འཆི་མེད་བདུད་རྩི་བུམ་པའི་རྣམ་དག་དབང་གི་ཆུ་རྒྱུན་གྱི་གསལ་བྱེད་བདུད་རྩིའི་ཟླ་སྣང་།
འཆི་མེད་བདུད་རྩི་བུམ་པའི་རྣམ་དག་དབང་གི་ཆུ་རྒྱུན་གྱི་གསལ་བྱེད་བདུད་རྩིའི་ཟླ་སྣང་བཞུགས་སོ། །
ཨོཾ་ཨ་ཐཱ། འཁོར་འདས་རྒྱལ་པོ་པདྨ་ཐོད་ཕྲེང་གི །རྣམ་སྤྲུལ་གཏེར་སྟོན་རྡོར་འབུམ་ཆོས་ཀྱི་གྲགས། །གདམས་པའི་བཀའ་བབས་སྔགས་འཆང་དབང་པོའི་སྡེའི། །ཞབས་རྡུལ་གཙུག་ཏོར་རྩེ་མོར་འབྲལ་མེད་བསྟེན། །འཆི་མེད་བདུད་རྩི་བུམ་པའི་དབང་ལུང་དང་། །མན་ངག་དམར་ཁྲིད་སྟོན་མཛད་རྡོ་རྗེ་འཛིན། །ཆོས་དབྱིངས་རང་གྲོལ་དེང་ནས་བྱང་ཆུབ་བར། །གཏན་གྱི་སྐྱབས་སུ་འཛིན་ན་བརྩེ་བས་སྐྱོངས། །རྣམ་དག་དབང་གི་ཆུ་རྒྱུན་བུམ་བཟང་བཅུད། །དམ་པའི་ཞལ་ལུང་བརླིང་བས་རྟོགས་དཀའ་བ། །གསལ་བྱེད་བརྒྱུད་ལྡན་ཕྱག་ལེན་ཇི་བཞིན་དུ། །འདྲི་བར་ཆོས་སྲུང་གཏེར་བདག་གནང་བ་སྩོལ། །དེ་ལ་འདིར་སྤྲུལ་པའི་གཏེར་སྟོན་ཆེན་པོ་འོད་ཀོར་རྨ་བྱའི་མདོངས་མཐའ་ཅན་གྱིས་བྱམས་སྤྲིན་རྡོ་སྐུའི་ཞབས་དང་པྲ་དུན་ཙེའི་དྲེགས་པ་ཟིལ་གནོན་གྱི་ཐུགས་གསང་ནས་གདན་དྲངས་པའི་འཆི་མེད་བདུད་རྩི་བུམ་པའི་སྨིན་བྱེད་དབང་གི་རིམ་པ་གཏེར་གཞུང་དངོས་དང་དེའི་གསལ་བྱེད་ཁྲི་སྲོང་རྣམ་སྤྲུལ་དཔལ་བཀྲ་ཤིས་སྟོབས་རྒྱལ་གྱིས་མཛད་པ་གཉིས་གོང་མའི་ཕྱག་བཞེས་ཉམས་འོག་ཏུ་མ་ཆུད་པའི་རིགས་ཀྱིས་ཚུལ་བཞིན་མ་རྟོགས་པར་བརྟེན་རྗེས་འཇུག་འདྲའི་རེག་ཟིག་བྲིས་པ་འགའ་ཞིག་མཐོང་བའང་དགོངས་པའི་ཕྱོགས་ཙམ་དུ་མ་སོང་བར་སྣང་བས། ཕུགས་ཕྱག་(༢ན)
ལེན་རྣམ་དག་གི་རྒྱུན་ཆད་དོགས་པའི་སྒོ་འགེགས་ཕྱིར་འདྲི་འདུན་ཡོད་པའི་སྟེང་ཉེ་ཆར་རྩོད་བྲལ་གྱི་གཏེར་སྟོན་རྩ་བའི་བླ་མ་གཏེར་བདག་གླིང་པས་བཀའ་ཕེབས་པ་དང་དུ་བླངས་ཏེ་གསལ་བྱེད་བདུད་རྩིའི་ཟླ་སྣང་འགོད་པ་ལ། ཅོག་ཙེ་ལྟ་བུའི་སྟེགས་སྟེང་ཁེབས་སོགས་བཀོད་པས་མཛེས་པར་མཉྫིའི་སྟེང་ཀ་པཱ་ལ་མཚན་ལྡན་གྱི་ནང་དུ་གཏོར་མ་རྩ་བ་དང་ལོ་འདབ་ལས་ཐོན་པའི་ཨ་རུ་ར་ཟུར་བརྒྱད་པའི་དབྱིབས་ཅན་མཁྱིད་གང་ལས་མི་ཆུང་བ་བཟོ་ཁྱད་ཐོན་པ་མཐོང་བ་བརྒྱུད་པ་ལྟར་བཤམས་པའི་རྩེར་གསང་བདག་གི་ཙཀླི་མངོན་རྟོགས་ཀྱི་གཞུང་དང་མཐུན་པ་བཙུགས་ཆུ་གཉིས་སྔོན་དུ་འགྲོ་བའི་ཉེར་སྤྱོད། སྨན་རཀ །རྒྱལ་ཆེན་བཞི། སྨན་གྱི་བཀའ་སྲུང་དྲེགས་པ་དགུ །བསྟན་མ་བཅུ་གཉིས། གཏེར་སྲུང་ཡང་ལེ་བར་རྣམས་ཀྱི་མཆོད་གཏོར་ཚོགས་ཆས། དབང་རྫས་ཀྱི་ཕུར་མའི་རྫས་རབ་གནས་ཆིངས་དང་ལྡན་པའི་སྲུང་འཁོར་སློབ་དཔོན་གྱི་འཁྲིས་སུ་རྡོར་དྲིལ། མེ་ཏོག །ཁྲུས་བུམ། ས་ཡུལ་ཅི་རིགས་པར། གུ་གུལ། སོལ་མེ། བགེགས་གཏོར། ཡུངས་ཀར། རོལ་མོ་སོགས་མཁོ་བའི་ཡོ་བྱད་རྣམས་འདུ་བྱས། ལྷ་བྷེཾ་ཁ་རྒྱན་དཔག་བསམ་ལྗོན་ཤིང་དཀྱུས་ལྟར་ལས་གཞུང་གྱེར་ནས། བདག་བསྐྱེད་བསྒོམ། འཛབ་དགོངས་མགུལ་རྒྱན་(༢བ)
པཉྩ་ལི་ཀ་དང་འཕྲུལ་གསང་སྔགས་བྱད་མཐོང་ཆོག་གི་དགོངས་དོན་ལྟར། གསང་བདག་གི་བཟླས་པ་བརྒྱ་སྟོང་སྐབས་དང་སྦྱར་བ་དེ་ལས་རིམ་འགྲོས་ཀྱི་ཇེ་ཉུང་དུ་བཏང་བའི་གུ་རུའི་ཐུགས་སྔགས་ཁྱུང་སྔགས། རྒོད་དབྱུང་གི་སྔགས་རྣམས་དང་གཞུང་དུ་མི་གསལ་ཡང་ཚི་བཏུལ་མ་ཅུང་ཟད་བཟླས་ཏེ་བདག་ཉིད་ནུས་ལྡན་དུ་བྱ། དེ་ནས་བགེགས་གཏོར་བསྔོས་ཤིང་ཧཱུཾ་བཞི་བརྗོད་ནས་རོལ་མོ་སྤོས་དུད་སོགས་ཀྱི་ཚམ་ངམ་དང་ལྡན་པས་འདི་སྐད་དོ། །བདག་ཉིད་གསང་བདག་གསལ་བའི་ཐུགས་ཀ་ནས། ཁྲོ་རྒྱལ་ངོ་བོ་མཐིང་ནག་ཧཱུཾ་ཡིག་བཅུ། །འཕྲོས་པས་བར་གཅོད་གདོན་བགེགས་མཚམས་བཅད་དེ། །ཚུར་འདུས་སྟེང་འོག་ཕྱོགས་མཚམས་སྲུང་བའི་གུར། ཧཱུཾ་ཧཱུཾ། ཧཱུཾ་ཧཱུཾ། ཧཱུཾ་ཧཱུཾ། ཧཱུཾ་ཧཱུཾ། ཧཱུཾ་ཧཱུཾ། ཁྲོ་བོ་རཱ་ཛས་ནད་ཁ་ཁོག་རིམས་ཁ་ཆིངས་ཞེས་པའི་སྔགས་ལན་ཁ་ཡར་བརྗོད། སླར་ཡང་བདག་ཉིད་གསང་བདག་ཡི་དམ་ལྷར། །གསལ་བའི་ཐུགས་ཀ་གུ་རུའི་གནས་གསུམ་ནས། །དཀར་དམར་མཐིང་བའི་ཡི་གེ་འབྲུ་གསུམ་ལས། །འོད་ཟེར་ལྕགས་ཀྱུ་ལྟ་བུར་རབ་འཕྲོས་ནས། །འོག་མིན་ལྷུན་གྱིས་གྲུབ་པའི་གནས་དང་ནི། །མ་ལ་ཡ་དང་པདྨ་འོད་ལ་སོགས། །དག་པའི་ཞིང་ཁམས་རྣམས་ནས་བླ་མ་དང་། །དཀོན་ཅོག་རིན་ཅན་ཞི་བ་བྱང་སེམས་དང་། ཁྲག་འཐུང་ཁྲོ་བོ་དཔའ་བོ་མཁའ་འགྲོ་དང་། །ཆོས་སྲུང་རྒྱལ་པོ་སྡེ་བཞི་གཏེར་གྱི་བདག །བོད་སྐྱོང་བསྟན་མ་བཅུ་གཉིས་ལ་སོགས་པ། །ཡེ་ཤེས་ལས་གྲུབ་དཔག་ཏུ་མེད་པའི་ཚོགས། །འཁོར་བཅས་གནས་འདིར་བཛྲ་ས་མཱ་ཛཿ མདུན་གྱི་ནམ་མཁར་འགྱུར་མེད་རྡོ་རྗེའི་གདན། །དྲི་མེད་པདྨ་ཉི་ཟླ་བརྩེགས་པ་ལ། །དམ་ཚིག་ཡེ་ཤེས་དབྱེར་མེད་བརྟན་པར་བཞུགས། །ཕྱག་འཚལ་མཆོད་བཞེས་དབང་དང་དངོས་གྲུབ་སྩོལ། །ཞེས་མཆོད་ཡུལ་སྤྱན་དྲངས། རྡོ་རྗེ་སློབ་དཔོན་སངས་རྒྱས་དཔལ་སོགས་ཀྱིས་བདུན་རྣམ་དག་བྱ། དབང་(༣ན)
གཏོར་དང་མཆོད་གཏོར་རྣམས་བྱིན་གྱིས་བརླབས་པ་ནི། བདག་ཉིད་ཐུགས་ཀར་གུ་རུ་ཡེ་ཤེས་སེམས། །སྐུ་གསུང་ཐུགས་ཀྱི་གནས་ནས་ཡིག་འབྲུ་གསུམ། །ཨཱོཾ་འཕྲོས་གཏོར་མའི་མ་དག་ཉེས་ཀུན་སྦྱངས། །ཨཱཿའཕྲོས་འདོད་ཡོན་དྲུག་གི་མཆོད་པར་བསྒྱུར། །ཧཱུཾ་འཕྲོས་སྤེལ་བས་ནམ་མཁའི་མཛོད་བཞིན་གྱུར། །ཨཱོཾ་ཨཱཿཧཱུཾ། བརྗོད་ཚིག་དོན་བཞིན་ཡིད་ལ་བསམས་གྱུར་ཏེ། །གཏོར་མའི་དངོས་པོ་ཀུན་བཟང་མཆོད་པའི་སྤྲིན། །བྱེ་བྲག་ཕྱི་ནང་གསང་བ་དེ་ཁོ་ན། །ཚོགས་ཀྱི་འཁོར་ལོ་འཆི་མེད་བདུད་རྩིའི་སྨན། །ཆགས་མེད་རཀྟའི་ཨརྒྷཾ་རྒྱ་མཚོར་འཁྱིལ། །མཆོད་པའི་ལྷ་མོ་རིག་མ་བཅུ་དྲུག་སོགས། །དཔག་ཏུ་མེད་པའི་མཆོད་པ་དམ་པ་འདི། །རྩ་བརྒྱུད་བླ་མ་སངས་རྒྱས་ཆོས་དགེ་འདུན། །ཡི་དམ་ལྷ་དང་མཁའ་འགྲོའི་ཚོགས་རྣམས་ལ། །གུས་པས་འབུལ་ལོ་བཞེས་ཤིག་ཐུགས་དམ་བསྐོངས། །ཉམས་པ་སོར་ཆུད་དབང་དང་དངོས་གྲུབ་སྩོལ། །གུ་རུ་ཨཱོཾ་ཨཱཿཧཱུཾ། བ་ལིནྟ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། བུདྡྷ་དྷརྨ་སཾ་གྷ་དེ་ཝ་ཌཱ་ཀི་ནི་བ་ལིནྟ་ཁ་ཁ་ཁཱ་ཧི་ཁཱ་ཧི། ཕྱག་རྒྱར་བཅས་པའི་སྔགས་ཀྱིས་ལན་བདུན་དབུལ། མཉེས་གྱུར་ལྷ་ཚོགས་བདག་གི་སྙིང་གར་བསྡུ། །སློབ་མ་རྣམས་ཁྲུས་ནས་དབྱུང་ནང་དུ་བཏང་། ཕྱི་འབྲང་གི་བགེགས་བསྐྲད། །དེ་ནས་སློབ་བུ་རྣམས་ཀྱིས་བླ་མ་ལ། །ཕྱག་འཚལ་སྐོར་བ་བྱས་ཏེ་ཅི་འབྱོར་བའི། །མཎྜལ་མེ་ཏོག་ཕུལ་ལ་གསོལ་བ་བཏབ། །གུ་རུ་མཁྱེན་རབ་རྡོ་རྗེ་དགོངས་སུ་གསོལ། །བདག་ཅག་ལུས་ངག་ཡིད་གསུམ་སྨིན་པའི་ཕྱིར། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །སྣོད་རུང་དབང་བསྐུར་ཟབ་མོ་སྩལ་དུ་གསོལ། །ཞེས་ལན་གསུམ་གྱིས་གསོལ་བ་བཏབ། །རྩ་བ་གསུམ་གྱི་སྤྱན་སྔར་རྒྱུད་དག་པའི་ཆེད་དུ། །ཐུགས་རྗེའི་དབང་གིས་འགྲོ་དོན་མཛད། །བླ་མ་རྣམས་ལ་སྐྱབས་སུ་མཆི། །རང་ལས་ཡེ་ཤེས་ཤར་བའི་སྐུ། །ཡི་དམ་ལྷ་ལ་སྐྱབས་སུ་མཆི། །དམ་ཚིག་(༣བ)
རྣམ་པར་དག་པའི་སྐུ། །མཁའ་འགྲོའི་ཚོགས་ལ་སྐྱབས་སུ་མཆི། །སྔོན་ནས་བསགས་པའི་སྡིག་སྒྲིབ་བཤགས། །འགྲོ་དོན་སངས་རྒྱས་ཐོབ་ཕྱིར་བསྔོ། །སྨོན་པའི་བྱང་ཆུབ་སེམས་བསྐྱེད་དོ། །སེམས་ཅན་ཡོངས་སུ་སྨིན་བྱའི་ཕྱིར། །གསང་སྔགས་སྤྱོད་པ་རླབས་ཆེན་སྤྱོད། །དོན་དམ་སྤྲོས་བྲལ་བྱང་ཆུབ་སེམས། །རང་བྱུང་མཐའ་བྲལ་སྟོང་གསལ་བསྒོམ། །ཞེས་ལན་གསུམ་གྱི་རྗེས་ཟློས་བྱ། །གུ་རུ་ལྷར་གསལ་ཐུགས་ཀའི་ཡེ་ཤེས་བྷྲུཾ། ཁ་དོག་ལྔ་ལྡན་ཞིག་འཕྲོས་གཏོར་མར་ཕོག །གཏོར་སྣོད་བནྡྷ་ཕྱི་དཀར་ནང་དམར་བ། །ཇ་རིལ་མེ་དཔུང་འབར་བའི་གཞལ་ཡས་ཁང་། །ནང་གི་གཏོར་མ་བཅུད་ཀྱི་འགྲོ་བ་ཀུན། །རྣམ་དག་རྫས་ཀྱི་དངོས་པོ་ཡི་དམ་ལྷ། །གུ་རུ་པདྨ་ཇོ་མོ་འཚོ་རྒྱལ་ཡུམ། །སྤྲུལ་པའི་བྱ་ཁྱུང་རིགས་གསུམ་ལས་སྤྲུལ་པའི། །དུག་གསུམ་རྣམ་དག་རྒོད་དབྱུང་ཞི་ཁྲོའི་འཁོར། །གཞོམ་མེད་རྡོ་རྗེའི་མཁར་རྫོང་ཁྲོ་བོ་བཅུ། །ཚོགས་ཀྱི་འཁོར་ལོ་འདོད་ཡོན་མཆོད་རྫས་བཅས། །རབ་འབྱམས་དབང་རྫོགས་བསྐུར་བའི་རྟེན་དུ་གྱུར། །ལྷ་བྷེཾ་ཁ་རྒྱན་དཔག་བསམ་ལྗོན་ཤིང་ཚར་གཅིག་བརྗོད་དེ་མདུན་བསྐྱེད་ནན་ཏན་དུ་གསལ་བཏབ། སྔགས་བྱང་ནང་གི་སྔགས་རྣམས་ཀྱང་ཅུང་ཟད་བཟླ་ཞིང་བྱིན་གྱིས་བརླབ་དེ་ནས་གཏོར་དབང་དང་པོ་གཏོར་མ་རིགས་གསུམ་མགོན་པོའི་ལྷ་ཚོགས་སུ་གསལ་བའི་ཐུགས་ཀ་དང་ཁྱད་པར་དཔྲལ་བའི་ཨཱོཾ་ཡིག་ལས་འོད་ཟེར་དཀར་པོ་དཔག་ཏུ་མེད་པ་ཨཱོཾ་དང་བཅས་པ་བྱུང་། སློབ་མའི་དཔྲལ་བར་ཐིམ་པས་ལུས་ཀྱི་ནད་གདོན་སྡིག་སྒྲིབ་དག །སྐུའི་དབང་ཐོབ་པའི་དམིགས་པ་ངོ་སྤྲད། གཏོར་མ་ལྷར་གསལ་བའི་སྤྱི་བོར་བཞག་སྟེ། སྣོད་ནི་བནྡྷ་འབར་བའི་གཞལ་ཡས་ཁང་། །བཅུད་ནི་ལྷ་ཚོགས་ཡབ་ཡུམ་སྤྲུལ་པར་བཅས། །རྫས་ནི་མཆོད་པའི་ལོངས་སྤྱོད་བསམ་མི་ཁྱབ། །བུ་འདིར་ཤོག་སྐུ་ཡི་དབང་མཆོག་ཁྱོད་ལ་བསྐུར། །ཨཱོཾ་སརྦ་ཏ་ཐཱ་ག་ཏ་མཧཱ་ཀཱ་ཡ་ཀ་ལ་ཤ་ཨ་བྷི་ཥིཉྩ་ཨབྷེ་ཤ་ཡ་བ་ལིཾ་ཏ་མ་ཧཱ་སིདྡྷི་ས་མ་ཡ་ཨཱཏྨ་ཀོ྅ཧཾ། ཨཱོཾ་ཨཱཿཧཱུཾ་ཀཱ་ཡ་ཨ་བྷི་(༤ན)
ཥིཉྩ་ཨཱོཾ། ཞེས་པ་ལྔའམ་གསུམ་གང་རུང་བརྗོད། བཅོམ་ལྡན་འདས་རིགས་གསུམ་མགོན་པོའི་སྐུ་མི་ཟད་པ་རྒྱན་གྱི་འཁོར་ལོའི་དབང་མཆོག་དམ་པ་ལྷ་དང་གཉིས་སུ་མེད་པ་ཐོབ་པར་གྱུར་ཅིག །ཅེས་བདེན་པ་བརྗོད་ཅིང་མེ་ཏོག་གཏོར། དྲིལ་བུའམ་རྒྱས་པར་སྤྲོ་ན་རོལ་ཆེན་བྱ། མཐའ་རྟེན་དུ་ལྷ་བྷེཾ་ཁ་རྒྱན་དཔག་བསམ་ལྗོན་ཤིང་ཚར་གཅིག་བརྗོད་ནས་སྒོམ་ལུང་ཕོག་སྟེ་ལྷ་སྒོམ་དུ་གཞུག །གཏོར་དབང་གཉིས་པ་ནི། ཐུགས་ཀ་དང་ཁྱད་པར་མགྲིན་པའི་ཨཱཿལས་འོད་ཟེར་དམར་པོ་དཔག་ཏུ་མེད་པ་ཨཱཿཡིག་དང་བཅས་པ་བྱུང་སློབ་མའི་མགྲིན་པར་ཐིམ་པས་ངག་གི་ནད་གདོན་སྡིག་སྒྲིབ་དག །གསུང་གི་དབང་ཐོབ། གཏོར་མ་མགྲིན་པར་གཏུག །བསྐུར་ཚིག་དངོས་གཞི་གོང་ལྟར་ལ་སྐུའི་དོད་དུ་གསུང་གི་དབང་མཆོག །ཀཱ་ཡའི་ཚབ་ལ་ཝཱ་ཀའི་འབྱིན་འཇུག །སྔགས་མཐར་ཝཱ་ཀ་ཨ་བྷི་ཥིཉྩ་ཨཱཿ །གསུང་མི་ཟད་པ་རྒྱན་གྱི་འཁོར་ལོ་ཞེས་འདོན་པ་བསྒྱུར། མཐའ་རྟེན་དུ་སྔགས་བྱང་ནས་བཤད་པའི་རྗེས་ཟློས་ལན་གསུམ་བྱེད། རླུང་བུམ་པ་ཅན་འཛིན་དུ་བཅུག་སྟེ་རྔུབ་པའི་དུས་ཚེ་བཅུད་བསྡུ་བ་དང་ཕྱིར་དབྱུང་ཚེ་ནད་བསལ་བའི་དམིགས་པ་སྤྲོད། །གཏོར་དབང་གསུམ་པ་ནི། ཐུགས་ཀའི་ཧཱུཾ་ལས་འོད་ཟེར་སྔོན་པོ་དཔག་ཏུ་མེད་པ་ཧཱུཾ་ཡིག་དང་བཅས་པ་བྱུང་། སློབ་མའི་སྙིང་གར་ཐིམ་པས་ཡིད་ཀྱི་ནད་གདོན་སྡིག་སྒྲིབ་དག །ཐུགས་ཀྱི་དབང་ཐོབ། གཏོར་མ་སྙིང་ག །བསྐུར་ཚིག་གོང་བཞིན་ལ་ཐུགས་ཀྱི་དབང་། ཙིཏྟ་ཨ་བྷི་ཥིཉྩ་ཧཱུཾ། ཐུགས་མི་ཟད་པ་རྒྱན་གྱི་འཁོར་ལོ་སོགས་རིམ་བཞིན་འདོན་པ་བསྒྱུར། མཐའ་རྟེན་དུ་རྫོགས་པ་ཆེན་པོ་དེ་དག་ལ་ངོ་སྤྲད་དེ་ཅུང་ཟད་མཉམ་པར་བཞག །གཏོར་དབང་བཞི་པ་ནི། ཐུགས་ཀ་དང་ཁྱད་པར་ལྟེ་བ་དཔུང་པ་གཡས་ཀྱི་སྭཱ་ལས་འོད་ཟེར་སེར་པོ་དཔག་ཏུ་མེད་པ་སྭཱ་ཡིག་དང་བཅས་པ་བྱུང་། (༤བ)
སློབ་མའི་དཔུང་པ་གཡས་དང་ལྟེ་བར་ཐིམ་པས་སྒོ་གསུམ་གྱི་ནད་གདོན་སྡིག་སྒྲིབ་དག །ཡོན་ཏན་གྱི་དབང་ཐོབ། གཏོར་མ་དཔུང་པ་གཡས་དང་ལྟེ་བ། བསྐུར་ཚིག་གོང་བཞིན་ལ་ཡོན་ཏན་དབང་མཆོག །གུ་ཧྱེ། གུ་ཧྱེ་ཨ་བྷི་ཥིཉྩ་སྭཱ། ཡོན་ཏན་མི་ཟད་པ་རྒྱན་གྱི་འཁོར་ལོ་སོགས་རིམ་བཞིན་འདོན་པ་བསྒྱུར། མཐའ་རྟེན་དུ་སྲིན་ལག་གཉིས་ཀྱིས་ཕུར་སྨན་ཆབ་ཀྱིས་བྲན་སྒོ་དགུ་གཞན་རྣམས་ལ་དངོས་དང་མིག་གཉིས་ཀྱི་དོད་མཁུར་ཚོས་ལ་འབྱུག་ཅིང་རྫས་བུར་མའམ་རིལ་བུའི་ཐུམ་བུ་གདངས། ནད་ཐམས་ཅད་ལ་བྷྱོ། ནད་རིམས་ཐམས་ཅད་ལ་བྷྱོ། རིམས་ཐམས་ཅད་ལ་བྷྱོ། གདོན་ཐམས་ཅད་ལ་བྷྱོ་ཞེས་བརྗོད་ཅིང་ཐལ་མོ་བརྡབ། གཏོར་དབང་ལྔ་པ་ནི། ཐུགས་ཀ་དང་ཁྱད་པར་གསང་གནས་དཔུང་པ་གཡོན་པའི་ཧྲཱིཿལས་འོད་ཟེར་ལྗང་གུ་དཔག་ཏུ་མེད་པ་ཧྲཱིཿཡིག་དང་བཅས་པ་བྱུང་། སློབ་མའི་དཔུང་པ་གཡོན་དང་གསང་གནས་སུ་ཐིམ་པས་སྒོ་གསུམ་བྱ་བ་དང་བཅས་པའི་སྡིག་སྒྲིབ་དག །འཕྲིན་ལས་ཀྱི་དབང་ཐོབ། གཏོར་མ་དཔུང་པ་གཡོན་དང་གསང་གནས། བསྐུར་ཚིག་གོང་བཞིན་ལ་འཕྲིན་ལས་དབང་མཆོག །ཀརྨ། ཀརྨ་ཀ་ལ་ཤ་ཨ་བྷི་ཥིཉྩ་ཧྲཱིཿ། འཕྲིན་ལས་མི་ཟད་པ་རྒྱན་གྱི་འཁོར་ལོ་སོགས་རིམ་བཞིན་འདོན་པ་བསྒྱུར། མཐའ་རྟེན་དུ་རྡོ་རྗེའི་ཁྲབ་རིངས་ཀྱི་འཁོར་ལོ་ཆེ་འབྲིང་ཆུང་གསུམ་གང་རུང་རྫས་ཆིངས་དག་བཅས་གདགས། འདི་ནི་དབང་རྫས་ཀྱི་རྟེན་འབྲེལ་ཙམ་ཡིན་གྱི་འདྲི་མཁན་སྟན་ལས་མ་ལངས་པ་སོགས་མཚན་ཉིད་ཚང་བ་དཀའ་བས་བློས་ཁེལ་གྱི་སྲུང་བའི་གོ་ཅུང་མི་ཆོད། སྔགས་རུལ་ལ་ལའི་ལག་ལེན་ལ་བལྟས་ན་གོ་ཆོད་ཤེས་ཀྱང་ཆེའོ། །མཇུག་གི་ངོ་སྤྲོད་ནི། དེ་ལྟར་དབང་ཐོབ་སློབ་བུ་ཐ་མལ་པའི། །གནས་ལས་གྱུར་ཏེ་ལུས་ལྷ་ངག་རྒྱུད་སྔགས། །སེམས་ཉིད་གཞོམ་མེད་རྡོ་རྗེའི་རང་བཞིན་དང་། །དབྱེར་མེད་ཉིད་དུ་གྱུར་ལ་འདོན་ཡོན་སྨན། །འཕྲིན་ལས་རྣམ་བཞིས་གང་ལ་(༥ན)
ཐོགས་མེད་པར། །སྤྱོད་པས་ཕྱེ་བས་ང་རྒྱལ་ལེགས་བསམ་མོ། །དེ་ནས་དགའ་སྟོན་ཚོགས་ཀྱི་ཡོ་བྱད་རྣམས། །སྔོན་དུ་ལས་བྱེད་ཀྱིས་བཏེག་གསང་ཆུ་གཏོར། །བདག་གི་ཐུགས་ནས་གུ་རུ་ཡེ་ཤེས་སེམས། །སྐུ་གསུང་ཐུགས་ཀྱི་གནས་ནས་ཡིག་འབྲུ་གསུམ། །ཨཱོཾ་འཕྲོས་ཚོགས་ཀྱི་མ་དག་ཉེས་ཀུན་སྦྱངས། །ཨཱཿའཕྲོས་འདོད་ཡོན་དྲུག་གི་མཆོད་པར་བསྒྱུར། །ཧཱུཾ་འཕྲོས་སྤེལ་བས་ནམ་མཁའི་མཛོད་བཞིན་གྱུར། །ཨཱོཾ་ཨཱཿཧཱུཾ། ཞེས་པས་བྱིན་རླབས་གཙང་མའི་སྣོད་དུ་བཤམས། །གྷུ་རུ་ཨཱོཾ་ཨཱཿཧཱུཾ་ག་ཎ་ཙཀྲ་ཨ་མྲྀ་ཏ་ཁ་ཁ་ཁཱ་ཧི་ཁཱ་ཧི། བྷདྡྷ་དྷརྨ་སངྒྷ་དེ་ཝ་ཌཱ་ཀི་ནི་ག་ཎ་ཙཀྲ་པཱུ་ཙ་ཁ་ཁ་ཁཱ་ཧི་ཁཱ་ཧི། ཞེས་བསྔོས་ཚོགས་ཀྱི་འཐོར་ཕུད་སློབ་དཔོན་གྱིས། ཕྱོགས་བཞིར་གཏོར་ལ་བདག་ཉིད་ལྷར་གསལ་བས། །ནང་གི་སྦྱིན་སྲེག་དོན་དང་ལྡན་པར་རོལ། །དེ་བཞིན་སློབ་བུའི་ལག་གཉིས་ཐབས་ཤེས་ནང་། །སིདྡྷི་ས་མ་ཨ་ཧོ་སུ་ཁ་ཧོཿ ཞེས་བརྗོད་ཚོགས་ཀྱི་དངོས་གྲུབ་ལག་ཏུ་གཏད། བུས་བླང་སིདྡྷི་ཨ་ལ་ལ་ཧོཿ ཞེས། རོལ་ལ་དེ་ནས་ཀ་པཱ་ལ་ཡི་དབང་། །བསྐུར་བའི་གཏོར་མ་དེ་ཉིད་སྤྲོས་བྱས་ལ། །གོང་བཞིན་དངོས་གྲུབ་རྫས་ལ་རོལ་དུ་གཞུག །དཀར་དམར་གཏོར་མ་གཙང་མའི་ཕུད་ཀྱིས་བྲན། །ཨཱོཾ་ཨཱཿཧཱུཾ། འདོད་ཡོན་ལྔ་ལྡན་མཆོད་པ་དམ་པ་འདི། །ཆོས་སྐྱོང་རྒྱལ་པོ་ཆེན་པོ་སྡེ་བཞི་དང་། །སྨན་གྱི་བཀའ་སྲུང་མཐུ་ཆེན་དྲེགས་པ་དགུ། །གཏེར་བདག་དམག་དཔོན་ཡང་ལེ་བེར་རྣམས་ལ། །འབུལ་ལོ་མཆོད་སྦྱིན་གཏོར་མ་འདི་བཞེས་ལ། །རིགས་འཛིན་པདྨའི་བཀའ་བཞིན་སྙིགས་དུས་འདིར། །གསོ་རིག་བསྟན་པ་དར་ཞིང་ནད་རིགས་འཇོམས། །བདག་ཅག་དཔོན་སློབ་བསམ་དོན་གྲུབ་པར་མཛོད། །ཅེས་པས་བསྔོས་ལས་ཕྱོགས་གཙང་སར་བསྐྱལ། །སྦྱར་བྱང་ལྟ་བུར་འདུག་ཀྱང་ཆེ་བ་བརྗོད་ཅིང་སྤྲོ་བ་བསྐྱེད་ཕྱིར་འདི་སྐད་དོ། །སློབ་དཔོན་ཆེན་པོ་པདྨའི་དགོངས་པའི་ཀློང་། །(༥བ)
རྟོལ་ཕྱིར་སྤྲུལ་འཁོར་གསུམ་སོགས་ཞུས་པའི་ལན། །གསོ་དཔྱད་བདུད་རྩི་བུམ་པ་མ་བུའི་སྐོར། །གསང་སྔགས་ལམ་གྱི་རིམ་པ་རྩ་འགྲེལ་བཅས། །བསྟན་པ་སྲུང་ཕྱིར་སྐུ་དགྲ་བསྒྲལ་ཐབས་ཏེ། །རྣམ་པ་གསུམ་ལ་སོགས་ཏེ་མདོར་བསྡུ་ན། །གུ་རུ་པདྨས་མཛད་པའི་རིག་པའི་གནས། །ཐམས་ཅད་ཀུན་གྱི་སྣོད་རུང་འདིས་ཆོག་གོ །ནད་པ་གསོ་བ་ལ་ཡང་སྔོན་ཉིད་དུ། །སྣོད་རུང་བྱས་ལ་དེ་ནས་སྨན་དཔྱད་སོགས། །བཏང་བས་ནུས་ཆེ་མཇུག་ལ་བཀྲ་ཤིས་སོ། །སློབ་བུ་ཡོན་བདག་སྙིང་དང་འདྲ་བ་ལ། །སྲུང་བ་མན་ངག་སྦྱིན་པར་བྱེད་ན་ཡང་། །སྔོན་ལ་སྣོད་རུང་བྱས་ལ་སྲུང་ཡོན་གྱི། །མེ་ཏོག་འབུལ་དུ་བཅུག་ལ་སྲུང་བ་བཏགས། །དེ་ལྟར་བྱས་པས་གདགས་བྱ་དག་ལ་ཡང་། །བར་གཅོད་གདོན་གྱི་གནོད་པས་མི་ཚུགས་སོ། །ཞེས་བརྗོད་མེ་ཏོག་གཏོར་ལ། བྱ་ཚེགས་ཆུང་ལ་འགྲོ་དོན་རྒྱ་ཆེ་བ། །སྣོད་རུང་རྩ་བ་མདོར་བསྡུས་སྤྲོས་པའོ། །འཆི་མེད་བདུད་རྩིས་སྒྲིབ་གཉིས་དྲི་མ་འཁྲུད། །རྣམ་དག་དབང་གི་ཆུ་རྒྱུན་བུམ་པའི་བཅུད། །མ་ལུས་སེམས་ཅན་ཀུན་ལ་ཁྱབ་པར་ཤོག །ཅེས་དང་གཞན་ཡང་བཀྲ་ཤིས་ཀྱི་ཚིགས་བཅད་ཅི་རིགས་པ་བྱའོ། །སྨྲས་པ། རྙིང་རློམ་དྲེགས་པས་ཉེར་སྤོས་འབྱུང་པོའི་བྱ། །བླུན་རྨོངས་མུན་པའི་སྨག་ཏུ་གར་རྩེ་ཞིང་། །ལོག་བཤད་ཐན་སྐད་སྒྲོག་རྣམས་ཉིན་མོའི་མལ། །མི་སྨྲ་གཉིད་ལ་ཡུར་ན་ཅུང་ཟད་མཛེས། །རིགས་གསུམ་དགོངས་དོན་པདྨའི་ཐུགས་ཀྱི་བཅུད། །རིས་མེད་འགྲོ་སྲོག་འཚོ་བའི་སྨན་དཔྱད་འདིར། །སྔགས་བཙུན་ཕལ་དང་དཔོན་ཚང་མཚན་འཛིན་པ། །མང་པོའི་སྤྱན་ཟུར་གཟིགས་པ་ཅུང་མ་ལྷུང་། །བསྐལ་མཐར་བར་པ་ཏ་སོགས་གསོ་དཀའི་ནད། །དྲུངས་འབྱིན་སྟོད་གཏེར་ལས་འོངས་བདུད་རྩིའི་རྒྱུན། །འཐུང་འདོད་གཟུར་གནས་མང་པོར་ཕན་པའི་ཆེད། །སྣོད་རུང་དབང་གི་ལག་ལེན་ལྷུག་པར་བཀོད། ཁོ་བོ་སྔ་འགྱུར་བསྟན་འཛིན་གྲལ་རིང་ལ། །ཆུད་པའི་སྙན་པོའི་མིང་དང་མི་ལྡན་ཡང་། །
པདྨ་ཀ་རའི་བྱིན་རླབས་སྙིང་དབུས་སུ། །འཕོས་པའི་བཟང་པོའི་སྐལ་ཅན་ཡིན་ནམ་སྙམ། །པད་རྩ་ལྟར་དཀར་དགེ་བའི་ལྷ་ཡི་ཆུས། །སེམས་ཅན་ཀུན་གྱི་ནད་རྣམས་གཞིལ་མཛད་པའི། །སྨན་གྱི་བླ་མ་བཻ་ཌཱུཪྻ་འོད་དང་། །མཚུངས་པར་ཕན་བདེའི་སྒོ་བརྒྱ་འབྱེད་པར་ཤོག །ཅེས་འཆི་མེད་བདུད་རྩི་བུམ་པའི་རྣམ་དག་དབང་གི་ཆུ་རྒྱུན་གྱི་གསལ་བྱེད་བདུད་རྩིའི་ཟླ་སྣང་འདི་ནི་མཆོད་དཔོན་ངག་དབང་ཤེས་རབ་ཀྱིས་བླ་མ་དམ་པར་སྨིན་བྱེད་ཀྱི་གསོལ་བ་བཏབ་པས་མཚམས་སྦྱར་ཏེ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པས་འདི་ལྟ་བུ་གྱིས་ཞེས་བཀས་བསྐུལ་བ་དང་དུ་བླངས་ཏེ་རྩ་བའི་བླ་མ་ཁྱབ་བདག་ཆོས་དབྱིངས་རང་གྲོལ་གྱི་བཀའ་དྲིན་ལས་ཆོས་ཚུལ་འདི་ལ་གོམས་པའི་ཟ་ཧོར་གྱི་རིགས་ལས་གཡོ་རུ་ལྷོ་བརྒྱུད་དུ་སྐྱེས་པའི་སྔགས་པ་རྒན་པོ་ཆེ་མཆོག་འདུས་པ་རྩལ་གྱིས་ཆོས་རྒྱལ་དབང་པོའི་སྡེའི་ལྗགས་བསྒྲིགས་རྡོ་རྗེའི་གསུང་དངོས་གཞི་སོར་བཞག་ལ་ཁ་སྐོང་དང་འཁྲུགས་བསྡེབས་ཕྱག་བཞེས་འཕྱུགས་མེད་དུ་བག་ཡོད་ཀྱི་ལོ་རྟ་ཆེན་ཟླ་བའི་ཉེར་དགུ་ལ་ཕོ་བྲང་དམར་པོ་རིར་སྦྱར་བའི་ཡི་གེ་པ་ནི་འཕྱོང་རྒྱས་ལྐོག་པ་ཕུན་ཚོགས་དབང་པོས་བགྱིས་པ་ཛ་ཡནྟུ། །སརྦ་མངྒ་ལཾ།།