འཇམ་དཔལ་ཚེ་བདག་ཕྱག་རྒྱ་ཟིལ་གནོན་གྱི་ལས་བྱང་གནམ་ལྕགས་འཁོར་ལོ།
འཇམ་དཔལ་ཚེ་བདག་ཕྱག་རྒྱ་ཟིལ་གནོན་གྱི་ལས་བྱང་གནམ་ལྕགས་འཁོར་ལོ་ཞེས་བྱ་བ་བཞུགས་སོ།།
ན་མ་ཤྲཱི་ཡ་མ་རཱ་ཛཱ་ཡུརྦ་ཏ་ཡེ། བདེ་ཆེན་འགྱུར་མེད་ཆོས་དབྱིངས་ཀུན་གསལ་མཛེས་མར་གྲངས་མེད་གཟུགས་སྐུའི་མི་ལྟུང་ཕྱང་ཕྲུལ་ལེགས་པར་འགོད་མཁས་བྱེད་པོ་ཀུན་ཏུ་བཟང་། །སྲིད་གསུམ་བདུད་སྡེའི་ཤ་མཆོག་སྦྱིན་བྱུང་ཕོན་པོ་ཕྱེ་མར་འཐག་མཛད་ལོངས་སྐུ་གཙུག་ན་ཟླ་བའི་ཉག་ཕྲན་འཇམ་དཔལ་གཤིན་རྗེའི་གཤེད། །རྒྱལ་ཀུན་གསང་གསུམ་ཡོན་ཏན་ཕུང་པོའི་ཀུན་ཕན་གང་ཐུགས་མཁའ་ལ་རབ་འཆར་ལས་ལྡན་ས་མོས་རྒྱས་མཛད་སྤྲུལ་སྐུ་པདྨ་འབྱུང་། །སྐུ་གསུམ་ངོ་བོ་རིགས་འཛིན་རྩ་བརྒྱུད་བླ་མའི་ཚོགས་ཀྱི་ཞབས་ཟུང་མཁའ་ལྡིང་དཀར་པོ་བདག་ཡིད་རྫིང་བུར་རོལ་བའི་དགའ་སྟོན་སྩོལ། །སྔ་འགྱུར་རྒྱུད་སྔའི་རང་བྱུང་མགོ་སྐྱེས་ནས། །འཇམ་དཔལ་གཤིན་རྗེའི་ཟབ་ལམ་འཆི་མེད་ཆབ། །འབད་རྩོལ་དུ་མས་ཕྱོགས་འདིར་རྒྱས་མཛད་པའི། །སྒྲ་བསྒྱུར་གནུབས་ཆེན་སྐལ་ལྡན་ཤིང་རྟའི་ཞབས། །ཕྱི་ནང་གསང་གསུམ་གདམས་པ་ཡིད་བཞིན་ནོར། །སྣ་ཚོགས་སྒྲོམ་བུའི་ཀླུ་དབང་ཅོད་པན་དུ། །མི་མངོན་ཕྱག་རྒྱས་བཏབ་པ་གསང་བའི་གཏེར། །ཐུབ་བསྟན་འདོད་དགུའི་དཔལ་འབྱོར་རྒྱས་བྱའི་ཕྱིར། །(༢ན)
ལེགས་པར་འདོན་མཛད་རྡོ་རྗེ་འོད་འབར་སོགས། །རབ་འབྱམས་ལས་བཞིའི་རིན་ཆེན་བང་མཛོད་མཆོག །འཛིན་མཁས་དངོས་བརྒྱུད་ཡོངས་འཛིན་ཚོགས་རྣམས་ལ། །གུས་པས་འདུད་དོ་བརྩེ་བའི་སྤྱན་གྱིས་གཟིགས། །སྡིག་རྒྱུད་གནམ་ལྕགས་ཐོག་མདའ་ལས་གྲུབ་པའི། །ཕྲིན་ལས་འཁོར་ལོ་འབར་བ་རྩིབས་སྟོན་ཅན། །མན་ངག་ཧ་ལ་ནག་པོས་དར་བཏགས་པ། །ཕྱོགས་བཅུར་འཁོར་རོ་བདུད་སྡེ་བག་ཡོད་བྱོས། །ཐོག་མར་བླ་བརྒྱུད་གསོལ་འདེབས་ནི། ཁྱབ་བདག་ཐོག་མའི་མགོན་པོ་ཀུན་ཏུ་བཟང་། ཁ་སྦྱོར་བདུན་ལྡན་ཁྲོ་རྒྱལ་གཤིན་རྗེའི་གཤེད། །ངེས་གསང་རྒྱུད་སྡེའི་བདག་པོ་རྡོ་རྗེ་འཛིན། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ཟུང་འཇུག་སྐུ་བརྙེས་འཇམ་དཔལ་བཤེས་གཉེན་ཞབས། །དུས་གསུམ་མཁྱེན་པ་པདྨ་སཾབྷ་ཝ། །བརྟུལ་ཞུགས་སྤྱོད་པ་མཐར་ཕྱིན་ནོར་བུ་འཛིན། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །སྐད་གཉིས་སྨྲ་བའི་དབང་པོ་བུདྡྷའི་མཚན། །ལས་ལྡན་གཏེར་སྟོན་རྡོ་རྗེ་འོད་འབར་དང་། །གང་དེའི་གདམས་པའི་མངའ་བདག་སཾབྷོཊར། །གསོལ་བ་(༢བ)
འདེབས་སོ་དངོས་གྲུབ་རྣམ་གཉིས་སྩོལ། །རིགས་འཛིན་དབང་པོ་གངས་བན་བཀྲ་ཤིས་དར། །མཐུ་སྟོབས་དབང་ཕྱུག་གངས་པ་རི་དཀར་བ། །སྡེ་བརྒྱད་བྲན་དུ་འཁོལ་བ་ཤཱཀ་འབུམ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །སྔ་འགྱུར་བསྟན་པའི་སྲོག་ཤིང་རྡོ་རྗེ་དཔལ། །ཟབ་སྦས་གསལ་བར་སྟོན་པའི་ཤཱཀྱའི་མཚན། །རིགས་འཛིན་མཁས་གྲུབ་མཁྱེན་རབ་དཔལ་མགོན་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ཐེག་མཆོག་བསྟན་པའི་གསལ་བྱེད་ཆོས་ཀྱི་རྗེ། །བདེ་ལེགས་རྒྱལ་མཚན་འཛིན་པའི་དཔལ་གྱུར་དང་། །གསང་རྙིང་བསྟན་པའི་བདག་པོ་སྒྲོལ་མ་བར། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །རྣམ་གཉིས་གཙུག་བསྟེན་རཏྣ་དྷྭ་ཛའི་ཞབས། །གཤིན་རྗེ་གཤེད་དངོས་སོ་མ་ནཱ་ཐ་དང་། །དབང་ཆེན་གྲུབ་པ་མཆོག་བརྙེས་ནུབ་དགོན་པར། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །སྤྲུལ་སྐུ་རིགས་འཛིན་ཆོས་རྒྱལ་དབང་པོའི་སྡེ། །ཟིལ་གནོན་དངོས་གྲུབ་མཆོག་བརྙེས་རྒྱལ་མཚན་དཔལ། །ཞིང་སྐྱེད་བྲན་དུ་བཀོལ་བའི་རྡོ་རྗེ་འཛིན། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །མ་ལུས་གདམས་པའི་གངྒཱ་ཁྱོད་ཐུགས་སུ། །ལེགས་གཏམས་མཁས་བཙུན་བཟང་པོའི་བརྟུལ་ཞུགས་ཅན། །དཔལ་འབྱོར་སྐུ་གསུམ་ལྷུན་གྲུབ་དྲང་སྲོང་ཆེ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །སྲིད་གསུམ་ཟིལ་གནོན་མངོན་སྤྱོད་དྲག་རྩལ་ལས། །འཕྲིན་ལས་རྡོ་རྗེའི་ཕ་ལམ་རྩིབས་སྟོང་ཅན། །འཁོར་བྱེད་ཁྲག་འཐུང་རྣམ་རོལ་དཔའ་བོའི་སྡེ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ཕྱི་ནང་གསང་གསུམ་གདམ་པ་ས་འཛིན་དབང་། །རྣོ་ངར་རྣ་ཆ་བརྒྱད་སོགས་གསེར་གྱི་རི། །སྟོན་མཛད་བྱེད་པ་དངོས་བརྒྱུད་ཡོངས་འཛིན་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །ངོ་མཚར་བཀྲ་ཤིས་བྱིན་ཆགས་གནས་མཆོག་ཏུ། །མི་ཕྱེད་ཕྱག་རྒྱས་བཏབ་པ་ཟབ་མོའི་གཏེར། །(༣ན)
གནས་ཆོས་བཀའ་ཡི་སྲུང་མར་བཅས་པ་ལ། །གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །འཁོར་བའི་ངང་ཚུལ་ཀུན་ལ་ཡིད་ལོག་ཅིང་། །འགྲོ་རྣམས་སངས་རྒྱས་ས་ལ་འགོད་པའི་ཆེད། །རྨད་བྱུང་ཐེག་པ་མཆོག་གི་ལམ་ཞུགས་ནས། །མཆོག་ཐུན་དངོས་གྲུབ་འགྲུབ་པར་བྱིན་གྱིས་རློབས། །བགྲོད་པ་རྣམ་པ་གསུམ་གྱི་འཇུག་ངོགས་ལས། །སྨིན་པར་བྱེད་པ་དབང་གི་རིམ་པ་དག །མཚན་ལྡན་རྡོ་རྗེ་སློབ་དཔོན་དྲུང་ནོད་དེ། །ངེས་གསང་སྣོད་དུ་རུང་བར་བྱིན་གྱིས་རློབས། །རྒྱུ་རྐྱེན་དང་བྲལ་ཆུ་ལས་ཉ་འཕར་ཚུལ། །གསལ་སྟོང་ལྷ་སྐུར་ལྡང་བའི་ང་རྒྱལ་གྱིས། །དྲེགས་པ་ཐུག་ཕྲད་བསད་པའི་དྲག་པོའི་སྔགས། །མངོན་སྤྱོད་འཕྲིན་ལས་འགྲུབ་པར་བྱིན་གྱིས་རློབས། །གྲངས་མེད་ཆོས་རྣམས་མ་ལུས་སེམས་ཀྱི་ཀློང་། །ཡེ་ནས་གྲོལ་བའི་མི་འགྱུར་ཀུན་ཏུ་བཟང་། །གདོད་ནས་འཁྲུལ་མ་མྱོང་བའི་རིག་པ་འདི། །ཚེ་འདིར་མྱུར་དུ་རྟོགས་པར་བྱིན་གྱིས་རློབས། །རིགས་བཟང་ཕྱག་རྒྱ་ལས་འོངས་དགའ་བ་བཞི། །རྫོགས་པའི་བདེ་སྟོང་ཡེ་ཤེས་རབ་རྒྱས་ཤིང་། །རྩ་གསུམ་འཁོར་ལོ་བཞི་ལྡན་སྐུ་བཞིའི་གར། །གདོད་མའི་མགོན་པོ་འགྲུབ་བར་བྱིན་གྱིས་རློབས། །མདོར་ན་ཡང་ཟབ་འཇམ་དཔལ་རྫོགས་ཆེན་སོགས། །སངས་རྒྱས་རྗེན་པར་སྟོན་པའི་ཟབ་མོའི་ཆོས། །ཉམས་སུ་བླངས་པས་འདི་ཕྱི་བར་གསུམ་གྱི། །བདེ་ལེགས་དོན་ཀུན་ལྷུན་གྱིས་གྲུབ་གྱུར་ཅིག །དེ་ནས་འཇམ་དཔལ་ཞི་བ་བསྐྱེད་པ་ནི། །ཆོས་ཀུན་སྟོང་ཉིད་ནམ་མཁའ་ལྟ་བུའི་ངང་། །པད་ཉི་ཆུ་ཤེལ་དབང་པོའི་དཀྱིལ་འཁོར་སྟེང་། །སྔགས་ཀྱི་ཡི་གེ་བརྗོད་དང་འཕྲོ་འདུ་ལས། །རང་ཉིད་འཛམ་བུ་ནཱ་དའི་མདངས་འཛིན་པའི། །(༣བ)
ཡིད་འོང་གཞོན་ནུ་ཟུར་ཕུད་ལྔ་པ་ཅན། །ཕྱག་ཟུང་ཤེས་རབ་རལ་གྲི་ཨུཏྤལ་གྱི། །འདབ་སྟོང་རྒྱས་རྩེར་ཤེར་ཕྱིན་གླེགས་བམ་བསྣམས། །ཞབས་གཉིས་མི་ཕྱེད་རྡོ་རྗེ་སྐྱིལ་ཀྲུང་ཅན། །སྣ་ཚོགས་རིན་ཆེན་ཕྲེང་བའི་དོ་ཤལ་དང་། །རབ་བཀྲ་ལྷབ་ལྷུབ་དར་གྱིས་མངོན་པར་ཀླུབས། །ཐུགས་ཀའི་ཧཱུཾ་ལས་འོད་ཟེར་འཕྲོ་འདུ་ཡིས། །དམ་ཚིག་པ་དང་ཡེ་ཤེས་གཉིས་མེད་གྱུར། །མདུན་དུ་དཔག་བསམ་རྐང་འཐུང་ཡལ་འདབ་དང་། །གད་བུ་མངོན་པར་རབ་ཏུ་རྒྱས་པའི་དབུས། །མི་འཇིགས་གདོང་ལྔའི་ཁྲི་ལ་ཉི་མའི་གཉེན། །ཐེག་གསུམ་གདུལ་བྱའི་འཁོར་གྱིས་ཡོངས་བསྐོར་བའི། །བདག་མདུན་ཀུན་ལ་ཕྱི་ནང་གསང་བ་ཡིས། །མཆོད་ཚོགས་དངོས་བཤམས་ཡིད་ཀྱིས་ལེགས་སྤྲུལ་འབུལ། །རྒྱུད་ཚིག་དབྱར་གྱི་རྔ་གསང་ཆེར་བསྒྲགས་པས། །སྐལ་ལྡན་མདོངས་མཐའི་དགའ་སྟོན་རྒྱས་གྱུར་ཅིག །རྒྱུད་རྒྱས་བསྡུས་གང་རུང་སོང་རྗེས། སྔོན་དུས་རྒྱལ་བས་རི་བོ་བྱ་རྐང་དུ། །རྒྱུད་འདི་གསུངས་ཚེ་སྐུ་ལས་འོད་ཟེར་འབུམ། །རེ་རེའི་རྩེ་ལ་འདབ་ལྡན་པདྨའི་སྟེང་། །སྤྲུལ་པའི་སྐུ་རེས་ཕྱོགས་བཅུའི་འཇིག་རྟེན་དུ། །ཆོས་འཁོར་བསྐོར་ལྟར་བདག་གིས་འཇམ་དཔལ་གྱི། །ཆོས་འདི་བསྒྲགས་པས་སེམས་ཅན་ཐམས་ཅད་ཀྱི། །རྒྱུད་ལ་སྐྱེ་མེད་ཡོངས་སུ་ཐོབ་པ་དང་། །འཛིན་མེད་རང་གྲོལ་འགྱུར་བའི་རྒྱུར་གྱུར་ཅིག །སྐྱབས་འགྲོ་ནི། བདག་དང་མཁའ་མཉམ་ལུས་ཅན་མ་ལུས་ཀུན། །དེང་ནས་བཟུང་སྟེ་བྱང་ཆུབ་སྙིང་པོའི་བར། །དཀོན་མཆོག་རིན་ཆེན་གསུམ་ལ་སྐྱབས་འགྲོ་ཞིང་། །རྒྱ་ཆེན་བྱང་ཆུབ་མཆོག་ཏུ་སེམས་མཆོག་བསྐྱེད། །སེམས་ཅན་ཐམས་ཅད་བདེ་བ་དང་ཞེས་སོགས་ལན་གསུམ་བརྗོད། ཚོགས་ཞིང་(༤ན)
ནི། མདུན་དུ་རིན་ཆེན་ཁྲི་པད་ཉི་ཟླའི་སྟེང་། །བཅོམ་ལྡན་ཕྱག་རྒྱ་ཟིལ་གནོན་ཅོད་པན་དུ། །ཀུན་འདུས་རྡོ་རྗེ་སློབ་དཔོན་བཞུགས་པ་ལ། །དམ་ཚིག་ཡེ་ཤེས་གཉིས་སུ་མེད་པར་གྱུར། །ཨཱོཾ་བཛྲ་ས་མ་ཡ་ཧཱུཾ་ཛཿ རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་སྟོན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པ། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་བགེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་དུས་དང་དམ་པའི་ཆོས། །མ་ཆགས་སྤྱོད་ལ་རྗེས་ཡི་རང་། དག་པའི་མཐའ་གཞན་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདག་དང་མཐའ་ཡས་སེམས་ཅན་རྣམས། །དུས་གསུམ་བཞུགས་ལ་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །དེ་ནས་སྲུང་འཁོར་ནི། རང་ཉིད་འཇམ་དཔལ་གཞོན་ནུར་གསལ་བ་སྐད་ཅིག་གིས་ཕྱག་རྒྱ་ཆེན་པོ་ཟིལ་གནོན་ཞལ་གསུམ་ཕྱག་དྲུག་ཞབས་བཞི་བགྲད་པ། དུར་ཁྲོད་ཀྱི་ཆས་དང་གར་དགུའི་ཉམས་ཅན་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པའི་ཐུགས་ཀའི་ཧཱུཾ་ལས་ཁྲོ་བོའི་ཚོགས་གྲངས་མེད་པ་འཕྲོ་བར་གྱུར། དེ་ནས་རོལ་མོ་དབྱངས་དང་བཅས་ཏེ། ཧཱུཾ། བདག་ཉིད་ཁྲོ་རྒྱལ་ཐུགས་ཀ་ནས། །མཐིང་ནག་ཧཱུཾ་གི་འོད་ཟེར་ལས། །སྟོང་གསུམ་མཐོ་བའི་རབ་གང་ཞིང་། །རྔམ་སྐས་འཇིག་རྟེན་ཀུན་བཀང་ནས། །གནོད་མཛེས་ཁྲོ་བོ་མ་ཡིན་པའི། །གདུག་པ་གཡོ་འགུལ་མིང་ཡང་མེད། །(༤བ)
ཁྲོ་རྒྱལ་མཚོན་ཆ་མེ་རི་འབར། །འབར་བའི་མཚམས་ལས་མ་འདའ་ཞིག །ཨཱོཾ་སུམྦྷ་ནི་སུམྦྷ་ཧཱུཾ། གྲྀ་ཧྞ་གྲྀ་ཧྞ་ཧཱུཾ། གྲྀ་ཧྞ་པཱ་ཡ་གྲྀ་ཧྞ་པཱ་ཡ་ཧཱུཾ། ཨཱ་ན་ཡ་ཧོ༔ བྷ་ག་ཝཱ་ན་བིདྱ་རཱ་ཛ་ཡ་ཧཱུཾ་ཕཊ། སྲ་བརྟན་མི་གཡོ་རྡོ་རྗེའི་གུར་ཁང་དང་། །གཏུམ་དྲག་ཁྲོ་བོ་རོལ་པས་རབ་གཏམས་ཤིང་། །རྣོ་ངར་མཚོན་ཆ་ཁ་དོག་ལྔ་ལྡན་པའི། །དུས་མཐའི་མེ་ཡིས་བར་མཚམས་མེད་པར་ཁྱབ། །ཕཊ་རཾ་ཨེ་རཾ་ཛྭ་ལ་རཾ། ཁྲོ་བོ་དང་མཚོན་ཆ་མེ་རབ་ཏུ་འབར་བའི་གུར་ཁང་དུ་གྱུར། །རང་ཉིད་ཟིལ་གནོན་གསལ་བའི་སྤྱི་གཙུག་ཏུ། །འཁོར་ལོས་སྒྱུར་བའི་ཐུགས་ཀར་བྷྲུཾ་ཡིག་ལས། །གསེར་འཁོར་ལྟེ་བར་བཅས་སྟེང་ཉི་གདན་ལ། །ཕྱོགས་ཀྱི་གྲངས་ལྡན་ཧཱུཾ་ལས་ཁྲོ་བོ་བཅུ། །རབ་འཇིགས་མཐིང་ནག་བེ་ཅོན་ཞགས་པ་བསྣམས། །དབུས་སུ་རང་ཉིད་ཞི་བའི་ཉམས་ལྡན་པའི། །འཁོར་ལོས་སྒྱུར་རྒྱལ་ཕྱག་གཉིས་ཙཀྲ་འཛིན། །ཐུགས་ཀར་ཡེ་ཤེས་འཁོར་ལོ་འཁོར་བ་ཡིས། །རིགས་སྔགས་བྱད་སྟེམས་རྦོད་གཏོང་ཟོར་ཁ་དང་། །ལོག་འདྲེན་དགྲ་སྡེའི་གནོད་ཅིང་འཚེ་བ་སོགས། །སྟོང་གསུམ་ཁྲོ་རྒྱལ་ཀུན་ཀྱང་སྐྲག་བྱེད་པའི། །རྣོ་ངར་རྩིབས་ཀྱི་བར་དུ་ལྷག་མེད་གྱུར། །ཨཱོཾ་ཨཱཿཨུཥྞི་ཥ་བཛྲ་ཙཀྲ་ཝརྟི་སརྦ་ལོ་ཀི་ཀ་ལོ་ཀི་ཏ་རཾ་པ་ཡན་ཏྲ་མན་ཏྲ་ཏན་ཏྲ་ཧ་ན་ཧ་ན་ད་ཧ་ད་ཧ་པ་ཙ་པ་ཙ་ཀུ་རུ་ཀུ་རུ་སྨུ་རུ་སྨུ་རུ་ཨ་བྷི་ཥིཉྩ་ཨ་ཨཱཿ གཏད་མནན་སྦྱོར་བ་ལ་སོགས་པ་དག་མནན་བྱེད་པའི་བན་བོན་ཐམས་ཅད་མཱ་ར་ཡ་སོད་སོད། ཛ་ལ་བཟློག་ཕཊ་སྭཱཧཱ། ལོང་སྐབས་དང་བསྟན་པའི་བཟླ་བར་བྱའོ། །དེ་ནས་བཤགས་པ་ནི། རབ་ཡངས་བདག་མདུན་མཁའ་ལ་རིན་ཆེན་ཁྲིས། །ཆུ་སྐྱེས་རྟ་བདུན་དཀྱིལ་འཁོར་གདན་སྟེང་དུ། །རྩ་(༥ན)
བརྒྱུད་བླ་མ་ཡི་དམ་སྲུང་མར་བཅས། །དབྱར་དུ་ཆུ་འཛིན་འཁྲིགས་ལྟར་བཞུགས་པར་གྱུར། །དམིགས་མེད་མཁའ་ལྟར་དག་པ་ཁྱབ་པའི་སྐུ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །ཀུན་འདུལ་ཟིལ་གནོན་ཐུགས་དང་ཅི་འགལ་བ། ཁྲོ་གཏུམ་ཐུགས་རྗེ་ཅན་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །གསོད་བྱེད་རྒྱལ་མོའི་ཐུགས་དང་ཅི་འགལ་བ། །དབྱིངས་ལྡན་ཆགས་མེད་ཡུམ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །འབྱུང་བ་ས་མེ་རླུང་ཆུ་དངས་མ་ལས། །ཡ་མ་རཱ་ཛ་ཕྱག་ན་རྡོ་རྗེ་དང་། །རུས་སྦལ་རྔ་མོང་བྱ་ཁྱུང་རྒྱལ་པོ་རྣམས། །ཡེ་ནས་རྡོ་རྗེའི་རིགས་དང་རིན་ཅེན་རིགས། །ལས་ཀྱི་རིགས་དང་པདྨའི་རིགས་ཉིད་དེ། །རིགས་བཞི་ཁྲོ་བོའི་ཐུགས་དང་ཅི་འགལ་བ། །དྲེགས་པ་འདུས་བྱེད་སྐུ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། ཁྱུང་ཆེན་སྨུག་ནག་སྟག་ཆེན་རྔམ་པ་དང་། །སེང་ཆེན་བརྗིད་པ་དུག་སྦྲུལ་ནག་པོ་སྟེ། །རྒྱན་གྱི་ལྷ་བརྒྱད་ཐུགས་དང་ཅི་འགལ་བ། །དྲེགས་པ་སྟོབས་ཀྱི་ལྷ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །འཁོར་གྱི་གཤིན་རྗེ་ཕོ་མོའི་ཐུགས་དང་ཅི་འགལ་བ། །བསྟན་སྲུང་སོ་སོའི་སྐུ་ལ་བཟོད་པར་གསོལ། །དོན་དམ་ངང་ལ་དགེ་སྡིག་གཉིས་མེད་ཀྱང་། །དེ་ལྟར་མ་རྟོགས་གཟུང་འཛིན་དབང་གིས་ན། །ཉམས་ཆགས་འགལ་འཁྲུལ་གྱུར་པ་ཅི་མཆིས་པ། །གནོང་འགྱོད་མོས་པའི་སེམས་ཀྱིས་མཐོལ་ལོ་བཤགས། །ཐོགས་མེད་ནས་བསགས་རྩ་བ་ཡན་ལག་གི །དམ་ཚིག་ཉམས་ཆགས་ཉེས་ལྟུང་མ་ལུས་རྣམས། །དཀྱིལ་འཁོར་ལྷ་ཚོགས་ཀུན་ལ་བཟོད་པར་(༥བ)
གསོལ། །ཟིལ་གནོན་ཐུགས་དམ་བཞིན་དུ་སྤྱད་པར་བགྱི། །ཡིག་བརྒྱ་བརྗོད། དེ་ནས་བྱིན་དབབ་ནི། །ཧཱུཾ། བདེ་གཤེགས་རྒྱལ་བ་ཀུན་གྱི་བདག་ཉིད་ཆེ། །དྲག་པོ་ལས་ཀྱི་ལྷ་ཚོགས་དགོངས་སུ་གསོལ། །ཆོས་དབྱིངས་དྲག་པོ་ཨེ་ཡི་གཞལ་ཡས་ནས། །བཅོམ་ལྡན་ཕྱག་རྒྱ་ཟིལ་གནོན་ཡུམ་དང་བཅས། །རྩ་བའི་ལྷ་དྲུག་རྒྱན་ལྷ་བདག་པོ་གསུམ། །གཤེད་བཞི་མོན་བདུད་འཆི་བདག་སྒོ་སྲུང་བཅས། །དྲག་པོའི་ལས་མཛད་ཕོ་ཉ་དམ་ཅན་ཚོགས། །དཀྱིལ་འཁོར་ལྷ་ཚོགས་རྣམས་ཀྱིས་བྱིན་ཕོབ་ཅིག །བདག་ཅག་སེམས་ཅན་ལས་ཀྱིས་མནར་བ་ལ། །རེ་ཞིག་དཔུང་གཉེན་གཞན་ན་མ་མཆིས་པས། །ཐུགས་རྗེ་ཆེན་པོས་འགྲོ་ལ་བརྩེར་དགོངས་ལས། །བྱིན་ཆེན་མྱུར་དུ་དབབ་པའི་དུས་ལ་བབ། །འཇམ་དཔལ་ཁྲོས་པའི་རྒྱལ་པོ་འཁོར་དང་བཅས། །སྔགས་ཚིགས་ཤུག་པ་བརྡ་ཡིས་སྤྱན་འདྲེན་ན། །མི་དམིགས་ཆོས་ཀྱི་དབྱིངས་ནས་སྐུ་བཞེངས་ལ། །དྲག་པོའི་དཀྱིལ་འཁོར་འདི་ལ་བྱིན་ཕོབ་ཅིང་། །སྒྲུབ་མཆོག་རྣལ་འབྱོར་བདག་ལ་དབང་བསྐུར་སྩོལ། །སྒྲུབ་རྫས་དམ་པ་འདི་ལ་མཐུ་སྩོལ་ཅིག །དྲག་པོའི་འཕྲིན་ལས་མཛད་པའི་དུས་ལ་བབ། །བདག་ཅག་རེ་བའི་འབྲས་བུ་མཆིས་པར་མཛོད། །ཕྱི་ནང་གི་མཆོད་རྫས་རྣམས་བྱིན་གྱིས་བརླབ་པ་ནི། བདག་གི་ཐུགས་ཀའི་ཧཱུཾ་ལས་འོད་འཕྲོས། ཕུད་སྣོད་ལ་ཐིམ་པས་སྣོད་ཀྱི་མ་དག་པ་སྦྱངས། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བཅུད་ཤ་ལྔ་བདུད་རྩི་ལྔར་གནས་པའི་སྟེང་ན་ཧཱུཾ་དཀར་པོ་དེའི་འོད་ཟེར་གྱིས་ཕྱི་འབྱུང་བའི་བཅུད་བསྡུས། །ཡེ་ཤེས་ལྔའི་རང་བཞིན་གྱི་བདུད་རྩི་བཀུག །བདུད་རྩི་ལ་ཐིམ་པས་དངོས་འཛིན་སྦྱངས་ནས་ཡེ་ཤེས་ཀྱི་བདུད་རྩི་(༦ན)
མུ་ཏིག་དཀར་པོ་དྲི་མ་མེད་པ་ལྟ་བུར་གྱུར། ཨཱོཾ་ཨཱཿཧཱུཾ་མ་ཧཱ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཐཱ། བདག་གི་ཐུགས་ཀའི་ཧཱུཾ་གི་འོད་ཀྱིས་རཀྟའི་དངོས་འཛིན་སྦྱངས། བནྡྷ་ཀ་པཱ་ལ་བྷྲུཾ། སྣོད་བནྡྷ་ཡངས་ཤིང་རྒྱ་ཆེ་བའི་ནང་དུ་བཅུད་པདྨ་དམར་པོ་འདབ་མ་བརྒྱད་པའི་ལྟེ་བ་ལ་ར་དམར་པོ། དེ་ལས་རཀྟའི་རྒྱ་མཚོ་ཆེན་པོ་རྦ་ཀློང་འཁྲུག་ཅིང་འཕྱོ་བའི་སྟེང་དུ་ཡི་གེ་དམར་པོ་འོད་ཟེར་འཕྲོ་བར་གྱུར། དེ་ལས་འོད་ཟེར་གྱི་འཕྲོ་འདུའི་རཀྟའི་ངོ་བོ་བདུད་རྩིའི་རོ་མཆོག་བརྒྱད་དང་ལྡན་པ་ཟེར་མ་ལ་འདོད་ཡོན་གྱི་ལྷ་མོ་དཔག་ཏུ་མེད་པ་འཕྲོ་བར་གྱུར། ཨཱོཾ་ཨཱཿཧཱུཾ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ། བདག་གི་ཐུགས་ཀ་ནས་རཾ་ཡཾ་ཁཾ་གྱིས་གཏོར་མའི་དངོས་འཛིན་སྦྱངས་ཏེ་སྣོད་ཨ་ལས་བནྡྷའི་ནང་དུ་བཅུད་ཨཱོཾ་ཨཱཿཧཱུཾ་ཞུ་བ་ལས་བྱུང་བའི་འདོད་ཡོན་དྲུག་གི་ལྷ་མོར་གྱུར། །ཨཱོཾ་བྷ་ལིཾ་ཏ་ཏེ་ཛོ་བྷ་ལིཾ་ཏ་བྷ་ལ་བྷ་ཏི་གུཧྱ་ས་མ་ཡེ་སྭཱཧཱ། བདག་གི་ཐུགས་ཀའི་ཧཱུཾ་ལས་འོད་འཕྲོས། །གཏོར་མ་ལ་ཕོག །སྣོད་བྷྲུཾ་ལས་དུར་ཁྲོད་ཀྱི་གཞལ་ཡས་ཁང་གི་ནང་དུ་བཅུད་དཔལ་ཆེན་པོ་ཟིལ་གནོན་རྩ་བའི་ལྷ་དྲུག །རྒྱན་གྱི་ལྷ་བརྒྱད། སྤྲུལ་པ་གསུམ། གཤེད་བཞི། །མོན་བདུད་བཅུ་དྲུག །འཆི་བདག་བཅུ་གཉིས། སྒོ་སྲུང་དང་བཅས་པ་ལ་འདོད་ཡོན་གྱི་ལྷ་མོས་བསྐོར་བར་གྱུར། ཨཱོཾ་མ་ཧཱ་བྷ་ལིཾ་ཏ་ཏེ་ཛོ་བྷ་ལིཾ་ཏ་བྷ་ལ་བྷ་ཏེ་གུ་ཧྱ་ས་མ་ཡེ་སྭཱཧཱ། ཨ་ཀ་ཕ་ལ་ཨ་དྷུ་པུ། ཨ་ག་ན་སྥ་ར་ཎ་ཕཊ། བཾ་ཧ་ར་ཎ་ཧཱུཾ། ཨཱོཾ་ཨ་ཧ་ར་ཧཱུཾ། བཛྲ་དྷཱུ་པེ། པུཥྤེ། ཨཱ་ལོ་ཀེ །གྷནྡྷེ། ནཻ་ཝ་དྱ། ཤཔྟ་ཨཱཿཧཱུཾ། ཏིང་འཛིན་རྣམ་གསུམ་ནི། ཨྱེ་ཨྱེ་ཨྱེ། འཁོར་འདས་(༦བ)
ལམ་གྱིས་བསྡུས་པའི་ཆོས་རྣམས་ཀུན། །རང་རིག་འགྱུར་མེད་བྱང་ཆུབ་སེམས་མཆོག་སྟེ། །གསལ་སྟོང་གཉིས་མེད་སྐུ་གསུམ་གདོད་མའི་མགོན། །རབ་འབྱམས་ལྷ་ཚོགས་ལས་ཀྱི་ཨེ་རུ་གྱུར། །འབྱུང་བཞིའི་དཀྱིལ་འཁོར་བརྩེགས་སྟེང་ཀེང་རུས་ཀྱི། །ས་འཛིན་དབང་པོའི་རྩེ་མོར་གཞལ་ཡས་ཁང་། །བཀོད་ལེགས་རིན་ཆེན་ལས་གྲུབ་སྒོ་བཞི་པ། །རྟ་བབས་བརྒྱད་ལྡན་བནྡྷའི་ཕ་གུ་ལ། །བྲང་འགྲོའི་སྲད་བུས་གཅུས་པའི་དྲ་ཕྱེད་འཕྱང་། །འོབས་ཆེན་བཅུ་དྲུག་དུར་ཁྲོད་ཆེན་པོ་བརྒྱད། །རྡོ་ར་བསྐལ་པའི་མེ་དཔུང་རབ་འཁྲིགས་པའི། །དབུས་སུ་མཐིང་ནག་ཨེ་ཡི་ཕོ་བྲང་ལ། །ཟླ་གམ་དམར་པོ་སུམ་ལྡན་ཐོད་མཁར་བཞི། །ལྕགས་མཁར་བརྒྱད་དང་བཅུ་གཉིས་བར་ཁྱམས་བཅས། །སྣང་སྲིད་འཇིག་རྟེན་དྲེགས་པའི་ཚོགས་རྣམས་ཀྱི། །ཀ་གདུང་དྲལ་ལྕམ་ཡས་ཕུབ་སྔ་ཐེམ་ཅན། །མ་ལུས་གནམ་ལྕགས་འབར་པའི་གཟེར་གྱིས་བཏབ། །ཀླུ་གཉན་ས་བདག་ཧ་ལའི་ངོ་བོ་ཉིད། །རླུང་གི་ཟས་ཅན་འབུམ་སྡེ་དུར་འཆི་ཁྲི། །འཕར་འགྲོ་སྟོང་དང་ཕྱོགས་སྐྱོང་རུ་དྲ་ཀུན། །སྤྱི་འཆིངས་རབ་བསྣོལ་འཇིགས་པ་བཅུ་པ་བརྒྱད། །འདབ་སྟོང་ནམ་མཁའི་ནོར་བུའི་དཀྱིལ་འཁོར་སྟེང་། །རྒྱུ་རྐྱེན་དང་བྲལ་རང་ཉིད་སྐད་ཅིག་གིས། ཁྲོ་རྒྱལ་ཀུན་ཀྱང་སྐྲག་བྱེད་གཤིན་རྗེའི་གཤེད། །འཇམ་དཔལ་ཚེ་བདག་ཕྱག་རྒྱ་ཟིལ་གནོན་སྐུ། །རབ་ཁྲོས་མཐིང་ནག་དུག་ཆེན་འཁྱིལ་འདྲའི་མདོག །ཞལ་གསུམ་ཕྱག་དྲུག་ཞབས་བཞི་དོར་སྟབས་བགྲད། །གཡས་དཀར་གཡོན་དམར་མུན་ལྟའི་རྩ་བའི་ཞལ། །ཕྱག་དྲུག་འཁོར་ལོ་རལ་གྲི་རྡོ་རྗེ་འཕེན། །བེ་ཅོན་གཏུན་ཤིང་སྡིགས་མཛུབ་མེ་དཔུང་འཕྲོ། །ཞབས་(༧ན)
བཞི་གཡས་བསྐུམ་གཡོན་བརྐྱང་ཚུལ་གྱིས་བཞུགས། །ལྷ་ལམ་ཁྱབ་པའི་རྡོ་རྗེའི་གཤོག་པ་སོགས། །དཔལ་གྱི་ཆོས་བརྒྱད་དུར་ཁྲོད་རྒྱན་རྣམས་ཀུན། །བཀོད་ལེགས་བགྲང་ཡས་ཕྱང་ཕྲུལ་ལེགས་སྤུད་ཅིང་། །འཇིགས་རུང་གར་དགུའི་ཉམས་ཀྱི་རྣམ་འགྱུར་ཅན། །ཡེ་ཤེས་མེ་དཔུང་འབར་བའི་དབུས་ན་བཞུགས། །རྡོ་རྗེ་ཁྲོས་མ་སྔོ་ནག་གཡས་ཙིཏྟ། །གཡོན་པ་བྷན་དྷ་ཁྲག་བཀང་གཙོ་ལ་སྟོབ། །ཐུགས་ཀར་ཉི་དཀྱིལ་བམ་སྟེང་སྲས་མཆོག་ནི། །གཡས་པ་གསེར་འཁོར་གཡོན་པ་ཙིཏྟ་བསྣམས། །ཡ་མའི་ཐུགས་ཀར་བསིལ་གཟེར་གདན་སྟེང་དུ། །དྲེགས་པ་ལྗང་ནག་རྡོ་རྗེ་རྩེ་དགུ་གཡས། །གཡོན་པ་སྙིང་ཕྲེང་འཛིན་ཅིང་གསུམ་ག་ཡང་། །རིན་ཆེན་སྦྲུལ་དང་དུར་ཁྲོད་ཆས་ཀྱིས་བརྒྱན། །གང་ཐུགས་ཆུ་སྐྱེས་སྟེང་དུ་རུས་སྦལ་ནི། །སྲིད་གསུམ་ཚེ་སྲོག་ལྟོར་འཆང་ཁྲོ་ཞིང་རྔམ། །རབ་དཀར་ཁྱུང་ཆེན་རལ་གྲི་འདབ་གཤོག་ལ། །གནམ་ལྕགས་མཆུ་སྡེར་རྭ་བགྲད་སྤྱི་བོར་ལྡིང་། །ཕྲག་གོང་སྨུག་ནག་ཁྱུང་གཉིས་གཤོག་པ་བརྡེབ། །ནུ་ཁར་གདོང་ལྔའི་དབང་པོ་འགྱིང་ཞིང་རྔམ། །སོགས་ཁར་སྟག་ཟུང་ཤ་དང་ཁྲག་ལ་རོལ། །སྟ་ཟུར་སྦྲུལ་ནག་གདུག་པའི་ལྕེགཉིས་བསྐྱོད། །ལྷུན་པོ་ལྷར་བརྗིད་གཙུག་ཏུ་ཧཱུཾ་མཛད་དང་། །མགྲིན་པར་པདྨ་དབང་ཆེན་ལྟག་རྣམ་རྒྱལ། །དཔུང་པ་གཉིས་ལ་གཤིན་རྗེ་བདུད་རྩི་འཁྱིལ། །མཐིང་ནག་རབ་ཁྲོས་ནང་དུ་ཞལ་གཟིགས་སྲུང་། །བརླ་གཉིས་དབྱུག་སྔོན་གཞན་གྱིས་མི་ཐུབ་པ། །ལྟ་བར་མི་གཡོ་མགོན་དང་དཔྱི་མཚམས་ན། ཁམས་གསུམ་རྣམ་རྒྱལ་གསང་གནས་སྟོབས་པོ་ཆེ། །ལྗང་ནག་(༧བ)
ཕྱིར་གཟིགས་ཕ་རོལ་བྱས་པ་བཤིག །ཁྲོ་བོ་བཅུ་པོ་ཀུན་ཀྱང་འཁོར་ལོ་གཡས། །གཡོན་པ་མེ་དཔུང་རབ་འབར་སྡིགས་མཛུབ་མཛད། །མགུར་ནས་ལོང་བུའི་བར་དུ་ཚོན་གང་གི །ཁྲོ་ཆུང་མེ་རླུང་ལས་ཀྱི་འཁོར་ལོ་བསྐོར། །བཟོད་དཀའ་ཚ་གྲང་འབྱུང་ལྔའི་འཁྲུལ་འཁོར་གྱིས། །སྲིད་གསུམ་ཀུན་ལས་རྣམ་པར་རྒྱལ་བར་གྱུར། །སྤྲུལ་པ་གསུམ་བསྐྱེད་པ་ནི། གཙོ་བོའི་གཡས་ཟུར་སྐུ་སྤྲུལ་འཆི་བདག་ནི། །རྩ་ཞལ་སྔོ་ནག་གཡས་སེར་གཡོན་དམར་བ། །ཕྱག་དྲུག་ཐོད་དབྱུག་རལ་གྲི་དགྲ་སྟ་གཡས། །བནྡྷ་མདུང་དང་ལྕགས་ཀྱི་རི་རབ་གཡོན། །ལྕགས་ཁྲབ་གསོལ་ཞིང་དུར་ཁྲོད་ཆས་ཀྱིས་བརྒྱན། །ཞབས་བཞི་མ་ཧེ་སྔོ་ནག་སྟེང་དུ་འགྱིང་། །ཡུམ་ཆེན་གསོད་བྱེད་ཕྱག་གཉིས་ཏྲི་ཤུ་དང་། །ཐོད་པ་ཁྲག་གང་འཛིན་པས་ཡབ་ལ་འཁྱུད། །གཡོན་ཟུར་གསུང་སྤྲུལ་སྲོག་བདག་དམར་པོ་ནི། །ཞལ་གཅིག་ཕྱག་བཞི་ཞབས་གཉིས་གི་ལིང་ཆིབས། །གཡས་གཉིས་བེ་ཅོན་རྒྱུ་ཞགས་གཡོན་པ་ན། །ལྕགས་ཀྱུ་མདུང་བསྣམས་རུས་སྦལ་གཡང་གཞི་གསོལ། །དུར་ཁྲོད་ཆས་བརྒྱན་རོ་ལངས་སྤུ་གྲི་དང་། །ཀ་པཱ་ལ་འཛིན་ཡབ་ཀྱི་མགུལ་ནས་འཁྱུང་། །རྒྱབ་ཕྱོགས་ཐུགས་སྤྲུལ་ཚེ་བདག་ནག་པོ་ནི། །ཞལ་དགུ་བཅོ་བརྒྱད་ཕྱག་ལ་ཞབས་བཞི་བགྲད། །དབུས་གསུམ་མ་ཧེ་ཁྲོ་ཞལ་ཁྱུང་གི་དབུ། །གཡས་གསུམ་སྟག་དང་ཞི་ཞལ་རྨ་བྱའི་གདོང་། །གཡོན་གསུམ་སེང་གེ་དབང་ཞལ་དུར་བྱའི་མགོ །ཕྱག་དགུ་གཡས་ཀྱིས་རྡོ་རྗེ་ཞིང་དབྱུག་མདུང་། །འཁོར་ལོ་རལ་གྲི་དགྲ་སྟ་ཁ་ཊྭཱཾ་ག །གྲི་གུག་རྡོ་རྗེ་འབར་བའི་ཐོ་བ་བསྣམས། །གཡོན་དགུ་ཀ་པཱ་ལ་དང་འབྱུང་པོའི་བྱ། །(༨ན)
བེ་ཅོན་གཏུན་ཤིང་སྡིགས་འཛུབ་ལྕགས་ཀྱུ་དང་། །ཞགས་པ་མི་སྙིང་ཞིང་ལྤགས་རྒྱལ་མཚན་འཛིན། །དུར་ཁྲོད་ཆས་བརྒྱན་བདུད་མོ་གསོད་བྱེད་རྒྱལ། །ཙིཏྟ་ཁྲག་གང་ཐོད་འཛིན་ཡབ་ལ་འཁྱུད། །གཤེད་བཞི་བསྐྱེད་པ་ནི། ཐོད་པའི་མཁར་བཞིར་དྲེད་མོ་ལག་རྡེབ་དང་། །དོམ་ནག་དྲེའུ་རྟ་རྔ་མོ་གདན་སྟེང་དུ། །གཤིན་རྗེ་སྲིན་པོ་ཀླུ་བདུད་གནོད་སྦྱིན་བཞི། །སྨུག་སེར་དམར་ལྗང་རབ་ཁྲོས་ནག་པོའི་མདངས། །བཞི་གའི་ཕྱག་གཉིས་འཁོར་ལོ་བེ་ཅོན་འཛིན། །སྦྲུལ་དང་ཐོད་པའི་ཕྲེང་བའི་རྒྱན་གྱིས་སྤྲས། །སྲིན་མོ་རལ་གཅིག་བདུད་དང་གནོད་སྦྱིན་མ། །ཡབ་ལ་འཁྱུད་ཅིང་ཐོད་ཁྲག་ཞལ་དུ་སྟོབ། །མོན་པ་བཞི་བསྐྱེད་པ་ནི། ལྕགས་མཁར་ཕྱོགས་བཞི་དུང་ལྕགས་བསེ་གསེར་གྱི། །མོན་པ་སེང་སྟག་དྲེད་དང་ཁྱུང་མགོ་ཅན། །གཡས་པ་རི་རབ་གཡོན་པ་ཞགས་པ་བསྣམས། །བླ་རྐུན་གཡུ་དང་ཁྲག་གི་རལ་པ་ཅན། །སྙིང་ལ་གཟེར་འདེབས་མ་རྣམས་ཙིཏྟ་དང་། །བནྡྷ་འཛིན་ཅིང་རང་འདྲའི་ཡབ་ལ་འཁྱུད། །མཚམས་བཞིར་ཧེ་ལ་ཁྱབ་པ་འཛུམ་མེད་དང་། །སོ་འདར་འཁྲིགས་པ་རལ་པ་སྤྱི་བཅིངས་རྣམས། །སྔོ་སེར་དམར་ལྗང་མདོག་ལ་མུན་པའི་མདངས། །འཁོར་ལོ་རལ་གྲི་པར་བུ་ཁྲམ་ཤིང་བསྣམས། །བརྒྱད་ཀ་མེ་དཔུང་གློག་ཕྲེང་སྐར་མདའ་སོགས། །སྙིང་རྐུན་སྙིང་འབྱིན་གཟོར་འདེབས་དབུགས་སྡུད་མ། །སྣ་ཚོགས་རྒྱན་གྱིས་དབང་པོའི་གཞུ་ལྟར་བཀྲ །མི་སྙིང་ཐོད་པ་འཛིན་ཅིང་ཡབ་ལ་འཁྱུད། །འཆི་བདག་བཅུ་གཉིས་བསྐྱེད་པ་ནི། ཕྱི་རིམ་ལྕགས་མཁར་བཅུ་གཉིས་ཤར་ཕྱོགས་སུ། །བྷེ་ཝ་ས་ཏྭ་ནོར་བུ་དགེ་འཕེལ་གཉིས། །མཐིང་སེར་མདངས་ཅན་བེ་ཅོན་འཁོར་ལོ་བསྐོར། །ཤར་ལྷོར་སེར་ནག་འཇོམས་(༨བ)
བྱེད་ལྕགས་ཀྱུ་འཛིན། །ལྷོ་རུ་བྱེ་བ་དགུ་ཁྲི་གློག་འཕྲེང་ཟུང་། །ལྗང་དམར་མདོག་ཅན་དབྱུག་པ་རྒྱུ་ཞགས་འཕེན། །ལྷོ་ནུབ་ཟ་བྱེད་སྔོ་ནག་སྤུ་གྲི་ཐོགས། །ནུབ་ཏུ་གཏུམ་པོ་གང་བ་ཀུན་ཏུ་འཇོམས། །དུད་ཁ་དཀར་མདངས་ཁྲམ་ཤིང་མདའ་གཞུ་འཛིན། །ནུབ་བྱང་རལ་གཅིག་དམར་ནག་རལ་གྲི་འཕྱར། །བྱང་ཕྱོགས་སྦྲུལ་མགོ་ཀུན་འཛིན་ངད་སྟོབས་ལྡན། །སྔོ་སེར་ལྕགས་ཀྱི་མདུང་ཐུང་དགྲ་སྟ་འཛིན། །བྱང་ཤར་ཧོང་པན་སྲོག་འཛིན་བདུད་ཞགས་འཕེན། །དུར་ཁྲོད་ཆས་སོགས་འཇིགས་པའི་རྒྱན་གྱིས་སྤྲས། །བར་ཁྱམས་ཀྱི་ལྷ་བསྐྱེད་པ་ནི། ཕྱི་རིམ་ཁྱམས་སུ་ལས་ཀྱི་གཤིན་རྗེ་རྣམས། །ཤ་ཟ་ཀི་ཀང་མ་མོ་དྲེགས་པ་ཡི། །ཚུལ་འཛིན་སྣ་ཚོགས་མཚོན་ཐོགས་དགྲ་བགེགས་ཀྱི། །སྲོག་དབུགས་བླ་ཚེ་ཤ་དང་ཁྲག་ལ་རོལ། །སྒོ་བ་བཞི་བསྐྱེད་པ་ནི། སྒོ་བཞིར་དཀར་པོ་སྙིང་འབྱིན་མགོན་པོ་ནག །ཡབ་རྗེ་མུན་པའི་མགོ་ཅན་སྐུ་མཆོག་དམར། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན། །རང་མདོག་དང་མཚུངས་བེར་ཆེན་སྐུ་ལ་གསོལ། །ཕྱི་རོལ་འོབས་སྲུང་ནི། འོབས་སྲུང་འཇིགས་རུང་བཤན་པ་སྲོག་གཤེད་བདག །ཕྱོགས་བཅུར་ལས་བྱེད་ཕོ་ཉ་གཤིན་རྗེའི་ཚོགས། །མིག་གིས་བལྟ་བར་བཟོད་དཀའ་ཁྲོ་བོའི་ལུས། །མཁའ་ལ་རྒྱུ་སྐར་ཚོགས་ལྟར་ལྷུན་གྱིས་གྲུབ། །སྙན་གསན་དབབ་པ་ནི། ཨྱཻ། མི་རྟོག་ངང་ལས་ཐུགས་རྗེའི་སྐུ། །སངས་རྒྱས་སྐུ་ལྔའི་བདག་ཉིད་ཅན། ཁྱབ་བདག་ཡེ་ཤེས་ལྔ་ཡི་བདག །ཟིལ་གནོན་ལྷ་ཚོགས་དབྱིངས་ནས་བཞེངས། །བཛྲ་ས་མཱ་ཛཿ སྤྱན་འདྲེན་ནི། དད་པ་དང་ནི་དམ་ཚིག་གིས། །ཚུར་གཤེགས་ཁྲོ་རྒྱལ་གཤིན་རྗེའི་(༩ན)
གཤེད། །གདུག་པའི་དགྲ་བགེགས་བསྒྲལ་བའི་ཕྱིར། །ཐུགས་དམ་དབང་གིས་གཤེགས་སུ་གསོལ། །ཟིལ་གནོན་སྐུ་ཡི་གཡོན་ཕྱོགས་ནས། །ཡུམ་ཆེན་གསོད་བྱེད་རྒྱལ་མོ་ཡང་། །མ་མོ་ཡོངས་ཀྱི་གཙོ་མོ་སྟེ། །ཐུགས་དམ་དབང་གིས་གཤེགས་སུ་གསོལ། །ཟིལ་གནོན་ཐུགས་ཀྱི་དཀྱིལ་འཁོར་ནས། །ཡ་མ་རཱ་ཛ་གཤེགས་སུ་གསོལ། །ཡ་མའི་ཐུགས་ཀྱི་དཀྱིལ་འཁོར་ནས། །ཕྱག་ན་རྡོ་རྗེ་གཤེགས་སུ་གསོལ། །དྲེགས་པའི་ཐུགས་ཀྱི་དཀྱིལ་འཁོར་ནས། །རུས་སྦལ་ཁྲོས་པ་གཤེགས་སུ་གསོལ། །ཟིལ་གནོན་དབུ་ཡི་གཙུག་རུམ་ནས། །བྱ་ཁྱུང་རྒྱལ་པོ་གཤེགས་སུ་གསོལ། ཁམས་གསུམ་ཟིལ་གྱིས་གནོན་མཛད་པའི། །ཁྱུང་ཆེན་སྨུག་ནག་གཤེགས་སུ་གསོལ། །ཉམས་པའི་ཤ་ཁྲག་གསོལ་མཛད་པའི། །སྟགཆེན་རྔམ་པ་གཤེགས་སུ་གསོལ། །གདུག་པ་ཟིལ་གྱིས་གནོན་མཛད་པའི། །སེང་ཆེན་བརྗིད་པ་གཤེགས་སུ་གསོལ། །མཛེ་ཤུ་རྐང་ནད་འཇོམ་མཛད་པའི། །དུག་སྦྲུལ་ནག་པོ་གཤེགས་སུ་གསོལ། །ཟླ་གམ་དབང་གི་གཞལ་ཡས་ནས། །སྤྲུལ་པ་རྣམ་གསུམ་གཤེགས་སུ་གསོལ། །ཕོ་བྲང་ཕྱོགས་བཞིའི་ཐོད་མཁར་ནས། །གཤེད་པོ་བཞི་རྣམས་གཤེགས་སུ་གསོལ། །འཁོར་ལོ་འབར་བའི་རྩིབས་སྟེང་ནས། །མོན་པ་བཞི་དང་བདུད་པོ་བཞི། །ཡུམ་གྱི་ཚོགས་བཅས་གཤེགས་སུ་གསོལ། །ལྕགས་མཁར་འབར་བ་བཅུ་གཉིས་ནས། །འཆི་བདག་བཅུ་གཉིས་གཤེགས་སུ་གསོལ། །ཕོ་བྲང་ཕྱོགས་བཞིའི་སྒོ་བཞི་ནས། །སྒོ་བ་བཞི་རྣམས་གཤེགས་སུ་གསོལ། །སྒྲོལ་གིན་ལས་གཤིན་ཕོ་ཉའི་ཚོགས། །བྱེ་བ་ས་ཡ་གཤེགས་སུ་གསོལ། །ཨྱཻ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཨ་ཧྱེ་ཏི་ཛཿཧཱུཾ་བཾ་ཧོཿ ཨྱཻ། འཁོར་ལོ་འབར་བའི་ལྟེ་བ་ལ། །དུག་གསུམ་ཡི་དྭགས་མ་ཧེ་དང་། །ཕྱོགས་སྐྱོང་པདྨ་ཉི་ཟླའི་གདན། །ལྷུན་གྱིས་གྲུབ་པའི་དཀྱིལ་འཁོར་དུ། །(༩བ)
བརྐྱང་བསྐུམ་ཚུལ་གྱིས་བརྗིད་པར་བཞུགས། །སྤྲུལ་པ་གསུམ་སོགས་འཁོར་གྱི་ཚོགས། །གྲངས་མེད་རྣམས་ཀྱང་དཀྱིལ་འཁོར་འདིར། །དངོས་གྲུབ་བསྒྲུབ་དང་འགྲོ་དོན་ཕྱིར། །མི་འགྱུར་བརྟན་པར་བཞུགས་སུ་གསོལ། །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཏིཥྚ་བཛྲ། ཕྱག་བྱ་བ་ནི། ཨྱཻ། ཆོས་ཉིད་སྐྱེ་བ་མེད་པ་ལས༔ སྤྲོས་བྲལ་བདེ་ཆེན་དག་པའི་སྐུ༔ རང་བཞིན་གཉིས་མེད་དག་པའི་གསུང་༔ མ་སྒྲིབས་དོན་དམ་རྫོགས་པའི་ཐུགས༔ སྐུ་གསུང་ཐུགས་ཉིད་རྣམ་དག་གིས༔ མཐའ་ཡས་འགྲོ་བའི་དོན་མཛད་པ༔ ཁྲོ་རྒྱལ་འདུས་པ་ཀུན་གྱི་གཙོ༔ ཕྱག་རྒྱ་ཟིལ་གནོན་ལ་ཕྱག་འཚལ༔ དབྱིངས་ལས་ཡེ་ཤེས་རིག་པ་ཤར༔ རང་བཞིན་ལྷུན་གྲུབ་ཕྱག་རྒྱར་གསལ༔ གཙོ་བོའི་ཐུགས་དམ་སྐོང་མཛད་པ༔ གསོད་བྱེད་རྒྱལ་མོ་ལ་ཕྱག་འཚལ༔ ཟིལ་གནོན་ཐུགས་ཀྱི་དཀྱིལ་འཁོར་ནས༔ ཐུགས་ཀྱི་སྤྲུལ་པ་མངོན་བྱུང་བ༔ སྡེ་བརྒྱད་ཀུན་གྱི་སྦྱོར་བ་འཇོམས༔ ཡ་མ་རཱ་ཙ་ལ་ཕྱག་འཚལ༔ ཡ་མའི་ཐུགས་ཀྱི་དཀྱིལ་འཁོར་ནས༔ ཐུགས་ཀྱི་སྤྲུལ་པ་མངོན་བྱུང་བ༔ འཕྲིན་ལས་སྣ་ཚོགས་རྫོགས་མཛད་པའི༔ གསང་བདག་ཆེན་པོ་ལ་ཕྱག་འཚལ༔ དྲེགས་པའི་ཐུགས་ཀྱི་དཀྱིལ་འཁོར་ནས༔ ཐུགས་ཀྱི་སྤྲུལ་པ་མངོན་བྱུང་བ༔ དུག་ལྔ་རྩད་གཅོད་འབྱུང་ལྔ་སྐེམས༔ རུས་སྦལ་ཁྲོས་པ་ལ་ཕྱག་འཚལ༔ ཟིལ་གནོན་དབུ་ཡི་གཙུག་རུམ་ནས༔ ཐུགས་ཀྱི་སྤྲུལ་པ་མངོན་བྱུང་བ༔ ཁམས་གསུམ་ཟིལ་གྱིས་གནོན་མཛད་པའི༔ བྱ་ཁྱུང་རྒྱལ་པོ་ལ་ཕྱག་འཚལ༔ ཟིལ་གནོན་སྐུ་ཡི་དཀྱིལ་འཁོར་ནས༔ ཐུགས་ཀྱི་སྤྲུལ་པ་མངོན་བྱུང་བ༔ སྡེ་བརྒྱད་དྲེགས་པ་ཀུན་གྱི་གཤེད༔ རྒྱན་གྱི་ལྷ་བརྒྱད་ལ་ཕྱག་འཚལ༔ སྤྲུལ་པ་རྣམ་(༡༠ན)
གསུམ་གཤེད་པོ་བཞི༔ མོན་བཞི་བདུད་བཞི་ཡུམ་དང་བཅས༔ འཆི་བདག་བཅུ་གཉིས་སྒོ་སྲུང་བཞི༔ དཀྱིལ་འཁོར་ལྷ་ཚོགས་རྣམས་ལ་འདུད༔ ཨྱཻ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཨ་ཏི་པུ་ཧོ༔ པྲ་ཏི་པུ་ཧོ༔ ན་མཿསརྦ་ཏ་ཐཱ་ག་ཏ་མཧཱ་ཡོ་གི་ནི་ཨ་ལ་ལ་ཧོ༔ ཕྱི་མཆོད་ནི། གྲངས་མེད་ཡིད་འོང་རིན་ཆེན་སྣོད་ཡངས་སུ། །ཡན་ལག་བརྒྱད་ལྡན་ལ་འགྲན་ཉལ་འགྲོའི་དབུས། །པད་དཀར་ས་མོས་འདབ་སྟོང་བཞད་པ་འདི། །མཐོང་ཚེ་འཆི་མེད་དགའ་ཚལ་འོངས་སམ་སྙམ། །མ་ལ་ཡར་སྐྱེས་མེ་ཏོག་དོན་ཅན་དང་། །ཐལ་བའི་སྙིང་པོ་ལ་སོགས་དྲི་མཆོག་རྣམས། །འོད་ཀྱི་ཤིང་རྟས་བསྲེགས་པའི་དུད་སྤྲིན་ནི། །ནམ་མཁའི་གཉིས་འཐུང་སྟུག་པོ་འཁྲིགས་པ་བཞིན། །དུས་མཐའི་རླུང་གི་གྲོགས་པོ་ཕམ་བྱེད་པའི། །སྣང་གསལ་མར་མེ་ལྷོ་ཕྱོགས་རྟ་གདོང་འོད། །བཟོད་པར་མ་ནུས་རྟ་བདུན་དཀྱིལ་འཁོར་དེ། །མཐར་ཐུག་གཞུ་ཁྱིམ་བགྲོད་ཚེ་སླར་ཡང་ལྡོག །ཇི་སྙེད་གཏིང་མཐའ་དཔག་པར་དཀའ་བ་ཡི། །ཆུ་སྲིན་གྲོང་ཁྱེར་དག་ལ་བཟང་དྲུག་གིས། །ལེགས་པར་བྲན་ཏེ་རཏྣའི་སྣོད་ཡངས་སུ། །མངོན་པར་འགོད་པའི་བྱེད་པོ་ཨེ་མ་མཚར། །ལྷ་མིའི་འདོད་ཡོན་རོ་མཆོག་བརྒྱ་པ་སོགས། །རྣམ་མང་ཟས་ཀྱི་ཚོགས་ཀུན་གཅིག་བསྡུས་པའི། །ཞིམ་དགུའི་ཞལ་ཟས་རྨད་བྱུང་བཀོད་ལེགས་འདི། །རབ་མཛེས་རྒྱན་གྱི་ཕྲེང་བ་ཚར་དུ་དངར། །ཆར་དུས་དབྱར་གྱི་རྔ་གསང་བསྒྲགས་བ་ལྟར། །པི་ཝང་གླིང་བུ་སིལ་སྙན་ཨུདྡྷ་ཀ །གྲེ་འགྱུར་གླུ་དབྱངས་ལ་སོགས་སྒྲ་ཡི་ཚོགས། །བསྒྲགས་པས་གན་དྷརྦྷ་ཡི་ཁེངས་འཕྲོགས། །ལེགས་བྲིས་སྐེད་མེད་ལ་འཁུ་ཟུར་(༡༠བ)
མིག་ཅན། །སྒྱུ་རྩལ་དྲུག་ཅུའི་ཉམས་ལྡན་ཡིད་འཕྲོག་མ། །ལྷབ་ལྷུབ་གོས་དང་ཕྱང་ཕྲུལ་ལེགས་བརྒྱན་ནས། །འདོད་ཡོན་ལྔ་སོགས་མཆོད་པའི་ཚོགས་རྣམས་སྤྲོ། །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་པུཥྤེ་ནས། ཤཔྟ་པྲཏཱི་ཙྪ་སྭཱཧཱ། ནང་གི་མཆོད་པ་ནི། མྱོང་གྲོལ་དམ་རྫས་དང་སྦྱར་ཨ་མྲྀ་ཏ། །ཡེ་ཤེས་བདུད་རྩིའི་ངོ་བོར་བྱིན་བརླབས་འདི། །རྩ་བརྒྱུད་བླ་མ་ཡི་དམ་ལྷ་ཚོགས་དང་། །བསྟན་སྲུང་རྒྱ་མཚོའི་ཚོགས་དང་བཅས་ལ་འབུལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བླ་མ་བརྒྱུད་མཆོད་ནི། འཕགས་པ་འཇམ་དཔལ་འཇམ་དཔལ་བཤེས་གཉེན་དང་། །ཨྱོན་པདྨ་གཙུག་ལག་དཔལ་དགེ་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བལ་པོའི་རྒྱལ་པོ་གནུབས་ཆེན་སངས་རྒྱས་དང་། །ཡོན་ཏན་རྒྱ་མཚོ་ཡེ་ཤེས་རྒྱ་མཚོ་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། པདྨ་དབང་རྒྱལ་བླ་ཆེན་འཇམ་དཔལ་དང་། །རྒྱ་གར་རྡོ་རྗེ་ཆོས་ཀྱི་ཡེ་ཤེས་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཁྲོ་བོ་འབར་བ་དར་མ་རྒྱལ་མཚན་དང་། །ཡང་དག་རྡོ་རྗེ་ཕུག་པ་ཤེས་རྒྱལ་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྔོག་སྟོན་འབུམ་དང་གྲོ་སྟོན་བསོད་ནམས་འབུམ། །བླ་ཆེན་བློ་རྒྱལ་ཕག་སྟོན་ཤཱཀ་མགོན་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྤུག་སྟོན་ཆེན་པོ་མཁས་གྲུབ་ཆེན་པོ་དང་། །སློབ་དཔོན་ཆེན་པོ་སེ་སྟོན་ཆེན་པོ་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿ སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཟླ་བ་མགོན་པོ་མཉམ་མེད་ནུབ་དགོན་པ། །དབང་པོའི་སྡེ་དང་བསྟན་པའི་རྒྱལ་མཚན་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གསང་བདག་གཉིས་པ་འཁོན་སྟོན་ཆོས་ཀྱི་རྗེ། །བཀའ་གཏེར་བླ་བརྒྱུད་རྩ་བའི་བླ་མ་ལ། །དམ་རྫས་བདུད་རྩིིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །ཨཱོཾ་ན་མཿསརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། གྲུ་གསུམ་མཐིང་ནག་དཀྱིལ་འཁོར་ནས། །བཅོམ་ལྡན་ཕྱག་རྒྱ་ཟིལ་གནོན་དང་། །ཡུམ་ཆེན་གསོད་(༡༡ན)
བྱེད་རྒྱལ་མོ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྨུག་ནག་འབར་བའི་དཀྱིལ་འཁོར་ནས། །གནོད་བྱེད་ཡ་མ་རཱ་ཛ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ལྗང་ནག་འབར་བའི་དཀྱིལ་འཁོར་ནས། །དྲེགས་པ་ཕྱག་ན་རྡོ་རྗེ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བསྐལ་པ་རྦ་ཀློང་འཁྲུག་པ་ནས། །རུས་སྦལ་རྔམ་པ་མི་ཟན་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཁམས་གསུམ་ཟིལ་གྱིས་གནོན་མཛད་པའི། །སྤྲུལ་པའི་བྱ་ཁྱུང་རྒྱལ་པོ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཁྱུང་སྟག་སེང་གེ་རོ་ཉེ་ཟུང་། །སྤྲུལ་པ་རྒྱན་གྱི་ལྷ་བརྒྱད་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྐུ་གསུང་ཐུགས་ཀྱི་སྤྲུལ་པ་སྟེ། །ལས་ཀྱི་བདག་པོ་རྣམ་གསུམ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཡ་མ་རཱ་ཛ་ལ་སོགས་ཏེ། །གཤེད་བཞི་ཡུམ་དང་བཅས་པ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དུང་གི་མོན་པ་ལ་སོགས་ཏེ། །མོན་བཞི་མོན་མོར་བཅས་པ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཧེ་ལི་ཁྱབ་པ་ལ་སོགས་ཏེ། །བདུད་བཞི་བདུད་མོར་བཅས་པ་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། བྷེ་ཝ་ས་ཏྭ་ལ་སོགས་ཏེ། །ལས་ཀྱི་འཆི་བདག་བཅུ་གཉིས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྒོ་བཞི་བསྲུང་བའི་ལས་མཛད་པ། །དྲག་པོའི་སྒོ་བ་བཞི་རྣམས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དཔལ་ཆེན་བཀའ་ཉན་ཕོ་ཉའི་ཚོགས། །མ་(༡༡བ)
གཤིན་དྲེགས་པའི་འཁོར་རྣམས་ལ། །དམ་རྫས་བདུད་རྩིའི་མཆོད་པ་འབུལ། །བཞེས་ནས་མཐུ་དབང་དངོས་གྲུབ་སྩོལ། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དངོས་གྲུབ་བླང་བ་ནི། ཨཱོཾ་ཨཱཿཧཱུཾ། སླར་ཡང་རིགས་འཛིན་སྨྲ་བའི་འབབ་སྟེགས་ཁར། །བདེ་ཆེན་བདུད་རྩིའི་རོ་མཆོག་མྱང་བ་ཡིས། །ཟིལ་གནོན་སྐུ་གསུང་ཐུགས་ཀྱི་དངོས་གྲུབ་རྣམས། །ཐོགས་པ་མེད་པར་མྱུར་དུ་སྩལ་དུ་གསོལ། །ཨཱོཾ་ན་མཿསརྦ་ཏ་ཐཱ་ག་ཏ་ཀཱ་ཡ་སིདྡྷི་ཨཱོཾ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། རཀྟ་ནི། གདུག་ཅན་དགྲ་བགེགས་ཁྲག་གི་དངས་མའི་མཚོར། །མཁའ་དབྱིངས་པདྨ་རཀྟའི་འབབ་ལྡན་ཀུན། །གཅིག་བསྡུས་མཚམས་སྤྲིན་ལ་འགྲན་དབུ་འཕྲེང་དང་། །རབ་འཇིགས་རྦ་རླབས་ཆེར་གཡོའི་ཚོགས་རྣམས་འབུལ། །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་རཀྟ་པཱུ་ཛ་ཁཱ་ཧི། གཏོར་མ་འབུལ་བ་ནི། ཞིང་བཅུ་བསྒྲལ་པའི་ཤ་རུས་དབང་ལྔའི་རྡུལ། །རབ་བརྩེགས་དམར་ཆེན་བྷ་ལིཾ་སྤྲིན་ཆེན་དབང་། །རིན་ཆེན་སྣ་བཞི་ཀུན་བཟང་མཆོད་སྤྲིན་དུ། །དམིགས་ཏེ་ཟིལ་གནོན་འཁོར་དང་བཅས་ལ་འབུལ། །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་བྷ་ལིཾ་ཏ་པཱུ་ཛ་ཁཱ་ཧི། སྦྲེང་མཆོད་ནི། དུག་ལྔའི་བདུད་རྩི་ཆེ་སྦྱར་ཡེ་ཤེས་ལྔ། །བསྒྲུབ་རྫས་བྱང་སེམས་མཾ་ས་རཀྟ་ཆུ། །དྲི་ཆེན་གྷོ་ཀུ་ད་ཧ་ན་སྦྱར་འདི། །འབུལ་གྱིས་དབྱིངས་ཐིམ་ཡོངས་ལ་ཁྱབ་གྱུར་ཅིག །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ནང་གི་འདོད་ཡོན་ནི། དུར་ཁྲོད་དབུས་སུ་ཚིལ་ཆེན་སྣང་འོད་འབར། །ཞིང་ལྤགས་བླ་བྲེས་འཕན་གཏིབས་རྒྱུ་མའི་འཕྲེང་། །ཀླད་པ་བྱང་སེམས་རྡོ་རྗེ་ལྷ་བ་ཤ །གསང་བ་དུར་ཁྲོད་སྣ་ལྔའི་མཆོད་པ་འབུལ། །ཨྱེ་ཀ་ཧེ་དུན་ཡ་མ་སྙིང་(༡༢ན)
ཁྲག་ར་མ་ཙ་ཡ་མཧཱ་མཾ་ས་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། མཧཱ་བྷ་སུ་ཏ་ཁཱ་ཧི། མཧཱ་གོ་རོ་ཙ་ན་ཁཱ་ཧི། མཧཱ་ཀེཾནྲྀ་ཏི་ཁཱ་ཧི། རང་སྣང་ཤེས་རབ་ཨེ་གསང་ཆུ་གཏེར་ཆེ། །ཐབས་ཀྱི་དྲན་པའི་ཀ་བའི་ལྷུན་པོ་ཡིས། །ལེགས་པར་བསྲབས་ལས་བྱང་སེམས་བདུད་རྩི་མཆོག །འདུ་འཕྲོད་ཐོན་པའི་བདེ་ཆེན་རྒྱས་གྱུར་ཅིག །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་མུ་དྲ་པཱུ་ཛ་ཁཱ་ཧི་ཧོཿ དེ་ནས་བསྟོད་པ་ནི། རབ་འབྱམས་དུས་གསུམ་རྒྱལ་བ་མ་ལུས་པའི། །ཇི་སྙེད་གསང་གསུམ་ཡོན་ཏན་ཕུང་པོའི་ཚོགས། །མི་ཟད་སྐུ་གསུམ་ཁྲོ་རྒྱལ་གར་ཉམས་ཀྱིས། །རྒྱ་ཆེན་སྲིད་གསུམ་ལོག་འདྲེན་འཇོམས་ལ་བསྟོད། །ཞལ་ཁྱིམ་ཐུན་མཚམས་དུས་ཀྱི་མུན་པ་ལ། །དམར་ཟླུམ་སྤྱན་གྱི་གློག་སྟོང་དྲག་འཁྱུག་ཅིང་། །འཇིགས་རུང་གསུང་གི་དབྱར་གྱི་རྔ་བོ་ཆེ། །རབ་སྒྲོག་གནམ་ལྕགས་རྡོ་རྗེའི་ཟེགས་མ་འབབ། །ཨིནྡྲ་ནཱི་ལིའི་འཁྲི་ཤིང་བསྐྱོད་འདྲ་བའི། །ཕྱག་དྲུག་རྣོ་ངར་ཤསྟྲ་བཏབ་ཙམ་གྱིས། །འཇིག་རྟེན་འདས་དང་མ་འདས་ཁྲོ་རྒྱལ་ཀུན། །སྐྲག་སྟེ་སླར་ཡང་ཁྱོད་ཀྱི་བྲན་དུ་མཆིས། །རེག་བྱེད་གྲངས་ལྡན་བགྲོད་བྱེད་པད་གཉེན་སྟེང་། །མི་སྡུག་སྒྱུ་རྩལ་གར་གྱི་རྣམ་འགྱུར་འཆང་། །རྡོ་རྗེ་འབར་བའི་ཁྱུང་གཤོག་གདངས་པ་ཡིས། །སྟོང་གསུམ་འཇིག་རྟེན་འདི་ཡང་ཁེངས་སམ་སྙམ། །ཆོས་དབྱིངས་ཡེ་ཤེས་ངོ་བོ་རིགས་བརྒྱའི་བདག །མཚན་དཔེ་རྒྱན་ལྡན་བདེ་ཆེན་སར་འགྱིང་ཡང་། །སྲིད་གསུམ་འདི་ན་དཔེ་བྲལ་དྲག་པོའི་སྐུར། །སྟོན་མཛད་ཚེ་བདག་ནག་པོ་ཁྱོད་ལ་བསྟོད། །དངོས་འཛིན་མཚན་བྲལ་ཡེ་ནས་ཀ་དག་མཁར། །མ་གདོན་འབུམ་(༡༢བ)
སྡེའི་མཚན་རྒྱུའི་གཉིས་སྐྱེས་ཚོགས། །འཇོམས་མཛད་བདེ་ཆེན་པད་ཚལ་རྒྱས་པའི་ཡུམ། །རྡོ་རྗེ་ཁྲོས་མ་བཅུ་གཉིས་བདག་པོར་བསྟོད། །རྣམ་ཤེས་ཕུང་པོ་ཡེ་དག་རྡོ་རྗེའི་རིགས། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །ཁྲོ་རྒྱལ་མཐུ་སྟོབས་སྦྱོར་བ་མེ་སྦྱིན་སྐྱེས། །འཇིགས་མཛད་སྲས་མཆོག་གཙུག་ན་ཟླ་བར་བསྟོད། །ཚོར་བའི་ཕུང་པོ་རྣམ་དག་རིན་ཆེན་རིགས། །གནོད་སྦྱིན་བདུད་དང་རྒྱལ་བཙན་ཐེའུ་རང་གཉན། །མུ་སྟེགས་ལས་ཀྱི་སྦྱོར་བའི་དུ་བའི་ཏོག །ཞི་མཛད་དྲེགས་པ་སིདྡྷའི་བདག་པོར་བསྟོད། །འདུ་བྱེད་ཕུང་པོ་རྣམ་དག་ལས་ཀྱི་རིགས། ཁམས་གསུམ་སྐྱེ་འགྲོའི་སྲོག་དང་བཀྲག་མདངས་ཚེ། །འབྱུང་བའི་དངས་མ་དབང་པོའི་བུང་བ་ཀུན། །སྡུད་མཛད་རུས་སྦལ་པུཎྜ་རཱི་ཀར་བསྟོད། །འདུ་ཤེས་ཕུང་པོ་རྣམ་དག་པདྨའི་རིགས། །གདུག་ཅན་ཀ་དྲུ་བུ་དང་ཀླུ་བདུད་ཀྱི། །མཛེ་སོགས་ཉེར་འཚེའི་སྦྱོར་བ་འགྲམ་ཐུང་མགོ །འགེམས་མཛད་ཁྱུང་ཆེན་འཕྲོག་བྱེད་དབང་པོར་བསྟོད། །སྡེ་བརྒྱད་དྲེགས་པ་རྦོད་གཏོང་རིག་སྔགས་དང་། །ཚ་བའི་དབལ་སོགས་གནོད་བྱེད་བྲག་གི་རི། །ཕྱེ་མར་འཐག་མཛད་གཟུགས་ཀྱི་སྤྲུལ་བསྒྱུར་ཅན། །རྒྱན་གྱི་ལྷ་བརྒྱད་ནམ་མཁའི་ཐོ་བར་བསྟོད། །དུག་གསུམ་རྣམ་དག་སྐུ་གསུང་ཐུགས་ཀྱི་གར། །རྣམ་འགྱུར་ཅིར་ཡང་སྟོན་པའི་ཁྲོ་བོའི་གཟུགས། །མནན་བཤིག་བསད་པའི་ལས་ཀྱིས་མཐའ་སྡུད་པའི། །ལས་ཀྱི་གཤིན་རྗེ་བདག་པོ་གསུམ་ལ་བསྟོད། །ཉོན་མོངས་བཞི་དག་སྤྱི་བོ་མགྲིན་པ་དང་། །སྙིང་ག་ལྟེ་བའི་རྩ་ཆེན་བསྲུང་སྐྱོབ་ཅིང་། །དགྲ་བགེགས་རྩ་འཁོར་བདུད་བཞི་རང་གཤེད་དུ། །དབབ་མཛད་ལས་ཀྱི་གཤེད་པོ་བཞི་ལ་བསྟོད། །ཚོགས་བརྒྱད་(༡༣ན)
སྐྱེ་མཆེད་བཅུ་གཉིས་ཡེ་དག་པའི། །ལོག་འདྲེན་དགྲ་སྡེའི་གཤེད་མ་མོན་བདུད་བརྒྱད། །འཆི་བདག་བཅུ་གཉིས་བདག་ལྟ་སྟོང་བའི་ངང་། །རང་རིག་ལྷར་གསལ་སྒོ་བ་བཞི་ལ་བསྟོད། །མ་བཅོས་རང་བཞིན་ལྷུན་གྲུབ་དཀྱིལ་འཁོར་དུ། །འཁོར་ལོའི་མགོན་གྱིས་གང་འཚམ་ལས་ཀྱི་ཕྱིར། །རབ་སྤྲོས་བརྗོད་བྲལ་སྤངས་མེད་ལྷ་ཚོགས་ལ། །སྒོ་གསུམ་དང་བའི་ཡིད་ཀྱིས་ཕྱག་འཚལ་བསྟོད། །དེ་ནས་བཟླས་པ་བྱ་བ་ནི། ཕྱི་ནང་གསང་གསུམ་ཡང་གསང་དང་བཅས་པའི་བཟླས་ཐབས་ལས། དང་པོ་ནི། ཐུགས་ཀར་ཉི་མའི་སྟེང་དུ་ཧཱུཾ་གི་མཐར། །སྐུ་ཡི་སྔགས་ལས་འཇའ་ཚོན་ལྟ་བུའི་འོད། །བ་སྤུའི་བུ་ག་ནས་ཐོན་སྡིག་སྒྲིབ་ཀུན། །བ་མོར་ཉི་མ་ཤར་བཞིན་དག་པར་གྱུར། །ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། གཉིས་པ་ནི། བདག་ཉིད་ལྷར་གསལ་ལྗགས་ཀྱི་རྩེ་མོ་ལས། །འོད་ཟེར་མེ་དཔུང་ཚ་ཚ་ལྔར་འཕྲོས་པས། །ལས་ངན་བག་ཆགས་བར་དུ་གཅོད་པ་ཀུན། །བྱ་སྒྲོ་མེ་ལ་བསྲེགས་པ་ལྟ་བུར་གྱུར། །ཨྱེ་མྱགས་ཡ་རྔུབས་མུགས་ཤག་ཀ་དུན། གསུམ་པ་ནི། ཐུགས་ཀར་མཐིང་ནག་ཧཱུཾ་ལས་སྔགས་འཁོར་ནི། །ཨིནྡྲ་ནཱི་ལའི་འཕྲེང་བ་ལྟ་བུ་ལས། །མགལ་མེའི་འཁོར་ལོ་དང་མཚུངས་འོད་ཟེར་གྱིས། །སྡིག་སྒྲིབ་སྦུར་མ་མེ་ལྕེས་བསྲེགས་ལྟར་གྱུར། །ཨྱེ་དུན་ཀ་ཡཾ། བཞི་པ་ལ་བསྙེན་པར་བཟླ་བ་དང་། དྲག་པོར་བཟླ་བའི་ལུགས་གཉིས་ལས། །དང་པོ་ནི། བདག་ཉིད་ཁྲོ་རྒྱལ་ཕྱག་རྒྱ་ཟིལ་གནོན་དུ། །གསལ་བའི་ཙིཏྟ་རིན་ཆེན་ཟ་མ་ཏོག །ཉི་མའི་གདན་ལ་ཡེ་ཤེས་སེམས་དཔའ་ནི། །སྐུ་མདོག་སྨུག་ནག་ཐུགས་ཀར་སཱུཪྱའི་(༡༣བ)
སྟེང་། ཁ་དོག་ལྔ་ལྡན་ཧཱུཾ་ལས་སྔགས་ཀྱི་ཕྲེང་། །གཡས་སུ་འཁོར་ལོས་འོད་ཟེར་འཕྲོས་པ་ཡིས། །ཡེ་ཤེས་སེམས་དཔའི་ཞལ་བརྒྱད་རང་གི་ལྕེ། །ཆུ་སྐྱེས་ཧྲཱིཿལ་སྔགས་ཀྱིས་བསྐོར་བར་ཕོག །དེ་ལས་འོད་འཕྲོས་ཀླད་ཁང་ཟླ་བའི་སྟེང་། །ཨཱོཾ་ལས་སྔགས་ཕྲེང་བསྐོར་ལ་ཕོག་པ་ཡིས། །ལུགས་བཟློག་ཏུ་འཕྲོས་མགལ་མེའི་འཁོར་ལོའི་མཐུས། །སྡིག་སྒྲིབ་ཀུན་སྦྱངས་དངོས་གྲུབ་རྣམ་གཉིས་ཐོབ། །སེམས་ཅན་དོན་བྱས་མཐུ་དཔལ་གཟི་མདངས་ཀུན། །རྟ་བདུན་འབུམ་གྱི་འོད་ལྟར་རྒྱས་པར་གྱུར། །ཕྱིར་འཕྲོས་དགྲ་དང་བགེགས་རྣམས་ཐལ་བར་བརླག །འཇིགས་མེད་རྡོ་རྗེ་ཁྲོ་བའི་སྲུང་བར་གྱུར། །ཨོཾ་ཨྱེ་ཨྱེ་ཨྱེ། ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་ཡེ། ཀཱ་ལ་རཱུ་པ་ཀ་པ་ཡེ། ཧྲཱི་སྟི་ཨ་པ་ཡེ། ཨ་ཨཱ་ནེ་ཨ་ནེ། ཨུ་ཨཱུ་ནེ་ཨུ་ནེ། དུ་དཱུ་ནེ་དུ་ནེ། ཨ་ཨི་ཨུ་ཨེ་ཨོ་ཨཾ། ར་རཱི། ལ་ལཱི། དུ་རུ་ཡེ། བྱ་ཙ་ཡེ། སིང་ཧ་ཡེ། ཧྲི་ད་ཡེ། བེ་ཏ་ཡེ། ཙི་ཏ་ཡེ། ཧ་ལ་ཡེ། མུ་ཀ་ཡེ། ཨུ་ཨུ་ནེ། ཨུ་ཨུ་ནེ། བྱི་ཏྲི་ཏ། ཨ་ཨ་ན་ན། ཡ་མ་རཱ་ཛ། ཡ་མ་རཀྴ །ཡ་མ་རཀ་ཨ། ཡ་མ་རཀྵ། པེ་ཏ་ལི། ཀྲོ་ཏི་ཤྭ་རི། མ་མ་ཨེ་ཀ་ཛ་ཏི། དེ་མ་ཁ་ལ་བཾ་རིལ། རུ་ལུ་རུ་ལུ། །ཤྲཱི་བཛྲ་ཀྲོཏ །ཡ་མ་ཀརྨཱ་རོ་ཥ་ཎ། ཀྲྀ་ཏ་ཙན་ཏ། རཀྴ་མོན་ཏ་ཨཱཿཧཱུཾ་ཛཿ ཕྱི་མ་དྲག་པོར་བཟླ་དང་རྣོ་འདོན་སྔགས། །སྟོང་སྲོག་སྒོས་སྲོག་གདགས་སོགས་ཟབ་མོའི་གནད། །བརྒྱུད་ལྡན་བླ་མའི་གསུང་ལས་སྩལ་མིན་པ། །ཡི་གེར་འབྲི་བ་མཁའ་འགྲོའི་བཀའ་རྒྱས་གདམས། །དེ་ནས་གསོལ་བ་གདབ་པ་ནི། བདེ་གཤེགས་རྒྱལ་བ་ཞི་ཁྲོའི་ལྷ་ཚོགས་ཀྱི། །མཐུ་སྟོབས་གཅིག་བསྡུས་འཇམ་དཔལ་གཤིན་(༡༤ན)
རྗེའི་གཤེད། །ཕྱག་རྒྱ་ཟིལ་གནོན་འཁོར་དང་བཅས་པ་རྣམས། །རྣལ་འབྱོར་བདག་ལ་དེང་འདིར་དགོངས་སུ་གསོལ། །རྟག་ཏུ་ལུས་ནི་ཁྱོད་ཀྱི་སྐུར་བསྒོམ་ཞིང་། །ངག་ནི་གསང་སྔགས་ཟབ་མོ་བསྙེན་ཅིང་བསྒྲུབས། །ཡིད་ནི་བདེ་སྟོང་ཏིང་འཛིན་ལ་རོལ་ན། །དངོས་གྲུབ་བསྒྲུབ་པའི་འབྲས་བུ་དུས་ལ་བབ། །གནས་སྐབས་འཕྲིན་ལས་རྣམ་བཞིའི་ཚོགས་ཀུན་དང་། ཁྱད་པར་སྲུང་བཟློག་གསད་མནན་བསྲེག་འཕང་སོགས། །མངོན་སྤྱོད་དྲག་པོའི་ལས་རྣམས་མ་ལུས་པ། །མྱུར་འགྲུབ་སྲིད་གསུམ་ཀུན་ལས་རྒྱལ་བར་མཛོད། །མཐར་ཐུག་ཐེག་པ་རིམ་དགུའི་ཡང་རྩེ་མཆོག །སྤྲོས་བལ་ཨ་ཏི་ཆེན་པོའི་ལྟ་བ་དང་། །རིམ་གཉིས་ཟབ་ལམ་ཐབས་ཤེས་ཟུང་འབྲེལ་དུ། །བསྒོམས་པས་ཀུན་བཟང་གདོད་མའི་སར་བགྲོད་ཤོག །གཏེར་བདག་མཆོད་པ་ནི། མཐུ་ཆེན་སྡེ་བཞིའི་གཏོར་མ་དང་གཏོར་སྣོད་སོགས་མཁས་པའི་ཕྱག་ལེན་ལྟར་བཤམ། རོལ་མོ་དབྱངས་དང་བཅས་པས་འདི་སྐད་དོ། །མཚོ་སྐྱེས་རྡོ་རྗེ་གནུབས་བན་ལོ་ཙཱ་བ། །རྡོ་རྗེ་འོད་འབར་ལ་སོགས་སྤྱན་སྔ་རུ། ཁས་བླངས་དམ་ལྡན་མཐུ་ཆེན་སྡེ་བཞི་པོ། །ཐོགས་པ་མེད་པར་གནས་འདིར་གཤེགས་སུ་གསོལ། །བཛྲ་ཨཾ་གུ་ཤ་ཛཿཛཿ དགྲ་བགེགས་ཤ་ཁྲག་ས་འཛིན་ལྟ་བུར་སྤུངས། །དོན་སྙིང་ཁྲག་གི་འབབ་ལྡན་མཚོ་རུ་འཁྱིལ། །སྣ་ཚོགས་རུས་པས་ནོར་འཛིན་ཁྱོན་ཀུན་ཁྱབ། །གསུར་ཆེན་དུད་པ་ཞུན་ཆེན་མར་མེ་དང་། །སྨན་རཀ་གཏོར་གསུམ་བདུད་རྩི་བྱིན་བརླབས་འདི། །མཐུ་ཆེན་བདུད་བཙན་ཟུང་གི་སྤྱན་ལམ་དུ། །འདོད་དགུར་སྤྱོད་ལ་ཐོགས་མེད་འཕྲིན་(༡༤བ)
ལས་སྒྲུབས། །རབ་དཀར་གཙང་མར་སྦྱར་བའི་བཤོས་བུ་ལ། །སྣ་ཚོགས་བཟང་པོའི་སྨན་སོགས་རྫས་ཀྱིས་བཀང་། །ཡིད་འོང་གཟུགས་མཛེས་རྒྱན་གྱིས་ལེགས་པར་སྤུད། །དྲི་ཞིམ་སྤོས་དང་གཙང་མའི་ཡོན་ཆབ་དང་། །སྒྱུ་རྩལ་ལས་ཀྱི་སྤྲུལ་བསྒྱུར་གར་ལ་སོགས། །འདོད་ཡོན་ལྔ་ལྡན་མཆོད་པ་དམ་པ་འདི། །བཀའ་ཉན་ལྷ་ཀླུ་ཟུང་གི་སྤྱན་ལམ་དུ། །འདོད་དགུར་སྤྱོད་ལ་ཐོགས་མེད་འཕྲིན་ལས་སྒྲུབས། །ན་མཿསརྦ་ཏ་ཐཱ་ག་ཏ་སོགས་ཀྱིས་གཏོར་མ་འབུལ། །དེ་ནས་བསྟོད་ཅིང་འཕྲིན་ལས་བཅོལ་བ་ནི། སྟོབས་ཀྱི་ཤུགས་འཆང་རྟ་དཀར་གདན་སྟེང་དུ། །ཞི་ཁྲོའི་ཉམས་ལྡན་རབ་དཀར་ལྷ་མཆོག་དཔལ། །ལྷབ་ལྷུབ་གོས་དང་འཇམ་དཀར་དར་ཐོད་ཅན། །སྲིད་རྩེར་བསྙེག་འདྲའི་དར་དཀར་རུ་མཚོན་འཕྱར། །སྟག་རལ་གཟིག་ཤུབས་རྐེད་བཅིངས་མཐུ་ལྡན་ཁྱོད། །སྔོན་གྱི་དམ་ཚིག་རྗེས་དགོངས་དགྲ་དཔུང་ལ། །མི་མཐུན་རྒྱུ་ཐུམས་སྙིང་གཟེར་ཚོགས་རྣམས་ཐོང་། །བཅོལ་བའི་ལས་ཀུན་ཐོགས་མེད་སྒྲུབ་པར་མཛོད། །ནོར་བུའི་འཁྲི་ཤིང་ལས་གྲུབ་ས་འཛིན་ལྟར། །མདོག་དམར་དར་གྱི་ཐོད་དང་ལྷབ་ལྷུབ་གོས། །སྟག་རལ་གཟིག་ཤུབས་རྐེད་བཅིངས་རུ་མཚོན་འཕྱར། །བཙན་གྱི་ཞགས་པ་དམར་པོ་གློག་ལྟར་འཕེན། །མཐུ་ལྡན་ཁྱོད་ཀྱི་དམ་ཚིག་རབ་དགོངས་ལ། །དམ་ཉམས་དགྲ་ལ་བཙན་ཞགས་དམར་པོ་ཐོག །གྲི་འཐབ་ལྷོག་གཟེར་ནད་སོགས་མ་ལུས་ཐོར། །བཅོལ་བའི་ལས་ཀུན་ཐོགས་མེད་སྒྲུབ་པར་མཛོད། །མཐིང་ནག་མུན་པའི་མདོག་ལྡན་སྲིན་པོའི་གཟུགས། །དར་ནག་གོས་གྱོན་དབུ་ལ་ཐོད་ནག་བཅིངས། །སྟག་རལ་གཟིག་ཤུབས་དང་ལྡན་རུ་མཚོན་འཛིན། །(༡༥ན)
རྟ་ནག་ཞོན་ནས་མཚན་མོ་ཕྱོགས་བཅུར་རྒྱུ། །བདུད་ཞགས་ནག་པོས་དགྲ་བོའི་སྐེ་ནས་འཆིངས། །མཐུ་ལྡན་ཁྱོད་ཀྱི་དམ་བཅའ་མ་ཡེལ་བར། །ཐིབས་ནད་ནག་པོ་དགྲ་བོའི་སྟེང་དུ་ཕོབ། །བཅོལ་བའི་ལས་ཀུན་ཐོགས་མེད་སྒྲུབ་པར་མཛོད། །རབ་ཁྲོས་སྡེར་མོ་གནམ་ལྕགས་སྤུ་གྲི་ཅན། །རུས་སྦལ་ལ་བཅིབས་རྡོ་རྗེ་སྤྱན་གཅིག་མ། །དྲུག་སྦྲུལ་གདེངས་ཀའི་ཆུན་པོས་དབུ་ལ་བརྒྱན། །སྡིག་ལྤགས་གསོལ་ཞིང་སྲམ་གྱི་རྒྱལ་མཚན་འཛིན། །དུག་སྦྲུལ་ཞགས་པ་ནག་པོ་ཀླད་ལ་བསྐོར། །མཐུ་ཆེན་ཁྱོད་ཀྱི་དམ་བཅའ་མ་གཡེལ་བར། །ཀླུ་ནད་མཛེ་ཤུ་ནག་པོ་དགྲ་ལ་ཐོང་། །བཅོལ་བ་ལས་ཀུན་ཐོགས་མེད་སྒྲུབ་པར་མཛོད། །དེ་ནས་ཚོགས་ནི། རཾ་ཡཾ་ཁཾ་གྱིས་ཚོགས་ཀྱི་ཡོ་བྱད་ཀུན། །མ་དག་སྐྱོན་སྦྱངས་གསང་གསུམ་ཡིག་འབྲུ་ཡི། །ནུས་མཐུའི་འཕྲུལ་གྱིས་སྦྱངས་རྟོགས་རབ་སྦར་ཞིང་། །ཧོཿཡིས་ཟག་མེད་ཡེ་ཤེས་བདུད་རྩིར་གྱུར། །ཨཱོཾ་ཨཱཿཧཱུཾ་ཧོ༔གྷ་ན་ཙཀྲ་ཧཱུཾ་ཧྲཱིཿཋ། མགྲོན་སྤྱན་དྲང་བ་ནི། རྩ་བརྒྱུད་བླ་མ་རྒྱལ་བ་ཞི་ཁྲོའི་ཚོགས། ཁྱད་པར་ཚེ་བདག་ནག་པོ་འཁོར་བཅས་རྣམས། །ཟག་མེད་ཚོགས་ཀྱི་འཁོར་ལོར་སྤྱན་འདྲེན་ན། །ཐོགས་པ་མེད་པར་མྱུར་དུ་གཤེགས་སུ་གསོལ། །ཚོགས་སྤྱིར་འབུལ་བ་ནི། །ངོ་བོ་སྣང་སྟོང་ཀུན་བཟང་མཆོད་པའི་སྤྲིན། །རྣམ་པ་འདོད་པའི་ཡོན་ཏན་ལྔ་ལྡན་འདི། །རྩ་གསུམ་དཀྱིལ་འཁོར་འཁོར་ལོའི་ཚོགས་ལ་འབུལ། །མཆོག་ཐུན་འདོད་དགུའི་དངོས་གྲུབ་སྩལ་དུ་གསོལ། །གཡོན་ཞལ་ལ་འབུལ་བ་ནི། ཟག་བྲལ་བདུད་རྩིའི་རོ་མཆོག་བརྒྱ་ལྡན་པའི། །ཡེ་ཤེས་ཚོགས་ཀྱི་མཆོད་པ་དམ་པ་འདི། །རབ་དམར་རྗེས་ཆགས་(༡༥བ)
གཡོན་གྱི་ཞལ་དུ་འབུལ། །དགྱེས་དགུར་སྤྱོད་ལ་དངོས་གྲུབ་རྣམ་གཉིས་སྩོལ། །ཡི་དམ་ནས་བཟུང་སྟེ་ཆོས་སྐྱོང་གི་བར་ལ་འབུལ་ལོ། །གཡས་ཞལ་ལ་བཤགས་པ་ནི། །མཆོག་དང་ཐུན་མོང་དངོས་གྲུབ་གངྒཱའི་རྒྱུན། །ལེགས་སྒྲུབ་འབྱུང་གནས་དམ་ཚིག་གངས་ཀྱི་རི། །ཉེས་ལྟུང་དྲི་མའི་ཚ་ཟེར་གྱིས་བཞུ་བ། ཁྲོ་རྒྱལ་ཆུ་འཛིན་ཚོགས་ལ་བཟོད་པར་གསོལ། །ཡིག་བརྒྱ་བརྗོད། དབུས་ཞལ་ལ་བསྒྲལ་མཆོད་ནི། ཧཱུཾ། ཨྱེ་རིང་ཚར་གཅིག་གིས་སྤྲུལ་པ་སྤྲོ། །ནྲིཿཛཿཏྲིཿཛཿ། ཛཿཧཱུཾ་བཾ་ཧོཿ པྲ་པེ་ཤ་ཕཊ་ཨ་བེ་ཤ་ཨཱཿ ཨྱེ། གྲུ་གསུམ་ཨེ་ཡི་སྣོད་ནང་དུ༔ བདུད་རྩི་ལྔ་ཡི་ཟས་ལྔ་ལ༔ མཚན་མ་མིང་དང་བཅས་པར་བྱ༔ གཏུམ་རྔམ་འཁྲུག་པའི་ལྷ་ཚོགས་ཀྱིས༔ དགྲ་བགེགས་དབང་པོ་བཀུག་ལ་བསྟིམ༔ ཕུར་པས་བཏབ་ལ་མཚོན་ཆས་གཏུབས། །ཨྱཻ། ཟིལ་གནོན་ལྷ་ཚོགས་འཁོར་བཅས་ཀྱི༔ ཐུགས་དམ་ཆེན་པོའི་དུས་ལ་བབ༔ གང་ལ་བྱ་བ་ཁྱེད་ཤེས་ཀྱིས༔ དམིགས་པ་གང་ཡིན་མྱུར་དུ་སྒྲོལ༔ ཞེ་སྡང་དྲེགས་པའི་སྦྱོར་བ་ཆོམས༔ རྩ་རྒྱུས་ཁྲག་དང་བླ་མཚོ་སྐོམས༔ ལུས་སྲོག་དབང་པོ་དངས་སྙེགས་ཕྱེ༔ འབྱུང་བ་རྣམ་ཤེས་བཀྲག་མདངས་སྡུས༔ སྡང་བའི་དགྲ་དང་གནོད་པའི་བགེགས༔ མངོན་སྤྱོད་ཚུལ་བཞིན་སྒྲལ་པར་མཛོད༔ ཨྱེ་མྱགས་ཡ་རྔུབས་མུགས་ཤག་ཀ་དུན་ཪྣྲི་ཏྲི་སྲོག་ལ་ཧུར་ཐུཾ་ཛཿ རྩ་ཁྲག་སྙིང་ཐུཾ་རིལ་རི་ཤག་རྦད། དགྲ་བོའི་ཙིཏྟ་བྲེང་ཤག་ཛཿ སྲོག་ལ་ཧུར་ཐུམས་རྦད༔ ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ༔ དགྲ་བོ་ཨ་མུ་ཀ་སྲོག་ལ་ཐུམ་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡི་ཤག་བྷྱོ༔ དགྲ་བོའི་སྲོག་ལ་མཱ་ར་ཡ་རྦད། དགྲ་བོའི་(༡༦ན)
སྲོག་ལ་སྟཾ་བྷ་ཡ་ནན༔ ཨྱེ། ཕྱག་རྒྱ་ཟིལ་གནོན་འཁོར་བཅས་ལ༔ བསྒྲལ་བའི་ཞིང་བཅུར་གྱུར་པ་འདི༔ བདུད་རྩིར་བསྒྱུར་ནས་འབུལ་ལགས་ཀྱི༔ གཏི་མུག་ཤ་ཡི་ངོ་བོ་ཟོ༔ འདོད་ཆགས་ཁྲག་གི་རྒྱ་མཚོ་འཐུང་༔ ཞེ་སྡང་རུས་པའི་རི་བོ་ཆོམས༔ ང་རྒྱལ་མཁྲིས་པ་རྩད་ནས་དྲོངས༔ ཕྲག་དོག་དོན་སྙིང་ཞལ་དུ་གསོལ༔ ཕུང་པོ་ལྔ་དང་འབྱུང་བ་ལྔ༔ ཁམས་དང་སྐྱེ་མཆེད་མ་ལུས་པ༔ འབར་བ་གཤིན་རྗེའི་ཞལ་དུ་བསྟབ༔ བསྟན་པ་སྲུང་ཕྱིར་བཞེས་སུ་གསོལ༔ མ་ཧཱ་མཾ་ས། མ་ཧཱ་རཀྟ། མ་ཧཱ་ཙིཏྟ། མ་ཧཱ་བྷ་སུ་ཏ། མ་ཧཱ་གོ་རོ་ཙ་ན། མ་ཧཱ་ཀེཾ་ནྲི་ཏི་ཁཱ་ཧི། དེ་ནས་བསྐང་བའི་ཆོ་ག་ནི། ཐོད་པ་མཚན་ལྡན་གྱི་ནང་དུ་ཤ་ཆན་དང་སྦྱར་བའི་བག་ཟན་གྱི་བམ་རོའི་གཟུགས་མཚན་ཉིད་ཚང་བ། སྨན་རཀ་གཏོར་གསུམ་སྒྲོན་མེ་དང་བཅས་པ་ཕྱག་ལེན་ལྟར་བཤམས་ལ། ཧཱུཾ། གསང་ཆེན་གནས་མཆོག་བདེ་ཆེན་ཕོ་བྲང་འདིར། །རབ་ཡངས་ཐོད་པའི་སྣོད་དུ་བམ་ཆེན་རོའི། །སྤྱི་བོར་བྷ་ལིང་རྒྱན་ལྡན་ཁྱུང་ཆེན་ལྡིང་། །ལག་གཉིས་ཐོད་ནང་སྨན་རཀ་མཚོར་འཁྱིལ་ཞིང་། །ཚིལ་ཆེན་མར་མེ་རྟ་བདུན་འོད་ལྟར་གསལ། །ཤ་ཆེན་དུད་པའི་སྤྲིན་གྱིས་ལྷ་ལམ་ཁྱབ། །སྲོག་ཆགས་ལུས་ཀྱི་རྣམ་འགྱུར་གྲངས་ལས་འདས། །སྙན་བརྗིད་སྒྲ་ཡིས་ཕྱོགས་ཀྱི་འཁོར་ལོ་འགེངས། །ཀུན་ཀྱང་རང་རང་དགྱེས་དགུར་ལོངས་སྤྱོད་པའི། །ལུས་ཀྱི་ཕྱི་ནང་དབང་པོ་དོན་སྣོད་དང་། །ཤ་ཁྲག་རུས་པ་ཚེ་སྲོག་དབུགས་ལ་སོགས། །ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །འདོད་ཡོན་ལྔ་ལྡན་ཀུན་བཟང་མཆོད་སྤྲིན་འདིས། །བཅོམ་(༡༦བ)
ལྡན་ཕྱག་རྒྱ་ཟིལ་གནོན་ཐུགས་དམ་བསྐང་། །ཡུམ་ཆེན་རྡོ་རྗེ་ཁྲོས་པའི་ཐུགས་དམ་བསྐང་། །སྲས་མཆོག་དྲེགས་པ་གཉིས་ཀྱི་ཐུགས་དམ་བསྐང་། །རུས་སྦལ་ཁྱུང་ཆེན་ཟུང་གི་ཐུགས་དམ་བསྐང་། །སྤྲུལ་པ་རྒྱན་གྱི་ལྷ་བརྒྱད་ཐུགས་དམ་བསྐང་། །ལས་གཤིན་བདག་པོ་གསུམ་གྱི་ཐུགས་དམ་བསྐང་། །ཕྱི་ནང་གསང་གསུམ་གཤེད་པོའི་ཐུགས་དམ་བསྐང་། །འཆི་བདག་བཅུ་གཉིས་སྒོ་བཞི་ལས་གཤིན་སོགས། །བཀའ་སྡོད་དམ་ཅན་རྒྱ་མཚོའི་ཚོགས་རྣམས་ཀྱི། །ཐུགས་དམ་གཉན་པོ་དབྱིངས་སུ་སྐོང་གྱུར་ནས། །བཅོལ་བའི་འཕྲིན་ལས་མ་ལུས་སྒྲུབ་པར་མཛོད། །ལྷག་མ་བཏང་བ་ནི། ཨཱོཾ་ཨཱཿཧཱུཾ་ཧོ༔ ཨཱོཾ་བཛྲ་ཊཱ་ཀི་རཱ་ཛ་ཧཱུཾ་ཛ༔ དཀྱིལ་འཁོར་ཕྱི་རོལ་བར་ཁྱམས་རབ་ཡངས་པར། །སྔོན་ཚེ་དཔལ་ཆེན་སྤྱན་སྔར་ཁས་བླངས་པའི། །མཁའ་འགྲོ་གཤིན་རྗེ་ལ་སོགས་དྲེགས་པའི་ཚོགས། །ཐམས་ཅད་ཐོགས་པ་མེད་པར་འདིར་འདུས་ཤིག །ཨཱོཾ་ཤྲཱི་མཉྫུ་ཀྲོ་ཏ་ཛྙཱ་ན་སརྦ་དུཥྚཾ་བྷནྡྷ་ཡ་ཕཊ། ས་མ་ཡ་དུ་མནྟ་ཀ་ར་ཡ་ཕཊ། ཨེ་ཀ་ས་མ་ཡ་ཧཱུཾ། དམར་ཆེན་ཤ་ཁྲག་བདུད་རྩི་ཨ་མྲྀ་ཏ། །ཚོགས་ལ་རོལ་བའི་ལྷག་གཏོར་འདི་བཞེས་ལ། །བདག་ཅག་དཔོན་སློབ་འཁོར་དང་བཅས་རྣམས་ཀྱི། །འགལ་རྐྱེན་ཀུན་གསོལ་མཐུན་པའི་དོན་རྣམས་སྒྲུབས། །ཨཱོཾ་ཨེ་ཀ་ཡ་མ་ཀྲོདྷ་ཁཱ་ཧི། ཀརྨ་ཡ་མ་སརྦ་ས་མ་ཡ་ཁཱ་ཧི། མ་མ་རཀྵ་ཌཱ་ཀི་ནི་ཁཱ་ཧི། །བདུད་པྲ་མ་ཡ་ཁཱ་ཧི། པྲེ་ཏ་བྷིན་དྷ་ཁཱ་ཧི། ཡ་མ་རཱ་ཛ་པྲེ་ཏ་ཛ་ལ་ཁཱ་ཧི། ཡ་མ་རཱ་ཛ་པྲེ་ཏ་ཐོརྐ་ཁཱ་ཧི། གྱིང་ཀཱ་ར་ཁཱ་ཧི། དགྲ་བོའི་མ་ཧཱ་མཾ་ས་ཁཱ་ཧི། མཧཱ་རཀྟ་ཁཱ་ཧི། མཧཱ་ཙིཏྟ་ཁཱ་ཧི། དེ་ནས་རང་བཞིན་གྱི་ཆེད་དུ་གནམ་ལྕགས་སྡིག་པའི་ཆོས་སྡེ་ནས་གསུངས་པའི་དྲག་པོ་ཟོར་གྱི་ལས་བྱ་བ་ནི། (༡༧ན)
མ་ཏྲཾ་གྱི་སྟེང་དུ་ལྕགས་སླང་བུག་རྡོལ་མེད་པའི་ནང་དུ་རི་རབ་བང་རིམ་བཞི་པར། ལྷ་སོ་སོའི་གཏོར་མ་ཐོག་གཟུགས་བྱ། ཙ་ཀ་ལི་རྩང་མར་མཚེ་ཡུངས་སོགས་དང་། ཀོང་ཟོར། ཁྲག་ཟོར། མདའ་ཟོར། ཡུངས་ཟོར། རྡོ་ཟོར་རྣམས་བཞིའམ་བརྒྱད་དང་། ཁྱད་པར་གཡག་འོག་ཡོད་ཀྱི་རྭ་གཡས་དང་། ཐུན་རྫས་གཏོར་ཆུང་དང་ལིང་ག་བཟློག་གསད་སྐབས་ཐོབ་ཀྱིས་ཕྱེ་བ་རྣམས་མཐོང་བ་བརྒྱུད་པའི་ཕྱག་ལེན་ལྟར་ཞིབ་པར་བཤམས། ཆས་གོས་རྣམས་ནག་པོར་བྱས་ཏེ། རང་ཉིད་ཟིལ་གནོན་དུ་གསལ་བའི་ང་རྒྱལ་གྱིས། ཨཱོཾ་སུམྦྷ་སོགས་ཀྱིས་བགེགས་བསྐྲད། རཾ་ཡཾ་ཁཾ་གྱིས་སྨན་རཀ་གཏོར་གསུམ་གྱི་སྐྱོན་རྣམས་སྦྱངས་ཏེ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨཱོཾ་ཨཱཿཧཱུཾ། ལན་གསུམ་བརྗོད། དེ་ནས། ཨཱོཾ་སྭ་བྷ་ཝས་མདུན་བསྐྱེད་ཀྱི་གཏོར་ཟོར་རྣམས་སྟོང་པར་སྦྱངས། སྟོང་པའི་ངང་ལས་འབྱུང་བཞིའི་དཀྱིལ་འཁོར་རིམ་གྱིས་བརྩེགས་པའི་སྟེང་དུ་ཀེཾ་ལས་ཀེང་རུས་ཀྱི་རི་རབ་ཡངས་ཤིང་རྒྱ་ཆེ་བ། དེའི་སྟེང་དུ་བྷྲུཾ་ལས་དུར་ཁྲོད་ཀྱི་གཞལ་ཡས་ཁང་གྲུ་བཞི་སྒོ་བཞི་རྟ་བབས་བརྒྱད་དང་ལྡན་པ། བནྡྷ་སྐམ་རློན་གྱི་རྩིག་པ་ལ་གནས་པ་ལ་གནམ་ལྕགས་ཀྱི་གཟེར་བཏབ་པ། ནང་ལྷ་ཆེན་བརྒྱད་ཀྱི་ཀ་བ། ཀླུ་ཆེན་བརྒྱད་ཀྱི་གདུང་། གཟའ་ཆེན་བརྒྱད་ཀྱི་གཞུ། རུས་སྦལ་གྱི་ཀ་གདན་གླང་ཆེན་གྱི་མ་ཐེམ། འབྲུག་གི་ཡ་ཐེམ། འགྲམ་གཉིས་སེང་གེ །སྟག་གཟིག་གི་སྒོ་ལ་ཉི་ཟླ་ཟུང་གིས་བརྒྱན་པ། ཆུ་སྲིན་གྱི་པད་བསྐོར། ཞིང་ཆེན་གྱི་ཐོག་ཕུབ་པ། དུག་སྦྲུལ་དང་རྒྱུ་རློན་གྱི་དྲ་བ་དྲ་ཕྱེད་འཕྱང་བ། དེའི་དབུས་སུ་ཨེའི་(༡༧བ)
ཕོ་བྲང་གླིང་དགུ། ཟླ་གམ་དམར་པོ་གསུམ་དང་ལྡན་པ། དེའི་ཕྱི་རོལ་ཏུ་ལྕགས་འཁོར་བཅུ་གཉིས་ཐོད་རས་བསྐོར་བ། གྲུ་ཆད་བཞིར་ལྕགས་མཁར་གྲུ་གསུམ་བཅུ་གཉིས་ཁྱམས་དང་བཅས་པ། ཕྱི་རོལ་ཏུ་རྡོ་ར་མེ་རིས་བསྐོར་བ། དབུས་སུ་ཀླུ་འབུམ། གཉན་ཁྲི། ས་བདག་སྟོང་། ཕྱོགས་སྐྱོང་བཅུ་རྣམས་སྤྱི་བཅིངས་སུ་བསྣོལ་བའི་ཁར་མ་ཧེ་བརྒྱད་ཀྱིས་བཏེགས་པའི་འཁོར་ལོ་པདྨ་ཉི་ཟླའི་གདན་སྟེང་དུ། སྐད་ཅིག་གིས་གཏོར་མ་འཇམ་དཔལ་ཚེ་བདག་ནག་པོ་ཞལ་གསུམ་ཕྱག་དྲུག་ཞབས་བཞི་བགྲད་པ། རྩ་ཞལ་དུག་ཧ་ལའི་མདོག་ལྟ་བུ། གཡས་ཞལ་དཀར་ལ་གཡོན་ཞལ་དམར་བའི་མདངས་ཅན། དམར་ལ་ཟླུམ་པའི་སྤྱན་དགུ་སྡང་མིག་ཏུ་བགྲད་ཅིང་། དབུ་སྐྲ་དང་སྨ་ར་སྨིན་མ་རྣམས་བསྐལ་པའི་མེ་ལྟར་འབར་བ། རབ་དཀར་མཆེ་བའི་ཆུ་འཛིན་གྱི་དབུས་སུ་ལྗགས་ཀྱི་གློག་འཕྲེང་འཁྱུག་པ། ཕྱག་གཡས་ཀྱི་དང་པོས་གནམ་ལྕགས་ལས་གྲུབ་པའི་འཁོར་ལོ་རྩིབས་བཅུ་པ་སྡིགས་མཛུབ་དང་བཅས་ཏེ་བསྐོར་བས་གཤིན་རྗེའི་ཚོགས་རྣམས་ཀྱང་སྡིགས་པ། བར་པས་རལ་གྲི་མེ་རབ་ཏུ་འབར་བས་བདུད་སྡེ་ཀུན་ལ་འཆི་བའི་འཇིགས་པ་སྟེར་བ། ཐ་མ་གསེར་གྱི་རྡོ་རྗེ་རྩེ་ལྔ་པས་མི་མཐུན་ཕྱོགས་རྣམས་ཀུན་ལས་བསྲུང་བ། གཡོན་གྱི་དང་པོ་ནི་རྡོ་རྗེས་མཚན་པའི་བེ་ཅོན་ནོར་བུ་འབར་བའི་ཏོག་གིས་མཚན་པ་ནམ་མཁའ་ལ་འཕྱར་བས་དངོས་གྲུབ་རྣམ་གཉིས་བདེ་བླག་ཏུ་སྩོལ་བ། བར་པ་ན་པདྨ་རཱ་གའི་ལྷུན་པོ་སྐྱེངས་པར་བྱེད་པའི་གཏུན་ཤིང་གིས་སྲིད་གསུམ་དྲེགས་པའི་མགོ་བོ་འགེམས་པ། ཐ་མ་སྡིགས་མཛུབ་དང་བཅས་པའི་ཞགས་པས་ལོག་འདྲེན་དགྲ་བགེགས་ཐམས་ཅད་འཆིང་བ། རྒྱལ་བ་རིགས་ལྔའི་བདག་ཉིད་ཅན་གྱི་ཐོད་སྐམ་ལྔའི་དབུ་རྒྱན་རིན་པོ་ཆེའི་(༡༨ན)
རྩེ་ཕྲན་གྱིས་བརྒྱན་པ། སྡེ་བརྒྱད་དྲེགས་པའི་མགོ་དང་ཙིཏྟ་རྒྱུ་མའི་སྲད་བུ་ལ་བརྒྱུས་པའི་དོ་ཤལ་དང་། རིན་པོ་ཆེའི་ཕྲེང་བ་དང་སྦྲུལ་གྱི་གདུ་བུ་རྣམས་ཀྱིས་སྤྲས་ཤིང་། རྡོ་རྗེ་འབར་བའི་ཁྱུང་གཤོག་མཁའ་ལ་གདེངས་པ། སྐུ་སྟོད་གླང་ཆེན་གྱི་ཀོ་རློན་དང་མི་ལྤགས་ཀྱི་གཡང་གཞི་གསོལ་ཞིང་། སྟག་ལྤགས་ཀྱི་ཤམ་ཐབས་སོགས་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། གར་དགུའི་ཉམས་ལྡན་ཞབས་བཞི་གཡས་བསྐུམ་གཡོན་བརྐྱང་གིས་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། སྤྱི་གཙུག་ཏུ་བྱ་ཁྱུང་དཀར་པོ་རལ་གྲིའི་གཤོག་པ་ལ་གནམ་ལྕགས་ཀྱི་མཆུ་སྡེར་ཅན། སྤྱི་བོར་ནོར་བུ་རིན་པོ་ཆེས་བརྒྱན་པ། ཀླུ་གཉན་ཀུན་གྱི་གཤེད་མ་མཛད་ཅིང་ནམ་མཁའ་ལ་ལྡིང་བ། གཡོན་ཕྱོགས་སུ་ཡུམ་ཆེན་པེ་ཏ་ལི་སྐུ་མདོག་སྔོ་ནག་ཞལ་གཅིག་ཕྱག་གཉིས་པ་གཡས་དགྲ་བགེགས་ཀྱི་དོན་སྙིང་བཟུང་ནས་ཡབ་ཀྱི་མགུལ་ནས་འཁྱུད་ཅིང་། གཡོན་བནྡྷ་རཀྟས་བཀང་བ་གཙོ་བོའི་ཞལ་དུ་སྟོབ་པ། རིན་པོ་ཆེ་དང་ཐོད་སྤྲུལ་ལ་སོགས་པའི་རྒྱན་གྱིས་སྤྲས་ཤིང་ཞབས་གཉིས་ཡབ་ལ་འཁྱུད་པའི་ཚུལ་གྱིས་མ་སྲིན་ཐམས་ཅད་ཟིལ་གྱིས་གནོན་པ། གཡས་སུ་དབྱིངས་ཡུམ་སྲིད་པའི་རྒྱལ་མོ་མཐིང་ནག་ཞལ་གཅིག་ཕྱག་གཉིས་ཀྱིས་གཡས་སྐྱེ་འགྲོ་ཁྲམ་ལ་འདེབས་ཤིང་། གཡོན་ནད་ཀྱི་རྐྱལ་པ་དགྲ་ལ་འཕྱོ་བ། མི་ལྤགས་ཀྱི་སྟོད་གཡོགས་དང་གཟིག་ལྤགས་ཀྱི་ཤམ་ཐབས་གྱོན་པ། དབུ་སྐྲ་སྤྱི་བོར་བཅིངས་པ། རྨ་བྱའི་སྒྲོ་མདོངས་ཀྱིས་བརྒྱན་ཅིང་ཐོད་སྦྲུལ་གྱི་དོ་ཤལ་དང་དར་གྱི་ལྷབ་ལྷུབ་ཅན། བམ་རོ་དམར་པོའི་སྟེང་ལ་བཞུགས་པ། གླིང་དགུའི་ཤར་ཕྱོགས་(༡༨བ)
དྲི་ཟ་ཕོ་མོ་བསྣོལ་བའི་སྟེང་དུ་དྲེགས་པའི་བདག་པོ་ཕྱག་ན་རྡོ་རྗེ་ལྗང་ནག་ཞལ་གཅིག་ཕྱག་གཉིས་ཀྱིས་རྡོ་རྗེ་དང་སྙིང་ཕྲེང་འཛིན་ཅིང་། སྦྲུལ་དང་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། དར་སྔོན་པོའི་སྟོད་གཡོགས་དང་སྟག་ལྤགས་ཀྱི་ཤམ་ཐབས་ཅན། ཀླུ་གཉན་ས་བདག་ཀུན་གྱི་གཤེད་མ་མཛད་པ། ལྷོ་ཕྱོགས་གཤིན་རྗེ་ཕོ་མོ་བསྣོལ་བའི་གདན་ལ་གསོད་བྱེད་སྲས་མཆོག་ཡ་མ་རཱ་ཙ་ཞལ་གཅིག་ཕྱག་གཉིས་པ་འཁོར་ལོ་དང་ཙིཏྟ་འཛིན་པ། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། གཟའ་རྒོད་རྦོད་གཏོང་ཐམས་ཅད་ཀྱི་སྟོབས་འཇོམས་པར་མཛད་པ། ནུབ་ཕྱོགས་ཀླུ་དབང་ཕོ་མོ་བསྣོལ་བའི་གདན་ལ་རུས་སྦལ་རྔམ་པ་མི་ཟན་གསེར་རྒྱབ་སེར་པོ་ལ་དུག་ཁྲག་གི་ཐིག་ལེས་བརྒྱན་པ། སྤྱན་གཉིས་ཉི་ཟླ་ལྟར་གསལ་ཞིང་མཆེ་བ་གངས་རི་ལྟར་དཀར་བ། སྡེར་མོ་སྤུ་གྲི་ལྟར་རྣོ་ཞིང་བ་སྤུ་མཚོན་ཆ་ལྟར་གཟིངས་པ། སྲིད་གསུམ་འབྱུང་བ་ཐམས་ཅད་ལྟོ་བར་འཆང་ཞིང་། ལྷ་སྲིན་སྡེ་བརྒྱད་ཀུན་ལས་རྣམ་པར་རྒྱལབ། བྱང་ཕྱོགས་གནོད་སྦྱིན་ཕོ་མོ་བསྣོལ་བའི་གདན་ལ་སྒྲོལ་ཡུམ་ཨེ་ཀ་ཛཱ་ཊི་སྔོ་ནག་དུག་གི་བརླབ་སྤྲིན་ལྟར་འཕྱོ་བ། གཡས་རལ་གྲི་གློག་གི་ཕྲེང་བ་འཛིན་ཅིང་། གཡོན་གཡུའི་སྤྱང་མོ་མགོ་དགུ་འགྱེད་པས་དགྲ་བགེགས་ཀྱི་བླ་དགུགས་པ། མི་ལྤགས་རེ་ལྡེའི་གོས་དང་ཐོད་སྦྲུལ་གྱི་རྒྱན་ཅན། རལ་པ་ཉི་ཟླ་པདྨ་ནོར་བུས་མཛེས་ཤིང་བམ་རོའི་གདན་ལ་བཞུགས་པ། ཤར་ལྷོར་མེ་ལྷའི་གདན་ལ་ལྷའི་གཤེད་པོ་སེང་གེའི་མགོ་ཅན། གཡས་སྲིད་པའི་ཕྱགས་ཤིང་དང་གཡོན་ན་གནམ་ལྕགས་ཀྱི་འཁོར་ལོ་འཛིན་པ། མི་ལྤགས་ཀྱི་གཡང་གཞི་དང་སྟག་ལྤགས་ཀྱི་ཤམ་ཐབས་གསོལ་(༡༩ན)
བ། ཡུམ་སེང་གེའི་གཟུགས་ཅན་འགྱིང་བ་ལ་བཅིབས་པ། ལྷོ་ནུབ་སྲིན་པོའི་གདན་ལ་སྲོག་བདག་དམར་པོ་སྟག་གི་མགོ་ཅན། གཡས་བེ་ཅོན་དང་གཡོན་གནམ་ལྕགས་ཀྱི་འཁོར་ལོ་འཛིན་ཅིང་ཞིང་ཆེན་དང་སྟག་ལྤགས་གསོལ་བ། ཡུམ་སྟག་གི་གཟུགས་ཅན་མི་རོ་ཟ་བ་ལ་ཆིབས་པ། ནུབ་བྱང་རླུང་ལྷའི་གདན་ལ་ཀླུ་གཤེད་ནག་པོ་ཆུ་སྲིན་གྱི་མགོ་ཅན། རལ་པའི་གསེབ་ནས་དུག་སྦྲུལ་དགུ་གདེང་བ། གཡས་ཁྲམ་ཤིང་དང་གཡོན་འཁོར་ལོ་འཛིན་ཅིང་། རུས་སྦལ་གྱི་གཡང་གཞི་དང་དར་དམར་གྱི་ཨང་རག་གསོལ་བ། ཡུམ་སྦྲུལ་གྱི་གཟུགས་ཅན་གདུག་པའི་ཁ་རླངས་འཕྱོ་བ་ལ་བཅིབས་པ། བྱང་ཤར་དབང་ལྡན་གྱི་གདན་ལ་བགེགས་ཀྱི་རྒྱལ་པོ་བི་ན་ཡ་ཀའི་དེད་དཔོན་ཁྱུང་གི་མགོ་ཅན་སྐུ་མདོག་མཐིང་སྨུག་བྱ་རྒོད་ཀྱི་གཡང་གཞི་གསོལ་པ། གཡས་རལ་གྲི་དང་གཡོན་འཁོར་ལོ་འཛིན་པ། ཡུམ་ཁྱུང་གི་གཟུགས་ཅན་ཁ་ལ་མེ་འབར་བ་ལ་བཅིབས་པ། བྱང་ཕྱོགས་ཀྱི་ཟླ་གམ་ལ་དམྱལ་ཁམས་ཕོ་མོ་བསྣོལ་བའི་གདན་སྟེང་དུ་སྐུ་ཡི་སྤྲུལ་པ་ཚེ་བདག་ནག་པོ་དབུ་དགུ། ཕྱག་བཅོ་བརྒྱད་པ། རྩ་ཞལ་གཡས་དཀར་གཡོན་དམར་དབུས་མཐིང་ཁྲོ་བོའི་ཞལ་ཅན། བར་པ་གསུམ་གཡས་སྟག་གཡོན་དོམ་དབུས་གཟིག་གི་ཞལ་ཅན། སྟེང་མ་གསུམ་ག་ཁྱུང་གི་གདོང་ཅན། གཡས་ཀྱི་ཕྱག་དགུ་ན་འཁོར་ལོ། རལ་གྲི །རྡོ་རྗེ། ཁ་ཊྭཱཾ། མདུང་ཐུང་། དུག་མདའ། དབྱུག་པ། རྒྱ་གྲམ། ལྕགས་ཀྱུ། གཡོན་གྱི་ཕྱག་དགུ་ན་བེ་ཅོན། གཏུན་ཤིང་། སྦྲུལ་ཞགས། ཁ་ཊྭཱཾ། སྡིགས་མཛུབ། སྤུ་གྲི། དགྲ་སྟ། གཡང་གཞི། སྙིང་ཕྲེང་འཛིན་(༡༩བ)
པ། གླང་ལྤགས་ལ་སོགས་པའི་དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། ཞབས་བརྒྱད་གཡས་བསྐུམ་གཡོན་བརྐྱང་གི་ཚུལ་གྱིས་བཞུགས་པ། ཤར་ལྷོའི་ཟླ་གམ་ལ་ས་བདག་ཕོ་མོ་བསྣོལ་བའི་གདན་སྟེང་དུ་གསུང་གི་སྤྲུལ་པ་སྲོག་བདག་དམར་པོ་དབུ་དགུ་ནག་པོ་བྱ་རོག་གི་གདོང་པ་ཅན། ཕྱག་གཡས་གནམ་ལྕགས་ཀྱི་འཁོར་ལོ་དང་། གཡོན་རྒྱུ་ཞགས་བསྣམས་པ། ལུས་ཐམས་ཅད་མིག་གིས་ཁེངས་པ། མི་ལྤགས་ཀྱི་གཡང་གཞི། སྟག་ལྤགས་ཀྱི་ཤམ་ཐབས། ཐོད་རློན་གྱི་དོ་ཤལ་ཅན། ཞབས་གཉིས་གཡས་བསྐུམ་གཡོན་བརྐྱང་གིས་བཞུགས་པ། ལྷོ་ནུབ་ཀྱི་ཟླ་གམ་ལ་ཀླུ་གཉན་ཕོ་མོ་བསྣོལ་བའི་གདན་སྟེང་དུ་ཐུགས་ཀྱི་སྤྲུལ་བ་འཆི་བདག་ནག་པོ་ཆུ་སྲིན་གྱི་ཞལ་ལ་སྦྲུལ་མགོའི་གདེངས་ཀ་ཅན། གཡས་གནམ་ལྕགས་ཀྱི་དགྲ་སྟ་དང་གཡོན་སྦྲུལ་ཞགས་འཛིན་པ། མི་ལྤགས་ཀྱི་གོས་ཅན། སྐུ་སྨད་སྦྲུལ་གྱི་ཆུན་པོ་འཁྱིལ་བ། དུག་སྦྲུལ་གྱི་སྟེང་དུ་བཞུགས་པ། དེའི་ཕྱི་རོལ་ཏུ་ལྕགས་མཁར་བཅུ་གཉིས་ལ་སྲིན་པོ་ཡ་མ་རཱ་ཙ་གཡས་རོ་དབྱུག་དང་གཡོན་འཁོར་ལོ་བསྣམས་པ། ཡུམ་ཐལ་མདོག་མ་དང་སྦྱོར་བ། གཤིན་རྗེ་མྱོས་བྱེད་འབར་བ་སེར་ནག་གཡས་བེ་ཅོན་དང་གཡོན་འཁོར་ལོ་བསྣམས་པ། ཡུམ་གསོད་བྱེད་མ་དང་སྦྱོར་བ། གཤིན་རྗེ་ཨཪྻ་མ་རུ་དམར་པོ་གཡས་བེ་ཅོན་དང་གཡོན་རྩེ་གསུམ་བསྣམས་པ་ཡུམ་སྲོག་ལེན་མ་དང་སྦྱོར་བ། གནོད་སྦྱིན་རལ་པ་ཚར་དགུ་ལྗང་ནག་གཡས་བེ་ཅོན་དང་གཡོན་འཁོར་ལོ་བསྣམས་པ། ཡུམ་བདུད་མོ་རལ་གཅིག་མ་དང་སྦྱོར་བ། དུང་གི་མོན་པ་སེང་གེའི་མགོ་ཅན། ཡུམ་བླ་རྐུན་མ་དང་སྦྱོར་བ། ལྕགས་ཀྱི་མོན་པ་སྟག་གི་མགོ་ཅན། ཡུམ་གཡུ་རལ་མ་དང་སྦྱོར་བ། བསེའི་མོན་པ་དྲེད་ཀྱི་མགོ་ཅན། མོན་མོ་ཁྲག་རལ་མ་དང་སྦྱོར་བ། གསེར་གྱི་མོན་པ་(༢༠ན)
ཁྱུང་གི་མགོ་ཅན། མོན་མོ་སྙིང་འབྱིན་མ་དང་སྦྱོར་བ། བཞི་གའང་གཡས་བེ་ཅོན་དང་གཡོན་དགྲ་བགེགས་ཀྱི་དོན་སྙིང་བསྣམས་པ། ཧེ་ལེ་ཁྱབ་པ་དཀར་པོ། མ་མོ་སྙིང་རྐུན་མ་དང་སྦྱོར་བ། ནག་པོ་འཇུམ་མེད་སེར་པོ་མ་མོ་སྙིང་ཁྲག་བཅུད་འཐུང་མ་དང་སྦྱོར་བ། སོ་འདར་འཁྲིགས་པ་དམར་པོ། ནག་མོ་ཤ་ལ་གཟེར་འདེབས་མ་དང་སྦྱོར་བ། རལ་པ་སྤྱི་བཅིངས་ལྗང་ནག །ནག་པོ་ཁྲག་རལ་མ་དང་སྦྱོར་བ། བཞི་གའང་གཡས་བེ་ཅོན་དང་གཡོན་བདུད་ཞགས་བསྣམས་པ། གྲུ་ཆད་ཀྱི་ལྕགས་མཁར་བཅུ་གཉིས་ལ། བྷ་ཝ་ས་ཏྭ་མཐིང་ནག །ནོར་བུ་དགེ་འཕེལ་དང་འཇོམས་བྱེད་གཉིས་སེར་ནག །ཡཀྴ་གློག་འཕྲེང་དམར་ནག །ཡཀྴ་གསོད་བྱེད་ནག་པོ། གཏུམ་པོ་དུད་ཀ །གང་བ་ཀུན་འཇོམས་དཀར་པོ། ཁ་འབར་རལ་གཅིག་མཐིང་ནག །སྦྲུལ་མགོ་ཀུན་འཛིན་དང་། དད་པ་སྟོབས་ལྡན་སེར་པོ། ཧེ་ལེ་ཁྱབ་པ་དང་། གྱད་པ་སྟོབས་ཆེན་ནག་པོ། བཅུ་གཉིས་པོ་རྣམས་ཀྱང་གཡས་བེ་ཅོན་དང་གཡོན་འཁོར་ལོ་འཛིན་པ། ཕྱི་ནང་གསང་བའི་གཤེད་པོ་བཅུ་གཉིས་དང་། ལས་ཀྱི་འཆི་བདག་བཅུ་གཉིས་པོ་ཐམས་ཅད་ཀྱང་ཐོད་སྐམ་གྱི་དབུ་རྒྱན། ཞིང་ཆེན་གྱི་གཡང་གཞི། སྟག་ལྤགས་ཀྱི་ཤམ་ཐབས་གསོལ་བ། ཕྱིའི་ཁྱམས་སུ་ཤར་དུ་བདུད་པོ་ཁྲམ་ཐོགས་བརྒྱད། ལྷོར་གཤིན་རྗེ་གླང་ཞོན་བརྒྱད་བེ་ཅོན་དང་འཁོར་ལོ་འཛིན་པ། ནུབ་ཏུ་མ་མོ་དྲིལ་ནག་ཞོན་པ་བརྒྱད་ནད་རྐྱལ་དང་ཐུན་ཟོར་བསྣམས་པ། བྱང་དུ་གནོད་སྦྱིན་བྱ་ནག་ཞོན་པ་བརྒྱད་རལ་གྲི་དང་ཞགས་པ་བསྣམས་པ། ཤར་སྒོར་དཀར་པོ་སྙིང་འབྱིན། ལྷོ་སྒོར་མགོན་པོ་(༢༠བ)
ནག་པོ་ནུབ་སྒོར་ཡབ་རྗེ་ནག་པོ། བྱང་སྐོར་སྐུ་མཆོག་དམར་པོ་རྣམས་རང་འདྲའི་མདོག་དང་མཚུངས་པའི་བེར་གསོལ་ཞིང་། གཡས་ཁྲམ་ཤིང་དང་གཡོན་འཁོར་ལོ་འཛིན་པ། ཐམས་ཅད་ཀྱང་སྐུ་ལས་སྐྱེས་པའི་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དཀྱིལ་འཁོར་གྱི་ཕྱི་རོལ་དུ་དུར་ཁྲོད་ཆེན་པོ་བརྒྱད། དེ་ན་གནས་པའི་ཕྱོགས་སྐྱོང་བཅུ། ལྷ་ཆེན་བརྒྱད། ཀླུ་ཆེན་བརྒྱད། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད། བདེ་དཔོན་ཆེན་པོ་དགུ། གཙང་རིགས་ཀྱི་དཔལ་མགོན་བདུན་ཅུ་རྩ་ལྔ་པོ་རྣམས་ལ་ཡང་རང་འདྲའི་འཁོར་འབུམ་འབུམ་གྱིས་བསྐོར་བ། གཞན་ཡང་བདུད་པོ་ཁྲམ་ཐོགས། ནག་པོ་དར་ཐོགས། གསོད་བྱེད་མཚོན་ཐོགས། ཁྱི་ནག །དོམ་དྲེད། འཕར་སྤྱང་མང་པོ་རྒྱུག་པ། བྱ་ནག་འཐིབ་པ། གཡག་རོག་ངུར་བ། རྟ་ནག་འཚེར་བ། མོན་པ་གར་བྱེད་པ། འུག་པ་རྐན་རྡེབ་པ། ཐུན་གྱི་སེར་བ་འབབ་པ། མི་ལྤགས་གཡབ་མོ་རྡེབ་པ། མེ་རླུང་འཚུབ་མ་འཁྱིལ་བ། ཟོར་གྱི་རྩེ་མོར་མཚོན་ཆ་སྣ་ཚོགས་ཀྱི་བུ་ཡུག་འཚུབ་པ། ཟོར་གྱི་སྐེད་པར་ཟོར་བདག་ཕོ་མོ་གློག་ལྟར་འཁྱུག་པ། ཟོར་གྱི་རྩ་བར་རུ་དྲ་ཕོ་མོ་ཁྲག་མཚོར་འཁྱིལ་བ། ཟོར་ཐམས་ཅད་ཀྱང་གནམ་ལྕགས་ཀྱི་ཐོག་མེ་རབ་ཏུ་འབར་བར་གྱུར། དེ་ནས་རོལ་མོ་དྲག་ཏུ་བརྡུང་ཞིང་འདི་སྐད་དོ། །འགྱུར་མེད་ཆོས་སྐུའི་ངང་ལས་མ་གཡོས་ཀྱང་། །རབ་འབྱམས་མངོན་སྤྱོད་ཕྲིན་ལས་བསྒྲུབ་པའི་ཆེད། ཁྲོ་རྒྱལ་ཚེ་བདག་ནག་པོ་འཁོར་བཅས་རྣམས། །དཀྱིལ་འཁོར་ཆེ་འདིར་ཐོགས་མེད་དེ་ཚུར་སྤྱོན། །ཨྱེ་ཀ་ཧེ་དུན་ཡ་མ་རཱ་ཛ་ས་མ་ཡ་ཧཱུཾ། ཡ་མ་རཱ་ཛ་ས་མ་ཡ་ཧཱུཾ་ཛ༔ ཏིཥྛ་ལྷན། མཆོད་པ་འབུལ་བ་ནི། འཇམ་(༢༡ན)
དཔལ་གཤིན་རྗེའི་གཤེད་པོ་འཁོར་བཅས་ལ། །ཕྱི་ནང་གསང་བའི་མཆོད་པའི་ཚོགས་རྣམས་ཀུན། །ཟག་མེད་ཡེ་ཤེས་བདུད་རྩིར་བྱིན་བརླབས་ནས། །གུས་པས་འབུལ་ལོ་དྲག་པོའི་འཕྲིན་ལས་སྒྲུབས། །ཨྱེ་ཀ་ཧེ་དུན་ཡ་མ་རཱ་ཛ་ཨརྒྷཾ་ནས་ཤཔྟའི་བར་དང་། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། མ་ཧཱ་བྷ་ལིཾ་ཏ་ཁ་རཾ་ཁཱ་ཧི། མ་ཧཱ་མཾ་ས་ཁ་རཾ་ཁཱ་ཧི། མ་ཧཱ་གོ་རོ་ཙ་ན་ཁ་རཾ་ཁཱ་ཧི། མ་ཧཱ་བྷ་སུ་ཏ་ཁ་རཾ་ཁཱ་ཧི། མ་ཧཱ་ཀེཾ་ནྲྀ་ཏེ་ཁ་རཾ་ཁཱ་ཧི། མ་ཧཱ་ཙིཏྟ་ཁ་རཾཾ་ཁཱ་ཧི། དེ་ནས་ལྷ་ཚོགས་རྣམས་བསྐུལ་བ་ནི། མཐིང་ནག་གྲུ་གསུམའབར་བའི་གཞལ་ཡས་ནས། །ཕྲིན་ལས་ཡོངས་རྫོགས་འཇམ་དཔལ་གཤིན་རྗེའི་གཤེད། །ཡབ་ཡུམ་གསུམ་གྱི་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། ཁྱོད་ཀྱི་ཕྱོགས་བཞིར་དྲེགས་པ་སྲས་མཆོག་དང་། །རུས་སྦལ་མི་ཟན་རྔམ་པ་སྒྲོལ་ཡུམ་དང་། །བྱ་ཁྱུང་རྒྱལ་པོའི་ཐུགས་དམ་དུས་ལ་བབ། །ཚིག་རྐང་ལྔ་པོ་འོག་མ་ཀུན་ལ་སྦྱོར། །མཚམས་བཞིར་ལྷ་དང་སྲོག་བདག་གནོད་སྦྱིན་ཀླུའི། །སྡེ་དཔོན་སེང་སྟག་དུག་སྦྲུལ་ཁྱུང་མགོ་ཅན། །རྒྱན་གྱི་ལྷ་བརྒྱད་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །ཟླ་གམ་དམར་པོ་ཐོད་པའི་ཕོ་བྲང་ནས། །མནན་བཤིག་བསད་པའི་ལས་ཀྱི་མཐའ་སྡུད་པའི། །སྤྲུལ་པ་རྣམ་གསུམ་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །རྣོ་ངར་ལྕགས་འཁོར་བཅུ་གཉིས་གདན་སྟེང་ནས། །སྲིད་གསུམ་ཚེ་སྲོག་བླ་ལ་(༢༡བ)
དབང་བསྒྱུར་བའི། །གཤེད་ཆེན་བཅུ་གཉིས་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །གྲུ་ཆད་ལྕགས་མཁར་འབར་བ་བཅུ་གཉིས་ནས། །དུས་བཞི་སྲིད་པ་ཀུན་ལ་ཁྱབ་པ་ཡི། །འཆི་བདག་བཅུ་གཉིས་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །གཞན་ཡང་ལས་གཤིན་ཟོར་གྱི་རྣ་ཆ་ཅན། །འཆར་ག་ནག་པོ་སྲིད་གསུམ་གཙོ་མོ་མཆོག །དམག་ཟོར་རྒྱལ་མོའི་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །སྣང་སྲིད་སྡེ་བརྒྱད་དྲེགས་པའི་ཚོགས་སྤྱི་དང་། ཁྱད་པར་གཟའ་བདུད་ནག་པོ་རཱ་ཧུ་ལ། །རྡོ་རྗེ་ལེགས་པའི་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །གཞན་ཡང་བཀའ་ཉན་དམ་ཅན་རྒྱ་མཚོའི་ཚོགས། ཁྱད་པར་ཟབ་མོ་གཏེར་གྱི་སྲུང་མ་མཆོག །མཐུ་ཆེན་སྡེ་བཞིའི་ཐུགས་དམ་དུས་ལ་བབ། །རྣོ་ངར་དྲག་པོ་ཟོར་གྱི་ལས་མཛོད་ལ། །བསྟན་པ་སྤྱི་དང་རིགས་འཛིན་བདག་ཅག་གི །དགོན་གནས་ཡོན་མཆོད་འཁོར་དང་བཅས་རྣམས་ལ། །ཉེ་བར་འཚེ་བའི་དགྲ་བགེགས་གདུག་ཅན་འདི། །ལོ་ཟླར་མ་བཞག་སྙིང་ཁྲག་ཞལ་དུ་གསོལ། །མདོར་ན་སྔ་དགྲ་ལག་དར་ཕྱི་དགྲ་སེམས། །ད་དགྲ་གནོད་ཅིང་འཚེ་བའི་དགྲ་བགེགས་འདི། །ཡར་གྱི་ཕ་རྒྱུད་མར་གྱི་བུ་རྒྱུད་ཆོད། །སྒོ་ཡི་ནོར་དང་མཆན་གྱི་བུ་དང་ཕྲོལ། །འཆི་བའི་དུས་ཐོབ་གནམ་གྱི་འཇུ་ཐག་ཆོད། །ལུས་དང་སྲོག་ཕྲོལ་ས་ཡི་རྟེན་ཕུར་ཕྱུང་། །རང་བཞིན་ལས་ཀྱིས་ཤི་ལ་ཁུངས་མ་འབྱིན། །སྐད་ཅིག་ཉིད་ལ་དོན་སྙིང་དེ་ཕྱུང་ཞིག །འཕྲིན་ལས་བཅོལ་བ་ནི། ཧཱུཾ། ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་རྒྱལ་རོལ་པའི་དུར་ཁྲོད་ཆེན་པོ་ནས༔ ཀླུ་འབུམ་གཉན་ཁྲི་ས་བདག་སྟོང་གི་གདན༔ ཕྱོགས་སྐྱོང་དྲེགས་པ་མ་ཧེ་བསྣོལ་བའི་སྟེང་༔ ཨེ་ལས་ཕྱག་རྒྱ་ཟིལ་གནོན་སྐུ་མདོག་ནག༔ ཞལ་གསུམ་ཕྱག་དྲུག་ཞབས་བཞི་དོར་སྟབས་བགྲད༔ རྣོ་བའི་མཚོན་ཆ་སྣ་ཚོགས་ཕྱག་ན་བསྣམས༔ སྤྲུལ་པའི་ལྷ་ཚོགས་མང་པོ་འཁོར་བཅས་(༢༢ན)
ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ བྱད་དང་རྦོད་གཏོང་མ་ལུས་བཟློག་ཏུ་གསོལ༔ ཤར་ཕྱོགས་དྲི་ཟ་ཕོ་མོ་བསྣོལ་སྟེང་དུ༔ དྲེགས་པ་ཕྱག་ན་རྡོ་རྗེ་ནི༔ ལྗང་ནག་རྡོ་རྗེ་སྙིང་ཕྲེང་འཛིན༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ དྲི་ཟའི་བྱད་དང་རྦོད་གཏོང་བཟློག་ཏུ་གསོལ༔ ལྷོ་ཕྱོགས་གཤིན་རྗེ་ཕོ་མོ་བསྣོལ་སྟེང་དུ༔ གསོད་བྱེད་ཡ་མ་སེར་ནག་ནི༔ འཁོར་ལོ་ཙིཏྟ་ཕྱག་ན་བསྣམས༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ བྱད་དང་རྦོད་གཏོང་མ་ལུས་བཟློག་ཏུ་གསོལ༔ ནུབ་ཕྱོགས་ཀླུ་དབང་ཕོ་མོའི་ཁྲི་སྟེང་དུ༔ རུས་སྦལ་རྔམ་པ་མི་ཟན་ནི༔ སྡེར་མོ་གནམ་ལྕགས་སྤུ་གྲི་འདྲ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ཀླུ་ཡི་བྱད་དང་རྦོད་གཏོང་རིམས་ནད་བཟློག༔ བྱང་ཕྱོགས་གནོད་སྦྱིན་ཕོ་མོའི་ཁྲི་སྟེང་དུ༔ སྔགས་སུ་ཨེ་ཀ་ཛཱ་ཊི་ནི༔ ཕྱག་ན་རལ་གྲི་གློག་ཕྲེང་བསྣམས༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ གནོད་སྦྱིན་བྱད་དང་རྦོད་གཏོང་བཟློག་ཏུ་གསོལ༔ ཡུམ་མཆོག་པེ་ཏ་ནག་མོ་ནི༔ ཙིཏྟ་བནྡྷ་ཡབ་ལ་སྟོབ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ བྱད་དང་རྦོད་གཏོང་མ་ལུས་བཟློག་ཏུ་གསོལ༔ ཤར་ལྷོ་མེ་ལྷའི་ཁྲི་སྟེང་དུ༔ ལྷ་ཡི་གཤེད་པོ་སེང་གེའི་དབུ༔ སྤུ་གྲི་མི་སྙིང་ཕྱག་ན་བསྣམས༔ ཡབ་ཡུམ་འཁོར་དང་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ཤར་ལྷོ་མེ་ལྷའི་གནོད་པ་བཟློག་ཏུ་གསོལ༔ ལྷོ་ནུབ་སྲིན་པོ་ཕོ་མོའི་ཁྲི་སྟེང་དུ༔ སྲོག་བདག་དམར་པོ་སྟག་གི་མགོ༔ སྤུ་གྲི་ཙིཏྟའི་ཕྲེང་བ་བསྣམས༔ སྲོག་བདག་ཡབ་ཡུམ་འཁོར་དང་བཅས་པ་ལ༔ ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ལྷོ་ནུབ་སྲིན་པོ་ཕོ་(༢༢བ)
མོའི་གནོད་པ་བཟློག༔ ནུབ་བྱང་རླུང་ལྷ་ཕོ་མོའི་ཁྲི་སྟེང་དུ༔ ཀླུ་གཤེད་ནག་པོ་སྦྲུལ་གྱི་མགོ༔ ཕྱག་ན་བསེ་ཡི་སྤུ་གྲི་བསྣམས༔ ཡབ་ཡུམ་འཆི་བདག་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ནུབ་བྱང་འཆི་བདག་ཀླུ་ཡི་གནོད་པ་བཟློག༔ བྱང་ཤར་དབང་ལྡན་ཕོ་མོའི་ཁྲི་སྟེང་དུ༔ གནོད་སྦྱིན་གཤེད་པོ་ཁྱུང་ནག་གཉིས༔ ཞལ་དུ་གདུག་པ་ཀླུ་སྦྲུལ་གསོལ༔ ཡབ་ཡུམ་ཁྱུང་ཆེན་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ བྱང་ཤར་གནོད་སྦྱིན་ཕོ་མོའི་གནོད་པ་བཟློག༔ ཟླ་གམ་ཐོད་མཁར་གསུམ་གྱི་དབུས༔ དུག་གསུམ་བསྣོལ་བའི་ཁྲི་སྟེང་དུ༔ ཚེ་བདག་སྲོག་བདག་འཆི་བདག་གསུམ༔ སྣ་ཚོགས་མི་སྡུག་སེམས་ཅན་དབུ༔ མཚོན་ཆ་མི་སྡུག་ལག་ན་ཐོགས༔ དུག་གསུམ་སྒྲོལ་བྱེད་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ དུག་གསུམ་འདུས་པའི་བྱད་དང་རྦོད་གཏོང་བཟློག༔ འཁོར་ལོ་ཐོད་མཁར་བཅུ་གཉིས་ནས༔ གསང་བའི་གཤེད་ཆེན་བཞི་པོ་ནི༔ སྲིན་པོ་ཡ་མ་རཱ་ཙ་ནི༔ མ་ཏྲང་རོ་དབྱུག་འཁོར་ལོ་ཐོགས༔ ཡུམ་མཆོག་ཐལ་མདོག་གཡོན་ན་འཁྲིལ༔ ཁྲམ་ཤིང་ནད་ཀྱི་རྐྱལ་པ་བསྣམས༔ གཤིན་རྗེ་མྱོས་བྱེད་འབར་བ་ནི༔ སེར་ནག་བེ་ཅོན་འཁོར་ལོ་འཛིན༔ གཡོན་དུ་ཡུམ་མཆོག་གསོད་བྱེད་མ༔ ཁྲམ་ཤིང་ནད་ཀྱི་རྐྱལ་པ་བསྣམས༔ གཤེད་པོ་ཨཪྱ་མ་རུ་ནི༔ དམར་པོ་བེ་ཅོན་ཙཀྲ་བསྣམས༔ གཡོན་དུ་སྲོག་ལེན་ནག་པོ་ནི༔ ཁྲམ་ཤིང་ནད་ཀྱི་རྐྱལ་པ་བསྣམས༔ གཤེད་བྱེད་རལ་པ་ཚར་དགུ་ནི༔ ལྗང་ནག་བེ་ཅོན་ཙཀྲ་བསྣམས༔ གཡོན་དུ་བདུད་མོ་རལ་ནག་མོ༔ ཁྲམ་ཤིང་ནད་ཀྱི་རྐྱལ་པ་བསྣམས༔ གསང་བའི་གཤེད་བཞི་བཅས་པ་(༢༣ན)
ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ གསང་གཤེད་སྤྲུལ་པའི་གདོན་དང་གནོད་པ་བཟློག༔ ནང་གི་གཤེད་ཆེན་བཞི་པོ་ནི༔ དུང་གི་མོན་པ་སེང་གེའི་མགོ༔ ཡུམ་ནི་མོན་མོ་བླ་རྐུན་མ༔ ལྕགས་ཀྱི་མོན་པ་སྟག་གི་མགོ༔ མོན་མོ་གཡུ་ཡི་རལ་པ་ཅན༔ བསེ་ཡི་མོན་པ་དྲེད་ཀྱི་མགོ༔ མོན་མོ་ཁྲག་གི་རལ་པ་ཅན༔ གསེར་གྱི་མོན་པ་ཁྱུང་གི་མགོ༔ མོན་མོ་སྙིང་འཛིན་ཟོར་འཕེན་མ༔ ཡབ་རྣམས་བེ་ཅོན་ཙིཏྟ་བསྣམས༔ ཡུམ་ཀུན་ལྕགས་ཀྱུ་ཞགས་པ་བསྣམས༔ ནང་གི་གཤེད་བཞིར་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ནང་གཤེད་མོན་པའི་གནོད་པ་བཟློག་ཏུ་གསོལ༔ ཕྱི་ཡི་གཤེད་ཆེན་བཞི་པོ་ནི༔ ཧེ་ལེ་ཁྱབ་པ་ཤར་གྱི་བདུད༔ ཡུམ་ནི་རོ་ཟན་སྙིང་འབྱིན་མ༔ ནག་པོ་འཛུམ་མེད་ལྷོ་ཡི་བདུད༔ ནག་མོ་སྙིང་ཁྲག་རོལ་འཐུང་མ༔ སོ་འདར་འཁྲིགས་པ་ནུབ་ཀྱི་བདུད༔ ནག་མོ་ཤ་ལ་གཟེར་འདེབས་མ༔ རལ་པ་སྤྱི་བཅིངས་བྱང་གི་བདུད༔ མ་མོ་ནག་མོ་ཁྲག་རལ་ཅན༔ ཡབ་རྣམས་ཁྲམ་ཤིང་ཞགས་པ་བསྣམས༔ ཡུམ་ཀུན་སྤུ་གྲི་མི་སྙིང་བསྣམས༔ ཕྱི་ཡི་གཤེད་བཞིར་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ཕྱི་ཡི་གཤེད་བཞིའི་གནོད་པ་བཟློག་ཏུ་གསོལ༔ གྲུ་ཆད་ལྕགས་མཁར་བཅུ་གཉིས་ནི༔ བྷེ་ཝ་ས་ཏྭ་ནག་པོ་དང་༔ ནོར་བུ་དགེ་འཕེལ་སེར་པོ་དང་༔ ནག་པོ་འཛུམ་མེད་སེར་ནག་དང་༔ བྱེ་བ་དགུ་ཁྲི་ནག་པོ་དང་༔ རཀྴ་གློག་ཕྲེང་དམར་པོ་དང་༔ ཡཀྴ་གསོད་བྱེད་ནག་པོ་དང་༔ གཏུམ་པོ་དུད་ཀ་རལ་པ་གདོང་༔ གང་བ་ཀུན་འཇོམས་དཀར་པོ་དང་༔ ཁ་འབར་རལ་གཅིག་མཐིང་ལ་སྔོ༔ སྦྲུལ་མགོ་ཀུན་འཛིན་སྔོ་ལ་སྐྱ༔ དད་པ་སྟོབས་ལྡན་ཀུན་ནས་(༢༣བ)
སེར༔ གྱད་པ་སྟོབས་ལྡན་ནག་ལ་འཇིགས༔ བེ་ཅོན་འཁོར་ལོ་ཕྱག་ན་བསྣམས༔ ཟླ་གཤེད་གཤིན་རྗེའི་བཅུ་གཉིས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ཟླ་གཤེད་བཅུ་གཉིས་གནོད་པ་བཟློག་ཏུ་གསོལ༔ ཞག་གཤེད་སུམ་བརྒྱ་དྲུག་ཅུ་ནི༔ ཤར་དུ་ཁྲམ་ཐོགས་བདུད་པོ་བརྒྱ༔ ཆིབས་སུ་རྟ་ནག་རྟིང་དཀར་བཅིབས༔ ལྷོ་ཡི་གཤིན་རྗེ་ཆུ་གླང་ཞོན༔ འཁོར་ལོ་བེ་ཅོན་ཕྱག་ན་བསྣམས༔ ནུབ་ན་མ་མོ་དྲེད་ནག་ཞོན༔ ཕྱག་ན་ནད་རྐྱལ་ཐུན་ཟོར་བསྣམས༔ བྱང་དུ་གནོད་སྦྱིན་བྱ་ནག་ཞོན༔ ཕྱག་ན་རལ་གྲི་ཞགས་པ་བསྣམས༔ ཞག་གི་གཤེད་པོ་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ཞག་གཤེད་སུམ་བརྒྱའི་གནོད་པ་བཟློག་ཏུ་གསོལ༔ ཤར་སྒོར་དཀར་པོ་ཤིང་འཛིན་དང་༔ ལྷོ་སྒོར་མགོན་པོ་ནག་པོ་དང་༔ ནུབ་སྒོར་བདུད་པོ་ཡབ་རྗེ་དང་༔ བྱང་སྒོར་གནོད་སྦྱིན་སྐུ་མཆོག་དམར༔ འཁོར་ལོ་ཐུན་ཁྲག་ཕྱག་ན་བསྣམས༔ སྐུ་ལ་ཙེ་བེར་ཁྲ་བོ་གསོལ༔ ཡུམ་མཆོག་མཁའ་འགྲོ་རོ་ལངས་ཀྱང་༔ མི་ལྤགས་རློན་པའི་ན་བཟའ་གསོལ༔ ཕྱག་གཡས་མ་ཏྲང་རོ་དབྱུག་འཕྱར༔ ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་གཡོན༔ སྒོ་བཞི་སྒྲོལ་གྱིང་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ གཤེད་བཞིན་ཕོ་ཉའི་གནོད་པ་བཟློག་ཏུ་གསོལ༔ ཕྱི་རོལ་དཀྱིལ་འཁོར་མུ་རན་སྐྱོང་༔ ཟ་མའི་གཤིན་རྗེ་བཅུ་དྲུག་ནི༔ ཕོ་གཤེད་སུམ་བརྒྱ་དྲུག་ཅུ་དང་༔ མོ་གཤེད་སུམ་བརྒྱ་དྲུག་ཅུ་དང་༔ གཤིན་རྗེ་བདུན་བརྒྱ་ཉི་ཤུ་ནི༔ ཕྱག་ན་འཁོར་ལོ་ཐུན་ཁྲག་བསྣམས༔ ཆིབས་སུ་མི་དམར་རྟ་དམར་བཅིབས༔ གཤེད་ཆེན་བདུན་བརྒྱ་ཉི་ཤུ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ལས་གཤེད་རྦོད་གཏོང་གནོད་པ་བཟློག་ཏུ་གསོལ༔ གཤིན་(༢༤ན)
རྗེ་ཕྱོགས་སྐྱོང་སྡེ་བརྒྱད་དྲེགས་པའི་ཚོགས༔ ས་ཆུ་མེ་རླུང་སྤྲིན་དང་དུར་ཁྲོད་བདག༔ མཁའ་ལ་རྒྱུ་དང་དབང་ཕྱུག་མཁའ་འགྲོ་མ༔ ཞིང་སྐྱོང་གིང་དང་ལངྐ་བསྟན་མའི་ཚོགས༔ འཇིག་རྟེན་ཀུན་ཏུ་ཁྱབ་པར་རྒྱུག་བྱེད་པ༔ ལས་ཀྱི་གཤིན་རྗེ་ཕོ་ཉ་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་བསྟབས༔ ཕོ་ཉ་གཤིན་རྗེའི་རྦོད་གཏོང་གནོད་པ་བཟློག༔ འཇམ་དཔལ་ཚེ་བདག་ནག་པོ་འཁོར་བཅས་ལ༔ དགྲ་བགེགས་དབང་པོ་ལྔ་དང་ཤ་ཁྲག་ལས༔ ལེགས་གྲུབ་སྨན་རཀ་གིས་བྲན་དམར་ཆེན་གྱི། །གཏོར་མ་འདི་འབུལ་བརྩེ་བས་ཉེར་བཞེས་ལ། །རིགས་འཛིན་སྔགས་འཆང་རྒྱུ་སྦྱོར་སྦྱིན་པའི་བདག །ལྟོས་བཅས་ཀུན་ལ་ཆགས་ཆེ་ཉམ་ང་སོགས། འགལ་རྐྱེན་བར་གཅོད་མི་མཐུན་ཕྱོགས་རྣམས་ཀུན། །དགྲ་བགེགས་སྟེང་དུ་སྒྱུར་བའི་ལས་མཛོད་ཅིག །ཨྱེ་ཀ་ཧེ་དུན་ཡ་མ་རཱ་ཛའི་མཇུག་ཏུ་སྨན་རཀ་གཏོར་གསུམ་གྱི་སྔགས་རྣམས་བཏགས་ཏེ་འབུལ། ལྷ་རེ་ལ་ཕྲིན་ལས་བཅོལ་བའི་ཚིགས་བཅད་རེ་དང་གཏོར་ཆུང་རེ་སྒྲགས་ནས་འབུལ། དེ་ནས་གནམ་ལྕགས་ལས་གྲུབ་པའི་འབྲུབ་ཁུང་གི་ནང་དུ་ཟན་ལིང་ལུས་ཀྱི་སྐྱེ་མཆེད་རྣམས་དོད་པར་བྱས་ཏེ། རྡོ་རྗེ་སློབ་དཔོན་གྱི་མདུན་དུ་བཤམ་པར་བྱའོ། །བསད་པའི་སྐབས་སུ་ཤོག་ལིང་སོགས་ཟུར་ཁྱད་མི་འདྲ་བ་ཅུང་ཟད་དགོས་པ་དག་ནི་བརྒྱུད་པའི་གདམས་ངག་དང་བལ་པོའི་ཤེས་རློམ་ཅན་རྣམས་ཀྱི་སྤྱོད་ཡུལ་མ་ཡིན་པས། བརྒྱུད་ལྡན་གྱི་བླ་མ་དམ་པ་རྣམས་ཀྱི་གསུང་ལས་མྱང་བར་བྱའོ། །དེ་ནས་གསང་བའི་རྫས་གསུམ་གྱིས་བཞིན་ལ་ཐིག་ལེ་དང་། དྲག་པོའི་སེམས་དང་ལྡན་པས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་(༢༤བ)
ལས། རང་གི་ཐུགས་ཀ་ནས་མཐིང་ནག་ཅིག་ཆད་པ་ཡོངས་སུ་གྱུར་པ་ལས། གནམ་ལྕགས་ལས་གྲུབ་པའི་འབྲུབ་ཁུང་ནག་པོ་མེ་རབ་ཏུ་འབར་བ་ཕྲུ་གསུམ་ནང་བང་རིམ་གསུམ་དང་ལྡན་པ། ནང་དུ་འདོད་ཆགས་ཀྱི་ཁྲག་མཚོ་འཁྱིལ་པ། ཞེ་སྡང་གི་མེ་རླུང་འཚུབ་པ། གཏི་མུག་གི་མུན་པ་འཁྲིགས་པ། མཚོན་ཆའི་སེར་བ་འབབ་ཅིང་ནད་ཀྱི་ན་བུན་འཐུལ་བ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་ཀྱི་གང་བ། ལས་ཀྱི་གཤིན་རྗེའི་ཕོ་ཉ་རྣམས་ནི་སེང་གེ་ལྟར་རྔམ་པ། སྟག་ལྟར་འཕྱོ་བ། སྦྲུལ་ལྟར་འཁྱུག་པ། སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། གསོད་གསོད་དང་རྒྱོབ་རྒྱོབ་ཀྱི་སྒྲ་འབྲུག་ལྟར་སྒྲོག་པ། དེའི་ནང་དུ་ཕྱིན་པ་ཙམ་གྱིས་ལྷ་དང་བྲལ་ཞིང་གཤེད་དུ་འབེབས་པ། ལས་ངན་ཐམས་ཅད་སྨིན་པར་བྱེད་པའི་བཙོན་ཁང་དྲག་པོའི་དབུས་སུ་ནྲྀ་ལས་དམིགས་བྱའི་དམ་ཉམས་དགྲ་བོ་དེ་དག་མདོག་ནག་ཅིང་ཉམ་ཆུང་བ། བུ་ག་དགུ་ནས་ཁྲག་དང་རྣག་འཛག་པ། ཡན་ལག་ཐམས་ཅད་ལྕགས་སྒྲོག་གིས་བསྡམས་པ། མི་མཐུན་ཕྱོགས་ཐམས་ཅད་འདུས་པའི་ངོ་བོར་གྱུར། དེ་ནས་སྣ་ཚོགས་པའི་རོལ་མོ་དང་། གྲོ་གའི་ཤུ་སྒྲ་དང་བཅས་པས། ན་མོ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་རྒྱལ་བ་ཞི་ཁྲོའི་ལྷ་ཚོགས། ཁྱད་པར་འཇམ་དཔལ་ཚེ་བདག་ནག་པོ་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ། རིག་སྔགས་འཆང་བ་བདག་གི་སྔགས་དང་ཏིང་ངེ་འཛིན་གྱི་བདེན་པ་ཆེན་པོའི་མཐུ་ལ་བརྟེན་ནས། སངས་རྒྱས་ཀྱི་བསྟན་དགྲ །བླ་མའི་སྐུ་དགྲ །དགེ་འདུན་གྱི་སྤྱི་དགྲ། ཁྱད་པར་རིགས་སྔགས་འཆང་བ་བདག་དང་། བལྟོས་(༢༥ན)
བཅས་སྦྱིན་པའི་བདག་པོ་འཁོར་དང་བཅས་པ་རྣམས་ལ་སྔ་དགྲ་ལག་ལ་དར་བ། ཕྱི་དགྲ་ཡིད་ལ་སེམས་པ། ད་དགྲ་གནོད་ཅིང་འཚེ་བའི་དགྲ་བགེགས་བསམ་པ་ངན་པ་ཡིད་ལ་འཆང་ཞིང་། སྦྱོར་བ་རྩུབ་མོར་སྟོན་པར་བྱེད་པ་རྣམས་ཀྱི་བླ་སྲོག་ཚེ་གསུམ་དང་བཅས་པ། གླིང་བཞི་གླིང་ཕྲན། རི་རབ་ཀྱི་ཁོང་གསེང་། ཉི་ཟླའི་གོ་བར། ཆོས་བོན་བསྲུང་མ་རྣམས་ཀྱིས་སྐྱོབ་པའི་འཁོར་ལོ་སོགས་གང་ན་གནས་ཀྱང་དམིགས་རྟེན་གྱི་ཉ་བོ་འདི་ཉིད་ལ་ཁུག་ཅིག །ཨྱཻ་རིང་གི་མཐར། བཛྲ་ཨཾ་གུ་ཤ་ཡ་ཛ༔ བཛྲ་པཱ་ཤ་ཧཱུཾ། བཛྲ་སྤོ་ཊ་བཾ། བཛྲ་གྷཎྜེ་ཧོ༔ བཛྲ་པྲ་བཻ་ཤ་ཡ་ཕཊ། ཨ་བཻ་ཤ་ཡ་ཨཱཿ དེ་ནས་དབང་གཟུགས་ནི། དངོས་གྲུབ་རྩ་བ་རྡོ་རྗེ་སློབ་དཔོན་དང་། །རབ་འབྱམས་མཐུ་སྟོབས་ལྡན་པའི་ཞི་ཁྲོའི་ལྷ། །ཡེ་ཤེས་སྤྱན་ལྡན་དམ་ཅན་སྲུང་མའི་ཚོགས། །མ་ཉེས་དཔང་མཛོད་བདེན་རྫུན་གཤགས་ཕྱེ་ཞིག །ཐུབ་བསྟན་གངས་ཀྱི་རི་ལ་གནས་བཅས་ཤིང་། །སྡོམ་གསུམ་ལུས་ཀྱི་རྩལ་ཁ་ཡོངས་རྫོགས་པའི། །རིགས་འཛིན་གདོང་ལྔའི་དབང་པོ་བདག་ཅག་ལ། །ལོག་འདྲེན་ཤྭ་ནའི་བུ་ཡི་གནོད་པ་བྱུང་། །རྩ་གསུམ་དཀྱིལ་འཁོར་འཁོར་ལོའི་ལྷ་ཚོགས་དང་། །བསྟན་སྲུང་རྒྱ་མཚོས་གསེར་སྐྱེམས་འདི་བཞེས་ལ། །ཡེ་ཤེས་སྤྱན་གྱིས་གཟིགས་ལ་གཟུ་དཔང་མཛོད༔ དུས་ལས་གཡེལ་ལམ་སྔོན་གྱི་དམ་ཚིག་དགོངས། །བསྙེན་ཅིང་བསྒྲུབ་པའི་འདབ་གཤོག་རབ་རྒྱས་ཤིང་། །ལས་སྦྱོར་དྲག་པོའི་རྣོ་ངར་མཆུ་སྡེར་ཅན། །རིགས་འཛིན་མཁའ་ལྡིང་དབང་པོ་བདག་ཅག་ལ། །དགྲ་བགེགས་འབྱུང་པོའི་བྱ་ཡི་གནོད་པ་བྱུང་། །རྩ་གསུམ་དཀྱིལ་འཁོར་ལྷ་ཚོགས་དང་། །(༢༥བ)
བསྟན་སྲུང་རྒྱ་མཚོས་གསེར་སྐྱེམས་འདི་བཞེས་ལ། །ཡེ་ཤེས་སྤྱན་གྱིས་གཟིགས་ལ་གཟུ་དཔང་མཛོད༔ དུས་ལས་གཡེལ་ལམ་སྔོན་གྱི་དམ་ཚིག་དགོངས། །སྐུ་གསུམ་ས་བོན་དབང་བཞིའི་འཆི་མེད་ཆབ། །མཚན་ལྡན་བླ་མའི་གངས་རི་ལས་འབེབས་པའི། །རིགས་འཛིན་སྐལ་ལྡན་ཤིང་རྟ་བདག་ཅག་ལ། །དགྲ་བགེགས་དྲང་སྲོང་ཛཧྣུའི་གནོད་པ་བྱུང་།རྩ་གསུམ་དཀྱིལ་འཁོར་འཁོར་ལོའི་ལྷ་ཚོགས་དང་། །བསྟན་སྲུང་རྒྱ་མཚོས་གསེར་སྐྱེམས་འདི་བཞེས་ལ། །ཡེ་ཤེས་སྤྱན་གྱིས་གཟིགས་ལ་གཟུ་དཔང་མཛོད༔ དུས་ལས་གཡེལ་ལམ་སྔོན་གྱི་དམ་ཚིག་དགོངས། །སྨིན་བྱེད་གཞུང་གི་ལྷ་ལམ་ལ་བརྟེན་ནས། །སྐུ་གསུམ་ལམ་འཁྱེར་ཟབ་མོ་པདྨའི་ཚལ། །རྒྱས་བྱེད་རིགས་འཛིན་རྟ་ལྗང་བདག་ཅག་ལ། །དགྲ་བགེགས་ཆུ་འཛིན་འཁྲིགས་པའི་གནོད་པ་བྱུང་། །རྩ་གསུམ་དཀྱིལ་འཁོར་འཁོར་ལོའི་ལྷ་ཚོགས་དང་། །བསྟན་སྲུང་རྒྱ་མཚོས་གསེར་སྐྱེམས་འདི་བཞེས་ལ། །ཡེ་ཤེས་སྤྱན་གྱིས་གཟིགས་ལ་གཟུ་དཔང་མཛོད༔ དུས་ལས་གཡེལ་ལམ་སྔོན་གྱི་དམ་ཚིག་དགོངས། །གྲོལ་བྱེད་རྒྱུད་སྡེའི་ནོར་འཛིན་ལ་བརྟེན་ནས། །རྩ་ཐིག་རླུང་གསུམ་ཉེ་ལམ་ལྷུན་པོའི་རྩེར། །གནས་བཅས་རིགས་འཛིན་ལྷ་དབང་བདག་ཅག་ལ། །དགྲ་བགེགས་སྔོན་གྱི་ལྷ་ཡི་གནོད་པ་བྱུང་། །རྩ་གསུམ་དཀྱིལ་འཁོར་འཁོར་ལོའི་ལྷ་ཚོགས་དང་། །བསྟན་སྲུང་རྒྱ་མཚོས་གསེར་སྐྱེམས་འདི་བཞེས་ལ། །ཡེ་ཤེས་སྤྱན་གྱིས་གཟིགས་ལ་གཟུ་དཔང་མཛོད༔ དུས་ལས་གཡེལ་ལམ་སྔོན་གྱི་དམ་ཚིག་དགོངས། །ཕན་བདེའི་འབྱུང་གནས་ཐུབ་བསྟན་ས་མོས་ཚལ། །ཉམས་བྱེད་དགྲ་བགེགས་གླང་པོའི་མགོ་བོ་འདི། །བསྟན་སྲུང་དམ་ཅན་རི་དྭགས་དབང་པོ་ཡིས། །འགེམས་པར་མི་བྱེད་མཐུ་དང་རྩལ་གྱིས་ཅི། །འདུས་སྡེ་ཡོངས་འདུ་རྡོར་འཛིན་ལོ་འབྲས་ཀུན། །འཇོམས་བྱེད་དགྲ་བགེགས་གྲང་རེག་ཉེར་འཚེའི་སྟོབས། །བསྟན་སྲུང་དམ་ཅན་རྒྱ་མཚོ་བདེ་བྱེད་ཀྱིས། །འཇོམས་པར་མི་བྱེད་ཚ་གདུང་ཅན་འདིས་ཅི། །འགྲོ་དྲུག་སེམས་ཅན་དགེ་བཅུའི་བདོག་པ་ཀུན། །འཕྲོག་བྱེད་དགྲ་བགེགས་ལྷ་མིན་སྟོབས་ལྡན་འདི། །བསྟན་སྲུང་དམ་ཅན་འཇུག་པ་བཅུ་པ་ཡིས། །ནོར་འཛིན་འོག་ཏུ་མི་འཆིང་ཐབས་ཀྱིས་ཅི། །མདོར་ན་ལོག་འདྲེན་འདི་ཡི་མཚང་རྣམས་ཀུན། །བདག་ཡིད་དང་བའི་སེམས་ཀྱི་རབ་བསྒྲགས་ན། །མཐུ་ལྡན་དམ་ཅན་རྒྱ་མཚོས་དགྲ་བགེགས་འདི། །ཐལ་བའི་རྡུལ་དུ་རློག་པའི་འཕྲིན་ལས་མཛོད། །ཅེས་དམ་བརྡར། དེ་ནས་དར་ནག་གི་གཡབ་མོ་དང་བཅས་(༢༦ན)
ཏེ། །བྷྱོ། བླ་འགུགས་སྤྲུལ་པ་གནོད་སྦྱིན་གསེར་གྱི་སྟག །ལྕགས་ཀྱི་དོམ་སྤྱང་བྱུ་རུའི་ཁྱི་མོ་དང་། ཁྱུང་ཆེན་གསེར་གྱི་འཕར་བ་ཟངས་ཀྱི་དྲེད། །གང་འཚམ་གཟུགས་སུ་སྤྲུལ་ལ་ཁྱོད་རྣམས་ཀྱིས། །བླ་ཚེ་འཁྱམས་པོ་འཕྱོ་པའི་དུས་དྲུག་ལ། །བླ་རྟགས་མི་དང་ཤ་བ་དགོ་བ་ལུག །ར་ཁྱི་བྱ་དང་གླ་བ་བོང་བུ་སོགས། །གང་དུ་བརྫུས་ཀྱང་ད་ལྟ་ཉིད་དུ་ཁུག །ཨྱེ་མྱགས་ཀྱི་མཇུག་ཏུ། དགྲ་བོའི་བླ་ཤ་རེ་མ་ཏི་འགྲིམ་འགྲིམ། ཤ་མ་རུ་ཏི་ཐུལ་ཐུལ། མྱོགས་མྱོགས། །ཡེད་ཡེད། ཤ་མ་རུ་ཏི་ཁུག་ཁུག །ལིང་མྱོགས་ལིང་ཤག །ལིང་ཐུམས། ཙ་མུན་ཏྲི་ཛཿཧཱུཾ་བཾ་ཧོཿ དེ་ནས་ལྷ་དང་དབྱེ་བ་ནི། ལས་ཀྱི་གཤིན་རྗེ་གཤེད་པོ་ཐམས་ཅད་དང་། ཁ་ཁ་མུ་ཁ་མཐིང་ནག་བྱ་རོག་གདོང་། །ཧུ་ལུ་མུ་ཁ་སེར་ནག་འུག་པའི་གདོང་། །འཁོར་བཅས་ཁྱོད་ཀྱི་ཐུགས་དམ་དུས་ལ་བབ། །དམ་ཉམས་དགྲ་བགེགས་མི་ནོར་འཁོར་བཅས་འདི། །དགྲ་དང་དགྲ་ལྷ་ལུས་དང་སྲུང་མ་ཕྲོལ། ཁྱོད་དང་ཆུང་མ་ཕ་དང་བུ་གཉིས་ཕྲོལ། །གཉེན་དང་ཉེ་དུ་ཕོ་བོ་ནུ་བོ་ཕྲོལ། །དགྲ་ལྷ་སྤྱི་གཙུག་ཕོ་ལྷ་ཕྲག་པ་གཡས། །ཡུལ་ལྷ་ཕྲག་གཡོན་སྲོག་ལྷ་སྙིང་གི་དཀྱིལ། །ཞང་ལྷ་ལྟེ་ཁུང་མ་ལྷ་གསང་བའི་གནས། །འགོ་བའི་བན་བོན་ལྷ་སྲུང་ཚོགས་རྣམས་ཀུན། །ཏིང་འཛིན་སྔགས་དང་རྫས་ཀྱི་འཁྲུལ་འཁོར་མཐུས། །སྐྱོབ་པའི་ལྷ་དང་ཕྲོལ་ལ་བདུད་དང་སྤྲོད། །རང་གཤེད་རང་ལ་དབབ་སོགས་དྲག་པོའི་ལས། །ཐོགས་པ་མེད་པར་མྱུར་དུ་སྒྲུབ་པར་མཛོད། །ཨྱེ་མྱགས་ཀྱི་མཐར། །མ་མ་ཏྲག་མཱ་ར་ཡ་ཕྱེ་ཕྱེ། ཏྲག་རཀྴ་རུ་དྲ་མཱ་ར་ཡ། དགྲ་བོ་ལྷ་སྲུང་དང་བཅས་པ་ཕྱེ་ཕྱེ། དཀྲུགས་དཀྲུགས། གཏོར་གཏོར། ཡེད་ཡེད། (༢༦བ)
བྱ་རོག་དང་འུག་པའི་དང་སྒྲོས་ཉ་བོ་ལ་བྱབ་ཅིང་། མཐར་གུ་གུལ་གྱི་དུད་པས་ཀྱང་བདུག་གོ །བསད་པའི་སྐབས་སུ་སྣ་ཚོགས་པའི་རྫས་ངན་དང་། དེ་དག་གི་བསྲེག་ཚུལ་སོགས་ཀྱང་ཞལ་ལས་ཤེས་དགོས་སོ། །དེ་ནས་ཐུན་བརྡེག་པ་ནི། མཚེ་ཡུང་རྡོ་ལྕགས་ལ་སོགས་དྲག་པོའི་རྫས། །དུག་དང་ཁྲག་ཏུ་སྦོལ་ཏེ་ངར་བཏགས་པའི། །རྡོ་རྗེའི་ཐོག་དང་མཚུངས་པའི་ཐུན་རྫས་འདི། །བཏབ་པས་ཚེ་སྲོག་བཀྲག་མདངས་ཉམས་པར་གྱུར། །ཞེས་འོག་གི་ཕུར་པ་གདབ་པའི་སྔགས་ཀྱི་མཇུག་ཏུ་འདི་བཏགས་ཏེ་བརྡེག་པར་བྱའོ། །ཨྱེ་དགྲ་བོའི་སྲོག་ལ་ཐུམ་རིལ་རྦད་བྷྱོ༔ དུན་ཁྲཾ་ཤིག་ཙིཏྟ་ལ་མྱོགས་རྦད་བྷྱོ༔ ཨ་མུ་ཀ་རྩ་ལ་དུན་རྨུགས་རྦད་བྷྱོ༔ ཨ་མུ་ཀ་ཡཾ་ཁྲག་ལ་མུགས་ཏི་ཐུན་རྦད་བྷྱོ༔ སྔགསཔ་སྙིང་དུ་སོད། ཙིཏྟ་གཏུབས་རྦད་ལོང་སྲོག་ཙིཏྟ་ལོང་། མྱགས་མྱགས་མཱ་ར་ཡ་ཙིཏྟ་ལ་ཐུན་བྷྱོ༔ དེ་ནས་ཕུར་པ་བཏབ་པ་ནི། རང་ཉིད་ཟིལ་གནོན་གསལ་བའི་ཐུགས་ཀ་ནས། །ཡ་མ་རཱ་ཛ་སྐུ་སྟོད་ཁྲོ་བོའི་གཟུགས། །གཡས་པ་འཁོར་ལོ་གཡོན་པ་ཙིཏྟ་འཛིན། །སྐུ་སྨད་གནམ་ལྕགས་ཕུར་པའི་དཔལ་ལྡན་པ། །དམ་ཉམས་དགྲ་བགེགས་ལུས་ལ་བཏབ་པ་ཡིས། །སྙིང་གི་དཀྱིལ་དུ་མར་མེ་ལྟ་བུའི་སྲོག །གསལ་མཚོར་དངས་པ་བསད་ཅིང་ནྲྀའི་རྣམ་པའི། །རྣམ་ཤེས་ཕུར་རྩེར་བླངས་ཏེ་ཐུགས་ཀར་བསྡུ། །ཨྱེ་རིང་གི་མཐར། ཨ་མུ་ཀ་མྱགས་ཐུཾ་རིལ་རྦད། ཏྲིག་ནན་སྦུར་ཡ་ནན། ཨེ་ཧུར་ཐུམས་ཛ༔ ཁཾ་ཤག་རོ་མྱགས་མུགས་ཏི་རྦད་ཡཱ། ཨྱེ་མྱགས་ཀྱི་མཐར། ནྲྀ་ཏྲི་སྲོག་ལ་ཧུར་ཐུམས་ཛ༔ རྩ་ཁྲག་སྙིང་ཐུཾ་རི་ལ་རཾ་ཤག་ཐད། དགྲ་བོའི་ཙིཏྟ་བྲེང་ཤག་ཛ༔ སྲོག་ལ་ཧུར་ཐུམས་རྦད། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། (༢༧ན)
དགྲ་བོ་ཨ་མུ་ཀ་སྲོག་ལ་ཐུཾ་རྨུགས་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ དགྲ་བོའི་སྲོག་ལ་མཱ་ར་ཡ་རྦད། དགྲ་བོའི་སྲོག་ལ་སྟཾ་བྷ་ཡ་ནན། ཞེས་ཕུར་པ་བཏབ། དེ་ནས་ལིང་རོ་བསྒྲལ་བ་ནི། སྲས་མཆོག་ཐུགས་ནས་དྲེགས་པའི་བདག་པོ་ནི། །ངོ་བོ་གསང་སྔགས་རྡོ་རྗེ་འཛིན་པ་ལ། །རྣམ་པ་གནམ་ལྕགས་རལ་གྲིས་ཤ་ཁྲག་ཀུན། །དུམ་བུར་གཏུབས་ནས་གཙོ་འཁོར་ཞལ་དུ་འདེབས། །གོང་གི་སྔགས་རྣམས་བརྗོད་ལ་རལ་གྲིས་གཏུབ་ཅིང་ལིང་རོ་རྣམས་བན་དྷར་བླུག་ལ། དེ་ནས། སྟོང་གསུམ་ཁེངས་པའི་སྐུར་བཞེངས་ཉི་ཟླའི་སྤྱན། །གཟིགས་ལ་གནམ་སའི་ཞལ་གདོངས་གློག་དམར་ལྗགས། ཁྱོད་ཞིག་གངས་རི་ལྟ་བུའི་མཆེ་གཙིགས་ནས། །དམ་ཉམས་དགྲ་བོའི་ཤ་ཁྲག་ཚོགས་བཞེས་ཤིག །ཅེས་བརྗོད་ལ་ལིང་རོ་རྣམས་གཏོར་མར་འབུལ། ཨྱེ་ཀ་ཧེ་དུན་གྱི་མཐར། མ་ཧཱ་མཾ་ས་སོགས་བརྗོད། དེ་ནས་བཟློག་པ་བྱ་བ་ནི། གཏོར་མའི་ཁར་རཀྟ་སྦྲེང་ཞིང་འདི་སྐད་དོ། །བྷྱོ། ད་ནི་བཟློག་པའི་དུ་ལ་བབ༔ ད་ནི་བསྒྱུར་བའི་དུས་ལ་བབ༔ འཇིགས་སུ་རུང་བའི་དུར་ཁྲོད་ནས༔ ཀླུ་འབུམ་གཉན་ཁྲི་ས་བདག་སྟོང་༔ མ་ཧེ་ཕྱོགས་སྐྱོང་དྲེགས་པའི་སྟེང་༔ གཤིན་རྗེའི་རྒྱལ་པོ་ཚེ་བདག་ནི༔ གཡས་དཀར་ལྷ་ཡི་ཆད་པ་བཟློག༔ གཡོན་དམར་མ་མོའི་ཆད་པ་བཟློག༔ དབུས་མཐིང་བདུད་ཀྱི་ཆོ་འཕྲུལ་བཟློག༔ ཕྱག་དྲུགརྒྱུད་དྲུག་རྦོད་གཏོང་བཟློག༔ དབུ་ལ་ཁྱུང་ཆེན་འབར་བ་ཡིས༔ ས་བདག་ཀླུ་གཉན་རྦོད་གཏོང་བཟློག༔ ཡུམ་མཆོག་ཟ་བྱེད་པེ་ཏ་ལི༔ སྦྱོར་ཡུམ་དབྱིངས་ཡུམ་འཁོར་བཅས་(༢༧བ)
ཀྱིས༔ སྲིད་པ་མ་མོའི་ཆོ་འཕྲུལ་བཟློག༔ གྱད་གནོན་སྤྲུལ་པའི་ལྷ་བརྒྱད་ཀྱིས༔ ལྷ་སྲིན་སྡེ་བརྒྱད་ཆོ་འཕྲུལ་བཟློག༔ བདུད་རྩི་ཆང་གི་མཆོད་པ་འབུལ༔ སྲིད་པ་ཕོ་རྒྱུད་ཆོ་འཕྲུལ་བཟློག༔ རཀྟ་ཁྲག་གི་མཆོད་པ་འབུལ༔ སྲིད་པ་མོ་རྒྱུད་ཆོ་འཕྲུལ་བཟློག༔ དམར་གྱི་གཏོར་མའི་མཆོད་པ་འབུལ༔ བྱད་དང་རྦོད་གཏོང་ཆོ་འཕྲུལ་བཟློག༔ དབུ་ལ་ནོར་བུ་འབར་བས་བརྒྱན༔ རྣལ་འབྱོར་ཚེ་རིང་དཔལ་ཡང་བསྐྱེད༔ བྷྱོ། ཚངས་པ་བརྒྱ་བྱིན་ལྷ་ཡི་གདོན༔ འཇིགས་པའི་སྟོབས་ཀྱིས་བཟློག་ཏུ་གསོལ༔ དགའ་བོ་འཇོག་པོ་ཀླུ་ཡི་གདོན༔ བརྗིད་པའི་སྟོབས་ཀྱིས་བཟློག་ཏུ་གསོལ༔ གང་བ་བཟང་པོ་གནོད་སྦྱིན་གདོན༔ འཇིགས་པའི་སྟོབས་ཀྱིས་བཟློག་ཏུ་གསོལ༔ ཟ་བྱེད་རྔམ་པ་སྲིན་པོའི་གདོན༔ དྲག་པོའི་སྟོབས་ཀྱིས་བཟློག་ཏུ་གསོལ༔ གཙོ་མོ་ཁ་འབར་ཡི་དྭགས་གདོན༔ བཞེད་པའི་སྟོབས་ཀྱིས་བཟློག་ཏུ་གསོལ༔ ཕག་གདོང་འཇིགས་པ་ཤ་ཟའི་གདོན༔ གཏུམ་པོའི་སྟོབས་ཀྱིས་བཟློག་ཏུ་གསོལ༔ བི་ན་ཡ་ཀ་བགེགས་ཀྱི་གདོན༔ འགྱིང་བའི་སྟོབས་ཀྱིས་བཟློག་ཏུ་གསོལ༔ ཁྱབ་འཇུག་བྱི་ནུ་གཟའ་ཡི་གདོན༔ དྲག་པོའི་སྟོབས་ཀྱིས་བཟློག་ཏུ་གསོལ༔ ཁྲམ་ཐོགས་གྲི་ཐོགས་གིང་གི་གདོན༔ སྤྲུལ་པའི་སྟོབས་ཀྱིས་བཟློག་ཏུ་གསོལ༔ ཁ་བཞིར་འགྱོགས་པ་བཙན་གྱི་གདོན༔ འཇིགས་པའི་སྟོབས་ཀྱིས་བཟློག་ཏུ་གསོལ༔ ཏེལ་པ་ཆ་སངས་གཤིན་རྗེའི་གདོན༔ སྤྲུལ་པའི་སྟོབས་ཀྱིས་བཟློག་ཏུ་གསོལ༔ རལ་པ་གསིག་པ་མ་མོའི་གདོན༔ གསུང་གི་སྟོབས་ཀྱིས་བཟློག་ཏུ་གསོལ༔ རོལ་བ་སྐྱ་བདུན་དམུ་ཡི་གདོན༔ མགོ་བརྙན་བརྗིད་པས་བཟློག་ཏུ་གསོལ༔ མ་ཧཱ་དེ་ཝ་མུ་སྟེགས་གདོན༔ བདེན་པའི་སྟོབས་ཀྱིས་བཟློག་ཏུ་གསོལ༔ བྷྱོ། འཇའ་འཁྱིལ་ལྷ་ཡི་ལྟས་ངན་ཡིན༔ ལྷ་ཡི་ལྟས་ངན་བཟློག་ཏུ་གསོལ༔ སེང་གེ་གཤིན་རྗེའི་ལྟས་ངན་ཡིན༔ གཤིན་རྗེའི་(༢༨ན)
ལྟས་ངན་བཟློག་ཏུ་གསོལ༔ དོམ་གཟིག་མ་མོའི་ལྟས་ངན་ཡིན༔ མ་མོའི་ལྟས་ངན་བཟློག་ཏུ་གསོལ༔ འུག་པ་དམུ་ཡི་ལྟས་ངན་ཡིན༔ དམུ་ཡི་ལྟས་ངན་བཟློག་ཏུ་གསོལ༔ ཕ་རོག་མགོན་པོའི་ལྟས་ངན་ཡིན༔ མགོན་པོའི་ལྟས་ངན་བཟློག་ཏུ་གསོལ༔ ཤ་བ་བཙན་གྱི་ལྟས་ངན་ཡིན༔ བཙན་གྱི་ལྟས་ངན་བཟློག་ཏུ་གསོལ༔ སྦྲུལ་ནག་ཀླུ་ཡི་ལྟས་ངན་ཡིན༔ ཀླུ་ཡི་ལྟས་ངན་བཟློག་ཏུ་གསོལ༔ བྱ་ནག་བདུད་ཀྱི་ལྟས་ངན་ཡིན༔ བདུད་ཀྱི་ལྟས་བཟློག་ཏུ་གསོལ༔ ནེ་ཙོ་ཀླུ་སྲིན་ལྟས་ངན་ཡིན༔ ཀླུ་སྲིན་ལྟས་ངན་བཟློག་ཏུ་གསོལ༔ གླ་བ་སྨན་གྱི་ལྟས་ངན་ཡིན༔ སྨན་གྱི་ལྟས་བཟློག་ཏུ་གསོལ༔ བྱ་རྒོད་རྒྱལ་པོའི་ལྟས་ངན་ཡིན༔ རྒྱལ་པོའི་ལྟས་བཟློག་ཏུ་གསོལ༔ སྲིན་བྱ་ཐེའུ་རང་ལྟས་ངན་ཡིན༔ ཐེའུ་རང་ལྟས་ངན་བཟློག་ཏུ་གསོལ༔ པུ་ཤུད་འགོང་པོའི་ལྟས་ངན་ཡིན༔ འགོང་པོའི་ལྟས་བཟློག་ཏུ་གསོལ༔ ཁྲུང་ཁྲུང་དྲི་མོའི་ལྟས་ངན་ཡིན༔ དྲི་མོའི་ལྟས་ངན་བཟློག་ཏུ་གསོལ༔ སྲོད་ལ་བྱ་ཕོ་འཚེར་བ་གནས་ཐེའི་ལྟས་ངན་ཡིན༔ གནམ་ཐེའི་ལྟས་ངན་བཟློག་ཏུ་གསོལ༔ ཐོ་རངས་སྒོ་ཁྱི་ངུ་བ་བར་ཐེའི་ལྟས་ངན་ཡིན༔ བར་ཐེའི་ལྟས་ངན་བཟློག་ཏུ་གསོལ༔ དུར་ཁྲོད་ཝ་མོ་བརྒྱལ་བ་ས་ཐེའི་ལྟས་ངན་ཡིན༔ ས་ཐེའི་ལྟས་ངན་བཟློག་ཏུ་གསོལ༔ སྤྱང་སྔོན་རྒྱུག་པ་ཕོ་རྒྱུད་ལྟས་ངན་ཡིན༔ ཕོ་རྒྱུད་ལྟས་ངན་བཟློག་ཏུ་གསོལ༔ གླ་བ་གྲོང་རྒྱུག་མོ་རྒྱུད་ལྟས་ངན་ཡིན༔ མོ་རྒྱུད་ལྟས་ངན་བཟློག་ཏུ་གསོལ༔ ལྷ་ཁང་འོད་རྣམས་རྒྱལ་པོའི་ལྟས་ངན་ཡིན༔ རྒྱལ་པོའི་ལྟས་ངན་བཟློག་ཏུ་གསོལ༔ སྡིག་སྦྲུལ་ཀླུ་ཡི་ལྟས་ངན་ཡིན༔ ཀླུ་ཡི་ལྟས་ངན་བཟློག་ཏུ་གསོལ༔ སྦལ་སྲིན་ས་བདག་ལྟས་ངན་ཡིན༔ ས་བདག་ལྟས་ངན་བཟློག་ཏུ་གསོལ༔ སྲེ་མོ་བྱི་འཁྱེར་གནོད་སྦྱིན་ལྟས་ངན་ཡིན༔ གནོད་སྦྱིན་ལྟས་ངན་བཟློག་ཏུ་གསོལ༔ རི་བྱ་ཁྱིམ་ཞུགས་གཉན་གྱི་ཐན༔ གཉན་གྱི་ལྟས་ངན་བཟློག་ཏུ་གསོལ༔ ཁྱིམ་དུ་རོ་ཐན་འགོང་པོའི་ཐན༔ འགོང་པའི་ལྟས་ངན་བཟློག་ཏུ་གསོལ༔ ཤ་ཕོ་རུ་འཛིངས་རྗེ་དཔོན་ཐནཿ རྗེ་དཔོན་ལྟས་ངན་བཟློག་ཏུ་གསོལ༔ ཉ་མོ་རྔ་འཛིངས་བྲན་གྱི་ཐན༔ བྲན་གྱི་ལྟས་ངན་བཟློག་ཏུ་གསོལ༔ བྱ་ནག་སྡེར་འཛིངས་ཆུང་མའི་ཐན༔ བྱེ་བྲལ་ལྟས་ངན་བཟློག་ཏུ་གསོལ༔ འདྲེ་བྱ་སྲེག་པ་ཆུང་སྲིའི་ཐན༔ ཆུང་སྲིའི་ལྟས་ངན་བཟློག་ཏུ་གསོལ༔ བན་དྷེ་ཧོ་མ་པར་བུའི་ཐན༔ བན་དྷེའི་ཕུང་ཟོར་བཟློག་ཏུ་གསོལ༔ བོན་པོའི་(༢༨བ)
གཙོ་ཟོར་ཞང་ཞུང་ཐན༔ བོན་པོའི་གཙོ་ཟོར་བཟློག་ཏུ་གསོལ༔ མུ་སྟེགས་གླང་ཟོར་མི་ཁའི་ཐན༔ མི་ཁའི་རྒྱ་ཐན་བཟློག་ཏུ་གསོལ༔ ཤ་མོ་ཁྱིམ་གང་མི་ཡི་ཐན༔ ཁྱིམ་གང་མི་ཡི་ལྟས་ངན་བཟློག་ཏུ་གསོལ༔ ར་གང་ནོར་ལ་སྤུ་ཐན་བྱུང་༔ གོད་འདྲེ་གོད་ཁའི་ལྟས་ངན་བཟློག་ཏུ་གསོལ༔ བང་གང་སྲིས་ལ་བྱི་ཐན་བྱུང་༔ འགོང་པོའི་སྲིས་ཐན་བཟློག་ཏུ་གསོལ༔ ཡུན་ཐན་སྲིད་པའི་རྩ་ཐན་བྱུང་༔ རྩ་ཐན་སེར་གསུམ་བཟློག་ཏུ་གསོལ༔ དགྲ་གཤེད་དུར་ལན་རྩ་ཐན་བྱུང་༔ གློ་འགོང་རྩ་ཐན་བཟློག་ཏུ་གསོལ༔ ལྷ་སྲིན་འཁྲུག་པའི་གཏད་སེལ་བྱུང་༔ བྱད་མ་འབུམ་གྱི་ལྟས་ངན་བཟློག་ཏུ་གསོལ༔ བྷྱོ་བྷྱོ་སྡང་བའི་དགྲ་ལ་བྷྱོ༔ བྷྱོ་བྷྱོ་གནོད་པའི་དགེགས་ལ་བྷྱོ༔ བྷྱོ་བྷྱོ་བར་ཆད་རྐྱེན་ལ་བྷྱོ༔ ཡས་ཀྱི་བདུད་དུ་གཡོས་པ་བྷྱོ༔ མས་ཀྱི་སྲི་རུ་ལངས་པ་བྷྱོ༔ ཕུད་བདུད་མཁའ་ལ་འཇབ་པ་བྷྱོ༔ མི་བདུད་གཤེད་དུ་ཁོལ་བ་བྷྱོ༔ ལྟག་པར་གཤེད་དྲེལ་བྱེད་པ་བྷྱོ༔ མདུན་ནས་རྩང་བཞིན་འཛུགས་པ་བྷྱོ༔ རྒྱབ་ནས་ཁྱི་བཞིན་འབྲང་བ་བྷྱོ༔ ངོས་ལ་སྤྲེལ་ལྟར་འཛེག་པ་བྷྱོ༔ ཡུལ་མིའི་དགྲ་དར་བྱེད་པ་བྷྱོ༔ ཐམས་ཅད་མ་ལུས་གཅིག་ཏུ་དྲིལ༔ ཕུང་པོ་ཁམས་དང་སྐྱེ་མཆེད་རྣམས༔ དམིགས་པའི་དགྲ་བགེགས་གཟུགས་སུ་དྲིལ༔ ཉ་བོ་འདི་ལ་བཀུག་བྱས་ནས༔ ཕུར་འདབས་ཐུན་དང་མཚོན་ཆས་བསད༔ བསྒྲལ་བའི་ཞིང་བཅུར་ལས་ལ་སྦྱར༔ དཔལ་ཆེན་ཚེ་བདག་ཞལ་དུ་བསྟབས༔ འཁོར་དང་གཤིན་རྗེ་འབུམ་ཕྲག་གིས༔ དགྱེས་པར་རོལ་ཅིག་ཁ་རཾ་ཁཱ་ཧི༔ ལྷག་མ་མེད་པར་ཞལ་དུ་བསྟབས༔ གཟུགས་ཕུང་ཤ་ཁྲག་མཆོད་པར་བཞེས༔ དམ་ཚིག་ཉམས་ཆགས་སོ་སོར་བཤགས༔ ཐུགས་དམ་སྐོངས་ལ་དངོས་གྲུབ་སྩོལ༔ བར་ཆད་རྐྱེན་ངན་(༢༩ན)
གདུག་རྩུབ་བཟློག༔ བསམ་པ་སྒྲུབས་ལ་རེ་བ་སྐོངས༔ ཕྲིན་ལས་རྣམ་བཞི་མྱུར་དུ་སྒྲུབས༔ བཅོལ་བའི་ཕྲིན་ལས་སྒྲུབ་པར་མཛོད༔ རབ་འཇིགས་གཤིན་རྗེ་གཤེད་ཀྱི་དཀྱིལ་འཁོར་ནས། །དུས་གསུམ་རྒྱལ་བའི་ནུས་མཐུ་མ་ལུས་ཀུན། །གཅིག་བསྡུས་ཚེ་བདག་ནག་པོ་འཁོར་བཅས་ཀྱིས། །མི་མཐུན་ཕྱོགས་རྣམས་བཟློག་བསྒྱུར་དུས་ལ་བབ། །མི་སྡུག་ཞལ་གསུམ་ཕྱག་དྲུག་ཞབས་བཞི་པ། །སྣ་ཚོགས་མཚོན་འཛིན་གར་དགུའི་ཉམས་ཅན་གྱིས། །སྡེ་བརྒྱད་དྲེགས་པའི་གནོད་ཅིང་འཚེ་བ་དང་། །ཕ་རོལ་མི་མཐུན་བན་བོན་རིག་སྔགས་ཀྱི། །ཟོར་ཁ་ཕུར་ཁ་གཏད་ཁ་ཁྲམ་ཁ་དང་། །ཉེ་འབྱེད་འགོང་ཆོག་བསྐྲད་འཁོར་དམར་ནག་ཐན། །སྔོན་ལས་འཕྲལ་རྐྱེན་མི་མཐུན་ཉེར་འཚེ་ཀུན། །དགྲ་བགེགས་སྟེང་དུ་བཟློག་བསྒྱུར་འཕྲིན་ལས་མཛོད། །གཅན་གཟན་རི་དྭགས་འདབ་ཆགས་ལ་སོགས་པ། །གྲངས་མེད་ལུས་ངག་ཡིད་ཀྱི་རྣམ་འགྱུར་ཚོགས། །དངོས་སམ་རྨི་ལམ་ཉམས་སུ་གང་ཤར་བ། །ལྷ་སྲིད་སྡེ་བརྒྱད་དེ་དང་རྗེས་མཐུན་པའི། །མ་རུངས་ལྟས་ངན་ཆོ་འཕྲུལ་ཚོགས་རྣམས་ཀུན། །ཐམས་ཅད་སྣང་བའི་དགྲ་ཡི་སྟེང་དུ་བྷྱོ༔ །མ་ལུས་གནོད་པའི་འགེགས་ཀྱི་སྟེང་དུ་བྷྱོ༔ །དམ་ཅན་མཐུ་དང་རྩལ་གྱི་དུས་ལ་ཕབ། །དེ་ནས་གཏོར་ཟོར་རྣམས་ཕྱིར་སྤགས་ཏེ་གྲལ་དུ་བཀོད། རོལ་མོ་དྲག་ཏུ་བརྡུང་ཞིང་འདི་སྐད་དོ། །ཧཱུཾ། གཏོར་མའི་ལམ་བསྟན་གང་དུ་བསྟན། །གཏོར་མའི་ལམ་བསྟན་ཤར་དུ་བསྟན། །ཤར་དུ་རྒྱལ་པོ་ཡུལ་འཁོར་སྲུང་། །དྲི་ཟ་ཕོ་མོའི་འཁོར་གྱིས་བསྐོར། །སྐུ་ཟུར་དེ་ནི་སྤྱན་བྱོལ་ཞིག །གཏོར་ཟོར་དམར་པོ་ཤར་ར་ར། །(༢༩བ)
ཁྲག་ཟོར་དམར་པོ་འཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟོར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། །ཧཱུཾ། གཏོར་མའི་ལམ་བསྟན་ལྷོ་རུ་བསྟན། །ལྷོ་ན་རྒྱལ་པོ་འཕགས་སྐྱེས་པོ། །གཤིན་རྗེ་མང་པོའི་འཁོར་གྱིས་བསྐོར། །སྐུ་ཟུར་དེ་ནི་སྤྱན་བྱོལ་ཞིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་འཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟོར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། །ཧཱུཾ། གཏོར་མའི་ལམ་བསྟན་ནུབ་ཏུ་བསྟན། །ནུབ་ན་རྒྱལ་པོ་སྤྱན་མི་བཟང་། །ཀླུ་དབང་མང་པོའི་འཁོར་གྱིས་བསྐོར། །སྐུ་ཟུར་དེ་ནི་སྤྱན་བྱོལ་ཞིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་འཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟོར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། །ཧཱུཾ། གཏོར་མའི་ལམ་བསྟན་བྱང་དུ་བསྟན། །བྱང་དུ་རྒྱལ་པོ་རྣམ་ཐོས་སྲས། །གནོད་སྦྱིན་མང་པོའི་འཁོར་གྱིས་བསྐོར། །སྐུ་ཟུར་དེ་ནི་སྤྱན་བྱོལ་ཞིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་འཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟོར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། །སྟེང་གི་ལྷ་ལ་ཟོར་མི་འཕེན། །ལྷ་ཆེན་བརྒྱད་པོ་ཞབས་སྡུས་ཤིག །འོག་གི་ཀླུ་ལ་ཟོར་མི་འཕེན། །ཀླུ་ཆེན་བརྒྱད་པོ་དབུ་འཕངས་སྨོད། །བར་གྱི་བཙན་ལ་ཟོར་མི་འཕེན། །གཉན་ཆེན་སྡེ་བཞི་སྐུ་ཟུར་ཅིག །དྲག་པོ་གཤིན་རྗེའི་གཏོར་ཟོར་འདི། །སྡང་བའི་དགྲ་ལ་གཏོར་ཟོར་ཡཱ། །དགྲ་བོ་བདུན་བརྒྱུད་རྩད་ནས་ཆོད། །གནོད་པའི་དགྲ་ལ་ཁྲག་ཟོར་ཡཱ། །མོ་རྒྱུད་ཁྲག་གི་མངལ་ནས་སྐེམས། །ཐུན་ཟོར་བུ་རྒྱུད་ཚ་ལ་ཡཱ། །བུ་ཚ་གདུང་བརྒྱུད་རྩད་ནས་ཆོད། །མདའ་ཟོར་སྒོ་ཡི་ནོར་ལ་རྒྱོབ། །སྒོ་ནོར་གོང་འདྲེ་ཕྱགས་མས་ཐོབ། །ཐོད་ཟོར་ནང་གང་(༣༠ན)
སྲིས་ལ་ཡཱ། །ཕྱགས་མས་ཐོབ་ལ་རླུང་ལ་བསྐུར། །ཐུར་ཟོར་དགྲ་ཡི་སྙིང་ལ་ཡཱ། །དྲག་པོའི་གྲི་འཐབ་ནད་ཀྱིས་གསོད། །རྡོ་ཟོར་དགྲ་བོའི་མཁའ་ལ་ཡཱ། །སྐྱེ་བོ་འཁོར་གྱི་རྒྱུན་ལམ་ཆོད། །བྱད་ཁ་བཟློག་ལ་ཕུར་ཁ་སྒྱུར། །བཅོལ་བའི་འཕྲིན་ལས་སྒྲུབ་པར་མཛོད། །དེ་ནས་ཕྱི་རོལ་ཏུ་སྒྲ་གཅན་གྱི་ཐེབས་བརྩི་བ་སོགས་སྲིད་གསུམ་རྣམ་པར་རྒྱལ་བའི་སྦྱོར་བ་དང་བཅས་ཏེ། སྒྲུབ་ཁང་གི་ཕྱི་རོལ་ཏུ་ཟོར་རྣམས་སྔར་བཞིན་གོ་རིམ་མ་ལོག་པར་བཞག །རྡོ་རྗེ་སློབ་དཔོན་གྱིས་གསེར་སྐྱེམས་སྦྲེང་ཞིང་། སྔར་གྱི་དབང་གཟུགས་རྣམས་ཀྱང་རོལ་མོ་དབྱངས་དང་བཅས་པས་བརྗོད་པར་བྱའོ། །དེ་ནས་ཟོར་བསྐུལ་བ་ནི། དུག་ཆེན་ཤིང་ལ་འུག་པའི་སྒྲོ་ཡིས་བསྒྲོན། །སྔགས་འཕྲེང་དུག་ཁྲག་གིས་བྲིས་མདེའུ་སྦྱར། །རབ་བརྗིད་གཞུར་བཀང་ཐོག་མདར་བྱིན་བརླབས་ནས། །དགྲ་བགེགས་ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ ཟོར་སྔགས་འདི་ལྷག་མ་ཀུན་ལ་འདོགས་སོ། །ཕུང་ཤུལ་དུར་ཁྲོད་གྲོག་མཁར་ལ་སོགས་པའི། །ས་ལས་རབ་གྲུབ་དུག་ཁྲག་ཐུན་གྱིས་བཀང་། །འཇིགས་རུང་སྤྲིན་གྱི་ཟེགས་མར་བྱིན་བརླབས་ནས། །དགྲ་བགེགས་ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ དམར་ནག་གྲོག་མ་འཐབ་པའི་སར་གྲུབ་ཅིང་། །ཐུན་སོགས་དྲག་པོའི་རྫས་ཀྱིས་རབ་བཀང་སྟེ། །རྩངས་དམར་ཁར་བསྒྲོན་ཐོག་ཏུ་བྱིན་བརླབས་ནས། །དགྲ་བགེགས་(༣༠བ)
ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ དུར་ཁྲོད་ནག་པོའི་རྡོ་བར་གདུག་པའི་སྔགས། །རཀྟ་ཧ་ལ་སྦྱར་བས་ལེགས་བྲིས་ཏེ། །སྤྲིན་གྱི་འོད་འབྱུང་དག་ཏུ་བྱིན་བརླབས་ནས། །དགྲ་བགེགས་ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ དམེ་ཡུག་བུད་མེད་ལ་སོགས་དུག་ཅན་གྱིས། །རེག་བྲལ་མ་ཉམས་ཡུངས་ཀར་གང་བཟང་དག །དུར་ས་ལ་གཟུགས་ཐོག་ཏུ་བྱིན་བརླབས་ནས། །དགྲ་བགེགས་ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ འབྲས་ཅན་གཡག་རྒོད་གཡས་པའི་རྭ་ནང་དུ། །དྲག་པོའི་རྫས་ལྡན་གདུག་པའི་སྔགས་དང་བཅས། །སྟོང་གསུམ་ཀུན་ལས་རྒྱལ་བར་བྱིན་བརླབས་ནས། །དགྲ་བགེགས་ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ ཟོར་གཞན་རྣམས་ཕྱོགས་བཞིར་འཕང་ཞིང་། རྭ་ཟོར་ཕྱོགས་བཞིར་གདེང་བ་ཙམ་བྱས་ནས་གཏོར་མ་དང་ལྷན་དུ་གྲུབ་ཁང་གི་ཕྱི་རོལ་གོམ་པ་ཞེ་དགུའི་སར་འཁྱེར་ཏེ། ལོང་ཡོད་ན་གསེར་སྐྱེམས་བྱ་ཞིང་། མེད་ཚེ་སྔར་གྱི་རྭ་ཟོར་འཕང་ཞིང་བརྟག་པ་བྱ། དེ་ནས་བསྐུལ་འདི་ལྟར་བྱའོ། །ཧཱུཾ། རབ་ཡངས་ལྕགས་སྣོད་ནང་དུ་རི་རབ་སྟེང་། །ཡོངས་རྫོགས་དམར་ཆེན་དྲག་པོའི་གཏོར་མའི་ཚོགས། །འཇིགས་བྲལ་གནམ་ལྕགས་རྡོ་རྗེར་བྱིན་བརླབས་ནས། །དགྲ་བགེགས་ལ་འཕངས་ཐལ་བའི་རྡུལ་དུ་རློག །ཨྱེ་མྱགས་ཡ་རྔུབས་མུགས་ཤག་ཀ་དུན། ཨྱེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ༔ སྲོག་ལ་ཁཾ་ཤག་བྷྱོ༔ སྲོག་ལ་བྲེང་ཤག་བྷྱོ༔ སྲོག་ལ་ཡཾ་ཤག་བྷྱོ༔ སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུཾ་རི་ལི་ལི་བྷྱོ༔ ཞེས་གཏོར་མ་གནམ་ལྕགས་ཀྱི་ཐོག་ཏུ་བསྐྱེད་པ་དེ་ཉིད་དགྲ་བོ་ཡུལ་མཁར་དང་བཅས་པའི་སྟེང་དུ་འཕངས་པས། ཐལ་བའི་རྡུལ་ཕྲན་བཞིན་དུ་བརླག་པར་བསམ་མོ། །དེ་རྗེས་བདག་ཉིད་ཁྲོ་རྒྱལ་ནས་བཟུང་སྟེ། །སྲུང་འཁོར་གྱི་བར་རྣམས་བརྗོད། རྡོ་རྗེ་སློབ་དཔོན་གྱིས་མཇུག་བསྡུས་ལ་ཕྱི་མིག་མི་བལྟ་བར་སྲུང་འཁོར་གྱི་རྒྱས་བཏབ་བོ། །དེ་ནས་ནང་དུ་ལོག་སྟེ། ལུགས་གཅིག་ལ་སྒོ་དྲུང་དུ་མེ་ཆུས་རྒྱས་འདེབས་ཤིང་། ཨྱེ་རིང་གི་མཐར་བསྲུང་སྔགས་གདགས་པར་བྱའོ། །(༣༡ན)
དེ་ནས་སྒྲུབ་པ་པོ་རྣམས་རྡོ་རྗེ་ལུ་གུ་རྒྱུད་ཀྱི་ཕྱག་རྒྱ་དང་བཅས་པས་གཏོར་གཞོང་རི་རབ་ཏུ་གསལ་བའི་འོག་ཏུ་དམ་སྲི་རྣམས་ཆུད་པར་བསམས་ལ་འདི་སྐད་དོ། །སྟོང་གསུམ་འཇིག་རྟེན་ཡངས་པའི་གཞལ་ཡས་སུ། །བཅུད་ཀུན་འཇམ་དཔལ་གཤིན་རྗེའི་རང་ཉིད་ལ། །བྲོ་བརྡུང་བདུད་སྡེའི་ཚོགས་རྣམས་ཐར་མེད་གནས། །དེ་ཕྱིར་གླུ་དང་བྲོ་འདི་རྒྱུན་མི་ཆད། །ཕྱོགས་བཞིར་ཕྲིན་ལས་རྣམ་བཞིའི་བྲོ་བརྡུངས་པས། །ཞི་རྒྱས་དབང་དྲག་ལྷུན་གྱིས་གྲུབ་པར་ཤོག །ཨྱེ་ཨ་ཀྲོ་ཏེ་ཀ་ཡ་མནྟ་ཀ །ཀཱ་ལ་རཱུ་པ་ཧྲཱི༔ཥྚི་ཝི་ཀྲི་ཏཱ་ན་ན་ཧཱུཾ་ཕཊ། ཤནྟིཾ་ཀུ་རུ་ཡེ་སྭཱཧཱ། པུཥྚིཾ་ཀུ་རུ་ཡེ་སྭཱཧཱ། པཱ་ཤཾ་ཀུ་རུ་ཡེ་སྭཱཧཱ། མཱ་ར་ཡ་ཕཊ། དེ་ནས་ཆད་མཐོ་བསྒྲག་ཅིང་བསྟན་མ་བསྐྱང་བ་ནི། གཏོར་མ་ནམ་མཁར་བཏེག་སྟེ། ཧཱུཾ། བསྐལ་པ་བརྒྱད་ཁྲི་འདས་པའི་སྔོན་རོལ་དུ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །སྤྲོས་བྲལ་བདེ་ཆེན་ཀུན་ཏུ་བཟང་པོ་ཡིས། །བྱ་རྩོལ་བྲལ་བའི་ཡིད་ཆོས་བསྟན་པའི་ཚེ། །རིགས་ལྔ་བདེ་ཆེན་མཁའ་དབྱིངས་འཁོར་གྱི་ཚོགས། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་ཕྲིན་ལས་སྒྲུབས། །དེ་རྗེས་འགྲོ་བའི་དོན་ལ་དགོངས་པའི་ཚེ། །སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས། །འཇམ་དཔལ་བྱེ་བ་འབུམ་སྡེ་དཔེ་ལ་བཀོད། །མ་གཤིན་ཡོངས་ཀྱི་དཀྱིལ་འཁོར་ཞལ་ཕྱེ་ཚེ། །བཀའ་སྲུང་གཤིན་རྗེ་དྲུག་གིས་སྲོག་སྙིང་ཕུལ། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་(༣༡བ)
གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་མ་ཆད་དམ། །ཇི་ལྟར་དམ་བཅས་བཞིན་དུ་མ་ཆད་དམ། །དེ་རྗེས་སློབ་དཔོན་ཤནྟིང་གརྦྷ་དང་། །མུ་སྟེགས་བཟློག་པའི་སྟོབས་ཅན་སྔགས་བཟློག་བརྩོད། །སྙིང་གཟེར་ནག་པོའི་དཀྱིལ་འཁོར་ཞལ་ཕྱེ་ཚེ། །སྡིག་པ་སྙིང་འཛངས་མུ་སྟེགས་བསྟན་པ་བཅད། །དྲེགས་པ་བཅོ་བརྒྱད་རང་སྲོག་ཕུལ་བའི་ཚེ། །དྲེགས་པ་མ་ལུས་འདུས་ནས་སྲོག་སྙིང་ཕུལ། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་ཕྲིན་ལས་སྒྲུབས། །དེ་རྗེས་སློབ་དཔོན་བྷ་སུ་དྷ་ར་ཡིས། །བཀའ་ཡི་མཆོད་རྟེན་སྟོབས་ཆེན་བཞེངས་པའི་ཚེ། །ལས་ཀྱི་གཤིན་རྗེའི་སྲོག་སྙིང་ཞལ་ཀྱང་བསྟན། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་ཕྲིན་ལས་སྒྲུབས། །དེ་རྗེས་སངས་རྒྱས་ཡེ་ཤེས་རིན་ཆེན་གྱིས། །ཨྱེ་རིང་རྣམ་གསུམ་དཀྱིལ་འཁོར་ཞལ་ཕྱེ་ནས། །མཆོད་རྟེན་ལུས་ལ་བཀོད་ནས་བསྒྲུབས་པའི་ཚེ། །མ་གཤིན་ཞལ་བསྟན་དངོས་གྲུབ་རྣམ་གཉིས་ཐོབ། །བཀའ་ཉན་སྡེ་བརྒྱད་དམ་ལ་ཐོགས་པའི་ཚེ། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་གཏོར་མ་ལོང་། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་ཕྲིན་ལས་སྒྲུབས། །དེ་ལྟར་བསྒྲུབ་པའི་གནས་མཆོག་དམ་པ་འདིར། །དཀྱིལ་འཁོར་མཆོད་རྟེན་ལུས་དཀྱིལ་གཏོར་མ་བཤམས། །བཀའ་བཞིན་ཕོག་པའི་སྲུང་མ་དམ་ཅན་རྣམས། །ཇི་ལྟར་ཁས་བླངས་དམ་ཚིག་ཕོག་ནས་ཀྱང་། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །ཡོན་བདག་བར་ཆད་(༣༢ན)
བཟློག་པར་མ་ཆད་དམ། ཁས་བླངས་དམ་བཅའ་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་ཕྲིན་ལས་མཛོད། །སྔོན་ཚེ་སློབ་དཔོན་སྤྱན་སྔར་རྣལ་འབྱོར་གྱི། །ལས་རྣམས་བསྒྲུབ་པར་དམ་བཅས་བསྟན་མའི་ཚིགས། །འདོད་ཡོད་ལྔ་ལྡན་གཏོར་མ་འདི་ལོང་ལ། །བསམ་དོན་ཡིད་བཞིན་འགྲུབ་པའི་འཕྲིན་ལས་མཛོད། །གཏང་རག་མཆོད་པ་ནི། ཁྲོ་རྒྱལ་ཕྱག་རྒྱ་ཟིལ་གནོན་འཁོར་བཅས་ལ། །མ་ཧཱ་བྷ་ལིང་བདུད་རྩིའི་རྒྱ་མཚོ་ཆེ། །རཀྟ་ལ་སོགས་ཕྱི་ནང་གསང་བ་ཡི། །མཆོད་པ་འབུལ་ལོ་མཆོག་ཐུན་དངོས་གྲུབ་སྩོལ། །དེ་ནས་དཀྱིལ་འཁོར་བསྡུ་བ་ནི། རྩ་བའི་ལྷ་དང་རྒྱན་གྱི་ལྷ་བརྒྱད་རྣམས། །ཕྱག་རྒྱ་ཟིལ་གནོན་ཐུགས་ཀའི་ཧཱུཾ་ལ་ཐིམ། །འཁོར་རྣམས་རང་རང་གནས་གཤེགས་གཙོ་བོ་ནི། །གཉིས་མེད་སྤྲོས་བྲལ་ཆོས་དབྱིངས་ངང་དུ་བཞུགས། །སྨོན་ལམ་ནི། བསྙེན་སྒྲུབ་ལས་གསུམ་ཡོངས་འདུ་ས་བརྟོལ་ལ། །བསྐྱེད་རིམ་ལོ་འདབ་འབྲས་བུ་རབ་རྒྱས་ཤིང་། །གྲོལ་བྱེད་ལམ་གྱི་གང་བུ་གཡུར་ཟ་བའི། །དངོས་གྲུབ་རྣམ་གཉིས་དགའ་སྟོན་རྒྱས་པར་ཤོག །ཤིས་པ་བརྗོད་པ་ནི། འདོད་དགུའི་འབྱུང་གནས་བླ་མ་ཡི་དམ་ལྷ། །དཔག་དཀའ་རབ་འབྱམས་ལས་བསྒྲུབ་དམ་ཅན་ཚོགས། །ཕོ་ཉ་ལས་གཤིན་ལ་སོགས་འཁོར་བཅས་ཀྱིས། །བཀྲ་ཤིས་དགའ་སྟོན་དཔལ་ལ་རོལ་གྱུར་ཅིག །དེ་ལྟར་ཟླ་གསང་སྡིག་རྒྱུད་རྒྱ་མཚོ་ཆེ། །བདག་ཡིད་ཁྱབ་འཇུག་འཕྲུལ་གྱི་སྒོ་འཕར་ལས། །འོངས་པའི་བདག་མདུན་ལས་བྱང་བདུད་རྩིའི་བཅུད། །རིགས་འཛིན་དགའ་སྟོན་དཔལ་ལ་རོལ་གྱུར་ཅིག །ཅེས་འཇམ་དཔལ་གཤིན་རྗེའི་གཤེད་ཀྱི་རྒྱུད་འགྲེལ་མན་ངག་དང་། ཁྱད་པར་ཆོས་རྗེ་སྒྲོལ་མ་པ། (༣༢བ)
སེ་སྟོན་གཉིས་ཀྱིས་མཛད་པའི་ལས་བྱང་ཟུར་འདེབས། ལྕགས་སྡིག་ལས་བྱང་ཆེན་མོ་གསུམ་ལ་གཞི་བྱས། །སྤྱང་མོ་དྲུག་ལ་སོགས་པའི་མན་ངག་ཟབ་མོ་འགའ་ཞིག་མ་གཏོགས། གཞན་མ་བདག་མདུན་ཚང་མ་ཁྲིགས་ཆགས་སུ་བསྡེབས་ཤིང་། བསྙེན་སྒྲུབ་ལས་གསུམ་གྱི་སྔགས་རྣམས་ལེགས་སྦྱར་གྱི་སྐད་དང་མི་མཐུན་པ་འདུག་ཀྱང་། སྒྲོན་གསལ་ལས། ཀོ་ཊ་ཀྵ་ལ་སོགས་པའི་སྒྲ། །འཇིག་རྟེན་བསྟན་བཅོས་ལ་མེད་ཅིང་། །དེ་བཞིན་གཤེགས་པའི་བརྡར་གྱུར་པ། །དེ་ནི་ཇི་བཞིན་མིན་པར་གྲགས། །ཞེས་གསུངས་པ་ལྟར་རང་སོར་བཞག་ཅིང་། གཞན་མའི་ཚིག་སྦྱོར་ལ་ལ་གཏེར་གཞུང་དངོས་དང་། བརྒྱུད་ལྡན་རིགས་པ་འཛིན་པ་རྣམས་ཀྱི་གསུང་རྣམས་བྱིན་རླབས་ཀྱི་མཐུ་དཔུང་ཆེ་བས་རང་སོར་བཞག །འགའ་ཞིག་འཁྱེར་བདེ་བའི་སླད་དུ་ཚིག་ཕྲེང་གསར་དུ་བསྒྲིགས་པའི་ལས་བྱང་གནམ་ལྕགས་འཁོར་ལོ་ཞེས་བྱ་བ་འདི་ཡང་། དབང་འགྲོ་མགོན་ཆོས་དབང་གི་གདུང་ལས། རྒྱལ་བ་བཙོང་ཁ་པ་ཆེན་པོའི་བསྟན་པ་ལ་ཞུགས་པ་ཡོངས་སུ་རྫོགས་པའི་རིག་པ་འཛིན་པ་ཨྱོན་བློ་བཟང་བསྟན་འཛིན་གྱིས་བསྐུལ་བའི་ངོར། འཇམ་དཔལ་ཕྱག་རྒྱ་ཟིལ་གནོན་སྙེམ་པའི་སྡེའམ་མིང་གཞན། ཤཱཀྱའི་བཙུན་པ་ངག་དབང་བློ་བཟང་རྒྱ་མཚོ་ཚངས་སྲས་བཞད་པའི་རྡོ་རྗེས། མྱོས་ལྡན་གྱི་ལོ། དག་བྱེད་ཟླ་བའི་ཕྱོགས་གཉིས་པའི་དྲང་སྲོང་ལྷ་མིན་བླ་མ་ནམ་གྲུའི་དགའ་མ་དང་རྩེ་བའི་འགྲུབ་སྦྱོར་གྱི་ཉིན་དགའ་ལྡན་ཕོ་བྲང་མེ་ཏོག་མངོན་པར་བཀྲ་བའི་ལྡིང་ཁང་དུ་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ། །སརྦ་མངྒ་ལཾ།། །།