འཇམ་དཔལ་ཚེ་བདག་གི་ཞི་བའི་སྦྱིན་སྲེག་གངྒཱའི་ཆུ་རྒྱུན།
འཇམ་དཔལ་ཚེ་བདག་གི་ཞི་བའི་སྦྱིན་སྲེག་གངྒཱའི་ཆུ་རྒྱུན་བཞུགས་སོ། །
འཁོར་འདས་ཡོངས་ཀྱི་ཕྱག་རྒྱ་མ་ལུས་པ། །ཟིལ་གནོན་འཇམ་དཔལ་དུས་དགྲའི་དབང་པོ་དང་། །དབྱེར་མེད་ཆོས་ཀུན་ཀ་ནས་དག་པའི་དབྱིངས། །རང་གྲོལ་རྩ་བའི་བླ་མ་གཙུག་ན་མཛེས། །སྲེག་བླུགས་ཟས་ཀྱི་མཆོད་པས་གཤིན་རྗེའི་གཤེད། །དགྱེས་པ་བསྐྱེད་རྣམས་ངལ་བ་དོན་ལྡན་ཞེས། །རྒྱུད་དང་རྒྱ་བོད་མཁས་གྲུབ་གཞུང་ལུགས་ལས། །གསུངས་པས་ཡིད་ལ་སྤྲོ་དགའ་གཟེངས་སུ་མཐོ། །དེ་ཕྱིར་སྤྱི་དང་བྱེ་བྲག་ཉེས་པའི་ཚོགས། །སྨག་རུམ་དཔུང་ལ་ཉི་ཟླ་ཇི་བཞིན་དུ། །ཞི་བྱེད་འཕྲིན་ལས་གངྒཱའི་ཆུ་རྒྱུན་འདི། །འཁྲུལ་མེད་བརྒྱུད་པའི་ཕྱག་བཞེས་ཇི་བཞིན་འདྲི། །དེ་ལ་འདིར་དུས་དགྲའི་དབང་པོ་འཇམ་དཔལ་ཚེ་བདག་ནག་པོའི་འཕྲིན་ལས་ཀྱི་རིམ་པ་མཐའ་ཡས་པ་རྣམས་ཀྱི་ནང་ནས་བསྲེག་པ་མེའི་སྦྱོར་བ་ལ་བརྟེན་ནས་ལས་བཞི་བསྒྲུབ་པའི་ནང་ཚན་ཞི་བའི་སྦྱིན་སྲེག་ལག་ཏུ་བླང་བ་ལ་ཞི་བའི་འཕྲིན་ལས་བསྒྲུབ་པ་ལ་ཤིས་པའི་གཟའ་ཚེས་དུས་སྦྱོར་སོགས་དང་བསྟུན་གཞན་གྱིས་ལོངས་མ་སྤྱད་པའི་ས་ཡིན་ན་ས་ཆོག་ངེས་པར་དགོས་ཤིང་། གནས་ཁང་རྙིང་པ་སོགས་ལ་མ་བྱས་ཀྱང་རུང་། ཕུན་སུམ་ཚོགས་པའི་ཡན་ལག་ཏུ་བྱེད་པར་སྤྲོ་ན་(༢ན)
གནུབས་ཡེ་ཤེས་རྒྱ་མཚོས་མཛད་པའི་དབང་ཆོག་སོགས་ལས་ཤེས་ཤིང་། མི་སྤྲོ་ན་དབང་ཆོག་ངེས་དོན་བདེ་འཇུག་གི་སྔོན་འགྲོའི་སྐབས་བཞིན་ཉམས་སུ་ལེན། སྒྲུབ་པ་སོགས་དང་འབྲེལ་བའི་གནས་ཁང་གི་མཐོ་ནང་དུ་བྱ་བ་ལ་དེ་དག་ཀྱང་བྱ་མི་དགོས་སོ། །དེའང་གནས་ཁང་དུ་ཕྱག་བདར་དང་སྐྱང་ནུལ་བྱ། དབྱེ་འགུགས་བསད་བསྐྲད་སོགས་ལ་དགོས་པའི་ས་དང་མ་འདྲེས་པའི་གཙང་ཞིང་བཀྲ་ཤིས་པའི་ས་ལ་སྟེགས་བུ་བརྩིགས། ཐབ་ཁུང་ཐུར་དུ་ཕྱག་གང་རྒྱར་ཁྲུ་གང་བྲུས། ཐིག་ཆེན་བརྒྱད་བཏབ་པའི་ཟངས་ཀྱི་ཁ་མཚམས་ནས་ཕྱིར་སོར་བཞིའི་ཚད་ཀྱི་ཁ་ཁྱེར་དང་མུ་རན་བསྐོར་བ་ལ་རྡོ་རྗེའི་འཕྲེང་བ་དང་། ཟུར་བཞིར་ཟླ་ཕྱེད་ལ་གནས་པའི་རྡོ་རྗེ་ཕྱེད་པས་མཚན་པ། ཐབ་ཀྱི་དབུས་སུ་པདྨ་འདབ་བརྒྱད་ལྟེ་བ་དང་འདབ་མ་ལ་ཕྱག་མཚན་ས་བོན་ཚོམ་བུ་གང་རུང་གྲངས་ལྡན་བཀོད། དེའི་སྟེང་དུ་དགོངས་རྒྱུད་ལས་ལྕང་མ་གླང་མ་གཞན་ཡང་པད་མ་འོ་མ་ཅན་ཞེས་བཤད་པའི་ཤུགས་ལ་བལ་བུ། འོམ་བུ། ཤུག་པ་སོགས་རུང་བར་གསུངས་པས་དེ་ག་ལྟར་རམ། བཟོ་དབྱིབས་འཇུག་བདེ་བའི་དབང་དུ་བྱེད་ན་ནགས་ཀྱི་ལྕི་བ་སྐམ་པོ་སྲོག་ཆགས་མེད་པ་གང་(༢བ)
རུང་གིས་ཐབ་ཟླུམ་པོ་རྐང་གང་བ་བརྩིགས་ཏེ་ས་དཀར་རམ་འབྲས་དཀར་གྱི་ཁུ་བས་བྱུགས། མན་ངག་ལྟར་མེ་ཚང་བཅའ། ནང་གི་ཤར་ལྷོར་ཏིང་ལོ་ཆེ་བ་ཞིག་བཞག །དཀར་རྩིའི་སྟེང་དུ་གངས་རི་དང་ས་བོན་བྲིས་པའི་མེ་ཡོལ་བྱ། བཤད་མ་ཐག་པའི་ཡམ་ཤིང་གིས་ཆག་རུལ་ཟོས་མེད་པ་སྲིད་དུ་སོར་བརྒྱད་སྦོམས་སུ་མཐེའུ་ཆུང་དང་མཉམ་པ་རྩ་རྩེ་གཉིས་མར་དང་འོ་མ་དང་སྦྲང་རྩིས་བྱུགས་ཤིང་བདུད་རྩི་དང་དྲི་ཞིམ་དཀར་པོའི་ཆུས་སྦགས་པ། རང་མདོག་ཅན་གྱི་མར་ཁུ་སོགས་རྫས་ཆེན་ཉེར་ལྔ་དང་རྫས་ཀྱི་སྦགས་ཤིང་རྫས་སྣ་བརྒྱད་འབྲས་དཀར་རླངས་བཙོས་དང་སྦྱར་བའི་ཟས་མཆོག་ལུགས་འདིའི་ཁྱད་པར་གྱི་རྫས་འབྲུ་སྣ་ཚོགས། རྩི་མར། མེ་ཏོག་སྣ་ཚོགས། གུ་གུལ་དཀར་པོ། ཙན་དན་དཀར་པོ། དཱུརྦ། པྲི་ཡང་ཀུ །ཐང་ཆུ། འབྲས་ཡོས། ཙམ་པ་ཀ །འདོད་གསོལ་གྱི་ཤིང་བྱང་སོགས་ལ་ཐུན་མོང་མ་ཡིན་པའི་དམ་རྫས་ལྔས་སྦགས་ཏེ་སོ་སོར་བཤམས་པའམ་ཤིང་བྱང་མ་གཏོགས་པ་རྣམས་རིལ་བུར་བསྒྲིལ་བ་སོགས་གང་བདེར་བྱས་པའི་རྫས་རྣམས་རིན་པོ་ཆེ་ལ་སོགས་པའི་སྣོད་དུ་འདས་མ་འདས་ཀྱི་དབྱེ་བས་མང་ཉུང་གཉིས་སུ་བྱས་ཏེ་གོ་རིམ་མ་འཁྲུགས་པར་གཡས་སུ་བཀོད། རང་རྫས་དམིགས་བསལ་གྱིས་སྦགས་པའི་འདས་གཏོར་དང་མེ་ལྷའི་གཏོར་མ། ཕྱི་ནང་གི་ཆུ་གཉིས་ཉེར་སྤྱོད་ཚར་གཉིས་རེ་གཡོན་ངོས་ནས་བསྒྲིག །མདུན་དུ་ལས་བུམ། མེ་ཏོག །ཐོད་རྔ། རྡོ་རྗེ། དགང་བླུགས་ཁ་སྦྱར། དྲིལ་བུ། སྨན་རཀ །ཀུ་ཤ་བརྒྱད། དཔལ་འབར། རླུང་གཡབ་རི་མོ་ཅན། སོ་རྩི། ངོས་ཟུང་སོགས་ཉེར་མཁོའི་ཡོ་བྱད་རྣམས་ལས་མཐུན་གྱི་གདན་ལ་བཤམས། དེ་ནས་(༣ན)
སྒྲུབ་པ་པོ་ལུས་དྲི་ཞིམ་པོས་བྱུགས། ཞི་བའི་གར་ཆས་སམ། མ་འགྲུབ་ན་གོས་རྒྱན་ཐོད་སོགས་དཀར་པོ་བྱས། ངག་བཅད་ནས་པདྨའི་འདུག་སྟངས་ཀྱིས་ཁ་ཤར་དུ་ཕྱོགས་ཏེ་སྔོན་དུ་ལས་བྱང་གྱེར་མ་ཟིན་ན་འཕྲིན་ལས་ཀྱི་གཞུང་བསྲངས་འཛབ་ཅུང་ཟད་བཟླ། ཚོགས་ལས་ཡན་སོང་ནས། རྡོར་དྲིལ་བཅངས་ཏེ་དེ་ཉིད་དང་རྔ་བྱིན་རླབས་གསང་རྫོགས་ཀྱི་ལས་བྱང་ལྷན་ཐབས་ལྟར་བྱ། གཟར་བུ་གཉིས་བརླབ་པ་ནི་རང་གི་ཐུགས་ཀ་ནས་འོད་ཟེར་འཕྲོས། ཡེ་ཤེས་ལྷའི་ཐུགས་རྒྱུད་བསྐུལ། བྱིན་རླབས་རྣམས་འོད་ཟེར་གྱི་ཚུལ་དུ་བཀུག་སྟེ་གཟར་བུ་གཉིས་ལ་ཐིམ། དེ་ཞུ་བ་ལས་ཧཱུཾ་ལས་བླུགས་གཟར་རྡོ་རྗེ་དང་ཨ་ལས་དགང་གཟར་དྲིལ་བུའི་རྣམ་པ་ཅན་ཡོངས་སུ་གྱུར་པ་ལས་ཕྱག་རྒྱ་གཅིག་པའི་ཚེ་བདག་ནག་པོ་རྡོ་རྗེ་ཞགས་པ་བསྣམས་པ་དང་གསོད་བྱེད་མ་སྔོ་ནག་ཙིཏྟ་བྷན་དམར་འཛིན་པ་དང་སྙོམས་པར་ཞུགས་པའི་རྐྱེན་གྱིས་འོད་དུ་ཞུ་ནས་བླུགས་གཟར་དང་དགང་གཟར་གྱི་རྣམ་པར་བསམ། ལས་བུམ་ནི་དབང་ཆོག་ངེས་དོན་བདེ་འཇུག་ཏུ་རྒྱས་བསྡུས་གཉིས་གསུངས་པའི། འདིར་བསང་ཆུའི་དོད་ཙམ་ལ་བསྡུས་པ་ཉིད་ཀྱིས་ཁྱབ་པས། ཨ་མྲྀ་ཏས་བསངས། སྭ་བྷ་ཝས་སྦྱངས། བུམ་པ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་བྷྲུཾ་ལས་བྱུང་བའི་བུམ་པ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཉི་ཟླའི་གའུ་ཁ་སྦྱོར་གྱི་དབུས་སུ་ཨ་དཀར་པོ་ཤེལ་དཀར་ལྟར་འཚེར་བ་དེ་ལས་འོད་ཟེར་འཕྲོས་འོག་མིན་ནས་བདེ་བར་གཤེགས་པ་ཞི་ཁྲོ་རབ་འབྱམས་རྣམས་ཀྱི་སྐུ་གསུང་ཐུགས་ཀྱི་བྱིན་རླབས་བདུད་རྩིའི་རྣམ་པར་བསྡུས་ཏེ་བུམ་ཆུ་(༣བ)
ལ་ཐིམ་པས་ཡེ་ཤེས་ཀྱི་བདུད་རྩིས་སེམས་ཅན་རྣམས་ཀྱི་ལས་དང་ཉོན་མོངས་པའི་སྒྲིབ་པ་ཐམས་ཅད་དག་པར་བྱེད་པའི་ནུས་པ་དང་ལྡན་པར་བསམ་ལ་ཨཱོཾ་ཨཱཿཧཱུཾ་བརྒྱ་རྩ་བརྒྱད་ལ་སོགས་པ་བཟླ། མཆོད་གཏོར་བྱིན་གྱིས་བརླབ་པ་ནི་བདག་གི་ཐུགས་ཀ་ནས་རཾ་ཡཾ་ཁཾ་ཞེས་པ་ནས་བཟུང་སྟེ་གུ་ཧྱ་ས་མ་ཡ་སྭཱཧཱ་ཞེས་པའི་བར་བརྗོད། མཆོད་པ་བརླབ་པ་ནི་གཡས་པས་གཡས་སྐོར་གྱིས་གསང་ཆུ་དང་། སྨན་ཕུད་ནས་ཀྱང་གཏོར། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དངས་ཤིང་ཐོགས་པ་མེད་པ་དཔལ་ཀུན་ཏུ་བཟང་པོའི་རྣམ་འཕྲུལ་ལས་བྱུང་བའི་མཆོད་པའི་སྤྲིན་ཕུང་ནམ་མཁའི་ཁམས་ཐམས་ཅད་གང་བར་བསམས་ལ། ཨཱོཾ་བཛྲ་ཨརྒྷཾ་ཨཱཿཧཱུཾ་ནས་ཤཔྟ་ཨཱཿཧཱུཾ་གི་བར་བརྗོད་པའི་སྔགས་རྒྱས་བྱིན་གྱིས་བརླབ། སྲེག་རྫས་བརླབ་པ་ནི། སྔར་བཞིན་བསངས་སྦྱངས་སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་སྲེག་རྫས་རྣམས་དྭངས་ཤིང་ཐོགས་པ་མེད་པ་སོ་སོའི་མཚན་ཉིད་ཡོངས་སུ་རྫོགས་ཤིང་རང་རང་གི་ཞི་བའི་ལས་རབ་འབྱམས་མ་ལུས་པ་བསྒྲུབ་པའི་ནུས་པ་དང་ལྡན་པར་མོས་ལ་ཕྱག་རྒྱ་དང་བཅས་ཏེ། ཨཱོཾ་ཨཱོཾ་སྭཱཧཱས་རྫས་རྣམས་བཀྲུ། ཨཱོཾ་ཨཱ༔སྭཱཧཱ་ཡཾ་ཤིང་། ཨཱོཾ་ཤྲཱིཾ་སྭཱཧཱས་མར། ཨཱོཾ་ཛྲིཾ་སྭཱཧཱས་འབྲུ། ཨཱོཾ་ཀུ་རུ་ཀུ་རུ་སྭཱཧཱས་རྫས་(༤ན)
གཞན་རྣམས་བརླབ་བོ། །མེ་བསྒྲུབ་པ་ནི། ལས་སྔགས་བརྗོད་ཅིང་གཞུང་ནས་གཤད་པའི་མེ་ལས་སྦར་བའི་སྤོར་ལྡེ་ཐལ་མོ་སྦྱར་བའི་བར་དུ་བཟུང་ནས་ལན་གསུམ་བསྐོར་དེ་དང་མཚུངས་པར་ཨྱེ་མྱགས་བཟླ་ཞིང་ཏིང་ལོ་སྦར་བ་དང་བཅས། ཧཱུཾ། བྲམ་ཟེ་རྒྱུན་བཞག་ལ་སོགས་ཆད་མེད་ལས། །བླངས་ཏེ་དྲི་ལྡན་ཤིང་ལ་རབ་སྦར་བས། །ཞི་བའི་སྲེག་རྫས་འབར་བར་མངའ་གསོལ་ལོ། །འབར་བའི་འཕྲོ་འདུ་འཁྱིལ་བའི་ལས་མཛོད་ཅིག །ཨཱོཾ་ཨགྣི་རཾ་ཛྭ་ལ་རཾ། ཞེས་བརྗོད་ཅིང་རྩྭ་སྐམ་ཅུང་ཟད་བཅུག །བཤད་མ་ཐག་པའི་སྔགས་དང་བཅས་བླུགས་གཟར་གསུམ་གྱིས་མེ་གསོ་ཞིང་རླུང་གཡབ་ཀྱིས་ཅུང་ཟད་གཡབ། མེ་པྲ་ངན་ན་གཞིལ་བའི་ཐབས་བྱ། སྔར་བཞིན་ཐབ་བསངས་སྦྱངས། སྟོང་པའི་ངང་ལས་པཾ་ལས་པདྨ་རཾ་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུཾ་ལས་བྱུང་བའི་ཞི་བའི་ཐབ་ཁུང་ཟླུམ་པོ་དཀར་པོ་རྒྱར་ཁྲུ་གང་བ། དཔངས་སུ་ཁྲུ་ཕྱེད་པ། ཁ་ཁྱེར་དང་མུ་རན་གཉིས་ཀ་སོར་བཞི་པ་རྡོ་རྗེའི་འཕྲེང་བས་ཟླུམ་པོར་བསྐོར་བ། ཕྱི་རོལ་གྱི་གྲྭ་བཞིར་ཟླ་ཕྱེད་རྡོ་རྗེས་མཚན་པ་དངས་ཤིང་ཐོགས་པ་མེད་པ་མེ་འབར་བའི་དབུས་སུ་པཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་རཾ་དཀར་པོ་ལས་བགྲང་འཕྲེང་རཾ་གྱིས་མཚན་པ་དེ་ལས་འོད་ཟེར་འཕྲོས་འདུས་གཅིག་ཏུ་གྱུར་པ་ལས་མེ་ལྷ་སྐུ་མདོག་དཀར་པོ་ར་སྐྱེས་ལ་ཞོན་པ་ཞལ་གཅིག་ཕྱག་གཉིས་པ་གཡས་གུནྡྷེ་དང་གཡོན་སྐྱབས་སྦྱིན་གྱི་ཕྱག་རྒྱས་བགྲང་འཕྲེང་འཛིན་པ། གསུས་ཁྱིམ་ཆེ་བ། རལ་བའི་ཐོར་ཚུགས་ཅན། སྨ་རའི་ཨག་ཚོམ་དང་ཚངས་པའི་སྐུད་པ་འཕྱང་བ། སྐུ་ལས་འོད་ཟེར་དཀར་པོ་དཔག་ཏུ་མེད་པ་འཕྲོ་ཞིང་དྲང་(༤བ)
སྲོང་གི་ཚོགས་ཀྱིས་བསྐོར་བ། དེའི་དཔྲལ་བར་ཨཱོཾ། མགྲིན་པར་ཨཱཿ ཐུགས་ཀར་ཧཱུཾ། དེ་ལས་འོད་ཟེར་འཕྲོས་པས་རི་རབ་ཀྱི་མེ་མཚམས་ནས་མེ་ལྷ་དྲང་སྲོང་གི་ཚོགས་ཀྱིས་བསྐོར་བ་བཛྲ་ས་མཱ་ཛཿ རྡོ་རྗེ་བསྡུ་བའི་ཕྱག་རྒྱ་བྱ་ཞིང་། དབྱུ་གུ་རྩེ་གསུམ་པའི་ཕྱག་རྒྱས་རྣ་བའི་དྲུང་ནས་གཡབས་ཏེ། དང་པོ་དང་ནི་དམ་ཚིག་གིས། །ཚུར་གཤེགས་མེ་ལྷ་དྲང་སྲོང་མཆོག །བསྟན་པ་བསྲུང་མཛད་གཟི་བརྗིད་ཅན། །རང་གི་དམ་ཚིག་ཚུལ་བཞིན་དུ། །འདིར་གཤེགས་ཞི་བའི་འཕྲིན་ལས་མཛོད། །ཨེ་ཧྱ་ཧི་བྷ་ག་ཝཱ་ན་ཛཿཧཱུཾཾ་བཾ་ཧོཿ ཨོཾ་ཨགྣ་ཡེ་ཛྙཱ་ན་ས་མ་ཡེ་མ་ཧཱ་ཀཱ་རུ་ཎི་ཀ་ཏྲི་ཤྱ་ཛ་ཧོཿ ས་མ་ཡ་སྟྭཾ། ཞེས་སྤྱན་དྲངས་ཏེ་བསྟིམ། ཧཱུྃ། གཟི་བྱིན་ཆེན་པོ་མེ་ཡི་ལྷ༔ འདོད་པ་ཐམས་ཅད་རབ་བསྒྲུབ་ཅིང་༔ ཐུགས་རྗེས་ཞི་བའི་ལས་མཛད་པཿ འབར་བའི་གདན་ལ་བཞུགས་སོ་གསོལཿ ཨོཾ་ཨགྣ་ཡེ་ས་མ་ཡ་ཏི་ཥྛ་ལྷན༔ ཞེས་གདན་དབུལ༔ ཧཱུཾ༔ མེ་ལྷའི་རྒྱལ་པོ་དྲང་སྲོང་མཆོག༔ ཞི་རྒྱས་དབང་དྲག་སྣ་ཚོགས་པ༔ འཕྲིན་ལས་ཀུན་གྱི་དཔང་པོ་མཛད༔ ཏིང་འཛིན་ལྷ་ལ་ཕྱག་འཚལ་ལོ༔ ཨཱོཾ་ཨགྣ་ཡེ་ཨ་ལ་ལ་ཧོ༔ ཨ་ཏི་པུ་ཧོ༔ པྲ་ཏི་ཛ་ཧོ༔ ཞེས་ཕྱག་བྱ། ཧཱུཾ། མེ་ལྷའི་རྒྱལ་པོ་དྲང་སྲོང་མཆོག༔ ར་སྐྱེས་བཅིབས་པས་གློག་ལས་མགྱོགས༔ སྲེག་རྫས་ཀུན་གྱིས་ཕྱག་ཚང་མཛད༔ ཚིམ་བྱེད་ཁྱོད་ལ་མཆོད་པ་ནི༔ མཆོད་ཡོན་ཞབས་བསིལ་མེ་ཏོག་སྤོས༔ མར་མེ་དྲི་ཆབ་ཞལ་ཟས་དང་༔ སྙན་པའི་རོལ་མོར་བཅས་པ་འབུལ༔ བཞེས་ནས་ཞི་བའི་འཕྲིན་ལས་མཛོད༔ ཨཱོཾ་བཛྲ་ཀྲོ་ཏ་ཨགྣ་ཡེ་ཨརྒྷཾ་པཱུ་ཛ་ཧཱུཾ། ཨཱོཾ་པཱ་དྱཾ་པཱུ་ཛ་ཧཱུཾ་ནས་ཤཔྟ་པཱུ་ཛ་ཧཱུཾ་(༥ན)
ཞེས་པའི་བར་གྱིས་ཕྱི་མཆོད་དབུལ། ཧཱུཾ། ཏིང་འཛིན་དབང་སྒྱུར་ཞལ་ཟས་བདུད་རྩི་ལྔ༔ དྲང་སྲོང་ཆེན་པོས་སྔོན་ཆད་མ་བསྟར་བའི༔ དག་ཅིང་གཙང་མར་སྦྱར་བ་འབུལ་ལགས་ཀྱིས༔ ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ༔ ཨཱོཾ་བཛྲ་ཀྲོ་ཏ་ཨགྣ་ཡེ་པཱུ་ཛ་ཁཱ་ཧི། སརྦ་པཉྩ་ཨ་མྲྀ་ཏ་ཁཱ་ཧི། མ་ཧཱ་བ་ལིཾ་ཏ་ཁཱ་ཧི། མཧཱ་རཀྟ་ཁཱ་ཧིས་ནང་མཆོད་འབུལ། ཧཱུཾ། གཟི་བརྗིད་ཆེན་པོ་མེ་ཡི་ལྷ༔ །འདོད་པ་ཐམས་ཅད་རབ་བསྒྲུབ་ཅིང་༔ ཐུགས་རྗེས་ཞི་བའི་ལས་མཛད་པར༔ ལོངས་སྤྱོད་ཚོགས་ཀྱི་མཆོད་པ་འབུལ༔ ཨཱོཾ་བཛྲཱ་ཀྲོ་ཏ་ཨགྣ་ཡེ་ག་ཎ་ཙཀྲ་པུ་ཛ་ཁཱ་ཧི༔ ཞེས་ཚོགས་ནས་ཀྱང་འབུལ། མེ་ལྷའི་རྒྱལ་པོ་དྲང་སྲོང་མཆོག༔ མཉམ་པའི་ངང་ལས་ཀུན་སྣང་ཡང་༔ ཆོས་ཉིད་ངང་ལས་མ་གཡོས་པའི༔ ཡེ་ཤེས་སྐུ་ལ་ཕྱག་འཚལ་བསྟོད༔ ཅེས་པས་བསྟོད། ཀུ་ཤ་བརྒྱད་པོ་གཡོན་དུ་བཟུང་ནས་སྔར་བཞིན་བསངས་སྦྱངས་སྟོང་པའི་ངང་ལས་ཧཱུཾ་ལས་བྱུང་བའི་ཀུ་ཤ་སྔོ་ལྗང་རྩ་རྩེ་མ་ཉམས་པ་དངས་ཤིང་ཐོགས་པ་མེད་པ་ཞི་པའི་ལས་རབ་འབྱམས་བསྒྲུབ་པའི་ནུས་པ་དང་ལྡན་པར་བསམས་ལ། ཀུ་ཤ་འདི་ནི་གཙང་ཞིང་དགེ །ས་ལས་སྐྱེས་པའི་སྙིང་པོ་མཆོག །དཀོན་མཆོག་གསུམ་གྱི་དག་བྱེད་དེ། །ཚངས་པ་ཡིས་ཀྱང་དག་བྱེད་ཡིན། །འདི་ཡིས་བདག་ལ་བགེགས་མེད་ཅིང་། །ལས་ཀྱི་དངོས་གྲུབ་སྩལ་དུ་གསོལ། །བཛྲ་ས་ཏྭ་ཨ། ཞེས་ཀུ་ཤ་རྣམས་རྩེ་མོ་གཡས་སྐོར་དུ་བསྟན་ཏེ། སྔ་མའི་རྩེ་ཕྱི་མའི་རྩ་བས་ནོན་པ་དགྲམ། །བྱོན་ཟན་འབུལ་བ་ནི། མེ་ལྷའི་ཞལ་འཛུམ་ཞིང་ཅུང་ཟད་གདངས་པའི་ལྕེ་ཧཱུཾ་ལས་རྡོ་རྗེ་རྩེ་ལྔ་པ་ཧཱུཾ་དང་དགང་བླུགས་ཀྱི་རྩེ་ལ་རཾ་(༥བ)
ཡིག་གིས་མཚན་པར་མོས་ནས། ཨོཾ་ཨགྣ་ཡེ་སྭཱཧཱ་བརྗོད་ཅིང་བླུགས་གཟར་བདུན་གྱིས་དགང་གཟར་བཀང་ལ་ལག་གཉིས་པུས་མོའི་ཁོངས་ལས་མི་འདའ་བས་རྡོ་རྗེ་ཁུ་ཚུར་ར་བ་བྱང་ཆུབ་མཆོག་གི་ཕྱག་རྒྱས་གཟར་བུ་གཉིས་ཁ་སྦྱར་ཏེ་གཡས་སུ་བསྐོར་ཞིང་། ཨཱོཾ་ཨགྣ་ཡེ་དེ་བྱ་དེ་བྱ་བི་ཤུདྡྷེ་མ་ཧཱ་ཤྲཱི་ཧ་བྱ་ཀ་བྱ་བ་ཧ་ན་ཡེ། བདག་ཅག་གི་ཏིང་ངེ་འཛིན་མི་གསལ་ཞིང་སྔགས་ཆད་ལྷག་གི་ཉེས་པ་དང་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་སྭཱཧཱ། ཞེས་པ་ལན་གསུམ་གྱིས་འབུལ། མེ་པྲ་བརྟག་ཅིང་ངན་ན་བསྲུང་། །མེ་ལྷའི་ཐུགས་ནས་འོད་འཕྲོས་པས། །བསྒྲུབ་བྱའི་ནད་གདོན་སྡིག་སྒྲིབ་སོགས། །མི་མཐུན་ཕྱོགས་ཀུན་དུད་ཁུ་དང་། །རྣག་ཁྲག་སྲོག་ཆགས་གཟུགས་བརྙན་ཚུལ། །བ་སྤུའི་བུ་ག་ཐམས་ཅད་ནས། །ཕྱིར་ཐོན་སྲེག་རྫས་རྣམས་ལ་ཐིམ། །ཞེས་བརྗོད་ནས། མེ་ལྷ་དྲང་སྲོང་འཁོར་བཅས་ལ། །ཡམ་ཤིང་མེ་ཏོག་དར་སྣ་མར། །ཏིལ་ཆང་སྤོས་དང་དཱུར་འབྲས་སོ། །ཟས་མཆོག་ཀུ་ཤ་ཡུངས་ཀར་ཤ །ཁྲག་ཚིལ་སྒྲོ་མདོངས་ལན་ཚ་ནས། །འོ་མ་སྲན་མ་རིན་ཆེན་གྲོ། །དངར་གསུམ་སྨན་སྣ་ཤིང་ཏོག་སྣུམ། ཁྱད་པར་རྫས་དང་བཅས་པ་འབུལ། །ཚེ་དཔལ་བསོད་ནམས་སྟོབས་འབྱོར་དང་། །ལུང་རྟོགས་ཆོས་སྲིད་ལེགས་ཚོགས་པ། །བར་དུ་གཅོད་པའི་གདོན་བགེགས་དགྲ །གཏད་སེལ་མནན་དབྱེ་རྦོད་གཏོང་བྱད། །དབུལ་ཕོངས་ནད་རིམས་དུས་མིན་འཆི། །སྡིག་སྒྲིབ་ཉེས་ལྟུང་ཇི་སྙེད་པ། །མ་ལུས་བྱང་ཞིང་དག་འགྱུར་བའི། །ཞི་བའི་འཕྲིན་ལས་དུས་ལ་བབ། །ཅེས་བརྗོད་དེ་གཡོན་པས་སྲེག་རྫས་ཀྱི་སྣོད་ནས་བཟུང་གཡས་པའི་མཐེབ་སྲིན་གྱིས་བླངས་ཏེ་འོག་ནས་(༦ན)
བསྐོར་ཞིང་མཆོག་སྦྱིན་གྱི་ཕྱག་རྒྱས། ཡམ་ཤིང་ནི། ཨཱོཾ་ཨགྣ་ཡེ་བཛྲ་ཡཱ་ཛྙཱ་ཡ། བདག་ཅག་གི་ཏིང་ངེ་འཛིན་མི་གསལ་ཞིང་སྔགས་ཆད་ལྷག་གི་ཉེས་པ་དང་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་སོགས་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་སྭཱཧཱ། ཞེས་པ་ཐོག་མཐའ་གཉིས་སུ་ཅི་རིགས་དང་རྫས་སྔགས་རྐྱང་པས་བདུན་ནམ་ཉེར་གཅིག་སོགས་མང་ཉུང་སྐབས་སྦྱར་འབུལ། གོང་གི་བསྙེན་པ་ནཁ་སྐོང་བའི་སྤེལ་ཚིག་གི་ཚབ་ལ་དམིགས་བསལ་གྱི་ལས་གང་སྒྲུབ་ཀྱི་ཁ་བསྒྱུར་དགོས་པ་ཕྱག་ལེན་ལྟར་བྱ། ལྷ་རྫས་ཀྱི་སྔགས་གཉིས་གོང་ལྟར་གྱི་མེ་ཏོག་སྣ་ཚོགས་ནི་གཟི་བརྗིད་ཕུན་སུམ་ཚོགས་པའི་ཚབ་ཏུ། མདངས་ཕུན་སུམ་ཚོགས་པ་ལ་ཞེས་པས་མཚོན་ཏེ་ལས་སྔགས་བསྒྱུར་མི་དགོས་པའི་དམིགས་གསལ་བྱུང་བ་རྣམས་མ་གཏོགས་འདོན་པ་བསྒྱུར་ལུགས་ཀུན་ལ་འགྲེ། དར་སྣ་ནི་ཁ་དོག་ཕུན་སུམ་ཚོགས་པ་ལ། མར་ནི། ཨཱོཾ་ཨགྣ་ཡེས་ལྷ་རྫས་གཉིས་ཀའི་སྔགས་ཀྱིས་གོ་བཅད། འབྱོར་བ་ཕུན་སུམ་ཚོགས་པ་ལ། ཏིལ་ནི། སརྦ་བཱ་པ་ད་ཧ་ན་བཛྲ་ཡ། དགེ་བ་ཕུན་སུམ་ཚོགས་པ་ལ། །སྔགས་གཉིས་གོང་ལྟར་གྱིས་ཆང་ནི། །ཉམས་རྟོགས་ཕུན་སུམ་ཚོགས་པ་ལ། སྤོས་ནི། དམ་ཚིག་དང་སྡོམ་པ་ཕུན་སུམ་ཚོགས་པ་ལ། དཱུརྦ་ནི། བཛྲ་ཨཱ་ཡུ་ཤེ །ཚེ་ཕུན་སུམ་ཚོགས་པ་ལ། འབྲས་ནི། ཨཱོཾ་བཛྲ་པུཥྚ་ཡེ། བསོད་ནམས་ཕུན་སུམ་ཚོགས་པ་ལ། སོ་བ་ནི། ཨཱོཾ་བཛྲ་བི་ཛཱ་ཡ། ནོར་དང་འབྲུ་ཕུན་སུམ་ཚོགས་པ་ལ། ཟས་མཆོག་ནི། ཨཱོཾ་སརྦ་སཾ་བྷ་དེ། བདེ་བ་ཕུན་སུམ་ཚོགས་པ་ལ། ཀུ་ཤ་ནི། ཨཱོཾ་ཨ་པྲ་ཏི་ཧ་ཏ་བཛྲཱ་ཡ། (༦བ)
སྲུང་བ་ཕུན་སུམ་ཚོགས་པ་ལ། ཡུངས་ཀར་ནི། ཨཱོཾ་སརྦ་ཨརྠ་ས་དྷཱ་ཡ། བགེགས་མེད་པ་ཕུན་སུམ་ཚོགས་པ་ལ། ཤ༔ ཁྲག༔ ཚིལ་གསུམ་ཡང་སྔགས་གསུམ་བཤད་མ་ཐག་པ་ལྟར་གྱིས་འབུལ། སྔགས་གཉིས་གོང་བཞིན་གྱིས་རྨ་བྱའི་མདོངས་ནི། འག་གདོན་གྱི་འཚེ་བ་མེད་པ་ཕུན་སུམ་ཚོགས་པ་ལ། ལན་ཚ་ནི། སྦྱོར་བ་ངན་པ་མེད་པ་ཕུན་སུམ་ཚོགས་པ་ལ། ནས་ནི། ཨཱོཾ་མ་ཧཱ་བེ་གཱ་ཡ། ཤུགས་ཕུན་སུམ་ཚོགས་པ་ལ། སྔགས་གཉིས་གོང་ལྟར་གྱིས། འོ་མ་ནི། ལོངས་སྤྱོད་ཕུན་སུམ་ཚོགས་པ་ལ། སྲན་མ་ནི། ཨཱོཾ་མ་ཧཱ་བ་ལཱ་ཡ། སྟོབས་ཕུན་སུམ་ཚོགས་པ་ལ། རིན་ཆེན་སྣ་ཚོགས་ཀྱང་སྔགས་གསུམ་གྱིས་གོང་ལྟར་འབུལ། གྲོ་ནི། ཨཱོཾ་བཛྲ་གྷ་སྨ་རེ། རིམས་མེད་པ་ཕུན་སུམ་ཚོགས་པ་ལ། དངར་གསུམ་ནི། ཨཱོཾ་བཛྲ་མ་ལེ་པུསྟ་ཡ། མོས་པ་ཕུན་སུམ་ཚོགས་པ་ལ། སྨན་སྣ་ཚོགས་ནི། ཨཱོཾ་བཛྲ་མ་ཧཱ་ཤྲི་ཡཾ་ས་ཏ་ཡེ། ནད་མེད་པ་ཕུན་སུམ་ཚོགས་པ་ལ། ཤིང་ཏོག་སྣ་ཚོགས་ནི། ཨཱོཾ་བཛྲ་ཤོ་བ་ལེ། རིགས་བརྒྱུད་ཕུན་སུམ་ཚོགས་པ་ལ། འབྲུ་མར་ནི། ཨཱོཾ་བཛྲ་ཚེ་ཏཱ་ཡ། ས་ལམ་གྱི་ཡོན་ཏན་ཕུན་སུམ་ཚོགས་པ་ལ། ཁྱད་པར་བའི་རྫས་སྤྱི་རྣམས། ཨཱོཾ་ཨགྣ་ཡེ། བདག་ཅག་གི་ཏིང་ངེ་འཛིན་མི་གསལ་ཞིང་སྔགས་ཆད་ལྷག་གི་ཉེས་པ་དང་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་སྭཱཧཱ་དང་། ཤིང་བྱང་ནི། ཨཱོཾ་ཨགྣ་ཡེ། བདག་ཅག་གི་འཁོར་འདས་ཀྱི་ཕུན་སུམ་ཚོགས་པ་ལ་བར་དུ་གཅོད་པའི་ནད་རིམས། དབུལ་ཕོངས་འཐབ་རྩོད། དགྲ་བྱད། མནན་གཏད་ཟོར་རླུང་། དབྱེ་བསྐྲད་ཕྲ་མེན། མདོ་(༧ན)
སྒྲུབ་དམོད་པ། གདོན་བགེགས་དུས་མིན་འཆི་བ་ཉེས་ལྟུང་སྡིག་སྒྲིབ་མ་ལུས་པ་ཤནྟིཾ་ཀུ་རུ་སྭཱཧཱས་སྔར་བཞིན་གྱི་གྲངས་དང་བཅས་ཏེ་འབུལ། སྲེག་རྫས་མཆོད་པས་མོ་ཡི་ལྷ། །མཉེས་ཏེ་སྐུ་ལས་འོད་ཟེར་འཕྲོས། །བསྒྲུབ་བྱའི་སྙིང་གར་ཕོག་པ་ཡིས། །སླར་ཡང་སྒོ་གསུམ་སྡིག་སྒྲིབ་བསྲེགས། །འོད་ཟེར་བདུད་རྩིའི་ཆུ་རྒྱུན་ལྟར། །བབས་པས་ནད་གདོན་སྡིག་སྒྲིབ་སོགས། །མི་མཐུན་ཕྱོགས་རྣམས་རབ་བཀྲུས་ཏེ། །བཤང་གཅིའི་ལམ་ནས་ཐོན་པར་གྱུར། །ཞེས་བརྗོད། ཧཱུཾ། མེ་ལྷའི་རྒྱལ་པོ་དྲང་སྲོང་མཆོག །ར་སྐྱེས་བཅིབས་ནས་གློག་ལས་མགྱོགས། །ཞེས་སོགས་སྔགས་བཅས་ཀྱིས་མཆོད། །བསྟོད་པས་བསྟོད། མེ་ལྷ་འཁོར་བཅས་ཁྱོད་རྣམས་ཀྱིས། །བདག་ཅག་དཔོན་སློབ་རྒྱུ་སྦྱོར་བ། །གནོད་བྱེད་ནད་གདོན་དགྲ་བགེགས་དང་། །མཐུ་བྱད་དབུལ་ཕོངས་དུས་མིན་འཆི། །སྡིག་སྒྲིབ་ཉེས་ལྟུང་མ་ལུས་པ། །ཞི་ཞིང་དག་པར་མཛད་དུ་གསོལ། །ཞེས་གསོལ་བ་བཏབ། སྤྱན་དྲངས་པའི་མེ་ལྷ་གཤེགས་སུ་གསོལ་བ་ནི། ཨགྣ་ཡེ། ཛྭ་ལ་ཛྭ་ལ། གྷ་ཚ་གྷ་ཚ། ལ་བྷ་བྷ་མུ༔ ཡེ་ཤེས་མེ་ལྷ་དམ་ཚིག་པ་ཉིད་ལས། །ཕྱིར་གཤེགས་ཤར་ལྷོའི་མཚམས་སུ་རབ་བཞུགས་ནས། །ཞལ་ཚུར་གཟིགས་ཏེ་དཀྱིལ་འཁོར་ལྷ་ཚོགས་རྣམས། །མཉེས་བྱེད་མཆོད་པའི་དབང་པོར་མཛད་པར་གྱུར། །འདས་པའི་མེ་ལྷ་མཆོད་པ་ནི། །དམ་ཚིག་མེ་ལྷའི་ཐུགས་ཀ་རུ། །ཨེ་ཡི་ཕོ་བྲང་ཟླ་གམ་གསུམ། །ཞེས་པ་ནས་བཟུང་སྟེ་སྣང་ལ་རང་བཞིན་མེད་པར་ལྟའི་བར་དཀྱུས་བཞིན་བྱ། །གཙོ་འཁོར་ཀུན་ཀྱང་སྐུ་མདོག་རྩ་བའི་ཞལ། །རབ་དཀར་ཞི་(༧བ)
མ་ཁྲོ་ཡི་འཛུམ་མདངས་ཅན། །དཀར་ལ་འཚེར་བའི་འོད་ཟེར་འཕྲོ་བ་ཡིས། །ཞི་བའི་ལས་ཀུན་མཛད་པའི་རྣམ་པར་གྱུར། །ཨྱེ། མི་རྟོག་ངང་ལས་ཐུགས་རྗེའི་སྐུ༔ ཞེས་པ་ནས། སྒོ་གསུམ་དང་བའི་ཡིད་ཀྱིས་ཕྱག་འཚལ་བསྟོདཿཀྱི་བར་གྱིས་སྤྱན་འདྲེན་མཆོད་བསྟོད་ལས་བྱང་གི་དཀྱུས་ལྟར་ལ། ནང་གི་འདོད་ཡོན་གྱི་མཆོད་པའི་རྗེས་སུ། བར་གཅོད་མི་མཐུན་ཕྱོགས་རྣམས་ཞི་བའི་ཕྱིར། །འཇམ་དཔལ་གཤིན་རྗེའི་གཤེད་ཀྱི་ལྷ་ཚོགས་ལ། །ཞལ་ཟས་ཚོགས་ཀྱི་མཆོད་པ་དམ་པ་འབུལ། །འབར་བ་གཤིན་རྗེའི་ཞལ་དུ་ཁ་རཾ་ཁཱ་ཧི། ཨེ་ཀ་ཡ་མ་ཀྲོ་ཏ་ག་ཎ་ཙཀྲ་པཱུ་ཛ་ཁཱ་ཧི། ཞེས་ཚོགས་ནས་ཀྱང་འབུལ། བྱོན་ཟན་ནི། ཡེ་ཤེས་པའི་ལྷ་ཚོགས་རྣམས་ཀྱི་ཞལ་འཛུམ་ཞིང་ཅུང་ཟད་གདངས་པའི་ལྗགས་ཧཱུཾ་ལས་རྡོ་རྗེ་རྩེ་ལྔ་པ་ཧཱུཾ་དང་དགང་བླུགས་ཀྱི་རྩེ་ལ་རཾ་ཡིག་གིས་མཚན་པར་མོས་ནས་ཕྱག་རྒྱ་སོགས་སྔར་བཞིན་བགྱིས་ཏེ། ཨྱེ་མྱགས་ཚར་བདུན་བརྗོད་ཅིང་བླུགས་གཟར་བདུན་གྱིས་དགང་གཟར་འགེང་བ་སོགས་འཇིག་རྟེན་པའི་སྐབས་ལྟར་བྱས་ཏེ། ཨཱོཾ་ཨགྣ་ཡེ་དེ་བྱ་དེ་བྱ་ནས་བཟུང་སྟེ་ནད་གདོན་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ཤནྟིཾ་ཀུ་རུ་སྭཱཧཱའི་བར་གྱིས་སྔར་ལྟར་ལན་གསུམ་འབུལ། མེ་ལྷའི་ཐུགས་ནས་འོད་འཕྲོས་པས། །ཞེས་པའི་ཚིག་རྐང་དང་པོ་འདས་ལྷའི་ཐུགས་ནས་འོད་འཕྲོས་པས། ཞེས་པར་བསྒྱུར་ཏེ་རྫོགས་པར་བརྗོད། ཨྱེ། ཕྱག་རྒྱ་ཟིལ་གནོན་གསོད་བྱེད་རྒྱལ། །ཡ་མ་རཱ་ཛ་གསང་བའི་བདག །རུས་སྦལ་རྔམ་པ་བྱ་ཁྱུང་རྒྱལ། ཁྱུང་སྟག་སེང་གེ་དུག་སྦྲུལ་ཟུང་། །རྩ་བ་རྒྱན་གྱི་ལྷ་རྣམས་ལ། །ཡཾ་ཤིང་མེ་ཏོག་དར་སྣ་མར། །ཞེས་པ་ནས། ཞི་(༨ན)
བའི་འཕྲིན་ལས་དུས་ལ་བབ་ཀྱི་བར་བརྗོད་ནས། འཇིག་རྟེན་པའི་སྐབས་བཞིན་རྫས་ཆེན་ཉེར་བདུན་ཁྱད་པར་གྱི་རྫས་དང་བཅས་པ་རྣམས་འཇིག་རྟེན་པའི་སྔགས་དང་འདས་སྔགས་བརྗེ་བ་མ་གཏོགས་འདྲ་ཞིང་གྲངས་ཉེར་གཅིག་དང་བརྒྱ་སོགས་སྐབས་སྦྱར་དང་། ཁྱད་པར་གྱི་སྒོས་ཆོས་བསྙེན་པ་ཁ་སྐོང་གི་སྦྱིན་སྲེག་དང་རྫས་སྔགས་གཅིག་ལ་བརྟེན་ནས་ཆིག་དྲིལ་དུ་ཐུན་རེ་ལ་སྟོང་ཁྲི་སོགས་སྔགས་ཀྱི་རིང་ཐུང་དང་བསྟུན་ཏེ་ཕྱག་ལེན་བཞིན་འབུལ། དེས་མཚོན་ཏེ་རང་འདོད་པའི་ལས་གང་བསྒྲུབ་ཀྱང་དེ་གའི་རྫས་སྔགས་ཆིག་དྲིལ་བྱ་ཚུལ་མཐོང་བརྒྱུད་ཀྱི་ཕྱག་ལེན་ལ་རག་ལུས་སོ། །དེ་ནས་འཁོར་རྣམས་ལ། ཨྱེ། སྤྲུལ་པ་རྣམ་གསུམ་གཤེད་པོ་བཞི། །མོན་བདུད་འཆི་བདག་བར་ཁྱམས་ལྷ། །སྒོ་བ་འོབས་སྲུང་བཅུ་དྲུག་དང་། །ཕོ་ཉ་བྱེ་བ་ས་ཡ་སོགས། །སྤྲུལ་པ་ཡང་སྤྲུལ་འཁོར་བཅས་ལ། །ཡམ་ཤིང་མེ་ཏོག་དར་སྣ་མར། །ཞེས་པ་ནས། ཞི་བའི་འཕྲིན་ལས་དུས་ལ་བབ་ཀྱི་བར་བརྗོད། སྔགས་རྣམས་གོང་དང་འདྲ་བར་བྱས་ཏེ་རྫས་ཆེན་ཉེར་བདུན་དང་ཁྱད་པར་གྱི་རྫས་རྣམས་བདུན་ནམ་ཉེར་གཅིག་ཙམ་དང་། དམིགས་བསལ་གྱི་རྫས་གཙོ་བོའི་བཅུ་ཆ་འབུལ། སྲེག་རྫས་མཆོད་པས་མེ་ཡི་ལྷ། །ཞེས་པའི་ཚིག་རྐང་དང་པོ་སྲེག་རྫས་མཆོད་པས་ཡེ་ཤེས་ལྷ། །ཞེས་པར་བསྒྱུར་ནས་ཚང་བར་བརྗོད། བྱོན་ཟན་གྱི་སྐབས་ལྟར་དགང་བླུགས་བདུན་ཚན་གསུམ་གཤེགས་སྐྱེམས་སུ་འབུལ། བཅོམ་ལྡན་ཕྱག་རྒྱ་ཟིལ་གནོན་འཁོར་བཅས་ལ། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་(༨བ)
རོལ་མོ་འབུལ། །བཞེས་ནས་དངོས་གྲུབ་མ་ལུས་སྩལ་དུ་གསོལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཨརྒྷཾ་པྲཏཱི་ཙྪ་སྭཱཧཱ་ནས་ཤཔྟའི་བར་བརྗོད། བཅོམ་ལྡན་ཕྱག་རྒྱ་ཟིལ་གནོན་འཁོར་བཅས་ལ། ཁྱད་པར་མཆོད་པ་པཉྩ་ཨ་མྲྀ་ཏ། །མ་ཧཱ་བ་ལིཾ་རཀྟར་བཅས་པ་འབུལ། །བཞེས་ནས་བླ་མེད་དངོས་གྲུབ་སྩལ་དུ་གསོལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་པཉྩ་དང་མཧཱ་ར་ཀྟ་སྦྱར་བས་སྨན་རཀ་དང་། གཏོར་མ་ལས་བྱང་གི་མཆོད་གཏོར་ལྟར་བྱིན་གྱིས་བརླབ། །ཧཱུཾ། བླ་མེད་མཆོག་གི་མཆོད་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །ཐུགས་དམ་བཞིན་དུ་ཅི་བདེར་བཞེས་སུ་གསོལ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་མ་ཧཱ་བ་ལིཾ་ཏ་པཱུ་ཛ་ཁཱ་ཧིས་འབུལ། ཨཱོཾ་བཛྲ་ཏམྦུ་ལ་ཡེ་སྭཱཧཱ་སོ་རྩི་དང་། ཨཱོཾ་བཛྲ་ཝ་སྟྲ་ཡེ་སྭཱཧཱས་གོས་ཟུང་འབུལ། ཆོས་དབྱིངས་ངང་ལས་ཁྲོ་བོའི་སྐུར་སྟོན་པ། །ལྷག་པའི་ལྷར་གྱུར་བཅོམ་ལྡན་གཤིན་རྗེའི་གཤེད། །བདུད་ཀྱི་བདུད་ཆེན་མ་རུངས་འདུལ་པའི་ལྷ། ཁྲོ་རྒྱལ་ཀུན་གྱི་གཙོ་ལ་ཕྱག་འཚལ་བསྟོད། །ཅེས་མཆོད་བསྟོད་བྱ། དེ་ནས་དགོངས་འདུས་རྟ་ནག་གི་པདྨ་དབང་ཞེས་པ་འདོན་པ་བསྒྱུར་བ་འདི་ལྟ་སྟེ། ལྷ་ཡི་ལྷ་མཆོག་འཇམ་དཔལ་གཤིན་རྗེའི་གཤེད༔ དུས་རྣམས་རྟག་ཏུ་ཁྲོ་རྒྱལ་ཁྱེད་བསྒྲུབས་ཏེ༔ སྲོག་གི་ཕྱིར་ཡང་ཡི་དམ་མི་སྤོང་ན༔ ཡེ་ཤེས་ཐུགས་རྗེའི་སྤྱན་གྱིས་གཟིགས་སུ་གསོལ༔ ཁྲོ་རྒྱལ་འཁོར་བཅས་ཁྱོད་ཀྱི་གཟི་བརྗིད་ཀྱིས༔ བར་གཅོད་བགེགས་ཀྱི་ཚོགས་རྣམས་བསལ་ནས་ཀྱང་༔ བྱམས་(༩ན)
པའི་ཞལ་བཟང་མངོན་སུམ་སྟོན་པ་དང་༔ སྒྲུབ་པའི་འབྲས་བུ་དུས་འདིར་སྩལ་དུ་གསོལ༔ ཡང་འབྲི་གུང་ཟུར་པ་རིན་པོ་ཆེས་མཛད་པའི་བསྐལ་པ་དཔག་ཏུ་མེད་པའི་སྔོན་རོལ་ནས། །ལྷ་མཆོག་ཁྱོད་དང་སྨོན་ལམ་གཅིག་པའི་མཐུས། །ད་ལྟ་ཞལ་མཐོང་ཡི་དམ་ལྷར་གསོལ་ན། །སྙིང་པོ་བྱང་ཆུབ་མཆོག་ལ་མི་གནས་ཚེ། །ཚེ་རབས་འཁོར་བ་གར་སྐྱེས་གར་གནས་ཀྱང་། །རྗེས་སུ་བཟུང་ཞིག་བཅོམ་ལྡན་གཤིན་རྗེའི་གཤེད། །དངོས་གྲུབ་སྩོལ་ཅིག་བཅོམ་ལྡན་གཤིན་རྗེའི་གཤེད། །བར་གཅོད་སོལ་ཅིག་བཅོམ་ལྡན་གཤིན་རྗེའི་གཤེད། །དགྲ་བགེགས་སྒྲོལ་ཞིག་བཅོམ་ལྡན་གཤིན་རྗེའི་གཤེད། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །གཞན་ཡང་། མཁྱེན་བརྩེ་ནུས་མངའ་འཇམ་དཔལ་དཔའ་བོ་ཡིས། །བསྟན་པ་རྒྱས་དང་དེ་འཛིན་ཚོགས་རྣམས་ཀྱི། །སྐུ་ཚེ་འཕྲིན་ལས་སྐྱེ་རྒུའི་བདེ་སྐྱིད་ལ། །བར་དུ་གཅོད་པ་ཐམས་ཅད་ཞི་མཛད་གསོལ། ཁྱད་པར་རིགས་འཛིན་བདག་ཅག་དཔོན་སློབ་དང་། །ཡོན་མཆོད་འཁོར་དང་བཅས་པ་མ་ལུས་པའི། །སྔོན་ལས་འཕྲལ་རྐྱེན་ལས་བྱུང་དགྲ་བགེགས་གདོན། །ནད་རིམས་དབུལ་ཕོངས་འཐབ་རྩོད་ཞི་མཛད་གསོལ། །ཕྱི་ནང་དྲང་སྲོང་དམོད་པ་མཐུ་བྱད་དང་། །བྱུང་དང་སྐལ་ངན་མི་ཤིས་དུས་མིན་འཆི། །སྒེག་སྲི་ལངས་སོགས་ཆགས་ཆེ་ཉམ་ང་བའི། །འགལ་རྐྱེན་བར་ཆད་ཐམས་ཅད་ཞི་མཛད་གསོལ། །འཕྲིན་ལས་ཆད་ལྷག་དམ་རྫས་མ་ཚང་ཉམས། །བསྙེན་སྒྲུབ་གཡེལ་ཞིང་དུས་ཀྱི་མཆོད་པ་ཆག །ཏིང་འཛིན་མི་གསལ་གསང་སྔགས་སྒྲ་ཉམས་སོགས། །སྡིག་སྒྲིབ་ཉེས་ལྟུང་མ་ལུས་ཞི་མཛད་གསོལ། །ཚེ་དཔལ་སྟོབས་འབྱོར་དབང་ཕྱུག་(༩བ)
ཕུན་སུམ་ཚོགས། །ལུང་དང་མངོན་པར་རྟོགས་པའི་ཡོན་ཏན་སོགས། །འཁོར་འདས་དངོས་གྲུབ་ཀུན་དང་ཁྱད་པར་དུ། །འཇམ་མགོན་ཀུན་བཟང་ཚེ་འདིར་མངོན་གྱུར་མཛོད། །ཅེས་འདོད་དོན་ལ་གསོལ་བ་གདབ། །གཤིན་རྗེའི་གཤེད་ཀྱི་ཡིག་བརྒྱ་ལན་གསུམ་གྱིས་ཆད་ལྷག་ཁ་བཀང་། །ཡི་དམ་ལྷ་མཆོག་ཟིལ་གནོན་འཁོར་བཅས་ཀྱི། །བསྙེན་སྒྲུབ་འཕྲིན་ལས་གཞུང་བཞིན་བགྱིས་པ་ལ། །བདག་ཅག་མ་རིག་ལོག་རྟོག་དབང་སོང་བའི། །འགལ་འཁྲུལ་ནོངས་པ་ཅི་མཆིས་བཟོད་པར་གསོལ། །ཞེས་ནོངས་པ་བཤགས། །ཨཱོཾ། ཁྱེད་ཀྱིས་སེམས་ཅན་དོན་ཀུན་མཛད་སོགས་དང་། བཛྲ་མུཿས་ཡེ་ཤེས་པ་རང་བཞིན་གྱི་གནས་སུ་གཤེགས། །དམ་ཚིག་པ་བདག་ལ་ཐིམ་པར་བསམ། །སླར་ཡང་འཇིག་རྟེན་པའི་མེ་ལྷ་མཆོད་པ་ནི། །དབང་པོར་བཞུགས་པའི་ཡེ་ཤེས་ཀྱི༔ མེ་ལྷ་བཛྲ་ས་མ་ཛཿ སླར་ཡང་དམ་ཚིག་སེམས་དཔའ་དང་༔ དབྱེར་མེད་ངོ་བོ་གཅིག་ཏུ་གྱུར༔ མེ་ལྷའི་རྒྱལ་པོ་དྲང་སྲོང་མཆོག༔ ར་སྐྱེས་བཅིབས་ནས་གློག་ལས་མགྱོགས༔ ཞེས་པ་ནས། ཡེ་ཤེས་སྐུ་ལ་ཕྱག་འཚལ་བསྟོད༔ཀྱི་བར་གྱིས་མཆོད་བསྟོད་བྱ། །མེ་ལྷ་དྲང་སྲོང་འཁོར་བཅས་ལ། །ཡམ་ཤིང་མེ་ཏོག་དར་སྣ་མང་། །ཞེས་པ་ནས་ཁྱད་པར་བའི་རྫས་ཡན་སྔར་ལྟར་དང་གཤེགས་སྐྱེམས་དགང་བླུགས་བདུན་གསུམ་བྱོན་ཟན་བཞིན་ཕུལ་རྗེས། བཛྲ་ཏཱམྦུ་ལས་སོ་རྩི་ཝ་སྟྲས་གོས་ཟུང་འབུལ། གཏོར་མ་ལས་བྱང་ལྟར་བྱིན་གྱིས་བརླབས། ཨཱོཾ་ཨགྣ་ཡེ་ས་པ་རི་ཝཱ་ར་མ་ཧཱ་བ་ལིཾ་ཏ་པཱུ་ཛ་ཁཱ་ཧི། ཞེས་ལན་གསུམ་གྱིས་འབུལ། མཆོད་སྦྱིན་གྱི་གཏོར་མ་འདི་བཞེས་ལས་ཞེས་པ་ནས་ཡིད་ལ་འདོད་པ་ཀུན་འགྲུབ་ཤོག་གི་བར་བརྗོད། མེ་ལྷ་འཁོར་བཅས་ཁྱེད་རྣམས་ཀྱིས། །ཞེས་སོགས་(༡༠ན)
འདོད་གསོལ་བྱ། ཨཱོཾ་ཨགྣ་ཡེ་ཨརྒྷཾ་པྲ་ཏཱི་ཙྪ་སྭཱཧཱ་ནས་ཤཔྟའི་བར་གྱིས་མཆོད། ཡིག་བརྒྱ་དང་མ་འབྱོར་བ་སོགས་ཀྱིས་བཟོད་པར་གསོལ། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་ཀྱིས་གཤེགས། །ཇི་བཞིན་དུས་སུ་ཚུར་སྤྱོན་ཅིག །བདག་གི་དངོས་གྲུབ་ཐམས་ཅད་སྒྲུབས། །ཨཱོཾ་ཨགྣ་ཡེ་ཡ་ཧི་གཙྪ། ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་ཛཿཧཱུཾ་བཾ་ཧོཿས། རང་དང་གཉིས་སུ་མེད་པར་བསམ། མཆེད་རྣམས་སྲིན་ལག་སྦྲེལ་གྲལ་ཟླུམ་པོར་བྱས་ཏེ། ཧཱུཾ། སྟོང་གསུམ་སྟོང་གི་འཇིག་རྟེན་ན༔ ཀུན་ཀྱང་འཇམ་དཔལ་གཤིན་རྗེའི་གཤེད༔ ཁྲོ་བོ་འདུས་པས་ནམ་མཁའ་གང་༔ ཁྲོ་མོ་འདུས་པས་བར་སྣང་གང་༔ ཁྲོ་ཆུང་འདུས་པས་ས་གཞི་གང་༔ ཐམས་ཅད་འདུས་པའི་ངང་ཉིད་ལས༔ རྐང་པ་གཡས་ཀྱིས་བྲོ་བརྡུངས་པས༔ ཕོ་སྲི་ཐམས་ཅད་གཡས་སུ་མནན༔ རྐང་པ་གཡོན་གྱིས་བྲོ་བརྡུངས་པས༔ མོ་སྲི་ཐམས་ཅད་གཡོན་དུ་མནན༔ གཉིས་སུ་མེད་པར་བྲོ་བརྡུངས་པས༔ ཆུང་སྲི་ཐམས་ཅད་རྡུལ་དུ་བརླག༔ བྲོ་ནི་ཡེ་ཤེས་ཆེན་པོའི་བྲོ༔ དགྲ་རྣམས་ཐལ་བར་རློག་པའི་བྲོ༔ བདུད་རྣམས་ཕྱེ་མར་འཐག་པའི་བྲོ༔ དེ་ཕྱིར་གླུ་བྲོ་རྒྱུན་མི་ཆད༔ ཤར་དུ་ཞི་བའི་བྲོ་བརྡུངས་པས༔ དགྲ་བགེགས་ཐམས་ཅད་ཞི་བར་ཤོག༔ ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཀཱ་ལ་རཱུ་པ་ཧྲཱིཿཥྚྲཱི་ཝི་ཀྲྀ་ཏཱ་ན་ན་ཧཱུཾ་ཕཊ་ཞི་བ་ཤནྟིཾ་ཀུ་རུ་སྭཱཧཱ། ཞེས་བྲོ་བརྡུང་ཞིང་སུམྦྷ་བརྗོད། བསྔོ་བ་སྨོན་ལམ་བཀྲ་ཤིས་བྱ་ཞིང་མེ་ཏོག་སིལ་མ་ཕྱོགས་ཀུན་ཏུ་གཏོར། རྒྱུན་གྱི་སྤྱོད་ལམ་ལ་འཇུག །སྦྲེལ་ནས་བྱེད་ན་ཐལ་བ་རྙིང་པ་མ་(༡༠བ)
དཀྲུགས་པར་ནེམ་ཙམ་བྱས་པའི་ཁར་ཨོང་ཀོང་བརྩིགས་ལ་བཤད་མ་ཐག་པ་ཉམས་སུ་བླངས། ལོང་ཡོད་ན་མེ་མ་ཤི་བར་དུ་མི་བསྒུལ་ཞིང་། རིངས་ན་འོ་མས་གཞིལ་ལ་རྡུལ་ཚོན་དང་ཐལ་བ་རྣམས་ཕལ་ཆེར་འབབ་ཆུ་ཆེན་པོར་དོར་ཞིང་། ཉེར་མཁོའི་རྫས་སུ་ཚགས་བྱ་བའང་རུང་། ཐབ་དང་ཉེ་འཁོར་ཀུན་ཏུ་དྲིས་བྱུགས་ཤིང་ལས་ཀྱི་རྗེས་མི་མངོན་པར་བྱའོ། །འཇམ་དཔལ་ཚེ་བདག་ཞི་བའི་འཕྲིན་ལས་ཀྱིས། །ཉེས་བརྒྱའི་དྲི་འཁྲུད་སྦྱིན་སྲེག་གངྒཱའི་རྒྱུན། །པད་གནུབས་ཚངས་པའི་རལ་ཀླུང་ལས་བབས་པ། ཁོ་བོའི་བློ་གྲོས་ཆུ་གཏེར་ཀློང་དུ་འཁྱིལ། འདི་ཕྱིའི་དོན་ཆེན་བསྒྲུབ་པའི་བགེགས་ཚོགས་ཀུན། །དུས་དགྲའི་དབང་པོ་མཆོད་པས་ཉེར་ཞི་ནས། །གདོད་ནས་དག་པའི་རང་རིག་འཇམ་པའི་དབྱངས། །རང་ཞལ་མངོན་སུམ་འཇལ་བར་གདོན་མི་ཟ། །དེ་ཕྱིར་རིགས་ཀུན་བདག་པོ་རྡོ་རྗེ་འཆང་། །ཟུར་ཆེན་ཆོས་དབྱིངས་རང་གྲོལ་བཀའ་དྲིན་ལས། །ཟིལ་གནོན་ཕྱག་རྒྱའི་ལམ་ངེས་ལོངས་རྙེད་པའི། །ཟ་ཧོར་རིགས་ཀྱི་བནྡེས་ཡི་གེར་བཀོད། །པད་གནུབས་ལུགས་སྲོལ་འཁྲུལ་མེད་ཡི་གེ་དག །ཚད་མའི་དབང་པོར་བྱས་ཏེ་མན་ངག་གིས། །བརྒྱན་ལས་ཕྱི་འགྱུར་ཁོ་ནའི་རྒྱས་འགེབས་དང་། །རང་བཟོས་མ་བསླད་ཤོག་སེར་དྲི་ངད་ལྡང་། །དགེ་དེས་མཁའ་མཉམ་འགྲོ་བ་མ་ལུས་པའི། །མི་བཟད་གདུང་བའི་རྩ་བ་དུག་གསུམ་གྱི། །མུན་པའི་དམག་རུམ་མཐའ་དག་གཞིལ་བྱས་ཏེ། །ཡེ་ཞེས་མཆོག་གི་འོད་སྟོང་འབར་གྱུར་ཅིག །ཅེས་འཇམ་དཔལ་ཚེ་བདག་ཕྱག་རྒྱ་ཟིལ་གནོན་གྱི་ཞི་བའི་སྦྱིན་སྲེག་གངྒཱའི་ཆུ་རྒྱུན་འདི་ནི་གནུབས་(༡༡ན)
བན་བློ་བཟང་ཐབས་མཁས། སྔགས་བན་བློ་བཟང་ངག་དབང་། སྔགས་བན་ངག་དབང་ཆོས་འཛིན། སྔགས་བན་འཕྲིན་ལས་རྒྱ་མཚོ་བཞིས་ཨྱེ་རིང་བསྙེན་ཆེན་བཏང་བའི་དུས་ཁ་སྐོང་གི་སྦྱིན་སྲེག་ངག་འདོན་ཞིག་དགོས་ཞེས་བསྐུལ་བས་རྐྱེན་བྱས་ནས་སླད་མར་ཡང་ལམ་འདི་ལ་མོས་ཤིང་ཉམས་སུ་ལེན་པ་རྣམས་ལ་ཕན་འདོད་ལྷག་བསམ་གྱིས་པད་གནུབས་གཉིས་ཀྱི་དྲག་པོའི་སྦྱིན་སྲེག་དང་ལས་བཞི་སོ་སོའི་སྦྱིན་སྲེག་གི་གཞུང་རྣམས་ལ་གཞི་བྱས། འབྲི་གུང་དབུར་སྨྱོན་གྱིས་མཛད་པའི་ཚེ་བདག་སྦྱིན་སྲེག་དང་། གཞན་ཡང་གཤིན་རྗེ་ཁྲོ་ཆུ་གཏེར་ཁ་གོང་འོག །བྱང་གཏེར་སོགས་རྙིང་མ་རང་ལུགས་ཀྱི་ཡིག་ཆ་ནས་ཁ་འགང་དགོས་པ་རྣམས་བཀང་། ཅུང་ཟད་མི་གསལ་བའི་མེད་དུ་མི་རུང་བ་རྣམས་མཐུ་ཆེན་འཇིགས་མེད་དཔའ་བོ་དང་འཇམ་མགོན་མཁྱེན་བརྩེའི་དབང་ཕྱུག་ལ་སོགས་ཀྱི་གསུང་རབ་ལ་ཞིབ་པོར་དཔྱད་ནས་ཚིག་ཕྲད་བསྣོན་དགོས་ཀྱིས་བརྒྱན་ཏེ་ཟུར་ཆེན་རྡོ་རྗེ་འཆང་ཆོས་དབྱིངས་རང་གྲོལ་གྱི་བཀའ་དྲིན་ལ་བརྟེན་ནས་ཆོས་ཚུལ་འདི་ལ་གོམས་པའི་ཟ་ཧོར་གྱི་སྔགས་སྨྱོན་བཞད་པ་རྩལ་གྱིས་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ།། །།སརྦ་མངྒ་ལཾ།། །།