འཇམ་དཔལ་ཚེ་བདག་ནག་པོའི་ལས་བྱང་སྲིད་གསུམ་རྣམ་རྒྱལ།
འཇམ་དཔལ་ཚེ་བདག་ནག་པོའི་ལས་བྱང་སྲིད་གསུམ་རྣམ་རྒྱལ་བཞུགས་སོ། །
ན་མོ་མཉྫུ་ཤྲཱི་བཱི་རེ་ཎ་མུ་དྲཱ་བྷི་བྷཱུ་ཡཱ་ཡ། མཁའ་ཁྱབ་སྤྲོས་བྲལ་གདོད་མའི་ཀློང་དུ་འཇམ་དཔལ་ཀུན་བཟང་ཆོས་ཀྱི་སྐུ། །འོག་མིན་ཞིང་ཁམས་ཞིང་གི་གཙོ་བོར་རྡོ་རྗེ་འཆང་དབང་ལོངས་སྤྱོད་རྫོགས། །ཡིད་སྲུབས་གཤེད་དུ་འཁོར་འདས་ཟིལ་གནོན་ཚེ་བདག་ནག་པོ་སྤྲུལ་པའི་སྐུ། །སྐུ་གསུང་ངོ་བོ་ཆོས་དབྱིངས་རང་གྲོལ་རིགས་ཀྱི་གཙོ་བོར་གཙུག་ན་མཛེས། །སྟང་ཟིལ་མདོག་ལྟར་གནག་པའི་སྲིན་པོའི་གཟུགས། །དུས་ཀྱི་བྱིན་ཟའི་དབུས་ན་འགྱིང་བའི་གར། །རབ་འབར་མཚོན་ཆ་གདེངས་པའི་མོད་ཉིད་ལ། ཁྲོ་རྒྱལ་ཕལ་གྱི་ལག་ཆ་དུས་གཅིག་འཆོར། །དྲི་ང་མགོ་བོ་རྒྱུ་མར་བརྒྱུས་པའི་འཕྲེང་། །ཕྲལ་བསད་པགས་རློན་ལྡིང་སྟབས་གོས་ཀྱིས་ཀྱང་། །མ་ཚིམ་སྙིང་གི་ཁྲག་དྲོན་འཐུང་བ་དང་། །ལྷན་ཅིག་ཐལ་ཞག་ཁྲག་གིས་ལུས་ཀུན་བྱུགས། །རུ་དྲ་བསྒྲལ་བའི་དཔལ་དང་དུར་ཁྲོད་ཆས། །དཔའ་རྟགས་ལོག་འདྲེན་ཚོགས་ལ་རྔོམ་བཞིན་དུ། །ཀ་དག་གཤོག་པའི་རྩལ་གྱིས་འཁོར་འདས་ཆོས། །ཟད་མཐའི་ལྷུན་(༢ན)
གྲུབ་མཁའ་ལ་ནམ་འཕང་སྤྱོད། །ལྷ་སྔགས་ཡེ་ཤེས་རྡོ་རྗེ་རྩེ་བརྒྱ་པ། །གདེངས་ཚེ་སྟོབས་ལྡན་འབྱུང་པོ་སྦྱིན་སྐྱེས་མོའི། །དྲེགས་བསྙེམས་མངལ་ལྷུངས་ཆབས་ཅིག་ལུས་མེད་སྨག །གཟི་བྱིན་ཉི་མའི་འོད་གདོང་མ་ཆུགས་སངས། །དགྲ་བོའི་བླ་རྐུ་སྲོག་གཅོད་ཚེ་ཡི་མཐའ། །བཏུལ་བའི་བམ་རོའི་སྟེང་ན་ཞབས་ཀྱི་བྲོ། །བརྡུང་ཡང་འགྲོ་ལ་སྙིང་རྗེའི་ཆུས་བརླན་པ། །རྒྱལ་ཀུན་སྤྱི་ལུགས་ཚུལ་ལས་འདས་མིན་མཚར། །རང་རྒྱུད་དུག་ལྔ་ཕྱི་རོལ་མེ་ལོང་དུ། །ཤར་བའི་དགྲ་གདོན་དེས་བསྐྱེད་དྲུང་འབྱིན་པའི། །བསྐྱེད་རྫོགས་རྫོགས་ཆེན་ལམ་གྱིས་ཚེ་གཅིག་ལ། །ཕུང་པོ་འོད་སྐུར་གྲོལ་ནུས་ལྷག་པའི་ལྷ། །རང་སྲུང་བཙན་པོའི་ལྕགས་རི་མཐོ་སྟེང་ནས། །ཟློག་བསད་ནག་པོ་མཐུ་ཡི་ལྕེ་འབབ་ཀྱང་། །དབང་འབྲིང་བར་དོར་འཇམ་དཔལ་ཞི་དང་ཁྲོར། །མ་བུ་རང་ངོ་འཕྲོད་པས་ཡ་མི་ང་། །དེ་ཕྱིར་ཟླ་གསང་རྒྱུད་སྡེ་འོ་མའི་མཚོའི། །ཡང་སྙིང་སྡིག་རྒྱུད་མར་གྱི་ཉིང་ཁུ་ལས། །པད་གནུབས་བཞེད་སྲོལ་སཱ་ལའི་སྨན་ལྗོངས་འདིར། །ཟབ་པ་གཏེར་དང་རྣམ་དག་བཀའ་མའི་རྒྱུད། །ཡོ་(༢བ)
ག་གསུམ་དུ་འགྲེལ་ལུགས་ཐ་དད་པར། །མཁྱེན་ལྡན་སྔགས་འཆང་དགོངས་དོན་མང་ལོན་མཐར། །སེ་སྟོན་ཕྱག་བཞེས་དབང་པོའི་སྡེས་གསལ་བ། །འདི་ཀོ་རིན་ཆེན་ཁྲོད་ནས་ཡིད་བཞིན་ནོར། །གང་དེར་དཔྱད་བཟོད་ཡང་དག་གཏན་ཚིགས་ཀྱིས། །ཡིད་དྲངས་རང་ཉམས་ལེན་དང་སྣོད་ལྡན་ཆེད། །འཕྲིན་ལས་སྲིད་པ་གསུམ་ལས་རྣམ་རྒྱལ་བའི། །འཇིགས་མེད་སེང་གེའི་རྒྱུད་ཀྱི་དབྱངས་སུ་ལེན། །དེ་ཡང་འཇམ་དཔལ་ཕྱག་རྒྱ་ཟིལ་གནོན་གྱི་འཕྲིན་ལས་ཀྱི་རིམ་པ་མན་ངག་རྩ་བའི་དགོངས་པ་ལྟར་མཁྱེན་བརྩེ་ནུས་པའི་བདག་ཉིད་སེ་སྟོན་ཆེན་པོ་རིན་ཆེན་རྒྱལ་མཚན་དང་ཁྲི་སྲོང་རྣམ་སྤྲུལ་ཆོས་རྒྱལ་དབང་པོའི་སྡེའི་བཞེད་པ་བཞིན་འདྲི་བ་ལ་སྔོན་འགྲོ་དངོས་གཞི་རྗེས་ཀྱི་རིམ་པ་དང་གསུམ་ལས། དང་པོ་འཇམ་དཔལ་རྫོགས་ཆེན་ནས་བཀང་དང་། །རྣམ་ངེས་རིན་ཅེན་སྒྲོན་མེ་དངོས་བསྟན་གཉིས། །དང་པོར་སྐྱབས་སེམས་བསྐྱེད་གསོལ་རྒྱུད་སྨོན་ལྔའི། །དང་པོ་སྐྱབས་སུ་འགྲོ་ཞིང་སེམས་བསྐྱེད་ནི། །བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆི། །སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་མཆི། །ཡེ་ཤེས་ལྷ་དང་དམ་ཚིག་ལྷ་ལ་སྐྱབས་སུ་མཆི། །ཆོས་སྐུ་ལོངས་སྐུ་སྤྲུལ་སྐུ་གསུམ་ལ་སྐྱབས་སུ་མཆི། །བདག་དང་དྲིན་ཅན་ཕ་མས་གཙོ་བྱས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ཉིད་ལ་དེར་ཤེས་ཀྱི། །བྱང་ཆུབ་མཆོག་ཏུ་རྒྱ་ཆེན་སེམས་ནི་བསྐྱེད་པར་བྱ། །ཞེས་ལན་གསུམ་བརྗོད། གཉིས་པ་བདག་དང་མདུན་གྱི་རྟེན་བསྐྱེད་པ། །ཨཱོཾ་སྭ་བྷཱ་ཝ་ཤུདྡྷ་སརྦ་དྡྷརྨཱ་སྭ་བྷཱ་ཝ་ཤུདྡྷོ྅་ཧཾ། ཆོས་ཀུན་སྟོང་ཉིད་ནམ་མཁའ་ལྟ་བུའི་ངང་། །ཨཱོཾ་ཝཱ་གཱི་ཤྭ་རི་མུཾ། སྟོང་པའི་གདངས་ལས་སྔགས་ཀྱི་སྒྲ་བསྒྲགས་མཐུས། །པད་(༣ན)
ཉི་ཆུ་ཤེལ་དབང་པོའི་དཀྱིལ་འཁོར་སྟེང་། །རང་ཉིད་ཛམྦུ་གསེར་གྱི་མདངས་འཛིན་པའི། །ཡིད་འོང་གཞོན་ནུ་ཟུར་ཕུད་ལྔ་པ་ཅན། །ཕྱག་ཟུང་ཤེས་རབ་རལ་གྲི་ཨུཏྤལ་གྱི། །འདབ་སྟོང་རྒྱས་རྩེར་ཤེར་ཕྱིན་གླེགས་བམ་བསྣམས། །ཞབས་གཉིས་མི་ཕྱེད་རྡོ་རྗེ་སྐྱིལ་ཀྲུང་ཅན། །སྣ་ཚོགས་རིན་ཆེན་མཛེས་རྒྱན་བརྒྱད་ཀྱིས་སྤྲས། །རབ་བཀྲ་ལྷབ་ལྷུབ་དར་གྱིས་མངོན་པར་ཀླུབས། །ཐུགས་ཀའི་ཧཱུཾ་ལས་འོད་ཟེར་འཕྲོ་འདུ་ཡིས། །འཕགས་པ་མཆོད་དང་རང་གཞན་དོན་བྱེད་གྱུར། །མདུན་དུ་དཔག་བསམ་ལྗོན་ཤིང་ཡལ་འདབ་དང་། །འབྲས་བུ་མངོན་པར་རབ་ཏུ་རྒྱས་པའི་དབུས། །མི་འཇིགས་གདོང་ལྔའི་ཁྲི་ལ་ཉི་མའི་གཉེན། །གཡས་གཡོན་འཇམ་དཔལ་དབྱངས་དང་སྤྱན་རས་གཟིགས། །རྒྱབ་ཏུ་ཉན་རང་གུས་བཏུད་ཕྱག་རྡོར་མདུན། །སྟེང་ཕྱོགས་ཤིང་རྩེར་དེ་བཞིན་གཤེགས་ཚོགས་དང་། །ཡལ་གར་གནས་པའི་ལྷ་ཡི་བུ་བུ་མོས། །མེ་ཏོག་ལ་སོགས་ཀུན་བཟང་མཆོད་སྤྲིན་སྤྲོ། །ཐུབ་པས་རྒྱུད་གསུང་སེམས་དཔས་སྒྲ་ཆེན་སྒྲོག །འཁོར་རྣམས་དགའ་མགུ་ཡི་རང་རྗེས་སུ་འདུད། །རྐན་གཉིས་རྒྱུད་ཀྱི་རྔ་ཆེན་ལྕེའི་དབྱུ་གུས། །བསྐུལ་ལས་ཟབ་དོན་ཆོས་སྒྲས་ཡོངས་གང་གྱུར། །གསུམ་པ་འཇམ་དཔལ་བརྒྱུད་འདེབས་རིམ་པ་ནི། །ཆོས་སྐུ་འདུས་པ་ཀུན་ཏུ་བཟང་པོ་དང་། །ལོངས་སྐུ་འདུས་པ་འཇམ་དཔལ་རིགས་ལྔ་དང་། །སྤྲུལ་སྐུ་འདུས་པ་ཤཱཀྱ་ཐུབ་པ་སོགས། །སྐུ་གསུམ་བླ་མ་རྣམས་ལ་གསོལ་བ་འདེབས། །རྡོ་རྗེ་མཁའ་འགྲོ་རིན་ཅེན་མཁའ་འགྲོ་དང་། །པདྨ་མཁའ་འགྲོ་ལས་ཀྱི་མཁའ་འགྲོ་དང་། །དེ་བཞིན་མཁའ་འགྲོ་ཨྱོན་མཁའ་འགྲོ་སོགས། །(༣བ)
མ་ལུས་མཁའ་འགྲོའི་ཚོགས་ལ་གསོལ་བ་འདེབས། །འཇམ་དཔལ་དབྱངས་དང་རྡོ་རྗེ་འཆང་ཆེན་པོ། །འཇམ་དཔལ་བཤེས་གཉེན་ཤྲཱི་སིངྷ་དང་། །རང་བྱུང་ཆེན་པོ་པདྨ་འབྱུང་གནས་ཞབས། །རིགས་འཛིན་བརྒྱུད་པ་རྣམས་ལ་གསོལ་བ་འདེབས། ཁྲི་སྲོང་ལྡེ་བཙན་འཇམ་མགོན་སྤྲུལ་པའི་སྐུ། །ཤེ་ས་སྒྲོན་གཅིག་མཚན་ལྡན་གསང་བའི་ཡུམ། །གཏེར་སྟོན་ཆེན་པོ་སར་བན་ཕྱོགས་མེད་སོགས། །སྤྲུལ་པའི་སྐུ་མཆོག་རྣམས་ལ་གསོལ་བ་འདེབས། །ལུང་ཟིན་སར་བན་ཉི་མའི་སྙིང་པོ་དང་། །སྔགས་འཆང་དབང་དར་འགར་སྟོན་རིན་ཅེན་འབུམ། །རི་པ་སངས་རྒྱས་བྱམས་པ་དཔལ་ལ་སོགས། །བརྒྱུད་འཛིན་བླ་མ་རྣམས་ལ་གསོལ་བ་འདེབས། །རྒྱ་བན་བླ་མ་རྦ་སྟོན་དཔལ་བ་དང་། །རིགས་འཛིན་ཆེན་པོ་རྒོད་ཀྱི་ལྡེམ་ཕྲུ་ཅན། །རྡོ་རྗེ་མགོན་པོ་ངག་དབང་གྲགས་པ་སོགས། །བཀའ་བབས་བླ་མ་རྣམས་ལ་གསོལ་བ་འདེབས། །སངས་རྒྱས་དཔལ་བཟང་ཐུགས་སྲས་ནམ་མཁའི་མཚན། །དཔལ་ལྡན་བློ་གྲོས་དྲན་མཆོག་ཆོས་ཀྱི་རྗེ། །ཡོངས་འཛིན་དམ་པས་རྗེས་བཟུང་དབང་པོའི་སྡེ། །རིགས་འཛིན་བླ་མ་རྣམས་ལ་གསོལ་བ་འདེབས། །རྒྱལ་དབང་པདྨའི་གདུང་གསོབ་ངག་གི་དབང་། །ཀློང་ཆེན་རབ་འབྱམས་གསུམ་པ་ཤ་གཟུག་པ། །ཟབ་དོན་གཏེར་མཛོད་འཕྲིན་ལས་གསང་སྔགས་རྗེ། །མཁས་གྲུབ་བླ་མ་རྣམས་ལ་གསོལ་བ་འདེབས། །གནུབས་ཆེན་ཡང་སྲིད་འཕྲིན་ལས་ལྷུན་གྲུབ་ཞབས། །རིགས་བརྒྱའི་ཁྱབ་བདག་ཆོས་དབྱིངས་རང་གྲོལ་རྗེ། །འཇམ་མགོན་དགྱེས་པའི་ཟ་ཧོར་བཞད་པ་རྩལ། །རྩ་བརྒྱུད་བླ་མ་རྣམས་ལ་གསོལ་བ་འདེབས། །སྟག་ཚང་བཀྲ་ཤིས་དཔལ་ཕུག་གཡུ་ཕྲའི་གནས། །བདུད་རྩིའི་ཚུལ་དུ་རྒྱས་བཏབ་གསང་བའི་གཏེར། །རྡོ་རྗེ་ཕྲག་སྐྱེས་སྐྱིན་མཐིང་ཤྭ་ཎ་མ། །གནས་ཆོས་སྲུང་(༤ན)
མར་བཅས་ལ་གསོལ་བ་འདེབས། །འཇམ་དཔལ་རིགས་ལྔ་ཞི་ཁྲོའི་དཀྱིལ་འཁོར་དུ། །རྨད་བྱུང་རྫས་ཀྱི་རྟེན་འབྲེལ་ལ་བརྟེན་ནས། །རིག་རྩལ་དབང་བཞིས་ཡེ་ཤེས་ཐོབ་པ་ཡི། །ངོ་འཕྲོད་དོན་གྱི་སྙིང་པོ་རྟོགས་པར་ཤོག །བདེ་གཤེགས་ཀུན་འདུས་རང་བྱུང་ཡེ་ཤེས་སྐུ། །གསལ་སྟོང་དབྱེར་མེད་བསྐྱེད་པའི་རིམ་པ་ཡིས། །ཐ་མལ་ལུས་ཀྱི་སྣང་ཞེན་ཡོངས་གྲོལ་ནས། །གཞི་ལུས་འོད་ཕུང་ཆེན་པོར་མངོན་གྱུར་ཤོག །སྒྱུ་འཕྲུལ་དྲ་བའི་བཅུད་ཕྱུངས་གླུ་བླངས་རྒྱུད། །བརྗོད་ཚུལ་བཞི་དང་ཡང་སྙིང་སྙིང་པོའི་དོན། །སྐྱེ་མེད་ཨ་ཡི་རང་སྒྲ་ཡོངས་བསྒྲགས་ནས། །མཐར་ཐུག་འབྲས་བུ་སྐུ་བཞི་ཐོབ་པར་ཤོག །རྡོ་རྗེ་ཐུགས་ཀྱི་བཟླས་པས་ལམ་སྦྱངས་ནས། །རྩ་ལ་ངོ་སྤྲད་རླུང་ལ་བདེ་བ་སྦྱར། །ཐིག་ལེ་ཆོས་ཀྱི་སྐུ་རུ་ལ་ཟླ་བའི། །ཟག་མེད་དགའ་བཞིའི་ཡེ་ཤེས་རྟོགས་པར་ཤོག །མཐའ་གཉིས་ལས་གྲོལ་རང་རིག་ཆེན་པོའི་དོན། །སྒོམ་མེད་སྒོམ་སོགས་དབང་པོའི་རིམ་པ་ཡིས། ཁྲེག་ཆོད་ཐོད་རྒལ་ཡེ་ཤེས་ཟང་ཐལ་སོགས། །ཚུལ་བཞིན་ལམ་དུ་ལོངས་པར་བྱིན་གྱིས་རློབས། །སྔོན་དུས་རྒྱལ་བའི་སྨོན་ལམ་རྣམ་དག་མཐུས། །ཕྱོགས་བཅུའི་ཞིང་ཁམས་རྡུལ་རྙེད་རབ་འབྱམས་ཀྱི། །འགྲོ་ཀུན་སྲིད་པའི་འཆིང་བ་ལས་གྲོལ་ནས། །ཀུན་བཟང་གདོད་མའི་གོ་འཕང་མྱུར་ཐོབ་ཤོག །བཞི་པ་འཇམ་དཔལ་མཚན་བརྗོད་རྒྱུད་བཀླག་པ། །གཞོན་ནུའི་ཆ་ལུགས་འཆང་བ་པོ། །ཞེས་སོགས་ཤླཽ་ལ་གཅིག་གི་མཐར་རྒྱུད་རྒྱས་པའམ་བསྡུས་པ་གང་རུང་བྱ། ལྔ་པ་སྨོན་ལམ་དག་པས་མཚམས་སྦྱོར་བ། །སྔོན་དུས་རྒྱལ་བས་རི་བོ་བྱ་རྐང་དུ། །རྒྱུད་འདི་གསུངས་(༤བ)
ཚེ་སྐུ་ལས་འོད་ཟེར་འབུམ། །རེ་རེའི་རྩེ་ལ་འདབ་ལྡན་པདྨའི་སྟེང་། །སྤྲུལ་པའི་སྐུ་རེས་ཕྱོགས་བཅུའི་འཇིག་རྟེན་དུ། །ཆོས་འཁོར་བསྐོར་ལྟར་བདག་གིས་འཇམ་དཔལ་གྱི། །ཆོས་འདི་བསྒྲགས་པས་སེམས་ཅན་ཐམས་ཅད་ཀྱི། །རྒྱུད་ལ་སྐྱེ་མེད་ཡོངས་སུ་ཐོབ་པ་དང་། །འཛིན་མེད་རང་གྲོལ་འགྱུར་བའི་རྒྱུར་གྱུར་ཅིག །གང་ཚེ་བལྟ་བར་འདོད་པའམ་སོགས་བྱའོ། །གཉིས་པ་རྣམ་ངེས་དངོས་བསྟན་དགོངས་དོན་ལ། །ཟུར་རྒྱན་བརྒྱུད་འདེབས་སྐྱབས་སེམས་ཚད་མེད་བཞི། །ཡན་ལག་བརྒྱད་པ་མཚམས་བཤགས་དམ་བྱིན་དབབ། །མཆོད་རྫས་བྱིན་བརླབ་སྔོན་འགྲོ་རྣམ་དགུའི་ཁྲིགས། །དང་པོ་ཟབ་གཏེར་བླ་བརྒྱུད་གསོལ་འདེབས་ནི། །ཐོག་མའི་མགོན་པོ་ཀུན་བཟང་འཇམ་དཔལ་དབྱངས། །གཤིན་རྗེའི་གཤེད་དུ་ཁྲོས་པ་དུས་དགྲའི་དབང་། །འཁོར་འདས་ཕྱག་རྒྱ་ཟིལ་གནོན་ཚེ་བདག་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །རྒྱུད་སྡེའི་བཀའ་བསྡུ་ཕྱག་ན་རྡོ་རྗེ་འཛིན། །ལྷའི་བུ་ཚངས་པ་ཉི་མ་བདེ་མཆོག་ལྡན། །མཁའ་འགྲོའི་གཙོ་མོ་ཟླ་བའི་འོད་ཟེར་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ཟུང་འཇུག་སྐུ་བརྙེས་འཇམ་དཔལ་བཤེས་གཉེན་ཞབས། །དུས་གསུམ་མཁྱེན་པ་པདྨ་སཾབྷ་ཝ། །བརྟུལ་ཞུགས་མཐར་ཕྱིན་བྷ་སུ་དྷ་ར་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །བོད་ཡུལ་དྲག་སྔགས་བདག་པོ་གནུབས་བན་རྗེ། །ལས་ལྡན་གཏེར་སྟོན་ཆེན་པོ་རྒྱ་ཞང་ཁྲོམ། །གདམས་པའི་མངའ་བདག་བྲལ་ཏེ་སམྦྷོ་ཊར། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །རིགས་འཛིན་དབང་པོ་གངས་བན་བཀྲ་ཤིས་དར། །མཐུ་སྟོབས་དབང་ཕྱུག་གངས་པ་རི་དཀར་པ། །སྡེ་བརྒྱད་བྲན་འཁོལ་གངས་པ་ཤཱག་འབུམ་པ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །(༥ན)
སྔ་འགྱུར་སྲོག་ཤིང་གཡུང་སྟོན་རྡོ་རྗེ་དཔལ། །ཟབ་སྦས་གསལ་མཛད་ཕག་སྟོན་ཤཱཀྱ་མགོན། །རིགས་འཛིན་སྦུག་སྟོན་དཔལ་ལྡན་མགོན་པོ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ཟུར་ཚོ་རྡོ་རྗེ་གླིང་པ་ཆོས་རྒྱལ་མཚན། །སྤང་སྟོན་འཇམ་དབྱངས་བདེ་ལེགས་རྒྱལ་མཚན་ཞབས། །མཁྱེན་བརྩེ་ནུས་མངའ་སེ་སྟོན་རིན་རྒྱལ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །མཐུ་ཆེན་སྤྱན་ཚབ་མགོན་པོ་ཟླ་བའི་ཞབས། །མཉམ་མེད་ནུབ་དགོན་བྱམས་པ་ཆོས་རྒྱལ་མཚན། ཁྲི་སྲོང་རྣམ་སྤྲུལ་བཀྲ་ཤིས་སྟོབས་རྒྱལ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །དེ་སྲས་སྤྲུལ་པའི་སྐུ་མཆོག་ངག་གི་དབང་། །རྡོ་རྗེ་འཆང་དངོས་ཆོས་དབྱིངས་རང་གྲོལ་དཔལ། །ཟ་ཧོར་སྔགས་སྨྱོན་ཟིལ་གནོན་དྲག་རྩལ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ཕྱི་ནང་གསང་གསུམ་གདམས་པ་ས་འཛིན་དབང་། །རྣོ་ངར་རྣ་ཆ་བརྒྱད་སོགས་གསེར་གྱི་རི། །སྟོན་མཛད་བྱེད་པོ་དངོས་བརྒྱུད་ཡོངས་འཛིན་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །རྫ་ལྷུད་རི་བོ་ཆེ་སོགས་གནས་མཆོག་ཏུ། །མི་ཕྱེད་ཕྱག་རྒྱས་བཏབ་པ་ཟབ་མོའི་གཏེར། །གནས་ཆོས་བཀའ་ཡི་སྲུང་མར་བཅས་པ་ལ། །གསོལ་པ་འདེབས་སོ་དངོས་གྲུབ་རྣམ་གཉིས་སྩོལ། །འཁོར་བའི་ངང་ཚུལ་ཀུན་ལ་ཡིད་ལོག་ཅིང་། །འགྲོ་རྣམས་སངས་རྒྱས་ས་ལ་འགོད་པའི་ཆེད། །རྨད་བྱུང་ཐེག་པ་མཆོག་གི་ལམ་ཞུགས་ནས། །མཆོག་ཐུན་དངོས་གྲུབ་འགྲུབ་པར་བྱིན་གྱིས་རློབས། །བགྲོད་པ་རྣམ་པ་གསུམ་གྱི་འཇུག་ངོགས་ལས། །སྨིན་པར་བྱེད་པ་དབང་གི་རིམ་པ་དག །མཚན་ལྡན་རྡོ་རྗེ་སློབ་དཔོན་དྲུང་ནོད་དེ། །ངེས་གསང་སྣོད་དུ་རུང་བར་བྱིན་གྱིས་རློབས། །རྒྱུ་རྐྱེན་དང་བྲལ་ཆུ་ལས་ཉ་འཕར་ཚུལ། །གསལ་སྟོང་ལྷ་སྐུར་ལྡང་བའི་ང་རྒྱལ་གྱིས། །(༥བ)
དྲེགས་པ་ཐུག་ཕྲད་གསོད་པ་དྲག་པོའི་སྔགས། །མངོན་སྤྱོད་འཕྲིན་ལས་འགྲུབ་པར་བྱིན་གྱིས་རློབས། །རིགས་བཟང་ཕྱག་རྒྱ་ལས་འོངས་དགའ་བ་བཞི། །རྫོགས་པའི་བདེ་སྟོང་ཡེ་ཤེས་རབ་རྒྱས་ཤིང་། །རྩ་གསུམ་འཁོར་ལོ་བཞི་ལྡན་སྐུ་བཞིའི་གར། །གདོད་མའི་མགོན་པོ་འགྲུབ་པར་བྱིན་གྱིས་རློབས། །གྲངས་མེད་ཆོས་རྣམས་མ་ལུས་སེམས་ཀྱི་ཀློང་། །ཡེ་ནས་གྲོལ་བའི་མི་འགྱུར་ཀུན་ཏུ་བཟང་། །གདོད་ནས་འཁྲུལ་མ་མྱོང་བའི་རིག་པ་འདི། །ཚེ་འདིར་མྱུར་དུ་རྟོགས་པར་བྱིན་གྱིས་རློབས། །གལ་ཏེ་ཚེ་འདིར་གྲོལ་བའི་ལམ་ཟབ་མོ། །མ་རྙེད་འདའ་བར་ཉེ་ཚེ་གནད་གཅོད་བྲལ། །འཆི་བ་འོད་གསལ་རང་བྱུང་ཡེ་ཤེས་སྒྲོན། །སྔར་འདྲིས་གྲོགས་བཞིན་ཤེས་པར་བྱིན་གྱིས་རློབས། །དབང་པོ་དམན་པས་སྲིད་པ་བར་དོ་རུ། །འཇིགས་རུང་འཁྲུལ་བའི་སྣང་བ་མང་ཤར་ཚེ། །དུས་དགྲའི་དབང་པོ་འཇམ་དཔལ་གཤིན་རྗེའི་གཤེད། །རང་བྱུང་རང་ངོ་འཕྲོད་པར་བྱིན་གྱིས་རློབས། །རྩ་གསུམ་ཐུགས་རྗེས་ལུང་བསྟན་དབུགས་དབྱུང་མཐུས། །ཞི་ཁྲོའི་ཞིང་ཁམས་རྒྱ་མཚོར་རབ་བགྲོད་ཅིང་། །ཐ་མར་ཆོས་ལྡན་སྒྲུབ་ནུས་རྟེན་གཟུང་ནས། །ལྷག་མའི་ལམ་སྦྱངས་བྱང་ཆུབ་མཆོག་ཐོབ་ཤོག །ཁྱབ་བདག་འཇམ་དཔལ་དཔའ་བོའི་སྐུར་བཞེངས་ཏེ། །ཐར་པའི་གནས་སུ་ལུས་ཅན་ཀུན་འདྲེན་ཞིང་། །གནས་སྐབས་འཕྲིན་ལས་རྣམ་བཞི་བསམས་པ་བཞིན། །འབད་མེད་ལྷུན་གྲུབ་བཀྲ་ཤིས་དཔལ་གྱིས་སྐྱོངས། །གཉིས་པ་སྐྱབས་གསོལ་སྨོན་འཇུག་སེམས་བསྐྱེད་པ། །བདག་དང་བསྲུང་བྱ་རྣམས་གཙོ་བོར་གྱུར་པའི་འགྲོ་བ་མར་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་དེང་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྗེ་
བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེས་རབ་སྙིང་རྗེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་དྲུང་དུ་གནས་བཅས་ནས། །རྫོགས་པའི་བྱང་ཆུབ་སེམས་བསྐྱེད་དོ། །ལན་གསུམ་བརྗོད། གསུམ་པ་ཚངས་པའི་གནས་བཞི་དྲན་པ་ནི། །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །ཅེས་སོགས་ལན་གསུམ་བརྗོད། བཞི་པ་ཡན་ལག་བརྒྱད་པའི་ཚོགས་གསོག་པ། །ཏྲཾ་རཏྣ་མཎྜ་ལ། པཾ་པདྨ་མཎྜ་ལ། མ་སཱུཪྻ་མཎྜ་ལ། ཨ་ཙནྡྲ་མཎྜ་ལ། རང་གི་མདུན་གྱི་ནམ་མཁའི་གནས་སུ་རིན་པོ་ཆེའི་ཁྲི་པདྨ་ཉི་ཟླ་བརྩེགས་པའི་གདན་གྱི་སྟེང་དུ་བཅོམ་ལྡན་འདས་འཇམ་དཔལ་གཤིན་རྗེའི་གཤེད་ཀྱི་ལྷ་ཚོགས་ལ་སངས་རྒྱས་བྱང་སེམས་རིགས་འཛིན་མཁའ་འགྲོ་དཔག་ཏུ་མེད་པས་བསྐོར་བ་རྣམས་ཀྱི་སྤྱི་བོར་བླ་མ་རྡོ་རྗེ་སློབ་དཔོན་བཞུགས་པ། ཨཱོཾ་བཛྲ་ས་མ་ཡ་ཛཿཞེས་རྡོ་རྗེ་བསྡུ་བའི་ཕྱག་རྒྱ་དང་བཅས་སྤྱན་དྲངས། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་སྟོན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་(༦བ)
ཡིད་ཀྱིས་རྣམ་སྤྲུལ་བའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདག་དང་མཐའ་ཡས་སེམས་ཅན་རྣམས། །དུས་གསུམ་བཞུགས་ལ་ལུས་དབུལ་ལོ། །ཚེ་རབས་བགྲངས་པའི་དགེ་བ་རྣམས། །བསྡུས་ནས་བྱང་ཆུབ་མཆོག་ཏུ་བསྔོ། །ལྔ་པ་མཚམས་གཅོད་གསུམ་ལས་བགེགས་སྐྲོད་པ། །སྐད་ཅིག་གིས་རང་ཉིད་ཟིལ་གནོན་ཕྱག་རྒྱ་ཆེན་པོ་ཞལ་གསུམ་གཡས་དཀར་གཡོན་དམར་དབུས་མཐིང་བ། ཕྱག་དྲུག་གཡས་གསུམ་འཁོར་ལོ་རལ་གྲི་རྡོ་རྗེ། གཡོན་གསུམ་བེ་ཅོན་གཏུན་ཤིང་སྡིགས་མཛུབ་ཅན་ཞབས་བཞི་བརྐྱང་བསྐུམ་དུ་བགྲད་པས་དྲེགས་པ་ཅན་ཐམས་ཅད་མནན་པ། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། གར་དགུའི་ཉམས་ཅན་མེ་རབ་ཏུ་འབར་བའི་དབུས་ན་བཞུགས་པའི་ཐུགས་ཀར་ཉི་མ་ལ་གནས་པའི་ཧཱུཾ་སྔོན་པོ་དེ་ལས་ཁྲོ་བོའི་སྤྲིན་རབ་འབྱམས་འཕྲོ་བ་དང་བཅས་པར་གྱུར། ཧཱུཾ། བདག་ཉིད་ཁྲོ་རྒྱལ་ཐུགས་ཀ་ནས། །མཐིང་ནག་ཧཱུཾ་གི་འོད་ཟེར་ལས། །སྟོང་གསུམ་ཁྲོ་བོས་རབ་གང་ཞིང་། །རྔམ་སྒྲས་འཇིག་རྟེན་ཀུན་བཀང་ནས། །གནོད་མཛེས་ཁྲོ་བོ་མ་ཡིན་ལ། །གདུག་པ་གཡོ་འགུལ་མིང་ཡང་མེད། ཁྲོ་རྒྱལ་མཚོན་ཆ་མེ་རི་འབར། །འབར་བའི་མཚམས་ལས་མ་འདའ་ཞིག །ཨཱོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱ་ན་བིདྱཱ་རཱ་ཛ་ཧཱུཾ་ཕཊ། གཉིས་པ་ཁྲོ་མཚོན་མེ་ཡི་སྲུང་འཁོར་ནི། །ཧཱུཾ། (༧ན)
དུར་ཁྲོད་མཚོན་ཆ་མེ་རི་ཁྲོ་བོ་འཁྲིག །སྟེང་འོག་ཕྱོགས་མཚམས་མེ་རི་འཁྲུག་ཅིང་འབར། །ཞེ་སྡང་འཇོམས་པའི་མེ་ནི་མཐིང་ནག་འབར། །གཏི་མུག་འཇོམས་པའི་མེ་ནི་སྨུག་ནག་འབར། །ང་རྒྱལ་འཇོམས་པའི་མེ་ནི་སེར་ནག་འབར། །འདོད་ཆགས་འཇོམས་པའི་མེ་ནི་དམར་ནག་འབར། །ཕྲག་དོག་འཇོམས་པའི་མེ་ནི་ལྗང་ནག་འབར། །དབང་དྲག་གདུག་རྩུབ་མེ་ནི་ཁམ་ནག་འབར། །བར་གཅོད་བགེགས་དང་ལོག་འདྲེན་རྡུལ་དུ་རློག །འབར་བ་མེ་ཡི་མཚམས་ལས་མ་འདའ་ཞིག །ཕཊ་རཾ་ཨེ་རཾ་ཛྭ་ལ་རཾ། ཁྲོ་བོ་དང་མཚོན་ཆ་དང་མེ་རབ་ཏུ་འབར་བའི་གུར་ཁང་དུ་གྱུར། གསུམ་པ་ལྷན་ཐབས་གཙུག་ཏོར་སྲུང་བའི་གནད། །རང་ཉིད་ཟིལ་གནོན་དུ་གསལ་བའི་སྤྱི་བོའི་གཙུག་ཏོར་འཁོར་ལོས་སྒྱུར་བའི་ངོ་བོ་ཁྲོ་ཞལ་སེར་པོ། རང་གི་ཐུགས་ཀར་བྷྲུཾ་ལས་སྲུང་བའི་འཁོར་ལོ་སེར་པོ་རྩིབས་བཅུ་ལ་མ་སཱུཪྻ་མཎྜལ་ཞེས་པས་ཉི་མའི་དཀྱིལ་འཁོར་བཅུའི་སྟེང་དུ་ཧཱུཾ་བཅུ་ཡོངས་སུ་གྱུར་པ་ལས་ཁྲོ་བོ་བཅུ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་བེ་ཅོན་དང་ཞགས་པ་བསྣམས་པ། དབུས་སུ་རང་ཉིད་གཙུག་ཏོར་འཁོར་ལོས་སྒྱུར་པའི་ངོ་བོ་ཁྲོ་ཞལ་སེར་པོ་ཞི་བའི་ཆ་བྱད་ཅན། ཕྱག་གཉིས་ན་འཁོར་ལོ་བསྣམས་པའི་ང་རྒྱལ་གྱིས་སྔགས་བཟླས་ཏེ། ཐུགས་ཀར་ཡེ་ཤེས་ཀྱི་འཁོར་ལོ་འཁོར་བས་འཁོར་ལོའི་རྩིབས་ཀྱི་བར་དུ་ནད་དང་གདོན་དང་རིམས་དང་དགྲ་བགེགས་དང་སྡིག་སྒྲིབ་ཐམས་ཅད་ཉལ་ཉལ་བཅད་པར་གྱུར། ཨཱོཾ་ཨཱ། ཨུཥྞཱི་དང་བཛྲ་ཙཀྲ་ཝརྟི། སརྦ་ལོ་ཀི་ཀ་ལོ་ཀི་ཏཱ་རཾ་པ། ཡནྟྲ་མནྟྲ་ཏནྟྲ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བྷནྡྷ་བྷནྡྷ། ཀུ་རུ་ཀུ་རུ། མུ་རུ་མུ་རུ། ཨབྷི་ཥིཉྩ་ཨ་ཨཱཿ (༧བ)
གཏད་མནན་སྦྱོར་བ་ལ་སོགས་པ་ངན་གནོད་བྱེད་པའི་བན་བོན་ཐམས་ཅད་མཱ་ར་ཡ་སོད་སོད་ཛ་ལ་བཟློག་ཕཊ་སྭཱཧཱ། དྲུག་པ་ཡུལ་དྲང་སྡིག་སྒྲིབ་བཤགས་པ་ནི། ཏྲཾ་རཏྣ་མཎྜ་ལ། པཾ་པདྨ་མཎྜ་ལ། མ་སཱུཪྻ་མཎྜ་ལ། ཨ་ཙནྡྲ་མཎྜ་ལ། རྡོ་རྗེ་བསྡུ་བའི་ཕྱག་རྒྱ་དང་བཅས་ཏེ། བཛྲ་ས་མ་ཡ་ཧཱུཾ་ཛཿས་སྤྱན་དྲངས་ཐལ་མོ་སྦྱར་ལ། ཧཱུཾ། དམིགས་མེད་མཁའ་ལྟར་དག་པ་ཁྱབ་པའི་སྐུ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །ཀུན་འདུས་ཟིལ་གནོན་ཐུགས་དང་ཅི་འགལ་བ། ཁྲོ་གཏུམ་ཐུགས་རྗེ་ཅན་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །གསོད་བྱེད་རྒྱལ་མོའི་ཐུགས་དང་ཅི་འགལ་བ། །དབྱིངས་ལྡན་ཆགས་མེད་ཡུམ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །འབྱུང་བ་ས་མེ་ལུང་ཆུ་དངས་མ་ལས། །ཡ་མ་རཱ་ཛ་ཕྱག་ན་རྡོ་རྗེ་དང་། །རུས་སྦལ་རྔམ་པ་བྱ་ཁྱུང་རྒྱལ་པོ་རྣམས། །ཡེ་ནས་རྡོ་རྗེའི་རིགས་དང་རིན་ཅེན་རིགས། །ལས་ཀྱི་རིགས་དང་པདྨའི་རིགས་ཉིད་དེ། །རིགས་བཞི་ཁྲོ་བོའི་ཐུགས་དང་ཅི་འགལ་པ། །དྲེགས་པ་འདུལ་བྱེད་སྐུ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། ཁྱུང་ཆེན་སྨུག་ནག་སྟག་ཆེན་རྔམ་པ་དང་། །སེང་ཆེན་བརྗིད་པ་དུག་སྦྲུལ་ནག་པོ་སྟེ། །རྒྱན་གྱི་ལྷ་བརྒྱད་ཐུགས་དང་ཅི་འགལ་པ། །དྲེགས་པ་སྟོབས་ཀྱི་ལྷ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །འཁོར་གྱི་གཤིན་རྗེ་ཕོ་མོའི་ཐུགས་དང་ཅི་འགལ་བ། བསྟན་སྲུང་སོ་སོའི་སྐུ་ལ་བཟོད་པར་གསོལ། །དོན་དམ་ངང་ལ་དགེ་སྡིག་གཉིས་མེད་ཀྱང་། །དེ་ལྟར་མ་རྟོགས་གཟུང་འཛིན་དབང་གིས་ན། །ཉམས་ཆགས་འགལ་འཁྲུལ་གྱུར་པ་ཅི་མཆིས་པ། །གནོང་འགྱོད་མོས་པའི་སེམས་ཀྱིས་མཐོལ་ལོ་བཤགས། །རྩ་བ་(༨ན)
དང་ཡན་ལག་གི་དམ་ཚིག་ལ་ཆག་ཉམས་དང་ཞིག་དྲལ་དུ་གྱུར་པ་ཅི་མཆིས་པ་ཐམས་ཅད་མཐོལ་ལོ་བཤགས་སོ། །ཨཱོཾ་མཉྫུ་ཤྲཱི་ས་མ་ཡ་ཞེས་སོགས་ཡིག་བརྒྱ་ལན་གསུམ་བརྗོད། ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། བདུན་པ་མི་འདའི་དམ་བཅའ་ཡོངས་བཟུང་བ། །བདག་ནི་དེང་ནས་བྱང་ཆུབ་སེམས་བསྐྱེད་དེ། །བསྙེན་སྒྲུབ་ཏིང་འཛིན་སྔགས་དང་ཕྱག་རྒྱ་ཡིས། །གསང་སྔགས་ཟབ་མོའི་སྤྱོད་པ་མཐར་དབྱུང་ཞིང་། །བླ་མེད་སྙིང་པོ་བསྒྲུབ་པར་དམ་བཅའོ། །བརྒྱད་པ་སྣོད་བཅུད་རྫས་ལ་བྱིན་དབབ་པ། །སྤོས་རོལ་གཡབ་དར་དང་བཅས་ཏེ། ཧཱུཾ། བདེར་གཤེགས་རྒྱལ་བ་ཀུན་གྱི་བདག་ཉིད་ཆེ། །དྲག་པོ་ལས་ཀྱི་ལྷ་ཚོགས་དགོངས་སུ་གསོལ། །ཆོས་དབྱིངས་དྲག་པོ་ཨེ་ཡི་གཞལ་ཡས་ནས། །བཅོམ་ལྡན་ཕྱག་རྒྱ་ཟིལ་གནོན་ཡུམ་དང་བཅས། །རྩ་བའི་ལྷ་དྲུག་རྒྱན་ལྷ་བདག་པོ་གསུམ། །གཤེད་བཞི་མོན་བདུད་འཆི་བདག་སྒོ་སྲུང་བཅས། །དྲག་པོའི་ལས་མཛད་ཕོ་ཉ་དམ་ཅན་སོགས། །དཀྱིལ་འཁོར་ལྷ་ཚོགས་རྣམས་ཀྱིས་བྱིན་ཕོབ་ཅིག །བདག་ཅག་སེམས་ཅན་ལས་ཀྱིས་མནར་བ་ལ། །རེ་ཞིག་དཔུང་གཉེན་གཞན་ན་མ་མཆིས་པས། །ཐུགས་རྗེ་ཆེན་པོས་འགྲོ་ལ་བརྩེར་དགོངས་ནས། །བྱིན་ཆེན་མྱུར་དུ་དབབ་པའི་དུས་ལ་བབ། །འཇམ་དཔལ་ཁྲོས་པའི་རྒྱལ་པོ་འཁོར་དང་བཅས། །སྔགས་ཚིག་བཤུག་པ་བརྡ་ཡིས་སྤྱན་འདྲེན་ན། །མི་དམིགས་ཆོས་ཀྱི་དབྱིངས་ནས་སྐུར་བཞེངས་ལ། །དྲག་པོའི་དཀྱིལ་འཁོར་འདི་ལ་བྱིན་ཕོབ་ཅིག །སྒྲུབ་(༨བ)
མཆོག་རྣལ་འབྱོར་བདག་ལ་དབང་བསྐུར་ཅིག །སྒྲུབ་རྫས་དམ་པ་འདི་ལ་མཐུ་སྩོལ་ཅིག །དྲག་པོའི་འཕྲིན་ལས་མཛད་པའི་དུས་ལ་བབ། །བདག་ཅག་རེ་བའི་འབྲས་བུ་མཆིས་པར་མཛོད། །ཧཱུཾ། རྟོག་མེད་སྤྲོས་བྲལ་ཆོས་ཀྱི་དབྱིངས་ཉིད་ལས། །སྟོང་པའི་ཆོས་ཉིད་ཡེ་ཤེས་རང་སྣང་བའི། །འཇམ་དཔལ་ཁྲོ་བོ་ཟིལ་གནོན་འཁོར་བཅས་ཀྱིས། །དབང་དང་བྱིན་རླབས་མཐུ་དང་དངོས་གྲུབ་སྩོལ། །རོལ་མོ་ཚར་རྗེས། ཧཱུཾ་ཧཱུཾ་ཧཱུཾ། ཞེས་རིང་པོར་བརྗོད། དགུ་པ་ཕྱི་ནང་མཆོད་ཚོགས་བརླབ་པ་ནི། །བདག་གི་ཐུགས་ཀའི་ཧཱུཾ་ལས་འོད་འཕྲོས་ཕུད་སྣོད་ལ་ཐིམ་པས་སྣོད་ཀྱི་མ་དག་པ་སྦྱངས། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བཅུད་ཤ་ལྔ་བདུད་རྩི་ལྔར་གནས་པའི་སྟེང་དུ་ཧཱུཾ་དཀར་པོ་དེའི་འོད་ཟེར་གྱིས་ཕྱི་འབྱུང་བའི་བཅུད་བསྡུས། ཡེ་ཤེས་ལྔའི་རང་བཞིན་གྱི་བདུད་རྩི་བཀུག་བདུད་རྩི་ལ་ཐིམ་པས་དངོས་འཛིན་སྦྱངས་ནས་ཡེ་ཤེས་ཀྱི་བདུད་རྩི་མུ་ཏིག་དཀར་པོ་དྲི་མ་མེད་པ་ལྟ་བུར་གྱུར། ཨཱོཾ་ཨཱཿཧཱུཾ་མཧཱ་སརྦ་པཉྩ་ཨ་མྲྀ་ཏ་ཧཱུཾ་ཧྲི་ཐཱ། ལན་གསུམ་བརྗོད། བདག་གི་ཐུགས་ཀའི་ཧཱུཾ་ལས་འོད་འཕྲོས་གཏོར་མ་ལ་ཕོག་པས་སྣོད་བྷྲཱུཾ་ལས་དུར་ཁྲོད་ཀྱི་གཞལ་ཡས་ཁང་གི་ནང་དུ་བཅུད་དཔལ་ཆེན་པོ་ཟིལ་གནོན་རྩ་བའི་ལྷ་དྲུག །རྒྱན་གྱི་ལྷ་བརྒྱད། སྤྲུལ་པ་གསུམ། གཤེད་བཞི། མོན་བདུད་བརྒྱད། འཆི་བདག་བཅུ་གཉིས་སྒོ་སྲུང་དང་བཅས་པ་ལ་འདོད་ཡོན་གྱི་ལྷ་མོས་བསྐོར་པར་གྱུར། ཨཱོཾ་ཨཱཿཧཱུཾ་མཧཱ་བྷ་ལིནྟ་ཏེ་ཛོ་བྷ་ལིནྟ་བྷ་ཡ་བྷ་ཏེ་གུ་ཧྱ་ས་མ་ཡེ་སྭཱཧཱ། ལན་གསུམ་བརྗོད། བདག་གི་ཐུགས་ཀ་ནས་རཾ་ཡཾ་ཁཾ་གིས་གཏོར་མའི་དངོས་འཛིན་སྦྱངས་ཏེ། སྣོད་ཨ་ལས་བྷནྡྷའི་ནང་དུ་བཅུད་ཨཱོཾ་ཨཱཿཧཱུཾ་ཞུ་བ་(༩ན)
ལས་བྱུང་བའི་འདོད་ཡོན་དྲུག་གི་ལྷ་མོར་གྱུར། ཨཱོཾ་བྷ་ལིནྟ་ཏེ་ཛོ་བྷ་ལིནྟ་བྷ་ལ་བྷ་ཏེ་གུ་ཧྱ་ས་མ་ཡེ་སྭཱཧཱ། ལན་གསུམ་བརྗོད། བདག་གི་ཐུགས་ཀའི་ཧཱུཾ་གི་འོད་ཀྱིས་རཀྟའི་དངོས་འཛིན་སྦྱངས། བྷནྡྷ་ཀ་པཱ་ལ་བྷྲུཾ་སྣོད་བྷནྡྷ་ཡངས་ཤིང་རྒྱ་ཆེ་བའི་ནང་དུ་བཅུད་པདྨ་དམར་པོ་འདབ་མ་བརྒྱད་པའི་ལྟེ་བ་ལ་ར་དམར་པོ་དེ་ལས་རཀྟའི་རྒྱ་མཚོ་ཆེན་པོ་རྦ་ཀློང་འཁྲུག་ཅིང་འཕྱོ་བའི་སྟེང་དུ་ཡི་གེ་ར་དམར་པོ་འོད་ཟེར་འཕྲོ་བར་གྱུར། དེ་ལས་འོད་ཟེར་གྱི་འཕྲོ་འདུས་རཀྟའི་ངོ་བོ་བདུད་རྩི་རོ་མཆོག་བརྒྱ་དང་ལྡན་པ་ཟེགས་མ་ལ་འདོད་ཡོན་གྱི་ལྷ་མོ་དཔག་ཏུ་མེད་པ་འཕྲོ་བར་གྱུར། ཨཱོཾ་ཨཱཿཧཱུཾ་མཧཱ་རཀྟ་ཛྭ་ལ་མཎྜ་ལ་ཧཱུཾ། ལན་གསུམ་བརྗོད། ཨ་ཀ་པཱ་ལ། ཨ་བཱ་དྷཱུ་པུ་ཨཱ་གྷ་ནཻ་ཤ་སྥ་ར་ཎ་ཕཊ། སཾ་ཧ་ར་ཎ་ཧཱུཾ། ཨཱོཾ་ཨ་ཧ་ར་ཨ་ཧ་ར། བཛྲ་དྷཱུ་པེ། པུཥྤེ། ཨཱ་ལོ་ཀེ །གྷནྡྷེ། ནཻ་ཝི་དྱ། ཤབྡ་ཨཱཿཧཱུཾ། གཉིས་པ་དངོས་གཞིར་དམ་ཚིག་ཡེ་ཤེས་མཆོད། །བཟླས་པ་བསྟོད་བསྐུལ་ལྔ་ལས་དང་པོ་ལ། །སྟོང་ཉིད་རྟེན་དང་བརྟེན་པ་རྣམ་གསུམ་གྱི། །དང་པོ་སྤྲོས་བྲལ་ཀ་དག་བསྒོམ་པ་ནི། །ཨྱེ་ཨྱེ་ཨྱེ། ཨེ་ཉིད་སྟོང་པ་ཆོས་འབྱུང་སྟེ། །མ་སྐྱེས་འགག་པ་མེད་པ་ལས། །རང་བཞིན་གནས་པ་དྲན་པར་བྱ། །གཉིས་པ་གཞལ་ཡས་ལ་ནི་དངོས་གདན་གཉིས། །དང་པོ་རྟེན་ལ་དྲག་པོའི་གཞལ་ཡས་ནི། །ཨེ་ཡི་ཕོ་བྲང་ཟླ་གམ་གསུམ། །ཐོད་པའི་མཁར་བཞི་འཁོར་ལོ་བརྒྱད། །ལྕགས་མཁར་བཅུ་གཉིས་བར་ཁྱམས་བཞི། །སྒོ་བཞི་རྟ་བབས་བརྒྱད་དང་ལྡན། །འོབས་ཆེན་བཅུ་དྲུག་རྡོ་རྗེའི་གུར། །བྱས་པ་མེད་པར་ལྷུན་གྱིས་གྲུབ། །བཤིག་པ་མེད་པར་ངང་གིས་སྟོངས། །ཕྱི་དང་ནང་མེད་ཀུན་ཏུ་ནང་། །གཉིས་(༩བ)
པ་གཙོ་དང་འཁོར་གྱི་གདན་བསྐྱེད་པ། །ཀླུ་འབུམ་གཉན་ཁྲི་ས་བདག་སྟོང་། །ཕྱོགས་སྐྱོང་རུ་དྲ་བ་ཧ་བརྒྱད། །ཉི་ཟླ་པདྨ་བརྩེགས་པའི་གདན། །ལྷུན་གྱིས་གྲུབ་པའི་དཀྱིལ་འཁོར་དུ། །གསུམ་པ་བརྟེན་པར་སྐད་ཅིག་གཙོ་བོ་དང་། །འཁོར་ཚོགས་གསུམ་ལས་དང་པོ་སྐད་ཅིག་བསྐྱེད། །རྒྱུ་དང་རྐྱེན་ལས་མ་བསྐྱེད་པར། །རིག་པ་ཆུ་ལས་ཉ་འཕར་ཚུལ། །གཉིས་པར་རྩ་རྒྱན་གོ་གསུམ་དང་པོ་ནི། །དྲུག་པ་རྡོ་རྗེ་འཆང་ཆེན་པོ། །རྒྱལ་བ་ཀུན་གྱི་སྤྱི་གཟུགས་ཅན། །མཐིང་ནག་ཟིལ་གནོན་དྲེགས་པ་འདུལ། །དབུ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་ཞལ། །འཁོར་ལོ་རལ་གྲི་རྡོ་རྗེ་གཡས། །བེ་ཅོན་གཏུན་ཤིང་སྡིག་མཛུབ་གཡོན། །རིགས་ལྔའི་ཁྲོ་བོས་དབུ་ལ་བརྒྱན། །དཔལ་གྱི་ཆས་བརྒྱད་དུར་ཁྲོད་བརྒྱན། །ཡུམ་ནི་གཉིས་མེད་ཆོས་ཀྱི་དབྱིངས། །མཐིང་ནག་ཙིཏྟ་བྷན་དམར་སྟེག །ཡེ་ཤེས་བཞི་ཡི་སྤྲུལ་པ་ལས། །ཐུགས་ཀར་ཡ་མ་རཱ་ཛ་ནི། །སྨུག་ནག་འཁོར་ལོ་ཙིཏྟ་འཛིན། ཡ་མའི་ཐུགས་ཀར་དྲེགས་པའི་བདག །ལྗང་ནག་རྡོ་རྗེ་སྙིང་འཕྲེང་འཛིན། །དྲེགས་པའི་ཐུགས་ཀར་ཁྱམས་ཁང་སྟེ། །འཇིགས་བྱེད་ཆེན་པོ་ཐུར་དུ་བལྟ། །ལྟོ་ན་སྲིད་གསུམ་ཚེ་སྲོག་འཆང་། །སྤྱི་གཙུག་མཁའ་ལྡིང་གདུག་པ་འདུལ། །དཀར་པོ་ཟིལ་གནོན་རོ་ཉ་ཟ། །གཉིས་པ་སྤྲུལ་པ་གྱད་གནོན་རྒྱན་ལྷ་བརྒྱད། །ཕྲག་གོང་སྨུག་ནག་འཇིགས་པའི་ཁྱུང་། །སོག་ཁར་སྟག་མོ་རོ་ལ་རྔམ། །ནུ་ཁར་སེང་གེ་རལ་པ་སྤྲུག །སྟ་ཟུར་དུག་སྤྲུལ་ཁ་རླངས་འབྱིན། །རི་རབ་ལྟ་བུར་བརྗིད་པ་ཡི། །གསུམ་པ་ཁྲོ་བོ་བཅུ་སོགས་སྲ་བཙན་གོ །སྐུ་ལ་ཁྲོ་བཅུ་རྫོགས་པར་བསྒོམ། །ཨེ། (༡༠ན)
སྟེང་དང་ཕྱོགས་བཞིའི་ཁྲོ་བོ་ནི། །སྤྱི་གཙུག་མགྲིན་པ་ལྟག་པ་དང་། །དཔུང་པ་གཡས་དང་གཡོན་ལ་བསྒོམ། །ཧཱུཾ་མཛད་རྟ་མགྲིན་རྣམ་རྒྱལ་གཤིན་རྗེའི་གཤེད། །བདུད་རྩི་འཁྱིལ་རྣམས་མཐིང་ནག་ཞལ་ནང་གཟིགས། །འཁོར་ལོ་སྡིགས་པའི་མཛུབ་ཅན་བསྲུང་བའི་ཚུལ། །མཚམས་བཞི་འོག་གི་ཁྲོ་བོ་ནི། །བརླ་གཡས་གཡོན་དང་ལྟེ་བ་དང་། །དཔྱི་མཚམས་གསང་བའི་གནས་སུ་བསྒོམ། །དབྱུག་སྔོན་གཞན་གྱིས་མི་ཐུབ་མི་གཡོ་མགོན། ཁམས་གསུམ་རྣམ་རྒྱལ་སྟོབས་ཆེན་རྣམས་ལྗང་ནག །འཁོར་ལོ་སྡིགས་མཛུབ་ཕྱིར་གཟིགས་བྱས་པ་བཤིག །མགུར་ནས་ཞབས་ཀྱི་བར་དག་ལ། ཁྲོ་ཆུང་མཚོན་ཆ་ཐོགས་པས་གཏམས། །བ་སྤུ་རྡོ་རྗེའི་ཚ་ཚ་འཕྲོ། །བུ་ག་དགུ་ནས་རྡོ་རྗེ་ཡི། །ཐོག་དང་མེ་ཡི་འཚུབ་མ་འཕྲོ། །སྤྲུལ་པའི་ཁྲོ་ཚོགས་དཔག་མེད་འགྱེད། །ཞི་ཁྲོ་མ་གཤིན་ཕུར་པ་དང་། །ས་བདག་འགོང་པོ་པེ་ཧར་དང་། །དམ་སྲི་སྐྱེ་འགྲོ་ཐམས་ཅད་ཀུན། །ཀླུ་དང་ཀླུ་བདུད་མཛེ་ཡི་ནད། །ཟིལ་གྱིས་གནོན་ཅིང་སྟོབས་རྣམས་འཕྲོག །གསུམ་པ་འཁོར་ལ་སྤྲུལ་གཤེད་མོན་བདུད་འཆི། ཁྱམས་སྒོ་འོབས་སྲུང་བདུན་ལས་དང་པོ་ནི། །ཟླ་གམ་གསུམ་ལ་སྤྲུལ་པ་གསུམ། །སྐུ་སྤྲུལ་འཆི་བདག་བྱེ་བ་དང་། །གསུང་སྤྲུལ་སྲོག་བདག་དམར་པོ་དང་། །ཐུགས་སྤྲུལ་ཚེ་བདག་དབུ་དགུ་པ། །ཤར་ལྷོར་གསུང་སྤྲུལ་སྲོག་བདག་སྐུ་མདོག་དམར། །ཞལ་གཅིག་ཕྱག་བཞི་བེ་ཅོན་རྒྱུ་ཞགས་གཡས། །གཡོན་པ་གཉིས་ན་ལྕགས་ཀྱུ་བསེ་མདུང་འཛིན། །རུས་སྦལ་གཡང་གཞི་དུར་ཁྲོད་ཆས་ཀྱིས་བརྒྱན། །སྲིན་མོ་རོ་ལངས་སྤུ་གྲི་ཐོད་འཛིན་འཁྱུད། །བསེ་ཡི་གྱི་ལིང་དམར་པོ་(༡༠བ)
སྲབ་མེད་ཆིབས། །ལྷོ་ནུབ་སྐུ་སྤྲུལ་བྱེ་བ་དགུ་རིང་ནི། །འཆི་བདག་ཞལ་གསུམ་ཕྱག་དྲུག་ཞབས་བཞི་པ། །གཡས་སེར་གཡོན་དམར་དབུས་དང་སྐུ་ཡི་མདོག །སྔོ་ནག་ཐོད་དབྱུག་དགྲ་སྟ་རལ་གྲི་གཡས། །ཐོད་པ་མདུང་ཐུང་ལྕགས་ཀྱི་རི་རབ་བམ། །མེ་དཔུང་གཡོན་འཛིན་ལྕགས་ཁྲབ་དུར་ཁྲོད་ཆས། །རིན་ཅེན་སྤྲུལ་སོགས་སྐུ་དང་ལྷུ་ཚིགས་བརྒྱན། །སྲིན་མོ་གསོད་བྱེད་ཏྲི་ཤུལ་ཐོད་འཛིན་འཁྱུད། །མ་ཧེ་སྔོ་ནག་སྦྲུལ་རིས་ཅན་ལ་ཆིབས། །བྱང་དུ་ཐུགས་སྤྲུལ་ཚེ་བདག་སྐུ་མདོག་མཐིང་། །དབུ་དགུ་ཕྱག་ནི་བཅོ་བརྒྱད་ཞབས་བརྒྱད་བགྲད། །དང་པོ་རྨ་བྱ་ཀརྨ་ཁྱུང་གི་མགོ །བར་པ་དཀར་དམར་དབུས་མཐིང་ཁྲོ་བོའི་ཞལ། །རྩ་ཞལ་གཡས་སྟག་གཡོན་སེང་དབུས་མ་ཧེ། །ཕྱག་མཚན་གཡས་དགུ་རིམ་བཞིན་འཁོར་ལོ་དང་། །རལ་གྲི་རྡོ་རྗེ་ཁ་ཊྭཱཾ་མདུང་མདའ་ཆེན། །ཞིང་དབྱུག་སྣ་ཚོགས་རྡོ་རྗེ་ལྕགས་ཕུར་བསྣམས། །གཡོན་པ་བེ་ཅོན་གཏུན་ཤིང་རྒྱུ་ཞགས་སྦྲུལ། །སྡིགས་མཛུབ་ཏྲི་ཤུལ་དགྲ་སྟ་གཞུ་ཙིཏྟ། །ཞིང་སྟག་པགས་རློན་ཐོད་སྦྲུལ་ལ་སོགས་བརྒྱན། །བདུད་མོ་གསོད་བྱེད་ཙིཏྟ་སྙན་དམར་ཐོགས། །མི་ལྤགས་གོས་གསོལ་ཡབ་འཁྱུད་མ་ཧེ་ཆིབས། །གཉིས་པ་གཤེད་བཞི་ཡབ་ཡུམ་བསྐྱེད་པ་ནི། །ཕྱི་རིམ་ཐོད་པའི་མཁར་བཞི་ལ། །གཤེད་པོ་ཡ་མ་རཱ་ཛ་དང་། །སྲིན་པོ་མྱོས་བྱེད་འབར་བ་དང་། །ཀླུ་བདུད་ཨཱཪྻ་དམར་པོ་དང་། །གནོད་སྦྱིན་རལ་པ་ཚར་དགུའོ། །སྨུག་ནག་རལ་གྲི་ཞགས་འཛིན་དྲེད་མོ་ཞོན། སེར་ནག་གྲི་དང་དགྲ་སྟ་འཛིན་དོམ་ཞོན། །དམར་ནག་ལྕགས་ཀྱུ་ཞགས་འཛིན་དྲེལ་རྟ་ཞོན། །ལྗང་ནག་དབྱུག་ཏོ་ཞགས་འཛིན་རྔ་མོ་ཞོན། །བཞི་གའང་སྦྲུལ་དང་ཐོད་པའི་(༡༡ན)
རྒྱན་གྱིས་བརྒྱན། །སྲིན་མོ་ནག་མོ་ཨེ་ཀ་ཛ་ཏི་དང་། །བདུད་མོ་ནག་མོ་གནོད་སྦྱིན་ནག་མོ་རྣམས། །རིམ་བཞིན་ཡབ་ལ་འཁྱུད་ཅིང་ཐོད་ཁྲག་སྟོབ། །གསུམ་པ་མོན་བདུད་རང་རང་ཡུམ་བཅས་ནི། །དེ་ཡི་ཕྱི་རིམ་རྩིབས་བརྒྱད་ལ། །ཕྱོགས་བཞི་ལ་ནི་མོན་པ་བཞི། །མཚམས་བཞི་ལ་ནི་བདུད་བཞི་སྟེ། །དེ་དག་ཡུམ་དང་བཅས་པའོ། །དུང་གི་མོན་པ་དྲེགས་ཆེན་སེང་གེའི་མགོ །མོན་མོ་བླ་རྐུན་རྔམ་པའི་གདོང་ཅན་འཁྱུད། །ལྕགས་ཀྱི་མོན་པ་གསོད་བྱེད་སྟག་གི་མགོ །མོན་མོ་ནག་མོ་གཡུ་ཡི་རལ་ཅན་འཁྱུད། །བསེ་ཡི་མོན་པ་གཏུམ་ཆེན་དྲེད་ཀྱི་མགོ །མོན་མོ་ཆེ་འཕྲོག་ཁྲག་གི་རལ་ཅན་འཁྱུད། །གསེར་གྱི་མོན་པ་སྲོག་གཤེད་ཁྱུང་གི་མགོ །མོན་མོ་བླ་རྐུན་སྙིང་ལ་གཟེར་འདེབས་འཁྱུད། །ཡབ་བཞི་གཡས་གཡོན་འཁོར་ལོ་ཞགས་པ་བསྣམས། །ཡུམ་བཞི་ཙིཏྟ་ཐོད་ཁྲག་འཛིན་འཁྱུད་སྟོབ། །ཧེ་ཡེ་ཁྱབ་པ་སྔོ་ནག་འཁོར་ལོ་ཅན། །བདུད་མོ་མི་ཟན་སྙིང་རྐུན་མ་ཡིས་འཁྱུད། །ནག་པོ་འཛུམ་མེད་སེར་ནག་རལ་གྲི་འཛིན། །བདུད་མོ་མེ་ཐོགས་སྙིང་འབྱིན་མ་ཡིས་འཁྱུད། །སོ་འདར་འཁྲིག་པ་དམར་ནག་པར་བུ་ཅན། །བདུད་མོ་ཁྲག་སྐྱུག་སྙིང་གཟེར་འདེབས་མས་འཁྱུད། །རལ་པ་སྤྱིར་བཅིངས་ལྗང་ནག་ཁྲམ་ཤིང་ཅན། །ནག་མོ་མྱོས་བྱེད་དབུགས་སྡུད་མ་ཡིས་འཁྱུད། །བདུད་པོ་བཞི་ཡི་གཡོན་ཀུན་ཁྲམ་ཤིང་བསྣམས། །ཡུམ་བཞི་ཙིཏྟ་ཐོད་ཁྲག་འཛིན་འཁྱུད་སྟོབ། །མོན་བདུད་ཡབ་ཡུམ་ཀུན་ཀྱང་ཤིན་ཏུ་རྔམ། །མེ་ལྕེ་གློག་དང་སྐར་མདས་བརྒྱན་པའོ། །བཞི་པ་ལས་ཀྱི་འཆི་བདག་བཅུ་གཉིས་ནི། །ཕྱི་རིམ་ལྕགས་མཁར་བཅུ་གཉིས་ལ། །ལས་ཀྱི་འཆི་བདག་བཅུ་གཉིས་གནས། །བྷེ་བ་སྭ་ཏྭ་མཐིང་ནག་བེ་ཅོན་རྡེག །(༡༡བ)
ནོར་བུ་དགེ་འཕེལ་སེར་ནག་འཁོར་ལོ་བསྐོར། །སེར་ནག་འཇོམས་བྱེད་ཁྲོས་པ་ལྕགས་ཀྱུ་འཛིན། །བྱེ་བ་དགུ་ཁྲི་ལྗང་ནག་དབྱུག་ཏོ་བསྣམས། །རཀྟ་གློག་འཕྲེང་དམར་ནག་རྒྱུ་ཞགས་འཕེན། །ཡཀྴ་ཟ་བྱེད་སྔོ་ནག་སྤུ་གྲི་ཐོགས། །གཏུམ་པོ་དུད་ཁ་བདུད་ཀྱི་ཁྲམ་ནག་འཕྱར། །གང་བ་ཀུན་འཇོམས་དཀར་པོ་མདའ་གཞུ་འགེང་། ཁ་འབར་རལ་གཅིག་དམར་ནག་རལ་གྲི་འཕྱར། །སྦྲུལ་མགོ་ཀུན་འཛིངས་སྔོ་སྐྱ་ལྕགས་མདུང་འཕེན། །དད་པ་སྟོབས་ལྡན་སེར་པོ་དགྲ་སྟས་གཏུབ། །ཧོང་པན་སྲོག་འཛིན་ནག་པོ་བདུད་ཞགས་རྡེག །ཀུན་ཀྱང་ཤིན་ཏུ་ཁྲོས་པའི་ཆ་ལུགས་ཅན། །འཇིགས་པའི་ཚུལ་ལ་དུར་ཁྲོད་ཆས་ཀྱིས་བརྒྱན། །ལྔ་པ་བར་ཁྱམས་ལ་གནས་སྤྲུལ་པའི་ཚོགས། །དེ་ཡི་ཕྱི་རིམ་བར་ཁྱམས་ལ། །ཕོ་གཤེད་མོ་གཤེད་ལ་སོགས་པའི། །ཤ་ཟ་ཀིང་ཀང་མ་མོའི་ཚོགས། །དྲུག་པ་ཕྱོགས་རྣམས་བསྲུང་བའི་སྒོ་བ་བཞི། །སྒོ་བཞི་རུ་ནི་རྒྱལ་པོ་དང་། །མགོན་པོ་བདུད་དང་གནོད་སྦྱིན་བཞི། །དཀར་པོ་སྙིང་འབྱིན་རུ་མཚོན་འཁོར་ལོ་འཛིན། །མགོན་པོ་ནག་པོ་གཡས་གཡོན་བེང་ཐོད་ཁྲག །ཡབ་རྔ་ནག་པོ་ལྕམ་ཤིང་བདུད་ཞགས་བསྣམས། །སྐུ་མཆོག་དམར་པོ་གཡས་གཡོན་དབྱུག་ཏོ་མདུང་། །རང་འདྲའི་མདོག་མཚུངས་བེར་ཆེན་སྐུ་ལ་གསོལ། །བདུན་པ་ཕྱི་རོལ་འོབས་ཆེན་སྲུང་བྱེད་རྣམས། །ཕྱི་རོལ་འོབས་ཆེན་བཅུ་དྲུག་ལ། །འོབས་སྲུང་ཆེན་པོ་བཅུ་དྲུག་གནས། །དེ་ལྟར་དེ་དག་ཐམས་ཅད་ཀུན། །སེམས་ཉིད་སྟོང་པའི་ཆོ་འཕྲུལ་ཏེ། །ཆོས་ཉིད་སྟོང་ལས་ཤར་བས་ན། །བར་སྣང་ཁམས་ཀྱི་འཇའ་ཚོན་ནམ། །མེ་ལོང་ནང་གི་གཟུགས་བརྙན་བཞིན། །སྣང་ལ་རང་བཞིན་(༡༢ན)
མེད་པར་བལྟ། །རྩ་བའི་གཉིས་པ་ཡེ་ཤེས་དཀྱིལ་འཁོར་ལ། །སྙན་གསན་སྤྱན་དྲངས་བཞུགས་གསུམ་དང་པོ་ནི། །ཨེ། མི་རྟོག་ངང་ལས་ཐུགས་རྗེའི་སྐུ། །སངས་རྒྱས་སྐུ་ལྔའི་བདག་ཉིད་ཅན། ཁྱབ་བདག་ཡེ་ཤེས་ལྔ་ཡི་བདག །ཟིལ་གནོན་ལྷ་ཚོགས་དབྱིངས་ནས་བཞེངས། །བཛྲ་ས་མ་ཡ་ཛཿ ཞེས་རྡོ་རྗེ་བསྡུ་བའི་ཕྱག་རྒྱ་བྱ། གཉིས་པ་རང་བཞིན་ནས་དྲངས་དབྱེར་མེད་བསྟིམ། །སྤོས་རོལ་གཡབ་དར་དང་བཅས། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཁྲོ་རྒྱལ་གཤིན་རྗེའི་གཤེད། །གདུག་པའི་དགྲ་བགེགས་བསྒྲལ་བའི་ཕྱིར། །ཐུགས་དམ་དབང་གིས་གཤེགས་སུ་གསོལ། །ཟིལ་གནོན་སྐུ་ཡི་གཡོན་ཕྱོགས་ནས། །ཡུམ་ཆེན་གསོད་བྱེད་རྒྱལ་མོ་ཡང་། །མ་མོ་ཡོངས་ཀྱི་གཙོ་མོ་སྟེ། །ཐུགས་དམ་དབང་གིས་གཤེགས་སུ་གསོལ། །ཟིལ་གནོན་ཐུགས་ཀྱི་དཀྱིལ་འཁོར་ནས། །ཡ་མ་རཱ་ཛ་གཤེགས་སུ་གསོལ། །ཡ་མའི་ཐུགསཀྱི་དཀྱིལ་འཁོར་ནས། །དྲེགས་པ་ཕྱག་རྡོར་གཤེགས་སུ་གསོལ། །དྲེགས་པའི་ཐུགསཀྱི་དཀྱིལ་འཁོར་ནས། །རུས་སྦལ་ཁྲོས་པ་གཤེགས་སུ་གསོལ། །ཟིལ་གནོན་དབུ་ཡི་གཙུག་རུམ་ནས། །བྱ་ཁྱུང་རྒྱལ་པོ་གཤེགས་སུ་གསོལ། ཁམས་གསུམ་ཟིལ་གྱིས་གནོན་མཛད་པའི། ཁྱུང་ཆེན་སྨུག་ནག་གཤེགས་སུ་གསོལ། །ཉམས་པའི་ཤ་ཁྲག་གསོལ་མཛད་པའི། །སྟག་ཆེན་རྔམ་པ་གཤེགས་སུ་གསོལ། །གདུག་པ་ཟིལ་གྱིས་གནོན་མཛད་པའི། །སེང་ཆེན་བརྗིད་པ་གཤེགས་སུ་གསོལ། །མཛེ་ཤུ་རྐང་ནད་འཇོམས་མཛད་པའི། །དུག་སྦྲུལ་ནག་པོ་གཤེགས་སུ་གསོལ། །ཟླ་གམ་དབང་གི་གཞལ་ཡས་ནས། །སྤྲུལ་པ་རྣམ་གསུམ་གཤེགས་སུ་གསོལ། །ཕོ་བྲང་ཕྱོགས་བཞིའི་ཐོད་མཁར་ནས། །གཤེད་པོ་བཞི་རྣམས་གཤེགས་སུ་གསོལ། །འཁོར་ལོ་འབར་བའི་རྩིབས་སྟེང་ནས། །མོན་པ་བཞི་དང་བདུད་པོ་བཞི། །ཡུམ་གྱི་ཚོགས་བཅས་གཤེགས་སུ་གསོལ། །ལྕགས་(༡༢བ)
མཁར་འགར་བ་བཅུ་གཉིས་ནས། །འཆི་བདག་བཅུ་གཉིས་གཤེགས་སུ་གསོལ། །ཕོ་བྲང་ཕྱོགས་བཞིའི་སྒོ་བཞི་ནས། །སྒོ་བ་བཞི་རྣམས་གཤེགས་སུ་གསོལ། །སྒྲོལ་ཞིང་ལས་གཤིན་ཕོ་ཉའི་ཚོགས། །བྱེ་བ་ས་ཡ་གཤེགས་སུ་གསོལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཨེ་ཧྱེ་ཧི་ཛཿཧཱུཾ་བཾ་ཧོ༔གསུམ་པ་རང་རང་སྟན་ལ་བཞུགས་པར་གསོལ། །ཨེ། འཁོར་ལོ་འབར་བའི་ལྟེ་བ་ལ། །དུག་གསུམ་ཡི་དྭགས་མ་ཧེ་དང་། །ཕྱོགས་སྐྱོང་པདྨ་ཉི་ཟླའི་གདན། །ལྷུན་གྱིས་གྲུབ་པའི་དཀྱིལ་འཁོར་དུ། །བརྐྱང་བསྐུམ་ཚུལ་གྱིས་བརྗིད་པར་བཞུགས། །སྤྲུལ་པ་གསུམ་སོགས་འཁོར་གྱི་ཚོགས། །གྲངས་མེད་རྣམས་ཀྱང་དཀྱིལ་འཁོར་འདིར། །དངོས་གྲུབ་བསྒྲུབ་དང་འགྲོ་དོན་ཕྱིར། །མི་འགྱུར་བརྟན་པར་བཞུགས་སུ་གསོལ། །ཨེ་ཀ་ཧེ་དུན་ཡ་མ་སྙིང་ཁག་ར་མ་ཙ་ཡ་ཏིཥྛ་བཛྲ། ཞེས་པད་ཀོར་སྔོན་དུ་འགྲོ་བའི་མཁྲིག་མ་གཉིས་བསྣོལ་ཏེ་སེ་གོལ་གདབ། རྩ་བའི་གསུམ་པ་མཆོད་པའི་ལས་རིམ་ལ། ཕྱག་ཕྱི་ནང་མཆོད་གསུམ་ལས་དང་པོ་ནི། ཐལ་མོ་སྦྱར་ཏེ། ཨེ། ཆོས་ཉིད་སྐྱེ་བ་མེད་པ་ལས། །སྤྲོས་བྲལ་བདེ་ཆེན་དག་པའི་སྐུ། །རང་བཞིན་གཉིས་མེད་དག་པའི་གསུང་། །མ་བསྒྲིབས་དོན་དམ་རྫོགས་པའི་ཐུགས། །སྐུ་གསུང་ཐུགས་ཉིད་རྣམ་དག་གིས། །མཐའ་ཡས་འགྲོ་བའི་དོན་མཛད་པའི། ཁྲོ་རྒྱལ་འདུས་པ་ཀུན་གྱི་གཙོ། །ཕྱག་རྒྱ་ཟིལ་གནོན་ལ་ཕྱག་འཚལ། །དབྱིངས་ལས་ཡེ་ཤེས་རིག་པ་ཤར། །རང་བཞིན་ལྷུན་གྲུབ་ཕྱག་རྒྱར་གསལ། །གཙོ་བོའི་ཐུགས་དམ་སྐོང་མཛད་པའི། །གསོད་བྱེད་རྒྱལ་མོ་ལ་ཕྱག་འཚལ། །ཟིལ་གནོན་ཐུགས་ཀྱི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་བྱུང་བ། །སྡེ་བརྒྱད་ཀུན་གྱི་སྦྱོར་བ་འཇོམས། །ཡ་མ་རཱ་ཛ་(༡༣ན)
ལ་ཕྱག་འཚལ། །ཡ་མའི་ཐུགས་ཀྱི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་བྱུང་བ། །འཕྲིན་ལས་སྣ་ཚོགས་རྫོགས་མཛད་པའི། །གསང་བདག་ཆེན་པོ་ལ་ཕྱག་འཚལ། །དྲེགས་པའི་ཐུགས་ཀྱི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་བྱུང་བ། །དུག་ལྔ་རྩད་གཅོད་འབྱུང་ལྔ་སྐེམས། །རུས་སྦལ་ཁྲོས་པ་ལ་ཕྱག་འཚལ། །ཟིལ་ནོན་དབུ་ཡི་གཙུག་རུམ་ནས། །ཐུགས་ཀྱི་སྤྲུལ་པ་མངོན་བྱུང་བ། ཁམས་གསུམ་ཟིལ་གྱིས་གནོན་མཛད་པའི། །བྱ་ཁྱུང་རྒྱལ་པོ་ལ་ཕྱག་འཚལ། །ཟིལ་གནོན་སྐུ་ཡི་དཀྱིལ་འཁོར་ནས། །ཐུགས་ཀྱི་སྤྲུལ་པ་མངོན་བྱུང་བ། །སྡེ་བརྒྱད་དྲེགས་པ་ཀུན་གྱི་གཤེད། །རྒྱན་གྱི་ལྷ་བརྒྱད་ལ་ཕྱག་འཚལ། །སྤྲུལ་པ་རྣམ་གསུམ་གཤེད་པོ་བཞི། །མོན་བཞི་བདུད་བཞི་ཡུམ་དང་བཅས། །འཆི་བདག་བཅུ་གཉིས་སྒོ་སྲུང་བཞི། །དཀྱིལ་འཁོར་ལྷ་ཚོགས་རྣམས་ལ་འདུད། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཨ་ཏི་པུ་ཧོ༔ པྲ་ཏི་ཛ་ཧོ༔ ན་མ༔སརྦ་ཏ་ཐཱ་ག་ཏ་མ་ཧཱ་ཡོ་གི་ནི་ཨ་ལ་ལ་ཧོ༔ གཉིས་པ་ཐུན་མོང་ཕྱི་ཡི་མཆོད་པ་ནི། །ཡིད་འཕྲོག་མཆོད་པའི་ལྷ་མོ་གྲངས་མེད་ཀྱིས། །དུང་ཆོས་ལས་འོངས་དངས་མའི་ཆུ་གཉིས་སྦྲེང་། །སྨན་ཤིང་སྣ་ཚོགས་སྤོས་ཀྱི་དྲི་ངད་འཐུལ། །ཐང་སྐྱེས་ཆུ་སྐྱེས་མེ་ཏོག་འཇའ་ལྟར་བཀྲ །འབྲུ་བཅུད་ཉི་ཟླ་རིན་ཅེན་མེ་འོད་གསལ། །དྲི་ཞིམ་ཆབ་ཀྱིས་གཏམས་པའི་ཕོར་པ་འཛིན། །རོ་བརྒྱ་ལྡན་པ་ལྷ་དང་མི་ཡི་ཟས། །རྔ་སིལ་པི་ཝཾ་སྙན་པའི་རོལ་མོ་དབུལ། །ཨཱོཾ་ཨ་ཧ་ར་ཨ་ཧ་ར་སརྦ་བི་དྷ་ར་པཱུ་ཛི་ཏེ་ཧཱུཾ། ཨཱོཾ་བཛྲ་དྷཱུ་པ་དྷཱུ། ཨཱོཾ་བཛྲ་བུཥྤེ་བུ། ཨཱོཾ་བཛྲ་ཨཱ་ལོ་ཀེ་ཨཱ། ཨཱོཾ་བཛྲ་གནྡྷེ་གན། ཨཱོཾ་བཛྲ་ནཻ་ཝི་དྱ་ནཻ། ཨཱོཾ་བཛྲ་ཤབྟ་ཤ །ཞེས་སོ་སོའི་ཕྱག་རྒྱ་དང་བཅས་ཏེ་འཇམ་རོལ་བྱ། གསུམ་པ་སྨན་གཏོར་གསང་རཀ་འདོད་ཡོན་ལྔའི། །དང་པོར་སྤྱི་གྲངས་དངོས་(༡༣བ)
གྲུབ་གསུང་ཐོག་མ། །ཧཱུཾ། རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་དྲུག་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩིའང་། །རྩ་བརྒྱུད་བླ་མ་ཡི་དམ་ལྷ། །ཕྱག་རྒྱ་ཟིལ་གནོན་འཁོར་བཅས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། ངེས་པའི་ལུང་སྟོན་རྡོ་རྗེ་སློབ་དཔོན་ཆེ། །བཀའ་དྲིན་མཉམ་མེད་རྩ་བའི་བླ་མ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། འཕགས་པ་འཇམ་དཔལ་འཇམ་དཔལ་བཤེས་གཉེན་དང་། །ཨྱོན་པདྨ་གཙུག་ལག་དཔལ་དགེ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། བལ་པོའི་རྒྱལ་པོ་གནུབས་ཆེན་སངས་རྒྱས་དང་། །ཡོན་ཏན་རྒྱ་མཚོ་ཡེ་ཤེས་རྒྱ་མཚོ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། པདྨ་དབང་རྒྱལ་ལྷ་རྗེ་འཇམ་དཔལ་དང་། །རྒྱ་གར་རྡོ་རྗེ་ཆོས་ཀྱི་ཡེ་ཤེས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། ཁྲོ་བོ་འབར་བ་དར་མ་རྒྱལ་མཚན་དང་། །ཡང་དག་རྡོ་རྗེ་ཕུག་པ་ཤེར་རྒྱལ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། རྔོག་སྟོན་འབུམ་ལེགས་གྲོ་སྟོན་བསོད་ནམས་འབུམ། །བླ་ཆེན་བློ་རྒྱན་ཕག་སྟོན་ཤཱཀ་མགོན་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། སྦུག་སྟོན་དཔལ་མགོན་རྡོར་གླིང་ཆོས་རྒྱལ་མཚན། །སྤང་སྟོན་བདེ་ལེགས་སེ་སྟོན་རིན་རྒྱལ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། མགོན་པོ་ཟླ་(༡༤ན)
བ་མཉམ་མེད་ནུབ་དགོན་པ། །བཀྲ་ཤིས་སྟོབས་རྒྱལ་ངག་གི་དབང་པོ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། ཆོས་དབྱིངས་རང་གྲོལ་ཟིལ་གནོན་བཞད་པ་རྩལ། །བཀའ་གཏེར་བླ་བརྒྱུད་རྩ་བའི་བླ་མ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲི་ཏ་ཁ་རཾ་ཁཱ་ཧི། གཉིས་པ་ལྷ་ཚོགས་རྐང་གྲངས་ཀྱིས་མཆོད་པ། །ཧཱུཾ། གྲུ་གསུམ་མཐིང་ནག་དཀྱིལ་འཁོར་ནས། །བཅོམ་ལྡན་ཕྱག་རྒྱ་ཟིལ་གནོན་དང་། །ཡུམ་ཆེན་གསོད་བྱེད་རྒྱལ་མོ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྨུག་ནག་འབར་བའི་དཀྱིལ་འཁོར་ནས། །གསོད་བྱེད་ཡ་མ་རཱ་ཛ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ལྗང་ནག་འབར་བའི་དཀྱིལ་འཁོར་ནས། །དྲེགས་པ་ཕྱག་ན་རྡོ་རྗེ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བསྐལ་པ་རྦ་ཀློང་འཁྲུག་པ་ནས། །རུས་སྦལ་རྔམ་པ་མི་ཟན་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཁམས་གསུམ་ཟིལ་གྱིས་གནོན་མཛད་པའི། །སྤྲུལ་པའི་བྱ་ཁྱུང་རྒྱལ་པོ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཁྱུང་སྟག་སེང་གེ་རོ་ཉེ་ཟུང་། །སྤྲུལ་པ་རྒྱན་གྱི་ལྷ་བརྒྱད་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྐུ་གསུང་ཐུགས་ཀྱི་སྤྲུལ་པ་སྟེ། །ལས་ཀྱི་བདག་པོ་རྣམ་གསུམ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཡ་མ་རཱ་ཛ་ལ་སོགས་ཏེ། །གཤེད་བཞི་ཡུམ་དང་བཅས་པ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དུང་གི་མོན་པ་ལ་སོགས་ཏེ། །མོན་བཞི་མོན་མོར་བཅས་པ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་(༡༤བ)
ནས་མཐུ་དབང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཧེ་ལེ་ཁྱབ་པ་ལ་སོགས་ཏེ། །བདུད་བཞི་བདུད་མོར་བཅས་པ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བྷེ་བ་ས་ཏྭ་ལ་སོགས་ཏེ། །ལས་ཀྱི་འཆི་བདག་བཅུ་གཉིས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྒོ་བཞི་བསྲུང་བའི་ལས་མཛད་པའི། །དྲག་པོའི་སྒོ་བ་བཞི་རྣམས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དཔལ་ཆེན་བཀའ་ཉན་ཕོ་ཉའི་ཚོགས། །མ་གཤིན་དྲེགས་པའི་ཚོགས་རྣམས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གསུམ་པ་ཉེས་བཤགས་སྣོད་གྱུར་བདུད་རྩི་མྱང་། ཡིག་བརྒྱ་བརྗོད་དེ་འགལ་འཁྲུལ་བཤགས། ཨཱོཾ་ཨཱཿཧཱུཾ། དཔལ་ལྡན་རྡོ་རྗེ་སྐུ་གསུང་ཐུགས་འཆང་བ། །མི་ཕྱེད་རྡོ་རྗེ་སྐུ་གསུང་ཐུགས་དང་ལྡན། །དེང་བདག་འཇམ་དཔལ་སྐུ་གསུང་ཐུགས་འཛིན་པས། །འཇམ་དཔལ་སྐུ་གསུང་ཐུགས་ཀྱི་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་ཀཱ་ཡ་སིདྡྷིི་ཨོཾ། ཝཱ་ཀ་སིདྡྷི་ཨཱ༔ ཙིཏྟ་སིདྡྷི་ཧཱུཾ། གཉིས་པ་བྷ་ལིང་གཏོར་མས་མཆོད་པ་ནི། །ཧཱུཾ། བླ་མེད་མཆོག་གི་མཆོད་པ་དམ་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །ཐུགས་དམ་བཞིན་ལས་ཅི་བདེར་བཞེས་སུ་གསོལ། །ཛཿཧཱུཾ་བཾ་ཧོ༔ཤྲཱི་ཧེ་རུ་ཀ་ཨི་དཾ། དྷཱུཔཾ། པུཥྤཾ། དཱི་པཾ། གྷནྡྷཾ། བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། གསུམ་པ་སྨན་གྱི་གསང་ནན་སྦྲེང་མཆོད་ནི། །དུག་ལྔའི་བདུད་རྩི་ཆེ་སྦྱར་ཡེ་ཤེས་ལྔ། །སྒྲུབ་རྫས་བྱང་སེམས་མཾ་ས་རཀྟ་ཆུ། །དྲི་ཆེན་གོ་ཀུ་ད་ཧ་ན་སྦྱར་འདི། །འབུལ་གྱི་དབྱིངས་ཐིམ་ཡོངས་ལ་ཁྱབ་གྱུར་ཅིག །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་པཉྩ་ཨ་(༡༥ན)
མྲྀ་ཏ་ཁ་ཁ་ཁཱ་ཧི་ཁཱ་ཧི། བཞི་པ་དམར་ཆེན་རཀྟའི་སྐྱེམས་འབུལ་བ། །གདུག་ཅན་དགྲ་བགེགས་ཁྲག་གི་དངས་མའི་མཚོར། །མཁའ་དབྱིངས་པདྨ་རཀྟའི་འབབ་ལྡན་ཀུན། །གཅིག་བསྡུས་མཚམས་སྤྲིན་ལ་འགྲན་དབུ་འཕྲེང་དང་། །རབ་འཇིགས་རྦ་རླབས་ཆེར་གཡོའི་ཚོགས་རྣམས་འབུལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་རཀྟ་ཁ་རཾ་ཁཱ་ཧི། ལྔ་པ་ནང་གི་འདོད་པའི་ཡོན་ཏན་ནི། །དུར་ཁྲོད་དབུས་སུ་ཚིལ་ཆེན་སྣང་འོད་འབར། །ཞིང་ལྤགས་བླ་བྲེ་འཕན་གཏིབས་རྒྱུ་མའི་ཕྲེང་། །ཀླད་པ་བྱང་སེམས་རྡོ་རྗེ་ལྷ་བ་ཤ །གསང་བ་དུར་ཁྲོད་རྣམ་ལྔའི་མཆོད་པ་འབུལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་མཾ་ས་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་བྷ་སུ་ཏ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མ་ཧཱ་ཀེཾ་ནྲྀ་ཏི་ཁཱ་ཧི། རྩ་བའི་བཞི་པ་སྔགས་ཀྱི་བཟླ་ཐབས་ལ། །ཕྱི་ནང་གསང་བ་ཡང་གསང་བཞིའི་དང་པོ། །ཐུགས་ཀར་ཉི་མའི་སྟེང་དུ་ཧཱུཾ་གི་མཐར། །སྐུ་ཡི་སྔགས་ལས་འཇའ་ཚོན་ལྟ་བུའི་འོད། །བ་སྤུའི་བུ་ག་ནས་འཐོན་སྡིག་སྒྲིབ་ཀུན། །བ་མོར་ཉི་མ་ཤར་བཞིན་དག་པར་གྱུར། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། གཉིས་པ་ནང་སྐོར་གསུང་གི་བཟླས་པ་ནི། །བདག་ཉིད་ལྟར་གསལ་ལྗགས་ཀྱི་རྩེ་མོ་ལས། །འོད་ཟེར་མེ་དཔུང་ཚ་ཚ་ལྟར་འཕྲོས་པས། །ལས་ངན་བག་ཆགས་བར་དུ་གཅོད་པ་ཀུན། །བྱ་སྒྲོ་མེ་ལ་བསྲེགས་པ་ལྟ་བུར་གྱུར། །ཨེ་མྱགས་ཡ་རྔུབས་མུགས་ཤག་ཀ་དུན། གསུམ་པ་གསང་སྒོར་ཞུགས་ཀྱི་བཟླས་པ་ནི། །ཐུགས་ཀར་མཐིང་ནག་ཧཱུཾ་ལ་སྔགས་འཁོར་ནི། །ཨིནྡྲ་ནཱི་ལའི་ཕྲེང་བ་ལྟ་བུ་ལས། །མགལ་མེའི་འཁོར་ལོ་(༡༥བ)
དང་མཚུངས་འོད་ཟེར་གྱིས། །སྡིག་སྒྲིབ་སྦུར་མ་མེ་ལྕེས་བསྲེགས་ལྟར་གྱུར། །ཨེ་དུན་ཀ་ཡཾ། བཞི་པ་ཡང་གསང་དྲག་པོ་སྔགས་རྒོད་འཛབ། །བདག་ཉིད་ཁྲོ་རྒྱལ་ཕྱག་རྒྱ་ཟིལ་གནོན་དུ། །གསལ་བའི་ཙིཏྟ་རིན་ཅེན་ཟ་མ་ཏོག །ཉི་མའི་གདན་ལ་ཡེ་ཤེས་སེམས་དཔའ་ནི། །སྐུ་མདོག་སྨུག་ནག་ཐུགས་ཀར་སཱུཪྻའི་སྟེང་། ཁ་དོག་ལྔ་ལྡན་ཧཱུཾ་ལ་སྔགས་ཀྱི་འཕྲེང་། །གཡས་སུ་འཁོར་ལས་འོད་ཟེར་འཕྲོས་པ་ཡིས། །ཡེ་ཤེས་སེམས་དཔའི་ཞལ་བརྒྱུད་རང་གི་ལྕེར། །ཆུ་སྐྱེས་ཧྲཱིཿལ་སྔགས་ཀྱིས་བསྐོར་བར་ཕོག །དེ་ལས་འོད་འཕྲོས་ཀླད་ཁང་ཟླ་བའི་སྟེང་། །ཨཱོཾ་ལ་སྔགས་ཕྲེང་བསྐོར་ལ་ཕོག་པ་ཡིས། །ལུགས་ལྡོག་ཏུ་འཕྲོས་མགལ་མེའི་འཁོར་ལོའི་མཐུས། །ལུས་ངག་ཡིད་གསུམ་སྡིག་སྒྲིབ་ཐམས་ཅད་སྦྱངས། །འོད་ཟེར་ཕྱིར་འཕྲོས་བདེར་གཤེགས་ཐུགས་རྒྱུད་བསྐུལ། །བྱིན་རླབས་ཚུར་འདུས་གསང་གསུམ་དངོས་གྲུབ་ཐོབ། །སླར་ཡང་སེམས་ཅན་ལ་ཕོག་སྒྲིབ་སྦྱངས་ནས། །མཐུ་དཔལ་གཟི་མདངས་ཚུར་འདུས་བདག་ལ་ཐིམ། །ཕྱིར་འཕྲོས་མེ་ལྕེས་དགྲ་བགེགས་ལྷག་མེད་བསྲེགས། །ཚེ་དཔལ་མཐུ་སྟོབས་མ་ལུས་ཚུར་ལ་བསྡུས། །རང་གི་བ་སྤུའི་བུ་གར་ཉི་གདན་ལ། །བཞུགས་པའི་ཁྲོ་ཆུང་མེ་རླུང་འཁོར་ལོ་ཐོགས། །གོ་མཚམས་མེད་པར་གཏམས་ཏེ་བར་གཅོད་ཀུན། །བསྲུང་ཞིང་བསྐྱབས་པས་གཞོམ་མེད་རྡོ་རྗེར་གྱུར། །ཨཱོཾ་ཨྱེ་ཨྱེ་ཨྱེ་ཨ་ཀྲོ་ཏེ་ག་ཡ་མཱནྟ་ཀ་ཡ་མ་ཡེ། ཀཱ་ལ་རཱུ་པ་ཀ་པ་ཡེ། ཧྲཱིཿཥྚཱིཿཨ་པ་ཡེ། ཨ་ཨ་ནེ་ཨ་ནེ། ཨུ་ཨུ་ནེ་ཨུ་ནེ། དུ་དུ་ནེ་དུ་ནེ། ཨ་ཨི་ཨུ་ཨེ་ཨོ་ཨཾ། ར་རཱི། ལ་ལཱི། དུ་རཱུ་ཡེ། བྱ་ཙ་ཡེ། སིང་ཧ་ཡེ། ཧྲི་ད་(༡༦ན)
ཡེ། བི་ཏ་ཡེ། ཙིཏྟ་ཡེ། ཧ་ལ་ཡེ། མུ་ཀ་ཡེ། ཨུ་ཨུ་ནེ། ཨུ་ཨུ་ནེ། བྱ་ཏྲི་ཏ། ཨ་ཨ་ན་ན། ཡ་མ་རཱ་ཙ། ཡ་མ་རཀྴ །ཡ་མ་རཀ་ཨ། ཡ་མ་རཀྵ། པེ་ཏ་ལི། ཀྲོ་ཏི་ཤྭ་རི། མ་མ་ཨེ་ཀ་ཙ་ཏི། དེ་མ་ཁ་ལ་པཾ་རི་ལ། རུ་ལུ་རུ་ལུ། ཤྲཱི་བཛྲ་ཀྲོ་ཏ། ཡ་མ་ཀརྨ་རོ་ཥ་ཎ། ཀྲི་དྷ་ཙན་དྷ་རཀྴ་མོན་ཏ་ཨཱཿཧཱུཾ་ཛཿ ཞེས་བསྙེན་མཐར། །བདེ་གཤེགས་རྒྱལ་བ་ཞི་ཁྲོའི་ལྷ་ཚོགས་ཀྱི། །མཐུ་སྟོབས་གཅིག་བསྡུས་འཇམ་དཔལ་གཤིན་རྗེའི་གཤེད། །ཕྱག་རྒྱ་ཟིལ་གནོན་འཁོར་དང་བཅས་པ་རྣམས། །རྣལ་འབྱོར་བདག་ལ་དེང་འདིར་དགོངས་སུ་གསོལ། །རྟག་ཏུ་ལུས་ནི་ཁྱོད་ཀྱི་སྐུར་བསྒོམ་ཞིང་། །ངག་ནི་གསང་སྔགས་ཟབ་མོ་བསྙེན་ཅིང་བསྒྲུབ། །ཡིད་ནི་བདེ་སྟོང་ཏིང་འཛིན་ལ་རོལ་ན། །དངོས་གྲུབ་བསྒྲུབ་པའི་འབྲས་བུ་དུས་ལ་བབ། །གནས་སྐབས་འཕྲིན་ལས་རྣམ་བཞིའི་ཚོགས་ཀུན་དང་། ཁྱད་པར་སྲུང་ཟློག་བསད་མནན་སྲེག་འཕང་སོགས། །མངོན་སྦྱང་དྲག་པོའི་ལས་རྣམས་མ་ལུས་པ། །མྱུར་འགྲུབ་སྲིད་གསུམ་ཀུན་ལས་རྒྱལ་བར་མཛོད། །མཐར་ཐུག་ཐེག་པ་རིམ་དགུའི་ཡང་རྩེ་མཆོག །སྤྲོས་བྲལ་ཨ་ཏི་ཆེན་པོའི་ལྟ་བ་དང་། །རིམ་གཉིས་ཟབ་ལམ་ཐབས་ཤེས་ཟུང་འབྲེལ་དུ། །བསྒོམས་པས་ཀུན་བཟང་གདོད་མའི་སར་བགྲོད་ཤོག །ཅེས་དངོས་གྲུབ་བླང་ངོ་། །རྩ་བའི་ལྔ་པ་བསྟོད་ཅིང་བསྐུལ་བ་ནི། །རབ་འབྱམས་དུས་གསུམ་རྒྱལ་བ་མ་ལུས་པའི། །ཇི་སྙེད་གསང་གསུམ་ཡོན་ཏན་ཕུང་པོའི་ཚོགས། །མི་བཟད་སྐུ་གསུམ་ཁྲོ་རྒྱལ་གད་ཉམས་ཀྱིས། །རྒྱ་ཆེན་སྲིད་གསུམ་ལོག་འདྲེན་འཇོམས་ལ་བསྟོད། །ཞལ་ཁྱིམ་(༡༦བ)
སྲོད་ཀྱི་མུན་པ་སྟུག་པོ་ལ། །དམར་ཟླུམ་སྤྱན་གྱི་གློག་སྟོང་དྲག་འཁྱུག་ཅིང་། །འཇིགས་རུང་གསུང་གི་དབྱར་གྱི་རྔ་བོ་ཆེ། །རབ་སྒྲོག་གནམ་ལྕགས་རྡོ་རྗེའི་ཟེགས་མ་འབབ། །ཨིནྡྲ་ནཱི་ལའི་འཁྲི་ཤིང་བསྐྱོད་འདྲ་བའི། །ཕྱག་དྲུག་རྣོ་ངར་མཚོན་ཆ་གདེངས་ཙམ་གྱིས། །འཇིག་རྟེན་འདས་དང་མ་འདས་ཁྲོ་རྒྱལ་ཀུན། །སྐྲག་སྟེ་སླར་ཡང་ཁྱོད་ཀྱི་བྲན་དུ་མཆིས། གྱད་ཀྱི་དོར་སྟབས་ཞབས་བཞི་པད་གཉེན་སྟེང་། །མི་སྡུག་སྒྱུ་རྩལ་གར་གྱི་རྣམ་འགྱུར་འཆང་། །རྡོ་རྗེ་འབར་པའི་ཁྱུང་གཤོག་བརྐྱངས་པ་ཡིས། །སྟོང་གསུམ་འཇིག་རྟེན་འདི་ཡང་ཁེངས་སམ་སྙམ། །གཟུགས་ཕུང་རྣམ་དག་དེ་བཞིན་གཤེགས་པའི་རིགས། །མཚན་དཔེ་རྒྱན་ལྡན་བདེ་ཆེན་སར་འགྱིང་ཡང་། །སྲིད་གསུམ་ཟིལ་གྱིས་གནོན་ཕྱིར་དྲག་པོའི་སྐུར། །སྟོན་མཛད་ཚེ་བདག་ནག་པོ་ཁྱོད་ལ་བསྟོད། །དངོས་འཛིན་མཚན་བྲལ་ཡེ་ནས་ཀ་དག་མཁར། །མ་གདོན་འབུམ་སྡེའི་མཚན་རྒྱུའི་གཉིས་སྐྱེས་ཚོགས། །འཇོམས་མཛད་བདེ་ཆེན་པད་ཚལ་རྒྱས་པའི་ཡུམ། །རྡོ་རྗེ་ཁྲོས་མ་བཅུ་གཉིས་བདག་པོར་བསྟོད། །རྣམ་ཤེས་ཕུང་པོ་ཡེ་དག་རྡོ་རྗེའི་རིགས། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱིས། ཁྲོ་རྒྱལ་མཐུ་སྟོབས་སྦྱོར་བ་ལྷ་མིན་དཔུང་། །འཇིགས་མཛད་སྲས་མཆོག་གཙུག་ན་ཟླ་བར་བསྟོད། །ཚོར་བའི་ཕུང་པོ་རྣམ་དག་རིན་ཅེན་རིགས། །གནོད་སྦྱིན་བདུད་དང་རྒྱལ་བཙན་ཐེའུ་རང་གཉན། །མུ་སྟེགས་ལས་ཀྱི་སྦྱོར་བ་མེ་ཡི་དཔལ། །ཞི་མཛད་དྲེགས་པ་སིནྡྷུའི་བདག་པོར་བསྟོད། །འདུ་བྱེད་ཕུང་པོ་རྣམ་དག་ལས་ཀྱི་རིགས། ཁམས་གསུམ་སྐྱེ་འགྲོའི་སྲོག་དང་བཀྲག་མདངས་(༡༧ན)
ཚེ། །འབྱུང་བའི་དངས་མ་དབང་པོའི་བུང་བ་ཀུན། །སྡུད་མཛད་རུས་སྦལ་པུཎྜ་རཱི་ཀར་བསྟོད། །འདུ་ཤེས་ཕུང་པོ་རྣམ་དག་པདྨའི་རིགས། །གདུག་ཅན་ཀླུ་རིགས་ལྔ་དང་ཀླུ་བདུད་ཀྱི། །མཛེ་སོགས་ཉེར་འཚེའི་སྦྱོར་བ་གླང་པོའི་མགོ །འགེམས་མཛད་ཁྱུང་ཆེན་གདོང་ལྔའི་དབང་པོར་བསྟོད། །ས་བདག་ས་སྲིན་བཙན་དང་ཡུལ་ལྷ་མི། །དུད་འགྲོ་སྟོབས་ཅན་དམོད་པ་ཚ་དབལ་བྲག །ཕྱེ་མར་འཐག་མཛད་གཟུགས་ཀྱི་སྤྲུལ་བསྒྱུར་ཅན། །རྒྱན་གྱི་ལྷ་བརྒྱད་གནམ་ལྕགས་ཐོག་མདར་བསྟོད། །དུས་གསུམ་རྣམ་དག་སྐུ་གསུམ་ཐུགས་ཀྱི་གར། །རྣམ་འགྱུར་ཅིར་ཡང་སྟོན་པའི་ཁྲོ་བོའི་གཟུགས། །མནན་བཤག་བསད་པའི་ལས་ཀྱི་མཐའ་སྡུད་པའི། །ལས་ཀྱི་གཤིན་རྗེ་བདག་པོ་གསུམ་ལ་བསྟོད། །ཉོན་མོངས་བཞི་དག་སྤྱི་བོ་མགྲིན་པ་དང་། །སྙིང་གི་ལྟེ་བའི་རྩ་ཆེན་སྲུང་སྐྱོབ་ཅིང་། །དགྲ་བགེགས་རྩ་འཁོར་བདུད་བཞི་རང་གཤེད་དུ། །དབབ་མཛད་ལས་ཀྱི་གཤེད་པོ་བཞི་ལ་བསྟོད། །ཚོགས་བརྒྱད་སྐྱེ་མཆེད་བཅུ་གཉིས་ཡེ་དག་པའི། །ལོག་འདྲེན་དགྲ་སྡེའི་གཤེད་མ་མོན་བདུད་བརྒྱད། །འཆི་བདག་བཅུ་གཉིས་བདག་ལྟ་སྟོང་པའི་ངང་། །རང་རིག་ལྷར་གསལ་སྒོ་བ་བཞི་ལ་བསྟོད། །མ་བཅོས་རང་བཞིན་ལྷུན་གྲུབ་དཀྱིལ་འཁོར་དུ། །འཁོར་ལོའི་མགོན་གྱིས་གང་འཚམ་ལས་ཀྱི་ཕྱིར། །རབ་སྤྲོས་བརྗོད་བྲལ་གྲངས་མེད་ལྷ་ཚོགས་ལ། །སྒོ་གསུམ་དང་བའི་ཡིད་ཀྱིས་ཕྱག་འཚལ་བསྟོད། །བསྐུལ་མཆོད་བསྟོད་གསལ་སྒྲོན་ནི་རྒྱུན་འཁྱེར་ལ་མི་དགོས་ཤིང་སྒྲུབ་པའི་དུས་སུ་བྱེད་ཚུལ་རྒྱས་བསྡུས་ཕྱག་ལེན་ལས་ཤེས་པར་བྱའོ། །(༡༧བ)
དཔལ་མགོན་སྟག་ཞོན་དང་གཏེར་སྲུང་མཐུ་ཆེན་སྡེ་བཞིར་གཏོར་བསྔོ་དང་གསོལ་མཆོད་བྱེད་ཅིང་གཞན་ཡང་ཆོས་སྐྱོང་གི་རིགས་ལ་བྱེད་དགོས་ཡོད་ན་འདིར་བྱའོ། །གསུམ་པ་རྗེས་ཆོག་ཚོགས་འཁོར་ལྷག་བསྟན་བསྡུ། །བསྔོ་ཤིས་རྒྱུན་སྤྱོད་བདུན་ལས་དང་པོར་བརླབ། །སྤྱན་དྲང་སྤྱི་དང་བྱེ་བྲག་མཆོད་ཅིང་བཤགས། །སྟོབ་པ་ཚོགས་རོལ་བདུན་གྱི་དང་པོ་ནི། །ཨཱོཾ་སརྦ་དྲ་བྱཾ་ཤྭདྷ་ཡ་ཧཱུཾ་ཕཊ། བི་ཤུདྡྷེ་ཨ་མྲྀ་ཏ་ཧཱུཾ་ཕཊ། དྷརྨ་ཨ་མྲྀ་ཏ་ཧཱུཾ་ཕཊ། བཛྲ་ཡཀྵ་ཀྲོདྷ་ཧ་ན་ཧ་ན་ཧཱུཾ་ཕཊ། རཾ་ཡཾ་ཁཾ། ཨཱོཾ་ཨཱཿཧཱུཾ། ཨཱོཾ་བྷ་ལིནྟ་ཏེ་ཛྭ་བྷ་ལིནྟ་བྷ་ལ་བྷ་ཏེ་གུ་ཧྱ་ས་མ་ཡེ་སྭཱཧཱ། ལན་གསུམ་བརྗོད། གཉིས་པ་ཚོགས་ཞིང་ལྷ་ཚོགས་སྤྱན་དྲང་བ། །ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་ཁྲོ་བདག་གཙོ། །རབ་ཏུ་མི་བཟད་འཇིགས་པའི་ཚོགས། །ཚོགས་ཀྱི་ལོངས་སྤྱོད་ཆེན་པོ་ལ། །གཏུམ་རྔམ་འཁྲུག་པའི་ཚོགས་རྣམས་གཤེགས། །ཡ་མ་ཀྲོ་དྷ་ས་མ་ཡ་ཛཿ ཛཿཧཱུཾ་བཾ་ཧོཿ གསུམ་པ་འདོད་ཡོན་དྲུག་སྤྲོས་སྤྱི་རུ་མཆོད། །ཧཱུཾ། བཀོད་པའི་དམ་ཚིག་ཕྱག་རྒྱ་ཆེ། །གཉིས་སུ་མེད་པར་བཞེས་སུ་གསོལ། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་གཏིབས། །མཉམ་སྦྱོར་མཆོད་པས་དགྱེས་པར་ཐིམ། །སྣ་ཚོགས་གཟུགས་མདོས་ཕྱག་རྒྱ་གར། །སྒྲ་སྙན་ཡིད་འོང་གླུ་དབྱངས་དང་། །ཀུན་ཏུ་ཚིམ་བྱེད་དྲི་མཆོག་དང་། །བདུད་རྩི་རོ་མཆོག་བརྒྱ་དང་ལྡན། །མཉེན་འཇམ་བདེ་བ་རེག་བྱའི་མཆོག །ཕྱོགས་བཅུ་ནམ་མཁའི་ཁམས་བཀང་ནས། ཁྲོ་རྒྱལ་གཤིན་རྗེའི་ཚོགས་ལ་འབུལ། །ཨ་ལ་ལ་ཧོ་དགྱེས་པར་མཛོད། །བཞི་(༡༨ན)
པ་བྱེ་བྲག་གཡས་ཞལ་དཀར་ལ་འབུལ། །ཨེ། མཉམ་སྦྱོར་ཆོས་སྐུའི་དཀྱིལ་འཁོར་ནས། །འབར་བ་གཤིན་རྗེའི་གཤེད་པོའི་ཚོགས། །གཏུམ་རྔམ་འཁྲུག་པའི་ལྷ་ཚོགས་ལ། །ལོག་འདྲེན་དགྲ་བགེགས་འདུལ་བའི་ཕྱིར། །ཞལ་ཟས་ཚོགས་ཀྱི་མཆོད་པ་འབུལ། །འབར་བའི་ཞལ་དུ་ཁ་རཾ་ཁཱ་ཧི། །ཨེ་ཀ་ཡ་མ་ཀྲོདྷ་གྷ་ན་ཙཀྲ་པཱུ་ཛ་ཁཱ་ཧི། ལྔ་པ་ཉེས་ཚོགས་གཡོན་ཞལ་དམར་ལ་བཤགས། །ཧཱུཾ། ཕྱག་རྒྱ་ཟིལ་གནོན་འཁོར་བཅས་དགོངས་སུ་གསོལ། །འདོད་ཆགས་ཞེ་སྡང་ང་རྒྱལ་ཕྲག་དོག་ལྔ། །ཡེ་ནས་རྣམ་པར་དག་པའི་རང་བཞིན་ལ། །རྨོངས་པའི་དབང་གིས་དེ་ལྟར་མ་རྟོགས་ཏེ། །དངོས་པོར་བཟུང་ནས་བླང་དོར་གཟུང་འཛིན་རྣམས། །འཇམ་དཔལ་རང་བཞིན་ཚེ་བདག་སྐུ་ལ་བཤགས། །ཡིག་བརྒྱ་བརྗོད། དྲུག་པ་ཐ་མའི་ཚོགས་ལ་དགུག་པ་དང་། །བསྒྲལ་ཅིང་སྟོབ་པ་གསུམ་གྱི་དང་པོ་ནི། །ཧཱུཾ། ཨྱེ་རིང་ཚར་གཅིག་གིས་སྤྲུལ་པ་སྤྲོ། །ནྲི་ཛཿ ཏྲིཛཿ ཛཿཧཱུཾ་བཾ་ཧོཿ བྲ་བེ་ཤ་ཡ་ཕཊ། ཨ་བེ་ཤ་ཡ་ཨ། ཨེ། གྲུ་གསུམ་ཨེ་ཡི་སྣོད་ནང་དུ། །བདུད་རྩི་ལྔའམ་ཟས་ལྔ་ལ། །མཚན་མ་མིང་དང་བཅས་པར་བྱ། །གཏུམ་རྔམ་འཁྲུག་པའི་ལྷ་ཚོགས་ཀྱིས། །དགྲ་བགེགས་དབང་པོ་བཀུག་ལ་བསྟིམ། །ཕུར་པས་བཏབ་ལ་མཚོན་ཆས་གཏུབས། །གཉིས་པ་རྣམ་ཤེས་སྤར་ཞིང་གཟུགས་ཕུང་གཏུབ། །ཨེ། ཟིལ་གནོན་ལྷ་ཚོགས་འཁོར་བཅས་ཀྱིས། །ཐུགས་དམ་ཆེན་པོའི་དུས་ལ་བབ། །གང་ལ་བྱ་བ་ཁྱོད་ཤེས་ཀྱི། །དམིགས་པ་གང་ཡིན་མྱུར་དུ་སྒྲོལ། །ཞེ་སྡང་དྲེགས་པའི་སྦྱོར་བ་ཆོམས། །རྩ་རྒྱས་ཁྲག་དང་(༡༨བ)
བླ་མཚོ་སྐོམས། །ལུས་སྲོག་དབང་པོ་དངས་སྙིགས་ཕྱེ། །འབྱུང་བ་རྣམ་ཤེས་བཀྲག་མདངས་སྡུས། །སྡང་བའི་དགྲ་དང་གནོད་པའི་བགེགས། །མངོན་སྤྱོད་ཚུལ་བཞིན་སྒྲོལ་བར་མཛོད། །ཨྱེ་མྱགས་ཡ་རྔུབས་མུགས་ཤག་ཀ་དུན། ཪྣྲིཏྲི་སྲོག་ལ་ཧུར་ཐུམས་ཛཿ རྩ་ཁྲག་སྙིང་ཐུམས་རིལ་རཾ་ཤག་རྦད། དགྲ་བོའི་སྲོག་ལ་ཙིཏྟ་བྲེང་ཤག་ཛཿ སྲོག་ལ་ཧུར་ཐུམས་རྦད། ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། དགྲ་བོ་ཨ་མུ་ཀ་སྲོག་ལ་ཐུན་རྨུགས་བྷྱོ། སྲོག་ལ་ཁཾ་ཤག་བྷྱོ། སྲོག་ལ་བྲེང་ཤག་བྷྱོ། སྲོག་ལ་ཡཾ་ཤག་བྷྱོ། དགྲ་བོའི་སྲོག་ལ་མཱ་ར་ཡ་རྦད། དགྲ་བོའི་སྲོག་ལ་སྟཾ་བྷ་ཡ་ནན། གསུམ་པ་སྨན་རཀ་གིས་སྦགས་ལིང་རོ་དབུལ། །ལིང་རོ་ལ་བདུད་རྩི་སྦྲན་ནས་ལྷ་ཚོགས་རྣམས་ལ་འབུལ་བ་ནི། ཨེ། ཕྱག་རྒྱ་ཟིལ་གནོན་འཁོར་བཅས་ལ། །བསྒྲལ་བའི་ཞིང་བཅུར་གྱུར་པ་འདི། །བདུད་རྩིར་བསྒྱུར་ནས་འབུལ་ལགས་ཀྱི། །གཏི་མུག་ཤ་ཡི་ངོ་བོའོ། །འདོད་ཆགས་ཁྲག་གི་རྒྱ་མཚོ་འཐུང་། །ཞེ་སྡང་རུས་པའི་རི་བོ་ཆོམས། །ང་རྒྱལ་མཁྲིས་པ་རྩད་ནས་དྲོངས། །ཕྲག་དོག་དོན་སྙིང་ཞལ་དུ་གསོལ། །ཕུང་པོ་ལྔ་དང་འབྱུང་བ་ལྔ། ཁམས་དང་སྐྱེ་མཆེད་མ་ལུས་པ། །འབར་བ་གཤིན་རྗེའི་ཞལ་དུ་སྟོབ། །བསྟན་པ་བསྲུང་ཕྱིར་བཞེས་སུ་གསོལ། །མ་ཧཱ་མཾ་ས་ཁཱ་ཧི། མ་ཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་བྷ་སུ་ཏ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་ཀེཾནྲྀ་ཏི་ཁཱ་ཧི། བཾ་སྐོངས་དང་རྩ་གསུམ་བསྐང་གསོ་གཏོང་། བདུན་པ་གསོག་འཇོག་མེད་པར་ལོངས་སྤྱོད་པ། །དེ་ནས་ལྷ་ལ་མཆོད་པའི་ཚུལ་དུ་རོལ་ལོ། །རྩ་བའི་གཉིས་པ་ལྷག་མར་བརླབ་དགུག་(༡༩ན)
མནན། བསྟན་བསྒྲག་སྦྲན་མཆོད་བདུན་ལས་དང་པོ་ནི། །ཨཱོཾ་ཨཱཿཧཱུཾ་ཧོཿ གཉིས་པ་ལྷག་མའི་མགྲོན་ཚོགས་འགུགས་པ་ནི། ཨེ་མ་བྱང་ཆུབ་སེམས་དཔའ་ནི། །འཇམ་དཔལ་ཁྲོ་བོའི་རྒྱལ་པོ་མཆོག །གང་ཕྱིར་སེམས་ཅན་འདུལ་དོན་དུ། ཁྲོ་བོ་འདི་དག་ཐུགས་ལས་བྱུང་། །ཐམས་ཅད་མ་ལུས་འདིར་འདུས་ཤིག །ཨཱོཾ་ཊཀྐི་རཱ་ཛ་ཧཱུཾ་ཛཿ གསུམ་པ་ཕྱག་རྒྱས་ཟིལ་གྱིས་མནན་པ་ནི། ཨཱོཾ་ཤྲཱི་མཉྫུ་ཀྲོ་དྷ་ཛྙཱ་ན་སརྦ་དུཥྚ་ན་བྷན་དྷ་ཡ་ཕཊ། བཞི་པ་དམ་ཚིག་ཕྱག་རྒྱ་བསྟན་པ་ནི། ས་མ་ཡ་དུ་མནྟ་ཀ་ར་ན་ཕཊ། ལྔ་པ་དམ་ཚིག་རྣ་བར་བསྒྲག་པ་ནི། ཨེ་ཀ་ས་མ་ཡ་ཧཱུཾ། དྲུག་པ་བྱང་ཆུབ་སེམས་ཀྱི་ཁ་ཆུ་སྦྲན། ཕྱག་ལེན་ལྟར་རྡོ་རྗེ་སློབ་དཔོན་གྱིས་དམིགས་པ་དང་བཅས་ཁ་ཆུ་བཏབ། རྨེ་གཏོང་སྨན་དང་ཞིང་བཅུའི་ཤ་རུས་དག །ཁྲག་ཆེན་དུག་དང་སྦྲུས་ཏེ་རབ་སྦྱར་ནས། །བདུད་རྩི་བྱིན་ནས་ཕྱག་རྒྱ་བསྒྲེང་བྱས་ཏེ། །ལོག་རྟོག་བདག་གིར་འཛིན་པའི་ཞིང་བཅུ་ལ། །མངོན་སྤྱོད་རྟགས་ཀྱི་འཕྲིན་ལས་འདི་སྤྱོད་ཅིག །རྣམ་ངེས་ཀྱི་ས་བཅད་ལ་རས་མི་འཕོག་པའི་ཕྱིར་འདི་བཞིན་བཀོད་ཀྱི་ཕྱག་ལེན་ལ་ཁ་ཕྲུ་བྱིན་རླབས་ཀྱི་སྔོན་དུ་འདེབས་ཤིང་ཚིགས་བཅད་འདི་འོག་གི་ས་བཅད་བདུན་པ་དང་སྦྲེལ་ལོ། །བདུན་པ་མཆོད་ཅིང་འཕྲིན་ལས་གཉེར་དུ་གཏོད། །ཨཱོཾ་ཨེ་ཀ་ཡ་མ་ཀྲོ་ཏ་ཁཱ་ཧི། ཀརྨ་ཡ་མ་སརྦ་ས་མ་ཡ་ཁཱ་ཧི། མ་མ་རཀྵ་ཌཱཀྐི་ནི་ཁཱ་ཧི། བདུད་པྲ་མ་ཡ་ཁཱ་ཧི། པྲེ་ཏ་བྷིནྡྷ་ཁཱ་ཧི། ཡ་མ་རཱ་ཛ་པྲེ་ཏ་ཛ་ལ་ཁཱ་ཧི། ཡ་མ་རཱ་ཛ་པྲེ་ཏ་ཐོརྐ་ཁཱ་ཧི། གིང་ཀ་ར་ཁཱ་ཧི། དགྲ་བོའི་མཧཱ་མཾ་ས་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། དམ་ཅན་(༡༩བ)
ལྷག་མའི་ལྷ་ཚོགས་རྣལ་འཕྲིན་ལས་སུ་གསོལ་བ་ནི། སྔོན་རྒྱལ་བའི་སྤྱན་སྔར་ཁས་བླངས་པ་ལྟར་སངས་རྒྱས་ཀྱི་བསྟན་པ་སྲུངས། དཀོན་ཅོག་གི་དབུ་འཕང་སྟོད། དགེ་འདུན་གྱི་སྡེ་དང་སྲིད་སྐྱོངས། སྒྲུབ་པ་པོའི་སྟོང་གྲོགས་ཚུལ་བཞིན་དུ་མཛོད། གནོད་པའི་དགྲ་བགེགས་ཐལ་བའི་རྡུལ་དུ་རློག་པར་མཛོད་ཅིག །ཅེས་བརྗོད། ཟོར་ལས་བྱེད་ན་སྐབས་འདིར་བྱ། རྩ་བའི་གསུམ་པ་བསྟན་མ་སྐྱོང་བ་ནི། ཧཱུཾ། བོད་ཁམས་སྐྱོང་བར་ཁས་བླངས་བསྟན་མའི་ཚོགས། །བདག་ཉིད་ཆེན་མོ་ལ་སོགས་བདུད་མོ་བཞི། །གངས་དཀར་ཤ་མེད་ལ་སོགས་གནོད་སྦྱིན་བཞི། །ཀོང་བཙུན་དེ་མོ་ལ་སོགས་སྨན་བཙུན་བཞི། །བསྟན་སྐྱོང་ཆེན་མོ་བཅུ་གཉིས་འཁོར་དང་བཅས། །སྔོན་ཚེ་ཇི་ལྟར་དམ་བཅས་ཇི་བཞིན་དུ། །གཏོར་མ་འདི་བཞེས་རྣལ་འབྱོར་གྲོགས་མཛོད་ཅིག །བཅོལ་བའི་འཕྲིན་ལས་ཐམས་ཅད་སྒྲུབ་པར་མཛོད། །ཅེས་པའི་མཐར། མ་མ། མེ་མེ། ལ་ལ། ལེ་ལེ། ཏ་ཏ། ཏེ་ཏེ། རྡོ་རྗེ་སྲིང་འགྲོ་མ་ཧཱུཾ་བྷྱོཿ མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། མཧཱ་བ་ལིཾ་ཏ་ཁ་རཾ་ཁཱ་ཧི། ཞེས་ནམ་མཁའ་མཐོང་སར་བཏེག་ལ་མཆོད། སྒོ་དྲུང་དུ་བྲོ་བརྡུང་། ནང་དུ་དཀྱིལ་འཁོར་གསལ་བཏབ་ལ། ཨེ། བཅོམ་ལྡན་ཕྱག་རྒྱ་ཟིལ་གནོན་འཁོར་བཅས་ལ། ཁྱད་པར་མཆོད་པ་པཉྩ་ཨ་མྲྀ་ཏ། མཧཱ་བྷ་ལིཾ་རཀྟ་བཅས་པ་འབུལ། །བཞེས་ནས་བླ་མེད་དངོས་གྲུབ་སྩལ་དུ་གསོལ། །ཆོས་དབྱིངས་ངང་ལས་ཁྲོ་བོའི་སྐུར་སྟོན་པ། །ལྷ་ཡི་ལྷར་གྱུར་བཅོམ་ལྡན་གཤིན་རྗེའི་གཤེད། །བདུད་ཀྱི་བདུད་ཆེན་མ་རུངས་འཇོམས་པའི་ལྷ། ཁྲོ་རྒྱལ་ཀུན་གྱི་(༢༠ན)
གཙོ་ལ་གུས་པས་འདུད། །ཡི་དམ་ལྷ་མཆོག་ཟིལ་གནོན་འཁོར་བཅས་ཀྱི། །བསྙེན་སྒྲུབ་འཕྲིན་ལས་གཞུང་བཞིན་བགྱིས་པ་ལ། །བདག་ཅག་མ་རིག་ལོག་རྟོག་དབང་སོང་བའི། །འགལ་འཁྲུལ་ནོངས་པ་ཅི་མཆིས་བཟོད་པར་གསོལ། །ཡིག་བརྒྱ་བརྗོད་ཅིང་འགལ་འཁྲུལ་བཤགས། །རྩ་བའི་བཞི་པ་དཀྱིལ་འཁོར་བསྡུ་བ་ནི། ཧཱུཾ་ཧཱུཾ། གཞལ་ཡས་རྩ་བའི་ལྷ་ལྔ་རྒྱན་ལྷ་བརྒྱད། །གཙོ་བོ་ཟིལ་གནོན་ཉིད་ཀྱི་ཐུགས་ཀར་བསྡུ། །ཟིལ་གནོན་ཉིད་ཀྱང་མི་དམིགས་ཆོས་ཀྱི་དབྱིངས། །འཁོར་རྣམས་རང་རང་གནས་སུ་ལས་ལ་གཤེགས། །བཛྲ་མུཿ ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། རྩ་བའི་ལྔ་པ་དགེ་བའི་ཚོགས་བསྔོ་བ། །དགེ་འདིའི་མཐུ་ཡིས་མཁའ་མཉམ་འགྲོ་ཀུན་གྱི། །རྒྱུད་ལ་ཡོད་པའི་སྒྲིབ་གཉིས་དཔུང་བཅོམས་ཏེ། །གཤིན་རྗེའི་གཤེད་གྱུར་བཅོམ་ལྡན་ཉིད་འགྲུབ་ནས། །འཕྲིན་ལས་རྣམ་བཞིས་གདུལ་བྱའི་དོན་བྱེད་ཤོག །རྩ་བའི་དྲུག་པ་བཀྲ་ཤིས་བརྗོད་པ་ནི། །གང་ཞིག་བླ་མེད་བཅོམ་ལྡན་གཤིན་རྗེའི་གཤེད། །སྐུ་གསུང་ཐུགས་ཀྱི་ཡོན་ཏན་བསམ་ཡས་པ། །འགྲོ་བ་ཀུན་གྱི་རྒྱུད་ལ་རབ་ཞུགས་ནས། །དངོས་གྲུབ་རྣམ་གཉིས་འཕེལ་བའི་བཀྲ་ཤིས་ཤོག །རྩ་བའི་བདུན་པ་རྒྱུན་གྱི་སྤྱོད་ལམ་ནི། དུས་ཀུན་ཏུ་ལྷ་སྔགས་ཡེ་ཤེས་ཀྱི་རོལ་པ་ལས་མི་འདའ་བར་ཉམས་སུ་བླང་བའོ། །ཨེ་མ་བགྲང་ཡས་བདེར་གཤེགས་ཀུན་གྱི་ཡབ། །འགྲོ་ངོར་རྒྱལ་སྲས་གཞོན་ནུ་ཟུར་ཕུད་ཅན། །འཇམ་པའི་རྡོ་རྗེ་གཤིན་རྗེའི་གཤེད་པོ་རུ། །རྣམ་རོལ་ཕྱག་རྒྱ་ཟིལ་གནོན་ཚེ་ཡི་བདག །གང་དེའི་ལྷ་སྔགས་ཡེ་ཤེས་རྣལ་འབྱོར་ལ། །གཅིག་ཏུ་གཞོལ་ན་བན་བོན་བྱད་མའི་མཚོན། །རང་གཤེད་ཕབ་སྟེ་བསད་ཞར་དགྲ་(༢༠བ)
བགེགས་ཀུན། །ལྔ་པའི་ལམ་ནས་འོག་མིན་ཞིང་དུ་འདྲེན། །ཐུན་མོང་ཙམ་ལ་མི་རེ་ཚེ་གཅིག་ལ། །འོང་སྐུར་གྲོལ་བའི་དབང་རྣོན་སྔོན་མང་དིང་། །སྦྱངས་པའི་ལས་འཕྲོ་སད་པའི་བརྩོན་འགྲུས་ཅན། །མི་འབྱུང་ཞེས་བྱའི་མཐའ་དེ་སུ་ཡིས་བཀག །དུས་སྐལ་ཕྲ་ཡང་འཇམ་དཔལ་ཞི་དང་ཁྲོའི། །ཚོམ་བུར་ཆོས་ཉིད་བར་དོར་ཤར་གྲོལ་ཞིང་། །ཆེས་དམན་མི་ལུས་ཐོབ་ནས་ལམ་གྱི་འཕྲོ། །འཐུད་པའི་གནད་ཀྱིས་མི་འཇིགས་ཞེ་བློ་བདེ། །དེ་ཕྱིར་འདི་ཕྱི་བར་དོ་མཐའ་ཀླས་པའི། །སྐྱབས་གནས་གཅིག་ཆོག་འཇམ་མགོན་ཀུན་བཟང་ལས། །ཆེས་ལྷག་འཚོལ་ཕྱིར་འཁོར་འདས་ཐམས་ཅད་ལ། །མྱུལ་ཡང་རྙེད་པའི་གོ་སྐབས་ག་ལ་ཞིག །བགྲང་རིང་སྐྱེ་བར་བསགས་པའི་བསོད་ནམས་ཀྱིས། །ཐོབ་པའི་ཡི་དམ་འདི་དང་དེང་ནས་བཟུང་། །ཆོས་ཉིད་ཟད་སར་འཁྱོལ་མིན་དེ་སྲིད་དུ། །མི་འབྲལ་བྱིན་རླབས་སྙིང་དབུས་འཇུག་པར་ཤོག །པད་གནུབས་གདམས་པའི་མཐོ་རིས་ཆུ་བོ་ཡིས། །ཉེས་བརྒྱའི་དྲི་མ་མ་ལུས་རབ་བཀྲུས་ནས། །མཆོག་དང་ཐུན་མོང་དངོས་གྲུབ་དབང་གི་རྒྱལ། །སྐལ་བཟང་རྒྱལ་མཚན་རྩེ་མོར་མཛེས་གྱུར་ཅིག །དེའང་ས་ཡོས་བྲག་སྣ་ཆོས་རྗེ་ཨྱོན་བསྟན་འཛིན་པས་ལས་བྱང་ཚིག་ཤིན་ཏུ་ཉུང་བ་ལ་བདག་མདུན་ཐམས་ཅད་ཚང་བ་དགོས་ཚུལ་གྱི་ཚེ། དེ་སྐབས་ཉེ་སྐོར་དུ་འཛུགས་འདུན་མེད་པར་བརྟེན། གཞན་ངོ་ལྡོག་བྱེད་ཙམ་ཞིག་བཀོད་པ་ཐོས་བསམ་དུ་མས་གཡེངས་ཏེ། ཚིག་དོན་གྱི་ཆ་ལ་ཞུས་དག་མ་བྱུང་བའི་མུར་གྲྭ་ཚང་དུ་འཛུགས་རྒྱུར་སྤྲད་པ་ཤིང་བྱ་ལོ་གདངས་དབྱངས་གཅོད་པའི་སྐབས་ལྷན་ཐབས་ཁ་ཡར་བྱས་ནའང་དགེ་འདུན་དར་རྒྱས་(༢༡ན)
སོགས་འགའ་ཞིག་གིས་མི་སྲུན་སྒྱུ་དྲ་ལ་བརྟེན་སྐྱོ་མ་སྔ་བཙན་གྱིས་སྐྱོན་མཐའ་དག་སེལ་མ་བདེ་བར་ལུས་པ་འདི་ཉིད་ལྷག་པའི་ལྷར་སོང་གཤིས་དག་སྐྱོར་གལ་པོ་ཆེར་མཐོང་ནས་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་ཀྱི་ཉམས་ལེན་དུ་མན་ངག་རྩ་བ། སེ་སྟོན་ཆེན་པོའི་ལས་བྱང་ལ་ཆོས་རྒྱལ་དབང་པོའི་སྡེས་ལྷན་ཐབས་སྦྱར་བའི་དགོངས་དོན་སོར་བཞག་ལས་ལག་ལེན་གཞན་དག་གིས་བསླད་པ་མེད་ཅིང་གསར་རྩོམ་ཅུང་ཟད་ཡོད་པ་རྣམས་ལའང་ཞུས་ཤིན་ཏུ་དག་པར་བགྱིས་པའི་ལས་བྱང་སྲིད་གསུམ་རྣམ་རྒྱལ་ཞེས་བྱ་བ་འདི་ནི་རིང་ནས་བསྒྲིག་འདུན་ཡོད་པའི་སྟེང་དབུ་མཛད་བློ་བཟང་ཡོན་ཏན། མཆོད་དཔོན་ངག་དབང་ཤེས་རབ། དགེ་སློང་འཇམ་དབྱངས་གྲགས་པ་གསུམ་གྱིས་ད་ཆ་མགྱོགས་པ་ཞིག་བསྒྲིགས་ན་ལེགས་ཞེས་མཚམས་སྦྱར་བས་རྐྱེན་བྱས་ལམ་འདིའི་སྨིན་གྲོལ་མན་ངག་མཐའ་དག་ལ་བློ་གྲོས་ཀྱི་སྣང་བ་གཅིག་ཏུ་དཀར་བའི་ཟ་ཧོར་གྱི་སྔགས་བན་ཟིལ་གནོན་བཞད་པ་རྩལ་གྱིས་ཀུན་དགར་འབོད་པ་ཤིང་སྟག་ཆོ་འཕྲུལ་ཟླ་བའི་དམར་ཆའི་དགའ་བ་གཉིས་པར་ཕོ་བྲང་པོ་ཏ་ལར་སྦྱར་བའི་ཡི་གེ་པའང་འཇམ་དབྱངས་གྲགས་པ་ཉིད་དོ། །སརྦ་མངྒ་ལཾ།། །།