གཤིན་རྗེ་ཀིང་ཀང་དམར་ནག་གི་གཏང་རག
རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་ལས་ཀྱི་གཤིན་རྗེ་ཀིང་ཀང་དམར་ནག །འཆི་བདག་ནག་པོ་ཆུ་སྲིན་གྱི་མགོ་བོ་ཅན་སོགས་འཁོར་དང་བཅས་པ་ཐོགས་པ་མེད་པར་གནས་འདིར་ཨེ་ཧྱེ་ཧི་བཛྲ་ས་མ་ཡ་ཛཿཛཿ ས་མ་ཡ་ཏིཥྛ་ལྷན། མནན་པའི་རྣ་ཆ་གཤིན་རྗེའི་གཤེད། །འཁོར་དང་བཅས་པའི་ཚོགས་རྣམས་ལ། །དབང་པོ་ལྔ་ཡི་མེ་ཏོག་འཕྲིག །བམ་ཆེན་བསྲེགས་པའི་དུད་སྤྲིན་འཐུལ། །ཞུན་ཆེན་གསལ་བའི་སྒྲོན་མེ་སྦར། ཁྲག་དང་མཁྲིས་པའི་དྲི་ཡི་ཆབ། །ཤ་རུས་ནད་ཁྲོལ་ཞལ་ཟས་སྤུངས། །རྐང་གླིང་སྣ་ཚོགས་རོལ་མོ་འཁྲོལ། །རྩ་བརྒྱད་སྟོང་སྦྱར་ཨ་མྲྀ་ཏ། །རཀྟའི་རྦ་ཀློང་ཟེགས་མ་འཁྲུག །བྷ་ལིཾ་ཚོགས་ཀྱི་མཆོད་པ་དང་། །ཕྱི་ནང་གསང་བའི་སྤྱན་གཟིགས་སོགས། །ལོག་འདྲེན་དགྲ་བོ་དམ་ཉམས་ལ། །སྔར་བཅོལ་རྟགས་ཐོན་གཏང་རག་དང་། །སླད་མར་མི་ནོར་ཚེ་སྲོག་དབུགས། །བསོད་ནམས་སྟོབས་འབྱོར་དམག་དཔུང་ཀུན། །ས་འོག་རིམ་པ་བདུན་གྱི་གཏིང་། །ལྷ་སྲིན་སྡེ་བརྒྱད་ཚོགས་རྣམས་ཀྱི། །ཟས་དང་སྐལ་པར་གཏད་བྱས་ནས། །ནམ་ཡང་མི་ལྡང་འཕྲིན་ལས་མཛོད། ཨོཾ་ཡ་མཱ་རི་ཀིང་ཀང་ས་པ་རི་ཝཱ་ར་ཨརྒྷཾ་ནས་ཤཔྟའི་བར་དང་། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། མ་ཧཱ་བྷ་ལིཾ་ཏ་ཁ་རཾ་ཁཱ་ཧི། མ་ཧཱ་མཾ་ས་ཁ་རཾ་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། མཧཱ་ཙིཏྟ་ཁ་རཾ་ཁཱ་ཧི། མཧཱ་བྷ་སུ་ཏ་ཁ་རཾ་ཁཱ་ཧི། མཧཱ་གོ་རོ་ཙ་ན་ཁ་རཾ་ཁཱ་ཧི། མཧཱ་ཀེཾ་ནི་རི་ཏི་ཁ་རཾ་ཁཱ་ཧི། ཧཱུཾ། དགྲ་བགེགས་བསྐལ་བའི་བར་དུ་ཡང་། །(༡བ)
མནན་པའི་ལས་མཛད་གཤིན་རྗེའི་གཤེད། །དམར་ནག་ཀིང་ཀང་ལས་བྱེད་ལ། །སྒོ་གསུམ་གུས་པས་ཕྱག་འཚལ་ལོ། །ཞེས་པའང་སྤྱི་བླ་མི་འགྱུར་བརྟན་པ་ཕྱོགས་གཏོགས་ནང་འཁྲུགས་ཀྱིས་བཅོམས་པ་དང་སླད་མར་ཡང་གཏང་རག་སོགས་ལ་མཁོ་བའི་ཆེད་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ།། །།སརྦ་མངྒ་ལཾ།།