དཔལ་ཆེན་ཕུར་བུའི་དམར་ཆེན་གཏོར་བཟློག་གནམ་ལྕགས་ཐོག་མདའ།
དཔལ་ཆེན་ཕུར་བུའི་དམར་ཆེན་གཏོར་བཟློག་གནམ་ལྕགས་ཐོག་མདའ་བཞུགས་སོ། །
ཞི་དང་ཁྲོ་བོའི་འཁོར་ལོ་ཀུན་གྱི་གཙོ། །དཔལ་ལྡན་རྡོ་རྗེ་ཕུར་པ་ལ་བརྟེན་པའི། །དམར་ཆེན་དྲག་པོའི་གཏོར་བཟློག་ལས་རིམ་དག །གོ་རིམ་ཇི་བཞིན་ཡི་གེའི་ཕྲེང་བར་སྤེལ། །དེ་ཡང་དཀྱིལ་འཁོར་འདྲི་བ་ནི། །ལྟེ་བ་གྲུ་གསུམ་མཐིང་ནག །ཟླ་གམ་དམར་པོ། འཁོར་ལོ་སེར་པོ་རྩིབས་བཅུ། རྡོ་ར་མེ་རི་དང་བཅས་པ་ལག་ལེན་ལྟར་འདྲི། ལྕགས་སླང་གི་ནང་དུ་འབྲུ་ནག་ངར་བཏགས་ཁྲག་ཆང་གིས་སྤྲུས་པའི་ཕྱེ་ལ། གཙོ་བོའི་དཔལ་གཏོར་ཆེ་བ་གཅིག་ལ་ཆུང་བ་བཅུས་བསྐོར་བ། མཐར་ཁྲག་གི་ཀོང་བུ་དང་རྩང་དམར་ཉེར་གཅིག་སྲིན་མོ་འགྲོས་སུ་བཙུགས་པ་ལ་རྒྱུ་མའི་ལྡ་ལྡི་བྱ། མཚེ་ཡུངས་ཀྱིས་བརྒྱན། དཔལ་གཏོར་གྱི་རྩེར་བྱ་ཁྱུང་དང་ཙཀླི་མདའ་དར་སོགས་འཛུགས། །མདའ་ཟོར་སོགས་ཟོར་གཞན་རྣམས་ཀྱང་ཚོགས་པར་བྱ། སྨན་རག་གཏོར་གསུམ་ཕྱི་ནང་གི་མཆོད་པ་སོགས་ལེགས་པར་བཤམས། རྩེ་ལུགས་ཀྱི་མངོན་རྟོགས་འཕྲིན་ལས་རྒྱ་མཚོ་ཞེས་བྱ་བའི་ལས་བྱང་གཞུང་བཞིན་གྱེར། ཚོགས་བར་པ་ཡན་གྲུབརྗེས། ཧཱུཾ། མི་མངོན་དབྱིངས་ན་བཞུགས་པའི་རྒྱལ་བ་ཞི་ཁྲོའི་ཚོགས། །ཨཱཿ བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་(༢ན)
བཞེངས། །ཨཱོཾ་བསྐུལ་ལོ་བསྐུལ་ལོ་འགྲོ་བའི་དོན་དུ་བསྐུལ། །ཧྲཱིཿམཛོད་ཅིག་མཛོད་ཅིག་བཅོལ་བའི་འཕྲིན་ལས་མཛོད། །ཧཱུཾ་ཕུར་པ་རོལ་བའི་དུར་ཁྲོད་ཆེན་པོ་ནས། །ལྗང་ནག་གྲུ་གསུམ་ལྷ་ཆེན་བསྣོལ་བའི་སྟེང་། །སྣང་སྲིད་ཕུར་པས་འདེབས་པའི་ལྷ་ཚོགས་ནི། །བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་། །གཉིས་མེད་ཡུམ་ཆེན་འཁོར་ལོ་རྒྱས་འདེབས་མ། །སྐུ་གསུང་ཐུགས་སྲས་སྲས་མཆོག་ཉི་ཤུ་གཅིག །བདུད་འདུལ་མཐུ་ཆེན་ཁྲོ་རྒྱལ་ཡབ་ཡུམ་བཅུ། །ཟ་བྱེད་ཁྲ་ཐབས་ཕྱག་བརྙན་ཉི་ཤུ་དང་། །བསྟན་སྐྱོང་ཆེན་མོ་ཤྭ་ན་མཆེད་བཞི་དང་། །བདག་ཉིད་ཆེན་མོ་རེ་ཏཱི་མཆེད་བཞི་དང་། །ས་བདག་ཆེན་མོ་བསེ་ཡི་ལྷ་མོ་བཞི། །བསེ་ལྕགས་དུང་གསུམ་དགེ་བསྙེན་ཉི་ཤུ་གཅིག །མ་བདུན་སྲིང་བཞི་དབང་ཕྱུག་ཉི་ཤུ་བརྒྱད། །ཕུར་པ་འཕྲིན་ལས་ལྷ་ཚོགས་ཐུགས་དམ་ཅན། །མི་མངོན་དབྱིངས་ནས་གནས་འདིར་སྐུ་བསྐྱོད་ལས། །དམ་རྫས་བདུད་རྩི་འབར་བ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཅེས་གཏོར་མ་ལ་སྨན་རག་སྒྲོན་ཞིང་ཐུན་གཏོར་འབུལ། །བརྒྱུད་གསུམ་བླ་མ་རིགས་འཛིན་རྣམས། །ཞེས་སོགས་(༢བ)
འཕྲིན་ལས་རྒྱ་མཚོའི་ཁ་སྐོང་ནས་བྱུང་བ་ལྟར་བསྐུལ། །ཚོགས་ཐ་མ་གཞུང་བཞིན་བྱ། དེ་ནས་བཟློག་བསྒྱུར་བྱ་བ་ནི། ཧཱུཾ། དབུས་ཕྱོགས་འཁོར་ལོའི་རྩིབས་སྟེང་ནས། །མ་ཧཱ་དེ་བ་བསྣོལ་བའི་སྟེང་། །བཅོམ་ལྡན་རྡོ་རྗེ་གཞོན་ནུ་དང་། །ཡུམ་ཆེན་འཁོར་ལོ་རྒྱས་འདེབས་མ། །སྲས་མཆོག་ཉེར་གཅིག་འཁོར་གྱིས་བསྐོར། །ཡང་སྤྲུལ་གྲངས་མེད་ཕྱོགས་བཅུར་འཕྲོ། །རྣལ་འབྱོར་བདག་ཅག་འཁོར་བཅས་ལ། །དབུས་ཀྱི་ཕྱོགས་ནས་བདུད་གཡོས་པ། །བཟློག་གོ་དམར་ཆེན་གཏོར་མས་བཟློག །བསྒྱུར་རོ་ངན་སྡིག་དགྲ་ལ་སྒྱུར། །བཟློག་བསྒྱུར་བཅོལ་བའི་ཕྲིན་ལས་མཛོད། །ཧཱུཾ། སྟེང་ཕྱོགས་འཁོར་ལོའི་རྩིབས་སྟེང་ན། །ཚངས་པ་ཕོ་མོའི་གདན་སྟེང་ན། ཁྲོ་བོའི་རྒྱལ་པོ་ཧཱུཾ་ཀཱ་ར། །ཡུམ་ཆེན་རྡོ་རྗེ་སྒྲ་འབྱིན་མ། །སྤྲུལ་པ་ཕག་དང་རྨིགས་བུའི་མགོ །ཡང་སྤྲུལ་གྲངས་མེད་ཕྱོགས་བཅུར་འཕྲོ། །རྣལ་འབྱོར་བདག་ཅག་འཁོར་བཅས་དང་། །རྒྱུ་སྦྱོར་ཡོན་བདག་འཁོར་བཅས་ལ། །སྟེང་ཕྱོགས་ཚངས་པའི་གདོན་དང་བགེགས། །བཟློག་གོ་དམར་ཆེན་གཏོར་༴། །བསྒྱུར་རོ་ངན་སྡིག་དགྲ་༴། །བཟློག་བསྒྱུར་བཅོལ་བའི་འཕྲིན་ལས་མཛོད། །ཧཱུཾ། ཤར་ཕྱོགས་༴། །དྲི་ཟ་ཕོ་མོའི་༴། ཁོ་བོའི་རྒྱལ་པོ་རྣམ་པར་རྒྱལ། །ཡུམ་ཆེན་རྡོ་རྗེ་བསྙེམས་མར་བཅས། །སྤྲུལ་པ་སྟག་དང་བྱ་རྒོད་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ཤར་ཕྱོགས་དྲི་ཟའི་གདོན་བགེགས་དང་།༴༴།ཧཱུཾ། ཤར་ལྷོ་༴། མེ་ལྷ་༴། ཁྲོ་བོའི་རྒྱལ་པོ་དབྱུག་པ་སྔོ། །ཡུམ་ཆེན་རྡོ་རྗེ་སྡེར་མོ་དང་། །སྤྲུལ་པ་གཡག་དང་བྱ་རོག་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ཤར་ལྷོ་མེ་ལྷའི་༴།༴༴། ཧཱུཾ། ལྷོ་ཕྱོགས་༴། །གཤིན་རྗེ་༴། ཁྲོ་(༣ན)
བོའི་རྒྱལ་པོ་གཤིན་རྗེ་གཤེད། །ཡུམ་ཆེན་རྡོ་རྗེ་དུར་ཁྲོད་མ། །སྤྲུལ་པ་ཤ་བ་འུག་པའི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ལྷོ་ཕྱོགས་གཤིན་རྗེ་༴།༴༴། ཧཱུཾ། ལྷོ་ནུབ་༴། །སྲིན་པོ་༴། ཁྲོ་བོའི་རྒྱལ་པོ་མི་གཡོ་མགོན། །ཡུམ་ཆེན་རྡོ་རྗེ་གཏུན་ཁུང་མ། །སྤྲུལ་པ་གཟིག་དང་ཁྭ་དའི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། །ལྷོ་ནུབ་སྲིན་པོའི་།༴༴།ཧཱུཾ། ནུབ་ཕྱོགས་༴། །ཀླུ་བདུད་ཕོ་མོའི་༴། ཁྲོ་བོའི་རྒྱལ་པོ་རྟ་མཆོག་དཔལ། །ཡུམ་ཆེན་རྡོ་རྗེ་གཏུམ་མོ་དང་། །སྤྲུལ་པ་བྱི་ལ་པུ་ཤུད་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར༴།༴༴།ཧཱུཾ། ནུབ་བྱང་འཁོར་ལོའི་༴། །རླུང་ལྷ་༴། ཁྲོ་བོའི་རྒྱལ་པོ་འདོད་པའི་རྒྱལ། །ཡུམ་ཆེན་རྡོ་རྗེ་མདའ་བསྙེམས་ན། །སྤྲུལ་པ་སྤྱང་མོ་ཁྲ་ཡི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴།༴༴།ཧཱུཾ། བྱང་ཕྱོགས་༴། །གནོད་སྦྱིན་༴། ཁྲོ་བོའི་རྒྱལ་པོ་བདུད་རྩི་འཁྱིལ། །ཡུམ་ཆེན་རྡོ་རྗེ་རླུང་འབྱིན་མ། །སྤྲུལ་པ་སེང་གེ་ཕ་ཝང་༴། །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར༴།༴༴།ཧཱུཾ། བྱང་ཤར་༴། །དབང་ལྡན་༴། ཁྲོ་བོའི་རྒྱལ་པོ་ཁམས་གསུམ་རྒྱལ། །ཡུམ་ཆེན་རྡོ་རྗེ་གསོད་བྱེད་མ། །སྤྲུལ་པ་དྲེད་དང་སྲེ་མོའི་མགོ །ཡང་སྤྲུལ་༴། །རྣལ་འབྱོར་༴། །རྒྱུ་སྦྱོར་༴། བྱང་ཤར་དབང་ལྡན་༴།༴༴།ཧཱུཾ། འོག་ཕྱོགས་འཁོར་ལོའི་༴། །ས་བདག་ཕོ་མོའི་གདན་སྟེང་ན། །ཁྲོ་བོའི་རྒྱལ་པོ་སྟོབས་པོ་ཆེ། །ཡུམ་ཆེན་རྡོ་རྗེ་སྐུལ་བྱེད་མ། །སྤྲུལ་པ་དོམ་དང་བྱི་བའི་མགོ །ཡང་སྤྲུལ་གྲངས་མེད་ཕྱོགས་བཅུར་འཕྲོ། །(༣བ)
བདག་ཅག་རྣལ་འབྱོར་འཁོར་བཅས་དང་། །རྒྱུ་སྦྱོར་ཡོན་བདག་འཁོར་བཅས་ལ། །འོག་ཕྱོགས་ས་བདག་གདོན་དང་བགེགས། །བཟློག་གོ་དམར་ཆེན་༴། །བསྒྱུར་རོ་༴། །བཟློག་བསྒྱུར་༴། གཞན་ཡང་བཟློག་ཅིང་བསྒྱུར་བ་ནི། །རྒྱུ་སྦྱོར་ཡོན་བདག་འཁོར་བཅས་ལ། །ཡས་ཀྱི་བདུད་དུ་གཡོས་པ་བཟློག །མས་ཀྱི་སྲི་རུ་ལངས་པ་བཟློག །ལྟག་པའི་བདུད་དུ་༴། །དཔྲལ་བའི་གཤེད་དུ་འཁོར་བ་༴། །ཕོ་སྲི་མོ་སྲི་ཆེ་སྲི་ཆུང་སྲི་༴། །དམ་སྲི་དབུལ་སྲི་གོང་སྲི་༴། །ཕ་མེས་དུར་སྲི་བཙན་སྲི་༴། །བདུད་ཀྱི་ཐན་ནག་ཕྱག་བརྙན་༴། །ལོ་སྐེག་ཀི་ཀང་གཤེད་པ་ཞིག །ས་ལ་ཞག་རྩིས་འདེབས་པ་༴། །གནམ་ལ་ཟླ་གྲངས་འདེབས་པ་༴། །གཟའ་དང་སྐར་མ་ངན་པ་༴། །ལོ་སྐེག་ཟླ་སྐེག་ཞག་སྐེག་༴། །ཟ་སྐེག་བདུན་ཟུར་ཐམས་ཅད་༴། །དུས་ཚོད་རྩིས་ནས་འདེབས་པ་༴། །གནམ་གྱི་དལ་ཁ་བབས་པ་༴། །ས་ལ་དུག་ནད་ལངས་པ་༴། །ཐོག་བབས་དལ་བབས་ཐམས་ཅད་༴། །བྱས་ཉེས་ཉམས་གྲིབ་ཐམས་ཅད་༴། །ཡུལ་མི་ཁྱིམ་མཚེས་སྨོད་མོ་༴། །གཡས་ན་ཕོ་བརྒྱ་མདའ་བརྡར་༴། །གཡོན་ན་མོ་བརྒྱ་དུག་སྦྱོར་༴། །མདུན་ན་ལངས་ཤིང་སྡོང་བ་༴། །རྒྱབ་ན་ཁྱི་བཞིན་འབྲབ་བ་༴། །མོ་ངན་ལོག་པར་བསྡིགས་པ་༴། །རྨི་ལྟས་མཚན་མ་ངན་པ་༴། །སྲོད་ལ་བྱ་ཕོ་འཚེར་བ་༴། །ཐོ་རངས་སྒོ་ཁྱི་ངུ་བ་༴། །འུག་པ་ཧ་ཧ་རྒོད་པ་༴། །སྲིན་བྱ་ཐོག་ཁར་འཚེར་བ་༴། །ལོགས་ལ་ཝ་སྤྱང་བརྒྱལ་བ་༴། །ལྟས་ངན་བརྒྱད་ཅུ་རྩ་བཞི་༴། །ཕ་ཚན་ནང་གི་རྒྱ་འདྲེ་༴། །མའུ་དེ་ནི་བྱུར་འདྲེ་༴། །དར་ཚན་ནང་གི་སྟོང་འདྲེ་༴། །ཕོ་བདུད་དལ་ཁ་གཡས་སུ་༴། །མོ་བདུད་དལ་ཁ་གཡོན་དུ་༴། །སྤྱི་(༤ན)
བདུད་དལ་ཁ་མཁའ་ལ་༴། །ཕས་ཀྱི་ཕུང་འདྲེ་རྦད་འདྲེ་༴། །ཚུར་གྱི་སྣ་འདྲེན་བྱེད་པ་༴། །ལུས་ལ་ན་ཚ་གཏོང་བ་༴། །ཚེ་ལ་བར་ཆད་བྱེད་པ་༴། །ལྐོག་ན་འབུ་བཞིན་གཡེང་བ་༴། །ངོས་ལ་ཏིལ་བརྡུང་བྱེད་པ་༴། ཁ་ན་དར་བཞིན་འཇམ་པ་༴། །གཏིང་ན་ཚེར་ལས་རྩུབ་པ་༴། །ལུས་ལ་སྦྲུལ་ལྟར་འཁྲིལ་བ་༴། །ངོ་ལ་སྤྲེལ་ལྟར་འཛེག་པ་༴། །མི་ཁ་བྲམ་མཆུ་ཐམས་ཅད་༴། །སྤྱི་རུ་ཆགས་ཆེ་ཐམས་ཅད་༴། །སྒོས་སུ་ཉེས་པ་ཡོད་པ་༴། །རྦད་སྟོང་རྦད་འདྲེ་ཐམས་ཅད་༴། །རྨི་ལམ་ངན་པ་ཐམས་ཅད་༴། །ཕོ་བྱོལ་དེ་ནི་གཡས་སུ་བྱོལ། །མོ་བྱོལ་དེ་ནི་གཡོན་དུ་བྱོལ། ཁྱིམ་མཚེས་གཞན་གྱི་ས་རུ་བྱོལ། །སྡང་དགྲ་གནོད་བགེགས་དེ་ལ་བྷྱོ། །ཟ་བར་བྱེད་པའི་འདྲེ་ལ་བྷྱོ། །ཕུང་བར་བྱེད་པའི་སྲི་ལ་༴། །སྦྱོར་ངན་གཏོང་བའི་ལྟག་ཏུ་བྷྱོ། །ཆོ་འཕྲུལ་ངན་པ་ཐམས་ཅད་དགྲ་ལ་སྒྱུར། །བཟློག་ཅིང་བསྒྱུར་བའི་ལས་མཛོད་ཅིག །དེ་ནས་སྒོ་དབྱེ་ནི། འཇམ་དཔལ་སྐུ་ཡི་ལྷ་ཚོགས་ཀྱིས། །ཞེས་སོགས་བརྗོད། ཟོར་རྣམས་ཕྱི་རོལ་ཏུ་ཁྱེར། གསེར་སྐྱེམས་བཏང་། གཟུ་དབང་རྒྱས་པར་སྤྲོ་ན། དངོས་བརྒྱུད་བླ་མ་ཡི་དམ་ཞི་ཁྲོའི་ཚོགས། ཁྱད་པར་དཔལ་ཆེན་རྡོ་རྗེ་ཕུར་པའི་ལྷ། །བསྟན་སྲུང་རྒྱ་མཚོར་བཅས་པའི་ཚོགས་རྣམས་ཀྱིས། །སྒྲིབ་མེད་ཡེ་ཤེས་སྤྱན་གྱིས་ཉེ་བར་དགོངས། །རྒྱལ་བའི་བསྟན་ལ་རབ་ཞུགས་རིགས་འཛིན་བདག ཁས་བླངས་སྡོམ་གསུམ་མིག་གི་འབྲས་ལྟར་བསྲུངས། །བསྐྱེད་རྫོགས་ཟབ་མོ་གཞུང་བཞིན་ཉམས་ལེན་པར། །དགྲ་དང་བགེགས་ཀྱིས་ཉེ་བར་འཚེ་བྱེད་ན། །ཡི་དམ་ཞི་ཁྲོས་གཟུ་དང་དཔང་པོ་མཛོད། །ཆོས་སྐྱོང་སྲུང་མས་དཀར་ནག་བདེན་ཤན་ཕྱེ། །དམ་ཅན་རྒྱ་མཚོས་བརྣག་པའི་དགྲ་བོ་སྒྲོལ། །(༤བ)
དམ་བཅའ་དུས་ལས་གཡེལ་ལམ་ར་མདའ་བཟློག །ཚེ་འདིའི་རྣམ་གཡེང་ཆེ་ཐབས་རྒྱང་དུ་བསྲིངས། །སྙིང་ནས་བྱང་ཆུབ་བསྒྲུབ་ལ་ལྷག་པར་གཞོལ། །ཐོས་བསམ་སྒོམ་པས་ཉིན་མཚན་འདའ་བྱེད་པའི། །ཟོལ་མེད་ཆོས་བཞིན་བྱེད་པའི་རྣལ་འབྱོར་ལ།༴༴༴། ངལ་བ་ཁྱད་བསད་བླ་མ་ཡུན་དུ་བསྟེན། །དཀའ་བར་མ་རྩེགས་བསྙེན་སྒྲུབ་མཐའ་རུ་ཕྱིན། །ཆོས་སྲུང་ལུས་དང་གྲིབ་མ་ལྟར་བསྟེན་པའི།༴༴།གཟུགས་བྱང་མིང་རུས་བཏབ་པའི་དགྲ་བོ་འདིས། །རྒྱལ་བའི་བསྟན་བཤིག་བླ་མའི་སྐུ་དགྲ་བྱས། །དགེ་འདུན་སྡེ་བཅོམས་སྐྱེ་འགྲོ་ཡོངས་ལ་འཚེ། །རིགས་འཛིན་སྲུང་མར་བཅས་ལ་བརྙས་བྱས་ན། །རྟགས་མཚན་མི་སྟོན་སྔོན་གྱི་དམ་བཅའ་འགལ། །ཆོས་དབྱིངས་བདེ་བ་ཆེན་པོའི་ངང་ཉིད་ལས། ཁྲག་འཐུང་ཁྲོ་བོའི་འཁོར་ལོར་སྟོན་མཛད་ནས། །ལོག་འདྲེན་གདུག་པའི་དགྲ་སྡེ་མི་སྒྲོལ་ན། །ཞི་བའི་ཚུལ་ལས་འགོངས་ལ་དགོས་པ་ཅི། །དཔལ་ཆེན་སྤྱན་སྔར་རྒྱལ་བའི་བསྟན་པ་མཆོག །སྐྱོང་བར་ཁས་བླངས་ཆོས་སྲུང་རྒྱ་མཚོ་རྣམས། །ལོག་འདྲེན་གདུག་པའི་དགྲ་སྡེ་མི་སྒྲོལ་ན། །འཇིགས་རུང་ཁྲོ་བོར་བསྟན་ལ་ངོ་རེ་གནོང་། །བདེན་པའི་ཚིག་གིས་སྨྲེང་དུ་གསོལ་བ་ལས། །ཡེ་ཤེས་ལྡན་ལ་བརྫུན་གཏམ་སུ་ཡིས་ནུས། །དེ་ཕྱིར་མཐུ་སྟོབས་ནུས་པའི་དཔུང་བསྐྱེད་ལ། །མངོན་སྤྱོད་དྲག་པོའི་འཕྲིན་ལས་མྱུར་དུ་མཛོད། །དེ་ནས་ཟོར་གཞན་རྣམས་རྩི་ལུགས་ཀྱི་ཕྱག་ལེན་ལྟར་ཕྱོགས་སུ་འཕེན། གཏོར་ཟོར་གོམ་པ་ཞེ་དགུའི་སར་ཁྱེར་ཏེ། གནམ་ལྕགས་འབར་བའི་སྣོད་ནང་དུ། །འབྲུ་ནག་ངར་བཏགས་དཔལ་གཏོར་ལ། །དྲག་པོའི་རྫས་ཀྱིས་ཉེར་བརྒྱན་པ། །དུག་དག་མཚོན་ཆར་བྱིན་བརླབས་པ། །ལོག་འདྲེན་(༥ན)
དགྲ་བགེགས་སྟེང་དུ་བྷྱོ། །སྲོག་རྩ་ཆོད་ལ་རྡུལ་དུ་རློག །བྱད་ཁ་བཟློག་ལ་ཕུར་ཁ་སྒྱུར། །དྲག་པོའི་འཕྲིན་ལས་བསྒྲུབ་པར་མཛོད། །ཅེས་གཏོར་ཟོར་འཕང་། མེ་ཆུའི་རྒྱས་འདེབས། འཕྲིན་ལས་རྒྱ་མཚོའི་སྲུང་འཁོར་རྣམས་བརྗོད། ལས་བཞིའི་བྲོ་བརྡུང་། ཆད་མཐོ་བསྟན་སྐྱོང་སོགས་མཇུག་ཆོག་གཞུང་ལྟར་བྱའོ། །ཞེས་དཔལ་ཆེན་ཕུར་བུའི་དམར་ཆེན་གཏོར་བཟློག་གི་རིམ་པ་གནམ་ལྕགས་ཐོག་མདའ་ཞེས་པ་འདི་ཡང་ཕོ་བྲང་གོང་རི་དཀར་པོའི་དཀོན་གཉེར་དཔོན་འཕྲིན་ལས་ཕུར་བུའི་རིག་པ་འཛིན་པ་དགེ་སྟེང་བླ་མ་བྱམས་པ་ཀུན་དགའ་འབྱུང་གནས་ཀྱིས་བསྐུལ་བ་ལྟར་བཀའ་མ་ནས་གཏོར་བཟློག་གི་ཡིག་ཆ་ཁུངས་མ་ཞིག་སྔོན་ཆད་མ་མཐོང་པས། ལྷ་བྲག་གཏེར་བྱོན་གྱི་བཟློག་གཞུང་དང་། ཕྱག་ལེན་གྱིས་ཁ་བཀང་། རྒྱལ་བ་སྤྱི་སྒེར་བསྐུལ་བ་ཁྲོ་རོལ་ནས་བགྱིས་ཤིང་། གཞན་ས་སྐྱོང་ཆོས་ཀྱི་རྒྱལ་པོ་གྲགས་པ་འབྱུང་གནས་ཀྱི་འཕྲིན་ལས་རྒྱ་མཚོར་ཁ་འཕངས་པས། རྩེ་ལུགས་ཕྱག་ལེན་གྱི་མཛེས་རྒྱན་དུ་འགྲོ་བར་བགྱིས་ཏེ་ཟ་ཧོར་གྱི་བཙུན་པ་ངག་དབང་བློ་བཟང་རྒྱ་མཚོས་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ།། །།