འཇོམས་བྱེད་རྩལ་ཆེན་ཉི་ཟླ་ནག་པོའི་བཀའ་གཏད་སྒོམ་ལུང་བྱ་ཚུལ་མཐོང་བས་དོན་ལྡན།
འཇོམས་བྱེད་རྩལ་ཆེན་ཉི་ཟླ་ནག་པོའི་བཀའ་གཏད་སྒོམ་ལུང་བྱ་ཚུལ་མཐོང་བས་དོན་ལྡན་བཞུགས་སོ། །
ཕྱི་ནང་སོ་སོའི་སྙིང་པོ་གནམ་ལྕགས་ཐོག །འོམ་བུ་ཚལ་གྱི་བྲག་ལ་རྒྱས་བཏབ་གཏེར། །པདྨའི་ཐུགས་ཀྱི་ཉིང་ཁུ་འབྱིན་མཛད་པ། །གཏེར་སྟོན་གྲུ་གུ་ཡང་ཝཾ་ཁྱོད་གཅིག་བསྔགས། །རྙིང་རློམ་ནུས་མཐུ་མེད་པའི་སྒྲིབ་ཤིང་དུ། །ཆོས་གོས་ཟླུམ་པོར་གྱོན་ནས་གཞན་འདྲིད་དང་། །རལ་ཁུར་ཁ་སྤུ་གོས་དཀར་ཙམ་ཉིད་ལ། །མཚར་འཛིན་ཕལ་གྱིས་མ་ཐོས་ཟབ་གསང་ཆོས། །ར་གན་གསེར་དུ་བརྫུ་བའི་གཡོ་སྒྱུ་མཁན། །མ་ཡིན་གཏེར་སྟོན་འཁྲུལ་མེད་དབང་པོའི་སྡེའི། །ཕྱག་ལེན་ཇི་བཞིན་མཐོང་ཆོག་ནག་འགྲོས་སུ། །བཀོད་འདིས་ཤེས་ལྡན་ཚོགས་རྣམས་དགའ་བས་ལོང་། །དེ་ཡང་ནང་པ་སངས་རྒྱས་པའི་བན་སྔགས་དང་འགྲས་པའི་གཤེད་མར་མུ་སྟེགས་དབང་ཕྱུག་མ་ཧཱ་དེ་ཝ་ཟླ་བ་ནག་པོའི་སྤུ་གྲི་ཀ་མཱ་ལ་དང་ཕྱི་རོལ་པའི་གཉེན་པོར་དཔལ་ཆེན་འཇམ་དཔལ་གཤིན་རྗེ་རཀྴའི་སྐུར་བསྟན་པ་ཐབས་ཤེས་གཉིས་སུ་མེད་པ་ལ་བརྟེན་ནས་གཟུགས་མེད་ཀྱི་བགེགས་བྱུར་སྲི་རྦད་འདྲེ་གནོད་བྱེད་དགྲ་བོ་རྦོད་གཏོང་མཁན་པོར་བཅས་པ་རྣམས་བསད་མནན་དཀྲུགས་བཤིག་འགོམ་ཆོག་སོགས་མངོན་སྤྱོད་ཀྱི་ལས་ཟབ་པའི་མཐར་ཐུག་པ་མུ་སྟེགས་སྤུ་གྲིའི་རྒྱུད་གསུམ་(༢ན)
ནས་སངས་རྒྱས་གཉིས་པ་དཔལ་ཨོ་རྒྱན་ཆེན་པོས་བསྡུས་ཏེ་ཇོ་མོ་མཁར་ཆེན་བཟའ་འཚོ་རྒྱལ་ལ་གདམས་ཏེ་འོམ་བུ་ཚལ་གྱི་བྲག་དམར་ལ་གསང་བའི་རྒྱས་བཏབ་པ་སྤྲུལ་པའི་གཏེར་སྟོན་གྲུ་གུ་ཡང་ཝཾ་གིས་སྤྱན་དྲངས་པའི་གདམས་པ་ཟབ་མོ་ཉམས་སུ་བླང་བ་ལ། འདི་ཉིད་ཀྱི་བཀའ་གཏད་མ་ཐོབ་པར་གྱ་ཚོམ་དུ་བསྟར་ན་དབང་ཕྱུག་ཆེན་པོ་སོགས་འཇིག་རྟེན་ལས་འདས་མ་འདས་ཀྱི་སྲུང་མས་རང་ཉིད་ཀྱི་སྲོག་ཟན་ལྟ་བུར་མཐོང་ནས་སྲོག་ལ་ཧབ་ཟས་བྱེད་པའི་ཉེས་དམིགས་ཤིན་ཏུ་ཆེ་བས་ཐོག་མའི་སྔོན་འགྲོར་བཀའ་གཏད་ནོད་པ་གལ་པོ་ཆེར་དགོངས་ནས་གཏེར་གཞུང་དུ་རྩ་ཐོ་ཙམ་དང་དེའི་གསལ་བྱེད་ཆོས་རྒྱལ་ཁྲི་སྲོང་ལྡེའུ་བཙན་གྱི་ཡོན་ཏན་གྱི་རྣམ་འཕྲུལ་མི་ཉག་བྱང་པ་སྔགས་འཆང་དཔལ་བཀྲ་ཤིས་སྟོབས་རྒྱལ་དྲག་པོ་སྟོབས་ཀྱི་འཁོར་ལོས་སྒྱུར་བ་འཇིགས་བྲལ་ཕྱོགས་ལས་རྣམ་པར་རྒྱལ་བའི་དཔའ་བོའི་སྡེས་མཛད་པའི་སྒོམ་ལུང་འབོགས་པའི་ཆོ་ག་ཚ་གྲང་ཉི་ཟླའི་གདུང་སེལ་དང་ཉི་ཟླའི་གདམས་གཏད་སྙན་བརྒྱུད་ཕྱག་ལེན་གསལ་བར་བྱེད་པའི་ལྡེ་མིག །བརྒྱུད་ལྡན་བླ་མ་དམ་པའི་བསྙེལ་ཐོའི་རེག་ཟིག་སོགས་བསྟན་པའི་བཙས་སུ་མཛད་པ་ལ་དགོས་དོན་མ་ཚང་བའི་ལེགས་བཤད་(༢བ)
གསར་པའི་བྲིས་རྩོམ་བྱེད་རྒྱུ་ཅི་ལ་མཆིས་ཀྱང་ཧ་ཅང་ཆིག་འདོམས་ཆེས་པས་གོ་དཀའ་ཞིང་སོགས་ཁོངས་རྣམས་གཏེར་གཞུང་དང་ལྗགས་སྒྲིགས་སོ་སོ་ནས་ལེན་པ་བདག་དང་བདག་འདྲའི་རྡོ་རྗེ་སློབ་དཔོན་དུ་རློམ་པ་རྣམས་མགོ་རྨོངས་པས་བུལ་པའི་དཀའ་ཚེགས་ཀྱིས་ངལ་བར་མི་འགྱུར་བའི་ཆེད་དུ་བཀླགས་ཆོག་ཆུ་འབབ་ཀྱི་ཚུལ་དུ་བཀོད་པ་ལ། སྔོན་འགྲོ་གཏེར་མ། བྱང་བུ། ཕུར་གདན། དཔོན་སློབ་གཉིས་ཀྱི་ཞལ་ཕྱོགས། ཆས་དང་ཕྱག་རྟེན་སོགས་སྔོན་འགྲོའི་ཕྱག་བཞེས་རྣམས་གསལ་བྱེད་ལྡེ་མིག་དང་མཐོང་བརྒྱུད་ལྟར་འཁྲུལ་མེད་སླ་ཆོས་སུ་མ་སོང་བར་གྲབས་བཤམས་བཀོད་མཛེས་སུ་མངོན་པར་འདུ་བགྱིས། སློབ་དཔོན་རང་རིག་དོན་གྱི་པདྨ་ཐོད་འཕྲེང་རྩལ་རང་ལས་གཞན་དུ་མ་ཡིན་པར་གདེངས་རྙེད་ཀྱི་ང་རྒྱལ་བརྟན་པོ་ལ་རྣམ་པ་དེར་གསལ་གྱི་བསྐྱེད་རིམ་སྤངས་པའི་སྒོ་ནས་བགེགས་གཏོར་བཏང་ཞིང་ཕྱིར་བསྐྲད་དེ་སྲུང་འཁོར་བསྒོམ། སྔོན་འགྲོ་སྤྱི་བྱེ་བྲག་གི་ཆོས་དང་འདི་ཉིད་མུ་སྟེགས་རྒྱུད་གསུམ་ནས་སློབ་དཔོན་ཆེན་པོ་པདྨ་འབྱུང་གནས་ཀྱིས་བསྡུས་ཏེ་མ་འོངས་བསྟན་པའི་བཙས་སུ་མཁའ་འགྲོ་ཡེ་ཤེས་འཚོ་རྒྱལ་ལ་གནང་ནས་བྲག་དམར་འོམ་བུ་ལ་གཏེར་དུ་སྦས་པ་མ་ཡིག་ས་བཅད་དྲུག་ཏུ་བསྡོམས་པ། བུ་ཡིག་གསལ་བྱེད་གསེར་གྱི་ཕྲེང་བ་རྣམས་ཀྱི་གདམས་པ་ཟབ་པའི་ཆེ་བ། གྲུ་གུ་ཡང་ཝཾ་གིས་སྤྱན་དྲངས་ཏེ་རྩ་བའི་བླ་མའི་བར་དུ་བརྒྱུད་པ་ཟམ་མ་ཆད་པར་བྱོན་པའི་ལོ་རྒྱུས་བཤད་པ་ལ་སྤྲོ་བ་བསྐྱེད། མཎྜལ་དབུལ། དཔོན་སློབ་ཐམས་ཅད་མགྲིན་གཅིག་ཏུ་བརྒྱུད་རིམ་གྱི་གསོལ་བ་འདེབས་པ་ནི། འགྲོ་བའི་ཉི་མ་ཐུགས་རྗེའི་འོད་ཟེར་གྱིས། །མངོན་པར་སྒོ་ཕྱེ་སིནྡྷུ་རོལ་པའི་རྒྱན། །པདྨ་གེ་སར་རྩེ་ལས་(༣ན)
རང་བྱུང་སྐུ། །དགེ་ལེགས་ཀུན་གྱི་འབྱུང་གནས་མཧཱ་གྷུ་རུ། །རྒྱལ་བ་དགོངས་བརྒྱུད་ཐོག་མའི་མགོན་པོར་ངེས། །བླ་མ་མཆོག་དང་དབྱེར་མེད་གཤིན་རྗེའི་གཤེད། །མ་རུངས་བདུད་སྡེའི་དཔུང་ཚོགས་འཇོམས་བྱེད་པའི། །རཀྴ་ཀ་ལ་ཉིད་ལ་གསོལ་བ་འདེབས། །བདེ་ཆེན་ཡེ་ཤེས་བསྐྱེད་པར་བྱ་བའི་ཕྱིར། །པ་ར་མི་ཏ་མཚན་ལྡན་ཤེས་རབ་ཚུལ། །མཚོ་གླིང་གནས་ནས་སྤྱན་དྲངས་རྒྱལ་སྲས་ཀྱི། །གཉིས་མེད་ཡུམ་གྱུར་འཇའ་ལུས་རྡོ་རྗེའི་སྐུ། །རིགས་འཛིན་རིག་པའི་བརྡ་བརྒྱུད་གསང་བའི་གཉེན། །བླ་མ་མཆོག་དང་དབྱེར་མེད་བཻ་ཏ་ལི། །བན་དགྲ་གླང་སྙིང་མུ་སྟེགས་ཕམ་མཛད་པའི། །མཐིང་འབར་རྒྱལ་མོ་ཉིད་ལ་གསོལ་བ་འདེབས། །སྨོན་ལམ་དབང་བསྐུར་མངོན་མཐོ་མཛད་འཕྲིན་ལས། །རྒྱས་བཏབ་མ་ཉམས་ཆོས་བདག་མཁའ་འགྲོས་གཏད། །འོམ་བུ་ཚལ་གྱི་བྲག་དམར་གཏེར་སྒོ་ཕྱེ། །གྲུ་གུ་ཡང་ཝཾ་ཞེས་གྲགས་སྤྲུལ་པའི་སྐུ། །བཀུར་འོས་དམ་པ་ཉིད་དང་བླ་མ་མཆོག །དབྱེར་མེད་ངོ་མཚར་མན་ངག་ཟབ་མོ་ཡིས། །རང་རྒྱུད་ནུས་སྟོབས་བདག་པོར་བྱིན་བརླབས་པ། །ཆོས་དང་གང་ཟག་བཅས་ལ་གསོལ་བ་འདེབས། །ཚུལ་ཁྲིམས་རྣམ་དག་རྡོ་རྗེ་འཛིན་པ་དང་། །བལ་པོ་ཞེས་སྐྱབས་རིན་ཆེན་རྒྱལ་བའི་མཚན། །སྟོན་ཆུང་གྲགས་དབང་བླ་མ་མཆོག་ཉིད་དང་། །དབྱེར་མེད་དམ་པ་གསུམ་ལ་གསོལ་བ་འདེབས། །ཚུལ་ཁྲིམས་ཕུང་པོ་ཕན་བདེ་འབྱུང་བའི་གནས། །གདམས་པའི་དབང་ཕྱུག་བདུན་ལྡན་རྡོ་རྗེའི་མཚན། །རིན་ཆེན་སེང་གེ་བླ་མ་མཆོག་ཉིད་དང་། །དབྱེར་མེད་དམ་པ་གསུམ་ལ་གསོལ་བ་འདེབས། །རིགས་ཀྱི་ངེས་བཟུང་མི་བསྐྱོད་རྡོ་རྗེ་དང་། །རིན་ཆེན་བཟང་པོ་བྲག་གསུམ་ནགས་ཕུག་པ། །ཏྲེ་(༣བ)
བོ་ཆོས་བཟང་བླ་མ་མཆོག་ཉིད་དང་། །དབྱེར་མེད་དམ་པ་གསུམ་ལ་གསོལ་བ་འདེབས། །རོང་པོའི་ཆར་འཁྲུངས་སེང་གེ་རྡོ་རྗེ་དང་། །ཕ་ཇོའི་ཚུལ་བཟུང་འཇིགས་བྱེད་ནག་པོ་དང་། །འཇམ་དཔལ་རྒྱ་མཚོ་བླ་མ་མཆོག་ཉིད་དང་། །དབྱེར་མེད་དམ་པ་གསུམ་ལ་གསོལ་བ་འདེབས། །སངས་རྒྱས་བསྟན་པའི་རྒྱལ་མཚན་འཛིན་པའི་དཔལ། །རིན་ཆེན་མཛོད་ལྟར་དབང་ཕྱུག་གདམས་པས་གཏམས། །མདོ་སྡེ་རྒྱ་མཚོ་བླ་མ་མཆོག་ཉིད་དང་། །དབྱེར་མེད་དམ་པ་གསུམ་ལ་གསོལ་བ་འདེབས། །གང་ལ་བསྐྱབ་ཕྱིར་པདྨ་དབང་ཕྱུག་ཅེས། །བཀྲ་ཤིས་མན་ངག་དབང་གྲགས་གདམས་པས་ཕྱུག །དཔལ་ལྡན་བཀྲ་ཤིས་སྟོབས་རྒྱལ་དབང་པོའི་སྡེ། །དབྱེར་མེད་དམ་པ་གསུམ་ལ་གསོལ་བ་འདེབས། །རིགས་འཛིན་མཆོག་སྤྲུལ་ངག་གི་དབང་པོའི་ཞབས། །ཡོལ་མ་སྤྲུལ་སྐུ་སྟོབས་ལྡན་ཤུགས་འཆང་རྩལ། །བཀའ་དྲིན་མཉམ་མེད་ཆོས་དབྱིངས་རང་གྲོལ་ཞབས། །དབྱེར་མེད་དམ་པ་གསུམ་ལ་གསོལ་བ་འདེབས། །ཕྱི་ནང་ཟུང་འཇུག་དབྱེར་མེད་དཀྱིལ་འཁོར་དུ། །སྐུ་གསུང་ཐུགས་ཡོན་འཕྲིན་ལས་དམ་ཚིག་རྫས། །བཀའ་གཏད་འཕྲུལ་གྱི་བརྡ་སྤྲོད་ཐབས་ཉིད་ལ། །བརྟེན་ནས་སྨིན་ཅིང་གྲོལ་བར་བྱིན་གྱི་རློབས། །བརྣག་པའི་མཐར་ཐུག་འཁྲུལ་འཁོར་ཉི་ཟླའི་བཅས། །གང་ལ་ཐོགས་མེད་གནམ་ལྕགས་འབར་བའི་དཔལ། །རྟེན་འབྱུང་ནུས་ལྡན་བསྒྲུབ་ལ་རབ་བརྩོན་པ། །ལྷ་མཆོག་འཇོམས་བྱེད་ཉི་ཟླ་འགྲུབ་པར་ཤོག །སྙིགས་དུས་ལོག་སྤྱོད་སྐྱེ་བོ་སྔགས་བཟློག་མཁན། །ལས་བྱེད་གཤིན་རྗེ་གཤེད་དང་གཞན་མི་ཐུབ། །སྒོམ་བཟླས་དམོད་ཚིག་ཐབས་རྫས་སྦྱར་བྱེད་སོགས། །འཇོམས་པར་བྱེད་འདིས་གསང་སྔགས་བསྟན་བསྲུང་ཤོག །མི་མཐུན་གཡུལ་ལས་རྣམ་རྒྱལ་དམ་པའི་ཆོས། །མཚོ་སྐྱེས་སྤྲུལ་སྐུའི་བསྟན་པ་སེམས་པ་ན། །རིམ་བརྒྱུད་ཕས་རྒོལ་(༤ན)
སྟོབས་འཇོམས་བྱེད་པོ་འདི། །ཕྱོགས་དུས་ཀུན་ཏུ་དར་ཞིང་རྒྱས་གྱུར་ཅིག །ཅེས་གདངས་དང་བཅས་ཏེ་ཚར་གཅིག་གིས་ཐུན་མོང་གི་འཇུག་པ་སོང་ནས། སྐྱབས་ཡུལ་འགྲོ་བ་པོ་འགྲོ་ཚུལ་ཕན་ཡོན་རྣམས་བརྡ་སྤྲད་དེ། གུ་རུ་པདྨ་ཡེ་ཤེས་འཚོ་རྒྱལ་ཡུམ། །སྤྲུལ་སྐུ་གཏེར་སྟོན་གྲུ་གུ་ཡང་ཝཾ་སོགས། །བཀའ་བབས་རྩ་བརྒྱུད་དཔལ་ལྡན་བླ་མ་ལ། །བདག་སོགས་འགྲོ་ཀུན་ཕྱག་འཚལ་སྐྱབས་སུ་མཆི། །འཇོམས་བྱེད་རྩལ་ཆེན་ཉི་ཟླ་ཕྱི་ནང་གཤེད། །དམར་ནག་རཀྴ་སྤུ་གྲི་གང་འདུལ་སྐུར། །སྟོན་མཛད་ལྷ་དང་མཁའ་འགྲོའི་ཚོགས་རྣམས་ལ། །བདག་སོགས་འགྲོ་ཀུན་ཕྱག་འཚལ་སྐྱབས་སུ་མཆི། །འགྲོ་བའི་དོན་དུ་བྱང་ཆུབ་སེམས་བསྐྱེད་ནས། །གཉིས་འཛིན་བདག་གིར་འཛིན་པའི་བསྟན་དགྲ་བཅོམ། །ཉོན་མོངས་བདུད་བཞིའི་གཡུལ་ལས་རྒྱལ་བའི་ཕྱིར། །ཉི་ཟླ་ནག་པོའི་དམོད་པ་བསྒྲུབ་པར་བགྱི། །ཞེས་ལན་གསུམ་གྱིས་སྐྱབས་སུ་འགྲོ་ཞིང་སེམས་བསྐྱེད། ཁྱེད་རང་དང་འོ་སྐོལ་གྱི་གཡས་ཕྱོགས་སུ་བཞུགས་པའི་དམར་གྱི་གཏོར་མ་ཕྱི་རོལ་པའི་ཅིག་ཤོས་སུ་བཤམས་པ་འདི་ཉིད་སྔགས་ཕུར་དང་གསུམ་ག་འཇམ་དཔལ་གཤིན་རྗེར་བསྐྱེད་དགོས་པ་ལགས་པས་འདི་བཞིན་དུ་སྒོམས་མཛོད་ཅེས་བརྡ་སྦྱར་ནས། གཞི་དོན་མ་རྟོགས་སྣང་སྲིད་འཁོར་འདས་ཀྱི། །ཆོས་ཀུན་སྟོང་ཞིང་བདག་འཛིན་བྲལ་བའི་ངང་། །སྐྱེ་མེད་དབྱིངས་ལས་རིག་གདངས་འགགས་མེད་རྩལ། །བདག་དང་མདུན་བསྐྱེད་གཏོར་མ་ལས་ཕུར་གསུམ། །སྟོང་གསུམ་སྟོང་གི་མི་མཇེད་འཇིག་རྟེན་ཁམས། །ཤ་ཁྲག་དུག་མཚོ་རྦ་ཀློང་འཁྲུག་པའི་དཀྱིལ། །རབ་འཇིགས་མཚོན་ཆ་སྣ་ཚོགས་འཁྲིགས་(༤བ)
པའི་གུར། །ཡེ་ཤེས་མེ་རི་འབར་བའི་གཞལ་ཡས་ཁང་། །ཕྱི་རོལ་གནམ་ལྕགས་ཐོག་གི་བུ་ཡུག་འཚུབ། །འོག་ཕྱོགས་ལྕགས་ཀྱི་ཁང་པ་གྲུ་གསུམ་པ། །གཤིན་རྗེའི་གྲོང་ཁྱེར་སྲིད་པའི་བཙོན་ཁང་ནང་། །གནོད་བྱེད་དམིགས་ཡུལ་སྡང་བར་བྱེད་པའི་དགྲ། །མཐུ་བྱད་བྱད་མ་རྦོད་གཏོང་བན་དང་བོན། །གདོན་བགེགས་ཟ་འདྲེ་ཕོ་མོ་འཕུང་བྱེད་སྲི། །ཕ་རོལ་རྦད་འདྲེ་ཕྱིར་འཕྲེང་སྒབ་འདྲེ་སོགས། །བསྒྱེལ་ཞིང་བསྣོལ་བའི་ཁྲིར་བརྩེགས་གདན་སྟེང་དུ། །བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད། །དགྲ་དཔུང་འཇོམས་བྱེད་རཀྴ་གནག་པའི་ལས། །མཐར་བྱེད་སྐུ་མདོག་དམར་པོ་ཁྲོ་བོའི་ཞལ། །ངོ་བོ་གཅིག་ལས་འགྱུར་མེད་ཐབས་ཤེས་རབ། །ཟུང་དུ་འབྲེལ་བའི་སྡིགས་མཛུབ་ཕྱག་གཉིས་པ། །མཆེ་བ་བཞི་དཀར་རབ་འཇིགས་སྤྱན་གསུམ་ལྡོག །སྨིན་ཕྲག་ཁྲོ་གཉེར་བཞིན་བསྡུས་རྔམས་ཤིང་བགྲད། །དབུ་སྐྲ་སྨ་ར་སྨིན་མ་དམར་སེར་མདོག །མེ་ལྟར་གཡོ་ཞིང་རལ་པ་གྱེན་དུ་འབར། །སྐུ་སྨད་གསང་བའི་གནས་ནས་གནམ་ལྕགས་ཀྱི། །ཟུར་གསུམ་དཔལ་ལྡན་ཕུར་པས་དགྲ་དང་བགེགས། །གནོད་བྱེད་ཉམས་པའི་སྙིང་ལ་རྟག་ཏུ་གཟིར། །ཕྱག་གཡས་རལ་གྲིས་དགྲ་བགེགས་བསྒྲལ་བའི་ཕྱིར། །ནམ་མཁར་འཕྱར་བས་སྲོག་རྩ་རྩད་ནས་གཅོད། །ཕྱག་གཡོན་ལྕགས་ཀྱུས་དགྲ་བོའི་དོན་སྙིང་ལ། །བཏབ་ནས་འཆོར་བ་མེད་པར་བཟུང་ཞིང་འགུགས། །ཞབས་གཉིས་གཡས་བརྐྱང་མཐིལ་ལ་གནམ་ལྕགས་དང་། །གཡོན་བསྐུམ་ཟངས་ཀྱི་སོག་ལེ་རྣོ་ངར་ཅན། །དེ་གཉིས་བར་དུ་དམིགས་བྱའི་མགོ་ལུས་སོགས། །པགས་རུས་ཤ་ཁྲག་དུམ་བུར་དམར་(༥ན)
ཉིལ་ལི། །གཏུབ་ཅིང་དྲག་པོའི་སྟང་སྟབས་ཚུལ་དུ་འགྱིང་། །འཇིགས་པའི་སྐུ་ལ་བསྐལ་བའི་མེ་ཆེན་པོ། །ཇི་ལྟར་བ་སྤུ་རེ་ལ་འབར་བ་ཡིས། །གནོད་པར་བྱེད་པའི་དགྲ་དང་བགེགས་ལ་སོགས། །ཐམས་ཅད་གཞོབ་ཏུ་བསྲེག་ཅིང་ཐལ་བར་གཏོང་། །འཕྲིན་ལས་ཐོགས་མེད་ཁྲོ་རྒྱལ་སྐུར་གྱུར་ཏོ། །ཞེས་གསལ་བཏབ། མདུན་བསྐྱེད་ཀྱི་ཐུགས་ཀ་ནས་སྔགས་ཀྱི་འཕྲེང་བ་ཐོན་སློབ་མའི་ཞལ་དུ་ཞུགས་པར་བརྡ་སྤྲད། །སྔགས་ལན་གསུམ་གྱི་རྗེས་ཟློས་བྱེད། །ཧཱུཾ་བསྐལ་པའི་མེ་ཆེན་འབར་བའི་ཀློང་དཀྱིལ་ནས༔ ཤ་ཁྲག་རྒྱ་མཚོ་འཁྱིལ་བའི་གཞལ་ཡས་སུ༔ དགྲ་བགེགས་གནོད་བྱེད་བསྣོལ་བའི་ཁྲི་སྟེང་ན༔ བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད༔ སྐུ་མདོག་དམར་པོ་ཞལ་གཅིག་ཕྱགགཉིས་པ༔ མཆེ་བ་རབ་གཙིགས་སྤྱན་གསུམ་ཁྲོ་གཉེར་བགྲད༔ དབུ་སྐྲ་དམར་སེར་མེ་ལྟར་གྱེན་དུ་འབར༔ སྐུ་སྨད་ཕུར་བུས་ཉམས་པའི་སྙིང་ལ་གཟེར༔ ཕྱག་གཡས་རལ་གྲིས་དགྲ་སྲོག་རྩད་ནས་གཅོད༔ ཕྱག་གཡོན་ལྕགས་ཀྱུས་དགྲ་བོའི་སྙིང་ནས་བཟུང་༔ ཞབས་གཉིས་བརྐྱང་བསྐུམ་དྲག་པོའི་ཚུལ་དུ་འགྱིང་༔ སྐུ་ལ་བསྐལ་པའི་མེ་ཆེན་འབར་བ་ཡིས༔ གནོད་བྱེད་དགྲ་བགེགས་ཐམས་ཅད་གཞོབ་ཏུ་གཏོང་༔ འཕྲིན་ལས་ཐོགས་མེད་ཁྱོད་ལ་ཕྱག་འཚལ་བསྟོད༔ དགྲ་བོའི་ཤ་ཁྲག་གཏོར་མ་འདི་བཞེས་ལ༔ རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད༔ ཅེས་སློབ་མ་ལྷར་གྱུར་པ་ལ་ཆེ་བརྗོད་འཕྲིན་བཅོལ་མངའ་གསོལ་གྱི་ཚུལ་དུ་དབྱངས་གྱེར་ནས་བྱ། གཡོན་དུ་བཀོད་པའི་གཏོར་མ་ནང་པའི་ཅིག་ཤོས་སུ་བཤམས་པ་འདི་ཉིད་སྔགས་ཕུར་དང་གསུམ་ག་དབང་(༥བ)
ཕྱུག་ཆེན་པོར་བསྐྱེད་དགོས་ཚུལ་བརྡ་སྤྲད་དེ། མུ་སྟེགས་རྩལ་ཆེན་དབང་ཕྱུག་ཆེན་པོ་ནི། །ཟླ་བ་ནག་པོའི་སྤུ་གྲི་ཀ་མཱ་ལ། །སྐུ་མདོག་སྔོ་ནག་ཁྲོ་གཟུགས་ཞལ་གཅིག་པ། །མཆེ་བ་རབ་གཙིགས་སྤྱན་གསུམ་སྡང་མིག་བགྲད། །དྲག་པོའི་ལྗགས་འདྲིལ་དགྲ་ལ་རྐན་སྒྲ་རྡེབ། །དབུ་སྐྲ་མཚོན་ཆ་ལྟར་གཟིངས་གྱེན་དུ་འབར། །གཡས་གཡོན་ཕྱག་གཉིས་ཟངས་ལྕགས་ལས་གྲུབ་པའི། །རི་རབ་མཆོད་རྟེན་བང་རིམ་དགུ་པ་རེ། །བཟློག་མཛད་ཕྱག་རྒྱར་བཅས་པའི་སྟེང་དུ་བསྣམས། །དམ་ཉམས་ལུས་ངག་ཡིད་གསུམ་མནན་པའི་རི། །བརྒྱབ་པས་དགྲ་བོའི་བདུན་བརྒྱུད་རྩད་ནས་གཅོད། །གཅེར་བུ་ལིངྒ་དམར་པོ་གྱེན་དུ་བསྒྲེངས། །ཞབས་གཉིས་གཡས་བརྐྱང་གཡོན་བསྐུམ་སྟང་སྟབས་གྱིས། །དྲག་པོའི་གདན་ལ་གནོན་མཛད་ཚུལ་དུ་བཞུགས། །སྐུ་ལ་དུག་གི་ནུས་ལྡན་མེ་འབར་བས། །དགྲ་བོ་མྱོས་ཤིང་གཞོབ་ཏུ་བསྲེག་པར་མཛད། །བདུད་དཔུང་འབུལ་མཛད་ཁྲོ་བོའི་སྐུར་གྱུར་ཏོ། །ཞེས་ལྷར་གསལ་བཏབ། དམིགས་པ་དང་བཅས་སྔགས་ལན་གསུམ་གྱི་བཟླས་ལུང་ཕོག །ཧཱུཾ། མཚོན་ཆ་སྣ་ཚོགས་གུར་ཁང་ན༔ དགྲ་བགེགས་བསྣོལ་བའི་ཁྲི་སྟེང་དུ༔ མུ་སྟེགས་དབང་ཕྱུག་ཆེན་པོ་ནི༔ སྐུ་མདོག་སྔོ་ནག་ཞལ་གཅིག་ཕྱག་གཉིས་པ༔ མཆེ་བ་རབ་གཙིགས་དྲག་པོའི་རྐན་སྒྲ་རྡེབ༔ དབུ་སྐྲ་མཚོན་ཆ་གྱེན་དུ་འབར༔ ཕྱག་གཉིས་རི་རབ་མཆོད་རྟེན་བསྣམས༔ དམ་ཉམས་དགྲ་བོའི་བདུན་བརྒྱུད་རྩད་ནས་གཅོད༔ ཞབས་གཉིས་བརྐྱང་བསྐུམ་དྲག་པོའི་ཚུལ་དུ་བཞུགས༔ སྐུ་ལ་དུག་གི་མེ་འབར་དགྲ་བོ་གཞོབ་ཏུ་ཐོང་༔ བདུད་འདུལ་ཁྲོ་བོའི་སྐུ་ལ་ཕྱག་འཚལ་བསྟོད༔ དགྲ་བོའི་ཤ་ཁྲག་གཏོར་(༦ན)
མ་འདི་བཞེས་ལ༔ རྣལ་འབྱོར་བཅོལ་བའི་འཕྲིན་ལས་སྒྲུབ་པར་མཛོད༔ ཅེས་ལྷར་གསལ་བ་ལ་བསྟོད། དཔོན་སློབ་གཉིས་ཀྱི་བར་ཐོད་པ་དང་སྔགས་བྱང་ཕུར་པ་སློབ་མར་གདོང་བསྟན་ཏེ་མདུན་དུ་བཤམ། ལིངྒ་དང་ཤ་བཙོས་པ་ལ་དམིགས་ཏེ། བདག་དང་མདུན་བསྐྱེད་སྒྲུབ་གཏོར་ལས་ཕུར་གསུམ། །ཕྱི་ནང་གང་སྒྲུབ་སྐབས་ཀྱི་སྐུར་གསལ་བའི། །མཐུ་སྟོབས་ནུས་རྩལ་འོད་ཟེར་སྤྲུལ་པའི་ཚོགས། །དངོས་འདྲ་ལྟ་བུའི་བཀའ་འཁོར་འཇིག་རྟེན་ལས། །འདས་དང་མ་འདས་དཔག་མེད་ཀྱིས་བསྐོར་བ། །གནོད་ཅིང་འཚེ་བའི་དགྲ་བགེགས་དམིགས་བྱ་ཡི། །སྙིང་ལ་ལྕགས་ཀྱུས་བཏབ་ནས་འོག་གི་ནི། །ལིངྒར་རྣམ་ཤེས་དགུག་བསྟིམ་ལས་མཛོད་ཅིག །ན་མོ་གུ་རུ་པདྨ་ཡེ་ཤེས་འཚོ་རྒྱལ་ཡུམ། །སྤྲུལ་སྐུ་གཏེར་སྟོན་གྲུ་གུ་ཡང་ཝཾ་སོགས། །མཐར་ཐུག་དཔལ་ལྡན་རྩ་བའི་བླ་མའི་བར། །བྱིན་རླབས་རིགས་འཛིན་བརྒྱུད་པའི་བདེན་པ་དང་། །དགྲ་དཔུང་འཇོམས་བྱེད་རཀྴ་གང་འདུལ་སྐུར། །མུ་སྟེགས་ཟླ་བ་ནག་པོའི་སྤུ་གྲི་སྟེ། །རྒྱས་པ་ཕྱི་ནང་གཤེད་མཛད་ཉི་ཟླ་ནག །ཡི་དམ་ལྷ་ཚོགས་རྣམས་ཀྱི་བདེན་པ་དང་། དུས་གསུམ་གནད་འབེབས་དཀྱིལ་འཁོར་སྒྲུབ་པའི་བཅས། །བྷ་ལིཾ་ལས་ཕུར་མནན་གཅོད་ཙཀྲ་སོགས། །ཏིང་འཛིན་སྔགས་དང་ཕྱག་རྒྱར་ལྡན་བྱས་པས། །རྟེན་འབྲེལ་ནུས་པར་ལྡན་པའི་བདེན་པ་དང་། །ཆོས་དབྱིངས་རྣམ་དག་བདེན་པའི་བྱིན་རླབས་ཀྱིས། །བསྟན་པ་ཡོངས་ལ་གནོད་པའི་སྤྱི་ཡི་དགྲ། །སྔགས་འཆང་སྐུ་ལ་བསྡོ་བ་སྒོས་ཀྱི་དགྲ། །ཞིང་བཅུ་ཚང་བ་བླ་མའི་སྐུ་དགྲ་སོགས། །བསྒྲལ་བྱའི་རྣམ་ཤེས་ཚེ་སྲོག་འདིར་ཁུག་ཅིག །བོད་ཁམས་འཕུང་བར་བྱེད་པ་མཐའ་དམག་(༦བ)
དཔུང་། །ཆོས་འཁོར་དབེན་གནས་འཇོམས་བྱེད་བདུད་ཀྱི་སྡེ། །གསང་སྔགས་བཀའ་གཏེར་བསྟན་ལ་གནོད་སེམས་ཅན། །དུས་བཟང་ཆོས་བཅུ་འཛིན་པའི་དགེ་རྒྱུན་གཅོད། །དེ་འདྲའི་བསྒྲལ་ཞིང་གང་འདུག་འདིར་ཁུག་ཅིག །པདྨ་འབྱུང་གནས་རིགས་འཛིན་གདུང་གསོབ་མཁན། །འདིར་དུས་དཔོན་སློབ་ཐར་ལམ་བསྒྲུབ་པ་ལ། །གནོད་བྱེད་བསམ་པ་ངན་ཞིང་སྦྱོར་བ་རྩུབ། །སྡང་བྱེད་དགྲ་དང་གནོད་པའི་བགེགས་ལ་སོགས། །བསྒྲལ་བར་འོས་པ་ཅི་འདུག་འདིར་ཁུག་ཅིག །ཅེས་འཇམ་དཔལ་འབྱོམས་བྱེད་ཀྱི་སྒོ་ནས་དགྲ་བོ་འགུགས་ཤིང་སླར་ཡང་དགྲ་དཔུང་འཇོམས་བྱེད་རཀྴ་ནག་པོའི་སྐུར་ཞེས་པའི་ཚབ་ལ་དགྲ་དཔུང་འཇོམས་བྱེད་མ་ཧཱ་དེ་ཝའི་སྐུ་ཞེས་འདོན་པ་བསྒྱུར་བའི་གདབ་ལས་ཚར་གཅིག་གཞུང་བསྲངས་ཏེ་ལིཾངྒ་དང་ཤ་མ་བཙོས་པ་ལ་དགུག་གཞུག་བྱ། བླ་འགུགས་ཀྱི་སྔགས་ལན་གསུམ་དང་དེ་ལ་བསད་པའི་འབྱུང་གཤམ་སྒྲིལ་བ་ཚར་གསུམ་བཟླ་བ་དང་ལྷན་ཅིག་པར་སྔགས་ཕུར་བསྒྲིལ་ཞིང་དང་པོའི་སྐབས་བཙོས་པ་དང་གཉིས་པར་མ་བཙོས་པ་རྣམས་དགྲ་བོའི་ངོ་བོར་བསམས་ལ་རྩབས་པའི་ཚུལ་གྱིས་དེ་རྣམས་བསྒྲལ་བའི་ཤ་ཁྲག་གི་ཕུང་པོ་ཞིག་ཏུ་དམིགས། དགྲ་བགེགས་ཤ་རུས་དུམ་བུར་གཏུབས་པའི་གདན། །ལྷར་གསལ་རྣོ་ངར་སྟོབས་ཤུགས་རྩལ་ལྡན་གྱི། །ཞབས་སུ་ཡི་དྭགས་སྡེ་དཔོན་ལས་བྱེད་དང་། །གཞན་གྱིས་མི་ཐུབ་ཉིད་ཀྱང་མནན་པར་གྱུར། །ཅེས་བརྗོད་ནས་གསལ་བཏབ་སྟེ། སློབ་མ་དང་བྱང་བུའི་མདུན་ངོས་ཀྱི་ཡིག་འབྲུ་རྣམས་འཇམ་དཔལ་གཤིན་རྗེ་འཇོམས་བྱེད་དུ་གསལ་བ་འོད་དུ་ཞུ་བ་ལས་བྱུང་བའི་བདུད་རྩིའི་རྒྱ་མཚོར་མོས་ཏེ། དཔོན་སློབ་གཉིས་ཀས་སྨྲ་བ་གཞན་གྱིས་བར་མ་ཆོད་པར་ཉིན་སྔགས་(༧ན)
བརྒྱ་རྩ་བཟླས་ནས། སྔགས་འཕྲེང་རྣམས་དབུ་ནས་རིམ་གྱིས་གུ་རུས་སྲིན་ལག་བདུད་རྩིར་བཅས་པས་བཀྲུས་པའི་ཁུ་བ་ཆང་ཕུད་ཧུབ་གང་བླུད་ཤ་བཙོས་པ་བསྟན་དགྲ་བསྒྲལ་བའི་དོན་སྙིང་དུ་དམིགས་ནས་སྔགས་འདྲེན་ཞིང་བྱིན། ཡང་སློབ་མ་དང་རྒྱབ་སྔགས་དབང་ཕྱུག་ཟླ་བ་ནག་པོར་གསལ་བཏབ་སྟེ་མཚན་སྔགས་བརྒྱ་རྩ་དང་བཅས་གོང་ལྟར་བཀྲུས་ལ་སྟེར། ཤ་མ་བཙོས་པ་སྦྱིན། སྨོད་མོ་ནི། ལོ་དང་ཟླ་བ་ལ་དགྲ་དར་བ་ཐམས་ཅད་མཱ་ར་ཡ་ནན། ཞག་དང་ཟ་མ་ལ་དགྲ་དར་བ་ཐམས་ཅད་མཱ་ར་ཡ་ནན། སྲོག་ལུས་དབང་ཐང་ལ་དགྲ་དར་བ་ཐམས་ཅད་མཱ་ར་ཡ་ནན། ཁ་རྗེ་དང་རླུང་རྟ་ལ་དགྲ་དར་བ་ཐམས་ཅད་མཱ་ར་ཡ་ནན། ཟ་མལ་དུ་དུག་གཡོས་པ་ཐམས་ཅད་མཱ་ར་ཡ་ནན། འགྲོ་ལམ་དུ་རྩང་འཛུགས་པ་ཐམས་ཅད་མཱ་ར་ཡ་ནན། གསོད་གཤོམ་འཕྲོག་གཤོམ་བརྐུ་གཤོམ་བྱེད་པ་ཐམས་ཅད་མཱ་ར་ཡ་ནན། བྱད་ཁ་ཕུར་ཁ་མོ་ངན་ལྟས་ངན་ཚེར་རྩུབ་ཐམས་ཅད་མཱ་ར་ཡ་ནན། བྱུར་མི་ཁ་སྙིང་སྟོང་ངན་པ་ཐམས་ཅད་མཱ་ར་ཡ་ནན། དགྲ་གཤོམ་དམག་གཤོམ་བསམ་ངན་མདུན་མ་ངན་པ་ཐམས་ཅད་མཱ་ར་ཡ་ནན། ཞེས་རྗེས་ཟློས་ལན་གསུམ་བྱས་ཏེ་ཐལ་མོ་ལན་གསུམ་བརྡབ། ཟོར་གཏད་ལ། ཧཱུཾ། ང་ནི་འཕེན་བྱེད་ཡེ་ཤེས་ལྷ། །ཉི་མ་ཟླ་བ་ནག་པོར་ཟོར། །གནོད་བྱེད་ཕྱི་ནང་གཉེན་པོ་རུ། །མདའ་ལྟར་བཀང་ཞིང་ཐོག་ལྟར་འབེབས། །འཇིག་རྟེན་ལས་གྲུབ་དབང་ཕྱུག་ཆེ། །སྡེ་བརྒྱད་དྲེགས་པའི་འཁོར་དང་བཅས། །དམིགས་ཡུལ་བྱད་མའི་སྟེང་དུ་རྒྱུག །བྱད་ཁ་རྦད་འདྲེ་རྦོད་གཏོང་བཟློག །གནོད་བྱེད་དགྲ་བོའི་སྟེང་དུ་རྒྱུག །བསམ་སྦྱོར་ངན་བཟློག་དམག་དཔུང་ཆོམས། །ལོ་ཟླ་ཞག་དུས་ཟ་མའི་སྐེག །སྲི་དང་ལྟས་ངན་མཚན་རྩུབ་བཟློག །ཅེས་ཟོར་སྔགས་བཟླ་ཞིང་དམིགས་བྱ་ཡོད་ན་གང་ཡིན་དང་། །(༧བ)
མེད་ན་ཐེབས་དང་བསྟུན་ཏེ་འཕེན་དུ་འཇུག །སློབ་མ་འཇམ་དཔལ་དུ་གསལ་བཏབ་པའི་སྤྱི་བོར་གཏོར་མ་འཇམ་དཔལ་གཤིན་རྗེར་བསྐྱེད་པའི་སྟེང་གི་ཆར་རྩ་བརྒྱུད་ཀྱི་བླ་མ་རྣམས་མཐོ་བརྩེགས་སུ་བཞུགས་པར་མོས་ནས་རྩ་བརྒྱུད་བླ་མའི་མཚན་ནས་བརྗོད་དེ་དམ་བསྒྲགས་ཤིང་བཀའ་བསྒོས། མཐར་ཡེ་ཤེས་པ་བཞུ་བླུགས་སུ་ཐིམ་པར་བསམས་ལ་ཟན་ཁམ་གྱི་དངོས་གྲུབ་ཀྱི་རྫས་ལ་རོལ། བསྐལ་མེ་མས་སྔར་ལྟར་བསྟོད་ནས་ཆེ་བའི་ང་རྒྱལ་བསྐྱེད། དེ་བཞིན་དུ་དབང་ཕྱུག་ལ་ཡང་བདུད་འདུལ་བའི་བསྟོད་པ་དང་བཅས་ཏེ་བྱ། བཀྲ་ཤིས་ནི། ཁྱབ་བདག་པདྨ་ཐོད་ཕྲེང་འཚོ་རྒྱལ་ཡུམ། །གྲུ་གུ་ཡང་ཝཾ་དྲག་སྔགས་གཏེར་གྱི་བདག །གདམས་པའི་བཀའ་བབས་རྩ་བརྒྱུད་བླ་མ་ཡིས། །དངོས་གྲུབ་ཆར་ལྟར་འབེབས་པའི་བཀྲ་ཤིས་ཤོག །ཕྱི་རོལ་མུ་སྟེགས་ངན་སྔགས་མཚོན་ཆའི་དབལ། །འཇོམས་མཛད་འཇམ་དཔལ་གཤིན་རྗེ་རཀྴ་དང་། །ནང་པའི་དམོད་བྱད་གཉེན་པོ་དབང་ཕྱུག་ཆེ། །ཐབས་ཤེས་གཉིས་མེད་འཕྲིན་ལས་བཀྲ་ཤིས་ཤོག །བསྟན་པའི་གཉེར་འཛིན་ཟབ་གཏེར་བསྲུང་ཞིང་སྐྱོང་། །རིགས་འཛིན་མངག་གཞུག་ལོག་འདྲེན་དགྲ་བགེགས་གཤེད། །གཏུམ་དྲག་རྩལ་ལྡན་དམ་ཅན་སྲུང་མ་ཡིས། །དྲག་སྦྱོར་མངོན་སྤྱོད་འགྲུབ་པའི་བཀྲ་ཤིས་ཤོག །གཞན་ཡང་ཤིས་བརྗོད་དང་སྨོན་ལམ་རྒྱ་ཆེར་བྱའོ། །དེ་ཡང་བཀའ་གཏད་ཀྱི་སྐབས་འདིར་ཁྱད་པར་གྱི་ཆོས་སུ་རྡོ་རྗེ་སློབ་དཔོན་ངོ་བོ་གུ་རུ་པདྨ་ཡིན་པ་ལ་ལྟར་སྣང་ཆ་ལུགས་ད་ལྟའི་ཐ་མལ་པའི་གཟུགས་སུ་བྷེཾ་པ་དེ་ག་ལས་གཞན་པའི་ལྷ་སོ་སོའི་རྣམ་པར་དཔོན་སློབ་གཉིས་ཀས་མི་བསམ་པ་ལ་དགོས་པ་ཞིག་ཡོད་པ་ཞལ་ལས་ཤེས་ཤིང་གནད་ཟབ། སྔོན་དུ་(༨ན)
དངོས་གྲུབ་རྫས་སུ་བྱིན་པའི་གཏོར་མ་སོགས་དམ་རྫས་སློབ་མ་རང་གིས་རོལ་པ་ལས་གཞན་ལ་མི་སྟེར་བ་འདིའི་ཁྱད་པར་གྱི་དམ་ཚིག་ཡིན་ནོ། །ཨེ་མ་རྒྱུད་གསུམ་དོན་བསྡུས་སྙིང་པོའི་བཅུད། །ཨྱོན་སངས་རྒྱས་གཉིས་པའི་ཞལ་གྱི་ལུང་། །ཡང་ཝཾ་སྤྲུལ་སྐུར་བཀའ་བབས་ཟབ་མོའི་གཏེར། །ཕྱི་ནང་སྔགས་མཁན་འཇོམས་པའི་ཐོ་བ་ཡིན། །བྱང་ཆུབ་བསྒྲུབ་པའི་དཀར་པོའི་མཁར་ནང་དུ། །དམ་པ་ཆོས་ཀྱི་དགའ་སྟོན་ལ་སྤྱོད་པར། །དགྲ་བགེགས་དཔུང་གིས་བརྫི་བར་ནུས་མིན་པའི། །ནག་པོ་མཐུ་ཡི་ལྕགས་རི་འདི་ན་བཙན། །ལོག་འདྲེན་གཟུགས་ཅན་གཟུགས་མེད་སྤྱི་གཙུག་ཏུ། །འཁྲུལ་འཁོར་ཉི་ཟླ་ནག་པོའི་གནམ་ལྕགས་ལྕེ། །བབས་ཚེ་བདུད་དཔུང་ཕམ་པའི་ཆོ་ངའི་སྒྲ། །སྒྲོགས་བཞིན་བྲོས་པའི་མོད་ལ་བརྒྱལ་ཞིག་རེངས། །སྲིད་སྡེ་དམག་གཤོམ་དུག་མཚོན་སྦྱར་བ་ལ། །ར་བའི་ཕྱི་འགྱུར་འདྲེན་རློམས་རྣམ་པར་ཐར། །མ་ཡིན་མཚམས་ཁང་ནང་ནས་སྲིད་གསུམ་ལས། །རྒྱལ་བའི་མདུན་མ་སྔགས་རྒན་རྣམས་ཀྱིས་འགྲུབ། །དེ་ཕྱིར་བསྙེན་སྒྲུབ་ལས་སྦྱར་སྔོན་འགྲོའི་སྒོ། །བཀའ་གཏད་མཐོང་བས་དོན་ལྡན་བཀོད་པའི་དགེས། །འཁྲུལ་པའི་དགྲ་སྲོག་བཅད་ནས་རང་གི་སེམས། །ཀུན་བཟང་འཇམ་དཔལ་གོ་འཕང་མངོན་འགྱུར་ཤོག །ཅེས་འཇོམས་བྱེད་རྩལ་ཆེན་ཉི་ཟླ་ནག་པོའི་བཀའ་གཏད་སྒོམ་ལུང་བྱ་ཚུལ་བཀླགས་ཆོག་ནག་པོ་འགྲོ་ཤེས་ཀྱི་ཚུལ་དུ་བཀོད་པ་མཐོང་བའི་དོན་ལྡན་འདི་ནི་བྱང་བདག་རིགས་འཛིན་ཆེན་པོའི་སྤྲུལ་པའི་སྐུ་རིན་པོ་ཆེར་ཆོས་འདི་འབུལ་བའི་སྟ་གོན་གྱི་ཆེ་འཇུག་བདེའི་བསམ་པས་མཚམས་སྦྱར་རང་དང་སྐལ་མཉམ་གྱི་ལས་དང་པོ་བ་མང་པོར་ཕན་འདོད་ཀྱི་བསམ་པས་(༨བ)
ཀུན་ནས་བླངས་ཏེ་ཟ་ཧོར་གྱི་སྔགས་སྨྱོན་ཟིལ་གནོན་དྲག་པོ་རྩལ་གྱིས་ཡོངས་འཛིན་ཞེས་པ་ཆུ་ཕོ་བྱི་བའི་ལོ་ཆོ་འཕྲུལ་མཆོད་པའི་དཀར་ཆ་རྒྱལ་ཕུར་གྱི་འགྲུབ་སྦྱོར་ཐོག་སྦྱར་བའི་ཡི་གེ་པ་ནི་རིག་འཛིན་གྱི་བཙུན་པ་འཇམ་དབྱངས་གྲགས་པས་བགྱིས་པ་དགྲ་བགེགས་གཡུལ་ལས་རྒྱལ་བའི་རྔ་སྒོ་སྲིད་གསུམ་ཀུན་ཏུ་ཁྱབ་པར་གྱུར་ཅིག །སརྦ་མངྒ་ལཾ།། །།