གཤིན་རྗེ་ཁྲོ་ཆུ་དུག་སྡོང་གི་རྒྱུན་གྱི་རྣལ་འབྱོར་སྤུ་གྲི་འབར་བ།
གཤིན་རྗེ་ཁྲོ་ཆུ་དུག་སྡོང་གི་རྒྱུན་གྱི་རྣལ་འབྱོར་སྤུ་གྲི་འབར་བ་བཞུགས་སོ། །
བླ་མ་ཡི་དམ་ཆོས་སྐྱོང་དབྱེར་མེད་ཅིང་། །རིགས་གསུམ་ཀུན་འདུས་ཁྲོ་ཆུ་དུག་སྡོང་ནག །རྣལ་འབྱོར་རྒྱུན་འཁྱེར་ཉམས་སུ་བླང་བདེ་བ། །གནུབས་ཆེན་བརྒྱུད་པའི་བཞེད་པ་མ་ནོར་འདྲི། །དེའང་ཡི་དམ་འདི་ཉིད་ཀྱི་སྐུའི་མདུན་དུ་སྨན་རག་མཆོད་གཏོར་ཅི་འབྱོར་པ་བཤམ། སྟན་བདེ་བར་ཁ་ལྷོར་བལྟས་ཏེ། དུས་འདི་ནས་བཟུང་བྱང་ཆུབ་སྙིང་པོའི་བར། །བླ་མ་ལྷ་དང་དཀོན་མཆོག་རིན་ཆེན་གསུམ། །གཤིན་རྗེ་གཤེད་པོའི་ལྷ་ཚོགས་འཁོར་བཅས་ལ། །ལུས་ངག་ཡིད་གསུམ་གུས་པས་སྐྱབས་སུ་འཆི། །སྣང་གྲགས་ཆོས་རྣམས་རང་བཞིན་མེད་པ་ལ། །དེ་ལྟར་མ་རྟོགས་སེམས་ཅན་སྙིང་རེ་རྗེ། །དེ་ཕྱིར་བདག་ནི་གཤིན་རྗེའི་གཤེད་གྱུར་ནས། །དེ་དག་སངས་རྒྱས་ས་ལ་འགོད་པར་བྱ། །ཞེས་ལན་གསུམ་གྱིས་སྐྱབས་སེམས་བྱ། ཨྱཻ་ཡཱ། ཁྲོ་རྒྱལ་ཆེན་པོའི་སྤྲུལ་པའི་ཚོགས་རྣམས་ནི། ཁྲོ་མཚོན་འཁོར་ལོ་རྡོ་རྗེ་ཕུར་བུ་དང་། །ཐོ་བ་རལ་གྲི་དགྲ་སྟ་མེ་ཡི་ཚོགས། །ཕྱོགས་མཚམས་སྟེང་འོག་བར་མེད་ཀུན་ཏུ་གཏམས། །ཨཱོཾ་ཤྲཱི་ཡ་མ་ཀྲོ་ཏ་ཙཀྲ་བཛྲ་ཀཱི་ལི་ཀཱི་ལཱ་ཡ་ཏིཀྵྞ་པ་ཤ་ཛྲ་ལ་རཾ་རཀྵ་ཧཱུཾ་ཕཊ། ཅེས་སྲུང་འཁོར་བསྒོམ། (༢ན)
ཨཱོཾ་བཛྲ་ཨརྒྷཾ་ཨཱཿཧཱུཾ་ནས་ཤཔྟའི་བར་དང་། ཨཱོཾ་སརྦ་པཉྩ་ཨ་མྲྀ་ཏ་ཁ་རཾ་ཁ་ཧི་ཧཱུཾ་ཧྲཱིཿཋ། ཨཱོཾ་བྷ་ལིནྟ་ཧཱུཾ་ཧྲཱི༔ཋ། ཨཱོཾ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཋ། ཞེས་མཆོད་པ་རྣམས་བརླབ། ཧཱུཾ། ཆོས་རྣམས་སྤྲོས་བྲལ་སྙིང་རྗེའི་རང་རྩལ་ལས། །རང་བྱུང་ཁྲོ་ཚོགས་མཐའ་མེད་ནམ་མཁའི་དབྱིངས། །ཚ་གྲང་རབ་འཁྲུག་མཚོན་ཆའི་བུ་ཡུག་འཚུབ། །དེ་ནང་ལྕགས་སྲེགས་མཚོན་ཆ་ཆོལ་པའི་ཁང་། །ཕྱི་རོལ་ཐོད་ཟླུམ་དུར་ཁྲོད་བརྒྱད་ཀྱིས་བསྐོར། །ཧ་ལའི་གུར་ཁང་རླུང་གི་སྤུ་གྲི་འཁོར། །དེ་ཕྱིར་ཁྲོ་བཅུའི་གུར་ཁང་བསྐལ་མེ་འབར། །དཀར་ནག་ཁྲོ་བོས་བསྲུང་དང་བཟློག་ལས་མཛད། །གཞལ་ཡས་ཁང་ནང་གཤིན་རྗེའི་གྲོང་ཁྱེར་ཆེ། །མཐིང་ནག་གྲུ་གསུམ་བསྣོལ་དབུས་མཚོན་ཆའི་ཚོགས། །དུག་ཕུར་ཁྲུ་སྟེང་པདྨ་ཟླ་ཉི་དང་། །མ་ཧེ་གཤིན་རྗེ་སྡེ་བརྒྱད་བདུད་ཀྱི་རིགས། །ཕྱི་ནང་ཡི་དམ་ཆོས་སྐྱོང་དགྲ་བགེགས་སྟེང་། །བདག་ཉིད་རྫུས་སྐྱེས་ལས་གཤིན་དམར་ནག་འཚེར། །ནག་དམར་ལྗང་ཞལ་གདངས་ཤིང་རྐན་སྒྲ་རྡེབ། །ལྗགས་འདྲིལ་མཆེ་གཙིགས་སྤྱན་བགྲད་སྨ་ར་དང་། །སྨིན་མ་དབུ་སྐྲ་(༢བ)
དམར་སེར་རབ་འབར་བ། །དབུ་སྟེང་དུག་ལྕགས་ཁྲོ་ཆུའི་མཆོད་རྟེན་ནང་། །དུས་གསུམ་སངས་རྒྱས་ཀུན་འདུས་རིགས་གསུམ་མགོན། །ཕྱག་དྲུག་གཡས་གསུམ་དགྲ་སྟ་གཡོན་ཙིཏྟ། །སྤུ་གྲི་རལ་གྲིའི་གཤོག་གདེངས་དུག་སྦྲུལ་དང་། །དུར་ཁྲོད་ཆས་བརྒྱན་སྲིད་རྩེ་མནར་མེད་བར། ཁྱབ་སྐུའི་ལྟེ་བར་གསལ་བྱེད་ཉི་ཟླ་འཆར། །རང་འདྲའི་སྤྲུལ་པ་བ་སྤུའི་གསེབ་ནས་འཕྲོ། །ལྟོ་བར་སྲིད་པའི་གྲོང་བཅས་ཁྲམ་ལ་འདབས། །སྐུ་རྐེད་ཆུ་སྲིན་ཞལ་ནས་ཕུར་པའི་དབལ། །སྦྲུལ་ཆུན་འཕྱང་རྩེ་ཉམས་པའི་སྙིང་ལ་གཟིར། །སྐུ་གསུང་ཐུགས་ཡོན་འཕྲིན་ལས་གཉིས་མེད་ཀྱི། །སྤྲུལ་པ་སྡེ་དྲུག་ཕྱི་འཁོར་གཤིན་རྗེའི་ཚོགས། །སྐར་མདའ་འཁྲུག་པ་ལྟ་བུས་ཕྱོགས་བཅུར་སྐོར། །ཞེས་དམ་ཚིག་པ་གསལ་གདབ། ཨྱཻ་ཡཱ། ཕྱོགས་ཕྱོགས་དག་ཀྱང་ཕ་གི་ན། །ཉི་མ་ལྷོ་ཕྱོགས་ཕ་གི་ན། །ལས་ཀྱི་གཤིན་རྗེའི་ཞིང་ཁམས་སུ། །ཚ་གྲང་འཁྲུག་པའི་དཀྱིལ་འཁོར་ནས། །སྤྱི་གཤེད་དུག་སྡོང་མཐུ་བོ་ཆེ། །སངས་རྒྱས་བསྟན་པ་བསྲུང་སླད་དུ། །དྲག་པོའི་ཕོ་བྲང་དམ་པ་འདིར། །སྤྱན་འདྲེན་མཆོད་ཕྱིར་གཤེགས་སུ་གསོལ། །ཡ་མ་རཱ་ཙ་ས་པ་རི་ཝཱ་ར་བཛྲ་ས་མ་ཡ་ཛཿ ཛཿཧཱུཾ་བཾ་ཧོཿ ས་མ་ཡ་ཏིཥྛ་ལྷན། ཨ་ཏི་པུ་ཧོཿ ཞེས་ཡེ་ཤེས་པ་སྤྱན་དྲང་ཞིང་སྟན་ལ་བཞུགས་པར་ཕྱག་བྱ། དུ་ཏྲི་ཡ་མ་རཱ་ཙ་ས་པ་རི་ཝཱ་ར་ཨརྒྷཾ་ནས་ཤཔྟ་པྲ་ཏཱིཙྪ་སྭཱཧཱ། གོང་གི་སྔགས་མཐར། མ་ཧཱ་པཉྩ་ཨ་མྲྀ་ཏ་པཱུ་ཙ་ཁཱ་ཧི། མ་ཧཱ་རཀྟ་པཱུ་ཙ་ཁཱ་ཧི། རྡོ་རྗེ་ཐལ་མོ་ཁ་ཕྱེ་ལ། སྔགས་མཐར་ཨི་དཾ་པ་ལིནྟ་ཁ་ཁ་ཁཱ་ཧི་ཁཱ་ཧི། དགྲ་བགེགས་བྱད་མའི་དོན་སྙིང་ཝ་ལ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། སྲོག་རྩ་སྙིང་རྩ་ཁྲག་རྩ་ལ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། (༣ན)
སྐྱེ་མཆེད་གཟུགས་ཕུང་ལ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། བྱད་མ་དགྲ་བགེགས་མི་ནོར་འཁོར་དང་བཅས་ལ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། དགྲ་བགེགས་སྐྱེ་བ་བདུན་བརྒྱུད་ལ་ཨི་དཾ་བ་ལིནྟ་ཁ་ཁ་ཁཱ་ཧི་ཁཱ་ཧི། ཞེས་ཕྱི་ནང་གི་མཆོད་པ་དབུལ། ཨྱཻ་ཡཱ། ངོ་བོ་དུས་གསུམ་སངས་རྒྱས་འདུས་པའི་དཔལ། །རྣམ་པ་ལས་ཀྱི་གཤིན་རྗེ་མཐུ་བོ་ཆེ། །རིགས་གསུམ་དྲག་པོར་ཁྲོས་པའི་རྔམ་ཞལ་ཅན། ཁྲོ་ཆུ་དུག་སྡོང་འཁོར་དང་བཅས་ལ་བསྟོད། །ཅེས་པའམ་བསྟོད་པ་རྒྱས་པ་སྐབས་སྦྱར་བྱ། །སྙིང་གར་རྡོ་རྗེའི་ལྟེ་བར་སངས་རྒྱས་སྟོང་། །ཙིཏྟ་ཟུར་གསུམ་རིགས་གསུམ་ཁྲོ་ཚུལ་ཅན། །དེ་ནང་ལྕགས་རྡོར་ལྟེ་བར་འོད་ལྔའི་ཀློང་། །ཉི་ཟླའི་གའུ་སྔགས་ཕྲེང་སྲད་བུས་བསྡམས། །ཧཱུཾ་ཡ་ཎི་མཐར་སྲུང་སྔགས་ཀྱིས་བསྐོར་བར། །འོད་འཕྲོས་རྒྱལ་མཆོད་འཇམ་དཔལ་ལྷ་ཚོགས་དགྱེས། །བསྒྲུབ་བྱའི་སྒྲིབ་དག་ཡེ་ཤེས་གསུམ་ལ་ཐིམ། །ཀླད་ཀོར་ནང་དུ་བླ་མ་ཚེ་དཔག་མེད། །ཐུགས་ཀའི་འོད་ཀྱིས་བཀུག་པའི་བདུད་རྩི་རྒྱུན། །ཚེ་སྲོག་གསུམ་ལ་ཐིམ་པས་འཆི་མེད་གྱུར། །རང་ཉིད་སྐད་ཅིག་འོད་ལྔ་ལས་གྲུབ་པའི། །རྐེང་རུས་བདེ་བའི་ཉམས་ལྡན་ལྷ་ཡི་སྐུའི། །ཨཱོཾ་དཀར་ཨཱཿདམར་ཧཱུཾ་མཐིང་ཡི་གེས་མཚན། །འོད་འཕྲོས་ཡེ་ཤེས་དཔག་མེད་སྤྱན་དྲངས་བསྟིམ། །འོད་ཀྱི་བདུད་རྩིའི་དབང་བསྐུར་དངས་མ་དྲངས། །འཆི་མེད་བཅུད་ཀྱིས་ཡོངས་ཁྱབ་ཁྲོ་བོ་ཡི། །བདུད་རྩི་ནང་འཁྱིལ་སྲིད་གསུམ་སྒྲིབ་པ་སྦྱངས། །བདེ་སྟོང་རོ་མྱངས་ཚེ་དང་དཔལ་འབྱོར་རྒྱས། །བསྲུང་བྱའི་ཚེ་སྲོག་ནད་གདོན་སྡིག་སྒྲིབ་ཀུན། །ཚེ་བདུད་བསྣོལ་མར་བསྟིམ་ལ་ཕུར་རྩེས་གཟིར། །སླར་ཡང་ཡིག་གསུམ་འཕྲོ་འདུས་གདུལ་བྱ་རྣམས། །སྒྲིབ་སྦྱངས་ལྷར་བསྒྱུར་འཁོར་འདས་ཡོན་ཏན་ཚོགས། །བསྡུས་ནས་(༣བ)
བདག་དང་བསྲུང་བྱར་ཐིམ་པ་ཡིས། འཇིགས་མེད་སྲ་མཁྲེགས་རྡོ་རྗེའི་ལུས་སུ་གྱུར། །ཞེས་དམིགས་པའི་བརྗེད་བྱང་ཙམ་དུ་སྤྲོ་ན་རྗེ་བཙུན་ཀུན་དགའ་ཆེ་མཆོག་གི་ལས་བྱང་ལས་བྱུང་བ་ལྟར་ངག་ཏུ་བརྗོད་ནས། དུ་ཏྲི་ཡ་མཱ་རཱ་ཛ། ཡ་མ་རཀྴ། ཀྲོ་ཏ་པ་ཙ་ལ་ཏེ། ཀཱ་ལ་རཱུ་པ། ཨ་ཀྲོ་རཱ་ཛ། ཡ་མ་རཱ་ཛ། ས་མཱ་ཡ་ཛཿཛཿ ཞེས་རྩ་སྔགས་ཅི་ནུས་སུ་བཟླ། སྲུང་བ་སོགས་བྱར་འདོད་ན་གཞན་དུ་ཤེས་པར་བྱ། ལས་ཀྱི་གཤིན་རྗེའི་ཚོགས་རྣམས་དགོངས་སུ་གསོལ། །བདག་གི་བསྙེན་སྒྲུབ་མཆོད་གཏོར་འཕྲིན་ལས་དང་། །ལམ་འདི་བརྩམས་པའི་དགེ་བའི་ནུས་མཐུ་ཡིས། །སངས་རྒྱས་བསྟན་དར་བསྟན་འཛིན་སྐུ་ཚེ་རིང་། །དཀོན་མཆོག་དབུ་མཐོ་བླ་མའི་ཐུགས་དགོངས་རྫོགས། །རྣལ་འབྱོར་ཚེ་རིང་ཡོན་བདག་བར་ཆད་ཞི། །བསོད་ནམས་དཔལ་འབྱོར་བསམ་དོན་ཕུན་ཚོགས་ཤིང་། །བདག་གཞན་ཐམས་ཅད་རྫོགས་སངས་རྒྱས་པར་ཤོག །ཅེས་སྨོན་ལམ་གདབ། མཐའ་ནས་རིམ་བཞིན་སྲུང་འཁོར་རྟེན་གཞལ་ཡས། །དེ་ཉིད་བརྟེན་པ་ཕྱི་འཁོར་ནས་བཟུང་སྟེ། །རིམ་པར་བསྡུས་ནས་གཙོ་དང་དབྱེར་མེད་གྱུར། །གཙོ་བོ་སྟོད་སྨད་ནས་བསྡུས་ཐུགས་ཀ་ཡི། །ས་བོན་ལ་ཐིམ་རིམ་བཞིན་འཇའ་ལྟར་ཡལ། །སླར་ཡང་ཆུ་ལས་རླབས་བཞིན་ལྷ་སྐུར་གྱུར། །ཞེས་རྟག་ཆད་ཀྱི་མཐའ་བསལ། ཨཱོཾ། བྱང་ཆུབ་སེམས་མཆོག་ཤེས་རབ་ཏིང་འཛིན་གྱིས། །ཉོན་མོངས་བདག་འཛིན་རྣམ་རྟོག་ཀུན་བཅོམས་ནས། །ཡ་མཱནྟ་ཀའི་དོན་ལ་རབ་བསྒོམས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་སོགས་ཤིས་བརྗོད་ཅི་རིགས་བྱའོ། །ཨེ་མ་དཔལ་ལྡན་དུས་(༤ན)
དགྲའི་རྒྱུད་ཀྱི་དོན། །རྒྱ་བལ་པཎ་གྲུབ་བཞེད་སྲོལ་གངས་ཅན་འདིར། །གནུབས་ཆེན་ཞང་ཁྲོམ་ཐུགས་ཀྱི་ཉིང་ཁུའི་ཐིགས། །བཀའ་བབས་གནམ་ལྕགས་མེ་འབར་འབྲི་གུང་པ། །དེ་ཚུལ་སྣང་གསལ་རིགས་འཛིན་རིམ་བརྒྱུད་པ། ཁོ་བོའི་འདྲེན་པ་རིགས་རྣམས་ཀུན་གྱི་བདག །ཆོས་དབྱིངས་རང་སར་གྲོལ་བའི་ཞལ་ལུང་བཅུད། །སྙིང་དབུས་ཟ་མ་ཏོག་ཏུ་རྣམ་པར་འཁྱིལ། །དེ་ཕྱིར་རྣལ་འབྱོར་རྒྱུན་དུ་འཁྱེར་བདེ་བ། །བན་བོན་མུ་སྟེགས་སྙིང་ལ་གཟེར་བའི་མཚན། །གནམ་ལྕགས་སྤུ་གྲི་འབར་བ་འདི་བཀོད་པས། །དགའ་རབ་དབང་ཕྱུག་སྡེ་ལས་ལེགས་རྒྱལ་ཤོག །ཅེས་རིགས་གསུམ་འདུས་པའི་བདག་ཉིད་ལས་ཀྱི་གཤིན་རྗེ་ཁྲོ་ཆུ་དུག་སྡོང་གི་རྒྱུན་གྱི་རྣལ་འབྱོར་སྤུ་གྲི་འབར་བ་འདི་ནི་སྔགས་བན་ངག་དབང་རྒྱ་མཚོས་བསྐུལ་བ་ལྟར་བསྙེན་སྒྲུབ་གལ་ཆེ་བའི་སྐབས་རིགས་འཛིན་ཆེན་པོ་ཀུན་དགའ་ཆེ་མཆོག་གིས་མཛད་པའི་ལས་བྱང་གཙོ་བོར་ཉམས་སུ་ལེན་དགོས་པས་བརྗེད་ཐོ་སྙིང་པོ་ལྟ་བུ་ཕན་ཚུན་འདྲེས་ནས་བརྗོད་མི་བདེ་བ་སྤངས་ཏེ་ཟ་ཧོར་གྱི་སྔགས་སྨྱོན་ཟིལ་གནོན་དྲག་པོ་རྩལ་གྱིས་ཕོ་བྲང་དམར་པོ་རིར་སྦྱར་བའི་ཡི་གེ་པ་ནི་རིག་སྔགས་འཆང་བ་འཇམ་གྲགས་པའོ། །སརྦ་མངྒ་ལཾ།། །།