འཆི་བདག་བཟློག་བྱེད་ཀྱི་གྱེར་གཞུང་འཆི་བདག་གཡུལ་ལས་རྒྱལ་བའི་རུ་མཚོན།
འཆི་བདག་བཟློག་བྱེད་ཀྱི་གྱེར་གཞུང་འཆི་བདག་གཡུལ་ལས་རྒྱལ་བའི་རུ་མཚོན་ཞེས་བྱ་བ་བཞུགས་སོ།།
ཨ་མྲྀ་ཏ་སིདྡྷི་པྲ་ཡཙྪ། མཁྱེན་བརྩེ་ནུས་པའི་འོད་ཟེར་འབུམ་ཕྲག་གིས། །འཆི་བདག་མུན་པའི་སྨག་རུམ་མཐར་མཛད་པའི། །ཚེ་དབང་རིགས་འཛིན་བརྙེས་པའི་པདྨ་འབྱུང་། །ལུས་ཅན་ཀུན་ལ་འཆི་མེད་དངོས་གྲུབ་སྩོལ། །གང་གི་ཟབ་གཏེར་ཨ་མྲའི་ཚལ་ཆེན་ལ། །ལྷ་བྲག་གཏེར་གྱི་འབྲས་བུ་སྨིན་པའི་བཅུད། །སྐལ་ལྡན་འགྲོ་ལ་སྟེར་མཁས་རྒོད་ལྡེམ་ཅན། །བརྒྱུད་པར་བཅས་པའི་རིག་སྔགས་འཆང་རྣམས་རྒྱལ། ཁྱད་པར་གཉགས་བན་ཛྙཱ་ན་ཀུ་མཱ་ར། །བཤེས་གཉེན་ཟོལ་ལ་བརྟེན་པའི་རྡོ་རྗེ་འཛིན། །དཀྱིལ་འཁོར་འཁོར་ལོའི་མགོན་པོ་ཨཱ་ནནྡ། །དུས་ཀུན་རིགས་ཀྱི་བདག་པོར་བརྟན་གྱུར་ཅིག །འཁྲུལ་མེད་དམ་པའི་སྤུ་གྲི་རྣོན་པོ་ཡིས། །འཆི་བདག་ཕོ་ཉའི་ཞགས་པ་རབ་བཅད་དེ། །འཛད་མེད་ཚེ་ལ་རིང་དུ་ལོངས་སྤྱོད་པའི། །མི་འཇིགས་སྦྱིན་པའི་སྒོ་འཕར་འདིར་ཕྱེ་ན། །འགོང་པོའི་གདོན་གྱིས་ཟིན་མིན་གཟུ་བོའི་བློ། །ལྡན་རྣམས་འདིར་འདུས་ཅི་གར་ལོངས་སྤྱོད་དང་། །བསམས་པའི་རེ་བ་ཡོངས་སུ་སྐོང་བྱེད་པའི། །བདུད་རྩིའི་བུམ་བཟང་ལག་ཏུ་ཐོབ་པར་ངེས། །དེ་ཡང་འཆི་བདག་འཇོམས་པའི་ཆོ་གའི་རིམ་པ། །གཏེར་ཁ་སོ་སོར་རྣམ་གྲངས་མང་དུ་མཆིས་པ་ལས། །འདིར་རིགས་འཛིན་ཆེན་པོ་རྒོད་ཀྱི་ལྡེམ་ཕྲུ་ཅན་གྱིས་བྱང་ཟང་ཟང་ལྷ་བྲག་གི་(༢ན)
རྐེད་བསེ་སྒྲོམ་སྨུག་པོའི་ལྷོ་གསེར་མཛོད་སེར་པོ་ནས་གདན་དྲགས་པའི་འཆི་བདག་ནག་པོ་བཟློག་བྱེད་ཀྱི་གྱེར་གཞུང་གི་རིམ་པ་ཁྲིགས་སུ་བསྡེབས་པ་ནི། ལག་ལེན་དང་ཆོ་གའི་ཆ་ལག་རྣམས་བླ་མའི་ཕྱག་ལེན་གྱིས་བརྒྱན་ཏེ་མངོན་པར་འདུ་བྱས་ལ། ངག་འདོན་དངོས་ནི། ཐུགས་སྒྲུབ་ཀྱི་ལས་བྱང་གཞུང་བསྲང་། བཀའ་སྲུང་གི་བསྐང་གསོ། །ཚོགས་ཐམ་རྩ་གསུམ་བསྐང་གསོ་དང་བཅས་པ་བཏང་རྗེས། གླུད་བསྔོ་བ་ནི། ཧཱུཾ། སྟོང་གསུམ་ཀུན་ཏུ་དྲི་མཆོག་འབྱུང་གྱུར་པའི། །སྤོས་དང་སྨན་སྦྱར་ཆུ་གཙང་དག་པའི་ཁྲུས། །ཡིད་བཞིན་སྤྲིན་ཕུང་མཁའ་ལ་ཆར་འབེབས་པས། །མི་གཙང་དྲི་མའི་ཚོགས་ཀུན་དག་གྱུར་ཅིག །ཨཱོཾ་ཤུདྡྷེ་ཤུདྡྷེ་ཤོདྷ་ན་ཡེ་སྭཱཧཱ། ཧཱུཾ། པད་སྡོང་འདབ་དྲུག་ཁྲི་འཕང་བཞིན། །ཉི་མ་ཟླ་བའི་གདན་སྟེང་དུ། །བདག་ཉིད་རྡོ་རྗེ་སེམས་དཔའི་སྐུ། །དཀར་གསལ་ཞལ་གཅིག་ཕྱག་གཉིས་པ། །རྡོ་རྗེ་དྲིལ་བུ་ཐུགས་ཀར་འཛིན། །དར་དང་རིན་ཆེན་དུ་མས་སྤྲས། །སྤྱི་གཙུག་བླ་མ་ཀུན་བཟང་མཐིང་། །མཚན་དཔེས་སྤྲས་པ་ཡུམ་དང་སྦྱོར། །སྐུ་ཡི་གནས་སུ་ཞི་ཁྲོའི་ལྷ། །ཆུ་ནང་ཟླ་བ་ལྟ་བུར་གསལ། །ཨཱོཾ་བཛྲ་སཏྭ་ཧཱུཾ། འདབ་དྲུག་ཤར་གྱི་པད་འདབ་ལ། །སྦྱོང་བའི་ལྷ་ནི་ཤཱཀ་ཐུབ་སེར། །ཕྱག་གཉིས་ས་གནོན་ལྷུང་(༢བ)
བཟེད་བསྣམས། །མཚན་དང་དཔེ་བྱད་ལྡན་པར་བཞུགས། །ཐལ་མོ་ཁོང་སྟོང་ཕྱག་རྒྱའི་ནང་། །ཨ་དཀར་འོད་འཕྲོས་དངོས་འཛིན་སྦྱངས། །ཨཱོཾ་སྭ་བྷཱ་ཝ་ཤུདྡྷཱཿསརྦ་དྷརྨཱ༔སྭ་བྷཱ་ཝ་ཤུདྡྷོ྅ཧཾ། སྔགས་འདི་ལན་བདུན་བརྗོད་པའི་མཐུས། །སྣོད་བཅུད་དངོས་འཛིན་དག་གྱུར་ཅིག །དེ་ཡི་མཚམས་ཀྱི་པད་འདབ་ལ། །སྤེལ་བའི་ལྷ་ནི་རྣམ་སྣང་དཀར། །ཕྱག་ན་འཁོར་ལོ་དྲིལ་བུ་བསྣམས། །མཚན་དང་དཔེ་བྱད༝། །ཐལ་མོ་ཚིགས་བཅག་ཕྱག་རྒྱའི་ནང་། ཁཾ་སྔོན་འོད་འཕྲོས་སྣོད་བཅུད་སྤེལ། །ཨཱོཾ་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཏད་ཁཾ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། སྔགས་འདི་ལན་བདུན༝། །སྣོད་བཅུད་ལེགས་ཚོགས་སྤེལ་གྱུར་ཅིག །དེ་ཡི་མཚམས་ཀྱི་པད་འདབ་ལ། །བསྒྱུར་ལྷ་བདུད་རྩི་འཁྱིལ་བ་ལྗང་། །ཕྱག་མཚན་རྒྱ་གྲམ་དྲིལ་བུ་བསྣམས། །མཚན་དང་དཔེ་བྱད༝། །ཐལ་མོ་ཁ་གྱེར་ཕྱག་རྒྱའི་ནང་། །ཛ་དམར་འོད་འཕྲོས་བདུད་རྩིར་བསྒྱུར། །ཨཱོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། སྔགས་འདི་ལན་བདུན༝། །སྣོད་བཅུད་ཟག་མེད་བདུད་རྩིར་གྱུར། །དེ་ཡི་མཚམས་ཀྱི་པད༝། །ཐོབ་ལྷ་རིན་འབྱུང་སྐུ་མདོག་སེར། །ཕྱག་ན་རིན་ཆེན་དྲིལ་བུ་བསྣམས། །མཚན་དང་དཔེ་བྱད༝། །མཆོག་སྦྱིན་ཕྱག་རྒྱ་ཏྲཾ་སེར་ལས། །འོད་འཕྲོས་ཀུན་གྱིས་འབད་མེད་ཐོབ། །ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། སྔགས་འདི་ལན་བདུན༝། །མགྲོན་རྣམས་ཀུན་གྱིས་ཐོབ་གྱུར་ཅིག །དེ་ཡི་མཚམས་ཀྱི༝། །ཚིམ་ལྷ་དོན་ཡོད་གྲུབ་པ་ལྗང་། །ཕྱག་མཚན་རལ་གྲི་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། ཁུ་ཚུར་མཆོག་སྦྱིན་ཕྱག་རྒྱའི་ནང་། །ཧ་ལྗང་འོད་འཕྲོས་མགྲོན་མཉེས་བསམ། །ཨཱོཾ་ཛྙཱ་ན་ཨ་ཝ་ལོ་ཀི་ཏེ་ན་མསྶ་མནྟ་སྥ་ར་(༣ན)
ཎ་ར་སྨི་བྷ་ཝ་མ་ཧཱ་མ་ཎི་དུ་རུ་དུ་རུ་ཧྲྀ་ད་ཡ་ཛ་ལ་ནི་སྭཱཧཱ། སྔགས་འདི་ལན་བདུན༝། མགྲོན་ཀུན་དགྱེས་ཤིང་ཚིམ་གྱུར་ཅིག །དེ་ཡི་མཚམས་ཀྱི༝། །དབང་ཆེན་ཕྱག་རྡོར་ལྗང་དམར་ནི། །ཕྱག་མཚན་རྡོ་རྗེ་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །སོར་བསྣོལ་ཕྱག་རྒྱ་ཛ་དམར་ལས། །འོད་འཕྲོས་མགྲོན་བཞིའི་མཐུ་སྟོབས་བསྡུས། །ན་མསྶ་མནྟ་བུདྡྷཱ་ནཱཾ་གྲ་ཧེ་ཤྭ་རི་པྲ་བྷཉྫ་ན་མཧཱ་ས་མ་ཡ་ཧཱུཾ་ཕཊ། སྔགས་འདི་ལན་བདུན་བརྗོད་པའི་མཐུས། དབང་བསྡུས་འཕྲིན་ལས་ཀུན་འགྲུབ་ཤོག །ཅེས་སྔགས་དྲུག་དང་ཕྱག་རྒྱ་དྲུག་གིས་བྱིན་གྱིས་བརླབས་ཏེ། ཧཱུཾ། འཆི་བདག་ནག་པོ་གཤིན་རྗེའི་གཙཿ བགེགས་ཀྱི་རྒྱལ་པོ་ཆེན་པོ་དངཿ སྟེང་གདོན་ལྷ་སྲིན་དྲེགས་པ་ཅནཿ འོག་གདོན་ཀླུ་སྲིན་ཀླུ་གཉན་དངཿ བར་གདོན་བདུད་དང་རྒྱལ་པོ་བཙནཿ སྲིད་པའི་ཕོ་འདྲེ་མོ་འདྲེ་དངཿ མགོན་པོ་དམ་སྲི་མ་ནིང་གདོནཿ གཤིན་རྗེ་ཕོ་ཉ་འབུམ་བྲག་དངཿ དྲེགས་པ་སྡེ་བརྒྱད་མ་ལུས་པཿ དཔོན་དང་གཡོག་འཁོར་བཅས་པ་ལཿ བདག་གཞན་གྱི་ཆེད་དུ་ཡིན་ན། མི་ལས་ལྷག་པའི་ཞེས་བསྒྱུར། ལས་ལྷག་པའི་གཟུགས་དང་གླུདཿ སྔགས་དང་ཕྱག་རྒྱས་བྱིན་རླབས་ནསཿ སྲིད་པའི་ལྷ་སྲིན་ཀུན་ལ་འབུལཿ ཁྱེར་ཅིག་ཁྱེར་ཅིག་གདོན་གྱི་ཚོགསཿ འདོད་སྲེད་ཆགས་སྡང་བྲལ་བར་བགྱིཿ མཐོང་དག་རེག་པའི་བསམ་ངན་རྟུལཿ གཟུང་བ་ཐོང་ལ་བཅིངས་པ་གློདཿ འཛིན་པའི་ཞེན་པ་དང་གྲོལ་ཅིགཿ སྔོན་གྱི་ལན་ཆགས་ཤ་འཁོན་དངཿ བུ་ལོན་འཕྲལ་གྱི་རྐྱེན་རྣམས་ཀུནཿ ཐམས་ཅད་མ་ལུས་འཁོར་བར་གྱིསཿ བདག་གི་བསམ་པའི་སྟོབས་དང་ནིཿ དེ་བཞིན་གཤེགས་པའི་སྦྱིན་སྟོབས་དངཿ ཆོས་ཀྱི་དབྱིངས་ཀྱི་སྟོབས་རྣམས་ཀྱིསཿ གདོན་བགེགས་མ་ལུས་ཐམས་ཅད་ཀྱིཿ བསམ་པ་ཡིད་(༣བ)
བཞིན་འགྲུབ་གྱུར་ཅིགཿ ལན་གསུམ་བརྗོད་དེ་གཞུང་བཞིན་རྫོངཿ རྒྱས་པར་སྤྲོ་ན་གླུད་རབས་གཞན་ནས་འབྱུང་བ་ལྟར་བྱས་ཀྱང་རུང་བར་སེམས་སོ། །སློབ་དཔོན་གྱིས་སྲུང་སྔགས་བཟླ་ཞིང་སྲུང་འཁོར་བསྒོམ། །བླ་མ་གཤིན་རྗེ་གཤེད་དུ་གསལ་གདབ་པ་ནི། རང་ཉིད་བླ་མ་རྡོ་རྗེ་དྲག་རྩལ་དུ། །གསལ་བ་སྐད་ཅིག་ཙམ་གྱིས་གནས་འགྱུར་ཏེ། །གྲུ་གསུམ་མཐིང་ནག་མཁའ་སྟེང་རླུང་ནག་འཁྲུག །བསྐལ་པའི་མེ་འབར་སྟེང་ན་རྒྱ་མཚོ་ཆེ། །མཐིང་ནག་རྦ་ཀློང་འཁྱིལ་བ་མཁའ་ལ་འཕྱོ། །སྲ་བརྟན་རྡོ་རྗེའི་ས་གཞི་རྣམ་པར་བཀྲ །གསལ་བ་དེ་སྟེང་དུ་ཡ་རགྴ་ནན། །ཞེས་པའི་སྔགས་ཀྱི་གཤིན་རྗེ་ཕོ་མོ་ནི། །ཟུང་ལྔ་བསྒྱེལ་བའི་སྟེང་དུ་པདྨ་དང་། །ཟླ་ཉི་བརྩེགས་སྟེང་ཡ་མ་མེ་ད་ཀྵེ། །ཡི་གེ་ཁ་དོག་རྣམ་པ་ལྔར་འབོར་བས། །འོད་ཟེར་འཕྲོ་འདུ་ཡོངས་སུ་གྱུར་བ་ལས། །དབུས་ཀྱི་མཐིང་ནག་ཡ་ལས་བདག་ཉིད་སྐུ། །ངོ་བོ་རིགས་འཛིན་བླ་མ་རྣམ་པ་ནི། །བཅོམ་ལྡན་དཔལ་ཆེན་འཇམ་དཔལ་གཤིན་རྗེ་གཤེད། །སྐུ་མདོག་མཐིང་ནག་ཞལ་གཅིག་ཕྱག་གཉིས་པ། །སྐུ་ཆེ་རགས་པ་རི་རབ་ལྷུན་པོར་བསྙེས། །དབུ་ཡིས་ཚངས་པའི་འཇིག་རྟེན་ཐང་དུ་སླེབས། །སྡང་མིག་སྤྱན་གཟིགས་ཞལ་གདངས་མཆེ་བ་གཙིགས། །སྨིན་མ་སྨ་ར་ཨག་ཚོམ་མེ་ལྟར་འབར། ཁམ་ནག་དབུ་སྐྲ་གྱེན་དུ་རྣམ་པར་འཁྱིལ། །ཕྱག་གཡས་ཞིང་གི་བེ་ཅོན་མཁའ་ལ་འཕྱར། །གཡོན་པ་ཞགས་པ་དང་བཅས་སྡིགས་མཛུབ་མཛད། །རིགས་ལྔའི་སངས་རྒྱས་དབུ་བརྒྱན་དུར་ཁྲོད་ཀྱི། །ཆས་བརྒྱད་མ་ལུས་སྐུ་ལ་ཡོངས་སུ་རྫོགས། །ཞབས་གཉིས་གཡས་བརྐྱང་གཡོན་བསྐུམ་ཚུལ་དུ་བཞུགས། །མདུན་གྱི་གདན་སྟེང་མ་ཡིག་ཡོངས་གྱུར་ལས། །ཡ་མ་རཱ་ཛ་སྨུག་ནག་གཡས་པ་ན། །ལྕགས་ཀྱི་བེ་ཅོན་གཡོན་པ་འཁོར་ལོ་འཛིན། །གཡས་ཀྱི་གདན་སྟེང་མེ་ཡིག་ཡོངས་གྱུར་ལས། །མྱོས་(༤ན)
བྱེད་འབར་བ་སེར་ནག་གཡས་པ་ན། །གསེར་གྱི་བེ་ཅོན་གཡོན་པ་འཁོར་ལོ་འཛིན། །རྒྱབ་ཀྱི་གདན་སྟེང་དུ་ད་ཡིག་ཡོངས་གྱུར་ལས། ཁྲོ་བོ་ཨརྱ་དམར་པོ་གཡས་པ་ན། །ཟངས་ཀྱི་བེ་ཅོན་གཡོན་པ་འཁོར་ལོ་འཛིན། །གཡོན་གྱི་གདན་སྟེང་ཀྵེ་ཡིག་ཡོངས་གྱུར་ལས། །རལ་པ་ཚར་དགུ་ལྗང་ནག་གཡས་པ་ན། །གཡུ་ཡི་བེ་ཅོན་གཡོན་པ་འཁོར་ལོ་འཛིན། །རྣམ་འགྱུར་རྒྱན་ཆ་གཙོ་བོ་དང་མཚུངས་གྱུར། །ཨཱོཾ་ཡ་མཱནྟ་ཀ་ཡ་མ་མེ་ད་ཀྵེ། རཱ་ཛ་ས་ཧོ། རུ་ན་ཡོ་ནི། ར་ཡ་ཙ་ནི་ཧཱུཾ་ཕཊ། དུ་རཾ་ཧྲི་ཡང་འདྲིད་བྱུང་ཧ་གཟེར་བྱུང་། །གཤིན་རྗེ་འཆི་བདག་ནག་པོའི་གནོད་པ་ཨེ་ཧུར་ཟུམ་ཛ། ཁཾ་ཤག་རོ་མྱགས་མུགས་ཏི་རྦད་ཡ། ཞེས་གོང་བསྙེན་གྱི་འཛབ་ཅི་ནུས་སུ་བཟླ། མདུན་བསྐྱེད་ནི། །ཨཱོཾ་སྭ་བྷཱ་ཝ་བི་ཤུདྡྷ་སརྦ་དྷརྨཱ་སྭ་བྷཱ་ཝ་བི་ཤུདྡྷོ་྅ཧཾ། ཆོས་རྣམས་མི་དམིགས་སྟོང་པ་ཉིད་དུ་གྱུར། །སྟོང་པའི་ངང་ལས་ཨེ་རཾ་ཡོངས་གྱུར་པས། །འོག་བཞི་ལྕགས་མཁར་གྲུ་གསུམ་ནག་པོ་ལ། །བསྐལ་པ་དུས་མཐའི་མེ་དཔུང་འུར་འུར་འབར། །དེ་ཡི་ནང་དུ་སྲོག་ཆགས་འབུམ་ཕྲག་གི །བཾ་རོ་གསར་རྙིང་བརྩིགས་པའི་ཁྲི་སྟེང་དུ། །སྐད་ཅིག་ཙམ་གྱིས་ཡི་གེ་ཡ་དག་དུ། །མཐིང་ནག་འོད་ཟེར་འཕྲོ་འདུ་ཡོངས་གྱུར་ལས། །འཇིག་རྟེན་ལས་ལ་གྲུབ་པའི་འཆི་བདག་ནི། །སྲིད་གསུམ་ཟ་བའི་གཤིན་རྗེ་མ་རུངས་པ། །མུན་པ་བྱེ་བས་བྱུགས་པ་ལྟར་གནག་པའི། །མདོག་ཅན་སྲིན་པོ་དྲག་ཏུ་ཁྲོས་པའི་གཟུགས། ཁྲོ་གཉེར་གཡོ་ཞིང་མིག་གསུམ་སྡང་མིག་བལྟ། །དམར་སེར་རལ་པའི་ཐོར་ཅོག་སྤྱི་བོར་བཅིངས། །སྨིན་མ་སྨ་ར་དུས་མཐའི་མེ་ལྟར་འབར། །གནམ་ས་གདངས་པ་ཙམ་གྱི་ཁ་ནང་དུ། །རབ་དཀར་མཆེ་བ་གངས་རི་ལྟ་བུ་གཙིགས། །ལྕེ་ནི་གློག་འཕྲེང་འཁྲིགས་པ་བཞིན་དུ་འཁྱུག །ཡན་ལག་རྣམས་(༤བ)
ཀྱི་ཉྭ་སུམ་རེ་རེ་ལ། །རྒྱང་གྲགས་གསུམ་གྱི་ཚད་དང་རྣམ་པར་ལྡན། །ཡན་ལག་བཞི་ཡི་སེན་མོ་རྣོ་ངར་ཅན། །ལྕགས་ཀྱུ་བཀུག་པ་ལྟ་བུར་རབ་ཏུ་འཇིགས། །གཡས་པ་འཇིག་རྟེན་མ་ལུས་འདེགས་ནུས་པའི། །ཕུང་བར་བྱེད་པའི་བདུད་ཀྱི་ཁྲམ་ཤིང་དང་། །སྐྱེ་འགྲོ་འཆིང་བའི་ཞགས་པ་ནག་པོ་ཐོགས། །གཡོན་པ་སྲོག་རྩ་མ་ལུས་གཅོད་བྱེད་པའི། །རལ་གྲི་སོ་གཅིག་པ་ནི་འཛིན་ཞིང་འཕྱར། །ཐོད་སྐམ་དབུ་བརྒྱན་རུས་པའི་རྒྱན་ཆས་དང་། །སྦྲུལ་གྱི་གདུ་བུ་པགས་རློན་གོས་སུ་གྱོན། །རོ་སྨད་སྟག་ལྤགས་རློན་པའི་ཤམ་ཐབས་དཀྲིས། །ལྟོ་བ་རབ་ཡངས་སྲིད་པའི་གྲོང་ཁྱེར་བཅས། །རྒྱ་མཚོ་ཆེན་པོའི་ཕ་མཐའ་འགེབས་ནུས་པའི། །འཇིགས་རུང་མ་ཧེ་ནག་པོའི་སྟེང་ན་འགྱིང་། །རྒྱབ་ཏུ་ལས་ཀྱི་འཚུབ་མའི་ཕུང་པོ་འཁྱིལ། །འཆི་བདག་མདུན་དུ་ཞེ་སྡང་ལས་གྲུབ་པའི། །གཤིན་རྗེ་ནག་པོ་ཁ་གདངས་མཆེ་བ་གཙིགས། །ཉྭ་སུལ་རགས་ཤིང་ཡན་ལག་རྣམ་པར་བགྲད། །མཐོང་བ་ཙམ་གྱིས་སྐྱེ་འགྲོའི་སྲོག་དབུགས་འཕྲོག །གཡོན་དུ་ཕྲག་དོག་འཁྲུགས་པ་ལས་བྱུང་བདུད། །སྡིག་པ་ནག་པོ་རྭ་དང་ཁ་མིག་གདངས། །ཡན་ལག་བགྲད་ཅིང་མཇུག་མ་ལྕགས་ཀྱུ་ལྟར། །བཀུག་ཅིང་མཐོང་བ་ཙམ་གྱིས་འཇིགས་པར་བྱེད། །རྒྱབ་ཏུ་གཏི་མུག་འཐིབས་པ་ལས་བྱུང་བདུད། །སྲ་མཁྲེགས་ལྕགས་ལས་རྣམ་པར་གྲུབ་པ་ཡི། །རུ་དང་གཤོག་པ་གདེངས་པའི་ཕྱེ་མ་ལེབ། །ཚུལ་ཅན་སྐྱེ་འགྲོའི་སྲོག་ལ་རྣམ་པར་རྒོལ། །གཡོན་དུ་འདོད་ཆགས་ཞེན་པ་ལས་བྱུང་བའི། །སྲོག་དབུགས་ཤ་ཁྲག་ཟ་ལ་རབ་རྔམ་པའི། །འཇིགས་སུ་རུང་བའི་དྲེད་མོ་དམར་ནག་གཟུགས། །མཆེ་བ་གཙིགས་ཤིང་སྦར་མོ་རྣོན་པོ་བགྲད། །གཞན་ཡང་ཁ་གདངས་མཆེ་གཙིགས་འཇིགས་སུ་རུང་། །སྣ་ཚོགས་མཚོན་ཆ་ཐོགས་ནས་བླ་ཚེ་བརྐུ། །སྲིད་གསུམ་མ་ལུས་མྱུལ་བའི་(༥ན)
གཤིན་རྗེ་ཡི། །གྲངས་མེད་འཁོར་གྱིས་ཡོངས་སུ་བསྐོར་བར་གྱུར། །ཨཱོཾ་བཛྲ་ཏྲི་ཀ་ཎ་ཁངྒ་ཧཱུཾ། ཞེས་བཟླས་ཤིང་ཐུན་སྒྲུབ། མི་བཟད་རྣོ་ངར་ལྡན་པ་ཡིས། །ཐུན་ནག་བྲབས་པས་ས་གཞི་གས། །མཐའ་ཡི་རྒྱ་མཚོ་ཆེར་ནག་པ། །མེར་མེར་མངོན་སུམ་གསལ་བར་གྱུར། །ཡང་སྔར་གྱི་སྔགས་དང་བཅས་ཏེ་ཐུན་རྡེག །ཛ། རང་ཉིད་གཤིན་རྗེ་གཤེད་གསལ་བའི། །ཐུགས་ཀ་ལས་འཕྲོས་འོད་ཟེར་ནི། །ལྕགས་ཀྱུ་རྣོན་པོ་ལྟ་བུ་ཡིས། །འཆི་བདག་གཤིན་རྗེའི་ཚོགས་རྣམས་བཀུག །ཨཱོཾ་ཀྲྀཥྞ་ཛ་མ་རི་ཧཱུཾ་ཛ་ཛཿཧཱུཾ་བཾ་ཧོཿ ས་མ་ཡ་ཛ་ཛ། ཞེས་ཕྱག་རྒྱ་དང་བཅས་ལན་མང་དུ་བརྗོད། ཨཱོཾ་བཛྲ་ཨ་མྲྀ་ཏས་བགེགས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བའི་ནང་དུ་ཁྲག་གི་ཨརྒྷཾ། ཤ་ཆེན་གྱི་དུད་པ། དབང་པོའི་མེ་ཏོག །ཞུན་ཆེན་གྱི་མར་མེ། མཁྲིས་ཆེན་གྱི་དྲི་ཆབ། ཤ་རུས་ཀྱི་ཞལ་ཟས། རྐང་གླིང་སྙན་པའི་རོལ་མོར་བཅས་པ། འཆི་བདག་གཤིན་རྗེའི་རྒྱལ་པོ་འཁོར་དང་བཅས་པ་རྣམས་ཀྱི་དབང་པོ་དྲུག་ཚིམ་པར་བྱེད་པའི་མཆོད་སྤྲིན་ཟད་མི་ཤེས་པ་ནམ་མཁའ་དང་མཉམ་པར་གྱུར། ཨཱོཾ་ཨ་ཧ་ར་ཨ་ཧ་ར་སརྦ་བིདྱ་ར་པཱུ་ད་ཏི་ཧཱུཾ། དྷཱུ་བེ་ཧཱུཾ། པུཥྤེ་ཊཾ། ཨཱ་ལོ་ཀེ་ཧྲི། གྷནྡྷེ་གན། ཀྲྀཥྞ་ཛ་མ་རི་ཧ་བྷ་ལིནྟ་ཁཱ་ཧི། ཞེས་མཆོད་པ་དང་གཏོར་མ་འབུལ་ལོ། །གཏོར་འབུལ་དངོས་ནི། སྭ་བྷཱ་ཝས་སྦྱངས། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཏ་ད་ཁམ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱཧཱ། ཨཱོཾ་ཨཱཿཧཱུཾ། ལན་གསུམ་བརྗོད་བྱིན་གྱིས་བརླབས། ཨཱོཾ་དུ་ཏི་བྷི་ཛ་ཧཱུཾ་ཐ་ཀྲྀཥྞ་ཛ་མ་རི། མ་ཧཱ་བ་ལིཾ་ཏ་ཁཱ་ཧི། ཨི་དན་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བདུན་ནམ་གསུམ་གྱིས་ཕུལ། དེ་ནས་རྡོ་རྗེ་དྲིལ་བུ་དང་རོལ་(༥བ)
མོ་ཐོགས་ནས་འདི་སྐད་ཅེས་བརྗོད་དོ། །ཧཱུཾ། ཡ་ལས་གྲུབ་པའི་སྟོབས་པོ་ཆེ། །དུ་ལས་གྲུབ་པའི་རྫུ་འཕྲུལ་ཅན། ཁམས་གསུམ་སྲིད་པའི་དབང་པོ་ཆེ། །མ་རུངས་དྲེགས་པ་ཀུན་གྱི་རྗེ། །འབྱུང་བའི་འཁོར་ལོས་ཐམས་ཅད་འཇོམས། །སྐྱེ་འགྲོའི་ཤ་ཁྲག་དབུགས་ལ་ཟ། །སྲོག་འཕྲོག་གཤིན་རྗེ་ནག་པོ་ནི། །སྐུ་མདོག་མཐིང་ནག་མུན་རུམ་འཁྱིལ། །སྤྱན་གསུམ་ཁྲོ་གཉེར་གློག་ལྟར་འཁྱུག །ལྕགས་ཀྱི་རལ་པ་མི་མགོས་བརྒྱན། །ལྗགས་འདྲིལ་མཆེ་བ་གཙིགས་པ་ཡིས། །དུས་གསུམ་སངས་རྒྱས་མ་གཏོགས་པའི། །ཚངས་པའི་འཇིག་རྟེན་མན་ཆད་ནས། །འཇག་མིག་སྲིན་བུ་ཡན་ཆད་ཀྱི། །སྲོག་དབུགས་ཟ་བའི་སྟོབས་པོ་ཆེ། །སྲོག་བདག་གཤིན་རྗེ་ནག་པོ་ཁྱོད། །གཡས་པ་ཁྲག་ཤིང་མིག་དགུ་ཡིས། །སྐྱེ་འགྲོ་སྲོག་དབུགས་ཁྲམ་ལ་འདེབས། །མུན་ཞགས་ནག་པོ་མདའ་ལྟར་འཕེན། །རླུང་ལྟར་མགྱོགས་པས་འགྲོ་དྲུག་འཆིང་། །གཡོན་པ་གྲི་ནག་སོ་གཅིག་གིས། །འགྲོ་བའི་སྲོག་རྩ་ཉལ་ཐག་གཅོད། །སེན་མོ་ལྕགས་ཀྱུའི་མཚོན་ཆ་ཡིས། །འགྲོ་དྲུག་རོ་ཡི་ལུས་ཀུན་གཏུབ། །རྔམས་པའི་སྟོབས་ཀྱིས་ཕྱོགས་བཅུར་རྒྱུག །འཇིག་རྟེན་ཁམས་ཀྱི་སྟོབས་པོ་ཆེ། །ཀུན་གྱི་གཟི་བརྗིད་སྟོབས་ཟ་བ། །དྲག་ཤུལ་ཅན་ལ་མཆོད་པར་དབུལ། །ཞེས་བསྟོད། དེ་ནས་མེ་ཏོག་འཐོར་ཞིང་། ཀྱེ། འཆི་བདག་གཤིན་རྗེ་འཁོར་དང་བཅས་པ་ཐམས་ཅད་དགོངས་སུ་གསོལ། །བདག་དང་ཁམས་གསུམ་གྱི་སེམས་ཅན་ཐམས་ཅད་དང་། །དེང་ཡོན་གྱི་བདག་པོ་མིང་འདི་ཞེས་བྱ་བ་ལ། །འཆི་བདག་གི་རྒྱལ་པོ་འཁོར་དང་བཅས་པ་ཁྱོད་རྣམས་ཀྱིས། །སྔོན་བསྐལ་པ་དཔག་ཏུ་མེད་པའི་ཐོག་མ་ནས་དུས་ད་ལྟ་ཡན་ཆད་དུ། བུ་ལོན་དང་། ལན་ཆགས་དང་། སྟོང་ཁྲིན་དང་། ཉོན་མོངས་པའི་ལས་ཀྱི་རྐྱེན་ཅི་ཡོད་པ་(༦ན)
ཐམས་ཅད་ད་ལྟ་ཉིད་དུ་འཇལ་བར་བགྱི། །ཚེ་དང་སྲོག་ལ་བར་དུ་གཅོད་པ་ཐམས་ཅད་ཞི་བར་གྱུར་ཅིག །ལུས་ངག་ཡིད་གསུམ་བར་དུ་གཅོད་པའི་རྐྱེན་དུ་འགྲོ་བ། འགལ་བར་བྱེད་པའི་ལས་གང་ཡང་མ་བྱེད་ཅིག །ལན་གསུམ་བརྗོད། ལན་ཆགས་འཇལ་རྒྱའི་ཡས་རྣམས་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབས། འབྲུ་སྣ་བཏུང་བའི་བྱེ་བྲག་རྣམས། །བྲེ་ལ་གཞལ་ཏེ་འབུལ་བར་གྱིས། །ཤ་མར་དར་ཟབ་རིན་ཆེན་སོགས། །སྲང་ལ་བཏེག་ནས་འབུལ་བར་གྱིས། །གྲངས་རྣམས་རིམ་པར་འདྲེན་བཞིན་མང་པོར་སྤེལ་བའི་སྔགས་ཀྱང་བརྗོད། དེ་རྗེས་གླུད་རབས་ཚར་གཅིག་བཏང་། ལྷའི་ང་རྒྱལ་གྱིས་འདི་སྐད་དོ། །ཧཱུཾ། རི་རྒྱལ་ལྷུན་པོའི་རྨང་འོག་ན། །རྒྱ་མཚོ་ཆེན་པོའི་གཏིང་རུམ་ན། །རླུང་ནག་འཚུབ་མའི་སྟེང་ཤེད་ན། །བསྐལ་པའི་མེ་དང་རྒྱ་མཚོའི་བར། །ལྕགས་བསྲེགས་ནག་པོའི་ས་གཞི་ལ། །ལྕགས་ཀྱི་ཁང་པ་སྒོ་མེད་ནང་། །གཤིན་ཡུལ་འཇིག་རྟེན་རྨེ་ནག་ཅེས། །ཟིན་ནས་ཐར་པ་མེད་པའི་གནས། །འཇིགས་སུ་རུང་བའི་གནས་དེ་ན། །འཆི་བདག་ཆོས་ཀྱི་རྒྱལ་པོ་ཁྱོད། །མངོན་ཤེས་མཐུ་དང་རྫུ་འཕྲུལ་ལྡན། །དགེ་སྡིག་ཆོས་བཞིན་སྤྱོད་པའོ། ཁྱོད་ལ་ལན་ཆགས་སྟོང་ཁྲིན་དུ། །འབྱོར་བའི་ལོངས་སྤྱོད་གླུད་འབུལ་གྱི། །འཇིག་རྟེན་ས་སྟེང་ལྷ་མིའི་ཡུལ། །དགེ་བཅུ་དམ་ཆོས་སྤྱོད་པའི་སར། །དེང་ནས་མི་ལོ་བཅུ་གསུམ་དུ། །འཆི་བདག་ཞགས་པས་མ་འདེབས་ཤིག །གཤིན་རྗེའི་ཕོ་ཉ་མ་གཏོང་ཞིག །འཇམ་དཔལ་ཡ་མཱནྟ་ཀ་ཡི། །བཀའ་དང་དམ་ལས་མ་འདའ་ཞིག །ཨཱོཾ་ཡ་མཱནྟ་ཀ་ཡ་བ་ཏི་ས་མ་ཡ་ན་ར་སྐན། རྩེ་གསུམ་གྱིས་བདུད་རྩི་ལྕེ་ཐོག་ཏུ་བཞག་ནས་མནའ་ཆུ་བླུད། །དམ་བསྒྲག་པ་ནི། ཧཱུཾ། ཆོས་དབྱིངས་ཀ་དག་གསལ་སྟོང་(༦བ)
འཛིན་མེད་ལ། །འཁོར་བ་མྱ་ངན་འདས་པར་རོ་གཅིག་པས། །གནོད་བྱ་གནོད་བྱེད་གནོད་པའི་ཡུལ་ལ་སོགས། །རྡུལ་ཕྲན་ཙམ་ཡང་གྲུབ་པ་ག་ལ་ཞིག །འཛིན་མེད་འཛིན་པ་ཞུགས་པའི་འཁྲུལ་ངོ་རུ། །ལུས་སྲོག་ལོངས་སྤྱོད་དེ་འཇོམས་དགྲ་བགེགས་སོགས། །སྒྱུ་མའི་རོལ་པ་ཇི་བཞིན་སྣང་བ་ཀུན། །རྟེན་འབྲེལ་ཐབས་ཀྱིས་མི་བཟློག་གང་ཡང་མེད། །འདོད་ཆགས་ཞེ་སྡང་གཏི་མུག་ལས་གྲུབ་པའི། །རྒྱུད་གསུམ་དྲེགས་པའི་ཚོགས་རྣམས་མ་ལུས་པ། །སྔོན་ཚེ་དཔལ་ཆེན་ཁྲག་འཐུང་ཧེ་རུ་ཀས། །སྲོག་གི་སྙིང་པོ་མ་ལུས་བླངས་མིན་ནམ། །བྱེ་བྲག་འཆི་བདག་གཤིན་རྗེའི་ཚོགས་རྣམས་ཀུན། །ཕྱག་རྒྱ་མ་ལུས་ཟིལ་གྱིས་གནོན་བྱེད་པའི། །འཇམ་དཔལ་དཔའ་བོ་དུས་ཀྱི་དགྲ་ཆེན་པོས། །སྲོག་སྙིང་བླངས་ནས་དམ་ལ་མ་བཏགས་སམ། ཁྱད་པར་དུས་གསུམ་རྒྱལ་བ་ཀུན་གྱི་དངོས། །ཨྱོན་སློབ་དཔོན་པདྨ་འབྱུང་གནས་ཀྱིས། །མ་རུངས་འདུལ་ཕྱིར་ལང་ཀའི་ལྷོ་ཕྱོགས་ཀྱི། །དུག་སྡོང་ནག་པོའི་འགྲམ་དུ་བཞུགས་པའི་ཚེ། །ནམ་གྱི་སྲོད་ཡོལ་དུས་སུ་མཐའི་རྒྱ་མཚོ། །མཁའ་ལ་འཕྱོ་ཞིང་རྦ་ཀློང་འཁྲུག་པ་དང་། །གདུག་པའི་སྐད་སྒྲོག་ས་གཞི་ནགས་ཚལ་གཡོ། །ལྷ་སྲིན་འབྲོས་སོགས་མི་རུང་ལྟས་དང་བཅས། །ཅུང་ཞིག་ཙམ་ན་རྒྱ་མཚོའི་འགྲམ་དག་ནས། །འཆི་བདག་ནག་པོ་རལ་པའི་ཐོར་ཅོག་ཅན། །འཇིགས་རུང་གཟུགས་ཅན་རང་དང་འདྲ་བའི་འཁོར། །འབུམ་ཕྲག་མང་པོས་བསྐོར་ཏེ་ས་སྟེང་དུ། །འོངས་ཚེ་རིགས་འཛིན་པདྨ་ཐོད་འཕྲེང་རྩལ། །ཞེ་སྡང་གཤིན་རྗེ་གཤེད་པོའི་ཏིང་འཛིན་གྱི། །འཆི་བདག་ནག་པོའི་སྲོག་སྙིང་འཕྲོགས་མིན་ནམ། །སྲིད་པའི་རྩེ་ནས་དམྱལ་བ་ཡན་ཆད་དུ། །ང་ཡིས་དབང་གྱུར་ཐམས་ཅད་བརླག་ནུས་པས། །ཡལ་གམ་ཆེན་པོ་ང་ཡི་གནས་འདི་ན། །མ་འདུག་ཅེས་པའི་ཁེངས་ཚིག་(༧ན)
སྨྲས་པའི་ལན། །ཁྱོད་ནི་འཇིག་རྟེན་འཁྲུལ་པའི་བདག་པོ་སྟེ། །ང་ནི་འཁོར་འདས་ཀུན་ལ་དབང་སྒྱུར་བས། །གནམ་ལྕགས་འབར་བའི་བེ་ཅོན་འདི་བརྒྱབ་ན། ཁྱེད་ཀྱང་ཐལ་བའི་རྡུལ་དུ་བརླག་པར་འགྱུར། །འཇིགས་མེད་རྡོ་རྗེའི་ཚིག་དེ་ཐོས་པ་ན། །ཞུམ་བཞིན་སྐྲག་ནས་སློབ་དཔོན་ཞབས་ལ་གཏུགས། །རྫས་སྔགས་ཏིང་འཛིན་འཁྲུལ་འཁོར་ལ་བརྟེན་ནས། །འཆི་བདག་བཟློག་པའི་ཆོ་ག་མ་ལུས་ཕུལ། །ཉམས་སུ་བླངས་ན་འཆི་བདག་ལག་ཆུད་ཀྱང་། །ལོ་ལྔར་བཟློག་པ་ཁས་ལེན་མ་བྱས་བསམ། །དེ་ཚེ་རྒྱལ་དབང་པདྨ་ཀ་ར་ཡིས། །སྲིན་པོ་ཁྲག་མིག་བསྒྲལ་བའི་ཤ་ཁྲག་སོགས། །མཐུན་རྫས་སྔགས་དང་ཕྱག་རྒྱས་བྱིན་རླབས་ནས། །ལུས་ཅན་ཀུན་གྱི་དོན་དུ་བསྔོས་པའི་ཚེ། །བཅུ་གསུམ་ལོ་ཡི་བར་དུ་འགྲོ་བ་ལ། །གནོད་པ་སྤོང་བའི་དམ་བཅའ་བྱས་མིན་ནམ། །དེ་ལྟར་སློབ་དཔོན་ཆེན་པོ་ནས་བཟུང་སྟེ། །རིགས་འཛིན་རྩ་བརྒྱུད་བླ་མ་མཐའ་དག་གིས། །དཔལ་ལྡན་དུས་དགྲའི་ཏིང་འཛིན་ལ་བརྟེན་ནས། །གཤིན་རྗེ་དམ་བཏགས་འཆི་བདག་གཡུལ་ལས་རྒྱལ། །དེང་འདིར་རིག་སྔགས་འཆང་བ་བདག་ཅག་རྣམས། །སྒྲུབ་ལ་མཆོག་གི་དེད་དཔོན་མཚོ་སྐྱེས་རྗེ། །རིང་ལུགས་བརྒྱུད་པའི་བཀའ་སྲོལ་མ་ཉམས་པ། །ཐོས་བསམ་བསྒོམ་པའི་བྱིན་རླབས་མཚན་ཁ་ཅན། །འཛིན་མེད་སྤྲོས་བྲལ་ལྟ་བའི་ཀློང་ཡངས་སུ། །གསལ་སྟོང་ཏིང་འཛིན་འཕྲོ་འདུ་འགོག་པ་མེད། །མཐུན་པའི་རྫས་དང་ཟབ་མོའི་གསང་སྔགས་བཅས། །དུས་མིན་འཆི་བ་བཟློག་པའི་ཐབས་བསྒྲུབ་ན། །སྔོན་ནས་ཁས་བླངས་དམ་བཅས་དམ་ཚིག་དང་། །རྟེན་འབྲེལ་རྒྱུ་རྐྱེན་ཚོགས་པའི་ནུས་མཐུ་ཡིས། །སྦྱིན་བདག་ཆེ་གེ་མོ་ཞེས་བྱ་བ་རྣམས། ཁྲམ་ལ་བཏབ་པ་ཡོད་ན་ཁྲམ་ཁ་ཕྱིས། །ཤོ་ལ་བཏབ་ན་རྡེའུ་(༧བ)
དཀར་ནག་སྤོས། །བདུད་ཀྱི་ཞགས་པས་བཅིངས་ན་མདུད་པ་ཁྲོལ། །བྱད་དུ་བཅུག་ན་བྱད་ཐག་མྱུར་དུ་ཆོད། །འདི་ལ་དུས་མིན་འཆི་བའི་ལྟས་ཡིན་ན། །བཅུ་གསུམ་བར་དུ་མི་འཆི་བཤོལ་ཐོབ་ཅིག །གལ་སྲིད་དུས་ལ་བབ་ཅིང་ཚེ་ཟད་ཀྱང་། །ལོ་གསུམ་བར་དུ་མི་འཆི་བཤོལ་ཐོབ་ཅིག །བསྒོ་བའི་བཀའ་ལ་ཉན་པར་མི་བྱེད་ན། ཁས་བླགས་དམ་བཅའ་ཉམས་པའི་བཀའ་ཆད་དང་། །རྩ་བ་གསུམ་གྱི་བདེན་པའི་བྱིན་རླབས་དང་། །ཏིང་འཛིན་སྔགས་དང་ཕྱག་རྒྱའི་ནུས་པ་ཡིས། །གདུག་ཅན་ཁྱོད་ཀྱི་མགོ་བོ་ཚལ་བར་འགས། །དེ་བས་མི་ལ་གླུད་དགའ་གླུད་འདི་ཁྱེར། །ལན་ཆགས་བུ་ལོན་འདི་ཡིས་ཚིམ་གྱིས་ལ། འདི་རུ་མ་འདུག་རང་གི་ཡུལ་དུ་སོང་། །དེ་ནས། འཆི་བདག་གཤིན་རྗེ་ཁ་བསྒྱུར་ཏེ་བཏེག །དི་ཨ་ཡི། བསྐལ་པ་དུས་མཐའི་རླུང་ཤུགས་དང་། །ལྡན་པའི་རྔ་མོ་ཡིས་བཏེག་ནས། །འཆི་བདག་གླུད་དང་བུ་ལོན་བཅས། །ལྷོ་ཡི་ཕྱོགས་སུ་འགྲོ་བར་གྱུར། །ཧཱུཾ། འཆི་བདག་གཤིན་རྗེ་ནག་པོའི་ཚོགས། ཁྱོད་ནི་ལས་ཀྱི་རྫུ་འཕྲུལ་ཅན། །འགྲོ་བའི་སྲོག་བདག་ཆེན་པོ་ཁྱོད། །མ་རུངས་གཤིན་རྗེའི་འཁོར་གྱིས་བསྐོར། །བགེགས་ཀྱི་རྒྱལ་པོ་འཁོར་བཅས་ལ། །མཆོད་སྦྱིན་གཏོར་གླུད་བཟང་པོ་དང་། །བུ་ལོན་ལན་ཆགས་བཅལ་ཟིན་གྱིས། །གླུད་དང་གཏོར་མ་འདི་ལོང་ལ། །ང་ཡི་སེམས་བསྐྱེད་གནས་འདི་རུ། །གཤིན་རྗེའི་གནོད་པ་མ་བཏང་ཞིག །བདུད་ཀྱི་ཁྲམ་ལ་བཏབ་པ་ཕྱིས། །འཆི་བདག་ཞགས་པས་མ་འཆིང་ཞིག །སྔོན་ཆད་བཅིངས་ན་ད་ལྟ་ཁྲོས། །སྐྱེ་འགྲོ་གསོད་པའི་ལས་མ་བྱེད། །དུད་ཀྱི་ཁྲམ་ཀ་སླར་ལ་བརྟུལ། ཁམས་གསུམ་སེམས་ཅན་ཐམས་ཅད་ལ། །གནོད་ཅིང་འཚེ་བར་མ་བྱེད་པར། །ལན་ཆགས་སྟོང་ཁྲིན་བཅལ་ཟིན་གྱིས། །གླུད་དང་གཏོར་(༨ན)
མ་འདི་ལོང་ལ། །འདི་ནས་ལྷོ་ཡི་ཕྱོགས་སུ་བསྐྱོད། །དཔག་ཚད་བརྒྱད་ཁྲི་བཞི་སྟོང་གི །ཕ་རོལ་རྒྱ་མཚོ་ནག་པོའི་གཏིང་། །ཉི་མ་ཟླ་བ་མེད་པའི་གནས། །མུན་རུམ་འཁྱིལ་བའི་ནང་ཤེད་ན། །འཆི་བདག་གཤིན་རྗེའི་རང་ཡུལ་ཡོད། །སྐྱོད་ཅིག་གཤིན་རྗེ་དེ་རུ་སྐྱོད། །གཤེགས་ཤིག་འཆི་བདག་འཁོར་བཅས་གཤེགས། །བགེགས་ཀྱི་རྒྱལ་པོ་ད་སྐྱོད་ཅིག །ལན་གསུམ་བརྗོད་དེ། རོལ་མོའི་སྒྲ་ཆེན་པོ་དང་བཅས་བཏང་། དྲག་སྔགས་མང་དུ་བཟླ་ཞིང་། ཐུན་གྱིས་བྲག་བཟློག་སྔགས་ཅི་རིགས་བཟླ། དེ་ནས། ཨཱོཾ་ཡ་མ་མེ་དཀྵེ། ར་ཙ་ས་ཏོ། རུ་ན་ཡོ་ནི། ར་ཡ་ཙ་ནི། སརྦ་ཙ་ཏུ་ར་ནན། སྙིང་གཟེར་བྲེང་ཤག་ཡི་རྦད། ཚར་ཇི་ལྟར་རིགས་པ་བཟླས་རྗེས། དཔལ་ལྡན་གཤིན་རྗེ་གཤེད་ཀྱི་ལྷ་ཚོགས་ཀྱིས། །ནམ་མཁའི་ཁྱོན་ཀུན་མ་ལུས་རབ་བཀང་སྟེ། །འོད་ཟེར་མཚོན་ཆ་སྣ་ཚོགས་འཕྲོས་པ་ཡིས། །ཐོགས་མེད་མཐུ་སྟོབས་ནུས་པའི་རྫུ་འཕྲུལ་གྱིས། །འཆི་བདག་གཤིན་རྗེ་བདུད་དང་བགེགས་ཀྱི་ཚོགས། །ཆོམ་སྒྲ་དང་བཅས་རྒྱ་མཚོའི་ཀློང་བསྐྱལ་ཏེ། དཔག་ཚད་བརྒྱད་ཁྲི་བཞི་སྟོང་འོག་རོལ་ཏུ། །མུན་རུམ་མཐའ་མེད་གཤིན་རྗེའི་ཡུལ་སོང་ནས། །བསྐལ་པ་འདི་ཉིད་མ་འདས་བར་དག་ཏུ། །ཐོན་པའི་གོ་སྐབས་ཅུང་ཟད་མེད་པར་གྱུར། །ཞེས་བརྗོད་ཅིང་དམིགས་པ་དང་བཅས་ཆུ་བོ་ཆེན་པོ་ལ་དོར་བ་བྱའོ། །ཕྱིར་ལོག་ཅིང་སྲུང་སྔགས་བརྗོད། སྒོ་དྲུང་དུ་མཚམས་གཅོད་པ་ནི། དང་པོར་ཐིག་ལེ་ཉག་ཅིག་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །བཞི་པ་ཚད་མེད་བཞི་ཡི་རྒྱ། །ལྔ་པ་རྒྱལ་བ་རིགས་ལྔའི་རྒྱ། །དྲུག་པ་ཐུབ་པ་དྲུག་གི་རྒྱ། །བདུན་པ་སངས་རྒྱས་རབས་བདུན་རྒྱ། (༨བ)
།རྒྱ་བདུན་བཏབ་པ་ཚུན་ཆད་དུ། །སྣང་སྲིད་འཁོར་འདས་དགྲར་ལངས་ཀྱང་། །དགྲ་ཞེས་བྱ་བའི་མིང་ཡང་མེད། །བགེགས་ཞེས་བྱ་བའི་མིང་ཡང་མེད། །རྒྱ་བདུན་མཚམས་ལས་མ་འདའ་ཞིག །ཨཻ་རིང་གི་སྲུང་སྔགས་བརྗོད། མེ་ཆུས་རྒྱས་བཏབ་བོ། །དེ་ནས་དཀྱིལ་འཁོར་བསྡུས། གཤིན་རྗེའི་བཤུལ་ལམ་དུ། ཧཱུཾ། སྲ་མཁྲེགས་རྡོ་རྗེ་འབར་བའི་རྒྱ་གྲམ་གྱིས། །གོ་སྐབས་མེད་པའི་ས་གཞིར་རབ་གྱུར་ནས། །བསྐལ་པ་མ་སྟོངས་བར་དུ་གཤིན་རྗེའི་ཚོགས། །སྐད་ཅིག་ཙམ་ཡང་ཐར་བ་མེད་པར་གྱུར། །ཨེ་ནན་བིག་ནན་སྟཾ་བྷ་ཡ་ནན། །ཞེས་བརྗོད་ཅིང་བྲོ་བརྡུང་། བླ་མ་གཤིན་རྗེ་གཤེད་དུ་རབ་གསལ་བ། །སླར་ཡང་གནས་འགྱུར་རྡོ་རྗེ་དྲག་པོ་རྩལ། །རྟེན་དང་བརྟེན་བར་བཅས་པའི་རྣམ་རོལ་ཏུ། །ལྷུན་གྲུབ་སྣང་སྟོང་ངང་དུ་གསལ་བར་གྱུར། །ཚོགས་ལ་རོལ་བ་ནས་བཟུང་། བསྔོ་བ་སྨོན་ལམ་བཀྲ་ཤིས་ཀྱི་བར་དཀྱུས་བཞིན་བཏང་བར་བྱའོ། །འདིའི་ཆ་ལག་དང་ལག་ལེན་གྱི་རིམ་པ་རྣམས་ནི་གཏེར་གཞུང་དང་ཟུར་རྒྱན་སོགས་ལས་ཤེས་པར་བྱའོ། །སྨྲས་པ། དཔག་བསམ་ཡོངས་འདུའི་ལྗོན་པ་དང་། །ཡིད་བཞིན་དབང་གི་རྒྱལ་པོ་ལ། །གསོལ་བ་བཏབ་ན་འདོད་པའི་དོན། །འགྲུབ་པ་དངོས་པོའི་གཤིས་ལུགས་མཚར། །རྫས་སྔགས་ཏིང་འཛིན་འཁྲུལ་འཁོར་དག །ཚུལ་བཞིན་ཉམས་སུ་བླངས་པ་ཡིས། །ལྔ་པའི་ཕོ་ཉ་བཟློག་ནུས་པའི། །རྟེན་ཅིང་འབྲེལ་བར་འབྱུང་འདི་རྨད། །འོན་ཀྱང་འདི་འདྲའི་གནད་ཤེས་པ། །ཨུ་དུམ་ཝཱ་ར་དང་མཚུངས་ཏེ། །དྲེགས་ལྡན་ཆེར་རློམ་འུར་བརྒྱངས་ཅན། །ཀུན་གྱི་སྤྱོད་ཡུལ་ག་ལ་ཡིན། ཁོ་བོས་མངོན་པའི་ང་རྒྱལ་སྤངས། །བཤེས་གཉེན་དམ་པ་ཡུན་དུ་བསྟེན། །དཀའ་བའི་གནད་ལ་སྒྲོ་འདོགས་བཅད། །བསམས་ཀྱིན་ཨེ་མ་(༩ན)
བསྐལ་པ་བཟང་། །དགེ་འདིས་བདག་གཞན་འགྲོ་བ་ཀུན། །འཇིག་རྟེན་གསུམ་གྱི་མངའ་བདག་གིས། །དུས་ཀྱི་ཆད་པ་ལས་ཐར་ཏེ། །འཆི་མེད་རྡོ་རྗེའི་སྐུ་ཐོབ་ཤོག །ཅེས་ལྷ་བྲག་གཏེར་བྱོན་གྱི། འཆི་བདག་བཟློག་པའི་གྱེར་གཞུང་འཆི་བདག་གཡུལ་ལས་རྒྱལ་བའི་རུ་མཚོན་ཞེས་པ་འདི་ནི་སའི་ཚངས་པ་བསྟན་འཛིན་ཆོས་ཀྱི་རྒྱལ་པོའི་སྐུ་རིམ་བསྒྲུབ་པ་ལ་མངོན་དུ་ཕྱོགས་པའི་ཚེ། ཐེག་མཆོག་བསྟན་པའི་སྲོག་ཤིང་ཟུར་གྱི་གདུང་ལས་རྡོ་རྗེ་འཛིན་པ་ཆོས་དབྱིངས་རང་གྲོལ་གྱིས། འདི་ལ་ཆོག་སྒྲིགས་གསལ་བ་ཞིག་བྱུང་ན་ལེགས་པ་འདུག་ཅེས་གསུངས་པས་མཚམས་སྦྱར་ཏེ། གཏེར་གཞུང་དངོས་སུ་མི་གསལ་བའི་འདོན་ཆ་རྣམས། གླེང་གཞི་དང་ལག་ལེན་སོགས་ཁུངས་དང་འབྲེལ་བ་རྣམས་ནས་ཁ་བཀང་སྟེ། རང་བཞིན་རྫོགས་པ་ཆེན་པོའི་གནས་ལུགས་ལ་ཅུང་ཟད་གཞོལ་བའི་ཟ་ཧོར་གྱི་སྔགས་བན་བླ་མེད་རྡོ་རྗེ་རྩལ་དུ་འབོད་པས། ལྕགས་སྟག་དབོ་ཟླའི་དམར་ཕྱོགས་ཀྱི་དགའ་བ་དང་པོའི་ཚེས་ལ། དགའ་ལྡན་ཕོ་བྲང་དུ་སྦྱར་བའི་ཡི་གེ་པ་ནི་བློ་བཟང་ཚེ་རིང་ངོ་། །སརྦ་མངྒ་ལཾ།། །།