གཤིན་རྗེ་དྲེགས་པ་འཇོམས་བྱེད་ཀྱི་ལས་བྱང་བདུད་ལས་རྣམ་པར་རྒྱལ་བ་ཚངས་པའི་རྔ་ཆེན།
གཤིན་རྗེ་དྲེགས་པ་འཇོམས་བྱེད་ཀྱི་ལས་བྱང་བདུད་ལས་རྣམ་པར་རྒྱལ་བ་ཚངས་པའི་རྔ་ཆེན་བཞུགས་སོ། །
ན་མོ་གུ་རུ་ཡཱ་མཱནྟ་ཀཱ་ཡ། དུས་གསུམ་རྒྱལ་བའི་སྤྱི་གཟུགས་པདྨ་འབྱུང་། །འཇིག་རྟེན་མིག་གཅིག་རྣམ་སྣང་ལོ་ཙཱ་བ། །དྲིན་ཅན་བླ་མ་ཆོས་རྒྱལ་གཏེར་བདག་གླིང་། །བྱང་ཆུབ་བར་དུ་བདེ་ཆེན་འཁོར་ལོར་བཞུགས། །བོད་འབངས་དགའ་སྤྲོར་བྱེད་པ་གནས་ཀྱི་མཆོག །ཨོཾ་ཌི་ཡཱ་ནའི་གླིང་མཚུངས་ཤེལ་བྲག་ནས། །སྤྱན་དྲངས་གཤིན་རྗེ་དྲེགས་པ་འཇོམས་བྱེད་ཀྱི། །འཕྲིན་ལས་མཁའ་འགྲོའི་ཞལ་རླངས་ཚ་དྲོད་འབར། །བཅོས་མེད་རྡོ་རྗེའི་ཚིག་རྣམས་སོར་བཞག་ལ། །མ་ཆད་ཁ་སྐོང་ཁྲིགས་སུ་ཉེར་བསྡེབས་པའི། །བདུད་ལས་རྣམ་པར་རྒྱལ་བ་ཚངས་པའི་རྔ། །ཡིད་སྲུབས་བཅོམ་པ་དཔའ་བོའི་རྟགས་སུ་རྡུངས། །དེ་ལ་འདིར་འཇམ་དཔལ་གཤིན་རྗེའི་གཤེད་དྲེགས་པ་འཇོམས་བྱེད་ཀྱི་འཕྲིན་ལས་ཅུང་ཟད་ཁ་བཀང་སྟེ་བཀོད་པ་ལ། འཇམ་དཔལ་ཁྲོས་པ་ཁྲོ་བོའི་རྒྱལ༔ གཤིན་རྗེ་གཤེད་ལ་ཕྱག་བཙལ་ནས༔ དེ་ཉིད་སྒྲུབ་པའི་ལས་གཞུང་བསྟན༔ དམ་ཚིག་ལྡན་པའི་རྣལ་འབྱོར་གྱིས༔ ཡིད་དང་མཐུན་པའི་གནས་རྣམས་སུ༔ མ་རྡལ་མདའ་གང་གྲུ་བཞི་པ༔ དྲི་བཟང་(༢ན)
རཀྟའི་ཆག་ཆག་གདབ༔ མ་རྡལ་ཆོས་འབྱུང་འཁོར་ལོ་དང་༔ མུ་ཁྱུད་སྒོ་སོགས་ཚད་ལྡན་བྲི༔ དེ་དབུས་མཉྫི་ཁྲིའུའི་ཁར༔ མཚན་ལྡན་ཐོད་པ་བདུད་རྩིས་བཀང་༔ ཨཱ་དརྴ་ཡི་ཁ་བཀབ་སྟེང་༔ རིན་ཆེན་བུམ་པ་བཅུད་ལྡན་དང་༔ དམིགས་རྟེན་འཇམ་དཔལ་སྐུ་ཡང་བཙུགས༔ སྨན་རཀ་དམ་རྫས་གཏོར་མ་དང་༔ ཕྱི་ནང་ཚོགས་མཆོད་ཚང་བར་བཤམས༔ དེ་ནས་བདེ་བའི་གདན་ལ་འདུག༔ སྔོན་འགྲོ། དངོས་གཞི། རྗེས་དང་གསུམ། སྔོན་འགྲོ་ལ་དང་པོ། རྒྱུན་འདེབས་ནི། གདོད་མའི་སངས་རྒྱས་རང་རིག་ཀུན་ཏུ་བཟང་། །མཚན་དཔེའི་ཟློས་གར་བསྒྱུར་བ་རྡོ་རྗེ་འཆང་། །གསང་ཆེན་བཀའ་སྡུས་ལག་ན་རྡོ་རྗེ་ལ། །གསོལ་བ་འདེབས་སོ་དགྲ་བགེགས་འཇོམས་པར་ཤོག །ལམ་འདིའི་བཀའ་བབས་འཇམ་དཔལ་བཤེས་གཉེན་ཞབས། །གཤིན་རྗེའི་རྣལ་འབྱོར་གཙུག་ལག་དཔལ་དགེ་དང་། ཁྲག་འཐུང་ནག་པོ་མཐུ་སྟོབས་ནུས་པའི་བདག །གསོལ་བ་འདེབས་སོ་དགྲ་བགེགས་འཇོམས་པར་ཤོག །ཤནྟིཾ་གརྦྷ་དྲག་སྔགས་གཏེར་གྱི་བདག །པདྨ་ཐོད་ཕྲེང་དུས་གསུམ་རྒྱལ་བའི་དབང་། ཡེ་(༢བ)
ཤེས་འཚོ་རྒྱལ་གནས་གསུམ་མཁའ་འགྲོའི་གཙོ། །གསོལ་བ་འདེབས་སོ་དགྲ་བགེགས་འཇོམས་པར་ཤོག །བཻ་རོ་ཙ་ན་དོན་གྱི་པཎྜཱི་ཏ། །ཟབ་གསང་བསྟན་པ་རྒྱས་མཛད་གཏེར་བདག་གླིང་། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ་དགྲ་བགེགས་འཇོམས་པར་ཤོག །རྡོ་རྗེ་སློབ་དཔོན་མཆོག་གིས་ཉེར་བཟུང་ནས། །དཀྱིལ་འཁོར་ཆེན་པོར་དབང་གིས་ལེགས་སྨིན་ཅིང་། །འཇམ་དཔལ་ཞི་ཁྲོའི་སྣང་སྟོང་ལྷ་ཡི་སྐུ། །ཕྲ་རགས་བསྐྱེད་རིམ་ཉམས་སུ་ལོངས་པར་ཤོག །ལྷ་སྔགས་ཡེ་ཤེས་ཟུང་དུ་འཇུག་པ་ཡི། །བསྙེན་སྒྲུབ་སྒྲུབ་པ་ཆེན་པོ་མཐར་ཕྱིན་ཏེ། །སྲུང་བཟློག་བསད་པ་མནན་སྲེག་འཕང་བ་སོགས། །ཞི་རྒྱས་དབང་དྲག་ལས་རྣམས་འགྲུབ་པར་ཤོག །མདོར་ན་ཕྱི་ནང་གསང་བའི་གཤིན་རྗེ་དང་། །དེ་འདུལ་གཉེན་པོར་བཅས་ཀུན་རང་རིག་རྩལ། །དོན་གྱི་འཇམ་དཔལ་རང་ངོ་ཉེར་འཕྲོད་པའི། །རྫོགས་ཆེན་ལམ་གྱིས་ཚེ་འདིར་གྲོལ་གྱུར་ཅིག །གཉིས་པ་སྐྱབས་འགྲོ་ནི། ན་མོ་བདག་དང་མཐའ་ཡས་སེམས་ཅན་ཀུན༔ དེང་ནས་བྱང་ཆུབ་སྙིང་པོའི་བར༔ བསླུ་མེད་སྐྱབས་གནས་ཐམས་ཅད་ལ༔ སྒོ་གསུམ་དང་བས་སྐྱབས་སུ་མཆི༔ གསུམ་པ་སེམས་བསྐྱེད་ནི། རང་རིག་རང་ངོ་མ་ཤེས་པའི༔ མ་རིག་འཁྲུལ་པའི་སེམས་ཅན་ཀུན༔ བདེ་ཆེན་ས་ལ་འགྲོད་བྱའི་ཕྱིར༔ བྱང་ཆུབ་མཆོག་ཏུ་སེམས་བསྐྱེད་དོ༔ བཞི་པ་ཡན་ལག་བཅུ་པ་ནི། ཏྲཾ་རཏྣ་མཎྜ་ལ། པཾ་པདྨ་མཎྜ་ལ། མ་སུཪྻ་མཎྜ་ལ། ཨ་ཙནྡྲ་མཎྜ་ལ། འཇམ་དཔལ་གཤིན་རྗེའི་གཤེད་དྲེགས་པ་འཇོམས་བྱེད་ཀྱི་སྤྱི་བོར་རྡོ་རྗེ་སློབ་དཔོན་བཞུགས་པ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨཱོཾ་བཛྲ་ས་མ་ཡ་ཛཿ བདེ་གཤེགས་སྲས་བཅས་(༣ན)
བདག་ལ་དགོངས་སུ་གསོལ། །སྒོ་གསུམ་དང་བས་རབ་ཏུ་ཕྱག་འཚལ་ཞིང་། །ཟག་མེད་ཀུན་བཟང་མཆོད་སྤྲིན་རྒྱ་མཚོས་མཆོད། མི་དགེའི་ལམ་ཞུགས་སྡིག་སྒྲིབ་ནོངས་པ་བཤགས། །དུས་གསུམ་རྒྱལ་བའི་མཛད་པར་རྗེས་ཡི་རང་། །བླ་མེད་ཆོས་འཁོར་བསྐོར་ཞིང་བཞུགས་གསོལ་འདེབས། །བདག་གཞན་དགེ་ཚོགས་བྱང་ཆུབ་མཆོག་ཏུ་བསྔོ། །འཁོར་བ་ཡོངས་དག་ཆོས་དབྱིངས་ཐོབ་པར་ཤོག །ཅེས་པ་སྐྱབས་འགྲོ་སེམས་བསྐྱེད་ཡན་ལག་བཅུས། །ཚོགས་བསག་ཚོགས་ཞིང་རང་ལ་བསྟིམ་ཞེས་པའི་དོན་ནོ། །བྱང་ཆུབ་སྒྲུབ་པའི་བགེགས་རྣམས་ལ། །ལན་ཆགས་བསྔོ་ཞིང་འདི་ལྟར་བསྒོ། །ཞེས་པའི་དོན་ལྟར། ལྔ་པ་ལན་ཆགས་བགེགས་གཏོར་ནི། རང་ཉིད་སྐད་ཅིག་གིས་འཇམ་དཔལ་གཤིན་རྗེ་དྲེགས་པ་འཇོམས་བྱེད་ཞལ་གསུམ་ཕྱག་དྲུག་ཞབས་བཞི་བགྲད་པ་དུར་ཁྲོད་ཀྱི་ཆས་དང་གར་དགུའི་ཉམས་ཅན་ཡེ་ཤེས་ཀྱི་མེ་དཔུང་འབར་བའི་དབུས་ན་བཞུགས་པར་བསམ། ཧཱུཾ། ས་ཕྱོགས་འདིར་གནས་བགེགས་དང་འབྱུང་པོའི་ཚོགས༔ འདོད་ཡོན་བདུད་རྩིའི་གཏོར་མ་འདི་ལོང་ལ༔ ཕན་བདེའི་བསམ་པས་རང་རང་གནས་སུ་སོང་༔ གལ་ཏེ་མི་འགྲོ་བསམ་སྦྱོར་ངན་པ་ཡིས༔ མི་མཐུན་བར་གཅོད་འབྲས་བུ་འབྱིན་གྱུར་ན༔ བདག་ཉིད་འཇམ་དཔལ་ཁྲོས་པའི་མཐུ་སྟོབས་ཀྱིས། ཁྱོད་རྣམས་བརླག་ཅིང་བསྲེག་པར་གདོན་མི་ཟ༔ དེ་བས་བཀའ་ལས་མ་འདའ་ཕྱིར་དེངས་ཤིག༔ ཨཱོཾ་མ་ཧཱ་ཀྲོདྷ་སརྦ་བྷུ་ཏ་ཡ་གཙྪ༔ ཧཱུཾ་བཞིའི་སྔགས་བརྗོད་རོལ་མོ་སྒྲོག༔ དྲུག་པ་མཚམས་ཅད་སྲུང་འཁོར་ནི༔ ཧཱུཾ། ང་ནི་འཇམ་དཔལ་གཤིན་རྗེ་གཤེད༔ ཐུགས་སྲོག་ཧཱུཾ་གི་འཕྲོ་འདུ་ལས༔(༣བ)
ཕྱོགས་མཚམས་འཁོར་ལོ་རྩིབས་བཅུ་འབར༔ རྩིབས་སྟེང་དཔལ་ཆེན་ཁྲོ་བོ་བཅུ༔ བསྲུང་བཟློག་འཕྲིན་ལས་མཛད་པའི་ཕྱིར༔ རྣོ་དབལ་མཚོན་ཆ་ལྔ་ཡི་གུར༔ བསྲ་བརྟན་མི་ཤིགས་ར་བས་བསྐོར༔ སྤྲུལ་པའི་ཁྲོ་ཚོགས་གློག་ལྟར་འཁྱུག༔ ཡེ་ཤེས་མེ་ལྕེ་ཀུན་ཏུ་འབར༔ བགེགས་དང་འབྱུང་པོ་རྡུལ་དུ་རློག༔ ཨཱོཾ་མ་ཧཱ་ཀྲོ་དྷ་རཀྵ་ཛྭ་ལ་རཾ་ཧཱུཾ་ཕཊ༔ བདུན་པ་བཤགས་པ་ནི། ཏྲཾ་རཏྣ་མཎྜ་ལ། པཾ་པདྨ་མཎྜ་ལ། མ་སུཪྻ་མཎྜ་ལ། ཨ་ཙནྡྲ་མཎྜ་ལ། རང་བཞིན་གྱི་གནས་ནས་བླ་མ་ཡི་དམ་མཁའ་འགྲོའི་ཚོགས་དང་བཅས་པ་ཨཱོཾ་བཛྲ་ས་མ་ཡ་ཛ༔ ཧཱུཾ། དམིགས་མེད་མཁའ་ལྟར་དག་པ་ཁྱབ་པའི་སྐུ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །དྲེགས་པ་འཇོམས་བྱེད་ཐུགས་དང་ཅི་འགལ་བ། ཁྲོ་གཏུམ་ཐུགས་རྗེ་ཅན་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །རོ་ལངས་རྒྱལ་མོའི་ཐུགས་དང་ཅི་འགལ་བ། དབྱིངས་ལྡན་ཆགས་མེད་ཡུམ་ལ་བཟོད་པར་གསོལ། །རང་རིག་ཡེ་ཤེས་ཀློང་དུ་མ་གྱུར་ཅིང་། །རྟགས་དང་མཚན་མ་མྱུར་དུ་མ་ཕྱིན་པས། །འཁོར་གྱི་གཤིན་རྗེ་ཕོ་མོའི་ཐུགས་དང་ཅི་འགལ་བ། །བསྟན་སྲུང་སོ་སོའི་སྐུ་ལ་བཟོད་པར་གསོལ། །དོན་དམ་ངང་ལ་དགེ་སྡིག་གཉིས་མེད་ཀྱང་། །དེ་ལྟར་མ་རྟོགས་གཟུང་འཛིན་དབང་གིས་ན། །ཉམས་ཆགས་འགལ་འཁྲུལ་གྱུར་པ་ཅི་མཆིས་པ། །གནོང་འགྱོད་མོས་པའི་སེམས་ཀྱིས་མཐོལ་ལོ་བཤགས། །ཐོག་མེད་ནས་བསགས་རྩ་བ་ཡན་ལག་གི །དམ་ཚིག་ཉམས་ཆགས་ཉེས་ལྟུང་མ་ལུས་རྣམས། །དཀྱིལ་འཁོར་ལྷ་ཚོགས་ཀུན་ལ་བཟོད་པར་གསོལ། །འཇོམས་བྱེད་ཐུགས་དམ་བཞིན་དུ་སྤྱད་པར་བགྱི། ཡིག་བརྒྱ་བརྗོད། བརྒྱད་པ། བྱིན་འབེབས་ནི། ཧཱུཾ། བདེ་གཤེགས་རྒྱལ་བ་ཀུན་གྱི་བདག་ཉིད་ཆེ། །དྲག་པོ་ལས་ཀྱི་ལྷ་ཚོགས་དགོངས་སུ་གསོལ། །ཆོས་དབྱིངས་དྲག་(༤ན)
པོ་ཨེ་ཡི་གཞལ་ཡས་ནས། །དྲེགས་པ་འཇོམས་བྱེད་ཡབ་ཡུམ་སྤྲུལ་པ་གསུམ། །སྤྱི་མགྲིན་སྙིང་ལྟེར་གནས་པའི་གཤེད་པོ་བཞི། །རྒོད་སྟག་ཀང་སྤྱང་གདོང་ཅན་སྒོ་བ་བཞི། དྲག་པོའི་ལས་མཛད་ཕོ་ཉ་དམ་ཅན་ཚོགས། །དཀྱིལ་འཁོར་ལྷ་ཚོགས་རྣམས་ཀྱིས་བྱིན་ཕོབ་ཅིག །བདག་ཅག་སེམས་ཅན་ལས་ཀྱིས་མནར་བ་ལ། །རེ་ཞིག་དཔུང་གཉེན་གཞན་ན་མ་མཆིས་པས། །ཐུགས་རྗེ་ཆེན་པོས་འགྲོ་ལ་བརྩེར་དགོངས་ལས། །བྱིན་ཚན་མྱུར་དུ་དབབ་པའི་དུས་ལ་བབ། །འཇམ་དཔལ་ཁྲོས་པའི་རྒྱལ་པོ་འཁོར་དང་བཅས། །སྔགས་ཚིག་ཤུགས་པ་བརྡ་ཡིས་སྤྱན་འདྲེན་ན། །མི་དམིགས་ཆོས་ཀྱི་དབྱིངས་ནས་སྐུ་བཞེངས་ལ། །དྲག་པོའི་དཀྱིལ་འཁོར་འདི་ལ་བྱིན་ཕོབ་ཅིག །སྒྲུབ་མཆོག་རྣལ་འབྱོར་བདག་ལ་དབང་བསྐུར་སྩོལ། སྒྲུབ་རྗེས་དམ་པ་འདི་ལ་མཐུ་སྩོལ་ཅིག །དྲག་པོའི་འཕྲིན་ལས་མཛད་པའི་དུས་ལ་བབ། །བདག་ཅག་རེ་བའི་འབྲས་བུ་མཆིས་པར་མཛོད། །དགུ་པ་ཕྱི་ནང་གི་མཆོད་རྫས་རྣམས་བྱིན་གྱིས་བརླབས་པ་ནི། བདག་གི་ཐུགས་ཀའི་ཧཱུཾ་ལས་འོད་འཕྲོས། ཕུད་སྣོད་ལ་ཐིམ་པས་སྣོད་ཀྱི་མ་དག་པ་སྦྱངས། ཨཱ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་བཅུད་ཤ་ལྔ་བདུད་རྩི་ལྔར་གནས་པའི་སྟེང་དུ་ཧཱུཾ་དཀར་པོ་དེའི་འོད་ཟེར་གྱིས་ཕྱི་འབྱུང་བའི་བཅུད་བསྡུས། ཡེ་ཤེས་ལྔའི་རང་བཞིན་གྱི་བདུད་རྩི་བཀུག །བདུད་རྩི་ལ་ཐིམ་པས་དངོས་འཛིན་སྦྱངས་ནས་ཡེ་ཤེས་ཀྱི་བདུད་རྩི་མུ་ཏིག་དཀར་པོ་དྲི་མ་མེད་པ་ལྟ་བུར་གྱུར། ཨཱོཾ་ཨཱཿཧཱུཾ་མ་ཧཱ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱ། བདག་གི་ཐུགས་ཀའི་ཧཱུཾ་གི་འོད་ཀྱིས་རཀྟའི་དངོས་འཛིན་སྦྱངས། བྷནྡྷ་ཀ་པཱ་ལ་བྷྲུཾ། སྣོད་བྷནྡྷ་ཡངས་ཤིང་རྒྱ་ཆེ་བའི་ནང་དུ་བཅུད་(༤བ)
པདྨ་དམར་པོ་འདབ་མ་བརྒྱད་པའི་ལྟེ་བ་ལ་ར་དམར་པོ། དེ་ལས་རཀྟའི་རྒྱ་མཚོ་ཆེན་པོ་རྦ་ཀློང་འཁྲུག་ཅིང་འཕྱོ་བའི་སྟེང་དུ་ཡི་གེ་ར་དམར་པོ་འོད་ཟེར་འཕྲོ་བར་གྱུར། དེ་ལས་འོད་ཟེར་གྱི་འཕྲོ་འདུས་རཀྟའི་ངོ་བོ་བདུད་རྩིའི་རོ་མཆོག་བརྒྱད་དང་ལྡན་པ་ཟེགས་མ་ལ་འདོད་ཡོན་གྱི་ལྷ་མོ་དཔག་ཏུ་མེད་པ་འཕྲོ་བར་གྱུར། ཨཱོཾ་ཨཱཿཧཱུཾ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ། བདག་གི་ཐུགས་ག་ནས་རཾ་ཡཾ་ཁཾ་གིས་གཏོར་མའི་དངོས་འཛིན་སྦྱངས་ཏེ་སྣོད་ཨ་ལས་བྷནྡྷའི་ནང་དུ་བཅུད་ཨཱོཾ་ཨཱཿཧཱུཾ་ཞུ་བ་ལས་བྱུང་བའི་འདོད་ཡོན་དྲུག་གི་ལྷ་མོར་གྱུར། ཨཱོཾ་བྷ་ལིཾ་ཏ་ཏེ་ཛོ་བྷ་ལི་ཾཏ་བྷ་ལ་བྷ་ཏེ་གུ་ཧྱ་ས་མ་ཡེ་སྭཱཧཱ། དེ་ཡང་གསུམ་པ་མཆོད་པའི་ཡོ་བྱད་རྣམས། སྔགས་རྒྱས་ནམ་མཁའ་གང་བར་སྤེལ་ཞེས་པའི་དོན་གོང་འོག་མཐའ་དག་ལ་སྦྱར་ནས། ཧཱུཾ། རྣམ་དག་ཆོས་དབྱིངས་ངང་ཉིད་ལས༔ རང་བྱུང་མཆོད་པའི་ཕུང་པོ་ནི༔ ཀུན་བཟང་མཆོད་པའི་སྤྲིན་ལྟ་བུས༔ དཔག་ཡས་ནམ་མཁའ་གང་བར་བསམ༔ ཨོ་བཛྲ་པུཥྤེ༔ དྷཱུ་པེ༔ ཨཱ་ལོ་གེ༔ གྷནྡྷེ༔ ནཻ་ཝེ་ཏྱེ༔ ཤཔྟ༔ རཱུ་པ༔ ཤཔྟ། གྷནྡྷེ། ར་ས༔ སྤརྴ༔ དྷརྨ་དྷ་ཏུ༔ ག་ན༔ པཉྩ༔ རཀྟ༔ བ་ལིཾ་ཏ༔ མ་ཧཱ་པཱུ་ཛ་ཨཱཿཧཱུཾ་ཧྲི་ཋ༔ སྔོན་དུ་འགྲོ་བའི་ལས་རིམ་མོ༔ སཱ་མཱ་ཡཱ༔ དངོས་གཞིའི་དང་པོ་བསྐྱེད་རིམ་ནི༔ ཧཱུཾ། ཆོས་ཀུན་གདོད་ནས་སྤྲོས་བྲལ་ཀྱང་༔ འགག་མེད་རང་མདངས་སྙིང་རྗེར་ཤར༔ དེ་ལས་རང་རིག་ཡི་གེ་ཧཱུཾ༔ ཧཱུཾ་ལས་རིམ་བརྩེགས་འབྱུང་ལྔའི་སྟེང་༔ དུར་ཁྲོད་རབ་འཇིགས་གཞལ་ཡས་ཁང་༔ མཚན་ཉིད་ཀུན་ཚང་ལྟེ་བ་རུ༔ དྲེགས་པ་ཆུ་གླང་པད་ཉིའི་སྟེང་༔ རང་རིག་ཧཱུཾ་ལས་གཤིན་རྗེའི་གཤེད༔ མཐིང་ནག་དུག་ཆེན་ཧ་ལའི་མདོག༔ ཞལ་གསུམ་ཕྱག་དྲུག་ཞབས་བཞི་པ༔ གཡས་དཀར་གཡོན་དམར་དབུས་མཐིང་(༥ན)
ཞལ༔ ཞལ་གདངས་མཆེ་གཙིགས་སྤྱན་དམར་འཁྲུག༔ འཁོར་ལོ་རལ་གྲི་གྲི་གུག་གཡས༔ ཐོད་ཁྲག་བེ་ཅོན་སྡིགས་མཛུབ་གཡོན༔ དཔལ་དང་དུར་ཁྲོད་ཆས་ཀྱིས་བརྒྱན༔ གཉིས་མེད་ཡུམ་མཆོག་པེ་ཏ་ནག༔ གྲི་ཐོད་འཛིན་ཞིང་ཡབ་དང་འཁྲིལ༔ སྤྱི་བོར་སྤྲུལ་པའི་བྱ་ཁྱུང་མཐིང་༔ སྤུ་གྲི་སྒྲོ་གཤོག་ཀླུ་གདོན་འདུལ༔ བདག་གི་སྐུ་ཡི་ཆ་ཀུན་ནས༔ སྤྲུལ་པའི་ཁྲོ་ཚོགས་གྲངས་མེད་འགྱེད༔ ཡེ་ཤེས་མེ་དཔུང་ཀློང་དུ་གསལ༔ ཟླ་གམ་གསུམ་ལ་རོ་ཡི་སྟེང་༔ ཚེ་བདག་ནག་པོ་གྲི་ཞགས་འཛིན༔ སྲོག་བདག་དམར་པོ་བེ་ཅོན་གྲི༔ འཆི་བདག་དུད་ཁ་ཁྲམ་སྙིང་འཛིན༔ ཀུན་ཀྱང་དུར་ཁྲོད་ཆས་ཅན་ནོ༔ དེ་ཡི་ཕྱི་རོལ་རྩིབས་བཞི་ལ༔ ཤར་དུ་ཡ་མ་ར་ཙ་མཐིང་༔ གཡས་གཡོན་རལ་གྲི་ཐོད་ཁྲག་འཛིན༔ ལྷོ་རུ་མྱོས་བྱེད་འབར་བ་སེར༔ གཡས་པ་བེ་ཅོན་གཡོན་འཁོར་ལོ༔ ནུབ་ཏུ་ཨཪྱ་མ་རུ་དམར༔ རྩེ་གསུམ་གཡས་ལ་མི་སྙིང་གཡོན༔ བྱང་དུ་རལ་པ་ཚར་དགུ་ལྗང་༔ ཐོད་དབྱུག་འཁོར་ལོ་གཡས་དང་གཡོན༔ ཀུན་ཀྱང་རང་རང་ཡུམ་དང་འཁྲིལ༔ དུར་ཁྲོད་འབར་བའི་ཆས་ཀྱིས་བརྒྱན༔ སྒོ་བཞིར་བྱ་རྒོད་སྟག་ཀང་ཀ༔ སྤྱང་གདོང་རྣམ་བཞི་ལྕགས་ཀྱུ་དང་༔ ཞགས་པ་ལྕགས་སྒྲོག་དྲིལ་བུ་འཛིན༔ ཚད་མེད་བཞི་ལྡན་སྒོ་བཞི་བསྲུང་༔ གཞན་ཡང་འཇིགས་བྱེད་གཤིན་རྗེའི་འཁོར༔ སྤྲུལ་པ་ཡང་སྤྲུལ་ཉིང་སྤྲུལ་བཅས༔ གྲངས་མེད་སྤྲིན་གཏིབས་ལྟར་གསལ་བའི༔ གཙོ་འཁོར་ཀུན་གྱི་གནས་གསུམ་དུ༔ འབྲུ་གསུམ་འོད་ཟེར་འབར་བ་ལས༔ འོད་འཕྲོས་ཡེ་ཤེས་སེམས་དཔའ་ཚོགས༔ རང་བཞིན་གནས་ནས་ས་མཱ་ཛ༔ གཉིས་པ་སྤྱན་འདྲེན་ནི༔ སྣ་ཚོགས་(༥བ)
རོལ་མོའི་སྒྲར་བཅས་ཏེ༔ གདུང་བའི་དབྱངས་ཀྱིས་སྤྱན་འདྲེན་པ༔ ཧཱུཾ། འོག་མིན་ལྷུན་རྫོགས་ཆོས་དབྱིངས་ཕོ་བྲང་ནས༔ སངས་རྒྱས་ཀུན་གྱི་ཡེ་ཤེས་འཇམ་དཔལ་དབྱངས༔ བདེ་ཆེན་ཞི་བའི་ངང་ལས་མ་གཡོས་ཀྱང་༔ ལོག་འདྲེན་གདུག་པའི་ཚོགས་རྣམས་འདུལ་བའི་ཕྱིར༔ མི་བཟད་དྲག་པོར་ཁྲོས་པ་ཁྲོ་བོའི་རྒྱལ༔ བཅོམ་ལྡན་དཔལ་ཆེན་འཇམ་དཔལ་གཤིན་རྗེའི་གཤེད༔ དད་པ་དམ་ཚིག་དབང་གིས་སྤྱན་འདྲེན་ན༔ ཐུགས་རྗེ་ཆེ་ལྡན་གནས་འདིར་གཤེགས་སུ་གསོལ༔ གཅིག་ལས་དུ་མའི་ཚུལ་དུ་རང་ཤར་བའི༔ གཉིས་མེད་ཡུམ་མཆོག་ཟ་བྱེད་པེ་ཏ་དང་༔ སྐུ་གསུང་ཐུགས་སྤྲུལ་གཤེད་ཆེན་རྣམ་བཞི་སོགས༔ འཇིགས་བྱེད་གཤིན་རྗེའི་ལྷ་ཚོགས་འཁོར་དང་བཅས༔ ཐུགས་རྗེ་ཐུགས་དམ་དབང་གིས་བརྩེར་དགོངས་ལ༔ ནད་གདོན་བར་ཆད་བསྲུང་ཕྱིར་གཤེགས་སུ་གསོལ༔ ཚེ་དང་བསོད་ནམས་སྤེལ་ཕྱིར་གཤེགས་སུ་གསོལ༔ ཁམས་གསུམ་དབང་དུ་སྡུད་ཕྱིར་གཤེགས་སུ་གསོལ༔ གདུག་པའི་དགྲ་བགེགས་བསྒྲལ་ཕྱིར་གཤེགས་སུ་གསོལ༔ ཨཱོཾ་མཉྫུ་ཤྲཱི་ཡ་མནྟ་ཀ་ས་པ་རི་ཝཱ་ར་བཛྲ་ས་མཱ་ཛ༔ གསུམ་པ་བཞུགས་སུ་གསོལ་བ་ནི༔ ཧཱུཾ། དུར་ཁྲོད་རབ་འཇིགས་གཞལ་ཡས་འདིར༔ དྲེགས་པ་ཆུ་གླང་མ་ཧེའི་སྟེང་༔ ཁྲོ་རྒྱལ་འཇམ་དཔལ་གཤིན་རྗེ་གཤེད༔ འཁོར་བཅས་དགྱེས་པར་བཞུགས་སུ་གསོལ༔ ཛཿཧཱུཾ་བཾ་ཧོ༔ ས་མ་ཡ་ཏིཥྛ་ལྷན༔ བཞི་པ་དབང་བསྐུར་རྒྱས་གདབ་ནི༔ རང་རིག་གདོད་ནས་འཇམ་དཔལ་ལྷར༔ དམིགས་བྱས་དབང་བསྐུར་དང་བྲལ་ཀྱང་༔ ལོག་རྟོག་སྙིང་རྗེ་བསྒྲལ་བའི་ཕྱིར༔ ཁྲོ་རྒྱལ་ནུས་མཐུས་རང་དབང་བསྐུར༔ ཨཱོཾ་ཧཱུཾ་སྭཱ་ཨཱཿཧཱཿ ཨ་བྷི་ཥིཉྩ་མི༔ དབང་བསྐུར་རིགས་ཀྱི་བདག་(༦ན)
པོས་བརྒྱན༔ ལྔ་པ་གུས་པས་ཕྱག་འཚལ་བ༔ ཐལ་སྦྱར་དང་བའི་སེམས་ཀྱིས་ནི༔ ཧཱུཾ། ལྷ་ཡི་ལྷ་མཆོག་བཅོམ་ལྡན་འདས༔ གཤིན་རྗེ་གཤེད་པོ་ཁྲོ་བོའི་རྒྱལ༔ གཙོ་འཁོར་སྤྲུལ་པར་བཅས་རྣམས་ལ༔ རབ་གུས་དུངས་པས་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏི་ཙ་ཧོ༔ དྲུག་པ་མཆོད་པའི་ལས་རིམ་ནི༔ ཧཱུཾ། དངོས་བཤམས་ཡིད་ལས་རྣམ་སྤྲུལ་བའི༔ མེ་ཏོག་གདུག་སྤོས་མར་མེ་དྲི༔ ཞལ་ཟས་རོལ་མོ་འདོད་ཡོན་ལྔ༔ ཀུན་བཟང་མཆོད་པའི་སྤྲིན་ལྟ་བུར༔ དཔག་ཡས་ནམ་མཁའི་ཁྱོན་བཀང་སྟེ༔ འཇམ་དཔལ་གཤིན་རྗེའི་ཚོགས་ལ་འབུལ༔ ཨོཾ་བཛྲ་པུཥྤེ༔ དྷཱུ་པེ༔ ཨཱ་ལོ་ཀེ༔ གྷནྡྷེ༔ ནཻ་ཝེ་ཏྱེ༔ ཤཔྟ༔ རཱུ་པ༔ ཤཔྟཿ་གྷནྡྷེ༔ ར་ས༔ སྤརྴ༔ པཱུ་ཛ་ཧོ༔ ཧཱུཾ། གདུག་པའི་དགྲ་དང་བགེགས་རྣམས་ཀྱི༔ དབང་པོ་ལྔ་དང་ཚིལ་ཆེན་གསུར༔ ཞུན་ཆེན་མར་མེ་འཁྲིགས་པའི་དྲི༔ ཤ་རུས་ཞལ་ཟས་ཐོད་རྔ་སོགས༔ དུར་ཁྲོད་ནང་གི་མཆོད་པ་འདི༔ འཇམ་དཔལ་གཤིན་རྗེའི་ཚོགས་ལ་འབུལ༔ མ་ཧཱ་མ་ས་རཀྟ་ཀེཾ་ནི་རི་ཏི་བ་སུ་ཏ་མ་ཧཱ་པཉྫ་པཱུ་ཛཿཧོ༔ ཧཱུཾ། སྣང་སྟོང་ཐབས་ཤེས་སྦྱོར་བ་ལས༔ བདེ་ཆེན་བྱང་ཆུབ་སེམས་ཀྱི་ཆུ༔ སྨྲ་མེད་བདེ་བའི་གསང་མཆོད་འདི༔ འཇམ་དཔལ་གཤིན་རྗེའི་ཚོགས་ལ་འབུལ༔ བྷོ་དྷི་ཙིཏྟ་ག་ན་གུ་ཡ་པཱུ་ཛཿཧོཿ འཆི་མེད་བདུད་རྩི་ཨ་མྲྀ་ཏ༔ རྩ་བརྒྱད་ཡན་ལག་སྟོང་སྦྱར་བའི༔ ཁྱད་པར་རྨད་བྱུང་བདུད་རྩི་འདི༔ འཇམ་དཔལ་གཤིན་རྗེའི་ཚོགས་ལ་འབུལ༔ སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི༔ ཆོས་སྐུ་ཀུན་བཟང་ལོངས་སྐུ་རྡོ་རྗེ་འཆང་༔ གསང་བའི་བདག་པོ་འཇམ་དཔལ་བཤེས་གཉེན་ཞབས། །གཙུག་ལག་དཔལ་དགེ་ཁྲག་འཐུང་ནག་པོ་ལ། །སྨན་མཆོད་འབུལ་ལོ་མཐུ་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ལ་(༦བ)
ཁ་རཾ་ཁཱ་ཧི། ཤནྟིཾ་གརྦྷ་རིགས་འཛིན་པདྨ་འབྱུང་། །ཇོ་མོ་འཚོ་རྒྱལ་གན་ཇག་ཐང་ཏ་དང་། །གཏེར་བདག་གླིང་པ་རྩ་བའི་བླ་མ་ལ། །སྨན་མཆོད་འབུལ་ལོ་མཐུ་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། དྲེགས་པ་འཇོམས་བྱེད་ཡུམ་ཆེན་པེ་ཏ་ལི། །གཤེད་ཆེན་བཞི་དང་སྒོ་བསྲུང་གཤིན་རྗེའི་ཚོགས། །ལས་ཀྱི་གཤིན་རྗེ་གཏེར་སྲུང་རྡོར་ལེགས་ལ། །སྨན་མཆོད་འབུལ་ལོ་མཐུ་དང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ལ་ཁ་རཾ་ཁཱ་ཧི། ལྕེ་ཡི་དམ་ཚིག་རྡོ་རྗེ་སོགས་བརྗོད། ལྕང་ལོར་བཅས་པའི་བྷནྡྷའི་ནང་༔ དམར་ཆེན་རཀྟ་རྒྱ་མཚོར་བསྐྱིལ༔ ཉོན་མོངས་འཁོར་བ་འཇོམས་པའི་ཕྱིར༔ འཇམ་དཔལ་གཤིན་རྗེའི་ཚོགས་ལ་འབུལ༔ མ་ཧཱ་རཀྟ་ཁ་རཾ་ཁཱ་ཧི༔ ཧཱུཾ། སྟོང་གསུམ་ཞིང་གི་གཏོར་གཞོང་དུ༔ བཅུད་ཀྱི་འགྲོ་དྲུག་གཏོར་མར་སྦྱར༔ མཛེས་པའི་དཀར་དམར་རྒྱན་གྱིས་བརྒྱན༔ འཇམ་དཔལ་གཤིན་རྗེའི་ཚོགས་ལ་འབུལ༔ མ་ཧཱ་བ་ལིཾ་ཏ་ཁ་རཾ་ཁཱ་ཧི༔ ཨཱཿགདོད་ནས་རང་རིག་ལྷ་རུ་དག༔ མཆོད་བྱ་མཆོད་བྱེད་མཆོད་ཡུལ་ཀུན༔ མི་དམིགས་སྤྲོས་བྲལ་ཕྱག་རྒྱ་ཆེ༔ འཇམ་དཔལ་གཤིན་རྗེའི་ཚོགས་ལ་འབུལ༔ མ་ཧཱ་མུ་ཏྲ་དྷརྨ་དྷཱ་ཏུ་པུ་ཛ་ཧོཿ བདུན་པ་བསྟོད་པ་བྱ་བ་ནི༔ ཧཱུཾ། གདོད་ནས་སྤྲོས་བྲལ་མི་དམིགས་ཆོས་ཀྱི་སྐུ༔ རང་མདངས་འགག་མེད་སྣ་ཚོགས་ལོངས་སྤྱོད་རྫོགས༔ ཐུགས་རྗེ་རབ་ཁྲོས་ཁྲོ་རྒྱལ་སྤྲུལ་པའི་སྐུ༔ གང་འདུལ་དེར་སྟོན་དཔལ་ལ་ཕྱག་འཚལ་བསྟོད༔ མི་གནས་མི་དམིགས་ཆོས་སྐུ་དག་པ་ལས༔ བདུད་འདུལ་ཁྲོ་རྒྱལ་མཆོག་གི་སྐུར་བསྟན་ནས༔ ཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལ༔ བཅོམ་ལྡན་གཤིན་རྗེ་གཤེད་ལ་ཕྱག་འཚལ་བསྟོད༔ གཏུམ་ཆེན་རབ་འབར་ཉི་མ་འབུམ་གྱི་གཟི༔ དཀར་མཐིང་དམར་བའི་དབུ་གསུམ་རྔམས་བཞད་ཁྲོ༔ ཕྱག་དྲུག་གདུག་པའི་མཚོན་ཆ་སྣ་ཚོགས་འཛིན༔ ཞབས་བཞིའི་གར་གྱིས་བདུད་ཚོགས་ཕྱེ་མར་འཐག༔ དཔལ་དང་དུར་ཁྲོད་དྲག་པོའི་ཆས་ཀྱིས་བརྒྱན༔(༧ན)
གར་གྱི་ཉམས་དགུ་མཚན་དཔེ་ཡོངས་སུ་རྫོགས༔ རབ་བརྗིད་གཤིན་རྗེའི་གཤེད་ལ་ཕྱག་འཚལ་བསྟོད༔ སྐྱེ་མེད་དབྱིངས་ལས་འགག་མེད་ལྷར་སྣང་བ༔ དབྱིངས་དང་ཡེ་ཤེས་རིག་རྩལ་ལས་ཤར་བའི༔ གཉིས་མེད་སྦྱོར་སྒྲོལ་ཡུམ་དང་མཁའ་ལྡིང་ཁྱུང་༔ སྐུ་གསུམ་ཐུགས་སྤྲུལ་ཚེ་འཆི་སྲོག་བདག་གསུམ། །འཇིགས་བྱེད་གཤིན་རྗེ་ཆེན་པོ་རྣམ་བཞི་སོགས༔ འཁོར་བཅས་དམ་ཚིག་ཅན་གྱི་ལྷག་པའི་ལྷ༔ གདུལ་བྱའི་བསམ་པ་ཡོངས་སུ་སྐོང་བའི་མཛོད༔ རྣམ་བཞིའི་འཕྲིན་ལས་སྒྲུབ་པའི་ཕོ་ཉ་བ༔ དམ་ཉམས་དགྲ་བགེགས་སྒྲོལ་བའི་སྲོག་གི་གཤེད༔ འཇམ་དཔལ་དཀྱིལ་འཁོར་ཡོངས་རྫོགས་ལྷ་ལ་བསྟོད༔ བརྒྱད་པ་བསྙེན་སྒྲུབ་བཟླས་པ་ནི༔ དང་པོ་རླུང་ལས་བསླབ་བྱ་སྟེ༔ རྔུབས་པ་ཨཱོཾ་ལ་གནས་པ་ཨཱ༔ འབྱིན་པ་ཧཱུཾ་ལ་སྦྱར་ཏེ་བཟླ༔ བདག་གི་ཐུགས་ཀར་འཁོར་ལོའི་དབུས༔ འཇམ་དཔལ་དམར་སེར་པོད་རལ་འཛིན༔ རིན་ཆེན་རྒྱན་མཛེས་ཐུགས་ཀའི་དབུས༔ ཉི་སྟེང་རྡོ་རྗེ་རྩེ་ལྔ་པ༔ ལྟེ་བར་ཧཱུཾ་མཐིང་མཚན་པའི་མཐར༔ སྔགས་འཕྲེང་གཡས་སུ་འཁོར་བ་ལས༔ འོད་འཕྲོས་འཕགས་མཆོད་མཐུ་དབང་བསྡུས༔ སེམས་ཅན་སྒྲིབ་སྦྱངས་དགྲ་བགེགས་བསྒྲལ༔ སྣོད་བཅུད་ཡོན་ཏན་དངས་མ་ཀུན༔ འོད་ཟེར་རྣམ་པར་བདག་ལ་བསྟིམ། ཨཱོཾ་མཉྫུ་ཤྲཱི་ཡ་མནྟ་ཀ་ཧཱུཾ་ཕཊ༔ འདི་ནི་རྩ་བའི་བསྙེན་པ་སྟེ༔ འབུམ་ཚོ་གཅིག་ཏུ་བཟླ་བར་བྱ༔ ཨཱོཾ་ཧྲི་ཥི་ཊི་བི་ཊི་ཏཱ་ན་ན་ཧཱུཾ་ཧཱུཾ་ཕཊ༔ འདི་ནི་ཉེ་བར་བསྙེན་པ་སྟེ༔ སུམ་འབུམ་ངག་ཏུ་བཟླ་བར་བྱ༔ ཨོཾ་ཨ་ཀྲོ་ཏེ་ཀ་ཡ་མནྟ་ཀ་ཀཱ་ལ་རཱུ་པ་ཧྲ་ིཥྚི་ཨ་པ་ཡེ་མ་མ་ཀྲོ་ཏི་ཤྭ་རི་ས་མ་ཡ་ཧཱུཾ་ཕཊ༔ ཨཱོཾ་ཡ་མ་ར་ཙ་ས་ཏོ་མེ་ཡ་ཡ་མེ་དོ་རུ་ཎ་ཡོད་ཡ་ཡ་ད་ཡོ་ནི་ར་(༧བ)
ཡཀྵེ་ཡ་ཡཀྵེ་ཡ་ཚ་ནི་ར་མ་ཡ་ཧཱུཾ་ཕཊ༔ འདི་ནི་སྒྲུབ་པའི་རྩ་སྔགས་ཏེ༔ བདུན་འབུམ་ཉི་ཁྲི་རྟགས་དང་སྦྱར༔ ལས་སྦྱོར་སྔགས་ཀྱི་ཤམ་བུ་ནི༔ རིག་པའི་མདའ་དང་བསྟུན་ཏེ་སྦྱར༔ མཐུན་མཐར་འཛབ་བསྐུལ་དངོས་གྲུབ་བླང་༔ ཞེས་པའི་དགུ་པ་འཛབ་བསྐུལ་ནི༔ ཨེ་དྲེགས་པ་འཇོམས་བྱེད་ཆོས་ཀྱི་དབྱིངས་ཀྱི་གསུང་ཞེས་སོགས། འཛབ་བསྟོད་ཟོར་གྱི་འཕྲིན་ལས་གནམ་ལྕགས་འབར་བའི་ཐོག་མདའ་ནས་ལེན། བཅུ་པ་དངོས་གྲུབ་བླང་བ་ནི། ཧཱུཾ། དགོངས་ཤིག་བདེ་གཤེགས་དཀྱིལ་འཁོར་ལྷ༔ བདག་ཅག་རྡོ་རྗེ་མཆེད་ལྕམ་གྱི༔ བསྐྱེད་རིམ་གསལ་ཞིང་བསྙེན་སྒྲུབ་ཐེམས༔ འཕྲིན་ལས་སྦྱོར་བ་མཐའ་རུ་ཕྱིན༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཀཱ་ཡ་ཝཱ་ཀ་ཙིཏྟ་སིདྡྷི་ཕ་ལ་ཧཱུཾ། སྒྲུབ་པ་དངོས་གཞིའི་ལས་རིམ་མོ༔ ས་མ་ཡ༔ དངོས་གྲུབ་ལེན་པ་རྒྱས་པར་སྤྲོ་ན་ཨེ་བདེ་གཤེགས་རྒྱལ་བ་ཐམས་ཅད་འདུས་པའི་སྐུ་ཞེས་སོགས་ཟོར་གྱི་འཕྲིན་ལས་ནས་ལེན། ལས་གཤིན་དང་གཏེར་བསྲུང་མཆོད་པ་ནི། དངོས་གཞི་དང་མཇུག་གང་དུ་བྱས་ཀྱང་ཁྱད་མེད་པ་སྐབས་འདིར་བཀོད་པ་ལ། གཤིན་རྗེ་གཤེད་ལ་ཕྱག་འཚལ་ལོ༔ ལས་བྱེད་བཀའ་སྲུང་གཤིན་རྗེ་ཉིད༔ སྒྲུབ་ཅིང་མཆོད་པའི་ཆོ་ག་བསྟན༔ རང་ཉིད་གཤིན་རྗེ་གཤེད་དུ་གསལ་བའི་མདུན་དུ༔ པད་ཉི་དང་དགྲ་བགེགས་མ་ཧེ་སེར་ནག་གི་སྟེང་དུ༔ ཡ་སྨུག་ནག་ལས་ལས་ཀྱི་གཤིན་རྗེ་གཤེད་པོ་སྐུ་མདོག་སྨུག་ནག༔ ཁྲོ་བོའི་ཆས་ཅན་རྔམས་ཤིང་འཇིགས་པ༔ ཕྱག་གཡས་ཐོད་དབྱུག་དང་༔ གཡོན་ཐོད་ཁྲག་འཛིན་པ༔ འཁོར་གཤིན་རྗེ་བསམ་གྱིས་མི་ཁྱབ་པས་བསྐོར་བ་དེའི་གནས་གསུམ་དུ་ཨཱོཾ་ཨཱཿཧཱུཾ་དང་༔ བདག་བསྐྱེད་ཀྱི་ཐུགས་ཀའི་ཧཱུཾ་(༨ན)
ལས་འོད་ཟེར་འཕྲོས་པས་ལྷོ་ཕྱོགས་གཤིན་རྗེའི་གནས་ནས་འཁོར་བཅས་སྤྱན་དྲངས༔ ཧཱུཾ། ལྷོ་ཕྱོགས་གཤིན་རྗེའི་འཇིག་རྟེན་གྱི༔ འཇིགས་སུ་རུང་བ་མུན་པའི་ཀློང་༔ དྲེགས་པ་ཀུན་གྱི་བཤན་ཁང་ནས༔ ལས་བྱེད་གཤིན་རྗེ་འཁོར་དང་བཅས༔ བདག་གིས་དད་པས་སྤྱན་འདྲེན་ན༔ དགྲ་བགེགས་འདུལ་ཕྱིར་གནས་འདིར་སྤྱོན༔ ཨེ་ཡ་མ་ར་ཛ་ས་པཱ་རི་ཝཱ་ར་བཛྲ་ས་མཱ་ཛཿཛཿཧཱུཾ་བཾ་ཧོ༔ ས་མ་ཡ་རཀྵ་ཏི་ཥྛ་ཧཱུཾ༔ ཞེས་སྤྱན་དྲངས་ཏེ་དམ་ལ་བཞག༔ ཧཱུཾ། ལས་མཛད་གཤིན་རྗེ་འཁོར་བཅས་ལ༔ གདུག་པའི་དགྲ་བགེགས་བསྒྲལ་བ་ཡི༔ དམར་ཆེན་ཁྲག་དང་དབང་པོ་ལྔ༔ ཚིལ་ཆེན་གསུར་དུད་ཞུན་ཆེན་མེ༔ མཁྲིས་ཆེན་བདུད་རྩི་སྨན་གྱི་བཅུད༔ ཤ་ཁྲག་དམར་གྱི་གཏོར་མ་སོགས༔ འདོད་ཡོན་ལོངས་སྤྱོད་བསམ་མི་ཁྱབ༔ བདག་ཅག་དད་པས་འབུལ་ལགས་ན༔ བསྟན་པ་བསྲུང་ཕྱིར་བཞེས་སུ་གསོལ༔ མ་ཧཱ་པཱུ་ཛ་བྷ་ལི་ཾཏ་ཁཱ་ཧི༔ རང་གི་ཐུགས་ཀ་ནས་སྔགས་ཀྱི་འོད་ཟེར་འཕྲོས་པས༔ ལས་གཤིན་གྱི་ཐུགས་ཀར་འཁོར་ཐུགས་དམ་གྱི་རྒྱུད་བསྐུལ་བར་བྷཻཾ་ལ༔ ཨཱོཾ་ཡ་མ་ར་ཛ་ས་མ་ཡ་ཧཱུཾ་ཕཊ༔ ཅེས་བཟླས་པ་བྱ༔ ཧཱུཾ། ཁྲག་འཐུང་གཤིན་རྗེ་གཤེད་པོ་ཡི༔ བཀའ་ཉན་འཇིགས་བྱེད་མ་རུང་པ༔ ཁམས་གསུམ་སྐྱེ་འགྲོའི་སྲོག་གི་བདག༔ རྫུ་འཕྲུལ་ཆེ་ཞིང་མཐུ་དང་ལྡན༔ བསྟན་པ་བསྲུང་མཛད་དམ་ཚིག་ཅན༔ ཉམས་པ་སྒྲོལ་བའི་གཤེད་པོ་ཆེ། དགེ་སྡིག་ཤན་འབྱེད་དཔང་པོ་མཛད༔ རྡོ་རྗེ་འཛིན་པའི་ཕོ་ཉ་བ༔ ལས་མཛད་ནག་པོ་ཁྱོད་ལ་བསྟོད༔ ཁྱོད་ཀྱི་ནུས་པ་ཀློག་ལྟར་འཁྱུག༔ ཤུགས་ནི་ནམ་མཁའི་ཐོག་ལས་ཆེ༔ དྲག་རྩལ་རི་རབ་ཀླད་ལ་བསྐོར༔ རྫུ་འཕྲུལ་སྣ་ཚོགས་ཅི་ཡང་བསྒྱུར༔ ཤ་ཁྲག་(༨བ)
གཏོར་མ་འདི་བཞེས་ལ༔ ཁྱོད་ཀྱི་ཐུགས་དམ་དུས་ལ་བབ༔ སྡང་བའི་དགྲ་བོ་སོད་ལ་ཤོག༔ བདུན་བརྒྱུད་རྩད་ནས་ཆོད་ལ་ཤོག༔ ལེགས་པའི་བྱ་བ་ཤོལ་ལ་ཤོག༔ ཉེས་པའི་བྱ་བ་བསྐུལ་ལ་ཤོག༔ གནམ་གྱི་འཇུ་ཐག་ཆོད་ལ་ཤོག༔ ས་ཡི་རྟེན་ཕུར་ཕྱུངས་ལ་ཤོག །གདུག་པའི་དཔུང་ཚོགས་འཇོམས་པར་མཛོད༔ ཅེས་བསྟོད་ཅིང་བསྐུལ་ལོ༔ ས་མ་ཡ༔ རྒྱ་རྒྱ་རྒྱ༔ ལས་ཀྱི་གཤིན་རྗེ་གཤེད་པོའི་འཕྲིན་ལས་ཀྱི་ཆོ་ག་རྫོགས་སོ༔ འདི་ཉིད་སངས་རྒྱས་ཀྱི་བསྟན་པ་བསྲུང་བའི་ལྕགས་རིར་ཤོག༔ པདྨ་གར་དབང་འགྱུར་མེད་རྡོ་རྗེ་རྩལ་གྱིས་ཡར་ཀླུངས་ཤེལ་ཕུག་གི་བྱང་འདབས་རྒྱལ་མཚན་འདྲ་བའི་བྲག་གི་ངོས་ནས་སྤྱན་དྲངས་པའོ། །གཤིན་རྗེ་གཤེད་ལ་ཕྱག་འཚལ་ལོ༔ ཟབ་མོའི་གཏེར་འདི་བཏོན་བྱས་ནས༔ འཆད་སྤེལ་ཉམས་ལེན་བྱེད་པའི་ཚེ༔ གཏེར་བདག་མཆོད་པ་མ་བཟུང་ན༔ རྣལ་འབྱོར་སྲོག་ལ་ཧུར་ཐུམས་འབྱུང་༔ དེ་ཕྱིར་འདི་ལ་བརྩོན་པར་བྱ༔ གཏོར་མ་ཤ་ཁྲག་ཕུད་ཀྱིས་བྲན༔ འབྲུ་གསུམ་སྔགས་ཀྱིས་བདུད་རྩིར་སྤེལ༔ ཧཱུཾ། སློབ་དཔོན་པདྨ་ཐོད་ཕྲེང་གི༔ བཀའ་ཉན་ཟབ་མོ་གཏེར་གྱི་བདག༔ དགྲ་ལྷའི་རྒྱལ་པོ་རྫུ་འཕྲུལ་ཅན༔ དམ་ཅན་སྐྱེས་བུ་ཐིག་ལེ་རྩལ༔ བཀའ་ཉན་འཁོར་དང་བཅས་པ་རྣམས༔ བསྟན་པ་བསྲུང་ཕྱིར་གནས་འདིར་སྤྱོན༔ ཏྲི་བཛྲ་ས་དུ་ས་མ་ཡ་ཛཿཛཿཧཱུཾ་བཾ་ཧོ༔ ཧཱུཾ། སྟོང་གསུམ་ནམ་མཁའི་ཁམས་གང་བའི༔ ཕྱི་ནང་གསང་དང་དེ་ཁོ་ན༔ སྨན་རཀ་བྷ་ལིཾ་གཏོར་མ་སོགས༔ མཁོ་དགུའི་ལོངས་སྤྱོད་བསམ་མི་ཁྱབ༔ དམ་ཅན་འཁོར་དང་བཅས་ལ་འབུལ༔ དགྱེས་པར་རོལ་ལ་འཕྲིན་ལས་མཛོད༔ མ་ཧཱ་པཉྩ་བྷ་ལི་ཾཏ་ཁཱ་ཧི༔ ཧཱུཾ། སྐྱེ་མེད་དབྱིངས་ལས་བསྟན་བསྲུང་ཕྱིར༔ སྙིང་རྗེས་བཞེངས་པའི་དམ་ཚིག་ཅན༔ དམར་(༩ན)
སྨུག་ཞལ་གཅིག་ཕྱག་གཉིས་པ༔ དར་དམར་བེར་གསོལ་ཁྲོ་ཆས་ཅན༔ ཕྱག་གཡས་རྡོ་རྗེས་དགྲ་དཔུང་འཇོམས༔ གཡོན་པ་དམ་ཉམས་ཙིཏྟ་བསྣམས༔ ཆིབས་སུ་སྟོབས་ལྡན་སེང་གེ་ཆིབས༔ མཆེད་འཁོར་སུམ་བརྒྱ་དྲུག་ཅུས་བསྐོར༔ བསྟན་པའི་བཀའ་སྲུང་མཐུ་སྟོབས་ཅན༔ འཁོར་དང་བཅས་ལ་ཕྱག་འཚལ་བསྟོད༔ དམ་རྫས་མཆོད་པ་འདི་བཞེས་ལ༔ དཀོན་མཆོག་གསུམ་གྱི་བསྟན་པ་སྲུངས༔ གདུག་པའི་དགྲ་བགེགས་དབྱིངས་སུ་སྒྲོལ༔ བཅོལ་བའི་འཕྲིན་ལས་སྒྲུབ་པར་མཛོད༔ ས་མ་ཡ༔ རྒྱ་རྒྱ་རྒྱ༔ ཁ་ཐམ༔ པདྨ་གར་དབང་འགྱུར་མེད་རྡོ་རྗེ་རྩལ་གྱིས་ཡར་ཀླུངས་ཤེལ་ཕུག་གི་བྱང་འདབས་རྒྱལ་མཚན་འདྲ་བའི་བྲག་གི་ངོས་ནས་སྤྱན་དྲངས་པའོ། །མཇུག་གི་ཆོ་ག་ལ། ཁ་སྐོངས་ཚོགས་ཀྱི་ལོངས་སྤྱོད་ནི༔ བཟའ་དང་བཏུང་བའི་ལོངས་སྤྱོད་རྣམས༔ ཚང་ཞིང་ལེགས་བཤམས་བྱིན་རླབས་ནི༔ ཧཱུཾ། བདག་ཉིད་འཇམ་དཔལ་ཐུགས་ཀ་ནས༔ རཾ་ཡཾ་ཁཾ་འཕྲོས་ཚོགས་རྫས་ཀྱི༔ དངོས་འཛིན་ཉེས་སྐྱོན་བསྲེགས་གཏོར་བཀྲུས༔ སླར་ཡང་སྙིང་པོ་འབྲུ་གསུམ་འཕྲོས༔ གཟུགས་སྒྲ་དྲི་རོ་རེག་བྱ་སོགས༔ ཚོགས་རྫས་འདོད་ཡོན་བདུད་རྩིར་བྱས༔ ཨཱོཾ་ཨཱཿཧཱུཾ་ཧོ༔ ཞེས་བརླབས་ཚོགས་ཞིང་སྤྱན་འདྲེན་པ༔ ཧཱུཾ། ཆོས་ཀྱི་དབྱིངས་ཀྱི་ཕོ་བྲང་མཆོག༔ དྲག་པོ་ཨེ་ཡི་གཞལ་ཡས་ནས༔ བཅོམ་ལྡན་འཇམ་དཔལ་གཤིན་རྗེ་གཤེད༔ སྲས་ཡུམ་སྤྲུལ་འཁོར་བཅས་པ་རྣམས༔ ཡེ་ཤེས་ཚོགས་ལ་སྤྱན་འདྲེན་ནས༔ དངོས་གྲུབ་སྩོལ་ཕྱིར་གཤེགས་སུ་གསོལ༔ བཛྲ་ས་མཱ་ཛཿཧཱུཾ་བཾ་ཧོ༔ ཆ་གསུམ་བཅད་དེ་ཕུད་དུ་འབུལ༔ བཟའ་དང་བཅའ་དང་བཏུང་བའི་ཚོགས༔ མ་ཚང་(༩བ)
མེད་པའི་འདོད་ཡོན་རྫས། ཁ་དོག་དྲི་རོ་བཅུད་ལྡན་པའི༔ ཚོགས་ཀྱི་མཆོད་པ་རྒྱ་ཆེན་འདི༔ འཇམ་དཔལ་གཤིན་རྗེའི་ཚོགས་ལ་འབུལ༔ བཞེས་ནས་ཀུན་ཏུ་དགྱེས་པར་མཛོད༔ ཨོཾ་ཀྲོ་དྷ་ར་ཛ་ཡ་མནྟ་ཀ་ག་ན་ཙཀྲ་པཱུ་ཛཿཁཱ་ཧི༔ བར་པས་བཀང་ཞིང་བཤགས་པ་བྱ། ཧཱུཾ། འདོད་ཡོན་ཚོགས་ཀྱི་ལོངས་སྤྱོད་དང་༔ སྲིད་ཞིའི་མཆོད་རྫས་སྣ་ཚོགས་ཀྱིས༔ ཁྲོ་རྒྱལ་འཁོར་བཅས་ཐུགས་དམ་བཀང་༔ སྐོངས་གྱུར་དབང་དང་དངོས་གྲུབ་སྩོལ༔ བདག་ཅག་མི་དགེ་འཁྲུལ་པའི་བློས༔ བག་མེད་འགལ་འཁྲུལ་ཉམས་པ་ཡིས༔ ཁྱོད་ཀྱི་ཐུགས་དང་ཅི་འགལ་བ༔ མཐོལ་ཞིང་བཤགས་སོ་ཚངས་པར་གསོལ༔ ཐ་མ་བསྒྲལ་ཞིང་བཏབ་པ་བྱ༔ ཧཱུཾ། གདོད་ནས་དག་པའི་ཡེ་ཤེས་ལ༔ གློ་བུར་བདག་ལྟའི་ཞིང་བཅུ་དགྲ༔ ཡེ་ཤེས་རྣོ་དབལ་མཚོན་ཆ་ཡིས༔ སྐྱེ་མེད་ཆོས་སྐུའི་ཀློང་དུ་བསྒྲལ༔ ཪྣྲི་ཏི་ཤ་ཏྲུཾ་མཱ་ར་ཡ་རྦད༔ ཧཱུཾ། དུག་གསུམ་དགྲ་བགེགས་བསྒྲལ་བའི་ཤ་ཁྲག་རུས༔ སྲིད་གསུམ་ཞིང་ཀུན་གང་བའི་ལོངས་སྤྱོད་འདི༔ སྐུ་གསུམ་རོལ་པ་ཁྲག་འཐུང་ཞལ་དུ་སྟོབ༔ ཁམས་གསུམ་ཡོངས་སྒྲོལ་དངོས་གྲུབ་སྩལ་དུ་གསོལ༔ མཾ་ས་རཀྟ་ཀེཾ་ནི་རི་ཏི་པཱུ་ཛ་ཧོ༔ དེ་ནས་འདུས་པའི་རྣལ་འབྱོར་རྣམས༔ གཙང་དམེའི་རྟོག་པ་ཚར་བཅད་ནས༔ རིམ་གཉིས་ལྡན་པས་ལོངས་སྤྱོད་རོལ༔ ལྷག་བསྡུས་ཕུད་བཤལ་ཁ་ཆུས་ནན༔ འདོད་ཡོན་བདུད་རྩི་བྱིན་གྱིས་བརླབས༔ ཨཱོཾ་ཨཱཿཧཱུཾ་ཧ་ཧོ་ཧྲི༔ཧཱུཾ། བཅོམ་ལྡན་འཇམ་དཔལ་གཤིན་རྗེ་ཡི༔ བཀའ་ཉན་ལྷག་མར་དབང་བའི་འཁོར༔ མཁའ་འགྲོ་དབང་ཕྱུག་གིང་ལངྐ༔ འབར་མ་མ་སྲིང་ཤ་ཟ་དང་༔ ལྷ་སྲིན་སྡེ་བརྒྱད་དྲེགས་པར་བཅས༔ ཀུན་ཀྱང་མི་མཐུན་གདུག་པ་ཅན༔ ཤ་ལ་དགའ་ཞིང་ཁྲག་(༡༠ན)
ལ་མོས༔ སྟོང་གསུམ་བསྐོར་ཞིང་དུར་ཁྲོད་མྱུལ༔ དམ་ཚིག་ཅན་གྱི་ལས་མཁན་མཛད༔ དམ་ཚིག་ཉམས་པའི་གཤེད་མ་བྱེད༔ འདིར་སྤྱོན་འདོད་ཡོན་ལྷག་གཏོར་བཞེས༔ དགྲ་བགེགས་ཞིང་བཅུ་ཆམ་ལ་ཕོབ༔ བཅོལ་བའི་འཕྲིན་ལས་སྒྲུབ་པར་མཛོད༔ ཨོཾ་ཨུ་ཙིནྟྲ་བ་ལིཾ་ཏ་ཁ་རཾ་ཁཱ་ཧི༔ དེ་ནས་ཐུགས་དམ་བསྐུལ་བ་ནི༔ ཧཱུཾ། ཆོས་ཀྱི་དབྱིངས་ནས་དྲག་པོའི་སྐུར༔ གདུག་པ་འདུལ་ཕྱིར་ཁྲོས་པའི་ལྷ༔ བཅོམ་ལྡན་འཇམ་དཔལ་གཤིན་རྗེ་གཤེད༔ མི་མངོན་དབྱིངས་ནས་ཐུགས་དམ་བསྐུལ། གཉིས་མེད་ཡུམ་དང་སྤྲུལ་པ་གསུམ༔ གཤེད་ཆེན་བཞི་དང་ཕྱོགས་སྐྱོབ་བཅུ༔ འཇམ་དཔལ་བཀའ་ཉན་སྤྲུལ་འཁོར་བཅས༔ ཐུགས་དམ་བསྐུལ་ལོ་འཕྲིན་ལས་མཛོད༔ དེ་ནས་ཆད་མཐོ་བསྒྲགས་པ་ནི༔ ཧཱུཾ། སྔོན་ཚེ་དཔལ་ཆེན་སྤྱན་སྔ་རུ༔ རྗེས་འཇུག་རྣལ་འབྱོར་སྐྱོང་བ་དང་༔ བསྟན་པ་བསྲུང་བར་དམ་བཅས་པའི༔ བཀའ་ཡི་སྲུང་མ་འཁོར་དང་བཅས༔ འདིར་སྤྱོན་དམ་རྫས་གཏོར་མ་ལོང་༔ ཁས་བླངས་མ་གཡེལ་འཕྲིན་ལས་མཛོད༔ ཆད་མཐོ་རྒྱས་པ་ཟོར་གྱི་འཕྲིན་ལས་ནས་ལེན༔ དེ་ནས་བསྟན་མ་སྐྱོང་བ་ནི༔ ཧཱུཾ། བོད་ཡུལ་སྐྱོང་བར་མཛད་པ་མོ༔ བདུད་མོ་གནོད་སྦྱིན་སྨན་མོ་བཞི༔ བསྟན་མ་བཅུ་གཉིས་འཁོར་དང་བཅས༔ འདིར་སྤྱོན་གཏོར་མའི་བཤལ་ཆུ་བཞེས༔ སྔོན་ཚེ་པདྨ་ཐོད་འཕྲེང་གི༔ སྤྱན་སྔར་ཁས་བླངས་དམ་བཅས་ལྟར༔ གངས་ཅན་ལྗོངས་འདིར་དུས་འཁྲུག་དང་༔ མི་མཐུན་ནད་མུག་ཀུན་ཞི་ནས༔ རྫོགས་ལྡན་དཔལ་ལ་སྤྱོད་པ་དང་༔ ཐེག་མཆོག་བསྟན་པ་རྒྱས་པར་མཛོད༔ པཉྩ་བ་ལིནྟ་ཁཱ་ཧི༔ གཏོར་གཞོང་མནན་ཞིང་རྟ་བྲོ་བརྡུང་༔ ཧཱུཾ་སྟོང་གསུམ་འཇིག་(༡༠བ)
རྟེན་གཞལ་ཡས་ཁང་༔ ཀུན་ཀྱང་འཇམ་དཔལ་གཤིན་རྗེ་གཤེད༔ ཐབས་མཆོག་རྐང་གཡས་བྲོ་བརྡུངས་པས༔ ཕོ་སྲི་ཐམས་ཅད་གཡས་སུ་མནན༔ ཤེས་རབ་གཡོན་གྱི་བྲོ་བརྡུངས་པས༔ མོ་སྲི་ཐམས་ཅད་གཡོན་དུ་མནན༔ གཉིས་སུ་མེད་པར་བྲོ་བརྡུངས་པས༔ ཆུང་སྲི་དམ་སྲི་དབྱིངས་སུ་མནན༔ དྲག་པོའི་གར་གྱི་བྲོ་བརྡུངས་པས༔ དགྲ་བགེགས་ཐམས་ཅད་རྡུལ་དུ་ལྷོགས༔ འཕྲིན་ལས་རྣམ་བཞིའི་བྲོ་བརྡུངས་པས༔ ལས་བཞི་མྱུར་དུ་འགྲུབ་བར་ཤོག༔ སརྦ་ཤ་ཏྲུཾ་ཨ་མུ་ཀཾ་མཱ་ར་ཡ་རྦད་ནན༔ ཤནྟིཾ༔ པུཥྚིཾ༔ བཱ་ཤཾཿ མཱ་ར་ཡ་རྦད༔ ཧཱུཾ། རང་རིག་ཡེ་ནས་འཇམ་མགོན་ལྟར༔ གཤེགས་བྱ་གཤེགས་བྱེད་དངོས་པོས་སྟོང་། །འོན་ཀྱང་སྣང་ཚུལ་ཡེ་ཤེས་པ༔ སྐྱེ་མེད་ཀློང་དུ་བཛྲ་མུ༔ ཡེ་ཤེས་གཤེགས་ཤིང་དམ་ཚིག་བསྡུ༔ ཤིས་པ་བརྗོད་ཅིང་སྨོན་ལམ་གདབ། །དགེ་བ་བྱང་ཆུབ་ཆེན་པོར་བསྔོ། །ས་མ་ཡ་ཞེས་པའི་ཤིས་བརྗོད་ནི། །རང་བཞིན་ཆོས་དབྱིངས་ངང་ཉིད་ལས། །གཞུགས་སྐུའི་རྣམ་རོལ་དཔག་ཡས་ཀྱི། །རླབས་ཆེན་འཕྲིན་ལས་སྐྱོང་མཛད་པའི། །བརྒྱུད་གསུམ་བླ་མའི་བཀྲ་ཤིས་ཤོག །མ་འགགས་རང་གསལ་འོད་ལྔའི་ཀློང་། །རབ་འབྱམས་དཀྱིལ་འཁོར་རྣམ་པར་མཛེས། །མཆོག་མཐུན་དངོས་གྲུབ་སྩོལ་བའི་ལྷ། །ཡི་དམ་ལྷ་ཚོགས་བཀྲ་ཤིས་ཤོག །ཕྱོགས་བཅུའི་གནས་ཡུལ་སྤྲུལ་པའི་ཞིང་། །འཕྲིན་ལས་རྣམ་བཞིའི་རོལ་གར་མཁན། །མཁའ་འགྲོ་སྲུང་མའི་ཚོགས་རྣམས་ཀྱིས། །བཀྲ་ཤིས་བདེ་ལེགས་སྩལ་དུ་གསོལ། །བསྔོ་སྨོན་ནི། དབྱེར་མེད་གཅིག་འདུས་རྡོ་རྗེའི་མཆེད་ལྕམ་གྱིས། །རྨད་བྱུང་དམིགས་བྱས་དམིགས་མེད་དགེ་བའི་མཐུས། ཁམས་གསུམ་སེམས་ཅན་བདེ་ཞིང་སྐྱིད་པ་(༡༡ན)
དང་། །ཟག་བཅས་ཡུལ་སྣང་རྡོ་རྗེའི་སྐུར་བྱང་ནས། །འཕོ་མེད་ཆོས་ཀྱི་དབྱིངས་མཆོག་ཐོབ་པར་ཤོག །འཇམ་དཔལ་སྒྲུབ་པའི་ལས་ཀྱི་གཞུང་༔ འདི་ནི་འཇིག་རྟེན་གསུམ་དུ་དཀོན༔ དེ་ཕྱིར་གསང་བའི་རྒྱ་ཡིས་ཐོབ༔ བསྟན་འཛིན་སྐྱེས་བུའི་མགོན་དུ་སྤོས༔ བཀའ་འདི་མཐུ་ལྡན་གསུམ་གྱིས་སྲུངས༔ ས་མ་ཡཱ༔ རྒྱ་རྒྱ་རྒྱ༔ འདི་ཁོ་ནའོ༔ པདྨ་གར་དབང་འགྱུར་མེད་རྡོ་རྗེ་རྩལ་གྱིས་ཡར་ཀླུངས་ཤེལ་ཕུག་གི་བྱང་འདབས་རྒྱལ་མཚན་འདྲ་བའི་བྲག་གི་ངོས་ནས་སྤྱན་དྲངས་པའོ། །དེ་ལྟར་འཇམ་དཔལ་ཁྲོས་པ་གཤིན་རྗེའི་དགྲ །མི་བསྲུན་དྲེགས་པ་འཇོམས་བྱེད་རྡོ་རྗེའི་ཐོག །ཨྱོན་བླ་མའི་ཐུགས་ཀྱི་ཉིང་ཁུའི་བཅུད། །ལོ་ཆེན་བཻ་རོ་ཙ་ནའི་ཞལ་གྱི་ལུང་། །བོད་འབངས་ཉེས་ཀུན་ལས་སྐྱོབ་སྲ་པའི་གོ །ཕན་བདེའི་འདོད་པ་འཇོ་བ་དཔག་བསམ་ཤིང་། །རྣལ་འབྱོར་བྱང་ཆུབ་སྒྲུབ་པའི་བརྣོག་པོའི་ཆོས། །ཡིད་སྲུབས་ལས་རྒྱལ་ཚངས་པའི་རྔ་ཆེན་ཡིན། །དེ་ཀོ་བློ་གསལ་མང་པོར་ཕན་འདོད་ཀྱི། །རབ་དཀར་དང་བས་བསྐྲུན་པའི་དགེ་བའི་འབྲས། །ཚེ་རབས་ཀུན་ཏུ་འཇམ་དཔལ་རྡོ་རྗེ་ཡིས། །བཤེས་མཛད་ལུས་ཅན་རྣམས་ཀྱི་མགོན་གྱུར་ཅིག །ཅེས་ཆོས་རྒྱལ་གཏེར་བདག་གླིང་པའི་གཏེར་གསར་འཇམ་དཔལ་གཤིན་རྗེ་དྲེགས་པ་འཇོམས་བྱེད་འདི་ལུང་བསྟན་དུས་བབས་བཞིན་རང་གཞན་གྱི་བདེ་སྐྱིད་སྤེལ་བའི་སླད་དུ་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་རྣམས་ཀྱི་ཆོག་གྲར་བཙུགས་སྐབས་ལས་བྱང་བདུད་ལས་རྣམ་པར་རྒྱལ་བ་ཚངས་པའི་རྔ་ཆེན་འདི་ནི་དགེ་སློང་འཇམ་དབྱངས་གྲགས་པས་ནན་གྱིས་བསྐུལ་བ་ལ་བརྟེན་ནས་གཏེར་གཞུང་དངོས་རྣམས་ཆད་ལྷག་མེད་པ་རང་སོར་བཞག །ཅུང་ཟད་སྣོན་དགོས་པ་རིགས་འཛིན་ཐུགས་ཐིག་དང་འཇམ་དཔལ་ཚེ་བདག་ནག་པོའི་ལས་བྱང་ནས་འབྲེལ་མཚུངས་ཁ་བཀང་མཚམས་སྦྱོར་ཕྲན་བུ་རང་བློས་བསྣན་ཏེ་རིགས་འཛིན་(༡༡བ)
པདྨ་ཡབ་ཡུམ་གྱིས་རྡོ་རྗེ་ཐོགས་མེད་རྩལ་དུ་མིང་བཏགས་ཤིང་ཆོས་བདག་ཏུ་རློམ་པ་ཟ་ཧོར་གྱི་བནྡེས་ཆུ་གླང་ནག་པ་ཟླ་བའི་ཚེས་བཅོ་ལྔ་ལ་སྦྱར་བའི་ཡི་གེ་པ་ནི་བསྐུལ་བ་པོ་ཉིད་དོ།། །།སརྦ་མངྒ་ལཾ། །