ལྷ་མཆོག་འབར་བ་རྩལ་གྱི་འཕྲིན་ལས་བརྒྱ་ཕྲག་ཉིད་ངོས་འཛིན་པའི་སྣང་གསལ།
ལྷ་མཆོག་འབར་བ་རྩལ་གྱི་འཕྲིན་ལས་བརྒྱ་ཕྲག་ཉིད་ངོས་འཛིན་པའི་སྣང་གསལ་བཞུགས་སོ། །
ན་མ་སྟྲཻ་ཀཱ་ལ་བུདྡྷ་པདྨཱ་ཀ་རཱ་ཡ། ཞི་དང་ཁྲོ་བོའི་དཀྱིལ་འཁོར་མ་ལུས་པའི། ཁྱབ་བདག་ཨོཾ་ཌྜི་ཡཱ་ནའི་རིག་སྔགས་འཆང་། །འཛམ་གླིང་ཆེ་བའི་བརྟུལ་ཞུགས་གྲུབ་པའི་དབང་། །རྒྱལ་མཆོག་པདྨ་ཐོད་འཕྲེང་བདག་བྱིན་རློབས། །མགོན་ཁྱོད་བཀའ་རྟགས་ཕྱག་རྒྱས་ཟུར་ཕུད་རྩེར། །རྗེས་གསལ་ལྕེ་ལ་ཨ་མྲྀ་ཏ་བླུད་པས། །དམ་ལྡན་ལྷ་ཆེན་རྡོ་རྗེ་འབར་བ་སྩལ། །བཀྲ་ཤིས་སྙིང་ཉེ་མཐུ་སྟོབས་རྫུ་འཕྲུལ་ཅན། །གང་དེ་མཆོད་གསོལ་བསྐང་དང་བསྙེན་ཅིང་སྒྲུབ། །ལས་སྦྱོར་རྩོམ་ལ་ཉེར་མཁོའི་གྱེར་སྒོམ་གཞུང་། །ལྷ་ཆེན་དགྱེས་ཞལ་འདབ་སྟོང་འཛུམ་བྱེད་པའི། །བརྒྱ་ཕྲག་ཉི་མའི་དངོས་འཛིན་སྣང་གསལ་སྤེལ། དེ་ལ་འདིར་དྲི་ཟའི་རྒྱལ་པོ་གཉན་ཆེན་ཐང་ལྷ་རྡོ་རྗེ་འབར་བ་རྩལ་གྱི་འཕྲིན་ལས་ཀྱི་རིམ་པ་ཉམས་སུ་བསྟར་བར་བྱེད་པ་ལ་སྒྲུབ་རྟེན་མཆོད་གཏོར་སྤྱན་གཟིགས་སོགས་མཁོ་བའི་རྫས་དང་ཡོ་བྱད་ཐམས་ཅད་མཐོང་བ་བརྒྱུད་པའི་ཕྱག་ལེན་ལྟར་ལེགས་པར་བཤམས། སྔོན་དུ་ཞི་ཁྲོ་གང་ཡང་རུང་བའི་འཕྲིན་ལས་ཀྱི་གཞུང་བསྲངས་པ་ལེགས་པས་ཐུགས་སྒྲུབ་དྲག་པོ་རྩལ་གྱི་ལས་བྱང་དོན་བསྟོད་ཡན་རྫོགས་པར་བཏང་། འདི་གའི་སྒོས་ཆོས་ཐོག་མར་འགྱུར་སྔགས་བརྗོད་ནས་གནས་ཡོ་བྱིན་གྱིས་བརླབ་པ་ནི། ཨཱོཾ་སཾ་རང་བྱུང་རང་ཤར་གྱི་སྔོན་འགྲོ་ལས་བྱུང་བ། བྷ་ར་(༢ན)
སཾ་བྷ་ར་བི་མ་ན། ས་ར་མ་ཧཱ་ཛ་ཝ་ཧཱུཾ་ཕཊ། ཨེ་ཡཾ་རཾ་སུཾ་ཀེཾ་རཾ་བྷྲཱུཾ་ཧཱུཾ། བྷྲཱུཾ་བི་ཤ་བི་ཤུདྡྷེ་བྷནྡྷ་ཛྙཱ་ན་ཨེ་ཙཀྲ་མཎྜལ་བྷྲཱུཾ། བྷྲཱུཾ་ལས་ས་ཕྱོགས་ཐམས་ཅད་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་ཆེན་པོ་གྲུ་བཞི་སྒོ་བཞི་པ་མཚན་ཉིད་ཐམས་ཅད་ཡོངས་སུ་རྫོགས་པར་གྱུར་པ་དེའི་ནང་དུ་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨཱོཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་རྫས་བསམ་གྱིས་མི་ཁྱབ་པ་ཡུལ་ས་དང་བར་སྣང་ཐམས་ཅད་ཡོངས་སུ་ཁྱབ་པ་དུས་འཁོར་བ་ཇི་སྲིད་མ་སྟོངས་ཀྱི་བར་དུ་གནས་པ། ཆོས་སྐུ་ཀུན་ཏུ་བཟང་པོའི་རྣམ་འཕྲུལ་ལས་བྱུང་བའི་འོག་མིན་ཡེ་ཤེས་རང་སྣང་གི་མཆོད་སྤྲིན་ལྟ་བུ་ཟད་མི་ཤེས་པས་ཁྱབ་པར་གྱུར། ཨཱོཾ་སརྦ་ཏ་ཐཱ་ག་ཏ་མཧཱ་ཤྲཱི་ཧེ་རུ་ཀ །མཧཱ་ཀྲོ་དྷ་རཱ་ཛ་ས་པ་རི་ཝཱ་ར་བཛྲ་ས་མ་ཡ་ཛཿཛཿ ཨརྒྷཾ། པུཥྤེ། དྷཱུ་པེ། ཨཱ་ལོ་ཀེ། གྷནྡྷེ། ནཻ་ཝི་ཏྱེ། ཤཔྟ་ཨཱཿཧཱུཾ། ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ་བཛྲ་སཱ་ར་པྲ་མ་རྡ་ནེ། ཏ་ཐཱ་ག་ཏཱ་ཡ་ཨརྷ་ཏེ། སམྱཀྶཾ་བུདྷཱ་ཡ། ཏ་དྱ་ཐཱ། ཨཱོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སི་ཀྲ་མ་ཎ་བཛྲེ། སརྦ་ཀརྨ། ཨཱ་བ་ར་ཎ་བི་ཤོ་དྷ་ན་བཛྲེ་སྭཱཧཱ། །སྐྱབས་འགྲོ་སེམས་བསྐྱེད་ནི། རང་བྱུང་ཐུགས་སྒྲུབ་ཀྱི་སྐྱབས་སེམས། ལྷུན་གྱིས་(༢བ)
གྲུབ་པའི་སྐུ། །འོད་གསལ་ཆེན་པོའི་དགོངས་པ་ཅན། །ཐུགས་རྗེའི་དབང་གིས་འགྲོ་དོན་མཛད། །བླ་མ་རྣམས་ལ་སྐྱབས་སུ་མཆི། །རང་ལས་ཡེ་ཤེས་ཤར་བའི་སྐུ། །མི་འབྲལ་རྩེ་གཅིག་དགོངས་པ་ཅན། །བྱིན་གྱིས་བརློབ་ཅིང་བར་ཆད་སེལ། །ཡི་དམ་ལྷ་ལ༝། །དམ་ཚིག་རྣམ་པར་དག་པའི་སྐུ། །བརྩེ་གདུང་བྱམས་པའི་དགོངས་པ་ཅན། །ལེགས་ཉེས་བསྟང་འཛིན་དངོས་གྲུབ་སྟེར། །མཁའ་འགྲོའི་ཚོགས་ལ༝། །སྔོན་ནས་བསགས་པའི་སྡིག་སྒྲིབ་བཤགས། །འགྲོ་དོན་སངས་རྒྱས་ཐོབ་བྱའི་ཕྱིར། །སྨོན་པའི་བྱང་ཆུབ་སེམས་བསྐྱེད་དེ། །སེམས་ཅན་ཡོངས་སུ་སྨིན་བྱའི་ཕྱིར། །གསང་སྔགས་སྤྱོད་པ་རླབས་ཆེན་སྤྱད། །དོན་དམ་སྤྲོས་བྲལ་བྱང་ཆུབ་སེམས། །རང་བྱུང་མཐའ་བྲལ་སྟོང་གསལ་བསྒོམ། །ཞེས་ལན་གསུམ་བརྗོད། སེམས་ཅན་ཐམས་ཅད་བདེ་བ་དང་ཞེས་སོགས་ཚད་མེད་བཞི་བསྒོམ། ཚོགས་ཞིང་ནི། རང་ཉིད་སྐད་ཅིག་གིས་རྟ་མགྲིན་དྲེགས་པ་ཟིལ་གནོན་དུ་གསལ་བའི་ཐུགས་ཀའི་ཧྲཱི་ལས་འོད་ཟེར་འཕྲོས་པས་རང་བཞིན་གྱི་གནས་ནས་བླ་མ་འོད་དཔག་མེད་རིགས་ཀྱི་བདག་པོར་བཞུགས་པའི་བཅོམ་ལྡན་འདས་པདྨ་དབང་ཆེན་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿཛཿས་སྤྱན་དྲངས། ཧཱུཾ། བླ་མ་རང་བྱུང་རང་ཤར་གྱི་སྔོན་འགྲོ་ལས་བྱུང་བ། ཡི་དམ་མཁའ་འགྲོ་གཤེགས་སུ་གསོལ། །སྤྱི་གཙུག་ཉི་ཟླ་པདྨའི་གདན་ལ་བཞུགས། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཕྱི་ནང་གསང་གསུམ་མ་ལུས་མཆོད་པ་འབུལ། །སྡིག་པ་མི་དགེ་ཐམས་ཅད་སོ་སོར་བཤགས། །དུས་གསུམ་དགེ་བའི་ཚོགས་ལ་རྗེས་ཡི་རང་། །ཆོས་འཁོར་རྒྱུན་ཆད་མེད་པ་བསྐོར་དུ་གསོལ། །མྱ་ངན་མི་འདའ་འགྲོ་བའི་དོན་ལ་བཞུགས། །དེ་སོགས་དགེ་བ་བྱང་ཆུབ་ཐོབ་ཕྱིར་བསྔོ། །སྐུ་(༣ན)
གསུམ་འཕྲིན་ལས་བདག་གིས་བྱེད་པར་ཤོག །ཅེས་བརྗོད། གོང་གནོན་གྱི་ཏིང་ངེ་འཛིན་གསལ་གདབ་པ་ནི། བདག་གཏེར་གཞུང་། ཉིད་ཐ་མལ་སྙིང་ག་ན། །ཡི་གེ་ཧྲཱིཿདམར་གནས་པ་ལ། །བདག་ཉིད་ཧྲཱིཿཡི་ལུས་སུ་གྱུར། །ཧྲཱིཿདེ་འོད་དུ་ཞུ་བ་ལས། །བདག་ཉིད་དབང་ཆེན་རྒྱལ་པོ་ནི། །དབུ་ནི་ཚངས་པའི་ཡུལ་རྩེར་སླེབས། །ཞབས་ནི་རྒྱ་མཚོའི་གཏིང་དུ་བརྐྱང་། །གཡས་ཀྱི་ཕྱག་གིས་གཏེར་གཞུང་། གཟུགས་ཁམས་འདེགས། །གཡོན་གྱི་ཕྱག་གིས་འདོད་ཁམས་གནོན། །ཉི་ཟླ་གཟའ་སྐར་རྐེད་ལ་འཁོར། །སྐུ་མདོག་བསྐལ་པའི་མེ་ལྟར་འབར། །སྐུ་སྟེགས་རི་རབ་སྟེང་ན་འཆའ། །དབུ་གཙུག་རྟ་མགོ་རྟ་སྐད་འཚེར། །གཡས་ཀྱི་རྟ་སྐད་ཐེངས་གསུམ་གྱིས། །སྲིད་པ་ཕོ་རྒྱུད་དབང་དུ་སྡུད། །གཡོན་གྱི་རྟ་སྐད་ཐེངས་གསུམ་གྱིས། །སྲིད་པ་མོ་རྒྱུད་དབང་དུ་སྡུད། །སྟེང་དུ་རྟ་སྐད་ཐེངས་གསུམ་གྱིས། །སྲིད་པའི་གཟའ་རྣམས་དབང་དུ་སྡུད། །འོག་ཏུ་རྟ་སྐད་ཐེངས་གསུམ་གྱིས། །སྲིད་པའི་ཀླུ་རྣམས་དབང་དུ་སྡུད། །ཧྲཱིཿཧཱུཾ་ཕཊ་གསུམ་བསྒྲགས་པ་ཡིས། །འབྲུག་སྟོང་དུས་གཅིག་ལྡིར་བ་ཙམ། །ཁམས་གསུམ་དབང་དུ་སྡུད་བྱེད་ཅིང་། །སྲིད་གསུམ་ཟིལ་གྱིས་གནོན་པར་བསྒོམ། །ཞེས་བསྐྱེད་རིམ་གསལ་གདབ་བོ། །ཧྲཱིཿམཧཱ་ཀྲོ་དྷ་པདྨཱནྟ་ཀྲི་ཏ་ཧ་ཡཾ་སྟཱི་ཝ་ཧཱུཾ་ཧཱུཾ་ཕཊ། ཡ་མ་ར་ཙ་དུ་ཏྲི་ཕུ་ཏི་ཧྲཱིཿཧཱུཾ་ཕཊ། ཅེས་སྐབས་སྦྱར་བཟླ། བསྟོད་པ་ནི། ཧྲཱིཿཧཱུཾ་ཕཊ། ཧྲཱིཿ དབང་གཏེར་གཞུང་ཆེན་ལས་ལ་རྔམ་མཛད་ཁྲོ་བོ་ཆེ། །སྐུ་མདོག་དམར་ནག་ཐམས་ཅད་དབང་དུ་སྡུད། །དབུ་ནི་ནམ་མཁའི་དབྱིངས་སུ་རྟ་སྐད་འཚེར། །ཞབས་ནི་རྒྱ་མཚོའི་གཏིང་དུ་ཀླུ་རྣམས་གནོན། །གཡས་ཀྱི་ཕྱག་གིས་སྣང་སྲིད་གཟུགས་ཁམས་འདེགས། །གཡོན་གྱི་ཕྱག་གིས་(༣བ)
འདོད་ཁམས་ས་གཞི་གནོན། །ཉི་ཟླ་གཟའ་སྐར་རྐེད་བཅིངས་གཟའ་རྣམས་འདུལ། །དུར་ཁྲོད་ཆས་བརྒྱད་ལྷ་སྲིན་སྡེ་བརྒྱད་འཇིགས། །རྟ་སྐད་འཚེར་བས་ཁམས་གསུམ་དབང་དུ་སྡུད། །ཧྲཱིཿཡི་སྒྲ་ཆེན་སྲིད་གསུམ་འགུལ་ཞིང་དངངས། །ཕཊ་ཀྱིས་ཐོག་འབེབས་བདུད་དཔུང་སྤྱི་ནས་འཇོམས། །ཧཱུཾ་གི་ང་རོས་གདུག་པ་བྲན་དུ་བཀོལ། །ཕྱག་མཚན་མཚོན་ཆས་རི་རབ་རྡུལ་དུ་འཇིག །བསྐལ་པའི་མེ་འབར་འཇིག་རྟེན་མ་ལུས་བསྲེག །འཇིག་རྟེན་དྲེགས་པས་ཁེངས་པའི་སྡེ་བརྒྱད་ནི། །དྲག་པོ་གཟའ་དང་གདུག་པ་ཀླུ་ལ་སོགས། །འཆི་བདག་གཤིན་རྗེ་ནད་གཏོང་མ་མོ་དང་། །ཆེ་བཙན་རྒྱལ་པོ་རོལ་པ་བཙན་གྱི་ཚོགས། །ནག་པོ་བདུད་དང་ཐེའུ་བྲང་བགེགས་ཀྱི་ཚོགས། །སྣང་སྲིད་ལྷ་སྲིན་སྡེ་བརྒྱད་སྟོབས་པོ་ཆེ། །རང་དབང་མེད་པར་དབང་སྡུད་ཟིལ་གྱིས་གནོན། །མཐུ་དང་རྫུ་འཕྲུལ་སྟོབས་དང་གཟི་བརྗིད་འཕྲོག །རང་བྱུང་ཐུགས་རྗེའི་དཔལ་ལ་ཕྱག་འཚལ་ལོ། །མདུན་བསྐྱེད་ཀྱི་སྨན་གཏོར་བྱིན་གྱིས་བརླབ་པ་ནི། ཆང་ལ་ཆོས་སྨན་བཏབ་ན་བརླབ་མི་དགོས་ཤིང་དེ་མིན་བཀའ་བརྒྱད་ལྟར་བྱིན་གྱིས་བརླབ། ཧྲཱིཿམ་གསར་བྲིས། ཧཱ་ཀྲོ་དྷ་པདྨཱནྟ་ཀྲི་ཏ་ཧ་ཡཾ་གྷྲཱི་ཝ་ཧཱུཾ་ཧཱུཾ་ཕཊ་ཀྱིས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨཱོཾ་འོད་དུ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་རེག་བྱ་ཕུན་སུམ་ཚོགས་པའི་སྟེང་དུ་ཨཱོཾ་ཨཱཿཧཱུཾ་གིས་མཚན་པ་ལས་འོད་ཟེར་འཕྲོས་པས་འཁོར་འདས་ཀྱི་རོ་བཅུད་ཐམས་ཅད་འདུས་ཏེ་གཏོར་མ་ལ་ཐིམ། ཡི་གེ་གསུམ་ཡང་འོད་དུ་ཞུ་ནས་དབྱེར་མེད་གཅིག་ཏུ་འདྲེས་པས་ཡེ་ཤེས་ཀྱི་བདུད་རྩི་རྒྱ་མཚོ་ཆེན་པོ་ཟད་མི་ཤེས་པའི་རང་བཞིན་དུ་གྱུར། ཨཱོཾ་ཨཱཿཧཱུཾ་མ་ཧཱ་བྷ་ལིནྟ་ཏི་ཛྭ་བྷ་ལིནྟ་བྷ་ལ་བྷ་ཏེ་གུ་ཧྱ་ས་མ་ཡེ་སྭཱཧཱ། ཞེས་ལན་གསུམ་མམ་བདུན་གསར་བྲིས། བརྗོད། རྟེན་བསྐྱེད་པ་(༤ན)
ནི། ཧྲཱིཿམཧཱ་ཀྲོ་དྷས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་རང་གི་མདུན་དུ་བྷྲཱུཾ་ལས་རིན་པོ་ཆེའི་གཞལ་ཡས་ཁང་ཤར་ཤེལ། ལྷོ་བཻ་ཌཱུཪྻ། ནུབ་པདྨ་རཱ་ག །བྱང་གསེར་ལས་གྲུབ་པ་གྲུ་བཞི་སྒོ་བཞི་པ་ལོགས་སུ་དྲ་བ་དང་དྲ་བ་ཕྱེད་བ་འཕྱང་ཞིང་མདའ་ཡབ་པུ་ཤུས་བསྐོར་བའི་སྟེང་དུ་རྒྱ་ཕུབས་རིན་པོ་ཆེའི་ཏོག་གིས་སྤྲས་པ། དེའི་ཕྱི་རོལ་ཏུ་ཁོར་ས་རིམ་པ་གཉིས་དང་ལྡན་པའི་དབུས་སུ་མན་ཤེལ་གྱི་ཁང་བཟང་ཛམྦུའི་གསེར་གྱི་རྒྱ་ཕུབས་འོད་དུ་འཚེེར་བའི་རྩེར་ཡིད་བཞིན་གྱི་ནོར་བུའི་ཏོག་གིས་མཚན་པ་རིན་པོ་ཆེ་སྣ་ཚོགས་ཀྱི་སྒོ་ལྕོག་འོད་འབར་བ། རྩ་བར་བདུད་རྩིའི་རྒྱ་མཚོ་འཕྱུར་བ། རྐེད་པར་འཇའ་འོད་ན་བུན་གྱི་གུར་ཕུབ་པ། རྩེ་མོར་སྤྲིན་དཀར་རིན་པོ་ཆེའི་ཟིལ་ཆར་འབེབས་པ། ས་གཞི་ལྗང་སྔོན་ལ་མེ་ཏོག་སྣ་ཚོགས་རྒྱས་པ། ཁོར་ཡུག་ཏུ་གནམ་ལྷ་བརྒྱད་ཀྱི་གངས་རི་ཤེལ་གྱི་མཆོད་རྟེན་ལྟ་བུས་བསྐོར་བ། དེའི་དབུས་སུ་ཉི་ཟླ་པདྨའི་གདན་ལ་སྟོབས་ལྡན་རྟ་མཆོག་ངང་དཀར་རིན་པོ་ཆེའི་སྒ་སྲབ་གོང་རྨེད་སྤུ་ལེན་ཟེ་ལོང་གི་ཁེབས་སོགས་རྒྱན་དུ་མས་མཛེས་པར་སྤྲས་པའི་སྟེང་ན་ཨཱོཾ་བཛྲ་ཐང་ཀ་ར་མུན་ཉིང་ཁུ་ཤ་ལི་སྭཱཧཱ་ལས་འོད་ཟེར་འཕྲོས། དགྲ་བགེགས་གདུག་པ་ཅན་ཐམས་ཅད་ཚར་བཅད་ཚུར་འདུས་ཡོངས་སུ་གྱུར་པ་ལས་ངོ་བོ་བྱང་ཆུབ་སེམས་དཔའ་ནམ་མཁའི་སྙིང་པོའི་རྣམ་པར་སྤྲུལ་པ་རྣམ་པ་ཚངས་རིས་ཀྱི་ལྷའི་གཙོ་བོ་མཚན་དྲུག་རྡོ་རྗེ་འབར་བ་རྩལ་ལ། དམ་ཅན་ཤེལ་གིང་དཀར་པོ། ལྷ་གནམ་ཐེ་དཀར་པོ། གནམ་ལྷ་བྱང་ཆུབ་སེམས་དཔའ། ཚངས་པའི་རྒྱལ་པོ་དུང་གི་ཐོར་ཚུགས་ཅན། དྲི་ཟ་ཟུར་ཕུད་ལྔ་པ། ཁྱབ་འཇུག་གནམ་མཚོའི་རྒྱལ་མོ་ཞེས་བྱ་བ་སྲུང་མ་ཆེན་མོ། ལྷ་ཆེན་རྡོ་རྗེ་འབར་བ་རྩལ་སྐུ་མདོག་ཤེལ་གྱི་རི་བོ་ལ་སྟོན་མཚན་ཟླ་བས་བྱུགས་པ་ལྟར་དཀར་ལ་བརྗིད་པ། ཞལ་འཛུམ་ཤིང་མཆེ་བའི་(༤བ)
མྱུ་གུ་ཅུང་ཟད་བཙིགས་པ། སྤྱན་གསུམ་རབ་ཏུ་བཀྲ་བ། དབུ་སྐྲ་གནག་སྣུམ་གྱི་ཐོར་ཚུགས་དར་དཀར་པོས་བཅིངས་པའི་རྩེ་མོར་ནོར་བུ་འབར་བས་སྤྲས་པ། ཕྱག་གཡས་རྡོ་རྗེ་རྩེ་ལྔས་མཚན་པའི་སྦ་ལྕག་ནམ་མཁའ་ལ་འཕྱར་ཞིང་གཡོན་པ་ཤེལ་དཀར་གྱི་འཕྲེང་བ་ཐུགས་ཀའི་ཐད་དུ་འདྲེན་པ། ཟབ་ཆེན་དཀར་དམར་མཐིང་གསུམ་གྱི་ཙེ་བེར་དང་ཡུག་གྱོན་གསོལ་བ། བེར་ནང་མ་གཉིས་ལ་རིན་པོ་ཆེ་སྣ་ཚོགས་ཀྱིས་སྤུད་པའི་གསེར་སྐེད་བཅིངས་ཤིང་། རིན་པོ་ཆེའི་གསེར་པད་ལ་གཡུའི་ཕྲ་ཚོམ་གྱིས་མཛེས་པའི་དབུ་རྒྱན། སྙན་རྒྱན། མགུལ་རྒྱན། གསེར་ག །སེ་མོ་དོ། དོ་ཤལ། གདུ་བུ་སོགས་རྒྱན་སྣ་ཚོགས་ཀྱིས་བརྒྱན་པ། སྙན་གོང་ཨུཏྤ་ལའི་ཆུན་པོ་དང་དར་དཔྱངས་ཅན། སྐུ་གཞོན་ཞིང་མཛེས་པ། ཞབས་གཉིས་ནོར་བུའི་མཆིལ་ལྷམ་གྱོན་ནས་རྒྱལ་པོ་རོལ་པའི་འདུག་སྟངས་ཀྱིས་བཞུགས་པ་གཡོན་དུ་བདེ་བ་སྐྱོང་བའི་དབང་མོ་ཡིད་འོངས་མདངས་ལྡན་གྱི་ཡུམ་གནམ་མཚོའི་རྒྱལ་མོ་རྡོ་རྗེ་གཡུ་སྒྲོན་མ་སྐུ་མདོག་སྔོ་སངས་ཞལ་གཅིག་ཕྱག་གཉིས་མ་སྤྱན་གསུམ་དང་ལྡན་པ། གཡས་རྒྱལ་མཚན་དང་གཡོན་མེ་ལོང་འཛིན་ཅིང་། དབུ་སྐྲ་ཐོར་ཚུགས་ལྷག་མའི་ཟར་བུ་ཐུར་དུ་འཕྱང་བ། སྨན་བཙུན་མཛེས་མ་ཡིད་དུ་འོང་བའི་ཆ་བྱད་ཀྱིས་གཙོ་བོ་ལ་བདུད་པའི་རྣམ་པ་ཅན་གཡུ་འབྲུག་བཅིབས་བ། གཙོ་བོའི་སྟེང་གི་ནམ་མཁར་མ་རུངས་ལོག་འདྲེན་ཀླུ་གཉན་ས་བདག་འདུལ་བའི་གཉེན་པོར་ངོ་བོ་ཡེ་ཤེས་ལྷའི་སྤྲུལ་པ་རྣམ་པ་ཁྱུང་ནག་དབུ་དགུ་པ་ཞལ་གདངས་ཤིང་ཀྲིཾ་ཀྲིཾ་གི་སྒྲ་སྒྲོག་པ། ཕྱག་གཉིས་ཀྱིས་ས་བདག་ཀླུ་གཉན་སྦྲུལ་གྱི་རྣམ་པ་ཅན་བཟུང་ནས་ཞལ་དུ་གསོལ་བ། གནམ་ལྕགས་མེའི་མཆུ་སྡེར་དང་སྤུ་གྲི་འབར་བའི་གཤོག་པ་ཅན། དམིགས་པའི་ས་གཉན་བཀབ་ཅིང་ནམ་མཁར་ལྡིང་བ། གཙོ་བོའི་མཐའ་སྐོར་དུ་མཆེད་འཁོར་སུམ་བརྒྱ་དྲུག་ཅུ། གཡས་(༥ན)
ཀྱི་རུ་འདྲེན་སྐྱེས་བུ་གཡུའི་སྨིན་མ་ཅན། གཡོན་གྱི་རུ་འདྲེན་ཁྱེའུ་ཆུང་གཡུའི་ཟུར་ཕུད་ཅན། མདུན་གྱི་རུ་འདྲེན་མི་དཀར་གཡུའི་ཐོར་ཅོག་ཅན། རྒྱབ་ཀྱི་རུ་འདྲེན་མི་སྔོན་འཇིགས་པ་སྟེ་སོ་སོ་བརྒྱ་ཕྲག་དང་བཅས་པས་བསྐོར་བ། ཤར་དུ་བཻ་ཌཱུཪྻ་དཀར་པོ་ལས་གྲུབ་པའི་ལྷའི་གཞལ་མེད་ཁང་རྒྱ་ཕུབས་ཅན་རིན་པོ་ཆེའི་ར་བ་གྲུ་བཞི་པས་བསྐོར་བའི་ནང་དུ་ནད་བརྒྱ་འཇོམས་པའི་སྨན་གྱི་མེ་ཏོག་ལོ་འབྲས་མྱུ་གུ་གྲངས་མེད་པས་ཡོངས་སུ་གཏམས་པའི་དབུས་སུ་པད་ཟླའི་སྟེང་ན་ཞི་མཛད་རྡོ་རྗེ་འབར་བ་རྩལ་སྐུ་མདོག་དཀར་པོ་གཡས་སྨན་གྱི་ལྗོན་ཤིང་ཐུགས་ཀ་དང་གཡོན་བདུད་རྩིས་གཏམས་པའི་བུམ་པ་བརླ་སྟེང་ན་འཛིན་ཅིང་། ཞབས་གཉིས་སེམས་དཔའི་སྐྱིལ་ཀྲུང་གིས་བཞུགས་པར་སྨན་ལྷ་དྲང་སྲོང་གི་ཚོགས་ཀྱིས་བསྐོར་བ། ལྷོར་ཛམྦུ་ཆུ་བོའི་གསེར་སྦྱངས་ལ་རིན་པོ་ཆེ་སྣ་ཚོགས་ཀྱིས་སྤྲས་པའི་ཁང་བཟང་རྒྱ་ཕུབས་ཅན། རིན་པོ་ཆེའི་ར་བ་གྲུ་བཞི་བས་ཁོར་ཡུག་ཏུ་བསྐོར་བའི་ནང་དུ་རྒྱལ་སྲིད་བདུན། བཀྲ་ཤིས་རྟགས་བརྒྱད། རིན་པོ་ཆེའི་རི། ཡོངས་འདུ་ས་བརྟོལ། འདོད་འཇོའི་བ། མ་རྨོས་པའི་ལོ་ཏོག་སོགས་ལྷ་མིའི་དཔལ་འབྱོར་ཕུན་སུམ་ཚོགས་པས་ཡོངས་སུ་གང་བའི་དབུས་ན་པད་ཟླ་དང་ནེའུ་ལེ་དམར་སེར་གྱི་གདན་ལ་རྒྱས་བྱེད་ཀྱི་རྡོ་རྗེ་འབར་བ་རྩལ་སེར་པོ་ཞལ་གཅིག་ཕྱག་གཉིས་པ། གཡས་ནོར་བུ་འབར་བ་ཐུགས་ཀ་དང་གཡོན་རིན་པོ་ཆེའི་སྒྲོམ་བུ་པུས་སྟེང་ན་འཛིན་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པར་གནོད་སྦྱིན་ནོར་ལྷའི་ཚོགས་ཀྱིས་བསྐོར་བ། ནུབ་ཏུ་པདྨ་རཱ་གའི་ཁང་བཟང་རྒྱ་ཕུབས་ཅན་ཁོར་ཡུག་དང་བཅས་པའི་ར་བར་འཆི་མེད་བདུད་རྩིས་གཏམས་པའི་བུམ་བཟང་། མཚོ། རྫིང་། ལྟེང་ཀ །ལུ་མ། ཆུ་མིག་དང་བཅུད་(༥བ)
ལེན་སྙིང་པོར་གྱུར་པའི་རྫས་སྨན་གྱིས་ཡོངས་སུ་ཁྱབ་པའི་དབུས་ན་པད་ཟླའི་གདན་ལ་དབང་གི་ལྷ་རྡོ་རྗེ་འབར་བ་རྩལ་སྐུ་མདོག་དམར་པོ་ཞལ་གཅིག་ཕྱག་གཉིས་མཉམ་གཞག་གི་སྟེང་ན་པདྨ་རཱ་གའི་ཚེ་བུམ་འཛིན་པ། རིན་པོ་ཆེའི་རྒྱན་རྡོ་རྗེའི་དབྱིབས་ཅན། ཞབས་རྡོ་རྗེའི་སྐྱིལ་ཀྲུང་གིས་བཞུགས་པར་ཚེའི་ལྷ་དང་རིགས་འཛིན་དྲང་སྲོང་གི་ཚོགས་ཀྱིས་བསྐོར་བ། བྱང་དུ་དྲག་པ་གནམ་ལྕགས་འབར་བའི་མཁར་སྟེང་དུ་རྒྱ་ཕུབས་དང་ཁོར་ཡུག་ར་བས་བསྐོར་བའི་ནང་མཚོན་ཆ་སྣ་ཚོགས་ཀྱི་དྲ་བས་སྦྲེལ་བའི་དབུས་སུ་པདྨ་ཉི་མ་དགྲ་བགེགས་ཕོ་མོ་བསྣོལ་བའི་གདན་ལ་ཀརྨ་ལས་ཀྱི་ཁྲོ་བོ་རྡོ་རྗེ་འབར་བ་རྩལ་སྐུ་མདོག་ནག་ལ་ཁྲོས་པ། མིག་རྩ་དམར་ཞིང་མཆེ་བ་གཙིགས་པ། རལ་པ་དམར་སེར་གྱེན་དུ་བརྫེས་ཤིང་རིན་པོ་ཆེའི་རྒྱན་རྣམས་དང་དུག་སྦྲུལ་གྱིས་བརྒྱན་པ། ཙེ་བེར་དམར་ནག་བརྩེགས་པའི་ནང་མ་གསེར་སྐེད་ཅན་གཡས་མདུང་དམར་དང་གཡོན་ལྕགས་ཀྱི་མདའ་གཞུ་འཛིན་པ་རིན་པོ་ཆེའི་ཧོར་ལྷམ་གྱོན་ནས་རྟ་མཆོག་བྲ་ནག་རླུང་ཤུགས་ཅན་ལ་བཅིབས་ཤིང་མེ་རླུང་འཁྲུག་པའི་ཀློང་ན་བཞུགས་པར་མངའ་བདག་དྲེགས་པའི་སྡེ་དཔོན་རྣམས་ཀྱིས་བསྐོར་བ། ཤར་ལྷོར་རྩེ་མོར་གངས་དང་། རྐེད་པར་ནེའུ་གསིང་། མེ་ཏོག་ནགས་ཚལ་གྱིས་བརྒྱན་པའི་དབུས་སུ་ཤེལ་དཀར་གྱི་ཁང་བཟང་ཡིད་དུ་འོང་བར་པད་ཟླའི་གདན་ལ་ལྷ་ཆེན་གཞོན་ནུ་སྐྱེས་བུ་བཞིན་བཟང་ཁ་དོག་དཀར་ལ་དབུ་སྐྲ་གཡུའི་ཟུར་ཕུད་ཅན། དུང་སོ་ཁོར་མ་ཡོད་པ། གཡས་སྐྱབས་སྦྱིན་དང་གཡོན་ཁུ་ཚུར་དཀུར་བརྟེན་པ། དར་དཀར་གྱི་ལའུ་གསོལ་ཞིང་ཞབས་གཉིས་མཉམ་པའི་སྟབས་ཀྱིས་བཞེངས་པར་རང་འདྲའི་ལྷ་ཕྲུག་དུ་མས་བསྐོར་བ། ལྷོ་ནུབ་ཏུ་མཚོན་ཆ་སྣ་ཚོགས་རྩེ་མོ་ཕྱིར་བསྟན་ཅིང་མེ་རླུང་འཚུབ་མར་(༦ན)
འཁྱིལ་བ་ལས་འཕྲོས་པའི་འོད་ཟེར་གྱིས་གནོད་བྱེད་དམིགས་བྱ་རྣམས་ར་བའི་ནང་དུ་བཀུག་པའི་སྟེང་ན་སྐྱེ་འགྲོའི་སྲོག་གཤེད་སྨྱོ་འདྲེ་སྲིན་པོ་འདུལ་བའི་གཉེན་པོར་ལྷ་ཆེན་གྱི་ངོ་བོ་རྣམ་པ་འབྲོང་གཡག་ཞལ་ཅན་དཀར་པོ་འགྱིང་བག་དང་ལྡན་པ། རྭ་གཉིས་ཐང་ཤིང་བརྒྱངས་པ་ཙམ་ལ་ཤིན་ཏུ་རྣོ་བ། ཁ་རླངས་ན་བུན་ལྟར་འཐིབས་ཤིང་ངུར་སྒྲ་འབྲུག་ལྟར་སྒྲོག་པ། གནམ་ལྕགས་རྨིག་པ་མེ་ལྟར་འབར་བས་རྒྱལ་འགོང་དམ་སྲི་འདམ་ལྟར་བརྫིས་ཤིང་རང་འདྲའི་སྤྲུལ་པ་དཔག་ཏུ་མེད་པ་འགྱེད་པ། ནུབ་བྱང་དུ་བྱུ་རུའི་བ་གམ་ལྕགས་རིས་བསྐོར་བའི་ར་བར་ཨུཏྤལ་དམར་པོས་མཆན་པའི་མེ་ཏོག་དང་ལྗོན་ཤིང་སྣ་ཚོགས་པའི་ཚལ་གྱིས་ཁོར་ཡུག་ཏུ་དཀྲིགས་པའི་དབུས་སུ་པད་ཉིའི་གདན་ལ་རླུང་སེམས་ལས་རུང་གི་ལྷ་དཔའ་བོ་རྡོ་རྗེ་འབར་བ་རྩལ་སྐུ་མདོག་དམར་ལ་འཚེར་བ་པདྨ་དམར་པོའི་ཕྲེང་རྒྱན་ཅན། གཡས་ལྕགས་ཀྱུས་བསྒྲུབ་བྱའི་སྙིང་ནས་འགུགས་ཤིང་གཡོན་ཞགས་པས་མགུལ་ནས་འཆིང་བ། ཞབས་ཕྱེད་སྐྱིལ་གྱིས་བཞུགས་པར་འགུགས་བྱེད་དབང་གི་ཕོ་ཉའི་ཚོགས་ཀྱིས་བསྐོར་བ། བྱང་ཤར་དུ་ཡིད་འོང་འཇའ་གུར་འཁྲིགས་པའི་ནང་དུ་རིན་པོ་ཆེ་ལས་གྲུབ་པའི་འཆི་མེད་ལྷའི་ཁང་བཟང་བཀོད་པ་ཕུན་སུམ་ཚོགས་པའི་ཁོར་ཡུག་ཏུ་ལྷའི་སྐྱེད་ཚལ་གྱིས་ཡོངས་སུ་བསྐོར་བའི་ལྟེ་བར་རིན་པོ་ཆེའི་ཁྲི་པདྨ་ཉི་ཟླ་དགྲ་བགེགས་ཕོ་མོའི་གདན་ལ་ལྷ་མཆོག་སྲིད་གསུམ་གྱི་བདག་པོ་སྐུ་མདོག་དམར་སེར་མཆེ་བ་གཙིགས་པ་ཨག་ཚོམ་དང་སྨིན་མ་གློག་ལྟར་འཁྱུག་པ། དབུ་སྐྲ་ལི་ཁྲིའི་མདོག་ཅན་ཐོར་ཚུགས་ཀྱི་རྩེར་སྐྱེ་བ་ལྔ་པའི་དུང་སུམ་ཚོམ་གྱི་སྟེང་དུ་ནོར་བུ་འབར་བས་མཚན་པ། སྤྱན་གསུམ་དང་ལྡན་ཞིང་ཞི་མ་ཁྲོའི་ཉམས་ཅན། གཡས་ཡེ་ཤེས་ཀྱི་རལ་གྲི་མེ་འབར་བ་ནམ་མཁར་(༦བ)
འཕྱར་ཞིང་གཡོན་པ་གསེར་གྱི་འཁོར་ལོ་རྩིབས་སྟོང་ཐུར་དུ་བསྐོར་བ། སྟག་ལྤགས་ཀྱི་རྐེད་དཀྲིས་དང་སྦྲུལ་གྱི་དོ་ཤལ་གསོལ་བ། ཞབས་གཉིས་མཉམ་པའི་སྟབས་ཀྱིས་བཞེངས་ནས་མེ་འོད་ཀློང་ན་བཞུགས་པར་ཚངས་རིས་ཀྱི་འཁོར་ཚོགས་གྲངས་མེད་པས་བསྐོར་བ་ཞི་རྒྱས་དབང་འགུགས་ཚངས་པ་སྟེ་ལྔ་གའང་དབུ་སྐྲ་རལ་པའི་ཐོར་ཚུགས་ཅན་པྲོག་ཞུ་སོགས་རིན་པོ་ཆེའི་རྒྱན་སྙན་གོང་ཨུཏྤལ་དང་དར་གྱི་ཅོད་པན་འཕྱང་བ། ནང་ཁ་དོག་སྣ་ཚོགས་དང་ཕྱི་རང་མདོག་དང་མཚུངས་པའི་ཙེ་བེར་ཉིས་བརྩེགས་གསོལ་བའི་ནང་མ་ལ་གསེར་སྐེད་བཅིངས་པ། རིན་པོ་ཆེའི་ཧོར་ལྷམ་གསོལ་ཞིང་སྐུ་ལས་འོད་ཟེར་སྣ་ཚོགས་ཕྱོགས་བཅུར་འཕྲོ་བའོ། །སྐུའི་རྣམ་པར་འཕྲུལ་པ་དགུར་བསྟན་པ་དེ་དག་གི་གཡས་ཕྱོགས་སུ་ངོ་བོ་ཡེ་ཤེས་ཀྱི་ལྷ་ལ་རྣམ་པ་དུང་ཁྲ་དཀར་པོས་བར་སྣང་རླབས་ཀྱིས་སྤྱད་དེ་ཁྱེར་འདྲེ་འཕུང་སྲི་འབྱུང་པོ་ཕུག་རོན་འདྲ་བའི་རྗེས་ཤུལ་བསྙེགས་ཏེ་ཤ་ཁྲག་རུས་པ་ཟ་བ། རྒྱབ་ཏུ་ལྕགས་སྡིག་ནག་པོ་ལུས་ཀྱིས་གཞི་ཁྱབ་ཅིར་རྭ་དང་མཇུག་མ་ནམ་མཁར་གདེངས་ནས་འོད་ཟེར་ལྕགས་ཀྱི་དྲ་བར་སྒབ་འདྲེ་ཕྱིར་འབྲང་བཅུག་སྟེ་སྙིང་ཁྲག་འབྱིན་པ། གཡོན་དུ་སྤྲུལ་པའི་དུང་སྤྱང་ཕོ་མོ་གློག་ལྟར་འཁྱུག་པ་སྤུ་གྲིའི་མཆེ་བས་དགྲ་བགེགས་འབིགས་ཤིང་ལྕགས་ཀྱི་སྡེར་མོས་ས་གཞི་འདྲད་པ། མཇུག་མ་བརྡབས་པས་མེ་རླུང་འཚུབ་པ། ཕྱི་རོལ་གྱི་ཁོར་ས་དང་པོ་ལ་ལྷ་དང་ཀླུ་གཉན་བྱེ་བ་འབུམ་སྡེའི་དམག་ཚོགས། ཕྱི་མ་ལ་སྣང་སྲིད་ལྷ་སྲིན་སྡེ་བརྒྱད་ཀྱི་དཔུང་ཚོགས་ཡན་ལག་བཞི་པའི་ཆ་ལུགས་སུ་འཇིགས་ཤིང་དཔའ་བ། །ཀུན་ཀྱང་ཉི་མ་འབུམ་གྱི་གཟི་བརྗིད་ལྟར་འབར་བའི་གཙོ་འཁོར་ཐམས་ཅད་ཀྱི་སྤྱི་བོར་ཨཱོཾ། མགྲིན་པར་ཨཱཿ ཐུགས་ཀར་ཧཱུཾ་ཧྲཱིཿ མཐར་སྙིང་པོས་བསྐོར་བ་དང་བདག་ཉིད་ཀྱི་ཐུགས་ཀ་ནས་འོད་ཟེར་འཕྲོས་པས་མཐོ་རིས་ལྷའི་ཚལ། (༧ན)
ལྷ་བརྒྱད་གངས་ཀྱི་ར་བས་བསྐོར་བའི་ཕོ་བྲང་སོགས་ནས་དྲི་ཟའི་རྒྱལ་པོ་རྡོ་རྗེ་འབར་བ་རྩལ་སྐུའི་རྣམ་འགྱུར་བརྒྱད་དང་བཅས་པར་གྲངས་མེད་པའི་འཁོར་ཚོགས་རྒྱ་མཚོས་བསྐོར་བ་བཛྲ་ས་མ་ཡ་ཛཿཛཿས་སྤྱན་དྲངས། སྤོས་སྦྱོར་བསྲེག་ཅིང་གཡབ་དར་རོལ་མོ་དབྱངས་དང་བཅས་ཏེ་སྤྱན་འདྲེན་བཞུགས་སུ་གསོལ་བ་ནི། ཧཱུཾ། སྔོན་ཚེ་གཏེར་གཞུང་། ཀ་དག་རྡོ་རྗེའི་དབྱིངས། །ནང་གསལ་འོད་ཀྱི་གཞལ་ཡས་ཁང་། །འོག་མིན་འཕྲུལ་གྱི་ཞིང་ཁམས་སུ། །སངས་རྒྱས་བསྟན་པ་བསྲུང་བྱའི་ཕྱིར། །བྱང་ཆུབ་སེམས་དཔའ་ནམ་མཁའི་སྙིང་། །སྤྲུལ་པ་ལྷ་ཆེན་འབར་བ་རྩལ། །མི་མཇེད་ཀུན་ལ་དབང་བསྐུར་བའི། །ཚངས་པའི་རྒྱལ་པོ་མཐུ་བོ་ཆེ། །དྲེགས་པའི་སྡེ་དཔོན་ཀུན་གྱི་རྗེ། །ཤེལ་གྱི་གནམ་ལྷ་དཀར་པོར་གྲགས། །གསང་ཡུམ་རྡོ་རྗེ་གཡུ་སྒྲོན་མ། །བྱང་ཐང་གནམ་མཚོའི་རྒྱལ་མོ་སྟེ། །མཆེད་འཁོར་གཙང་རིས་ལྷ་ཡི་ཚོགས། །བཀའ་སྡོད་དྲེགས་ལྡན་དུ་མས་བསྐོར། །ལྷ་ཆེན་དཔལ་འབར་དྲག་ཤུལ་ཅན། །རྫུ་འཕྲུལ་སྟོབས་ཀྱིས་སྐུ་བསྐྱོད་ཚེ། །ས་གཞི་རི་བྲག་ཐམས་ཅད་ཀྱང་། །མཐོ་དམའ་མེད་པར་ཞོངས་སེ་ཞོང་། །དཔུང་ཚོགས་ཆར་སྤྲིན་འཐིབས་པ་བཞིན། །དགྱེས་པའི་གད་བརྒྱངས་དིར་རི་རི། །སྤྱན་འདྲེན་དང་བའི་གནས་འདིར་གཤེགས། །ཉི་ཟླ་པདྨ་རིན་ཆེན་ཁྲིར། །ཡེ་ཤེས་གསང་བའི་ལྷ་མཆོག་ཁྱོད། །བསྟན་སྲུང་རྒྱལ་བོར་མངའ་གསོལ་ཚེ། །སྐུ་གསུང་ཐུགས་ཀྱི་དཀྱིལ་འཁོར་ལ། །གཟི་བརྗིད་ཉི་མ་འབུམ་བཞིན་རྒྱས། །ནག་ཕྱོགས་བདུད་དཔུང་ཟིལ་གྱིས་གནོན། །དཔའ་བོ་སྟོབས་ལྡན་སྙིང་རྗེ་ཅན། །སྡེ་དཔོན་ཆེན་པོའི་སྤྱན་སྔ་རུ། །བདག་གིས་ཁས་བླངས་དམ་(༧བ)
བཅའ་གཡེལ། །དམ་ཚིག་ཉམས་ཆགས་མཐོལ་ལོ་བཤགས། །མཉེས་མཆོད་ཐུགས་དམ་བསྐང་བ་ནི། །མན་ཤེལ་འོད་འཕྲོ་གསང་བའི་རྟེན། །ཏིང་འཛིན་གསལ་བས་ཐུགས་དམ་བསྐང་། །དམ་རྫས་གཏོར་མ་ནང་གི་རྟེན། །བསྙེན་སྒྲུབ་བཟླས་པས་ཐུགས་དམ་བསྐང་། །སྐུ་འབག་རྒྱན་ལྡན་ཕྱི་ཡི་རྟེན། །འདོད་ཡོན་ལོངས་སྤྱོད་ཐུགས་དམ་བསྐང་། །ཧཱུཾ། ཡེ་ཤེས་གཏེར་གཞུང་། གཞལ་ཡས་བསྐྱེད་ཀྱི་རྒྱ་མ་ཆུང་། །སེང་གེ་གླང་ཆེན་ཁྲི་བཤམས་དཔངས་མ་དམའ། །ཉི་ཟླ་པདྨའི་གདན་བཏིང་བཀྲག་མ་ཞན། །ཡེ་ཤེས་ལྷ་མཆོག་བསྙེན་གྱི་རྒྱང་མ་རིང་། །འཇིག་རྟེན་སྲུང་མ་བསྒྲུབས་ཀྱི་མཐུ་མ་ཆུང་། །འདིར་གཤེགས་ཉི་ཟླའི་གདན་ལ་བཞུགས་སུ་གསོལ། །རྡོ་རྗེ་འབར་བ་རྩལ། ས་མ་ཡ་ཛཿཛཿ ཧཱུཾ། སྐུ་ལྷའི་ཡབ་སྨོས་པ། འོ་དེ་གུང་རྒྱལ་ལགས། །སྐུ་ལྷའི་ཡུམ་སྨོས་པ། །གཡུ་བྱ་གཤོག་གཅིག་ལགས། །སྐུ་ལྷ་ཉིད་སྨོས་པ། །ཡ་ཟུར་གཉན་གྱ་ལྷ། །བཞུགས་ཡུལ་མཚན་གསོལ་བ། །འདམ་ཤོད་སྣར་མོ་ལགས། །ཁྲི་རྒོད་གཡུ་ལྗང་ཁྲིལ། །དབྱར་སྔོ་དགུན་ཡང་སྔོ། །བཞུགས་ཡུལ་ཉམས་རེ་དགའ་དགྱེས་སོ་ལྷ་ཡི་ཡུལ། །མི་ཆོས་མཚན་གསོལ་བ། །ཐང་ལྷ་ཡ་ཞུར་ལགས། །ལྷ་ཆོས་མཚན་གསོལ་བ། །དྲི་ཟའི་རྒྱལ་པོ་ནི། །ཟུར་ཕུད་ལྔ་པ་ལགས། །གསང་བའི་མཚན་གསོལ་བ། །རྡོ་རྗེ་འབར་བ་རྩལ། །སྐུ་ལ་ཅི་གསོལ་གསུམ་ཀུན་ཏུ་རྒྱུ། །མདོག་དཀར་འོད་ཟེར་འབར། །གཡས་པ་སྦ་ལྕག་འཕྱར། །མ་བདུན་ལས་ལ་འགྱེད། །ཡོན་པ་ཤེལ་འཕྲེང་འདྲེན། །ཐུགས་(༨ན)
དམ་དབྱིངས་སུ་ཟློ། སྤྲུལ་པ་ཅི་འགྱེད་ན། །རྟ་དམག་འབུམ་སྡེ་འགྱེད། །བློན་གཡོག་འཁོར་དང་བཅས། །འདིར་སྤྱོན་འཕྲིན་ལས་མཛོད། །དམ་ཅན་ཀུན་གྱི་ལྷ། །དམ་མེད་ཀུན་གྱི་གཤེད། །མནའ་ཟན་ཀུན་གྱི་བདུད། །རྣལ་འབྱོར་ཀུན་གྱི་དཔལ། །སྒྲུབ་མཆོག་བདག་གི་གྲོགས། །འཕྲིན་ལས་སྐལ་ཕོག་པ། །སྨྱོ་བའི་འདྲེ་འདུལ་ཞིང་། །སྡང་བའི་དགྲ་སྲོག་གཅོད། །མགྱོགས་སུ་རྟ་གཏོད་ཀྱི། །རྨིག་ཐོགས་ཟོར་མ་ལྕི། །རྣོ་རུ་མཚོན་རྡོར་གྱི། །རྩེ་མོ་དབལ་མ་ཞན། ཅི་དང་དོ་སྔོ་ན། དོ་ཐག་ཆང་ཏ་རེ། མགྱོགས་དང་དཀྱུས་མཉམ་ན། །དཀྱུས་ཐོག་ཤོར་ར་རེ། །སྡང་དགྲས་འཁྱེར་ར་རེ། །བྱམས་ཀྱིས་སྐྱོང་ཏ་རེ། །དུས་ལ་བབ་པོ་ས་མ་ཡ། །དམ་ཚིག་རྗེས་སུ་དྲན་པར་གྱིས། །ལས་ལ་བབ་པོ་བགེགས་ཀྱི་རྒྱལ། །བཅོལ་བའི་འཕྲིན་ལས་སྒྲུབ་པར་མཛོད། །དབུས་གཙང་རུ་བཞིའི་ཡུལ་ལྷ་ཁྱོད། །ཆོས་སྐྱོང་རྒྱལ་པོ་ལྷ་ཡི་སྲས། ཁྲི་སྲོང་ལྡེའུ་བཙན་སྐུ་ལྷ་ཡིན། །ཨྱོན་པདྨ་འབྱུང་གནས་ཀྱིས། །དམ་ལ་བཏགས་པའི་དམ་ཚིག་ཅན། །ད་ལྟ་ཅི་བསྒོའི་ལས་རྣམས་ཉོན། །ཕྱི་རབས་བསྟན་པའི་ཐ་མ་ལ། །ཨྱོན་པདྨ་འབྱུང་གནས་ཀྱི། །རྗེས་སུ་འཇུག་པའི་སྔགས་འཆང་དང་། །ཆོས་རྒྱལ་ཁྲི་སྲོང་ལྡེའུ་བཙན་གྱི། །ལྷ་བརྒྱད་ཆགས་པའི་རྗེ་རིགས་རྣམས། །མཐོ་མཐོ་གུང་ལ་རེས་པ་དང་། །དམའ་དམའ་བུ་བཞིན་སྐྱོང་བར་གྱིས། །བོད་ཁམས་རུ་བཞི་ཕྱུགས་བཞིན་སྐྱོངས། །བསམ་ཡས་ལྷ་ཁང་དཀོར་བཞིན་སྲུངས། །བསྐལ་པ་ཐ་མའི་སེམས་ཅན་ལ། ཁྱེད་ཀྱིས་སྲུང་སྐྱོབ་མི་བྱེད་ན། །དང་པོ་བྱང་ལམ་བར་པ་རུ། །གསང་(༨བ)
བདག་ཕྱག་ན་རྡོ་རྗེ་ཡིས། །སྲོག་སྙིང་གཟིར་བ་མི་དྲན་ནམ། །བར་དུ་བསམ་ཡས་ཧས་པོ་རིར། །དབང་ཆེན་པདྨ་ཧེ་རུ་ཀས། །དབང་དུ་བསྡུས་པ་མི་དྲན་ནམ། །ཐ་མ་རི་རྒྱལ་བཀྲ་བཟང་གི །རྩེ་མོར་ལྷ་སྲིན་ཀུན་བསགས་ནས། །དཔལ་ཆེན་རྡོ་རྗེ་གཞོན་ནུ་ཡིས། །དམ་ཚིག་ཕོག་པ་མི་དྲན་ནམ། །ང་ནི་པདྨ་འབྱུང་གནས་ཡིན། ཁྱོད་ནི་གཉན་ཆེན་ཐང་ལྷ་ཡིན། །ཡུལ་ནི་དབུས་གཙང་རུ་བཞི་ཡིན། །བྱིན་རླབས་སྤྲིན་ལྟར་ཐིབས་སེ་ཐིབ། །ཐུགས་རྗེ་ཆར་ལྟར་ཤར་ར་ར། །དམ་ཚིག་མདངས་ལྡན་ཡལ་ལ་ལ། །ཐང་ལྷ་གཉན་པོ་གཤེགས་སུ་གསོལ། །སྐུ་ལྷ་གཉན་པོ་འཁོར་བཅས་ལ། །བརྗིད་ལྡན་བཟང་རིང་བཤོས་ཀྱིས་མཆོད། །གཡའ་ཆུ་གངས་ཆུ་གཙང་མས་མཆོད། །དྲི་ཞིམ་སྤོས་དཀར་དུང་བས་མཆོད། །གསེར་དངུལ་རིན་ཆེན་སྣ་ལྔས་མཆོད། །རྔོན་ཆ་དར་དང་ཟ་འོག་མཆོད། །གསང་ལུགས་འབྲས་དཀར་གཙང་མས་མཆོད། །མཆོད་ཡོན་ཉེར་སྤྱོད་རོལ་མོ་འབུལ་བ་ནི། ཧཱུཾ། དྲི་མེད་གཡའ་ཆུ་གངས་ཆུ་གཙང་མའི་ཆུ། །རབ་དཀར་ཡོལ་གོའི་སྣོད་དུ་ཀུན་ནས་བསྐྱིལ། །མདངས་མཛེས་དྲི་ཞིམ་ལྟེ་བ་རབ་མཐོ་བའི། །མེ་ཏོག་དཀར་པོས་གསེར་གྱིས་བུམ་བཟང་མཛེས། ཡོལ་མོ་བ་གསུམ་པས་མཛད། ཙནྡན་སྤོས་དཀར་རྒྱ་ཤུག་སྦྱར་བའི་བསངས། །སྲིད་གསུམ་འཇིག་རྟེན་ཁྱབ་པའི་དུད་སྤྲིན་འཐུལ། །རྩི་བཅུད་གསང་བའི་ཞུན་མེ་དངུལ་དཀར་གྱི། །ཀོང་བུར་ཉི་ལྟར་འབར་བའི་སྣང་གསལ་མཆོག །རིན་ཆེན་བརྡར་ཤེལ་ལས་གྲུབ་པད་ཕོར་ནང་། །ག་ཕུར་བསིལ་བའི་ཆུར་བཏབ་བྱུག་པའི་རྫས། །དམར་དང་མ་འདྲེས་བདའ་དགུར་སྦྱར་བའི་ཟས། །རིན་ཆེན་བྱུ་རུའི་(༩ན)
གཞོང་པར་རི་ལྟར་སྤུངས། །སྙན་པའི་སྒྲ་དབྱངས་མ་འདྲེས་སྣ་ཚོགས་པ། །དགའ་དང་སྤྲོ་དང་དད་པས་གུས་མཆོད་ཀྱི། །ལྷ་ཆེན་གསང་མཚན་རྡོ་རྗེ་འབར་བ་རྩལ། །ཡུམ་གཅིག་མཚོ་སྨན་སྤྲུལ་འཁོར་རྟ་དམག་འབུམ། །མ་བདུན་བྲན་གཡོག་འཁོར་དང་བཅས་ལ་འབུལ། །དགྱེས་ཤིང་ཐུགས་བརྩེར་དགོངས་ལ་བཞེས་སུ་གསོལ། །ཨཱོཾ་བཛྲ་ཐང་ཀ་ར་ས་པ་རི་ཝཱ་ར་ཨརྒྷཾ། པུཥྤེ་ནས་ཤཔྟ་པྲ་ཏཱིཙྪ་སྭཱཧཱའི་བར་བརྗོད། དམ་ཚིག་རྡོ་རྗེའི་ཕྱག་རྒྱ་བཅས་ལ། དཔལ་ཕྱག་ན་རྡོ་རྗེ། ཨྱོན་ཆོས་ཀྱི་རྒྱལ་པོ། པཎ་ཆེན་བི་མ་ལ་མི་ཏྲ། ལོ་ཆེན་བཻ་རོ་ཙ་ན། ཆོས་རྒྱལ་མངའ་བདག་ཡབ་སྲས། ཇོ་མོ་མཁར་ཆེན་བཟའ། གཏེར་སྟོན་རིགས་འཛིན་ཡབ་སྲས། སྔགས་གསར་བྲིས། འཆང་རྡོ་རྗེ་རྣམ་གཉིས། མཚན་ལྡན་བླ་མ་རྣམ་གཉིས། དྲིན་ཅན་སངས་རྒྱས་དཔལ་བཟང་། ལྡོངས་སྟོན་ཆོས་རྒྱལ་བསོད་ནམས་ཡབ་སྲས། ཀུན་མཁྱེན་མཁྱེན་བརྩེའི་དབང་ཕྱུག །འཕགས་མཆོག་བྱམས་པ་སྐལ་བཟང་། རྡོ་རྗེ་འཆང་དབང་ཕྱུག་རབ་བརྟན། ཁྱབ་བདག་མགོན་པོ་བསོད་ནམས་མཆོག་ལྡན། གཞན་ཡང་གཏེར་སྟོན་ཡབ་སྲས་ནས། རྡོར་འཆང་བསོད་ནམས་བཟང་པོ། མཁས་གྲུབ་ཆོས་ཀྱི་རྒྱལ་མཚན། དཔལ་ལྡན་ནམ་མཁའ་གྲགས་པ། རྗེ་དཀོན་ཅོག་བློ་གྲོས། མཚུངས་མེད་བློ་གྲོས་དབང་པོ། མཉམ་མེད་ཤཱཀྱ་དཔལ་བཟང་། ནུབ་དགོན་པ་བྱམས་པ་ཆོས་ཀྱི་རྒྱལ་མཚན། གཞན་ཡང་གཏེར་སྟོན་ཡབ་སྲས་ནས། ཆོས་རྗེ་སངས་རྒྱས་དཔལ་བ། རྗེ་ཆོས་དཔལ་འབྱོར། མཚུངས་མེད་རིན་ཅེན་གཞོན་ནུ། སྔགས་
འཆང་ཤཱཀྱ་བཟང་པོ། རིགས་འཛིན་ལེགས་ལྡན་རྡོ་རྗེ་དང་ནུབ་དགོན་པ་སྟེ་རྣམ་གཉིས་གཙུག་བརྟེན་དཔལ་བཀྲ་ཤིས་སྟོབས་རྒྱལ། རིགས་འཛིན་ངག་གི་དབང་པོ། ཡོལ་མོ་གཏེར་སྟོན་བསྟན་འཛིན་ནོར་བུ། བརྒྱུད་པ་ཀུན་འདུས་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་སོགས་རིགས་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ལ་བཏགས་པའི་དམ་ཚིག་གཉན་པོ་ཉེ་བ་དགོངས་ལ་མངའ་བདག་རྒྱལ་པོའི་སྐུ་ལྷ། ཡ་རབས་བསོད་ནམས་ཀྱི་སྲུང་མ། དབུས་གཙང་རུ་བཞིའི་ཡུལ་ལྷ། དམ་ཚིག་ཉམས་པའི་སྲོག་བདུད། མནའ་ཟན་ཡོངས་ཀྱི་གཤེད་མ། གྲིབ་གནོན་རྒྱལ་འགོང་དམ་སྲིའི་གཉའ་གནོན། སྐུ་གཅིག་ལ་རྣམ་འགྱུར་དགུར་སྟོན་པ། དོན་གཅིག་ལ་མཚན་དྲུག་ཏུ་གྲགས་པ། ལྷ་ཆེན་རྡོ་རྗེ་འབར་བ་ཁྱོད་ཀྱིས་སངས་རྒྱས་ཀྱི་བསྟན་པ་སྲུངས། དཀོན་ཅོག་གི་དབུ་འཕང་བསྟོད། མཆོད་གནས་སྡེ་གཉིས་ཀྱི་འདུས་སྡེ་སྐྱོངས། །བོད་ཡུལ་རུ་བཞིའི་རྒྱལ་ཁམས་འདིར་བདེ་སྐྱིད་སྤེལ། ཁྱད་པར་རིགས་འཛིན་སྔགས་འཆང་བདག་ཅག་དཔོན་སློབ་རྒྱུ་སྦྱོར་མི་ནོར་འཁོར་དང་བཅས་པའི་ཚོགས་ལ་སྡང་བར་བྱེད་པའི་དགྲ་ཐུལ། གནོད་པར་བྱེད་པའི་བགེགས་ཆོམས། བྱེ་བྲག་གྲིབ་གནོན་རྒྱལ་བསེན་དམ་སྲི་འབྱུང་པོ་རྣམས་ཀྱི་མཐུ་སྟོབས་ནུས་པ་རྡུལ་ཕྲན་བཞིན་དུ་རློག་ལ་བདག་སོགས་ཡོངས་ཀྱི་ནད་རིམས་དུས་མིན་འཆི་བས་མཚོན་པའི་མི་མཐུན་པའི་ཕྱོགས་ཀུན་ཞི་བ་དང་ཚེ་དཔལ་ལོངས་སྤྱོད་མངའ་ཐང་སོགས་ཆོས་སྲིད་ཀྱི་ལེགས་ཚོགས་མ་ལུས་ཡར་ངོའི་ཟླ་བ་ལྟར་སྤེལ་བ་དང་སྲིད་གསུམ་ཟིལ་གྱིས་གནོན་པ་དང་ཁམས་གསུམ་ཐམས་ཅད་དབང་དུ་བསྡུ་བའི་འཕྲིན་ལས་ཐོགས་པ་མེད་པར་ལྷུན་གྱིས་གྲུབ་པར་(༡༠ན)
མཛོད་ཅིག །བཛྲ་ས་མ་ཡ་ཧཱུཾ། ཞེས་དམ་བསྒྲགས། པྲ་སྟོན་གཏེར་གཞུང་། པར་གསོལ་བ་ནི། ལྷ་ཆེན་རྡོ་རྗེ་འབར་བ་རྩལ་འཁོར་དང་བཅས་པ་ལ་མཉེས་མཆོད་རྟེན་གཏོར་འདི་ཕུལ་བས་བདག་གི་ཕྱི་ནང་གསང་བའི་བར་ཆད་མི་མཐུན་པའི་ཕྱོགས་ཐམས་ཅད་ཞི་བ་དང་ལེགས་ཉེས་ཀྱི་མཚན་མ་དང་རྟགས་རྣམས་གསལ་བར་བསྟན་དུ་གསོལ། ཞེས་དམོད་བོར་ཞིང་བརྟག་ལུགས་གཞན་དུ་ཤེས་སོ། །སྨན་གཏོར་གསར་བྲིས། འབུལ་བ་ནི། ཧཱུཾ། རྩ་བརྒྱད་སྟོང་སྦྱར་བདུད་རྩི་ཨ་མྲྀ་ཏ། །རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ། །རྡོ་རྗེ་འབར་རྩལ་འཁོར་དང་བཅས་ལ་འབུལ། །བཞེས་ནས་དངོས་གྲུབ་མ་ལུས་སྩལ་དུ་གསོལ། །མཧཱ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཧཱུཾ། དཀར་གསུམ་དངར་གསུམ་བཟང་སྨན་འབྲུ་དཀར་ཟན། །ལེགས་སྦྱར་ཡེ་ཤེས་བདུད་རྩིར་བྱིན་བརླབས་པ། །རོ་མཆོག་བརྒྱ་ཕྲག་ལྡན་པའི་བྷ་ལིནྟ། །འབུལ་གྱིས་བཞེས་ལ་དངོས་གྲུབ་སྩལ་དུ་གསོལ། །རྡོ་རྗེ་ཐལ་མོ་ཁ་ཕྱེ་བའི་ཕྱག་རྒྱ་དང་བཅས། ལྷ་ཆེན་རྡོ་རྗེ་འབར་བ་རྩལ་འཁོར་དང་བཅས་པའི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་གྱིས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ཨཱོཾ་བཛྲ་ཐང་ཀ་ར་ས་པ་རི་ཝཱ་ར་མཧཱ་བྷ་ལིནྟ་ཁ་ཁ་ཁཱ་ཧི་ཁཱ་ཧི། གཙོ་བོ་ལ་ལན་བདུན་ནམ་ཉེར་གཅིག །ཨ་ཀཱ་རོས་གཙོ་འཁོར་སྤྱིར་ལན་གསུམ་མམ་བདུན་གྱིས་འབུལ། བཀའ་སྲུང་རྒྱས་མཆོད་དང་གཞི་བདག་ལ་གཏོར་མ་བསྔོ། གཏེར་གཞུང་། འཛབ་ནི། ལྷ་ཚོགས་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་ཨཱཿདཀར་པོའི་མཐར། (༡༠བ)
ཨཱོཾ་བཛྲ་ཐང་ཀར་མུན་ཉིད་ཁུ་ཤ་ལི་སྭཱཧཱ། ཞེས་པ་དུང་གི་ཕྲེང་བ་ལྟ་བུས་བསྐོར་བ། རང་དཔལ་རྟ་མགྲིན་དུ་གསལ་བའི་ཐུགས་ཀར་ཉི་མའི་དཀྱིལ་འཁོར་ལ་ཧྲཱིཿདམར་པོ་རྩ་སྔགས་ཀྱིས་བསྐོར་བ། དེའི་འོད་ཟེར་ལྕགས་ཀྱུ་ལྟ་བུས་ལྷ་ཆེན་གྱི་ནུས་པ་དང་གཟི་བྱིན་འོད་ཟེར་སྣ་ཚོགས་སུ་རང་ལ་ཐིམ་པར་བསམ། སླར་གསར་བྲིས། ཡང་འོད་ཟེར་འཕྲོས། དབུས་དང་ཕྱོགས་མཚམས་སུ་བཞུགས་པའི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། དེ་དག་ལས་ཀྱང་འོད་ཟེར་ལྕགས་ཀྱུ་ལྟ་བུ་འཕྲོས། ལྷ་མིའི་གནས་སུ་གཞུགས་པའི་རྡོ་རྗེ་འབར་བ་རྩལ་སོ་སོའི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་བྱིན་རླབས་ལས་མ་དག་པ་སྦྱོང་བའི་ཁྲུས་ཆར་འབེབས། དྲི་བཟང་སྤོས་ཀྱི་ངད་པ་འཐུལ། ཨཱ་ལི་ཀཱ་ལིའི་རང་སྒྲ་བསྒྲགས་པས་ནད་གདོན་བར་ཆད་ཞི་ཞིང་ཚེ་དཔལ་འདོད་དགུའི་ལེགས་ཚོགས་རྣམས་བསྡུས་ནས་རང་ལ་ཐིམ། སྟོང་གསུམ་གྱི་སྐྱེ་རྒུ་ཀུན་དབང་དུ་འདུས་ཏེ་བྲན་དུ་བཀོལ་ཞིང་འདར་ཡེེང་ཡང་ནས་དགྲ་བགེགས་བདུད་དཔུང་ཐམས་ཅད་ཚར་བཅད། མདོར་ན་ཅི་བསམས་པའི་དོན་རྣམས་ཡིད་བཞིན་དུ་སྒྲུབ་པར་བསམ་ཞིང་སྔགས་ཅི་ནུས་བཟླ། ལས་སོ་སོར་སྒྲུབ་ཚེ་སྐབས་ཐོབ་ཀྱི་གཙོ་བོ་འཕོ་བ་དང་དམིགས་པའི་ཁ་བསྒྱུར་གྱི་གནད་ཞལ་ལས་འདྲི། ཉམས་ཆགས་ཀྱི་ལྟས་ཆེ་ན་བག་ཆགས་སྟོབས་འཇོམས་ཀྱི་སྒོ་ནས་ཁྲུས་གསོལ། ཡེ་ཤེས་སྐུ་མཆོག་མ་དང་གཞན་ཡང་། ཧཱུཾ། བྱང་གསར་བྲིས། སེམས། ནམ་མཁའི་སྙིང་པོ་འགྲོ་བའི་དོན། །ལས་བཞི་བསྒྲུབ་ཕྱིར་སྣ་ཚོགས་སྤྲུལ་པའི་གར། །སྟོན་མཛད་ཟུར་ཕུད་ལྔ་པ་དྲི་ཟའི་རྒྱལ། །འཁོར་དང་བཅས་པ་དེང་འདིར་སྙན་གསོན་ཞིག །དངོས་གྲུབ་(༡༡ན)
འབྱུང་གནས་རྩ་བརྒྱུད་བླ་མ་ལ། །ལོག་པར་ལྟ་སོགས་སྤྱི་དང་བྱེ་བྲག་གི །གསང་ཆེན་རྡོ་རྗེ་ཐེག་པའི་དམ་ཚིག་ལས། །ཉམས་ཆགས་ནོངས་པར་གྱུར་པའི་ཚོགས་ཀུན་བཤགས། །ཚོན་བརྒྱ་ཉེ་བའི་མན་ཤེལ་ཇི་བཞིན་དུ། །ལྷ་ཁྱོད་བགྲང་ཡས་སྐུ་ཡི་རྣམ་པར་འཕྲུལ། །གསལ་སྟོང་བསྐྱེད་རིམ་ཚུལ་ལྡན་མེ་བསྒོམས་པ། །སྐུ་ཡི་དམ་ཚིག་ཉམས་ཆགས་མ་ལུས་བཤགས། །སྲོག་གི་སྙིང་པོ་གསང་བ་སྔགས་ཀྱི་སྒྲ། །གྲག་སྟོང་རྒྱུན་མི་ཆད་པའི་འཛབ་བཟླས་ཀྱིས། །ཐུགས་དམ་བརྒྱུད་བསྐུལ་བསྙེན་སྒྲུབ་གཡེལ་བ་སོགས། །གསུང་གི་དམ་ཚིག༝། །ངོ་བོ་ཡེ་དག་རང་བཞིན་འོད་གསལ་བར། །ཀུན་ཁྱབ་ཀུན་ལ་འཇུག་པའི་ཐུགས་རྗེའི་གདངས། །བདེ་སྟོང་ཟུང་འཇུག་ཏིང་འཛིན་ལ་གཡེལ་བའི། །ཐུགས་ཀྱི་དམ་ཚིག་ཉམས་ཆགས༝། །སྲོག་དབང་ལུང་དང་མན་ངག་གནད་གསང་ཀུན། །དམ་མེད་སྣོད་མིན་རྣམས་ལ་བསྟན་པ་དང་། །བསྙེན་སྒྲུབ་ལས་སྦྱོར་མཆོད་པའི་རྫས་མ་ཚང་། །འབགས་བཙོག་འཆོལ་དང་ནོར་འཕྲུལ་མ་དག་བཤགས། །དམ་ཚིག་སྡོམ་ཉམས་འཁོན་མཛེ་དམེ་ཡུགས་བཤན། །རོ་བག་མི་གཙང་ཀ་ཅ་རྫས་ངན་སོགས། །རྩིང་པོར་སྤྱད་པས་ལྷ་དང་སྒྲུབ་བ་པོ། །ནོངས་པའི་རྒྱུ་རྐྱེན་བསགས་པ་མ་ལུས་བཤགས། །ལོ་ཟླ་ཚེས་གྲངས་དུས་ཀྱི་གསོལ་བསྐང་མདོས། །རྒྱུན་གྱི་གཏོར་མ་བག་མེད་གཡེང་བས་ཆག །ནག་ཕྱོགས་ལྷ་རིགས་འབྱུང་པོར་ཡིད་བསྟད་དེ། །འབད་པས་བསྟེན་ཅིང་མཆོད་པའི་ཉེས་ཀུན་བཤགས། །དྲི་མེད་རིག་པ་ཡེ་ནས་རང་དག་ཀྱང་། །ཀུན་རྫོབ་སེམས་ཀྱི་འཁྲུལ་(༡༡བ)
ངོའི་ཉེས་པ་རྣམས། །སྒྱུ་མའི་རྟ་གླང་ཇི་བཞིན་དོན་དམ་དབྱིངས། །བཤགས་བྱ་བཤགས་བྱེད་བྲལ་བའི་ངང་ནས་བཤགས། །ཞེས་བརྗོད། ཕྱི་ནང་གསང་བའི་བསྐང་རྫས་བྱིན་གྱིས་བརླབ་པ་ནི། ཧཱུཾ། སྟོང་ཀུན་བཟང་ཐུགས་གཏེར་སོགས་གཏེར་ཁ་སྣ་ཚོགས་ནས་བྱུང་བ། གསུམ་ཀུན་ཏུ་དྲི་མཆོག་འབྱུང་འགྱུར་བའི། །སྤོས་དང་སྨན་སྦྱར་ཆུ་གཙང་དག་པའི་ཁྲུས། །ཡིད་བཞིན་སྤྲིན་ཕུང་མཁའ་ལ་ཆར་འབེབས་པ། །མི་གཙང་དྲི་མའི་ཚོགས་ཀུན་དག་གྱུར་ཅིག །ཨཱོཾ་ཤུདྡྷེ་ཤུདྡྷེ་ཤོདྷ་ན་ཡེ་སྭཱཧཱ། ཧཱུཾ། བདེ་སྡོང་འདབ་དྲུག་ཁྲི་འཕང་བཞིན། །ཉི་མ་ཟླ་བའི་གདན་སྟེང་དུ། །བདག་ཉིད་རྡོ་རྗེ་སེམས་དཔའི་སྐུ། །དཀར་གསལ་ཞལ་གཅིག་ཕྱག་གཉིས་པ། །རྡོ་རྗེ་དྲིལ་བུ་ཐུགས་ཀར་འཛིན། །དར་དང་རིན་ཆེན་དུ་མས་སྤྲས། །སྤྱི་གཙུག་བླ་མ་ཀུན་བཟང་མཐིང་། །མཚན་དཔེས་སྤྲས་པ་ཡུམ་དང་སྦྱོར། །སྐུ་ཡི་གནས་སུ་ཞི་ཁྲོའི་ལྷ། །ཆུ་ནང་ཟླ་བ་ལྟ་བུར་གསལ། །ཨཱོཾ་བཛྲ་སཏྭ་ཧཱུཾ། འདབ་དྲུག་ཤར་གྱི་པད་འདབ་ལ། །སྦྱོང་བའི་ལྷ་ནི་ཤཱཀ་ཐུབ་སེར། །ཕྱག་གཉིས་ས་གནོན་ལྷུང་བཟེད་བསྣམས། །མཚན་དང་དཔེ་བྱད་ལྡན་པར་བཞུགས། །ཐལ་མོ་ཁོང་སྟོང་ཕྱག་རྒྱའི་ནང་། །ཨ་དཀར་འོད་འཕྲོས་དངོས་འཛིན་སྦྱངས། ཨཱོཾ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། སྔགས་འདི་ལན་བདུན་བརྗོད་པའི་མཐུས། །སྣོད་བཅུད་དངོས་འཛིན་དག་གྱུར་ཅིག །དེ་ཡི་མཚམས་ཀྱི་པད་འདབ་ལ། །སྤེལ་བའི་ལྷ་ནི་རྣམ་སྣང་དཀར། །ཕྱག་ན་འཁོར་ལོ་དྲིལ་བུ་བསྣམས། །མཚན་དང་དཔེ་བྱེད་ལྡན༝། །ཐལ་མོ་ཚིགས་བཅག་ཕྱག་རྒྱའི་ནང་། ཁཾ་སྔོན་འོད་འཕྲོས་སྣོད་བཅུད་སྤེལ། །ན་མཿ(༡༢ན)
སརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁི་ཨུད་ག་ཏེ་སྥ་ར་ཎ་ཨི་མཾ་ག་ག་ན་ཁཾ། སྔགས་འདི་ལན་བདུན་བརྗོད་པའི༝། །སྣོད་བཅུད་ལེགས་ཚོགས་སྤེལ་གྱུར་ཅིག །དེ་ཡི་མཚམས་ཀྱི་པད་འདབ་ལ། །བསྒྱུར་ལྷ་བདུད་རྩི་འཁྱིལ་པ་ལྗང་། །ཕྱག་མཚན་རྒྱ་གྲམ་དྲིལ་བུ་བསྣམས། །མཚན་དང་དཔེ་བྱད་ལྡན་པར་བཞུགས། །ཐལ་མོ་ཁ་གྱེར་ཕྱག་རྒྱའི་ནང་། །ཛཿདམར་འོད་འཕྲོས་བདུད་རྩིར་བསྒྱུར། །ཨཱོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། སྔགས་འདི་ལན་བདུན༝། །སྣོད་བཅུད་ཟག་མེད་བདུད་རྩིར་གྱུར། །དེ་ཡི་མཚམས་ཀྱི་པད་འདབ་ལ། །ཐོབ་ལྷ་རིན་འབྱུང་སྐུ་མདོག་སེར། །ཕྱག་ན་རིན་ཆེན་དྲིལ་བུ་བསྣམས། །མཚན་དང་དཔེ་བྱད་ལྡན༝། །མཆོག་སྦྱིན་ཕྱག་རྒྱའི་ཏྲཾ་སེར་ལས། །འོད་འཕྲོས་ཀུན་གྱིས་འབད་མེད་ཐོབ། །ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ། སྔགས་འདི་ལན་བདུན༝། །མགྲོན་རྣམས་ཀུན་གྱིས་ཐོབ་གྱུར་ཅིག །དེ་ཡི་མཚམས་ཀྱི་པད་འདབ་ལ། །ཆིམ་ལྷ་དོན་ཡོད་གྲུབ་པ་ལྗང་། །རྒྱས་མཚན་རལ་གྲི་དྲིལ་བུ་བསྣམས། །མཚན་དང་དཔེ་བྱད་ལྡན་པར༝། ཁུ་ཚུར་མཆོག་སྦྱིན་ཕྱག་རྒྱའི་ནང་། །ཧ་ལྗང་འོད་འཕྲོས་མགྲོན་མཉེས་བསམ། །ཨཱོཾ་ཛྙཱ་ན་ཨ་ཝ་ལོ་ཀི་ཏེ་ན་མཿས་མནྟ་སྥ་ར་ཎ་ར་སྨི་སཾ་བྷ་ཝ་ས་མ་ཡ་མཧཱ་མ་ཎི་དུ་རུ་དུ་རུ་ཧྲྀ་ད་ལ་ཛ་ཡ་ནི་སྭཱཧཱ། སྔགས་འདི་ལན་བདུན༝། །མགྲོན་ཀུན་དགྱེས་ཤིང་ཚིམ་གྱུར་ཅིག །དེ་ཡི་མཚམས་ཀྱི་པད་འདབ་ལ། །དབང་ཆེན་ཕྱག་རྡོར་ལྗང་དམར་ནི། །ཕྱག་མཚན་རྡོ་རྗེ་དྲིལ་བུ་རྣམས། །མཚན་དང་དཔེ་བྱད་ལྡན་(༡༢བ)
པར་བཞུགས། །སོར་བསྣོལ་ཕྱག་རྒྱའི་ཛ་དམར་ལས། །འོད་འཕྲོས་མགྲོན་བཞིའི་མཐུ་སྟོབས་སྡུས། །ན་མསྶ་མནྟ་བུདྡྷཱ་ནཱི་གྲ་ཧེ་ཤྭ་རི་བྲབྷ་ཉྩ་ཛ་ཏི་མ་ཧཱ་ས་མ་ཡ་ཧཱུཾ་ཕཊ། སྔགས་འདི་ལན་བདུན་བརྗོད་པའི་མཐུས། །དབང་སྡུད་འཕྲིན་ལས་ཀུན་འགྲུབ་ཤོག །ཅེས་བྱིན་གྱིས་བརླབ། ཕྱིའི་བསྐང་བ་ནི། རབ་ཡོལ་མོ་བ་གསུམ་པས་མཛད། དྭངས་ཞི་བའི་རླབས་ལྡན་གཙང་མའི་ཆབ། །ལྷུང་ལྷུང་སྙན་པའི་སྒྲར་བཅས་རྒྱུན་འབབ་ཀླུང་། །གཡའ་ཆུ་གངས་ཆུ་ལུ་མར་སྐྱེ་སོགས་ཀྱི། །མཆོད་ཡོན་མཛེས་པར་སྦྲེངས་པས་ཁྱོད་མཆོད་དོ། །པུཎྜ་རི་ཀའི་ཚལ་རྒྱས་ཨུཏྤལ་ནགས། །གཞན་ཡང་ཆུ་དང་ཐང་སྐྱེས་མེ་ཏོག་ཚོགས། །དཔྱིད་ཀྱི་དཔལ་མོས་རབ་སྤེལ་འཕྲེང་མཛེས་པ། །ལྷ་མཆོག་དབུ་ལ་འཆིང་བའི་ཐོད་དུ་འབུལ། །ཙན་དན་སྤོས་དཀར་ལྷ་ཤུག་སོགས་སྦྱར་བའི། །དུད་སྤྲིན་སྲིད་པ་གསུམ་གྱི་བླར་འཕུངས་པས། །མ་དག་ཉེས་པའི་དྲི་མ་ཀུན་སེལ་བ། །ཤངས་ཀྱི་དབང་པོ་ཚིམ་ཕྱིར་བདག་འབུལ་ལོ། །རབ་སྦྱངས་ནོར་བུའི་སྒྲོན་མེ་སྣ་ཚོགས་དང་། །རྩི་བཅུད་ཏིལ་གྱི་མར་མེ་གསལ་འབར་བས། །བསྐལ་པའི་གཤེ་མུན་མཐར་བྱེད་ཨཱ་ལོ་ཀཾ །མ་བསྒྲིབས་གསལ་བར་སྤྱན་གྱི་གཟིགས་མོར་འབུལ། །ག་པུར་དོག་པས་རབ་བསིལ་གུར་ཀུམ་གྱི། །གེ་སར་རྡུལ་ཚོགས་རྒྱས་པས་རབ་མཛེས་པ། །ཡིད་འོང་ཁྲུས་ཀྱི་རྫིང་བུ་འདི་དག་ནི། །བརྗིད་པའི་སྐུ་ལ་བྱུག་པའི་རྫས་སུ་སྦྱར། །འབྲས་དཀར་ཕུང་པོ་འབྲུ་བཅུད་བཟང་པོ་དང་། །གཉིས་སུ་མེད་སྦྱར་རྒྱན་ལྡན་གཙང་མའི་བཤོས། །དཀར་གསུམ་མངར་གསུམ་ཤིང་ཏོག་འབྲུ་སྣ་ཡིས། །(༡༣ན)
ལྗགས་ཀྱི་དབང་པོ་ཀུན་ནས་ཚིམ་གྱུར་ཅིག །རྔ་ཆེན་དུང་དང་སིལ་སྙན་གླིང་བུའི་སྒྲས། །རབ་དྲངས་དྲི་ཟའི་དབྱངས་སུ་རབ་འཚེར་བའི། །སྤྱན་འདྲེན་མཆོད་བསྟོད་བསྐུལ་བའི་གྱེར་མང་པོ། །ཐོགས་པ་མེད་གསན་ལྷ་ཡི་སྙན་ལ་འབུལ། །སྐད་ཅིག་གཅིག་ལ་སྟོང་གསུམ་འཇིག་རྟེན་ཀུན། །བགྲོད་བྱེད་རྫུ་འཕྲུལ་ཤུགས་ལྡན་མཛེས་པའི་ཆིབས། །གསེར་དངུལ་དར་ཟབ་རྒྱན་ལྡན་ལྷ་རྟ་དཀར། །གསང་ཆེན་བཀའ་ཡི་བྱ་ར་མཛད་ཕྱིར་འབུལ། །སྤྲིན་དཀར་དག་པའི་ཕུང་པོ་ཆེར་ཕུངས་ལྟའི། །ཞོལ་དཀར་རྡོ་རྗེའི་རྭ་ལྡན་རི་ལྟར་འགྱིང་། །སྣ་ཚོགས་དར་གྱི་ཕོན་པོས་ལྟར་མི་མངོན། །ཕྱི་རྟེན་ལྷ་གཡག་མཛེས་པས་ཐུགས་དམ་བསྐང་། །ཐོགས་མེད་ཅིར་ཡང་རྒྱུ་བ་སྐར་མདའི་སྤུན། །མཛེས་པའི་དུང་ཁྲ་འཕུར་ལྡིང་གཟན་ལ་བཅུམ། །ཤེལ་དུམ་ལྟར་དཀར་གཙང་ལུག་མང་པོ་ཡིས། །ལྷ་མཆོག་ཐུགས་ཀྱི་དགྱེས་པ་སྐོང་གྱུར་ཅིག །འདོད་གཟུགས་འཇིག་རྟེན་ཀུན་ན་ཟླ་བྲལ་ཞིང་། །ཟླ་བའི་གདུགས་དཀར་གཡས་སུ་འཁོར་བའི་ཏོག །ཡིད་བཞིན་ནོར་བུས་མཚན་པ་བསིལ་བ་འབོད། །རྒྱལ་མཚན་དར་འཕན་རྔ་ཡབ་དཀར་པོས་བསྐང་། །མཆོག་དམན་རིན་ཆེན་མང་སྤུངས་གཏེར་གྱི་རི། །དར་ཟབ་ལྡ་ལྡིར་རབ་དཔྱངས་ཚོན་རིས་ཀྱིས། །ཕྱོགས་ལ་དབང་པོའི་ཚོན་དགོད་སྤྱན་གཟིགས་ཀྱིས། །ལྷ་གཉན་འཁོར་བཅས་ཐུགས་དམ་སྐོངས་གྱུར་ཅིག །གསར་བྲིས། སྲ་བརྟན་ཁྲབ་ཆེན་ཟ་འོག་ཤམ་བུ་ཅན། །རྒྱལ་མཚན་དར་ལྕོག་རྒོད་སྤུར་ཆས་ལྡན་རྨོག །རྔ་མའི་འཇའ་རིས་ཞོལ་བཏགས་ལྕགས་གཞིབས་སོགས། །རང་སྲུང་རྡོ་རྗེའི་གོ་ཆས་ཐུགས་དམ་བསྐང་། །རལ་གྲི་(༡༣བ)
སྤུ་གྲི་དགྲ་སྟ་དཔག་ཆེན་མདའ། །གྲི་གུག་རྩེ་གསུམ་དུང་རྣོན་འཕྲུལ་སྒྱོགས་སོགས། །ཕ་རོལ་དགྲ་དཔུང་ཕྱེ་མར་འཐག་ནུས་པའི། །སྣ་ཚོགས་མཚོན་ཆའི་རིགས་ཀུན་ཁྱོད་ལ་འབུལ། ཁ་དོག་རབ་བཀྲ་ཙེ་བེར་ལྷབ་ལྷུབ་གོས། །ལྷ་མིའི་རིན་ཆེན་རྒྱན་ཆ་སྐ་རགས་ལྷམ། །པད་འཕྲེང་སྙན་གོང་ཨུཏྤལ་དར་ལྕེ་གཡོ། །སྟག་ཤམ་སྦྲུལ་གྱི་ཆུན་པོས་ཁྱོད་མཆོད་དོ། །སྦ་ལྕག་ཤེལ་འཕྲེང་གསེར་གྱི་འཁོར་ལོ་བྲི། །སྨན་ལྗོན་བཅུད་བུམ་ནོར་བུ་རིན་ཆེན་སྒྲོམ། །མདུང་ཞབས་ལྕགས་ཀྱི་མདའ་གཞུ་མཆིལ་པ་དང་། །རྒྱལ་མཚན་མེ་ལོང་ཕྱག་མཚན་ཚོགས་རྣམས་འབུལ། །རྟ་ནག་ནེའུ་ལེ་གཡུ་འབྲུག་སེང་སྟག་དོམ། །ཤ་རྐྱང་རྨ་བྱ་ནེ་ཙོ་ཐང་དཀར་སོགས། །གནམ་ལ་འཕུར་དགུ་ས་ལ་འཇུལ་དགུ་དང་། །རི་དྭགས་འཕྱོ་དགུའི་ཚོགས་ཀྱིས་ཐུགས་དམ་བསྐང་། །བཟང་དྲུག་ཙན་དན་ག་པུར་ལ་སོགས་སྨན། །བཀྲ་ཤིས་རྟགས་བརྒྱད་རྒྱལ་སྲིད་སྣ་བདུན་དང་། །རི་རབ་གླིང་བཞི་གླིང་ཕྲན་ཉི་ཟླ་སོགས། །ལྷ་ཀླུ་གནོད་སྦྱིན་མེ་ཡི་འབྱོར་ཚོགས་འབུལ། །ཕྱིའི་རྟེན་ནི། ཡོལ་མོ་བའི་གསུང་ལ་ཅུང་ཟད་བསྣན་པ། མཎྜལ་གྲུ་བཞི་སྨྱུག་རྒོད་དར་སྣས་བརྒྱན། །བྲིས་འབུར་ཞལ་བརྙན་ཡེ་ཤེས་སེམས་དཔའ་འཁྱིལ། །དར་དཀར་གཞི་དམར་ལེགས་བྲིས་སྙིང་པོའི་ཕྲེང་། །ལྷ་ཆེན་ཆགས་པའི་ཕྱི་སྒྲུབ་རྟེན་དུ་འབུལ། །ནང་གི་བསྐང་བ་ནི། གསེར་སྐྱེམས། རཾ་ཡོལ་མོ་བ་གསུམ་པས་མཛད། ཡཾ་ཁཾ་ཨཱོཾ་ཨཱཿཧཱུཾ་གིས་བྱིན་གྱིས་བརླབ། ཧཱུཾ། འབྲུ་བཅུད་སྟོང་ལ་སྦྱར་བའི་ཛ་གད་དང་། །དཀར་དང་རྒྱ་ཇ་གཙང་མའི་གསེར་ཕྱེ་སྦར། །འཆི་མེད་བདུད་རྩིའི་རྒྱ་མཚོ་ཆེན་པོ་འདིས། །ལྷ་ཆེན་འཁོར་བཅས་ཐུགས་དམ་སྐོང་གྱུར་ཅིག །(༡༤ན)
ཅེས་བརྗོད། ལོགས་སུ་གསེར་སྐྱེམས་བཤམས་པ་ལས་ཀྱི་རྡོ་རྗེས་བཏེག་ལ། ཧོ། དྲི་ཟའི་གསར་བྲིས། རྒྱལ་པོ་རྡོ་རྗེ་འབར་བ་རྩལ་འཁོར་དང་བཅས་པ་རྣམས་ཀྱིས་གསེར་གྱི་མཆོད་པ་རྒྱ་ཆེན་པོ་འདི་བཞེས་ལ་བདག་ཅག་དཔོན་སློབ་རྒྱུ་སྦྱོར་ཀུན་ལ་གནོད་པར་བྱེད་པའི་བན་བོན་སྔགས་པའི་མཐུ་བྱད། སྣང་སྲིད་ལྷ་འདྲེའི་ཟ་ཁ་ཟུག་པ། ནད་གདོན་བར་ཆད། ཆགས་ཆེ་ཉམ་ང་། ཁྱད་པར་སྟེང་འོག་བར་གསུམ་གྱི་གདོན་གནོད་ཐམས་ཅད་བཟློག་ཏུ་གསོལ། བྱེ་བྲག་ཆེ་གེ་མོ་སོགས་དངོས་ཉམས་རྨི་ལམ་དུ་ཆོ་འཕྲུལ་ངན་པ་སྟོན་པ་པོ་རྣམས་སྤྲུལ་པའི་ལྷ་གཡག་དཀར་པོས་འདམ་ལྟར་རྫིས། དུང་ཁྲ་དཀར་པོས་མཆུས་ཐལ་ཕྱུང་དུ་ཕུག །ལྕགས་ཀྱི་སྡིག་པ་ནག་པོས་སྲོག་རྩ་ཆོད་ལ་རྡུལ་དུ་རློག་ཅིག །མདོར་ན་འཕྲིན་ལས་རྣམ་བཞི་ལྷུན་གྱིས་གྲུབ་པར་མཛད་དུ་གསོལ། ཞེས་བརྗོད་ཅིང་གཙང་སར་གཏོར། ཚོགས་མཆོད་ནི། ཨཱོཾ་ཨུཙྪུསྨ་བཻ་ཏཱ་ལཱི་ཀྲོ་དྷ་ནཱི་སརྦ་དྲ་པྱཾ་སཾ་ཤོ་དྷ་ནི་ཧཱུཾ་བཀའ་བརྒྱད་གསང་རྫོགས་ལས། ཕཊ་སྭཱཧཱ། རྡོ་རྗེ་ལྟ་བུའི་ཡེ་ཤེས་ཀྱིས། །ཆོས་ཀུན་ཐམས་ཅད་སྒྱུ་མར་རིག །རིག་པའི་ཡེ་ཤེས་རཾ་ཡཾ་ཁཾ། །ཚོགས་ཀྱི་དངོས་པོ་བསྲེགས་སྦྱངས་བཀྲུ། །ཨཱོཾ་ཨཱཿཧཱུཾ་གིས་བྱིན་གྱིས་བརླབ། ཞི་རྫས་དང་དྲག་རྫས་ཀྱི་ཚོགས་ཕུད་མ་འདྲེས་པར་བཤམས། དང་པོ་མཆོད་པ་ནི། གདོད་ཡོལ་མོ་བ་གསུམ་པས་མཛད་ནས་ཡོངས་དག་དམ་ཚིག་ཆེན་པོའི་རྫས། །ཡེ་ཤེས་བདུད་རྩིའི་བཟའ་བཅའ་བཏུང་བའི་དངོས། །ལྷ་ཆེན་ཡུམ་གཅིག་འཁོར་དང་བཅས་ལ་འབུལ། །བཞེས་ནས་དམ་ཚིག་བཀའ་ཡི་བྱ་ར་མཛོད། །རྡོ་རྗེ་འབར་བ་རྩལ་ས་པ་རི་ཝ་ར་ག་ཎ་ཙཀྲ་པཱུ་ཛ་ཁཱ་ཧི། (༡༤བ)
བར་པ་ནི། སྒྲུབ་རྫས་མ་ཚོགས་མནའ་དང་དམ་ལས་འགལ། །མི་གཙང་གྲིབ་ཕོག་དམ་མེད་མི་དང་འདྲེས། །ནག་ཕྱོགས་ལྷ་རིགས་བསྟེན་སོགས་ཉེས་སྤྱད་ཚོགས། །རང་གནོང་འགྱོད་པས་བཤགས་སོ་བྱང་བར་མཛོད། །ཐམ་ལ་ཉ་བོ་དང་ཕྱག་མཚན་རྣམས་བཤམ། །ཧཱུཾ། གསར་བྲིས། ཨེ་ལས་ཐར་མེད་གནམ་ལྕགས་འབྲུབ་ཁུང་ནང་། །ཪྣྲི་དང་ཏྲི་ལས་དམ་ཉམས་དགྲ་བགེགས་ཚོགས། །སྐྲ་གཟིངས་རིད་ཅིང་ཡན་ལག་ལྕགས་སྒྲོག་བསྡམས། །ཉམ་ཐག་མྱ་ངན་འདུག་སྟངས་ཅན་དུ་གྱུར། །དགྲ་བགེགས་བླ་ཚེ་རྣམ་ཤེས་འགུགས་པའི་ཆེད། །རང་ཉིད་དྲི་ཟའི་རྒྱལ་པོར་གསལ་བ་ཡི། །ཕྱག་གཡས་སྦ་ལྕག་འཕྱར་བས་མ་མོ་བདུན། །སྐར་མདའ་འཕངས་པ་བཞིན་དུ་ཐོགས་མེད་སོང་། །ན་མ་རྦད་བྷྱོ་ལན་བདུན་བརྗོད། ཧཱུཾ་ཞེས་བརྗོད་པས་སྐད་ཅིག་གནས་གྱུར་ཏེ། །དཔའ་བོ་རྡོ་རྗེ་འབར་རྩལ་ཕྱག་གཉིས་ཀྱིས། །ལྕགས་ཀྱུས་སྙིང་བཟུང་ཞགས་པས་སྐེ་བཅིངས་ཚེ། །མ་མོ་བདུན་གྱི་ང་རོ་བཅས་ཏེ་བཀུག །ཪྣྲི་ཏྲི་ཛཿཛཿལན་བདུན་བརྗོད། ཕོ་ཉ་བསྐུལ་ལ། ན་མཿརྩ་གསུམ་ལྷ་ཚོགས་བདེན་པ་དང་། །ཆོས་ཉིད་ཡེ་ནས་འགྱུར་བ་མེད་པ་ལ། །ཆོས་ཅན་རྒྱུ་འབྲས་སླུ་མེད་བདེན་པ་དང་། ཁྱད་པར་ཞི་བ་བྱང་སེམས་ནམ་མཁའི་སྙིང་། ཁྲོ་བོ་རྡོ་རྗེ་འབར་རྩལ་འཁོར་བཅས་ཀྱི། །མཐུ་སྟོབས་ནུས་པ་རྫུ་འཕྲུལ་བདེན་པ་དང་། །ཆེ་མཉམ་བསོད་ནམས་འབྲེལ་བའི་བདེན་པ་དང་། །འགོ་ལྷ་རུ་བཞིའི་ཡུལ་ལྷའི་བདེན་པ་དང་། །མནའ་དང་དམ་ལ་གནས་པའི་སྒྲུབ་པ་པོའི། །ཏིང་འཛིན་སྔགས་དང་ཕྱག་རྒྱའི་བྱིན་རླབས་དང་། ཁྱོད་གསོལ་མཆོད་སྒྲུབ་བརྩོན་པའི་བདེན་པ་དང་། །(༡༥ན)
བདེན་པ་ཆེན་པོའི་མཐུ་དང་བྱིན་རླབས་ཀྱིས། །སངས་རྒྱས་བསྟན་འཇིག་འགྲོ་བའི་བདེ་སྐྱིད་འཕྲོག །ཡང་གསང་བཀའ་གཏེར་སྙིང་པོའི་བསྟན་པ་སྣུབ། ཁྱད་པར་སྔགས་འཆང་དཔོན་སློབ་རྒྱུ་སྦྱོར་ལ། །བྱད་མ་དུག་མཚོན་གཡུལ་འཁྲུག་ངན་གྲོས་མཁན། །བསམ་ངན་སྦྱོར་བ་རྩུབ་པའི་གཟུགས་ཅན་དགྲ། །ཚེ་ལ་རྐུ་ཞིང་སྲོག་ལ་རྣམ་པར་འཇབ། །ལུས་ལ་ན་ཚ་སེམས་ལ་སྡུག་བསྔལ་གཏོང་། །བསམ་པར་བར་དུ་གཅོད་པའི་གཟུགས་མེད་བགེགས། །སྨྱོ་འདྲེ་རྒྱལ་བསན་འགོང་པོ་དམ་སྲིའི་ཚོགས། །རྦད་འདྲེ་ལྷ་སྲིན་འབྱུང་པོ་མ་རུངས་ཀུན། ཁུ་གཅིག་བཛྲ་ཨངྐུ་ཤ་ཡ་ཛ། །སྐེ་ནས་ཆིངས་ཤིག་བཛྲ་པཱ་ཤ་ཧཱུཾ། །ཡན་ལག་སྡོམས་ཤིག་བཛྲ་སྥོ་ཊ་བཾ། །མྱོས་པར་གྱིས་ཤིག་བཛྲ་གྷཎྜེ་ཧོཿ ཕྱེ་ཞིག་བཛྲ་པྲ་བེ་ཤ་ཡ་ཕཊ། དབྱེར་མེད་བསྟིམ་ཞིག་ཨ་བེ་ཤ་ཡ་ཨཱཿ ཞེས་ལན་གསུམ་མམ་བདུན་སོགས་དགུག་གཞུག་བྱ། །དེ་ནས་བསྒྲལ་བ་ནི། ཧཱུཾ་རང་ཉིད་ཀརྨ་རྡོ་རྗེ་འབར་བ་རྩལ། །ཐབས་ཤེས་ལྕགས་ཀྱི་མདའ་གཞུར་བར་ཀང་ནས། །གནམ་ལྕགས་འབར་བའི་མདེའུ་དགྲ་བགེགས་ཀྱི། །སྙིང་ལ་འཕངས་ཏེ་སོད་ཅིག་ཤ་རེ་ཎ། །དར་ལྕེ་རླུང་གིས་བསྐྱོད་པའི་བ་དན་ཅན། །རྣོ་ངར་དབལ་དང་ལྡན་པ་རྣོན་པོའི་མདུང་། །གཟུགས་ཅན་དགྲ་དང་གཟུགས་མེད་བགེགས་ཚོགས་ཀྱི། །ལྟེ་བར་བསྣུན་ནོ་ཕུག་ཅིག་ཀུནྟེ་ན། །རང་ཉིད་ལྷ་ཆེན་ཚངས་པར་གནས་འགྱུར་བའི། །མི་བཟད་རྣོ་ངར་ལྡན་པའི་རལ་གྲི་ཡིས། །གནོད་བྱེད་དགྲ་དང་བགེགས་ཀྱི་ཡན་ལག་རྣམས། །ཚལ་པ་དུམ་བུར་གཏུམས་ཤིག་ཁཌྒེན། །རྩིབས་(༡༥བ)
སྟོང་གསེར་གྱི་འཁོར་ལོ་ཐོགས་མེད་དུ། །ཤུགས་དྲག་རབ་འཁོར་རྣོ་དཔལ་འབར་བ་ཡིས། །སྡང་བྱེད་དགྲ་དང་གནོད་བྱེད་བགེགས་རྣམས་ཀྱིས། །མགོ་ལ་བསྐོར་བས་འགེམས་སོ་ཙཀྲ་ཎ། །དགྲ་བགེགས་སྨྱོ་འདྲེ་དམ་སྲི་འབྱུང་པོའི་སྲོག་ལ་མཱ་ར་ཡ་ཕཊ། ཪྣྲི་ཏྲི་མཱ་ར་ཡ་སོད། ཅེས་དུམ་བུར་གཏུབས། །ལིང་རོར་བདུད་རྩི་བྲན་ལ། ཡོལ་མོ་བ་གསུམ་པས་མཛད། གདུག་བྱེད་དགྲ་བོ་མི་བསྲུན་དམ་ཉམས་ཀྱི། །གཟུགས་ཕུང་ཤ་ཁྲག་རུས་པ་ཀླད་ཚིལ་སྙིང་། །གློ་བ་རྒྱུ་མ་ནང་ཁྲོལ་རྐང་མར་དང་། །དངས་མ་ཆུ་བ་དབང་པོ་རྣམ་ལྔའི་ཚོགས། །བྷནྡྷ་ཡངས་པའི་སྣོད་དུ་ཡོངས་བསྐྱིལ་ནས། །རླུང་མེ་འབར་བའི་སྦྱོར་བས་སྐོལ་བྱས་ཤིང་། །འབྲུ་གསུམ་ཞུ་བའི་བདུད་རྩི་ཆེན་པོ་འདི། །སངས་རྒྱས་བསྟན་པ་བསྲུང་ཕྱིར་གུས་པས་འབུལ། །རབ་ཐོས་ལྷ་ཆེན་རྡོ་རྗེ་འབར་བ་རྩལ། །རྡོ་རྗེ་གཡུ་སྒྲོན་བདུད་མོར་ཁྲོས་པའི་གཟུགས། །འཇིགས་པའི་མི་བདུན་ལས་བྱེད་བཤན་པའི་ཚོགས། །སྤྲུལ་འཁོར་སྡེ་བརྒྱད་དྲེགས་པའི་ཚོགས་ཀྱིས་བཞེས། །མ་ཧཱ་མཾ་ས་རཏྐ་གོ་རོ་ཙ་ན་བ་སུ་ཧ་བོ་དྷི་ཙིཏྟ་ཀེ་མ་ནྲྀ་ཏི་ཨིནྡྲ་པཉྩ་ཁཱ་ཧི། ཞེས་འབུལ། ལྷག་མ་ལ་བདུད་རྩི་བྲན། ཡོལ་མོ་བ་གསུམ་པས་མཛད། ཨཱོཾ་ཨཱཿཧཱུཾ་གིས་བྱིན་གྱིས་བརླབས་ལ། རང་ལྷ་ཆེན་པོའི་ཏིང་ངེ་འཛིན་གྱིས། །ལྷག་ལ་དབང་བ་བྲན་དང་ཕོ་ཉའི་ཚོགས། །མཆོད་སྦྱིན་བཀའ་ཡི་ཕམ་ཕབ་འདི་ལོང་ལས། །གཙོ་བོའི་བཀའ་བཞིན་བཅོལ་བའི་འཕྲིན་ལས་རྣམས། །མ་ཐོགས་མྱུར་དུ་སྒྲུབ་པའི་ལས་མཛོད་ཅིག །མ་ཧཱ་བ་ལིནྟ་ཁཱ་ཧི། ནང་རྟེན་ནི། ཡོལ་མོ་བའི་གསུང་ལ་ཅུང་ཟད་བསྣན་པ། དཀར་གསུམ་གཙང་ཕྱེ་སྨན་(༡༦ན)
ཕུད་ཡོངས་སྦྱར་བར། །སྣ་ཚོགས་རྒྱན་གྱི་ཁྱད་པར་བཀོད་ལེགས་པ། །ཤེལ་མཁར་རིན་ཆེན་སྒོ་ལྕོག་འབར་བའི་དབྱིབས། །དམ་རྫས་གཏོར་མ་ནང་གི་རྟེན་དུ་འབུལ། །ཞེས་བརྗོད། གསང་བའི་བསྐང་བ་ནི་རབ་ཡོལ་མོ་བ་གསུམ་པས་མཛད། མཛེས་གསང་བའི་ཡུམ་ཆེན་གཡུ་སྒྲོན་མ། །འཛུམ་སྒེག་ཟུར་གྱིས་ལྟ་བའི་མི་གཡངས། མ། །ནུ་འབུར་རབ་མཐོ་རྐེད་སྐབས་རབ་ཕྲ་མ། །བརྒྱད་གཉིས་ལོན་འདྲའི་གཟུགས་བཟང་བདེ་སྦྱིན་མ། ཁྱུག་ཁྱུག་སྨིན་ལེགས་རི་མོར་བྲིས་འདྲ་ཞིང་། །སིལ་སིལ་དབུ་སྐྲའི་ལན་བུ་རྒྱན་ཏུ་གྲོལ། ཁྲོལ་ཁྲོལ་གསེར་གྱི་གདུ་བུ་རབ་འཁྲོལ་ཞིང་། །ལྷང་ལྷང་སྙན་པའི་གླུ་སྒྲ་ལེན་པས་བྲེལ། །སྔོ་བསངས་ལང་ཚོ་ལྡན་པའི་ལུས་ཀྱི་མཁའ། །མུ་ཏིག་རྒྱུ་སྐར་བྱེ་བས་རྣམ་བཀྲ་ཞིང་། །དར་ཟབ་རྣམ་ལྔའི་འཇའ་ཚོན་སྤེལ་ལེགས་ཀྱི། །སྨད་དཀྲིས་ཤམ་བུས་མཛེས་པ་དེང་འདིར་དྲན། །མ་མཆུའི་སྦྲང་རྩི་ཅི་ཡང་སྟེར་བྱེད་ཅིང་། །མཉེན་ལྕུག་དམ་པོར་འཁྱུད་པའི་ཕྱག་ཟུང་ལྡན། །ཟག་མེད་དགའ་བཞིའི་འདོད་འབྱུང་ཨུཏྤ་ལའི། །དྲི་ལྡན་མཁའ་དབྱིངས་གསར་པས་རྣམ་པར་མཚན། །ལྷ་མོ་ཁྱོད་ནི་ལྷ་ཆེན་དགྱེས་མཛད་དེ། །གཉིས་མེད་གསང་བའི་མཆོད་པ་འདི་འབུལ་གྱི། །ཟུང་འཇུག་ཡེ་ཤེས་ཆེན་པོའི་དགོངས་པ་ཡི། །བདེ་ཆེན་དགའ་བཞིའི་རོལ་པས་བཞེས་སུ་གསོལ། །མཧཱ་མུ་དྲ་པཱུ་ཙ་ཧེཿ གུ་ཧྱ་པཱུ་ཛ་ས་མ་ཡ་ཧོཿ གསང་བའི་རྟེན་ནི། ཡོལ་མོ་བ་གསུམ་པས་མཛད་པ། ཏིང་འཛིན་གསལ་བའི་དོན་མཚོན་མན་ཤེལ་དཀར། །དྲི་མེད་འོད་རྒྱུན་ཟད་མི་ཤེས་པའི་རྟེན། །རྣམ་པར་མི་རྟོག་ཐུགས་ཀྱི་དམ་རྫས་མཆོག །གསང་(༡༦བ)
རྟེན་ཡིད་བཞིན་ནོར་བུས་ཐུགས་དམ་བསྐང་། །དེ་ཁོ་ན་ཉིད་ཀྱི་བསྐང་བ་ནི། ཧཱུཾ། གདོད་གསར་བྲིས། ནས་དྲི་བྲལ་ངོ་བོ་ནམ་མཁའི་སྙིང་། །རང་བཞིན་ལྷུན་གྲུབ་འགག་པ་མེད་པའི་གདངས། །ཀུན་ཁྱབ་ལྷ་ཆེན་ངང་དུ་ངེས་རྙེད་པའི། །དོན་དམ་མཆོགགི་མཆོད་པས་ཐུགས་དམ་བསྐང་། །ཡོལ་མོ་བ་གསུམ་པས་མཛད། བདེ་གསལ་མི་རྟོག་དབྱིངས་རིག་དབྱེར་མེད་པ། །དུས་གསུམ་རྒྱལ་བ་རྒྱ་མཚོའི་བགྲོད་གཅིག་ལམ། །ལྷ་ཆེན་ཐུགས་ཀྱི་དགོངས་པ་ཟབ་ཞིའི་ངང་། །ཇི་བཞིན་མཉམ་པར་བཞག་པས་ཐུགས་དམ་བསྐང་། །རྩ་གསུམ་བསྐང་གསོ་བཏང་ནས་ཚོགས་ལ་རོལ། བསྟོད་པ་ནི། ཧཱུཾ། དཔལ་གཏེར་གཞུང་། ལྡན་ལྷ་ཡི་ལྷ་མཆོག་ཁྱེད། །འཛམ་གླིང་བྱང་ཕྱོགས་ཁ་བ་ཅན། ཁ་བ་ཅན་གྱི་བྱང་ལྗོངས་སུ། །ས་གཞི་ལྗང་སྔོན་རྩི་བཅུད་རྒྱས། །མེ་ཏོག་པདྨ་འོད་དུ་འཕྲོ། །གངས་དཀར་ཤེལ་གྱི་འཕྲེང་བས་བསྐོར། །ཡིད་འོང་མཚོ་ཆེན་མདངས་དང་ལྡན། །ཤེལ་མཁར་རིན་ཆེན་སྒོ་ལྕོག་འབར། །རྩ་བ་ཡིད་བཞིན་རྒྱ་མཚོས་བསྟེན། །རྐེད་པར་འཇའ་འོད་ན་བུན་འཐིབས། །རྩེ་མོར་དཀར་གསལ་དགོས་འདོད་ཀྱི། །རིན་ཆེན་ཆར་འབེབས་འབྲུག་སྒྲ་སྒྲོག །གཞལ་ཡས་དེ་ཡི་ནང་ཤེད་ན། །ཉི་ཟླ་པདྨ་རྟ་མཆོག་སྟེང་། །དམ་ཅན་རྡོ་རྗེ་འབར་བ་རྩལ། །སྐུ་མདོག་དཀར་ལ་ཁྲོ་འཛུམ་འགྱིང་། །ཕྱག་གཡས་རྡོ་རྗེའི་སྤ་ལྕག་འཕྱར། །གཡོན་པ་ཟླ་བའི་ཤེས་འཕྲེང་འདྲེན། །དར་དཀར་ཐོད་བཅིངས་དབུ་སྐྲའི་རྩེར། །ཡིད་བཞིན་ནོར་བུ་འབར་བས་བརྒྱན། །སྐུ་ལ་བེར་ཆེན་ཕྲུག་གསུམ་གསོལ། །གཞོན་མཛེས་ཡིད་འཕྲོག་རྒྱལ་པོའི་ཆས། །འོད་ཟེར་སྣ་ཚོགས་ཕྱོགས་(༡༧ན)
བཅུར་འཕྲོ། །མཆེད་འཁོར་སུམ་བརྒྱ་དྲུག་ཅུ་དང་། །དམག་དཔུང་བྱེ་བ་འབུམ་སྡེས་བསྐོར། །ཀུན་ཀྱང་ཁྲོ་གཏུམ་བརྗིད་པའི་གཟུགས། །དར་ཚོན་རོལ་མོས་ནམ་མཁའ་གང་། །བདེ་གཤེགས་སྟོང་གི་བསྟན་པ་བསྲུང་། །པདྨ་འབྱུང་གནས་བཀའ་བཞིན་བསྒྲུབ། །ཆོས་རྒྱལ་མངའ་རིས་བུ་བཞིན་སྐྱོང་། །དབུས་གཙང་རུ་བཞིའི་ཡུལ་ལྷ་མཛད། །རྗེ་དཔོན་ཡོངས་ཀྱི་དགྲ་ལྷར་གྱུར། །རྡོ་རྗེ་འབར་བ་རྩལ་ལ་བསྟོད། །ལྷ་ཆེན་ཡོངས་ཀྱི་རྗེ་བོར་བསྟོད། །དྲི་ཟའི་རྒྱལ་པོ་ཁྱོད་ལ་བསྟོད། །དེང་ནས་རིགས་འཛིན་མཆོག་ཐོབ་པར། །སྙན་པ་ནམ་མཁའི་འབྲུག་ལྟར་སྒྲོགས། །གྲགས་པ་གཟའ་སྐར་འོད་ལྟར་ཁྱེ། །དབུ་འཕང་རི་རྒྱལ་རྩེ་ལྟར་བསྟོད། །རིགས་བརྒྱུད་ཆུ་བོའི་རྒྱུན་ལྟར་སྤེལ། །དགོས་འདོད་དཔག་བསམ་ཤིང་ལྟར་སྩོལ། །སྡེ་བརྒྱད་དྲེགས་པ་བྲན་ལྟར་བཀོལ། །སྨྱོ་འདྲེ་རྒྱལ་པོ་རྡུལ་བཞིན་ཐུལ། །དམ་མེད་མནའ་ཟན་བགེགས་བཞིན་སྒྲོལ། །བདག་གི་ལུས་དང་གྲིབ་མ་བཞིན། །འགྲོགས་ནས་དངོས་གྲུབ་རྣམ་གཉིས་སྩོལ། །གསར་བྲིས། ཆོས་ཀྱི་དབྱིངས་ལས་ནམ་ཡང་གཡོ་མེད་དང་། །བརླང་པོར་སྤྱོད་པའི་ཡིད་སྲུབས་སྡེ་དཔུང་རྣམས། །འདུལ་ཕྱིར་ནམ་མཁའི་སྙིང་པོ་ལྷ་ཆེན་སྐུར། །སྟོན་མཛད་རྡོ་རྗེ་འབར་བ་རྩལ་ལ་བསྟོད། །ལྷ་བརྒྱད་གངས་རིའི་འཕྲེང་བས་བསྐོར་བའི་ལྗོངས། །རིན་ཆེན་རྒྱན་གྱིས་མཛེས་པའི་ཕོ་བྲང་དབུས། །པདྨ་ཉི་ཟླའི་སྟེང་ན་གར་དགུ་ཡིས། །རྣམ་རོལ་དྲི་ཟའི་རྒྱལ་པོ་ཁྱོད་ལ་བསྟོད། །ཤེལ་དཀར་ཞུན་མའི་ལྷུན་པོ་ཟླ་ཟེར་གྱིས། །འཁྱུད་འདྲའི་གཟུགས་སྐུས་ལྷ་ཡི་ཁེངས་པ་འཕྲོག །གནམ་(༡༧བ)
སྔོན་ཁུ་བས་བྱུགས་པའི་ཐོར་ཚུགས་རྩེར། །ཡིད་བཞིན་དབང་གི་རྒྱལ་པོས་མཚན་ལ་བསྟོད། །འཇའ་ལྟར་རྣམ་པར་བཀྲ་བའི་སྤྱན་དཀྱུས་རིང་། །སྨིན་ལེགས་གཡུ་ཡི་འཁྲི་ཤིང་མངོན་པར་འཁྱུག །ཅུང་ཟད་ཁྲོ་ཉམས་ཞི་ཆགས་མཆུ་སྒྲོས་འདབ། །འཛུམ་དབུས་ཚེམས་དཀར་ཟེའུ་འབྲུ་རྒོད་ལ་བསྟོད། །ཕྱག་གཡས་རྡོ་རྗེས་མཚན་པའི་སྦ་དཀར་ལྕག །ལྷ་ལམ་ངོས་འཕྱར་མ་བདུན་ལས་ལ་འགྱེད། །གཡོན་པ་ལེགས་ཉེས་རྩིས་སུ་འདྲེན་པ་ཡི། །མན་ཤེལ་བརྒྱ་རྩའི་འཕྲེང་བ་འཛིན་ལ་བསྟོད། །དམར་མཐིང་ཙེ་གོས་རིན་ཆེན་གསེར་སྐེད་བཅིངས། །གོས་དཀར་བེར་ཆེན་ལྡིང་སྟབས་ཚུལ་དུ་གསོལ། །པྲོག་ཞུ་སྙེན་མགུལ་གདུ་བུ་སེ་མོ་དོ། །དོ་ཤལ་གསེར་གའི་རྒྱན་གྱིས་སྤུད་ལ་བསྟོད། །ནོར་བུའི་སྒ་སྲབ་གོང་རྨེད་ཟ་འོག་གི །སྤུ་ལེན་ཟེ་ལོང་ཁེབས་མཛེས་ངང་དཀར་བཅིབས། །གོམ་འགྲོས་ལྷོད་པོར་རྒྱུ་སྟེང་ཕྱེད་སྐྱིལ་ཞབས། །རིན་ཆེན་ལས་གྲུབ་མཆིལ་ལྷམ་གསོལ་ལ་བསྟོད། །བདེ་སྟེར་གསང་ཡུམ་གཡུ་སྒྲོན་ནམ་མཁའི་མདོག །རྒྱལ་མཚན་མེ་ལོང་འཛིན་ཅིང་ལྷབ་ལྷུབ་གོས། །མཛེས་པའི་རྒྱན་འཁྲོལ་གཡུ་འབྲུག་སྟེང་བཞུགས་པའི། །ཡིད་འཕྲོག་སྨན་བཙུན་གནམ་མཚོའི་རྒྱལ་མོར་བསྟོད། །གནམ་ལྕགས་སྤུ་གྲིའི་རྭ་དང་མཆུ་སྡེར་ཅན། །སྟང་ཟིལ་མདོག་བཞིན་གནག་འཚེར་དབུ་དགུ་པ། །ཀྲིམ་ཀྲིམ་སྒྲ་ཡིས་ས་བདག་ཀླུ་གཉན་ཀླད། །འགེམས་བྱེད་གཙུག་ལྡིང་ཁྱུང་ཆེན་དབང་པོར་བསྟོད། །ཆོ་རིགས་མཚུངས་པའི་མཆེད་པོ་ལྷ་ཡི་བུ། །སྟོན་ཟླའི་མཛེས་པ་འཕྲོག་པའི་བཞིན་རས་ཅན། །ལས་སྒྲུབ་ཕོ་ཉར་འཁོར་གྱི་སྒྱུ་མའི་འཕྲུལ། །སྟོན་མཛད་སུམ་
བརྒྱ་དྲུག་ཅུའི་ཚོགས་ལ་བསྟོད། །གཡུ་སྨིན་ཐོར་ཙུགས་ལྷ་གཉན་ཁྱེའུ་དང་། །མི་དཀར་གཡས་གཡོན་མདུན་གྱི་དཔུང་སྣ་འདྲེན། །འཇིགས་རུང་ལྕགས་ཀྱི་མི་སྔོན་རྒྱབ་ཀྱི་རུ། །དྲངས་ནས་གཡུལ་ལས་རྣམ་པར་རྒྱལ་ལ་བསྟོད། །རྩི་སྨན་ལྗོན་ཤིང་དྲི་ངད་འཐུལ་བ་དང་། །ལྷན་ཅིག་ཀ་ལ་ཤ་ཡི་བདུད་རྩིའི་ཆུས། །བཀྲུས་ཚེ་བཞི་བརྒྱ་རྩ་བཞི་ལས་གྱུར་པའི། །ནད་ཀྱི་ཟུག་རྔུ་དྲུང་ནས་འབྱིན་ལ་བསྟོད། །རབ་འབར་ནོར་བུ་རིན་ཆེན་སྒྲོམ་བུ་ལས། །ལྷ་ཀླུ་གནོད་སྦྱིན་མི་ཡི་ལོངས་སྤྱོད་ཀྱི། །འཛད་མེད་མཆོད་སྦྱིན་ཆར་གྱིས་བཀྲེས་སྐོམ་སོགས། །དབུལ་བའི་དུཿཁ་ཕ་མཐར་མཛད་ལ་བསྟོད། །པདྨ་རཱ་གའི་བུམ་བཟང་འཁོར་འདས་ཀྱི། །སྲོག་གི་ཟུངས་གྱུར་བཅུད་ཀུན་འཁྱིལ་བའི་རྒྱུན། །སྦྱིན་པའི་མོད་ལ་འཆི་བ་མེད་པའི་ཚེ། །གྲུབ་པའི་རིགས་འཛིན་ས་ལ་སྦྱོར་དེར་བསྟོད། །མདུད་རྣོན་མཚོན་གྱིས་དགྲ་སྙིང་ཚལ་པ་རུ། །བཏང་བས་མ་ཚིམ་ཐོག་ཆེན་འབར་བའི་མདའ། །གནམ་ལྕགས་གཞུ་མོར་བཀང་ཚེ་སྲིད་པ་གསུམ། །འདར་བྱེད་དྲག་ཤུལ་བརྟུལ་ཞུགས་འཆང་ལ་བསྟོད། །སྐབས་གསུམ་བདག་པོའི་ལང་ཚོ་འཕྲོག་ནུས་པའི། །བཞིན་བཟང་སྐྱེས་བུ་གཞོན་ནུའི་རྣམ་འགྱུར་གྱིས། །ཆེ་མཉམ་ཚངས་པ་ལྷ་ཡི་མེ་ཏོག་གི །སྲུང་མའི་གཙོ་བོར་ཞལ་གྱིས་འཆེས་ལ་བསྟོད། །སྔོ་བསངས་རྭ་རྩེ་སྲིད་པའི་རྩེ་མོར་གདེངས། །རྨིག་པས་སྨྱོ་འདྲེ་ལ་སོགས་འབྱུང་པོ་བརྫི། ཁ་རླངས་ན་བུན་བཞིན་འཐུལ་འབྲུག་སྒྲ་ལྟར། །ངུར་བའི་འབྲོང་གཡག་ཞོལ་ཆེན་དཀར་པོར་བསྟོད། །བཏབ་པ་ཙམ་གྱིས་ཡིད་དབང་འཕྲོག་ནུས་པའི། །རབ་དམར་ལྕགས་(༡༨བ)
ཀྱུ་ཞགས་པའི་འཕྲུལ་ཆེན་པོས། ཁབ་ལེན་རྡོ་དང་ལྕགས་བཞིན་བརྟན་གཡོའི་དངོས། །འབད་མེད་དབང་དུ་བསྡུ་བར་མཛད་ལ་བསྟོད། །སིནྡྷུ་ཝཱ་རའི་མདངས་ཀྱིས་འཇིག་རྟེན་གསུམ། །ཟིལ་གནོན་བྲན་འཁོལ་རལ་གྲི་གསེར་འཁོར་གྱི། །རག་པའི་རྩ་ལག་འཐག་པའི་མཐུ་རྩལ་ལྡན། །ཚངས་པ་དུང་གི་ཐོར་ཚུགས་ཅན་ལ་བསྟོད། །མི་རབས་ཕྱུགས་དང་ལོངས་སྤྱོད་འཕུང་བའི་སྲི། །འདྲེ་ངན་འབྱུང་པོ་བྱ་དཀར་གཟུགས་སྤྲུལ་བ། །གནམ་ལྕགས་མཆུ་དང་སྡེར་མོས་ཐལ་ཕྱུང་དུ། །འབུགས་མཛད་སྤྲུལ་པའི་རྒྱ་ཁྲ་དཀར་པོར་བསྟོད། །སྨྱོ་འབོག་སྙིང་རླུང་རྒྱལ་གཟེར་དམུ་ཆུ་དང་། །འཁྲུག་སློང་གཏོང་བའི་ལྷ་མིན་གདོན་གྱི་སྙིང་། །རྣོན་པོའི་མཆེ་བ་བཏབ་ནས་ཁྲག་འཇིབ་པའི། །འཇིགས་རུང་ལྕགས་ཀྱི་སྡིག་པ་ནག་པོར་བསྟོད། །སྤུ་གྲིའི་མཆེ་གཙིགས་སྡེར་མོས་ས་གཞི་འདྲད། །མཇུག་མ་བརྡབས་པས་མེ་རླུང་འཚུབ་མ་གཡོ། །གློག་ལྟར་འཁྱུག་པས་སྟོང་གསུམ་སྐད་ཅིག་མ། །མྱུལ་མཛད་སྤྲུལ་པའི་དུང་སྤྱང་ཕོ་མོར་བསྟོད། །མདོག་དབྱིབས་ཆ་ལུགས་ཕྱག་མཚན་སྣ་ཚོགས་པ། །ཞི་རྒྱས་ཆགས་པའི་ཉམས་ཀྱི་རྣམ་འགྱུར་དང་། །མི་སྡུག་གཏུམ་པོ་ཕྱི་ནང་བར་གསུམ་དུ། །འཁོད་པའི་འཁོར་ཚོགས་དམ་ཅན་རྒྱ་མཚོར་བསྟོད། །འཕྲིན་ལས་འཆོལ་བ་ནི། ཡོལ་མོ་བ་གསུམ་པས་མཛད། པདྨ་ཐོད་འཕྲེང་རྒྱལ་བའི་སྤྱན་སྔ་རུ། །དམ་བཅས་ཞལ་བཞེས་ཐུགས་དམ་རྗེས་དགོངས་ལ། །རྣལ་འབྱོར་བདག་གིས་ཇི་ལྟར་བཅོལ་བའི་ལས། །མ་ལུས་ཡིད་བཞིན་འགྲུབ་པའི་ལས་མཛོད་ཅིག །སྐྱོ་བའི་འདྲེ་རྒོད་རྒྱལ་པོ་ཀུན་འདུལ་ཞིང་། །རྣམ་ཐོས་བུ་ཡི་བདོག་པས་ཡང་དག་འབྱོར། །སྔགས་(༡༩ན)
སྐྱེས་མུ་དྲ་དབང་དུ་འདུ་བ་དང་། །ཕས་རྒོལ་གཡུལ་ལས་རྒྱལ་བའི་ལས་མཛོད་ཅིག །འཆི་མེད་བདུད་རྩིའི་བཏུང་བས་ཡུན་དུ་འཚོ། །བྱད་མ་བན་བོན་གདུག་པའི་མཐུས་མི་བརྫི། །བསྟན་འཛིན་རིགས་བརྒྱུད་ཆུ་བོའི་རྒྱུན་ལྟ་བུ། །རང་གཞན་དོན་ཀུན་འགྲུབ་པའི་ལས་མཛོད་ཅིག །གནོད་བྱེད་དགྲ་སྡེར་ཐོག་སེར་ཆར་ལྟར་འབེབས། །གཏད་ཁྲམ་ལས་ཀྱི་སྡེ་དཔོན་སུམ་ཅུའི་ཚོགས། །བྲན་བཀོལ་མཛེ་ཕོལ་གཟེར་ཐབས་སྨྱོ་འབོག་དང་། །ནད་རིམས་དུ་མས་བསྟན་དགྲ་ཕུང་དུ་ཆུག །ལྷ་ཡི་ལྷ་མཆོག་ཁྱོད་འཁོར་ལྷ་ཆེན་བརྒྱད། །སྡེ་དཔོན་སུམ་ཅུ་སྡེ་བརྒྱད་བསྟན་མར་བཅས། །ལས་ལ་བཀོལ་ནས་སྲིད་གསུམ་ཟིལ་གནོན་ཅིང་། །གྲགས་འབར་ལས་བཞི་འགྲུབ་པའི་ནུས་ལྡན་མཛོད། །མཚན་ལྡན་ཐོད་པ་ཤེལ་ཕོར་ཅི་རིགས་པ། །འབྲས་དཀར་ཛ་གད་བཟང་པོས་ཡོངས་བཀང་བའི། །རྟེན་འབྲེལ་ཐབས་ཀྱིས་ལེགས་ཉེས་ཀུན་གསལ་ཞིང་། །གཟའ་རྒོད་གནོད་པ་ཞི་བའི་ལས་མཛོད་ཅིག །ཁྱད་པར་རྒྱལ་བས་གཉེར་གཏད་ཡོངས་འདུའི་བརྒྱུད། །དགུང་ལ་རེག་དང་བུ་བཞིན་སྐྱོང་བ་རུ། །དམ་བཅས་ཞལ་བཞེས་དུས་ལས་མི་གཡེལ་བར། །སྲུང་སྐྱོབ་ཡོངས་སུ་སྦ་བའི་ལས་མཛོད་ཅིག །སློབ་དཔོན་སྨོད་རྩོད་སྐུར་འདེབས་ཞེ་སྡང་བའི། །དམ་ཉམས་སློབ་བུ་མནའ་ཟན་སྐྱེ་བོའི་ཚོགས། །ལོག་འདྲེན་དགྲ་བགེགས་མ་ལུས་ཚར་བཅད་ནས། །བཀའ་གསུང་བསྟན་པ་རྒྱས་པའི་འཕྲིན་ལས་མཛོད། །གཏེར་གཞུང་། ང་ནི་དབང་དྲག་པདྨའི་སྲས། །ཉིད་ནི་ལྷ་ཆེན་འབར་བ་རྩལ། །སྔོན་གྱི་ཞལ་བཞེས་ཐུགས་དམ་དགོངས། །མཐུ་(༡༩བ)
དང་རྫུ་འཕྲུལ་སྟོབས་བསྐྱེད་ལ། །ནད་གདོན་བར་ཆད་མི་མཐུན་ཕྱོགས། །མ་ལུས་ཞི་བའི་འཕྲིན་ལས་མཛོད། །ཚེ་དང་བསོད་ནམས་ཕན་བདེའི་ཚོགས། །ཅིར་ཡང་རྒྱས་པའི་འཕྲིན་ལས་མཛོད། །སྣོད་བཅུད་འཁོར་དང་ལོངས་སྤྱོད་ཚོགས། ཁམས་གསུམ་དབང་སྡུད་འཕྲིན་ལས་མཛོད། །ལོག་ལྟ་གནོད་བྱེད་དགྲ་བགེགས་རྣམས། །ཚར་གཅོད་དྲག་པོའི་འཕྲིན་ལས་མཛོད། །སྙན་པར་བསྔགས་དང་གྲགས་པའི་ཚོགས། །ཕྱོགས་བཅུར་རྒྱས་པའི་འཕྲིན་ལས་མཛོད། །འགྲོ་ཀུན་སྨིན་གྲོལ་ལེགས་ལམ་སྟོན། །དོན་གཉིས་མཐར་ཕྱིན་འཕྲིན་ལས་མཛོད། །བསྐུལ་བ་ནི། ཧཱུཾ་ཧཱུཾ་ཧཱུཾ། གཏེར་གཞུང་། བཞུགས་ཡུལ་འདམ་ཤོད་སྣར་མོ་ནས། །ཡ་ཞུར་གཉན་པོ་སྐུ་བཞེངས་ཤིག །བླ་མཚོ་འཁྱིལ་བའི་ནང་ཤེད་ནས། །གཉན་ཆེན་ཐང་ལྷ་སྐུ་བཞེངས་ཤིག །བྲག་དཀར་གཉན་པོའི་རྩེ་མོ་ནས། །དྲི་ཟའི་རྒྱལ་པོ་སྐུ་བཞེངས་ཤིག །གངས་དཀར་མཐོན་པོའི་རྩེ་མོ་ནས། །ཡུལ་ལྷ་ཆེན་པོ་སྐུ་བཞེགས་ཤིག །སྤྲིན་དང་ན་བུན་གསེབ་ཤེད་ནས། །ཟུར་ཕུད་ལྔ་པ་སྐུ་བཞེངས་ཤིང་། །སྡང་བའི་དགྲ་འདུལ་སྐུ་བཞེངས་ཤིག །གནོད་པའི་བགེགས་འདུལ་སྐུ་བཞེངས་ཤིག །སྨྱོ་བའི་འདྲེ་འདུལ་སྐུ་བཞེངས་ཤིག །སྤྲུལ་པའི་ཚུལ་དུ་སྐུ་བཞེགས་ཤིག །སྤྲུལ་པ་འཇིགས་པའི་ལུས་པོ་དེ། །ལྷ་གཡག་དཀར་པོ་ཞིག །དུང་རུ་གནམ་དུ་དབྱུག །དུང་རུ་དཀར་པོ་ཞིག །གནམ་གྱི་བདུད་ལ་བསྒྱུར། །ནང་གི་གོད་ཁ་བསྒྱུར། །རྨིག་བཞིས་ལ་འཁྲབ། །དུང་རྨིག་དཀར་པོ་ཡིས། །ལྷ་སྲིན་ཉལ་ཐག་ཆོད། །རྔ་མ་དལ་ཁར་དབྱུག །རྔ་དཀར་སྤྲུགས་པ་ཡིས་(༢༠ན)
ལྷ་བཙན་བྲན་དུ་འཁོལ། །ངར་སྐད་ཐེངས་གསུམ་ངར། ཁམས་གསུམ་དབང་དུ་སྡུད། །རུ་གསིགས་ལན་གསུམ་སྤྲུགས། །སྲིད་གསུམ་དབང་དུ་སྡུད། །མཐོ་མཐོ་གོང་གསུམ་ནས། །དུང་ཁྲ་མེལ་ཚེ་བཞིན། །དུང་ཁྲ་དཀར་པོ་ཞིག །ལ་ཉེ་ཁྲིལ་ལི་ལི། །རོང་དང་འཕྲང་སྒོ་ནས། །དུང་སྤྱང་དཀར་པོ་ཞིག །དགྲ་བོའི་བླ་ལ་རྒྱུག །དྲག་ཏུ་བསྐུལ་བའི་ཚེ། །སྡང་བའི་དགྲ་བོ་གསད། །གནོད་པའི་བགེགས་རྣམས་ཐུལ། ཨཱོཾ་བཛྲ་ཀྲོ་ཏ་ན་ཤི་ལི་མི་ལི་དུ་བགེགས་མཱ་ར་ཡ་ཕཊ། ཧཱུཾ། ཡང་གཅིག་ནག་པོ་ཏི་པ་ར་ཙ་ཁྱོད། །བྱང་ཕྱོགས་རྒྱུད་དུ་ཆེ་བའི་སྐུར་སྟོན་པ། །གཉན་ཆེན་ཐང་ལྷ་ཞེས་སུ་མཚན་ཡང་གསོལ། །དམ་རྫས་རྒྱན་པའི་གཏོར་མ་འདི་བཞེས་ལ། །བདག་ཅག་རིགས་འཛིན་འཁོར་དང་བཅས་པ་ཡི། །ཆོས་རྒྱལ་རཏྣ་གླིང་པའི་དྲག་དམར་ཆོས་སྡེ་ལས་བྱུང་བ། མི་མཐུན་རྐྱེན་སོལ་མཐུན་རྐྱེན་བསམ་པ་སྒྲུབས། །སྐྱིད་ཤོད་ཀླུང་དུ་ཆེ་བའི་སྐུར་སྟོན་པ། །གཉན་ཆེན་མཁར་ནག་ཅེས་སུ་མཚན་ཡང་གསོལ། །དམ་རྫས་རྒྱན་གྱི་གཏོར་མ་འདི་བཞེས་ལ། །བདག་ཅག་རིགས་འཛིན་འཁོར་དང་བཅས་པ་ཡི། །མི་མཐུན་རྐྱེན་སོལ་མཐུན་རྐྱེན་བསམ་པ་སྒྲུབས། །ཕོ་མོ་རྫིང་རིང་ཕྱོགས་སུ་ཆེ་བའི་སྐུར་སྟོན་པ། །ཀླུ་བདུད་མགོ་དགུ་ཞེས་སུ་མཚན་ཡང་གསོལ། །དམ་རྫས་རྒྱན་གྱི་གཏོར་མ་འདི་བཞེས་ལ། །བདག་ཅག་རིགས་འཛིན་འཁོར་དང་བཅས་པ་ཡི། །མི་མཐུན་རྐྱེན་སོལ་མཐུན་རྐྱེན་བསམ་པ་སྒྲུབས། །ལྷོ་སྟོད་དབུ་རུའི་ཕྱོགས་སུ་ཆེ་བའི་སྐུར་སྟོན་པ། །སྐུ་ལ་མཁའ་རི་ཞེས་སུ་མཚན་ཡང་གསོལ། །དམ་རྫས་རྒྱན་གྱི༝། །(༢༠བ)
བདག་ཅག་རིགས་འཛིན༝། །མི་མཐུན་རྐྱེན་སོལ༝། །སྒོ་ཆུ་ལྷ་རྒྱབ་ཕྱོགས་སུ་ཆེ་བའི་སྐུར་སྟོན་པ། །བདུད་པོ་ཟླ་བའི་གདོང་ཅན་ཞེས་སུ་མཚན་ཡང་གསོལ། །དམ་རྫས་རྒྱན་གྱི༝། །བདག་ཅག་རིགས་འཛིན༝། །མི་མཐུན་རྐྱེན་སོལ༝། །མོན་ཁ་རིང་མོའི་ཕྱོགས་སུ་ཆེ་བའི་སྐུར་སྟོན་པ། །བདུད་པོ་བཀྲག་མེད་ཅེས་སུ་མཚན་ཡང་གསོལ། །དམ་རྫས་རྒྱན་གྱི༝། །བདག་ཅག་རིགས་འཛིན༝། །མི་མཐུན་རྐྱེན་སོལ༝། །སེང་གེ་རྫོང་གསུམ་ཕྱོགས་སུ་ཆེ་བའི་སྐུར་སྟོན་པ། །ཟུར་ར་ཟུར་སྐྱེས་ཞེས་སུ་མཚན་ཡང་གསོལ། །དམ་རྫས༝། །བདག་ཅག༝། །མི་མཐུན༝། །ལྷོ་བྲག་མཁར་ཆུའི་ཕྱོགས་སུ་ཆེ་བའི་སྐུར་སྟོན་པ། །དགེ་བསྙེན་སྙོན་ཁ་ཞེས་སུ་མཚན་ཡང་གསོལ། །དམ་རྫས་རྒྱན་གྱི་གཏོར་མ་འདི་བཞེས་ལ། །བདག་ཅག་རིགས་འཛིན་འཁོར་དག་བཅས་པ་ཡི། །མི་མཐུན་རྐྱེན་སོལ་མཐུན་རྐྱེན་བསམ་པ་སྒྲུབས། །ནག་པོ་ཏི་བར་ཙ་ནཱ་ག་རཀྴ་ཀྲོ་ཏ་པ་ཙ་ལ་དགྲ་བགེགས་ཀྱི་ཤ་ཁྲག་རུས་པ་ལ་རྦད་རྦད། ཅེས་ལན་བདུན་བརྗོད། ཐུན་གཏོར་ལ་ཆབ་སྤྲན་ལ། ཧཱུཾ། གཏེར་གཞུང་། གཡས་རུ་རི་རྒྱལ་བཀྲ་བཟང་རྩེར། །རིགས་འཛིན་རྡོ་རྗེ་དྲག་པོ་རྩལ། །བཀའ་ཉན་ལྷ་སྲིན་ཀུན་འདུས་ཆེ། ཁྲི་སྲོང་ལྡེའུ་བཙན་སྐུ་ལྷ་ཁྱེད། །ལྷ་བྲག་ཐུགས་གཏེར་བདག་པོར་བསྔགས། །རྫོགས་པ་ཆེན་པོའི་རྣལ་འབྱོར་སྐྱོང་། །སྙིགས་དུས་རྒྱལ་འགོང་དམ་སྲི་ཡི། །གཉེན་པོ་སྲོག་གི་གཤེད་མར་བསྐོས། །རྒྱལ་བའི་བསྟན་པ་གུས་མཆོད་ཅིང་། །དཀར་ཕྱོགས་སྐྱོང་བའི་ལས་ལ་བརྩོན། །གུས་པས་བསྟེན་ལ་སྙིང་ཉེ་ཞིང་། །མགོན་སྐྱབས་དཔུང་གཉེན་མི་(༢༡ན)
འབྲལ་བསྲུང་། །མདོར་ན་བདག་སོགས་འཁོར་བཅས་ཀྱི། །བྱང་ཆུབ་སྒྲུབ་ལ་གེགས་མེད་ཅིང་། །བསམ་དགུ་ཆོས་བཞིན་འགྲུབ་པ་དང་། །འདོད་དགུ་ཡིད་བཞིན་འབྱུང་བ་ཡི། །མཆོག་ཐུན་དངོས་གྲུབ་མ་ལུས་རྣམས། །འབད་མེད་ལྷུན་གྲུབ་འཕྲིན་ལས་མཛོད། །ཡང་ཐོག་ཏུ་མཆོད་གཏོར་སྤྱན་གཟིགས་དང་གཞན་ཡང་རྟེན་འདོགས་རྣམས་གཞུང་བཞིན་བཤམ། མཆོད་རྫས་རྣམས་དཀྱུས་ལྟར་བྱིན་གྱིས་བརླབ། ཡེ་ཤེས་གཞལ་ཡས་བསྐྱེད་ཀྱི་རྒྱ་མ་ཆུང་། ཞེས་པ་ནས། ས་མ་ཡ་ཛཿཛཿས་སྤྱན་དྲངས། སྭཽ། བོད་ཡུལ་ཕྱོགས་བཞི་དབུས་དང་ལྔ། །འཛམ་གླིང་ས་ཡི་དབུས་ཕྱོགས་ན། །ལྷ་རི་ཆགས་པ་གངས་དཀར་རི། །གངས་དཀར་ཤེལ་འོད་འབར་བའི་གནས། །རྩེ་ལ་ན་བུན་ཐིབས་སེ་ཐིབ། །ལོགས་ལ་འདབ་ཆགས་སྟོངས་སེ་སྟོང་། གཏེར་སྟོན་གྱིས་མཛད་པ། ཟུར་ལ་གཅན་གཟན་ཁྲལ་ལ་ལ། །རྩ་བར་གཡུ་མཚོ་ཁྱིལ་ལི་ལི། །འཛམ་གླིང་ཤར་ནས་བལྟས་ཙ་ན། །ཤེལ་གྱི་མཎྜལ་བརྩེགས་པ་འདྲ། །འཛམ་གླིང་ལྷོ་ནས་བལྟས་ཙ་ན། །ཟ་འོག་ཡོལ་ཆེན་འཐེན་པ་འདྲ། །འཛམ་གླིང་ནུབ་ནས་བལྟས་ཙ་ན། །དུང་གི་གུར་དཀར་ཕུབ་པ་འདྲ། །འཛམ་གླིང་བྱང་ནས་བལྟས་ཙ་ན། །དུང་སེང་གནམ་དུ་མཆོང་བ་འདྲ། །རྩེ་ལྔ་ནམ་མཁའི་མཐོངས་སུ་གསལ། །ཤེལ་འདྲ་གུར་ཁང་རྩེར་རེ་རེ། །རྨང་གཞི་དོག་མོའི་དཀྱིལ་ན་གནས། །འབྱུང་པོའི་ཚོགས་རྣམས་སྐྱིལ་ལི་ལི། །རྐེད་པ་གཡུང་དྲུང་གླིང་དགུར་གནས། །སྡེ་བརྒྱད་སྲོག་འཁོར་སྒོར་རོ་རོ། །དེ་འདྲའི་གཞལ་(༢༡བ)
ཡས་དམ་པ་ན། །སུ་བཞུགས་དེ་ནི་སུ་མི་བཞུགས། །དེ་ན་རྗེ་ཡི་སྐུ་ལྷ་གཉན་པོ་བཞུགས། །ཟུར་ཕུད་ལྔ་པ་འཁོར་བཅས་བཞུགས། །དེ་ན་ཇོ་བོ་གཉན་ཆེན་ཐང་ལྷ་བཞུགས། །མི་དཀར་གཡུ་ཡི་སྨིན་མ་ཅན། །དར་དཀར་བེར་ཆེན་སྐུ་ལ་གསོལ། །རིན་ཆེན་རྒྱན་ཆ་དུ་མས་བརྒྱན། །སྟག་རལ་གཡས་ལ་གཟིག་ཤུབས་གཡོན། །སྐུ་ཡི་ཆས་ནི་མཛེས་སྡུག་འོད་དུ་འབར། །ཐོག་རྒོད་གཏུམ་པོས་ཁམས་གསུམ་ཟིལ་གྱིས་གནོན། །ལས་ཀྱི་ཤོག་མདས་དགྲ་བགེགས་སྲོག་དབུགས་འདྲལ། །ལྕགས་ཀྱི་རལ་གྲིས་དགྲ་བགེགས་མགོ་ལུས་གཅོད། །བར་སྣང་ཁམས་ནས་གར་གཤེགས་ཐོགས་པ་མེད། །ཐང་ལྷ་གཉན་སྲས་སྐུ་ལ་བསྟོད་པ་འབུལ། །མཛེས་པའི་ཟུར་ཕུད་ལྔ་པོས་སྐུ་ལ་བརྒྱན། །གསེར་གྱི་སྦ་ལྕག་གཡུ་ཡི་ལྕག་འབྲས་ཅན། །ལན་གསུམ་ཀླད་དབྱུགས་ཆིབས་པར་དྲག་ཏུ་བརྒྱབ། །ཐང་ལྷ་གཉན་སྲས་སྐུ་ལ་བསྟོད་པ་འབུལ། །ངང་དཀར་ཞུར་པོས་གར་བསམས་ཡུད་ཀྱིས་ཕྱིན། །འཇིགས་པའི་བྱ་ཁྱུང་དབུ་ཡི་གཙུག་ན་ལྡིང་། །ས་བདག་ཀླུ་གཉན་ལས་ཀྱི་ཕོ་ཉར་འགྱེད། །ཀླུ་རྒྱལ་ཐོད་དཀར་སྐུ་ལ་བསྟོད་པ་འབུལ། །རྣལ་འབྱོར་བདག་གིས་བསྟོད་ཅིང་མཆོད་ཕུལ་བས། །སྟག་སེང་དོམ་དྲེད་རྔམ་འཇིགས་དགྲ་ལ་སྟོན། །བསྟོད་ཅིང་བསྐུལ་བས་གཡེལ་བ་མ་མཛད་ཅིག །ཚུར་གཤེགས་བདག་གིས་བཅོལ་བའི་འཕྲིན་ལས་མཛོད། གཏོར་མ་དཀར་གསུམ་དངར་གསུམ་གྱི་སྟེང་དུ། །འབྲུ་གསུམ་ཨོཾ་ཨཱཿཧཱུཾ་འོད་དུ་ཞུ་བ་ལས་གྲུབ་པ། འདོད་དགུ་འབྱུང་བའི་རྒྱ་མཚོ་ཆེན་པོར་གྱུར་པ་འདི། །ལྷ་ཆེན་རྡོརྗེ་འབར་བ་རྩལ་འཁོར་(༢༢ན)
དང་བཅས་པའི་ཞལ་དུ་ཨཱོཾ་བཛྲ་ཐང་ཀ་ར་ས་པ་རི་ཝ་ར་མཧཱ་བྷ་ལིཾ་ཏ་ཁ་ཁ། ཁཱ་ཧི་ཁཱ་ཧི། ཨོཾ་ཨཱཿཧཱུཾ། ཞེས་པ་བདུན་གྱིས་ཕུལ་བས་དགྱེས་པའི་ཚུལ་དུ་བསྒོམ། དེ་ནས་ཡང་འཁོར་ཚོགས་ལ་གཏོར་མ་ཟུར་གསུམ་མཐོ་གང་པ་བརྒྱད་དམ་བཅུ་གཉིས། བཅུ་དྲུག་གི་རྩེ་ལ་རྒྱན་གྱིས་བརྒྱན་པ། གསུར་དུད་བསངས་དུད་ཤིན་ཏུ་ཆེ་བ། ཆང་ཕུད། འོ་ཕུད། ཞོ་ཕུད་དང་བཅས་ཏེ་འདི་སྐད་དོ། །སྭཽ། སྐུ་ལྷ་གཡས་ཀྱི་རུ་འདྲེན་པ། །ལྷ་གཉན་གཡུ་ཡི་སྨིན་མ་ཅན། །སྐུ་ལྷ་གཡོན་གྱི་རུ་འདྲེན་པ། ཁྱེའུ་ཆུང་གཡུ་ཡི་ཟུར་ཕུད་ཅན། །སྐུ་ལྷ་མདུན་གྱི་རུ་འདྲེན་པ། །མི་དཀར་གཡུ་ཡི་ཐོར་ཅོག་ཅན། །སྐུ་ལྷ་རྒྱབ་ཀྱི་རུ་འདྲེན་པ། །ལྕགས་ཀྱི་མི་སྔོན་འཇིགས་པ་བརྒྱ། །འདིར་སྤྱོན་ཕུད་དང་གཏོར་མ་བཞེས། །བཅོལ་བའི་འཕྲིན་ལས་གྲུབ་པར་མཛོད། ཁབ་ནི་གནམ་མཚོ་ཕྱུག་མོ་སྟེ། །སྨན་མོ་གཡུ་ཡི་ཐུལ་པ་ཅན། །གསེར་གཡུ་སྤེལ་མའི་ཟུར་ཕུད་ཅན། །སྐུ་ལ་དར་དཀར་ཐུལ་པ་གསོལ། །ཕྱག་ན་དངུལ་དཀར་མེ་ལོང་བསྣམས། །ཆིབས་སུ་ཆུ་རྟ་སྔོན་པོ་བཅིབས། །སྲས་ནི་ཐང་སྲས་མཆོར་བ་སྟེ། །མི་དཀར་གཡུ་ཡི་སྨིན་མ་ཅན། །སྐུ་ལ་དར་དཀར་ལའུ་གསོལ། །ལྕམ་ནི་འབྲི་རྗེ་གང་བཟང་མ། །དཀར་མོ་གཡུ་ཡི་ཐུལ་པ་ཅན། །ནང་བློན་ཕྱི་བློན་སྒོ་བར་བཅས། །ཕྱག་བརྙན་འཁོར་དང་བཅས་རྣམས་བསྒྲུབ། །བསྐུལ་ལོ་འཁོར་བཅས་མ་གཡེལ་ཞིག །བསྐུལ་ཅིང་རྦད་ན་གཉན་སྲས་མཐུ་མ་ཆུང་། །ཐང་ལྷ་གཉན་སྲས་འཁོར་བཅས་ལ། ཕྱི་ཡི་མཆོད་པ་འབྲུ་ཡི་གཡག་ལུག་དང་། །(༢༢བ)
ནང་གི་མཆོད་པ་གསེར་གཡུ་ཆང་དང་སྦྱར། །ཞལ་ཟས་རྟེན་དུ་འབྲུ་ཡི་གཡག་པོ་འབུལ། །ཐང་ལྷ་གཉན་སྲས་འཁོར་བཅས་རྣམས། །རིན་ཆེན་གསེར་གྱིས་ཐུགས་དམ་བསྐང་། །སྒྲ་དབྱངས་རོལ་མོས་ཐུགས་དམ་བསྐང་། །རྟེན་རྫས་ཚང་མས་ཐུགས་དམ་བསྐང་། །ལྷ་གཡག་དཀར་པོས་ཐུགས་དམ་བསྐང་། །དམར་རྩ་ལུག་གིས་ཐུགས་དམ་བསྐང་། །རྔོན་ཆ་ཚང་མས་ཐུགས་དམ་བསྐང་། །རྒྱན་གྱི་གཏོར་མས་ཐུགས་དམ་བསྐང་། །བདུད་རྩི་སྨན་གྱིས་ཐུགས་དམ་བསྐང་། །ཛ་གད་ཕུད་ཀྱི་ཐུགས་དམ་བསྐང་། །གདུང་བའི་དབྱངས་ཀྱིས་ཐུགས་དམ་བསྐང་། ཁྱེད་ཀྱི་ཐུགས་དམ་བདག་གིས་བསྐང་། །བདག་གིས་བཅོལ་བའི་འཕྲིན་ལས་མཛོད། །དེ་ལྟར་མཆོད་ཅིང་བསྐང་བ་ཡིས། །བདག་སོགས་དགོན་གནས་རྒྱུ་སྦྱོར་གྱི། །མགོན་སྐྱབས་དཔུང་གཉེན་ཁྱེད་ཀྱིས་མཛོད། །བཅོལ་བའི་འཕྲིན་ལས་བསྒྲུབ་པ་དང་། །བསྒྲུབས་ཤིང་བསྟན་པ་བསྲུང་དུ་གསོལ། །སྭཱཽ། ལྷ་རྒྱལ་ལོ། །གཡག་ལུག་ཕུལ་བའི་ཡོན་ཏན་གྱིས། །ནོར་ལ་གོད་ཁ་མེད་པ་དང་། །གླིང་སྟོད་རྟ་རའི་བདག་པོ་མཛོད། །གླིང་སྨད་ལུག་རའི་བདག་པོ་མཛོད། །གཡག་དང་མཛོ་ཡི་བདག་པོ་མཛོད། །ནོར་ལ་འཕེལ་བ་ཁྱེད་ཀྱིས་མཐོང་། །ཅི་བསམས་འགྲུབ་པའི་འཕྲིན་ལས་མཛོད། །སྭཱཽ། ལྷ་རྒྱལ་ལོ། །རྟེན་འདོགས་ནི། ཡོལ་མོ་བ་གསུམ་པས་མཛད། ཧཱུཾ། ཅང་ཤེས་རྟ་མཆོག་གསེར་སྒོ་དངུལ་སྲབ་ཅན། །སྣ་ཚོགས་དར་ཟབ་བཟང་པོས་རབ་མཛེས་པ། །གཡང་ལྡན་གསང་ལུག་གངས་རི་ལྟ་བུར་འཚེར། །བག་ཕེབས་དལ་ཁུར་རྒྱུ་དང་འགྲོ་བའི་སྟབས། །ཟླ་ཤེལ་ཞུན་(༢༣ན)
མས་བྱུགས་ལྟར་རབ་དཀར་བའི། །མཁའ་ལྡིང་འདབ་ཆགས་སྙན་པའི་སྐད་གསང་ཅན། །སྤྲིན་དཀར་ཕུང་པོ་ལྟ་བུའི་ལྷ་གཡག་ཆ། །རྡོ་རྗེའི་ར་དང་རྔ་ཡབ་དཀར་པོ་ཅན། །ཀུན་ཀྱང་དར་ཟབ་དྲིལ་བུ་གཡེར་ཁ་དང་། །མུ་ཏིག་བཟང་པོའི་འཕྲེང་བས་རབ་མཛེས་པ། །ཕྱི་རྟེན་མཛེས་པའི་འགྲོ་ཚོགས་འདི་དག་གིས། །ལྷ་ཆེན་འཁོར་བཅས་ཐུགས་དམ་སྐོང་གྱུར་ཅིག །གཡས་རུ་ང་རྒྱལ་བཀྲ་བཟང་རྩེར། །ཞེས་སོགས་བྱ། མངའ་གསོལ་ནི། ཡོལ་མ་བ་གསུམ་པས་མཛད། ལྷ་དབང་ཀླུ་བདག་ལངྐའི་རྒྱལ་བ་སོགས། །སྲིད་གསུམ་དབང་ཕྱུག་ཀུན་གྱིས་མདུན་བདར་ནས། །མཆོད་སྤྲིན་རྒྱ་མཚོས་སྲི་ཞུར་བཅས་མཆོད་པའི། །ལྷ་ཆེན་རྡོ་རྗེ་འབར་བ་རྩལ་ལ་བསྟོད། །རྣམ་པར་རྒྱལ་བའི་ཁང་བརྩེགས་ལས་རྒྱལ་བའི། །རིན་ཆེན་ཤེལ་གྱི་སྐུ་མཁར་ཟླ་བའི་ཕྱིར། །བ་གམ་ནོར་བུའི་འོད་ཚོགས་རབ་རྒྱས་པས། །ཞིང་ཁམས་རྒྱ་མཚོའི་གོ་སྐབས་ཡང་དག་གྲགས། །རྩ་བ་ཡིད་བཞིན་འབྱུང་གནས་ཡིད་བཞིན་གྱིས། །བར་མེད་རབ་རྫོགས་རྐེད་སྐབས་མཚོན་ལྔས་མཛེས། །ཛམྦཱུ་ནཱ་དའི་རྒྱ་ཕུབས་ཆེས་འབར་བའི། །རྩེ་མོ་རིན་ཆེན་ཆར་འབེབས་ཆུ་འཛིན་དཀྲིགས། །དུས་གསུམ་རྒྱལ་བའི་ཆོ་འཕྲུལ་དག་ལས་བཞིན། །རྒྱ་ཆེ་བཀོད་པའི་ཁྱད་པར་རྒྱ་ཆེ་བའི། །ཕོ་བྲང་སྲིད་རྩེའི་གུང་ན་མངོན་མཐོའི་རྩེ། །ཡིད་བཞིན་རྒྱལ་མཚན་གསར་པས་མངའ་གསོལ་ལོ། །དཔག་ཡས་ཞིང་གི་རྡུལ་སྙེད་རབ་འབྱམས་ཞིང་། །སྐད་ཅིག་མྱུལ་བའི་འགྲོས་ལྡན་ལྷ་རྟ་དཀར། །རྒྱུ་སྐར་བདག་པོའི་དྲེགས་འཇོམས་རྒྱན་ལྡན་པ། །ལྷ་ཆེན་ཆིབས་ཀྱི་དམ་པར་མངའ་(༢༣བ)
གསོལ་ལོ། །ཀ་ཙ་ལིནྡའི་བེར་ཆེན་སུམ་བརྩེགས་པས། །མཛེས་འཛུམ་རླབས་ཀྱི་གཟུགས་བརྙན་བགོ་འོས་པ། །འཇམ་མཉེན་རེག་བྱའི་ཁྱད་པར་རྨད་བྱུང་བའི། །རབ་མཛེས་ལྷ་ཡི་ན་བཟའ་མངའ་གསོལ་ལོ། །ནོར་བུའི་མཆིལ་ལྷམ་གསེར་གྱི་སྐ་རགས་འབར། །ག་བུར་དོ་ཤལ་རིན་ཆེན་སེ་མོ་དོ། །མུ་ཏིག་འབྲས་ཆགས་ནོར་བུའི་སྙན་ཆ་གསོལ། །མཛེས་བྱེད་རྒྱན་གྱི་དམ་པས་མངའ་གསོལ་ལོ། །གསེར་པད་གཡུ་ཡི་ཡལ་འདབ་མཛེས་པའི་ཁོངས། །རྣམ་མང་འོད་ཀྱི་གེ་སར་རབ་རྒྱས་པ། །སྤེལ་ལེགས་འཕྲེང་བ་བསྟར་པའི་ཅོད་པན་འདི། །སྐྲ་མཚམས་མཛེས་པའི་རྒྱན་དུ་མངའ་གསོལ་ལོ། །བརྒྱ་བྱིན་ཐོགས་པའི་ནོར་བུ་ལས་ལྷག་ནོར། །བཀྲ་ཤིས་དམ་པ་ཀུན་གྱིས་བཀྲ་ཤིས་པར། །རྒྱལ་བས་རབ་བསྔགས་གཡས་སུ་འཁྱིལ་བའི་དུང་། །ཐོར་ཚུགས་མཛེས་པའི་རྒྱན་དུ་མངའ་གསོལ་ལོ། །རྩེ་མོར་ཟུར་ཕུད་ལྔ་བཅིངས་རལ་པའི་ཁྱོན། །བུང་བ་སྟང་ཟིལ་མིག་སྨན་ལྟར་སྣུམ་པའི། །རྩ་ཆིངས་བཀྲ་ཤིས་རི་མོས་རྣམ་བཀྲ་བའི། །དར་དཀར་དྲི་མེད་ལྭ་བས་མངའ་གསོལ་ལོ། །མྱུར་མགྱོགས་རྫུ་འཕྲུལ་ཤུགས་ལྡན་བཱ་ལ་ཧར། །སྐུལ་བྱེད་ཕྱག་ཆའི་ཁྱད་པར་མི་འཚལ་ཡང་། །མ་བདུན་ལས་ལ་བསྐུལ་བའི་འཕྲུལ་ཆེན་པོ། །སྦ་ལྕག་རྡོ་རྗེས་མཚན་པས་མངའ་གསོལ་ལོ། །ཆ་ཤས་རབ་རྫོགས་ཟླ་བའི་སྤུན་ཟླ་ཞེས། །བདུད་རྩིས་བྲན་པའི་ཐིགས་མ་དངོས་གྲུབ་ལྟར། །ཟད་མི་ཤེས་འབབ་ནོར་བུའི་ཤེལ་འཕྲེང་འདི། །ཐུགས་དམ་དབྱིངས་སུ་ལོ་ཕྱིར་མངའ་གསོལ་ལོ། །དར་ཟབ་སྤྱན་གཟིགས་མང་པོས་ས་བླའི་ཁོངས། །བརྒྱ་བྱིན་གཞུ་ཡི་དྲ་བས་མཛེས་བྱས་ཤིང་། །སྙན་བརྗིད་དཔའ་བའི་(༢༤ན)
ཉམས་ལྡན་འབོད་པའི་དབྱངས། །སྣ་ཚོགས་རོལ་མོར་བཅས་པས་མངའ་གསོལ་ལོ། །གཙང་མའི་ཞལ་ཟས་ལ་སོགས་འདོད་ཡོན་ལྔ། །ལྷ་ཀླུ་མི་དང་གནོད་སྦྱིན་ཐམས་ཅད་ཀྱི། །དཀོན་ནོར་མ་ཚང་མེད་སྤུངས་ནོར་འཛིན་མའི། །ཕང་བ་རབ་རྫོགས་འདོད་དགུས་མངའ་གསོལ་ལོ། །དཀོན་མཆོག་སྐྱབས་ཀྱི་དམ་པར་སྐྱབས་སོང་མགྲོན། །དཀར་ཕྱོགས་ལྷ་དང་གདེངས་ཅན་འབྱུང་པོའི་ཚོགས། །བསྟན་ལ་རབ་དགའ་མཐུ་རྩལ་རྨད་བྱུང་བ། །ཀུན་གྱི་རྗེ་བོར་དེང་བདག་གཟེངས་བསྟོད་དོ། ཁྱད་པར་དཔལ་གྱི་སྤྲུལ་པ་པདྨའི་ལུང་། །ཇི་བཞིན་མནོས་པའི་བཀའ་ལས་མི་འདའ་བར། །གཏེར་བདག་གནས་བདག་དཀོར་བདག་ཐམས་ཅད་ཀྱི། །ཚོགས་བདག་ཚོགས་ཀྱི་རྗེ་བོར་གཟེངས་བསྟོད་དོ། །རྣལ་འབྱོར་བདག་གི་མགོན་སྐྱབས་འཆེས་པའི་ལྷ། །བསྟེན་གསོལ་མཆོད་བསྒྲུབ་ལྷ་སྲུང་གཉན་རྣམས་དང་། ཁྲི་སྲོང་ལྷ་བརྒྱུད་སྐུ་ལྷ་གཉན་རྣམས་ཀྱི། །རྗེ་བཙུན་ལྷ་ཡི་ལྷ་མཆོག་གཟེངས་བསྟོད་དོ། །རྒྱལ་དབང་པདྨའི་རིང་ལུགས་འཛིན་རྣམས་ཀྱི། །དབུ་འཕང་རི་རྒྱལ་རྩེ་མོར་གཟེངས་བསྟོད་དེ། །སྔགས་འཆང་བདག་གིས་མངའ་གསོལ་གཟེངས་བསྟོད་ན། །ལྷ་ཡི་ལྷ་མཆོག་ལྷ་ཞལ་མཐོ་བར་མཛོད། །ཅེས་པ་བྱ། ནང་དུ་ལོག་ནས། ཡིག་བརྒྱ་བརྗོད། མ་འབྱོར་བ་དང་ཉམས་པ་དང་། །སོགས། ལྷག་པ་དང་ནི་ཆད་པ་དང་། སོགས། སེར་སྣའི་དབང་གྱུར་མ་འབྱོར་ཞིང་། །མཆོད་པ་ངན་ཞིང་བཤམ་ཉེས་པ། །སྦྱོར་བ་གཙང་སྦྲས་མ་ཐོན་པ། །དེ་ཡང་བཟོད་པར་མཛད་དུ་གསོལ། །རྟེན་ཡོད་ན། འདིར་ནི་གཟུགས་(༢༤བ)
དང་ལྷན་ཅིག་ཏུ། །ཞེས་པ་ནས། སུ་པྲ་ཏིཥྛ་བཛྲེ་སྭཱཧཱས་བརྟན་བཞུགས་བྱ། རྟེན་མེད་པའི་སྐབས་ཡིན་ན། ཁྱེད་ཀྱིས་སེམས་ཅན་སོགས། །བཛྲ་མུཿས་ཡེ་ཤེས་པ་གཤེགས། །དམ་ཚིག་པ་རང་ཉིད་ལ་ཐིམ་པར་བསམ། ཤིས་བརྗོད་ནི། ཧཱུཾ། གསར་བྲིས། གར་དབང་འོད་མཐའ་ཡས་པ་ཆོས་ཀྱི་སྐུ། །གདུག་པ་འདུལ་མཛད་རྟ་མགྲིན་ལོངས་སྤྱོད་རྫོགས །མཚོ་ལས་སྐྱེས་པའི་རྡོ་རྗེ་སྤྲུལ་པའི་སྐུ། །དབྱེར་མེད་ཡེ་ཤེས་སུམ་ལྡན་བཀྲ་ཤིས་ཤོག །ས་བརྒྱད་བརྙེས་ཀྱང་བསྟན་དང་འགྲོ་བའི་དོན། །དྲེགས་པའི་སྡེ་དཔོན་ཚུལ་འཛིན་གཉན་གྱི་རིགས། །དྲི་ཟའི་རྒྱལ་པོ་རྡོ་རྗེ་འབར་བ་རྩལ། །རྣམ་འགྱུར་ཅིར་ཡང་སྟོན་པའི་བཀྲ་ཤིས་ཤོག །ཞི་རྒྱས་དབང་དྲག་ལས་ཀུན་སྒྲུབ་མཛད་པའི། །གསང་ཡུམ་མཆེད་བློན་སྤྲུལ་པ་ཡང་སྤྲུལ་དང་། །སྡེ་བརྒྱད་དྲེགས་པའི་དམག་གི་དཔུང་ཚོགས་སོགས། །གྲངས་མེད་འཁོར་ཚོགས་རྒྱ་མཚོའི་བཀྲ་ཤིས་ཤོག །བདུད་དང་རྒྱལ་འགོང་དམ་སྲི་འབྱུང་པོའི་རིགས། །དངོས་དང་ཡིད་ལ་བརླམས་པའི་སྐྱེ་བོའི་མཚོན། །ནག་པོའི་རྩ་ལག་བ་དན་རབ་བསྙིལ་ཏེ། །དཀར་ཕྱོགས་རྒྱལ་མཚན་བསྒྲེད་པའི་བཀྲ་ཤིས་ཤོག །བོད་སྐྱོང་ལྷ་རིགས་དངོས་དང་དངོས་འདྲ་བ། །ཆེན་ཉམ་བསོད་ནམས་ལྡན་པ་ཡ་རབས་ཀྱི། །སྐུ་ལྷ་གཉན་པོ་མཛད་ནས་གངས་ལྗོངས་འདིར། །བདེ་སྐྱིད་དགའ་སྟོན་དཔལ་འབར་བཀྲ་ཤིས་ཤོག །གཞན་ཡང་བཀྲ་ཤིས་ཀྱི་ཚིགས་བཅད་ཅི་རིགས་པ་བརྗོད་ཅིང་མེ་ཏོག་སིལ་མ་ཕྱོགས་ཀུན་ཏུ་དགྲམ་པར་བྱའོ། །པད་འབྱུང་རིག་སྔགས་འཆང་བའི་བརྟུལ་ཞུགས་ཀྱིས། །ས་བཏུལ་བསམ་ཡས་གཙུག་ལག་འབྱོངས་མིན་གོང་། །གཡུང་དྲུང་བོན་གྱིས་བསྟེན་(༢༥ན)
པའི་ལྷ་ཆེན་པོ། །ལུགས་དེའི་གྱེར་སྒོམ་གསོལ་མཆོད་ཅི་ཡང་དར། །ཨྱོན་སངས་རྒྱས་གཉིས་པས་ཟངས་མཛོད་ཀྱི། །སྲུང་མར་བཀའ་བསྒོས་སྒྲུབ་ཡིག་བདུད་རྩིའི་བཅུད། །ཤོག་སེར་མ་བུའི་ཟ་མ་ཏོག་འཁྱིལ་བས། །ཚིམ་པའི་རྙིང་རྒན་ཉིན་མོའི་སྐར་མ་ཙམ། །བརྒྱུད་པའི་གསུང་སྒྲོས་ཕྱག་ལེན་མཐོང་ཐོས་བྲལ། །གབ་དཀྲུགས་འཐོར་བསྡེབས་མི་ཤེས་ཕྱོགས་རེའི་གཞུང་། །ཀློག་ཅིང་རོལ་མོ་བརྡུང་བ་ལྷུར་ལེན་པ། །བོན་དཀར་ལྷ་གསོལ་མཁན་པོའི་ཆོ་ག་བཞིན། །དེ་ཕྱིར་ཤོག་སེར་དྲི་ངད་ཆལ་ཆིལ་དུ། །གཡོ་བའི་དགོངས་དོན་རིགས་འཛིན་ཞལ་གྱི་ལུང་། །བཀླགས་པས་དོན་ཀུན་འགྲུབ་པ་གངྒཱའི་རྒྱུན། ཁོ་བོའི་རྣམ་དཔྱོད་མ་དྲོས་མཚོ་ལས་བབས། །འབད་པས་ཉེར་བསྒྲུབས་རླུང་གི་ཤིང་རྟ་ཡིས། །དྲངས་པའི་བདེ་སྐྱིད་བརྒྱ་ཕྲག་ཉི་མའི་དངོས། །ལེགས་བྱས་དགུང་ལ་འཆར་ནུབ་རབ་སྤངས་ནས། །རྟག་ཏུ་སྣང་བའི་དགའ་སྟོན་དར་བར་ཤོག །དེའང་ལྷ་ཆེན་འདི་ཉིད་ཀྱི་མཆོད་བསྐང་གི་རིམ་པ་ཆོས་རྒྱལ་མངྒའི་མཚན་ཅན་ཡན་ཆད་དུ་གསུང་རྒྱུན་མ་གཏོགས་ཁྲིགས་ཆགས་ཀྱི་ཡིག་རིགས་མི་སྣང་ཞིང་ཞང་སྣ་ནམ་པའི་སྤྲུལ་པའི་སྐུ་མཆོག་རིགས་འཛིན་ངག་གི་དབང་པོ་ཆོས་རྒྱལ་བསྟན་པའི་རྒྱལ་མཚན་གྱིས་གཏེར་གཞུང་དང་གྲངས་གཏེར་སྟོན་གསུམ་པའི་གཞུང་འཁྲུགས་བསྡེབས་སུ་མཛད་པ་ཁུངས་ཐུབ་ཏུ་འདུག་ཀྱང་ཕྱག་ལེན་རྣམས་དཀྱུས་སུ་བཀོད་པ་སོགས་ཅུང་ཟད་རྟོགས་དཀའ་བ་ནས་རང་ཉིད་སྲུང་མ་ཆེན་པོ་འདིར་མོས་པའི་དང་བས་ཡིད་དྲངས་ཏེ་མཆོད་སྤྲིན་ཚངས་པ་ལྷའི་ཤེལ་གྱི་རྔ་བོ་ཆེའི་གོ་རིམ་ཕལ་ཆེར་གཙོ་བོར་བཟུང་གཞན་མ་གཏེར་གཞུང་། བླ་མ་བོར་མ་དག་གིས་མཛད་(༢༥བ)
པ། གསར་བྲིས་རྣམས་སོ་སོར་ཁུངས་སྨོས་ཤིང་། གཅིག་པོ་ཉིད་ལས་དུ་མའི་གར་ཡིན་ནའང་གངས་ཅན་འདིར་འབྲེལ་ཆགས་ཀྱི་རྣམ་འགྱུར་གཙོ་བོར་བཟུང་། མདོར་ན་ཅུང་ཟད་མི་གསལ་ཞིང་མ་ཚང་བ་རྣམས་ཚང་ན་སྙམ་པའི་ལྷག་བསམ་གྱིས་ཀུན་ནས་བླངས་ཏེ། ལྷ་མཆོག་རྡོ་རྗེ་འབར་བ་རྩལ་གྱི་འཕྲིན་ལས་བརྒྱ་ཕྲ་ཉིད་ངོས་འཛིན་པའི་སྣང་གསལ་འདི་ནི་ཟ་ཧོར་གྱི་སྔགས་བཙུན་ཟིལ་གནོན་བཞད་པ་རྩལ་གྱིས་ཀུན་དགའ་ཞེས་པ་ཤིང་སྟག་ཧོར་ཟླ་བདུན་པའི་དཀར་ཆའི་དགའ་བ་དང་པོ་རྒྱལ་ཕུར་གྱི་ཐོག་ལ་དབུ་བཙུགས་ཟླ་བ་དེ་གའི་ཚེས་ལྔ་ཟླ་བ་གྲོ་བཞིན་འཛོམ་པའི་འཕྲོད་དགེ་བར་གནམ་བསྐོས་ཀྱི་ཕོ་བྲང་ཆེན་པོ་དམར་པོ་རིར་གྲུབ་པར་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པས་བགྱིས་པ་དཔལ་ལྡན་ལྷ་ཆེན་ཚངས་པས་ཉིན་མཚན་དུས་དྲུག་ཏུ་བསྲུང་ཞིང་སྐྱོབ་པའི་རྒྱུར་གྱུར་ཅིག །སརྦ་མངྒ་ལཾ། །