འཇམ་དཔལ་གཤིན་རྗེ་དྲེགས་པ་འཇོམས་བྱེད་ཀྱི་དྲག་པོ་ཟོར་གྱི་འཕྲིན་ལས་གནམ་ལྕགས་འབར་བའི་ཐོག་མདའ།
འཇམ་དཔལ་གཤིན་རྗེ་དྲེགས་པ་འཇོམས་བྱེད་ཀྱི་དྲག་པོ་ཟོར་གྱི་འཕྲིན་ལས་གནམ་ལྕགས་འབར་བའི་ཐོག་མདའ་བཞུགས་སོ། །
ན་མོ་དརྦ་བི་དཱ་ར་ཎ་ཀྲྀ་མཉྫུ་ཤྲཱི་ཡ་མཱ་ར་ཡེ། ཞི་ཁྲོ་ཀུན་འདུས་དཀྱིལ་འཁོར་རྒྱ་མཚོའི་མགོན། །པདྨས་རྗེས་བཟུང་དྲག་སྔགས་བཀའ་བབས་ཅན། །བཻ་རོའི་རྣམ་འཕྲུལ་སྤྲུལ་སྐུ་གཏེར་བདག་གླིང་། །དྲིན་ཅན་བླ་མ་གཙུག་གི་རྒྱན་དུ་མཛེས། །གང་གི་ཟབ་གཏེར་མཁའ་འགྲོའི་ཞལ་དྲོད་རླངས། །མ་ཉམས་དངར་པོར་འཐུལ་བ་གཤེད་སྐོར་གཞུང་། །དྲེགས་པ་འཇོམས་བྱེད་ལས་མཐའ་དྲག་པོའི་ཟོར། །རྣོ་ངར་རྡོ་རྗེའི་ཚ་ཚ་ཕྱོགས་བཅུར་འཕྲོ། །དེ་ཕྱིར་གབ་བསལ་འཁྲུགས་བསྡེབས་འཐོར་བ་བསྡུས། །མ་ཆད་ཁ་བཀང་གཏོར་བཟློག་འཕྲིན་ལས་ཀྱི། །གྱེར་སྒོམ་གནམ་ལྕགས་འབར་བའི་ཐོག་མདའ་ཡིས། །ཡིད་སྲུབས་སྡེ་བཅས་མགོ་བོ་ཅིག་ཅར་འགེམ། །གློ་སྙིང་ཆེམས་ཆེམས་ཟ་ཞིང་རྒྱུ་མ་ཡི། །ག་ཤ་རིང་པོར་འཕྱང་བའི་གཤིན་རྗེའི་ཚོགས། ཁྲོས་པའི་གད་བརྒྱངས་དྲག་པོ་ཐོས་པའི་མོད། །དགྲ་སྲོག་དུམ་བུར་འཆད་པ་དངོས་པོའི་གཤིས། །འོན་ཏེ་དམ་ལྡན་སྒྲུབ་པོར་མཆོག་མཐུན་གྱི། །དངོས་གྲུབ་འདོད་པ་འཇོ་བ་ཡོངས་འདུའི་ལྗོན། །འཇམ་དཔལ་རྣམ་པར་རོལ་པའི་གྲིབ་བསིལ་དུ། །བདེ་བར་ངལ་སོས་ཀྭ་ཡེ་སྐལ་བཟང་ཚོགས། །(༢ན)
དེ་ཡང་འཇམ་དཔལ་གཤིན་རྗེ་གཤེད་ཀྱི་སྐོར་ལ་བཀའ་གཏེར་མང་དུ་བཞུགས་པའི་ནང་ནས་སློབ་དཔོན་ཆེན་པོ་པདྨ་འབྱུང་གནས་ཀྱིས་ལོ་ཆེན་བཻ་རོ་ཙ་ན་ལ་གནང་བའི་གཤིན་རྗེ་དྲེགས་པ་འཇོམས་བྱེད་ཀྱི་ཆོས་སྡེ་ཡར་ཀླུངས་ཤེལ་ཕུག་གི་བྱང་འདབས་རྒྱལ་མཚན་འདྲ་བའི་བྲག་ངོས་ནས་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པས་གདན་དྲངས་པའི་ཆོས་སྐོར་གྱི་ནང་ཚན་དྲག་པོ་ཟོར་གྱི་འཕྲིན་ལས་ཉམས་སུ་བླང་བ་ལ། གནམ་ས་ཆོས་འབྱུང་གི་དབྱིབས་ཅན་དང་དུར་ཁྲོད་སོགས་དྲག་པོའི་གནས་སམ། ཡང་ན་ཡིད་དང་མཐུན་པའི་སྒྲུབ་ཁང་དུ་ཕྱག་བདར་དང་སྐྱང་ནུལ་ལེགས་པར་བྱས་ཏེ་ས་རྒྱན་གནམ་རྒྱན་གོ་མཚོན་སྤྱན་གཟིགས་ཀྱི་རིམ་པ་བཀོད་པས་མཛེས་པ་བསྟར་ཞིང་། སྒྲུབ་པ་ལ་ཉེ་བར་མཁོ་བའི་ཡོ་བྱད་རྣམས་མ་ཚང་བ་མེད་པ་བསག །ཞི་ཁྲོ་སྤྱི་བྱེ་བྲག་དང་ཁྱད་པར་སྒོས་ཀྱི་བླ་མ་ཡི་དམ་སྲུང་མའི་རྟེན་དང་མཆོད་གཏོར་བཤམ། འཕུང་ས་གསུམ་ལས་གྲུབ་པའི་སྟེགས་བུ་ལ་དུག་ཁྲག་གིས་ཆག་ཆག་གདབ། མ་ཏྲཾ་གྱི་ལྟོ་བར་ཆོས་འབྱུང་གྲུ་གསུམ་མཐིང་ནག་ཟླ་གམ་སུམ་ལྡན། འཁོར་ལོ་རྩིབས་བཞི། རྡོར་རྭ་མེ་རི་དང་བཅས་པར་ལྷ་བཅུ་གཉིས་ཀྱི་མཚན་(༢བ)
མའམ་ཚོན་སྤུངས་དགོད། དེའི་སྟེང་དུ་མཉྫིའམ་ཁྲིའུའི་ཁར་ལྕགས་སམ་བྷནྡྷའི་སྣོད་དུག་རིགས་ཁྲག་སྣ་འབྲུ་སྣ་ལྔའི་ཕྱི་སོགས་རྫས་རྣམས་ཚང་བའི་འབྲུ་ནག་དར་བཏགས་སྦྲུས་པའི་དྲག་པོའི་གཏོར་མ་ཟུར་གསུམ་རྣོ་དབལ་ཅན་ལོགས་རྒྱབ་ཏུ་བསྟན་པ་དམར་སིང་ངེ་བ་མེ་རི་སོགས་དྲག་རྒྱན་རྔམ་བརྗིད་དང་ལྡན་པ། མཐར་ནང་དུ་འཁོར་བཅུ་གཅིག །དེའི་ཕྱི་རོལ་ཏུ་ཁྲོ་བཅུའི་གཏོར་མ། ཁྲག་ཀོང་མཚེ་ཡུངས། རྩང་རྒྱུ་མའི་ལྡ་ལྡིས་བརྒྱན་པ། ལྷ་རྟེན་ཙཀ་ལི་བཀོད་པ། གཏོར་གདུགས་ཀྱི་ནང་དུ་སྲུང་འཁོར། གཏོར་མའི་སྨད་ཆར་བཟློག་འཁོར། དམིགས་ཀྱིས་བསལ་བ་ལ་ལིངྒ་བསད་འཁོར་གྱིས་གཏུམས་པ་བཟློག་འཁོར་འོག་ཏུ་འཇུག །རྡར་རྭའི་ནང་གི་མདུན་ཐད་དུ་མཉྫིའི་ཁར་ལས་གཤིན་གྱི་གཏོར་མ་ཐོག་གཟུགས་འཁོར་སོ་བཞིའམ་བསྡུ་ན་གཙོ་འཁོར་ལྔ་པ་སྐྱུ་གུ་ཉེར་དགུ་ཁྲག་ཀོང་མཚེ་ཡུངས་རྩང་དམར་གྱིས་བརྒྱན་པ་ཙཀ་ལི་གཏོར་གདུག་བཙུགས། གཏེར་གཞུང་དངོས་བསྟན་དུ་ཀོང་ཟོར་དང་མདའ་ཟོར་གཉིས་ལ་ཟོར་རྣམས་ཚང་བ་འདྲ་ཞིག་འདུག་ནའང་། ཇི་སྐད་དུ། ཐུན་དང་ཟོར་གྱི་ཡོ་བྱད་ཀུན༔ མན་ངག་གནད་ཀྱིས་ཚོགས་པར་བཤམས༔ ཞེས་འབྱུང་བས། མདོས་ཟོར་གྱི་རྣ་ཆ་འཇོམས་བྱེད་འཆར་ཀ་ནག་པོ་ནས་ཁ་བཀང་སྟེ། ཀང་ཟོར། རྡོ་ཟོར། མདའ་ཟོར། ཁྲག་ཟོར་རྣམས་གཞུང་ནས་བཤད་པའི་བཅའ་གཞི་རྫས་སོགས་ཚང་མ་བཀོད། ཡུངས་ཟོར་ལོགས་སུ་བྱས་ཀྱང་འགལ་བ་མེད་ཅིང་གོང་གི་རྫས་ཁྲོད་དུ་ཡོད་པས་བཞག་ཀྱང་ཆད་ལྷག་ཏུ་མི་འགྱུར། མཐར་མདུན་ནས་བརྩམས་ཏེ་ཞི་བ་དང་དྲག་པོའི་ཉེར་སྤྱོད། སྨན་རཀ །ལས་གཤིན་གཏེར་སྲུང་གཞི་བགེགས་ཀྱི་གཏོར་མ། ཚོགས། གཙོ་འཁོར་རྣམས་ཀྱི་བཀང་(༣ན)
བའི་གཏོར་མ་རྒྱན་སྤྲོས་ཅན། བེ་རོ། རྟ་ནག །གཡག་ནག །གླང་ནག །ལུག་ནག །ར་རོག །བྱ་ནག་རྣམས་རང་རང་གི་ཤ་ཁྲག་བསྲེས་པའི་བཟོ་དབྱིབས་དོད་པ་གཞན་ཡང་སྲོག་ཆགས་གང་འབྱོར་གྱི་ཤ་ཁྲག་གློ་སྙིང་མཁས་མཆིན་རྒྱུ་ཞག་ཚིལ་བུ། སྨན་སྣ། རིན་པོ་ཆེ། བཟའ་བཅའ་སྤྱན་གཟིགས་མཆོད་པའི་རྫས་སྣ་ཚོགས་ཀྱིས་བསྐོར་བ་གསེར་སྐྱེམས་གདབ་ལས་ཀྱི་ཆས་རྣམས་མངོན་པར་འདུ་བགྱིས། བདག་མདུན་གཉིས་ཀ་ལྷན་ཅིག་ཏུ་ལས་བྱང་བདུད་ལས་རྣམ་རྒྱལ་གྱི་གཞུང་བསྲངས། བསྟོད་པ་ཡན་སོང་བ་དང་ཟུར་གཏོར་ལ་དམིགས་ཏེ་ལས་གཤིན་གྱི་འཕྲིན་ལས་བཟླས་པ་མ་གཏོགས་བསྟོད་པའི་བར་བྱ། བདག་མདུན་གྱི་ཏིང་ངེ་འཛིན་འཕྲོ་འདུ་དང་བཅས་བསྙེན་སྒྲུབ་ཀྱི་སྔགས་རྣམས་བཟླ་ཞིང་ཁྱད་པར་ཐུན་ཡོད་ན་ཐོར་ཐུན་ལ་བསྙེན་སྒྲུབ། སྔ་ཐུན་ལ་སྲུང་འཁོར། དགོངས་ཐུན་ལ་བཟློག་པ། སྲོད་ཐུན་ལ་བསད་པ་རྣམས་ཀྱི་སྔགས་དམིགས་མན་ངག་ལྟར་བྱ། འཛབ་བསྟོད་འབུལ་བ་ནི། ཨྱེ་དྲེགས་པ་འཇོམས་བྱེད་ཆོས་ཀྱི་དབྱིངས་ཀྱི་གསུང་། །ཐུགས་དམ་གསུང་གི་ཡེ་ཤེས་རོལ་པ་ལས། །ཐབས་དང་ཤེས་རབ་ཡིག་འབྲུ་དཔག་མེད་མཁར། །འཁོར་ལོ་བསྐོར་ཞིང་ཡིག་འབྲུའི་རང་སྒྲ་ལས། །གྲག་སྟོང་དབྱེར་མེད་རྒྱལ་བའི་གསུང་མཆོག་སྟེ། །འོད་ཟེར་འཕྲོ་འདུ་ཉི་ཟླའི་འཁོར་ལོ་བཞིན། །ཕར་འཕྲོས་འཕགས་མཆོད་སེམས་ཅན་སྒྲིབ་པ་སྦྱངས། །དམ་ཅན་རྒྱུད་བསྐུལ་ལྷ་སྲིན་གནད་ལ་འབེབས། །དགྲ་དང་བགེགས་ལ་ཕོག་པས་རྡུལ་དུ་བརླག །སླར་འདུས་རྣལ་འབྱོར་བདག་གིས་དངོས་གྲུབ་ཐོབ། །བཅོམ་ལྡན་དཔལ་ཆེན་དྲེགས་པ་འཇོམས་བྱེད་ཀྱི། །གསུམ་གྱི་བཟླས་པས་གསུང་གི་རྒྱུད་(༣བ)
བསྐུལ་ཞིང་། །སྐུ་ཡི་ཆ་ལུགས་འཇིགས་པར་སྟོན་མཛད་པ། །བདེ་གཤེགས་འཇོམས་བྱེད་གསུང་ལ་ཕྱག་འཚལ་ལོ། །ལས་བྱང་གི་གཞུང་བཞིན་དངོས་གྲུབ་བླང་། །རྒྱས་པར་སྤྲོ་ན། ཨྱེ་བདེ་གཤེགས་རྒྱལ་བ་ཐམས་ཅད་འདུས་པའི་སྐུ། །བཅོམ་ལྡན་དྲེགས་པ་འཇོམས་བྱེད་འཁོར་བཅས་རྣམས། །རྣལ་འབྱོར་བདག་གིས་རྩེ་གཅིག་གདུང་བ་ཡིས། །བསྐལ་པ་དཔག་ཏུ་མེད་པའི་སྔོན་རོལ་ནས། །བསྙེན་ཅིང་བསྒྲུབས་ནས་ལས་ཀྱི་འཕྲོ་འཐུད་དེ། །སྐད་ཅིག་ཙམ་ཡང་མི་བརྗེད་ཁྱེད་བསྒྲུབས་ན། །དུས་འདི་ཉིད་ལ་བདག་གི་བསམ་བསྒྲུབ་ཕྱིར། ཁྱད་པར་གྱུར་པའི་མཆོད་པའི་ཚོགས་རྣམས་དང་། །བཟླས་བསྙེན་སྔགས་ཀྱི་མཆོད་པ་འདི་འབུལ་པས། །ཐུགས་དམ་དབང་གིས་མྱུར་བར་བཞེས་ནས་ཀྱང་། །དངོས་གྲུབ་སྒྲུབ་པའི་འབྲས་བུ་གང་ལགས་པ། །དུས་འདི་ཉིད་དུ་བདག་ལ་གསོལ་བ་ནི། ཁམས་གསུམ་དབང་སྡུད་སྲིད་གསུམ་ཟིལ་གནོན་པ། །ཐེག་དགུ་བགྲོད་ཅིང་ས་རྣམས་ནོན་གྱུར་ནས། །མཐར་ཐུག་འབྲས་བུ་སྐུ་ལྔའི་བདག་ཉིད་མཆོག །བཅོམ་ལྡན་འཇོམས་བྱེད་གོ་འཕང་མྱུར་ཐོབ་སྩོལ། །དེ་མ་ཐོབ་ཀྱི་གནས་སྐབས་རྣམས་སུ་ཡང་། །ཚེ་རིང་ནད་མེད་ལོངས་སྤྱོད་འཕེལ་བ་དང་། །ཆེ་བཙན་དྲེགས་པའི་འགྲོ་བ་འདུལ་བ་དང་། །སྒྲུབ་པོ་དམིགས་བྱར་བཅས་པའི་བསྲུང་སྐྱོབ་དང་། །དགྲ་བགེགས་འཇོམས་ཤིང་རྦོད་ཟོར་བཟློག་པ་དང་། །ཟོར་རྣམས་རང་འགགས་མནན་པ་རང་རུལ་དང་། །ལྷ་རྣམས་རང་གཤེད་མི་གཡོ་མི་འགུལ་ཞིང་། །ཕྱི་ནང་བར་ཆད་ཐམས་ཅད་ཞི་བ་དང་། །དྲག་སྔགས་ཕྱི་ལ་ཚུགས་ཤིང་རྣོ་བ་དང་། །བསྲུང་བསྐྲད་བཅོམ་གཟིར་དབབ་བཅད་ལ་སོགས་ཀྱི། །སྟོབས་ཆེན་ཐམས་ཅད་ཟིལ་གྱིས་(༤ན)
གནོན་པ་དང་། །འཕྲིན་ལས་རྣམ་བཞི་ལྷུན་གྱིས་གྲུབ་པ་དང་། ཞི་རྒྱས་དབང་དྲག་དངོས་གྲུབ་མ་ལུས་ཏེ། །བཅོམ་ལྡན་དྲེགས་པ་འཇོམས་བྱེད་འཁོར་བཅས་ཀྱི། །སྐུ་གསུང་ཐུགས་ཀྱི་དངོས་གྲུབ་མ་ལུས་པ། །རྣལ་འབྱོར་བདག་གི་ལུས་ངག་ཡིད་གསུམ་གྱི། །རྒྱུད་ལ་ད་ལྟ་ཉིད་དུ་ཐོབ་པར་སྩོལ། །ཚོགས་བར་པ་ཡན་སོང་ནས་བསྐུལ་བ་ནི། ཨྱེ་རང་བཞིན་རྣམ་དག་ཆོས་དབྱིངས་དྲག་པོའི་ཞིང་༔ སྐྱེ་མེད་དབྱིངས་ནས་སྒྱུ་མའི་སྐུར་བཞེངས་པ༔ ཁྲག་འཐུང་ཁྲོ་རྒྱལ་འཇམ་དཔལ་གཤིན་རྗེ་གཤེད༔ མངོན་སྤྱོད་འཕྲིན་ལས་མཛད་ཕྱིར་ཐུགས་དམ་བསྐུལ༔ ཁྱོད་ཐུགས་ཆོས་དབྱིངས་ཞི་ལས་མ་གཡོས་ཀྱང་༔ སྙིགས་མ་ལྔ་བདོའི་ལས་ངན་འགྲོ་བ་རྣམས༔ ཞི་བས་མི་ཐུལ་འདུལ་ཕྱིར་ཐུགས་རྗེ་ཆེས༔ མི་བཟད་རབ་འཇིགས་དྲག་པོའི་སྐུར་བཞེངས་ལ༔ བྱང་ཆུབ་བསྒྲུབ་ལ་འཚེ་བའི་གདོན་ཚོགས་དང་༔ ཞིང་བཅུ་ཚང་བ་བསྟན་པ་སྤྱི་ཡི་དགྲ༔ ཁྱད་པར་བདག་ལ་སྡང་བའི་དགྲ་བོའི་ཚོགས༔ མངོན་སྤྱོད་དྲག་པོའི་འཕྲིན་ལས་མི་གཡེལ་བར༔ མིང་ཙམ་མེད་པར་རྡུལ་དུ་བརླག་པ་ཡི༔ ཐུགས་དམ་དུས་ལ་བབ་བོ་ས་མ་ཡ༔ རྣལ་འབྱོར་བདག་གི་དད་པས་བསྐུལ་བསྒྲུབས་ཚེ། འདོད་པའི་འབྲས་བུ་མཆིས་པར་མི་མཛད་ན༔ ཞལ་བཞེས་ཐུགས་དམ་ཉམས་པར་མི་འགྱུར་རམ༔ དེ་བས་ཁྲག་འཐུང་འཁོར་བཅས་དབྱིངས་ནས་བཞེངས༔ མངོན་སྤྱོད་དྲག་པོའི་འཕྲིན་ལས་བསྒྲུབ་པར་མཛོད༔ རྒྱས་པར་སྤྲོ་ན། ཨེ་ཆོས་ཀྱི་དབྱིངས་ཀྱི་ཕོ་བྲང་གི །དྲག་པོ་ཨེ་ཡི་གཞལ་ཡས་ནས། །སྡེ་བརྒྱད་ཆུ་གླང་མ་ཧེའི་སྟེང་། ཁྲོ་བོའི་རྒྱལ་པོ་འཇོམས་བྱེད་ནི། །སྐུ་མདོག་དུག་(༤བ)
ཆེན་འཁྱིལ་བ་འདྲ། །སྐུ་ཆེ་གཏུམ་ལ་བརྔམས་ཤིང་འབར། །དབུ་གསུམ་ཕྱག་དྲུག་ཞབས་བཞི་བགྲད། །གཡས་དཀར་ལྷ་བརྒྱད་ཟས་སུ་ཟ། །གཡོན་དམར་ཀླུ་འབུམ་གཉན་ཁྲི་གསོལ། །དབུས་ཀྱི་མཐིང་ནག་བརྔམ་པ་ཡིས། །སྐུ་དགྲར་འོས་པའི་དམ་ཉམས་དང་། །ས་བདག་སྡེ་བརྒྱད་ལྷ་སྲིན་གྱི། །དབང་པོ་ལྔ་དང་ཙིཏྟ་གསོལ། །གཡས་ཀྱི་དང་པོ་འཁོར་ལོ་ཡིས། །དགྲ་བགེགས་མགོ་ལུས་ཚལ་པར་གཤོག །བར་པ་གནམ་ལྕགས་རལ་གྲི་ཡིས། །དམ་ཉམས་དགྲ་བོའི་སྲོག་རྩ་གཅོད། །ཐ་མ་གནམ་ལྕགས་གྲི་གུག་གིས། །དགྲ་བོའི་ཁོག་པ་གཤགས་ནས་འབྱེད། །གཡོན་གྱི་དང་པོ་དུང་ཁྲག་ནང་། །རཀྟ་དམར་གྱིས་བཀང་ནས་གསོལ། །བར་པ་རྡོ་རྗེ་བེ་ཅོན་གྱིས། །དགྲ་བགེགས་ཞེ་སྡང་མགོ་ལ་བསྣུན། །ཐ་མ་སྡིགས་མཛུབ་མེ་འབར་བས། །དགྲ་བགེགས་ལུས་ངག་གཟིར་ཅིང་བསྲེག །སྐུ་ལ་དུར་ཁྲོད་ཆས་བརྒྱད་དང་། ཁྱུང་གཤོག་ལ་སོགས་དཔལ་ཆེན་གྱི། །རྒྱན་དང་ཆས་ཀྱིས་རྣམ་པར་བརྗིད། །མཆེ་བ་དགུ་ཁྲི་རྩང་ཕུར་གཏམས། །སྤྱན་ནས་འཇིགས་པའི་མེ་འབར་ཞིང་། །ཤངས་ནས་རླུང་ནག་འཚུབ་མ་ལྡང་། །དབུ་སྐྲ་སྨ་ར་བ་སྤུ་ལས། །གདུག་རྩུབ་སྨ་ར་མེ་ཆེན་འབར། །སྐུ་དགྲར་འོས་པའི་དམ་ཉམས་དང་། །གདུག་པའི་ཀླུ་གཉན་ས་བདག་བསྲེག །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་(༥ན)
ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། སྦྱོར་བའི་ཡུམ་གཅིག་པེ་ཏ་ལི། །སྐུ་མདོག་མཐིང་ནག་འབར་བ་ལ། །གདུག་པའི་རལ་པ་མུན་ལྟར་གཏིབས། །དུར་ཁྲོད་རུས་པ་སྦྲུལ་གྱིས་བརྒྱན། །གཡས་པ་གྲི་གུག་མཁའ་ལ་འཕྱར། །གཡོན་པ་དུང་ཁྲག་འཛིན་པས་འཁྱུད། །སྒྲོལ་ཡུམ་རལ་གཅིག་མཐུ་མོ་ཆེ། །ནད་མཚོན་ཆར་པ་དགྲ་ལ་འབེབས། །དྲག་ཏུ་བསྐུལ་ཞིང་རྦད་ཙ་ན། །མ་ཚོགས་འབུམ་ཡང་གཟིར་ཞིང་བསྐུལ། །མ་མོ་ཀི་ཀང་དགྲ་ལ་འབེབས། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། སྤྱི་གཙུག་གདུག་པ་འདུལ་བྱེད་པ། །བྱ་ཁྱུང་རྒྱལ་པོ་སྐུ་མདོག་མཐིང་། །སྤུ་གྲིའི་སྒྲོ་ཤོག་མཚོན་ཆ་ཡིས། །གདུག་ཅན་མ་ལུས་གཤོག་ཅིང་གཏུབ། །སྤྱན་མིག་ཉི་མའི་གཟི་མདངས་ཀྱིས། །བག་ཆགས་རྒྱ་མཚོ་གཏིང་ནས་སྐེམས། །རྡོ་རྗེ་འབར་བའི་མཆུ་དབལ་གྱིས། །གདུག་པའི་ཀླུ་རྒྱལ་སྤྱི་ནས་འདྲེན། །ཞལ་གདངས་ཀླུ་གཉན་ཁོང་དུ་གསོལ། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། ཟླ་གམ་དམར་པོ་གསུམ་གྱི་སྟེང་། །བཾ་ཆེན་རོ་ཡི་གདན་སྟེང་དུ། །ཚེ་བདག་ནག་པོ་གཏུམ་ཞིང་བརྔམ། །གཡས་པ་སྤུ་གྲིས་དགྲ་སྲོག་གཅོད། །(༥བ)
གཡོན་པ་ཞགས་པས་སྡམ་ཞིང་འཆིང་། །དུར་ཁྲོད་འབར་བའི་ཆས་ཀྱིས་བརྒྱན། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། སྲོག་བདག་དམར་པོ་ཁྲག་རུལ་མདོག །གཡས་པ་བེ་ཅོན་མཁའ་ལ་འཕྱར། །གཡོན་པ་རལ་གྲིས་དགྲ་བགེགས་གཏུབ། །ཞལ་གདངས་མཆེ་གཙིགས་བཞིན་མི་སྡུག །དུར་ཁྲོད་ཆས་ཀྱིས་རྣམ་པར་སྤྲས། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། འཆི་བདག་དུད་ཁ་སྲིན་པོའི་གདོང་། །གཡས་པ་དགྲ་བོ་ཁྲམ་ལ་འདེབས། །གཡོན་པ་དོན་སྙིང་ཕྱུང་ནས་ཟ། །མཆེ་གཙིགས་ལྗགས་འདྲིལ་རྐན་སྒྲ་གཏོག །དུར་ཁྲོད་ཆས་བརྒྱད་སྐུ་ལ་རྫོགས། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། ཤར་རྩིབས་ཡ་མ་ར་ཙ་མཐིང་། །གཡས་པ་རལ་གྲི་ཐོད་ཁྲག་གཡོན། །སྲིན་པོའི་གཟུགས་ཅན་གཏུམ་ཞིང་བརྔམ། །དུར་ཁྲོད་ཆས་ཀྱི་རྣམ་པར་བརྗིད། །ཡུམ་དང་གཉིས་སུ་མེད་པར་འཁྲིལ། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། ལྷོ་རྩིབས་མྱོས་བྱེད་འབར་བ་སེར། །གཡས་པ་བེ་ཅོན་འཁོར་ལོ་གཡོན། ཁྲོ་གཏུམ་མི་བཟད་སྲིན་པོའི་གཟུགས། །སྐུ་ལ་དུར་ཁྲོད་ཆས་རྣམས་རྫོགས། །གསང་བའི་ཡུམ་དང་མཉམ་པར་སྦྱོར། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། ནུབ་རྩིབས་ཨཪྻ་མ་རུ་དམར། །རྩེ་གསུམ་གཡས་ལ་མི་སྙིང་གཡོན། །ཞལ་གདངས་མཆེ་གཙིགས་མི་སྡུག་གཟུགས། །དུར་ཁྲོད་རྫས་ཀྱིས་སྐུ་ལ་སྤྲས། །གཏུམ་ཆེན་ཡུམ་མཆོག་སྐུ་ལ་འཁྱུད། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། བྱང་རྩིབས་རལ་པ་ཚར་དགུ་ལྗང་། །ཐོད་དབྱུག་གཡས་ལ་འཁོར་ལོ་གཡོན། །གཏུམ་དྲག་འབར་བ་འཇིགས་པའི་གཟུགས། །དུར་(༦ན)
ཁྲོད་རྒྱན་དང་གོས་ཀྱིས་བརྗིད། །ཡུམ་མཆོག་ཁྲོ་མོ་སྐུ་ལ་འཁྱུད། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། སྒོ་བཞིར་བྱ་རྒོད་སྟག་ཆན་དང་། །ཀང་ཀ་སྤྱང་གདོང་བརྔམ་ཤིང་བརྗིད། །ལྕགས་ཀྱུ་ཞགས་སྒྲོག་དྲིལ་བུ་འཛིན། བཞི་གའང་དུར་ཁྲོད་ཆས་དང་ལྡན། །འགུགས་འཆིང་སྡོམ་མྱོས་ལས་རྣམས་མཛད། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། བསྲུང་བའི་འཁོར་ལོའི་རྩིབས་སྟེང་ན། །བདུད་འདུལ་ཆེན་པོ་ཁྲོ་བོ་བཅུ། །གཡས་གཡོན་ལྕགས་ཀྱུ་ཐོ་བ་བསྣམས། །དུར་ཁྲོད་ཆས་ཀྱིས་སྐུ་ལ་སྤྲས། །སྲུང་བཟློག་འཕྲིན་ལས་མ་ལུས་མཛད། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། དྲག་པོའི་གཞལ་ཡས་བར་ཁྱམས་ན། །གཤིན་རྗེའི་དམག་ཚོགས་བསམ་མི་ཁྱབ། །སྤྲུལ་པ་ཡང་སྤྲུལ་ཉིང་སྤྲུལ་དང་། །ཕོ་ཉ་གློག་འཁྱུག་སྐར་ལྟར་འཁྲུག །གསོད་གཅོད་དྲག་པོའི་ལས་ལ་བརྔམ། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། རིམ་པ་བདུན་གྱི་ས་འོག་ནས། །འཆི་བདག་སྨུག་ནག་ཁྲོ་ཞིང་བརྔམ། །ཐོད་དབྱུག་དུང་ཁྲག་ཕྱག་ན་བསྣམས། །མི་སྲུན་གཏུམ་མོ་དུག་ཧྲུལ་མ། །གཤེད་བཞི་མོན་བཞི་བདུད་པོ་བཞི། ཁྲམ་བདག་བཅུ་གཉིས་སྒོ་བ་བཞི། །བདུན་བརྒྱ་ཉི་ཤུ་ཡང་འཁོར་བཅས། །སྡེ་བརྒྱད་དྲེགས་པའི་འཁོར་གྱིས་བསྐོར། །ལས་ཀྱི་གཤིན་རྗེའི་དམག་ཚོགས་རྣམས། །གང་ལ་བྱ་བ་ཁྱོད་ཀྱིས་ཤེས། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །སྲོག་ལུས་དབང་པོའི་དངས་སྙིགས་ཕྱེ། །རྩ་རྒྱུས་ཁྲག་དང་རྦ་ཀློང་སྐོམས། །ལུས་སྲོག་དབང་པོའི་རྟེན་ལས་ཕྲོལ། །འབྱུང་བ་རྣམ་ཤེས་བཀྲག་མདངས་སྡུས། །བླ་མཚོ་བཀྲག་མདངས་བག་ཆགས་སྐོམས། །ལྕགས་མཁར་སྒོ་མེད་ནང་དུ་ཆུག །འབྱུང་བའི་གདན་བཞི་རྔམས་ཀྱིས་གནོན། །གདུག་རྩུབ་མེ་ཡི་ཞལ་དུ་སྟོབ། །སྡང་བའི་དགྲ་དང་གནོད་པའི་བགེགས། །མཆོད་པར་འབུལ་ལོ་ཁ་རཾ་ཁཱ་ཧི། །ཐལ་བ་བཞིན་དུ་རབ་ཏུ་རློག །བཟློག་ཅིང་བསྒྱུར་བའི་འཕྲིན་ལས་མཛོད། །ཨྱེ། དུས་དགྲའི་དབང་པོ་གཤིན་རྗེའི་གཤེད། །སྤྲུལ་པ་ཡང་སྤྲུལ་ཕོ་ཉ་དང་། ཁྱད་པར་སྐྱེ་འགྲོ་ཐམས་ཅད་ཀྱི། །བླ་ཚེ་སྲོག་ལ་དབང་བསྒྱུར་བ། །རལ་པ་ཚར་དགུ་གཏུམ་དྲག་ཅན། །དྲེགས་པའི་སྡེ་དཔོན་ཀུན་གྱི་གཙོ། །ཕོ་(༦བ)
བརྒྱད་མོ་བརྒྱད་གཤིན་རྗེ་སོགས། །ལྷ་སྲིན་སྡེ་བརྒྱད་ཡོངས་ཀྱི་རྗེ། །འཁོར་དང་བཅས་པ་ཁྱེད་རྣམས་ཀྱིས། །སངས་རྒྱས་བསྟན་བཤིག་སེམས་ཅན་འཚེ། །དཀོན་མཆོག་གསུམ་གྱི་དབུ་འཕང་སྨད། །བླ་མའི་སྐུ་དགྲ་ཆོས་འཁོར་འཇིག །ཁྱད་པར་རིགས་འཛིན་སྒྲུབ་པ་པོ། །དགོན་གནས་ཡོན་བདག་བཅས་པ་ལ། །སྔ་དགྲ་ལག་དར་ཕྱི་དགྲ་སེམས། །ད་དགྲ་གནོད་ཅིང་འཚེ་བ་ཡི། །སྡང་བར་བྱེད་པའི་གཟུགས་ཅན་དང་། །ཚེ་སྲོག་བསམ་སྦྱོར་འདོད་པའི་དོན། །ཆོས་སྲིད་ལེགས་ཚོགས་བསྒྲུབ་པ་ལ། །བར་དུ་གཅོད་པའི་གཟུགས་མེད་བགེགས། །སྟེང་འོག་ཕྱོགས་མཚམས་གར་འདུག་ཀྱང་། །ཕོ་ཉ་དུས་མེའི་ཚ་ཚ་ནི། །གློག་སྟོང་ལྟར་འཁྱུག་སྐད་ཅིག་ལ། །སྤྲོས་ཏེ་ལྕགས་ཀྱུས་སྙིང་ནས་བཟུང་། །ཞགས་པས་སྐེ་དང་མགོ་ལུས་ཆིངས། །ཡན་ལག་ལྕགས་ཀྱི་སྒྲོག་ཏུ་ཆུག །དྲིལ་བུའི་སྒྲ་ཡིས་རྣམ་ཤེས་སྨྱོས། །ལྷ་དང་བསྲུང་བའི་འཁོར་ལོ་རྫས། །བསོད་ནམས་ཟ་ཐང་མངའ་ཐང་སོགས། །སྐྱོབ་བྱེད་ཀུན་དང་རྣམ་པར་ཕྲོལ། །འདྲེ་གདོན་གཤེད་མའི་ལག་ཏུ་ཕྲོད། །ལས་ཀྱི་རླུང་དམར་ལ་བསྐྱོན་ནས། །སྐད་ཅིག་ཐངས་ཅིག་ཡུད་ཙམ་ལ། །གནམ་ལྕགས་འབྲུབ་ཁུང་ནང་འདིར་ཆུག །རྣམ་ཤེས་ལུས་ཀྱི་རྟེན་དང་ཕྲོལ། །སྲོག་རྩ་དམར་པོ་རྦད་ཀྱིས་ཆོད། །ཤ་རུས་ནང་ཁྲོལ་ཚོགས་རྣམས་ཟོ། །སྙིང་ཁྲག་དྲོན་མོ་ཧུབ་ཀྱིས་འཐུང་། །པགས་པ་དམར་བཤུས་གོས་སུ་གྱོན། །མུ་སྟེགས་དྲང་སྲོང་བྲམ་ཟེ་དང་། །བན་བོན་སྔགས་པའི་མཐུ་བྱད་ཚོགས། །དྲག་སྔགས་དམོད་པའི་མཚོན་ཆ་དང་། །རྦད་འདྲེ་རྦོད་གཏོང་མ་ལུས་པ། །ཐམས་ཅད་རང་གཤེད་རང་ལ་ཕོབ། །མདོར་ན་དགྲ་བོ་མི་ནོར་བྲན། །(༧ན)
ཕ་ཚན་སྲིད་སྡེ་ཡུལ་མཁར་རྣམས། །མིང་ཙམ་བརྡའ་ཙམ་མ་ལུས་པར། །ཐལ་བའི་རྡུལ་བཞིན་བརླག་པར་མཛོད། །ཅེས་བསྐུལ། བསྒྲལ་ལས་བསྡུས་པ་ལས་བྱང་གི་ཚོགས་ཐ་མས་གོ་ཆོད་ཀྱང་འདིར་རྒྱས་པའི་དབང་དུ་བཏང་སྟེ་འབྲུབ་ཁུང་ལིང་ག་ཕུར་ཐུན་སྒྲོལ་གྲི་སོགས་ཡོ་བྱད་རྣམས་རྡོ་རྗེ་སློབ་དཔོན་གྱི་མདུན་དུ་གསར། སྔགས་པ་བདུད་ཆས་སུ་ཞུགས། ཐོག་མར་གསེར་སྐྱེམས་ནི། ཧཱུཾ། རིགས་འཛིན་རྩ་བརྒྱུད་བླ་མ་དམ་པ་དང་། །བདེ་གཤེགས་ཀུན་འདུས་ཞི་ཁྲོ་རབ་འབྱམས་ཚོགས། ཁྱད་པར་འཇམ་དཔལ་གཤིན་རྗེའི་ལྷ་ཚོགས་རྣམས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །ལས་གཤིན་འཆི་བདག་བྷེ་བ་ས་ཏྭ་སོགས། །དྲེགས་པའི་སྡེ་དཔོན་སུམ་ཅུ་ཡབ་ཡུམ་སྲས། །བཀའ་ཉན་བྲན་གཡོག་མངག་གཞུག་བཅས་པ་རྣམས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །སྔགས་འཆང་བདག་གི་རིགས་ཀྱི་སྲུང་མ་དང་། །ས་ཕྱོགས་འདི་ཡི་ཡུལ་གཞིས་གནས་ཀྱི་བདག །ལོ་ཟླ་ཞག་དུས་ཚེས་ལ་དབང་བའི་ལྷས། །གསེར་སྐྱེམས་འདི་བཞེས་རྣལ་འབྱོར་མཐུ་དཔུང་སྐྱེད། །གཟུ་དཔང་གསོལ་བ་ནི། ཧཱུཾ། དཀྱིལ་འཁོར་ཀུན་བདག་མཆོག་གསུམ་བླ་མ་དང་༔ ཡི་དམ་ཞི་ཁྲོ་རབ་འབྱམས་མཁའ་འགྲོའི་ཚོགས། ཁྱད་པར་བཅོམ་ལྡན་འཇམ་དཔལ་གཤིན་རྗེའི་གཤེད། །འཁོར་བཅས་བདག་ལ་དགོངས་ཤིང་གསན་དུ་གསོལ། །སྣང་སྲིད་གདོད་ནས་ཆོས་སྐུར་རོ་གཅིག་ལ༔ མ་རྟོགས་སྒྲིབ་བསལ་འགྲོ་ཀུན་བསྒྲལ་སེམས་ཀྱང་༔ དམ་ཉམས་དགྲ་བོས་བྱེད་དུ་མ་སྟེར་རོ༔ རྩ་བརྒྱུད་བླ་མས་གཟུ་དང་དཔང་མཛོད་ཅིག༔ སྨིན་གྲོལ་ལམ་ཞུགས་བསྐྱེད་རྫོགས་ཟབ་མོའི་དོན༔ ཚུལ་བཞིན་ཉམས་(༧བ)
བླངས་དངོས་གྲུབ་བླང་སེམས་ཀྱང་༔ དམ་ཉམས་དགྲ་བོས་བྱེད་དུ་མ་སྟེར་རོ༔ ཡི་དམ་ལྷ་ཚོགས་གཟུ་དང་དཔང་མཛོད་ཅིག༔ བླ་མེད་བྱང་ཆུབ་མཆོག་ཏུ་སེམས་བསྐྱེད་ནས༔ འགྲོ་ལ་ཕན་བདེའི་དགའ་སྟོན་སྤེལ་སེམས་ཀྱང་༔ དམ་ཉམས་དགྲ་བོས་བྱེད་དུ་མ་སྟེར་རོ༔ དཔའ་བོ་མཁའ་འགྲོ་གཟུ་དང་དཔང་མཛོད་ཅིག༔ ཚེ་འདི་བློས་བཏང་དབེན་པའི་གནས་རྣམས་སུ༔ བདེ་ཆེན་བྱང་ཆུབ་བསྒྲུབ་པར་སེམས་ན་ཡང་༔དམ་ཉམས་དགྲ་བོས་བྱེད་དུ་མ་སྟེར་རོ༔ དམ་ཅན་ཆོས་སྐྱོང་གཟུ་དང་དཔང་མཛོད་ཅིག༔ མ་ཉེས་མ་ལེན་ཡེ་ཤེས་ལྷ་ཡི་ཚོགས༔ སྡིག་ཅན་ལས་ངན་བསྟན་པའི་སྤྱི་དགྲ་འདིས༔ སངས་རྒྱས་བསྟན་བཤིག་དཀོན་མཆོག་དབུ་འཕང་སྨད༔ བླ་མའི་ཐུགས་དཀྲུགས་དགེ་འདུན་སྡེ་ལ་སྨོད༔ ཁྱད་པར་རྣལ་འབྱོར་བདག་ཅག་འཁོར་བཅས་ལ༔ རི་ལྟར་བརྗིད་ཅིང་རྩང་ལྟར་འཛུགས་པ་དང་༔ མདུན་ནས་དགུག་དང་རྒྱབ་འདེད་ཟུར་ནས་གསོད༔ ལུས་ཀྱིས་བརྡུང་བརྡེག་དཀོར་རྫས་རྐུ་ཞིང་འཕྲོག༔ ངག་གིས་ཡ་གས་གཞན་གྱི་ནུས་མཐུ་བསྒུལ༔ ཡིད་ཀྱིས་བསམ་ངན་དུག་ལྟར་གཡོ་བྱེད་པའི༔ སྔ་དགྲ་ལག་བརྡར་ཕྱི་དགྲ་ཡིད་སེམས་དང་༔ ད་དགྲ་སྡོ་བའི་དགྲ་བགེགས་གར་གནས་ཀྱང་༔ གཤིན་རྗེ་གཤེད་པོའི་བཀའ་ཉན་འཁོར་ཚོགས་ཀྱིས༔ སྐད་ཅིག་འདིར་ཁུག་མངོན་སྤྱོད་ལས་མཛོད་ཅིག༔ མཁྱེན་དགོངས་དམོད་བཅོལ་ནི། ཧོ་བླ་མ་ཡི་དམ་ཆོས་སྐྱོང་སྲུང་མའི་ཚོགས་སྤྱི་དང་ཁྱད་པར་འཇམ་དཔལ་གཤིན་རྗེའི་གཤེད་དྲེགས་པ་འཇོམས་བྱེད་ཀྱི་དཀྱིལ་འཁོར་ལྷ་ཚོགས་བཀའ་སྡོད་ལས་ཀྱི་གཤིན་རྗེ་སྣང་སྲིད་ལྷ་སྲིན་སྡེ་བརྒྱད་ཀྱི་ཚོགས་རྣམས་གཟུ་དང་དཔང་པོ་མཛོད་ཅིག༔ བསྟན་དང་འགྲོ་ལ་འཚེ་བ་སྤྱིའི་དགྲ། རྣལ་འབྱོར་པར་སྒོས་སུ་སྡོ་བའི་སྔ་དགྲ་ངན་པ་ལག་ལ་བཀལ་བ། ཕྱི་(༨ན)
དགྲ་བསམ་ངན་རླུང་ལྟར་འཚུབ་པ། ད་དགྲ་དྲག་པོ་དངོས་སུ་འཛུགས་པའི་གཟུགས་ཅན་གྱི་དགྲ་དང་གཟུགས་མེད་གདོན་བགེགས་ཀྱི་ཚོགས་འདི་རྣམས་ཀྱིས། སྤྱིར་སངས་རྒྱས་ཀྱི་བསྟན་པ་བཤིག་གོ །དཀོན་མཆོག་གི་དབུ་འཕང་སྨད་དོ། །རྡོ་རྗེ་འཛིན་པའི་སྐུ་དགྲ་བྱས་སོ། །རབ་བྱུང་ངུར་སྨྲིག་འཛིན་པ་དང་སྔགས་འཆང་གོས་དཀར་ལྕང་ལོ་ཅན་གྱི་སྡེ་བཅོམ་མོ། །སེམས་ཅན་རྣམས་ཀྱི་བདེ་སྐྱིད་ཕྲོགས་སོ། །སྣང་སྲིད་ལྷ་འདྲེའི་ཟ་ལམ་བཀག་གོ །ཡང་སྒོས་རིགས་འཛིན་བདག་དང་སྲུང་མ་ཁྱེད་རྣམས་ལ་དོ་བསྡོས་སོ། །སྒྲུབ་པ་པོ་སྡེ་དང་བཅས་པ་རྣམས་ཀྱི་འདི་ཕྱིའི་བདེ་བ་བསྒྲུབ་པ་ལ་བར་དུ་གཅོད་པའི་དགྲ་བགེགས་གཟུགས་བྱང་བུར་བྲིས་ཤིང་མིང་ཡི་གེར་བཏབ་པ་འདི་རྣམས་དམིགས་རྟེན་གྱི་ཉ་བོ་འདི་ཉིད་ལ་ད་ལྟ་ཉིད་དུ་འགུགས་པའི་འཕྲིན་ལས་མཛོད་ཅིག །འབྲུབ་ཁུང་བསྐྱེད་ཆོག་གཏེར་གཞུང་གི་གདབ་ལས་ལྟར་བྱས་ཀྱང་རུང་མོད་རྒྱས་པར་སྤྲོ་ན་བསང་སྦྱངས། སྟོང་པའི་ངང་ལས་རང་གི་ཐུགས་ཀ་ནས་ཨེ་མཐིང་ནག་གཅིག་ཆད་མདུན་དུ་འཕྲོས་ཡོངས་སུ་གྱུར་པ་ལས། དུག་དང་ཟངས་ལྕགས་ཁྲོ་ཆུ་ལས་གྲུབ་པའི་ཁང་སྒྲོམ་མེ་འབར་བ། གྲུ་གསུམ་པ་བང་རིམ་དགུ་དང་ལྡན་པ། ཁ་ཁྱེར་ཡངས་ཤིང་གཏིང་ཟབ་པ། དེའི་ནང་དུ་འདོད་ཆགས་ཀྱི་ཁྲག་མཚོ་འཁྱིལ་བ། ཞེ་སྡང་གི་མེ་རླུང་འཚུབ་པ། གཏི་མུག་གི་མུན་པ་འཁྲིགས་པ། མཚོན་ཆའི་དྲག་ཆར་འབབ་པ། ནད་ཀྱི་ན་བུན་འཐུལ་བ། དུག་གི་རླངས་པ་སྔོ་དམར་དུ་འཕྱོ་བ། ཁྲག་གི་སེར་ཆེན་འབེབས་པ། གཤིན་རྗེའི་སྐྱེས་བུ་དཔག་ཏུ་མེད་པ་རྒྱུག་པ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་(༨བ)
ཀྱིས་གང་བ། གཞན་ཡང་སྤྲུལ་པའི་ཕོ་ཉ་འཇིགས་སུ་རུང་བ་རྣམས་ནི། སེང་གེ་ལྟར་བརྔམ་པ། སྟག་ལྟར་མཆོང་བ། འབྲོང་ལྟར་འགྱིང་བ། ཁྲ་ལྟར་འཛུལ་བ། སྦྲུལ་ལྟར་འཁྱུག་པ། འདྲེ་སྲིན་ལྟར་ངུར་བ། འགོང་པོ་ལྟར་སྨྱོ་བ། སྲིན་བྱ་ལྟར་རྒོད་པ། ཝ་མོ་ལྟར་བརྒྱལ་བ། སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། སོད་སོད་དང་རྒྱོབ་རྒྱོབ་ཀྱི་སྒྲ་འབྲུག་ལྟར་སྒྲོག་པས་གང་བ། དེའི་ནང་དུ་བསྐལ་པ་སྟོང་གི་མུན་པ་འཁྲིགས་པ། ཕྱི་ནས་བསྐལ་པ་སྟོང་གི་མེ་འབར་ཞིང་རླུང་ནག་འཚུབ་པ། གཤིན་རྗེའི་ཞིང་ཁམས། བཤན་པའི་ཕོ་བྲང་། སྲོག་གཅོད་ཀྱི་གྲོང་ཁྱེར། སྲིད་པ་ལས་ཀྱི་གཞལ་ཡས་ཁང་ཆེན་པོ། དགྲ་བོ་ཕྱིན་མ་ཐག་ལྷ་དང་འབྲལ་ཞིང་གཤེད་དུ་འབེབས་པ། ལས་ངན་ཐམས་ཅད་རྣམ་པར་སྨིན་པའི་བཙོན་ཁང་དྲག་པོ་དེའི་དབུས་སུ། སངས་རྒྱས་ཀྱི་བསྟན་དགྲ། དཀོན་མཆོག་གི་སྤྱི་དགྲ། བླ་མའི་སྐུ་དགྲ། རྣལ་འབྱོར་གྱི་སྒོས་དགྲ། དམིགས་པའི་དགྲ་བོ་གང་གི་རྣམ་པར་ཤེས་པ་ཪྣྲི་ཏྲི་དུད་ཁ་ཡོངས་སུ་གྱུར་པ་ལས་དམ་ཉམས་པའི་དགྲ་བགེགས་དེ་དག །ཉམ་ཆུང་བ། སྒྱིད་པ་ཕྲ་བ། སྐྲ་གཟིངས་པ། མདོག་ནག་ཅིང་བམ་པ། མྱ་ངན་གྱི་ཕྱག་རྒྱ་ཅན། བུ་ག་དགུ་ནས་ཁྲག་དང་རྣག་འཛག་པ། ཁ་ནས་སིད་ཀྱི་སྒྲ་སྒྲོག་པ། བསྲུང་ཞིང་སྐྱོབ་པའི་ལྷ་དང་འབྲལ་ཞིང་གཤེད་དུ་འབེབས་པ། གནོད་བྱེད་ཐམས་ཅད་འདུས་པའི་ངོ་བོར་གྱུར། དེའི་འོག་ཏུ་ཞིང་ཆེན་གྱི་ས་གཞི་བརྡལ་བ། མཚོན་ཆ་སྣ་ཚོགས་གཟིངས་ཏེ་འདུག་པ། དྲག་པོའི་ཚ་ཚ་ཆིལ་ལི་ལི་ཁོལ་བ། དེའི་འོག་ཏུ་རཀྟའི་རྦ་རླབས་འཁྲུག་ཅིང་ཞིང་ཆེན་གྱི་རྦ་ཉིལ་ཉིལ་འཕྱོ་བ། དེའི་འོག་ཏུ་(༩ན)
བསྐལ་པའི་རླུང་དམར་ནག་འུར་འུར་འབར་བ། དེའི་འོག་ཏུ་བསྐལ་པའི་རླུང་སྤུ་གྲི་སོ་རྒལ་ཆིལ་ལི་ལི་འཁྲུག་པ། དེའི་འོག་ཏུ་དྲག་པོ་ཆོས་ཀྱི་དབྱིངས་ནམ་མཁའི་དཀྱིལ་འཁོར་གྲུ་གསུམ་མཐིང་ནག་འབར་བའི་དཀྱིལ་འཁོར། དགྲ་བོ་ཐམས་ཅད་གཏན་ནས་བརླག་པར་བྱེད་པ། མཐའ་དང་དབུས་མེད་པའི་རང་བཞིན་དུ་གྱུར། ན་མོ་རིགས་འཛིན་རྩ་བརྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ། སངས་རྒྱས་ཀྱི་བཀའ་བདེན་པ། ཆོས་ཀྱི་བཀའ་བདེན་པ། དགེ་འདུན་གྱི་བཀའ་བདེན་པ། གསང་སྔགས་དང་རིག་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བཀའ་བདེན་པ། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་ཁྱད་པར་བཅོམ་ལྡན་འདས་འཇམ་དཔལ་གཤིན་རྗེའི་གཤེད་དྲེགས་པ་འཇོམས་བྱེད་ཀྱི་དཀྱིལ་འཁོར་གྱི་ལྷ་ཚོགས་བཀའ་སྡོད་ལས་ཀྱི་གཤིན་རྗེ་འཆི་བདག་རལ་པ་ཚར་དགུ་ལྷ་སྲིན་སྡེ་བརྒྱད་རྣམས་ཀྱི་བདེན་པ་དང་བདེན་པའི་ནུས་མཐུ་ལ་བརྟེན་ནས། བསྟན་དང་འགྲོ་བའི་སྤྱི་དགྲ། རིག་པ་འཛིན་པ་བདག་ཅག་དཔོན་སློབ་སྦྱིན་པའི་བདག་པོ་འཁོར་དང་བཅས་པ་རྣམས་ལ་སྡང་བར་བྱེད་པ་སྒོས་ཀྱི་དགྲ་བོ་གནོད་བྱེད་བར་དུ་གཅོད་པའི་གདོན་བགེགས་ཐམས་ཅད་ད་ལྟ་ཉིད་དུ་དམིགས་རྟེན་འདི་ཉིད་ལ་ཁུག་ཅིག །ལན་གསུམ་མམ་བདུན་སོགས་ཀྱི་མཐར་སྒྲུབ་སྔགས་ཀྱི་ཤམ་བུར་ཆེ་གེ་ཪྣྲི་ཛ། ཏྲི་བཾ་རིལ་ཛ། ཨ་ཀརྴ་ཡ་ཛ། གཪྠ་ནི་ཛ། ཨ་བེ་ཤ་ཡཱ་ཛ་ཞེས་བསྟིམ། དགྲ་བོ་མི་ནོར་སྲིད་སྡེ་དང་བཅས་པ་འདི་རྣམས་ཀྱི་ཤ་ཁྲག་བླ་ཚེ་སྲོག་དབུགས་རྣམས་འཆི་བདག་གཤིན་རྗེ་ནག་པོས་གཙོ་བྱས་སྔགས་བདག་དྲེགས་པའི་སྡེ་དཔོན་ཚོགས་ཀྱི་ཟས་སྐལ་དུ་གཏད་པ་ཡིན་པས། དགྲ་བོ་འདི་རྣམས་འགོ་བའི་ལྷ་(༩བ)
ལྔ་དང་ཕྲོལ་ཞིག །གནོད་པའི་འདྲེ་ལྔ་དང་སྤྲོད་ཅིག །གནམ་གྱི་འཇུ་ཐག་སྟེང་ནས་ཆོད་ཅིག །ས་ཡི་རྟེན་ཕུར་འོག་ནས་ཕྱུངས་ཤིག །བླ་ཚེ་འཁྱམ་པོ་ད་ལྟ་ཁྱེར་ཞིག །སྲོག་རྩ་དམར་པོ་དུམ་བུར་གཏུབས་ཤིག །གསལ་གསལ་ཡིད་ཀྱི་སྣང་བ་སྒྲིབས་ཤིག །བརྗོད་པ་གཏམ་གྱི་སྨྲ་བ་ལྐུགས་ཤིག །རྒྱུ་བ་དབུགས་ཀྱི་འགྲོ་འོང་ཆོད་ཅིག༔ རྣམ་ཤེས་རྟེན་གྱི་གཟུགས་དང་ཕྲོལ་ཞིག །ཕ་ཚན་མི་རབས་རྩ་བ་ཕྱུངས་ཤིག །ཞང་ཚན་ཉེ་རིགས་ཕ་མཐའ་བཏུལ་ཞིག །མངའ་འབངས་འཁོར་གཡོག་སྲིད་སྡེ་གཏོར་ཞིག །དབང་ཐང་བསོད་ནམས་ཟད་དུ་ཆུག་ཅིག །དཔལ་འབྱོར་ལོངས་སྤྱོད་ཡལ་དུ་ཆུག་ཅིག །མཁར་དར་གྲོང་ཁྱེར་སྟོངས་སུ་ཆུག་ཅིག །ཞིང་ལ་ལོ་མེད་ཐ་བར་ཐོང་ཞིག །ཚ་གྲང་ནད་ཀྱིས་མནར་དུ་ཆུག་ཅིག །སྡེ་བརྒྱད་ཟ་ཁ་ཟུག་ཏུ་ཆུག་ཅིག །བསྟེན་པའི་ལྷ་སྲུང་བདུད་དུ་ཕོབ་ཅིག །བྱད་མ་རྦོད་གཏོང་རང་གཤེད་ཕོབ་ཅིག །མདོར་ན་དགྲ་བགེགས་འདི་རྣམས་ལོ་ཟླ་ཞག་དུས་ལས་མ་འགྱངས་པར་དམ་ཅན་སྲུང་མ་ཁྱེད་རྣམས་ཀྱིས་རྐན་སྒྲ་དྲག་པ་དང་བཅས་ཏེ་ད་ལྟ་ཉིད་དུ་རབ་དཀར་ཚེམས་ཀྱིས་ཆེམས་ཆེམས་བཞེས་ལ་ཐལ་བའི་རྡུལ་དུ་རློག་པའི་འཕྲིན་ལས་མཛོད་ཅིག །ཧཱུཾ། ཁྲག་འཐུང་འཇམ་དཔལ་གཤིན་རྗེ་ཡི༔ ལས་བྱེད་བཀའ་ཉན་ཕོ་ཉའི་ཚོགས༔ ཁྱོད་ཀྱི་དམ་ཚིག་དུས་ལ་བབ༔ སྤྲུལ་པ་འགྱེད་པའི་དུས་ལ་བབ༔ དགྲ་བགེགས་འགུགས་པའི་དུས་ལ་བབ༔ སྡང་བའི་དགྲ་དང་གནོད་པའི་བགེགས༔ གང་ལ་བྱ་བ་ཁྱོད་ཀྱིས་ཤེས༔ བླ་སྲོག་རྣམ་པར་ཤེས་པ་ཀུན༔ མ་ཤར་མ་གཏང་ཁུག་ལ་ཤོག །བཏབ་པའི་དུས་ལས་མ་འདའ་བར༔ ཞིང་བཅུ་ཚང་བའི་དགྲ་དང་བགེགས༔ ཐམས་ཅད་མ་ལུས་མྱུར་དུ་ཁུག༔ ལྕགས་ཀྱུ་ཅན་གྱིས་སྙིང་ནས་དྲོངས༔ ཞགས་པ་(༡༠ན)
ཅན་གྱིས་ཡན་ལག་ཆིངས༔ ལྕགས་སྒྲོག་ཅན་གྱིས་དབང་པོ་སྡོམས༔ དྲིལ་བུ་ཅན་གྱིས་མྱོས་སུ་ཆུག༔ ལས་ཀྱི་རླུང་གིས་རྒྱབ་ནས་ཕུལ༔ འཇིགས་པའི་མུན་པས་མདུན་ནས་སུས༔ སྐད་ཅིག་དེ་ནི་ཡུད་ཙམ་ལ༔ རང་དབང་མེད་པར་ཁྲིད་ལ་ཤོག༔ ཨ་མུ་ཀ་སརྦ་ཪྣྲི་ཏྲི་བཛྲ་ཨཾ་གུ་ཤ་ཛཿཛཿ། ཕོ་ཉ་བསྐུལ་ཞིང་བླ་འགུགས་པ་ནི། ཧཱུཾ་བྷྱོ། ད་ནི་བསྒྲལ་བའི་ཐུགས་དམ་དུས་ལ་བབས༔ དོ་ནུབ་ནམ་གྱི་སྲོད་དང་གུང་ལ་བབས། །ད་ལྟ་ནམ་གྱི་གུང་ལ་བབ་དུས་འདིར༔ སེམས་མེད་འབྱུང་བ་ཆུ་ཡང་གཉིད་ལོག་གི །དགྲ་བོ་ལས་ངན་སྡིག་ཅན་གཉིད་ལོག་པའི། །བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། ད་ལྟ་ནམ་གྱི་སྲོད་ལ་བབ་དུས་འདིར། །ཆོམ་རྐུན་ལས་ལ་འགྱེད་པའི་དུས་ཡིན་པས། །དམ་ཉམས་དགྲ་བོའི་བླ་ཚེ་འཁྱམ་པའི་དུས༔ བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། ད་ལྟ་ནམ་གྱི་ཐོ་རངས་བབས་དུས་འདིར། །དགྲ་བོའི་བླ་ཚེ་འཕྱོ་ཞིང་འཕྲོ་བའི་དུས། །དམ་ཉམས་དགྲ་བོའི་བླ་ཚེ་འཕྱོ་བའི་དུས། །བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། ད་ལྟ་ནམ་ལངས་ཉི་མ་ཤར་དུས་འདིར། །མི་ཕྱུགས་ཐམས་ཅད་ལས་ལ་གྲམ་པའི་དུས། །དགྲ་བོའི་བླ་ཚེ་སྒོ་རུ་འཐོན་པའི་དུས། །བླ་འཁྱམ་ལས་ངན་མྱུར་དུ་ཁྲིད་ལ་ཤོག །བྷྱོ། ད་ལྟ་ཉི་མའི་གུང་ལ་བབ་དུས་འདིར། །དགྲ་ཀུན་རྣམ་ཤེས་བྱིང་ཞིང་མྱོས་པའི་དུས། །དགྲ་བོའི་བླ་ཚེ་འཐོམ་ཞིང་འཁྱམ་པའི་དུས། །བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། ད་ལྟ་ཉི་ནུབ་གྲིབ་སོ་ཕོག་དུས་འདིར། །སྙིང་མི་དགའ་ཞིང་ཤེས་པ་འཕྱོ་བའི་དུས། །དགྲ་བོའི་བླ་ཚེ་རྣམ་ཤེས་འཕྱོ་བའི་དུས། །བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། བླ་འཁྱམ་ལས་ངན་འཕྱོ་བའི་དུས་དྲུག་ལ༔ བླ་གཤེད་ཕོ་ཉ་ཁྱེད་རྣམས་མྱུར་དུ་རྒྱུག །མགོན་མེད་བྱིའུ་ཕྲུག་རྒྱ་ཁྲས་ཟིན་པ་ལྟར། །རང་(༡༠བ)
དབང་མེད་པར་མྱུར་དུ་ཁུག་ལ་ཤོག །དགྲ་བོ་བླ་འཁྱམ་མི་རུ་རྫུ་བ་ན། །ཕོ་ཉ་གནོད་སྦྱིན་སྲིན་པོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་ཤ་བར་རྫུ་བ་ན། །ཕོ་ཉ་གསེར་གྱི་སྟག་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་དགོ་བར་རྫུ་བ་ན། །ཕོ་ཉ་ལྕགས་དོམ་ནག་པོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་ལུག་ཏུ་རྫུ་བ་ན། །ཕོ་ཉ་ལྕགས་ཀྱི་སྤྱང་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་ར་རུ་རྫུ་བ་ན། །ཕོ་ཉ་བྱུ་རུའི་ཁྱི་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་བྱ་རུ་རྫུ་བ་ན། །ཕོ་ཉ་བྱ་རྒྱལ་ཁྱུང་དུ་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་གླ་བར་རྫུ་བ་ན། །ཕོ་ཉ་གསེར་གྱི་འཕར་བར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་བོང་བུར་རྫུ་བ་ན། །ཕོ་ཉ་ཟངས་ཀྱི་དྲེད་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །བྷྱོ། དམ་ཉམས་དགྲ་བོའི་བླ་རྟགས་བརྒྱད་པོ་ལ། །ཕོ་ཉ་བརྒྱད་ཀྱིས་གཉེན་པོར་སྐུ་སྤྲུལ་ལ། །འབྲུབ་ཁུང་འཁོར་བའི་བཙོན་ཁང་འདིའི་ནང་དུ། །དམ་ཉམས་ལིང་གའི་རྟེན་ལ་བླ་སྲོག་ཁུག །བླ་སྲོག་གསུམ་ལ་དྲག་པོའི་ཕུར་པས་ཐོབ། །ཕུར་མཚོན་དཔལ་གྱིས་ལུས་སེམས་ཕྱེ་ལ་སྒྲོལ། །དགྲ་བོའི་བླ་སྲོག་སྟེང་དུ་མཱ་ར་ཡ། །སྲོག་རྩ་དམར་པོ་རྦད་ཀྱིས་ཆོད་ལ་ཤོག །བླ་འཁྱམ་ལས་ངན་སྟེང་དུ་མཱ་ར་ཡ། །ར་དང་ལུག་དང་བོང་བུ་རྣམ་པ་གསུམ། །བླ་རྟགས་ཡིན་པས་མྱུར་དུ་ཁྱེར་ལ་ཤོག །སོ་དང་སེན་མོ་པགས་པ་རྣམ་པ་གསུམ། །ཕྱི་རྟགས་ཡིན་པས་མྱུར་དུ་ཁྱེར་ལ་ཤོག །སྣ་དང་ལྕེ་དང་མིག་དང་གསུམ་པོ་ནི། །དབང་པོ་ཡིན་པས་མྱུར་དུ་ཁྱེར་ལ་ཤོག །ཕོ་བ་སྙིང་དང་མཆིན་པ་(༡༡ན)
གསུམ་པོ་ནི། །དོན་སྙིང་ཡིན་པས་མྱུར་དུ་ཁྱེར་ལ་ཤོག །གཉེ་མ་རྒྱུ་མ་མཁལ་མ་གསུམ་པོ་ནི། །ནང་ཁྲོལ་ཡིན་པས་མྱུར་དུ་ཁྱེར་ལ་ཤོག །ཤ་ཁྲག་བརྒྱན་པའི་མཆོད་གཏོར་འདི་བཞེས་ལ། །བཅོལ་བའི་འཕྲིན་ལས་མྱུར་དུ་གྲུབ་པར་མཛོད། །སྒྲུབ་སྔགས་ཇུག་ཏུ་དགྲ་བོའི་བླ་ཤ་རེ་མ་ཏི་འགྲིམ་འགྲིམ། ཤ་མ་རུ་ཏི་ཐུལ་ཐུལ། མྱོགས་མྱོགས། ཡེད་ཡེད། ཤ་མརུ་ཏི་ཁུག་ལིང་། མྱོག་ལིང་། ཤ་ལིང་། ཐུམ་ཙ་མུན་ཏྲི་བྷྱོ་ཛ། ལྷ་དང་དབྱེ་བ་ནི། ཧཱུཾ། དབྱེ་བྱེད་ལས་ཀྱི་ཕོ་ཉའི་ཚོགས༔ ལས་ངན་སྡིག་ཅན་དགྲ་བོ་འདི༔ བསྲུང་ཞིང་སྐྱོབ་པར་བྱེད་པ་ཡི༔ ཡེ་ཤེས་འཇིག་རྟེན་ལྷ་ཡི་ཚོགས༔ ཕྲོལ་ཞིག་ཕྱེ་ཞིག་རྣམ་པར་ཕྱེ༔ དགྲ་ལྷ་སྤྱི་བོའི་གཙུག་ནས་ཕྲོལ༔ སྲོག་ལྷ་ཕྲག་པ་གཡས་ནས་ཕྲོལ། །ཡུལ་ལྷ་ཕྲག་པ་གཡོན་ནས་ཕྲོལ། །ཞང་ལྷ་ལྟེ་བའི་ཁུང་ནས་ཕྲོལ། །མ་ལྷ་གསང་བའི་གནས་ནས་ཕྲོལ། །རིགས་འཛིན་སྲུང་མ་རྒྱབ་ནས་ཕྲོལ། །མཉམ་པོར་འོང་བའི་བདུད་དང་སྤྲོད༔ མ་མ་ཏྲག་རཀྴ་མཱ་ར་ཡ་ཕྱེ་ཕྱེ༔ ཪྣྲི་ཏྲི་དེ་ཝ་སརྦ་ཨུ་ཙ་ཏ་ཡ་ཕཊ༔ ཐུན་རྫས་སྣ་ཚོགས་ཀྱིས་བྲབ་པ་ནི། ཧཱུཾ། ཁྲག་འཐུང་འཇམ་དཔལ་གཤིན་རྗེ་ཡི༔ ཕོ་ཉར་མངགས་པ་ཐུན་གྱི་བདག༔ དགྲ་བགེགས་སྒྲོལ་ཕྱིར་ལས་ལ་ཡཱ༔ སྣ་ཚོགས་དྲག་པོ་རྫས་ཀྱི་ཐུན༔ གློག་ལྟར་འཁྱུག་ཅིང་ཐོག་ལྟར་འབེབས༔ དགྲ་བགེགས་ལུས་སེམས་འབེམ་ལ་ཡཱཿ སྒྲུབ་སྔགས་ཤམ་བུར་ཨེ་ཡ་མ་རཱ་ཛ་དགྲ་བོ་བྱད་མ་ཤ་ཏྲཱུཾ༔ སྲོག་ཪྣྲི་ཏྲི་ཧུར་ཐུཾ་ཛཿ མཱ་ར་ཡ་རྦད་སོད༔ ཁཾ་ཤག་རོ་མྱགས་མུག་ཏི་རྦད༔ དགྲ་བོ་ཆེ་གེ་མོའི་སྲོག་རྩ་མཱ་ར་ཡ་ཆོད༔ ཐུཾ་རིལ་རྦུད༔ ཨེ་མྱགས་ཐུན་བྷྱོ༔ མཱ་ར་ཡ་རྦད་ཛ༔ ཉེས་(༡༡བ)
པ་བསྒྲག་ཅིང་ཕུར་གདབ་ནི། ཧཱུཾ། དུག་ལྔའི་དབང་གྱུར་ལས་ངན་ཁྱོད༔ བསྒྲལ་བའི་ཞིང་བཅུ་ཚང་བ་སྟེ༔ སྙིང་རྗེས་ཁྲོས་ནས་བསྒྲལ་བར་བྱ༔ བྱང་ཆུབ་མཆོག་ཏུ་སེམས་སྐྱེད་ཅིག༔ རང་གི་ལག་གཉིས་ཉི་ཟླ་རུ༔ གྱུར་པའི་གཡས་ཀྱི་སོར་མོ་ལྔ༔ ཨོཾ་ཧཱུཾ་ཏྲཾ་ཧྲཱིཿཨཱཿདང་ནི། མཱུཾ་ལཱཾ་མཱཾ་པཱཾ་ཏཱཾ་ལྔ་གཡོན། །རིགས་ལྔ་ཡབ་ཡུམ་སྦྱོར་མཚམས་ནས། །སྲས་མཆོག་གཤིན་རྗེ་ཀཱི་ལཱ་ཡ། །ཞལ་གཅིག་ཕྱག་གཉིས་རྡོར་གཤོག་ཅན། །ཕྱག་གཉིས་ཕུར་པ་ཐུགས་ཀར་བསྒྲིལ། །འཆང་ཟུང་རྡོ་རྗེའི་ལྟེ་བ་ལ། །འཇམ་དཔལ་ཡབ་ཡུམ་ཡེ་ཤེས་སེམས། །ཡར་དང་མར་གྱི་ར་ལྔ་ལ། །ཞི་ཁྲོ་རིགས་ལྔ་ཡབ་དང་ཡུམ། །རྒྱ་མདུད་གོང་མར་ཡི་དམ་ལྷ། །འོག་མར་དམ་ཅན་བཀའ་སྐྱོང་ཚོགས། །སྐུ་སྨད་ཕུར་བུའི་དཔལ་གསེང་ལ། །མེ་ཡི་ཚ་ཚ་སྡེ་བརྒྱད་དམག །རྩེ་མོར་མཚོན་ཆའི་བུ་ཡུག་འཚུབ། །བསྒྲིལ་བས་སྲིད་པ་གསུམ་འདར་ཞིང་། །ཕྱར་བ་ཙམ་གྱིས་ཁམས་གསུམ་དངངས། །བཏབ་པས་དགྲ་བགེགས་རྡུལ་དུ་རློག །ཨཱོཾ་ཡ་མཱནྟ་ཀ་བཛྲ་ཀཱི་ལི་ཀཱི་ལཱ་ཡ་ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཨཱོཾ་ཨཱཿཧཱུཾ། ཕུར་པ་ལས་འཕྲོས་འོད་ཟེར་གྱིས། །སྲས་བཅས་རྒྱལ་བའི་བྱིན་རླབས་རྣམས། །ཚུར་འདུས་ཁམས་གསུམ་དུས་གཅིག་ཏུ། །སྒྲོལ་བར་ནུས་པའི་དབང་ཐོབ་གྱུར། །ན་མཿས་མནྟ་བུདྡྷ་ནཱཾ་ཀཱ་ཡ་ཝཱཀ་ཙིཏྟ་ཡ་མཱནྟ་ཀ་བཛྲ་ཀཱི་ལི་ཀཱི་ལཱ་ཡ་ཧཱུཾ་ཕཊ། ཧཱུཾ། ཁྲོ་རྒྱལ་ཁྲག་འཐུང་ཆེན་པོ་ཡི༔ སྲས་མཆོག་བཛྲ་ཀཱི་ལཱ་ཡ༔ བསྒྲིལ་བས་ལྷ་ཡང་སྐྲག་བྱེད་ན༔ བཏབ་པས་དགྲ་བགེགས་སྨོས་ཅི་དགོས༔ ཞིང་བཅུ་ཚང་བའི་ལོག་འདྲེན་ཚོགས༔ སྒྲོལ་ཅིག་ཡེ་ཤེས་ཀློང་དུ་སྒྲོལ༔ ཨེ་མྱགས་རྔུབས་མུགས་ཤག་ལ་དུན་སྒྲུབ་(༡༢ན)
སྔགས་མཇུག་ཏུ་བཛྲ་ཀཱི་ལི་ཀཱི་ལཱ་ཡ་ཧཱུཾ་ཕཊ་ལ་གོང་གི་བསད་སྔགས་བཏགས་ཏེ་ཚེ་ཁྲུས་ཀྱི་དགོངས་པ་ལྟར་སྙིང་གར་བཏབ་ནས་བསྒྲལ། ཨེ་མ་ཁམས་གསུམ་སེམས་ཅན་རྣམས༔ མ་རྟོགས་འཁྲུལ་པ་སྙིང་རེ་རྗེ༔ སྙིང་རྗེས་བསྒྲལ་བའི་དམ་ཚིག་ནི༔ བསད་ཅིང་མནན་པ་མ་ཡིན་ཏེ༔ ཐུགས་རྗེའི་ཐབས་ཀྱི་སྦྱོར་བ་ཡིས༔ ཕུང་པོ་བསྒྲལ་བའི་ཞིང་དུ་བྱས༔ རྣམ་ཤེས་ཡུམ་གྱི་མཁའ་ལ་སྦ༔ ཡེ་ཤེས་དཔའ་བོར་བྱིན་བརླབས་ཏེ༔ རིག་པ་ཆོས་ཀྱི་དབྱིངས་སུ་འཕངས༔ ཁྱོད་ནི་རྒྱལ་བའི་སྲས་སུ་བསྐྱེད༔ ཅེས་བརྗོད། སླར་ཡང་འཁོར་བར་མི་ཟློག་པའི་ཕྱིར་གནས་བཅུར་བརྡེག་པ་ནི། ཧཱུཾ། དྲག་པོ་སྒྲོལ་མཛད་ཕུར་བུ་ཡིས། །ལུས་ཀྱི་འཁྲུལ་བ་རྩད་གཅོད་ཕྱིར། །ལྟེ་བའི་དཀྱིལ་དུ་ཀཱི་ལཱ་ཡ། །གཟུགས་སུ་འཁྲུལ་བ་རྩད་གཅོད་ཕྱིར། །མིག་གི་དཀྱིལ་དུ་ཀཱི་ལཱ་ཡ། །དྲི་རུ་འཁྲུལ་བ་རྩད་གཅོད་ཕྱིར། །སྣ་ཡི་དཀྱིལ་དུ་ཀཱི་ལཱ་ཡ། །སྒྲ་རུ་འཁྲུལ་བ་རྩད་གཅོད་ཕྱིར། །རྣ་བའི་དཀྱིལ་དུ་ཀཱི་ལཱ་ཡ། །རོ་རུ་འཁྲུལ་བ་རྩད་གཅོད་ཕྱིར། །ལྕེ་ཡི་དཀྱིལ་དུ་ཀཱི་ལཱ་ཡ། །འཁོར་བར་འཁྲུལ་བ་རྩད་གཅོད་ཕྱིར། །གསང་བའི་དཀྱིལ་དུ་ཀཱི་ལཱ་ཡ། །རེག་བྱར་འཁྲུལ་བ་རྩད་གཅོད་ཕྱིར། །ཡན་ལག་བཞི་ལ་ཀཱི་ལཱ་ཡ། །གོང་གི་སྔགས་དང་བཅས་གདང་། དེ་ནས་རལ་གྲིས་དུམ་བུར་གཅོད་ཅིང་། །ཧཱུཾ། སྙིང་རྗེས་ཁྲོས་པའི་ཁྲོ་རྒྱལ་གྱི༔ ཡེ་ཤེས་རྣོ་དབལ་མཚོན་ཆ་ཡིས༔ དགྲ་བགེགས་བག་ཆགས་འཁྲུལ་སེམས་བསྒྲལ༔ རྣམ་ཤེས་སྐྱེ་མེད་དབྱིངས་སུ་ཐིམ༔ ཨེ་མྱགས་རྔུབས་མུགས་ཤ་ལ་དུན༔ ཨ་མུ་ཀ་ཤ་ཧྲཱུཾ་ཏྲིག་ནན་རྦད་ནན་ཙིཏྟ་ཐུམས་རིལ་རྦད༔ ཆེ་གེ་མོའི་སྲོག་ཪྣྲི་ཧུར་ཐུམས་ཛ༔ ཁཾ་ཤག་རོ་མྱགས་མུག་ཏི་རྦད༔ མཱ་ར་ཡ་རྦད༔ ཅེས་བསྒྲལ། ཐོ་བ་ཧོམ་གཟར་ཐོགས་ལ། ཧཱུཾ། རྡུངས་ཤིག་རྡོ་རྗེ་འབར་བའི་གཏུན༔(༡༢བ)
བཀའ་ལས་འདའ་བྱེད་སྡིག་ཅན་རྣམས༔ ཁྲོ་མོ་འབར་བའི་གཏུན་ཁུང་དུཿ རྡོ་རྗེ་ཐོ་བས་བརྡུངས་བྱས་པས༔ ལྷ་ཡང་རུང་སྟེ་བརླག་བྱེད་ན༔ དགྲ་དང་བགེགས་ལ་སྨོས་ཅི་དགོས༔ ཨཱོཾ་པདྨ་ཨ་ཀོ་ཊ་ཡ་ཁ་ཐཾ་ཁ་ཐཾ༔ སྟོབ་པ་ནི། ཧཱུཾ། བསྐལ་པ་མེ་ལྟར་འབར་བའི་ཀློང་༔ ཁྲོ་རྒྱལ་འཇམ་དཔལ་གཤིན་རྗེའི་གཤེད༔ སྐུ་ནི་རི་རབ་ལྟ་བུར་བཞེངས༔ གནམ་ས་ལྟ་བུའི་ཞལ་གདོངས་ཤིག༔ གངས་རི་གཏམས་འདྲའི་མཆེ་བ་གཙིགས༔ གློག་དམར་འཁྱུག་འདྲའི་ལྗགས་སྐྱོངས་ལ༔ ཞིང་བཅུ་བསྒྲལ་བའི་ཤ་ཁྲག་རུས༔ དུག་གསུམ་སྐུ་གསུམ་ཀློང་དུ་འབུལ༔ བཞེས་ཤིག་རོལ་ཞིག་ཁ་རཾ་ཁཱ་ཧི༔ ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ས་པ་རི་ཝཱ་ར་མ་ཧཱ་མཾ་ས་རཀྟ་ཀེཾ་ནྲི་ཏི་ཙིཏྟ་བྷ་སུ་ཏ་ཁ་ཁ་ཁཱ་ཧི་ཁཱ་ཧི༔ ལིང་རོའི་ཕུད་ནས་གཏོར་མར་སྟོབ། གཏེར་སྲུང་གི་གསོལ་ཁ་བྱ། བསྐང་རྫས་རྒྱས་པའམ་མདོར་བསྡུ་ན་ཚོགས་ཙམ་ལ་དམིགས་ནས་བསྐང་བ་ནི། མར་མེ་སྦར། གསུར་ཆེན་གྱི་དུད་པ་བཏང་། རོལ་མོ་སྣ་ཚོགས་འཁྲོལ་ཞིང་། ཧཱུཾ། གདོད་ནས་དག་པའི་རང་རིག་འདུས་མ་བྱས། །རྟོགས་ན་ཀུན་བཟང་འཇམ་དཔལ་གཤིན་རྗེའི་གཤེད། །མ་རྟོགས་བླ་ཚེའི་གཤེད་པོ་འཆི་བདག་ནག །ཉོན་མོངས་དུག་གསུམ་རང་གདངས་འགག་མེད་དུ། ༡ །ཤར་བའི་རྒྱུད་གསུམ་སྡེ་བརྒྱད་དྲེགས་པའི་ཚོགས། །དར་ནག་གཡབ་ཅིང་ཚིལ་ཆེན་དུད་པ་འཐུལ། ཁྲག་ཆང་སྐོམ་སྦྲེང་རྐང་གླིང་ཐོད་རྔ་སྒྲོག །ཏིང་འཛིན་སྔགས་དང་ཕྱག་རྒྱས་འབོད་བྱེད་ན། ༢ །དུར་ཁྲོད་རུས་པའི་གཞལ་ཡས་གནས་མཆོག་འདིར། །དབྱར་གྱི་གློག་དམར་བཞིན་དུ་འཁྱུག་ཅིང་སྤྱོན། །དགུན་གྱི་བུ་ཡུག་བཞིན་དུ་འཚུབ་ཅིང་སྤྱོན། །ཐོགས་(༡༣ན)
མེད་འདིར་སྤྱོན་དགྱེས་པའི་གདན་ལ་བཞུགས། ༣ །རང་རང་དབང་པོ་སྣ་ལྔ་ཚིམ་བྱེད་པ། །མཆོད་པའི་སྤྲིན་ཕུང་ནམ་མཁའ་མཛོད་ཀྱི་སྒོ། །རབ་ཕྱེ་དངོས་བཤམས་ཡིད་ཀྱིས་སྤྲུལ་བྱེད་ན། །བསྐང་ངོ་བསྐལ་པར་ཐུགས་དམ་གཉན་པོ་བསྐང་། ༤ །སྨན་ཆབ་དྲི་ངད་འཐུལ་བའི་མཆོད་ཡོན་དང་། །རྙོག་མེད་བསིལ་བའི་ཀླུང་ཆེན་ཞབས་བསིལ་སྦྲེང་། །པད་དཀར་ཀུ་མུད་མེ་ཏོག་སྣ་ཚོགས་འཕྲེང་། །དྲི་ཞིམ་སྡོང་པོ་བསྲེགས་པའི་དུད་སྤྲིན་འཁྲིགས། ༥ །ཉི་ཟླ་ནོར་བུར་རྩི་འབྲུའི་སྣང་གསལ་སྦར། །ག་བུར་གུར་ཀུམ་བསྲེས་པའི་བྱུག་པའི་རྫས། །བརྒྱ་ཕྲག་རོ་བདའ་ལྷ་དང་མི་ཡི་ཟས། །སྙན་ཅིང་བརྗིད་པའི་རོལ་མོ་འབྲུག་ལྟར་སྒྲོག ༦ །བསད་ཁྲག་དྲོད་རླངས་མ་ཉམས་ཨརྒྷཾ་དང་། མིག་ལྕེ་རྣ་བ་སྣ་སྙིང་མེ་ཏོག་བཤམས། །བཾ་རོ་སྦམ་པོར་བསྲེགས་པའི་དུད་པ་འཐུལ། །ཚིལ་ཆེན་རོ་སྐྲ་ལ་སྦར་མར་མེ་གསལ། ༧ །མཁྲིས་ཞག་ངད་པ་ལྡང་བ་བྱུག་པའི་དྲི། །ནང་ཁྲོལ་ཤ་རུས་བཤོས་བུ་འཕྲེང་བར་བསྒྲིགས། །མི་ཐོད་གསང་བའི་རྔེའུ་ཆུང་རྐང་གླིང་སྒྲ། །གཟུགས་མཛེས་ལྷ་མོ་གར་བསྒྱུར་པི་ཝཾ་བརྡུང་། ༨ །བཅུད་ལྡན་དུང་ཆོས་བཟའ་བཅས་གང་བའི་སྣོད། །ལྷ་མིའི་གོས་བཟང་འཇམ་པའི་རེག་བྱ་རྔོམ། །མི་སྡུག་སྲིན་པོ་དྲག་ཤུལ་གར་སྟབས་བསྒྱུར། །བླ་ཚེ་བཞུགས་པའི་འོ་དོད་ཕྱོགས་བཅུར་འབོད། ༩ །ལྕང་ལོའི་བྷནྡྷས་ཁྲག་ཞག་དྲི་ལྡན་འཕྱར། །གློ་སྙིང་ཤ་ཁྲག་གཏམས་པའི་ཡོལ་གོ་བཏེག །དམར་བཤུས་པགས་པ་རྒྱུ་མའི་ཐག་པར་བཀལ། །སྐམ་རློན་ཐོད་པ་བརྒྱུས་པའི་རྒྱན་དྲུག་བྲེས། ༡༠ །གླང་སྟག་སྣ་ཚོགས་པགས་པར་ཁྲག་རྒྱུན་འཛག །རྩ་བརྒྱད་ཡན་ལག་སྟོང་སྦྱར་ཨ་མྲྀ་(༡༣ན)
ཏ། །པད་རཱཀ་དམར་ཆེན་ཁྲག་གི་རྒྱ་མཚོ་འཁྲུག །དམ་རྫས་གཏོར་མའི་རི་བོ་མཁའ་ལ་སྙེག ༡༡ །སྟོང་ཕྲག་ཤ་སྣའི་ལྷུ་དུམ་བརྩིགས་ཤིང་ཉིལ། །གློ་སྙིང་མཁལ་མཆིན་མཆེར་པ་ཕྱུར་བུར་སྤུངས། །ཀླད་པ་ཞག་ཚིལ་རྐང་མར་འདམ་རྫབ་གཡོ། ༡༢ །སྣ་ཚོགས་རུས་པའི་གྲམ་ཀྲོད་ས་གཞི་གཡོགས། །རྒྱུ་མའི་སྲད་བུར་བརྒྱུས་པའི་ནང་ཁྲོལ་དང་། །རྐང་ལག་སྤེལ་མར་བྱས་པའི་ལྡ་ལྡི་གཡོ། །ཞིང་གི་རྒྱལ་མཚན་མི་མགོའི་ཏོག་གིས་མཛེས། ༡༣ །རོ་སྐྲའི་རྔ་ཡབ་རུས་པའི་ཡུ་བ་ཅན། །ཞལ་ཟས་ཚོགས་ཀྱི་མཆོད་པ་འཇའ་ལྟར་བཀྲ། །ཛ་གད་གསེར་སྐྱེམས་ཆང་ཕུད་ཆལ་ཆིལ་གཡོ། །རྟ་མཆོག་རྒྱན་གྱིས་སྤྲས་པ་མཁའ་ལ་འཕྱོ། ༡༤ །འབྲོང་གཡག་ལྕགས་རྭ་རྣོན་པོས་དགྲ་སྙིང་འབིགས། །འོ་མའི་རྒྱུན་འཛིན་བ་མོ་འདོད་པ་འཇོ། །འཇམ་པའི་སྤུ་ལྡན་ལུག་ནག་རོག་པོའི་རྭ། །ཕོ་རོག་ཁྲ་སོགས་གནམ་ལ་འཕུར་དགུ་ལྡིང་། ༡༥ །སྟག་གཟིགས་ཁྱི་དང་ཅེ་སྤྱང་སེང་གེ་སོགས། །ས་ལ་འཛུལ་དགུའི་སྲོག་ཆགས་ཕ་མཐའ་ཡས། །ཤ་རྐྱང་ལ་སོགས་རི་དྭགས་འཕྱོ་དགུ་རྒྱུ། ཁྲབ་རྨོག་ཞོལ་བཏགས་ལྕགས་བཞིབས་རང་བསྲུང་གོ ༡༦ །མདའ་མདུང་གྲི་སོགས་ཕ་རོལ་འཇོམས་པའི་མཚོན། །བླ་བྲེ་འཕན་གདུགས་ལྡ་ལྡི་བགྲང་ཡས་བསྟར། །བཀྲ་ཤིས་རྟགས་བརྒྱད་རྒྱལ་སྲིད་རྣམ་པ་བདུན། །ཉ་བའི་རིན་ཆེན་བདུན་དང་གླུ་གར་མ། ༡༧ །རིན་ཆེན་རི་བོ་དཔག་བསམ་ལྗོན་པའི་ཤིང་། །མ་རྨོས་ལོ་ཏོག་གསལ་བྱེད་ཉི་ཟླ་ཟུང་། །རི་རབ་གླིང་བཞི་གླིང་ཕྲན་དང་བཅས་པའི། །ལྷ་ཀླུ་གནོད་སྦྱིན་དྲི་ཟ་གྲུལ་བུམ་དང་། ༡༨ །མི་སོགས་མཐོ་རིས་གནས་ཀྱི་འབྱོར་བ་ཡིས། །རྒྱལ་བ་དགོངས་པས་བརྒྱུད་པ་ཐུགས་དམ་བསྐངས། །རིགས་འཛིན་བརྡ་ཡི་བརྒྱུད་པ་ཐུགས་དམ་བསྐངས། །(༡༤ན)
གང་ཟག་སྙན་ཁུང་བརྒྱུད་པ་ཐུགས་དམ་བསྐངས། ༡༩ །སྨོན་ལམ་དབང་བསྐུར་བརྒྱུད་པ་ཐུགས་དམ་བསྐངས། །བཀའ་བབས་ལུང་བསྟན་བརྒྱུད་པ་ཐུགས་དམ་བསྐངས། །མཁའ་འགྲོ་གཏད་རྒྱ་བརྒྱུད་པ་ཐུགས་དམ་བསྐངས། །ལས་འཕྲོ་གཏེར་གྱི་བརྒྱུད་པ་ཐུགས་དམ་བསྐངས། །ཤོག་སེར་ཚིག་གི་བརྒྱུད་པ་ཐུགས་དམ་བསྐངས། །གྲངས་མེད་རྒྱལ་བ་ཞི་ཁྲོ་ཐུགས་དམ་བསྐངས། །འཇམ་དཔལ་གཤིན་རྗེ་དྲེགས་འཇོམས་ཐུགས་དམ་བསྐངས། །སྦྱོར་ཡུམ་རོ་ལངས་ནག་མོའི་ཐུགས་དམ་བསྐངས། ༢༡ །སྒྲོལ་ཡུམ་ཨེ་ཀ་ཛ་ཊིའི་ཐུགས་དམ་བསྐངས། །སྤྲུལ་པ་བྱ་ཁྱུང་རྒྱལ་པོའི་ཐུགས་དམ་བསྐངས། །ཐུགས་སྤྲུལ་ཚེ་བདག་ནག་པོའི་ཐུགས་དམ་བསྐངས། །གསུང་སྤྲུལ་སྲོག་བདག་དམར་པོའི་ཐུགས་དམ་བསྐངས། །སྐུ་སྤྲུལ་འཆི་བདག་དུད་ཁའི་ཐུགས་དམ་བསྐངས། །གཤིན་རྗེ་ཡ་མཱ་རཱ་ཙའི་ཐུགས་དམ་བསྐངས། །སྲིན་པོ་མྱོས་བྱེད་འབར་བའི་ཐུགས་དམ་བསྐངས། །ཀླུ་བདུད་ཨཪྻ་མ་རུའི་ཐུགས་དམ་བསྐངས། ༢༤ །གནོད་སྦྱིན་རལ་པ་ཚར་དགུའི་ཐུགས་དམ་བསྐངས། །སྒོ་བསྲུང་ཆེན་པོ་བཞི་ཡི་ཐུགས་དམ་བསྐངས། །འཇིགས་བྱེད་ཁྲོ་བོ་བཅུ་ཡི་ཐུགས་དམ་བསྐངས། ཁྱམས་ཀྱི་གཤིན་རྗེའི་དམག་ཚོགས་ཐུགས་དམ་བསྐངས། །འཆི་བདག་བྷེ་ཝ་ས་ཏྭའི་ཐུགས་དམ་བསྐངས། །གཏུམ་མོ་དུག་ཧྲུལ་ནག་མོའི་ཐུགས་དམ་བསྐངས། །གཤེད་པོ་སྒྲོལ་གིང་རྣམ་བཞིའི་ཐུགས་དམ་བསྐངས། །བླ་འགུགས་མོན་པ་བཞི་ཡི་ཐུགས་དམ་བསྐངས། ༢༦ །བཤན་པ་བདུད་པོ་སྡེ་བཞིའི་ཐུགས་དམ་བསྐངས། །ལས་ཀྱི་འཆི་བདག་བཅུ་གཉིས་ཐུགས་དམ་བསྐངས། །ཕྱོགས་ཀྱི་སྒོ་སྐྱོང་རྣམ་བཞིའི་ཐུགས་དམ་བསྐངས། །སྲོག་གཅོད་རུ་དྲ་སྡེ་བཞིའི་ཐུགས་དམ་བསྐངས། ༢༧ །དྲེགས་པ་ལྷ་སྲིན་སྡེ་བརྒྱད་ཐུགས་དམ་བསྐངས། །རྩ་གསུམ་དམ་ཅན་སྲུང་མ་རྒྱ་མཚོའི་ཚོགས། ཁྱེད་ཀྱི་ཐུགས་དམ་བདག་གིས་སྐོངས་ལགས་ཀྱི། །བདག་གི་འགལ་རྐྱེན་བར་ཆད་ཁྱེད་ཀྱིས་ཟློག ༢༨ །ཡར་གནས་ཕ་མེས་བཞིན་དུ་ངས་མཆོད་ན། །བུ་སྡུག་ཚ་བོ་བཞིན་དུ་ཁྱོད་ཀྱིས་སྐྱོངས། །མཁའ་འགྲོ་སྤུན་གྲོགས་བཞིན་དུ་ངས་བསྟེན་ན། །གདུངས་པའི་གཉེན་བཞིན་ཕན་པ་ཁྱོད་ཀྱིས་སྒྲུབས། ༢༩ །དམ་ཅན་མངའ་འབངས་བཞིན་དུ་ངས་བསྐྱངས་ན། །སྙིང་ཉེ་བྲན་ལྟར་ལས་རྣམས་ཁྱོད་ཀྱིས་སྒྲུབས། །ཐུགས་དམ་གཉན་པོ་དབྱིངས་སུ་བསྐངས་པའི་(༡༤བ)
འབྲས། །མཆོད་པའི་ཡུལ་རྣམས་དགྱེས་པ་རབ་བསྐྱེད་དེ། ༣༠ །རྩ་བ་ཡན་ལག་དམ་ཚིག་དང་འགལ་བའི། །སྐུ་གསུང་ཐུགས་ཀྱི་ཉམས་ཆགས་སོས་གྱུར་ཞིང་། །མཐུན་པའི་དངོས་གྲུབ་མ་ལུས་སྩོལ་བ་དང་། །བྱང་ཆུབ་བསྒྲུབ་པའི་གདོང་གྲོགས་དཔུང་གཉེན་མཛོད། །ཚོགས་ལ་རོལ། ལིང་རོ་ལྷག་མ་རྣམས་སྨན་རཀ་དང་བཅས་འབུལ་ཞིང་འཕྲིན་ལས་འཆོལ་བ་ནི། ཨྱེ། ཆོས་དབྱིབས་དྲག་པོ་ཨེ་ཡི་གཞལ་ཡས་ན། །དྲེགས་པ་གླང་རྒོད་པདྨ་ཉི་མའི་སྟེང་། །འཇོམས་བྱེད་བཅོམ་ལྡན་འཇམ་དཔལ་གཤིན་རྗེའི་གཤེད། །སྐུ་མདོག་མཐིང་ནག་མུན་པའི་མདོག་འདྲ་ཞིང་། །ཞལ་གསུམ་གདངས་པས་སྲིད་གསུམ་ཟས་སུ་ཟ། །མཆེ་བ་གཙིགས་པས་སྐྱེ་ཤི་རྩད་ནས་གཅོད། །ཞལ་ནས་ཁྲག་འབབ་སྟོང་གསུམ་ནད་ཀྱིས་འགེང་། །ཤངས་ནས་རླུང་བྱུང་རི་རབ་ཆེན་པོ་གཏོར། །སྤྱན་ནི་ཉི་ཟླ་རིགས་དྲུག་འདམ་རྫབ་སྐེམ། །སྙན་གྱི་འབྲུག་སྒྲས་བདུད་ཁམས་ཀླད་པ་འགེམ། །རལ་པ་ཁམས་ནག་སྲིད་པའི་རྩེ་མོར་འཁྱིལ། །དུར་ཁྲོད་དཔལ་གྱི་ཆས་རྣམས་སྐུ་ལ་རྫོགས། །གཡས་གསུམ་འཁོར་ལོའི་རྩིབས་བར་དགྲ་བོ་གཏུབ། རྣོ་ངར་རལ་གྲིས་མགོ་ལུས་ཚལ་པར་གཤོག །གྲི་གུག་བརྡེག་པས་ཁོག་པ་དམར་པོར་བྲལ། །གཡོན་གསུམ་ཐོད་པར་ཁྲག་རྒྱུན་བཅུས་ནས་གསོལ། །བེ་ཅོན་དགྲ་བགེགས་ཚོགས་ཀྱི་མགོ་ལ་བསྣུན། །སྡིགས་མཛུབ་རྩེ་ལས་མེ་འབར་སྲིད་གསུམ་བསྲེག །བཟློག་པའི་ལས་མཛད་ཁྲོ་ཆུང་སྤྲུལ་པ་འགྱེད། །ངན་སྔགས་བསྲེག་བྱེད་བ་སྤུ་མེ་དཔུང་འཕྲོ། །ལས་རྣམས་བསྒྲུབ་ཕྱིར་མ་གཤིན་འཁོར་གྱིས་བསྐོར། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་(༡༥ན)
པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །བྷྱོ། གཉིས་མེད་སྦྱོར་བའི་ཡུམ་མཆོག་པེ་ཏ་ལི། །སྐུ་མདོག་མཐིང་ནག་གཏུམ་དྲག་ཁྲོ་མོའི་གཟུགས། །གཡས་པ་གྲི་གུག་དགྲ་བོའི་མགོ་ལུས་གཤོག །གཡོན་པ་ཐོད་ཁྲག་གཙོ་བོའི་ཞལ་དུ་སྟོབ། །སྒྲོལ་བའི་ཡུམ་མཆོག་ཨེ་ཀ་ཛ་ཊི་མ། །མཚོན་ཆ་དལ་ཡམས་སྣ་ཚོགས་དགྲ་ལ་གཏོང་། །དྲག་པོའི་ལས་རྣམས་བསྒྲུབ་པའི་བཤན་པ་མོ། །མ་མོ་འབུམ་སྡེ་ཕོ་ཉ་ལས་ལ་འགྱེད། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། སྤྱི་བོའི་གཙུག་ན་བྱ་ཁྱུང་ཀ་རུ་ཌ། །སྐུ་མདོག་མཐིང་ནག་སྤུ་གྲིའི་སྒྲོ་གཤོག་ཅན། །རྭ་དང་མཆུ་སྡེར་གནམ་ལྕགས་ལས་གྲུབ་རྣོ། །གདུག་པ་ཀླུ་གཉན་ས་བདག་ཞལ་དུ་གསོལ། །རིན་ཆེན་རྒྱན་དང་སྦྲུལ་གྱིས་སྐུ་ལ་སྤྲས། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ཐུགས་ཀྱི་སྤྲུལ་པ་ཚེ་བདག་ནག་པོ་ནི། །ཞལ་གཅིག་ཕྱག་གཉིས་རལ་གྲི་ཞགས་པ་འཛིན། །དུར་ཁྲོད་ཆས་ལྡན་ཁྲོ་གཏུམ་མི་བཟད་འཇིགས། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། གསུང་གི་སྤྲུལ་པ་སྲོག་བདག་དམར་པོ་ནི། །ཞལ་གཅིག་ཕྱག་གཉིས་བེ་ཅོན་རལ་གྲི་བསྣམས། ཁ་གདངས་མཆེ་གཙིགས་དུར་ཁྲོད་ཆས་ཀྱིས་བརྒྱན། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། སྐུ་ཡི་སྤྲུལ་པ་འཆི་བདག་དུད་ཁའི་མདོག །ཞལ་གཅིག་ཕྱག་གཉིས་ཁྲམ་ཤིང་མི་སྙིང་འཛིན། །སྲོག་ལ་(༡༥བ)
བརྔམས་ཤིང་དུར་ཁྲོད་ཆས་རྣམས་ཚོགས། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ཡ་མ་རཱ་ཙ་མཐིང་ནག་མུན་པའི་མདོག །གཡས་གཡོན་ཕྱག་ན་རལ་གྲི་ཐོད་ཁྲག་འཛིན། །དུར་ཁྲོད་ཆས་བརྗིད་གསང་བའི་ཡུམ་དང་སྦྱོར། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་ཁ་རླུང་བསྒྱུར་བའི་ལས་མཛོད་ཅིག །ཨྱེ། མྱོས་བྱེད་འབར་བ་སེར་ནག་མི་སྡུག་གཟུགས། །གཡས་གཡོན་ཕྱག་གཉིས་བེ་ཅོན་འཁོར་ལོ་བསྣམས། །ཡུམ་ཆེན་སྐུར་འཁྲིལ་དུར་ཁྲོད་ཆས་གོས་གསོལ། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ཨཪྻ་མ་རུ་དམར་ནག་ཁྲོ་ཞིང་གཏུམ། ཕྱག་གཉིས་རྩེ་གསུམ་མི་སྙིང་དྲོན་མོ་ཐོགས། །དུར་ཁྲོད་ཆས་སྤྲས་སྐུ་ལ་ཡུམ་གྱིས་འཁྲིལ། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། རལ་པ་ཚར་དགུ་ལྗང་ནག་མིག་རྩ་དམར། །ཕྱག་གཉིས་ཐོད་དབྱུག་ལྕགས་ཀྱི་འཁོར་ལོ་ཐོགས། །དུར་ཁྲོད་ཆས་ཀྱིས་ཉེར་བརྗིད་ཡུམ་དང་འཁྲིལ། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། སྒོ་བསྲུང་རྒོད་སྟག་ཀང་ཀ་སྤྱང་གདོང་བཞི། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན། །འགུགས་འཆིང་སྡོམ་མྱོས་ལས་རྣམས་ཐོགས་མེད་མཛད། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། སྟེང་ཕྱོགས་ཁྲོ་བོའི་རྒྱལ་པོ་ཧཱུཾ་ཀ་ར། །གཡས་པ་ལྕགས་ཀྱུས་དགྲ་བགེགས་སྙིང་ནས་འདྲེན། །གཡོན་པ་ཐོ་བས་ལུས་སེམས་རྡུལ་དུ་རློག །ཁྲོ་གཏུམ་འབར་ཞིང་དུར་ཁྲོད་ཆས་ཀྱིས་བརྒྱན། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། སྟེང་ཕྱོགས་ཚངས་པའི་གདོན་ཚོགས་བཟློག་པར་མཛོད། །ཤར་ཕྱོགས་ཁྲོ་བོ་རྣམ་པར་རྒྱལ་བ་མཐིང་། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ཤར་ཕྱོགས་བརྒྱ་བྱིན་གདོན་ཚོགས་བཟློག་པར་མཛོད། །ཤར་ལྷོ་ཁྲོ་བོ་དབྱུག་པ་སྔོན་པོ་ནག །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ཤར་ལྷོ་མེ་ལྷའི་གདོན་ཚོགས་བཟློག་པར་མཛོད། །ལྷོ་ཕྱོགས་གཤིན་རྗེའི་གཤེད་པོ་མུན་པའི་མདོག །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ལྷོ་ཕྱོགས་འཆི་བདག་གདོན་ཚོགས་བཟློག་པར་མཛོད། །ལྷོ་ནུབ་ཁྲོ་བོའི་རྒྱལ་པོ་མི་གཡོ་མཐིང་། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ལྷོ་ནུབ་སྲིན་པོའི་གདོན་ཚོགས་བཟློག་པར་མཛོད། །ནུབ་ཕྱོགས་ཁྲོ་བོ་རྟ་མགྲིན་སྐུ་མདོག་ནག །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། ནུབ་ཕྱོགས་ཀླུ་དབང་(༡༦ན)
གདོན་ཚོགས་བཟློག་པར་མཛོད། །ནུབ་བྱང་ཁྲོ་བོ་གཞན་གྱིས་མི་ཐུབ་སྔོ། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། །ནུབ་བྱང་རླུང་ལྷའི་གདོན་ཚོགས་བཟློག་པར་མཛོད། །བྱང་ཕྱོགས་ཁྲོ་བོ་བདུད་རྩི་འཁྱིལ་བ་མཐིང་། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། བྱང་ཕྱོགས་གནོད་སྦྱིན་གདོན་ཚོགས་བཟློག་པར་མཛོད། །བྱང་ཤར་ཁྲོ་བོ་ཁམས་གསུམ་རྣམ་རྒྱལ་ནག །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། བྱང་ཤར་འབྱུང་པོའི་གདོན་ཚོགས་བཟློག་པར་མཛོད། །འོག་ཕྱོགས་ཁྲོ་བོའི་རྒྱལ་པོ་སྟོབས་ཆེན་མཐིང་། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། འོག་ཕྱོགས་ས་བདག་གདོན་ཚོགས་བཟློག་པར་མཛོད། །དཀྱིལ་འཁོར་བར་འཁྱམས་གཤིན་རྗེ་དམག་གི་ཚོགས། །ཤ་ཟ་ཁྲག་འཐུང་སྲོག་གཅོད་ལམ་ལ་དགའ། །སྤྲུལ་པ་ཡང་སྤྲུལ་འཁོར་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །དྲག་པོ་ཟོར་གྱི་དཔུང་ལ་གཤེགས་སུ་གསོལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ཆགས་ཆེ་ཉམ་ང་བཟློག་པའི་ལས་མཛོད་ཅིག །བྱད་ཁ་ཕུར་ཁ་བཟློག་པའི་ལས་མཛོད་ཅིག །ཟོར་ཁ་རླུང་ཁ་བསྒྱུར་བའི་ལས་མཛོད་ཅིག །ཨྱེ། བྱང་ཕྱོགས་དཔག་ཚད་བརྒྱད་ཁྲི་མར་འདས་ན། །ཐོད་པ་ལྕགས་ཀྱི་མུན་ཁང་ནག་པོའི་དབུས། །ལས་ཀྱི་གཤིན་རྗེ་རལ་པ་ཚར་དགུ་ནི། །སྨུག་ནག་ཞལ་གཅིག་ཕྱག་ཀྱང་གཉིས་པ་སྟེ། །གཡས་པ་ཐོད་དབྱུག་གཡོན་པ་དུད་ཁྲག་འཛིན། །དམ་ཉམས་དགྲ་བོ་ཁྲམས་ལ་འདེབས་པར་བྱེད། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བསྟན་པ་འཇིག་པའི་དམ་ཉམས་དགྲ་བོ་འདི། ཁྲམ་ལ་ཐོབ་ལ་འཁོར་ལོ་བསྐོར་ལ་སྒྲོལ། །ལོ་དང་ཟླ་བར་བཞག་པའི་སྐབས་མེད་པས། །ཞག་དང་ཟ་མར་མ་བཞག་མྱུར་དུ་སྒྲོལ། །ཨྱེ། དེ་ཡི་ཐུགས་དམ་རྒྱུད་བསྐུལ་ཆེན་མོ་ནི། །གཏུམ་མོ་དུག་ཧྲུལ་གོས་གྱོན་སྐྱེ་འགྲོའི་གཤེད། །སྲིད་གསུམ་ལྟོར་གནས་ལས་ཀྱི་རླུང་དམར་ཞོན། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བསྟན་པ་འཇིག་པའི་དམ་ཉམས་དགྲ་བོ་འདི། འདུས་པའི་ནད་ཐོད་གཤིན་རྗེའི་ལག་ཏུ་ཐོད། །ཨྱེ། ཕྱོགས་བཞི་གྲུབ་པ་ཐོད་པའི་ལྕགས་མཁར་ནས། །དགྲ་བོའི་གཤེད་མ་སྒྲོལ་བའི་གིང་ཆེན་བཞི། །ཡ་མ་རཱ་ཛ་མྱོས་བྱེད་འབར་བ་དང་། །ཨཪྻ་མ་རུ་རལ་པ་ཚར་དགུ་(༡༦བ)
བཞི། །གདུག་པའི་སྐུ་མདོག་སྨུག་སེར་དམར་ལྗང་ནག །དབྱུག་པ་བརྡེག་ཅིང་བདུད་ཞགས་ནག་པོ་འཕེན། །ལས་ཀྱི་ཡུམ་ཆེན་བཞི་དང་བཅས་པ་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བསྟན་པ་འཇིག་པའི་དམ་ཉམས་དགྲ་བོ་འདི། །མགོ་བསྐོར་ཡིད་དཀྲུགས་ཁྲག་ཏུ་སྐྱུག་པ་དང་། །རྣམ་ཤེས་གཟིར་ལ་མྱུར་དུ་སྒྲོལ་བར་མཛོད། །ཨྱེ། གཤིན་རྗེའི་བཀའ་བསྒྲུབ་དགྲ་གཤེད་མོན་པ་བཞི། །དུང་གི་མོན་པ་ལྕགས་ཀྱི་མོན་པ་དང་། །བསེ་ཡི་མོན་པ་གསེར་གྱི་མོན་པ་བཞི། །སེང་གེ་སྟག་དྲེད་ཁྱུང་གི་མགོ་བོ་དགུ། །གཡས་རྣམས་བེ་ཅོན་གཡོན་རྣམས་དགྲ་སྙིང་འཛིན། །མོན་མོ་བཞི་ནི་ལྕགས་ཀྱུ་ཞགས་པ་བསྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བསྟན་པ་འཇིག་པའི་དམ་ཉམས་དགྲ་བོ་འདི། །ཉེས་བྱེད་དགྲ་བོ་གཟུགས་ཕུང་རྣམ་ཤེས་ཕྲོལ། །ཕ་ཚན་ཡུལ་འཁོར་མི་ནོར་སྡེ་དཔུང་ཆོམས། །རང་དབང་མེད་པར་སྐད་ཅིག་བརླག་པར་གྱིས། །ཨྱེ། གཤིན་རྗེའི་བཤན་པ་བདུད་པོ་སྡེ་བཞི་ནི། །ཞེ་སྡང་མེ་འབར་འདོད་ཆགས་ཁྲག་མཚོ་འཁྱིལ། །ང་རྒྱལ་རི་ཉིལ་གཏི་མུག་དུག་མཚོའི་ཀློང་། །སྔོ་ནག་ཁྲག་རུས་དུད་ཁ་ཁམ་པའི་མདོག །འབྱུང་བཞིའི་རང་བཞིན་རྩ་བཞི་འཇིབ་ཅིང་གཅོད། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བསྟན་པ་འཇིག་པའི་དམ་ཉམས་དགྲ་བོ་འདི། །རྩ་བཞི་ཆོད་ལ་འབྱུང་བཞིའི་དངས་མ་སྡུས། །ཀླད་ཁྲག་དཀྲུགས་ལ་ཁོང་ཁྲག་སྐྱུག་ཏུ་ཆུག །ལུས་སེམས་ཕྲོལ་ལ་ཚེ་ཡི་འདུ་བྱེད་སྟུངས། །ཨྱེ། གྲུབ་པའི་ཐོད་པ་ལྕགས་ཀྱི་མུན་ཁང་ནས། །ལས་ཀྱི་འཆི་བདག་ཁྲམ་བདག་བཅུ་གཉིས་ཀྱང་། །ལས་ཀྱི་སྲིང་མོ་ཆུང་མར་བཅས་པ་རྣམས། །མུན་པའི་ཀློང་ནས་འདིར་བྱོན་འཕྲིན་ལས་མཛོད། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བསྟན་པ་འཇིག་པའི་དམ་ཉམས་དགྲ་བོ་འདི། །གཟེར་ནད་ཚ་བའི་ནད་དང་ཁྲག་སྐྱུག་དང་། །(༡༧ན)
ཆོ་འཕྲུལ་འབྲུམ་ནག་མཁྲིས་པ་ཤ་ཡ་དང་། །མཛེ་ནད་ལྷོག་གཟེར་སྐྱ་རྦབ་བལ་ནད་དང་། །སྐྲངས་འབུར་རིམས་ནད་གཞོགས་སྐམས་ནད་རྣམས་ཀྱིས། །མྱུར་དུ་གཟིར་ལ་ཚེ་ཡི་འདུ་བྱེད་བཀུམས། །ཨྱེ། དཔལ་ཆེན་གཤིན་རྗེའི་སྒོ་བ་ཆེན་པོ་བཞི། །ཤར་ལྷོ་ནུབ་བྱང་བསྲུང་བའི་ཕོ་ཉའི་ཚོགས། །དཀར་པོ་སྙིང་འབྱིན་མགོན་པོ་ནག་པོ་དང་། །བདུད་པོ་ཡབ་རྗེ་གནོད་སྦྱིན་བཤན་པ་སྟེ། །ཕྱག་ན་འཁོར་ལོ་ཐུན་ཁྲག་བེར་ཁྲབ་གསོལ། །ཡུམ་མཆོག་མཁའ་འགྲོ་རོ་ལངས་མཆེད་བཞིར་བཅས། །མ་ཏྲཾ་རོ་དབྱུག་ལྕགས་ཀྱུ་དྲིལ་བུ་བསྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །སྒོ་བ་རྣམ་བཞིས་དགྲ་བོའི་དུས་མཐའ་སྟུངས། །སྒོ་མ་བཞི་ཡིས་དགྲ་བོ་ཁ་འཕུང་ཐོང་། །ཨྱེ། སྲོག་གཅོད་རུ་དྲ་སྡེ་བཞི་དྲེགས་པའི་ཚོགས། །ཕོ་གཤེད་མོ་གཤེད་བདུན་བརྒྱ་ཉི་ཤུ་དང་། །ཡང་འཁོར་གཤིན་རྗེ་དགུ་འབུམ་དགུ་ཁྲི་རྣམས། །དགྲ་བགེགས་བསྒྲལ་བའི་ཤ་ཁྲག་འདི་བཞེས་ལ། །བཅོམ་ལྡན་གཤིན་རྗེ་གཤེད་པོའི་ཞབས་དྲུང་དུ། །སྔོན་གྱི་དམ་བཅས་ཚུལ་བཞིན་མནའ་བོར་བ། །དམ་ལས་མ་འདའ་བཅོལ་བའི་འཕྲིན་ལས་མཛོད། །དམར་སྦྲེང་ཞིང་བཟློག་བསྒྱུར་ནི། ཨྱེ། ཆོས་དབྱིངས་དྲག་པོ་ཨེ་ཡི་ཞིང་ཁམས་སུ༔ རྡོ་རྗེ་ར་གུར་ཡེ་ཤེས་མེ་དཔུང་དབུས༔ དྲེགས་པ་སྡེ་བརྒྱད་ཆུ་གླང་མ་ཧེའི་སྟེང་༔ དུས་གསུམ་རྒྱལ་བའི་ཡེ་ཤེས་གཅིག་བསྡུས་པ༔ བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད༔ སྐུ་མདོག་མཐིང་ནག་དུག་ཆེན་ཧ་ལའི་མདོག༔ དབུ་གསུམ་ཕྱག་དྲུག་ཞབས་བཞི་དོར་སྟབས་བགྲད༔ རྣོ་དབལ་མཚོན་ཆ་སྣ་ཚོགས་ཕྱག་ན་བསྣམས༔ དཔའ་བརྗིད་དུར་ཁྲོད་འབར་བའི་ཆས་ཀྱིས་ཀླུབས༔ སྐུ་ནི་མི་བཟད་གར་གྱི་(༡༧བ)
ཉམས་དགུར་ལྡན༔ གསུང་གི་ང་རོ་འབྲུག་སྟོང་ལྟར་བརྔམ་སྒྲ༔ ཐུགས་ནི་ཆོས་དབྱིངས་སྤྲོས་བྲལ་སྙིང་རྗེའི་ངང་༔ ཡོན་ཏན་མཆོག་མཐུན་དངོས་གྲུབ་སྟེར་བའི་མཛོད༔ འཕྲིན་ལས་དགྲ་བགེགས་བྱད་མ་སྒྲོལ་བའི་གཤེད༔ བདེ་གཤེགས་ཁྲོ་རྒྱལ་ཀུན་གྱི་རྗེ་བོ་ཆེ༔ རབ་འཇིགས་གཤིན་རྗེ་མང་པོའི་འཁོར་གྱིས་བསྐོར༔ ཁྱོད་ཀྱིས་མི་བཟློག་མི་བསྒྱུར་གང་ཡང་མེད༔ དེང་འདིར་རྣལ་འབྱོར་བདག་ཅག་འཁོར་བཅས་ཀྱི༔ མི་མཐུན་འགལ་རྐྱེན་གནོད་པའི་ཕྱོགས་རྣམས་ཀུན༔ ད་ནུབ་བཟློག་ཅིང་བསྒྱུར་བའི་འཕྲིན་ལས་མཛོད༔ སྟོང་ཉིད་ཤེས་རབ་མ་མོ་ཀུན་གྱི་གཙོ༔ གཉིས་མེད་སྦྱོར་ཡུམ་པེ་ཏ་ནག་མོ་དང་༔ སྒྲོལ་བའི་ཡུམ་མཆོག་ཨེ་ཀ་ཛ་ཊི་མས༔ མི་མཐུན་བདུད་ཀྱི་བར་གཅོད་དགྲ་ལ་བཟློག༔ སྐུ་གསུང་ཐུགས་སྤྲུལ་དུག་གསུམ་སྒྲོལ་བའི་གཤེད༔ རྡོ་རྗེ་གསུམ་གྲུབ་སྐུ་གསུམ་ངོ་བོ་རྫོགས༔ ཚེ་སྲོག་འཆི་བདག་ཆེན་པོ་རྣམ་གསུམ་གྱིས༔ གདུག་པའི་དགྲ་བགེགས་ཐམས་ཅད་བཟློག་ཏུ་གསོལ༔ ཡ་མ་ར་ཙ་མྱོས་བྱེད་འབར་བ་དང་། །ཨཪྻ་མ་རུ་རལ་པ་ཚར་དགུ་སྟེ༔ འཇིགས་བྱེད་གཤེད་ཆེན་རྣམ་བཞི་ཡུམ་དང་བཅས༔ རིག་སྔགས་དམོད་པའི་མཚོན་ཆ་བཟློག་ཏུ་གསོལ༔ འཁོར་ལོའི་རྩིབས་སྟེངས་བདུད་འདུལ་ཁྲོ་བོའི་རྒྱལ༔ དཔལ་ཆེན་ཁྲོ་རྒྱལ་ཆེན་པོ་རྣམ་པ་བཅུ༔ རང་རང་བཀའ་སྡོད་འཁོར་དང་བཅས་རྣམས་ཀྱིས༔ ཕྱོགས་བཅུའི་བྱད་དང་རྦོད་གཏོང་བཟློག་ཏུ་གསོལ༔ ས་བདག་གདོན་འཇོམས་མཁའ་ལྡིང་ཁྱུང་ཆེན་དང་༔ ཕྱོགས་སྐྱོང་སྒོ་བསྲུང་བཀའ་ཉན་ལས་བྱེད་བཅས༔ གཤིན་རྗེ་གཤེད་པོའི་ལྷ་ཚོགས་འཁོར་བཅས་ཀྱིས༔ བསྟན་དགྲ་གདུག་པའི་ཚོགས་རྣམས་ཐམས་ཅད་དང་༔(༡༨ན)
མི་མཐུན་འཁྲུལ་འཁོར་ཐམས་ཅད་བཟློག་ཏུ་གསོལ༔ ཟོར་གྱི་རབས་དང་བཅས་བཟློག་པ་ནི། བྷྱོ། སྔོན་ཚེ་བཟློག་པ་གང་ནས་བྱུང་། །བཅོམ་ལྡན་རྒྱལ་བ་ཤཱཀྱ་ཐུབ་ལ། །ལྷས་བྱིན་བདུད་ཀྱི་བར་ཆད་བྱུང་། །བཅོམ་ལྡན་འཇམ་དཔལ་གཤིན་རྗེ་ཡིས། །དམར་ཆེན་ཁྲག་གི་ཟོར་བརྒྱབ་པས། །ལྷས་བྱིན་ངན་པ་ཁྲག་ཏུ་སྐྱུགས། །བདུད་ཀྱི་དམག་དཔུང་བརྒྱལ་ཞིང་བོག །བར་དུ་བཟློག་པ་གང་ནས་བྱུང་། །རྒྱལ་པོ་ཁྲི་སྲོང་ལྡེའུ་བཙན་ལ། །མུ་སྟེགས་ངན་པའི་ཆད་པ་བྱུང་། པ་གོར་བཻ་རོ་ཙ་ན་ཡིས། །དམར་ཆེན་ཁྲག་གི་ཟོར་བརྒྱབ་པས། །མུ་སྟེགས་ངན་པ་རྩད་ནས་བཅད། །ཐ་མར་བཟློག་ན་འདིར་ལྟར་བཟློག །ཨྱེ། དྲག་པོ་ཨེ་ཡི་གཞལ་ཡས་ན། །སྡེ་བརྒྱད་དྲེགས་པའི་གདན་སྟེངས་སུ། །བཅོམ་ལྡན་འཇམ་དཔལ་གཤིན་རྗེའི་གཤེད། །སྐུ་མདོག་མཐིང་ནག་སྟོང་གསུམ་གང་། །རལ་པ་ཁམ་ནག་སྲིད་རྩེར་ཁྱབ། །སྟེང་ཕྱོགས་ལྷ་རྣམས་མ་ལུས་བཟློག །ཐོད་སྐམ་རིན་ཆེན་ལྔ་ཡིས་བརྒྱན། །ཉོན་མོངས་དུག་ལྔའི་དམག་དཔུང་བཟློག །སྤྱན་དགུ་དམར་ཟླུམ་བགྲད་པ་ཡིས། །གཟའ་དང་རྒྱུ་སྐར་དམག་དཔུང་བཟློག །ཨག་ཚོམས་སྨ་ར་མེ་འབར་བས། །ལས་ཀྱི་གཤིན་རྗེའི་དམག་དཔུང་བཟློག །མཆེ་བ་བཅུ་གཉིས་ཟླ་ཚེས་གཏམས། །ལས་ཀྱི་བཤན་པའི་དམག་དཔུང་བཟློག །དུར་ཁྲོད་ཆས་ཀྱིས་བརྒྱན་པ་ཡིས། །ཕོ་རྒྱུད་དམག་དཔུང་ཐམས་ཅད་བཟློག །ཞལ་ནས་ཁྲག་ཞག་རྒྱ་མཚོར་འབབ། །མོ་རྒྱུད་དམག་དཔུང་ཐམས་ཅད་བཟློག །གཡས་ཀྱི་མཚོན་ཆ་འབར་བ་ཡིས། །བདུད་དང་སྲིན་པོའི་དམག་དཔུང་བཟློག །གཡོན་གྱི་ཕྱག་མཚན་བསྣམས་པ་ཡིས། །(༡༨བ)
དྲག་པོ་བཙན་གྱི་གནོད་པ་བཟློག །རྡོ་རྗེ་འབར་བའི་ཁྱུང་གཤོག་གིས། །དྲེགས་བྱེད་ཕོ་མོའི་གནོད་པ་བཟློག །དབུ་གཙུག་ཁྱུང་ཆེན་འབར་བ་ཡིས། །ས་བདག་ཀླུ་གཉན་གནོད་པ་བཟློག །བ་སྤུ་རང་འདྲའི་སྤྲུལ་པ་འགྱེད། །བྱད་ཁ་རྦད་འདྲེ་རྦོད་གཏོང་བཟློག །གཤིན་རྗེའི་ཚོགས་ཀྱིས་བསྐོར་བ་ཡིས། །ལྷ་སྲིན་སྡེ་བརྒྱད་གནོད་པ་བཟློག །ཚངས་པ་བརྒྱ་བྱིན་ལ་སོགས་པའི། །ལྷ་སྲིན་འཁྲུག་པའི་གདུག་རྩུབ་རྣམས། །འཇིགས་པའི་སྟོབས་ཀྱིས་བཟློག་ཏུ་གསོལ། །དགའ་བོ་འཇོག་པོ་ལ་སོགས་པའི། །ཀླུ་སྲིན་འཁྲུག་པའི་གདུག་རྩུབ་རྣམས། །གཟི་བརྗིད་སྟོབས་ཀྱིས་བཟློག་ཏུ་གསོལ། །གང་བ་བཟང་པོ་ལ་སོགས་པའི། །གནོད་སྦྱིན་འཁྲུག་པའི་གདུབ་རྩུབ་རྣམས། །འཇིགས་པའི་སྟོབས་ཀྱིས་བཟློག་ཏུ་གསོལ། །ཟ་བྱེད་རྔམ་པ་ལ་སོགས་པ། །སྲིན་པོ་འཁྲུག་པའི་གདུག་རྩུབ་རྣམས། །རྔམ་པའི་སྟོབས་ཀྱིས་བཟློག་ཏུ་གསོལ། ཁ་འབར་རྒྱལ་མོ་ལ་སོགས་པ། །ཡི་དྭགས་འཁྲུག་པའི་གདུག་རྩུབ་རྣམས། །བཞད་པའི་སྟོབས་ཀྱིས་བཟློག་ཏུ་གསོལ། །ཕག་གདོང་འཇིགས་པ་ཤ་ཟའི་གདོན། །གཏུམ་པའི་སྟོབས་ཀྱིས་བཟློག་ཏུ་གསོལ། །བི་ན་ཡ་ཀ་བགེགས་ཀྱི་གདོན། །འགྱིང་བའི་སྟོབས་ཀྱིས་བཟློག་ཏུ་གསོལ། ཁྱབ་འཇུག་བྱི་ནུ་གཟའ་ཡི་གདོན། །དྲེགས་པའི་སྟོབས་ཀྱིས་བཟློག་ཏུ་གསོལ། ཁྲམ་ཐོགས་གྲི་ཐོགས་གིང་གི་གདོན། །སྤྲུལ་པའི་སྟོབས་ཀྱིས་བཟློག་ཏུ་གསོལ། ཁ་བཞིན་མགྱོགས་པ་བཙན་གྱི་གདོན། ཁྲོས་པའི་སྟོབས་ཀྱིས་བཟློག་ཏུ་གསོལ། །ཏེལ་པ་ཕྱ་སང་གཤིན་རྗེའི་གདོན། །སྤྲུལ་པའི་སྟོབས་ཀྱིས་བཟློག་ཏུ་གསོལ། །རལ་གཅིག་ནག་མོ་མ་མོའི་གདོན། །གསུང་གི་སྟོབས་ཀྱིས་བཟློག་ཏུ་གསོལ། །རོལ་པ་སྐྱ་བདུན་དམུ་ཡི་གདོན། །མགོ་བརྙན་སྟོབས་ཀྱིས་བཟློག་ཏུ་གསོལ། །མ་ཧཱ་དེ་ཝ་མུ་སྟེགས་གདོན། །བདེན་པའི་སྟོབས་(༡༩ན)
ཀྱིས་བཟློག་ཏུ་གསོལ། །བྷྱོ། གཞན་ཡང་བཟློག་ཅིང་བསྒྱུར་བ་ནི༔ རྣལ་འབྱོར་བདག་ཅག་འཁོར་བཅས་ལ༔ གནོད་ཅིང་བར་དུ་གཅོད་པ་ཡི༔ ལྟས་ངན་བརྒྱད་ཅུ་རྩ་བཞི་བཟློག༔ ཡེ་འབྲོག་སུམ་བརྒྱ་དྲུག་ཅུ་བཟློག༔ གློ་བུར་བདུན་བརྒྱ་ཉི་ཤུ་བཟློག༔ བགེགས་རིགས་སྟོང་ཕྲག་བརྒྱད་ཅུ་བཟློག༔ གདོན་རིགས་སྟོང་ཕྲག་བཅོ་བརྒྱད་བཟློག༔ སྐེག་ཆེན་སུམ་བརྒྱ་དྲུག་ཅུ་བཟློག༔ ལྷ་ཆེན་དྲག་པོའི་གདུག་རྩུབ་བཟློག༔ ལྷ་མ་ཡིན་གྱི་རྒྱུ་སྟབས་བཟློག༔ མགོན་པོའི་པར་བུ་བསྐོར་བ་བཟློག༔ གཤིན་རྗེའི་འཁྲུལ་འཁོར་བཅས་པ་བཟློག༔ དྲང་སྲོང་བྲམ་ཟེའི་དམོད་པ་བཟློག༔ གཟའ་ཡི་ཀི་ཀང་འཕེན་པ་བཟློག༔ བཙན་ནད་གཟེར་ཁ་གཏོང་བ་བཟློག༔ ས་བདག་ཀླུ་ཡི་མཛེ་ནད་བཟློག༔ བནྡེའི་འབུམ་བསྐོར་བྱེད་པ་བཟློག༔ སྔགས་པའི་སྔགས་ཐོར་འཕེན་པ་བཟློག༔ བོན་གྱི་བཙོ་དམར་འཕེན་པ་བཟློག༔ མུ་སྟེགས་ངན་སྔགས་བྱེད་པ་བཟློག༔ བྱད་ཕུར་རྦོད་གཏོང་བྱུང་བ་བཟློག༔ མནན་གཏད་བསྲེག་འབངས་བྱས་པ་བཟློག༔ སྔ་ཞགས་མདའ་ལྟར་འཕེན་པ་བཟློག༔ ཕྱི་ཞགས་དྲུ་ལྟར་འཐུལ་བ་བཟློག༔ ཡས་ཀྱི་བདུད་དུ་གཡོས་པ་བཟློག །མས་ཀྱི་སྲི་རུ་ལངས་པ་བཟློག །ཕ་ཚན་ནང་གི་རྒྱ་འདྲེ་བཟློག །མ་ཚན་ངན་པའི་དུག་འདྲེ་བཟློག །མོ་བཏབ་མོ་རུ་ངན་པ་བཟློག །རྩིས་བྱས་རྡེའུ་ངན་པ་བཟློག །ཁྱིམ་གང་མི་ཡི་ནད་འདྲེ་བཟློག །སྒོ་གང་ནོར་གྱི་གོད་འདྲེ་བཟློག །བན་བོན་སྔགས་པའི་ཟོར་ཁ་བཟློག །མགོན་པོས་སྦྱིན་སྲེག་བྱེད་པ་བཟློག །མ་མོས་ཐུན་ཟོར་འཕེན་པ་བཟློག །ཡུངས་ཀར་ཁྲོ་བོའི་རྦབ་ཟོར་བཟློག །བནྡེ་ཡོངས་ཀྱི་སྔགས་བྱད་བཟློག །དབང་ཕྱུག་ཆེན་པོའི་པར་བུ་བཟློག །ཀླུ་བདུད་ནག་པོའི་(༡༩བ)
གཏད་ཁྲམ་བཟློག །བོན་པོ་ཡོངས་ཀྱི་ལྷ་བྱད་བཟློག །བལ་པོའི་ངན་སྔགས་སྦྱོར་བ་བཟློག །རྒྱ་གར་ཆོས་ཀྱི་མཐུ་བྱེད་བཟློག །མར་པས་ཕྲ་མིན་གཏོང་བ་བཟློག །སུམ་པས་གླང་དམར་རྨོ་བ་བཟློག །མི་ཉག་འབོ་ལེ་ཐམས་ཅད་བཟློག །བོད་ཀྱིས་རྦོད་གཏོང་བྱེད་པ་བཟློག །བྲམ་ཟེའི་སྔགས་རྒོད་དམོད་པ་བཟློག །དྲི་ཟས་སྨྱོས་ཤིང་འཐིབས་པ་བཟློག །རྒྱལ་པོས་སྨྱོ་འབོག་གཏོང་བ་བཟློག །སྲིན་པོས་ཤོད་ཁ་གཏོང་བ་བཟློག །བདུད་ཀྱིས་ཁྲམ་ལ་བཏབ་པ་བཟློག །བཙན་གྱིས་ཞགས་ལ་འཕེན་པ་བཟློག །གནོད་སྦྱིན་རྩིས་ལ་འདེབས་པ་བཟློག །འབྱུང་པོས་ཉམས་ལེན་བྱེད་པ་བཟློག །མཚེ་ཟོར་ཡུངས་ཟོར་འཕེན་པ་བཟློག །ཐེའུ་རང་སྲི་ལ་རྐུ་བ་བཟློག །གློ་བུར་ཡེ་འབྲོག་ཐམས་ཅད་བཟློག །འབྱུང་པོས་གོད་འདྲེ་བྱེད་པ་བཟློག །སེ་རགས་སྲིས་ལ་རྐུ་བ་བཟློག །དར་ཚན་ནང་གི་སྟོང་འདྲེ་བཟློག །བདུད་བཙན་ཡོངས་ཀྱི་གནོད་འདྲེ་བཟློག །མ་མོ་རྣམས་ཀྱི་རིམས་ནད་བཟློག །ནད་དང་མཚོན་གྱི་དྲུ་བུ་བཟློག །རིམས་ནད་གག་ལྷོག་གཟེར་གསུམ་བཟློག །མི་ནད་སྣ་དགུ་ཐམས་ཅད་བཟློག །རྒན་སྲི་དར་སྲི་ཐམས་ཅད་བཟློག །བྱིས་པའི་ཆུང་སྲི་ཐམས་ཅད་བཟློག །བདུད་ཀྱི་ཆོ་འཕྲུལ་གཏོང་བ་བཟློག །གཤིན་གྱི་དུར་སྲི་ལངས་པ་བཟློག །རུས་ལ་ཚིག་ངན་གཏོང་བ་བཟློག །སྣག་ལ་མཚན་ངན་འདོགས་པ་བཟློག །རྟ་ནད་ནོར་ནད་ཐམས་ཅད་བཟློག །ལོ་དགྲ་བཙའ་དང་སད་སེར་བཟློག །ནད་རིགས་བཞི་བརྒྱ་རྩ་བཞི་བཟློག །ལྟས་ངན་ཉི་ཁྲི་ཆིག་སྟོང་བཟློག །བྱིས་པའི་གདོན་ཆེན་བཅོ་ལྔ་བཟློག །ཕྱི་ཡི་ལྟས་ངན་ཕྱི་རུ་བཟློག །བར་གྱི་ལྟས་ངན་དབྱིངས་སུ་བཟློག །བྱད་མ་ལྷ་སྲུང་བཅས་པ་བཟློག །མི་མཐུན་གནོད་པའི་ཕྱོགས་ཀུན་བཟློག༔ བཟློག་གོ་དམར་ཆེན་གཏོར་མས་བཟློག༔ སྒྱུར་རོ་འཇམ་དཔལ་མཐུ་ཡིས་བསྒྱུར༔ ཟོར་རོ་དགྲ་དང་བགེགས་ལ་ཟོར༔ བཅོམ་(༢༠ན)
ལྡན་གཤིན་རྗེ་གཤེད་པོའི་ཚོགས༔ དམ་རྫས་མཆོད་པ་འདི་བཞེས་ལ༔ བྱད་དང་རྦོད་གཏོང་བསྒྱུར་བ་དང་༔ བཅོལ་བའི་འཕྲིན་ལས་སྒྲུབ་པར་མཛོད༔ ཨཱོཾ་ཡ་མཱནྟ་ཀ་ཪྣྲི་ཏྲི་དགྲ་བགེགས་ཨ་མུ་ཀཾ་མཱ་ར་ཡ་རྦད་བཟློག༔ ཏྲིག་ནན། གཟེར་ནན། རྦུད་ཐུམས་བཟློག༔ མྱོགས་རྔུབས་མཱ་ར་ཡ་དུར་ན་བཟློག༔ གནོད་བྱེད་རཱུ་པ་ཙིཏྟ་ཧ་ན་ད་ཧ་པ་ཙ་ཚིནྡྷ་ཧཱུཾ་ཕཊ༔ མཱ་ར་ཡ་རྦད་བཟློག༔ མདོས་ལམ་འཐེན་ལ་སྒོ་དབྱེ་བ་ནི། ཧཱུཾ། ཕྱོགས་བཞི་མཚམས་བརྒྱད་སྟེང་འོག་གནས་པའི་སྣང་སྲིད་ལྷ་འདྲེའི་ཚོགས༔ གསེར་སྐྱེམས་མཆོད་པ་འདི་བཞེས་ལ༔ རིགས་འཛིན་བདག་གི་བཀའ་ལ་ཉོན༔ དམར་ཆེན་དྲག་པོའི་གཏོར་ཟོར་འདི༔ ལྷ་སྲིན་ཚོགས་ལ་འཕེན་སྙམ་སྟེ༔ དཀར་པོའི་ཕྱོགས་ལ་མི་འཕེན་ནོ༔ ཁྱེད་རྣམས་རང་རང་གནས་ལ་གཤེགས༔ ཧཱུཾ། རྣལ་འབྱོར་ཟོར་འཕེན་གང་དུ་འཕེན༔ སྡང་དགྲ་གནོད་བགེགས་ཕྱོགས་སུ་འཕེན༔ ཕྱོགས་དེར་གནས་པའི་གཞི་བདག་རྣམས༔ སྐུ་གཟུར་དབུ་སྨོད་ཞབས་བསྡུས་ལ༔ དོ་ནུབ་ཟོར་གྱི་ཟོར་ལམ་ཕྱེ༔ འཁོར་བཅས་དྲག་པོའི་དམག་སྣ་དྲོངས༔ སྡང་དགྲ་གནོད་བགེགས་ཕྱོགས་སུ་ཁྱེར༔ ཧཱུཾ། ང་ནི་འཇམ་དཔལ་གཤིན་རྗེའི་གཤེད༔ ཁྲག་འཐུང་ཀུན་གྱི་རྒྱལ་པོ་ཡིན༔ བཀའ་འཁོར་ལས་བྱེད་སྟོང་གསུམ་གང་༔ ཐམས་ཅད་དྲག་པོའི་ལས་ལ་ཕྱོས༔ སྒྲོལ་བྱེད་དྲག་པོ་ཟོར་གྱི་རྫས༔ སྡང་དགྲ་གནོད་བགེགས་ཕྱོགས་སུ་འཕེན༔ གཏོར་ཟོར་ཐོག་ལྟར་ཤར་ར་ར༔ ཁྲག་ཟོར་མཚོ་ལྟར་ཁྱིལ་ལི་ལི༔ མདའ་ཟོར་འཁྱུག་ལྟར་ཁྱུགས་སེ་ཁྱུག༔ རྡོ་ཟོར་རྦབ་ལྟར་ཉིལ་ལི་ལི༔ ཐུན་ཟོར་སེར་ལྟར་ཤར་ར་ར༔(༢༠བ)
དུག་ཟོར་མུན་ལྟར་ཐིབས་སེ་ཐིབ༔ དྲག་པོ་སྣ་ཚོགས་ཟོར་གྱི་རྫས༔ སྡང་བ་དགྲ་ཡི་སྙིང་ལ་ཡཱ༔ བདུན་བརྒྱུད་ཆོད་ཅིག་མཱ་ར་ཡ༔ གནོད་པ་བགེགས་ཀྱི་སྙིང་ལ་ཡཱཿ མེད་པར་ཆོམས་ཤིག་མཱ་ར་ཡ༔ ཡུལ་མཁར་ཁྱིམ་ལ་གཏོར་ཟོར་ཡཱཿ རྡུལ་དུ་རློག་ཅིག་མཱ་ར་ཡ༔ བདག་འཛིན་བདུད་ལ་གཏོར་ཟོར་ཡཱཿ གཉིས་མེད་སྒྲོལ་ཅིག་མཱ་ར་ཡ༔ དམག་ལྟོའི་ཚུལ་དུ་ཐོག་མར་ཚོགས་ལྷག་བཏང་། དེ་ནས་ཆད་མཐོ་ནི། །ཧཱུཾ། སྔོན་ཚེ་འོག་མིན་ཆོས་དབྱིངས་གནས་མཆོག་ཏུ། །བཅོམ་ལྡན་འཇམ་དཔལ་ཀུན་ཏུ་བཟང་པོ་ཡིས། །སྒྲ་ཚིག་བྱ་རྩོལ་བྲལ་བའི་རྒྱུད་གསུངས་ཚེ། །རང་ལས་མི་ཞན་རིག་པའི་རང་གདངས་འཁོར། །མཁའ་ལ་འཇའ་ལྟར་ཤར་བའི་ཚོགས་རྣམས་ཀྱིས། །རང་བྱུང་རང་ཤར་རྟོགས་གྲོལ་དུས་གཅིག་ཏུ། །བླང་དུ་མེད་པའི་དམ་ཚིག་མ་བཅས་སམ། །སྣང་རིག་དོན་གཏོར་ལེན་པར་མ་ཆད་དམ། ཁས་བླངས་ཇི་བཞིན་གཏོར་མ་འདི་ལོང་ལ། །ཇི་ལྟར་བཅོལ་བའི་འཕྲིན་ལས་སྒྲུབ་པར་མཛོད། །དེ་འོག་བསྐལ་པ་བར་མའི་དུས་ཀྱི་ཚེ། །རི་རྒྱལ་མེ་རི་འབར་བའི་རྩེམོ་རུ། །སྐུ་ཡི་རིགས་འཛིན་འཇམ་དཔལ་བཤེས་གཉེན་གྱིས། །འཇམ་དཔལ་ཞི་ཁྲོའི་དཀྱིལ་འཁོར་ཞལ་གཟིགས་ནས། །ཟླ་གསང་རྒྱུད་དོན་མན་ངག་ལ་བསྡེབས་ཚེ། །གཤིན་རྗེ་དྲུག་ཁྲིས་སྲོག་སྙིང་རབ་ཕུལ་ནས། །བཀའ་ཡི་གཏོར་ལེན་རྣལ་འབྱོར་བུ་བཞིན་སྐྱོང་། །འཕྲིན་ལས་རྣམ་བཞི་སྒྲུབ་པར་མ་ཆད་དམ། ཁས་བླངས་ཇི་བཞིན་གཏོར་མ་འདི་ལོང་ལ། །ཇི་ལྟར་བཅོལ་བའི་འཕྲིན་ལས་སྒྲུབ་པར་མཛོད། །དེ་འོག་དུར་ཁྲོད་སྒྲུབ་པའི་གནས་ཆེན་ཚོར། །གཙུག་ལག་དཔལ་དགེ་དྷ་ན་ད་ལ་དང་། །ཤཱནྟིང་གརྦྷ་བྷ་སུ་དྷ་ར་སོགས། །དྲག་སྔགས་བཀའ་བབས་རིགས་འཛིན་ཚོགས་རྣམས་ཀྱིས། །འཇམ་དཔལ་གཤིན་རྗེའི་དངོས་གྲུབ་གྲུབ་པའི་ཚེ། །ལས་ཀྱི་གཤིན་རྗེའི་སྲོག་སྙིང་རབ་ཕུལ་ནས། །བཀའ་ཡི་གཏོར་ལེན་རྣལ་འབྱོར་བུ་བཞིན་སྐྱོང་། །འཕྲིན་ལས་རྣམ་བཞི་སྒྲུབ་པར་མ་ཆད་དམ། ཁས་བླངས་ཇི་བཞིན་གཏོར་མ་འདི་ལོང་ལ། །ཇི་ལྟར་བཅོལ་བའི་འཕྲིན་ལས་སྒྲུབ་པར་མཛོད། །དེ་འོག་བསྐལ་པ་ཐ་མའི་དུས་ཀྱི་ཚེ། །འཕྲིན་ལས་(༢༡ན)
སྒྲུབ་གནས་ཡར་ཀླུངས་ཤེལ་བྲག་ཏུ། །པདྨ་ཐོད་ཕྲེང་ཇོ་མོ་མཁར་ཆེན་བཟའ། །སྒྲ་སྒྱུར་ཆེན་པོ་བཻ་རོ་ཙ་ན་ཡིས། །དྲེགས་པ་འཇོམས་བྱེད་དཀྱིལ་འཁོར་ཞལ་ཕྱེ་དུས། །མ་གཤིན་དྲེགས་པའི་སྲོག་སྙིང་རབ་ཕུལ་ནས། །བཀའ་ཡི་གཏོར་ལེན་རྣལ་འབྱོར་བུ་བཞིན་སྐྱོང་། །འཕྲིན་ལས་རྣམ་བཞི་སྒྲུབ་པར་མ་ཆད་དམ། ཁས་བླངས་ཇི་བཞིན་གཏོར་མ་འདི་ལོང་ལ། །ཇི་ལྟར་བཅོལ་བའི་འཕྲིན་ལས་སྒྲུབ་པར་མཛོད། །དེ་འོག་རྩུབ་འགྱུར་ལྔ་བརྒྱའི་བསྐལ་པ་ལ། །རྔ་ཡབ་ཟངས་མདོག་དཔལ་རིའི་ཕོ་བྲང་དུ། །འཁོར་འདས་དབང་སྒྱུར་པདྨ་འབྱུང་གནས་དང་། །སློབ་མའི་དངས་མ་འགྲོ་འདུལ་གླིང་པ་ཡིས། །འཇམ་དཔལ་ཞི་ཁྲོའི་དཀྱིལ་འཁོར་ཞལ་ཕྱེ་ཚེ། །རལ་པ་ཚར་དགུས་སྲོག་སྙིང་རབ་ཕུན་ནས། །བཀའ་ཡི་གཏོར་ལེན་རྣལ་འབྱོར་བུ་བཞིན་སྐྱོང་། །འཕྲིན་ལས་རྣམ་བཞི་སྒྲུབ་པར་མ་ཆད་དམ། ཁས་བླངས་ཇི་བཞིན་གཏོར་མ་འདི་ལོང་ལ། །ཇི་ལྟར་བཅོལ་བའི་འཕྲིན་ལས་སྒྲུབ་པར་མཛོད། །ད་ལྟ་སྒྲུབ་པའི་གནས་མཆོག་དམ་པ་འདིར། །མ་དང་མཁའ་འགྲོའི་ཁ་རླངས་མ་ཉམས་པ། །སྨིན་གྲོལ་མན་ངག་ཆད་མེད་བརྒྱུད་འཛིན་པའི། །རིགས་འཛིན་སྔགས་འཆང་བདག་གིས་གཤིན་རྗེའི་གཤེད། །ཚུལ་བཞིན་བསྒྲུབས་ནས་འཕྲིན་ལས་བཅོལ་བའི་ཚེ། །ལས་གཤིན་གཙོར་གྱུར་སྡེ་བརྒྱད་ཚོགས་རྣམས་ཀྱིས། །བཀའ་ཡི་གཏོར་ལེན་རྣལ་འབྱོར་བུ་བཞིན་སྐྱོང་། །འཕྲིན་ལས་རྣམ་བཞི་སྒྲུབ་པར་མ་ཆད་དམ། ཁས་བླངས་ཇི་བཞིན་གཏོར་མ་འདི་ལོང་ལ། །ཇི་ལྟར་བཅོལ་བའི་འཕྲིན་ལས་སྒྲུབ་པར་མཛོད། །དེ་ནས་ཕྱི་རོལ་དུ་གསེར་སྐྱེམས་བཏང་ཟོར་འཕེན་པ་ནི། རྩང་དམར་མཚེ་ཡུངས་ཐུན་རྫས་མེ། །སྣ་ཚོགས་རྫས་ཀྱིས་བར་བཏགས་པའི། །དྲག་པོའི་ཀོང་བུ་ཟུར་གསུམ་ཅན། །དུག་དང་མཚོན་ཆར་བྱིན་བརླབས་པ། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལས་རྡུལ་དུ་རློག །བྱད་ཁ་བཟློག་ལ་ཕུར་ཁ་བསྒྱུར། །དྲག་པོའི་འཕྲིན་ལས་སྒྲུབ་པར་མཛོད། །སྒྲུབ་སྔགས་མཇུག་ཏུ་ཨེ་ཡ་མ་ར་ཙ༔ ཤ་ཏྲཱུཾ་རཱུ་པ་ཏྲིག་ནན༔ སྲོག་ཪྣྲི་ཏྲི་ཧུར་ཐུམས་ཛ༔ མཱ་ར་ཡ་རྦད་བྷྱོ༔ ཕུང་ཤུལ་དུར་ཁྲོད་ལ་སོགས་པའི༔ འཇིགས་སུ་རུང་བའི་རྡོ་ནག་པོ། །དྲག་པོ་རྫས་ཀྱིས་ངར་བཏགས་པ། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལས་རྡུལ་དུ་རློག །བྱད་ཁ་བཟློག་ལ་ཕུར་ཁ་བསྒྱུར། །དྲག་པོའི་འཕྲིན་ལས་སྒྲུབ་པར་མཛོད། །(༢༡བ)
དུག་ཆེན་ཚེར་མའི་ཤིང་དག་ལ། །ལྟས་ངན་འབྱུང་པོའི་སྒྲོ་ཡིས་བརྒྱན། །གནམ་ལྕགས་འབར་བའི་མདེའུ་བཙུགས། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལས་རྡུལ་དུ་རློག །བྱད་ཁ་བཟློག་ལ་ཕུར་ཁ་བསྒྱུར། །དྲག་པོའི་འཕྲིན་ལས་སྒྲུབ་པར་མཛོད། །གྲུ་གསུམ་ས་ཡི་ཀོང་བུའི་ནང་། །དམར་ནག་ཁྲག་གི་མཚོ་བསྐྱིལ་བར། །ཧ་ལ་ནག་པོའི་ངར་བཏགས་པ། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལས་རྡུལ་དུ་རློག །བྱད་ཁ་བཟློག་ལ་ཕུར་ཁ་བསྒྱུར། །དྲག་པོའི་འཕྲིན་ལས་སྒྲུབ་པར་མཛོད། །གནམ་ལྕགས་འབར་བའི་སྣོད་ནང་དུ། །འབྲུ་ནག་དར་བཏགས་དཔལ་གཏོར་ལ། །དྲག་པོའི་རྫས་ཀྱིས་ཉེར་བརྒྱན་པ། །ལོག་འདྲེན་དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལས་རྡུལ་དུ་རློག །བྱད་ཁ་བཟློག་ལ་ཕུར་ཁ་བསྒྱུར། །དྲག་པོའི་འཕྲིན་ལས་སྒྲུབ་པར་མཛོད། །ཅེས་དམིགས་པ་དང་བཅས་དགྲ་བགེགས་བར་ཆོད་ཐམས་ཅད་རྡུལ་དུ་བརླག་པར་བསམ་ཞིང་བསྲུང་བ་ནི། ཧཱུཾ། དང་པོ་ཐིག་ལེ་ཉག་གཅིག་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །བཞི་པ་ཚད་མེད་བཞི་ཡི་རྒྱ། །ལྔ་པ་རྒྱལ་བ་རིགས་ལྔའི་རྒྱ། །དྲུག་པ་ཐུབ་པ་དྲུག་གི་རྒྱ། །བདུན་པ་སངས་རྒྱས་རབས་བདུན་རྒྱ། །བརྒྱད་པ་སེམས་དཔའ་བརྒྱད་ཀྱི་རྒྱ། །དགུ་པ་ཐེག་པ་རིམ་དགུའི་རྒྱ། །བཅུ་པ་ཁྲོ་བོ་བཅུ་ཡི་རྒྱ། །བཅུ་གཅིག་ཨྱོན་པདྨའི་རྒྱ། །བཅུ་གཉིས་རྣལ་འབྱོར་བདག་གི་རྒྱ། །བཅུ་གསུམ་རྡོ་རྗེ་འཛིན་པའི་རྒྱ། །བཅུ་བཞི་ཕན་ཆད་མྱ་ངན་འདས། །མྱ་ངན་འདས་པའི་ཕ་རོལ་ན། །སྣང་སྲིད་འཁོར་འདས་དགྲར་ལངས་ཀྱང་། །དགྲ་ཞེས་བྱ་བའི་མིང་ཡང་མེད། །བགེགས་ཞེས་བྱ་བའི་མིང་ཡང་མེད། །མཚམས་ཀྱི་དཀྱིལ་འཁོར་ལྷུན་གྱིས་གྲུབ། །བསྲུང་སྔགས་བཟླ་ཞིང་མེ་ཆུས་རྒྱས་འདེབས། གཏོར་གཞོང་གི་བཤལ་ཆུས་བསྟན་མ་བསྐྱང་ཞིང་སྒོ་དྲུང་དུ་བྲོ་བརྡུང་། །ནང་དུ་སླེབས་ནས་ཚེ་འགུགས། །གཏང་རག་ནི། ཧཱུཾ། ཕྱི་ནང་ཉེར་སྤྱོད་སྨན་རག་གཏོར་གསུམ་སོགས། །ཀུན་ཏུ་བཟང་པོའི་མཆོད་སྤྲིན་རྒྱ་མཚོའི་ཚོགས། །གཤིན་རྗེ་གཤེད་པོའི་ལྷ་ཚོགས་འཁོར་(༢༢ན)
བཅས་ལ། །འབུལ་གྱིས་བཞེས་ལ་དངོས་གྲུབ་རྣམ་གཉིས་སྩོལ། །གཤིན་རྗེའི་གཤེད་ཀྱི་ཡི་གེ་བརྒྱ་པ་བརྗོད་དེ། ནོངས་པ་བཟོད་པར་གསོལ། རྟེན་ཡོད་ན་བརྟན་བཞུགས་བྱ་ཞིང་མེད་ན་གཤེགས་གསོལ་དང་དཀྱིལ་འཁོར་ཉེར་སྡུ་བྱེད། སྨོན་ལམ་ནི། དགེ་བ་འདི་ཡིས་བདུད་བཞིའི་དཔུང་བཅོམ་སྟེ། །ཀུན་བཟང་འཇམ་དཔལ་གཤིན་རྗེའི་ས་བརྙེས་ནས། །རང་དོན་མཐར་ཕྱིན་མཁའ་མཉམ་སེམས་ཅན་རྣམས། །ཕན་དང་བདེ་བའི་དཔལ་ལ་སྤྱོད་པར་ཤོག །ཤིས་པ་བརྗོད་པ་ན། སྐུ་ཡི་རིགས་འཛིན་རྩ་བརྒྱུད་བླ་མ་དང་། །འཇམ་དཔལ་ཞི་ཁྲོ་ཡི་དམ་དཀྱིལ་འཁོར་ལྷ། །མ་དང་མཁའ་འགྲོ་ལས་གཤིན་སྲུང་མ་ཡི། །བཀྲ་ཤིས་ཕྱོགས་དུས་ཀུན་ཏུ་ཁྱབ་པར་ཤོག །གཞན་ཡང་ཤིས་བརྗོད་ཅི་རིགས་བྱའོ། །ཟླ་གསང་རྒྱུད་སྡེ་རྒྱ་མཚོའི་བཅུད་ཕྱུང་བ། །སངས་རྒྱས་གཉིས་པ་ཨྱོན་ཞལ་གྱི་ལུང་། །དྲག་སྔགས་བཀའ་བབས་བཻ་རོ་ཙ་ན་ཡི། །ཟབ་ཆོས་དྲེགས་པ་འཇོམས་བྱེད་གཤིན་རྗེའི་སྐོར། །ཤེལ་བྲག་རི་བོར་རྒྱས་བཏབ་གསང་བའི་གཏེར། །འགྲོ་འདུལ་གཏེར་བདག་གླིང་པས་སྤྱན་དྲངས་པ། །ཤོག་སེར་དྲི་ངད་ལྡང་བའི་ཙནྡན་ལྗོན། །དགྲ་བགེགས་ཚ་གདུང་གཞིལ་བའི་ཆོ་ག་མཁན། །གང་གི་འཕྲིན་ལས་བཞི་དང་ཁྱད་པར་དུ། །དྲག་སྦྱོར་མངོན་སྤྱོད་ནང་ཚན་ཟོར་གྱི་ལས། །གནམ་ལྕགས་འབར་བའི་ཐོག་གི་མདའ་ཆེན་པོས། །དགྲ་བགེགས་སྡེ་བརྒྱད་མགོ་བོ་ཅིག་ཅར་འགེམས། ༣ །འདི་ཀོ་རྩོད་བྲལ་སྤྲུལ་པའི་གཏེར་སྟོན་གྱིས། །བཀླགས་ཆོག་ཚུལ་དུ་སྒྲིགས་ཞེས་སྐབས་དབྱེ་ལྟར། །ལུང་ཟིན་ཆོས་ཀྱི་བདག་པོར་ཉེར་རློམ་པའི། །ཟ་ཧོར་སྔགས་སྨྱོན་(༢༢བ)
བཞད་པ་རྩལ་གྱིས་བཀོད། ༤ །བསོད་ནམས་བཙུག་ན་ཟླ་བའི་མིག་གི་མེས། །དགྲ་བགེགས་དགའ་རབ་དབང་ཕྱུག་ལུས་བསྲེགས་ནས། །ཐུབ་བསྟན་སུམ་རྩེན་ལྷ་རྣམས་རྒྱལ་བའི་རྔ། །བརྡུངས་པའི་སྒྲ་ཡིས་འཇིག་རྟེན་ཀུན་ཁྱབ་ཤོག ༥ །ཅེས་རྣམ་སྣང་ལོ་ཙཱའི་ཡང་སྲིད་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པས་ཡར་ཀླུངས་ཤེལ་རི་རྒྱལ་མཚན་འདྲ་བའི་བྱང་འདབས་ཀྱི་བྲག་ངོས་ནས་སྤྱན་དྲངས་པའི་འཇམ་དཔལ་དྲེགས་པ་འཇོམས་བྱེད་ཀྱི་སྨད་ལས་དྲག་པོ་ཟོར་གྱི་སྐོར་ཆོག་སྒྲིགས་བཀླགས་ཆོག་མ་ཞིག་བྲིས་ཞེས་རིགས་འཛིན་ཆེན་པོ་ཉིད་ཀྱི་གསུང་དང་དུ་བླངས་ཏེ་སྨད་ལས་གནམ་ལྕགས་འབར་བའི་ཐོག་མདའ་འདི་ནི་ཟ་ཧོར་གྱི་སྔགས་རྒན་ཟིལ་གནོན་བཞད་པ་རྩལ་གྱིས་གཏེར་གཞུང་རྡོ་རྗེའི་ཚིག་རྣམས་རང་སོར་བཞག །ཁ་འགེང་དགོས་པ་སྒྲོལ་ཆེན་བསམ་གྲུབ་རྡོ་རྗེས་མཛད་པའི་ཚེ་བདག་གི་འཕྲིན་ལས་འབྲིང་པོ། འབྲི་ཁུང་ལུགས་ཀྱི་ཡང་བཟློག་མེའི་སྤུ་གྲིའི་ལྷན་ཐབས་རིགས་འཛིན་ཀུན་དགའ་ཚེ་མཆོག་གིས་མཛད་པའི་འཇམ་དཔལ་ཁྲོ་ཆུ་དུག་སྡོང་གི་སྨད་ལས། བྱང་གཏེར་ཕུར་བཟློག་གི་ཆོག་བསྒྲིགས་རྣམས་ལས་བླངས་ཤིང་། གསེར་སྐྱེམས། ལིང་རོ་འབུལ་བའི་འཕྲིན་བཅོལ། ཆད་མཐོ་སོགས་འགའ་ཞིག་རང་བློས་གསར་དུ་བསྐྲུན་ཏེ་ཡོངས་འཛིན་ཞེས་པ་ཆུ་ཕོ་བྱི་བའི་ལོ་རྣམ་འདྲེན་ཤཱཀྱ་སེང་གེས་གཞན་སྡེ་ཚར་བཅད་པའི་ཆོ་འཕྲུལ་གྱི་དུས་ཆེན་དཀར་ཕྱོགས་ཀྱི་རྒྱལ་བ་གཉིས་པ་ལ་རྒྱལ་ཁབ་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པས་བགྱིས་པ་བདུད་སྡེའི་གཡུལ་ལས་རྒྱལ་བའི་རྒྱུར་གྱུར་ཅིག། །། སརྦ་མངྒ་ལཾ།། །།