ཐུགས་སྒྲུབ་ཀྱི་ལས་བྱང་ནོར་བུའི་ཅོད་པན།
ཐུགས་སྒྲུབ་ཀྱི་ལས་བྱང་ནོར་བུའི་ཅོད་པན་ཞེས་བྱ་བ་བཞུགས་སོ། །
ན་མོ་གུ་རུ་ཝེ། ཕུལ་བྱུང་ཟག་བྲལ་བདེ་ཆེན་མཁའ་ཀློང་དབྱིངས་སུ་རྟག་རོལ་འགྱུར་བ་མེད་པ་ཆོས་ཀྱི་སྐུ་དེ་ལས། །ཞི་དང་ཁྲོ་སོགས་འཁོར་ལོའི་མགོན་པོ་ལོངས་སྤྱོད་རྫོགས་སྐུའི་གར་གྱིས་རྣམ་རོལ་རྡོ་རྗེ་དྲག་པོ་རྩལ། །བསིལ་ལྡན་ལྗོངས་འདིར་བཀའ་དྲིན་ཟླ་མེད་སྩོལ་མཛད་ཡེ་ནས་གདོད་མའི་སངས་རྒྱས་པདྨ་སཾ་བྷ་ཝ། །སྐུ་གསུམ་དབྱེར་མེད་ངང་དུ་རོལ་ཀྱང་སྐལ་ལྡན་སྨིན་མཛད་རྩ་བརྒྱུད་བླ་མའི་ཞབས་པད་སྤྱི་བོས་བསྟེན། །ངོ་མཚར་གནས་སུ་རྒྱ་ཡིས་ལེགས་སྤྲས་པའི། །ཡིད་བཞིན་ནོར་ལྟའི་ཐུགས་སྒྲུབ་ཟབ་མོའི་ལམ། །ཐོག་མར་སྒོ་འབྱེད་དངོས་གྲུབ་རྒྱལ་མཚན་ནས། །གསང་ཆེན་ཆོས་འདིའི་འཕྲིན་ལས་སྒོ་བརྒྱ་པ། །སྤེལ་མཛད་པདྨས་བྱིན་བརླབས་རིགས་འཛིན་ཚོགས། ཁྱད་པར་གདུལ་བྱའི་དོན་དུ་ཀུན་བཟང་མགོན། །དཀའ་སྤྱད་གྲུབ་པ་མཆོག་བརྙེས་རིགས་འཛིན་རྗེའི། །རྣམ་རོལ་དྲིན་ཅན་བླ་མའི་ཞབས་ལ་འདུད། །གང་ཞིག་ཡི་དམ་ཆོས་སྲུང་རྒྱ་མཚོ་ལ། །མཆོད་བསྟོད་སྒྲུབ་ལ་སྔོན་དུ་མེད་མི་རུང་། །དངོས་གྲུབ་ཀུན་གྱི་གཏེར་གྱུར་བླ་མ་མཆོག །ཉེར་བསྒྲུབ་འཕྲིན་ལས་རྟ་ལྗང་དབང་པོ་འདིས། །གངས་ལྡན་ཕན་བདེའི་པད་ཚལ་བཞད་པ་དང་། །རྡོ་རྗེ་ཐེག་པའི་ལེགས་བཤད་རྒྱ་མཚོའི་གླིང་། །ཕུན་ཚོགས་(༢ན)
དགའ་སྟོན་སྤེལ་ཕྱིར་འདྲི་བྱེད་ན། །མཐུ་ལྡན་གཏེར་སྲུང་དུས་འདིར་གནང་བ་སྩོལ། །སྐྱབས་འགྲོ་ནི། བདག་སོགས་འགྲོ་ཀུན་བྱང་ཆུབ་མ་ཐོབ་བར། །མཆོག་གསུམ་ཀུན་ལ་སྐྱབས་འགྲོ་དུས་གསུམ་དགེས། །རང་བྱུང་རིག་པ་རང་ཤར་ཆོས་ཀྱི་སྐུ། །ཡང་དག་སྙིང་པ་མྱུར་དུ་རྟོགས་པར་ཤོག །ཕྱིའི་མཎྜལ། ནོར་འཛིན་ལྷུན་པོ་རི་ཕྲན་ཉི་ཟླ་མཚོ། །གླིང་བཞི་གླིང་ཕྲན་མུ་ཁྱུད་ལྷ་དང་མིའི། །འདོད་ཡོན་དང་བཅས་དཀོན་ཅོག་གསུམ་ལ་འབུལ། །ཚོགས་རྫོགས་རང་བྱུང་ཡེ་ཤེས་མྱུར་རྫོགས་ཤོག །ནང་གི །ཡུལ་མཁར་ལོངས་སྤྱོད་བྱམས་པའི་མཛའ་གྲོགས་སོགས། །བདག་གི་འཇིག་རྟེན་འདི་ཡི་གཅེས་པ་ཀུན། །བླ་མར་འབུལ་གྱི་ཉོན་མོངས་འཛིན་པའི་ཡུལ། །དག་པ་ཡེ་ཤེས་རང་གནས་བསྟན་དུ་གསོལ། །གསང་བའི། བདག་གི་རྣམ་ཤེས་དབང་པོ་ཚོགས་བརྒྱད་དང་། །སྒྱུ་ལུས་ཕྱི་ནང་དྲིན་ཅན་བླ་མ་ལ། །འབུལ་ལོ་ལམ་གྱི་འཕྲུལ་སྣང་ཀུན་དག་ནས། །རང་རིག་ཡེ་ཤེས་རྟོགས་པར་མཛད་དུ་གསོལ། །རྡོར་སེམས་སྒོམ་བཟླས་ནི། སྤྱི་བོར་གདན་སྟེང་ཨཱཿལས་རྡོར་སེམས་དཀར། །རྡོ་རྗེ་དྲིལ་འཛིན་སེམས་དཔའི་སྐྱིལ་ཀྲུང་མཛད། །ཐུགས་ཀའི་མདངས་ལྡན་ཨཱཿལས་བདུད་རྩིའི་རྒྱུན། །བབས་པས་ཕྱི་ནང་ལུས་བཀྲུས་(༢བ)
དག་པར་གྱུར། །ཡིག་བརྒྱ་གྲངས་སྐབས་སྦྱར་བརྗོད། བླ་མའི་རྣལ་འབྱོར་ནི། སྤྱི་བོར་སུམ་བརྩེགས་གདན་དང་དར་ཆེན་ཁྲི། །བརྩེགས་སྟེང་མཐིང་ནག་གུ་རུ་དྲག་པོ་རྩལ། །རྡོར་དྲིལ་འཛིན་ཅིང་དུར་ཁྲོད་ཆས་བརྒྱད་རྫོགས། །ཐབ་ཆེན་བེར་གསོལ་གར་དགུའི་ཉམས་ཀྱིས་བཞུགས། །དུས་གསུམ་རྒྱལ་བ་ཡི་དམ་བླ་མའི་ཚོགས། །འོད་ཞུ་མ་ཧཱ་གུ་རུའི་སྐུ་ལ་ཐིམ། །ཀུན་འདུས་བླ་མར་ཕྱག་འཚལ་མཆོད་པ་འབུལ། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཨཱོཾ་ཨཱཿཧཱུཾ། རྒྱལ་བ་དགོངས་བརྒྱུད་རིགས་འཛིན་བརྡའ་བརྒྱུད་དང་། །གང་ཟག་སྙན་བརྒྱུད་རྩ་བའི་བླ་མ་ལ། །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། །ཐུགས་དམ་དབྱིངས་ནས་བསྐུལ་ལོ་བྱིན་གྱིས་རློབས། །ཡི་དམ་མཁའ་འགྲོ་ཆོས་དང་དེའི་སྲུང་མར། །མཆེད་ལྕམ་རྡོ་རྗེའི་སྤུན་གྲོགས་བཅས་པ་ལ། །སྙིང་ནས༝། །ཐུགས་དམ༝། །དེ་ལྟར་དངོས་དང་བརྒྱུད་པའི་བླ་མ་ལ། །འགྱུར་མེད་གདུང་ཤུགས་དྲག་པོས་གསོལ་འདེབས་ན། །རང་རིག་མ་བཅོས་བླ་མའི་ངོ་བོ་རུ། །ད་ལྟ་ཉིད་དུ་རྟོགས་པར་བྱིན་གྱིས་རློབས། །ཨཱོཾ་ཨཱཿཧཱུཾ་མ་ཧཱ་གུ་རུ་སརྦ་སིདྡྷི་ཧཱུཾ། འདི་སྣང་སྒྱུ་མར་གོ་ཞིང་འཁོར་བ་ལ། །ངེས་པར་ཡིད་འགྱུར་རྒྱལ་བའི་གསུང་རབ་ཐོས། །ཀུན་གྱི་རྩ་བ་གཉིས་འཛིན་དུ་ཤེས་ཀྱང་། །ཉོན་མོངས་བག་ཆགས་དབང་དུ་ཤས་ཆེར་ཤོར། །ཆགས་ཞེན་འདོད་སྲེད་ལས་ངན་རྩར་བཅད་ནས། །གཉིས་འཛིན་སྒྲོག་ལས་གྲོལ་བར་བྱིན་གྱིས་རློབས། །ཨཱོཾ་ཨཱཿཧཱུཾ་མ་ཧཱ་གུ་རུ་སརྦ་སིདྡྷི་ཧཱུཾ། མ་བཅོས་རང་ལ་གདོད་ནས་ལྷུན་གྲུབ་པའི། །རང་བྱུང་རིག་པ་གཉུག་མ་ལྷན་ཅིག་སྐྱེས། །མངོན་དུ་གྱུར་ནས་མར་གྱུར་འགྲོ་བ་རྣམས། །ཀུན་བཟང་ས་ལ་འགོད་པའི་མཐུ་ལྡན་ཤོག །རྒྱལ་ཆེན་མཚམས་གཅོད་ནི། ཧཱུཾ་ཧཱུཾ། པདྨ་ཉི་ཟླ་རཀྴ་སྲིན་པོ་ཡི། །གདན་སྟེང་སྐད་ཅིག་ངང་ལས་བདག་(༣ན)
ཉིད་ནི། །རྡོ་རྗེ་དྲག་རྩལ་ཁམས་གསུམ་དབང་སྡུད་ཅིང་། །སྲིད་གསུམ་ཟིལ་གྱིས་གནོན་པ་ཉིད་དུ་གྱུར། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཨཱོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུྃ་ཧཱུྃ་ཧཱུྃ། ན་ན་བ་དྷེ་སིདྡྷི་སརྦ་སིདྡྷི་དྷ་ནཾ་མེ་དྷི་ཧྲིཿ ཨཱ་ཡུཿསིདྡྷི་ས་མ་ཡ་སྡུས་སྡུས། ཐུགས་ཀ་ལས་བྱུང་དཀར་སེར་དམར་ལྗང་ཧཱུྃ། །ཡོངས་གྱུར་རྒྱལ་ཆེན་སྡེ་བཞི་འཁོར་བཅས་རྣམས། །གཏོར་མ་འདི་བཞེས་ཕྱོགས་ཀྱི་གདོན་སྲུངས་ལ། །མཐུན་པའི་རྐྱེན་རྣམས་ཡིད་བཞིན་གྲུབ་པར་མཛོད། །ནང་མཚམས་གཅོད་པ་ནི། ཧཱུྃ། ཕྱི་ནང་སྣོད་བཅུད་སྣང་བ་ཐམས་ཅད་ཀུན། །རང་རིག་སེམས་ལས་བྱུང་བའི་ཆོ་འཕྲུལ་ཏེ། །སེམས་ཉིད་ངོ་བོ་གཞི་རྩ་བྲལ་བའི་ངང་། །དེ་ལྟར་རྟོགས་ན་བགེགས་རྣམས་རང་སར་གྲོལ། །གསང་མཚམས་ནི། ཧཱུྃ། དེ་ཉིད་ངང་ལས་སྐད་ཅིག་དྲག་པོ་རྩལ། །བསྐལ་པའི་མེ་འབར་རྡོ་རྗེའི་ཚ་ཚ་འཕྲོ། །འཇིག་རྟེན་ཐམས་ཅད་རབ་ཏུ་ལྡེག་ཅིང་འཁྲུག །བདུད་དང་དམ་སྲི་བགེགས་རིགས་བརླག་པར་བྱེད། སྒྲིབ་སྦྱོང་བཤགས་དཀྱིལ། ཏིང་འཛིན་གདུང་བའི་མོས་པས་མདུན་གྱི་མཁར། །ཐོགས་མེད་བྱོན་པའི་རྩ་གསུམ་སྤྱན་སྔ་རུ། །དུག་ལྔའི་དབང་གིས་བསགས་པའི་སྡིག་སྒྲིབ་ཀུན། །ཟོལ་མེད་སྙིང་གི་དཀྱིལ་ནས་མཐོལ་ལོ་བཤགས། །བྱིན་དབབ་ཐུགས་དཀྱིལ། སྡིག་སྒྲིབ་རྣམ་དག་ཕུང་པོར་ལྷ་རྣམས་ཀུན། །དགྱེས་ཤིང་སྟོང་གསུམ་གང་འོད་བདག་ཐིམ་པས། །ཡི་དམ་ལྷར་གྱུར་ཐུགས་གསུང་སྐུའི་དངོས་གྲུབ། །རབ་ཐོབ་མཆོག་ཐུན་དངོས་གྲུབ་བྱིན་ཆེན་ཕོབས། །མཆོད་གཏོར་བྱིན་རླབས། བདག་ཉིད་ལྷར་གསལ་ངང་ནས་འོད་འཕྲོས་པས། །སྨན་རག་གཏོར་གསུམ་ཕྱི་ནང་མཆོད་པ་ཡི། །མི་གཙང་ཉེས་པའི་སྐྱོན་ཀུན་རབ་སྦྱངས་ནས། །ཟག་མེད་བདུད་རྩིའི་རོ་ལྡན་ངོ་བོར་གྱུར། །ཧཱུྃ་ཨཱོཾ་སྭཱ་ཨཾ་ཧཱ་ཧྲིཿམ། ཨཱོཾ་བཛྲ་ཡཀྴ་ཀྲོ་ཏ་ཧཱུཾ་ཕཊ། ཨཱོཾ་ཨཱཿཧཱུྃ། རཀྟ་མཎྜ་ལ་ཧཱུྃ། (༣བ)
ཨ་དྷཱུ་པུ་ཨཱ་ག་ཧཱུྃ། དེ་ཏིང་། སེམས་ཀྱི་སྣ་ཚོགས་སྣང་འདི་ཡེ་ཤེས་ཏེ། །སྣང་བའི་དུས་ན་ངོ་བོ་སྟོང་པའི་ངང་། །ཆོས་ཀྱི་དབྱིངས་ཉིད་སྤྲོས་དང་བྲལ་བར་གནས། །དབྱེར་མེད་བྱང་ཆུབ་སེམས་ནི་བདེ་བ་ཆེ།ཀུན་ཏིང་། མ་རྟོགས་འཁྲུལ་པའི་འགྲོ་ལ་སྙིང་རྗེ་ཆེ། །བྱམས་པའི་ཏིང་ངེ་འཛིན་གྱི་རང་རིག་འོད། ཁ་དོག་ལྔ་ལྡན་གསལ་འཚེར་དངས་པ་ལ། །ངོ་བོ་བདེ་བའི་སྙིང་རྗེ་ཆེན་པོར་གྱུར། རྒྱུའི་ཏིང་། འོད་ལྔ་འདུས་པའི་ཧཱུྃ་སྔོན་རབ་འབར་བ། །སྣང་སྟོང་དབྱེར་མེད་ངང་དུ་གསལ་བར་ཤར། །སྐར་ཆེན་ཐང་ལ་ཕེབས་པའི་ཚུལ་བཞིན་དུ། །འབྲས་བུ་རྒྱུ་ཡི་ཡི་གེ་ཧཱུྃ་དུ་གྱུར། །དཀྱིལ་འཁོར་དངོས། གངས་ལས་ཐིགས་པ་བབས་ལྟར་ཧཱུྃ་ཡིག་ལས། །ཧཱུྃ་ལྔ་རབ་འཕྲོས་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། །དེ་ལས་འོད་འཕྲོས་འོག་བཞིའི་དཀྱིལ་འཁོར་ལྔ། །བརྩེགས་སྟེང་རྒྱུ་ཡིག་ཉིད་ལས་ཧཱུྃ་འཕྲོས་པས། །སྣོད་ཀྱི་རྟེན་དང་བདག་ཕུང་གཞལ་ཡས་ཁང་། །ཙིཏྟ་རིན་ཅེན་ཕོ་བྲང་རྩའི་ཀ་གདུང་། །བནྡྷའི་རྩིག་པ་ནང་ཁྲོལ་དྲ་བར་ལྡན། །ཚོགས་བརྒྱད་གཟེར་བཏབ་མིག་གཉིས་ཉི་ཟླ་ཡི། །མཐོངས་ཁུང་སྟེང་འོག་རྒྱུ་ལམ་བཞི་ནི་སྒོ། །བྱང་ཆུབ་སེམས་ལས་ཀུན་འབྱུང་གཞལ་ཡས་ཁང་། །རྒྱུ་ཡི་ཡི་གེ་འོད་འཕྲོས་འདུས་པ་ལས། །པད་ཉི་ཟླ་གདན་སྲིན་པོ་རུ་དྲའི་སྟེང་། །རྡོ་རྗེ་དྲག་རྩལ་མཐིང་ནག་རབ་ཁྲོས་པ། །གཡས་པ་གནམ་ལྕགས་རྡོ་རྗེ་གསེར་དྲིལ་གཡོན། །དཀུར་བརྟེན་ཟབ་ཆེན་བེར་གསོལ་རིན་ཅེན་རྒྱན། །དུར་ཁྲོད་ཆས་རྫོགས་བརྗིད་པའི་གར་དགུར་ལྡན། །ཞབས་གཉིས་གྱད་ཀྱི་འགྱིང་བག་སྟབས་བཞུགས་སྐུའི། །སྤྱི་བོ་ཚངས་བྲག་གི་རྩ་གནས། ཀླད་པ་དུང་ཁང་གི་རྩ་འཁོར། མགྲིན་པ་ལོངས་སྤྱོད་ཀྱི་རྩ་འཁོར། སྙིང་ག་ཆས་ཀྱི་འཁོར་ལོའི་རྩ་འདབ། ལྟེ་བ་དང་འཁོར་ལོ་འདུས་པའི་རྩ་འདབ། གསང་གནས་བདེ་ཆེན་འཁོར་ལོ། རྩ་ཆེན་རྩ་ཕྲན་སྟོང་གི་འཁོར་ལོ། རྣམས་ལ་རིམ་པ་བཞིན། དམར་པོ་མཉམ་གཞག་བུམ་(༤ན)
པ་འཛིན། ཚེ་དཔག་མེད་སྐུ་ནག་པོ་བེ་ཅོན་སྡིགས་མཛུབ་མཛད། འཇམ་དཔལ་དམར་ནག་པདྨ་སྡིགས་མཛུབ་མཛད། པདྨ་གསུང་། མཐིང་ནག་རྡོ་རྗེ་དུང་དམར་འཛིན། རྡོ་རྗེ་ཐུགས་ཡོན་སྨུག་ནག་རྡོ་རྗེ་དྲིལ་བུ་འཛིན། བདུད་རྩི་མཐིང་ནག་རྡོ་རྗེ་དུང་དམར་འཛིན། ཚེ་མཆོག་དང་། མཐིང་ནག་ཕྱག་གཉིས་ཕུར་བུ་བསྒྲལ། མཁའ་འགྲོ་འབུམ་སྡེའི་ལྷ་ཚོགས་དང་བཅས་རྫོགས། །སྐུ་ནི་རྡོ་རྗེ་ཁྲོས་པའི་སྐུ་གསུང་ཐུགས། །རིགས་ལྔས་དབང་བསྐུར་ཕྱག་མཚན་ཁྲོ་རྡོ་རྗེ་ལ་ཡབ་དང་དྲིལ་བུ་ལ་ཡུམ། བཅུ་རྫོགས། །ཞབས་གཉིས་བརྐྱང་བསྐུམ་རུ་དྲ་བརྫིས་པ་ལ། །ཕྱོགས་སྐྱོང་སྡེ་བརྒྱད་དྲེགས་པའི་སྲོག་རྩ་འདུས། སྤྱན་འདྲེན་ནི། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། སྔོན་གྱི་བསྐལ་པའི་དང་པོ་ལ། ཞེས་པ་ནས། བྱིན་གྱིས་བརླབ་ཕྱིར་གཤེགས་སུ་གསོལ། །ཧཱུྃ། དྷ་ན་ཀོ་ཤའི་མཚོ་གླིང་དུ། །དྲག་པོའི་བརྟུལ་ཞུགས་མཛད་པའི་ཚེ། །སངས་རྒྱས་རྣམས་ཀྱིས་དབང་བསྐུར་མཛད། །མཁའ་འགྲོ་ཐམས་ཅད་དབང་དུ་བསྡུས། །རྡོ་རྗེ་ཕག་མོ་ཡུམ་དང་རོལ། །ལྷ་སྲིན་སྡེ་བརྒྱད་བྲན་དུ་འཁོལ། །བདུད་དང་ལོག་འདྲེན་ཐམས་ཅད་བསྒྲལ། །གསང་མཚན་རྡོ་རྗེ་དྲག་པོ་རྩལ། །རྡོ་རྗེ་སྲིན་པོའི་ལྷ་ཚོགས་རྣམས། །གནས་འདིར་སྤྱན་འདྲེན་གཤེགས་སུ་གསོལ། །ལྷུན་གྲུབ་བདེ་བ་ཆེན་པོའི་ཕོ་བྲང་ནས། །དུས་གསུམ་སངས་རྒྱས་པདྨ་ཐོད་ཕྲེང་རྩལ། །རིགས་འཛིན་དཔའ་བོ་མཁའ་འགྲོའི་ཚོགས་དང་བཅས། །ཐོགས་མེད་ཐུགས་རྗེའི་དབང་གིས་གཤེགས་སུ་གསོལ། །ཧཱུྃ། མ་གཡེལ་མ་གཡེལ་རྩ་གསུམ་དཀྱིལ་འཁོར་ཚོགས། །བླ་མ་ཡི་དམ་མཁའ་འགྲོའི་ལྷ་ཚོགས་རྣམས། །ཀུན་འདུས་བླ་མ་རྡོ་རྗེ་དྲག་པོ་རྩལ། །གནས་འདིར་སྤྱན་འདྲེན་གཤེགས་ཤིང་བཞུགས་སུ་གསོལ། །བཞེངས་ཤིག་པདྨ་འབྱུང་གནས་ནས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཕྱག་མཆོད་ནི། རིགས་(༤བ)
འཛིན་གྲུབ་པའི་དབང་ཕྱུག་པདྨ་འབྱུང་། །ལྔ་བརྒྱའི་གཙུག་རྒྱན་དཔལ་ལྡན་མར་མེ་མཛད། །རྡོ་རྗེ་འཆང་དབང་བློ་བཟང་གྲགས་པའི་དཔལ། །སྣ་ཚོགས་སྤྲུལ་པའི་གར་མཛད་དེ་ལ་འདུད། །ཕྱི་ནང་གསང་གསུམ་བསྒྲལ་མཆོད་ནི། །རྩ་གསུམ་སྤྱན་སྔར་མཆོད་ཡོན་མེ་ཏོག་སྤོས། །མར་མེ་དྲི་ཆབ་ཞལ་ཟས་རོལ་མོ་བཤམས། །དབང་ལྔ་ཚིལ་ཆེན་ཞུན་ཆེན་དྲིཆེན་ཆུ། །རྐང་གླིང་ཐོད་པའི་རྔ་སྒྲ་བརྗིད་བག་ལྡན། །དུག་གསུམ་སྐུ་གསུམ་དུག་ལྔ་ཡེ་ཤེས་ལྔ། །སྣང་སྲིད་ཕྱག་རྒྱ་བཞིར་མཆོད་ཡབ་ཡུམ་མཁའི། །བྱང་སེམས་དཀར་དམར་དགྲ་བགེགས་བསྒྲལ་བའི་ཤ །ཕྱི་ནང་གསང་བ་བསྒྲལ་བའི་མཆོད་པ་སྟེ། །ཕྱི་ཡི་མཆོད་པ་ས་དང་བར་སྣང་གང་། །ནང་གི་མཆོད་པ་ཟག་མེད་བདུད་རྩིའི་མཚོ། །གསང་བ་བདེ་ཆེན་སྨྲ་བསམ་བརྗོད་ལས་འདས། །འགྲོ་བའི་དོན་ཕྱིར་དགྱེས་བཞིན་བཞེས་སུ་གསོལ། །སྨན་མཆོད་ནི། རང་བྱུང་གདོད་ནས་རྣམ་པར་དག །རྩ་བ་བརྒྱད་དང་ཡན་ལག་སྟོང་། །བདུད་རྩི་སྨན་གྱི་མཆོད་པ་འདི། །བླ་མ་ཡི་དམ་མཁའ་འགྲོ་དང་། །དམ་ཅན་ཆོས་སྐྱོང་རྣམས་ལ་འབུལ། །རཀྟ་ནི། བླ་མ་ཡི་དམ་མཁའ་འགྲོ་ལ། །ཞིང་བཅུ་རྒྱུད་དྲུག་བསྒྲལ་བའི་ཁྲག །གསང་བ་ཡུམ་གྱི་རཀྟ་འདི། །འདོད་ཆགས་རྩད་ནས་བཅད་ཕྱིར་འབུལ། །སྐྱེ་མེད་དོན་གྱི་མཆོད་པ་བཞེས་གཏོར་མ་ནི། བླ་མ་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །ཐུགས་དམ་བཞིན་དུ་ཅི་བདེར་བཞེས་སུ་གསོལ། །རྟགས་བསྟོད་ནི། དུར་ཁྲོད་འཇིགས་དབུས་ཆགས་མེད་ཐབས་ཤེས་གདན། །དྲེགས་སྲིན་སྟེང་དུ་འཇིགས་བྱེད་དྲག་པོ་རྩལ། །མཐིང་ནག་སྤྱན་བགྲད་མཆེ་གཙིགས་དབུ་སྐྲ་འབར། །སྣ་ཚོགས་རྒྱན་སྤྲས་རྡོ་རྗེ་དྲིལ་བུ་འཛིན། །གར་དགུའི་ཉམས་ལྡན་བེར་སྨུག་ན་བཟའ་གསོལ། །རུས་པའི་རྒྱན་དུག་རྟགས་ཀྱིས་མཛེས་པར་བརྒྱན། །བདེ་གཤེགས་གསང་གསུམ་ཀུན་འདུས་མཁའ་(༥ན)
འགྲོའི་གཙོ། །རྡོ་རྗེ་དྲག་པོ་རྩལ་ལ་ཕྱག་འཚལ་བསྟོད། །དེ་ནས་བཟླས་པ་དངོས་ནི། གནད་ཀྱི་དམིགས་པའི་ཟབ་གནད་ཞལ་ལས་ཤེས། །ཨཱོཾ་ཨཱཿཧཱུྃ་མ་ཧཱ་གུ་རུ་སརྦ་སིདྡྷི་ཧཱུྃ། ཞི་ཁྲོ་དབང་དང་དངོས་གྲུབ་བླང་བ་ཡི། །བཟླ་ཚུལ་མན་ངག་ཕྱག་ལེན་ལྟར་བྱ་སྟེ། །ཧཱུྃ། ཆོས་ཀྱི། དབྱིངས་ཀྱི་ཕོ་བྲང་། རང་བྱུང་རྣམ་དག་ཞིང་ཁམས། ལྕང་ལོ་ཅན་རྣམས་ནས། །ཀུན་བཟང་ཧེ་རུ་ཀ །རྒྱལ་བ་ལྔ་དང་གསང་བའི་བདག །འགྲོ་དོན་སྐུར་བཞེངས་ཆོས་ཉིད་རང་སྒྲ་སྒྲོགས། །བདག་ཀྱང་རྗེས་འཇུག་ཐུགས་རྗེས་བྱིན་གྱིས་རློབས། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཚིག་རྐང་ཕྱི་མ་གཉིས་ཧཱུྃ་བདུན་དང་བཅས་པ་འོག་མ་ཀུན་ལ་སྦྱོར། བགྲོད་དཀའ་མཚོ་གླིང་མ་ལ་ཡའི་རྩེ་མོ་སོགས། གནས་མཆོག །དམ་པ་སོ་སོ་ནས། སྨུག་ནག་དབང་གི་རཱ་གི་ཚངས་པའི་རྒྱལ་པོ་གདོང་གསུམ། ལྷ་དབང་བརྒྱ་བྱིན། ཀླུ་རྒྱལ། འཇོག་པོ་ཛ། རྒྱལ་པོ། འགྲོ་དོན་བསྐུར་བཞེངས༝།བདག་ཀྱང་༝། །ཧཱུྃ༝༝༝། །ཟ་ཧོར་ཡུལ་ཡང་ལེ་ཤོད། ཆུ་བོ་གངྒཱའི་རྩ་བ། མཎྜལ་སོགས་རྒྱ་གར་གནས་རྣམས་ནས། ཤཱཀྱ་པྲ་བྷ་རིགས་འཛིན་ཆེན་པོ་པད་འབྱུང་བི་མཱ་ལ་མི་ཏྲ། བལ་པོ་ཤཱི་ལ།མཉྫུ། འགྲོ་དོན༝། །བདག་ཀྱང་༝། །ཧཱུྃ༝༝༝། མོན་ཁ་སེང་རྫོང་རི་བོ། བཀྲ་བཟང་བོད་སོགས། ཀྱི་གནས་རྣམས་ནས། མཁར་ཆེན། བཟའ། སྣ་ནམ་རྡོ་རྗེ་བདུད་འཇོམས། སྤྲུལ་སྐུ་རིགས་འཛིན་རྒོད་ལྡེམ། རྗེ། །འགྲོ་དོན༝། །བདག་ཀྱང་༝། །ཧཱུྃ༝༝༝། །རྡོ་རྗེ་མགོན་དང་བྱམས་པ་བཤེས་གཉེན་དཔལ། །ངག་དབང་གྲགས་པ་སངས་རྒྱས་དཔལ་བཟང་ཞབས། །༝༝༝ནམ་མཁའ་རྒྱལ་མཚན་སྔགས་འཆང་ཤཱཀྱ་བཟང་། །བདུད་འཇོམས་རྡོ་རྗེ་མཁའ་འགྲོ་ཡོངས་གྲུབ་རྩལ༝༝། །བསྟན་པའི་རྒྱལ་མཚན་རྗེ་བཙུན་རྡོ་རྗེ་འཛིན། །བཀའ་དྲིན་སུམ་ལྡན་ཟིལ་གནོན་དྲག་རྩལ་རྗེ། །༝༝༝། འབྲལ་མེད་སྙིང་གའི་ཕོ་བྲང་རང་ལུས་རྒྱལ་བའི་དཀྱིལ་འཁོར(༥བ)
གཏེར་མཛོད། བསེ་སྒྲོམ་སྨུག་པོ། སྨུག་ནག་གྲུ་གསུམ་གཞལ་ཡས་རྣམས། ནས། །རྩ་བའི་བླ་མ་གུ་རུ་གསང་སྔགས་རང་རིག་མཧཱ། སྲུང་སྙིང་པོའི་མཐར་ཐུག །བཀའ། ཨེ་ཀ་ཛཱ་ཊི། །༝༝༝། རྩ་དང་། ཐིག་ལེ་དང་། དགའ་དང་དམ་ཚིག་གི །གཞལ་ཡས་རྣམས་ནས། །མཁའ་མདང་མ་ཤེས། འགྲོ་བཀའ་སྲུང་ཆོས་སྐྱོང་གཏེར་བདག །རྡོ་རྗེ་སྤུན་གྲོགས་རྣམས། །༝༝༝། །ལུས་ངག་ཡིད་གསུམ་བྱིན་རློབས་ཕྱི་དང་ནང་། །གསང་བའི་བར་ཆད་སོལ་ལ་བྱིན་གྱིས་རློབས། །མི་མཐུན་རྐྱེན་རྣམས་སོལ་ལམ་སྣ་ཆོས་ལ་ཡེ་ཤེས་དྲོངས། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། དོན་བསྟོད་ནི། ཧཱུྃ། སྐྱེ་འགག་མེད་པ་ཆོས་ཉིད་དབྱིངས་ཀྱི་ངང་། །འདུ་འབྲལ་མེད་པ་བདེ་ཆེན་ཕོ་བྲང་ནས། །རང་བྱུང་རང་གསལ་ཐུགས་རྗེ་ཆེན་པོའི་སྐུ། །བདེ་གཤེགས་ཀུན་འདུས་རྡོ་རྗེ་དྲག་པོ་རྩལ། །རང་རིག་ལྷ་ཡི་ལྷ་ལ་ཕྱག་འཚལ་ལོ། །གསལ་འགྲིབ་མེད་པ་བདེ་བ་ཆེན་པོའི་སྐུ། །རང་རིག་རང་གདངས་མ་འགགས་གསལ་བ་ལ། །རྩོལ་གྲུབ་བྲལ་བས་བྱ་བྱེད་གོལ་ས་ཆོད། །མ་བཅོས་རང་ཤར་འཛིན་མེད་སྤྲོས་དང་བྲལ། །རིག་པ་རང་གསལ་ངང་ལ་ཕྱག་འཚལ་ལོ། །རིག་པའི་ཆོ་འཕྲུལ་ཅིར་ཡང་སྣང་བ་ལ། །རྒྱ་ཆད་ཕྱོགས་ལྷུང་མེད་པས་འཕྲུལ་པ་བྲལ། །ཅིར་སྣང་འཛིན་མེད་གྲོལ་བས་བདེ་བ་ཆེ། །གསལ་འཚེར་དངས་པ་སྐྱོན་བྲལ་རིག་པའི་གདངས། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །འབྱུང་བ་བཞི་ལ་བརྟེན་པའི་ཕུང་པོ་ལ། །བཅིངས་ཐུམས་རྡུགས་པ་མེད་པར་ཕྱོགས་བཅུར་འཆར། །གང་ཤར་རྟག་ཆད་བྲལ་བས་ཟངས་ཐལ་ལ། །འཁྲུལ་སྣང་རང་སོས་མི་བཏབ་རང་སོར་བཞག །རང་བྱུང་སྤྲུལ་པའི་སྐུ་ལ་ཕྱག་འཚལ་ལོ། །རིག་པ་དངོས་འཛིན་ཁ་དོག་མ་གྲུབ་པས། །སྣང་སྟོང་ཕྱོགས་ལྷུང་ཡེ་ནས་བྲལ་བ་ལ། །མ་འགགས་གསལ་འཚེར་དངས་པ་ཆོས་ཉིད་དང་། །རང་རིག་ངོ་བོ་མ་བཅོས་ཐོད་ཕྲེང་རྩལ། །རང་རིག་བླ་མའི་མཆོག་ལ་(༦ན)
ཕྱག་འཚལ་ལོ། །དེ་ལྟར་ཚོགས་དང་གཏེར་སྲུང་མཆོད་པ་ལ་སོགས་པ་རྣམས་ནི། ཐུགས་སྒྲུབ་དང་། རྡོ་རྗེ་འཆང་དཔལ་འབྱོར་ལྷུན་གྲུབ་ཀྱིས་མཛད་པའི་ཡིག་ཆ་དང་། ཁ་སྐོངས་ཀྱི་ཡི་གེ་གཞན་དག་ལ་གསལ་བས་འདིར་མ་སྤྲོས། ཟིལ་གནོན་ལས་བྱང་ཆེན་མོ་དང་ཟུང་དུ་སྦྲེལ་ཏེ་ཉམས་སུ་ལེན་པ་ལ་འདི་ཙམ་འཁྱེར་བདེ་ཞིང་། མཇུག་ཆོག་ཀྱང་ཤུགས་ལས་འབྱུང་བ་ཡིན་ནོ། །འདི་ཉིད་ཀྱང་ཟིལ་གནོན་ལས་བྱང་ལྟར་བཀའ་རྒྱ་དམ་ཞིང་། གཏེར་སྲུང་བཀའ་གཉན་པས། དབང་མ་ཐོབ་པ་དང་བཀའ་རྒྱ་མ་ཁྲོལ་པ་ལ་སྟོན་པ་དང་ཉམས་སུ་ལེན་པ་ནི་རང་གཞན་གཉིས་ཀ་ལ་བར་ཆད་དུ་འགྱུར་བས་གསང་ཞིང་སྦ་བར་བྱའོ། །སྨྲས་པ། གང་ཞིག་ལྗོངས་འདིར་བསྟན་ལ་ལེགས་ཞུགས་པ། །ལ་ལ་གཞན་ངོ་ཙམ་དུ་དུལ་བར་སྟོན། །འགའ་ཞིག་ཁུངས་མེད་དཔེ་ཧྲུལ་ཕན་ཚུན་བསྲེ། །དྲེགས་ལྡན་ཐོས་བསམ་བྲལ་བ་དམ་པར་རློམ། ཁ་ཅིག་མཐོན་པོའི་ཁྲི་དང་རིགས་ཙམ་བསྟེན། །མང་ཞིག་རྟོག་གེའི་རིག་པ་འགའ་ཤེས་པས། །སྔོན་ཆད་མཐོང་ཐོས་མེད་ལའང་བཤད་པ་བྱེད། །འབྲེལ་མེད་རང་བཟོའི་ཚིག་དང་འདི་མི་འདྲ། །འདི་ནི་རབ་འབྱམས་རྒྱལ་བའི་སྤྱི་གཟུགས་མཆོག །མཚོ་སྐྱེས་ཐུགས་སྒྲུབ་ཀུན་གྱི་ཡང་སྙིང་བཅུད། །སྐལ་བཟང་ཉམས་སུ་བླངས་པས་ཚེ་གཅིག་ལ། །སྐུ་གསུམ་གོ་འཕང་ཐོབ་པའི་ལག་རྗེས་མང་། །དེ་ཕྱིར་ཐུགས་སྒྲུབ་དོན་ཀུན་འདུས་པ་ལ། །རྣམ་མང་ཚིག་གི་སྦུན་པས་མ་རྙོགས་པའི། །ལས་བྱང་ཡིད་བཞིན་ནོར་བུ་འདི་ལྟ་བུ། །གཞན་དུ་བྱེད་པོ་ཡོད་ན་ཐལ་མོ་སྦྱོར། །དེ་ལྟར་རྣམ་པར་དགེ་བའི་ཉིན་བྱེད་དབང་། །ཟབ་དོན་ཆོས་ཀྱི་འོད་སྟོང་འབར་བ་ཡིས། །བདུད་རིགས་ནག་པོའི་ཕྱོགས་རྣམས་རབ་བཅོམས་ནས། །ངེས་དོན་ཉིན་མོའི་སྣང་བ་རྒྱས་པར་ཤོག །ཅེས་ཐུགས་སྒྲུབ་ཀྱི་ལས་བྱང་ནོར་བུའི་ཅོད་པན་ཞེས་བྱ་བ་འདི་ཡང་། རྗེ་བཙུན་དམ་(༦བ)
པ་རྒྱལ་བ་པུ་ཎྱ་སཱ་ག་རའི་དགོངས་གཞི་སོགས་དགོས་པ་དུ་མ་མཐོང་བས་བསྒྲིག་པའི་འདུན་པ་མངོན་དུ་གྱུར་པ་དང་། དོན་གཉེར་ཅན་མང་པོས་ཉེ་བར་བསྐུལ་བ་ལ་བརྟེན་ནས་ཤཱཀྱའི་བཙུན་པ་ཟིལ་གནོན་དྲག་རྩལ་དུ་འབོད་པས་རང་ལོ་ཉེར་དྲུག་པ་གྲོ་ཞུན་ཅན་གྱི་དཔའ་བོ་མཁའ་འགྲོ་འདུ་བའི་ཚེས་བཟང་པོ་ལ་དགའ་ལྡན་ཕོ་བྲང་དུ་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ། །བཀའ་སྲུང་བརྒྱད་ཀྱི་གཏོར་མ་སོ་སོར་རམ་མདོར་བསྡུས་འཁྱེར་བདེ་བྱེད་པ་ཕྱག་ལེན་ལྟར་སྐབས་ཐོབ་དང་སྦྱར་ཏེ་བཤམས་ལ། ཧཱུཾ། ཀུན་བཟང་ཐུགས་སྤྲུལ་སངས་རྒྱས་ཀུན་གྱི་ཡུམ། །ཞལ་གཅིག་ཕྱག་གཉིས་ཁ་ཊྭཱཾ་བྷནྡྷ་ཐོགས། །སྨུག་ནག་སྤྲིན་དཀར་འཇའ་ཡི་མཐའ་ཅན་གྱོན། །ཨེ་ཀ་ཛཱ་ཊི་རལ་གཅིག་གཤེགས་སུ་གསོལ། །དུར་ཁྲོད་བརྒྱད་དབུས་མ་མོ་རོ་ཁ་མ། །ནམ་གྲུ་ཙ་མུནྟྲི་གསུམ༝། །ཉི་མ་བྱང་ཕྱོགས་གནས་ནས་རེ་མ་ཏཱི། །མ་གཅིག་དཔལ་ལྡན་གནས་འདིར༝། །དམར་ནག་པདྨ་ཁྲོས་པའི་དུར་ཁྲོད་ནས། །དབང་གི་མ་མོ་མཆེད་བདུན༝། །རི་ལུང་ཐང་དམར་ཟངས་མཁར་དམར་པོ་ནས། །སྒྲོལ་གིང་ཆེན་པོ་བཙན་རྒོད༝། །སྟེང་ཕྱོགས་ནམ་མཁའ་འོད་ཀྱི་གཞལ་ཡས་ནས། །ལེགས་ལྡན་ཆེན་པོ་གནས་འདིར༝། །སྙིང་ཉེ་བཀའ་ཉན་གཏེར་བདག་གཤོག་རྒོད་རྩལ། །དམ་ཅན་རྡོ་རྗེ་ལེགས་པར༝། །དྲི་ཟའི་རྒྱལ་པོ་རྡོ་རྗེ་འབར་བ་རྩལ། །སྔོན་གྱི་དམ་ཚིག་དགོངས་ལ༝། ཁ་བ་ཅན་གྱི་ཡུལ་བདག་སྲུང་མ་ཆེ། །བསྟན་མ་བཅུ་གཉིས་འཁོར་བཅས༝། །བཀྲ་བཟང་རི་བོའི་གནས་ནས་ཉེ་བའི་དཔང་། །རི་དེའི་ཕྱོགས་བཞིར་ལྷ་བདུད་བཙན་ཀླུ་ཡི། །དགེ་བསྙེན་ཁྲོམ་པ་སྐྱེས་བཞི་མཚམས་བཞི་ནས། །ཀླུ་སྲས་བུ་ལེ་དཀར་པོ་རྒྱལ་ཐང་དཀར། །ཀླུ་བཙན་སྤུན་གསུམ་རྣོ་མྱུར་ནག་པོ་སོགས། །གཏེར་སྲུང་འཁོར་བཅས་གནས་འདིར་གཤེགས་སུ་གསོལ། །ཨཱོཾ་བཛྲ་ཏྲག་རཀྴ་ཨེ་ཀ་ཛཱ་ཊཱི་མ་(༧ན)
མ་རཀྨོ་ཏྲ་ཏྲ་ཏྲ་ག །མ་ཧཱ་ཡཀྴ་ནག་མོ། པདྨ་ཌཱ་ཀི་ནཱི་ཡ་མ་ཤུ་ཏྲི། མ་ཧཱ་ཀཱ་ལ། བཛྲ་སཱ་དྷུ། བཛྲ་ཐང་ཀ་ར། མ་མ། ཁ་ཁ། ལ་ལ། ལེ་ལེ། ཏ་ཏ། ཏེ་ཏེ། དྷ་རྨ་པཱ་ལ་ས་པ་རི་ཝཱ་ར་བཛྲ་ས་མ་ཡ་ཛཿ དེ་ནས་མཆོད་འབུལ་ནི། ཧཱུཾ། བཀའ་སྲུང་འཁོར་དང་བཅས་པའི་སྤྱན་ལམ་དུ། རཀྟ་གསུར་ཆེན་དུད་པ་ཚེལ་ཆེན་སྒྲོན། །ཤ་རུས་ཞལ་ཟས་ཐོད་རྔ་རོལ་མོའི་སྒྲ། །དམ་རྫས་གཏོར་མ་བདུད་རྩི་ཨ་མྲྀ་ཏ། །དྲི་ཟའི་རྒྱལ་པོ་བཤོས་དང་གཡའ་གངས་ཆུ། །སྤོས་དཀར་དུད་པ་རིན་ཅེན་རྣམ་པ་ལྔ། །དར་དང་ཟ་འོག་འབྲས་དཀར་གཙང་མ་དང་། །གསང་ལུག་ལ་སོགས་རང་རང་མཐུན་པའི་རྫས། །ཀླུ་རྣམས་དཀར་གསུམ་བདུད་རྩི་རིན་ཅེན་ལྔ། །ཀླུ་སྨན་ལ་སོགས་རང་རང་དགྱེས་པ་ཡི། །འདོད་པའི་ལོངས་སྤྱོད་ཚོགས་རྣམས་རབ་འབུལ་གྱི། །དགའ་བདེར་སྤྱོད་ལ་མཐུན་པའི་ལས་རྣམས་སྒྲུབས། །གོང་གི་སྔགས་གཤམ་དུ་ས་པ་རི་ཝཱ་རའི་མཇུག་ཏུ། མ་ཧཱ་པཉྩ་ཨ་མྲྀ་ཏ་ཁ་ཁ། ཁཱ་ཧི་ཁཱ་ཧི། མ་ཧཱ་བྷ་ལིཾ་ཏ་ཁ་ཁ། ཁཱ་ཧི་ཁཱ་ཧི། བསྟོད་པ་ནི། བཀའ་སྲུང་སྡེ་བརྒྱད་མཆེད་ཟླ་བྲན་གཡོག་རྣམས། །རྒྱལ་བའི་བསྟན་དང་རྣལ་འབྱོར་མ་གཡེལ་སྲུང་། ཁྱད་པར་གསང་སྔགས་ཟབ་མོའི་ཆོས་འདི་སྐྱོངས། །ལོག་པར་འདྲེན་པའི་དམ་ཉམས་དགྲ་བོ་ལ། །བསད་བསྐྲད་རེངས་རྨོངས་རྫུ་འཕྲུལ་སྣ་ཚོགས་སྟོན། །བོད་ཁམས་རུ་བཞི་ནད་འཁྲུག་ཉེར་འཚེ་ལས། །སྐྱོབས་ལ་གནས་ཆེན་བྱིན་བརླབས་ཟབ་གཏེར་སྲུང་། །མདོར་ན་བཅོལ་བའི་ལས་ཀུན་སྒྲུབ་པར་མཛད། །ཅེས་རྡོ་རྗེ་དྲག་པོ་རྩལ་གྱི་གཏེར་སྲུང་རྣམས་ལ་མཆོད་གཏོར་འབུལ་ཚུལ་མདོར་བསྡུས་འདི་ཡང་། མེད་དུ་མི་རུང་བའི་ཕྱིར་ཐུགས་སྒྲུབ་ཆ་ལག་ཏུ་བཀོད་པའོ། །རྩ་གསུམ་ལྷ་ལ་གུས་བཏུད་ནས། །བོད་ཡུལ་བསྟན་དང་འགྲོ་བ་ཡི། །ཕན་བདེ་རྒྱས་ཤིང་ས་སྤྱོད་ཀྱི། །ཆོས་སྲིད་ཡུན་དུ་གནས་པ་ལ། །པདྨས་ཞལ་བཞེས་མི་བསླུ་ཕྱིར། །ཐུགས་(༧བ)
སྒྲུབ་མཇུག་གི་བྱ་བ་ཀུན། །བྲི་ལ་གཏེར་སྲུང་གདུག་ཅན་གྱིས། །སྐབས་ཕྱེ་སྣོད་མིན་རྣམས་ལ་གསོངས། །ལས་བྱང་ནོར་བུའི་ཕྲེང་བའི་ཁ་སྐོངས། །དུས་ཀྱི་མཆོད་པའི་སྐབས་གཞན་དུ་ཡང་རུང་བའི་གསོལ་འདེབས་དང་ཚོགས་གཉིས་ལས། གསོལ་འདེབས་ཐུན་དྲུག་ཏུ་བྱེད་པ་ནི་གཞན་དུ་ཤེས་ལ། དཀྱུས་གཅིག་ཏུ་གཏོང་བའི་དབང་དུ་བྱས་ན། ཨཱོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། གསོལ་བ་འདེབས་པའི་རྟེན་བསྐྱེད་པ་ནི། རང་ལུས་འཛིན་མེད་སྤྱི་བོ་ཡི། །པདྨ་ཉི་ཟླའི་གདན་སྟེང་དུ། །དུས་གསུམ་སངས་རྒྱས་ཐམས་ཅད་ཀྱི། །ཐུགས་ཀྱི་སྤྲུལ་པའི་རིགས་འཛིན་ན། །པདྨ་འབྱུང་གནས་རྒྱལ་བའི་སྐུ། །སྐུ་མདོག་དཀར་དམར་སྐྱིལ་ཀྲུང་མཛད། །གཞོན་ནུ་ལོ་བརྒྱད་ལོན་པའི་ཚུལ། །སྔགས་པའི་ཆ་ལུགས་མཐིང་ནག་གོས། །རབ་བྱུང་ཆ་ལུགས་ཆོས་གོས་དམར། །རྒྱལ་པོའི་ཆ་བྱད་ཟབ་བེར་གསོལ། །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་པ་མཉམ་གཞག་ཀ་པཱ་ལ། །དབུ་ལ་པདྨའི་གཉེན་ཞུ་གསོལ། །སྣ་ཚོགས་རིན་ཅེན་རྒྱན་གྱིས་མཛེས། །བཀྲག་དང་གཟི་མདངས་ལྡན་པ་ལ། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་གཏེར་བདག་ཚོགས། །མ་ལུས་འཁོར་གྱིས་བསྐོར་བར་བསམ། །ཡེ་ཤེས་པ་སྤྱན་དྲང་བ་ནི། ཧཱུྃ། ཨྱོན་ཡུལ་གྱི་ནུབ་བྱང་མཚམས། །པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་མཁའ་འགྲོ་མང་པོས་བསྐོར། ཁྱེད་ཀྱི་རྗེས་སུ་བདག་སྒྲུབ་གྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །མཆོད་པ་འབུལ་བ་ནི། ཧཱུྃ། མེ་ཏོག་བདུག་སྤོས་མར་མེ་དང་། །ལྷ་བཤོས་དྲི་ཆབ་མཆོད་པར་བཤམས། །བླ་བྲེ་རྒྱལ་མཚན་ན་བཟའ་དང་། །བ་དན་གདུགས་དང་རོལ་མོའི་ཚོགས། །རིན་པོ་ཆེ་དང་མེ་ཏོག་དང་། །གཟུགས་སྒྲ་དྲི་རོ་རེག་བྱ་དང་། །ཆོས་དང་མདངས་ཆེན་བྱང་ཆུབ་སེམས། །མཆོད་སྤྲིན་བསམ་གྱིས་མི་ཁྱབ་པ། །(༨ན)
རྩ་བ་བརྒྱུད་པའི་བླ་མ་དང་། །ཡི་དམ་ཞི་ཁྲོའི་ལྷ་ཚོགས་དང་། །ཆོས་བདག་དཔའ་བོ་མཁའ་འགྲོའི་ཚོགས། །དམ་ཅན་ཆོས་སྐྱོང་རྣམས་ལ་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །དེ་ནས་གསོལ་འདེབས་ལེའུ་བདུན་པ་དཀྱུས་བཞིན་བྱེད། །བརྒྱུད་འདེབས་ནི། བདེ་ཆེན་ཆོས་སྐུའི་ངོ་བོ་འོད་དཔག་མེད། །ལོངས་སྤྱོད་རྫོགས་སྐུའི་རྣམ་རོལ་པད་དཀར་ཅན། །གྲངས་མེད་སྤྲུལ་པའི་ཟློས་གར་པདྨ་འབྱུང་། །ནམ་མཁའི་སྙིང་པོ་འཚོ་རྒྱལ་ཁྲི་སྲོང་ལྡེ། །རྡོ་རྗེ་བདུད་འཇོམས་མུ་ཁྲི་བཙན་པོ་ལ། །གསོལ་བ་འདེབས་སོ་ཐུགས་རྗེའི་སྤྱན་གྱིས་གཟིགས། །ཚུལ་འདིའི་སྒོ་འབྱེད་གཏེར་སྟོན་བཟང་པོ་གྲགས། །བཀའ་བབས་དངོས་གྲུབ་རྒྱལ་མཚན་རྡོ་རྗེ་དཔལ། །བྱམས་པ་བཤེས་གཉེན་བུདྡྷ་ཤྲཱིའི་ཞབས། །མེས་སྟོན་ནམ་མཁའི་མཚན་ཅན་ཤཱཀྱ་བཟང་། །བདུད་སྡེའི་དཔུང་འཇོམས་རྡོ་རྗེ་འཛིན་པ་ལ། །གསོལ་བ༝། །སྔ་འགྱུར་སྲོག་ཤིང་ཆེ་མཆོག་འདུས་པ་རྩལ། །རྡོ་རྗེ་བདུད་འཇོམས་སྤྲུལ་པའི་ཟློས་གར་ཅན། །ཐེག་མཆོག་ཆོས་ཀྱི་རྒྱལ་པོ་རིག་སྔགས་འཆང་། །ཀུན་བཟང་སྒྱུ་འཕྲུལ་དྲ་བའི་རོལ་གར་ཅན། །འཁོན་སྟོན་དཔལ་འབྱོར་ལྷུན་གྲུབ་འཁོར་ལོའི་མགོན། །གསོལ་བ༝། །རུ་ལག་གྲོམ་པ་རྒྱ་དང་ཡོན་པོ་ལུང་། །གཏིང་ཟབ་སྒྲོམ་བུར་མི་མངོན་ཕྱག་རྒྱ་ཡི། །རྒྱས་བཅིངས་གསང་བ་ཟབ་མོ་གཏེར་གྱི་ཆོས། །དཔལ་ལྡན་ལྷ་མོ་དགེ་བསྙེན་ནོར་བུ་བཟང་། །གཏེར་གནས་སྲུང་མར་བཅས་པའི་ཚོགས་རྣམས་ལ། །གསོལ་བ༝། །མཆོག་ཐུན་དངོས་གྲུབ་མ་ལུས་འབྱུང་བའི་གནས། །ཚིག་དོན་ཡང་ཟབ་གསོལ་འདེབས་ཚངས་པའི་དབྱངས། །ཤེས་ལྡན་གཡེལ་བ་མེད་པར་ཉམས་ལེན་ན། །ཐུགས་རྗེ་ནུས་པའི་མཐུ་དཔུང་བསྐྱེད་དུ་གསོལ། །ཞེས་པ་སྤྲོས་བྲལ་ཆོས་དབྱིངས་མའི་སྐབས་སུ་འོས་པར་བྱ་ཞིང་། །ཨྱོན་རྗེས་འཇུག་འཁོར་བ་སྤོང་འདོད་རྣམས། །དད་གུས་མོས་པས་རྒྱུན་དུ་གསོལ་བ་
ཐོབ། །རྩེ་གཅིག་གདུང་བའི་དབྱངས་ནི་འདི་ལྟ་སྟེ། ཁྱེའུ་ཕ་མར་འབོད་འདྲའི་གདུངས་དབྱངས་ལ། །པི་ཝང་གླིང་བུའི་གདངས་ལྟར་སྙན་པ་ཡིས། །ཉིན་མཚན་དུས་དྲུག་རྣམས་སུ་གསོལ་བ་ཐོབ། །ཅེས་གསུངས་སྔོན་གྱི་ཐུགས་དམ་ཞལ་བཞེས་བཞིན། །བསྐུལ་ཕྱིར་གདུང་ཤུགས་དྲག་པོས་གསོལ་འདེབས་བར། །ཀྱེ་མ་ཐུགས་རྗེས་གཟིགས་ཤིག་མ་ཧཱ་གུ་རུ། །བྱིན་གྱིས་རློབས་ཤིག་རྗེ་བཙུན་ཐོད་ཕྲེང་རྩལ། །བར་ཆད་ཀུན་སོལ་བདུན་བདུལ་དྲག་པོ་རྩལ། །དངོས་གྲུབ་མཆོག་སྩོལ་ཨྱོན་རིན་པོ་ཆེ། །ད་ལྟ་རྩོད་དུས་ལྔ་བརྒྱའི་སྙིགས་དུས་འདིར། །འབྱུང་པོས་རྒྱུད་དཀྲུགས་སྐྱེ་བོས་ལོག་པར་འཚེ། །མཐའ་ཡི་དམག་དཔུང་ནད་མཚོན་མུ་གེ་སོགས། །བྱུར་དང་ལྟས་ངན་གནོད་པ་ཀུན་ཞི་ཞིང་། །རྒྱལ་བའི་བསྟན་དང་ཁྱད་པར་ཐེག་དགུའི་སྲོལ། །དེ་འཛིན་ཚོགས་རྣམས་དར་སྨིན་རྒྱས་གྱུར་ཅིག །ཕུན་ཚོགས་བསམ་ཡས་ལྷུན་གྲུབ་ཕོ་བྲང་ནས། །པདྨ་འབྱུང་གནས་ལམ་བཟང་མཆོག་སྟོན་པ། །ཐེག་ཆེན་རྒྱལ་སྲིད་རིན་ཅེན་བདུན་ལྡན་ཆོས། །སྐལ་ལྡན་ལས་ཅན་དག་པ་རྣམ་ལྔའི་འཁོར། །འོད་དཀར་རྒྱལ་གྱིས་གང་བའི་བཀྲ་ཤིས་དུས། །དེང་འདིར་བསམ་པ་ལྷུན་གྲུབ་བཀྲ་ཤིས་ཤོག །དོན་བསྟོད་ཀྱི་རྗེས་སུ་ཚོགས་ནི། བདག་གི་ཐུགས་ཀའི་ཧཱུྃ་ལས་འོད་འཕྲོས་པས། །ཚོགས་ཀྱི་གཉིས་འཛིན་རྣམ་རྟོག་ཀུན་སྦྱངས་ནས། །རིན་ཅེན་ཡངས་པའི་སྣོད་དུ་བདུད་རྩིའི་བཅུད། །འདོད་ཡོན་ལྔ་ཡི་མཆོད་པས་ཁྱབ་པར་གྱུར། །ཞེས་བྱིན་རླབས་འདི་རྡོ་རྗེ་སློབ་དཔོན་ཙམ་གྱིས་བྱ། དེ་ནས་རོལ་མོ་དང་བཅས་ཏེ། ཧཱུྃ། རབ་འབྱམས་དག་པའི་རང་སྣང་གཞལ་ཡས་ནས། །མ་ཧཱ་གུ་རུ་རྡོ་རྗེ་དྲག་པོ་རྩལ། །སྒྲུབ་ཆེན་བཀའ་བརྒྱད་ལྷ་ཡི་འཁོར་ལོའི་ཚོགས། །འགྱིང་བག་གར་གྱི་རྣམ་འགྱུར་ཤིགས་སེ་ཤིག །འཇིགས་རུང་གསུང་གི་ང་རོ་ལྡིར་རི་རི། །ཐུགས་རྗེ་ནུས་མཐུའི་བྱིན་རླབས་ཐིབས་སེ་ཐིབ། །གནས་འདིར་བརྩེར་དགོངས་ཚོགས་ཀྱི་མཆོད་པ་ལ། །(༩ན)
ཐོགས་མེད་རྫུ་འཕྲུལ་ལྡན་པས་གཤེགས་སུ་གསོལ། །འབུལ་བ་ནི། །རྩ་བ་གསུམ་གྱི་དཀྱིལ་འཁོར་ལྷ་ཚོགས་ལ། །སྨན་རཀ་གཏོར་མ་ཤ་སྣ་དབང་པོ་ལྔ། །གཟའ་དང་བཅའ་བ་བཏུང་བའི་བྱེ་བྲག་སོགས། །སོ་སོར་དགྱེས་པའི་ཇི་སྙེད་མཆོད་པའི་ཚོགས། །བདུད་རྩིའི་རྒྱ་མཚོ་ཆེན་པོར་བྱིན་བརླབས་འདིས། །རྩ་བརྒྱུད་བླ་མ་ཐུགས་དམ་སྐོང་གྱུར་ཅིག །བཀའ་བརྒྱད་ལྷ་ཚོགས་ཐུགས་དམ༝། །ཆོས་སྲུང་གཏེར་བདག་ཐུགས་དམ༝། །བཤགས་པ་ནི། མཆོག་དང་ཐུན་མོང་དངོས་གྲུབ་གངྒཱའི་རྒྱུན། །ཞེས་སོགས་གནམ་ལྕགས་འཁོར་ལོ་ལྟར་རོ། །གདབ་པ་ནི། ཧཱུྃ་ལས་ཕོ་ཉ་ཁྲོ་བོའི་ཚོགས་སྤྲོས་པས། །ཐར་མེད་འབྲུབ་ཁུང་ལྕགས་མཁར་འབར་བའི་ནང་། །དགྲ་དང་བགེགས་ཀྱི་དམིགས་རྟེན་ལིངྒ་ལ། །སྐར་མདའ་འཕངས་པ་བཞིན་དུ་འདིར་ཁུག་ཅིག །བཛྲ་ཨཾ་གུ་ཤ་ཛཿབཛྲ་པཱ་ཤ་ཧཱུྃ། བཛྲ་སྥོ་ཊ་བཾ། བཛྲ་གྷཎྜ་ཧོཿ། གནམ་ལྕགས་གྲུ་གསུམ་འབར་བའི་ཕུར་བུ་ཡིས། །སྙིང་གར་བཏབ་པས་མར་མེ་བསད་ལྟར་གྱུར། །དུར་ཏྲི་ཨ་མོ་གྷ་ཏྲི་ག་ནན་མྱགས་ཐུཾ་ཛ་མཱ་ར་ཡ་རྦད། རྣམ་ཤེས་ཕུར་རྩེར་བླངས་ནས་ཐུགས་ཀར་བསྡུ། །གནམ་ལྕགས་རལ་གྲིས་ཤ་ཁྲག་རབ་གཏུབས་ནས། །རྡོ་རྗེ་དྲག་རྩལ་འཁོར་དང་བཅས་ལ་འབུལ། །རྒྱལ་བའི་བསྟན་པ་བསྲུང་ཕྱིར་བཞེས་སུ་གསོལ། །མ་ཧཱ་མཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བྷ་སུ་ཏ། མ་ཧཱ་གོ་རོ་ཙ་ན། མ་ཧཱ་ཀཾ་ནི་རི་ཏི་ཁཱ་ཧི། ཚོགས་ལ་རོལ་རྗེས། སློབ་དཔོན་མཆེད་དང་ལྕམ་དྲལ་ཚོགས་རྣམས་ཀྱིས། །མ་ཧཱ་མཾ་ས་གསོལ་བས་རྡོར་སེམས་ལྟར། །སྐུ་ཚེ་ལང་ཚོ་རྒྱས་པའི་མངའ་བརྙེས་ཤོག །ཛ་གད་དཔའ་བོས་འགྲོ་བ་དབང་སྡུད་ཅིང་། །ཞལ་ཟས་རོ་བརྒྱའི་ཟས་ལ་ལོངས་སྤྱད་པས། །ཞི་དང་ཁྲོ་བོའི་དབང་རྣམས་ཐོབ་པར་ཤོག །ཅེས་པ་ཡང་རྡོ་རྗེ་སློབ་དཔོན་ཙམ་གྱིས་བྱེད་དོ། །ལྷག་མ་ནི། ཧཱུྃ། སྔོན་ཚེ་ཁྲག་མཐུང་ཧེ་རུ་ཀའི། །སྤྱན་སྔར་ཁས་བླངས་དམ་བཅས་དང་། །བར་(༩བ)
དུ་པདྨ་འབྱུང་གནས་ཀྱི། སྤྱན་སྔར་ཁས་བླངས་དམ་བཅས་དང་། །ད་ལྟ་རིགས་འཛིན་བདག་ཉིད་ཀྱི། །བྲན་དང་ཕོ་ཉར་ཁས་བླངས་པའི། །སྒྲུབ་སྡེ་བརྒྱད་ཀྱི་བཀའ་སྲུང་དང་། །གསང་སྔགས་ཐེག་པའི་བཀའ་སྲུང་རྣམས། །བཀའ་ཡི་ཕམ་ཕབས་འདི་བཞེས་ལ། །སྔོན་གྱི་དམ་ཚིག་དྲན་པར་གྱིས། །གསང་སྔགས་བསྟན་པ་རྒྱས་པར་མཛོད། །བདུད་དང་དམ་སྲི་རྡུལ་དུ་རློག །ཆད་མཐོ་བསྟན་སྐྱོང་ནི། སྔོན་ཚེ་བསྐལ་པ་དང་པོ་འོག་མིན་དུ། །བཅོམ་ལྡན་དཔལ་ཆེན་ཧེ་རུ་ཀ་དཔལ་གྱིས། །སྣང་སྲིད་མ་ཚོགས་དམ་ལ་བཏགས་པའི་ཚེ། ཁྲོ་མོ་བཞི་དང་སྒོ་མ་བཞི་སོགས་ཀྱིས། །སོ་སོའི་གཟུགས་བསྟན་བཀའ་ཡི་གཏོར་མ་བླངས། །བཅོལ་བའི་ལས་ཀུན་བསྒྲུབ་སོགས་ཁས་བླངས་པ། །དུས་འདིར་མ་གཡེལ་གཏོར་མ་འདི་བཞེས་ལ། །ཞི་རྒྱས་དབང་དྲག་ཕྲིན་ལས་ཐམས་ཅད་སྒྲུབས། །བསྐལ་པ་བར་མ་བལ་ཡུལ་ཡང་ཤོད་དུ། །པདྨ་ཀཱ་ར་ཤཱཀྱ་དེ་ཝ་ཡིས། །རྡོ་རྗེ་དབྱིངས་ཀྱི་དཀྱིལ་འཁོར་ཞལ་ཕྱེ་ནས། །བདུན་ཅུ་རྩ་ལྔའི་མགོན་པོ་དམ་བཏགས་ཚེ། །སོ་སོའི་གཟུགས་བསྟན༝། །བཅོལ་བའི་ལས་ཀུན༝། །དུས་འདིར་མ་གཡེལ༝། །ཞི་རྒྱས་དབང་དྲག༝། །བསྐལ་པ་ཐ་མ་བསམ་ཡས་མཆིམས་ཕུ་རུ། །སློབ་དཔོན་ཆེན་པོ་རྗེ་འབངས་གྲོགས་དགུ་ཡིས། །བཀའ་བརྒྱད་ལྷ་ཡི་དཀྱིལ་འཁོར་ཞལ་ཕྱེ་ནས། །དྲེགས་པ་སྡེ་བརྒྱད་དམ་ལ་བཏགས་པའི་ཚེ། །སོ་སོའི་གཟུགས་བསྟན༝། །བཅོལ་བའི་ལས་ཀུན༝། །དུས་འདིར་མ་གཡེལ༝། །ཞི་རྒྱས་དབང་དྲག༝། །པདྨ་ཐོད་འཕྲེང་སྤྱན་སྔར་སྲོག་སྙིང་ཀུན། །ཕུལ་ཏེ་དམ་བཅས་བསྟན་མ་བཅུ་གཉིས་པོ། །གཏོར་མ་འདི་ལོང་གནོད་བྱེད་དགྲ་བགེགས་ཐུལ། །བཅོལ་བའི་འཕྲིན་ལས་མ་ལུས་བསྒྲུབ་པར་མཛོད། །དངོས་གྲུབ་བསྐུལ་བ་ནི། ཕྱོགས་བཞིར་བུས་ནས་དངོས་གྲུབ་བསྐུལ་བའི་ལྷ། །རྡོ་རྗེ་རཏྣ་པདྨ་ཀརྨ་དང་། །བུདྡྷ་ཐོད་ཕྲེང་རྩལ་ལྔ་རང་རྟགས་ཀྱི། །སྐུ་(༡༠ན)
མདོག་ཕྱག་མཚན་ན་བཟའ་རྒྱན་འཕྲེང་འཚེར། །མཆེད་ལྔའི་རྒྱུད་བསྐུལ་བདག་ཅག་རྒྱུ་སྦྱོར་གྱི། །ནད་གདོན་ཀུན་ཞི་ཚེ་དང་བསོད་ནམས་རྒྱས། །མཐུན་རྐྱེན་དབང་སྡུས་གནོད་བྱེད་དགྲ་བགེགས་སྒྲོལ། །ཐམས་ཅད་ལྷུན་གྱིས་གྲུབ་པའི་དངོས་གྲུབ་ཞུ། །ཨཱོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུྃ། དཀྱིལ་འཁོར་བསྡུ་བ་ནི། སྣོད་བཅུད་མ་ལུས་ཡི་གེ་ཧཱུྃ་དུ་གྱུར། །ཧཱུྃ་ཡང་འཇའ་ལྟར་དམིགས་མེད་སྟོང་པའི་ངང་། །རང་ཉིད་མ་ཧཱ་གུ་རུ་དྲག་པོ་རྩལ། །འཇིགས་མེད་རྡོ་རྗེ་འབར་བའི་སྐུ་རུ་གྱུར། །སྨོན་ལམ་ཤིས་བརྗོད་གནམ་ལྕགས་འཁོར་ལོ་ལྟར་རོ། །དེ་ལྟར་ཐུགས་སྒྲུབ་མཇུག་ཆོག་འདི་ཡང་སྔོན་དུ་བགྱིས་པའི་ལས་བྱང་ཆ་ལག་ཚང་བའི་ཆེད་ཙམ་དུ་མ་ཟད་དུས་ཀྱི་བསྐལ་བ་དང་བསྟུན་པའི་དགོས་པའི་ཚོགས་དུ་མ་མཐོང་སྟེ་ཟིལ་གནོན་དྲག་རྩལ་གྱིས་ཤིང་སྤྲེལ་སྤྲེའུ་ཟླ་བའི་ཚེས་བཅུར་སྦྱར། །སརྦ་མངྒ་ལཾ།། །།