འཇམ་དཔལ་ཕྱག་རྒྱ་ཟིལ་གནོན་གྱི་དབང་གི་ཆོ་ག་སྔགས་འཆང་ཀུནྡའི་འདོད་འཇོ་ཟླ་ཤེལ་གསར་པའི་ཐིགས་པ།
འཇམ་དཔལ་ཕྱག་རྒྱ་ཟིལ་གནོན་གྱི་དབང་གི་ཆོ་ག་སྔགས་འཆང་ཀུནྡའི་འདོད་འཇོ་ཟླ་ཤེལ་གསར་པའི་ཐིགས་པ་ཞེས་བྱ་བ་བཞུགས་སོ། །
ན་མོ་གུ་རུ་ཤྩ་མཉྫུ་ཤྲཱཡུཿབ་ཏ་ཡེ། ཕུན་ཚོགས་ཆོས་དབྱིངས་ནོར་འཛིན་ལྟོ་བར་མི་སྡུག་སྒེག་པའི་ཉམས་ཀྱི་ཆུ་གཏེར་ལས། ཁྲོ་ཆགས་སྙིང་རྗེའི་ཤུགས་དྲག་དྲི་བཞོན་ལས་འོངས་རབ་བརྗིད་ང་རོའི་རྦ་རླབས་འཁྲུག །མངོན་སྤྱོད་ཧ་ལའི་ཕྲིན་ལས་ན་ཀྲའི་ཚོགས་རྒྱུ་མཆོག་ཐུན་དངོས་གྲུབ་ཡིད་བཞིན་ནོར། །མ་ལུས་སྩོལ་པའི་བྱེད་པོ་སྲོག་དབུགས་བླ་ཚེའི་གཤེད་པོར་རྣམ་རོལ་དེ་ལ་བདུད། །དུས་གསུམ་རྒྱལ་བའི་གསང་གསུམ་ཡོན་ཏན་ཀུན། །གཅིག་བསྡུས་རྒྱལ་དབང་པདྨཱ་ཀ་རའི་ཞབས། །བརྒྱ་ཕྲག་ཐབས་ཀྱིས་ངེས་གསང་རྒྱུད་སྡེ་འདི། །ལེགས་པར་བསྒྱུར་མཛད་གནུབས་བན་ལོ་ཙཱ་བ། །སླར་ཡང་ཟབ་མོའི་གཏེར་ཁ་སྤེལ་བའི་ཕྱིར། །སྤྲུལ་པའི་གར་མཛད་དུམ་པ་ཞང་ཁྲོམ་དང་། །རྡོ་རྗེ་འཆང་དབང་འཁོན་སྟོན་འགྲོ་བའི་མགོན། །ཡབ་སྲས་བརྒྱུད་པར་བཅས་ལ་སྙིང་ནས་འདུད། །རྣམ་དག་དབང་བཞིའི་ཕུལ་བྱུང་བདུད་ཙི་ལས། །མ་ཉམས་རིགས་འཛིན་ཕྱག་བཞེས་ཟིལ་མངར་བཅུད། །སྔགས་འཆང་འཆི་མེད་ཚོགས་ཀྱི་དགའ་སྟོན་དུ། །འཁྲུལ་མེད་གླེགས་བུའི་ཀ་ལཱ་ཤ་འདི་འགེང་། །དེའང་། ཕྱག་(༢ན)
རྒྱ་ཆེན་པོ་ཐིག་ལེ་ལས། དབང་མེད་ན་ནི་དངོས་གྲུབ་མེད། །བྱེ་མ་བཙིར་ལ་མར་མེད་བཞིན། །ཞེས་གསུངས་པ་ལྟར། གསང་ཆེན་རྡོ་རྗེ་ཐེག་པའི་ལམ་གྱི་གཙོ་བོ་ནི་ཐོག་མར་སྨིན་བྱེད་ཀྱི་སྒོ་དམ་པ་དབང་ཡིན་ལ། སྨིན་བྱེད་ཀྱི་དབང་མ་ཐོབ་པར་གྱ་ཚོམ་དུ་གསང་སྔགས་ཀྱི་ལམ་ལ་ཐོས་བསམ་གྱིས་འཇུག་པ་ནི་དངོས་གྲུབ་མི་ཐོབ་པར་མ་ཟད། སྡུག་བསྔལ་མི་བཟད་པ་མྱོང་དགོས་པས། དེས་ན། རྒྱལ་བ་དགོངས་པས་བརྒྱུད་པ། ལྷ་དང་མཁའ་འགྲོ་བརྡས་བརྒྱུད་པ། རིགས་འཛིན་རིགས་པས་བརྒྱུད་པ། གང་ཟག་སྙན་ཁུང་བརྒྱུད་པ། ལས་འཕྲོ་གཏེར་གྱི་བརྒྱུད་པ་སོགས་བརྒྱུད་པ་ཟམ་མ་ཆད་པས་ཕྱག་ལེན་གྱི་སྲོལ་མ་ཉམས་ཤིང་། བྱིན་རླབས་ཀྱི་དྲོད་མ་ཡལ་བའི་རྡོ་རྗེ་སློབ་དཔོན། རྡོ་རྗེཐེག་པའི་རྒྱུད་སྡེ་རྣམས་ལ་ལེགས་པར་སྦྱངས་པའི་གོམས་པ་དང་ལྡན་པ། དེ་ཁོ་ན་ཉིད་ཀྱི་དོན་རྟོགས་ཤིང་ཟབ་མོའི་ལམ་གྱི་རྟོགས་པ་མངོན་དུ་གྱུར་པ་སོགས་ཡོན་ཏན་ཕུན་སུམ་ཚོགས་པ་དང་ལྡན་པའི་བླ་མ་དམ་པ་ཞིག་ལ་བརྟེན་དགོས་ཏེ། ཇི་སྐད་དུ། སློབ་དཔོན་འཇམ་དཔལ་བཤེས་(༢བ)
གཉེན་གྱིས། གོམས་པ་སྔོན་སྦྱངས་མང་ཐོས་ཆོས་རྣམས་ཤེས། །ཆོས་ཉིད་མཉམ་པའི་དོན་རྟོགས་གཏི་མུག་མེད། །དབྱིངས་དང་ཡེ་ཤེས་གཉིས་མེད་གཟུང་མ་འདུ། །བླ་མའི་མན་ངག་ཐོབ་པའི་གདེངས་ལྡན་པ། །ཡོན་ཏན་རྫོགས་པའི་བླ་མ་དམ་པ་བྱ། །ཞེས་གསུངས་ལ། དེ་ལྟ་བུའི་ཡོན་ཏན་དང་ལྡན་པ་ནི་མཆོག་ཡིན་ཞིང་། དེ་ལྟར་མིན་ནའང་བསྙེན་པ་རྫོགས་ཤིང་ལྷའི་གནང་བ་ཐོབ་པ་ནི་ཤིན་ཏུ་གལ་ཆེ་སྟེ། སློབ་དཔོན་བྷ་སུ་དྷ་རའི་དབང་གཞུང་ལས། ལྷ་ཡི་གནང་བ་ཐོབ་པ་ཡིས། །དེ་ཡིས་བདག་གཞན་དོན་རྣམས་འགྲུབ། །ཅེས་གསུངས་སོ། །སློབ་མའང་དད་པ་དང་བརྩོན་འགྲུས་ཆེ་ཞིང་། ཤེས་རབ་ཀྱི་རྩལ་ཁ་དང་ལྡན་པ། དམ་ཚིག་ལ་གནས་ཤིང་ལམ་འདི་ལ་བརྟེན་ནས་མཆོག་ཐུན་གྱི་དངོས་གྲུབ་ཐོབ་པར་འདོད་པ་ཞིག་དགོས་ཏེ། དད་དང་བརྩོན་འགྲུས་མེ་ལྟར་འབར་བ་དང་། །ཤེས་རབ་ཆེ་ཞིང་ཕྱོགས་མེད་སློབ་པ་དང་། །དད་པ་ཆེ་ཞིང་གཟུངས་ཐོབ་བློ་བརྟན་པ། །དམ་ཚིག་གཙོར་འཛིན་སྒོམ་སྲན་ཆེ་བ་དང་། །རང་རིག་བློ་ལྡན་ཆོས་ཉིད་དོན་རྟོགས་དང་། །གོ་འཕང་ཐོབ་དང་མན་ངག་འདོད་པ་ལ། །གསང་བའི་དོན་འཇུག་ལུང་འདིས་དབང་བསྐུར་བྱ། །ཞེས་གསུངས་སོ། །བསྐུར་བྱའི་དབང་ཡང་བགྲོད་པ་རྣམ་པ་གསུམ་གྱི་སྒོ་ནས་འཇུག་དགོས་ཏེ། ཇི་སྐད་དུ་དབང་པོའི་སྡེས། བདེ་ཆེན་ཡེ་ཤེས་སྐུ་དང་མཆོག་གི་བཾ། །མཚན་ལྡན་གཟུང་མ་ལུས་ཀྱི་དཀྱིལ་འཁོར་དུ། །རབ་འབྱམས་བགྲོད་པ་རྣམ་གསུམ་ལ་བརྟེན་ནས། །བདག་རྒྱུད་སྨིན་ཅིང་གྲོལ་བར་བྱིན་གྱིས་རློབས། །ཞེས་གསུངས་པ་ལྟར་རོ། །དེ་ལྟ་བུའི་དབང་བསྐུར་བའི་ལས་ཀྱི་རིམ་པར་(༣ན)
བསྟན་པར་བྱ་བ་འདི་ལ་གསུམ་སྟེ། སྔོན་དུ་འགྲོ་བ། གཞུང་གི་ལས་རིམ་རྗེས་ཀྱི་ཆོ་གའོ། །དང་པོ་ལ་ཡོ་བྱད་བཤམ་ཞིང་གཏོར་མ་གཏང་བ། ཐིག་ཚོན་རབ་ཏུ་གནས་ཤིང་ཆག་ཆག་གདབ་པ། དཀྱིལ་འཁོར་འདྲི་ཞིང་རྫས་འགོད་པ་སློབ་མ་སྟ་གོན་བྱ་བའི་རིམ་པའོ། །ས་བཅད་གོང་མ་གསུམ་ནི་སེ་སྟོན་ཆེན་པོས་མཛད་པའི་དབང་གི་ཆོ་ག་ངེས་པའི་དོན་བདེ་བླག་ཏུ་འཇུག་པ་ཞེས་བྱ་བ་ནས་ཇི་ལྟར་གསུངས་པ་བཞིན་འཆུགས་མེད་དུ་བྱ་དགོས་ལ། དེའང་དཀྱིལ་འཁོར་འདྲི་བ་འཆུགས་མེད་ཀྱི་ཕྱག་ལེན་དང་ལྡན་པའི་རས་བྲིས་བྱིན་རླབས་ཅན་ཡོད་ཀྱང་རུང་ལ། ཡོ་བྱད་བཤམ་པ། བུམ་པ་བཀོད་ཅིང་བསྒྲུབ་པ། སྒྲུབ་རྫས་བཀོད་པ། མཆོད་རྫས་བཀོད་པ་སོགས་སླ་ཆོས་སུ་མ་སོང་བའི་ངེས་དོན་བདེ་འཇུག་ནས་ཇི་ལྟར་གསུངས་པ་བཞིན་བྱ་བ་ནི་ཕྱག་ལེན་ཡིན་ནོ། །བཞི་པ་སློབ་མ་སྟ་གོན་ནི། སློབ་མ་རྣམས་ཕྱི་རོལ་དུ་ཁྲུས་བྱས། དེ་ནས་བགེགས་སྦྱངས་ལ། གཏོར་མ་ཆངས་བུ་ཏིང་ལོ་དང་བཅས་པ་བྱིན་གྱིས་བརླབས་ཏེ། ཨཱོཾ་སརྦ་བིགྷཱན། ན་མ་སྶརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿསརྦ་ཏཏྑཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞ་བི་ལཾ་ཏ་ཡེ་སྭཱཧཱ། ཞེས་ཚར་རེ་དང་། གཏོར་མ་རེ་སློབ་མ་ལ་ཕྱིར་བསྐོར་ཏེ་བཏང་། དེ་ནས་ཆངས་བུ་ཏིང་ལོ་དང་སྦྲགས་པ་ཆ་རེ་སློབ་མ་ལ་ཕྱིར་བསྐོར་བ་དང་མཉམ་དུ་རོལ་མོ་དབྱངས་དང་བཅས་པས། ཧཱུྃ། ཡང་དག་ལྷ་ཡི་རྣལ་འབྱོར་གཞལ་ཡས་འདིར། །འདུ་བར་དབང་བའི་ལས་ནི་མ་གཏོགས་པ། །བར་ཆད་འབྱུང་པོ་ཐམས་ཅད་མི་གནས་ཏེ། །རང་རང་གནས་སུ་མ་ཐོགས་མྱུར་དུ་དེངས། །ཨྱཻ་རིང་དང་སུམྦྷ་དྲག་ཏུ་བརྗོད་ཅིང་ཡུངས་ཀར་གཏོར་(༣བ)
གུ་གུལ་གྱིས་བདུག །རོལ་མོ་དྲག་ཏུ་བྱ་ཞིང་བགེགས་བསྐྲད་དོ། །དེ་ནས་སློབ་མ་རྣམས་ཕྱག་དང་མཎྜལ་ཕུལ་ཏེ། དེའང་བམ་ཆེན་གསང་བའི་དབང་གི་ཆོ་ག་ལས། སྤྲོ་བ་བསྐྱེད་དང་གནང་བ་བྱིན། །སྡོམ་པ་འབོགས་ཤིང་སྲུང་སྐུད་གདགས། ཁྱོར་ཆུ་བླུད་དང་སོ་ཤིང་དོར། །ཀུ་ཤ་བྱིན་དང་གཟེངས་བསྟོད་དེ། །རྨི་ལམ་བརྟག་དང་སྦྱིན་སྲེག་བྱ། །ཞེས་པ་ལྟར་བཅུ་ལས། སྤྲོ་བ་བསྐྱེད་པ་ནི། གསང་སྔགས་སྤྱི་རྒྱུད་ལས། སྔགས་ཀྱི་དངོས་གྲུབ་འདོད་པ་གང་། །དཀྱིལ་འཁོར་འདིར་ནི་གཞུག་པར་བྱ། །སངས་རྒྱས་འདོད་པ་དེ་ལས་གཞན། །འཇིག་རྟེན་འདི་ཡི་བསམ་པ་སྤང་། །སླར་ཡང་དད་དང་ལྡན་པ་ཡིས། །འཇིག་རྟེན་ཕ་རོལ་ལ་དམིགས་ནས། །བློ་ལྡན་དཀྱིལ་འཁོར་གཞུག་པར་བྱ། །བདག་དོན་འདི་འབྲས་གཉེར་མི་བྱ། །བདག་དོན་ཚེ་འདིའི་ཆེད་བྱེད་ན། །གཞན་དོན་སངས་རྒྱས་གང་ལས་བྱུང་། །གཞན་དོན་རྩེ་གཅིག་ཏུ་དམིགས་ན། །འབད་པ་མེད་པར་འདི་འབྲས་འགྲུབ། །ཅེས་པའི་དོན་བཤད། གཉིས་པ་སློབ་མས་གསོལ་བ་གདབ་པར་གནང་བ་བྱིན་པ་ནི། མགོན་པོ་རྫོགས་སངས་རྒྱས་ཀུན་གྱི། །གསང་འཛིན་ཅི་ནས་བདག་འགྱུར་ཕྱིར། །ངེས་པར་འབྱུང་གི་བར་དུ་ནི། །བདག་གི་བསམ་པ་བརྟན་པོས་བཟུང་། །ཉོན་མོངས་མ་ལུས་བསལ་བ་དང་། །མི་ཤེས་མ་ལུས་སྤང་བའི་ཕྱིར། །བསམ་པའི་ཁྱད་པར་ཇི་བཞིན་དུ། །བདག་ཅག་རྣམས་ལ་བསྟན་པར་འཚལ། །ཞེས་ལན་གསུམ་གྱིས་གསོལ་བ་གདབ། དེ་ནས་བླ་མས་གནང་བ་བྱིན་པ་ནི། ཡང་དག་སངས་རྒྱས་ལམ་རིག་པ། །ངེས་འབྱུང་ཀུན་གྱི་ལམ་ལ་གནས། །(༤ན)
ངེས་པར་འབྱུང་བ་ཀུན་སྟོན་པ། །བུ་འདིར་ཤོག་ཅིག་བདེ་བའི་ས། །ཐེག་ཆེན་རིམ་པས་འགྲོ་བ་དང་། །སྐུ་གསུང་ཐུགས་ཀྱི་རྡོ་རྗེ་བཟུང་། །རྫོགས་པའི་ཡེ་ཤེས་བདེ་ཆེན་གྱི། །དམིགས་པ་མེད་པར་གནས་ཕྱིར་དུ། །སྟོང་ཞིང་རང་སེམས་རྟག་པར་བཟུང་། །སྒྱུ་འཕྲུལ་དྲ་བའི་དབང་རྫོགས་བྱིན། །འཁོར་བའི་སེམས་ཅན་ཐམས་ཅད་ཀུན། །འཁོར་རྒྱུད་ལམ་གྱི་སྒོ་བཅད་ནས། །མཐོ་རིས་ཐར་པའི་སྒོ་ཕྱེ་སྟེ། །མ་ཡེངས་གནས་སུ་གཏང་བར་བྱ། །ཞེས་བརྗོད།གསུམ་པ་སྡོམ་པ་འབོགས་པ་ནི། །དཀོན་མཆོག་གསུམ་ལ་སྐྱབས་སུ་མཆིའོ། །དཀོན་མཆོག་གསུམ་ལ་ཕྱག་འཚལ་ལོ། །སྡིག་པ་ཐམས་ཅད་སོ་སོར་བཤགས། །དགེ་བ་ཀུན་ལ་རྗེས་སུ་སྨོན། །སངས་རྒྱས་བྱང་ཆུབ་ཡིད་ཀྱིས་བཟུང་། །བྱང་ཆུབ་མཆོག་ཏུ་སེམས་ནི་བསྐྱེད། །དུས་གསུམ་བདེ་གཤེགས་ཐམས་ཅད་ཀྱི། །ཐུགས་ཀྱི་སྲས་སུ་མཛད་དུ་གསོལ། །ལན་གསུམ་དང་། གསང་བ་མཆོག་གི་དཀྱིལ་འཁོར་དུ། །བླ་མེད་གནས་སུ་སྒྲུབ་པ་དང་། །བདེ་གཤེགས་དངོས་གྲུབ་ཐོབ་བྱའི་ཕྱིར། །བྱང་ཆུབ་མཆོག་དུ་སེམས་བསྐྱེད་དོ། །ཞེས་ལན་གསུམ་བརྗོད། བཞི་པ་སྲུང་སྐུད་གདགས་པ་ནི། བདུད་རྩི་འཁྱིལ་པའི་སྔགས་བཟླས་པའི་སྲུང་སྐུད་ཁ་དོག་སྔོན་པོ་མདུད་པ་ཉེར་གཅིག་བྱས་པ་དཔུང་པར་བཅིངས་ཏེ། བུ་ཁྱོད་ཚུར་ཉོན་སྐལ་ལྡན་དངོས་གྲུབ་བསྒྲུབ། །དེ་ལ་བགེགས་ཀྱི་བར་ཆད་བཟློག་པའི་ཕྱིར། ཁྲོ་རྒྱལ་སྔགས་བཟླས་མདུད་པ་ཉེར་གཅིག་བྱ། །སྲུང་སྐུད་དཔུང་པར་གདགས་པས་བགེགས་སྲུངས་ཤིག །ཨཱོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཨཱོཾ་བཛྲ་རཀྵ་ཧཱུྃ་(༤བ)
ཞེས་བརྗོད་ཅིང་རྡོ་རྗེ་དང་དྲི་ཆུས་རྒྱས་གདབ་བོ། །སྤྱི་བོར་རྡོ་རྗེ་བཞག་ལ་ཨྱཻ་རིང་གིས་བར་ཆད་བསྲུང་ངོ་། །ལྔ་པ་ཁྱོར་ཆུ་བླུད་པ་ནི། ཨཱོཾ་བྷིགྷྣཱནྟ་ཀྲྀཏ་ཧཱུྃ་ཕཊ། ཨཱོཾ་སརྦ་ཤོ་དྷན་ཡ་ཧཱུྃ་ཕཊ། ཅེས་བརྗོད་དེ་བྱིན་ལ། ཧཱུྃ། སྔགས་བཟླས་བདུད་རྩིའི་ཆུ་འདི་ཡིས། །ལུས་ངག་ཡིད་གསུམ་སྒྲིབ་པ་སྦྱངས། །བར་ཆད་ཐམས་ཅད་དག་གྱུར་ཏེ། །ཟབ་མོའི་སྣོད་དུ་རུང་བར་ཤོག །ཅེས་བརྗོད་དོ། །དྲུག་པ་སོ་ཤིང་ནི། འོ་མ་ཅན་གྱི་ཤིང་ཉེས་སྐྱོན་དང་བྲལ་བ་སོར་བཅུ་གཉིས་པ་མགོ་བོ་རྒྱ་མདུད་ཀྱི་དབྱིབས་ཅན་རྩེ་མོར་མེ་ཏོག་བཅིངས་པ། །བཛྲ་ཛི་ཧཾ་སཾ་བྷ་ཏི་ཧཱུཾ་ཕཊ། ཅེས་བཟླས་ཏེེ་བྱིན་ལ། ཧོ། བླ་མས་བསྒོ་བ་ཇི་བཞིན་སོ་ཤིང་དོར། །འཇམ་དཔལ་ཞི་ཁྲོའི་སྐུ་གསུང་ཐུགས་མཆོག་གི །ཡེ་ཤེས་དངོས་གྲུབ་དམ་པ་ཐོབ་བྱའི་ཕྱིར། །དབུས་མཆོག་དགའ་ལྡན་གནས་སུ་ལྷུང་བར་ཤོག །ཅེས་དབུས་སུ་དོར་བས་ཕྱོགས་བཞི་དང་འོག་ཏུ་འཕྲིན་ལས་བཞི་དང་ས་འོག་རིགས་འཛིན་གྱི་དངོས་གྲུབ། སྟེང་དུ་མཆོག་ཐོབ།བདུན་པ་ཀུ་ཤ་ནི། ཨཱོཾ་ཨེ་ཏི་ཧཱུཾ་ཕཊ། ཅེས་བཟླས་ཏེ་བྱིན་ལ། ཧཱུཾ། བུ་ཚུར་ཉོན་ཟབ་མོ་བསྒྲུབ་པ་ཡང་། །དངོས་གྲུབ་མ་འགྲུབ་བར་དུ་རྟགས་མི་འབྱུང་། །འཇུག་པའི་རྨིས་ལྟས་བཟང་ངན་བརྟག་པའི་ཕྱིར། །ཀུ་ཤའི་རྩྭ་མཆོག་ཁྱོད་ཀྱི་སྔས་སུ་བཏིང་། །ཞེས་བརྗོད་དོ། །བརྒྱད་པ་གཟེངས་བསྟོད་པ་ནི། འཇིག་རྟེན་ན་ནི་ཀུན་མཁྱེན་པའི། །ཨུ་དུཾ་ཝ་རའི་མེ་ཏོག་བཞིན། །རྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་བ། །གསང་སྔགས་སྤྱོད་ཚུལ་མཆོག་འདི་ནི། །དེ་བས་ཀྱང་ནི་དཀོན་པ་སྟེ། །གང་གིས་བསྐལ་པ་བྱེ་བ་རུ། །སྡིག་པའི་ལས་(༥ན)
ཀུན་བྱས་པ་ཡང་། །དེ་ཀུན་གྱིས་ནི་དཀྱིལ་འཁོར་ནི། །མཐོང་བས་བྱང་བར་འགྱུར་བས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །གང་གིས་བསྐལ་པ་བྱེ་བ་རུ། །བསོད་ནམས་ཡེ་ཤེས་ཚོགས་བསགས་ཀྱང་། །འདི་ནི་མཐོང་བར་ཤིན་ཏུ་དཀའ། །བླ་མེད་འདི་ལ་དགའ་བར་གྱིས། །ཞེས་བརྗོད། ཡང་ན། སངས་རྒྱས་བསྟན་པ་རྨད་བྱུང་བསམ་ཡས་ལ༔ ཁྱད་པར་འཕགས་པའི་བསྟན་པ་རྣམ་གསུམ་བྱུང་༔ སངས་རྒྱས་ཤཱཀྱ་ཐུབ་པའི་བསྟན་པ་ལ༔ གསང་སྔགས་རྡོ་རྗེ་ཐེག་པའི་བསྟན་པ་བྱོན༔ ཅེས་སོགས་བརྗོད་དེ། མུན་བསྐལ་ལ་བལྟོས་ཏེ། སངས་རྒྱས་ཀྱི་བསྟན་པ་འབྱུང་བ་དཀོན། བསྟན་པ་གྲངས་མེད་བྱོན་པའི་ནང་ནས་ཀྱང་ཤཱཀྱ་ཐུབ་པ་སོགས་གསུམ་ལ་གསང་སྔགས་ཀྱི་བསྟན་པ་བྱོན། གཞན་རྣམས་ལ་མ་བྱོན་པས་རྡོ་རྗེའི་ཐེག་པ་རྙེད་དཀའ་ཞིང་དོན་ཆེ་བ་སོགས་ཀྱིས་གཟེངས་བསྟོད་དོ། །དགུ་པ་རྨི་ལམ་བརྟག་པ་ནི། ལྷ་དང་བླ་མ་ཡང་ལ་བགྱི། །རྨི་ལམ་སྣང་བ་ཅི་བྱུང་ཡང་། །ནང་པར་མ་གསང་སྨྲ་བར་བགྱི། །བཟང་ན་ཤིན་ཏུ་ལེགས་ངན་ན། །ཞེས་པ་ལྟར་རོ། །བཅུ་པ་སྦྱིན་སྲེག་ནི། རྨི་ལམ་ངན་པ་བྱུང་ན་བརྩམ་པར་བྱའོ། །སྤྱི་དོན་གཉིས་པ་དངོས་གཞིའི་ལས་ཀྱི་རིམ་པ་ལ། དཀྱིལ་འཁོར་བསྒྲུབ་པ། དབང་བསྐུར་བ་གཉིས། དང་པོ་ལ། ལས་བྱང་འཛབ་ལ་ཐུག་པར་གཞུང་བསྲང་། སྐབས་དེར་བཾ་ལས་བུམ་གྱི་ཆུས་བསང་ཞིང་སྦྱངས་ཏེ། བཾ་གྱི་ཙིཏྟ་གྲུ་གསུམ། ཞེས་པ་ནས། མཚན་མ་བཟང་པོ་རྙེད་ཀྱི་བར་དུ་བྱའོ། །ཞེས་(༥བ)
པའི་བར་ངེས་དོན་བདེ་འཇུག་ལས་ཇི་ལྟར་གསུངས་པ་བཞིན་རྟགས་དང་ཡུན་རིང་ཐུང་སོགས་སྐབས་དང་སྦྱར་རོ། །དབང་ཆོས་འདིའི་ལུགས་ཀྱི་བདག་མདུན་གྱི་དཀྱིལ་འཁོར་ཆིག་ཆོད་དུ་བསྒྲུབ་པ་ཡིན་ལ། དེ་ཙམ་བློས་མི་ལྕོགས་པ་འཛབ་ཁང་མདུན་གྱི་དཀྱིལ་འཁོར་རྣམས་ལ་དབྱེ་བའི་གནད་ཤེས་དགོས་སོ། །གཉིས་པ་དབང་བསྐུར་བ་ལ། དཀྱིལ་འཁོར་དུ་འཇུག་པ་དང་། དབང་བསྐུར་བ་དངོས་གཉིས། དང་པོ་ལ་སློབ་དཔོན་འཇུག་པ་དང་། སློབ་མ་འཇུག་པའོ། །དང་པོ་ནི། ཆོས་འདིའི་ལུགས་ཀྱི་དཀྱིལ་འཁོར་བསྒྲུབ་པ་ཉིད་ཀྱི་ངེས་པའི་དོན་རང་བཞིན་ལྷུན་གྱིས་གྲུབ་པ་ཡིན་པས་ལོགས་སུ་བྱེད་མི་དགོས་ཀྱང་། བློ་ཆུང་ལས་དང་པོ་བས་བྱེད་པར་སྤྲོ་ན། མཎྜལ་ཕུལ་ཞིང་གསོལ་བ་གདབ་པ་ནས་བཟུང་སྟེ། དབང་བཞི་མཐའ་བརྟེན་དང་བཅས་པ་སྔགས་ཙམ་མམ། ཚིག་མདོར་བསྡུས་པ་ཏིང་འཛིན་གསལ་བས་བླངས་པར་འགལ་བ་མེད་དོ། །གཉིས་པ་ནི། ཐོག་མར་སློབ་དཔོན་གྱིས་གསོལ་བ་གདབ་པར་བྱ་སྟེ། རང་བཞིན་ལྷུན་གྲུབ་ཀྱི་དཀྱིལ་འཁོར་མངོན་སུམ་དུ་དམིགས་ལ། ཧཱུྃ། ལྷུན་གྲུབ་རང་བཞིན་གནས་པའི་ཕོ་བྲང་ནས། །ཡེ་ཤེས་རྒྱ་མཚོ་ལྷུན་གྱིས་གྲུབ་པ་ཡི། །འཇམ་དཔལ་ཁྲོས་པ་གཤིན་རྗེ་གཤེད་ཀྱི་ལྷ། །མ་ལུས་མཉམ་པའི་རྒྱལ་པོ་དགོངས་སུ་གསོལ། །སློབ་མ་མཚན་ལྡན་ཡུམ་གྱི་དཀྱིལ་འཁོར་དུ། །བརྟུལ་ཞུགས་དྲག་པོའི་སྟོབས་ཀྱིས་བཞུགས་སུ་གསོལ། །བདེ་ཆེན་གསང་བའི་ཕོ་བྲང་དམ་པ་རུ། །རིག་པ་བརྟུལ་ཞུགས་སྟོབས་ཀྱིས་བཞུགས་སུ་གསོལ། །ཞེས་ལན་གསུམ་བརྗོད་དེ་མེ་ཏོག་དོར་བས། སློབ་མ་ལ་ཅི་དགར་དབང་བསྐུར་ཞིག་ཅེས་(༦ན)
གནང་བ་ཐོབ་པར་བསམ་མོ། །དེ་ནས་ངེས་དོན་བདེ་འཇུག་ལས། ཁྲུས་སོགས་བྱ་ཞིང་གསོལ་བ་གདབ། །རྒྱུན་བཤགས་སེམས་བསྐྱེད་གནས་གསུམ་བརླབ། །སླར་ཡང་གསོལ་གདབ་གནས་སུ་དྲངས། །དྲི་དང་ཆུ་བླུད་དམ་བསྒྲགས་ཤིང་། །སྒྲིབ་སྦྱངས་ལྷ་དབབ་མེ་ཏོག་དོར། །མིག་དབྱེ་དཀྱིལ་འཁོར་བསྟན་པའོ། །ཞེས་པ་ལྟར་བཅུ་གཅིག་ལས། དང་པོ་ནི། སློབ་མ་རྣམས་ཁྲུས་བྱས། ནང་དུ་ཕྱག་དང་མཎྜལ་ཕུལ་ཏེ་གསོལ་བ་གདབ་པ་ནི། ཧོ། བསྟན་པའི་སྒྲོན་མེ་བཅོམ་ལྡན་འདས། །ལྷ་དང་སློབ་དཔོན་དགོངས་སུ་གསོལ། །དྲེགས་པ་སྟོབས་ཀྱི་ཚུལ་བསྟན་པ། །འགྱུར་མེད་བདེ་ཆེན་ཕོ་བྲང་ནས། །དྲེགས་པའི་ལྷ་ཚོགས་དགོངས་སུ་གསོལ། །བྷ་ག་གསང་བའི་དཀྱིལ་འཁོར་ནས། །མཉམ་པའི་རྒྱལ་པོ་དགོངས་སུ་གསོལ། །དམ་ཚིག་དཀའ་ཐུབ་སྡོམ་པའི་མཆོག །རིག་པའི་རྒྱལ་པོ་བདག་ལ་སྩོལ། །གསང་བའི་སྒྲོན་མེ་བདག་ལ་སྩོལ། །ཡེ་ཤེས་རོལ་པ་བདག་ལ་སྩོལ། །ཞེས་ལན་གསུམ་བརྗོད། གཉིས་པ་རྒྱུན་བཤགས་སེམས་བསྐྱེད་ནི། །དཀོན་མཆོག་གསུམ་ལ་སྐྱབས་སུ་མཆིའོ། །ཞེས་པ་ནས། བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པའི་བར་སྟ་གོན་གྱི་སྐབས་བཞིན་དང་། ཨཱོཾ་བོ་དྷི་ཙིཏྟ་ཨཱཿ གསུམ། ཀུ་པ་ཏ་ཡ་མི་ཞེས་བརྗོད། གསུམ་པ་གནས་གསུམ་བརླབ་པ་ནི། རྡོ་རྗེ་དང་བཅས་པའི་དྲིའི་ཐིག་ལེས་སློབ་མའི་གནས་གསུམ་དུ་རེག་ཅིང་། ཨཱོཾ་ཨཱཿཧཱུྃ་ཞེས་བྱིན་གྱིས་བརླབ་པོ། །བཞི་པ་སླར་ཡང་ནང་འཇུག་གི་དོན་དུ་གསོལ་བ་གདབ་པ་ནི། (༦བ)
ཡང་གསང་གཤེད་པོའི་དཀྱིལ་འཁོར་དུ། །བདག་ནི་འཇུག་པར་འཚལ་ལགས་ཀྱི། །རྡོ་རྗེ་སློབ་དཔོན་དཀྱིལ་འཁོར་གཙོ། །དཔའ་བོས་བདག་ལ་བཀའ་དྲིན་གསོལ། །ཞེས་ལན་གསུམ་བརྗོད། ལྔ་པ་གནས་སུ་དྲང་བ་ནི། འཁོར་བའི་སེམས་ཅན་ཐམས་ཅད་ཀུན། །རྒྱུད་ལྔ་ལམ་གྱི་སྒོ་བཅད་དེ། །མཐོ་རིས་ཐར་པའི་སྒོ་ཕྱེ་ནས། །བླ་མེད་གནས་སུ་དྲང་བར་བྱའོ། །ཨཱོཾ་བཛྲ་ས་མ་ཡ་ཛཿཛཿཞེས་ཡོལ་བའི་ནང་དུ་དྲངས་ལ་སྒོམ་དོན་སློབ་མ་དཀྱིལ་འཁོར་གྱི་ཤར་སྒོའི་རྩར་སླེབ་པར་མོས་ལ། ཨཱོ་བཛ་སཀྵུ་བྷནྡྷ་ཝ་ར་ནས། མིག་དར་བཀབ། ཨ་ཁཾ་ཝི་ར་ཧཱུྃ། ཞེས་མེ་ཏོག་གི་ཕྲེང་བ་བྱིན་ནོ། །དྲུག་པ་དྲི་བ་ནི། སྐལ་ལྡན་རིགས་ཀྱི་བུ་ཁྱོད་ཀྱིས། །གསང་བའི་དམ་ཚིག་བསྲུང་ནུས་སམ། །གྲུབ་མཆོག་བརྟུལ་ཞུགས་སྤྱོད་ནུས་སམ། །མངོན་སྤྱོད་ལས་རྣམས་བྱེད་ནུས་སམ། །ཞེས་དྲི། ལན་དུ། རྡོ་རྗེ་སློབ་དཔོན་དགོངས་སུ་གསོལ། ཁྱོད་ཀྱི་བཀའསྩལ་བདག་རྗེས་བསྒྲུབ། །དམ་ཚིག་སྡོམ་པ་གང་ཡིན་དང་། །གསང་བའི་ལས་ཀུན་བསྒྲུབ་པར་འཚལ། །བརྟུལ་ཞུགས་ཆེན་པོ་བླ་མེད་པ། །མཐར་ཕྱིན་པ་ནི་སྤྱད་པར་འཚལ། །ཕྲིན་ལས་རྣམ་བཞིའི་བྱ་བ་རྣམས། །ཇི་ལྟར་གསུངས་པ་ཉན་པར་འཚལ། །ཞེས་ཁས་བླང་ངོ་། །བདུན་པ་ཆུ་བླུད་དམ་བསྒྲག་ནི། བདུད་རྩི་ལྕེ་ལ་བཞག་ཅིང་། འདི་ནི་ཁྱོད་ཀྱི་དམྱལ་བའི་ཆུ། །རྡོ་རྗེ་དམ་ཚིག་གཉན་པོ་སྟེ། །ཚུལ་བཞིན་བསྲུངས་ན་དངོས་གྲུབ་ཐོབ། །ཉམས་ན་རྡོ་རྗེའི་དམྱལ་བར་འགྲོ །རྡོ་རྗེའི་ཆུ་འདི་ཁྱོད་ཀྱིས་ལོང་། །ཨཱོཾ་བཛྲ་ཀྲོ་དྷ་ཨི་དཾ་ཧོཿབཀྵས་མ་(༧ན)
ཡ་ཨི་དམ་ན་ར་སྐན། ཞེས་དང་། རྡོ་རྗེའི་རིགས་ཀྱི་བུ་མཆོག་ཁྱོད། །དེ་རིང་ཕྱིན་ཆད་ང་ཡི་བུ། །ང་ཡིས་བསྒོ་བ་བྱ་བ་དང་། །དམ་ཚིག་ལ་ཡང་གནས་པར་བྱ། །ཞེས་བརྗོད།བརྒྱད་པ་སྒྲིབ་སྦྱོང་ནི། སློབ་མ་དཀྱིལ་འཁོར་གྱི་ཤར་སྒོ་ཡིད་ཀྱིས་ཤག་གིས་ཕྱེ་བས་གཞལ་ཡས་ཁང་གི་ནང་ན་ཕྱག་རྒྱ་ཟིལ་གནོན་གྱི་ལྷ་ཚོགས་རྣམས་མངོན་སུམ་དུ་བཞུགས་པ་ལ་མོས་གུས་དུང་བ་བྱས་པས་ལྷ་ཚོགས་རྣམས་ཀྱི་གནས་གསུམ་ནས་འོད་ཟེར་དཔག་ཏུ་མེད་པ་བྱུང་། སློབ་མའི་གནས་གསུམ་དུ་ཐིམ་པས་ཐོག་མེད་ནས་བསགས་པའི་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་བྱང་བར་བསམ་མོ། །དེ་བཞིན་དུ་སྒོ་གཞན་གསུམ་དུ་ཡང་བྱའོ། །དགུ་པ་ལྷ་དབབ་པ་ནི། བླ་མ་རྡོ་རྗེ་འཛིན་པ་ཡི། །ཆོས་དབྱིངས་ཡེ་ཤེས་ཕོ་བྲང་ནས། །ཡེ་ཤེས་ཁྲོ་བོའི་སྤྲིན་ཆེན་རྣམས། །མ་ལུས་བདག་ལ་དབབ་ཏུ་གསོལ། །ཞེས་སློབ་མས་ལན་གསུམ་གྱིས་གསོལ་བ་གདབ། དེ་ནས་སློབ་མ་ཕྱག་རྒྱ་གཅིག་པའི་ཚེ་བདག་སྔོ་ནག་ཞལ་གཅིག་ཕྱག་གཉིས་གཡས་རྡོ་རྗེ་དང་གཡོན་ཞགས་པ་འཛིན་པ་རྒྱན་དང་ལྡན་པར་གྱུར་པའི་ཐུགས་ཀའི་ཧཱུཾ་ལས་འོད་ཟེར་དཔག་ཏུ་མེད་པ་འཕྲོས། བླ་མའི་ཐུགས་ཀར་ཕོག །བླ་མའི་ཐུགས་ཀ་ནས་འོད་ཟེར་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་རྣམ་པ་ཡི་གེ་བཞིས་མཚན་པ་དང་དཔག་ཏུ་མེད་པ་འཕྲོས། འོག་མིན་ཆོས་ཀྱི་དབྱིངས་ཀྱི་ཕོ་བྲང་། དྲག་པོ་ཨེའི་གཞལ་ཡས་ཁང་ནས། རྒྱལ་བ་ཞི་ཁྲོའི་ཚོགས་ཐམས་ཅད་བཅོམ་ལྡན་འདས་ཕྱག་རྒྱ་ཟིལ་གནོན་གྱི་རྣམ་པར་ནམ་(༧བ)
མཁའ་ལ་སྤྲིན་ཕུང་འཁྲིགས་པ་བཞིན་དུ་བྱིན་ཏེ། སློབ་མའི་སྤྱི་བོ་དང་བ་སྤུའི་བུ་ག་ནས་ཞུགས་ཏེ་སྙིང་གའི་འཇམ་དབྱངས་ཀྱི་རང་བཞིན་ཧཱུྃ་ལ་གཉིས་སུ་མེད་པར་ཐིམ་པར་གྱུར་པར་བསྒོམས་ལ། གུ་གུལ་གྱི་དུད་པ་བྱ། རོལ་མོ་དབྱངས་དང་བཅས་པས་བྱིན་འབེབས་བདེ་ཆེན་ཆོས་དབྱིངས་མའམ། རྒྱས་པར་སྤྲོ་ན། བདེ་གཤེགས་རྒྱལ་བ་མ་རྫོགས་པར་བྱས་པའི་མཇུག་ཏུ། སྐུ་གསུང་ཐུགས་སྔགས་ཀྱི་མཐར་ཏིཥྛ་མ་ཧཱ་ཀྲོ་དྷ་ཨ་བེ་ཤ་ཡཿཨ་བེ་ཤ་ཡ་ཛྙཱ་ན་མཎྜ་ལ་ཨ་བེ་ཤ་ཡ་ཞེས་དང་། ཨྱཻ་རིང་བརྗོད་ཅིང་རོལ་མོ་དྲག་ཏུ་བྱའོ། །རྫོགས་པར་སློབ་མ་རྣམས་ལྷོད་གློད་ལ་སེམས་ཀྱི་ངོ་བོ་ལ་ཆེར་བལྟ། དེ་དུས་ཉམས་དང་རྟོགས་པ། སྐུ་འཕར་གཡོ། གསུང་སྔགས། ཐུགས་བདེ་གསལ་ལ་སོགས་པ་སྔར་དང་མི་འདྲ་བ་ཞིག་འབྱུང་སྟེ། བྱང་གཏེར་དབང་བྱང་ལས། དེ་ལྟར་དྲག་ཏུ་བརྗོད་པ་ཡིས། །བྱིན་རླབས་ཡེ་ཤེས་ཕེབས་པའི་རྟགས། །འདར་དང་འཁྲབ་དང་གར་བྱེད་པ། །སྨྲ་བ་རྒོད་དང་འོད་གསལ་ཉམས། །མི་རྟོག་ཡེ་ཤེས་ཐོད་རྒལ་གྱི། །ཞེས་པ་ལྟར་རོ། །དེ་བརྟན་པའི་ཕྱིར་སྤྱི་བོར་རྡོ་རྗེ་རྒྱ་གྲམ་དུ་བཞག་ཅིང་། ཏིཥྛ་བཛྲ་ཞེས་བརྗོད། བཅུ་པ་མེ་ཏོག་དོར་བ་ནི། དར་སྣ་ལྔ་སོར་ལྔ་པ་གཏུབས་ཏེ་མེ་ཏོག་ལྔ་བརྒྱུས་པ་ཕྲེང་བ་སྙིམ་པར་ཐོགས་ཏེ། ཤར་སྒོ་ནས་འདུན་པ་དྲག་པོས། དཀྱིལ་འཁོར་གྱི་ལྷ་ཚོགས་ལ་བཟང་ངན་མེད་ཀྱང་སྔོན་གྱི་རིགས་ཀྱི་འབྲེལ་བ་གང་ཡོད་ཅིག་དང་མཇལ་བར་གྱུར་ཅིག་སྙམ་པའི་ཡིད་ཀྱིས། འཇམ་དཔལ་དངོས་གྲུབ་ཐོབ་བྱའི་ཕྱིར། །འགྲོ་ལ་ཕན་ཕྱིར་འཇམ་དཔལ་གྱིས། །བདག་ལ་ཐུགས་བརྩེར་དགོངས་ནས་ཀྱང་། །སྨན་པར་དགོངས་ནས་བཞེས་སུ་(༨ན)
གསོལ། །ཨྱཻ་ཀ་ཡ་མ་པྲ་ཏཱིཙྪ་བཛྲ་ཧོ༔ ཞེས་སྐབས་འདིར་ཕྱག་ལེན་ལ་དཀྱིལ་འཁོར་ལ་མི་དོར་བར་སློབ་དཔོན་གྱི་སྐུ་ལ་མེ་ཏོག་བལྟོས་མེད་དུ་དོར། གང་ལ་བབས་པའི་རིགས་ངོས་བཟུང་ལ་བསྟན། རྩ་སྔགས་དང་པྲ་ཏི་གྲྀཧྞ་མ་ཧཱ་བ་ལ་ཧོཿ ཞེས་མེ་ཏོག་མགོ་ལ་བཞག་ལ་ལྷ་བསྟིམ་མོ། །སྐབས་དེར་སློབ་དཔོན་གྱི་སྐུ་ལ་མེ་ཏོག་ཕོག་ན་རྡོ་རྗེ་བཞད་པ་རྩལ་ལམ། ཟིལ་གནོན་དྲག་པོ་རྩལ་དང་། གཡས་གཡོན་མདུན་རྒྱབ་ཏུ་ཕོག་ན་སོ་སོའི་རིགས་དང་སྦྱར་ཏེ་གསང་མཚན་བཏགས་སོ། །བཅུ་གཅིག་པ་མིག་དབྱེ་དཀྱིལ་འཁོར་བསྟན་པ་ནི། ཧོཿརིག་པའི་སྟོབས་ལྡན་སྦྱོར་བའི་གནས། འཁྲུལ་པའི་བག་ཆགས་སྤྲིན་ལྟ་བུ། །ཡེ་ཤེས་རིག་པའི་སྒྲོན་མར་གསལ། །མཉམ་པའི་སྟོབས་ཀྱིས་བརྟུལ་ཞུགས་ལོང་། །ཨྱེ་ཀ་ཡ་མ་ཙཀྵུ་པྲ་བེ་ཤ་ཕཊཿ ཅེས་མིག་དར་བསལ་ལ་དཀྱིལ་འཁོར་སྟོན་པ་ནི། ངེས་དོན་བདེ་འཇུག་ཏུ། རྟེན་དང་བརྟེན་པར་བཅས་པའི་དཀྱིལ་འཁོར་ལེགས་པར་བསྟན་ནས་གཞལ་ཡས་ཁང་དང་ལྷའི་རྣམ་དག་བཤད་ནས། ཞེས་གསུངས་པ་ལྟར། གསང་སྔགས་རྙིང་མའི་ཕྱག་ལེན་དུ། རྟེན་དང་བརྟེན་པར་བཅས་པའི་དཀྱིལ་འཁོར་དག་པ་དང་བཅས་ཏེ་ཞིབ་པར་མཛད་སྣང་བ་དང་། བདག་ཅག་གི་འདྲེན་པ་དམ་པ་རྡོ་རྗེ་འཆང་ཆེན་པོ་དཔལ་འབྱོར་ལྷུན་གྲུབ་ཚུལ་འདི་ལ་ནན་ཏན་དུ་མཛད་པའི་ཕྱིར་ཞིབ་པར་བརྗོད་ན། རྡོ་རྗེའི་རྭ་བ་མེ་རིས་བསྐོར་བའི་དུར་ཁྲོད་ཆེན་པོ་བརྒྱད་དང་བཅས་པའི་དབུས་སུ་ལྷུན་གྱིས་གྲུབ་པའི་གཞལ་ཡས་ཁང་། ཡུམ་གྱི་མཁའ་དབྱིངས་མཚོན་པའི་གྲུ་གསུམ་མཐིང་ནག །ཐུགས་(༨བ)
རྗེའི་རོལ་པ་མཚོན་པའི་ཐོད་ཕྲེང་གི་རྭ་བས་བསྐོར་བ། བདེ་བ་ཆེན་པོ་མཚོན་པའི་ཟླ་གམ་གསུམ་དང་བཅས་པའི་ཕྱི་རོལ་ཏུ་ཡེ་ཤེས་བཞི་མཚོན་པའི་ཐོད་མཁར་བཞི། ཡེ་ཤེས་བཅུ་དྲུག་མཚོན་པའི་འཁོར་ལོ་རྩིབས་བརྒྱད་མཚན་དང་བཅས་པ། སྐྱེ་མཆེད་བཅུ་གཉིས་དག་པའི་ལྕགས་མཁར་བཅུ་གཉིས། ཆད་མེད་བཞི་མཚོན་པའི་གྲུ་ཆད་བཞི། འཕྲིན་ལས་བཞི་མཚོན་པའི་ཁྱམས་བཞི། ཡེ་ཤེས་བཞི་མཚོན་པའི་སྒོ་བཞི། རྣམ་ཐར་བརྒྱད་མཚོན་པའི་རྟ་བབས་བརྒྱད། ཆོས་བརྒྱད་ཀྱི་སྤྲོས་པ་དང་བྲལ་བའི་སྣ་ཚོགས་པའི་རྒྱན་ཅན། རྩེ་མོ་མཐོ་བ་ཐིག་ལེ་ཉག་གཅིག་དང་བཅས་པའི་གཞལ་ཡས་ཁང་གི་དབུས་སུ་དྲེགས་པ་ཅན་རྣམས་བདེ་བ་ཆེན་པོར་སྦྱོར་ཞིང་ཐབས་ཤེས་ཆགས་མེད་མཚོན་པའི་གདན་གྱི་སྟེང་དུ་ཡེ་ཤེས་ལྔའི་ངོ་བོར་གྱུར་པའི་རྩ་བའི་ལྷ་ལྔ། སྐྱེ་མེད་ཀྱི་ངང་དུ་མྱ་ངན་ལས་འདས་པའི་ཡུམ་རྡོ་རྗེ་ཁྲོས་མ། ཡེ་ཤེས་ཀྱི་རོལ་པའི་ངོ་བོར་གྱུར་པའི་རྒྱན་གྱི་ལྷ་བརྒྱད། །སྐུ་གསུང་ཐུགས་ཀྱི་ཡེ་ཤེས་ཀྱི་ངོ་བོར་གྱུར་པའི་སྤྲུལ་པ་གསུམ། ཉོན་མོངས་བཞི་དག་པའི་གཤེད་བཞི། རྣམ་ཤེས་ཚོགས་བརྒྱད་དག་པའི་མོན་བདུད་བརྒྱད། སྐྱེ་མཆེད་བཅུ་གཉིས་དག་པའི་འཆི་བདག་བཅུ་གཉིས། བདག་ཏུ་བལྟ་བ་དག་པའི་སྒོ་བ་བཞིའོ། །དེ་ལྟར་ཕྱི་རྡུལ་ཚོན་གྱི་དཀྱིལ་འཁོར་ནི་དེ་བས་མཚོན་པ་ཡིན་གྱི། དོན་དམ་པར་རང་གི་ཕུང་ཁམས་སྐྱེ་མཆེད་ཐམས་ཅད་ལྷའི་ངོ་བོར་ལྷུན་གྲུབ་ཏུ་གནས་པ་ཡིན་ཏེ། དེའི་དོན་དབང་དོན་ངོ་སྤྲོད་པའི་སྐབས་སུ་རིམ་པར་འབྱུང་བ་ལགས་སོ། །གཉིས་པ་དབང་བསྐུར་བ་ལ། བུམ་དབང་། གསང་དབང་། ཤེས་རབ་ཡེ་ཤེས་ཀྱི་དབང་། རང་བྱུང་ཡེ་ཤེས་(༩ན)
ཀྱི་དབང་། རྗེས་དམ་ཚིག་བསྟན་པའོ། །དང་པོ་ལ་མཎྜལ་ཕུལ་ཞིང་གསོལ་བ་གདབ་པ། ཁྲུས་ཀྱི་བུམ་པས་བཀྲུ་ཞིང་ལྷར་བསྐྱེད་པ། ལྷ་བུམ་ལ་ཤིས་བརྗོད་བསྒྲགས་ཏེ་དབང་བསྐུར་བ། ཡོན་ཏན་རྒྱས་བྱེད་ཡེ་ཤེས་ལྔའི་དབང་། བུམ་པའི་དབང་དོན་ངོ་སྤྲད་པ། མཐའ་བརྟེན་གྱི་དབང་ངོ་། །དང་པོ་ནི། ན་མོ་དབང་ཆེན་གཞལ་ཡས་དབུས་ཀྱི་ལྟེ་བ་ལ། །ཞེས་པའམ། ནོར་འཛིན་ལྷུན་པོ་རི་ཕྲན་ཉི་ཟླ་མཚོ། །ཞེས་སོགས་སྐབས་སྦྱར་གྱི་མཎྜལ་ཕུལ་ལ། ཧོཿ ཁམས་གསུམ་དབང་དུ་བསྡུ་བ་དང་། །སྲིད་གསུམ་ཟིལ་གྱིས་གནོན་པ་དང་། །སྟོང་གསུམ་གཡུལ་དུ་འབྲུབ་པའི་ཕྱིར། །དུས་གསུམ་སངས་རྒྱས་དབང་བསྐུར་གསོལ། །འཇམ་དཔལ་གསང་བའི་དཀྱིལ་འཁོར་དུ། །བསྙེན་སྒྲུབ་ལས་ལ་སྦྱར་བ་དང་། །དཀྱིལ་འཁོར་ལས་མཐའ་བསྟན་པའི་ཕྱིར། །ཕྱི་ནང་གསང་བའི་དབང་བསྐུར་གསོལ། །གཤེད་བཞི་སྦྱོར་བའི་འཁོར་ལོ་དང་། །བན་དགྲ་ནག་པོ་སྒྲོལ་བ་དང་། །འཕྲིན་ལས་རྣམ་བཞི་བསྒྲུབ་པའི་ཕྱིར། །མཐུ་རྩལ་དབང་བསྐུར་སྩལ་དུ་གསོལ། །ཞེས་ལན་གསུམ་གྱིས་གསོལ་བ་གདབ། གཉིས་པ་ནི། བདག་ནི་དམ་ཚིག་འཇམ་དཔལ་ཏེ། །རིན་ཆེན་དངུལ་གྱི་བུམ་པ་ན། །བྱང་ཆུབ་སེམས་ཀྱི་ཆུ་ཡིས་བལྟམས། །ཉོན་མོངས་བག་ཆགས་བྱང་གྱུར་ཅིག །ཨཱོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། ཞེས་བཀྲུས་ཏེ། ལུས་ངག་ཡིད་གསུམ་གྱི་སྒྲིབ་པ་ཐམས་ཅད་དག་པར་བསམ་པའི་ངང་ལས། སློབ་མ་ཉིད་ཕྱག་རྒྱ་གཅིག་པའི་ཚེ་བདག་སྔོ་ནག་ཞལ་གཅིག་ཕྱག་གཉིས་ཀྱི་གཡས་རྡོ་(༩བ)
རྗེ་དང་གཡོན་ཞགས་པ་འཛིན་པ་རྒྱན་དང་ལྡན་པར་གསལ་བཏབ། གསུམ་པ་ནི། དབང་སྟེགས་པདྨ་འདབ་བརྒྱད་བྲིས་པའམ་བསམས་པའི་སྟེང་དུ། སློབ་མ་དཀྱིལ་འཁོར་ལ་མངོན་པར་ཕྱོགས་ཏེ་འདུག་པའི་སྟེང་དུ་གཡས་སུ་གདུགས་དཀར་པོ། གཡོན་དུ་བ་དན་རྒྱལ་མཚན། ཕྱོགས་ཀུན་ཏུ་མཆོད་པས་བསྐོར་ཞིང་། སྟེང་གི་ནམ་མཁའ་ལ་དབང་ལྷ་གཞལ་ཡས་ཁང་དང་བཅས། སངས་རྒྱས་དང་བྱང་ཆུབ་སེམས་དཔའ་ནམ་མཁའ་གང་བས་དབང་བསྐུར་བར་མོས་ལ། ཧཱུཾ། བཀྲ་ཤིས་ཀུན་གྱི་བཀྲ་ཤིས་པ། །སངས་རྒྱས་ཕྱག་འཚལ་བཀྲ་ཤིས་ཤོག །ཆོས་ལ་ཕྱག་འཚལ་བཀྲ་ཤིས་ཤོག །དགེ་འདུན་ཕྱག་འཚལ་བཀྲ་ཤིས་ཤོག །བདེ་གཤེགས་རིགས་ལྔའི་བཀྲ་ཤིས་ཤོག །ཅེས་བརྗོད་ཅིང་མེ་ཏོག་གི་ཆར་ཡང་ཕབ། རྣམ་རྒྱལ་བུམ་པ་སྤྱི་བོའི་སྟེང་དུ་བཞག་ཅིང་གླུད་གཏོར་བྱ། དཀྱིལ་འཁོར་ལྷ་ཚོགས་བྱང་ཆུབ་སེམས་དཔའ་ཐམས་ཅད་ཞུ་ཞིང་ཐིམ། བྱང་ཆུབ་སེམས་ཀྱི་དབང་བསྐུར། ཧཱུཾ། མཁའ་དབྱིངས་བུམ་པ་ཆེན་པོ་ན། །རིགས་ཀྱི་དཀྱིལ་འཁོར་རྫོགས་པར་བཞུགས། །གཉིས་མེད་ཡེ་ཤེས་དབང་བསྐུར་བས། ཁམས་གསུམ་རིགས་ཀྱི་བདག་པོར་གྱུར། ཁམས་གསུམ་དབང་དུ་བསྡུ་བ་དང་། །སྲིད་གསུམ་ཟིལ་གྱིས་མནན་པ་དང་། །དམ་ཅན་ལས་ལ་འཛུད་པ་ཡི། །དབང་མཆོག་དམ་པ་བསྐུར་དུ་གསོལ། །ཨྱཻ་ཀ་ཡ་མ་ཀ་པཀྵ་ཨ་བྷི་ཥིཉྩ་ཧཱུྃ་བྷྲུཾ་ཧཱུྃ། སྐུ་གསུང་ཐུགས་ཀྱི་སྙིང་པོ་དང་། ཨྱཻ་རིང་གི་མཐར། ཨོཾ་སརྦ་ཏ་ཐ་ག་ཏ་ཨ་བྷི་ཥིཉྩ་བཛྲི་བྷ་ཝ་ཧཱུཾ། ཉོན་མོངས་པ་ལྔའི་དྲི་མ་དག །ཕུང་པོ་ལྔ་གནས་བསྒྱུར། ཡེ་(༡༠ན)
ཤེས་ལྔའི་རྟོགས་པ་མངོན་དུ་གྱུར། རྒྱལ་བ་རིགས་རྣམ་པ་ལྔས་དབུ་བརྒྱན་པ། དེ་ལ་སངས་རྒྱས་བྱང་སེམས་དཀྱིལ་འཁོར་ལྷ་ཚོགས་དབང་ལྷ་རྣམས་ཀྱིས་མཆོད་པ་བསམ་གྱིས་མི་ཁྱབ་པས་མཆོད། བཀྲ་ཤིས་ཀྱི་མེ་ཏོག་གི་ཆར་དབབ། རོལ་མོའི་སྒྲ་བསྒྲགས་ནས་ཁམས་གསུམ་ཆོས་ཀྱི་རྒྱལ་པོ་ཆེན་པོར་མངའ་གསོལ་ལོ། །བཞི་པ་ནི། སློབ་བུའི་མགོ་ཐོག་ཏུ་དབུ་རྒྱན་བཞག་སྟེ། མགོ་བོའི་གནས་ལྔར་དབུ་རྒྱན་རིགས་ཀྱི་ལྷ་ཁྲག་འཐུང་ཁྲོ་བོ་རིགས་ལྔ་མངོན་སུམ་དུ་བཞུགས་པར་མོས་ལ། ཨཱོཾ་མ་ཧཱ་ཤཱུནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ༔ ཨཱོཾ་མ་ཧཱ་ཨ་ཏ་རི་ཤ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ༔ ཨཱོཾ་མ་ཧཱ་ས་མནྟ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ༔ ཨཱོཾ་མ་ཧཱ་པྲ་ཏ་བེ་ཤ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨཱོཾ་མ་ཧཱ་ཧྲི་ཏ་ཨ་གུ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ༔ ཞེས་བརྗོད་དོ། །ལྔ་པ་ནི། འཁོར་འདས་ལམ་གྱིས་བསྡུས་པའི་ཆོས་ཐམས་ཅད་ཚེ་བདག་གི་དོན་རྟགས་ལས་མི་འདའ་བའི་བརྡ་དོན་ངོ་སྤྲད་པ་ཡིན་ལ། དེ་ཡང་དོན་བརྡ་ཡིས་ངོ་སྤྲོད་པ། དོན་རྟགས་རྣམ་པ་ལྔ་དང་ལྡན་པ། དབྱེ་བ། ངོ་བོ། ཡོན་ཏན་ལྔ་ལས། འབྲས་བུ་ལྷུན་གྱིས་གྲུབ་པའོ། །དང་པོ་ཀུན་གྱི་གཞི་ཡིན་པའི་ཕྱིར་ངོ་བོ་བཤད་པ་ནི། ཚེ་བདག་ངོ་བོ་ཟེར་བ་འདུག །ཅེས་ཚེ་བདག་གི་དོན་བརྟག་ཅིང་རྣམ་པར་བཤད་པ་ལྔ་ལས། དང་པོ་དབྱེ་བ་ནི། དབྱེ་བ་དག་ལ་རྣམ་པ་ལྔ། །རང་བཞིན་ལྷུན་གྲུབ་ཚེ་བདག་དང་། །ཡེ་ཤེས་ལྷུན་གྲུབ་ཟིལ་གནོན་དང་། །ཕྱག་རྒྱ་གཅིག་པའི་ཚེ་བདག་དང་། །ཐུགས་ལས་སྤྲུལ་པའི་ཚེ་བདག་དང་། །རང་རྒྱུད་ལས་ཀྱི་ཚེ་བདག་གོ །ཞེས་གསུངས། ངོ་བོ་ནི། (༡༠བ)
ཚེ་བདག་ངོ་བོ་འདི་ལྟ་སྟེ། །ཐམས་ཅད་ཆོས་སྐུ་ངོ་བོ་གཅིག །ལྷུན་གྲུབ་ཡེ་ཤེས་ཆེན་པོའི་སྐུ། །སྣ་ཚོགས་སྣང་བ་སྤྲུལ་པའི་སྐུ། །རོལ་པ་གསུམ་གྱི་ངང་དུ་རྫོགས། །ཞེས་སོ། །ཡོན་ཏན་ནི། ཡོན་ཏན་རིན་པོ་ཆེ་ལྟ་བུ། །ཀུན་འབྱུང་འཕེལ་འགྲིབ་མེད་པར་གནས། །ལྷུན་གྲུབ་ཚེ་བདག་དངས་མ་ལྔ། །རྒྱུ་རྐྱེན་འཕྲོ་འདུའི་རྩོལ་དང་བྲལ། །ཕྱག་རྒྱ་ཆེན་པོར་ལྷུན་གྱིས་གྲུབ། །ཟིལ་གྱིས་གནོན་པའི་ཚེ་བདག་ནི། །སྣང་སྲིད་ཡེ་ཤེས་རྟོགས་ལས་འདས། །རྟོག་ཅན་འཕྲུལ་པ་རུ་བཟློག་ཕྱིར། །རིན་ཆེན་གཞལ་ཡས་ལྷུན་གྲུབ་གནས། །གདུག་པ་ལྟོ་འཕྱེ་ཕྱོགས་སྐྱོང་གླང་། །སྟོབས་ཀྱི་གདན་ལྔ་དེ་བཞིན་གྲུབ། །རང་བཞིན་གསལ་བའི་ངང་ཉིད་ལས། །ཡེ་ཤེས་ལྷུན་གྱིས་གྲུབ་པའི་སྐུ། །ལྷུན་པོ་རི་རབ་ལྟར་བརྟན་བརྗིད། །སྲིད་གསུམ་སྦྱོར་བ་ཟིལ་གྱིས་གནོན། །བདུད་མོ་མཁའ་འབར་གསོད་བྱད་མ། །མྱོས་བྱེད་ཁྲག་སྐྱུག་མ་མོའི་ཚོགས། །མ་ལུས་ཟིལ་གྱིས་གནོན་ཅིང་འཇོམས། །གསོད་བྱེད་བཀའ་ཡི་བྱིན་རླབས་གནོད། །བྱ་ཁྱུང་ཀླུ་བདུད་ཀླུ་སྲིན་གནོན། །སེང་གེས་རྒྱལ་བློན་སྟོབས་ཅན་གནོན། །སྟག་གིས་གཅན་གཟན་གདུག་པ་འཇོམས། །ཞེ་སྡང་གདུག་པའི་སྦྲུལ་ནག་གིས། །སྔགས་དང་དམོད་པའི་རིགས་བཞིའི་གླུ། །དུག་རིགས་ལྔ་དང་དབྱིག་སོགས་བཞི། །ཚ་བའི་ནད་དབལ་ཟིལ་གྱིས་གནོན། །སྲིད་པའི་ཁྱམས་ཁང་རུས་སྦལ་གྱིས། །སྲོག་དབུགས་བཀྲག་མདངས་ཚེ་སྲོག་འཆང་། །རང་བཞིན་ཆོས་སྐུ་སྐྱེ་མེད་ལས། །སྐྱེ་བའི་ཆོ་འཕྲུལ་ལྷུན་གྲུབ་སྐུས། །སྐྱེ་བ་ལས་ཀྱི་འཁྲུལ་པ་ཡིས། །སྐམ་ཆགས་སྐྱེ་མེད་དབྱིངས་སུ་སྒྲོལ། །དྭངས་མའི་(༡༡ན)
ཐིག་ལེ་བཅུད་ལ་སྡུད། །སྣང་སྲིད་སྐྱེ་འགྲོ་མ་ལུས་ཀྱི། །ཚེ་སྲོག་ཡི་གེ་གཉིས་བསྡུས་འཆང་། །ཕྱག་རྒྱ་གཅིག་པའི་ཚེ་བདག་ནི། །གདན་ལ་ཡབ་ཡུམ་བྱ་ཁྱུང་དྲེགས། །རྒྱན་གྱི་སྔགས་དང་གབ་པའི་སྔགས། །ལུས་བསྲུང་དྲག་པོ་འཇོམས་པས་སོ། །སྤྲུལ་པའི་ཚེ་བདག་ནག་པོ་ནི། །ཟིལ་གནོན་ཐུགས་ཀྱི་སྤྲུལ་པ་སྟེ། །དབུ་དགུ་ལས་དང་ཡོན་ཏན་སྟོབས། །གནད་དགུ་མི་ནད་འཇོམས་བདུད་ཡིན། །ཐེག་པ་དགུ་ཡི་དོན་ལྡན་ལ། །འབྲས་བུ་རིགས་ལྔ་ཡེ་ཤེས་བཞི། །སྤྲུལ་པ་སྣ་ཚོགས་བསམ་དཔག་དཀའ། །ལས་ཀྱི་ཚེ་བདག་ནག་པོ་ནི། །འབྱུང་བ་གདན་བཞི་རྔམ་འོག་ན། །མི་དགེ་བཅུ་ཡི་ལས་དབང་ལས། །ཡི་དྭགས་རྒྱལ་པོ་འཆི་བདག་སྐུ། །ཤ་ཟ་ཀི་ཀང་འཁོར་དང་བཅས། །སྔགས་ཀྱིས་དབང་སྡུད་ལས་ཀུན་བྱེད། །ཅེས་སོ། །ལས་ཀྱི་རྣམ་གྲངས་བསྟན་པ་ནི། །ལས་ཀྱི་རྣམ་གྲངས་འདི་ལྟ་སྟེ། །རྩ་བ་བཞི་དང་ཡན་ལག་བཅས། །ལྷུན་གྲུབ་ཚེ་བདག་ནག་པོ་ལས། །རྩ་བ་གཉིས་དང་ཡན་ལག་བཅུ། ཁྱད་པར་བརྒྱ་དང་བཅུ་དྲུག་སྤྱོད། །སྙིང་པོ་མན་ངག་རྩ་བ་གཉིས། །ཡན་ལག་ཕྲ་མོ་ཉི་ཤུ་དགུ། །ཟིལ་གནོན་ཕྱག་རྒྱ་ཆེན་པོའི་ལས། །སྦྱོར་བའི་རྣམ་གྲངས་བརྒྱ་ཕྲག་གཅིག །དྲུག་ཅུ་རྩ་གཅིག་བྱེད་པར་གསུངས། །ཞེས་སོ། །ལམ་ཀུན་གཅིག་ཏུ་གྲོལ་བའི་འབྲས་བུ་ནི། །འབྲས་བུའི་གནས་ཚུལ་འདི་ལྟ་སྟེ། །ཆོས་ཉིད་རང་བཞིན་མི་འགྱུར་ལས། །རང་བྱུང་ཡེ་ཤེས་ཕྱག་རྒྱར་ཤར། །ཐམས་ཅད་སྣང་སྲིད་ཡེ་ཤེས་སྐུ། །དབྱིངས་དང་ཡེ་ཤེས་གཉིས་སུ་མེད། །སྣང་སྟོང་མ་(༡༡བ)
འགགས་བདེ་ཆེན་ནོ། །ཞེས་སོ། །དེ་དག་གི་དོན་བཀྲོལ་ལ་བཤད་དོ། །འདི་དག་ཆོ་ག་ཟོར་ཡང་བར་བྱེད་ན་ཚིག་མདོར་བསྡུས་ཏེ་དོན་གོ་ཙམ་བྱས་པས་ཆོག་པར་སེམས་སོ། །མདོར་ན་སྣང་སྟོང་ཐམས་ཅད་ལྷ་དང་ཡེ་ཤེས་ཀྱི་རྣམ་རོལ་དུ་འཆར་བ་ལས་མི་འདའ་བར་བྱའོ། །དྲུག་པ་ལ། སྐུའི་ནུས་པ་སྟེར་བར་བྱེད་པ་ཕྱག་རྒྱའི་དབང་། གསུང་གི་ནུས་པ་སྟེར་བར་བྱེད་པ་སྔགས་ཀྱི་དབང་། ཐུགས་ཀྱི་ནུས་པ་སྟེར་བར་བྱེད་པ་ཕྱག་མཚན་གྱི་དབང་། ཡོན་ཏན་གྱི་ནུས་པ་སྟེར་བར་བྱེད་པ་ལོངས་སྤྱོད་ཀྱི་དབང་། འཕྲིན་ལས་ཀྱི་ནུས་པ་སྟེར་བར་བྱེད་པ་སྦྱོར་སྒྲོལ་གྱི་དབང་ངོ་། །དང་པོ་ནི། སློབ་མའི་ལུས་ཐམས་ཅད་ལྷའི་དཀྱིལ་འཁོར་དུ་བསྒོམ་པ་སྐུ་ཕྱག་རྒྱ་འདི་དབང་བསྐུར་བ་ཡིན་ཏེ། དེ་ཡང་སློབ་མ་རྟེན་དང་བརྟེན་པར་བཅས་པའི་དཀྱིལ་འཁོར་དུ་བསྒོམ་པའམ། ལུས་མཆོད་རྟེན་དུ་གསལ་བཏབ་ནས་དེ་ལ་ལྷ་དགོད་པ་ལ། འོག་མིན་གྱི་དཀྱིལ་འཁོར་ནས་ལྷ་ཚོགས་རྣས་མངོན་སུམ་དུ་བྱོན་ནས་གཉིས་མེད་དུ་ཐིམ་སྟེ་སྐུའི་ནུས་པ་བརྗིད་དང་ལྡན་པར་བསྒོམ་ཞིང་། རྩ་བ་རྒྱན་གྱི་ལྷ་རྣམས་ཀྱི་ང་རྒྱལ་བརྟན་པོ་འཛིན་དུ་གཞུག །སྤྲུལ་པ་གསུམ་ནས་སྒོ་མའི་བར་གྱི་ལྷ་རྣམས་རང་རྒྱུད་ཀྱི་སྲོག་གི་གནད་དང་དམ་ཚིག་གི་དབང་གིས་བྲན་གཡོག་གི་ཚུལ་དུ་བཀའ་བསྒོ་བ་ཡང་ཡིན་ནོ། །དེ་ལྟར་གཙོ་བོ་ནས་རལ་པ་སྤྱི་བཅིངས་ཀྱི་བར་དབང་ཆོག་མུ་ཏིག་ཕྲེང་བ་ལྟར་ལ། འཆི་བདག་བཅུ་གཉིས་སྒོ་མ་བཞི་དང་བཅས་པས་ཟུར་བརྒྱན་ཏེ་ལྷ་གྲངས་ཚང་བའི་ཙཀ་ལི་བསྐུར་ཚིག་རྒྱབ་ཡིག་ལྟར་སྦྲགས་ཏེ་བསྐུར་རོ། །གཉིས་པ་ནི། རྡོ་རྗེ་སློབ་དཔོན་གྱི་གནས་གསུམ་གྱིས་(༡༢ན)
བོན་སྔགས་འཕྲེང་དང་བཅས་པ་ལས་སྔགས་ཀྱི་འཕྲེང་བ་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱུང་སྟེ། སློབ་མའི་མགྲིན་པའི་ལམ་བརྒྱུད་གནས་གསུམ་གྱི་ས་བོན་ལ་བསྐོར་བར་བསམས་ལ། དཔོན་སློབ་གཉིས་ཀ་འཕྲེང་བ་གཅིག་ལ་འཇུས་ཏེ་སྐུ་གསུང་ཐུགས་ཀྱི་སྔགས་དང་ཨྱེ་རིང་ལན་གསུམ་སློབ་དཔོན་གྱི་རྗེས་སུ་སློབ་མས་བརྗོད། དེ་བཞིན་དུ་སྔགས་ཚར་གསུམ་གྱི་བཟླས་ལུང་བྱིན་ལ། མཐར་འཕྲེང་བའི་མེ་ཏོག་སྤྱི་བོར་བཞག་སྟེ། ཧཱུཾ། གསང་སྔགས་རྒྱལ་པོ་འདི་དག་ནི། །འཁོར་བའི་འཕྲོ་འདུ་གསལ་བསྒོམས་ཏེ། ཁྱོད་ཀྱིས་རྟག་ཏུ་བཟླས་པར་གྱིས། །གསང་བ་གཞན་དུ་སྨྲ་མི་བྱ། །ཞེས་བརྗོད་དོ། །གསུམ་པ་ནི། སློབ་དཔོན་གྱི་ཐུགས་ཀའི་འོད་ཀྱིས་ཡེ་ཤེས་ཀྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། སངས་རྒྱས་ཐམས་ཅད་ཐུགས་ཕྱག་མཚན་གྱི་རྣམ་པ་བསམ་གྱིས་མི་ཁྱབ་པར་འདུས། དེ་དག་ཟིལ་གནོན་གྱི་ཕྱག་རྒྱ་དྲུག་ཏུ་གྱུར། དྲུག་པོའང་བསམ་གྱིས་མི་ཁྱབ་པར་སློབ་བུའི་སྙིང་གར་ཐིམ་པར་བསམས་ལ། ཧོ། འཁོར་བ་འདལ་བྱེད་འཁོར་ལོ་དང་། ཉོན་མོངས་གཅོད་པའི་རལ་གྲི་དང་། །ཆོས་ཉིད་སྐྱེ་མེད་རྡོ་རྗེ་ཡིས། །སྐུ་གསུམ་མཉམ་པའི་དབང་ཐོབ་ཤོག །ཨྱེ་ཀ་ཡ་མ་ཙཀྲ་ཁངྒ་བཛྲ། བཛྲ་ཨ་བྷི་ཥིཉྩ་ཧོཿ བེ་ཅོན་དུག་ལྔ་ཟིལ་གྱིས་གནོན་པ་དང་། །གདུག་པ་མ་ལུས་འཇོམས་བྱེད་གཏུན་ཤིང་དང་། །ལོག་རྟོག་རྐམ་ཆགས་སྒྲོལ་བའི་སྡིགས་མཛུབ་ཀྱིས། །རེག་པ་སྟོབས་ཀྱི་སྒོ་གསུམ་ཐོབ་པར་ཤོག །ཨྱེ་ཀ་ཡ་མ་བྷི་ཏ་ཧུ་ཏི་ས་བ་ར་ཨ་བྷི་ཥིཉྩ་ཧོཿ ཞེས་བརྗོད་ཅིང་ཕྱག་མཚན་(༡༢བ)
རྣམས་སྙིང་གར་གཏུག་ཅིང་ལག་ཏུ་བྱིན།བཞི་པ་ལ། གདུག་པ་ཟིལ་གྱིས་གནོན་པ་དཔའ་བོའི་ཆས། །རྣལ་འབྱོར་བར་ཆད་ཞི་བ་རྡོ་རྗེའི་ཚེ། །དངོས་གྲུབ་མྱུར་དུ་ཐོབ་བྱེད་དཔའ་བོའི་རྫས། །དང་པོ་ནི། ཧོཿ གླང་ཆེན་ཞིང་ལྤགས་སྟག་ཤམ་སྦྲུལ། །ཐོད་པ་སྙིང་འཕྲེང་ཀེང་རུས་རྒྱན། །མེ་རི་དུར་ཁྲོད་དབང་བསྐུར་བས། །དྲེགས་པའི་མཐུ་སྟོབས་ལྡན་པར་ཤོག །ཨྱཻ་ཀ་ཡ་མ་ཧོ་ཏི་མ་ཧཱ་ན་ག་ཀ་པ་ལི་ཙིཏྟ་ཛྭ་ལ་ནྲྀ་ཏི་ཨ་བྷི་ཥིཉྩ་ཧཱུཾ། ཞེས་བརྗོད་དེ། རྒྱན་རྣམས་ལུས་ལ་འགོད་པའི་ཚུལ་བྱ།གཉིས་པ་ནི། བཀྲ་ཤིས་དངོས་གྲུབ་གའུ་རུ། །མི་འགྱུར་བརྟན་པའི་ཚེ་བསྐྱིལ་ནས། །རང་རྟགས་ཚེ་ཡི་དབང་བསྐུར་བས། །མི་འགྱུར་བརྟན་པའི་དབང་ཐོབ་ཤོག །ཨྱཻ་ཀ་ཡ་མ་ཨཱ་ཡུར་ཛྙཱན་ཨ་བྷི་ཥིཉྩ་ཧོཿ ཞེས་བརྗོད་དེ་ཚེ་བུམ་མགོ་ལ་གཏུག །གསུམ་པ་ལ། བདུད་རྩི། གཏོར་མ། རཀྟ། བཾ། དང་པོ་ནི། འཆི་མེད་རང་བྱུང་ར་ས་ཡན། །བཀྲ་ཤིས་མཚན་ལྡན་ལྷག་པའི་རྫས། །འཕེལ་འགྲིབ་མེད་པའི་དབང་བསྐུར་བས། །རིགས་ལྔ་ཡེ་ཤེས་ལྔ་ཡི་དབང་ཐོབ་ཤོག །ཨྱཻ་ཀ་ཡ་མ་སརྦ་པཉྩ་ཨ་མྲྀ་ཏ་ཛྙཱ་ན་ཨ་བྷི་ཥིཉྩ་ཧོཿ ཞེས་བརྗོད་དེ། བདུད་རྩི་མྱང་ཞིང་ལག་ཏུ་གཏད།གཉིས་པ་ནི། སྣོད་ཀྱི་འཇིག་རྟེན་གཏོར་གཞོང་དུ། །བཅུད་ཀྱི་སེམས་ཅན་གཏོར་མར་གསལ། །འབྱུང་བ་རྣམ་ལྔ་གཏོར་མའི་རྒྱུ། །ལྷུན་གྲུབ་ཀུན་འབྱུང་གཏོར་མའི་རྒྱན། །འཛིན་ཆགས་མེད་པའི་སྟོབས་ཀྱིས་རོལ། །ཨྱཻ་ཀ་ཡ་མ་བ་ལིཾ་ཛྙཱ་ན་ཨ་བྷི་ཥིཉྩ་ཧོཿ ཞེས་བརྗོད་དེ་སྤྱི་བོར་གཏུག་ཅིང་ཅུང་ཟད་རོལ། གསུམ་པ་ནི། རྡོ་རྗེ་པདྨ་མཉམ་སྦྱར་ནས། །པདྨ་རཀྟ་བྱང་ཆུབ་སེམས། །བཾ་ཆེན་(༡༣ན)
རྨེ་བ་དོན་དང་སྦྱར། །བརྟུལ་ཞུགས་རོལ་པས་དབང་བསྐུར་བས། །མི་ཟད་རྒྱན་གྱི་དབང་ཐོབ་ཤོག །ཨྱཻ་ཀ་ཡ་མ་གུ་ཧྱ་རཀྵ་བོ་དྷི་ཙིཏྟ་ཨ་བྷི་ཥིཉྩ་ཧོཿ ཞེས་བརྗོད་དེ་ཅུང་ཟད་མྱང་ཞིང་ལག་ཏུ་གཏད་དོ། །བཞི་པ་ནི། དཔའ་བརྟུལ་སྔགས་ཀྱི་བྱིན་བསྐྱེད་པའི། །བཾ་ཆེན་རོ་ལ་མཉམ་པར་རོལ། །རྡོ་རྗེ་འཛིན་པའི་དབང་ཐོབ་ནས། །མི་ཟད་རྒྱན་གྱི་དབང་ཐོབ་ཤོག །ཨྱཻ་ཀ་ཡ་མ་མ་ཧཱ་མཾ་ས་ཨ་ཏི་བ་ཏ་སིདྡྷི་ཨ་བྷི་ཥིཉྩ་ཧོཿ ཞེས་བརྗོད། བཾ་གྱི་བསམ་རྒྱུད་ནི། བཾ་གྱི་ཕྱི་རྒྱུད་ཀྱི་ལྷ་ཐམས་ཅད་ཙིཏྟའི་དཀྱིལ་འཁོར་ལ་འདུས། དེ་ཡང་དངས་མ་ལྔའི་ཐིག་ལེ་ལ་འདུས། དེ་སློབ་མའི་སྙིང་གར་འུབ་ཀྱིས་ཐིམ་པར་བསམ་མོ། །དེ་ཡང་བཾ་དེ་ཡེ་ཤེས་ལྔའི་ངོ་བོ་བྱིན་རླབས་དང་དངོས་གྲུབ་དཔག་ཏུ་མེད་པར་བསམས་ལ་དུམ་བུར་བགོས་ཏེ་ཡུལ་དང་དབང་པོ་རོ་གཅིག་པའི་དེ་ཁོ་ནའི་རྣལ་འབྱོར་གྱི་རྣམ་རོལ་ལོ། །དེ་དག་གི་དོན་ཡང་། རོ་ནི་བདག་མེད་པ་ཡིན་ལ། བཾ་ཆེན་གསང་བ་རབ་འབྱམས་ཀྱི་དབང་ཐོབ་ནས་ཆོས་ཐམས་ཅད་བདག་མེད་པའི་དོན་ཁོང་དུ་ཆུད་པར་འགྱུར་ཞིང་། བཾ་ཆེན་པོ་ཉིད་ཡེ་ཤེས་ལྔའི་རང་བཞིན་གྱི་དམ་རྫས་ཀྱི་མཆོག་ཏུ་བསྐྱེད་རྫོགས་གསུམ་གྱི་རྒྱུད་མཐའ་དག་ལས་བཤད་ཅིང་། ལས་ཀྱི་གཤིན་རྗེ་མ་མོ་ཤ་ཟ་ཀི་ཀང་ཤ་ཁྲག་ལ་མངོན་པར་དགའ་བ་རྣམས་ཀྱང་རང་བཞིན་གྱིས་འདུ་ཞིང་དམ་ཚིག་དྲན་ཏེ་རྣལ་འབྱོར་པའི་གྲོགས་སུ་འགྱུར་རོ། །གཞན་ཡང་རྟོག་པ་ཤིན་ཏུ་རགས་པའི་གནས་སུ་གྱུར་པའི་བཾ་དང་། དེའི་རྨེ་བའི་རྫས་ལ་ངན་རྟོག་གི་འཛིན་པ་ཆོད་དེ་ལམ་དུ་ལྷོངས་ན་གཞན་ཚོགས་དྲུག་གི་དངོས་པོ་ཐམས་ཅད་ལ་གཙང་རྨེ་མེད་བཞིན་(༡༣བ)
དུ་ཆོས་ཉིད་དུ་རོ་གཅིག་པའི་རྟོག་པ་སྐྱེ་སླ་བ་ཡིན་ནོ། །ལྔ་པ་ནི། དྲིལ་བུ་ལག་ཏུ་གཏད་ལ། ཧཱུྃ། ཐབས་དང་ཤེས་རབ་གཉིས་མེད་པའི། །ཡང་གསང་བདེ་ཆེན་ཏིང་འཛིན་ནི། །དངོས་གྲུབ་ཀུན་གྱི་གཏེར་ཡིན་པས། །བདེ་ཆེན་མཆོག་གི་དབང་བསྐུར་རོ། །ཨཱོཾ་ཨཱཿཧཱུྃ་བཛྲ་ས་ཏྭ་སུ་ཁ་སིདྡྷི་ཕ་ལ་མ་ཧཱ་ཨཱཏྨ་ཀོ྅ཧཾ། ཞེས་ཆོས་ཐམས་ཅད་བདེ་སྟོང་གི་དོན་དྲན་དུ་གཞུག །རལ་གྲི་གཏད་ལ། གཤེད་ཆེན་མཐུ་སྟོབས་ཡོངས་རྫོགས་པ། །དཔག་མེད་ཕྲིན་ལས་མཐར་ཕྱིན་ཅིང་། །སྟོང་ཁམས་སྲིད་པའི་ཟིལ་མནན་ནས། །སྣང་སྲིད་ཀུན་སྒྲོལ་དབང་བསྐུར་རོ། །ཨྱཻ་ཀ་ཧེ་དུན་ཡ་མ་ཀྲོ་དྷ་སརྦ་ཀརྨ་མཱ་ར་ཡ་ཨ་བྷི་ཥིཉྩ་ཧཱུཾ། ཞེས་སྣང་སྲིད་ཐམས་ཅད་སྙིང་རྗེས་བསྒྲལ་ལོ། །སྦྱོར་སྒྲོལ་གྱི་དོན་མཐར་ཕྱིན་པ་ནི་སྟོང་ཉིད་སྙིང་རྗེའོ། །སྐབས་འདིར་ཆོས་རྒྱལ་དབང་པོའི་སྡེའི་ཕྱག་ལེན་དུ། བམ་ཆེན་གསང་བ་རབ་འབྱམས་ནས་ཁ་བསྐང་སྟེ། ཁམས་གསུམ་ཡོངས་སྒྲོལ་གྱི་དབང་། མཆོད་རྟེན་གྱི་དབང་། རྡོ་རྗེ་སློབ་དཔོན་གྱི་དབང་ལས། དང་པོ་ནི། ཕོ་རྫས་དུག་གིས་སྤོས་པར་བྱེད། །མོ་རྫས་ཁྲག་གི་མྱོས་པར་བྱེད། །ཡུངས་ཀར་རྒྱལ་པོས་གཟེར་བར་བྱེད། །གཤིན་རྗེའི་མདའ་ཡིས་འབུགས་པར་བྱེད། །བཤན་པའི་གྲི་ཡིས་སྲོག་རྩ་གཅོད། །དྲག་པོ་སྔགས་ཀྱིས་ཕོ་ཉ་བསྐུལ། །གུ་གུལ་སྦྱར་བས་ལྷ་དང་ཕྲལ། །དྲག་པོའི་ཕུར་པ་སྙིང་ལ་འདེབས། །ཐུན་རྫས་རྣམས་ཀྱི་དབང་བསྐུར་བས། ཁམས་གསུམ་དྲེགས་པ་འཇོམས་པའི་མཐུ། ཁེངས་པ་ཐམས་ཅད་བསྒྲལ་བའི་མཐུ། །བསྒྲལ་བའི་ཞིང་བཅུ་སྒྲོལ་བའི་མཐུ། །རུ་དྲ་དམ་ཉམས་སྒྲོལ་བའི་མཐུ། །གང་གིས་མི་ཐུབ་བཟློག་(༡༤ན)
པའི་མཐུ། །དམ་ཉམས་རང་གཤེད་འབེབས་པའི་མཐུ། །བདུད་རྣམས་ཐམས་ཅད་འདུལ་བའི་མཐུ། །སྐལ་ལྡན་ཁྱོད་ལ་དབང་བསྐུར་བས། ཁམས་གསུམ་སྒྲོལ་བའི་དབང་ཐོབ་ཤོག །ཨྱཻ་དུན་ཀ་ཡཾ་དགྲ་བགེགས་སརྦ་མཱ་ར་ཡ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ཞེས་བརྗོད་དེ་རྫས་རྣམས་ལག་ཏུ་གཏད་དོ། །གཉིས་པ་ནི། པད་སྤུངས་ལག་ཏུ་གཏད་ལ། ཆོས་སྐུ་འགྱུར་མེད་མཆོད་རྟེན་འདི། །ལོངས་སྐུ་བདེ་ཆེན་ཟིལ་གནོན་བཞུགས། །སྤྲུལ་སྐུ་འཁོར་ཚོགས་བསམ་མི་ཁྱབ། །སྐལ་ལྡན་ཁྱོད་ལ་དབང་བསྐུར་བས། །རྡོ་རྗེའི་མཁར་དུ་བསྲུང་བ་དང་། །ནམ་མཁའི་མཐོངས་སུ་བཤིག་པ་དང་། །རི་རབ་རྩེ་ལ་བསད་པ་དང་། །རི་ཐང་མཚམས་སུ་བཟློག་པ་དང་། །རྒྱ་མཚོའི་གཏིང་དུ་མནན་པ་དང་། །དྲེགས་པ་ཙིཏྟ་དཀྲུག་པ་སྟེ། །ལས་དྲུག་འཁོར་ལོ་བསྐོར་བ་ཡི། །དབང་རྣམས་ཁྱོད་ཀྱིས་ཐོབ་པར་ཤོག །ཨཱོཾ་སརྦ་ཏ་ཐཱ་ག་ཏ་ཀ་ཎི་ཀ་ཨ་བྷི་ཥིཉྩ་ཧཱུྃཿ ཞེས་བརྗོད།གསུམ་པ་ནི། ཚོགས་ཀྱི་སློབ་དཔོན་ཚོགས་ཀྱི་བདག །ཕྱག་བྱར་འོས་པ་བླ་མའི་རབ། །རྡོ་རྗེ་དང་ནི་དྲིལ་བུ་ཆེ། །བཟུང་ཞིག་རྡོ་རྗེས་བྱིན་བརླབས་ནས། ཁྱོད་ནི་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །ཆོས་ཀྱི་དུང་ནི་སྒྲ་ཆེན་ལྡན། །ཆོས་ཀྱི་གྷནྡྷེ་སྒྲ་བོ་ཆེ། ཆོས་ཀྱི་རྒྱལ་མཚན་ལེགས་པར་འཛུགས། ཁྱབ་བདག་ཆེན་པོ་རིན་ཆེན་གདུགས། །ལྷ་རྣམས་མཆོད་དང་སེམས་ཅན་གསོ། །ཞི་རྒྱས་དབང་དང་མངོན་སྤྱོད་ཀྱི། །སེམས་ཅན་དོན་རྣམས་ཁྱོད་ཀྱིས་གྱིས། །ཞེས་བརྗོད་(༡༤བ)
དོ། །དེ་ལྟར་མཐའ་བརྟེན་གྱི་དབང་དེ་རྣམས་བུམ་དབང་གི་མཐའ་བརྟེན་དུ་བསྐུར་ནའང་མི་ལེགས་པ་མེད་ཅེས་ངེས་དོན་བདེ་འཇུག་ཏུ་གསུངས་ལ་ཕྱག་ལེན་དུ་ཡང་མཛད་པ་ཡིན་ནོ། །གཉིས་པ་གསང་བའི་དབང་ནི། སློབ་མ་མཚན་ཉིད་དང་ལྡན་པས་བླ་མ་འཁོར་ལོའི་དབང་ཕྱུག་ལ་རིག་མ་མཚན་ལྡན་ཁྲུས་དང་རྒྱན་གྱིས་སྤྲས་པ་དབུལ་ཞིང་། ཡོལ་བ་ལ་སོགས་པས་དབེན་པར་བྱས་ལ་ཡབ་ཡུམ་ཟིལ་གནོན་ཡབ་ཡུམ་གྱི་སྐུར་རྫོགས་པ་དང་། ཡབ་ཀྱི་སྤྱི་བོ་བདེ་ཆེན་གི་འཁོར་ལོ་ལ་ཡ་མ་རཱ་ཛ། མགྲིན་པ་ལོངས་སྤྱོད་ཀྱི་འཁོར་ལོ་ལ་མྱོས་བྱེད་འབར་བ། ལྟེ་བ་སྤྲུལ་པའི་འཁོར་ལོ་ལ་ཨཪྱ་དམར་པོ། གསང་བ་དབང་པོའི་འཁོར་ལོ་ལ་རལ་པ་ཚར་དགུ་སྟེ་ཕུང་པོ་བཞི་དག་པའོ། །མིག་གི་རྩ་ནང་དུ་དུང་གི་མོན་པ། རྣ་བའི་རྩ་ནང་དུ་ལྕགས་ཀྱི་མོན་པ། སྣའི་རྩ་ནང་དུ་བསེའི་མོན་པ། ལྕེའི་རྩ་ནང་དུ་གསེར་གྱི་མོན་པ། མིག་གི་རྩའི་ཕྱི་རུ་ཧེ་ལེ་ཁྱབ་པ། རྣ་བའི་རྩའི་ཕྱི་རུ་ནག་པོ་འཛུམ་མེད། སྣའི་རྩའི་ཕྱི་རུ་སོ་འདར་འཁྲིགས་པ། ལྕེའི་རྩའི་ཕྱི་རུ་རལ་པ་སྤྱི་བཅིངས་ཏེ་རྣམ་ཤེས་བརྒྱད་དག་པའོ། །ལྟེ་བ་ཕོ་བ་བཅུ་གཉིས་ཀྱི་རྩ་ནང་དུ་འཆི་བདག་བཅུ་གཉིས་སྐྱེ་མཆེད་བཅུ་གཉིས་དག་པའོ། །ལྟོ་བ་ཟླུམ་པོའི་ཁྲག་ཁྱམས་སུ་ཤ་ཟ་ཀི་ཀང་བཤན་པའི་ཚོགས་ཁམས་དག་པའོ། །ལག་པ་གཡས་ཀྱི་ངར་མཐིལ་ལ་དཀར་པོ་སྙིང་འབྱིན། གཡོན་གྱི་ངར་མཐིལ་ལ་མགོན་པོ་ནག་པོ། རྐང་པ་གཡས་ཀྱི་ངར་མཐིལ་ལ་ཡབ་རྗེ་ནག་པོ། རྐང་པ་གཡོན་གྱི་ངར་མཐིལ་ལ་སྐུ་མཆོག་དམར་པོ་སྟེ་ལོག་རྟོག་བཞི་དག་པའོ། །ཡུམ་གྱི་སྤྱི་བོ་བདེ་ཆེན་གྱི་འཁོར་ལོ་ལ་དཔལ་གྱི་བཀའ་ཉན་ཁྲག་གི་དྲི་སྣོམ་མ། མགྲིན་པ་གཤིན་རྗེའི་བཙུན་མོ་ཁ་འབར་མ། (༡༥ན)
ལྟེ་བ་ཡེ་ཤེས་ཀྱི་མ་མོ་དཔའ་མོ་བཙན། གསང་བ་ལྕགས་ཀྱི་སྤྱང་མོ་མགོ་དགུ་མ་སྟེ་འབྱུང་བ་བཞི་དག་པའི་ཡུམ་མོ། །མིག་གི་རྩ་ནང་དུ་མོན་མོ་བླ་རྐུན་རྔམ་པའི་གདོང་། རྣ་བའི་རྩ་ནང་དུ་མོན་མོ་གཡུའི་རོལ་བ་ཅན། སྣའི་རྩ་ནང་དུ་མོན་མོ་ཚེ་ཕྲོག་ཁྲག་གི་རལ་པ་ཅན། །ལྕེའི་རྩ་ནང་དུ་མོན་མོ་སྙིང་ལ་གཟེར་འདེབས་མ། མིག་རྩ་ཕྱི་རུ་མི་ཟན་སྙིང་རྐུན་མ། རྣ་བའི་རྩའི་ཕྱི་རུ་མེ་ཏོག་སྙིང་འབྱིན་མ། སྣ་རྩ་ཕྱི་རུ་ཁྲག་མིག་སྙིང་ལ་གཟེར་འདེབས་མ། ལྕེའི་རྩ་ཕྱིར་སྨྱོ་བྱེད་དབུགས་སྡུད་མ་སྟེ་ཡུལ་དུས་བརྒྱད་དག་པའི་དཔའ་མོའོ། །ལྟེ་བ་ཕོ་བ་བཅུ་གཉིས་སུ་འཆི་བདག་གི་དཔའ་མོ་བཅུ་གཉིས་སོ། །ལྟོ་བ་ཁྲག་ཁྱམས་སུ་ལོག་ཤེས་དག་པའི་གྱིང་མོ་ཤ་ཟ་དཔའ་མོའི་ཚོགས། །ཡན་ལག་བཞི་ལ་རྟག་ཆད་མུ་བཞི་དག་པའི་སྒོ་མའོ། །ཡབ་ཡུམ་གྱི་སྙིང་ག་ཆོས་ཀྱི་འཁོར་ལོའི་དབུས་ན་དངས་མ་ལྔ་འདུས་ཀྱི་ཐིག་ལེ་ལ་ཡེ་ཤེས་སྙིང་པོ་རྩ་བའི་ལྷ་དྲུག་རྒྱན་ལྷ་དང་བཅས་པ། རྩ་བའི་འདབ་བཞི་ལ་གཤེད་བཞི། ཡལ་ག་བརྒྱད་དུ་གྱེས་པ་ལ་མོན་བདུད་བརྒྱད། དེའི་ཕྱི་འཆི་བདག་བཅུ་གཉིས་འོབས་སྲུང་དང་བཅས་པ་སྟེ། དེ་ཡང་རྩ་དེ་དག་བྱང་ཆུབ་སེམས་ཀྱི་ཐིག་ལེས་རང་བཞིན་གྱིས་གང་བ། ལྷར་ངོ་ཤེས་པར་བྱས་པ་ཉིད་ཀྱིས་ཆོག་གིས་ཆ་ལུགས་རྫོགས་པར་བསྒོམ་དགོས་པ་ནི་མ་གོའོ། །འོན་ཀྱང་གོང་མའི་ཕྱག་ལེན་འབའ་ཞིག་ལ་བྱུང་བས་ཆ་ལུགས་གསལ་བར་བསྒོམས་པ་ལ་ཡང་སྐྱོན་མེད་དོ། །ཡུམ་གྱི་བྷ་ག་ཕྲིན་ལས་བཞིའི་དབྱིབས་སུ་གནས་པའི་ཕོ་བྲང་དུ་ཡབ་ཀྱི་རྡོ་རྗེ་བརྩེགས་པ་ལས་རྙེད་པའི་དགའ་བ་ཉམས་སུ་བསྟར་བའི་ཡེ་ཤེས་བཅུ་དྲུག་ཚུལ་རྫོགས་པ་ནི་ཟིལ་གནོན་བདེ་བ་ཆེན་པོའི་དཀྱིལ་འཁོར་རོ། །དོན་གྱི་དེ་(༡༥བ)
ལྟར་ཡིན་ལ། འོན་ཀྱང་ལྷ་ཚོགས་རྫོགས་པར་བསྒོམ་པའང་མི་འགལ་ལོ། །དེ་ལྟར་ཕྱི་ལུས་ཀྱི་དཀྱིལ་འཁོར། ནང་རྩ་དང་ཐིག་ལེ། གསང་བ་བདེ་བ་ཆེན་པོ་ལྷན་སྐྱེས་ཀྱི་སྣང་བ་དེ་ཡུམ་ལ་དཀྱིལ་འཁོར་གསུམ། བམ་གྱི་ཕྱི་ལུས། ནང་ཙིཏྟ་སྟེ་དཀྱིལ་འཁོར་གཉིས། དེ་ལྟ་བུའི་དཀྱིལ་འཁོར་ལྔ་ནི་བགྲོད་པ་འདི་ཡི་དཀྱིལ་འཁོར་དངོས་གཞི་ཡིན་པར་ཤེས་སོ། །དེ་ནས་དཀྱིལ་འཁོར་དེ་རྣམས་རྟེན་དང་བརྟེན་པར་ཕན་ཚུན་འདྲེས་ཏེ་མཚོན་བྱ་མཚོན་བྱེད་དེ་ཕྱི་དང་ནང་ཐ་དད་དུ་འཛིན་པའི་རྟོག་པ་དག་པར་བྱས་ཏེ་ལྷའི་ང་རྒྱལ་བཟུང་ལ། དྲངས། བརྟན། མཆོད། བཟླས། བསྟོད་ཚོགས་ཀྱི་འཁོར་ལོ་རྫོགས་པར་བྱའོ། །དེ་ནས་སློབ་མ་ཁྲུས་བྱས། རྒྱན་གྱིས་བརྒྱན་ཏེ་གདོང་གཡོགས་དང་ལྡན་པས། ཕྱག་དང་། ན་མོ་འཇིག་རྟེན་ལས་གྱིས་འདུས་པའི་བར་དོ་རུ། །ཞེས་སམ། ཡུལ་མཁར་ལོངས་སྤྱོད་བྱམས་པའི་མཛའ་གྲོགས་སོགས། །ཞེས་སོགས་སྐབས་སྦྱར་གྱི་མཎྜལ་ཕུལ་ལ། ཧོ། བསྟན་པའི་སྒྲོན་མ་བཅོམ་ལྡན་འདས། །ལྷ་དང་སློབ་དཔོན་དགོངས་སུ་གསོལ། །འགྱུར་མེད་བདེ་ཆེན་ཕོ་བྲང་ནས། །དྲེགས་པའི་ལྷ་ཚོགས་དགོངས་སུ་གསོལ། །སློབ་མ་མཚན་ལྡན་ཡུམ་གྱི་དཀྱིལ་འཁོར་དུ། །བརྟུལ་ཞུགས་དྲག་པོའི་སྟོབས་ཀྱིས་བཞུགས་སུ་གསོལ། །དམ་ཚིག་དཀའ་ཐུབ་སྡོམ་པའི་མཆོག །གསང་བའི་སྒྲོན་མེ་བདག་ལ་གསོལ། །ཞེས་ལན་གསུམ་གྱིས་གསོལ་བ་གདབ། བམ་ཆེན་གསང་བའི་དཀྱིལ་འཁོར་ལ་མེ་ཏོག་གཏོར་དུ་གཞུག །གདོང་གཡོགས་བཀྲོལ་ཏེ་ལྷ་ངོ་བསྟན། སྔར་བསྟན་པའི་ཕྱི་རྡུལ་ཚོན་གྱི་དཀྱིལ་འཁོར་དེ་(༡༦ན)
བས་ནང་བམ་ཆེན་གྱི་དཀྱིལ་འཁོར་དང་། ཡུམ་གྱི་དཀྱིལ་འཁོར་འདི་ཉིད་ཁྱད་པར་འཕགས་ཏེ། རྒྱུད་ལས། བམ་ཆེན་ཙིཏྟའི་ཕོ་བྲང་དུ། །འཇུག་པ་ནང་གི་ལྷ་ངོ་བསྟན། །གཟུང་མ་ལུས་ཀྱི་དཀྱིལ་འཁོར་དུ། །གསང་བ་ཕྱི་ཡི་ལྷ་ངོ་བསྟན། །ཙིཏྟ་གསང་བའི་དཀྱིལ་འཁོར་དུ། །གསང་བ་སེམས་ཀྱི་ལྷ་ངོ་བསྟན། །བྷ་ག་གསང་བའི་དཀྱིལ་འཁོར་དུ། །མེ་ཏོག་དོར་ལ་ལྷ་ངོ་བསྟན། །གདོང་གཡོགས་བཀྲོལ་ལ་སྤྲོ་བ་བསྐྱེད། །ཅེས་གསུངས་པའི་དོན་ནོ། །ཞེས་སྤྲོ་བ་བསྐྱེད། དེ་ནས་དཀྱིལ་འཁོར་གྱི་ལྷ་ཐམས་ཅད་ཀྱི་ཡབ་ཀྱི་མཁའ་ཧཱུཾ་ལས་རྡོ་རྗེ་རྩེ་ལྔ་པའི་ཨཱོཾ་ལས་ནོར་བུའི་བུ་ག་ཕཊ་ཀྱིས་བཀག །དཔའ་མོ་རྣམས་ཀྱི་མཁའ་བཾ་ལས་ཆུ་སྐྱེས་དྲི་མ་མེད་པ་ཨཱཿལས་ཟེའུ་འབྲུ་ཕཊ་ཀྱིས་བཀག །ཧོཿབཀྲ་ཤིས་མཚན་ལྡན་གསང་བའི་ཕོ་བྲང་དུ། །གཉིས་མེད་སངས་རྒྱས་ཀུན་དང་མཉམ་སྦྱར་བའི། །བྱང་ཆུབ་སེམས་ཉིད་མི་འགྱུར་བདེ་བའི་མཆོག །ཕོ་བྲང་ལྷུན་གྱིས་གྲུབ་པར་བཞུགས་པ་དང་། །རྨེ་བ་ལྔ་དང་བདུད་རྩི་སྦྱར་བའི་སེམས། །བཀྲ་ཤིས་མཚན་ལྡན་བུམ་པར་བརྟུལ་ཞུགས་ཕྱིན། །ཛཿཧཱུཾ་བཾ་ཧོཿས་ཡབ་ཡུམ་སྙོམས་པར་ཞུགས། །དགའ་བ་བཞི་ཉམས་སུ་མྱོང་ཞིང་། ཨཱོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ཆགས་པ་ཆེན་པོའི་སྒྲས་སངས་རྒྱས་རྣམས་སྤྱན་དྲངས་སྙོམས་པར་ཞུགས་ཏེ་ཐིག་ལེར་ཞུ་ནས་རྩ་གནས་ཀྱི་ལྷ་རྣམས་ཀྱི་ཞལ་དུ་ཞུགས། རྩ་གནས་ཀྱི་ལྷ་ཐམས་ཅད་སྦྱོར་བ་མཛད། ཐིག་ལེ་དཀར་དམར་དུ་ཞུ་བ་དེས་གསེར་འགྱུར་གྱི་རྩི་ལྟར་གཞལ་ཡས་ཁང་ཡང་ཐིག་ལེར་ཞུ་སྟེ་དབྱེར་མེད་དུ་འདྲེས་(༡༦བ)
པ་ཉི་ཟླ་ཁ་དོག་དཀར་དམར་རྡོ་རྗེ་སེམས་དཔའ་ཡབ་ཡུམ། དོན་དམ་བདེ་བ་ཆེན་པོ་ཉིད་མོ་ཐོད་དུ་བསྐྱིལ་ལ་ཕོ་ཐོད་དུ་བཀབ་པ་བཾ་གྱི་རྨེ་བ་ལྔ་དང་བསྲེས་ལ། ཀ་ར་འོ་མ་ལ་སོགས་པས་རོ་མདོག་བསྒྱུར་བའམ། བསྐུར་ཐབས་གང་ཡང་རུང་བས། སྦྱོར་བ་དག་པས་བྱིན་བརླབས་ལས། རྩ་རྒྱུད་བདེ་བའི་ཐིག་ལེར་བསྐྱིལ། །བྱང་ཆུབ་སེམས་དང་རྨེ་བ་བསྲེས། །བཀྲ་ཤིས་མཚན་ལྡན་བུམ་པར་བསྐྱིལ། །བརྟུལ་ཞུགས་རབ་འབྱམས་དབང་བསྐུར་རོ། །ཨྱཻ་ཀ་ཡ་མ་གུ་ཧྱ་བོ་དྷི་ཙིཏྟ་ཨ་བྷི་ཥིཉྩ་ཧོཿ ཞེས་ཁར་བྱིན། དེས་ཀྱང་། ཨ་ཧོཿསུ་ཁ་ཞེས་མྱོང་བས་ཡེ་ཤེས་བདུད་རྩི་ཤེལ་ལྟར་དངས་པ་བདེ་བ་བསྐྱེད་པས་ལུས་ཀྱི་རྩ་གནས་ཐམས་ཅད་གང་སྟེ་འཁོར་བར་སྐྱེད་བྱེད་ཀྱི་ས་བོན་ཐམས་ཅད་བཅོམ། ནང་གི་ལྷ་གསལ་སྟོང་ནམ་མཁའ་དང་མཉམ་པའི་ཏིང་འཛིན་རྒྱུད་ལ་སྐྱེ་བར་འགྱུར་རོ། །གསུམ་པ་ཤེས་རབ་ཡེ་ཤེས་ཀྱི་དབང་ལ། ཕྱག་རྒྱ་མོ་མཚན་ལྡན་ཁྲུས་བྱས། རྒྱན་བཏགས་པ་ལྷ་མོ་གསོད་བྱེད་མར་བསམས་པའི་བྷ་ག་ལས་བཞིའི་དབྱིབས་ཅན་གྱིས་གང་བར་ལྷུན་གྱིས་གྲུབ་པའི་དཀྱིལ་འཁོར་རྫོགས་པར་བསྒོམ། སློབ་མ་ཁྲུས་བྱས་གདོང་གཡོགས་པས་ཕྱག་དང་། བདག་ལུས་འབྱུང་བཞི་འདུས་པའི་ཕོ་བྲང་དུ། །ཞེས་སམ། བདག་གི་རྣམ་ཤེས་དབང་པོ་ཚོགས་བརྒྱད་དང་། །ཞེས་སོགས་སྐབས་སྦྱར་གྱི་མཎྜལ་ཕུལ་ལ། བསྟན་པའི་སྒྲོན་མ་བཅོམ་ལྡན་འདས། །ཞེས་བཞི་དང་། བདེ་ཆེན་གསང་བའི་ཕོ་བྲང་གསང་བ་རུ། །རིག་པ་བརྟུལ་ཞུགས་སྟོབས་ཀྱིས་བཞུགས་སུ་གསོལ། །དམ་ཚིག་དཀའ་ཐུབ་སྡོམ་པའི་མཆོག །ཤེས་རབ་རོལ་པ་(༡༧ན)
བདག་ལ་གསོལ། །ཞེས་ལན་གསུམ་གྱིས་གསོལ་བ་གདབ། བྷ་གའི་དཀྱིལ་འཁོར་ལ་མེ་ཏོག་གཏོར། གདོང་གཡོགས་བཀྲོལ་ཏེ་ལྷ་ངོ་བསྟན་ལ་སྤྲོ་བ་བསྐྱེད། དེ་ནས་བླ་མས། བཀྲ་ཤིས་མཚན་ལྡན་གསང་བའི་ཕོ་བྲང་དུ། །གཉིས་མེད་སངས་རྒྱས་ཀུན་དང་མཉམ་སྦྱར་བས། །བྱང་ཆུབ་སེམས་ཉིད་མི་འགྱུར་བདེ་བའི་མཆོག །ཕོ་བྲང་ལྷུན་གྱིས་གྲུབ་པར་བཞུགས་པ་དང་། །མི་འགྱུར་བརྟན་པའི་སྐུ་དང་ཡེ་ཤེས་བགྲོད། །ཅེས་བརྗོད་དེ། ཕྱག་རྒྱ་མོ་སློབ་བུ་ལ་གཏད། བུ་མོས་ཡབ་ཀྱི་ང་རྒྱལ་བཟུང་ཞིང་། བླངས་ལ་ལག་པ་གཉིས་བཅངས། གསང་བའི་གཟུང་མ་སྤྲོ་བ་བསྐྱེད་ལ་བླངས། །ཞེས་སོ། །དེ་ནས། ཧོཿ བདེ་ཆེན་གསང་བའི་ཕོ་བྲང་དུ། །ཐབས་ཆེན་གསང་བའི་བདེ་ཕོབ་ལ། །དབུ་མའི་རྩ་རྒྱུད་ས་བོན་བསྲེག །བྷ་གའི་གནས་སུ་ཆོས་སྐུར་བསྐྱིལ། །རྩ་བ་འོད་འཕྲོས་ལོངས་སྤྱོད་སྐུ། །མཉམ་པར་གནས་པ་བྱང་ཆུབ་སྐུ། །སྤྲོས་བྲལ་ཀུན་ཁྱབ་སྤྲུལ་པའི་སྐུ། །བསྟན་པ་ཐོབ་པ་རྡོ་རྗེའི་སྐུ། །ཡབ་ཡུམ་མཉེས་པས་མཉེས་པར་བྱའོ། །ཞེས་གདམས་ནས། དེ་དག་གི་དོན་ཉམས་སུ་བླང་བ་ནི། མཁའ་གསང་བརླབ། ཡུམ་གྱིས་ས་མ་ཡ་སྟྭཾ་གྱི་སྦྱོར་བའི་བརྡས་བསྐུལ། ཡབ་ཀྱིས་ས་མ་ཡ་ཧོས་ལན་གདབ། གཉིས་ཀས། ཨ་ཏི་གུ་ཧྱ་ཧོཿ ཞེས་འཁྲིལ་སྦྱོར་བྱ། ཛཿཧཱུཾ་བཾ་ཧོཿ སྲུབས་པ་དང་བསྲུབ་པའི་སྦྱོར་བ་བྱ་སྟེ། གསོད་བྱེད་གཟུང་མས་གཡོན་ནས་འཁྱུད། །བྷ་ག་གསང་བའི་ཕོ་བྲང་དུ། །རྡོ་རྗེ་བརྩེགས་པའི་ཕྱག་རྒྱ་ཡིས། །གསང་བ་ལྷུན་གྲུབ་མཁའ་ལ་འཇུག །ཅེས་པའི་དོན་ནོ། །དེ་ལྟར་ཡས་བབས་མས་བརྟན་གྱི་དགའ་བ་བཞིའི་རིམ་(༡༧བ)
པས་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་བ་ལ། ཧོཿ རིག་པའི་སྟོབས་ལྡན་སྦྱོར་བའི་གནས། །འཁྲུལ་པའི་བག་ཆགས་སྤྲིན་ལྟ་བུ། །ཡེ་ཤེས་རོལ་པའི་སྒྲོན་མས་བསལ། །མཉམ་པའི་སྟོབས་ཀྱིས་བརྟུལ་ཞུགས་ལོངས། །ཨྱཻ་ཀ་ཡ་མ་པྲ་ཛྙཱ་ཛྙཱ་ན་ཨ་བྷི་ཥིཉྩ་ཧོཿབཞི་པ་རང་བྱུང་ཡེ་ཤེས་ཀྱི་དབང་ལ། བླ་མས་རང་བྱུང་ཡེ་ཤེས་ཕོ་བྲང་དུ་ལྷུན་གྲུབ་ཀྱི་དཀྱིལ་འཁོར་རྩལ་རྫོགས་པར་གསལ་བཏབ། སློབ་བུ་ཁྲུས་བྱ་ཞིང་ཡོལ་བས་བཅད་ལ། ཕྱག་དང་། ཕྱི་ནང་གསང་གསུམ་གྱི་མཎྜལ་ཡོངས་རྫོགས་རྒྱས་བསྡུས་གཉིས་སྐབས་སྦྱར་གྱིས་ཕུལ་ལ། བསྟན་པའི་སྒྲོན་མ་བཅོམ་ལྡན་འདས། །ལྷ་དང་སློབ་དཔོན་དགོངས་སུ་གསོལ། །ལྷུན་གྲུབ་རང་བཞིན་གསང་བའི་ཕོ་བྲང་ནས། །ཡེ་ཤེས་རྒྱ་མཚོ་ལྷུན་གྱིས་གྲུབ་པ་ཡི། །མ་ལུས་མཉམ་པའི་རྒྱལ་པོ་དགོངས་སུ་གསོལ། །རིག་པ་བྱང་ཆུབ་སེམས་ཀྱི་དཀྱིལ་འཁོར་དུ། །རང་རྩལ་ཡེ་ཤེས་ལྔ་ཡིས་གཞུག་ཏུ་གསོལ། །དམ་ཚིག་དཀའ་ཐུབ་སྡོམ་པའི་མཆོག །ཡེ་ཤེས་རོལ་པ་བདག་ལ་སྩོལ། །ཞེས་ལན་གསུམ་གྱིས་གསོལ་བ་གདབ། རང་བྱུང་ཡེ་ཤེས་ཕོ་བྲང་དུ། །རིག་རྩལ་འོད་ལྔའི་ལྷ་ངོ་བསྟན། །མེ་ལོང་ཤེལ་དང་ཉི་ཟེར་བསྟན། །ཞེས་པས། རང་བྱུང་གི་ཡེ་ཤེས་རང་བཞིན་ལྷན་ཅིག་སྐྱེས་པའི་ཡེ་ཤེས་དང་། །དཔེའི་ཡེ་ཤེས་ཞུ་བ་དེ་ལྷན་ཅིག་སྐྱེས་པའི་ཡེ་ཤེས་གཉིས་དབྱེར་མེད་ནམ་མཁའ་ལྟར་བརྗོད་པ་ཐམས་ཅད་དང་བྲལ་ཞིང་སྨྲ་བསམ་གྱི་ཡུལ་ལས་འདས་པ། རྩལ་སྣ་ཚོགས་སུ་འཆར་བ་ཉིད་ཀྱང་ཡེ་ཤེས་འོད་ལྔའི་ངོ་བོར་མ་འགགས་པ་ཡིན་ནོ། །ཞེས་བརྗོད་ཅིང་། དཔེ་ལ་ངོ་སྤྲད་པའི་ཕྱིར་མེ་ལོང་(༡༨ན)
གཡའ་དངས་པ་ལ་བྲིས་སྐུའི་གཟུགས་བརྙན་འཆར་དུ་བཅུག་པ་བསྟན་ལ། འདི་ལྟར་མེ་ལོང་ནང་གི་ཕྱག་རྒྱ་སྣ་ཚོགས་སུ་སྣང་ཡང་སྣང་བཞིན་དུ་སྟོང་ཞིང་ངོས་བཟུང་མེད་པ་སྣང་སྟོང་མཐའ་ལས་འདས་པ་ལྟར། རང་བྱུང་ཡེ་ཤེས་སྣང་སྟོང་གི་མཐའ་དང་བྲལ་བ། དེ་ཡང་རྐྱེན་བཅོས་བཅོས་པ་ལྟ་བུ་ནི་མ་ཡིན་ཏེ། ལྷུན་གྲུབ་ཏུ་བཞུགས་པའོ། །ཞེས་དང་། དེ་བཞིན་དུ་ཤེལ་དངས་པ་ཉི་ཟེར་རམ། མཚན་མོ་ཡིན་ན་མར་མེའི་འོད་དང་འཕྲད་པའི་འོད་ཁ་དོག་ལྔ་ལ་བལྟར་བཅུག་ལ། རང་བྱུང་གི་ཡེ་ཤེས་ལྷུན་གྲུབ་ཏུ་བཞུགས་པའི་རྩལ་ཡེ་ཤེས་ལྔར་རྫོགས་པའི་ཕྱག་རྒྱ་སྣ་ཚོགས་སུ་འཆར་བ་ཡིན་ལ། འཁྲུལ་པ་ཀུན་བཏགས་ལ་བདེན་འཛིན་གྱི་མཐའ་བཏུལ་ནས། བློ་འདས་རྫོགས་པ་ཆེན་པོར་བཞུགས་པས་རང་བྱུང་ཡེ་ཤེས་རིག་ཅིང་ངོ་འཕྲོད་པའི་དབང་ཐོབ་པ་ཡིན་ནོ། །ཞེས་དང་། ཧོཿཡེ་ཤེས་ལྷུན་གྲུབ་འཆར་སྒོ་ཡིས། །བརྟུལ་ཞུགས་རིག་པའི་དབང་བསྐུར་བས། །འཁོར་བ་རྣམ་དག་ཆོས་སྐུར་གསལ། །རང་བྱུང་ཡེ་ཤེས་དབང་ཐོབ་ཤོག །ཨྱཻ་ཀ་ཡ་མ་ཛྙཱ་ན་པཉྩ་ཨ་བྷི་ཥིཉྩ་ཧོཿ འབྲས་བུ་རང་བྱུང་ཡེ་ཤེས་ལྔ་རྫོགས་པའི་ཕྱག་རྒྱར་ལྷུན་གྱིས་གྲུབ་པའོ། །རྗེས་དམ་ཚིག་བསྟན་པ་ལ། མན་ངག་སྣོད་མིན་ལ་མི་སྤེལ་ཞིང་། སློབ་དཔོན་གྱི་བཀའ་ལས་མི་འགལ་བར་གདམས་པ། མནའ་ཆུ་བླུད་པ། དམ་ཚིག་བསྲུང་ཐབས་བསྟན་པ། འཁོར་གྱི་སྲུང་མ་ལ་དམ་བསྒྲགས་པའོ། །འདི་དག་བླ་མའི་ཕྱག་ལེན་དུ་ངེས་དོན་བདེ་འཇུག་ལས་ཇི་ལྟར་གསུངས་པ་བཞིན་ཕྲི་བསྣན་མི་མཛད་པས་དེར་བལྟ་བར་བྱའོ། །སྤྱི་དོན་གསུམ་པ་རྗེས་ཀྱི་བྱ་བ་ལ། ཚོགས་ཀྱི་ཆོ་ག་(༡༨བ)
བཾ་བསྐང་། གཏེར་སྲུང་མཆོད། ཚོགས་ལྷག་བཏང་། བསྟན་མ་སྐྱོང་། དཀྱིལ་འཁོར་མཆོད་བསྟོད་བྱས་ལ་གཤེགས་ཏེ་དཀྱིལ་འཁོར་བསྡུ་ཞིང་ཐིག་རྗེས་མི་མངོན་པ་བྱ། ལྷ་བསྐྱེད། ལུས་བསྲུང་། གོ་བསྒོ། རྡུལ་མཚོན་རྣམས་ཆུ་བོ་ཆེན་པོར་དོར་རོ། །སློབ་དཔོན་ལ་ཡོན་ཕུལ། བཀྲ་ཤིས་པའི་ཚིགས་སུ་བཅད་པ་བརྗོད་པར་བྱའོ། །སྨྲས་པ། གདོད་མའི་སངས་རྒྱས་ཀུན་ཏུ་བཟང་པོ་ཡི། །གསུང་མཆོག་ངེས་གསང་རྒྱུད་སྡེའི་གངས་རི་ལས། །གཤེད་སྐོར་གངྒཱའི་ཆུ་རྒྱུན་སྤེལ་བྱེད་པ། འཇམ་དཔལ་བཤེས་གཉེན་བཀའ་དྲིན་བླ་ན་མེད། །གང་དེ་ལས་རྒྱུད་གསང་ཆེན་ཆུ་གཏེར་ཆེའི། །ཡང་སྙིང་ཟླ་གསང་སྡིག་རྒྱུད་བདུད་རྩིའི་བཅུད། །པད་འབྱུང་ལྷ་ཡི་འཁྲུལ་འཁོར་བྱེད་པོ་ལས། །གནུབས་བན་གཙུག་ན་ཟླ་བའི་མགྲིན་པར་མཛེས། །དེ་ལྟའི་བདུད་རྩིར་སྤྱོད་པའི་སྐལ་བཟང་དཔལ། །སྔགས་འཆང་དབང་པོ་གཏེར་སྟོན་དུམ་པ་རྒྱ། །བརྒྱུད་པར་བཅས་འགས་དབང་དང་རིམ་གཉིས་ལམ། །འཁྲུལ་མེད་ཉམས་བསྟར་བདེ་ཆེན་སར་རོལ་ཀྱང་། །དགས་རྒྱུད་ཕག་མོའི་བྱིན་རླབས་ཙམ་ཉིད་ཀྱིས། །ཟབ་མོའི་སྣོད་དུ་རུང་སྨྲའི་རྒྱ་མཚོའི་རླངས། །ཐུབ་བསྟན་མཁའ་དབྱིངས་ངོས་ལ་རྟག་འཁྲིགས་པས། །གསར་རྙིང་ལུགས་བཟང་ཉི་ཟླའང་སྒྲིབ་སྙམ་བྱེད། ཁྱད་པར་སྙིགས་མ་ལྔ་བསྡོའི་མཚན་མོའི་དུས། །རང་བཟོའི་བསྲེ་བསླད་ལོག་ཆོས་སྐད་སྒྲོག་ཅིང་། །རིགས་འཛིན་ཆེར་རློམ་མཚན་རྒྱུའི་གཉིས་སྐྱེས་འགའ། །ཚད་ལྡན་སྔགས་འཆང་ཁྱུང་ཆེན་གྲལ་དུ་བསྙེག །ཀྱེ་མ་དེ་ལྟའི་ངང་ཚུལ་མ་བཟོད་པར། །རིགས་འཛིན་སེ་སྟོན་རིན་ཆེན་རྒྱལ་མཚན་གྱིས། །པདྨའི་གཞུང་ལ་འཁྲུལ་མེད་ཕྱག་བཞེས་ཀྱིས། །ལེགས་བརྒྱན་(༡༩ན)
སྔོན་མེད་དབང་གི་ཆོ་ག་མཛད། །རིགས་བརྒྱའི་ཁྱབ་བདག་བཤེས་གཉེན་རྣམ་རོལ་གྱིས། །མཐའ་ཡས་འགྲོ་བའི་དོན་མཛད་རིགས་འཛིན་རྗེའི། །གསུང་རྒྱུན་རྐང་དྲུག་སྙིང་གི་པད་མཚོའི་དབུས། །འབྲལ་མེད་བསྐྱངས་ལས་དབང་ཆོག་དབྱངས་ཉིད་བསྒྲགས། །དེ་ལྟའི་ཟླ་གཞོན་ལས་ཀྱང་ཆེས་དཀར་བའི། །རྣམ་མང་དགེ་ཚོགས་གཙང་མའི་ཆུ་རྒྱུན་གྱིས། །མ་དག་དྲི་མའི་ཚོགས་ཀུན་རབ་བཀྲུས་ནས། །འགྲོ་རྣམས་ཟབ་མོའི་སྣོད་དུ་རུང་བར་ཤོག །ཅེས་འཇམ་དཔལ་ཕྱག་རྒྱ་ཟིལ་གནོན་གྱི་དབང་གི་ཆོ་ག་སྔགས་འཆང་ཀུནྡའི་འདོད་འཇོ་ཟླ་ཤེལ་གསར་པའི་ཐིགས་པ་ཞེས་པ་འདི་ཡང་། ཕན་བདེ་ལེགས་བཤད་གླིང་གི་སློབ་དཔོན་པ་ཆོས་རྗེ་ངག་དབང་བློ་བཟང་དང་། འབྲོམ་གྱི་བཙུན་པ་ཆོས་རྗེ་བསོད་ནམས་གྲགས་པ་གཉིས་ཀྱིས་བསྐུལ་བའི་ངོར། དབང་ཆོག་ངེས་དོན་བདེ་འཇུག་ལ་གཞི་བྱས་བླ་མའི་ཕྱག་ལེན་གྱིས་བརྒྱན་ཏེ། སྔགས་རྙིང་མའི་མ་གཤིན་ཕུར་གསུམ་གྱི་ལྷའི་གནང་བ་ཐོབ་པའི་སྔགས་འཆང་རིམ་པར་བྱོན་པའི་གདུང་ལས་སོན་པ། ཟིལ་གནོན་དྲག་རྩལ་དུ་འབོད་པས་སྨིན་དྲུག་ཟླ་བའི་ཡར་ཚེས་ལ་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ།། །།སརྦ་མངྒ་ལཾ།། །།