ཟིལ་གནོན་དྲག་པོའི་སྦྱིན་སྲེག་གི་ལས་བྱང་དུས་ཀྱི་མེ་ལྕེའི་ཕྲེང་བ།
ཟིལ་གནོན་དྲག་པོའི་སྦྱིན་སྲེག་གི་ལས་བྱང་དུས་ཀྱི་མེ་ལྕེའི་ཕྲེང་བ་བཞུགས་སོ། །
གང་ཞིག་ཟླ་བྲལ་ནུས་མཐུའི་མེ་དཔུང་གིས། །དགྲ་བགེགས་ནག་ཕྱོགས་སྡེར་བཅས་བུད་ཤིང་རྣམས། །ཐལ་བར་བསྲེག་མཛད་ཚེ་བདག་ནག་པོ་དང་། །དབྱེར་མེད་རྩ་བརྒྱུད་བླ་མའི་ཞབས་བཏུད་ནས། །མནན་སྲེག་འཕང་ཞེས་རིགས་སྔགས་འཆང་ཀུན་ལ། །རླུང་ལྟར་གྲགས་ཀྱང་མིང་ཙམ་གྱུར་ཚུལ་འདི། །མཐོང་བ་སྦྱིན་སྲེག་མཆོད་པས་གཤིན་རྗེའི་གཤེད། །མཉེས་བྱེད་དུས་ཀྱི་མེ་ལྕེའི་ཕྲེང་བ་འདྲི། །དེའང་མན་ངག་རྩ་བ་ལས། །དེ་ནས་བསྲེག་པ་མེ་ཡི་ལས། །གདུག་རྩུབ་དྲག་པོའི་སྦྱོར་བ་བརྩམ། །གདུག་པའི་ནད་རྣམས་ཞི་བ་དང་། །དགྲ་བགེགས་བསྒྲལ་ཞིང་ལས་འདི་བྱ། །ཞེས་གསུངས་པ་ལྟར། རིགས་འཛིན་སྔགས་འཆང་རྣམས་ཀྱིས་མངོན་སྤྱོད་དྲག་པོའི་ལས་སྦྱོར་མཐའ་ཡས་པ་ལས། བསྲེག་པ་མེའི་སྦྱོར་བ་ཞེས་བྱ་བ་ལས་ཀྱི་མཇུག་སྡུད་དང་། གདུག་པ་ཅན་ཐུག་ཕྲད་དུ་འདུལ་བ་དང་། ཞིང་བཅུའི་དགྲ་དང་བར་ཆད་ཀྱི་བགེགས་བསྒྲལ་ཞིང་འོག་གདོན་གདུག་པ་ཅན་གྱི་གནོད་པ། ནད་པ། སྲིའུ་སོགས་ལ་གནོད་བྱེད་དང་། སྨྱོ་འབོག་རྣམས་འབུལ་བའི་ཕྱིར་ཉམས་སུ་བླང་བར་བྱ་དགོས་ལ། དེའང་གནས་དུར་ཁྲོད་དམ། སྒྲུབ་ཁང་(༢ན)
རྙིང་པ་གཉན་ཞིང་དབེན་པའི་སར། སྒྲུབ་པ་པོ་བསྙེན་པ་རྫོགས་ཤིང་ལྟ་བའི་གདངས་དང་ལྡན་པས་ལག་ཏུ་བླང་བར་བྱ་སྟེ། མན་ངག་རྩ་བ་ལས། གཉན་ཞིང་དབེན་པའི་གནས་ཉིད་དུ། །བསྙེན་རྫོགས་གདེངས་དང་ལྡན་པ་ཡིས། །ཞེས་སོ། །ད་ེལྟར་སྦྱིན་སྲེག་གི་ལས་རིམ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ནི། གནས་ཁང་ཕྱག་བདར་བྱས་ལ། ས་གཞི་ངོས་མཉམ་ཞིང་འཇམ་པར་ས་ཚོན་གྱིས་རུས་སྦལ་སེར་པོ་རྡོ་རྗེའི་རྒྱ་གྲམ་གྲུ་གསུམ་ཟླ་གམ་ཅན་དཔེ་ཆུང་ལྟར་བྲིས་པའི་སྟེང་དུ་ས་སྣ་གསུམ་དང་། འཁར་གོང་སྲིན་ཅན་རྣམས་ལ་མཎྜལ་མདའ་གང་གྲུ་བཞི་པའི་དབུས་སུ་ཐབ་ཁུང་གྲུ་གསུམ་པ་ཆག་གང་བ་བང་རིམ་སུམ་ལྡན། རྩང་དང་ཐོད་པ་མེ་རིས་བརྒྱན་པ། ནང་དུ་འོག་འདེགས་རླུང་གི་འཁོར་ལོ། སྲེག་འཁོར་མུ་ཁྱུད་དྲུག་པ། སྦྲུལ་དང་མེ་རི་ཅན། སྦྱོར་བའི་འཁོར་ལོ་རྣམས་བརྩེགས། ཐབ་ཁུང་སྟེང་དུ་དྲག་པོའི་ཤིང་ལ་ཧོམ་ཐབ་གྲུ་གསུམ་མཐོ་གང་བ་བརྩིགས། གཅོད་པ་ནམ་མཁའི་འཁོར་ལོ་དང་དྲག་པོའི་འཁོར་ལོ་གཉིས་མཁའ་ལ་བརྒྱང་ངོ་། །ཕྱིའི་མཆོད་པ་ལྔ། སྨན་རག་(༢བ)
གཏོར་གསུམ། མར་ནག །ཉ་བོ། སྦྱིན་སྲེག་སྤྱི་གཞུང་གི་སྲེག་རྫས་རྣམས་དང་། ལུགས་འདིའི་ཐུན་མོང་མ་ཡིན་པའི་དྲག་པོའི་རྫས། གནད་ཀྱི་རྫས། ཚ་བའི་རྫས། གསོད་པའི་རྫས། མྱོས་བྱེད་ཀྱི་རྫས་རྣམས་ཐོད་པའམ་ལྕགས་སོགས་ཀྱི་སྣོད་དུ་བཤམ་མོ། །གཉིས་པ་ལ། འཇིག་རྟེན་པའི་མེ་ལྷ་མཆོད་པ་དང་ཡེ་ཤེས་ཀྱི་མེ་ལྷ་མཆོད་པ་གཉིས། དང་པོ་ནི། འཕྲིན་ལས་ཀྱི་གཞུང་བསྲངས། །འཛབ་དང་ཚོགས་མཆོད་འབུལ། །དེ་ནས་རྡོ་རྗེ་སློབ་དཔོན་ཕོད་ནག་གྱོན། རག་ཤའི་འཕྲེང་བ་སེ་རལ་དུ་བྱས། །ཞྭ་ནག་གམ་ཐོད་ནག་བཅིངས། ཁ་ལྷོར་བསྒྱུར། རྐང་པ་དོར་སྟབས་སུ་འདུག་པ་ལ། རྡོ་རྗེ་དྲིལ་བུ་ལག་ཏུ་བཟུང་ནས། མཆོད་རྫས་བྱིན་གྱིས་བརླབ་པ་ནི། རང་ཉིད་ཡི་དམ་ལྷར་གསལ་ཐུགས་ཀ་ནས། །མ་ཧཱ་རཀྟ་ཧཱུཾ་ཧྲཱིཿཋ། ཞེས་པའི་བར་དང་། ཨ་ཀ་ཕ་ལ། ཞེས་པ་ནས། ཤཔྟའི་བར་བརྗོད་པའོ། །སྲེག་རྫས་བྱིན་གྱིས་བརླབ་པ་ནི། ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་དམ་ཉམས་དགྲ་བགེགས་ཀྱི། །ཤ་དང་ཁྲག་ལས་བྱུང་བའི་སྲེག་བྱེད་ཀྱི། དྲག་པོའི་རྫས་རྣམས་དངས་ཤིང་ཐོགས་མེད་པ། །ཤ་ལྔ་བདུད་རྩི་ལྔ་ཡི་རང་བཞིན་གྱུར། ཨོཾ་སྭཱཧཱ། ཨོཾ་ཨཱཿསྭཱཧཱ། ཨོཾ་ཤྲེ་ཡཾ་སྭཱཧཱ། ཨོཾ་ཛིཾ་སྭཱཧཱ། ཨོཾ་ཀུ་རུ་ཀུ་རུ་སྭཱཧཱ། ཞེས་བྱིན་གྱིས་བརླབ། དེ་ནས་མེ་སྦར་བ་ནི། ངག་ཏུ་རྩ་སྔགས་ལན་གསུམ་བརྗོད། མེ་བྱིན་གྱིས་བརླབས་ལ་འདི་སྐད་དོ། །ཧཱུཾ། དམེ་ཡུགས་བཤན་པ་ནག་པོའི་ཁྱིམ་ནང་ནས། །བླངས་མེ་ཡམ་ཤིང་ནག་པོ་ལ་སྦར་བས། །དྲག་པོའི་སྲེག་རྫས་འབར་བར་མངའ་གསོལ་ལོ། །འབར་བའི་འཕྲོ་འདུ་འཁྱིལ་(༣ན)
བའི་ལས་མཛོད་ཅིག །ཨོཾ་ཨགྣེ། ཨ་བྱ་ཀ་བྱ་ཛཿ དགྲ་བོ་ཆེ་གེ་མོ་མཱ་ར་ཡ་ཕཊ། ཅེས་ལན་གསུམ་བརྗོད་ཅིང་རླུང་གཡབ་དང་བཅས་པས་ཕྱོགས་བཞི་ནས་མེ་སྦར་རོ། །དེ་ནས་ཐབ་བསྐྱེད་པ་ནི། སྭཱ་བྷ་ཝས་སྟོང་པར་སྦྱངས། ཐབ་ཁུང་མི་དམིགས་སྟོང་པའི་ངང་ཉིད་ལས། །མདུན་དུ་དྲག་པོའི་ཐབ་ཁུང་གྲུ་གསུམ་པ། །དཔངས་རྒྱར་ཁྲུ་གང་ཁ་ཁྱེར་སུམ་བརྩེགས་ཅན། །ཐབས་ཀྱི་མཚན་ཉིད་ཡོངས་སུ་རྫོགས་པའི་དབུས། །ཉི་མའི་གདན་སྟེང་རཾ་ལས་མེ་ལྷ་ནི། །སྐུ་མདོག་མཐིང་ནག་ཞལ་གཅིག་ཕྱག་བཞི་པ། །གཡས་གཉིས་རྡོ་རྗེ་བགྲང་འཕྲེང་གཡོན་པ་ན། །དབྱུག་པ་གྷུནྡྷེ་འཛིན་ཅིང་མེ་དཔུང་བརྒྱན། །ར་སྐྱེས་ཁམ་པ་འཇའ་ཚོན་གློག་གིས་འཁྲིལ། །ཞིང་གི་ཡ་འགལ་སྔ་རུ་སྦྲུལ་ནག་དང་། ཁྲ་བོས་གོང་རྨེད་བྱས་ལ་རབ་བཅིབས་པའི། །གནས་གསུམ་ཡི་གེ་གསུམ་གྱིས་མཚན་པ་ལས། །འོད་ཟེར་འཕྲོས་པས་ཤར་ལྷོ་མཚམས་ནས་ནི། །སྐད་ཅིག་ཉིད་ལ་གནས་འདིར་སྤྱན་འདྲེན་ནོ། །བཛྲ་ས་མ་ཡ་ཛ༔ དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷའི་རྒྱལ་པོ་དྲང་སྲོང་མཆོག །སྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་གཤེགས་ཤིང་བཞུགས། །དགའ་དང་གུས་པས་ཕྱག་བགྱིའོ། །ཨགྣེ་དྷེ་པ་རྀ་ཥི་ས་མ་ཡ་ཛཿཛཿ ས་མ་ཡ་ཏིཥྛ་ལྷན། ན་མོ་སིདྡྷི་ཧཱུཾ། གདན་འབུལ་བ་ནི། ཨོཾ་ཀུ་ཤ་འདི་ནི་གཙང་ཞིང་དགེ །ཚངས་པ་ལྷ་རྣམས་དག་བྱེད་ཡིན། །དཀོན་ཅོག་གསུམ་པོ་མཉེས་བྱེད་དང་། །ས་ལས་སྐྱེས་འདི་འདབ་མའི་སྙིང་། །བདག་(༣བ)
གི་བགེགས་རྣམས་ཐམས་ཅད་ནི། །ཞི་དང་བཀྲ་ཤིས་མཛད་དུ་གསོལ། །ཨོཾ་བཛྲ་ཨ་ན་ལ་མ་ཧཱ་བྷུ་ཏ་ན་ཛྭ་ལ་ཡེ། ཕྱི་མཆོད་འབུལ་བ་ནི། མཆོད་ཡོན་མེ་ཏོག་སྤོས་དང་མར་མེ་དང་། །དྲི་ཆབ་སྨན་རག་བདུད་རྩི་ཞལ་ཟས་རྣམས། །དག་ཅིང་གཙང་མར་སྦྱར་ཏེ་ཡིད་འོང་བ། །དྲང་སྲོང་མེ་ལྷ་འཁོར་དང་བཅས་ལ་འབུལ། །སྔགས་ལ་ཨརྒྷཾ་ནས་ཤབྡའི་བར་སྦྱོར་རོ། །གཏོར་མ་ནི། ཧཱུཾ། ཏིང་འཛིན་དབང་གྱུར་ཞལ་ཟས་བདུད་རྩི་ལྔ། །དྲང་སྲོང་ཆེན་པོས་སྔོན་ཆད་མ་བསྟར་བའི། །དག་ཅིང་གཙང་མར་སྦྱར་ལ་འབུལ་ལགས་ཀྱི། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །ཨོཾ་ཨགྣེ། དྷེ་ཝ་རྀ་ཥི། ཨ་བྱ་ཀ་བྱ། དྷེ་ཝ་རྀ་ཥི། མ་ཧཱ་བ་ལིཾ་ཏ་པཱུ་ཛ་ཁཱ་ཧི། སྐྱེར་ཚེར་འབུལ་བ་ནི། དྲང་སྲོང་མེ་ལྷ་འཁོར་དང་བཅས་པ་ལ། །མར་དང་དྲི་ཆུ་བདུད་རྩི་བྱུགས་པ་ཡིས། །དུག་ཤིང་ཚེར་མ་དྲག་ལས་བསྒྲུབ་ཕྱིར་འབུལ། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །རྩ་སྔགས་ལ་ཀ་ལ་སྲིག་མཱ་ར་ཡ་ཕཊ་སྦྱར་རོ། །མར་ཁུ་ནི། དྲང་སྲོང་མེ་ལྷ་འཁོར་དང་བཅས་པ་ལ། །དྲི་མེད་རྩི་བཅུད་དང་ལྡན་རྣམ་པར་དག །བྱང་ཆུབ་སེམས་ཀྱི་ངོ་བོ་མར་འདུལ་གྱི། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །རྩ་སྔགས་ལ་ཀ་ལ་སྲིག་ཤ་མཱ་ར་ཡ་ཕཊ་སྦྱར་རོ། །སྨན་རཀ་ནི། དྲང་སྲོང་མེ་ལྷ་འཁོར་དང་བཅས་པ་ལ། །དུག་ལྔ་སེལ་བའི་བདུད་རྩིའི་རྒྱ་མཚོ་དང་། །ཐུགས་རྗེ་ཆགས་པའི་དམར་ཆེན་རཀྟ་འབུལ། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །རྩ་སྔགས་ལ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། རཀྟ་པཱུ་ཛ་ཁཱ་ཧི་ཧོཿ བདུད་རྩི་འབུལ་བ་ནི། དྲང་སྲོང་མེ་ལྷ་འཁོར་དང་བཅས་པ་ལ། །བདེ་ཆེན་དབྱིངས་ལ་སྟེར་(༤ན)
བྱེད་རོ་ལྡན་པ། །སྐྱེ་མེད་བྱང་ཆུབ་སེམས་རྟོགས་བདུད་རྩི་འབུལ། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །རྩ་སྔགས་ལ་བོ་དྷི་ཙིཏྟ་ཁ་རཾ་ཁཱ་ཧི། སྨན་སྣ། རིན་པོ་ཆེ། འབྲུ་སྣ་འབུལ་བ་ནི། དྲང་སྲོང་མེ་ལྷ་འཁོར་དང་བཅས་པ་ལ། །སྨན་སྣ་རིན་ཅེན་ལྔ་དང་འབྲུ་སྣ་ལྔ། །སྙིང་པོ་ལྔ་དང་ཆོས་མཆོག་ལྔ་རྣམས་འབུལ། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །རྩ་སྔགས་ལ་བྷ་ར་ཨ་མྲྀ་ཏ་མཱ་ར་ཡ་ཁ་རཾ་ཁཱ་ཧི། ཧི་ར་ས་རཏྣ་བྷུ་ཏ་ཧཱུཾ། བསྟོད་པ་ནི། ཧཱུཾ། མེ་ལྷའི་རྒྱལ་པོ་དྲང་སྲོང་མཆོག །ཞི་རྒྱས་དབང་དྲག་ལ་སོགས་པ། །འཕྲིན་ལས་ཀུན་གྱི་དབང་པོ་མཛོད། །ལྷ་འཛིན་ལྷ་ལ་ཕྱག་འཚལ་ལོ། །སྔགས་ཀྱི་མཇུག་ཏུ་ཨ་ལ་ལ་ཧོཿ ཨ་ཏི་པུ་ཧོཿ པྲ་ཏིཙྪ་ཧོཿ དེ་ནས་སྲེག་རྫས་འབུལ་བ་ནི། རཾ། མེ་དཔུང་འབར་བའི་དཀྱིལ་འཁོར་འདིར། །མཚན་མར་གྱུར་པའི་དངོས་པོ་རྣམས། །བསྲེགས་པས་དངོས་ཀུན་བརླག་པར་གྱུར། །སླར་ཡང་མི་འཕྱོར་བར་དུ་སྲེགས། །རཾ་ཛཱ་ལ་རཾ་དགྲ་བགེགས་མཱ་ར་ཡ་ཧཱུཾ་ཕཊ། དེ་ནས་སྲེག་རྫས་ཀྱི་གཙོ་བོ་དགྲ་བགེགས་བྱད་མ་བསྲེག་པ་ནི། ལིང་ག་ཕྱག་ལེན་ལྟར་བཤམ། རང་གི་ཐུགས་ཀ་ནས་ཨེ་མཐིང་ནག་ཞིག་ཆད་པ། ཞེས་པ་ནས་བཟུང་སྟེ། སྲས་མཆོག་ཐུགས་ནས་དྲེགས་པའི་བདག་པོ་ནི། ཞེས་སོགས་སྔགས་དང་བཅས་པའི་བར་དཀྱུས་བཞིན་བཏང་། དེ་ནས་མེ་ལྷའི་རྒྱལ་པོ་དྲང་སྲོང་འཁོར་བཅས་རྣམས། །གྲུ་གསུམ་མཐིང་ནག་འབར་བའི་ཞལ་གདོངས་ལ། །ལྗགས་ཁྱོངས་སྐྱེ་ཤི་རྩད་ཆོད་ཚེམས་གཅིགས་ལ། །དགྲ་བགེགས་ཤ་ཁྲག་འབུལ་གྱི་བཞེས་སུ་གསོལ། །རྩ་སྔགས་ཀྱི་མཇུག་ཏུ་ཛྭ་ལ་རཾ་མ་ཧཱ་མཾ་ས་ཁཱ་ཧི། མ་ཧཱ་(༤བ)
རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བྷ་སུ་ཏ་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། མ་ཧཱ་ཀེཾ་ནེ་རི་ཏི་ཁཱ་ཧི། དགྲ་བགེགས་འབྱུང་པོ་མཱ་ར་ཡ་ཕཊ། ཅེས་འབུལ་ལོ། །དེ་ནས་དགང་བླུགས་ཐོགས་ལ། དྲང་སྲོང་མེ་ལྷའི་ལྗགས་ནི་རྡོ་རྗེ་ཡི། །སྦུ་གུ་ཅན་ལ་རཾ་གྱི་ཡི་གེས་མཚན། དགང་བླུགས་ཁ་ལ་ཧཱུཾ་ཡིག་འོད་ཟེར་ནི། །རབ་ཏུ་འབར་ཞིང་འཕྲོ་བས་མཚན་པར་གྱུར། །ཨོཾ་ཨགྣེ་དྷེ་བ་རྀ་ཥི་ཧ་བྱ་ཀ་བྱ་དྷེ་བ་རྀ་ཥི་མ་ཧཱ་མཱ་ར་ན་ཕཊ། ཅེས་པ་བདུན་ནམ་ཉེར་གཅིག་གིས་མེ་གསོ་བའི་ཕྱིར་དུ་མར་ཁུ་འབུལ། བདག་ཅག་དཔོན་སློབ་རྣམས་ཀྱི་མི་མཐུན་པའི་ཕྱོགས་ཐམས་ཅད་དང་། དགྲ་བགེགས་ཆེ་གེ་མོ་ཐམས་ཅད་མཱ་ར་ཡ་ཧཱུཾ་ཕཊ། དེ་ནས་ཐོག་མར་ཡཾ་ཤིང་ནི། ཨོཾ་བོ་དྷི་བྲྀཀྵ་ཡེ་སྭཱཧཱ། བདག་ཅག་དཔོན་སློབ་ནས། ཕྱོགས་ཐམས་ཅད་ཅེས་པའི་བར་སྔར་ལྟར་ལ། གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པའི་དགྲ་བགེགས་ཆེ་གེ་མོ་ཐམས་ཅད་མཱ་ར་ཡ་ཧཱུཾ་ཕཊ། མར་ཁུ། ཨོཾ་ཨགྣེ་ཡེ་སྭཱཧཱ། བདག་ཅག་དཔོན་སློབ་༝༝ སྦྱོར་བ་ཕུན་སུམ་ཚོགས་པ་ལ་བར་དུ་གཅོད་པའི་༝༝ ཏིལ། ཨཱོཾ་སརྦ་པཱ་པཾ་ད་ཧ་ན་བཛྲ་ཡེ་ཧཱུཾ་ཕཊ། བདག་ཅག་དཔོན་སློབ་༝༝ སྡིག་པ་དང་སྒྲིབ་པ་ལོག་པར་འདྲེན་པའི་དགྲ་བགེགས་༝༝ དུར་བ། ཨཱོཾ་བཛྲ་ཨཱ་ཡུ་ཥེ་སྭཱཧཱ།༝༝ ཚེ་རྒྱས་པ་ལ་བར་དུ་གཅོད་པའི་༝༝ འབྲས། ཨཱོཾ་བཛྲ་པུཥྚ་ཡ་སྭཱཧཱ།༝༝ བསོད་ནམས་རྒྱས་པ་ལ་བར་དུ་གཅོད་པའི་༝༝ ཞོ་ཟན། ཨཱོཾ་སརྦ་སཾ་པ་རི་ཡེ་སྭཱཧཱ།༝༝ བདེ་བའི་ཚོགས་ལ་བར་དུ་གཅོད་པའི༝༝ ཀུ་ཤ །ཨཱོཾ་ཨ་པྲ་ཏི་ཧ་ཏ་བཛྲ་ཡེ་སྭཱཧཱ།༝༝ འབྲུ་རྒྱས་པ་ལ་བར་དུ་གཅོད་པ་ཐམས་ཅད༝༝ (༥ན)
ཡུངས་ཀར། ཨཱོཾ་ཨཪྠ་སིདྡྷ་ཡེ་སྭཱཧཱ།༝༝ ནོར་དང་འབྲུ་རྒྱས་པ་ལ་བར་དུ་གཅོད་པའི༝༝ ནས། ཨཱོཾ་མཧཱ་བེ་བྷཱ་ཡ་སྭཱཧཱ།༝༝ མྱུར་བའི་ཤུགས་ལ་འབྱུང་བའི་བར་དུ་གཅོད་པའི༝༝ སྲན་མ། ཨཱོཾ་མ་ཧཱ་བ་ལཱ་ཡ་སྭཱཧཱ།༝༝ སྟོབས་རྒྱས་པ་ལ་བར་དུ་གཅོད་པའི༝༝ གྲོ །ཨཱོཾ་བཛྲ་གྷསྨ་རི་ཡེ་སྭཱཧཱ།༝༝ ནད་མེད་པ་ལ་བར་དུ་གཅོད་པའི་༝༝ བུ་རམ་ལ། ཨཱོཾ་སྟཾ་བྷ་ལེ་ཡེ་སྭཱཧཱ།༝༝ ལོག་པར་འདྲེན་པའི༝༝ གོས་ཟུང་། ཨཱོཾ་བཛྲ་ཝ་སྟྲ་ཡེ་སྭཱཧཱ།༝༝ གཟི་བརྗིིད་ཕུན་སུམ་ཚོགས་པ་ལ་བར་དུ་གཅོད་པའི་༝༝ དྲག་པོའི་རྫས། གནད་རྫས། ཚ་རྫས། གསོད་རྫས། མྱོས་རྫས་རྣམས་སོ་སོའི་རིལ་བུ་བྱས་པ་འབུལ་ཞིང་། ཨཱོཾ་ཨགྣ་ཡེ་སྭཱཧཱ། ཁྱད་པར་སྔ་དགྲ་ལག་ལ་བདར་བ། ཕྱི་དགྲ་ཡིད་ལ་སེམས་པ་ད་དགྲ་གནོདཅིང་འཚེ་བར་བྱེད་པའི་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུཾ་ཕཊ། ཅེས་པ་མེ་ལྷའི་སྔགས་དང་འབྲེལ་བ་བརྒྱའམ་ཉེར་གཅིག་གང་རུང་གིས་འབུལ། དེ་ནས་བསྟོད་པ་ནི། ཧཱུཾ། མེ་ལྷའི་རྒྱལ་པོ་དྲང་སྲོང་མཆོག །བདུད་བཞི་འཇོམས་པའི་ཕྱག་བཞི་པོ། །ཞབས་བཞི་ལས་ཀུན་འགྲུབ་བྱེད་པའི། །ལས་ཀུན་མཛད་ལ་ཕྱག་འཚལ་བསྟོད། །ཅེས་བསྟོད། །གཉིས་པ་ལ། རྩ་བའི་ལྷ་དང་རྒྱན་ལྷ་མཆོད་པ། འཁོར་རྣམས་མཆོད་པའོ། །དང་པོ་ནི། སྤྱན་དྲངས་པའི་མེ་ལྷ་གཤེགས་སུ་གསོལ་བ་ནི། ཨགྣ་ཡེ། ཛ་ཡ་ཛ་ཡ། གྷ་ཛ་གྷ་ཛ། ས་བྷ་བྷ་མུ། ཡེ་ཤེས་མེ་ལྷ་དམ་ཚིག་པ་ཉིད་ལས། །ཕྱིར་གཤེགས་ཤར་ལྷོ་མཚམས་སུ་རབ་བཞུགས་ནས། །ཞལ་ཚུར་གཟིགས་ཏེ་དཀྱིལ་འཁོར་ལྷ་ཚོགས་རྣམས། །མཆོད་པའི་དཔང་(༥བ)
པོ་ལྟ་བུར་བཞུགས་པར་གྱུར། །དམ་ཚིག་མེ་ལྷའི་ཐུགས་ཀར་གཞལ་ཡས་ཁང་། །བཀོད་ལེགས་རིན་ཅེན་ལས་གྲུབ་སྒོ་བཞི་པ། །ཞེས་པ་ནས། ཕྱག་རྒྱ་གར་མཆོད་ཀྱི་བར་དཀྱུས་བཞིན་བཏང་། དེ་རྗེས་ལིངྒ་བཅུ་བཞི་བསྒྲལ་ཞིང་སྟོབ་པའི་བར་དཀྱུས་ལྟར་བྱ་ཞིང་། འོན་ཀྱང་སྟོབ་པའི་སྔགས་མཇུག་ཏུ། ཨེ་མྱགས་ཡ་རྔུབས་མུགས་ཤག་ཀ་དུན། ཆེ་གེ་མོའི་སྲོག་ལ་ཧུར་ཐུམས་ཛཿ ཛྭ་ལ་རཾ་ཤག་རྦད། ཛྭ་ལ་རཾ། ས་ནཱ་ག་དུ་རུ་རཾ། ས་ནཱ་ག་ཨུ་ན་ན། གཟིར་ཕྱུང་། སྲོག་ལ་དུ་རཾ། ཙིཏྟ་བྲེང་ཤག་དུ་རཾཿ ཨེ་རཾ་ས་ནཱ་ག་སྙིང་གཟེར་དུ་རཾཿ ཨི་ནན་འདྲིད་ཕྱུང་༔ ས་ནཱ་གཱ་ཙིཏྟ་ཐུཾ་རིལ་རྦདཿ ཛྭ་ལ་རཾ་མཱ་ར་ཡ་ཕཊ་ཕཊཿ ཅེས་སྦྱར་རོ། །གདོན་བགེགས་དམིགས་བསལ་ཀླུ་ལྟ་བུ་ལ་འདི་བཞིན་དང་། གནོད་བྱེད་སྡེ་བརྒྱད་གཞན་ལའང་མཚོན་ཞིང་། བགེགས་སྤྱིར་བཏང་ལ། ཨེ་མྱགས་༝༝ གནོད་བྱེད་སོགས་ལ་རཾ་ཛ་ལ་རཾ་ཁཱ་ཧི། དགྲ་སྤྱིར་བསྲེག་པ་ལ། ཨྱེ་མྱགས་༝༝ དགྲ་བོའི་སྲོག་ལ་ཁཱ་རཾ་ཛྭ་ལ་རཾ་ཁཱ་ཧི། ཐུན་མོང་ལ། ཨྱེ་མྱགས་༝༝ དགྲ་བགེགས་གནོད་བྱེད་ཀྱི་སྲོག་ལ་ཁཱ་རཾ་ཛྭ་ལ་རཾ་ཁཱ་ཧི། ཞེས་སྐབས་དང་སྦྱོར་རོ། །དམིགས་བསལ་ཡོད་ན། ཨྱེ། ཟིལ་གནོན་རྩ་བ་རྒྱན་གྱི་ལྷ་རྣམས་ཀྱིས། རྣལ་འབྱོར་དཔོན་སློབ་ལྟོས་བཅས་སྦྱིན་པའི་བདག །འཁོར་དང་བཅས་པ་སྡང་ཞིང་གདུག་པ་དང་། །དྲག་ཤུལ་སེམས་འཆང་བསམ་ངན་སྦྱོར་རྩུབ་པའི། །བྱད་མ་དགྲ་བོ་ཆེ་གེ་འདི་ཞེས་པའི། །ཤ་ཟོ་ཁྲག་འཐུང་སྲོག་ཆོད་དབུགས་ལོང་ལ། །ལོ་ཟླ་ཞག་དང་ཟ་མར་མ་ལུས་པར། །ད་ལྟ་ཉིད་དུ་བཞེས་པའི་འཕྲིན་(༦ན)
ལས་མཛོད། །རྩ་སྔགས་གསང་སྔགས་དང་བཅས་པའི་གཤམ་དུ་ཐལ་མོ་བརྡེབ། དེ་ཡང་བགེགས་དམིགས་ཀྱིས་གསལ་བ་ལ་ལིངྒ་བར་སྣང་ལ་བརྒྱང་སྟེ་སྣུམ་ཁོལ་མར། ཆང་ལ་རྫས་བསྲེགས་པ་རྭ་ཅོའི་ལྡུགས་སྣོད་དང་བཅས་ཏེ་ཧོམ་འབར་བའི་བསྐུལ་ཚིག་ཀྱང་འདི་ཉིད་ཀྱིས་བྱེད་ཅིང་། བྱད་མ་དགྲ་བོ་ཞེས་པ་བགེགས་གང་ཡིན་པ་ལ་འདོན་པ་བསྒྱུར་རོ། །དེ་ནས་སྲེག་རྫས་འབུལ་ཞིང་གཉེར་གཏད་བྱ་བ་ནི། ཨྱེ། ཆོས་དབྱིངས་དྲག་པོ་ཨེ་ཡི་ཕོ་བྲང་ནས། །བཅོམ་ལྡན་ཕྱག་རྒྱ་ཟིལ་གནོན་གསོད་བྱེད་རྒྱལ། །སྲས་མཆོག་དྲེགས་པ་རུས་པའི་ག་རུ་ཌ། ཁྱུང་སྟག་སེང་སྦྲུལ་སྤྲུལ་པ་འཁོར་བཅས་ལ། །ཆོས་ཉིད་གདལ་བ་ཆེན་པོའི་ཧོམ་ཁུང་དུ། །རིག་པ་བྱང་ཆུབ་སེམས་ཀྱི་མེ་སྦར་ནས། །དམ་རྫས་བདུད་རྩི་འབར་བའི་སྦྱིན་སྲེག་འབུལ། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱི། །བྱད་ཕུར་གཏད་ཁྲམ་ཟོར་རླུང་ཉེ་འབྱེད་དང་། །འགོམས་ཆོག་བསྐྲད་འཁོར་རིག་སྔགས་གནོད་པ་དང་། །ཆགས་ཆེ་ཉམ་ང་མི་མཐུན་ཕྱོགས་རྣམས་ཀུན། །ཐམས་ཅད་བཟློག་ཅིང་བསྒྱུར་བའི་འཕྲིན་ལས་མཛོད། །དེ་ནས་དགང་བླུག་ཐོག་ལ། རྩ་བ་རྒྱན་ལྷའི་ལྗགས་ནི་རྡོ་རྗེ་ཡི། །ཞེས་སོགས་སྔར་ལྟར་བརྗོད། ཨྱེ་ཀ་ཧེ་དུན་སོགས་རྩ་སྔགས་བདུན་ནམ་ཉེར་གཅིག་གིས་མར་ཁུ་ཕུལ་ཏེ་མེ་གསོ་བ་དང་། སྲེག་རྫས་ཡཾ་ཤིང་ནས་གོས་ཟུང་གི་བར་རྩ་སྔགས་ཀྱི་གཤམ་ལ་སྦྱར་ཏེ་འདོད་གསོལ་དང་བཅས་བརྒྱའམ་ཉེར་གཅིག་སོགས་ལོང་སྐབས་དང་བསྟུན་ནས་སྔར་ལྟར་འབུལ། དེ་ནས་ཚེ་བདག་ནག་པོ་རྩ་བ་རྒྱན་གྱི་ལྷ། །འཁོར་དང་བཅས་ལ་(༦བ)
དྲག་རྫས་གནད་ཀྱི་རྫས། །ཚེ་རྫས་གསོད་དང་མྱོས་བྱེད་རྫས་བསྲེགས་པས། །དམིགས་པའི་དགྲ་བགེགས་མྱུར་དུ་བརླག་གྱུར་ཅིག །ཨྱེ་མྱགས་མཇུག་ཏུ་དྲག་སྔགས་སྐབས་སྦྱར་གྱིས་འབུལ། ཨྱེ་ཀ་ཧེ་དུན༝༝ མ་ཧཱ་པཉྩ་ཨ་མྲྀ་ཏ་ཁཱ་རཾ་ཁཱ་ཧི། ཞེས་ནང་མཆོད་ཀྱང་དབུལ་ལོ། །གཉིས་པ་ནི། ཡོ་བྱད་རྣམས་སྔར་ལྟར་བཤམས་ལ། ཨྱེ། སྤྲུལ་པ་རྣམ་གསུམ་གཤེད་བཞི་མོན་པ་བཞི། །བདུད་བཞི་འཆི་བདག་བཅུ་གཉིས་བར་ཁྱམས་ལྷ། །སྒོ་བ་བཞི་དང་འོབས་སྲུང་བཅུ་དྲུག་སོགས། །ཕོ་ཉ་བྱེ་བ་ས་ཡར་བཅས་པ་ལ། །ཆོས་ཉིད་གདལ་བ་སོགས་སྔར་ལྟར་བརྗོད། གཏོར་མ་ལྷ་གྲངས་དང་མཉམ་པ་ལོག་འདྲེན་དགྲ་བོ་བསྒྲལ་བའི་ཤ་ཁྲག་ལས། ཞེས་སོགས་དང་ཨྱཻ་རིང་གི་མཐར་གཏོར་སྔགས་དང་བཅས་པས་ཕུལ། ལིངྒ་ལྷ་གྲངས་དང་མཉམ་པ་གོང་བཞིན་བསྒྲལ་ཏེ་ཕུལ། དེ་ནས་དགང་བླུགས་ཐོགས་ལ། ཕྱི་ནང་འཁོར་རྣམས་ལྗགས་ནི་རྡོ་རྗེ་ཡི། །ཞེས་སོགས་བརྗོད། ཨྱེ་རིང་ལ་ཨགྣེ་སྦྱར་བའི་མར་ཁུ་དང་། ཡམ་ཤིང་ནས་གོས་ཟུང་གི་བར་སྔར་བཞིན་ཕུལ། ཨྱེ་མནན་བཤིག་བསད་པའི་ལས་ཀྱི་མཐའ་སྡུད་པའི། །འཆི་བདག་སྲོག་བདག་ཚེ་བདག་མགོ་དགུ་པ། །གཤེད་བཞི་མོན་བདུད་འཆི་བདག་སྒོ་སྲུང་སོགས། །འཁོར་དང་བཅས་ལ་དྲག་རྫས་གནད་ཀྱི་རྫས། །ཞེས་སོགས་དང་། ནང་མཆོད་སྔར་ལྟར་འབུལ། འདོད་དོན་ལ་གསོལ་བ་གདབ་པ་ནི། བཅོམ་ལྡན་ཕྱག་རྒྱ་ཟིལ་གནོན་འཁོར་བཅས་ལ། །སྦྱིན་སྲེག་མཆོད་པ་དམ་པ་འདི་ཕུལ་བས། །རྒྱལ་བའི་བསྟན་དར་བླ་མའི་སྐུ་ཚེ་བརྟན། །འགྲོ་རྣམས་བདེ་ཞིང་བདག་ཅག་འཁོར་བཅས་ཀུན། །(༧ན)
བསམ་དོན་འགྲུབ་ཅིང་མི་མཐུན་ཕྱོགས་རྣམས་ཞི། །དགྲ་བགེགས་བྱད་མ་རྦོད་འདྲེ་རྦོད་གཏོང་སོགས། །ཐལ་བར་རློག་ལ་བཅོལ་བའི་འཕྲིན་ལས་མཛོད། །གཉིས་པ་མཇུག་གི་ཆོ་ག་ལ། གཏང་རག་མཆོད་བསྟོད་བྱ་ཞིང་། གཤེགས་སུ་གསོལ་བ། མཐར་ལས་མཇུག་མནན་པ་བྱ་བའོ། །དང་པོ་ལ་འཇིག་རྟེན་ལས་འདས་པ་ལ་བྱ་བ་དང་། འཇིག་རྟེན་པའི་མེ་ལྷ་ལ་བྱ་བའོ། །དང་པོ་ནི། ཁྲོ་རྒྱལ་ཕྱག་རྒྱ་ཟིལ་གནོན་འཁོར་བཅས་ལ། །ཞེས་སོགས་དང་། ཨ་ཀ་ཕ་ལ་ཨ་དྷུ་སུ། ཞེས་པ་ནས། ཤཔྟའི་བར་དང་། སྨན་རག་གཏོར་གསུམ་གྱི་སྔགས་རྣམས་འབུལ། །རབ་འབྱམས་དུས་གསུམ་རྒྱལ་བ་མ་ལུས་པའི། །ཞེས་སོགས་ཀྱིས་བསྟོད། ཡི་དམ་ལྷ་མཆོག་ཟིལ་གནོན་འཁོར་བཅས་ཀྱི། །བསྙེན་སྒྲུབ་འཕྲིན་ལས་གཞུང་བཞིན་བགྱིས་པ་ལས། །བདག་ཅག་མ་རིག་ལོག་རྟོག་དབང་སོང་བས། །འགལ་འཁྲུལ་ནོངས་པ་ཅི་མཆིས་བཟོད་པར་གསོལ། །གཤིན་རྗེ་གཤེད་ཀྱི་ཡི་གེ་བརྒྱ་པ་བརྗོད་དེ་ཉེས་བྱས་བཤགས། །གཤེགས་གསོལ་སྨོན་ལམ་རྣམས་ལས་བྱང་གི་དཀྱུས་བཞིན་བྱའོ། །གཉིས་པ་ནི། དཔང་པོར་བཞུགས་པའི་ཡེ་ཤེས་མེ་ལྷ་ནི། །སླར་ཡང་དམ་ཚིག་པ་ལ་ཐིམ་པར་གྱུར། །དྲང་སྲོང་མེ་ལྷའི་ལྗགས་ནི་རྡོ་རྗེ་ཡི། །ཞེས་སོགས་ནས་གོས་ཟུང་དང་། དྲག་རྫས་འབུལ་བའི་བར་སྔར་བཞིན་དང་། ནང་མཆོད་ཀྱང་འབུལ། མེ་ལྷའི་གཏོར་མ་བདུད་རྩིར་བྱིན་གྱིས་བརླབས་ལ། ཏིང་འཛིན་དབང་གྱུར་ཞལ་ཟས་བདུད་རྩི་ལྔ། །ཞེས་སོགས་སྔགས་དང་བཅས་པས་ཕུལ། མཆོད་སྦྱིན་གཏོར་མ་འདི་བཞེས་ལ། །རྣལ་(༧བ)
འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་པའི་བར་བརྗོད། འཕྲིན་ལས་གསོལ་བ་ནི། དྲང་སྲོང་ཆེན་པོ་འཁོར་དང་བཅས་པ་ལ། །སྦྱིན་སྲེག་མཆོད་པ་རྣམ་དག་ཕུལ་བ་ཡིས། །སྐུ་གསུང་ཐུགས་ལ་མཉེས་པའི་ཚོགས་གྱུར་ཅིག །དྲག་རྫས་ལྷ་ཡི་རྫས་སུ་རྟོགས་པར་མཛོད། །ཅེས་བརྗོད། དེ་ནས། མཆོད་ཡོན་མེ་ཏོག་སྤོས་དང་མར་མེ་དང་། །ཞེས་པ་ནས། ཤབྡའི་བར་གྱིས་མཆོད། ཧཱུཾ། མེ་ལྷའི་རྒྱལ་པོ་དྲང་སྲོང་མཆོག །ཞེས་སོགས་ཀྱིས་བསྟོད། གང་ཡང་བདག་བློ་རྨོངས་པ་ཡིས། །ཞེས་སོགས་ཀྱིས་བཟོད་པར་གསོལ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །ཅེས་སོགས་དང་། ཨགྣེ་བཛྲ་མུ། མེ་ལྷ་ཡེ་ཤེས་པ་གཤེགས། དམ་ཚིག་པ་མེ་འབར་བའི་རྣམ་པ་ཅན་དུ་གྱུར། །ཅེས་བརྗོད་དེ་གཤེགས་གསོལ་བྱ། འདོད་རྒུའི་འབྱུང་གནས་བླ་མ་ཡི་དམ་ལྷ། །ཞེས་སོགས་ཀྱིས་ཤིས་པ་བརྗོད་ཅིང་མེ་ཏོག་འཐོར་རོ། །གཉིས་པ་ལས་མཇུག་མནན་པ་བྱ་བ་ནི། ཐལ་བ་ལ་ཉ་བོ་བྱ་ཞིང་། མིང་བྱང་སོགས་མན་ངག་ལྟར། གཅོད་པ་ནི་ནམ་མཁའི་འཁོར་ལོ་དང་བཅས་ཏེ་ཕག་ཐོད་དུ་འཇུག་པ་སོགས་ལག་ལེན་ལྟར་བྱས་ལ་སྐམ་གཤེར་གང་ཡང་རུང་བར་སྐབས་དང་སྦྱར་ཏེ་མནན་ཅིང་བྲོ་ཡིས་གཟིར་བ་སོགས་གཞུང་ལྟར་བྱའོ། །ཐབ་ཁུང་བསྡུ་ཞིང་ལས་ཀྱི་རྗེས་མི་མངོན་པར་བྱས་ལ། ཡང་ན་འཁོར་ལོ་གཅིག་ལ་སྦྱིན་སྲེག་བདུན། །བྲམ་ཟེ་ཛྙཱ་ན་ཀིརྟིས་མཛད། །འཁོར་ལོ་རེ་ལ་སྦྱིན་སྲེག་གསུམ། །འདི་ནི་འཇམ་དཔལ་རྫུས་(༨ན)
སྐྱེས་གཞུང་། །ཡང་ན་འཁོར་ལོ་གཅིག་ལ་ཡང་། །ཚེས་ནས་ཞག་བདུན་སྦྱིན་སྲེག་བྱ། །བཅུ་གཉིས་སྲེད་མེད་བུ་ཡང་འཇོམས། །དེ་ནི་རྒྱལ་པོ་ཀུན་སྐྱོང་མན་ངག་ཡིན། །ཞེས་སོགས་གསུངས་པ་ལྟར་རོ། །སྨྲས་པ། འཇམ་དཔལ་གཤིན་རྗེའི་ལས་མཐའ་བསྲེག་པའི་གཞུང་། །པད་ལུགས་གཞིར་བཞག་གནུབས་ཀྱི་མན་ངག་གིས། །ལེགས་པར་བརྒྱན་ཏེ་དམ་པའི་ཕྱག་བཞེས་བཞིན། །གཟུར་གནས་སྔགས་འཆང་རྣམས་ཀྱི་དོན་དུ་བཀོད། །དེ་ལྟའི་རྣམ་པར་དཀར་བའི་དགེ་ཚོགས་ཀྱིས། །མར་གྱུར་འགྲོ་འདིའི་དུཿཁའི་ནགས་ཀླུང་རྣམས། །ཡེ་ཤེས་མཆོག་གི་མེ་ལྕེས་རབ་བསྲེགས་ནས། །ཀུན་བཟང་གདོད་མའི་ལམ་དེར་བགྲོད་པར་ཤོག །ཅེས་འཇམ་དཔལ་ཚེ་བདག་ནག་པོའི་དཀྱིལ་འཁོར་གྱི་ལྷ་ཚོགས་རྣམས་སྦྱིན་སྲེག་གི་མཆོད་པས་མཉེས་པར་བྱེད་པའི་ལས་བྱང་དུས་ཀྱི་མེ་ལྕེའི་འཕྲེང་བ་ཞེས་བྱ་བ་འདི་ཡང་དོན་གཉེར་ཅན་དུ་མས་ཉེ་བར་བསྐུལ་ཞིང་ཕན་བདེ་ལེགས་བཤད་གླིང་པ་རྣམས་ཀྱི་ལག་ལེན་དུ་ཁྱེར་བདེ་བའི་ཕྱིར་དུ་ཟིལ་གནོན་དྲག་རྩལ་རྡོ་རྗེས་དབྱུ་གུ་ཟླ་བའི་དམར་ཕྱོགས་ཀྱི་དམ་ཅན་མངོན་པར་འདུ་བའི་ཚེས་ལ་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ།། །།སརྦ་མངྒ་ལཾ།།