འཇམ་དཔལ་ཚེ་བདག་ནག་པོའི་མཆོད་རྟེན་བཅས་ཆོག་གི་རབ་གནས་བྱིན་རླབས་ཉི་མའི་གཟི་འབར།
འཇམ་དཔལ་ཚེ་བདག་ནག་པོའི་མཆོད་རྟེན་བཅས་ཆོག་གི་རབ་གནས་བྱིན་རླབས་ཉི་མའི་གཟི་འབར་བཞུགས་སོ། །
སངས་རྒྱས་ཀུན་འདུས་པདྨ་ཀ་ར་དང་། །བོད་ཡུལ་དྲག་སྔགས་བདག་པོ་གནུབས་ཆེན་ཞབས། །ཟབ་གཏེར་སྒོ་འཕྱེད་དུམ་པ་རྒྱ་ཞང་སོགས། །དངོས་བརྒྱུད་བླ་མའི་ཚོགས་རྣམས་ཕྱག་གི་ཡུལ། །བཅས་པས་རྡོ་རྗེའི་མཁར་རྫོང་བཙན་པའི་གོ །རང་གཤེད་དབབ་པ་བཟློག་བསད་མནན་གཏད་མཚོན། །ཕ་རོལ་བན་བོན་མུ་སྟེགས་བྱད་མཁན་གྱིས། །ལོ་བརྒྱར་བསྒྲུབས་འཇིག་གནམ་ལྕགས་འབར་བའི་ཐོག །དེ་ཕྱིར་ཆོས་སྐུ་འགྱུར་མེད་ཐུགས་ཀྱི་རྟེན། །འཁོར་འདས་ཕྱག་རྒྱ་ཟིལ་གནོན་དཀྱིལ་འཁོར་ཆ། །རབ་གནས་ཆོ་ག་མཁས་པའི་ཕྱག་ལེན་ལྟར། ཁྲིགས་སུ་བསྡེབ་བོ་ཤེས་ལྡན་རྣ་བ་ལྷོགས། །དེ་ལ་འདིར་སྡིག་པ་སྙིང་འཛིངས་ནག་པོ་སོགས་རྒྱུད་ཀྱི་དགོངས་དོན་ལྟར་རྒྱ་བལ་གྱི་མཁས་གྲུབ་རྣམས་ཀྱིས་ཁྲིགས་སུ་བསྡེབས་པའི་མཆོད་རྟེན་བཅས་ཆོག་བོད་ཡུལ་འདིར་དང་པོར་གནུབས་དང་གཏེར་སྟོན་རྒྱ། བར་དུ་མཁས་པ་གངས་པ་ཤཱཀ་འབུམ་དང་གཡུང་སྟོན་རྡོ་རྗེ་དཔལ། ཐ་མར་མཁས་པ་སེ་སྟོན་རིན་ཅེན་རྒྱལ་མཚན་དང་པཎ་ཆེན་སྐུ་མཆེད་སོགས་ཀྱི་ཕྱག་ལེན་ལྕགས་སྡིག་ལྕགས་འདྲ་གཉིས་ཀྱི་མཆོད་རྟེན་གང་ལག་ཏུ་བསྟར་(༢ན)
ནའང་མེད་དུ་མི་རུང་བ་ནི། ལྕགས་སྡིག་ཞལ་གདམས་ལས། མཆོད་རྟེན་རབ་ཏུ་གནས་པར་བྱ། །རབ་གནས་མེད་ན་འཕུང་བཤིག་ཡིན། །ཞེས་རབ་གནས་གལ་ཆེ་ཞིང་། དེའང་སྔགས་གསར་རྙིང་སྤྱི་གཞུང་ལས་འབྱུང་བའི་རབ་གནས་གྲུབ་ཀྱང་ཕུན་སུམ་ཚོགས་པའི་ཡན་ལག་ཡིན་མོད། མེད་དུ་མི་རུང་བ་གཏེར་གཞུང་ལས་བྱུང་བའི་ཆོ་གའི་ཕྱག་ལེན་གྱི་རིམ་པ་ནི། ཐོག་མར་ལྕགས་སྡིག་ཀུན་གཞི་གཏི་མུག་སེམས་བྱུང་ལས་ཆད་པའི་ཆོས་སྡེ་དབང་བཀའ་རིན་ཅེན་ཕྲེང་བ་ལས། སཱཙྪ་གདབ་ཅིང་ཆུ་གཏོར་བཏང་། །འགྲུབ་ན་ཕ་རོལ་ཕྱིན་ལ་འདོན། །མ་གྲུབ་དཔང་སྐོང་བཤགས་པ་བྱ། །ཞེས་པ་ལྟར་ལུས་ཀྱི་སྒྲིབ་སྦྱོང་སཱཙྪ་གདབ་པ། ངག་གི་སྒྲིབ་སྦྱོང་གསུང་རབ་ཀློག་པ། ཡིད་ཀྱི་སྒྲིབ་སྦྱོང་ཆུ་གཏོར་གཏོང་བ། བླ་མ་དངོས་སུ་བཞུགས་ན་དང་མིན་ན་རྩ་གསུམ་དགྱེས་པའི་ཚོགས་མཆོད་དབུལ་བ་སྟེ་ཕྱིའི་བཤགས་པ་བྱ། དཀར་གཏོར་དམར་གཏོར་ཉུང་ངུ་རྣམ་གསལ་བཞིན་བཏང་། རྒྱལ་ཆེན་མཐོ་འཛུགས་ནི། མཆོད་གཏོར་བྱིན་རླབས་དང་བསྐྱེད་ཆོག་མཆོད་གཏོར་འབུལ་བ་རྣམས་ཕུར་པའི་ས་ཆོག་གི་སྐབས་ཇི་ལྟ་བ་ལས།(༢བ)
ཧཱུཾ། ཤར་གྱི་ཕྱོགས་ནས་ཡུལ་འཁོར་བསྲུང་། །དྲི་ཟའི་གདོན་ལས་མཚམས་ཆོད་ཅིག །ལྷོ་ཡི་ཕྱོགས་ནས་འཕགས་སྐྱེས་པོ། །གྲུལ་བུམ་གདོན་ལས་མཚམས་ཆོད་ཅིག །ནུབ་ཀྱི་ཕྱོགས་ནས་སྤྱན་མི་བཟང་། །ཀླུ་ཡི་གདོན་ལས་མཚམས་ཆོད་ཅིག །བྱང་གི་ཕྱོགས་ནས་རྣམ་ཐོས་སྲས། །གནོད་སྦྱིན་གདོན་ལས་མཚམས་ཆོད་ཅིག །ཅེས་འཕྲིན་ལས་བཅོལ། རི་རབ་ལྷུན་པོའི་རྩེ་བརྒྱད་ནས་ཞེས་སོགས་ནང་མཚམས་གཅོད་པ་དང་ནང་བཤགས་བྱེད་པ་བཤད་འདུག་ནའང་ལས་གཞུང་བསྲང་བའི་ཞར་ལ་འོང་བས་བཏང་སྙོམས་སུ་བཞག །སྟེགས་བུའི་ཁར་རབ་རྡུལ་ཚོན། འབྲིང་རས་བྲིས། ཐ་མ་ཚོམ་བུའི་དཀྱིལ་འཁོར་གང་རུང་གི་སྟེང་དུ་མན་འཇིའི་ཁར་ལྷ་ཚོགས་རྣམས་ཀྱི་ཙཀླི་བཞག །སྨན་རཀ་གཏོར་གསུམ་ཕྱི་ནང་གི་ཉེར་སྤྱོད་གཏེར་སྲུང་གི་གཏོར་མ། ཚོགས་ཆོས་སོགས་བཤམ། ལས་བྱང་གཞུང་བསྲངས་ཏེ་འཛབ་བཟླས་བསྟོད་བསྐུལ་རྒྱས་བསྡུས་ཅི་རིགས་ཀྱི་བར་བྱས་ལ་བདག་མདུན་ལྷན་ཅིག་ཏུ་བསྒྲུབ། རྣམ་བུམ་དང་ལས་བུམ་གཉིས་རྫས་དང་བཅས་པ་གུ་གུལ་གྱིས་བདུག །བདག་ཉིད་ཁྲོ་རྒྱལ་སོགས་བརྗོད་ཅིང་ཡུངས་ཀར་གྱིས་བྲབས་ཏེ་བགེགས་བསྐྲད། སྲོག་ཆགས་མེད་པའི་ཆུ་གཙང་གིས་སུམ་གཉིས་བཀང་ལ་བུམ་རྫས་ཉེར་ལྔ་དང་བདུད་རྩི་ལྔ་བླུག །ཁ་རྒྱན་མགུལ་ཆིངས། དུད་ཆོས་གཟུངས་ཐག་བཏགས། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུཾ་ལས་རིན་པོ་ཆེའི་བུམ་པ་ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་(༣ན)
བ། ལྷའི་གོས་ཀྱིས་མགུལ་པ་དཀྲིས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྨན་སྣ་ཚོགས་ཀྱིས་གང་བའི་ནང་དུ་ཨྱེ་ཡི་ཕོ་བྲང་ཟླ་གམ་གསུམ་ཞེས་པ་ནས་ནང་གི་འདོད་ཡོན་གྱི་བར་དཀྱུས་ལྟར་དང་། དེ་རྗེས་བསྟོད་པ་བྱ། རང་གི་སྙིང་ག་ནས་སྔགས་ཕྲེང་གཟུངས་ཐག་ལ་བརྟེན་ཏེ་སོང་བས་བུམ་ལྷ་རྣམས་ཀྱི་ཐུགས་རྒྱུད་བསྐུལ། བུམ་ལྷའི་ཐུགས་ཀ་ནས་འོད་ཟེར་འཕྲོས་པས་སེམས་ཅན་གྱི་སྒྲིབ་པ་སྦྱངས་ཏེ་རྒྱལ་བའི་གོ་འཕང་ལ་བཀོད། རྒྱལ་བ་རྣམས་ཀྱི་མཐུ་དང་བྱིན་རླབས་ཚུར་འདུས། ཡང་འོད་ཟེར་འཕྲོས་འོག་མིན་གྱི་བདེ་བར་གཤེགས་པ་ཐམས་ཅད་ཀྱི་ཐུགས་རྒྱུད་བསྐུལ། མཐུ་སྟོབས་དང་གཟི་བརྗིད་བྱིན་རླབས་སྐུ་སྔགས་ཕྱག་མཚན་གྱི་རྣམ་པ་བུམ་པ་ལ་ཐིམ། བུམ་ལྷ་རྣམས་སྦྱོར་བ་མཛད་པའི་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་བུམ་པ་གང་བར་བསམས་ལ། སྐུ་གསུང་ཐུགས་སྔགས་དང་ཨྱེ་རིང་བཟླ། མཆོད་བསྟོད་བྱ། ཐོད་ཆུ་བླུག་པས་སྐུ་གསུང་ཐུགས་ཀྱི་རང་བཞིན་དུ་གྱུར་པར་བསམ། མཆོད་རྟེན་ལ་ཁྲུས་གསོལ་གྱི་ཆེད་དུ་ལས་བུམ་དུའང་ཅུང་ཟད་ལྡུགས། ཁ་རྒྱན་གྱི་མདུན་ངོས་སུ་ཙཀླི་རྣམས་བཞུགས་དབུ་རྒྱན་དང་ཅོད་པན་བུམ་པའི་ཁ་ལ་བསྡམས་ཀྱང་རུང་། དཀྱིལ་འཁོར་གྱི་དབུས་སུ་བཀང་། ལས་བུམ་གྱི་ནང་དུ་ཉི་ཟླའི་དབུས་སུ་ཨ་དཀར་པོ་ལས་འོད་ཟེར་འཕྲོས་འོག་མིན་ནས་བདེ་བར་གཤེགས་པ་རྣམས་ཀྱི་བྱིན་རླབས་བདུད་རྩིའི་རྣམ་པར་བསྡུས་ཏེ་བུམ་ཆུ་ལ་ཐིམ་པས་ཡེ་ཤེས་ཀྱི་བདུད་རྩི་རྟེན་མི་གཙང་བས་འཕགས་པའི་དྲི་མ་ཐམས་ཅད་འདག་པར་བྱེད་པའི་ནུས་པ་དང་ལྡན་པར་བསམ། ཨཱོཾ་ཨཱཿ(༣བ)
ཧཱུཾ་བརྒྱ་རྩ་བཟླ། རང་གི་གཡས་ངོས་སུ་བཞག །ལྕགས་སྡིག་མཁལ་མ་ལས་ཆད་པའི་ཆོས་སྡེ་རབ་གནས་ཡེ་ཤེས་ཟུང་འཇུག་ལས། མཆོད་རྟེན་གྱི་ཆ་ཚད་བསྟན་ཅིང་ཐ་མལ་གྱི་མཆོད་རྟེན་བཅས་པའི་དྲི་ངན་དབྱི་བར་བཤད་པའི་ཆ་ཚད་ནི་འདིར་སྨོས་མ་དགོས། དྲི་ངན་དབྱི་བ་ནི་འབྲས་ཟན་གྱི་ཆངས་བུ་ཐོགས་ཏེ་ཨཱོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་ཁ་ཡར་བརྗོད་པ་དང་ལྷན་ཅིག་པར་མཆོད་རྟེན་གྱི་ཕྱི་ལ་ཟན་ཕྱིས་བརྒྱག་པའི་ཚུལ་བྱས་ལ་རོ་མ་ཕྱིར་དོར། བགེགས་བསྐྲད་ཅིང་ཡེ་ཤེས་སེམས་དཔའ་གཞུག་པ་ལ་བགེགས་གཏོར་བཏང་། གུ་གུལ་གྱིས་འདུག །བདག་ཉིད་ཁྲོ་རྒྱལ་མ་སོགས་བརྗོད་དེ་ཡུངས་ཀར་བྲབས་ལ་བགེགས་བསྐྲད། དུར་ཁྲོད་མེ་རིམ་སོགས་ཀྱིས་མཚམས་བཅད། རང་གི་ཐུགས་ག་ནས་འོད་ཟེར་འཕྲོས་སྤྱན་མ་ལ་སོགས་པའི་ལྷ་མོ་བདུད་རྩིའི་བུམ་པ་ཐོགས་པ་དཔག་ཏུ་མེད་པ་བཛྲ་ས་མ་ཛཿས་སྤྱན་དྲངས། དེ་རྣམས་ཀྱིས་སྟོང་གསུམ་དང་མཉམ་པའི་མཆོད་རྟེན་ལ་ཁྲུས་གསོལ་བས་མ་དག་པའི་དྲི་མ་ཐམས་ཅད་དུད་ཁུ་དང་སོལ་ཁུ་ལྟར་ནག་ཉིལ་གྱིས་ཕྱིར་ཐོན། མཆོད་རྟེན་དངས་ཤིང་དྲི་མ་མེད་པ་ལྟ་བུར་གྱུར་བར་བསམས་ནས་ལས་བུམ་ཐོགས་མེ་ལོང་ལ་གཟུགས་བརྙན་འཆར་དུ་བཅུག་ལ། ཧཱུཾ། གུར་ཀུམ་ལ་སོགས་སྦྱར་བའི་ཆུ། །དག་པ་ཡེ་ཤེས་ཆུ་ཡིས་ཁྲུས་གསོལ་བས། །མི་གཙང་དྲི་མའི་ཚོགས་རྣམས་རབ་དག་ནས། ཡེ་ཤེས་སེམས་དཔའ་བཞུགས་པའི་གནས་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཇི་ལྟར་བལྟམས་པ། དེ་དག་སྐུ་ལ། རྒྱལ་བའི་སྐུ་གསུང་ཐུགས་ལ། ཕར་ཕྱིན་དྲུག་གི་བར་(༤ན)
སྤྱི་ལྟར་བྱ། ཨ་མྲྀ་ཏས་བསངས། སྭབྷཱ་ཝས་སྦྱངས། སྟོང་པའི་ངང་ལས་རི་རབ་བང་རིམ་བཞི་པ་སེང་གེའི་ཁྲི་དང་བཅས་པའི་སྟེང་དུ་བྷྲཱུཾ་ལས་ཆོ་འཕྲུལ་མཆོད་རྟེན་བང་རིམ་བཞི་མན་ཆད་ནག་པོ། བུམ་པ། བྲེ། གདུགས་ཆར་ཁེབས་ཏོག་དང་བཅས་པ་རྣམས་དཀར་པོ་དངས་གསལ་རྙོག་པ་མེད་པ་ཤེལ་ལྟར་འཚེར་བར་བསམ། རང་ཡི་དམ་དུ་གསལ་བའི་ཐུགས་ཀ་ནས་འོད་ཟེར་འཕྲོས་ཤར་ཕྱོགས་མངོན་པར་དགའ་བ་ལ་སོགས་པའི་ཞིང་ཁམས་ནས་དེ་བཞིན་གཤེགས་པ་མི་བསྐྱོད་པ་ལ་སོགས་པའི་རྡོ་རྗེའི་རིགས་ཀྱི་ལྷ་ཚོགས་རྣམས་རྣམ་པ་ཆོ་འཕྲུལ་ཆེན་པོའི་མཆོད་རྟེན་གྱི་དབྱིབས་ཅན་ཁ་དོག་སྔོན་པོ་གྲངས་མེད་པ་ཨཱོཾ་བཛྲ་ས་མ་ཛཿ ཤར་ཕྱོགས་བདེ་གཤེགས་ཞིང་ཁམས་གྲངས་མེད་ནས། །རྡོ་རྗེ་རིགས་ཀྱི་མཆོད་རྟེན་སྔོ་ལ་འཚེར། །མཆོད་རྟེན་གཞལ་ཡས་ཆེན་པོའི་ཤར་ཕྱོགས་སུ། །འགྲོ་བའི་དོན་དུ་སྤྱན་འདྲེན་གཤེགས་སུ་གསོལ། །བཛྲ་ཨཀྵོ་བྷྱ་སཱཙྪ་ཛཿཧཱུཾ་བཾ་ཧོ༔ཞེས་ལན་གྲངས་མང་དུ་བརྗོད། མདུན་ངོས་ནས་ཐིམ་པས་མཆོད་རྟེན་དེ་ཨིནྡྲ་ནཱི་ལའི་མདོག་ལྟར་སྔོ་ཞིང་འཚེར་བར་བསམ། རང་གི་ཐུགས་ཀ་ནས་འོད་ཟེར་འཕྲོས། ལྷོ་ཕྱོགས་དཔལ་དང་ལྡན་པ་ལ་སོགས་པའི་ཞིང་ཁམས་ནས་དེ་བཞིན་གཤེགས་པ་རིན་ཅེན་འབྱུང་གནས་ལ་སོགས་པའི་རིན་ཅེན་རིགས་རྣམས་རྣམ་པ་ཆོ་འཕྲུལ་ཆེན་པོའི་མཆོད་རྟེན་གྱི་དབྱིབས་ཅན་ཁ་དོག་སེར་པོ་གྲངས་མེད་པ་ཨཱོཾ་བཛྲ་ས་མཱ་ཛ༔ ལྷོ་ཕྱོགས་བདེ་གཤེགས་ཞིང་ཁམས་གྲངས་མེད་ནས། །རིན་ཆེན་རིགས་ཀྱི་མཆོད་རྟེན་སེར་ལ་འཚེར། །མཆོད་རྟེན་གཞལ་ཡས་ཆེན་པོའི་ལྷོ་ཕྱོགས་སུ། །འགྲོ་བའི་དོན་དུ་སྤྱན་(༤བ)
འདྲེན་གཤེགས་སུ་གསོལ། །རཏྣ་སཾ་བྷ་ཝ་ཏྲཱཾ་སཱཙྪ་ཛཿཧཱུཾ་བཾ་ཧོ༔ ལན་གྲངས་མང་དུ་བརྗོད། ལྷོ་ཕྱོགས་ནས་ཐིམ་པས་མཆོད་རྟེན་དེ་གསེར་ཞུན་མའི་མདོག་ལྟར་སེར་ཞིང་འཚེར་བར་བསམ། རང་གི་ཐུགས་ཀ་ནས་འོད་ཟེར་འཕྲོས། ནུབ་ཕྱོགས་བདེ་བ་ཅན་ལ་སོགས་པའི་ཞིང་ཁམས་ནས་དེ་བཞིན་གཤེགས་པ་འོད་དཔག་མེད་ལ་སོགས་པ་པདྨའི་རིགས་རྣམས་རྣམ་པ་ཆོ་འཕྲུལ་ཆེན་པོའི་མཆོད་རྟེན་གྱི་དབྱིབས་ཅན་ཁ་དོག་དམར་པོ་གྲངས་མེད་པ་ཨཱོཾ་བཛྲ་ས་མཱ་ཛ༔ ནུབ་ཕྱོགས་བདེ་གཤེགས་ཞིང་ཁམས་གྲངས་མེད་ནས། །པདྨའི་རིགས་ཀྱི་མཆོད་རྟེན་དམར་ལ་འཚེར། །མཆོད་རྟེན་གཞལ་ཡས་ཆེན་པོའི་ནུབ་ཕྱོགས་སུ། །འགྲོ་བའི་དོན་དུ་སྤྱན་འདྲེན་གཤེགས་སུ་གསོལ། །ཨ་མི་ཏྭ་བྷ་ཧྲཱིཿསཱཙྪ་ཛཿཧཱུཾཿབཾ་ཧོཿ ལན་གྲངས་མང་དུ་བརྗོད། ནུབ་ཀྱི་ཕྱོགས་ནས་ཐིམ་པས་མཆོད་རྟེན་དེ་པདྨ་རཱ་གའི་མདོག་ལྟར་དམར་ཞིང་འཚེར་བར་བསམ། རང་གི་ཐུགས་ཀ་ནས་འོད་ཟེར་འཕྲོས། བྱང་ཕྱོགས་ལས་རབ་རྫོགས་པ་ལ་སོགས་པའི་ཞིང་ཁམས་ནས་དེ་བཞིན་གཤེགས་པ་དོན་ཡོད་གྲུབ་པ་ལ་སོགས་པ་ལས་ཀྱི་རིགས་རྣམས་རྣམ་པ་ཆོ་འཕྲུལ་ཆེན་པོའི་མཆོད་རྟེན་གྱི་དབྱིབས་ཅན་ཁ་དོག་ལྗང་གུ་གྲངས་མེད་པ་ཨཱོཾ་བཛྲ་ས་མཱ་ཛཿ བྱང་ཕྱོགས་བདེ་གཤེགས་ཞིང་ཁམས་གྲངས་མེད་ནས། །ལས་ཀྱི་རིགས་ཀྱི་མཆོད་རྟེན་ལྗང་ལ་འཚེར། །མཆོད་རྟེན་གཞལ་ཡས་ཆེན་པོའི་བྱང་ཕྱོགས་སུ། །འགྲོ་བའི་དོན་དུ་སྤྱན་འདྲེན་གཤེགས་སུ་གསོལ། །ཨ་མོ་གྷ་སིདྡྷི་ཨཱཿསཱཙྪ་ཛཿཧཱུཾ་བཾ་ཧོཿ ལན་གྲངས་མང་དུ་བརྗོད། བྱང་གི་ཕྱོགས་ནས་ཐིམ་པས་མཆོད་རྟེན་མརྒད་ཀྱི་མདོག་ལྟར་ལྗང་ཞིང་འཚེར་བར་བསམ་(༥ན)
རང་གི་ཐུགས་ཀ་ནས་འོད་ཟེར་འཕྲོས། སྟེང་ཕྱོགས་འོག་མིན་ལ་སོགས་པའི་ཞིང་ཁམས་ནས་དེ་བཞིན་གཤེགས་པ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རིགས་རྣམས་རྣམ་པ་ཆོ་འཕྲུལ་ཆེན་པོའི་མཆོད་རྟེན་གྱི་དབྱིབས་ཅན་ཁ་དོག་དཀར་པོ་གྲངས་མེད་པ་ཨཱོཾ་བཛྲ་ས་མཱ་ཛཿ དབུས་ཕྱོགས་བདེ་གཤེགས་ཞིང་ཁམས་གྲངས་མེད་ནས། །དེ་བཞིན་གཤེགས་པའི་མཆོད་རྟེན་དཀར་ལ་འཚེར། །མཆོད་རྟེན་གཞལ་ཡས་ཆེན་པོའི་དབུས་ཕྱོགས་སུ། །འགྲོ་བའི་དོན་དུ་སྤྱན་འདྲེན་གཤེགས་སུ་གསོལ། །བཻ་རོ་ཙ་ན་ཨཱོཾ་སཱཙྪ་ཛཿཧཱུཾ་བཾ་ཧོ༔ ལན་གྲངས་མང་དུ་བརྗོད། དབུས་ཕྱོགས་ནས་ཐིམ་པས་མཆོད་རྟེན་ཤེལ་དཀར་ལྟར་དཀར་ཞིང་འཚེར་བར་གྱུར། མཆོད་ཅིང་བསྟོད་པ་ནི། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་མཎྜལ་དང་བཅས་པ་བཤམ། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ། འདོད་ཡོན་ལྔ་ལ་སོགས་པ་དཔལ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ཕུང་བསམ་གྱིས་མི་ཁྱབ་པར་བསམ། ཨཱོཾ་བཛྲ་ཨརྒྷཾ་ཨཱཿཧཱུཾ་ནས་ཤཔྟའི་བར། ཨཱོཾ་རཱུ་པ་ནས་སྤརྴའི་བར་བརྗོད། མཆོད་པ་སྤྲིན་གྱི་གཟུངས། ཨཱོཾ་ན་མོ་བྷ་ག་ཝ་ཏེ་བཛྲ་སཱ་ར་པྲ་མ་རྡ་ནེ། ཏ་ཐཱ་ག་ཏཱ་ཡ་ཨརྷ་ཏེ་སམྱ་ཀྶཾ་བུདྷྱ་ཡ། ཏདྱ་ཐཱ། ཨཱོཾ་བཛྲེ་བཛྲེ། མཧཱ་བཛྲེ། མཧཱ་ཏེ་ཛ་བཛྲེ། མཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མཧཱ་བོདྷི་མཎྜོ་པ་སཾ་ཀྲ་མ་ཎ་བཛྲེ་སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་(༥བ)
བཛྲེ་སྭཱཧཱ། ཞེས་བརླབ། རྙོག་མེད་དངས་ཤིང་བསིལ་བའི་མཆོད་ཡོན་འདི། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །རྙོགས་མེད་དངས་ཤིང་བསིལ་བའི་ཞབས་བསིལ་འདི། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །ཆུ་སྐྱེས་ཐང་སྐྱེས་ཤིང་སྐྱེས་མེ་ཏོག་ཀུན། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །ཤིང་སྣ་སྨན་སྤོས་བསྲེགས་པའི་བདུག་སྤོས་འདི། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །འབྲུ་མར་རྩི་བཅུད་ལས་སྤར་སྒྲོན་མེ་འདི། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །སྤོས་དང་དྲི་ཞིམ་སྦྱར་བའི་དྲི་ཆབ་འདི། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །ནས་འབྲས་གྲོ་སྲན་སྦྱར་བའི་ལྷ་བཤོས་འདི། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །མཁར་རྔ་དུང་དང་ཆ་ལང་གླིང་བུའི་སྒྲ། །དེ་བཞིན་གཤེགས་པའི་ཐུགས་ཀྱི་རྟེན་ལ་འབུལ། །ཨཱོཾ་སརྦ་ཏ་ཐཱ་ག་ཨརྒྷཾ་ནས་ཤཔྟའི་བར་བརྗོད། གཟུགས་མཛེས་གར་བསྒྱུར་སྙན་པའི་རོལ་མོ་འཁྲོལ། །དྲི་ཞིམ་སྤོས་ཆུ་རོ་བརྒྱ་བདའ་བའི་ཟས། །འཇམ་མཉེན་ན་བཟའ་ཁྱད་པར་ཇི་སྙེད་པ། །དེ་བཞིན་གཤེགས་པའི་ཐུགས་ཀྱི་རྟེན་དུ་འབུལ། །ཨཱོཾ་སརྦ་ཏ་ཐཱ་ག་རཱུ་པ་ནས་སྤརྴའི་བར་བརྗོད། རི་རབ་ལྷུན་པོ་གླིང་བཞི་གླིང་ཕྲན་དང་། །རིན་ཅེན་རི་བོ་དཔག་བསམ་ལྗོན་པའི་ཤིང་། །འདོད་འཇོའི་བ་དང་མ་རྨོས་ལོ་ཏོག་ཚོགས། །རྒྱལ་སྲིད་བདུན་དང་ཉེ་བའི་རིན་ཅེན་བདུན། །གཏེར་ཆེན་བུམ་པ་སྒེག་སོགས་ལྷ་མོ་བརྒྱད། །ཉི་ཟླ་གདུགས་དང་རྒྱལ་མཚན་ལ་སོགས་པ། །ལྷ་མིའི་དཔལ་འབྱོར་ལོངས་སྤྱོད་ཕུན་ཚོགས་ཀུན། །དེ་བཞིན་(༦ན)
གཤེགས་པའི་ཐུགས་ཀྱི་རྟེན་ལ་འབུལ། །ཨཱོཾ་སརྦ་ཏ་ཐཱ་ག་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུཾ། ཤར་ཕྱོགས་མངོན་པར་དགའ་བའི་ཞིང་ཁམས་ནས། །རྡོ་རྗེ་རིགས་ཀྱི་མཆོད་རྟེན་སྔོན་པོ་ནི། །སྒོ་མང་རྟ་བབས་ཆོས་འཁོར་གདུགས་དང་བཅས། །མེ་ལོང་ཡེ་ཤེས་འོད་ཟེར་སྔོན་པོ་འཕྲོ། །ཞེ་སྡང་རྣམ་རྟོག་མ་ལུས་ཚར་བཅད་ནས། །དམྱལ་བའི་སྐྱེ་སྒོ་གཅོད་ལ་ཕྱག་འཚལ་བསྟོད། །ལྷོ་ཕྱོགས་རིན་ཅེན་ཡོད་པའི་ཞིང་ཁམས་ནས། །རིན་ཅེན་རིགས་ཀྱི་མཆོད་རྟེན་སེར་པོ་ནི། །སྒོ་མང་རྟ་བབས་ཆོས་འཁོར་གདུགས་དང་བཅས། །རིན་ཅེན་རིགས་ཀྱི་འོད་ཟེར་སེར་པོ་འཕྲོ། །སེར་སྣ་ལས་གྱུར་རྣམ་རྟོག་རྩད་ནས་གཅོད། །ཡི་དྭགས་སྐྱེ་སྒོ་གཅོད་ལ་ཕྱག་འཚལ་བསྟོད། །ནུབ་ཕྱོགས་སྣང་བ་མཐའ་ཡས་ཞིང་ཁམས་ནས། །པདྨ་རིགས་ཀྱི་མཆོད་རྟེན་དམར་པོ་ནི། །སྒོ་མང་རྟ་བབས་ཆོས་འཁོར་གདུགས་དང་བཅས། །པདྨ་རིགས་ཀྱི་འོད་ཟེར་དམར་པོ་འཕྲོ། །འདོད་ཆགས་ལས་གྱུར་རྣམ་རྟོག་རྩད་ནས་གཅོད། །མི་ཡི་སྐྱེ་སྒོ་གཅོད་ལ་ཕྱག་འཚལ་བསྟོད། །བྱང་ཕྱོགས་འབྲུག་སྒྲ་སྒྲོག་པའི་ཞིང་ཁམས་ནས། །ལས་ཀྱི་རིགས་ཀྱི་མཆོད་རྟེན་ལྗང་གུ་ནི། །སྒོ་མང་རྟ་བབས་ཆོས་འཁོར་གདུགས་དང་བཅས། །ལས་ཀྱི་རིགས་ཀྱི་འོད་ཟེར་ལྗང་གུ་འཕྲོ། །ཕྲག་དོག་ལས་གྱུར་རྣམ་རྟོག་རྩད་ནས་གཅོད། །བྱོལ་སོང་སྐྱེ་སྒོ་གཅོད་ལ་ཕྱག་འཚལ་བསྟོད། །དབུས་ཕྱོགས་བདེ་བ་ཆེན་པོའི་ཞིང་ཁམས་ནས། །དེ་བཞིན་རིགས་ཀྱི་མཆོད་རྟེན་དཀར་པོ་ནི། །འདུས་པ་ཆོས་དབྱིངས་འཁོར་ལོ་སྤུངས་པའི་ཚེ། །ཆོས་འཁོར་གདུགས་ལ་དྲིལ་བུ་གཡེར་(༦བ)
ཁ་འཁྲོལ། །དེ་བཞིན་རིགས་ཀྱི་འོད་ཟེར་དཀར་པོ་འཕྲོ། །གཏི་མུག་ལས་གྱུར་རྣམ་རྟོག་རྩད་ནས་གཅོད། །ལྷ་ཡི་སྐྱེ་སྒོ་གཅོད་ལ་ཕྱག་འཚལ་བསྟོད། །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཞེས་སོགས་ཀྱིས་ཤིས་པ་བརྗོད་ཅིང་མེ་ཏོག་འཐོར། དཀོན་ཅོག་གསུམ་གྱི་བདེན་པས་བདེན་པ་ཆེན་པོ་འདི་འགྲུབ་པར་གྱུར་ཅིག །ཅེས་ཕྱག་འཚལ་བ་དང་བཅས་ལན་གསུམ་བརྗོད། དེ་ལྟར་རིགས་ལྔའི་ཡེ་ཤེས་ཀྱི་ངོ་བོ་བྱིན་གྱིས་བརླབས་པ་ལ་དབང་བཀའ་རིན་ཅེན་ཕྲེང་བ་ལྟར་གསུང་སྔགས་སྒྲིབ་དབང་གི་ལྷ་བསྒོམ་དུ་རུང་བའི་དབང་ནི། ལྷ་བསྐྱེད་ཅིང་འཛབ་བཟླ་དགོས་པས། དཔལ་འབྲི་གུང་པ་ཆེན་པོ་ཆོས་ཀྱི་གྲགས་པས་མཛད་པའི་ལྕགས་སྡིག་ནག་པོའི་བཅའ་གཞི་རྒྱས་བསྡུས་གཉིས་ཀའི་མཆོད་རྟེན་གྱི་ལས་བྱང་ངག་སྒྲིགས་མའི་སྐྱབས་འགྲོ་ནས་བཟུང་ཨྱེ་རིང་ལ་ཨཱ་ལི་ཀཱ་ལི་དང་རྟེན་འབྲེལ་སྙིང་པོ་བཏགས་ནས་བཟླ་བའི་བར་དཀྱུས་བཞིན་བྱ། རོལ་མོའི་སྒྲ་དྲག་པོ་དང་བཅས་པ་ཡུལ་ཡངས་པ་ཡོད་ན་མཆོད་རྟེན་ལ་དངོས་སུ་བསྐོར་བ་དང་མེད་ན་ཡིད་ཀྱིས་བསྐོར་བ་བྱ། ལྷ་བཀའ་དོན་གྱི་དབང་བསྐུར་བ་ནི། ཙཀླི་རྣམས་རིམ་པར་ཐོགས་ཏེ། དཀྱིལ་འཁོར་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་མཆོད་རྟེན་གྱི་ལྷ་སོ་སོ་ལ་ཐིམ་པར་བསམས་ལ། ཧཱུཾ། ཆོས་ཀྱི་དབྱིངས་ལ་འཕོ་འགྱུར་མི་མངའ་ཡང་། །ཐབས་མཁས་ཐུགས་རྗེས་འགྲོ་བའི་སྐུར་སྤྲུལ་ཏེ། །ཡེ་ཤེས་ཁྲོ་བོ་ཚེ་བདག་ནག་པོ་ནི། །ཀླུ་འབུམ་གཉན་ཁྲི་ས་བདག་སྟོང་གི་གདན། ཕྱོགས་སྐྱོང་གཤིན་རྗེ་མ་ཧེ་བསྣོལ་བའི་སྟེང་། །དབུ་གསུམ་ཕྱག་དྲུག་ཞབས་བཞི་བརྐྱང་བསྐུམ་བཞུགས། །གཡས་དཀར་གཡོན་(༧ན)
དམར་དབུས་མཐིང་ནག་པོའི་ཞལ། །གཡས་པ་རྡོ་རྗེ་འཁོར་ལོ་རལ་གྲི་བསྣམས། །གཡོན་པ་བེ་ཅོན་གཏུན་ཤིང་སྡིགས་མཛུབ་འཕྱར། །ཆོས་ཀྱི་སྐུ་ལ་འཕོ་འགྱུར་མེད་པའི་དགོངས། །དབྱིངས་སུ་སྒྲོལ་བའི་དོན་གྱི་དབང་ཐོབ་ཤོག །ཨེ་ཀ་ཏེ་དུན་ཡ་མ་སྙིང་ཁྲག་རཱ་མ་ཙ་ཡ་ཨ་བྷི་ཥིཉྩ་ཧཱུཾ། བདུད་མོ་མཐིང་ནག་ཐོད་འཕྲེང་བརྒྱན། །ཡུམ་ཆེན་རང་བྱུང་རྒྱལ་མོ་ནི། །སྐུ་མདོག་ཡབ་དང་མཐུན་པ་ལ། །གཡས་པས་ཡབ་ཀྱི་མགུལ་ནས་འཁྱུད། །གཡོན་པ་དུང་དམར་གཙོ་ལ་སྟོབ། །འཁོར་བ་དབྱིངས་སྒྲོལ་དབང་ཐོབ་ཤོག །ཨེ་ཀ་ཧེ་དུན་མ་མ་ཏྲག་རཀྴ་ཀྲོ་ཏི་ཨ་བྷི་ཥིཉྩ་ཧཱུཾ། ཚེ་བདག་ཐུགས་ཀར་ཡ་མ་རཱ་ཛ་ནི། །སྐུ་མདོག་སྨུག་ནག་མཆོད་སྨུག་བཅག་པ་འདྲ། །གཡས་པ་གསེར་གྱི་འཁོར་ལོ་རྩིབས་བཞི་འཛིན། །གཡོན་པ་ཙིཏྟའི་ཕྲེང་བ་འདྲེན་པ་ཡིས། །དྲེགས་པ་དབང་དུ་སྡུད་པའི་དབང་ཐོབ་ཤོག །ཨེ་ཀ་ཧེ་དུན་ཡ་མ་རཱ་ཙ་ཨ་བྷི་ཥིཉྩ་ཧཱུཾ། ཡ་མའི་ཐུགས་ཀར་དྲེགས་པ་ཕྱག་རྡོར་ནི། །སྐུ་མདོག་མཐིང་ནག་ཨིནྡྲ་ནཱི་ལའི་མདོག །གཡས་པ་གསེར་གྱི་རྡོ་རྗེ་རྩེ་དགུ་འཛིན། །གཡོན་པ་ཙིཏྟའི་ཕྲེང་བ་སྨུག་ནག་འདྲེན། །གནོད་སྦྱིན་དབང་དུ་སྡུད་པའི་དབང་ཐོབ་ཤོག །ཨཱོཾ་བཛྲཱ་པཱ་ཎི་ཨ་བྷཱི་ཥིཉྩ་ཧཱུཾ། དྲེགས་པའི་ཐུགས་ཀར་རུས་སྦལ་ཁྱམས་ཁང་ནི། །སྨེ་བའི་ཐིག་ལེ་ཁྲག་དང་དུག་གིས་བརྒྱན། །ཡན་ལག་བཞི་ནི་ཤེལ་གྱི་མཆོད་རྟེན་བརྒྱན། །སྣང་སྲིད་ཟིལ་གྱིས་གནོན་པའི་དབང་ཐོབ་ཤོག །ཨེ་ཀ་ཧེ་དུན་མཧཱ་བྷིརྐ་ཨ་བྷི་ཥིཉྩ་ཧཱུཾ། མཁའ་ལྡིང་རྒྱལ་པོ་གྷ་རུ་ཌ། །གཤོག་གཡུ་མཚོན་ཆ་འཁོར་ལོར་གཏམས། །ཀླུ་གཉན་དཔའ་བོ་གདུག་པ་གཟིར། །བྱ་ཁྱུང་རྒྱལ་པོའི་(༧བ)
དབང་ཐོབ་ཤོག །ཨེ་ཀ་ཡ་མ་ཧཱ་གྷ་རུ་ཌ་ཨ་བྷི་ཥིཉྩ་ཧཱུཾ། ཁྱུང་མོ་སྨུག་ནག་ཀླུ་གཉན་ས་བདག་འདུལ། །སྟག་མ་རོ་ཟན་བཙན་དང་ས་བདག་འདུལ། །སེང་གེ་དཀར་མོས་རིག་འཛིན་ལས་ལ་འཛུད། །དུག་སྦྲུལ་ནག་པོས་ལས་ཀྱི་རྦོད་གཏོང་བཟློག །སྤྲུལ་པ་གྱད་གནོན་དབང་མཆོག་ཐོབ་པར་ཤོག །ཨེ་ཀ་མཧཱ་གྷ་རུ་ཌ་བྱ་ཏྲི་ཙནྡྷ་སིདྷ་རོ་ཧེ་ཧ་ལ་ཨ་བྷི་ཥིཉྩ་ཧཱུཾ། སྤྲུལ་སྐུ་བྱེ་བ་དགུ་རིང་དང་། །གསུང་སྤྲུལ་ཨཱཪྻ་མ་རུ་དང་། །ཡ་མ་གཏུམ་པོ་མགོ་དགུ་པའི། །མནན་བཤིག་བསད་ལས་དབང་ཐོབ་ཤོག །ཨེ་ཡ་མ་དུ་ཤ་ཧཱུཾ། ཡ་མ་རཱཀྴ་ཧཱུཾ། ཡ་མ་ཡཀྴ་ཧཱུཾ་ཨ་བྷི་ཥིཉྩ་ཧཱུཾ། མཆོད་རྟེན་ཡོངས་རྫོགས་བང་རིམ་དང་པོ་ལ། །ཚེ་སྲོག་ཀུན་འཛིན་གཤེད་ཆེན་བཞི་པོ་ནི། །སྐུ་མདོག་མི་འགྱུར་དེ་བཞིན་རིགས་དང་མཐུན། །གཡས་པ་བེ་ཅོན་གཡོན་པ་འཁོར་ལོ་འཛིན། །དྲེད་དང་དོམ་དང་དྲེལ་རྟ་རྔ་མོ་བཅིབས། །དམ་ཉམས་དགྲ་བོའི་ཚེ་སྲོག་སྡུད་པ་དང་། །མ་མོ་ལས་ལ་བསྐུལ་བའི་དབང་ཐོབ་ཤོག །ཡ་མ་རཱ་ཙ་ས་དོ་མེ་ཡ་སོགས་ཀྱི་མཇུག་ཏུ་ཨ་བྷི་ཥིཉྩ་ཧཱུཾ། མཆོད་རྟེན་ཡོངས་རྫོགས་བང་རིམ་གཉིས་པ་ལ། །ཚེ་བདག་ལས་མགོན་མོན་པ་བཞི་པོ་ནི། །དུང་གི་མོན་པ་སེང་གེའི་མགོ་ཅན་དང་། །ལྕགས་ཀྱི་མོན་པ་སྟག་གི་མགོ་ཅན་དང་། །བསེ་ཡི་མོན་པ་དྲེད་ཀྱི་མགོ་ཅན་དང་། །གསེར་གྱི་མོན་པ་ཁྱུང་གི་མགོ་ཅན་བཞི། །གཡས་པ་གྲི་གུག་གཡོན་པ་ཙིཏྟ་ཟ། །རུ་དྲ་རྡུལ་དུ་བརླག་པའི་དབང་ཐོབ་ཤོག །ཨེ་ཀ་ཡ་མ་མོནྟ་ཨ་བྷི་ཥིཉྩ་ཧཱུཾ། མཆོད་རྟེན་ཡོངས་རྫོགས་བང་རིམ་གསུམ་པ་ལ། །ཚེ་བདག་ནག་པོ་ཕྱི་ཡི་གཤེད་བཞི་ནི། །ཧེ་ལེ་ཁྱབ་བྱེད་སོ་འདར་འཁྲིགས་པ་དང་། །(༨ན)
ནག་པོ་འཛུམ་མེད་རལ་པ་ཆར་དགུ་བཞི། །སྐུ་མདོག་མི་འགྱུར་དེ་བཞིན་རིགས་དང་མཐུན། །གཡས་པའི་ཕྱག་ན་གཅོད་པའི་འཁོར་ལོ་འཛིན། །གཡོན་པ་འཇོམས་བྱེད་བེ་ཅོན་བར་སྣང་འཕྱར། །དགྲ་བགེགས་ཕུང་པོ་གཞོམ་པའི་དབང་ཐོབ་ཤོག །ཨེ་ཀ་ཡ་མ་བདུད་ཏྲཾ་ཀཱ་ལ་ཨ་བྷི་ཥིཉྩ་ཧཱུཾ། མཆོད་རྟེན་ཡོངས་རྫོགས་བང་རིམ་བཞི་པ་ལ། །ཚེ་བདག་ལས་མཁན་འཆི་བདག་བཅུ་གཉིས་ནི། སྐུ་མདོག་མ་ངེས་སོ་སོར་གསལ་བ་ལ། །གཡས་པ་འཁོར་ལོ་གཡོན་པ་བེ་ཅོན་འཛིན། །རུ་དྲའི་ཚེ་སྲོག་སྡུད་བའི་དབང་ཐོབ་ཤོག །ཨེ་ཀ་ཡ་མ་ཀྲིཥྞ་ཛ་མ་རི་ཡ་མ་ཀརྨ་ཨ་བྷི་ཥིཉྩ་ཧཱུཾ། མཆོད་རྟེན་ཡོངས་རྫོགས་རི་རབ་སྒོ་བཞི་ལ། །དཀར་པོ་སྙིང་འབྱིན་མགོན་པོ་ནག་པོ་དང་། །ཡབ་རྗེ་ནག་པོ་སྐུ་མཆོག་དམར་པོ་བཞི། །གཡས་པས་འཁོར་ལོ་གཡོན་པ་དགྲ་སྟ་འཕྱར། །ལྟ་སྤྱོད་ཚད་མེད་བཞི་ཡི་དོན་རྟོགས་ནས། །ལྷ་ཚོགས་ལས་ལ་བསྐུལ་བའི་དབང་ཐོབ་ཤོག །ཛཿཧཱུཾ་བཾ་ཧོཿཨབྷི་ཥིཉྩ་ཧཱུཾ། ཐུགས་བུམ་པའི་དབང་ནི། རྣམ་རྒྱལ་བུམ་པ་བཏེགས། ཧཱུཾ། སྣང་སྟོང་གཉིས་མེད་རྣམ་རྒྱལ་བུམ་པ་ནི། ཁ་རྒྱན་ནམ་མཁའ་འཁོར་ལོ་རྩིབས་བརྒྱད་ལ། །ཞབས་རྒྱན་ས་གཞི་པདྨ་འདབ་བརྒྱད་ཡིན། །བར་གྱི་ཡོན་ཏན་བཀྲ་ཤིས་རྫས་བརྒྱད་འཕྲོས། །བུམ་པ་རྣམ་དག་གཞལ་ཡས་དབང་བསྐུར་བས། །མི་རྟོག་ཆོས་ཀྱི་དབྱིངས་ཀྱི་དབང་ཐོབ་ཤོག །བུམ་པའི་དར་དཔྱངས་ལས་འོད་གསལ་སྤྲོ་བསྡུ་ཅོད་པན་གྱི་དབང་ནི། ཅོད་པན་ལྷ་གྲངས་དང་མཉམ་པ་གསར་དུ་འདོགས་པའམ་སྔར་ནས་བཏགས་ཟིན་པའི་དབང་དུ་བྱས་ན་འཇུག་པ་བདེ་(༨བ)
བས་དེ་ལ་དམིགས་ཏེ་ཅོད་པན་ཐོགས་ལ། ཧཱུཾ། ཅོད་པན་རིན་ཅེན་ལྷ་ཡི་དར་དཔྱངས་འདི། །ནས་འབྲས་འབྲུ་ཡི་ཕྲེང་བརྒྱུས་ནས། །ཐེག་པ་རིམ་དགུ་འཛེག་པའི་རྟགས། །འདི་ལ་དར་གྱི་འཕུར་ལྕེ་འཕྲོ་བ་ནི། །དུས་གསུམ་སངས་རྒྱས་མཆོད་པ་འབུལ་བའི་རྟགས། །རིན་ཅེན་ཅོད་པན་འདི་ཡི་དབང་བསྐུར་བས། །རབ་ཏུ་དགའ་བའི་ས་ལ་བགྲོད་པར་ཤོག །ཅོད་པན་གདགས་ཚུལ་བྱ། དེ་ནས་མདུན་བསྐྱེད་ཀྱི་དཀྱིལ་འཁོར་ལ་མཆོད་བསྟོད་བཤགས་པ་བྱ། རྡུལ་ཚོན་ཡིན་ན་གཤེགས་གསོལ། རས་བྲིས་ཡིན་ན་ཙཀླི་དང་ལྷན་དུ་བརྟན་བཞུགས། །མཇུག་ཏུ་སྨོན་ལམ་ཤིས་བརྗོད་སོགས་བྱས་ཏེ་ལས་ཀྱི་རྗེས་མི་མངོན་པར་བསྡུ། མཆོད་རྟེན་ལ་བརྟན་བཞུགས་ཀྱི་སྒྲུབ་པ་ཞག་གསུམ་བྱ་བ་ནི། ཨྱེ་རིང་གི་རཀྴ་མོནྟའི་མཇུག་ཏུ་སུ་པྲ་ཏིཥྛ་བཏགས་ནས་ཐུན་བཞིའམ་དྲུག་ཏུ་བཅད་ནས་ཅི་ནུས་བཟླ་ཞིང་ཐུན་མཐར་ཡང་རཀྴ་མོནྟའི་མཚམས་སུ་རྟེན་འབྲེལ་སྙིང་པོ་བཏགས་པ་ཉེར་གཅིག་ཙམ་བཟླ་ཞིང་། ཕྱོགས་བཅུ་ན་བཞུགས་པ་ཞེས་སོགས་དང་བཅས་མེ་ཏོག་མཐོར་བ་ནི་མཆོད་རྟེན་དམ་ཡེ་དབྱེར་མེད་ནུས་ལྡན་དུ་བྱ་བའི་རབ་གནས་ཀྱི་མན་ངག་གོ །བདག་མདུན་ལ་ཚོགས་མཆོད་འབུལ་ཞིང་བདག་བསྐྱེད་ཀྱི་འཇུག་ཆོག་སྤྱི་ལྟར་བྱའོ། །བཅས་ཆོག་མཆོད་རྟེན་ཡོད་ཅེས་སྙན་པའི་རྔ། །ཕྱོགས་བྲལ་རྣ་ལུང་མཛེས་བྱེད་ཆེས་མང་ཡང་། །བྱིན་རླབས་ནུས་ལྡན་རབ་ཏུ་གནས་པའི་ཐབས། །ཤེས་པའི་སྔགས་འཆང་ཉིན་མོའི་སྐར་མ་ཙམ། །གདམས་པའི་མན་ངག་ཚང་བ་མཐོང་བ་དཀོན། །མཐོང་ཡང་ཡིག་ནག་ཐུག་ཕྲད་འཇོག་པ་མང་། །ཤེས་པར་(༩ན)
རློམ་ཡང་འཁྲུགས་སྡེབ་གནད་ལ་རྨོངས། །སྔ་འགྱུར་བསྟན་ཡང་མིང་བཏགས་ཙམ་དུ་ཟད། །སྐྱེ་སྤྲུལ་མིང་གིས་དཀའ་བའི་གནད་མི་རྟོགས། །རིགས་རུས་ཙམ་གྱིས་མཐུ་ནུས་ག་ལ་ཞིག །འཆལ་སྤྱོད་ཆང་བཟི་གྲུབ་ཐོབ་ཞིག་པོ་མིན། །ངུར་སྨྲིག་མཛེས་ཀྱང་གཞན་སྣང་བསྒྱུར་ཐབས་ཙམ། །རི་མགོ་ཁ་བས་གཏུམས་ལ་ཏེ་སེ་ཞེས། །གྲགས་སྐམ་ཙམ་མིན་དོན་ལྡན་རིག་སྔགས་འཆང་། །འབྲི་གུང་དབུར་སྨྱོན་ཟུར་ཆེན་པདྨ་དབང་། །དྲིན་ལས་སྨྲ་བའི་གདེངས་ཚད་ཅུང་ཟད་རྙེད། །གཏེར་གཞུང་དངོས་དོན་རང་བཟོས་མ་བསླད་ཅིང་། །དམ་པའི་ཕྱག་བཞེས་ལུང་རིགས་དང་འབྲེལ་བའི། །མཆོད་རྟེན་རབ་གནས་བྱིན་རླབས་ཉི་མའི་གཟི། །རབ་འབར་ཡིད་སྲུབས་མུན་པ་ཕ་མཐར་བསྐྲད། །དགེ་དེས་འཇམ་དཔལ་ཆོས་སྐུ་བདེ་ཆེན་ཀློང་། །རང་རིག་ལོངས་སྐུ་ཕྱག་རྒྱ་ཟིལ་གནོན་དུ། །བཞེངས་ཏེ་སྣ་ཚོགས་སྤྲུལ་སྐུས་མཁའ་མཉམ་འགྲོ། །འདྲེན་པའི་དེད་དཔོན་ཆེན་པོར་བདག་འགྱུར་ཤོག །ཅེས་འཇམ་དཔལ་ཚེ་བདག་ནག་པོའི་མཆོད་རྟེན་བཅས་ཆོག་གི་རབ་གནས་བྱིན་རླབས་ཉི་མའི་གཟི་འབར་ཞེས་བྱ་བ་འདི་ནི་མེ་འབྲུག་ལོ་མཆོད་རྟེན་གསར་བཞེངས་ཀྱི་ཚེ་གལ་པོ་ཆེར་མཐོང་ནས་དབང་བཀའ་རིན་ཅེན་འཕྲེང་བའི་ལྷ་དབང་གི་ཚིག་འགའ་ཞིག་མ་རྙེད་པ་མུ་ཏིག་ཕྲེང་བ་སོགས་ནས་བཀང་སྟེ་ཟ་ཧོར་གྱི་སྔགས་འཆང་ཟིལ་གནོན་བཞད་པ་རྩལ་གྱིས་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་གནས་བཙུན་འཇམ་དབྱངས་བསྟན་འཛིན་ནོ།། །།སརྦ་མངྒ་ལཾ།།