རིགས་གསུམ་འདུས་པ་འཇམ་དཔལ་ཁྲོ་ཆུ་དུག་སྡོང་ནག་པོའི་བསྙེན་པའི་ཡི་གེ་རིན་ཆེན་ཀེ་ཏ་ཀ
རིགས་གསུམ་འདུས་པ་འཇམ་དཔལ་ཁྲོ་ཆུ་དུག་སྡོང་ནག་པོའི་བསྙེན་པའི་ཡི་གེ་རིན་ཆེན་ཀེ་ཏ་ཀ་ཞེས་བྱ་བ་བཞུགས་སོ། །
ན་མོ་མཉྫུ་ཤྲཱི་ཏྲཻ་ཀུ་ལ་ས་མཱ་ཛཱ་ཡ། སྲིད་པའི་རྩེ་ནས་མནར་མེད་བར་ཁྱབ་མིག་སྨན་ལྷུན་པོ་སྲིན་པོའི་གཟུགས། །སྲིད་གསུམ་གྲོང་ཁྱེར་ལྟོ་བར་རབ་འཆང་སྐྱེ་དགུའི་བླ་སྲོག་གཤེད་གྱུར་ཀྱང་། །སྲིད་འཁྱམས་འགྲོ་ལ་གཅིག་ཏུ་རྗེས་བརྩེ་བགྲང་ཡས་རྣམ་འདྲེན་ཡོངས་ཀྱི་ཡབ། །སྲིད་ཞིའི་ཕ་མཐར་ནམ་ཡང་ལྷུང་མིན་འཇམ་དཔལ་ཀུན་ཏུ་བཟང་པོ་རྒྱལ། ཁྲོ་མེད་དམ་ཉམས་དགྲ་ལ་ལྷག་པར་ཁྲོ། །སྡང་མེད་བདུད་སྡེའི་ཚོགས་ལ་གཅིག་ཏུ་སྡང་། །བརྩེ་མེད་འཆི་བདག་གཤིན་རྗེ་འགྲོ་ལ་བརྩེ། །འཇིགས་མེད་དཔའ་བོ་ཁྲོ་ཆུ་དུག་སྡོང་འཇིགས། །གང་གི་གདམས་པ་རྒྱ་གར་མཁས་པའི་གཞུང་། །བོད་ཡུལ་མཐུ་སྟོབས་ཟླ་བྲལ་གནུབས་ཆེན་ལུགས། །དྲག་སྔགས་རྩིབས་སྟོང་རྩེ་མོར་ལོག་འདྲེན་ཚོགས། །མི་རྟག་ལམ་འགོད་གྲགས་པ་ཕྱོགས་བཅུར་སྙན། །འོན་ཏེ་མིང་ཙམ་བརྗོད་ལས་ཚུལ་བཞིན་དུ། །ལེགས་མཁྱེན་གནམ་ལྕགས་མེ་འབར་ཡབ་སྲས་དང་། །བརྒྱུད་པར་བཅས་ལས་སྔགས་རློམས་ཕལ་ཆེར་གྱིས། །མ་རྟོགས་གསང་བའི་མཛོད་ཀྱི་སྒོ་ལྕགས་དམ། །བསམས་ཀྱིན་བདག་འདྲའི་བློ་དམན་གདུལ་བྱ་ལ། །གཉགས་(༢ན)
བན་རྣམ་སྤྲུལ་ཆོས་དབྱིངས་རང་གྲོལ་ཞབས། །འཁོར་ལོའི་རི་མོ་གཙུག་ཏོར་རྩེར་བཀྲ་བ། །སངས་རྒྱས་ཐོབ་ཀྱང་རྒྱན་དུ་འཛིན་པར་སྤྲོ། །བླ་ཆེན་མིང་དང་རིགས་རུས་སྐྱེ་བ་ཡིས། ཁྲི་མཐོར་ཁེངས་པའི་ལྟོ་བ་མ་སྦོས་པར། ཁོ་བོས་དམ་པ་བསྟེན་ཅིང་མཁས་དུ་མར། །བགྲོས་པས་མུན་པར་རྫས་འཚོལ་རེ་བ་སྐྱུངས། །དེ་ཕྱིར་ཡི་དམ་ཆོས་སྐྱོང་དབྱེར་མེད་པ། །རིགས་གསུམ་འདུས་པའི་བདག་ཉིད་གཤིན་རྗེའི་གཤེད། །བསྙེན་ཐབས་ཆུ་ཀླུང་དངས་བྱེད་ཀེ་ཏ་ཀ །དཔྱོད་ལྡན་སྙིམ་པར་འབུལ་གྱིས་དང་བས་ལོང་། །དེའང་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱ་གྲངས་མེད་པའི་རྒྱུད་ཀྱི་ཉོན་མོངས་པའི་གཉེན་པོར་དམ་པའི་ཆོས་ཀྱི་ཕུང་པོ་མཐའ་ཡས་པར་སྩལ་པ་ཐམས་ཅད་ཀྱང་ཉན་རང་བྱང་སེམས། ཀྲྀ་ཡོག་སྡེ་གསུམ། ཡོ་ག་གསུམ་སྟེ་ཐེག་པ་རིམ་པ་དགུར་འདུས་ལ། དེའི་ནང་ནས་སྒྲུབ་སྡེ་བརྒྱད་ལ་སོགས་པའི་སྐོར་རྣམས་བསྐྱེད་པ་མ་ཧཱ་ཡོ་གར་གཏོགས་ཤིང་དེ་ལ་ཡང་སྐུ་གསུང་ཐུགས་ཡོན་ཏན་འཕྲིན་ལས་མ་མོ་རྦོད་གཏོང་འཇིག་རྟེན་མཆོད་བསྟོད་དྲག་སྔགས་རྣམས་ལས་སྐུ་འཇམ་དཔལ་གཤིན་རྗེ་ལ་(༢བ)
དེ་བཞིན་གཤེགས་པའི་རིགས་ཕྱག་རྒྱ་ཟིལ་གནོན། རྡོ་རྗེའི་རིགས་འཇོམས་བྱེད་ནག་པོ། རིན་པོ་ཆེའི་རིགས་ཁ་ཐུན་ནག་པོ། པདྨའི་རིགས་འཇིགས་བྱེད་རུ་མཚོན་དམར་པོ། ལས་ཀྱི་རིགས་གཤོར་བསད་ཉི་མ་ཁྲོས་པའི་སྐོར་སོགས་རྣམ་གྲངས་ཆེས་མང་བ་ལས་འཇམ་དཔལ་ཚེ་བདག་གི་ལས་ཀྱི་གཤིན་རྗེ་ཁྲོ་ཆུ་དུག་སྡོང་ནག་པོ་འདི་ནི་འགྲན་གྱི་ཟླ་མེད་པས་བྱད་མ་མཁན་པོའི་རྦོད་གཏོང་རང་གཤེད་དུ་འབེབས་ཤིང་རྒྱལ་བ་ཞི་ཁྲོ་ནས་གྲོང་རྒྱུའི་འགོང་པོ་ཡན་གྱི་གཉེན་པོ། སྐྱེ་འགྲོ་རྣམས་ལ་ཆུ་སྲིན་ཁ་གདངས་པ་ལྟ་བུ། ཡི་དམ་ཆོས་སྲུང་གཞན་གྱིས་ལྟ་བར་མི་བཟོད་པའི་མུ་སྟེགས་རྫས་མཐུ་ནག་པོས་གནོད་མི་ནུས་པར་མ་ཟད་འདི་ལ་གྲོགས་སུ་འགྱུར། བྱད་མ་ཕ་རོལ་པོ་ནུས་པ་ཆེ་ཞིང་སྲུང་ཟློག་ཇི་ལྟར་མང་བཞིན་དུ་ལྷག་པར་ཕར་ལ་བཟློག་བསད་མྱུར། ལན་ཅིག་བསྒྲུབས་ན་སླར་བསྐྱར་མི་དགོས། བསྙེན་པ་ཁ་གསོ་གཏོར་བསྐུལ་འཐུ་བ་བརྡབས་པ་ཙམ་གྱིས་དགྲ་བོ་སྐད་ཅིག་ལ་འཆི་བའི་རལ་གྲི་ཕྱུང་རྒྱག །རླུང་སྒྲུབ་བམ་རྫུ་འཕྲུལ་གྱི་བསྒྲུབ་པ་ཡིན་པས་སྤུ་གྲི་ཀ་མ་ལ་ལྟར་རྣོ་ཞིང་རླུང་བཞིན་འཁྱུག་པ་ལ་སོགས་པ་ཡོན་ཏན་དཔག་ཏུ་མེད་པ་དང་ལྡན་པའི་སྐོར་འདི་ནི་སྨན་སྡོང་ཆེན་མོའི་རྒྱུད་ལས། རྒྱ་གར་གྱི་གྲོང་ཁྱེར་མུ་སྟེགས་ཀྱི་བ་ར་དྷྭ་ཛ་བྱ་བ་དར་སངས་རྒྱས་བཅོམ་ལྡན་འདས་ཀྱི་བསྟན་པ་ནི་དར་ཡོད་པ་མུ་སྟེགས་ཀྱི་སྟོན་པ་འཕུང་བྱེད་ནག་པོ་དང་། མུ་སྟེགས་སྐྲའི་ལ་བ་ཅན་དང་། མུ་སྟེགས་མེའི་སླག་པ་ཅན་དང་། མུ་སྟེགས་ཀྱི་སྡེ་རིགས་ཐམས་ཅད་འདུས་ནས་སངས་རྒྱས་བཅོམ་ལྡན་འདས་ཀྱི་བསྟན་པ་ཐམས་ཅད་ནི་བཤིག །གླེགས་བམ་ཐམས་ཅད་མེ་ལ་བསྲེགས། ཆོས་ཀྱི་སྒྲ་ཡང་(༣ན)
མི་གྲག་པར་བྱས་སོ། །དེའི་དུས་སུ་སངས་རྒྱས་བཅོམ་ལྡན་འདས་ཀྱི་བསྟན་པ་འདི་འདྲ་ཡོང་བ་ཡང་འཕགས་པ་འཇམ་དཔལ་གྱིས་དགོངས་ཏེ་ཐུགས་མུག་སྐྱེས་ཏེ་འཇམ་དཔལ་ཐུགས་ཁྲོས་པ་ལས་ལས་ཀྱི་གཤིན་རྗེ་ཡ་མ་རཱ་ཛ་ཞེས་པའི་སྐུར་སྤྲུལ་ནས་དབུ་གསུམ་ཕྱག་དྲུག་གཡས་གསུམ་དགྲ་སྟ། གཡོན་གསུམ་གློ་སྙིང་བསྣམས་པ། སྐུ་སྨད་ལྕགས་ཀྱི་ཕུར་པ་ཟུར་གསུམ་པ་དཔལ་དང་ལྡན་པ། སྐུ་ལ་ཡེ་ཤེས་ཀྱི་མེ་འབར་བ་འཇིགས་སུ་རུང་བ་ཞིག་ཏུ་བསྟན་པས་མུ་སྟེགས་ཐམས་ཅད་བརྒྱལ་ཞིང་ཤི། མུ་སྟེགས་ཀྱི་ཡིག་ཆ་ཐམས་ཅད་མེར་བསྲེགས། མུ་སྟེགས་ཀྱི་བསྟན་པ་ནི་གཅིག་ཀྱང་མེད་པར་བྱས་སོ། །ཞེས་པ་ལྟར་ལྷ་མཆོག་འདི་ཉིད་ཤེས་བྱ་བཅུའི་སྒོ་ནས་ཤེས་དགོས་པ་འབྱུང་ཁུངས་ནི། གཤིན་རྗེ་ཟླ་གསང་ནག་པོའི་རྒྱུད་ལས་བྱུང་ཞིང་མུ་སྟེགས་པ་རྣམས་འདུལ་བའི་ཐབས་གཙོ་བོར་བསྟན་པས་མུ་སྟེགས་ཟླ་གསང་ནག་པོར་གྲགས། རིགས་ནི་སྐུ་གསུང་ཐུགས་ཡོན་ཏན་འཕྲིན་ལས་ལྔ་ལས་སྐུའི་རིགས། མཚན་ནི་རྒྱུད་ལས། ནང་ལྟར་རྟ་མགྲིན་འཇམ་དབྱངས་ཕྱག་རྡོར་གསུམ་ཡིན། ཕྱི་མུ་སྟེགས་ལ་རྣོ་བ་མཐུ་དེ་ལྟར་ཆེ། གསང་བ་ལྟར་ཆོས་སྐུ་ལོངས་སྐུ་གསུམ་ཡིན་པས་རྟགས་མཚན་ཆེ་བ་དེ་ལྟར་ལགས། ཕྱི་ལྟར་ན་འཆི་བདག །ཚེ་བདག །སྲོག་བདག་གསུམ་ཡིན། རྫུ་འཕྲུལ་དྲག་རྩལ་ཆེ་བ་དེ་ལྟར་ལགས། ཞེས་པ་ལྟར་རིགས་གསུམ་འདུས་པའི་བདག་ཉིད་གཤིན་རྗེ་ཁྲོ་ཆུ་དུག་སྡོང་ནག་པོ། མུ་སྟེགས་སྲོག་གི་སྤུ་གྲི། བྱད་མ་འབུམ་གྱི་སྲོག་གཅོད། ལས་ཀྱི་མཐའ་སྡུད་སྤྱི་གཤེད་ནག་པོ་ཞེས་སོགས་རྣམ་(༣བ)
གྲངས་མཐའ་ཡས། འཁོར་ནི་གཤེད་ཆེན་སྡེ་དྲུག་པོར་མ་ཟད་ཡེ་ཤེས་ཀྱི་སྲུང་མ་དང་འཇིག་རྟེན་དྲེགས་པའི་ཚོགས་རྣམས་ཀྱིས་བཀའ་ཉན། གསུང་བསྟོད། འཕྲིན་ལས་སྒྲུབ་པར་བྱེད་པ་འདིའི་སྔོན་གྱི་དམ་ཚིག་དང་ལས་ཀྱི་ཆེ་བ་ལས་ནི་སངས་རྒྱས་སྟོང་རྩའི་སྤྱན་སྔར་སྲོག་སྙིང་ཕུལ་ནས་དམ་བཅས་པའི་མཐུས་ཕྱི་ནང་བན་བོན་གྱི་བྱད་མ་མཁན་པོ་གང་དང་འགྲས་ཀྱང་ལོག་རྡུགས་འབྱམས་གསུམ་མེད་པར་སྐད་ཅིག་ལ་བརླག་པའི་ལས་འགྲུབ། སྤྲུལ་པ་ནི་དུས་དྲུག་དམ་རྫས་ཚོགས་ཤིང་རྦད་བསྐུལ་གནད་ཀྱི་སྤྲུལ་པ་ལྷ་སྲིན་སྡེ་བརྒྱད་དམ་ལས་མི་འདའ་བར་གང་བཅོལ་བྱེད་པ། སྤྲུལ་པའི་རྒྱུ་མཚན་ཡང་ཇི་སླད་དུ། སྤྱི་བོའི་རྩ་ནས་ཡཿཤར་གཤིན་རྗེ་བྱུང་། །ལྟེ་བའི་རྩ་ནས་མཿཤར་མ་མོ་བྱུང་། །སྙིང་གའི་རྩ་ནས་ནཿཤར་ཀླུ་རྒྱལ་བྱུང་། །མགྲིན་པའི་རྩ་ནས་ར་ཿཤར་རྒྱལ་པོ་བྱུང་། །ཤངས་ཀྱི་ཁུང་ནས་ཤཿཤར་གཟའ་རྒོད་བྱུང་། །སྙན་གྱི་ཁུང་ནས་ཀྵཿཤར་གནོད་སྦྱིན་བྱུང་། །སྤྱན་མིག་གཉིས་ནས་ཙཿཤར་བཙན་རྒོད་བྱུང་། །ཕྱག་ཞབས་མཐིལ་ནས་དུཿཤར་དམུ་རྒྱལ་བདུད། །ཅེས་ཚེ་བདག་གི་ལས་སྦྱོར་སྐབས་རྒྱུད་ཁུངས་དང་འབྲེལ་བ་དོན་གྱི་འདིར་ཡང་ཐོབ། མཛད་པ་པོ་ནི་སིངྒ་ལའི་པཎྜི་ཏ་འཇམ་དཔལ་བཤེས་གཉེན། ཨྱོན་སངས་རྒྱས་གཉིས་པ། སློབ་དཔོན་ཁྲག་འཐུང་ནག་པོ་རྣམས་ཀྱིས་ཟླ་གསང་གི་རྒྱུད་རྣམས་བཤད་ཐབས་ཀྱི་སྒོ་ནས་བལ་ཡུལ་གྱི་འབངས་འབུམ་སྡེར་དབང་བའི་ཡམ་བུའི་རྒྱལ་རིགས་གུ་རུ་ནོར་བུ་འཛིན་པར་གནང་། གཞུང་ལས། མུ་སྟེགས་སྟོན་པ་འདི་ཉིད་ཀྱི། །ལས་སྦྱོར་གཤིན་རྗེའི་ངན་སྔགས་འདི། །གཤིན་རྗེ་ནག་པོའི་རྒྱུད་ལས་བཏུས། །ལྕགས་ཀྱི་(༤ན)
པར་བུར་བཅུག་ནས་ནི། །བལ་ཡུལ་བུམ་ཐང་གཏེར་དུ་སྦས། །ཕྱི་རབས་དུས་ཀྱི་ཐ་མ་ལ། །ལས་ཅན་ཞིག་དང་འཕྲད་པར་ཤོག །ལས་ཅན་ཞིག་གིས་ཐོན་ནས་ཀྱང་། །གདུག་པའི་དགྲ་བགེགས་སྒྲོལ་བར་ཤོག །ཅེས་པ་ལྟར། སློབ་དཔོན་བལ་པོའི་རྒྱལ་པོས་གཤིན་རྗེ་ཟླ་གསང་ནག་པོའི་རྒྱུད་ལས་བཀོལ་ཏེ་ལྕགས་ཀྱི་པར་བུར་བཅུག་རྒྱ་རིམ་པ་གསུམ་གྱིས་བཏབ་ནས་གཞུང་ཡིག་རྣམས་བལ་ཡུལ་བུམ་ཐང་ཀེ་རུར་གཏེར་དུ་སྦས། སློབ་དཔོན་འདིས་མུ་སྟེགས་པ་རྣམས་བཏུལ་བས་མུ་སྟེགས་སློབ་དཔོན་དུའང་གྲགས། ཆོས་སྐོར་རྣམས་གནུབས་སངས་རྒྱས་ཡེ་ཤེས་རིན་པོ་ཆེར་ཆིག་བརྒྱུད་ཀྱི་ཚུལ་དུ་གསུངས་པས་ཇི་སྐད་དུ། སྤུ་ངན་སངས་རྒྱས་ཡེ་ཤེས་ཀྱིས། །རྒྱ་གར་གཙུག་ལག་དཔལ་དགེ་ལ། །བལ་ཡུལ་ཡམ་བུའི་དགོན་དུ་ཞུས། །ཞེས་བལ་པོའི་རྒྱལ་པོར་མ་ཟད་གཙུག་ལག་དཔལ་དགེར་ཡང་གསན། བདག་འདྲ་སངས་རྒྱས་ཡེ་ཤེས་ཀྱི། །གཤིན་རྗེ་ནག་པོའི་ཞལ་གདམས་སྦྱར། །གཙུག་ལག་དཔལ་དགེའི་བཀར་ཉན་པས། །སུ་ལའང་མི་སྤེལ་གཏེར་དུ་སྦ། །ཞེས་པ་ལྟར་ཤོག་དྲིལ་ལ་ཞལ་གདམས་ཕལ་ཆེར་བསེ་སྒྲོམ་སྨུག་པོར་བཅུག་ནས་མོན་བུམ་ཐང་དང་འཐོར་བུ་བྱང་སྤྲ་དུན་རྩེར་ཡང་གཏེར་དུ་སྦས། དགོས་བྱེད་ནི་སྤྱིར་བསྟན་འགྲོའི་བདེ་སྐྱིད་འཕྲོག་པ་དང་། བྱེ་བྲག་སྔགས་བན་ལ་སྟོབས་ལྡན་གྱི་འཚེ་བས་ཁས་ཉེན་པ། ལྷག་པར་བན་བོན་མུ་སྟེགས་བྱད་མ་མཁན་པོ་མཐུ་ཆེན་རྣམས་འདུལ་བའི་ཕྱིར་མཛད། གཏེར་སྟོན་ནི་གནུབས་ཆེན་གྱི་སྐྱེ་བ་སྤྲུལ་སྐུ་རྒྱ་ཞང་ཁྲོམ་རྡོ་རྗེ་འོད་འབར་གྱིས་གཏེར་ཁ་གསུམ་པོ་ཚང་བར་གདན་དྲངས་པས། བདག་འདྲ་སངས་རྒྱས་ཡེ་ཤེས་ཀྱིས། །རྒྱ་གར་ཤར་ནུབ་ཆུ་(༤བ)
བཞིན་མྱུལ། །ཐ་མར་བོད་ཡུལ་དབུས་སུ་སླེབས། །སངས་རྒྱས་བསྟན་པ་བསྲུང་དོན་དུ། །སྲོག་སེར་གཏད་གསུམ་ལ་སོགས་པའི། །ངན་སྔགས་ཡིག་སྣ་དཔག་མེད་ཞུས། །སངས་རྒྱས་བསྟན་པའི་བཙས་སུ་བཞག །ཁྱད་པར་སྙིང་ཐིག་སྐོར་མཛོད་ནས། ཁྲོ་ཆུ་ཁོལ་མའི་འགོམ་ཆོག་འདི། །བལ་ཡུལ་བུམ་ཐང་ཀེ་རུར་སྦས། །དུམ་པ་རྒྱ་ཡིས་གཏེར་ནས་བཏོན། །ཤ་བ་རྒྱུག་པའི་འཕྲོ་ལ་འགྱེལ། །གདམས་པ་འདི་འདྲ་ཨ་ཙ་མ། །ཞེས་པས་ཤེས་ནུས་ཤིང་གདམས་པའི་ཆེ་བ་འདོན་པའི་ཆེད་དུ་བལ་པོ་ནས་ལ་སྟོད་ཀྱི་བར་གཏོར་མ་དང་བསྐུལ་ཙམ་གྱིས་བན་བོན་ལྔ་བཅུ་ཙམ་ཞག་བདུན་ནས་འཆི་རྟགས་ཐོན་པར་བསྒྲལ་བས་དྲག་སྔགས་ཀྱི་སྙན་པས་ཁྱབ། བརྒྱུད་པ་ནི་གཏེར་སྟོན་རྒྱ་ཞང་ཁྲོམ་ལ་གནུབས་སྟོན་དར་དབང་གིས་འབྲི་སུམ་ཅུ་སོ་གསུམ་གཞལ་བའི་རྟ་འབྲུག་གཤོག །གསེར་སྲང་གང་། སྦྱང་ཐུལ་རྣམས་ཕུལ་ནས་ཞུས། དགྲ་བོ་ཞག་བདུན་ནས་འཆི་རྟགས་ཐོན། དེ་ལ་བྷ་ཡ་ཤཱཀ་རྡོར་གྱིས་གསེར་སྲང་གང་དང་ནོར་བུ་གཡུ་འབར་བྱ་བ་ཕུལ་ནས་ཞུས། ཕོ་མོ་སུམ་ཅུ་ཟླ་གཅིག་ནས་འཆི་རྟགས་ཐོན། དེ་ལ་སྲས་ཨ་གྲགས་ཀྱིས་འབུལ་ཞབས་བཏེག་ནས་ཞུས་པས་མཐུ་ནུས་ཀྱི་གྲགས་པ་ཐོབ། གཞན་ཡང་རྗེ་བཙུན་དོན་ཡོད་རྡོ་རྗེས་གསན་པ་སོགས་ནས་ཉེ་བར་བརྒྱུད། བར་སྐབས་སུ་དར་རྒྱས་ཆེ་བ་ཙམ་བྱུང་ནའང་རིམ་གྱིས་ཆོས་རྒྱུན་ཉག་ཕྲར་སོང་བས་ལྷོ་ན་སྟག་དང་བྱང་ན་འབྲོང་གི་དཔེ་བཞིན་ཁྲོ་ཆུ་དུག་སྡོང་ཟེར་བའི་གཤེད་སྐོར་ཞིག་ཡོད་པར་སྣང་ཞེས་གླེང་བ་ཙམ་ལས་རྟོགས་པ་ནི་དགུན་ཆུ་ལྟར་གྱུར་སྐབས་གུང་རད་པ་ཚུལ་ཁྲིམས་རྒྱ་མཚོ་དང་རྒྱ་སྟོན་ནམ་མཁའི་མཚན་ཅན་སོགས་ཡོངས་འཛིན་འགའ་ཞིག་ལ་རྗེ་ཟུར་པ་གནམ་(༥ན)
ལྕགས་མེ་འབར་གྱིས་གསན། དེ་ལ་སྣང་གསལ་བ་བཀྲ་ཤིས་རྒྱ་མཚོ་ཡབ་སྲས་རྣམས་ཀྱིས་གསན་པ་ལས་རིམ་པར་བརྒྱུད་དེ་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་དང་དཔལ་འགྲི་གུང་པ་དབུར་སྨྱོན་ཆོས་ཀྱི་གྲགས་པས་གསན་པའི་རྒྱུན་མ་ཆད་པ་ཡོད་ཅིང་མཆོག་སྤྲུལ་ལེགས་ལྡན་རྡོ་རྗེས་ཀྱང་ཚེ་བདག་ཡང་བཟློག་དང་ཁྲོ་ཆུའི་སྐོར་རྗེ་འབྲི་གུང་པར་གསན། ཆོས་རྒྱལ་བཀྲ་ཤིས་སྟོབས་རྒྱལ་གྱིས་འཇམ་དཔལ་དུག་སྡོང་གི་སྐོར་སྣང་གསལ་བ་རིགས་འཛིན་ཀུན་དགའ་ཆེ་ཆོག་ལ་གསན་པར་གྲགས་ཀྱང་བརྒྱུད་པ་དེ་དག་ལས་འོངས་པའི་རྒྱུན་ནི་ནམ་མཁའི་དབྱིངས་སུ་དེངས་སོ། །དེ་ཡང་ཆོས་སྐོར་འདིའི་ཡིག་སྣ་ཕྲ་ཞིབ་གབ་དཀྲུགས་འཐོར་བའི་ཚུལ་དུ་བཞུགས་པས་རྡོ་རྗེ་སློབ་དཔོན་གྱི་གསུང་རྒྱུན་ཕྱག་བཞེས་དམར་ཁྲིད་དུ་སྡེབ་ལུགས་མཛུབ་བཙུགས་སུ་ངོ་མ་འཕྲོད་ན་ཡུངས་ཀར་སྤང་ལ་གཏོར་བའམ་བྱིས་པ་འཇའ་ཚོན་བལྟ་བ་ལྟར་ལག་ཏུ་མི་ཁེལ་བས་སྤྱི་སྒོས་སུ་འཚེ་བའི་དགྲ་བོ་གདུག་ཅན་ལ་མཁས་པ་གཙང་ནག་པར་ཁྱིས་རྨུག་པར་བརྩམས་པ་ན། དགག་བྱ་བྱུང་ན་དགོས་པ་ཡོད། ཁྱི་ལ་ཆོས་ཀྱི་བཀྲ་ཤིས་ཤོག །ཅེས་གསུངས་ནས་པོ་ཏི་བརྒྱབ་པ་ལྟར་དུག་སྡོང་གི་གླེགས་བམ་དཔངས་མཐོ་བར་བཞུགས་པ་བསྣུན་ན་དགྲ་གཅིག་གི་ཐོད་པ་གཏིབ་ཐུབ་པ་ཙམ་ནི་ཡོད་ཤས་ཆེ། དེ་ལས་གཞན་དུ་གླེགས་བམ་སྔས་སུ་རྒྱག་གམ་གསར་མ་བའི་ཆོས་སྐྱོང་རྣམས་ཀྱི་བེའུ་བུམ་དང་ལྷན་དུ་རྡུལ་དང་མུན་པའི་མལ་དུ་གཟིམས་པ་ལས་འོས་མ་མཆིས་པས་གནུབས་ཆེན་དང་སྤྲུལ་སྐུ་རྒྱའི་ཐུགས་བཅུད་འདི་ཉིད་ཀྱི་དགོས་དོན་ལོག་འདྲེན་གྱི་དགྲ་བོ་ཚེ་སྲོག་དང་ཕྲལ་ཏེ་རྣམ་ཤེས་ཆོས་སྐུ་བདེ་བ་ཆེན་པོའི་ཀློང་དུ་འདྲེན་པའི་ལས་ལ་སྦྱོར་བ་དེའི་སྔོན་(༥བ)
དུ་གྲུབ་པའི་གནད་ཤེས་དགོས། སྒྲུབ་པ་ལའང་ལྷ་ཉེ་བར་བསྙེན་པ་ཉིད་གལ་ཆེ་བས་དེ་ལ་སྔོན་འགྲོ། དངོས་གཞི། རྗེས་ཀྱི་རིམ་པ་དང་གསུམ་གྱི་དང་པོ་ལ་ངེས་པའི་དོན་བདེ་བླག་ཏུ་འཇུག་པ་སོགས་ཡིག་ཆ་ཁུངས་བཙུན་གྱི་སྟེང་ནས་འཇམ་དཔལ་ཚེ་བདག་ཕྱག་རྒྱ་ཟིལ་གནོན་གྱི་དཀྱིལ་འཁོར་དུ་ལེགས་པར་སྨིན་ཅིང་། སྨན་སྡོང་ནག་པོའི་བྱིན་རླབས་དུག་གི་སྲོག་དབང་གི་ཡི་གེ་ལྟར་ལས་གཤིན་འདི་ཉིད་ཀྱི་སྒོ་ནས་དབང་ལུང་མན་ངག་ཕྱག་ཁྲིད་ལེགས་པར་ནོད་པའི་སྔགས་པས་གནས་ཀྱི་ཁྱད་པར་རྒྱུད་སྡེ་སྤྱི་སྐད་དུ་བསྙེན་པར་གནམ་ས་བར་གསུམ་ལ་བཀྲ་ཤིས་རྟགས་བརྒྱད་སོགས་ས་དཔྱད་བཀྲ་ཤིས་པ་འབྱུང་པོ་གདུག་པ་ཅན་གྱི་རྒྱུ་སྲང་སོགས་མི་དང་མི་མ་ཡིན་གྱིས་འཚེ་བ་ཉུང་བ། སྒྲུབ་ཐོབ་གོང་མས་བྱིན་གྱིས་བརླབས་ཤིང་ཞབས་ཀྱིས་བཅགས་པས་མཚོན་དགེ་བའི་མཚན་མ་དང་མངོན་སྤྱོད་ལ་གནམ་ས་གྲུ་གསུམ་རི་བྲག་མཚོན་ཆ་གཟིངས་པ་ལྷ་འདྲེ་དྲག་པོ་འདུ་ཞིང་དུར་ཁྲོད་དང་བས་མཐའ་ཆུ་གླིང་ལྟ་བུ་འཇིགས་ཤིང་སྐྱི་གཡའ་བའི་གནས་བཤད་ལ། གཏེར་སྟོན་རྒྱལ་པོ་ཆོས་རྒྱལ་རཏྣ་གླིང་པའི་རྟ་མགྲིན་གསང་འདུས་སུ། སྡེ་དགོན་གནས་གཞི་སྦྱིན་སྲེག་བྱས་བཤུལ་དུ། །སེར་བ་བསྒྲུབས་ན་མི་འགྲུབ་ཞུད་པས་སྤང་། །དབང་བསྐུར་བྱིན་རླབས་ཚེ་སྒྲུབ་བྱས་བཤུལ་དུ། །མཐུ་ཕྲན་བསྒྲུབས་ན་མི་འགྲུབ་ཞུད་པས་སྤང་། །མཆོད་རྟེན་སཱཙྪ་གསུང་རབ་བཀླགས་མལ་དུ། །ལྟས་ངན་བསྒྲུབས་ན་མི་འགྲུབ་ཞུད་པས་སྤང་། །དུག་སྦྲུལ་འགྱུས་སྲང་ས་རལ་ཤྭ་འོད་རྩར། །ནོར་སྒྲུབ་བསྒྲུབས་ཀྱང་མི་འགྲུབ་ཞུད་པས་སྤང་། །ཞེས་སོགས་རྟེན་འབྲེལ་གྱི་གནད་འགག་བརྩི་ལུགས་སངས་རྒྱས་གཉིས་པ་པདྨ་འབྱུང་གནས་ཀྱི་གསུང་ལྷད་མེད་ངོ་མཚར་བ་སྣང་མོད། འོན་(༦ན)
ཀྱང་རིགས་གསུམ་འདུས་པའི་ལས་ཀྱི་གཤིན་རྗེ་འདི་ཉིད་ཀྱི་བསྙེན་སྒྲུབ་ལས་གསུམ་དཀྱུས་གཅིག་ཏུ་བྱེད་པའི་དབང་དུ་བྱས་ནས་རྩ་ཚིག་བཞི་བཅུ་རྩ་དྲུག་གི་བཤད་བཀྲོལ་རིན་པོ་ཆེའི་གཏེར་མཛོད་ལས། དང་པོ་སྒྲུབ་པའི་ས་གསུམ་ནི། དུར་ཁྲོད། ནགས་ཁྲོད་ཤིན་ཏུ་འཇིགས་པའི་ས་ནི་དབེན་པའི་གནས་སོ། །དུར་ཁྲོད་དམ་ཞེས་པ་ནི་རོ་བསྲེགས་པའི་ས། དམེ་བྱས་པའི་ས། མི་གྲིར་བསད་པའི་ས་དང་དེ་རྣམས་བསྡུས་པས་དུར་ཁྲོད་དོ། །ནགས་ཁྲོད་ནི། མཚམས་ཁང་གསལ་ཁུང་མེད་པ་ཡོལ་བ་དང་མཚམས་རིག་ལེགས་པར་བྱའོ། །ཤིན་ཏུ་འཇིགས་པ་ནི་རི་གཉན་གསུམ་གྱི་རྩེའམ་གདོང་སྣའི་ས་དང་། ལུང་གཉན་གསུམ་འདུས་པའི་ས་དང་། ལྷ་ཁང་རྙིང་པའི་ས་དང་། མཆོད་རྟེན་ཞིག་པོའི་ས་དང་། དེ་རྣམས་ལྷ་འདྲེ་འདུ་བའི་ས་ཡིན་པས་འཇིགས་པའི་སའོ། །དབེན་པ་ནི་མཚམས་དགྲ་མེད་པ་མཐོ་བ་བཙན་པ་ཁྱི་ལ་སོགས་པའི་གནོད་འཚེ་མེད་པ། མཚམས་གཡོག་གོ་ཆོད་པ། བསིལ་ཁང་འཛོམ་པ་ལ་སོགས་པའོ། །ཞེས་བྱུང་ལ། དུས་ཚོད་གཟའ་སྐར་ཡང་ལུགས་གཞན་ལྟར་ཤིས་པ་གཙོ་བོར་མི་འདོན་པར་སྒྲུབ་ཐབས་འགྲེལ་པ་ལག་ལེན་གསལ་སྒྲོན་ལས། སྒྲུབ་པའི་དུས་ཚོད་གཟའ་སྐར་ནི། གཟའ་ཕུར་བུ། སྐར་མ་མགོ་ལ་སོགས་པ་མར་གྱི་ངོ། གཟའ་སྐར་འཕྲོད་པའི་དུས་སུ། ཞེས་བཤད་པ་དྲག་པོའི་སྒྲུབ་པ་ལ་ཡིན་ནམ་སྙམ་ན། གཞུང་འདི་གར། སྨྲ་བཅད་བྱས་ལ་གཞུང་ལྟར་བསྙེན་པ་དྲག་ཏུ་ཐོག་ལྟར་བཟླས་སོ། །ཞེས་པས་རྟོགས་ནུས། ཆོས་རྒྱལ་འབྲི་གུང་པ་དབུར་སྨྱོན་གྱིས་གཟའ་སྐར་འགྲུབ་སྦྱོར་ལའང་གདམ་ངར་གསུངས་པ་འགྲུབ་སྦྱོར་བདུན་པོ་ཞི་དྲག་ཀུན་ལ་ཤིས་པར་དགོངས། (༦བ)
ལས་རབ་རྒྱ་མཚོར་གཟའ་སྐར་དུས་ཚེས་བཟང་བར་བཤད་པ་ལུགས་འདི་གའི་བཟང་བ་དེ་གཞན་དག་གི་ངན་འཚུབ་ལ་ངོས་འཛིན་དགོས་པ་ཕར་རི་ལ་བལྟོས་ནས་ཚུར་རི་དང་ཚུར་རི་ལ་བལྟོས་ནས་ཕར་རིར་འཇོག་པ་བཞིན་ཡིན་པས་གནས་དང་ཡོ་བྱད་འདུ་བྱས་ཤིང་། དུས་ཚོད་ཚེས་གྲངས་དང་བསྟུན་མཚམས་ཁང་དུ་འཇམ་དཔལ་ཕྱག་རྒྱ་ཟིལ་གནོན་དང་ལས་གཤིན་དུག་སྡོང་ནག་པོ་སོགས་ཀྱི་བྲིས་འབུར་གྱི་བརྟེན་རབ་གནས་ཅན་བཤམས། བསྙེན་པའི་སྐབས་བདག་བསྐྱེད་ཁོ་ནར་བརྟེན་པ་དང་། བདག་མདུན་ཟུང་འབྲེལ་གཉིས་བྱུང་བ་སྤྲོས་པར་མི་དགའ་ན་སྔ་མས་འགྲུབ་ཀྱང་། རྗེ་འབྲི་གུང་ཆོས་ཀྱི་གྲགས་པས་མཛད་པའི་ལས་བྱང་གདུག་པ་ཀུན་སྤྲོས་ལས། གཉིས་པ་མདུན་བསྐྱེད་སྒྲུབ་པ་ནི། བསྙེན་པའི་དུས་རང་གི་མདུན་དུ་བསྐྱེད་ཅིང་། སྲུང་བཟློག་བསད་པའི་དུས་གཏོར་ཆེན་ལ་དམིགས་པའོ། །དེ་ཡང་འདི་ལྟ་སྟེ། མདུན་གྱི་རྟེན་ནམ་གཏོར་ཆེན་བསངས་སྦྱངས་ལ། ཧཱུཾ། ཆོས་རྣམས་དམིགས་མེད་སྤྲོས་བྲལ་ཀུན་ཁྱབ་གདལ། །ཞེས་པ་ནས། སྤྱན་དྲངས་གྱུར་གྱི་བར་བདག་བསྐྱེད་ཀྱི་སྐབས་ཇི་ལྟ་བ་ལས། བདག་ཉིད་ཅེས་པའི་མལ་དུ་མདུན་ཞེས་འདོན་པ་བསྒྱུར་བས་ལྷ་ཚོགས་རྣམས་གསལ་བར་བསྐྱེད་ལ། ཞེས་བྱུང་བས་སྲུང་བཟློག་བསད་མནན་གྱི་དུས་མདུན་བསྐྱེད་ཀྱི་གཏོར་མར་དམིགས་རྟེན་དུ་མཛད་ལ། རྗེ་སྣང་གསལ་བ་ཀུན་དགའ་ཚེ་མཆོག་གིས་མཛད་པའི་བཟློག་བསད་གནམ་ལྕགས་འབར་བ་ལོག་འདྲེན་འཇོམས་པའི་མཚོན་ཆའི་འཁོར་ལོར་མདུན་དུ་གཏོར་ཆེན་གྱི་ལྷ་ཚོགས་བསྐྱེད་ཚུལ་རྒྱས་པར་གསུངས་པ་ལྟར་བྱེད་ན་གོང་དུ་བཤད་པ་བཏང་སྙོམས་སུ་བཞག་པས་ཆོག་ཅིང་འདིར་མ་ཏྲཾ་གྱི་ལྟོ་བར་ཆོས་འབྱུང་བསྣོལ་མ་བྲིས་པ་ཟོར་གདན་དང་ནོར་(༧ན)
བས་གཏོར་ཆེན་ལ་སྟེགས་བུ་འབྲུབ་ཁུང་སོགས་དགོས་ཚུལ་རྗེ་འབྲི་གུང་པ་གསུང་བ་བླ་མ་གཉིས་ཀ་ཆོས་འདི་ལ་ནང་བྱན་ཆུད་པར་འདུག་པས་རྒྱས་བསྡུས་ཀྱི་ཁྱད་པར་ལས་མི་འགལ་ཞིང་གཤིན་རྗེ་སྡེ་དྲུག་ཕྱག་དྲུག་ཏུ་བཤད་པ་ཡིག་ཆུང་ཤོག་དྲིལ་ནས་བསྟན་པས་ལུགས་གཉིས་གང་བྱས་ཀྱང་མི་འཐད་པ་མེད་དམ་སྙམ། སྣང་གསལ་ཕྱོགས་སུ་རང་འདྲའི་སྤྲུལ་པ་ཟེར་བ་ཙམ་ལའང་ཁུངས་སུ་མཛད་རུང་མུ་ཏིག་ཕྲེང་བར་རང་འདྲའི་སྤྲུལ་པ་ཕྱག་གཉིས་པའང་བཤད་པས་མཐའ་གཅིག་ཏུ་མ་ངེས་པ་འདྲ། གདུག་པ་ཀུན་སྒྲོལ་དུ་སྲུང་བཟློག་གསད་པ་དང་མ་འབྲེལ་བའི་མདུན་བསྐྱེད་ཀྱི་དམིགས་རྟེན་སྒྲུབ་གཏོར་ལ་བཤད་ཅིང་། རྗེ་སྣང་གསལ་བའི་ལས་བྱང་དུ། མདུན་བསྐྱེད་བསྒྲུབ་པ་ནི་རྟེན་རྣམས་བསངས་སྦྱངས་བྱས་ལ་ཞེས་པ་ལས་གཏོར་མའི་གསལ་ཁ་མེད་ཅིང་ལས་བྱང་གི་བརྗོད་བྱ་དང་མཐུན་པའི་བདག་བསྐྱེད་ཀྱི་དཀྱིལ་འཁོར་མཚན་ཉིད་དང་ལྡན་པ་སྣང་བ་ལུགས་འདིའི་དབང་གི་ཆོ་ག་གཏོར་མར་བརྟེན་པ་ལས་དཀྱིལ་འཁོར་དགོས་དོན་ཡང་མེད་ལ་ཕྱག་ལེན་ལའང་མི་མཛད་པས་མདུན་བསྐྱེད་ཀྱི་སྒྲུབ་གཞི་ཁོ་ན་གཙོ་ཆེ་ཞིང་དུས་གཏོར་སོགས་རྒྱུན་གྱི་ཉམས་ལེན་ལ་ཚོགས་མཆོད་ཀྱི་ཡུལ་ལྟ་བུ་སོགས་ལ་དགོངས་ཏེ་བཟླས་པ་གྲུབ་ནས་སླར་གསལ་འདེབས་སྐྱོར་མཛད་མོད། བདག་མདུན་བསྙེན་སྒྲུབ་ཟུང་འབྲེལ་གྱི་སྐབས་ཐོག་མ་ཉིད་ནས་གསལ་འདེབས་དགོས་པས་སྟེགས་ཀྱི་ཁར་མདུན་དཀྱིལ་བཀྲམ་པའི་སྟེང་མཉྫིར་ལྕགས་སམ་བྷནྡྷའི་ཞིང་དུ་ཤ་ལྔ། བདུད་རྩི་ལྔ། མི་རྟ་བྱ་གཡག་ར་སྟག་གཟིག་སོགས་ནག་པོའི་རིགས་ཀྱི་ཤ་ཁྲག །བཙན་དུག་ཐང་ཕྲོམ་སོགས་དུག་སྣ། འབྲུ་སྣ་རྙེད་ཚད་རྣམས་བསྲེས་པ་ཆང་དང་སེམས་ཅན་གྱི་གསོན་ཁྲག་གིས་སྦྲུས་པའི་གཏོར་མ་(༧བ)
འོག་ཏུ་ཟན་གྲུ་གསུམ་ལོགས་མདུན་ལ་བསྟན་པའི་སྟེང་དུ་ཟུར་གསུམ་ཕུར་བུའི་དབལ་ལྟ་བུ་ཟུར་མདུན་ལ་བསྟན་པ་ལས་ཅུང་ཟད་ཆུང་བ་ཡུམ། དེ་ལས་ཆུང་བའི་སྡེ་དྲུག་སྟེ་བདུན་གྱིས་བསྐོར་བ་རྣམས་ཀྱི་དཀྱིལ་ནག་མཐའ་དམར་བར་མེ་རི་ཕྱག་མཚན་ས་བོན་སོགས་དཀར་དམར་གྱི་རྒྱན་སྤྲོད་ལེགས་པའི་མཐར་མཐེབ་སྐྱུས་བསྐོར་བར་རྩང་དམར་ཉེར་གཅིག་སྲིན་འགྲོས་སུ་བཙུགས་པར་ཤ་ཁྲག་གིས་བརྒྱན་པ། དེའང་སྲུང་བཟློག་བསད་པའི་གཏོར་མའི་ནང་བཞུགས་ཀྱི་འཁོར་ལོ་ལྕགས་སྦུབས་སུ་བཅུག་པ་དང་སྟེང་ནས་གདུགས་ལྟར་འབུགས་པའི་ཚེ་བདག་ལྟོ་འཁོར་སོགས་མི་དགོས་ཀྱང་སྲོག་འཁོར་གལ་ཆེ་བ་སྣང་གསལ་བའི་དཔེ་རིས་ཀྱི་མུ་ཁྱུད་ཅིག་ལ་ཐུན་སྔགས་འདུག་པ་མན་ངག་ཡིག་ཆུང་དུ་མི་གསལ་ཡང་། རིགས་འཛིན་ཆོས་ཀྱི་གྲགས་པའི་ཕྱག་རྒྱུན་གྱི་དཔེའུ་རིས་སུ་མི་སྣང་ཞིང་། དེའི་ལྟོ་བར་རྡོ་རྗེ་དང་དེའི་ཕྱི་རོལ་ཏུ་རིགས་གསུམ་མགོན་པོའི་སྔགས་བཤད་པ་ཡིག་ཆུང་དུ་མ་བྱུང་ཡང་བསྲུང་དམིགས་དང་འབྲེལ་ཆགས་ཤིང་རྗེ་ཟུར་པའི་ཕྱག་དཔེ་ཁུངས་ཐུབ་ཀྱི་རྒྱུན་ཡིན་འདྲ་བ་དག་གམ་སྙམ་གང་ལྟར་སྲོག་འཁོར་མཚན་ཉིད་དང་ལྡན་པ་ལྟེ་བ་ལུགས་མཐོང་བརྒྱུད་ཀྱི་ཕྱག་ལེན་ལྟར་བྱས་པ་ཚོན་སྣ་ལྔའི་སྲད་བུས་བཅིངས། གྲི་ལྕགས་ཀྱི་རྟེན་ཕུར། ཚེར་ནག་གི་ཕུར་པ་དར་སྣ་ལྔས་བརྒྱན་ཅིང་དར་དམར་གྱིས་གྲིལ་བ་དེ་དང་ལྷན་ཅིག་པར་རྩེ་མོ་རྡོ་རྗེ་ཕྱེད་པ་ལ་རྩ་བ་ཕུར་ཞབས་ཅན་རྣམས་གཏོར་གདུགས་ཀྱི་འོག་ཏུ་མི་མངོན་པར་མདའ་ལ་འདོགས། དཀྱིལ་འཁོར་རྡུལ་ཚོན་གྱིས་བྲིས་པའམ་རས་བྲིས་ལ་ལྷ་མཚན་ཙམ་ལས་སྐུ་མེད་པ་དང་། དེ་ཡང་མ་འབྱོར་བར་གཏོར་མ་འབའ་ཞིག་ལ་བརྟེན་ན་གཙོ་འཁོར་བརྒྱད་པོའི་ཙཀླི་འཛུགས། དེའི་མདུན་ངོས་སུ་གཏོར་གདུགས་སྲོག་འཁོར་ཕུར་པ་རྩང་སོགས་སྤང་ཞིང་ཚད་(༨ན)
ཀྱང་སྔ་མ་ལས་ཆུང་བའི་འཛིན་གཏོར་དང་དེ་ལས་ཅུང་དམའ་བའི་གཏའ་གཏོར་བཤམས། འཛིན་གཏོར་ཞེས་པ་གསར་མའི་ཤན་ཤོར་སྙམ་པའི་ལོག་རྟོག་འབྱུང་སྲིད་ཀྱང་། ཁ་བྱང་གསལ་བའི་སྒྲོན་མེར། རྟེན་བཞེང་བ་དང་། སྲོག་འཁོར་བཅའ་བ་དང་། གྲི་ཕུར་གྱི་རྟེན་བཅའ་བ་དང་། གཏར་ཆེན་དང་། རྒྱུན་གྱི་འཛིན་གཏོར་བཅས་པའོ། །ཞེས་བཤད། ལོགས་ཤིག་ཏུ་ལྕགས་སམ་བྷནྡྷའི་ནང་དུ་སྤྱི་གཤེད་ཀྱི་གཏོར་མ་ཤ་ཁྲག་རྩང་གིས་བརྒྱན་པ། མདུན་གྱི་གཡས་སུ་པཉྩ་ཨ་མྲྀ་ཏས་སྤགས་པའི་ཆང་ཞིམ་པོའི་སྨན་མཆོད། གཡོན་དུ་མིའམ་དུད་འགྲོའི་གསོན་ཁྲག་ལ་དུག་སྣ་དང་ཁྲག་ཆེན་བསྲེས་པའི་རཀྟ། ལྕང་ལོར་བཅས་པའི་བྷནྡྷའི་སྣོད་སོ་སོར་ཁྲག་ཆེན་གྱི་ཡོན་ཆབ། དབང་པོའི་མེ་ཏོག །ཤ་ཆེན་གྱི་བདུག་སྤོས། ཚིལ་ཆེན་གྱི་མར་མེ། མཁྲིས་པའི་དྲི་ཆབ། ཙིཏྟའི་ཞལ་ཟས་རྣམས་སྒོར་མཆོད་དམ་ཐད་མཆོད་གང་རུང་དུ་བསྒྲིག །སྒྲུབ་པ་པོའི་སྟན་དང་རྡོར་དྲིལ་ཐོད་རྔ་འཐོར་ནས་གུ་གུལ་སོགས་ཉེ་བར་མཁོ་བའི་རྫས་ཡོ་ཐམས་ཅད་བསྙེན་སྒྲུབ་སྤྱི་གཞུང་ལྟར་འདུ་བྱ། འདི་ཉིད་སྒྲུབ་པའི་སྒབ་འདྲེ་གཟའ་དང་རྒྱལ་པོ་ཡིན་པ་གནོན་ཐབས་ཀྱི་མན་ངག་བཤད་ཀྱང་ལྟ་སྒོམ་གྱི་དྲོད་ཚང་མེད་ན་དྲེགས་པ་ཅན་འདི་རིགས་ཐུལ་དཀའ་བས་ཕྱག་ལེན་ལ་ཚེར་མི་མཛད། མདུན་དཀྱིལ་གྱི་མཐའ་སྐོར་དུ་སྡེ་བརྒྱད་རྣམས་ཀྱང་འགོད་ཅིང་ཚོགས་གཏོར་དབུལ་ནས་སྲུང་མའི་ཚུལ་གྱིས་ལྟས་ངན་གཡང་དུ་བླང་བ་ཡིན་གསུང་། ལས་རབ་རྒྱ་མཚོར། སྤྱིར་བསྟན་དགྲ །ཁྱད་པར་དུ་ཡང་བསྙེན་སྒྲུབ་ལ་བར་ཆད་བྱེད་པ་རྣམས་ཀྱི་རཱུ་པ་བཟློག་བསད་ཀྱི་སྔགས་ཀྱིས་བསྐོར་བ་གཞུག །ཅེས་པ་ལྟར་ལག་ལེན་བཞིན་བྲིས་ནས་བསྒྲུབས་ཤིང་མནན་ན་(༨བ)
དགྲ་བགེགས་ཀྱི་བར་ཆད་སྤྱིར་ཞི་བའི་ཞར་སྒབ་འདྲེའི་གནོད་པ་ལའང་ཤུགས་ཀྱིས་ཕན་པར་སེམས་མོད་དིང་སང་ཕྱག་ལེན་དུ་མཛད་པ་ཉུང་བས་མ་བྱས་ཀྱང་འགལ་བ་མེད། གཉིས་པ་དངོས་གཞི་ནི། མཚམས་ཀྱི་སྔོན་དུ་ཆ་གསུམ་དང་གསེར་སྐྱེམས་བཏང་སྟེ་སྡེ་བརྒྱད་ཆ་མཉམ། དཀར་དམར་གྱི་གཏོར་མ་བསྔོ་བ་འདི་གའི་ལས་བྱང་ཚོར་བྱུང་བ་ལྟར་བགེགས་བསྐྲོད་དང་སྲུང་འཁོར་བྱ། དེའང་གནུབས་ཆེན་གྱིས་མཛད་པའི་ལས་བྱང་བདུད་དཔུང་གཏོར་བྱེད་དུ་བདག་བསྐྱེད་འཇམ་དཔལ་ཚེ་བདག་ནག་པོ་དང་མདུན་བསྐྱེད་ཁྲོ་ཆུ་ལས་ཀྱི་གཤིན་རྗེའི་ཚུལ་དུ་སྒྲུབ་པར་གསུངས་པས་ཟིལ་གནོན་གྱི་ལས་བྱང་རྒྱས་པའམ་ཡང་བཟློག་ཡབ་ཡུམ་གྱི་མངོན་རྟོགས་ཙམ་ལ་བརྟེན་ཀྱང་ལེགས་པའི་ཆ་ཡིན་མོད་ཕྱིས་སུ་འཇུག་པ་བདེ་བའི་ཆེད་ཡི་དམ་ཆོས་སྐྱོང་དབྱེར་མེད་དུ་བཞེད་པས་རིགས་འཛིན་ཀུན་དགའ་ཚེ་མཆོག་གིས་མཛད་པའི་ལས་བྱང་གཞུང་བསྲང་། རྒྱུད་ལས། ཏིང་ངེ་འཛིན་རྣམ་པ་གསུམ་ཡིན་ཏེ་ཕྱི་ལྟར་འཆི་བདག་སྲོག་བདག་ཚེ་བདག་གསུམ་དུ་འདུས་པས་ཁྲོ་ཆུ་དུག་སྡོང་གི་སྒྲུབ་པ་དང་གཅིག །ནང་ལྟར་འཇམ་དབྱངས་རྟ་མགྲིན་ཕྱག་རྡོར་གསུམ་དུ་འདུས་པས་རིགས་གསུམ་མགོན་པོའི་སྒྲུབ་པ་དང་གཉིས། གསང་བ་སྐུ་གསུམ་འདུས་པ་གཞི་ལམ་འབྲས་གསུམ་སྒྲུབ་པ་དང་གསུམ། ཞེས་བཤད་པའི་དོན་བཞིན་ཆོས་རྣམས་དམིགས་མེད་སྤྲོས་བྲལ་ཀུན་ཁྱབ་གདལ། །ཞེས་པ་གཞི་ཆོས་སྐུ་དེ་བཞིན་ཉིད་ཀྱི་ཏིང་ངེ་འཛིན་ཀ་དག་གི་ངང་ནས། སྙིང་རྗེའི་རྩལ་དུ། ཞེས་པས་ལམ་གོང་གི་གདངས་འགག་པ་མེད་པ་ལོངས་སྐུ་ཀུན་ཏུ་སྣང་བའི་ཏིང་ངེ་འཛིན་ལྷུན་གྲུབ་འོད་ལྔའི་རང་བཞིན་ཉི་མའི་སྙིང་པོ་ལྟ་བུ། རང་བྱུང་ཁྲོ་ཚོགས་གསལ། ཞེས་པས་འབྲས་བུ་ཉི་མ་ལས་འོད་ཟེར་ཤར་བ་(༩ན)
ལྟར་སྤྲུལ་སྐུ་རྒྱུའི་ཏིང་ངེ་འཛིན་ཁྲོ་བོའི་ཚོགས་ཀྱི་རྟེན་བརྟེན་པ་རྣམས་འཆར་བྱེད་ཀྱི་རྒྱུ་ཡི་གེ་ཨེ་ལས་རིམ་གྱིས་འཕྲོས་པས། ཨེ་ལས་རབ་འཇིགས་ནམ་མཁའ་མཐའ་དབུས་མེད། །ཅེས་སོགས་ཚིག་རྐང་བདུན་གྱིས་བདག་མདུན་གཉིས་ཀའི་གཞི་རྟེན་གཅིག་ཏུ་བྱས་ཏེ། རྒྱུད་ལས་སྟོང་པའི་ངང་ལས་འཇིག་རྟེན་ཁམས། །གཤིན་རྗེ་དམྱལ་བའི་ཡུལ་དུ་བསམ། །འོག་ནི་སྤུ་གྲིའི་ས་གཞི་ལ། །ཞེས་པ་ལྟར། ཕྱི་རུ་མཚོན་ཆ་འཆོལ་བའི་གཞལ་ཡས་ཁང་། །ཞེས་སོགས་ཤློ་ཀ་ལྔས་སྲུང་འཁོར་དང་འོག་ནས་འབྱུང་བའི་རྟེན་བརྟེན་པ་བསྒོམ་ཚུལ་རྣམས་བསྙེན་པའི་དུས་དམིགས་པ་གཏོད་པའི་ཟབ་ཁྱད་ཀྱིས་མེ་ལོང་ལ་གཟུགས་བརྙན་ཤར་བ་ལྟར་ལས་བྱང་གི་ཚིག་གཅིག་པུས་བདག་བསྐྱེད་བསྒོམ་པ་དང་མཉམ་དུ་མདུན་བསྐྱེད་ཀྱང་གསལ་འདེབས་ཤིང་གསང་སྔགས་སྤྱིའི་སྲུང་འཁོར་དང་མི་འདྲ་བར་ཅུང་ཟད་འཁྲུག་ཅིང་རྟོགས་དཀའ་བ་གུར་ཁང་ཤོག་དྲིལ། རྗེ་ཀུན་དགའ་ཚེ་མཆོག་གི་གསུང་རྒྱུན་དང་ཞལ་བཀོད་ཀྱི་མདུན་དཀྱིལ་རིགས་འཛིན་ཀུ་མཱ་རའི་རྣམ་སྤྲུལ་ཟུར་སྔགས་འཆང་གཞོན་ནུ་དོན་གྲུབ་ཀྱི་ཕྱག་བྲིས་མ་ཁུངས་བཙུན་དང་དམ་པའི་ཞལ་ལུང་ལྟར་གོ་བདེ་བར་བཤད་ན། ཁ་བྱང་ལས། ཏིང་ངེ་འཛིན་གྱི་སྲུང་བ་ལ་དགུ །ཕྱི་གུར་ཁང་བརྒྱད་ཀྱི་སྲུང་བ་དང་ཞེས་སོགས་ཀྱི་གུར་ཁང་བརྒྱད་ནི། ཤོག་དྲིལ་ལས། ལྕགས་བསྲེགས་ལས་གྲུབ་པའི་གཞལ་ཡས་ཁང་དམར་ཧར་རེ་འདུག་པ་ཞིག་ཏུ་བསམ། དེའི་ཕྱི་རོལ་ཏུ་མཚོན་ཆ་སྣ་ཚོགས་ལས་གྲུབ་པའི་གཞལ་ཡས་ཁང་། དེའི་རྒྱབ་ཏུ་ཐོད་པའི་གཞལ་ཡས་ཁང་དབྱིབས་སྒོ་ང་ལྟ་བུ། དེའི་ཕྱི་རོལ་ཏུ་དུར་ཁྲོད་ཀྱི་གཞལ་ཡས་ཁང་དེའི་འོད་ཟེར་དང་། གཞལ་ཡས་ཁང་གི་ལྷ་འཇམ་(༩བ)
དཔལ་གཙོ་འཁོར་རྣམས་ཀྱི་ཐུགས་ཀ་ནས་འོད་ཟེར་འཕྲོས་པས་བྱད་མ་ལྷ་སྲུང་དང་བཅས་པའི་སྙིང་གར་ཕོག །རྣམ་ཤེས་མར་མེ་ལྟ་བུར་གསལ་བ་དེ་འོད་ཟེར་ཕོག་པ་ཙམ་གྱིས་ཁོའི་ལྷ་སྲུང་འཁོར་བཅས་འཁོར་ས་མ་རྙེད་ནས་བྲོས་ཏེ་སྲུང་མས་མགོན་བྱེད་རྒྱུ་ལ་རང་གི་སྲུང་མ་ཁོའི་སྲུང་མའི་མལ་དུ་གནས་པས་ཁོའི་གཤེད་བྱེད་པར་བསྒོམས། དེའི་ཕྱི་རོལ་ཏུ་དུག་སྣ་ཚོགས་ལས་གྲུབ་པའི་གཞལ་ཡས་ཁང་དབྱིབས་གྲུ་བཞི་པ་ཁ་དོག་ན་བུན་ལྟ་བུ་སྨུག་ནག་འཐིབས་ཤིང་གཡས་དང་གཡོན་དུ་འཁོར་བ་དུག་གི་འོད་ཟེར་འཕྲོས་པས་བྱད་མ་ལྷ་སྲུང་གནོད་བྱེད་ཐམས་ཅད་ཀྱིས་མཐོང་བ་ཙམ་གྱིས་བརྒྱལ་ནུས་པ་ཞིག་ཏུ་བསྒོམས། དེའི་ཕྱི་རོལ་དུ་རླུང་སྤུ་གྲི་ངར་མ་སོ་འཐབ་ཀྱི་གུར་ཁང་དབྱིབས་གྲུ་གསུམ་པ་ཁ་དོག་ལྗང་ནག་གཡས་གཡོན་དུ་འཁོར་བས་བྱད་མ་ལྷ་དང་བཅས་པའི་གནོད་བྱེད་ཐམས་ཅད་བསྐལ་པའི་མེ་ལ་བྱ་སྒྲོ་ཕོག་པ་ལྟ་བུར་བསམ། དེའི་ཕྱི་རོལ་དུ་ཁྲོ་ཆུའི་གཞལ་ཡས་ཁང་སྲ་ལ་མཁྲེགས་པ་བསྐལ་པའི་རླུང་ཡང་མི་ཐར་བར་བསམ། དེའི་ཕྱི་རོལ་ཏུ་བསྐལ་པའི་མེ་རི་མེ་དཔུང་འབར་བས་གནོད་བྱེད་གང་གིས་ཀྱང་མི་ཚུགས་པར་བསམ་སྟེ་གུར་ཁང་བརྒྱད་ཀྱི་བསྲུང་བ་ཞེས་པ་ཕྱི་ནས་རིམ་པ་བཞིན་བརྩིས་ན་དང་པོ་མེ། གཉིས་པ་ཁྲོ་ཆུ། གསུམ་པ་རླུང་གི་སྤུ་གྲི། བཞི་པ་དུག་སྣ་ཚོགས། ལྔ་པ་དུར་ཁྲོད། དྲུག་པ་ཐོད་པ། བདུན་པ་མཚོན་ཆ་སྣ་ཚོགས། བརྒྱད་པ་ལྕགས་སྲེགས་ཀྱི་ཁང་པའི་གུར་ཏེ་བརྒྱད་པོ་བསྡོམས་པ་གཟུགས་ཀྱི་ཤོག་དྲིལ་ཡིན་ལ། དེ་དག་གི་ཞིབ་ཆའི་རྒྱས་བཤད། སྲུང་བའི་ཤོག་དྲིལ་གསུམ་པ་ལས། ཤིན་ཏུ་འཇིགས་སུ་རུང་བ་ལྕགས་སྲེགས་ལས་གྲུབ་པའི་གཞལ་ཡས་ཁང་དམར་ཧར་རེ་བ་འདུག་པ་ལ་བསྐལ་པའི་མེའི་ཚ་ཚ་དམར་(༡༠ན)
ཕྲོམ་ཕྲོམ་འཕྲོ་བར་བསམ། དེའི་ཕྱི་རོལ་ཏུ་མཚོན་ཆ་སྣ་ཚོགས་ལས་གྲུབ་པའི་གུར་ཁང་། རྡོ་རྗེ། རལ་གྲི། ལྕགས་ཀྱུ། མདུང་རྩེ་གསུམ་པ། དགྲ་སྟ། ཞགས་པ། འཁོར་ལོ། གྲི་གུག །མདའ་ལ་སོགས་པ་མཚོན་ཆ་རྩེ་ཕྱིར་བསྟན་པའི་གུར། རྡོ་རྗེ་སྔོན་པོ། ནོར་བུ་སེར་པོ། པདྨ་དམར་པོ། སྣ་ཚོགས་རྡོ་རྗེ། གྲི་གུག །རྒྱ་གྲམ་གྱི་གུར་ཁང་བསྒོམ་མོ། །དེའི་ཕྱི་རིམ་ཐོད་པའི་གུར་ཁང་དབྱིབས་སྒོ་ང་ལྟ་བུ་སྲ་ལ་མཁྲེགས་པའི་གུར་ཁང་། དེའི་ཕྱི་རོལ་ཏུ་དུར་ཁྲོད་འཇིགས་སུ་རུང་བའི་གཞལ་ཡས་ཁང་། ཞིང་ཆེན་དང་། ཞིང་ཆུང་གི་དྲལ་མ་འཕྱོ་བ། མཾ་སའི་གཡང་གཞི། རོ་བམ་པ་མྱག་མ་རུལ་བྲོ་བ་གཟར་བ་རོ་ཞེ་སྡང་གི་མེས་འཚིག་པ། གཅན་གཟན་གྱི་ཟ་འཕྲོ་ཡོད་པ། ཀེང་རུས་ཁྲལ་ཁྲོལ་ཡོད་པ། དུར་བྱ་སྣ་ཚོགས་ཀླད་ལ་ལྡིང་བ། གཅན་གཟན་སྣ་ཚོགས་ངར་བ་རྒྱུག་མཆོངས་བྱེད་པ། རླངས་པ་སྔོ་དམར་ཐུ་ལུ་ལུ་བྱེད་པའི་འོད་ཟེར་འཕྲོ་བ་ཞིག་བསྒོམ། ཤིན་ཏུ་ཡ་ང་བ་སྐྱི་གཡའ་བ་ཞིག་བསྒོམ། དེའི་ཕྱི་རོལ་ཏུ་དུག་སྣ་ཚོགས་ལས་གྲུབ་པའི་གཞལ་ཡས་ཁང་དབྱིབས་གྲུ་བཞིར་འདུག་པ། ཁ་དོག་ན་བུན་སྨུག་ནག་འཐིབས་པ། དུག་གི་འོད་ཟེར་སྔོ་དམར་གྱི་ནམ་མཁའ་ས་གཞི་ཁྱབ་པར་འཕྲོས་པས་བྱད་མ་ལྷ་སྲུང་གནོད་བྱེད་དང་བཅས་པ་རྣམས་བརྒྱལ་ནུས་པར་བསམ། དེའི་ཕྱི་རིམ་རླུང་གི་སྤུ་གྲི་སོ་འཐབ་པ་ངར་མའི་གུར་ཁང་དབྱིབས་གྲུ་གསུམ་དུ་འདུག་པ་ཁ་དོག་ལྗང་ནག་གཡས་དང་གཡོན་དུ་འཁོར་བས་བྱད་མ་གནོད་བྱེད་ཐམས་ཅད་གྲིའི་བར་དུ་གཏུབ་པའམ་བསྐལ་པའི་མེ་ལ་བྱ་སྒྲོ་བསྲེགས་པ་ལྟར་བསམ། དེའི་ཕྱི་རོལ་ཏུ་ཁྲོ་ཆུའི་གཞལ་ཡས་ཁང་སྲ་ལ་མཁྲེགས་པ་ཅིས་ཀྱང་མི་ཤིགས་པའི་གུར་ཁང་།(༡༠བ)
དེའི་རྒྱབ་ཏུ་བཀའ་ལྷ་མ་སྲིན་སྡེ་བརྒྱད་མཚོན་ཆ་སྣ་ཚོགས་འཛིན་པའི་གུར་ཁང་། དེའི་རྒྱབ་ཏུ་མེ་ཆུ་རླབས་ཀྱི་རྦ་རླབས་འཕྱོ་བའི་གུར་ཁང་། དེའི་རྒྱབ་རླུང་ནག་འཚུབ་མའི་གུར་ཁང་སྤུ་གྲི་ལྟར་དུ་འཁྲུགས་པ། དེའི་རྒྱབ་ཏུ་ལྷ་དམག་ཉི་ཁྲི་ཆིག་སྟོང་གི་གུར་ཁང་། བསྐལ་པའི་མེ་ཆེན་པོ་ནི་ཀུན་ཏུ་སྒོང་རིལ་ཚུར་འབར་བ། གཟུགས་མེད་ནམ་མཁའི་རང་སྒྲའི་བྱད་མ་ལ་སོགས་པ་གནོད་བྱེད་རྣམས་གསོད་ཅིག །རྒྱོབ་ཅིག །རྡུངས་ཤིག །མེད་པར་གྱིས་ཤིག །རྡུལ་དུ་ལྷོགས་ཤིག །ཅེས་པའི་སྒྲས་འཇིག་རྟེན་གསུམ་ཁྱབ་པར་བསམ་མོ། །གུར་ཁང་རེ་རེ་ལ་འཐུག་རྔམས་དཔག་ཚད་རེ་ཡོད་པར་བསམ། ཀུན་ཀྱང་སྲ་བ་བརྟན་པ་གཞན་གྱི་སྐྱོན་གྱིས་འཇིག་མི་ནུས་པར་བསམ་མོ། །ཞེས་བྱུང་བ་གོང་གི་གུར་རིམ་བརྒྱད་པོར་ལྷན་ཐབས་སུ་སྦྱོར་བ་གནད་ཆེ་ཞིང་ཁྲོ་ཆུའི་གུར་ཁང་དཀྱིལ་འཁོར་གཞན་ལྟར་ཁྲོ་བོ་བཅུར་ངོས་མི་འཛིན་པར་ཁྲོ་ཆུ་ཁོལ་མའི་གུར་ཡིན་པས་མ་འཁྲུལ་བ་དགོས། ཁྲོ་བོ་དཀར་ནག་ནི། དེ་ཉིད་ལས། དེ་རྣམས་ཀྱི་ནང་དུ་ཁྲོ་བོ་ནག་པོ་ཕྱག་ན་མཚོན་ཆ་སྣ་ཚོགས་ཐོགས་པས་ཞལ་ཕྱིར་འགྱུ་ནས་བཟློག་པའི་སྔགས་དང་བཟློག་པའི་ལས་ཕུན་སུམ་ཚོགས་པས་དམིགས་བྱ་རྣམས་ཕྱིར་བཟློག་ཅིང་རེས་འགའ་ཕྱི་རོལ་གྱི་མེ་ལའང་བསྲེག་གོ །དེའི་ནང་དུ་ཁྲོ་བོ་དཀར་པོ་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་ཚེ་བུམ། བར་པ་གཉིས་ཀྱིས་ཙཀྲ །ཐ་མ་གཉིས་ཀྱིས་ཐོད་པ་བསྣམས་ཤིང་ཞལ་ནང་དུ་གཟིགས་ནས་སྲུང་བའི་སྔགས་དབྱངས་གསལ་དང་བཅས་བརྗོད་ཅིང་སྲུང་བའི་ལས་ཕུན་སུམ་ཚོགས་པ་མཛད་པའི་གུར་ཁང་དུ་བསམས་ཏེ་ཁྲོ་བོ་དཀར་ནག་གི་སྲུང་བ་ཞེས་པ་དང་དུས་མཚུངས་ལས་བྱང་དུའང་མི་གསལ་མོད། ཅེས་བྱུང་བ་ཡང་བཟློག་མེའི་སྤུ་གྲིའི་(༡༡ན)
གུར་རིམ་བཅུ་གསུམ་གྱི་བར་མཚམས་ཚོར་ཁྲོ་བོས་གཏམ་པ་དང་དགོངས་པ་གཅིག་པས་གུར་རིམ་བརྒྱད་པོའི་བར་ཐམས་ཅད་ཁྲོ་བོ་དཀར་ནག་གི་སྲུང་བཟློག་མཛད་པར་བསམས་པ་མིག་གི་ཤོག་དྲིལ། གུར་ཁང་གཞལ་ཡས་ཆེན་པོའི་ནང་ཉིད་དུ་ཞེས་སོགས་ཤློ་ཀ་གཉིས་ཀྱིས་གཞལ་ཡས་ཁང་དང་གདན་བསྐྱེད་ལྷ་བསྒོམ་པ་ནི་བདག་ཉིད་སྐད་ཅིག་རྫུས་སྐྱེས་རྡོ་རྗེའི་སྐུ། །ཞེས་པ་ནས་འོད་འཕྲོས་ཡེ་ཤེས་ལྷ་ཚོགས་སྤྱན་དྲངས་གྱུར། །ཞེས་པའི་བར་ནི། ཤོག་དྲིལ་ལས། གུར་ཁང་གི་ནང་དུ་ཨེ་མཐིང་བསྣོལ་བའི་དབུས་སུ་གཞུང་ལྟར་ལྷ་བསྒོམ་པ་ནི། ཞེས་པ་སྲུང་བ་མེའི་ཤོག་དྲིལ་ཏེ་ཁྱད་པར་གྱི་དམིགས་པ། སྲུང་བཟློག་བསད་གསུམ་གྱི་ཞལ་གདམས་ལས། རང་ཉིད་གཤིན་རྗེའི་གཤེད་དུ་བསྒོམས་པའི་སྤྱི་བོར་མཆོད་རྟེན་གསུམ་ལ་རིག་གསུམ་གྱི་མགོན་པོ་བསྐྱེད་ནས་ཕྱོགས་བཅུའི་སངས་རྒྱས་ཐམས་ཅད་དང་ཡི་དམ་ཞི་ཁྲོའི་ལྷ་ཚོགས་ཀྱི་འོད་ཟེར་སྙིང་པོ་བཅུད་བསྡུས་པའི་བདག་ཉིད་དུ་གྱུར་བར་བསམ། ཡང་འོད་ཟེར་འཕྲོས་པས་མུ་སྟེགས་ལ་སོགས་པའི་ཁྲོ་བོ་དབང་ཆེན་མ་ཧཱ་དེ་ཝ་ལ་སོགས་མུ་སྟེགས་ཀྱི་ལྷ་ཐམས་ཅད་ཀྱི་བཅུད་དང་འོད་ཟེར་ནུས་མཐུ་ཐམས་ཅད་བསྡུས་ནས་སྐུ་ལ་ཐིམ་པར་བསམས་ནས་ཕྱི་ནང་བན་བོན་ཐམས་ཅད་ཀྱི་ཡི་དམ་གྱི་ལྷ་ཚོགས་ཐམས་ཅད་གཅིག་ཏུ་བསྡུས་པས་དུག་སྡོང་གི་སྐུར་གྱུར་པར་བསམས་པ་ནི། ཞེས་བྱུང་གཟབ་གནད་དོ། །དེའང་ཁ་གནོན་དགོས་པ་ཁྲོ་ཆུང་ཚོགས་འཕྲོས་དགྲ་བགེགས་རྡུལ་དུ་རློག །ཅེས་ཡབ་བསྐྱེད་ཟིན་པའི་འོག་ཏུ། གསང་ཡུམ་གསང་བ་དུན་ཏིང་ནག་མོ་ནི། །ཞལ་གཅིག་ཕྱག་བཞི་འཇིགས་པའི་ཆ་བྱད་ཅན། །མཆེ་བ་བཞི་གཙིགས་སྤྱན་གསུམ་སྡང་(༡༡བ)
མིག་བགྲད། །རལ་པ་ཁམ་ནག་སྲིད་པའི་རྩེ་མོར་བསྙེག །ཕྱག་གཡས་དང་པོ་རལ་གྲིས་དགྲ་སྲོག་གཅོད། །འོག་མ་ལྕགས་ཀྱུས་དགྲ་བགེགས་བླ་སྲོག་འགུགས། །གཡོན་གྱི་དང་པོ་ཐོད་ཁྲག་ཡབ་ལ་སྟོབ། །འོག་མ་ལྕགས་སྒྲོག་གནོད་བྱེད་བླ་སེམས་འཆིང་། །ཞབས་གཉིས་ཡབ་ཀྱི་ལྟེ་བར་འཁྲིལ་སྦྱོར་ཚུལ། །རང་འོད་ལས་བྱུང་སྦས་པའི་ཚུལ་དུ་གསལ། །ཞེས་པ་འཇུག་ཅིང་གདུག་པ་ཀུན་སྒྲོལ་དུ་གཉིས་མེད་སྤྲུལ་པ་ཞལ་གཅིག་ཕྱག་གཉིས་པ་སྡེ་དྲུག་གི་གྲས་དང་། དེའི་ཕྱི་རོལ་ཏུ་ལས་ཀྱི་བཤན་པ་ཞལ་གསུམ་ཕྱག་དྲུག་པ་མཛད་ཅིང་། སྣང་གསལ་བའི་ལས་བྱང་ན་གཡོན་དུ་གཉིས་མེད་སྤྲུལ་པ་ཞལ་གསུམ་ཕྱག་དྲུག་པ་མཛད་པ་ལས་ལོགས་སུ་ལས་ཀྱི་བཤན་པ་མེད་པ་རྒྱས་བསྡུས་ལས་ངོ་བོ་གཅིག་པས་འཇུག་པ་བདེ་བའི་དབང་དུ་བྱས་ཏེ་སྣང་གསལ་བ་གཞིར་བཞག་ལ་འདི་སྐོར་དང་སྤྱན་འདྲེན། མཆོད་བསྟོད་སོགས་ལ་ཡུམ་དང་ལས་ཀྱི་བཤན་པ་འཇུག་པ་གདུག་པ་ཀུན་སྒྲོལ་ནས་བླངས་ན་ལེགས་པར་མངོན་ཞིང་མི་ལེན་ན་གཉིས་མེད་དུག་གསུམ་ཁྲོས་པར་སྤྱི་གཤེད་ཀྱི་གཏོར་མ་བསྔོས་པས་འགྲུབ་བོ། །སྤྱན་འདྲེན་ནས་བསྟོད་པའི་བར་བདག་མདུན་ལ་ལྷན་ཅིག་ཏུ་བྱ། བསྙེན་པ་ལ། འཇམ་དཔལ་ཟིལ་གནོན་གྱི་བསྙེན་པ་ཐེབས་ན་དེས་ཁྱབ་ཅིང་རྗེ་དབུར་སྨྱོན་ལག་རིས་མཐོང་ཙམ་ལ་ཚེ་བདག་གི་ལས་བྱང་གྱེར་དགོས་པར་གསུངས་ཀྱང་བདག་མདུན་གཉིས་ཀ་ལས་གཤིན་ལ་བྱས་ཕྱིན་ཚེ་བདག་གི་ལས་བྱང་རྒྱུན་གྱི་ཐུགས་དམ་ལ་ཡོད་ན་མ་གཏོགས་པར་བཀབ་མི་དགོས་པ་ཟུར་ཀུན་མཁྱེན་ཆེན་པོའི་བཞེད་པ་གོང་བསྙེན་མ་སོང་ན་དབུ་སྟེང་གི་རིགས་གསུམ་མགོན་པོར་དམིགས་ནས་སོ་སོའི་བཟླས་པ་བརྒྱ་རྩ་རེ་བྱེད་པ་གནད་དམ་པ་(༡༢ན)
ཡིན། སྙིང་གར་རྡོ་རྗེ་དཀར་པོའི་ལྟེ་བ་རུ་ཞེས་སོགས་རྐང་པ་དང་པོ་གསུམ་གྱི་དོན། ཤོག་དྲིལ་ལས། རང་གི་ཙིཏྟ་དུ་ལས་བྱས་པ་ཟུར་གསུམ་རྣོ་བའི་ངར་དང་ལྡན་པ་སྲ་ཞིང་མཁྲེགས་པ། དེའི་རྒྱབ་ཏུ་རྡོ་རྗེ་ལྟེ་བ་གཅིག་པ་སྟེང་འོག་ཕྱོགས་མཚམས་ཐམས་ཅད་དུ་རྩེ་མོ་འབུར་ཐབས་སུ་ཡོད་པ། ནང་འཇམ་པ་མར་དཀར་གྱི་ཞལ་བ་བྱས་པ་ལྟ་བུའི་ནང་དུ་སངས་རྒྱས་སྟོང་རྩ་གཉིས་ཞལ་ནང་དུ་གྱུར་ནས་སྲུང་བའི་ལས་བྱེད་པར་བསམ། ཞེས་པ་འོད་དཀར་རྡོ་རྗེའི་སྲུང་བ་ཆུ་བོའི་ཤོག་དྲིལ། ནང་དུ་ཙིཏྟ་ཟུར་གསུམ་དུག་རླངས་འཕྱོ། །ཞེས་སོགས་རྐང་པ་དྲུག་གི་དོན་ཤོག་དྲིལ་ལས། དུག་གི་ཙིཏྟའི་མདུན་ཟུར་མར་འཇམ་དཔལ། གཡས་སུ་རྟ་མགྲིན་གཡོན་དུ་ཕྱག་རྡོར་རྣམས་རང་རང་གི་རང་རྟགས་ཀྱི་ཕྱག་རྒྱ་དང་བཅས་ཏེ་སྔགས་དང་སྲུང་བའི་ལས་མཛད་པ། ཞེས་པ་རིགས་གསུམ་མགོན་པོའི་སྲུང་བ་འབྱུང་བའི་ཤོག་དྲིལ། དེ་ནང་གནམ་ལྕགས་རྡོ་རྗེ་རྩེ་དགུ་པ། ཞེས་སོགས་ཚིག་རྐང་བཞིའི་དོན། ཤོག་དྲིལ་ལས། ཙིཏྟའི་ནང་དུ་ལྕགས་ཀྱི་རྡོ་རྗེ་རྩེ་དགུ་པ་གྱེན་དུ་བསྒྲེང་བ་ལྟེ་བ་ཡངས་ཤིང་རྒྱ་ཆེ་བ། དེའི་ནང་དུ་ངོ་བོ་ཡེ་ཤེས་རྣམ་པ་ལྔ་ལས་གྲུབ་པའི་རྣམ་པ་འོད་ལྔའི་གུར་ཁང་། དེའི་ནང་དུ་ཉི་ཟླའི་གའུ་ཁ་སྦྱོར། དེ་ལ་ཡེ་དྷརྨཱ་དང་། ཨཱོཾ་ཨཱཿཧཱུཾ་གི་ཐག་པས་བསྡམས་པའི་འོད་ཀྱི་གུར་ཁང་བསམ་སྟེ། ཞེས་པ་རྡོ་རྗེ་འོད་ལྔའི་སྲུང་བ་དུས་ཀྱི་ཤོག་དྲིལ་ཏེ། སྨན་སྡོང་གནད་ཀྱི་ཤོག་དྲིལ་མུ་ཏིག་ཕྲེང་བ་ལས། དེའི་ལྟེ་བ་ཡངས་པའི་ནང་དུ་ཉི་ཟླའི་གའུ་ཁ་སྦྱོར་སྲ་ཞིང་མཁྲེགས་པ་སྲུབས་མེད་པ། ཟླ་དཀྱིལ་ལ་གཡས་སྐོར་དུ་ཨཱ་དི། ཉི་དཀྱིལ་ལ་གཡོན་སྐོར་དུ་ཀཱ་དི། དེའི་རྒྱབ་ཏུ་ཡེ་དྷརྨཱ་རྒྱ་གྲམ་དུ་འཁྲིལ་བ། ཞེས་བཤད། དབུས་སུ་རྒྱལ་བའི་(༡༢བ)
ཐུགས་སྲོག་ཧཱུཾ་མཐིང་ནག །ཅེས་སོགས་ཚིག་རྐང་དྲུག་གི་དོན། ཤོག་དྲིལ་ལས། སྲུང་བ་དྲུག་པོའི་དབུས་སུ་དུས་གསུམ་གྱི་རྒྱལ་བ་ཐམས་ཅད་ཀྱི་ངོ་བོ་ཧཱུཾ་མཐིང་ནག །དེ་ནས་འཇམ་དཔལ་གྱི་ཐུགས་ཀྱི་ངོ་བོ་ཡ་དམར་ནག །བསྲུང་བྱ་ཐམས་ཅད་ཀྱི་ངོ་བོ་ནི་དམར་པོ་འོད་དང་བཅས་པ། དེ་གསུམ་གྱི་མཐར་སྲུང་སྔགས་ཀྱིས་བསྐོར་བར་བསམ་ཞིང་། དུས་གསུམ་སངས་རྒྱས་བྱང་སེམས་དམ་ཅན་སྲུང་མ་འཇམ་དཔལ་གཤིན་རྗེའི་གཤེད་དུ་གྱུར་ཚད་བསྲུང་བྱ་ལ་བསྐྱེད་བསྟིམ་བྱ་བ་ནི་གནད་དམ་པའོ། །ཞེས་པའི་དམིགས་རིམ་འདི་ལ་ཡ་ནྲི་ཧཱུཾ་གསུམ་གྱི་སྲུང་བ་རི་བོའི་ཤོག་དྲིལ་ཏེ། སྲུང་བའི་མན་ངག་ལྡེ་མིག་ལས་རྣམ་ཤེས་ཀྱི་ངོ་བོ་ཡི་གེ་ནྲི་དཀར་པོ་མིང་ཡིག་དང་བཅས་པ་བསྒོམ། བསྲུང་བྱ་རྣམས་གཡས་སུ་ཕོ་རིགས་གཡོན་དུ་མོ་རིགས། མདུན་ཕྱོགས་སུ་གཅེས་པ། རྒྱབ་ཕྱོགས་སུ་འཁོར་གཡོག །ཡུལ་ཞིང་བང་ཁང་བསྒོམ། དེ་རྒྱབ་ཏུ་བསྙེན་སྔགས་ཀྱིས་བསྐོར་བར་བསྒོམ། དེའི་རྒྱབ་ཏུ་འོད་རྡོ་རྗེའི་ར་བས་བསྐོར་བར་བྷེཾ། རྡོ་རྗེའི་དྲ་མིག་ཐམས་ཅད་སངས་རྒྱས་སྟོང་རྩ་གཉིས་གཡས་རང་རྟགས་ཀྱི་ཕྱག་མཚན་གཡོན་པས་བདུད་རྩིའི་བུམ་པ་བདུད་རྩིས་གང་བ་བསམ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་སྲུང་བའི་རྒྱས་བཏབ་པས་ཅིས་ཀྱང་མི་ཤིགས་པ་ཆོས་ཀྱི་སྐུ་རུ་བྷེཾ། ཡང་ཐུགས་ཀྱི་སྔགས་འཕྲེང་ལས་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ལ་བརྒྱུད། དེ་རྣམས་ལས་འོད་ཟེར་འཕྲོས་པས་བ་སྤུའི་ཁྲོ་བོ་རྣམས་ལ་བརྒྱུད། དེ་རྣམས་ལས་འོད་ཟེར་འཕྲོས། འཁོར་གྱི་ཁྲོ་བོ་རྣམས་ལ་བརྒྱུད། དེ་རྣམས་ལས་འོད་ཟེར་འཕྲོས། ཁམས་གསུམ་སྲིད་གསུམ་ཐམས་ཅད་རང་དང་འདྲ་(༡༣ན)
བས་འཇིགརྟེན་གྱི་ཁམས་ཐམས་ཅད་ཁེངས། དེ་ལས་འོད་ཟེར་འཕྲོས། རྒྱ་མཚོའི་གླིང་བར། རི་རབ་ཀྱི་ལྕོག་བར། ཉི་ཟླའི་ཐེབ་བར། སྤྲིན་གྱི་གོ་བར། ས་རྡོ་རི་བྲག །རྩི་ཤིང་ནགས་ཚལ། ལྷ་འདྲེའི་གཏད་མནན་གར་སྦས་སྦྱང་བ། ཁྲོ་བོ་རྣམས་ཀྱི་ཐུགས་རྗེའི་སྤྱན་གྱིས་གཟིགས་བསྲུང་བྱའི་རྣམ་ཤེས་ཀྱི་ངོ་བོ་དེ་ཡི་གེ་ཧཱུཾ་དུ་བྱས་ཏེ་ཚུར་འདུས། རྡོ་རྗེ་ཡ་ནྲིས་མཚན་པ་ལ་བསྟིམ། བཀྲག་མདངས་གཟི་བརྗིད་དང་ལྡན་པར་བྷེཾ། ཡང་འོད་ཟེར་སྔར་ལྟར་འཕྲོས་པས་སྲིད་པ་གསུམ་གྱི་བཀྲག་མདངས། འབྱུང་བ་ལྔའི་བཅུད། ཉི་ཟླའི་འོད། མིའི་ཚེ། ཟས་ཀྱི་བཅུད། རིན་པོ་ཆེའི་རིགས། མེ་ཏོག་གི་བཅུད། རྩི་ཏོག་གི་བཅུད། ས་རྡོ་རི་བྲག་གི་བཅུད་ཐམས་ཅད་ཚུར་འོད་ཟེར་དམར་པོའི་རྣམ་པར་བསྡུས་ནས་ཡ་ནྲིས་མཚན་པ་ལ་བསྟིམ་པས་སྔར་བས་ཀྱང་འོད་ཟེར་གཟི་བརྗིད་དང་ལྡན་པར་བསམ། ཡང་འོད་ཟེར་སྔར་ལྟར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྒྱུད་བསྐུལ། ཚུར་འདུས་སྤྱི་བོར་རིགས་གསུམ་མགོན་པོ་ལ་ཐིམ་པས་དེ་རྣམས་ཀྱི་ཐུགས་རྗེ་ནུས་མཐུ་ཐམས་ཅད་བདུད་རྩིའི་རང་བཞིན་དུ་ཚུར་རང་གི་སྤྱི་གཙུག་ཏུ་མར་ཐིམ་པས་རྡོ་རྗེ་ཡ་ནྲིས་མཚན་པ་ལ་བསྟིམ། བཀྲག་མདངས་གཟི་བརྗིད་དང་ལྡན་པར་བསམ། ཅིས་ཀྱང་མི་ཤིགས་པ་ཆོས་ཀྱི་སྐུར་བསམ། ཞེས་པས་འཕྲོ་འདུ་རྣམས་ཀྱིས་བསྙེན་ཡིག་གཞན་དག་ནས་འབྱུང་བའི་བསྙེན་པ་བདག་བྱིན་རླབས་སོགས་མིང་འདོགས་སྣ་ཚོགས་པའི་གནད་ཐམས་ཅད་ཚང་ཞིང་། ཧཱུཾ་གི་ཀླད་ཀོར་དབུས་སུ་བླ་མ་དང་། ཞེས་སོགས་རྐང་པ་ལྔའི་དོན་ཤོག་དྲིལ་ལས། མི་ཕྱེད་པའི་ཐུགས་ཀྱི་མི་བསྐྱོད་པའི་དབུས་སུ་བླ་མ་(༡༣བ)
དང་བཅོམ་ལྡན་འདས་ཚེ་དཔག་མེད་ཐ་དད་མེད་པ་ཚེ་བུམ་ཅན་དུ་བསྐྱེད་ནས་མན་ངག་ལྟར་སྤྲོ་བསྡུ་ལ་ཚེའི་ཕུར་པ་གདབ་པར་བྱའོ། །ཞེས་པ་ནཱ་དར་ཚེ་ཕུར་གདབ་པའི་བསྲུང་བ་གདེངས་ཅན་གྱི་ཤོག་དྲིལ། སྐད་ཅིག་རང་ཉིད་རྫུས་སྐྱེས་ཁྲོ་བོའི་སྐུ། །ཞེས་སོགས་ཤློ་ཀ་དྲུག་གི་དོན། ཤོག་དྲིལ་ལས། རང་ཉིད་སྐད་ཅིག་གི་རྫུས་སྐྱེས་སུ་ལྷག་པའི་ལྷ་ཁྲག་དང་ཆུ་སེར་གྱི་བརླན་མེད་པ། ལོ་དུ་མ་ལོན་པའི་རུས་པ་བཙའ་ཅན་འདྲ་བ། ངོ་བོ་ཡེ་ཤེས་ལྷའི་རང་བཞིན། ཁ་དོག་རྣམ་པ་ལྔ་ལས་གྲུབ་པའི་ཀེང་རུས་ཀྱི་ཁྲོ་བོ་བདེ་བ་ཆེན་པོའི་ཉམས་དང་ལྡན་པ་ཞལ་ཕྱག་སོགས་བསྐྱེད་ལ། ཡི་གེ་གསུམ་གྱི་བསྐྱེད་བསྟིམ་སོགས་བྱས་ནས་སླར་ཡང་འོད་ཟེར་གྱི་ཚོགས་དཔག་ཏུ་མེད་པ་འཕྲོས་པས་བླ་མ་ཡི་དམ་སངས་རྒྱས་བྱང་སེམས། དམ་པ་ཆོས་སྐྱོང་སྲུང་མ་ཐམས་ཅད་མཉེས་པའི་མཆོད་པ་ཕུལ། དེ་དག་གི་སྐུ་གསུང་ཐུགས་ཡོན་ཏན་འཕྲིན་ལས་ཐུགས་རྗེ་ནུས་མཐུ་སྲོག་གི་ཡི་གེ་དང་བཅས་པ་ཐམས་ཅད་དབང་དུ་བསྡུས་ནས་སྔགས་ཕྲེང་ས་བོན་དང་བཅས་པ་ལ་ཐིམ་པས་དེ་དག་ཐམས་ཅད་བདག་གི་དབང་དུ་འདུས་ཤིང་། སླར་ཡང་འོད་ཟེར་འཕྲོས་པས་འཇིག་རྟེན་གྱི་དྲེགས་པ་ཅན་ཐམས་ཅད་ལ་ཕོག་སྡིག་སྒྲིབ་ཐམས་ཅད་སྦྱངས་ནས་ལྷའི་གོ་འཕང་ལ་བཀོད། དེ་དག་གི་མཐུ་སྟོབས་རྫུ་འཕྲུལ་ཡོན་ཏན་ནུས་མཐུ་སྲོག་གི་སྙིང་པོའི་ཡི་གེ་དང་བཅས་པ་ཐམས་ཅད་དབང་དུ་བསྡུས་ནས་སྔགས་འཕྲེང་ས་བོན་དང་བཅས་པ་ལ་ཐིམ་པས་མི་མཐུན་པའི་ཕྱོགས་ཐམས་ཅད་ནག་བུན་བུན་སྲེགས་ནས་གཟི་བརྗིད་ཕུན་སུམ་ཚོགས་པ་དང་ལྡན་ཞིང་འཇིག་རྟེན་དང་འཇིག་རྟེན་ལས་འདས་པའི་དྲེགས་པ་ཅན་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་བཀྲག་མདངས་གཟི་(༡༤ན)
བརྗིད་མཐུ་སྟོབས་ཐམས་ཅད་གཅིག་ཏུ་བསྡུས་པའི་བདག་ཉིད་ངའོ་སྙམ་པའི་ང་རྒྱལ་བརྟེན་པོར་བྱས་ལ་སྤྲོ་བསྡུ་དེ་ཉིད་ཀྱི་ངང་ལས་སྒྱུ་མ་ལྟ་བུར་དོན་ཤེས་པར་བྱས་ལ་བཟླས་པ་བྱ། ཞེས་པ་དྲེགས་པ་དབང་དུ་བསྡུས་ནས་བསྲུང་བ་བུ་གའི་ཤོག་དྲིལ་ཏེ། གཞན་ཡང་ཚེ་བདུད་ཀྱི་ཨུ་པ་དེ་ཤ་ལས། སྔོན་གྱི་ལས་དང་འཕྲལ་གྱི་རྐྱེན་ལས་གྱུར་པའི་མི་མཐུན་པའི་ཕྱོགས་ཐམས་ཅད་དང་། ཁྱད་པར་དུ་ཚེ་ཐུང་བའི་ལས་སྒྲིབ་དང་དམ་ཚིག་ཉམས་ཆགས་ཐམས་ཅད་ནག་ཉིལ་ལི་ལི་སོང་ནས་ཚེ་བདུད་ལ་ཐིམ་པས་ནག་གཟིར་གྱིས་སོང་། ཚེ་བདུད་ཕོ་མོའི་བཀྲག་མདངས་དང་རང་གི་ཚེ་དཔལ་ཕྲོགས་པ་རྣམས་དང་བཅས་པ་བསྡུས་ནས་སྔགས་འཕྲེང་ལ་ཐིམ་པས་རང་གི་ཚེ་དང་བཀྲག་མདངས་ཐམས་ཅད་རབ་ཏུ་རྒྱས་ནས་ཚེ་ཉི་ཟླ་དང་མཉམ་པར་གྱུར་ཏེ་སྐྱེ་འཆི་མེད་པ་རྡོ་རྗེའི་སྐུ་ཐོབ་པར་བསམ། ཞེས་པའི་དོན་དྲན་པར་བྱ་བ་སོགས་ཏིང་ངེ་འཛིན་དེ་ལྟ་བུ་མདུན་བསྐྱེད་ལའང་གསལ་བའི་འོད་ཟེར་གྱི་འཕྲོ་འདུའི་ངང་ནས་བཟླས་པ་བྱ། བདག་ཉིད་ལྷར་གསལ་བའི་ཐུགས་སྲོག་ལས་འོད་འཕྲོས་ནས་མདུན་བསྐྱེད་ཀྱི་ཐུགས་ཀར་རང་རང་གི་ས་བོན་གནས་པ་ལ་ཕོག་སྟེ་ཐུགས་དམ་གྱི་བརྒྱུད་བསྐུལ་བས་འཕྲིན་ལས་ཐམས་ཅད་ཐོགས་མེད་དུ་སྒྲུབ་པར་བསམས་ཤིང་གཙོ་བོར་ཤོག་དྲིལ་བདུན་པ་དང་དགུ་པའི་དམིགས་པར་ནན་ཏན་དུ་བྱས་ནས་བདག་དང་བསྲུང་བྱར་བཅས་པ་སྦ་གཟུང་བྱེད་པ་ཤིན་ཏུ་ཟབ་པ་ཡང་བཟློག་མེའི་སྤུ་གྲིའི་པུ་ཏི་དཀར་པོར་སྦ་བ་ལྟ་བུ་ལ་འདིར་མདུན་བསྐྱེད་ལྷར་གསལ་བ་དང་། ཡང་བཟློག་ལ་མཚན་མ་རྫས་ཀྱི་པུ་རིའི་ཁྱད་པར་ཡོད་ཀྱང་སྔགས་རློམ་ཕལ་ཆེར་ལ་འདི་ཞེས་གཏད་སོ་མེད་ཅིང་མཁས་པའི་རྒྱུད་འཛིན་ལ་ལ་མཆོད་རྟེན་ལ་ཏིང་ངེ་འཛིན་གྱི་སྒྲུབ་གཞིར་ནོར་བ་དང་། དེ་ལས་(༡༤བ)
རྣམ་དབྱེ་ཆེ་བ་འགའ་ཡང་ཏིང་ངེ་འཛིན་གྱི་མཆོད་རྟེན་ཞལ་སྤྲོད་སོགས་ཆོས་ཀྱི་གྲགས་པའི་གསུང་རྒྱུན་མ་ཟིན་པའི་བཞད་གད་ཀྱི་གནས་དུ་མ་མཐོང་ངོ་། །ཐུན་མཐར་གཤིན་རྗེ་གཤེད་ཀྱི་ཡི་གེ་བརྒྱ་པས་བྱིན་བརླབས་བརྟན་པར་བྱས། ཚོགས་ཐོག་མཐའ་བར་གསུམ། མདངས་བསྐང་། ཚོགས་ལྷག །ཐུན་གཏོར་མཚམས་ཀྱི་ཐོག་མཐའི་ཚོགས་འཁོར་དང་འབྲེལ་བར་ལྷ་ཚོགས་ཡོངས་རྫོགས་བསྐུལ་ཞིང་བསྲུང་བའི་ཤམ་བུའི་འདོད་གསོལ་དང་བཅས་ཁང་ཐོག་ཏུ་འབུལ། གཏོར་མནན་གྱི་དམིགས་པ་ལས་གཤིན་ཡ་མ་རཱ་ཛར་སྦྱར་བ་སྣང་གསལ་བའི་གཞུང་གི་དགོངས་དོན་ལྟར་མངའ་གསོལ་གཏོར་མར་ཤ་ཟན་སྨན་རཀ་གིས་གསོས་ལ་བསྔོ། ཕྱི་ནང་གིས་མཆོད་ཅིང་བསྟོད་པ་བསྡུས་པ་ཞིག་བྱ། ནོངས་པ་བཟོད་པར་གསོལ་ཞིང་སྨོན་ལམ་དང་ཤིས་པ་བརྗོད། མདུན་བསྐྱེད་མི་བསྡུ་ཞིང་། བདག་བསྐྱེད་ཀ་དག་འོད་གསལ་གྱི་ངང་ནས་ཉལ་བའི་རྣལ་འབྱོར་བྱ། ནམ་གུང་། ཐོ་རེངས། སྔ་ཐུན། ཉིན་གུང་གི་ཐུན་རྣམས་ལ་བཟླས་པའི་ཐུན་མཐར་མཆོད་གཏོར་འབུལ་བ་མན་ཆད་ལས་ཚོགས་དང་མངའ་གསོལ་སོགས་དོར་ཞིང་། ནམ་གུང་། ཐོ་རེངས། ཉིན་གུང་། དགོངས་མོ། སྲོད་ལྔའི་ཐུན་ལ་བདག་མདུན་ཏིང་ངེ་འཛིན་གྱི་གསལ་འདེབས། ནང་པར་ལག་རིས་མཐོང་ཙམ་ནས་ལས་བྱང་རྒྱས་པར་གྱེར་ཏེ་སྔ་ཐུན་དང་སྦྲེལ། ཉིན་གུང་གི་ཐུན་མཇུག་ཡབ་ཡུམ་གྱི་སྔགས་སྦྲེལ་ནས་སུམ་བརྒྱ་ཙམ་བཟླ་བ་ཁྱད་པར། དགོངས་ཐུན་ལ་ཚོགས་མཆོད། བསྐང་བ། མངའ་གསོལ། སྲོད་ལ་ཚོགས་དང་མངའ་གསོལ་སྤངས་པའི་ཐུན་གཏོར་ཡ་མ་རཱ་ཛ་མན་ཆད་ཀྱིས་བསྐུལ་ནས་གཏོར་མནན་བྱ་བའི་སོ་སོའི་དམིགས་བསལ་གྱི་འབྱིན་འཇུག་ཤེས་དགོས། བསྙེན་ཚད་ས་ཡ་(༡༥ན)
ལྔར་གསུངས་པ་རྙིང་ལུགས་ལ་བྱེ་བ་སྔོན་དུ་གཏོང་སྲོལ་ལྟར་ན་ཞག་གཅིག་ལ་ཡིག་དྲུག་ཁྲི་ཚོ་གསུམ་འགྲོ་བར། ལོ་རྐྱང་དགུ་བཤོལ་གྱི་ཟླ་བ་གསུམ་ཞག་གསུམ་ཉི་མའི་གསུམ་ཆ་རྣམས་ལ་དུང་ཕྱུར་འགྲོ་བ་སྔགས་འདི་དང་མ་ཎི་ཕྱེད་དང་དྲུག་སྐོར་བརྩིས་ན་ཟླ་བཤོལ་དང་བཅས་པའི་ལོ་ཉེར་བཞི་ཟླ་བ་བདུན་ཉི་མའི་གསུམ་ཆ་གཉིས་དགོས་པ་སྒྲུབ་པ་པོར་མ་ཟད་ལྷ་ཡང་སྐུ་ཐང་ཆད་དོགས་འདུག་ཅིང་སྤྱི་དང་མཐུན་པའི་ས་ཡ་ལ་ལོ་གཉིས་ཟླ་བ་ལྔ་ཞག་བཅུ་དགུ་ཉི་མའི་དྲུག་ཆ་གཅིག་དགོས་ཤིང་། འབྲུ་འབུམ་ལ་ལོ་གཅིག་ཟླ་བ་བདུན་ཞག་གཅིག་ཉི་མའི་དྲུག་ཆ་བཞི་རྣམས་བྱུང་། གསེར་ཆོས་ནཱ་རོ་མཁའ་སྤྱོད་ཀྱི་འབྲུ་འབུམ་ལོ་གསུམ་ཙམ་དགོས་པ་ཤས་ཆེ་བ་ལེགས་སྦྱར་གྱི་སྔགས་རིང་ཆ་སོགས་ལ་ཞིབ་མོར་བྱས་པ་སྣང་བ་སྔ་འགྱུར་ལ་འགྲོ་ལྡིང་དང་ཤ་ཟ་སོགས་སྐད་རིགས་སྣ་ཚོགས་པས་མྱུར་བ་ཡོང་རིགས་ཡིན་ནམ་སྙམ་དེ་ཙམ་མ་ལྕོགས་ན་འབུམ་ཕྲག་བཅུ་ལ་ལས་རུང་དང་གྲངས་དང་དུས་ལས་རྟགས་གཙོ་ཆེ་བས། རྒྱུད་ལས། མཁར་བརྩིག་པ་དང་གོ་ཁྲབ་གྱོན་པ་དང་མཚོན་ཐོགས་པ་དང་གཡུལ་དམག་འགྱེད་པ་དང་རྡོ་རྗེའི་རྫོང་བརྩིག་པ་དང་འཐབ་པ་ལས་རྒྱལ་བ་དང་བྲག་བཤིག་པ་དང་ཤིང་བཅད་པ་དང་ཁམས་གསུམ་ཀུན་ལས་རྒྱལ་བ་རྨི། དེ་ལྟར་བྱུང་ན་འགྲུབ་པའི་རྟགས་ཞེས་དང་། སྐུ་ཡི་རྟགས་སུ་འདི་ལྟར་ལགས། །མཚོ་ཡི་ཁ་ལ་བསྡད་པ་དང་། །གངས་དཀར་རྩེ་ལ་འཛེག་པ་དང་། །གོས་དཀར་གྱོན་དང་མེ་ཏོག་མཐུ། །དེ་ལྟར་བྱུང་ན་སྐུ་ཡི་རྟགས། །གསུང་གི་རྟགས་སུ་འདི་ལྟར་ལགས། །ལུས་ལ་མེ་འབར་མཚོན་ཆ་ཐོགས། །རོལ་མོའི་བྱེ་བྲག་དཀྲོལ་བ་དང་། །ལོ་ལེགས་མཆོད་རྟེན་བསྐོར་བ་སོགས། །དེ་ལྟར་བྱུང་(༡༥བ)
ན་གསུང་གི་རྟགས། །ཐུགས་ཀྱི་རྟགས་སུ་འདི་ལྟར་ལགས། །བདུད་རྩི་འཐུང་དང་ཆོས་ཤེས་དང་། །ཉི་ཟླ་འཆར་བ་ཐུགས་ཀྱི་རྟགས། །ཞེས་དང་། རྒྱས་པར་བྱ་ལམ་ནས་བྱུང་བ་ལྟར་རོ། །བསྙེན་པ་ཐེངས་ནས་ཏིང་ངེ་འཛིན་གོང་ལྟར་ལ་སྲུང་སྔགས་ཤམ་བུ་འདོགས་ལུགས་རྗེ་རཏྣའི་མཚན་ཅན་གྱི་སྔགས་འགྲིག་དང་གསུང་རྒྱུན་ལྟར་སྲུང་སྔགས་ཞག་བདུན་ཙམ་ཇི་ལྟར་འོས་པའི་ཐུན་ཐམས་ཅད་ཀྱི་མཐར་ཐུན་གཏོར་ལ་དགུག་བྲན་བརླབས་པའི་སྲུང་བའི་ཐུན་ཕུལ་ཤམ་བུ་དང་བཅས་སྲོད་ཐུན་མ་གཏོགས་པའི་ལྔ་པོར་མདུན་བསྐྱེད་ལ་འབུལ་ཞིང་། སྲོད་ཐུན་ལ་དགྲ་ཕྱོགས་སུ་འཕེན། འཕང་ཕྱིན་ལས་གཤིན་ཡ་མ་རཱ་ཛའི་དམིགས་པ་རྗེ་དབུར་སྨྱོན་གྱི་བཞེད་པ་ལྟར་འདིར་སྦྱོར་བ་འཐད་པར་སེམས་ཤིང་། ལུགས་གཉིས་ཀའི་ཁུངས་ནི་གདམས་པ་གནད་ཀྱི་ཤོག་དྲིལ་ལས། གྲུ་གསུམ་རྡོ་རྗེ་གདན་ལ་ཐུག་པའི་འོག་རྒྱ་མཚོ་ཆེན་པོའི་ནང་དུ་ལས་ཀྱི་གཤིན་རྗེ་ཡ་མ་རཱ་ཙ་ཁྲོས་པའི་མགོ་བོ་གསུམ་ནི་གཡས་སེང་གེའི་མགོ །གཡོན་ཕག་མགོ་ནག་པོ་དབུས་ཞལ་ཆུ་སྲིན་གྱི་གདོང་ལ། ཡ་ཐོད་གནམ་ལ་མ་མགལ་ས། མཆེ་བ་སྤུ་གྲི་ལྟར་རྣོ་བའི་ངར་དང་ལྡན་པ་ཞིག་འོག་ཏུ་ཁ་གདངས་ནས་ཡོད་པར་བསམ་ཞེས་བཤད་དོ། །བཟློག་པ་ནི། བཟློག་པའི་ཤོག་དྲིལ་ཟླ་བའི་དོན་ནི། གཤིན་རྗེ་རྟ་མགྲིན་བྱ་ཁྱུང་རྣམ་གསུམ་ལ། །དུས་གསུམ་རྒྱལ་བ་ཡི་དམ་ཞི་ཁྲོས་བསྐོར། །ཞེས་རྐང་པ་གཉིས་འཇུག་དགོས་པར་མ་ཟད་དྲག་པོའི་ལས་ལ་བསྔགས་པ་རྒྱུད་ལས། ཕྱི་སྒྲུབ་ལྷ་གསུམ་འདི་ལྟར་ལགས། །འཇམ་དཔལ་ཐུགས་སྤྲུལ་འཆི་བདག་ལགས། །མུ་སྟེགས་བསྟན་པ་བཤིག་དོན་དུ། །འཆི་བདག་གཏད་ཁྲམ་དཀོར་ལ་དབང་། །མུ་སྟེགས་བསྟན་པ་བཤིག་དོན་དུ། །རྟ་མགྲིན་ཐུགས་སྤྲུལ་ཚེ་བདག་ལགས། །ཚེ་བདག་རླུང་གི་ལས་ལ་དབང་། །མུ་སྟེགས་བསྟན་པ་ཤིག་དོན་དུ། །ཕྱག་རྡོར་(༡༦ན)
སྤྲུལ་པ་སྲོག་བདག་ལགས། །སྲོག་བདག་ལས་སྦྱོར་མནན་སྲེག་སྐོར་ལ་དབང་། །ལྷ་གསུམ་འདུས་པ་ཁྲོ་ཆུ་དུག་སྡོང་ཡིན། །དྲག་པོའི་ལས་རྣམས་ཀུན་ལ་དབང་། །ཞེས་བཤད། སྒོ་བསྲུང་བསྒྱུར་བ་བཟློག་པའི་ཤོག་དྲིལ་ཟུང་གི་དོན་ནི། གཤིན་རྗེ་དམར་ནག་རལ་གྲི་ཞགས་པ་འཛིན། །ཞེས་བརྗེ་ཞིང་བསྐལ་བཟང་གི་སངས་རྒྱས་སྟོང་ཀྱང་ཁྲོ་བོར་བསྒྱུར་བ་མན་ངག་གོ །རང་ཉིད་གཤིན་རྗེ་ཁྲོ་ཆུར་གསལ་བ་ཡི། །སྤྱི་བོར་གཤིན་རྗེ་འཆར་ག་ནག་པོ་ནི། །ཞལ་གཅིག་ཕྱག་གཉིས་མཆོད་རྟེན་བསྣམས་པ་ཡིས། །སྟེང་ཕྱོགས་ལྷ་ཡི་གདུག་པ་བཟློག་པར་བྱེད། །མགྲིན་པར་གཤིན་རྗེ་འཇོམས་བྱེད་འབར་བ་ནག །གཡས་པ་མཆོད་རྟེན་གཡོན་པ་དགྲ་སྟ་བསྣམས། །བར་སྣང་གཉན་གྱི་གདུག་པ་བཟློག་པར་བྱེད། །སྙིང་གར་གཤིན་རྗེ་ཚེ་བདག་ནག་པོ་ནི། །ཞལ་གསུམ་གཡས་དཀར་གཡོན་དམར་དབུས་མཐིང་རྔམས། །གཡས་གསུམ་འཁོར་ལོ་རལ་གྲི་རྡོ་རྗེ་དང་། །གཡོན་གསུམ་ལྕགས་ཀྱུ་གཏུན་ཤིང་སྡིགས་མཛུབ་བརྡེག །འོག་ཕྱོགས་ཀླུ་ཡི་གདུག་པ་བཟློག་པར་བྱེད། །གསང་བར་གཤིན་རྗེ་ཁ་ཐུན་ནག་པོ་ནི། །ཕྱག་གཉིས་ལྕགས་པར་བསྣམས་ནས་དགྲ་ཤ་ཟ། །སྡེ་བརྒྱད་དྲེགས་པའི་གདུག་པ་བཟློག་པར་བྱེད། །དཔུང་གཡས་གཤིན་རྗེ་ཁྲག་མཚོ་ཁོལ་མ་ནི། །ཕྱག་གཉིས་ཉི་ཟླ་ཆ་ལང་ལྟར་བརྡེབ་པས། །བྱད་མའི་ཤ་ཁྲག་ཉལ་ཉལ་རབ་སྟེར་ཞིང་། དགྲ་གདོན་ཕོ་རྒྱུད་ཚོགས་རྣམས་བཟློག་པར་བྱེད། །དཔུང་གཡོན་གཤིན་རྗེ་རལ་པ་ཚར་དགུ་ནི། །མདོག་ནག་ཕྱག་གཡས་ཁྲམ་ཤིང་གཡོན་ནད་རྐྱལ། །ཐོགས་ནས་བྱད་མ་ལྷར་བཅས་ཁྲམ་ལ་འདེབས། །དགྲ་བགེགས་མོ་རྒྱུད་ཚོགས་རྣམས་བཟློག་པར་བྱེད། །(༡༦བ)
རང་གི་བ་སྤུའི་གསེབ་ནས་ཁྲོ་ཆུང་ཚོགས། །མཚོན་ཐོགས་གྲངས་མེད་སྐར་ལྟར་འཕྲོས་པ་ཡིས། །བྱད་མ་ལྷར་བཅས་བཟློག་ཅིང་གསོད་པར་བྱེད། །གཤིན་རྗེ་སྡེ་དྲུག་དུག་གསུམ་ཁྲོས་པ་དང་། །སྤྲུལ་པ་ཡང་སྤྲུལ་འཁོར་ཚོགས་བཅས་རྣམས་ཀྱང་། །ཞལ་ཕྱིར་གཟིགས་ནས་བཟློག་པའི་ལས་མཛད་ཅིང་། །བ་སྤུའི་གསེབ་ནས་མཚོན་ཆ་སྣ་ཚོགས་པ། །འཕྲོས་པས་དགྲ་གདོན་བཟློག་ཅིང་གསོད་པར་བྱེད། །གུར་ཁང་ཕྱི་རོལ་གནམ་ལྕགས་ལས་གྲུབ་པའི། །འཁོར་ལོ་རྩིབས་བརྒྱད་སྟེང་འོག་གཉིས་དང་བཅུ། །གཡས་སུ་འཁོར་བས་བྱད་མ་ལྷ་སྲུང་བཅས། །བླ་སྲོག་གཅོད་ཅིང་ཤ་ཁྲག་འཐོར་བར་བྱེད། །རྩིབས་ལ་མ་རེག་ཙམ་དུ་ཁྲོ་ཆེན་བཅུ། །ཤར་དུ་གཤིན་རྗེ་མཐར་བྱེད་ནམ་མཁའི་མདོག །གཡས་པ་རྡོ་རྗེ་གཡོན་པ་ཐོ་བ་བསྣམས། །ལྷོ་རུ་ཤེས་རབ་མཐར་བྱེད་དུང་གི་མདོག །གཡས་པ་ཐོད་དབྱུག་གཡོན་པ་སྡིགས་མཛུབ་གཟིར། །ནུབ་ཏུ་པདྨ་མཐར་བྱེད་བྱུ་རུའི་མདོག །གཡས་པ་པདྨ་གཡོན་པ་བསྡིགས་མཛུབ་གཟིར། །བྱང་དུ་བགེགས་ཚོགས་མཐར་བྱེད་མུ་མེན་མདོག །གཡས་པ་རྡོ་རྗེ་གཡོན་པ་སྡིགས་མཛུབ་གཟིར། །ཤར་ལྷོར་འདོད་རྒྱལ་སྔོ་ནག་གཡས་ལྕགས་ཀྱུ། །ལྷོ་ནུབ་དབྱུག་པ་སྔོན་པོ་གཡས་དབྱུག་ཏོ། །ནུབ་བྱང་སྟོབས་ཆེན་མཐིང་ནག་གཡས་རྡོ་རྗེ། །བྱང་ཤར་མི་གཡོ་བམ་ཤིང་གཡས་རལ་གྲི། །སྟེང་དུ་ཧཱུཾ་མཛད་སྔོན་པོ་གཡས་རྡོ་རྗེ། །འོག་ཏུ་གནོད་མཛེས་མཐིང་ནག་གཡས་གཏུན་ཤིང་། །གཡོན་རྣམས་སྡིགས་མཛུབ་དགྲ་གདོན་བགེགས་ཚོགས་གཟིར། །ཀུན་ཀྱང་སྟག་ཤམ་དུར་ཁྲོད་ཆས་ཀྱིས་བརྒྱན། །ཞལ་ཕྱིར་གཟིགས་ནས་བཟློག་པའི་ལས་མཛད་ཅིང་། །བྱད་མ་ལྷར་བཅས་རྦད་གཏོང་བྱོལ་ཟོར་སོགས། །གཞན་གྱི་སྦྱོར་ངན་བགེགས་དང་གནོད་བྱེད་ཚོགས། །ཕར་ལ་བཟློག་ཅིང་མེ་ལྕེར་སྦྲང་མ་ལྟར། །ཐལ་བར་བརླག་ཅིང་ཕྱི་ཡི་(༡༧ན)
རྒྱ་མཚོ་ཆེའི། །ཕ་མཐར་བསྐྲད་ཅིང་བསད་བཅད་གཏུབས་གཏོར་ནས། །མིང་ཡང་མེད་པར་སྐད་ཅིག་བརླག་པར་གྱུར། །བདག་དང་ལྷ་རྣམས་སྐུ་ལས་རང་འདྲ་བའི། ཁྲོ་ཚོགས་གྲངས་མེད་ནད་མཚོན་ཐོགས་སྤྲོས་པས། །བྱད་མ་ལྷར་བཅས་ཕར་བཟློག་བསད་ཅིང་བསྒྲལ། །འབྱུང་བཞིས་ཚར་བཅད་ལྷག་རྣམས་རྒྱ་མཚོའི་མཐར། །བསྐྲད་ཅིང་མཚམས་བཅད་ཚུར་མི་བཟློག་པར་གྱུར། །ཞེས་ས་མཱ་དྷི་དང་བཅས་སྔགས་འགྲིག་བཞིན་བཟློག་སྔགས་ཞག་བདུན་སོགས་ཅི་རིགས་བཟླ། ཇ་སོགས་ཀྱི་དུས་ཐལ་རྡེབ་དང་དམོད་པ་བྱ་ཞིང་ཐུན་གཏོར་གཏོང་ལུགས་དངོས་གཞི་སྲུང་བ་དང་འདྲ་བ་ལ་མདུན་བསྐྱེད་ལ་བསྔོས་རྗེས་བཟློག་པའི་ཤམ་བུ་ཅན་གྱིས་བསྐུལ་ནས་དགྲ་ཕྱོགས་སུ་འཕང་ངོ་། །དེ་ལྟར་ལུས་དཀྱིལ་ལ་ལྷ་རྣམས་བཀོད་པའི་དགོས་པ་ནི་ལྷ་དེ་རྣམས་ཀྱི་བྱང་དུ་བདག་ཉིད་བཏབ་པ་སོགས་ཡོད་ན་ལྷ་དེ་རྣམས་བཙོན་དུ་བཟུང་བའི་དགོས་པ་ཡོད་ཅིང་ལྷ་དེ་རྣམས་བྱད་མ་ཁོ་རང་གི་རང་གཤེད་དུ་འབེབས་པ་ཡིན་ནོ། །ལུས་དཀྱིལ་འགོད་པ་དང་ཁྲོ་བོ་བཅུ་བསྐྱེད་པ་འདི་བཟློག་པའི་དུས་མ་གཏོགས་གཞན་ནམ་དུ་ཡང་མི་དགོས་སོ། །དེ་ལྟར་བཟློག་པའི་དམིགས་པ་སྔགས་དང་བཅས་པ་འདི་ནི་ཁྲོ་བཅུའི་བཟློག་པ་རི་རབ་ཁོང་མྱུལ་གྱི་དོན་ཡིན་པ་རིགས་འཛིན་ཆོས་ཀྱི་གྲགས་པའི་མན་ངག་གོ །ཏིང་ངེ་འཛིན་གྱི་སྲུང་བཟློག་འདི་ཙམ་བསྙེན་པའི་མཇུག་དང་སྦྲེལ་ན་ལེགས་ཤིང་མཐའ་གཅིག་ཏུ་བྱེད་དགོས་པའི་ངེས་པ་མེད། སྤྱིར་འདི་ཉིད་ལ་མཆོད་རྟེན་དཀར་ནག །ཐོད་པ་ཞལ་དབྱེ། བསད་ཁང་གཅིག་མ་དང་བཅོ་ལྔ་མ་སོགས་གང་འཚམ་ལ་བརྟན་པའི་སྲུང་བཟློག་བསད་མནན་སྲེག་ཟོར་གྱིས་མཚོན། ཙིཏྟ་རླུང་འཁོར། འགོམ་ཆོག །དགྲ་སྲི་མནན་པ། (༡༧བ)
སྣང་བ་དགུ་འགྱུར། དུ་བ་རླུང་ཞོན་སོགས་ལས་ཕྲན་མང་དུ་ཡོད་པ་གནུབས་ཆེན་བརྒྱུད་པའི་ཟབ་ཆོས་ལ་ནང་བྱན་ཆུད་པའི་རིག་སྔགས་འཆང་བ་ཞིག་གི་དྲུང་དུ་ས་སེར་རྡོ་སྔོན་ལྕགས་གོས་ཀྱི་ཡོན་དང་བཅས་འབད་པས་འཚོལ་བར་རིགས་སོ། །གསུམ་པ་མཇུག་ནི། དངོས་གྲུབ་ལེན་པར་གསལ་ཁ་མ་བྱུང་ཀྱང་སྔ་འགྱུར་གྱི་ཕྱོགས་སུ་དར་རྒྱས་ཆེ་ཞིང་བསྙེན་སྒྲུབ་ཀྱི་འབྲས་བུ་དངོས་གྲུབ་བླང་བ་ཡིན་པས། ཚེ་ཟན་། ཚེ་རིལ། ཚེ་ཆང་། ཟླ་ཁྲོམ། ཟླ་རྒྱས། ཐུན། སི་ཐོག །སྤང་ན་སྐྱེས་སོགས་བཟའ་བཅའ་སྣ་ཚོགས་བཤམ། གཏེར་ཁ་གཞན་ནས་བྱུང་བའི་དངོས་གྲུབ་ཀྱི་སྔགས་དམིགས་བསྐུལ་བ་སོགས་སྦྱར། སྒྲུབ་གཏོར་ལས་སྐུ་གསུང་ཐུགས་ཀྱི་བྱིན་རླབས་ལེན་ཞིང་དངོས་གྲུབ་ཀྱི་རྫས་རྣམས་ལ་རོལ། གཏའ་གཏོར་བསྙེན་པའི་སྟོད་སྨད་བར་གསུམ་གང་འོས་སུ་རྟགས་བཟང་བ་བྱུང་ན་དུས་དེར་གཏོར་ཡང་སླར་དེ་ཚབ་དགོས་པ་འདི་དུས་དབུལ། ཚོགས་བསྐང་བ། མངའ་གསོལ། གཏང་རག་མཆོད་པ། ནོངས་པ་བཟོད་གསོལ། རྟེན་རྣམས་ལ་བརྟན་བཞུགས་དང་རྟེན་མེད་རྣམས་གཤེགས། སྨོན་ལམ། བཀྲ་ཤིས་བྱ། སྒྲུབ་གཏོར་གྱི་འཁོར་ལོ་དང་ཕུར་པ་རྣམས་རང་གི་ལུས་ལ་འཆང་། མདུན་དཀྱིལ་བསྡུས་ཀྱང་སྒྲུབ་གཏོར་ཤས་པ་རྣམ་པ་གསུམ་གྱི་ཚུལ་དུ་བཞུགས་སུ་གསོལ། འཛིན་གཏོར་ལོ་རེར་བརྗེ་ཞིང་རྒྱུན་གྱི་གཏོར་བསྔོས་དང་དགུ་གསུམ་ལ་དུས་གཏོར་རམ་ཐ་མའང་ཉེར་དགུ་ལ་བཟང་བ་དང་ཕྲལ་དུ་ལྷའི་བསྐྱེད་རིམ་དང་བསྙེན་པ་མ་ཆག་པ་བྱ་བ་སོགས་ལྷ་སྒྲུབ་གཞན་ལྟར་བྱེད་ཅིང་། ལྷ་དང་བླ་མར་སོམ་ཉི་སྤངས་པའི་ཡིད་ཆེས་པའི་མོས་གུས་དང་རྩ་བ་དང་ཡན་ལག་གི་དམ་ཚིག་མ་ཉམས་པ་དུས་དང་ཡུན་དུ་བགྱིད་པ་དང་བསྙེན་སྒྲུབ་ལག་ལེན་ཕྲ་ཞིབ་རྣམས་(༡༨ན)
གཞན་ལས་འབྱུང་བ་ལྟར་ལ་ཁྱད་ཆོས་ཡུགས་ས་མར་མི་སྤྱོད། མཚམས་ཁང་དུ་བུད་མེད་དང་ཁྱིའི་རིགས་མི་གཏོང་བས་མཚོན་སྤང་བླང་མཐའ་དག་ཞིབ་མོར་དཔྱོད་པ་གཅེས་སོ། །ཕྱི་ནང་བན་བོན་རྦོད་གཏོང་མཁན་པོའི་བྲག །འཇམ་དཔལ་ཁྲོས་པ་དུས་དགྲའི་གནམ་ལྕགས་ཐོག །ཁྲོ་ཆུ་ཁོལ་མའི་ཟེགས་མ་ཕྱོགས་བརྒྱ་རུ། །འཐོར་ཚེ་ཡིད་སྲུབས་མྱ་ངན་ཁང་བུར་བརྒྱལ། །རྒྱ་བལ་པཎ་གྲུབ་ཞལ་གྱི་བདུད་རྩིའི་བཅུད། །གནུབས་ཆེན་ཐུགས་ཀྱི་སྒྲོམ་བུར་ཉེར་གབ་གཏེར། །ཞང་ཁྲོམ་ཕྱག་རྒྱས་བཀྲོལ་བ་ཐུབ་པའི་བསྟན། །རིང་གནས་ནག་པོ་མཐུ་ཡི་ལྕགས་རི་བཙན། །ཐོར་ཚུགས་དམར་པོའི་རྩ་ཆིངས་གོས་དཀར་ཀླུབས། །ལྕགས་ཕུར་དར་ནག་ཀླུང་བསྐྱོད་རྐེད་པར་ལྡན། །ཐུན་དོང་རཀྴའི་ཕྲེང་འཛིན་སྔགས་འཆང་གིས། །སྔོན་དུས་གངས་ཅན་དཔལ་མོའི་ལྟོ་བ་ཁེངས། །སོ་ཟུར་གནུབས་ལུགས་སྨིན་གྲོལ་མན་ངག་དང་། །རྒྱུད་བཤད་བསྟན་དང་རང་རྟགས་ཆ་བྱད་ཀུན། །ཉི་གཞོན་འཆར་ཀའི་མཁའ་ལ་རྒྱུ་སྐར་བཞིན། །བཙལ་ཡང་རྙེད་དཀའི་དུས་འདིར་སྐལ་ངན་བྱས། །བྱེ་བྲག་ཕྱོགས་འདིར་དཀར་བའི་བློ་གྲོས་ཟླས། །ཟབ་དོན་ཨུཏྤལ་འཛུམ་པ་སྔོན་མང་ཡང་། །དེང་སང་ཕལ་ཆེར་རྨོངས་ཆེན་མུན་པ་ཡིས། །ལན་བརྒྱར་བྱུགས་པའི་ཚུལ་ལ་བཞིན་རས་སྨད། །གནུབས་བསྟན་དགུན་གྱི་ཆུ་ཕྲན་ལྟར་གྱུར་ཚེ། །ལྷ་སྲས་རྣམ་སྤྲུལ་རྗེ་བཙུན་རཏྣའི་ཞབས། །སྲོལ་འབྱེད་དུ་མ་རང་གྲོལ་ལ་སོགས་པས། །པདྨའི་སྐུད་ཕྲར་རྡོ་རྗེའི་སྲོག་ཐུངས་བྱིན། ཁྱད་པར་བཀའ་གཏེར་རིང་ལུགས་གངྒཱའི་རྒྱུན། །སྔ་འགྱུར་རྒྱ་མཚོར་ཆད་མེད་འབབ་པའི་དྲིན། །ནོརའཛིན་གསེར་གྱིས་བཀང་ཡང་འཇལ་དཀའི་ཡུལ། །ཟུར་ཆེན་འཇམ་དབྱངས་(༡༨བ)
བླ་མ་ཁྱོད་མིན་སུ། །ཞྭ་སེར་བསྟན་པའི་ས་སྲུངས་གླང་པོའི་སྟེང་། །བགྲང་ཡས་ཤེས་བྱར་ལྟ་བའི་མིག་སྟོང་ང་། །བཅུ་ཕྲག་རིག་གནས་སྦྱོང་ལ་རབ་བྲེལ་བར། །མཐུ་མཁན་རྒན་པོའི་གཡར་ཁྲལ་ཅི་ཕྱིར་བབས། །འོན་ཏེ་སོ་དཀར་ཙམ་ནས་ཚེ་བདག་སོགས། །གཤིན་རྗེའི་རྒྱུད་ལུང་མན་ངག་མང་ཐོས་པས། །སྐྲ་དཀར་ལང་ཚོ་ཡོལ་ཡང་རྣམ་དག་ཚིལ། །ཕྲེང་བར་སྤེལ་ལ་བློ་གྲོས་མི་དོག་ཡངས། །གྲགས་འདོད་བཞིན་རས་ལས་བྱང་ཆུས་བཀྲུས་ཀྱང་། །ནུས་ལྡན་མཛེས་ཆོས་སྒྲུབ་པའི་ལུས་ཕྲའི་ཚོགས། །སྙན་བརྒྱུད་མུ་ཏིག་སྦྲེལ་ལེགས་འཁོར་ལོ་འདིས། །གཞན་ཡིད་འགུགས་པའི་ལྕགས་ཀྱུ་བྱེད་དང་སྙམ། །འཆི་བདག་གཤིན་རྗེའི་རྣམ་པར་ཉེར་བསྟན་པ། །ངེས་པའི་དོན་དུ་འཇམ་དཔལ་ཀུན་ཏུ་བཟང་། །བསྐྱེད་དང་རྫོགས་པའི་རྣལ་འབྱོར་ལ་གོམས་པས། །མཁའ་མཉམ་སྐྱེ་དགུ་མ་ལུས་གྲོལ་བར་ཤོག །ཅེས་རིགས་གསུམ་འདུས་པ་འཇམ་དཔལ་ཁྲོ་ཆུ་དུག་སྡོང་ནག་པོའི་བསྙེན་པའི་ཡི་གེ་རིན་ཆེན་ཀེ་ཏ་ཀ་འདི་ནི་སྔ་འགྱུར་བསྟན་པའི་ཉི་མ་ཆེན་པོ་རིགས་འཛིན་སྤྲུལ་པའི་སྐུ་བློ་བཟང་པདྨ་འཕྲིན་ལས་ཐེག་མཆོག་དབང་གི་རྒྱལ་པོ་ཡོངས་འདུའི་སྡེའི་གསུང་གིས་བསྐུལ་བ་ལྟར་དྲིན་ཅན་བླ་མ་ཁྱབ་བདག་ཆོས་དབྱིངས་རང་གྲོལ་གྱི་དྲུང་དུ་དབང་ལུང་ཕྱག་བཞེས་དམར་ཁྲིད་དང་ལུང་རྒྱུན་ཐོར་བུ་ལུས་པ་རྣམས་སྔགས་འཆང་དཀོན་མཆོག་ལྷུན་གྲུབ་ཀྱི་རྒྱུན་ལས་མཁས་གྲུབ་ཁྲ་ཚང་པ་ཆེན་པོར་ཐོས་ཤིང་། རཏྣ་གཉིས་པ་མཚུངས་མེད་ཆོས་ཀྱི་གྲགས་པའི་ཐུན་མོང་མ་ཡིན་པའི་གསུང་རྒྱུན་རྣམས་བན་གྲོང་སྔགས་འཆང་མཆོག་གྲུབ་རྒྱལ་པོར་ཕྱག་ཁྲིད་ཞུན་ཐར་བཅད་པས་གཤིན་རྗེ་མཁན་པོའི་གྲལ་དུ་སྡོད་པ་ལ་མ་ནོངས་པའི་ཟ་ཧོར་གྱི་སྔགས་སྨྱོན་ཟིལ་གནོན་བཞད་པ་རྩལ་(༡༩ན)
གྱིས་མེ་སྦྲུལ་ཧོར་ཟླ་བརྒྱད་པའི་ཁྲག་འཐུང་རྣམ་པར་རོལ་བའི་ཚེས་ལ་རྒྱལ་ཁབ་དམར་པོ་རིར་སྦྱར་བའི་ཡི་གེ་པ་ནི་རིགས་འཛིན་གྱི་བཙུན་པ་འཇམ་དབྱངས་གྲགས་པས་བགྱིས་ཤིང་། དུས་དབང་གིས་གལ་ཆུང་ཆོས་ལ་བྱེད་པར་མ་ཟད་གཤེད་སྐོར་འདི་ཉིད་དཀོན་ཞིང་གདམས་པ་རྣམས་ཁ་འཐོར་བའི་ཉག་ཕྲ་བར་སྣང་བས་ཞལ་ཤེས་ཡིག་ཆུང་གིས་ལེགས་པར་བརྒྱན་ནས་གསལ་བར་བཀོད་པ་བརྒྱུད་པའི་ཁུངས་ལ་མི་སེམ་ཞིང་། རང་གི་གེགས་སེལ་ཙམ་དུ་རྨ་ཁར་ཕན་ན་ཁྱི་ཚིལ་དུ་བྱེད་པ་སོགས་སྣོད་མིན་ལ་གསང་ཞིང་སྦ་བའི་བཀར་རྒྱ་ཡོད་པས་འཆོལ་པར་སྤྱོད་ན་འཆི་བདག་ལས་ཀྱི་གཤིན་རྗེས་ཚར་ཆོད་ཅིག་གུ་ཧྱ་ས་མཱ་ཡཱ། །སརྦ་མངྒ་ལཾ།། །།