ལེའུ་བདུན་བརྒྱུད་འདེབས།
ལེའུ་བདུན་བརྒྱུད་འདེབས་བཞུགས་སོ། །བདེ་ཆེན་ཆོས་སྐུའི་ངོ་བོ་འོད་དཔག་མེད། །ལོངས་སྤྱོད་རྫོགས་སྐུའི་རྣམ་རོལ་པད་དཀར་ཅན། །གྲངས་མེད་སྤྲུལ་པའི་ཟློས་གར་པདྨ་འབྱུང་། །ནམ་མཁའི་སྙིང་པོ་འཚོ་རྒྱལ་ཁྲི་སྲོང་ལྡེ། །རྡོ་རྗེ་བདུད་འཇོམས་མུ་ཁྲི་བཙན་པོ་ལ། །གསོལ་བ་འདེབས་སོ་ཐུགས་རྗེ་ཅན་གྱིས་གཟིགས། །ཚུལ་འདིའི་སྒོ་འབྱེད་གཏེར་སྟོན་བཟང་པོ་གྲགས། །བཀའ་བབས་དངོས་གྲུབ་རྒྱལ་མཚན་རྡོ་རྗེ་དཔལ། །བྱམས་པ་བཤེས་གཉེན་བུདྡྷ་ཤྲཱིའི་ཞབས། །མེས་སྟོན་ནམ་མཁའི་མཚན་ཅན་ཤཱཀྱ་བཟང་། །བདུད་སྡེ་དཔུང་བཅོམས་རྡོ་རྗེ་འཛིན་པ་ལ། །གསོལ་བ་འདེབས་སོ་ཐུགས་རྗེ་ཅན་གྱིས་གཟིགས། །སྔ་འགྱུར་སྲོག་ཤིང་ཆེ་མཆོག་འདུས་པ་རྩལ། །རྡོ་རྗེ་བདུད་འཇོམས་སྤྲུལ་པའི་ཟློས་གར་མཁན། །ཐེག་མཆོག་ཆོས་ཀྱི་རྒྱལ་པོ་རིག་སྔགས་འཆང་། །ཀུན་བཟང་སྒྱུ་འཕྲུལ་དྲ་བའི་རོལ་གར་ཅན། །འཁོན་སྟོན་དཔལ་འབྱོར་ལྷུན་གྲུབ་འཁོར་ལོའི་མགོན། །གསོལ་བ་འདེབས་སོ་ཐུགས་རྗེ་ཅན་གྱིས་གཟིགས། །རུ་ལག་གྲུམ་པ་རྒྱང་དང་ཡོན་པོ་ལུང་། །གཏིང་ཟབ་སྒྲོམ་བུ་མི་མངོན་ཕྱག་རྒྱ་ཡིས། །རྒྱས་བཅིངས་གསང་བ་ཟབ་མོའི་གཏེར་གྱི་ཆོས། །དཔལ་ལྡན་ལྷ་མོ་དགེ་བསྙེན་ནོར་བུ་བཟང་། །གཏེར་གནས་སྲུང་མར་བཅས་པའི་ཚོགས་རྣམས་ལ། །གསོལ་བ་༴ མཆོག་ཐུན་དངོས་གྲུབ་མ་ལུས་འབྱུང་བའི་གནས། །ཚིག་དོན་ཡང་ཟབ་གསོལ་འདེབས་ཚངས་པའི་དབྱངས། །ཤེས་ལྡན་གཡེལ་བ་མེད་པར་ཉམས་ལེན་ན། །ཐུགས་རྗེ་ནུས་པའི་མཐུ་དཔུང་བསྐྱེད་དུ་གསོལ། །ལེའུ་བདུན་བརྒྱུད་འདེབས་ཁྱེར་བདེར་ཤིང་སྤྲེལ་ལོ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་ངག་དབང་དགེ་ལེགས་སོ།། །།སརྦ་མངྒ་ལཾ།།