འཇམ་དཔལ་ཞི་བའི་འཕྲིན་ལས་སངས་རྒྱས་མངོན་སུམ་སྟོན་པའི་ལག་བཅངས།
འཇམ་དཔལ་ཞི་བའི་འཕྲིན་ལས་སངས་རྒྱས་མངོན་སུམ་སྟོན་པའི་ལག་བཅངས་བཞུགས་སོ། །
ཆོས་ཀུན་སྒྲིབ་བྲལ་གཟིགས་པའི་སྤྱན་རས་ཀྱིས། །ཤེས་བྱ་ཐམས་ཅད་མཁྱེན་པའི་རྡོ་རྗེ་འཛིན། ངེས་པ་དོན་གྱི་འཇམ་མགོན་བླ་མ་མཆོག །ཆོས་དབྱིངས་རང་གྲོལ་སྙིང་དབུས་པད་མཚོར་བཞུགས། །གདོད་ནས་དག་པའི་རང་གི་སེམས་ཉིད་འདི། །འཇམ་དཔལ་རྡོ་རྗེ་མངོན་སུམ་ངོ་སྤྲད་ནས། །ཚེ་འདིར་བྱང་ཆུབ་བསྒྲུབ་པ་གསང་བའི་ལམ། །གནུབས་ཆེན་འབྱུང་བའི་ལུགས་སྲོལ་འདི་རྨད་བྱུང་། །བསྐལ་བརྒྱར་བསྒྲུབ་བྱའི་གྲགས་ཆེན་སངས་རྒྱས་དེ། །རང་ངོ་འཕྲོད་ནས་ཕུང་པོ་འོད་སྐུ་རུ། །གྲོལ་ཚེ་གཞན་ནས་འཚོལ་འདོད་དཀའ་སྤྱད་ཅན། །བློ་ཆུང་བྱིས་པ་ཆུ་ཟླའི་གཟུགས་ཀྱིས་བསླུ། །གནས་སྐབས་ལས་བཞི་བསྒྲུབ་པར་སྔོན་འགྲོའི་ཆོས། །མཐར་ཐུག་བྱང་ཆུབ་འཚོལ་ལ་དངོས་གཞིའི་ལམ། །རིགས་འཛིན་རིམ་པར་བྱོན་པའི་ཞལ་གྱི་དྲོད། །མ་ཉམས་བྱིན་རླབས་རླངས་པ་ཅི་ཡང་འཐུལ། །ལྕགས་སྡིག་ཆོས་སྡེའི་ལྷ་ལམ་ཡངས་པའི་ངོས། །སྟོད་དྲིལ་ཉི་མ་ཤར་བའི་འོད་སྟོང་གིས། །སྒྲིབ་གཉིས་སྨག་རུམ་སངས་དང་ལྷན་ཅིག་པར། །དངོས་གྲུབ་སྣང་བའི་(༢ན)
དགའ་སྟོན་འདིར་སྤྱོད་ཅིག །དེ་ལ་འདིར་འཇམ་དཔལ་ཕྱག་རྒྱ་ཟིལ་གནོན་དང་ཟུང་དུ་འབྲེལ་བར་འཇམ་དཔལ་ཞི་བའི་སྒྲུབ་སྐོར་ལ། གཙོ་བོར་བྱ་སླ་ཞིང་འཁྱེར་བདེ་བ་གནམ་ལྕགས་སྡིག་པའི་ཆོས་སྡེའི་བྱང་ཆུབ་བསྒྲུབ་པའི་སྐོར་ལྕགས་འདྲའི་ཆོས་ཚན་འཇམ་དཔལ་ཞི་བའི་སྒྲུབ་ཐབས་བདུད་རྩིའི་ཐིགས་པ་དང་གཏེར་ཁ་མི་གཅིག་པ་སྤྲུལ་པའི་གཏེར་སྟོན་གསར་བན་ཕྱོགས་མེད་ཀྱིས་སྟག་ཚང་བཀྲ་ཤིས་དཔལ་ཕུག་ནས་གདན་དྲངས་པའི་འཇམ་དཔལ་རྫོགས་ཆེན་གྱི་སྐོར་སོགས་ལས་ཇི་ལྟར་རིགས་པ་དྲག་སྒྲུབ་མང་པོའི་སྔོན་དུ་འགྲོ་དགོས་པ། ཇི་སྐད་དུ། ཞི་བར་བསྙེན་ཅིང་དྲག་པོར་སྒྲུབ། །ཅེས་རྒྱུད་ཀྱི་དགོངས་དོན་དང་མཚུངས་པར་ཡང་བཟློག་ནག་པོ་མེའི་སྤུ་གྲིའི་ལས་སྦྱོར་རྩ་བསྙེན་གྱི་གོང་གནོན་ཟླ་གསང་ཞི་བསྙེན་གྱི་སྔོན་འགྲོར་འཇམ་དཔལ་ཞི་བ་ཡེ་ཤེས་སེམས་དཔའི་བསྙེན་པ་བྱ་དགོས་པ་ཡང་བཟློག་གི་ཆོས་སྐོར་དུ་ས་བཅད་ཙམ་ལས་མེད་ཅིང་། དེ་ལ་བརྟེན་ནས་གོང་མ་རྣམས་ཀྱིས་ཡང་བཟློག་དང་འབྲེལ་མཚུངས་པའི་འཇམ་དཔལ་གྱི་སྒྲུབ་སྐོར་ཇི་ལྟར་རིགས་པ་ཐུགས་ཉམས་སུ་བསྟར་བ་ལས་ཡིག་ཆར་འཁོད་པ་མ་བྱུང་ལ། (༢བ)
ཕྱིས་སུ་རྗེ་འབྲི་གུང་པ་ཆེན་པོ་དབུར་སྨྱོན་ཆོས་ཀྱི་གྲགས་པས་ཡིག་ཆ་ཞིག་མཛད་པ་དངོས་གཞི་ཤིན་ཏུ་ལེགས་ནའང་ཕྱིས་འགྱུར་གྱི་ཆོ་ག་དང་འབྲེལ་བ་ཞིག་འདུག་པ་དེ་ཉིད་མི་རུང་བ་མ་ཡིན་མོད། འོན་ཀྱང་གཏེར་བྱོན་རྡོ་རྗེའི་གསུང་འཁྲུལ་པ་མེད་པ་ཉམས་སུ་བླང་བྱ་ཡོད་བཞིན་དུ་དེ་ཁོ་ན་ལྟར་བྱེད་པར་རིགས་ཤིང་། དེའང་གོང་དུ་སྨོས་པ་གསུམ་གྱི་ནང་ནས་མངོན་རྟོགས་སོགས་ལྕགས་སྡིག་གི་ཞི་བའི་སྒྲུབ་པ་དང་ཡང་བཟློག་གི་ཐུགས་ཀའི་འཇམ་དཔལ་འབྲེལ་མཚུངས་པས་དེའི་དགོངས་དོན་ལྟར་ཉམས་སུ་བླང་བ་ལ། སྔོན་འགྲོ་ནི། དེ་ཉིད་ལས། བྱང་ཆུབ་དབེན་པའི་གནས་མཆོག་ཏུ། །ས་བཟང་སྲོག་ཆགས་མེད་པ་ལ། །ཡང་ན་རིན་ཅེན་ཤིང་ལ་ནི། །མཎྜལ་མདའ་གང་གྲུ་བཞིར་བཞེང་༔ འོད་ལྔ་ཁ་དོག་ལེགས་པར་བྲི། །དཀྱིལ་དུ་ཨ་ལྔ་འོད་ཀྱི་གཟུགས། །སྐུ་ལྔ་རིགས་ལྔའི་ངོ་བོ་ལས༔ སྟེང་དུ་དར་སྣ་ལྔ་ཡི་གུར༔ མཆོད་ལྔ་གཏོར་མ་ལེགས་པར་བཤམས༔ རོལ་མོ་སྣ་ཚོགས་ཡིད་འོང་བཤམས༔ ཕྱི་ནང་གཏོར་མས་མཆོད་བྱས་ལ༔ ཞེས་པ་ལྟར་གནས་ཁང་ཕྱག་དར་བྱ། སྲོག་ཆགས་མེད་ཅིང་བཀྲ་ཤིས་པའི་ས་ལ་སྟེགས་བུའམ་ཡང་ན་ཅོག་ཙེ་ལྟ་བུའི་སྟེང་དུ་རིན་པོ་ཆེ་དང་ཤིང་སོགས་ལས་གྲུབ་པའི་མཎྜལ་མདའ་གང་གྲུ་བཞི་ཁོད་སྙོམས་པར་འོད་ལྔའི་དཀྱིལ་འཁོར་དབུས་སུ་འཇམ་དཔལ་རིགས་ལྔའི་ས་བོན་རང་མདོག་དང་མཐུན་པ་མཐོང་བརྒྱུད་ཀྱི་ཕྱག་ལེན་ལྟར་འབྲི་དར་ཚོན་སྣ་ལྔའི་གུར་ཕུབ། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ། གཏོར་མ་ཟླུམ་པོ་པད་འདབ་ཅན་སྨན་རག་ཚོགས་གཞི་བགེགས་ཀྱི་གཏོར་མ་སོགས་མཁོ་བའི་ཡོ་བྱད་རྣམས་(༣ན)
མངོན་པར་འདུ་བྱས། དེའང་རྫོགས་ཆེན་དང་འབྲེལ་བའི་དབང་དུ་བྱས་ན་གདོན་བགེགས་རང་སྣང་རིག་པའི་ཆོ་འཕྲུལ་ལས་ལོགས་སུ་མེད་པས་ཀ་དག་གི་དབྱིངས་སུ་གནོད་བྱ་གནོད་བྱེད་དང་བྲལ་ནའང་སྒྱུ་མའི་སྲིན་པོ་ལྟར་ཀུན་རྫོབ་དང་བསྟུན་ཏེ་རང་ཉིད་ཟིལ་གནོན་གཤིན་རྗེའི་གཤེད་ཀྱི་ང་རྒྱལ་ལ་གནས་པས་གཞི་བགེགས་ལ་བཀའ་བསྒོ་བ་ནས་སྲུང་འཁོར་གྱི་བར་ལས་བྱང་རྡོ་རྗེའི་ཐོག་མདའ་བཞིན་བྱ། སྐྱབས་འགྲོ་སེམས་བསྐྱེད་སྡོམ་པ་བཟུང་བ་ནི། དཀོན་ཅོག་གསུམ་ལ་སྐྱབས་སུ་མཆིའོ༔ དཀོན་ཅོག་གསུམ་ལ་ཕྱག་འཚལ་ལོ༔ སྡིག་པ་ཐམས་ཅད་སོ་སོར་བཤགས༔ དགེ་བ་ཀུན་ལ་རྗེས་སུ་སྨོན༔ སངས་རྒྱས་བྱང་ཆུབ་ཡིད་ཀྱིས་བཟུང་༔ བྱང་ཆུབ་མཆོག་ཏུ་སེམས་ནི་བསྐྱེད༔ དུས་གསུམ་སངས་རྒྱས་ཐམས་ཅད་ཀྱི༔ ཐུགས་ཀྱི་སྲས་སུ་མཛད་དུ་གསོལ༔ ལན་གསུམ། གསང་བ་མཆོག་གི་དཀྱིལ་འཁོར་དུ༔ བླ་མེད་གནས་སུ་སྒྲུབ་པ་དང་༔ བདེ་གཤེགས་དངོས་གྲུབ་ཐོབ་བྱའི་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ ཞེས་ལན་གསུམ་བརྗོད༔ སྔོན་འགྲོར་ཞི་བ་འཇམ་དབྱངས་བསྒོམ་ཞིང་མཚན་བརྗོད་བཀླག་པ་ནི། ཆོས་ཀུན་སྟོང་ཉིད་ནམ་མཁའ་ལྟ་བུའི་ངང་༔ ཞེས་པ་ནས༔ འཛིན་མེད་རང་སར་གྲོལ་བའི་རྒྱུར་གྱུར་ཅིག་གི་བར་ལས་བྱང་ཆེན་མོ་བཞིན་བྱ། ཏྲཾ་རཏྣ་མཎྜ་ལ། པཾ་པདྨ་མཎྜ་ལ། མ་སཱུཪྱ་མཎྜ་ལ། ཨ་ཙནྡྲ་མཎྜལ། བཛྲ་ས་མ་ཡ་ཧཱུཾ་ཛཿ རྡོ་རྗེ་སློབ་དཔོན་སངས་རྒྱས་དཔལ་སོགས་ཀྱིས་ཚོགས་ཞིང་དཀྱུས་ལྟར་དང་། ཧཱུཾ། ངོ་བོ་ཆོས་སྐུ་སྤྲོས་བྲལ་མཁའ་དབྱིངས་ནས། །རང་(༣བ)
བཞིན་ལོངས་སྐུ་འཇམ་དཔལ་རིགས་ལྔའི་ཚོགས། །ཐུགས་རྗེ་སྣ་ཚོགས་སྤྲུལ་པའི་ཟློས་གར་གྱིས། །སྐུ་གསུང་ཐུགས་ཡོན་འཕྲིན་ལས་བྱིན་ཆེན་ཕོབ། །ཨཱོཾ་མཉྫུ་ཤྲཱི་ས་མ་ཡ་ཨ་བེ་ཤ་ཡ་ཨ་ཨས་བྱིན་དབབ། རྟེན་གཏོར་དོར་བའི་སྨན་རག་གཏོར་གསུམ་དང་མཆོད་པ་བྱིན་རླབས་ལས་བྱང་ལྟར་བྱ། དངོས་གཞི་ནི་གཏེར་གཞུང་ལས། དེ་རྫོགས་བསམ་གཏན་ཏིང་འཛིན་ནི༔ རང་ཉིད་འཇམ་དཔལ་སེར་པོར་བསྐྱེད༔ ཅེས་སོགས་ཀྱི་དགོངས་དོན་ཅུང་ཟད་ཁ་བཀང་བ་ནི། ཧཱུཾ། ཆོས་རྣམས་ཐམས་ཅད་ཀ་ནས་དག་པའི་གཤིས། །མ་སྐྱེས་འགག་མེད་གང་དུ་མི་གནས་པ། །རང་རིག་གདོད་མའི་མགོན་པོ་འཇམ་དཔལ་དབྱངས། །ལྷུན་གྲུབ་འོད་གསལ་འདུས་མ་བྱས་པའི་དབྱིངས། །སྲ་མཁྲེགས་སྲུང་བའི་འཁོར་ལོ་ཡངས་པའི་ནང་། །ཆུ་ལས་ཉ་འཕར་བཞིན་དུ་པདྨ་དང་། །ཉི་མའི་གདན་སྟེང་རང་ཉིད་འཇམ་དཔལ་དབྱངས། །སྐུ་མདོག་སེར་པོ་གུར་གུམ་མདངས་དང་ལྡན། །ཞལ་གཅིག་ཕྱག་གཉིས་གཡས་པ་ཤེས་རབ་ཀྱི། །རལ་གྲི་འཕྱར་ཞིང་གཡོན་པ་ཨུཏྤ་ལའི། །ཡུ་བ་ནས་འཛིན་དགུང་ཐད་འདབ་སྟེང་དུ། །བསྟོད་པ་གླུར་བླངས་ལེའུའི་གླེགས་བམ་བསྣམས། །རིན་ཅེན་དབུ་རྒྱན་སྙན་ཆ་མགུལ་རྒྱན་དང་། །ཕྱག་ཞབས་གདུ་བུ་དོ་ཤལ་སེ་མོ་དོ། །ཆོས་ཉིད་འཁོར་ལོ་དབུ་ཡི་གཙུག་ན་མཛེས། །སྲབ་འཇམ་དར་གྱི་སྟོད་གཡོགས་ལྷབ་ལྷུབ་དང་། པཉྩ་ལི་ཀའི་ཤམ་ཐབས་རྣམ་པར་ཀླུབས། །ཞི་ཞིང་འཛུམ་ལྡན་བཅུ་དྲུག་ལང་ཚོ་ཅན། །ཞབས་གཉིས་མི་ཕྱེད་རྡོ་རྗེའི་སྐྱིལ་ཀྲུང་གིས། །ཡེ་ཤེས་འོད་ལྔ་འབར་བའི་ཀློང་ན་བཞུགས། །(༤ན)
ཐུགས་ཀར་ཐབས་ཤེས་ཟུང་འཇུག་ཉིན་མཚན་གྱིས། །མདངས་མཚོན་ཟླ་ཉི་ཁ་སྦྱོར་གའུའི་ནང་། །འཇའ་འོད་ཀློང་དུ་ཨ་ཡིག་མཐིང་དཀར་སེར། །དམར་ལྗང་ཐ་མར་སྙིང་པོའི་སྔགས་ཀྱིས་བསྐོར། །ཞེས་བདག་བསྐྱེད་ཀྱི་ཏིང་འཛིན་སྔོན་དུ་བཏང་སྟེ་མདུན་བསྐྱེད་བསྒྲུབ་པ་ནི། ཆོས་སྐུ་སྟོང་པའི་རང་མདངས་མ་འགགས་པའི། །ཡེ་ཤེས་འོད་ལྔའི་འཇའ་རིས་རྣམ་བཀྲ་བ། །ཐིག་ལེ་རྣམ་ལྔའི་ཚོམ་བུའི་གུར་ཁང་ནང་། །གདོད་ནས་རྣམ་དག་ལྷུན་གྱིས་གྲུབ་པའི་ལྷ། །དབུས་དང་ཕྱོགས་བཞིར་འཇམ་དཔལ་རིགས་ལྔ་ནི། །ཉོན་མོངས་ལྔ་དག་ཡེ་ཤེས་རྣམ་ལྔའི་མདངས། །མ་འདྲེས་མཐིང་དཀར་སེར་དམར་ལྗང་གུའི་མདོག །ཞི་ཞིང་འཛུམ་ལྡན་བཅུ་དྲུག་ན་ཚོད་ཅན། །རལ་པའི་ཟུར་ཕུད་ལྔ་ལྡན་རིན་ཅེན་རྒྱན། །སྣ་ཚོགས་དར་གྱི་ན་བཟའ་མཛེས་པར་གསོལ། །ཕྱག་གཡས་ཤེས་རབ་རལ་གྲིའི་འཆང་བཟུང་ནི། །རྡོ་རྗེ་འཁོར་ལོ་རིན་ཅེན་པདྨ་དང་། །རྒྱ་གྲམ་རང་རྟགས་ལས་གྲུབ་ཡུ་བ་འཛིན། །གཡོན་པ་ཐུགས་ཀར་ཨུཏྤལ་རྩ་བ་ནས། །བཟུང་བའི་འདབ་སྟེང་མཚན་བརྗོད་གླེགས་བམ་བསྣམས། །ཞབས་གཉིས་སྐྱིལ་ཀྲུང་པད་ཉིའི་གདན་ལ་བཞུགས། །ཐུགས་ཀར་ཟླ་ཉི་ཁ་སྦྱར་གའུའི་ནང་། །འཇའ་ཚོན་འོད་ལྔའི་གུར་དབུས་རང་རང་གི །མདོག་ལྡན་ཨ་ཡིག་ཐ་མར་ཡི་གེ་དྲུག །སུམ་ཅུ་རྩ་དྲུག་སྔགས་ཀྱིས་ཡོངས་སུ་བསྐོར། །བདག་མདུན་ལྷ་ཚོགས་རྣམས་ཀྱི་གནས་གསུམ་དུ། །ཨཱོཾ་དཀར་ཨཱཿདམར་ཧཱུཾ་ཡིག་མཐིང་ག་ཡིས། །མཚན་པ་ལས་འཕྲོས་ཡེ་ཤེས་ལྷ་ཚོགས་རྣམས། །དབྱིངས་(༤བ)
རིག་དག་པའི་ཀློང་ནས་ས་མཱ་ཛཿ། ཧཱུྃ། རང་བཞིན་སྤྲོས་བྲལ་ཆོས་ཉིད་ཕོ་བྲང་ནས༔ རང་བྱུང་ཡེ་ཤེས་ཞི་བའི་ཆ་ལུགས་ཅན༔ གསེར་མདོག་གཟི་མདངས་འོད་ཟེར་ཕྱོགས་བཅུར་འཕྲོས༔ ཕྱག་གཉིས་ཤེས་རབ་རལ་གྲི་པོ་ཏི་ཅན༔ བདེན་པ་དབྱེར་མེད་འཇའ་ཚོན་ཀློང་ན་བཞུགས༔ མ་རིག་རྟོག་པའི་མུན་པ་སེལ་བའི་ཕྱིར༔ རང་བྱུང་ཡེ་ཤེས་སྤྱན་འདྲེན་གཤེགས་སུ་གསོལ༔ ཨེ་ཧྱེ་ཧི་བྷ་ག་ཝཱ་ན་མཉྫུ་ཤྲཱི་ནྱ་པ་ཏ་མ་ཧཱ་ཀ་རུ་ཎི་ཀ་ཏྲི་ཤ་ཧོ༔ས་མ་ཡ་ཧོཿ ས་མ་ཡ་སྟྭཾཿ ཛ་ཧཱུཾ་བཾ་ཧོཿ ཞེས་སྤྱན་དྲངས་ཤིང་བསྟིམ། ཧཱུཾ། དབྱིངས་དང་ཡེ་ཤེས་གཉིས་སུ་མེད་པ་ཡི༔ འཁོར་འདས་དབྱེར་མེད་བདེ་བ་ཆེན་པོའི་ངང༔ མ་རྟོགས་བློ་ཡི་ཞེན་པ་སྒྲོལ་བའི་ཕྱིར༔ རང་བྱུང་ཡེ་ཤེས་འཕོ་འགྱུར་མེད་པར་བཞུགས༔ ཨོཾ་མཉྫུ་ཤྲཱི་ཛྙཱ་ན་སརྦ་དྷརྨ་དྷཱ་ཏུ་མ་ཧཱ་སུ་ཁ་ཧཱུཾ་ཨ་ཨཱཿས་བཞུགས་སུ་གསོལ། ཧཱུཾ། མི་གནས་མ་བཅོས་དག་པ་ཆོས་སྐུ་ལས༔ རང་སྣང་ཡེ་ཤེས་དཔལ་གྱི་སྐུར་གསལ་ནས༔ གང་ལ་གང་འདུལ་སྤྲུལ་པའི་འབྱུང་གནས་ཏེ༔ འཇམ་དཔལ་རིགས་ལྔའི་སྐུ་ལ་ཕྱག་འཚལ་བསྟོད༔ ཨ་ཏི་པུ་ཧོཿཔྲ་ཏི་ཛ་ཧོ༔ ཞེས་ཕྱག་བྱ། ཧཱུཾ། མཁའ་དབྱིངས་ཀློང་ཡངས་ཀུན་ཏུ་བཟང་པོའི་ངང་༔ རང་འོད་རང་སྣང་ཀུན་བཟང་རོལ་པའི་སྤྲིན༔ ཕྱི་ནང་གསང་བའི་མཆོད་སྤྲིན་མ་ལུས་པ༔ གཉིས་མེད་རང་སྣང་ངང་ལ་ཐིམ་པར་འབུལ༔ ཨོཾ་མཉྫུ་ཤྲཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ་ནས་ཤཔྟ་པྲ་ཏཱིཙྪ་སྭཱཧཱའི་བར་གྱིས་མཆོད། ཧཱུཾ། རང་བྱུང་གདོད་ནས་དག་པའི་བཅུད༔ རིགས་ལྔ་དམ་ཚིག་ལྔ་ཡི་དངོས༔ ཡེ་ཤེས་ལྔ་རྫོགས་གྲུབ་པའི་(༥ན)
རྫུས༔ རྒྱུད་དྲུག་སེམས་ཅན་ཀུན་སྒྲོལ་བ༔ དུག་ལྔ་སེལ་བའི་བདུད་རྩི་འདི༔ བླ་མ་ཡི་དམ་རྣམས་ལ་འབུལ༔ སརྦ་པཉྩ་ཨ་མྲྀ་ཏ་ཁཱ་ཧིཿ བླ་མ་བརྒྱུད་མཆོད་ནི༔ ཉམས་ལེན་དཀྱུས་མ་ལ་ལས་བྱང་ཆེན་མོ་ལྟར་དང་། ཡང་བཟློག་གི་སྔོན་འགྲོར་སྒེར་དུ་བྱེད་ན། དེ་གའི་རྒྱུན་མཆོད་ལེན། དུག་ལྔ་རང་གྲོལ་ཡེ་ཤེས་ལྔ་ཡི་བདག༔ བཅོམ་ལྡན་འཇམ་དཔལ་ཡེ་ཤེས་སེམས་དཔའ་ལ༔ རྣམ་དག་བདུད་རྩིའི་དམ་རྫས་མཉེས་མཆོད་འབུལ༔ ཐུགས་རྗེ་ཆེར་དགོངས་དབང་དང་དངོས་གྲུབ་སྩོལ༔ ཨོཾ་མཉྫུ་ཤྲཱི་སརྦ་པཉྩ་ཨ་མྲི་ཏ་ཁཱ་ཧིཿ ཞེས་སྨན་མཆོད་འབུལ། ཨོཾ་ཨཱཿཧཱུཾ། དཔལ་ལྡན་རྡོ་རྗེ་སྐུ་གསུང་ཐུགས་འཆང་བ༔ མི་ཕྱེད་རྡོ་རྗེ་སྐུ་གསུང་ཐུགས་དང་ལྡན། །དེང་བདག་འཇམ་དཔལ་སྐུ་གསུང་ཐུགས་འཛིན་པ། །འཇམ་དཔལ་སྐུ་གསུང་ཐུགས་ཀྱི་དངོས་གྲུབ་སྩོལ། །ཨོཾ་མཉྫུ་ཤྲཱི་ཀཱ་ཡ་སིདྡྷི་ཨཱོཾ་ཝཱ་ཀ་སིདྡྷི་ཨཱཿཙིཏྟ་སིདྡྷི་ཧཱུཾ་གིས་དངོས་གྲུབ་བླངས། ཧཱུཾ། རང་བཞིན་སྤྲོས་བྲལ་ཆོས་ཉིད་དག་པ་ལ། །འགྲོ་མགོན་རང་བྱུང་འཇམ་དཔལ་ཡེ་ཤེས་སེམས༔ རང་རྒྱུད་བཅིངས་པའི་བདག་འཛིན་མཚན་མའི་ཆོས༔ བདག་མེད་རྒྱལ་བའི་ཞིང་དུ་སྦྱོར་བའི་ཕྱིར༔ རང་སྣང་ཞེན་བྲལ་འདོད་ཡོན་ལྷ་མོས་མཆོད༔ བདུད་རྩི་སྨན་རཀ་དམ་རྫས་གཏོར་མ་རྣམས༔ རིགས་ལྔ་དབྱེར་མེད་ཀློང་དུ་འབུལ་ལགས་ན༔ གཉིས་སུ་མེད་པའི་དོན་གྱིས་བཞེས་ནས་ཀྱང་༔ མཚན་མའི་རྣམ་རྟོག་བག་ཆགས་ཞི་བར་མཛོད༔ ཨོཾ་མཉྫུ་ཤྲཱི་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧིཿ མ་ཧཱ་རཀྟ་ཁ་རཾ་ཁཱ་ཧིཿ མཧཱ་བ་ལིངྟ་ཁ་(༥བ)
རཾ་ཁཱ་ཧི༔ ཞེས་པས་ནང་གི་མཆོད་པ་འབུལ། ཧཱུཾ། འཇམ་དཔལ་དཔལ་དང་ལྡན་པའི་མཆོག༔ མཆོག་སྦྱིན་རྡོ་རྗེ་མཆོག་ཁྱོད་འདུད༔ ཡང་དག་མཐར་གྱུར་ཁྱོད་ལ་འདུད༔ སྟོང་ཉིད་ལས་བྱུང་ཁྱོད་ལ་འདུད༔ སངས་རྒྱས་བྱང་ཆུབ་ཁྱོད་ལ་འདུད༔ སངས་རྒྱས་ཆགས་པ་ཁྱོད་ལ་འདུད༔ སངས་རྒྱས་འདོད་ལ་ཕྱག་འཚལ་འདུད། སངས་རྒྱས་དགྱེས་པ་ཁྱོད་ལ་འདུད༔ སངས་རྒྱས་རོལ་པ་ཕྱག་འཚལ་འདུད། སངས་རྒྱས་འཛུམ་པ་ཁྱོད་ལ་འདུད༔ སངས་རྒྱས་བཞད་པ་ཕྱག་འཚལ་འདུད། སངས་རྒྱས་གསུང་ཉིད་ཁྱོད་ལ་འདུད༔ སངས་རྒྱས་ཐུགས་ལ་ཕྱག་འཚལ་འདུད༔ མེད་པ་ལས་བྱུང་ཁྱོད་ལ་འདུད༔ སངས་རྒྱས་འབྱུང་བ་ཁྱོད་ལ་འདུད༔ ནམ་མཁའ་ལས་བྱུང་ཁྱོད་ལ་འདུད༔ ཡེ་ཤེས་ལས་བྱུང་ཁྱོད་ལ་འདུད༔ སྒྱུ་འཕྲུལ་དྲ་བ་ཁྱོད་ལ་འདུད༔ སངས་རྒྱས་རོལ་སྟོན་ཁྱོད་ལ་འདུད༔ ཐམས་ཅད་ཐམས་ཅད་ཁྱོད་ལ་འདུད༔ ཡེ་ཤེས་སྐུ་ཉིད་ཁྱོད་ལ་འདུད༔ ཅེས་པས་བསྟོད། ཧོཿ རང་བཞིན་རྣམ་པར་དག་པའི་གཞལ་ཡས་ནས༔ རང་བྱུང་ཡེ་ཤེས་ཆེན་པོའི་སྐུ༔ མཚན་ལྡན་ཞི་བའི་ཆ་ལུགས་སུ་བཞུགས་པ། བཅོམ་ལྡན་འདས་འཇམ་དཔལ་རིགས་ལྔ་མཁྱེན་པར་མཛོད་ཅིག་དགོངས་སུ་གསོལ་ལོ། །རང་བཞིན་རྣམ་པར་དག་པའི་མཆོད་པ། ཡེ་ཤེས་ཀྱི་རོལ་པ་འདོད་པའི་ཡོན་ཏན་དང་བདུད་རྩིའི་ཆུ་རྒྱུན་དུ་བྱིན་གྱིས་བརླབས་ཏེ་འབུལ་ན་ཐུགས་རྗེ་ཆེན་པོས་བཞེས་ཤིང་ལོངས་སྤྱད་དུ་གསོལ། ཆོས་ཐམས་ཅད་རང་བྱུང་ཡེ་ཤེས་ཡིན་པ་ལ་ཡིན་པར་མ་ཤེས་པས་དངོས་པོ་ལ་མངོན་པར་ཞེན་པ་སྟེ། རྩ་བ་དང་ཡན་ལག་གི་དམ་ཚིག་ལ་ཉམས་ཆགས་དང་འགལ་འཁྲུལ་དུ་གྱུར་པ་མཐོལ་ཞིང་བཤགས༔ རང་བྱུང་ཡེ་ཤེས་དོན་མཆོག་དང་ཐུན་མོང་གིས་བསྡུས་པ༔ དུས་དང་ལས་ལ་རག་མ་ལུས་པར་ད་ལྟ་ཉིད་དུ་སྩལ་(༦ན)
དུ་གསོལ༔ འདུ་བའི་ནད་དང་བར་གཅོད་ཀྱི་གདོན་ཞི་བ་དང་ཚེ་དང་བསོད་ནམས་དང་ཡེ་ཤེས་རྒྱས་པ་དང་སེམས་ཀྱི་ཆོས་ཉིད་ལ་རང་དབང་བསྒྱུར་ཏེ་རྟོག་པའི་མཚན་མ་ཐམས་ཅད་དབྱིངས་སུ་གཞོམ་དུ་གསོལ། ཞེས་གསོལ་བ་གདབ་ཅིང་ནོངས་པ་བཤགས། དེ་ནས་བསྐྱེད་རིམ་ལ་གསལ་སྣང་ཐོན་པ་བསྒོམ། གཏེར་གཞུང་ལས། བཟླས་བརྗོད་བྲལ་བ་སྙིང་པོའི་དོན༔ བསམ་གཏན་དྲན་རིག་ངེས་དོན་བཟུང་༔ ཞེས་ལྷུན་གྲུབ་འོད་ལྔ་བསྐྱེད་རིམ་གྱི་གསལ་སྣང་མཐའ་དག་ཀ་དག་གི་དབྱིངས་སུ་རྒྱས་བཏབ་སྟེ་དེའི་གནས་ལུགས་ཀྱི་དོན་ལ་ཅི་གནས་སུ་བཞག །གཏེར་གཞུང་ལས། དེ་ལ་གནས་པ་འགྱུ་བ་གནས༔ ཞེས་རྟོག་པ་འཕྲོ་བ་ན་འཛབ་བཟླ་བ་ནི། བདག་མདུན་བསྐྱེད་རིམ་སྔགས་འཁོར་རབ་གསལ་བའི། །རང་གི་ཐུགས་ལས་འོད་ཟེར་འཇའ་ལྟ་བུ། །འཕྲོས་པས་མདུན་བསྐྱེད་ཐུགས་བསྐུལ་འོད་ཟེར་འཕྲོས། །སངས་རྒྱས་བྱང་སེམས་སྐྱབས་གསུམ་མ་ལུས་དང་། ཁྱད་པར་འཇམ་དཔལ་རིགས་ལྔའི་ལྷ་ཚོགས་ལ། །མཆོད་པ་ཕུལ་བས་མཉེས་ཤིང་དེ་རྣམས་ཀྱི། །མཁྱེན་བརྩེ་ནུས་མཐུ་སྐུ་གསུང་ཐུགས་ཡོན་དང་། །འཕྲིན་ལས་བྱིན་རླབས་མ་ལུས་རབ་བསྡུས་ཤིང་། ཁྱད་པར་རིགས་ལྔ་སོ་སོའི་ཁ་དོག་དང་། །མཚུངས་པའི་ཨ་ཡིག་ཆར་བབས་བདག་མདུན་ལ། །ཐིམ་ཞིང་མདུན་བསྐྱེད་རིགས་ལྔའི་ཚོགས་ལས་ཀྱང་། །བྱིན་རླབས་ཡེ་ཤེས་རང་འོད་འཇའ་ཚོན་དང་། །ཡིག་འབྲུའི་རྣམ་པ་སྐྱེ་བ་མེད་པའི་སྒྲ། །བརྗོད་བྲལ་བརྗོད་པའི་ངང་ནས་བདག་ཉིད་དང་། །དབྱེར་མེད་འཇའ་རིས་འོད་ལྔའི་(༦བ)
གོང་བུར་གྱུར། །སླར་འཕྲོས་སྣོད་བཅུད་ཀུན་ཚང་སྣོད་གཞལ་ཡས། །བཅུད་ཀུན་ལྷར་གྱུར་གསང་སྔགས་འབྲུག་ལྟར་སྒྲོག །འཁོར་འདས་རྣམས་ཀྱི་ཕུན་ཚོགས་ཡོན་ཏན་ཀྱང་། ཁབ་ལེན་རྡོ་དང་ལྕགས་ཀྱི་སྣང་ཚུལ་བཞིན། །མ་ལུས་བདག་ལ་འདུས་ཏེ་རོ་གཅིག་གྱུར། །ཨོཾ་བཛྲ་མཉྫུ་ཤྲཱི་ཨཿ ཨཱོཾ་ཝཱ་གི་ཤྭ་རི་མུཾ༔ དྷརྨ་དྷཱ་ཏུ་སངྒྷ༔ ཛྙཱ་ན་གརྦྷ་ཨ་ཧྲཱི༔ ཨ་ཨི་ཨེ་ཨོ་ཨཾ་ཨ༔ ར་ལི་ལ་ལི་ཡེ་ཧཱུཾ། ཡང་བཟློག་གི་གོང་བསྙེན་མིན་པའི་འདི་ག་ལ་ཆིག་དྲིལ་ཡིན་ན་ཡི་གེ་དྲུག་པ་འདི་སྟོང་ཕྲག་དྲུག་བཟླས་པས། གཏེར་གཞུང་ལས། ཡི་གེ་དྲུག་པ་རྡོ་རྗེའི་སྒྲ༔ འཇམ་དབྱངས་ཆེན་པོ་སྒྲ་ཆེ་བ༔ སྔགས་འདི་སྟོང་ཕྲག་དྲུག་གིས་ནི༔ མཚན་མའི་བག་ཆགས་སྒྲིབ་པ་དག༔ འོད་ལྔ་ཁ་དོག་འཇའ་འོད་འབྱུང་༔ ཞེས་པའི་དོན་ཡིན་ཞིང་། ཟླ་གསང་གཞི་བསྙེན་གྱི་སྔོན་འགྲོ་གཙོ་བོར་བྱེད་ན་ཡི་གེ་དྲུག་པའི་འཛབ་འདི་ཐོག་མཐར་ཅུང་ཟད་རེ་བཟླ་ཞིང་། གཙོ་བོ་ཝཱ་གི་ཤྭ་རི་ལ་ཆིག་དྲིལ་དུ་བྱས་པའི་འབུམ་ཕྲག་དྲུག་གིས་འགྲུབ་པར་ཟླ་གསང་རྩ་རྒྱུད་ལས། ཡེ་ཤེས་སེམས་དཔའ་བསྒོམས་བྱས་ནས༔ ཝཱ་གི་ཤྭ་རི་དྲུག་འབུམ་བཟླས༔ ཞེས་པ་ལྟར་རོ། །གཞན་ཡང་གཏེར་གཞུང་ལས། བཏགས་གྲོལ་དངོས་གྲུབ་བླང་བར་བྱ༔ ཚེ་ཡི་བདག་པོར་འདོད་པས་ན༔ ཞེས་མ་བསྒོམས་སངས་རྒྱས་ཀྱི་ཆོས་ལྔའི་ནང་ཚན་བཏགས་གྲོལ་གྱི་མན་ངག་དང་ཚེ་ཉི་ཟླ་དང་མཉམ་པར་འགྱུར་བའི་ཉམས་ལེན་ཀྱང་ཞལ་ལས་ཤེས་ཤིང་། ཡང་དེ་ཉིད་ལས། རྡོ་རྗེའི་བཟླས་པ་བྱ་བ་ནི༔ སོགས་ཀྱི་དགོངས་དོན་རྫོགས་རིམ་གྱི་གནད་གསང་ཟབ་མོ་དང་། ཡང་དེ་ཉིད་(༧ན)
ལས། ཞི་རྒྱས་དབང་དྲག་མངོན་སྤྱོད་རྣམས༔ ཞེས་དང་། ཆོས་ཉིད་འཆི་ཁའི་འཕོ་བ་ནི༔ སོགས་ཀྱི་གནས་སྐབས་ལས་ཀྱི་ཁ་བསྒྱུར་དང་སྡིག་པོ་ཆེ་བཙན་ཐབས་སུ་འཚང་རྒྱ་བའི་མྱུར་ལམ་ཟབ་མོ་རྣམས་ཀྱང་པད་གནུབས་གདམས་པའི་མན་ངག་ལ་འདྲིས་པར་བྱས་ཏེ་ཉམས་སུ་བླང་ངོ་། །མཇུག་ཆོག་ནི། ཨཱོཾ་ཨཱཿཧཱུཾ་ཧྲཱིཿས་ཚོགས་བྱིན་གྱིས་བརླབས། འཇམ་དཔལ་རིགས་ལྔའི་ལྷ་ཚོགས་རྣམས༔ ལོངས་སྤྱོད་ཚོགས་ལ་སྤྱན་འདྲེན་གཤེགས༔ གཟུགས་སྒྲ་དྲི་རོ་རེག་བྱ་ཆོས། །ཟག་མེད་བདུད་རྩིའི་མཆོད་པ་འབུལ། །ཨཱོཾ་མཉྫུ་ཤྲཱི་ག་ཎ་ཙཀྲ་པཱུ་ཛ་ཁཱ་ཧིཿ ཞེས་པས་འབུལ། བདག་སོགས་དུག་ལྔའི་དབང་གྱུར་ཏེ། །ཡེ་ཤེས་དག་པའི་རང་བཞིན་ལ། །དངོས་པོར་བཟུང་བའི་ཉེས་པ་ཀུན། །འཇམ་དཔལ་ལྷ་ཚོགས་རྣམས་ལ་བཤགས། །ཡིག་བརྒྱ་བརྗོད་དེ་བཤགས། ལྷག་མ་དཀྱུས་བཞིན་གཏོང་། །བཅོམ་ལྡན་འཇམ་དཔལ་རིགས་ལྔ་འཁོར་བཅས་ལ། ཁྱད་པར་མཆོད་པ་པཉྩ་ཨ་མྲྀ་ཏ། །ཞེས་སོགས་ཀྱིས་གཏང་རག །གཞོན་ནུའི་སྐུ་ལུས་འཆང་བ་པོ་སོགས་ཀྱིས་བསྟོད། ཡི་དམ་འཇམ་དཔལ་རིགས་ལྔ་འཁོར་བཅས་ལ། །བསྙེན་སྒྲུབ་འཕྲིན་ལས་གཞུང་བཞིན་ཞེས་སོགས་ཀྱིས་བཟོད་པར་གསོལ། སྣོད་བཅུད་སྲུང་འཁོར་ལ་ཐིམ་དེ་མདུན་བསྐྱེད། །དེ་ཡང་བདག་ཐིམ་སྟོད་སྨད་ནས་ཞུ་སྟེ། །རིམ་གྱིས་ས་བོན་ལ་ཐིམ་ཇེ་ཕྲའི་མཐར། །གནས་ལུགས་སྤྲོས་བྲལ་ངང་ལས་ལྷ་སྐུར་ལྡང་། །ཞེས་ཉེར་བསྡུ་བྱ། འཇམ་དཔལ་རིགས་ལྔའི་(༧བ)
རྣམ་འབྱོར་ཟབ་མོ་ལ། །བརྟེན་ནས་ཡི་གེ་དྲུག་པ་རྡོ་རྗེའི་སྒྲ། །ཉམས་སུ་བླངས་པས་ཚེ་འདིར་འཇའ་ལུས་སྐུ། །མངོན་གྱུར་འཇམ་དཔལ་ཀུན་བཟང་ཐོབ་པར་ཤོག །ཅེས་སྨོན་ལམ་གདབ། འཇམ་དཔལ་རིགས་ལྔའི་དཀྱིལ་འཁོར་ལྷ་ཚོགས་ཀྱི། །སྐུ་གསུང་ཐུགས་ཀྱི་ཡོན་ཏན་བསམ་ཡས་པ། །འགྲོ་བ་ཀུན་གྱི་རྒྱུད་ལ་རབ་ཞུགས་ནས། །དངོས་གྲུབ་རྣམ་གཉིས་འཕེལ་བའི་བཀྲ་ཤིས་ཤོག །སོགས་ཤིས་པ་བརྗོད་པར་བྱའོ། །སངས་རྒྱས་ཀུན་གྱི་ཡབ་གཅིག་འཇམ་དཔལ་དབྱངས། །བདེ་སྟོང་རིགས་ལྔར་ཤར་བའི་དཀྱིལ་འཁོར་ལ། །བརྟེན་ནས་ཚེ་འདིར་འཇའ་ལུས་བསྒྲུབ་པའི་ཐབས། །ཉམས་སུ་ལེན་པའི་བློ་ལྡན་སྐལ་བཟང་དཔྱིད། །སྒྱུ་འཕྲུལ་དྲ་བའི་རྒྱུད་ཀྱི་བཅུད་ཕྱུང་པ། །བསྟོད་པ་གླུར་བླངས་ཡང་སྙིང་སྐྱེ་མེད་དོན། །འཇམ་དཔལ་བཤེས་གཉེན་ཞལ་ལུང་གནུབས་བན་གྱི། །དཀའ་སྤྱད་རྒྱ་བལ་ནས་བསྒྱུར་ཆོས་སྡེ་ཡི། །འདི་དོན་ཉམས་སུ་བསྟར་ལ་ཉེར་མཁོ་བའི། །སངས་རྒྱས་མངོན་སུམ་ལག་བཅངས་འཕྲིན་ལས་འདིས། །འགྲོ་རྣམས་རང་སྣང་དག་པའི་འོག་མིན་དུ། །འཇམ་དཔལ་ལོངས་སྤྱོད་རྫོགས་སྐུར་འཚང་རྒྱ་ཤོག །ཅེས་ཡང་བཟློག་ནག་པོ་མེའི་སྤུ་གྲིའི་ལས་སྦྱོར་རྩ་བའི་གོང་བསྙེན་ཟླ་གསང་གཞི་བསྙེན་གྱི་སྔོན་འགྲོ་འཇམ་དཔལ་ཞི་བའི་འཕྲིན་ལས་སངས་རྒྱས་མངོན་སུམ་སྟོན་པའི་ལག་བཅངས་འདིའང་ལམ་འདི་ཉམས་སུ་ལེན་པ་རྣམས་ལ་ཕན་འདོད་ཀྱི་བསམ་པས་ཆོས་ཀྱི་ཆ་ལག་ཏུ་བསྒྲིག་འདུན་ཡོད་པ་ལྟར་ཉེ་ཆར་སྔགས་རམས་པ་ནོར་བུ་ཆོས་འཕེལ་དང་སྔགས་བན་བློ་གྲོས་རྒྱལ་བ་གཉིས་ཡང་(༨ན)
བཟློག་གི་གཞི་བསྙེན་བྱེད་པར་དུས་ཀྱིས་གཏུགས་པས་མཚམས་སྦྱར་ཏེ་གནམ་ལྕགས་སྡིག་པའི་ཆོས་སྡེའི་ནང་ཚན་སྟོད་དྲིལ་ཉི་མ་ཤར་བ་ལས་བྱང་ཆུབ་བསྒྲུབ་པའི་ཆོས་སྡེའི་དགོངས་དོན་གཙོ་བོར་བཟུང་འདོན་ཆའི་ཁ་འགེངས་དགོས་པ་རྣམས་སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་སྒྲུབ་ཐབས་བདུད་རྩིའི་ཐིགས་པ་ནས་ཁ་བཀང་བའི་སྐབས་ཐོབ་ཀྱི་ཚིག་ཕྲད་ཕྲན་བུ་བསྒྱུར་ཅིང་མེད་མི་རུང་འགའ་ཞིག་གསར་དུ་བསྒྲིགས་ཏེ་ཟ་ཧོར་གྱི་རིགས་ལས་སྔགས་འཆང་བཞད་པ་རྩལ་གྱིས་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་གནས་བན་འཇམ་དབྱངས་སོ།། །།སརྦ་མངྒ་ལཾ།།