འཇམ་དཔལ་ཚེ་བདག་ནག་པོའི་ཟོར་གྱི་ལས་རིམ་གནམ་ལྕགས་ཐོག་མདའ།
འཇམ་དཔལ་ཚེ་བདག་ནག་པོའི་ཟོར་གྱི་ལས་རིམ་གནམ་ལྕགས་ཐོག་མདའ་བཞུགས་སོ། །
རྒྱལ་ཀུན་ཡབ་གྱུར་འཇམ་དཔལ་ཚེ་བདག་དང་། །དབྱེར་མེད་དྲིན་ཅན་བླ་མའི་ཞབས་ཀྱི་རྡུལ། །མི་ཕྱེད་དད་པའི་གཙུག་ཏོར་རྩེར་བཀོད་ནས། །ཟོར་གྱི་ལས་རིམ་གནམ་ལྕགས་ཐོག་མདའ་འདྲི། །དེ་ཡང་ལས་བྱང་དང་ཟོར་ལས་གཉིས་སོ་སོར་བཀོད་པ་འཁྲུལ་གཞི་ཆུང་ཞིང་ཉམས་སུ་བསྟར་བདེ་བར་མངོན་པས། ལྕགས་སྡིག་བཟློག་གཞུང་ཐེམས་མང་ལས། །དང་པོར་སྔགས་པ་བསྙེན་རྫོགས་པས། །ཞིང་ཆེན་གདན་ལ་མཎྜལ་དབུལ། །འབྲུ་ནག་ལྷ་གྲངས་ཚོམ་བུ་དགོད། །ཅེས་སོགས་གསུངས་པ་ལྟར་བཟློག་དཀྱིལ་རྒྱས་འབྲིང་བསྡུས་གསུམ་གང་རུང་དང་བཟློག་གཏོར་ཕྱག་ལེན་རྒྱས་བསྡུས་མི་འདྲ་བ་འགའ་ཞིག་ཡོད་པ་ཇི་ལྟར་རིགས་པ། ཟོར། མཆོད་གཏོར་སོགས་བདག་མདུན་གཉིས་ཀར་དགོས་པའི་ཆས་དང་ཡོ་བྱད་རྣམས་མཐོང་བ་བརྒྱུད་པའི་ཕྱག་ལེན་ལྟར་བཤམ། ཐོག་མར་འཁོར་འདས་མཚམས་དབྱེ་བའི་རོལ་མོ་རྒྱས་འབྲིང་བསྡུས་གསུམ་གང་ཡང་རུང་བ་བྱ། དེ་ནས་འཇམ་དཔལ་རྫོགས་ཆེན་གྱི་སྐྱབས་འགྲོ་ནས་བཟུང་ཡན་ལག་བརྒྱད་པ་མཚམས་གཅོད་ཀྱི་སྤྲིན་རབ་འབྱམས་འཕྲོ་བ་(༢ན)
དང་བཅས་པར་གྱུར་ཅེས་བརྗོད། བགེགས་གཏོར་བཤམས་ལ་རྡོ་རྗེ་སློབ་དཔོན་གྱིས་བསྔོ། བདག་ཉིད་ཁྲོ་རྒྱལ་མ་ནས་མཆོད་རྫས་བྱིན་རླབས་ཀྱི་བར་སོང་ནས་བདག་མདུན་གཉིས་མེ་ལོང་ལ་གཟུགས་སྒྲུབ་ཆེན་ལ་ཐོག་མར་ངོ་བོ་དབྱེར་མེད་བྱས་ནས་མཐར་འཛབ་ཁང་དབྱེ་བའི་གནད་ཤེས་དགོས་ཀྱང་གཏོར་བཟློག་ལ་ཐོག་མ་ནས་ཞལ་སྤྲོད་བྱེད་པས་མ་འདྲེས་པར་གལ་ཆེ། བརྙན་ཤར་བ་ལྟར་གྱེར་བསྒོམ་ཚུལ་དུ་སྟོང་ཉིད་བསྒོམ་པ་ནས། འདོད་ཡོན་ནང་མཆོད་ཀྱི་མཇུག་ཏུ་མཆོད་པའི་རྔ་ཚིག་ཆེན་མོ་ཕྱག་ལེན་བཞིན་བྱ། འཛབ་ཀྱི་ཚེ་ཨ་ཀྲོ་བཅུ་བདུན་མ། སྐུ་གསུང་ཐུགས་སྔགས། ཨྱེ་རིང་རྣལ་མ། གཟིར་བ་གཡུ་སྤྱང་དང་བཟློག་པ་གཡུ་སྤྱང་བཏགས་པ་རྣམས་མང་ཉུང་ལོང་སྐབས་དང་བསྟུན་ནས་བཟླ་ཞིང་བྱས་པ་བཤིག་པ་སོགས་ལས་གཞན་སྦྱར་དགོས་ཡོད་ན་མན་ངག་བཞིན་བྱེད། འཛབ་རྫོགས་མཚམས་སུ་དམོད་མོ་བྱ་ཞིང་ཐལ་མོ་བརྡབ་དངོས་གྲུབ་བླངས། གཏོར་མར་སྨན་རག་སྦྲན། བསྟོད་པ་བཏང་། གཏོར་མ་དང་ཁྲག་སྐྱེམས་ལ་དམིགས་ནས། རཾ་ཡཾ་ཁཾ་གིས་བསྲེགས་གཏོར་བཀྲུས། ཨཱོཾ་ཨཱཿཧཱུཾ་གིས་གཏོར་མ་ཤ་ཁྲག་བདུད་རྩིའི་རང་བཞིན་དུ་བསམ། སྒྲུབ་པའི་ཐོག་མཐའ་གཉིས་ལ་འཇུག་པ་བདེ་ཕྱིར་མཆོད་(༢བ)
བསྟོད་གསལ་སྒྲོན་གྱི་རྒྱན་ལྷ་ཡན་མཛད་སྲོལ་འདུག་ནའང་ཐོག་མ་ནས་ཚང་མ་བཏང་བ་མི་འགལ་བར་སེམས་ཤིང་གཏོར་བཟློག་ལ་ཐལ་བ་བཞིན་དུ་རབ་ཏུ་རློག །ཅེས་པའི་མཇུག་ཏུ། བཟློག་ཅིང་བསྒྱུར་བའི་ཕྲིན་ལས་མཛོད། །ཅེས་དང་མནན་སྲེག་འཕང་བ་སོགས་ལ་ཁ་བསྒྱུར་བ་གནད་དུ་ཆེ། ཐུགས་སྤྲུལ་གྱི་ཁྱུང་བསྐུལ་རྗེས་སུ་ཉིན་དང་པོར་རྭ་ཟོར་གྱི་ངར་འདོན་ནི། སླ་ངའི་ནང་དུ་གཟུགས་གསུམ་པོ་བཤམས་པར་རཀྟ་སྦྲན། ཚོགས་ཐ་མ་ཇི་ལྟ་བ་ལ་ཕུར་འདེབས་ཀྱི་ཚབ་ཏུ་རྭ་ཟོར་སྙིང་གར་བསྣུན་པའི་སྟང་ག་ཙམ་གྱིས་གནས་སྤར་ནས་མི་གསོད་མྱོང་བས་གཏུབས་རྗེས་སྨན་རཀ་སྒྲོན་ཏེ་ཞལ་སྟོབ་དཀྱུས་ལྟར་བྱེད། རྭ་ཟོར་སྒྲུབ་ལུགས་མན་ངག་དང་ཕྱག་ལེན་བཞིན་ཉམས་སུ་བསྟར། བསྐུལ་རྫོགས་མཚམས་སུ་མཱ་ར་ཡའི་དྲག་བརྡུངས་དང་བསྟུན་གཏོར་མ་ཁྲག་སྐྱེམས་འབུལ་ཁར་རྡོ་རྗེ་སློབ་དཔོན་གྱིས་མེ་ཏོག་འཐོར་བ་དང་བཅས་བསྟན་འགྲོའི་བདེ་སྐྱིད་དང་སྒྲུབ་པ་པོ་ཡོན་མཆོད་འཁོར་དང་བཅས་པའི་སྒོས་ཀྱི་འདོད་གསོལ་རྒྱས་པར་བྱེད་ཅིང་འདིས་མཚོན་གཏོར་མ་ཕྱིར་འབུལ་བ་རྣམས་ལ་རིགས་འདྲེ། གཏེར་སྲུང་སོགས་ཆོས་སྐྱོང་གི་བསྐང་གསོ་ནས་ཚོགས་བར་པའི་བར་དཀྱུས་བཞིན་གཏོང་། དེ་ནས་གདབ་ལས་རྒྱས་པར་སྤྲོ་ན་ཤོག་ལིང་ཟན་ལིང་སོགས་མཐོང་བ་བརྒྱུད་པའི་ཕྱག་བཞེས་ལྟར་བཤམ། རྡོ་རྗེ་སློབ་དཔོན་གྱིས་གསེར་སྐྱེམས་བྱིན་གྱིས་བརླབ། ཁྲོ་རོལ་ཆོག་སྒྲིགས་བདུད་སྡེའི་གཡུལ་ལས་རྒྱལ་བའི་སྒྲ་དབྱངས་ནས་བླངས་པའི་ཞི་ཁྲོ་བཀའ་བརྒྱད་ལྷ་ཞེས་པ་འཇམ་དཔལ་ཚེ་བདག་ནག་པོ་དང་དཔལ་མགོན་ནག་པོ་མ་ནིང་ཆེ། སྟག་ཞོན་མཐུ་ཆེན་སྡེ་བཞི་པོར་བསྒྱུར། འབྲུབ་ཁུང་བསྐྱེད་པ་ནི། སྭ་བྷཱ་བས་སྦྱངས། སྟོང་པའི་ངང་ལས་རང་གི་ཐུགས་ཀ་ནས་ཨེ་(༣ན)
མཐིང་ནག་གཅིག་ཆད་མདུན་དུ་འཕྲོས་ཡོངས་སུ་གྱུར་པ་ལས། དུག་དང་ཟངས་ལྕགས་ཁྲོ་ཆུ་ལས་གྲུབ་པའི་ཁང་སྒྲོམ་མེ་འབར་བ་གྲུ་གསུམ་པ་བང་རིམ་དགུ་དང་ལྡན་པ། ཁ་ཁྱར་ཡངས་ཤིང་གཏིང་ཟབ་པ་དེའི་ནང་དུ་འདོད་ཆགས་ཀྱི་ཁྲག་མཚོ་ཁོལ་བ་ཞེ་སྡང་གི་མེ་རླུང་འཚུབ་པ། གཏི་མུག་གི་མུན་པ་འཁྲིགས་པ། མཚོན་ཆའི་དྲག་ཆར་འབབ་པ། ནད་ཀྱི་ན་བུན་འཐིབས་པ། དུག་གི་རླངས་པ་སྔོ་དམར་དུ་འཕྱོ་བ། ཁྲག་གི་སེར་ཆེན་འབབ་པ། གཤིན་རྗེའི་སྐྱེས་བུ་དཔག་ཏུ་མེད་པ་རྒྱུག་པ། ཐན་དང་ལྟས་ངན་གྱི་ཆོ་འཕྲུལ་སྣ་ཚོགས་ཀྱིས་གང་བ། གཞན་ཡང་སྤྲུལ་པའི་ཕོ་ཉ་འཇིགས་སུ་རུང་བ་རྣམས་ནི་སེང་གེ་ལྟར་རྔམ་པ། སྟག་ལྟར་མཆོང་བ། འབྲོང་ལྟར་འགྱིང་བ། ཁྲ་ལྟར་འཛུལ་བ། སྦྲུལ་ལྟར་འཁྱུག་པ། འདྲེ་སྲིན་ལྟར་ངུར་བ། འགོང་པོ་ལྟར་སྨྱོ་བ། སྲིན་བྱ་ལྟར་རྒོད་པ། ཝ་མོ་ལྟར་བརྒྱལ་བ། སྲིན་པོ་ལྟར་ཁྲོས་པ། ཤ་ཟ་ལྟར་རྒྱུག་པ། སོད་སོད་དང་རྒྱོབ་རྒྱོབ་ཀྱི་སྒྲ་འབྲུག་ལྟར་སྒྲོག་པས་གང་བ། དེའི་ནང་དུ་བསྐལ་པ་སྟོང་གི་མུན་པ་འཁྲིགས་པ། ཕྱི་ནས་བསྐལ་པ་སྟོང་གི་མེ་འབར་ཞིང་རླུང་ནག་འཚུབ་པ། གཤིན་རྗེའི་ཞིང་ཁམས། བཤན་པའི་ཕོ་བྲང་། སྲོག་གཅོད་ཀྱི་གྲོང་ཁྱེར། སྲིད་པ་ལས་ཀྱི་གཞན་ཡས་ཁང་ཆེན་པོ། དགྲ་བོ་ཕྱིན་མ་ཐག་ལྷ་དང་འབྲལ་ཞིང་གཤེད་དུ་འབེབས་པ། ལས་ངན་ཐམས་ཅད་རྣམ་པར་སྨིན་པར་བྱེད་པའི་བཙོན་ཁང་དྲག་པོ། དེའི་དབུས་སུ། སངས་རྒྱས་ཀྱི་བསྟན་དགྲ །དཀོན་མཆོག་གི་སྤྱི་དགྲ །བླ་མའི་སྐུ་དགྲ །རྣལ་འབྱོར་གྱི་སྒོས་དགྲ །དམིགས་པའི་དགྲ་བོ་གང་གི་རྣམ་པར་ཤེས་པ་ཪྣྲི་དུད་ཁ་ཡོངས་སུ་གྱུར་པ་ལས། དམ་ཉམས་པའི་དགྲ་བོ་དེ་དག །ཉམ་ཆུང་བ། སྒྱིད་པ་ཕྲ་བ། སྐྲ་གཟིངས་པ། (༣བ)
མདོག་ནག་ཅིང་བམ་པ། མྱ་ངན་གྱི་ཕྱག་རྒྱ་ཅན། བུ་ག་དགུ་ནས་ཁྲག་དང་རྣག་འཛག་པ། ཁ་ནས་སྲིད་ཀྱི་སྒྲ་སྒྲོག་པ། བསྲུང་ཞིང་སྐྱོབ་པའི་ལྷ་དང་བྲལ་ཞིང་གཤེད་དུ་བབས་པ། གནོད་བྱེད་ཐམས་ཅད་འདུས་པའི་ངོ་བོར་གྱུར། དེའི་འོག་ཏུ་ཞིང་ཆེན་གྱི་ས་གཞི་བརྡལ་བ། མཚོན་ཆ་སྣ་ཚོགས་གཟེངས་ཏེ་འདུག་པ། དྲག་པོའི་ཚ་ཚ་ཆིལ་ལི་ལི་འཁོལ་བ། དེའི་འོག་ཏུ་རཀྟའི་རྦ་རླབས་འཁྲུག་ཅིང་ཞིང་ཆེན་གྱི་རྦ་ཉིལ་ཉིལ་འཕྱོ་བ། དེའི་འོག་ཏུ་བསྐལ་པའི་མེ་རླུང་དམར་ནག་འུར་འུར་འབར་བ། དེའི་འོག་ཏུ་བསྐལ་བའི་རླུང་སྤུ་གྲི་སོ་རྒལ་ཆིལ་ལི་ལི་འཁྲུག་པ། དེའི་འོག་ཏུ་དྲག་པོ་ཆོས་ཀྱི་དབྱིངས་ནམ་མཁའི་དཀྱིལ་འཁོར་གྲུ་གསུམ་མཐིང་ནག་འབར་བའི་དཀྱིལ་འཁོར། དགྲ་བོ་ཐམས་ཅད་གཏན་ནས་རླག་པར་བྱེད་པ། མཐའ་དང་དབུས་མེད་པའི་རང་བཞིན་དུ་གྱུར། རང་གི་ཐུགས་ཀ་ནས་སྤྲུལ་པའི་ཕོ་ཉ་དཔག་ཏུ་མེད་པ་འཕྲོས་པས། གནོད་བྱེད་དགྲ་བགེགས་ཐམས་ཅད་ཉི་མ་ཕྱོགས་བཞི་མཚམས་བརྒྱད་སྟེང་འོག་གང་དུ་གནས་ཀྱང་སྐད་ཅིག་གིས་བཀུག་པར་གྱུར། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་ཏིང་ངེ་འཛིན་གྱི་བཀའ་བདེན་པ་དང་། ཆོས་ཉིད་གདོད་ནས་སྟོངས་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བདེར་གཤེགས་རྒྱལ་བ་ཞི་ཁྲོ་དམ་ཅན་རྒྱ་མཚོའི་ཚོགས་སྤྱི་དང་ཁྱད་པར་འཇམ་དཔལ་ཚེ་བདག་ནག་པོ་དཀྱིལ་འཁོར་གྱི་ལྷ་ཚོགས་བཀའ་སྡོད་ལས་ཀྱི་གཤིན་རྗེ་འཆི་བདག་བྷེ་ཝ་ས་ཏྭ་འཁོར་ལྷ་སྲིན་སྡེ་བརྒྱད་དང་བཅས་པའི་བདེན་པ་དང་། སྔགས་འཆང་རྣལ་འབྱོར་བདག་གི་ལྷ་སྔགས་ཡེ་ཤེས་ཀྱི་(༤ན)
རོལ་པའི་བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས་སངས་རྒྱས་བསྟན་པའི་སྤྱི་དགྲ །དཔལ་ལྡན་བླ་མའི་སྐུ་དགྲ །རིགས་འཛིན་རྣལ་འབྱོར་མཆེད་ཀྱི་སྒོས་དགྲ །རྒྱུ་སྦྱོར་སྦྱིན་པའི་བདག་པོའི་རྐྱེན་དགྲ །སེམས་ཅན་ཡོངས་ལ་འཚེ་བ་ཁྱད་པར་སྔགས་འཆང་བདག་ཅག་དཔོན་སློབ་རྒྱུ་སྦྱོར་ཡོན་གྱི་བདག་པོ་འཁོར་དང་བཅས་པ་རྣམས་ལསྔ་དགྲ་ལག་ལ་དར་བ། ཕྱི་དགྲ་ཡིད་ལ་སེམས་པ། ད་དགྲ་གནོད་ཅིང་འཚེ་བ། ངོ་ཕྱར་གདོད་ནས་བསྡོ་བ། ཁ་འཇམ་ཐབས་ཀྱིས་གནོད་པ། གཡུལ་འཁྲུག་གྲོས་ངན་བཤོམས་པ། དུག་དང་མཚོན་ཁ་གཏོད་པ། མཐུ་བྱད་རྦོད་གཏོང་བྱེད་པ་སོགས་མདོར་ན་བསམ་པ་ངན་པ་ཡིད་ལ་འཆང་ཞིང་སྦྱོར་བ་རྩུབ་མོར་སྟོན་པ་རྣམས་ཀྱི་བླ་སྲོག་ཚེ་གསུམ་དང་བཅས་པ་གནམ་ས་གླིང་བཞི་གླིང་ཕྲན། རི་རབ་ཀྱི་ཁོང་གསེང་། ཉི་ཟླའི་གོང་བར་ཆོས་བོན་སྲུང་མ་རྣམས་ཀྱིས་བསྐྱབས་པའི་མཚན་བཅས་དང་མཚན་མེད་ཀྱི་བསྲུང་བའི་འཁོར་ལོ་སོགས་གང་ན་གནས་ཀྱང་དམིགས་རྟེན་གི་ལིངྒ་འདི་ཉིད་ལ་ཁུག་ཅིག་ཨྱེ་རིང་གི་རཀྴ་མོནྟའི་མཚམས་སུ། བཛྲ་ཨཾ་ཀུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷཎྜ་ཧོ༔ བཛྲ་པྲ་བེ་ཤ་ཡ་ཕཊ། ཨ་བེ་ཤ་ཡ་ཨ། ཞེས་དྲག་རོལ་གྲོ་གའི་རྩི་སྒྲ་དང་བཤུག་པའི་འབོད་སྒྲ་དང་རྫས་དུད་གཡབ་དར་ཚམ་ངམ་དང་བཅས་པ་གསུམ་བདུན་ཉེར་གཅིག་སོགས་ཇི་ལྟར་རིགས་པ་བྱ། གྲུ་གསུམ་ཨེ་ཡི་སྣོད་ནང་དུ། ཞེས་སོགས་ཤློ་ཀ་ཕྱེད་གཉིས་བརྗོད། གཟུ་དཔང་ནི། ཧཱུཾ། བདག་ཉིད་སངས་རྒྱས་བསྟན་ལ་རབ་བཞུགས་ཏེ། །དཀོན་མཆོག་རིན་ཆེན་གསུམ་ལ་སྐྱབས་སུ་སོང་། །རིགས་བདུན་སོ་སོ་ཐར་པའི་སྡོམ་པ་བླངས། །བྱང་ཆུབ་མཆོག་གི་བསམ་པ་བརྟེན་པོར་ལྡན། ཁྱད་པར་གསང་ཆེན་རྡོ་རྗེ་ཐེག་པའི་རྩ། །རྡོ་(༤བ)
རྗེ་སློབ་དཔོན་ཁོང་གི་སྙིང་ལྟར་བཟུང་། །དེ་ཡི་སྐུ་ལ་མ་བརྙས་གསུང་མ་བཅག །ཐུགས་རྒྱུད་མ་དཀྲུགས་གུས་བརྟེན་དམ་མ་དྲལ། །ཐེག་དགུ་རྒྱུད་སྡེའི་དཀྱིལ་འཁོར་ལྷ་ཚོགས་དང་། །བསྟན་སྲུང་དམ་ཅན་རྒྱ་མཚོ་ཕྱི་ནང་གི །རྒྱུད་གཞུང་མན་ངག་ཐོས་བསམ་སྒོམ་པ་དང་། །སྨོན་གྲོལ་བསྐྱེད་རྫོགས་བསྙེན་སྒྲུབ་ཚུལ་བཞིན་སྤྱད། །ཆོས་ལོངས་སྤྲུལ་སྐུའི་སྟོན་དང་རྟེན་ཅིང་འབྲེལ། །ཟུང་འཇུག་རྒྱུ་འབྲས་ལྡན་པའི་ཆོས་བསྟན་པ། །གདུལ་བྱའི་བསགས་པས་ཐག་པ་གྲུབ་མཐའ་སྒོ། །མཐའ་ཡས་དུ་མར་གོ་ཡང་ངོ་བོར་གཅིག །ཀུན་ལ་རིས་མེད་དག་སྣང་རྩལ་སྦྱངས་ཤིང་། །བདག་བསྟོད་གཞན་སྨོད་ཆགས་སྡང་ཚེར་མ་སྤངས། །རང་གིས་ཚུལ་བཞིན་དམ་ཆོས་སྤྱོད་པ་ལ། །བན་སྔགས་བོན་དགྲ་ནག་པོས་འཚེ་བ་དང་། །རང་ཟས་སྨན་དང་གཞན་ཟས་དུག་ལྟར་བལྟས། །དམན་པའི་ས་བཟུང་ཁས་ཉེན་དཔུང་པ་དམད། །མཐོ་ལ་མ་སྨད་དམན་ལ་མ་བརྙས་ཤིང་། །བར་དུ་ཕྲག་དོག་རུ་ངའི་སྦྱོར་སྤངས་ཀྱང་། །བསྟན་པའི་རུ་དྲ་ནག་པོ་གླང་སྙིང་འདིས། །སྤྱིར་ནི་སངས་རྒྱས་བསྟན་པ་ཡོངས་ལ་འཚེ། །སྒོས་སུ་དཔལ་ལྡན་བླ་མའི་ཐུགས་རྒྱུད་དཀྲུགས། །ཡང་སྒོས་བདག་ཅག་ཆོས་སྲིད་བཅས་པ་ལ། །བདེན་པ་ཁྱད་བསད་རང་གནོད་ཁོང་སྐྲན་བཅས། །ངོར་རྩུབ་མ་བདེ་ཐབས་ཀྱིས་མཐའ་ནས་བསྐུམ། །རང་ནུས་མ་ཐོན་ལོག་འདྲེན་གཞན་དག་རྦོད། ཁ་དཀར་ཞེ་གནག་མགོ་སྨོད་སྒབ་ནས་རྩུབ། །མ་བྱས་བྱས་དང་མ་བྱུང་བྱུང་ཞེས་པའི། །ལེགས་བསུབ་ཉེས་སྒྲོག་ཡ་ཁ་ངན་སྨྲས་སྦོར། །རྒྱབ་ནས་འདེད་ཅིང་མདུན་ནས་འགུགས་པ་དང་། །ཟུར་ནས་གསོད་གཅོད་རྐུ་འཕྲོག་རྡེག་བྱེད་ཅིང་། །རང་གི་ཆོས་སྲིད་འབྱོར་པས་མ་ངོམས་པར། །གཞན་ལ་ཕྲག་དོག་བསྟན་ལ་བསྙེངས་པ་ཡི། །(༥ན)
ཕྱི་དགྲ་ཞེ་སྡང་མེ་ལྟར་འབར་བ་དང་། །ནང་དགྲ་བསམ་ངན་རླུང་ལྟར་འཚུབ་པ་ཡི། །སྔ་དགྲ་ཉེས་བྱེད་ཆུ་ལྟར་རྒྱུག་པ་དང་། །ཕྱི་དགྲ་བྱེད་སེམས་དུག་ལྟར་ཁོང་དུ་གཡོ། །ད་དགྲ་དྲག་པོ་ཚེར་ལས་རྩུབ་པ་ཡི། །བྱད་མ་དགྲ་བོ་ཕྱོགས་མཚམས་གར་གནས་ཀྱང་། །འཇིག་རྟེན་འདས་དང་མ་འདས་ཚུལ་འཛིན་པའི། །བསྟན་སྲུང་དམ་ཅན་རྒྱ་མཚོ་དྲེགས་པའི་འཁོར། །བསྟན་དང་བསྟན་འཛིན་རྣལ་འབྱོར་ལ་གདུང་བའི། །རྔམ་དྲག་འབར་བ་དཔལ་གྱི་ཕོ་ཉ་རྣམས། །རྒྱལ་བའི་བཀའ་དང་རྣལ་འབྱོར་དམ་བཞིན་འདུས། །ཉེས་བྱེད་དགྲ་བོའི་གཟུགས་ཕུང་རྣམ་ཤེས་བཅས། །ཕ་ཚན་ཡུལ་འཁོར་མི་ནོར་སྡེ་དཔུང་རྣམས། །རང་དབང་མེད་པར་དྲག་པོའི་རྟེན་ལ་ཕོབ། །དེ་ནས་དགྲ་བོའི་བླ་རྒྱུ་བའི་དུས་དྲུག་དང་བླ་རྟགས་བརྒྱད་ལ་ཕོ་ཉ་བརྒྱད་བསྐུལ་ཏེ་འགུགས་པ་ནི་གཡབ་དར་དང་བཅས་ནས། ཧཱུཾ་བྷྱོ། ད་ནི་བསྒྲལ་བའི་ཐུགས་དམ་དུས་ལ་བབ། །ད་ལྟ་ནམ་གྱི་སོང་ལ་བབ་དུས་འདིར། །ཆོམ་རྐུན་ལས་ལ་འགྱེད་པའི་དུས་ཡིན་པས། །དམ་ཉམས་དགྲ་བོའི་བླ་ཚེ་འཁྱམ་པའི་དུས། །བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། ད་ལྟ་ནམ་གྱི་གུང་ལ་བབ་དུས་འདིར། །སེམས་མེད་འབྱུང་བ་ཆུ་ཡང་གཉིད་ལོག་གི །དགྲ་བོ་ལས་ངན་སྡིག་ཅན་གཉིད་ལོག་པའི། །བླ་ཚེ་འཁྱམ་པོ་ད་ལྟ་ཁྲིད་ལ་ཤོག །བྷྱོ། ད་ལྟ་ནམ་གྱི་ཐོ་རངས་བབ་དུས་འདིར། །དགྲ་བོའི་བླ་ཚེ་འཕྱོ་ཞིང་འཕྲོ་བའི་དུས། །དམ་ཉམས་དགྲ་བོའི་བླ་ཚེ་འཕྱོ་བའི་དུས། །བླ་འཁྱམས་ལས་ངན་མྱུར་དུ་ཁྲིད་ལ་ཤོག །བྷྱོ། ད་ལྟ་ནམ་ལངས་ཉི་མ་ཤར་དུས་འདིར། །མི་ཕྱུགས་ཐམས་ཅད་ལས་ལ་གྲམ་པའི་དུས། །དགྲ་བོའི་བླ་ཚེ་སྒོ་རུ་ཐོན་པའི་དུས། །བླ་འཁྱམས་ལས་ངན་མྱུར་དུ་ཁྲིད་ལ་ཤོག །བྷྱོ། ད་ལྟ་ཉི་མའི་གུང་ལ་(༥བ)
བབ་དུས་འདིར། །དགྲ་ཀུན་རྣམ་ཤེས་བྱིང་ཞིང་མྱོས་པའི་དུས། །དགྲ་བོའི་བླ་ཚེ་འཐོམ་ཞིང་འཁྱམ་པའི་དུས། །བླ་འཁྱམས་ལས་ངན་མྱུར་དུ་ཁྲིད་ལ་ཤོག །བྷྱོ། ད་ལྟ་ཉི་ནུབ་གྲིབ་སོ་ཕོག་དུས་འདིར། །སྙིང་མི་དགའ་ཞིང་ཤེས་པ་འཕྱོ་བའི་དུས། །དགྲ་བོའི་བླ་ཚེ་རྣམ་ཤེས་འཕྱོ་བའི་དུས། །བླ་འཁྱམས་ལས་ངན་མྱུར་དུ་ཁྲིད་ལ་ཤོག །བྷྱོ། བླ་འཁྱམ་ལས་ངན་འཕྱོ་བའི་དུས་དྲུག་ལ། །བླ་གཤེད་ཕོ་ཉ་ཁྱེད་རྣམས་མྱུར་དུ་རྒྱུག །མགོན་མེད་བྱེའུ་ཕྲུག་རྒྱ་ཁྲས་ཟིན་པ་ལྟར། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་མི་རུ་བརྫུ་བ་ན། །ཕོ་ཉ་གནོད་སྦྱིན་སྲིན་པོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་ཤ་བར་བརྫུ་བ་ན། །ཕོ་ཉ་གསེར་གྱི་སྟག་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་སྒོ་བར་བརྫུ་བ་ན། །ཕོ་ཉ་ལྕགས་སྡོང་ནག་པོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་ལུག་ཏུ་བརྫུ་བ་ན། །ཕོ་ཉ་ལྕགས་ཀྱི་སྤྱང་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་ར་རུ་བརྫུ་བ་ན། །ཕོ་ཉ་བྱུ་རུའི་ཁྱི་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་བྱ་རུ་བརྫུ་བ་ན། །ཕོ་ཉ་བྱ་རྒྱལ་ཁྱུང་དུ་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་གླ་བར་བརྫུ་བ་ན། །ཕོ་ཉ་གསེར་གྱི་འཕར་བར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །དགྲ་བོའི་བླ་འཁྱམ་བོང་བུར་བརྫུ་བ་ན། །ཕོ་ཉ་ཟངས་ཀྱི་དྲེད་མོར་སྐུ་སྤྲུལ་ལ། །རང་དབང་མེད་པར་མྱུར་དུ་ཁུག་ལ་ཤོག །བྷྱོ། དམ་ཉམས་དགྲ་བོའི་བླ་རྟགས་བརྒྱད་པོ་ལ། །ཕོ་ཉ་བརྒྱད་ཀྱི་གཉེན་པོར་སྐུ་སྤྲུལ་ལ། །འབྲུབ་ཁུང་འཁོར་བའི་བཙོན་ཁང་འདིའི་ནང་དུ། །དམ་ཉམས་ལིངྒའི་རྟེན་ལ་བླ་སྲོག་ཁུག །བླ་སྲོག་གསུམ་ལ་དྲག་པོའི་ཕུར་པས་ཐོབ། །ཕུར་མཚོན་དཔལ་གྱིས་ལུས་སེམས་ཕྱེ་མར་ཐོད། །དགྲ་བོའི་བླ་སྲོག་སྟེང་དུ་མཱ་ར་ཡ། །སྲོག་རྩ་དམར་པོ་རྦད་ཀྱིས་ཆོད་ལ་ཤོག །བླ་འཁྱམ་ལས་ངན་སྟེང་དུ་མཱ་ར་ཡ། །ར་དང་ལུག་དང་བོང་བུ་རྣམ་པ་གསུམ། །བླ་རྟགས་ཡིན་པས་མྱུར་དུ་ཁྱེར་ལ་ཤོག །སོ་དང་སེན་མོ་པགས་པ་རྣམ་(༦ན)
པ་གསུམ། །ཕྱི་རྟགས་ཡིན་པས་མྱུར་དུ་ཁྱེར་ལ་ཤོག །རྣ་བ་ལྕེ་དང་མིག་དང་གསུམ་པོ་ནི། །དབང་པོ་ཡིན་པས་མྱུར་དུ་ཁྱེར་ལ་ཤོག །གློ་བ་སྙིང་དང་མཆིན་པ་གསུམ་པོ་ནི། །དོན་སྙིང་ཡིན་པས་མྱུར་དུ་ཁྱེར་ལ་ཤོག །མཉེ་མ་རྒྱུ་མ་མཁལ་མ་གསུམ་པོ་ནི། །ནང་ཁྲོལ་ཡིན་པས་མྱུར་དུ་ཁྱེར་ལ་ཤོག །ཤ་ཁྲག་བརྒྱན་པའི་མཆོད་གཏོར་འདི་བཞེས་ལ། །བཅོལ་པའི་ཕྲིན་ལས་མྱུར་དུ་སྒྲུབ་པར་མཛོད། །ཨྱེ་མྱགས་ཀྱི་མཐར། ཆེ་གེ་མོ་ཨཱ་ཀརྵ་ཡ་ཧཱུཾ་ཛཿཛཿཨཱ་ཡུརྫྙཱ་ན་ཨ་ཀརྵ་ཡ་ཧཱུཾ་ཛཿཛཿཏྲི་ཡཾ་ནི་ཨཱ་ཀརྵ་ཡ་ཧཱུཾ་ཛ༔ཛཿ རཱུ་པ་སྐནྟ་ཨཱ་ཀརྵ་ཡ་ཧཱུཾ་ཛཿཛཿཞེས་དང་། ཨྱེ་མྱགས་ཀྱི་གཤམ་དུ། དགྲ་བོའི་བླ་ཤ་རེ་མ་ཏི་འགྲིམ་འགྲིམ། ཤ་མ་རུ་ཏི་ཐུལ་ཐུལ། མྱོགས་མྱོགས། ཡེང་ཡེང་། ཤ་མ་རུ་ཏི་ཁུག་ཁུག །ལིང་མྱོགས། ལིང་ཤག །ལིང་ཐུམས། ཙ་མུན་ཏྲི་ཛཿཧཱུཾ་བཾ་ཧོཿ ཞེས་རྟགས་མ་བྱུང་གི་བར་བྱ། དེ་ནས། ལྷ་དང་དབྱེ་བ་ནི། ལས་ཀྱི་གཤིན་རྗེའི་གཤེད་པོ་ཐམས་ཅད་དང་། ཁ་ཁ་མུ་ཁ་མཐིང་ནག་བྱ་རོག་གདོང་། །ཧུ་ལུ་མུ་ཁ་སེར་ནག་འུག་པའི་གདོང་། །འཁོར་བཅས་ཁྱོད་ཀྱི་ཐུགས་དམ་དུས་ལ་བབ། །དམ་ཉམས་དགྲ་བགེགས་མི་ནོར་འཁོར་བཅས་འདི། །སྐྱོབ་པའི་དགྲ་ལྷ་ལུས་དག་སྲུང་བ་ཕྲོལ། ཁྱོ་དང་ཆུང་མ་ཕ་དང་བུ་གཉིས་ཕྲོལ། །གཉེན་དང་ཉེ་དུ་ཕོ་བོ་ནུ་བོ་བྲོལ། །དགྲ་ལྷ་སྤྱི་གཙུག་ཕོ་ལྷ་ཕྲག་པ་གཡས། །ཡུལ་ལྷ་ཕྲག་གཡོན་སྲོག་ལྷ་སྙིང་གི་དཀྱིལ། །ཞང་ལྷ་ལྟེ་ཁུང་མ་ལྷ་གསང་བའི་གནས། །འགོ་བའི་བན་བོན་ལྷ་སྲུང་ཚོགས་རྣམས་ཀུན། །ཏིང་འཛིན་སྔགས་དང་རྫས་ཀྱི་འཁྲུལ་འཁོར་མཐུས། །སྐྱོབ་པའི་ལྷ་དང་ཕྲོལ་ལ་བདུད་དང་སྤྲོད། །རང་གཤེད་རང་ལ་དབབ་སོགས་དྲག་པོའི་ལས། །ཐོགས་པ་མེད་པར་མྱུར་དུ་སྒྲུབ་པར་མཛོད། །ཨྱེ་མྱགས་ཀྱི་མཐར། ཆེ་གེ་མོ་དྷེ་ཝ་ཀ་པ་ཡེ། ཨེ་ཛ་ལ་ཛ་ལ། ར་ཙ་ཕྱེ་ར་ཙ་ཕྱེ་ཨ་ཤག་ཤག་(༦བ)
ཡ་མ་ཕྱེ་ཡ་ཡ་མ་ཕྱེ་ཡ། སྤུ་ཏ་སྤུ་ཏ་ཕུས་ཕུས། ལང་ལང་། སེང་སེང་། ཕུས་ཕུས། ཆེ་གེ་མོ་ཡུལ་ལྷ་དང་ཕྱེ། དགྲ་ལྷ་དང་ཕྱེ། སྲོག་ལྷ་དང་ཕྱེ། ཕོ་ལྷ་དང་ཕྱེ། མ་ལྷ་དང་ཕྱེ། ཞེས་དང་། ཨྱེ་མྱགས་ཀྱི་གཤམ་དུ། མ་མ་ཏྲག་མཱ་ར་ཡ་ཕྱེ་ཕྱེ། ཏྲག་རཀྴ་རུ་དྲ་མཱ་ར་ཡ། དགྲ་བོ་ལྷ་སྲུང་དང་བཅས་པ་ཕྱེ་ཕྱེ། དཀྲུགས་དཀྲུགས། གཏོར་གཏོར། ཡེད་ཡེད། ཅེས་རྫས་དུད་གཏོང་ཞིང་དང་སྒྲོས་བྱབ། ཐུན་བརྡེག་པ་ནི། མཚེ་ཡུངས་རྡོ་ལྕགས་ལ་སོགས་དྲག་པོའི་རྫས། །དུག་དང་ཁྲག་ཏུ་སྦོལ་ཏེ་ངར་བཏགས་པ། །རྡོ་རྗེའི་ཐོག་དང་མཚུངས་པའི་ཐུན་རྫས་འདི། །བཏབ་པས་ཚེ་སྲོག་བཀྲག་མདངས་ཉམས་པར་གྱུར། །ཅེས་འོག་གི་ཕུར་གདབ་ཀྱི་སྔགས་མཇུག་ཏུ་ལས་དྲུག་གི་སོ་གང་དགོས་དང་ཉིན་མཚན་གྱི་ཐུན་སྔགས་ཅི་དགོས་བཏགས་ནས་བརྡེག །ཕུར་གདབ་ནི། ཨེ། ཟིལ་གནོན་ལྷ་ཚོགས་འཁོར་བཅས་ཀྱི། །ཞེས་སོགས་སྔགས་དང་བཅས་ཕུར་པ་ཡ་མ་རཱ་ཛར་གསལ་བ་སྙིང་གར་བཏབ་སྟེ་ཚེ་ཁྲུས་ཀྱི་དགོངས་པས་རྣམ་ཤེས་སྤར། རལ་གྲིས་གཏུབ་པ་ནི། སྲས་མཆོག་ཐུགས་ནས་དྲེགས་པའི་བདག་པོ་ནི། །ངོ་བོ་གསང་སྔགས་རྡོ་རྗེ་འཛིན་པ་ལ། །རྣམ་པ་གནམ་ལྕགས་རལ་གྲིས་དགྲ་བགེགས་ཀྱི། །གཟུགས་ཕུང་ཤ་ཁྲག་མ་ལུས་དུམ་བུར་གཏུབས། །ཞེས་ཕུར་གདབ་ཀྱི་སྔགས་དང་བཅས་ཏེ་རྐང་པ་གཡོན་ནས་རིམ་བཞིན་གཏུབ། སྟོབ་པ་ནི་ལིང་རོ་སྨན་རག་གིས་སྦྲུས་པ་བྷནྡྷར་བླུགས་སྟེ། ཨྱེ། ཕྱག་རྒྱ་ཟིལ་གནོན་འཁོར་བཅས་ལ། །ཞེས་སོགས་སྔགས་དང་བཅས་པས་དབུལ། བམ་སྐོངས་དང་རྩ་གསུམ་གྱི་བཀང་བ་སོང་རྗེས་ཚོགས་ལ་རོལ། ལྷག་མ་བྱང་ཤར་དུ་སྣོད་ཅིག་ཏུ་སྤུངས་ནས་བཙོན་དུ་འཛིན། གཏེར་གཞུང་དུ་ཨྱེ་རིང་ཨྱེ་མྱགས་བཟློག་གཤམ་སྤྲད། ཅེས་པའི་དགོངས་པ་ལྟར། སྐུའི་སྔགས་ལ། (༧ན)
སརྦ་ཙིཏྟ་རོ་མྱགས་ཁ་ཐམ་སྲོག་གཟེར་སྦུར་ནན་འདྲིད་ཕྱུང་ཧྲི་ཤག་རྦད། བཏགས་ཏེ་ལན་གསུམ་བཟླས་པའི་གསུམ་གའི་མཇུག་ཏུ་ཐལ་མོ་རེ་བརྡེབ། དེས་འོག་མ་རྣམས་ལ་འགྲེ། གསུང་གི་སྔགས་ལ། ཧ་ལ་ཧ་ལ་ཙ་མ་རི་ཕྱུང་གནོད་བྱེད་ཨ་མུ་ཀ་མྱགས་ཐུམ་རིལ་ཏྲིག་ནན་སྦུར་ཡ་ནན་ཨེ་ཧུར་ཐུམས་ཛ་ཁཾ་ཤག་རོ་མྱགས་མུགས་ཏི་རྦད་ཡ་བཏགས་པ་ལན་གསུམ། ཐུགས་ཀྱི་སྔགས་ལ། གསུང་སྔགས་ཀྱི་གཤམ་བུ་གནོད་བྱེད་ཨ་མུ་ཀ་མན་ཇི་ལྟ་བ་བཏགས་པ་ལན་གསུམ། ཨྱེ་རིང་ལན་གསུམ་ལ་སྤྱང་མོ་དྲུག་སྐབས་ཐོབ་ཀྱི་གང་དགོས་སྦྱོར་ཞིང་རྒྱུན་དུ་བཟློག་སྦྱང་གཙོ་ཆེ་བར་མཛད། ཚར་གསུམ་པའི་མཐར་དམོད་མོ་རྒྱས་པར་བརྗོད། ཡང་བཟློག་མེའི་སྤུ་གྲི། རྡོ་རྗེ་ཕ་ལམ། ཧྲཱིཿཥྚྲཱིཿལ་གྲོང་ཁྱེར་ཉི་ཤུ་པ་བཏགས་པ་རྣམས་ཀྱང་སོ་སོར་ལན་གསུམ་རེར་ཐལ་རྡེབ་བྱེད་པ་གོང་དང་འདྲ། འདིའི་དུས་རྡོ་རྗེ་སློབ་དཔོན་སོགས་ཀྱི་བློར་ཡོད་ན་ཕོ་ཁྲོམ་དང་མོ་ཁྲོམ་གྱིས་མཚོན་བཟློག་སྔགས་ཟབ་མོ་གཞན་ཡང་བཟླས་པ་ལེགས་ཆར་འགྱུར་བར་སེམས་སོ། །མདུན་བསྐྱེད་ཀྱི་ལྷ་ཚོགས་ལྕགས་འདྲར་གསལ་བ་རྣམས་ལྕགས་སྡིག་ཏུ་བསྒྱུར་བ་བཀའ་བརྒྱད་ལ་དབུ་ཉེར་གཅིག་པར་བསྒྱུར་བ་དང་མཚུངས་ལ། དེ་ནས་ཕུད་ཆང་ལ་བཏབ་པའི་ལིང་རོ་རྣམས་ཚིག་དང་བསྟུན་ནས་འབུལ་ཞིང་། འཕྲིན་ལས་འཆོལ་བ་ནི། ཧཱུཾ། ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་རྒྱལ་རོལ་པའི་དུར་ཁྲོད་ཆེན་པོ་ན༔ ཀླུ་འབུམ་གཉན་ཁྲི་ས་བདག་སྟོང་གི་གདན༔ ཕྱོགས་སྐྱོང་དྲེགས་པ་མ་ཧེ་བསྣོལ་བའི་སྟེང་༔ ཨེ་ལས་ཕྱག་རྒྱ་ཟིལ་གནོན་སྐུ་མདོག་ནག༔ ཞལ་གསུམ་ཕྱག་དྲུག་ཞབས་བཞི་དོར་སྟབས་བགྲད༔ རྣོ་བའི་མཚོན་བྱ་སྣ་ཚོགས་ཕྱག་ན་བསྣམས༔ སྤྲུལ་པའི་ལྷ་ཚོགས་མང་པོ་(༧བ)
འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ བྱད་དང་རྦོད་གཏོང་མ་ལུས་བཟློག་ཏུ་གསོལ༔ ཤར་ཕྱོགས་དྲི་ཟ་ཕོ་མོ་བསྣོལ་སྟེང་དུ༔ དྲེགས་པ་ཕྱག་ན་རྡོ་རྗེ་ནི༔ ལྗང་ནག་རྡོ་རྗེ་སྙིང་འཕྲེང་འཛིན༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ དྲི་ཟའི་བྱད་དང་རྦོད་གཏོང་བཟློག་ཏུ་གསོལ༔ ལྷོ་ཕྱོགས་གཤིན་རྗེ་ཕོ་མོ་བསྣོལ་སྟེང་དུ༔ གསོད་བྱེད་ཡ་མ་སེར་ནག་ནི༔ འཁོར་ལོ་ཙིཏྟ་ཕྱག་ན་བསྣམས༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ བྱད་དང་རྦོད་གཏོང་མ་ལུས་བཟློག་ཏུ་གསོལ༔ ནུབ་ཕྱོགས་ཀླུ་དབང་ཕོ་མོའི་ཁྲི་སྟེང་དུ༔ རུས་སྦལ་རྔམ་པ་མི་ཟན་ནི༔ སྡེར་མོ་གནམ་ལྕགས་སྤུ་གྲི་འདྲ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ཀླུ་ཡི་བྱད་དང་རྦོད་གཏོང་རིམས་ནད་བཟློག༔ བྱང་ཕྱོགས་གནོད་སྦྱིན་ཕོ་མོའི་ཁྲི་སྟེང་དུ༔ སྔགས་སྲུང་ཨེ་ཀ་ཛ་ཏི་ནི༔ ཕྱག་ན་རལ་གྲི་གློག་འཕྲེང་བསྣམས༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ གནོད་སྦྱིན་བྱད་དང་རྦོད་གཏོང་བཟློག་ཏུ་གསོལ༔ ཡུམ་མཆོག་པེ་ཏ་ནག་མོ་ནི༔ ཙིཏྟ་བནྡྷ་ཡབ་ལ་སྟོབ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ བྱད་དང་རྦོད་གཏོང་མ་ལུས་བཟློག་ཏུ་གསོལ༔ ཤར་ལྷོ་མེ་ལྷའི་ཁྲི་སྟེང་དུ༔ ལྷ་ཡི་གཤེད་པོ་སེང་གེའི་དབུ༔ སྤུ་གྲི་མི་སྙིང་ཕྱག་ན་བསྣམས༔ ཡབ་ཡུམ་འཁོར་དང་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ཤར་ལྷོ་མེ་ལྷའི་གནོད་པ་བཟློག་ཏུ་གསོལ༔ ལྷོ་ནུབ་སྲིན་པོ་ཕོ་མོའི་ཁྲི་སྟེང་དུ༔ སྲོག་བདག་དམར་པོ་སྟག་གི་མགོ༔ སྤུ་གྲི་ཙིཏྟའི་འཕྲེང་བ་བསྣམས༔ སྲོག་བདག་ཡབ་ཡུམ་འཁོར་དང་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ལྷོ་ནུབ་སྲིན་པོ་ཕོ་མོའི་གནོད་པ་བཟློག༔ ནུབ་བྱང་རླུང་ལྷ་ཕོ་མོའི་ཁྲི་སྟེང་དུ༔ ཀླུ་གཤེད་ནག་པོ་སྦྲུལ་གི་མགོ༔ ཕྱག་ན་བསེ་ཡི་སྤུ་གྲི་བསྣམས༔ ཡབ་ཡུམ་འཆི་བདག་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ནུབ་བྱང་འཆི་བདག་ཀླུ་ཡི་གནོད་པ་བཟློག༔ བྱང་ཤར་དབང་ལྡན་ཕོ་མོའི་ཁྲི་སྟེང་དུ༔ གནོད་སྦྱིན་(༨ན)
གཤེད་པ་ཁྱུང་ནག་གཉིས༔ ཞལ་དུ་གདུག་པ་ཀླུ་སྦྲུལ་གསོལ༔ ཡབ་ཡུམ་ཁྱུང་ཆེན་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ བྱང་ཤར་ཀླུ་གདོན་གནོད་སྦྱིན་གནོད་པ་གནོད་པ་བཟློག༔ ཟླ་གམ་ཐོད་མཁར་གསུམ་གྱི་དབུས༔ དུག་གསུམ་བསྣོལ་བའི་ཁྲི་སྟེང་དུ༔ ཚེ་བདག་སྲོག་བདག་འཆི་བདག་གསུམ༔ སྣ་ཚོགས་མི་སྡུག་སེམས་ཅན་དབུ༔ མཚོན་ཆ་མི་སྡུག་ལག་ན་ཐོགས༔ དུག་གསུམ་སྒྲོལ་བྱེད་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ དུག་གསུམ་འདུས་པའི་བྱད་དང་རྦོད་གཏོང་བཟློག༔ འཁོར་ལོ་ཐོད་མཁར་བཅུ་གཉིས་དབུས༔ གསང་བའི་གཤེད་ཆེན་བཞི་པོ་ནི༔ སྲིན་པོ་ཡ་མ་རཱ་ཙ་ནི༔ མ་ཏྲཾ་རོ་དབྱུག་འཁོར་ལོ་ཐོགས༔ ཡུམ་མཆོག་ཐལ་མདོག་གཡོན་ནས་འཁྲིལ༔ ཁྲམ་ཤིང་ནད་ཀྱི་རྐྱལ་པ་བསྣམས༔ གཤིན་རྗེ་མྱོས་བྱེད་འབར་བ་ནི༔ སེར་ནག་བེ་ཅོན་འཁོར་ལོ་འཛིན༔ གཡོན་དུ་ཡུམ་མཆོག་གསོད་བྱེད་མ༔ ཁྲམ་ཤིང་ནད་ཀྱི་རྐྱལ་པ་བསྣམས༔ གཤེད་པོ་ཨཱཪྱ་མ་རུ་ནི༔ དམར་པོ་བེ་ཅོན་ཙཀྲ་བསྣམས༔ གཡོན་དུ་སྲོག་ལེན་ནག་མོ་ནི༔ ཁྲམ་ཤིང་ནད་ཀྱི་རྐྱལ་པ་བསྣམས༔ གཤེད་ཆེན་རལ་པ་ཚར་དགུ་ནི༔ ལྗང་ནག་བེ་ཅོན་ཙཀྲ་བསྣམས༔ ཡུམ་མཆོག་བདུད་མ་རལ་ནག་མ༔ ཁྲམ་ཤིང་ནད་ཀྱི་རྐྱལ་པ་བསྣམས༔ གསང་བའི་གཤེད་བཞིར་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ གསང་གཤེད་སྤྲུལ་པའི་གནོད་པ་བཟློག༔ ནང་གི་གཤེད་ཆེན་བཞི་པོ་ནི༔ དུང་གི་མོན་པ་སེང་གེའི་མགོ༔ ཡུམ་ནི་མོན་མོ་བླ་རྐུན་མ༔ ལྕགས་ཀྱི་མོན་པ་སྟག་གི་མགོ༔ མོན་མོ་གཡུ་ཡི་རལ་པ་ཅན༔ བསེ་ཡི་མོན་པ་དྲེད་ཀྱི་མགོ༔ མོན་མོ་ཁྲག་གི་རལ་པ་ཅན༔ གསེར་གྱི་མོན་པ་ཁྱུང་གི་མགོ༔ མོན་མོ་སྙིང་འབྱིན་གཟེར་འབེབས་མ༔ ཡབ་རྣམས་བེ་ཅོན་ཙིཏྟ་(༨བ)
བསྣམས༔ ཡུམ་ཀུན་ལྕགས་ཀྱུ་ཞགས་པ་བསྣམས༔ ནང་གི་གཤེད་བཞིར་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ནང་གཤེད་མོན་པའི་གནོད་པ་བཟློག༔ ཕྱི་ཡི་གཤེད་ཆེན་བཞི་པོ་ནི༔ ཧེ་ལེ་ཁྱབ་པ་ཤར་གྱི་བདུད༔ ཡུམ་ནི་རོ་ཟན་སྙིང་འབྱིན་མ༔ ནག་པོ་འཛུམ་མེད་ལྷོ་ཡི་བདུད༔ ནག་མོ་སྙིང་ཁྲག་རོལ་འཐུང་མ༔ སོ་འདར་འཁྲིག་པ་ནུབ་ཀྱི་བདུད༔ ནག་མོ་ཤ་ལ་གཟེར་འདེབས་མ༔ རལ་པ་སྤྱིར་བཅིངས་བྱང་གི་བདུད༔ མ་མོ་ནག་མོ་ཁྲག་རལ་ཅན༔ ཡབ་རྣམས་ཁྲམ་ཤིང་ཞགས་པ་བསྣམས༔ ཡུམ་ཀུན་སྤུ་གྲི་མི་སྙིང་བསྣམས༔ ཕྱི་ཡི་གཤེད་བཞིར་བཅས་པ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ཕྱི་ཡི་གཤེད་བཞིའི་གནོད་པ་བཟློག༔ གྲུ་ཆད་ལྕགས་མཁར་བཅུ་གཉིས་ནང་༔ བྷེ་ཝ་ས་ཏྭ་ནག་པོ་དང་༔ ནོར་བུ་དགེ་འཕེལ་སེར་པོ་དང་༔ ནག་པོ་འཛུམ་མེད་སེར་ནག་དང་༔ བྱེ་བ་དགུ་ཁྲི་ནག་པོ་དང༔ རཀྴ་གློག་འཕྲེང་དམར་པོ་དང་༔ ཡཀྴ་གསོད་བྱེད་ནག་པོ་དང་༔ གཏུམ་པོ་དུད་ཁ་རལ་པ་གདེངས༔ གང་བ་ཀུན་འཇོམས་དཀར་པོ་དང་༔ ཁ་འབར་རལ་གཅིག་མཐིང་ལ་སྔོ༔ སྦྲུལ་མགོ་ཀུན་འཛིན་སྔོ་ལ་སྐྱ༔ ངང་པ་སྟོབས་ལྡན་ཀུན་ན་སེར༔ གྱད་པ་སྟོབསལྡན་ནག་ལ་འཇིགས༔ བེ་ཅོན་འཁོར་ལོ་ཕྱག་ན་བསྣམས༔ ཟླ་གཤེད་གཤིན་རྗེ་བཅུ་གཉིས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ཟླ་གཤེད་བཅུ་གཉིས་གནོད་པ་བཟློག༔ ཞག་གི་གཤེད་པོ་སོ་གཉིས་ནི༔ ཤར་དུ་ཁྲམ་ཐོགས་བདུད་པོ་བརྒྱད༔ ཆིབས་སུ་རྟ་ནག་རྟིང་དཀར་ཆིབས༔ ལྷོ་ཡི་གཤིན་རྗེ་ཆུ་གླང་ཞོན༔ འཁོར་ལོ་བེ་ཅོན་ཕྱག་ན་བསྣམས༔ ནུབ་ན་མ་མོ་དྲེལ་ནག་ཞོན༔ ཕྱག་ན་ནད་རྐྱལ་ཐུན་ཟོར་བསྣམས༔ བྱང་དུ་གནོད་སྦྱིན་བྱ་ནག་ཞོན༔ ཕྱག་(༩ན)
ན་རལ་གྲི་ཞགས་པ་བསྣམས༔ ཞག་གི་གཤེད་པོ་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ཞག་གཤེད་སུམ་བརྒྱའི་གནོད་པ་བཟློག༔ ཤར་སྒོར་དཀར་པོ་སྙིང་འཛིན་དང་༔ ལྷོ་སྒོར་མགོན་པོ་ནག་པོ་དང་༔ ནུབ་སྒོར་བདུད་པོ་ཡབ་རྗེ་དང་༔ བྱང་སྒོར་གནོད་སྦྱིན་སྐུ་མཆོག་དམར༔ ཕྱག་ན་འཁོར་ལོ་ཐུན་ཁྲག་བསྣམས༔ སྐུ་ལ་ཙེ་བེར་ཁྲ་བོ་གསོལ༔ ཡུམ་མཆོག་མཁའ་འགྲོ་རོ་ལངས་བཞི༔ མི་ལྤགས་རློན་པའི་ན་བཟའ་གསོལ༔ ཕྱག་གཡས་མ་ཏྲཾ་རོ་དབྱུག་འཕྱར༔ ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་གཡོན༔ སྒོ་བཞི་སྒྲོལ་གིང་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ གཤེད་བཞི་ཕོ་ཉའི་གནོད་པ་བཟློག༔ ཕྱི་རོལ་དཀྱིལ་འཁོར་མུ་རན་སྐྱོང་༔ ཟ་མའི་གཤིན་རྗེ་བཅུ་དྲུག་ནི༔ ཕོ་གཤེད་སུམ་བརྒྱ་དྲུག་ཅུ་དང་༔ མོ་གཤེད་སུམ་བརྒྱ་དྲུག་ཅུ་དང་༔ གཤིན་རྗེ་བདུན་བརྒྱ་ཉི་ཤུ་ནི༔ ཕྱག་ན་འཁོར་ལོ་ཐུན་ཁྲག་བསྣམས༔ ཆིབས་སུ་མི་དམར་རྟ་ལ་ཆིབས༔ གཤེད་ཆེན་བདུན་བརྒྱ་ཉི་ཤུ་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ལས་གཤེད་རྦོད་གཏོང་གནོད་པ་བཟློག༔ གཤིན་རྗེ་ཕྱོགས་སྐྱོང་སྡེ་བརྒྱད་དྲེགས་པའི་ཚོགས༔ ས་ཆུ་མེ་རླུང་སྤྲིན་དང་དུར་ཁྲོད་བདག༔ མཁའ་ལ་རྒྱུ་དང་དབང་ཕྱུག་མཁའ་འགྲོ་མ༔ ཞིང་སྐྱོང་གིང་དང་ལངྒ་བསྟན་མའི་ཚོགས༔ འཇིག་རྟེན་ཀུན་ཏུ་ཁྱབ་པར་རྒྱུག་བྱེད་པ༔ ལས་ཀྱི་གཤིན་རྗེ་ཕོ་ཉ་འཁོར་བཅས་ལ༔ དགྲ་བགེགས་བསྒྲལ་བའི་ཤ་རུས་ཞལ་དུ་སྟོབ༔ ཕོ་ཉ་གཤིན་རྗེའི་རྦོད་གཏོང་གནོད་པ་བཟློག༔ དེ་ནས་བཟློག་པ་བྱ་བ་ནི། སྨན་རག་གཏོར་གསུམ་ཚིག་དང་བསྟུན་ནས་དབུལ་ཞིང་འདི་སྐད་དོ། །བྷྱོ། ད་ནི་བཟློག་པའི་དུས་ལ་བབ༔ ད་ནི་བསྒྱུར་བའི་དུས་ལ་བབ༔ འཇིགས་སུ་རུང་(༩བ)
བའི་དུར་ཁྲོད་ན༔ ཀླུ་འབུམ་གཉན་ཁྲི་ས་བདག་སྟོང་༔ མ་ཧེ་ཕྱོགས་སྐྱོང་དྲེགས་པའི་སྟེང་༔ གཤིན་རྗེའི་རྒྱལ་པོ་ཚེ་བདག་ནི༔ གཡས་དཀར་ལྷ་ཡི་ཆད་པ་བཟློག༔ གཡོན་དམར་མ་མོའི་ཆད་པ་བཟློག༔ དབུས་མཐིང་བདུད་ཀྱི་ཆོ་འཕྲུལ་བཟློག༔ ཕྱག་དྲུག་རྒྱུད་དྲུག་རྦོད་གཏོང་བཟློག༔ དབུ་ལ་ཁྱུང་ཆེན་འབར་བ་ཡིས༔ ས་བདག་ཀླུ་གཉན་བྱད་ཐན་བཟློག༔ ཡུམ་མཆོག་ཟ་བྱེད་པེ་ཏ་ལི༔ སྦྱོར་ཡུམ་དབྱིངས་ཡུམ་འཁོར་བཅས་ཀྱིས༔ སྲིད་པ་མ་མོའི་ཆོ་འཕྲུལ་བཟློག༔ གྱད་གནོན་སྤྲུལ་པའི་ལྷ་བརྒྱད་ཀྱིས༔ ལྷ་སྲིན་སྡེ་བརྒྱད་ཆོ་འཕྲུལ་བཟློག༔ བདུད་རྩི་ཆང་གི་མཆོད་པ་འབུལ༔ སྲིད་པ་ཕོ་རྒྱུད་ཆོ་འཕྲུལ་བཟློག༔ རཀྟ་ཁྲག་གི་མཆོད་པ་འབུལ༔ སྲིད་པ་མོ་རྒྱུད་ཆོ་འཕྲུལ་བཟློག༔ དམར་གྱི་གཏོར་མའི་མཆོད་པ་འབུལ༔ བྱད་དང་རྦོད་གཏོང་ཆོ་འཕྲུལ་བཟློག༔ དབུ་ལ་ནོར་བུ་འབར་བས་བརྒྱན༔ རྣལ་འབྱོར་ཚེ་སྲིངས་དཔལ་ཡང་སྐྱེད༔ བྷྱོཿ ཚངས་པ་བརྒྱ་བྱིན་ལྷ་ཡི་གདོན༔ འཇིགས་པའི་སྟོབས་ཀྱིས་བཟློག་ཏུ་གསོལ༔ དགའ་བོ་འཇོག་པོ་ཀླུ་ཡི་གདོན༔ བརྗིད་པའི་སྟོབས་ཀྱིས་བཟློག་ཏུ་གསོལ༔ གང་བ་བཟང་པོ་གནོད་སྦྱིན་གདོན༔ གཟེར་བའི་སྟོབས་ཀྱིས་བཟློག་ཏུ་གསོལ༔ ཟ་བྱེད་རྔམ་པ་སྲིན་པོའི་གདོན༔ དྲག་པོའི་སྟོབས་ཀྱིས་བཟློག་ཏུ་གསོལ༔ གཙོ་མོ་ཁ་འབར་ཡི་དྭགས་གདོན༔ བཞད་པའི་སྟོབས་ཀྱིས་བཟློག་ཏུ་གསོལ༔ ཕག་གདོང་འཇིགས་པ་ཤ་ཟའི་གདོན༔ གཏུམ་པོའི་སྟོབས་ཀྱིས་བཟློག་ཏུ་གསོལ༔ བྱི་ན་ཡ་ཀ་བགེགས་ཀྱི་གདོན༔ འགྱིང་བའི་སྟོབས་ཀྱིས་བཟློག་ཏུ་གསོལ༔ ཁྱབ་འཇུག་བྱི་ནུ་གཟའ་ཡི་གདོན༔ དྲག་པོའི་སྟོབས་ཀྱིས་བཟློག་ཏུ་གསོལ༔ ཁྲམ་ཐོགས་གྲི་ཐོགས་གིང་གི་གདོན༔ སྤྲུལ་པའི་སྟོབས་ཀྱིས་བཟློག་ཏུ་གསོལ༔ ཁ་བཞིར་མགྱོགས་པ་བཙན་གྱི་གདོན༔ འཇིགས་པའི་སྟོབས་ཀྱིས་བཟློག་ཏུ་གསོལ༔ ཧལ་པ་ཕྱ་སངས་གཤིན་(༡༠ན)
རྗེའི་གདོན༔ སྤྲུལ་པའི་སྟོབས་ཀྱིས་བཟློག་ཏུ་གསོལ༔ རལ་པ་གསིག་པ་མ་མོའི་གདོན༔ གསུང་གི་སྟོབས་ཀྱིས་བཟློག་ཏུ་གསོལ༔ རོལ་པ་སྐྱ་བདུན་དམུ་ཡི་གདོན། མགོ་བརྙན་བརྗིད་པས་བཟློག་ཏུ་གསོལ༔ མ་ཧཱ་དེ་ཝ་མུ་སྟེགས་གདོན༔ བདེན་པའི་སྟོབས་ཀྱིས་བཟློག་ཏུ་གསོལ༔ བྷྱོ། འཇའ་འཁྱིལ་ལྷ་ཡི་ལྟས་ངན་ཡིན༔ ལྷ་ཡི་ལྟས་ངན་བཟློག་ཏུ་གསོལ༔ སེང་གེ་གཤིན་རྗེའི་ལྟས་ངན་ཡིན༔ གཤིན་རྗེའི་ལྟས་ངན་བཟློག་ཏུ་གསོལ༔ དོམ་གཟིག་མ་མོའི་ལྟས་ངན་ཡིན༔ མ་མོའི་ལྟས་ངན་བཟློག་ཏུ་གསོལ༔ འུག་པ་དམུ་ཡི་ལྟས་ངན་ཡིན༔ དམུ་ཡི་ལྟས་ངན་བཟློག་ཏུ་གསོལ༔ ཕོ་རོག་མགོན་པོའི་ལྟས་ངན་ཡིན༔ མགོན་པོའི་ལྟས་ངན་བཟློག་ཏུ་གསོལ༔ ཤ་བ་བཙན་གྱི་ལྟས་ངན་ཡིན༔ བཙན་གྱི་ལྟས་ངན་བཟློག་ཏུ་གསོལ༔ སྦྲུལ་ནག་ཀླུ་ཡི་ལྟས་ངན་ཡིན༔ ཀླུ་ཡི་ལྟས་ངན་བཟློག་ཏུ་གསོལ༔ བྱ་ནག་བདུད་ཀྱི་ལྟས་ངན་ཡིན༔ བདུད་ཀྱི་ལྟས་ངན་བཟློག་ཏུ་གསོལ༔ ནེ་ཙོ་ཀླུ་སྲིན་ལྟས་ངན་ཡིན༔ ཀླུ་སྲིན་ལྟས་ངན་བཟློག་ཏུ་གསོལ༔ གླ་བ་སྨན་གྱི་ལྟས་ངན་ཡིན༔ སྨན་གྱི་ལྟས་ངན་བཟློག་ཏུ་གསོལ༔ བྱ་རྒོད་རྒྱལ་པོའི་ལྟས་ངན་ཡིན༔ རྒྱལ་པོའི་ལྟས་ངན་བཟློག་ཏུ་གསོལ༔ སྲིན་བྱ་ཐེའུ་རང་ལྟས་ངན་ཡིན༔ ཐེའུ་རང་ལྟས་ངན་བཟློག་ཏུ་གསོལ༔ པུ་ཤུད་འགོང་པོའི་ལྟས་ངན་ཡིན༔ འགོང་པོའི་ལྟས་ངན་བཟློག་ཏུ་གསོལ༔ ཁྲུང་ཁྲུང་དྲེ་མོའི་ལྟས་ངན་ཡིན༔ དྲེ་མོའི་ལྟས་ངན་བཟློག་ཏུ་གསོལ༔ སྲོད་ལ་བྱ་ཕོ་འཚེར་བ་གནམ་ཐེའི་ལྟས་ངན་ཡིན༔ གནམ་ཐེའི་ལྟས་ངན་བཟློག་ཏུ་གསོལ༔ ཐོ་རང་སྒོ་ཁྱི་ངུ་བ་བར་ཐེའི་ལྟས་ངན་ཡིན༔ བར་ཐེའི་ལྟས་ངན་བཟློག་ཏུ་གསོལ༔ དུར་ཁྲོད་ཝ་མོ་བརྒྱལ་བ་ས་ཐེའི་ལྟས་ངན་ཡིན༔ ས་ཐེའི་ལྟས་ངན་བཟློག་ཏུ་གསོལ༔ སྤྱང་སྔོན་རྒྱུག་པ་ཕོ་རྒྱུད་ལྟས་ངན་ཡིན༔ ཕོ་རྒྱུད་ལྟས་ངན་བཟློག་ཏུ་གསོལ༔ གླ་བ་གྲོང་རྒྱུག་མོ་རྒྱུད་ལྟས་ངན་ཡིན༔ མོ་རྒྱུད་ལྟས་ངན་བཟློག་ཏུ་གསོལ༔ ལྷ་ཁང་འོད་རྣམས་རྒྱལ་པོའི་ལྟས་ངན་ཡིན༔ རྒྱལ་པོའི་ལྟས་ངན་བཟློག་ཏུ་གསོལ༔ སྡིག་སྤྲུལ་ཀླུ་ཡི་ལྟས་ངན་ཡིན༔ ཀླུ་ཡི་ལྟས་ངན་བཟློག་ཏུ་གསོལ༔ སྦལ་སྲིན་ས་བདག་ལྟས་ངན་ཡིན༔ ས་བདག་ལྟས་ངན་བཟློག་ཏུ་གསོལ༔ སྲེ་མོ་བྱི་ཁྱེར་གནོད་སྦྱིན་ལྟས་ངན་ཡིན༔ གནོད་སྦྱིན་ལྟས་ངན་བཟློག་ཏུ་གསོལ༔ རི་བྱ་ཁྱིམ་ཞུགས་གཉན་གྱི་ཐན༔ གཉན་གྱི་ལྟས་ངན་བཟློག་ཏུ་གསོལ༔ ཁྱིམ་དུ་རོ་ཐན་འགོང་པོའི་ཐན༔ འགོང་པོའི་ལྟས་ངན་བཟློག་ཏུ་གསོལ༔ ཤ་ཕོ་རུ་འཛིངས་རྗེ་དཔོན་ཐན༔ རྗེ་དཔོན་ལྟས་ངན་བཟློག་ཏུ་གསོལ༔ ཉ་མོ་རྔ་འཛིངས་བྲན་གྱི་ཐན༔ བྲན་གྱི་ལྟས་ངན་བཟློག་ཏུ་གསོལ༔ བྱ་ནག་སྡེར་འཛིངས་ཆུང་མའི་ཐན༔ བྱེ་བྲལ་ལྟས་ངན་བཟློག་ཏུ་གསོལ༔ འདྲེ་བྱ་སྲེག་པ་ཆུང་སྲིའི་ཐན༔ (༡༠བ)
ཆུང་སྲིའི་ལྟས་ངན་བཟློག་ཏུ་གསོལ༔ བནྡེ་ཧོ་མ་པར་བུའི་ཐན༔ བན་དེའི་ལྟས་ངན་བཟློག་ཏུ་གསོལ༔ བོན་པོའི་བཙོ་ཟོར་ཞང་ཞུང་ཐན༔ བོན་པོའི་བཙོ་ཟོར་ལྟས་ངན་བཟློག་ཏུ་གསོལ༔ མུ་སྟེགས་གླང་ཟོར་མི་ཁའི་ཐན༔ མི་ཁའི་རྒྱ་ཐན་ལྟས་ངན་བཟློག་ཏུ་གསོལ༔ ཤ་མོ་ཁྱིམ་གང་མི་ནད་ཐན༔ ཁྱིམ་གང་མི་ནད་ལྟས་ངན་བཟློག་ཏུ་གསོལ༔ ར་གང་ནོར་ལ་སྤུ་ཐན་བྱུང་༔ གོད་འདྲེ་གོད་ཁའི་ལྟས་ངན་བཟློག་ཏུ་གསོལ༔ བང་གང་སྲིས་ལ་བྱི་ཐན་བྱུང་༔ འགོང་པོའི་སྲིས་ཐན་ལྟས་ངན་བཟློག་ཏུ་གསོལ༔ ཡུལ་ཐན་སྲིད་པའི་བཙའ་ཐན་བྱུང་༔ བཙའ་སད་སེར་གསུམ་ལྟས་ངན་བཟློག་ཏུ་གསོལ༔ དགྲ་གཤེད་དུར་ལེན་བཙོ་ཐན་བྱུང་ཿ གློ་འགོང་བཙོ་ཐན་ལྟས་ངན་བཟློག་ཏུ་གསོལ༔ ལྷ་སྲིན་འཁྲུགས་པའི་གཏད་སེལ་བྱུང་༔ བྱད་མ་འདུམ་གྱི་ལྟས་ངན་བཟློག་ཏུ་གསོལ༔ བྷྱོ་བྷྱོ་སྡང་བའི་དགྲ་ལ་བྷྱོ༔ བྷྱོ་བྷྱོ་གནོད་པའི་བགེགས་ལབྷྱོ༔ བྷྱོ་བྷྱོ་བར་ཆད་རྐྱེན་ལ་བྷྱོ༔ ཡས་ཀྱི་བདུད་དུ་གཡོས་པ་བྷྱོ༔ མས་ཀྱི་སྲི་རུ་ལངས་པ་བྷྱོ༔ ཆུང་བདུད་མཁའ་ལ་འཇབ་པ་བྷྱོ༔ མི་བདུད་གཤེད་དུ་ཁོལ་བ་བྷྱོ༔ ལྟག་པར་གཤེད་དྲིལ་བྱེད་པ་བྷྱོ༔ མདུན་ནས་རྩང་བཞིན་འཛུགས་པ་བྷྱོ༔ རྒྱབ་ནས་ཁྱི་བཞིན་འབྲེང་བ་བྷྱོ༔ ངོས་ལ་སྤྲེལ་ལྟར་འཛེག་པ་བྷྱོ༔ ཡུལ་མི་དགྲ་སྡང་བྱེད་པ་བྷྱོ༔ ཐམས་ཅད་གཅིག་ཏུ་དྲིལ་ནས་ཀྱང་༔ ཕུང་པོ་ཁམས་དང་སྐྱེ་མཆེད་རྣམས༔ དམིགས་པའི་དགྲ་བགེགས་གཟུགས་སུ་དྲིལ༔ ཉ་བོ་འདི་ལ་བཀུག་བྱས་ནས༔ ཕུར་འདེབས་ཐུན་དང་མཚོན་ཆས་བསད༔ བསྒྲལ་བའི་ཞིང་གྱུར་ལས་ལ་སྦྱར༔ དཔལ་ཆེན་ཚེ་བདག་ཞལ་དུ་སྟོབ༔ འཁོར་དང་གཤིན་རྗེ་འབུམ་ཕྲག་གི །དགྱེས་པར་རོལ་ཅིག་ཁ་རཾ་ཁཱ་ཧི༔ ལྷག་མ་མེད་པར་ཞལ་དུ་སྟོབ༔ གཟུགས་ཕུང་ཤ་ཁྲག་མཆོད་པར་བཞེས༔ དམ་ཚིག་ཉམས་ཆགས་སོ་སོར་བཤགས༔ ཐུགས་དམ་སྐོངས་ལ་དངོས་གྲུབ་སྩོལ༔ བར་ཆད་རྐྱེན་ངན་གདུག་རྩུབ་བཟློག༔ བསམས་(༡༡)
པ་སྒྲུབས་ལ་རེ་བ་སྐོངས༔ འཕྲིན་ལས་རྣམ་བཞི་མྱུར་དུ་སྒྲུབས༔ འགྲོ་བ་འཇམ་དཔལ་ས་ཐོབ་ཤོག༔ ཅེས་ཐུན་གཏོར་དང་གསེར་སྐྱེམས་ཐོག་ཁར་འབུལ་ཞིང་མཱ་ར་ཡའི་དྲག་བརྡུང་བྱེད་རིང་སློབ་དཔོན་གྱིས་དམོད་མོ་བརྗོད་ཅིང་ཐལ་མོ་བརྡབ། རྩ་གསུམ་གཏོར་མར་སྨན་རཀ་སྦྲན་ཏེ་དཔལ་འབར་བཙུགས་ལ། ཆད་མཐོ་ནི། ཧཱུཾ། བསྐལ་པ་བརྒྱད་ཁྲི་བཞི་སྟོང་སྔོན་རོལ་དུ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །སྤྲོས་བྲལ་ཆེན་པོ་ཀུན་ཏུ་བཟང་པོ་ཡིས། །བྱ་རྩོལ་བྲལ་བའི་ཡིད་ཆོས་བསྟན་པའི་ཚེ། །རིགས་ལྔ་བདེ་ཆེན་མཁའ་དབྱིངས་བཀོད་པའི་ཚོགས། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅས་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་འཕྲིན་ལས་མཛོད། །དེ་རྗེས་འགྲོ་བའི་དོན་ལ་དགོངས་པའི་ཚེ། །སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས། །འཇམ་དཔལ་དྲ་བ་འབུམ་སྡེ་དཔེ་ལ་བཀོད། །མ་གཤིན་ཡོངས་ཀྱི་དཀྱིལ་འཁོར་ཞལ་ཕྱེ་ཚེ། །བཀའ་སྲུང་གཤིན་རྗེ་དྲུག་ཁྲིས་སྲོག་སྙིང་ཕུལ། །ཇི་ལྟར་ཁས་བླངས་དམ་ཚིག་ཕོག་ནས་ནི། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅས་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་འཕྲིན་ལས་མཛོད། །དེ་རྗེས་སློབ་དཔོན་ཤནྟི་ཾགརྦྷ་དང་། །མུ་སྟེགས་བཟློག་པའི་སྟོབས་ཅན་སྔགས་བཟློག་རྩོད། །སྙིང་གཟེར་ནག་པོའི་དཀྱིལ་འཁོར་ཞལ་ཕྱེ་ཚེ། །སྡིག་པ་སྙིང་འཛིངས་མུ་སྟེགས་བསྟན་པ་བཅད། །དྲེགས་པ་བཅོ་བརྒྱད་རང་སྲོག་ཕུལ་པའི་ཚེ། །དྲེགས་པ་མ་ལུས་འདུས་ནས་སྲོག་སྙིང་ཕུལ། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅས་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་འཕྲིན་ལས་མཛོད། །དེ་རྗེས་སློབ་དཔོན་བྷ་སུ་དྷ་ར་ཡིས། །བཀའ་ཡི་(༡༡བ)
མཆོད་རྟེན་སྟོབས་ཆེན་བཞེངས་པའི་ཚེ། །ལས་ཀྱི་གཤིན་རྗེའི་སྲོག་སྙིང་ཞལ་ཡང་བསྟན། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅས་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་འཕྲིན་ལས་མཛོད། །དེ་རྗེས་སངས་རྒྱས་ཡེ་ཤེས་རིན་ཆེན་གྱིས། །ཨྱེ་རིང་རྣམ་གསུམ་དཀྱིལ་འཁོར་ཞལ་ཕྱེ་ནས། །མཆོད་རྟེན་ལུས་ལ་བཀོད་ནས་བསྒྲུབས་པའི་ཚེ། །མ་གཤིན་ཞལ་བསྟན་དངོས་གྲུབ་རྣམ་གཉིས་ཐོབ། །བཀའ་སྲུང་སྡེ་བརྒྱད་དམ་ལ་ཐོགས་པའི་ཚེ། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅས་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་འཕྲིན་ལས་མཛོད། །ད་ལྟ་སྒྲུབ་པའི་གནས་མཆོག་དམ་པ་འདིར། །དཀྱིལ་འཁོར་མཆོད་རྟེན་ལུས་དཀྱིལ་གཏོར་མ་བཤམས། །བཀའ་བཞིན་ཕོག་པའི་སྲུང་མ་དམ་ཅན་རྣམས། །བཀའ་ཡི་གཏོར་མ་ལེན་པར་མ་ཆད་དམ། །རྣལ་འབྱོར་བུ་བཞིན་སྐྱོང་བར་མ་ཆད་དམ། །རྒྱུ་སྦྱོར་བར་ཆད་བཟློག་པར་མ་ཆད་དམ། ཁས་བླངས་དམ་བཅས་བཞིན་དུ་གཏོར་མ་ལོང་། །ཇི་ལྟར་དམ་བཅས་བཞིན་དུ་འཕྲིན་ལས་མཛོད། །རོལ་ཆེན་གྱི་ཚེ་སློབ་དཔོན་གྱིས་འཕྲིན་བཅོལ་བྱས་མཐར་གཏོར་མ་ཐོག་ཏུ་ཕུལ་བའི་བཤལ་ཆུས་བསྟན་མ་བསྐྱང་། མཆོད་བསྟོད། བཟོད་གསོལ། བརྟན་བཞུགས། སྨོན་ལམ་ཤིས་བརྗོད་ཀྱི་བར་དཀྱུས་བཞིན་ནོ། །སང་ཟོར་འཕེན་པའི་ཉིན་སྔ་མར་བཟླས་པའི་དུས་ཟོར་སྐོར་བྱ་བ་ནི། བཟློག་པ་གཡུའི་སྤྱང་མོ་བཟླ་བའི་ཚེ་རཀྴ་མོནྟ་རིགས་འཛིན་སྔགས་འཆང་རྣལ་འབྱོར་པ་བདག་ཅག་དཔོན་སློབ་ཡོན་མཆོད་སྐུ་འཁོར་དང་བཅས་པའི་འགལ་རྐྱེན་བར་གཅོད་སྤང་བྱ་མི་མཐུན་པའི་ཕྱོགས་ངན་ཐམས་ཅད་ཨེ་ནན་ཡཾ་བཟློག་འདྲིད་བྷྱོ་སོགས་ཀྱི་རྗེས་སུ་ཐལ་མོ་ལན་གསུམ་བརྡབ། དེའི་ཚེ་ཕྱོགས་གཏོར་ནས་བརྩམས་ཏེ་བཟློག་གཏོར་གྱི་བར་གོ་རིམ་མ་འཕྱུགས་པར་གཡས་སྐོར་དུ་བསྐོར་ཞིང་མཚམས་ཀྱི་ལག་མ་འགགས་པ་རྣམས་ཀྱིས་བཟློག་མཚམས་སུ་ཐལ་རྡེབ་བྱེད། དེ་ནས་བསྒྲིག་ལུགས་ཀྱང་ཁ་བསྒྱུར་ཕྱག་ལན་ལྟར་བྱ། གཞན་མ་ཆོ་ག་དཀྱུས་བཞིན་ལ། ཟོར་ལམ་དབྱེ་བ་ནི། བཟློག་གཞུང་གི་བྱད་མ་འབུམ་གྱི་ལྟས་ངན་བཟློག་ཏུ་གསོལ་ཡན་(༡༢ན)
གྲུབ་མཚམས། དཔོན་སློབ་རྣམས་ཐོག་ཏུ་བྱོན། གསེར་སྐྱེམས། ལྷག་མ། དཀར་གཏོར་རྣམས་གཏོང་ཞིང་ཕྱག་རྒྱ་བསྟན། ཁ་ཕྲུས་བཏབ། གཏོར་སྣོད་ཉི་ཟླའི་དཀྱིལ་འཁོར་དུ། །ཞལ་ཟས་ཧཱུཾ་གིས་དངོས་ཟློག་བསྲེགས། །ཨཱཿཡིས་ནམ་མཁའ་ལྟ་བུ་སྟེ། །ཨཱོཾ་གྱིས་མོས་པ་ཇི་ལྟ་བར། །ཧོཿཡིས་བདུད་རྩི་ཉིད་དུ་བསྒྱུར། །གཟུགས་ནི་བསྒྲལ་བའི་དངོས་པོར་གྱུར། །ཨཱོཾ་ཨཱཿཧཱུཾ་ཧོཿ ཞེས་སློབ་དཔོན་རྐྱང་པས་བརླབ། བསྔོ་བའི་བར་དཀྱུས་བཞིན་སོང་ནས། སྒོ་དབྱེ་ནི། ཧཱུཾ། གཏོར་མའི་ལམ་བསྟན་གང་དུ་བསྟན། །གཏོར་མའི་ལམ་བསྟན་ཤར་དུ་བསྟན། །ཤར་དུ་རྒྱལ་པོ་ཡུལ་འཁོར་སྲུང་། །དྲི་ཟ་ཕོ་མོའི་འཁོར་གྱིས་བསྐོར། །སྐུ་གཟུར་དེ་ནི་སྤྱན་བྱོལ་ཅིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་ཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟེར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། ཧཱུཾ། གཏོར་མའི་ལམ་བསྟན་གང་དུ་བསྟན། །གཏོར་མའི་ལམ་བསྟན་ལྷོ་རུ་བསྟན། །ལྷོ་རུ་རྒྱལ་པོ་འཕགས་སྐྱེས་པོ། །གཤིན་རྗེ་མང་པོའི་འཁོར་གྱིས་བསྐོར། །སྐུ་གཟུར་དེ་ནི་སྤྱན་བྱོལ་ཅིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་ཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟོར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། ཧཱུཾ། གཏོར་མའི་ལམ་བསྟན་གང་དུ་བསྟན། །གཏོར་མའི་ལམ་བསྟན་ནུབ་ཏུ་བསྟན། །ནུབ་ཏུ་རྒྱལ་པོ་སྤྱན་མི་བཟང་། །ཀླུ་དབང་མང་པོའི་འཁོར་གྱིས་བསྐོར། །སྐུ་གཟུར་དེ་ནི་སྤྱན་བྱོལ་ཅིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་ཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟེར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། ཧཱུཾ། གཏོར་མའི་ལམ་བསྟན་གང་དུ་བསྟན། །གཏོར་མའི་ལམ་བསྟན་བྱང་དུ་སྟན། །བྱང་དུ་རྒྱལ་པོ་རྣམ་ཐོས་སྲས། །གནོད་སྦྱིན་མང་པོའི་འཁོར་གྱིས་བསྐོར། །སྐུ་གཟུར་དེ་ནི་སྤྱན་བྱོལ་ཅིག །གཏོར་ཟོར་དམར་པོ་ཤར་ར་ར། ཁྲག་ཟོར་དམར་པོ་ཁྱིལ་ལི་ལི། །ཐུན་ཟོར་སེར་ཕྲན་ཉིལ་ལི་ལི། །མདའ་ཟེར་སྐར་ལྟར་བྲེངས་སེ་བྲེང་། །ཐོད་ཟོར་རྦབ་ལྟར་རིལ་ལི་ལི། །ཕུར་ཟོར་ཤ་ལ་ཐིམས་སེ་ཐིམ། །རྡོ་ཟོར་ཐོག་ལྟར་རྦད་དེ་རྦད། སྟེང་གི་ལྷ་ལ་ཟོར་མི་འཕེན། །ལྷ་ཆེན་བརྒྱད་(༡༢བ)
པོ་ཞབས་སྡུས་ཤིག །འོག་གི་ཀླུ་ལ་ཟོར་མི་འཕེན། །ཀླུ་ཆེན་བརྒྱད་པོ་དབུ་འཕང་སྨོད། །བར་གྱི་གཉན་ལ་ཟོར་མི་འཕེན། །གཉན་ཆེན་སྡེ་བཞི་སྐུ་གཟུར་ཅིག །དྲག་པོ་གཤིན་རྗེའི་གཏོར་ཟོར་འདི། །སྡང་བའི་དགྲ་ལ་གཏོར་ཟོར་ཡཱ། །དགྲ་བོ་བདུན་རྒྱུད་རྩད་ནས་ཆོད། །གནོད་པའི་དགྲ་ལ་ཁྲག་ཟོར་ཡཱ། །མོ་རྒྱུད་ཁྲག་གི་མངལ་ནས་སྐོམས། །ཐུན་ཟོར་བུ་རྒྱུད་ཚ་ལ་ཡཱ། །བུ་ཚ་བདུན་རྒྱུད་རྩད་ནས་ཆོད། །མདའ་ཟོར་སྒོ་ཡི་ནོར་ལ་རྒྱོབ། །སྒོ་ནོར་གོད་འདྲེའི་ཕྱགས་མས་ཐོབ། །ཐོད་ཟོར་ནང་ཁང་སྲིས་ལ་ཡཱ། །ཕྱགས་མས་ཐལ་བ་རླུང་ལ་སྐུར། །ཕུར་ཟོར་དགྲ་ཡི་སྙིང་ལ་ཡཱ། །དྲག་པོ་གྲི་འཐབ་ནད་ཀྱིས་གསོད། །རྡོ་ཟོར་དགྲ་བོའི་མཁར་ལ་ཡཱ། །སྐྱེ་བོ་འཁོར་གྱི་རྒྱུན་ལམ་ཆོད། །བྱད་ཁ་བཟློག་ལ་ཕུར་ཁ་སྒྱུར། །བཅོལ་བའི་འཕྲིན་ལས་སྒྲུབ་པར་མཛོད། །ཅེས་པའི་ཚིག་དང་བསྟུན་ཕྱོགས་གཏོར་འཕེན་ཞིང་མཐར་ཕྱག་ལེན་ལྟར་གསེར་སྐྱེམས་གཏོར། ཟོར་བསྐུལ་ལས་ཀོང་ཟོར་ནི། །རི་རབ་ཚད་མཉམ་སྟོབས་ཆེན་ཀོང་བུའི་ཟོར། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། །ཨྱེ་མྱགས་ཡ་རྔུབས་མུགས་ཤག་ཀ་དུན། ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ཆེ་གེ་མོའི་སྲོག་ལ་ཐུན་རྨུགས་བྷྱོ། སྲོག་ལ་ཁམ་ཤག་བྷྱོ། སྲོག་ལ་(༡༣ན)
བྲེང་ཤག་བྷྱོ། སྲོག་ལ་ཡཾ་ཤག་བྷྱོ། སྲོག་ལ་མཱ་ར་ཡ་རྦད། ཆེ་གེ་མོའི་སྲོག་ལ་རྦད་ཐུམ་རིལ་ལི་ལི་བྷྱོ། ཟོར་སྔགས་འོག་མ་རྣམས་ལ་འགྲེ །རྡོ་ཟོར་ནི། རྡོ་ཟོར་རི་རབ་ཐོགས་པའི་གནོད་སྦྱིན་དཔུང་། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། །མདའ་ཟོར་ནི། གཤིན་རྗེའི་དམག་ཚོགས་ཐོག་མདའི་ཟོར་འཕེན་པ། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། ཁྲག་ཟོར་ནི། དལ་ཡམས་འཕྱོ་བ་ཁྲག་ཟོར་མ་མོའི་ཚོགས། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། །ཡུངས་ཟོར་ནི། ཁྲོ་མཚོན་བདུད་པོ་ཁྲམ་ཐོགས་ཡུངས་ཀྱི་ཟོར། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། །རྭ་ཟོར་ནི། སྡེ་བརྒྱད་དུག་མཚོན་འཁྲུག་པ་རྭ་ཡི་ཟོར། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། །གཏེར་ཟོར་ནི། །གཤིན་རྗེའི་དམག་ཚོགས་རོལ་པ་གཏོར་མའི་ཟོར། །རྩེ་མོར་མཚོན་ཆ་སྣ་ཚོགས་བུ་ཡུག་འཚུབ། །རྐེད་པར་ཟོར་བདག་ཕོ་མོ་གློག་ལྟར་འཁྱུག །རྩ་བར་རུ་དྲའི་ཁྲག་མཚོར་ཞིང་དུམ་འཕྱོ། །དྲག་པོའི་ཟོར་སྣ་དགྲ་དང་བགེགས་ལ་བྷྱོ། །བན་བོན་མཐུ་བྱད་བཟློག་ལ་རང་གཤེད་ཕོབ། །བསོད་ནམས་རླུང་རྟ་ནུས་སྟོབས་རྡུལ་དུ་རློག །ལུས་ངག་ཡིད་གསུམ་སྲོག་ལ་མཱ་ར་ཡ། །ཞེས་སོ་སོའི་བསྐུལ་དང་བསྟུན་ནས་ཟོར་གཞན་རྣམས་དང་གཏོར་བསྐུལ་གྱི་རྗེས་སུ། །བྷྱོ་བྷྱོ་སྡང་བའི་དགྲ་ལ་བྷྱོ། །ཞེས་སོགས་ཀྱི་བསྐུལ་དང་བཅས་ཏེ་དྲག་རོལ་གྱི་ཚེ་བཟློག་སྔགས་དང་དམོད་མོ་ཟབ་མོ་བཏགས་ནས་ཐུན་གཏོར་འཕེན་ཞིང་ཐལ་མོ་དགུ་ཕྲུགས་སུ་བརྡབ། བཤལ་ཆུར་འབྲུ་ཚོམ་དང་བཅས་ཏེ་བསྟན་མ་བསྐྱང་། སྲུང་འཁོར་བསྒོམ། སྒྲུབ་ཁང་དུ་ཆད་མཐོ་གཏོར་མར་སྨན་རག་སྦྲན་ཞིང་མཆོད་པ་ནས་ཤིས་བརྗོད་གྱི་བར་དཀྱུས་ལྟར་གཏོང་། སང་ཉིན་ཕྱི་རོལ་དུ་གདབ་ལས་མི་སྤྲོ་ན་བཟློག་གཞུང་གི་ཚེ་ཞལ་བསྒྱུར་ལམ་དཀར་འཐེན། མཆོད་གཏོར་སོགས་གཏོར་ཆེན་ལ་སྦྲན་པ་ཕྱག་ལེན་བཞིན་བྱས་
ནས། བྱད་མ་འབུམ་གྱི་ལྟས་ངན་བཟློག་ཏུ་གསོལ། ཞེས་པའི་དུས་དམག་ལྟོའི་ཚུལ་དུ་ཟུར་གྱི་ཁྲག་ཆང་བཞི་ནས་གཏོར་མར་སྦྲན་ཏེ་གཏོར་ཆེན་བཏེག །མཱ་ར་ཡཱའི་དྲག་བརྡུང་གི་ཚེ། སློབ་དཔོན་གྱིས་རྭ་ཟོར་ཐོགས་ལ་ལམ་འགྲོས་ལེན་བཞིན་པས་ཕྱིར་འཐོན་ཏེ་གསེར་སྐྱེམས་ནས་སྒོ་དབྱེའི་བར་ནུབ་སྔ་མ་ལྟར་ལ་ཚོགས་ལྷག་འདོན་རིང་དཀར་གཏོར་བཏེག་ཙམ་མ་གཏོགས་མི་གཏོང་། ཟོར་འཆམས་དང་བཅས་ཏེ་བསྐུལ་དང་བསྟུན་ནས་ཟོར་སྣ་རེ་འཕེན་ཞིང་རྭ་ཟོར་འཕེན་ཚུལ་བྱ། སློབ་དཔོན་གྱིས་རྭ་ཟོར་དང་ཟོར་གཞུ་ཐོགས་ཏེ་སྣ་དྲངས་གཏོར་མ་འཕེན་སར་གསེར་སྐྱེམས། སྲིད་པ་ཧུ། དེ་ནས་དམིགས་ཡུལ་དགུག་གཞུག་བྱས་རྗེས། བྷྱོ་བྷྱོ་སྡང་བའི་དགྲ་ལ་བྷྱོ། །ཞེས་སོགས་ནས་དྲག་རོལ་གྱི་ཟོར་རྣམས་སྔགས་དང་བཅས་ཏེ་རིམ་བཞིན་བརྡེག །གཤིན་རྗེའི་དམག་ཚོགས་ཞེས་སོགས་ཀྱི་བསྐུལ་དང་བཅས་གཏོར་མ་འཕེན། ཕོད་ཀའི་སྣེ་གཉིས་བཟུང་བའི་དུལ་མོ་དང་ཐལ་བརྡབ་དམོད་པ་བྱེད། བཤལ་ཆུས་བསྟན་མ་སྐྱོང་། སྲུང་འཁོར་དང་མེ་ཆུས་རྒྱས་འདེབས། སྤྱང་མོ་དང་ཨུཥྞཱི་ཥའི་སྔགས་བཟླས་བཞིན་པར་སློབ་དཔོན་གྱིས་རྗེས་མནན་ཏེ་ཚུར་ལོག་ནས་སྒོ་དྲུང་དུ་ཟོར་སྣོད་རྣམས་ཁ་སྦུབ། སློབ་དཔོན་གྱིས་དགྲ་བགེགས་དམ་སྲི་རྣམས་དགུག་གཞུག་བྱ། བྲོ་བརྡུང་བ་ནི། ཧཱུཾ། སྟོང་གསུམ་སྟོང་གི་འཇིག་རྟེན་ན། །ཀུན་ཀྱང་འཇམ་དཔལ་གཤིན་རྗེའི་གཤེད། ཁྲོ་བོ་འདས་པས་ནམ་མཁའ་གང་། ཁྲོ་མོ་འདུས་པས་བར་སྣང་གང་། ཁྲོ་ཆུང་འདུས་པས་ས་གཞི་གང་། །ཐམས་ཅད་(༡༤ན)
འདུས་པའི་ངང་ཉིད་ལས། །རྐང་པ་གཡས་ཀྱིས་བྲོ་བརྡུངས་པས། །ཕོ་སྲི་ཐམས་ཅད་གཡས་སུ་མནན། །རྐང་པ་གཡོན་གྱིས་བྲོ་བརྡུངས་པས། །མོ་སྲི་ཐམས་ཅད་གཡོན་དུ་མནན། །གཉིས་སུ་མེད་པར་བྲོ་བརྡུངས་པས། །ཆུང་སྲི་དམ་སྲི་རྡུལ་དུ་རློག །བྲོ་འདི་ཡེ་ཤེས་ཆེན་པོའི་བྲོ། །དགྲ་རྣམས་ཐལ་བར་རློག་པའི་བྲོ། །བདུད་རྣམས་ཕྱེ་མར་འཐག་པའི་བྲོ། །དེ་ཕྱིར་གླུ་བྲོ་རྒྱུན་མི་འཆད། །སུཾ་བྷ་སོགས་དང་། ཤར་དུ་ཞི་བའི་བྲོ་བརྡུངས་པས། །དགྲ་བགེགས་དམ་སྲི་ཞི་བར་ཤོག །ཨྱེ་ཨ་ཀྲོ་ཏེ་ཀ་ཡ་མཱནྟ་ཀ་ཀཱ་ལ་རཱུ་པ། ཧྲཱིཿཥྚྲཱི་ཝི་ཀྲྀ་ཏཱ་ན་ན་ཧཱུཾ་ཕཊ། ཤཱནྟིཾ་ཀུ་རུ་ཡེ་སྭཱཧཱ། བྱང་དུ་དྲག་པོའི་བྲོ་བརྡུངས་པས། །དགྲ་བགེགས་དམ་སྲི་མེད་པར་ཤོག །མཱ་ར་ཡ་ཕཊ། ནུབ་དུ་དབང་གི་བྲོ་བརྡུངས་པས། །ལྷ་འདྲེ་མི་གསུམ་དབང་བསྡུད་ཤོག །པ་ཤཾ་ཀུ་རུ་ཡེ་སྭཱཧཱ། ལྷོ་རུ་རྒྱས་པའི་བྲོ་བརྡུངས་པས། །ཚེ་དང་བསོད་ནམས་རྒྱས་པར་ཤོག །པུཥྚིཾ་ཀུ་རུ་ཡེ་སྭཱཧཱ། རྒྱས་པའི་གསོལ་བྱང་གི་ཚེ་གཏོར་སྣོད་རྣམས་ཁ་སྒྱེན་ལ་སློབ་དཔོན་གྱིས་འབྲུ་ཚོམ་བླུག་གོ །ཕྱི་རོལ་དུ་འགྲོས་དང་བསྟུན་ནས་གདབ་ལས་རྒྱས་པར་བྱེད་ན་ཆད་ལྷག་མི་འབྱུང་བའི་ཕྱིར་ཚོགས་ཐ་མ་ལས་བྱང་གི་དཀྱུས་བཞིན་བཏང་། བཟློག་གཞུང་གི་བྱད་མ་འབུམ་གྱི་ལྟས་ངན་བཟློག་ཏུ་གསོལ། ཞེས་པའི་མཚམས་སུ་གཏོར་ཟོར་སྒྲུབ་ཁང་གི་སྒོའི་ནང་ཙམ་དུ་སྦགས། གསེར་སྐྱེམས། ཚོགས་ལྷག །སྒོ་དབྱེ་རྣམས་བྱ། མདོར་གསེར་སྐྱེམས་ནས་བཟུང་རལ་གྲིས་གཏུབ་པའི་བར་དང་སྟོབ་པ་(༡༤བ)
འཇུག་པ་བདེ་བའི་ཕྱིར། སྟོང་གསུམ་ཁེངས་པའི་སྐུར་བཞེངས་ཉི་ཟླའི་སྤྱན། །གཟིངས་ལ་གནམ་སའི་ཞལ་གདོངས་གློག་དམར་ལྗགས། ཁྱོངས་ཤིག་གངས་རི་ལྟ་བུའི་མཆེ་གཙིགས་ནས། །དམ་ཉམས་དགྲ་བོའི་ཤ་ཁྲག་ཚོགས་བཞེས་ཤིག །ཅེས་འཆམས་དབྱངས་དང་བསྟུན་གདབ་ལས་རྒྱས་པ་ཇི་ལྟ་བ་ལ་ལིངྒར་ནང་ཟོར་རྡེག་པ་ཙམ་མ་གཏོགས་གོང་དང་འདྲ། ནང་དུ་སླེབས་ནས་ཚེ་འགུགས། གཏང་རག་གི་ཚུལ་དུ་བམ་བསྐང་གཏོང་། ཆད་མཐོ་དང་བཅས་ཆོས་སྐྱོང་གི་གཏོར་མ་རྣམས་ཐོག་སྟེང་དུ་འབུལ། སྒྲུབ་གཏོར་དང་བམ་ལ་སྨན་རཀ་སྦྲན་ཏེ་གཏང་རག །བཟོད་གསོལ་གྱིས་བཤམས། བམ་དངོས་གྲུབ་ཀྱི་ཚུལ་དུ་རོལ། རྟེན་མེད་པ་རྣམས་ལ་གཤེགས་གསོལ་དང་ཡོད་པ་རྣམས་ལ་བརྟན་བཞུགས། བདག་མདུན་གྱི་དཀྱིལ་འཁོར་བསྡུ། སྨོན་ལམ་ཤིས་བརྗོད་བྱའོ། །དེ་ལྟར་དགྲ་བགེགས་བྱད་མ་རྦོད་གཏོང་གི །སྙིང་རྩ་དམར་ཆེན་ཟོར་གྱི་མཚོན་རྣོན་པོས། །གཅོད་དང་ལྷན་ཅིག་སྒྲིབ་གཉིས་ཡེ་ཤེས་གྲིས། །བཅད་དེ་བདེ་ཆེན་ས་ལ་རོལ་བར་ཤོག །འཇམ་དཔལ་ཚེ་བདག་ནག་པོའི་ལས་བྱང་སྲིད་གསུམ་རྣམ་རྒྱལ་གྱི་ཟུར་རྒྱན་ཟོར་གྱི་ལས་རིམ་གནམ་ལྕགས་ཐོག་མདའ་ཞེས་བྱ་བ་འདི་ནི་སེ་བརྒྱ་མཁར་པ། ནུབ་དགོན་པ། ཆོས་རྒྱལ་མངྒའི་མཚན་ཅན་ཡབ་སྲས་ཀྱི་ཕྱག་བཞེས་ཟུར་ཐམས་ཅད་མཁྱེན་པ་ལས་ཐོས་པ་དང་གསུང་རྒྱུན་འཛིན་པའི་རྗེས་འབྲང་དུ་མར་བགྲོས་པའི་སྟེང་སྤྲུལ་པའི་སྐུ་མཆོག་པདྨ་འཕྲིན་ལས་ཀྱི་ཟིན་བྲིས་ཉིད་གཙོ་བོར་བཟུང་གདབ་ལས་ཀྱི་ལེགས་ཆ་གཤིན་རྗེ་ཁྲོ་ཆུ་ནས་ཀྱང་བླངས་(༡༥ན)
ཏེ་ཟ་ཧོར་གྱི་སྔགས་སྨྱོན་དྲག་པོ་རྩལ་གྱིས་རྟ་ཆེན་ཟླ་བའི་དམར་ཆ་ཁྲག་འཐུང་རོལ་པའི་ཚེས་ལ་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པའོ།། །།སརྦ་མངྒ་ལཾ།། །།