དབང་ཆེན་ཡང་གསང་ཁྲོས་པའི་ལས་བྱང་སྙིང་པོ་བཅུད་བསྡུས།
དབང་ཆེན་ཡང་གསང་ཁྲོས་པའི་ལས་བྱང་སྙིང་པོ་བཅུད་བསྡུས་ཞེས་བྱ་བ་བཞུགས་སོ། །
རིགས་ཀུན་ཁྱབ་བདག་ཆོས་དབྱིངས་རང་གྲོལ་གྱི། །ཞབས་སེན་ཟླ་ཚེས་གཙུག་ཏོར་རྩེར་བཀོད་ནས། །པདྨ་ཐོད་ཕྲེང་གདམས་པའི་ཉིང་ཁུ་མཆོག །ཡང་གསང་ཁྲོས་པའི་འཕྲིན་ལས་རྒྱུན་འཁྱེར་འདྲི། །སྐྱབས་འགྲོ་ནི། བདག་དང་མཁའ་མཉམ་སེམས་ཅན་མ་ལུས་པ། ཁྱབ་བདག་ཀུན་བཟང་གོ་འཕང་མ་ཐོབ་བར། །དཀོན་མཆོག་འདུས་པའི་བདག་ཉིད་རྩ་བ་གསུམ། །དཀྱིལ་འཁོར་ལྷ་ཚོགས་རྣམས་ལ་སྐྱབས་སུ་མཆི། །སེམས་བསྐྱེད་ནི། མཐའ་མེད་མར་གྱུར་དྲིན་ཅན་འགྲོ་བ་ཀུན། །བླ་མ་སངས་རྒྱས་ས་ལ་འགོད་པའི་ཆེད། །དབང་ཆེན་ཡང་གསང་ཁྲོས་པ་བསྒྲུབ་པའི་ཐབས། །ཟབ་མོའི་འཕྲིན་ལས་ཉམས་སུ་བླང་བར་བྱ། །ཚོགས་ཞིང་ནི། རང་གི་མདུན་དུ་པད་ཉི་རུ་དྲའི་སྟེང་། ཁྲག་འཐུང་ལྷ་ཚོགས་རིགས་ཀྱི་བདག་པོ་རུ། །རྩ་བ་བརྒྱུད་པའི་བླ་མ་ཀུན་བཞུགས་པ། །མཁའ་ལ་དབང་པོའི་གཞུ་ལྟར་བཀྲ་བར་གྱུར། །རྡོ་རྗེ་སློབ་དཔོན་སངས་རྒྱས་དཔལ་སོགས་བརྗོད། །མཚམས་གཅོད་ནི། ཨཱོཾ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་པཾ་པདྨ་མཎྜ་ལ། ཨ་ཙནྡྲ་མཎྜ་ལ། མ་སཱུཪྻ་མཎྜ་ལ། རུ་དྲ་བཾ། ཧྲཱིཿ སྥ་ར་ཎ་ཕཊ། སཾ་ཧ་ར་ཎ་ཧཱུཾ། བཛྲ་ཀྲོ་དྷ་ཡ་ཧ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། ཧྲཱི༔ དཔལ་ཆེན་མི་(༢ན)
བཟད་དཀྱིལ་འཁོར་ནས། །འབར་བའི་ཁྲོ་བོ་མེ་དཔུང་འབར། །གདུག་པའི་མཚོན་ཆ་སྣ་ཚོགས་བསྣམས། །བགེགས་དང་ལོག་འདྲེན་རྡུལ་དུ་རློག །ཧཱུཾ་བཞིའི་སྔགས་བརྗོད། སྲུང་འཁོར་ནི། །ཧྲཱིཿསྟེང་འོག་ཕྱོགས་མཚམས་མ་ལུས་ཁྲོ་བོ་དང་། །རྡོ་རྗེའི་ར་བ་བསྐལ་པའི་མེ་འབར་བས། །བར་མཚམས་མེད་པར་གཏམས་པའི་གུར་ཁང་གི །སྲུང་བའི་འཁོར་ལོའི་མཚམས་ལས་མ་འདའ་ཞིག །ཨོཾ་རཾ་ཀྲོ་དྷ་རཀྵ་བཛྲ་ཛྭ་ལ་རཾ་ཏིཀྵ་ཎ་བི་ཤྭ་ཛྭ་ལ་རཾ་ཕཊ་རཾ་རཾ། བཤགས་པ་ནི། རང་ཉིད་ལྷར་གསལ་ཐུགས་ཀའི་ས་བོན་ལས། །འོད་འཕྲོས་ཁྲག་འཐུང་ལྷ་དགུའི་དཀྱིལ་འཁོར་ལ། །བླ་མ་སངས་རྒྱས་བྱང་ཆུབ་སེམས་དཔའ་ཡིས། །བསྐོར་བ་མདུན་དུ་བཛྲ་ས་མཱ་ཛཿ། ཧཱུཾ། བདག་ནི་དང་པོ་བྱང་ཆུབ་སེམས་བསྐྱེད་ནས། །གྲུབ་པའི་རིགས་འཛིན་དབང་ཕྱུག་གོ་འཕང་དུ། །ཡི་དམ་ལྷ་དང་རྡོ་རྗེ་སློབ་དཔོན་ལ། །འདའ་བར་མི་བྱ་བསྲུང་བར་དམ་བཅས་ཏེ། །ལས་ངན་དབང་གྱུར་སྐྱེ་བོ་བདག་འདྲ་བ། །འདོད་ཆགས་ཞེ་སྡང་གཏི་མུག་དབང་དུ་གྱུར། །རྩ་བ་ཡན་ལག་དམ་ཚིག་ཉམས་ཆགས་ཀུན། །འཐོལ་ཞིང་བཤགས་སོ་ཚངས་པའི་དངོས་གྲུབ་སྩོལ། །ཨོཾ་པདྨ་ཤྲཱི་ཧེ་རུ་ཀ་སོགས་ཡི་གེ་བརྒྱ་པ་བརྗོད། །བྱིན་འབེབས་ནི། ཨ་ལ་ལ་ཧོ། བྷ་ག་ཝན་(༢བ)
ས་མ་ཡ་ཧོ། ས་མ་ཡ་སྟྭཾ། འཕགས་མཆོག་ཐུགས་རྗེའི་དུས་ལ་བབ། ཁྱད་པར་སྟོན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །དགྲ་བགེགས་སྒྲོལ་བའི་དུས་ལ་བབས། །ཉམས་ཆགས་སྐོང་བའི་དུས་ལ་བབ། །མཐུ་ཆེན་མཐུ་སྩོལ་བཅོམ་ལྡན་འདས། །དབང་ཆེན་དབང་སྐུར་བཅོམ་ལྡན་འདས། །བྱིན་ཆེན་ཕོབ་ཅིག་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བཅོམ་ལྡན་འདས་ཀྱི་བདག་རྣམས་ལ། །ལས་ཀྱི་འབྲས་བུ་མཆིས་པར་མཛོད། །ཨོཾ་བཛྲ་ཨཾ་ཀུ་ཤ་ཛ༔ མཆོད་རྫས་བྱིན་བརླབ་ནི། རཾ་ཡཾ་ཁཾ། ཨ་དྷུ་སུ་ཨ་ག་ན་ཤཿ། ས་མ་ཡ་སྟྭཾ། སྥ་ར་ཎ་ཕཊ་སཾ་ཧ་ར་ཎ་ཧཱུཾ། ཨོཾ་བཛྲ་ཨ་ཧ་ར་ཨ་ཧ་ར་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་པུཥྤེ་ཧཱུཾ་ནས་ཤཔྟའི་བར་བརྗོད། །ཨཱོཾ་ཨཱཿཧཱུཾ་མ་ཧཱ་པཉྩ་ཨ་མྲྀ་ཏ་ཧཱུཾ་ཧྲཱིཿཋ༔ ཨོཾ་བ་ལིཾ་ཏ་མ་ཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུ་ཧྱ་ས་མ་ཡ་ཧཱུཾ་ཧྲཱི༔ ཨཱོཾ་ཨཱཿཧཱུཾ༔ མ་ཧཱ་རཀྟ་ཛཱ་ལ་མཎྜ་ལ་ཧཱུཾ། ཏིང་འཛིན་རྣམ་གསུམ་རྟེན་བརྟེན་པ་བསྐྱེད་པ་ནི། ཧཱུཾ། ཆོས་ཉིད་ནམ་མཁའི་ཀློང་ཡངས་ནས། །ཆོས་རྣམས་སྣ་ཚོགས་རང་ཤར་བ། །རང་བཞིན་མེད་དེ་ཆུ་ཟླ་འདྲ། །ཐུགས་རྗེ་ཆེན་པོས་ཀུན་ལ་ཁྱབ། །སྙིང་པོ་ཡེ་ཤེས་ཧཱུཾ་གི་དབྱིབས། །ས་བོན་སྔགས་རྣམས་ཡོངས་སུ་གྱུར་བ་ལས། །འབྱུང་ལྔའི་རི་རབ་གཞལ་ཡས་ལྷུན་གྱིས་གྲུབ། །ཨེ་ལས་ནམ་མཁའ་སྔོ་སྐྱ་གྲུ་གསུམ་སྟེང་། །ཡཾ་ལས་རླུང་དཀྱིལ་འཁོར་ཟླ་གམ་དུད་ཁ་གཡོ། །རཾ་ལས་མེ་དཀྱིལ་དམར་པོ་ཟུར་གསུམ་འབར། ཁཾ་ལས་ཁྲག་མཚོ་དམར་ནག་ཟླུམ་པོ་འཁྲུག །སུཾ་ལས་ས་དཀྱིལ་སེར་པོ་གྲུ་བཞི་བརྟན། །ཀཾ་ལས་ཀེང་རུས་རི་རབ་གྲུ་བཞི་དཀར། །བྷྲུཾ་ལས་ཐོད་པ་རིན་ཆེན་གཞལ་ཡས་ཁང་། །དབུས་སུ་གྲུ་གསུམ་དམར་ནག་དཀྱིལ་འཁོར་ལ། །ཟླ་གམ་དམར་(༣ན)
པོ་ཐོད་པའི་ར་བ་ཅན། །ཕྱི་རོལ་འཁོར་ལོ་རྩིབས་བཞི་ཕྱོགས་ཀྱི་མདོག །མགོ་བོ་རློན་པའི་ཕྲེང་བས་ཟླུམ་པོར་བསྐོར། །དེའི་ཕྱིར་གྲུ་བཞི་སྒོ་བཞི་གཞལ་ཡས་ཁང་། །ཕྱོགས་སྐྱོང་བཅུ་ཡིས་རྩིག་པའི་རྨང་གཞི་བྱས། །ནང་ནི་བནྡྷ་སྐམ་རློན་རྙིང་པ་ཡི། །རྩིག་པ་གནམ་ལྕགས་འབར་བའི་གཟེར་གྱིས་བཏབ། །ཕྱི་ནི་རིན་ཆེན་སྣ་ཚོགས་ལས་གྲུབ་པ། །དམར་དཀར་ལྗང་སེར་ནག་པོའི་རྩིག་པ་ཅན། །བར་དུ་ལྷ་ཆེན་བརྒྱད་ཀྱི་རྩིག་པས་གཏམས། །རྩིག་སྟེང་རིན་ཆེན་རུས་པའི་ཕ་གུ་ལ། །རྒྱུ་མ་རློན་པའི་དྲ་བ་དྲ་ཕྱེད་འཕྱང་། །དེའི་སྟེང་རིན་ཆེན་རུས་པ་སྤེལ་མ་ཡི། །མདའ་ཡབ་པུ་ཤུ་རྩིག་པའི་རྩ་བ་ན། །འདོད་སྣམ་དམར་པོ་མཆོད་པའི་ལྷ་མོས་གང་། །རྒྱལ་ཆེན་བཞི་དང་ཐོད་པ་སྐམ་པོ་ལས། །གྲུབ་པའི་ཀ་བ་བརྒྱད་ཀྱིས་ལེགས་བཏེག་པའི། །ཐོད་པ་རློན་པའི་ཀ་གཞུ་རབ་ཏུ་བརྫིད། །ཀླུ་ཆེན་བརྒྱད་ཀྱི་གདུང་མས་ཕྱོགས་མཚམས་བྲེས། །དེ་ལ་མཛེས་པའི་མེ་ཏོག་རྒྱན་དུ་སྤུད། །གཟའ་ཆེན་བརྒྱད་ཀྱི་བད་ཕུར་བཏང་བ་ལ། །རྒྱུ་སྐར་ཉི་ཤུ་རྩ་བརྒྱད་གྲལ་ཕྱམ་བྱས། །བདུད་རྩི་ལྔ་ལས་གྲུབ་པའི་ཞལ་པ་ཅན། །དབུས་ཀྱི་ལྟེ་བ་ཕྱུར་བུར་མཐོ་བའི་རྩེར། །པདྨས་བཏེག་པའི་ཙིཏྟའི་ཏོག་གིས་རྒྱན། །སྒོ་བཞི་ཀ་བ་བཞི་བཞིས་བཏེག་པ་ཡི། །རྟ་བབས་བང་རིམ་བཞི་དང་ལྡན་པའི་སྟེང་། །པདྨ་ཆོས་འཁོར་བཅུ་གསུམ་གདུགས་རི་དྭགས། །མགོ་སྙིང་ཏོག་མཛེས་ཞིང་ཆེན་རྒྱལ་མཚན་དང་། །ལག་པའི་འཕན་དང་སྐྲ་ཡི་རྔ་ཡབ་ཅན། །དབང་པོའི་མེ་ཏོག་སྤེལ་བའི་ཕྲེང་བ་གཡོ། །མདོར་ན་རྔམ་བརྗིད་མཛེས་པའི་རྒྱན་གྱིས་སྤུད། །ཕྱི་རོལ་པད་ར་དུར་ཁྲོད་ཆེན་པོ་བརྒྱད། །རྡོ་རྗེའི་ར་བ་བསྐལ་པའི་མེ་དཔུང་འབར། །དབུས་ཀྱི་གྲུ་གསུམ་དམར་ནག་དཀྱིལ་འཁོར་སྟེང་། པཾ་ལས་སྣ་ཚོགས་(༣བ)
པདྨ་མཛེས་པའི་གདན། །ཨ་ལས་ཟླ་བའི་དཀྱིལ་འཁོར་ཉ་གང་བ། །མ་ལས་ཉི་མའི་དཀྱིལ་འཁོར་འོད་ཟེར་འབར། །བ་ལས་རུ་དྲ་ཕོ་མོ་བསྣོལ་བ་ཡི། །གན་རྒྱལ་ཁ་སྤུབ་བརྩེགས་པའི་གདན་སྟེང་དུ། །རབ་འབར་རྒྱུ་ཏིང་ཧཱུཾ་ཡིག་བབས་པ་ལས། །ཧྲཱིཿཡིག་དམར་ནག་བཾ་ཡིག་སྔོན་པོར་གྱུར། །དེ་ལས་འོད་འཕྲོས་འཕགས་ཚོགས་མཆོད་པས་མཉེས། །སེམས་ཅན་རྣམས་ཀྱི་སྡིག་སྒྲིབ་མ་ལུས་སྦྱངས། །སླར་ཡང་འདུས་ཤིང་བརྟན་པར་བྱས་པ་ལས། །རང་ཉིད་རྟ་མགྲིན་པདྨ་དབང་ཆེན་སྐུ། །ཞལ་གསུམ་གཡས་དཀར་གཡོན་ལྗང་དབུས་དམར་ནག །སྤྱི་བོའི་གཙུག་ཏུ་རྟ་མགོ་ལྗང་གུའི་ཞལ། །རྔོག་མ་དམར་པོ་ཕྲུམ་ཕྲུམ་སེར་པོ་དང་། །ཞུར་དཀར་རྟ་སྐད་སྒྲ་དབྱངས་ཕྱོགས་བཅུར་འཚེར། །ཞལ་རྣམས་ཀུན་ལ་སྤྱན་གསུམ་དམར་ཞིང་ཟླུམ། །སྨིན་མ་སྨ་ར་སེར་པོ་གློག་ལྟར་འཁྱུག །དབུ་སྐྲ་རལ་པ་ཁམ་ནག་གྱེན་དུ་བརྫེས། །ཕྱག་དྲུག་གཡས་ཀྱི་དང་པོ་པདྨ་བསྣམས། །གཡོན་གྱི་དང་པོ་ཁྲག་གང་ཀ་པཱ་ལ། །བཟུང་སྟེ་བདེ་ཆེན་ཡུམ་གྱི་མགུལ་ནས་འཁྱུད། །ལྷག་མ་གཡས་གཉིས་ལྕགས་ཀྱུ་བེ་ཅོན་དང་། །གཡོན་གཉིས་ཞགས་པ་རལ་གྲི་མེ་འབར་འཛིན། །སྐུ་སྟོད་ཞིང་ལྤགས་གླང་ཆེན་ཀོ་རློན་གསོལ། །སྐུ་སྨད་སྟག་གི་པགས་པའི་ཤམ་ཐབས་ཀླུབས། །ཐོད་སྐམ་དབུ་རྒྱན་རིན་ཆེན་རྩེ་ཕྲན་ཅན། །མགོ་བོ་སྐམ་རློན་རྙིང་པ་ལྔ་བཅུ་ཡི། །ཚར་གསུམ་འཕྲེང་བའི་དོ་ཤལ་སྐུ་ལ་གསོལ། །རུས་པ་རིན་ཆེན་སྦྲུལ་རིགས་བཞི་ཡིས་བརྒྱན། །ཞག་གི་སོར་རིས་རཀྟའི་ཐིག་ལེ་དང་། །ཐལ་ཆེན་ཚོམ་བུ་སྐུ་ཡི་གནས་སུ་བྱུགས། ཁམས་གསུམ་རྣམ་པར་རྒྱལ་བའི་ཁྱུང་གཤོག་ཅན། །གར་དགུའི་ཉམས་ལྡན་ཞབས་བཞི་བརྐྱང་བསྐུམ་བཞུགས། །གཙོ་བོའི་གཡོན་ནས་སྐུ་ལ་འཁྲིལ་ཚུལ་ཅན། །གསང་ཡུམ་པདྨ་གར་གྱི་དབང་ཕྱུག་(༤ན)
ནི། །སྐུ་མདོག་མཐིང་ནག་ཞལ་གཅིག་ཕྱག་གཉིས་པ། །སྤྱན་གསུམ་སྡང་མིག་ཞལ་བགྲད་མཆེ་བ་གཙིགས། །དབུ་སྐྲ་རལ་པ་ནག་པོ་མུན་ལྟར་གཏིབས། །ཕྱག་གཡས་ཙིཏྟ་ཐོགས་ནས་ཡབ་ལ་འཁྱུད། །གཡོན་པ་དུང་ཆེན་ཁྲག་གིས་གང་བའི་མཚོ། །དཔལ་ཆེན་གཙོ་བོའི་ཞལ་དུ་འདེབས་ཚུལ་མཛད། །ཡབ་ཡུམ་གཉིས་ཀྱི་སྤྱི་བོར་ཟླ་བ་དང་། །མགྲིན་པར་པདྨ་ཐུགས་ཀར་ཉི་མའི་སྟེང་། །ཨཱོཾ་དཀར་ཨཱཿདམར་ཧཱུཾ་སྔོན་ཡི་གེ་ཡིས། །མཚན་པས་སྐུ་གསུང་ཐུགས་རྣམས་བྱིན་གྱིས་བརླབས། །དབུ་ལ་ཐོད་པའི་ཁང་བུ་ལྔས་བརྒྱན་པའི། །སྤྱི་གཙུག་ཧཱུཾ་སྔོན་མཚོག་མར་ཨཱོཾ་དཀར་པོ། །རྣ་ལྟག་གཡས་སུ་སྭཱ་སེར་ལྟག་པ་ན། །ཨོཾ་དམར་རྣ་ལྟག་གཡོན་ན་ཧཾ་ལྗང་གུ །དེ་རྣམས་སྐད་ཅིག་ཡོངས་སུ་གྱུར་བ་ལས། །རྡོ་རྗེ་ཁྲག་འཐུང་སྔོན་པོ་རྡོར་དྲིལ་འཛིན། །སངས་རྒྱས་ཁྲག་འཐུང་དཀར་པོ་འཁོར་དྲིལ་འཛིན། །རིན་ཆེན་ཁྲག་འཐུང་སེར་པོ་རིན་ཆེན་དྲིལ། །པདྨ་ཁྲག་འཐུང་དམར་པོ་པད་དྲིལ་འཛིན། །ལས་ཀྱི་ཁྲག་འཐུང་ལྗང་གུ་རལ་གྲི་དྲིལ། །རྒྱན་དང་ཆ་ལུགས་གཙོ་བོ་དག་དང་མཐུན། ཁྲག་འཐུང་རིགས་ལྔ་དབུ་ཡི་རྒྱན་དུ་རྫོགས། །ཡབ་ཀྱི་གསང་གནས་ཡི་གེ་ཧཱུཾ་ཡིག་ནི། །ཡོངས་གྱུར་རྡོ་རྗེ་རྩེ་ལྔའི་རྣམ་པ་ཅན། །ཡུམ་གྱི་གསང་གནས་པཾ་ལས་པད་འདབ་བརྒྱད། །སྙོམས་པར་ཞུགས་པའི་བདེ་བ་ཆེན་པོའི་སྒྲས། །སངས་རྒྱས་སྲས་དང་བཅས་པ་སྤྱན་དྲངས་ནས། །ཡབ་ཀྱི་ཞལ་ཞུགས་ཐུགས་ཀར་འོད་དུ་ཞུ། །རྡོ་རྗེའི་ལམ་ནས་ཡུམ་གྱི་མཁར་བབས་པའི། །ཐིག་ལེ་ཡིག་འབྲུ་བརྒྱད་ཀྱི་ངོ་བོར་གྱུར། །ཤར་གྱི་རྩིབས་སྟེང་དེ་བ་བཾ་ཡོངས་གྱུར། །དྲི་ཟ་དཀར་པོ་ཕོ་མོ་བསྣོལ་གདན་ལ། །ཨཱོཾ་ལས་རྡོ་རྗེ་དབང་ཆེན་སྐུ་མདོག་དཀར། །ཞལ་གཅིག་ཕྱག་གཉིས་གཡས་པ་རྡོ་རྗེ་དང་། །(༤བ)
གཡོན་པ་དབྱུག་ཏོ་བསྣམས་ཤིང་འགྱིང་བའི་ཚུལ། །ལྷོ་ཡི་རྩིབས་སྟེང་ཡ་མ་བཾ་ཡོངས་གྱུར། །གྲུལ་བུམ་སྔོན་པོ་ཕོ་མོ་བསྣོལ་གདན་ལ། །སྭཱ་ལས་རིན་ཆེན་དབང་ཆེན་སྐུ་མདོག་སྔོ། །ཞལ་གཅིག་ཕྱག་གཉིས་གཡས་པ་རིན་ཆེན་དང་། །གཡོན་པ་ལྕགས་ཀྱུ་འགུགས་པའི་ཚུལ་གྱིས་འཛིན། །ནུབ་ཀྱི་རྩིབས་སྟེང་ནཱ་ག་བཾ་ཡོངས་གྱུར། །ཀླུ་རྒྱལ་དམར་པོ་ཕོ་མོ་བསྣོལ་གདན་ལ། །ཨཾ་ལས་པདྨ་དབང་ཆེན་སྐུ་མདོག་དམར། །ཞལ་གཅིག་ཕྱག་གཉིས་གཡས་པ་པདྨ་དང་། །གཡོན་པ་ཞགས་པ་འཆིང་བའི་ཚུལ་གྱིས་འཛིན། །བྱང་ཕྱོགས་རྩིབས་སྟེང་ཡཀྵ་བཾ་ཡོངས་གྱུར། །གནོད་སྦྱིན་ལྗང་གུ་ཕོ་མོ་བསྣོལ་གདན་ལ། །ཧ་ལས་ལས་རབ་དབང་ཆེན་ལྗང་དམར་མདོག །ཞལ་གཅིག་ཕྱག་གཉིས་གཡས་པ་རལ་གྲི་དང་། །གཡོན་པ་རྩེ་གསུམ་བསྣུན་པའི་ཚུལ་གྱིས་འཛིན། །ཀུན་ཀྱང་སྤྱན་གསུམ་ཞལ་བགྲད་ཆེ་བ་གཙིགས། །དབུ་སྐྲ་ཁམ་ནག་གྱེན་བརྫེས་སྦྲུལ་གྱིས་བཅིངས། །དུར་ཁྲོད་ཆས་རྣམས་མ་ལུས་སྐུ་ལ་བརྒྱན། །མེ་དཔུང་ཀློང་ན་གར་སྟབས་ཚུལ་གྱིས་བཞུགས། །སྒོ་བཞིར་ཨ་དང་ཙནྡྲ་བཾ་ཡོངས་གྱུར། །ཟླ་བའི་དཀྱིལ་འཁོར་རེ་རེའི་གདན་སྟེང་དུ། །ཛ་ཡིག་ཡོངས་གྱུར་སྒོ་མ་ལྕགས་ཀྱུ་མ། །དཀར་མོ་ཁྲག་རལ་ལྕགས་ཀྱུ་གློ་སྙིང་འཛིན། །ཧཱུཾ་ཡིག་ཡོངས་གྱུར་སྒོ་མ་ཞགས་པ་མ། །སེར་མོ་གཡུ་རལ་ཞགས་པ་གློ་སྙིང་འཛིན། །བཾ་ཡིག་ཡོངས་གྱུར་སྒོ་མ་ལྕགས་སྒྲོག་མ། །དམར་མོ་མཐིང་རལ་ལྕགས་སྒྲོག་གློ་སྙིང་འཛིན། །ཧོཿཡིག་ཡོངས་གྱུར་སྒོ་མ་དྲིལ་བུ་མ། །ལྗང་གུ་གསེར་རལ་དྲིལ་བུ་གློ་སྙིང་འཛིན། །ཀུན་ཀྱང་ཞལ་གཅིག་ཕྱག་དང་ཞབས་གཉིས་པ། །དུར་ཁྲོད་ཆས་བརྒྱན་མེ་དཔུང་ཀློང་ན་བཞུགས། །སྙན་གསན་ནི། བཛྲ་ས་མཱ་ཛ༔ སྤྱན་འདྲེན་ནི། ཆོས་ཀྱི་དབྱིངས་ནས་སྐུ་(༥ན)
བཞེངས་པ། །དབང་ཆེན་ཁྲོས་པའི་རྒྱལ་པོ་བཞེངས། །ལྷ་ཚོགས་འཁོར་དང་བཅས་པ་རྣམས། །གནས་འདིར་སྤྱན་འདྲེན་བཞུགས་སུ་གསོལ། །ཨེ་ཧྱེ་ཧི་བྷ་ག་ཝན་མ་ཧཱ་ཀ་རུ་ཎི་ཀ་ཏྲི་ཤྱ་ཧོ༔ ས་མ་ཡ་ཛ༔ ས་མ་ཡ་སྟྭཾ། བཞུགས་གསོལ་ནི། ཛཿ ཧཱུཾ་བཾ་ཧོ༔ ས་མ་ཡ་སྟཾ། ཕྱག་འཚལ་ནི། ཨ་ཏི་པུ་ཧོ༔ པྲ་ཏི་ཛ་ཧོ༔ མཆོད་པ་འབུལ་བ་ནི། ཨོཾ་སརྦ་ཏ་ཐཱ་ག་ཏ་མ་ཧཱ་པདྨེ་ཤྭ་ར་ས་པ་རི་ཝཱ་ར་ཨརྒྷཾ་ནས་ཤཔྟའི་བར་བརྗོད། དེ་བཞིན་དུ་རཱུ་པ་ནས་སྤཪྴའི་མཐར་དྷརྨ་དྷཱ་ཏུའི་བར་བརྗོད། ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཀཱ་ཡ་སིདྡྷི་ཨོཾ། ཝཱཀ་སིདྡྷི་ཨཱ༔ ཙིཏྟ་སིདྡྷི་ཧཱུཾ། མ་ཧཱ་མཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཀེཾ་ནྲྀ་ཏི་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། མ་ཧཱ་རཀྟ་ཁ་རཾ་ཁཱ་ཧི། མ་ཧཱ་སུ་ཁ་བྷོ་དྷི་ཙིཏྟ་སྭཱཧཱ། མ་ཧཱ་མཾ་ས། མ་ཧཱ་རཀྟ། མ་ཧཱ་ཀེཾ་ནྲྀ་ཏི། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། འོད་གསལ་དབྱིངས་ལས་མ་གཡོས་ཀྱང་། །ཟུང་འཇུག་བདེ་ཆེན་རྣམ་སྤྲུལ་བ། །སྣ་ཚོགས་སྤྲུལ་པའི་སྐུར་སྟོན་པའི། །རྟ་མཆོག་ཚོགས་ལ་ཕྱག་འཚལ་བསྟོད། །ཧཱུཾ། བདག་ཉིད་ཁྲོ་རྒྱལ་རྟ་མཆོག་དཔལ། །ཐུགས་ཀར་པདྨ་འདབ་བརྒྱད་ཀྱི། །གེ་སར་ལ་ནི་སྙིང་པོ་ཧྲཱི༔ འདབ་མ་བརྒྱད་ལ་སྔགས་ཀྱིས་བསྐོར། །འོད་འཕྲོས་བདེ་གཤེགས་རྣམས་ལ་ཐིམ། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཀྱི་དངོས་གྲུབ་བསྡུ། །སེམས་ཅན་སྒོ་གསུམ་དྲི་མ་སྦྱོང་། །རྣལ་འབྱོར་ལུས་ངག་ཡིད་ལ་བསྡུ། །ཧྲཱིཿ བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། ཨཱོཾ་མ་ཧཱ་ཀྲོ་དྷེ་ཤྭ་རི་ཧཱུཾ་ཕཊ། ཨཱོཾ་བཛྲེ་ཤྭ་ར་ཀྲོ་དྷ་ཧཱུཾ་ཕཊ། ཨཱོཾ་རཏྣེ་ཤྭ་ར་ཀྲོ་དྷ་ཧཱུཾ་ཕཊ། ཨཱོཾ་པདྨེ་ཤྭ་ར་ཀྲོ་དྷ་ཧཱུཾ་ཕཊ། ཨཱོཾ་ཀརྨ་ཤྭ་ར་ཀྲོ་དྷ་ཧཱུཾ་ཕཊ། ཨཱོཾ་བཛྲ་ཨངྐུ་ཤ་ཛ༔ ཨཱོཾ་བཛྲ་པཱ་ཤ་(༥བ)
ཧཱུཾ། ཨཱོཾ་བཛྲ་སྥོ་ཊ་བཾ། ཨཱོཾ་བཛྲ་གཎྜེ་ཧོ༔ ཧཱུཾ། ཁྲོ་རྒྱལ་རྔམ་པ་རྟ་མཆོག་དཔལ། །དཔལ་གྱི་སྐུ་གསུང་ཐུགས་མཆོག་ལས། །མཆོག་གི་དངོས་གྲུབ་ཡེ་ཤེས་དབྱིག །དུས་འདིར་རྣལ་འབྱོར་བདག་ལ་སྩོལ། །ཨཱོཾ་པདྨཱནྟ་ཀྲྀ་ཏ་པདྨེ་ཤྭ་རི་མ་ཧཱ་ཀྲོ་དྷ་ཧ་ཡ་གྲཱི་ཝ་མ་མ་ཏྲག་མོ་དུན་ཏི་ཧྲཱིཾ་ཧྲཱིཾ་ཛ༔ ཨཱོཾ་པདྨ་ཀྲོ་དྷ་ཀཱ་ཡ་ཝ་ཀ་ཙིཏྟ་སིདྡྷི་ཨ་ལ་ལ་ཧོ༔ བཀའ་སྲུང་མཆོད་པ་ནི། རང་གི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་མང་པོ་འཕྲོས་པས་པདྨ་དབང་གི་ཞིང་ཁམས་ནས་སྲོག་བདག་འོད་ཀྱི་རྒྱལ་པོ། རྒྱ་ཡུལ་ནམ་མཁའི་ཆད་ཆོད་ནས་ཚངས་པ་དུང་གི་ཐོར་ཚུགས་ཅན། ནུབ་ཕྱོགས་ཕ་ཝཾ་ལོང་བུའི་མཁར་ནང་ནས་དམ་ཅན་རྡོ་རྗེ་ལེགས་པ། བདུད་ཡུལ་ཁ་རག་སྒོ་དགུ་ནས་བདུད་པོ་རི་ནག་སྤུངས་པ། བཙན་ཡུལ་ཟངས་ཐང་དམར་པོ་ནས་བཙན་རྒོད་ཡམ་ཤུད་དམར་པོ་འཁོར་དང་བཅས་པ་སྐད་ཅིག་ཡུད་ཙམ་ལ་ཨེ་ཧྱེ་ཧི། བཛྲ་ས་མཱ་ཛ༔ པདྨ་ཀ་མ་ལཱ་ཡ་སྟྭཾ། རྡོ་རྗེ་པདྨ་ཁ་ཕྱེ་བའི་མཐར་སེ་གོལ་གཏོག་ཅིང་ཨོཾ་རཱ་ཛ་སྲོག་ལ་ཧྲཱི༔ ཨ་ཤུག་མི་ཏྲ་སྲོག་ལ་ཛཿཙ་པ་ལ་ཨ་ཤུག་མེ། ཏྲི་ལི་ཛཾ། བཛྲ་སཱ་དྷུ་ཧྲཱི༔ དུན་དུན་ཤུ་ལ་གྲཱི་ཝ་ཨི་དཾ་བ་ལིཾ་ཏཾ་ཁ་ཁ་ཁཱ་ཧི་ཁཱ་ཧི། ཧཱུཾ། དབང་དྲག་དཀྱིལ་འཁོར་སྤྱི་ཡི་བཀའ་སྡོད་ནི། །སྲོག་ལ་དབང་སྒྱུར་གིང་ཆེན་ལྔ་རྣམས་ཀྱང་། །ལས་སུ་སངས་རྒྱས་བསྟན་པ་སྲུང་བྱེད་ཅིང་། །ཟས་སུ་དགྲ་བོའི་ཤ་ཁྲག་ཚོགས་རྣམས་ཟ། དམ་ཉམས་དགྲ་བགེགས་རྩད་ནས་གཅོད་མཛད་པའི། །དྲེགས་པ་མཐུ་རྩལ་ཅན་ལ་ཕྱག་འཚལ་བསྟོད། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་པའི་དངོས་གྲུབ་སྩལ་དུ་གསོལ། །རང་གི་ཐུགས་ཀའི་ས་བོན་གྱི་འོད་ཟེར་གྱིས་ལྷོ་ནུབ་མཚམས་ཀྱི་སྲིན་ཡུལ་ལང་ཀ་པུ་རིའི་གྲོང་ཁྱེར་ནས་དྲེགས་པ་གཟའ་གདོང་ལྕམ་དྲལ་ལྷ་སྲིན་སྡེ་བརྒྱད་ཀྱི་འཁོར་དང་བཅས་པ་ཨཱོཾ་ཨེ་ཧྱེ་ཧི་བཛྲ་ས་མཱ་ཛ༔ པདྨ་ཀ་(༦ན)
མ་ལཱ་ཡ་སྟྭཾ། ཨཱོཾ་རཱ་ཧུ་ལ་མ་ར་ཙ་ཤ་ཡ་ཨི་དཾ་བ་ལིཾ་ཏ་ཁཱ་ཧི་ཁཱ་ཧི། ཧཱུཾ། ཕྱོགས་བཞི་བར་སྣང་ནམ་མཁའི་ཀློང་ཡངས་ནས། །དམ་ཅན་བཀའ་སྡོད་གཟའ་གདོང་ལྕམ་དྲལ་ཀྱང་། །ལས་སུ་སངས་རྒྱས་བསྟན་པ་བསྲུང་མཛད་ཅིང་། །ཟས་སུ་དགྲ་བོའི་ལོ་ཏོག་ནར་མར་གསོལ། །དགྲ་བགེགས་ཡུལ་ཁམས་ཐལ་བར་རློག་བྱེད་པའི། །གཟའ་གདོང་དྲེགས་པ་ཅན་ལ་ཕྱག་འཚལ་བསྟོད། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་པའི་དངོས་གྲུབ་སྩལ་དུ་གསོལ། །བཟོད་གསོལ་ནི། པདྨ་ཧེ་རུ་ཀའི་ཡི་གེ་བརྒྱ་པ་བརྗོད། བླ་མ་དཀྱིལ་འཁོར་ལྷ་ཚོགས་དགོངས་སུ་གསོལ། །བདག་ཅག་མ་རིག་ལུས་དང་ངག་སེམས་ཀྱི། །བག་མེད་ཚུལ་གྱིས་དམ་ལས་འགལ་གྱུར་ཏེ། །པདྨ་དབང་ཆེན་དཀྱིལ་འཁོར་ལྷ་ཚོགས་ཀྱི། །ཐུགས་དང་འགལ་བའི་ལས་རྣམས་ཅི་བགྱིས་པ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །བཟོད་པར་གསོལ་ལོ་ཚངས་པར་སྩལ་དུ་གསོལ། །ཚངས་པ་འཕྲུལ་གྱི་དངོས་གྲུབ་སྩལ་དུ་གསོལ། །ཉེར་བསྡུ་ནི། སྣོད་བཅུད་གཞལ་ཡས་དེ་ཡང་འཁོར་ལ་ཐིམ། །འཁོར་རྣམས་གཙོ་བོ་ཡུམ་ཡང་ཡབ་ལ་ཐིམ། །དབང་ཆེན་སྐུ་ཡང་འཇའ་ཚོན་ལྟར་ཡལ་ནས། །ཀ་དག་གདོད་མའི་ཀློང་དུ་བཛྲ་མུ༔ །སླར་ཡང་ཆུ་ལས་ཆུ་བུར་བརྡོལ་བ་ལྟར། །རང་ཉིད་ཡང་གསང་ཁྲོས་པར་གསལ་བ་ཡི། །སྐུ་ལས་ཡེ་ཤེས་མེ་དཔུང་རབ་འབར་བ། །འཇིགས་མེད་སྲུང་བའི་གོ་ཆ་བཙན་པོར་གྱུར། །སྨོན་ལམ་ནི། དགེ་བ་འདི་ཡིས་འགྲོ་ཀུན་སེམས་ཅན་རྣམས། །པདྨ་རྒྱལ་པོའི་གོ་འཕང་མཆོག་ཐོབ་ནས། །མ་རིག་ལྡོངས་པའི་སྐྱེ་ཚོགས་ཐམས་ཅད་ལ། །རོལ་བའི་རྟ་སྐད་ཕྱོགས་བཅུར་སྒྲོག་པར་ཤོག །ཤིས་བརྗོད་ནི། སྐུ་གསུང་ཐུགས་ཡོན་འཕྲིན་ལས་ཟ་མ་ཏོག །(༦བ)
དངོས་གྲུབ་འཆི་མེད་བདུད་རྩིས་ལེགས་གཏམས་ནས། །མཆོག་ཐུན་དོན་ཀུན་གྲུབ་པའི་རྡོ་རྗེའི་སྲོག །བསྒྲུབ་མཛད་རྟ་མགྲིན་ལྷ་ཚོགས་བཀྲ་ཤིས་ཤོག །ཅེས་དབང་ཆེན་ཡང་གསང་ཁྲོས་པའི་ལས་བྱང་སྙིང་པོ་བཅུད་བསྡུས་འདི་ནི་མཆོད་དཔོན་ངག་དབང་ཤེས་རབ་ཀྱི་ཉམས་ལེན་དུ་དགོས་ཚུལ་ལྟར་ཟ་ཧོར་སྔགས་བན་གྱིས་སྦྱར་བའི་ཡི་གེ་པ་ནི་རིག་བྱེད་སྨྲ་བ་པ་བསམ་མཐོང་པ་ཕུན་ཚོགས་དབང་པོའོ།། །།སརྦ་མངྒ་ལཾ། །