དབང་ཆེན་ཡང་གསང་ལྷ་དགུའི་སྒོ་ནས་དྲག་པོ་ཟོར་གྱི་འཕྲིན་ལས་རྡོ་རྗེ་ཕ་ལམ།
དབང་ཆེན་ཡང་གསང་ལྷ་དགུའི་སྒོ་ནས་དྲག་པོ་ཟོར་གྱི་འཕྲིན་ལས་རྡོ་རྗེ་ཕ་ལམ་ཞེས་བྱ་བ་བཞུགས་སོ། །
ན་མོ་གུ་རུ་ཤྩ་པ་ར་མ་ཧ་ཡ་གྷྲཱི་བ་ཤྲི་ཡེ། བགྲང་ཡས་སངས་རྒྱས་ཀུན་འདུས་པདྨ་འབྱུང་། །དམོད་པ་དྲག་སྔགས་བཀའ་བབས་བཻ་རོའི་ཞབས། །རྩ་བརྒྱུད་བླ་མ་ཡོངས་ཚང་ཟུར་ཆེན་རྗེ། །ཆོས་དབྱིངས་རང་གྲོལ་ཞབས་རྡུལ་གཙུག་ན་བསྟེན། །པདྨ་གསུང་གི་དཀྱིལ་འཁོར་ཀུན་གྱི་རྩེར། །ལེགས་སོན་ཡང་གསང་ཁྲག་འཐུང་ལྷ་དགུ་ལ། །བརྟེན་ནས་དགྲ་བགེགས་ཕྱེར་འཐག་གཏོར་ཟོར་གྱི། །ལས་རིམ་རྡོ་རྗེ་ཕ་ལམ་གཅིག་ཏུ་མཚར། །དེ་ཕྱིར་རིགས་འཛིན་བརྒྱུད་པའི་བཞེད་སྲོལ་གྱི། །དགོངས་དོན་ཇི་བཞིན་འཁྲུགས་སྡེབས་བཀླགས་ཆོག་ཏུ། །ཉེ་བར་འདྲི་ལ་རྩ་གསུམ་ལྷ་ཚོགས་དང་། །བཀའ་སྐྱོང་གཏེར་བདག་ཚོགས་ཀྱིས་གནང་བ་སྩོལ། །དེའང་པདྨ་གསུང་གི་དཀྱིལ་འཁོར་ལ་བརྟེན་ནས་སྒྲུབ་འཕྲིན་གྱི་རིམ་པ་གཏེར་བྱོན་མཐའ་ཀླས་པའི་ནང་ནས་བྱིན་རླབས་དང་དངོས་གྲུབ་ཀྱི་ཚན་ཁ་ཕུལ་དུ་བྱུང་བ་ཡང་གསང་ཁྲོས་པ་ཁྲག་འཐུང་ལྷ་དགུའི་འཕྲིན་ལས་ཀྱི་སྒོ་ནས་རང་གཞན་གྱི་དོན་དུ་ཕ་རལ་རིག་སྔགས་ཀྱི་རྦོད་གཏོང་སྡེ་བརྒྱད་འབྱུང་པོའི་གདོན་བྱད་ཟ་ཁ་ཟུག་པ། ཆགས་ཆེ་བ། ལྷ་འདྲེ་དྲག་པོ་གཡོས་པ། རྨི་ལྟས་(༢ན)
མཚན་མ་ངན་པ་སོགས་གཟུགས་ཅན་དང་གཟུགས་མེད་ཀྱི་གནོད་འཚེ་བར་ཆད་ཐམས་ཅད་དྲག་པོ་ཟོར་གྱི་སྒོ་ནས་བཟློག་པའི་ལས་རིམ་བྱ་བར་འདོད་པས་ཐོག་མར། པདྨ་གསུང་གི་དཀྱིལ་འཁོར་འདི་ཉིད་དུ་མཚན་ཉིད་དང་ལྡན་པའི་རྡོ་རྗེ་སློབ་དཔོན་གྱི་སྤྱན་སྔར་སྨིན་གྲོལ་མན་ངག་ཐམས་ཅད་ལེགས་པར་ནོས་ཤིང་། དམ་ཚིག་དང་སྡོམ་པ་ལ་གནས་པ། བསྙེན་སྒྲུབ་ཚད་དུ་ཐེངས་པའི་སྒྲུབ་པ་པོས་ཉམས་སུ་བསྟར་བ་ལ་སྔོན་འགྲོ་དངོས་གཞི་རྗེས་ཀྱི་རིམ་པ་དང་གསུམ། །དང་པོ་ལ་མངོན་སྤྱོད་ཀྱི་ལས་སྦྱོར་བསྒྲུབ་པའི་གནས་ནི། དྲག་པོའི་ལས་བརྩོམ་གནས་བཙལ་བ། །དུར་ཁྲོད་ས་ཕུག་བྲག་ཕུག་གམ། །ཆུ་ཀླུང་ནགས་ཚལ་རྐང་གཅིག་ཤིང་། །གནས་རེངས་ལྷ་ཁང་གོག་པོ་རུ། །གཤིན་རྗེ་ཐེ་བྲང་སྲིན་པོ་དང་། །ཀླུ་དང་ས་བདག་གནོད་སྦྱིན་རྒྱལ། །རིམ་བཞིན་གནས་པ་བསྒྲུབ་པར་བླ། །ཞེས་པ་ལྟར་མཐུན་པའི་གནས་སམ། །ཡང་ན་སྒྲུབ་ཁང་རྙིང་པ་སོགས་མཚན་ཉིད་དང་ལྡན་པར་ཟོར་ལས་ལ་ཉེ་བར་མཁོ་བའི་རྫས་དང་ཡོ་བྱད་རྣམས་ཚོགས་པར་བྱས། དྲག་ལས་ལ་ཤིས་པའི་གཟའ་སྐར་འཕྲོད་སྦྱོར་སོགས་(༢བ)
དང་བསྟུན། ས་སྟེགས་སམ་ཞལ་བ་སྐྱང་ནུལ་ལེགས་པར་བྱས། ལས་བྱང་ཡོངས་རྫོགས་སམ་དཔའ་བོ་རྐྱང་སྒྲུབ་ལྟ་བུའི་སྒྲུབ་ཐབས་རྒྱས་པར་བསྒོམས་ནས་བཟླས་པ་ཅུང་ཟད་བྱ། བཟློག་དཀྱིལ་རྡུལ་ཚོན་གྱིས་འདྲི་ན། ས་ལྷ་ནས་བཟུང་ཐིག་ཚོན་གྱི་ཆོ་གའི་བར་རྭ་ཆེན་གྱི་དབང་ཆུ་མ་དག་པའི་དྲི་མ་འཁྲུད་བྱེད་ལྟར་དཀྱིལ་འཁོར་སྒོ་རྫོགས་སམ། བསྡུ་ན་ཚངས་ཟུར་གྱི་ཐིག་བཏབ་པའི་དབུས་དམར་ནག་གྲུ་གསུམ། དེའི་ཕྱི་རོལ་ན་ཟླ་གམ་དམར་པོ་གསུམ། དེའི་ཕྱི་རོལ་ན་འོག་གཞི་ནག་པོ་ཐོད་པའི་ཕྲེང་བ་ཟླུམ་པོ་དཀར་པོ། ཕྱི་རོལ་ཏུ་འཁོར་ལོ་རྩིབས་བཞི་ཕྱོགས་ཚོན། རྩིབས་མཚན་ཕྱོགས་མདོག་གམ། མཛེས་ཚོན། དེའི་ཕྱི་རོལ་ཏུ་མུ་ཁྱུད་ཟླུམ་པོ་ཁྲག་འཁྱམས། དེའི་ཕྱིར་རྡོ་ར་མེ་རི་མ་ཏྲཾ་མགོ་ལྷོ་ནུབ་ཏུ་བལྟ་བ་འདྲི་བའམ། ཡང་ན་རས་བྲིས་ཀྱིས་རུང་བས། ཐོག་མར་སྒྲུབ་བྱང་ལས། ཆ་གསུམ་བགེགས་རིགས་གཏོར་མ་བཏང་ཞེས་གསུངས་པས། ཆ་གསུམ་སྔོན་དུ་གཏོང་བ་ནི་ཆོས་འདི་གའི་ལུགས་སྲོལ་ལ་གསར་མའི་རྒྱས་བཀབ་ཀྱི་ལོག་རྟོག་ཏུ་སེམས་སོ། །དེ་ནས་བཟློག་དཀྱིལ་གྱི་སྟེང་དུ་མཉྫིའི་ཁར་ལྕགས་སླང་བུག་རྡོལ་མེད་པར་དཔལ་གྱི་གཏོར་མ་ཟུར་གསུམ་དམར་ཟང་ངེ་བ་མེ་རི་སོགས་རྒྱན་གྱིས་སྤྲས་པ་ཟུར་མདུན་དུ་བསྟན་པ་སུམ་ཆ་གཉིས་ཡར་བཅད་པའི་འོག་ཏུ། འབྲུབ་ཁུང་བྲུས་པའི་ནང་། སྦས་པ་མིག་འབྱེད་ལས། ལིངྒ་བཅའ་བའི་རིམ་པ་ནི། སྐྲ་སྣབས་ལུད་པ་མཆིལ་མ་དང་། །དྲི་ཆེན་དྲི་ཆུ་ལ་སོགས་པ། །རྒྱུ་དྲུག་ལིངྒ་སོར་བརྒྱད་བྱ། །བགེགས་ལ་གནོད་པའི་རྫས་དང་ནི། །གནོད་པའི་ཕྱོགས་ནས་ས་བླངས་ལ། །ལིངྒ་སོར་ནི་བརྒྱད་པ་བྱ། །གྲོ་གར་མིང་རུས་བླ་དྭགས་བྲི། །(༣ན)
སྙིང་དཔྲལ་ལྟེ་བ་གསང་གནས་གཞུག །ཕོ་རིས་པི་པི་ལིང་དང་སྒ། །དུག་སྣ་རྙེད་ཚད་ཀུན་གྱིས་བྱུག །ཅེས་པ་ལྟར་ལ་མཐོང་བ་བརྒྱུད་པའི་མན་ངག་བཞིན་རྒྱས་བསྡུས་སྐབས་དང་སྦྱར་ལ་མགོ་མཇུག་ལྡོག་ལ་གཞུག །འཁོར་བརྒྱད་ཀྱིས་བསྐོར་བའི་མཐར་ཁྲག་ཀོང་མཚེ་ཡུངས། རྩང་། རྒྱུ་ལྡིང་། ཤ་རྫར། ལྷ་རྟེན་ཙཀླི། གཏོར་གདུགས་སོགས་རྔམ་ཞིང་བརྗིད་ཆགས་པར་བྱེད། དེའི་མདུན་ལྕགས་སྣོད་ཆུང་བ་ཞིག་ཏུ་ཟོར་གཏོར་གྲུ་གསུམ་མེ་རི་ཁྱི་མཇུག་མ་མཐེབ་སྐྱུ་ཡུངས་ཀར་རྩང་གིས་བརྒྱན་པ། དེའི་ཕྱི་རོལ་ཏུ་སྣོད་རེར་གཏོར་ཆུང་གྲུ་གསུམ་བཅུ་རེ་བཅུག་པའི་ཚན་པ་བཅུས་ཕྱོགས་མཚམས་བསྐོར། དེ་དག་གི་ཐད་ཀྱི་ཕྱི་རོལ་ཏུ་གཏོར་ཆུང་རེ་རེ་བཤམས་པ་ཐམས་ཅད་ཁྲག་གིས་སྦགས་ཤིང་མཚེ་ཡུངས་ཀྱིས་བརྒྱན་པ། དེའི་ཕྱི་རོལ་གྱི་གཡས་གཡོན་དུ་ཁྲག་ཟོར་ཐོད་པ་མཆན་ངན་དུ་ཁྲག་སྣ་དུག་སྣས་བཀང་བར། ཡུངས་ཀར། སྐྱེ་ཚེ། ཤང་ཙེ་རྣམས་བཏབ་པ། ཡུངས་ཐུན་ལ་ཐོད་པ་མཚན་ངན་དུ་ཡུངས་ཀར་རྒྱལ་པོས་བཀང་བ། །དྲག་པོའི་ཐུན་རྫས་ནི་སྦས་པ་མིག་འབྱེད་ལས། དགྲ་བགེགས་ཐུན་གྱིས་བསད་པ་ལ། །རབས་ཆད་ནག་པོའི་ཐོད་པ་རུ། །ཡུངས་ཀར་ཡུངས་ནག་སྐྱེ་ཆ་དང་། །བཙན་དུག་ར་དུག་སྤྱང་དུག་པ། །རེ་ཅག་རྩ་བ་དུག་བཞི་ཚང་། །མི་རྟ་ཁྱི་ཕག་སྤྱང་ཀིའི་བྲུན། །མི་རུས་མེ་ཡིས་བསྲེགས་པ་དང་། །ཚེར་མའི་རིགས་གྱུར་ཚོགས་ཚད་དང་། །གཅན་གཟན་མཆེ་སྡེར་ཚོགས་ཚད་དང་། །ཞེས་བཤད་པའི་ཐུན་རྫས་རྣམས་ལག་ལེན་ལྟར་བཟོས་པ་རབས་ཆད་ཐོད་པའམ་མ་རྙེད་(༣བ)
ན་གཡག་འོག་ཅན་གྱི་རྭ་ལྟ་བུར་ལྡུགས། སྨན་རཀ་གཏོར་གསུམ། ཕྱི་ནང་གི་ཉེར་སྤྱོད། བཀའ་སྲུང་གིང་ལྔ་གཟའ་གདོང་། ཆོས་སྐྱོང་བེག་ཙེ་ལྕམ་དྲལ། གཞན་ཡང་ཡུལ་ལྷ་གཞི་བདག་གི་གཏོར་མ། ཚོགས་འཁོར་འབྲུབ་ཁུང་ལིངྒ། གསེར་སྐྱེམས། ཆད་མཐོའི་རྩ་གསུམ། ཐུན་གཏོར། བགེགས་གཏོར། ཡུངས་ཐུན། གུ་གུལ། འཐོར་ནས། རྡོར་དྲིལ། ཕུར་པ་སྒྲོལ་གྲིི། གཡབ་དར། རོལ་མོ་སོགས་མཁོ་བའི་ཡོ་བྱད་ཐམས་ཅད་ལེགས་པར་བཤམ་མོ། །གཉིས་པ་དངོས་གཞི་ནི། སྒྲུབ་པ་པོ་སྟན་བདེ་བ་ལ་འདུག་སྟེ་ལས་བྱང་གི་འཛབ་ལ་ཐུག་གི་བར་བཟླས་པ་ལོང་སྐབས་དང་སྦྱར་བའི་རྒྱས་བསྡུས་ཅི་རིགས་པ་གཞུང་དང་མན་ངག་གིས་བརྒྱན་པའི་དམིགས་པའི་འཕྲོ་འདུ་བྱ་ཞིང་། འཛབ་ཁང་དབྱེ་བ་སོགས་བཏང་སྙོམས་སུ་བཞག་སྟེ་བདག་མདུན་མེ་རི་འདབ་ཁྱར་གྱི་ཚུལ་དུ་ཉམས་སུ་བསྟར། དེ་ནས་བཟློག་པའི་དམིགས་པ་ནི། རང་ཉིད་དབང་ཆེན་གསལ་བའི་ཐུགས་ཀ་ཡི། །ཧྲཱིཿལས་འོད་འཕྲོས་མདུན་བསྐྱེད་ལྷ་ཚོགས་ཀྱི། །ཐུགས་ཀར་འཕོག་ནས་རྒྱུད་བསྐུལ་བ་སྤུ་ཡི། །བུ་ག་ཀུན་ནས་ཁྲོ་ཆུང་ཉི་ཟེར་གྱི། །རྡུལ་ལྟར་འཕྲོས་པས་བདག་ཅག་འཁོར་བཅས་ལ། །གནོད་བྱེད་ཕ་རོལ་རྦོད་གཏོང་མཁན་པོ་དང་། །དུག་མཚོན་གཡུལ་སོགས་བསམ་སྦྱོར་ངན་རྩོམ་པའི། །གཟུགས་ཅན་དགྲ་དང་རྦད་འདྲེ་ལྷ་མ་སྲིན། །སྡེ་བརྒྱད་འབྱུང་པོ་སྤྱི་དང་བྱེ་བྲག་སོགས། །ལུས་ལ་ན་ཚ་སེམས་ལ་སྡུག་བསྔལ་གཏོང་། །བསམ་པར་བར་གཅོད་ཆགས་ཆེ་ཉམ་ང་གཡོ། །མདོར་ན་འགལ་རྐྱེན་མི་མཐུན་ཕྱོགས་བརྩོམ་པའི། །གཟུགས་མེད་བགེགས་རྣམས་ཐལ་བའི་རྡུལ་(༤ན)
བཞིན་རློག །རྣམ་ཤེས་བླ་ཚེ་སྲོག་དབུགས་བཅས་པ་རྣམས། །དམིགས་རྟེན་གཟུགས་ཀྱི་ཉ་བོ་འདི་ཉིད་ལ། །རང་དབང་མེད་པར་བཀུག་ནས་ཐིམ་པར་གྱུར། །རྩ་སྔགས་མཇུག་ཏུ་གནོད་བྱེད་བན་བོན་སྔགས་པས་བཏང་བའི་མཐུ་བྱད་རྦད་འདྲེ་དང་སྡེ་བརྒྱད་འབྱུང་པོའི་གནོད་པ་ཐམས་ཅད་ཨ་པ་ན་ཡ་བཟློག་བྷྱོ། ཞེས་དམིགས་པ་དང་བཅས་ཅི་ནུས་སུ་བཟླས། མཐར་ཡུངས་ཀར་ཡུངས་ནག་དུག་ཁྲག་ལ་ཕུས་བཏབ་སྟེ་བཟློག་གཏོར་ལ་བྲབ་ཅིང་བསྐུལ། དེ་ནས་གཏོར་ཟོར་ལ་དམིགས་ཏེ། རང་ཉིད་དབང་ཆེན་གསལ་བའི་ཐུགས་ཀ་ཡི། །ཧྲཱིཿ ལས་འོད་འཕྲོས་གཏོར་ཟོར་ལ་ཕོག་པས། །དབང་ཆེན་རོལ་བའི་ཁྲོ་བོ་སྐར་ལྟར་འཁྲུག །མཚོན་ཆ་སྣ་ཚོགས་བུ་ཡུག་ལྟ་བུ་རུ། །འཚུབ་ཅིང་འཕྲོས་པས་བདག་ཅག་འཁོར་བཅས་ལ། གནོད་བྱེད་ཕ་རོལ་རྦོད་གཏོང་མཁན་པོ་སོགས་གོང་བཞིན་བརྗོད་རྗེས་རྩ་སྔགས་ཤམ་བུར་སརྦ་པཱ་པཾ་སརྦ་དུ་ཧྲི་མཱ་ར་ཡ་བཟློག་བཟློག་བྷྱོ་བྷྱོ། ཞེས་ཅི་ནུས་བཟླས་ཏེ་སྔར་བཞིན་ཐུན་གྱིས་བྲབ། དེ་ནས་ཁྲག་ཟོར་ལ་དམིགས་ཏེ། རང་ཉིད་དབང་ཆེན་ཐུགས་ཀའི་ས་བོན་ལས། །འོད་འཕྲོས་ཁྲག་ཟོར་རྫས་ལ་ཕོག་པ་ཡིས། །མགར་གྱི་སོལ་མལ་ལྕགས་ལས་ཟེར་འཕྲོས་ལྟར། །དྲེགས་པ་མོ་རྒྱུད་ཁྲོ་མོ་ཕྱག་གཉིས་ཀྱིས། །ཐོ་བ་ལྕགས་ཀྱུ་རབ་འཛིན་ལུས་ལ་མེ། །འབར་ཞིང་ཁ་ནས་ནད་རླངས་འཚུབ་ཅིང་འཐུལ། །གྲངས་མེད་རི་རབ་བོངས་ཚད་མེ་དཔུང་འབར། །དེ་ལས་གནམ་ལྕགས་ཐོག་མདའ་ཆར་འབེབས་པ། །དགྲ་བགེགས་ཡུལ་ཀུན་ཁྱབ་པར་སྤྲོས་པ་ཡིས། །གཟུགས་ཕུང་བླ་ཚེ་རྣམ་ཤེས་ཡུལ་འཁོར་དང་། །སྡེ་(༤བ)
དཔུང་བཅས་པ་མིང་ཙམ་བརྡ་ཙམ་དང་། །ཐ་སྙད་ཙམ་དུ་མི་གྲག་བརླག་པར་གྱུར། །ཅེས་རྩ་སྔགས་ཤམ་བུར་མ་མ་ཏྲ་ག་རཀྴ་མ་ཏྲ་རུ་ཏྲ་སྙིང་ཁ་རག་ཐུན་བྷྱོ་བྷྱོ་བཟློག་བཟློག་ཅེས་བཟླས་ཤིང་ཐུན་བྲབ། དེ་ནས་ཡུངས་ཟོར་ལ་དམིགས་ཏེ། ཐུགས་ཀའི་ཧྲཱིཿལས་འོད་འཕྲོས་ཡུངས་ཀར་ལ། །ཕོག་པས་དྲེགས་པ་ཕོ་རྒྱུད་ཁྲོ་བོའི་ཚོགས། །མཚོན་ཆ་སྣ་ཚོགས་འཛིན་ཅིང་ཉི་ཐེར་གྱི། །རྡུལ་ཕྲན་ལྟ་བུར་སྟེང་དུ་འཕྲོས་པ་ཡིས། །རྒྱལ་བ་རྒྱ་མཚོའི་ཚོགས་ཀྱི་ཐུགས་དམ་སྐོང་། །འོད་འཕྲོས་ངན་སོང་གསུམ་གྱི་སྐྱེ་སྒོ་བཅད། །དགྲ་བོའི་ཡུལ་སོང་སྐྱོབ་པའི་ལྷ་དང་ཕྲལ། །གཟུགས་ཕུང་ལ་བརྒྱབ་ངན་སྙིང་དམར་པོ་ཕྱུང་། །ནང་ཁྲོལ་ཡན་ལག་དབང་པོ་ལྔ་པོ་དང་། །རྣམ་པར་ཤེས་པའི་འབེམ་ལ་བརྒྱབ་པ་ཡིས། །ཕྱིན་ཆད་འཁོར་བར་སྐྱེ་བའི་ལམ་བཅད་དེ། །དགྲ་བགེགས་རྗེས་ཤུལ་མེད་པར་བརླག་པར་གྱུར། །རྩ་སྔགས་ཤམ་བུར་ཤིག་ཤིག །དུཾ་དུཾ། ཉིལ་ཉིལ་རྒྱོབ། དུམ་བུ་རུལ་རྦད། དུམ་བུ་ཉལ་རྦད། ཐུཾ་རིལ་ཐུཾ་རིལ་བྷྱོ་བྷྱོ། ཐིབས་ཡ་ཐིབས་ཡ་བྷྱོ་བྷྱོ། ཧུ་ཡ་ཧུ་ཡ། སྲོག་སྲོག་བྷྱོ་བྷྱོ། གོང་མ་རྣམས་ཀྱི་དམིགས་པ་དང་བཅས་རྩ་སྔགས་ཤམ་བུར། ཧྲཱིཿཧ་ཡ་གྷྲཱི་ཝ་རཀྴ་རྦད་ཐུན་སོད། པདྨཱནྟ་ཀྲྀ་ཏ་དགྲ་བོའི་སྙིང་ལ་ཐུན། རྦད་མ་མ་རཀྴ་དགྲ་བོའི་སྙིང་ལ་ཐུན་རྦད། རག་མོ་ཚལ་དུན་སྙིང་ལ་ཁས་རྦད། ཀྲོ་ཏ་རཀྴ་དགྲ་བོའི་སྙིང་ལ་རྦད། ཐུན་མཱ་ར་ཡ་རྦད། ཐུཾ་རིལ་ཧ་ན་ཧ་ན་བྷྱོ་བྷྱོ་ཞེས་ཟོར་སོ་སོར་ཐུན་གྱིས་བྲབ། སྤུ་གྲིའི་སྔགས་རིང་མོ་ཡང་མང་དུ་བཟླས་ནས་འཛབ་བསྟོད་བྱ། ཆོས་སྐྱོང་སྤྱི་སྒེར་གྱི་གཏོར་ཆོག་དང་བསྐང་གསོ་སོགས་གང་དགོས་གཏོར། ཚོགས་བར་པ་ཡན་གཞུང་ལྟར་བཏང་རྗེས་(༥ན)
གོང་གི་གཏོར་ཆུང་བརྒྱ་བཅུ་པོ་རྣམས་རིམ་བཞིན་གཙོ་འཁོར་རྣམས་ལ་དབུལ་ལ། ཧྲཱིཿ དམར་ནག་གྲུ་གསུམ་དབང་གི་དཀྱིལ་འཁོར་ནས། །པདྨ་ཉི་ཟླ་བདུད་བསྣོལ་གདན་སྟེང་དུ། །རྣམ་ཤེས་གནས་གྱུར་པདྨ་ཧེ་རུ་ཀ༔། །ཞེ་སྡང་རྣམ་དག་ཆོས་དབྱིངས་ཡེ་ཤེས་དང་། །རྒྱུད་དྲུག་ཉོན་མོངས་ཞེ་སྡང་འཇོམས་མཛད་པ། ཁྲོ་རྒྱལ་རྟ་མཆོག་དཔལ་ལ་ཕྱག་འཚལ་ལོ། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་བའི་དངོས་གྲུབ་སྩལ་དུ་གསོལ། །དགའ་བ་བདེ་བ་ཆེན་པོའི་དཀྱིལ་འཁོར་ནས། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །བདེ་སྟོང་ཟུང་འཇུག་ཤེས་རབ་ཐབས་དང་རོལ། །དབྱིངས་དང་ཡེ་ཤེས་དབྱེར་མེད་ཁྲོ་བོའི་སྐུ། །རྒྱུད་དྲུག་ལས་དང་ཉོན་མོངས་འཇོམས་མཛད་མ། ཁྲོ་མོ་གར་དབང་ཡུམ་ལ་ཕྱག་འཚལ་ལོ། །ཕྱི་ནང་གསང་བའི་མཆོད་པ་འདི་བཞེས་ལ། །རྨད་བྱུང་རོལ་པའི་དངོས་གྲུབ་སྩལ་དུ་གསོལ། །ཡབ་ཡུམ་ཐབས་ཤེས་གཉིས་མེད་རོལ་པ་ལས། །ཤར་ཕྱོགས་འཁོར་ལོ་དྲི་ཟའི་གདན་སྟེང་དུ། །གཟུགས་ཕུང་གནས་གྱུར་རྡོ་རྗེ་དབང་ཆེན་སྐུ། །གཏི་མུག་རྣམ་དག་མེ་ལོང་ཡེ་ཤེས་དང་། །རྒྱུད་དྲུག་ཉོན་མོངས་གཏི་མུག་༴། །རྡོ་རྗེ་དབང་ཆེན་སྐུ་༴། །ཕྱི་ནང་༴། །རྨད་བྱུང་༴། །ཡབ་ཡུམ་༴། །ལྷོ་ཕྱོགས་འཁོར་ལོ་གྲུལ་བུམ་གདན་སྟེང་དུ། །ཚོར་ཕུང་གནས་གྱུར་རིན་ཆེན་དབང་ཆེན་སྐུ། །ང་རྒྱལ་རྣམ་དག་མཉམ་ཉིད་ཡེ་ཤེས་དང་། །རྒྱུད་དྲུག་ཉོན་མོངས་ང་རྒྱལ་༴། །རིན་ཆེན་དབང་ཆེན་སྐུ་ལ་༴། །ཕྱི་ནང་༴། །རྨད་བྱུང་༴། །ཡབ་ཡུམ་༴། །ནུབ་(༥བ)
ཕྱོགས་འཁོར་ལོ་ཀླུ་དབང་གདན་སྟེང་དུ། །འདུ་ཤེས་གནས་གྱུར་པདྨ་དབང་ཆེན་སྐུ། །འདོད་ཆགས་རྣམ་དག་སོར་རྟོག་༴། །རྒྱུད་དྲུག་ཉོན་མོངས་འདོད་ཆགས་༴། །པདྨ་དབང་ཆེན་སྐུ་ལ་༴། །ཕྱི་ནང་༴། །རྨད་བྱུང་༴། །ཡབ་ཡུམ་༴། །བྱང་ཕྱོགས་འཁོར་ལོ་གནོད་སྦྱིན་གདན་སྟེང་དུ། །འདུ་བྱེད་གནས་གྱུར་ལས་རབ་དབང་ཆེན་སྐུ། །ཕྲག་དོག་རྣམ་དག་བྱ་གྲུབ་༴། །རྒྱུད་དྲུག་ཉོན་མོངས་ཕྲག་དོག་༴། །འཕྲིན་ལས་དབང་ཆེན་སྐུ་ལ་༴། །ཕྱི་ནང་༴། །རྨད་ བྱུང་༴། །ཡབ་ཡུམ་༴། །ཤར་ཕྱོགས་སྒོ་ཁྱུད་ཟླ་བའི་གདན་སྟེང་དུ། །ས་ཁམས་རྣམ་དག་སྒོ་མ་ལྕགས་ཀྱུ་མ། །བྱམས་པ་ཚད་མེད་ཞི་བའི་ལས་རྣམས་བསྒྲུབ། །རྒྱུད་དྲུག་ལས་དང་ཉོན་མོངས་ཞི་མཛད་མ། །རྡོ་རྗེ་ལྕགས་ཀྱུ་མ་ལ་༴། །ཕྱི་ནང་༴། །རྨད་བྱུང་༴། །ཡབ་ཡུམ་༴། །ལྷོ་ཕྱོགས་སྒོ་ཁྱུད་ཟླ་བའི་གདན་སྟེང་དུ། །ཆུ་ཁམས་རྣམ་དག་སྒོ་མ་ཞགས་པ་མ། །སྙིང་རྗེ་ཚད་མེད་རྒྱས་པའི་ལས་རྣམས་བསྒྲུབ། །ཚེ་དང་ཡེ་ཤེས་མ་ལུས་རྒྱས་མཛད་མ། །རྡོ་རྗེ་ཞགས་པ་མ་ལ་༴། །ཕྱི་ནང་༴། །རྨད་བྱུང་༴། །ཡབ་ཡུམ་༴། །ནུབ་ཕྱོགས་སྒོ་ཁྱུད་ཟླ་བའི་གདན་སྟེང་དུ། །མེ་ཁམས་རྣམ་དག་སྒོ་མ་ལྕགས་སྒྲོག་མ། །དགའ་བ་ཚད་མེད་དབང་གི་ལས་རྣམས་བསྒྲུབ། ཁམས་གསུམ་མ་ལུས་དབང་དུ་སྡུད་མཛད་མ། །རྡོ་རྗེ་ལྕགས་སྒྲོག་མ་ལ་༴། །ཕྱི་ནང་༴། །རྨད་བྱུང་༴། །ཡབ་ཡུམ་༴། །བྱང་ཕྱོགས་སྒོ་ཁྱུད་ཟླ་བའི་གདན་སྟེང་དུ། །རླུང་ཁམས་རྣམ་དག་སྒོ་མ་དྲིལ་བུ་མ། །བཏང་སྙོམས་ཚད་མེད་དྲག་པོའི་ལས་རྣམས་བསྒྲུབ། །དགྲ་བགེགས་མངོན་སྤྱོད་ལས་ཀྱིས་ཚར་གཅོད་མ། །རྡོ་རྗེ་དྲིལ་བུ་མ་ལ་༴། །(༦ན)
ཕྱི་ནང་༴། །རྨད་བྱུང་༴། །ཞིང་ཁམས་ཐམས་ཅད་དབང་དྲག་གཞལ་ཡས་ཁང་། །ཕུང་པོ་ཁམས་དང་སྐྱེ་མཆེད་ཡེ་ཤེས་ལྷ། །སྐུ་ལྔ་ཡེ་ཤེས་ལྔ་ཡི་རང་བཞིན་ཅན། །ཚད་མེད་བཞི་དང་འཕྲིན་ལས་རྣམ་བཞིན་ལྡན། །ཐུགས་རྗེ་ཁྲོས་པའི་ཁྲོ་ཞལ་རྔམས་པའི་ཞལ། །ཡབ་ཡུམ་གཙོ་འཁོར་བཅུ་ལ་༴། །ཕྱི་ནང་༴། །རྨད་བྱུང་༴། །དབང་དྲག་དཀྱིལ་འཁོར་བཞི་ཡི་བཀའ་སྲུང་ནི། །སྲོག་ལ་དབང་སྒྱུར་གིང་ཆེན་རྣམ་ལྔ་ཡང་། །ལས་སུ་སངས་རྒྱས་བསྟན་པ་སྲུང་མཛད་ཅིང་། །ཟས་སུ་དགྲ་བགེགས་ཤ་ཁྲག་ཚོགས་རྣམས་གསོལ། །དམ་ཉམས་དགྲ་བགེགས་ཐལ་བར་རློག་མཛད་པ། །དྲེགས་པ་མཐུ་རྩལ་ཅན་ལ་༴། །ཕྱི་ནང་༴། །རྨད་བྱུང་༴། །ཕྱོགས་བཞི་བར་སྣང་ནམ་མཁའི་དཀྱིལ་ཡངས་ནས། །དམ་ཅན་བཀའ་སྡོད་གཟའ་གདོང་ལྕམ་དྲལ་ཡང་། །ལས་སུ་སངས་རྒྱས་བསྟན་པ་སྲུང་མཛད་ཅིང་། །ཟས་སུ་དགྲ་བོའི་ལོ་ཏོག་ནར་མར་གསོལ། །དགྲ་བགེགས་ཡུལ་ཁམས་ཐལ་བར་རློག་མཛད་པ། །གཟའ་གདོང་དྲེགས་པ་ཅན་ལ་༴། །ཕྱི་ནང་༴། །རྨད་བྱུང་༴། །དབང་གསར་བསྒྲིགས་ཆེན་ཁྲག་འཐུང་དཀྱིལ་འཁོར་ལྷ་ཚོགས་དང་། །བཀའ་སྡོད་ཆོས་སྐྱོང་སྲུང་མའི་ཚོགས་རྣམས་ཀྱིས། །མཐུ་སྟོབས་ནུས་པའི་དཔུང་ཚོགས་རབ་བསྐྱེད་ནས། །བཟློག་ཅིང་བསྒྱུར་བའི་འཕྲིན་ལས་དུས་ལ་བབ། །བདག་ཅག་དཔོན་སློབ་དཔོན་ཡོན་མཆོད་འཁོར་བཅས་ལ། །ཕ་རོལ་བན་བོན་སྔགས་པའི་མཐུ་བྱད་དང་། །སྣང་སྲིད་ལྷ་འདྲེའི་གནོད་འཚེ་ཟ་ཁ་ཟུག །དུས་མིན་འཆི་དང་ནད་གདོན་ཀེག་ངན་སྲི། །མི་ཁ་གྲམ་མཆུ་དུག་མཚོན་གཡུལ་གཤོམ་སོགས། །ཆགས་ཆེ་ཉམ་ང་བར་(༦བ)
ཆད་མ་ལུས་པ། །བྱད་མ་མཁན་དང་ལོག་འདྲེན་དགྲ་བགེགས་ཀྱི། །སྟེང་དུ་བཟློག་ཅིང་བསྒྱུར་བའི་འཕྲིན་ལས་མཛོད། །འཇིགས་བརྒྱད་ཞི་ཞིང་འབྱོར་དྲུག་འཕེལ་བ་དང་། །མོས་བཞི་དབང་སྡུད་གནོད་བྱེད་མ་ལུས་པ། །བསད་བསྐྲད་རེངས་རྨོངས་སོགས་ཀྱིས་ཚར་བཅད་ནས། །འཕྲིན་ལས་རྣམ་བཞི་མ་ལུས་སྒྲུབ་པར་མཛོད། །ཅེས་འཕྲིན་ལས་བཅོལ་ལོ། །ཚོགས་ཐ་མའི་སྔོན་དུ་བསྐུལ་གྱི་རིམ་པ་ལ། རིགས་འཛིན་སྤྱི་བསྐུལ་ནི། རྒྱལ་བ་མུས་སྲད་དཔལ་ལྡན་སེང་གེས་མཛད། ཀུན་བདག་ཆོས་སྐུ་ཀུན་ཏུ་བཟང་། །བདག་དོན་མཚན་ལྡན་ལོངས་སྐུ་རྡོ་རྗེ་སེམས། །ཐུགས་རྗེས་དོན་མཛད་སྤྲུལ་སྐུ་རྡོ་རྗེ་འཛིན། །སྐུ་གསུམ་མཆོག་གི་ཚོགས་རྣམས་དབྱིངས་ནས་བཞེངས། །སློབ་དཔོན་དགའ་རབ་རྡོ་རྗེ་མན་ཆད་ནས། །པཱ་གོར་བཻ་རོ་ཙ་ན་ལ་སོགས་པའི། །རྫོགས་ཆེན་སྒོ་ནས་གྲུབ་པ་བརྙེས་པ་ཡི། །མན་ངག་རིགས་འཛིན་ཚོགས་རྣམས་དབྱིངས་ནས་བཞེངས། །བདུད་པོ་ལངྐ་བདག་པོ་༴། །ལོ་ཙཱ་ཆེ་བཙན་སྐྱེས་མཆོག་༴། །མདོ་ཡི་སྒོ་ནས་༴། །ལུང་གི་རིགས་འཛིན་༴། །གསང་བདག་ཕྱག་ན་རྡོ་རྗེ་༴། །ལོ་ཙཱ་རྨ་གཉགས་རྣམ་གཉིས་༴། །སྒྱུ་འཕྲུལ་སྒོ་ནས་༴། །བརྒྱུད་ཀྱི་རིགས་འཛིན་༴། །སློབ་དཔོན་འཇམ་དཔལ་བཤེས་གཉེན་༴། །གནུབས་ཆེན་སངས་རྒྱས་ཡེ་ཤེས་༴། །གཤིན་རྗེའི་སྒོ་ནས་༴། །སྐུ་ཡི་རིགས་འཛིན་༴། །སློབ་དཔོན་ཀླུ་སྒྲུབ་སྙིང་པོ་༴། །དགེ་སློང་ངན་ལམ་རྒྱལ་མཚན་༴། །པདྨའི་སྒོ་ནས་༴། །གསུང་གི་རིགས་འཛིན་༴། །སློབ་དཔོན་དུར་ཁྲོད་བདེ་བ་༴། །བོད་ཀྱི་དགེ་སློང་མི་ལྔ་༴། །ཡང་དག་སྒོ་ནས་༴། །ཐུགས་ཀྱི་རིགས་འཛིན་༴། །(༧ན)
ཚངས་པ་དུང་གི་ཐོར་ཚུགས་༴། །གཉགས་ཆེན་ཀུ་མཱ་ར་ལ་སོགས་པ་ཡི། །བདུད་རྩིའི་སྒོ་ནས་༴། །ཡོན་ཏན་རིགས་འཛིན་༴། །སེམས་དཔའ་ལྷ་ཡི་དབང་པོ་༴། །གཟུང་མ་མཁར་ཆེན་འཚོ་རྒྱལ་༴། །ཕུར་པའི་སྒོ་ནས་༴། །འཕྲིན་ལས་རིགས་འཛིན་རྣམས་༴། །སྟོན་པ་མངོན་རྫོགས་རྒྱལ་པོ་༴། །འབྲོག་མི་སངས་རྒྱས་ཡེ་ཤེས་༴། །མ་མོའི་སྒོ་ནས་༴། །དམ་ཅན་རིགས་འཛིན་༴། །དགེ་སློང་ཀུ་ཀུ་ར་ཙ་༴། །སོག་པོ་དཔལ་གྱི་ཡེ་ཤེས་༴། །ཐེག་པ་སོ་སོ་ཡི། །གང་ལ་སྦྱངས་པའི་ཡོན་ཏན་ཁྱད་པར་ཅན། །མི་ཡི་ལུས་ཀྱི་སངས་རྒྱས་རིན་པོ་ཆེ། །རྐང་གཉིས་མཆོག་གྱུར་ཚོགས་རྣམས་དབྱིངས་ནས་བཞེངས། །སློབ་དཔོན་པདྨ་འབྱུང་གནས་མན་ཆད་ནས། །དཔལ་ལྡན་གྲུབ་ཐོབ་འདར་ཕྱར་ལ་སོགས་པའི། །མཁྱེན་རབ་སྒོ་ནས་གྲུབ་པ་བརྙེས་པ་ཡི། །བྱིན་རླབས་རིགས་འཛིན་ཚོགས་རྣམས་དབྱིངས་ནས་བཞེངས། །རྒྱུད་ལུང་མན་ངག་ཐུགས་སུ་ཆུད་གྱུར་ཅིང་། །རྟོགས་ཚད་གདེངས་ལྡན་བླ་མ་རིན་པོ་ཆེ། །ཐ་དད་བཞུགས་ནས་བསྟན་པའི་རྒྱལ་མཚན་འཛིན། །བོད་ཀྱི་རིགས་འཛིན་ཚོགས་རྣམས་དབྱིངས་ནས་བཞེངས། །ཡི་དམ་མཁའ་འགྲོ་ཆོས་སྐྱོང་སྲུང་མ་ཡི། །མངོན་སྤྱོད་འཕྲིན་ལས་སྒྲུབ་པའི་ཐུགས་དམ་རྒྱུད། །རིགས་འཛིན་བརྒྱུད་པའི་ཐུགས་རྗེ་(༧བ)
བྱིན་རླབས་དང་། །དམ་ཚིག་གཉན་པོས་བསྐུལ་པའི་དུས་ལ་བབ། དཀོན་མཆོག་སྤྱི་བསྐུལ་ནི། རྣམ་དག་མུས་སྲད་པ་དཔལ་ལྡན་སེང་གེས་མཛད། སྐུ་ལྔ་ཡེ་ཤེས་ལྔ་ཡི་དངོས། ཁྱབ་བདག་རང་བྱུང་རྒྱལ་བ་བཅོམ་ལྡན་འདས། །སྐྱབས་མཆོག་དཔལ་ལྡན་བླ་མ་ཧེ་རུ་ཀ༔། །དབྱེར་མེད་ཞབས་ལ་གུས་པས་ཕྱག་འཚལ་ལོ། །ཡི་དམ་ལྷ་དང་དཀོན་མཆོག་གསུམ་གྱི་དངོས། །རྩ་བརྒྱུད་བླ་མ་མི་མངོན་དབྱིངས་ནས་བཞེངས། །དུར་ཁྲོད་གསང་བ་དབང་དྲག་དཀྱིལ་འཁོར་ནས། །ཐོད་པ་རིན་ཆེན་དུར་ཁྲོད་གཞལ་ཡས་ཁང་། །གནམ་ལྕགས་ཨུར་མོ་ཟེར་ཆེན་ཏ་ལ་ལ། །སྤྲུལ་པའི་ལྕང་ལོ་མང་པོ་ཁ་བད་ཅན། །བསྐལ་པའི་མེ་ནི་སྨུག་ནག་འཚུབ་མར་འབར། །མི་རོ་ཐོད་ཕྲེང་ཀེང་རུས་ཚོགས་ཀྱིས་བརྒྱན། །རཀྟའི་རྒྱ་མཚོ་རྦ་རླབས་ཆིལ་ལི་ལི། །རུས་ཆེན་ཚོགས་ཀྱི་ཕུང་པོ་ཁྲོལ་ལོ་ལོ། །ཁྲག་དང་ཞག་གི་འབབ་ཆུ་ཟུལ་ལུ་ལུ། །རྡོ་རྗེ་ཞིང་ཆེན་དྲི་ངད་ཐུལ་ལུ་ལུ། །ཙིཏྟ་གསར་རྙིང་རྒྱན་མཆོག་ཡེར་རེ་རེ། །དབང་ཆེན་ཁྲག་འཐུང་རྒྱལ་བ་འཁོར་དང་བཅས། །སྒྲུབ་སྡེ་བརྒྱད་ཀྱི་ལྷ་ཚོགས་འཁོར་དང་བཅས། །མ་མོ་མཁའ་འགྲོས་བདག་ལ་བྱིན་གྱིས་རློབས། །གྲུབ་པའི་རྟགས་མཚན་མྱུར་དུ་བསྟན་དུ་གསོལ། །ཆོས་ཉིད་ཞི་བའི་ཚུལ་གྱིས་དོན་མཛད་པའི། །བཅོམ་ལྡན་ཞི་བའི་ལྷ་ཚོགས་དབྱིངས་ནས་བཞེངས། །ཁྲོ་བོའི་ཚུལ་གྱིས་གདུག་པ་འདུལ་མཛད་པའི། །འབར་བ་ཁྲོ་བོའི་༴། །སྐྱེ་མེད་དམིགས་བྲལ་ངང་ནས་སྐུ་བཞེངས་པ། །འཇམ་དཔལ་སྐུ་ཡི་༴། ཁམས་གསུམ་དབང་དུ་སྡུད་པའི་ལས་མཛད་པ། །པདྨ་གསུང་གི་༴། །དུས་གསུམ་(༨ན)
བདེ་གཤེགས་ཀུན་གྱི་ཐུགས་ཀྱི་ཐུགས། །ཡང་དག་ཐུགས་ཀྱི་༴། །དུག་ལྔ་གཏན་བཅོམ་ཡེ་ཤེས་སྦྱར་བ་ཡི། བདུད་རྩི་ཡོན་ཏན་༴། །བདུག་པའི་དགྲ་བགེགས་མ་ལུས་ཚར་ གཅོད་པའི། །ཕུར་པ་འཕྲིན་ལས་༴། །དུས་གསུམ་བདེ་གཤེགས་རྒྱལ་བ་འདུས་པ་ཡི། །ཐབས་དང་ཤེས་རབ་གཉིས་མེད་རོལ་པ་ཡི། །མ་མོ་རྦོད་གཏོང་༴། །བསྟན་ལ་གནོད་པའི་དགྲ་བགེགས་ཚར་གཅོད་པའི། །དྲག་སྔགས་སྨོད་པའི་༴། །ལེགས་ཉེས་སྟངས་འཛིན་དམ་ཚིག་རྗེས་གཅོད་པའི། །ལོ་ཀ་མཆོད་ བསྟོད་༴། །རྡོ་རྗེའི་གདུང་གསོབ་རིགས་འཛིན་ཕོ་མོའི་ཚོགས། །མི་མངོན་དབྱིངས་ནས་བཞེངས་ལ་བྱིན་གྱིས་རློབས། །རྩི་ཤིང་ཐམས་ཅད་ཡེ་ནས་སྨན་དང་བཅུད། །སྣང་སྲིད་ཐམས་ཅད་ཡེ་ནས་བྱང་ཆུབ་སེམས། །སྟོང་གསུམ་ཐམས་ཅད་ཡེ་ནས་གཞལ་ཡས་ཁང་། །རྒྱུད་དྲུག་ཐམས་ཅད་ཡེ་ནས་རྒྱལ་བའི་སྐུ། །སྒྲ་དབྱངས་ཐམས་ཅད་དྲག་པོ་སྔགས་ཀྱི་ཚིག །མ་སྲིང་སྲུང་མ་ཡེ་ནས་བྲན་དང་གཡོག །རྦད་ཅིང་མངགས་སོ་དམ་ཅན་ཐུགས་དམ་ཅན། །དམ་རྫས་རྒྱན་གྱི་གཏོར་མ་འདི་བཞེས་ལ། །གང་ལྟར་བཅོལ་བའི་འཕྲིན་ལས་གྲུབ་པར་མཛོད། །ང་དཔལ་ཁྲག་འཐུང་ཧེ་རུ་ཀཿ། །འཇིག་རྟེན་ཐམས་ཅད་བསྒྲལ་བའི་ཞིང་། །བཟའ་བཏུང་ཐམས་ཅད་ཤ་ཁྲག་ཚོགས། །གཟུགས་སྣང་ཐམས་ཅད་ཁྲོ་བོའི་སྐུ། །དབང་ཆེན་ཐུགས་ཀྱི་དཀྱིལ་འཁོར་ནས། ཁྲོ་བོ་དམར་ནག་སྟེང་གསུམ་བཀང་། །སྒྲུབ་ཐབས་སྦས་པ་མིག་འབྱེད་ཀྱི་ཕོ་ཉ་བཏང་བའི་ཞལ་ཁྲིགས། གནམ་ལྕགས་ཐོག་གི་རལ་པ་ཅན། །སྤྱན་མིག་ཉི་ཟླ་མེ་ཆུ་འབར། །ཤངས་ནས་(༨བ)
ནད་དང་རླུང་འཚུབ་འགྱེད། །ཞལ་ནས་གནམ་ལྕགས་ཞུན་མ་འཐོར། །མཚོན་ཆ་སྣ་ཚོགས་བ་སྤུ་ཅན། །ལྕགས་ཀྱུས་འཛིན་ཅིང་ཞགས་པས་འཆིང་། །ཡིད་ལ་བརྣག་པའི་དགྲ་བགེགས་ཀྱི། །ལུས་སྲོག་འཚོ་བའི་ལྷ་དང་ཕྲོལ། །དཔག་ཚད་ཙམ་ནས་སྡེབས་སུ་ཆུག །འདོམ་གང་ཙམ་ནས་མྱོས་སུ་༴། ཁྲུ་གང་ཙམ་ནས་བརྒྱལ་དུ་༴། །མཐོ་གང་ཙམ་ནས་བརླག་པར་གྱིས། །བླ་སྲོག་དྲངས་ཏེ་གཟུགས་ལ་བསྟིམ། །ལིངྒ་འདི་ལ་ཤད་ཀྱིས་ཆུག །རིངས་པར་ཁུག་ལ་མྱུར་དུ་སྒྲོལ། །རྣམ་ཤེས་དབང་པོ་རྟེན་དང་ཕྲོལ། །པགས་པ་ཤུས་ལ་ནང་ཁྲོལ་ཐོན། །མགོ་དང་ཡན་ལག་བྲེགས་ལ་ཤོག །གློ་སྙིང་ཕྱུངས་ལ་ལྷུ་གཟུགས་ཕྲོལ། །ཤ་ཟོ་ཁྲག་འཐུང་རུས་པ་འཆོས། །བདུན་བརྒྱུད་རྩ་བ་ཆོད་ལ་ཤོག །མིང་ཡང་མེད་པར་བརླག་པར་གྱིས། །བྱང་ཆུབ་སེམས་ནི་མ་སྐྱེས་ན། །ཡུན་དུ་ནམ་ཡང་བཏང་མི་བྱ། །བྱང་སེམས་སྐྱེས་ན་བཏང་བར་བྱ། །སྐབས་འདི་རུ་གཟུགས་ལ་བསྟིམ། ཛཿ ང་དཔལ་རྡོ་རྗེ་དབང་ཆེན་སྐུ། །ཁྲོ་བོ་དཀར་པོས་སྟོང་གསུམ་བཀང་། གནམ་༴། ཤངས་༴། ཞལ་༴། མཚོན་༴། ལྕགས་༴། ཡིད་༴། ལུས་༴། དཔག་༴། འདོམ་༴། ཁྲུ་༴། མཐོ་༴། བླ་༴། ལིང་༴། རིངས་༴། རྣམ་༴། པགས་༴། མགོ་༴། གློ་༴། ཤ་༴། བདུན་༴། མིང་༴། བྱང་༴། ཡུན་༴། བྱང་༴། །ཛཿ ང་དཔལ་རིན་ཆེན་དབང་ཆེན་སྐུ། །མཐིང་ནག་ཁྲོ་བོས་སྟོང་གསུམ་བཀང་། །གནམ་༴། སྤྱན་༴། ཤངས་༴། ཞལ་༴། མཚོན་༴། ལྕགས་༴། ཡིད་༴།
ལུས་༴། དཔག་༴། འདོམ་༴། ཁྲུ་༴། མཐོ་༴། བླ་༴། ལིང་༴། རིངས་༴། རྣམ་ཤེས་༴། པགས་༴། མགོ་༴། གློ་༴། ཤ་༴། བདུན་༴། མིང་༴། བྱང་༴། ཡུན་༴། བྱང་༴། །ཛཿ ང་ནི་པདྨ་དབང་ཆེན་སྐུ། ཁྲོ་བོ་དམར་སྨུག་སྟོང་གསུམ་བཀང་། །གནམ་༴། སྤྱན་༴། ཤངས་༴། ཞལ་༴། མཚོན་༴། ལྕགས་༴། ཡིད་༴། ལུས་༴། དཔག་༴། འདོམ་༴། ཁྲུ་༴། མཐོ་༴། བླ་༴། ལིང་༴། རིངས་༴། རྣམ་༴། པགས་༴། མགོ་༴། གློ་༴། ཤ་༴། བདུན་༴། མིང་༴། བྱང་༴། ཡུན་༴། །བྱང་༴། །ཆོས་སྐྱོང་སྤྱི་བསྐུལ་ནི། །དུར་མུས་སྲད་པ་དཔལ་ལྡན་སེང་གེས་མཛད། ཁྲོད་རོལ་པ་ཆེན་པོའི་གནས་མཆོག་ནས། །བསྟན་ལ་གནོད་བྱེད་གདུག་པའི་གདན་སྟེང་ན། །དཔལ་ལྡན་མགོན་པོ་མ་ཧཱ་ཀཱ་ལ་ཡེ། །དུས་གསུམ་རྒྱལ་བའི་བཀའ་གཉན་མཐུ་རྩལ་ཅན། །ལེགས་ལྡན་ནག་པོ་གྲོང་ཁྱེར་སུམ་(༩བ)
བརྩེགས་དགྲ། །གྲུ་འཛིན་ཆེན་པོ་སྲིད་གསུམ་དབང་སྡུད་ཅིང་། །ལྷ་ཆེན་སྲས་པོ་ཚོགས་བདག་དྲག་ཤུལ་ཅན། །རྣལ་འབྱོར་དགྲ་ལྷ་བསྟན་སྲུང་ཡོངས་ཀྱི་གཙོ། །ཨེ་ཀ་ཛཱ་ཊཱི་བདུད་མོ་རལ་གཅིག་མ། །འདོད་ཁམས་གཙོ་མོ་གཤིན་རྗེ་ཡོངས་ཀྱི་ལྕམ། །གདོང་དམར་ལྷ་མོ་མ་མོ་ཡོངས་ཀྱི་གཙོ། །ཡམ་ཤུད་དམར་པོ་བཤན་པ་ཡོངས་ཀྱི་རྗེ། །དུར་ཁྲོད་བདག་པོ་སྲིན་མོ་ཞིང་སྐྱོང་ཚོགས། །དཔལ་མགོན་བརྒྱད་ཅུ་རྩ་བདུན་འཁོར་དང་བཅས། །ལྷ་སྲིན་སྡེ་བརྒྱད་སྤྲུལ་པ་ཡང་སྤྲུལ་དང་། །པུ་ཏྲ་ལ་སོགས་ལས་མཁན་འཁོར་དང་བཅས། །རྣམ་ལྔ་རྒྱན་གྱི་ལོངས་སྤྱོད་སྣ་ཚོགས་དང་། ཁྱད་པར་རྨད་དུ་བྱུང་བའི་གཏོར་མ་དང་། །ཛཱཾ་བུ་ཏི་བའི་བདུད་རྩི་སྨན་གྱི་མཆོག །སྔར་བཅོལ་ལས་ཀྱི་གཏང་རག་གཉན་པོར་འབུལ། །ད་འཆོལ་ལས་ཀྱི་གསལ་འདེབས་གཉན་པོར་འབུལ། །འཁོར་རྣམས་བསྲུང་ཞིང་རྐྱེན་རྣམས་བཟློག་པ་དང་། །སྡང་བའི་དགྲ་དང་གནོད་པའི་བགེགས་ལ་སོགས། །བདུད་དང་བར་དུ་གཅོད་པ་རྣམ་མང་པོ། །ཐམས་ཅད་རྡུལ་ཕྲན་བཞིན་དུ་བརླག་པར་མཛོད། །བསྟན་པ་དར་རྒྱས་འཕྲིན་ལས་ཁྱོད་ཀྱིས་སྒྲུབས། །ཚེ་འདིར་ནད་མེད་ལོངས་སྤྱོད་འཕེལ་བ་དང་། །བསམ་པའི་དོན་རྣམས་ཆོས་བཞིན་འགྲུབ་པ་དང་། །ཕྱོགས་དུས་ཀུན་ཏུ་བཀྲ་ཤིས་བདེ་ལེགས་ཤིང་། །ལམ་ལྔ་ཁྱད་པར་ས་རྣམས་བགྲོད་བྱས་ཏེ། །མི་མཐུན་བདུད་ཀྱི་ཚོགས་ལས་གཡུལ་རྒྱལ་ཞིང་། །རྡོ་རྗེ་འཛིན་པའི་ས་མཆོག་ཐོབ་པར་ཤོག །རྒྱུད་ཀྱི་ལེའུ་བཅུ་གཉིས་པ་ལས་ཕྱུང་བ། ཧྲཱིཿ རང་བཞིན་ཆོས་ཀྱི་སྐུ་ལས་རང་བྱུང་བ། །དམར་ནག་གྲུ་གསུམ་དབང་གི་དཀྱིལ་འཁོར་ནས། །(༡༠ན)
པདྨ་འཁྱིལ་པ་དབང་ཆེན་ཁྲོ་བོའི་སྐུ། །ཐུགས་རྗེ་ཐབས་ཀྱིས་སྤྲུལ་སྐུ་བཞེངས་སུ་གསོལ། །བདུད་ཕོ་བདུད་མོ་སྤྱི་ཆིངས་བསྣོལ་བའི་སྟེང་། །ཆགས་མེད་པདྨ་ཉི་ཟླའི་གདན་སྟེང་ན། །དུས་གསུམ་དབང་སྒྱུར་ཡེ་ཤེས་ལྷ་ཡི་ལྷ། །དབང་ཆེན་ཁྲག་འཐུང་ཧ་ཡ་གྷྲི་བའི་སྐུ། །སྐུ་མདོག་དམར་ནག་དབུ་གསུམ་ཕྱག་དྲུག་པ། །ཞབས་བཞི་བརྐྱང་བསྐུམ་འགྱིང་རྔམ་བརྗིད་པའི་སྐུ། །སྤྱན་གསུམ་ཞལ་བགྲད་དབང་གི་མཆེ་བ་གཙིགས། །སྨིན་མ་སྨ་ར་ཨག་ཚོམས་མེ་ལྟར་འབར། །དབུ་སྐྲ་ཁམས་ནག་རལ་པ་གྱེན་དུ་འཁྱིལ། །སྤྱི་གཙུག་རྟ་མགོ་ལྗང་གུ་ཟིལ་གནོན་རྔམས། །རྔོག་མ་དམར་པོ་དབང་གི་རྟ་སྐད་འཚེར། །གཡས་དཀར་གཡོན་ལྗང་དབུས་དམར་རྔམ་སྒྲ་སྒྲོག །སྐུ་སྟོད་ཞིང་ཆེན་གཡང་གཞི་གླང་ཆེན་ཀོ་རློན་གསོལ། །སྐུ་སྨད་སྟག་གི་ཤམ་ཐབས་བདུད་དཔུང་འདུལ། །ཐོད་རློན་ཚར་གསུམ་ཕྲེང་བས་རྒྱན་དུ་བྱས། །སྦྲུལ་རིགས་བཞི་ཡིས་སྐུ་བརྒྱན་ཕྱག་ཞབས་སྤྲས། །དང་པོ་པདྨ་བནྡྷས་དབང་དུ་སྡུད། །བར་པ་ལྕགས་ཀྱུ་ཞགས་པས་དམིགས་པ་འགུགས། །ཐ་མ་བེ་ཅོན་རལ་གྲིས་དགྲ་བགེགས་སྒྲོལ། །དབང་དྲག་མེ་དཔུང་ཀློང་དཀྱིལ་རིན་ཆེན་སྤྲས། །སྐུ་ལ་དུར་ཁྲོད་ཆས་བརྒྱད་རྫོགས་པར་ལྡན། །དབང་ཆེན་གདུག་པའི་སྤྱན་རྩ་ལྡོག་པ་ཡིས། །སྣང་སྲིད་དྲེགས་པ་ཐམས་ཅད་དབང་དུ་སྡུད། །ཤངས་ནས་རླུང་ནག་འཚུབ་པའི་བསྐལ་པ་འབྱུང་། །སྣང་སྲིད་ཀུན་འདར་མཐུ་ཆེན་དྲག་རྩལ་འདུལ། །སྙན་ནས་བསྐལ་པའི་འབྲུག་སྟོང་ལྡིར་བ་ཡིས། །སྲིད་པའི་ཆེ་བཙན་ཐམས་ཅད་ཟིལ་གྱིས་(༡༠བ)
གནོན། །ཚེམས་ལ་དྲག་པོའི་ཐོག་ཆེན་ཕབ་པ་ཡིས། །སྡང་དགྲ་གནོད་བགེགས་ཐལ་བའི་རྡུལ་དུ་རློག །ཞལ་ནས་རཀྟའི་རྒྱ་མཚོ་འཁྲུག་ཅིང་འཁྱིལ། །བསྟན་པ་བཤིག་པའི་དགྲ་ལ་སྐྱིན་ཐང་ཕོབ། ཁྲོ་རྒྱལ་དབང་གི་རྟ་སྐད་འཚེར་རེ་རེ། །ཐུགས་རྗེ་དབང་ཆེན་ཆེ་བཙན་དབང་དུ་སྡུད། །པདྨ་དབང་ཆེན་ཁྲག་འཐུང་མི་བཟད་པ། ཁྱོད་ཀྱི་དབང་དྲག་འཕྲིན་ལས་དུས་ལ་བབ། །སྡང་དགྲ་གནོད་བྱེད་ཐལ་བའི་རྡུལ་དུ་རློག །ཧྲཱི༔ ཁྲོ་རྒྱལ་དབང་ཆེན་སྐུ་ཡི་གཡོན་ཕྱོགས་ནས། ཁྲོ་མོ་པདྨ་གར་གྱི་དབང་ཕྱུག་མ། །སྐུ་མདོག་མཐིང་ནག་ཞལ་གཅིག་ཕྱག་གཉིས་མ། །སྤྱན་གསུམ་ཞལ་བགྲད་དབང་གི་མཆེ་བ་གཙིགས། །དབུ་སྐྲ་རལ་བ་ནག་པོ་མུན་ལྟར་གཏིབས། །སྐུ་ལ་དུར་ཁྲོད་ཆས་བརྒྱད་ལེགས་པར་ལྡན། །ཕྱག་གཡས་རྡོ་རྗེ་ཐོགས་ནས་ཡབ་ལ་འཁྱུད། །ཕྱག་གཡོན་དུང་ཆེན་དམར་འཁྱིལ་གཙོ་ལ་སྟོབ། ཁྲོ་མོ་ཀུན་གྱི་དབང་ཕྱུག་ཆེན་མོ་ཁྱོད། །རྔམས་པའི་ང་རོས་ཐམས་ཅད་ཟིལ་གྱིས་གནོན། །སྤྱན་ནས་ཁྲག་འཛག་ཞལ་ནས་མི་རོ་འཕྲུལ། །སྙན་ནས་འབྲུག་སྒྲོག་ཤངས་ནས་རླུང་ནག་འཚུབ། ཁྱོད་ཀྱི་༴། །སྡང་དགྲ་༴། །ཧྲཱིཿ ཡབ་ཡུམ་ཐབས་དང་ཤེས་རབ་རོལ་པ་ལས། །ཐུགས་ཀྱི་སྤྲུལ་པ་དབང་ཆེན་ཁྲོ་བོའི་སྐུ། །ཤར་ཕྱོགས་འཁོར་ལོ་འབར་བའི་རྩིབས་སྟེང་ནས། །དྲི་ཟ་ཕོ་མོ་བསྣོལ་བའི་གདན་སྟེང་ན། །རྡོ་རྗེ་དབང་ཆེན་དཀར་པོ་ཁྲོ་བོའི་སྐུ། །ཞལ་གཅིག་ཕྱག་གཉིས་དུར་ཁྲོད་ཆས་བརྒྱད་རྫོགས། །སྤྱན་གསུམ་ཞལ་བགྲད་མཆེ་གཙིགས་མི་རོ་ཟ། །དབུ་སྐྲ་ཁམ་ནག་གྱེན་བསྒྲེངས་སྦྲུལ་གྱིས་བཅིངས། །(༡༡ན)
ཕྱག་གཡས་རྡོ་རྗེས་དགྲ་བགེགས་མགོ་ལུས་གཤོག །ཕྱག་གཡོན་དབྱུག་ཏོས་མྱོས་ཤིང་བརྒྱལ་བར་བྱེད། །མེ་དཔུང་ཀློང་ནས་འགྱིང་གར་སྟབས་ཚུལ་དུ། །རྔམས་པའི་ང་རོ་འབྲུག་སྟོང་ལྡིར་རི་རི། །ཐུགས་ཀྱི་སྤྲུལ་པས་སྟོང་གསུམ་ཁྱབ་པར་བྱེད། ཁྱོད་ཀྱི་༴། །སྡང་དགྲ་༴། །ཧྲཱིཿ ཡབ་ཡུམ་༴། །ཐུགས་ཀྱི་༴། །ལྷོ་ཕྱོགས་༴། །གྲུལ་བུམ་༴། །རིན་ཆེན་དབང་ཆེན་མཐིང་ནག་ཁྲོ་བོའི་སྐུ། །ཞལ་གཅིག་ཕྱག་གཉིས་༴། །སྤྱན་གསུམ་༴། །དབུ་སྐྲ་༴། །ཕྱག་གཡས་རིན་ཅེན་མྱུ་གུས་དགོས་འདོད་སྐོང་། །ཕྱག་གཡོན་ལྕགས་ཀྱུས་བླ་འགུགས་ཙིཏྟ་འབྱིན། །མེ་དཔུང་༴། །རྔམས་པའི་༴། །ཐུགས་ཀྱི་༴། ཁྱོད་ཀྱི་༴། །སྡང་དགྲ་༴། །ཧྲཱིཿ ཡབ་ཡུམ་༴། །ཐུགས་ཀྱི་༴། །ནུབ་ཕྱོགས་༴། །ཀླུ་དབང་༴། །པདྨ་དབང་ཆེན་དམར་སྨུག་ཁྲོ་བོའི་སྐུ། །ཞལ་གཅིག་༴། །སྤྱན་གསུམ་༴། །དབུ་སྐྲ་༴། །ཕྱག་གཡས་པདྨས་ཆེ་བཙན་དབང་དུ་སྡུད། །ཕྱག་གཡོན་ཞགས་པས་ལུས་དང་ཡན་ལག་འཆིང་། །མེ་དཔུང་༴། །རྔམས་པའི་༴། །ཐུགས་ཀྱི་༴། ཁྱོད་ཀྱི་༴། །སྡང་དགྲ་༴། །ཧྲཱིཿ ཡབ་ཡུམ་༴། །ཐུགས་ཀྱི་༴། །བྱང་ཕྱོགས་༴། །གནོད་སྦྱིན་༴། །འཕྲིན་ལས་དབང་ཆེན་ལྗང་དམར་ཁྲོ་བོའི་སྐུ། །ཞལ་གཅིག་༴། །སྤྱན་གསུམ་༴། །དབུ་སྐྲ་༴། །ཕྱག་གཡས་རལ་གྲིས་རྩ་དང་སྲོག་གཟུགས་གཅོད། །ཕྱག་གཡོན་ཁ་ཊྭཱཾ་རྩེ་གསུམ་དུག་གསུམ་སྒྲོལ། །མེ་དཔུང་༴། །རྔམས་པའི་༴། །ཐུགས་ཀྱི་༴། །(༡༡བ)
ཁྱོད་ཀྱི་༴། །སྡང་དགྲ་༴། །ཧཱུཾ། ཤར་ཕྱོགས་དུང་གི་སྒོ་ཁྱུད་ལ། །བུད་མེད་ནག་མོ་འཇིགས་ཚུལ་ཅན། ཁྲག་གི་རལ་པ་ཤར་ར་ར། །ཕྱག་ན་ལྕགས་ཀྱུ་དགྲ་སྙིང་འབྱིན། །རིངས་པར་ཁུག་ཅིག་ཨཾ་ཀུ་ཤ །ལྷོ་ཕྱོགས་གསེར་༴། །སེར་མོ་ནག་མོ་༴། །གཡུ་ཡི་༴། །ཕྱག་ན་ཞགས་པ་བླ་ཚེ་འགུགས། །ཆིངས་ཤིག་སྡོམས་ཤིག་པཱ་ཤྱ་ཧྲི། །ནུབ་ཕྱོགས་ཟངས་ཀྱི་༴། །བུད་མེད་དམར་མོ་༴། །མཐིང་གི་རལ་པ་༴། །ཕྱག་ན་ལྕགས་སྒྲོག་ཚེ་སྲོག་བསྟིམ། །རྟེན་ལ་བསྟིམ་ཞིག་སྥོ་ཊ་བཾ། །བྱང་ཕྱོགས་གཡུ་ཡི་༴། །བུད་མེད་སྔོན་མོ་༴། །གསེར་གྱི་༴། །ཕྱག་ན་དྲིལ་བུས་བརྒྱལ་བར་བྱེད། །མྱོས་པར་གྱིས་ཤིག་གྷཎྜེ་ཧོཿ། །ཧྲཱིཿ བཅོམ་ལྡན་པདྨ་ཧེ་རུ་ཀཿ། །དབང་ཆེན་ཐུགས་ཀྱི་སྤྲུལ་པ་ནི། །སྲོག་བདག་འོད་ཀྱི་རྒྱལ་པོ་བྱུང་། །སྐྱེས་མཆོག་འོད་ཀྱི་མི་བོ་ཆེ། །སྐུ་ལ་སེང་གེའི་སློག་པ་གསོལ། །དབུ་ལ་ཇི་ལེ་དཀར་པོ་བཅིངས། །ནམ་མཁའ་འཇའ་ཡི་སྐ་རགས་ཅན། །ལྕགས་ཀྱི་སྡེར་མོས་དགྲ་སྙིང་འབྱིན། །གཡས་པ་རལ་གྲིས་དགྲ་སྲོག་གཅོད། །གཡོན་པ་འོད་ཀྱི་ཞགས་པ་འཕེན། །དགྲ་བོའི་ཚེ་སྲོག་དོན་སྙིང་ཕྱུངས། །དྲག་ཏུ་བསྐུལ་ལོ་དགྲ་སྲོག་ཆོད། །ཤར་གྱི་དཀར་པོ་དམ་ཚིག་ཅན། །རྟ་རུ་དཀར་པོ་ངང་རིང་ཞོན། །སྐུ་ལ་དར་དཀར་རལ་ཀ་གསོལ། །དབུ་ལ་དུང་གི་ཅོད་པན་ཅན། །ཕྱག་ན་ཤེལ་གྱི་ཟངས་གྲི་ཐོགས། །ཕྱག་གཡོན་ཞགས་པ་དགྲ་ལ་འདེབས། །ཚངས་པ་དུང་གི་ཐོར་ཚུགས་ཅན། །དགྲ་བོའི་ལྷ་ཕྲོལ་ཁོང་སྙིང་ཕྱུངས། །ལྷོ་ཡི་དགེ་བསྙེན་དམ་ཚིག་ཅན། །(༡༢ན)
སྐུ་ལ་ཟ་འོག་སྔོ་ཁྲ་གསོལ། །དབུ་ལ་བསེ་མེན་འགྱིང་ཐོད་བཅིངས། །རྟ་ནི་ཁམ་པ་ལག་དཀར་ཞོན། །གཡས་ན་བསེ་ཡི་རྡོ་རྗེ་ཐོགས། །གཡོན་པ་ཙིཏྟ་དམར་པོ་ཐོགས། །གྱིང་ཆེན་རྡོ་རྗེ་གཤོག་རྒོད་རྩལ། །དགྲ་བོའི་སྙིང་ཕྱུངས་སྲོག་རྩ་ཆོད། །ནུབ་ཀྱི་བདུད་ནག་དམ་ཚིག་ཅན། །སྐུ་ལ་ལྕགས་ཀྱི་ཞུན་ཁྲབ་གསོལ། །དབུ་ལ་བདུད་ཞྭ་ལྡིང་ནག་གསོལ། །ཆིབས་སུ་བདུད་རྟ་ནག་པོ་བཅིབས། །ཕྱག་གཡས་བདུད་ཀྱི་ཁྲམ་ཤིང་བསྣམས། །ཕྱག་གཡོན་ཞགས་པ་ནག་པོ་འདེབས། །ནག་པོ་གསོད་བྱེད་བདུད་ཀྱི་བུ། །དགྲ་བོའི་ཚེ་སྲོག་ཁྲམ་ལ་ཐོབ། །བྱང་གི་སྲོག་བདག་དམ་ཚིག་ཅན། །སྐུ་ལ་བསེ་ཁྲབ་དམར་པོ་གསོལ། །དབུ་ལ་བསེ་རྨོག་ཟངས་རིང་གསོལ། །ཆིབས་སུ་བསེ་ཡི་ར་སྐྱེས་བཅིབས། །ཕྱག་གཡས་ཟངས་ཀྱི་གྲི་རིང་བསྣམས། །གཡོན་པ་ཞགས་པ་དགྲ་ལ་འདེབས། །བསྭོ་ཏོ་སྲོག་གཅོད་ལག་དམར་གྱིས། །དགྲ་བོའི་མདངས་ཕྲོགས་སྲོག་རྩ་ཆོད། །དམ་ཉམས་མ་བཏང་ཤོར་ར་རེ། །ཧྲཱིཿ པདྨ་རྒྱལ་པོ་རྟ་མཆོག་དཔལ། ཁྲོ་རྒྱལ་ཁྲག་འཐུང་ཧེ་རུ་ཀཿ། །ཐུགས་ཀྱི་སྤྲུལ་པ་མི་བཟད་པ། །སྐྱིན་ཐང་ཆུ་འཁྱགས་མངའ་བདག་ཁྱོད། ཁྱབ་འཇུག་ཆེན་པོ་རཱ་ཧུ་ལ། །བྱི་ཏྟ་པེ་ཏེ་སྒྲ་གཅན་འཛིན། །དྲང་སྲོང་ཆེན་པོ་ཀུན་ཏུ་རྒྱུ། །གཟའ་རྒོད་དྲག་པོ་སྐྱིན་ཐང་བདག །དུད་ཁ་མགོ་དགུ་མིག་གིས་ཁེངས། །རོ་སྨད་སྦྲུལ་གྱིས་རྒྱ་མཚོ་འཁྲུག །ཕྱག་གཡས་སྐྱིན་ཐང་འཁོར་ལོ་བསྣམས། །ཕྱག་གཡོན་ཆུ་སྲིན་ཞགས་པ་འཕེན། །དགྲ་ཡུལ་ལོ་ཏོག་(༡༡བ)
རྡུལ་དུ་རླག །ཧྲཱིཿ ཕྱོགས་བཞི་ནམ་མཁའ་དཀྱིལ་ཡངས་ནས། །ངན་སྔགས་བདག་མོ་སྐྱིན་ཐང་ཕོབ། །ཤར་གྱི་སྟག་སྲིན་ཟོར་བ་གདོང་། །ལྷོ་ཡི་བཾ་སྲིན་དྲེད་མོ་གདོང་། །ནུབ་ཀྱི་ཀོང་སྲིན་བ་ལང་གདོང་། །བྱང་གིས་འབྲོག་སྲིན་ཆུ་སྲིན་གདོང་། །ངན་སྔགས་བདག་པོ་བཞི་པོ་ནི། །གཡས་པ་ཟོར་བ་གཡོན་ནད་རྐྱལ། །སྐྱིན་ཐང་ཆུ་རྒད་མངའ་བདག་མོ། །དགྲ་བོའི་ལོ་ཏོག་སྣར་མ་ལ། །ཆུ་རྒོད་འཁྱགས་པའི་སྐྱིན་ཐང་ཕོབ། །དགྲ་ཡུལ་ཐལ་བ་རྡུལ་དུ་རློག །གནོད་སྦྱིན་བེག་ཙེ་རིག་པའི་ལྷ་མོ་དང་། །སྒྲོལ་གྱིང་སྲོག་བདག་གྲི་ཐོགས་བཤན་པ་བརྒྱད། །རོ་བཤན་ཉེར་གཅིག་བདུད་ནག་གནོད་སྦྱིན་དང་། །བཙན་དམག་ཕོ་ཉ་འཁོར་ཚོགས་རྒྱ་མཚོ་ཡིས། །རྦོད་གཏོང་ཆགས་ཆེ་བར་གཅོད་མ་ལུས་པ། །གསར་སྒྲིགས། རང་གཤེད་རང་ལ་ཕབ་སྟེ་དགྲ་བགེགས་ཀྱི། །སྙིང་ཁྲག་ཧུབ་འཐུང་སྲོག་རྩ་དམར་པོ་ཆོད། །ཐལ་བའི་རྡུལ་དུ་རློག་པའི་འཕྲིན་ལས་མཛོད། །ཧྲཱིཿ བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུཾ་ཕཊ། ཨཱོཾ་མཧཱ་ཀྲོ་དྷེ་ཤྭ་རི་ཧཱུཾ་ཕཊ། །ཨཱོཾ་བཛྲ་ཀྲོ་དྷེ་ཤྭ་རི་ཧཱུཾ་ཕཊ། །ཨོཾ་རཏྣ་ཀྲོ་དྷེ་ཤྭ་རི་ཧཱུཾ་ཕཊ། ཨོཾ་པདྨ་ཀྲོ་དྷེ་ཤྭ་རི་ཧཱུཾ་ཕཊ། ཨཱོཾ་ཀརྨ་ཀྲོ་དྷེ་ཤྭ་རི་ཧཱུཾ་ཕཊ། ཨཱོཾ་བཛྲ་ཨཾ་ཀུ་ཤ་ཛཿ། ཨཱོཾ་བཛྲ་པཱ་ཤ་ཧཱུཾ། །ཨཱོཾ་བཛྲ་སྥོ་ཊ་བཾ། ཨཱོཾ་བཛྲ་གྷཎྜེ་ཧོཿ གིངྐར། རཱ་ཧུ་ལ། རགྨོ་པྲ་ཎ་ཨཏྨ་ན། ས་པ་རི་ཝཱ་ར་ཎ། མཐུ་བྱད་རྦོད་གཏོང་སྡེ་བརྒྱད་ཀྱི་གནོད་པ། ནད་གདོན། ཆགས་ཆེ། ཉམ་ང་། བར་གཅོད་ཐམས་ཅད་དགྲ་བགེགས་ཀྱི་སྟེང་དུ་བྷྱོ་བྷྱོ་བཟློག་བཟློག །གསེར་སྐྱེམས་དང་གཟུ་དཔང་གཏོད། (༡༣ན)
འབྲུབ་ཁུང་དུ་ཉ་པོ་བསྐྱེད་འགུགས་ནི། སྭ་བྷཱ་བས་སྦྱངས། གསར་སྒྲིགས། སྟོང་པའི་ངང་ལས་ཨེ་ལས་གནམ་ལྕགས་ལས་གྲུབ་པའི་འབྲུབ་ཁུང་ནག་པོ་ཁ་དོག་ཅིང་མཐིལ་ཡངས་པ་ཁ་ཁྱེར་རིམ་པ་གསུམ་དང་ལྡན་ཞིང་། འོག་ཕྱོགས་འདོད་ཆགས་ཀྱི་ཁྲག་མཚོ་ཁོལ་བ་ཕྱི་ནས་གཏི་མུག་གི་མུན་པ་ཐིབས་ཤིང་། ནང་ཞེ་སྡང་གི་མེ་དཔུང་འཁྲུག་པ། ལྷ་སྲིན་སྡེ་བརྒྱད་ཀྱི་བཤས་ར་འཇིགས་སུ་རུང་བའི་དབུས་སུ། ཪྣྲི་དང་ཏྲི་ལས་གནོད་བྱེད་དགྲ་བགེགས་དེ་ཉིད་ཉམ་ཐག་ཅིང་མྱ་ངན་གྱི་འདུག་སྟངས་ཅན་ཡན་ལག་ལྕགས་སྒྲོག་གིས་བསྡམས་པ་མངོན་སུམ་ལྟ་བུར་གསལ་བར་གྱུར། བདེན་བརྡར་ནས་བཟུང་སྟོབ་པའི་བར་དཀྱུས་བཞིན་བྱ། བསྐང་བ་ཆོས་སྐུ་སྐྱེ་མེད་མ་གཏོང་། སྒྲུབ་པ་པོ་རྣམས་ཚོགས་ལ་རོལ་རྗེས་དབང་བསྐུར་སྨོན་ལམ་གདབ། བཟློག་བསྒྱུར་ནི། རྩ་བརྒྱུད་མུས་སྲད་པ་དཔལ་ལྡན་སེང་གེས་མཛད། །བླ་མ་ཐམས་ཅད་ལ། །དོ་ནུབ་བཟློག་པའི་ལས་འཆོལ་གྱིས། །ཕྱིར་བཟློག་ཚུར་ལ་བཟློག་པར་མཆིའོ། །གཉེན་བྱས་དགྲ་རུ་སོང་བར་མཆིའོ། །བཟློག་གོ་དམར་ཆེན་གཏོར་མས་བཟློག །བསྒྱུར་རོ་ལྟས་ངན་ཆོ་འཕྲུལ་དགྲ་ལ་སྒྱུར། བཟློག་བསྒྱུར་བཅོལ་བའི་འཕྲིན་ལས་མཛོད། །དུས་ལ་བབ་བོ་ས་མ་ཡ། །བཅོམ་ལྡན་ཁྲོ་རྒྱལ་རྟ་མགྲིན་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ཡུམ་ཆེན་པདྨ་གར་དབང་ལ། །དོ་ནུབ་༴། །ཕྱིར་བཟློག་༴། །གཉེན་(༡༣བ)
བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། ཁྲོ་རྒྱལ་རྡོ་རྗེ་དབང་ཆེན་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། ཁྲོ་རྒྱལ་རིན་ཆེན་དབང་ཆེན་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། ཁྲོ་རྒྱལ་པདྨ་དབང་ཆེན་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། ཁྲོ་རྒྱལ་ལས་ཀྱི་དབང་ཆེན་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ཤར་ཕྱོགས་སྒོ་མ་ལྕགས་ཀྱུ་མ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ལྷོ་ཕྱོགས་སྒོ་མ་ཞགས་པ་མ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ནུབ་ཕྱོགས་སྒོ་མ་ལྕགས་ཀྱུ་མ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །བྱང་ཕྱོགས་སྒོ་མ་དྲིལ་བུ་མ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ཡི་དམ་ལྷ་ཚོགས་ཐམས་ཅད་ལ། །དོ་ནུབ་༴། །ཕྱིར་བཟློག་༴། །(༡༤ན)
གཉེན་བྱས་དགྲ་རུ་སོང་བར་མཆིའོ། །བཟློག་གོ་དམར་ཆེན་གཏོར་མས་བཟློག །བསྒྱུར་རོ་ལྟས་ངན་ཆོ་འཕྲུལ་དགྲ་ལ་སྒྱུར། །བཟློག་སྒྱུར་བཅོལ་བའི་འཕྲིན་ལས་མཛོད། །དུས་ལ་བབ་བོ་ས་མ་ཡ། །སྲོག་བདག་འོད་ཀྱི་རྒྱལ་པོ་ལ། །དོ་ནུབ་བཟློག་པའི་ལས་འཆོལ་གྱིས། །ཕྱིར་བཟློག་ཚུར་ལ་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །དགེ་བསྙེན་རྡོ་རྗེ་ལེགས་པ་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །གཏུམ་དྲག་རེ་ནག་བླངས་པ་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །སྲོག་བདུད་བཙན་འཁོར་དམར་པོ་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །གཟའ་རྒོད་ཁྱབ་འཇུག་ཆེན་པོ་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ཡུམ་ཆེན་གདོང་མོ་བཞི་པོ་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །དྲེགས་བྱེད་སྡེ་བརྒྱད་འཁོར་བཅས་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །(༡༤བ)
བསྟན་སྲུང་རྒྱ་མཚོའི་ཚོགས་རྣམས་ལ། །དོ་ནུབ་༴། །ཕྱིར་བཟློག་༴། །གཉེན་བྱས་༴། །བཟློག་གོ་༴། །བསྒྱུར་རོ་༴། །བཟློག་བསྒྱུར་༴། །དུས་ལ་༴། །ཞེས་དང་། ཧཱུཾ༔ དང་པོར་རང་སེམས་འཁྲུལ་པ་ཡིས། །གཉིས་མེད་དོན་ནི་མ་རྟོགས་པའི། །ལོག་རྟོག་འཁོར་བའི་བག་ཆགས་བླངས། །འབྲས་བུ་སྨིན་བྱེད་བསྐྱེད་རྫོགས་གསལ། །རང་གཞན་གཉིས་མེད་དོན་རྟོགས་ནས། །རྣམ་རྟོག་འཁོར་བས་ཆགས་པ་རྒྱས། །ཡིག་རྙིང་ཡང་བཟློག་ནག་པོའི་བཟླ་བ། ཧཱུཾ། ང་ནི་དབང་ཆེན་རྟ་མཆོག་དཔལ། །བག་ཆགས་འཁོར་བའི་དུཿ ཁ་རྒྱས། །གཉིས་མེད་རང་གི་ང་རྒྱལ་ཅན། །ཡ་གི་ཁྲོ་བོ་མན་ཆད་ནས། །མ་གི་བསེན་མོ་གྲོང་རྒྱུ་ཡན། །ཐམས་ཅད་མ་ལུས་ང་ལ་ཉོན། །ང་ནི་སེམས་ཅན་དོན་རེ་བྱེད། །ང་ཡིས་མདོས་གཏོར་འདི་བསྔོས་པས། །འཇམ་དཔལ་གཤིན་རྗེའི་རྦོད་ཁ་བཟློག །ཡ་མཱནྟ་ཀྲྀ་ཏ་དགྲ་ལ་བཟློག །སེམས་ཅན་དོན་ལ་ང་མི་ཡེངས། །སྙིང་རྗེས་བསྒྲལ་བའི་ཤ་ཁྲག་གི །ཚད་མེད་མདོས་གཏོར་འདི་བསྔོས་པས། །རྟ་མགྲིན་གསུང་གི་རྦོད་གཏོང་བཟློག །ཧ་ཡ་གྷྲི་ཝ་དགྲ་ལ་བཟློག །དྲག་པོའི་དྲག་སྔགས་གཉིས་མེད་བཟླས། །ཕ་རོལ་རྒྱས་པའི་སྙིང་ཁྲག་གི །ཚད་མེད་རཀྟ་འདི་བསྔོས་པས། །ཕྱག་རྡོར་ཐུགས་ཀྱི་རྦོད་གཏོང་བཟློག །བཛྲ་པཱ་ཎི་དགྲ་ལ་བཟློག །ཨེ་ཡཾ་ས་མ་ཡ་སྙིང་ལ་བྷྱོ་བྷྱོཿ དགྲ་ལ་བཟློག་བཟློག །སྙིང་རྩ་ཕྱུངས་ཕྱུངས། སྲོག་རྩ་ཆོད་ཆོད། བྱད་མ་མཱ་ར་ཡ་བཟློག་བཟློག །ཅེས་བརྒྱ་སྟོང་བཟླས་སོ། །དེ་ནས་ཡང་འདི་སྐད་དོ། ཧཱུཾ། དུས་གསུམ་སངས་རྒྱས་ར་མདའ་སློག །(༡༥ན)
ཡི་དམ་ལྷ་ཚོགས་ར་མདའ་སློག །ཆོས་སྐྱོང་སྲུང་མ་ར་མདའ་སློག །བྱད་མའི་སྟེང་དུ་དམག་འདྲེན་གྱིས། །དམག་དཔོན་ཡེ་ཤེས་ལྷས་མཛད་དོ། །བྱད་མ་མ་ལུས་ཐལ་བར་ཐོང་། །བདག་ལ་བརྣག་པའི་དགྲ་བགེགས་འདི། །ཡུན་དུ་མ་ཞོག་སྲོག་རྩ་ཆོད། །བྱད་མ་ཤ་ཏྲཱུཾ་བྱེར་བྱེར་སོད་སོད། །ཧཱུཾ། དགྲ་བོ་བསོད་ནམས་ཟད་པ་དང་། །རྣལ་འབྱོར་ཡར་ལ་འཕེལ་བ་གཉིས། །དུས་གསུམ་ལྷ་ཡིས་བྱིན་རློབས་ལ། །རྣལ་འབྱོར་ཚེ་དང་བསོད་ནམས་རྣམས། །གོང་ནས་གོང་དུ་འཕེལ་བར་མཛོད། །དགྲ་བོ་བསོད་ནམས་མེད་པར་མཛོད། །ཧཱུཾ། ཉོན་ཅིག་སྣང་སྲིད་ལྷ་འདྲེའི་ཚོགས། །རྣལ་འབྱོར་ལྷ་མེད་ཟེར་ནས་བརྙས། །ལྷ་ལ་མཐུ་མེད་ཟེར་ནས་བརྙས། བྷྱོ། དམ་ཉམས་དགྲ་ལ་གཏོར་ཟོར་བཟློག །དམ་ཉམས་དགྲ་ལ་ཡུངས་ཟོར་བཟློག །དམ་ཉམས་དགྲ་ལ་བཙོ་ཟོར་བཟློག །དམ་ཉམས་དགྲ་ལ་གྲི་ཟོར་བཟློག །དམ་ཉམས་དགྲ་ལ་རྦབ་ཟོར་བཟློག །དམ་ཉམས་དགྲ་ལ་ཁྲག་ཟོར་བཟློག །དམ་ཉམས་དགྲ་ལ་འུར་ཟོར་བཟློག །དམ་ཉམས་དགྲ་ལ་མཚེ་ཟོར་བཟློག །དམ་ཉམས་དགྲ་ལ་ཕུར་ཟོར་བཟློག །དམ་ཉམས་དགྲ་ལ་མདའ་ཟོར་བཟློག །དམ་ཉམས་དགྲ་ལ་རྡོ་ཟོར་བཟློག །བྷྱོ། ཤར་ཕྱོགས་མི་ནག་མཆེ་བ་ཅན། དམ་ཉམས་དགྲ་ལ་རྦོད་ཁ་སྒྱུར། །བྷྱོ། ལྷོ་ཕྱོགས་མི་སྔོན་མཆེ་བ་ཅན། །དམ་ཉམས་དགྲ་ལ་རྦོད་ཁ་སྒྱུར། །བྷྱོ། ནུབ་ཕྱོགས་མི་དམར་མཆེ་བ་ཅན། །དམ་ཉམས་དགྲ་ལ་རྦོད་ཁ་སྒྱུར། །བྷྱོ། བྱང་ཕྱོགས་མི་སེར་(༡༥བ)
མཆེ་བ་ཅན། །དམ་ཉམས་དགྲ་ལ་རྦོད་ཁ་སྒྱུར། །བྷྱོ། ཁྱེད་ལ་འཕྲིན་ལས་བཅོལ་བ་ནི། །བདག་དང་ཡོན་མཆོད་འཁོར་བཅས་ལ། །ཕུར་ཁ་ཟོར་ཁ་ལངས་པ་བཟློག །མདའ་ཟོར་འུར་ཟོར་འཕེན་པ་བཟློག །ཀོང་ཟོར་འབྲུབ་ཁུང་བཅུག་པ་བཟློག །མི་དམར་ཞགས་པ་འཕེན་པ་དང་། །མི་ནག་གཡབ་མོ་གཡབ་པ་བཟློག །བཤན་པ་ལས་ལ་ཞུགས་པ་བཟློག །མོན་པ་རིམ་པ་བརྗེས་པ་བཟློག །སྐྱེས་པས་མདའ་ཟོར་འཕེན་པ་བཟློག །བུད་མེད་དམོད་ཟོར་བྱེད་པ་བཟློག །བདུད་གཅོད་སྲོག་རྒུད་ལུས་ཀྱི་ན་ཚ་དང་། །བླ་ཉམས་ཚེ་ཉམས་ཐམས་ཅད་དགྲ་ལ་བཟློག །ལྷ་བསྒྲལ་སྲོག་ཞུད་ངན་པ་བཟློག །སྲོག་རྒལ་ཕུར་པ་བཏབ་པ་བཟློག །བདག་ལ་བརྣག་པའི་བསམ་ངན་དང་། །སྦྱོར་བ་ངན་པ་སྣ་ཚོགས་བཟློག །ཡིད་ལ་བརྣག་པའི་དགྲ་བོ་འདི། །སྡེར་མོ་ཅན་གྱིས་སྙིང་ནས་དྲོངས། །མཆེ་བ་ཅན་གྱིས་ཀླད་ནས་ཐུག །ཞགས་པ་ཅན་གྱིས་ཡན་ལག་ཁྱིགས། །ལྕགས་སྒྲོག་ཅན་གྱིས་ཡན་ལག་སྡོམས། །དྲིལ་བུ་ཅན་གྱིས་མྱོས་སུ་ཆུག །ཐོ་བ་ཅན་གྱིས་མགོ་ནས་རྡུངས། །ལས་ཀྱི་རླུང་གིས་རྒྱབ་ནས་དེད། །མུན་པ་ནག་པོས་མདུན་ནས་སུས། །ཡིད་ལ་བརྣག་པའི་དགྲ་བོ་འདི། །ལས་མཁན་རྣམས་ཀྱི་ཞལ་དུ་ཐོབ། །གནམ་གྱི་འཇུ་ཐག་ཆོད་ལས་ཤོག །ས་ཡི་རྟེན་ཕུར་ཐོན་ལས་ཤོག །དོན་སྙིང་ལྔ་པོ་ཕྱུངས་ལས་ཤོག །ཁ་ནས་ཁོང་ཁྲག་སྐྱུག་ཏུ་ཆུག །སྐྱོབ་པའི་ལྷ་དང་ཕྲོལ་ལས་ཤོག །ལྟས་ངན་བརྒྱད་ཅུ་རྩ་བཞི་ཐོང་། །ཡེ་འབྲོག་སུམ་བརྒྱ་དྲུག་ཅུ་ཐོང་། །ནད་རིགས་བཞི་བརྒྱ་རྩ་བཞི་ཐོང་། །(༡༦ན)
དམ་ཉམས་ལས་ངན་སྡིག་ཅན་འདི། །ལོ་དང་ཟླ་བར་མ་འཇོག་པར། །རྟགས་དང་མཚན་མ་མྱུར་དུ་སྟོན། །བཅོལ་བའི་ལས་འདི་མ་བྱས་ན། །དུས་གསུམ་རྒྱལ་བའི་བཀའ་ཡང་བསླུས། །ཕྱི་རབས་གསང་སྔགས་སུན་ཡང་ཕྱུང་། །རིགས་འཛིན་བདག་གི་རེ་བ་ཆད། །སྔོན་གྱི་ཐུགས་དམ་གཉེན་པོ་ཉམས། །རྩ་བརྒྱུད་བླ་མའི་དམ་ཚིག་འགལ། །ཐུབ་པའི་བསྟན་སྲུང་མིང་ཙམ་གྱུར། །དེ་བས་དམ་ལས་མ་འདའ་བར། །མཐུན་པའི་དམ་རྫས་འདི་བཞེས་ལ། །བཅོལ་བའི་འཕྲིན་ལས་བསྒྲུབ་པར་མཛོད། །ཅེས་དང་། བྷྱོ། ཡིག་རྙིང་བཟློག་པ་རྣམ་རྒྱལ་སྟོབས་ཀྱི་མཚོན་ཆ། སངས་རྒྱས་བསྟན་པ་གཉན་པོ་བཤིག་པ་བཟློག །དཀོན་མཆོག་གསུམ་གྱི་དབུ་འཕང་དམོད་པ་བཟློག །གཙུག་ལག་ཁང་ཆེན་དཀོར་ཁང་བཤིག་པ་བཟློག །གསང་སྔགས་རྒྱུད་ལ་བཅས་སུ་འདོགས་པ་བཟློག །དགེ་འདུན་དཀོར་ལ་རློམ་ཞིང་འཁྱེར་བ་བཟློག །འགྲོ་བ་ཀུན་ལ་གནོད་ཅིང་འཚེ་བ་བཟློག །དཀར་པོའི་ཆོས་ལ་བརྣག་ཅིང་དམོད་པ་བཟློག །བཀའ་ལས་འདའ་ཞིང་དམ་ཉམས་ཁྲིམས་ཉམས་བཟློག །བདག་ལ་གནོད་པར་སེམས་པའི་བསམ་ངན་བཟློག །སྒྲུབ་ལ་བར་དུ་གཅོད་པ་བྱེད་པ་བཟློག །མཚམས་ཀྱི་ཁོངས་སུ་འཇུག་པར་བྱེད་པ་བཟློག །ཚོགས་ཀྱི་ཡོ་བྱད་བརྐུ་ཞིང་འཕྲོག་པ་བཟློག །ཏིང་འཛིན་དྲོད་ལ་བར་དུ་གཅོད་པ་བཟློག །དངོས་གྲུབ་བགེགས་དང་བར་ཆད་བྱེད་པ་བཟློག །དུས་ཚོད་ཕྱོགས་ངན་བདུད་བཙན་ཐམས་ཅད་བཟློག །ཚེས་བརྒྱད་ཡུལ་གྱི་གདོན་འདྲེ་ལངས་པ་བཟློག །བཅོ་ལྔའི་(༡༦བ)
བླ་ལ་རྐུ་བར་བྱེད་པ་བཟློག །ཉི་ཤུ་བཞི་ལ་སྲོག་གཅོད་རྩོམ་པ་བཟློག །ཉེར་དགུའི་གདུག་ལ་ཚེ་ལེན་བྱེད་པ་བཟློག །ཡིད་ཀྱིས་དངངས་ནས་སྤྲུག་པར་བྱེད་པ་བཟློག །ཏིང་འཛིན་གསལ་ཁར་སྒྲིབ་ཏུ་ཡོང་བ་བཟློག །དངོས་གྲུབ་ཡོང་ཁར་འཕྲོག་ཏུ་ཡོང་བ་བཟློག །ལྷར་བརྫུས་འབྱུང་པོ་ཁྱིམ་དུ་འཇུག་པ་བཟློག །མིར་བརྫུས་འབྱུང་པོ་སྒོ་རུ་རྒྱུ་བ་བཟློག །དགྲར་བརྫུས་འབྱུང་པོ་སྲང་བར་འཁྱམས་པ་བཟློག །གྲོང་རྒྱུ་འགོང་པ་སྐབས་བལྟར་འཚོལ་བ་བཟློག །ཁྱི་རྐུན་ལྟར་དུ་རྒྱལ་བསེན་ཕུག་པ་བཟློག །རྣམ་རྟོག་གློ་བུར་ཕུང་འདྲེ་ལངས་པ་བཟློག །ཕ་མེས་རྒྱས་པའི་ཕུང་འདྲེ་ལངས་པ་བཟློག །བུ་ལོན་ལན་ཆགས་ཕུང་འདྲེ་ལངས་པ་བཟློག །ཤ་འཁོན་ལངས་པའི་ཕུང་འདྲེ་ལངས་པ་བཟློག །གསང་སྔགས་ཐོག་སེར་ཐོག་ལྟར་འཕེན་པ་བཟློག །མུ་སྟེགས་རྭ་ཟར་སྤྲིན་ལྟར་འཐིབས་པ་བཟློག །རྒྱ་ནག་གཏོར་ཟོར་སེར་ལྟར་འབེབས་པ་བཟློག །ཞང་ཞུང་བཙོ་ཟོར་མེ་ལྟར་འབར་བ་བཟློག །སུམ་པའི་གླང་ཟོར་མཚོ་ལྟར་འཁྱིལ་བ་བཟློག །ཕུར་པའི་དཔལ་ཟོར་རྟ་ལྟར་བརྒྱུག་པ་བཟློག །ཡུངས་ཟོར་རི་གཟར་རྦབ་ལྟར་བསྒྲིལ་བ་བཟློག །མཚེ་ཡི་ཟོར་ཁ་མདུང་ལྟར་འདྲིལ་བ་བཟློག །ཁྲག་ཟོར་དཔག་ཆེན་མདའ་ལྟར་འཕེན་པ་བཟློག །དྲག་སྔགས་ཆུ་བོའི་རྒྱུན་ལྟར་འཁྲུག་པ་བཟློག །འབྱུང་བའི་བཞི་གཤེད་ཀི་ཀང་གཤེད་བཞི་བཟློག །བདུད་གཅོད་རླུང་ནག་བདུན་ཟུར་དྲུག་ཁྲམ་བཟློག །ལུས་སྲོག་དབང་ཐང་རླུང་རྟ་གུད་པ་བཟློག །འབྲེལ་བའི་འཁོན་གཞི་གཙོ་དང་སྒྲོགས་ངན་བཟློག །ཉམས་སུ་སྣང་བའི་ཆད་པ་འབེབས་པ་བཟློག །
རྣམ་བཞི་འཁོར་ལ་བར་ཆད་བྱེད་པ་བཟློག །སྔ་དགྲ་ལུས་ངག་ཡིད་ལ་དར་བ་བཟློག །ཕྱི་དགྲ་སེམས་ཤིང་གནོད་སེམས་འཆང་བ་བཟློག །རྫས་ལ་བརྐུ་ཞིང་འཕྲོག་པར་བྱེད་པ་བཟློག །ལོངས་སྤྱོད་འཁོར་ལ་གནོད་པར་བྱེད་པ་བཟློག །བརྒྱགས་ལ་བརྐུ་ཞིང་འཕྲོག་པར་བྱེད་པ་བཟློག །དཔལ་ལ་འཇབ་ཅིང་འཚེ་བར་བྱེད་པ་བཟློག །མ་ཉེས་ཉེས་ཟེར་བརྗོད་ཅིང་མནར་བ་བཟློག །འཁོར་དང་ནད་འཁྲུག་ལེ་པོའི་འཕང་ལེན་བཟློག །ཕ་ཁུའི་རྒན་སྲི་མ་བུའི་གྱུར་སྲི་བཟློག །སྐྱེས་པའི་མདའ་སྲི་ཟ་མའི་འཕང་སྲི་བཟློག །བུ་ཚའི་ཆུང་སྲི་རྣལ་འབྱོར་དམ་སྲི་བཟློག །མཚོན་སྲིས་གཏུབ་ཅིང་མདའ་སྲིས་འབུག་པ་བཟློག །ཆུ་སྲིས་འཁྱེར་ཞིང་རྡིབ་སྲིས་འཚུབ་པ་བཟློག །ལྕེབ་སྲིས་འཕྱེད་ཅིང་གཡང་ལ་ལྷུང་བ་བཟློག །འཕུང་སྲི་ལངས་ཤིང་གནམ་སྲི་ལྟུང་བ་བཟློག །གོད་སྲི་ལངས་ཤིང་རྐུན་སྲི་དར་བ་བཟློག །ཕུ་ན་མི་ཁ་རྟ་སྐད་འཚེར་བ་བཟློག །མདའ་ན་མི་ཁ་རླུང་ལྟར་འཚུབ་པ་བཟློག །ཡུལ་པའི་མི་ཁ་ཁྱི་ལྟར་ཟུག་པ་བཟློག །གླུ་ལྟར་ལེན་ཞིང་སྒྲོག་པའི་མི་ཁ་བཟློག །ཕོ་ཡི་མི་ཁ་མདའ་ལྟར་འབེན་པ་བཟློག །མོ་ཡི་མི་ཁ་བལ་ལྟར་གཡེང་བ་བཟློག །གྲོགས་པོའི་ཁ་དན་རྦབ་ལྟར་བསྒྲིལ་བ་བཟློག །གྲོགས་མོའི་སྙིང་ངན་ཆུ་རྒྱུན་ལྟ་བུ་བཟློག །ཡས་ཀྱི་བདུད་གཡོས་མས་ཀྱི་སྲི་ལངས་བཟློག །བར་གྱི་བདུད་འཁྲུགས་ཕ་ཚན་རྒྱ་འདྲེ་བཟློག །ཕུ་ནུའི་བྱོལ་ཁ་བཞད་ཀ་རྦོད་གཏོང་བཟློག །བྱུར་དུ་གང་ཆེ་སྐལ་དུ་གང་རིང་བཟློག །ལན་དུ་གང་ཆགས་ཤ་རུ་(༡༧བ)
གཉེར་བ་བཟློག །བྱ་རུ་མི་རུང་བཀྲ་རུ་མི་ཤིས་བཟློག །རྨི་ལམ་མཚན་ངན་ལྟས་ངན་བརྒྱད་སྡིག་བཟློག །མོ་ངན་མཐུ་སྡིག་གོད་ཁ་ཁ་མཆུ་བཟློག །གནོད་ཅིང་འགལ་བྱེད་སྐུ་ལ་བསྡོ་བ་བཟློག །འཐབ་རྩོད་ཚིག་རྩུབ་ངན་སྨྲས་གཏོང་བ་བཟློག །ལག་ངན་མཛུབ་མོའི་རྡེག་རྡུང་བྱེད་པ་བཟློག །རིང་ལ་བཤད་སྙོམ་མཐོ་ལ་འགྲན་སེམས་བཟློག །མཉམ་ལ་འགྲན་སེམས་བཟང་ལ་སྐྱོན་བརྗོད་བཟློག །མགྱོགས་ལ་བང་སྙོམས་ཡ་རབས་རྒྱུད་པ་བཟློག །མཁས་ལ་སྨོད་ཅིང་དམངས་ལ་བསྟོད་པ་བཟློག །བླ་མ་རྡོ་རྗེ་སློབ་དཔོན་སྐུ་དགྲ་བཟློག །རྣལ་འབྱོར་སྒོས་དགྲ་སྔགས་པའི་སྤྱི་དགྲ་བཟློག །མང་པོས་འཐིབ་བརྫིས་ཁ་དྲག་ཟས་ཟོས་བཟློག །དཔུང་པའི་ཚོང་ཟོར་མི་རན་ཆས་ཆོད་བཟློག །མ་ཆགས་བུ་ལོན་འདེད་པ་ཁྱད་གསོད་བཟློག །བརླབ་ཚིག་གཤགས་འདེབས་རྒྱབ་བསྟན་མནའ་ཟ་བཟློག །གཡོ་སྒྱུ་ཟོལ་ཟོག་ཕྲ་མ་འཛུད་པ་བཟློག །ངོ་ཚ་ཁྲེལ་འཛེམ་མེད་པའི་ངན་རྙོག་བཟློག །ལང་དུ་ཤོར་བའི་ཟ་འདོད་ཆུད་ཟོས་བཟློག །འདོད་གཏམ་ལྟ་བའི་ཆུང་ཚད་ཆོད་པ་བཟློག །སྐབས་འཆོལ་རྐྱེན་སྙོམས་གླེགས་པུ་རེ་བ་བཟློག །མཐོ་བའི་ལ་ལ་བརྒལ་དབང་མེད་པ་བཟློག །དམའ་བའི་ཆུ་ལ་བརྒལ་དབང་མེད་པ་བཟློག །དབང་མེད་སྡིག་རྡུང་སྡིག་ལ་བྱེད་པ་བཟློག །གཉའ་གནོན་ཁ་ལ་འགུལ་དབང་མེད་པ་བཟློག །ཐུགས་ལ་ཆགས་ཤིང་བླ་ལ་ཉེ་བ་བཟློག །དགྲ་ལ་གཡག་རྡུང་བྱེད་དོ་ཟེར་བ་བཟློག །ཕ་དང་མེས་པོ་རྒས་སུ་མི་སྟེར་བཟློག །བུ་དང་ཚ་འོ་འཚར་དུ་མི་སྟེར་བཟློག །ངན་པའི་སེམས་བློ་བདེ་རུ་མི་སྟེར་(༡༨ན)
བཟློག །གཡོག་དང་འཁོར་རྣམས་སྐྱིད་དུ་མི་སྟེར་བཟློག །ལོངས་སྤྱོད་བསོད་ནམས་རྒྱས་སུ་མི་སྟེར་བཟློག །མནོལ་དང་མི་དམེ་རིགས་བརྒྱུད་འཆལ་བ་བཟློག །རྟ་རྟོད་ལ་རྒྱུག་ལུང་རྒྱུག་ཟེར་བ་བཟློག །ལ་དེད་འཕྲང་དེད་ལུང་འགེགས་ཟེར་བ་བཟློག །ལ་རྒྱུག་འཕྲང་བསྐྱིལ་ཟེར་བ་ཐམས་ཅད་བཟློག །སྐབས་ལྟར་གླགས་ཚོལ་སྒོ་རུ་སྲང་ཚག་བཟློག །སྲོད་ཀྱི་འཇབ་བུ་གུང་གི་ཧུར་ཐུམ་བཟློག །ཐོ་རངས་རྒྱུ་བའི་བསམ་སྦྱོར་ངན་པ་བཟློག །ཐུབ་ཚད་འགྲན་འཚོལ་ཟ་འདོད་སྙད་འཚོལ་བཟློག །ཀུ་རེ་ཀྱལ་ཀ་དགུག་པའི་རྔན་ཆན་བཟློག །འཁོན་གྱི་བསམ་པས་འཐབ་ཁ་སྙད་འཚོལ་བཟློག །མི་ཐུབ་རྩིས་པའི་བརྙས་བཅོས་ཁྱད་གསོད་བཟློག །མི་ནད་ཕྱུགས་ནད་ཕ་རོལ་དམག་དཔུང་བཟློག །མེ་ཆུ་དུག་མཚོན་མུ་གེ་ལྕེ་འབབ་བཟློག །གཅན་གཟན་འཇིགས་པ་སྒྲ་དང་ས་གཡོས་བཟློག །ལྷ་ཀླུ་ཐོག་སེར་དུས་མིན་འཆི་བ་བཟློག །སྐར་མདའ་རྒྱལ་པོའི་ཆད་པས་འཇིགས་པ་བཟློག །གནམ་གྱི་བྱ་ཐན་ས་ཡི་བྱི་ཐན་བཟློག །སད་སེར་ཐན་པ་བཙའ་འབུ་ཁ་བ་བཟློག །དྲུག་ལྷག་ཤོ་རེ་མི་ཡི་ཐན་པ་བཟློག །མནའ་ཁ་རྒྱུ་ལུག་ཕྱུགས་ཀྱི་ཐན་པ་བཟློག །གནམ་ལ་དལ་བབས་ས་ལ་སྲི་ལངས་བཟློག །གདགས་ལ་བྲག་རལ་སྲིབས་ལ་ཤིང་ཆག་བཟློག །ཤ་ཕོ་རུ་འཛིངས་བྱ་རྒོད་སྡེར་འཛིངས་བཟློག །གཡག་པོ་རུ་འཛིངས་ཉ་མོ་རྔ་འཛིངས་བཟློག །སྲེག་པ་ཁྱིམ་ཞུགས་སྦྲུལ་ཆེན་ལམ་ཉལ་བཟློག །བྱི་ལ་ལམ་སྟོར་སྦྲེ་མོ་སྐད་འཚེར་བཟློག །ཕུགས་ན་ར་སྦྲིད་སྒོ་ན་ཁྱི་ངུ་བཟློག །སྲིན་བྱ་རྒོད་ཅིང་(༡༨བ)
བྱ་རོག་འཕྲལ་བ་བཟློག །གླ་བའི་སྦར་འཛིངས་འུག་པའི་གད་མོ་བཟློག །རྒྱུད་ཀྱི་འཁྲུལ་འཁོར་རྫས་ཀྱི་སྦྱོར་བ་བཟློག །མུ་སྟེགས་ངན་སྔགས་རྒྱ་ནག་རྩིས་ཁ་བཟློག །ཉན་ཐོས་སྤར་ཁ་ས་བདག་གཏད་ཁྲམ་བཟློག །ལྷ་ཆེན་གདུག་པའི་ངན་སྔགས་སྤྲུལ་པ་བཟློག །མ་མོའི་དལ་ཡམས་གནོད་སྦྱིན་ཁྲམ་ཁ་བཟློག །འགོང་པོའི་གོད་ཁ་རྒྱལ་པོའི་སྨྱོ་འབོག་བཟློག །དམུ་ཡི་འཐིབས་ནད་བཙན་གྱི་གཟེར་ནད་བཟློག །ཀླུ་ཡི་མཛེ་ནད་བདུད་ཀྱི་ཁྲམ་ཁ་བཟློག །ཧོར་གྱི་ན་ཁ་མོན་གྱི་ཁྲ་མ་བཟློག །བོད་ཀྱི་སྐྱོ་མ་ནག་མོའི་མཆུ་སྡུར་བཟློག །བྲན་གཡོག་འོག་མི་དཔོན་དུ་གྱུར་པ་བཟློག །མཁར་ལ་ཏོག་ཐོགས་ཁྱིམ་པ་དགྲར་ལངས་བཟློག །ཕྱུགས་ལ་ཞགས་ཐོགས་མི་ལ་མཚོན་ཐོགས་བཟློག །ནོར་དང་འབྲུ་ལ་བྲ་དང་ཕད་ཐོགས་བཟློག །ཟས་སྦྱོར་དུག་གསོད་གཉེན་བྱས་དགྲར་ལངས་བཟློག །གཙང་ཆུ་ཤྭ་བརྒལ་སྒོ་རུ་འཁྲུག་པ་བཟློག །བགེགས་རིགས་སྟོང་ཕྲག་བརྒྱད་ཅུ་རྩ་བཞི་བཟློག །ནད་སྣ་བརྒྱད་ཅུ་རྩ་བཞི་སྤྲིན་འཐིབ་བཟློག །གློ་བུར་བརྒྱད་ཅུ་རྩ་བཞིའི་རླུང་གཡོས་བཟློག །ཡེ་འབྲོག་སུམ་བརྒྱ་དྲུག་ཅུ་རྩ་བཞི་བཟློག །རྐྱེན་ངན་ཉི་ཁྲི་ཆིག་སྟོང་ཐོ་དྲུག་བཟློག །གསོད་ཐབས་བརྒྱད་ཅུ་རྩ་བཞི་གློག་འཁྱུག་བཟློག །དུས་མིན་འཆི་བ་བཅོ་བརྒྱད་ཐོག་སེར་བཟློག །ངན་དགུ་སྡིག་བཅུ་བར་བཅད་ཐམས་ཅད་བཟློག །ཕོ་བདུད་དལ་ཁ་ཐམས་ཅད་གཡས་སུ་སྒྱུར། །མོ་བདུད་དལ་ཁ་ཐམས་ཅད་གཡོན་དུ་སྒྱུར། །སྤྱི་བདུད་དལ་ཁ་ཐམས་ཅད་མཁའ་ལ་སྒྱུར། །བཟློག་སྒྱུར་བཅོལ་བའི་འཕྲིན་ལས་གྲུབ་པར་མཛོད། །སརྦ་པཱ་པཾ་སརྦ་དུ་ཏྲི་མཱ་ར་ཡ་བཟློག་བཟློག །བྷྱོ། གནོད་(༡༩ན)
བྱེད་རྦོད་ཟེར་སརྦ་ཨ་པ་ན་ཡ་བཟློག་བཟློག །ཅེས་བརྒྱ་ལ་སོགས་པ་བཟླས་སོ། །བདག་དམོད་པ་དུག་མཚོ་ཁོལ་བ། ལ་གནོད་བྱེད་དགྲ་བགེགས་ངན་པ་འདི། ཁ་དྲག་ཟ་ཞིང་དཔུང་པ་འཚོང་བ་འདི། །རྨད་པོ་མཐེབས་ཀྱིས་བརྫིས་ནས་སྣང་བ་འདི། །མཛའ་བོ་སླུ་བྱེད་རྨས་སུ་འཛུད་པ་འདི། །དམངས་ཀྱི་བདེན་པ་ཁྱད་དུ་གསོད་པ་འདི། རྫུན་གྱི་སྙད་ཀྱིས་བུ་ལོན་འཕྲོག་པ་འདི། །མནར་སེམས་བཅངས་ནས་སྦྱོར་རྩུབ་བྱེད་པ་འདི། །བླ་མའི་སྐུ་དགྲ་སེམས་ཅན་སྤྱི་དགྲ་འདི། །དཀོན་མཆོག་གསུམ་གྱི་དབུ་འཕང་དམོད་པ་འདི། །བསྒྲལ་བའི་ཞིང་བཅུར་གྱུར་པའི་དགྲ་བོ་འདི། །གནོད་བྱེད་འགལ་བྱེད་སྡང་ཞིང་གདུག་པ་འདི། །མཛའ་བོ་རྣམས་དང་ཕྲ་མ་འཛུད་པ་འདི། ཁྲོ་ཞིང་རྩུབ་པས་སྐུ་ལ་བསྡོ་བ་འདི། །ཕ་ཡི་ཞིང་བཅུར་གྱུར་པའི་སྒོས་དགྲ་འདི། །མ་ཉེས་སྒྲོག་ངན་སྐུར་པ་འདེབས་པ་འདི། །མཛའ་བོའི་ནོར་དང་གཟུངས་མ་བརྐུ་བ་འདི། །བརླང་དང་ཚིག་རྩུབ་ཁ་གསག་སྨྲ་བ་འདི། །རིང་ལ་སྙོབ་ཅིང་ཟས་གོས་འཕྲོག་པ་འདི། །མ་ཉེས་ཉེས་ཟེར་སྒྲུབ་ལ་འཚེ་བྱེད་འདི། །ངན་སྨྲས་གཏོང་ཞིང་ལག་ངན་རྡེག་པ་འདི། །ང་རྒྱལ་གཉའ་གནོན་ཐོག་རྫིས་བྱེད་པ་འདི། །གྲགས་དང་ལོངས་སྤྱོད་བསྙེན་བཀུར་འདྲེན་པ་འདི། །ཕྲག་དོག་ཁ་འཇམ་ཞེ་ནས་དམོད་པ་འདི། །རྣམ་བཞི་འཁོར་ལ་བར་དུ་གཅོད་པ་འདི། །ངན་སེམས་གནོད་སྐྱེལ་བྱེད་པ་འདི་དག་ལ། །བདེན་པ་རྫུན་པ་གཉིས་ཀྱི་གཤགས་ཕྱེ་ཞིག །དམ་ཚིག་རྫས་ཆོད་ལེགས་ཉེས་སྟངས་བཟུང་ཞིག །སྨྲས་པ་ཐམས་ཅད་(༡༩བ)
ཉོན་ཞིག་གཏང་སར་རྒྱུག །མ་གཡེལ་མ་གཡེལ་དམ་ཅན་རྒྱ་མཚོའི་ཚོགས། །བཅོལ་ལོ་གཏད་དོ་སྔགས་བདག་གཉན་པོ་ལ། །བསྐུལ་ལོ་ཟད་དོ་བསྐོར་རོ་མཐུ་མ་ཆུང་། །བོས་སོ་གཡབ་བོ་སྲུང་མ་སྤྱན་མ་བརྟུལ། །དགྲ་བགེགས་དགུ་བརྒྱུད་ཆོད་ཅིག་རྩལ་མ་ཞན། །དམ་ཚིག་ལྟོས་ལ་ཤོ་རྡེའུ་དཀར་ནག་ལྟོས། ཁྲམ་ལ་ཐོབ་ལ་བྱང་མར་དཀྱུས་ལ་བྲིས། །ཐུགས་ནག་ཚོངས་ལ་ནད་རྐྱལ་ཁ་ཕྱེ་ཞིག །ཀླད་ནད་གཟེར་ནད་མཁྲིས་ནད་མིག་སེར་ཕོབ། །འདུས་རང་ཞིག་པ་རླུང་ནད་གཡོ་བ་ཕོབ། །ཁྲག་ནད་ཚ་གཟེར་ཚ་ནད་ཁོལ་བ་ཕོབ། །བད་ཀན་འཁྱིལ་པ་མཁལ་ནད་སུཪྻ་ཕོབ། །མགོ་ནད་འཁོར་བ་མཛེ་ནད་སྐྲངས་འབུར་ཕོབ། །ལྷོག་པ་གག་པ་སྨན་ལྕགས་ཡོ་མོ་ཕོབ། །རྒྱུ་གཟེར་ཁྲག་འཇག་དུམ་ཆུ་སྐྱ་བབ་ཕོབ། །ཚད་པ་མགོ་ཡོར་གྲང་ནད་གཞང་འབྲུམ་ཕོབ། །སྨྱོ་ནད་སྙིང་རླུང་འབོག་ནད་སྙིང་འགས་ཕོབ། །མཛེ་ནད་གཞོགས་སྐམ་ཤུ་བ་གཡན་པ་ཕོབ། །སྦུས་རེ་ཐེར་ཆད་གཡའ་རི་དུམ་བུ་ཕོབ། །གྲི་སྲི་ཡུ་དམར་མདའ་སྲི་ལྟོང་དམར་ཕོབ། །རྦབ་སྲི་བཅར་ཕོག་ཆུ་སྲི་འདར་ཤད་ཕོབ། །མཚོན་སྲི་ལྕག་ཆེན་ལྕེབ་གྲིས་འགྱེག་པ་ཕོབ། །བསྲུང་བའི་རྒྱབ་ཕྲོལ་མཆེས་པའི་ལྷ་དང་ཕྲོལ། །སྲུང་བྱེད་ལེ་དགུ་འགོ་བའི་སྨན་དང་ཕྲོལ། །སྡོད་པའི་གནས་ཕྲོལ་དབང་བའི་ནོར་དང་ཕྲོལ། །རྒྱུ་བའི་ཡུལ་ཕྲོལ་མཐུན་པའི་གྲོགས་དང་ཕྲོལ། །འཚོ་བའི་ཟས་ཕྲོལ་ལུས་སྲོག་གཉིས་པོ་ཕྲོལ། །འོག་ནས་གྲང་བ་ཆུ་ལྟར་འཁྱིལ་དུ་ཆུག །སྟེང་ནས་ཚ་བ་ཉི་ལྟར་སྲེག་ཏུ་ཆུག །བར་ནས་ཚ་གྲང་རླུང་ལྟར་(༢༠ན)
འཁྲུག་ཏུ་ཆུག །གནམ་གྱི་འཇུ་ཐག་སྟེང་ནས་ཆོད་ལ་ཐོང་། །ས་ཡི་རྟེན་ཕུར་འོག་ནས་ཕྱུངས་ལ་ཐོང་། །དྲན་རིག་ཀུན་གཞི་བར་དོར་ཆུག་ལ་ཐོང་། །ལུས་ལ་གནམ་ལྕགས་མེ་ཆེན་སྤོར་དུ་ཆུག །ཁ་ནས་གྱོད་གཏམ་དགྲ་ངན་འདོན་དུ་ཆུག །ངུ་འབོད་སྨྲེ་སྔགས་བྲང་ལག་འཐབ་ཏུ་ཆུག །ལས་ཀྱི་རླུང་གིས་རྒྱབ་ནས་མྱུར་དུ་ཕུལ། །འཇིགས་པའི་མུན་ནག་ཆེན་པོས་མདུན་ནས་སུས། །ལུས་སྲོག་དབང་པོ་རྣམ་ཤེས་རྟེན་དང་ཕྲོལ། །ནོར་ལ་གོད་ཁ་སྐྱིད་ལ་རྐེད་ཆོད་ཐོང་། །ཕོ་ཡི་དཔལ་ཕྲོགས་མོ་ཡི་དབང་ཐང་ཕྲོལ། །ནོར་གྱི་གཡང་ཕྲོལ་ཟས་ཀྱི་བཅུད་ཕྲོགས་ཤིག །བྱ་རུ་མི་རུང་བཀྲ་རུ་མི་ཤིས་ཐོང་། །དར་བཞི་སྲང་གསུམ་བཞི་མདོར་འཁྱམ་དུ་ཆུག །ཤ་ཁྲག་ལྷུ་བཞི་ཁྱི་ཡིས་མུར་དུ་ཆུག །རྐང་ལག་ལམ་འཕྲང་བཞི་མདོར་འགོམ་དུ་ཆུག །བཀའ་ཆད་ཕོབ་ཅིག་སྙིང་ཁྲག་སྐྱུག་ཏུ་ཆུག །ཡན་ལག་ཆིངས་ཤིག་པགས་ཤུས་མགོ་བོ་ཆོད། །བརླ་བཞི་ཕྲོལ་ཞིག་དོན་སྙིང་དམར་པོ་ཕྱུངས། །རྩ་རྒྱུས་ཆོད་ལ་ཁོང་ཁྲག་ལོང་དུ་ལྷུག །ཤ་ཟོ་ཁྲག་འཐུང་རྐང་ལྡོག་ལྷ་བ་འཇིབས། །ཀླད་པ་ལྡག་ཅིང་རུས་པ་མུར་དུ་ཆོས། །པགས་ཆེན་སོལ་ཞིག་བསྲེག་པའི་གསུར་ལ་སྣོམས། །ཕོ་རྒྱུད་མོ་རྒྱུད་རིགས་བརྒྱུད་རྩད་ནས་ཆོད། །རྡོ་ཡིས་སྲན་ཕུང་གཏོར་བཞིན་ཕྱོགས་བཅུར་གཏོར། །མེ་སྟག་ཆུ་ལ་ཡར་བཞིན་ཙད་མེད་ཐོང་། །བྱ་སྒྲོ་མེ་ཡིས་བསྲེགས་བཞིན་བརླག་པར་མཛོད། །ཡོན་བདག་སྒྱུ་མ་འདི་ལ་བརྙས་མ་འདོགས། །ནུས་པ་ཕྲན་ཚེགས་ཙམ་ལ་རྩིས་མ་བྱེད། །ནམ་མཁའ་སྟོང་པ་འདི་ལ་ཚད་(༢༠བ)
མ་འཛུགས། །དགྲ་བགེགས་འདི་ཡི་སྐྱེ་ཤི་ཁུངས་ཕྱུང་ཞིག །དགྲ་དཔུང་ཐམས་ཅད་རྩད་ནས་མྱུར་དུ་ཆོད། །བདུད་དཔུང་ཐམས་ཅད་བསྒྱུར་ཞིང་རྗེས་མེད་ཐོང་། །སྡང་དགྲ་གནོད་བགེགས་འབྱུང་པོ་དམ་སྲི་རྣམས། །ཐལ་བའི་རྡུལ་དུ་བརླག་པའི་འཕྲིན་ལས་མཛོད། །གསེར་སྐྱེམས་བཏང་ལྷ་བཏེག་ཅིང་བསྡུས། གཟུགས་སྒྱུར་བྱེད། སྒོ་དབྱེ་ནི། ཡིག་རྙིང་། བཅོམ་ལྡན་ཁྲོ་རྒྱལ་རྟ་མགྲིན་ལ། །དོ་ནུབ་ཟོར་གྱི་ལས་གཞོལ་གྱིས། །ཟོར་འཕངས་སླད་ལ་ལོག་པར་མཆིའོ། །གཉེན་བྱས་དགྲ་རུ་སོང་བར་མཆིའོ། །བྱས་ལ་དེ་ནས་ཟོར་ལམ་དབྱེ་སྟེ། སྒོ་བ་རྣམས་ནི་སྒོ་ཕྱེ་ཞིག །འཕྲང་པ་རྣམས་ཀྱིས་འཕྲང་སོལ་ཅིག །བདག་ནི་རྣལ་འབྱོར་སྒྲུབ་པ་པོ། །སྒྲུབ་པ་པོ་ལ་དགྲ་བྱུང་གི །ཁྲོ་བོའི་རྒྱལ་པོས་ར་མདའ་སློག །ཆོས་སྐྱོང་སྲུང་མས་ར་མདའ་སློག །སྲིན་པོའི་ཡུལ་དུ་དམག་འདྲེན་གྱིས། །དམག་དཔོན་ཡེ་ཤེས་ལྷ་ཡིས་མཛོད། །དམག་དཔོན་ཆོས་སྐྱོང་སྲུང་མས་མཛོད། །སྟེང་གི་ལྷ་ལ་མི་འཕེན་ནོ། །འོག་གི་ཀླུ་ལ་མེ་འཕེན་ནོ། །བར་གྱི་བཙན་ལ་མི་འཕེན་ནོ། །མཐོ་བ་རྣམས་ཀྱང་ཞབས་སྡུས་ཤིག །དམའ་བ་རྣམས་ཀྱང་དབུ་ཆུམས་ཤིག །བར་པ་རྣམས་ཀྱང་སྐུ་གཟུར་ཞིག །ཟོར་ལམ་ཆེན་པོ་ཁྱེད་ཀྱིས་ཕྱེ། །ད་ནི་གཤེགས་སོ་ཤར་ར་ར། །ཞེས་སོགས་བརྗོད། ཡས་མར་མཆོད་པ། ཆད་མཐོ་བཏང་། ཟོར་འཕེན་སར། གསེར་སྐྱེམས་གཟུ་དཔང་། རྒྱས་པར་སྤྲོ་ན་གོང་གི་དམོད་མཚོ་ཁོལ་མ་བྱས་ཀྱང་ཆོག །གཏོར་ཟོར་འཕང་བ་ནི། ཡིག་རྙིང་། དང་པོ་གཏི་མུག་ཐིབས་ཀྱིས་བསྐྱེད། །དེ་ནས་(༢༡ན)
ཞེ་སྡང་ཕ་ཡིས་བསྐྱེད། །དེ་ནས་དྲི་ཟ་ལྟེ་བར་འཁོར། །ཕུང་ལྔ་རྩད་ནས་བཅད་པའི་ཕྱིར། །ལྟེ་བའི་དཀྱིལ་དུ་གཏོར་ཟོར་ཡ། །རྣམ་རྟོག་རྩད་ནས་བཅད་པའི་ཕྱིར། །སྙིང་གི་དཀྱིལ་དུ་གཏོར་ཟོར་ཡ། །དྲན་པ་ཉམས་པར་བྱ་བའི་ཕྱིར། །ཀླད་པའི་རྒྱས་སུ་གཏོར་ཟོར་ཡ། །ལྟ་བའི་རྟེན་དང་བྲལ་བའི་ཕྱིར། །མིག་གི་དཀྱིལ་དུ་གཏོར་ཟོར་ཡ། །སྨྲ་བའི་རྟེན་དང་བྲལ་བའི་ཕྱིར། །མགྲིན་པའི་གནས་སུ་གཏོར་ཟོར་ཡ། །འདུ་བྱེད་ལས་དང་བྲལ་བའི་ཕྱིར། །དཔུང་མགོ་གཉིས་ལ་གཏོར་ཟོར་ཡ། །སྲིད་པ་རྩད་ནས་བཅད་པའི་ཕྱིར། །གསང་བའི་གནས་སུ་གཏོར་ཟོར་ཡ། །འགྲོ་བའི་རྟེན་དང་བྲལ་བའི་ཕྱིར། །བརླ་འོག་གཉིས་ལ་གཏོར་ཟོར་ཡ། །གཏོར་མ་དུག་གི་རང་བཞིན་གྱིས། །བགེགས་རྣམས་དྲན་པ་ཉམས་པར་བྱེད། །གཏོར་མ་མེ་ཡི་རང་བཞིན་པས། །བགེགས་རྣམས་ཐམས་ཅད་ཐལ་བར་བསྲེག །བསྙེན་སྔགས་གཤམ་དུ་ཐུམ་རིལ་ཧ་ན་ཧ་ན་ཙིཏྟ་ལ་བྲེང་ཤག་རྦད། ཧྲཱིཿ བྷྱོ་བྷྱོ། སྤུ་གྲི་རིང་མོ་བཟླ། མཚན་ངན་ཐོད་པའི་སྣོད་ནང་དུ། །དམར་ཆེན་རཀྟ་ལ་སྦྱར་བའི། །ཡུངས་ཡིག་རྙིང་། ཀར་ཟོར་འཕེན་ཤར་ར་ར། །མཚེ་ཡི་ཟོར་འཕེན་སིལ་ལི་ལི། །ཡུངས་མོ་ཟོར་འཕེན་ཐབས་སེ་ཐབ། །སྦྱོར་བ་ངན་པ་གཏོང་བ་ལ། །སྡང་བའི་དགྲ་དང་གནོད་བགེགས་འདི། །དང་པོ་ཞེ་སྡང་ཕ་ཡིས་བསྐྱེད། །བར་དུ་འདོད་ཆགས་ མ་ཡི་མངལ། །ཐ་མ་དྲི་ཟ་ལྟེ་བར་འཁོར། །ལྔ་ཕུང་རྩད་ནས་བཅད་པའི་ཕྱིར། །ཀླད་པའི་རྒྱས་སུ་ཁྲག་ཟོར་ཡ། །སྙིང་(༢༡བ)
གི་དཀྱིལ་དུ་༴། །སྲོག་གི་སྒོ་རུ་༴། །སྲོག་རྩའི་སྦུབས་སུ་༴། །གློ་བའི་དཔྲལ་དུ་༴། །མཆིན་པའི་སྦུབས་སུ་༴། །མཆེར་པའི་སྒང་ལ་༴། །རྒྱུ་མའི་དཀྱིལ་དུ་༴། །མཁལ་མའི་གློ་རུ་༴། །ལྟ་བའི་མིག་ལ་༴། །སྣམ་པའི་སྣ་ལ་༴། །སྨྲ་བའི་ལྕེ་ལ་༴། །ཉན་པའི་རྣ་བར་༴། །སེམས་པའི་སྙིང་༴། །ཚོར་བའི་ལུས་ལ་༴། །འོག་གི་རྟ་ལ་༴། །བར་གྱི་ནོར་ལ་༴། །ཕུགས་ཀྱི་སྲིས་ལ་༴། །སྒོ་ཡི་ཁྱི་ལ་༴། །འོག་གི་ཆུང་མར་༴། །མཆན་གྱི་བུ་༴། །ཡུལ་མཁར་ཁྱིམ་ལ་༴། །རྩི་སྣར་ཞིང་ལ་༴། །གནམ་གྱི་འཇུ་ཐག་སྟེང་ནས་ཆོད། །ས་ཡི་རྟེན་ཕུར་འོག་ནས་ཕྱུངས། །བཀའ་ཡི་ཆད་པ་མྱུར་དུ་ཕོབ། །ཧྲཱིཿཧ་ཡ་གྷྲི་བ་རཀྴ་རྦད། ཐུད་སོད། པདྨཱནྟ་ཀྲྀ་ཏ་དགྲ་བོའི་སྙིང་ལ་ཐུན་རྦད། མ་མ་རཀྵ་དགྲ་བོའི་སྙིང་ལ་ཐུར་རྦད། ཏྲག་མོ་ཚལ་དུན་སྙིང་ལ་ཁོས་རྦད། ཀྲོ་ཏ་རཀྵ་དགྲ་བོའི་སྙིང་ལ་རྦད། ཐུན་མཱ་ར་ཡ་རྦད། ཐུམ་རིལ་ཧ་ན་ཧ་ན་བྷྱོ་བྷྱོ། ཐུམ་རིལ་ཧ་ན་ཧ་ན་ཙིཏྟ་ལ་བྲམ་ཤག་རྦད་ཧྲི་བྷྱོ་བྷྱོ། ཡུངས་ཟོར་ནི། གནོད་སྦྱིན་རྒྱལ་པོ་ཁྲོས་པའི་སོགས་དཀྱུས་ལྟར། གཏོར་ཆེན་འཕང་བ་ནི། གསར་སྒྲིགས། ནག་པོ་ལྕགས་ཀྱི་སྣོད་ཡངས་པར། །དཔལ་གྱི་དམར་ཆེན་གཏོར་མ་ལ། །མཚེ་ཡུངས་རྩང་སོགས་རྒྱན་གྱིས་སྤྲས། །དབང་ཆེན་ཁྲག་འཐུང་རོལ་པའི་ཟོར། །ཐོག་མཚོན་དུག་ནད་འཚུབ་མ་འདི། །དགྲ་དང་བགེགས་ཀྱི་སྟེང་དུ་བརྡེག །བྱད་ཕུར་ཆགས་ཆེ་བར་ཆད་བཟློག །གནོད་བྱེད་ཐལ་བའི་རྡུལ་དུ་རློག །དྲག་སྔགས་སྤུ་གྲི་རིང་མོ་དང་། །བཟློག་སྔགས་སོགས་ཅི་རིགས་བརྗོད་ལ་བརྡེག །ཐལ་མོ་བརྡབ་ཅིང་(༢༢ན)
དམོད་མོ་བྱ། །མེ་ཆུའི་རྒྱས་འདེབས་ནི། ཧཱུཾ། ཡིག་རྙིང་། དང་པོ་ཆོས་ཀྱི་དབྱིངས་ཀྱི་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །བཞི་པ་ཚད་མེད་བཞི་ཡི་རྒྱ། །ལྔ་པ་ཡེ་ཤེས་ལྔ་ཡི་རྒྱ། །དྲུག་པ་རིགས་དྲུག་སངས་རྒྱས་རྒྱ། །བདུན་པ་མ་མོ་ཀུན་གྱི་རྒྱ། །བརྒྱད་པ་རྣམ་ཐར་བརྒྱད་ཀྱི་རྒྱ། །དགུ་པ་ཐེག་པ་རིམ་དགུའི་རྒྱ། །བཅུ་པ་ཁྲོ་བོ་བཅུ་ཡི་རྒྱ། །ང་ཡི་རྒྱ་ལས་མ་འདའ་ཞིག །བཤལ་ཆུས་བསྟན་མ་བསྐྱང་། སྒོ་དྲུག་བྲོ་བརྡུང་། ནང་དུ་ལོག་ནས་ཚེ་འགུགས་ནི། ཡིག་རྙིང་། བཅོམ་ལྡན་མགོན་པོ་ཚེ་དཔག་མེད། །སྐུ་མཆོག་མཚན་དཔེས་བརྒྱན་པའི་སྐུ། །གསུང་མཆོག་ཡན་ལག་དྲུག་ཅུའི་གསུང་། །ཐུགས་མཆོག་མི་རྟོག་པ་ཡི་ཐུགས། །མཁའ་འདྲའི་སྐུ་གསུང་ཐུགས་མངའ་བ། །ཚེ་དཔག་མེད་ལ་ཕྱག་འཚལ་བསྟོད། །རྡོ་རྗེའི་ཚེ་མཆོག་འགུགས་པའི་ལས་མཛོད་ཅིག །རྡོ་རྗེ་ཚེ་ཡི་དངོས་གྲུབ་སྩལ་དུ་གསོལ། །ཨོཾ་པུཎྱེ་པུཎྱེ་མ་ཧཱ་པུཎྱེ་ཨ་པ་ར་མི་ཏ་ཨཱ་ཡུཿཔུཎྱེ་ཛྙཱ་ན་སམྦྷ་རོ་པ་ཙི་ཏེ་སྭཱ་ཧཱ། ཨོཾ་བཛྲ་ཨཱ་ཡུ་ཥེ་ཧཱུཾ་ཨཱཿ ཨོཾ་ཨཱ་ཡུརྫྙ་ན་སིདྡྷི་བྷྲུཾ། ཧཱུཾ། འགུགས་པའི་ལྷ་མོ་ལྕགས་ཀྱུ་མ། །དཀར་མོ་མཛེས་མ་ལྕགས་ཀྱུ་བསྣམས། །དྲི་ཟའི་ལག་ནས་ཚེ་ཁུག་ལ། །མེ་ལྷའི་ལག་ནས་དཔལ་སྐྱོབས་ཤིག །སྔགས་འགྲེ། ཧཱུཾ། འཆིང་བྱེད་ལྷ་མོ་ཞགས་པ་མ། །སྔོན་མོ་མཛེས་མ་ཞགས་པ་བསྣམས། །གཤིན་རྗེའི་༴། །སྲིན་པོའི་༴། །སྔགས་འགྲེ། ཧཱུཾ། སྡོམ་བྱེད་ལྷ་མོ་ལྕགས་སྒྲོག་མ། །དམར་མོ་མཛེས་མ་ལྕགས་སྒྲོག་བསྣམས། །ཀླུ་དབང་༴། །རླུང་ལྷའི་༴། །སྔགས་འགྲེ། ཧཱུཾ། འབེབས་(༢༢བ)
བྱེད་ལྷ་མོ་དྲིལ་བུ་མ། །ལྗང་གུ་མཛེས་མ་དྲིལ་བུ་བསྣམས། །གནོད་སྦྱིན་༴། །འབྱུང་པོའི་༴། །སྔགས་འགྲེ །ཁྲོ་རྒྱལ་རྔམས་སོགས་ཀྱིས་དངོས་གྲུབ་བླང་། གཏང་རག་ནས་ཤིས་བརྗོད་ཀྱི་བར་ལས་བྱང་གི་དཀྱུས་བཞིན་བྱའོ། །གསང་རྒྱུད་སྙིང་པོ་རྒྱལ་དབང་པདྨ་དང་། །བཻ་རོའི་དགོངས་དོན་དམར་ཆེན་ཟོར་གྱི་ལས། །མན་ངག་ཐོར་བུར་བཞུགས་པ་ཕྱོགས་འདི་ལ། །མཁས་ཤིང་སྦྱངས་པས་གསལ་བྱེད་ཟིན་བྲིས་མཛད། །འོན་ཏེ་འགྲོ་རྣམས་བློ་གྲོས་རིམ་གྱིས་དམན། །ཕྱག་ལེན་འཁྲུགས་བསྡེབས་མན་ངག་རྟོགས་པ་ ཉུང་། །གསར་མའི་ལྷད་བྲལ་རང་སྐད་ཤེས་པ་དཀོན། །དེ་ཕྱིར་འཁྲུལ་སྤོང་བཀླགས་ཆོག་ཚུལ་དུ་བཀོད།། སྔ་འགྱུར་བཀའ་གཏེར་སྤྱི་དང་བྱེ་བྲག་གི །རྒྱུད་དང་ཕྱག་བཞེས་མན་ངག་དུ་མའི་གནད། །ཡོངས་འཛིན་དྲིན་ལས་རྙེད་ཕྱིར་ལེགས་བཀོད་ཀྱིས། །མགལ་དུམ་ཕྲེང་བར་སྤེལ་བའི་ཟོག་ཆོས་མིན། །དགེ་འདིས་རྟ་སྐད་ཐེངས་གཅིག་ཀ་དག་ལམ། །བསྐྱེད་རྫོགས་ཟུང་དུ་འཇུག་པའི་རྣལ་འབྱོར་ལ། །བརྟེན་ནས་འཕྲིན་ལས་རྣམ་བཞི་ལྷུན་གྲུབ་ཅིང་། །དབང་ཆེན་ཀུན་བཟང་ཚེ་འདིར་མངོན་གྱུར་ཤོག །པདྨ་གསུང་གི་མཐུ་སྟོབས་ཉིན་བྱེད་ཀྱིས། །བདུད་བཞིའི་དཔུང་ཚོགས་སྨག་རུམ་མཐར་བྱས་ཏེ། །མཆོག་དང་ཐུན་མོང་དངོས་གྲུབ་འོད་སྣང་གིས། །འཇིག་རྟེན་གསུམ་པོ་ཁྱབ་པའི་བཀྲ་ཤིས་ཤོག །ཅེས་དབང་ཆེན་ཡང་གསང་ལྷ་དགུའི་སྒོ་ནས་དྲག་པོ་ཟོར་གྱི་འཕྲིན་ལས་རྡོ་རྗེའི་ཕ་ལམ་འདི་ནི་མཆོད་དཔོན་(༢༣ན)
ངག་དབང་ཤེས་རབ་ཀྱིས་བསྙེན་ཆེན་བཏང་བའི་ཚེ་ཆོག་སྒྲིགས་དགོས་ཚུལ་ལྟར་ཟ་ཧོར་གྱི་སྔགས་སྨྱོན་ཟིལ་གནོན་བཞད་པ་རྩལ་གྱིས་ལྕགས་མོ་བྱ་ལོ་སྤྲེལ་ཟླའི་ཚེས་བཅུ་ཆེན་མོའི་ཉིན་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་འཆམས་དཔོན་ངག་དབང་དཀོན་མཆོག་གིས་བྲིས་པ་དགྲ་བགེགས་ཀྱི་གཡུལ་ལས་རྣམ་པར་རྒྱལ་བའི་རྒྱུར་གྱུར་ཅིག །སརྦ་མངྒ་ལཾ།། །།