དཔལ་ཀུན་ཏུ་བཟང་པོའི་འཆམས་ཀྱི་བརྗེད་བྱང་ལྷའི་རོལ་གར།
དཔལ་ཀུན་ཏུ་བཟང་པོའི་འཆམས་ཀྱི་བརྗེད་བྱང་ལྷའི་རོལ་གར་བཞུགས་སོ། །
ཞི་ཁྲོ་རབ་འབྱམས་དཀྱིལ་འཁོར་ཐམས་ཅད་ཀྱི། ཁྱབ་བདག་གདོད་མའི་ཀུན་བཟང་ཧེ་རུ་ཀ །སྣ་ཚོགས་སྤྲུལ་པའི་གར་མཁན་པདྨ་འབྱུང་། །དབྱེར་མེད་དྲིན་ཅན་རྩ་བའི་བླ་མར་འདུད། །མིག་སྨན་ཁུ་བས་སྦགས་པའི་ལྷུན་པོ་ལ། །དུས་མཐའི་མེ་དཔུང་འབར་བའི་གོས་གྱོན་པ། །ཁྲོ་བོའི་དབང་པོ་དཔལ་ཆེན་ཕུར་པ་ཡི། །ལྷ་ཚོགས་རྣམས་ཀྱིས་དངོས་གྲུབ་ཆར་ལྟར་ཕོབ། །གར་ཐིག་དབྱངས་ཞེས་གསང་སྔགས་འཆང་ཀུན་ལ། །རླུང་ལྟར་གྲགས་པའི་ཁྲག་འཐུང་ཁྲོ་བོའི་འཆམས། །སྟང་སྟབས་ཙམ་གྱིས་བདུད་སྡེ་ཚར་གཅོད་པའི། །རིགས་འཛིན་བརྒྱུད་པའི་ལུགས་སྲོལ་ཇི་བཞིན་འདྲི། །དེའང་རྡོ་རྗེ་ཐེག་པའི་དཀྱིལ་འཁོར་གྱི་ཆོ་ག་ལ། །སྔོན་འགྲོའི་སྐབས་བློས་བཟུང་བ་དང་། སྟང་སྟབས་ཀྱིས་བཟུང་བ་གཉིས་ལས། ཕྱི་མའི་སྐབས་གསང་སྔགས་གསར་མ་ལ། མཁའ་འགྲོ་རྡོ་རྗེ་གུར་དང་། ཡོ་ག་ལས་བཤད་པའི་གར་ཐམས་ཅད་མཁྱེན་པ་བུ་སྟོན་ཆོས་རྗེ་སོགས་ཀྱིས་དར་རྒྱས་སུ་མཛད་པ་དང་། གསང་སྔགས་རྙིང་མ་ལ་ཁྲག་འཐུང་གི་འཆམས་ཞེས་བཀའ་གཏེར་གཉིས་ཀའི་རིག་སྔགས་འཆང་བ་རྒྱུ་སྐར་གྱི་འཕྲེང་བ་ལྟ་(༢ན)
བུ་ལ་ཡོངས་སུ་གྲགས་པའི་ནང་ནས། དཔལ་ཆེན་ཕུར་བུའི་བསྐྱེད་རིམ་ཕྱག་རྒྱའི་གར་འཆམས། དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གྱི་ཕྱག་བཞེས་མཆོད་དཔོན་ཤེས་རབ་སྣང་བས་བརྗེད་བྱང་དུ་བཀོད་པ་ལུས་འགྱུར་སྣང་བ་དང་སྒོ་བསྟུན། ས་སྐྱོང་ཐམས་ཅད་མཁྱེན་པ་གྲགས་པ་འབྱུང་གནས་དང་། དཔལ་ཀུན་བཟང་རྩེ་བའི་ཕྱག་བཞེས་མཐོང་བརྒྱུད་ལྟར་བྲི་བར་བྱའོ། །སྤྱིར་དཔལ་ཀུན་ཏུ་བཟང་པོ་དང་། རྒྱལ་བ་རིགས་ལྔ་ལས་བརྒྱུད་དེ། རྡོ་རྗེ་སེམས་དཔས་ཆེ་མཆོག་ཧེ་རུ་ཀ་ལ་གསུངས། དེས་རིགས་གསུམ་མགོན་པོ་ལ་གསུངས་ཏེ། ལྷ་ཀླུ་གནོད་སྦྱིན་གྱི་ཡུལ་དུ་དར་བ་དང་། ཁྱད་པར་སྐལ་ལྡན་རྒྱལ་པོ་ཛས་མཁས་པ་མི་གསུམ་ལ་བཤད། དེ་ནས་བརྒྱུད་དེ་སློབ་དཔོན་པདྨ་སམྦྷ་ཝ། བི་མཱ་ལ་མི་ཏྲ། ཤཱི་ལ་མཉྫུ། ལོ་ཙཱ་བ་ཛྙཱ་ན་ཀུ་མཱ་ར་སོགས་ལ་བརྟེན་ནས། ཨྱོན། རྒྱ་གར། བལ་ཡུལ། བོད་སོགས་སུ་དར་རྒྱས་ཆེ་བར་བྱུང་ལ། དགོས་པའི་གཙོ་བོ། བཛྲ་ཧེ་རུ་ཀས། རུ་དྲ་འདུལ་བའི་ཆེད་དུ། གླུ་དྲུག་བླངས་པས་དོན་དྲུག་རྫོགས། སྟབས་དྲུག་བསྐྱོད་པས་འགྲོ་དྲུག་སྒྲོལ། །ཞེས་སྟང་སྟབས་དྲུག་(༢བ)
གམ་བརྒྱད་ཀྱི་སྒོ་ནས་མཛད་ཅིང་། རིགས་འཛིན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས། དཔལ་བསམ་ཡས་ཀྱི་ས་འདུལ་འཕྲིན་ལས་ཀྱི་དཀྱིལ་འཁོར་ཆེན་པོ་འདི་ཉིད་ལ་བརྟེན་ནས་གར་འཆམས་མཛད་པས། ལྷ་སྲིན་གྱིས་གདུག་རྩུབ་ཞི་བ་སོགས་དགོས་པ་ཁྱད་པར་ཅན་བྱུང་བས། ས་ཆོག་དང་། འཕྲིན་ལས་ཀྱི་ཁ་སྐོང་བ་དང་། བསྒྲལ་བ་དང་། མདོས་ཟོར་གྱི་སྐབས་སུ་ཉམས་སུ་བསྟར་བ། རྒྱུད་ཀྱི་ཁུངས་དང་འབྲེལ་ཞིང་བྱིན་རླབས་ཀྱི་ཚན་ཁ་ཆེ་བ་ཡིན་ནོ། །དེ་ཡང་ལག་སྟབས་གཙོ་ཆེ་བ་ལ་གར། རྐང་སྟབས་གཙོ་ཆེ་བ་ལ་འཆམས། དེ་གཉིས་ཀ་གཙོ་ཆེ་བ་སྟང་སྟབས་ཞེས་བཤད་པས། གནས་སྐབས་སུ་མི་འདྲ་བ་འདྲ་ཞིག་མཆིས་ཀྱང་། དོན་ལུས་ཀྱི་རྣམ་འགྱུར་གྱི་སྒོ་ནས་འཕྲིན་ལས་བསྒྲུབ་པ་ལ་མི་འགལ་ལོ། །ལུས་ཀྱི་རྣམ་འགྱུར། འགྱིང་བ། སྤྲུག་པ་སོགས་ཕྱག་རྒྱ་མཁས་པའི་མན་ངག་དང་ལྡན་ཞིང་། ངག་སྔགས་ཀྱི་བཟླས་པ་རྒྱུན་མི་ཆད་པ་དང་། ཡིད་ལྷ་གང་དང་གང་གི་ང་རྒྱལ་བརྟན་པོ་འཛིན་ཅིང་། དེ་ཐམས་ཅད་ཀྱང་གསལ་སྟོང་འཛིན་པ་མེད་པ་ལྟ་བས་རྒྱས་ཐེབས་པ་ཞིག་དགོས་པས། ཚེ་འདིའི་རྙེད་གྲགས་ཆོས་བརྒྱད་ཀྱི་ཆེད་ཁོ་ན་དང་། ལྟད་མོ་དང་རྩེད་མོ་ཙམ་གྱི་ཆེད་དུ་བྱ་བའི་ཐ་མལ་གྱི་སྤྱོད་ཚུལ་དང་མཚུངས་པ་ནི་མ་ཡིན་ནོ། །འོན་ཀྱང་འོག་ནས་འབྱུང་བའི་ཆས་གོས་རྒྱན་སྤྲོད་སོགས་ནི་ཁུངས་དག་འབྲེལ་ངོས། ཤིན་ཏུ་རྒྱས་པ་བྱ་བ་མ་གཏོགས། རས་སུ་བོར་ཞིང་སྤང་བར་མི་བྱ་སྟེ། དཀྱིལ་འཁོར་གྱི་ལྷ་ཚོགས་རྣམས་སྤྲོས་པའི་མཚན་མ་ཀུན་དང་བྲལ་ཡང་། སྤྲོས་པ་སྣ་ཚོགས་ཀྱིས་བརྒྱན་པས་སོ། །འོག་ནས་འབྱུང་བ་རྣམས་ལ་ཐུན་མོང་དུ་(༣ན)
དགོས་པའི་ཡན་ལག་ནི། ཁྱུང་ཆེན་ནམ་མཁའ་ལ་ལྡིང་བ་ལྟར་ཕོད་ཀའི་ཐང་ཤ་བཅད། སེང་གེ་གཡུ་རལ་སྤྲུག་པ་ལྟར་མ་རལ་གྱི་འཁྱིལ་བ་ཤིག །རྒྱ་སྟག་ནགས་མའི་ཚལ་དུ་འགྱིང་བ་ལྟར་ལུས་ཀྱི་འཛུམ་བསྟན། ལུས་སྟོད་ལ་སེང་ཆགས། རྐེད་པ་ལ་འཁྲིལ་ཆགས། སྒྱིད་པ་ལ་ལྡེམ་ཆགས། ཚིགས་བཞི་ལ་འཕྲུལ་ཆགས། རྐང་མགོ་ལ་བདེ་ཆགས། བཞག་ཤ་ལ་ལྷོད་ཆགས། རྣམ་འགྱུར་ལ་འགྱིང་ཆགས། ཤ་འགྱུར་ལ་མེར་ཆགས། སྤྱོད་པ་དལ་ལ་དོད། ཕྱག་རྒྱ་གཡས་སུ་འཆའ་ཞིང་འགྲོལ་ན་གཡོན་དུ་བལྟ། གཡོན་དུ་དེ་ལས་ལྡོག །དབུས་སུ་ཐད་ཀར་ལྟ་ཞིང་འགྱིང་བ་རྣམས་ཡིན་ནོ། །འདིར་རྡོ་རྗེ་ཕུར་པའི་འཆམས་སྤྱིར་བསྟན་པ་དང་། བྱེ་བྲག་འཆམས་ཀྱི་རྣམ་གྲངས་གཞན་བསྟན་པ་གཉིས། དང་པོ་ལ། སྟོད་ལས་བྱང་ཆུབ་བསྒྲུབ་པའི་ཡན་ལག་ཏུ་རྩ་བའི་འཆམས་བཤད། སྨད་ལས་གདུག་པ་སྒྲོལ་བའི་ཡན་ལག་ཏུ་བྲུབ་འཆམས་བཤད་པ་གཉིས། དང་པོ་ལ་སྔོན་འགྲོ། དངོས་གཞི། མཇུག་དང་གསུམ། དང་པོ་རང་ལུས་ཆས་སུ་འཇུག་པ་ནི། ཕོད་ཀ །རུས་རྒྱན། སེ་རལ་ཁ། སྐྲ་བརྫུས། བསེ་ཐེབ་ལ་ཞྭ་དར་དང་། མེ་ལོང་ནི་མེད་དུ་མི་རུང་སྟེ། སྤྱིར་སྔགས་འཆང་རྣམས་ཀྱིས་གྱོན་པའི་ཞྭ་ནག་ལ་སྲིད་པ་སྤྱི་ལུགས་ཀྱི་ཞྭ་ཞེས་བཤད་ཅིང་། དེའི་དོན་སྲིད་པ་ཞེས་པ། འཇིག་རྟེན་གྱི་ཁམས་དང་། ཁམས་སྤྱིའི་དབྱིབས་ལུགས་ལ་དཔེ་བྱས་ལ། བྱས་ཚུལ་ནི། པདྨའི་གདུང་ཚབ་སྔགས་འཆང་བཀྲ་ཤིས་སྟོབས་རྒྱལ་གྱི་གསུང་ལས། མགུལ་སྒྲོག་ཆོས་དབྱིངས་གདེངས་ཀ་གྱེན་བསྟན་དབྱིབས། །དེ་(༣བ)
སྟེང་རྒྱབ་བསྣོལ་རླུང་དཀྱིལ་རྒྱ་གྲམ་ཚུལ། །དེ་སྟེང་གྲུ་གསུམ་ཀུན་ནས་འབར་བའི་མེ། །ཕན་ཚུན་བསྣོལ་མ་རཀྟའི་རྦ་ཀློང་འཁྲུག །ས་ཆེན་གྲུ་བཞིའི་དབྱིབས་སུ་རྩ་བ་བརྟན། །མུ་ཁྱུད་ཁོར་ཡུག་ཀུན་ནས་བསྐོར་བའི་དབུས། །ལྷུན་པོ་ལྟར་བརྗིད་རྐེད་པར་ཉི་ཟླའི་རྒྱན། །ནང་གི་རུ་ཤིང་ཀེང་རུས་ལྷུན་སྡུག་བརྗིད། །མཚོ་སྟེང་མཚོན་སྐུད་པཉྩས་ཟུར་བརྒྱད་དུ། །དྲིས་པ་གླིང་ཆེན་བཞི་དང་གླིང་ཕྲན་བཅས། །སྦས་དོན་ནམ་མཁར་རྒྱས་བཏབ་ཐོག་རིས་བཀོད། །ཏོག་ཕོད་དར་དཕྱངས་ཡོངས་བརྟོལ་དཔག་བསམ་ཤིང་། །གདོད་ནས་འགྱུར་མེད་བུང་བའམ་སྟང་ཟིལ་མདོག །ལས་བཞི་གང་བསྒྲུབ་ཐོད་བཅིངས་ཁ་དོག་བསྒྱུར། །ནུས་ལྡན་རྫས་ཀུན་མཛེས་པའི་རྒྱུན་དུ་བཀོད། །ཅེས་སོ། །གཙོ་བོར་ཞྭ་འདི་ཉིད་དགོས་རྒྱུ་ཡིན་ནའང་། །འཆམས་ཡུན་རིང་བ་དང་བཅས་འཇུག་པ་བདེ་བའི་ཆེད་དུ་ཞྭ་ཐེབ་འདི་ཉིད་མཛད་ཅིང་། དེ་ལྟར་མཛད་པ་ཁུངས་དང་མི་འབྲེལ་བའི་སྐྱོན་མེད་དེ། དབང་པོའི་སྡེས། རྒྱ་བཟོའི་རྒྱུན་གྱི་ཞྭ་དམར་དར་སོ་ཆེ། །དབང་དྲག་སྒོ་མཐུན་དོན་གྱི་ལས་ཞྭར་མཛད། ཅེས་སོ། །རྒྱས་པར་སྤྲོ་ན། རྨ་བྱའི་སྒྲོ་མདོངས་ནོར་བུའི་དབྱིབས་ལ་གཟུང་མོ་བྱེ་ཐུར་གཡས་གཡོན་དུ་གླང་པོའི་མཆེ་བ་ལྟར་མཛེས་པ་དང་། དར་གྱི་སྦྲུལ་མགོ་ལྔའམ་གསུམ་གང་འོས། །བནྡྷ་སྐྲ་ཅན། ཕུར་པ་དར་གྱི་ཅོད་པན་ཅན་སོགས་འཚོགས་པར་བྱ་ཞིང་ཆས་གོས་རྣམས། གཡས་ནས་བརྔམ་པར་བླངས་ཏེ་གཡོན་ཕྱོགས་ནས་གྱོན། བན་ཕུར་པད་ཀོར་གྱི་ཚུལ་གྱི་ལན་པ་སོགས་བྱའོ། །གཉིས་པ་གསེར་སྐྱེམས་ནི། ལྷའི་ཕྱག་རྒྱ་མི་བཟོད་པའི་ཡུལ་ལྷ་དང་། སྡེ་བརྒྱད་རྣམས་ལ་གཏོང་བ་སྟེ། རྔ་པ་རྣམས་(༤ན)
ཆས་སུ་མི་འཇུག་ཀྱང་། བེར་སོགས་རང་ཆས་གང་ལེགས་བྱས་ནས་གསེར་སྐྱེམས་འབུལ་ཞིང་། ཕུར་བསྒྱུར་བྱ། དེ་ནས་འཆམས་དཔོན་གྱིས་སྣ་དྲངས་ཏེ། ཕྱོགས་ཀྱི་གསོལ་གདབ་རྣམས་ཀྱང་གོ་རིམ་མི་འཕྱུགས་པ་ཡོད་པར་བསྒྲིགས་ནས་འཆམས་གྲལ་ཕྲེང་བ་མཉམ་པར་བྱས། ལག་པ་རྒོད་གཤོག་ལྟར་བརྒྱངས་པའི་གཡས་ཕུར་པ་མཁྲིག་མ་ནང་དུ་བཀུག་པས་བཟུང་བ་ཅུང་མཐོ། གཡོན་བནྡྷ་ཅུང་ཟད་གཞོལ་བར་བཟུང་སྟེ། རྐང་གཡོན་བཏེག་ནས་སྦྲམ་ཞེས་རོལ་མོ་ཆེ་བ་༡་ལ་རྐང་གཡས་རྟིང་གསིག་བྱས་པའི་གཡོན་འགྲོ་ཕྱོགས་ཕབ། འགྱིང་བའི་ངང་ནས་རོལ་མོ་ཐེངས་བརྡུང་ཆུང་ངུ་གསུམ་བཞི་རྐང་གཡས་གཡོན་ཕྱོགས་སུ་བསྐོར་བའི་བཞག་ཐད་གཡོན་དྲུང་ནས། རྐང་གཡས་བཏེག་པའི་སྦྲམ་ཞེས་རོལ་མོ་ཆེ་བ་གཅིག་ལ་རྐང་གཡོན་རྟིང་གསིག་བྱས། རྐང་གཡས་འགྲོ་ཕྱོགས་སུ་ཕབ་འགྱིང་བའི་ངང་ནས་རོལ་མོ་ཐེང་བརྡུང་ཆུང་ངུ་གསུམ་བཞི་ལ་རྐང་གཡོན་གཡས་ཕྱོགས་སུ་བཞག་ཐད་གཡས་དྲུད་པ་བྱ། འདོན་དེ་ག་རེ་མོས་ཀྱི་དོ་ར་འཁོར་བ་དང་། འཆམས་དཔོན་དབུས་སུ་སླེབ་པར་བྱས་ནས། གསུམ་པ་ལ་གསུམ་ལས། དང་པོ་ས་གཞི་འཁོད་སྙོམས་པར་བྱ་བ་ནི། རྐང་གཡོན་བཏེག་སྦྲམ་ཞེས་གཡས་པའི་རྟིང་གསིག་བྱས། རྐང་གཡས་གཡོན་ཕྱོགས་སུ་བསྐོར་བའི་བར་དེར། དང་པོ་དང་གཉིས་པ་སོང་ནས་གསུམ་པ་ནས་སྟོན་པར་བྱེད་པ་ནི་འདི་ལྟར། ཞེས་འཆམས་སྐད་ཀྱི་བརྡའ་སྦྱར་མཚམས། སྦྲམ་ཞེས་རྐང་གཡས་མདུན་དུ་ཕབ། གཡོན་དེ་དང་མཉམ་པར་དྲུད་ནས། སྦྲམ་གཅིག་ཅེས་པའི་༡་དེ་ལ་རོལ་མོ་ཆུང་ཙམ་ཡོང་བའི་སྒམ་ལ་བན་ཕུར་(༤བ)
གཡོན་ཕྱོགས་བསྐོར་ནས། ༡་ལ་གཡས་སུ་གཞོལ་བ་བྱ། སྦྲམ་གཉིས་ཞེས་པ་དེ་དང་འདྲ། སྦྲམ་སྦྲམ་ཆུང་ངུ་གསུམ་བཞི་ལ་བན་ཕུར་ནང་དུ་བསྐོར་བའི་འོག་ནས་ཡར་སྟེང་དུ་འཕྱར། འདི་ལ་ཆིག་བརྡུང་རོལ་བ་ཞེས་བྱ་སྟེ་འོག་ཏུའང་རིགས་འགྲེ། ལག་གཉིས་འཕྱར་བ་དང་རྐང་གཡས་བཏེག་ནས་རྐང་གཡོན་པའི་རྩེར་ལྕགས་མདའ་རིགས་སུ་ཕབ། སྦྲམ་ཞེས་ཆེ་བར་རྐང་གཉིས་ཀ་རྟིང་གསིག་དང་ལུས་གཡས་ཕྱོགས་འགྱིང་གསིག །ཡང་སྦྲམ་ཞེས་རྟིང་གསིག་ལུས་གཡོན་ཕྱོགས་བགྱིང་གསིག །ཡང་སྦྲམ་ཞེས་པར་གཡས་གོང་ལྟར་འགྱིང་གསིག་བྱ། དེ་ནས་འཆམས་དཔོན་ཁྲིའུའི་སྟེང་དུ་བཞུགས། ཕྱོགས་ཀྱི་མཆོད་འབུལ་རམ་འདེགས་དང་བཅས་པ་ཕྱོགས་སོ་སོར་འཁོད། གསོལ་བཏབ་སོགས་དངོས་གྲུབ་རྒྱ་མཚོའི་རོལ་གར་ལྟར་རོ། །དེ་ནས་རྡོ་རྗེ་སློབ་དཔོན་གྱི་རོལ་མོ་དང་བསྟུན། འོག་ནས་འབྱུང་བའི་རྡོ་རྗེ་ཕྱེད་འགྲོས་ཀྱི་བྱང་ཤར་དུ་འགྲོ། དེ་རྗེས་ཕྱོགས་དཔོན་བཞི་སློབ་དཔོན་གྱི་གཡས་གཡོན་དུ་འཁོད། སྦིར་སྦྲམ། སྦིར་སྦྲམ་གཉིས་རྗེས་དགུ་བརྡུངས་༡་བྱས་བསྒྲལ་མཆོད་ཀྱི་དབྱངས་བཀབ་སྟེ། ཨེ་མ་ང་ནི་ཞེས་པའི་སྐབས་རྐང་གཡས་བཏེག་ཅིང་གཡོན་ཅུང་ཟད་འགྱིང་། རང་ཞེས་པའི་སྐབས་སུ་གཡས་འགྲོ་ཕྱོགས་སུ་འཛུགས། འབྱུང་ཞེས་པར་གཡོན་པའི་རྩེ་གཡས་པའི་རྟིང་ཐད་དུ། བ་ཞེས་པ་དེ་གར་འགྱིང་། རྐང་པ་གཡས་གཡོན་གོ་ལྡོག་པའི་རེ་མོས་ཙམ་མ་གཏོགས་ཚིག་རྐང་ལྷག་མ་བདུན་ལའང་དེ་ག་བཞིན་བྱ། དེ་ནས་མི་ཞེས་པའི་སྐབས་སུ་གཡས་སུ་ཤུགས་ཆེའི་ཛམ་ནས་གཡོན་ཕྱོགས་དོ་རེའི་ནང་དུ་བསྐོར། ཉན་ཞེས་པར་རྐང་(༥ན)
གཡོན་འགྲོ་ཕྱོགས་བཙུགས། གདུག་ཅེས་པར་རྐང་གཡས་བཏེག །པའི་ཞེས་པར་གཡས་བཙུགས། ཚོགས་ལ་གཡོན་བཏེག །བ་ལ་གཡོན་བཙུགས། ཡོད་ལ་གཡས་བཏེག །ན་ལ་གཡས་བཙུགས། འའི་བའི་ལ་གོང་བཞིན་ནས། ༡༢༣༤ཞེས་རོལ་མོ་ཆེ་བ་བཞི་གཡས་སུ་རྒྱག །ཆུང་བ་བཞི་གཡོན་དུ་རྒྱག །ཡང་སྔ་མ་གཉིས་ཇི་ལྟ་བ་བྱ། དེ་ནས་གཡས་ཕྱོགས་སུ་རོལ་མོ་ཆེམ་བརྡུང་ལ་ཕབ་རྗེས། སྦིར་སྦྲམ། སྦིར་སྦྲམ་ཞེས་ཐེངས་བརྡུང་བྱ། དེ་ནས་༡་ལ་གཡས་བཏེག །༢ལ་ཕབ། ༣ལ་གཡོན་བཏེག །༤ལ་ཕབ། ༥༦༧༨ལ་གོང་བཞིན་རེ་མོས་བྱ། ༩༩་ལ་རང་སར་འདུག །ཡང་། འབྱུང་པོ་གདོན་གྱི་ཚོགས་བཅས་ཀུན། །ཞེས་སོགས་ཀྱི་ཚིག་གཉིས་ལ། གོང་གི་ཤློ་ཀ་གཉིས་པོའི་ལེན་ལུགས་ལྟ་བ་ལ། གཡས་གཡོན་སྔ་ཕྱི་ལྡོག །མི་ཉན་གདུག་པ་མན་ཆད་བྱེད་ལུགས་སྔ་མ་བཞིན་ལ། གཡོན་དུ་ཤུགས་ཆེའི་ཛམ་ནས་གཡས་ཕྱོགས་སུ་དོ་རའི་གཡོན་སྐོར་འགྲོ་བ་སོགས་དང་། རོལ་མོ་བཤད་མ་ཐག་དེ་ག་གཡོན་དུ་སྔ་མ་གོ་ལྡོག་ལེན་ཅིང་། ཡང་འབྱུང་པོ་གདོན་མན་ཆད་སྔར་བཞིན་ལན་༡བྱས་པའི་མཇུག་ཏུ་ཆེམ་བརྡུང་འབེབས་པ་སོགས་སོ། །དེ་ནས་རོལ་མོ་རྣམས་བཞག །བན་ཕུར་ཐོགས་ཏེ་སྔར་བཞིན་རོལ་འགྲོས་ལ་འཇུག །གཉིས་པ་རྐང་གཡས་འགྲོ་ཕྱོགས་སུ་བསྐོར་པ་དང་མཉམ་དུ། འཆམས་སྐོར་དང་པོ། ཞེས་བརྗོད། སྦྲམ་ཞེས་རྐང་གཡས་ཕབ། གཡོན་མདུན་དུ་དྲུད་པའི་རྩེར་གཡས་ལྕགས་མདའ་རིགས་སུ་བྱས། ལག་གཉིས་བརྒྱངས་པའི་གཡོན་ཐོ་བས། སྦྲམ་༡། སྦྲམ་༢། སྦྲམ་༣། སྦྲམ་༤། (༥བ)
ཞེས་པར་གཡས་སྐོར་དུ་རྟིང་གསིག་གི་དོ་རའི་ཕྱིར་ཕྱོགས་པའི་བར་བསྐོར། སྦྲམ་སྦིར་སྦྲམ་གསུམ་གྱི་དང་པོ་ལ་ཡངས་པད། འདི་རིགས་ཀྱི་ཡངས་པད། གོང་གི་བཞིའི་སྐབས་ནས་བླངས་ནས། འདི་གའི་དང་པོ་ལ་ཕུར་པ་པུས་སྟེང་དུ་ཡོང་བ་ཞིག་དགོས་པས་འོག་ཏུའང་རིགས་འགྲེའོ། །གཉིས་པར་ཕུར་དར་གཡུག །གསུམ་པར་ཕུར་རྩེ་བནྡྷར་གཏོད་པ་དང་མཉམ་དུ། རྐང་གཡས་བཏེག་པའི་རང་བབས་སུ་ཕབ་པའི་རྩེར། རྐང་གཡོན་ལྕགས་མདའ་རིས་སུ་བྱས། ལག་གཉིས་བརྒྱངས་པ་གཡས་མཐོ་བ་དང་བཅས། གཡོན་སྐོར་དུ་རོལ་མོ་ཆེ་བཞི་ལ་རྟིང་གསིག་གི་དོ་རའི་མདུན་ཕྱོགས་བར་བསྐོར། ཆུང་གསུམ་ལ་དང་པོ་དང་གཉིས་པར་ཡང་པད་ལེན་གཡུག་དང་། གསུམ་པར་ཕུར་རྩེ་བནྡྷར་གཏོད་པ་དང་མཉམ་དུ་རྐང་གཡོན་འགྲོ་ཕྱོགས་སུ་ཕབ་ནས་རོལ་འགྲོས་ལ་འཇུག །གསུམ་པ་རྐང་གཡོན་བཏེག་པ་དང་མཉམ་དུ། འཆམས་སྐོར་གཉིས་པ། ཞེས་བརྗོད་གཡོན་ཕབ། སྦྲམ་ཞེས་རྐང་གཡས་གཡོན་ཕྱོགས་སུ་བབ་པའི་རྩེར་གཡོན་ལྕགས་མདའ་རིས་སུ་བྱས་པའི་གཡོན་སྐོར་དུ་རྟིང་ག་སིག་གིས་རྒྱབ་ཀྱི་ཚབ་གཡས་ཡོང་ཕྱོགས་དང་། གཡས་སྐོར་གྱི་རྟིང་གསིག་བྱས་མདུན་གྱི་ཚབ་གཡོན་འགྲོ་ཕྱོགས་བྱེད་པ་གོ་རིམ་བརྗེ་བ་མ་གཏོགས་སྔ་མ་ལྟར་རོ། །བཞི་པ་ནི། རོལ་འགྲོས་ཀྱི་ངང་ནས་གཡོན་དོ་རའི་འགྲོ་ཕྱོགས་སུ་ཕབ། གཡས་པ་གཡོན་ཕྱོགས་བསྐོར་བ་དང་མཉམ་དུ། ཆོས་ཀྱི་དབྱིངས་བསྐྱེད་པར་བྱ་བའི་ཕྱིར་སྐོར་བ་ལན་གསུམ་དུ་བྱ་བ། ཞེས་བརྡའ་སྦྱར། སྦྲམ་ཞེས་རྐང་གཡས་མདུན་དུ་ཕབ། སྦྲམ། སྦིར། སྦྲམ་སྦིར་ཞེས་པའི་(༦ན)
དང་པོར་ལག་གཉིས་བརྒྱངས་གཡས་སུ་གཅུ་ཞིང་འགྱིང་། གཉིས་པར་གཡོན་དུ་གཅུ་ཞིང་འགྱིང་། གསུམ་པར་རྐང་གཡས་རྒྱབ་ཏུ་འཐེན་པ་དག་ལག་གཉིས་མཁྲིག་མ་ནང་དུ་གུག་པས་འགྱིང་། འདི་ལ་རོལ་འགྱིང་ཞེས་བྱ་སྟེ་འོག་ཏུ་རོལ་འགྱིང་ཞེས་པར་འདིས་མཚོན་ནོ། །བཞི་པ་ཆུང་བར་ཡངས་པད་ཀྱི་འགོ་བརྩམ། སྦྲམ་སྦིར་སྦྲམ་གསུམ་གྱི་དང་པོར་ཡངས་པད་བྱ། ཕུར་པ་པུས་སྟེང་། གཉིས་པར་ཕུར་དར་རྒྱབ་ཏུ་གཡུག །གསུམ་པར་ཕུར་རྩེ་བནྡྷར་གཏོད་པ། འདི་ལ་ཡངས་པད་ཅེས་བྱའོ། །རོལ་མོ་དང་ལག་སྟབས་དེ་འདྲ་བའི། གཏོད་པ་དང་མཉམ་དུ་རྐང་གཡོན་བཏེག་པའི་གཡས་ཡོང་ཕྱོགས། གཡས་བཏེག་མདུན་དུ། གཡས་བཏེག་གཡོན་འགྲོ་ཕྱོགས། གཡོན་བཏེག་མདུན་རྣམས་དུ་ཡངས་པད་ལེན་པ་འདི་ལ་བཞི་པད་ཅེས་བྱ་སྟེ། འོག་ཏུ་བཞི་པད་ཡོངས་རྫོགས་ལ་འདིར་རིགས་འགྲེའོ། །འོག་མ་རྣམས་སུ་བཞི་པད་སོང་ནས་བརྩམ་ཞེས་བརྡའ་སྦྱར་ཚེ་བསྡུས་ནས་ཡངས་པད་༡གིས་ཆོག་པས་ཤེས་པར་བྱའོ། །དེ་ནས་བན་ཕུར་ཐུགས་ཀར་མཉམ་པས། སྦྲམ་སྦིར་སྦྲམ་གསུམ་ལ་དང་པོར་གཡོན་ཕྱོགས་གཅུ། གཉིས་པར་གཡས་ཕྱོགས་གཅུ། གསུམ་པར་བནྡྷར་ཕུར་པ་ནང་དུ་བསྐོར་བའི་འོག་ནས་ཡར་སྟེང་དུ་བརྒྱངས། འདི་ལ་ཛམ་ཆུང་ཞེས་བྱའོ། །དེ་ནས་རྐང་གཡས་བཏེག་གཡོན་ཅུང་ཟད་འབར་བ་དང་བཅས། སྦྲམ་༡། སྦྲམ་༢། སྦྲམ་༣། སྦྲམ་༤། སྦྲམ་༥། ཞེས་པར་༡ལ་རྐང་གཡས་མདུན་དུ་འབེབས། དེ་ནས་གཡས་སྐོར་གྱི་གཉིས་པར་གཡས་སུ། གསུམ་པར་རྒྱབ་ཏུ། བཞི་པར་གཡོན་དུ། ལྔ་པར་མདུན་དུ་འགྱིང་བ་དང་བཅས་(༦བ)
འབེབས་པ་དང་མཉམ་དུ་པད་ཀོར་ལེན་པའི་འགོ་འཛུགས། ཆུང་གསུམ་གྱི་ཡངས་པད་ལེན་པ། གཡུག་པ། གཏོད་པ་སོགས་གོང་བཞིན་ནས། རྐང་གཡས་བཏེག་གཡོན་དུ། གཡོན་བཏེག་མདུན་དུ། གཡོན་བཏེག་གཡས་སུ་ཡངས་པད་ལེན་པ་འདི་ལ་མཆོངས་པད་ཅེས་བྱ། འོག་ཏུ་མཆོངས་པད་ལ་འདིས་རིགས་འགྲེ །མཆོངས་པད་སོང་ནས་བརྩམ་ཞེས་བརྡའ་སྦྱར་ཚེ་བསྡུས་ནས་པད་ཀོར་༡གིས་ཆོག་པ་ཤེས་པར་བྱའོ། །དེ་ནས་རྐང་གཡོན་གཡོན་དུ་དྲུད་པ་དང་མཉམ་དུ། སྦྲམ་༡སྦྲམ་༢ཐེང་བརྡུངས་ཀྱི། སྦྲམ་ལ་བན་ཕུར་གཡོན་དུ་བསྐོར་ནས་༡ལ་གཡས་སུ་གཞོལ། སྦྲམ་༢ལའང་སྔ་མ་བཞིན་བྱ། འདི་ལ་རོལ་བ་ཞེས་བྱ་བས་འོག་ཏུའང་ཤེས་པར་བྱོས་ཤིག །སྦྲམ་སྦྲམ་ཞེས་ཆུང་ངུ་བཞི་ལྔ་ལ་རྐང་གཡས་གཡས་སུ་འདེགས་འཇོག་དང་བསྟུན། ལག་གཡས་གཡས་ནང་དུ་བསྐོར། རྐང་གཡོན་འདེགས་འཇོག་དང་བསྟུན། ལག་གཡོན་ནང་དུ་བསྐོར་ནས་འགྲོ་ཕྱོགས་སུ་བལྟས་ཏེ་ཕུར་དར་ལག་གཡོན་མཁྲིག་མ་ནང་ནས་དྲངས་ཏེ། ལག་གཉིས་བརྒྱང་བ་དང་མཉམ་དུ་གཡོན་རྟིང་གསིག །རྐང་གཡས་བཏེག་འགྲོ་ཕྱོགས་སུ་སྦིར་ཞེས་ཕབ་པའི་རྩར་རྐང་གཡོན་དྲུད་པའི་རྩེར་གཡས་ལྕགས་མདའ་རིས་སུ་བཞག་སྟེ་སྦྲམ་ལ་གཉིས་ཀའི་རྟིང་གསིག་བྱས་ལ་འགྱིང་བ་འདི་ལ་བསྐྱོད་འགྲོས་ཏེ་འོག་ཏུའང་རིགས་འགྲེ་དགོས་སོ། །དེ་ནས་རོལ་འགྲོས་ལ་འཇུག །ལྔ་པ་ནི། སྣང་སྲིད་རྣམས་དབང་དུ་བསྡུ་བར་བྱ་བའི་ཕྱིར་གཡབ་མོ་ལན་གསུམ་དུ་བྱ་བ། ཞེས་བརྗོད། སྦྲམ་ཞེས་མདུན་དུ་རྐང་གཡས་ཕབ། ཡངས་པའི་མཆོངས་པད་ཡོངས་རྫོགས་ཀྱི་མདུན་གྱི་(༧ན)
རྗེས་མར་བན་ཕུར་གཉིས་གཡས་གཡོན་བརྗེས། གཡས་ཀྱི་ཡངས་པད་དུས་རྐང་གཡས་གཡོན་པའི་རྒྱབ་ཏུ་གཞག་པའི་ཡོངས་ཕྱོགས་སུ་བལྟ། དེ་ནས། སྦྲམ་༡། སྦྲམ་༢ལ་བན་ཕུར་བརླ་སྟེང་ནས་མདུན་དུ་དུད་པ་རེ་བྱས་སྦྲམ་སྦྲམ་ཞེས་ཆུང་ངུ་ཁ་ཡར་ལ་བན་ཕུར་ནང་དུ་བསྐོར་ནས་གཡོན་དགུ་ལ་བརྟེན། ལག་གཡས་འཕྱར་བ་དང་རྐང་གཡས་བཏེག་འགྲོ་ཕྱོགས་སུ་ཕབ་པའི་སྦྲམ་ཞེས་བན་སྐྲ་གཡབ་ཅིང་། རོལ་མོ་ཆུང་ངུ་ཁ་ཡར་ལ་རྐང་གཡས་བཏེག་ནས་གཡས་འགྲོ་ཕྱོགས་སུ་སྦྲམ་ཞེས་ཕབ། ལག་གཡས་ཀྱང་བརླ་སྟེང་དུ་རྐྱོང་། ཡང་སྔ་མ་ཇི་ལྟ་བ་བཞིན་འགྲོ་ཕྱོགས་སུ་གཡབས་རྗེས། རྐང་གཡོན་མདུན་དུ་བསྐོར་བའི་བཞག །གཡས་རྒྱབ་ཏུ་དྲུད་ཙམ་གྱི་འགྱིང་ནས་རོལ་འགྲོས་ལ་འཇུག །དྲུག་པ་ནི། མཁའ་འགྲོ་རྣམས་དཔའ་བསྐྱེད་པར་བྱ་བའི་ཕྱིར་གསིག་གསིག་ལན་གསུམ་དུ་བྱ་བ། ཞེས་བརྗོད། ཛམ་ཆུང་ཡན་ཆོས་དབྱིངས་ཇི་ལྟ་བ་ལས་མདུན་དུ་པད་ཀོར་གསུམ་པའི་དབུས་མར་ཕྱག་མཚན་བརྗེ། དེ་ནས། སྦྲམ་༡། སྦྲམ་༢། སྦྲམ་༣། སྦྲམ་༤། ཞེས་པའི་བར་རྐང་གཡས་བརྐྱངས་ནས་སྤོས་པའི་གཡས་ཕྱོགས་གསིག་ཅིང་། སྦྲམ་༤ཞེས་པའི་བཞི་དེ་ལ་རོལ་མོ་ཆུང་བ་ཞིག་ཡོང་བ་དེ་ལ་རྐང་གཡོན་གཡས་སུ་མི་འགྲོ་བར་གཡོན་དུ་འཐེན། སྦྲམ་སྦིར་སྦྲམ་གསུམ་གྱི་དང་པོར་གཡས་སུ་གཅུ་སྟེ་འགྱིང་། གཉིས་པར་གཡོན་དུ་གཅུ་པའི་འགྱིང་། གསུམ་བར་མདུན་དུ་ནེམ། དེ་ནས་གཡོན་ཕྱོགས་ལ་གོ་ལྡོག་པའི་གསིག་འགྱིང་། དབུས་སུ་བཞི་ལ་རེ་མོས་ཀྱིས་གསིག་རྗེས། རྐང་གཡས་བཏེག་ལག་གཡས་འཕྱར་ཏེ། གཡོན་འགྲོ་(༧བ)
ཕྱོགས་སུ་སྦྲམ་ཞེས་གཡོན་པའི་རྟིང་གསིག་དང་བསྟུན་ནས་ཕབ། ཕུར་དར་གཡོན་ཕྱོགས་གཡུག །སྦིར་ཞེས་པར་གཡས་བཏེག་ཕུར་དར་གཡས་སུ་གཡུག །སྦྲམ་ཞེས་པར་རྐང་གཡས་གཡས་ཕྱོགས་ཕབ། ཡང་སྦྲམ་ལ་རྐང་གཡོན་གཡོན་ཕྱོགས་བསྐོར་ནས་མདུན་དུ་ཕབ། གཡས་རྒྱབ་ཏུ་དྲུད། སྦིར་ལ་རྐང་གཡོན་བཏེག་གཡོན་པའི་བན་སྒྲ་གཡོན་ཕྱོགས་གཡུག་ཅིང་འཕྱར། སྦྲམ་ལ་རྐང་གཡོན་རང་བབས་སུ་ཕབ། འདི་ལ་འཇོལ་ལམ་གཞོལ་ཞེས་བྱ་བ། འོག་ཏུ་གཞོལ་ཞེས་པར་འདིས་འགྲེའོ། མཆོངས་པད་སོང་ནས་ཙམ། ཞེས་བརྗོད། ཡངས་པད་༡བྱ། དེ་ནས་རོལ་པ་དང་བསྐྱོད་འགྲོས་ཀྱི་འགྱིང་ཆོས་དབྱིངས་ཇི་ལྟ་བ་ནས་རོལ་འགྲོས་ལ་འཇུག །བདུན་པ་ནི། དམ་ཉམས་ཀྱི་བླ་འགུགས་པར་བྱ་བའི་ཕྱིར་མགོ་ཁུག་ལན་གསུམ་དུ་བྱ་བ། ཞེས་དང་། བཞི་པར་བརྗོད་ནས་ཡངས་པད་༡བྱ། ཛམ་ཆུང་ནས་བཟུང་། ལག་གཉིས་དཀུ་ལ་བརྟེན་པ་དང་། མགོ་ཁུག་བྱེད་པ་མ་གཏོགས་དཔའ་བསྐྱེད་ཇི་ལྟ་བ་བཞིན་ནོ། །དེ་ནས་རོལ་འགྲོས་ལ་འཇུག །བརྒྱད་པ་ནི། བསྲུང་མ་རྣམས་སྤྱན་དྲང་བའི་ཕྱིར་ཤུག་པ་ལན་གསུམ་དུ་བྱ་བ། ཞེས་དང་། བཞི་པད་བརྗོད། ལག་གཉིས་ཀྱི་སྲིན་ལག་མཐེའུ་ཆུང་། མཐེ་བོང་གིས་མནན། གོང་མཛུབ་གཉིས་བརྐྱངས་ནས། གོང་གི་དབུས་ལྟར་གཡས་གཡོན་རེ་མོས་སུ་གཅུ་བའི་གསུམ་ལ་ཤུག་པ་འཚེར། བཞི་པར་གཡས་སུ་ནེམས་བྱས་ནས་གཞོལ་སོགས་སྔ་ཕྱི་རྣམས་བླ་འགུགས་ལྟར་བྱས་ནས་རོལ་འགྲོས་ལ་འཇུག །དགུ་པ་ལ་གསུམ་ལས། དང་པོ་ནི། སྟེང་བྱིན་གྱིས་བརླབ་པར་བྱ་བའི་ཕྱིར་གནམ་འཁོར་ལོ་རྩིབས་བརྒྱད་དུ་(༨ན)
བྲི་བ། ཞེས་བརྗོད། རོལ་འགྱིང་། བཞི་པད་ཡོངས་རྫོགས་ཆོས་དབྱིངས་བཞིན་ལས་གཡས་སུ་ཡངས་པད་ཀྱི་སྐབས་རྐང་གཡས་གཡོན་རྒྱབ་ཏུ་བཞག་སྟེ་ཡོངས་ཕྱོགས་ལ་བལྟས་བླངས་རྗེས། བན་ཕུར་བརླ་སྟེང་ནས་མདུན་དུད་ཙམ་གཉིས་གཡབ་མོ་ལྟར་བྱས་ནས། རྐང་གཡོན་པའི་པུས་སྟེང་རྐང་གཡས་བཞག །ལག་གཡོན་དཀུ་ལ་བརྟེན། ལག་གཡས་འཕྱར་བའི་ཕུར་རྩེ་ནམ་མཁའ་ལ་བསྟན། རོལ་མོ་ཆེ་བ་བརྒྱད་ལ་གཡས་སྐོར་དུ་འཕར་ཞིང་དལ་བུས་བསྐོར་བའི། ༨་༨་ཞེས་པའི་རྗེས་མར་ཆུང་བ་ཞིག་ཡོད་དེ་ལ་ལག་གཡས་ཕབ། རྐང་གཡས་ཅུང་ཟད་ཕབ་པའི་ངང་ནས། སྦྲམ་སྦིར་སྦྲམ་གསུམ་གྱི་དང་པོ་ལ་ཕུར་དར་གཡོན་དུ་གཡོབ། གཉིས་པར་ལག་གཡས་སུ་འཕྱར། གསུམ་པར་རྐང་གཡས་ཕབ། ཡང་རོལ་མོ་གསུམ་ལ་རྐང་གཡོན་བཏེག་པའི་གོ་ལྡོག་པའི་ལེན་ལུགས་གོང་ལྟར་བྱ་བ་འདི་ལ། གྲོལ་བསྡུ་ཞེས་པའམ་འགྲོ་ལ་བསྡུ་ཞེས་བྱ་སྟེ་འོག་ཏུའང་འདིས་འགྲེའོ། །དེ་ནས་མཆོངས་པད་བྱ། རོལ་བ་བསྐྱོད་འགྲོས་རྣམས་ཆོས་དབྱིངས་དང་འདྲ། དེ་ནས་རོལ་འགྲོས། གཉིས་པ་ནི། བར་བྱིན་གྱིས་བརླབ་པར་བྱ་བའི་ཕྱིར་ལོགས་བཀྲ་ཤིས་རྟགས་བརྒྱད་དུ་བྲི་བ། ཞེས་བརྗོད། སྔར་དང་འདྲ་བ་ལས། ཕུར་རྩེ་བར་དུ་གཏོད། གསུམ་པ་ནི། འོག་བྱིན་གྱིས་བརླབ་པར་བྱ་བའི་ཕྱིར་ས་པདྨ་འདབ་བརྒྱད་དུ་བྲི་བ། ཞེས་བརྗོད། སྔ་མ་ལྟར་ནས་ཕུར་རྩེ་འོག་ཏུ་གཏོད། བསྡུས་པ་བྱེད་ན་འདི་གསུམ་འཆམས་སྐད་གཅིག་ཏུ་བསྒྱུར་ནས། རོལ་མོ་བརྒྱད་ཀྱི་དང་པོ་གཉིས་ལ་ཕུར་རྩེ་གནམ། བར་པ་གསུམ་ལ་ཕུར་རྩེ་བར། ཐ་མ་གསུམ་ལ་ཕུར་རྩེ་འོག་ཏུ་གཏོད་པའོ། (༨བ)
བཅུ་པ་ནི། རྡོ་རྗེ་ཕྱེད་འགྲོས་ཀྱིས་ས་བཙལ་བ། ཞེས་བརྗོད། རོལ་མོ་ཆེ་བ་གསུམ་ལ་རོལ་འགྱིང་། དེ་ནས་རོལ་མོ་བཞི་བརྡུང་དུ་བསྒྱུར། མཆོངས་པད་བྱ་བས་བཞི་བརྡེག་གཉིས་ཀྱི་དང་པོ་ལ་ཡངས་པད། གཉིས་པ་ལ་གཡས་སུ་གཞོལ་ཙམ་ནས་རྐང་གཡོན་བཏེག་ནས་ལེན་བྱ། དེ་ནས་བཞི་བརྡེག་གསུམ་གྱི་དང་པོ་ལ་རྐང་གཡས་འགྲོ་ཕྱོགས་སུ་བལྟས་པའི་གཡོན་དུ་ཕབ། ཕུར་རྩེ་བནྡྷའི་ནང་དུ་གཏོང་། གཉིས་པར་རྐང་གཡས་གཡས་སུ་ཕབ་ཅིང་ཡངས་པད་དང་ཕུར་དར་གཡུགས། གསུམ་པར་དེ་གཉིས་ཀྱིས་དབུས་སུ་གཡས་ཕབ་ནས་ལག་གཉིས་ཐུགས་ཀར་བསྣོལ་ནས་འདིའི་བཞི་བརྡེག་གི་གསུམ་ལ་གཡོན་ཕབ་བཞི་ལ་གཡས་བཏེག་ནས། སླར་བཞི་ཚན་གཅིག་གི་དང་པོར་རྐང་གཡས་གཡས་སུ་ཕབ། གཉིས་པར་གཡོན་བཏེག །གསུམ་པར་ཕབ་བཞི་པར་གཡས་པའི་རྩེར་གཡོན་ལྕགས་རིས་སུ་ཕབ་ནས་༡ཅེས་ཆིག་བརྡེབ་ལ་ལག་གཉིས་དཀུར་བརྟེན་ནས་འགྱིང་། ༢་༢ལ་རྐང་གཡོན་བཏེག །བཞི་བརྡེག་གསུམ་གྱི་དང་པོ་ལ་རྐང་གཡོན་གཡས་སུ་ཕབ། གཉིས་པར་གཡོན། གསུམ་པར་དབུས་སུ་ཕབ། འདི་རྣམས་ཀྱི་ལག་སྟབས་གོང་ལྟར། འདིའི་གསུམ་པ་ལ་གཡས་ཕབ། བཞི་པ་ལ་གཡོན་བཏེག །དེ་ནས་བཞི་བརྡེག་གཅིག་གི་དང་པོ་ལ་རྐང་གཡོན་གཡོན་དུ་ཕབ། གཉིས་པ་ལ་རྐང་གཡས་བཏེག །གསུམ་པ་ལ་རྐང་གཡས་མདུན་དུ་ཕབ། བཞི་ལ་གཡོན་བཏེག་ནས་རྐང་གཡས་པའི་རྩེར་གཡོན་ལྕགས་རིས་སུ། ༡་ཅེས་ཆེམ་རྒྱབ་ལ་འབེབས་པ་དང་ལག་གཉིས་དཀུར་བརྟེན་ལྡེམ་འགྲོས་ཀྱི་འགྱིང་། ༢་༢ལ་རྐང་གཡོན་བཏེག་འབེབས་ནས་གཡས་ཀྱི་བཞི་འགྲོས་ནས་བརྩམ་སྟེ་བཞི་(༩ན)
འགྲོས་ལ་འཇུག །བཅུ་གཅིག་པ་ནི། བཞི་འགྲོས་ཇི་ཙམ་འོས་པའི་གཡོན་པའི་བཞི་འགྲོས་ཀྱི་གསུམ་པའི་ཐོག་ནས། རྡོ་རྗེ་རྐྱང་འགྲོས་ཀྱིས་ས་བཏུལ་བ། ཞེས་པ་རྐང་གཡོན་པའི་གཉིས། གཡས་པའི་བཞི་འགྲོས་གསུམ་པའི་ཐོག་ཏུ་རྫོགས་པ་ཡོང་། དེ་ནས་བཞི་ཚན་གཉིས་ཀྱི་དང་པོའི་གསུམ་ཡན་ལག་གཡས་སུ་གཅུ་བའི་འགྱིང་། བཞི་དང་གཉིས་པའི་གཉིས་ཡན་གཡོན་དུ་གཅུ་བའི་འགྱིང་། གསུམ་བཞི་ལ་གཡས་ཕྱོགས་ནས་ཡངས་པད་ཀྱི་འགོ་བརྩམ། དེ་ནས་བཞི་ཚན་བཅུ་ལས། དང་པོའི་༡ལ་ཡངས་པད། ༢་པར་ཕུར་པ་མདུན་ནས་ཡར་དྲངས། ༣་པར་པུས་སྟེང་། བཞི་པར་རྒྱབ་ཏུ་ཕུར་དར་གཡུག །གཉིས་པར་བན་ཕུར་གཡས་སུ་གཞོལ་བའི་འགྱིང་། གསུམ་པར་རྐང་གཡས་བཏེག་འབེབས་ངོས་གཡས་ཟུར་དུ་ཡངས་པད་གོང་ལྟར། བཞི་པར་བན་ཕུར་གཡས་སུ། ལྔ་པར་རྐང་གཡོན་བཏེག་ཙམ་བཞག་པའི་རྒྱབ་ཏུ་རྐང་གཡས་བཞག་པའི་ཡོང་ཕྱོགས་ཀྱི་པད་མ་འདྲི་ཚུལ་གཡས་སུ་ཡངས་པད། དྲུག་པར་བན་ཕུར་གཡས་སུ། བདུན་པར་རྐང་གཡས་བཏེག་ཙམ་བཞག་པའི་རྒྱབ་ཏུ་རྐང་གཡོན་བཞག་པའི་འགྲོ་ཕྱོགས་ཀྱི་པདྨ་འདྲི་ཚུལ་གཡོན་ཕྱོགས་ཡངས་པད། བརྒྱད་པར་བན་ཕུར་གཡས་སུ། དགུ་པར་གཡོན་གཏེག་ཙམ་གྱིས་བཞག་པའི་རོལ་ལ་གཡས་པའི་རྟིང་པ་གཏད་ལྟེ་བ་སྐོར་ཚུལ་ནས་མདུན་དུ་ཡངས་པད་བཅུ་པར་བན་ཕུར་གཡས་སུ་གཞོལ་བའི་འགྱིང་རྣམས། དེ་ནས་གཡོན་འགྲོ་ཕྱོགས་སུ་རྐང་གཡས་རྡོ་རྗེའི་རྭ་ཕྱེད་འགྲོས་ཇི་ལྟ་བ་ལ་དབུས་རྭ་རྫོགས་ནས། ༡ཅེས་ཆེམ་རྒྱག་ལ་གཡས་ཕབ། ༢་༢ལ་རྐང་གཡོན་བཏེག །གཡས་པའི་རྟིང་(༩བ)
གསིག་གིས་གཡས་སུ་བསྐོར་ཡོང་ཕྱོགས་ལ་རྐང་གཡོན་གྱི་རྡོ་རྗེའི་རྭ་དང་། ལྡེམ་འགྲོས། བཞི་འགྲོས་ལ་འཇུག་པ་རྣམས་ཕྱེད་འགྲོས་ལྟར་བྱའོ། །བཅུ་གཉིས་པ་ནི། བཞི་འགྲོས་གཡོན་པའི་གསུམ་ཐོག་ནས། སྣ་ཚོགས་རྡོ་རྗེས་ས་གཞི་བྱིན་གྱིས་རློབ་པ། ཞེས་བརྗོད། བན་ཕུར་གཡས་སུ་གཞོལ་བ་ཡན་ཕྱེད་འགྲོས་ལྟར་བྱ། དེ་ནས་བཞི་ཚན་གསུམ་ལ་རྐང་གཡས་ཀྱི་མདུན་དུ་རྡོ་རྗེའི་རྭ་སུམ་ཀྱི་དབུས་རྭའི་བཞི་གྲངས་རྫོགས་ནས། ༡་ཅེས་ཆེམ་བརྡུང་ལག་གཡས་ཕབ། ༢་༢ལ་གཡོན་བཏེག་གཡས་པའི་རྟིང་གསིག་གིས་བསྐོར་ཏེ་གཡས་ཡོང་ཕྱོགས་སུ། བཞི་ཚན་གསུམ་ལ་རྐང་གཡོན་པས་རྡོ་རྗེའི་རྭ་གསུམ་རྫོགས་ནས། ༡་ཅེས་ཆེམ་བརྡུང་གཡོན་བབ། ༢་༢ལ་གཡས་བཏེག་གཡོན་རྟིང་གསིག་གི་རྒྱབ་ཏུ་རྐང་གཡས་ཀྱི་མདུན་དེ་ལྟ་བ་དང་། གཡོན་འགྲོ་ཕྱོགས་སུ་རྐང་གཡོན་གྱི་གཡས་སུ་ཇི་ལྟ་བ་བཞིན་བྱས་ནས། ལྡེམ་འགྲོས་དང་བཞི་འགྲོས་ལ་འཇུག་པ་ཕྱེད་འགྲོས་བཞིན་ནོ། །བཞི་འགྲོས་དེ་གའི་ངང་ནས་རྒྱབ་ཏུ་བལྟ་བའི་གཡས་ཀྱི་བཞི་འགྲོས་ཐོག་ནས་མཆོངས་པད་སོང་ནས་བརྩམ་ཞེས་བརྗོད། རྐང་གཡོན་མདུན་ཕྱོགས་ཕབ་ནས་གཡས་གཡོན་གྱི་རོལ་བགྱིང་། ཡངས་པད། བན་ཕུར་གཡས་སུ་གཞོལ་བ་རྣམས་རྐྱང་འགྲོས་ལྟར་བྱས་རྗེས། བཞི་ཚན་གསུམ་གྱི་དང་པོ་ལ་བན་ཕུར་གཡོན་དུ་བསྐོར་ནས་གཡས་སུ་གཞོལ་བའི་རོལ་པ། གཉིས་པར་ལག་རོལ་པ་དང་གསུམ་བཞི་ལ་རྐང་གཡོན་བཏེག་འབེབས། གསུམ་པའི་༡་༢ལ་རྐང་གཡས་བཏེག་འབེབས། གསུམ་བཞི་ལ་བན་ཕུར་ནང་དུ་བསྐོར། རྐང་གཡས་བཏེག །སྦིར་སྦྲམ་ལ་བསྐྱོད་འགྲོས་ཆོས་(༡༠ན)
དབྱིངས་ཇི་ལྟ་བ་བཞིན་བྱས་ནས་རོལ་འགྲོས་ལ་འཇུག །དེ་ལྟར་སྔོན་དུ་འགྲོ་བའི་སྐོར། བློ་ལྡན་མིག་གི་དགའ་སྟོན་ཏེ། །སྟེང་འོག་ཕྱོགས་མཚམས་བྱིན་བརླབ་པའི། །ཕྱག་རྒྱའི་གར་འཚམས་ཨེ་མ་མཚར། གཉིས་པ་དངོས་གཞི་ལ། རྟེན་དང་བརྟེན་པ་གཉིས་ལས། དང་པོ་ནི། མཁའ་དབྱིངས་འབྱུང་བཞི་རཀྟ་དང་། རྐང་རུས་གཞལ་ཡས་ཁང་གི་གཟུགས། །གསལ་སྟོང་རིག་པའི་མེ་ལོང་དུ། །འཆར་བྱེད་ཕྱག་རྒྱ་འདི་ནའོ། །ཞེས་བརྒྱད་ལས། དང་པོ་རོལ་འགྲོས་ངང་ནས་རྐང་གཡོན་བཏེག་པའི་རྒྱབ་ཏུ་བལྟ་བ་དང་། ས་ལས་མཁའ་དབྱིངས་དག་པའི་ནམ་མཁའི་དཀྱིལ། ཞེས་བརྗོད། རོལ་འགྱིང་ཆོས་དབྱིངས་དང་འདྲ། དེ་ནས་བཞི་བརྡུང་ལ་བསྒྱུར་ནས། བཞི་པད་ཀྱི་བརྡའ་སྦྱར་བའི་བཞི་ཚན་གཉིས་ཀྱི་དང་པོ་ལ་ཡངས་པད། གཉིས་པའི་༡དང་གཉིས་ལ་བན་ཕུར་གཡས་སུ་གསུམ་པ་དང་བཞི་པ་རྐང་གཡོན་བཏེག་འབེབས་བྱས་ནས། བཞི་ཚན་གསུམ་གྱི། དང་པོའི་༡དང་གཉིས་ལ་རྐང་གཡས་གཡོན་པའི་རྩེར་ཕབ། གཡོན་ཕྱོགས་སུ་ཕུར་དར་གཡོན་སྐོར་དུ་གཡུགས་ནས་གཡོམ་ཞིང་གསིག །གསུམ་པ་དང་བཞི་པ་ལ་གཡས་སུ་ཅུང་ཟད་གཅུ་བའི་འགྱིང་། འདི་དང་འདྲ་བ་བཞི་ཚན་གཉིས་པ་དང་གསུམ་པ་ལ་བྱེད་ཅིང་། གསུམ་པའི་གསུམ་དང་གཉིས་ལ་རྐང་གཡོན་བཏེག་འབེབས་བྱས། རྐང་གཡས་བཏེག །༡ཅེས་ཆེམ་བརྡུང་ལ་མདུན་ཟུར་དུ་མཆོངས། གཡོན་བཏེག་པའི་ངང་ནས། ༢་༢ལ་གཡས་པའི་རྟིང་གསིག་བྱས། བཞི་ཚན་ལྔ་ཡི་དང་པོའི་༡ལ་གཡོན་ཟུར་འགྲོ་ཕྱོགས་སུ་མཆོངས་པའི་བཞི་ཚན་གསུམ་ལ་གཡོམ་གསིག་སྔ་མ་ཇི་ལྟ་བ་ནས། བཞི་ཚན་བཞི་(༡༠བ)
པ་དང་ལྔ་པ་ལ། ལག་གཡོན་པའི་མཁྲིག་མ་ནས་ཕུར་དར་དྲངས་ཏེ་ཕུར་རྩེ་བནྡྷ་ལ་གཏད་ནས་རྟིང་གསིག་གི་གཡས་སུ་ཅུང་ཟད་བསྐོར་ནས་ཡོངས་སུ་བལྟ། ཡང་བཞི་ཚན་ལྔ་ལ་ལེན་ལུགས་སྔ་མ་ལྟར་གྱིས་རྐང་གཡས་ཡོང་ཕྱོགས་དང་། གཡོན་ཟུར་དུ་མཆོངས་པའི་གཡོམ་གསིག །རྟིང་གསིག་རྫོགས་ནས། བཞི་ཚན་ལྔ་ལ་གོང་ལྟར་གཡས་གཡོན་འགྲོ་ཕྱོགས་དང་། གཡོན་གཡས་ཡོངས་སུ་མཆོངས་པའི་གཡོམ་གསིག་རྟིང་གསིག་སྔ་མ་བཞིན་རྫོགས་ནས། བཞི་ཚན་བརྒྱད་ལ་བཞི་བརྡུང་གི་འགྲོས་བསྡུ་ལེན་ལུགས་དང་པོའི་༡ལ་རྐང་གཡས་དལ་བུས་བཏེག །ལག་གཡོན་ཐུགས་ཀ །ལག་གཡས་ནང་དུ་བསྐོར་ནས་གཡས་ཕྱིར་བརྒྱངས། །གཉིས་པའི་༡ལ་གཡས་ཕབ། ལྷག་མ་གསུམ་ལ་འགྱིང་། གསུམ་པའི་༡ལ་རྐང་གཡོན་བཏེག །ལག་གཡོན་ནང་དུ་བསྐོར་ནས་གཡོན་ཕྱིར་བརྒྱངས་ནས། བཞི་པའི་༡ལ་གཡོན་པར་ལྷག་འགྱིང་ཞིང་ཡངས་པད་ཀྱི་འགོ་བརྩམ། ལྔ་པར་ཡངས་པད་བྱ། །དྲུག་པ་བདུན་པ་གཉིས་ལ་རོལ་བར་བྱ། བདུན་པའི་གསུམ་བཞི་ལ་རྐང་གཡོན་བཏེག་འབེབས་དང་ལག་གཡོན་རོལ། བརྒྱད་པའི་༡༢ལ་རྐང་གཡས་བཏེག་འབེབས་དང་ལག་གཡས་རོལ། གསུམ་བཞི་ལ་བན་ཕུར་ནང་དུ་བསྐོར་ནས་ཕྱིར་བརྒྱངས་ནས། སྦིར་སྦྲམ་ཞེས་པར་བསྐྱོད་འགྲོས་ཆོས་དབྱིངས་དང་འདྲ་བ་ལ་ལག་གཉིས་དཀུར་བརྟེན་པའི་རོལ་འགྲོས་ལ་འཇུག །གཉིས་པ་ནི། ཡཾ་ལས་རླུང་ཆེན་རྒྱ་གྲམ་སྲ་ཞིང་བརྟན། ཅེས་དང་། ཆེ་གསུམ་གྱི་རོལ་འགྱིང་བྱ། དེ་ནས་རོལ་མོ་ལྔ་བརྡུང་ཆེ་ཆུང་སྤེལ་མར་བསྒྱུར། བཞི་པད་བརྗོད། ལྔ་ཚན་ཆེ་ལ་ཡངས་པད་ལན་ཚུལ། དང་པོར་པད་ཀོར། གཉིས་པར་ལག་གཡས་པུས་(༡༡ན)
སྟེང་། གསུམ་པར་ཕུར་དར་གཡུག །བཞི་པར་བནྡྷ་ར་ཕུར་པ་གཏད། ལྔ་པར་གཡས་སུ་ཅུང་ཟད་གཅུས་ནས་བན་ཕུར་ཁ་གྱེན་དུ་བསྟན་ནས་ཛཾ་བྱ། དེ་ནས་ལྔ་ཚན་དྲུག་པ་ལ་དང་པོ་ལ་ལག་གཉིས་བརྒྱངས་ནས་རྐང་གཡས་བཏེག་གཡོན་པས་རྟིང་གསིག་གི་གཡོན་འགྲོ་ཕྱོགས་སུ་བསྐོར། གཉིས་པར་གཡོན་བཏེག་གཡས་རྟིང་གསིག་གི་གཡས་ཡོང་ཕྱོགས་བསྐོར། གསུམ་པར་རྐང་གཡས་བཏེག་པའི་གནས་སྐོར་དུ་མདུན་གྱི་བར་དང་བཞི་པར་གཡོན་བཏེག་པའི་གཡོན་སྐོར་དུ་མདུན་བར་བསྐོར། ལྔ་པར་ཡངས་པད་གོང་ལྟར་བླངས་པའི་མཆོངས་པད་བྱ། །དྲུག་པར་༡་༢ལ་གཡས། གསུམ་ལ་གཡོན། བཞི་ལ་གཡས་རྣམས་ལ་ལག་པ་རྐང་པ་ཕྱོགས་མཐུན་བྱ། ལྔ་པར་རྐང་གཡོན་བཏེག་བན་ཕུར་ནང་དུ་བསྐོར་བའི་བསྐྱོད་འགྲོས་དཀུར་བརྟེན་སྔར་བཞིན་རོལ་འགྲོས་སོ། །གསུམ་པ་ནི། དེ་སྟེང་པཾ་ལས་ཆུ་ཡི་དཀྱིལ་འཁོར་དཀར། ཞེས་བརྗོད། ལྔ་ཚན་གཉིས་པ་རླུང་དཀྱིལ་དང་འདྲ། དེ་ནས་ལྔ་ཚན་དྲུག་ལ། དང་པོ་ལ་ལག་གཡས་མཆན་ཁུང་ནས་བསྐོར་ནས་བརྒྱངས། རྐང་གཡས་བཏེག་གཡོན་འགྲོ་ཕྱོགས་པར་དང་། གཉིས་པར་རྐང་གཡོན་བཏེག་གཡོན་སྐོར་དུ་གཡས་ཡོང་ཕྱོགས་བར་དང་། གསུམ་པའི་༡ལ་རྐང་གཡས་རྒྱབ་ཏུ་ཕབ་རྐང་གཡོན་བཏེག་གཡས་སྐོར་དུ་མདུན་དུ་བསྐོར། བཞི་པར་ཡངས་པད་བྱ། ལྔ་པར་གཡས་ཟུར་དུ་མཆོངས་པད་དང་། ཡངས་པད་བྱ། དྲུག་པར་རླུང་དཀྱིལ་ལྟར་བསྐྱོད་འགྲོས་རོལ་འགྲོས་སོགས་བྱ། བཞི་པ་ནི། རཾ་ལས་མེ་བྱུང་བསྐྱོད་པ་དེ་ཡི་ཆེད། །ཅེས་དང་། བཞི་པ་དེ་བརྗོད་པ་མ་གཏོགས་བཞི་ཚན་(༡༡བ)
གཉིས་པ་ཡན་རྡོ་རྗེ་ཕྱེད་འགྲོས་དང་འདྲ། དེ་ནས་མེ་དཀྱིལ་གྲུ་གསུམ་རྩ་མོ་ཡོང་ཕྱོགས་སུ་བསྟན་པ་གཉིས་ཡོད་པས། བཞི་ཚན་གསུམ་གྱི་དང་པོ་ལ་འགྲོ་ཕྱོགས་སུ་བལྟ་བའི་མདུན་ནས་གཡས་ཟུར་དུ་རྐང་གཡས་ཀྱི་གོམ་པ་གཉིས་སྤོ་དུས་ལག་བནྡྷ་ཁ་ཕྱིར་བསྟན་ལ་ཕུར་རྩེ་གཏོད། གཉིས་པར་གཡོན་ཟུར་དུ་རྐང་གཡོན་གྱི་གོམ་པ་གཉིས་སྤོ་དུས་བནྡྷ་ཁ་ཁྱེར་བསྟན་ལ་ཕུར་རྩེ་གཏོད། གསུམ་པའི་༡ལ་གཡས་ཀྱི་གོམ་གང་མདུན་ཟུར་དུ་སྤོ་བ་དང་ཕུར་དར་གཡས་སུ་གཡུག །གཉིས་གསུམ་ལ་རྐང་གཡོན་བཏེག་འཇོག་བྱ། བཞི་ལ་རྐང་གཡས་བཏེག་ནས། ༡ཅེས་ཆེམ་རྒྱག་ལ་རྐང་གཡས་གཡོན་པའི་རྩེར་འཇོག་པ་དང་ལག་གཉིས་དཀུར་བརྟེན་གྱི་ལྡེམ། ༢་༢་ཞེས་པར་དེ་གར་འདུག །ཡང་བཞི་ཚན་གསུམ་ལ་སྔ་མ་གོ་ལྡོག་པའི་རྐང་གཡོན་གཡོན་ཟུར་དུ། གཡས་གཡས་ཟུར། གཡོན་གྱི་གཅིག་ལ་མདུན་ཟུར་དུ། ལྷག་མ་གསུམ་ལ་གཡས་སུ་བསྐོར་ནས་མདུན་དུ། ལག་གཉིས་དཀུར་བརྟེན། ༡་ཅེས་ཆེམ་རྒྱག་ལ་ལྡེམ་འགྲོས་བརྗོད། ༢་༢ལ་རྐང་གཡོན་ནས་བརྩམ་པའི་བཞི་འགྲོས་ལ་འཇུག་གོ །ལྔ་པ་ནི། བཞི་འགྲོས་གཡོན་པའི་གསུམ་ཐོག་ནས། ལཾ་ལས་ས་ཡི་དཀྱིལ་འཁོར་བརྟན་པར་གྱུར། ཅེས། བཞི་ཚན་བཞི་པ་རྡོ་རྗེ་རྐྱང་འགྲོས་བཞིན་བྱས་ནས། བཞི་པད་བརྗོད་དེ། ཆུ་དཀྱིལ་གྲུ་བཞི་པའི་དབང་དུ་བྱས། བཞི་ཚན་དྲུག་གི་དང་པོ་ལ་རྐང་གཡས་མདུན་ཟུར་གཡོན་དུ་ཕབ་ནས་བན་ཕུར་སྤྲོད། གཉིས་པར་རྐང་གཡས་གཡས་ཟུར་དུ་ཕབ་ཅིང་ཡངས་པད་ཀྱི་ཕུར་དར་གཡས་སུ་གཡུག །གསུམ་པའི་༡་༢ལ་གཡས་སུ་ཅུང་ཟད་ཕབ་ནས་གསིག །རོལ་མོ་ཆེ་བའི་༣་༤ལ་རྐང་གཡས་བཏེག་གཡོན་(༡༢ན)
དུ་བསྐོར་ནས། རྒྱབ་ཏུ་བཞི་པར་རྐང་གཡས་ཀྱི་གཡོན་ཟུར་དུ་ལག་སྟབས་གོང་ལྟར། ལྔ་པར་རྐང་གཡས་གཡས་ཟུར་དུ། དྲུག་པའི་༡ལ་རྐང་གཡོན་ཕབ། ༢་ལ་རྐང་གཡས་བཏེག །༣་ལ་རྐང་གཡས་གཡས་ཕྱོགས་ཕབ། ༤་ལ་རྐང་གཡོན་བཏེག་མདུན་དུ། ༡་ཅེས་ཆེམ་རྒྱག་ལ་འབེབས་པ་དང་བསྟུན་ལྡེམ་འགྲོས་དཀུར་བརྟེན་བྱ། ༢་༢ལ་བཞི་འགྲོས་གོང་བཞིན་བྱ། དྲུག་པ་ནི། དེ་སྟེང་རཀྟའི་རྒྱ་མཚོ་རྦ་ཀློང་འཁྲུག །ཅེས་དང་། མཆོངས་པད་བརྗོད་བཞི་ཚན་བཞི་པ་ཡན་རྡོ་རྗེ་རྐྱང་འགྲོས་ལྟར་བྱས་ནས། བཞི་ཚན་དྲུག་གི །དང་པོ་ལ་རྐང་གཡས་གཡོན་པའི་པུས་ཐད་བཏེག །ལག་གཉིས་གཡོན་དུ་བསྐོར་རྟིང་གསིག་དང་བཅས་གཡས་སུ་གཞལ་བ་རིམ་གྱིས་མཐོ་བ། བཞི་ཚན་༢པའི་༡དང་༢ལ་རྦ་ཀློང་གི་ཚུལ་གྱི་ནང་དུ་ལག་གཉིས་གཡབ་པ་དང་རྐང་གཡས་མདུན་དུ་ཕབ། གསུམ་པ་དང་བཞི་པ་ལ་འགྱིང་། བཞི་ཚན་གསུམ་པ་དང་བཞི་པ་ལ་རྐང་གཡོན་བཏེག །ལག་གཉིས་གཡས་སུ་བསྐོར་བ་ནས་བཟུང་གཡས་གོ་ལྡོག་པའི་ལེན་བཞི་ཚན་ལྔ་པར་གཡས་ཇི་ལྟ་བ་དང་། བཞི་ཚན་དྲུག་པའི་༡་༢ལ་རྐང་གཡས་འབེབས། །གསུམ་ལ་རྐང་གཡོན་ཤུགས་ཅུང་ཆེ་བ་རེ་བཏེག །བཞི་ལ་ཕབ་ནས་མཆོངས་པད་བརྗོད་ནས། ཡངས་པད་༡དང་རོལ་པ་བསྐྱོད་འགྲོས་ཀྱི་འགྱིང་དང་། ༡ནས་བརྩམས་པའི་རྐང་གཡོན་པའི་བཞི་འགྲོས་ལ་འཇུག །བདུན་པ་ནི། དབུས་སུ་ཀེང་རུས་རི་རབ་བརྩེགས་པའི་སྟེང་། ཞེས་བརྗོད། བཞི་ཚན་བཞི་པ་ཡན་རཀྟ་དང་མཚུངས། དེ་ནས་བཞི་ཚན་དགུའི་དང་པོ་ལ། རྐང་གཡས་བཏེག །ལག་གཉིས་ནང་དུ་བསྐོར་བའི་གར་གྱི་རྐང་གཡོན་པའི་རྟིང་གསིག་(༡༢བ)
གིས་གཡོན་དུ་བསྐོར་ནས་འགྲོ་ཕྱོགས་སུ་ལག་གཡས་མཆོག་སྦྱིན་གཡོན་དཀུར་བརྟེན་ནས། བཞི་ཚན་གཉིས་པའི་༡ལ་རྐང་གཡས་ཕབ། གཉིས་ལ་དེ་གར་འདུག །གསུམ་བཞི་ལ་ལག་གཉིས་གྱེན་དུ་བསྟན་རྐང་གཡོན་བཏེག །བཞི་ཚན་གསུམ་པར་གཡོན་ནས་ལག་གཉིས་ནང་དུ་ནང་བསྐོར་བའི་གར་དང་རྐང་གཡས་པའི་རྟིང་གསིག་གི་གཡས་སུ་བསྐོར། ཡོང་ཕྱོགས་སུ་ལག་གཡོན་མཆོག་སྦྱིན་གཡས་དཀུར་བརྟེན་ནས། བཞི་ཚན་བཞི་པའི་༡ལ་གཡོན་ཕབ་གཉིས་ལ་དེ་གར་འདུག །གསུམ་བཞི་ལ་ལག་གཉིས་གྱེན་བསྟན་རྐང་གཡས་བཏེག །བཞི་ཚན་ལྔ་པར་གོང་གི་གཡས་ཇི་ལྟ་བ་ནས། གཡས་འགྲོ་ཕྱོགས་སུ་ཤུགས་ཆེ་བས་དྲུག་པའི་༡ལ་རྐང་གཡས་ཕབ། གཉིས་པར་རྐང་གཡོན་གཡས་ཀྱི་མདུན་དུ་སྤོས། གསུམ་པར་རྐང་གཡས་མདུན་དང་། བཞི་པར་རྐང་གཡོན་མདུན་དུ་མཉམ་པར་ཕབ། བདུན་པར་ལག་གཉིས་ཐལ་སྦྱར་པུས་མོ་ཅུང་ཟད་ཕབ་ནས་ལན་གཉིས་གསིབ། བརྒྱད་པར་ལག་གཉིས་གཡས་སུ་གཞོལ་ནས་ཡངས་པད་ཀྱི་འགོ་བརྩམས་པའི། དགུ་པར་ཡངས་པད་ནས་བཟུང་བཞི་འགྲོས་ལ་འཇུག་པ་ཡན་རཀྟ་དང་འདྲའོ། །བརྒྱད་པ་ནི། བཞི་འགྲོས་དེའི་ངང་ནས་རྐང་གཡས་པའི་བཞི་འགྲོས་ཀྱི་གསུམ་པའི་ཐོག་ནས། བྷྲཱུཾ་ལས་རིན་ཅེན་སྣ་ལྔའི་རང་བཞིན་ལས། །ལེགས་གྲུབ་དངས་ཤིང་ཐོགས་མེད་གཞལ་ཡས་ཁང་། ཞེས་བརྗོད། བཞི་ཚན་གསུམ་གྱི་ཕུར་དར་གཡུག་པ་ཡན་གོང་དང་འདྲ། དེ་ནས་སྦིར་སྦྲམ་ལ་ཕུར་རྩེ་བནྡྷར་གཏད་དེ་གཡས་སུ་གཞོལ། སྦིར་སྦྲམ་ལན་གསུམ་ལ་རོལ་བ་བྱས་པའི་གསུམ་པའི་སྐབས་རྐང་གཉིས་གཡས་(༡༣ན)
སུ་དྲུད་ཙམ་བྱས། རོལ་མོ་ཐེང་བརྡུང་ལ་རྐང་གཡས་གཡོན་འདེགས་འཇོག་རེ་མོས་དང་བསྟུན་ལག་གཉིས་གཡས་གཡོན་རེ་མོས་སུ་འཕྱར་བ་ནི་བཤུད་འགྲོས་ཆིག་རྡེག་ཅེས་བྱ། འགྲོས་འདིས་ཕྱོགས་བཞི་ཀའམ་ཕྱོགས་༡ཏུ་རེ་ཁ་འཐེན་པའི་ཚུལ་དང་། སྒོ་འཁྱོག་སྒོ་འགྲམ་སྒོ་ལོགས་ཡ་ཕུབ་སོགས་ཀྱི་དོད་རེ་བྱས་ཏེ་གྲུབ་རྗེས། མཆོངས་པད་བྱ། རོལ་མོ་ཆེ་ཆུང་ཐེངས་བརྡུང་རེ་ལ་ཡངས་པད་ཀྱི་ལེན་གཡུག་གཏོད་པ་རེ་རེ་བྱ། རོལ་པ་དང་བཅས་བླངས་རྗེས། སྦྲམ་སྦྲམ་ཞེས་ཆུང་ངུ་ཁ་ཤས་ལ་ལག་གཉིས་ནང་དུ་བསྐོར་ནས་བསྐྱོད་འགྲོས་བྱས་ཏེ་རོལ་འགྲོས་ལ་འཇུག །དེ་ལྟར་རྟེན་གྱི་རིམ་པ་རྣམས། །མིག་ལ་བདེ་བའི་སྟང་སྟབས་ཀྱི། །འཛིན་མེད་སྟོང་པའི་ངང་ཉིད་ལས། །འཇའ་ཚོན་ལྟ་བུར་གསལ་བར་ཤར། །གཉིས་པ་བརྟེན་པ་ལྷ་བསྐྱེད་པ་ལ་བརྒྱད་ལས། དང་པོ་གཙོ་བོ་བསྐྱེད་པ་ལ་དགུ་སྟེ། འདི་ནས་སྒོ་མའི་བར་འཆམས་སྐད་གཏོང་མཚམས་ཆོས་དབྱིངས་དང་འདྲའོ། །བརྟེན་པ་ལྷ་བསྐྱེད་པ་ལ་དགུའི་དང་པོ་དཔལ་ཆེན་པོའི་འགྱིང་ཆེན། ཅེས་བརྗོད། ཛཾ་ཆུང་ཡན་བླ་འགུགས་ཇི་ལྟ་བ་ནས་ཅུང་དལ། ལག་གཉིས་བརྒྱངས་པའི་ངོས་ལག་གཡས་ཅུང་ཟད་མཐུ་བར་བྱ། སྦྲམ་༡སྦྲམ་༢སྦྲམ་༣སྦྲམ་༤ལ་རྐང་གཡས་བརྐྱང་གི་ཡོང་ཕྱོགས་སུ་འགྲོ་བ་སྤོས་ཕྲལ་དེའི་རྟིང་པའི་ཐད་རྐང་གཡོན་སླེབ་པ་ལ་དཔའ་བསྐྱེད་དང་འདྲ་བ་བྱེད། །སྦྲམ་༤པའི་༤དེ་ལ་རོལ་མོ་ཆུང་བ་ཞིག་ཡོང་བས་དེ་ལ་གཡས་པའི་རྟིང་པའི་རྩར་གཡོན་མི་འགྲོ་བར་གཡོན་འགྲོ་ཕྱོགས་སུ་ཅུང་ཟད་འཐེན་ཅིང་། གཡས་བཏེག་སྦྲམ་ཞེས་པར་ཕུར་དར་གཡོན་དུ་གཡུག །སྦིར་ལ་གཡས་ཕྱར་(༡༣བ)
ཕུར་དར་རྒྱབ་ཏུ་གཡུག །སྦྲམ་ཞེས་པར་རྐང་གཡས་ཕབ་ཡང་སྦྲམ་སྦིར་སྦྲམ་ལ་གཡོན་ལ་གོ་ལྡོག །འདི་གྲོལ་བསྡུའམ་འགྲོས་བསྡུ་ཞེས་བྱ་སྟེ་སྟེང་བར་འོག་དང་འདྲ། གསུམ་བརྡུང་གཉིས་ཀྱི་དང་པོ་ལ་ཡངས་པད། གཉིས་པ་ལ་ཛཾ་ཆུང་། དེ་ནས་རྐང་གཡོན་བརྐྱང་གི་གཡོན་འགྲོ་ཕྱོགས་ལ་ཆེ་བཞི་ལ་གོང་གི་གཡས་གོ་ལྡོག་དང་འགྲོས་བསྡུ་ཛཾ་ཆུང་བྱ། དབུས་སུ་ཆ་བཞི་པ་གཡས་གཡོན་རེ་མོས་དང་། འགྲོས་བསྡུ། མཆོངས་པད། རོལ་པ། བསྐྱོད་འགྲོས་དང་། འདི་ནས་སྟག་ཤམ་གྱི་བར་བསྐྱོད་འགྲོས་དཀུར་བརྟེན་གྱི་རོལ་འགྲོས་བྱ། གཉིས་པ་ནི། དཔལ་ཆེན་པོའི་འགྱིང་ཆུང་། ཞེས་བརྗོད། ཛཾ་ཆུང་ཡན་འགྱིང་ཆེན་དང་འདྲ། དེ་ནས་ལག་གཉིས་དཀུར་བརྟེན་ནས་འགྱིང་ཆེན་གྱིདབུས་མ་ནས་གཟུང་བསྐྱོད་འགྲོས་རྣམས་བྱའོ། །གསུམ་པ་ནི། དབུ་གསུམ་རྫོགས་སུ་བསྐྱེད་པ། ཞེས་བརྗོད། ཛཾ་ཆུང་ཡན་འགྱིང་ཆེན་དང་འདྲ་བ་ལས། ཛཾ་ཆུང་གི་རོལ་མོ་གསུམ་གྱི་རེ་རེར་ཚིག་རྐང་གསུམ་རེ་བརྗོད་པས། ཞལ་གཡས་དཀར་ལ་བཞད་པས་རྒོད་རྒོད་འདྲ་ཞེས་བྱ། ལག་གཉིས་ཐལ་མོ་ཁོང་སྟོང་རྣ་བ་གཡས་ཐད་དུ་གཡས་ཞལ་མཚོན་བྱེད་སྟེང་འོག་ཏུ་གཅུ་ཙམ་རེ་བྱ་བ་མ་གཏོགས་ཆེ་བཞི་ལ་གཡས་གསིག་འགྱིང་བཞིན་བྱ། དེས་མཚོན། ཛཾ་ཆུང་ལ། ཞལ་གཡོན་དམར་ལ་གདངས་པས་གཤེ་གཤེ་འདྲ། ཞེས་བརྗོད། ཆེ་བཞི་ལ་གཡོན་འགྲོ་རྐང་ལག་གཡས་གོ་ལྡོག་གི་གཡོན་ཞལ་མཚོན་པར་བྱ། ཛཾ་ཆུང་ལ། ཞལ་དབུས་མཐིང་ལ་རྔམས་པས་འཇིགས་པར་སྟོན། ཞེས་བརྗོད། དབུས་སུ་རེ་མོས་ཀྱི་གཅུ་བས་དབུས་ཞལ་མཚོན་པར་བྱས་ནས་གཞན་མ་རོལ་འགྲོས་པར་འགྱིང་(༡༤ན)
ཆེན་ཇི་ལྟ་བ་བཞིན་ནོ། །བཞི་པ་ནི། ཕྱག་དྲུག་རྫོགས་སུ་བསྐྱེད་པ། ཞེས་བརྗོད། ཡངས་པད་ཡན་འགྱིང་ཆེན་དང་འདྲ། ཛཾ་ཆུང་དང་བསྟུན། རྡོ་རྗེ་རྩེ་དགུའི་ས་དགུས་རྟོག་པ་འཇོམས། །ཞེས་བརྗོད་ནས། ཆེ་བཞི་ལ་ལག་གཡོན་དཀུར་བརྟེན་གཡས་མཐོ་བར་འཕྱར། གཡས་ཡོང་ཕྱོགས་སུ་རྐང་གཡས་བཏེག་གཡོན་རྟིང་གསིག །གཡས་ཕབ་མཚམས་གཡོན་སླེབ་པ་བྱ། སྦྲམ་བཞི་ཞེས་པའི་བཞི་དེར་རོལ་མོ་ཆུང་བ་ཞིག་ཡོང་བས་རྐང་གཡོན་བཏེག་གཡོན་འགྲོ་ཕྱོགས་སུ་གཡས་གཡོན་གཉིས་ཀའི་གཞོལ་བྱ། དེ་ནས་ཡངས་པད་དང་། ཛཾ་ཆུང་དུས། རྡོ་རྗེ་རྩེ་ལྔས་དུག་ལྔ་དབྱིངས་སུ་དག །ཅེས་བརྗོད། ལག་གཡས་ཐད་ཀར་བརྒྱད་པ་མ་གཏོགས་ཡངས་པད་ཡན་སྔ་མ་ཇི་ལྟ་བ་བྱ། ཛཾ་ཆུང་དང་བསྟུན། མེ་དཔུང་འབར་བས་འཁོར་བའི་ཉོན་མོངས་བསྲེག །ཅེས་བརྗོད། ལག་གཡས་དཀུར་བརྟེན། གཡོན་པའི་སྲིན་ལག་དང་མཐེའུ་ཆུང་གཉིས་བསྐུམ་གཟན་གསུམ་བརྐྱང་ནས་མཐོ་བར་བརྐྱངས། རྐང་གཡོན་བཏེག་གཡོན་འགྲོ་ཕྱོགས་སུ། གཡས་གོ་ལྡོག་པའི་གཞོལ་དང་བཅས་པ་བྱ། ཛཾ་ཆུང་དང་བསྟུན། ཁ་ཊྭཱཾ་རྩེ་གསུམ་དུག་གསུམ་རྩད་ནས་གཅོད། །ཅེས་བརྗོད། ལག་གཡོན་པའི་མཐེ་བོས་མཐེའུ་ཆུང་མནན་གཞན་གསུམ་བརྐྱད་པ་ཐད་ཀར་བརྒྱང་བ་མ་གཏོགས་སྔ་མ་དང་འདྲ། ཛཾ་ཆུང་ལ། རི་རབ་ཕུར་བུས་དགྲ་བགེགས་གཟིར་བར་བྱེད། ཅེས་བརྗོད་ལག་གཉིས་ཕུར་པ་སྒྲིལ་ཚུལ་བྱ་བ་མ་གཏོགས་གཞན་མ་རོལ་འགྲོས་ཡན་དབུས་ཞལ་དང་མཚུངས་སོ། །ལྔ་པ་ནི། ཞབས་བཞི་རྫོགས་སུ་བསྐྱེད་པ། ཞེས་བརྗོད། ཛཾ་(༡༤བ)
ཆུང་ཡན་འགྱིང་ཆེན་དང་འདྲ། དེ་ནས་ལག་གཉིས་པུས་མོའི་ཐད་ཀར་བརྐྱང་། །རྐང་གཉིས་གཡོན་བརྐྱང་དུ་བསྒྲད་པའི་གཡས་གཡོན་ནང་དུ་གཅུ་ཞིང་གསིག་ཅིང་གཞོལ་སོགས་ནས་རོལ་འགྲོས་བར་དཔའ་བསྐྱེད་བཞིན་བྱ། དྲུག་པའི་དང་པོ་ནི། བཏགས་པའི་རྒྱན་གཉིས་ཀྱི་ཐོག་མར་མི་མགོ་སྐམ་པོ་ལྔ་ཡི་དབུ་རྒྱན། ཞེས་བརྗོད། ཛཾ་ཆུང་ཡན་འགྱིང་ཆེན་བཞིན་བྱ། དེ་ནས་སྦྲམ་༡ནས་སྦྲམ་ལྔའི་བར་ཆེ་ལྔ་ཡི་བཞི་ཡན་ལ་རྐང་གཡས་གཡོན་རེ་མོས་ཀྱི་གཅུ། ལྔ་པར་རང་སར་འདུག །ལག་གཉིས་ཐལ་མོ་ཁོང་སྟོང་དུ་སྦྱར་བ། དཔྲལ་བའི་དབུས། རྣ་ལྟག་གཡས། དེ་གཉིས་ཀྱི་བར། རྣ་ལྟག་གཡོན། དེ་དང་དཔྲལ་དབུས་ཀྱི་བར་རྣམས་སུ་ཐོད་སྐམ་ལྔའི་ཚུལ་བྱ། དེ་རྗེས་འགྲོས་བསྡུ་ནས་རོལ་འགྲོས་པར་འགྱིང་ཆེན་དང་འདྲ། གཉིས་པ། ཐོད་རློན་ལྔ་བཅུའི་དོ་ཤལ། ཅེས་བརྗོད། ཡངས་པད་ཡན་འགྱིང་ཆེན་དང་འདྲ། ཛཾ་དང་བསྟུན་ནས་སྐྲ་ལག་གཡས་ཀྱི་བཟུང་། རྣ་ལྟག་གཡོན་ཐད་དུ་འཕྱར་ནས། སྦྲམ་༡ནས་སྦྲམ་དྲུག་གི་བར་རིམ་གྱིས་བསུས་པའི་མཐའ་སྐོར་ནས་རྣ་ལྟག་གཡས་ཐད་དུ་འཕྱར་ནས། སྦྲམ་སྦིར་སྦྲམ་གསུམ་ལ་འགྱིང་། སྦྲམ་༡ནས་ལྔའི་བར་སྔ་མ་གོ་ལྡོག་ཏུ་བསྐོར་བའི། དྲུག་ལ་སྐྲ་བཞག་རྐང་གཡོན་བཏེག་ནས་གཞོལ་བྱེད་པ་ནས་རོལ་འགྲོས་རྣམས་དཔའ་བསྐྱེད་བཞིན་ནོ། །བདུན་པའི་དང་པོ་ནི་བྱུག་པའི་རྩི་གསུམ་གྱི་ཐོག་མར་རཀྟའི་ཐིག་ལེ། ཞེས་བརྗོད། ཡངས་པད་ཡན་འགྱིང་ཆེན་དང་འདྲ། ཛཾ་ཆུང་གི་༡་༢་ལ་གོང་མཛུབ་སྲིན་གསུམ་བན་ནང་དུ་བཅུག །གསུམ་པར་སྟོན་ཏེ། སྦྲམ་༡རས། སྦྲམ་བཞིའི་བར་རྐང་གཡས་གཡོན་རེ་མོས་སུ་མདུན་(༡༥ན)
དུ་སྤོ་ཞིང་གཅུ་བ་དང་། བྱུག་པའི་རྒྱན་ནི་དང་པོ་ལ་གོང་མོའི་རྩེས་སྨིན་དབྲག །གཉིས་པར་མཛུབ་སྲིན་གྱི་མཁུར་ཚོས་གཡས་གཡོན། གསུམ་པར་སྣ་རྩེ། བཞི་པར་ཨོག་མ་རྣམས་སུ་རཀྟའི་ཐིག་ལེ་བྱ། དེ་ནས་རྔ་གསུམ་ལ་ཕུར་རྩེ་ཕྱིར་བསྟན་གཡས་སུ་བསྐོར་ནས། འགྲོས་བསྡུ་དང་། ཡངས་པད་དང་བསྟུན། གཉིས་པ། ཐལ་ཆེན་གྱི་ཚོམ་བུ། ཞེས་བརྗོད། ཛཾ་ཆུང་མན་དངོས་གཞི་སྔ་མ་དང་འདྲ་བ་ལ། ཕྱག་རྒྱ་ཐལ་ཆེན་གྱི་ཚོམ་བུ་བྱུག་ཚུལ། དང་པོ་དཔྲལ་མཚམས་ཀྱི་དབུས། གཉིས་པར་དེའི་གཡས། གསུམ་པར་གཡོན། བཞི་པར་དབུས་ཀྱི་འོག་ཏུ་བྱ། གསུམ་པ། ཞག་གི་ཟོ་རིས། ཞེས་བརྗོད། གཞན་གོང་དང་འདྲ། ཕྱག་རྒྱ་བྱུག་ཚུལ་ལུས་མི་གཅུ་བར་ལག་གཡས་ཀྱི་སོར་མོས། ནུ་མ་གཡོན་འོག་ནས་བཟུང་ལྟེ་བ་དང་། ནུ་མ་གཡས་པའི་འོག་གི་བར་བྱུག་ཚུལ་བྱས་རྗེས་ཕུར་རྩེ་མི་བསྐོར་བར་འགྲོས་བསྡུ་ནས་བཟུང་རོལ་འགྲོས་བར་འགྱིང་ཆེན་བཞིན་བྱ། བརྒྱད་པའི་དང་པོ་ནི། བགོ་བའི་གོས་གསུམ་གྱི་ཐོག་མར་གླང་ཆེན་གྱི་ཀོ་རློན། ཞེས་བརྗོད། ཡངས་པད་ཡན་འགྱིང་ཆེན་བཞིན་དང་། ཛཾ་ཆུང་དང་བསྟུན་པའི་དང་པོ་གཉིས་པར་ལག་གཡོན་པས་ཕུར་དར་གྱི་སྣེ་ནས་བཟུང་གསུམ་པར་གླང་ལྤགས་གྱོན་ཚུལ་བྱས་ནས། གཡས་གཡོན་དུ་འགྲོ་ལུགས། དབུས་སུ་རེ་མོས་རྣམས་ཀྱིས་མཚམས་སུ་སྦྲམ་སྦིར་སྦྲམ་གསུམ་ལ་ལུས་མི་གཅུ་བར་འགྱིང་སྟེ་སྡོད་པ་མ་གཏོགས་དཔའ་བསྐྱེད་ཇི་ལྟ་བ་བཞིན་ནོ། །གཉིས་པ། ཞིང་ཆེན་གྱི་གཡང་གཞི། ཞེས་བརྗོད། ཕུར་དར་གྱི་སྣེ་འཛིན་པ་ཡན་གླང་ལྤགས་དང་འདྲ། གསུམ་པར་གྱོན་(༡༥བ)
ཚུལ་དང་བསྟུན་རྐང་གཡོན་བཏེག་པ་གཡོན་ཟུར་ཕབ་གཡོན་དུ་བསྐོར་ནས་དོ་རའི་ཕྱིར་ཁ་ཕྱོགས་པས་རྐང་གཡས་ཀྱི་འགྲོ་ཕྱོགས་སུ་གསིག་པ། སྦྲམ་སྦིར་སྦྲམ་གསུམ་ལ་དེ་གར་འགྱིང་གསུམ་པར་རྐང་གཡོན་བཏེག་པའི་གཡོན་སྐོར་དུ་མདུན་དུ་ཕྱོགས་པའི་གཡས་ཡོང་ཕྱོགས་སུ་གསིག །གསུམ་ལ་འགྱིང་ནས་དབུས་སུ་གསིག་པ་མན་ནས་རོལ་འགྲོས་པར་དཔའ་བསྐྱེད་དང་འདྲའོ། །གསུམ་པ། སྟག་ལྤགས་ཀྱི་ཤམ་ཐབས། ཞེས་བརྗོད། ཕུར་དར་གྱི་སྣེ་འཛིན་པ་ཡན་གླང་ལྤགས་དང་འདྲ། དེ་ནས་ལག་གཉིས་བརླ་སྟེང་བརྐྱང་ནས་སྟག་ཤམ་གྱི་ཚུལ་བྱས། རྐང་གཡས་གཡོན་རེ་མོས་ནས་རོལ་འགྲོས་རྣམས་དཔའ་བསྐྱེད་བཞིན་ནོ། །དགུ་པ་ནི། ཁམས་གསུམ་ཟིལ་གྱིས་གནོན་པ་རྡོ་རྗེའི་ཁྱུང་གཤོག །ཅེས་བརྗོད། འདིའི་དངོས་གཞི་འགྱིང་ཆེན་དང་འདྲ་བ་ལ་གཡས་གཡོན་དབུས་གསུམ་གྱི་མཚམས་སུ་འགྲོས་བསྡུའི་ཚབ་ཏུ་གཞོལ་བྱ། རྗེས་བསྐྱོད་འགྲོས་ཀྱི་འགྱིང་ལ་དཀུར་བརྟེན་མི་བྱ་བར་ལག་གཉིས་བརྒྱངས་པའི་མཚམས་ཆན་བྱས་ནས་རོལ་འགྲོས་སོ། །གཉིས་པ་ཡུམ་བསྐྱེད་པ་ནི། འཁྲིལ་སྦྱོར་ཡུམ་གྱི་ཕྱག་རྒྱ། ཞེས་བརྗོད། ཛཾ་ཆུང་ཡན་འགྱིང་ཆེན་དང་འདྲ། དེ་ནས་རོལ་མོ་ཆེ་བཞི་ལ་གཙོ་བོའི་དབུས་ཞལ་ཇི་ལྟ་བ་བྱས་ནས་འགྲོས་བསྡུ་ཡངས་པད་ཛཾ་ཆུང་བྱ། ཆེ་བཞི་ལ་ལག་གཡོན་དཀུ་ལ་བརྟེན། ལག་གཡས་བརྐྱངས་ཏེ་རྐང་གཡས་ཀྱི་འགྲོ་བ་འགྱིང་ཆེན་གྱི་གཡས་འགྲོ་ལྟར་བྱ། འགྲོས་བསྡུ་ཡངས་པད་ཛཾ་ཆུང་བྱས་ནས། ཆེ་བཞི་ལ་ལག་གཡས་དཀུ་ལ་བརྟེན་གཡོན་མདུན་དུ་བརྐྱང་། རྐང་གཡོན་བཏེག་ནས་བྱ། འགྲོས་བསྡུ་ཡངས་པད་ཛཾ་ཆུང་བྱ། ཡང་ཆེ་བཞི་ལ། རྐང་(༡༦ན)
གཡོན་བཏེག །ལག་གཉིས་འཁྱུད་པའི་ཚུལ་གྱི་བྱ། འགྲོས་བསྡུ་མཆོངས་པད་རོལ་པ་བསྐྱོད་འགྲོས་ཀྱི་འགྱིང་། ལག་གཉིས་བརྒྱངས་པའི་མཚམས་ཆེན་བྱས་ཏེ་རོལ་འགྲོས་སོ། །དེ་ལྟར་ཆོས་དབྱིངས་བདེ་བའི་ངང་། ཧེ་རུ་ཀ་དཔལ་ཡབ་ཡུམ་གྱི། སྣ་ཚོགས་གཟུགས་སྐུའི་གར་མཁན་མ། །སྟང་སྟབས་མེ་ལོང་ངོས་ལ་ཤར། གསུམ་པ་ནི། ཁྲོ་བཅུ་རོལ་པའི་སྟང་སྟབས། ཞེས་བརྗོད། གཡས་གཡོན་དུ་གཅུ་བའི་འགྱིང་གཉིས་ཀྱི་རྗེས། བན་ཕུར་ཁ་གྱེན་བསྟན་བྱས་སྦྲམ་སྦྲམ་ཞེས་ཆེམ་བརྡུང་ཆུང་ངུར་ཕབ་སྟེ་རོལ་མོ་བཞག །དབྱངས་དང་བཅས་ཏེ། ཨོཾ་མའི་ལ་ལུས་བསྲངས་ལག་གཉིས་བརྒྱངས། ཧཱུཾ་ངའི་ལ་རྐང་གཡས་བཏེག །ཆེན་༼ཉེར༽ལ་རྐང་གཡས་མདུན་དུ་ཕབ། ལག་གཉིས་ཀྱང་ཅུང་ཟད་ཕབ། ནཱའི་ལ་རྟིང་གསིག །ཀ་བའི་ལ་རྐང་གཡོན་བཏེག་གཡས་སྐོར་དུ། རའི་༼ཉེར༽ལ་རྐང་གཡོན་གཡས་ཡོང་ཕྱོགས་སུ་ཕབ། ཡའི་ལ་རྟིང་གསིག་ཕྱག །གའི་ལ་རྐང་གཡས་བཏེག་ནས་རིམ་གྱི། རྒྱ་༼ཉེར༽ལ་རྐང་གཡས་གཡོན་འགྲོ་ཕྱོགས་སུ་ཕབ། པའི་ལ་རྟིང་གསིག་རྐང་གཡོན་བཏེག་ནས། ནི་ལ་གཡོན་མདུན་དུ་ཕབ། ཡ་བ་ཞེས་པར་འགྱིང་། འའི་ཝའི་ལ་ལུས་གཡས་སུ་གཅུ་ཞིང་། རྐང་གཡས་བཏེག་ཙམ་བྱས་པའི་ཡངས་པད་ཀྱི་འགོ་བརྩམ། ལག །གའ་ཞེས་པར་པད་ཀར་ལེན། གཉིས་ལ་ཕུད་དར་མདུན་ནས་ཡར་འཐེན། ཐལ་༼ཉེར་༽ལ་ཕུར་པ་པུས་སྟེང་། སྦྱར་ལ་ཕུར་དར་རྒྱབ་ཏུ་གཡུག །རའ་ཞེས་པར་རྐང་གཡས་བཏེག་ཙམ་གྱི། གྱེན། ནའི་ལ་གཡས་སུ་ཡངས་པད་ལེན། དུའི་༼ཉེར༽ལ་ཕུར་པ་པུས་སྟེང་། བསྒྲེང་ངའ་ལ་ཕུར་དར་རྒྱབ་ཏུ་(༡༦བ)
གཡུགས་ནས་ལག་ཐལ་སྦྱར་བྱ། འའི། ཝའི་ལ་ལུས་གཡས་སུ་ཅུང་ཟད་གཅུ་ཞིང་རྐང་གཡས་བཏེག་པའི་ཡངས་པད་བརྩམ། རྐང་ངའི། གཉིས་ལ་ཡངས་པད་གཡོན་ཟུར་དུ་བླངས། མཐིལ་༼ཉེར༽ཕུར་པ་པུས་སྟེང་། སྦྱར་ལ་ཕུར་དར་རྒྱབ་ཏུ་གཡུག་ཐུར། རའི། དུ་༼ཉེར༽ཞེས་པར་ལག་ཐལ་སྦྱར། རྐང་གཉིས་རྟིང་པ་སྦྱར། ཟུག་ལ་པུས་མོ་ཅུང་ཟད་ཕབ། ཝ་འའི་ཝའི། ཚིགས། གའི། ཆེན། ནའི། ཞིའི་༼ཉེར༽རྣམས་ཀྱི་ཚིགས་དང་ལྷུ་རེར་བསྟུན་ལག་གཉིས་སྦྱར་བ་གཡས་སུ། རྐང་གཡས་བཏེག་འབབས་ཀྱི་རྟིང་གསིག་བཅས་ལན་གསུམ་གསིག །ཡང་ལ་རྐང་ལག་གཉིས་མདུན་དུ་མཉམ། བཅག །ག །བར། རའ། བྱ་ཞེས་བར་གཡས་གོ་ལྡོག་ཏུ་གཡོན་ཕྱོགས་ལན་གསུམ་གསིག །ཝའི། ཝའ་ཞེས་པར་བན་ཕུར་ཁ་གྱེན་བསྟན་མདུན་དུ་མཉམ། ཨོཾ་མའི་ཞེས་པར་རྐང་གཡས་བཏེག་ཙམ་གྱི་ཡངས་པད། བཛྲ་ལ་ཕུར་པ་མདུན་ནས་ཡར་བནྡྷར་བསྐོར། ཀྲོ་ལ་པུས་སྟེང་། དྷ་ལ་ཕུར་དར་གཡུག །ཧཱུཾ། ངོ་ལ་རྐང་གཡས་བཏེག་ཙམ་ནས་གཡོན་དུ་ཡངས་པད། ཀ་ལ་ཕུར་པ་པུས་སྟེང་། ར་ལ་ཕུར་དར་གཡུག །ཧཱུཾ། ངོ་ལ་གཡོན་བཏེག་གཡས་སུ་ཡངས་པད། གར་ལ་ཕུར་པ་པུས་སྟེང་། ཛ་ལ་རྐང་གཡོན་དྲུད་པའི་རྟིང་གསིག་དང་བཅས་ཕུར་དར་གཡུག །གརྫ་ལ་ལག་གཉིས་བརྐྱངས་རྐང་གཡོན་བཏེག་ནས། ཧཱུཾ་ལ་ཕབ་ལག་གཉིས་བན་ཕུར་ནང་དུ་བསྐོར། རྐང་གཡས་བཏེག་གཡོན་འགྲོ་ཕྱོགས་སུ་ཕཊ་ལ་བསྐོར་བའི་མདུན་དུ་ཕབ། ཊ་ལ་རྐང་གཡོན་བརྐྱང་། ལག་གཡས་འཕྱར། གཡོན་ཐུགས་ཀར་སྡིགས་མཛུབ་བྱ། ཁྲོ་བོ་གཞན་རྣམས་ཀྱི་ཕྱག་རྒྱ་ཚིག་དང་མཐུན་པར་བྱ་ཞིང་། སྔགས་ལ་ཕྱོགས་བཞིའི་ཁྲོ་བོ་སྟེང་(༡༧ན)
དང་མཐུན་པར། ཨོཾ་ལ་ལག་གཉིས་བརྒྱངས་རྐང་གཡོན་བཏེག་ནས། བཛྲ་ལ་ཕབ། ཀྲོ་དྷ་ནས་བཟུང་གཡོན་སྐོར་དུ་རིམ་གྱིས་བསྐོར་ནས། མདུན་དུ་ཧཱུཾ་ཕཊ་ལ་རྐང་གཡོན་བརྐྱང་། ལག་གཡས་འཕྱར་གཡོན་ཐུགས་ཀར། མཚམས་བཞི་དང་འོག་གི་ཁྲོ་བོ་ལ། ཨོཾ་ལ་ལག་གཉིས་བརྒྱངས། རྐང་གཡས་བཏེག །བཛྲ་ལ་ཕབ། ཀྲོ་དྷ་ནས་བཟུང་གཡས་སྐོར་དུ་རིམ་གྱིས་བསྐོར་ནས་མདུན་དུ་ཧཱུཾ་ཕཊ་ལ་རྐང་གཡས་བརྐྱང་། ལག་གཡོན་འཕྱར་གཡས་ཐུགས་ཀར་སྡིགས་མཛུབ། ཧཱུཾ་ཆེན་ཀ་རའི་ཕྱག་རྒྱ་ནི། ལག་གཉིས་ཐལ་སྦྱར་གྱེན་དུ་སྒྲེང་། རྐང་གཉིས་མཐིལ་སྦྱར་ཐུར་དུ་ཟུག །ཚིགས་ཆེན་བཞི་ཡང་བཅག་པར་བྱ། །ཨོཾ་བཛྲ་ཀྲོ་དྷ་ཧཱུཾ་ཀཱ་ར་ཧཱུཾ་གརྫ་གརྫ་ཧཱུཾ། རྣམ་པར་རྒྱལ་བའི་ཕྱག་རྒྱ་ནི། ལག་གཉིས་ཐུགས་ཀར་བསྣོལ་ནས་ནི། མཆེ་བ་གཙིགས་ཤིང་ཞལ་བགྲད་པ། རྣམ་པར་རྒྱལ་བའི་ཕྱག་རྒྱ་ཡིན། །ཨོཾ་བཛྲ་ཀྲོ་དྷ་བི་ཛ་ཡ་ཧཱུཾ་ཧ་ན་ཧ་ན་ཧཱུཾ་ཕཊ། དབྱུག་པ་སྔོན་པོའི་ཕྱག་རྒྱ་ནི། །གཡོན་པ་དགུ་ལ་བརྟེན་ནས་ནི། །གཡས་པའི་མཛུབ་དང་གོང་གཉིས་བསྒྲེང་། །ལྡེབས་པའི་ཚུལ་དུ་བྱས་པ་ཡིན། །ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུཾ་ད་ཧ་ད་ཧ་ཧཱུཾ་ཕཊ། །གཤིན་རྗེ་གཤེད་པོའི་ཕྱག་རྒྱ་ནི། །གཡས་པ་གདེངས་ཤིང་ཁུ་ཚུར་བཅིངས། གཡོན་པ་དཀུ་ལ་བརྟེན་པ་ནི། །གཤིན་རྗེ་གཤེད་པོའི་ཕྱག་རྒྱ་ཡིན། །ཨོཾ་བཛྲ་ཀྲོ་དྷ་ཡ་མཱནྟ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། མི་གཡོ་མགོན་པོའི་ཕྱག་རྒྱ་ནི། །ལག་གཉིས་སྦར་མོ་གདེངས་ནས་ནི། །སྔོན་གྱི་ཕྱོགས་སུ་འཕྱར་བ་ནི། །མི་གཡོ་མགོན་པོའི་ཕྱག་རྒྱ་ཡིན། །ཨོཾ་བཛྲ་ཀྲོ་དྷ་ཨཱཪྻ་ཨ་ཙ་ལ་ཧཱུཾ། བྷནྡྷ་བྷནྡྷ་ཧཱུཾ་ཕཊ། རྟ་མགྲིན་རྒྱལ་པོའི་ཕྱག་རྒྱ་ནི། །ལག་གཉིས་སྤྱི་བོར་རྒྱ་བཅིང་ནས། །(༡༧བ)
ལུས་པོ་བསྟུངས་པར་བསྟན་པ་ནི། །རྟ་མགྲིན་རྒྱལ་པོའི་ཕྱག་རྒྱ་ཡིན། ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧཱུཾ། ཧུ་ལུ་ཧུ་ལུ་ཧཱུཾ་ཕཊ། གཞན་གྱིས་མི་ཐུབ་ཕྱག་རྒྱ་ནི། །ལག་གཉིས་སྦར་མོ་གདེངས་ནས་ནི། །འཛིན་པའི་སྟབས་སུ་བྱས་པ་ནི། གཞན་གྱིས་མི་ཐུབ་ཕྱག་རྒྱ་ཡིན། །ཨོཾ་བཛྲ་ཀྲོ་དྷ་ཨ་པ་ར་ཛི་ཏ་ཧཱུཾ། ཏིཥྛ་ཏིཥྛ་ཧཱུཾ་ཕཊ། བདུད་རྩི་འཁྱིལ་པའི་ཕྱག་རྒྱ་ནི། ལག་གཉིས་དཀུ་ལ་བརྟེན་ནས་ནི། །རྐེད་པ་བསྟུངས་པར་བསྟན་པ་ནི། །བདུད་རྩི་འཁྱིལ་བའི་ཕྱག་རྒྱ་ཡིན། །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ། ཚིནྡྷ་ཚིནྡྷ་ཧཱུཾ་ཕཊ། ཁམས་གསུམ་རྣམ་རྒྱལ་ཕྱག་རྒྱ་ནི། །གཡས་པ་དཀུ་ལ་བརྟེན་ནས་ནི། །གཡོན་པའི་མཐེ་བོས་མཐེ་ཆུང་མནན། །གསུམ་པོ་འཛིན་པ་ལྕགས་ཀྱུའི་ཚུལ། ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུཾ། བིནྡྷ་བིནྡྷ་ཧཱུཾ་ཕཊ། སྟོབས་པོ་ཆེ་ཡི་ཕྱག་རྒྱ་ནི། ལག་གཉིས་སྦར་མོ་བསྣོལ་ནས་ནི། །སྟེང་ནས་གནོན་པ་ལྟ་བུ་ནི། །སྟོབས་པོ་ཆེ་ཡི་ཕྱག་རྒྱ་ཡིན། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུཾ། སྥོ་ཊ་སྥོ་ཊ་ཧཱུཾ་ཕཊ། དེ་ནས་རོལ་མོ་དང་བཅས་རོལ་པ་བསྐྱོད་འགྲོས་ལག་གཉིས་བརྒྱངས་པའི་མཚམས་ཅན་བྱས་ནས་རོལ་འགྲོས་བྱ། བཞི་པ་ནི། ཕྱག་བརྙན་བསྐྱེད་པ་ལ་ལྔ་ལས། དང་པོ་ནི། ཕྱག་བརྙན་བཅུ་ཡི་བརྗིད་འཆམས་ལས། སྟེང་དང་ཤར་གྱི་ཕྱག་བརྙན་ནི། །མདའ་ཆེན་དང་ནི་རྩེ་གསུམ་འཛིན། །ཞེས་བརྗོད་ནས་ཚིག་བརྡུང་གསུམ་ལ་རོལ་འགྱིང་འགྱིང་ཆེན་དང་འདྲ། དེ་ནས་རོལ་མོ་ལྔ་བརྡུང་ཆེ་ཆུང་སྤེལ་བར་བསྒྱུར་ནས། ལྔ་ཚན་ཉི་ཤུ་རྩ་གཉིས་ཀྱི། ལྔ་ཚན་དང་པོ་བཞི་པར་རླུང་དཀྱིལ་དང་འདྲ། གཉིས་པའི་གསུམ་ཡན་ལ་བན་ཕུར་མདུན་མཉམ་དང་། བཞི་པ་དང་ལྔ་པ་ལ་ལག་གཡོན་མཁྲིག་མ་ནས། གཡས་པའི་ཕུར་དར་དྲངས་པའི་གཡས་འཕྱར་(༡༨ན)
གཡོན་ཐུགས་ཀ །གསུམ་པ་ལ་རྐང་གཡས་བཏེག་གཡོན་ལྕགས་མདའ་རིས་ཀྱི་འཕར་ཞིང་ཡོང་ཕྱོགས་སུ་བཞི་ཡི་བར་འགྲོ་ལྔ་ལ་འདུག །བཞི་པ་ཆུང་བར་ཡངས་པད་བྱ། ལྔ་དྲུག་དང་བདུན་བརྒྱད་ལ་བཤད་མ་ཐག་པ་དེ་ག་བྱེད་ལྔ་ཚན་དགུ་པ་དང་བཅུ་པར་གཡས་གཡོན་གྱི་འགྲོས་བསྡུ། ལྔ་ཚན་བཅུ་གཅིག་པར་མདུན་དུ་ཡངས་པད། བཅུ་གཉིས་པར་གཡས་སུ་ཡངས་པད་ཀྱི་གསུམ་པར་རྐང་གཡོན་བཏེག །བཞི་ལ་ཕབ་ལྔ་ལ་རྐང་གཡས་བཏེག་པའི་གཡོན་དུ་བསྐོར་དོ་རའི་ཕྱི་ངོས་སུ་བལྟས་འགྲོ་ཕྱོགས་ལ་ཕྱག་རྒྱ་རྐང་སྟབ་སྔ་མ་ལྟར། ལྔ་ཚན་ཆེ་ཆུང་། ༡༣ ༡༤ ༡༥ ༡༦ ༡༧ ༡༨ རྣམས་ལ་སྔ་མ་བཞིན་དང་། ༡༩ ༢༠ལ་གཡས་གཡོན་གྱི་འགྲོས་བསྡུའི་གཡོན་འགྲོས་བསྡུས་དོ་རའི་ནང་དུ་བསྐོར། ༢༡པར་མཆོངས་པད་ཀྱི་ཡངས་པད་དང་། ཉི་ཤུ་རྩ་གཉིས་པའི་གཅིག་དང་གཉིས་ལ་བན་ཕུར་གཡས་སུ་ཛཾ། ༣པར་རྐང་གཡོན་བཏེག་འབེབས་དང་བན་ཕུར་གཡོན་དུ། ༤པ་ལ་རྐང་གཡས་བཏེག་འབེབས་དང་བན་ཕུར་གཡས་སུ། ལྔ་པར་རྐང་གཡོན་བཏེག །ལག་གཉིས་བན་ཕུར་ནང་དུ་བསྐོར་ནས་བརྒྱངས། འགྲོ་ཕྱོགས་སུ་སྦིར་སྦྲམ་ལ་བསྐྱོད་འགྲོས་དཀུར་བརྟེན་བྱས་ཏེ་རོལ་འགྲོས་སོ། །འདིར་དོ་རའི་ཁ་ནང་དུ་བསྟན་པའི་དུས་ཕག་དང་། དོ་རའི་ཕྱིར་བསྟན་པའི་དུས་སྟག་གི་འགྲོས་ཡིན་པས། དང་པོའི་ཚེ་ལག་གཡས་བརྐྱངས་ཏེ་མདའ་འཕྱར་བའི་ཚུལ་དང་། ཕྱི་མའི་ཚེ་ལག་གཡས་གྲུ་མོ་ནས་གྱེན་དུ་བསྒྲེངས་ཏེ་མཐོ་བར་འཕྱར་བའི་མཐེ་བོས་མཐེའུ་ཆུང་མནན། མཛུབ་གོང་སྲིན་གསུམ་བརྐྱང་བ་རྩེ་གསུམ་གྱི་ཚུལ་བྱ། གཉིས་ཀའི་ལག་གཡོན་ཕུར་བུ་འཛིན་པའི་(༡༨བ)
ཚུལ་གྱི་སྡིགས་མཛུབ་བྱའོ། །མེ་དང་ལྷོ་ཡི་ཕྱག་བརྙན་ནི། དབྱུག་ཏོ་དང་ནི་བེ་ཅོན་འཛིན། ཞེས་བརྗོད། རོལ་མོ་དང་རྐང་གྲངས་འཆམས་ཚུལ་སྔ་མ་དང་ཁྱད་པར་མེད། གཡག་ཁ་ནང་བསྟན་དང་། ཤ་བ་ཁ་ཕྱིར་བསྟན་ཡིན་ཅིང་། དང་པོའི་ལག་གཡས་མདུན་བསྒྲེང་སྟེ་དབྱུག་ཏོ་འཛིན་ཚུལ། གཉིས་པ་ལག་གཡས་འཕྱར་སྟབས་སུ་བེ་ཅོན་འཕྱར་ཚུལ་དང་། གཉིས་ཀའི་ལག་གཡོན་བརླའི་སྟེང་དུ་བརྐྱང་བའི་སྡིགས་མཛུབ་བྱེད། བདེན་བྲལ་ནུབ་ཀྱི་ཕྱག་བརྙན་ནི། །སྤུ་གྲི་དང་ནི་རལ་གྲི་འཛིན། །ཞེས་བརྗོད། འཆམས་ཚུལ་སྔ་མ་བཞིན། གཟིག་ཁ་ནང་བསྟན། བྱི་ལ་ཁ་ཕྱིར་བསྟན་ཡིན་ཅིང་། གཉིས་ཀའི་ལག་གཡས་ཀྱི་མཐེ་བོས། སྲིན་ལག་དང་མཐེའུ་ཆུང་མནན། གུང་མཛུབ་རྐྱང་པ་རལ་གྲིའི་ཚུལ་བྱས་ནས། ༡༢༣ཞེས་པའི་སྐབས་ཕྱི་ནས་ནང་དུ་བསྐོར། ༤༥ལ་ཕྱིར་གཡུག་པའི་གཅོད་ཚུལ་བྱེད། དེ་གཉིས་ཀྱི་ལག་གཡོན་སྙིང་གའི་ཐད་ནས་མདུན་དུ་བརྒྱངས་པའི་སྡིགས་མཛུབ་བྱ། རླུང་དང་བྱང་གི་ཕྱག་བརྙན་ནི། །བ་དན་དང་ནི་རྒྱ་གྲམ་འཛིན། །ཞེས་བརྗོད། འཆམས་ཚུལ་སྔར་ལྟར། སྤྱང་ཀི་ཁ་ནང་དུ་བསྟན་སྐབས་དང་སེང་གེ་ཁ་ཕྱིར་བསྟན། དང་པོའི་ལག་གཡས་གྲུ་མོ་ནས་ཅུང་ཟད་བཀུག་ཅིང་བ་དན་འཕྱར་ཚུལ་དང་། ཕྱི་མར་ལག་གཡས་ཀྱི། ༡༢ལ་གཡོན་སྐོར། གསུམ་ལ་གཡས་སྐོར་བྱས་ནས་རྒྱ་གྲམ་འདྲི་ཚུལ་བྱེད། གཉིས་ཀའི་ལག་གཡོན་གཡས་པའི་གྲུ་མོའི་འོག་ཏུ་སྡིགས་མཛུབ་བྱ། དབང་ལྡན་འོག་གི་ཕྱག་བརྙན་ནི། ཁ་ཊྭཱཾ་དང་ནི་ཐོ་བ་འཛིན། །ཞེས་བརྗོད། འཆམས་ཚུལ་སྔར་བཞིན། དྲེད་ཁ་ནང་བསྟན་དོམ་ཁ་ཕྱིར་བསྟན། དང་པོའི་གཡས་རྩེ་གསུམ་དང་འདྲ་གཉིས་པའི་གཡས་གཡོན་པའི་དཔུང་ཐད་དུ་བཀུག་(༡༩ན)
སྟེ་ཐོ་བ་འཛིན་ཚུལ་བྱ། གཉིས་ཀའི་གཡོན་ཐུར་དུ་བརྐྱང་སྟེ་སྡིགས་མཛུབ་བྱེད་དོ། །འདི་ཡི་བསྐྱོད་འགྲོས་ཀྱི་འགྱིང་ལ་ལག་གཉིས་བརྒྱངས་པའི་མཚམས་ཆེན་བྱས་ཏེ་རོལ་འགྲོས་སོ། །ལྔ་པ་ནི། ཕྲ་མེན་བསྐྱེད་པ་ལ་ལྔ་ལས། དང་པོ་ནི། ཕྲ་མེན་བཅུ་ཡི་ཤོན་འཆམས་ལས། སྟེང་དག་ཤར་གྱི་ཕྲ་མེན་ནི། །གཞུ་མཆོག་དང་ནི་འཁོར་ལོ་འཛིན། །ཞེས་བརྗོད། ཆེ་བ་གསུམ་ལ་རོལ་འགྱིང་། དེ་ནས་བཞི་བརྡུང་དུ་བསྒྱུར་བའི། ཆེ་ཆུང་སྤེལ་ནས་བྱ་བའི། བཞི་ཚན་ཆེ་བར་བཞི་པད་བརྗོད་ནས་ཡངས་པད་ལེན་ལུགས་གོང་གི་ཆེ་གསུམ་གྱི་རྗེས་མར་ཡངས་པད་འགོ་བརྩམ། འདི་གའི་༡ལ་ཡངས་པད། གཉིས་པར་ཕུར་དར་གཡུག །གསུམ་པར་བན་ཕུར་སྤྲོད། བཞི་ལ་འགྱིང་། བཞི་ཚན་ཆུང་བར་བན་ཕུར་མདུན་མཉམ་ནས། བཞི་ཐོག་ནས་དངོས་གཞི་བརྩམ་དགོས་ཤིང་། དེ་ནས་བཞི་ཚན་བཅུ་དྲུག་ཡོད་པར་རོལ་མོ་ཆེ་ཆུང་སྤེལ་མའི་ནང་ཚན། སོ་སོའི་ཕྱག་རྒྱ་བྱ་བ་དང་། ཡངས་པད་དུས། ༡ལ་གསུམ་ལ་ཆེ་ངེས་ཀྱི་ཐེང་བརྡུང་དང་། འགྲོས་བསྡུ་གཡས་པ་ཆེ་བའི་རི་མོས་ཡིན་ཡང་ཅུང་ཟད་ཆུང་བ་ཙམ་བྱེད་པ་ཀུན་ལ་འགྲེ །དང་པོའི་༡ལ་རྐང་གཡས་གཡོན་ཐད་དུ་ཕབ་ཙམ་བྱས་ཏེ། ༢༣ལ་གཡས་བཏེག །ལག་གཡས་ཕུར་དར་གཡོན་དུ་བསྐོར་ནས་གཡས་སུ་ཅུང་ཟད་བརྒྱངས་ཏེ། བཞི་ལ་རྐང་གཡས་གཡས་སུ་ཕབ། བཞི་ཚན་གཉིས་པར་གཡས་ཟུར་དུ་བལྟ་བའི་འགྱིང་ནས་༣༤ལ་རྐང་གཡས་ནེམ་པ་བྱས་ནས་སྔ་མ་བཞིན་བཞི་ཚན་གསུམ་པ་དང་བཞི་པ། ལྔ་པ་དང་དྲུག་པ་རྣམས་དེ་ལན་གཉིས་པོའང་སྔ་མ་ལྟར་བྱ། གཉིས་པའི་ཕྱག་རྒྱ་འཁོར་ལོ་(༡༩བ)
བྲི་བ་རྒྱ་གྲམ་དང་འདྲ་བའི། བཞི་ཚན་བདུན་པ་དང་བརྒྱད་པ། དགུ་པ་དང་བཅུ་པ། བཅུ་གཅིག་པ་དང་བཅུ་གཉིས་པ་རྣམས་ལ་རྐང་སྟབས་སྔ་མ་ཇི་ལྟ་བ་བཞིན་བྱས་ནས། བཅུ་གསུམ་པ་དང་བཅུ་བཞི་པར། གཡས་གཡོན་གྱི་འགྲོས་བསྡུ་བྱ། བཅོ་ལྔ་པར་ཡངས་པད། བཅུ་དྲུག་པའི་༡ལ་རྐང་གཡས་བཏེག་འཇོག་དང་བསྟུན་བན་ཕུར་གཡས། གཉིས་པར་རྐང་གཡོན་བཏེག་འཇོག་དང་བསྟུན་བན་ཕུར་གཡོན། གསུམ་པར་སྔ་མའི་གཡས་བཞིན། བཞི་པར་རྐང་གཡོན་བཏེག་ལག་གཉིས་བན་ཕུར་ནང་དུ་བསྐོར་བ་དང་གཡོན་ཕབ། འགྲོ་ཕྱོགས་སུ་རྐང་གཡས་བཏེག་ནས་སྦིར་སྦྲམ་ལ་བསྐྱོད་འགྲོས་དཀུ་བརྟེན་བྱས་ཏེ་རོལ་འགྲོས་སོ། །ཕྱག་རྒྱ་འཆིང་བ་དང་པོ་གསུམ་རྨིགས་བུ་དང་། ཕྱི་མ་གསུམ་བྱ་རྒོད་ཡིན་ལ། དང་པོའི་ལག་གཡས་མདུན་གྱི་གཡས་ཟུར་དུ་གྲུ་མོ་ཅུང་ཟད་བཀུག་ཅིང་གཞུ་མཆོག་ངོམ་ཚུལ་བྱེད། གཉིས་པ་འཁོར་ལོ་བསྐོར་ཚུལ་རྒྱ་གྲམ་དང་འདྲ། གཉིས་ཀའི་ལག་གཡོན་དཔུང་པ་གཡོན་པ་དང་འབྲེལ་བ་ལྟར་བྱས་ནས་སྡིགས་མཛུབ་བྱ། མེ་དང་ལྷོ་ཡི་ཕྲ་མེན་ནི། །མེ་དཔུང་དང་ནི་དབྱུག་ཏོ་འཛིན། །ཞེས་བརྗོད། འཆམས་ཚུལ་སྔ་མ་ལྟར། དང་པོ་གསུམ་བྱ་རོག་དང་། ཕྱི་མ་གསུམ་འུག་པ། དང་པོའི་གཡས་མདུན་ཟུར་དུ་མཁྲིག་མ་ཅུང་ཟད་བཀུག་ཅིང་། མའི་རྒྱ་མཐེའུ་ཆུང་དང་སྲིན་ལག་བསྐུམ་གཞན་བརྐྱང་བ་བྱ། ཕྱི་མ་མདུན་ཕྱོགས་སུ་དབྱུག་ཏོ་འཛིན་ཚུལ་བྱ། གཉིས་ཀའི་ལག་གཡོན་མེ་དང་ལྷོའི་ཕྱག་བརྙན་དང་འདྲ། བདེན་བྲལ་ནུབ་ཀྱི་ཕྲ་མེན་ནི། །ཞགས་པ་དང་ནི་སྦྲུལ་ཞགས་འཛིན། །ཞེས་བརྗོད། འཆམས་ཚུལ་གོང་ལྟར། དང་པོ་གསུམ་ཁྭ་ད། ཕྱི་མ་གསུམ་པུ་(༢༠ན)
ཤུད། འགྲོ་ཕྱོགས་སུ་ཁ་གཏོད་པའི་ཚེ། དང་པོ་ལག་གཉིས་ཁུ་ཚུར་རྒྱབ་བསྣོལ་གྱི་ཞགས་པས་འཆིང་ཚུལ། གཉིས་པ་ལག་གཡོན་པར་གཡས་པས་བསྐོར་བའི་སྦྲུལ་ཞགས་འཆིང་ཚུལ། གཉིས་ཀའི་ཁ་གཡས་སུ་གཏོད་དུས་ལག་གཡོན་བདེན་བྲལ་ནུབ་ཀྱི་ཕྱག་བརྙན་དང་འདྲ། །རླུང་དང་བྱང་གི་ཕྲ་མེན་ནི། །བ་དན་དང་ནི་དྲིལ་བུ་འཛིན། །ཞེས་བརྗོད། རྐང་སྟབས་སྔ་མ་ལྟར། དང་པོའི་གསུམ་ཁྲ་དང་། ཕྱི་མ་གསུམ་ཕ་ཝང་། དང་པོའི་གཡས་བཤད་ཟིན། ཕྱི་མའི་གཡས་དཔུང་པ་གཡས་པར་འབྱོར་བ་ལྟ་བུའི་དྲིལ་བུ་དཀྲོལ་ཚུལ་བྱེད། གཉིས་ཀའི་གཡོན་རླུང་དང་བྱང་གི་ཕྱག་བརྙན་དང་འདྲ། དབང་ལྡན་འོག་གི་ཕྲ་མེན་ནི། །འཁོར་ལོ་དང་ནི་གཏུན་ཤིང་འཛིན། །ཞེས་བརྗོད། འཆམས་ཚུལ་སྔར་ལྟར། དང་པོ་གསུམ་སྲེ་མོང་དང་། ཕྱི་མ་གསུམ་བྱི་བ། དང་པོའི་གཡས་བཤད་ཟིན། གཉིས་པ་ལག་གཡས་ཁུ་ཚུར་གསང་གནས་ཀྱི་ཐད་དུ་བརྐྱང་ངོ་། །གཉིས་ཀའི་གཡོན་དབང་ལྡན་འོག་གི་ཕྱག་བརྙན་དང་འདྲ། འདི་རྗེས་ཀྱི་བསྐྱོད་འགྲོས་ལ་ལག་གཉིས་བརྒྱངས་པའི་མཚམས་ཆེན་བྱས་ནས་རོལ་འགྲོས་ལ་འཇུག །དྲུག་པ་སྒོ་མ་བསྐྱེད་པ་ནི། རོལ་འགྲོས་དེ་གའི་ངང་ནས་རྐང་གཡས་གཡོན་དུ་བསྐོར་བ་དང་མཉམ་དུ། སྒོ་མ་ཁྲོ་མོ་བཞི་ཡི་རྔམས་འཆམས་ལས། གནོད་སྦྱིན་དཀར་མོ་ལྕགས་ཀྱུ་འཛིན། །ཞེས་བརྗོད། དོ་རའི་ཕྱར་ཁ་བསྟན་པ་བཞི་ག་མ་རྫོགས་པར་ཡིན། འདིའི་རོལ་འགྱིང་སྔ་མ་གཡས་ཀྱིས་བྱ། དེ་ནས་རོལ་མོ་བཞི་བརྡུང་དུ་བསྒྱུར་ནས། བཞི་ཚན་ལྔ་ཡི་གཡོན་གསུམ་པོ་ལ་ནམ་མཁའ་དབྱིངས་ལྟར་བྱས། དེ་ནས་༡༢ ༡༢ ཞེས་པའི་ལེ་ཚན་ལ། ༡ལ་རྐང་(༢༠བ)
གཡས་འཛུགས། གཉིས་ལ་གཡོན་རྒྱབ་ཏུ་ཕབ། དེའི་ཚེ་ལག་གཡས་ལྕགས་ཀྱུའི་ཕྱག་རྒྱས་འདྲེན་པའི་སྟངས་ཀ་བྱེད། དེ་ནས་ཆིག་བརྡུང་༡་ལ་རྐང་གཡས་འཛུགས་གཡོན་རྒྱབ་ཏུ་བཏེག །ལག་གཉིས་ཐུགས་ཀར་བསྣོལ་ནས་འགྱིང་། དེ་རྗེས་༢༢ཞེས་པའི་དང་པོ་ལ་རྐང་གཡོན་ཕབ། གཉིས་པར་གཡབ་བཏེག །དེ་ནས་བཞི་ཚན་གསུམ་གྱི་དང་པོའི་༡ལ་ལག་གཉིས་བརྒྱངས་རྐང་གཡས་གཡས་ཕྱོགས་ཕབ། གཉིས་ལ་རྐང་གཡོན་གཡས་པའི་རྩར་སྤོ། གསུམ་ལ་གཡས་བཏེག་གཡོན་རྟིང་གསིག་གིས་བསྒིར་ཞིང་ཡངས་པད་ངོས། ཕུར་དར་གཡས་སུ་གཡུག་པ་དང་བསྟུན། བཞི་ལ་རྐང་གཡས་གཡོན་ཟུར་དུ་འབེབས། བཞི་ཚན་གཉིས་པར་དེ་གཡོན་ལ་གོ་ལྡོག་པ་ནི། ༡ལ་རྐང་གཡོན་གཡོན་ཕྱོགས་ཕབ། གཉིས་ལ་རྐང་གཡས་གཡོན་པའི་རྩར་སྤོ། གསུམ་ལ་གཡོན་བཏེག་གཡས་རྟིང་གསིག་གིས་བསྒིར་ཞིང་ཡངས་པད་ངོས་ཕུར་དར་གཡས་སུ་གཡུག་པ་དང་བསྟུན། བཞི་ལ་རྐང་གཡོན་ཟུར་དུ་འབེབས། བཞི་ཚན་གསུམ་པར་གཡས་སྔ་མ་ལྟར་བྱེད་པ་དང་བསྟུན། འཇིགས་བྱེད་སེར་མོ་ཞགས་པ་འཛིན། །ཞེས་བརྗོད་མཚམས་དང་། བཞི་པར་རྐང་གཡས་གཡོན་ཟུར་དུ་འབེབས་པ་འགྲིག་ཡོང་ཞིང་། དེ་ནས་གཡོན་བཏེག་ཙམ་གྱི་གཡོམ་གསུམ་སྔ་མ་ལྟར་བྱས་ནས། ༡༢ ༡༢ལྕགས་ཀྱུའི་འདྲེན་ཚུལ་གྱི་དོད། ལག་གཡོན་པར་གཡས་པས་བསྐོར་བ་ཙམ་གྱི་འཆིང་ཚུལ་བྱ་བ་མ་གཏོགས། གཞན་རྣམས་བཤད་མ་ཐག་པ་བཞིན་ནས། བཞི་ཚན་གསུམ་པའི་རྗེས་མ་དང་བསྟུན། བདུད་རྩི་དམར་མོ་ལྕགས་སྒྲོག་འཛིན། །ཞེས་བརྗོད། ལག་གཉིས་དཔུང་ཐད་ནས་མདུན་(༢༡ན)
དུ་ཕབ་པའི་ལྕགས་སྒྲོག་གི་སྡམ་ཚུལ་མ་གཏོགས་སྔར་བཞིན། གསོད་བྱེད་ལྗང་གུ་དྲིལ་འཁྲོལ་དགྱེས། །ཞེས་བརྗོད། དྲིལ་བུ་འཁྲོལ་ཚུལ་བྱ་ཞིང་གཞན་སྔར་ལྟར། འདི་ཡི་བཞི་ཚན་གསུམ་པ་རྫོགས་ནས། སླར་བཞི་ཚན་དྲུག་ལས་དང་པོ་དང་གཉིས་པར་གཡས་གཡོན་གྱི་འགྲོས་བསྡུས་ནང་དུ་འཁོར་བ་དང་། གསུམ་པར་མཆོངས་པད་བརྗོད་པའི། ཡངས་པད་བྱ། བཞི་པ་དང་ལྔ་པར་རོལ་པ་དང་དྲུག་པར་བསྐྱོད་འགྲོས་ལེན་པ་ཀེང་རུས་ལྟར་དང་འགྱིང་ལ་རོལ་པའི་མཚམས་ཆེན་བྱས་ཏེ་རོལ་འགྲོས་ལ་འཇུག །བདུན་པ་ནི། དམ་ཅན་སྤྱིའི་བསྐུལ་འཆམས། མཆོངས་པད་སོང་ནས་བརྩམ། ཞེས་བརྗོད། སྦྲམ། སྦིར། སྦྲམ་སྦྲམ། ཞེས་པའི་ཆེ་གསུམ་ལ་རོལ་འགྱིང་། བཞི་པའི་སྦྲམ་ལ་ཡངས་པད་ཀྱི་འགོ་བརྩམ་ཡང་སྦྲམ་སྦིར་སྦྲམ་སྦྲམ། ཞེས་པའི་དང་པོར་ཡངས་པད། གཉིས་པར་ཕུར་དར་གཡུག །གསུམ་པ་དང་བཞི་པའི་ཆུང་བར་ཕུར་རྩེ་བནྡྷ་ལ་གཡས་སུ་གཏོད། སྦིར་སྦྲམ་ཞེས་པ་གསུམ་ལ་རོལ་པ་རེ་བྱས་པའི་རྗེས་མར་གཡས་སུ་གསེགས་ནས། འགྲོ་ཕྱོགས་ལ་སྦིར་སྦྲམ་ཞེས་པར་རྐང་གཡས་གཡོན་གསེགས་ལ་བཏེག་འབེབས་དང་ཕུར་དར་གཡས་སུ་གཡུག །སྦིར་སྦྲམ་ལ་རྐང་གཡོན་གཡས་བཏེག་གེགས་ལ་བཏེག་འབེབས་བྱས། བནྡྷ་གཡོན་དུ་འཕྱར་བའི་ལྕགས་སྒྲོག་འགྲོས་ཇི་ཙམ་འོས་པ་སོང་ནས། བརྒྱད་པ་ནི། དབང་ཕྱུག་མ་ལ་གོང་གི་འགྲོས་དེའི་གཡས་པའི་ཐོག་ནས། དབང་ཕྱུག་མ་ལས་བཞིའི་འདུར་འཆམས། མཆོངས་པད་སོང་ནས་བརྩམ། ཞེས་བརྗོད་པ་གཡས་པ་དང་གཡོན་པའི་ཐེང་བརྡུང་གི་འགྲོས་ལ་རྫོགས་པ་(༢༡བ)
ཡོང་བས། དེ་ནས་སྦྲམ་སྦྲམ་ཞེས་པའི་དང་པོ་ལ་རྐང་གཡས་ཕབ། གཉིས་པ་ལ་རྐང་གཡོན་གཡས་མདུན་དུ་བསྐོར་ནས། སྦྲམ་སྦིར་སྦྲམ་སྦྲམ་ལ་ཡངས་པད་དང་། སྦིར་སྦྲམ་ལ་རོལ་སོགས་དམ་ཅན་སྤྱིའི་འཆམས་ལྟར་བྱ། ལྕགས་རིས་མི་བྱེད་པར་བཤུད་འགྲོས་དང་། ལག་གཡས་འཕྱར་གཡོན་དཀུར་བརྟེན་པའི་ངོས་རྐང་གཡས་པའི་ཐོག་ནས། ཤར་ནས་གཤེགས་པའི་རྣལ་འབྱོར་བདུན། །ཁྱོད་ཀྱིས་ཞི་བ་འི་ལས་མཛོད་ཅིག །ཅེས་བརྗོད་གཡས་པ་ནས་བཟུང་ཤུགས་ཆེ་བར་འཕར་བའི་ཟླུམ་སྐོར་གྱི་ཚུལ་ལ་འགྲོས་སྔར་ལྟར། མཆོངས་པད་རོལ་པ་གོང་བཞིན་ནས། ལག་གཡོན་འཕྱར་གཡས་དཀུར་བརྟེན། རྐང་གཡོན་པའི་ཐོག་ནས། ལྷོ་ནས་གཤེགས་པའི་རྣལ་འབྱོར་བདུན། ཁྱོད་ཀྱིས་རྒྱས་བའི་ལས་མཛོད་ཅིག །གཡོན་ནས་བཟུང་ཤུགས་ཆེ་ཙམ་གྲུ་བཞིའི་ཚུལ་བྱ། མཆོངས་པད་རོལ་པ། ལག་གཡས་འཕྱར་གཡོན་དཀུ །ནུབ་ནས་གཤེགས་པའི་རྣལ་འབྱོར་བདུན། །ཁྱོད་ཀྱིས་དབང་གི་ལས་མཛོད་ཅིག །གཡས་ནས་ཤུགས་ཆེ་ཙམ་ཟླ་གམ་གྱི་ཚུལ། མཆོངས་པད་རོལ་པ། ལག་གཡོན་འཕྱར་གཡས་དཀུ། བྱང་ནས་གཤེགས་པའི་རྣལ་འབྱོར་བདུན། ཁྱོད་ཀྱིས་དྲག་པོའི་ལས་མཛོད་ཅིག །གཡོན་ནས་བཟུང་ཤུགས་ཆེའི་གྲུ་གསུམ་དུ་བསྐོར་བའི་ཚུལ་བྱ། དེ་རྣམས་ཀྱི་དངོས་གཞི་རྣམས་སོང་ནས། རྗེས་ཀྱི་བྱ་བ་བཅུ་གཅིག་ལ། དང་པོ་ནི། བཤུད་འགྲོས་དེ་གའི་རྐང་གཡས་པའི་ཐོག་ནས། བམ་རོལ་པས་འཚོལ་བ། མཆོངས་པད་སོང་ནས་བརྩམ། ཞེས་བརྗོད། ཡངས་པད་དང་རོལ་པ་གསུམ་གོང་ལྟར་ནས་བཤུད་འགྲོས་གཡས་གཡོན་དང་བསྟུན་ལག་གཉིས་རོལ་པ་(༢༢ན)
བྱ་བ་ཇི་ལྟར་རིགས་པ་ནས། གཉིས་པ་ནི། བམ་སྤྲུལ་ནག་གིས་འཚོལ་བ། མཆོངས་པད་སོང་ནས་བརྩམ། ཞེས་བརྗོད། ཡངས་པད་རོལ་པ་སྔར་ལྟར་བྱས་ནས། བཤུད་འགྲོས་ཀྱི་སྦྲུལ་འཁོར་བ་ལྟར་འཁྱོག་འཁོར་བྱ་ཞིང་། འགུགས་མཚམས་རོལ་མོ་དྲག་པ་དང་། ལུས་གཅུམ་ནས་འཕར་བའི་མཐར་སྐོར་ལམ་དུ་འཁོད་པའི་ངང་ནས། འཆམས་དཔོན་གྱིས་བན་སྐྲ་ནས་བཟུང་སྣར་བའི། རོལ་དཔོན་གྱི་མདུན་དུ་སླེབ་པ་དང་རྐང་གཡོན་པ་མདུན་དུ་ཅུང་དོར་བས་བནྡྷ་ཁ་སྦུབ་ཏུ་བཞག་ནས། འཆམས་པ་དམངས་རྣམས་ཀྱི་བན་སྐྲ་ནས་བཟུང་སྣར་ནས་བཤུད་འགྲོས་དེ་ག་བྱ། འཆམས་དཔོན་གྱི། ༡༡ ༢༢ ༣༣ ༤༤ ༥༥ ༦༦ གི་ཐེང་བརྡུང་ལ་ལག་གཡས་མཆན་ཁུང་ནས་བསྐོར་ཏེ་བརྒྱང་བ་དང་། རྐང་གཡས་བཏེག་གཡས་སྐོར་དུ་༡༡ལ་འགྲོ་ཕྱོགས་སུ་ཕབ། གཡོན་བཏེག་༢༢ལ་གཡས་སྐོར་འགྲོ་ཕྱོགས་ལ་ཕབ། གཡས་བཏེག་ཡོང་ཕྱོགས་ལ་བལྟས་ནས་༣༣ལ་རྒྱབ་ཏུ་འགྲོ་ཕྱོགས་ལ་འཐེན། གཡོན་བཏེག་༤༤ལ་གཡོན་ཟུར་དུ་འཐེན་གཡས་བཏེག་ཕུར་དར་གཡས་སྐོར་དུ་གཡུགས་ནས་༥༥ལ་འགྲོ་ཕྱོགས་སུ་ཕབ། གཡོན་བཏེག་གཡོན་སྐོར་༦༦ལ་འགྲོ་ཕྱོགས་སུ་ཕབ་༦ཚན་དེ་གས་སྐོར་བ་༡སོང་བའི་རོལ་དཔོན་མདུན་དུ་འཆམས་དཔོན་གྱིས་སླེབ་པ་དང་། འཆམས་པ་དམངས་ཀྱིས་བནྡྷ་སོ་སོའི་མདུན་དུ་ཁ་སྦུབ་ཏུ་བཞག་ནས། ༦ཚན་གྱི་སྐོར་འགྲོས་འཆམས་དཔོན་དང་བསྟུན་ནས་སྐོར་བ་༡བྱ། གསུམ་པ་ནི། རྐང་གཡོན་པའི་ཐོག་ནས། བམ་རྡེའུས་བརྟག་པ། མཆོངས་པད་སོང་ནས་བརྩམ། ཞེས་བརྗོད། སྦྲམ་སྦྲམ་གཡས་འབེབས་(༢༢བ)
འཕར་དང་། སྦྲམ་སྦྲམ་ལ་གཡོན་འབབས། འཕར་བྱ། སྦྲམ་སྦི་སྦྲམ་སྦྲམ་ཞེས་ཆེམ་བརྡུང་གསུམ་ལ་ཡངས་པད་དང་ཆུང་བ་ཁོང་འདྲེན་དུ་བྱས་པ་སྔར་བཞིན་བྱས། གཡས་ཀྱི་རྒྱབ་ཟུར་དུ་ལག་གཡས་བརྒྱངས། གཡོན་དཀུ་ལ་བརྟེན་ནས། ༡༠ ༢༢ ༣༣ ལ་རྐང་གཡས་༡སྔ་མར་ཕབ། གཡོན་༡རྗེས་མར་སྤོ་བ་གསུམ་གྱི་བར་རིགས་འགྲེ་བས་ཛཾ་ཆུང་གསུམ་དང་། མདུན་དུ་བམ་ཕྱོགས་ལ་སྔ་མ་ལྟར། ༡༡ ༢༢ལ་ཛཾ་བྱ། ༣༣ལ་ཤུགས་ཆེ་བས་དང་པོ་ལ་རྐང་གཡས་ཕབ། གཉིས་པར་གཡོན་བཏེག་ཙམ་བྱ། དེ་ནས་ཆེམ་རྒྱག་གསུམ་དང་ཆུང་བ་༡ལ་གོང་ལྟར་བྱ། དེ་རྗེས་ལག་གཉིས་ཐུགས་ཀར་སྡིགས་མཛུབ་སྤྲད་དེ་རྡེའུ་འཛིན་ཚུལ་བྱ། ལུས་གཡོན་བནྡྷར་བསྟན། མིག་ཟུར་གྱི་བལྟ་ཞིང་། རོལ་མོ་༡༡ ༢༢ ༣༣ལ་རྡེའུ་རྒྱག་པའི་སྟངས་ཀ་ཚར་གཅིག་དང་བཅས། རྟིང་པ་ཅུང་ཟད་བཏེག་ཙམ་གྱིས་འཕར་ཆུང་བྱས་ཏེ་ཤི་མ་ཤི་ཐེ་ཚོམ་ཟོས་པ་བཏག་པའི་ཕྱིར། བནྡྷ་ཕྱོགས་སུ་ཅུང་ཞིག་ཉེ་བར་འགྲོ་ཚུལ་བྱེད། གསུམ་རྗེས་མར་ལག་གཡོན་མཁྲིག་མར་ཕུར་དར་དྲངས་ཏེ། བྲེད་ཚུལ་གྱི། ༡༢ ༣༤ཡི་གསུམ་ལ་གཡས་སུ་ཕྱིར་བརྒྱངས་ཏེ་ཟུར་འཐེན་བྱས་བཞི་ལ་དེ་གར་འདུག །དེ་བཞིན་ལན་གསུམ་དགོས་པར་རྗེས་མ་གཉིས་ལ་བམ་ལ་བལྟ་མི་ནུས་བཞིན་དུ། ༡༡ ༢༢ ༣༣ ༤༤ ལ་སྔ་མར་རྡེའུ་རྒྱག་པ། ཉེ་བར་འགྲོ་ཚུལ་བྱས་ནས་བཞི་པར་གོང་གི་གསུམ་པ་དང་འདྲ་བར་ཕུར་དར་དྲངས་ནས་ཟུར་འཐེན་སྔ་མ་དང་འདྲ་བ་བྱས་ཏེ། དྲུག་ཚན་གྱི་སྐོར་འགྲོས་དེ་གས་དོར་བསྐོར་ནས། རྡེའུ་རྒྱག་པ་སོགས་སྙིང་ཁམ་ཆེར་གཏོང་བའི་རྒྱག་ཚུལ་མ་གཏོགས་སྔ་མ་ཇི་ལྟ་བ་བྱས་ཏེ། རང་(༢༣ན)
རང་གི་བནྡྷ་ལ་སྐོར་འགྲོས་ཀྱིས་སྐོར་བ་༡བྱས་རྗེས། ཡང་སྔ་མ་བཞིན་སྙིང་ཁམ་ཆེ་བའི་རྒྱག་ཚུལ་རྣམས་བྱས་ཏེ། དོ་རར་སྐོར་འགྲོས་ཀྱིས་སྐོར་བ་༡བྱའོ། །བཞི་པ། བམ་རྡོ་རྗེའི་འགྲོས་ཀྱི་མཆོངས་པད་སོང་ནས་བརྩམ། ཞེས་བརྗོད་ནས། ཐུ་གཤམ་བསྡུས་ནས་ཙོག་པུར་འདུག་ནས་གཡོམ་གསུམ་བྱས་ནས། གཡས་ངོས་སུ་རྡོ་རྗེའི་འགྲོས་གསུམ་བྱ་བཞི་ལ་དེ་གར་འདུག་ནས། ཡང་གཡོམ་གསུམ་བྱས་ཏེ། རྡོ་རྗེའི་འགྲོས་གསུམ་གྱི་བནྡྷའི་རྩར་འགྲོ་བཞི་ལ་དེ་གར་འདུག །བཞི་ཚན་༡གི་དང་པོ་ལ་བནྡྷ་ལ་ལག་རེག་གཉིས་པ་ལ་བནྡྷ་ཁ་སྒྱེལ། ༣༤ལ་ལངས་ནས་སྔར་བཞིན་དོ་རར་སྐོར་བ་བྱས་ནས། བནྡྷ་དང་འདོམ་གང་གི་སར་ཙོག་པུར་བསྡད་གཡོམ་གསུམ་བྱ། ༤གྲངས་༡ལ་རྡོ་རྗེའི་འགྲོས་ཀྱིས་བནྡྷའི་རྩར་ཕྱིན། ཕྱེད་སྐྱིལ་དུ་སྡད། ལྔ་པ་བམ་འདོད་ཡོན་དུ་བྱིན་གྱིས་བརླབ་པ་ནི། རོལ་མོ་ལྔ་བརྡུང་ཆེ་ཆུང་སྤེལ་མར་བསྒྱུར་ཏེ། བཞི་པད་ཡོངས་རྫོགས་༡བྱ། ལྔ་ཚན་ཆུང་བ་༡ལ་ཡངས་པད་ཐོལ་༡བྱས་ནས་འདོད་ཡོན་ཏུ་བྱིན་གྱིས་བརླབ་པ་ནས་བཟུང་། རང་གི་ཨམ་པྲག་ཏུ་འཇུག་པ་ཡན་ལ། ལྔ་ཚན་ཆེ་བ་གང་ཡིན་ལ་ཕྱག་རྒྱ་རྣམས་རིམ་པར་བྱ་ཞིང་། ལྔ་ཚན་ཆུང་བ་གང་ཡིན་ལ་ཡངས་པད་ཁོ་ན་བྱེད་པས། དེ་ལྟར་ཤེས་པར་བྱས་ཏེ། ལག་གཡོན་ཁུ་ཚུར་སྟེང་གཡས་སྐྱབས་སྦྱིན་ཕྱག་རྒྱས་གཟུགས་ཀྱི་མེ་ལོང་མཚོན། ལག་གཡོན་ཁུ་ཚུར་རྣ་བ་གཡོན་ཐད་དུ་མཁྲིག་མ་ནང་དུ་བཀུག་གཡས་པའི་གོང་མཛུབ་ཀྱིས་རྒྱུད་བརྡུང་ཚུལ་ཏེ་སྒྲ། ལག་མཐིལ་གཉིས་ཕྱིར་བསྟན་པའི་ཕྱག་རྒྱ་དྲི། ལག་གཉིས་རྡོར་ཐལ་ཁ་ཕྱེ་བའི་ཕྱག་རྒྱ་རོ་(༢༣བ)
ཕུར་དར་འཕྱར་བ་རེག་བྱའོ། །དྲུག་པ་མགྲོན་སྤྱན་འདྲེན་ནི། ལག་གཡས་ཀྱི་གཡས་ངོས་ནས་སྨིན་མཚམས་ཀྱི་བར་གཡོབ་ཅིང་ཞི་བ་བཞི་བཅུ་རྩ་གཉིས་ཀྱི་ལྷ་ཚོགས་སྤྱན་དྲངས། ལག་གཡོན་གཡོན་ཕྱོགས་ནས་གཡོབ་ཅིང་ཁྲག་འཐུང་ལྔ་བཅུ་རྩ་བརྒྱད་ཀྱི་ལྷ་ཚོགས་སྤྱན་དྲངས་གཉིས་སྨིན་མཚམས་ཀྱི་མདུན་ངོས་ནས་གཡོབ་སྟེ། རྒྱལ་བ་དགོངས་བརྒྱུད། རིགས་འཛིན་བརྡ་བརྒྱུད། གང་ཟག་སྙན་བརྒྱུད། ལས་འཕྲོ་གཏེར་བརྒྱུད། སྨོན་ལམ་གཏད་རྒྱའི་བརྒྱུད་པ་རྣམས་སྤྱན་དྲངས། སླར་ལག་གཡས་གཡས་ཟུར་ནས་གཡབ་སྟེ་ཆོས་སྐྱོང་སྲུང་མའི་ཚོགས་རྣམས་སྤྱན་དྲངས། ལག་གཡོན་གཡོན་ཟུར་ནས་གཡོབ་སྟེ་ཕུར་པ་བཀའ་གཏེར་གྱི་སྲུང་མ་རྣམས་སྤྱན་དྲངས། བདུན་པ་བསྒྲལ་བ་ནི་ཕུར་པ་ཕྲག་པ་གཡས་པའི་ཐད་དུ་བསྒྲིལ། ཕྲག་པ་གཡོན། དཔྲལ་བའི་ཐད་ནས་ཀྱང་བསྒྲིལ་ཕུར་པ་གཡས་ཕྱོགས་སུ་བརྡར་ཚུལ་བྱ། བརྒྱད་པ་བསྒྲལ་མཆོད་ནི་ཕུར་པ་བཏབ་སྟེ་ལག་གཉིས་གཡས་ངོས་སུ་གྱེན་དུ་ཕྱོགས་པས་ཞི་བའི་ལྷ་ཚོགས་རྣམས་མཆོད། ཕུར་པ་བཏབ་སྟེ་ལག་གཉིས་གཡོན་ངོས་སུ་གྱེན་དུ་ཕྱོགས་པས་ཁྲོ་བོའི་ལྷ་ཚོགས་རྣམས་མཆོད། ཕུར་པ་བཏབ་སྟེ་ལག་གཉིས་མདུན་ངོས་སུ་གྱེན་དུ་བཏབ་སྟེ་བླ་མ་རིགས་འཛིན་རྣམས་མཆོད། ཕུར་པ་འདབས་པ་སོགས་སྔ་མ་བཞིན་གཡས་ཟུར་དུ་ཆོས་སྐྱོང་རྣམས་མཆོད། གཡོན་ཟུར་དུ་སྲུང་མ་རྣམས་མཆོད། གཡས་ཕྱོགས་སུ་གྲོགས་ལ་འདྲེན། གཡོན་ཕྱོགས་སུ་གྲོགས་ལ་འདྲེན། རང་ཉིད་ཟ་བའི་ཚུལ་དང་། རང་གི་ཨམ་ཕྲག་ཏུ་འཇུག་པའི་ཚུལ་རྣམས་བྱས་ཏེ། རོལ་མོ་ཆེམ་བརྡུང་དུ་ཕབ། དགུ་པ་ལྷག་མ་ཁུར་ནས་རྒྱུག་པ་སྟེ། ལག་
གཡོན་གྱིས་བནྡྷའི་སྐྲ་ནས་བཟུང་། ཤ་པགས་རུས་པ་སོགས་ལྷག་མ་རྣམས་ཁུར་བའི་ཚུལ་གྱིས་པུས་མོ་བཙུགས། ལག་གཡས་ཀྱིས་ཕུར་པ་ས་ལ་བཙུགས་ཏེ་ཅུང་ཟད་མི་ཐེག་པ་ལྟར་འདར་བའི་ཚུལ་བྱེད། དེ་ནས་ལུས་ཅུང་ཟད་བསྲངས་ཏེ་ཧར་ལངས་རྐང་གཡོན་བཏེག་པ་དང་མཉམ་དུ་བནྡྷ་ཕྲག་པ་ལ་སྦྲམ་ཞེས་བཀལ་རོལ་མོ་ཐེར་བརྡུང་གིས་བཤུད་འགྲོས་ཀྱིས་མགྱོགས་པར་སྐོར་བ་གསུམ་མམ་༡གང་རུང་སོང་རྗེས། སྦྲམ་ཞེས་རྐང་གཡོན་ཡོང་ཕྱོགས་སུ་བསྐོར་ནས། བཅུ་པ་དཔལ་ཆེན་པོའི་སྟོབ་འཆམས་ནི། ཡོང་ཕྱོགས་ལ་རྐང་གཡོན་གྱི་བཞི་འགྲོས། གཡས་ཀྱི་བཞི་འགྲོས་གཡོན་གྱི་བཞི་འགྲོས་གསུམ་པ་ལ་རྐང་གཡོན་རྒྱབ་ཏུ་ཕབ། མདུན་དུ་བཞི་ལ་གཡས་ནུར་ནས། ༡ཅེས་ཆེམ་རྒྱག་ལ་དེ་གར་ནེམ། ༢༢ལ་རྐང་གཡས་བཏེག་འབེབས་དང་། རྐང་གཡོན་བཏེག །༤ཚན་གསུམ་པའི་དང་པོའི་༡ལ་གཡོན་ནས་བརྩམ། འཆམས་ལུགས་སྒོ་མའི་བཞི་ཚན་གསུམ་པོ་དང་འདྲ་བའི་རྫོགས་མཚམས། ༡ཅེས་ཆེམ་རྒྱག་ལ་གཡོན་དུ་ནེམ། ༢༢ལ་རྐང་གཡས་ཕྱིར་འཐེན་གཡོན་བཏེག་པའི་འབེབས་བྱས། རྐང་གཡས་བཏེག་སྟེ་༤ཚན་གསུམ་པོ་སྔ་མ་གོ་ལྡོག་དང་། འགྲོ་ཕྱོགས་ལ་རྐང་གཡས་གཡོན་གྱི་བཞི་འགྲོས་རེ་དང་། སླར་གཡས་པའི་བཞི་འགྲོས་དང་གསུམ་པར་རྐང་གཡས་རྒྱབ་ཏུ་འཐེན་མདུན་དུ་རྐང་གཡོན་ནུར་ནས། ༡ཅེས་ཆེམ་རྒྱག་ལ་མདུན་དུ་ནེམ། ༢༢ལ་གཡོན་བཏེག་འབེབས་དང་གཡས་བཏེག །བཞི་ཚན་གསུམ་པོ་སྒོ་མ་བཞི་དང་འདྲ་བ་སྔ་མ་གོ་ལྡོག །རྫོགས་མཚམས་དོ་རའི་ནང་དུ་གཡོན་ཟར་བཙུགས་ཏེ། ༡ཅེས་ཆེམ་རྒྱག་ལ་གཡོན་(༢༤བ)
དུ་ནེམ། ༢༢ལ་རྐང་གཡས་ཕྱིར་འཐེན། གཡོན་བཏེག་འབེབས་བྱས་ནས་མདུན་ཕྱོགས་སུ། རྐང་གཡས་གཡོན་གྱི་བཞི་འགྲོས་རེ། སླར་གཡས་ཀྱི་བཞི་འགྲོས་༡རྫོགས་ནས་ཆེམ་བརྡུང་ཆུང་ངུར་ཕབ་སྟེ་རོལ་མོ་བཞག །བཅུ་གཅིག་པ་བགེགས་ལ་ཕུར་བུས་བཏབ་པ་ནི། འཆམས་དཔོན་དབུས་ནས་ཤར་དུ་ཕྱོགས་པས་གཡས་རྡོ་རྗེའི་ཐོ་བ་གཡོན་ཕུར་བུ་བཟུང་སྟེ། ཨོཾ་མའི་ཞེས་པར་རྐང་གཡས་གཡས་ཕྱོགས་འཐེན་ལག་གཡས་འཕྱར། བཛྲ་ལ་རྐང་གཡས་བཏེག །གཡོན་ཕྱོགས་སུ་འདེབས་པ་དང་ལག་གཉིས་ཕུར་བུ་བརྡུང་བའི་ཚུལ་བྱ། ཀཱི་ལི་ལ་རྐང་གཡས་བཏེག་གཡས་སུ་ཕབ་ལག་གོང་ལྟར། ཀཱི་ལཱ་ལ་དེ་གཉིས་ཀྱི་དབུས་སུ་རྐང་གཡས་བཏེག་འབེབས་དང་ལག་གོང་ལྟར། ཡ་ལ་རྐང་གཡས་རང་སར་འཐེན་ལག་གཉིས་བརྒྱངས་པའི་འགྱིང་། ཝའི་སརྦ་ལ་ལག་གཉིས་བརླའི་ཐད་ཕྱིར་གཞོལ་ཏེ། མདུན་ནས་ཡར་ལག་གྱེན་བསྟན་པར་བསྣོལ་ཕྱི་བརྒྱངས་ནས་བརླ་སྟེང་ཕབ་པ་དང་། བེགྷཾ་ཡོང་བར་བྱ། བཾ་མའི་ལ་རྐང་གཡས་གཡས་སུ་འཐེན། ལག་གཡས་བརྒྱངས། ཧཱུཾ་ངའི་ཕཊ་ལ་རྐང་གཡས་གཡོན་གོམ་པ་ར་དང་ཕུར་བུ་བརྡུང་ཚུལ་བྱ། དེ་ལྟ་བུ་སླར་ལན་༡བལྡབས་ནས་ཁྲོ་བོ་བཅུ་སོ་སོའི་ཕུར་བུ་རང་རང་གི་སྔགས་རྗེས་ཕུར་གདབ་ཀྱི་སྔགས་ཀྱིས་འདེབས་པའོ། །བསྔོ་སྨོན་ཤིས་བརྗོད་བྱས་ཏེ། སྦྲམ་༡ སྦྲམ་༢ལ་རོལ་མོ་དག་རོལ་བ་བྱ། སྦྲམ་སྦྲམ་ཞེས་བཞི་ལྔ་ལ་བན་ཕུར་གཉིས་ནང་དུ་བསྐོར་ནས་ལག་གཉིས་བརྒྱངས་ཏེ། ཆེམ་རྒྱག་བཞི་ལ། དང་པོ་ལ་རྐང་གཡས་མདུན་དུ་ཕབ། སླར་གཡས་པ་འབའ་ཞིག་བཞི་པའི་བར་དོ་རའི་བར་འགྲོ་ཚུལ། གཉིས་པར་གཡས་ཕྱོགས་སུ། གསུམ་པར་རྒྱབ་(༢༥ན)
ཏུ། བཞི་པར་མདུན་ཕྱོགས་སུ། དེ་ནས་མཆོངས་པད་བརྗོད་ནས། རྡོ་རྗེ་ཕྱེད་པ་ལན་གསུམ་སྔར་དང་འདྲ་བ་ལས། འདི་སྐབས་ཀྱི་གསུམ་པ་རྐང་གཡས་པས་ལེན་ཅིང་། ༡༢༢ཞེས་པའི་སྐབས། ༡སྔ་མར་གཡས་བཏེག་ནས་འགྲོ་ཕྱོགས་སུ་འཛུགས། གཉིས་སྔ་མར་རྐང་གཡས་འགྲོ་ཕྱོགས་སུ་འཛུགས་པའི་ཁྱད་པར་ཙམ་མོ། །དེ་ནས་བཞི་འགྲོས་ཁོ་ནས་སྦྲུལ་ནག་འཁྱོག་འགྲོས་བྱས་ཏེ་རྡོགས་ནས། ཆས་ཞུགས་ཁང་པར་སོང་སྟེ་ཆས་རྣམས་སོ་སོར་བཞག །ལྷའི་ང་རྒྱལ་དང་གསལ་སྟོང་གི་ལྟ་བའི་ངང་ནས་ཆོ་གའི་ཁྲིགས་རིམ་དང་། ཐུན་མཚམས་ཀྱི་བྱ་བ་ལ་འཇུག་གོ །དཔལ་ལྡན་གསང་ཆེན་རྒྱུད་སྡེའི་མན་ངག་ལས། །བསྐྱེད་རིམ་ཕྱག་རྒྱའི་གར་འཆམས་ངོ་མཚར་གནད། །རིགས་འཛིན་བརྒྱུད་པའི་ཕྱག་བཞེས་ཇི་བཞིན་དུ། །བཀོད་འདི་སྔགས་འཆང་རྣམས་ཀྱི་དགའ་སྟོན་གནས། །སྟོད་ལས་བྱང་ཆུབ་བསྒྲུབ་པ་ལ། །ཉེར་མཁོ་ཁྲག་འཐུང་རྩ་བའི་འཆམས། །བརྒྱུད་ལྡན་མཁས་པའི་ཕྱག་བཞེས་ལྟར། །འཁྲུལ་པ་མེད་པར་བཀོད་ཟིན་ནས། །མ་རུངས་གདུག་ཅན་དགྲ་སྡེའི་དཔུང་། །དོན་དམ་དབྱིངས་སུ་རོ་གཅིག་ཀྱང་། །ཀུན་རྫོབ་འཁྲུལ་ངོར་སྒྲོལ་བྱེད་པའི། །བྲུབ་འཆམས་ལག་ལེན་འདི་ནའོ། །གཉིས་པ་སྨད་ལས་གདུག་པ་སྒྲོལ་བའི་ཡན་ལག་ཏུ་བྲུམ་འཆམས་བཤད་པ་ལ། སྔོན་འགྲོ། དངོས་གཞི། རྗེས་གསུམ། དང་པོ་ལ་བསྒྲལ་ལས་ཀྱི་ས་དེར། ས་ཚོན་གྱི་བྲུབ་ཁུང་ནག་པོ་མེ་རི་དང་བཅས་པ། དབུས་སུ་དགྲའི་ས་བོན་ནྲྀ་དང་། བགེགས་ཀྱི་ས་བོན་ཏི་བྲིས་པ། དེའི་སྟེང་ལིངྒ་ཉམས་དོད་ཅིང་། ཀླད་པ་སྙིང་ཁྲག་རྒྱུ་མ་སོགས་བམ་དངོས་ལྟ་བུ་གདབ་(༢༥བ)
ཀའི་ཆེ་སྐྲག་རྔམ་དང་ཟིལ་ཆེན་པོ་ཡོང་བ་བཤམ། རྡོ་རྗེ་སློབ་དཔོན་གྱི་གཡས་ངོས་སུ་སྟེགས་ཇི་ཙམ་འོས་པའི་ཁར། མགྱོགས་ཕུར། གདབ་ཕུར། དམ་ཅན་གྱི་ཕུར་པ། ལས་ཕུར། སྐམ་ཐུན། རློན་ཐུན། ཐོ་བ། ཧོམ་གཟར། གྲི་ཁུག །སྒྲོལ་གྲི་རྣམས་བཤམ། རྔ་པ་རྣམས་ཞྭ་ནག་ཕོད་ཀ །མགོ་དར་སྐབས་དར། རུས་རྒྱན། སྐྲ་ཚབ། རྔ། རྔ་གཡོག །དེ་དག་ལ་འདོགས་རྒྱུའི་དར། སྣ་ཞུར། གདབ་ལས་དུས་དཀྲོལ་རྒྱུའི་སྦུག་ཆོལ། དེའི་གདན། རྔ་གདན། རྡོ་རྗེ་སློབ་དཔོན་གྱི་བཞེས་པའི་རྡོ་རྗེ་གཞོན་ནུའི་ཞལ་བརྙན། མ་རལ་དར་ཚོན་སྣ་ལྔས་བཅིངས་པར་ནོར་བུ་འབར་བའི་རྩེ་རྒྱན་ཅན། གཞན་ཕྲ་ཕྱག་ཉི་ཤུ་སྒོ་མ་བཞི་རྣམས་སོ་སོའི་ཞལ་བརྙན། ཕོད་ཀ་རུས་རྒྱན། མ་རལ་མགོ་དང་། གཡས་སོ་སོའི་ཕྱག་མཚན། གཡོན་ཕུར་པ་དར་གྱི་ཅོད་པན་ཅན་ཞེ་གཅིག །དུང་ཆེན། རྐང་གླིང་། སྤོས་ཕོར། གསེར་སྐྱེམས་སོགས་ཉེར་མཁོའི་ཡོ་བྱད་རྣམས་ཚོགས་པར་བྱའོ། །གཉིས་པ་དངོས་གཞི་ལ་སྔ་འཆམས་དང་། བྲུབ་འཆམས་དངོས་གཉིས། དང་པོ་ལ་བརྒྱད་ལས། དང་པོ་འཇམ་འགྲོས་ནི། རྔ་ཡུ་བརླ་ལ་བརྟེན་ཅིང་། རྔའི་ལོགས་རང་གི་གདོང་ཐད་དུ་བསྟན་པར་སྟེང་བརྡུང་ཞེས་བྱ། རྐང་གཡས་བཏེག་གཡོན་རྟིང་གསིག་དང་བཅས། རྔ་དབྱུག་སྡིགས་མཛུབ་ཀྱིས་བཟུང་སྟེ་སྟེང་བརྡུང་སྒྲ་ཐོས་ཙམ་གྱི་ཆུང་ངུར་བརྡུང་ཞིང་གོམ་པ་ཆུང་བ་འགའ་ཞིག་འགྲོ་ཕྱོགས་སུ་སྤོས་པའི་ངང་ནས་ནང་དུ་ཁ་བསྒིར། དོ་རའི་ནང་དུ་ཁ་བལྟ་བའི་རྐང་གཉིས་རྟིང་གསིག་ཅུང་ཟད་བྱེད་པ་དང་མཉམ་དུ་རྔ་དྲང་ཐད་དུ་བླང་སྟེ་ལག་གཉིས་བརྒྱངས་ངོས་མདུན་དུ་ཕབ། རྔ་ཡུ་བརླ་ལ་བརྟེན་ནས་རྔའི་རི་རང་གི་གདོང་(༢༦ན)
ཐད་དུ་ཡོང་བ་བྱས། རྐང་གཡོན་བཏེག་རྟིང་གསིག་དང་བཅས་རྔ་འོག་བརྡུང་བྱས་ཏེ་གོམ་པ་ཆུང་བ་འགའ་ཞིག་སྤོས། དེའི་ངང་ནས་རྔ་སྟེང་བརྡུང་དུ་བསྒྱུར་ཅིང་། རྐང་གཡས་བཏེག་ནས་འགྲོ་བ་སོགས་གཡས་གཡོན་རེ་མོས་སྤེལ་བས་ངོར་འཁོར་བ་དང་། དོ་རའི་ནང་དུ་ཕྱོགས་པས་ལག་གཉིས་བརྒྱངས་ཏེ་རྐང་གཡོན་བཏེག་རྔ་མདུན་དུ་འབེབས་པ་དང་བསྟུན། རྔ་དཔོན་གྱིས་འོག་བརྡུང་གི་རྔ་བརྡ་ཆེ་བ་གཅིག་བྱ། ཆུང་བ་གསུམ་གྱི་དང་པོར་སྟེང་བརྡུང་། གཉིས་པར་འོག་བརྡུང་། གསུམ་པར་སྟེང་བརྡུང་བྱེད། གཉིས་པ་རྩེ་གསུམ་ནི། ལྔ་བཞི་བརྡུང་གི་བཞི་ཚན་བཅུ་གསུམ་ལས། དོ་རར་མདུན་ཕྱོགས་པའི་བཞི་ཚན་དང་པོ་གཡས་ངོས་སུ་འོག་བརྡུང་བྱ། བཞི་ཚན་གཉིས་པའི་༡༢ལ་སྟེང་བརྡུང་༣པར་སྟེང་བརྡུང་དང་མཉམ་དུ་ནེམ་རྗེས་༤པར་རྔ་མདུན་དུ་བསྒྲེངས་ཏེ་བླངས་པའི་འོག་བརྡུང་བྱ། ༤ཚན་༣པར་རྔ་གཡས་སུ་སྟེང་བརྡུང་བདེ་ཁྱེར་ངོས་༡ལ་རྐང་གཡས་ཕབ་༢ལ་གཡོན་བཏེག་༣ལ་ཕབ་༤ལ་གཡས་བཏེག་སྟེང་བརྡུང་དེ་གའི་ངང་ནས་འགྲོ་ཕྱོགས་སུ། ༤ཚན་༤པར་རྐང་གཡས། ༤ཚན་ལྔ་པར་རྐང་གཡོན་པར་འོག་བརྡུང་། ༤ཚན་དྲུག་པར་དེ་གཉིས་ཀྱི་དབུས་སུ་རྐང་གཡས་ལ་རྔ་མདུན་དུ་བསྒྲེངས་ཏེ་བསླང་བའི་འོག་བརྡུང་རྣམས་ཀྱི་རྐང་པའི་འབེབས་ལུགས་དང་རྔ་བརྡུང་བ་སོགས་རྡོ་རྗེ་ཕྱེད་པ་ལྟར་རོ། །༤ཚན་༧པར་རྔ་ཡུ་བརླ་ཁུགས་སུ་བརྟེན། གཡས་སུ་རྔ་སྟེང་བརྡུང་བདེ་ཁྱེར་གྱིས་གཅུ་བ་མ་གཏོགས་རྐང་པ་རྡོ་རྗེ་ཕྱེད་པ་ལྟར་བྱས་པའི། དེ་རྗེས་རྐང་གཡས་མདུན་འགྲོ་ཕྱོགས་སུ་འབེབས་པ་དང་ལུས་བསྲངས། རྔ་བསྒྲེངས་ཏེ་འཛིན་ཅིང་༡ཅེས་ཆིག་བརྡུང་ཆུང་བར་བྱ། ༢་ཁོང་འདྲེན་བྱས་ངོས་རྔ་སྟེང་བརྡུང་དུ་བསྒྱུར་ཏེ། ༣་༤ལ་རྔ་ཆུང་བརྡུང་བྱ། དེ་ནས་རྐང་གཡོན་བཏེག་གཡས་སུ་༤ཚན་བརྒྱད་པ། གཡོན་དུ་༤་ཚན་དགུ་པ། དེ་གཉིས་ཀྱི་དབུས་སུ་༤ཚན་༡༠(༢༦བ)
རྣམས་དང་། ༤ཚན་༡༡པར་གཡོན་དུ་རྔ་སྟེང་བརྡུང་བདེ་ཁྱེར་གྱི་གཅུ་བ་སོགས་གཡས་གོ་ལྡོག་བྱ། ༤ཚན་༡༢པར་གཡས་སུ་འོག་བརྡུང་། ༤ཚན་༡༣པར་མདུན་དུ་སྟེང་བརྡུང་ངོ་། །གསུམ་པ་ཡོངས་བསྒྱུར་ནི། རྔ་ཡུ་བརླ་ལ་བརྟེན་ནས་གཡས་སུ་ཉེ་བར། ༡༢ཞེས་ཉིས་བརྡུང་བཅུ་གཅིག་ལས། དང་པོ་གཡས་སུ་འོག་བརྡུང་། ༢པར་མདུན་དུ་སྟེང་བརྡུང་ནེམ་པ་བྱས་པའི་༣པར་རྔ་བསྒྲེངས་ཏེ་འོག་བརྡུང་བྱ་བ་དང་རྐང་གཡོན་བཏེག་གཡོན་དུ་ཕབ། ༤པར་རྐང་གཡས་བཏེག་གཡོན་ཕྱོགས་ཕབ། ལྔ་པར་རྒྱབ་ཏུ་རྔ་སྟེང་བརྡུང་ནེམ་པ་བྱ། དྲུག་པར་རྔ་བསྒྲེངས་ཏེ་རྐང་གཡས་བཏེག་གཡས་སུ་བསྐོར་ནས་ཕབ། བདུན་པར་རྐང་གཡོན་བཏེག་གཡས་སུ་བསྐོར་བ་ཕབ་པའི། བརྒྱད་པར་མདུན་དུ་རྔ་སྟེང་བརྡུང་ནེམ་པ་བྱ། གོང་ལྟར་གཅིག་བལྡབས་པའི་རྗེས་མའི་བརྒྱད་ཀྱི་ནེམ་པའི་ཚབ། དགུ་པའི་༡ལ་རྔ་བརྡ་བྱ། ༢པར་ཆུད་པ་བྱས་ངོས་གཡས་སུ་༡༠པར་འོག་བརྡུང་། ༡༡པར་མདུན་དུ་སྟེང་བརྡུང་བྱའོ། །བཞི་པ་མེ་བྱུང་ནི། བཞི་བརྡུང་དྲུག་ལས། ༤བརྡུང་༣གྱི་ལེན་ལུགས་རྩེ་གསུམ་ཇི་ལྟ་བ་དང་། དེ་ནས་༤ཚན་༣ལ་མའི་དཀྱིལ་འཁོར་གྱི་ལོགས་གསུམ་རྩ་འཆམས་དང་འདྲ་བའི་དང་པོར་འོག་བརྡུང་། ༢བར་སྟེང་བརྡུང་། ༣པར་ཡང་སྟེང་བརྡུང་བྱ། དེ་རྗེས། ༡༢ ༡༢ ༡༢ ༣་༤ཞེས་པའི་དང་པོའི་ཉིས་བརྡུང་ལ་ལུས་ཅུང་ཟད་སྒུར་བ་དང་བཅས་རྐང་གཡས་མདུན་དུ་ཕབ་པའི་འོག་བརྡུང་། ༢པར་རྐང་གཡོན་མདུན་དུ་ཕབ་པའི་སྟེང་བརྡུང་། ༣པའི་༤བརྡུང་ལ་རྐང་གཡས་མདུན་དུ་འབེབས་པ་དང་མཉམ་དུ་རྔ་བསྒྲེངས་ཏེ་འོག་བརྡུང་བྱ། དེ་ནས་རྐང་གཡོན་མེ་དཀྱིལ་ལྟར་ལོགས་གསུམ་གྱི་དང་པོར་སྟེང་བརྡུང་། ༢པར་འོག་བརྡུང་། གསུམ་པར་སྟེང་བརྡུང་། དེ་ནས། ༡༢ ༡༢ ༡༢ ༣༤ ལ་སྔ་མ་གོ་ལྡོག་པའི་ཉིས་བརྡུང་དང་པོར་རྐང་གཡོན་མདུན་དུ་འབེབས་པ་དང་(༢༧ན)
ལུས་ཅུང་ཟད་སྒུར་བ་བཅས་འོག་བརྡུང་། ༢པར་རྐང་གཡས་མདུན་དུ་འབེབས་པ་དང་སྟེང་བརྡུང་། ༣པའི་བཞི་བརྡུང་ལ་རྐང་གཡོན་མདུན་དུ་འབེབས་པ་དང་རྔ་བསྒྲེངས་ཏེ་འོག་བརྡུང་གི་བཞི་བརྡུང་བྱ། དེ་ནས་གཡས་སུ་གཅུས་ཏེ་འོག་བརྡུང་དེ་གའི་བཞི་བརྡུང་༡དང་། མདུན་དུ་སྟེང་བརྡུང་གི་བཞི་བརྡུང་༡བྱའོ། །ལྔ་པ་ངར་འཛིན་ནི། སྦིར་སྦྲམ་མམ། ༡༢ཞེས་པའི་ཉིས་བརྡུང་དྲུག་ལས། དང་པོ་གཡས་སུ་གཅུས་ཏེ་སྟེང་བརྡུང་། ༢་ཕར་གཡོན་དུ་བཅུས་ཏེ་འོག་བརྡུང་། དེ་ལྟར་ལན་གསུམ་སོང་རྗེས། ཡང་ཉིས་བརྡུང་དྲུག་གི་དང་པོའི་༡༡ལ་རྔ་བསྒྲེངས་ཏེ་རྐང་གཡས་མདུན་དུ་ཕབ། ༢༢ལ་རྐང་གཡས་རྒྱབ་ཏུ་འཐེན་པ་དང་རྔ་སྟེང་བརྡུང་། དེ་ལྟར་ལན་གསུམ་སོང་རྗེས། དེ་ནས་༡༡ལ་རྔ་བསྒྲེངས་ཏེ་འོག་བརྡུང་ངོས་རྐང་གཡས་མདུན་དུ་འབེབས་པ་དང་༢༢ལ་རྐང་གཡོན་འབེབས་པ་སོགས་གཡས་སྐོར་གྱིས། ༡༡ ༢༢ ༣༣ ༤༤ ༥༥ ༦༦ ༧༧ ཞེས་པའི་བར་རྐང་གཉིས་རེ་མོས་ཀྱིས་ཕབ་མདུན་དུ། ༨༨ཅེས་པར་རྔ་བརྡ་བྱ་ཞིང་། དེ་ནས་གཡས་སུ་གཅུས་པའི་སྟེང་བརྡུང་གི་ཉིས་བརྡུང་༡ གཡོན་དུ་གཅུས་པའི་འོག་བརྡུང་ཉིས་བརྡུང་༡། མདུན་དུ་སྟེང་བརྡུང་༡བྱའོ། །དྲུག་པ་ཤང་ཤང་ནི། རྔ་ཡུ་བརླ་ལ་བརྟེན་ཏེ། སྟེང་བརྡུང་གི །༡༢༣ལ་རྔ་བརྡ་ཆེ་བ་བྱ་ཞིང་། དེའི་༣བར་ལུས་ཅུང་ཟད་ནེམ་ཙམ་བྱས་ནས་རྔ་བསྒྲེངས་ཏེ་འཛིན་ཞིང་། ཆིག་བརྡུང་གི་༡༢༣། ༡༢ཞེས་པའི་གསུམ་ལ་གྲངས་པར་ཐག་རན་པ། ༡༢ལ་ཆིག་བརྡུང་དལ་བ་ཡོད་པའི། ལྔ་ཚན་དང་པོའི་༡ལ་རྐང་གཡོན་ཕབ། ༢ལ་རྐང་གཡས་བཏེག་ནས་བར་སྣང་། གསུམ་པར་ཕབ། ༡ལ་རྐང་གཡོན་བཏེག་ནས་ཕབ། ༢ལ་རྐང་གཡས་བཏེག་ཕབ་(༢༧བ)
རྣམས་འགྲོ་ཕྱོགས་སུ་སྤོ། ༢པའི་ཚེ་རྔ་ཡུ་བརླ་ལ་བརྟེན་ནས་སྟེང་བརྡུང་ངོས་རྒྱབ་ལ་ཕྱི་ཐེན་བྱེད་པ་མ་གཏོགས་སྔ་མ་གཤིན་འབེབས་ལུགས་བྱ། ༢པར་སྔ་མ་ཇི་ལྟ་བ་བཞིན་འགྲོ་ཕྱོགས་སུའོ། །༤པ་ལ་༢པ་ཇི་ལྟ་བའི་རྒྱབ་ཐེན་ངོས་རྗེས་མའི་༢ཞེས་པར་རྔ་བརྡ་ཆེ་བ་༡བྱ། དེ་ནས་རྔ་བསྒྲེངས་ཏེ་འཛིན་ཞིང་། ལྔ་པའི་༡ལ་རྐང་གཡོན་གཡོན་དུ་ཕབ། ༣པར་རྐང་གཡས་བཏེག་ཅིང་ཅུང་ཤུགས་ཆེ་བས་གཡོན་སྐོར་དུ་བསྐོར་ངོས་ཡོང་ཕྱོགས་སུ་སླེབ་པ་དང་༣པར་ཕབ། ༡ལ་རྐང་གཡོན་གཏེག་ལ་གཡོན་དུ་ཅུང་ཟད་གཅུ་༢ལ་རྐང་གཡས་བཏེག་ནས་གཡས་ཕྱོགས་སུ་གཅུ་ཞིང་བགྱིད་པ་ནེམ་བྱེད། ༦པ་འགྲོ་ཕྱོགས་ལ་རྒྱབ་བསྟན་པའི་མདུན་འགྲོ་དང་། ༧བར་རྒྱབ་ཐེན། ༨པར་མདུན་འགྲོ། ༧པར་རྒྱབ་ཐེན་སོགས་སྔ་མ་ལྟར་བྱས་པའི། དགུ་པའི་༡༢ལ་རྔ་བརྡ་ཆེ་བ་དང་། ༡༠པའི་༡ལ་རྔ་མདུན་དུ་བསྒྲེངས་ཏེ་ཆིག་བརྡུངས་ངོས་རྐང་གཡོན་བཏེག་ནས་གཡོན་དུ་ཅུང་ཟད་གཅུས་ངོས། ༢ལ་གཡས་སྐོར་དུ་བསྐོར་ཏེ་ཕབ། གསུམ་ལ་རྐང་གཡས་བཏེག་ནས་འགྲོ་ཕྱོགས་སུ་ཕབ། ༡ལ་རྐང་གཡོན་བཏེག་ནས་མདུན་དུ་བཙུགས། ༢ལ་རྔ་ཡུ་བརླ་ལ་བརྟེན་ནས་སྟེང་བརྡུང་ངོས། ༡༡བར་རྔ་བསྒྲེངས་ཏེ་མདུན་འགོ་གཅིག་བྱའོ། །བདུན་པ་རྦ་རླབས་ནི། རྔ་ཡུ་བརླ་ལ་བརྟེན་ཅིང་སྟེང་བརྡུང་ངོས་རྔ་བརྡ་ཆེ་བ་གསུམ་དང་ཆུང་བ་༡ལ་རྐང་གཡོན་གཡོན་ཕྱོགས་སུ་ཅུང་ཟད་ནུད། དེ་ནས་སྦིར་སྦྲམ་ཞེས་པར་རྔ་འོག་བརྡུང་གི་སྦིར་ལ་རྐང་གཡས་བཏེག་ཅིང་། སྦྲམ་ལ་ཕབ། དེ་བཞིན་གཡོན་གྱི་ཚེ་རྔ་སྟེང་བརྡུང་བྱེད་པ་མ་གཏོགས་འདྲ་ཞིང་། གཡས་གཡོན་རེ་མོས་ཀྱི་མང་ཉུང་ཇི་ལྟར་འཚམ་པ་བྱས་རྗེས། རྐང་གཡོན་བཏེག་ནས་རྔ་སྟེང་བརྡུང་ངོས་རྔ་བརྡ་ཆེ་བ་(༢༨ན)
༣གྱི་རྗེས་མར་གཡོན་ཕབ། གཡོན་དུ་བསྐོར་ཞིང་བསྒིར་ནས་ཡོང་ཕྱོགས་སུ་བལྟ་བའི་རྐང་གཡས་གཡོན་འདེགས་འཇོག་རྔ་སྟེང་འོག་བསྒྱུར་བ་སོགས་སྔ་མ་བཞིན་ཇི་ལྟར་འཚམ་པ་སོང་རྗེས། གཡོན་བཏེག་ཐོག་རྔ་བརྡ་ཆེ་བ་གསུམ་སྔར་བཞིན་བྱས་པའི་གཡོན་སྐོར་དུ་འགྲོ་ཕྱོགས་སུ་བལྟས་ནས་གཡས་གཡོན་རེ་མོས་སྔ་མ་ལྟར་ཇི་ལྟར་འཚམ་པ་སོང་རྗེས། རྐང་གཡོན་པའི་ཐོག་གཡོན་མ་བཏེག་པར་རྔ་བརྡ་ཆེ་བ་གསུམ་བྱའོ། །བརྒྱད་པ་སྦྲུལ་ནག་ཆིག་འགྲོས་ནི། གོང་གི་རྔ་བརྡ་གསུམ་གྱི་བར་མར་ལུས་ནེམ་ཙམ་དང་རྗེས་མ་རྐང་གཡོན་འདེབས་པ་དང་མཉམ་དུ་རྔ་བསྒྲེངས་ཏེ། ༡༢༣དང་། ༡༢ཞེས་པར་ཤང་ཤང་བཞིན་ལས་གཡོན་འདེགས་དུས་གཡས་འཕར་བའི་ཤུགས་ཆེ་བ་བྱ་བའི་དང་པོའི་༡ལ་རྐང་གཡོན་ཕབ། གཉིས་ལ་རྐང་གཡས་བཏེག །༣ལ་རྐང་གཡས་ཕབ། ཆིག་བརྡུང་༡ལ་རྐང་གཡོན་འདེགས་འཇོག་དང་། ༢ལ་རྐང་གཡས་འདེགས་འཇོག །ཡང་གོང་བཞིན་ལ་རྔ་སྟེང་བརྡུང་གི ༡ལ་རྐང་གཡོན་ཕབ། ༢ལ་གཡས་བཏེག །༣ལ་གཡས་ཕབ། ཆིག་བརྡུང་༡ལ་གཡོན་འདེགས་འཇོག་དང་། ༢ལ་རྐང་གཡས་མདུན་དུ་འབེབས་པ་དང་མཉམ་དུ་སྟེང་བརྡུང་ནེམ་པ་བྱེད། སྦྲུལ་ནག་མ་རྫོགས་བར་གོང་ལྟར་བལྡབ་པའོ། །དེ་ནས་རྔ་པ་རྣམས་བྲུབ་ཁུང་གི་དབུས་སུ་དགྲ་བགེགས་ཀྱི་གཟུགས་བརྙན་བཀོད་པའི་མདུན་དུ་ཕྱོགས་ལ། གཉིས་པ་བྲུབ་འཆམས་དངོས་ལ། སྒོ་མ་བྱ་འུག་ཤ་གཡག་གི་འཆམས་དང་། གཙོ་བོ་ཕྲ་ཕྱག་གི་འཆམས་གཉིས། དང་པོ་ནི་རོལ་མོ་ཆེ་བར་བྱས་ཏེ། སྦྲམ་སྦྲམ་ཞེས་ཇེ་མྱུར་ཕབ་པའི་འབེབས་ལ་འཆམས་པའི་ལག་གཉིས་གྲུ་མོ་ཅུང་ཟད་བཀུག་ཅིང་། དཔུང་པའི་ཐད་ཀར་ལག་པའི་མགོ་ཡོད་(༢༨བ)
པར་བརྒྱངས། ལུས་དྲང་པོར་བསྲང་ཞིང་མགོ་བོ་གཡས་གཡོན་དུ་བལྟ་བའི་ངོས་ཤབ་རྒྱུགས་བྱས་ལ་འབྲུབ་ཁུང་མཐར་སྐོར་བ་༡བག་མེད་ཙམ་ནས་རྐང་གཡོན་བཏེག་པའི་འབེབ་པ་དང་མཉམ་དུ་དཔུང་གཡོན་དོར་རའི་ནང་དུ་བསྟན། ལུས་ཅུང་ཟད་ནེམ་པ་བྱས་ནས་གཡོན་རྟིང་གསིག་དང་བཅས་ལུས་བསྲངས། ༡ ༢ ༣ ༤ ༥ ༦ ༧ ༨ ༩༩༩ ཞེས་པའི་དང་པོར་རྐང་གཡས་གཡོན་སྐོར་འགྲོ་ཕྱོགས་སུ་ཕབ། ༢པར་གཡས་རྟིང་གསིག་ཆེ་བ་བྱ། ༣ པར་རྐང་གཡོན་གཡོན་སྐོར་ཡོང་ཕྱོགས་སུ་ཕབ། ༤པར་གཡོན་རྟིང་གསིག་ཆེ་བ་དང་གཡས་བཏེག །༥ བར་རྐང་གཡས་གཡས་སྐོར་དུ་འགྲོ་ཕྱོགས་ཕབ། ༦པར་གཡས་རྟིང་གསིག་ཆེ་བ་དང་གཡོན་བཏེག །༧ པར་གཡོན་མདུན་དུ་ཕབ། ༨པར་གཡོན་རྟིང་གསིག་ཆེ་བ་དང་། དགུ་དང་པོར་རྐང་གཡས་གཡོན་དུ་བསྐོར་ཞིང་འབེབས། ༢བར་རྐང་གཡོན་གཡོན་དུ་བསྐོར་ནས་འབེབས། ༣པར་རྐང་གཡས་གཡས་སུ་བསྐོར་ཞིང་འབེབས། ༤པར་རྐང་གཡོན་གཡས་སུ་བསྐོར་ཅིང་མདུན་ཕྱོགས་འབེབས། བལྡབས་ནས་ལེན་དུས་རོལ་མོ་ཆུང་བ་གཅིག་གི་ཐེན་རྐང་ཡོང་བ་གྲངས་སུ་མི་གཏོགས་པས་དེ་ལྟར་དགུ་སྐོར་ལན་གསུམ་སོང་ནས། ཐེན་རྐང་མེད་པར་རྐང་གཡས་བཏེག་པའི་ངང་ནས་དོ་རའི་ནང་དུ་བསྒིར་བ་དང་མཉམ་དུ། དཀྱིལ། ལའི་ཞེས་པར་རྐང་གཡས་འགྲོ་ཕྱོགས་སུ་ཕབ། ལག་གཉིས་གྲུ་མོ་ཅུང་ཟད་བཀུག་སྟེ་བརྒྱངས་པའི་ངང་ནས་པད་ཀོར་ཚུལ་གྱིས་ལག་ཁ་སྦུབ་དང་། འཁོར། རོ་ཞེས་པར་རྐང་གཉིས་རྟིང་གསིག་དང་ལག་གྱེན་བསྟན་མཐེ་བོང་ཕྱིར་བསྟན་ངོས། ཤར། ར་ཞེས་པར་རྐང་གཡོན་རྒྱབ་ཏུ་ཕབ། ལག་གཡས་མདུན་དུ་བརྐྱང་སྟེ་ནང་ནས་ཡར་དྲངས། ཕྱོགས་ལ་རྐང་གཉིས་རྟིང་(༢༩ན)
གསིག་བྱས་ནས་གཡས་བཏེག་ལག་གཡས་བརྒྱངས་ཏེ། སྒོ་འོལ་རྐང་གཡས་གཡས་སྐོར་དུ་ཡོང་ཕྱོགས་སུ་ཕབ། བསྲུང་ངོ་ཞེས་པར་རྐང་གཉིས་རྟིང་གསིག་བྱ། པུ་ལ་རྐང་གཡོན་མདུན་དུ་བསྒིར་ཞིང་འབེབས་པ་དང་ལག་གཡས་ནང་ནས་མས་ཡར་སྡིགས་མཛུབ་བསྒྲེངས་ཏེ་གཡས་སུ་འཕྱར། འུ་ལ་རྟིང་གསིག་བྱ། ཤུད་ལ་རྐང་གཡས་གཡས་སུ་ཕབ། འོ་ལ་རྐང་གཡོན་མདུན་དུ་ཛཾ་ཞིང་རྟིང་གསིག་ཅུང་ཞིག་བྱ། མགོ་ཝལ་རྐང་གཡས་གཡས་སུ་ཕབ། འའི་ལ་རྐང་གཡོན་བཏེག་ནས་གཡོན་སྐོར་དུ་ཕབ་ཝའི་རྟིང་གསིག་དང་བཅས་རྐང་གཡས་བཏེག་ནས་གཡོན་སྐོར་དུ་ཚིག་རྐང་གཉིས་པོའི་འབེབས་པ་ནས་བཟུང་བཤད་མ་ཐག་པ་དེ་གའི་འགྲོས་བྱ་ཞིང་། ཚིག་རྐང་བཞི་པའི་ཨཾ་གུ་ཤ་ཡ་ཛ༔ ཞེས་པའི། གུ་ལ་ལག་གཡས་མདུན་དུ་བརྐྱང་བའི་ནང་ལ་བཀུག་པའི་མས་ནས་ཡར་ཕྱར་ཞིང་། ཤ་ལ་རྐང་གཡས་གཡས་ཟུར་དུ་བཞག །འ་ལ་རྐང་གཉིས་རྟིང་གསིག་བྱས་ནས། ཡ་ལ་རྐང་གཡོན་ཛཾ་པའི་ཕབ། འ་ལ་རྐང་གཡས་བཏེག །ཛཿལ་རྐང་གཡས་ལིངྒའི་མདུན་དུ་འབེབས་པ་དང་ལྕགས་ཀྱུས་སྒུག་པའི་བརྡ་བྱེད། ཝ་ལ་རྐང་གཡོན་རྟིང་པ་ཅུང་ཟད་བཏེག་ཙམ་བྱ། འའི་ལ་རྐང་གཡས་སུ་ཕྱིར་འཐེན། ཝའི་ལ་རྐང་གཡོན་བཏེག་ཙམ་གྱི་ཛཾ་ནས་རྐང་གཡས་བཏེག་སྟེ། ལྷོའི་སྒོ་མ་ནས་རིམ་གྱིས་ཚིག་དང་བསྟུན་པའི་འཆམས་ཚུལ་འདྲ་བ་ནས་ཞགས་པས་འཆིང་ཚུལ། ལྕགས་སྒྲོག་གིས་བསྡམ་ཚུལ། དྲིལ་བུས་དབང་དུ་སྡུད་ཚུལ་བྱེད་པ་མ་གཏོགས་གཞན་མ་ཤར་གྱི་སྒོ་མ་དང་ཁྱད་པར་མེད། པུ་ཤུད་ལྷོའི་དབྱངས་དང་བསྟུན་པའི་དངོས་གཞི་སྔར་ལྟར་ལ་གོམ་ཆུང་ཅུང་ཟད་མང་བ་བྱས་ཏེ་འཆམས་ཁང་དུ་རྡོག །སྒོ་མ་(༢༩བ)
གཞན་གསུམ་གྱི་སྔ་མ་གཉིས་པུ་ཤུད་ལྟར་རྡོག་ཅིང་། ཁྲའི་འཆམས་རྐང་རྫོགས་རྗེས། ༡༡ ༢༢ ཞེས་པའི་ཉིས་བརྡུང་ཐེན་རྐང་གི་༡༡ལ་རྐང་གཡས་བཏེག་ནས་རྟིང་གསིག་དང་བཅས་མདུན་དུ་ཕབ། ༢༢ལ་རྐང་གཡོན་བཏེག་རྟིང་གསིག་དང་བཅས་གཡོན་ཐུར་དུ་ཕབ་ཡང་༡༡ལ་རྐང་གཡས་བཏེག་རྟིང་གསིག་དང་བཅས་མདུན་དུ་ཕབ། ༢༢ལ་རྐང་གཡོན་བཏེག །གཡས་སུ་ཅུང་ཟད་གཅུ་ཞིང་བཙུགས། ཡང་། ༡༡ལ་རྐང་གཡས་བཏེག་འབེབས་གཡས་ཕྱོགས་དང་། ༢༢ལ་རྐང་གཡོན་བཏེག་འབེབས་གཡོན་དུ་བྱེད་ཅིང་འཆམས་ཁང་བར་འདི་ཀ་བལྡབས་ལྡོག །ལག་པའི་ཕྱག་རྒྱ་རྩ་འཆམས་བཞིན་ནོ། །བྱ་འུག་གཉིས་སྒོ་མ་དང་འདྲ་བ་ལ་རྡོག་པ་དུས་མཉམ་དུ་བྱེད། ཤ་གཡག་གི་ཛཾ་རྒྱུག་པའི་ཚེ་དགུ་སྐོར་རླུང་ནག་འཚུབ་མ་ལེན་པའི་བར་སྒོ་མ་དང་འདྲ་བ་ལ། དེ་ནས་ཤ་འཆམས་ཀྱི་ནང་གི་དགུ་སྐོར་རྐྱང་མ་ཚར་གཅིག་བླངས། དེ་ནས་དགུ་སྐོར་རླུང་ནག་ཚུབ་མ་རེ་དང་རྐྱང་མ་རེ་སྤེལ་བའི་ངང་ནས་བརྡོག་གོ །མིག་ལ་བདེ་བའི་དཔལ་སྟེར་ཞིང་། །དགྲ་བོའི་བླ་སྲོག་འགུགས་བྱེད་པའི། །ལས་མཁན་ཕོ་མོའི་སྟང་སྟབས་ཀྱི། །རྣམ་པར་དབྱེ་བ་ད་ཙམ་མོ། །གཉིས་པ་གཙོ་བོ་ཕྲ་ཕྱག་གི་འཆམས་དང་། གདབ་ཁའི་འཆམས་སོ། །དང་པོ་ལ་བརྒྱད་ལས། དང་པོ་འདོན་ནི་འཆམས་དཔོན་གཅིག་པོ་སྒོ་ནང་ནས་འགྲོ་ཕྱོགས་སུ་ལུས་ཀྱི་གཡོན་ངོས་བསྟན། སྦིར་སྦྲམ། སྦིར་སྦྲམ་ཞེས་གཉིས་ཀྱི། དང་པོ་ལ་རྐང་གཡོན་འགྲོ་ཕྱོགས་ཕབ་ལག་གཡས་ཕྱག་མཚན་མཐོ་བར་འཕྱར། ལག་གཡོན་ཅུང་ཟད་དམའ་བའི་བནྡྷཱ་ཁ་གྱེན་བསྟན་ནས། སྦིར་ལ་རྐང་གཉིས་རྟིང་གསིག་དང་གཡོན་ཕྱོགས་འགྱིང་། སྦྲམ་ཞེས་བར་རྐང་གཡས་གཡས་སུ་ཕབ། ༢པའི་སྦིར་ལ་རྐང་གཉིས་རྟིང་གསིག་ལག་(༣༠ན)
གཉིས་སྔ་མ་གོ་ལྡོག་གི་གཡས་ཕྱོགས་འགྱིང་། སྦྲམ་ལ་རྐང་གཡོན་འགྲོ་ཕྱོགས་ནུད་དེ་ཕབ་བོ། །སྦིར་ལ་རོལ་མོ་ཆེ་ཞིང་སྦྲུམ་ལ་ཆུང་བའི་ཐེང་བརྡུང་བྱ། དེ་ནས་བཞི་འགྲོས་ནི། ༡༢༣༤ཞེས་པའི་༡དང་༤ལ་རོལ་མོ་ཆེ་བ་ཡོད་པས། གཡས་པའི་བཞི་འགྲོས་ནི། ༡ལ་རྐང་གཡས་འགྲོ་ཕྱོགས་སུ་འབེབས་ཤིང་། ལག་གཡས་མདུན་དུ་གཡབ་པའི་པད་ཀོར་ལེན། ༢ལ་རྐང་གཡོན་གཡས་པའི་སར་དྲུད་ཅིང་ལག་གཡོན་བན་སྐྲ་ཕྱིར་ཕྱོགས། ༣ལ་རྐང་གཡས་འགྲོ་ཕྱོགས་ཕབ། ལག་གཉིས་མདུན་མཉམ་ནེམ། ༤ལ་རྐང་གཡོན་བཏེག །ལག་གཡོན་བན་སྐྲ་རྒྱབ་ཏུ་གཡུགས་ཅིང་། རྐང་གཡས་འཕར། རྐང་གཡོན་གཡས་སུ་བསྐོར་ནས། གཡོན་བཞི་འགྲོས་ཀྱི་༡ལ་འབེབས་ཤིང་། ལག་གཡོན་པད་ཀོར་བྱས་ཏེ། ༢ལ་རྐང་གཡས་གཡོན་པའི་རྩར་དྲུད་པ་དང་། ༣ལ་རྐང་གཡོན་འགྲོ་ཕྱོགས་སུ་འབེབས་ཤིང་ལག་མདུན་མཉམ་བྱས་ཅུང་ཟད་ཤུགས་ཆེ་ཙམ་ནས་༤ལ་རྐང་གཡས་མདུན་དུ་ཕབ་ཅིང་བན་སྐྲ་རྒྱབ་ཏུ་གཡུགས་ནས་གདོང་འགྲོ་ཕྱོགས་ལ་བསྟུན་ནས། ༤བརྡུང་གསུམ་གྱི། དང་པོའི་༡༢ལ་ཡངས་པད་ལེན། ༣༤ལ་ལག་གཡོན་ཐུགས་ཀར་སྡིགས་མཛུབ་དང་གཡས་ཕྱིར་བརྒྱངས་ཏེ། ༢པའི་༡༢ལ་དེ་གར་འགྱིང་། ༣ལ་ལག་གཡས་པུས་སྟེང་། ༤ལ་ཕྱིར་གཡུག །འདི་རྣམས་ལ་པད་ཀོར་ལེན་དགག་བསྐྱུར་གསུམ་སྟེ། དགག་པད་ཅེས་བྱའོ། །༣པའི་༡ལ་ལག་གཉིས་གཡས་སུ་གཞོལ་བ་དང་། རྐང་གཡོན་པ་བཏེག་ཙམ་བྱ། ༢པར་རྐང་གཡས་རྒྱབ་ཏུ་དྲུད། ༣ལ་རྐང་གཡོན་བཏེག་འབེབས་དང་། ༤ལ་རྐང་གཡས་བཏེག །གཡོན་ཅུང་ཟད་འཕར་ཏེ་བཞི་འགྲོས་ལ་འཇུག་པ་དང་བསྟུན། འདི་ནས་འཆམས་དམངས་ཀྱང་རིམ་འདོན་བྱེད། བཞི་འགྲོས་ནི་གོང་དུ་བཤད་མ་ཐག་དེ་(༣༠བ)
བཞིན་ལ་གཡོན་པའི་བཞི་འགྲོས་སྐབས་ལག་པའི་འགྱུར་བ་ནི། གཡས་འཕྱར། གཡོན་འཕྱར། གཉིས་ཀ་བརྒྱང་བ། གཉིས་ཀ་དཀུར་བརྟེན་པ་རྣམས་རིམ་གྱིས་བྱ་དགོས་ཤིང་། འདོན་འདིས་དོ་ར་འཁོར་བ་དང་། གཉིས་པ་ནི། རྐང་གཡོན་པའི་བཞི་འགྲོས་༣པའི་ཐོག །འཆམས་དཔོན་གྱི་ཕཊ་ཅེས་བརྗོད་དེ་བསྒྱུར། ༤ལ་རྐང་གཡོན་འབེབས་པ་དང་མདུན་དུ་ཡངས་པད་ཀྱི་འགོ་བརྩམ། ༤བརྡུང་༢ལ་ཡངས་པད་ལེན་དགག་བསྐྱུར་༣གོང་དུ་བཤད། དེ་ནས་བཞི་བརྡུང་གསུམ་གྱི། དང་པོའི་༡༢ལ་ལག་གཉིས་གཡས་སུ་གཞོལ། ༣༤ལ་ལག་གཉིས་གཡོན་དུ་བསྐོར་ཏེ། ༢པའི་༡༢ལ་གཡས་སུ་གཞོལ་ནས། ༣༤ལ་རྐང་གཡོན་བཏེག་འབེབས་ཅུང་ཟད་ཤུགས་ཆེ་བ་དང་། ལག་གཉིས་གཡོན་ཕྱོགས་བསྐོར། ༣པའི་༡ལ་རྐང་གཡས་འབེབས་པ་དང་ལག་གཡས་པུས་སྟེང་བརྐྱང་། ༣༤ལ་རྐང་གཡོན་བཏེག་འབེབས་དང་ལག་གཉིས་ནང་དུ་བསྐོར་ཏེ་འོག་ནས་ཡར་སྟེང་དུ་འཕྱར། ༤ལ་རྐང་གཡས་བཏེག་སྟེ། ཆིག་བརྡུང་བཞིའི་དང་པོ་ལ་རྐང་གཡས་མདུན་དུ་ཕབ། རྟིང་གསིག་གི་གཡོན་སྐོར་འགྲོ་ཕྱོགས་ལ་བལྟ་བས་རྐང་གཡོན་རྒྱབ་ཏུ་རྟིང་གསིག་གི་གཡས་སྐོར་མདུན་དུ་བལྟ་བས་རྐང་གཡས་ཡོང་ཕྱོགས་ཀྱི་གཡས་ཟུར་དུ། ༤པར་རྟིང་གསིག་གི་རྐང་གཡོན་མདུན་རྣམས་སུ་ཕབ། འདི་ལ་དགའ་བ་ཡོངས་བསྒྱུར་ཅེས་བྱ་སྟེ་རྒྱས་པར་བྱ་ན་ལན་༡བལྡབ། གསུམ་པ་ནི། རྐང་གཡོན་ཕབ་ནས་ཕཊ་ཀྱི་བསྒྱུར། དགའ་བ་ཡོངས་བསྒྱུར་གྱིས་ཞེས་པའི་རྗེས་རོལ་མོ་ཆུང་བ་ཞིག་ཡོང་བར་ཡངས་པད་ཀྱི་འགོ་བརྩམ། སྦིར་སྦྲམ་ཞེས་༢ཚན་ལྔའི། དང་པོ་ལ་ཡངས་པད། ༢བར་ལག་གཡོན་ཐུགས་ཀ་དང་གཡས་འཕྱར། ༣བར་ཕུར་དར་རྒྱབ་ཏུ་གཡུག །༤པ་དང་༥པར་ལག་(༣༡ན)
གཉིས་རོལ་པ་བྱས། དེ་ནས་སྦྲམ་སྦྲམ་ཞེས་ཆུང་ངུ་ཁ་ཡར་ལ་རྐང་གཡས་བཏེག་འབེབས་དང་བསྟུན་ལག་གཡས་གཡས་སུ་ཕབ། རྐང་གཡོན་བཏེག་དང་བསྟུན་ལག་གཉིས་ནང་དུ་བསྐོར་ཏེ་འོག་ནས་ཡར་འཕྱར་ཞིང་བརྒྱངས། བཞི་པ་ནི། རྐང་གཡས་བཏེག་འགྲོ་ཕྱོགས་སུ་གཡོན་རྟིང་གསིག་གིས་སྦྲམ་ཞེས་པར་རྐང་གཉིས་བགྲད་དེ་བརྗིད་འབེབས་དང་། པུས་མོ་ཅུང་ཕབ་སྟེ་ཟླུམ་པོའི་འདུག་སྟངས་བྱ། ཐེང་བརྡུང་ཆུང་ངུ་ལ་རྐང་གཡོན་གཡས་སུ་ཅུང་ཟད་བསྐོར་ཏེ། རྐང་གཡས་ཕྱིས་འཐེན། རྐང་གཡོན་འབེབས་པ་དང་སྦྲམ། སླར་ཐེང་བརྡུང་ཆུང་ངུ་ལ་ལག་གཉིས་ནང་དུ་བསྐོར་ཏེ་བརྒྱངས། རྐང་གཡས་བཏེག་སྟེ་འགྲོ་ཕྱོགས་སུ་སྔ་མ་ཇི་ལྟ་བ་བཞིན། ༡གམ་༢་བལྡབ་འདི་ལ་སེང་གེའི་བརྗིད་འཆམས་ཞེས་བྱ། སྦྲམ་ཞེས་གཡོན་འབེབས་པ་དང་། ཕཊ་ཀྱིས་བསྒྱུར་རྗེས་རོལ་མོ་ཆུང་བར་ཡངས་པད་ཀྱི་འགོ་བརྩམ་པ་ནས། ཐེང་བརྡུང་ཆུང་ངུར་ལག་གཉིས་བརྒྱངས་པའི་བར་གོང་བཞིན་བྱས་ནས། ལྔ་པ་ནི། རྐང་གཡས་བཏེག །སྦྲམ་༡། སྦྲམ་༢། སྦྲམ་༣། སྦྲམ་༤། ཞེས་པར་སྦྲམ་ལ་ཆེ། གྲངས་ལ་ཆུང་བས། རྐང་གཡོན་འཕར་བ་དང་བཅས་རྐང་གཡས་དང་པོ་མདུན་དུ་ཕབ། གྲངས་ལ་རྐང་གཡོན་བཏེག་ཙམ་བྱས༔ དེ་བཞིན་དུ། ༢པར་གཡས་ཡོང་ཕྱོགས། ༣པར་རྒྱབ། ༤པར་གཡོན་འགྲོ་ཕྱོགས་རྣམས་སུ་དང་པོ་ཇི་ལྟ་བ་དང་། རྗེས་མའི་གྲངས་༤ཞེས་པར་རྐང་གཡོན་མདུན་དུ་བསྐོར་ཏེ་ཕབ། འདི་ལ་བཞི་སྐོར་ཞེས་བྱ། དེ་ནས་སྦིར་སྦྲམ་ཞེས་༢ཀྱི་དང་པོའི་སྦིར་ལ་ལག་གཉིས་བརྒྱངས་པ་གཡོན་ཕྱོགས་འཕྱར་བའི་ཛཾ་དང་རྐང་གཉིས་རྟིང་གསིག་བྱ། སྦྲམ་ལ་རྐང་གཡས་གཡས་སུ་འཐེན། ༢པའི་སྦིར་ལ་ལག་གཉིས་གཡས་སུ་འཕུར་བའི་ཛ་དང་རྟིང་གསིག །(༣༡བ)
སྦྲམ་ལ་རྐང་གཡོན་བཏེག་ཙམ་བྱས་ཏེ་བཞི་འགྲོས་ལ་འཇུག །གཡོན་གཡས་ཀྱི་ཛཾ་འདི་འོག་ཏུའང་འགྲེ །དེ་ནས་བཞི་འགྲོས་ཇི་ཙམ་འོས་པའི། གཡོན་པའི་གསུམ་པའི་ཐོག་ཕཊ་ཀྱིས་བསྒྱུར་ནས། དྲུག་པ་ནི། སྦིར་སྦྲམ་ཞེས་པའི་༢་ཚན་པ་ལ་དགག་པད་རོལ་པ་བྱས་ཏེ། སླར་སྦིར་སྦྲམ་༡ལ་གཡས་སུ་ཅུང་ཟད་འཕར་ཏེ་རྐང་གཡས་བཏེག་གཡོན་རྟིང་གསིག་གིས་གཡས་སྐོར་དུ། ༡༢༣༤༥༦རྣམས་ལ་བསྐོར་ཏེ། མདུན་དུ་༧ལ་རྐང་གཡས་ཕབ། གཡོན་བཏེག །༨ལ་གཡོན་ཕབ་ནས་༩༩༩༩ཞེས་པར་གཡོན་གཡས་སུ་ཛམ་པ་གོང་གི་སྦིར་སྦྲམ་དང་འདྲ་བ་ནས་བཞི་འགྲོས་ལ་བཅུག །འདི་ལ་དགུ་སྐོར་ཆུང་བ་ཞེས་བྱ། ཇི་ཙམ་འོས་པའི་གཡོན་གསུམ་པའི་ཐོག་ཕཊ་ཀྱིས་བསྒྱུར་ནས། བདུན་པ་ནི། སྦིར་སྦྲམ་གྱི་ཉིས་ཚན་ཆུང་བ་༢དང་ཆེ་བ་རེ་སྦལ་པའི་༢ཚན་དྲུག་གི །དང་པོ་དང་༢པ་ཆུང་བར་དགག་པད། ༣པ་ཆེ་བའི་སྦིར་ལ་རྐང་གཡོན་བཏེག་གཡས་འཕར་བ་དང་ལག་གཉིས་མདུན་མཉམ་ནས་ནེམ། སྦྲམ་ལ་རྐང་གཡོན་མདུན་དུ་འབེབས་པ་དང་ཕུར་དར་རྒྱབ་ཏུ་གཡུགས་དེ་གཡས་ཡོང་ཕྱོགས་ལ། ༤པ་དང་༥པ་ཆུང་བར་དགག་པད། ༦པ་ཆེ་བར་རྐང་གཉིས་རང་སར་ནེམ་ཅིང་ཕུར་དར་གཡུགས་ནས། ༡༡ ༢༢ ༣༣ ༤༤ ཞེས་པར་ལག་གཡས་འཕྱར་གཡོན་དཀུར་བརྟེན་ནས། ༢ཚན་༤ཡི་དང་པོའི་༡ལ་རྐང་གཡས་གཡས་སུ་གོམ་པ་རེ་དང་། ༢པར་རྐང་གཡོན་དྲུད་པ་རྗེས་མ་༣ལ་འགྲེ་བའི་རྗེས་མའི་༤༤ལ་ཅུང་ཤུགས་ཆེ་ཙམ་ངོས། ༡༢༣༤ཞེས་ཆེ་བཞིའི་དང་པོ་ལ་རྐང་གཡས་བཏེག་གཡོན་དུ་བསྐོར་བའི་མཆོད་སྟབས་ཀྱིས་གཡས་ངོས་བཙུགས་ནས་༢༣༤ལ་གསིག །ཆུང་བ་བཞིའི། ༡༢ལ་རང་ས་དང་། ༣ལ་ལག་གཉིས་བརྒྱངས། རྐང་གཡས་བཏེག་ནས་འགྲོ་ཕྱོགས་སུ་(༣༢ན)
༤ལ་ཕབ་ནས། རྐང་གཡོན་བཏེག་ཙམ་གྱི། སྦིར་སྦྲམ་༢ཚན་༣གྱི་དང་པོ་དང་༢པ་ཆུང་བར་དགག་པ་དང་། ༣པ་ཆེ་བར་རྐང་གཉིས་ནེམ་པ་དང་བཅས་ཕུར་དར་རྒྱབ་ཏུ་གཡུགས་ཏེ། ལག་གཡས་དཀུར་བརྟེན་གཡོན་འཕྱར་ནས་རྐང་གཡོན་གཡོན་དུ། ༡༡ ༢༢ ༣༣ ༤༤ ཞེས་པར་གཡས་ཇི་ལྟ་བ་གོ་ལྡོག །དེ་བཞིན་དུ་ཆེ་༤དང་ཆུང་༤ཡང་སྔ་མ་གོ་ལྡོག་ནས། ཆུང་བཞིའི་༣༤ལ་ཡང་རང་ས་ནས། སྦིར་སྦྲམ་གཉིས་ལ་གཡོན་གཡས་སུ་ཛཾ་རྗེས་བཞི་འགྲོས་ལ་བཅུག །འདི་ལ་གཡས་གཡོབ་གཡོན་གཡོབ་ཅེས་བྱའོ། །གོང་ལྟར་ཕཊ་ཀྱིས་བསྒྱུར་ནས། བརྒྱད་པ་ནི། སྦིར་སྦྲམ་ཞེས་༢ཚན་ཆུང་བ་༢རེ་དང་ཆེ་བ་རེ་སྤེལ་བའི་༢ཚན་བཅུ་གཉིས་ཀྱི་དང་པོ་དང་གཉིས་པ་ཆུང་བར་དགག་པ་དང་། གསུམ་པ་ཆེ་བར་ལག་གཉིས་མདུན་མཉམ་ནེམ་པ་དང་བཅས། རྐང་གཡོན་བཏེག་གཡས་ཡོང་ཕྱོགས་སུ་རྐང་གཡས་ལྕགས་རིས་སུ་ཕབ། ༤པ་དང་༥་པ་ཆུང་བར་དགག་པད། ༦པ་ཆེ་བར་ལག་གཉིས་སྔ་མ་ལྟར་དང་རྐང་གཡས་བཏེག་གཡོན་བསྐོར་ཏེ་མདུན་དུ་རྐང་གཡོན་ལྕགས་རིས་སུ་ཕབ། ༧པ་དང་༨པ་ཆུང་བར་དགག་པད་༧པ་ཆེ་བར་ལག་གོང་ལྟར་རྐང་གཡོན་བཏེག་གཡས་ཡོང་ཕྱོགས་སུ་རྐང་གཡས་ལྕགས་རིས་སུ་ཕབ། ༡༠པ་དང་། ༡༡པ་ཆུང་བར་དགག་པད་༡༢པ་ཆེ་བར་རྐང་ལག་ནེམ་པ་དང་བཅས་ཕུར་དར་རྒྱབ་ཏུ་གཡུག །དེ་ནས་༡༡ ༢༢ ཞེས་པ་འདི་ག་ལེ་ཚན་དྲུག་གི །དང་པོའི་༡༡དང་། ༢སྔ་མར་སྡིགས་མཛུབ་འབྲུབ་ཁུང་ལ་བསྡིགས། ༢རྗེས་མར་དང་གཡས་གཡས་སུ་འཐེན་ཅིང་རྐང་གཡོན་ལྕགས་རིས། ལག་གཉིས་གཡས་འཕྱར། ༢པའི་༡༡པ་དེ་ག་རང་ས། ༢༢ཆེ་བའི་རྐང་གཡོན་བཏེག་གཡས་འཕར་བའི་ལྕགས་(༣༢བ)
རིས་སུ་ཕབ། ༣པའི་༡༡། ༢་༢ལ་སྡིགས་མཛུབ་བྲུབ་ཁུང་ལ་བསྡིགས། ༤པའི་༡༡ལ་ལག་གཉིས་གཡས་འཕྱར། ༢༢ཆེ་བར་རྐང་གཡས་བཏེག་གཡོན་འཕར་བའི་ལྕགས་རིས་སུ་ཕབ་ནས། ལྔ་པའི་༡༡། ༢༢ལ་སྡིགས་མཛུབ་བྲུབ་ཁུང་ལ་བསྡིགས། ༦པའི་༡་༡། ༢༢ལ་ལག་གཉིས་གཡས་འཕར། དེ་ནས་ལྷན་གྱིས་རྐང་གཡས་གྱི་མཐིལ་དང་གཡོན་པའི་པུས་མོ་བཙུགས་ཏེ་བསྡད་ནས། སྦིར་སྦྲམ་ཞེས་པ་༤ལ་གཡོན་གཡས་སུ་རོལ་པ་གཉིས་རེ་བྱས་ཏེ་གཡས་རོལ་རྗེས་མར་ཕངས་ནས་ལག་གཡས་འཕྱར་གཡོན་དཀུར་བརྟེན་ཏེ། ༡་༢་༣་༤་༥་༦རྣམས་ལ་གཡོན་དུ་བསྐོར་ཅིང་རྟིང་གསིགས་ནས། འབྲུབ་ཁུང་ལ་གཡས་ངོས་བསྟན་ཏེ། ༧་༨ལ་ལག་གཡས་ནང་དུ་བསྐོར་ནས་ལ་ལ་ལག་གྱེན་བསྟན་གྱིས་བསྡིགས། དེ་ནས། ༡༢༣༤ ༡༢༣༤ཞེས་༤ཚན་གཉིས་ཀྱི་དང་པོ་ལ་ལག་གཡས་ནང་དུ་བསྐོར་ནས་བསྡིགས་པ་གོང་ལྟར་དང་། ༢པའི་༡༢ལ་རང་ས། ༣༤ལ་རྐང་གཡས་བཏེག་གཡོན་འཕར་བ་དང་བཅས་འགྲོ་ཕྱོགས་ལ་རྐང་གཡོན་ལྕགས་རིས་སུ་ཕབ་ནས། སྦིར་སྦྲམ་ཞེས་པ་༧ལ་འགྲོ་ཕྱོགས་སུ་ཆུང་བ་༢ལ་དགག་པད། ཆེ་བ་རྐང་གཡོན་བཏེག །མདུན་དུ་ཆུང་བ་༢ལ་དགག་པད། ཆེ་བར་རྐང་གཡས་བཏེག་འགྲོ་ཕྱོགས་སུ་ཆུང་བ་༢ལ་དགག་པད། ཆེ་བར་རྐང་ལག་ནོམ་པ་དང་བཅས་ཕུར་དར་གཡུགས། དེ་ནས། ༡༡ ༢༢ ཞེས་པ་ལེ་ཚན་དྲུག་དང་། བསྡད་ནས་རོལ་པ། ལང་སྟེ་དགུ་སྐོར་གྱིས་གསིག་པ། ལག་གཡས་གྱེན་བསྟན་གྱི་བསྡིགས་པ་རྣམས་དང་། ༤ཚན་༢པའི་༢པ་ཡན་གཡོན་ཇི་ལྟ་བ་གཡས་ལ་གོ་ལྡོག །༢པའི་༣༤པ་རང་སར། འདི་ལ་པད་ཀོར་འཁྱིལ་ཉལ་ཞེས་བྱའོ། །དེ་ནས་སྦིར་སྦྲམ་༢ཀྱི་(༣༣ན)
གཡོན་གཡས་སུ་ཛཾ་རྗེས། གཉིས་པ་གདབ་ཁའི་འཆམས་དམ་ཚིག་ཆེན་པོའི་འགྲོས་ལ་འཇུག་སྟེ། འདི་ནས་འཆམས་དཔོན་དོ་རའི་དཀྱིལ་འབྲུབ་ཁུང་གི་མཐར་བསྐོར་ཅིང་། ཛཿཞེས་དང་། ཝའི་གསུམ་ལ་གཡས་ཕྱོགས་ལག་གཉིས་འཕྱར་ཏེ་འགྱིང་། འའི་ཝའི་ལ་རྐང་གཡོན་བཏེག་འབེབས་བྱས་ནས། དམ་མའ་ཞེས་པར་རྐང་གཡས་འགྲོ་ཕྱོགས་སུ་འབེབས་ཤིང་། ལག་ཡངས་པད་ཚིམས་ལ་རྐང་གཡོན་དྲུད། ཆེན་ནའི་ཞེས་པར་རྐང་གཡས་བཏེག་འབེབས་དང་ལག་མདུན་མཉམ། པོའི་ལ་རྐང་རྟིང་གསིག །ལག་གཉིས་མདུན་འཕྱར། དུས་ཡའི། ཅེས་པར་རྐང་གཡོན་དུ་ཕབ་ལག་གཉིས་གཡོན་དུ་ཕྱོགས། ལ་ཝའི་ལ་རྐང་གཡས་གཡས་སུ་འཐེན་ནས་ལག་གཉིས་གཡས་འཕྱར། བབ་ལ་རྐང་གཡས་འགྲོ་ཕྱོགས་སུ་འབེབས་པ་དང་ལག་ཡངས་པད། ཝའ་ཞེས་པར་རྐང་གཡོན་དྲུད། འའི་ལ་རྐང་གཡས་བཏེག་འབེབས་དང་ལག་མདུན་མཉམ། ཝའི་ལ་རྟིང་གསིག །སྦྲུལ་ལའི་ཞེས་པར་རྐང་གཡོན་འགྲོ་ཕྱོགས་སུ་ཕབ་ནས་ལག་གཉིས་གཡོན་ཕྱོགས། པ་ལ་རྐང་གཡས་གཡས་སུ་འཐེན། ཆེན་ནའི་ཞེས་པར་རྟིང་གསིག་ལག་གཉིས་གཡས་འཕྱར། པོའི་ཞེས་པར་རྐང་གཡོན་འགྲོ་ཕྱོགས་སུ་བཏེག་འབེབས་དང་། དུས་ལ་རྐང་གཡས་འགྲོ་ཕྱོགས་སུ་འབེབས་པ་དང་ལག་ཡངས་པད། ཡའི་ཞེས་པར་རྐང་གཡོན་དྲུད། ལ་ཞེས་པར་རྐང་གཡས་བཏེག་འབེབས་དང་། བཛྲའི་ལ་རྟིང་གསིག །བབ་ཅེས་རྐང་གཡོན་འགྲོ་ཕྱོགས་ཕབ། ཝའ་ལ་རྐང་གཡས་བཏེག་ནས་ལག་གཡས་འཕྱར། འའི་རྐང་གཡོན་བཏེག་ནས་ཡངས་པད་ཀྱི་འགོ་བརྩམ། ཝའི་ཞེས་པར་རྐང་གཡོན་ཕབ་བོ། །ཚིགས་བཅད་རེར་བཞི་བརྡུང་༣རེའི་རྩིས་ཡིན་ཡང་། རྟིང་(༣༣བ)
གསིག་ལ་རྔ་ཆུང་བ་རེ་ཡོད་ཞིང་། བསྒྲལ་ཚིག་ཤློ་ཀ་འགྲིག་ན་རྫོགས་མཐར་རྐང་གཡོན་དང་འགྲིག་ཅིང་། ཤློ་ཀ་འགྲིག་ན་རྫོགས་ཚིག་ཐ་མར་རྐང་གཡོན་འགྲོ་ཕྱོགས་ཕབ། ཚིག་ལྷད་གསུམ་གོང་དུ་བཤད་པ་ལྟར་ནས་གཡས་གཡོབ་ལེན། གདབ་རྫུས་ཡིན་ན་གཡས་གཡོབ་རྫོགས་རྗེས། སྦིར་སྦྲམ་གྱི་ཛཾ་རྗེས་འཆམས་དབྱངས་ལ་འཇུག་པ་ཡིན་ནོ། །བསྒྲལ་བ་དངོས་ལ་གཡས་གཡབ་རྫོགས་རྗེས་ཀྱི་འབྲུབ་ཁུང་ལ་ལུས་ཀྱི་གཡས་ཟུར་བསྟན་ཏེ་༤བརྡུང་བ་ཡོད་པའི་དང་པོར་ལག་གཡས་ནང་དུ་བསྐོར་ནས་ཕྱིར་བསྔགས་པ་གོང་བཞིན་དང་། ༢པའི། ༣པ་ལ་རྐང་གཡས་བཏེག་འབེབས་དང་ལག་གཉིས་གཡས་ཕྱོགས་ནས་ཡངས་པད་ལེན་ཞིང་། ༤པར་རྐང་གཡོན་བཏེག །སླར་༤བརྡུང་༡གི་དང་པོར་ལག་གཡོན་འོག་ཏུ་གཡས་པའི་མཁྲིག་མ་བཀུག །༢པར་རྐང་གཡོན་འབེབས་པ་དང་ལག་མདུན་མཉམ། ༣པར་རྐང་གཡས་ཀྱི་རྩེ་རྒྱབ་ཏུ་དྲུད་ཅིང་ལག་གཉིས་ཐུར་དུ་བརྐྱང་། ༤ལ་རྟིང་གསིག་ཆེ་བ་དང་ལག་གཉིས་སྟེང་དུ་འཕྱར་ནས། སྦིར་སྦྲམ་༢ལ་གཡོན་གཡས་སུ་ཛཾ་ཞིང་བསྡད་ནས། རོལ་མོ་འབེབས་༡གམ་༣ལ། ལས་གཞུང་ལྟར་བསྒྲལ་རྗེས། རོལ་པ་༢ཀྱི་རྗེས་མར་ལངས་ཏེ། གཡས་སུ་དགུ་སྐོར་ཆུང་བ་ལྟར་གསིག་རྗེས། གཡོན་གཡས་སུ་ཛཾ་ནས་འཆམས་དབྱངས་སོ། །བསྒྲལ་ཚིག་ཤློ་ཀ་༡རང་ཡིན་ཚེ་འབེབས་ཀྱི་རྗེས་རོལ་མོ་༡གིས་མཚམས་བཅད། བསྡད་པའི་རང་ནས་ལག་གཉིས་གཡས་སུ་འཕྱར་ཏེ། ཛཾཿཝའི་རྫོགས་རྗེས། ཚིག་རྐང་དང་པོར་ཡངས་པད་ངལ་བ་༡བྱ། ༢པར་ཡངས་པད་བྲེལ་ཙམ་༡དང་ལག་གཡས་གཡབ། ༣པར་ཡངས་པད་གཡོན་གཡབ། ༤པར་ཡངས་པད་༢ཀ་གཡབ་རྗེས་སྦིར་སྦྲམ་༢ལ་ཕུར་པ་(༣༤ན)
གཡོན་གཡས་སུ་བརྡར་ཚུལ་བྱས་ཏེ་སྒྲོལ། གདབ་ཁ་ཐ་མའི་རྗེས་སུ་ཤ་བས་སྒྲོལ་ཚེ། རོལ་མོ་འབེབས་ཀྱི་རྗེས་ནས། ལྔ་བརྡུང་ཆེ་ཆུང་སྤེལ་བ་ཁོ་ན་ཡིན་ནའང་། དའི་རོལ་མོ་ལྔ་བརྡུང་ཆེ་བའི་དུས་ཆེ་བཞིའི་བར་དང་ལྔ་པར་ཆུང་བ་བྱ། ཆུང་བའི་དུས་སུ་ཆུང་བཞིའི་བར་དང་ལྔ་པར་ཆེ་བ་ཡོད་པ་ཀུན་ལ་འགྲེ། རྡོ་རྗེའི་འགྲོས་ལ་ཆེ་བ་འབའ་ཞིག་གོ །ཤ་འཆམས་རྫོགས་རྗེས་རོལ་པ་ལེན་དང་། འཆམས་པ་དམངས་ཀྱིས་བསྟུན་ནས་རོལ་པ་གཉིས་བླངས་ནས་དགུ་སྐོར་ཆུང་བས་གསིག་པ་དང་། ཤ་བས་དགུ་སྐོར་རྐྱང་མས་འཆམས་བྲལ་དུ་སླེབ་པ་མཐུན་པར་བྱས་རྗེས། གཡོན་གཡས་སུ་ཛཾ་ནས། དགུ་སྐོར་རླུང་ཚུབ་འཛག་གཉིས་མ་བཞི་ལ། དངོས་གཞི་སྒོ་མའི་སྐབས་བཤད་པ་བཞིན་ནས། ༧པའི་ཚེ་རྐང་གཡོན་མི་འབེབས་པར་བརྒྱད་ལ་ཕབ་རྗེས། ༧༧ཞེས་པར། ལག་གཡོན་དཀུར་བརྟེན་གཡས་འཕྱར་ཏེ། དང་པོ་ལ་རྐང་གཡས་བཏེག་ལག་གཉིས་གཡོན་ཕྱོགས་དང་། ༢པར་རྐང་གཡོན་བཏེག་ལག་གཉིས་གཡས་ཕྱོགས་ལ་ཛཾ་རེ་བྱ། དེ་བཞིན་དུ། ༢པར་ལག་གཡས་གཡོན་གོ་ལྡོག ༣པར་ལག་གཉིས་ཀ་འཕྱར། ༤པར་ལག་གཉིས་དཀུ་ལ་བརྟེན་པའོ། །དེ་ནས་གཡས་པས་བརྩམས་ཏེ་བཞི་འགྲོས་འགྲོ་ཕྱོགས་ལ་གསུམ་སོང་རྗེས། ༡་༢ཞེས་པར་རྐང་གཡོན་མདུན་ཕབ་ནས། སྟོབ་དབྱངས་བྱ་སྟེ། ཧཱུཾ། ༤ངའི་ཕྱི། ཡའི། ནང་། གསང་ཞེས་པ་རྣམས་ལ་ལག་གྱེན་བསྟན་མདུན་མཉམ་བྱ་སྟེ་རང་སའོ། །བའི་ལ་རྐང་རྟིང་གསིག་དང་། ལག་གཉིས་གཡས་སུ་ཅུང་ཟད་འཕྱར། མཆོད་འོ་འ་ཞེས་པར་ནང་གཡོན་བཏེག་ལག་གཉིས་གཡོན་དུ་གཞོལ་བའི་འགྲོ་ཕྱོགས་(༣༤བ)
ཕབ། པ་ལ་རྐང་རྟིང་གསིག་དང་། ལག་གཉིས་གཡོན་ཕྱོགས་བཏེག་ནས་སྟོབ་ཚུལ་བྱ། རྒྱ་ཞེས་པར་རྐང་གཡས་གཡོན་དུ་བསྐོར་ནས་འགྲོ་ཕྱོགས་ཕབ། མའི་ལ་རྐང་རྟིང་གསིག་ལག་མདུན་མཉམ། མཚོའི་ཞེས་པར་རྐང་གཡས་རྒྱབ་ཕྱོགས་ཀྱི་གཡོན་དུ་བཏེག་འབེབས། འོ་འ་ཞེས་པར་རྟིག་གསིག །ཚོགས་ལ་རྐང་གཡས་རྒྱབ་ཕྱོགས་ཀྱི་གཡོན་ངོས་སུ་ཕབ་ཅིང་ལག་གཉིས་ཀྱང་གཡོན་དུ་ཕྱོགས། ཝའ་ཞེས་པར་རྐང་གཡོན་དྲུད་པ་དང་། འའི་ལ་རྐང་གཡས་འགྲོ་ཕྱོགས་སུ་བཏེག་འབེབས། ཝའི་ལ་རྟིང་གསིག་གི་གཡས་སུ་ཅུང་ཟད་བསྐོར། དང་། ངའི་ལ་རྐང་གཡོན་མདུན་དུ་བཏེག་འབེབས་དང་ལག་མདུན་མཉམ། ཝའི་ལ་རྟིང་གསིག །སེམས། མའི་ཞེས་པར་རྐང་གཡས་ཡོང་ཕྱོགས་སུ་འཐེན། ཀྱི་ལ་རྟིང་གསིག་དང་ལག་གཉིས་གཡས་སུ་འཕྱར། འབུལ་འུ་ཞེས་པར་རྐང་གཡོན་འགྲོ་ཕྱོགས་སུ་བཏེག་འབེབས་ལག་གཉིས་གཡོན་དུ་གཞོལ། ལོ་ཞེས་པར་རྐང་རྟིང་གསིག །ལག་གཉིས་གཡོན་ཕྱོགས་བཏེག་པའི་སྟོབ་ཚུལ། བཞེས་ལ་རྐང་གཡས་འགྲོ་ཕྱོགས་ཕབ་ལག་གཉིས་གཡོན་དུ་ཕྱོགས། ཡའི་ལ་རྐང་གཡོན་བཏེག་ཙམ། སུ་ལ་རྐང་གཡས་འགྲོ་ཕྱོགས་ཕབ། འུ་ཞེས་པར་རྟིང་གསིག་གི་གཡས་སུ་ཅུང་ཟད་བསྐོར། གསོལ་ལ་རྐང་གཡོན་འགྲོ་ཕྱོགས་ཕབ། ལ་ཞེས་པར་རྟིང་གསིག །འའི་ལ་རྐང་གཡོན་བཏེག་འབེབས། ལའི་ལ་རྐང་གཡས་བཏེག་ནས་བཞི་འགྲོས་གསུམ་གྱི་རྗེས་༡་༢ལ་རྐང་གཡོན་མདུན་དུ་ཕབ་ནས། སྟོབ་དབྱངས་གཉིས་པ་སྔུན་མ་ཇི་ལྟ་བ་བཞིན་རྫོགས་རྫས་ཀྱི་རྐང་གཡས་བཏེག་སྟེ། ཏྲི་ཤུ་འགྲོས་གསུམ་བྱ་བ་ནི། རྩ་བའི་འཆམས་ཀྱི་རྡོ་རྗེ་ཕྱེད་འགྲོས། རྐང་གཡས་ལེན་ཁོ་ན་ལན་གསུམ་བྱ་བ་ཡིན་ཅིང་། དེ་ནས་བཞི་(༣༥ན)
འགྲོས་ཉིད་ཀྱིས་སྦྲུལ་ནག་འཁྱོག་འགྲོས་བྱས་ཏེ་འཆམས་ཁང་དུ་རིམ་བཞིན་བརྡོག་པའོ། །དེ་ལྟར་དཔལ་ཆེན་རྡོ་རྗེ་ཕུར་བུ་ཡི། །སྟོད་ལས་བྱང་ཆུབ་བསྒྲུབ་དང་སྨད་ལས་ཀྱི། །འཆམས་ཀྱི་གསལ་བྱེད་བཀླགས་པས་ཀུན་ཤེས་པ། །རིག་སྔགས་འཆང་བའི་དགའ་སྟོན་བླ་ན་མེད། །ལུས་འགྱུར་སྣང་སོགས་སྔོན་རབས་མཁས་པ་ཡི། །གསུང་བཅུད་ཉིན་བྱེད་དབང་པོའི་དཀྱིལ་འཁོར་དག །རྟོགས་དཀའི་ཆུ་འཛིན་སྒྲིབ་གཡོགས་ཀུན་བསལ་ནས། །མཐོང་གྲོལ་སྣང་བའི་འོད་སྟོང་འདི་ན་འབར་ཅེས་སོ། །ས་སྐྱོང་གྲགས་པ་འབྱུང་གནས་གསུང་གི་བཅུད། །ལེགས་པའི་ཕྱག་རྒྱའི་རིགས་ཀུན་ཉེར་བསྡུས་པའི། །འཆམས་ཡིག་སྣང་བ་ཀུན་ནས་འགྱུར་ནུས་པ། །ངོ་མཚར་བཀོད་པའི་དགའ་སྟོན་འདི་ནའོ། །དེ་ལ་སྔོན་དུ་འགྲོ་བ། དངོས་གཞི། རྗེས་གསུམ་ལས། དང་པོ་ལ་དགུ་ལས། དང་པོ་འདོན་ནི། འཆམས་དཔོན་སྒོ་ཁང་ནས་འདོན་པ་ལུས་ཀྱི་གཡོན་ཟུར་བསྟན་ཏེ་གཡོན་གཡས་སུ་ཛཾ་དང་བཅས་བཞི་འགྲོས་ལེན་པ་རྣམས་ངོ་བོ་བྲུབ་འཆམས་དང་འདྲ་ཡང་ཅུང་བྲེལ་བ་དང་ཤུགས་ཆེ་བའི་དབང་གིས་གཡས་པའི་བཞི་འགྲོས་ལ་རྐང་གཡས་བཏེག་ལག་ཡངས་པད་༡ལ་རྐང་གཡོན་འཕར་བའི་གཡས་གཡབ། ༢ལ་རྐང་གཡོན་འདེགས་འཇོག་དང་། རྐང་གཡས་བཏེག །༣ལ་འགྲོ་ཕྱོགས་སུ་ལག་མདུན་མཉམ་དང་། གཡོན་འཕར་བའི་རྐང་གཡས་ཕབ་སྟེ་གཡོན་བཏེག །༤ལ་གཡས་འཕར་ཞིང་། རྐང་གཡོན་འགྲོ་ཕྱོགས་སུ་ལག་གཡོན་ནང་དུ་བསྐོར་ཞིང་། ༡ལ་གཡས་འཕར་བའི་གཡོན་འབེབས་པ་སོགས་གཡས་གོ་ལྡོག་རྗེས། དེ་ནས་༤བརྡུང་༢ལ་གདོང་འགྲོ་ཕྱོགས་སུ་བལྟ་བས། དང་པོའི་༡ལ་(༣༥བ)
ལག་གཡས་འཕྱར་གཡོན་དུ་གཡབ་ཅིང་། རྐང་གཡས་གཡོན་ཕྱོགས་སུ་རྐང་གཡོན་འཕར་ཏེ་ཕབ། ༢པར་རྐང་གཡོན་བཏེག་གཡས་འཕར་ཏེ་ལག་གཡོན་མདུན་འཕྱར་དང་། ༣ལ་གཡས་འཕར་བའི་གཡས་ཕྱོགས་སུ་རྐང་གཡོན་ཕབ། ༤ལ་རྐང་གཡས་བཏེག་ལག་གཡས་འཕྱར་བའི་ཕྱིར་བསྐོར་ཏེ་༢པའི་༡ལ་གཡོན་འཕར་བའི་རྐང་གཡས་གཡས་སུ་ཕབ། ༢ལ་གཡོན་བཏེག་གཡས་འཕར་ཏེ་ལག་མདུན་མཉམ་དང་། ༣ལ་རྐང་གཡོན་བཏེག་གཡས་འཕར་བའི་གཡོན་ཕྱོགས་ཕབ་སྟེ། ༤ལ་རྐང་གཡོན་འཕར་ཞིང་གཡོན་དུ་བསྐོར། ཡོང་ཕྱོགས་སུ་༡ལ་རྐང་གཡས་ཕབ་སྟེ་བཞི་འགྲོས་བྱས་ཤིང་འཆམས་ཁང་མཚམས་སུ་བརྡོག །དེ་ནས་སླར་བཞི་འགྲོས་བརྩམ་སྟེ་འཆམས་དམངས་ཀྱང་རིམ་འདོན་ངོས་རྐང་གཡས་གཡོན་གྱི་བཞི་འགྲོས་གཉིས་རེ་དང་། བཤད་མ་ཐག་པའི་༤ཚན་གཉིས་པོའི་ལེན་སྤེལ་བའི་འདོན་གྱི་དོ་ར་འཁོར་བ་དང་། གཡོན་པའི་བཞི་འགྲོས་༣ཐོག་ཕཊ་ཅེས་པས་བསྒྱུར། གཉིས་པ་ནི། གོང་གི་གྲངས་ལྷག་༤ལ་ཡངས་པད་ཀྱི་འགོ་བརྩམས་ཏེ། དེ་ནས་༤ཚན་༤ལ་དགག་པད་དང་། རོལ་པ་༡བྱ་བ་མ་གཏོགས། རྐང་གཡས་གཡོན་འདེགས་འཇོག །ལག་ནང་དུ་བསྐོར་ནས་ལག་བརྒྱང་བ། ཆེམ་རྒྱག་བཞི་ལ་དགའ་བ་ཡོངས་བསྒྱུར་རྐང་གཡོན་མདུན་དུ་འབེབས་པ་ཡན་བྲུབ་འཆམས་དང་འདྲ། སླར་ཆེམ་རྒྱག་༢ཀྱི་དང་པོ་ལ་ལག་གཡས་གཡས་ཕྱོགས་ནས་བསྐོར་ཏེ་ཕྱིར་བརྒྱང་བ་དང་མཉམ་དུ་རྐང་གཡས་གཡས་སུ་ཕབ། ༢པར་གཡོན་གོ་ལྡོག་བྱ་བ་ནི་དགའ་བ་ཡོངས་བསྒྱུར་འཐོལ་བཅས་ཞེས་བྱ། གསུམ་པ་ནི། རྐང་གཡོན་གཡོན་དུ་འབེབས་དང་ཕཊ་ཅེས་བསྒྱུར། སྦིར་སྦྲམ་༤ལ་དགག་པར་རོལ་པ་༡། (༣༦ན)
ལག་གཉིས་ནང་དུ་བསྐོར་ནས། བརྗིད་འབེབས་བགྲད་ཟླུམ་གྱི་སེང་གེའི་བརྗིད་འཆམས་བྱ་བ། བཞི་པ་ནི། ཕཊ་ཀྱིས་བསྒྱུར་ནས། དགག་བདེ། ལག་གཉིས་ནང་དུ་བསྐོར་ནས་བཞི་སྐོར་དང་། གཡོན་གཡས་སུ་ཛཾ་པ་རྣམས་བྲུབ་འཆམས་བཞིན་བྱ། ལྔ་པ་ནི་ཕཊ་ཅེས་བསྒྱུར་ནས། སྦིར་སྦྲམ་༣ལ། དང་པོ་དང་༢པའི་སྦིར་ལ་འགྲོ་ཕྱོགས་སུ་རྐང་གཡས་བཏེག་གཡོན་འཕར་བའི་ཕབ་རྗེས་གཡོན་བཏེག་ནས། སྦྲམ་ལ་ཕབ་པའི་མྱུར་བ་བཏུད་མ་༢སོང་རྗེས་༣པའི་སྦིར་ཞེས་ཆེམ་རྒྱག་པར་ཐག་རིང་བར་རྐང་གཡོན་མདུན་དུ་ཕབ་ནས་ཅུང་ཟད་འགྱིངས་ནས། སྦྲམ་སྦྲམ་ཞེས་ཆུང་བ་དང་བཅས་པར་རྐང་གཡོན་འདེགས་འཇོག་བྱས་ནས། སླར་འགྲོ་ཕྱོགས་སུ་གཡས་གསིག་གོང་ལྟར་༡གམ་༢གང་འོས་བལྡབ་པ་འདི་ལ་ཀླུ་པ་ཞེས་བྱ། ཡང་ཕན་ཅེས་བསྒྱུར་ནས། དྲུག་པ་ནི། གོང་གི་སྦྲམ་སྦྲམ་ལ་ཡངས་པད་ཀྱི་འགོ་བརྩམས་ཏེ། དགག་པད་དང་། འདི་ལ་རོལ་པ་༣བྱ་བའི་རྗེས་མར་གཡས་སུ་གསིག་པའི་དགུ་སྐོར་ཆུང་བ་གཡོན་གཡས་ཀྱི་ཛཾ་ནས་བཞི་འགྲོས་རྣམས་བྲུབ་འཆམས་ལྟར་རོ། །བདུན་པ་ནི། བཞི་འགྲོས་གཡོན་གསུམ་པའི་ཐོག་ཕཊ་ཀྱིས་བསྒྱུར་ཏེ། གོང་གི་༤ལ་ཡངས་པད། དེ་ནས་༤བརྡུང་༢ཀྱི་དང་པོའི་༡ལ་ལག་གཡས་ཕྱག་མཚན་པུས་སྟེང་། ༢ལ་གཡས་སྟེང་དུ་འཕྱར་བ་དང་མཉམ་དུ་རྐང་གཡོན་བཏེག་གཡས་འབར་བའི་ཡོང་ཕྱོགས་སུ་༣ལ་ཕབ། ༤ལ་གཡས་བཏེག་གཡོན་འཕར་བའི། ༢པའི་༡ལ་ལག་གཡས་སུ་ཕབ་སྟེ། གཡོན་བཏེག་༢ལ་གཡས་འཕར་ནས། ༣ལ་གཡོན་དུ་ཕབ། ༤ལ་གཡས་བཏེག་ནས་ཡོང་ཕྱོགས་ལ་བལྟ་བས། ༡་༡་(༣༦བ)
༢་༢ལ་གཡས་སུ་རྐང་བཏེག་འབེབས་དང་ལག་གཡས་འཕྱར་གྱི་ཛཾ་ནས། ༤ཚན་༢ཀྱི་དང་པོའི་༡ལ་རྐང་གཡས་བཏེག་གཡོན་དུ་བསྐོར་མདུན་དུ་མཆོད་སྟབས་ཀྱིས་གཡས་ཟུར་བསྟན་ལྷག་མ་༣ལ་གསིག་པ་དང་། ལག་གཡས་ནང་དུ་བསྐོར་ནས་ཕྱིར་བསྡིགས་ནས། ༢པའི་༡༢ལ་རང་ས་དང་། ༣ལ་རྐང་གཡས་བཏེག་འབེབས་པ་དག་བསྟུན་ཡངས་པད་བྱ། ༤ལ་གཡོན་བཏེག་ནས། སླར་༤ཚན་༡གི་དང་པོ་ལ། གཡས་འཕར་བའི་རྐང་གཡོན་འགྲོ་ཕྱོགས་ཕབ་ནས། ༢ལ་གཡས་བཏེག་གཡོན་འཕར་བའི་༣ལ་ཕབ་བསྟུན་ལག་གཡས་པུས་སྟེང་། ༤ལ་འགྲོ་ཕྱོགས་བལྟ་བའི་རྐང་གཡོན་བཏེག་ལག་གཡོན་འཕྱར་ནས། གཡོན་ཕྱོགས་སུ་ཛཾ་གཉིས་དང་། ༤ཚན་༢ཀྱི་དང་པོར་གཡས་སུ་བསྐོར་གཡོན་ཟུར་བསྟན་ནས་གསིག་པ་སོགས་སྔ་མ་གོ་ལྡོག །༢པའི་༡་༢ལ་རང་ས། ༣ལ་རྐང་གཡས་མདུན་དུ་སྤོ། ༤ལ་ཡངས་པད། སླར་༤ཚན་༡གི་དང་པོ་ལག་གཡས་པུས་སྟེང་། ༢ལ་ལག་གཡས་སྟེང་དུ་འཕྱར། ༣ལ་གཡས་སུ་ཅུང་ཟད་གཞོལ། ༤ལ་རྐང་གཡོན་མདུན་དུ་སྤོས་ནས་གཡོན་གཡས་སུ་ཛཾ་བྱ། འདི་ལ་གཡས་གཡོབ་གཡོན་གཡོབ་བོ། །བརྒྱད་པ་ནི། གོང་གི་གཡས་ཛཾ་ཐོག་ཕཊ་ཀྱིས་བསྒྱུར་ཏེ། སྦིར་སྦྲམ་ཞེས་པ་གཉིས་ཀྱི་སྦིར་ལ་རོལ་མོ་ཆེམ་རྒྱག་ཆེ་བའི་བར་ཐག་རིང་བ་དང་། སྦྲམ་ལ་བར་ཐག་ཅུང་ཐུང་བ་ཡོད་པས་དང་པོའི་སྦིར་ལ་རྐང་གཡས་བཏེག་གཡོན་འཕར་བ་དང་ལག་གཡས་ཕྱིར་ནས་མཆན་ཁུང་ནས་བསྐོར་ཏེ་ཕྱིར་བརྒྱད་པའི་འགྲོ་ཕྱོགས་སུ་ཕབ། སྦྲམ་ཞེས་པར་ལག་གཡོན་འཕྱར་རྐང་གཉིས་རྟིང་གསིག་བྱ། ༢པ་ལ་གཡས་ཇི་ལྟ་བ་གཡོན་གོ་ལྡོག །འདི་ལ་གྲོས་གསར་ཞེས་བྱ་ལན་(༣༧ན)
༡གམ་༢བལྡབ་ཅིང་། མཧ་དང་བཅས་ཞལ་བརྙན་རྭ་ཅན་གྱི་རྭ་ཁྱེར་དང་། ཞལ་བརྙན་ངོམ་པ་ཞེས་པ་ནི། ལག་པ་གཡས་གཡོན་གྱི་འཁྱེར་ལ་མིག་བལྟས་པས་ཡོང་བ་ཡིན་ཏེ། འདོན་ནས་བརྩམས་ཏེ་རྣམ་བཤད་བར་ཀུན་ལ་འགྲེའོ། །དགུ་པ་ནི། གོང་གི་གཡོན་རེས་ཀྱི་རྟིང་གསིག་ཐོག་ཕཊ་ཀྱིས་བསྒྱུར་ནས། སྦིར་སྦྲམ་ཞེས་པ་བཞི་ལ་རོལ་མོ་གྲོས་གསར་དང་ལེན་ལུགས་འདྲ་བས། དང་པོའི་སྦིར་ལ་ཡངས་པད་ལེན་སྐྱུར་བྱ་སྟེ། རྐང་གཡོན་བཏེག་གཡས་སུ་བསྐོར་ཡོང་ཕྱོགས་གཡས་འཕར་བའི་སྦྲམ་ཞེས་ཕབ། གཡས་བཏེག་གཡོན་འཕར་བས་ཡངས་པད་ལེན་སྐྱུར་བྱས་ཏེ་༢པའི་སྦིར་ལ་ཕབ་རྗེས་རྐང་གཡོན་གཡས་སུ་དྲུད་དེ། གཡས་བཏེག་གཡོན་དུ་ཅུང་ཟད་བསྐོར་སྦྲམ་ལ་ཕབ། གཡོན་བཏེག་གཡོན་འཕར་བའི་ཡངས་པད་ལེན་སྐྱུར་བྱས་ནས་༣པའི་སྦིར་ལ་ཕབ་རྗེས། གཡས་གཡོན་ཕྱོགས་དྲུད་དེ། གཡོན་བཏེག་གཡས་སུ་ཅུང་ཟད་བསྐོར་ཡོང་ཕྱོགས་ལ་སྦྲམ་ལ་ཕབ་རྗེས། གཡས་བཏེག་གཡོན་འཕར་བས་ཡངས་པད་ལེན་སྐྱུར་བྱས་ཏེ་༤པའི་སྦིར་ལ་ཕབ་རྗེས། གཡས་འདེགས་འཇོག་ལ་སྦྲམ་སྦྲམ་ཞེས་རྗེས་མ་ཆུང་བར་གཡོན་བཏེག་ཙམ་ནས་འབྲུབ་ཁུང་ལ་གཡོན་ཟུར་བསྟན་ཏེ། ༡༡ ༢༢ ཞེས་པའི་ལེ་ཚན་དྲུག་དང་། རོལ་པ། དགུ་བརྡུང་། ༤ཚན་༢ཀྱི། ༢པའི་༢པ་ཡན་བྲུབ་འཆམས་དང་མཚུངས། ལྷག་མའི་༣༤ལ་རྐང་གཡས་བཏེག་འབེབས་བྱ། དེ་ནས་སྦིར་སྦྲམ་༣ལ་དང་པོ་ལ་གཡོན། ༢པ་བདུན། ༣པ་གཡོན་འགྲོ་ཕྱོགས་རྣམས་ལ་སྔ་མ་གོ་ལྡོག །དེ་བཞིན་དུ་༡༡ ༢༢ ཞེས་པ་དྲུག་དང་། རོལ་བ། དགུ་བརྡུང་། ༤ཚན་༢ཀྱི་དང་པོ་ཡན་ཀྱང་སྔ་མ་གོ་ལྡོག་བྱས་ཏེ། ༤ཚན་༢པ་རང་སར་བསྡད་དེ་གཡོན་(༣༧བ)
གཡས་སུ་ཛཾ་ནས། གཉིས་པ་གདབ་ཁ་དངོས་གཞི་ལ་གསུམ་ལས། དང་པོའི་བསྐུལ་ཚིག་ལ་འཆམས་དང་དབྱངས་གཉིས་ཀ །བྲུབ་འཆམས་ཀྱི་དམ་ཚིག་ཆེན་པོ་བཞིན་དང་། གཡས་གཡབ་ཀྱང་བྱ། གཉིས་པའི་ཚེ། ཆོས་རྒྱལ་གྱི་ཞལ་བརྙན་དུས། དབྱངས་གོང་བཞིན་དང་འཆམས་གྲོས་གསར་བྱ་སྟེ་ཚིག་རྐང་རེར་གཡས་གཡོན་གྱི་འགྲོས་རེ་འགྲོ་བའི་རྫོགས་མཚམས་ཀྱི་ཚིག་ལྷད་གཉིས་ལ་རྐང་གཡོན་འདེགས་འཇོག་བྱས། དེ་ནས་༤བརྡུང་༢ཀྱི་དང་པོའི་༡ལ། རྐང་གཡས་བཏེག་ལག་གཡས་མདུན་བརྐྱང་བྱས་རྐང་གཡོན་འཕར་ཏེ་མདུན་འབྲུབ་ཁུང་ཕྱོགས་སུ་ཕབ་རྗེས། གཡོན་བཏེག་གཉིས་ལ་རྐང་གཡས་འཕར་ལག་གཡོན་མདུན་བརྐྱང་ནས་༣ལ་འབྲུབ་ཁུང་མདུན་དུ་ཕབ་རྗེས། གཡས་བཏེག་༤ལ་གཡོན་འཕར། ༢པའི་༡ལ་རྐང་གཡས་མི་འབེབས་པར་ལག་མདུན་མཉམ་བྱ་ཞིང་འགྱིང་། ༢ལ་རྐང་གཡས་ཀྱི་རྩེ་འབེབས་པ་དང་ལུས་ཅུང་གུག་ཙམ་ནས། ༣ལ་རྐང་རྟིང་གསིག་དང་བཅས་ལག་གཉིས་སྟེང་དུ་འཕྱར། ༤ལ་རྐང་གཡོན་མདུན་དུ་དྲུད་དེ། སྦིར་སྦྲམ་གྱི་གཡོན་གཡས་སུ་ཛཾ་ཞིང་བསྡད་ནས་རོལ་མོ་འབེབས་བྱས་བསྒྲལ་བའོ། །ལྷ་མོའི་ཞལ་བརྙན་འཆམ་དུས། གཉིས་པའི་ཚེ་དྲུག་བརྡུང་གི་འགྲོས་ནི། འཆམས་དབྱངས་གོང་ལྟར་གྱི་ཚིག་རྐང་རེར། ༡༢༣༤༥༦ཅེས་པ་༢ཀྱི་དང་པོའི་༡༢༣རེ་རེར་འགྲོ་ཕྱོགས་སུ་རྐང་གཡས་བཏེག་འབེབས་རེ་རེར་གཡོན་འཕར་ཆུང་རེ་བྱས་ཏེ་འགྲོ། ༤ལ་རང་གཡོན་ཡོང་ཕྱོགས་སུ་འཐེན་ནས། ༥༦ལ་ལག་གཉིས་གཡོན་འཕྱར་གདོང་ཡོང་ཕྱོགས་ལ་བལྟས་ཏེ་འགྱིང་། ༢པ་ལ་རྐང་གཡོན་བཏེག་ནས་འགྲོ་ཕྱོགས་ལ་རྐང་གཡས་གཡོན་དང་ལག་གོ་ལྡོག་བྱ། ཕྱག་མཚན་སོ་སོ་བརྡེག་དུས། གཡོན་པའི་དྲུག་ཚན་གྱི། ༡ལ་(༣༨ན)
རྐང་གཡོན་མདུན་བསྐོར་ཏེ་འབེབས་པ་དང་ལུས་ཀྱི་གཡོན་ནམ་ཞིང་གཡས་སུ་བལྟ། ༢ལ་གཡོན་འཕར་བ་དང་གཡས་གོམ་རྐུན་བྱས་ཏེ་འབྲུབ་ཁུང་མདུན་དུ་རྐང་གཡས་བཏེག་འབེབས་དང་བསྟུན་༣ལ་ཕྱག་མཚན་བཏབ་སྟེ། ༤ལ་རྐང་གཡོན་ཕྱིར་འཐེན། ༥༦ལ་གཡས་སུ་ལག་གཉིས་འཕྱར་ཞིང་འགྱིངས་ནས། དེ་ནས་གཡས་བཏེག་པའི་འགྲོས་གོང་ལྟར་བྱ། མཚམས་ཀྱི་བསྒྲལ་ལུགས་རྣམས་མཐོང་བརྒྱུད་ལྟར་བྱ་དགོས་པ་རྫོགས་ནས། རྗེས་ཀྱི་བྱ་བ་གསུམ་ལས་དང་པོ་སྦིར་སྦྲམ་གྱི་རོལ་པ་༣གྱི་རྗེས་མར་ལངས་ཏེ། དགུ་སྐོར་ཆུང་བ། གཡོན་གཡས་ཀྱི་ཛཾ་ནས། དགུ་སྐོར་འཛག་གཉིས་མ་༤དང་། བཞི་འགྲོས་༣རྗེས་༡༢ལ་རྐང་གཡོན་མདུན་དུ་འབེབས་རྣམས་བྲུབ་འཚམས་ལྟར་བྱ། གཉིས་པ་སྟོབ་དབྱངས་ལ། ཧཱུཾ། ༤ངའི། ཕྱི། ཡའི། ནང་། གསང་ཞེས་པར་ལག་གྱེན་བསྟན་མདུན་མཉམ། བའི་ལ་ལག་གཉིས་གཡས་སུ་འཕྱར་རྐང་རྟིང་གསིག་བྱ། མཆོད། འོའ་ཞེས་པར་ལག་གཉིས་གཡོན་ཕྱོགས་གཞོལ་ནས། པའ་ཞེས་པར་ལག་གཉིས་གཡོན་ཕྱོགས་མཐོ་བར་བཏེག་ནས་སྟོབ་ཚུལ་བྱ་སྟེ། རྐང་གཡོན་རང་ས། རྐང་གཡས་བརྐྱང་གི་རྟིང་པ་བཙུགས་ཏེ་རྐང་མགོ་བཏེག །སྤྱིར་མགོ་ཅུང་ཟད་ཕབ། གདོང་གཡས་སུ་བསྟན་ནས། རྒྱ་མའི། མཆོའ། འོས། ཚོགས། ཝའ། འའི། ཝའི། དང་། ངའ། བའི། སེམས་བར་དེ་ཁ་རང་ས། ཀྱི་ལ་ལག་གཉིས་གཡོན་ཕྱོགས་འཕྱར་རྐང་རྟིང་གསིག འབུལ་འུལ་ལག་གཉིས་གཡས་སུ་གཞོལ་ནས། ལོ་ཞེས་པར་ལག་གཉིས་གཡས་སུ་བཏེག་སྟེ་སྟོབ་ཚུལ་ལ་རྐང་། ལག །སྤྱི། གདོང་རྣམས་སྔ་མགོ་ལྡོག་ནས། བཞེས། ཡའི། སུའུ་རྣམས་ལ་རང་ས། གསོལ་ལ་རྐང་གཡོན་མདུན་དུ་འདེགས་(༣༨བ)
འཇོག་དང་། ལ་ཞེས་པར་རྐང་གཡས་བཏེག་ཙམ་བྱ། འའི་རྐང་གཡོན་འགྲོ་ཕྱོགས་སུ་འདེགས་འཇོག་བྱས་ནས། ལའི་ལ་རྐང་གཡས་བཏེག་ནས་བཞི་འགྲོས་༣བྱས་ཏེ། མདུན་༡༢ཞེས་པར་རྐང་གཡོན་ཕབ། ༢༢ལ་སླར་རྐང་གཡོན་བཏེག་གཡོན་འཕར་ཏེ་ཕབ་གཡས་བཏེག །༤བརྡུང་གསུམ་ལ་གཡས་པས་བརྩམས་ཏེ། རྩ་བའི་འཆམས་དཔལ་ཆེན་པོའི་སྟོབ་འཆམས་ལྟར་བྱས་ནས་༡༢ལ་རྐང་གཡོན་མདུན་དུ་ཕབ་ནས། སྟོབ་དབྱངས་གཉིས་སྔ་མ་ཇི་ལྟ་བ་སྔ་ཕྱི་གོ་ལྡོག་པ་རྫོགས་མཚམས་ཀྱི་གསོལ་ལ་རྐང་གཡས་མདུན་དུ་འདེགས་འཇོག་ནས། ཚིག་ལྷད་གསུམ་དང་། བཞི་འགྲོས་གསུམ་ཡང་སྔ་མ་གོ་ལྡོག་བྱས་ཏེ། ༡ལ་རྐང་གཡས་མདུན་དུ་ཕབ། ༢༢ལ་སླར་རྐང་གཡས་འདེགས་འཇོག་བྱས། ༤ཚན་༣ལ་གཡོན་ནས་བརྩམ་སྟེ་སྟོབ་འཆམས་བཞིན་ནོ། །དེ་ནས་༡ལ་རྐང་གཡོན་མདུན་དུ་ཕབ། ༢ལ་གཡས་ཕྱིར་འཐེན་ཙམ། ༢རྗེས་མར་གཡོན་བཏེག་འཇོག་ནས། གཡས་ནས་བརྩམས་པའི་བཞི་འགྲོས་གསུམ་མདུན་ཕྱོགས་སུ་བྱས་ཏེ། ༡༢ལ་རྐང་གཡོན་མདུན་དུ་ཕབ་ནས་ཆེམ་བརྡུང་ཆུང་ངུར་བྱ། དེ་ནས་ཆེམ་རྒྱག་བཞི་ལ། དང་པོ་ལ་ལག་གཡས་གཡས་ཕྱོགས་ནས་ནང་དུ་བསྐོར་ཏེ་ཕྱིར་བརྒྱང་བ་དང་མཉམ་དུ་རྐང་གཡས་ཕྱིར་འཐེན། ༢པར་ལག་གཡོན་གཡོན་ཕྱོགས་ནས་ནང་དུ་བསྐོར་ཏེ་ཕྱིར་བརྒྱང་བ་དང་མཉམ་དུ་རྐང་གཡོན་ཕྱིར་འཐེན། ཕྱི་མ་༢ལའང་དེ་ག་བལྡབ། དེ་ནས་ཕཊ་ཀྱིས་བསྒྱུར། སྦྲམ་སྦིར་སྦྲམ་༣ལ་དང་པོ་ཡངས་པད། ༢པ་ལ་ལག་གཡས་སྟེང་དུ་འཕྱར། ༣པར་གཡས་སུ་གཞོལ། དེ་རྗེས་རོལ་གསུམ་གྱིས་རྗེས་མར་གཡས་སུ་གསིགས་ནས། སྦིར་སྦྲམ་གྱིས་རོལ་མོ་ཐང་བརྡུང་ལ་རྐང་གཡས་བཏེག་གཡོན་འཕར་ཏེ་སྦིར་ལ་འབེབས་པ་དང་བསྟུན་ལག་གཡས་མདུན་དུ་
བརྐྱང་། རྐང་གཡོན་བཏེག་སྦྲམ་ལ་གཡོན་འཕར་བ་དང་ལག་གཡས་དཀུར་བརྟེན། སྦིར་ལ་ལག་གཡོན་མདུན་བརྐྱང་བ་དང་། སླར་རྐང་གཡས་འཕར་བའི་གཡོན་འབེབས། གཡས་བཏེགས་སྦྲམ་ལ་གཡོན་འཕར་ཏེ་ལག་གཡོན་དཀུར་བརྟེན་པ་འདི་ལ་རྣམ་བཤད་འགྲོས་སམ་སྦར་བསྣོལ་ཞེས་བྱ། འདི་གས་སྦྲུལ་ནག་འཁྱོག་འགྲོས་བྱས་ཏེ་འཆམས་ཁང་དུ་བརྡོག་པའོ། །དེ་ལྟར་བསྐྱེད་རིམ་ཕྱག་རྒྱའི་གར་འཆམས་ཀྱི་རིམ་པ་མཐའ་དག་མ་ཚང་བ་མེད་པར་བཤད་ཟིན་ཏོ། །སྤྱིར་བཟོ་ལ་ལུས་ངག་ཡིད་གསུམ་གྱི་བཟོ་གསུམ་དུ་སྟག་ཚང་ལོ་ཙཱ་བ་སོགས་མཁས་པ་རྣམས་ཀྱིས་གསུངས་ལ། ཕྱག་རྒྱའི་གར་འཆམས་འདི་ཉིད་ལ་ལུས་ངག་ཡིད་གསུམ་གྱི་བཟོ་གསུམ་ག་ཚང་བ་ཡིན་ཏེ། ལུས་ཀྱི་བཟོ་ནི་མངོན་སུམ་དུ་གྲུབ་ཅིང་། ངག་གི་བཟོ་ནི་གསང་སྔགས་ཀྱི་སྒྲ་གྲག་སྟོང་སྐྱེ་བ་མེད་པའི་ཚུལ་དུ་བཟླ། ཡིད་ཀྱི་བཟོ་ནི་ལྷའི་བསྐྱེད་རིམ་གྱི་ང་རྒྱལ་གསལ་སྣང་དང་མ་བྲལ་བས་སོ། །གསང་སྔགས་རྙིང་མ་ལ་ཞི་ཁྲོ་སྒྱུ་འཕྲུལ་དང་། སྒྲུབ་ཆེན་བཀའ་བརྒྱད། རིག་འཛིན་བླ་མའི་དཀྱིལ་འཁོར། བསྟན་སྲུང་ཆོས་སྐྱོང་གི་སྐོར་སོགས་ལ་འཆམས་ཀྱི་རིམ་པ་རྣམ་གྲངས་མང་ཞིང་། ཁྱད་པར་གུ་རུ་རིན་པོ་ཆེ་ཆོས་ཀྱི་དབང་ཕྱུག་དང་། འབྲི་ཁུང་ཞབས་དྲུང་རིན་ཅེན་ཕུན་ཚོགས་སོགས་གཏེར་བཏོན་མང་པོ་ཞིག་གིས་མནལ་ལམ་བཟུང་ནས་ཟངས་མདོག་དཔལ་རིར་བྱོན་ཏེ། དེར་གར་འཆམས་མཛད་ཀྱི་འདུག་པ་རྣམས་གཟིགས་པ་ལ་བརྟེན། ལུས་འགྱུར་གྱི་རིམ་པ་མང་དུ་འདུག་པའང་ངོ་མཚར་བའི་གནས་སུ་སྣང་ཞིང་། བཀའ་བརྒྱད་བྱེ་བྲག་པ་ཕུར་པའི་འཆམས་འཁོན་ཀླུའི་དབང་པོ་སྲུངས་ནས་ཉེ་བར་བརྒྱུད་དེ་དཔལ་ལྡན་ས་སྐྱ་པ་ཡབ་སྲས་(༣༩བ)
ཀྱི་ཕྱག་ལེན་དུ་ཉེ་བར་བསྟར་བ། མཁྱེན་བརྩེ་ནུས་པའི་བདག་ཉིད་ཆོས་ཀྱི་རྗེ་དཔལ་ལྡན་བླ་མ་དམ་པའི་གསུང་རྒྱུན་ཇི་ལྟ་བར་མཆོད་དཔོན་ཤེས་རབ་སྣང་བས་བཀོད་པའི་ལུས་འགྱུར་སྣང་བའི་ལུགས་བཞིན་གནམ་བསྐོས་རྒྱལ་པོའི་ཕོ་བྲང་སྣེའུ་སྡོང་རྩེར་ས་སྐྱོང་ཐམས་ཅད་མཁྱེན་པ་གྲགས་པ་འབྱུང་གནས་དང་། དཀོན་གཉེར་དཔོན་རིན་པོ་ཆེ་ཀུན་བཟང་རྩེ་བ་རྣམས་ཀྱི་ཕྱག་བཞེས་སུ་མཛད་པ་དག་རང་ཉིད་ཀྱིས་སྦྱངས་ཤིང་ཉམས་སུ་མྱོང་བ་ཡི་གེར་བཀོད་པ་ཡིན་ནོ། །ས་སྐྱ་ནས་བདག་པོ་སྔགས་འཆང་ཆེན་པོས་ཕུར་པ་སྨད་ལས་ཀྱི་འཆམས་ལ་དུར་ཁྲོད་བདག་པོའི་འཆམས་བཅུག་ནས་གཟིགས་མོ་འབུལ་ཕྱིར་ངེད་རང་གི་བློ་ལ་ཤར་ནས་བྱས་གསུང་བ། བདག་ཆེན་པ་འཕྲེང་པོ་གཏེར་བཏོན་པའི་ལུང་བསྟན་ན་སློབ་དཔོན་བཻ་རོ་ཙ་ནའི་སྤྲུལ་པར་བསྟན་ཡོད་འདུག་པས་དམ་པའི་གཟིགས་སྣང་ལ་ཤར་བ་དག་ཁུངས་དང་འབྲེལ་བའི་གནས་ཡིན་ཤས་ཆེ་ནའང་། གོང་མའི་ཕྱག་ལེན་ལ་མེད་པ་གསར་དུ་བཅུག་པ་འབྲེལ་མ་ཆགས་ཤིང་། གཟིགས་མོ་འབུལ་ཕྱིར་གསུང་བ། དིང་སང་གསང་སྔགས་ཀྱི་ཕྱག་ལེན་སོགས་མི་ཤེས་པར་ལྟོ་ཕྱིར་དུ་སྣང་བ་ལ་གང་ཤར་གྱི་འཆམས་བྱས་ནས་གཞན་མགོ་བསྐོར་བ་རྣམས་ཀྱི་ངང་ཚུལ་ལ་བརྟེན། འཆམས་ལྟད་མོ་དང་རྩེད་མོ་ལྟ་བུ་ཡིན་སྙམ་པའི་ཕལ་ཚིག་ཤོར་འདུག་པས་རྫོབ་རྟགས་ཀྱི་གསུང་དུ་འདུག་གོ །ལུས་ནི་ལྷ་ཡི་རྣམ་འགྱུར་རོལ་གར་ཅན། །ངག་ནི་གསང་སྔགས་དབྱར་རྔ་ལྟ་བུར་སྒྲོལ །ཡིད་ནི་བསྐྱེད་རྫོགས་ཟུང་འཇུག་ཏིང་འཛིན་ཅན། །ཚད་ལྡན་རིག་སྔགས་འཆང་བ་དེ་རྨད་བྱུང་། །དྲི་མེད་རྒྱུད་སྡེའི་ཕྱག་ལེན་ཇི་བཞིན་དུ། །ཆད་མེད་རིགས་འཛིན་ཚོགས་ལ་ཉེར་འོངས་པའི། །སྔོན་མེད་འཆམས་ཀྱི་ལུས་འགྱུར་གསལ་(༤༠ན)
བྱེད་འདི། །འཁྲུལ་མེད་ཀུན་བཟང་རྩེ་བའི་ལུགས་སྲོལ་ཡིན། །ཚད་ལྡན་ལག་ལེན་བོར་ནས་རང་བཟོ་ཡི། །གང་ཤར་ཁྲོམ་གྱི་དབུས་སུ་འཆམས་པ་རྣམས། །གསང་ཆེན་བསྟན་པ་ཉམས་པའི་བྱེད་པོ་རུ། །གཞན་འཕྲུལ་དབང་བྱེད་གནས་ནས་འོངས་མིན་ནམ། །དེ་ཕྱིར་འགོང་པོའི་གདོན་གྱིས་མ་ཟིན་པའི། །རྣམ་དཔྱོད་ལྡན་རྣམས་སྔོན་བྱོན་དམ་པ་ཡི། །རིང་ལུགས་ཉམས་པ་མེད་ལ་བསླབས་བྱས་ནས། །རང་གཞན་དོན་གཉིས་ལྷུན་གྱིས་གྲུབ་པར་བྱོས། །དེ་ལྟར་ཆེར་འབད་དགེ་ཚོགས་ཡིད་བཞིན་དབང་། །བསམས་དོན་ལྷུན་གྱིས་གྲུབ་པའི་རྒྱལ་མཚན་རྩེར། །བཀོད་པའི་མཐུ་ཡིས་གར་ཐིག་དབྱངས་ལ་སོགས། །གསང་ཆེན་བསྟན་པའི་ཕྱག་ལེན་རྒྱས་གྱུར་ཅིག །ཅེས་དཔལ་ཀུན་ཏུ་བཟང་པོའི་འཆམས་ཀྱི་བརྗེད་བྱང་ལྷའི་རོལ་གར་ཞེས་པ་འདིའང་རྣམ་པར་རྒྱལ་བའི་ཕན་བདེ་ལེགས་བཤད་གླིང་པ་སོགས་རིག་སྔགས་འཆང་བའི་འདུས་པའི་སྡེ་དུ་མ་ལ་ཕན་པར་བསམ་པའི་བློས། ཟ་ཧོར་གྱི་བནྡེ་ངག་དབང་བློ་བཟང་རྒྱ་མཚོ། མིང་གཞན་བླ་མེད་རྡོ་རྗེ་རྩལ་དུ་འབོད་པས་མེ་ཕག་ཧོར་ཟླ་བཞི་པའི་ནང་དུ་འགོ་བཙུགས་ཏེ། རྩ་འཆམས་ཡོངས་སུ་རྫོགས་པ་དང་། བྲུབ་འཆམས་ཀྱི་ཕལ་ཆེར་གྲུབ་སྐབས་རྣམ་གཡེང་གི་ཁོལ་པོར་སོང་ནས་འཕྲོ་ལུས། དེ་ནས་ས་གླང་ནང་དུ་ཕོ་བྲང་པོ་ཏ་ལར་སྣེའུ་སྡོང་རྩེ་ནས་ཞབས་དྲུང་རིན་པོ་ཆེ་མ་ཆེན་ཕེབས་སྐབས། སྤྱན་ལམ་དུ་ཕབ་ནས་ཞུས་དག་གནང་ཞིང་། སླར་ཕོ་བྲང་གོང་རི་དཀར་པོའི་དཀོན་གཉེར་དཔོན་དགེ་སྟེང་བླ་མ་བྱམས་པ་ཀུན་དགའ་འབྱུང་གནས་ཀྱིས་ཞུས་དག་དང་། ཅུང་ཟད་ལུས་པ་རྣམས་གོང་དང་ཆ་མཚུངས་སུ་ཡི་གེར་བཀོད་བཅུག་པའི་མཇུག་སྡོམ་དང་བཅས་ཡོངས་སུ་རྫོགས་པར་ཆུ་འབྲུག་ནག་པ་ཟླ་བའི་རྒྱལ་བ་གསུམ་པའི་ཚེས་ལ་དགའ་ལྡན་ཕོ་བྲང་དུ་བཀོད་པ་སིདྡྷི་རསྟུ།། །།