འཇམ་དཔལ་ཁྲོ་ཆུ་དུག་སྡོང་ནག་པོའི་བརྒྱུད་འདེབས་སྨོན་ལམ་དང་བཅས་པ།
འཇམ་དཔལ་ཁྲོ་ཆུ་དུག་སྡོང་ནག་པོའི་བརྒྱུད་འདེབས་སྨོན་ལམ་དང་བཅས་པ་བཞུགས་སོ། །
རིགས་གསུམ་ཀུན་འདུས་དུག་སྡོང་གཤིན་རྗེ་གཤེད། །བཅོམ་ལྡན་ཐུབ་ཆེན་ཤཱཀྱ་སེང་གེའི་ཞབས། །དགེ་སློང་འཆར་ཀ་ཉན་ཐོས་སྡེ་ཡི་གཙོ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །ཟླ་གསང་མངའ་བདག་འཇམ་དཔལ་བཤེས་གཉེན་ཞབས། །དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །སྡེ་བརྒྱད་བྲན་འཁོལ་ཁྲག་འཐུང་ནག་པོ་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །གཤིན་རྗེ་གཤེད་དངོས་སློབ་དཔོན་ནོར་བུ་འཛིན། །དྲག་སྔགས་ཀུན་གྱི་བཀའ་བབས་གནུབས་བན་ཞབས། །ཟབ་གཏེར་བསྟན་པ་རྒྱས་མཛད་རྒྱ་ཞང་ཁྲོམ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །ཐུགས་ཀྱི་སྲས་མཆོག་དོན་ཡོད་རྡོ་རྗེ་དཔལ། །རིག་སྔགས་གྲུབ་པ་རོལ་པའི་རྡོ་རྗེ་དང་། །གསང་སྔགས་འཆང་བ་ཀརྨ་སིདྡྷི་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །སློབ་དཔོན་ཆེན་པོ་དཀའ་བཞིའི་མཚན་ལྡན་དང་། །གྲུབ་པ་མཆོག་བརྙེས་ཉི་མ་བཅུ་དྲུག་པ། །ཟབ་དོན་བཀའ་བབ་ཀུན་དགའ་རྒྱལ་མཚན་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །སྦས་པའི་རྣལ་འབྱོར་བྱང་ཆུབ་དཔལ་མོ་དང་། །མཚུངས་མེད་ཚུལ་ཁྲིམས་རྒྱ་མཚོ་གུང་རད་པ། །ཆོས་རྒྱལ་འབྲི་གུང་གནམ་(༢ན)
ལྕགས་མེ་འབར་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །རས་ཆུང་རྣམ་སྤྲུལ་བཀྲ་ཤིས་རྒྱ་མཚོའི་ཞབས། །རིགས་འཛིན་ཆེན་པོ་ཀུན་དགའ་ཚེ་མཆོག་དང་། །རྗེ་བཙུན་ངག་དབང་ཡེ་ཤེས་གྲུབ་པ་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །ཞང་ཁྲོམ་དངོས་སློབ་གནུབས་ཆེན་དར་མ་དབང་། །སྔགས་འཆང་གྷ་བ་ཤཱཀྱ་རྡོ་རྗེའི་ཞབས། །མཐུ་སྟོབས་ནུས་པའི་རྩལ་ལྡན་ཨ་གྲགས་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །གྲུབ་པ་མཐར་ཕྱིན་སློབ་དཔོན་ཨ་ཝཾ་མཚན། །བརྟུལ་ཞུགས་གྲུབ་པ་ཨཀྵོ་བཛྲ་དང་། །བསྙེན་སྒྲུབ་མཐར་ཕྱིན་ཆོས་ཀྱི་རྒྱལ་མཚན་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །རིགས་གསུམ་ལྷ་ཡིས་རྗེས་གཟུང་བྲག་ལ་བ། །རབ་འབྱམས་འཕྲིན་ལས་ཀུན་འགྲུབ་ཨ་རྡོར་དང་། །བདུད་དཔུང་མཐར་བྱེད་རྒྱ་སྟོན་ནམ་མཁའ་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །བརྒྱུད་པ་ཀུན་འདུས་ཟུར་ཆེན་ཐམས་ཅད་མཁྱེན། །གདམས་པའི་ཁ་འགེང་ཕུར་པ་བཀྲ་ཤིས་དང་། །རིག་སྔགས་འཆང་བ་པདྨ་དབང་རྒྱལ་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །འགྲན་ཟླ་གཉིས་པ་དབུར་སྨྱོན་ཆོས་ཀྱི་གྲགས། །མཁྱེན་བརྩེ་ནུས་ལྡན་དཀོན་མཆོག་ལྷུན་གྲུབ་དཔལ། །རིགས་ཀུན་བདག་པོ་བློ་མཆོག་རྡོ་རྗེ་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །མདོར་ན་སྲོག་དབང་ཀླག་ལུང་མན་ངག་(༢བ)
སོགས། །ཕྲ་ཞིབ་དམར་འཁྲིད་སྟོན་པའི་ཡོངས་འཛིན་ཚོགས། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ་དྲག་པོའི་དངོས་གྲུབ་སྩོལ། །རིགས་གསུམ་ཀུན་འདུས་འཇམ་དཔལ་གཤིན་རྗེ་གཤེད། །ཁྲོ་ཆུ་དུག་སྡོང་སྲོག་དབང་བྱིན་རླབས་ཀྱིས། །བདག་རྒྱུད་སྨིན་ནས་ལམ་འདིའི་མཆོག་ཀུན་གྱི། །ལས་རྣམས་ཐོགས་པ་མེད་པར་ལྷུན་གྲུབ་ཤོག །སྲུང་བའི་གུར་ཁང་བཅུ་གསུམ་རྡོ་རྗེའི་མཁར། །ཡིད་སྲུབས་དཔུང་གིས་འཇིག་པར་མི་ནུས་པས། །བདག་སོགས་དམིགས་བྱ་མཐའ་དག་གཞོམ་ཞིག་དང་། །བྲལ་བའི་འཆི་མེད་རིགས་འཛིན་འགྲུབ་པར་ཤོག །མུ་སྟེགས་བན་བོན་མཐུ་བྱད་སྒྱོགས་ཀྱི་འཕྲུལ། །ཕྱིར་བཟློག་རྡོ་ཡིས་བར་སྣང་ལ་བཅག་ནས། །རྦོད་གཏོང་མཁན་པོར་རྦད་འདྲེ་རིག་སྔགས་ཀྱི། །རྣོ་དབལ་རང་གཤེད་ཐོག་ཏུ་འབེབས་པར་ཤོག །བསམ་སྦྱོར་ངན་པས་རྫས་སྔགས་ཏིང་འཛིན་གྱི། །འཁྲུལ་འཁོར་བྱེད་པོས་མཚོན་པའི་དགྲ་བགེགས་ཀུན། །གཡུལ་ངོར་གསོད་པ་འཆི་བདག་གཤིན་རྗེ་ཡི། །མངོན་སྤྱོད་ལས་སྦྱོར་མྱུར་དུ་འགྲུབ་པར་ཤོག །ཕས་རྒོལ་ཚེ་སྲོག་ནུས་སྟོབས་ཆུ་སྲིན་གྱི། །མགྲིན་པ་བཙོན་དོང་ནང་རུལ་མནན་པའི་ལས། །རི་བོ་རླུང་གིས་མི་བསྐུལ་བསྐལ་པའི་བར། །ནམ་ཡང་ལྡང་བར་མི་ནུས་ལས་འགྲུབ་ཤོག །བསྒྲལ་བྱ་སྒྲོལ་བྱེད་མཐའ་དག་སེམས་ཉིད་ཀྱི། །རྣམ་འཕྲུལ་སྒྱུ་མའི་སེང་གེས་གླང་པོའི་སྲོག །ཕྲལ་བ་ཇི་བཞིན་ཀ་དག་ཆོས་སྐུའི་ཀློང་། །དབྱེར་མེད་འཚེངས་གསུམ་དོན་དང་ལྡན་པར་ཤོག །ཕྱི་རོལ་དགྲ་བགེགས་བཅོམ་པའི་རྟེན་འབྲེལ་གྱིས། །ནང་དུ་དུག་གསུམ་སྲོག་རྩ་ཉེར་འཕྲལ་ཏེ། །རང་རིག་འཇམ་དཔལ་ཀུན་ཏུ་བཟང་པོའི་ཞལ། །མངོན་སུམ་མཇལ་བའི་(༣ན)
དགའ་སྟོན་མྱོང་བར་ཤོག །བརྩོན་འགྲུས་ལས་འཕྲོ་ཞན་པས་ཚེ་འདི་ལ། །མ་གྲོལ་འཆི་བ་འོད་གསལ་ཤར་བ་ན། །སྐྱབས་མགོན་གཅིག་ཆོག་གཤིན་རྗེ་གཤེད་པོ་ཡིས། །ཀུན་གཟིགས་དག་པའི་ཞིང་དེར་འཁྲིད་པར་ཤོག །འཁྲིད་བྱེད་ལྷ་དང་བགྲོད་བྱའི་གནས་རྣམས་ཀུན། །མེད་བཞིན་ཆུ་ནང་ཟླ་གཟུགས་ལྟར་ཤར་བ། །གནས་ལུགས་ངོ་འཕྲོད་འཇམ་དཔལ་རང་སེམས་ལས། །གཞན་མིན་ཐག་ཆོད་གདེངས་ཚད་རྙེད་པར་ཤོག །དེང་ནས་ཆོས་ཉིད་ཟད་པའི་ཕ་མཐའ་རུ། །འཁྱོལ་མིན་དེ་སྲིད་ལྷག་པའི་ལྷ་ཁྱོད་ཀྱིས། །རྗེས་བཟུང་བར་ཆད་མི་མཐུན་ཀུན་ཞི་ཞིང་། །འཁོར་འདས་ལེགས་ཚོགས་དོན་རྣམས་ལྷུན་གྲུབ་ཤོག །ཁྱད་པར་དྲག་སྔགས་བདག་པོ་གནུབས་ཆེན་གྱི། །བཀའ་གཏེར་གཤིན་རྗེའི་སྨིན་གྲོལ་རྒྱུད་བཤད་ལུང་། །སྒྲུབ་འཕྲིན་ཕྱག་བཞེས་མཐའ་དག་ཐུབ་བསྟན་གྱི། །བཙས་སུ་མི་ནུབ་དར་ཞིང་རྒྱས་པར་ཤོག །ཅེས་འཇམ་དཔལ་གཤིན་རྗེ་ཁྲོ་ཆུ་དུག་སྡོང་ནག་པོའི་བརྒྱུད་འདེབས་སྨོན་ལམ་དང་བཅས་པ་འདི་ནི་རྣམ་པར་རྒྱལ་བའི་ཕན་བདེ་ལེགས་བཤད་གླིང་གི་ཆོག་གྲྭ་བ་རྣམས་ཀྱིས་བསྐུལ་ཞིང་། སོའི་སྔགས་འཆང་གནས་བྱུང་པ་གནམ་ལྕགས་ཟིལ་གནོན་དཔའ་བོས་བསྐུལ་བ་ལྟར་ཟུར་ཆེན་རྡོ་རྗེ་འཆང་གི་བཀའ་དྲིན་ལ་བརྟེན་ནས་ཆོས་ཚུལ་འདི་ལ་བློ་གྲོས་ཀྱི་སྣང་བ་ཅུད་ཟད་དཀར་བ་ཟ་ཧོར་གྱི་སྔགས་སྨྱོན་ཟིལ་གནོན་བཞད་པ་རྩལ་གྱིས་སྦྱར་བའི་ཡི་གེ་པ་ནི་འཆམས་དཔོན་དགེ་སློང་ངག་དབང་དཀོན་ཅོག་གོ །