འཇམ་དཔལ་ཚེ་བདག་ནག་པོའི་ལས་མཐའ་ཡང་བཟློག་མེའི་སྤུ་གྲིའི་ལས་བྱང་རང་གཤེད་དབབ་པ་རྡོ་རྗེའི་ཕ་ལམ།
འཇམ་དཔལ་ཚེ་བདག་ནག་པོའི་ལས་མཐའ་ཡང་བཟློག་མེའི་སྤུ་གྲིའི་ལས་བྱང་རང་གཤེད་དབབ་པ་རྡོ་རྗེའི་ཕ་ལམ་ཞེས་བྱ་བ་བཞུགས་སོ། །
དཔལ་ལྡན་གདོད་མའི་སངས་རྒྱས་ཀུན་ཏུ་བཟང་། །སུམ་ལྡན་རྡོ་རྗེ་འཛིན་པའི་རྣམ་རོལ་ཅན། །ཆོས་ཀྱི་རྒྱལ་པོ་དཔལ་འབྱོར་ལྷུན་གྲུབ་ལ། །གུས་པས་འདུད་དོ་བྱང་ཆུབ་བར་དུ་སྐྱོངས། །དེ་ལ་འདིར་ཁྲོ་བོའི་དབང་པོ་དུས་ཀྱི་དགྲ་ཆེན་པོའི་ལས་ཚོགས། ཕྱི་སྐོར་ལྕགས་འདྲ། གསང་སྐོར་གནམ་ལྕགས་ཐོག་མེའི་སྐོར་གསུམ་གྱི་ནང་ཚན་དུ་མི་གཏོགས་པའི། གཅེས་པ་བརྒྱད་དང་ལྡན་པ་འདི། །ཀུན་ལ་ཡོད་ན་ངོ་མཚར་ཆུང་། །ཞེས་གནུབས་བན་གྱི་ཆེ་བ་བརྒྱད་ལྡན་གྱི་མན་ངག །དུམ་པ་ཞང་ཁྲོམ་གྱིས་ལྷོ་བྲག་མཁོ་མཐིང་ལྷ་ཁང་ནས་བཞེས་པའི་ཟབ་གཏེར་ཡང་བཟློག་ནག་པོ་མེའི་སྤུ་གྲིའི་འཕྲིན་ལས་ངག་འདོན་གོ་རིམ་བཞིན་འཁྱེར་བདེ་བ་བརྗོད་པར་བྱའོ། །དེང་སང་ཚེ་བདག་གསུམ་གྱི་རྣམ་དབྱེ་ཙམ་ཡང་མི་ཤེས་པའི་འདི་ཁོ་ནས་ཚེ་བདག་མཁན་པོར་རློམ་པ་མང་དུ་མཆིས་ཀྱང་། མནན་བསྲེག་འཕང་གསུམ་སོགས་འདིའི་ལག་ལེན་དཔྱིས་ཕྱིན་པར་ལུགས་གཞན་རྣམས་ལ་བལྟོས་དགོས་ཤིང་། རིགས་འཛིན་མངའ་རིས་པ་ཡབ་སྲས་ཀྱི་བཀའ་སྲོལ་དྲི་མ་མེད་པ་ཁོ་བོའི་བླ་མའི་བར་དུ་བྱོན་པའི་ལུགས་འདི་ལ། ཚེ་བདག་ཕྱག་རྒྱ་ཟིལ་གནོན་གྱི་(༢ན)
དབང་བཞི་ཐོབ་ཅིང་། དཀྱིལ་འཁོར་ཡོངས་རྫོགས་ཀྱི་འཕྲིན་ལས་སྔོན་དུ་འགྲོ་བ་ཞིག་གིས་ཉམས་སུ་ལེན་པའི་ཕྱག་བཞེས་ཡོད་པས། འདི་འཕྲིན་ལས་ཐུན་མོང་མ་ཡིན་པ་རྣམས་མ་གཏོགས། ཐུན་མོང་བ་རྣམས་ལས་བྱང་གནམ་ལྕགས་འཁོར་ལོ་ལྟར་འདྲི་བར་བྱའོ། །དེ་ལ་ཐོག་མར་སྐྱབས་འགྲོ་ནི། བདག་དང་མཁའ་མཉམ་ལུས་ཅན་མ་ལུས་ཀུན། །དེང་ནས་བཟུང་སྟེ་བྱང་ཆུབ་སྙིང་པོའི་བར། །དཀོན་མཆོག་རིན་ཆེན་གསུམ་ལ་སྐྱབས་འགྲོ་ཞིང་། །རྒྱ་ཆེན་བྱང་ཆུབ་མཆོག་ཏུ་སེམས་མཆོག་བསྐྱེད། །ཚོགས་ཞིང་ནི། མདུན་དུ་རིན་ཆེན་ཁྲི་པད་ཉི་ཟླའི་སྟེང་། །བཅོམ་ལྡན་ཕྱག་རྒྱ་ཟིལ་གནོན་ཅོད་པན་དུ། །ཀུན་འདུས་རྡོ་རྗེ་སློབ་དཔོན་བཞུགས་པ་ལ། །ཡི་དམ་ཡེ་ཤེས་གཉིས་སུ་མེད་པར་གྱུར། །ཇི་སྙེད་ཡིད་ཀྱི་ལྷ་ལམ་རབ་ཡངས་པར། །ཀུན་བཟང་མཆོད་པའི་ཆུ་འཛིན་རབ་འཁྲིགས་ཤིང་། །ཐུགས་རྗེའི་ཆར་གྱིས་སྡིག་ལྟུང་དྲི་མ་འཁྲུད། །དགེ་ཚོགས་བྱང་ཆུབ་འབྲས་བུ་རྒྱས་གྱུར་ཅིག །ཕྱི་ནང་གི་མཆོད་རྫས་བྱིན་གྱི་བརླབ་པ་ནི། རང་ཉིད་ཡི་དམ་ལྷར་གསལ་ཐུགས་ཀ་ནས། །ཡེ་ཤེས་འབྱུང་གསུམ་དག་གིས་ས་བོན་རྣམས། །ཕྱོགས་བཅུར་འཕྲོས་པས་སྨན་རཀ་གཏོར་གསུམ་གྱི། །མ་དག་སྐྱོན་སྦྱངས་ཟག་མེད་བདུད་རྩིར་གྱུར། ཨཱོཾ་(༢བ)
ཨཱཿཧཱུཾ་མ་ཧཱ་པཉྩ་ཨ་མྲྀ་ཏ་ཛྭ་ལ་མཎྜ་ལ་ཧཱུཾ། མ་ཧཱ་བྷ་ལིཾ་ཏ། མ་ཧཱ་རཀྟ་ཧཱུཾ་ཧྲཱིཿཋ། སྲུང་འཁོར་ལྷ་དང་བཅས་པར་བསྐྱེད་པ་ནི། ཨཱོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅་ཧཾ། ཆོས་རྣམས་མ་ལུས་སྟོང་པ་ཉིད་དུ་གྱུར། དྷརྨ་དྷ་ཏུ་ཨཱཿགྲངས་མེད་ལུས་ཅན་ཚོགས་རྣམས་བསྒྲལ་བའི་སླད། བོ་དྷི་ཙིཏྟ་ཧཱུཾ། རང་སེམས་གདོད་མའི་མགོན་པོ་ཧཱུཾ་ཡིག་མཐིང་། །དེ་ལས་འཕྲོས་པའི་རཾ་ཡཾ་ཁཾ་གསུམ་གྱིས། །དངོས་འཛིན་བསྲེགས་གཏོར་སྦྱངས་དཀྱུས་ངང་ཉིད་ལས། །ཧཱུཾ་ལས་ཨེ་ཡཾ་རཾ་བཾ་ལཾ་རྣམས་ནི། །རིམ་གྱུར་ནམ་མཁའ་རླུང་མེ་ཆུ་ས་ལྔ། །བརྩེགས་སྟེང་བྷྲུཾ་དཀར་འོད་ཟེར་ལྔ་ལྡན་དང་། །དབྱངས་གསལ་ངོ་བོ་རྡོ་རྗེའི་ཕ་ལམ་ཅན། །བྱང་ཆུབ་མཆོད་རྟེན་གདན་ཁྲི་བང་རིམ་གསུམ། །རི་རབ་བང་རིམ་བཞི་པ་བུམ་པ་བྲེ། །ཆོས་འཁོར་གདུགས་ཏོག་ཉི་ཟླ་ནོར་བུར་བཅས། །འོད་ཟེར་ཀུན་ཁྱབ་སྟོང་གསུམ་ཁེངས་པར་གྱུར། །བུམ་ནང་ཧཱུཾ་ལས་གསེར་གྱི་རྡོ་རྗེ་ནི། །རྒྱ་གྲམ་དྲ་མིག་རྡོ་རྗེའི་ཚ་ཚ་འཁོལ། །ལྟེ་བ་གའུ་ཁ་སྦྱོར་ལྟ་བུའི་དབུས། །པད་ཉིའི་སྟེང་དུ་ཤེལ་རྡོར་རྩེ་ལྔ་པ། །རྭ་བཅུ་འོད་ཟེར་ལྔས་མཚན་ལྟེ་བར་ཧཱུཾ། །དེ་ལས་འོད་འཕྲོས་ཡ་མ་ཏི་ར་བཾ། །ཞེས་པའི་འཕྲོ་འདུས་གཤིན་རྗེ་མ་ཧེ་ཟུང་། །ཉི་ཟླ་པདྨ་བརྩེགས་པའི་གདན་སྟེང་དུ། །དྷུ་ཡིག་ཧཱུཾ་ནག་འཕྲོ་འདུས་གནམ་ལྕགས་ཀྱི། །རྡོ་རྗེ་རྩེ་དགུ་ཧཱུཾ་ཡིག་མཐིང་ཁས་མཚན། །འོད་ཟེར་རབ་འཕྲོས་སྔགས་ཀྱི་རྣམ་པར་གྱུར། །ཨཱོཾ་ཨཀྲོ་ཏེ་ཀ་ཡ་མཱནྟ་ཀ་ཧཱུཾ་ཕཊ། སྔགས་འཕྲེང་ཡོངས་གྱུར་རང་ཉིད་སྐད་ཅིག་གིས། ཁྲོ་རྒྱལ་ཀུན་ཀྱང་སྐྲག་བྱེད་གཤིན་རྗེའི་གཤེད། །འཇམ་དཔལ་ཚེ་བདག་ཕྱག་རྒྱ་ཟིལ་གནོན་སྐུ། །རབ་ཁྲོས་མཐིང་ནག་དུག་ཆེན་འཁྱིལ་འདྲའི་མདོག །ཞལ་གསུམ་ཕྱག་དྲུག་ཞབས་བཞི་དོར་སྟབས་བསྒྲད། །གཡས་དཀར་གཡོན་དམར་མུན་ལྟའི་(༣ན)
རྩ་བའི་ཞལ། །ཕྱག་དྲུག་འཁོར་ལོ་རལ་གྲི་རྡོ་རྗེ་འཕེན། །ལྕགས་ཀྱུ་གཏུན་ཤིང་སྡིགས་མཛུབ་མེ་དཔུང་འཕྲོ། །ཞབས་བཞི་གཡས་བརྐྱང་གཡོན་བསྐུམ་ཚུལ་གྱིས་བཞུགས། །ལྷ་ལམ་ཁྱབ་པའི་རྡོ་རྗེའི་གཤོག་པ་སོགས། །དཔལ་གྱི་ཆས་བརྒྱད་དུར་ཁྲོད་རྒྱན་རྣམས་ཀུན། །བཀོད་ལེགས་བགྲང་ཡས་འཕྱང་འཕྲུལ་ལེགས་སྤུད་ཅིང་། །འཇིགས་རུང་གར་དགུའི་ཉམས་ཀྱི་རྣམ་འགྱུར་ཅན། །ཡེ་ཤེས་མེ་དཔུང་འབར་བའི་དབུས་ན་བཞུགས། །ཐུགས་ཀར་བྷྲུཾ་ལས་གསེར་འཁོར་རྩིབས་བཞིའི་སྟེང་། །འཇམ་དཔལ་སེར་པོ་ཕྱག་གཡས་རལ་གྲི་དང་། །གཡོན་པའི་མཐེབ་སྲིན་ཐུགས་ཀར་ཨུཏྤ་ལའི། །ཡུ་བ་ནས་འཛིན་འདབ་མ་སྙན་གྱི་ཐད། །རབ་རྒྱས་སྟེང་ན་ཤེར་ཕྱིར་གླེགས་བམ་ཅན། །མི་ཕྱེད་སྐྱིལ་ཀྲུང་རིན་ཆེན་རྒྱན་གྱིས་སྤྲས། །ཞི་ཞིང་འཛུམ་ལྡན་རལ་པའི་ཟུར་ཕུད་ཅན། །སྲུང་བའི་ཚུལ་གྱིས་བཞི་གའང་ཞལ་ནང་གཟིགས། །འཁོར་ལོའི་ལྟེ་བར་པད་ཉི་ཟླ་སྟེང་དུ། །སྣ་ཚོགས་རིན་ཆེན་མཆོད་རྟེན་བུམ་པར་ཡང་། །སུམ་རྩེགས་གདན་ལ་ཧཱུཾ་ལས་རྡོ་རྗེ་སེར། །ཡར་གྱི་རྭ་ལྔ་བདེ་གཤེགས་རིགས་ལྔ་ཡབ། །མར་ལྔ་ཡུམ་གྱིས་ལེགས་པར་མཚན་པ་ཡི། །ལྟེ་བར་དབྱངས་གསལ་ཞུ་བའི་ཉི་ཟླའི་གུར། ཁ་སྦྱར་རྡོ་རྗེའི་ལྟེ་བར་ཧཱུཾ་ཡིག་ནང་། །བསྲུང་བྱར་བཅས་པ་བསྲུང་བའི་སྔགས་འཁོར་དང་། །ཨཱ་ལི་གཡས་དང་ཀཱ་ལི་གཡོན་སྐོར་གྱུར། །ཁྱུང་ནག་རྡོ་རྗེའི་མཆུ་ལ་ཉི་ཟླའི་སྤྱན། །གནམ་ལྕགས་རྭ་སྟེར་སྤུ་གྲིའི་སྒྲོ་གཤོག་དང་། །སྤུ་ཕྲན་མཚོན་ཆ་ཁྱུང་ནག་རྡོ་རྗེས་གཏམས། །དཀར་ནག་སྦྲུལ་ཟ་སྤྱི་བོའི་གཙུག་ཏུ་ལྡིང་། །ཐུགས་ཀའི་འོད་ཟེར་རྩེ་ལ་བྷྱོ་སྨུག་ནག །འཕྲོ་འདུ་ཡོངས་གྱུར་ནག་མོ་ཁྲག་མིག་མ། །སྨུག་(༣བ)
ནག་གཅེར་བུ་རྒྱན་མེད་འཇིགས་གཟུགས་ཅན། །ཞལ་གཅིག་ཕྱག་གཡས་ལྕགས་ཀྱུ་མཁའ་ལ་འཕྱར། །གཡོན་པ་ཐུགས་ཀར་བནྡྷ་ཁྲག་གང་འཛིན། །ཞབས་གཉིས་དོར་སྟབས་མ་མོ་བྱེ་བས་བསྐོར། །སླར་ཡང་ཐུགས་ཀའི་འོད་ཟེར་རྩེ་ལ་ཡ། །དམར་ནག་ཡོངས་གྱུར་ཡ་མ་རཱ་ཙ་ནི། །ཞལ་གཅིག་ཕྱག་གཉིས་གཡས་པ་རལ་གྲི་དང་། །གཡོན་པ་ཙིཏྟ་འདྲད་ཅིང་ཞིང་ཆེན་གསོལ། །ཞབས་གཉིས་སར་བརྡེབ་སྡེ་བརྒྱད་ཡོངས་ཀྱིས་བསྐོར། །གཉིས་པ་མེ་དཔུང་འབར་བའི་དབུས་ན་བཞུགས། །ཐུགས་ནས་རཾ་སྤྲོས་ཧཱུཾ་བྷྱོ་ཁྲོ་ཁྲོ་མོས། །སྲུང་བའི་གུར་རྣམས་བར་མཚམས་མེད་པར་གཏམས། །མཆོད་རྟེན་ཕྱི་རོལ་བྷྲུཾ་ལས་གསེར་གའུའི། །ནང་བཞུགས་དེ་ནས་ཕྱི་རོལ་རིམ་པ་བཞིན། །ཧཱུཾ་སྥ་ར་ཎ་ཕཊ། ཁྲོ་སྔོན་རྡོ་རྗེ་ཐོགས་པ་རྡོ་རྗེའི་གུར། །ཨཱོཾ་སྥ་ར་ཎ་ཕཊ། ཁྲོ་དཀར་འཁོར་ལོ་ཐོགས་པ་འཁོར་ལོའི་གུར། །ཏྲ་མ་སྥ་ར་ཎ་ཕཊ༔ ཁྲོ་སེར་ནོར་བུ་ཐོགས་པ་ནོར་བུའི་གུར། །ཧྲིཿསྥ་ར་ཎ་ཕཊ༔ ཁྲོ་དམར་པདྨ་ཐོགས་པ་པདྨའི་གུར། །ཨཱཿསྥ་ར་ཎ་ཕཊ༔ ཁྲོ་བོ་སྣ་ཚོགས་རྡོ་རྗེ་འཛིན་པས་གཏམས། །ཏིཀྞ་གཡོན་ཕྱོགས་དྲག་འཁོར་རལ་གྲིའི་འཁོར་ལོ་ཡིས། །གནོད་བྱེད་མ་ལུས་ཕྱི་མར་བཏུབས་པའི་གུར། །ཡཾ་སྥ་ར་ཎ་ཕཊ༔ ཁྲོ་བཾ་རླུང་གཡབ་ཐོགས་པ་རླུང་གི་གུར། །རཾ་ཛ་ལ་མཎྜ་ལ་ཕཊ༔ ཁྲོ་དམར་མེ་དཔུང་ཐོགས་པ་མེ་འབར་གུར། །བཾ་ཏིཀྵ་མཎྜ་ལཿ ཁྲོ་དཀར་ཆུ་ཞགས་ཐོགས་པ་ཆུ་འཁྲུག་གུང་། །ལཾ་ཏིཀྞ་མཎྜ་ལ༔ རྒྱ་གྲམ་ནང་ཀུན་ཁྲོ་སེར་རི་ཐོགས་གུར། །ཨེ་མཎྜ་ལ༔ ནམ་མཁའ་ལྕགས་གུར་ནང་དུ་ཁྲོ་བོ་ནག །སྣ་ཚོགས་མཚོན་ཆ་ཆར་ལྟར་འབེབས་པའི་གུར། །ཀུན་ཀྱང་སྲ་མཁྲེགས་སེར་བུའི་རླུང་ཙམ་ཡང་། །མི་ཐར་རྡོ་རྗེ་སྤུ་གྲི་རེག་གཅོད་རླུང་། །མེ་དཔུང་(༤ན)
ཆུ་གྲི་མཚོན་ཆ་འཁོར་ལོ་སོགས། །འཚུབ་མ་དྲག་པོའི་འོད་ཟེར་འཕྲོས་པ་ཡིས། །དགྲ་བགེགས་ཐམས་ཅད་ཐལ་བའི་རྡུལ་དུ་གྱུར། །རང་སྔགས་དབྱངས་གསལ་འཕྲེང་འཁྲིགས་དགྲ་བགེགས་ཀུན། །སོད་ཅེས་སྟོང་ཉིད་རང་སྒྲ་སྒྲོག་པའི་གུར། །ཐུན་ཕུར་ལས་གཤིན་དམར་ནག་ཞལ་གཅིག་ལ། །ཕྱག་གཡས་བེ་ཅོན་བརྡེག་ཚུལ་གཡོན་ཐུན་ཐག །འཛིན་པས་དགྲ་བགེགས་དོན་སྙིང་འདྲད་ཚུལ་ཅན། །སྟག་ལྤགས་ཤམ་ཐབས་ཞབས་གཉིས་བརྐྱང་བསྐུམ་བཞུགས། །སྙན་གསན་དབབ་པ་ནི། སྤྲོས་བྲལ་བདེ་ཆེན་ཆོས་དབྱིངས་ལྷ་ལམ་ལས། །གཟུགས་སྐུ་ཕྱག་རྒྱ་ཟིལ་གནོན་ཆུ་འཛིན་ཆེ། །རྩེ་གཅིག་གདུང་བའི་དབྱར་དུས་ན་ཆུང་དང་། །སྙན་ཚིག་རླུང་གི་བསྐུལ་ལོ་དབྱིངས་ནས་བཞེངས་བཛྲ་ས་མ་ཡ་ཛཿ སྤྱན་འདྲེན་པ་ནི། གྲངས་མེད་ཡེ་ཤེས་ལྷ་ཡི་གྲུ་ཆར་ཚོགས། །འགྱུར་མེད་ཐུགས་རྗེས་དུས་ལས་མ་གཡེལ་བར། །དམ་ཚིག་རྟེན་གྱི་ཟླ་བའི་མ་མ་ལ། །ཏིང་འཛིན་སྔགས་ཀྱིས་མཛའ་བའི་ལྕུགས་མར་གྱུར། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། འཇིག་རྟེན་དྲེགས་པ་མ་ཧེ་ལྷུན་པོའི་སྟེང་། །པད་ཉི་རྣམ་པར་རྒྱལ་བའི་ཁང་བཟང་དུ། །འཇམ་དཔལ་གཤིན་རྗེ་མཆོད་སྦྱིན་བརྒྱ་པ་གང་། །འགྱུར་མེད་རྡོ་རྗེ་ལྟ་བུར་རྟག་བཞུགས་གསོལ། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། ཏིཥྛ་བཛྲ། ཕྱག་བྱ་བ་ནི། དུས་གསུམ་རྒྱལ་བ་ཀུན་གྱིས་ནུས་མཐུའི་འཕྲུལ། །གཅིག་བསྡུས་ཁྲོ་རྒྱལ་གཤིན་རྗེ་གཤེད་པོ་ཡི། །དྲག་པོ་ཨེ་ཡི་དཀྱིལ་འཁོར་ལྷ་ཚོགས་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། ཨ་ཏི་པུ་ཧོཿ པྲ་ཏི་ཛ་ཧོ༔ ནང་གི་མཆོད་པ་ནི། མྱོང་གྲོལ་དམ་རྫས་དང་སྦྱར་ཨ་མྲྀ་ཏ། །ཡེ་ཤེས་བདུད་རྩིའི་ངོ་བོར་བྱིན་བརླབས་འདི། །རྩ་(༤བ)
བརྒྱུད་བླ་མ་ཡི་དམ་ལྷ་ཚོགས་དང་། །བསྟན་སྲུང་རྒྱ་མཚོའི་ཚོགས་དང་བཅས་ལ་འབུལ། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། མ་ཧཱ་པཉྩ་ཨ་མྲྀ་ཏ་ཁཱ་རཾ་ཁཱ་ཧི། དངོས་གྲུབ་བླང་བ་ནི། ཨཱོཾ་ཨཱཿཧཱུཾ། སླར་ཡང་རིགས་འཛིན་སྨྲ་བའི་འབབ་སྟེགས་ཁར། །བདེ་ཆེན་བདུད་རྩིའི་རོ་མཆོག་མྱང་བ་ཡི། །ཟིལ་གནོན་སྐུ་གསུང་ཐུགས་ཀྱི་དངོས་གྲུབ་རྣམས། །ཐོགས་པ་མེད་པར་མྱུར་དུ་སྩལ་དུ་གསོལ། །ཨཱོཾ་ན་མཿསརྦ་ཏ་ཐཱ་ག་ཏ་ཀཱ་ཡ་སིདྡྷི་ཨཱོཾ། ཝཀ་སིདྡྷི་ཨ༔ ཙིཏྟ་སིདྡྷི་ཧཱུཾ། རཀྟ་ནི། གདུག་ཅན་དགྲ་བགེགས་ཁྲག་གི་དངས་མའི་མཚོར། །མཁའ་དབྱིངས་པདྨ་རཀྟའི་འབབ་ལྡན་ཀུན། །གཅིག་བསྡུས་མཚམས་སྤྲིན་ལ་འགྲན་དབུ་ཕྲེང་དང་། །རབ་འཇིགས་རྦ་རླབས་ཆེར་གཡོའི་ཚོགས་རྣམས་འབུལ། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། མ་ཧཱ་རཀྟ་པཱུ་ཛ་ཁཱ་ཧི། གཏོར་མ་འབུལ་བ་ནི། ཞིང་བཅུ་བསྒྲལ་བའི་ཤ་རུས་དབང་ལྔའི་རྡུལ། །རབ་བརྩེགས་དམར་ཆེན་བ་ལིཾ་སྤྲིན་ཆེན་དབང་། །རིན་ཆེན་སྣ་བཞི་ཀུན་བཟང་མཆོད་སྤྲིན་དུ། །དམིགས་ཏེ་ཟིལ་གནོན་འཁོར་དང་བཅས་ལ་འབུལ། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། མ་ཧཱ་བྷ་ལིཾ་ཏ་པཱུ་ཛ་ཁཱ་ཧི། རང་སྣང་ཤེས་རབ་ཨེ་གསང་ཆུ་གཏེར་ཆེ། །ཐབས་ཀྱི་དྲན་པའི་ཀ་བའི་ལྷུན་པོ་ཡིས། །ལེགས་པར་བསྲུབས་ལས་བྱང་སེམས་བདུད་རྩི་མཆོག །འདུ་འཕྲོད་ཐོན་པའི་བདེ་ཆེན་རྒྱས་གྱུར་ཅིག །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་མ་མ་ཨེ་ཀ་ཛཱ་ཊི་ཨེ་ཧྱེ་ཧི་ཛ༔ཧཱུཾ་བཾ་ཧོ། མ་ཧཱ་མུ་དྲ་པཱུ་ཛ་ཁཱ་ཧི་ཧོ༔ དེ་ནས་བསྟོད་པ་ནི། རབ་འབྱམས་དུས་གསུམ་རྒྱལ་བ་མ་ལུས་པའི། །ཇི་སྙེད་གསང་གསུམ་ཡོན་ཏན་ཕུང་པོའི་ཚོགས། །མི་ཟད་སྐུ་གསུམ་ཁྲོ་རྒྱལ་གར་ཉམས་ཀྱིས། །རྒྱ་ཆེན་སྲིད་གསུམ་ལོག་འདྲེན་འཇོམས་ལ་བསྟོད། །བཀའ་ཡི་ལས་མཛད་ཡུམ་ཆེན་ཁྲག་མིག་མ། །སྲས་མཆོག་གཤེད་པོ་ཡ་མ་ར་ཙ་དང་། །འཇིགས་རུང་ལས་ཀྱི་གཤིན་རྗེར་བཅས་པ་ལ། །དང་(༥ན)
བས་ཕྱག་འཚལ་ལས་ཀུན་ཐོགས་མེད་སྒྲུབས། །བསྙེན་པ་བྱ་བ་ནི། ལྷ་ཚོགས་ཐུགས་ཀའི་ཧཱུཾ་གི་འོད་ཟེར་ལས། །ཕོ་ཉ་སྤྲུལ་པ་ཡང་སྤྲུལ་དཔག་མེད་འཕྲོས། །བདག་གཞན་བསྲུང་བྱའི་ཚེ་སྲོག་ཎིའི་རྣམ་པ། །སྡེ་བརྒྱད་རྣམས་ཀྱིས་བརྐུ་འཕྲོགས་ཡར་བ་སོགས། །སྲིད་རྩེ་མནར་མེད་བར་དུ་གར་ཡོད་ཀྱང་། །གནོད་བྱེད་ཚར་བཅས་ཚེ་སྲོག་ཧཱུཾ་ཡིག་གི །རྣམ་པར་བྱས་ལ་སོ་སོར་བསྟིམ་གྱུར་ཞིང་། །བདེ་གཤེགས་ཞི་ཁྲོའི་བྱིན་རླབས་སྡེ་བརྒྱད་ཀྱི། །སྲོག་སྙིང་ལྷག་མའི་ཚེ་སྲོག་འབྱུང་ལྔའི་བཅུད། །བཀུག་ལ་རང་གཞན་ལ་ཐིམ་སྟོབས་ལྡན་གྱུར། །ཨེ་ཀ་ཡ་མ་དུ་རུ་ཙཀྲས་སྲུངས། །ཧེ་ཀ་ཡ་མ་དུ་རུ་ཙཀྲས་སྲུངས། །གཱི་མ་ཡ་མ་དུ་རུ་ཙ་ཀྲས་སྲུངས། །སརྦ་ཙིཏྟ་གཟེར་ཐུམ་བྷྀག་ནན་ཏྲིག་ནན༔ རྦད་ཡ་བཟློག་ཡ༔ སཾ་གྷྲི་ཝ་རི་དག་དམིགས་ཡུལ་དང་བཅས་པ་ལ། སྲུངས་ཤིག་རཀྵ་རཀྵ་ཀུ་རུ་ཡེ་སྭཱཧཱ། ཞེས་སྔགས་ཐུན་དྲུག་གམ་བཞིར་བཅད་ལ་བཟླའོ། །དེ་ནས་བཟློག་པ་ནི། སྒྲུབ་པ་པོ་རྣམས་ཆས་གོས་ནག་པོ་གྱོན་ཞིང་། སྐྲ་དངོས་སམ་བཅོས་མའི་སྐྲས་ཀྱང་རུང་སྟེ། བཞིན་ལ་རྫས་ཀྱི་ཐིག་ལེ་དང་དྲག་པོའི་ང་རྒྱལ་དང་ལྡན་པས། འབྲུབ་ཁུང་བསྐྱེད་ཆོག་ནས་བཟུང་སྟེ་ལྷ་དབྱེའི་བར་ལས་བྱང་གནམ་ལྕགས་འཁོར་ལོ་ལྟར་བྱས་ལ་དེ་ནས་འདི་ལྟར་བརྗོད་དོ། །བླ་སྲོག་ཞུགས་པའི་ལིང་ག་དགྲ་དངོས་དེའི། ཁང་པར་གནམ་ལྕགས་འཁོར་ལོ་རྩིབས་བཞི་པ། །རྣོ་ངར་ལྡན་པས་བརྒྱངས་པས་གཡོ་འགུལ་མེད། །སྤྱི་བོར་ལམ་ལས་སུ་རི་ནག་པོ་ནི། །བང་རིམ་དགུ་པ་བོང་ཚད་རི་རབ་ཙམ། །མགོ་ཞབས་ལོག་པ་ཞིག་གིས་མནན་པའི་སྟེང་། །མཆོད་རྟེན་སྲུང་བའི་གུར་དང་བཅས་པར་གྱུར། །སྙིང་གའི་འཇམ་དཔལ་བཞི་ཡང་རབ་(༥བ)
ཁྲོས་ཤིང་། །ཞལ་ཕྱིར་གཟིགས་ནས་བཟློག་པའི་ལས་མཛད་ལ། །ཐུགས་ཀ་བ་སྤུ་རྣམས་ནས་ཁྲོ་བོའི་ཚོགས། །མཚོན་ཐོགས་སྐར་ལྟར་འཁྲུག་ཅིང་གློག་ལྟར་འཁྲུག །བྱད་མ་ཕར་བཟློག་ཐལ་བ་ལྟར་བཏང་ཞིང་། སྟོབས་ཆེར་ཚུལ་བཟློག་རྣམས་ཀྱང་མཚོན་ཆས་གཏུབས། །བྱད་སྟེམས་ཕབ་ཅིང་རང་གཤེད་དབབ་པར་གྱུར། །ཨཱོཾ་ཨེ་ཀ་ཡ་མ་དུ་རུ་ཙཀྲས་བཟློག །ཧེ་ཀ་ཡ་མ་དུ་རུ་ཙཀྲས་བཟློག །གྷྲི་ར་ཡ་མ་དུ་རུ་ཙཀྲས་བཟློག །སརྦ་ཙིཏྟ་གཟེར་ཐུམ་བྷིག་ནན་ཏྲིག་ནན་རྦད་ཡ་བཟློག་ཡ། དགྲ་བོ་བྱད་མ་ལྷ་སྲུང་དང་བཅས་པའི་རིག་སྔགས་ཀྱི་བསམ་སྦྱོར་ངན་པའི་གནོད་པ་ཐམས་ཅད་བྱད་མ་ཁོ་རང་གི་སྟེང་དུ་མཱ་ར་ཡ་བཟློག་ཡ། ཞེས་ཐུན་དྲུག་གམ་བཞིར་བཅད་ལ་བཟླས་རྗེས། ཐུན་འཇོག་ཁར། དགྲ་བོའི་ཤ་ལ་རྒྱུག །སྙིང་ལ་མཱ་ར་ཡ་རྒྱུག །དབུགས་ལ་རྒྱུག །སྲོག་ལ་མཱ་ར་ཡ་རྒྱུག །ཁྲག་ལ་རྒྱུག །རྩ་ལ་མཱ་ར་ཡ་རྒྱུག །ཧཱུཾ་ཕཊ། བྱད་མ་ལྷ་སྲུང་དང་བཅས་པ་མཱ་ར་ཡ་བཟློག་ཡཱ། ཞེས་པ་འདི་སྔགས་གོང་མ་ལ་མང་ཉུང་འཚམ་པ་རེ་བཏགས་ཏེ་ཐུན་བསྒྲུབ་ཅིང་། དེ་ནས་ཐུན་བརྡེབ་པ་ནི། སྐྱབས་བྲལ་ལོག་པར་འདྲེན་པའི་དགྲ་བོ་དེའི། ཁོང་པའི་གནམ་ལྕགས་འཁོར་ལོ་དྲག་འཁོར་བས། །སྲོག་སྙིང་རྩ་ཁྲག་ཐམས་ཅད་རབ་འབད་ཅིང་། །སྟོབས་དང་ནུས་པ་གཟི་བརྗིད་ཉམས་པར་གྱུར། །མཚེ་ཡུངས་རྡོ་ལྕགས་ལ་སོགས་དྲག་པོའི་རྫས། །དུག་དང་ཁྲག་ཏུ་སྦོལ་ཏེ་དར་བཏགས་པ། །ཐོག་དང་སྣ་ཚོགས་མཚོན་ཆའི་ཆར་གྱུར་པ། །བཏབ་པས་ལུས་ཀུན་ཁྲོལ་མ་ལྟ་བུར་གྱུར། །དུག་དང་ནད་ཀྱི་རླངས་པ་རབ་རྒྱས་ཤིང་། །བརྟེན་པའི་ལྷ་དང་རྫས་སྔགས་འཁྲུལ་འཁོར་སོགས། ཁོ་རང་རྣམས་ཀྱིས་བྱས་པའི་སྦྱོར་བ་ཀུན། །དགྲ་བོ་འཁོར་བཅས་གསོད་པའི་གཤེད་དུ་གྱུར། །བཟློག་སྔགས་(༦ན)
ཤམ་བུ་དང་བཅས་པས་ཐུན་བརྡེག་ཅིང་། དེ་ནས་རང་ཉིད་ཚེ་བདག་གསལ་བའི་ཕྱག་གཉིས་པོ། །ཟླ་བ་ཉི་མའི་དཀྱིལ་འཁོར་གྱུར་པའི་བར། །ལྷག་མར་ལུས་པའི་འོག་འདྲེན་དགྲ་སྡེའི་ཚོགས། །ཐལ་བའི་རྡུལ་ཕྲན་བཞིན་དུ་བརླག་པར་གྱུར། །ཞེས་དམིགས་པ་དང་བཅས་པས་ཐུན་གཏོར་འཕང་། གཏང་རག་མཆོད་པ་ནི། ཁྲོ་རྒྱལ་ཕྱག་རྒྱ་ཟིལ་གནོན་འཁོར་བཅས་ལ། །མ་ཧཱ་བྷ་ལིང་བདུད་རྩིའི་རྒྱ་མཚོ་ཆེ། །རཀྟ་ལ་སོགས་ཕྱི་ནང་གསང་བ་ཡི། །མཆོད་པ་འབུལ་ལོ་མཆོག་ཐུན་དངོས་གྲུབ་སྩོལ། །སྨོན་ལམ་ནི། བསྙེན་སྒྲུབ་ལས་གསུམ་ཡོངས་འདུ་ས་བརྡོལ་ལ། །བསྐྱེད་རིམ་ལོ་འདབ་འབྲས་བུར་བརྒྱས་ཤིང་གྲོལ་བྱེད་ལམ་གྱི་གང་བུ་གཡུར་ཟ་བ། །དངོས་གྲུབ་རྣམས་ཉིས་དགའ་སྟོན་རྒྱས་པར་ཤོག །ཤིས་བརྗོད་ནི། འདོད་དགུའི་འབྱུང་གནས་བླ་མ་ཡི་དམ་ལྷ། །དཔག་དཀའ་རབ་འབྱམས་ལས་སྒྲུབ་དམ་ཅན་ཚོགས། །ཕོ་ཉ་ལས་གཤིན་ལ་སོགས་འཁོར་བཅས་ཀྱིས། །བཀྲ་ཤིས་དགའ་སྟོན་དཔལ་ལ་རོལ་གྱུར་ཅིག །ཐུན་མཚམས་སུ། བསྲུང་བྱ་མ་ལུས་ཐུགས་ཀའི་ཧཱུཾ་ཡིག་གི །ཐིག་ལེར་ཐིམ་ཞིང་རང་ཉིད་གཤིན་རྗེ་གཤེད། །ཞལ་གཅིག་ཕྱག་གཉིས་འཁོར་ལོ་ལྕགས་ཀྱུ་འཛིན། ཁྲོ་བོའི་ང་རྒྱལ་དག་གིས་མཐའ་དག་བསྲུང་། །ཞེས་སྲུང་བཟློག་གཉིས་ཀྱི་གོ་རིམ་དངོས་སུ་བསྒྲིགས་པ་འདིས། །མནན་བསད་གཉིས་ཀྱི་ངག་འདོན་ཀྱང་རགས་རིམ་ཙམ་ཤུགས་ལ་ཤེས་པར་འགྱུར་ལ། འོན་ཀྱང་སྲུང་བཟློག་བསད་མནན་གྱི་ལག་ལེན་ཞིབ་མོ་ཞལ་ཤེས་དང་བཅས་པ་ནི། གཏེར་གཞུང་དང་སྒོ་བསྟུན་ཏེ་བརྒྱུད་ལྡན་གྱི་བླ་མ་དམ་པའི་གསུང་ལས་མྱང་དགོས་པའི་ཕྱིར། ངག་འདོན་ཙམ་ཡང་སྤྲོས་པ་མ་ཡིན་ནོ། །སྨྲས་པ། ལྔ་བརྒྱའི་དུས་མཐར་བསིལ་བའི་ལྗོངས་འདི་ན། །ཚིག་ཙམ་སྐྱབས་འཛིན་མཁས་དང་ཚུལ་འཆོས་བསྒོམ། །སྟབས་ལེགས་(༦བ)
མཐུ་རུ་རློམ་པའི་རིགས་སྔགས་འཆང་། །བླུན་རྨོངས་སྐྱེ་བོའི་གཙུག་ཏུ་མངོན་པར་མཛེས། །རྒྱུད་རྒྱལ་མ་ཧཱ་ཡོ་གའི་རྒྱ་མཚོ་ལས། །གཤེད་སྐོར་ཡིད་བཞིན་དབང་གི་རྒྱལ་པོ་ཆེ། །འཛིན་པའི་ཁས་འཆེ་མང་ཡང་ཟབ་མོའི་གནད། །ཚུལ་བཞིན་ཤེས་པ་ཨུ་དུམ་ཝཱ་ར་བཞིན། །སྣོད་ལ་མི་ལྟ་བུ་སོགས་འགའ་ཞིག་ལ། །སྟོན་པའི་རིགས་ནས་དྲང་སྲོང་གསང་ཚིག་དང་། །ཕན་ཚུན་ཚིག་གཅོད་ངང་ལས་རང་ཤུགས་ཀྱིས། །ཤེས་པའི་རྟོག་གེའི་ཆོས་དང་འདི་མི་འདྲ། །ཚུལ་འདི་རིན་ཆེན་ལྟ་བུའི་གདུལ་བྱ་ཡིས། །ཐོག་མར་རྡོ་རྗེ་སློབ་དཔོན་རབ་བསྟེན་ནས། །སྙན་བརྒྱུད་ཟབ་མོ་སྒྲོ་འདོགས་ལེགས་དཔྱད་པས། །འདོད་དོན་དབང་གི་རྒྱལ་པོ་དེ་ནས་འགྲུབ། །དེ་ཕྱིར་བསམ་ཞིང་གནུབས་བན་ལོ་ཙཱ་བ། །ཟབ་གཏེར་སྤེལ་ལོ་སྔགས་འཆང་དུམ་པ་རྒྱ། །སྙན་བརྒྱུད་བཟུང་ངོ་རིགས་འཛིན་མངའ་རིས་པ། །བརྩེ་བས་བརྐྱངས་སོ་འཁོན་སྟོན་ཆོས་རྗེའི་ཞབས། །དེང་དུས་རིགས་རུས་སྟོབས་དང་ཟོག་རྫུན་གྱིས། །ཆེས་རབ་ཁེངས་ཀྱང་སྨྲ་བཅས་རྒྱ་ཡིས་བཅིངས། །ཟླ་བྲལ་ཟབ་གནད་འདི་ལ་གདེངས་ཐོབ་པས། །བསམས་ཤིང་བཀའ་དྲིན་དྲན་ནོ་ཡོངས་འཛིན་རྗེ། །དེ་ལྟར་ཡང་བཟློག་མེ་ཡི་སྤུ་གྲི་ཡི། །ལས་བྱང་སྔོན་མེད་འཁྱེར་བདེ་བཀླགས་ཆོག་འདི། །བཀོད་པས་བདུད་རིགས་མུན་པའི་སྲོག་བཅོམ་སྟེ། །ངེས་གསང་པད་ཚལ་ཆེས་ཆེར་རྒྱས་གྱུར་ཅིག །ཅེས་འཇམ་དཔལ་ཚེ་བདག་ནག་པོའི་ལས་མཐའ་ཡང་བཟློག་མེའི་སྤུ་གྲིའི་ལས་བྱང་། རང་གཤེད་དབབ་པ་རྡོ་རྗེའི་ཕ་ལམ་ཞེས་བྱ་བ་འདི་ཡང་། ཚུལ་འདིར་མོས་པའི་སྐལ་ལྡན་འགའ་ཞིག་ལ་ཕན་པར་འགྱུར་ཞིང་། ཁྱད་པར་དུ་ངེས་གསང་ཐེག་པ་མཆོག་ལ་གཅིག་ཏུ་གཞོལ་བའི་ཁྲིམས་ལྡན་འདུས་པའི་སྡེ། ཕན་བདེ་ལེགས་བཤད་གླིང་པ་རྣམས་ཀྱི་སྐབས་སུ་འོས་པའི་ཉམས་ལེན་དུ་འཁྱེར་བདེ་བར་བསམས་ཏེ། ཟིལ་གནོན་དྲག་(༧ན)
རྩལ་རྡོ་རྗེས། ཆོས་འཁོར་དཔལ་གྱི་ལྷ་སའི་བྱ་འདབས་དགའ་ལྡན་ཁང་གསར་དུ་བྲིས་པའི་ཡི་གེ་པ་ནི་ངག་དབང་དགེ་ལེགས་སོ། །