ཚེ་བདག་རྣོན་པོ་ནད་གཅོད་ཀྱི་དབང་གི་ཆོག་སྒྲིགས་ཉ་རྒྱས་ཟླ་བའི་དཀྱིལ་འཁོར།
ཚེ་བདག་རྣོན་པོ་ནད་གཅོད་ཀྱི་དབང་གི་ཆོག་སྒྲིགས་ཉ་རྒྱས་ཟླ་བའི་དཀྱིལ་འཁོར་བཞུགས་སོ། །
ན་མོ་མཉྫོ་རྒྷོ་ཥ་ཤི་བ་ཀྲོ་ཏཱ་ཡ། ལྔ་ལྡན་ཟུར་ཕུད་འཆང་བ་འཇམ་པའི་དབྱངས། །འཁོར་འདས་ཕྱག་རྒྱ་ཟིལ་གནོན་ཚེ་བདག་གར། །རབ་བསྒྱུར་འཁོར་མེད་དྲིན་ཅན་ཡོངས་འཛིན་ཚོགས། །སྙིང་གི་ཟེའུ་འབྲུར་སྤྱོན་ལ་བདག་བྱིན་རློབས། །གཙུག་ལག་དཔལ་དགེས་གཤེད་སྐོར་རྒྱུད་སྡེའི་དོན། །ལེགས་བཀྲལ་བཀའ་བབས་པདྨ་ཐོད་འཕྲེང་གིས། །བལ་པོའི་རྒྱལ་པོར་གཏད་དེ་གནུབས་ཆེན་གྱིས། །སྤུངས་པ་རི་བོའི་ངོས་སུ་རྒྱས་བཏབ་པ། །དུམ་པ་རྒྱ་ཡིས་སྤྱན་དྲངས་ཟབ་མོའི་གཏེར། །གནུབས་ཆུང་ཕྱག་མཚན་ལས་ཀྱི་རལ་གྲི་ཆེ། །དེང་དུས་རྗེ་བཙུན་རཏྣ་རྗེས་འབྲང་གིས། །རང་སྐྱོབ་གཞན་གསོད་གོ་མཚོན་གཅེས་པའི་ནོར། །དེ་ཕྱིར་སྨིན་བྱེད་རྣོན་པོ་ནང་གཅོད་ཀྱི། །དབང་ཆོག་ལག་མཐིལ་རྫས་བཞིན་གསལ་ནུས་པ། །པད་གནུབས་བརྒྱུད་པའི་ཕྱག་བཞེས་མི་ཉམས་སླད། །ཡི་གེར་འབྲི་ན་གཏེར་སྲུང་གནང་བ་སྩོལ། །དེ་ལ་འདིར་གཤིན་རྗེ་གཟའ་གདོང་དམར་ནག་མེའི་སྤུ་གྲིའི་དབང་གི་རིམ་པ་པདྨས་མིང་བཏགས་རྗེ་བཙུན་དབུ་རུ་སྨྱོན་པ་ལ་ཡི་དམ་གྱི་ལྷས་དངོས་སུ་གནང་བའི་དབང་མཆོད་རྟེན་གྱི་དཀྱིལ་(༢ན)
འཁོར་ལ་བརྟེན་པའི་དབང་རྒྱས་པ་ཡོད་པ་རྗེ་ཉིད་ཀྱིས་མཛད་པའི་ཡིག་ཆ་ཤིན་ཏུ་ཁ་གསལ་བར་སྣང་ལ། གཏེར་སྟོན་རྒྱ་ཞང་ཁྲོམ་གྱི་ཞལ་གདམས་ཆོས་རྒྱལ་རིན་ཅེན་ཕུན་ཚོགས་ཀྱི་བར་དུ་སྙན་བརྒྱུད་དུ་བཞུགས་པའི་རྣོན་པོ་ནང་གཅོད་སྡེ་པ་སྣང་རྩེ་ནས་ཀྱིས་མཛད་པ་དེར་སྙིང་པོ་ནང་བཅུད་གསུང་བ་མིང་ཡང་མ་དགོངས་འདུག་པས་དོན་ལ་རེ་བ་མེད་པས་ནང་ཆ་ཕྱིར་བསྟན་ནོ། །ཀྱི་དབང་འདི་ལ་རྗེ་བཙུན་རཏྣའི་ཞབས་ཀྱི་རེག་ཟིག་ཉུང་ངུ་ཞིག་མ་གཏོགས་ཡིག་ཆ་ཁུངས་བཙུན་པ་གཞན་མི་སྣང་བས་བསྟན་པའི་རྒྱུན་ལ་ཕན་ཕྱིར་གོ་བདེ་བར་བཀོད་པ་ལ། གནས་ཁང་བྱི་དོར་བྱས་སློབ་དཔོན་གྱི་གཡས་སུ་སྟེགས་ཀྱི་ཁར་རྟེན་ཁེབས་སོགས་བཀོད་པས་མཛེས་པ་བྱས་པར་འབྲུ་སྣ་དར་བཏགས་མན་ངག་ལས་བྱུང་བའི་རྫས་རྣམས་འཚོགས་པར་བྱས་པ་ཁྲག་ཆང་གིས་སྦྲུས་པའི་གཏོར་མ་གཙོ་འཁོར་ལྔ་པ་བྲ་གཟུགས། ཁྲམ་རིས། འཁོར་ལོ། ཨོང་སྐྱུ། མེ་རི། ཤ་སྣང་རྩེ་ནས་ཀྱིས་ཐོག་མདེའུའི་གཟུགས་ཀྱི་དཀར་རྒྱན་ཤ་ཁྲག་གིས་བརྒྱན་པ་གསུང་བ་གསར་རྙིང་ཀུན་ལ་མ་གྲགས་པའི་ཁྱད་ཆོས་ཤིག་ཡིན་པ་འདྲ། ཁྲག་གིས་བརྒྱན་པར་སོ་སོའི་ལྷ་རྟེན་ཙཀ་ལི་གཏོར་གདུགས་སོགས་ཞིབ་ཆ་མཐའ་དག་མཐོང་བ་བརྒྱུད་པའི་ཕྱག་ལེན་ལྟར་མངོན་པར་འདུ་བྱས་པ་མཉྫིའི་སྟེང་དུ་བཀོད། (༢བ)
མཐར་ཆུ་གཉིས་སྔོན་སྣང་རྩེ་ནས་ཀྱིས་ཕྱི་ནང་གསང་མཆོད་སྨན་རཀ་གཏོར་གསུམ་ཞེས་སྨན་རཀ་གཏོར་གསུམ་ནང་མཆོད་ཀྱི་གྲལ་ནས་བཏོན་འདུག་པ་ཁྲག་གི་ཨརྒྷཾ་སོགས་ལ་འཁྲུལ་བར་སྣང་ཡང་ཕྱི་མཆོད་ལ་ཕྱི་མཆོད་ཀྱི་ཕྱི་མཆོད། ཕྱི་མཆོད་ཀྱི་ནང་མཆོད། ཕྱི་མཆོད་ཀྱི་གསང་མཆོད །དེ་བཞིན་དུ་ནང་གསང་གཉིས་ལ་ཡང་མུ་གསུམ་དུ་དབྱེར་ཡོད་པ་ནང་གསེས་ཀྱི་རྣམ་གཞག་ཡིན་པ་མ་དགོངས་པའི་ཤེས་བྱ་མཐའ་བཀག་པ་འདི་འདྲ་རྙིང་མ་བྱིངས་དང་མ་མཐུན་ཀྱང་ཉིད་ཀྱི་གཏེར་གསར་ན་ཡོད་ཤས་ཆེ། དབང་གཏོར་གྱི་སྨད་ཤ་ཁྲག་གི་རྒྱ་མཚོར་བསྐྱེད་གསུང་བ་དེ་ག་འབུལ་བའི་ཐུགས་རྩེ་གཏད་བཞིན་དུ་གཏོར་མ་ཟུར་པ་བཟོས་པར་དགོས་པ་ལྷག་པོ་མེད་ཅིང་གཉེར་ཚང་གི་བུ་ལོན་ལ་གནོད་པ་འདུག་གོ །དུ་འགྲོ་བའི་ཕྱི་ནང་གི་ཉེར་སྤྱོད། སྨན་རཀ །གཏེར་སྲུང་དང་གཞི་བགེགས་ཀྱི་གཏོར་མ། ལས་བུམ་རྫས་ལྡན་ཁ་རྒྱན་དང་བཅས་པ། ཡུངས་ཐུན། གུ་གུལ། རོལ་མོ། ཚོགས་ཆས་སོགས་མཁོ་བའི་ཡོ་བྱད་ཐམས་ཅད་འཚོགས་པར་བྱ། ལས་བྱང་གཞུང་བསྲང་རེག་ཟིག་ན་བདག་མདུན་གཉིས་སོ་སོར་བསྒོམ་པར་གསུང་བ་མི་རུང་བ་མ་ཡིན་ཀྱང་གཞུང་གྱེར་ཐེངས་གཅིག་པུ་དེ་ཀས་མེ་ལོང་ལ་གཟུགས་བརྙན་ཤར་བ་ལྟར་བདག་མདུན་གྱི་ལྷ་ཞལ་སྤྲོད་དུ་བསྒོམ་པ་འཇུག་པ་བདེ་ཞིང་སྲུང་བཟློག་གི་སྐབས་ཀྱང་འདི་ཀ་མཛད། བ་སྦས་ལྷ་གཉིས་ཀྱི་མངོན་རྟོགས་ཀྱི་མཐར་རྦད་ཡ་བཟློག་ཡ་ཞེས་པའི་སྔགས་ཀྱིས་གཡས་སུ་བསྐོར་བར་གྱུར་ཞེས་པའི་བར་བཏང་རྗེས་ལས་བུམ་གྱི་ནང་དུ་པད་ཉི་དགྲ་བགེགས་ཀྱི་གདན་ལ་ཡ་མཐིང་ནག་ལས་སྐྱེས་པའི་ལས་ཀྱི་གཤིན་རྗེ་དམར་ནག་ཞལ་གཅིག་ཕྱག་གཉིས་པ། རལ་པ་ཁམ་ནག་ཟུར་གསུམ་གྱེན་དུ་འཕྱོ་བ་སྤྱན་གསུམ་དམར་ཞིང་འཁྲུག་པ། སྨིན་མ་དང་སྨ་ར་ཨག་ཚོམ་རྣམས་མེ་ལྟར་འབར་བ། མཆེ་བ་གཙིགས་ཤིང་ལྗགས་འགྱུར་ཧཱུཾ་གི་སྒྲ་སྒྲོག་པ། སྦོམ་ཐུང་གསུས་པ་འཕྱང་ཞིང་མི་སྡུག་པ། རུས་པ་དང་སྦྲུལ་གྱིས་བརྒྱན་ཅིང་། སྐུ་སྟོད་ལ་(༣ན)
མི་ལྤགས་ཀྱི་གཡང་གཞི་དང་སྐུ་སྨད་སྟག་གི་ཤམ་ཐབས་གྲོལ་བ། །གཡས་བེ་ཅོན་རྡེག་པའི་ཚུལ་དང་གཡོན་ཐུགས་ཀར་སྡིགས་མཛུབ་དགྲ་བགེགས་ཀྱི་དོན་སྙིང་འདྲད་པའི་ཚུལ་གྱིས་ཞགས་པ་འཛིན་པ། ཞབས་གཡས་བསྐུམ་གཡོན་བརྐྱང་བས་བསྐལ་པ་དུས་མཐའི་མེ་འབར་བའི་ཀློང་ན་བཞུགས་པར་བསམ། ཞེས་པའི་བར་དབང་ཆོག་བདུད་དཔུང་ཟིལ་གནོན་ལྟར་དང་། དེ་ནས་སླར་ཡང་ཡབ་ཡུམ་ཐུགས་ཀའི་ཧཱུཾ་བྷྱོ་ལས། །ཞེས་པ་ནས་བཟུང་སྟེ་བསྒྲུབས་ན་ལང་ཚོ་དང་མཉམ། ཞེས་དག་པ་དྲན་པའི་བར་གྱི་རྗེས་སུ་ལྷ་རྣམས་ཀྱི་ཐུགས་ཀར་ཉི་མའི་དཀྱིལ་འཁོར་གྱི་དབུས་སུ་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུཾ་མཐིང་ནག་གི་མཐར་སྔགས་འཕྲེང་གིས་བསྐོར་བ་ལས་འོད་འཕྲོས། འགྲོ་བའི་དོན་བྱས་སླར་འདུས་སྔགས་འཕྲེང་ལ་ཐིམ་པར་བསམ་རྗེས་སུ། ཁམས་གསུམ་མ་ལུས་གཞལ་ཡས་ཆེན་པོར་ལྟ་ཞེས་སོགས་གདེངས་གསུམ་དང་ལྡན་པའི་སྒོ་ནས་རྩ་བའི་བསྙེན་སྔགས་རྣམས་འགྲུབ་ཚད་བཟླ། ལས་བུམ་ལ་དམིགས་ཏེ། ཨཱོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཕཊ། ཅེས་པ་ཇི་ལྟར་རིགས་པ་དང་། ཇི་སྲིད་དབང་གི་བྱ་བ་མ་རྫོགས་ཀྱི་བར་དུ་བགེགས་རྣམས་བསྲུང་ཞིང་བཟློག་པར་མཛད་དུ་གསོལ། ཞེས་མེ་ཏོག་དོར། གཏེར་སྲུང་མཆོད། ཚོགས་མཆོད་དབུལ། ཏིང་ངེ་འཛིན་གྱི་སྒོ་ནས་བདག་ཉིད་ཀྱིས་དབང་བླང་། སློབ་མ་རྣམས་ཁྲུས་ནས་དབྱུང་། གྲལ་ལ་འཁོད། དཀར་གཏོར་དང་དམར་གཏོར་བཤམས་ནས་བགེགས་སྐྲོད་དང་བསྲུང་འཁོར་དཀྱུས་བཞིན་གཏོང་། མཎྜལ་འབུལ། སྤྱི་དང་བྱེ་བྲག་གི་ཆོས་བཤད། ཁྱད་པར་ཡིད་ཆེས་ཤིང་ཁུངས་བཙུན་པར་བྱེད་པའི་ཕྱིར་སྔོན་བྱུང་རྫོགས་ལྡན་གྱི་བསྐལ་པར་ལྷའི་སྲིད་པ་ཀ་རུ་ཞེས་(༣བ)
པ་སྔགས་ཀྱི་ལམ་དུ་ཞུགས་པ་ལྟ་སྤྱོད་ལོག་སྟེ་ལྷོ་ཕྱོགས་རིམ་པ་མདུན་གྱི་འོག་ལྕགས་མཁར་གླིང་དགུའི་བདག་པོ་འཆི་བདག་ནག་པོ་མ་རུངས་པར་སྐྱེས་ཤིང་འགྲོ་བ་རྣམས་འཕུང་བར་བྱེད་པ་ན། དེ་བཞིན་གཤེགས་པ་རྣམས་ཀྱིས་བསྐུལ་ཏེ་འཕགས་པ་འཇམ་པའི་དབྱངས་ཁྲོ་རྒྱལ་གཤིན་རྗེའི་གཤེད་ཀྱི་སྐུར་བཞེངས་ནས་བཏུལ་ཞིང་དྲེགས་པའི་ཚོགས་རྣམས་འབངས་དང་བྲན་དུ་བཀོལ་ཅིང་བསྟན་པའི་སྲུང་མར་བསྐོས། དེ་ནས་ལྷོ་ཕྱོགས་གཤིན་རྗེའི་གནས་གཏུམ་དྲག་གི་ཚལ་ཞེས་བྱ་བ་ཕྱི་དུར་ཁྲོད་ཀྱི་གཞལ་ཡས་ཁང་ནང་རྡོ་རྗེ་བཙུན་མོའི་མཁའ་ཀློང་རྣམ་པར་དག་པ་འོག་མིན་གྱི་གནས་སུ་འཇམ་དཔལ་ཀུན་ཏུ་བཟང་པོས་གཤིན་རྗེའི་གཤེད་ཀྱི་རྩ་བའི་རྒྱུད། བཤད་པའི་རྒྱུད། ཐུན་མོང་དང་ཐུན་མོང་མ་ཡིན་པ་མན་ངག་གི་རྒྱུད། ཆ་མཐུན་གྱི་རྒྱུད། འཕྲོས་པའི་རྒྱུད། སྤྱི་རྒྱུད་དང་། སྒོས་རྒྱུད་ལ་སོགས་པ་རྒྱ་ཆེར་བཀའ་སྩལ་པ་རྡོ་རྗེ་རྣོན་པོ་དང་། ལག་ན་རྡོ་རྗེ་སོགས་ཀྱིས་བསྡུས་ཏེ་བཻ་ཌཱུཪྻའི་གླེགས་བམ་དུ་བྱས་ནས་ཨྱོན་གྱི་ཡུལ་དུ་དཔལ་རང་བྱུང་གི་མཆོད་རྟེན་ཆེན་པོར་རྒྱས་བཏབ་པ་སློབ་དཔོན་དགའ་རབ་རྡོ་རྗེས་མ་མོ་མཁའ་འགྲོ་རྣམས་དམ་ལ་བཏགས་ཏེ་མཆོད་རྟེན་ནས་བྱུང་བ་ཨྱོན་གསང་ཡིག་ཏུ་བྲིས་ཏེ་སློབ་དཔོན་ཆེན་པོ་འཇམ་དཔལ་བཤེས་གཉེན་ནས་གསང་མཚན་རྡོ་རྗེ་གཞོན་ནུ་རྩལ་ཞེས་པར་གཏད། ལུགས་གཅིག་ལ་འོག་མིན་ནས་ལྷའི་བུ་ཚངས་པ། ཉི་མ། བདེ་བ་མཆོག་ལྡན་རྣམས་ལས་རིམ་པར་བརྒྱུད་དེ་མཁའ་འགྲོ་མ་ཟླ་བའི་འོད་ཟེར་གྱིས་སིངྒ་ལའི་སློབ་དཔོན་འཇམ་དཔལ་བཤེས་གཉེན་ལ་བཀའ་བབས་ཀྱི་ཚུལ་དུ་གཏད། དེ་ནས་སངས་རྒྱས་གཉིས་པ་པདྨ་ཐོད་འཕྲེང་། སློབ་དཔོན་ཤནྟིཾ་གརྦྷ། ཡེ་ཤེས་སྙིང་པོ། ཁ་གརྦྷ། གཙུག་(༤ན)
ལག་དཔལ་དགེ །དྷ་ན་དྷ་ལ། ཁྲག་འཐུང་ནག་པོ། བྷ་སུ་དྷ་ར་སོགས་སློབ་དཔོན་འདི་དག་ལ་གཤིན་རྗེའི་རྒྱུད་མན་ངག་གི་བཀའ་བབས་ཚུལ་ནི་གོ་རིམ་མི་མཐུན་པ་སྣ་ཚོགས་ཡོད་པ་མཐའ་གཅིག་པར་ངེས་བཟུང་དུ་གཏན་ཚིགས་ཀྱིས་བསྒྲུབ་མི་ནུས་ཤིང་སློབ་དཔོན་སོ་སོས་རྒྱུད་མན་ངག་ལ་བརྟེན་ནས་ཁ་ཐུན། ཚེ་བདག །ཁྲོ་འདུས། འཇོམས་བྱེད། ཁྲོ་ཆུ་སོགས་སྒྲུབ་ཐབས་ཀྱི་རིམ་པ་མཐའ་ཀླས་པ་མཛད་ཅིང་བྱེ་བྲག་གཤིན་རྗེ་གཟའ་གདོང་དམར་ནག་གི་སྐོར་འདི་འཇམ་དཔལ་བཤེས་གཉེན་ནས་རིམ་པ་བཞིན་འཕུང་བྱེད་ཤིནྟཾ་གརྦྷ། དེས་སློབ་དཔོན་ཁྲག་འཐུང་ནག་པོའམ་གསང་མཚན་རྡོ་རྗེ་མྱུ་གུ་གཏེར་ལ་གཏད་པ་བཀའ་མ་དང་ཟླ་གསང་འཇམ་དཔལ་ཐུགས་ཀྱི་རྒྱུད་རྩ་བ་ཆེན་པོ་ནི་ཚངས་པ་ཀླུ་གནད་ཀྱི་བསེའི་ཀ་བ་ནས་སློབ་དཔོན་ཛྙཱ་ན་གརྦྷས་གཏེར་ནས་བཏོན་ཏེ་སིནྡུ་ནགས་ཚལ་དུ་སློབ་དཔོན་ཨ་ཀཱ་ཤ་གརྦྷ་ལ་གཏད། དེས་ཁྲག་འཐུང་ནག་པོ་ལ་གཏད་དེ་བཀའ་གཏེར་ཟུང་དུ་འཇུག་པ་སློབ་དཔོན་གཙུག་ལག་དཔལ་དགེ་ལ་བབས། སློབ་དཔོན་འདིས་རྒྱུད་མན་ངག་རྣམས་ཀྱི་ནང་ནས་ཕྱུང་བ་ཤིན་ཏུ་ཟབ་པ་སྐོར་གསུམ་མཆན་བཞི་གནད་གསུམ་དུ་གྲགས་པར་ཡང་བཟློག་མེའི་སྤུ་གྲིར་བཏགས་ནས་སློབ་དཔོན་ཆེན་པོ་པདྨ་ཐོད་འཕྲེང་རྩལ་ལ་གནང་། དེས་བལ་བོའི་སློབ་དཔོན་བྷ་སུ་དྷ་ར་ཞེས་གསང་མཚན་རྡོ་རྗེ་ཐོག་འབེབས་རྩལ་དུ་གྲགས་པ་ལ་གཏད། དེའི་དྲུང་དུ་དྲག་སྔགས་ཀྱི་བདག་པོ་གནུབས་སངས་རྒྱས་ཡེ་ཤེས་ཀྱིས་ལན་བདུན་བྱོན་པའི་ཕྱི་མའི་ཚེ་བཀའ་རྒྱས་བཏབ་སྟེ་གནང་བ་ཆུ་དར་སྔོན་པོ་ལ་དངུལ་གྱི་ཡི་གེར་བྲིས་ཏེ་ཤེལ་གྱི་པར་བུར་སྩལ་པ་མཆོང་སྒྲོམ་སྨུག་པོར་བཅུག་ནས་ཕུང་པོ་རི་བོ་ཆེ་དང་ལྷོ་(༤བ)
བྲག་མཁོ་མཐིང་ལྷ་ཁང་གཉིས་སུ་གཏེར་དུ་སྦས། ཕུང་པོ་རི་བོ་ཆེ་ནས་གནུབས་ཆེན་གྱི་སྐྱེ་བ་སྤྲུལ་པའི་གཏེར་སྟོན་རྒྱ་ཞང་ཁྲོམ་གྱིས་སྤྱན་དྲངས་ནས་ལྷ་རྗེ་གནུབས་ཆུང་རྒྱ་དང་གནུབས་ཆུང་གི་བར་དུ་བླ་མ་གཉིས་ཙམ་ཞིག་སྣང་སོག་གོང་གསུམ་གྱི་བརྒྱུད་ཡིག་ཏུ་འདུག་པ་སྣང་རྩེ་ནས་ཀྱིས་འདི་སྐོར་འབྲི་གུང་དུ་གསན་པས་དེའི་བརྒྱུད་པར་ནི་ཡོང་དོན་མི་འདུག་ཁོ་རང་རྣམས་ཀྱི་རྨི་ལམ་དུ་བྱུང་བ་ནི་མིན་ལ་ཆེ། ལར་ཟག་ཟོག་གི་རིགས་འདི་ལ་རྒྱས་བསྡུས་མ་མཛད་ན་རྫུན་གྲོག་པོ་ཕུ་རྡུགས་ད་རྡོལ་གཉེན་གདའོ། །པ་གསང་མཚན་རྡོ་རྗེ་གཏེར་བཞད་རྩལ་ལ་གནང་། གནུབས་ཆུང་པས་ལྷོ་བྲག་མཁོ་མཐིང་ལྷ་ཁང་ནས་སྤྱན་དྲངས་པའི་གཏེར་ཁ་གསར་རྙིང་ཞུས་དག་ཕེར་བ་བྱུང་། རྗེ་བཙུན་མི་ལས་མངོན་སྤྱོད་ཀྱི་གྲགས་པ་ཐོན་པའང་གཤིན་རྗེ་གཟའ་གདོང་དམར་ནག་འདི་ཉིད་ཡིན་པར་གྲགས་ཤིང་མཚུར་སྟོན་རིན་ཅེན་རྡོ་རྗེས་སྤོང་ཞོན་སྟོན་ལ་མཐུ་བྱས་པའི་ཚེ། དེའི་བཟློག་པའི་རིམ་གྲོ་པ་རོལ་པོ་མེས་སྟོན་གྱིས་བྱས་པར་བརྟེན་མཐུ་ལོག་སྟེ་ཆོ་འཕྲུལ་ཆེན་པོ་བྱུང་བ་ན་མཚུར་སྟོན་གྱིས་ཁ་རག་ལྷ་མོ་དབང་ཕྱུག་རྡོ་རྗེའི་དྲུང་དུ་རྒྱུ་མཚན་རྣམས་ཞུས་པས་རོལ་པོ་མེས་སྟོན་ལས་བཟློག་པ་མཁས་པ་གཙང་གི་རྒྱལ་ཁམས་ན་མེད། ངེད་ཀྱི་བཟློག་པ་ཡང་ཞུན་གྱི་རིགས་དང་ཁྱོད་རང་ལ་ཕྱག་ཆ་ཨུར་མོ་འདུག་པ་རྣམས་ཀྱི་མི་འོང་བས་གཙང་རོང་དུ་ལྷ་རྗེ་གནུབས་ཆུང་པར་ཞུས་ཤིག་པའི་ལུང་བསྟན་པ་ལྟར་སྣམ་བུ་ཚོས་མ་བདུན་ཁྱེར་ནས་ཞུས་པར་གདམས་པ་མ་ཆད་པ་ཞིག་གནང་བས་རང་ཡུལ་དུ་ལོག་སྟེ་བསྒྲུབས་ཀྱང་ཆོ་འཕྲུལ་ཆེར་སོང་། སླར་ཁུ་ལུང་དུ་བྱོན་ནས་རྟ་ཕོ་ངང་ཞུར་ཞིག་དང་གསེར་སྲང་དུ་མ་ཕུལ་ཏེ་ཞུས་པས་གདམས་པ་ཆད་ལྷག་མེད་པའི་དབུ་དབྱུང་དང་བཅས་རྫོགས་པར་གནང་(༥ན)
བས་ཐུགས་ཚིམ་ནས་སྲས་འཇམ་དཔལ་ལོ་བཅོ་བརྒྱད་པ་དང་མཚུར་སྟོན་དབང་དེ་ལོ་བཅོ་ལྔ་འགྲོ་བ་གཉིས་དང་ལྷན་དུ་སྲུང་བཟློག་བསད་མནན་གྱི་སྔགས་རྒྱུན་བཙུགས་པས་ཚུར་བཟློག་མཁན་པོ་རོལ་པོ་མེས་སྟོན་དཔོན་གཡོག་བཞི་ཁྲག་སྐྱུགས་ཏེ་ཤི །དེ་རྗེས་སྤོང་ཞོན་སྟོན་ཕོ་མོ་དྲུག་ཅུ་རྩ་གཅིག་ཟླ་བ་དགུའི་ཁོངས་སུ་འཇིག་རྟེན་ཕ་རོལ་གྱི་ལྟད་མོར་སོང་། མཚུར་སྟོན་རིན་ཅེན་རྡོ་རྗེ་ལ་སྐུ་ཞང་དཔལ་ལྡན་གྱིས་གསན། དེ་ནས་རིམ་བཞིན་བླ་མ་ཚུལ་ཁྲིམས་རིན་ཆེན། སྔགས་འཆང་བྱང་ཆུབ་མགོན་པོ། མཁས་གྲུབ་ནམ་མཁའི་མཚན་ཅན། དེས་རིགས་འཛིན་ཚུལ་ཁྲིམས་ཞབས། རྒྱ་སྟོན་དབོན་པོ་ནམ་མཁའ་རིགས་འཛིན་གསང་བ། འདིའི་ཞལ་ངོར་རྭ་བའི་བླ་མ་རྒྱ་སྟོན་ཀུན་དགའ་བརྩོན་འགྲུས་སོགས་མཁས་གྲུབ་མང་དུ་བྱུང་ཞིང་ཕྱི་མ་འགའ་ཞིག་ཚེ་བདག་ལ་ཤིན་ཏུ་མཁས་པས་ཡང་བཟློག་གི་ལྷན་ཐབས་ཀྱི་ཡིག་ཆ་མང་དུ་མཛད། དེ་ལ་ལྷ་སྲས་རྒྱལ་པོའི་རྣམ་སྤྲུལ་ཆོས་རྒྱལ་འབྲི་གུང་པ་རིན་ཅེན་ཕུན་ཚོགས་ཀྱིས་གསན་ཅིང་ཐུགས་ཉམས་སུ་བསྟར་བས་ཡི་དམ་ལྷས་ཞལ་གཟིགས་ཤིང་གཞིས་ཀ་རིན་སྤུངས་པ་སོགས་བསྒྲལ་བའི་ཞིང་དུ་མར་རྟགས་མཚན་དངོས་སུ་བསྟན་པ་སོགས་འཕྲིན་ལས་ཐམས་ཅད་ལྷུན་གྱིས་གྲུབ། དེས་རྒྱལ་སྲས་ལྷ་རྗེའི་ཡང་སྲིད་རིགས་ཀྱི་སྲས་ཆོས་རྒྱལ་ཕུན་ཚོགས་ལ་གནང་། དེས་ནཱ་རོ་པའི་རྣམ་སྤྲུལ་སྲས་བཀྲ་ཤིས་ཕུན་ཚོགས་ལ་སྩལ། དེས་རིགས་འཛིན་གནམ་ལྕགས་མེ་འབར་གྱི་སྤྲུལ་པའི་སྐུ་གཅུང་རིགས་འཛིན་ཆོས་ཀྱི་གྲགས་པ་ལ་གནང་། ཡབ་སྲས་འདི་གསུམ་གས་ཀྱང་ཡི་དམ་གྱི་ལྷ་ཞལ་གཟིགས་ཤིང་མངོན་སྤྱོད་ལ་རྟགས་ཐོན་པ་ཤ་སྟག་ཡིན། དམ་པ་འདི་ཉིད་ལ་བདག་ཅག་གི་རྣམ་(༥བ)
འདྲེན་གཉགས་ཛྙཱ་ན་ཀུ་མཱ་རའི་སྤྲུལ་པའི་ཟློས་གར་ཟུར་རྡོ་རྗེ་འཆང་ཆོས་དབྱིངས་རང་གྲོལ་གྱིས་རྣོན་པོ་ནང་གཅོད་ཀྱི་དབང་གསན། ཡིག་རྙིང་གི་ལུང་དང་ཕྱག་ལེན་ནི་རྗེ་རིན་ཅེན་ཕུན་ཚོགས་ནས་སྣང་གསལ་བ་བཀྲ་ཤིས་རྒྱ་མཚོ། རིགས་འཛིན་ཀུན་དགའ་ཚེ་མཆོག །ངག་དབང་ཡེ་ཤེས་གྲུབ་པ། ཟུར་ཀུན་མཁྱེན་ཆེན་པོ། ཡང་ཕྱག་ལེན་གནད་འགག་རྣམས་དུ་མ་རང་གྲོལ་ནས་ཡབ་ཟུར་ཆེན་གཞོན་ནུ་དོན་གྲུབ་ལ་གསན་པ་ཐམས་ཅད་བདག་ལ་བཀའ་དྲིན་དུ་སྩལ་ཞིང་ཕྱག་ལེན་ཤིན་ཏུ་ཞིབ་པ་ནི་དབུར་སྨྱོན་ཆོས་ཀྱི་གྲགས་པ་ཉིད་ལས་དངོས་སུ་ཐོས། དཀྱིལ་འཁོར་ལ་བརྟེན་པའི་དབང་དང་རྣོན་པོ་ནང་གཅོད། ལུང་ཡོངས་སུ་རྫོགས་པ་ནི་དབུར་སྨྱོན་དཀོན་ཅོག་ཕུན་ཚོགས་ནས་སྔགས་འཆང་དཀོན་ཅོག་ལྷུན་གྲུབ་སྤྲུལ་པའི་སྐུ་མཆོག་གཏེར་བདག་གླིང་པ། དེས་བདག་ལ་གནང་ཞིང་གཞན་ཡང་བཀའ་གཏེར་གྱི་བརྒྱུད་པ་མཐའ་ཀླས་ཡོད་པ་ཐམས་ཅད་ཆུ་བོ་གཅིག་ཏུ་འདྲེས་པའི་རྒྱུན་མ་ཉམས་པས་རྒྱལ་བ་དགོངས་པའི་བརྒྱུད་པ། རིགས་འཛིན་བརྡའི་བརྒྱུད་པ། གང་ཟག་སྙན་ཁུང་བརྒྱུད་པ། སྨོན་ལམ་དབང་བསྐུར་བརྒྱུད་པ། བཀའ་བབས་ལུང་བསྟན་བརྒྱུད་པ། ལས་འཕྲོ་གཏེར་གྱི་བརྒྱུད་པ། ཤོག་སེར་ཚིག་གི་བརྒྱུད་པ་སྟེ་བདུན་ལྡན་བརྒྱུད་པའི་བཀའ་མ་ཉམས་པ། མ་དང་མཁའ་འགྲོའི་ཁ་རླངས་མ་ཡལ་བ། ཕྱག་ལེན་མཐོང་བརྒྱུད་ཀྱི་དམར་འཁྲིད་མ་ཆད་པ། དམ་ཉམས་འདྲེས་ཁྱེར་གྱི་བསླད་ས་ལ་མ་ཞུགས་པ། སྟེང་ན་བསྲུང་བ་རྡོ་རྗེའི་གུར་ཁང་མ་ཞིག་པ། བར་ན་བཟློག་བསད་རླུང་ཟོར་གྱི་དབལ་ངར་མ་ཆག་པ། འོག་ཏུ་མནན་གཏད་སྡེབས་ཧོམ་གྱི་ཚ་ངར་མ་ཉམས་(༦ན)
པ། དཀར་པོ་ཆོས་བསྒྲུབ་པ་ལ་མེད་དུ་མི་རུང་བ་ནག་པོ་མཐུའི་ལྕགས་རི་གཤིན་རྗེ་གཟའ་གདོང་དམར་ནག་གི་བྱིན་རླབས་རྣོན་པོ་ནང་གཅོད་ཀྱི་དབང་འབུལ་བར་བྱེད་པ་ལ། ཐོག་མར་མདུན་གྱི་ནམ་མཁའི་གནས་སུ་རྩ་བ་གསུམ་གྱི་ལྷ་ཚོགས་བཞུགས་པའི་སྤྱན་སྔར་སྐྱབས་འགྲོ་སེམས་བསྐྱེད་དང་རིག་པ་འཛིན་པའི་སྡོམ་པ་གཟུང་བའི་སླད་དུ་མངའ་རིས་པཎ་ཆེན་པདྨ་དབང་རྒྱལ་གྱིས་བསམ་ཡས་དབུ་རྩེ་ནས་གདན་དྲངས་པའི་འཇམ་དཔལ་དོན་གྱི་གསང་ཏིག་ལས། ན་མོ། བླ་མ་འཇམ་དཔལ་ཚེ་ཡི་བདག །དུས་འདི་ནས་བཟུང་ཡེ་ཤེས་སེམས་དཔའི་སྐུ་མ་ཐོབ་བར་དུ་ཕྱག་འཚལ་སྐྱབས་སུ་མཆི་འཁོར་བའི་སྡུག་བསྔལ་ཐམས་ཅད་སྒྲོལ་བར་ཤོག །ཅེས་ལན་གསུམ་དང་། འཇམ་པའི་རྡོ་རྗེ་ལ་སོགས་པ། །སྲས་བཅས་རྒྱལ་བ་འཁོར་དང་བཅས། །མ་ལུས་བདག་ལ་དགོངས་སུ་གསོལ། །བདག་ནི་འགྲོ་བའི་དོན་གྱི་ཕྱིར། །དུས་གསུམ་མགོན་པོ་གང་མཛད་པའི། །དོན་དེ་བདག་གིས་བཟུང་བར་བགྱི། །དྲི་མ་བྲལ་བའི་ཚུལ་ཁྲིམས་དང་། །ཆོས་རྣམས་ཡོངས་སྡུད་དགེ་བ་དང་། །སེམས་ཅན་དོན་བྱེད་རྣམ་པ་གསུམ། །བདག་གིས་ཡོངས་སུ་བཟུང་བར་བགྱི། །མ་རྒལ་བ་རྣམས་བདག་གིས་བསྒྲལ། །དེ་བཞིན་མ་དགྲོལ་བ་རྣམས་གྲོལ། །དབུགས་མ་ཕྱིན་རྣམས་དབུགས་དབྱུང་ཞིང་། །ཐམས་ཅད་མྱ་ངན་འདས་ལ་འགོད། །འཇམ་དཔལ་སྐུ་ཡི་དམ་ཚིག་ཏུ། །དཀོན་མཆོག་གསུམ་བཟུང་མི་གཏང་ངོ་། །འཇམ་དཔལ་གསུང་གི་དམ་ཚིག་ཏུ། །ཐེག་པ་གསུམ་པོ་མ་ཉམས་བཟུང་། །འཇམ་དཔལ་ཐུགས་ཀྱི་དམ་ཚིག་ཏུ། །རྡོ་རྗེ་དྲིལ་བུ་ཕྱག་རྒྱ་བཟུང་། །འཇམ་དཔལ་ཡོན་ཏན་དམ་ཚིག་ཏུ། །དུས་དྲུག་སྦྱིན་པ་རྣམ་བཞི་སྦྱིན། །འཇམ་དཔལ་འཕྲིན་ལས་དམ་ཚིག་ཏུ། །ཕྱི་ནང་གསང་བའི་མཆོད་པ་བྱ། །འཇམ་དཔལ་ཐམས་ཅད་འདུས་པ་ཡི། །སློབ་དཔོན་དག་ཀྱང་བཟུང་བར་བགྱི། །སྡོམ་(༦བ)
པ་ཀུན་དང་ཡང་དག་ལྡན། །རྒྱུད་ཀུན་ཡོངས་སུ་བཟུང་བར་བགྱི། །ཞེས་ལན་གསུམ་བརྗོད། རྗེ་རཏྣའི་རེག་ཟིག་ཏུ་གུར་ལས་བྱུང་བའི་རྒྱུན་བཤགས་དང་ཕྱི་འགྱུར་ལ་གྲགས་པའི་སྡོམ་བཟུང་ལ་ཞལ་འཕངས་ཤིང་གནུབས་ཡེ་ཤེས་རྒྱ་མཚོས་ཟིལ་གནོན་གྱི་དཀྱིལ་འཁོར་གྱི་ཆོ་གར་ཡང་སྡོམ་བཟུང་དེ་དང་ཆ་མཚུངས་སྣང་བས་གང་བདེ་བྱས་པས་ཁྱབ་ལ། གསར་མ་དང་ཕྱོགས་མཐུན་པ་ཡང་ཕུར་སོགས་རྙིང་མ་བཀའ་མ་མང་པོར་ཡོད་པས་ཕྱོགས་རེའི་མིག་ཅན་གྱི་སྦུགས་འཐུམ་བྱ་མི་དགོས། གསོལ་བ་གདབ་པ་ནི། གསང་ཏིག་ལས། ཨེ། མཐིང་ནག་ཨེ་ལས་དྲག་པོའི་གཞལ་ཡས་སུ། །གཤིན་རྗེ་ཆུ་གླང་བརྫིས་པའི་གདན་སྟེང་དུ། །འཇམ་དཔལ་ཡ་མཱནྟ་ཀ་གཤིན་རྗེའི་གཤེད། །གཤེད་པོ་ཁྲོ་བོ་དྲེགས་པའི་འཁོར་གྱིས་བསྐོར། །གཤིན་རྗེ་གཤེད་པོའི་ལྷ་ཚོགས་ལ་གསོལ་བ་འདེབས། །བདག་ལ་དབང་བསྐུར་བྱིན་གྱིས་བརླབ་ཏུ་གསོལ། །ཞེས་ལན་གསུམ་བརྗོད། རེག་ཟིག་ཏུ་རྡོ་རྗེ་འཛིན་པ་སོགས་འདུག་པ་མི་འཐད་པ་མ་ཡིན་ནའང་ཁ་འགེང་དགོས་པ་རྣམས་རྗེ་དབུར་སྨྱོན་གསང་ཏིག་ནས་བླངས་པ་ལེགས་པའི་ཕྱོགས་སུ་བཞེད། དེ་ནས་བླ་མ་དང་གཏོར་མ་འཇམ་དཔལ་གཤིན་རྗེའི་གཤེད་གཙོ་འཁོར་ལྔའི་རྣམ་པ་ཅན་བདག་མདུན་གྱི་ཚུལ་དུ་བཞུགས་པར་བརྡ་སྤྲད། ཡེ་ཤེས་དབབ་པའི་ཕྱིར་དུ་སློབ་མ་ལས་སྔགས་དང་ལས་བུམ་གྱི་ཆུས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་དྷཱིཿཡིག་སེར་པོ་ཡོངས་སུ་གྱུར་པ་ལས་སློབ་མ་འཇམ་སྣང་རྩེ་ནས་ཀྱིས་མངོན་རྟོགས་སྲུང་འཁོར་གཞུང་བཞིན་བསྐྱེད་གསུང་བ་བྱང་ཆེན་འདིའི་དཀྱིལ་འཁོར་ཡིན་(༧ན)
པས་བཀའ་བརྒྱད་ཀྱི་དབང་ལྟ་བུ་ལ་ཡང་སློབ་མ་ཆེ་མཆོག་ཏུ་བསྐྱེད་པས་མི་ཆོག་པར་དཀྱིལ་འཁོར་ཡོངས་རྫོགས་བསྒོམ་གྱིན་ཡོད་པ་ཡིན་ནམ། རྫ་བཅོག་མང་ན་ཇ་ཁང་གི་སྣོད་ལ་ལག་རྡུགས་འབྱུང་དོགས་དགོས་འདུག་གོ །དཔལ་གསེར་བཙོ་མའི་མདོག་ཅན་ཞལ་གཅིག་ཕྱག་གཉིས་པ། གཡས་ཤེས་རབ་ཀྱི་རལ་གྲི་དཔུང་པའི་ཐད་སོར་འཛིན་ཅིང་། གཡོན་པའི་མཐེབ་སྲིན་གྱིས་ཨུཏྤ་ལའི་ཡུ་བ་ཐུགས་ཀར་འཛིན་པ་འདབ་མ་སྙན་ཀྱི་ཐད་ཀར་ཁ་ཕྱེ་བ་རྒྱས་པའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་བསྣམས་པ། ཞབས་རྡོ་རྗེ་སྐྱིལ་མོ་ཀླུང་གིས་བཞུགས་ཤིང་། དར་དང་རིན་པོ་ཆེས་བརྒྱན་པ། ཞི་ཞིང་འཛུམ་པའི་མདངས་དང་ལྡན་ཞིང་། རལ་པའི་ཟུར་ཕུད་ལྔ་དང་ལྡན་པའི་དཔྲལ་བར་ཨཱོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོས་མཚན་པའི་གནས་གསུམ་གྱི་ཡི་གེ་ལས་འཕྲོས་པའི་འོད་ཟེར་དང་བདག་མདུན་གྱི་ཐུགས་ཀའི་ཧཱུཾ་ལས་འཕྲོས་པའི་འོད་ཟེར་གྱིས་རང་བཞིན་དག་པ་འོག་མིན་ཆོས་ཀྱི་དབྱིངས་ཀྱི་ཕོ་བྲང་དམ་པ་ནས་འཇམ་དཔལ་གཤིན་རྗེའི་གཤེད་ཡབ་ཡུམ་སྲས་འཁོར་དང་བཅས་པ་སྐུ་ཆེ་བ་རི་རབ་དང་ཆུང་བ་རྡུལ་ཕྲན་ཙམ་པ་བུ་ཡུག་འཚུབ་པ་ལྟར་སྤྱན་དྲངས་ཏེ། སློབ་མའི་ལུས་ལ་སྐུ། ངག་ལ་གསུང་། ཡིད་ལ་ཐུགས། མཚོ་ལ་ཁ་བ་བབས་པ་ལྟར་ཐིམ་པའི་དམིགས་པ་སྤྲད། གུ་གུལ་སོགས་རྫས་སྦྱར་བའི་དུད་པ་བཏང་ཞིང་རོལ་མོ་དབྱངས་དང་བཅས་པས་ལས་བྱང་རྡོ་རྗེའི་ཐོག་མདའ་ལས་བྱུང་བའི་བྱིན་འདེབས་ཀྱི་མཇུག་ཏུ་ཨཱོཾ་སྐུ་ཡིས་བྱིན་གྱིས་བརླབ་ཏུ་གསོལ། །ལུས་ལ་གཟི་བྱིན་བསྐྱེད་དུ་གསོལ། །ལུས་ཀྱི་སྒྲིབ་པ་སྦྱང་དུ་གསོལ། །སྐུ་མི་འགྱུར་ཚེ་ཡི་དངོས་གྲུབ་སྩོལ། །ཨཱཿ(༧བ)
གསུང་གིས་བྱིན་གྱིས་བརླབ་ཏུ་གསོལ། །ངག་ལ་ནུས་པ་སྤར་དུ་གསོལ། །ངག་གི་སྒྲིབ་པ་སྦྱང་དུ་གསོལ། །གསུང་གི་སྙིང་པོ་ལུང་གི་དངོས་གྲུབ་སྩོལ། །ཧཱུཾ་ཐུགས་ཀྱིས་བྱིན་གྱིས་བརླབ་ཏུ་གསོལ། །སེམས་ལ་རྟོགས་པ་སྤར་དུ་གསོལ། །སེམས་ཀྱི་སྒྲིབ་པ་སྦྱང་དུ་གསོལ། །ཐུགས་སྐྱེ་མེད་རྡོ་རྗེའི་དངོས་གྲུབ་སྩོལ། །ཞི་དྲག་གི་སྔགས་དང་རྩ་སྔགས་རྣམས་ཀྱི་མཐར་ཏིཥྛ་མ་ཧཱ་ཀྲོ་དྷ་ཨ་བེ་ཤ་ཡ་ཨ་བེ་ཤ་ཡ་ཛྙཱ་ན་མཎྜ་ལ་ཨ་བ་ཤ་ཡ་ཨ་ཨཱཿ ཞེས་དབྱེར་མེད་དུ་བསྟིམ་ཞིང་སྤྱི་བོར་རྡོ་རྗེ་རྒྱ་གྲམ་གྱིས་རྒྱས་བཏབ་སྟེ་བརྟན་པར་བྱ། བྱིན་ཕབ་པའི་རྐྱེན་གྱིས་རྒྱུ་འཇམ་དཔལ་འབྲས་བུ་གཤིན་རྗེའི་གཤེད་ཀྱི་སྐུར་གསལ་བར། དབང་དངོས་བསྐུར་བ་ལ། དང་པོ་སྐུའི་བྱིན་རླབས་དབང་བཞིའི་ཚུལ་དུ་བསྐུར་བ་ནི། གཏོར་མ་གཙོ་འཁོར་ལྔར་གསལ་སྣང་རྩེ་ནས་ཀྱིས་གཏོར་མ་ལྷར་བསྐྱེད་གསུང་བ་ལྟར་ན་དབང་བསྒྲུབ་ཀྱི་རིགས་མཛད་ཀྱིན་མེད་པ་འདྲ་དཔྱོད་ལྡན་རྣམས་ནི་སྔར་ཡོད་གསལ་འདེབས་ཀྱི་ཚུལ་དུ་ཟེར་བ་ཡིན། སྡེ་པ་སྐྱིད་ཤོད་པའི་དམག་དཔོན་མཛད་འཕྲོར་དབང་བསྐུར་ལ་བྱོན་པའི་སྐྱོན་དུ་འདུག །བའི་གཙོ་བོའི་དཔྲལ་བའི་ཨཱོཾ་དཀར་པོ་ལས་འོད་ཟེར་དཀར་པོའི་ཚོགས་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་དཔྲལ་བར་ཐིམ། ལུས་ཀྱི་ནང་ཐམས་ཅད་གང་བས་བྱིན་གྱིས་བརླབ་པར་བརྡ་སྤྲད། གཏོར་མ་དཔྲལ་བར་གཏུགས་ལ། ལས་བྱང་གི་བསྟོད་རིང་གི །ཨེ། ཆོས་ཀྱི་དབྱིངས་ཀྱི་ཕོ་བྲང་དམ་པ་ནས། །གཤིན་རྗེ་མ་ཧེ་ཉི་ཟླ་པདྨའི་སྟེང་། །ཞེས་པ་ནས་བཟུང་སྟེ་དམིགས་པ་གང་ཡིན་དེ་ཉིད་ད་ལྟ་བརླག །ཁྲོ་རྒྱལ་གཤིན་རྗེའི་གཤེད་ཀྱི་དབང་བསྐུར་རོ། །འཁོར་གྱི་གཤིན་རྗེ་བྱེ་བའི་དབང་ཐོབ་ཤོག །གསང་ཏིག་ལས། དཔལ་ལྡན་རྡོ་རྗེ་སྐུ་འཆང་བ། །རྡོ་རྗེ་མི་ཕྱེད་སྐུ་དང་ལྡན། །(༨ན)
དེང་བདག་སངས་རྒྱས་སྐུ་འཛིན་པ། །སྐུ་ཡི་རྡོ་རྗེ་ཨཱོཾ་ཡང་སྦྱིན། །ཨཱོཾ་ཨ་སྣང་རྩེ་ནས་ཀྱིས་དབང་བསྐུར་ཚིག་བསྟོད་རིང་ནས་ལེན་དགོས་པ་རྩད་མ་ཆོད་ཅིང་སྔགས་ཀྱང་ཨ་ཀྲོ་འབྲུ་བཅུ་གཅིག་པ་སྦྱར་བ་འབྲི་གུང་དུ་དབང་གསན་དུས་སྙན་བལ་དུག་གིས་བསྒགས་ཡོད་པ་འདྲ། འདི་འདྲའི་རྡོ་རྗེ་སློབ་དཔོ་གྱི་ཐུགས་ཁུར་སྣེའུ་སྡོང་རྩེར་རིན་ཅེན་རྒྱན་སྤྲོད་ལ་འབྱོན་པ་རང་བབས་སམ་སྙམ། ཀ་ཡ་མ་དུ་རུ་ཙཀྲ་ཀཱ་ཡ་ཨ་བྷི་ཥིཉྩ་ཧཱུཾ་ཧྲཱི༔ ཞེས་དབང་བསྐུར་བས། ལུས་ཀྱི་སྒྲིབ་པ་དག །བུམ་པའི་དབང་ཐོབ། ལུས་འཇམ་དཔལ་གཤིན་རྗེའི་སྐུ་བསྒྲུབ་པ་ལ་དབང་། སྐུའི་དམ་ཚིག་མ་ལུས་པ་བསྲུང་། ལུས་སྤྲུལ་པའི་སྐུ་འགྲུབ་པའི་སྐལ་བ་ཅན་དུ་བྱས་སོ། །ཞེས་ངོ་སྤྲད། གཏོར་མ་མ་མོ་ཁྲག་མིག་མར་གསལ་བའི་མགྲིན་པའི་ཨཱཿདམར་པོ་ལས་འོད་ཟེར་དམར་པོའི་ཚོགས་དཔག་ཏུ་མེད་པ་འཕྲོས་ཁྱོད་རང་རྣམས་ཀྱི་མགྲིན་པར་ཐིམ། མགྲིན་པའི་ནང་ཐམས་ཅད་གང་བས་བྱིན་གྱིས་བརླབ་པར་བརྡ་སྤྲད། གཏོར་མ་མགྲིན་པར་གཏུགས་ལ། ཧཱུཾ། ཁྲོ་རྒྱལ་ཆེན་པོའི་གཡོན་གྱི་ཕྱོགས་ནས་ནི། །གསོད་བྱེད་ཡུམ་ཆེན་མ་མོ་ཁྲག་མིག་མ། །ཞེས་པ་ནས་བཟུང་སྟེ་ཞབས་གཉིས་དོར་སྟབས་རབ་བགྲད་དགྲ་བགེགས་གནོན། །ཡུམ་མཆོག་ཨེ་ཀ་ཛཱ་ཏིའི་དབང་བསྐུར་རོ། །འཁོར་གྱི་མ་མོའི་དམག་ཚོགས་དབང་ཐོབ་ཤོག །དཔལ་ལྡན་རྡོ་རྗེ་གསུང་འཆང་བ། །རྡོ་རྗེ་མི་ཕྱེད་གསུང་དང་ལྡན། །དེང་བདག་སངས་རྒྱས་གསུང་འཛིན་པ། །གསུང་གི་རྡོ་རྗེ་ཨཱཿཡང་སྦྱིན། །ཧྱ་ཀ་ཡ་མ་དུ་རུ་ཙཀྲ་ཝ་ཀ་ཨ་བྷི་ཥཱིཉྩ་ཧཱུཾ་ཧྲཱིཿ ཞེས་དབང་བསྐུར་བས། ངག་གི་སྒྲིབ་པ་དག །གསང་བའི་དབང་ཐོབ། ངག་འཇམ་དཔལ་གཤིན་རྗེའི་གསུང་བསྒྲུབ་པ་ལ་དབང་། གསུང་གི་དམ་ཚིག་མ་ལུས་པ་བསྲུང་། ངག་ལོངས་(༨བ)
སྤྱོད་རྫོགས་པའི་སྐུ་འགྲུབ་པའི་སྐལ་བ་ཅན་དུ་བྱས་སོ། །ཞེས་ངོ་སྤྲད། གཏོར་མ་སྲས་མཆོག་ཡ་མ་རཱ་ཙར་གསལ་བའི་ཐུགས་ཀའི་ཧཱུཾ་སྔོན་པོ་ལས་འོད་ཟེར་སྔོན་པོ་ཚོགས་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་སྙིང་གར་ཐིམ། སྙིང་གི་ནང་ཐམས་ཅད་གང་བས་བྱིན་གྱིས་བརླབ་པར་བརྡ་སྤྲད། གཏོར་མ་སྙིང་གར་གཏུགས་ལ། ཧཱུཾ། གཡས་ན་སྲས་མཆོག་ཡ་མ་རཱ་ཙ་ནི། །ཞེས་པ་ནས་བཟུང་སྟེ་ཕྱག་གཡོན་དགྲ་བགེགས་རྣམས་ཀྱི་དོན་སྙིང་འདྲད། གསོད་བྱེད་ཡ་མ་རཱ་ཙའི་དབང་བསྐུར་རོ། །འཁོར་གྱི་ལས་མཁན་སྡེ་བརྒྱད་དབང་ཐོབ་ཤོག །དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་ཐུགས་དང་ལྡན། །དེང་བདག་སངས་རྒྱས་ཐུགས་འཛིན་པ། །ཐུགས་ཀྱི་རྡོ་རྗེ་ཧཱུཾ་དུ་མཛོད། །གྷྲི་མ་ཡ་མ་དུ་རུ་ཙཀྲ་ཙིཏྟ་ཨ་བྷི་ཥིཉྩ་ཧཱུཾ་ཧྲཱིཿ ཞེས་དབང་བསྐུར་བས། ཡིད་ཀྱི་སྒྲིབ་པ་དག །ཤེས་རབ་ཡེ་ཤེས་ཀྱི་དབང་ཐོབ། ཡིད་འཇམ་དཔལ་གཤིན་རྗེའི་ཐུགས་བསྒྲུབ་པ་ལ་དབང་། ཐུགས་ཀྱི་དམ་ཚིག་མ་ལུས་པ་བསྲུང་། ཡིད་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས་སོ། །ཞེས་ངོ་སྤྲད། གཏོར་མ་ཡབ་ཡུམ་སྲས་གསུམ་སྐུ་སྤྲུལ་འཆི་བདག་གསུང་སྤྲུལ་སྲོག་བདག་སྟེ་གཙོ་འཁོར་ལྔའི་གནས་གསུམ་གྱི་ཡི་གེ་གསུམ་ལས་འོད་ཟེར་ཁ་དོག་སྣ་ཚོགས་པ་དཔག་ཏུ་མེད་པ་འཕྲོས། ཁྱེད་རང་རྣམས་ཀྱི་དཔྲལ་བ། མགྲིན་པ། སྙིང་གའི་གནས་རྣམས་སུ་ཐིམ། ལུས་ཀྱི་ནད་ཐམས་ཅད་གང་བས་བྱིན་གྱིས་བརླབ་པར་བརྡ་སྤྲད། གཏོར་མ་ལག་རྗེ་ཟུར་པའི་དུས་སྦས་ལྷ་གཉིས་ཞལ་ཤེས་སུ་མཛད་པས་ལས་མཁན་བཀའ་བཏད་ཀྱི་ཚུལ་དུ་དགོངས་པ་སྣང་རྩེ་ནས་ཀྱིས་མ་རྟོགས་པར་གཏོར་མ་གནས་གསུམ་དུ་བཞག་ནས་སྟིམ་པ་ནི་དངོས་བསྟན་གྱི་ལྷ་ཡབ་ཡུམ་སྲས་(༩ན)
གསུམ་ལས་མེད་པ་སོར་བཞག་གི་རང་མཚང་ངོ་། །ཏུ་གཏད་ལ། ཧཱུཾ། གཞན་ཡང་ཁྲོ་རྒྱལ་ཆེན་པོ་ཁྱེད་རྣམས་ལ། །འཕྲིན་ལས་བཅོལ་བ་འདི་རྣམས་ད་མཛོད་ཅིག །ཅེས་པ་ནས་བཟུང་སྟེ། བཅོལ་བའི་འཕྲིན་ལས་མྱུར་དུ་སྒྲུབ་པ་མཛོད། །སརྦ་ཙིཏྟ་གཟེར་ཐུམས་བྷིག་ནན་ཏྲིག་ནན། རྦད་ཡ། བཟློག་ཡ། སརྦ་སིདྡྷི་ཨ་བྷི་ཥིཉྩ་ཧཱུཾ་ཧྲཱི༔ ཞེས་དབང་བསྐུར་བས། སྒོ་གསུམ་གྱི་དྲི་མ་བག་ཆགས་དང་བཅས་པ་དག །དབང་བཞི་པ་ཚིག་དབང་རིན་པོ་ཆེ་ཐོབ། ལུས་ངག་ཡིད་གསུམ་རྡོ་རྗེ་གསུམ་གྱི་དཀྱིལ་འཁོར་བསྒྲུབ་པ་ལ་དབང་། གསང་སྔགས་བརྡའི་དམ་ཚིག་བཞི་བསྲུང་། འབྲས་བུ་ངོ་བོ་ཉིད་སྐུ་འགྲུབ་པའི་སྐལ་རྒྱས་པར་སྤྲོ་ན་གཙོ་བོའི་གནས་གསུམ་གྱི་འཕྲོ་འདུ་སོགས་ལ་བརྟེན་ནས་གཏོར་མ་སྤྱི་མགྲིན་སྙིང་ག་ལག་པར་གཏད་ནས་སྐུལ་ཚིག་ཁ་བསྒྱུར་བའི་དབང་བཞི་དང་ཡབ་ཡུམ་སྲས་གཙོ་འཁོར་ལྔ་ག་ལ་ཡང་སོ་སོར་དབང་བཞི་ཁ་ཕྲལ་ནས་བྱེད་པ་ཡོད་ནའང་དེང་སང་གོང་མ་ཉིད་མཛད་པ་ཤས་ཆེའོ། །བ་ཅན་དུ་བྱས་སོ། །བསྒོམ་པ་ལྷའི་བསྐྱེད་རིམ་དེ་དག་ནི་སྐུའི་དབང་ཡིན་ལ། ཞེས་དེའི་མཇུག་ཏུ་སྣང་རྩེ་ནས་ཀྱིས་ཡབ་ཡུམ་གྱི་དབང་བསྐུར་རྒྱས་གདབ་མཛད་འདུག་པ་རྙིང་རྒན་རྣམས་ལ་དེ་འདྲའི་དབང་མི་དགོས་པས་ར་ལུང་དུ་འབྲུག་པ་མི་ཕམ་ཆོས་རྒྱལ་ལ་བསྐུར་བ་ཞུ། ངོ་སྤྲད། གཉིས་པ་གསུང་བཟླས་པའི་ལུང་སྦྱིན་པ་ནི་བདག་མདུན་གྱི་གཙོ་འཁོར་ལྔ་སོ་སོའི་ཐུགས་ཀར་ཉི་མའི་དཀྱིལ་འཁོར་གྱི་དབུས་སུ་གཙོ་བོའི་ཐུགས་ཀར་ཧཱུཾ་མཐིང་ནག །ཡུམ་གྱི་ཐུགས་ཀར་བྷྱོ་སྨུག་ནག །སྲས་དང་སྦས་ལྷ་གཉིས་ཀྱི་ཐུགས་ཀར་ཡ་དམར་ནག་གི་མཐར་རང་སྔགས་ཀྱིས་གཡས་སྐོར་དུ་འཁོོར་བ་ཤངས་བུག་གཡས་ནས་ཐོན། སློབ་མའི་སྣ་བུག་གཡོན་ནས་ཞུགས། སྙིང་གར་ཉི་མའི་སྟེང་དུ་ཧཱུཾ་གི་མཐར་སྔགས་ཀྱི་འཕྲེང་བས་བསྐོར་བ་ལ་ཐིམ། སླར་སྣ་བུག་(༩བ)
གཡས་ནས་ཐོན། བདག་མདུན་གྱི་སྣ་བུག་གཡོན་བརྒྱུད་ཐུགས་ཀའི་སྔགས་འཕྲེང་ལ་ཐིམ་པ་སོགས་གསལ་བར་བསྒོམ་ཞིང་རྩ་སྔགས་དང་བསྲུང་སྔགས་ཀྱི་རྗེས་ཟློས་ལན་གསུམ། སྔགས་འཕྲེང་གཡོན་དུ་འཁོར་བ་ལ་འཕྲོ་འདུ་གོང་ལྟར་བྱས་ནས་བཟློག་བསད་མནན་གསུམ་གྱི་སྔགས་ཀྱི་རྗེས་ཟློས་ལན་གསུམ་གྱི་མཐར་རུ་དྲ་ཀྵའི་སྣང་རྩེ་ནས་ཀྱིས་མེ་ཏོག་གཏོར་ཏེ་བཅོམ་ལྡན་བདག་ལ་སྩལ་སོགས་སྒྲུབ་ཐབས་རྒྱ་རྒྱམ་ནས་བཛྲ་ས་མ་ཛཿས་སྤྱན་དྲངས་འདུག་པ་སི་ཏུ་དྲུང་པའི་སྒྲུབ་ཐབས་བརྒྱ་རྩའི་རྗེས་གནང་མགོ་མེད་རྩ་མེད་དེ་དང་ལྷན་དུ་མཚུར་ཕུར་སྐྱེལ་བ་ཞུ། འཕྲེང་བ་མགྲིན་པར་བཞག་སྟེ་ཛཿཧཱུཾ་བཾ་ཧོ༔ ཞེས་བྱིན་གྱིས་བརླབ། དེ་ནི་སྔགས་ཀྱི་བཟླས་ལུང་ཞེས་པ་གསུང་གི་དབང་ཡིན་ཞེས་བརྡ་སྤྲད། གསུམ་པ་ཐུགས་ཀྱི་སྡེ་པ་སྣང་རྩེ་བས་འདི་མེད་པ་ལ་རྡོ་རྗེས་གནས་གསུམ་དུ་གོ་བགོ་བ་འདུག་པ་རྣམ་འཇོམས་ཀྱི་བྱབ་ཁྲུས་ཀྱི་དཔེ་ཚལ་པ་ཞིག་རྙེད་པའམ། ཡང་ན་གཏེར་ཞབས་ཚུལ་དུ་ཁྱུང་ཚང་བྲག་ནས་བཏོན་པ་འདྲའོ། །དབང་ནི། ཚེ་དཔག་མེད་བདུད་རྩི་འཁྱིལ་པ་ལས། གཞི་དོན་བསྒོམ་བྱ་སྒོམ་བྱེད་བྲལ། །ངང་གིས་གསལ་ལ་གཟུང་འཛིན་མེད། །སོ་མ་རང་གདངས་ལྷུག་པའི་ངང་། །གསལ་སྟོང་ལམ་བསྒོམ་དབང་བསྐུར་རོ། །ཞེས། གནས་ལུགས་ཀྱི་གཞི་བསྒོམ་བྱ་སྒོམ་བྱེད་དང་བྲལ་ཡང་གང་དུ་སྐུའི་བྱིན་རླབས་དབང་བཞིའི་ཚུལ་དུ་བསྐུར་བ་དང་གསུང་གི་བྱིན་རླབས་སྔགས་ཀྱི་བཟླས་པའི་ལུང་གི་སྤྲོ་བསྡུ་སོགས་བསྐྱེད་རིམ་པའི་ལྷ་སྔགས་ཡེ་ཤེས་ཀྱི་རོལ་པ་དེ་ཐམས་ཅད་མཁའ་ལ་འཇའ་ཚོན་བཞིན་ངང་གིས་གསལ་ཡང་གཟུང་བ་དང་འཛིན་པའི་རྟོག་པ་མེད་པ་རིག་པ་སོ་མ་རང་གདངས་སམ་བཅོས་ལྷུག་པའི་གཤིས་གསལ་སྟོང་འཛིན་བྲལ་སྤྲོས་མེད་བདེ་བ་ཆེན་པོ་ཆོས་དབྱིངས་རང་བཞིན་རྣམ་པར་མི་རྟོག་པའི་ངོ་བོར་ཅུང་ཟད་ཅིག་མཉམ་པར་འཇོག་པར་ཞུ་ཞེས་ངོ་སྤྲད་པ་ནི་
ཐུགས་ཀྱི་དབང་ཡིན་ནོ། །སྤྱི་དང་བྱེ་བྲག་གི་དམ་ཚིག་རྣམས་ལ་ནན་ཏན་དུ་བསྲུང་སྙམ་པས། རྡོ་རྗེ་འཛིན་པའི་བཀའ་བཞིན་དུ། །བདག་ནི་རྩེ་གཅིག་གུས་གདུང་བས། །མ་ལུས་བདག་གིས་བསྒྲུབས་ལགས་ན། །བརྩེ་བས་རྗེས་བཟུང་བྱིན་གྱིས་རློབས། །ཞེས་ལན་གསུམ་གྱི་རྗེས་ཟློས་བྱ། གཏང་རག་གི་མཎྜལ་དབུལ། ཚོགས་ལྷག །ཆད་མཐོ། བསྟན་མ། བྲོ་བརྡུང་། ཟིལ་གནོན་ལས་བྱང་ཆེན་མོ་བཞིན་གཏང་རག་གིས་མཆོད། བཟོད་གསོལ། རྟག་ཆད་ཀྱི་མཐའ་བསལ་བ། ལུས་བསྲུང་བ་རྣམས་ལས་བྱང་རྡོ་རྗེ་ཐོག་མདའ་ལྟར་དང་སྨོན་ལམ་ཤིས་བརྗོད་བྱའོ། །མི་བསྲུན་གདུག་པ་འདུལ་བའི་གཉེན་པོ་རུ། །དུས་ཀྱི་དགྲ་བོར་འཇམ་དཔལ་དཔའ་བོ་ཆེ། །སྲིད་གསུམ་ཟ་བྱེད་ཁྲོ་ཞལ་གདངས་པའི་མོད། །ཡིད་སྲུབས་སྡེར་བཅས་འཕམ་པའི་ཆོ་ངེ་འདོན། །གཙུག་ལག་དཔལ་དགེས་ཟླ་གསང་བཅུད་ཕྱུང་བའི། །གཤིན་རྗེ་གཟའ་གདོང་དམར་ནག་གངྒཱའི་ཆབ། །རྒྱ་བལ་པཎ་གྲུབ་མ་དྲོས་ལས་བབས་པ། །གནུབས་ཆེན་བརྒྱུད་པའི་ཐུགས་ཀྱི་རྒྱ་མཚོར་འཁྱིལ། །དུམ་པ་རྒྱ་ནས་རིམ་བཞིན་ཞལ་སྒྲོས་སུ། །འོངས་པའི་སྨིན་བྱེད་རྣོན་པོ་ནང་གཅོད་དབང་། །ལྷ་སྲས་རྣམ་སྤྲུལ་ཆོས་རྒྱལ་འབྲི་གུང་པས། །འཁྲུལ་པའི་དྲི་བྲལ་རེག་ཟིག་རྨད་དུ་བྱུང་། །འོན་ཏེ་བློ་དམན་རྣམས་ཀྱིས་མ་རྟོགས་དང་། །ལོག་རྟོགས་བགྲོད་དཀའི་དཔྱ་འཕྲང་ལ་རྡུགས་ཤིང་། །ཟག་ཟོག་རྫུན་བྲིས་ཡིག་ཧྲུལ་རྡུལ་འཚུབ་ཀྱིས། །ཕྱག་ལན་དངས་པའི་ཆུ་ཀླུང་རྙོག་མར་བྱས། །སྔོན་བྱོན་དམ་པའི་རིང་ལུགས་རྟ་ལྗང་ཅན། །སྐལ་དམན་ཐུན་མཚམས་སྟེགས་ལ་ཉེ་བའི་ཚེ། །རིགས་འཛིན་(༡༠ན)
ཀུནྡ་བཞད་པའི་སྨིན་བྱེད་གཞུང་། །ཉ་རྒྱས་ཟླ་བའི་དཀྱིལ་འཁོར་དིང་འདིར་ཤར། །ལག་ནོམ་མུན་པའི་རྫས་འཚོལ་མི་དགོས་པར། །ཕྱག་བཞིས་རྗེན་པར་མཐོང་བའི་སྙིང་ནོར་འདི། །མིང་བཏགས་མ་ཡིན་བསྟན་སྲོག་འཛིན་ངེས་པའི། །སྔགས་འཆང་རལ་པའི་ཁུར་ཅན་རྣམས་ཀྱིས་ལོང་། །དགེ་འདིས་མགོན་པོ་ཟུར་ཕུད་ལྔ་ལྡན་དེས། །གྲངས་མེད་སྐྱེ་བར་བཤེས་མཛད་རྗེས་བཟུང་ནས། །འཇམ་དཔལ་རྫོགས་ཆེན་ཐེམ་སྐས་ལ་འཛེགས་ཏེ། །རང་རིག་དག་པའི་འོག་མིན་ཞིང་བགྲོད་ཤོག །ཅེས་འཇམ་དཔལ་ཚེ་བདག་ནག་པོ་མེའི་སྤུ་གྲིའི་རྣོན་པོ་ནང་གཅོད་ཀྱི་དབང་གི་ཆོག་སྒྲིགས་ཉ་རྒྱས་ཟླ་བའི་དཀྱིལ་འཁོར་འདི་ནི་རྩོད་དུས་པདྨའི་རྒྱལ་ཚབ་སྤྲུལ་པའི་སྐུ་མཆོག་གཏེར་བདག་གླིང་པས་སྔ་གོང་ནས་གསུང་གིས་བསྐུལ་བ་དང་ཆོས་རྒྱུན་གྱི་ཕྱག་ལེན་མི་འཕྱུགས་པར་ཕན་པའི་ལྷག་བསམ་གྱིས་ཀྱང་ཡིད་དྲངས་ཏེ་ཟ་ཧོར་གྱི་སྔགས་སྨྱོན་དྲག་པོ་རྩལ་གྱིས་མཚུངས་མེད་གནམ་ལྕགས་མེ་འབར་གྱི་རེག་ཟིག་དང་བརྒྱུད་པའི་ཕྱག་བཞེས་ལ་ཡིད་གཏན་དུ་བཟུང་། མེད་དུ་མི་རུང་བ་རྣམས་རང་བཟོའི་བསླད་པ་མ་ཞུགས་པས་ཁ་བཀང་ནས་བག་ཡོད་ཀྱི་ལོ་སྣྲོན་གྱི་ཟླ་བའི་ཉེར་གསུམ་པ་སངས་ནམ་གྲུའི་འགྲུབ་སྦྱོར་ཐོག་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་སྡོམ་བརྩོན་འཇམ་དབྱངས་གྲགས་པའོ། །མངྒ་ལཾ།། །།