀྱི་རྗེས་སུ་བདག་བསྒྲུབ་ཀྱི། བྱིན་གྱིས་བརླབ་ཕྱིར་གཤེགས་སུ་གསོལ། ཧཱུཾ། དྷ་ན་ཀོ་ཤའི་མཚོ་གླིང་དུ། དྲག་པོའི་བརྟུལ་ཞུགས་མཛད་པའི་ཚེ། སངས་རྒྱས་ཀུན་གྱིས་དབང་བསྐུར་མཛད། མཁའ་འགྲོ་དམ་ཅན་དབང་དུ་བསྡུས། རྡོ་རྗེ་ཕག་མོ་ཡུམ་དང་རོལ། ལྷ་སྲིན་སྡེ་བརྒྱད་བྲན་དུ་བཀོལ། བདུད་དང་ལོག་འདྲེན་ཐམས་ཅད་བསྒྲལ། གསང་མཚན་རྡོ་རྗེ་དྲག་པོ་རྩལ། རྡོ་རྗེ་སྲིན་པོའི་ལྷ་ཚོགས་རྣམས། གནས་འདིར་སྤྱན་འདྲེན་གཤེགས་སུ་གསོལ། ཧཱུཾ། མ་གཡེལ་མ་གཡེལ་རིགས་འཛིན་ཚོགས། ཆོས་སྐུ་ལོངས་སྐུ་སྤྲུལ་སྐུ་ཡི། བླ་མ་ཀུན་འདུས་ཐོད་ཕྲེང་རྩལ། གནས་འདིར༝། ཧཱུཾ། མ་གཡེལ་མ་གཡེལ་ཡི་དམ་ལྷ། སྒྲུབ་ཆེན་བཀའ་བརྒྱད་ལྷ་ཚོགས་ཀྱི། ཡི་དམ་ཀུན་འདུས་བྲག་པོ་རྩལ། གནས་འདིར༝། ཧཱུཾ། མ་གཡེལ་མ་གཡེལ་དམ་ཅན་ཚོགས། མཁའ་འགྲོ་གིང་དང་བཀའ་ཉན་རྣམས། སྔོན་གྱི་དམ་ཚིག་རྗེས་དགོངས་ལ། གནས་འདིར༝། ཧཱུཾ། བཞེངས་ཤིག་པདྨ་འབྱུང་གནས་མཁའ་འགྲོའི་ཚོགས། དགོངས་ཤིག་ཕྱོགས་བཅུ་དུས་གསུམ་བདེ་གཤེགས་རྣམས། རྗེ་བཙུན་ཆེན་པོ་(༡༡ན)
པདྨ་ཐོད་འཕྲེང་རྩལ། རིགས་འཛིན་མཁའ་འགྲོའི་གནས་ནས་གཤེགས་སུ་གསོལ། དབུ་སྐྲ་མཛེས་པའི་ཐོར་ཚུགས་ཤིགས་སེ་ཤིག །རིན་ཆེན་རྒྱན་ཆ་མང་པོ་སིལ་ལི་ལི། དུར་ཁྲོད་རུས་པའི་རྒྱན་ཆ་ཁྲོལ་ལོ་ལོ། སྒྲ་དང་རོལ་མོ་མང་པོ་འུར་རུ་རུ། ཡི་དམ་ལྷ་ཚོགས་ཧཱུཾ་སྒྲ་དིར་རི་རི། མཁའ་འགྲོ་སྡེ་ལྔའི་གར་བྱེད་ཤིགས་སེ་ཤིག །གིང་ཆེན་དཔའ་བོའི་བྲོ་རྡུང་ཁྲབས་སེ་ཁྲབ། མ་མོ་མཁའ་འགྲོ་སྤྲིན་ལྟར་ཐིབས་སེ་ཐིབ། ཕྱོགས་སྐྱོང་སྡེ་བརྒྱད་ལས་བྱེད་ཁྱུགས་སེ་ཁྱུག །ཞུབ་ཅན་སྟོང་གི་སྒྲ་སྐད་སིལ་ལི་ལི། གཡས་ན་ཕོ་རྒྱུད་ཐམས་ཅད་ཤར་ར་ར། གཡོན་ན་མོ་རྒྱུད་ཐམས་ཅད་ཤར་ར་ར། བར་སྣང་ཐམས་ཅད་དར་དུ་ལྷབས་སེ་ལྷབ། དྲི་ཞིམ་སྤོས་ཀྱི་ངད་པ་ཐུལ་ལུ་ལུ། མཁའ་འགྲོ་གསང་བའི་བརྡ་སྐད་དིར་རི་རི། གྱིང་ཆེན་དཔའ་བོའི་བཤུག་གླུ་ཀྱུར་རུ་རུ། ཧཱུཾ་གི་སྣང་གླུ་མང་པོ་དིར་རི་རི། ཕཊ་ཀྱི་བརྡ་སྐད་དྲག་པོ་སངས་སེ་སང་། བདག་དང་འགྲོ་དྲུག་སེམས་ཅན་ཐམས་ཅད་ལ། ཐུགས་རྗེས་གཟིགས་ལ་གནས་འདིར་གཤེགས་སུ་གསོལ། གནས་འདིར་ཐུགས་རྗེས་དགོངས་ཏེ་གཤེགས་ནས་ཀྱང་། བདག་གིས་བྱང་ཆུབ་སྙིང་པོ་མ་ཐོབ་བར། བགེགས་དང་ལོག་འདྲེན་བར་ཆད་འདུལ་བ་དང་། མཆོག་དང་ཐུན་མོང་དངོས་གྲུབ་སྩལ་དུ་གསོལ། ཧཱུཾ། སྐྱེ་འགག་འགྱུར་མེད་འཕྲིན་ལས་ཐམས་ཅད་རྫོགས། རང་བྱུང་ཐུགས་རྗེས་འགྲོ་དྲུག་སྒྲོལ་བར་མཛད། ཡིད་བཞིན་ནོར་བུའི་དངོས་གྲུབ་ཆར་ལྟར་འབེབས། རྡོ་རྗེ་ཐོད་འཕྲེང་རྩལ་ལ་ཕྱག་འཚལ་བསྟོད། ཧཱུཾ། བླ་མ་ཡི་དམ་མཁའ་འགྲོ་ལ། ལྷ་རྫས་ཕྱི་མཆོད་འབུལ་(༡༡བ)
བ་ནི། ཨརྒྷཾ་བདུག་སྤོས་མེ་ཏོག་དང་། མར་མེ་དྲི་ཆབ་ཞལ་ཟས་དང་། སྙན་པའི་རོལ་མོ་མཆོད་པར་འབུལ། ཧཱུཾ། བླ་མ་ཡི་དམ་མཁའ་འགྲོ་ལ། རང་བྱུང་ནང་མཆོད་འབུལ་བ་ནི། དབང་པོ་ལྔ་ཡི་མེ་ཏོག་མཆོད། གསུར་ཆེན་དུད་པའི་དྲི་ཡིས་མཆོད། ཞུན་ཆེན་སྣང་གསལ་མར་མེས་མཆོད། རྡོ་རྗེ་དྲི་ཆུ་བྱུག་པས་མཆོད། བདུད་རྩི་དྲི་ཆེན་ཞལ་ཟས་མཆོད། རྐང་གླིང་ཐོད་རྔའི་སྒྲ་ཡིས་མཆོད། དུག་གསུམ་སྐུ་གསུང་ཐུགས་སུ་མཆོད། དུག་ལྔ་ཡེ་ཤེས་ལྔ་རུ་མཆོད། སྣང་སྲིད་ཕྱག་རྒྱ་བཞི་རུ་མཆོད། མཆོད་བཞེས་དབང་དང་དངོས་གྲུབ་སྩོལ། ཧཱུཾ། བླ་མ་ཡི་དམ་མཁའ་འགྲོ་ལ། གཉིས་མེད་གསང་མཆོད་འབུལ་བ་ནི། ཡབ་ཡུམ་གཉིས་མེད་མཁའ་གསང་ནས། བྱང་སེམས་དཀར་དམར་བདེ་བའི་མཆོག །བདེ་བ་ཆེན་པོ་མཆོད་པར་འབུལ། སྐུ་ལུས་རྒྱས་ཕྱིར་བཞེས་སུ་གསོལ། ཧཱུཾ། བླ་མ་ཡི་དམ་མཁའ་འགྲོ་ལ། དྲག་པོའི་བསྒྲལ་མཆོད་འབུལ་བ་ནི། ཆེ་མཆོག་པདྨ་ཐོད་འཕྲེང་རྩལ། ཕྱག་གཡས་རྡོ་རྗེ་རྩེ་དགུ་གདེངས། ཕྱག་གཡོན་ཕུར་བུས་དགྲ་སྙིང་གཟིར། གནོད་བྱེད་ཐལ་བའི་རྡུལ་དུ་རློག། དགྲ་བགེགས་ཤ་རུས་མཆོད་པར་བཞེས། ཧཱུཾ། རང་བྱུང་གདོད་ནས་རྣམ་པར་དག །རྩ་བ་བརྒྱད་ལ་ཡན་ལག་སྟོང་། བདུད་རྩི་སྨན་གྱི་མཆོད་པ་འདི། བླ་མ་ཡི་དམ་མཁའ་འགྲོ་དང་། དམ་ཅན་ཆོས་སྐྱོང་རྣམས་ལ་འབུལ། སྐུ་གསུང་ཐུགས་ཀྱི་དངོས་གྲུབ་སྩོལ། ཧཱུཾ། བླ་མ་ཡི་དམ་མཁའ་འགྲོ་ལ། རྒྱུད་དྲུག་བསྒྲལ་བའི་རཀྟ་འདི། འདོད་ཆགས་རྩད་ནས་བཅད་པའི་ཕྱིར། སྐྱེ་མེད་དོན་གྱི་མཆོད་པ་(༡༢ན)
བཞེས། ཧཱུཾ། བླ་མེད་མཆོག་གི་མཆོད་པ་དམ་པར་སྦྱར་བ་འདི། ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། ཐུགས་དམ་བཞིན་དུ་ཅི་བདེར་བཞེས་སུ་གསོལ། ལས་ཅན་འདི་དང་འཕྲད་པ་རྣམས། དཀྱིལ་འཁོར་གསུམ་པོ་གསལ་བཏབ་ལ། ཉིན་མཚན་དུས་དྲུག་ཐམས་ཅད་དུ། བསྙེན་པ་ཆུ་བོའི་གཞུང་བཞིན་བཟླས། དམ་རྫས་ཕྱི་ནང་གསང་བའི་རྫས། དངོས་འབྱོར་ཡིད་ཀྱིས་རྣམ་སྤྲུལ་ཏེ། དུས་དང་གཟའ་སྐར་བཟང་པོ་ལ། དབུ་བཙུགས་ཧཱུཾ་གི་འཕྲིན་ལས་ནི། བླ་མ་མཆོད་ཕྱིར་རྒྱུན་དུ་འབུལ། རྟགས་དང་དོན་གྱི་བསྟོད་པ་ནི། འཛབ་བསྙེན་འཕྲིན་ལས་སྐབས་སུ་འབུལ། ཧཱུཾ། དུར་ཁྲོད་ཆེན་པོ་འཇིགས་པའི་གད་བརྒྱངས་ཅན། བསྐལ་པའི་མེ་འབར་རྡོ་རྗེའི་ཚ་ཚ་འཕྲོ། མ་མོ་མཁའ་འགྲོ་སྤྲིན་ལྟར་འདུ་བའི་གནས། ཤ་ཟ་སྲིན་པོ་བརྒྱལ་ཞིང་རེངས་པའི་གནས། ཨྱོན་མཁའ་འགྲོའི་གླིང་ནས་ཟབ་མོའི་བཀའ། བསམ་གྱིས་མི་ཁྱབ་གསུང་གི་སྙིང་ཐིག་འདི། དྲག་པོའི་ཐུགས་ཀྱི་སྒྲུབ་པ་འདི་ཙམ་སྟེ། གཏེར་དུ་སྦེད་དོ་ནམ་ཞིག་བསྟན་པའི་མཐར། ལས་ཅན་ང་ཡི་བུ་དང་འཕྲད་པར་ཤོག །རྟགས་བསྟོད་འདི་ལྟར་དུ་དགོངས་ལ་རྟགས་ཀྱི་བསྟོད་པའོ། །ཧཱུཾ། དུར་ཁྲོད་ཆེན་པོ་རབ་ཏུ་འཇིགས་པའི་ཚལ། ཉོན་མོངས་འཇོམས་མཛད་མེ་དཔུང་འབར་བའི་ཀློང་། ཆགས་མེད་པདྨ་ཐབས་ཤེས་ཉི་ཟླའི་གདན། དྲེགས་པ་སྲིན་པོ་བརྫིས་པའི་གདན་སྟེང་དུ། འཇིགས་བྱེད་ཆེན་པོ་རྡོ་རྗེ་དྲག་པོ་རྩལ། སྐུ་མདོག་མཐིང་ནག་འབར་བའི་གར་དགུ་ལྡན། སྤྱན་(༡༢བ)
བགྲད་མཆེ་གཙིགས་ཨག་ཚོམས་མེ་ལྟར་འབར། གྱད་ཀྱི་དོར་སྟབས་འགྱིང་བག་སྟབས་སུ་བཞུགས། དབུ་སྐྲའི་ཐོར་ཚུགས་ནམ་མཁའི་སྤྲིན་ལྟར་གཏིབས། རིགས་ལྔའི་སངས་རྒྱས་རྣམས་ཀྱིས་དབུ་ལ་བརྒྱན། རིན་ཆེན་འབར་བས་དབུ་དང་ཕྱག་ཞབས་སྤྲས། ཕྱག་གཡས་གནམ་ལྕགས་རྡོ་རྗེ་རྩེ་དགུ་འཕྱར། ཕྱག་གཡོན་གསེར་གྱི་དྲིལ་བུ་དཀུ་ལ་བརྟེན། དུར་ཁྲོད་ཆས་བརྒྱད་སྐུ་ལ་ལེགས་པར་བརྒྱན། ཟབ་ཆེན་བེར་སྨུག་དབང་གི་ན་བཟའ་གསོལ། རུས་པའི་རྒྱན་དྲུག་རྟགས་ཀྱིས་མཛེས་པར་བརྒྱན། བདེ་གཤེགས་ཐམས་ཅད་འདུས་པའི་སྐུ་གསུང་ཐུགས། མཁའ་འགྲོ་འབུམ་ཕྲག་མང་པོའི་སྡེ་དཔོན་མཛད། རྡོ་རྗེ་དྲག་པོ་རྩལ་ལ་ཕྱག་འཚལ་བསྟོད། སྐབས་འདིར་སུམ་བརྒྱ་ཉེར་གཅིག་གི་འཛབ་བཟླ། ཧཱུཾ། ཆོས་ཀྱི་དབྱིངས་ཀྱི་ཞིང་ཁམས་སུ། ཀུན་བཟང་ཆེ་མཆོག་ཧེ་རུ་ཀ །འགྲོ་བའི་དོན་དུ་སྐུ་བཞེངས་ལ། ཆོས་ཉིད་སྟོང་པའི་རང་སྒྲ་སྒྲོག །བདག་ཀྱང་ཁྱེད་ཀྱི་རྗེས་སུ་འཇུག །རིགས་འཛིན་བླ་མ་ཚོས་བྱིན་གྱིས་རློབས་མཛོད་ཅིག །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། རང་བྱུང་རྣམ་དག་གཞལ་ཡས་སུ། ཡེ་ཤེས་ལྔ་ལྡན་རྒྱལ་བ་ལྔ། ལྕང་ལོ་ཅན་གྱི་གནས་མཆོག་ཏུ། གསང་བདག་ཕྱག་ན་རྡོ་རྗེ་ཡང་། བྱང་ཆུབ་སེམས་ཀྱི་གཞལ་ཡས་སུ། སྨུག་ནག་དབང་གི་མཁའ་འགྲོ་ཡང་། འགྲོ་བའི༝། ཆོས༝། བདག༝། རིགས༝། ཧཱུཾ༝། རི་རྒྱལ་ལྷུན་པོའི་རྩེ་མོ་རུ། ཚངས་པའི་རྒྱལ་པོ་གདོང་གསུམ་ཡང་། རྣམ་པར་རྒྱལ་བའི་ཁང་བཟང་དུ། རིགས་འཛིན་ལྷ་དབང་བརྒྱ་བྱིན་ཡང་། སིནྡྷུ་རྒྱ་མཚོའི་མཚོ་གླིང་དུ། རིགས་འཛིན་ཀླུ་རྒྱལ་འཇོག་
པོ་ཡང་། འགྲོ་བའི༝༝༝། མ་ལ་ཡ་གནམ་ལྕགས་རྩེ་མོ་རུ། བསོད་ནམས་བསགས་པའི་རྒྱལ་པོ་ཛ། ཟ་ཧོར་ཡུལ་གྱི་གནས་མཆོག་ཏུ། མཁས་པ་ཤཱཀྱ་པྲ་བྷ་ཡང་། ཡང་ལེ་ཤོད་ཀྱི་བྲག་ཕུག་ཏུ། རིགས་འཛིན་པདྨ་འབྱུང་གནས་ཀྱང་། འགྲོ་བའི༝༝༝། ཆུ་བོ་གངྒཱའི་རྩ་བ་རུ། མཁས་པ་བི་མཱ་མི་ཏྲ་ཡང་། མ་བལ་ནགས་ཀྱི་རྩ་བ་རུ། བལ་པོ་ཤཱི་ལ་མཉྫུ་ཡང་། མོན་ཁ་སེང་གེ་ཡང་རྫོང་དུ། མཁར་ཆེན་བཟའ་ཡི་འཚོ་རྒྱལ་ཡང་། །འགྲོ་བའི༝༝༝། །རོང་གི་བྲག་དམར་ཀེའུ་ཚང་དུ། །སྣ་ནམ་རྡོ་རྗེ་བདུད་འཇོམས་ཀྱང་། །རི་བོ་བཀྲ་བཟང་ཤར་འདབས་སུ། གཏེར་སྟོན་རིགས་འཛིན་ཡབ་སྲས་ཀྱང་། ཐུགས་རྗེ་འགྱུར་མེད་གཞལ་ཡས་སུ། །དྲན་མཆོག་རྡོ་རྗེའི་མཚན་ཅན་ཡང་། །འགྲོ་བའི༝༝༝། །མཁའ་སྤྱོད་དག་པའི་ཞིང་ཁམས་སུ། །སྔགས་འཆང་རྡོ་རྗེ་མགོན་པོ་ཡང་། །ཤྲཱི་བྱང་རྫོང་སྒྲུབ་ཁང་དུ། །མཚན་ལྡན་བྱམས་པ་བཤེས་གཉེན་ཡང་། །རྡོ་རྗེ་ཕུར་པའི་གཞལ་ཡས་སུ། །མཚན་ལྡན་ངག་དབང་གྲགས་པ་ཡང་། །འགྲོ་བའི༝༝༝། །སྐྱ་བོ་ཁ་གདངས་གནས་མཆོག་ཏུ། །ཆོས་རྗེ་སངས་རྒྱས་དཔལ་བཟང་ཡང་། །བདེ་གྲོལ་གསང་སྔགས་ཆོས་གླིང་དུ། །ཐུགས་སྲས་ནམ་མཁའ་རྒྱལ་མཚན་ཡང་། །ཡོལ་མོ་གངས་ཀྱི་ར་བ་རུ། །སྔགས་འཆང་ཤཱཀྱ་བཟང་པོ་ཡང་། །འགྲོ་བའི༝༝༝མ། །ཆུ་བོ་རི་ཡི་བྲག་ཕུག་ཏུ། །རིགས་འཛིན་བདུད་འཇོམས་རྡོ་རྗེ་ཡང་། །པདྨའི་ཨེ་ཝཾ་ལྕོག་སྒར་དུ། །ཆོས་རྒྱལ་དབང་པོའི་སྡེ་ཉིད་ཀྱང་། །ཐུབ་བསྟན་རྡོ་རྗེའི་བྲག་སྟེང་དུ། །རིགས་འཛིན་ངག་གི་དབང་པོ་ཡང་། །འགྲོ་བའི༝༝༝། །ཐེག་(༡༣བ)
མཆོག་གསང་སྔགས་ཕོ་བྲང་དུ། །ཟུར་ཆེན་ཆོས་དབྱིངས་རང་གྲོལ་ཡང་། །བདེ་ཆེན་ཆོས་སྐུའི་ཀློང་ཡངས་སུ། །བརྒྱུད་པ་ཀུན་འདུས་ཚོགས་རྣམས་ཀྱང་། །ཨོ་རྒྱན་སྨིན་གྲོལ་གླིང་མཆོག་ཏུ། །སྤྲུལ་སྐུ་གཏེར་བདག་གླིང་པ་ཡང་། །འབྲལ་མེད་སྙིང་གའི་ཕོ་བྲང་དུ། །དྲིན་ཆེན་རྩ་བའི་བླ་མ་ཡང་། །འགྲོ་བའི༝༝༝། །རང་ལུས་རྒྱལ་བའི་དཀྱིལ་འཁོར་དུ། །རང་རིག་མ་ཧཱ་གུ་རུ་ཡང་། །གཏེར་མཛོད་བསེ་སྒྲོམ་སྨུག་པོ་རུ། གསང་སྔགས་སྙིང་པོའི་མཐར་ཐུག་ཀྱང་། །སྨུག་ནག་གྲུ་གསུམ་གཞལ་ཡས་སུ། བཀའ་སྲུང་ཨེ་ཀ་ཛཱ་ཊི་ཡང་། འགྲོ་བའི༝༝༝། །རྩ་དང་ཐེག་ལེའི་གཞལ་ཡས་སུ། །མ་དང་ཡེ་ཤེས་མཁའ་འགྲོ་ཡངཿ བཀའ་དང་དམ་ཚིག་གཞལ་ཡས་སུཿ བཀའ་སྲུང་ཆོས་སྐྱོང་གཏེར་བདག་ཀྱངཿ དམ་ཚིག་གཙང་མའི་གཞལ་ཡས་སུཿ མཆེད་ལྕམ་རྡོ་རྗེའི་སྤུན་གྲོགས་ཀྱངཿ འགྲོ་བའི་དོན་དུ྾༔ ཆོས་ཉིད྾༔ བདག་ཀྱང་྾༔ རིགས་འཛིན་བླ་མ་ཚོས་བྱིན་གྱིས་རློབས་མཛོད་ཅིགཿ ཧཱུཾ༝། ལུས་ལ་བདེ་བ་བྱིན་གྱིས་རློབསཿ ངག་ལ་ནུས་པ་བྱིན་གྱིས་རློབསཿ སེམས་ལ་རྟོགས་པ་བྱིན་གྱིས་རློབས། ལུས་ངག་ཡིད་གསུམ་ལ་བྱིན་གྱིས་རློབས་མཛོད་ཅིག །ཧཱུཾ། ཕྱི་ཡི་བར་ཆད་ཕྱི་རུ་གསོལཿ ནང་གི་བར་ཆད་ནང་དུ་སོལཿ གསང་བའི་བར་ཆད་དབྱིངས་སུ་སོལཿ ཕྱི་ནང་གསང་གསུམ་གྱི་བར་ཆད་སོལ་མཛོད་ཅིགཿ ཧཱུཾ༝། །མི་མཐུན་རྐྱེན་དང་བར་ཆད་སོལཿ མཐུན་པའི་ལམ་སྣ་ཆོས་ལ་དྲོངསཿ མཆོག་དང་ཐུན་མོང་གི་དངོས་གྲུབ་སྩོལ་མཛོད་ཅིགཿ ཧཱུཾ༝། །འོག་གི་དངོས་གྲུབ་ཀྱི་འཛབ་འདིར་བླངས་ཏེ་(༡༤ན)
གསུམ་ཙམ་བཟླཿ གསོལ་འདེབས་འཛབ་དང་འབྲེལ་བ་ཡིན་ཞེས་གསུངས་པས་སྐབས་འདིར་ལེའུ་བདུན་མ་འདོནཿ དོན་གྱི་བསྟོད་པ་ནི། ཧཱུཾ། སྐྱེ་འགག་མེད་པ་ཆོས་ཉིད་དབྱིངས་ཀྱི་ངངཿ འདུ་འབྲལ་མེད་པ་བདེ་ཆེན་ཕོ་བྲང་ནསཿ རང་བྱུང་རང་ཤར་ཐུགས་རྗེ་ཆེན་པོའི་སྐུཿ བདེ་གཤེགས་ཀུན་འདུས་རྡོ་རྗེ་དྲག་པོ་རྩལཿ རང་རིག་ལྷ་ཡི་ལྷ་ལ་ཕྱག་འཚལ་ལོཿ གསལ་འགྲིབ་མེད་པ་བདེ་བ་ཆེན་པོའི་སྐུཿ རང་རིག་རང་གདངས་མ་འགགས་གསལ་བ་ལཿ རྩོལ་སྒྲུབ་བྲལ་བས་བྱ་བྱེད་གོལ་ས་ཆོདཿ མ་བཅོས་རང་ཤར་འཛིན་མེད་སྤྲོས་དང་བྲལཿ རིག་པ་རང་གསལ་ངང་ལ་ཕྱག་འཚལ་ལཿ རིག་པའི་ཆོ་འཕྲུལ་ཅིར་ཡང་འཆར་བ་ལཿ རྒྱ་ཆད་ཕྱོགས་ལྷུང་མེད་པས་འཁྲུལ་པ་བྲལཿ ཅིར་སྣང་འཛིན་མེད་གྲོལ་བས་བདེ་བ་ཆེཿ གསལ་འཚེར་དངས་པ་སྐྱོན་བྲལ་རིག་པའི་གདངསཿ ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལཿ འབྱུང་བ་བཞི་ལ་བརྟེན་པའི་ཕུང་པོ་ལཿ བཅིངས་འཐུམས་རྡུགས་པ་མེད་པར་ཕྱོགས་བཅུར་འཆརཿ གང་ཤར་རྟག་ཆད་བྲལ་བའི་ཟང་ཐལ་ལཿ འཁྲུལ་སྣང་ངར་གསོས་མི་གདབ་རང་སོར་བཞགཿ རང་བྱུང་སྤྲུལ་པའི་སྐུ་ལ་ཕྱག་འཚལ་ལོཿ རང་རིག་ཁ་དོག་ངོས་འཛིན་མ་གྲུབ་པཿ སྣང་སྟོང་ཕྱོགས་ལྷུང་ཡེ་ནས་བྲལ་བ་ལཿ མ་འགགས་གསལ་འཚེར་དངས་པ་ཆོས་ཉིད་དངཿ རང་རིག་གོ་བོ་མ་བཅོས་ཐོད་ཕྲེང་རྩལཿ རང་རིག་བླ་མའི་མཆོག་ལ་ཕྱག་འཚལ་ལོཿ སྐབས་འདིར་བསྟན་སྲུང་ཡོངས་རྫོགས་སོགས་གཏེར་སྲུང་གི་གསོལ་མཆོད་རྣམས་མཛད། དེ་ལྟར་(༡༤བ)
ཧཱུཾ་གི་འཕྲིན་ལས་ཟབ་མོ་འདིཿ ལས་ཅན་བུ་དང་འཕྲད་ནས་བསྒྲུབས་པའི་ཚེཿ གསང་སྔགས་ཟབ་མོའི་ཚིག་དང་དོན་དུ་བསྡེབསཿ དོན་བསྟོད་སྔགས་ཀྱི་ལས་བྱང་ནང་དུ་ལྟོསཿ མཚམས་གཅོད་བཤགས་པ་བྱིན་དབབ་གསུམ་གྱི་དབྱངསཿ ནམ་མཁའི་འབྲུག་ལྟར་དྲག་ལ་ངར་དང་ལྡནཿ སྤྱན་འདྲེན་མཆོད་འབུལ་བསྟོད་པ་གསུམ་གྱི་དབྱངསཿ སྙན་ལ་གདངས་ཆགས་དྲིལ་བུའི་སྒྲ་ལྟར་བརྗོདཿ ཏིང་འཛིན་རྣམ་གསུམ་ལ་སོགས་གཞུང་གི་དབྱངསཿ ནམ་མཁའ་དངས་པའི་ཀློང་ལྟར་གཏིང་ཟབ་གསལཿ ལྷག་མ་ལ་སོགས་མཇུག་གི་ཆོ་ག་རྣམསཿ རྒྱལ་པོའི་བཀའ་ལྟར་གསལ་ལ་བརྗིད་ཆགས་པཿ ཐུགས་སྒྲུབ་དྲག་པོའི་སྐུ་གསུང་ཐུགས་ཀྱི་བཅུདཿ ནམ་མཁའ་ལྟ་བུའི་རྡོ་རྗེ་སྒྲུབ་པའི་སྒོརཿ ལས་ཅན་དམ་ཚིག་ཅན་དང་འཕྲད་པར་ཤོགཿ རྗེས་ལ། ཚོགས་བྱ་བ་ནི། རཾ་ཡཾ་ཁཾ་ཏྲཾ་ཧཱུཾཿ ཨཱོཾ་ཨཱཿཧཱུཿ ཧཱུཾ། ཚོགས་ཀྱི་ཡོ་བྱད་ཐམས་ཅད་ཀུནཿ རྣམ་རྟོག་དངོས་འཛིན་བག་ཆགས་སྦྱངསཿ རཏྣའི་སྣོད་ལ་བདུད་རྩིའི་བཅུདཿ འདོད་ཡོན་ལྷ་མོ་སྤྲིན་ལྟར་གཏིབསཿ ཧཱུཾ་ཧཱུཾ། རྗེ་བཙུན་པདྨ་ཐོད་འཕྲེང་རྩལཿ གདུང་བ་དྲག་པོས་བདག་དུངས་ཤིངཿ མཁའ་འགྲོའི་ཚོགས་དང་བཅས་པ་ལཿ འདོད་ཡོན་ལྔ་ལྡན་མཆོད་པ་འབུལཿ བ་ལིཾ་རྒྱན་གྱི྾༔ བདུད་རྩི་སྨན་གྱི྾༔ རཀྟ་དམར་གྱི྾༔ ཞལ་ཟས་ཚོགས་ཀྱི྾༔ ཏིང་འཛིན་རྩེ་གཅིག྾༔ སྐུ་གསུང་ཐུགས་ཀྱི་དངོས་གྲུབ་སྩོལ། ཧཱུཾ། སྣང་བ་སྣོད་ཀྱི་འཇིག་རྟེན་གཏོར་གཞོང་དུཿ སྲིད་པ་བཅུད་ཀྱི་སེམས་ཅན་གཏོར་མར་སྦྱརཿ དཔལ་གྱི་གཏོར་མ་བརྗིད་ལྡན་འགྱིང་བ་(༡༥ན)
འདཿ རི་རབ་ལྷུན་པོ་བས་ཀྱང་དཔངས་རེ་མཐཿ མ་མོའི་གཏོར་མ་པདྨས་བསྐོར་བ་འདཿ གླིང་བཞི་གླིང་ཕྲན་བས་ཀྱང་བཀོད་རེ་ལེགསཿ དཀར་གྱི་ཐིག་བཏབ་དམར་གྱི་གུར་ཕུབ་བཿ གསེར་གྱི་རི་བདུན་བས་ཀྱང་བརྗིད་རེ་ཆེཿ རཀྟ་དམར་གྱི་ཨརྒྷཾ་སྦྲེང་བ་འདིཿ རྒྱ་མཚོའི་མཆིང་ནམ་བས་ཀྱང་རྒྱ་རེ་ཆེཿ བདུད་རྩི་སྨན་གྱིས་གཏོར་མ་བྲན་པ་འདཿ ལྷ་ཡི་ཞལ་ཟས་བས་ཀྱང་རོ་དེ་བདའཿ དཀར་རྩི་དམར་རྩི་ཤ་ཆེན་དྲི་ཆེན་དངཿ དྲི་ཆུ་བྱུག་པའི་རྫས་དེ་རྣམ་པ་ལྔཿ སེང་གེ་རྟ་དང་གླང་ཆེན་བ་ལང་དངཿ མཆོག་ཆེན་མི་ལ་སོགས་ཏེ་རྣམ་པ་ལྔཿ མ་ཧཱ་མཾ་ས་ལ་སོགས་ཤ་སྣ་སྟོངཿ མ་ཧཱ་ཙིཏྟ་ལ་སོགས་སྙིང་སྣ་སྟོངཿ དབང་པོ་ལྔ་དང་གོ་རོ་ཙ་ན་དངཿ བྷ་སུ་ཏ་དང་ནང་ཁྲོལ་རྣམ་པ་ལྔཿ ཤིང་ཏོག་མེ་ཏོག་འབྲུ་སྣ་སྨན་སྣ་དངཿ ཟན་དང་འཁུར་བ་ཐུག་པའི་བྱེ་བྲག་དངཿ མར་ཐུད་ཕྲུམ་དང་ཞོ་དང་འོ་མར་བཅསཿ ཙི་དང་ཙ་རུ་ཙི་ཆེན་གོ་སྙོད་དངཿ སྒ་དང་ལན་ཚ་སྤོད་ཀྱི་བྱེ་བྲག་དངཿ རི་སྒོག་ཀླུངས་སྒོག་ཤ་མོ་སྣ་ཚོགས་དངཿ བཟའ་དང་བཅའ་བ་བཏུང་བའི་བྱེ་བྲག་དངཿ གཟུགས་སྒྲ་དྲི་རོ་རེག་བྱ་ཆོས་ལ་སོགསཿ འདོད་ཡོན་ལྔ་ཡི་མཆོད་པ་སྣ་ཚོགས་ཀུནཿ ཐོགས་མེད་བློ་ཡིས་ཐམས་ཅད་ཀུན་བསྡུས་ནསཿ ཏིང་འཛིན་དགོངས་བརྒྱུད་དག་པས་བྱིན་བརླབས་ཏེཿ བདུད་རྩིར་གྱུར་པའི་གཏོར་མ་ཆེན་པོ་འདིསཿ རྡོ་རྗེ་སློབ་དཔོན་ཐུགས་དམ་སྐོངས་གྱུར་ཅིགཿ ཡི་དམ་ལྷ་ཚོགསཿ མཁའ་འགྲོ་སྡེ་བཞིའི྾༔ དཔའ་བོ་གིང་བཞིའི྾༔ དམ་ཅན་སྲུང་མའི྾༔ མཆོད་པར་འོས་པའི྾༔ འདིར་རྩ་(༡༥བ)
གསུམ་བསྐང་གསོ་གཏོངཿ དེ་ནས། ཧོ། ཞལ་ཟས་ཚོགས་ཀྱི་མཆོད་པ་འདིཿ འདོད་ཡོན་མ་སྤངས་ལོངས་སྤྱོད་རྒྱནཿ དངོས་གྲུབ་སྣ་ཚོགས་འདི་ལས་འབྱུངཿ ཚོགས་ཀྱི་མཆོད་པ་རྒྱན་དུ་རོལཿ སིདྡྷི་ཕ་ལ་ཨ་ལ་ལ་ཧོ༔ཚོགས་ལ་རོལ་རྗེསཿ ཧོ། བདག་དང་རྡོ་རྗེ་སློབ་དཔོན་དངཿ མཆེད་དང་ལྕམ་དྲལ་རྣམས་ཀྱིས་མ་ཧཱ་མཾ་ས་གསོལ་བས་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་པར་གྱུར་ཅིགཿ ཛ་གད་དཔའ་བོ་གསོལ་བས་འགྲོ་བ་མང་པོ་དབང་དུ་འདུ་བར་གྱུར་ཅིགཿཞལ་ཟས་ཀྱི་བྱེ་བྲག་མང་པོ་གསོལ་བསཿ སྒྲུབ་པ་པོའི་མཐུ་དང་རྫུ་འཕྲུལ་དང་དངོས་གྲུབ་ལ་མངའ་བརྙེས་པར་གྱུར་ཅིག ཿདེའི་དགེ་བའི་རྩ་བས་སྒྲིབ་པ་རྣམ་པ་གཉིས་བྱང་ཚོགས་རྣམ་པ་གཉིས་རྫོགས་ཏེ་བླ་ན་མེད་པའི་བྱང་ཆུབ་ཀྱི་འབྲས་བུ་འཐོབ་པར་གྱུར་ཅིག ཿཅེས་བརྗོད་ལྷག་མར་རང་ལྷ་རུ་གསལ་བའི་ཁ་ཆུས་བྲན་ལ་འདི་སྐད་དོ། །ཧཱུཾ། སྔོན་ཚེ་ཁྲག་འཐུང་ཧེ་རུ་ཀའིཿ སྤྱན་སྔར་ཁས་བླངས་དམ་བཅས་ཤིངཿ བར་དུ་པདྨ་འབྱུང་གནས་ཀྱིཿ སྤྱན་སྔར་ཁས་བླངས་དམ་བཅས་པཿ ད་ལྟ་རིགས་འཛིན་བདག་ཅག་གིཿ བྲན་དང་ཕོ་ཉར་ཁས་བླངས་པའིཿ སྒྲུབ་སྡེ་བརྒྱད་ཀྱི་བཀའ་སྲུང་དངཿ གསང་སྔགས་ཐེག་པའི་བཀའ་སྲུང་རྣམསཿ བཀའ་ཡི་ཕམ་ཕབས་འདི་བཞེས་ལཿ སྔོན་གྱི་དམ་ཚིག་དྲན་པར་གྱིསཿ གསང་སྔགས་བསྟན་པ་རྒྱས་པར་སྤེལཿ བདུད་དང་དམ་སྲི་རྡུལ་དུ་རློགཿ བཅོལ་བའི་འཕྲིན་ལས་སྒྲུབ་པར་མཛོདཿ དེ་ནས་ཆད་མཐོ་བྱ་བ་ནི། ཧཱུཾ། སྔོན་གྱི་བསྐལ་པ་དང་པོ་འདས་པའི་དུསཿ འོག་(༡༦ན)
མིན་དགའ་ལྡན་ཞེས་བྱའི་གནས་མཆོག་ཏུཿ བཅོམ་ལྡ་དཔལ་ཆེན་ཁྲག་འཐུང་ཆེན་པོ་ཡིས། སྣང་སྲིད་མ་མོ་དམ་ལ་བཏགས་པའི་ཚེཿ གཽ་རི་ལ་སོགས་གནས་ཀྱི་ཁྲོ་མོ་བརྒྱདཿ སིངྷ་ལ་སོགས་ཡུལ་གྱི་ཕྲ་མེན་བརྒྱདཿ རྟ་གདོང་ལ་སོགས་སྒོ་མ་བཞི་རྣམས་ཀྱིསཿ སོ་སོའི་གཟུགས་མཆོག་དམ་པ་བསྟན་ནས་ཀྱངཿ བཀའ་ཡི་གཏོར་མ་ལེན་པར་མ་ཆད་དམཿ རྣལ་འབྱོར་ཚེ་སྲོག་བསྲིང་བར་མ་ཆད་དམཿ བཅོལ་བའི་འཕྲིན་ལས་སྒྲུབ་པར་མ་ཆད་དམཿ སྔོན་ཚེ་ཞལ་བཞེས་དམ་ལས་མ་འདའ་བརཿ དཔལ་ཆེན་བཀའ་ཡི་གཏོར་མ་འདི་ལོང་ལཿ བདག་གིས་བཅོལ་བའི་འཕྲིན་ལས་སྒྲུབ་པར་མཛོདཿ བསྐལ་པ་བར་མ་གསང་སྔགས་དར་བའི་དུསཿ བལ་ཡུལ་ཡང་ལེ་ཤོད་ཀྱི་བྲག་ཕུག་ཏུཿ སློབ་དཔོན་ཆེན་པོ་པདྨ་འབྱུང་གནས་དངཿ ལས་ཅན་བལ་མོ་ཤཱཀྱ་དེ་བ་ཡིསཿ རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེ་ཚཿ གཙང་རིས་དཔལ་མགོན་བདུན་དུ་རྩ་ལྔ་ཡིསཿ སོ་སོའི་བཀའ་ཡི྾༔ རྣལ་འབྱོར་྾༔ བཅོལ་བའི྾༔ སྔོན་ཚེ྾༔ སློབ་དཔོན་བཀའ་ཡི྾༔ བདག་གིས྾༔ དེ་འོག་ལྔ་བརྒྱ་ཐ་མ་བོད་ཀྱི་ཡུལཿ བསམ་ཡས་མཆིམས་ཕུའི་བྲག་དམར་ཀེའུ་ཚང་དུཿ སློབ་དཔོན་ཆེན་པོ་པདྨ་འབྱུང་གནས་དངཿ མངའ་བདག་རྒྱལ་པོ་ལ་སོགས་གྲུབ་ཆེན་བརྒྱདཿ སྒྲུབ་པ་བཀའ་བརྒྱད་དཀྱིལ་འཁོར་ཞལ་ཕྱེ་ཚེཿ བཀའ་ཡི་སྲུང་མ་དྲེགས་པ་སྡེ་བརྒྱད་ཀྱིསཿ སོ་སོའི྾༔ བཀའ་ཡི྾༔ རྣལ་འབྱོར྾༔ བཅོལ་བའི྾༔ སྔོན་ཚེ྾༔ སློབ་དཔོན་བཀའ་ཡི྾༔ བདག་གིས྾༔ དེ་འོག་ལྔ་བརྒྱ་ཐ་མ་བོད་ཀྱི་ཡུལཿ བསམ་ཡས་མཆིམས་ཕུའི་བྲག་དམར་ཀེའུ་ཚང་དུཿ སློབ་དཔོན་ཆེན་པོ་པདྨ་འབྱུང་གནས་དངཿ མངའ་བདག་རྒྱལ་པོ་ལ་སོགས་གྲུབ་ཆེན་བརྒྱདཿ སྒྲུབ་པ་བཀའ་བརྒྱད་དཀྱིལ་འཁོར་ཞལ་ཕྱེ་ཚེཿ བཀའ་ཡི་སྲུང་མ་དྲེགས་པ་སྡེ་བརྒྱད་ཀྱིསཿ སོ་སོའི྾༔ བཀའ་ཡི྾༔ རྣལ་འབྱོར྾༔ བཅོལ་བའི྾༔ སྔོན་ཚེ྾༔ དམ་ཚིག་བཀའ་ཡི྾༔ བདག་གིས྾༔ དེ་ནས་བསྟན་མ་བསྐྱང་བ་ནིཿ ཧཱུཾ། ཨ་(༡༦བ)
སུ་ར་ཡི་བྲག་ཕུག་ཏུཿ ཨྱོན་པདྨ་འབྱུང་གནས་ཀྱིཿ སྤྱན་སྔར་ཁས་བླངས་དམ་བཅས་པའིཿ བོད་ཡུལ་བསྟན་མ་བཅུ་གཉིས་དངཿ ཕྱི་གཏོར་དབང་བར་ཁས་བླངས་རྣམསཿ ཆོད་སྦྱིན་གཏོར་མ་འདི་བཞེས་ལཿ བདུད་དཔུང་ཐུལ་ལ་ཞིང་བཅུ་སྒྲོལཿ དལ་ཁ་ཆིངས་ལ་འབྲུ་བཅུད་སྤེལཿ དམག་དཔུང་ཆོམས་ལ་མཚོན་རྩེ་ཐུལཿ བཅོལ་བའི་འཕྲིན་ལས་སྒྲུབ་པར་མཛོདཿ དངོས་གྲུབ་བླང་བ་ནི། ཧཱུཾ། བསྟན་པ་འདི་ལ་ངོ་མཚར་རྨད་བྱུང་བའིཿ འཇིག་རྟེན་སྐྱབས་གྱུར་པདྨ་རྒྱལ་པོ་ནཿ རིགས་ནི་ཟ་ཧོར་རྒྱལ་པོའི་སྲས་སུ་འཁྲུངསཿ ཨྱོན་ཡུལ་དུ་སྒྲོ་འདོགས་མ་ལུས་བཅདཿ བསིལ་བའི་ཚལ་དུ་དངོས་གྲུབ་ཐམས་ཅད་བརྙེསཿ ཁ་བ་ཅན་དུ་བསྟན་པ་རྒྱས་པར་མཛདཿ ལྷོ་ནུབ་མཚམས་སུ་སྲིན་པོའི་ཁ་གནོན་མཛདཿ མྱ་ངན་མི་འདའ་འགྲོ་བའི་གཉེན་གཅིག་པུཿ སྐུ་གསུམ་ཆེ་མཆོག་བཛྲ་ཧེ་རུ་ཀཿ མཉམ་མེད་བླ་མ་མཆོག་དེ་དུས་འདིར་དྲནཿ འདིར་གཤེགས་རྒྱན་གྱི་གཏོར་མ་འདི་བཞེས་ལཿ བདག་ཅག་དཔོན་སློབ་ཡོན་མཆོད་འཁོར་བཅས་ལཿ མཆོག་དང་ཐུན་མོང་གི་དངོས་གྲུབ་ཞུ་བ་ལགས་སོཿ ཨཱོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾཿ ཧཱུཾ། ཤར་གྱི་ཕྱོགས་ནས་དངོས་གྲུབ་བསྐུལ་བའི་ལྷཿ ཞི་བའི་ལས་མཛད་རྡོ་རྗེ་ཐོད་ཕྲེང་རྩལཿ ཞི་བའི་རང་བཞིན་སྐུ་མདོག་དཀར་ལ་འཚེརཿ ན་བཟའ་དཀར་པོ་ཤིན་ཏུ་མཛེས་པར་གསོལཿ ཕྱག་མཚན་རྡོ་རྗེ་ལྕགས་ཀྱུ་ཌཱ་མ་རུཿ རྡོ་རྗེ་མཁའ་འགྲོའི་ཐུགས་དམ་རྒྱུད་བསྐུལ་ལོཿ བདག་ཅག་དཔོན་སློབ་ཡོན་མཆོད་འཁོར་བཅས་ལཿ ནད་གདོན་སྡིག་སྒྲིབ་ཞི་བའི་དངོས་གྲུབ་ཞུ་བ་ལགས་སོཿ ཨཱོཾ྾༔ ཧཱུཾ། ལྷོ་ཡི྾༔ རྒྱས་པའི་ལས་མཛད་རཏྣ་ཐོད་ཕྲེང་རྩལཿ རྒྱས་པའི་རང་བཞིན་སྐུ་མདོག་སེར་ལ་(༡༧ན)
འཚེརཿ ན་བཟའ་སེར་པོ་ཤིན་ཏུ་མཛེས་པར་གསོལཿ ཕྱག་མཚན་རིན་ཅེན་ཞགས་པ་ཌཱ་མ་རུཿ རིན་ཅེན་མཁའ་འགྲོའི་ཐུགས་དམ྾༔ བདག་ཅག྾༔ ཚེ་དང་བསོད་ནམས་རྒྱས་པའི་དངོས་གྲུབ་ཞུ་བ་ལགས་སོཿ ཨཱོཾ྾༔ ཧཱུཾ། ནུབ་ཀྱི྾༔ དབང་གི་ལས་མཛད་པདྨ་ཐོད་ཕྲེང་རྩལཿ དབང་གི་རང་བཞིན་སྐུ་མདོག་དམར་ལ་འཚེརཿ ན་བཟའ་དམར་པོ་ཤིན་ཏུ་མཛེས་པར་གསོལཿ ཕྱག་མཚན་པདྨ་ལྕགས་སྒྲོག་ཌཱ་མ་རུཿ པདྨ་མཁའ་འགྲོའི྾༔ བདག་ཅག྾༔ ཁམས་གསུམ་དབང་སྡུད་ཀྱི་དངོས་གྲུབ་ཞུ་བ་ལགས་སཿ ཨཱོཾ྾༔ ཧཱུཾ། བྱང་གི྾༔ དྲག་པོའི་ལས་མཛད་ཀརྨ་ཐོད་འཕྲེང་རྩལཿ དྲག་པོའི་རང་བཞིན་སྐུ་མདོག་ལྗང་ལ་འཚེརཿ ན་བཟའ་ལྗང་གུ་ཤིན་ཏུ་མཛེས་པར་གསོལཿ ཕྱག་མཚན་རྒྱ་གྲམ་དྲིལ་བུ་ཌཱ་མ་རུཿ ལས་ཀྱི་མཁའ་འགྲོའི་ཐུགས་དམ་རྒྱུད་བསྐུལ་ལོཿ བདག་ཅག྾༔ དགྲ་བགེགས་ཚར་གཅོད་ཀྱི་དངོས་གྲུབ་ཞུ་བ་ལགས་སོ། ཨཱོཾ་ཨཱཿཧཱུཾ་བཛྲ༝། ཧཱུཾ། དབུས་ཀྱི྾༔ སྐུ་ལྔ་ལྷུན་གྲུབ་བུདྡྷ་ཐོད་འཕྲེང་རྩལཿ ལྷུན་གྲུབ་རང་བཞིན་སྐུ་མདོག་སྨུག་ལ་འཚེེརཿ ན་བཟའ་སྨུག་པོ་ཤིན་ཏུ་མཛེས་པར་གསོལཿ ཕྱག་མཚན་འཁོར་ལོ་དྲིལ་བུ་ཌཱ་མ་རུཿ སངས་རྒྱས྾༔ དག་ཅག྾༔ མཆོག་དང་ཐུན་མོང་གི་དངོས་གྲུབ་ཞུ་བ་ལགས་སོཿ ཨཱོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ་ཧཱུཾ་ཧཱུཾཿ ན་ན་ཁ་དྷེ་སིདྡྷི་ཧཱུཾ་ཧཱུཾ་ཧཱུཾཿ སརྦ་སིདྡྷི་དྷ་ནཾ་དྷི་མེ་དྷི་ཧྲཱིཿ ཨཱ་ཡུཿསིདྡྷི་ས་མ་ཡ་སྡུས་སྡུསཿ ཞེས་ལན་གསུམ་བརྗོད། དངོས་གྲུབ་བསྐུལ་བའི་ཆོ་གའོ། ལྷག་ཆད་ཁ་བསྐང་། དེ་ནས་དཀྱིལ་འཁོར་བསྡུ་བ་ནི། ཧཱུཾ། ད་ནི་དཀྱིལ་འཁོར་གསལ་བཏབ་ལཿ ཕྱི་ནང་སྣོད་བཅུད་ཐམས་ཅད་ཀུནཿ ཡིག་འབྲུ་ཧཱུཾ་ལ་ཧྲིལ་གྱི་བསྡུཿ ཧཱུཾ་ཡང་མི་དམིགས་འཇའ་ལྟར་(༡༧བ)
ཡལཿ དེ་ནས་བདག་ཉིད་ལྷ་རུ་གསལཿ རྟག་ཆད་གཉིས་ཀྱི་མཐའ་གསལ་ལོཿ སྨོན་ལམ་ཤིས་བརྗོད་བླ་མ་གསང་འདུས་ལྟར་བྱཿ ཐུགས་སྒྲུབ་ཧཱུཾ་གི་འཕྲིན་ལས་འདིཿ མ་འོངས་སྙིགས་མ་ལྔ་བརྒྱ་ལཿ ལས་ཅན་བུ་དང་འཕྲད་པར་ཤོགཿ ཏན་ཉནྐསྭ་ལྟཿ ཐུགས་སྒྲུབ་དྲག་པོ་ཧཱུཾ་གི་འཕྲིན་ལས་ནཿ རྒྱས་པར་བྱེད་ན་ཚིག་དང་དོན་དུ་བསྡེབསཿ བསྡུས་པར་བྱེད་ན་རང་གཞུང་སོ་སོར་བྱཿ ས་མ་ཡཿ སྐུའི་རྒྱཿ གསུང་གི་རྒྱཿ ཐུགས་ཀྱི་རྒྱཿ བྲག་རི་དུག་སྦྲུལ་སྤུངས་འདྲའི་རྐེད་ལྷོ་གསེར་མཛོད་སེར་པོ་ནས་རིགས་འཛིན་རྒོད་ཀྱི་ལྡེམ་ཕྲུ་ཅན་གྱིས་གདན་དྲངས་པའོ། །འདི་བསྒྲུབས་དུས་གསུམ་རྒྱལ་བ་ཡིན་ནོ་ཅོག །ཅིག་ཅར་འགྲུབ་པ་རིགས་འཛིན་བླ་མ་ཡི། །དྲག་པོ་ཧཱུཾ་གི་འཕྲིན་ལས་ཉམས་བསྟར་བ། །བསྐལ་མང་བསོད་ནམས་བསགས་པའི་མཐུ་ལས་ཅི། །བགྲང་ཡས་ཞི་ཁྲོ་སྣང་སྟོང་ལུས་དཀྱིལ་ནས། །ཧཱུཾ་གི་གླུ་དབྱངས་གྲག་སྟོང་སྔགས་ཀྱི་སྒྲ། །ཀ་དག་རང་རྩལ་གསལ་སྟོང་ཆོས་ཉིད་ཀློང་། །འབྱམས་སུ་ཀླས་པས་རིག་སྟོང་རང་ངོ་འཕྲོད། །ཀུན་བཟང་གོ་འཕང་ཚེ་འདིར་སྒྲུབ་ཞར་ལ། །ཞི་རྒྱས་དབང་སོགས་ཐུན་མོང་དངོས་གྲུབ་ཀུན། །འབྲས་དཀར་ལོ་ལེགས་རྩྭ་ཕུབ་འབད་མེད་དུ། །འབྱུང་འདིས་ཐེག་དགུའི་ཟབ་གསང་གནད་ཀུན་རྫོགས། །གསེར་མིན་གསེར་དུ་བརྫུ་བའི་རྫུན་པོའི་གཏེར། །ཞིག་མིན་ཞིག་པོར་རློམས་པས་ཉེར་སྤེལ་ནས། །རིགས་མིན་རིགས་པར་འབད་པས་བསྒྲུབ་པ་ལ། །མཚུངས་མིན་མཚུངས་བྲལ་སྔ་འགྱུར་ཟབ་མོའི་ཆོས། །འཕྲིན་ལས་ལྷན་ཐབས་བསྡེབས་པའི་རིན་ཅེན་འཕྲེང་། །བཀོད་པས་སྐྱེ་བར་མཚོ་སྐྱེས་རྡོ་རྗེ་ཡིས། །རྗེས་བཟུང་གངས་(༡༨ན)
ཅན་བསྟན་འགྲོའི་ཕན་བདེ་རྣམས། །སྤེལ་ལ་པདྨ་ཐོད་ཕྲེང་དང་མཚུངས་ཤོག །ཐུགས་སྒྲུབ་དྲག་པོ་རྩལ་གྱི་འཕྲིན་ལས་འབྲིང་པོ་ཆ་ལག་ཚང་བ་ཞིག་རྣམ་པར་རྒྱལ་བའི་ཕན་བདེ་ལེགས་བཤད་གླིང་པའི་ཞལ་འདོན་དུ་ཐོག་མ་ནས་འཛུགས་རྩིས་ཡོད་ཀྱང་གཞན་རྐྱེན་གྱིས་གླེང་བརྗོད་སོགས་ལ་བརྟེན་རིམ་འགྱངས་སུ་ལུས་པ་ཡི་དམ་འདི་ཉིད་ཀྱི་སྒོ་ནས་བོད་འབངས་བདེ་ཐབས་སོགས་མང་དུ་བསྟར་དགོས་པས་གལ་ཆེ་ངེས་སུ་མཐོང་ཞིང་སྒྲིག་རྩོམ་ཀྱང་སྟོད་ཕྱོགས་ནས་ལྷད་ཡོད་མེད་སྣ་ཚོགས་ཤིག་མཐོང་བ་མཆོག་གི་སྤྲུལ་སྐུ་རིགས་འཛིན་མངའ་རིས་པ་ཆེན་པོ་དང་མཉམ་མེད་ནུབ་དགོན་པ་བྱམས་པ་ཆོས་ཀྱི་རྒྱལ་མཚན་སོགས་ཚད་ཐུབ་ཀྱི་དམ་པ་དུ་མའི་གསུང་གི་བདུད་རྩིས་ཐུགས་ཀྱི་བུམ་བཟང་ཡོངས་སུ་གཏམས་པ་ཁྲི་སྲོང་རྣམ་འཕྲུལ་དཔལ་བཀྲ་ཤིས་སྟོབས་རྒྱལ་གྱི་ཕྱག་བཞེས་འཁྲུལ་མེད་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱིས་གསུང་ལས་ཉེ་བར་ཐོས་པ་བརྗེད་ངས་ཀྱི་སོམ་ཉི་རྣམས་རིགས་འཛིན་མཆོག་སྤྲུལ་པདྨ་འཕྲིན་ལས་ལ་དོགས་དཔྱོད་ཞིབ་མོར་ཞུས་པའི་རེག་ཟིག་གི་དོན་ལྟར་ལ་ཚོགས་མཆོད་ཀྱི་སྐབས་སྣང་བ་སྣོད་བཅུད་མ་ལེ་བརྒྱད་མ་དང་འདྲ་མིན་ཅུང་ཟད་བྱུང་བ་འདོན་བདེ་ཁྱེད་ནས་གཏེར་ཁ་འོག་མ་སོར་བཞག་དང་དེ་ཕྱིན་བཅོས་བསླད་མེད་པའི་འཕྲིན་ལས་རིན་ཅེན་འཕྲེང་བ་འདི་ནི་དོན་གྲུབ་ཅེས་པ་ས་མོ་ལུག་གི་ལོ་ཧོར་ཟླ་བདུན་པའི་ཡར་ཚེས་ལྔ་ལ་ཟ་ཧོར་གྱི་སྔགས་སྨྱོན་ཟིལ་གནོན་བཞད་པ་རྩལ་གྱིས་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་དཔལ་གྲོང་སྔགས་དམས་པ་ངག་དབང་དགེ་ལེགས་ཀྱིས་བགྱིས་པ་དགེ་ལེགས་འཕེལ། །སརྦ་མངྒ་ལཾ།། །།